1 Livi laSimakadze lelefika kuZefaniya, umsa waKushi, umsa waGedaliya, umsa wa-Amariya, umsa waHezekiya, ngesikhatsi sekubusa kwaJosaya, umsa wa-Amoni, inkhosi yakaJuda, latsi:
2 “Ngiyawutsanyela ngisuse konkhe, ngikususe ebusweni bemhlaba,” kusho Simakadze.
3 “Ngiyawutsanyela bonkhe bantfu netilwane; ngiyawutsanyela tinyoni tasemoyeni kanye netinhlanti taselwandle. Lababi ngiyakubacedza kanye nato tonkhe tikhubekiso, nase ngisusa bonkhe bantfu ebusweni bemhlaba,” kusho Simakadze.
4 “Ngiyakwelula sandla sami ngimelane naJuda, ngimelane nabo bonkhe labahlala eJerusalema. Yonkhe imisalela yaBhali ngiyakuyisusa kulendzawo: Emabito emahedeni nebaphristi labakhonta tithico,
5 nalabo labakhotsama etulu etingcongwaneni tetindlu bakhonte tinkhanyeti telizulu, nalabo labakhotsama bafunge batsi batakwetsembeka kuSimakadze baphindze bafunge nangaMoloki
6 nalabo lase bancandzekile bakuyekela kulandzela Simakadze bangete bamfuna Simakadze bangabuti nekubuta kuye.
7 “Thula embikweNkhosi Simakadze, ngobe lilanga laSimakadze selisondzele. Simakadze sewulungise umhlatjelo; ubehlukanisile labo labamemile.
8 Ngelilanga lemhlatjelo waSimakadze ngiyawujezisa tikhulu, netiphatsimandla, nabo bonkhe labo labembetse tingubo tebetive.
9 Ngalelo langa ngiyawubajezisa bonkhe labo labagwema kunyatsela emnyango, besaba tithico, labagcwalisa lithempeli labonkulunkulu babo ngebudlova nangenkhohliso.”
10 Simakadze utsi: “Ngalelo langa kuyawuvela kukhala eSangweni Lenhlanti, kuvele kulila eNcenyeni Lensha yelidolobha, nekuphihlika lokukhulu lokuphuma emagcumeni.
11 Hhewulani, nine lenihlala esigodzini semakethe, bonkhe batsengisi benu batawucitfwa baphele, bonkhe labatsenga batsengise ngesiliva bayawubhujiswa.
12 “Ngaleso sikhatsi ngiyakuyiphenya ngetibane iJerusalema, ngijezise labo labatesutsisako, labafanana neliwayini lelisele emashiceni alo, bacabange batsi: ‘Simakadze angeke ente lutfo, loluhle nome lolubi.’
13 Ingcebo yabo iyawuphangwa, netindlu tabo tibhidlitwe. Bayawukwakha tindlu, kodvwa bangahlali kuto; bayawuhlanyela tivini, kodvwa bangalinatsi liwayini lato.”
14 “Lilanga lelikhulu laSimakadze selisondzele, yebo, lisedvute, futsi lita ngekushesha. Lalelani! Kukhala kwangalelo langa laSimakadze kuyawuba munyu, sekuhhewula libutfo lapho.
15 Lelo langa kuyawuba lilanga lelulaka, lilanga lelusizi nebuhlungu, lilanga lenhlupheko nembhubhiso, lilanga lebumnyama nelitfunti, lilanga lemafu nebumnyama lobukhulu,
16 lilanga lelicilongo nelekuhlaba inyandzaleyo yekumelana nemadolobha latinqaba neyekumelana nemibhoshongo yemakona.
17 “Ngiyakwehlisela lusizi ebantfwini bahambe njengetimphumphutse, ngobe bonile kuSimakadze. Ingati yabo iyawutfululwa njengelutfuli, nematfumbu abo atfululwe njengebulongo.”
18 Isiliva yabo negolide yabo kungeke kubasindzise ngelilanga lelulaka lwaSimakadze. Emlilweni wesikhwele sakhe umhlaba wonkhe uyawushiswa, ngobe uyakwenta siphetfo lesisheshisako sabo bonkhe labahlala emhlabeni.
