1 Lencwadzi iphuma kuPawula umphostoli, longatfunywanga bantfu nome ngemuntfu, kodvwa ngaJesu Khristu naNkulunkulu longuYise lowamvusa kulabafile.
2 Iphuma kimi nakubo bonkhe bazalwane lenginabo. Iya emabandleni aseGalathiya.
3 Akube kini umusa nekuthula lokuvela kuNkulunkulu, longuBabe, nakuJesu Khristu, iNkhosi.
4 Nguye lowatinikela ngenca yetono tetfu, kuze kutsi ngentsandvo yaNkulunkulu longuBabe asephule kulesikhatsi lesibi.
5 Akube kuye ludvumo kuze kube phakadze naphakadze. Amen.
6 Ngiyamangala kutsi senimhlubuke masinyane kangaka Nkulunkulu lowanibita ngemusa waKhristu, nase nijikela kulelinye nje livangeli.
7 Empeleni akusho kutsi likhona lelinye livangeli, kodvwa nje kutsi kukhona labanihluphako labafuna kuguculela liVangeli laKhristu.
8 Kodvwa-ke nakukhona umuntfu, nome ngabe ngitsi nome yingilosi lechamuka ezulwini, lofika nalelinye livangeli lelehlukile kunaleli lesanishumayela lona, lowo akabe ngulocalekisiwe.
9 Njengobe sasho, namanje ngiyaphindza ngiyasho ngitsi: Nakukhona lonishumayela lelinye livangeli kunalelo lenalemukela, lowo akabe ngulocalekisiwe.
10 Kungabe kambe ngitincengela kubantfu yini nome kuNkulunkulu? Nome ngetama kujabulisa bantfu yini? Nangabe ngisajabulisa bantfu, bengingeke ngibe sisebenti saKhristu.
11 Ngako-ke ngiyanatisa, bazalwane, kutsi liVangeli lelishunyayelwe ngimi alisilo lebantfu.
12 Ngobe angilinikwanga ngumuntfu, kantsi futsi angilifundziswanga ngumuntfu, kodvwa ngalembulelwa nguJesu Khristu.
13 Senivile ngemphilo yami yakucala ngekwenkholo yebuJuda kutsi ngalihlupha kamatima kanjani libandla laNkulunkulu ngetama kulicedza.
14 Ngachubeka ngekwenkholo yebuJuda, ngabendlula labanyenti lababebontsanga yetfu esiveni sakitsi ngishisekela kakhulu kugcina timfundziso tabokhokho.
15 Kodvwa Nkulunkulu wavele wangehlukanisela ngingakatalwa, wangibita ngemusa wakhe. Kwatsi nakakhetsa
16 kungembulela iNdvodzana yakhe kutsi ngiyishumayele kubetive, angibutanga muntfu.
17 Angizange ngenyukele ngisho naseJerusalema kulabo babebaphostoli kucala kunami; kodvwa ngesuka ngekushesha ngaya e-Arabiya, ngase ngiyancandzeka ngiya eDamaseko.
18 Emvakweminyaka lemitsatfu ngenyuka ngayawubonana naKhefase eJerusalema; ngefika ngahlala naye emalanga lali-15.
19 Kodvwa angizange sengibone namunye webaphostoli ngaphandle kwaJakobe, umnakabo weNkhosi.
20 Ngiyacinisa embikwaNkulunkulu kutsi loku lenginibhalele kona akusiwo emanga.
21 Ngase ngiya etifundzeni taseSiriya naseSilisiya.
22 Noko ngangisengakatiwa ngemehlo emabandleni aKhristu aseJudiya.
23 Kodvwa babeva ngendzaba nje kutsi: “Lowo lowake wasihlupha kamatima sewushumayela kona loko kukholwa lake wetama kukucedza,”
24 bese badvumisa Nkulunkulu ngami.
1 Emvakweminyaka leli-14 ngaphindze ngenyukela eJerusalema ngihamba naBhanabasi kanye naThithusi.
2 Ngenyukela kubo njengobe Nkulunkulu abengembulele kutsi ngiye khona, ngafike ngabalandzisa liVangeli lengilishumayela kubetive, labo labatiwa ngekutsi babaholi ngabalandzisa emasitseleni, funa mhlawumbe kwenteke kutsi ngigijimele lite, nome ngagijimela lite.
