1 Wasana aiꞌaru aiꞌaru aboraurite kanauguna, Isu Karaisiti aeba Abaraꞌamuke, ae agaꞌnu Tebitike, isige tupisa aborantiye.
2 Pigoya, Abaraꞌamu aepisa Aisaki aboraogana, Aisaki aepisa Yekobu aboraogana, Yekobu aepisa Yutabe to aꞌnatabarabe aborantawe.
3 Pigoya, Yuta aepisa Peresebe Sarabe aborantase. Piya, Tema yakari puwaisitantiye. Pigoya, Perese aepisa Esoroni aboraogana, Esoroni aepisa Aramu aboraogana,
4 Aramu aepisa Aminatapu aboraogana, Aminatapu aepisa Nasoni aboraogana, Nasoni aepisa Saramani aboraogana,
5 Saramani aepisa Powasi aborantiye. Piya, Areyabu yakari potantiye. Pigoya, Powasi aepisa Obeti aborantiye. Piya, Aruti yakari potantiye. Pigoya, Obeti aepisa Yesi aboraogana,
6 Yesi aepisa waꞌega Tebiti aborantiye. Pigoya Tebiti aepisa Soromoni aborantiye. Piya, Yuraya nkanarimpa yakari potantiye.
7 Pigoya, Soromoni aepisa Ariyabomu aboraogana, Ariyabomu aepisa Abaisa aboraogana, Abaisa aepisa Esa aboraogana,
8 Esa aepisa Yiyosapati aboraogana, Yiyosapati aepisa Yoramu aboraogana, Yoramu aepisa Asaya aboraogana,
9 Asaya aepisa Yotamu aboraogana, Yotamu aepisa Eyasi aboraogana, Eyasi aepisa Esekaya aboraogana,
10 Esekaya aepisa Manasa aboraogana, Manasa aepisa Emosi aboraogana, Emosi aepisa Yosaya aboraogana,
11 Yosaya aepisa Yekonayabe aꞌnatabarabe aborantawe. Piya puguni, Yuta kinapa Pebironi mari irakuꞌma ibabute wanta, pi kanabi aborantawe.
12 Pigoya, igeba Pebironi umintuguna, piꞌna akaꞌi Yekonaya aepisa Siyatiyeri aborantiye. Pigoya Siyatiyeri aepisa Serababeri aboraogana,
13 Serababeri aepisa Abayati aboraogana, Abayati aepisa Erayakimu aboraogana, Erayakimu aepisa Eso aboraogana,
14 Eso aepisa Seroki aboraogana, Seroki aepisa Ekimu aboraogana, Ekimu aepisa Eriyati aboraogana,
15 Eriyati aepisa Eriyesa aboraogana, Eriyesa aepisa Matani aboraogana, Matani aepisa Yekobu aboraogana,
16 Yekobu aepisa Yosepe aborantiye. Aeba Mariya awaentana puntiye. Aibogana, Mariyaba Isu yakari potaogini, ae ageba: Karaisiti, Koti utaratanta yagarawe, untawe.
17 Aborantapa pipa mayamawe: Abaraꞌamu aepisa agobima aborata kanauguna Tebiti aboranti, pi aꞌwaipa 14 puntiye. Piya, Tebiti aepisa aboraurite kanauguna Yuta kina Pebironi mari ibabute wanta, pi aꞌwaipa pabiyama 14 puntiye. Piya, pi kanabisa aboraurite kanauguna Karaisiti aboranti, pi aꞌwaipa pabiyama 14 puntiye. Mariyaba Isu yakari potantiye
18 Isu Karaisiti aboranti, pi agowapa mayama waintiye: Mariyaba Yosepeka maekiyema utatauguna, kampa atokaema isiyota isiyota puma mintusuguna, Aota Awamusaꞌama Mariyati tumima aoꞌmaeyogana yagara agaꞌe pogini agantawe.
19 Piya pogana, kana utatanta yagara Yosepeba arupu yagara miyomeka mayama napintiye: Naeba kamanaꞌwa pagusama otakana ani pusanaga uwa kakamagi kaikuwema, napintiye.
20 Piyama napima mintogana, Waꞌegawamatisa enisore kaꞌwaina amonta tumpa patama maya omintiye: Yosepe, kaeba Tebiti ntagaramaga, wayaka Mariya maekenagaba karuba a-po. Yagara agaꞌe pemipa, pipa Aota Awamusaꞌama esegi potama aboramiye.
21 Pigoya, masinto yakari potakanaba, ae ageba: Isuwe, pipa kamanatepisa Tauꞌikena yagarawe, omo. Piya, aeba aokinaꞌwapa aguntaenawaipisa iꞌima aogi puwaitakiye.
23
22 Pigoya aꞌyaꞌwaemaena aborantikana, paipa poropete kaꞌwaina Waꞌegawama nkawamutasa maya kamana untiye: Abiyo. Ageꞌaragawae kaꞌwaina agaꞌe pumagina, masinto yakari pekiripa, agewapa Imanuweriwe ukibewe. Pipa kamanatepisa: Kotiba taege mintiye ukibewe, untiye. Poropete piya kamana unti, pi auꞌwa aborantiye.
24 Pigoya, Yosepeba awaibintisa aogamagina, enisorewama kamana omome pi wasimagina, anarimpa kayone potama ababuntiye.
25 Pigoya, wayaꞌwaenaba kampa puma mintusuguna yagaraba aborantiye. Piya pogana, Yosepeba ae ageba: Isuwe, omintiye.
1 Pigoya, Eroti pi mparasa waꞌega yagara mintogana, Isu aeba Petariyamu kumata Yutiya mara aborantiye. Pigoya pi kanabipa, pa nkirosaꞌmitisa to marisa nori aisuma aganta kinaꞌmi Yerusaremi kumata ampa irosaꞌma, ibigama maya untawe:
2 Yuta kina tige aoso Waꞌega ae kumata aboraye. Taeba maroti maretisa yakari potanti noriwa agategi, ampa ae agisabi parokaema taꞌmu potakena kanaune, untawe.
3 Piya yuguna, waꞌega yagara Eroti abima pami pogini, aꞌyaꞌma Yerusaremi kuma ago kina igebe pami puguna,
4 Eroti aeba aꞌyaꞌma tabe mono kiye kinape mono tisa kinape igegaꞌe yogini aki puguna: Karaisiti yagaraba, ae kumata aborakiyema untanema, ibigaogini,
5 maya omintawe: Yutiya mari Petariyamu kumatane. Pika Kotitisa kamana abima uwaimikena poropete kaꞌwaina mayama kaemarantiye:
6 Petariyamu kuma Yuta mari, kaeba Yuta kuma aiꞌne tuminta kumapa kampaye, iye.
Kaetisa kiya yagara ka aborama, Isureyo naokina kabiwaitakiyema, kaemarantiye untawe.7 Piya yuguna abite, Erotiba nori aisunta kina ibira igegaꞌe umagina, pi nori aborantika pasema ibigaogini omuguna:
8 Petariyamu kumati waiyema, uwaitama maya untiye: Tigeba wama esegima uma aguyosaꞌma, kana yagaranto aboratate kanama unamigi, pabiyama naeba wama naꞌmu potamagi agisabi parokaekuwe, untiye.
9 Kana waꞌega yagarama piya uwaimogini abite wantawe. Keꞌi wantini maroti mawaitisa nori aganta, pipa pabiyama to kake aboraogini agaurite wauguna, kana yagaranto mintome ntamankama abobora esegima waintantiye.
10 Piya pogini, igeba nori agate tabera iꞌmuntanaba puntawe.
11 Piya pumagini, namapinti ima yagarantobe anowampa Mariyape isigama, irakabima ae ageba asagaꞌyuma, kotawaipisa iꞌmuntanaba maema aisa potamagini, kori yabape, aogi agunta kagupe, tusa masawaepe amintawe.
12 Piya puguna, Waꞌegawama amonta paitama akayuwaitaogini, igeba Erotiti kampa aꞌwae puma wanta, to kiꞌi wama mawaiti wantawe. Yosepege Mariyage Isu ababute Isipi mari wantase
13 Pigoya igeba aꞌwae puma wauguna, Waꞌegawamatisa enisore kaꞌwaina Yosepe amonta patama, kamana maya untiye: Kaeba asima, yagarantobe anope isibabute Isipi mari tiyegaka wama, nae kamanaka agawa puma miyiyo. Abo. Eroti aeba yagaraga aguyosaꞌma aegukena piya, ababute wagaso, omintiye.
14 Piya omogana, Yosepeba asima yagarantoke anoke isibabute aseka Isipi mari paiꞌma wamagini,
15 pitaꞌi umintuguna Eroti purintiye. Piya, poropete kaꞌwaina Waꞌegawama nkawamupisa kamana maya untiye: Yagaranepa Isipi mari mintaka, kegaꞌe yekana pitaꞌisa kanakiye. Pi kamanaꞌama esegi puntiye. Eroti uwaitaogini inamu ntagara iyeguntawe
16 Pigoya, nori aisunta kina igeba Eroti ikabitate wauguna, agowa abite agobipa tabera puntiye. Piya pumagina irebu kina uwaitaogini, igeba wama Petariyamu kumatasabe awamori kumaꞌantontorasabe, masi yagara kabowaipa tara kampa punta yagara, igepa aꞌyaꞌma iyeguntawe. Pipa nori aisunta kina ige iwamupisa kana yumesa puma, pabi kana yagara iyeguntawe.
17 Pigoya, pika poropete Yeremaya kamana maya unti, piꞌna esegi puntiye:
18 Arama kumatasa ka kamana abogini, tabera intaraꞌena puma kubeꞌena puguni abewe, iye.
Areseriba araga yagarawa aegugasumeka iguyosakate tabera kubeꞌena pekini, aurikena pugagate atakibewe, piya untiꞌna esegi puntiye. Yosepebe waya yagarawampabe aꞌwae puma kanantawe19 Pigoya, Eroti puꞌwaogana, Yosepe Isipi mari miyogana, Waꞌegawamatisa enisore kaꞌwaina amonta patama maya omintiye:
20 Yagara aegukena punta kinapa ago puꞌwawe. Kaeba asima, yagarantobe anope isibabute Isureyo mari waiyoma, omintiye.
21 Piyama omogana, Yosepeba asima yagarantoke anoke isibabute Isureyo mari wantawe.
22 Pigoya, Akereyasi aeba abawampa Eroti mparupa maema Yutiya mara kabinti, pi kamanapa Yosepe abitegina, pitaꞌi wama umikenagaba karu puntiye. Piya pogana, Waꞌegawama amonta kiꞌisa kamana uma aboramogana, pimpa atate Karariya mari wama,
23 ka kumapa, agewapa Nasareti, pitaꞌi wama umintantiye. Piya, Karaisitika poropete kinaꞌmi: Ae agewapa Nasareti yagarawe ikibewe, unta, piꞌna esegi puntiye.
1 Pigoya pi kanabipa, Yoni wani paiꞌitanti ntagara, Yutiya mari aborama kaꞌme mpari umima, mono maya untiye:
2 Koti kabiratakenaena agarosaya, aguntaenaripa kaite tigu aꞌwae piyo, untiye.
3 Pigoya, pi ntagaraga poropete Aisaya maya unti, pipa aborantiye:
Awaga kamana ikena yagara kaꞌme mpari mima, kegaꞌe uma mayama aboraye:Waꞌegawamanta ke iꞌma arupu puma amuyena piyo, piya untiye.4 Pigoya, Yoniba kaiwapa kamoro yaga ayatasa pumaranta, pi ami uꞌmagina, arirasa kante puma abamu kimagina, nanintawapa iroke tuke nama mintantiye.
5 Pigoya, Yerusaremi kumatisabe Yutiya marisabe Yontani waninkama maroteri materi miyume kinape, aꞌyaꞌma aeti wawaentawe.
6 Piya pumagini, aguntaena pume kamanaꞌwaipa uma aborauguna, Yontani anompapi paiꞌitantiye.
7 Pigoya, uwoma Parasi kinaꞌmibe Sarusi kinaꞌmibe mono wanika irosauguna, Yoni igate maya uwaimintiye: Tigeba kuya awarorawe. Kotitisa amoꞌena aborarimekiri kakagaisanaga kebaya urimegiri mataꞌi kanawe.
8 Tigeba aguntaenaripa kaitegiri tigu aꞌwae pigina, mono aꞌwapa aboraigiriba, wani kanara maekibewe.
9 Pigoya, ti maete ikenaba a-puma: Taeba Abaraꞌamu nkagaꞌnuraga aogima mikunemagiripa, a-siyo. Pabigo urimekiri abiyo: Kotiba ma ntabatasa Abaraꞌamu nkaoso agaꞌnugi iba pikenaba agantiye.
10 Piya, ya agaiyukena tupa ya agobi atantiye. Pi ntawama a kampa aogima aeyakanapa agaiyuma yakupi kaekiye, Yoniba meto kamana piya untiye.
11 Piya untana to maya untiye: Naeba tigu aꞌwae piyoma wanitasa paititauwa, nakaꞌi kanakibi ntagara, agewapa asunagasima waintika, naeba mayamanaba agisa anapa kampa arakae potakuwe. Pi ae Aota Awamusatasabe yakutasabe paititakiye.
12 Aeba aka maete kanama, witi naninta ampa aigaga pumagina, anonkapa namapi atantana, ariwapa tayaba yakupi kaegaikiye, piya untiye. Yoniba Isu wani paiꞌatantiye
13 Aibogana, Isu aeba Karariya marisa Yontani waniti kanama, Yoniti aborama: Mono wani paiꞌnatanema, omintiye.
14 Pigoya, Yoniba abitegina kunta puma maya untiye: Ayamabaya kaeba naeti ampa piyama yene. Kaeba nae paiꞌnatagana kanara pikiye, untiye.
15 Piya yogana, Isuba kamana mayama aꞌwae puma omintiye: Aꞌa-o, ibaba paiꞌnatao. Piya pekara, tasigeba Koti kamana aogima wasikuse, untiye. Piya yogana Yoniba abitegina paiꞌatantiye.
16 Pigoya, Isupa paiꞌataogana aeba Yontani wanipintisa iyogana, manta kabi aꞌwaiyogana, agaomepa Koti Nkawamusaꞌama pupunta kanta purite aeti tumpintiye.
17 Tumpintogana, mantabintisa kamana ka maya untiye: Mepa nabugai ntagaranene. Tabera naꞌmu potauwe, untiye.
1 Pigoya, Awamusaꞌama Isu kaꞌme mpari ababute wama, kewama amiyo potakenaga ababute wantiye.
2 Pigoya, Isuba pitaꞌi nanintaga aꞌa-o uma, 40 yaga uwa miyogana agaꞌena abuntiye.
3 Piya pogana, amiyo pikena agowama aeti aborama maya omintiye: Kaeba Koti Ntagara mintanapa, yegana ma ntabankama paretiyena pekana nao, untiye.
4 Piya yogana, Isuba antota maya untiye: Mono isaꞌama maya iye: Wasanama nanintarasa kampa aꞌyaꞌma esegiyenawapa maekiye. Koti nkawamupisa mono pi abima esegiyenaba maekiye iye, untiye.
5 Piya yogana, kewamaba Isu Yerusaremi kumati ababute ima, tabe mono nama nkagari mesutama,
6 maya omintiye: Kaeba Koti Ntagara mintanapa, paꞌyo puma tumo. Piya, mono isaꞌama maya iye: Koti aeba enisore kinaꞌwa uwaitakini kabigatakibewe, iye. Piya, kaegukena pikibipa, iyatasa kababute tumigina, yabankamaba kagisaba kampa airisakiye iye, untiye.
7 Piya yogana Isu maya omintiye: Pigoya, mono isaꞌama to ka maya iye: Waꞌega Kotigapa amiyo puma agakenaenaba a-po iye, untiye.
8 Piya yogana, kewama to ababuma eꞌero nkamuti ima mesutamagina, aꞌyaꞌma mampabisa kumape igaenabe ayakimagina,
9 maya omintiye: Nae nagisabi ampa parokaema nageba asagayuyegapa, aꞌyaꞌwaema waintintanaba kamiwaekuwe, untiye.
10 Piya yogana Isu mayama omintiye: Satani, kaeba natate wagaso. Mono isaꞌama maya iye: Waꞌega Kotigapa, ae age asagayuma, ae abiwa kayokayaꞌena potao iyema, omintiye.
11 Piya omogana kewama atate waogini, enisore kina igeba irosaꞌma aogima kabitantawe. Isu Karariya mari wama mono yuga agobintiye
12 Pigoya, Yoni arakuꞌma igaꞌna namapi atauguna mintogana, Isuba pi awaga kamana abitegina, pimpa atate Karariya mari wantiye.
13 Wamagina Nasareti kumapa agaite Kapaniyamu kumati umintantiye. Pi kana kumapa kotu awamori, Seburonige Napitaraige isigaꞌnu mpara umintantiye.
14 Piya pogana, pintanaga poropete Aisaya maya unti, pipa auꞌwa aborantiye:
15 Seburonige Napitaraige isige mari, kotu awamori, Yontani waninkama maroteri waintipa,
To marisa kinaꞌmi ampinta mpa, Karariyawa,16 Pita minta kinaꞌmiba tununtanabi miyeꞌnagiba tabe eꞌwasaena agawe, iye.
Piya, purikena puma miye kinaꞌmiti eꞌwasa aboraye, piya untiye.17 Pigoya, pi ntagaba Isuba agobima mono untana, maya uwaimintiye. Koti kabiratakenaenaba agarosaya, aguntaenaripa kaite tigu aꞌwae piyo, piya uwaimintiye. Tarawa tarawaki kina igegaꞌe yogini aegarantawe
18 Pigoya, Isu aeba Karariya kotu awamori wama nasi nasi puntana, tara yagarara isigaomepa, kapa Saimoni to agiwapa Pitabe, aꞌnantowampa Enturube, isigeba inoyanta aebusume ntagararaginisi, kotupinti kuko aibarekima wanipinti motausuguna, uma isigantiye.
19 Piya uma isigate maya uwaisimintiye: Naegaraiso. Inoyanta aeyamesa puma wasana iba pikenaena tisiyakikuwe, uwaisimintiye.
20 Piya uwaisimoginisi, pabigo kukoꞌwaisipa atate aegarantase.
21 Aubusuguna, Isu to nasi nasi puma to tara yagarara isigaomepa, Sepeti ntagara Yemisige aꞌnantowampa Yonige, isibawaisimpa Sepetige wanipisa karebi mima, kuko aogi puma mintuguna, ampa isigantiye. Pigoya, Isuba isigegaꞌe yoginisi,
22 isibawaisimpa pabi wanipisa karebi atate, Isu aegarantase. Isu uwoma kinaꞌmiti yoga puntiye
23 Pigoya, Isuba Karariya mari ainkima nasi nasi puma, ini namankaipinti ima mono kamana umagina, Koti kabiratakena kamanapa uwaimagina, yoni kinape iꞌama kampa aogi punta kinape kaba itantana puwaentiye.
24 Piya pogana, awaga kamanaꞌama Siriya mari abae purite wagana pogini abite, yoni kinape, iki nakiyena ibome kinape, ke kina intabaipinti minta kinape, aonanta puma wareꞌnaowa pume kinape, kebo kinape, aeti aꞌyaꞌma ibabute wauguna aogima kaba itawaentiye.
25 Piya pogini, Karariya marisabe, Tekaporisi kumatisabe, Yerusaremi kumatisabe, Yutiya marisabe, Yontani maroteri materisa tabe uwoma kina aki puma akaꞌi wantawe.
1 Pigoya, Isuba uwoma kina igate, amuti ima asu mintogini, abagi kinaꞌwa agora wauguna,
2 mono maya uma uwaimintiye:
3 Iguꞌamaka abegana kusi miye kina, igepa Koti kabiwaitakini iꞌmuntanabi mikibewe.
4 Intaraꞌenabi miye kina, igeba aintiba mantarasaena intawama asoyaena pekini, iꞌmuntanabi mikibewe.
5 Agoya puwaita kina, igeba aintiba aogi kumapa maema mimagini, iꞌmuntanabi mikibewe.
6 Igaꞌena ibemi kina, igeba naninta wanika ibemisa puma Koti nkarupuyena ibemi kina, igeba aintiba igaꞌe pakini iꞌmuntanabi mikibewe.
7 To kinaꞌmika intara pe kina, igepa aintiba Koti antara puwaitama iyoꞌmaeyakini, iꞌmuntanabi mikibewe.
8 Aguntaena kampa napiye kina, igeba aintiba Kotipa agamagini iꞌmuntanabi mikibewe.
9 Iꞌima paru puwaita kina, igeka Kotiba: Yagara araganene uwaimekini, iꞌmuntanabi mikibewe.
10 Arupuyenaraka karana puwaitagini miye kina, igepa Koti kabiwaitakini iꞌmuntanabi mikibewe.
11 Pigoya, naeka wasanami kamparaga kamana uritama, karana puritama, agunta kamana uma kumpari uritagiripa, aintiba tiꞌmuntanabi mikibewe.
12 Piya, tigeba aintiba aogi ikantanaripa mantariba taberakaꞌyane. Pika tiꞌmu puma tinta asoya puma miyiyo. Paipa wasanami poropete mintanta kinapa pabiyama karana puwaitantawe, piya untiye. Wasanaba kayoge kaneke waiyemisa puma miyeno
13 Tigeba wasana ikapi mimagiri, kayo kanta puma mintawe. Pigoya, kayo iꞌnisama kasigabekapa, aya pekana to kake asabama iga pikiye. Pipa kampaye. Piyaena pikenaba kampa waintiye. Uwa asunu kaegasagini, wasanami pitaꞌi nasi nasi puma aeyese pewe.
14 Pigoya, tigeba wasana ikapi kane kanta puma mintawe. Piya, kuma ka amuta abora waintakanaba, asekapa eꞌwasaenawapa aꞌyaꞌma wasanamiba agakibewe.
15 Pigoya, kaꞌwaina kane igiꞌmagina kampa kankabe maema airari kaetantana, marunkata igiꞌma atakana, nama nkantabaipinti eꞌwasaba aꞌyaꞌma kina puwaitakiye.
16 Tigeba etimpaba pabiyama wasana eꞌwasa puwaitano. Igeba aogima mikenaenari agaigina aogi pekini, mantari tibarimpa nkage asagaꞌyuyewo, piya untiye. Paisa mono kaikenaba kampa aborauwe, Isu untiye
17 We, paisa ago kamanape poropete kinaꞌmi kamanape kaikena aborantiyeba, naekaba a-siyo. Naeba kaikenaba kampa aboramagi, naeba to wasima abae pikenaba aborauwe.
18 Naeba taga urimekiri abiyo: Mage mantage waiyemisa puma, Koti nkago kamanapa uwa waikiye. Ka awaꞌenaba kampa kakawakibikana, uwa waikiye.
19 Pigoya, wasana kaꞌwaina Koti unti kamana ago uwaenanto ka kasimagina to kinakaba: Piyama kasiyema uwaimikibiꞌnaba, ae ageba uwaenanto Koti kabiratakibi ntagaba waikiye. Piya, kaꞌwaina aeba aꞌyaꞌma wasimagina to kinakaba: Piyama poma uwaimikibiꞌnaba, aeba pabiyama Koti kabiratakibi ntagaba tabe yagara ima mikiye.
20 Pika urimekiri abiyo: Arupuyenarimpa kampagina mono tisa kinaꞌmige Parasi kinaꞌmige arupuyenawaimpapa igaikibipa, aintiba tigeba Koti kabiratakenaenabipa kampa uma pasikibewe, piya untiye. Igobi pikena kamanane
21 Pigoya, tayabamagi kamana maya uwaimintiye: Kaeba wasanaba a-nkaeguma kaiyo. Kaꞌwaina wasana aeguyekiripa, kamana abikena kinaꞌmiti ababute wama metaiyo, paisa kamanapa piyamagiri abewe.
22 Piya, naeba to urimekiri abiyo: Ka yagaramaba aoꞌyagaraga agobi potakanaba, pika kamana abikena kinaꞌmiti ababute wama kamana otakiye. Pipa kanarane. To waina aeba aoꞌyagaraga kamparaga kamana uma: Kani po omekiniba, ababute kanisore kinaꞌmi akiyenabi metakibewe. Piya, to kaꞌwaina aeba aoꞌyagaraga: Aibo yagaragawe omikibiꞌnaba, aꞌabibintisa yakupi wao, omikiye. Pipa kanarane, piye untiye.
23 Pigoya, kaeba kaꞌmuntana tabe mono namapinti maete ikena puntanapa: Naoꞌyagaramage kamanatesi waintiye, piyama napintanapa,
24 pabigo kaꞌmuntanaba arata agora atate tumima, wama kaoꞌyagaramage kamanatisipa uma aogi pugaite, aꞌwae puma ima kaꞌmuntanaba Kotiti aratarapa mesutagana aogi peno.
25 Pigoya, tigetisa kaꞌwaina kamana ugatakanapa, kamana abikena kinaꞌmiti kampa uma irosanta keꞌi wantirisi, pi ntagaramage kamanatisipa uma aogi piso. Piya kampa pikibempepa, ugatakibi ntagaramaba karuꞌena abikena kinaꞌmiti wama agoga yekana, abikena yagarama irebu kinaꞌwa uwaitakini, igaꞌna namapi katakibewe.
26 Naeba taga ugamukuwa, abo. Kaeba pi nkigaꞌna namapi mintanapa, uwaba kampa irosa wakibene. Aintiba iretaba amima aꞌya kaite, wakibene, piya untiye. To wae kuntana paibikena kamanane
27 Pigoya, kamana paipa maya uwaimintine: Kumiyenaba a-po. Pi kamanapa abintawe.
28 Pigoya naeba urimukuwa, abiyo. Ka yagarama to wae kaꞌwaina agama agabakibipa, ae aumawama Koti nkaobi ago ata puma kumiyenaba potaye.
29 Pigoya, ka kaowama aguntaena pikena pekanapa, piꞌma maebugaso. Tarayaga kao waintakanapa kaeba aꞌabibinti tumisanaga, aogima kabiyo.
30 Kayatakantisa aguntaena pikena pekanapa, arisaꞌma maebugaso. Aogi kiyenayaga waima kaeba aꞌabibinti tumisanaga, aogima kabiyo, piya untiye. Waya kaikena kamanane
31 Pigoya, paipa to kamanapa mayama uwaimintiye: Kaꞌwaina wayaꞌwa kaikena puntanaba, kaikena awaꞌena amimagina otano, untiye.
32 Pigoya, naeba urimukuwa, abiyo. Kaꞌwaina wayaꞌwampaba kupiyonaba kampa puntakana uwa kaikibipa, aeba ata potakana, karuꞌena kumiyenaba pikiye. Piya, to ka yagarama kainta wae maekibipa, aebe kumiyenaba pikiye, piya untiye. Koti nkaobi uma esegi pukena kamanane
33 Pigoya, tayabamagi to ka maya uwaimintine: Kaeba Koti nkaobi atamaba kumpari kamanapa uma esegiba a-po. Piya, ae aobi uma esegi pumaba wasiyegana, auꞌwa aborano, untine. Pi paisa kamanapa piyamagiri abewe.
34 Naeba pika urimukuwa, abiyo. Koti nkaobi uma esegi pentanaba ataiyo. Piya, mantara uma esegiba pipa a-piyo. Mantaba pipa Koti nkaemu yabaewe.
35 Piya, mara uma esegiba pentanaba pipa a-piyo. Maba Koti nkagisa aema miyemi mpawe. Piya, Yerusaremi kumata uma esegiba a-piyo. Yerusaremiba tabe Waꞌega Yagarama kumane.
36 Piya, tiꞌno nkabiyata uma esegiba a-piyo. Tigeba antugu tiꞌnu nkabiyema ka omigina, tunu pikibera, to ka omigina waeꞌwae pikiyo. Pipa kampaye.
37 Pigoya, pika kamanatipa tagaka owe uma, pabiyama aegaraiyo. Aꞌa uma, pabiyama aegaraiyo. To nara uma esegi pukibepa, pi kamanapa ke kinapisa aboraye, piya untiye. Antotaꞌenaba kampa pikena kamanane
38 Pigoya, paipa kamana maya untine: Kaꞌwaina kaoga airikakanapa, antota airikao, iye. Piya, kawa aibarara pekanapa, antota aepa pabiyama aibarara po, untine. Piya kamana abintawa,
39 pika to kapa naeba urimukuwa, abiyo. Tiyeguma karana titakena pigiripa, antotapa a-nkataenaba puwaitaiyo. Pika kaꞌwaina katamara kaeguyekanapa, to ka aukaꞌi aꞌwae puma amo.
40 Piyamaba, to kaꞌwaina kae kamana ugatamagina siyotiga maeyakanapa, muꞌmu siyotigapa kaga amo.
41 Piyamaba, ka kiye yagara agaro kiꞌi nababute waoma ugamekanapa, kaeba eꞌero kiꞌi ababute wama aoꞌmaeyo.
42 Piyamaba, to kaꞌwaina kaꞌenaga esugatakanapa, amo. Piya, aꞌyo ukatakena yekanapa, owe otao, piya untiye. Kama kina agu kaoꞌena pikena kamanane
43 Paisa kamana ka mayama waintiye: Kaeba kaokina agu kaoꞌena potantana, kama kinakaba kagobi potao, untiye. Pi kamanapa abintawe.
44 Pika naeba urimukuwa, abiyo: Kama kinatipa agu kaoꞌena puwaitantiri, karana purita kina igeka napima nunamu yiyo.
45 Piya puntiripa, mantarisa tibarimpa ntagaraena puma mikibewe. Piya, Koti aeba yegina, pankamaba agunta kinape aogi kinape kaga eꞌwasa puwaitaye. Pabiyama yegina, kaba arupu kinape antage kinape kaga kanara tiyeye.