1 Buyani ndzawonye, nihlangane ndzawonye, nine sive lesilihlazo,
2 sikhatsi lesibekiwe sisengakefiki nisengakapheshulwa njengemakhoba, lusengakehleli etikwenu lulaka lwaSimakadze lolwesabekako, lisengakefiki lilanga lelulaka lwaSimakadze etikwenu.
3 Funani Simakadze, nonkhe nine lenitfobekile belive, nine lenenta loko latsi kwenteni. Funani kulunga, nifune kutfobeka, mhlawumbe ningahle nivikeleke ngelilanga lentfukutselo yaSimakadze.
4 IGaza iyawushiywa yodvwa, ne-Ashkeloni iyawusala itindzala. Emini i-Ashdodi iyawucitfwa, kutsi i-Ekroni isishulwe.
5 Nako kini lenihlala ngaselwandle, nine sive semaKherethi. Livi laSimakadze limelene nani, awu Khenani, live lemaFilisti. “Ngiyawunibhubhisa nonkhe, kute namunye loyawusala.”
6 Live lelingaselwandle, lapho kuhlala khona emaKherethi, liyawuba yindzawo yebelusi netibaya tetimvu.
7 Liyawuba lemisalela yendlu yakaJuda, ngulapho-ke lapho bayawutfola khona emadlelo. Kusihlwa bayawulala phansi etindlini tase-Ashkeloni. Simakadze Nkulunkulu wabo uyawubanakekela; uyawubuyisela kubo tinhlanhla tabo.
8 “Ngitivile tinhlamba tebakaMowabi netibhinco tema-Amoni, labetfuka ngato sive sami basongela nelive laso.
9 Ngako-ke, kuphila kwami,” kusho Simakadze Somandla, longuNkulunkulu wema-Israyeli, “impela Mowabi uyawuba njengeSodoma, nema-Amoni abe njengeGomora, indzawo yelukhula nemigodzi yeluswayi, live lelilihlane phakadze naphakadze. Insali yesive sami iyawubaphanga; besive sami labayawusala bayawulidla live labo.”
10 Nguloku bakaMowabi nema-Amoni labayawukutfola kube ngumvuzo wekutigcabha kwabo, ngenca yekwetfuka nekuphukuta kwabo sive saSimakadze longuSomandla.
11 Simakadze uyakwesabeka kubo, nase abhubhisa bonkhe bonkulunkulu balelo live. Tive letikulo lonkhe lusentse lwelwandle tiyakumkhonta, nguleso naleso sive eveni laso.
12 “Nani futsi, maKushe, niyawubulawa ngenkemba yami.”
13 Simakadze uyakwelula sandla sakhe amelane nenyakatfo, abhubhise i-Asiriya, iNineve ayishiye ilihlane, yome njengelugwadvule.
14 Imihlambi yetimvu neyetimbuti kanye nemihlambi yetinkhomo iyawulala phansi khona lapho, tilwane netidalwa talo lonkhe luhlobo. Sikhova selihlane nesikhova lesiklabalazako kuyawuhlala etihlokweni tetinsika tayo ebusuku. Kukhala kwato kuyakwenta kutsi umsindvo wekuhokoma uphume ngemafasitelo, imfuhlululu iyawubaseminyango, tinsika temsedari tiyawubekeka ebaleni.
15 Leli lidolobha lelinganaki lutfo, lelaliphila liphephile. Latikhulumela lona, latsi: “Ngimi ngimi, kute futsi lelinye ngaphandle kwami.” Maye, imbhubhiso lese lingiyo, seliyindzawo yekubutsanela tilwane tesiganga! Bonkhe labendlula ngakulo bayalishalatelela, balihheletele ngetandla tabo.
1 Nako kulelo dolobha lebacindzeteli, labahlubukako nalabangcolile!
2 Alihloniphi muntfu, alivumi kucondziswa. Aletsembeli kuSimakadze. alisondzeli kuNkulunkulu walo.
3 Tiphatsimandla talo tingemabhubesi labhodlako, tikhulu talo titimphisi takusihlwa, letingashiyi lutfo lwangakusasa ekuseni.
