1 Lawa ngemavi a-Amose, lomunye webantfu lababefuye timvu eThekhowa, ngaloko lakuboniswa lokumacondzana nema-Israyeli iminyaka lemibili umhlaba ungakatamatami, ngesikhatsi Uziya ayinkhosi yakaJuda, Jerobowamu, umsa waJehoyashi, ayinkhosi yaka-Israyeli.
2 Amose wakhuluma watsi: “Simakadze uyabhodla eSiyoni, yebo, Simakadze uyabhavumula aseJerusalema, emadlelo ebelusi ayoma, nesicongo sentsaba iKhameli siyabuna.”
3 Naku lokushiwo nguSimakadze, utsi: “Bantfu baseDamaseko bone kwaze kwengca, ngaleso sizatfu ngingeke ngihlale ngingabajezisi. Baphatse sive sakaGileyadi ngensila nakabuhlungu, basihhudlisa phansi njengetihliphi nanjengetihhudlo.
4 Ngako ngitakwehlisela umlilo endlini yakaHazayeli, lotawushisa ucotfule leto tigodlo takaBheni Hadadi.
5 Ngitawubhidlita emasango aseDamaseko, ngibhubhise inkhosi leseSigodzini sase-Aveni, nalowo lophetse indvuku yebukhosi eBhethi Edeni. Sive semaSiriya sitawutfunjelwa eKhiri,” kusho Simakadze.
6 Naku lokushiwo nguSimakadze, utsi: “Bantfu baseGaza bone kwaze kwengca, ngaleso sizatfu ngingeke ngihlale ngingabajezisi. Batfumba yonkhe imindeni yesive bayitsengisa ka-Edomu.
7 Ngako-ke ngitakwehlisela umlilo etikwetibondza taseGaza, lotawucotfula tonkhe tigodlo tayo.
8 Ngitayibhubhisa inkhosi yase-Ashdodi nalowo lophetse indvuku yebukhosi e-Ashkeloni. Ngitayivukela i-Ekroni, ngiwabhubhise onkhe emaFilisti kungasali namunye,” kusho iNkhosi Simakadze.
9 Naku lokushiwo nguSimakadze, utsi: “Bantfu baseThire bone kwaze kwengca, ngaleso sizatfu ngingeke ngihlale ngingabajezisi. Batfumba yonkhe imindeni yesive bayitsengisa ka-Edomu, bangete basigcina sivumelwane sebuhlobo lesasentiwe.
10 Ngako-ke ngitakwehlisela umlilo etikwetindvonga taseThire lotawucotfula tigodlo tayo.”
11 Naku lokushiwo nguSimakadze, utsi: “Bantfu baka-Edomu bone kwaze kwengca, ngaleso sizatfu ngingeke ngihlale ngingabajezisi. Bacosha bomnakabo ngenkemba balahla sihawu, intfukutselo yabo yabhebhetseka kokuphela, yebo, nekutfukutsela kwabo kwakungasekhuteki.
12 Ngako-ke ngitakwehlisela umlilo etikwaThemani lotawucotfula tigodlo taseBhosra.”
13 Naku lokushiwo nguSimakadze, utsi: “Bantfu baka-Amoni bone kwaze kwengca, ngaleso sizatfu ngingeke ngihlale ngingabajezisi. Ema-Amoni abahlinze beva bafati labatetfwele bakaGileyadi, kuze atekwandzisa iminyele yawo.
14 Ngako-ke ngitawulumeka umlilo etikwetibondza taseRabha lotawucotfula tonkhe tigodlo tayo emkhatsini webumayemaye bekukhala ngelilanga lekulwa imphi, nasemkhatsini wemimoya lenemandla, ngelilanga lesivunguvungu.
15 Inkhosi yabo iyawudzingiswa kanye nato tonkhe tikhulu tayo,” kusho Simakadze.
1 Naku lokushiwo nguSimakadze, utsi: “Bantfu bakaMowabi bone kwaze kwengca, ngaleso sizatfu ngingeke ngihlale ngingabajezisi. Bashise ematsambo enkhosi yaka-Edomu, adzimate aba njengemcakaco.
