1 Emvakwekufa kwaSawula, Davide wancandzeka nasancobe ema-Amaleki, wafike wahlala eSikilagi emalanga lamabili.
2 Ngelilanga lesitsatfu kwefika indvodza iphuma enkambu yaSawula, inetimphahla tayo letidzabukile kanye nelutfuli enhloko. Yatsi nayifika kuDavide, yawa phansi, yakhotsama, imhlonipha.
3 Davide wayibuta watsi: “Uphumaphi?” Yaphendvula yatsi: “Ngibaleke enkambu yaka-Israyeli.”
4 Davide wayibuta watsi: “Kwenteke njani? Ngitjele.” Yamphendvula yatsi: “Emadvodza abalekile ashiya imphi. Linyenti lawo ligwaziwe lafa. NaboSawula nemsa wakhe Jonathani bafile.”
5 Davide wakhuluma kulelijaha lelalimletsele lombiko, watsi: “Wati ngani kutsi Sawula nemsa wakhe Jonathani bafile?”
6 Lelijaha latsi: “Kwentekile ngaba setikwentsaba iGilbowa, ngabona Sawula eyeme etikwesikhali sakhe, tincola kanye nebagibeli bemahhashi sekusondzele kutawukhwela etikwakhe.
7 Watsi kube agucuke angibone, wamemeta, mine ngabuta ngatsi: ‘Yini nje lengingayenta?’
8 “Wase uyangibuta watsi: ‘Ungubani wena?’ “Mine ngamphendvula ngatsi: ‘Ngingum-Amaleki.’
9 “Wabe sewukhuluma kimi utsi: ‘Mani lapha ngenhla kwami ungibulale! Sengisemlonyeni wekufa, kodvwa seloku ngisaphila.’
10 “Ngako ngivele ngema ngenhla kwakhe, ngambulala, ngobe ngatile kutsi njengobe asawile angeke aphindze asindze. Ngibese ngitsatsa lomchele lobewusenhloko yakhe kanye nelibhengela lelisemkhonweni wakhe, ngakuletsa lapha enkhosini yami.”
11 Davide kanye nawo onkhe emadvodza labenawo badzabula tembatfo tabo.
12 Balila bakhala kwaze kwaba nguntsambama, bazilela Sawula, nemsa wakhe Jonathani, nemabutfo aSimakadze, nesive sema-Israyeli, ngobe babebulewe ngenkemba.
13 Davide wabuta lelijaha lelaliletse lombiko kuye, watsi: “Wena uphumaphi?” Laphendvula latsi: “Mine ngiyindvodzana yemuntfu wesive, um-Amaleki.”
14 Davide wambuta watsi: “Wena awukesabi ngani kuphakamisa sandla sakho nekubulala umgcotjwa waSimakadze?”
15 Ngako Davide wabita lenye yalamadvodza, watsi kuyo: “Hamba kuye, umbulale!” Wavele wambulala, wafa.
16 Ngobe Davide abetsite kuye: “Ingati yakho itawubasetikwakho. Nemlomo wakho ukulahla ngebufakazi, nawutsi: ‘Ngibulele logcotjiwe waSimakadze.’ ”
17 Davide washo nasi sililo, alilela Sawula nemsa wakhe Jonathani,
18 wakhipha nemlayeto kutsi emadvodza akaJuda afundziswe lesililo sebutjoki. Sibhalwe encwadzini yaJasheri:
19 “Bukhosi bakho, Israyeli, bulele phansi, bubulawelwe etintsabeni. Emachawe lanemandla kakhulu asawile!
20 “Loku akusiwumenyetelwa eGathi, kungakhulunywa nasetitaladini tase-Ashkeloni, funa emadvodzakati emaFilisti ajabule, funa emadvodzakati alabangakasoki atfokote.
21 “Nine tintsaba taseGilbowa, shangatsi ningabate ematolo nemvula, nibete nemasimi laneminikelo yalokutinhlavu. Ngobe lihawu lalabanemandla lilele ehlazweni, lihawu laSawula alisamanyateliswa ngemafutsa.
22 Engatini yalabagwaziwe nasetidvunjini temachawe, butjoki baJonathani bashaya bacotfula, nenkemba yaSawula ayibuyanga yabayaba.
23 “Sawula naJonathani basaphila babetsandvwa, baligugu, nasekufeni abazange behlukane. Bebanematubane kwendlula emangce, bebanemandla kwendlula emabhubesi.
24 “Awu, madvodzakati aka-Israyeli, lilelani Sawula. Wanembatsisa ngaletibovu naleticolisakele, wahlobisa tingubo tenu ngemihlobiso yegolide.
25 “Emachawe lanemandla awile emphini! Jonathani ulele, ubulawelwe etintsabeni takho.
26 “Ngiyakukhalela, mnaketfu Jonathani, bewuligugu kimi! Lutsandvo lwakho kimi belumangalisa, lumangalisa kwendlula lwalabasikati.
27 “Emachawe lanemandla awile! Tikhali temphi nato setibhubhile.”
1 Emvakwesikhatsi Davide wabuta kuSimakadze, watsi: “Kufanele yini ngenyuke kuyawutsatsa lelinye lalamadolobha akaJuda?” Simakadze watsi: “Yenyuka.” Davide wabuta watsi: “Kufanele ngiye kuphi?” Simakadze wamphendvula watsi: “EHebroni.”
2 Ngako Davide wenyuka kanye nebafati bakhe lababili, bo-Ahinowami waseJezreyeli kanye na-Abigayili, umfelokati waNabali waseKhameli.
3 Davide wahamba kanye nalamadvodza labemsingatsile, nguleyo naleyo inemndeni wayo; bafike bakha emadolobhaneni aseHebroni.
4 Emadvodza akaJuda eta eHebroni, afike amgcobela lapho Davide kutsi abe yinkhosi etikwendlu yakaJuda. Watsi kube Davide eve kutsi emadvodza aseJabeshi Gileyadi ngiwo labengcwabe Sawula,
5 watfumela titfunywa kulawo madvodza aseJabeshi Gileyadi, tafike tatsi: “Simakadze akanibusise ngekukhombisa umusa wenu ngekungcwaba Sawula, inkhosi yenu.
6 Shangatsi Simakadze manje anganiphatsa ngemusa nangekwetsembeka, nami futsi ngitaniphatsa ngalowo musa, njengobe nani nentile.
7 Manje-ke, cinani nibe nesibindzi, ngobe Sawula, inkhosi yenu, sewufile, kodvwa indlu yakaJuda seyigcobe mine kutsi ngibe yinkhosi etikwayo.”
8 Ngaso leso sikhatsi Abneri, umsa waNeri, labeyindvuna yemphi yaSawula abesatsetse Ishboshethi, umsa waSawula, wamletsa eMahanayimu.
9 Wafike wambeka inkhosi yakaGileyadi, neyaka-Asheri, neyaseJezreyeli, neyaka-Efrayimu, neyakaBhenjamini, naku-Israyeli wonkhe.
10 Ishboshethi, umsa waSawula, abesaneminyaka lengema-40, nakabekwa kuba yinkhosi etikwa-Israyeli; wabusa iminyaka lemibili. Kodvwa indlu yakaJuda yona yalandzela Davide.
11 Davide waba yinkhosi eHebroni etikwaJuda iminyaka lesikhombisa netinyanga letisitfupha.
12 Abneri, umsa waNeri, kanye nemadvodza labelandzela Ishboshethi, umsa waSawula, besuka eMahanayimu baya eGibeyoni.
13 Jowabe, umsa waSeruya, kanye nemadvodza akaDavide bahamba bahlangana nabo esitibeni saseGibeyoni. Lelinye licembu lahlala ngalapha kwalesitiba, kwatsi leli lelinye lahlala ngale kwaso, abukana.
14 Abneri wakhuluma kuJowabe, watsi: “Ake sivulele lamajaha alwe, embikwetfu sibuka.” Jowabe watsi: “Kulungile, ase balwe.”
15 Ngako asukuma abalwa, kwaba ngemadvodza lali-12 akaBhenjamini na-Ishboshethi, umsa waSawula, kwatsi lali-12 aba ngakaDavide.
16 Lelo nalelo jaha labamba lelo lelicondzene nalo ngenhloko laligwaza ngenkemba emhlubulweni, awa phansi kanyekanye. Ngako lendzawo yaseGibeyoni yetsiwa libito kwatsiwa yiHelkathi Hasurimu.
17 Ngalelo langa imphi yayesabeka kakhulu, Abneri nemadvodza aka-Israyeli behlulwa ngemadvodza akaDavide.
18 Emadvodzana aSeruya lamatsatfu abelapho, boJowabe na-Abishayi kanye na-Asaheli. Asaheli abegijimisa kwenyamatane yesiganga.
19 Wacosha Abneri, wacondzana naye; abengajikeli ngesekudla nome ngesancele, asamcosha.
20 Abneri wabuka emvakwakhe, wabuta watsi: “Asaheli, nguwe yini lowo?” Waphendvula watsi: “Ngimi.”
21 Abneri wakhuluma kuye watsi: “Phambukela ngasesandleni sekudla nome sesancele ucondzane nalelinye lalamajaha ulemuke letikhali talo.” Kodvwa Asaheli akazange ayekele kumcosha.
22 Waphindza futsi Abneri wecwayisa Asaheli, watsi: “Yekela kungicosha ngemuva! Ungiphocelelelani kutsi ngikugwaze? Ngingambukelwa ngubani umnakenu, Jowabe?”
23 Kodvwa Asaheli akayekelanga kumcosha ngemuva; ngako Abneri wagucuka wamgwaza ngesikhali sakhe esiswini, saze saphumela ngemuva. Wawela phansi, wafa khona lapho. Bonkhe babefike beme lapho Asaheli abewele khona, wafa.
24 Kodvwa Jowabe na-Abishayi bachubeka bacosha Abneri; latsi lilanga nalishona, befika egcumeni lase-Ama, edvute naGiya, endleleni leya emacwacwasini aseGibeyoni.
25 Ngako emadvodza akaBhenjamini abutsana ndzawonye emvakwa-Abneri. Aba sicumbi, abese ema esicongweni seligcuma.
26 Abneri wamemeta Jowabe, watsi: “Kufanele sichubeke nekulwa siphelane yini? Awuboni ngani kutsi loku kuyawugcina sekumunyu? Lamadvodza akakho utawatjela nini kutsi akakuyekele lokucosha bomnakabo ngemuva?”
27 Jowabe waphendvula watsi: “Ngifunga kuphila kwaNkulunkulu, ngitsi kube awukakhulumi, lamadvodza akami abetawuchubeka nekunicosha, kuze kube ngukusasa ekuseni.”
28 Ngako Jowabe washaya licilongo lakhe, onkhe emadvodza ema. Akazange achubeke nekuwacosha lamadvodza aka-Israyeli, kantsi futsi akazange aphindze alwe nawo.
29 Kubo bonkhe lobo busuku Abneri nemadvodza akakhe bashuca badzabula sihosha saseJordane, i-Arabha. Bewela iJordane, badzabula iBhithroni ekhatsi, baye befika eMahanayimu.
30 Jowabe wabuya ekucosheni Abneri, wahlanganisa onkhe emadvodza akakhe. Ngaphandle kwa-Asaheli, kwatfolakala kutsi emadvodza akaDavide lali-19 abesanyamalele.
31 Kodvwa emadvodza akaDavide abebulele bakaBhenjamini labangema-360 labebahamba na-Abneri.
32 BoJowabe batsatsa Asaheli bamngcwaba ethuneni leyise eBhetlehema. Base bashuca busuku bonkhe, befika eHebroni nakudzabuka kusa.
1 Kulwa emkhatsini wendlu yakaSawula neyakaDavide kwachubeka sikhatsi lesidze. Davide wakhula wachubeka kuba nemandla, kantsi indlu yakaSawula yachubeka kuba butsakatsaka.
2 Emadvodzana Davide lawatalelwa eHebroni ngulawa: Litubulo lakhe bekungu-Amnoni ku-Ahinowami waseJezreyeli.
3 Yesibili bekunguKhileyabi, umsa wa-Abigayili, umfelokati waNabali waseKhameli. Yesitsatfu bekungu-Absalomu, umsa waMakha, indvodzakati yaThalmayi, inkhosi yaseGeshuri.
4 Yesine bekungu-Adoniya, umsa waHagithi. Yesihlanu bekunguShefathiya, umsa wa-Abitali.
5 Yesitfupha bekunguJithreyamu ku-Egla, umkakhe. Bonkhe laba batalelwa Davide eHebroni.
6 Ngesikhatsi semphi leyayisemkhatsini wendlu yakaSawula nendlu yakaDavide, Abneri yena abechubeka nekucinisa sikhundla sakhe endlini yaSawula.
7 Sawula abenesingani, libito laso kunguRispha, indvodzakati ya-Aya. Ishboshethi wabuta Abneri, watsi: “Ulaleleni nesingani sababe?”
8 Abneri watfukutsela wabilelana ngenca yalenkhulumo ya-Ishboshethi, waphendvula watsi: “Ucabanga kutsi mine ngikhonta Juda yini? Lamuhla loku mine ngihlonipha indlu yeyihlo, Sawula, nemndeni wakhe kanye nebangani bakhe. Angikaze ngikunikele esandleni saDavide. Noko manje sewungibeka licala macondzana nalomfati!
9 Shangatsi Nkulunkulu angangiphatsa kabuhlungu mine Abneri, nangingamenteli Davide loko Simakadze lametsembisa kona ngesifungo,
10 esuse bukhosi endlini yaSawula, bese umisa Davide esihlalweni sebukhosi kutsi abuse etikwa-Israyeli naJuda, kusukela kaDani kuye kufike eBherisheba.”
11 Ishboshethi akazange aphindze abe nesibindzi sekukhuluma lelinye livi ku-Abneri, ngobe abesamesaba.
12 Abneri watfumela titfunywa takakhe kuDavide, tafike tatsi: “Labani lelive? Yenta nami sivumelwane, mine ngitakusita ekubuyiseni wonkhe Israyeli kutsi abe ngakuwe.”
13 Davide watsi: “Kulungile, ngitasenta nawe sivumelwane. Kodvwa kunye lengikufuna kuwe: Ungeti lapha embikwami, nawungakaletsi Mikhali, indvodzakati yaSawula, nawuta kutangibona.”
14 Davide watfumela titfunywa ku-Ishboshethi, umsa waSawula, wamtjela, watsi: “Letsa umkami Mikhali, lengamtsatsa ngekumkhokhela likhulu lemajwabu emaFilisti.”
15 Ngako Ishboshethi wakhipha umlayeto kutsi atsatfwe endvodzeni yakhe Phaltiyeli, umsa waLayishi.
16 Lendvodza yakhe yahamba naye, ikhala emvakwakhe yonkhe indlela, kwaze kwaba nguseBhahurimu. Abneri wakhuluma kuyo watsi: “Ncandzeka, ubuyele ekhaya!” Yancandzeka-ke lendvodza.
17 Abneri wakhuluma nebaholi baka-Israyeli, watsi: “Sesikhatsi lesidze seloku nifuna kubeka Davide kutsi abe yinkhosi yenu.
18 Manje kwenteni loko! Ngobe Simakadze wetsembisa Davide watsi: ‘Ngenceku yami Davide ngiyakwephula sive sonkhe sema-Israyeli esandleni semaFilisti nasetandleni tato tonkhe titsa taso.’ ”
19 Abneri waphindze wakhuluma yena cobo lwakhe kubakaBhenjamini. Wabe sewuya eHebroni kuyawutjela Davide konkhe Israyeli nendlu yakaBhenjamini lababekufuna.
20 Ngesikhatsi Abneri, labehamba nalamadvodza langema-20, efika kuDavide eHebroni, Davide wamlungiselela lidzili yena kanye nalamadvodza labehamba nawo.
21 Abneri wakhuluma kuDavide, watsi: “Ngicela kutsi ngihambe khona nyalo inkhosi yami ngiyihlanganisele Israyeli wonkhe, khona sitekwenta sivumelwane kanye nawe, nekutsi utewubusa etikwako konkhe lokufisako.” Ngako Davide wase uhambisa Abneri; wahamba ngekuthula.
22 Kwatsi kusenjalo, emabutfo aDavide anaJowabe efika aphuma ekuhlaseleni eta nemphango lenyenti. Kodvwa Abneri abesangekho kuDavide eHebroni, ngobe Davide abesamhambisile, naye wahamba ngekuthula.