46 Tigeba agu kaoꞌena purita kina, igeꞌamana agu kaoꞌena puwaitaiginaba, aintiba aya iretaripa Kotiba timikiye. Pipa kampaye. We, takisi maenta ku kinaꞌmiba piyaba puwaitawe.
47 Piya, to marisa kinaꞌmiba iyokina aogi puwaitawe. Tigeba pabiyama tiyokinapa aogi puwaitantiripa, ayama igaikibewe. Pipa kampaye.
48 Abiyo. Tigeba mantarisa tibarimpa aota miyemisa puma, pabi nkawameta miyiyo, Isu piya untiye.
1 Tigeba aogima kabiyiyo. Aogiyena puntiripa, tipa wasanami nkiyobipa a-mpaete iyiyo. Piya pukibepa, mantarisa tibarimpatisa ka ikantanaba kampa maekibewe.
2 Tigeba wasana kaoꞌena puma awagaena puwaitantiripa: Kaꞌisa kinaꞌmi tagama iꞌmu purataiyemaba, taberasaba a-kegaꞌe yiyo. Piya, kumpari mono kina igeba ini namapipe uwa keꞌibe: Tage maete ima iꞌmu puratayema, wasana kaoꞌena puwaitawe. Naeba tagaka urimuwe. Piya kinaꞌmiba wasana iꞌmu puwaita nkikantanawaipa ago maerekana, aintiba toba kampaye. Ige pesa puma a-piyo.
3 Pigoya, kusi kina kaoꞌena puwaitaganaba, ka kaentisa kinaꞌma pukibintanaba to kaentisa kinaꞌmiba a-nkabiyo.
4 Piya peganaba, kaoꞌenagampaba kakama waigatagina, kabagampa aꞌyaꞌmaena kakama waintintana agamagina, antotapa kamikiye, piya untiye. Nunamu ukena kamanane
5 Pigoya, tigeba nunamu ukena puntiripa, kumpari kinaꞌmi yesa pumaba a-siyo. Pi kina igeba ini namapipe keꞌibe nunamu yepa, pipa: Wasanami tagama iꞌmu purataiyema, piyaba pewe. We, naeba tagaka urimuwe: Piya kinaꞌmiba auꞌwapa ago maentaka, toba kampa maekibewe.
6 Piya, kaeba nunamu ukena puntanapa, namakapinti ima kabe kitama kabagampa kakama miyemiꞌna aeti nunamu yo. Piya pegana, kabagampa kakama agamagina, antotapa kamikiye.
7 Pigoya, tigeba nunamuba uwa tiwamutasa urite wagana pumaba a-siyo. Pipa to marisa kinaꞌmintanawe. Pi kina igeba uwoma kamana aisurite wagana pekana: Koti abiramikiyema, yewe. We, pipa kampaye.
8 Tibarimpapa kampa esotantagana, aeba agoripa ago abiwaeyagiri, tigeba ige yesa puma a-siyo.
9 Pigoya, tigeba maya uma nunamuba yiyo:
Taba, mantabinti mintane. Kae kage aota waiyeno.10 Kae kabiratakenaenagapa aborawaeyano.
Mantari kae kawamu aegaꞌma wasikenaena waintemisa puma, pabiyama mabi taeti aborano.11 Ibaba kaeba nanintarepa tae awameta tamo.
12 Taoꞌmi kaintanawai nkatupa mae igasompe nkawameta kaintanare nkatupa maeragaso.
13 Tamiyo pusanagaba aogima kabiratao.
Kewama nkayapisa taba puratao, piya nunamu yiyo, untiye.14 Piya, tigeba wasanami nkaiboꞌenawaipa kasiginaba, mantarisa tibarimpaba pabiyama tigeꞌenaba maerigaikiye.
15 Piya, tigeba wasanami nkaiboꞌenawaipa kampa igasiginaba, tibarimpaba aiboꞌenaripa pabiyama kaga kampa maerigaikiye, piya untiye. Naninta aꞌa-o uma mikena kamanane
16 Pigoya, tigeba monoka naninta aꞌa-o uma mintiripa, tiyowa muruse puma a-mpiyiyo. Piya, kumpari mono kinaꞌmi ige piya pegana, wasanamiba ige naninta aꞌa-o uma miyentanawai igabebe piyema, iyowawamaba ataena pegini miyewe. Pigoya, ige pesa a-piyo. Naeba tagaka urimuwe: Igeba ikantanawaipa ago maentane.
17 Piya, kaeba naninta aꞌa-o uma mintanapa, kaꞌnoti masawae paiꞌma kaowaena po.
18 Piya pegini, wasanamiba naninta aꞌa-o uma miyempentanama nkagogapa kampa agabebe pegana, kabagampa kakama miyemi, ae abintowa abeno. Piya pegana, kabagampa kakama agamagina antotapa kamikiye, piya untiye. Aogiyena maema aki pikena kamanane
19 Pigoya, tigeba mampabi aꞌyaꞌmaena aogiyenaba a-mpaema aki piyo. Kampaye. Mampabipa umuwama narigagina kasipama ataena pegina, ku kinaꞌmi agasabaꞌma kuntana pewe.
20 Piya, tigeꞌena aogiyenaripa mantari aki piyo. Pitaꞌiba umuwamaba kampa narigakanaba kasipama ataenaba kampa pekini, ku kinaꞌmiba agasabaꞌma kuntanaba kampa pikibewe.
21 Piya, aogiyenaripa waintemi, pi kumakaba asi nasi napiyewe, piya untiye. Auꞌama nkeꞌwasaenama kamanane
22 Pigoya, kauꞌama kaneꞌwapa kaowe. Kaogapa aogima waintanaba, kauꞌamapa kanara eꞌwasa potakiye.
23 Kaoga tikaeyakanaba, kauꞌamaba pabiyama tunusu wakiye. We, kaguꞌama kaneꞌwa tuꞌma wakanapa, tabera tununtanaba aboragamekana kaorikaꞌena puma mikibene, piya untiye. Kaꞌwainaba tarara kayokayaꞌena kanara kampa pikiye
24 Pigoya, ka yagarama tabe yagararamisi kayokayaꞌenaba kampa kanara pikiye. Aeba kaꞌwainapa kayone potantana to kaꞌwainapa agama aekita potakiye. Piya pumagina, aeba kaꞌwainati uma atokaentana to kaꞌwainapa akabitakiye. We, tigeba pabiyama Koti ntugabe mone kutankama ntugabe ka awameta kanara kampa maekibewe, piya untiye. Arirasaenaga taberapa a-ntapi napi piyo
25 Pigoya, naeba urimekiri abiyo: Tigeba mikenaenarikaba: Nana nanintabe wanipe maema nakune. Tauꞌamakaba: Nana tautasaena maema purukunema, uwoma tigiba a-ntapiyiyo. Piya, naninta wanane. Mikenaenarimpa auꞌwantagaꞌenawe. Titasaena wanane. Tiꞌama auꞌwantagaꞌenawe.
26 Piya, tigeba inatisa kabara agaiyo. Igeba aintanaba kampa puma nanintaba kampa kubuꞌma namankaipi kampa aki pewe. Kampaye. Mantarisa tibarimpa nanintaba uwa aborama imiye. We, tigeba kabarapa kampaye. Ae aobipa tigeba wasanarawe.
27 Pigoya, tigeba napiyenari waintakiripa mampara to kake amato puma to kaꞌisa yaga mirite wakibewa, a. Pipa kampaye.
28 Piya pikenaena kampa waintegiripa, nana piyema kaigaba uma uwoma tigiba napiyewe, a. We, yaobisa ya aosa pamika agoba abiyo. Aeba aotasaenawampa ntugaba kampa piye.
29 Pika urimukuwa, abiyo: Paipa tabe yagara Soromoni aeba konariyenawantaga yagaramaba aogiyenaba purintomepa ya aosawamapa kampa againtiye. Kampaye.
30 Piya, yaobintisa aꞌno ibanto pabiyama aogima mparamagina, aiba pabigo paribekini yakupi maema kaekibepa, pipa Koti yegina aꞌnopa aogiyena maraye. We, tigeba kampa agama napiyegana timatitiꞌenaba uwaenantowe. Piya, Kotiba titasaenarikaba kabiritaye.
31 Pigoya, tigeba uwoma tigi a-ntapimagiri: Nana nanintabe wanipe maema nakune. Nana maema amirikuneba, taberapa a-siyo.
32 We, to marisa kinaꞌmiba aꞌyaꞌmaena yontanaga napi napi pewe. Piya, mantarisa tibarimpa pi aꞌyaꞌwaemaenarikaba abintegiri, uwoma tigi a-ntapi piyo.
33 Pigoya, tigeba Koti kabiratakena monoꞌama nkauꞌwape arupuyenawape aborasanaga tigupa paitama ataigina waiyeno. Piya pigina, aeba mampara aꞌyaꞌmaenaripa kaga aborarimikiye.
34 Tigeba aisaenagaba uwoma tigiba a-ntapiyiyo. Aisa yagaba nana kuntuyenabaya aborakibi, pipa kampa abintawe. Aꞌyaꞌma yagaba kuntaenaba toma toma aboraurite wayema, pabinkanto uwa napiyegana waiyeno, Isu piya untiye.
1 Tigeba to wasanama aupi pima kamana a-nkuwaitaiyo. Kampa uwaitakibepa, tigeba pabiyama antota kamanapa kampa uritakiye.
2 Piya, tigeba wasana antota kamana uwaitakibe, pabi nkawameta Kotiba tigeba uritakiye. Piya, wasana pabi aborawaimikibe nkawameta Kotiba aꞌwae puma timikiye.
3 Pigoya, kaoꞌyagarama nkaobipa iꞌnintana waintakanapa, ayama agantana, kaeka kaobi ya atu waintakanapa, nanaga ae aogi potakenaga napiyene.
4 We, kaeka kaobi ya atu waintemipa, kaeba ayama kaoꞌyagaragaba mayaba omegana aogi pikiye: Naoꞌyagara, kaeba abintaga, kaobi iꞌni waintika maegagasanoma, aogi pikiye.
5 We, kumpari kina, kaeka kaobi ya atu waintemi, pipa maru maegaite aogima agantana, kaoꞌyagarama nkaobisa iꞌni maegasagana aogi pikiye.
6 Pigoya, tigeba monotasaenaba kara kanta kinapa a-nkimiyo. Piya, aogi mono kutatipa yaga kanta kinapa a-nkimiyo. Igeba pintanaba uwa igisarasa aewarigaitegini pabigo aꞌwae puma tige tiba nasanaga, piyaba a-piyo, piya untiye. Wasanama esegi puma nunamu ukena kamanane
7 Pigoya, tigeba Koti abigaiginaba timikiye. Aguyosagaiginaba auꞌwapa maema tigeti aborakiye. Kabera aiwakarusiginaba Kotiba aititakiye.
8 Piya, Kotiti esota kinaꞌmiba maeyawe. Aguyosaga kinaꞌmiba agawe. Kabera aiwakaruse kinaꞌmitiba Kotiba aiꞌitaye.
9 We, tigetisa ae ntagarama yagarawampa nanintaga yekanaba antotapa yabapa amikiye, a.
10 Inoyantaga yekanaba kuyaba amikiye, a. Pipa kampaye.
11 We, tigeba antage kinaꞌmitaba yagara aragaripa aogiyena imewe. Piya, mantarisa tibarimpa aeba asugasima esota kina tigepa aogiyenaba tabera timikiye.
12 Pigoya, tigeba wasanami purataiyema tibikibintanaba, pabi nkawameta igepa puwaitaiyo. Piya puwaitamagiri, tigeba Moseseke poropete kinaꞌmike kamanaꞌama nkagoba aborakibewe, piya untiye. Kabewama kamanane
13 Pigoya, tigeba uwaena kabintori mantari ima uma pasiyo. Ataena pikena kumaꞌama kabewapa pipa tabewe. Piya keꞌwapa pabiyama tabe waiyegini, pitaꞌiba uwoma kinaꞌmiba pasewe.
14 Piya, miyaba kumaꞌama kabewapa uwaenanto waiyegina, keꞌwapa wakenaba esegi puntiye. Pitaꞌiba uwaena kinaꞌantomi pasewe, piya untiye. Kumpari poropete kinaka aogima kabiyiyo
15 Tigeba kumpari poropete kinaꞌmika aogima kabiyiyo. Igeba iꞌamaba sipisipi kanta purite tigeti paebuma kanakibewe. We, intabaipintiba igeba kabu kara kanta puma tige tiba nakena kanakibewe. Pika aogima kabima miyiyo.
16 Pigoya, mono auꞌwaipa agamagiri agowaipa aogima agakibewe. Piya, wasanami waini aꞌwapa akenanaenabintisa kampa asikewe. Piki yawamapa asigiꞌma nakenaba agaenabintisa kampa asikewe. Kampaye.
17 Piya, aogi yawamaba aogi yamanka aeyagiri asikewe. We, ata yawamaba ata yamanka aeye.
18 Piya, aogi yawama ata yamanka aekenaenaba kampa waintegina, ata yawama aogi yamanka aekenaenaba pabiyama kampa waintiye.
19 Pigoya, aꞌyaꞌma yawama aogi yamanka kampa aeyaginiba agaꞌyuma yakupi maebugasawe.
20 Pika naeba maya yuwe: Pi kinaꞌmi mono auꞌwaimpa igama agowaika aogima abikibewe.
21 Pigoya: Waꞌegane, Waꞌegane, sumagini nagise kina igeba aꞌyaꞌmaginiba Koti kabiratakena mantariba kampa ikibewe. Kampaye. Mantarisa nabanempa nkawamu wasiye kina igemana ikibewe.
22 Piya, pi kanabipa uwoma kinaꞌmi maya unamikibewe: We, Waꞌegare, Waꞌegare, taeba kae kawamutapa wasanaba monopa uwaiminta, ke kinapa kae kawamutapa agaruba igainta, kae kawamutapa tabena aboranema puntompene. Kampa tagantano, ukibewe.
23 Piya unamigipa, naeba maya uwaimukuwe: Naeba ayantaga tigabebe puntone, a. Aguntaena pe kina tigeba aeꞌwama wawaegasiyo, piya uwaimukuwema, untiye. Esegima aema mikena kamanane
24 Pigoya, wasana kaꞌwaina ma kamanaꞌne abima wasikibipa, aeba napi napi yagara ae awametane. Pi ntagara aeba namankapa u takaitasa nama kintiye.
25 Kimaraogana waintogana, tabe ka aema wani paꞌma iguguya pumagina akasabakena pugagate ataogana waintantiye. Piya, esegi yarasa kimaraomeka tonkiya puma waintantiye.
26 Pigoya, wasana kaꞌwaina ma kamanaꞌne abima kampa wasikibi, aeba aibo yagara ae awametane. Piya, aibo yagara kaꞌwaina aeba namanka amunta yarasa kintiye.
27 Kimaraogana, tabe ka aema wani paꞌma iguguya pumagina kana namapa akasakasu paꞌwantiye, piya untiye.
28 Pigoya, Isu ma kamana uma aꞌya ataogini abimagini pami puntawe.
29 Piya, aeba mono tisa kinaꞌmi yesa kamana nane. Aeba kiye kinaꞌmi yesa puma uwaimintiyema, untawe.
1 Pigoya, Isuba amutisa tumogini uwoma kinaꞌmiba aegarantawe.
2 Piya puguna, ka karu yagara aeti kanama ampa parokaema maya uma omintiye: Kae kabemika kaba nayakena puntanapa aogi punatao, untiye.
3 Piya yogana, Isu aya parosuma auta uꞌma maya untiye: Piyaenaga nabiye. Pabigo kata wakana aogima miyo, untiye. Piya yogana, pabi ntaga kana karuyenawapa ata wantiye.
4 Ata waogana Isu maya omintiye: Uwa kinapa a-nkuwaimima, kaeba marupa wama kaupa mono kiya yagara uma ayakegana agano. Piya, kaeba wama Mosese uramintintanaba Kotiti amegini, wasanamiba kagate: Aoso yagara miyema, napikibewe, piya omintiye. Isu irebu yagarama kayokaya yagara kaba atantiye
5 Pigoya, Isuba piya potategina Kapeniyamu kumati aꞌwae puma wantiye. Aꞌwae puma waogana, Aroma kinaꞌmi irebu kiye yagara kaꞌwaina aeti irosaꞌma maya omintiye:
6 Waꞌega yagara, kayokaya yagarane yonintana abegina agisa ayapa ago puꞌwaewamagina tabera aukegina mintiye, omintiye.
7 Omogana, Isu abite: Naene ima kaba atakuwe, omintiye.
8 Piyama omogana, irebu kiye yagara aeba maya untiye: Waꞌega, naeba tumima minta kina mintogana, nana pegina namantepintiba ubasikibene. Kaeba pitaꞌi uma mima kamana yegana kayokaya yagaranepa kabareno.
9 Piya, naeba ima minta kinaꞌmi nkiwamu wasimagi, to kaꞌisa tumima minta irebu kinaꞌnepa kabiyuwe. Piya, igetisa kaꞌwainapa: Wao, omekanaba wakiye. To kapa: Kanao, omekanaba kanakiye. Kayokaya yagarane: Pi ntuga po, yekanaba pikiye. Piya, kiya kinaꞌmi yosa kamana yeganaba ata wano, untiye.
10 Piya yogana, Isu pi kamana abima napi napi puntana, aegaꞌma kanaume kina maya uwaimintiye: Taga urimekiri abiyo: Isureyo kina, tigetiba ma ntagarama nkamatitiꞌena piya awametapa kampa agauwe.
11 Pika amato puma yekiri abiyo: Pankao irosamitisabe tupasemitisabe wasanaba uwoma namuꞌisa kina irosaꞌma, Abaraꞌamu, Aisaki, Yekobu, igege mantarisa kumati aki puma naninta kaga nama iꞌmu pikibewe.
12 Piya pigiri: Taeba Yuta kina, mono ago kina mintune, ye kinaꞌmitaba, tigeba tununtanabi tumima tiwara upaba puma kubeꞌena puma mikibewe, untiye.
13 Isu piya ute, irebu kinaꞌmi kiye yagara maya omintiye: Kaeba wao. Kamatitiꞌenagampa auꞌwapa aboragamikiyema, omintiye. Pigoya, kana kayokaya yagarawapa pabi ntaga kabaꞌma aogi puntiye. Isu Pita aentawa yoninka kaba atantiye
14 Pigoya, Isu Pita ntamapi iyomepa aentawampa nkau yaku taogana awaita mintogana agantiye.
15 Agate ayata urogana yoninkapa pabigo ata wantiye. Ata waogana, kana waeꞌmaba asima naninta maema Isu amogana nantiye. Isu uwoma kina kaba itantiye
16 Aibogini, asenamaita ke kina intabaipinti minta kinapa uwoma ibabute kanagana puntawe. Piya puguna, Isuba ke kinaꞌwaipa kamanaꞌwatasa igarubantana, aꞌyaꞌma kinaꞌmi nkinuntanawaipa kaba itantiye.
17 Piya pogana, poropete Aisaya kamana mayama kaemaranti, piꞌna esegi puntiye: Aeba anuntanarepa taparintana yonintanarepa aesagabintiye, piyama kaentiye. Isu aegarakena kamana untiye
18 Pigoya, uwoma kinaꞌmiba aeti kanama ampa ainkiyuguna igate abagi kinaꞌwa: Kotu maroteri wakunema, uwaimintiye.
19 Uwaimogini wakena puguna, mono tisa yagara kaꞌwaina agora wama maya omintiye: Tisa, kaeba pitaꞌi mataꞌi wakena yegapa naeba kaegarakuwe, untiye.
20 Piya yogana Isu maya aꞌwae pomintiye: Kabu kara igeba ageꞌwaintaga waintiye. Piya, inatisa kabara igeba inaꞌwaintaga waintiye. We, Wasanama Ntagara naeba nawaikena maruntepa kampa waintiye, omintiye.
21 Piya omogini, abagi kina igetisa to kaꞌwaina mayama omintiye: Waꞌega abintaga, marupa wama nabanempapa puꞌwaka uma kaitate kaegarano, untiye.
22 Piya yogana Isuba maya omintiye: Monota puꞌwasu puma miye kinaꞌmiba igeba purikibe kinapa kanara kaiwaitakibewe. Kaeꞌenagaka ampa naegaraoma, omintiye. Pontawama Isu nkawamu wasintiye
23 Isu piya ute wanipisa karebi iyogini, abagi kinaꞌwa iyuguni wantawe.
24 Wauguna, pabigo pontaba tabera puma kotupa aigaꞌyoꞌya puma ataena puritegina wanipisa kare antabaipinti tumintiye. Aibogana, Isu aeba awaitamintantiye.
25 Piya pogini, igeba wama abage pumagini: Waꞌega, naisikena pune, untawe.
26 Piya yuguna maya uwaimintiye: Nanaga tiyekuruba pewe. Timatitiꞌenaripa uwaenantowa, a, untiye. Piya uwaimimagina, aeba asima pontabe wanipe tabe kamana uwaisimoginisi uwasuwa puntase.
27 Aibogini, pi kinaꞌmiba agate uwoma nkigi napima maya untawe: Aeba nana yagaragana, pontawamake waninkamakeba awamupa wasiyese, untawe. Isu tara kinaꞌmisi ke kina igarubantiye
28 Pigoya, Isuba kotupa taꞌema maroti Katara kinaꞌmi mpari wama uma irosantiye. Uma irosaoginisi tara yagarara ke kinaꞌwaisintaga kanama ampa abatantase. Isigeba wasana irubintisa kanamaginisi agasiya pusuguni iyekuru puma pitaꞌiba wasanaba kampa nasi nasi puntawe.
29 Isigeba Isu agateginisi kegaꞌe uma maya untase: Kaeba Koti Ntagaragawa, nana purasitakena kanane. Kanapa kampa agarosantegina kaeba ata purasitakenaga iyenoma, untase.
30 Pigoya, pagasari uwoma ntaga naninta namagini mintantawe.
31 Mintuguni, kana ke kina igeba Isuka maya uma esotantawe: Tagarubakena puntanapa, urataga pi ntagami nkintabaipinti tumpa paseno, untawe.
32 Piya yuguna Isu aeba: Karuꞌena aeꞌwaiyo, uwaimintiye. Piyama uwaimogini, kana yagara taramisi isintabaipintisa irosaꞌmagini, yaga intabaipinti uma pasintawe. Pasuguni, kana yagami karuꞌena kotu waintometa ausari tumima wanipinti naisuwaewantawe.
33 Piya puguni, igate kana yaga kiye kina igeba iyegaka kumati ima, pi aꞌyaꞌma kamanape keꞌwaisintaga yagara taramisi kamanape kaga wasana aꞌyaꞌma uwaimiwaentawe.
34 Uwaimuguni, wabe wayape aꞌyaꞌmagini kumatisa tumimagini Isuti tumpa irosantawe. Aeti tumpa irosaꞌmagini: Marepa atate to mari waomagini, esegima omintawe.
1 Pigoya, Isuba wanipisa karebi ima kotupa to kake taꞌema kanama kumaꞌwati to kakema irosantiye.
2 Irosaogini, agisa aya puꞌwanta yagara ka wasara wasirite kanatawe. Piya puguna, Isuba imatitiꞌenawaimpa nkagoba igate agisa aya puꞌwanta yagara maya omintiye: Yagarane, kaekuruba a-po. Naeba aguntaenagapa maegagasuwema, omintiye.
3 Piyama omogana, mono tisa kina kaꞌisamiba intabaipinti mayama napintawe: Aeꞌwa nkau maete ima Kotika akayasotayema, napintawe.
4 Piyama napiyuguna, Isuba napiyenawai igate maya uwaimintiye: Tigebipa nanaga agunta kamanapa napiyewe.
5 Piya, aguntaenawa mpaegasuwe, yopa, auꞌwapa kampa agawe. Asima wao ukubopa, kaba atama kasa au aborakenaenagaba tiyobi kunta piye.
6 Pigoya, Wasanama Ntagara naepa mabi aguntaena asuꞌa pikena esegiyenaba naminti, piꞌna nkagoba aogima agabebema agaiyo, piya ute, agisa aya puꞌwanta yagaragaba maya omintiye: Asima wasagapa aesagabite waꞌegati waoma, omintiye.
7 Piyama omogana, asima waꞌewati wantiye.
8 Piya pogini, aꞌyaꞌma kinaꞌmiba agate iyekuru pumagini, Koti pi nkesegiyena wasana imomeka iꞌmu puntawe. Isu Matiyuka kegaꞌe untiye
9 Pigoya, Isu aeba pitasa wama takisi maeyome ntagara ka agewapa Matiyu, aeba yogaeba pome ntamankapi mintogana uma abatama omima maya untiye: Kaeba kanama ampa naegaraoma, omogana, pabigo asima aegarantiye.
10 Pigoya, Isu namankapinti naninta nanema agegaꞌe yogana iyogini, takisi maeyume kinape to kaꞌisa aguntaena pume kinape uwoma irosauguni, Isube abagi kinape kaga nanintaba nantawe.
11 Piya puguni igate, Parasi kina igeba abagi kinaꞌwa maya uwaimintawe: Tisaripa takisi maeya kina aguntaena pe kinaꞌmikeba nana pikena kaga mima nanintaba nayema, ibigantawe.
12 Pi kamana Isuba abite maya uwaimintiye: Tusa yagara aeba aogi kinaꞌmitiba kampa yogaba piye. Yoni kinaꞌmiti mana piye.
13 Pigoya, tigeba wama paisa kamana mayama waintemi, pi nkagoba abibebe piyo: Naeba kaema agunta abasakenaenagaba kampa nabiye. Agu kaoꞌenaga nabiye, iye. Piya, naeba: Aogi kinatawe, ye kinapa aogi puwaitakenaba kampa tumintone. Naeba agunta kina igu aꞌwae pikibeka tumone, piya uwaimintiye. Isu aogantaꞌenawampa paisaenaba agarubaye
14 Pigoya, pi ntaga Yoni nkabagi kina igeba Isuti ampa irosaꞌma maya uma abigantawe: Taebe Parasi kinape kaꞌisa yagaba monotaka nanintaba aꞌa-o uma uwa miyuna, pi kae kabagi kinaꞌmiba nana piyema nanintaba aꞌyuguba nawe, untawe.
15 Piya yuguna aeba maya uwaimintiye: Wasanami ibaꞌena pigina iba waeꞌma nkawaeba uwa mintakiniba, ayama aokinaꞌmiba intaraꞌena puma nanintaba aꞌa-o uma mikibewe, a. Pipa kampaye. Ainti ibaꞌwaeꞌma nkawae ampa arakurite ababute to mari wagasiginiba, aokinaꞌmiba intara puma kampa naninta nanta uwa mima aeka napikibewe.
16 Piya, ae ntagarama paisa kai atugekanaba aoso kairasaba pugunikiye, a. Pipa kampaye. Aoso kaiwama paisa kai tabera paibekana atuꞌma atisasanaga piyaba a-po.
17 Piya, ke kasa wainiba paisa meme aribipa ariꞌatakiye, a. Kampaye. Kasa wainiwama paisa meme ariba atuꞌma wainibe meme aribe ataena pusanaga piyaba a-po. Piya, kasa waini to kasa meme aribi ariꞌataiginaba, isigeba kaga aogima waikibese, piya untiye. Isu Yairasi nkaraga purintapisa kaba atantiye
18 Isu aeba pi kamana uwaimima mintogini, monota paitama miyome ntagara kaꞌwaina aeti kanama agora ampa parokaema maya untiye: Aragane ibanto puriya, kaeba kanama auta ampa aukaya pegana aoganoma, omintiye.
19 Piyama omite waogini, Isu aeba asima abagi kinaꞌwake aegaꞌma wantawe.
20 Wauguna, waya ka iyegari tumiyaba mima miyogana kaboba nagisarisa tara tumpaema aꞌya punti, aeba Isu kai atunkata aukaya puntiye.
21 Piya puntana, antabaipintiba mayama napintiye: Kai manankata aukaya pumagi kabarikuwe, untiye.
22 Piya ute, aukaya pogana Isuba aꞌwae puma kana waeꞌmati ao agama maya untiye: Araganepa, kantawamaba paru peno. Kaeba kamatiti punatampeka aogi kabiyema, omintiye. Omogana, pabigo kana waepa kabaꞌma atawantiye.
23 Pigoya, Isuba wama kiya yagarama ntamapi ima ini kubegabe kamanaꞌwaipa abite maya uwaimintiye:
24 Tigeba irosaꞌma tumiwaegasiyo. Ma nkaraga aeba kampa purintiya, aeba uwa awaita mintiye, piya uwaimogini, kamanaꞌwa abugunaba uwa anagi kamana kanta piyema napintawe.
25 Aibuguna uwaitaogini, abeꞌi irosaꞌma tumiwaegasuguna, kana wasana wasa waintometi uma paiꞌma kana aragama nkayata urogana, aogama asintiye.
26 Piya pogana, pi kamanaꞌama pi mpariba pabigo abae purite wagana puwaentiye. Isu isiyorika yagararage aibo yagarage aogi puwaitantiye
27 Pigoya, Isuba pi mpaba atate waogini, isiyorika yagara taramisi aegaꞌma wantinisi kegaꞌe uma maya untase: Kaeba Tebiti ntagaragawa, tasigeka kantara po, untase.
28 Piya yusuguna abite wama kumata uma irosaoginisi agora wausuguna isibigama maya untiye: Tisiyo aogi puritakena esegiyenaba wainatantiya, pipa abibebe pesoma, isibigantiye. Piyama isibigaoginisi isigeba maya untase: Pipa taga abibebe puse, untase.
29 Piya yusuguna isiyora aukaya puntana maya untiye: Tisimatitiꞌenarisimpa auꞌwapa aborarisimikiye, untiye.
30 Piya yogana, pabigo isiyo apinaꞌma agantase. Aibusuguna, Isuba esegi kamana uma maya uwaisimintiye: Abiso. Tisigeba ma kamanapa wasana a-nkuwaimisigini abiyo, uwaimintiye.
