1 Lawa ngemavi eMshumayeli, umsa waDavide, inkhosi yaseJerusalema:
2 “Lite lelite!” kusho uMshumayeli. “Kulite mbamba! Konkhe kulite.”
3 Umuntfu utfolani ngawo wonkhe umshikashika lawusebentelako lapha ngaphansi kwemtfunti welilanga?
4 Titukulwane tiyefika, titukulwane tiyendlula, kodvwa umhlaba uyakusala unjalo phakadze naphakadze.
5 Lilanga liyaphuma, lilanga liyashona, libuyele endzaweni yalo lapho liphuma khona.
6 Umoya uphephetsela ngaseningizimu, bese uyajika ucondza ngasenyakatfo, ushaye situngeletane, ujikeleta lapho uhambe khona.
7 Yonkhe imifula ingenisa elwandle, noko lwandle alugcwali, lapho ichamuka ngakhona imifula, iphindze ibuyele khona futsi.
8 Tonkhe tintfo tiyadzinana, kute umuntfu longatichaza. Liso alizange leneliswe kubuka, kantsi nendlebe ayigcwali ngekuva.
9 Lokwake kwaba khona kuyawuphindze kube khona futsi, lokwase kwentiwa kuyawuphindze kwentiwe futsi; kute intfo lensha, lapha ngaphansi kwemtfunti welilanga.
10 Kukhona yini intfo umuntfu langasho ngayo atsi: “Ase nibuke, kusha-ke loku”? Cha, kwase kwaba khona endvulo, kwakukhona sisengakabikho.
11 Bantfu bakadzeni abakhunjulwa, nalabo labalandzelako abayiwukhunjulwa ngulabo lababalandzelako.
12 Mine, Mshumayeli, ngangiyinkhosi yema-Israyeli eJerusalema.
13 Ngatimisela kutsi ngekuhlakanipha ngifundze ngiphenyisise ngako konkhe lokwentiwa emhlabeni. Maye, mkhulu umtfwalo Nkulunkulu lawetfwese bantfu!
14 Ngikubone konkhe lokwentiwako ngaphansi kwemtfunti welilanga; konkhe kulite, kufanana nekucosha umoya.
15 Loko lokugwegwile kungeke kucondziseke, loko lokungekho kungeke kubalwe.
16 Ngaticabangela ngatsi: “Mine ngikhulile, ngacokelela incumbi yekuhlakanipha, ngabendlula bonkhe labase babusela eJerusalema ngaphambi kwami; sengikubone kakhulu kuhlakanipha kanye nelwati.”
17 Ngatimisela engcondvweni yami kukwati kuhlakanipha, nebuhlanya nebulima, kodvwa ngefika lapho ngibona khona kutsi nako loko kufanana nekucosha umoya.
18 Ngobe kuhlakanipha lokukhulu kutala lusizi lolukhulu: Umuntfu utsi angaba nelwati lolukhulu, nekuhlupheka kwakhe kube kukhulu.
1 Ngacabanga enhlitiyweni yami, ngatsi: “Ngitatitika ngato tonkhe tinhlobo tenjabulo ngitsi ngiyatijabulisa, ngifuna kubona kutsi yini lenhle.” Kodvwa ngatfola kutsi naloko kulite.
2 Ngabona, ngatsi: “Cha, kuhleka kubuhlanya. Yini nje lenhle ngekutijabulisa?”
3 Ngako ngetama kutijabulisa ngeliwayini, ngagona bulima. Kodvwa ingcondvo yami yayidvonswa kuhlakanipha. Ngangifuna kubona kutsi yini lokungukona kufanele kwentiwe bantfu lapha emhlabeni kulamalangana emphilo yabo.
4 Ngesukela imisebenti lemikhulu: Ngatakhela tindlu, ngahlanyela tivini.
5 Ngahlanyela tingadze, ngakha netindzawo tekuphumula, ngahlanyela tonkhe tinhlobo tetihlahla tetitselo lapha ngekhatsi kuletingadze,
6 ngatakhela emadamu ekunisela lamahlatsi etihlahla letikhulako,
7 ngatsenga tigcili letidvuna naletisikati, kantsi futsi nganginaleti letatalelwa khona ekhaya kami. Ngetulu kwaloko ngangifuyile, nginemihlambi yetinkhomo, neyetimbuti, neyetimvu, ngendlula bonkhe laba labake bahlala kucala kunami eJerusalema.
8 Ngabutsisa ndzawonye isiliva negolide kanye nengcebo yemakhosi neyemave. Ngatibutsela bahlabeli labadvuna nalabasikati nako konkhe umuntfu langahle atijabulise ngako.
9 Ngaba mkhulu, ngadvuma kakhulu, kwendlula bonkhe laba labase babusela eJerusalema kucala kunami. Kuko konkhe loko kuhlakanipha kwami kwakuloku kukimi.
10 Konkhe emehlo ami labefisa kukubuka, ngangiwanika kona. Angizange ngitibambe ngisho nakukunye kutijabulisa. Ngatijabulisa ngawo wonkhe umsebenti wami; loku kwaba ngumvuzo wami ngawo wonkhe umsebenti wami.
11 Ngako ngesuka lapho ngayibukisisa kahle yonkhe imisebenti yetandla tami, wonkhe umshikashika nekukhandleka kwami bekulite, kufanana nekucosha umoya! Kute lokwaba yinzuzo lapha ngaphansi kwemtfunti welilanga.
12 Ngabe sengicabangisisa ngekuhlakanipha, nangebuhlanya kanye nangebulima. Yini nje lengentiwa ngulowo lolandzela inkhosi embusweni ngaphandle kwaloko lesekwentiwe?
