1 Maye! laze lasala likhala libhungane lidolobha, yebo, lidolobha lelake lanyakatela bantfu! Awu! laze lafanana nemfelokati, lidolobha lelake ladvuma emkhatsini wetive! IJerusalema leyake yaba yindlovukazi emkhatsini wemave, nyalo seyigucuke yaba sigcili.
2 Ebusuku likhala kabuhlungu, tihlatsi talo tigeleta tinyembeti. Kute namunye longalidvudvuta, kubo bonkhe labalitsandzako. Bonkhe bangani balo balihlamukile, sebagucuke baba titsa talo.
3 Emvakwekushaywa nekukhandleka kamatima, Juda sewuyiswe ekutfunjweni. Sewuhlala emkhatsini wetive, akayitfoli indzawo yekuphumula. Bonkhe labacoshana naye sebamkhandzile, bamkhandza asekhatsi elusizini.
4 Imigwaco leya eSiyoni iyalila, ngobe sekwabate namunye lota emikhosini yayo lemisiwe. Onkhe emasango ayo asasala anesitunge, baphristi bayo bayabubula, emantfombatana ayo ayadzabuka, isebuhlungwini lobumatima kakhulu.
5 Titsa tayo setigucuke taba baphatsi bayo; titsa tayo tikhibikile. Simakadze sewehlisele kuyo kudzabuka ngenca yetono tayo letinyenti. Bantfwabayo bayiswa ekutfunjweni, sebatigcili kuto titsa tayo.
6 Bonkhe lobucwebecwebe sebunyamalele kuyo iNdvodzakati yaseSiyoni. Babusi bayo bafanana netinyamatane letilambako; letibaleka ngekutayiya, natibalekela batingeli bato.
7 Ngemalanga ekushaywa nekundzindza kwayo iJerusalema iwakhumbula onkhe emagugu ayo labengewayo ngemalanga akadzeni. Ngaleto tikhatsi bantfu bayo nabawela etandleni tetitsa, kwabate namunye labengayilamlela. Titsa tayo tayibuka, tayihleka bulima nayibhidlika.
8 IJerusalema yone kakhulu, ngaloko seyisinengiso. Bonkhe lababeyihlonipha sebayayedzelela, ngobe sebabubonile bungcunu bayo; yona cobo lwayo iyabubula ifulatsele.
9 Kungcola kwayo kunamatsele etidvwabeni tayo; ayizange ilinakekele likusasa layo. Kuwa kwayo kwakumangalisa, kwabate labengayidvudvuta. “Awu Simakadze, buka kushaywa kwami, ngobe sitsa siyangehlula.”
10 Sitsa sabeka tandla taso kuyo yonkhe imicebo yayo; iJerusalema yabona betive bangena ethempelini layo, labo lowabalela kutsi bangene ebandleni lakho.
11 Bonkhe bantfu bayo bayabubula ngesikhatsi bafunana kudla bantjintjisa imicebo yabo ngenca yekudla, batsi bentele kutsi batiphilise. “Awu Simakadze, buka unake, ngobe ngibukelwa phansi.”
12 “Akusho lutfo yini kini, nonkhe nine lenendlula ngendlela? Calatani ndzawo tonkhe nibone. Kukhona yini kuhlupheka lokufanana nekwami kuhlupheka lokwehliselwa kimi, kuhlupheka Simakadze langishaya ngako ngelilanga lekutfukutsela kwakhe lokwesabekako?
13 “Watfumela umlilo asetulu, wawehlisela phansi ematsanjeni ami. Webekela tinyawo tami linetha, wangincandzekisa. Wangenta ngaba ngulolahliwe, ngacaleka lilanga lonkhe.
14 “Tono tami taboshwa ngesandla sakhe taba lijoko. Watephotsela yena watihlanganisa, setikhuphukele entsanyeni yami, naSimakadze uwesusile emandla ami. Unginiketele kulabo lengingeke ngikhone kumelana nabo.
