<h4>1</h4>
<p><sup>1</sup> <p/><font color='#7a8080'>[1-2]</font> Инаг хайрата Тимофей хүбүүмни, шамда би Павел бэшэнэб. Би Бурханай эрхэ мэдэлээр <b>элшэнгээр</b> һунгагдаад, маанадта Иисус Христостой нэгэдэхэдэмнай найдуулагдаһан амидарал тухай номнохоёо эльгээгдэһэн байгааб. Бурхан Эсэгэ болон манай Дээдын Эзэн Иисус Христос шамда һайн һайханиие, үршөөл хайра ба амгалан тайбаниие үршөөг лэ.
<p><sup>2</sup> 
<p><sup>3</sup> <p/>Үбгэ эсэгэнэрэйнгээ мүргэдэг Бурханда би үнэн зүрхэнһөө алба хэжэ, үдэр һүнигүй тэрээндээ зальбархадаа үргэлжэ шамайе дурдан, баяр хүргэжэ байдагби.
<p><sup>4</sup> Дуһааһан нулимсануудыешни һанаад, шамтай уулзаха гэжэ ехээр лэ хүсэнэб. Тиигэбэл, би баяраар дүүрэхэ һэнби.
<p><sup>5</sup> Үнэн зүрхэнһөө Бурханда һүзэглэдэг байһыешни би һананаб. Лоида хүгшэн эжышни, Евника эхэшни үнэн зүрхэнһөө һүзэглэдэг бэлэй. Шишье баһал тиимэ һүзэгтэйш гэжэ би этигэнэб.
<p><sup>6</sup> Тиимэһээ гараа дээрэшни табихадамни шамда Бурханһаа үгтэһэн абьяас бэлиг зосоошни бадаржал байг лэ.
<p><sup>7</sup> Бурханай үршөөһэн <b>Нангин Һүлдэ</b> бидэниие аймхай болгодог бэшэ, харин хүсэ шадалаар, хайра дураар дүүргэдэг, бэеэ барижа ябаха шадал үгэдэг юм.
<p><sup>8</sup> <p/>Тиимэһээ манай Дээдын Эзэн Иисус Христос тухай гэршэлхэеэ бү айгаарай, Христосой түлөө түрмэдэ һуужа байһан намһаа бү эшэжэ, улайжа байгаарай. Харин Бурханай үгэһэн хүсэ шадалаар <b>Һайн Мэдээсэлэй</b> түлөө зоболон дабажа байгаарай.
<p><sup>9</sup> Бурхан хэһэн хэрэгүүдэймнай түлөө бидэниие абараа бэшэ, харин өөрынгөө һайн хүсэлөөр ба үршөөл хайраар бидэниие абаржа, гэгээн арад болгохоёо дуудаа юм. Бурхан сагай урадхалай эхи абахаһаа урда бидэндэ Иисус Христосой ашаар өөрынгөө үршөөлые хайрлаа юм.
<p><sup>10</sup> Харин мүнөө манай <b>Абарагша</b> Иисус Христосой ерэхэдэнь, тэрэ үршөөлынь эли болоо. Христос Иисус үхэлые туйлажа, Һайн Мэдээсэлэй ашаар бүхы хүнүүдтэ мүнхын амидарал үршөөгөө.
<p><sup>11</sup> <p/>Һайн Мэдээсэл номнохымни тула Бурхан намайе элшэн ба һургагша болгон табяа.
<p><sup>12</sup> Тиимэһээ би иигэжэ тулижа зобожо байнаб, зүгөөр би эшэжэ улайнагүйб. Ушарынь юуб гэхэдэ, хэндэ һүзэглэжэ байһанаа би мэдэнэб, намда даалгаһан юумэеэ  тэрэ Үдэр болотор Иисус Христос хадагалжа шадаха гэһэн этигэлтэйб.
<p><sup>13</sup> Минии шамда хөөрэһэн үнэн зүб һургаалые хатуугаар баримталжа ябаарай. Тэрэ һургаал шамда жэшээ боложо байг. Иисус Христостой нэгэдэхэдээ олоһон һүзэг, хайра дураяа бадараажа ябаарай.
<p><sup>14</sup> Шамда даалгагдаһан үлзытэй һайхан зүйлнүүдые сэдьхэлдэмнай оршоһон Нангин Һүлдын хүсэ шадалаар хадагалжа байгаарай.