3 Ngisho naThithusi, umGriki labekanye nami, abamcindzetelanga kutsi asoke.
4 Kodvwa bazalwanembumbulu labaletfwa ngasese, bangena ngekunyelela emkhatsini wetfu, batinhloli tenkhululeko yetfu lesinayo kuKhristu Jesu, khona batesenta tigcili.
5 Noko asibanikanga ngisho nalelincane nje litfutjana lekubatfobela, kuze kutsi liciniso leliVangeli libe kini njalo.
6 Labo labadvume ngekutsi baholi -- kutsi babe yini akusho lutfo kimi, ngobe Nkulunkulu akakhetsi buso bemuntfu -- ngitsi: Labo baholi abazange bengete lutfo eVangelini lengilishumayelako.
7 Kodvwa esikhundleni saloko babona kutsi ngiphatsiswe liVangeli kutsi ngilishumayele kubetive, njengobe naPhetro aphatsiswa liVangeli kutsi alishumayele kumaJuda.
8 Ngobe yena lowo lowasebenta ngaPhetro kutsi abe ngumphostoli wemaJuda, wasebenta nangami futsi kubetive.
9 Batsi kube boJakobe, naPhetro, naJohane, labebatiwa ngekutsi batinsika, babone umusa lengiwuphiwe banika tsine naBhanabasi sandla sekudla sebudlelwane kutsi siye kubetive, bona baye kumaJuda.
10 Batsi nje kumelwe sikhumbule labamphofu, lebekungiyonantfo nami lebengiyikhutsalele.
11 Kodvwa ngesikhatsi nakufika Khefase e-Antiyokhi ngaphikisana naye embikwebazalwane, ngenca yesento sakhe lesibi.
12 Ngesikhatsi kungakefiki batnfu labatsite, abedla nebetive; kodvwa kwatsi kube kufike emadvodza labephuma kuJakobe, wase uyatehlukisa kulabo betive, ngobe phela bekesaba lamaJuda.
13 Nalamanye emaJuda ase angena kulobo buhatsa bakhe bekutentisa, kwadzimate kwatsatseka naBhanabasi ngaloko kutentisa kwabo.
14 Kodvwa ngatsi kube ngibone kutsi abasahambi khona ecinisweni leliVangeli, ngavele ngamtjela Phetro embikwabo bonkhe ngatsi: “Nangabe wena longumJuda, uphila njengebetive, hhayi njengemJuda, pho, yini ubacindzetele betive kutsi abaphile njengemaJuda?”
15 Tsine singemaJuda ekutalwa, asisito toni tebetive.
16 Siyati kutsi imisebenti yemtsetfo layentako umuntfu ingeke imente emukeleke kuNkulunkulu kutsi ulungile, kepha umuntfu wemukeleka kuNkulunkulu kutsi ulungile ngekukholwa kwakhe nguKhristu Jesu. Natsi-ke sakholwa nguKhristu Jesu, sentiwa semukeleka kuNkulunkulu kutsi silungile ngaloko kukholwa kwetfu nguKhristu, hhayi ngekwenta loko lokufunwa ngumtsetfo. Empeleni kute umuntfu lowemukeleka kuNkulunkulu kutsi ulungile ngobe ente imisebenti yemtsetfo.
17 Nangabe tsine sifuna kwemukeleka kuNkulunkulu kutsi silungile ngaKhristu tsine ngekwetfu sibe sitfolakala sitoni, ngabe kambe naKhristu usikhonti sesono yini? Cha, akasiso.
18 Nangabe ngiphindza ngivusa loko lengikubhidlitile, ngabe ngitenta sephulamtsetfo.
19 Ngobe mine ngekwami ngafa ngemtsetfo emtsetfweni, kuze ngiphilele Nkulunkulu. Ngibetselwe kanye naKhristu;
20 ngako-ke mine angisaphili, kodvwa nguKhristu lophila kimi. Nalemphilo lengiyiphilako kulomtimba, ngiyiphila ngekukholwa yiNdvodzana yaNkulunkulu leyangitsandza yatinikela yona matfupha esikhundleni sami.
21 Angiwenti lite umusa waNkulunkulu; ngobe nangabe kulunga kutfolakala ngekwenta lokufunwa ngumtsetfo, kusho kutsi Khristu wafela lite.