23 Watsi kube Jowabe nemabutfo onkhe labehambe nawo efike, watjelwa kutsi Abneri, umsa waNeri, abete enkhosini, nenkhosi yamhambisa ngekuthula.
24 Ngako Jowabe wahamba waya enkhosini, wafike watsi: “Wenteni? Buka, Abneri ufike lapha. Umyekeleleni ahambe? Manje sewuhambile!
25 Nawe uyamati Abneri, umsa waNeri; abetele kutakukuyenga nekubukisisa kuphuma nekungena kwakho, kuze atekuhlolisisa kahle konkhe lokwentekako.”
26 Jowabe wesuka lapho watfumela titfunywa talandzela Abneri, tamncandza tambuyisa asasemtfonjeni waseSira. Kodvwa Davide abengakwati loko.
27 Watsi kube Abneri efike eHebroni, Jowabe wamdvonsela nganhlanye esangweni, kwaba shangatsi kukhona lafuna kutsi akukhulume ngasemasitseleni. Khona lapho, wabe sewumgwaza esiswini, wafa. Ngako Abneri wabulawelwa kutsi naye abebulale Asaheli, umnakaboJowabe.
28 Emvakwaloko, watsi kube Davide eve ngaloku, watsi: “Mine nembuso wami embikwaSimakadze anginalo licala lengati ya-Abneri, umsa waNeri.
29 Shangatsi licala lengati yakhe lingaba setikwenhloko yaJowabe kanye nendlu yeyise! Shangatsi indlu yaJowabe ingete yahlala ingenaye umuntfu lonesilondza lesincincako nome lonalokusabulephelo, nome lohamba ngetimboko, nome lobulawa ngenkemba, nome loswele kudla.”
30 Ngako boJowabe na-Abishayi bakhokha sibhongo ngekubulala Abneri, ngobe abebulele umnakabo Asaheli eGibeyoni.
31 Davide wakhuluma kuJowabe nakubo bonkhe bantfu lababelapho, watsi: “Klebhulani timphahla tenu nembatse emasaka, nihambe nendlule embikwa-Abneri.” Davide, inkhosi, naye cobo lwakhe wahamba emvakweluhlaka lwemngcwabo wa-Abneri.
32 Abneri bamngcwaba eHebroni, inkhosi yakhala yadzatimula ethuneni la-Abneri; nebantfu bonkhe bakhala.
33 Inkhosi yahlabela sililo sa-Abneri, yatsi: “Abneri bekufanele yini afe njengemuntfu losilima?
34 Tinyawo takho betingakaboshwa, netandla takho tingakankinkwa. Uwele phansi wafa njengemuntfu lobulewe tigelekece.” Sive sonkhe saphindza samkhalela futsi.
35 Base bayefika kutawucela Davide kutsi sale asadla kusesemini, kodvwa Davide watsatsa sifungo, watsi: “Shangatsi Nkulunkulu angangishaya ngife, nangingadla lilanga lisengakashoni!”
36 Bonkhe bantfu bakubona loko bajabula; empeleni, konkhe lokwakwentiwa yinkhosi kwabajabulisa.
37 Ngako ngalelo langa bonkhe bantfu nesive sonkhe sema-Israyeli sakwati kutsi inkhosi yayingazange ifake sandla ekubulaweni kwa-Abneri, umsa waNeri.
38 Inkhosi yakhuluma kulamadvodza ayo, yatsi: “Utsi niyabona nje kutsi lamuhla kufe umbusi longumuntfu lomkhulu ka-Israyeli?
39 Lamuhla mine nome sengigcotjiwe, kodvwa angikacini, lamadvodzana aSeruya atidlova. Shangatsi Simakadze angamkhokhisa lomubi ngetento takhe letimbi!”
1 Watsi kube Ishboshethi, umsa waSawula, eve kutsi Abneri ufele eHebroni, wesaba kakhulu, sonkhe sive sema-Israyeli setfuka.
2 Indvodzana yaSawula yayinemadvodza lamabili labebaholi betidlova tekuhlasela. Lomunye bekunguBhana, lomunye kunguRekhabi; babengemadvodzana eRimoni, umBherothi, wesive sakaBhenjamini. IBherothi itsatfwa njengencenye yakaBhenjamini,
3 ngobe sive saseBherothi sabaleka saya kuyakwakha eGithayimu; seloku sahlala khona lapho njengebafokatana kuze kube ngulamuhla.
4 Jonathani, umsa waSawula, abenendvodzana leyayichwalile etinyaweni. Yayineminyaka lesihlanu, nakufika umbiko wekufa kwaSawula naJonathani eJezreyeli. Umzanyana wakhe wamtsatsa wammema, wabaleka naye; kodvwa watsi asabhudvuteliswa kubaleka, lendvodzana yawa, yabe seyiba sishosha. Libito layo bekunguMefiboshethi.
5 BoRekhabi naBhana, emadvodzana aRimoni, umBherothi, bahamba baya endlini ya-Ishboshethi, befika emini selishisa, naye asecambalele kwasemini.
6 Bangena ngekhatsi endlini, kwaba shangatsi bayawufuna kolo, bafike bamgwaza esiswini, wafa. BoRekhabi naBhana, umnakabo, besuka lapho babaleka.
7 Babengene endlini ngesikhatsi asalele embhedzeni, ekamelweni lakhe lekulala. Batsi kube bamgwaze bambulale, base bancuma inhloko yakhe. Bayitsatsa bahamba nayo bonkhe busuku ngendlela yase-Arabha.
8 Lenhloko ya-Ishboshethi bayimikisa kuDavide eHebroni, bafike kuye, batsi: “Nansi inhloko ya-Ishboshethi, umsa waSawula, sitsa sakho labetama kukubulala. Lamuhla Simakadze sewukhokhele inkhosi yami sibhongo kuSawula nentalelwane yakhe.”
9 Davide waphendvula boRekhabi naBhana, umnakabo, emadvodzana aRimoni, umBherothi, watsi: “Ngifunga kuphila kwaSimakadze longikhulule kuko konkhe kuhlupheka,
10 yatsi indvodza nayingitjela itsi: ‘Sawula ufile,’ yona icabanga kutsi ingiletsele tindzaba letimnandzi, ngayibamba ngayibulalela eSikilagi. Lowo kwaba ngumholo nemvuzo lengamnika wona ngaleto tindzaba takhe!
11 Kubi kakhulu kanganani-ke kulabantfu lababi kangaka lababulele umuntfu longenacala, endlini yakhe atilalele embhedzeni wakhe. Mine ngitamkhiphela sibhongo kini ngekunibulala, nginitsanyele emhlabeni!”
12 Ngako Davide wakhipha umlayeto wawucondzisa kulamadvodza akakhe, ababulala. Bajuba tandla tabo netinyawo tabo, tidvumbu tabo batilengisa ngasesitibeni saseHebroni. Kodvwa batsatsa inhloko ya-Ishboshethi bayingcwaba ethuneni la-Abneri, eHebroni.
1 Tonkhe tive tema-Israyeli teta kuDavide eHebroni, tafike tatsi: “Tsine siyinyama yakho nengati yakho.
2 Kadzeni, ngesikhatsi Sawula aseyinkhosi etikwetfu, nguwe lowawuhola sive sema-Israyeli nasiyekulwa etimphini. Simakadze wakhuluma kuwe, watsi: ‘Wena utawuba ngumelusi wesive sami ema-Israyeli, ube ngumbusi waso.’ ”
3 Batsi kube befike bonkhe baholi bema-Israyeli enkhosini Davide eHebroni, inkhosi yenta nabo sivumelwane eHebroni embikwaSimakadze; base bagcoba Davide kutsi abe yinkhosi yema-Israyeli.
4 Davide abeneminyaka lengema-30, nakabekwa kuba yinkhosi, wabusa iminyaka lengema-40.
5 EHebroni wabusa Juda iminyaka lesikhombisa netinyanga letisitfupha, kwatsi eJerusalema wabusa Israyeli naJuda iminyaka lengema-33.
6 Inkhosi nemadvodza ayo yahloma yashuca kuyawuhlasela emaJebhusi labehlala eJerusalema. EmaJebhusi akhuluma kuDavide, atsi: “Ungeke ungenise lapha; ngisho imphumphutse nesishosha imbala, singamane sikuchilite nje wena.” Bacabanga batsi: “Davide angeke angene lapha ngekhatsi.”
7 Noko, Davide wayitfumba inqaba yaseSiyoni, lidolobha laDavide.
8 Ngalelo langa Davide wakhuluma, watsi: “Lowo lotawuncoba emaJebhusi kufanele asebentise imihubhe yemanti, khona atewufikela ‘kulabatishosha nalabatimphuphutse,’ labatitsa taDavide.” Ngiko nje batsi: “ ‘Timphumphutse netishosha’ tingeke tingene endlini.”
9 Davide watsi kube ayitfumbe lenqaba, wabe sewuhlala kuyo, wayetsa libito watsi Lidolobha laDavide. Wakha lidolobha ndzawo tonkhe kuyitungeleta, kusukela kulendzawo leyayigcwalisiwe ngasemphumalanga neligcuma.
10 Wachubeka waba nemandla kakhulu, ngobe Simakadze Nkulunkulu longuSomandla abenaye.
11 Hiramu, inkhosi yaseThire, watfumela titfunywa kuDavide, kanye netingodvo temsedari, nebabati kanye nebacoti bematje, bafike bakha sigodlo saDavide.
12 Davide abati kutsi Simakadze sewumbeke kutsi abe yinkhosi yema-Israyeli, waphakamisa umbuso wakhe ngenca yesive sema-Israyeli.
13 Watsi kube esuke eHebroni, Davide watsatsa labanye bafati, waba netingani letinye nasaseJerusalema, watalelwa emadvodzana nemadvodzakati lamanyenti.
14 Lawa-ke ngemabito ebantfwana labatalelwa eJerusalema: boShamuwa, naShobabi, naNathani, naSolomoni,
15 naJibhari, na-Elishuwa, naNefegi, naJafiya,
16 na-Elishama, na-Eliyada, na-Elifeleti.
17 Atsi kube emaFilisti eve kutsi Davide sewugcotjwe kutsi abe yinkhosi yema-Israyeli, esusa lomkhulu umkhankhaso wekuyakumfuna, kodvwa Davide weva ngaloko, wabe sewuyehla uya enqabeni.
18 EmaFilisti abesafike asabalala naso sonkhe leso Sigodzi semaRefa.
19 Ngako Davide wabuta kuSimakadze, watsi: “Kufanele yini ngihambe kuyawuhlasela lamaFilisti? Utawanikela yini esandleni sami?” Simakadze wamphendvula watsi: “Yebo, hamba, ngobe nakanjani emaFilisti ngitawanikela esandleni sakho.”
20 Ngako Davide wahamba waya eBhali Pherasimu, wafike walwa nawo, wawehlula. Wakhuluma watsi: “Simakadze utibhidlite watehlula titsa tami embikwami, watikhukhula njengekukhukhula kwazamcolo.” Ngako leyo ndzawo yetsiwa libito kwatsiwa yiBhali Pherasimu.
21 EmaFilisti abaleka ashiya tithico tawo khona lapho, boDavide nemadvodza akakhe batitsatsela bahamba nato.
22 Aphindza futsi emaFilisti enyuka asabalala naso sonkhe leso Sigodzi semaRefa.
23 Ngako Davide wabuta kuSimakadze, lowaphendvula watsi: “Ungenyukeli lapho, kodvwa tungeleta ngemuva kwawo, bese uwahlasela ngembili kwetihlahla tebhalisamu.
24 Utawutsi ungeva tigi tekushuca kwawo lena enhla nato letihlahla tebhalisamu, usheshise ushakutele, ngobe loko kutawube kusho kutsi Simakadze sewuhambe embili kuyawubulala emabutfo emaFilisti.”
25 Ngako Davide wenta loko Simakadze labemyale ngako kutsi akwente, emaFilisti wawabulala yonkhe indlela kusukela eGibeyoni kuze kufike eGezeri.
1 Davide waphindze wabutsela ndzawonye emadvodza elikhetselo aka-Israyeli, labeti-30 000 asawonkhe.
2 Davide kanye nawo onkhe lamadvodza labewabutsile bashuca besuka eBhala lakaJuda kuyakwenyusa libhokisi lesivumelwane saSimakadze khona, lelalibitwa ngeLibito, libito laSimakadze longuSomandla, lobusela esihlalweni sebukhosi asemkhatsini wemakherubhi lasetikwelibhokisi lesivumelwane.
3 Bekhweta libhokisi lesivumelwane saNkulunkulu encoleni lensha, balikhipha endlini yaka-Abinadabi, leyayisetulu entsatjananeni. Bo-Uza na-Ahiyo, emadvodzana a-Abinadabi, babeshayela lencola lensha,
4 leyayetfwele libhokisi lesivumelwane saNkulunkulu; Ahiyo yena abelihambela embili.
5 Davide kanye nayo yonkhe indlu yaka-Israyeli babejabula bagidza ngawo onkhe emandla abo embikwaSimakadze bamdvumisa ngetingoma, nangemahabhu, nangemalire, nangemafahlawane, nangetikhelekehle, nangabokhencekhence.
6 Batsi nabefika ebaleni lekubhulela lakaNakhoni, letinkhabi takhubatela, ngako Uza welula sandla, wabamba libhokisi lesivumelwane saNkulunkulu.
7 Lulaka lwaSimakadze lwamvutsela Uza, ngenca yesento sakhe sekungahloniphi. Ngako Nkulunkulu wamshaya, wafa, wafela khona lapho eceleni kwelibhokisi lesivumelwane saNkulunkulu.
8 Davide wase uyatfukutsela, ngobe lulaka lwaSimakadze lwalwehlele etikwa-Uza. Kuze kube ngulamhla loku leyo ndzawo seyabitwa ngekutsi yiPheresi Uza.
9 Ngalelo langa Davide wesaba Simakadze, wadzimate watsi: “Lingeta kanjani-ke libhokisi lesivumelwane kami?”
10 Ngako wangabe asavuma kulitsatsa ahambe nalo aye eJerusalema, Lidolobha laDavide. Wabe sewuyaphambuka, walimikisa ekhaya ka-Obedi Edomu, waseGathi.
11 Libhokisi lesivumelwane saSimakadze lahlala ekhaya ka-Obedi Edomu, waseGathi, tinyanga letintsatfu; Simakadze wambusisa Obedi Edomu kanye nayo yonkhe indlu yakhe.
12 Inkhosi Davide bayitjela batsi: “Simakadze sewuyibusisile indlu yaka-Obedi Edomu, kanye nako konkhe kwakakhe ngenca yelibhokisi lesivumelwane saSimakadze.” Ngako Davide wase uyehla uyawulandza libhokisi lesivumelwane saNkulunkulu ekhaya ka-Obedi Edomu, weta nalo, waliletsa eJerusalema, Lidolobha laDavide, ahamba ajabula.
13 Kwatsi laba lababetfwele lelibhokisi lesivumelwane nase batsetse tinyatselo letisitfupha, wase unikela ngemhlatjelo wenkunzi nangelitfokati lelikhuluphele.
14 Davide abembetse sidziya sebaphristi lesasentiwe ngelineni, wagidza embikwaSimakadze ngawo onkhe emandla akhe ajabulile,
15 ngesikhatsi yena kanye nayo yonkhe indlu yema-Israyeli beta nelibhokisi lesivumelwane saSimakadze badvumisa ngekuhlabela nangekushaya emacilongo.
16 Latsi libhokisi lesivumelwane saSimakadze nalingena eDolobheni laDavide, Mikhali, indvodzakati yaSawula, wabukela, avele ngelifasitelo. Watsi nakabona inkhosi Davide igiya igcabashula embikwaSimakadze, wayedzelela enhlitiyweni yakhe.
17 Libhokisi laSimakadze baliletsa balibeka endzaweni yalo ekhatsi ethendeni Davide labelakhele lona, Davide wenta umhlatjelo wekushiswa kanye neminikelo yebudlelwane embikwaSimakadze.
18 Watsi nase acedzile kwenta iminikelo yekushiswa neminikelo yebudlelwane, wase ubusisa sive egameni laSimakadze longuSomandla.
19 Wase uniketa wonkhe umuntfu labekhona kuleso sicuku umkhama wesinkhwa, nelicebelengwane lemasundvu kanye nelemagelebisi lomisiwe, onkhe ema-Israyeli, labadvuna nalabasikati. Bonkhe bantfu bacitseka babuyela emakhaya abo.
