<h4>1</h4>
<p><sup>1</sup> <p/>Эсэгэ Бурхан болон Дээдын Эзэн Иисус Христостой нэгэдэһэн Фессалоники хотын <b>һүзэглэгшэдэй бүлгэм</b>, таанадые Павел, Сила, Тимофей гурбан амаршална.
<p><sup>2</sup> Эсэгэ Бурхан болон Дээдын Эзэн Иисус Христос таанадта үршөөл хайра ба амгалан тайбаниие үршөөг лэ!
<p><sup>3</sup> <p/>Аха дүүнэрни, таанадай түлөө бидэ үргэлжэ Бурханда баясхалан хүргэжэ байха ёһотойбди. Юундэб гэхэдэ, таанад бүри ехээр Бурханда һүзэглэжэ байнат, бүри ехээр бэе бэеэ хайрлажа байнат.
<p><sup>4</sup> Тиимэһээ бидэ <b>һүзэглэгшэдэй</b> бүлгэмүүдэй урда таанадаар омогорхожо байнабди. Бүхы хашалан мүрдэлгэнүүдтэ, зоболонгуудта һүзэг этигэлээ алдангүй таанадай тэсэбэритэй байһандатнай омогорхожо байнабди.
<p><sup>5</sup> <p/>Эдэ бүхэн Бурханай зарга шүүбэриин үнэн зүб байһыень батална. Саашадаа таанад <b>Бурханай хаан орондо</b> орохо эрхэтэй болохот, юундэб гэхэдэ, тэрэнэй түлөө зобожо байнат.
<p><sup>6</sup> Бурханай урда үнэн зүб юумэ бүтэхэнь болтогой: таанадые зобоожо байһан хүнүүд зобохо,
<p><sup>7</sup> <font color='#7a8080'>[7-8]</font> харин зобожо байһан таанад, мүн бидэ баясахабди. Дээдын Эзэн Иисусай һүр хүсэтэй Эльгээмэлнүүдтэйгээ тэнгэридэ аһажа байһан гал соо харагдахадань, Бурхан эдэ бүхэниие бэелүүлхэ. Бурханиие буруушааһан хүнүүдые, <b>Һайн Мэдээсэлыень</b> баримталдаггүй хүнүүдые Дээдын Эзэн Иисус хэһээхэ.
<p><sup>8</sup> 
<p><sup>9</sup> Дээдын Эзэнэй ерэхэ тэрэ үдэр тэдэ зон Дээдын Эзэнһээ, тэрэнэй алдарта һүр хүсэнһөө илгагдаад, хэтын хэтэдэ хэһээгдэн зобохо.
<p><sup>10</sup> Дээдын Эзэнэй тэрэ үдэр ерэхэдэнь, гэгээн арадынь, бүхы һүзэглэгшэдынь тэрэниие хүндэлхэ, тэрээндэ алдар соло дуудаха. Бидэнэй номноһон һургаалда этигэһэн хадаа таанадшье баһа тэрэ зоной дунда байлсахат.
<p><sup>11</sup> Тиимэһээл бидэ таанадай түлөө ходо зальбаржа байдагбди. Зохистой ажамидархынтнай тула Бурхан таанадые дуудаа. Тиин тэрэ ажамидаралые Бурхан таанадта үршөөг лэ. Һайн һайхан юумэ хэжэ байха гэһэн хүсэлэнгүүдыетнай Бурхан өөрынгөө хүсөөр бэелүүлэг лэ, этигэл һүзэгтэйгөөр хэжэ байһан хэрэгүүдыетнай эсэстэнь хүргэг лэ.
<p><sup>12</sup> Манай Бурхан болон Дээдын Эзэн Иисус Христосой үршөөл хайраар Дээдын Эзэн Иисус Христосой нэрэнь таанад соо алдаршаһай, таанад тэрээн соо алдаршаһайт.
<h4>2</h4>
<p><sup>1</sup> <p/>Дээдын Эзэн Иисус Христосой ерэхэ болон бидэнэй тэрээнтэй хамта байха суглаан тухай хэлэбэл, аха дүүнэрни,
<p><sup>2</sup> <b>Дээдын Эзэнэй үдэр</b> ерээ гэхэдэ таанад бэлээр ухаан бодолоороо мэгдэжэ, һанаагаа бү зобооройт гэжэ гуйнаб. Тэрэ үдэр ерээ гэжэ бидэниие уридшалан хэлээ, али номноо, али үгы һаа бэшэг соогоо бэшээ гэжэ таанад бодожо магадгүйт.
