1 Lencwadzi iphuma kuPawula, umphostoli waKhristu Jesu ngekwentsandvo yaNkulunkulu, nakuThimothi, umzalwane wakhe.
2 Iya kubazalwane labangcwele baseKholose, labakholwa nguKhristu Jesu ngekwetsembeka. Akube kini umusa nekuthula lokuvela kuNkulunkulu, longuBabe wetfu.
3 Sihlale simbonga njalo nje Nkulunkulu uYise weNkhosi yetfu Jesu Khristu ngesikhatsi sinikhulekela,
4 ngobe sivile ngekukholwa kwenu nguKhristu Jesu kanye nangelutsandvo leninalo kubo bonkhe labangcwele.
5 Sibonga litsemba lenibekelwe lona ekhaya ezulwini, leneva ngalo kucala ngesikhatsi kushunyayelwa kini livi leliciniso, liVangeli.
6 Lona lifike kini, njengaloku likhona nasemhlabeni wonkhe jikelele; futsi litsela titselo landze, njengobe nakini kunjalo, seloku kwesukela mhlazana niva kahle ngebunjalo beliciniso lemusa waNkulunkulu.
7 Nafundziswa ngu-Ephafrasi lotsandzekako, losisebenti kanye natsi. Nguye losimelele ngekutsi abesikhonti lesetsembekile saKhristu.
8 Seva ngaye ngelutsandvo lwenu leninalo ngaMoya Longcwele.
9 Kanjalo-ke natsi, kusukela mhlazana siva ngani, asizange siyekele kunithandazela, sinincusela kutsi niphelele ekwatini intsandvo yaNkulunkulu ngekuhlakanipha nekucondza konkhe kwaMoya.
10 Sinicelela nekutsi niphile imphilo lefanele naletsandzekako eNkhosini, nitsele titselo emsebentini wonkhe lolungile, futsi nikhule nasekumatini Nkulunkulu.
11 Sinincusela kutsi Nkulunkulu anicinise ngemandla ebukhosi bakhe, kuze kutsi nome sekuvelani kodvwa nine nisime, nime, nibeketele ngekujabula,
12 nibonge uYise lowanenta nafanelwa sabelo selifa lalabangcwele ekukhanyeni.
13 Wasikhulula emandleni ebumnyama, wasibeka embusweni weNdvodzana yakhe letsandzekako.
14 Kuyo sinekuhlengwa, lokukutsetselelwa kwetono tetfu.
15 INdvodzana ingumfanekiso waNkulunkulu longabonwa ngemehlo enyama, futsi ngiyo yematubulo ayo yonkhe indalo.
16 Ngobe konkhe kwadalelwa kuyo, lokusezulwini nalokusemhlabeni, lokubonakalako nalokungabonakali, nome-ke kutihlalo tebukhosi, nome kubukhosi, nome babusi, nome tiphatsimandla. Konkhe kwadalwa ngayo, futsi kwadalelwa yona.
17 Yona ikhonanchanti kwako konkhe, tonkhe tintfo time ngayo.
18 Yona iyinhloko yemtimba wayo, libandla; ngiyo lesicalo, nelitubulo kulabafile, kuze kutsi kuko konkhe ibe yekucala.
19 Kwakuyintsandvo nenjongo yaNkulunkulu, kutsi ahlale kuJesu ngebuNkulunkulu bakhe bonkhe,
20 kuze kutsi ngaye abuyisane netintfo tonkhe letisemhlabeni naletisezulwini, akhe kuthula ngengati yesiphambano sakhe.
21 Nani-ke benikadze nikhashane naNkulunkulu nititsa takhe ngemicabango nangemisebenti yenu lemibi.
22 Kodvwa nyalo Nkulunkulu sewubuyisene nani ngekucitsa ingati yaJesu esiphambanweni, kuze kutsi animise ningcwele, ningenasici, ningenacala embikwakhe.
23 Loko kungenteka kuphela nangabe nine nihlala ekukholweni, futsi nisekelekile, nisimile, ninganyikanyiswa lutfo ekwetsembeni kwenu liVangeli lenalitfola, naliva lishunyayelwa emhlabeni wonkhe jikelele. Mine Pawula ngentiwa ngaba sikhonti salo lelo Vangeli.