31 Piyama uwaisimoginisi, pigo isigeba wamaginisi mare-u me-u pusuguna pi mpariba kana kamanaꞌama abae purite wagana puntiye.
32 Pigoya, isigeba wausuguni, igeba karuꞌena ka yagara Isuti ababute kanantawe. Aeba ke kina kaꞌwaina aigaraogana aiboꞌena puma mintantiye.
33 Piya pome ntagara ke kina agaruba agasogana aeba kamana untiye. Piya pogini, uwoma kina mintume kinaꞌmiba iꞌmu pumagini maya untawe: Maretapa paipa piyaenaba kapa kampa aboragi agama miyompene, untawe.
34 Piya yuguni, Parasi kina igeba Isuka maya untawe: Ke kinaꞌmi asu igasima minti ntagarama aoꞌmaeyagina, ke kinapa agaruba igasaye, untawe. Isu aeba aꞌyaꞌma kinaka antara kamana untiye
35 Pigoya, Isu aeba pabiyamagina aꞌyaꞌma mari nasi nasi pumagina, tabe kumatibe uwaena kumantontoribe Koti kabiratakena kamana mono namapinti uwaimintana, yonintana iki nakiyena ibome kinapa kabaꞌma paru puwaita waentiye.
36 Pigoya, uwoma kina igantana igeka antara puntiye. Igeba sipisipi kiye kampa kabiyegana ataenabi mpiyesa puma miyuguna,
37 pika antara puma abagi kina maya uwaimintiye: Yogaba tabe waintegina, piya naninta aꞌna pukena kinapa tarantowe.
38 Pika tigeba yoga agowamaka esotaigina naninta aꞌna pukena kinapa aboraigiri yogawatapa waiyo, piya uwaimintiye.
1 Isu aeba abagi kina nagisarisa tara tumpaema kinaꞌwa igegaꞌe yogini ampa irosauguna, ke kina igaruba igaikenabe yonintana iki nakiyena ibome kina kaba itakibeka esegiyena imintiye.
2 Pigoya, aposoro nagisarisa tara tumpaema kinaꞌmi nkigeba mayamawe: Marusa yagara Saimoni aoso agiwapa Pitawa, ae aꞌnanto Enturuwa, Sepeti ntagara Yemisiwa, ae aꞌnanto Yoniwa,
3 Piripiwa, Patoromayowa, Tomasiwa, takisi maeyome ntagara Matiyuwa, Aopayesi ntagara Yemisiwa, Tariyesiwa,
4 namuꞌisa kiya kina igarubakaikena abugai ntagara Saimoniwa, ainti Isu minagaꞌena punti ntagara Yutasi Isikeriyotiwa sumagini, abagi puntawe. Isu abagi kinaꞌwa yoga kamana uwaimintiye
5 Pigoya, Isu abagi kina nagisarisa tara tumpaema kinaꞌwa ige uwaitama igarubantana maya untiye: Tigeba to marisa kinaꞌmitiba a-nkwaiyo. Sameriya kinaꞌmi kumatiba a-nkubasiyo.
6 Isureyo tu, sipisipi kabuba wantasa puma miye kina, igeti mana waiyo.
7 Wasanamiti uma irosantiripa maya uwaimiyo: Koti kabiratakena yagaba agarosaye, uwaimiyo.
8 Piya, tigeba yoni kina kaba itaiyo. Puꞌwanta kinapa asiwaitaiyo. Karu kinapa aogi kaba itaiyo. Ke kinapa igaruba igasiyo. Piya, maeyantanaba ikantanarasa wanane. Uwa maeyasa puma tigeba ikantanaba a-mpaentiri uwa iyoꞌmaema aogi puwaitaiyo.
9 Monebe tabebe uwaenantobe kapa a-nkiraꞌma maete waiyo.
10 Kopa a-nkarakae piyo. Piya, tara kaibe tigisa anape pusuꞌma keꞌi nasikena wantape a-mpaete waiyo. Uwa tika nasiyo. Piya, yoga kinapa yogawaitasa nanintawaipa imegini maeyasa puma timigiri maeyiyo.
11 Pigoya, kuma pitaꞌi mataꞌi uma irosantiripa wasana ago igaiyo. Kaꞌwaina kayone puritama kaoꞌena puritakiripa, pabi ae namapi ima pabipi mima waimarate waiyo.
12 Namankaipinti uma pasintiripa: Mono tigeti waiyema, uwaimiyo.
13 Piya, kana namapisa kina aogima arupu puma miyiginaba, tigu paruyenamaba igeti wano. Piya, kampa aogima miyiginaba, pi paruyenaba tigetiti aꞌwae puma kanano.
14 Piya, ka yagarama namankapinti kampa tibabute wama kamanati kamana abekiripa, wakibe ntagaba tigisarisa iꞌni aiwaka potate waiyo.
15 Naeba taga urimukuwa, abiyo: Aintisa kanabipa Sotomu Komora kina tumimaena puwaitantana, maya kumatasa kinapa tabe kuntuyena aborawaimikiye. Aintiba toma toma kuntuyena aborakiye
16 Abiyo. Sipisipi kabukarawama ige abakapintiba kampa uwaitakenaena naeba pi tigepa uritauwa, pika tigeba miyarinkama pemisa puma pasema aogimagiri napima nasiyo. Piya pupuntama pemisa puma aogima napima kamparagaena a-piyo.
17 Tigeba wasanamika aogima kiya puma nasiyo. Igeba kamana uritakena namankaipinti tibabute wamagini, mono namankaipinti eru kasutasa tiyegukibewe.
18 Pipa nanagawane. Tigeba nabagi kina mintaka uma tabe kiye kinatibe waꞌega kina igetibe tibaisusu purite wama kamana uritakibewe. Piya, tigeba ige iyobipe to marisa kinaꞌmi nkiyobipe esegima mono uma araiyo.
19 Piya, igeba kamana uritakibepa: Aya kamana ukunemaba abima, tara taraba a-piyo. Pi ntagaba kamana ukena kamanapa Aota Awamusaꞌama napi napiyenaripi ataritakiye.
20 Piya puritakiri, kamana yiginaba tige kamana kantaba kampa pikiye. Tibarimpatisa Aota Awamusaꞌama tigupi mikibi, ae kamanaꞌena pikiye.
21 Pigoya, pi ntagaba aganto kaꞌwainaba aꞌnantopa minaga pekini aegukibewe. Aba kaꞌwainaba yagarawapa pabiyama minaga pekini aegukibewe. Piya, yagara aragawaimpiba inogi ibagipa kamana uwaitama minaga pigini iyegukibewe.
22 Pigoya, nae nawaga kamanataka wasanamiba tigeka abima kama puritakibewe. Pigoya, kaꞌwainaba kampa natakibikana esegima mimagina kanaꞌwa aꞌya pekanaba, aintiba Koti ababikiye.
23 Pigoya, ka kumata uma irosaꞌma mintigini tiyeguma tigarubaigiripa, to kumati paiꞌma tiyegaka waiyo. Piya, naeba ubebema urimukuwa, abiyo: Aꞌyaꞌma Isureyo kumati yoga wairite wanti, pipa igiga puma mintigi, Wasanama Ntagara naeba tumpa irosakuwe.
24 Pigoya, abikena namapisa yagara kaꞌwaina tisawampa asu agaikenaenaba pipa kampa waintiye. Piya, kayokaya yagara kaꞌwaina pabiyama tabe yagarawa asu agaikenaenaba pipa kampa waintiye.
25 Piya, abikena namapisa yagara aeba tisawampa ae awameta pekanaba kanarasakiye. Kayokaya yagara aeba tabe yagarawampa ae awameta maema aborakanaba pabiyama aogi pikiye. Pigoya, tibatipa Piyesiburu, pipa ke kinaꞌmi tabewaimpawe unamekini, naokina tigepa pabiyamagini tabera kamparaga kamana uritakibewe, piya untiye. Wasanamaba Kotika aekuru peno
26 Pigoya, tigeba wasanamika a-tiyekuru piyo. Kakama waintintanaba pipa agorapa kampa kakama waikiye. Pipa aintiba aborakiye. Piya, airarikaegaintaꞌena waintipa, pipa agorapa kampa kakawakiye. Pabiyama aintiba apira puma aborakibewe.
27 Pigoya, tununtanabinti urimo kamanapa tigeba ara uwaimiyo. Piya, obina kamana abepa tigeba nama nkagari asu mimagiri kegaꞌe uma uwaimiyo.
28 Pigoya, aririꞌama aeguntini tigu tiꞌama aegukena aguyosagakibe kina igekaba a-tiyekuruba piyo. Piya, tigutipe ariripe kaga isibanakinisi agagabinti tumikena esegiyenawantaga yagara Koti, aeka tiyekuru piyo.
29 Pigoya, kisabentonto uwaena monentorasa ika pewe. Piya tibarimpaba kampa owe untakanaba ayamagina mabipa tumikiye. Pipa kampaye.
30 Piya, wasana tige tiꞌno nkabiyapa pipa aꞌyaꞌmagina aisuma abiwaeye.
31 Pika tigeba tiyekuruyenabipa a-mpiyiyo. Tigeba kisabepa kampaye. Tigeba wasanarawe. Isu nkage uma aborakena kamanane
32 Pigoya, kaꞌwaina aeba nae nagene wasanami nkiyobi uma aborakapa, naeba pabiyamagi mantarisa nabanempa ae aobi uma aborakuwe.
33 To kaꞌwaina aeba wasanami nkiyobi kakanatakapa, aepa naeba pabiyamagi mantarisa nabanempa ae aobi kakatakuwe. Isuba maꞌena pikena aborantiye
34 Pigoya, tigeba naekaba: Aeba paruyena maema aborakena tumintiyeba, a-siyo. Naeba paruyena wanane. Maꞌena pikena kasontentaga tumintone.
35 Piya, naeba wasana atatara puwaitakena tumintone. Pika abage yagarawampage isigeba atatara pisigina, anoge aragawampage isigeba atatara pisigina, aentawampage anatuge isigeba pabiyama atatara pikibese.
36 Pigoya, kaꞌwaina aeba aokina igetisa yagarama kama potasanaga aborantone.
37 Piya, kaꞌwaina aeba abake anoke agu kaoꞌena tabera puwaisitantana naepa uwaenanto punatakibi, aeba nae naoꞌyagaraba kampa mikiye. Piya, kaꞌwaina aeba yagara aragawa agu kaoꞌena tabera puwaitantana naepa uwaenanto punatakibi, aeba pabiyama nae naoꞌyagaraba kampa mikiye.
38 Eya, kaꞌwaina aeba maripowa, pipa wasanami igobi punatantanaba kampa aesagabinta naegarakibiꞌnaba, aeba pabiyama nae naoꞌyagaraba kampa mikiye.
39 Piya, kaꞌwaina aeba mikenaenawaka owe yekanaba, aꞌyugu potakiye. Piya, naeka napima mikenaenawaka aꞌa-o yekanaba, aboramikiye, piya untiye. Isuka kayone pe kina aogi ikantana maekibewe
40 Pigoya, wasana kaꞌwaina aeba aogi puritaiꞌnaba pipa nae aogi punataye. Piya, nae aogi punataiꞌnaba Koti aogi potaye. We, ae unataoga naeba kanantokanane.
41 Pigoya, kaꞌwaina poropete yagaraga: Koti nkaoꞌyagarawe, otama aogi potakibiꞌnaba, aeba poropete kinaꞌmi ige awameta ikantanaba maekiye. Piya, kaꞌwaina Koti aegaꞌma tagantana pe kina to kaꞌwainaka: Koti nkaoꞌyagarawe, otama aogi potakibiꞌnaba aeba tagantana pe kinaꞌmi ige awameta ikantanaba maekiye.
42 Ae abagi kinane, uwaitamagina, aogaso wani iruꞌma imikibiꞌna ikantanawapa aintiba kampa kaikiye, Isu piya untiye.
1 Isuba nagisarisa tara tumpaema abagi kinaꞌwa kamana piya uwaimiwaetate atate, to kumati mono uwaimirite wantiye.
2 Piya pogana, Yoni wani paiꞌitanti ntagara aeba igaꞌna namapi mintana, Karaisiti yoga pome pi awaga kamana abite abagi kinaꞌwa uwaitaogini igeba wamagini,
3 Isu maya uma abigantawe: Kaeba utaratanti ntagara Karaisiti kanakiye, untapa, kaebera to ka yagaraga agawa puma misunema, abigantawe.
4 Piyama abigauguna, Isuba maya uwaimintiye: Tigeba aꞌwae puma wamagiri, agama abentanama kamana uma Yonipa omiyo. Pipa mayaenawe:
5 Iyorika kinaꞌmiba iyo agawema, igisa iya puꞌwanta kina igeba keꞌi nasi nasi pewema, karu kinaꞌmi nkiꞌamaba aogi piyema, purinta kinaꞌmi iyo agawema, kusi kinaꞌmiba aogi kamana abewemagiri uma omintiri, to kapa mayama amato puma omiyo:
6 Kaꞌwaina aeba naeka abima aekita kampa pikibiꞌnaba aeba aꞌmu pikiye, iyema omiyo, untiye.
7 Piya uwaimogini, Yoni nkabagi kina igeba aꞌwae puma wauguna, Isu aeba wasana mintume kina Yonika maya uwaimintiye: Tigeba kaꞌme mpariba Yoniti wama, ayaena agakena wantawe. Misa ka ponta wama maete wate kanate pemisa pogiri agakena wantawa, a. Pipa kampaye.
8 Wasana kawaina kaiwapa aogi awaꞌena purintogiri agakena wantawa, a. Pipa kampaye. We, wasana aogi kai pure kinaꞌmiba tabe kinaꞌmi ntamapi mintini iwaiba waintini pewe.
9 Piya, poropete ka agakena wantawa, a. We, nae naeba urimukuwa, abiyo: Tigeba pi agama miye ntagara aeba poropete kaisa kina ige awametapa kampaye. Aeba to awametane.
10 Piya, aeka mono isapisa kamana ka mayama waintiye:
Abo. Kamanaꞌne maenta yagara agarubakana paitama kaori wama, kekapa aogi pikiyema, Koti untiye, iye.11 Pika naeba ubebema urimukuwa, abiyo: Wayaꞌmapisa aboranta kaꞌwainaba Yoni wani paiꞌitanti ntagara aepa kampa againtikana, pigo Koti kabiratakena yaga aborakiniba nagora tumima miye kinaꞌnempiba Yonipa asugaikibewe.
12 Pigoya, Yoni wani paiꞌitanti ntagara, ae yoga agobinti ntagaba Koti kabiratakenaenaba agobima agasiya puma aborantiꞌnaba aboraye. Pika esegi pe kinaꞌmi ige Koti kabiratakena kumapa maekena pewe.
13 Piya, aꞌyaꞌma poropete kinaꞌmi kamanape Mosese ominti ago kamanape ke nasompentanaga kaeta kanantagana, Yoni aboraogana kamanaꞌwaimpa auꞌwa aborakena kanapa aborantiye.
14 Pigoya: Iraiya aꞌwae puma kanakiyema unta, pipa tigeba Yonika: Iraiyawe, yiyo.
15 Pigoya, ageyaga kinaꞌmaba ma kamanapa abibebe peno.
16 Pigoya, mampabisa ae kinaꞌmita awame puritasuwe, a. Tigeba yagara araga ige awametane. Igeba kumati mima iyo kina maya uwaimewe:
17 Ini yokiripa, nanaga waꞌenaba kampa pewe. Tantara ena pokiripa, nanaga kubeꞌenaba kampa pewe, piya yewe.
18 Piya omesa puma Yoniba yogawa agobintanaba monoka kaꞌisa nanintabe waini wanipe kampa nama aꞌa-o uma miyogini agantiniba maya untawe: Aeba aiboꞌena piye, untawe.
19 We, Wasanama Ntagara naeba tumima wanipe nanintabe naogiri, nagantiripa maya yewe: Aeba uwoma ntanintabe waini wanipe nayaba yagarawe. Aeba takisi maeya kinape aguntaena pe kinape ige iyoꞌyagarawema, naeka yewe. We, mono agowapa iguꞌama kintarama miye kinaꞌmi, ige aogima aegaragiri agawe, Isu piya untiye. Kaꞌisa marisa kinaꞌmiba atama mintanta kamanane
20 Pigoya, Karariya kaꞌisa kumati Isuba uwoma ntuga puma esegiyenawampa ago maema aboraogini agantiniba igupa kampa aꞌwae puguna, igeꞌma kamana maya uwaimima untiye:
21 We Korasini, nantarane. We Petisaita, nantarane. Mebi, Tigeti kukantana tabera aboranti, pipa Taya Saironi kumata aborantisinta igeba intara puma karuꞌena augaꞌmagini igu aꞌwae puntasine.
22 Pika urimukuwa abiyo: Aintisa kanabipa Taya Saironi kina tumimaena puwaitantana, maya kumatasa kinapa tabe kuntuyena aborawaikiye.
23 We, Kapaniyamu kina, tigepa mantari tibabute ikibewa, a. Kampaye. Aintiba agagabinti tumikibewe. Piya, kukantana tige kumati aborantemisa puma Sotomu kumata aborantemisinta, ibabe aintibe Sotomuba uwa waiyesine.
24 Pika urimekiri abiyo: Aintisa kanabipa Sotomu kumatasa kina tumimaena puwaitantana, maya kumatasa kinapa tabe kuntuyena aborawaikiye, Isu piya untiye. Tigeba naeti kanamagiri migaraiyo, Isu untiye
25 Pigoya, pi ntagaba Isuba abawampa aꞌmu potamagina maya untiye: We naba, kaeba mantage mage tabe agowe. Abikenaenawaika abegana tabe pe kinapa kaka waigasane. Piya, iguꞌamaka abegana inamu kanta pe kinaꞌmipa iyakima imene, pika naeba naꞌmu pugataopa,
26 kaeba piyama aboraurite wagana penema, pipa uma esegi puntampene.
27 Pigoya, aꞌyaꞌmaena wainatantipa nabanempa nayapi atawaentine. Pika wasana kaꞌwaina yagarawa naeka agoneka kampa abibebe piye. Nabanempa abiwa abibebe piye. Piya, nabanempa ae agowaka pabiyama wasana kaꞌwaina kampa abibebe piye. Yagarawa nae nabinto abibebe puwe. Piya, yagarawa naeba wasana kaꞌwaina nabanempa nkago uma aboramekanaba aege abibebe pikiye, Isu piya untiye.
28 Piya ute to maya untiye: Pigoya, kuntaena aesagaꞌma tintaraꞌenabi mpiye kina tigeba aꞌyaꞌma naeti kanawaeyigi migarakenaena timekana paruribeno.
29 Piya, naeba nanta nagu paruyenanentaga mintoka, kanamagiri miminte tibota atama agonepa ampa abibebe piyo. Piya pigina tigu timankamaba migarano.
30 Pi kuntuyenaba tibota aesagatitaopa pipa aogiyenawe. Piya, pi timontana aesagabikibepa kuntaba kampa tibikiye, Isu piya untiye.
1 Pigoya, pi ntagaba Isuba abagi kinaꞌwapa paita itaogini sabatira witi yugabinti wantawe. Wantini abagi kina igeba igaꞌena ibogini witiba akima nantawe.
2 Piya puguni, Parasi kinaꞌmiba igate Isu omima maya untawe: Abo. Kabagi kinaꞌmiba sabatira akumparantaꞌena peganaba ataena piye, untawe.
3 Piya omuguna maya uwaimintiye: Tebitibe aokinaꞌmibe igaꞌena ibogini punta, pi kamanapa tigeba kampa aisuma abewa, a. We, tige abintawe.
4 Igeba tabe mono namapinti iyogana pareti Koti nkamume pipa amigini maema nantane. Pipa aebe aokinaꞌmibe aꞌyuguba kampa nakibewema, mono kiye kinaꞌmi mana nakenawema, akumparantane.
5 Pigoya, aꞌmuntana kaekena mono kina igeba yoga pumentanawaika Moseseba kamana kaenti, pipa aisuma kampa abewa, a. Pipa ago abintawe. Igeba sabatira yoga pumagini sabati ataena peweba asuwaitaiyo.
6 Piya, naeba pika urimekiri abiyo: Tiyora asima minti, aeba tabe mono namapa asugasima mintiye.
7 Pigoya kamana awaꞌena ka mayama waintipa, pi kapa tigeba abisanawa, kampa abewo. We, naeba kaema agunta abasakenaenagaba kampa nabiye. Kaoꞌena waintaga misanaga nabiye, Koti untiye. Tigeba pi kamana abima yesinta, kaintanawai kampa wainta kinapa ma uwa kamanapa kampa uwaitasine.
8 Pigoya, Wasanama Ntagara naeba pi sabatirapa kabima miyuwe, Isu piya untiye. Isu sabatira ka yagara kaba atantiye
9 Isu piya ute, pitasaba atate wama mono namankaipinti intiye.
10 Pigoya, pitaꞌi ka yagara mintantiye. Aeba ayapa tagarakiwanta, mintogini wasanamiba Isu abigama maya untawe: Ma ntagaraba sabatirapa kanara kaba atakibepera kampaye, untawe. Piya, igeba uwaba kampa untawe. Kamanaꞌwa abite kamana otakena napimagini untawe.
11 Pigoya, Isu aeba iwamu aibatenama maya untiye: Tigetisa kaꞌwaina yagawa kabinti, sabatira tumekanaba sabatiraka uma kasakana uwa mikiyo. Pipa kampaye. Aeba aoꞌmaekiye.
12 Yaga uwaena kinane. Wasana tigeba pi amantaga kinane. Pika sabatirapa wasana kanara aogi puwaitakune untiye.
13 Piya ute kana yagarapa: Kayapa parosoma, omintiye. Piyama omogana, ayankasa pogana aibarutama aogi puma to ka aukaꞌisa ayankama waintomesa puntiye.
14 Piya pogini, Parasi kina igeba pintana agate wawaemagini Isu nkaegukenaenaga nikintawe. Isu aeba taga Koti kayokaya yagarawane
15 Pigoya, Isuba pi kamana abite pimpa kumapa mintantipa atate tori wantiye. Waogini uwoma kinaꞌmi aegaꞌma wauguna, yoni kinapa kabaꞌma aogi puwaitantiye.
16 Pigoya, igeba to kaꞌisa kinapa: Nawaga kamana a-nkuwaimiyoma, tonkiya kamana esegima uwaimintiye.
17 Piya pogana, Koti nkawamupisa kamana poropete Aisaya meto kamana kaemaranti, piꞌna auꞌwantagaꞌena mayama puntiye:
18 Mapa kayokaya yagarane. Nae utamarantone, iye.
Pigoya aewapa aogi yagaranene. Naeba aeka nabugaye, iye.19 Naeba Aota Awamusaꞌne aeta atakana aoꞌmaeyakana kamanaꞌne aꞌyaꞌma namuꞌisa kinapa uma aborawaima maema arupu pikiye, iye.
Piya, aeba kaba kampa ibiꞌma, taberasa kampa uwaitakiye, iye.Piya, tabe kamanaꞌwapa keꞌiba kampa aborakini abikibewe, iye.20 Pigoya, uwaena misankanto akaꞌyuwaintipa, aꞌyaꞌma kampa akaꞌyuwaisa pumagina ataenaba kampa puratakiye, iye.
Piya kaꞌisa yagaba uwaena yakunkanto tamipa, kampa tuꞌma waikana, magi magi kinapa kampa ataba puratakiye, iye.Piya puma, esegima yoga pekana Koti kamanaꞌamaba aborama arupu puma aogi purite wagana pikiye, iye.21 Piya pekini, to marisa kinaꞌmiba aeka napinapima agawa pikibewe, Koti untiyema, Aisaya Isuka piya kaentiye. Isuba ke kina agaruba agasogini kamana otantawe.
22 Pigoya pi ntagaba ka yagara kewama aigaramagina aorikaema aiboꞌena puntiye. Aibogini, Isuti ababute wantawe. Piya puguna, Isu kabaꞌma aogi potaogana kamana uma ao agantiye.
23 Piya pogini, aꞌyaꞌma uwoma kina mintume kinaꞌmiba agate tabera pami pumagini maya untawe: Taeba napiyompepa Isuba Tebiti ntagara utaratanta Karaisiti kanta piye, untawe.
24 Piya yuguni, Parasi kina igeba pi kamana abite maya untawe: Kumparine, ke kinaꞌmi tabewai agewapa Piyesiburu, ae esegiyenawatasa ke kinapa agaruba igasaye, untawe.
25 Piya yuguni Isuba napi napiyenawai igate maya uwaimintiye: Ka marasa aokinaꞌmige kamaena pumagini kamparagaena pigina kaꞌme mpa aborakiye. Piya, to kumatisa kinaꞌmibe to namapisa kinaꞌmibe pabiyama aokinaꞌmige maꞌena puma ataena pigini nama kumaꞌwaipa akasabaꞌmagina ataena puwakiye.
26 Piya, Satani ke kinapa ayama agarubaꞌma kama potama agarubakiye, a. Pipa kampaye. Piya pekana aege maꞌena puma ataraisigina aꞌyaꞌwaemaenawampa kamparagaena pusanaga piyaba kampa pewe.
27 Piya, naekaba mayawe yewe: Aeba Piyesiburu aoꞌmaeyagina ke kinapa agaruba igasaye, yepa: Pigoya, kaꞌisa tiyokinaꞌmi igeba ke kinapa agaruba igasawe. Pipa ke iyoꞌmaema esegi puwaitagini pi ntugaba pewe, a. Pi ke kina Piyesiburu ae esegiyenarasaba kampaye. Piya, tiyokinaꞌmiba agaruba agoba agamagini, aintisagaba tigepa utaritakibewe.
28 Pigoya, naeba Koti Nkawamusaꞌama naoꞌmaeyagi ke kinapa agaruba igasoka, Koti kabiratakenaenaba tigetiba aboraye.
29 Pigoya, kewama esegi yagara kanta puma mintakanaba, ayamagina namankapintiba ima kotapa aparikiye, a. Pipa kampaye. Marupa pi esegi yagara arakuꞌma agisa aya kirokaetama pabigo kotankapa aisagakiye.
30 Pigoya, kaꞌwaina aeba kayone kampa punataiꞌnaba kama punataye. Piya, kaꞌwaina aeba yagarunte kampa ibabuma aki piꞌnaba aeba igarubaye.
31 Pika urimukuwa abiyo: Aintiba kotiba aꞌyaꞌma aguntaenabe aꞌyaꞌma kamparaga kamana wasanami yepe kanara mae igaikiye. Pigoya, Aota Awamusaꞌama akayasotakibiꞌna, ae kaintanawapa Kotiba kampa maegaikiye.
32 Wasanama Ntagara nae uma kamparaga punatakibiꞌna, aepa aguntaenawapa uma asuꞌa pogaikuwe. Piya to kaꞌwaina aeba Aota Awamusaꞌama uma kamparaga potakibiꞌna, ae kaintanaba mabipe mantaribe kampa uma asuꞌa pogaikuwe, Isu piya untiye. Ata yawamaba kamparaga yamanka aeye
33 Isu piya untana to maya untiye: Pigoya tigeba ka yawama nkaꞌwakaba: Aogiyenawe, untiri, kana yawaka kaga: Aogiyenawe, yewe. Piya, to ka yawama nkaꞌwakaba: Kamparagawe, untiri, kana yawakaba kaga: Kamparaga yawe, yewe. Piya, yawama nkapa agamagiri, agowaka aogima napikibewe.
34 We, kuyawama ntagara, tigeba agunta kina mintawa, aogi kamanapa kapa nanawe ukibewe, a. Pipa kampaye. Tigupi waintintanaba pabiyama tiwamupisa irosaye.
35 Pigoya, aogi aguꞌyaga yagaramaba aogiyena aborakiye. Kamparaga aguꞌyaga yagaramaba pabiyama kamparagaena aborakiye.
36 Naeba urimukuwa abiyo: Kamparaga kamana toma toma se, pi kamanapa Koti aꞌyaꞌma kina pako pikibi ntaga ibigakini, kamana yigina uritakiye.
37 Piya, aintiba kaeka kamanataka kababikibe, pabi kaeka kamanatakabaya katakiye, Isu piya untiye. Kaꞌisa kinaꞌmi: Kukantana peka agakune, untawe
38 Piya uma uwaimogini, mono tisa kinape Parasi kaisa kinaꞌmibe maya kamana aꞌwae pumagini omintawe: Tisa, kaeba kukantana ka pega agano, untawe.
39 Piya yuguna maya uwaimintiye: Monoꞌwai kampa waima antage kinaꞌmitaba, tigeba kukantanagaba yewo. Tigeba kukantanaba aosoꞌenaba kapa kampaye. Yonati aborantisa puma pabiyama aborakiri agakibewe.
40 Yona aeba kakaga yaga tabe inoyantawama nkantabaipinti mintantisa pumagi, Wasanama Ntagara naeba pabiyamagi ma antabaipinti kakaga yaga mikuwe.
41 Ainti Koti aꞌyaꞌma kina pako pikibi ntagaba Niniba kumatisa kina aborama mamparisa kinaꞌmi kamparaga kamanati uma abora uritakibewe. Pipa uwaba kampaye. Niniba kumatasa kina igepa Yona aeba wasanarakaꞌyankama igeꞌma kamana uwaimogini abima igu aꞌwae puntaka, piya ma minto naeba Yona ae awametapa kampaye. Pipa asugasima mintogiri, pabi ntaga tigeba kampa piyama aꞌwae pigina pi Niniba kina uritakibewe.
