1 Lencwadzi iphuma kuPawula, umphostoli waKhristu Jesu ngekwentsandvo yaNkulunkulu, nakuThimothi, umzalwane. Iya ebandleni laNkulunkulu leliseKhorinte, nakubo bonkhe labangcwele labakulo lonkhe lase-Akhaya.
2 Umusa nekuthula lokuvela kuNkulunkulu longuBabe wetfu, naseNkhosini Jesu Khristu, akube nani.
3 Akabongwe Nkulunkulu uYise weNkhosi yetfu Jesu Khristu, longuYise wemusa. Yebo, akabongwe Nkulunkulu longumtfombo wayo yonkhe indvudvuto.
4 Yena uyasidvudvuta etinhluphekweni tetfu tonkhe; kuze labo labasetinhluphekweni sibe nemandla ekubadvudvuta ngaleyo ndvudvuto lesiyemukela kuNkulunkulu.
5 Njengaloku tinhlupheko taKhristu tisiphetse kangaka, kanjalo-ke nekudvudvuteka kwetfu kuyaphuphuma ngaKhristu.
6 Nasihlupheka kungenca yekudvudvutwa nekusindziswa kwenu; nasidvudvuteka kungenca yekudvudvuteka kwenu, khona Nkulunkulu atenidvudvuta nanicinisele kuletinhlupheko letisiphetse tsine nani.
7 Litsemba letfu kini lisimile, sati kutsi njengobe nihlanganyela natsi etinhluphekweni, kanjalo niyahlanganyela natsi nasendvudvutweni.
8 Asitsandzi, bazalwane, kutsi ningete nati ngetinhlupheko tetfu letasehlela ngesikhatsi sisese-Asiya. Lapho satfolana nebulukhuni lobabungetulu kwemandla etfu kangangekutsi sacishe salahlekelwa nalitsemba lekuphila.
9 Yebo, kona, tsine ngekwetfu besesibona kutsi litfunti lekufa selisengeme. Leyontfo yasifundzisa kutsi singatetsembi tsine, kodvwa setsembe Nkulunkulu; ngobe nguye yedvwa lovusa labafile.
10 Nkulunkulu wasikhulula kuleyo ngoti yekufa. Nanyalo usetawusikhulula futsi. Litsemba letfu silibeke kuye kwekutsi uyawusikhulula nangemuso,
11 njengaloku nani nisiphasa ngekusikhulekela, khona kutewutsi labanyenti basibongele kuNkulunkulu ngesibusiso lesisiphiwe.
12 Kutibonga kwetfu kunye, kutsi nembeza wetfu umhlophe embikwebantfu, ikakhulu kini. Ekutiphatseni kwetfu besimsulwa sesaba Nkulunkulu ngeliciniso, hhayi ngekuhlakanipha kwetfu, kepha ngemusa waNkulunkulu.
13 Sinibhalele loku, lokutawutsi nanikufundza, nikuve. Ngiyetsemba kutsi niyawukuva kahle, kudzimate kube ngusekugcineni,
14 njengaloku senibonabona kutsi tsine singaba ligugu lenu, nani nibe ligugu letfu ngalelo langa lekubuya kweNkhosi yetfu Jesu.
15 Kucala ngangifisa kuta kini, kuze nitewutfola umusa ngalokuphindziwe.
16 Ngangitimisele kwendlula kini, ngisaya eMasedoniya nome sengibuya khona, kuze ningisite nase ngiya eJudiya.
17 Kodvwa ngabe bengidlala yini nangihlose loko? Kungabe ngenta tincumo tami ngekwami yini? Ngitsi: “Yebo,” ngiphindze ngitsi: “Cha,” ngasikhatsi sinye?
18 Njengobe Nkulunkulu etsembekile, nemavi etfu kini akasiye “Yebo” na “Cha.”
19 INdvodzana yaNkulunkulu lenguKhristu Jesu leyashunyayelwa ngitsi kini, mine nginaboSilasi, naThimothi, beyingesiye “Yebo” na “Cha”; kepha yona ingu “Yebo”.
20 Kuto tonkhe tetsembiso takhe Nkulunkulu utsi: “Yebo” kuyo. Kungako nje-ke sidvumisa Nkulunkulu sitsi: “Amen,” ngaJesu Khristu.
21 NguNkulunkulu losicinisako tsine kanye nani kuKhristu. NguNkulunkulu futsi lowasigcoba,
22 wasibeka luphawu lwakhe tsine; wasipha Moya wakhe, etinhlitiyweni tetfu, losibambiso saloko lokutako.
23 Ngibita Nkulunkulu kutsi abe ngufakazi wami wekutsi mine ngangisita nine ngekungaphindzi kwami ngite eKhorinte.
24 Asisho kutsi tsine sitikhulu etikwekukholwa kwenu, kodvwa sibambisene nani ekusebenteleni kujabula kwenu, ngobe nisimile ekukholweni.
1 Kungako ngatimisela ngekutsi ngingaphindzi kunivisa buhlungu ngekunivakashela.
2 Ngobe nangabe nginivise buhlungu, ngubani longangitfokotisa? Kungaba nguye yena lowo lese ngimvise buhlungu?
3 Nguloko lokwabangela kutsi ngibhale njengaloku ngenta. Ngangentela kutsi nangifika ngingete ngaviswa buhlungu ngulabo lekufanele bangijabulise. Mine nginati kahle kamhlophe, kangangekutsi ngingasho ngitsi nangijabulile mine, nani nijabulile.
4 Nganibhalela ngisebuhlungwini ngidzabukile enhlitiyweni, tinyembeti tigcwele emehlo, hhayi ngobe ngifuna kunivisa buhlungu, kepha kuze nati kutsi nginitsandza kangakanani.
5 Nakukhona lovise lomunye buhlungu, akevisi mine ngedvwa, ngalenye indlela usivise buhlungu sonkhe, noko angengeti ngekusho njalo.