20 Watsi Davide nasabuyele ekhaya lakhe kuyawubusisa indlu yakakhe, wahlangatjetwa nguMikhali, indvodzakati yaSawula, wafike watsi: “Inkhosi yema-Israyeli itentele ligama lelikhulu lamuhla, itivete njengalesikhulu silima emehlweni aletidzandzane tetindvuna tayo!”
21 Davide wamphendvula watsi: “Bengigcabashula embikwaSimakadze lona lowakhetsa mine kuneyihlo, nakubo bonkhe bantfu basendlini kakhe, mzukwane angigcoba kutsi ngibe ngumholi etikwesive saSimakadze, ema-Israyeli. Ngisetawugiya embikwaSimakadze.
22 Ngisetakwehla kakhulu kunaloku, futsi ngitakwedzeleleka kakhulu emehlweni ami. Kodvwa-ke kuletigcili letitintfombi lokhuluma ngato ngitawuhlonipheka.”
23 Mikhali, indvodzakati yaSawula, akazange abe namntfwana, kwaze kwaba lilanga lakhe lekufa.
1 Davide inkhosi watsi nase ahleti kahle, atintile esigodlweni sakhe, Simakadze asamphumutile nekumphumuta etitseni takhe tonkhe letatakhelene naye,
2 wase ukhuluma kuNathani, umphrofethi, watsi: “Buka la, mine ngihleti kahle esigodlweni lesakhiwe ngemisedari, kodvwa libhokisi lesivumelwane saNkulunkulu lihleti ethendeni.”
3 Nathani wayiphendvula inkhosi, watsi: “Loko lonako engcondvweni yakho, chubeka ukwente, ngobe Simakadze unawe.”
4 Ngalobo busuku kwefika livi laSimakadze kuNathani, latsi:
5 “Hamba utjele inceku yami Davide, utsi: ‘Naku lokushiwo nguSimakadze, utsi: Nguwe yini lofanele kungakhela indlu yekuhlala?
6 Mine angizange sengihlale endlini kusukela ngelilanga lengakhipha ngalo ema-Israyeli eveni laseGibhithe kuze kube ngulamuhla. Bengisolo ngihamba tindzawo ngetindzawo, nelithende lekuhlangana kunguyonandlu yami lengihlala kuyo.
7 Yonkhe indzawo lapho bengihamba khona nema-Israyeli, ngase ngasho yini khona kumunye webaholi babo, lengangibatfuma kutsi beluse sive sami ema-Israyeli, ngatsi: “Awukangakheli ngani indlu yekuhlala yemisedari?” ’
8 “Manje-ke tjela inceku yami Davide, utsi: ‘Naku lokushiwo nguSimakadze longuSomandla, utsi: “Ngakutsatsa emadlelweni, ekulandzeleni imihlambi, kutsi utewuba ngumholi wesive sami, ema-Israyeli.
9 Benginawe kuyo yonkhe indzawo lapho bewuhamba khona, ngibhubhise tonkhe titsa takho embikwakho. Manje ngitakwenta libito lakho libe likhulu njengemabito ebaholi labakhulu emhlabeni.
10 Sive sami, ema-Israyeli, ngitasentela indzawo lenhle, ngisihlanyele khona kuze sibe nelikhaya laso, singaphindzi sikhatsateke. Bantfu lababi bangeke baphindze basihluphe sive njengobe bebenta ekucaleni,
11 njengobe benta seloku ngacala kubeka baholi etikwesive ami, ema-Israyeli. Ngitakupha nekuphumula kuto tonkhe titsa takho. “ ‘ “Simakadze ukhipha livi kuwe lekutsi Simakadze yena matfupha utakwakhela wena indlu.
12 Emalanga akho nase aphelile, sewulele kuboyihlomkhulu, ngiyawuvusa umliba wakho kutsi uhlale esihlalweni sakho sebukhosi, loyo loyawuphuma elukhalweni lwakho, ngiyakuwumisa umbuso wakhe.
13 Nguye-ke longuyena ayawungakhela indlu, ayakhele Libito lami, ngiyakumisa sihlalo sebukhosi bembuso wakhe phakadze naphakadze.
14 Mine ngiyawuba nguyise wakhe, yena abe yindvodzana yami. Nakenta lokubi, ngiyakumjezisa ngeluswati lwemadvodza, nangemivimba leyentiwa boyise kubantfwana.
15 Kodvwa lutsandvo lwami alusoze lwasuswa kuye, njengobe ngalususa kuSawula, lengamsusa embikwakho.
16 Indlu yakho nembuso wakho kuyakuma embikwami kuze kube phakadze. Sihlalo sakho sebukhosi siyakuhlala sisimile phakadze naphakadze.” ’ ”
17 Nathani wawabika kuDavide onkhe lamavi aso sonkhe leso sembulo.
18 Inkhosi Davide yase iyahamba yayawungena ethendeni lebukhona baSimakadze, yafike yahlala phansi, yathandaza yatsi: “Bengingubani mine, Nkhosi Simakadze? Yona indlu yeketfu beyiyini, kutsi ungangihola kuze kube ngumanje?
19 Kwaba shangatsi konkhe loku bekungakeneli kuwe. Awu! Nkhosi, Simakadze! Manje sewukhulume ngisho nangelikusasa lendlu yenceku yakho. Kungabe kantsi lena nguyona ndlela lophatsa ngayo bantfu bakho yini, Nkhosi, Simakadze?
20 Yini lenye lengashiwo nguDavide kuwe, ngobe uyayati inceku yakho, awu, Nkhosi Simakadze?
21 Ngenca yelivi lakho nangekwentsandvo yakho, wente letintfo letinkhulu kangaka, wase utatisa inceku yakho.
22 “Maye, wena umkhulu! Awu! Nkhosi, Simakadze! Kute lonjengawe, futsi kute Nkulunkulu ngaphandle kwakho, njengobe tsine sativela ngetindlebe tetfu.
23 Kona ngubani nje lonjengesive sakho, ema-Israyeli, sive lekukuphela kwaso emhlabeni Nkulunkulu lowaphuma wayakusikhulula kutsi sibe sive sakhe, atakhele libito lelikhulu, watakwenta timangaliso letinkhulu naletishacisako ngekudvungulula tive ngetive kanye nabonkulunkulu bato embikwesive sakho lowasikhulula eGibhithe?
24 Umise sive sakho, ema-Israyeli, sibe sive lesingusona sisakho phakadze naphakadze, wena-ke Simakadze, sewaba nguNkulunkulu waso.
25 “Manje-ke, Simakadze Nkulunkulu, sale usigcina setsembiso sakho losentile macondzana nenceku yakho kanye nendlu yayo. Yenta njengobe wetsembisile,
26 kuze Libito lakho libe likhulu phakadze naphakadze. Ngaloko-ke bantfu bayakutsi: ‘Simakadze longuSomandla, unguNkulunkulu wema-Israyeli!’ Indlu yenceku yakho Davide iyakuma itinte embikwakho.
27 “Awu, Simakadze longuSomandla, Nkulunkulu wema-Israyeli, ukwembulile loku encekwini yakho, watsi: ‘Ngiyakwakhela indlu.’ Ngako inceku yakho ikhutsatekile kutsi inikele ngalomkhuleko kuwe.
28 Awu, Nkhosi, Simakadze! Wena unguNkulunkulu! Emavi akho etsembekile, manje futsi sewunike inceku yakho lesetsembiso lesihle.
29 Manje-ke, shangatsi kungakujabulisa kubusisa indlu yenceku yakho, kuze ichubeke njalo embikwakho, ngobe wena, Nkhosi Simakadze, sewukukhulumile. Ngesibusiso sakho indlu yenceku yakho iyawubusiseka phakadze naphakadze.”
1 Kwatsi emvakwaloko, Davide wahlasela emaFilisti, wawehlula, wawemuka emandla ekutibusa wona eveni, watsatsa neMethegi Ama, wayikhipha ekubusweni ngemaFilisti.
2 Davide wachubeka wahlasela nemaMowabi, wawehlula. Abebalalisa phansi emhlabatsini, bese ubulala babili njalo kulabatsatfu baletitfunjwa. Ngako emaMowabi ase aba ngaphansi kwakhe, aletsa imitselo yawo kuDavide.
3 Ngetulu kwaloko Davide wahlasela naHadadezeri, umsa waRehobi, inkhosi yaseSobha, ngesikhatsi Hadadezeri asayawutsatsa kubusa kwakhe ngasemfuleni iYufrathe.
4 Davide watfumba inkhulungwane yetincola takhe temphi, nebashayeli betincola temphi labati-7 000, nemasotja lahamba ngetinyawo lati-20 000. Onkhe emahhashi wawageca imisipha, washiya emahhashi etincola letilikhulu.
5 Atsi ayeta emaSiriya aseDamaseko, atsi atekwelekelela Hadadezeri, inkhosi yaseSobha, Davide wabulala aba ti-22 000 kuwo.
6 Davide wase umisa tinkambu temabutfo eSiriya laseDamaseko. EmaSiriya ase aba bantfu bakhe atsela kuye Davide. Simakadze wapha Davide kuncoba nome ngukuphi lapho ahlasela khona.
7 Davide watsatsa lamahawu egolide labengewetindvuna taHadadezeri, wahamba nawo, wawayisa eJerusalema.
8 Davide watitsatsela incumbi yelitfusi edolobheni laseThebha, nelaseBherothayi, emadolobha labebuswa nguHadadezeri.
9 Kwatsi kube Thoyi, inkhosi yaseHamathi, eve kutsi Davide ubhubhise yonkhe imphi yakaHadadezeri,
10 Thoyi wase utfumela indvodzana yakhe Joramu kuDavide, inkhosi, kutsi iyekumbingelela iphindze imhalalisele ngekuncoba kwakhe emphini yabo naHadadezeri. Hadadezeri abeke walwa naThoyi ngaphambili. Joramu waphatsela Davide tintfo tesiliva, netegolide, netelitfusi.
11 Inkhosi Davide letintfo yatinikela kuSimakadze, njengobe beyentile nangaleti tesiliva, nangetegolide letatiphuma kuto tonkhe tive beyitincobile, yatitfumba:
12 ema-Edomu, nemaMowabi, nema-Amoni, nemaFilisti, nema-Amaleki. Davide wanikela nangemphango labeyitfumbe kuHadadezeri, umsa waRehobi, inkhosi yaseSobha.
13 Davide wadvuma kakhulu, nasabuya kuyawubhubhisa ema-Edomu lati-18 000 eSigodzini Seluswayi.
14 Wase umisa tinkambu temasotja kulo lonkhe laka-Edomu. Onkhe ema-Edomu ase aba ngaphansi kwaDavide. Simakadze wapha Davide kuncoba nome ngukuphi lapho ahlasela khona.
15 Davide wawabusa onkhe ema-Israyeli, enta loko lokulungile kubo bonkhe bantfu bakhe.
16 Jowabe, umsa waSeruya, abengumphatsi wemphi; Jehoshafati, umsa wa-Ahiludi, abengulobhalisako.
17 BoSadoki, umsa wa-Ahitubi, kanye na-Ahimeleki, umsa wa-Abiyatha, bona babebaphristi; Seraya yena abengumabhalane.
18 Bhenaya, umsa waJehoyada, abephetse emaKherethi nemaPhelethi, emadvodzana aDavide wona abeliqoqo.
1 Ngalelinye lilanga Davide wabuta watsi: “Sekwabate ngisho namunye yini loyinsali yendlu yakaSawula lengingamentela umusa ngenca yaJonathani?”
2 Kwakukhona sisebenti sasendlini yakaSawula lekwakutsiwa nguSiba, libito laso. Ngako bambita kutsi avele embikwaDavide, inkhosi. Davide wafike watsi kuye: “Nguwe yini Siba?” Yena waphendvula watsi: “Ngiyinceku yakho.”
3 Inkhosi yabuta yatsi: “Sekwabate ngisho namunye yini wendlu yakaSawula lengingamentela umusa waNkulunkulu?” Siba waphendvula inkhosi watsi: “Isekhona indvodzana yaJonathani; mane nje yachwala tinyawo totimbili.”
4 Inkhosi yabuta yatsi: “Iphi?” Siba watsi: “Isendlini kaMakhire, umsa wa-Amiyeli, eLo Dabari.”
5 Ngako inkhosi Davide, yatsi ayilandvwe endlini kaMakhire, umsa wa-Amiyeli, eLo Dabari.
6 Watsi Mefiboshethi, umsa waJonathani, lotalwa nguSawula, nefika kuDavide, wakhotsama, akhombisa kumhlonipha. Davide watsi: “Mefiboshethi!” Mefiboshethi watsi: “Ngiyinceku yakho.”
7 Davide watsi: “Ungesabi, ngobe ngempela ngitakwentela umusa ngenca yeyihlo Jonathani. Ngitalibuyisela kuwe lonkhe lelo live lelalilamkhulu wakho Sawula, wena-ke utabodla nami njalo nje etafuleni lami.”
8 Mefiboshethi wakhotsama, watsi: “Iyini inceku yakho, kutsi ungaze unakekele inja lefile njengami?”
9 Ngako inkhosi yase ibita Siba, sisebenti sakaSawula, yatsi kuye: “Senginike umntfwanemntfwanenkhosi yakho konkhe loko bekukwaSawula kanye nekwendlu yakhe.
10 Wena-ke kanye nemadvodzana akho netisebenti takho kufanele nilime lomhlaba wakhe niletse tivuno, kuze lomntfwanemntfwanenkhosi yakho angetiwulamba. Mefiboshethi-ke, umntfwanemntfwanenkhosi yakho, yena utabodla kanye nami etafuleni lami onkhe emalanga.” Siba abesanemadvodzana lali-15 kanye netisebenti letingema-20.
11 Siba wakhuluma enkhosini, watsi: “Inceku yakho itakwenta konkhe loko lokushiwo yinkhosi yami, inkhosi, kutsi inceku ikwente.” Ngako-ke Mefiboshethi abesadla etafuleni laDavide kanye naye njengalomunye wemadvodzana enkhosi Davide.
12 Mefiboshethi-ke abenendvodzana yakhe leyayiseyincane, libito layo kunguMikha; bonkhe bendlu yaSiba bebatisebenti taMefiboshethi.
13 Mefiboshethi-ke abesahlala eJerusalema, ngobe abesadla nenkhosi etafuleni layo njalo nje. Abechwale tinyawo totimbili.
1 Kwatsi emvakwaloko inkhosi yema-Amoni yakhotsama. Hanuni, umsa waNahashi, waba yinkhosi.
2 Davide wacabanga watsi: “Ngitakumentela bubele Hanuni, umsa waNahashi, njengobe neyise angentela bubele.” Ngako Davide watfumela titfunywa kutsi tiyewulilela Hanuni macondzana nekufa kweyise. Tatsi letitfunywa taDavide natifika eveni lema-Amoni,
3 baholi bema-Amoni bakhuluma kuHanuni, inkhosi yabo, batsi: “Ucabanga kutsi Davide uhlonipha uyihlo ngalokutfumela emadvodza akakhe lapha kuwe kutsi atekulilela? Utsi Davide akatfumeli lamadvodza kuwe kutsi atewuhlamahlama lelidolobha, alihlole, bese ayalibhubhisa?”
4 Ngako Hanuni wawabamba lamadvodza akaDavide, wawahhula, nguleyo naleyo incenye yesilevu sayo, wahhumbula netembatfo tawo macondzana netibunu tawo, wase uyawayekela, ahamba.
5 Kwatsi kube Davide atjelwe ngaloko, wakhipha tigijimi kutsi tiwahlangabete lamadvodza, ngobe abesahlaziseke kakhulu. Inkhosi yatsi: “Hlalani eJerikho, tize tihlume kahle tilevu tenu, bese niyabuya-ke.”
6 Ema-Amoni atsi kube abone kutsi asatente aba liphunga lelibi kuDavide, ase acasha emasotja emaSiriya lati-20 000, ashuca ngetinyawo esuka eBhethi Rehobu, naseSobha; nasenkhosini yaseMakha kwaphuma emadvodza layinkhulungwane, naseThobu kwaphuma emadvodza lati-12 000.
7 Watsi kube akuve loko Davide, watfumela Jowabe, wamkhipha nalo lonkhe libutfo lemphi yetingwazi.
8 Ema-Amoni ashuca aphumela ngephandle, atihlela ekungeneni kwelidolobha. Laba labanye, emaSiriya aseSobha newaseRehobu kanye nemadvodza aseThobu newaseMakha wona atihlela ngephandle esigangeni.