15 “Simakadze uwalahlile onkhe emabutfo lengisemkhatsini wawo, sewuhlomise imphi letewumelana nami kutsi itewuhlifita onkhe emajaha akami. Simakadze uyihlifitile iNtfombi yakaJuda njengemagelebisi etjeni lekuhlutela liwayini.
16 “Nguloko lokungenta ngilile, nemehlo ami aphophota tinyembeti. Kute namunye losedvutane longidvudvutako, kute namunye longabuyisa umoya wami. Bantfwabami bahlutjuliwe, ngobe sitsa singehlulile.”
17 ISiyoni yelula tandla tayo, kodvwa kute namunye longayidvudvuta. Simakadze ushaye umtsetfo ngaJakobe kutsi bomakhelwane bakhe babe titsa takhe. IJerusalema seyigucuke yaba yintfo lesinengiso emkhatsini wabo.
18 “Simakadze ulungile, noko ngayihlubuka imitsetfo yakhe. Lalelani, nonkhe nine tive, bukani kuhlupheka kwami. Emajaha akami netintfombi takami sebatfunjiwe.
19 “Ngabamemeta labo labangakimi, kodvwa bona bangihlamuka. Baphristi bami, nebaholi bami babhubhela edolobheni, ngesikhatsi balibele kuchwandza kudla batsi betama kutiphilisa.
20 “Awu Simakadze, buka nje kutsi ngihlupheke kangakanani! Ngisemalahleni lapha ngekhatsi, inhlitiyo yami ikhatsatekile, ngobe bengingulelikhulu lihlubuka. Ngephandle, inkemba iyabulala; ngekhatsi ekhaya, kunekufa kodvwa.
21 “Bantfu bakuvile kububula kwami, kodvwa kute namunye longidvudvutako. Tonkhe titsa tami tivile ngekuhlupheka kwami. Tiyajabula ngaloko lokwentile. Mane sale uliletsa lelilanga lowalimemetela, kuze nabo batewuba njengami.
22 “Kodvwa konkhe kungalungi kwabo akute embikwakho, nabo ubaphatse njengaloku wentile kimi, ngenca yato tonkhe tono tami. Kububula kwami kunyenti, nenhlitiyo yami iyacaleka.”
1 Maye! Simakadze uyimbonye kanjani iNdvodzakati yaseSiyoni ngelifu lentfukutselo yakhe! Ubudzaceke phansi bukhosi baka-Israyeli, busuka ezulwini buya emhlabeni. Akazange asikhumbule senabelo setinyawo takhe ngelilanga lentfukutselo yakhe.
2 Simakadze ushwabudzele onkhe emakhaya akaJakobe, ngaphandle kwekuwahawukela. Ngelulaka lwakhe udladlabule tinqaba teNdvodzakati yakaJuda. Uwehlisele phansi emhlabatsini ngelihlazo umbuso wayo kanye netikhulu tayo.
3 Ngentfukutselo leyesabekako uncamule tonkhe timphondvo taka-Israyeli. Usifinyetile sandla sakhe sekudla ngesikhatsi kuchamuka sitsa. Ushise Jakobe, kwaba shangatsi kulavutela emalangabi emlilo, yebo, umlilo lodla ucotfule konkhe lokusedvutane nawo.
4 Ujijimete umcibisholo wakhe njengesitsa, sandla sakhe sangesekudla silungele kulwa. Njengesitsa ujube bonkhe labebajabulisa emehlweni; watfulula lulaka lwakhe njengemlilo etikwelithende leNdvodzakati yaseSiyoni.
5 Simakadze unjengesitsa; umgwinyile Israyeli. Ugwinye tonkhe tigodlo takhe, wabhubhisa tinqaba takhe. Wandzise kulila nekukhala kabuhlungu kuyo iNdvodzakati yakaJuda.