6 Kwenele nje lokwekutsi linyenti limlahlile lowo.
7 Nyalo-ke sekufuneka nine nimcolele nibuye nimkhutsate, ningamyekeleli etinhlungwini adzimate aphele.
8 Ngako ngiyanincenga kutsi nimkhombise kutsi nimtsandza ngempela.
9 Empeleni ngakubhalela kutsi nginihlole nje kutsi nihlonipha kuko konkhe yini.
10 Nome ngubani lenimtsetselelako, nami ngiyamtsetselela; ngobe mine nase ngitsetselele, ngisuke ngikwente ngempela, ngikwentele nine kube shangatsi ngusebukhoneni baKhristu.
11 Siyawati emachinga aSathane; ngako-ke akukafaneli simvumele asehlule.
12 Mhlazana ngifika eThrowasi kuyawushumayela liVangeli laKhristu, umnyango wawungivulekele kabanti kutsi ngisebentele iNkhosi.
13 Kodvwa ngabate kuphumula emphefumulweni, ngobe ngangingakamboni Thithusi umzalwane. Ngako-ke ngase ngiyabavalelisa, ngaya eMasedoniya.
14 Kodvwa akabongwe Nkulunkulu losihola njalo eludvwendvweni lwekuncoba ngaKhristu. Nkulunkulu usebentisa tsine kutsi etindzaweni tonkhe avakalise liphunga lelimnandzi lekumati Khristu.
15 Ngempela siliphunga lelimnandzi laKhristu kuNkulunkulu, emkhatsini walabasindziswako nasemkhatsini walabasendleleni lebange ekubhujisweni.
16 Siliphunga lekufa kube kufa kulababhujiswako, kantsi siliphunga lekuphila kube kuphila kulabasindziswako. Ngubani-ke longakumela loko?
17 Tsine-ke asinjengabo bantfu labanyenti labenta livi laNkulunkulu libe yindali; kodvwa tsine lesikuKhristu sikhuluma kwaNkulunkulu ngekuciniseka ebukhoneni bakhe.
1 Sesiphindze siyatincoma yini? Siyatidzinga yini tsine tincwadzi tekusincoma letiya kini nome letiphuma kini, njengobe labanye batidzinga? Cha!
2 Nine niyincwadzi yetfu, lebhalwe etinhlitiyweni tetfu, leyatiwa ifundvwe bantfu bonkhe.
3 Kuyakhanya kutsi niyincwadzi yaKhristu leletfwe ngitsi, lengakabhalwa ngenki, kepha ngaMoya Longcwele, waNkulunkulu lophilako, hhayi etibhelekeceni tematje kepha etinhlitiyweni tebantfu.
4 Loko sikusho ngobe setsembele kuNkulunkulu ngaKhristu.
5 Akusho noko kwekutsi sinemandla ekwenta lutfo ngekwetfu; kute lokuphuma kitsi, kepha emandla etfu avela kuNkulunkulu,
6 lowasenta safaneleka kuba baphatsi besivumelwane lesisha, lesingesiso semtsetfo lobhaliwe, kodvwa saMoya; umtsetfo lobhaliwe uyabulala, kodvwa Moya uyaphilisa.
7 Inkonzo yemtsetfo lobhalwe etibhelekeceni tematje igcine iletse kufa noko yeta ngeludvumo, kangangekutsi baka-Israyeli abazange bakhone kubuka buso baMosi ngenca yenkhatimulo yayo, nome yabuye yaphela.
8 Iyawuba yinkhulu kangakanani-ke leyo nkhatimulo yenkonzo yaMoya?
9 Nangabe inkonzo yemtsetfo leletsa kulahlwa yefika nenkhatimulo lengaka, iyawuba yinkhulu kangakanani-ke inkhatimulo yalenkonzo lesenta silungelane naNkulunkulu?
10 Nangempela loko lokwase kwefika ngenkhatimulo seyakulahlekela, sekuvulele litfuba kuloko lokunenkhatimulo lenkhulu kuneyako.
11 Ngobe nangabe loko lobekutawuphela kwaba neyako inkhatimulo, iyawuba yinkhulu kangakanani-ke inkhatimulo yaloko lokungayikuphela?
12 Ngulelo litsemba letfu, ngiko nje sikhuluma ngesibindzi.
13 Tsine asifanani naMosi yena lowambonya buso bakhe ngendvwangu kuze baka-Israyeli bangetiwusibona siphetfo saleyo nkhatimulo lebeyitawuphela.
14 Kodvwa ingcondvo yabo yaba lukhuni, ngisho nalamuhla loku nakufundvwa sivumelwane lesidzala, leyo ndvwangu isehleti; nanyalo ayikembulwa, ngobe yembuleka ngaKhristu kuphela.
15 Yebo, kudzimate kube ngulamuhla, nakufundvwa tincwadzi taMosi, kuba shangatsi kukhona indvwangu lembonye tingcondvo tabo, baka-Israyeli.
16 Kodvwa “umuntfu nakaphendvukela kuNkulunkulu, indvwangu iyesuswa.”
17 INkhosi inguye Moya, lapho akhona Moya nenkhululeko ikhona.
18 Ngako tsine sonkhe lesibuka ngebuso lobembuliwe, inkhatimulo yeNkhosi ibonakala kitsi njengasesibukweni, sibe siguculwa sibe njengaye ngekusuka ezingeni lelitsite lenkhatimulo siye kulelinye lizinga. Ngulowo-ke umsebenti weNkhosi lenguMoya.
1 Nkulunkulu ngemusa wakhe wasiniketa lenkonzo; ngiko nje singadzinwa.
2 Sesiyilahle yonkhe imisebenti yebumnyama neyelihlazo asiphili ngebucili, asiliphambanisi livi laNkulunkulu, kepha sibeka liciniso laNkulunkulu ebaleni, kunembeza webantfu bonkhe embikwaNkulunkulu.
3 Kepha nangabe liVangeli letfu lifihlakele, lifihlakele kuphela kulabo labalahlekako.
4 Ngobe kubo labangakholwa nkulunkulu walomhlaba uphumphutsekise tingcondvo tabo, kuze kungasi kubo kukhanya kweliVangeli lenkhatimulo yaKhristu, lofute Nkulunkulu.
5 Asitishumayeli tsine, kodvwa sishumayela kutsi Khristu Jesu uyiNkhosi, tsine-ke sitisebenti tenu ngenca yakhe.
6 Ngobe yena lowo Nkulunkulu lowatsi: “Akuvele kukhanya ebumnyameni,” nguye futsi lokhanyise etinhlitiyweni tetfu, kuze sikwati kubona inkhatimulo yaNkulunkulu ebusweni baKhristu.