24 Namanje ngijabulela kuhlushwa kwami ngenca yenu, emtimbeni wami ngiphelelisela loko lokwasilela elusizini lwaJesu Khristu, ngenca yemtimba wakhe lolibandla.
25 Ngekuhlela kwaNkulunkulu, ngentiwa sikhonti salo. Ngetfweswa umtfwalo macondzana nani, kuze kutsi ngimemetele livi laNkulunkulu ngalokuphelele,
26 imfihlakalo yalo leseloku yafihlakala kusukela ekucaleni kwetikhatsi netitukulwane, kepha manje seyembulelwe labangcwele bakhe.
27 Nkulunkulu watsandza kutsi kwateke kubo kutsi iyini ingcebo nebukhosi balemfihlakalo kubetive. Lemfihlakalo inguKhristu kini, lolitsemba lebukhosi.
28 Nguye lesimshumayelako, seluleka bonkhe bantfu, sifundzisa bonkhe bantfu ngekuhlakanipha konkhe, kuze sikwati kumisa bonkhe bantfu baphelele kuKhristu Jesu.
29 Ngisebentela loko ngishikashikeka ngekusebenta kwakhe, lokusebenta ngemandla kimi.
1 Ngiyatsandza kunatisa kutsi ngishikashikeka kangakanani ngenca yenu, nangenca yebaseLowadisiya nangabo bonkhe lengingazange ngibonane nabo buso nebuso.
2 Loko ngikwentela kutsi tinhlitiyo tabo tikhutsateke tidvudvuteke, bahlanganiswe babe munye elutsandweni, babe nekuciniseka konkhe kwekwati lokuphelele, bayati kahle imfihlakalo yaNkulunkulu lenguKhristu.
3 Kuye kutfukuswe emagugu onkhe ekuhlakanipha newekwati.
4 Loku nginitjela khona kutebate muntfu loniyenga ngetinkhulumo temanga.
5 Nome ngingekho emkhatsini wenu ngemtimba, kodvwa ngikhona ngemoya, ngijabulela kubona kuhlela kwenu lokuhle, nekusima kwekukholwa kwenu nguKhristu.
6 Ngako-ke njengobe senemukele iNkhosi Jesu Khristu, hambani nikuye,
7 nisime ngekugcila, futsi nakhelwe kuye, niciniswe ekukholweni, njengaloku nifundzisiwe, nivame kubonga.
8 Caphelani-ke kutsi kubete lonitfumba ngekuhlakanipha, nangekukhohlisa lokulite, aniyenge ngemikhuba yebantfu nangetimfundziso temimoya yemvelo emkhatsini. Konkhe loko kuphambene nendlela yaKhristu.
9 Emtimbeni waKhristu kuhlala kuphelela konkhe kwebuNkulunkulu.
10 Nani-ke seniphelelisiwe kuye, yena loyinhloko yemibuso neyemandla onkhe.
11 Kuye nani nasokwa, hhayi ngalokwentiwa ngetandla, kodvwa ngekusoka kwaKhristu lokungukwehlukana nemtimba wemvelo.
12 Nembelwa kanye naye embhabhatisweni, lokungawo futsi navuswa kanye naye ngekukholwa ngemandla aNkulunkulu, lowamvusa ekufeni.
13 Nani-ke lebenifile ngekona kwenu nangekungasoki emtimbeni wenu, Nkulunkulu sewanenta labaphilako kanye naye ngekunitsetselela tonkhe tono tenu.
14 Wesula incwadzi yemacala etfu leyayimelene natsi ngemitsetfo yayo, wayisusa ngekuyibetsela esiphambanweni.
15 Babusi, nalabanemandla wabemuka tikhali, wabatsela ngelihlazo ebaleni abehlula ngaso siphambano.
16 Ngako-ke akubete umuntfu lonilahla ngekudla nangekunatsa, nome ngemikhosi, nangekwetfwasa kwenyanga, nome ngemaSabatha.