6 Indzawo yakhe yekuhlala uyicitse njengelidlangala lasensimini, uyibhubhisile indzawo yakhe yekuhlangana. Simakadze wente iSiyoni yawakhohlwa emadzili ayo lemisiwe, nemaSabatha ayo. Ngentfukutselo yakhe ukudvube kokubili: inkhosi yayo nemphristi wayo.
7 Simakadze ulilahlile lilati lakhe, wayishiya indzawo yakhe lengcwele. Unikele tibondza tetigodlo taseSiyoni etitseni; tamemeta kakhulu ekhatsi endlini yaSimakadze, kwaze kwaba shangatsi ngungelilanga lelidzili lelamiswa.
8 Simakadze watimisela kudzilitela phansi lubondza lolutungelete iNdvodzakati yaseSiyoni. Welula intsambo yekukala, wangete wasincandza sandla sakhe ekubhubhiseni. Wenta tibondza tekuvikela, netindvonga kwakhala, konkhe kwaguga kanyekanye.
9 Emasango ayo ashone emhlabatsini; imicabo yayo wayifohlota wayibhubhisa. Inkhosi yayo netikhulu tayo tahlakatwa tayiswa etiveni, umtsetfo sekwabate, Nebaphrofethi bayo abasayitfoli imibono levela kuSimakadze.
10 Babusi beNdvodzakati yaseSiyoni bahlala phansi bathule, batsele lutfuli etinhloko tabo, bembatse emasaka. Emantfombatana aseJerusalema atfobile, abhekisa tinhloko tawo phansi.
11 Emehlo ami aluvitsi ngenca yekukhala. Ngiyasha ngiyabhadla emphefumulweni wami, inhlitiyo yami itfululeleke phansi emhlabatsini, ngobe bantfu bakitsi babhujisiwe, bantfwana netinswane kuyacaleka etitaladini telidolobha.
12 Bakhuluma kubonina batsi: “Kuphi kudla neliwayini?” ngesikhatsi nabacaleka njengemadvodza lagwaziwe etitaladini telidolobha, ngesikhatsi imiphefumulo yabo iphuma ihamba, basetandleni tabonina.
13 Ngingatsini nje ngawe? Ngingakufananisa nani nje, wena Ndvodzakati yaseJerusalema? Yini nje lengingakulinganisa nayo, kuze ngikudvudvute, wena Ntfombi yaseSiyoni? Linceba lakho lishona njengelwandle. Ngubani longakwelapha?
14 Imibono yebaphrofethi bakho yayingemanga, futsi ingenamsebenti. Baphrofethi bakho abazange batibeke ebaleni tono takho, kuze uvikeleke kuloko kugcilateka. Letembulo labakunika tona tatitemanga netekwedukisa.
15 Bonkhe labo labendlula ngakuwe bashaya tandla tabo ngawe. Bayancifa, banikine tinhloko ngayo iNdvodzakati yaseJerusalema, batsi: “Kungabe kambe ngilo leli lelidolobha lelalibitwa ngekutsi kuphelela kwebuhle, nenjabulo yemhlaba wonkhe?”
16 Tonkhe titsa takho tikukhamisela imilomo lemikhulu. Tiyancifa tigugudze imihlatsi titsi: “Lidolobha sesilimitile. Leli lilanga lebesivele sililindzele, besihlalele kubona lona.”
17 Simakadze wente loko labesakumisile; ulifezile livi lakhe lalimemetela kadzeni. Sewubhidlitile, wangete waba nesihawu, wente sitsa sakucoloshela, uluphakamisile luphondvo lwetitsa takho.
18 Tinhlitiyo tebantfu tikhala kuSimakadze. Awu, wena lubondza lweNdvodzakati yaseSiyoni, tinyembeti takho atigobhote njengemfula busuku nemini, ungatiniki kuphumula, emehlo akho angaphumuli.
19 Vuka ukhale kusengusebusuku, ngesikhatsi balindzi bangena emsebentini wabo, utfulule inhlitiyo yakho njengemanti ebukhoneni baSimakadze. Phakamisela tandla takho kuye ngenca yetimphilo tebantfwana bakho lasebacaleka ngenca yendlala, ekucaleni nasekupheleni kwato tonkhe titaladi.