2 Ngako-ke ngitakwehlisela umlilo etikwaMowabi, lotawucotfula tigodlo taseKheriyothi. Bantfu bakaMowabi bayawufela emsindvweni lomkhulu wemphi ngesikhatsi nakuliwa imphi, emkhatsini wekukhala bumayemaye bemabutfo kanye nasekukhaleni kwelicilongo.
3 Ngitawubhubhisa umbusi wakaMowabi kanye nato tonkhe tikhulu takhe,” kusho Simakadze.
4 Naku lokushiwo nguSimakadze, utsi: “Bantfu bakaJuda bone kwaze kwengca, ngaleso sizatfu ngingeke ngihlale ngingabajezisi. Bawulahlile umtsetfo waSimakadze, bangete batigcina timiso takhe, bedukiswe tithico, lekutithico letatikhontwa boyisemkhulu.
5 Ngako-ke ngitakwehlisela umlilo etikwaJuda lotawushisa ucotfule tigodlo taseJerusalema.”
6 Naku lokushiwo nguSimakadze, utsi: “Bantfu baka-Israyeli bone kwaze kwengca, ngaleso sizatfu ngingeke ngihlale ngingabajezisi. Labalungile babatsengisa ngesiliva, bese kutsi labeswele babatsengise ngetincabule letimbili.
7 Bagcobagcoba tinhloko talabamphofu kube shangatsi bagcobagcoba lutfuli lwemhlaba, bese kutsi labacindzetelwe bangababoneleli. Indvodza nemsa wayo balala nentfombatana yinye, ngaloko bahlazise Libito lami lelingcwele.
8 Bacambalala phansi eceleni kwalelo nalelo lati ngetingubo tesibambiso. Endlini yaNkulunkulu wabo banatsa liwayini lalabahlawulisiwe.
9 “Kepha mine ngawabhubhisa ema-Amori embikwenu, nome abemadze njengemisedari acine njengema-okhi. Ngabhubhisa netitselo tawo ngetulu netimphandze tawo ngaphansi.
10 “Mine futsi nganikhipha eGibhithe, nganihola iminyaka lengema-40 ehlane, ngentela kuninika live lema-Amori.
11 Ngaphindza nganivusela baphrofethi emkhatsini wemadvodzana enu kanye nebaNaziri emkhatsini wemajaha enu. Akusilo liciniso yini lelo, sive sema-Israyeli?” kusho Simakadze.
12 “Kodvwa nine nanatsisa baNaziri liwayini, nalela baphrofethi bami kutsi baphrofethe.
13 “Manje-ke, ngitanipitjita njengekupitjita kwencola nayetfwele umtfwalo lomkhulu walokutinhlavu.
14 Nalabagijima ngematubane bangeke baphunyule, nalabanemandla bangeke bakhone kuwagcogca emandla abo, kanjalo nelichawe lingeke liyisindzise imphilo yalo.
15 Loyingcweti ekudubuleni ngebutjoki angeke akhone kucina, lisotja lelihamba phansi ngetinyawo lingeke libaleke, kanjalo nemgibeli welihhashi angeke akhone kusindzisa imphilo yakhe.
16 Ngisho nemachawe lanesibindzi kakhulu ayawubaleka angcunu ngalelo langa,” kusho Simakadze.
1 Lalelani nankha emavi lashiwo nguSimakadze ngani, anisola nine, sive sema-Israyeli, umelana nawo wonkhe umndeni lawukhipha eGibhithe, utsi:
2 “Ngini kuphela lenginikhetsile emkhatsini wato tonkhe tive temhlaba; ngako-ke ngitanijezisa ngenca yato tonkhe tono tenu.”
3 Bantfu lababili bangahambisana yini kanyekanye bangakavumelani?
4 Libhubesi liyabhodla yini ehlatsini, lingakabambi inyamatane? Libhubesi lelincane lona lingahhonga yini endzaweni yalo, lingakabambi lutfo?
5 Inyoni iyawela yini elugibeni loluphansi emhlabatsini, kungekho leyetsiywe ngako? Sochaka umane atisukele yini phansi, azube kungekho lutfo lolumtsintsile?
6 Nakukhala impalampala edolobheni, abatfutfumeli yini bantfu? Inhlekelele iyalehlela yini lidolobha, ingakatfunyelwa nguSimakadze?