42 Piya, mare takaerisa tabe wae aeba pabiyamagina aꞌyaꞌma kina pako pikena yagaba ma mpabisa kinaꞌmiti kamparaga kamanati abora uritakiye. Pigoya pipa uwaba kampaye. Pi kana waepa aeba atuti wama Soromoni aetisa mono abintiye. Piya, ma minto naeba Soromoni ae awametapa kampaye, pipa asugasima mintuwe, Isu piya untiye. Ke kina to kake aꞌwae pumagina kanakiye
43 Piya untana, Isu to maya untiye: Kewamaba wasanaba atate wama kaꞌme mpari umima, maru kumakaba aguyosagakiye. Aguyosakate maya ikiye:
44 Namantepa atate kanantoka, pitaꞌi to kake aꞌwae pumagi wakuwe. Piya ute aꞌwae pumagina agakibipa, kana namapa paga pumagini aogi pugaintane.
45 Piyaena agate wama ke aokina tonaentisa tara umaema kina to kake kamparagaena pe kina ibabekini kanama pabi ntamapi ampikibewe. Aibigina pi ntagara aeba paipa kampa aogi yagara mintantiꞌnaba aintiba tabera kampa aogimagina ata puwakiye. Mamparasa kamparaga kina tigetiba pabiyaena aborakiye, Isu piya untiye. Isu ano aꞌnanto ige kamanane
46 Pigoya, Isu aeba wasana mono uwaimima mintogini, ikaꞌi anobe aꞌnatabarabe kamana omikena ampa agawa pumagini mintantawe.
47 Piya puguna, kaꞌwaina igate maya omintiye: Kanobe kaꞌnatabarabe kamana ugamikena takaꞌi kagawa pumagini mintawe, piyama omintiye.
48 Piyama omogana Isu maya omintiye: Nano naꞌnatabaraga yewo, untiye.
49 Piya ute abagi kinaꞌwa mintumeti aya nkasa pumagina maya untiye: Igaiyo. Nano naꞌnatabaragi maye, untana:
50 Mantarisa nabanempa nkawamu wasima aegara kina pi ige nano naꞌnanto namanaꞌmaba mintawe, Isu untiye.
1 Pigoya, pabi ntaga Isuba namapintisa irosaꞌma wamagina kotu kepari umintantiye.
2 Umintogini, wawaya uwoma kinaꞌmi ampa irosaꞌmagini aki puguna, igate to ka wanipisa karebi intiye. Imagina aeba wanipisa karebi mintogini uwoma kina igeba kepari mintantawe.
3 Piya puguna, meto kamana toma toma uwaimintana, kapa maya untiye: Abewo. Ka yagarama aintana pikena wantiye.
4 Wama uma aibarase pogana aowa kaꞌisaba kepi tumpa waintantiye. Aibogana, kabarankama irosaꞌma ampa nawaegaintiye.
5 Piya aowa kaꞌisaba yabankama nkabobori uwaena manto waintometa tunkwaima, karuꞌena irantiye.
6 Piya pogana abuꞌwapa tumomepa inata araꞌwaiyogana pa taogana asama pari puma puꞌwantiye.
7 Piya kaꞌisa aowapa kabubinti tunkwaima iraogana kabuwama aibarusa pogana asa wantiye.
8 Pigoya kaꞌisa aoba apa mabi tumpa waimagina anonkapa uwoma aborama aosa pama kaꞌisa 100-wa, to kaꞌisa 60-wa, to kaꞌisa 30-wa, suma aboraogana uwoma ntaninta waintantiye.
9 Piya, ageyaga kinaꞌmaba ma kamanapa abibebe peno, Isu piya untiye. Isu meto kamanaka uwaimintiye
10 Kamana piya umagina uwaimogini, abagi kinaꞌwa igeba agora wamagini abigama maya untawe: Kaeba nanaga meto kamanapa uwaimene, untawe.
11 Piya yuguna, aeba maya uwaimintiye: Kakamagina Koti kabiratakena kamana waintemipa, pipa tigemana abikibewema untine. Pigoya, kaꞌisa uwoma kinaꞌmiba kampagini abikibewe, untine.
12 Pigoya kaꞌwaina aeba mono amintaꞌena maemagina miyekanaba aintiba Kotiba to kake amekana uwomantana aboramikiye. Piya, to kaꞌwaina mono amintaꞌena kampa aogima maema miyekanaba apaꞌurekana uwa mikiye.
13 Igeba iyo maꞌmaginiba kampagini agabebe pewe. Igerasa abintiniba kampa aogima abibebe pewe. Piya, agowapa kampa abeka ma kamana meto kamanatasa uwaimuwe.
14 Pigoya, igeka Aisaya meto kamana mayama kaenti, piꞌna esegi piye:
Igerasa uwa abintiniba igutasaba kampa aogima abibebe pikibewe, iye.Piya, iyorasaba agantiniba kampa aogimagini agabebe pikibewe, iye.15 Ma mparasa kina igepa iguꞌama esegi puwama ige akumpagini, iyorika pewe, iye.
Pika iyowamaba kampa aogimagina agabebe pikiye, iye.Igewamaba kampa aogima abibebe pikiye, iye.Piya, iguꞌamaba kampa aogima napikiye, iye.Piya pumagini iguꞌkampa aꞌwae pigipa ayamagi naeba aogima kaba itakuwe. Pipa kampaye, Koti unti kamana Aisaya piyama kaentiye.16 Pigoya tigeba tiyoyaga mintiri, tigeyaga mintawa, pika tiꞌmuntanabi mpintawe.
17 Naeba ubebema urimukuwe: Poropete kina mono kina uwoma kinaꞌmi igeba tige abima agantana pi agakenagaba ibugagate itaogini, uwa kampa agama abintane, Isu piya untiye. Aintana asigikena kamana ago uwaimintiye
18 Piya untana, Isu to maya untiye: Pigoya, ma aintana asigikena kamana urimo kamana, piꞌna nkagowa uma aborarimekiri abiyo:
19 Aꞌyaꞌma kina koti kabiratakena kamana abimagini aogima kampa igupi napikibe kina igeti Satani irosaꞌma aintana asigimarantapa maerite wagasaye. Pi ntagara aeba kepi aowa tumpa waintanti pi nkawametane.
20 Pigoya yabankama nkabobori tumpa waintantisa nkawameta piyamagini miye kina igeba mono abimagini pabigo iga ibegini napimagini miyewe.
21 Igupipa abupa kampa panta inata araꞌma miyewe. Piya pegana aogi kamanaꞌneka maꞌena pumagini ataena piginaba ae abintemi kamana agaro kaikiye.
22 Pigoya, kaꞌisa aowa kabubinti tumpa waintanti, pi nkawameta miye kinaꞌmiba mono abimagini mintagana, mampabisa kuntaenagabe mone kutakabe napi napima miyekana, igaenama iguꞌama maema aꞌyugu puwaigasakini pabigo monoꞌama nkauꞌwapa kampa aboraye.
23 Pigoya, apa mabi tumpa waintantisa pi nkawameta mikibe kinaꞌmiba mono abimagini igutasa maemagini miyewe. Piya pegana, kaꞌwainatiba auꞌwapa 100-wa, to wainatiba 60-wa, to kaꞌwainatiba 30-wa, suma aboraye, Isu piya uwaimintiye. Yogabinti yoni tagakena meto kamana untiye
24 Piya untana, Isuba meto kamana to ka maya uwaimintiye: Ka yagarama yogawati aogi aintana aowa asigitanti, aeta Koti kabiratakenaenaba awame pukuwe.
25 Pigoya kana yagara aeba aintanaba asigitate waogana aseka kama yagarawampa kanamagina yoni nkaosa maemagina aibarase pugaite wagaintiye.
26 Pigoya, kana aintana pumaraomepa iꞌmagina nakena aborakena pogana yonipa kaga tarage uma irantiye:
27 Piya pogini, kayokaya yagara igeba agate yogawama nkabapa omima maya untawe: Tabe yagarare, kaeba yogagatiba aogi aintana asigimarantampepa, aetasabaya yonipa tagayema, abigantawe.
28 Piyamagini abigauguna maya untiye: Pipa kama kina kaꞌwaina asigimarantegina tarage uma iraye, yogini, igeba abigama maya untawe: Abintaga, wama uma iꞌma maebugasano, untawe.
29 Piyama yuguna maya uwaimintiye: Kampaye. Tigeba yoni igintiri kaga nakenaena igisanaga uwa ataiyo.
30 Nakenabe yonipe kaga waimaginisi aborakibese. Pigoya, nakena maekena yaga aborakapa, yoga kina uwaimekini igeba marupa yoni kibiꞌma iꞌmagini asaema yakupi kaentini, nakena aintanaba maemagini namantepinti ataigina waikiye, untiyema, Isu piya untiye. Masitetige yisitiwamake meto kamanane
31 Pigoya, meto kamana ka maya uma uwaimintiye: Koti kabiratakenaenaba masiteti aꞌwanto piyamawe. Wasana kaꞌwaina aowa yogawati metantiye.
32 Kana yamankapa to kaꞌisa yamanka piyama wanane. Aeba uwaenantowe. Kana yaba iꞌmaginaba kaꞌisa nakena yawamapa igasimagina tabe yaena piye. Piya pegina, kabarankamaba kanama amarapa ampa mima inapa kiyewe, untiye.
33 Piya untana, meto kamana to ka maya uwaimintiye: Koti kabiratakenaenaba yisitiba piyamawe. Ka waeꞌma yisiti maemagini paretibinti paigu pekanaba, pi pareti anosama igaena tabera pukiye, Isu piya untiye. Isuba meto kamanaꞌamana untiye
34 Pigoya, Isu aeba wasana kamana uwaimintintanaba pi meto kamanaꞌamana uwaimintiye. Kamana auꞌwapa kampa aboramagina uwaimintiye.
35 Piya pogana, poropete yagara kaꞌwaina kamana abima mayama kaenti, piꞌna esegi puntiye: Nawamupipa meto kamanaꞌamana aboraka ukuwe. Piya, ma aborantemitasa kakanta kamana wairite kanama agowapa ampaema aborakuwema, Isu piya untiye. Yogabinti yoni tagakena meto kamanaꞌama nkagowane
36 Pigoya, Isuba pi aꞌyaꞌma kina itaogini wauguna namapinti intiye. Ima mintogini abagi kina igeba aeti wamagini omima maya untawe: Witi yugabinti yoni taganti pi kamana ago kaeba yega abeno, untawe.
37 Piya umagini abigauguna maya uwaimintiye: Wasana aogi aintana asigiyemipa Wasanama Ntagara naewe.
38 Yogaba pipa aꞌyaꞌma marisa kinane. Aogi aintanaba pipa nae monota miye kinane. Yoni nkaosa asigintemi, pi kinapa kewama nkaokinane.
39 Pigoya, pi yoni nkaosa asigintemi ntagara, aeba Sataniwe. Piya, witi maekena yagaba pipa ainti tabe kanawe. Naninta maema akibikena kinapa enisore kina igewe.
40 Pigoya, yoni iꞌma yakupi kaeyasa pumagina, ainti tabe kanabipa aborakiye.
41 Piya, aintiba Wasanama Ntagara naeba enisore kinaꞌne uwaitakini maga maga naokinaꞌne igetisa naegarakenaenawaipa ata puwaitakenaenabe agunta pe kinape kibiꞌma,
42 tayaba yakupi itakini tumpikibewe. Pitaꞌi tumpimagini kubeꞌena pumagini iwarasa kaki aema mikibewe.
43 Pigoya, pi ntagaba arupu kina igeba mantarisa ibawaimpa ae kumata pa nkeꞌwasaena piyaenama eꞌwasa puwaitakiye. We, ageyaga kinaꞌmaba ma kamanapa abibebe peno, Isu piya untiye. Wasanama mone pogisi abatama maenti meto kamanane
44 Pigoya, Isu toba maya untiye: Koti kabiratakenaenaba piyamawe: Mone pogisi yogari kakataogana waintantiye. Piya waintogana, kaꞌwaina uma abatamagina to kakantiye. Piyamagina tabera aꞌmu pumagina aꞌyaꞌwaemaenawapa to kina imogini mone amuguna wama yoga uma ika puntiye, Isu meto kamana piya untiye. Tabe ikantana pasesuwama mpeto kamanane
45 Pigoya Koti kabiratakenaenaba ka yagarama yoga pumagina pasesuga aguyosaganti, ae piyamawe.
46 Aeba aogi pasesu agategina, wama aꞌyaꞌwaemaenawapa maema wasana imima mone maeritegina wama aogi pasesu uma ika puntiye, Isu piya untiye. Kukoꞌama mpeto kamanane
47 Pigoya, Isu to ka meto kamana maya untiye: Koti kabiratakenaenaba kuko piyamawe. Wasanami kuko wanipinti motagana tumegini inoyantaba toma toma ampa paiꞌma awaitaye.
48 Piya pegini, paibegana uwa mari iyegini kana inoyantaba pako pumagini nakenaba tuꞌnapi atantini kampa nakena inoyantaba uwa kasagana waye.
49 Pigoya, aintisa kana mampa aꞌya pekanaba pabiyaena aborakiye. Piya pekini pi ntagaba enisore kinaꞌmi maga maga nasi nasi pumagini, aogi kinaꞌmi abakapintisa agunta kinapa kibiꞌmagini,
50 tayaba yakupinti ipasanaigini tumikibewe. Pitaꞌi tumpima kubeꞌena pumagini iwarasa kaki aema mikibewe, untiye.
51 Piya untana, Isuba abagi kinaꞌwa ibigama maya untiye: Tigeba aꞌyaꞌma ago abibebe pewa, a, untiye. Piya yogini, igeba: Ago abune, untawe.
52 Piya yuguna aeba maya uwaimintiye: Pigoya, mono tisa kinaꞌmi Koti kabiratakenaenama nkagoba abinta kina, igeba mono abikenaena uwaena waintiye. Piya, wasanama aotasaenawatasa tonarona maema aboramisa puma, igeba mono abikenaenawaipisa tonarona aogi paisaenabe kasasaenabe maema napimagini aboraramewe, Isu piya untiye. Nasareti kumatasa kinaꞌmi Isu ikabitantawe
53 Pigoya, Isuba meto kamana toma toma uma aꞌya atate, mawati wantiye.
54 Wama mono namapi imagina kamana yogini, wasanamiba abite pami pumagini maya untawe: Aetasabaya ma aogi napiyenabe awameꞌena potakena esegiyenabe maeye.
55 Taeba agowapa abintune. Aeba kapenta yagarama ntagarawe. Anowampa ageba Mariyawe. Piya, aꞌnatabarami nkigewaipa Yemisiwa, Yosepewa, Saimoniwa, Yutasiwa sumawe.
56 Pigoya amanaꞌnatabaraba taege kaga mintawe. Pigoya aeba aꞌyaꞌwaemaenaba aetasa maemagina aborantiye, untawe.
57 Piya umagini aeka abuguna kampa aogi puntiye. Aibogana, Isu maya uwaimintiye: Koti unti kamana yemi poropete yagarama kamana uwoma kinaꞌmi ibugaye. Piya, mawatape agowatape namankapipe ageba kampa waintiye, untiye.
58 Piya, igeba aeka kampa aogima ntapiyumeka, Isuba kukantanaba uwomapa pi kumatapa kampa puntiye.
1 Pigoya, pintaga Karariya kinaꞌmi tabe yagara Eroti aeba Isu kamana abite,
2 aokinaꞌwa Isuka maya uwaimintiye: Pi Yoni mono wani paiꞌitanti ntagara aeba purintapisa aogamagina asima ma nkesegiyena puma miye, piyama napima uwaimintiye.
3 Pi kamanapa uwa kampa untiye. Pai irebu kinaꞌwa uwaitaogini Yoni agisa aya kirokaema igaꞌna namapi atantane. Pipa mayaenaraka piya potantawe: Eroti aeba aꞌnantowampa Piripi nkwae, agewapa Erotiyasi aparogana,
4 Yoniba tutusotama maya untiye: Kaeba kuntana pumagina aogiyena kampa penema, omintiye. Piyama omogana, Erotiyasiba pitaka agobi pogana, Eroti aeba yogini igaꞌna namapi ababotantawe.
5 Pigoya, aegukena pomepa, uwa wasanamiba Yonikaba: Poropete yagarawe, yumeka aekuru puma atantiye.
6 Aibogana, Eroti yakari potanta yaga aboraogini, tabe kina igeba kanama aege ampa aki pumagini mintuguna, Erotiyasi nkaragawampa ige iyobi waꞌena pogana, Eroti agamagina aꞌmu potamagina maya omintiye:
7 Naeba Koti nkaobi uma esegi puwe. Kaeba piya mayaenaga yegapa kamukuwe, untiye.
8 Piya yogana, kana araga aeba anowampa uma agegaogana maya untiye: Kaeba Yoni mono wani paiꞌitanti ntagara, ae aꞌnonkayampu isigiꞌma tuꞌnapi atamagina pabigo namo, untiye.
9 Piya yogana tabe yagara abima pami puma kunta puntiye. Pigoya, Koti nkaobi uma esegi puntika, wasana ma minta kinaꞌmi abigini kamanaꞌne tumisanagawema:
10 Owe otama, yogini, kayokaya kinaꞌmi igeba wamagini Yonipa igaꞌna namapisa anaꞌmu uma isigima,
11 anonkayampuba tuꞌnapi atamagini maete kanama kana araga me nkamuguna aeba maemagina anowampa amintiye.
12 Piyama Yonipa aeguyuguna purogini, Yoni nkabagi kinaꞌmiba ampa irosaꞌma auꞌwapa maete uma kaintawe. Kaitate Isuti wama pi awaga kamana uma omintawe. Isu 5,000 kina naninta imintiye
13 Pigoya, Isu aeba Yoni kamanapa abite, pi mpaba atate wanipisa karebi ima kaꞌme mpari abintowa umikena wantiye. Waogini, wasanamiba abite aꞌyaꞌma kumatisa uwoma kinaꞌmi aegaꞌma wamagini, pabitaꞌi uma irosantawe.
14 Piya puguna, wanipisa karebintisa tumima aꞌyaꞌma kina igamagina, antara puwaitama yoni kinapa kabaꞌma paru puwaitantiye.
15 Piya pumagina mintogana, atamisaogini abagi kinaꞌwampi igeba omima maya untawe: Mapa kaꞌme mpari mintokana atamisaya, pika wasana itagini aꞌyaꞌma kumati wamagini naninta maema aboraiyoma, omintawe.
16 Piyama omuguna maya uwaimintiye: Nanaga waiyema uwaitawe, a. Tigeba naninta imiyo, untiye.
17 Piya uwaimogini maya untawe: Taeba ma paretiba nayakaꞌmuna, inoyantaba tarawa suma, pabinkawanto urintune, piya untawe.
18 Piya yuguna aeba: Pipa naeti maete kanaiyo, yogini maete kanantawe.
19 Maete kanauguna, wasana uwaitaogini kabu aebaruꞌma maraꞌmintantawe. Piya puguna pi pareti nayakaꞌmuna, inoyanta tarawa sumagina maema, mantari ao maꞌmagina Kotiti aꞌmu potamagina apako pumagina abagi kina imogini, igeba wasana pako pumagini imintawe.
20 Imuguni, igeba aꞌyaꞌmagini namagini igaꞌe pantawe. Piya puntini, arita waiyomepa kibiꞌmagini iraguguna nagisarisa tara tumpaema waꞌnu ku awaitantiye.
21 Pigoya, kana naninta nanta kinapa 5,000-wa kinane. Piya, waya yagara araga kampa aisuntane. Isu aeba wani nkabobori wantiye
22 Piya pute, pabigo Isuba abagi kinaꞌwa uwaitaogini, wanipisa karebi ibiwai imagini kotu maroteri aꞌwae pumagini wakena paitama wantawe. Piya puguna, aeba aꞌyaꞌma kinapa itaogini waꞌewaiti wawaeyuguna,
23 aeba abintowa amuti imagina nunamu untiye. Piyamagina mintogana ase yogana, ae abinto pabitaꞌi mimagina mintantiye.
24 Piya pogana, kana wanipisa kareba wamagina koyu abakapi uma irosantiye. Piya pogana, pontaba waumetisa puritegina kanama wanipa tabera aigaꞌyoꞌya pumagina wanipisa karebi apasanantiye.
25 Aibogana, Isuba aseka aba mariki wani nkabobori wamagina, abagi kinaꞌmiti uma irosantiye.
26 Piyamagina waogini agategini iyekuru pumagini: Ke kina kanayemagini, A-e, a-e, untawe.
27 A-e, a-e, yuguna, Isuba karuꞌena kegaꞌe uma maya uwaimintiye: Tintawamaba paru peno. Naene kanauwa, tiyekuruba a-piyo, untiye.
28 Piya yogana, Pitaba pabigo awamuta uꞌmagina maya untiye: Waꞌega, kae kanantanapa yega, wani nkabobori kaeti wano, untiye.
29 Piya yogana, Isu: Kanao, omintiye. Piya omogana, Pitaba wanipisa karebintisa irosaꞌma tumimagina wani nkabobori Isuti wantiye.
30 Wantana tabe punta pogana agategina aekuru pumagina wanipinti tumikena puntana, Isu agisumagina: Waꞌega, kaeba naoꞌmaeyo, untiye.
31 Piya yogana, pabigo Isuba ayata uꞌma aoꞌmaentana maya untiye: Kaeba kamatitiꞌenaba uwaenantowe. Kaeba nanaga kaguꞌama tara taraba pene, untiye.
32 Piya utegina, ababoginisi wanipisa karebinti iyusuguna, pabigo pontaba asabaꞌwantiye.
33 Piya pogini, kana wanipisa karebi mintume aꞌyaꞌma kinaꞌmiba Isu nkagora ampa parokaemagini maya untawe: Kaeba taga Koti Ntagaragawe, untawe. Isu uwoma kina Kenesareti mari kaba itantiye
34 Pigoya, kotupa taꞌemagini Kenesareti kuma uwa mari iyuguni,
35 wasanamiba Isupa agabebe pumagini yuguni, kana kumaꞌama nkawamori mintanto kina igeba yonintana ibome kinapa ibabute kanauguni Isu maya omintawe:
36 Abintaga, kaigampa nkatuta aukaya pekana yonitepa tatawano, untawe. Piya ute, piya pume kinaꞌmiba kabaꞌma aogi puwaentawe.
1 Pigoya, pi ntagaba Yerusaremi kumatisa Parasi kinape mono tisa kinape kaꞌisa Isuti ampa irosaꞌmagini mayama abigama untawe:
2 Kabagi kina igeba nanaga tayabamagi meto kamana agoba aemita pewe. Piya puntini igeba naninta nakenaba, iyantanaba kampa punta uwa nawe, untawe.
3 Piya ute abigauguna, Isuba maya uwaimintiye: We, tigeba pipa nanaga tigeti mpeto kamana ago wasintiri, Koti aeꞌwa nkawamupisa kamanapa aemita pewe.
4 Piya, Kotiba mayama utantiye: Kaeba kano kaba kamana abimagina isiꞌwaisipa asagaꞌyuyo, iye. Piya, kaꞌwaina aeba anoke abakega kamparaga kamana uma ata puwaisitakibipa, aepa aeguma kaiyo, untiye.
5 Pigoya, tigeba pipa aya pewe. Yagara araga igeba inogi ibagipa maya kamana uwaimewe: Nautasaenaba mapa tisigepa kampa tisiminta, tabe mono namapinti maete ima Kotiti aꞌmuntana amukuwe, piya umagini, inogi ibagi kampa aogima iyoꞌmaeyagiripa, tigeba abeganaba aogi piyo.
6 Tigeba piya pumagiri Koti kamanapa aemita puntiri tigeti kamanapa maema wasima asagaꞌyuyewe.
7 We, kumpari kina, tigeka Koti Aisaya omogana meto kamana ago mayama taga untiye:
8 Ma kinaꞌmiba iwamutasaba nae nage asagaꞌyuntini, iguꞌamaba pagasara miyewe, iye.
9 Naeti monoꞌwaipa kampa yewa, uwaba yewe, iye.
Piya, nae kamanaꞌnepa kampa unta, wasanami kamana yewema, Koti iyema, kaentiyema, Isu piya untiye. Agu yagara iꞌnintana potakena kamanane10 Pigoya, Isu aeba pi kamana uwaimite to kaꞌisa kina igegaꞌe yogini kanauguna maya uwaimintiye: Naeba kamana urimekiripa aogima abima napiyiyo.
11 Tintabaipinti tumemintana, piꞌnaba tiguꞌamapa iꞌnintanaba kampa potaye. Tiwamupintisa irosaꞌma iyemintana, piꞌna tiguꞌamapa iꞌnintanaba potaye, untiye.
12 Piya yogini, abagi kina igeba agora wamagini maya omima untawe: Kaeba kamana uwaimekini Parasi kina abimagini ata pepa abeno, untawe.
13 Piya yuguna, pi Parasi kinaka maya uwaimintiye: Aꞌyaꞌma yaba mantarisa nabanempaba kampa kurinti, pipa abuꞌyaga igima maebugaikiye.
14 Piya, tigeba igepa uwa itaiyo. Igeba iyorika kinaꞌmi to kaꞌisa iyorika kina ke iyakikena kinane. Piya, ka aorika yagarama to ka aorika yagara ke ayakikibipa kaga agagabi tumikibese, untiye.
15 Piya yogana Pitaba Isu maya omintiye: Meto kamana yempeꞌna nkagoba aborama yega taeba abeno, untiye.
16 Piya yogana Isu maya untiye: We, tigeba pabiyama tigu napi napiyena kampa wainta mintawa, a.
17 Agoba mayamagiripa kampa abewe: Tiwamupi nagana tintabaipinti tumimagina ayasaurite keꞌwati to kake tumiye.
18 Piya, tintabaipinti waintana tiwamupisa irosai, piꞌna tiguꞌamapa iꞌnintana pumagina kamparaga potaye.
19 Piya, wasana antabaipintisa aguntaena toma toma irosai, pipa mayamawe: Ata napiyenawa, wasana aegukenaenawa, kumiyenawa, kupiyonawa, kuntanawa, kumpari kamana otakenaenawa, akayasukenaenawa sumagina,
20 pintanama tiguꞌamapa aegumagina iꞌnintanaba potaye. Piya, tiyantana kampa punta naninta nantanamaba tiguꞌamapa aeguma iꞌnintanaba kampa potaye, Isu piya untiye. Kenani marisa wae kaꞌwaina Isu agisuntiye
21 Pigoya, Isu aeba Yuta kina ige maba atate to marisa kinaꞌmi mpari Taya Saironi kuma waintusumeti wantiye:
22 Wamagina umintogana, Kenani marisa wae, pi mara miyome nkwaeꞌmaba kanama Isuka kegaꞌe uma agisumagina maya untiye: We, Waꞌega, kaeba Tebiti ntagaragawa, naeka kantara punatao. Araganepa kewama tabera aigarama amiyo piye, untiye.
23 Piya yogana abintanaba, Isuba kamanapa kapa kampa aꞌwae pomintiye. Piyama kampa aꞌwae pogini, abagi kina igeba omima maya untawe: Kaeba waya otagana wano. Aeba takaꞌi tabe kigaꞌe uta kanaye, untawe.
24 Piya yuguna aeba maya uwaimintiye: Naeba Isureyo aruyenabisa yaga kabubama miye kanta pe kinaꞌamanamiti unatantine, piya untiye.
25 Piya yogana, kana wae aeba agora ampa irosaꞌma parokaema esotamagina: Waꞌega, kaeba uwa naoꞌmaeyo, untiye.
26 Piya yogana, Isureyo kinaꞌmige uwa kinaꞌmige mono abikibeka Isu meto kamanapisa maya omintiye: Yagarantomi ntaninta ipaꞌmagi kara imekanaba kampa aogi pikiye, untiye.
27 Piya yogana, kamana mayama aꞌwae pumagina omintiye: Waꞌega, pipa kanara yene. Pigoya karantontomi ibawaimpigi naninta yabaera atamagini nagana aritawa tumeginiba pipa uwa nawe, untiye.
28 Piya yogana maya omimagina untiye: We waya, kamatitiꞌenaga imagina waintiye. Pi yempesa pugatano, untiye. Piya yogana pabigo aragawapa kabaꞌmagina aogi puntiye. Isuba uwoma kina kaba itantiye
29 Pigoya, Isu aeba pi mparasa to kake aꞌwae puma kanama Karariya kotuta ampa irosantiye. Irosaꞌma amuti ima mintogini,
30 uwoma kina kanagana pumagini aeti ampa irosantawe. Igeba igisa iya puꞌwanta kinape, iyampu aigakayoꞌnaꞌna kinape, iyorika kinape, aibo kinape, to kaꞌisa inuntana ibome kinape uwoma kina aꞌyaꞌma ibabute kanama Isu agora ampa aki puwaitantawe. Aibuguna kabaꞌma aogi puwaitawaentiye.
31 Piya pogini, aibo kinaꞌmiba kamana untawe. Igisa iya puꞌwanta kinaꞌmiba ke nasintawe. Iyampu aigakayoꞌnaꞌna kinaꞌmiba aogi puntawe. Iyorika kinaꞌmiba iyo agantawe. Piya puguni, wasanamiba pi agate Isureyo kinaꞌmi Kotiwaipa tabera iꞌmu potantawe. Isu 4,000 kina naninta imintiye
32 Pigoya, Isuba abagi kina igegaꞌe uma maya uwaimintiye: Naeba aꞌyaꞌma ma kinaꞌmika nantara puwe. Igeba naege kakaga yaga mimagini igaꞌenaga purewe. Piya, naeba uwaitakini igeba naninta kampa nanta wamagini, keꞌi uma iyonanta pumagini wareꞌnasanaga abimagi tara puwe, untiye.
33 Piya yogini, abagi kinaꞌwampiba maya omintawe: Mapa kaꞌme mpariwa, tabe nanintaba aetasa aborama ma uwoma kinapa imekana naigina kanarasa waetakiyema, omintawe.
34 Piyama omuguna, Isu ibigama maya untiye: Tigeti ntanintaba ayaki waintiye, yogini, igeba maya untawe: Tonaentisa tara umaema paretiwa, uwaena inoyantantonto tarantowa sumagina waintiye, untawe.