20 “Buka, Simakadze, unakisise. Ngubani nje lowake wamphatsa ngalendlela? Kufanele yini bafati badle batukulu babo, bantfwana lababongile babakhulisa? Baphrofethi nebaphristi kufanele yini babulawe bafele endlini lengcwele yaSimakadze?
21 “Labasha nalabadzala kulale lunja kanyekanye elutfulini lwetitaladi; emajaha ami netintfombi tami kuwe ngelusiko lwenkemba. Ubabhubhisile ngelilanga lentfukutselo yakho; ubabulale ngenkemba ungenasihawu nabo.
22 “Wabutsisa tesabiso tami ndzawo tonkhe, kwaba shangatsi umemela bantfu edzilini. Ngelilanga lentfukutselo yaSimakadze kute namunye lowaphunyula nalowasindza. Titsa tami tibashaye tabacotfula labo lengangibongile ngabanakekela.”
1 Mine ngingumuntfu lokubonile kuhlupheka ngendvuku yelulaka lwaSimakadze.
2 Ungicoshile, wangenta ngahamba ngetinyawo, ngahamba ebumnyameni kungesiko ekukhanyeni.
3 Ngempela, sandla sakhe usiguculele ngakimi, simelana nami njalo nje, onkhe emalanga.
4 Usigugisile sikhumba sami nenyama yami, ematsambo ami uwafohlotile.
5 Ungivimbetele, wangitungeleta ngalokubabako nangekuhlupheka lokukhulu.
6 Ungihlalise ebumnyameni, nginjengalabo lasebalala kadzeni emadlizeni.
7 Ungibiyele ngetindvonga, ngako angikhoni kuphunyula ngibaleke. Ungibophe ngetinketane letimatima.
8 Ngisho nome sengimemeta, ngikhalela kusitwa, uyivalela ngaphandle imikhuleko yami.
9 Indlela yami uyivale ngetinguzanguza tematje; wagwegwisa indlela yami, yaba matombetombe.
10 Njengelibhele lelibhacele inyamatane, nanjengelibhubesi lelitifihlile,
11 ungihudvule endleleni, wangisitila, wangishiya ngingenamsiti.