13 Ngabona kutsi kuhlakanipha kuncono kunebulima, njengobe nekukhanya kuncono kunebumnyama.
14 Umuntfu lohlakaniphile uyabona lapho aya khona, kodvwa silima sona sihamba ebumnyameni; noko ngase ngiyabona kutsi bobabili befikelwa siphetfo lesifananako.
15 Ngabe sengicabanga enhlitiyweni, ngatsi: “Ngisho nami imbala siphetfo sesilima siyakungifikela. Pho, kungisita ngani kuhlakanipha kwami?” Ngacabanga enhlitiyweni yami, ngatsi: “Nako loko kulite.”
16 Kukhunjulwa kwesihlakaniphi akukwendluli ngalutfo kukhunjulwa kwesilima, ngobe ngekuhamba kwemalanga bobabili bayawukhohlakala. Lohlakaniphile nalosilima bafa kufa kunye!
17 Ngako ngakutondza kuphila, ngobe konkhe lokwentiwako lapha ngaphansi kwemtfunti welilanga kuhlupheka kimi. Konkhe loku kulite, kufanana nekucosha umoya.
18 Ngase ngifika lapho ngiwutondza khona wonkhe umshikashika nekukhandleka kwami lengase ngikwentile ngaphansi kwemtfunti welilanga, ngobe titselo tako kufanele ngitishiyele lowo loyakuta emvakwami.
19 Empeleni ngubani lowatiko kutsi utawuba sihlakaniphi yini nome utawuba silima? Noko kutawuba nguye lotakwengamela tonkhe titselo temsebenti wami netebungcweti bami lapha ngaphansi kwemtfunti welilanga. Nako loko kulite.
20 Ngako inhlitiyo yami yacala kuphelelwa ngemandla kuko konkhe kukhandleka kwami lengikwentile lapha ngaphansi kwemtfunti welilanga.
21 Ngobe kunjalo, umuntfu umsebenti wakhe angawenta ngekuhlakanipha, nangelwati kanye nangekucophelela, kodvwa kufanele konkhe loko lokungekwakhe akushiyele umuntfu longakaze wakusebentela. Nako loko kulite nebubi lobukhulu.
22 Umuntfu utfolani ngako konkhe kukhandleka kwakhe nekushikaneka kwakhe lakwentako lapha ngaphansi kwemtfunti welilanga?
23 Kuto tonkhe tinsuku tekuphila kwakhe, umsebenti wakhe yiminjunju nekuhlupheka; ngisho nasebusuku ingcondvo yakhe ayinako kuphumula. Nako loko kulite.
24 Kute lokuncono umuntfu langakwenta ngaphandle kwekutsi adle anatse eneliseke ngemsebenti wakhe. Nako loku futsi ngikubona kuphuma esandleni saNkulunkulu,
25 ngobe ngubani longadla ajabule ngaphandle kwakhe?
26 Nkulunkulu uphana ngekuhlakanipha, nangelwati kanye nangenjabulo kumuntfu lotfokotisa yena, kodvwa soni usinika umshikashika wekubutsisa nekucongelela bunjinga, kuze kunikwe lowo lotfokotisa Nkulunkulu. Nako loko kulite, kufanana nekucosha umoya.
1 Konkhe kunesikhatsi sako, yonkhe intfo leyentekako inesikhatsi sayo lapha emhlabeni:
2 Kunesikhatsi sekutalwa nesikhatsi sekufa, sikhatsi sekuhlanyela nesikhatsi sekusiphula,
3 sikhatsi sekubulala nesikhatsi sekuphilisa, sikhatsi sekubhidlita nesikhatsi sekwakha,
4 sikhatsi sekukhala nesikhatsi sekuhleka, sikhatsi sekulila nesikhatsi sekugidza,
5 sikhatsi sekusakata ematje nesikhatsi sekuwabutsa, sikhatsi sekugona nesikhatsi sekuchilita,
6 sikhatsi sekufuna nesikhatsi sekuyekela, sikhatsi sekulondvolota nesikhatsi sekulahla,
7 sikhatsi sekudzabula nesikhatsi sekuchibela, sikhatsi sekubindza nesikhatsi sekukhuluma,
8 sikhatsi sekutsandza nesikhatsi sekutondza, sikhatsi semphi nesikhatsi sekuthula.
9 Umuntfu losebentako ubuyelwa yini ngekukhandleka kwakhe?
10 Ngiwubonile umshikashika Nkulunkulu lawunike bantfu kutsi bawente.
11 Konkhe ukwente kwalungela sikhatsi sako. Uphindze wabeka liphakadze etinhlitiyweni tebantfu; noko abakhoni kuyicondza imisebenti yaNkulunkulu kusukela ekucaleni kwayo kuze kube ngusekugcineni.
12 Ngiyati kutsi kute lokuncono ngaphandle kwekutsi bajabule baphile imphilo lekahle basesemhlabeni.
13 Ngetulu kwaloko kutsi umuntfu adle anatse atijabulise ngayo yonkhe imishikashika yakhe kusipho saNkulunkulu.
14 Ngiyati kutsi konkhe lokwentiwa nguNkulunkulu kuyakuma phakadze naphakadze; kute lokungengetwa nalokungacetunwa kuko. Konkhe ukwenta ngendlela yekutsi bantfu batfutfumele ebukhoneni bakhe.
15 Konkhe lokukhona ngulokwake kwaba khona, naloko lokuyawuba khona sekwake kwaba khona, Nkulunkulu uyakubuyisa loko lekwake kwenteka kutsi kuphindze kwenteke ngesikhatsi sako.
