1 Lencwadzi iphuma kuPawula, umphostoli waKhristu Jesu ngekwentsandvo yaNkulunkulu lowetsembisa kuphila lokukuKhristu Jesu.
2 Iya kuThimothi, umntfwanami lotsandzekako. Akube kuwe umusa, nebubele, nekuthula lokuvela kuNkulunkulu, longuBabe, nakuKhristu Jesu iNkhosi yetfu.
3 Ngibonga Nkulunkulu lengimkhonta nganembeza lomhlophe, njengobe nabokhokho bami babenta. Emikhulekweni yami nangimbonga Nkulunkulu, ngikukhumbula imini nebusuku ngingakhawuli.
4 Ngikhumbula tinyembeti takho, bese ngifisa kukubona, khona kujabula kwami kutewuphelela.
5 Ngikhunjutwa kukholwa kwakho lokute kutentisa. Ngiko kona loko kukholwa lokwacala kutfolakala kugogo wakho Lowisi nakunyoko Yunisi, ngineliciniso kutsi nakuwe kukhona.
6 Kungako ngikukhumbuta kutsi usibasele kabusha sipho saNkulunkulu lesikuwe, lowasitfola ngekubekwa ngimi tandla.
7 Ngobe Nkulunkulu akasiphanga umoya webugwala, kodvwa wasipha Moya wemandla, newelutsandvo, newekutekhuta.
8 Ngako-ke ungabi nemahloni ngekufakaza ngeNkhosi yetfu. Ubete emahloni nangami, siboshwa sayo, kodvwa hlanganyela nami ekuhluphekeleni liVangeli ngemandla aNkulunkulu.
9 Nguye lowasisindzisa wasibita ngelubito lwakhe lolungcwele, hhayi ngemisebenti yetfu, kodvwa ngelisu lakhe nangemusa wakhe, lasipha wona kuKhristu Jesu, umhlaba ungakasekelwa,
10 kepha nyalo sewembulwe ngekubonakaliswa kweMsindzisi wetfu Khristu Jesu lowakucitsa kufa; kuphila nekungabhubhi wakuletsa ekukhanyeni ngeliVangeli.
11 Ngamiselwa kutsi ngibe ngummemeteli, nemphostoli, nemfundzisi waleliVangeli,
12 kungako nje ngihlupheka nanyalo. Kodvwa ngite emahloni, ngobe ngiyamati lengetsembele kuye, futsi ngineliciniso kutsi yena unawo emandla ekukulondvolota loko lakubeke kimi, kuze kube ngalelo langa.
13 Hamba ngekukholwa nangelutsandvo lolukuKhristu Jesu. Ulandzele etinyatselweni temavi lacinile lengakufundzisa wona.
14 Loko lokuhle lokuligugu lophatsiswe kona ukulondvolote ngaMoya Longcwele lohlala kitsi.
15 Uyati kutsi bonkhe labase-Asiya bangifulatsela, boFigelusi naHemogenesi basemkhatsini wabo.
16 Shangatsi iNkhosi ingaba nebubele kubaka-Onesiforusi, labevame kungihlumelelisa njalo, ngobe abengenamahloni ngekuboshwa kwami.
17 Nakefika eRoma, wangifunisisa, wadzimate wangitfola,
18 futsi uyayati kahle yonkhe imisebenti yakhe lemihle labetinikele kuyo e-Efesu. Shangatsi iNkhosi ingamhawukela ngalelo langa!
1 Wena-ke, mntfwanami, cina emseni lokuKhristu Jesu.
2 Loko lokuve kimi embikwabofakazi labanyenti, nawe kuphatsise bantfu labetsembekile labatawuba nemandla ekukufundzisa kulabanye.
3 Hlanganyela kanye nami ekuhluphekeni njengelisotja lelilungile laKhristu Jesu.
4 Kute lisotja lelisemphini lelibuye litikhatsate ngetintfo letingesito tebusotja; phela injongo yalo kwenelisa lowo lolibutsile.
5 Futsi nemdlali, nakangawugcini umtsetfo wemdlalo, akawiniswa.
6 Ngumlimi losebenta kamatima lekufanele atfole kucala sabelo esivunweni.
7 Cabangisisa loku lengikushoko, ngobe iNkhosi itakupha kucondzisisa konkhe.
8 Khumbula Jesu Khristu wesitukulwane saDavide, lowavuswa kulabafile, njengobe ngiyaye ngisho nangishumayela liVangeli.
9 Ngilo leliVangeli lengilihluphekelako, ngidzimate ngaboshwa nangetinketane, kwaba shangatsi ngisigebengu. Kepha noko livi laNkulunkulu alikaboshwa.