7 Ngempela iNkhosi Simakadze kute lekwentako ingakayembuli inhloso yayo etincekwini tayo, baphrofethi.
8 Nakubhodla libhubesi, ngubani longahlala angesabi? INkhosi Simakadze seyikhulumile, ngubani longahlala angaphrofethi?
9 Memetelani etigodlweni tase-Ashdodi nasetigodlweni taseGibhithe, nitsi: “Butsanani ndzawonye etintsabeni taseSamariya; bonani umsindvo lomkhulu losemkhatsini wayo kanye nekucindzetelwa lokukuyo.”
10 Simakadze utsi: “Abati kutsi bangakwenta njani lokulungile, labo lababutsise budlova nemphango etigodlweni tabo.”
11 Ngaleso sizatfu naku lokushiwo yiNkhosi Simakadze, itsi: “Sitsa siyakulitungeleta live, sibhidlite tonkhe tinqaba tenu, siphange netigodlo tenu.”
12 Naku-ke lokushiwo nguSimakadze, utsi: “Njengemelusi asindzisa emlonyeni welibhubesi imilente lemibili yekugcina nome sicu sendlebe yelizinyane, ayakuhlwitfwa kanjalo nema-Israyeli lambalwa, lawo lasahlala eSamariya, emaphetselweni emibhedze yawo, lasahlala acuphele etihlalweni tawo tekuphumula.”
13 INkhosi Simakadze, Nkulunkulu longuSomandla, utsi: “Vanini naku, niyidvonse ngendlebe indlu yakaJakobe.
14 “Mhlazana ngijezisa ema-Israyeli ngenca yetono tawo, ngiyawubhidlita emalati aseBetheli, netimphondvo telilati tiyawujutjwa tilahleke phansi.
15 Ngiyawubhidlita indlu yasebusika kanye nendlu yasehlobo, tindlu letihlotjiswe ngematinyo etindlovu tiyawubhidlitwa, kanjalo netindlu letibukekako tiyawuhhihlitwa,” kusho Simakadze.
1 Lalelani nali livi, nine bafati basentsabeni yaseSamariya, leniphila kahle, nitamase njengetinkhomati taseBhashani, nine lenicindzetela labamphofu, nifihlite labeswele, niphocelele emadvodza enu kutsi aninike tjwala!
2 INkhosi Simakadze ifungile ngebungcwele bayo, yatsi: “Lalelani la: Siyeta sikhatsi lapho niyawutsatfwa khona ngemadweba, ngisho nebekugcina benu bayawutsatfwa ngemahhuka ekudweba tinhlanti.
3 Nitawuhudvulwa lapho ngamunye nikhishwe ngetikhala letiselubondzeni, nilahlelwe ngephandle eHemoni,” kusho Simakadze.
4 Simakadze utsi: “Sive saka-Israyeli, hambani niye eBetheli, indzawo lengcwele, niyekona, nichubeke niye eGilgali, nandzise khona tono tenu, njengobe nitsandza kwenta. Onkhe emalanga ekuseni niletse imihlatjelo yenu, bese kutsi kanye ngeminyaka lemitsatfu niletse kwelishumi kwenu.
5 Shisani sinkhwa senu lesinemvubelo kube ngumnikelo wekubonga, tigabatiseni ngeminikelo yenu yesihle. Gungubalani ngayo, nine ma-Israyeli, ngobe nguko loko lenitsandza kukwenta.
6 “Ngimi lenganinika tisu letingenalutfo kuwo onkhe emadolobha enu, nekwesweleka kwesinkhwa emakhaya enu onkhe; kodvwa anikabuyeli kimi,” kusho Simakadze.
7 “Ngaphindze ngabamba imvula, sekusele tinyanga letintsatfu nje kutsi kuvunwe; ngatfumela imvula kulelinye lidolobha, kodvwa ngayibamba kulelinye. Lenye insimi yatfola imvula, lenye yangete yayitfola imvula yaze yoma.
8 Bantfu badzayitela besuka kulelinye lidolobha baya kulelinye, bafunana nemanti, kodvwa abazange bawatfole lenele kutsi banganatsa baze bakholwe; noko anikabuyeli kimi,” kusho Simakadze.