35 Piya yuguna, abintana yogini kana aꞌyaꞌma kinapa aki pumagini maraꞌmintantawe.
36 Piya puguna, kana paretibe inoyantabe maema Kotiti aꞌmu potamagina, apako pumagina abagi kinaꞌwa imogini pako pumagini pi kinapa imintawe.
37 Imuguni, aꞌyaꞌma kina namagini igaꞌe pantawe. Aibuguna, arita waiyomepa kibiꞌmagini tonaentisa tara umaema waꞌnu kupi iraguguna awaitantiye.
38 Pigoya, naninta nanta waba 4,000 wa mintuguni, waya yagaraba kampa aisuntawe.
39 Piya potate, Isuba wasana uwaitaogini wauguna aeba wanipisa karebi imagina wama Magatani mari uma irosantiye.
1 Pigoya Parasibe Sarusi kinape igeba Isuti ampa irosaꞌmagini amiyo pumagini maya untawe: Kaeba yegana mantarisa awameꞌena aboraka agano, untawe.
2 Piya yuguna, aeba maya uwaimintiye: Tigeba ase ikena pegiripa maya yewe: Abayarere puwaewaikana aiba pa takiye, yewe.
3 Maregiripa maya yewe: Ibinapa tunusuma atami pikana ka aekiye, yewe. Tigeba ibinankama nkagoba abintawe. Pi ma kanaꞌama nkagoba nanaga kampa abewe.
4 Antage kina, mono kampa wainta kina, awameꞌena ka agakenaga yewo. Tigeba tonaba kampaye. Yonati awameꞌena aborantisa pumagina aborakiri agakibewe. Piya uwaimitegina itate wantiye. Parasi Sarusi kinaꞌmikaba meto kamana untiye
5 Pigoya, abagi kina igeba Isuge kotupa taꞌemagini maroti uma irosantini, nanintaba igeguꞌama kampa maenta wantawe.
6 Piya, Isu maya uwaimintiye: Pigoya, paretibi yisiti atagana anosamisa puma, Parasi Sarusi kinaꞌmi ata kamanaꞌwai anosasanaga kabiyiyo, untiye.
7 Piya yogini, igeba mayama mare-u me-u puntawe: Pareti atate kanaompeka piyaba uramiye, untawe.
8 Piya kamana yuguna, pabigo kana kamanaꞌama agebi pasogana abite maya uwaimintiye: We, tigeba timatitiꞌenaba uwaenantowe. Tigeba nanaga naninta kampa maete kanakaba abima tara tara tigiba napiyewe.
9 Naeba kaꞌena punto, pipa karuꞌena tigeguꞌa pegiri kampa napiyewo. Naeba pareti nayakamutasa 5,000 kinaꞌmi imuwagini namagini igaꞌe pauguni, aritapa kibiꞌma waꞌnu kupa ayaki iraguguna awaitantiye.
10 Pareti tonaentisa tara umaema pabintantorasa 4,000 kina imuwagini namagini igaꞌe pantini, aritapa kibiꞌma ayaki waꞌnu ku iraguguna awaitantiye.
11 Pigoya, naeba nanintagaba kampa urimuwa, pipa aogimagiri abibebe pusanaga yuwe. Piya, naeba Parasi Sarusi kinaꞌmi ata kamanaꞌwai anosasanaga aogima kabiyiyo, yuwe, untiye.
12 Piya kamana uwaimogini, ibaba abibebe pumagini maya untawe: We, paretiwama yisitigaba kampa iye. Parasi Sarusi kinaꞌmi kamanaka aogima kabiyiyoma iye, piya untawe. Pitaba Isuka Karaisitiwema uma aborantiye
13 Pigoya, Isu aeba wamagina Sisariya kumata, Piripi kabinti kumata uma irosakena puntana, abagi kinaꞌwa ibigama maya untiye: Wasanamiba Wasanama Ntagara naekaba kewe yewema, ibigantiye.
14 Piyama ibigaogini, igeba maya omima untawe: Igeba kae kageba toma toma sewe. Kaꞌisamiba Yoni mono wani paiꞌitanti ntagarawe yegini, kaꞌisamiba Iraiyawe yegini, kaꞌisamiba Yeremayawe yegini, to kaꞌisamiba to ka mintanti poropetewe, kaekaba piya yewe, piya untawe.
15 Piya uma omuguna, to kake ibigama maya untiye: Pigoya tigeripa pipa naekaba kewe, untiye.
16 Piya yogana Saimoni Pitaba maya untiye: Kaeba utaratanti ntagara Karaisiti, Koti miyaba ae yagaragawe, untiye.
17 Piya yogana Isu maya omintiye: Saimoni, Yona ntagara, kaeba kaꞌmu po. Ma kamanapa ka yagaramaba kampa ugamiye. Mantarisa nabanempa uma aboragamintiye.
18 Pika naeba kamana ka ugamukuwa, abo: Pita kaeba yabakawe. Ma ntabata naokinaꞌnepa itakini atokaemagini mintigina aꞌabiwama nkesegiyenamaba kampa ipasanakiye, untiye.
19 Piya untana to maya untiye: Naeba Koti kabiwaitakena kumaꞌama kiwapa kamuwe. Pigoya mabi kabe aiꞌitaganaba, mantariba pabi nkawameta aborakiye. Piya, mabi kabe kiꞌitaganaba, mantariba pabi nkawameta pabiyamagina aborakiye, untiye.
20 Piya utegina, abagi kinaꞌwapa kamana esegima uwaimima maya untiye: Naeka Karaisiti yagara mintiyemaba tigeba wasanaba ankuwaimiyo, untiye. Isu puꞌmagina asikibi kamana uwaimintiye
21 Pigoya pi ntaga Isuba agobima ainti aꞌyaꞌwaemaena aborakibi, pi kamana aboramagina abagi kinaꞌwa uwaimintiye. Aibuntana Yerusaremi kumati iyekini monota kabiyume kinaꞌmibe, tabe mono kiye kinaꞌmibe, mono tisa kinaꞌmibe tabe kuntaenaba aboramimagini, aeguyigina puꞌmagina kakaga yaga mite to aogama asikibi, pi kamanapa aꞌyaꞌma uwaimiwaentiye.
22 Piya uwaimogana Pitaba Isu abiri agegaꞌe uma kabiꞌmagina maya omintiye: Waꞌega, Kotiba kaoꞌmaeyakana pintanaba kampa aboragameno, untiye.
23 Piya yogana Isu akaꞌintaesi potama Pitapa maya omintiye: Satanigawa, kaeba natate wagaso. Kaeba antage ki nayakima Kotikaba kampa napiyene. Kaeba wasanama kamanaꞌamana napiyene, untiye.
24 Pigoya, pabintaga Isu kamana ka mayama amato puma abagi kinaꞌwapa maya uwaimintiye: Wasana kaꞌwaina nae naegarakena puntanaba auꞌama kamana akabitate wasanami igobi potakibikaba a-nkaekuru puma maripowa aesagaꞌuritegina naegarano.
25 Pigoya kaꞌwaina mikenaenawaka owe yekanaba, aꞌyugu potakiye. Piya, to kaꞌwaina aeba naeka mikenaenawaka aꞌa-o yekanaba aboramikiye.
26 Pigoya kaꞌwaina aeba mabi aꞌyaꞌwaemaena maemagina aguꞌamankapa aeguma kaiyekanaba, aya pukiye, a. Agupa ayamabaya to kakema ika pekana kanarasakiye, a. Pipa kampaye.
27 We, naeba yekiri abiyo: Wasanama Ntagara naeba, nabanempa mantarisa eꞌwasaenama naeti ampa eꞌwasa punataka, enisore kinaꞌwapa ibabeka tumukune. Piya pumagi, aꞌyaꞌma kinaꞌmiba mampabi pentana mana, pabi nkawameta antotaꞌenaba imukuwe.
28 Pigoya naeba taga urimukuwa abiyo: Tigetisa ma kaꞌisa minta kinapa kampa purintigi, Wasanama Ntagara naeba tumima waꞌegaenanepa abora maema aborakini nagakibewe, Isu piya untiye.
1 Pigoya, Isu aeba tonaentisa kaꞌumaema yaga aꞌya puwaogana, Pitana, Yemisina, aꞌnanto Yonina, sumagina ibabute wasana kampa minta amuti intawe.
2 Pitaꞌi iyora asima mima auꞌamaba to auga puntiye. Piya pogana, aowawamaba pankama nkeꞌwasa pemisa puma eꞌwasa puwantiye. Aibogana kaiwampaba waeꞌwae pumagina tabera eꞌwasa puwantiye.
3 Piya pogana, Mosesege Iraiyage pabigo ampa aborama aege kamana uma abuguna igeba igantawe.
4 Piya puguna, Pitaba Isu maya omintiye: Waꞌega, mataꞌi miyokana aogi piye. Pika abintaga kakaga ke nama kiyeno, kaeꞌena kana, Mosesenta kana, Iraiyanta kana sumagi, kiyeno, untiye.
5 Piya yogana, pabigo wae ibinankama tumimagina itikaewantiye. Aibogana ibinankama antabaipintisa kamana ka mayama tumintiye: Mepa nabugai ntagaranene. Tabera naꞌmu potauwa, ae kamana abiyo, untiye.
6 Piya kamana abite, abagi kina igeba iyowarisa aigarepaꞌmagini tabaraba pumagini tabera iyekuru puntawe.
7 Piya puguna, Isuba igora wama aya ikaya puma maya untiye: Tigeba asima, karuba a-pumagiri miyiyo, untiye.
8 Piya yogini igeba iyomaꞌmagini agaumepa, Isu abiwa agantawe.
9 Pigoya, amutisa tumintini Isu maya uwaimintiye: Ma kasaꞌena aga, pi kamana wasanaba a-nkuwaimima mintigi, Wasanama Ntagara naeba purintapisaba naogamagi asiyekiri uwaimiyoma, uwaimintiye.
10 Piyama uwaimogini, pi abagi kinaꞌwa abigama maya untawe: Iraiya marupa irosakana ae akaꞌi utaratanti ntagara Karaisitiba irosakiyeba, mono tisa kinaꞌmiba nanaga yewema, abigantawe.
11 Piyama abigauguna maya uwaimintiye: Iraiya aeba taga kanama aꞌyaꞌwaemaena ampa maemagina aogima arupu pikiyeba untane.
12 Pika urimekiri abiyo: Iraiya mparu mpaenti ntagaramaba ago irosaꞌma mintogiri, kampa napinta, tigeti ntapiyena aegaꞌma ataena potantane. Piya, Wasanama Ntagara naepa pabiyama ataena punatakibewe, untiye.
13 Piya yogini igeba mayama abintawe: Pipa Yoni mono wani paiꞌitanti ntagara aeka iye, untawe. Isu ke kinaꞌma antabaipinti minta yagaranto kaba atantiye
14 Pigoya, amutisa tumimagini amuri wasana mintumeti tumpa irosauguna ka yagara Isuti kanama agora ampa parokaema maya omintiye:
15 Waꞌega, kaeba yagaraneka kantara potao. Aeba aonanta puma wareꞌnaowa pumagina tapa wagite wanipintiba tumite piye.
16 Piya pegi abagi kinakampiti ababute kanaogini kabaꞌma aogi potakena pugagate igiga pumagini uwa atawe, piye omintiye.
17 Piya omogana Isu maya omintiye: We, timatitiꞌena kampa wainta amu kina tigeba, naeba ayaki yaga tigege mimagi kuntaenaripa aesagaꞌmagi tiyoꞌmaema mikuwe, a, untiye. Piya umagina: Kana yagaranto ababute kanaiyo, untiye.
18 Piya yogini igeba ababute kanauguna Isu kana ke kina kabiraogana kana yagaranto atate waogana aogi puntiye.
19 Aibogini, abagi kina igeba abiri abigama maya untawe: Taeba nanaga ke kina agarubakenaba pugagate ataune, untawe.
20 Piya yuguna, aeba: Timatitiꞌenaripa uwaenantowe, uwaimintiye. Piya untana to maya untiye: Taga timatitiꞌena uwaena yamankaꞌanto kanta puma wairitantagiripa, maro nkamuꞌamaka: Tigabao, yiginaba tigabakiye. Pigoya, aintiba ka yuga kampa waintigiripa kanara kampa pikibewe.
21 (Piya, ke kina pipa to kaꞌenarasaba kampaye, uwa nunamurasage monoka naninta aꞌa-o uma mikenaenarasage igarubakibewe, Isu piya untiye.) Isu purintapisa asikena kamana uwaimogana tara puntiye
22 Pigoya, ainti Isuba Karariya mari nasi nasi puntana, abagi kina maya uwaimintiye: Wasanama Ntagara naeba eꞌero ntagaba kampa mintakana minagaꞌena puma wasanami nkiyapi natakini,
23 naeguyigi puꞌmagi, kakaga yaga miyekana to kake nabage pikiye, untiye. Piya yogini, abagi kinaꞌmiba abite ata inta paritantawe. Mono namataka takisi punti kamanane
24 Pigoya, Kapaniyamu kumati aꞌwae puma kanauguni tabe mono namankama takisi mone maemagini mintantawe, piya pume kinaꞌmi ige Pita abigamagini maya untawe: Tisarimpaba tabe mono namankama takisi atabera aya piye, untawe.
25 Piya yuguna, Pita maya untiye: Owe. Aeba ataikaiwe, untiye. Piya ute Isu mintome ntamapinti imaginaba kana kamanapa kampa omintogana aewa abigama maya untiye: Pita kaeba nana kagi napiyene. Mabi to marisa tabe kinaꞌmiba igeba ketisa tabe takisi moneba maeyawe. Iyoꞌmitisabe uwa to ampa kabinta kinaꞌmitisabaya maeyawema, abigantiye.
26 Piyama abigaogana: Pi ampa kabinta kinaꞌmitisawe, untiye. Piya yogana Isuba to maya omintiye: Pipa kanara yena, pigoya pika iyokina igeba uwa miyewe. Pigoya, taeba Koti nkaokinatawe.
27 We, igeba taeka abima aꞌyugu atabusanaga kotuti wama igaꞌna atagana tumokana inoyanta maru okabikibi, pi paibuma awamu atarama ka mone maema wama tasigekaba tabe mono namankama takisi menkimo, piya untiye.
1 Pigoya, pabi ntaga abagi kina igeba Isuti wamagini maya uma abigantawe: Koti kabiratakena yaga aborakanaba ke tabeba mikiye untawe.
2 Piya yuguna, Isu uwaena yagaranto ka kegaꞌe yogana kanaogana abakankaipi asitamagina,
3 maya untiye: Taga urimukuwa abiyo: Tigeba tigupa aꞌwae puma yagara araga ano aba aegaramisa puma mikibepa, Koti kabiratakenaenama nkagupi uma pasikibewe. Piya kampa pikibepa taga kampa uma pasikibewe.
4 Piya, kaꞌwaina aeba ma ntagaranto ae awameta tumima mikibiꞌnaba Koti kabiratakenaenama nkaguta kiya mikiye.
5 Pigoya, kaꞌwaina naeka napimagina ma kana yagaranto aoꞌmaekibiꞌnaba pipa aeba nae naoꞌmaekiye, Isu piya untiye. Ataenama wasanama nkamatitiꞌenaba maema kamparaga potaye
6 Pigoya, Isu to kamana maya untiye: Piya, maya yagaranto naegarakana, kaꞌwaina ayakekana kamparagaena pukibemipa, kana ayakikibi ntagara arakuꞌma tabe yabantama anaꞌmubi ubuꞌatama tabe wanipinti apasanakasagana naisemisinta: Pipa kanara pewe, yesine.
7 Aguntaena pukena amiyoꞌena asi nasiba mara aboragita, ataenabi miyune. Aibegiba, aguntaena aborakibi ntagarama aintiba ataenabi mikiye.
8 Pigoya, kayankamabera kagisawama kamparagaena pikena pekanapa, arisaꞌma maebugaso. Kagisa kaya tararasa aguntaena pekanaba, ainti tayaba tayaba yakupi maebugatasanaga piya po. Kagisa kaya kampa wainta yagara mintana miyaba kumati uma irosakibempepa, pipa kanarane.
9 Pigoya, kao agama kamparagaena pikena pekanapa piꞌma maebugaso. Tara kaoyaga mintana ainti tayaba yakupi maebugatasanaga piya po. Kaorika mintana miyaba kumati uma irosakibempepa, pipa kanarane, Isu piya untiye. Yaga kaka wanti meto kamanane
10 Pigoya, Isu to kamana maya untiye: Tigeba pasemagiri ma ntakarantonto igekaba abigina uwaena kantaba a-peno. Naeba pika urimukuwa abiyo: Enisore kinaꞌwai igeba mantarisa nabanempa nkaobi asi nasi aborama miyewe.
11 (Pigoya, Wasanama Ntagara naeba kabubama miye kina iguyosaꞌma ibabikena tumintone.)
12 Piya, kaꞌwaina sipisipiwa 100 igetisa kaꞌanto kabubawakanaba kaikibera, 99 igepa itate kabubinti wama kaka waiꞌnaka uma aguyosakiye. Pika tigeba nanawe yewe.
13 Naeba tagaka urimukuwe. Aeba aogima aguyosagakiye. Aguyosaꞌma aboratamaginaba, 99 minta igeka wanane. Kaka wai aeka aꞌmu pikiye.
14 Piya, ma ntakarantonto igetisaba pabiyama kaꞌwainaba kamparagaenabi misanaga mantarisa nabanempati kampa aogi piye, Isu piya untiye. Aguntaena pikibe kinaꞌmika iyoꞌmaekena kamanane
15 Piya untana Isu to maya untiye: Pigoya kaoꞌyagara kaꞌwaina kaeti aguntaena maema aborakanapa kaeba wama tisibiri aguntaenawapa aborama omo. Aeba kamanaka abima paruma kayone pekanapa abegana pabigo aꞌya peno.
16 Piya, kamanaka aꞌa-o uma kampa abekanapa, ka yagarawo, tara yagarawo isiba peginisi isige agowapa kaga abima uma arupu potaiyo.
17 Piya, kapi kamanati aꞌa-o uma kampa abekiripa mono kiye kinaꞌmi-nkakiyenabi ababotaiyo. Ige kamana aꞌa-o umagina kampa abekiripa: Aeba to kina, agunta kinane, otaiyo.
18 Pigoya, naeba taga urimukuwa abiyo: Tigeba mabi aꞌyaꞌwaemaena aguntaenawai uwa ataigina waiyekanaba, mantariba pabiyama waikiye. Piya, mabi uma uwa kasiginaba, mantarisa pabiyama uwa kaikiye.
19 Pigoya abiyo: Tigetisa tara yagara taramisi kaꞌenaga isigu kata atokaemaginisi esotaisiginaba, mantarisa nabanempaba abiwaisimikiye.
20 Piya, wasana tarawo, naeka akibigipa, naeba ibakapi mikuwe, Isu piya untiye. Ata kayokaya yagarama mpeto kamanane
21 Pigoya Isuba kamana piya yogana, Pitaba aeti uma mayama abigantiye. Waꞌega, naoꞌyagarama aguntaena punatakapa, aguntaenawapa asuꞌa pugasakana ayaki pekana kanarasakiye. Piya, asuꞌa pugasakana tonaentisa tara umaeyakana kanarasakiyoma, abigantiye.
22 Piyama abigaogana Isu maya omintiye: Tonaentisa tara umaemaba kampaye. Kampa aisuntaenaba uwa asuꞌa pugaso.
23 Pigoya, pika Koti kabiratakenaenaga, meto kamana yekiri abiyo: Ka marasa tabe yagara kaꞌwaina kayokaya yakarakinunka: Iretane namikibewema, igegaꞌe untiye.
24 Pigoya, ka yagara ababute kananta aetiba iretawapa 10,000,000 tora waintantiye.
25 Aeba tabe irita pipa antota amikenagaba mone aguyosagantiye. Aibogana tabe yagara aeba pi ntagarama nkwaya yagarawape, aewape, yaga kotankape aꞌyaꞌmagini wasanami ikantana maeyigina, kana monewamaba aeꞌenaena puwaewanema, untiye.
26 Aiyogana, kayokaya yagara aeba tabe yagarama nkagisabi ampa parokaema maya uma agisuntiye: Tabe yagarane, kaeba uwa nataga naeba ainti iretagapa kamenoma agisuntiye.
27 Piyama agisogana tabe yagara aeba antara potama igaꞌna namapipa kampa ababotanta atunkapa uwa atatantiye.
28 Piya potaogana namapintisa irosaꞌma tumima waomepa kana kayokaya yagara aoꞌyagara ka tumpa abatama, aeti atunkapa 100 tora waintogana, abatama arakuꞌma anaꞌmu kana uꞌma tutusotama maya untiye: Atuntepa pabigo ma kanara namo, untiye.
29 Piya yogana, aoꞌyagara aeba agora uma parokaema agisuma maya untiye: Kaeba uwa nataga ainti naeba iretagapa kamukuwe, untiye.
30 Piya uma agisogana, kamanaꞌwapa kampa abinta wama yogini aoꞌyagaraba maya uma igaꞌna namapi ababotantawe. Aibuntini maya omintawe: Iretagapa amiwaegaite irosakibene, untawe.
31 Piya pogini, aege atokaema yoga pume kinaꞌmiba agate igeba intara pumagini wama tabe yagara kana kamana uma omiwaentawe.
32 Piya yuguna aeba abite kayokaya yagara aepa to kake kegaꞌe uma maya omintiye: Kaeba kamparaga yagaragawe. Nagiseka naeba nantara pugatama tabe iritanepa atagatauwe.
33 We, kaeba kaoꞌyagaraga pabiyama kantara potama auꞌisanawe, piya untiye.
34 Piya uma tabera amoꞌena pumagina irebu kinaꞌmiti atama maya untiye: Tigeba kamparagaena potama karana atamagiri miyigina tabe iritanepa aꞌya wakiri ataiyo, untiye.
35 Pigoya, tigeba tinta aseꞌyonabisa aguntaena kampa mae igasiginaba mantarisa nabanempaba pabiyama kuntaena puritakiye, Isu piya untiye.
1 Pigoya Isu aeba toma toma kamana uma aꞌya atate, Karariya maba atate Yontani wani mparoteri uraꞌema wama Yutiya irosantiye.
2 Irosaogini wasana uwoma kinaꞌmi igeba aegarauguna yoni kinaꞌwai kaba itantiye.
3 Aibuguni, kaꞌisa Parasi kinaꞌmiba aeti irosaꞌma, amiyo potakena maya uma abigantawe: Ago kamanatepinti wasanama waya kaꞌmaenaraka puma waya kaikenaba kanara payawa, uramoma abigantawe.
4 Piyama abigauguna maya uwaimintiye: Tigeba mono kamana mayama waintipa, pipa kampa aisuma abewa, a. Aꞌyaꞌmaena Koti maru maema aborantanaba, wabe wayape kaga aborawaigitantine.
5 Aborawaisitama, maya untine: Pika wamaba anope abape isitate wayaꞌwampati uma atokaema, isigeba ka kina kanta puma miyese, untiye.
6 Piya, isigeba taraba kampa punta, kaꞌena puma miyese. Koti atokae isitantika, wasanamaba a-nkatara isitano, Isu piya uwaimintiye.
7 Piya uwaimogini igeba maya untawe: We, pipa Moseseba waya kaikena puntiripa esa amima otaiyoba, piyaba nanaga untiye, untawe.
8 Piya yuguna Isuba maya uwaimintiye: Monoka kampa karuꞌena abima tige akuneka Mosese waya kaikenaenagaba abima owe puritantine. Piya, agobintiꞌnaba piyaba kampa untine.
9 Pika naeba urimukuwa abiyo: Kaꞌwaina wayaꞌwampaba kumiyonaba kampa puntakana uwa kaite to wae maekibipa, aeba kumiyenaba pikiye, Isu piya untiye.
10 Piya yogini, abagi kina igeba maya omima untawe: Wawaya isige agoba piyama waintika, waya kampa maenta uwa mikenaenaba, pipa kanarane, untawe.
11 Piya yuguna Isu maya uwaimintiye: Pi ye kamana ukubopa, pipa uwa kinaꞌmi wanane. Pi utawaitanta kinaꞌmi mana ubikibewe, untiye.
12 Wasana kaꞌisa kinapa inogi intabaipintisa waya kampa maekena kina aborawe. Piya, kaꞌisa kinapa wasanami i kasamagini waya kampa maekibewema, uwaitawe. Piya, to kaꞌisa kinaꞌmiba mantari kabiratakenaenaga napimagini waya kampa maenta uwa miyewe. Pigoya, ma kamanapa otawaitai kinaꞌmi mana abima aegaraiyo, Isu piya untiye. Isu inamu ntakarantonto akayona puwaitantiye
13 Pigoya, igeba inamu ntakarantontowai Isuti ibabute kanauguna, ayapa iꞌnota atama nunamu ikiyema omintawe.
14 Aibuguni, abagi kina igeba karu kamana uwaitauguna, Isuba maya untiye: Tigeba itaigini yakarantonto igeba naeti kanaiyo. Tigeba a-nkakunkitaiyo. Piya miye kinaꞌmi kaba Koti kabiratakenaenaba utawaitantine, untiye.
15 Piya ute ayapa inota atama kayone puwaitategina, kana maba atate tori wantiye. Tabe kutantaga masimabi kaꞌwaina Isu akabitantiye
16 Pigoya, ka yagarama Isuti ampa irosaꞌma abigama maya untiye: Tisa, naeba aogiyenaba aya pukuboti, eꞌwasaena maemagi aꞌyaꞌma yagaba miyaba mikuwoma, abigantiye.
17 Piyama abigaogana, maya omintiye: Pi aogiyenagaba nanaga nabigane. Aogiyenama nkagoba kaꞌanto mintiya, kaeba aꞌyaꞌma yaga miyaba mikuwe untanapa, ae kamana ago abima wasiyo, untiye.
18 Piya yogana, aeba: Ae kamana agowema, abigantiye. Abigaogana maya untiye: Paisa mono ago kamanaꞌamaba maya iye: Kaeba wasanaba a-nkaeguma kaiyoma, kumiyenaba a-poma, kuntanaba a-poma, kumpari kamanapa to wainapa a-sotaoma,
19 kano kaba kamana wasiyo. Piya puntana kaekaka kabemisa puma kaokinakaba pabiyama kabeno, piya untiye.
20 Piya yogana kana yagara aeba maya omintiye: Pipa wasirite kanama mintantone. Pika kapa aya pusuwema abigantiye.
21 Abigaogana Isu maya omintiye: Kaeba arupu puma aogima mpikenaga untanapa, wama kotagapa to kina imima mone maemagina kusi kina imegana aogima miyepa, mantari aogiyenagapa aboragamekana kaeba kanama ampa naegarao, untiye.
22 Piya yogana kana yagara abima kamparaga potate wantiye. Kotapa taberakaꞌya waitantogana, pika piya puntiye.
23 Piya pute waogana, Isuba abagi kinaꞌwa maya uwaimintiye: Naeba taga urimukuwa abiyo: Tabe kutantaga kinaꞌmi kabiratakena manta kumati ikenagaba pipa igiga puma tabe kuntuyenawe.
24 Naeba pabi kamana to kake urimukuwe. Tabe kamoro yagawama naꞌama nkagepinti uma pasikenaenaba pipa esegiyenawe. Piya, tabe kutantaga yagaramaba Koti kabiratakena kumati ikenaba pipa to awameta, tabe kuntaenawe, untiye.
25 Piya yogini, abagi kinaꞌmiba pi kamana abite pami pumagini maya untawe: We, kebaya mantariba ikiye, untawe.
26 Piya yuguna Isuba igantana maya untiye: Pipa wasanama piya pikenaenaba kampa waintiye. Pipa Koti ka pikenaena waintiye, piya uwaimintiye.
27 Piya uwaimogana Pitaba pabigo awamuta uꞌmagina maya untiye: Abo, taeba aꞌyaꞌwaemaenarepa takabiwaetate kaepa kaegaraune. Pigoya aintiba piꞌna nkantotapa nanaena aboraramikiye, abigantiye.
28 Piyama abigaogana Isu maya uwaimintiye: Naeba taga urimekiri abiyo: Aintiba aꞌyaꞌwaemaena aborama aogi pikena kanabipa, Wasanama Ntagara naeba eꞌwasa naemu yabaeneta miyekini, naegara kina tigeba pabiyama mampabisa tabe kinaꞌmi nkimu yabae nagisarisa tara tumpaema pitaꞌi mima, Isureyo aruyena to nagisarisa tara tumpaema kinaꞌmi ige kamana uma aꞌya itakibewe.
29 Pigoya, kaꞌwaina aeba naeka uma aganto, aꞌnanto, amanaꞌma, ano aba, araga yagarawa, kumaꞌwa, kiyanka, atate aeba naegarakibiꞌnaba piꞌna antotapa uwomantana maema mintana aintiba miyabaꞌena maekiye.
30 Piya, iba kaꞌisa kiya kinaꞌmiba igeba kayokaya kina miyigini to iba kayokaya pe kinaꞌmiba igeba kiya kina uma mikibewe, Isu untiye.
1 Pigoya, Isu to kamana maya untiye: Koti kabiratakenaenaba waini yugawama nkaba aeta meto kamana ukuwe. Piya, waini yugawama nkaba kaꞌwaina abaya aseka kaꞌisa kayokaya yagara ibabikena wantiye.
2 Pigoya kaꞌisa ibabuma ka yagasa ikantanaba wantora piya uma aborawaimogini abuguna kanarasaogini yogawati uwaitaogini wantawe.
3 Pigoya to pabi ntaga abaya to kake wama kaꞌisa kina maketi kumati uwa mintuguna,
4 uma igama maya uwaimintiye: Waini yugane waintiya, wama uma pigi, ikantanaba kanara timukuwe, yogini, abite waini yugawati wantawe.