17 Loko bekusitfunti nje saloko bekuta, lokungiko sibili ngulokukuKhristu.
18 Akubete umuntfu lonilahla ngelicala, atsandza kutenta lotfobile, akhonte tingilosi, alibele ngimibono yakhe, atikhukhumeta ngelite engcondvweni yakhe.
19 Lowo sewuyekele kusima kuKhristu loyinhloko, lokusitwa ngaye umtimba wonkhe, uhlanganiswe ngemalunga nemisipha, ukhule ngekukhula kwaNkulunkulu.
20 Nangabe nafa kanye naKhristu nakhululwa etimfundzisweni temimoya yemvelo emkhatsini, nentiwa yini kutsi niphile kungatsi nisebantfu baseveni? Nititfobelelani timfundziso tekutsi:
21 “Ungakuphatsi loku”, “Ungakuva nangelulwimi loko”, “Ungakutsintsi lokwa”?
22 Konkhe loku kusho tintfo letiphelako natisetjentiswa, yimiyalo netimfundziso tebantfu nje.
23 Tibonakala shangatsi tinekuhlakanipha, tineminako yetinkholo tabo, nekutitfobambumbulu, nekuhlupha umtimba, kepha tite lusito macondzana nekutitsiba etinkhanukweni tenyama.
1 Nangabe-ke navuswa kanye naKhristu, funani tintfo tasezulwini lapho Khristu ahleti ngesekudla saNkulunkulu.
2 Nakekelani tintfo tasezulwini, ninganaki tintfo talapha emhlabeni.
3 Ngobe phela nafa, imphilo yenu ifihliwe kanye naKhristu kuNkulunkulu.
4 Mhlazana Khristu, lokuphila kwetfu, abonakaliswa, nani niyawubonakaliswa kanye naye ebukhosini bakhe.
5 Ngaloko-ke bulalani tonkhe tinkhanuko tenu talapha emhlabeni: bugwadla, nebuphingi, nekungcola, nekuhungeka, nekukhanuka lokubi, nebukhali lobukukhonta tithico.
6 Konkhe loku kwenta Nkulunkulu ehlisele lulaka lwakhe kubantfu labangamlaleli.
7 Nani nake natiphatsa kanjalo.
8 Kepha manje kulahleni konkhe: kutfukutsela, nelulaka, nenzondo, nekuhlambalata, nekukhuluma emahlazo.
9 Ningakhulumelani emanga, ngobe senikhumule umuntfu lomdzala kanye nemikhuba yakhe.
10 Manje senembetse umuntfu lomusha, kuze nihlale nakhiwa kabusha, nifute Nkulunkulu, nimati ngalokuphelele.
11 Kulabanjalo kute umehluko emkhatsini wemGriki nemJuda, walosokile nalongakasoki, wetive nemSikithi, sigcili nalokhululekile, kodvwa Khristu ungiko konkhe, futsi ukubo bonkhe.
12 Ngako-ke njengebantfu labakhetsiwe baNkulunkulu, labangcwele nalabatsandzekako, yembatsani bubele benhlitiyo, nesisa, nekutitfoba, nebumnene, nekucinisela.
13 Nibeketelelane, nitsetselelane, nangabe umuntfu akhube lomunye; ngobe phela neNkhosi yanitsetselela, nani-ke yentani njalo.
14 Kodvwa-ke ngetulu kwako konkhe loko yembatsani lutsandvo, lolusibopho sekuphelela.
15 Kuthula kwaKhristu, lenabitelwa kuko emtimbeni munye, akubuse etinhlitiyweni tenu; futsi netayele kubonga.
16 Livi laKhristu alihlale ngekhatsi kwenu liphuphume. Fundzisanani niyalane ngekuhlakanipha konkhe, nifundzisane ngemahubo nangetingoma, nangemaculo akaMoya. Nihlabelele Nkulunkulu ngekumbonga etinhlitiyweni tenu.
17 Konkhe lenikwentako kwenteni ngelibito leNkhosi Jesu, nome ngelivi, nome ngemisebenti, nibonge Nkulunkulu uYise ngaye.