<p><sup>15</sup> <p/>Аси можын бүхы зон, тэдэнэй тоодо Фигелл ба Ермоген хоёр намайе орхижо ошоо гэжэ ши мэдэнэш.
<p><sup>16</sup> Гэхэтэй сасуу оло дахин һанааемни заһажа байһанайнь түлөө Дээдын Эзэн Онисифорой гэр бүлэдэ үршөөл хайраа харуулһай даа. Түрмэдэ һуужа байна гээд тэрэ намһаа эшэжэ зобожо байгаагүй,
<p><sup>17</sup> харин <b>Рим</b> хото ерээд, намайе ехэл удаан бэдэржэ олоһон байгаа.
<p><sup>18</sup> Дээдын Эзэн ерэхэ Үдэртөө тэрээндэ үршөөл хайраа хайрлаһай даа! Эфес хотодошье байхадаа, тэрэнэй намда ехэл туһа хүргэжэ байһыень ши һайнаар мэдэнэш.
<h4>2</h4>
<p><sup>1</sup> <p/>Хүбүүмни, Иисус Христосой хайрлаһан үршөөл хайраарнь бэхижэжэ бай.
<p><sup>2</sup> Олон гэршэнэрэй хажууда хүнүүдые һургаха шадабаритай, этигэлтэй зондо намһаа дуулажа абаһан һургаалаа дамжуулаарай.
<p><sup>3</sup> <p/>Иисус Христосой үнэн сэхэ сэрэгшэдэл адляар зоболонгуудые дабажа байгаарай.
<p><sup>4</sup> Алба хэжэ байһан сэрэгшэ ахалагшадаа һайшаагдахын тула юрын ажамидаралтай холбоотой хэрэгүүдтэ оролсодоггүй юм.
<p><sup>5</sup> Урилдаанда хабаадажа байһан тамиршан дүримүүдые баримталаагүй һаа, шагналда хүртэдэггүй юм.
<p><sup>6</sup> Хүндэ ажал хэжэ байһан таряашан гараһан ургасаһаа түрүүн өөрөө амсаха ёһотой.
<p><sup>7</sup> Хэлэһэн юумэнүүд тухаймни бодомжолжо байгаарай. Дээдын Эзэн шамда эдэ бүгэдые ойлгохо ухаан үршөөхэ.
<p><sup>8</sup> <p/>Минии номноһон <b>Һайн Мэдээсэлэй</b> ёһоор үхөөд амидырһан <b>Давидай</b> үри һадаһан болохо Иисус Христосые һанажа байгаарай.
<p><sup>9</sup> Тэрэл Һайн Мэдээсэлэй түлөө би зобожо, үшөө тиихэдэ дээрмэшэндэл мэтэ гэнжээр хүлеэтэй байнаб. Зүгөөр Бурханай үгые гэнжээр хүлижэ болохогүй юм.
<p><sup>10</sup> Бурханай шэлэжэ абаһан хүнүүдэй Иисус Христосой ашаар абарагдан, мүнхын алдарта хүртэхын тула би эдэ зоболонгуудые дабажа байнаб.
<p><sup>11</sup> Иигэжэ хэлэһэн үнэн зүб юм: <p/>«Хэрбээ бидэ тэрээнтэй хамта үхэһэн байбал, <p/>Тэрээнтэйл хамта амидархабди.
<p><sup>12</sup> <p/>Хэрбээ бидэ зоболонгуудые дабажа байбал, <p/>Тэрээнтэйл хамта зонхилхобди. <p/>Хэрбээ бидэ тэрээнһээ арсабал, <p/>Тэрэ баһал бидэнһээ арсаха.
<p><sup>13</sup> <p/>Амалһан юумэеэ дүүргэдэггүй байхадамнай, <p/>Тэрэ айладхаһан лэ юумэеэ ходо дүүргэдэг, <p/>Ушарынь тайлбарилжа хэлэбэл, <p/>Тэрэ өөрыгөө хубилгаха аргагүй юм».
<p><sup>14</sup> <p/>Хэлэһэн эдэ бүгэдыемни шагнагшадтаа һануулжа байгаарай. Үгэнүүд тухай арсалдахаяа болигты гэжэ Дээдын Эзэниие гэршэ болгон захиржа байгаарай. Тиимэ арсалдаан шагнагшадта ямаршье туһагүй, тэдэнэй һүзэг этигэл алдуулдаг юм.