1 Hhawu, maGalathiya lalibele! Seniyengwe ngubani? Akusini yini lenakhonjiswa emehlweni enu kutsi Jesu Khristu wabetselwa?
2 Ase ningitjele naku: Moya waNkulunkulu namemukela ngekwenta lokufunwa ngumtsetfo yini, nome namemukela ngekukholwa liVangeli lenaliva nalishunyayelwa?
3 Kungabe nitilima kangako yini? Nicale ngaMoya waNkulunkulu, pho, niyawupheleliswa ngemandla enu yini?
4 Ngabe kambe letintfo letinyenti kangaka lesenitibonile tilite yini? Phela loko kungasho kutsi tilite.
5 Nkulunkulu uyaninika yini Moya wakhe ente imisebenti lemangalisako emkhatsini wenu ngobe nigcina umtsetfo, nome uninika ngobe nikholwe liVangeli lenaliva nalishunyayelwa?
6 Abrahama “wakholwa nguNkulunkulu; ngenca yekukholwa kwakhe Nkulunkulu wamemukela watsi ulungile.”
7 Yatini-ke kutsi ngulabakholwako labangemadvodzana a-Abrahama.
8 UmBhalo wakubona kucala kutsi Nkulunkulu nebetive uyawubalungisisa ngekukholwa; ngiwo lowashumayela liVangeli kucala ku-Abrahama watsi: “Tive tonkhe tiyawubusiswa ngawe.”
9 Ngako-ke labakholwako babusiswe kanye na-Abrahama lowakholwa.
10 Bonkhe labetsembele ekwenteni lokufunwa ngumtsetfo bangephansi kwesicalekiso, ngobe kubhaliwe kutsi: “Bacalekisiwe bonkhe labangagcini konkhe lokubhaliwe emculwini wemtsetfo, kutsi bakwente.”
11 Ngako-ke kuyakhanya kutsi kute umuntfu lowemukeleka kuNkulunkulu kutsi ulungile ngekwenta lokufunwa ngumsetfo, ngobe umBhalo utsi: “Umuntfu lowemukeleka kuNkulunkulu kutsi ulungile ngekukholwa kwakhe uyawuphila.”
12 Umtsetfo awukasimi ekukholweni, kodvwa “lowo lowentako uyawuphila ngawo.”
13 Khristu wasihlenga esicalekisweni lesasiletfwe ngumtsetfo, ngekutsi abe sicalekiso endzaweni yetfu; ngobe kubhaliwe kutsi: “Ucalekisiwe wonkhe umuntfu lolenga emtsini.”
14 Loko Khristu wakwenta, kuze kutsi sibusiso lesetsenjiswa Abrahama sifike sinikwe betive ngaJesu Khristu, nekutsi semukele ngekukholwa sipho saMoya lesetsenjiswa sona.
15 Ase nginibekisele ngentfo levamile nje, bazalwane: Bantfu lababili lasebente sivumelwane kute longasephula nome engete lutfo, yingci nasebavumelene.
16 Mayelana netetsembiso letanikwa Abrahama nentalo yakhe: “Intalo” yinye, hhayi lenyenti. Akukhulunywa ngalenyenti, kodvwa kushiwo yinye; leyo-ke nguKhristu.
17 Ngisho kutsi-ke: Lomtsetfo lowase uyefika emvakweminyaka lengema-430, awusephuli lesivumelwane lesasentiwe nguNkulunkulu, futsi ungeke usicitse lesetsembiso.
18 Ngobe nangabe lifa litfolakala ngekwenta lokufunwa ngumtsetfo, alisesilo-ke lesetsembiso; kodvwa Nkulunkulu walinika Abrahama ngesetsembiso.
19 Pho, umtsetfo wawudzingeke ngani? Wengetelwa kubonakalisa kutsi siyini sono, kudzimate kufike lowo lesasicondziswe kuye setsembiso labeyintalo ya-Abrahama. Umtsetfo waletfwa tingilosi ngesandla semlamuli.
20 Umlamuli akadzingeki ngalutfo umuntfu nakayedvwana, vele-ke Nkulunkulu munye.
21 Pho, ngabe kusho kutsi umtsetfo uphambene yini netetsembiso taNkulunkulu? Cha, akunjalo. Ngobe nangabe ubekiwe umtsetfo longaphilisa, nakanjani kulunga bekungatfolakala ngekwenta lokufunwa ngumtsetfo.