9 “Sekukanyenti ngishaya tingadze tenu netivini tenu, ngatishaya ngemswenya nangasicencane. Sikhonyane sashaya sacotfula emakhiwa enu netihlahla tenu temincumo, kwaphela kwatsi nya, noko anikabuyeli kimi,” kusho Simakadze.
10 “Nginitfumela tishayo njengaloku ngenta naseGibhithe. Emajaha enu ngawabulala ngenkemba, kanye nemahhashi enu latfunjiwe. Emakhala enu ngawagcwalisa ngeluboti etinkanjini tenu; noko anikabuyeli kimi,” kusho Simakadze.
11 “Labanye benu ngababhubhisa njengaloku ngabhubhisa iSodoma neGomora. Nanifanana nendvuku leshako, lehlwitfwe emlilweni; noko anikabuyeli kimi,” kusho Simakadze.
12 “Ngako-ke, ma-Israyeli, ngitanijezisa; futsi njengobe ngitakwenta njalo nje, tilungiseleleni kubhekana naNkulunkulu wenu, nine ma-Israyeli!”
13 Ngako-ke lalelani! Yena lowo lobumba tintsaba, adale umoya, embule imicabango yakhe kumuntfu, yena lowo logucula intsatsakusa, ayente bumnyama, anyatsele tindzawo letiphakeme temhlaba, nguSimakadze Nkulunkulu longuSomandla libito lakhe.
1 Lalelani nali livi, ninendlu yaka-Israyeli. Lesililo ngisenta ngenca yenu:
2 “Iwile iNtfombi yaka-Israyeli, ingeke iphindze ivuke futsi, ayinakwa ngumuntfu eveni layo, kantsi futsi kute longayivusa ime.”
3 Ngobe naku lokushiwo yiNkhosi Simakadze, itsi: “Lidolobha laka-Israyeli lebelinemasotja layinkhulungwane laphuma ayawuhlasela litawugcina linemasotja lalikhulu, kutsi lidolobha lebelinemasotja lalikhulu ligcine selinemasotja lalishumi.”
4 Naku lokushiwo nguSimakadze kuyo indlu yaka-Israyeli, utsi: “Ngifuneni, nitewuphila.
5 Ningangifuni eBetheli, ningayi naseGilgali, ningayi ngisho naseBherisheba. Ngobe iGilgali ngempela itawudzingiswa, kutsi iBetheli incishiswe ize ibe lite.”
6 Funanai Simakadze, nitewuphila, ngobe nakungenjalo, utawuhlasela lendlu yakaJosefa njengemlilo. Lomlilo utawukhotsisisa, iBetheli imeswele lotawucisha lowo mlilo.
7 Nine lenigucule imphatfocotfo nayenta yababa, kulunga nakudzaceka phansi emhlabatsini!
8 Simakadze lowenta tinkhanyeti, wadala Silimela neMtsentse. Nguye logucula bumnyama abente intsatsakusa, ente imini ibe busuku. Ubita emanti aselwandle, awatsele ebusweni bemhlaba, nguSimakadze libito lakhe.
9 Umanyatisa imbhubhiso kulabanemandla, abhidlite lidolobha leliyinqaba.
10 Nine bantfu niyamtondza umuntfu lomelana nebubi benu, nimedzelele umuntfu lokhuluma liciniso lodvwa enkhundleni.
11 Nigcobagcoba labamphofu nibacindzetele kutsi baninike kudla. Ngako-ke, nome nakhe tindlu letinkhulu tematje, ningeke nihlale kuto; nome nihlanyele tivini letikhulu, ningeke nilinatse liwayini lato.
12 Ngobe ngiyati kutsi mangaki emacala enu nekutsi tono tenu tikhulu kangakanani. Niyabacindzetela labalungile, nitsatse imidizo, nemuke labamphofu emalungelo abo etinkhundleni.
13 Ngako-ke umuntfu locaphelako uyabindza etikhatsini letinje, ngobe tikhatsi timbi.
14 Funani lokuhle, hhayi lokubi, khona nitewuphila. Khona-ke Simakadze Nkulunkulu longuSomandla uyawuba nani, njengobe nani nisho kutsi unani.
15 Tondzani lokubi nitsandze lokulungile, etinkhundleni yehlulelani ngekungakhetsi. Mhlawumbe Simakadze Nkulunkulu longuSomandla angaba nesihawu kuyo insali yakaJosefa.