4 Baphrofethi balo bayatigcabha; bangemadvodza labotulujane. Baphristi balo bahlazisa indzawo lengcwele, bephule umtsetfo waNkulunkulu.
5 Simakadze ulungile ekhatsi kwalelidolobha; akenti lutfo lolungakalungi. Kusa ngekusa bantfu bakhe ubaphatsa ngekungakhetsi, kulelo nakulelo langa lelisha akayekeli kwehlulela ngebucotfo, noko labangakalungi abalati lihlazo.
6 “Tive ngiticedzile, tinqaba tato tibhidlitiwe. Titaladi tato ngitishiye tikhala libhungane, kute namunye lowendlula ngato. Emadolobha ato abhujisiwe; kute namunye lotawusala kulo, kute namunye.
7 Ngakhuluma kulelidolobha, ngatsi: ‘Impela, uyawungesaba uvume kucondziswa!’ Lendzawo yalo-ke ingeke icitfwe, kantsi netijeziso tami tonkhe tingeke tehliselwe etikwalo. Kodvwa babesolo banenshisekelo yekukwenta ngebubi konkhe labakwentako.”
8 Simakadze utsi: “Ngako-ke ngimeleni, ngalelo langa ngiyawuma ngifakaze. Ngincume kuhlanganisa tive, ngibutsele ndzawonye imibuso, bese ngitfululela lulaka lwami etikwato, yonkhe intfukutselo yami leyesabekako. Umhlaba wonkhe uyawubhujiswa ngemlilo wekukhweleta kwentfukutselo yami.
9 “Tindzebe tetive ngiyawube sengiyatihlambulula-ke, kuze kutsi bonkhe lababite libito laSimakadze, bacela lusito kuye, bamkhonte bahlangene lihlombe ngelihlombe.
10 “Kusukela ngesheya kwemifula yaseKushe tikhonti tami, bantfu bami labasakatekile, bayawungiletsela iminikelo.
11 Ngalelo langa ungeke udliwe ngemahloni ngako konkhe lokubi lokwentile kimi, ngobe kulelidolobha ngiyawubesusa labo labajabula ngeligcabho labo. Ungeke uphindze utigcabhe etikwaleligcuma lami lelingcwele.
12 Kodvwa ngiyawushiya ekhatsi kuwe labamnene nalabatfobekile, labetsembele kulo libito laSimakadze.
13 “Imisalela yaka-Israyeli ingeke ikwente lokubi; ingeke iwakhulume emanga, nenkhohlakalo ingeke itfolakale emilonyeni yayo. Lemisalela iyakudla, icambalale phansi, kute futsi umuntfu loyakuyesabisa.”
14 Hlabela, Ndvodzakati yaseSiyoni; memeta kakhulu, wena Israyeli! Jabula utfokote ngayo yonkhe inhlitiyo yakho, Ndvodzakati yaseJerusalema!
15 Simakadze usisusile sijeziso sakho, watincandzekisa netitsa takho. Simakadze, iNkhosi yaka-Israyeli, inawe; ungeke uphindze wesabe nome nguyiphi ingoti.
16 Ngalelo langa bayawusho kuyo iJerusalema, batsi: “Ungesabi, Siyoni, netandla takho ungatiyeketsisi.
17 Simakadze Nkulunkulu wakho unawe, unemandla ekusindzisa. Uyawukujabulela kakhulu wena, uyawukupha kuthula ngelutsandvo lwakhe; uyawukujabulela ngekuhlabela.”
18 “Tinsizi temadzili labekiwe ngiyakutisusa kuwe; tingumtfwalo nelihlazo kuwe.
19 Ngaleso sikhatsi ngiyawubajezisa bonkhe labo lababekucindzetela; labachutako ngiyawubaphephisa, ngibabutse bonkhe labo labebasakatiwe. Ngiyawubadvumisa ngibatisise emhlabeni wonkhe lapho bebahlazeke khona.
20 Ngaleso sikhatsi ngiyawunibutsa; ngaleso sikhatsi ngiyawunibuyisela ekhaya. Ngiyawuninika kuhlonipheka neludvumo emkhatsini wato tonkhe tive temhlaba, nase nginibuyisela tinhlanhla tenu embikwemehlo enu nibuka,” kusho Simakadze.