16 Ngetulu kwaloko kukhona lokunye lengaphindze ngakubona lapha ngaphansi kwemtfunti welilanga: lapho kwakufanele kusebenta khona umtsetfo, kwasebenta umonakalo; lapho kwakufanele kusebente khona kulunga, kwasebenta umonakalo.
17 Ngacabanga enhlitiyweni yami, ngatsi: “Nkulunkulu uyakwehlulela labalungile nalababi, ngobe kutawuba nesikhatsi sako konkhe lokwentiwako, nesikhatsi sawo wonkhe umsebenti.”
18 Ngaphindze ngacabanga ngatsi: “Macondzana nebantfu Nkulunkulu uyaye abavivinye, khona batewubona kutsi bafanana netilwane.
19 Ngobe siphetfo semuntfu siyafanana nesiphetfo setilwane; kokubili kumelwe siphetfo lesifananako: Njengobe lokunye kufa, naloku lokunye kuyafa. Konkhe kunemiphefumulo lefananako, umuntfu kute lancono ngako kunesilwane. Ngako konkhe kulite.
20 Konkhe kuya endzaweni yinye; konkhe kuphuma elutfulini kuphindze kubuyele elutfulini.
21 Ngubani lowatiko kutsi umphefumulo wemuntfu wenyukela etulu yini, nekutsi umphefumulo wesilwane wehlela phansi emhlabatsini?”
22 Ngako ngase ngiyabona kutsi kute lokuncono kumuntfu ngaphandle kwekutsi atijabulise ngemsebenti wakhe lawentako, ngobe phela leso ngusona sabelo sakhe. Empeleni ngubani nje longamvusa kuze atewubona kutsi kutakwentekani nase afile?
1 Ngaphindze ngabuka ngabona konkhe kucindzetelana lokwentiwako lapha ngaphansi kwemtfunti welilanga: Ngabona tinyembeti talabacindzetelwe, bate ngisho nemdvudvuti; emandla abengakubacindzeteli babo, kodvwa labo labacindzetelwe bate ngisho nemdvudvuti.
2 Ngakhandza kutsi labafile bayajabula; labo lasebalala bancono kunalaba labaphilako.
3 Kodvwa loncono kunabo bonkhe ngulowo losengakatalwa losengakawuboni lomonakalo lowenteka lapha ngaphansi kwemtfunti welilanga.
4 Ngabona kutsi wonkhe umshikashika nako konkhe kuphumelela kwemuntfu kusukela ekuhawukeleni kwakhe lutfo kumakhelwane wakhe. Nako loko kulite, kufanana nekucosha umoya.
5 Silima sigoca tandla, silambe size sife.
6 Kuncono kubamba ngesandla sinye ube nekuthula emoyeni, kunekubamba emabhabha ngemshikashika nekucosha umoya.
7 Ngaphindze futsi ngabona lokunye lokulite lapha ngaphansi kwemtfunti welilanga:
8 Bekunemuntfu labehleti yedvwana, abengenandvodzana ate nemnakabo. Abeshikaneka siphelane ajinge angeneliseki ngebunjinga bakhe, watibuta watsi: “Empeleni ngikhandlekela bani? Ngitemukelani lokujabula?” Nako loko kulite, umsebenti lolusizi!
9 Babili bancono kunamunye, ngobe batfola umvuzo lomuhle ngemsebenti wabo:
10 Nakuwa lomunye wabo, lomngani wakhe uyamsita amsukumise, kodvwa maye kulowo muntfu loyedvwa, lotsi nakawa angabi naye lotamsita amsukumise.
11 Kantsi futsi bantfu nabalele bababili bayafutfumetana; kodvwa umuntfu angatifutfumeta kanjani alele yedvwa?
12 Nangabe umuntfu ayedvwa, angehlulwa nakahlaselwa; kantsi nabababili bangativikela. Intsambo lenemicu lemitsatfu ayisheshi idzabuke.
13 Uncono umuntfu lomusha lophuyile nalohlakaniphile kunenkhosi lendzala lesilima nalengasatitsatsi teluleko.
14 Umuntfu lomusha angaphuma ejele angene esihlalweni sebukhosi, nome abengulotelwe angulomphofu embusweni walenkhosi.
15 Ngabona kutsi bonkhe bantfu labake baphila lapha ngaphansi kwemtfunti welilanga balandzela lona lomusha labetsetse sikhundla senkhosi.
16 Bangaba banyenti kabi bantfu labangabuswa yinkhosi. Kodvwa itawutsi ingakhotsama, bantfu bangakubongi loko lekwentile. Nako loko kulite, kufanana nekucosha umoya.
1 Caphela tinyatselo takho, nawuya endlini yaNkulunkulu. Ngobe kuncono kusondzela nekulalela kunekutsi unikele ngemhlatjelo wetilima, letingati kutsi ngekwenta loko tiyona.
2 Ungasheshi ukhulume ngemlomo wakho, ungabi nematata enhlitiyweni yakho kutsi ukhulume nome yini kuNkulunkulu. Nkulunkulu usezulwini, wena usemhlabeni, ngako emavi akho akabe mbalwa.
3 Njengobe liphupho likuhlasela nawuneminako leminyenti, kanjalo nenkhulumo yesilima ibonakala ngemavi lamanyenti.
4 Nawenta sifungo kuNkulunkulu, ungacali wephute ekusifezeni. Akatijabuleli tilima; sifungo sakho sifeze.
5 Kuncono kutsi ungasenti setsembiso kunekutsi usente ungabe usasifeza.
6 Ungawuvumeli umlomo wakho kutsi ukuholele esonweni, bese ukhuluma engilosini yaNkulunkulu utsi: “Cha, loko ngikushito ngesiphosiso.” Kudzingeke ngani kutsi Nkulunkulu aze atfukutseliswe ngemavi akho nekutsi yonkhe imisebenti yakho ibe lite kuye?