5 Pigoya, kagi abebege atamaisakenage pogana, to kake wama pabiyama uma ibabuntiye.
6 Pigoya atamai to kake wama kaꞌisa kinapa yoga kampa punta uwa mintuguna uma ibatama maya uwaimintiye: Tigeba nanaga eꞌero ntaga uwanama mintagana atamaisaye, untiye.
7 Piya yogini maya omintawe: Ka yagaramaba yoga kamanapa taepa kampa tababuma urataine, untawe. Piya yuguna maya uwaitama untiye: Waini yugane waintiya, wama piyo, uwaimintiye.
8 Piya, yogawama nkababa piya puma mintogana, aseyogana kiya yagarawa mayama omima untiye: Kaeba yoga kina igegaꞌe uma mone imo. Ainti ibabo kinaꞌmitisa agobima imirite wamagina maru ibabo kinaꞌmitiba uma imima aꞌya po, piya untiye.
9 Piya yogana abite ainti atamai ibabunta kina ige igegaꞌe yogini kanauguna kaꞌwainanta kaꞌwainanta wantora imiwaentiye.
10 Piya imogini, maru kanaume kinaꞌmi igeba agate: Taepa ikantanaba mesuba puma tamikiyema, napintawe. Aibuguna pabiyama wantora wantora imintiye.
11 Piya imogini agate, yogawama nkabapa kabiꞌma maya untawe:
12 Ainti kana kina igeba yogaenaba uwa anagiꞌena ampa pewe. Piya taeba pipa pankaerugumpa taise pagapaga yugaena puma mintokana ase iya, pipa nanaga ainti kana kina igeke ka awametapa tamiye, untawe.
13 Piya yuguna, yogawama nkababa igetisa ka yagara maya omintiye: Naoꞌyagara, naeba ataenaba kampa pugatauwa, kaeba wantoraga ugamogana abima kanarane yempene.
14 Pika monegapa maete wao. Naeba ainti kana kinapa kaeke ka awameta timukuwema napiyegana kanarasaine.
15 Pintanaba pipa naeꞌenawe, pika naeba agowama nae napimagi, piya mayaena pikena untapa pukuwe. Kaeba nanaga nanta aseyonaneka poganapa abima ataba pene, untiye.
16 Pika kayokaya kinaꞌmiba kiya kina miyigini, kiya kinaꞌmiba kayokaya kina mikibewe, Isu piya untiye. Isu purintapisa asikena kamana kakagara untiye
17 Pigoya Yerusaremi kumati ikena puguna, Isu aeba abagi kina nagisarisa tara tumpaema igeꞌamana ibabogini ibiwai wantawe. Keꞌi wantini maya uwaimintiye:
18 Abewo, taeba Yerusaremi kumati iyune. Pitaꞌi nabanempaba Wasanama Ntagara naepa tabe mono kiye kinape mono tisa kinape ige iyapi natakini igeba: Aeguyiyoma, unatamagini,
19 namuꞌisa kinaꞌmiti unataigini igeba karana natama eru kasutasa naeguma maripora ita nataigi purukuwe. Puꞌmagi kakaga yaga miyekana nabanempaba to kake asinatakiye, Isu piya untiye. Yemisige Yonigeba tabe mikenaga untase
20 Pigoya, pi ntaga isinowaisimpa Sebeti ntagara tara isibabute Isu nkagora kaꞌenaga esotakena uma parokaentiye.
21 Uma parokaeyogana abigama maya untiye: Kaeba nanaga kabiye, yogana, aeba maya untiye: Kaeba yega, yagarane tara ainti tabe Waꞌega aborakibempe ntagaba kayatakanti kayakeꞌmasima mikibese, untiye.
22 Piya yogana Isu maya omintiye: Tigeba aiboꞌenarika piyaba yewe. Nae nantaraꞌenabi tisigeba kanara pasikibeso, untiye. Piya yoginisi isigeba: Owe, pabiya pukuse, untase.
23 Piya yusuguna maya uwaisimintiye: Nae nantaraꞌenabi taga pasikibese. Pigoya, nayatakanti nayakeꞌmasi mikena kamana ukenaenaba pipa naetiba kampa waintiye. Nabanempa uwaitanti kina, ige pi yabaerapa mikibewe, Isu piya untiye.
24 Pigoya, to nayataraꞌmu abagi kinaꞌmiba pi kamana abite kana agantoke aꞌnantokeba ka isibirantawe.
25 Piya puguna Isuba igegaꞌe uma maya uwaimintiye: Mampabisa tabe kinaꞌmiba esegima kabiwaitawe. Imagini miye kina igeba uwa kinapa igasimagini tabe kinaꞌwai miwaetawe. Pipa abintawe.
26 Pigoya tigeba itigiso atigiso piyo. Pika tigetisa kaꞌwaina imagini kiya mikena puntanaba, aokinaꞌmi kayokayaꞌena pumagina miyeno.
27 Pigoya kaꞌwaina aeba paitaritamagina kiyari mikena puntanaba, aokinaꞌmi ige yoga kina miyeno.
28 Piya, Wasanama Ntagara naeba pabiyama tige nae kayokayaꞌena punataiyomaba kampa tumintone. Naeba tige kayokaya pumagi, mikenaenanetasa uwoma kina ika puma aꞌwatitakena tumintone, Isu piya untiye. Isiyorika yagara tara isiyo agawaisitantiye
29 Pigoya Isube abagi kinaꞌwape igeba Yeriko kuma agaite wauguni, wasana uwoma kinaꞌmi iyegaꞌma wantawe.
30 Piya pugunisi, isiyorika yagara tara ke awamori mintusuguni, Isu kanama keꞌi waye, untawe. Yugunisi abite pabigo agasiya kigaꞌe uma maya untase: Waꞌega, kaeba Tebiti ntagara tasigeka kantara po, untase.
31 Piyama tabera kegaꞌe yusuguni, aꞌyaꞌma kinaꞌmiba: Paka pisoma, uwaisimumepa, isigeba kampa abintinisi to kake esegima kegaꞌe umaginisi maya untase: Waꞌega, Tebiti ntagara, kaeba tasigeka kantara purasitao, untase.
32 Piya yusuguna, Isu aeba abite keta asimagina mintana yoginisi kanausuguna: Nana purasitaomagirisi yesema, isibigantiye.
33 Piyama isibigaoginisi maya omintase: Waꞌega, tasiyo agarasitaoma yuse, untase.
34 Piya yusuguna, isiyora aukaya pogana pabigo isiyo apinaꞌma agantase. Aibuntinisi Isu aegaꞌma wantase.
1 Pigoya, wamagini Yerusaremi kumata uma irosakena puntawe. Piya puntini, Oribesi amuta irosaꞌma uwaena kumaꞌanto ka, agewapa Petipaesi pipa agaikena puntana Isuba abagi kinaꞌwampitisa tara yagarara uwaisimima isigarubaꞌmagina,
2 maya untiye: Tisigeba maretaꞌi uwaena kumaꞌanto waintiti wamagirisi, tonki yaga anobe aikeribe igaꞌnara mintakibesa, uma iyobaꞌma isibabute kanaiso.
3 Tisigeba piya pisigina kaꞌwaina tisibigakirisiba maya omiso: Waꞌega aeba pikaba aꞌyo mpaekenaga iye, omiso. Piya yisiginaba owe urisitakiye, piyama uwaisitaoginisi wantase.
4 Pigoya, pintanaba uwaba kampaye. Poropete ae meto kamanaꞌama esegi penema piya puntane. Aeba maya kamana kaentiye:
5 Tigeba Saiyoni kumatasa kinapa maya uwaimiyo: Abewo. Waꞌegari aeba aguparuyenawaka uma tonki yaga akabapi mima tigeti waye, iye.
Pika aikeri yaga akabata mima waye, piyama kaentiye.6 Pigoya uwaisitaoginisi abagi yagara tara isigeba wamaginisi Isu nkawamu wasimaginisi,
7 yaga anoke aikerige uma iyobaꞌurite kanausuguni, kaiwaipa atamagini abobori ama agutauguna ima mintantiye.
8 Piya pogini, uwoma kinaꞌmi kaiwaipa atamagini keꞌi ama aguta wauguni, kaꞌisa kinaꞌmiba yanta aerisaꞌma agurite wantawe.
9 Aibuntini, uwoma kinaꞌmi aoribe akaꞌibe wama iꞌmu potama maya untawe:
We, Tebiti ntagara taeti kanaye. Waꞌegawama nkawamuta kanaika taꞌmu potano.We, inatisa yagaraga taꞌmu potano, uta wantine.10 Pigoya Yerusaremi kumati iyogini, kuma ago kinaꞌmiba pami pumagini maya untawe: Pipa ke kanagini yewe, yuguni,
11 maya uwaimintawe: Poropete Isu, aeba Karariya mari Nasareti kumatasa aborantiꞌna pimpaye, piya untawe. Tabe mono namapi ikantana puguna Isu igarubantiye
12 Pigoya, Isuba pitaꞌi tabe mono namapi iyomepa pitaꞌi ikantana puma mintuguna, igarubantana mono ankami ankami pume kinaꞌmi ntabaebe kabara ataume ntabaebe apasanaꞌma asunukaentana,
13 maya uwaimintiye: Mono isaꞌama maya iye: Mono namantepa nunamu ukena namantana peno, iye. We, tigeba piya kuntana pe kinaꞌmi ntamantana piye, uma igarubantiye.
14 Piya utegina, pi tabe mono namapinti mintogini iyorika kinape iraena ibome kinape aeti kanauguna kaba itantiye.
15 Piya pogini, tabe mono kiye kinaꞌmibe mono tisa kinaꞌmibe igeba pi esegiyena ometana agantini yagara araga tabe mono namupi iꞌmu potamagini: Tebiti ntagara taeti kanagi taꞌmu peno, piya yuguni abintini, igeba kamparaga potamagini,
16 Isu maya omintawe: Ma nkaraga yagarami iꞌmu pugatapa abeno, untawe. Piya yuguna Isu maya untiye: Naeba ago abuwe. Piya, mono kamana ka waintipa mayama kampa aisewo: Inamu kina nonotasa kinaꞌmi inta maema aseꞌyo pegana iwamupi Kotiti iꞌmuntana aogima aboraye, pipa kampa aisewoma, ibigantiye.
17 Aibumagina, akabiwaitate Yerusaremi kumatisa tumimagina Petani kumati ima ase yogana waintiye. Isu yogana piki ya asawantiye
18 Pigoya, abayara tabe kumati aꞌwae puma kanaogana agaꞌena abuntiye.
19 Piya pogana ke awamora piki ya ka agategina wama agori aꞌwaka uma aguyosagaomepa aꞌyenkamana waintogana agantiye. Agate kana ya maya omintiye: Kaeba apa toganaba kampa aekibene, yogana, pabigo kana yaba tamiriꞌma asamagina pari puwantiye.
20 Piya pogini abagi kina igeba agategini pami puma maya untawe: We, ma ntaba nana pumagina agaropa asaye, untawe.
21 Piya yuguna Isu maya uwaimintiye: Naeba taga urimekiri abiyo: Tigeba tiguꞌama tara tara kampa punta esegima timatiti pumagiri mikibepa, pipa yara kukantana aboramisa puma pipe to kaꞌisaena pikibewe. Piya, tigeba maro amuꞌamaka: Kaeba tigabaꞌma wanipinti tumo, yesinta, pabi ikibesa pesine.
22 Pigoya, aogima timatiti puma mintiri aꞌyaꞌwaemaenaga esotaiginaba Koti aborarimikiye, Isu piya untiye. Kiya kinaꞌmi Isu amiyo puma abigantawe
23 Pigoya, wama tabe mono namapi ima mono untiye. Umagina mintogini, monotasa tabe kiye kinape Yuta kinaꞌmi monota kabiyume kinape igeba aeti wamagini maya uma abigantawe: Kaeba mataꞌi aꞌyaꞌwaemaena pempepa ke nkawamuta pene. Ke ugatagina pene, untawe.
24 Piya yuguna, Isu kamana maya uma aꞌwae pumagina uwaimintiye: Naeba ka kamana tibigakiri unamigi, naeba pabiyama ke nkawamutapaya aꞌyaꞌwaemaenaba poka pipa antotapa urimukuwe:
25 Yoni mono wani paiꞌitantintana aetasa aborantiye. Pipa mantarisaenabera wasanamintanawema, ibigantiye. Piyama ibigaogini igeba: Nana kamana omusune, ugate uwa asabaꞌwantawe. Aibuntini maya untawe: Taeba mantarisaenawe yekanaba, nanaga kamanaꞌwapa kampa abintawe, ukiye.
26 Piya, wasanamantanawe yekiniba, wasanamiba Yonikaba tabe poropetewe umagini ataena puratakibewe, untawe.
27 Piya utegini igeba: Kampa abintune, untawe. Piya yuguna Isu kamana mayama aꞌwae puwaimintiye: Pi yepa kanarana, pipa naeba pabiyama ke awamutapaya aꞌyaꞌwaemaena poka antotapa kampa urimukuwe, Isu piya untiye. Ka yagarama ntagara taramisi meto kamanane
28 Piya untana to maya untiye: Kamana ka urimekiri abimagiri agaiyo. Ka yagarama ntagara tara mintantase. Aibusuguna aeba amaru yagarawa maya omintiye: Yagarane, ibaba kaeba wamagina waini yugaena uma po, omintiye.
29 Piya omogana kana yagara aeba maya untiye: Aerawane, kampa nabosagaye, untiye. Piya utegina ainti to uma aꞌwae puma napimagina uma puntiye.
30 Piya pogana isibaba aeba to aintisa yagara pabi yoga kamana omogana maya untiye: Naeba kanaraka uma pukuwe, untiye. Piya ute ainti antawama ata pogana atate wagaintiye.
31 Pigoya, tigeba aentagaramaba abawampa nkawamu wasintiyeba yewe, untiye. Piya yogini igeba: Amaru yagarawampawe, untawe. Piya yuguna Isu maya uwaimintiye: Naeba tagaka urimukuwe. Ae pemisa puma takisi maeya ku kinape kupiyo waepe paitamagini Koti kabiratakenaenama nkagupi uma pasigiri, tigeba aintisaena pikibewe.
32 Piya, Yoni ampa irosaꞌma arupu puma mikena ki tiyakogiripa, tigeba monoꞌwapa aꞌa-o yuguni takisi maeya ata kinape kupiyo waepe ige uwasuwama aꞌyugu mikenaenawaipa atategini wasintane. Igeba piya puguripa, tigeba igantiripa aintiba kampa tintara pumagiripa kampa aꞌwae pumagiri abintane, Isu piya untiye. Waini yugara kamparaga kinaꞌmi kabinta meto kamanane
33 Piya umagina, Isu to maya untiye: Naeba to ka kamana urimukuwa, abiyo. Wasana kaꞌwaina mawata waini kurintiye. Kuꞌma aꞌya atamagina, ainkima kagisa kimagina waini anti airakenaena puntiye. Piya potama yoga kiye pikena nama kitama kiya kabiwaitate to mari wantiye.
34 Umintogana nakena aborakena kana aboraogana, kayokaya kinaꞌwa: Waini naeꞌena kaꞌisa maete kanaiyoma, uwaitaogini wamagini kiya kabima miyume kinaꞌmiti uma irosantawe.
35 Irosaꞌma yuguni, kana yoga kiye kina igeba kayokaya kina irakuꞌma kapa uwa aeguntini, kapa ara aeguntini, piya kapa yaba kasutasa ausa aeguntawe.
36 Piya puguna yogawama nkababa to kake uwoma ntagara uwaitaogini ampa irosauguni pabiyaena puwaitantawe.
37 Piya puguna ainti aeꞌwa ntagara mayama napimagina otantiye: Yagarane agarubakana wakiniba ae awamu wasikibewema, napintiye.
38 Piyama napima otagana ampa irosaogini agate, kana yoga kiye kinaꞌmiba maya mare-u me-u puntawe: Aintiba pi ae kana yuga maesanaga, taeba aepa aegugaite aintana pekana taeꞌenaena pikiye, untawe.
39 Piya yuguna pabigo ampa irosaogini, agaruba urite yoga awamori uma aegumagini kaintawe, Isu piya untiye.
40 Pi kamana uma aꞌya atate, Isu wasana ibigama maya untiye: Yogawama nkabawampa aeba ampa irosantanaba, aintiba kana waini yuga kiye kinapa aya puwaitakiyema, ibigantiye.
41 Piyama ibigaogini igeba maya omintawe: Kamparagaena potantaka pabiyama kamparagaena puwaitama iyegukiye. Aibuntana waini yugawatapa aogi kiye kina ibabuwaitakini igeba aꞌyaꞌma yagaba wainiwapa maema amimagini mikibewe, untawe.
42 Piya yuguna Isuba maya uma amato puma uwaimintiye: Mono isapi kamana ka waintipa, pipa tigeba kampa aisewa, a. Pipa mayamawe:
Nama kikena kinaꞌmiba ka ya ago kainta ntawama iba waꞌega ya asima waintiye, iye.Pintanaba Waꞌegawamaba ago pega taeba agantompeka taꞌmu pune, untiye.43 Pika urimukuwa abiyo: We Yuta kina, Koti kabiratakenaenaba tigetisa tipaꞌma to aoso kina, mono auꞌwapa maema aborakibe kina imikiye.
44 (Pigoya wasana kaꞌwaina pi waꞌega yara aeguma au aerisa puma aikiye. Pipa pi waꞌega yawamaba pipa wasana to kaꞌwaina abobora tumpa waima aeguma aigisebaꞌma aerisa puwakiye, Isu piya untiye.)
45 Meto kamana piya yogini monotasa tabe kiye kinaꞌmibe Parasi kinaꞌmibe igeba abibebe pumagini: We, pipa taeka iye, untawe.
46 Piya ute arakuꞌma aegukena napiyumepa, wasanamiba Isukaba: Poropete yagarawe, yumeka iyekuru pumagini uwa atantawe.
1 Pigoya, Isuba meto kamana to ka amato puma maya uwaimintiye:
2 Mantari kabiratakenaenaba mampabisa tabe yagara kaꞌwainata awame pukuwe, untiye. Piya, tabe yagara kaꞌwaina yagarawampa nkwae ibaꞌena pomuguna tabe naninta maema kao puntiye.
3 Piya puntana kayokaya kinaꞌwa uwaitaogini aꞌyaꞌma uwaiminti kinaꞌmiti wama kegaꞌe uma ibabikena wantawe. Wama uma uwaimuguni: Aꞌa-o, untawe.
4 Piya yuguna tabe yagara aeba kayokaya kinaꞌwa to kaꞌisa mayama uwaitama untiye: Tigeba wama naokinati wama maya uwaimiyo, untiye: Tabe yagara aeba ago naninta maema aki pugasima yegini uwoma apa purumaka ago aegumagini kao pugasawe. Aibumagini aꞌyaꞌma nanintaba ago maema aogi pumagini tiyobi pewe. Pika tigeba kanaigi yagaranepa waya ababomima kana naninta namagi taꞌmu potano, iyema uwaimiyoma uwaitaogini wantawe.
5 Pigoya igeba wama uma uwaimuguni, kamana abima aekita potate, kaꞌwaina aeba yogawati wantiye. Aibogana to kaꞌwainaba situwawata kabikena wantiye.
6 Piya pusuguni to kaꞌisa kinaꞌmiba kayokaya kinaꞌwapa irakuꞌma iyegumagini kaintawe.
7 Piya puguna tabe yagara aeba ata pumagina irebu kina uwaitaogini igeba uma iyegumagini namankaipa yaku nkigiꞌma kaewaegaintawe.
8 Piya puguna tabe yagara aeba to kake kayokaya kinaꞌwa maya uwaimintiye: Nanintaba ago kao pugasune, piya kegaꞌe uwaimintompe kinapa igeba iyekita pumagini kampa kanapa aerana, kasiyo.
9 Piya, tigeba keꞌi nasi nasi pumagiri wasana ibatakibepa ibabute kanaiyo, untiye.
10 Piya yogini kayokaya kina igeba keꞌi nasi nasi pumagini uwa kamparaga kinape aogi kinape aꞌyaꞌmagini ibabuguni irosaꞌma namapa ampa pumaema mintantawe.
11 Mintuguna tabe yagara aeba igakena iyomepa, ka yagara aogi kaiba kampa aminta uwa ima asu mintogana agate maya omintiye:
12 Naoꞌyagara, kaeba aya pegina kaigapa aogiyenaba kampa amirinta asumintane, yogana, aeba kamana asaba wantiye.
13 Aibogana, tabe yagara aeba kayokaya kinaꞌwa uwaimima maya untiye: Tigeba agisa ayata kirokaema tununtanabinti apasanaigina tumima, pitaꞌi tumpimagina awamu uparisa puma kubeꞌena pumagina miyeno, Isu piya untiye.
14 Piya untana to maya untiye: Pi puntisa puma igegaꞌe unta kinapa uwomane. Piya, ibabuma kibiꞌitanta kinapa tarantowe, Isu untiye. Takisi monega Isu abigantawe
15 Isu piya uwaimogini, Parasi kina igeba ka auꞌi wamagini kamana tobi tabi potama arakurikena kamana uma abintawe.
16 Piya puntini, ibagi kinaꞌwaipe Eroti nkaokina kaꞌisamipe: Kamana uma aborama, uwaimuguni igeba Isuti wama maya untawe: Tisa, taeba kae agoba abune. Kaeba taga ntagara mintane. Piya, ima tumima minta kinakaba kampa karu punta esegiyenawaika kampa kaekuruba puma Koti mponoꞌama kipa kanara uramima tayakene.
17 Piya, ka kabigakuna, uramo: Mono kinaꞌmita, taeba Aroma waꞌega yagara Sisa takisi mone amusupera kampaye, untawe.
18 Piya yuguna intabaipinti kumpari kamanaꞌwai igate maya untiye: Kumpari kina, tigeba nanaga minaga punatakenaga yewe.
19 Tigeba tabe yagara Sisa mone ame, pi ka nayakigi agano, untiye. Piya yogini mone ka maema ayakuguna ibigama maya untiye:
20 Amankape awaꞌenabe mapa kewema, ibigaogini
21 igeba: Sisantawe, untawe. Piya yuguna maya uwaimintiye: Pigo yewa, Sisantanaba Sisa amiyo. Piya, Kotintanaba Koti amiyo, untiye.
22 Piya umagina uwaimogini, igeba abima pami potategini atate wantawe. Purintapisa asikenaenaga Isu abigantawe
23 Pigoya igeba wauguni, pabintaga kaꞌisa Sarusi kina igeba Isuti ampa irosantawe. Pi kina igeba: Purintapisa asikenaenaba kampa waintiye, piya uma miyume kinane.
24 Pi ige Isu maya uma omintawe: We tisa-o, Moseseba kamana mayama kaentiye: Wasana kaꞌwaina yagarawa kampa aboratanta purekanaba aꞌnanto kiyaba maetama aganto antotapa yagara aborano, untiye.
25 Pigoya, abakatepi ka agaꞌna tonaentisa tara umaema mintantawe. Aibuntini marusa iganto waya maemagina yagara kampa aboranta mima puꞌwaogana, aꞌnanto kiya aetantiye.
26 Aeba pabiyama yagara kampa aboranta mima puꞌwaoganaba, aꞌnanto to kaꞌwaina kiya waepa pabiyama taetantiye.
27 Piya pumagini tonaentisa tara umaema agaꞌnaba aꞌyaꞌmagini puꞌwaewauguna, kiya wae aeba ainti mima purintiye.
28 Piya, igeba ka waeꞌamana aꞌyaꞌmagini maentaka, ainti asiratakena yagaba ke nkwae mikiyema abigantawe.
29 Piyama abigauguna Isu maya uwaimintiye: Tigeba mono kamanape Koti nkesegiyenagabe kampa napima kamanapa umagiri ata pewe.
30 Asikena yagaba wawayapa to kake kampa maekibewe. Igeba enisore miyesa puma asu mikibewe.
31 Pigoya, tigeba asikenaenaga yepa urimukuwe. Koti aeba kamana urimintipa, pipa tigeba aisuma kampa abewa, a.
32 Maya urimintine: Naeba Abaraꞌamu, Aisaki, Yekobu ige Koti mintuwe, untiye. Piya untika, aeba puꞌwanta kinaꞌnane. Aeba iyoganta kinaꞌmi Koti mintiye, Isu piya untiye.
33 Kamana piya yogini, wa waya aꞌyaꞌma kina igeba mono yomeka abima pami puntawe. Isu mono aiꞌnega abigantawe
34 Pigoya, Isu kamanaꞌama Sarusi kina irakuꞌma akunogini, Parasi kina igeba abite aki puntawe.
35 Aki pumagini kamana awaꞌena abinta, iyoꞌyagara ka otauguna agoꞌena pumagina maya untiye:
36 Tisa, mono kamana aiꞌneba aeꞌna tabeba piye, untiye.
37 Piya yogana Isu maya omintiye: Kaeba aꞌyaꞌma kagu kaumakape napiyenagape Waꞌega Kotigapa aꞌyaꞌma amegana waiyeno.
38 Pi kamanapa mono aiꞌneba asugasimagina waintiye.
39 Pigoya to ka abae wainti, isigeba ka awametane. Pipa mayama: Kaekaka kabemisa puma pabi nkawameta kaokinaka kabeno.
40 Pi kamana aiꞌne taramisi Mosese nkago kamanape poropete kina ige kamanape agona pese, Isu untiye. Isu aeba Karaisitika Parasi kina ibigantiye
41 Pigoya, Parasi kina aki pumagini mintuguna Isuba ibigamagina maya untiye:
42 Tigeba Karaisitikaba nanawe yewe. Aeba ke ntagarawema, ibigaogini, igeba Tebiti ntagarawe, untawe.
43 Piya yuguna Isu maya uwaimintiye: Piya, Tebiti aeba Awamusaꞌama otaogana ayaga utaratanta yagara Karaisitikaba Waꞌeganeneba, omintiye. Aeba maya untine:
44 Tabe yagara aeba nae Waꞌegaba maya omintine: Kaeba nayatakanti ampintaga, kama kinakapa kagisabi ibabuma aki peno, untiye.
45 Pigoya, Tebiti aeba nanaga agaꞌnukaba: Waꞌeganeneba, untiyema, ibigantiye.
46 Piya uma ibigaogini igeba kamana aꞌwae puma omikenaga napigate uwa atantini, pi ntaga aeka karu puntawe. Piya puntini, aintiba to kake kampa kamanapa abigantawe.
1 Pigoya pi ntagaba Isuba kaꞌisa kinape abagi kinaꞌwape maya uwaimintiye:
2 Mosese marutapa mono tisa kinake Parasi kinake miyewe.
3 Pika kamana aborama urimigiripa abimagiri wasiyiyo. Piya, igewai miyesa pumaba a-mpiyiyo. Igeba kamana iwamupisa untiniba agowapa kampa wasiyewe.
4 Igeba kuntaena asaema tibota aesagatitate, igewaipa uwa ika miyewe.
5 Pi aꞌyaꞌwaemaena pepa iꞌmaete imaena mana pewe. Igeba mono nunamurasa tusantanawai puwaitagini pu uꞌma, toma tomantana maema paentaenabi miyewe.
6 Piya pumagini, tabe naninta nakena yagabe mono namapi mikena yagabe marusa yabaera paitama asu misanaga ibugaye.
7 Wa waya uwa kinaꞌmi keꞌibe kumatibe iꞌmu purataiyema iyowa agasiya pumagini mintini, igewaipa tisawe uwaimisanaga ige atakae puma miyewe.
8 Pigoya, tigeba pipa tisawe uramiyomaba a-siyo. Tisaripa Koti abintowe. Piya, tigeba uwa aꞌyaꞌmagiri aganto aꞌnanto mintawe.
9 Pigoya, mabi kawainaka tabaweba a-siyo. Mantari tibarimpaba kaꞌanto mintiye.
10 Pigoya kiya kinateneba a-suritaiyo. Kiya yagararipa Karaisiti aeba kaꞌantowe.
11 Piya, tigeti kiya ima mikibiꞌnaba tige kayokayaꞌena peno.
12 Piya, kaꞌwaina aeꞌwa nkaumarasa au maete ima miyekanaba, merunkaba potakiye. Piya to kaꞌwaina au maete tumima miyekanaba ababuma mesuba potakiye, Isu piya untiye. Mono tisa kinake Parasi kinake igeꞌma kamana Isu untiye
13 Piya yogana Isu amato puma maya untiye: We, mono tisa kinake Parasi kinake kumpari kina, tigeba ataenabi mikibewe. Nana pegiri wasanami igeba mantari kabiratakena kumati uma pasikena yegiripa ke akunkigasawe. Tigeripa kampa uma pasintiri ige uma pasikena yegiripa aꞌa-o uma akaꞌya waitawe.
14 We, mono tisa kinake Parasi kinake, kumpari kina, tigeba tara taraena puma, ataenabi mikibewe. Tigeba eꞌero nunamurasa agoꞌena pumagiri ainti abeya waeꞌmi mpone kutankai aꞌyaꞌma aisaga, piꞌna nkantotapa aintiba kamparaga ikantana maekibewe.
15 We, mono tisa kinake Parasi kinake, kumpari kina, tigeba ataenabi mikibewe. Tigeba wanipe mabe agasigasima nasimagiri to marisa kina ababuma tibagi kinati me nkatakena wantiri, pigo tige kamparagaena pesa puma ayakigina aeba tigasimagina tabera kamparagaena puma aꞌabibi tumikiye.
16 We, tiyorika kiye kina, tigeba ataenabi mikibewe. Nanaga mayaba yewe: Tabe mono namata aigima uma esegi pepa pipa kamparine. Pigo tabe mono namatasa aogi awaꞌenawata aigima esegi puma ukenagaba nanaga tagakaba yewe.
17 We, tigeba aibo kina tiyorikane. Awaꞌena pipa uwaenawe. Awaꞌena wainta aota namankama asugasima aeba tonawe.
18 Pigoya, to kapa mayawe yewe: Aratara aigima uma esegi pepa pipa kumparine. Pi arata aboborisa aꞌmuntanara aigima esegi puma ukenagaba, nanaga tagakaba yewe.