9 Jowabe wabona kutsi emabutfo etitsa atamhlasela ngembili nangemuva, wase ukhetsa bokadzebona betingwazi cobo lwato temabutfo ema-Israyeli, watimisa tabhekana nemaSiriya.
10 Kwatsi lawa lasele emabutfo wawabeka esandleni semnakabo, Abishayi, lowawahlela nawo abhekana nema-Amoni.
11 Jowabe watjela Abishayi watsi: “Nawubona kutsi emaSiriya ayangehlula, ubobe sewuyeta utangelekelela, nami nangibona kutsi ema-Amoni ayakwehlula, ngitakuta ngitekwelekelela.
12 Cina, ube nesibindzi! Asilwe ngesibindzi silwele sive sakitsi nemadolobha aNkulunkulu wetfu. Simakadze utakwenta loko lokuhle emehlweni akhe.”
13 Jowabe nelibutfo lakakhe bashuca bahlasela emaSiriya. EmaSiriya ehlulwa, abaleka.
14 Ema-Amoni nawo atsi kube abone kutsi emaSiriya ayabaleka, nawo esuka ngematubane abalekela Abishayi, angena edolobheni. Ngako Jowabe wabuya ekuhlaseleni ema-Amoni, wabuyela ekhaya eJerusalema.
15 EmaSiriya atsi kube abone kutsi ehlulwe ngema-Israyeli, ahlanganisa onkhe emabutfo awo ndzawonye.
16 Inkhosi Hadadezeri walandza nemaSiriya labengasemphumalanga kwemfula iYufrathe, beta nabo eHelamu, baholwa nguShobaki, indvuna yemphi yenkhosi Hadadezeri waseSobha.
17 Davide watsi kube akuve loko, naye wabutsa onkhe emabutfo ema-Israyeli, wewela umfula iJordane wabanga eHelamu. EmaSiriya nawo aklamela abhekana naye. Imphi yabambana etulu.
18 Kodvwa emaSiriya abaleka embikwema-Israyeli, Davide wabulala bagibeli betincola temphi lababengema-700, nemasotja labeti-40 000, labeshuca ngetinyawo. Wachubeka wagadla nakuShobaki, indvuna yabo yemphi, wafa khona lapho.
19 Lawa lamanye emakhosi labengaphansi kwaHadadezeri, atsi kube abone kutsi asehlulwe ngema-Israyeli, ase enta sivumelwane sekuthula nema-Israyeli, ase aba ngaphansi kwawo. Ngako emaSiriya esaba kuphindze asite ema-Amoni.
1 Kwatsi entfwasahlobo lelandzelako, ngesikhatsi emakhosi laphuma ngaso timphi, Davide yena watfumela Jowabe, wamkhipha kanye netindvuna takhe kanye nayo yonkhe imphi yema-Israyeli. Bafike babhubhisa ema-Amoni, bavimbetela lidolobha laseRabha. Davide yena abesele eJerusalema.
2 Kwatsi ngalelinye lilanga kusihlwa Davide wavuka embhedzeni wakhe, wahambahamba etulu endlini yakhe yebukhosi. Watsi aselapho, wabona umfati ageza. Lomfati abemuhle, acedzile.
3 Davide wase utfumela umuntfu kuyawubuta kutsi ungubani. Lomuntfu wakhuluma watsi: “Phela lowo nguBhatisheba, indvodzakati ya-Eliyamu; ungumka-Uriya, umHethi.”
4 Davide wase uyatfumela kutsi akalandvwe. Wefika kuDavide, Davide wamtsatsa, walala naye. Bhatisheba abesandza kucedza kutihlambulula ekungcoleni kwakhe. Wase uyancandzeka ubuyela ekhaya.
5 Bhatisheba wase uyatibona kutsi sewutetfwele, wase utfumela ligama kuDavide, wamatisa watsi: “Sengitetfwele.”
6 Davide watfumela ligama kuJowabe atsi: “Ngitfumelele Uriya, umHethi.” Ngako Jowabe watfumela Uriya kuDavide.
7 Watsi nakefika Uriya, Davide wambuta Jowabe kutsi unjani, nekutsi emabutfo wona anjani, nekutsi imphi ichubeka kanjani.
8 Davide wase utsi ku-Uriya: “Yehla uye ekhaya kakho uyewuphumula sikhashana.” Ngako Uriya waphuma esigodlweni; inkhosi yatfumela sipho ekhaya ka-Uriya.
9 Kodvwa Uriya akazange aye ekhaya lakhe, walala emasangweni esigodlo kanye naletinye tinceku tenkhosi yakhe.
10 Watsi Davide nakeva kutsi Uriya akayi ekhaya kakhe, wambuta, watsi: “Awukayi ngani ekhaya lakho? Angitsi uyefika nje ubuya khashane?”
11 Uriya waphendvula Davide watsi: “Libhokisi lesivumelwane nemadvodza aka-Israyeli newakaJuda asemathendeni kanye nendvuna yami Jowabe netindvuna takhe bakambe ebaleni esigangeni. Pho, mine ngingaya kanjani ekhaya lami ngiyekudla, nginatse, ngilale kumkami? Ngifunga ngawe nangemphefumulo wakho, ngitsi: Ngingeke sengiyente mine intfo lenjalo!”
12 Davide wase ukhuluma utsi: “Ase uhlale natsi-ke lonkhe lelilanga lalamuhla, ngitakuncandzekisa kusasa.” Ngako Uriya wahlala eJerusalema lonkhe lelo langa, nangakusasa kwakhona.
13 Davide wammema kutsi atewudla kanye naye ekudleni kwakusihlwa, wamklinkla ngetjwala, entela kutsi adzakwe. Kodvwa nangalobo busuku Uriya akazange aye ekhaya lakhe, wesuka walala kanye naletinye tinceku tenkhosi yakhe esigodlweni.
14 Ekuseni ngakusasa Davide wabhala incwadzi, wabhalela Jowabe, wayiphatsisa Uriya.
15 Kulencwadzi abebhale watsi: “Beka Uriya embili lapho imphi ishisa ngakhona. Bese niyakhwesha kuye, nentele kutsi atewubulawa.”
16 Ngako kwatsi Jowabe nasavimbetele lidolobha, wabeka Uriya endzaweni lapho abati kahle khona kutsi titsa tinemandla.
17 Emabutfo etitsa atsi nasaphumela ngaphandle kwelidolobha, ahlasela Jowabe kanye nemabutfo akhe, letinye tihlabani letibalulekile taDavide tabulawa kanye na-Uriya, umHethi, tafa.
18 Jowabe wase utfumela kuDavide umbiko lophelele ngekuchubeka kwemphi.
19 Wayala lesitfunywa watsi: “Nasewucedzile kunika inkhosi lombiko ngalemphi,
20 inkhosi ingahle ikuvutsele ngelukaka, bese iyabuta itsi: ‘Nisondzeleleni madvutane kangako nelidolobha kuyakulwa nalo? Beningati yini kutsi bangahle banijijimete ngetikhali lapha etulu elubondzeni?
21 Ngubani lowabulala Abimeleki, umsa waJerubheshethi? Akabulawanga yini ngumfati lowehlisela imbakadza yelitje etikwakhe asetulu elubondzeni, kuze afele eThebesi? Benisondzelelani ngaphansi kwalolubondza?’ Nakakubuta konkhe loko, umtjele utsi: ‘Nenceku yakho Uriya, umHethi, ifile.’ ”
22 Lesitfunywa saphuma sahamba, satsi kube sifike kuDavide, samtjela konkhe lesasikutfunywe nguJowabe kutsi sikusho.
23 Lesitfunywa satsi kuDavide: “Lemphi isengeme futsi iphume yahlangabetana natsi ebaleni, kodvwa sibadvudvule sayawubabeka esangweni lelidolobha.
24 Banembi bakhona base bajijimeta tinceku takho basetulu elubondzeni, lamanye emadvodza enkhosi afa. Ngetulu kwaloko kufe nenceku yakho Uriya, umHethi.”
25 Davide watsi kulesitfunywa: “Ubofike utjele Jowabe utsi: ‘Kungakujabhisi loku; umkhonto udla umuntfu njengalomunye. Cinisa kakhulu uhlasele lelo dolobha ulibhubhise.’ Khuluma loko ukhutsate Jowabe.”
26 Umka-Uriya watsi kube eve kutsi indvodza yakhe seyifile, wayizilela.
27 Kwatsi nase siphelile sikhatsi sekumzilela, Davide watsi akalandvwe aletfwe kakhe. Wabe sewumenta umfati wakhe, wamtalela indvodzana. Kodvwa lentfo leyayentiwe nguDavide yaba yimbi emehlweni aSimakadze.
1 Simakadze watfumela Nathani kuDavide. Watsi kube efike kuye, wakhuluma watsi: “Edolobheni lelitsite kwakunemadvodza lamabili, lenye yayinjingile, kantsi lena lenye yona yayiphuyile.
2 Lena leyayinjingile yayinemihlambi lemikhulu yetimvu netinkhomo,
3 kodvwa lena lephuyile yayingenalutfo ngaphandle kwelizinyane linye lelisikati leyayilitsengile. Yalikhulisa, lakhula kanye nebantfwabayo. Yayilondla ngisho nangekudla kwayo, ilinatsise nemanti endzebeni yayo, yayize iligone lilale emikhonweni yayo. Lalifanana nendvodzakati yayo kuyo.
4 “Ngalelinye lilanga kwefika sihambi kulena lenjingile, kodvwa lenjinga yala kutsatsa lenye yetimvu tayo nome etinkhomeni tayo itewulungisa kudla kwalesihambi lesasiyifikele. Esikhundleni saloko yatsatsa lelizinyane lemvu lelisikati lelalilalendvodza lephuyile, yalungisela lesivakashi lesasifike lapha kayo.”
5 Davide watfukutsela wabila, atfukutselela lendvodza, waze wakhuluma kuNathani watsi: “Ngifunga kuphila kwaSimakadze, ngitsi, lomuntfu lowente intfo lenjena kufanele afe nekufa!
6 Kufanele akhokhe lelizinyane lalomuntfu seliphindvwe kane, ngobe wente intfo lembi, wayenta ngesibhuku.”
7 Nathani wakhuluma kuDavide, watsi: “Lowo muntfu nguwe, nkhosi! Naku-ke Simakadze Nkulunkulu wema-Israyeli lakushoko, utsi: ‘Ngakugcoba kutsi ube yinkhosi yema-Israyeli, ngakukhulula esandleni saSawula.
8 Ngakupha indlu yenkhosi yakho kanye nebafati benkhosi yakho kutsi babe bakho. Ngakupha indlu yaka-Israyeli neyakaJuda. Kube konkhe loku bekukuncane kakhulu kuwe, ngabe ngikwengetele ngakunika lokunye ngetulu.
9 Uledzeleleleni livi laSimakadze ngekwenta lokubi emehlweni akhe? Ubulele Uriya, umHethi, ngenkemba, wabe sewutsatsa umkakhe wamenta umkakho. Umbulele ngenkemba yema-Amoni.
10 Ngako-ke inkemba ingeke iphindze isuke endlini yakho, ngobe wedzelele mine ngekutsatsa umka-Uriya, umHethi, umente umkakho.’
11 “Naku-ke lokushiwo nguSimakadze, utsi: ‘Ngitakwehlisela inhlekelele letawuvela emndenini wakho. Ngitawutsatsa bafati bakho ubuka, ngibanike lowo lohlobene nawe, alale nabo emini kubuka wonkhe umuntfu.
12 Wena loku ukwentele emasitseleni, kodvwa mine loko ngitakwenta emini kala bha, sonkhe sive sema-Israyeli sibuka.’ ”
13 Davide wakhuluma kuNathani, watsi: “Ngonile kuSimakadze.” Nathani waphendvula watsi: “Simakadze sewusisusile sono sakho. Ungeke usafa.
14 Kodvwa njengobe sewente loku, wenta kutsi titsa taSimakadze tingamhloniphi, lendvodzana yakho letawutalwa itakufa.”
15 Nathani wahamba waya ekhaya kakhe. Simakadze washaya lomntfwana waDavide, labemtele kumka-Uriya, ngesifo, wagula.
16 Davide wancengela lomntfwanakhe kuNkulunkulu. Wazila, wangena endlini yakhe, walala phansi emhlabatsini busuku ngebusuku.
17 Baholi bendlu yakhe bema eceleni kwakhe bentela kumvusa, kodvwa wala, akazange adle kanye nabo.
18 Kwatsi ngelilanga lesikhombisa lomntfwanakhe wafa. Tinceku taDavide tesaba kumtjela kutsi umntfwana sewufile, ngobe taticabanga titsi: “Ngesikhatsi lomntfwana asaphila, sakhuluma kuDavide, akazange asilalele. Pho, singamtjela kanjani kutsi lomntfwana sewufile? Angahle ente intfo lebuhlungu.”
19 Davide wabona kutsi kukhona tinceku takhe letatikuhleba, wavele wabona kutsi lomntfwana sewufile. Wabuta watsi: “Lomntfwana sewufile yini?” Tavuma tatsi: “Yebo, sewufile.”
20 Davide wasukuma phansi. Watsi kube ageze, agcobise, antjintje netimphahla takhe, wahamba waya endlini yaSimakadze, wafike wamkhonta. Wabe sewuya endlini yakhe, wabacela kutsi bamnike kudla, wadla.
21 Tinceku takhe tambuta tatsi: “Ukwentelani loku? Ngesikhatsi lomntfwana asaphila, wazila, wakhala, kodvwa nyalo, njengobe lomntfwana asafile, usukume wadla!”
22 Watiphendvula watsi: “Ngesikhatsi lomntfwana asaphila, ngazila ngakhala. Ngangicabanga ngitsi: ‘Ngubani lowatiko? Mhlawumbe Simakadze angahle abe nemusa kimi aphilise lomntfwana.’
23 Kodvwa nyalo njengobe asafile, sengingatsi ngizileleni? Ngingaphindze ngimbuyise yini? Mine ngitakuya kuye, kodvwa yena angeke ancandzeke ete kimi.”
24 Davide wase udvudvuta umkakhe Bhatisheba, wahamba wayawulala naBhatisheba; watala indvodzana, labayetsa libito batsi nguSolomoni. Simakadze wamtsandza;
25 kwatsi ngobe Simakadze amtsandza, watfumela livi ngaNathani, umphrofethi, kutsi etsiwe libito kutsiwe nguJedidiya.
26 Ngaleso sikhatsi Jowabe abesachubeka kulwa neRabha yema-Amoni, abesatfumbe inqaba yebukhosi.
27 Jowabe wabe sewutfumela titfunywa kuDavide, watsi: “Sengilwe neRabha, ngatfumba lendzawo labakha kuyo emanti.
28 Hlanganisa lamanye emabutfo uvimbetele lelidolobha, bese uyalitfumba. Ngaphandle kwaloko mine ngitalitfumba lelidolobha, bese letsiwa libito ngami.”
29 Ngako Davide wahlanganisa onkhe emabutfo, wase uya eRabha; wafike wayihlasela, wayitfumba.
30 Watsatsa umchele lowawusenhloko yalenkhosi yema-Amoni, sisindvo segolide yawo lesasingemakhilogremu labengaba ngema-34, wawunematje laligugu; wafakwa enhloko yaDavide. Watsatsa imphango lenyenti kabi kulelo dolobha,
31 nalabantfu bebalapho wabakhipha wabafaka emsebentini lababewenta ngemasaha, nangemapiki ensimbi, nangemazembe, wabafolomisa netitini. Konkhe loku wakwenta kuwo onkhe emadolobha ema-Amoni. Davide nawo onkhe emabutfo akhe base bayancandzeka babuyela eJerusalema.
1 Ngekuhamba kwesikhatsi Amnoni, umsa waDavide, watsandza Thamari labemuhle kakhulu, angudzadzewabo-Absalomu, umsa waDavide.
2 Amnoni wakhatsateka emphefumulweni wakhe, waze wefika ezingeni lekugula ngenca yalodzadzewabo Thamari, ngobe abeyintfombi leyayingayati indvodza, noko kwabonakala kulukhuni kutsi kungaba khona langakwenta kuye.
3 Amnoni abenemngani wakhe lekwakunguJonadabi, umsa waShama, umnakaboDavide. Jonadabi bekuyindvodza leyayinebucili kakhulu.
4 Wabuta Amnoni watsi: “Kwentiwa yini wena, ungumntfwanenkhosi, ubukeke uwombile onkhe emalanga? Ase ungitjele, kwente njani?” Amnoni watsi kuye: “Ngitsandza dzadzewetfu Thamari, wakabomnaketfu Absalomu.”