7 Kwandza kwemaphupho nemavi lamanyenti kulite. Ngako wena yesaba Nkulunkulu.
8 Nawubona lophuyile acindzetelwe endzaweni letsite, asemukwe emalungelo akhe nekwehlulelwa ngebucotfo, kungakumangalisi loko. Lowo nalowo lophetse unemuntfu longetulu kwakhe, kantsi nalowo longetulu kwakhe unemuntfu longetulu kwabo bonkhe.
9 Inala yemhlaba itfolwa ngibo bonkhe bantfu; ngisho nenkhosi imbala nayo iyabuyelwa nguloko lokutfolakala emhlabatsini.
10 Umuntfu lotsandza imali akeneliseki ngayo; nemuntfu lotsandza bunjinga lobukhulu akeneliswa nguloko lakutfolile. Nako loko kulite.
11 Ngekwandza kwetimphahla, nalabo labatisebentisako bayandza. Pho, timsita ngani-ke lomnikati ngaphandle kwekutsi atitsaphe ngemehlo?
12 Maye, butfongo besisebenti bumnandzi, lite nome sidle kancane nome sidle sesutsa; kodvwa inala yemuntfu lonjingile ayimniki butfongo.
13 Ngibone intfo lembi lelusizi lapha ngaphansi kwemtfunti welilanga: Umcebo lobutselwe ndzawonye bese usuka ulimata umnikati wawo,
14 nome-ke lomcebo bese ulahleka ngelishwa lelitsite, nendvodzana yalomnikati ingasatfoli lutfo.
15 Umuntfu uphuma angcunu esiswini senina, kanjalo nome asahamba, uyawuhamba angcunu. Kute layawukuphatsa ngesandla sakhe kuko konkhe lakusebentele.
16 Nako loko kuyimvisabuhlungu: Kufika kwemuntfu kufanana nekuhamba kwakhe; utfolani-ke umuntfu, nangabe kantsi wonkhe lomshikashika wakhe ungumoya nje?
17 Onkhe emalanga akhe udlela ebumnyameni, ngekukhatsateka lolukhulu, nelusizi, nelulaka.
18 Ngase ngiyabona kutsi kuhle kutsi umuntfu adle, anatse, atijabulise ngayo yonkhe imisebenti yakhe layentako lapha ngaphansi kwemtfunti welilanga, atijabulise ngawo onkhe lawo malangana Nkulunkulu lamuphe wona kutsi awaphile ngaphansi kwemtfunti welilanga, ngobe loko kusabelo sakhe,
19 ngetulu kwaloko kusipho saNkulunkulu kuye wonkhe umuntfu lamuphe bunjinga, nemcebo, nemandla, kutsi atijabulise ngako, asemukele leso sabelo sakhe, ajabule emsebentini wakhe.
20 Ngobe akayikutikhumbula kakhulu tinsuku tekuphila kwakhe, ngobe phela Nkulunkulu umenta ahlale amatasatasa ngekujabula enhlitiyweni yakhe.
1 Ngibone lenye intfo lembi lapha ngaphansi kwemtfunti welilanga, futsi ingumtfwalo lomatima kubantfu:
2 Nkulunkulu upha umuntfu ingcebo, netimphahla letinyenti, nekuhlonipheka, kuze kutsi kubete lakweswelako lokufiswa yinhlitiyo yakhe, kodvwa Nkulunkulu angamvumeli kutsi atijabulise ngayo, esikhundleni saloko kube ngumfokati nje lotijabulisa ngayo. Nako loko kulite nemvisabuhlungu lembi.
3 Indvodza ingaba nebantfwana labalikhulu, iphile iminyaka leminyenti; kodvwa nome ingaphila sikhatsi lesidze, ingakwati kutijabulisa ngetintfo letinhle tekuphila, bese kutsi ekugcineni ingabe insangcwatjwa nakahle, ngitsi umntfwana lotelwe asafile uncono kakhulu kunayo.
4 Kutalwa kwakhe kulite, unyamalala ebumnyameni nelibito lakhe lifihlakale ebumnyameni.
5 Nome angazange alibone lilanga, angazange ati nalutfo, kuphumula kwakhe kuncono kunekwaleyo ndvodza,
6 lite nome leyo ndvodza ingaphila iminyaka leyinkhulungwane lephindvwe kabili, kodvwa ibe yehluleka kutijabulisa ngalengcebo yayo. Abayi ndzawonye bonkhe yini?
7 Yonkhe imitamo yemuntfu ngeyekutfola kudla, noko lutsandvo lwekudla alweneliseki.
8 Umuntfu lohlakaniphile uncono ngani kunemuntfu losilima? Umuntfu lophuyile utfolani ngekwati kutiphatsa kahle embikwebantfu?
9 Kuncono kweneliswa nguloko lokubona ngemehlo akho kunekushangashangiswa lutsandvo lwekudla. Nako loko kulite, kufanana nekucosha umoya.
10 Konkhe lokukhona sekwetsiwa libito lako, nemvelo yemuntfu iyatiwa. Kute umuntfu longamelana nalonemandla kunaye.
11 Ngekwandza kwemavi, kwandza nebute bawo. Kona loko kumbuyiselani nje umuntfu?
12 Empeleni ngubani longahle ati kutsi yini lenhle lefanele umuntfu kulokuphila, nakulamalangana lambalwa nalalite lendlula kuwo njengesitfunti? Ngubani nje longatjela lomunye umuntfu kutsi kutakwentekani lapha ngaphansi kwemtfunti welilanga nangasekho?