22 Kodvwa umBhalo utsi bonkhe bantfu bangephansi kwemandla esono, kuze kutsi loko lokwetsenjiswa ekukholweni nguKhristu Jesu kuniketwe labakholwako.
23 Kusengakefiki kukholwa, sasigcinwe ngumtsetfo, sivaleleke ngephansi kwemandla awo, kwaze kwefika kukholwa lobekutakwembulwa.
24 Ngako-ke umtsetfo wasebenta njengemcondzisi wetfu wekusiyisa kuKhristu, kuze sibe ngulabemukeleka kuNkulunkulu kutsi silungile ngekukholwa kwetfu.
25 Kodvwa nyalo ngobe kukholwa sekufikile, asisekho ngephansi kwemcondzisi.
26 Ngako-ke nonkhe ningemadvodzana aNkulunkulu ngekukholwa nguKhristu Jesu.
27 Nine nonkhe nabhajatiselwa kuKhristu, ngako-ke senembetse Khristu.
28 Kute umJuda nemGriki, kute sigcili nalokhululekile, kute lomdvuna nalomsikati, nonkhe nimunye kuKhristu Jesu.
29 Nangabe-ke nibaKhristu, niyintalelwana ya-Abrahama, nitindlalifa ngekwesetsembiso.
1 Ngisho kutsi-ke: Ngesikhatsi indlalifa iseyincane ayikehlukani nesisebenti, nome ingumnikati wako konkhe.
2 Iba ngephansi kwebalindzi nebaphatsi bayo kuze kufike sikhatsi lesabekwa nguyise.
3 Kunjalo-ke nakitsi, ngesikhatsi sisebantfwana sasigcilatwe ngimimoya yemvelo.
4 Kodvwa kwatsi sikhatsi sesifike ngalokuphelele Nkulunkulu watfumela iNdvodzana yakhe leyatalwa ngumfati, yakhula ingephansi kwemtsetfo,
5 khona itebahlawulela labo labangephansi kwemtsetfo, kuze natsi semukeleke njengemadvodzana.
6 Njengobe ningemadvodzana akhe nje, Nkulunkulu usitfumelele Moya weNdvodzana yakhe etinhlitiyweni tetfu lobubula atsi: “Babe, Babe wami.”
7 Ngako-ke awusesiso sigcili, kodvwa sewuyindvodzana; nawuyindvodzana uyindlalifa yaNkulunkulu ngaKhristu.
8 Kodvwa nisengakamati Nkulunkulu nanigcilatwe bonkulunkulumbumbulu,
9 kodvwa nyalo seniyamati Nkulunkulu, ngetulu kwaloko senatiwa nguNkulunkulu, kwentiwa yini kutsi nifune kuncandzeka, niye kulemimoya yemvelo lebutsakatsaka nalengasiti lutfo? Niyatsandza yini kutsi iphindze inigcilate?
10 Senihlonipha emalanga, netinyanga, netikhatsi, neminyaka.
11 Ngineluvalo ngani, shangatsi konkhe lokukhandleka kwami lapho kini kwaba lite.
12 Bazalwane, ngiyanincenga kutsi nibe njengami, njengobe nami nginjengani. Kute kona lenangona ngako;
13 kepha niyati kutsi kwaba kungaphili kahle kwami lokwangenta ngatfola litfuba lekushumayela liVangeli kini kwekucala.
14 Kodvwa nome loba butsakatsaka bami baba silingo lesikhulu kini, anizange ningedzelele nome ningangemukeli. Esikhundleni saloko, nangemukela njengesitfunywa saNkulunkulu, kwaba shangatsi nemukela Khristu Jesu.
15 Pho, sekushonephi loko kujabula kwenu kwakucala? Ngobe nanyalo ngiyacinisa ngitsi kube beninemandla, ngabe nakhipha emehlo enu nawanika mine.
16 Kungabe sengigucuke ngaba sitsa senu ngekunitjela liciniso yini?
17 Labo bantfu banishisekela kakhulu, noko kungesiko ngenjongo lenhle, kepha bafuna kunivalela ngephandle kuze nishisekele bona.
18 Kona kuhle kushisekela lokuhle njalonjalo, hhayi nangikhona emkhatsini wenu kuphela.
19 Bantfwabami, nginemhelo ngani, kuyawudzimate kwakheke Khristu kini.
20 Bengifisa shangatsi ngingake ngibe nani nyalo, kumbe ngingake ngikhulume ngalenye indlela, ngobe sengidzidzekile ngani.