12 Ujijimete umcibisholo wakhe, wangenta ngaba yinkoyoyo yemicibisholo yakhe.
13 Ugwaze inhlitiyo yami ngemicibisholo yasengculwini yakhe.
14 Ngagucuka ngaba yintfo yekuhlekisa kubo bonkhe bantfu, bahlabela tingoma ngami bangihaya lonkhe lilanga.
15 Ungesutsise ngemitsi lebabako, wangigcwalisa ngenyongo.
16 Ematinyo ami uwagamule ngelukhetse, wangigcobagcoba elutfulini.
17 Ngidlelelwe kuthula, ngadzimate ngakhohlwa nekutsi kuyini kuphumelela.
18 Nguko ngitsi: “Bukhosi bami buhambile kanye nako konkhe lebengetsembele ngako kuSimakadze.”
19 Ngikhumbula kushaywa kwami kanye nekundzindza kwami, loko kubaba kanye nenyongo.
20 Ngikukhumbula kahle, umphefumulo wami uphansi, udzabukile ngekhatsi kwami.
21 Yebo, noko ngiyakubuyisa engcondvweni, ngako nginelitsemba:
22 Ngenca yelutsandvo lolukhulu lwaSimakadze asikadliwa sacedvwa, ngobe sihawu sakhe singeke siphele.
23 Sisha onkhe emalanga ekuseni, kwetsembeka kwakho kukhulu.
24 Ngiyatitjela ngitsi: “Simakadze usabelo sami, ngako ngitawulindzela yena.”
25 Simakadze ulungile kulaba lababeke litsemba labo kuye, kulaba labamfunisisako.
26 Kuhle kuyilindzela ngekuthula nangekubeketela insindziso yaSimakadze.
27 Kuhle kumuntfu kutsi etfwale lijoko ngesikhatsi asesemusha.
28 Akahlale yedvwa athule, ngobe nguSimakadze lona lometfwese lona.
29 Akembele buso bakhe elutfulini, mhlawumbe kusengaba khona litsemba.
30 Akaniketele sihlatsi sakhe kulowo longamshaya ngemphama, atseleke ngemahloni nangelihlazo.
31 Ngobe Simakadze bantfu akabalahli kokuphela.
32 Nome akuletsa kudzabuka, kodvwa uyawubuye ahawukele, lukhulu kangako-ke lutsandvo lwakhe.
33 Ngobe bantfu akabahluphi ngobe atsandza kubevisa buhlungu nome-ke kubadzabukisa.
34 Kuhlifita ngetinyawo tonkhe tiboshwa eveni,
35 nekudlelela umuntfu emalungelo akhe embikwaSimakadze Longetulu Kwako Konkhe,
36 nekudlelela umuntfu lilungelo lakhe lekwehlulelwa ngebucotfo bemtsetfo, kungabe Simakadze angeke yini atibone tintfo letinjengaleto?
37 Ngubani longakhuluma, ente kwenteke, nangabe Simakadze angakakumiseli kutsi kube njalo?
38 Akuphumi lokuhle nalokubi yini emlonyeni wakhe, Longetulu Kwako Konkhe?
39 Umuntfu nje lophilako ukhononelani, nakajeziswa ngenca yetono takhe?
40 Asihlolisise tindlela tetfu sitivivinye, bese sibuyela kuSimakadze.
41 Asiphakamisele tinhlitiyo tetfu kanye netandla tetfu etulu, sitiphakamisele kuNkulunkulu, sitsi:
42 “Sonile sahlubuka, awukatsetseleli.
43 “Utimbonye ngelulaka, wasisukela wasicosha, wabulala ngaphandle kwesihawu.
44 Utimbonye ngelifu, kuze kutebate umthandazo longefika kuwe.
45 Usente emagwebu netilahlwa emkhatsini wetive tonkhe.
46 “Tonkhe titsa tetfu setisikhamisele imilomo lemikhulu.
47 Sehlelwe kwesaba neluvalo, nemigodzi, kubhujiswa, nekucitfwa.”
48 Imifula yetinyembeti iyageleta isuka emehlweni ami, ngobe bantfu bami babhujisiwe.
49 Emehlo ami ayawugobhota angemi, angabi nako kuphumula,
50 adzimate Simakadze abuke phansi asezulwini kutsi abone.
51 Loku lengikubonako kuletsa lusizi emphefumulweni wami, ngenca yabo bonkhe besifazane basedolobheni lami.
52 Labo lababetitsa tami ngaphandle kwesizatfu babengitingela njengenyoni.
53 Betama kucedzela imphilo yami emgodzini, bangijikijela ngematje,
54 emanti ayisibekela inhloko yami, ngacabanga ngatsi akusesingakanani ngincanyulwe.
55 Ngalibita Libito lakho, Simakadze, ekujuleni kwemgodzi lohlokomako.
56 Wakuva kuncusa kwami: “Ungativali tindlebe takho ekukhaleni kwami; ngicela kuphunyutwa.”
57 Wasondzela kimi nangikubita, watsi: “Ungesabi.”
58 Awu Simakadze, wayimela indzaba yami, wayihlenga imphilo yami.
59 Awu Simakadze, nawe ukubonile lokubi lokwentiwe kimi. Phumelelisa indzaba yami!
60 Ukubonile kujula kwemphindziselo yabo, onkhe emacebo labangibophele wona ngasense.
61 Awu Simakadze, utivile tinhlamba tabo, onkhe emacebo abo labangimisele wona,
62 loko titsa tami letikuhlebako, tingumtela ngami lonkhe lilanga.