16 Ngako-ke naku lokushiwo yiNkhosi, Nkulunkulu longuSomandla, Simakadze, itsi: “Kuyawuba khona kudzindza sililo kuto tonkhe titaladi, nekukhala kabuhlungu kuto tonkhe tinkhundla. Kutawubitwa balimi kutsi nabo balile, kubitwe nalabati tililo kutsi bakhale.
17 Kuyawuba khona kudzindza sililo kuto tonkhe tivini, ngobe ngiyakwendlula emkhatsini wenu nginijezise.”
18 Nako kini nine lenifisa lilanga laSimakadze! Nilifiselani lilanga laSimakadze? Lelo langa liyawuba bumnyama, lingabi kukhanya.
19 Kuyawuba shangatsi ngumuntfu lobalekele libhubesi, wase utitsela etikwelibhele; kube shangatsi ngumuntfu longene endlini yakhe wabeka tandla takhe elubondzeni, kusuke inyoka imlume.
20 Lilanga laSimakadze lingeke yini libe bumnyama lingabi kukhanya, kube bumnyama lobukhulu kubete ngisho nemushi nje wekukhanya?
21 Simakadze utsi: “Ngiyawatondza, futsi ngiwabukela phansi lamadzili enu enkholo; ngiyehluleka kuyemukela leyo mihlangano yenu.
22 Ngisho nome ningangiletsela imihlatjelo yekushiswa kanye neminikelo yalokutinhlavu, ngingeke ngiyemukele. Ngisho nome ningaletsa iminikelo yebudlelwane yelikhetselo, ngingeke ngiyinake.
23 Sukani lapha nalemisindvo yenu yekuhlabela! Ngingeke ngikulalele loko kuhlabela kwenu ngemahabhu.
24 Kodvwa kwenta tintfo ngekungakhetsi akube yintfo legeleta njengemfula, kulunga kube yintfo legeleta njengemfula longashi.
25 “Nake nangiletsela yini imihlatjelo neminikelo kuleminyaka lengema-40 ehlane, ninendlu yaka-Israyeli?
26 Niphakamise tithico tenu: Sakhuthi, inkhosi yenu, naKhewani, nkulunkulu wenu loyinkhanyeti, ngako-ke nitakwetfwala leto titfombe tenu lenitentele tona,
27 ngitanenta nitfunjelwe ngesheya kweDamaseko,” usho njalo-ke Simakadze, lolibito lakhe linguNkulunkulu longuSomandla.
1 Maye kini, nine labanetsetekile eSiyoni, nakini nine labativela bavikelekile entsabeni yaseSamariya! Maye nakini, nine madvodza lagcamile esiveni lesikhulu nalesisekucala etiveni tonkhe, nine labeta kini baka-Israyeli!
2 Kutsiwa: “Hambani niye eKhalne, niye kuyibuka. Nibosuka lapho nicondze eHamathi lenkhulu, nisuke lapho nehlele eGathi yaseFilistiya! Nine nincono yini kunaleyo mibuso? Live labo lalilikhulu yini kunelenu?”
3 Nikhweshisela eceleni lilanga lelibi, bese nisondzeta edvutane umbuso lowesabisako.
4 Nilala emibhedzeni lehlotjiswe ngematinyo etindlovu, nicambalale etihlalweni tenu tekuphumula, nititika ngenyama yemawundlu elikhetselo nangeyematfokati lakhuluphalisiwe.
5 Nanihlabela, nigubhutelisa emahabhu enu, nitakhele nine imintjingozi yemculo njengaDavide.
6 Ninatsa liwayini ngetitja letigcwele, nitigcobise ngemafutsa lanuka kamnandzi, kodvwa anidzabuki ngekucitfwa kwaJosefa.
7 Ngako-ke nitawuba kanye nebekucala kulabayawudzingiswa. Lokutamasa kwenu ngemadzili, nicambalale kamnandzi, kutawuphela.
8 INkhosi Simakadze itifungile. Simakadze Nkulunkulu longuSomandla utsi: “Ngiyakwenyanya kutigcabha kwaJakobe, tiyanginenga naletinqaba takhe. Ngitaliyekelela lelo dolobha, nako konkhe lokukulo.”