7 Kepha lamagugu lesinawo siwaphetse ngetitja telibumba. Loko kubonakalisa kutsi lamandla lamakhulu kangaka akasiwo etfu kepha ngaNkulunkulu.
8 Sicindzetelwa ndzawo tonkhe, kodvwa asibotfoki; siyacakeka, kodvwa asipheli emandla.
9 Siyatingelwa, kodvwa Nkulunkulu akasilahli, siyamukulwa siwiswe phansi, kodvwa asibhujiswa.
10 Solomane setfwala njalo emitimbeni yetfu kufa kwaJesu, kuze kutsi nekuphila kwakhe kubonakaliswe emitimbeni yetfu.
11 Ngobe tsine, nome sisaphila, sinikelwa mihla le ekufeni, ngenca yaJesu, kuze kutsi nekuphila kwakhe kubonakaliswe emitimbeni yetfu lefako.
12 Kanjalo-ke kitsi kusebenta kufa, kepha kini kusebenta kuphila.
13 UmBhalo utsi: “Ngangikholwa kuNkulunkulu, ngako ngakhuluma.” Natsi futsi sinawo lowo moya wekukholwa kuNkulunkulu, ngako-ke sikhuluma
14 sati kutsi yena lowo Nkulunkulu lowavusa iNkhosi Jesu, natsi uyawusivusa kanye naJesu asetfule kanye nani kuye.
15 Ngobe konkhe loko kwentelwa nine, kuze kutsi umusa usenabela kubantfu labanyenti, kwandziswe kubonga kwabo, kube ludvumo kuNkulunkulu.
16 Ngako-ke asidzinwa; nome lingephandle letfu libhubha, kodvwa lingekhatsi lentiwa libe lisha imihla ngemihla.
17 Ngobe lolusizi lwetfu luncane futsi lwesikhashana, lusilungiselela inkhatimulo lengenawulinganiswa, yaphakadze.
18 Tsine asibheki lokubonakalako kodvwa lokungabonakali, ngobe loko lokubonakalako kwesikhashana nje, kepha loko lokungabonakali kwaphakadze.
1 Ngobe siyati kutsi nangabe lifutwa lelidlangala lelingumtimba wetfu walapha emhlabeni, sinesakhiwo saNkulunkulu ezulwini, indlu yaphakadze lengakakhiwa ngetandla.
2 Empeleni siyabubula silangatelela kakhulu likhaya lasezulwini,
3 kuze kutsi nasikulo singetiwutfolakala site indzawo yekuhlala.
4 Ngobe nasisekulo lelidlangala lelingumtimba wetfu, siyabubula sikhale ngaphansi kwemtfwalo. Asifuni kuwushiya lomtimba lomdzala, kodvwa sifuna kwemukela kuphephela kulomusha, kuze kutsi loko lokubhubhako kumitwe kuphila.
5 NguNkulunkulu matfupha lowasilungiselela loku ngekusinika Moya losibambiso.
6 Ngako-ke ngaso sonkhe sikhatsi sinelitsemba, ngobe siyati kutsi nasisekuwo lomtimba sisekhashane nalelikhaya leliseNkhosini.
7 Siphila ngekukholwa, hhayi ngekubona.
8 Ngesibindzi sitsi kuncono siwushiye lomtimba siyewuhlala neNkhosi.
9 Ngako nome sikhona la, nome singekho la, umgomo wetfu kutsi sihlale semukelekile kuyo.
10 Ngobe sonkhe kufanele sime embikwesihlalo saKhristu sekwehlulela, kuze kutsi ngulowo nalowo atekwemukela umvuzo wakhe ngalakwentile, lokuhle nome lokubi, asekulomtimba.
11 Ngako-ke, njengobe sati kutsi kuyini kwesaba Nkulunkulu, setama kuzuza bonkhe bantfu. Nkulunkulu usati njengobe sinjalo; nami ngiyetsemba kutsi nani niyasicondzisisa.
12 Ngaloko-ke asetami kubuye sitincome kini. Sininika litfuba lekutsi nitigabatise ngatsi, kuze kutsi nitekwati kubaphendvula labo labatigabatisa ngalokubonakala emehlweni, esikhundleni sekutigabatisa ngalokusenhlitiyweni.
13 Nangabe sibukeka sitinhlanya, kungenca yaNkulunkulu. Nangabe sibukeka singahlanyi, kungenca yenu.
14 Lutsandvo lwaKhristu luyasichuba. Sesidzimate sefika kunasi siphetfo sekutsi: Munye lowafela bonkhe; ngako-ke bonkhe bafa.
15 Wabafela bonkhe, kuze kutsi bonkhe labo labafela bangabe basatiphilela, kodvwa baphilele yena lowabafela waphindze wavuselwa bona.
16 Ngako kusukela nyalo asiseyikwati muntfu ngekwenyama. Nome sake samati Khristu ngekwenyama nyalo asisamati kanjalo.
17 Ngako-ke nangabe umuntfu akuKhristu, usidalwa lesisha; tintfo letindzala setendlulile, konkhe sekwentiwe kwaba kusha.
18 Konkhe kuphuma kuNkulunkulu, lowabuyisana natsi ngaKhristu, wase usinika umsebenti wekutsi natsi sibuyisane nalabanye;
19 loku kusho naku: Nkulunkulu ubuyisene nelive ngaKhristu. Bantfu akababambeli emagcubu ngetono tabo, kodvwa usiphatsise livi lekubuyisana.
20 Ngako singemancusa aKhristu; Nkulunkulu uncusa ngatsi. Sinincenga egameni laKhristu sitsi: “Buyisanani naNkulunkulu.”
21 Khristu abengenasono. Noko Nkulunkulu wamenta kutsi abe sono ngenca yetfu, kuze kutsi ngaye semukeleke kuNkulunkulu kutsi silungile.
1 Njengobe sibambisene naNkulunkulu emsebentini wakhe, siyanincenga sitsi: Yemukelani umusa waNkulunkulu, ningawenti lite.