1 Libito lelihle lincono kunemakha lamnandzi, nelilanga lekufa lincono kunelekutalwa.
2 Kuncono kuya endlini lapho kulilwa khona kunekuya endlini lapho kunelidzili khona, ngobe kufa kusiphetfo sabo bonkhe bantfu; labo labaphilako kufanele bakufake enhlitiyweni yabo loko.
3 Lusizi luncono kuneluhleko, ngobe buso lobudzabukile buyayilungela inhlitiyo.
4 Inhlitiyo yalabahlakaniphile isendlini yalabalilako, kodvwa inhlitiyo yetilima isendlini yalabatsakasile.
5 Kuncono kulalela nawekhutwa ngumuntfu lohlakaniphile kunekunaka kubongelelwa tilima.
6 Njengekusasamba kwemanyeva nakasha ngaphansi kwelibhodo, lunjalo-ke neluhleko lwetilima. Nako loko kulite.
7 Ngempela, inkhohliso yenta umuntfu lohlakaniphile abe silima; umdizo wonakalisa inhlitiyo nengcondvo.
8 Siphetfo sentfo sincono kunesicalo sayo, nekubeketela kuncono kuneligcabho.
9 Ungasheshi ucansuke emoyeni wakho, ngobe intfukutselo ihlala esifubeni sesilima.
10 Ungabuti utsi: “Kwabangelwa yini kutsi tinsuku takadzeni tibe ncono kunaleti tetfu?” Ngobe akukahlakaniphi kubuta leyo mibuto.
11 Kuhlakanipha kuyintfo lenhle njengelifa, kantsi futsi kusita labo labasabona lilanga.
12 Kuhlakanipha kuyintfo yekukhosela njengobe nemali kuyintfo yekukhosela, kodvwa buhle belwati kutsi: Kuhlakanipha kuyawulondvolota kuphila kwemnikati wako.
13 Cabangisisa ngemisebenti yaNkulunkulu. Ngubani longacondzisa loko lakwenta kwaba sigwegwe?
14 Natintfo tihamba kahle, tsakasa; kodvwa natintfo tingahambi kahle, khumbula naku: Nkulunkulu ukuvumela kutsi kwenteke kokubili. Ngako-ke umuntfu angeke akwati kubona lutfo ngelikusasa lakhe.
15 Kulokuphila kwami lokulite ngikubone kokubili loku: Umuntfu lolungile ufela ekulungeni kwakhe, nemuntfu lomubi uphila sikhatsi lesidze ebubini bakhe.
16 Ungatenti umuntfu lolunge kakhulu, futsi ungabi ngulohlakaniphe kunabo bonkhe; empeleni utibulalelani nje?
17 Ungatenti umuntfu lomubi kakhulu, kantsi futsi ungatenti silima kakhulu; empeleni ufunelani kufa, sikhatsi sakho sekufa singakefiki?
18 Kuhle kutsi ukubambe loku, kodvwa ungakuyekeli-ke lokwa. Umuntfu lowesaba Nkulunkulu uyawuphumelela kuko konkhe.
19 Kuhlakanipha kwenta umuntfu munye abe nemandla kakhulu kunebabusi belidolobha labalishumi.
20 Kute nome munye umuntfu lolungile emhlabeni lowenta lokuhle kuphela, kubete lakonako.
21 Ungawanaki onkhe emavi lakhulunywa bantfu, ungahle uve nesisebenti sakho sikuhlambalata,
22 ngobe ngisho nawe wati kahle enhlitiyweni yakho kutsi kukanyenti kangakanani uhlambalata labanye bantfu.
23 Konkhe loku ngakuhlolisisa ngekuhlakanipha, ngase ngitsi: “Ngitimisele kuba ngulohlakaniphile,” kodvwa loko bekungetulu kwemandla ami.
24 Lokungiko sibili kukhashane kakhulu, kantsi futsi kujule kakhulu, ngubani longakutfola?
25 Ngase ngijikisela ingcondvo yami ekufunisiseni kwati nasekuphenyisiseni kuhlakanipha nekuhleleka kwetintfo, nasekucondzisiseni bulima bebubi kanye nebuhlanya bebulima.
26 Ngikhandza lokubaba kakhulu kunekufa: umfati lolugibe nalonenhlitiyo lengusochaka, yebo, umfati lotandla takhe titibopho. Indvodza lejabulisa Nkulunkulu iyawubaleka kuye, kodvwa indvodza lesoni uyakuyibamba.
27 UMshumayeli utsi: “Ase ubuke naku lengikutfolile: Kuhlanganisa intfo lencane ngayinye ngayinye kulokunye, kuze ngitfole indzikimba.
28 Ngatsi ngisaphenyisisa ngingatfoli lutfo, ngatfola indvodza yinye lecondzile kulayinkhulungwane, kodvwa kwabate ngisho namunye umfati locondzile kubo bonkhe.
29 Naku kuphela lengikutfolile: kutsi Nkulunkulu wadala umuntfu, wamenta waba ngulocondzile, kodvwa bantfu besuka bayawufuna emachinga abo lamanyenti.”
1 Ngubani umuntfu lonjengalohlakaniphile? Ngubani lowati inchazelo yetintfo? Inhlakanipho ikhanyisa buso bemuntfu igucule kunyukubala kwebuso bakhe.