5 Jonadabi watsi: “Hamba uyewulala embhedzeni, wente shangatsi uyagula. Utawutsi uyihlo naketa atekubona, umtjele utsi: ‘Ngicela kute dzadzewetfu Thamari, atengipha kudla. Lokudla akulungisele lapha kami khona ngitembuka, ngitawube sengidla loko latanginika kona ngesandla sakhe.’ ”
6 Ngako Amnoni watigulisa, wahamba wayawulala embhedzeni. Watsi Davide, inkhosi, nasefikile kutamvusela, Amnoni wakhuluma kuye watsi: “Ngicela kute dzadzewetfu Thamari, atengentela emacebelengwane lamabili ngikhona, ngimbuka, khona ngitekudla loko latanginika kona ngesandla sakhe.”
7 Davide watfumela kuThamari esigodlweni, watsi: “Hamba uye endlini yemnakenu Amnoni, uyekumlungisela kudla.”
8 Ngako Thamari wahamba waya endlini yemnakabo Amnoni, labelele phansi. Thamari watsatsa inhlama, wayibhuca, wabhaka emacebelengwane, Amnoni ambuka.
9 Watsatsa lipani wamnika lamacebelengwane, kodvwa Amnoni wala kudla. Amnoni watsi: “Khipha bonkhe labantfu lapha endlini.” Ngako bonkhe bantfu baphuma.
10 Amnoni wakhuluma kuThamari watsi: “Letsa lokudla lapha ekamelweni lami lekulala, khona ngitekudlela esandleni sakho.” Thamari watsatsa lamacebelengwane labewalungisile wawaletsa ku-Amnoni, umnakabo, ekamelweni lakhe lekulala.
11 Kodvwa watsi Thamari nakatsatsa lokudla amletsela kutsi atekudla, Amnoni wambamba watsi: “Kota utewulala nami, dzadzewetfu.”
12 Thamari watsi: “Cha, mnaketfu, ungangiphoceleli. Lentfo lenjena akufanele yentiwe ka-Israyeli! Ungayenti intfo lembi kangaka.
13 Mine lelihlazo lelingaka ngiyakulisusa kanjani? Wena-ke utakwente njani? Utawufanana nalesinye setihlangananhloko lapha ka-Israyeli. Ngicela ukhulume enkhosini, ingeke yale kutsi ungishade ngibe ngumkakho.”
14 Kodvwa wala kumlalela; njengobe-ke Amnoni abenemandla kunaThamari, wavele wambamba wamlala ngenkhani.
15 Amnoni watondza Thamari ngenzondo lenkhulu. Empeleni wamtondza ngenzondo lenkhulu kwengca lolutsandvo labemtsandza ngalo. Amnoni wamkhakhabisa watsi: “Vuka uhambe la!”
16 Thamari watsi: “Cha! Kungicosha kwakho kubi kakhulu kunaloku losukwente lapha kimi.” Kodvwa Amnoni akazange amnake nekumnaka.
17 Wabita inceku yakhe wayitjela watsi: “Khipha lomuntfu lomsikati lapha elawini lami ukhiye sivalo.”
18 Inceku yamkhiphela ngephandle lona lomsikati, yakhiya sivalo emvakwakhe. Thamari abembetse ingubo leyayihlotjiswe kakhulu, ngobe loluhlobo lwengubo lwalwembatfwa bantfwabenkhosi labatintfombi lababengazange balale nemuntfu lomdvuna.
19 Thamari watitsela ngemlotsa enhloko waklebhula lengubo yakhe labeyembetse. Wetfwala imikhono enhloko, ahamba akhala kakhulu.
20 Absalomu, umnakabo, watsi: “Bewuna-Amnoni, umnakenu, yini? Bindza dzadzewetfu; ungumnakenu. Lentfo ungayifaki kakhulu enhlitiyweni.” Ngako Thamari wahlala endlini ya-Absalomu aselusizini lolukhulu.
21 Watsi kube Davide akuve konkhe loko, watfukutsela wagaya tiboti.
22 Absalomu akazange akhulume ngisho nalelilodvwa livi lelihle nome lelibi ku-Amnoni. Watondza Amnoni, ngobe abehlazise dzadzewabo longuThamari.
23 Emvakweminyaka lemibili, batsi bahhuli betimvu baka-Absalomu baseseBhali Hasori, edvute nemnyele waka-Efrayimu, Absalomu wamema onkhe emadvodzana enkhosi.
24 Absalomu wahamba waya enkhosini, wafike watsi: “Inceku yakho ihhula timvu tayo. Inkhosi kanye netinceku tayo ingete yahlanganyela natsi yini?”
25 Inkhosi yaphendvula yatsi: “Cha, msa wami, akukafaneli sihambe sonkhe, singaba ngumtfwalo kuwe.” Kwala nome Absalomu asamncenga, kodvwa wachubeka wala kuhamba naye, noko wambusisa.
26 Absalomu wamncenga watsi: “Nakungenjalo, ngicela mane kuhambe umnaketfu Amnoni.” Inkhosi yambuta yatsi: “Ufunelani kutsi ahambe nawe?”
27 Kodvwa Absalomu wachubeka wamncenga, waze wamvumela; Amnoni wahamba nalabanye bantfwabenkhosi.
28 Absalomu wakhuluma kuletinceku takhe, watsi: “Lalelani! Utakutsi Amnoni nasanatse waze wativa asamnandzi, ngitsi kini: ‘Jubani Amnoni afe,’ nibombulala. Ningesabi, ngobe leligunya nalamandla ninikwa ngimi. Cinani nibe nesibindzi.”
29 Ngako lamadvodza aka-Absalomu enta ku-Amnoni njengobe abetjelwe ngu-Absalomu. Bonkhe bantfwabenkhosi basukuma, bagibela iminyuzi yabo babaleka.
30 Batsi basesendleleni, umbiko wefika kuDavide utsi: “Absalomu sewubulele onkhe emadvodzana enkhosi, kute nome yinye lesele.”
31 Inkhosi yasukuma, yaklebhula tingubo tayo leyayitembetse, yalala phansi emhlabatsini; tonkhe tinceku tayo tatime eceleni kwayo, nato tingubo tato tatiklejuliwe.
32 Kodvwa Jonadabi, umsa waShama, umnakaboDavide, watsi: “Inkhosi yami ingabocabanga kutsi bonkhe bantfwabenkhosi babulewe; ngu-Amnoni kuphela lofile. Loko kwakuvele kusifiso sa-Absalomu labevele ahlose kusiphumelelisa, kusukela mhlazana Amnoni adlwengula dzadzewabo Thamari.
33 Inkhosi yami ayingatihluphi ngekunaka lombiko lotsi onkhe emadvodzana enkhosi afile. Ngu-Amnoni kuphela lofile.”
34 Ngaleso sikhatsi Absalomu abesabalekile. Lomunye mahlalesangweni watsi emile, wabona sicumbi sebantfu emgwacweni ngasenshonalanga, sehla eceleni kweligcuma. Wahamba wayakubikela inkhosi, wafike watsi: “Ngibona emadvodza lapha ngekubheka eHoronayimu, eceleni leligcuma.”
35 Jonadabi wakhuluma enkhosini Davide, watsi: “Nankho emadvodzana akho eta, sekuye njengobe bengishito kutsi ayeta.”
36 Watsi asandza kucedza kukhuluma, emadvodzana enkhosi angena, akhala kakhulu. Inkhosi kanye nato tonkhe tinceku tayo bahlala kabuhlungu.
37 Absalomu wagewuka waya kuThalmayi, umsa wa-Amihudi, inkhosi yaseGeshuri. Inkhosi Davide yalila onkhe emalanga, ililela Amnoni, indvodzana yayo.
38 Absalomu wabaleka wafike wahlala eGeshuri iminyaka lemitsatfu khona.
39 Umoya waDavide, inkhosi, wawuloku uncokombele kuya ku-Absalomu, ngobe abesadvudvutekile ngekufa kwa-Amnoni.
1 Jowabe, umsa waSeruya, abati kutsi inhlitiyo yenkhosi yayincokombele Absalomu.
2 Ngako Jowabe wabe sewutfumela umuntfu eThekhowa, kutsi alandze umfati lohlakaniphile khona. Jowabe wakhuluma kulomfati watsi: “Tentise kube shangatsi uzilile. Yembatsa inzilo, ungacali utisebentise tinongo temtimba. Ubotentisa kube shangatsi lomuntfu lofile sewumzilele sikhatsi lesidze.
3 Ubobe sewuyahamba uya enkhosini, ufike ukhulume kuyo nankha emavi lengitakunika wona.” Jowabe wavele wamfunta lawo mavi labefanele kuwakhuluma.
4 Lomfati waseThekhowa wahamba waya enkhosini, wafike wawa ngebuso embikwayo, ayikhotsama, watsi: “Awu, Nkhosi! Ngicela mane ungisite!”
5 Inkhosi yambuta yatsi: “Inkinga yakho yini?” Wayiphendvula watsi: “Mine ngingumfelokati, indvodza yami ifile.
6 Mine, ncekukati yakho, benginemadvodzana lamabili. Alwa odvwana esigangeni, kwabate umuntfu wekulamula. Lenye yashaya lena lenye, yayibulala.
7 Manje lonkhe lusendvo seluvukele incekukati yakho, lutsi: ‘Letsa lona lowabulala umnakabo, kuze sitekumbulala ngenca yekubulala lomnakabo, ngekwenta njalo sitawube sesibulala lendlalifa.’ Ngalendlela batawube sebacisha lelo lahle belisasele livutsa, loko kwente indvodza yami ibete libito, iphindze ibete situkulwane emhlabeni.”
8 Inkhosi yakhuluma kulomfati, yatsi: “Ncandzeka uye ekhaya, ngitawukhipha umtsetfo egameni lakho.”
9 Lomfati waseThekhowa waphendvula watsi: “Nkhosi yami, shangatsi licala lingabasetikwami nasetikwendlu yababe, kodvwa inkhosi netinceku tayo bangabi nacala.”
10 Inkhosi yamphendvula yatsi: “Nangabe kukhona lokhuluma lokutsite kuwe, ubomletsa lapha kimi, angeke aphindze akuhluphe futsi.”
11 Waphendvula watsi: “Nkhosi, ngicela kutsi uthandaze kuSimakadze Nkulunkulu wakho, kutsi lesihlobo sami lesifuna kukhokha sibhongo ngekubulala lendvodzana yami, singengeti bubi ngekubulala lena lenye indvodzana yami.” Inkhosi yatsi: “Ngifunga kuphila kwaSimakadze ngitsi, ngisho lunwele lunye enhloko yendvodzana yakho lungeke luwele emhlabatsini.”
12 Lomfati wakhuluma watsi: “Ngicela kutsi incekukati yakho seyikhulume livi libe linye enkhosini yami.” Inkhosi yatsi: “Khuluma.”
13 Lomfati watsi: “Pho, wena uyenteleni intfo lenjena esiveni saNkulunkulu? Nangabe inkhosi ikhuluma kanjena, ayitilahli ngelicala yini, njengobe naku inkhosi seloku ayikayibuyisi ekhaya lendvodzana leyabaleka?
14 Njengemanti lacitsekele phansi, angeke abutseke futsi, natsi kufanele sife. Kodvwa Nkulunkulu akabulali, esikhundleni saloko wenta tindlela letitsite, kuze kutsi umuntfu lodzingisiwe angahlali akhashane naye.
15 “Manje ngite lapha kutewukhuluma enkhosini yami, ngobe bantfu bangesabisile. Incekukati yakho ibese iyacabanga, itsi: ‘Loku ngitakukhuluma enkhosini, mhlawumbe ingahle yente loko lokucelwa yincekukati yayo.
16 Mhlawumbe inkhosi itawuvuma kukhulula incekukati yayo esandleni semuntfu lowetama kubhubhisa mine nendvodzana yami asilahlise lelifa Nkulunkulu lasipha lona.’
17 “Manje-ke incekukati yakho itsi: ‘Shangatsi emavi enkhosi yami, inkhosi, angangiletsela kuphumula, ngobe phela inkhosi yami ifanana nengilosi yaNkulunkulu ekwehlukaniseni lokuhle kulokubi. Shangatsi Simakadze Nkulunkulu wakho angaba nawe.’ ”
18 Inkhosi yaphendvula yatsi: “Ngitakubuta umbuzo, wena-ke ngitjele lonkhe liciniso.” Lomfati watsi: “Inkhosi yami ngicela kutsi ikhulume.”
19 Inkhosi yabuta yatsi: “Loku awukakwenti naJowabe yini?” Waphendvula watsi: “Ngifunga kuphila kwakho, nkhosi yami, kute longaphambukela ngesekudla nome ngesancele esuke kuloko lokushiwo yinkhosi yami. Yebo, yinceku yakho Jowabe, lengitfume kutsi ngente loku, nguye futsi lofake onkhe lamavi emlonyeni wencekukati yakho.
20 Jowabe, inceku yakho, loku ukwentele kugucula simo lesikhona kwamanje. Inkhosi yami inekuhlakanipha lokufanana nekwengilosi yaNkulunkulu, yati konkhe lokwentekako lapha eveni.”
21 Inkhosi yakhuluma kuJowabe, yatsi: “Yebo, loko ngitawukwenta. Hamba ulandze lomfana Absalomu.”
22 Jowabe wakhotsamisa buso bakhe wabubhekisa phansi emhlabatsini, ahlonipha inkhosi, ayibusisa. Jowabe watsi: “Lamuhla sengiyati kutsi ngizuze umusa emehlweni akho, nkhosi yami, ngobe inkhosi isemukele sicelo senceku yayo.”
23 Jowabe wesuka lapho waya eGeshuri, wabuya na-Absalomu wamletsa eJerusalema.
24 Kodvwa inkhosi yatsi: “Kufanele ahambe aye endlini kakhe, akukafaneli abonane nebuso bami.” Ngako Absalomu wavele waya endlini kakhe, wangete wabonana nebuso benkhosi.
25 Kulo lonkhe laka-Israyeli kute indvodza leyayidvume ngebuhle kwendlula Absalomu. Abemuhle kusuka etulu enhloko kuye phansi elunyaweni, ate ngisho nalesincane sici.
26 Njalo nje nakahhula tinwele takhe, labevame kutihhula kanye ngemnyaka, nase timsindza, abetikala, atikhandze kutsi sisindvo sato sasiba ngetulu kwemakhilogremu lamabili ngesikali lesisemtsetfweni.
27 Absalomu abenemadvodzana lamatsatfu nendvodzakati yinye. Lendvodzakati yakhe wayetsa libito watsi nguThamari; abeyintfombi lenhle kakhulu.
28 Absalomu wahlala eJerusalema iminyaka lemibili, seloku angakaze abonane nebuso benkhosi.
29 Absalomu wase utfumela kuJowabe kutsi ammikise enkhosini, kodvwa Jowabe wala kuta kuye. Ngako waphindze watfumela kuye kwesibili, kodvwa nakhona lapho waphindze wala kuta.
30 Absalomu wakhuluma etincekwini takhe, watsi: “Bukani la, insimi yaJowabe isedvute naleyami, uhlanyele ibhali kuyo. Hambani nifike niyilumeke ngemlilo.” Ngako letinceku takhe tavele tayilumeka ngemlilo.
31 Jowabe wesuka lapho waya ku-Absalomu, wafike wabuta watsi: “Letinceku takho tiyilumekeleni ngemlilo lensimi yami?”
32 Absalomu waphendvula watsi: “Buka la, ngitfumele livi kuwe ngatsi: ‘Kota lapha, khona ngitekutfumela enkhosini kutsi uyewubuta utsi: “Ngibuyiselweni lena eGeshuri? Ngabe kuncono kimi kube ngisatihlalele lapho!” ’ Manje ngifuna kubonana nenkhosi; nangabe nginelicala lelitsite, ayivele ingibulale.”
33 Ngako Jowabe wavele wahamba waya enkhosini, wafike wayitjela konkhe loko. Inkhosi yabe seyibita Absalomu; wafike wakhotsamisa buso bakhe phansi emhlabatsini embikwenkhosi. Inkhosi yanga Absalomu.
1 Emvakwaloko Absalomu watihlinzeka ngencola yemphi, nemahhashi kanye nemadvodza langema-50 kutsi ahambe embikwakhe.
2 Abevuka ekuseni eme eceleni kwemgwaco lowawucondze esangweni lelidolobha laseJerusalema. Kwakutsi njalo nje nakufika umuntfu nesikhalo sakhe, lasiletse enkhosini, khona itewukhipha sincumo, Absalomu ambute atsi: “Uphuma kuliphi lidolobha?” umuntfu aphendvule atsi: “Inceku yakho iphuma kulesinye setive tema-Israyeli.”