2 Ngobe utsi: “Ngikuvile ngesikhatsi lesifanele; ngakusita ngelilanga lensindziso.” Lalelani la, “sikhatsi lesifanele” ngiso lesi; “lilanga lensindziso” ngilo lona leli.
3 Kute lesimbekele sikhubekiso endleleni, kuze kutsi kubete liphutsa lelitfolakala emsebentini wetfu.
4 Esikhundleni saloko konkhe lesikwentako sikwenta sikhombisa kutsi sitisebenti taNkulunkulu ngekutsi konkhe sikumele: ngekucinisela lokukhulu ekuhlushweni, nasebulukhunini, nasekugongonyekeni,
5 nasekushayweni, nasekufakweni ejele, nasetiphitsiphitsini, nasekukhandlekeni, nasekucwasheni, nasekulaleni ngendlala,
6 nangekuhlanteka, nangelwati, nangekubeketela, nangemusa, nangaMoya Longcwele, nangelutsandvo lolujulile,
7 nangelivi leliciniso, nangemandla aNkulunkulu. Kuko konkhe loku tikhali tetfu tikulunga lesikuphetse ngesandla sangesekudla nangesandla sangesancele.
8 Siyadvunyiswa, sihhalatiswe. Siyasolwa, sibongwe. Sitsatfwa njengebakhohlisi, kantsi sibeliciniso.
9 Asinakwa, kodvwa satiwa kakhulu. Shangatsi siyafa, kodvwa siyaphila. Siyajeziswa, kodvwa asigwetjwa intsambo.
10 Siviswa buhlungu, kodvwa sitfokota njalonjalo. Siphuyile, kodvwa banyenti lesibanjingisako. Asinalutfo, kodvwa sinako konkhe.
11 Sikhuluma kini, nine baseKhorinte, inhlitiyo yetfu ivulekele kini.
12 Kute lesinigodlele kona tsine, kodvwa ngini lenisivalele tinhlitiyo tenu.
13 Nyalo-ke, sengikhuluma njengeyise akhuluma kubantfwana bakhe, ngitsi: “Nani-ke, vulani tinhlitiyo tenu.”
14 Ningaboshelwa ejokeni linye nalabangakholwa. Empeleni nje, kukhona yini kuvana kwekulunga nebubi? Buyini budlelwane bekukhanya nebumnyama?
15 Bangaba nakuvana kuni boKhristu naBheliyali? Angevana ngani umKhristu nemhedeni?
16 Nhlanganyelo yini lesemkhatsini welithempeli laNkulunkulu netithico? Ngobe tsine silithempeli laNkulunkulu lophilako; njengobe Nkulunkulu watsi: “Ngiyawuhlala kubo, ngihambe emkhatsini wabo; ngiyawuba nguNkulunkulu wabo, bona bayawuba sive sami.”
17 INkhosi yaphindza yatsi: “Phumani emkhatsini wabo, nehlukane nabo. Ningakutsintsi lokungcolile, ngiyawube sengiyanemukela.”
18 INkhosi, Somandla, yaphindza yatsi: “Mine ngiyawuba nguYihlo, nine-ke niyawuba ngemadvodzana nemadvodzakati ami.”
1 Bazalwane, njengobe letetsembiso titetfu, asitihlante kuko konkhe lokungcolisa umtimba nemoya, siphile imphilo yebungcwele lobuphelele ngekwesaba Nkulunkulu.
2 Semukeleni ngenhlitiyo lemhlophe. Kute lesamona, kute lesamphatsa kabi, kute nalesamphamba.
3 Loko angikushololo kutsi nginilahle; bese vele ngishito lokutsi nine nisetinhlitiyweni tetfu, ngangekutsi nome kuphila nome kufa, sifisa kutsi lokungenani sibe munye kuko.
4 Nginesibindzi lesikhulu kini; ngitigcabha kakhulu ngani. Kuko konkhe lokuhlupheka kwetfu ngiva nginendvudvuto, nenjabulo yami iyaphuphuma.
5 Kuliciniso kutsi nasifika eMasedoniya, asikutfolanga kuphumula. Satikhandza sisenhluphekweni macala onkhe: Kwakunekulwa ngephandle, kunekwesaba ngekhatsi.
6 Kodvwa Nkulunkulu lodvudvuta labanetinhlitiyo letephukile, wasidvudvuta ngekufika kwaThithusi.
7 Asidvudvutwanga ngiko kuphela, kodvwa sadvudvuteka nangekudvudvuteka kwakhe asemkhatsini wenu. Wasitjela kutsi beninesifiso sekungibona, nekutsi naba buhlungu kangakanani etinhlitiyweni, nekutsi benifisa kangakanani kuma kanye nami. Loko kwangenta ngajabula kakhulu futsi.
8 Ngobe nome nganidzabukisa ngalencwadzi, noko angitisoli ngayo. Ngiyabona kutsi lencwadzi yanivisa buhlungu nome nje kwakukwesikhashana. Kodvwa nome ngake ngatisola,
9 nyalo sengiyajabula, hhayi ngobe neva buhlungu, kodvwa ngobe kuva kwenu buhlungu kwanenta naphendvuka. Loko kuva kwenu buhlungu kwaya ngentsandvo yaNkulunkulu, ngako-ke kute lokwanilahlekela ngenca yetfu.
10 Kudzabuka lokukwaNkulunkulu kuveta kuphendvuka kube kusindziswa, kubete kutisola ngako; kodvwa kudzabuka lokukwemhlaba kuveta kufa.
11 Ase nibuke nje kutsi lokudzabuka lokukwaNkulunkulu sekuveteni kini: Kukhutsala lokungaka, nekukwati kutiphendvulela, nekutfukutsela, nekwesaba, nekulangatelela, nenshisekelo, nekujezisa. Kuko konkhe senikhombise kutsi nite licala kulendzaba.
12 Ngako-ke nome nganibhalela, anginibhalelanga ngenca yalotsite labente lokubi, nome ngenca yalotsite labephatseke dlephu, kodvwa ngangentela kunikhombisa embikwaNkulunkulu inshisekelo yenu ngatsi.
13 Ngako-ke siyadvudvuteka. Ngaphandle kwalendvudvuto sajabula kakhulu ngekujabula kwaThithusi, ngobe nonkhe namcinisa lidvolo.