63 Tibuke! Natihleti nome timile, tiyangihaya nangetingoma tato.
64 Awu Simakadze, buyisela kuto loko lokufanele tandla tato.
65 Mbonya tinhlitiyo tato ngendvwangu, shangatsi sicalekiso sakho singaba setikwato!
66 Ticoshe ngentfukutselo yakho, utibhubhise, tingaphindzi tibe khona ngaphansi kwemazulu aSimakadze.
1 Yeka legolide leseyilahlekelwe bucwebecwebe bayo, igolide lebeyicolisakele seyigucuke yafiphala. Ematje laligugu endlu lengcwele asasakateleke emaphetselweni ato tonkhe titaladi.
2 Maye, emadvodzana labalulekile aseSiyoni, noko nawo ake alingana negolide lecengekile, njengaloku nyalo asatsatfwa njengetindziwo telibumba nje, umsebenti wetandla tencondzi yetekubumba ngelibumba!
3 Ngisho netimphungutja tiyayikhipha imibele yato timunyise emazinyane ato, kodvwa bantfu bami sebagucuke bangabi nanhlitiyo, baba njengetinshi tasehlane.
4 Ngenca yekoma, lulwimi lwalabamunyako lunamatsela elwangeni; bantfwana bacela kudla, kodvwa kubete lobapha kona.
5 Labo labake badla kahle batamasa, nyalo sebangimizulane netindzindzi etitaladini. Labo lababekhuliswa ngaletibukhwebeletane, nyalo sebalala emataleni etincunjini temlotsa.
6 Sijeziso sebantfu bami sikhulu kunesalabo baseSodoma, lababhujiswa ngemzuzwana munye, kwabate nasinye sandla lesabelekelela.
7 Tikhulu tabo taticwebetela kwendlula sitfwatfwa, timhlophe kwendlula lubisi. Imitimba yato yayibovu yendlula emarubi, kubonakala kwato kwakunjengekwemasafire.
8 Kodvwa nyalo setimnyama kwengca umsiti, atatiwa ngisho nasetitaladini. Sikhumba sato sesishwaphene sanamatsela ematsanjeni ato, sesome saba njengelukhuni.
9 Labo lababulawa ngenkemba bancono kunalabo labafa babulawa yindlala; badvutjutwe yindlala, baze baguga baphela ngenca yekweswela kudla emasimini.
10 Bafati labanesihawu badzimate bapheka bantfwababo ngetabo tandla, bagucuka baba kudla kwabo ngesikhatsi bantfu bakitsi babhujiswa.
11 Simakadze ulufeze ngalokuphelele lulaka lwakhe, uyitfululile intfukutselo yakhe levutsako. ESiyoni uphembe umlilo lowadla tisekelo tayo.
12 Kute emakhosi emhlaba, ngisho nasinye sive lesisemhlabeni, lesake sakukholwa kutsi titsa nalabaphambene nayo bangangena emasangweni aseJerusalema.
13 Kodvwa kwenteka ngenca yetono tebaphrofethi bayo, nangetiphambuko tebaphristi bayo, labacitsa ingati yalabamsulwa ekhatsi kuyo.
14 Nyalo baphrofethi nebaphristi sebadvukuta etitaladini njengemadvodza latimphumphutse. Tingubo tabo setishone ingati, tadzimate tangcola lokwekutsi sekute namunye lofisa nekutitsintsa ngesandla tembatfo tabo.
15 Bantfu bayabacosha, batsi: “Hambani la! Sukani la! Ningcolile! Khweshani! Khweshani! Ningasitsintsi!” Ngesikhatsi baphrofethi nebaphristi babaleka bayewuzulazula, bantfu betive ngetive batsi: “Bangeke basachubeka nekuhlala lapha!”
16 Simakadze cobo lwakhe ubasakatile, akasabelusi. Baphristi abasahlonishwa, nalabadzala abasaphatfwa ngemusa.
17 Ngetulu kwaloko, emehlo etfu adzimate akhatsala solomane agolotele lusito lungaveli, sabukisisa emibhoshongweni yetfu, silindzele sive lesasingeke sisisindzise.