<p><sup>15</sup> Һайн албатан байнаш гэһэн Бурханай магтаалда хүртэхын тула һайнаар ажаллажа байгаарай. Хэжэ байһан ажалһаа эшэжэ зобохогүйн тула Бурханай үгые үнэн зүбөөр һургажа байгаарай.
<p><sup>16</sup> Хүнүүдые Бурханһаа холодуулдаг, Бурханиие буруушааһан тэнэг шашалдаанһаа зайсажа байгаарай.
<p><sup>17</sup> Тиимэ шашалдаан болбол махабад бэеэр таража байһан эдеэртэй яра шархада адли юм. Именей Филит хоёр тиимэ дэмы юумэндэ һургажа байна.
<p><sup>18</sup> Тэдэ үнэн зүб замһаа хадуурба, бидэ <b>һүзэглэгшэд</b> амидыраабди гэжэ хэлэн зарим һүзэглэгшэдэй этигэл һүзэгые алдуулна.
<p><sup>19</sup> Тиигэбэшье Бурханай татаһан бата һуури хүдэлөөгүй юм. «Дээдын Эзэн өөрынгөө хүнүүдые мэдэхэ», «Дээдын Эзэнэй харьяалда орооб гэжэ хэлэһэн хүн нүгэлтэ хэрэгүүдые хэхэеэ болихо ёһотой» гэһэн үгэнүүдтэй тамга тэрэ татагдаһан һууриндань табигданхай байна.
<p><sup>20</sup> <p/>Томо гэртэ элдэб янзын амһартанууд байдаг: зариманиинь мүнгөөр гү, али алтаар хэгдэнхэй, нүгөө зариманиинь модоор гү, али шабараар бүтээгдэнхэй; нэгэ заримыень тусхай ушарнуудта хэрэглэдэг, нүгөө заримыень үдэр бүхэн хэрэглэдэг юм.
<p><sup>21</sup> Хүнүүдшье баһал тиимэ. Зарим хүнүүд нүгэл хэхэеэ болижо, арюун сэбэр болоод, тусхай хүнүүд болодог. Тэдэнэй ажамидарал Бүтээгшэдэ таатай арюун гэгээн байдаг, тэдэ ямаршье һайн һайхан хэрэгүүдые хэхэдэ бэлэн байдаг.
<p><sup>22</sup> Залуугай ташаяанһаа зугадажа, Дээдын Эзэндэ үнэн зүрхэнһөө зальбаржа байһан зоноор хамта үнэн зүбые баримталжа, һүзэглэжэ, хайра дуратай, амгалан тайбан байгаарай.
<p><sup>23</sup> Тэнэг, мунхаг хэрүүлһээ зайсажа байгаарай. Тэрээнһээл шэрүүн арсалдаан гарадаг гэжэ ши мэдэнэ ха юмши.
<p><sup>24</sup> Дээдын Эзэнэй зараса, ши хэрүүл гаргангүй, харин уринаар хүн бүхэндэ хандажа, тэсэбэритэй һайн һургагша байха ёһотойш.
<p><sup>25</sup> Шамда эсэргүүсэһэн хүнүүдые Бурхан нүгэл үйлэдэхыень болюулжа, өөртөө хандуулха, үнэн зүбые мэдэрхэ боломжо үгэхэ магадалтай юм хадань ши тэдэ зониие ехэл дарууханаар заһажа байгаарай.
<p><sup>26</sup> Тиигэжэ тэдэнэр <b>шолмосой</b> эрхэ мэдэлдэ байһанаа мэдэржэ, һабарһаань мултаран тэрьедэхэ.
<h4>3</h4>
<p><sup>1</sup> <p/>Һүүлшын Үдэрнүүдтэ ехэл хүшэр байха гэжэ мэдэжэ байгаарай.
<p><sup>2</sup> Хүнүүд бэеэ дээгүүр абанхай, алта мүнгэндэ шунанхай, омог бардам зантай, хорон үгэтэй, эхэ эсэгынгээ үгые дууладаггүй, хүнэй аша туһые харюулдаггүй, Бурханда шүтэдэггүй, хоорондоо эбгүй,
<p><sup>3</sup> эбсэшэгүй ябадалтай, хүниие хардадаг, бэеэ баридаггүй, дошхон хэрзэгы зантай, һайн юумэндэ дурагүй,
<p><sup>4</sup> урбадаг, убайгүй ябадалтай, маадагар зантай, Бурханда шүтэнхаар, нааршаахань дээрэ гэжэ тоолодог,
<p><sup>5</sup> Бурханда һүзэглэһэн хэбэр үзүүлээд, үнэн дээрээ сэдьхэлдээ ямаршье һүзэггүй хүнүүд байха. Тиимэ хүнүүдһээ зайсажа байгаарай.