<p><sup>3</sup> Таанадые хэншье, ямаршье аргаар бү мэхэлэг. Бурханда эсэргүүсэһэн һүүлшын үймөөнэй болотор, һүйдхэл асардаг харата хүнэй элиртэр тэрэ Үдэр ерэхэгүй.
<p><sup>4</sup> Бурханда, нангин гэжэ нэрлэгдэдэг бүхы юумэндэ тэрэ хүн эсэргүүсэхэ, тэдэ бүхэнэй дээгүүр өөрыгөө табиха. Тиихэдээ тэрэ бүри Бурхан <b>Һүмэдэ</b> һуугаад, өөрыгөө Бурханби гэжэ баталан хэлэхэ.
<p><sup>5</sup> <p/>Таанадтай хамта байхадаа би эдэ бүхэн тухай хөөрэжэ байгаа һэм, һанана гүт?
<p><sup>6</sup> Харата хүнэй ерэхэдэнь ямар юумэн һаалта болоноб гэжэ таанад өөһэдөө мэдэнэт. Тэрэ томилогдоһон сагтаал ерэхэ.
<p><sup>7</sup> Бурханай дайсан нюусаар ажаллажа байна ха юм, гэхэдээ тэрэниие халхалжа байһан хүсэн түрүүн буураха ёһотой.
<p><sup>8</sup> Тиигээд Бурханай дайсан элирхэ, харин Дээдын Эзэн Иисус ерэхэдээ, тэрэниие аманайнгаа амисхалаар алаха, өөрынгөө һаргама ялагар байдалаар тэрэниие һүнөөхэ.
<p><sup>9</sup> Бурханай дайсан <b>шолмосой</b> хүсэ барижа ерэхэ, тиигээд элдэб янзын хуурмаг гайхамшагта үзэгдэлнүүдые, дүлгэ тэмдэгүүдые үзүүлжэ,
<p><sup>10</sup> үхэлдэ хүртэхэ хүнүүдтэ элдэб янзын мэхэ гохо хэрэглэхэ. Өөһэдыгөө абаран, үнэн зүб юумэндэ этигээгүй, дурлаагүй зон үхэхэ.
<p><sup>11</sup> Тэрэнэйнь түлөө Бурхан тэдэ зониие эндүүрүүлхэ аргатай хүсэ эльгээхэ, тиигээд тэдэ зон хуурмаг юумэндэ этигэжэ байха.
<p><sup>12</sup> Һүүлдэнь үнэн зүб юумэндэ этигээгүй, харин нүгэлтэ юумэ үйлэдэхэ дуратай байһан хүн бүхэн буруушаагдаха.
<p><sup>13</sup> <p/>Дээдын Эзэндэ инаг хайрата байһан аха дүүнэрни, бидэ таанадай түлөө үргэлжэ Бурханда баясхалан хүргэжэ байха ёһотойбди. Таанадай Нангин Һүлдын хүсөөр Бурханай хүнүүд боложо, үнэн зүб юумэндэ этигэһэн һүзэгөөрөө абарагдахынтнай тула Бурхан таанадые эхинһээ нааша шэлэжэ абаа.
<p><sup>14</sup> Бидэнэй таанадта номноһон <b>Һайн Мэдээсэлэй</b> ашаар абарагдахынтнай тула Бурхан таанадые дуудаа юм. Дээдын Эзэн Иисус Христосой алдарые хубаалсахаар тэрэ таанадые дуудаа.
<p><sup>15</sup> Тиимэһээ, аха дүүнэрни, бидэнэй номноһон ба бэшэһэн һургаалнуудые баримталжа, бата бэхи байгты.
<p><sup>16</sup> <p/>Маанадта дуратай, хайра үршөөлөөрөө маанадые хэтын хэтэдэ урмашуулдаг, бата найдабари үршөөдэг Эсэгэ Бурхамнай болон манай Дээдын Эзэн Иисус Христос өөрөө
<p><sup>17</sup> һанааетнай заһажа, һайн һайхан үйлэнүүдые ходо хэжэ, хэлэжэ байхаартнай таанадые батажуулаг лэ.