14 Kube benginidvumisile kuye, ngabe anikangijabhisi. Kute lesakukhuluma kini ngaphandle kweliciniso, nekunidvumisa kwetfu kuThithusi kwatfolakala kuliciniso.
15 Inhlitiyo yakhe seyinamatsele kini, ngobe phela ukhumbula inhlonipho yenu, nekutsi namemukela ngekwesaba nangekutfutfumela.
16 Ngiyajabula ngobe, kuko konkhe, sengingetsembela ngalokuphelele kini.
1 Bazalwane, sitsandza kutsi nati ngemusa waNkulunkulu lawuphe emabandla aseMasedoniya.
2 Avivinywa kakhulu ngekuhlupheka, noko emkhatsini wako konkhe loko, kujabula kwawo kwaphuphuma. Nome bekaphuye kakhulu, akhombisa kuceba ngekwephana lokukhulu ekunikeleni kwawo.
3 Ngiyanitjela ngitsi, anikela ngemandla awo onkhe, kwadzimate kwaba ngetulu kwawo. Ngekweminikelo yawo yesihle
4 asincengisisa kutsi abe nesabelo ekusiteni labangcwele.
5 Loko-ke sasingakakubheki; ngobe bacale batinikela bona eNkhosini, base-ke batetfula kitsi ngekwentsandvo yaNkulunkulu.
6 Ngiko nje sacela Thithusi kutsi acedzele lowo msebenti wemusa nakini, njengobe wawuvele usetandleni takhe kwasekucaleni.
7 Njengobe nenta kahle kakhulu kuko konkhe: ekukholweni, nasekukhulumeni, naselwatini, nasekukhutsaleni konkhe, naselutsandvweni lwenu lese siluvutsele kini, nibovele nente kahle kakhulu nakulomusa wekwephana.
8 Loko ngikusho, hhayi njengemtsetfo kodvwa kunitjela ngekukhutsatela kwalabanye, ngetama kutfola kahle kutsi lutsandvo lwenu lungilo sibili yini.
9 Ngobe niyawati umusa weNkhosi yetfu Jesu Khristu, kutsi nome abecebile, kodvwa ngenca yenu waba luphuya, kuze kutsi ngebuphuya bakhe anente nicebe.
10 Ngako ase nginivetele umcondvo wami ngalendzaba: Nine nakucala nyakenye kufaka sandla ekusiteni ngesihle. Nyalo-ke ngitsi kungaba ncono kutsi
11 nicedzele loko lenakucala nyakenye. Nanitimisele kuba lusito ngaleso sikhatsi; ngako-ke chubekani nente njalo ngekwemandla enu.
12 Nangabe umuntfu atimisele ngekunikela, akukabhekeki kutsi anikele ngaloko late kona, kodvwa ubhekeke kunikela ngaloko lanako.
13 Nangisho njalo, angikacondzi kutsi ngitsi labanye abetfwale kamalula, nine-ke bese netfwala kamatima; kodvwa akwetfwaliswane ngalokulinganako.
14 Kwanyalo nje nine ninenala letawuhlangabetana netidzingo tabo. Ngalelinye lilanga inala yabo iyawuhlangabetana netidzingo tenu, kuze kutsi kubete umehluko.
15 NemBhalo utsi: “Lowo lowabutsa lokunyenti, akazange abe nenala; nalowo lowabutsa kwaba kuncane, akazange eswele.”
16 Kodvwa akabongwe Nkulunkulu lobeke enhlitiyweni yaThithusi lenshisekelo lenjengeyetfu yekunisita.
17 Samcela kutsi ete kini, wavuma; kodvwa abesavele atilungiselele kutitela lapho yena ngekwakhe.
18 Simtfumele lapho kini kanye nemzalwane lodvunyiswa kuwo onkhe emabandla ngemsebenti wakhe wekuhambisa liVangeli.
19 Akusiko loko kuphela, kodvwa ukhetfwe ngemabandla kutsi abe sitfunywa kanye natsi kulomsebenti wekuhambisa lomnikelo lesiwuphatsele kukhombisa ludvumo lweNkhosi nekubakhutsalela kwetfu.
20 Setama kutsi kubete losisolako ngalesipho lesisiphetse.
21 Injongo yetfu kutsi lesikwentako kube kuhle embikwaNkulunkulu nasembikwebantfu.
22 Sibatfumele kanye nemzalwane wetfu lesike samvivinya kanyenti samkhandza akhutsele, kodvwa nyalo unesifiso lesikhulu kunakucala, ngobe unetsemba kakhulu.
23 Thithusi-ke yena sibambisene naye emsebentini wekunikhonta. Labazalwane-ke, batitfunywa temabandla, baludvumo kuKhristu.
24 Ngako-ke khombisani embikwemabandla lutsandvo lwenu kulamadvodza, nifakazele kutigcabha kwetfu ngani.
1 Mayelana nekunikelela bazalwane, asikho sidzingo sekutsi nginibhalele.
2 Ngiyati kutsi nitimisele kangakanani kusita. Ngiko loko lengiyaye ngitigcabhe ngako kubaseMasedoniya, ngibatjela kutsi base-Akhaya bese bavele bakulungele kunikela khona nyakenye. Inshisekelo yenu ibavusele umdlandla labanyenti.
3 Kodvwa labazalwane ngibatfumelele kutsi kube bufakazi kutsi konkhe loko lesakusho sitigcabha ngani kulendzaba kuliciniso. Ngifuna nihlale nilungele;
4 ngobe phela nangingafika nemaMasedoniya sikhandze ningakalungeli, tsine nani siyawuba nemahloni, ngobe besinetsembe kakhulu.
5 Ngiko nje ngibone kufanele kutsi ngicele labazalwane bahambe embili bete lapho kini, batewulungisa lesipho lenisetsembisile, kuze kutsi sihlale sesilungile, hhayi ngekuphocelelwa, kodvwa ngesihle.