<p><sup>6</sup> Тэдэнэй зариманиинь айлаар ябажа, элдэб янзын ташаяан хүсэлэнгүүдтэ хүтэлүүлэн, нүгэл абаһан, һуража байдагшье һаа,
<p><sup>7</sup> үнэн зүбые мэдэрдэггүй тэнэг эхэнэрнүүдэй толгойень эрьюулдэг юм.
<p><sup>8</sup> Янэс Ямбрэс хоёрой <b>Моисейдэ</b> эсэргүүсэдэг байһандал тон адляар тэдэ зон зүб бодомжолхоёо болёод, һүзэгөө алдаад, үнэн зүбэй урдаһаа эсэргүүсэбэ гээшэ.
<p><sup>9</sup> Тиимэһээ тэдэ зон холо ошохогүй, хүн бүхэн тэдэнэй тэнэг байһые мэдэрхэ. Тиимэл юумэн Ианний Имбравий хоёртой болоо һэн.
<p><sup>10</sup> <p/>Зүгөөр ши минии һургаалые баримталбаш, намдал адли ажамидарнаш, намдал адли зорилготой, һүзэгтэй, хайра дуратай байнаш, намдал адли шиираг тэсэбэритэй байнаш.
<p><sup>11</sup> Антиох, Икони, Листра хотонуудта хашуулан мүрдүүлдэг, зободог байһандамнил адли ши баһа хашуулан мүрдүүлнэш, зоболон эдлэнэш. Тэдэ зоболонгуудые би дабажа гараа хүнби, Дээдын Эзэн тэдэнһээ намайе аршалаа юм.
<p><sup>12</sup> Иисус Христостой нэгэдэн, Бурханда һүзэглэн амидарха һанаатай хүн бүхэндэ тиимэ зоболонгууд тудаха.
<p><sup>13</sup> Харин хара һанаатай, мэхэшэ зон бусад зониие эндүүрүүлхэ, өөһэдөөшье эндүүрэн бүри муу муухай юумэ үйлэдэжэл байха.
<p><sup>14</sup> Харин ши һуража абаһан үнэн зүб юумэндэ хатуу этигэжэ, тэрэнээ бэелүүлжэ байгаарай. Шамайе хэнэй һургажа байһые ши мэдэнэш,
<p><sup>15</sup> шинии үхибүүн байха сагһаа мэдэдэг Нангин Бэшэг шамайе һургажа, сэсэн ухаатай болгоно. Тиин тэрэ ухаан Иисус Христосто этигэһэн һүзэгэйшни ашаар шамайе абарна.
<p><sup>16</sup> Нангин Бэшэгэй номуудынь бултадаа Бурханай урмашуулгаар бэшэгдэһэн, тиимэһээ тэдэ булта үнэн зүб юумэндэ һургадаг, алдуунуудые шүүмжэлэн элирүүлдэг, заһадаг, үнэн сэдьхэлтэйгээр ажамидархые заабарилдаг юм.
<p><sup>17</sup> Тиимэһээ Бурханда алба хэжэ байһан хүн ямаршье буянтай һайхан хэрэгүүдые хэхэ бэлэдхэл гаража, тиимэ хэрэгүүдые бүтээхэ аргатай байхань болтогой.
<h4>4</h4>
<p><sup>1</sup> <p/>Иисус Христос хаан ороноо захирхаяа ерэхэдээ үхэһэн ба амиды хүнүүдые бултыень шүүхэ. Тиимэһээ Бурханай, Христосой урда
<p><sup>2</sup> Бурханай үгэ номногты гэжэ захинаб. Хүнүүдэй дуулаха дуратай, дурагүйшье байбалнь, сухарингүй номнохо ёһотойш. Буруу хэһэн юумэнүүдыень заажа, нүгэлнүүдыень шүүмжэлэн элирүүлэ. Гэхэтэй сасуу тэрэ хүнүүдые урмашуулжа, тэсэбэритэйгээр һурга.