2 Ngitsi hlonipha umyalo wenkhosi ngenca yesifungo lowasenta kuNkulunkulu.
3 Ungasheshi usuke embikwenkhosi. Ungacali futsi ukusukumele lokubi, ngobe itakwenta nome ngabe yini leyikutsandzako.
4 Njengobe livi lenkhosi liyabusa, ngubani longasho kuyo atsi: “Yini lena loyentako?”
5 Lohlonipha umyalo wenkhosi, kute lokungamfaka engotini. Umuntfu lohlakaniphile uyati enhlitiyweni yakhe sikhatsi lesilungile nendlela lekahle yekwenta tintfo.
6 Ngobe yonkhe indzaba inesikhatsi sayo nendlela yayo, noko lusizi lwemuntfu luhlala lumatima etikwakhe.
7 Njengobe kute umuntfu lowati likusasa lakhe kutsi limphatseleni, ngubani nje longasho kutsi yini letakwenteka?
8 Kute umuntfu lonemandla ekubamba umoya, futsi kute nalonemandla ekujikisa lilanga lekufa kwakhe. Njengobe kute umuntfu lokhululekile nakuliwa imphi, kanjalo futsi nebubi bungeke bubakhulule labo lababentako.
9 Konkhe loku ngakubona ngisacabangisisa ngako konkhe lokwenteka lapha ngaphansi kwemtfunti welilanga. Sikhona sikhatsi lapho umuntfu usuke atihlisibete etikwalabanye kantsi utilimata yena.
10 Ngase ngabona lababi, babengcwatjwa, labo babephuma bangena endzaweni lengcwele babatjatwe badvunyiswe edolobheni lapho bebakwenta khona loko. Nako loko kulite.
11 Ngenca yekutsi sigwebo sentfo lembi siyephuta kukhishwa, tinhlitiyo tebantfu setihlosa kwenta bubi ngesibindzi.
12 Nome lomubi enta bubi kalikhulu, achubeke aphile sikhatsi lesidze, ngiyati kutsi kuyakubahambela kahle labo labesaba Nkulunkulu, bahloniphe Nkulunkulu.
13 Kodvwa kungeke kubahambele kahle lababi, futsi imphilo yabo ingeke yeluleke njengematfunti, ngobe bangamesabi Nkulunkulu.
14 Kukhona lokunye lokulite lokwentekako lapha emhlabeni: Kukhona bantfu labalungile labehlelwa nguloko lokufanele kwehlele lababi, kantsi futsi kukhona nalababi labehlelwa nguloko lokufanele kwehlele labalungile. Ngatsi nako loko kulite.
15 Ngako mine ngincoma kutsi umuntfu kufanele atijabulise ngekuphila kwakhe, ngobe umuntfu ute lutfo loluhle lapha ngaphansi kwemtfunti welilanga, ngaphandle kwekutsi adle, anatse, atijabulise; ngobe loku kuyawuhlala kukuye kuwo wonkhe umshikashika wekuphila kwakhe, Nkulunkulu lamuphe wona lapha ngaphansi kwemtfunti welilanga.
16 Ngatsi nangitimisela engcondvweni yami kufunisisa kwati nekuhlakanipha nekutfolisisa kutsi yini umshikashika lowentiwa ngumuntfu emhlabeni, angalali emini nebusuku,
17 ngayibona yonkhe imisebenti yaNkulunkulu kutsi umuntfu angeke ayicondze yonkhe imisebenti leyentiwako lapha ngaphansi kwemtfunti welilanga. Nome umuntfu angatihlupha kangakanani afunisisa, angeke ayicondze; nome lohlakaniphile angatsi yena uyati, angeke ayicondze.
1 Ngacabangisisa ngako konkhe loko, ngabona kutsi lolungile nalohlakaniphile nako konkhe labakwentako kusesandleni saNkulunkulu, nome kulutsandvo nome kuyinzondo; kute lowatiko. Konkhe lokusembikwabo kulite.
2 Bonkhe banasiphetfo sinye: labalungile nalabangakalungi, labahle nalababi, labahlantekile nalabangcolile, labenta imihlatjelo nalabangayenti. Njengobe kunjalo kumuntfu lolungile, kuyawuba njalo nakulosoni; nanjengobe kunjalo kulabo labenta tifungo, kutawuba njalo nakulabo labesaba kutenta.
3 Naku lokubi kuko lokwentekako lapha ngaphansi kwemtfunti welilanga: Bonkhe behlelwa siphetfo lesifananako. Ngetulu kwaloko tinhlitiyo tebantfu tigcwele bubi, kantsi kunebuhlanya etinhlitiyweni tabo basaphila, emvakwaloko bangena ekufeni.
4 Kodvwa kulowo losabalelwa kulabaphilako litsemba lisekhona; khumbula kutsi inja lephilako incono kunelibhubesi lelifile.
5 Liciniso, labaphilako bayati kutsi batakufa, kodvwa labafile abati lutfo; sebate umvuzo, abasakhunjulwa ngisho nekukhunjulwa.
6 Kubo lutsandvo, nenzondo, nemona sekwaphela, bangeke baphindze babe nesabelo kuko konkhe lokwentiwako lapha emhlabeni.
7 Hamba udle kudla kwakho ngenjabulo, unatse liwayini lakho ngenhlitiyo lejabulako, ngobe Nkulunkulu uyakuvumela kuloku lokwenta nyalo.
8 Tembatfo takho atihlale timhlophe, nenhloko yakho ihlale igcotjiswe ngemafutsa enjabulo.
9 Tijabulise ngekuphila nemfati wakho lomtsandzako, kuto tonkhe tinsuku letendlula ngekushesha, Nkulunkulu lakuphe tona lapha ngaphansi kwemtfunti welilanga. Ngobe phela loko sabelo sakho ekuphileni kwakho nasekukhandlekeni kwakho lapha ngaphansi kwemtfunti welilanga.