6 Khumbulani naku: Lowo lohlanyela kancane, uyawuvuna kancane; lowo lohlanyela kakhulu, uyawuvuna kakhulu.
7 Lowo nalowo akatincumele yena enhlitiyweni yakhe kutsi utawunikela kangakanani, bese unikela ngekukhululeka, hhayi ngekusola nangekucindzetelwa. Nkulunkulu utsandza umuntfu lonikela ngenhlitiyo lemhlophe.
8 Nkulunkulu unawo emandla ekuninika konkhe lenikudzingako, nangetulu kwako, kuze kutsi ngaso sonkhe sikhatsi nibe nako kube kunyenti, nitekwati kusita emisebentini yonkhe lemihle.
9 NemBhalo utsi: “Wenetisa ngekukhululeka, aphe labaphuyile; kulunga kwakhe kungeke kuphele phakadze naphakadze.”
10 Lowo lonika inhlanyelo kumhlanyeli ephane ngesinkhwa sekudliwa, uyawuninika inhlanyelo aphindze ayente imile ikhule, asandzise nesivuno sekunikela kwenu ngekwephana.
11 Uyawunipha konkhe lokuhle, kuze nikwati kwephana ngato tonkhe tindlela; loko kuyakwenta labanye babonge Nkulunkulu ngetipho tenu labatitfole ngatsi.
12 Ngobe lenkonzo lesiyentako ayisiti labangcwele kuphela, kodvwa iphuphuma ngekutsi labanyenti babonge Nkulunkulu.
13 Bantfu bayawudvumisa Nkulunkulu ngalenkonzo yenu lefakazela kulalela kwenu liVangeli laKhristu, lelisivumo senu. Lokusitana kufakazela kwephana kwenu ngekubanikelela bona kanye nabo bonkhe labanye.
14 Bayawubona bukhulu bemusa waNkulunkulu kini, bese bafisa kakhulu kuhlanganyela nani emthandazweni.
15 Akabongwe Nkulunkulu ngesipho sakhe lesingachazeki.
1 Mine, Pawula matfupha, ngiyanincenga ngebumnene nangebubele baKhristu. Nginguye yena loPawula lenimtsatsa ngekutsi uyatikhobosa nasemkhatsini wenu, kodvwa abe nesibindzi kini nangekho embikwenu.
2 Nginincenga kutsi nase ngifikile lapho kungadzingeki ngibadvumele ngesibindzi lengicondze kusisebentisa kulabanye labatsi tsine sichutjwa live.
3 Ngobe nome siphila eveni, kodvwa asilwi ngetikhali telive.
4 Tikhali lesilwa ngato akusito telive, kodvwa tikhali taNkulunkulu letinemandla ekubhidlita tinqaba, ticitse tinkhulumo letingenamsebenti.
5 Tibhidlita konkhe lokuphakamele kuvimbela kwati Nkulunkulu. Titfumba yonkhe imicabango, tiyente itfobele kulalela Khristu.
6 Nangabe senitimisele kulalela ngalokuphelele, sikulungele kujezisa konkhe kungalaleli.
7 Tsatsani lamaciniso njengobe anjalo. Kukhona yini lokholwa kutsi yena waKhristu? Kuhle loko, kodvwa akase acabange naku: Natsi futsi sibaKhristu njengaye.
8 Mhlawumbe ngitigabatisa kakhulu ngalamandla neligunya lami lenganikwa lona nguNkulunkulu, kutsi nginakhe nginganibulali. Kodvwa ngite emahloni ngaloko.
9 Ningacabangi kutsi ngicondze kunetfusa nje ngaletincwadzi.
10 Labanye batsi: “Tincwadzi takhe tinemandla nesisindvo, kodvwa bukhona bakhe abunasitfunti, nenkhulumo yakhe imalula.”
11 Lowo locabanga loko kufanele ati kutsi loko lesikukhulume encwadzini singekho, siyawukwenta nase sifikile lapho kini.
12 Asisho kutsi ngaloko sicondze kutilinganisa nalabo labatincomako, singeke sikwente loko. Kodvwa nabaticatsanisa bona bodvwa, batilinganise bona bodvwa, batilima.
13 Kodvwa singeke sitigabatise kwendlula, noko sitawugcina emaphetselweni lesinikwe wona nguNkulunkulu cobo lwakhe. Lawo maphetselo anifaka ngekhatsi nine baseKhorinte.
14 Ngitsi lesefika kini kucala neliVangeli laKhristu; ngako-ke nasitigabatisa ngani, sisengekhatsi kwemaphetselo etfu.
15 Asitigabatisi ngephandle kwemaphetselo ngalokwentiwe ngulabanye, kodvwa siyetsemba kutsi nisakhula ekukholweni, nemsebenti wetfu utakwandza emkhatsini wenu,
16 kuze sitewushumayela liVangeli nasemaveni langesheya kwenu, ngaphandle kwekutigabatisa ngemsebenti lese wentiwe ngulomunye umuntfu.
17 UmBhalo utsi: “Lowo lofuna kutibonga, akatibonge ngeNkhosi.”
18 Ngobe lowemukelela eNkhosini, akusiye lotincomako, kodvwa ngulowo lonconywa yiNkhosi.
1 Ngicela senimane ningibeketelele ngalobulinyana lengitabukhuluma. Vele, ngiyati seningibeketelele!
2 Nginesikhwele ngani, sikhwele saNkulunkulu; ngobe nganendzisa njengentfombi lengenasici, nganetfula kuKhristu, lekunguyona ndvodza yenu leyodvwana.
3 Kodvwa ngineluvalo ngani, kutsi njengobe inyoka yakhohlisa Eva ngebucili bayo, nani tingcondvo tenu tingahle tedukiswe niyekele kutinikela kuKhristu ngeliciniso nangebumsulwa.
4 Nangabe kufika lomunye umuntfu ashumayele lomunye Jesu kunalowo lesamshumayela, nome-ke nangabe nemukela lomunye umoya lowehlukile kunalowo lenamemukela, nome-ke nangabe nemukela lelinye livangeli lelehlukile kunalelo lenalemukela, konkhe loko shangatsi nikubeketelele ngalokumangalisako.
5 Ngitsi angisiye lodzelelekile kunalabaphostoli lababonakala bagcame kakhulu.
6 Nome ngingesilo libeka ekukhulumeni, kodvwa nginalo lwati. Loko-ke sinikhombise ngato tonkhe tindlela etintfweni tonkhe.