3 Absalomu abevele akhulume atsi: “Uyabona, lentfo lokhala ngayo iyevakala, futsi iliciniso, kodvwa kute lomele inkhosi lotakuva loko.”
4 Abese uchubeka utsi: “Kube kwakhetfwa mine kutsi ngibe ngumehluleli walelive! Ngabe kutsi wonkhe lota kimi nesikhalo lesitsite, bese ngenta konkhe lokusemandleni ami kutsi ngikulungise.”
5 Lokunye kwakutsi nome ngubani lota kutawukhotsama embikwakhe, Absalomu elule sandla sakhe, ambambe, bese uyamanga.
6 Absalomu watiphatsa kanjena kuwo onkhe ema-Israyeli labefika atewucela kusitwa yinkhosi; ngaleyo ndlela wateba tonkhe tinhlitiyo temadvodza aka-Israyeli.
7 Ekupheleni kweminyaka lemine Absalomu wakhuluma enkhosini, watsi: “Ngicela kutsi sengimane ngiye eHebroni kuyawufeza sifungo sami lengasenta kuSimakadze.
8 Ngesikhatsi inceku yakho iseseGeshuri kulaseSiriya ngenta sifungo ngatsi: ‘Nangabe Simakadze angibuyisele eJerusalema, Simakadze ngiyakumkhonta eHebroni!’ ”
9 Inkhosi yakhuluma kuye yatsi: “Hamba kahle.” Ngako wavele waya eHebroni.
10 Absalomu wase utfumela titfunywa latiphatsisa imfihlo kuto tonkhe tive taka-Israyeli. Letitfunywa tatimemetela titsi: “Naniva kukhala kwemacilongo, nibotsi ‘Absalomu yinkhosi eHebroni.’ ”
11 Emadvodza langema-200 labephuma eJerusalema abephekeletele Absalomu. Abemenywe njengetivakashi, avuma ahamba, angati lutfo ngaleyo ndzaba.
12 Kwatsi Absalomu asanikela ngemhlatjelo, waphindze watfumela kwalandvwa Ahithofeli, umGilo, edolobheni lakubo laseGilo; Ahithofeli abengulomunye webeluleki baDavide. Ngako loluzungu lwacina, sibalo sebantfu lababelandzela Absalomu sandza.
13 Sitfunywa sefika sabika kuDavide, satsi: “Tinhlitiyo tawo onkhe emadvodza aka-Israyeli setiku-Absalomu.”
14 Davide wakhuluma kuto tonkhe tindvuna takhe letatinaye eJerusalema, watsi: “Wotani! Asibalekeni, ngaphandle kwaloko kute nome munye lotawusindza ku-Absalomu. Asiphangise sibaleke, ngobe angahle asheshe asihlasele asibhubhise sonkhe nalelidolobha lonkhe ngelusiko lwenkemba.”
15 Letindvuna takhe, Davide, tamphendvula tatsi: “Tinceku takho setivele tikulungele kwenta loko lokukhetfwe yinkhosi yato.”
16 Inkhosi yaphuma yabaleka, ilandzelwa ngumndeni wayo wonkhe; kodvwa yashiya emaphovela ayo lalishumi kutsi asale anakekela sigodlo.
17 Ngako inkhosi yavele yaphuma yabaleka nesive sonkhe siyilandzela, base bema endzaweni letsite, bucamama.
18 Onkhe emadvodza ayo endlula eceleni kwayo kanye nawo onkhe emaKherethi nemaPhelethi, nawo onkhe emaGathi langema-600 labehamba nawo esuka eGathi, nawo futsi endlula embikwenkhosi.
19 Inkhosi yakhuluma ku-Ithayi, umGathi, yatsi: “Uhambelani natsi? Ncandzeka uyewuhlala nenkhosi yakho Absalomu, ungewetive lowatfunjwa eveni lakini.
20 Ufike itolo loku. Lamuhla sengitakwenta uzulazule natsi, kantsi angati nalapho ngiya khona. Ncandzeka uhambe nesive sakho. Shangatsi umusa nekwetsembeka kungaba nawe.”
21 Kodvwa Ithayi waphendvula inkhosi, watsi: “Nkhosi, ngifunga kuphila kwaSimakadze, nangenkhosi yami lephilako ngitsi, lapho inkhosi yami iya khona, ekuphileni nasekufeni, nenceku yakho itakuya khona.”
22 Davide, inkhosi, waphendvula Ithayi, watsi: “Kulungile, chubeka, uhambe.” Ngako Ithayi, umGathi, wachubeka wahamba nawo onkhe emadvodza akakhe kanye nemindeni labehamba nayo.
23 Kuyo yonkhe leyo ndzawo sive sakhala kakhulu sisendlula. Inkhosi nayo yewela Sigodzi seKhidroni, sonkhe sive sahamba sacondza ngasehlane.
24 Sadoki naye abelapho naye, akanye nawo onkhe emaLevi, betfwele libhokisi lesivumelwane saNkulunkulu. Balibeka phansi libhokisi lesivumelwane saNkulunkulu, Abiyatha wase unikela ngemihlatjelo, baze baphuma bonkhe bantfu edolobheni.
25 Inkhosi yakhuluma kuSadoki, yatsi: “Tsatsani lelibhokisi lesivumelwane nilibuyisele edolobheni. Nangitfole umusa emehlweni aSimakadze, utangibuyisa, angivumele ngiphindze ngilibone, kanye nendzawo lapho lihlala khona.
26 Kodvwa nangabe utsi: ‘Angijabuli ngawe,’ sengikulungele loko; akente kimi loko lakubona kumlungele.”
27 Inkhosi yaphindze yakhuluma kuSadoki, umphristi, yatsi: “Awusiye yini umboniswa? Ncandzeka ngekuthula wena na-Ahimasi, naJonathani, umsa wa-Abiyatha, nibuyele edolobheni. Wena na-Abiyatha tsatsani lamadvodzana enu omabili, nihambe nawo.
28 Mine ngitawufike ngime ematubukweni ehlane, ngize ngitfole livi leliphuma kini.”
29 Ngako boSadoki na-Abiyatha batsatsa lelibhokisi lesivumelwane saNkulunkulu balibuyisela emuva eJerusalema, bahlala khona lapho.
30 Kodvwa Davide yena wachubeka wenyuka iNtsaba Yemincumo, ahambe akhala; inhloko yakhe yayimbonyiwe, nasetinyaweni angakafaki lutfo. Bonkhe bantfu lababenaye lapho babembonye tinhloko tabo, nabo benyuka bakhala.
31 Davide abesatjeliwe kwatsiwa: “Ahithofeli usemkhatsini walabo labenta luzungu lwekutsatsa bukhosi kanye na-Absalomu.” Ngako Davide wathandaza watsi: “Awu, Simakadze, gucula kweluleka kwa-Ahithofeli kube nebulima.”
32 Watsi kube Davide efike esicongweni, lapho sive sasivamise kukhontela Nkulunkulu khona, Hushayi, um-Akhi, abefike khona lapho kutakumhlangabeta, ingubo yakhe idzatjuliwe nasenhloko yakhe atitsele ngelutfuli.
33 Davide wakhuluma kuye watsi: “Nawuhamba nami, utawuba ngumtfwalo kimi.
34 Kodvwa nawungancandzeka ubuyele edolobheni ufike ukhulume ku-Absalomu utsi: ‘Ngitawuba yinceku yakho, nkhosi; kadze ngiyinceku yeyihlo, kodvwa manje ngitawuba yinceku yakho,’ ngaleyo ndlela utangisita ekugwegwiseni teluleko ta-Ahithofeli.
35 Bangeke yini baphristi boSadoki na-Abiyatha babe nawe lapho? Batjele konkhe lokuvako esigodlweni senkhosi.
36 Emadvodzana abo lamabili, bo-Ahimasi, umsa waSadoki, naJonathani, umsa wa-Abiyatha, anabo khona lapho. Batfumele lapha kimi baletse umlayeto ngako konkhe lokuvile.”
37 Ngako Hushayi, umngani waDavide, wefika ngesikhatsi Absalomu angena nje edolobheni, eJerusalema.
1 Davide watsi asahambe libangana nje etulu esicongweni sentsatjana, wahlangatjetwa nguSiba, sisebenti saMefiboshethi. Siba abechuba timbongolo letimbili letatiboshelwe, tetfwele imikhama yetinkhwa lengema-200, nemacebelengwane lalikhulu emagelebisi lomisiwe, netikhehle temakhiwa letilikhulu, nesikhumbasikhwama sigcwele liwayini.
2 Inkhosi yabuta Siba yatsi: “Ukuletseleni konkhe loku?” Siba waphendvula watsi: “Letimbongolo tebemndeni wenkhosi yami kutsi bagibele, letinkhwa naletitselo talamadvodza kutsi adle, leliwayini lekunatsisa labo lasebadziniwe nalasebomile lapha ehlane.”
3 Inkhosi yabuta yatsi: “Uphi umntfwanemntfwanenkhosi yakho?” Siba watsi: “Uhleti lena eJerusalema, ngobe acabanga atsi: ‘Lamuhla indlu yaka-Israyeli itangibuyisela umbuso wamkhulu.’ ”
4 Inkhosi yakhuluma kuSiba, yatsi: “Konkhe loku lebekukwaMefiboshethi sekwakho nyalo.” Siba waphendvula watsi: “Ngikhotsama ngekutitfoba. Shangatsi ngingatfola umusa emehlweni akho, nkhosi yami, nkhosi.”
5 Kwatsi inkhosi Davide naseyisondzele eBhahurimu, lomunye wetihlobo taSawula, Shimeyi, umsa waGera, waphuma wamhlangabeta, weta ametfuka ngeticalekiso.
6 Wajikijela Davide kanye nato tonkhe tindvuna takhe ngematje, kwala nome Davide abesingatfwe ngabo bonkhe bantfu kanye netingwazi takhe.
7 Shimeyi wamcalekisa watsi: “Suka la! Hamba la, jabhane-ndzini! Lesigebengu lesi!
8 Watsatsa umbuso waSawula, manje Simakadze sewujezisa wena ngenca yekubulala bantfu labanyenti kangaka bendlu yaSawula! Simakadze sewutsetse umbuso wakho wawunika indvodzana yakho Absalomu, wena sewutiphuphisile mbulali-ndzini.”
9 Abishayi, umsa waSeruya, wakhuluma enkhosini, watsi: “Bayethe, nkhosi yami, nkhosi! Uyivumelelani lenja kutsi ikucalekise? Ngivumele ngiye lapha kuyo, ngifike ngijube inhloko yayo ngiyilahle lapha!”
10 Inkhosi yaphendvula yatsi: “Ningenelana ngani nami, nine madvodzana aSeruya? Nangabe acalekisa, ngobe kushito Simakadze kutsi akangicalekise, ngubani lonelilungelo lekumbuta atsi: ‘Ukwentelani loku?’ ”
11 Davide wakhuluma ku-Abishayi nakuto tonkhe tindvuna takhe, watsi: “Indvodzana yami lephuma elukhalweni lwami, ngiyo lefuna kungibulala. Kangakanani-ke lomBhenjamini! Myekeleni anjalo, akachubeke angicalekise, ngobe utjelwe nguSimakadze kutsi akakwente.
12 Mhlawumbe Simakadze uyawukubona kuhlupheka kwami, angivuze ngalokuhle kuletinhlamba lengititfola lamuhla nje.”
13 Ngako Davide nemabutfo akhe bachubeka nendlela yabo, wabe naShimeyi abaphekeletela ngeticalekiso, ahamba ngetulu egcumeni abajikijela ngematje, abatsela nangemhlabatsi.
14 Inkhosi kanye nabo bonkhe leyayihamba nabo base bayefika lapho babeya khona sebadzinwe bafile, inkhosi yefika lapho yaphumula.
15 Ngaleso sikhatsi bo-Absalomu kanye nebantfu bakakhe babetseleka eJerusalema, na-Ahithofeli abekanye nabo;
16 Hushayi, um-Akhi, umngani lomkhulu waDavide, wase uya ku-Absalomu, wafike watsi kuye: “Bayethe! Lunwele loludze! Phila uze ukhokhotele.”
17 Absalomu wabuta Hushayi watsi: “Ngulona lutsandvo lolukhombisa kumngani wakho kambe lolo? Awukahambi ngani naye lomnganakho?”
18 Hushayi waphendvula watsi: “Cha, lowo losakhetfwe nguSimakadze, nangulesive, nanguwo onkhe emadvodza aka-Israyeli, mine ngiyawuba wakhe, ngihlale naye.
19 Ngetulu kwaloko ngubani lomunye lengingamkhonta? Ngingete ngayikhonta yini indvodzana? Njengobe ngangikhonte uyihlo, nawe ngitakukhonta kanjalo.”
20 Absalomu wabuta ku-Ahithofeli, watsi: “Selulekeni. Sitakwenta njani?”
21 Ahithofeli waphendvula watsi: “Lala nalamaphovela eyihlo lawashiyela kutsi asale acize lesigodlo, khona atekwati onkhe ema-Israyeli kutsi sewutente sitsa seyihlo, nebalandzeli bakho batawukhutsateka ngaloko.”
22 Ngako kwase kumiselwa Absalomu lithende etulu eluphahleni lwesigodlo sakhe, wase ulala nalamaphovela eyise embikwawo onkhe ema-Israyeli abuka.
23 Ngaleso sikhatsi, nome ngabe ngusiphi seluleko lesasiletfwa ngu-Ahithofeli sasemukeleka kube shangatsi ngulona livi laNkulunkulu; bobabili boDavide na-Absalomu babevele basilalele.
1 Emvakwaloko Ahithofeli wakhuluma ku-Absalomu, watsi: “Angikhetse emabutfo lati-12 000, lamhla nje ebusuku, ngisukele Davide, ngimcoshe.
2 Ngitamkhandzanisa nyalo asedziniwe, futsi ajabhile; ngimetfuse, lonkhe lelibutfo lakhe litawubhedvuka, libaleke. Ngitawubulala lenkhosi kuphela,
3 bese ngibuya nabo bonkhe labantfu bakhe ngibaletse kuwe, njengamakoti abuyela endvodzeni yakhe. Kufa kwemuntfu munye lomfunako kutabe kusho kubuya kwabo bonkhe; bonkhe laba labanye ngeke bentiwe lutfo.”
4 Lelisu labonakala lilungile ku-Absalomu, nakubo bonkhe baholi baka-Israyeli.
5 Kodvwa Absalomu watsi: “Bitani naHushayi, um-Akhi, sitekuva kutsi yena utsini kuloku.”
6 Watsi kube efike Hushayi, Absalomu watsi: “Ahithofeli ubeka nasi seluleko. Kufanele sikwente yini loku lakushoko? Nangabe akukalungi, sinike seluleko sakho.”
7 Hushayi waphendvula watsi: “Leseluleko lesibekwe ngu-Ahithofeli asikalungi kwanyalo.
8 Uyamati uyihlo kanye nalamadvodza akakhe kutsi tingwazi, besabeka njengelibhele lesiganga nalemukwe emazinyane alo. Ngaphandle nje kwaloko, babe wakho ngunsukuwansuku, ngukadzebona, angeke alale emkhatsini walamabutfo akhe ebusuku.
9 Nyalo nje sewubhace emgedzeni lotsite nome kulenye indzawo. Nakungahle kube nguye logadla kucala kulamabutfo akho, wonkhe umuntfu loyivako leyo ndzaba angavele atsi: ‘Licobe lavungula emabutfweni lahamba na-Absalomu.’
10 Lapho-ke ngisho nengwazi lenenhlitiyo lenjengeyelibhubesi itawuncibilika ngenca yekwesaba, ngobe wonkhe um-Israyeli uyati kutsi babe wakho yingwazi yelucobo, nekutsi laba labanaye ngemadvodza sibili, anesibindzi.
11 “Ngako mine ngikweluleka ngitsi: Onkhe ema-Israyeli kusukela kaDani kuze kuyewuphuma eBherisheba, ngebunyenti bawo angangesihlabatsi saselwandle, akabutselwe lapha kuwe, wena cobo lwakho uwahole niye emphini.
12 Lapho-ke siyawumhlasela, nome ngabe ukuphi lapho angatfolakala khona, futsi siyawumtselekela njengematolo ehlela emhlabatsini. Kute loyawuphunyula asale aphila, yena kanye nalamadvodza lahamba nawo.