<h4>3</h4>
<p><sup>1</sup> <p/>Аха дүүнэрни, түгэсхэлдэнь иимэ юумэн хэлэхэ байнаб: Дээдын Эзэнэй һургаал таанадай дунда яажа таража байнаб, тон тиигэжэл саашадаа таража, алдаршажа байхын тула таанад бидэнэй түлөө зальбаржа байгты.
<p><sup>2</sup> Бидэниие нүгэлтэ, хуурмаг хүнүүдһээ зайсуулжа байхыень баһа Бурханда зальбаржа байгты. Хүн бүхэн Бурханай Үгэдэ үнэн сэхэ байдаггүй ха юм.
<p><sup>3</sup> <p/>Гэхэдэ Дээдын Эзэн этигэл найдабаритай юм. Тиимэһээ тэрэ таанадые батажуулжа, <b>шолмосһоо</b> аршалжа байха.
<p><sup>4</sup> Таанад бидэнэй захирһан юумые хэхэт, саашадаашье хэжэ байхат гэһэн хатуу этигэл Дээдын Эзэн бидэндэ үгэжэ байна.
<p><sup>5</sup> <p/>Бурханай хайра дурые мэдэрүүлжэ, Христосой ерэхые хүлеэхэ тэсэбэри Дээдын Эзэн таанадта үршөөг лэ.
<p><sup>6</sup> <p/>Аха дүүнэрни, бидэнэй үгэһэн захяа заабариие сахидаггүй, журамгүй <b>һүзэглэгшэдһөө</b> зайсажа байгты гэжэ Дээдын Эзэн Иисус Христосой нэрэ алдараар таанадтаа захиран ханданабди.
<p><sup>7</sup> Бидэнэйл хэһэн юумые һажаажа хэхэ ёһотойгоо таанад өөһэдөөшье һайн ойлгоно ха юмта. Таанадтай хамта байхадаа бидэ журам сахидаг бэлэйбди.
<p><sup>8</sup> Бидэ хэнээшье туһаламжые түлөөһэгүй абадаггүйбди. Таанадай хэндэшье ашаан болохогүй гэжэ бидэ үдэр һүнигүй ажалладаг бэлэйбди.
<p><sup>9</sup> Туһаламжа эрихэ эрхэгүй байһандаа бидэ тиигээ бэшэбди, харин таанадта һажаажа байха жэшээ харуулхын тула тиигэжэ ажаллажа байгаабди.
<p><sup>10</sup> Бидэ таанадаар суг байхадаа, «Ажаллаха дурагүй хүн эдихэ ёһогүй» гэжэ хэлэдэг бэлэйбди.
<p><sup>11</sup> <p/>Таанадай дунда журам сахидаггүй, юушье хэдэггүй, гансал ондоо хүнүүдэй хэрэгтэ оролсожо байдаг хүнүүд бии гэжэ дуулаһан хадаа эдэ бүхэниие хэлэнэбди.
<p><sup>12</sup> Тэдэ зониие дарууханаар амидаржа, өөһэдөө ажаллажа, өөһэдыгөө тэжээжэ байхыень Дээдын Эзэн Иисус Христосой нэрэ алдараар бидэ уряалжа, идхажа байнабди.
<p><sup>13</sup> <p/>Аха дүүнэрни, таанад ходол һайн юумэ хэжэ ябагты.
<p><sup>14</sup> Энэ бэшэг соогоо захиһан үгэнүүдыемнай дуулаха дурагүй хүнүүд байжа магадгүй. Тиигэбэл таанад тэдэ хүнүүдэй эшэжэ улайхын тула тэдэниие ажаглажа байгаад, тэдэнээр харилсангүй байгаарайт.
<p><sup>15</sup> Тиихэдээ тэдэндэ дайсадта адли бү хандаарайт, харин аха дүүнэрээ һургажа байһандал ухаан заажа байгаарайт.
<p><sup>16</sup> <p/>Амгалан тайбанай эхин болохо Дээдын Эзэн өөрөө таанадта хододоо бүхы юумэндэ амгалан тайбаниие үршөөжэ байг лэ. Дээдын Эзэн та бүхэнтэй оршожо байг лэ.
<p><sup>17</sup> <p/>Өөрын гараар би энээниие бэшэнэб: Павел таанадые амаршална. Иимэ арга бүхы хандалгануудаймни бэлгэ тэмдэг болодог юм. Иигэжэл би бэшэдэг хүм.
<p><sup>18</sup> <p/>Дээдын Эзэн Иисус Христосой үршөөл хайра та бүхэнтэй оршожо байг лэ.