10 Wonkhe umsebenti losetandleni takho wente ngemandla akho onkhe, ngobe ethuneni lapho uya khona, kute kusebenta, nekucabanga, nelwati kanye nekuhlakanipha.
11 Kukhona lokunye lengikubonile lapha ngaphansi kwemtfunti welilanga: Ematubane lamakhulu akusiwo lenta umuntfu aphumelele emncintiswaneni, nemandla akusiwo lenta uncobe ekulweni, kantsi nekudla akutfolwa ngulabahlakaniphile bodvwa, nebunjinga abusibo balabakhaliphe ngengcondvo kuphela, nemphumelelo ayisiyo yalabanelikhono; kodvwa sikhatsi nematfuba kubehlela bonkhe.
12 Ngetulu kwaloko kute umuntfu lowatiko kutsi sikhatsi sakhe siyawufika nini: Njengenhlanti ibanjwa enetheni, nenyoni igcotjwa sifu, kanjalo nebantfu babanjwa kufikelwa tikhatsi letimbi bangakaticapheli.
13 Ngiphindze ngabona lokunye futsi lapha ngaphansi kwemtfunti welilanga, lekwaba sibonelo lesikhulu sekuhlakanipha kimi.
14 Bekunelidolobha lelincane lelalinebantfu labambalwa kulo. Kwefika lenkhulu inkhosi lenemandla itekulihlasela, yalivimbetela, yakha takhiwo tekulihlasela lelidolobha.
15 Kwakukhona indvodza lemphofu kulelo dolobha leyayinekuhlakanipha; yona yodvwa nje ngekuhlakanipha kwayo yalisindzisa lelidolobha. Kodvwa kwabate namunye lowakhumbula lutfo ngaleyo ndvodza.
16 Ngako enhlitiyweni yami ngatsi: “Kuhlakanipha kuncono kunetikhwepha.” Kodvwa lokuhlakanipha kwalomuntfu lomphofu kwatsatselwa phansi, nemavi akhe akazange anakwe ngumuntfu.
17 Umuntfu lohlakaniphile lokhuluma inhlitiyo yakhe ngalelipholile kuncono alalelwe kakhulu kunekulalela umphatsi lolibala kumemeta, anika imiyalo etilimeni.
18 Kuhlakanipha kuncono kunetikhali temphi, kodvwa soni lesisodvwa sibhubhisa lokuhle lokukhulu, lokwentiwe kahle.
1 Njengobe timphungane letifile tenta emakha abe neliphunga lelibi, kanjalo nebulima lobuncane nje benta kuhlakanipha neludvumo kulahlekelwe simo sako.
2 Inhlitiyo yalohlakaniphile ibheke ekulungeni, kodvwa yesilima ibuke ebubini.
3 Nome sihamba emgwacweni, silima asikhombisi ingcondvo, sihambe sikhombisa bonkhe bantfu kutsi singiso.
4 Nangabe intfukutselo yembusi ikuvukela, ungawushiyi umsebenti wakho. Kutfobeka kulungisa emaphutsa lamakhulu.
5 Kukhona bubi lengibubonile lapha ngaphansi kwemtfunti welilanga, sono lesentiwa ngumbusi:
6 Tilima tifakwa etikhundleni letiphakeme, kutsi labakhulu nalabanjingile bafakwe kuletiphansi.
7 Ngibone tigcili tigibele emahhashi, kwatsi bantfu labakhulu bahamba phansi ngetinyawo njengetigcili.
8 Umuntfu lomba umgodzi angahle awele kuwo. Umuntfu lobhidlita lubondza angahle alunywe yinyoka.
9 Umuntfu lomba ematje enkwali angahle alinyatwe ngiwo; lowo locheketa tingodvo angahle alinyatwe ngito.
10 Nangabe lizembe lisidlindzi lingakacali lalolwa, umuntfu kudzingeka asebentise emandla lamakhulu; kodvwa likhono liletsa imphumelelo.
11 Nangabe inyoka iluma ingakatfotjiswa, kute inzuzo kulowo mwungi wayo.
12 Emavi laphuma emlonyeni wemuntfu lohlakaniphile amentela ludvumo, kodvwa silima sidliwa tindzebe taso.
13 Ekucaleni emavi aso abulima, kutsi ekugcineni abe kwedzelela nebuhlanya;
14 silima siba nemavi lamanyenti. Kodvwa ekugcineni kubate lowatiko kutsi yini letako. Ngubani nje longamtjela kutsi kutakwentekani emvakwakhe?
15 Silima sitigugisa sona ngemisebenti yaso size sife, ngobe asiyati nendlela leya edolobheni.
16 Nako kuwe wena live, nangabe sigcili sesigucuke saba yinkhosi yakho, kantsi nebantfwabenkhosi belive lakini badla lidzili ekuseni.
17 Libusisiwe live, nangabe inkhosi yalo yatalwa ingulehlakaniphile, nebantfwabenkhosi balo badla ngesikhatsi lesingiso, labadlela emandla, hhayi kudzakwa.
18 Nangabe umnikati wendlu avilapha, luphahla lwendlu yakhe luyahhibika; kantsi futsi nakayingileka nje, indlu yakhe igcina seyingenela.