19 We, tiyorika kina tigeba, aꞌmuntana pipa uwaenawe. Aꞌmuntana wainta aratawama asugasima aeba tonawe.
20 Pika kaꞌwaina aeba aratara aigima uma esegi pekanaba arata aeꞌwape abobori waintintanabe kagaꞌena pukiye.
21 Pigoya, kaꞌwaina aeba tabe mono namata aigima uma esegi pekanaba, pipa mono nama aeꞌwape kana mono namapi miyiꞌnape kagaꞌena pukiye.
22 Piya, kaꞌwaina aeba mantari aigimagina uma esegi pikibipa, pipa Koti marunkape kana marunkama nkababe kagaꞌena pukiye.
23 We, mono tisa kinake Parasi kinake kumpari kina, tigeba ataenabi mikibewe. Yogarisaenabe to kaꞌisaena maema nayataraꞌmu aki pumaꞌma kapa Kotinta atakena kamana yewe. Piya puntiri ka aukaꞌi auꞌwantagaꞌena monota uma arupu puma, agama kaoꞌena puma kamana ago wasima aegarakenaenaba pipa kampa pewe. Ka wasintiri to kapa wasiyiyo.
24 We, paitama miye tiyorika kiye kina, tigeba maeyaena pewe: Wanitipisa kiꞌnunkama agama maema maebugasagana, tabe yagawamaba kampa aganta pabigo asagaꞌyuma paga iyopotaye.
25 We, mono tisa kinake Parasi kinake kumpari kina, tigeba, ataenabi mikibewe. Tigeba tuꞌnatipe kankaberipe aririsaba wani nkaema waeꞌwae puntiri antabaipintisa kampa aeyobagana iꞌnintanabe aguntaenabe awaitama waintiye.
26 We, Parasi kaorika kina kaeba, marupa tuꞌna kankabegapa antabaipintisa kaꞌena waintipa, pipa waninkaema aogi pugaite ainti aririsaba waninkaema aeyobao.
27 We mono tisa kinake Parasi kinake, kumpari kina, tigeba ataenabi mikibewe. Wasana aru piyama mintawe. Wasana aru aboboriba awaꞌena puma aogi pugasawe. Piya, antabaipintiba puꞌwanta kinaꞌmi ayampube karebe kobabe waintiye.
28 Tigeba pabiyama tipa wasana iyora aogi tiwa maema miyewe. Piya tintabaipinti pipa kumparipe monoꞌama aguya aikenaenabe awaitama waintiye. Tisa kinapa kamparaga ikantana maekibewe Isu untiye
29 We, mono tisa kinake Parasi kinake, kumpari kina tigeba ataenabi mikibewe. Tigeba poropete kinaꞌmi nkiru paga pumagiri aogi pewe. Piya puntiri paisa mono kinaꞌmi nkiru yugaba awaꞌena puntiri,
30 maya yewe: Tayabamagi mintantata miyompesinta, igepa kampa iyoꞌmaema poropete kinapa iyegumagi ataenaba kampa puwaitaompesine, yewe.
31 We, tigeba piya kamana umagiri poropete iyegunta kina ige igaꞌnugi miyepa agoripa uma aborawe.
32 Piya, tiyabamagi kaintaba uwa inatasa atata kanantagiri, tigeba pabita amato pegana tabe kuntu piye.
33 Tigeba kuyarawe. Tigeba maꞌama nkawarorawe. Kaintanama nkantota aꞌabibinti tumikena yaga aborakiripa aeta paiꞌma wama kakakibewe. Pipa kampaye.
34 Pigoya abiyo: Naeba tigeti poropetebe, aogi napiyena puma abinta kinape, mono tisa kinape, uwaitakini uma irosaigiripa, tigeba kaꞌisaba iyeguma kamparaga puwaitakibewe. Piya puntiri kaꞌisaba maripora iyeguntiri, kaꞌisaba mono namapinti eru kasutasa iyeguma aꞌyaꞌma kumati igarubata nasikibewe.
35 Piya pugini, aogi kinaꞌmi korankai uwarakaꞌya airiꞌma ataena purite kanama mintanta, piꞌna nkantotapa tigeti ampa aborarimikiye. Pai Eboro, aetasa maꞌena aborama purite kanama Perekaya ntagara Sekaraya ae tabe mono namapi arata agora aeguma aꞌya puntane. Piꞌna nkantotapa tigeti ampa aborarimikiye.
36 Pika taga urimukuwa, abiyo: Pi aꞌyaꞌma kamaena purite kananta, pi kaintanaba ma kanabi mpiye kina tigeti ampa puma aꞌya pikiye, Isu piya untiye. Isu Yerusaremi kumatasa kinamika kubeꞌena puntiye
37 Piya untana Isu to maya untiye: We, Yerusaremi kina, Yerusaremi kinaꞌmitaba, tigeba nanaraka poropete kama puwaitama mono kina tigeti uwaitantapa yaba kasutasa iyeguma kaiyawe. Kokorewama awagiꞌnu agagatasa isamu puma agagapinti itamagina miyemisa pumagi, naeba tigepa agasiyama ibabumagi nagora aki puwaitakena yuwagini, aꞌa-o urite kanamagini mintantane.
38 Pika nama kumatipa kasakana kabu isubumagina waikiye.
39 Piya yekiri abiyo: Naeba titakiri kampa naganta mirite wamagiri, asaba: Waꞌegawama nkawamuta kanaika ae taꞌmu potano, ukibepa, pi ntagaba tigeti to kake aborakuwe, Isu piya untiye.
1 Pigoya Isu aeba tabe mono namapisa irosaꞌma waogini, abagi kina igeba ainti wantini tabe mono nama aogima kimarantakini agama agabantini omuguna,
2 maya uwaimintiye. Ma kanabipa waiyegiri agawe. Pigoya, naeba tagaka urimukuwa abiyo. Kama kinaꞌmi irosaꞌma nama kumatiba akasagasuba kasigina, ka yabankamaba to ka yabankama nkabobora wareꞌnaigina nama tubo aborama waikiye, Isu piya untiye. Aintiba uwoma kuntuyena aborakiye, Isu untiye
3 Piya ute Oribesi amuti ima mintogini, abagi kina ibiwai agora wamagini abigama maya untawe: Pi yempentanaba ae ntaga aborakiye. Pipa kaega ampa irosakena yagawo, mampa aꞌya pikena yagawo aborakena pekanaba, nana kukantana kapa aborakiyema, abigantawe.
4 Piyama abigauguna Isu maya uwaimintiye: Ainti kaꞌwaina kumpari urigasima tiguꞌama maema aꞌyugu puritasanaga aogima kiya kabimagiri miyiyo.
5 Piya wasana uwoma kina irosaꞌma nae nage umagini: Naeba Karaisiti nawe umagini, uwoma kinaꞌmi nkiguꞌama paibumagini kamparaga puwaitakibewe.
6 Pigoya, maꞌena pewe kamana abintiripe, esiba kamana abitegiri tiyekuruba a-puma: Kana aꞌya piyeba, a-siyo. Pi maꞌena maru pikibepa, asa akaꞌi agogo yaga aborakiye.
7 Maga maga kinaꞌmiba kamaena pigini, to kaꞌisa kinaꞌmiba to ka marisa kina uma iyeguyigini kamaena purite wagana pikibewe. Kaboba tabera aborakana imimapa tabera purite wagana pikiye.
8 Pigoya pi ntagaba marusaena uwa tiki nakiyenaba tabera aborarimikiye.
9 Pigoya, pi ntagaba tibabute wamagini tiki nakiyena purintini tiyeguma kaikibewe. Aꞌyaꞌma marisa kinaꞌmiba naetaka kama puritamagini kamparaga puritakibewe.
10 Piyaena aborakiniba uwoma kinaꞌmi monopa kaitegini iyokinaka minagaꞌena pumagini igobi puma kamparaga uwaitakibewe.
11 Piya pigini, uwoma kumpari poropete kina ampa irosaꞌmagini, napi napiyenari maema aꞌyugu purigaikibewe.
12 Pigoya mono aguya aikenaenama anosama abae pekana, agu kaoꞌenaba uwoma kinaꞌmitiba kaka wakiye.
13 Pigoya kaꞌwaina aeba monopa esegima aegaꞌmagina mintakana kanaꞌwapa aꞌya pekanaba, ababikiye.
14 Pigoya Koti kabiratakena aogi awaga kamanaꞌama maga maga wagana pumagini, aꞌyaꞌma marisa kinaꞌmi ige agowaipa maema aborakana, kanapa aꞌya puwakiye, Isu piya untiye. Aintiba kamparagaena aborakena kamanane
15 Piya untana Isu to maya untiye: Poropete Taniyeri kamana kaenti, pipa pasema aisuma abiyo. Piya, ma nkisapi aisuma agakibe kinaꞌmiba aogima abiyo. Pi kamanaꞌama esegi pekanaba kamparagaenaba tabe mono namapi ataigiri tiniꞌena pikibewe.
16 Piya pumagiri igate, Yutiya mari mikibe kinaꞌmiba tiyegaka amu mari iyiyo.
17 Piya pigini, wasanami abeꞌi mintakibetisaba namatipinti aꞌwae pumagiri ima kotatipa a-mpaentiri uwa waiyo.
18 Piya, to wasanamiba yogari mintakibetisaba aꞌwae pumagiri waꞌeri a-nkwama kai kabiripa a-mpaentiri uwa waiyo.
19 We, pi kanabipa igaꞌentaga waepe inamuganto mono amikibe waepe kamparagama mikibewe.
20 Tigeba Waꞌega esotaigina abintakiri, tiyegaka paiꞌma wakenaenaba esiba yagabe sabatirape a-nkaborano.
21 Piya, pi ntagaba tabe kuntuyena aborakiye. Pintanaba ma aborantitasaba kampa aborantine. Aintibe to kake kampa aborakiye.
22 Piya, Kotiba kanapa kasama arosakenaenagaba umarantine. Kampa piya untemisinta, wasana kaꞌwaina mono maema mikenaenaba pipa kampa aboramisine. Piya, Koti aeꞌwa nkibabikena kinaka umagina kanapa kasama, arosakiye.
23 Pigoya: Karaisitiba mataꞌi taeti aboraya, marotaꞌi igeti aboraye, piya kamanaꞌama wagana pekiripa, a-nkabiyo.
24 Piya, pi ntagaba kumpari karaisitibe kumpari poropetebe ampa irosaꞌma kukantanaba toma toma agasiyaena pumagini wasanami abikenaenawaipa maema aꞌyugu puwae igaikibewe. Piya puntini Koti aeꞌwa nkibabikena kinaꞌmi nkabikenaenawai maema aꞌyugu puwaigaikenaba kasaꞌenabe awameꞌenabe tabera aborakibewe.
25 Pigoya naeba maru urimoka, ainti aborakiripa aibopa a-piyo.
26 Pigoya, pika kaꞌme mpari Karaisiti aboragi agaune yigiripa, a-nkwaiyo. Piya nama pitaꞌi mataꞌi aboraye yigiripa, pipa a-nkabiyo. Kampaye.
27 Wasanama Ntagara naeba kakamaba kampa kanakuwe. Apayaena pegina aꞌyaꞌma aukaꞌi eꞌwasa puwamisa puma, naeba pabi nkawameta aborakuwe.
28 Eya, wasana purinta kina wainti mpari kegebankama kanama ampa aki pemisa puma, pabi nkawameta aborakiri nagakibewe, Isu piya untiye. Wasanama Ntagara tumikena kamanane
29 Piya untana Isu to maya untiye: Pigoya, tabe kuntuyena pikibi kanaba aꞌya puwakana, papa tunusekana, opa kampa eꞌwasa pekana, noriba tutu pekana, mantaba kuru pekana esegiyenawapa iyobaꞌma kareko pikiye.
30 Pigoya Wasanama Ntagara nae kukantanaba mantari aborakini aꞌyaꞌma maga maga kinaꞌmiba pi agate kubeꞌena pumagini nagisigi naeba mantarisa ibinankama nkabobori eꞌwasaena esegiyenanentaga tumpa irosakuwe.
31 Piya, enisore kinaꞌnepa uwaitakini tabe kigaꞌe uma ma maretibe metibe, atibe abetibe naokinaꞌnepa kibiꞌmagini ibabuma aki pikibewe, Isu piya untiye. Piki yawamaka meto kamana untiye
32 Piya untana Isu to maya untiye: Pigoya, piki yawama kana aboragiripa agama abewe. Aꞌno mpaꞌma pari pegiripa agantiripa: Tabe pa tagiya wakena piye, yewe.
33 Pabiyama urimontana aborawae wakiri, agantiripa, naeka: Aeba kabera ampa asintiye, yiyo.
34 Piya, kamana ka taga urimukuwa abiyo: Ma kanabi miye kinapa kampa purinta uwa mintigina pi aꞌyaꞌwaemaenaba aborakiye.
35 Pigoya mantabe mabe aꞌya wakana, kamanaꞌnepa waiyaba waima kampa kakakiye, Isu untiye. Kaꞌwaina aeba kanapa kampa abintiye
36 Isu piya untana to maya untiye: Pigoya, pintana aborakena yagaga wasana kaꞌwaina kampagina abibebe puntiye. Piya, enisore kina igeba pabiyama kampa abintawe. Yagarawa naebe pabiyama kampa abintuwe. Nabanempa ae abintowa abintiye.
37 Piya Nowa mintanti kanabi wasanami aꞌyaꞌwaemaena puntasa puma, Wasanama Ntagara nae ampa irosakena yaga agarosakiniba pikibewe.
38 Piya, paipa wani kampa pagintoginiba, nanintabe wanipe uwa nantini, ibaꞌena puntini, pumagini aꞌyuguma mintantawe. Mintuguna, Nowaba pabigo wanipisa karebi iyogana,
39 tabe wani paꞌma ipirintantisa puma, Wasanama Ntagara nae ampa irosakena yagaba pabiya awameꞌena pikibewe.
40 Pigoya, pi ntagaba tara yagarara yogari mintisiginaba, Kotiba kaꞌwainapa ababuntana to kaꞌwainapa aꞌa-o uma atakiye.
41 Piya, waya taramisi naninta kaoꞌena puma mintisiginaba, kaꞌwainapa ababuntana to kaꞌwainapa aꞌa-o uma atakiye.
42 Pika tigeba aogima kabiyiyo. Waꞌegaripa kanakena kanapa kampa abintawe.
43 Pigoya, tigeba agowapa mayama abiyo: Ka kumatasa kina ku kina ma aseka irosakiyema napiyisinta, iyogabama mima nama kumaꞌwaipa kabiyiginaba kuntanaba kampa maeyisine.
44 Pigoya, Wasanama Ntagara naekaba pabiyama kampa napikibe kanabi, kanakuboka aseyo puma miyiyo, piya untiye. Aogi yuga yagarage ata yuga yagarage isige meto kamanane
45 Piya untana amato puma maya untiye: Waꞌega kaꞌwaina kayokaya kinaꞌwampa ige kiyawaika otamagina maya omikiye: Naeba wama umintakanapa, kaeba kiya kabiwaitama asi nasiba naninta ka awameta imima miyo, ukiye. Pigoya, aeba ayama miyekanapa kiyaba mono wantaga awamu wasikenaena wantagane otaiyo.
46 Piya, aeba yoga otanta pipa aogima puma miyekanaba, waꞌega yagarawapa irosaꞌmagina abekanaba aꞌmu potakiye.
47 Naeba taga tagaꞌya yekiri abiyo: Aeba pi ntagaraba pipa kiya tabe otama aꞌyaꞌmaenawatapa kabiyenoma otakiye.
48 Pigoya, pi kayokaya yagara aeba waꞌeganepa agaropa kampa kanakiyema, antabaipintiba napimagina,
49 karana itamagina, kayokaya kina iyegumagina, nanintabe esegi wanipe nama aibo aboꞌena puma karana itakanaba,
50 togana waꞌega yagarawa aꞌwae puma kanakena kanapa, pi kampa napinta mintakana,
51 agaronkanto irosaꞌma agarubaꞌma kumpari kina aiꞌaruyenabi atakana ata maru mpikiye. Pi mparupi igeba iwara upaba puma kubeꞌena puma mikibewe, Isu piya untiye.
1 Isu kamana ka maya untiye: Pigoya, pi kanabipa Koti kabiratakenaena nayataramu aratagawae igeta meto puma maya ukuwe, untiye. Piya, ibaꞌwae aoꞌmaekena puntini, igeba wama wasana keꞌi kabima mimagini, ababikena kaneꞌwaipa maete wantawe.
2 Pigoya, nayakaꞌmu aragawae igeba aibona, piya to nayakaꞌmu aragawae igeba napi napiyena waintagana sumawe.
3 Piya, aibo aragawae igeba kaneꞌwaipa uwa maete wama kampa napima waninkapa kampa awaitama tiginta wantawe.
4 Pigoya, napi napiyena waintaga aragawae igeba wanipa awaitama ari atamagini kaneꞌwaipa maete wantawe.
5 Piya puguna wasana kampa karuꞌena kanaogana, aobi puma mintuguna iwaiga ibogini waintawe.
6 Waintuguna, aseka nkabubu saogana, kegaꞌe kamana ka mayama aborantiye: We, wasana ago kanaya, karuꞌena asimagiri uma ababiyo, untiye.
7 Pigoya aratagawae igeba abite iyogama asimagini kaneꞌwai maema tabe puguna tantiye.
8 Piya puntini, aibo aragawaeꞌmipa napi napiyena waintaga aragawaepa maya uwaimintawe: Taeba kanete tabe pokana tuꞌmakena piya, tigeba wanipa kapa ariꞌma na tamiyo, untawe.
9 Piya yuguni, napi napiyena waintaga igeba maya uwaimintawe: Piya kampa pukune. Wanipa pipa kaga kampa kanarasaratakiye. Tigeba situwati wama ika piyo, untawe.
10 Pigoya, igeba kaneꞌwaipika wani ika pikena wagasuguna aobi pume ntagara ampa irosaꞌma aratagawae aseꞌyo puma kaneꞌwaintaga mintume ige ibabogini wantawe. Wamagini kumati uma irosaꞌma namapinti ima kabe kitama naninta namagini mintantawe.
11 Mintuguni aibo aratagawae igeba kanama kegaꞌe umagini: Naba-o, naba-o, kabe aitatao, untawe.
12 Piyama kegaꞌe yuguna maya uwaimintiye: Naeba taga urimekiri abiyo: Naeba kampa tigao kinatawa, wagasiyo, untiyema, Isu untiye.
13 Piya, kanapa kampa abintaka, tiguꞌama kiyeba aogima kabima miyiyo, Isu piya untiye. Kayokaya kina mone asa iminta meto kamanane
14 Piya untana, Isu to amato puma maya untiye: Aintiba tabe yagara kaꞌwaina punti, pi nkawameta aborakiye, untiye. Pi tabe yagara kaꞌwaina pagasa mari wakena puntana kiya kinaꞌwa igegaꞌe uma monewa kabitaiyema pako puma imintiye.
15 Pigoya, ka kiye yagara mone asaba nayakaꞌmu ($5,000) amintiye. To kaꞌwaina tara asa ($2,000) amintiye. To kaꞌwainapa ka asa ($1,000) amintiye. Piya potate wantiye.
16 Wagasogana pabigo 5,000 tora maeyome kiye yagaramaba agobima to kake aborakena yuga pogana to 5,000 tora aborantiye.
17 Piya, to aoꞌyagara 2,000 tora maeyome, aeba pabiyama yoga pogana to kake 2,000 tora aborantiye.
18 Pigoya, 1,000 tora maenti, aeba tabe yagarawampa moneba maete wamagina uma ka kuꞌmagina kaitaogana waintantiye.
19 Pigoya, tabe yagarawai eꞌero kana mintana, aꞌwae puma kanantiye. Kanama mone iminti kiye kina igegaꞌe uma mone kamana abikena aki puntiye.
20 Piya pogana 5,000 tora aminti, aeba ampa irosaꞌma to kasa 5,000 tora me nkatantana maya untiye: Tabe yagarane, kaeba mone asaba nayakaꞌmu asa namintampetasa naeba yoga pogana, to kake nayakaꞌmu asa mampa aboraye, untiye.
21 Piya yogana tabe yagarawampa maya omintiye: Kaeba aogi kayokaya yagaragawe. Kaeba aogiyena pene. Kaeba yogarapa aogima kabiyene. Kaeba uwaenarapa aogima kabiyempeka naeba ugatakana, to kaꞌisaenaba kabikibena, kaeba kanama tabe yagaragampa, naege ampima kaꞌmu po.
22 Piya yogana, 2,000 tora aminti kiye yagara aeba ampa irosaꞌma maya untiye: Tabe yagarane, kaeba mone asaba tara asa namintampepa, pitasa naeba yoga puma maema aki pogana to kake tara asa mampa aboraye, untiye.
23 Piya yogana tabe yagarawampa maya omintiye: Kaeba aogi kayokaya yagaragawe. Kaeba aogiyena pene. Kaeba yogarapa aogima kabiyene. Kaeba uwaenarapa aogima kabiyempeka naeba ugatakana, to kaꞌisaenaba kabikibena, kaeba kanama tabe yagaragampa naege ampima kaꞌmu po.
24 Piya yogana, ainti mone 1,000 tora aminti, aeba ampa irosaꞌma maya untiye: Tabe yagara, naeba agogapa mayama abintuwe. Kaeba agasiya yagaragawe. Kaeba to kinaꞌmi yoga pumarapisaba naninta uwa maeyane. Piya, to kinaꞌmi aintana asigimarapisaba uwa maeyane.
25 Pigoya naeba pika naekuru pumagi, ka mono asa namintampepa maete wama mabinti kaitaogana waintika, mampa maete mekamuwa maeyo, untiye.
26 Piya yogana tabe yagarawampaba maya kamana aꞌwae pomintiye: Kaeba kayokaya yagara ata yagara kamparaga yagaragawe. Naeba yogaba kampa punta uwa mima to kinaꞌmi pumarapisa maema nakena yuwe. Piya, aintanaba kampa maemagi uwa kupisa maema namigi nakena yuwe.
27 Naekaba piyama napimagina monenepa mone kiye kinaꞌmi imekini yoga puma to kaꞌisa maemagini atantaga ampaeyosintawe, untiye.
28 Piya ute to maya untiye: Tigeba mone apaꞌma nayataraꞌmu mone asa urinti ntagara ae amiyo.
29 Piya, kaꞌwaina Kotitisa maentintanaba aogima maema miyekanaba, pipa uwomantana to kake aboramikiye. Piya, to kaꞌwaina Kotitisa maentintana kampa aogima maema miyekiniba, apaꞌurigina pipa uwa mikiye.
30 Pi kamparaga kayokaya yagaraba arakuꞌma tununtanabinti apasanaigina tumeno. Pitaꞌi tumpima awamu uparisa puma kubeꞌena pumagina miyeno, Isu piya untiye. Wasanama Ntagara aꞌyaꞌma kina pako pikena kamanane
31 Piya untana Isu to maya untiye: Pigoya, ainti Wasanama Ntagara naeba mantarisa eꞌwasaena wantaga enisore kinaꞌmi abakapi igege irosaꞌmagi, awaꞌena yabaeneta imagi mikuwe.
32 Piya punta, aꞌyaꞌma maga maga kina igegaꞌe yekini nae naora ampa aki puwaekibewe. Aibigi, kiya kaꞌwaina sipisipibe memebe pako pemisa puma, pabiyama pako pumagi,
33 sipisipiba nayatakanti aki puwaitanta, memeba nayakeꞌmasi aki puwaitakuwe.
34 Piya puwaitanta, naeba Waꞌegawaimpana nayatakantisa kina maya uwaimukuwe: Nabanempatisa akayona maenta kina, tigeba kanama Koti kabiratakena kasa kumati ampaema miyiyo. Pipa paitakaꞌya maba kampa aborantogana utaritantiye.
35 Piya, tigeba mayaena punatantaka: Nagaꞌena nabogiripa nanintaba namintane. Wanika nabogiripa namintane. Naeba to marisa namu kanaogiripa aogima nababuma natantane.
36 Nauka miyuwagiripa tigeba nautasaenaba namintane. Yonintana naboga waitamintuwagiripa tigeba kaoꞌena punatantane. Piya igaꞌna namapi mintuwagiripa kanama ampa nagantane. Pigoya pika kasa kumati ampaema miyo, ukuwe.
37 Piya yekini, monota arupu puma asoya puntaꞌnagiba maya kamana aꞌwae puma unamikibewe: Waꞌega, kaeba aeta kagaꞌenaba kaboga nanintaba kamintompene. Piya, aeta wanikaba kaboga kamintompene.
38 Piya, to marisa namupa aeta kanauku namapipa kababugatantompene. Piya, aeta kaukapa mintuku kautasaenaba kamintompene.
39 Piya, kapa aeta yonintanaba kaboganape igaꞌna namapipe mintuku uma kagama kaoꞌmaentompene, ukibewe.
40 Piya yigipa, naeba Waꞌegawaimpa naba maya uwaimukuwe: Naeba taga urimukuwa, abiyo. Tumima uwaena kanta puma miye naokina kaoꞌena puwaitantapa, pipa nae punatantasu piye, ukuwe.
41 Piya utegi, nayakeꞌmasisa kina igepa maya uwaimukuwe: Kaniꞌena puritanta kina, tigeba nabanempaba Satanike aokinaꞌwake tayaba yaku kaewaitanti, pitaꞌi tumima miyiyo.
42 Tigeba maya puntawe: Naeba nagaꞌena nabogiripa nanintaba kampa namintane. Piya, wanika nabogiripa kampa namintone.
43 Piya, to marisa namu kanauwagiripa kampa nababuma aogi punatantawe. Nauka mintuwagiripa nautasaenaba kampa namintane. Yonintana nabogiripe igaꞌna namapi mintuwagiripe kampa ampa nagantane. Pigoya, tigeba tayaba yakupi tumpiyiyo, uwaimukuwe.
44 Piya uwaimekini, nayakeꞌmasisa kina igeba maya ukibewe: Waꞌega, kaeba aeta naninta wanika kagaꞌenaba kabogana mintukupe, to marisa namu kanaukupe, kauka mintukupe, yonintana kabogana mintukupe, igaꞌna namapi mintukupe, aeta kagamagi taekitaba pugatantompene, ukibewe.
45 Piya yigipa maya uwaimukuwe: Naeba taga urimukuwa abiyo. Tumima uwaena kina kanta puma miye naokina kayone puma kaoꞌena kampa puwaitantapa, pipa nae kampa punatantasu piye, ukuwe.
46 Pigoya, igeba iki naki puyaba kumati tumigini, pi aogima arupu puma miye kina igeba aꞌyaꞌma yaga miyaba kumati ima asu mikibewe, Isu piya untiye.
1 Pigoya, Isu aeba pi kamana uma aꞌya atate abagi kinaꞌwa maya uwaimintiye:
2 Tara yaga aꞌya pekana Pasoba yagaba aborakiye. Pigoya, pi ntaga nabanempaba Wasanama Ntagara naepa wasanamiti unatakini maripora naegukibewe, untiye.
3 Piya yogini, pabi ntaga tabe mono kiye kinape Isureyo kinaꞌmi kiye kinape, igeba monota paitanta yagara Kayapasi, ae namapi aki puntawe.
4 Aibumagini pasema Isu arakuꞌma aegukena kamana uma abintawe.
5 Piya puntini maya untawe: Ma nkaota yagaba kampa piya pukune. Aꞌyugu aꞌyaꞌma kinaꞌmi maꞌena puratasanagawe, untawe. Waya kaꞌwaina agunta wani Isu paiꞌatantiye
6 Pigoya, Isu aeba Petani kumati wama Saimoni, karu yagarama ntamapinti ima naninta nantiye.
7 Namagina mintogana, waya kaꞌwaina aeti wamagina tabe ikantana wantaga aogi yaba kankabentobisa aogi agunta masawae aꞌnoti paiꞌatantiye.
8 Piya pogini, abagi kinaꞌmiba agate uma iyekita pumagini maya untawe: Pi tabe ikantana wantagaꞌenaba nanaga uwa kasaye.
9 We, pitasa mone uwoma maema kusi kina imekana kanarasakenawe, untawe.
10 Piya yuguna Isuba abite maya uwaimintiye. Tigeba nanaga ma kana waepa abima kunta potawe, a. Pi nkwaepa aeba naukaena punataye.
11 Pigoya, kusi kinapa asi nasi tigege miyigiri aintiba iyoꞌmaekibewe. Piya, naeba pipa tigegeba asi nasiba kampa mikuwe:
12 Naeba ago purekini kainatakibewe, pika masawaepa nauꞌama paiꞌma aogi potaye.
13 We, naeba taga urimukuwa abiyo: Maga maga aogi mono kamana urite wantiniba, ma nkwayaꞌma nauꞌama aogi potai, pi nkawaga kamanapa kaga urite waigini abae pikiye, Isu untiye. Yutasiba Isu minaga pikena mone maentiye
14 Pigoya, nagisarisa tara tumpaema abagi kinaꞌwapisa ka yagara, agewapa Yutasi Isikerioti, aeba tabe mono kiye kinaꞌmiti wama maya uwaimintiye:
15 Naeba Isu minaga puritakiripa, tigeba moneba ayaki namikibewema ibigantiye. Piyama ibigaogini, pabigo 30-wa siriba mone aisuma amuguna maentiye.
16 Maeritegina Isu minaga pikena apasa puma mintantiye. Isu aeba abagi kinaꞌmige Pasoba naninta nantawe
17 Pigoya, yisiti kampa wainta pareti nakena yaga agarosaogini, abagi kina igeba Isu abigamagini maya untawe: Taeba ibaba Pasoba nanintaba ae ntamapi kao pugatasune, untawe.