9 Nangabe kusele emadvodza lalishumi endlini yinye, nawo futsi atakufa.
10 Nangabe sihlobo lesifanele kushisa leto tidvumbu sifika sitetikhipha kuleyondlu, leso sihlobo nasibuta lona losabhacile, sitsi: “Usekhona yini lomunye losasele kanye nawe?” yena lolomunye aphendvule atsi: “Kute,” leso sihlobo siyawuphendvula sitsi: “Shi, thulani, kufanele sicaphele singaliphatsi Libito laSimakadze.”
11 Ngobe Simakadze ubeke umyalo, lendlu lenkhulu itawubhidlitwa, iphihlitwe ibe ticucu, kutsi nalena lencane ibe ticucu.
12 Emahhashi ayagijima yini emadvwaleni latihhehle? Umuntfu angalima yini khona lapho ngetinkhabi? Kodvwa nine senijikise umtsetfocotfo, nawenta waba butsi, netitselo tekulunga natenta tababa,
13 nine lenijabulela kwehlulwa kweLo Dabari bese nitsi: “Asiyitsatsanga yini iKhanayimu ngemandla etfu?”
14 Kodvwa Simakadze Nkulunkulu longuSomandla uyakhuluma utsi: “Ngiyawuchukuluta sive, sinivukele, ninendlu yaka-Israyeli. Leso sive siyawunicindzetela yonkhe indlela kusukela eLebo Hamathi kuze kuyewufika esigodzini sase-Arabha.”
1 Naku-ke iNkhosi Simakadze lengibonise kona: Ngiyibone yenta lifu lesikhonyane ngesikhatsi nakuphela kuvunwa kwemabele enkhosi, nakucala kuhluma kwesibili.
2 Satsi kube sikudle konkhe lokuluhlata eveni, ngakhala kakhulu ngatsi: “Nkhosi Simakadze, cola! Jakobe angasindza kanjani? Mncane kakhulu!”
3 Simakadze wase uyayekela, watsi: “Loko kungeke kusenteka.”
4 Naku-ke iNkhosi Simakadze lengibonise kona: INkhosi Simakadze beyisabita kwehlulela kwemlilo, lomlilo womisa lwandle lolungaphansi kwemhlaba, waze lomlilo wacala kudla live.
5 Ngase ngiyakhala ngitsi: “Nkhosi Simakadze, ngiyakuncenga, mane ume; Jakobe angasindza kanjani? Mncane kakhulu!”
6 Ngako Simakadze wase uyayekela, watsi: “Naloku kungeke kusenteka nako.”
7 Naku-ke Simakadze langibonise kona: Simakadze abeme eceleni kwelubondza lolwalwakhiwe lwalinganiswa kahle ngesilinganiso, abephetse silinganiso esandleni sakhe.
8 Simakadze wangibuta watsi: “Ubonani, ye Amose?” Ngatsi: “Silinganiso.” Simakadze watsi: “Buka la! Ngibeka silinganiso kubantfu bami ema-Israyeli; ngingeke ngisabacolela.
9 “Tindzawo letiphakeme taka-Isaka tekukhontela tithico tiyawubhujiswa, netindlu taka-Israyeli tekukhontela bonkulunkulu tiyawubhidlitwa. Ngenkemba yami ngiyawuvukela indlu yakaJerobowamu.”
10 Amasiya, umphristi waseBetheli, watfumela sigijimi kuJerobowamu, inkhosi yaka-Israyeli, watsi: “Amose wakha luzungu ngawe embusweni waka-Israyeli. Live lingeke liwamele onkhe lamavi akhe.
11 Ngobe naku lokushiwo nguAmose, utsi: “ ‘Jerobowamu utakufa ngenkemba, ema-Israyeli wona ngempela atawudzingiswa, esuswe eveni lawo lekutalwa.’ ”
12 Amasiya wakhuluma ku-Amose, watsi: “Phuma, wena mboniswa. Buyela eveni lakaJuda. Hamba uyewuhlala khona usebentele kudla kwakho khona, uphrofethe khona.