21 Ase ningitjele, nine lenifuna kuba ngephansi kwemtsetfo, aniva yini kutsi umtsetfo utsini?
22 Kubhaliwe kutsi Abrahama abenemadvodzana lamabili, lenye kwakuyesigcilikati sakhe, lenye kuyemfati wakhe sibili.
23 Kodvwa lendvodzana yesigcilikati yatalwa ngendlela latalwa ngayo wonkhe umuntfu; lena yemfati wakhe sibili yatalwa ngekwesetsembiso.
24 Loku kungumfanekiso: Labafati lababili bamele tivumelwane letibili, lona lonebantfwana labatalelwe ebugcilini nguHagari; leso sivumelwane siphuma entsabeni yaseSinayi.
25 Hagari umele iNtsaba yaseSinayi lese-Arabiya. Ufanekisa iJerusalema yanyalo legcilateke kanye nebantfwabayo.
26 Kodvwa lomfati wakhe sibili ukhululekile, umele iJerusalema yasezulwini lengumake wetfu.
27 Ngobe kubhaliwe kutsi: “Jabula, wena mfati loyinyumba, longatalanga mntfwana, jabula, nome ungahelwanga; ngobe lomfati losaliwakati unebantfwana labanyenti kunemfati loyintsandvokati.”
28 Kodvwa nine bazalwane, njenga-Isaka nibantfwana besetsembiso saNkulunkulu.
29 Kodvwa njengobe lona lowatalwa ngalokwetayelekile watingela lona labetelwe ngekwaMoya, namanje kusenjalo.
30 Kodvwa umBhalo utsini? Utsi: “Cosha lesigcilikati kanye nendvodzana yaso; ngobe lendvodzana yesigcilikati ingeke ibe yindlalifa kanye nendvodzana yemfati sibili.”
31 Ngako-ke, bazalwane, asisibo bantfwana besigcilikati, kodvwa sibantfwana bemfati sibili, lokhululekile.
1 Khristu wasikhululela kutsi sihlale sikhululekile. Manini-ke, nicine, ningaphindzi niboshelwe ejokeni lebugcili.
2 Ase nginitjele, mine Pawula, ngitsi kini: Nanemukela kusoka, Khristu angeke abe nelusito kini.
3 Ngiyafakaza futsi kunobe ngubani wekusoka kutsi ubophelekile ekwenteni konkhe lokufunwa ngumtsetfo.
4 Nine lenifuna kwemukeleka kuNkulunkulu kutsi nilungile ngekwenta lokufunwa ngumtsetfo nitehlukanisile naKhristu, ningephandle kwemusa waNkulunkulu.
5 Tsine-ke sinelitsemba kutsi sitakwemukeleka kuNkulunkulu kutsi silungile, loko sikulindzele ngemandla aMoya Longcwele losebenta ngekukholwa.
6 Ngobe kuKhristu Jesu kusoka nekungasoki akunamsebenti, kodvwa kuphela kukholwa lokusebenta ngelutsandvo.
7 Benigijima kahle! Pho, ngubani lona losanivimbele kutfobela liciniso?
8 Lokukhohliseka akuveli kuye lowanibita.
9 Khumbulani naku: “Sibiliso lesincane nje lesibilisa yonkhe inhlama.”
10 Ngisenelitsemba ngani eNkhosini kutsi ningeke niwutsatse lomunye umcondvo; kodvwa lowo lonihluphako uyakwetfwala sijeziso sakhe, nome ngangubani.
11 Kodvwa, bazalwane, nangabe mine ngisashumayela kusoka, pho, ngisahlushelwani? Kube bekunjalo ngabe sesisusiwe lesikhubekiso lesisiphambano.
12 Ngifisa shangatsi labo labaniphatamisako bangatiphakula bona!
13 Ngobe bazalwane, nabitelwa enkhululekweni; kuphela nje ningayisebentisi inkhululeko yenu kunika ematfuba ekwenta sono, kodvwa khontanani ngelutsandvo lomunye kulomunye.