18 Piya yuguna maya uwaimintiye: Tigeba kumati ima ka yagaramati wama maya omiyo: Tisarempaba kaeka maya iye: Kanaꞌne agarosagi kae namapi ima nabagi kinaꞌmige Pasoba naninta nakenaga yuwe iyema, omiyo, untiye.
19 Pigoya, Isu yome kamanapa abagi kinaꞌmiba wasiwae uꞌmagini wama Pasoba nanintaba maema kao puntawe.
20 Piya puguna ase yogana, Isuba nagisarisa tara tumpaema abagi kinaꞌwapa ibabute pi ntamapi ima Pasoba naninta nantawe.
21 Nantini Isuba maya uwaimintiye: Naeba taga urimukuwa abiyo: Tigetisa kaꞌwaina nae minaga pikiye, untiye.
22 Piya yogini, abagi kinaꞌmi intawamaba tabera kamparaga pogini ka ka abigaurite wama: Waꞌega, naeka iyepera kewe, untawe.
23 Piya yuguna aeba maya uwaimintiye: Ma ntagara tuꞌnapi naege aya kaga atami ntagara, ae naepa minaga pikiye.
24 Piya, Wasanama Ntagara naeba mono kamanata unatanti kiꞌi wakuwe. We, Wasanama Ntagara naepa minaga punatakibiꞌnaba ataenabi mikiye. Piya, pi ntagarapa wasanama kampa yakari potantesinta, kanara pesine, Isu untiye.
25 Piya yogana Yutasi, minaga yagaramaba pabigo abigama maya untiye: Tisa, naeka kapa yeno, untiye. Piya yogana Isu: Pabigo yene, untiye. Isu abagi kinaꞌwa ara naninta imintiye
26 Pigoya igeba naninta namagini mintuguna, Isuba pareti maema aꞌmu potama ako puma abagi kinaꞌwa maya uma imintiye: Mapa nae nauna, maema naiyo, untiye.
27 Piya utegina, waini kankabe pabiyama maema Koti aꞌmu potama maya uma imintiye: Tigeba aꞌyaꞌwaemagiri naiyo.
28 Mapa Kotiti aoso atokaekena korantene. Aꞌyaꞌma kinaꞌmiti aguntaenari aꞌsua penema ataritauwe.
29 Pigoya, urimekiri abiyo: Mabipa waini wanipa ibanto ainkagogo namagi aꞌya puwe. Pigoya to kake kampa nanta uwa mimagi ainti nabanempa kabiratakibi kumati tigege kasa waini nakune, untiye.
30 Pigoya, ini urite kumatisa wama tumima maro nkaukaꞌi Oribesi amuti intawe. Pita Isu akabita kena kamana untiye
31 Pigoya keꞌi wantini Isu maya uwaimintiye: Mono isaꞌama naeka mayama unti, piꞌna esegi pikiye: Sipisipira kabima minti ntagara aeguyiginiba, kana sipisipi iyegaka aibarara puwakibewe, iye. Piya yemisa puma tigeba iba ma nkaseka aꞌyaꞌwaema natate tiyegakaꞌya puwakibewe.
32 Piya pigi purintapisa asinataka, Karariya mari wama paitaritakuwe, untiye.
33 Piya yogana Pita maya omintiye: Kaꞌisa kina igeba aꞌyaꞌwaemagi kaekaba abima katate ata pikibewa, pigoya naeba pipa kapa abimagi kampa katategi ataenaba kampa pukuwe, untiye.
34 Piya yogana Isu maya omintiye: Kampaye. Naeba taga ugamukuwa abo: Ma ibasa aseka kokorewama kampa aga untakana, kakaga yaga uwameka unatakibene, untiye.
35 Piya yogana Pita maya untiye: Kaeka kaeguntini naepa pabiyama naegukena pigipa, uwamegaba kampa ugatakuwe, untiye. Piya yogini abagi kinaꞌwampiba aꞌyaꞌma pabiya uwaentawe. Isu Kesemeni yugabi nunamu untiye
36 Pigoya, wama yogaba ka agewapa Kesemeni, pitaꞌi uma irosaꞌmagina Isuba abagi kinaꞌwa maya uwaimintiye: Tigeba mata mintiginto, naeba marotaꞌi wamagi nunamu ukuwe, untiye.
37 Piya ute, Pitake Sebeti ntagara tarage ibabute wantiye. Wantana pabigo napiyenawapa kunta puma kampa ayampu puma tabaraba puntiye.
38 Piya puntana maya uwaimima untiye: Nantawamaba tabera kunta puma puremantana nabiya, tigeba mata tiyogaba puma naege miyiyo, uwaimintiye.
39 Piya uwaimite, uwaenantora wama mabi uma parokaema maya uma nunamu untiye: Nabanempa, abegana kanarasakana ma nauki nakiyenaba naparo. We, nae napiyenanepa a-nkaegaranta, kaeka ntapiyena mana aegarao, untiye.
40 Piyama nunama ugaite kakaga abagi kinaꞌmiti aꞌwae puma kanama iwaita mintuguna igate, Pitapa maya omintiye: Tigeba naege uwaenantoba tiyogamaba kanara kampa misiwa, a.
41 We, timiyoꞌena abekiri amu puma wareꞌnasanaga tiyogaba pumagiri nunamu yiyo. Tiguꞌamaba aseyo pegina aritiꞌamaba kunta piye, untiye.
42 Piya ute to kake wama kamana maya uma nunamu untiye: Nabanempa, nauki nakiyenama naparikena abegana kampa aogi pekanapa, uwa abiwaeyekana kae kamanaꞌama esegi peno, untiye.
43 Piya ute aꞌwae puma abagi kinaꞌpa iwaita mintuguna ampa ibatantiye. Piya pogana iyowama kunta pogana igate
44 itate to wama nunamu yogana kakaga puntiye. Kamana maru yome, pabi kamana uma untiye.
45 Nunama aꞌya atate aꞌwae puma abagi kinaꞌmiti kanama maya uwaimintiye: Tiwairabampa waikena untiripa, ainti piya piyo. Mapa Wasanama Ntagara nae agunta kinaꞌmiti unatakena kanaꞌne agarosaye.
46 Pika asiyigi wano. Minaga punatakibi ntagara pabigo irosaye, Isu piya untiye. Kama kinaꞌmi Isu arakurintawe
47 Piya uwaimima mintogini, nagisarisa tara tumpaema abagi kina igetisa iyoꞌyagara Yutasi aeba uwoma kama kinapa paita itaogini pabigo ampa irosantawe. Tabe mono kiye kinape Isureyo kiye kinape uwaitauguni, irebube maꞌena kasupe maete ampa irosantawe.
48 Pigoya, kana minaga yagaramaba marupa maya kamana uwaimintiye: Amo nakiri agantiripa, pimpayemagiri arakuriyo, uwaimintiye.
49 Piya uwaimite ampa irosaꞌma Isuti wama: We, Tisane, untana pabigo amo nantiye.
50 Piya pogana Isuba maya omintiye: Naoꞌyagara, yoga pikena ute kanampepa karuꞌena ibanto po, untiye. Piya yogini igeba pabigo kanama arakuꞌma ayatara kirokaentawe.
51 Piya puguna Isuge mintume kina igetisa kaꞌwaina kasonkapa abamu kantibisa pabigo aꞌyu pumagina tabe kiye yagarama kayokaya yagara aegukena age arisa kaintiye.
52 Piya pogana Isu maya omintiye: Kasokapa maemo kabamu kantibinti paka puro. Kaꞌwaina aeba maꞌena puntanaba antotapa maꞌenamana aꞌyaꞌwaema kinapa iyegukiye.
53 Pigoya, kaeba naekaba nanawe yene. Nabanempapa kanara kampa esotakana pabigo uwoma enisore kina uwaitakini tumima naoꞌmaekibewema, kampa napiyewo.
54 Pigoya tumima naoꞌmaeyigina monota naeka meto kamana unta, piꞌna nkauꞌwapa kampa aborasanaga, uwa pintanaba aboranamikiye, Isu untiye.
55 Piya utegina uwoma kina arakurikena kanaume, igepa maya uwaimintiye: Tigeba naeka abeganaba kama yagara kanta pegiri irebu maꞌena kasutintaga kanama ampa nababewo. We, naeba asi nasi abora, tabe mono namapi mono urimima miyone. We, narakurikena untiripa pita narakurisanawe.
56 Piya, pipa uwaba kampaye. Pipa poropete kinaꞌmi mono isapisa kamanaꞌama esegi puwaeyenema aborawaentiye, Isu untiye. Piya yogini abagi kinaꞌmiba Isu atate aꞌyaꞌmagini iyegaka wawaegaintawe. Monota paitanta kiye yagarama ntamapi ababute intawe
57 Pigoya, irebu kina igeba Isu arakuꞌurite monota paitanta kiye yagara Kayapasi aeti ababute wantawe. Pi ae namapi mono tisa kinape kabiyume kinape aki pumagini mintantawe.
58 Pigoya Isu ababute wauguna, Pitaba igama maro ita maro ita putagina ainti wantiye. Wamagina uma irosaꞌmagina tabe kiye yagarama kagisa kagopi uma paꞌima kayokaya kinaꞌmi nkibakapi uma: Isupa ayabaya otakibeka agakuwe, ute uma maraꞌmintantiye.
59 Pigoya tabe kiye kinape aꞌyaꞌma monotasa kanisore kinape igeba Isu kumpari kamana maema aborama otamagini, aegukena kamana umagini abintawe.
60 Aibuntini kumpari kamanapa uwoma uma aboramagini abumepa aeguyema kamanapa kapa kampa aboraogini aguyosaꞌma mintantawe. Piya puguni tara yagararamisi aborama,
61 Isuka maya untase: Ma ntagara aeba Koti tabe mono nama akasabaꞌma kakaga yaga aꞌya peka to kake kima aꞌya pukuwe yogara abintomene, untase.
62 Piya yusuguna paitanta kiye yagara aeba asimagina Isu maya omintiye: Kae kamana yepa nanaraka ugatagana pipa ka aukaꞌisaba ukena napiyepera kampaye, untawe.
63 Piya yogana, Isuba kamana kampa unta asabaꞌmagina mintantiye. Piyama mintogana monota paitanta yagara aeba to kake abigama untiye: Koti miyaba yagara, ae aobi kabigakanapa umagina esegi po. Kaeba Karaisiti, Koti Ntagaragabera kampayema, abigantiye.
64 Abigaogana Isuba maya untiye: Pabigo yene. Pigoya, ka urimukuwa abiyo: Aintiba Wasanama Ntagara naeba esegiyenama nkagowama ae ayatakanti mimagi mantarisa ibinankama nkabobori tumpa irosakiri nagakibewe, untiye.
65 Piya yogana monota paitanta kiye yagara aeba pi kamana abima amoꞌena puma kaiwa atutu puntana aokina maya uwaimintiye: Aeba Koti akayasotaya, pika nanaga to kake ukune. Pipa kampaye.
66 Pi kamanapa tigeba abimagiri, ayama napiyewe, untiye. Piya yogini igeba: Aeba ataena piya, aeguma kaiyo, untawe.
67 Piya utegini, igeba Isu nkaowapi kaisa potama aeguyuguni, kaꞌisa kinaꞌmiba iya kasu atamara aeguntini,
68 karana puma maya untawe: Kaeba Karaisiti yagara mintanapa, kaeguyemi ntagarama nkagewapa yo, untawe. Pita Isuka agantuwema uwame otantiye
69 Piya puma mintuguna, Pita aeba abeꞌisa kagisa kagopinti mintantiye. Mintogana, kayokaya araga kaꞌwaina aeti wama maya untiye: Kaeba Isu, Karariya yagara, aege miyempene, untiye.
70 Piya yogana, aeba wasana mintume kina ige iyobi uwame umagina: Nae kampa abinto kamana kaeba yene, untiye.
71 Piya ute kabebi tumikena pogana, kayokaya araga to kaꞌwaina agate aeka wasana maya uwaimintiye: Ma ntagara Isu Nasareti kumatasa yagara aege miyine, uwaimintiye.
72 Piya uwaimogana Pitaba to kake uwame uma waya untiye: Naeba kana yagara aepa kampa agantuwe. Pipa Koti nkaobi taga suwe, untiye.
73 Piya otate mintogini, wasanamiba Pitati wama maya untawe: Taeba kamanakapa ago abibebe pune. Kaeba taga ige aruyenabisawe, untawe.
74 Piya yuguna, to kake Koti nkaobi uma esegima aꞌyugu kamana uma: Naeba kana yagaraba kampa agantuwe, uwaimintiye. Piya yogana pabigo kokore aga untiye.
75 Piya pogana, Isu kamana maya unti: Kokorewama kampa aga untakana kaeba kakagara uwame unatakibene unti, pi kamana napimagina abeꞌi wama tabera antara puma kubeꞌena puntiye.
1 Marogini tabe mono kiye kinape to kaꞌisa Isureyo kabiyume kinape aꞌyaꞌma aki puma Isu aeguma kaikena kamana uma esegi puntawe.
2 Piya yuguni Isu ayatarara kirokaetama ababute tabe yagara Pairatiti metantawe. Yutasi uma kobama purintiye
3 Pigoya purikiyema uma esegi puguna, Yutasi minaga yagara aeba agama abite: Nanaga piyaba puwe, ute, antawama kampa aogi pogana, kana 30-wa mone siriba amintapa maete kiya kina aꞌwae puma imintana uwaimima maya untiye:
4 Naeba kumpari sumagi, kaintanawa kampa wainta yagara minaga pogana ataena piye. Piya yogini igeba: Taetiba nanaga kanama yene. Pipa kaeꞌenawe, untawe.
5 Piya ute moneba aꞌa-o yuguna, pi tabe mono namapinti uma maebugaite kaiwa amirite wama uma kobantiye.
6 Piya pogini, tabe mono kiye kinaꞌmiba kana moneba kita puntini maya untawe: Moneba wasana ikantanaga tabe mono namapisa monebisa atakanaba kampa aogi pikiye, untawe.
7 Pigoya, kana monerasaba ayabusune, umagini mare-u me-u pumagini magabu pome ntagara ae ma, namu kinaꞌmi ige iru yuga, pitaꞌi aboranema ika puntawe.
8 Pigoya, kana mawama nkageba: Kora mpawe, untawe. Piya kana agiba uwa waintiye.
9 Pigoya, paipa mono kamana Poropete Yeremaya nkawamupi aboranti, pi kamanaꞌama nkauꞌwapa aboranti, maya untiye: Isureyo kina igeba ikantanawa 30-wa mone siribawe, untawe.
10 Piya, kana monerasa magabu pome ntagara ae ma ika puntawe. Waꞌegawama unamintisa puntawe, Yeremaya piyama kaentiye, untiye. Pairati Isu abigantiye
11 Pigoya, igeba Isu tabe yagara Pairatiti ababute wauguna abigama maya untiye: Yuta kinaꞌmi Waꞌega Yagaraba kaewo, untawe. Piya yogana Isuba: Pabigo yene, untiye.
12 Pigoya, tabe mono kiye kinaꞌmibe monota kabiyume kinaꞌmibe kamana otaugunaba, antotapa kampa aꞌwae puma uwaimintiye.
13 Piya pogana Pairatiba abigamagina maya untiye: Kamana ugataganapa, nanaga kaꞌiba kamanapa kapa kampa yene, untiye.
14 Piya yogana Isuba kamanapa kapa kampa aꞌwae pumagina yogana, kiya yagaramaba uwoma agi napintiye. Pairatiba Isupa maripora aeguyiyo untiye
15 Pigoya aꞌyaꞌma kabu, Pasoba naninta nakena yagaba, pi mparisa kiya yagarama aeba Yuta kinaꞌmi nkigaꞌna kina kaꞌwainaka age yugunaba auꞌima iyoba imima mi pomekana piye.
16 Pigoya, pi ntagaba ka kamparaga yagara igaꞌna namapi mintantiye. Agewapa Parabasiwe.
17 Pigoya, wasana aki puma miwaentuguna Pairatiba mayama ibigantiye: Ke uwa ataoma yewe. Parabasipera Isu aeba Karaisiti yagarawe ye, ae uwa atasuwe, piya untiye.
18 Piya Yuta kina igeba uwa Isupa igobi potama aeti metaume pi abintana piya untiye.
19 Pigoya, Pairatiba kamana uma aꞌya pikena yabaera mintogana, wayaꞌwampa aeti maya kamana ataogana wantiye: We, naeba iba asekapa amonta agama aeka tabera nantara puwa, pi aogi asoya yagara uwa atao, untiye.
20 Pigoya tabe mono kiye kinape kabiyume kinape igeba aꞌyaꞌma kinaꞌmi imo atikebaꞌmagini maya untawe: Omigina Parabasi uwa atantana, Isupa aeguyenoma, omiyo, untawe.
21 Piya yuguna kiya yagaramaba to kake ibigama maya untiye: Aepera, ae uwa ataoma yewe, untiye. Piya yogini igeba: Parabasiwe, untawe.
22 Piya yuguna maya uwaimintiye: We, Karaisiti yagarawe ye ntagara, aepa aya pukuwema, ibigantiye. Piyama ibigaogini, aꞌyaꞌwaemagini ka kamana umagini: Maripora pureno, untawe.
23 Piya yuguna Pairatiba to kake umagina: Nana kaintanarakawe, untiye. Piya yogini to kake tabe kamana uma: Maripora pureno, untawe.
24 Piya yuguna Pairatiba napiyomepa kamanaꞌwampaba kampa aogi puntiye. Piya pogini, pabigo tabe maꞌena pikena puguna, yogini wani amuguna iyora ayapa wani nkaentana maya untiye: Ma ntagarama kaintanaba naetiba kampa tamakaeyano. Pipa tige aꞌwae puma timuwe, untiye:
25 Piya yogini igeba iwamu kaꞌi kaꞌi: Kanarane, untawe: Pi kaintanaba taebe tagaꞌnugitibe taeti waikiye, untawe.
26 Piya yuguna, Pairatiba Parabasi uwa ataogana igeti waogana, Isupa eru kasutasa aegugasimagina, maripora aeguyiyema irebu kina ababuwaimintiye. Irebu kinaꞌmi Isu akayasotantawe
27 Pigoya, pi tabe kiye yagarama irebu kinaꞌwa kaꞌisamiba igeba Isu ababute namapintisa tumima, irebu kinaꞌmi ntamapinti ababute ima, yuguni aꞌyaꞌma irebu kinapa ampa aki puntawe.
28 Aki puwaeyuguni Isunta kaiwapa atagasima tabe yagaramanta tete kai potantawe.
29 Pigoya, ake wainta taminoku ka pugasimagini aꞌnotapa taminonkitantawe. Piya potantini, wantapa ka amuguna ayatakanti uꞌmagina tabe kina kanta puma mintantiye. Aibogini igeba wama agora uma irakabima akayasotama maya untawe: We, Yuta Waꞌega Yagara, kaeba aya pene, untawe.
30 Piya ute, igeba kaisa potama, wantawa apaꞌma pabigo aꞌno nkaiwaꞌma aeguntawe.
31 Piyama aegumugaitegini, pi tete kaiba atagasimagini to kake aeꞌwa kai maema amitamagini maripora aegukena ababute wantawe. Isu maripora aeguyuguna purintiye
32 Pigoya, ababute wama keꞌi ka yagara uma abatantawe. Agewapa Saimoni aeba Sairini kumatasa, ae tutusotauguna Isunta maripoba maema aesagaꞌu ataogini wantawe.
33 Wamagini, maba ka agewapa Korikota, pipa kamanatepisa aꞌno nkayampu amuta, uma irosantawe.
34 Uma irosaꞌma waini wanipi asa tusa wanipa paigu puma amikena yuguna, nabigategina aꞌa-o untiye.
35 Piya pogini pabigo maripora itagintawe. Piya puguna maripora mintogini, kaiwata teteꞌena pumagini pako puntawe.
36 Piya puritegini maraꞌmimagini kiya kabitantawe.
37 Pigoya, aꞌnotapa agowapa mayama kaimaranta waintantiye: Mapa Isu, Yuta kinaꞌmi Nkwaꞌega kaema atantawe.
38 Pigoya, maꞌena kuntana yagara tara kaga maripora iyeguma to ayatari to ayatari pumagini isitantawe.
39 Pigoya pitaꞌi wa waya wate kanate pume pi kinaꞌmiba Isu akaya kamana omima maya untawe:
40 We, tabe mono nama akasabaꞌma kakaga yaga kima aꞌya pukuwe yempe ntagaragawa, kaeka kaupa aoꞌmaeyowe. Kaeba Koti Ntagara mintanapa, mariporasa iyobaꞌma tumowe, untawe.
41 Pigoya, tabe mono kiye kinape kabiyume kinape igeba pabiyama akayasotama maya untawe:
42 Wasana kaꞌisa kina iyoꞌmaentikana, aeꞌwa nkauꞌamampa aoꞌmaekenagaba igiga pumagina kunta piye. Aeba Isureyo kina tae Waꞌega mintanaba, mariporasa iyobaꞌma tumeka aeti uma atokaeyano.
43 Aeba: Naeba Koti Ntagara nawe, ute, amatitiꞌenawapa Kotiti atantegina waintika, pika Kotiba aeka abekanaba iyobaꞌatano, untawe.
44 Pigoya maꞌena kuntana yagara tara aeke kaga iyegunta, isigeba pabiyama akayasotama umaginisi kamparaga potantase. Isu puꞌwantiye
45 Piya potama mintuguna, kagi abebe pogana ase uma maba kanarasama waintogana atamaisa puntiye.
46 Piya atamaisaogana Isuba pabigo kegaꞌe uma maya untiye: Iro-i, Iro-i, arama sabatani, untiye. Pipa maya untiye: We Kotinempa, Kotinempa, nanaga natane, untiye.
47 Piya yogini, mintume kina igetisa kaꞌisa kinaꞌmi abite maya untawe: Mae ntagara aeba Iraiyaka kegaꞌe uma agisiye.
48 Piya yuguna, ka yagara aeba karuꞌena wamagina kai atuta asa wanipi aemagina asara kitamagina Isu amikena pogini kaꞌisa kinaꞌmiba maya untawe:
49 Kaeba uwa ataganao. Iraiyaba taga kanama iyobaꞌatakana tumeka agakune, untawe.
50 Piya yuguna, Isuba to kake tabera kegaꞌe yogana aumaba iwaegaintiye.
51 Piya puroganaba, tabe mono namapi Koti nkaukaꞌi akumparanta kaiba atisa aturite tumima abeti tumpa tasawaogana tara awatentana puntiye. Piya puntana imimapa tabera pogana tabe yabapa aibako pumagina kuya mpaentiye.
52 Pigoya, pitaꞌi wasana iru wairite wanti, pipa aꞌwaiyogini mono kina, pai purinta kina, igetisa kaꞌisa kinapa iyogama asintawe.
53 Piya, Isu aeꞌwa paitama asiyogini igeba irubintisa imagini aota mono kuma, Yerusaremi, ima uwoma kinaꞌmi aborawaimintawe.
54 Pigoya, irebu kinaꞌmi kiye yagarabe aokinape Isuta kiya kabima mintume kinape, igeba pi imima pomepe to kaꞌisaenabe agamagini abite, iyekuru puma maya untawe: Ma ntagara aeba taga Koti Ntagarawe, untawe.
55 Pigoya, Isu aegunta pitaꞌiba wayapa uwoma pagasari mimagini pi puntanaba agama abintawe. Igeba Isu Karariya marisa aegaꞌma kanama kayokayaꞌena potantaꞌnagi,
56 igeba Mariya Matara kumatasa wa, piya to auka Mariyawa, Yemisike Yoseke isinowa, pigoya to kaꞌwaepa Sebeti ntagara tara isige isinowa, to kaꞌisa waena sumagini, igeba kaga mimagini agantawe. Isu kaitantawe
57 Pigoya asenamaisaogana, Arimatiya kumatisa aꞌyo ampiyome tabe kutantaga yagara, agewapa Yosepe, Isu mpono abima abagi puma mintantiye. Pi ae kanantiye.
58 Kanama Pairatiti wama, Isu yabaewaka omogana abite yogini irebu kina igeba amintawe.
59 Piya puguna Yosepeba wasana wasaba maema wae kairasa asagakokima maete wantiye.
60 Maete wama, yaba nkage, aewa nkaruwema kana kaba kuꞌmaranta, pipi Isupa metama tabe yabantama ka aꞌwarigasogana awaba aigunkaogana wantiye.
61 Pigoya kana wasana aru awarapa Mariya Matara kumatasawa, to Mariya aoꞌwaena suma isigeba mimaginisi agantase. Irebu kinaꞌmi Isu nkarura kiya kabintawe
62 Marogana sabati aboraogini, tabe mono kiye kinape Parasi kinape igeba aki purite Pairatiti wamagini maya untawe:
63 Tabe yagarare, taeba kamana ka napiyompeka ugamukune. Aegutompe kumpari yagara aeba aogama mintana maya untiye: Puꞌmagi papa kakaga peka naogamagi asikuwe, untika asisanaga kabikibewe.
64 Piya abagi kinaꞌwampi wamagini kuntana isuꞌurintini ago asiwayema, wasana kampari uwaigaisanaga yegini irebu kina igeba arura esegima kiya kabimagini mintigina, kakaga yaga aꞌya peno. Paipa kumpari sumagina: Naeba Koti ntagara nawe untikana, aintisa kumpari kamanaꞌama abobori anosasanaga, uwoma tagi napima ugamune, untawe.
65 Piya yuguna Pairatiba maya uwaimintiye: Kanaraka irebu kina timekiri ibabute wama wasana aruba akumpa kiya kabiwaitaigini pasemagini mikibewe, untiye.
66 Piya yogini igebe irebu kinaꞌmige wama kana aruba akunkatamagini yabankama nkaboboriba araꞌena potama irebu kinapa itauguni kabima mintantawe.
1 Pigoya, sabatiba aꞌya puwaogini waintuguna marusa yaga aborantiye. Piya pogana marikena poginisi, Mariya Matara kumatasawa, to auka Mariyawa suma, isigeba aru agakena wantase.
2 Wausuguna tabe imima pabigo pogana, Waꞌegawamatisa enisore kaꞌwaina mantarisa tumima yabapa aebasanakasogana aꞌwaiwaogana abobora mintantiye.
3 Piya, apayaena kanta eꞌwasa pemisa aowarisaba puwaogana kaiwatisaba waeꞌwae puma ibina kanta puwantiye.
4 Pigoya, arura kabima mintume kina igeba agate iyekuru pumagini tabaraba puma purikena kanta puma mintantawe.
5 Pigoya, tara wae tara uma irosausuguna enisorewama maya uwaisimintiye: Tisigeba a-tisiyekuruba piso. Naeba abintuwa, tisigeba Isu maripora aegunta agakena kanase.
6 Pigoya aeba mataꞌiba kampaye. Aeba maru urimintisa pumagina ago asiwaye. Tisigeba kanama marunkapa mampaye. Pipa agate,
7 karuꞌena wama abagi kinaꞌwa maya uwaimiso: Isu aeba purintapisa ago asiwaye. Pigoya, Karariya mari wama paitaritakiya, tigeba pitaꞌi wama agakibewema uwaimiso. Pigoya, ago urisimuwe, untiye.
8 Piya uwaisimoginisi, isigeba karuꞌena aruba irikabitate isiyekuru puma tabera isiꞌmu purite abagi kina uwaimikena karuꞌena wantase.
9 Piya pusuguna keꞌi Isuba pabuma: Aya pese, untiye. Piya yoginisi, isigeba agora uma parokaema agisara arakuꞌma ae age maema asagaꞌyuntase.
10 Piya pusuguna Isu maya uwaisimintiye: Tisigeba a-tisiyekuruba piso. Wama naokina uma uwaimisigini Karariya mari ima pitaꞌi nagaiyo, piya uwaisimintiye. Irebu kinaꞌmi kamanane
11 Pigoya waya tara isigeba wausuguni, wasana aru kiye kina igetisa kaꞌisa kinapa karuꞌena kumati ima, pi aborantintanama nkawaga kamana tabe mono kiye kina uwaimiwaentawe.
12 Pigoya, kiya kina igeba monota kabiyume kina igegaꞌe uma igege kamana uma abiritegini, igeba irebu kina mone uwoma imimagini maya uwaimintawe:
13 Tigeba maya yiyo: Aseka tauwaitamintokini, abagi kinaꞌwampi kanama Isu nkaupa kuntana isoꞌurewe, yiyo.
14 Piya kamana kiya yagaramaba abite kaꞌena puritasanagaba a-tiyekuruba piyo. Taeba kanara uma kayone potakune, untawe.
15 Piya uma uwaimuguni, irebu kina igeba pi mpone maeritegini kamana uwaiminta, pi wasintawe. Pigoya pi kumpari kamanaꞌamaba Yuta kinaꞌmitiba anosama tabe wairite kanantiye. Isu amuta aborama mono yugaraka uwaimintiye
16 Pigoya, abagi kina nagisarisa ka tumpaema, igepa Karariya mari ka amuti Isu igegaꞌe yogini intawe.
17 Imagini, aeꞌwa agate aeti uma parokaema agisuntawe. Piya puguni, kaꞌisa kinaꞌmiba iguꞌama tara tara puntawe.
18 Piya puguna, Isuba igora wamagina maya uwaimintiye: Kotiba mantarisa mabisa esegiyenaba aꞌyaꞌma nae namiwaentine.
19 Pika tigeba maga maga wama toma toma nae nage awaga kamana uwaimigini naegaraigiri, Nabanempawa, Yagarawa nawa, Aota Awamusana suma, tae tageraka mono wani paiꞌitaiyo.
20 Aibumagiri kamana uriminto kamana uwaimigini wasiwaeyiyo. We, tigeba abiyo: Naeba aꞌyaꞌma yagaba asi nasima tigege miyekana pi kanapa aꞌya pikiye, Isu piya untiye.