10 Ngako-ke ngicinisela kuko konkhe ngenca yalabakhetsiwe, kuze kutsi nabo batekwemukela insindziso lekuKhristu Jesu baphiwe nebukhosi baphakadze.
11 Letsembekile lelivi lelitsi: “Nasafa kanye naye, siyawuphila kanye naye futsi.
12 Nasicinisela, siyawubusa kanye naye; nasimphika, naye futsi uyawusiphika.
13 Nasingetsembeki, yena uhlala etsembekile, ngobe angeke atiphikise.”
14 Khumbuta bantfu ngaloku, ubayale embikwaNkulunkulu kutsi bangaphikisani ngemavi langasiti lutfo, kodvwa lasicitfo kulabawevako.
15 Khutsalela kutiveta wemukelekile kuNkulunkulu, ube sisebenti lesetsembekile kuye lesite emahloni nalesiliphakela kahle livi leliciniso.
16 Kodvwa utigege tinkhulumo telive letilite, ngobe tibanga kungamesabi Nkulunkulu.
17 Inkhulumo yabo iyawubhidlika njengesilondza semgubho lesincincako. Emkhatsini wabo kukhona boHumenayosi naFiletusi,
18 lese baphambukile ecinisweni batsi kuvuka kulabafile sekwendlula. Bacitsisa labanye kukholwa kwabo.
19 Kodvwa sisekelo lesimiswe nguNkulunkulu solomane simile, sineluphawu lolutsi: “INkhosi iyabati lababayo,” nekutsi: “Wonkhe umuntfu lotibita ngelibito leNkhosi akakhweshe kulokubi.”
20 Endlini lenkhulu akuhlali titja tegolide netesiliva kuphela, kodvwa kukhona netelugodvo, netelibumba. Letinye tihloniphekile, letinye tekusetjentiswa nje nome kunini.
21 Nangabe umuntfu atihlanta yena angabi sitja sekusetjentiswa nje nome kunini, uyabe sewuba sitja lesihloniphekile lesingcweliswe sadzimate safanela umniyo wendlu, size silungele nome ngumuphi umsebenti lomuhle.
22 Ngako-ke balekela tinkhanuko tebusha, kodvwa hambisana nalabo labakhuleka eNkhosini ngenhlitiyo lehlambululekile, ujonge kulunga, nekukholwa, nelutsandvo, nekuthula.
23 Kodvwa ungakunaki kuphikisana kwebulima lokungenasisekelo, ngobe uyati nawe kutsi kubanga kucabana.
24 Sisebenti seNkhosi asikafaneli kutsi silwe, kodvwa sifanele kutsi sibe mnene kubo bonkhe bantfu, sibe nelisu lekufundzisa, sibeketele,
25 sibayale ngemoya lomnene labo labamelene naso, mhlawumbe Nkulunkulu angabanika kuphendvuka, badzimate balati liciniso,
26 baze basanguluke etingcondvweni tabo, baphunyule elugibeni lwaSathane, lowabagcilata kuze bente intsandvo yakhe.
1 Khumbula naku: Emalangeni ekugcina kuyawufika tikhatsi letimatima.
2 Bantfu bayawutitsandza, batsandze imali, batigcabhe, batigabatise, balulate Nkulunkulu ngenhlamba. Bayawuba ngulabangalaleli batali babo, bangabongi, babete bungcwele,
3 babete lutsandvo, bangatsetselelani. Bayawuba tinyoka, bangatitsibi, babe nebulwane, batondze lokuhle,
4 batsengise ngalabanye bantfu, babe nemawala, bakhukhumukiswe kutatisa, batsandze kutijabulisa kunekutsi babe ngulabatsandza Nkulunkulu.
5 Bayawuba nesimo sekumesaba Nkulunkulu, kodvwa babe bawaphika emandla ako; labo-ke ubakhweshele.
6 Ngobe emkhatsini wabo laba kukhona labakhokhobela kungena etindlini talabasikati lababutsakatsaka ngekusindvwa tono tabo, baholwa tinkhanuko letimihibahiba.
7 Laba labasikati bafundza njalonjalo, kodvwa bangeke befike ekulatini liciniso.
8 Njengobe boJanesi naJambresi bamelana naMosi, nabo-ke labantfu bamelene neliciniso, babantfu labanengcondvo leyonakele netehluleki ekukholweni.