13 Nakadvudvulekela edolobheni lelitsite, wonkhe um-Israyeli uyawuta netindophi kulelo dolobha bese silidvonsela phansi esihosheni, kuze kungatfolwa ngisho nelucetu lwalo.”
14 Absalomu kanye nawo onkhe emadvodza aka-Israyeli batsi: “Leseluleko saHushayi, um-Akhi, sincono kunalesa sa-Ahithofeli.” Loku kwentiwa kutsi Simakadze abecondze kuswabisa leseluleko sa-Ahithofeli, kuze ehlisele bubi ku-Absalomu.
15 Hushayi watjela boSadoki na-Abiyatha, baphristi, watsi: “Ahithofeli abeseluleke Absalomu nemadvodza aka-Israyeli ngaloku nangaloku, kodvwa mine ngibeluleke kutsi abente kutsi nekutsi.
16 Manje-ke phutfumisani umbiko masinyane nitjele Davide, nitsi: ‘Ungacali ulale lapha enkambu ebusuku, lapho ehlane, yewelela ngesheya nome kanjani; ngaphandle kwaloko, inkhosi kanye nabo bonkhe bantfu bayo, batawubhujiswa lamuhla nje.’ ”
17 BoJonathani na-Ahimasi babehlala e-Eni Rogeli. Sisebenti lesasiyintfombatana sasifanele siyewubatjela, bona-ke bese bayawutjela inkhosi Davide, ngobe bebangeke baze bacale babonakale bangena edolobheni.
18 Ngalelinye lilanga babonwa ngulomunye umfana, wase utjela Absalomu. Ngako besuka bobabili babaleka bayawubhaca endlini yalomunye umuntfu eBhahurimu. Bekunemgodzi ebaleni lalomuti walomuntfu, ngako bangena kuwo babhaca.
19 Umfati walendvodza watsatsa kwekumbonya, wambonya ngako emnyango walomgodzi wase usakata tinhlavu etikwalokwekumbonya, kwabate lowatiko ngaloko.
20 Tindvuna taka-Absalomu tatsi natifika kulomfati walendvodza, tambuta tatsi: “Baphi bo-Ahimasi naJonathani?” Lomfati watiphendvula watsi: “Bewelele ngesheya kwalomfudlana.” Letindvuna tabafuna, kodvwa atizange tibatfole; tagcina tibuyele emuva eJerusalema.
21 Tatsi nase tihambile letindvuna, bo-Ahimasi naJonathani bavumbuka lapha emgodzini, bahamba bayawubika enkhosini Davide. Batjela Davide loko bekwelulekwe ngu-Ahithofeli ngaye batsi: “Phutfumani newelele ngesheya kwemfula masinyane. Ahithofeli abeluleke kutsi nekutsi ngawe.”
22 Ngako Davide kanye nemabutfo akhe bavele bacala bewelela ngesheya kwemfula iJordane; kwatsi kudzabuka kusa, babe sebewele bonkhe baphelela.
23 Ahithofeli watsi kube abone kutsi seluleko sakhe abakasilandzeli, wabophela imbongolo yakhe, waphuma, wabanga ekhaya kakhe lelalisedolobheni lakubo. Wacala walungisa kahle tonkhe tintfo tasemndenini wakakhe, wase uyatikhunga, wafa; wangcwatjwa edlizeni leyise.
24 Davide wahamba waze wefika edolobheni laseMahanayimu. Ngaleso sikhatsi Absalomu kanye nemphi yakhe bese bakhuphukele ngesheya kwemfula iJordane.
25 Absalomu abesabeke Amasa kutsi abe yindvuna yemabutfo akhe esikhundleni saJowabe. Amasa abengumsa walenye nje indvodza lekwakutsiwa nguJetheri libito layo, yayingum-Israyeli; unina wa-Amasa bekungu-Abigayili, indvodzakati yaNahashi, dzadzewaboSeruya, unina waJowabe.
26 Bo-Absalomu nalama-Israyeli akakhe bafike bemisa eveni lakaGileyadi.
27 Kwatsi Davide nakefika eMahanayimu, boShobi, umsa waNahashi waseRabha yema-Amoni, naMakhire, umsa wa-Amiyeli waseLo Dabari, naBhazilayi, umGileyadi waseRogelimu,
28 baletsa kwekulala, netitja, netintfo letibunjwe ngelibumba. Baze baletsa ngisho kolo kanye nebhali, fulaha kanye nembasha, emabhontjisi kanye nemalentili,
29 neluju lwetinyosi, nemasi, netimvu, nashizi lophuma elubisini lwetinkhomo, bakuletsela Davide kanye nebantfu bakakhe kutsi batekudla. Ngobe batsi: “Labantfu sebafile yindlala nakudzinwa, nekoma kwakulelihlane.”
1 Davide wabutsela onkhe lamadvodza akakhe ndzawonye, wase uwehlukanisa tigaba ngetigaba, lamanye aba tinkhulungwane, lamanye aba ngemakhulu, wase uwabekela tindvuna tawo njengekwetigaba tawo.
2 Wase uyawakhipha ngeticheme letintsatfu, sinye saphuma naJowabe, lesinye saphuma na-Abishayi, umnakaboJowabe, sekugcina wasikhipha na-Ithayi, umGathi. Inkhosi Davide yakhuluma kulamabutfo, yatsi: “Nami cobo lwami ngitawushuca kanye nani.”
3 Kodvwa lamabutfo atsi: “Wena akukafaneli kutsi uphume kanye natsi; nasekufanele sibaleke, tsine bangeke babe nandzaba natsi. Ngisho nome incenye yetfu ingafa, bangeke babe nandzaba naloko; kodvwa wena ungalinganiswa nemadvodza lati-10 000 akitsi. Kungaba ncono kutsi wena usale lapha edolobheni, usitfumelele lusito.”
4 Inkhosi yaphendvula yatsi: “Ngitakwenta loko lokubonakala kukuhle kini.” Inkhosi yase ima ngasesangweni ngesikhatsi emadvodza akayo aphuma ngetigaba temakhulu netetinkhulungwane.
5 Inkhosi yayala boJowabe, na-Abishayi, na-Ithayi, yatsi: “Nibomane ningisite tsine ningamenti lutfo lomfana Absalomu, ngenca yami.” Onkhe lamabutfo ayiva inkhosi nayiyala tonkhe tindvuna tayo.
6 Imphi yaphuma yaya esigangeni kuyakulwa nema-Israyeli aka-Absalomu. Leyomphi yayilwelwa ehlatsini laka-Efrayimu.
7 Lapho-ke emabutfo ema-Israyeli ehlulwa ngemadvodza akaDavide. Ngalelo langa lacoba lavungula kuma-Israyeli, kwafa emadvodza lati-20 000.
8 Imphi yabhedvuka nalo lonkhe live, ngalelo langa bantfu labanyenti ngulabafela ehlatsini kunalaba labafa ngenkemba.
9 Masinyane nje Absalomu watsi ngcwamangca ahlangana nemadvodza akaDavide. Absalomu abegibele umnyuzi wakhe. Lomnyuzi watsi uphuma ngaphansi kwemagala lahlangene esihlahla sem-okhi, inhloko ya-Absalomu yahhukeka emagaleni alesihlahla sem-okhi, wasala yedvwa alenga ngenhloko kulesihlahla, umnyuzi labewugibele wona washaya wacitsa.
10 Lomunye walamadvodza akaDavide watsi nakakubona loku, watjela Jowabe watsi: “Ngisandza kubona Absalomu alenga lapha kulesa sihlahla sem-okhi.”
11 Jowabe wakhuluma kulendvodza yayimtjela loko, watsi: “Ini? Umbonile? Awukamgadli ngani wamlahla phansi khona lapho? Mine cobo lwami bengitakunika tinhlavu tesiliva letilishumi kanye nembhenso.”
12 Kodvwa lendvodza yamphendvula yatsi: “Ngisho nome bewunganginika inkhulungwane yetinhlavu tesiliva, bengingete sengicale ngiphakamise sandla sami etikwendvodzana yenkhosi. Sonkhe besiva ngesikhatsi inkhosi ininika umyalo nine nabo-Abishayi na-Ithayi, itsi: ‘Nibomane ningisite tsine, ningacali nimbeke sandla lomfana Absalomu, ngenca yami.’
13 Kodvwa kube ngiwephulile lomyalo wenkhosi, ngabulala Absalomu, inkhosi beyitawuva ngaloko, ngobe iva ngako konkhe, nawe bewungasenakungivikela.”
14 Jowabe wayiphendvula watsi: “Angisenawucitsa sikhatsi nawe kanje.” Watsatsa tikhali letintsatfu, watiphisela esifubeni sa-Absalomu asengakafi, alenga esihlahleni sem-okhi.
15 Kwesuka lishumi lemadvodza akaJowabe latselekela Absalomu, lamcedzela.
16 Jowabe washaya impalampala; emabutfo onkhe ayekela kucosha ema-Israyeli, ngobe abesayekeliswe nguJowabe.
17 Atsatsa sidvumbu sa-Absalomu asijika esihholweni ehlatsini, ambonya lesihholo ngendvundvuma yematje. Ngaleso sikhatsi onkhe ema-Israyeli labehamba na-Absalomu abaleka abuyela emakhaya awo.
18 Ngesikhatsi sakhe Absalomu bekatakhele litje lesikhumbuto, waligcumeka eSihosheni Senkhosi, ngobe abecabange watsi: “Anginandvodzana letawuchubeka ivuse libito lami,” waletsa ngaye lelitje lesikhumbuto, nalamuhla loku solomane kutsiwa Litje la-Absalomu Lesikhumbuto.
19 Ahimasi, umsa waSadoki, wase utsi kuJowabe: “Angigijimise umbiko kuDavide, inkhosi, kutsi Simakadze sewumkhululile esandleni setitsa takhe.”
20 Jowabe wamtjela watsi: “Akusiwe lofanele uhambise lombiko lamuhla nje. Ungawuhambisa umbiko ngaletinye tikhatsi, kodvwa akukafaneli ukwente loko lamuhla, ngobe kufe umntfwanenkhosi.”
21 Jowabe wase ukhuluma nesigcili sakhe lesasingumKushe, watsi: “Hamba utjele inkhosi loko lokubonile.” Lesigcili sakhotsamela Jowabe, sase siyesuka ngematubane.
22 Ahimasi, umsa waSadoki, waphindza wakhuluma kuJowabe watsi: “Nome kungentekani, ngivumele ngigijime ngilandzele lomKushe, nami ngiphutfumise umbiko.” Kodvwa Jowabe waphendvula watsi: “Ndvodzana yami; ufunelani lokuhamba? Kute umvuzo lotawutfola ngaloku.”
23 Watsi: “Nome kungavelani, ngifuna kugijima nami.” Ngako Jowabe watsi: “Gijima-ke.” Ahimasi wagijima wajuba ngendlela yasematsafeni, wamendlula lomKushe.
24 Ngaleso sikhatsi Davide asehleti emkhatsini wemnyango longekhatsi edolobheni nelisango lelingaphandle, gadzi wakhuphukela etulu eluphahleni lwelisango lelingaselubondzeni. Watsi uphakamisa emehlo, wabona umuntfu eta agijima, ayedvwana.
25 Logadzi wabikela inkhosi ngaloko. Inkhosi yatsi: “Nangabe uta yedvwana, kufanele kutsi uphetse tindzaba letimnandzi.” Indvodza yaya ngekuya isondzela.
26 Logadzi waphindze wabona lenye ichamukile nayo ngematubane, wamemeta lona losesangweni ngaphansi, watsi: “Bukela nansiya lenye indvodza nayo igijima yodvwana!” Inkhosi yatsi: “Nayo kufanele kube ita netindzaba letimnandzi.”
27 Logadzi watsi: “Kushangatsi kimi lona logijima embili, ngu-Ahimasi, umsa waSadoki.” Inkhosi yatsi: “Yindvodza-ke leyo; uta netindzaba letimnandzi.”
28 Ahimasi wakhulekela enkhosini, watsi: “Konkhe kukahle.” Wakhotsama phansi embikwenkhosi buso bakhe bubheke phansi, watsi: “Ludvumo alube kuSimakadze Nkulunkulu wakho! Ubanikele kuwe bantfu labaphakamisa tandla tabo etikwakho, nkhosi yami, nkhosi.”
29 Inkhosi yabuta yatsi: “Unjani umfana Absalomu?” Ahimasi waphendvula watsi: “Nkhosi, ngesikhatsi inceku yakho Jowabe ingitfuma, ngibone kudzidzitela lokukhulu, kodvwa angati kutsi bekudzidziteliswani.”
30 Inkhosi yatsi: “Asewume lapha eceleni.” Ngako wakhwesha, wema eceleni.
31 Kwase kungena lomKushe, watsi: “Nkhosi yami, nkhosi, vani nati tindzaba letimnandzi! Simakadze ukukhululile lamuhla, kubo bonkhe labakuvukelako.”
32 Inkhosi yabuta kulomKushe, yatsi: “Unjani umfana Absalomu?” LomKushe waphendvula watsi: “Shangatsi loko lokwenteke kuye kungenteka kubo bonkhe labatitsa takho, nkhosi, nabo bonkhe labakuvukelako.”
33 Inkhosi yehlulwa buhlungu. Yasukuma yakhuphukela ekamelweni lelalingetulu kwelisango yayawukhala khona. Isakhuphuka, yayihambe ikhala itsi: “Awu, ndvodzana yami, Absalomu! Ndvodzana yami, ndvodzana yami, Absalomu! Kube kufane kwafa mine esikhundleni sakho! Awu, Absalomu, ndvodzana yami, ndvodzana yami!”
1 Jowabe wabikelwa kwatsiwa: “Inkhosi iyakhala, ililela Absalomu.”
2 Ngalelo langa kuyo yonkhe imphi yakhe kuncoba kwagucuka kwaba sililo, ngobe ngalelo langa emabutfo abikelwa kwatsiwa: “Inkhosi idzindza lesikhulu sililo ngenca yemntfwanayo.”
3 Emabutfo angena edolobheni anyondlota ngalelo langa, njengemadvodza langena ngekunyenya, nakanemahloni ngobe abaleke emphini.
4 Inkhosi yambonya buso bayo, yadzatimula yakhala yatsi: “Awu, ndvodzana yami, Absalomu, ndvodzana yami, ndvodzana yami!”
5 Jowabe wangena ekamelweni enkhosini, watsi: “Lamuhla uwajabhisile onkhe emabutfo akho, emadvodza lasindzise imphilo yakho nemphilo yemadvodzana akho, neyemadvodzakati akho, nemphilo yaso sonkhe sigodlo sakho kanye neyemaphovela akho.
6 Utsandza labo labakutondzako, utondze labo labakutsandzako! Ubonakalisile lamuhla kutsi letindvuna takho temphi nalamabutfo ato atisilo lutfo kuwe. Sengiyabona-ke kutsi bekutaba mnandzi kuwe kube lamuhla kuphila Absalomu tsine sonkhe sifile.
7 Manje-ke phumela ngaphandle ukhutsate emabutfo akho. Ngifunga kuphila kwaSimakadze ngitsi: Nawungaphumi nyalo, litawutsi lishona lamuhla kube kute ngisho nayinye indvodza lotabe usasele nayo. Loku kutaba buhlungu kakhulu kuwe kunato tonkhe tigigaba letake takwehlela kusukela ebusheni bakho kuze kube ngunyalo.”
8 Ngako inkhosi yavuka yahlala esihlalweni sayo ngasekungeneni kwelisango. Emabutfo atsi kube atjelwe kwatsiwa: “Inkhosi seyihleti esangweni,” onkhe eta embikwayo. Ngaleso sikhatsi onkhe ema-Israyeli aka-Absalomu abesabaleke atindvumbeka emathendeni awo.
9 Kuto tonkhe tive tema-Israyeli bonkhe bantfu babephikisana bodvwa, batsi: “Inkhosi Davide yasikhulula etandleni tetitsa tetfu, ngiyo leyo leyasephula esandleni semaFilisti. Kodvwa manje seyibalekile kulelive ngenca ya-Absalomu,
10 naye lo-Absalomu lesambeka kutsi abe yinkhosi yetfu sewufele emphini. Manje nithuleleni ningalandzi inkhosi Davide nibuyisele yona?”