18 Emadvodza asibekela lugibe kuto tonkhe tinyatselo tetfu, ngaloko asikhonanga kuhamba etitaladini tetfu, kuphela kwetfu kwakusedvute, nemalanga etfu abesabaliwe, ngobe kuphela kwetfu kwase kufikile.
19 Batingeli betfu babegijima kwendlula lusweti lwasesibhakabhakeni; basigijimisa etintsabeni, basibhacela ehlane.
20 Logcotjiwe waSimakadze, lokunguyena angimitsambo yekuphila kwetfu, wabhajwa etingibeni tabo. Besicabanga kutsi siyawukhosela ngaphansi kwematfunti akhe, siphile emkhatsini wetive ngetive.
21 Awu, Ndvodzakati yase-Edomu, jabula utsakase, wena lohlala eveni lase-Usi. Kodvwa nakuwe itakwendluliselwa lendzebe, uyawudzakwa uhlutjulwe ube ngcunu.
22 Awu, Ndvodzakati yaseSiyoni, kujeziswa kwakho kutawuphela; Simakadze angeke aselule sikhatsi sekudzingiswa kwakho. Kodvwa, awu, wena Ndvodzakati yase-Edomu, uyawujeziswa ngenca yesono sakho, abubeke ebaleni bubi bakho.
1 Awu Simakadze! Khumbula kutsi kwentekeni kitsi. Buka ulibone lihlazo letfu.
2 Lifa letfu selijikisiwe lanikwa bafokati, nemakhaya etfu anikwa bachamuki.
3 Sesigucuke saba tintsandzane, sabate nabobabe, nabomake sebabafelokati.
4 Emanti lesiwanatsako kufanele siwatsenge, netinkhuni sititfola ngemali kuphela.
5 Labo labasicoshako basihleti emsileni, sikhatsele sidziniwe, asikutfoli kuphumula.
6 Satinikela kubaseGibhithe nakubase-Asiriya, kuze sitfole kudla lokwenele.
7 Bobabemkhulu labona sebafa, tsine sesetfwele licala labo.
8 Tigcili tibusa etikwetfu, kute namunye longasikhulula etandleni tato.
9 Kudla kwetfu sikutfola ngekutidzela ematsambo ngenca yenkemba lesehlane.
10 Sikhumba setfu sishisa njengelitiko, siyavevetela ngenca yekulamba.
11 Bafati badlwenguliwe eSiyoni, netintfombi tadlundlulutwa emadolobheni akaJuda.
12 Tikhulu tilengiswe ngetandla tato; labadzala bangete bahlonishwa.
13 Emajaha ayaphishaneka etigayweni, bafana bayadzayitela ngaphansi kwetinyandza tetinkhuni.
14 Baholi besukile emasangweni elidolobha, emajaha asewuyekele umculo wawo.
15 Injabulo iphelile etinhlitiyweni tetfu; kugidza kwetfu kwenjabulo sekugucuke kwaba sililo.
16 Umchele udzilikile etinhloko tetfu. Maye kitsi! Ngobe sonile.
17 Ngenca yako konkhe loku tinhlitiyo tetfu tidzabukile, nangenca yato tonkhe letintfo emehlo etfu ayadvumba,
18 ngobe intsaba iSiyoni seyisele ikhala libhungane, timphungutja tiyajangaza kuyo.
19 Awu, wena Simakadze, uyabusa kuze kube phakadze. Sihlalo sakho sebukhosi sihlala sicinile titukulwane ngetitukulwane.
20 Usikhohlwelani njalo nje? Usilahleleni sikhatsi lesidze kangaka?
21 Awu! Simakadze, sibuyisele kuwe, kuze natsi sitewubuyela kuwe; sivusetele emalanga etfu abe njengemalanga asendvulo.
22 Nome sewusilahle kokuphela yini? Sekute yini siphetfo ekutfukutseleni kwakho?