19 Lidzili lentelwa injabulo, neliwayini lenta kutsi kutsakaswe; kodvwa imali iyimphendvulo yako konkhe.
20 Ungakhulumi kabi ngenkhosi, ngisho nangekucabanga kwakho, nangalonjingile ekamelweni lakho, ngobe inyoni yemoya ingahle iwetfwale emavi akho, nesitfunywa lesinemaphiko singahle sisho kutsi utsiteni.
1 Jika sinkhwa sakho emantini, ngobe utawuphindze usitfole emvakwemalanga lamanyenti.
2 Yaba timphahla takho tekutsengiswa kulabasikhombisa, yebo, kulabasiphohlongo, ngobe awati kutsi yini lengahle yehlele umhlaba.
3 Nangabe emafu agcwele imvula, lemvula ayitfululela etikwemhlaba. Nangabe sihlahla siwe sabheka ngaseningizimu nome ngasenyakatfo, siyawulala ngaleyo ndlela lesiwe ngayo.
4 Lowo lonaka umoya angeke aze ahlanyele; nalowo lolindzela emafu emvula angeke aze avune.
5 Njengobe ungati kutsi umoya uvelaphi, nekutsi kwenteka kanjani kutsi umfati lotetfwele abe nemtimba lonemoya lophilako esiswini sakhe, kanjalo ungeke wati kutsi Nkulunkulu uMdali wako konkhe, usebenta kanjani.
6 Ekuseni hlanyela inhlanyelo yakho, ungayekeli kusebenta lize liyewushona, ngobe awuyati lenguyona itawuphumelela, kutsi ngulena yini nome nguleyo, nome totimbili tiyawuphumelela kahle ngalokufananako.
7 Kukhanya kwelilanga kumnandzi, nekubonakala kwenhlavu yelilanga kuyawajabulisa emehlo.
8 Nangabe umuntfu aphiwe iminyaka leminyenti yekuphila emhlabeni, akatijabulise ngayo yonkhe, kodvwa noko akakhumbule kutsi ayeta emalanga lamanyenti ebumnyama. Konkhe lokutako kuyawuba lite lelite.
9 Jabula jaha, ebusheni bakho, inhlitiyo yakho ayikujabulise ngemalanga ebusha bakho. Landzela tindlela tenhlitiyo yakho nako konkhe lokubonwa ngemehlo akho; kodvwa ukhumbule kutsi Nkulunkulu uyawukwehlulela ngako konkhe lokwentile.
10 Ngako-ke cosha kungeneliseki engcondvweni yakho, utsintsitse tinhlupheko emtimbeni wakho, ngobe busha nekucala kwemphilo kulite nje.
1 Khumbula uMdali wakho etinsukwini tebusha bakho, tinsuku tekuhlupheka tisengakefiki, neminyaka isengakasondzeli lapho uyawusho ngayo utsi: “Kuphila angisakujabuleli.”
2 Mkhumbule yena, lilanga, nekukhanya, nenyanga netinkhanyeti kusengakafiphali, nemafu asengakabuyeli emvakwemvula.
3 Ngaleso sikhatsi balindzi bendlu bayawutfutfumela, nemadvodza lanemandla ayawutfotfobala, lapho basili bayakuyekela kusila, ngobe nalabo basili bayawube sebambalwa; nalabo labalunguta ngemafasitelo bangabe basahlola;
4 ngesikhatsi neminyango lephumela esitaladini seyivalekile, nemsindvo wesigayo sewushabalala; ngesikhatsi bantfu bavuswa kuntjilota kwenyoni, nalokuhlabelela kwato sekuvakala kancane,
5 ngesikhatsi bantfu besaba konkhe lokuphakeme, kanye netingoti tasetitaladini, ngesikhatsi tihlahla te-alimondi setichakaza, nentsetse itotoba endleleni yayo, nenkhabunkhabu iphela. Umuntfu uya ekhaya lakhe laphakadze, labalilako bazulazula etitaladini.
6 Mkhumbule yena, intsambo yakho yesiliva isengakadzabuki, nesitja segolide sisengakaphahlaki, imbita yemanti isengakaphahlaki ngasemtfonjeni wemanti, nelisondvo lingakephukeli ngasemtfonjeni.
7 Mkhumbule yena, lutfuli lusengakabuyeli emhlabatsini, lapho lwatsatfwa khona, nemoya usengakabuyeli kuNkulunkulu lowawuniketa.
8 UMshumayeli utsi: “Lite lelite, konkhe kulite.”
9 Wachubeka kanjalo-ke uMshumayeli afundzisa bantfu ngekuhlakanipha kwakhe konkhe lakwatiko naye. Abecabangisisa aphenyisise, aphindze atihlelise kahle taga letinyenti engcondvweni yakhe,
10 bese uphenyisisa kutsi angatimisa kanjani. Abewahlela kahle emavi akhe kuze abe mnandzi, kodvwa loko lakubhala kwakuliciniso lodvwa.
11 Taga tebantfu labahlakaniphile tinemavi lakhalipha njengentjumentju yemelusi, nanjengetipikili letishayelwe tacina, tinjalo taga natihlanganiswe ndzawonye, ngobe bavela kumelusi munye.
12 Ndvodzana yami, caphela kungabikho lokwengetekako. Kubhalwa kwetincwadzi kungeke kuphele, kantsi nekufundza kakhulu kuyawudzinisa umtimba.
13 Konkhe sekuvakele. Nasi-ke siphetfo sendzaba: Yesaba Nkulunkulu, ugcine imiyalo yakhe, kute lokunye lokungetulu kwaloko lokudzingekako kumuntfu.
14 Ngobe Nkulunkulu uyakuyehlulela yonkhe imisebenti lesiyentile, ngisho nalokufihlakele lesikwentako, nome kuhle nome kubi.