18 Bafati, tfobelani emadvodza enu, njengalokufanele eNkhosini.
19 Madvodza, tsandzani bafati benu, ningabacansukeli.
20 Bantfwana, lalelani batali benu etintfweni tonkhe, ngobe nguloko lokutsandvwa yiNkhosi.
21 Boyise, ningabatfukutselisi bantfwabenu, khona bangetiwudzinwa.
22 Tisebenti, labangemakhosi enu ngekwasemhlabeni balaleleni etintfweni tonkhe, ningamane nitsenge emehlo, njengalabajabulisa bantfu, kodvwa yesabani iNkhosi ngebucotfo benhlitiyo.
23 Konkhe lenikwentako, kwenteni ngenhlitiyo, kube shangatsi nentela iNkhosi, hhayi bantfu.
24 Khumbulani kutsi nikhonta iNkhosi. Nati kutsi niyakwemukeliswa umvuzo welifa kuKhristu.
25 Ngobe lowo lowenta lokungakalungi, uyakwemukela lokungakalungi lakwentile, ngobe kuyawube kungakhetfwa bala lamuntfu.
1 Makhosi, tiphatseni kahle nangalokulungile tisebenti tenu, nikhumbule kutsi nani nineNkhosi lesezulwini.
2 Ciniselani ekuthandazeni, nilindze kuko ngekubonga.
3 Nisikhulekele natsi kuNkulunkulu, kutsi asinike ematfuba ekushumayela livi lakhe, sitekwati kukhuluma imfihlakalo yaKhristu, mine lengisiboshwa ngenca yayo.
4 Ningincusele kuze ngiyibonakalise ngalokuphelele, njengobe ngifanele kukhuluma.
5 Tiphatseni ngekuhlakanipha nanisemkhatsini webantfu labangakholwa, bambisisani sikhatsi, niwasebentise kahle ematfuba leninawo.
6 Kukhuluma kwenu akube nemusa ngaso sonkhe sikhatsi, nikunandzise njengeluswayi ekudleni, khona nitekwati lenifanele kubaphendvula ngako bantfu.
7 Thikhikhusi, umzalwane lotsandzekako, nalosikhonti lesetsembekile, lesiyinceku kanye nami eNkhosini, utanatisa konkhe ngami.
8 Ngimtfumele kini kutsi anatise kutsi tsine siphila njani, advudvute netinhlitiyo tenu.
9 Utawube ahamba na-Onesimuse, umzalwane lomunye lowetsembekako nalotsandzekako, yena-ke ungulomunye wenu. Batanilandzisa-ke ngako konkhe lokwenteka ngalapha.
10 Uyanihambisa Aristakhusi losiboshwa kanye nami, naMakho, umzala waBhanabasi, lenatjelwa ngaye, nakefika lapho kini nibomemukela.
11 Uyanihambisa naJesu lowatiwa ngekutsi nguJustusi, labo-ke ngibo bodvwa lababekusoka labasebentela umbuso waNkulunkulu kanye nami, sebayindvudvuto lenkhulu kimi.
12 Uyanihambisa na-Ephafrasi longulomunye wakini, inceku yaKhristu Jesu, lonilwela ngaso sonkhe sikhatsi emkhulekweni, kuze nime, niphelele nisime ekwenteni intsandvo yaNkulunkulu.
13 Nami ngingufakazi wakhe wekutsi uyanisebentela, nine kakhulu, kanye nebaseLawodisiya, nebaseHiyerapholisi.
14 NaLukha longudokodela lotsandzekako, kanye naDemasi bayanihambisa kakhulu.
15 Ngikhonteleni nami kubazalwane baseLawodisiya nakuNimfasi, nasebandleni lelihlanganela endlini yakhe.
16 Nangabe lencwadzi seniyifundzile, nibobafundzisa nebaseLawodisiya, nani niyifundze lena lephuma eLawodisiya.
17 Nitjele Akhipho nitsi: “Caphela kufeza lowo msebenti lowawemukela eNkhosini.”
18 Nako-ke kukhonta kwami, ngesandla sami, mine Pawula. Nikhumbule kutsi mine ngisaboshiwe. Umusa awube nani.