13 Ungaphindzi uphrofethe lapha eBetheli, ngobe lena yindzawo lekutsiwa ingcwele yenkhosi, nelithempeli lembuso.”
14 Amose waphendvula Amasiya, watsi: “Angizange sengibe ngumphrofethi mine, ngisho nekuba ngumsa wemphrofethi nje. Kodvwa bengingumelusi nje, nanyalo ngisengumlimi wetihlahla temakhiwa.
15 Kodvwa Simakadze wangitsatsa ekweluseni kwami timvu, watsi kimi: ‘Hamba uyewuphrofetha esiveni sami, ema-Israyeli.’
16 Manje-ke vani livi laSimakadze. Wena watsi: “ ‘Ungaphrofethi lokumelene na-Israyeli. uyekele nekushumayela umelane nendlu ya-Isaka.’
17 “Ngako-ke naku lokushiwo nguSimakadze: “ ‘Umfati wakho uyawuba yingwadla yelidolobha; emadvodzana nemadvodzakati akho ayakufa ngenkemba. Emasimi akho atawulinganiswa, abelwe labanye; wena utakufa, ufele eveni lemahedeni. Israyeli, vele, yena utawutfunjwa, esuswe eveni lakhe lekutalwa.’ ”
1 Naku-ke iNkhosi Simakadze lengibonise kona: Ngabona libhasikidi letitselo letivutsiwe.
2 Simakadze wase uyangibuta utsi: “Ubonani, ye Amose?” Ngamphendvula ngatsi: “Ngibona libhasikidi lelinetitselo letivutsiwe.” Simakadze wase ukhuluma kimi utsi: “Sikhatsi sesive sami saka-Israyeli sesiphelile, ngingeke ngisasicolela.”
3 INkhosi Simakadze itsi: “Ngalelo langa, tingoma letihlatjelwa ethempelini tiyawujika tibe tekudzindza sililo. Kuyawuba nebunikilili betidvumbu letijikijelwe yonkhe indzawo. Kuyawuthula kutsi gudvu!”
4 Lalelani lapha, nine lenigcobagcoba labeswele nibuye nicedze bonkhe labamphofu balelive,
5 nikhuluma nitsi: “Ingabe umkhosi longcwele wekwetfwasa kwenyanga uyakwendlula nini, khona sitewutsengisa ngesivuno salokutinhlavu, neliSabatha litawuphela nini, khona sitewutsengisa ngakolo?” Ngaloko nentela kunciphisa tikali nenyuse intsengo, nitewuganga ngekusebentisa tikali letingekho emtsetfweni,
6 nitsenge labamphofu ngesiliva, nalabeswele ngetincabule letimbili, ngisho naloku lokushanyelwe phansi esibuyeni sekubhula nikubite imali.
7 Simakadze loludvumo lwaka-Israyeli utifunge yena, watsi: “Ngingeke ngikukhohlwe nakunye kwalabakwentile.
8 Live lingeke yini litfutfumele ngaloku, nabo bonkhe labahlala kulo bangeke yini balile? Lonkhe live liyawukhukhumuka njengeNayili, liyawutanyatanyiswa, bese liyabotja njengalomfula waseGibhithe.”
9 INkhosi Simakadze itsi: “Ngalelo langa ngiyakwenta lilanga lishone emini, ngente umhlaba ube mnyama emini kala bha.
10 Emadzili enu enkholo ngiyakuwagucula abe sililo, nako konkhe kuhlabela kwenu kube kukhala. Ngiyawunenta nonkhe nembatse emasaka, nihhule tinhloko tenu. Leso sikhatsi ngiyawusenta sifanane nesekulilela indvodzana letelwe yodvwa kabo. Lelo langa liyawugcina kabuhlungu kakhulu.”
11 INkhosi Simakadze itsi: “Lalelani la, ayeta emalanga lapho ngiyawutfumela khona indlala kulo lonkhe live, kungabi yindlala yekufuna kudla neyekomela emanti, kodvwa kube yindlala yekufuna livi laSimakadze.
12 Bantfu bayawuyendza kusukela elwandle kuye kulolunye, bazulazule kusukela enyakatfo kuye emphumalanga, bafunana nelivi laSimakadze; kodvwa bangeke balitfole.
13 “Ngalelo langa tintfombi letinhle nemajaha lanemandla bayawucaleka ngenca yekoma.