7 Ngona yini ngekunishumayela liVangeli laNkulunkulu mahhala, nangekutitfoba kuze niphakanyiswe nine?
8 Ngawaphamba lamanye emabandla ngekutsi ngitsatse liholo lami kuwo, kuze kutsi ngikhonte nine.
9 Ngisenani, angizange ngibe ngumtfwalo kunome ngubani, nangeswele. Tonkhe tidzingo tami tacedvwa bazalwane labebaphuma eMasedoniya. Ngako-ke angizange ngibe ngumtfwalo, futsi sonkhe sikhatsi ngiyawuchubeka ngingesiwo.
10 Njengobe liciniso laKhristu likimi, kute loyawungibindzisa kulokutigabatisa kwami etifundzeni tase-Akhaya.
11 Leni? Ngobe nginganitsandzi yini? Nkulunkulu uyati kutsi ngiyanitsandza.
12 Kodvwa ngitawuchubeka ngente loku lengikwentako, kuze kutsi bangalitfoli litfuba lekutiveta labo labalifunako, labenta shangatsi benta umsebenti lofanana newetfu njengobe bona basho.
13 Ngobe labantfu babaphostolimbumbulu, tisebenti temanga; batenta shangatsi baphostoli baKhristu.
14 Loko-ke akumangalisi, ngobe naSathane utigucula abe yingilosi yekukhanya.
15 Ngako-ke akumangalisi nangabe tisebenti takhe titigucula tibe tisebenti tekulunga. Siphetfo sato siyawuya ngemisebenti yato.
16 Ngiyaphindza ngitsi: Kubete longitsatsa njengesilima; kodvwa nome kunjalo, ningangitsatsa njengaso, kuze nami ngitewutfola litfutjana lekutigabatisa.
17 Loko lengikushoko-ke nyalo, angikukhulumi ngemandla nangeligunya leNkhosi, kodvwa njengesilima lesitigabatisa ngesibindzi.
18 Ingani bantfu labanye bayatigabatisa ngetintfo tabo temhlaba; pho, mine ngitakuyekelelani kutigabatisa?
19 Maye, niyajabula ngekubeketelela tilima nibe nine nihlakaniphile!
20 Niyambeketelela nome ngubani lonigcilatako, nalonichwagako, nalonicaphatako, nalotichayisako, nalonimukula ebusweni.
21 Nginemahloni nangikuvuma kutsi mine bengehluleka kakhulu kuloko. Kodvwa nakukhona umuntfu lofuna kutigabatisa ngentfo letsite, loko-ke ngikusho njengesilima, nami futsi ngingatigabatisa.
22 BangemaHebheru yini? Nami nginguye. Bangema-Israyeli yini? Nami nginguye. Batitukulwane ta-Abrahama yini? Mine-ke ngingiso.
23 Batisebenti taKhristu yini? Mine ngingulesincono. Loku sengikukhuluma njengeluhlanya. Ngasebenta kakhulu kunabo, ngidvonsa matima, ngaboshwa kanyenti, ngashaywa kanyenti, ngabasengotini yekufa.
24 Kwaze kwaba ngemahlandla lasihlanu emaJuda angibhambabula imivimba lengema-39 leyayimiswe ngumtsetfo wawo.
25 Ngabhanjabulwa ngemzaca emahlandla lamatsatfu; ngagcotjwa ngematje kanye. Ngephukelwa yimikhumbi emahlandla lamatsatfu; ngabasesitsabatsabeni selwandle busuku bonkhe nemini yonkhe.
26 Eluhambeni lwami ngabasetingotini temifula, nasetingotini tetigelekece, nasetingotini kubantfu bakitsi, nasetingotini kubetive, nasetingotini tasemadolobheni, nasetingotini temaphandleni, nasetingotini telwandle, nasetingotini kubazalwanembumbulu.
27 Ngasebenta kakhulu ngidvonsa matima. Bengike ngicwashe ngingalali, ngilambe, ngome, ngeswele kudla, ngiphatfwe lichwa, ngeswele nekwekwembatsa.
28 Ngetulu kwako konkhe, nginemtfwalo losetikwami, nginekushisekela onkhe emabandla.
29 Nakukhona lobutsakatsaka, angitfwalisani naye yini kulobutsakatsaka bakhe? Nakukhona lowako ekukholweni, angimveli buhlungu yini?
30 Nangabe kufanele ngitigabatise, ngiyawutigabatisa ngetintfo letibonakalisa butsakatsaka bami.
31 Nkulunkulu neYise weNkhosi Jesu, yena lofanele kudvunyiswa phakadze naphakadze, uyati kutsi angicali wona emanga.
32 EDamaseko Lusibalukhulu labengaphansi kwenkhosi Arethasi wagadza lidolobha lonkhe afuna kungibamba angibophe,
33 kodvwa ngakhishwa ngelibhasikidi esikhaleni lesasentiwe elubondzeni, ngaphunyula esandleni sakhe.
1 Kufanele ngitigabatise, nome kungasiti lutfo nje. Sengitanitjela ngemibono netembulo teNkhosi.
2 Kukhona umuntfu lengimati akuKhristu, lekwatsi eminyakeni leli-14 leyendlulile, wenyuselwa ezulwini lesitsatfu; nome abesemtimbeni nome abekuMoya, angati; nguNkulunkulu lowatiko.
3 Ngiyaphindza ngitsi: Nome lomuntfu abesemtimbeni nome abekuMoya, angati; nguNkulunkulu lowatiko. Kodvwa ngiyamati lomuntfu
4 kutsi wenyuselwa ePharadisi lapho efike weva tintfo letiyimfihlo, kangangekutsi kute umuntfu lekufanele atikhulume.
5 Ngingamgabatisa-ke umuntfu lonjalo, kodvwa mine ngingeke ngitigabatise ngalutfo, ngaphandle kwebutsakatsaka bami.
6 Kube bengifuna kutigabatisa, bengingeke ngibente bulima, ngobe ngitabe ngikhuluma liciniso. Kodvwa ngiyativimba kuloko, kuze phela kubete longibeka ngetulu kwaloko langibona nome langiva nginguko.