9 Kodvwa bangeke bafike ndzawo; ngobe bulima babo butakwembuleka kubo bonkhe bantfu, njengebulima balabo bobabili.
10 Kodvwa wena ungilandzele kunaku: esifundzisweni, nasekutiphatseni, nasemgomeni, nasekukholweni, nasekubeketeleni, naselutsandvweni, nasekubambeleleni,
11 nasekutingelweni, nasekuhluphekeni lokwangehlela e-Antiyokhi, nase-Ikhoniyumi, naseListra; ngacinisela kuko konkhe lokutingelwa, futsi iNkhosi yangikhulula kuko konkhe.
12 Yebo, bonkhe labafisa kuphila ngekukholwa nguKhristu Jesu bayawutingelwa bahlushwe,
13 kepha lababi nebakhohlisi bayawudlanga ngebubi, bedukise, nabo bedukiswe.
14 Kodvwa wena chubeka kuloko lokufundzile wakukholwa, wati kutsi ukufundze kubobani,
15 nekutsi kusukela ebuntfwaneni bakho wayati imiBhalo lengcwele lenemandla ekuhlakaniphisa kube kusindziswa ngekukholwa nguKhristu Jesu.
16 Yonkhe imiBhalo iphefumulelwe nguNkulunkulu; ilungele kufundzisa, nekusola, nekucondzisa, nekuyala ngekulunga,
17 kuze umuntfu waNkulunkulu atewuhlonyiswa alungele kwenta wonkhe umsebenti lomuhle lamiselwe wona.
1 Ngiyakuyala embikwaNkulunkulu naKhristu Jesu, lotakwehlulela labaphilako nalabafile, ngikuyalisisa ngekubonakala kwakhe nembuso wakhe, ngitsi:
2 Shumayela livi, ulimele nome tikhatsi tivuma nome tingavumi; sola, ucwayise, uyale ngako konkhe kubeketela nekufundzisa.
3 Ngobe siyeta sikhatsi lapho bangeyiwuyemukela imfundziso lephilile; kodvwa ngekwenkhanuko yabo bayawutibutsela bafundzisi babo, bafundziswe loko labatsandza kufundziswa kona.
4 Bayawufulatselisa tindlebe tabo ecinisweni baphambukele etinganekwaneni.
5 Kodvwa wena, zitsa etintfweni tonkhe, ubeketele ekuhluphekeni, wente umsebenti webuvangeli, utifeze tonkhe timfanelo telubito lwakho.
6 Mine sengiyanikelwa; sesifikile sikhatsi sami.
7 Ngikulwile kulwa lokuhle, sengiyicedzile indzima yami, ngibambelele ekukholweni.
8 Manje sengihlalelwe kutfola umchele wekulunga, lengibekelwe wona yiNkhosi, uMehluleli lolungile. INkhosi iyawunginika lowo mchele ngalelo langa, hhayi mine kuphela kodvwa bonkhe labetsabele kubuya kwayo.
9 Shesha ufike la kimi masinyane.
10 Demasi sewungibalekele waya eThesalonika, ngenca yekutsandza lelive. Khresensi waya eGalathiya, Thithusi waya eDalmathiya;
11 nguLukha kuphela lenginaye la. Ubota naMakho, ngobe ulusito kimi emsebentini.
12 Thikhikhusi ngimtfumele e-Efesu.
13 Ubota nalelo jazi lami lengalishiya kuKhaphusi eThrowasi, kanye naleto tincwadzi, ikakhulu leti tesikhumba.
14 Alekzanda, umkhandzi welitfusi, wenta tintfo letinyenti letimbi kimi, iNkhosi iyawungenanela kuye.
15 Mkhweshele nawe, ngobe wamelana kakhulu nemfundziso yetfu.
16 Ekutiphendvuleleni kwami kwekucala kute ngisho namunye lowangimela, bonkhe bangilahla. Abangabekelwa sono!
17 Kodvwa iNkhosi yema nami yangicinisa kuze inshumayelo yami ipheleliselwe ngami, nebetive beve. Ngako-ke ngakhululwa emlonyeni welibhubesi.
18 INkhosi iyawungikhulula kuyo yonkhe imisebenti lemibi, ingisindzise, ngize ngifike embusweni wayo wasezulwini. Akube kuyo bukhosi phakadze naphakadze. Amen.
19 Hambisa boPhrisila na-Akhwila kanye nebaka-Onesiforusi.
20 Erastusi wasala eKhorinte; Trofimusi ngamshiya agula eMilethusi.
21 Shesha ute la bungakefiki busika. Bayakuhambisa bo-Ebulusi, naPhudensi, naLinusi, naKlawudiya kanye nabo bonkhe bazalwane.
22 INkhosi ayibe nemoya wakho. Umusa awube nani.