14 Labo labafunga ngetithico taseSamariya nome batsi: ‘Ngekuphila kwankulunkulu wakho, Dani,’ nome: ‘Ngekuphila kwankulunkulu wakho, Bherisheba,’ bayakuwa phansi, bangaphindzi bavuke.”
1 Ngabona Simakadze eme ngaselatini, watsi: “Shaya tihloko tetinsika, kuze tenabelo teminyango titewunyikanyika. Juba tihloko tetinsika utehlisele etinhloko tabo bonkhe bantfu; labo labasele ngiyawubabulala ngenkemba. Kute namunye loyawubaleka; yebo, kute loyawuphunyula.
2 Nome bangemba bashone phansi ekujuleni kwelithuna, nakhona lapho sandla sami siyawubakhipha. Nome bangekhwela benyukele etulu emazulwini, nakhona lapho ngiyawubehlisela phansi.
3 Nome bangatifihla esicongweni sentsaba iKhameli, nakhona lapho ngiyawubatingela ngize ngibabambe. Nome bangangibhacela ekujuleni kwelwandle, nakhona lapho ngiyawutfumela inyoka ibalume.
4 Nome bangatfunjwa titsa tabo, nakhona lapho ngiyawuyala inkemba kutsi ibabulale. Emehlo ami ngiyakuwanamatselisa kubo, kube kubi kubo, kungabi kuhle.”
5 INkhosi Simakadze lenguSomandla, yona letsintsa umhlaba bese uyancibilika, kutsi bonkhe labahlala kuwo balile, live lonkhe likhukhumuke njengeNayili, liphindze libotje njengalomfula waseGibhithe,
6 ngiyo leyakha sigodlo sayo lesiphakeme emazulwini, sisekelo sayo isimbele emhlabatsini, yona lememeta emanti aselwandle bese iwacitsela etikwebuso bemhlaba, libito layo nguSimakadze.
7 “Nine, ma-Israyeli, anifanani yini kimi nemaKushe?” kusho Simakadze. “Angizange ngimkhiphe yini Israyeli eGibhithe, nemaFilisti eKhaftori ngakhipha nemaSiriya eKhiri?”
8 Naku-ke lokushiwo nguSimakadze, utsi: “Ngempela emehlo eNkhosi Simakadze asetikwawo wonkhe lowo mbuso lowonako. Ngiyakuwubhubhisa ungabikho ebusweni bemhlaba, noko ngingeke ngiyibhubhise yonkhe indlu yakaJakobe.
9 “Ngako ngiyawukhipha umyalo, nginyakatise indlu yaka-Israyeli emkhatsini wato tonkhe tive, njengemabele nakanyakatiswa ngesisefo, kodvwa kute ngisho nayinye inhlavu leyakuwela emhlabatsini.
10 Tonkhe toni letisemkhatsini wesive sami, tiyakufa ngenkemba; labo labakhuluma batsi: ‘Inhlekelele ingeke isehlele nome isikhandze.’ ”
11 “Ngalelo langa ngiyakulivusa kabusha lithende laDavide leliwile. Ngiyakutakha kabusha tindzawo talo letephukile, ngiwakhe kabusha emadzibikelo alo, ngiphindze ngilakhe libe nguloku lelake laba nguko,
12 khona batekudla lifa lensali yaka-Edomu kanye nelato tonkhe tive letibitwa ngeLibito lami,” usho njalo Simakadze, lotawutenta tonkhe letintfo.
13 Naku-ke lokushiwo nguSimakadze, utsi: “Ayeta emalanga, lapho bavuni bayakwengcelelwa ngulabalimako, nalabahlanyelako bengcelelwe ngulabahluta liwayini. Liwayini lelisha liyawuntfontsa etintsabeni, ligelete kuwo onkhe emagcuma.
14 Ngiyawusilandza sibuye sive sami ema-Israyeli lebesitfunjiwe, siyakuwakha kabusha emadolobha aso langemadzibikelo, bese sihlala kuwo. Siyawuhlanyela tivini, sinatse liwayini lato; siyawukwakha tingadze, sidle titselo tato.
15 Ngiyakuhlanyela ema-Israyeli eveni lawo, angaphindzi futsi asishulwe kulelo live lengiwaphe lona,” usho njalo-ke Simakadze Nkulunkulu wakho.