14 Ngobe wonkhe umtsetfo upheleliswe evini linye lelitsi: “Ubotsandza makhelwane wakho njengobe utitsandza wena.”
15 Kodvwa nanilumana nidlane nodvwana, nibocaphela kutsi ningacedzani.
16 Kodvwa ngitsi: Hambani ngaMoya, khona ningetiwufeza tinkhanuko tenyama.
17 Ngobe inyama ikhanuka lokuphambene naMoya, naMoya, uphambene nenyama, ngobe kokubili kuyaphikisana, kuze ningetikwenta lenikutsandzako.
18 Kodvwa naniholwa nguMoya, anikho ngaphansi kwemtsetfo.
19 Phela imisebenti yenyama isebaleni, ngulena: bugwadla, nebuphingi, nekungcola, nemanyala,
20 nekukhonta tithico, nekutsakatsa, nebutsa, nenkhani, nemona, nelulaka, nekubanga, nekwehlukana, nekuhlubuka,
21 nekuhawukela, nekudzakwa, nebudli, naletinye tintfo letifanana naleti lenganitjela ngato kucala, kutsi labo labenta letintfo bangeke balidle lifa lembuso waNkulunkulu.
22 Kodvwa titselo taMoya nguleti: lutsandvo, nekujabula, nekuthula, nekubeketela, nebubele, nekulunga, nekwetsembeka,
23 nekutfobeka, nekutibamba; kute umtsetfo lophambene naletintfo.
24 BaKhristu Jesu bayibetsele esiphambanweni inyama nekushangashanga kwayo kanye netinkhanuko tayo.
25 Njengobe siphila kuMoya, ngako asihambe ngaMoya.
26 Asingafuni ludvumo lolulite, singacansulani, futsi singabi nemona lomunye kulomunye.
1 Bazalwane, nangabe lomunye wenu asawele esonweni, nine bakaMoya, lowo mephuleni, loko nikwente ngemoya wekutfobeka; kodvwa nawe uticaphele, ngobe ungahle ulingeke.
2 Tfwalisanani imitfwalo yenu, kuze nigcwalise umtsetfo waKhristu.
3 Nangabe umuntfu aticabanga kutsi ulutfo, kantsi akasilo lutfo, uyatiyenga.
4 Kodvwa akube ngulowo atihlolele wakhe umsebenti, khona uyawuba nekutibonga ngekwakhe yedvwana, hhayi ngekwalomunye umuntfu.
5 Ngobe ngulowo nalowo uyawutetfwalela umtfwalo wakhe.
6 Akutsi lowo lofundziswako ngelivi laNkulunkulu ahlephunelane etintfweni tonkhe letinhle nalowo lamfundzisako.
7 Ningayengwa, Nkulunkulu akaphukutwa, ngobe umuntfu uyawuvuna loko lakuhlanyelako.
8 Ngobe lowo lohlanyela enyameni yakhe, uyawuvuna kubola kuyo; kodvwa lohlanyela kuMoya waNkulunkulu, uyawuvuna kuphila lokuphakadze kulowo Moya.
9 Asingadzinwa kwenta lokuhle; ngobe nasingadzinwa, siyawuvuna ngesikhatsi lesifanele.
10 Ngako-ke njengobe sinematfuba nje, asente lokuhle kubo bonkhe bantfu, ikakhulu kubendlu yaketfu yekukholwa.
11 Niyabona-ke nani, nati tinhlavu letinkhulu lesengitibhala ngesandla sami kulencwadzi.
12 Ngulabo labafisa kubukeka emtimbeni wabo labaniphocelela kutsi nisoke, khona phela bangetiwuhlushwa ngenca yesiphambano saKhristu Jesu.
13 Ngobe nemaJuda akakwenti lokufunwa ngumtsetfo, kodvwa bafisa kutsi nine nisoke, kuze phela batetigabatisa ngani kuloko.
14 Kodvwa akube khashane nami kutigabatisa ngaphandle kwesiphambano seNkhosi yetfu Jesu Khristu; ngesiphambano sakhe live lifile kimi, nami ngifile kulo.
15 Ngobe kusoka nekungasoki akusilutfo kodvwa kuphela kudalwa kabusha.
16 Kuthula nemusa akube kubo bonkhe labahamba ngalomyalo, ema-Israyeli aNkulunkulu.
17 Sale kubate longihluphako, ngobe emtimbeni wami nginetimphawu taJesu.
18 Umusa weNkhosi yetfu Jesu Khristu awube nemoya wenu, bazalwane. Amen.