7 Bengingahle ngikhukhunyetwe kakhulu ngenca yetembulo letinyenti, ngako-ke kwabekwa linyeva enyameni yami, ingilosi yaSathane yangihlaba, khona ngingetitikhukhumeta kakhulu.
8 Kwadzimate kwaba ngemahlandla lamatsatfu ngincusa iNkhosi kutsi ilisuse kimi.
9 Kodvwa iNkhosi yatsi kimi: “Umusa wami ukwanele wena, ngobe emandla ami abonakaliswa aphelele ebutsakatsakeni.” Ngako-ke ngitawutigabatisa kakhulu ngebutsakatsaka bami, kuze phela emandla aKhristu atewuhlala kimi.
10 Ngenca yaKhristu-ke, ngiyeneliswa butsakatsaka, netinhlamba, nebulukhuni, nekutingelelwa kuhlushwa kanye netingoti; ngobe nangibutsakatsaka, kulapho ngiba nemandla khona.
11 Ngibe silima! Ngiphocelelwe ngini kulobulima, ngobe bekufanele nginconywe ngini. Empeleni angikedzeleleki kunabo bonkhe labaphostoli labagcamile, nome ngingasibani nje.
12 Timphawu temphostoli wangempela tabonakaliswa kini, njengobe nitibonele ngemehlo enu, nati kubeketela, netibonakaliso, netimanga, nemisebenti yemandla.
13 Empeleni nine nentiwa yini kutsi nibe nenhlanhla lembi kunalamanye emabandla ngaphandle kwekutsi nine angizange nginetfwese umtfwalo? Ngitsetseleleni kulesiphosiso!
14 Sekwesitsatfu ngilungela kuta lapho kini. Ngingeke ngibe ngumtfwalo kini, ngobe angifuni kona lokukwenu, kodvwa ngifuna nine. Phela bantfwana akusibo labafanele kukhatsalela batali babo, kodvwa batali labafanele bakhatsalele bantfwababo.
15 Ngiyawujabula kutsi nginikele ngako konkhe ngize nginikelwe nami lucobo, kuze kusitakale imiphefumulo yenu. Nanginitsandza kakhulu, pho, mine kufanele yini kutsi ngitsandvwe kancane?
16 Hho! Kodvwa nitsi ngaba nebucili ngekutsi nginganetfwesi umtfwalo, kuze phela ngitenibamba kahle ngebucili.
17 Nganicinela yini ngalabo lenganitfumelela bona?
18 Ngakhutsata Thithusi kutsi ahambe, ngatfuma umzalwane kutsi ahambe naye. Ngobe loThithusi wanihlakaniphela yini? Sasingatenti ngamoya munye yini tintfo? Asititsatsanga yini tinyatselo letifanako?
19 Beningacabangi yini kutsi sonkhe lesikhatsi besitivikela kini? Batsandzekako, konkhe loku besikukhuluma kuKhristu embikwaNkulunkulu, kuze nitekwakheka.
20 Ngobe ngesaba kutsi mhlawumbe ngiyawutsi ngiyefika lapho kini nginikhandze ningesiko loko lengibheke kutsi nibe ngiko, nami ningikhandze ngingesiko loko lenibheke kutsi ngibe ngiko. Ngesaba kutsi mhlawumbe kunekulwa, nemona, nekutfukutsela, nebugovu, nenkhani, nenhlebo, nekutatisa, nesiphitsiphitsi.
21 Ngesaba kutsi nangiphindze ngita lapho futsi, shangatsi Nkulunkulu wami angangitfobisa embikwenu, kutsi ngililele labo labonile labangakaphendvuki ekungcoleni, nasebugwadleni, nasebuphingini, nasenkhanukweni labayentile.
1 Sekwesitsatfu ngilungiselela kuta lapho kini. “Yonkhe inkhulumo yenu iboba nabofakazi lababili nome labatsatfu,” njengobe kusho umBhalo.
2 Ngabecwayisa labo labona kucala, namanje futsi ngiyabecwayisa naloku ngingekho, njengobe ngabatjela nangilapho ekuvakasheni kwami kwesibili kutsi nangingefika lapho ngiyakubashiya emehlo ekubuka,
3 njengobe nifuna siciniseko kutsi Khristu ukhuluma kimi. Yena angeke aniphatse ngebutsakatsaka, kodvwa unemandla kini.
4 Ngobe wabetselwa ebutsakatsakeni, kodvwa sewuphila ngemandla aNkulunkulu. Sibutsakatsaka kuye, kodvwa sitawuphila kanye naye ngemandla aNkulunkulu, kuze sikwati kunisita.
5 Tihlolisiseni nine ngekwenu nitibone kutsi nibambelele yini ekukholweni kwenu. Tivivinyeni nine. Aniboni yini kutsi Jesu Khristu ukini? Ngaphandle kwaloko nitehluleki!
6 Ngiyetsemba niyawukhandza kutsi asikehluleki.
7 Kodvwa sithandaza kuNkulunkulu kutsi ningoni, hhayi kutsi sibonakale singulabancono, kodvwa kuze nente loko lokufanele, nome kungabonakala shangatsi sehlulekile.
8 Ngobe site emandla ekwenta lutfo, nasimelene neliciniso, kodvwa sinawo kuphela nasimele liciniso.
9 Ngobe tsine siyajabula nangabe nine nicinile nome tsine sibutsakatsaka. Sithandazela kutsi nine nipheleliswe kuKhristu.
10 Loku ngikubhala ngisengakefiki kini, kuze kutsi nangifika lapho kungadzingeki kutsi nginiphatse ngesandla lesimatima lenginikwe sona yiNkhosi, kutsi ngakhe, ngingahliphiti.
11 Kwekugcina-ke bazalwane, ngitsi: Salani kahle. Lungisani imihambo yenu, netsabele kwemukela imiyalo, nivumelane, nihlalisane ngekuthula, khona Nkulunkulu wekuthula newelutsandvo atewuba nani.
12 Bingelelanani ngekwangana lokungcwele. Bayanihambisa bonkhe bazalwane.
13 Umusa weNkhosi Jesu, nelutsandvo lwaNkulunkulu, nebudlelwane baMoya Longcwele akube nani nonkhe.