<p><sup>3</sup> Ушарынь юуб гэхэдэ, хүнүүд зүйтэй һургаал дуулахаяа болёод, шагнаха дуратай юумыень хэлэдэг багшанарые өөрынгөө дураар шэлэдэг саг ерэхэ.
<p><sup>4</sup> Тэдэнэр үнэн зүб юумэ шагнахаяа болижо, хооһон үльгэр зугаа шагнадаг болохо.
<p><sup>5</sup> Харин ши ямаршье ушарта бэеэ барижа, зоболонгуудые дабажа, <b>Һайн Мэдээсэл</b> дэлгэрүүлхэ ажалаа бүтээжэ, Бурханай зарасын дүүргэхэ ёһотой уялга гүйсэдхэжэ байгаарай.
<p><sup>6</sup> <p/>Ами наһатайгаа хахасаха сагни ерээ, амимни үргэлэй архидал адляар сасагдахань.
<p><sup>7</sup> Бүхын барилдаанда би һайн барилдааб, урадхални адагтаа хүрөө, этигэл һүзэгөө алдаагүйб.
<p><sup>8</sup> Тиимэһээ үнэн сэхэ Заргаша, Дээдын Эзэн тэрэ үдэр намда үгэхэ шагналаа мүнөө бэлдээд байна. Тэрэ шагнал гансал намда үгэхэ бэшэ, харин тэрэнэй заларан ерэхые хүлеэжэ байһан бүхы зондо үгэхэ юм.
<p><sup>9</sup> <p/>Намда түргэхэн хүрэжэ ерэхые бодоорой.
<p><sup>10</sup> Димас энэ оршолон дэлхэйдэ татагдажа, намайе орхёод, Фессалоники хото руу ябаа. Крискент Галадай можо, Тит Далмадын можо ошобод.
<p><sup>11</sup> Гансал Лука намтай хамта байна. Ши Маркые дахуулжа ерээрэй, тэрэ ажалдамни туһатай байха.
<p><sup>12</sup> Тихикые би Эфес ябуулааб.
<p><sup>13</sup> Ши ерэхэдээ, Карпында орхиһон субыемни, хуйламал бэшэгүүдыемни, илангаяа арһан хуйламал бэшэгүүдыемни абажа ерээрэй.
<p><sup>14</sup> <p/>Түмэр дархан  Александр намда ехэл муу юумэ хээ һэн. Дээдын Эзэн хэһэн зэргээрнь тэрээндэ ашыень харюулаг лэ.
<p><sup>15</sup> Шишье тэрээнһээ болгоомжолжо байгаарай, тэрэ манай үгын урдаһаа ехэл эсэргүүсээ юм.
<p><sup>16</sup> <p/>Түрүүшынхиеэ өөрыгөө хамгаалхадамни булта намайе орхижо ошоо бэлэй. Тэдэ зониие Дээдын Эзэн бү зэмэлэг лэ.
<p><sup>17</sup> Тэрэ үедэ Дээдын Эзэн намтай байжа, намайе зоригжуулһан байгаа. Тиимэһээ би Бурханай үгэ бусад арадуудай бултанайнь дуулахаар гүйсэд номнохо шадалтай байгааб. Бурхан намайе үхэлэй һабарһаа аршалаа.
<p><sup>18</sup> Дээдын Эзэн намайе муу юумэнһээ аршалан, тэнгэриингээ хаан орондо гэм зэмэгүйгөөр оруулха. Тэрэ хэтын хэтэдэ алдар солотой байхань болтогой.
<p><sup>19</sup> <p/>Прискилла, Акила болон Онисифорой гэр бүлэдэ мэндые дамжуулаарай.
<p><sup>20</sup> Эраст Коринф хотодо үлэбэ. Трофимые үбшэн байһан хадань би Милет хотодо орхёоб.
<p><sup>21</sup> Үбэл болотор ерэхэ гэжэ оролдоорой. <p/>Еввул, Пуд, Лин, Клавдий болон бэшэшье <b>һүзэглэгшэд</b> булта шамда мэндые дамжуулна.
<p><sup>22</sup> <p/>Дээдын Эзэн шамтай байхань болтогой. <p/>Бурханай үршөөл хайра та бүхэнтэй оршожо байг лэ. Болтогой.