11 Inkhosi Davide, yatfumela lomlayeto kuboSadoki na-Abiyatha, baphristi, lotsi: “Butani baholi bakaJuda nitsi: ‘Nentiwa yini kutsi nibe bekugcina ekubuyiseleni inkhosi Davide esigodlweni sayo, njengobe konkhe lokushiwo kulo lonkhe lema-Israyeli sekufikile etindlebeni tenkhosi, lapho igogobele khona?
12 Nine nibomnaketfu, niyinyama yami nengati yami. Manje nentiwa yini kuba bekugcina kubuyisela inkhosi Davide?’
13 Khulumani ku-Amasa nitsi: ‘Awusiyo yini wena ingati yami nenyama yami? Shangatsi Nkulunkulu angangijezisa angishaye kabuhlungu, nangabe kusukela nyalo ngingakubeki kutsi ube yindvuna yemphi yami esikhundleni saJowabe.’ ”
14 Emavi aDavide atitsatsa tinhlitiyo tabo bonkhe bantfu bakaJuda, kwaba shangatsi bangumuntfu munye. Batfumela ligama kuDavide batsi: “Buya kanye nawo onkhe emabutfo akho.”
15 Inkhosi yase iyancandzeka, yahamba yaze yefika eJordane. Emadvodza akaJuda eta eGilgali kutewuhlangabeta inkhosi ayewete umfula iJordane.
16 Kwatsi kusenjalo, Shimeyi, umsa waGera, umBhenjamini waseBhahurimu, waphutfuma ngasemfuleni iJordane wehla nemadvodza akaJuda kuyawuhlangabeta inkhosi Davide.
17 Shimeyi abehamba nenkhulungwane yemadvodza esive sakaBhenjamini. Siba-ke yena, sisebenti sendlu yakaSawula, weta nemadvodzana akhe lali-15 netisebenti letingema-20, befika eJordane embikwenkhosi.
18 Bewela emfuleni bentela kusingatsa bukhosi nabewelako, nekwenta loko labangahle bakutjelwe yinkhosi. Inkhosi Davide yatsi isatilungiselela kwewela, Shimeyi watilahla inyandzana phansi embikwenkhosi,
19 watsi: “Nkhosi! Ngicela inkhosi yami ibukhohlwe bonkhe bubi bami lengabenta ngalela langa, mhlazane iphuma eJerusalema. Shangatsi inkhosi ingakukhipha loko engcondvweni yayo.
20 Ngobe mine nceku yakho ngiyati kutsi ngonile, kodvwa lamuhla sengite lapha njengewekucala kubo bonkhe bendlu yakaJosefa, kutsi ngitetitfoba ngihlangabete inkhosi yami, nkhosi.”
21 Abishayi, umsa waSeruya, watsi: “Akukafaneli yini Shimeyi abulawe, ngobe wacalekisa lowo lowagcotjwa nguSimakadze kutsi abe yinkhosi?”
22 Davide waphendvula watsi: “Ngihlangana ngani mine nani, nine madvodzana aSeruya? Kantsi lamuhla senigucuke naba titsa tami? Kufanele yini lamuhla kutsi kube khona lobulawako ka-Israyeli? Angati yini kutsi lamuhla ngimi inkhosi yaka-Israyeli?”
23 Inkhosi yafunga kuShimeyi, yatsi: “Ngiyafunga ngitsi: ‘Ungeke ubulawe ngumuntfu.’ ”
24 Mefiboshethi naye, umntfwanemntfwana Sawula, wehla watawuhlangabeta inkhosi Davide. Abengazange atigeze tinyawo takhe, nesilevu sakhe abengazange asihhule, netimphahla takhe abengazange atigeze kusukela mhlazane inkhosi, Davide, iphuma eJerusalema kwaze kwaba lilanga leyabuya ngalo iphephile.
25 Watsi nakefika aphuma eJerusalema atewuhlangabeta inkhosi, inkhosi yambuta yatsi: “Awuhambanga ngani nami, wena Mefiboshethi?”
26 Waphendvula watsi: “Nkhosi yami, nkhosi, njengobe mine nceku yakho ngisishosha, ngatfumela sisebenti sami Siba, kutsi sibophele imbongolo yami, kuze ngigibele nami ngihambe kanye nawe, kodvwa sona sangentela bucili.
27 Safike sangicalela emanga enkhosini yami, kodvwa wena ufanana nengilosi yaNkulunkulu, ngako yenta loko lokubonakala kukuhle kuwe.
28 Tonkhe titukulwane tamkhulu wami betingakafanelwa lutfo ngaphandle kwekubulawa yinkhosi yami, nkhosi, kodvwa inceku yakho wayipha indzawo kutsi ihlale kanye nalabadla etafuleni lakho. Ngako angisenalungelo lekubuye ngicele lomunye umusa enkhosini yami.”
29 Inkhosi yaphendvula yatsi: “Akusadzingeki ukhulume lokunyenti kunaloku. Sengincumile kutsi nine naSiba nitawuhlephulelana emasimi.”
30 Mefiboshethi waphendvula watsi: “Siba akasale atsatsa konkhe, kimi sekwenele lokutsi inkhosi yami ibuye ekhaya iphephile.”
31 Bhazilayi, wakaGileyadi, naye wehla esuka eRogelimu, atewusingatsa inkhosi Davide, nayewela umfula iJordane.
32 Bhazilayi besekulikhehla lelidzala, asaneminyaka lengema-80 budzala. Abenjinge kakhulu, nguye labekhipha kudla aphe inkhosi ngesikhatsi isahlala eMahanayimu.
33 Inkhosi yakhuluma kuye yatsi: “Buya uhambe nami siye eJerusalema, ngitakunakekela.”
34 Kodvwa Bhazilayi watsi: “Ngisetawuhlala iminyaka lemingaki kutsi ngisengaya eJerusalema kanye nenkhosi?
35 Manje sengineminyaka lengema-80 budzala. Angisakwati kwehlukanisa lokubi kulokuhle. Angisabuva nebumnandzi bekunambitseka kwalengikudlako nalengikunatsako. Angisaweva nemaphimbo alabadvuna nalabasikati labahlabelelako. Sengingaba ngumtfwalo welite nje enkhosini yami, inkhosi.
36 Angikasifaneli sibongo lesikhulu kangaka. Ngako ngitakuphekeletela libangana nje, nasewewele iJordane.
37 Ngivumele ngibuyele ekhaya lami ngiyewufela edvutane nemadliza abobabe namake. Nansi inceku yakho Khimhamu, lotakukhonta, tsatsa yena uhambe naye, nkhosi yami, nkhosi. Mentele loko lokubonakala kukuhle kuwe.”
38 Inkhosi yatsi: “Ngitawuhamba naKhimhamu, ngifike ngimentele nome yini wena loyifunako. Nawe ngitakwentela nome ngabe yini loyifunako.”
39 Ngako bonkhe bantfu base bewela umfula iJordane, nenkhosi yase iyewela. Inkhosi yavalelisa Bhazilayi ngekumanga nangekumbusisa. Bhazilayi wase uyancandzeka ubuyela ekhaya kakhe.
40 Ngesikhatsi inkhosi Davide yewela umfula iJordane, yayisingatfwe ngibo bonkhe bantfu bakaJuda nencenye yebantfu baka-Israyeli, yachubekela eGilgali; naKhimhamu abehamba nayo.
41 Kwesuka onkhe emadvodza aka-Israyeli aya enkhosini, afike atsi: “Nkhosi, kwentiwe yini kutsi bomnaketfu, emadvodza akaJuda, acabange kutsi analo lilungelo lekusemuka wena, akusingatse kanye nendlu yakho, nemabutfo akho akwewete umfula iJordane?”
42 Lamadvodza akaJuda aphendvula lawa aka-Israyeli atsi: “Loko sikwente ngobe inkhosi yelusendvo lwaketfu. Nine nitfukutseliswa yini ngaloko? Kukhona yini lesiyidlele kona inkhosi lokungumphako wayo? Kukhona yini lesititsatsele kona?”
43 Emadvodza aka-Israyeli aphendvula lawa akaJuda atsi: “Tsine phela, tabelo tetfu telive tilishumi, ngako emalungelo etfu ekubanga inkhosi angetulu kwewenu. Manje-ke nisedzelelelani? Ningakhohlwa kutsi ngitsi lesaba bekucala kukhuluma ngekubuyiselwa kwenkhosi yetfu Davide.” Kodvwa emadvodza akaJuda aphendvula ngesikhahlo lesikhulu kakhulu kunalamadvodza aka-Israyeli.
1 Lesinye sichomoketi lesasikhona lapho bekunguSheba, umsa waBikri, wesive sakaBhenjamini. Sona-ke sesuke sashaya impalampala samemetela satsi: “Asinasabelo kuDavide! Ngeke silandzele umsa waJese! Madvodza aka-Israyeli, asambeni emakhaya!”
2 Ngako onkhe emadvodza aka-Israyeli amhlubuka Davide alandzela Sheba, umsa waBikri. Kodvwa emadvodza akaJuda wona onkhe asala anamatsele enkhosini yawo Davide, ahamba nayo kusukela eJordane kuze kuyewufika eJerusalema.
3 Davide watsi kube efike esigodlweni sakhe eJerusalema, wabutsa lamaphovela akhe labewashiyele kutsi sale anakekela lesigodlo, wawangenisa endlini watsi akagadvwe. Abewanakekela ngato tonkhe tidzingo tawo, kodvwa akazange aphindze aweyame. Abehlala avalelwe kuleso simo, kwaze kwaba lilanga lawo lekufa, aphila njengebafelokati.
4 Inkhosi yase ikhuluma ku-Amasa, itsi: “Bita onkhe emadvodza akaJuda kutsi ete kimi kungakapheli emalanga lamatsatfu, nawe cobo lwakho ube khona.”
5 Kodvwa Amasa wahamba wayawubita lamadvodza akaJuda, watsatsa sikhatsi lesidze kubuya kunaleso besibekwe yinkhosi.
6 Davide wakhuluma ku-Abishayi, watsi: “Manje Sheba, umsa waBikri, sewutasenta intfo lemnyama kakhulu kunaloku lesakwentiwa ngu-Absalomu. Tsatsa tindvuna tami umcoshe, angakaze watfola emadolobha labiyelwe ngetibondza, aphunyule.”
7 Ngako libutfo lakaJowabe, emaKherethi kanye nemaPhelethi labesingatsa inkhosi, nawo onkhe lamanye emabutfo baphuma eJerusalema baholwa ngu-Abishayi kutsi bacoshe Sheba, umsa waBikri.
8 Batsi nabefika edvwaleni lelikhulu laseGibeyoni, Amasa weta watakubahlangabeta. Jowabe abegcoke temphi, abophele inkemba yakhe endzaweni yayo letsekeletelwe ebhandeni lakhe. Watsi asasondzela, lenkemba yaphuma lapha esikhwameni sayo yawa.
9 Jowabe wakhuluma ku-Amasa, watsi: “Unjani, mnaketfu?” Jowabe wadvonsa Amasa ngesilevu ngesandla sakhe sekudla kutsi atemanga.
10 Amasa abengakayicapheli lenkemba leyayisesandleni saJowabe, Jowabe wayiphisela esiswini sa-Amasa, ematfumbu akhe acitsekela phansi emhlabatsini. Angakamphindzi kabili kumgwaza, wavele waphangalala Amasa. BoJowabe na-Abishayi, umnakabo, bachubeka bacosha Sheba, umsa waBikri.
11 Lomunye welibutfo lakaJowabe wema eceleni kwesidvumbu sa-Amasa, watsi: “Wonkhe lohambisana naJowabe, naye wonkhe lowakaDavide, akalandzele Jowabe!”
12 Amasa wasala abhabha engatini yakhe ekhatsi emgwacweni, lendvodza yase iyabona kutsi onkhe lamabutfo efike eme lapho. Watsi kube abone kutsi bonkhe befike beme lapha ku-Amasa, wase uyamhudvula, amsusa lapha emgwacweni wamhudvulela esigangeni, wase ummbonya ngengubo.
13 Kwatsi kube simbonywe sidvumbu sa-Amasa, sesisusiwe lapha emgwacweni, bonkhe bantfu bachubekela embili naJowabe, bacoshana naSheba, umsa waBikri.
14 Sheba wagangalata watendlula tonkhe tifundza tetive tema-Israyeli, waze wayawufika edolobheni lase-Abela Bhethi Makha akanye nabo bonkhe bendlu yakaBeri lababutsana ndzawonye nabo bashulungana balandzela Sheba, baze bayawungena naye edolobheni.
15 BoJowabe nemabutfo akhe beva kutsi Sheba ungenise lapha e-Abela Bhethi Makha, ngako balivimbetela lelidolobha. Bema tingelo emvakwalolubondza loluvikele lelidolobha, baluvalele ngekhatsi. Batsi basalibele kugqala letibondza bafuna kutidzilitela phansi,
16 kwamemeta umfati lohlakaniphile angekhatsi edolobheni, watsi: “Lalelani! Lalelani! Tjelani Jowabe kutsi akete lapha ngitewukhuluma naye.”
17 Jowabe waya kuye. Lomfati wambuta watsi: “Nguwe kambe, Jowabe?” Jowabe watsi: “Nginguye.” Lomfati watsi: “Lalela-ke kutsi incekukati yakho itsini.” Jowabe watsi: “Ngilalele.”
18 Lomfati wachubeka watsi: “Lokwa kadzeni babevamise kutsi: ‘Hamba ulandze imphendvulo yakho e-Abela,’ bebavele bente njalo, kube kuphela kwendzaba njalo.
19 Tsine sibantfu bekuthula nalabetsembekile ka-Israyeli. Wena wetama kubhubhisa lidolobha lelingunina wema-Israyeli. Ufunelani kumita lifa laSimakadze?”
20 Jowabe waphendvula watsi: “Akube khashane nami! Akube khashane nami kumita nekubhubhisa!
21 Akusiyo injongo yetfu leyo. Kukhona indvodza lekutsiwa nguSheba, umsa waBikri, wekutalwa eveni letintsaba kulaka-Efrayimu, uphakamisele inkhosi sandla, wavukela Davide. Khiphani lowo muntfu, yena yedvwa, ngitawube sengiyaliyekela-ke lelidolobha.” Lomfati watsi kuJowabe: “Sitanijikela inhloko yakhe lapha etulu elubondzeni.”
22 Lomfati wase uya kulamadvodza labenawo nalelisu lakhe lelihlakaniphile, base bajuba inhloko yaSheba, umsa waBikri, bayiphosela Jowabe basetulu elubondzeni. Ngako Jowabe wase ushaya impalampala kutsi emabutfo asale aliyekela lelidolobha. Ngulowo nalowo watibuyelela ekhaya kakhe, naJowabe wabuyela emuva eJerusalema enkhosini.
23 Jowabe abesengamele yonkhe imphi yema-Israyeli; Bhenaya, umsa waJehoyada, abephetse emaKherethi nemaPhelethi.
24 Adoniramu yena abengamele yonkhe imisebenti yencindzetelo. Jehoshafati, umsa wa-Ahiludi, abengulobhalisako.
25 Sheva abengumabhalane; boSadoki na-Abiyatha bona bekubaphristi.
26 Ira, waseJayire, yena abengumphristi waDavide.
1 Kwaba nendlala lenkhulu ngesikhatsi sekubusa kwaDavide, kwadzimate kwaphela iminyaka lemitsatfu ilandzelana. Ngako Davide wafunisisa buso baSimakadze ngaloko. Simakadze watsi: “Loku kungenca yaSawula nangendlu yakhe lebovu ingati, kungobe Sawula wabulala bantfu baseGibeyoni.”
2 Inkhosi Davide yabita emaGibeyoni kutsi ete kuye. EmaGibeyoni phela abengesiyo incenye yema-Israyeli, kodvwa bekungimitfonselana nje yema-Amori leyayisele. Baka-Israyeli babefungile batsi batawayekela aphile, kodvwa Sawula ngenca yekushisekela kwakhe ngesive saka-Israyeli nesakaJuda, abetama kuwacedza.
3 Davide wabuta emaGibeyoni watsi: “Nginganentelani? Ngifuna kwenta inhlawulo yekubuyisana nani ngenca yaloko lokubi lokwentiwa kini, kuze nani nibusise sive saSimakadze.”
4 EmaGibeyoni amphendvula atsi: “Kucabana kwetfu naSawula nendlu yakhe kungeke kucedvwe ngesiliva nangegolide, futsi kute nem-Israyeli lesifuna kumbulala.” Davide wababuta watsi: “Nifuna nginenteleni-ke?”
5 Bamphendvula batsi: “Macondzana nalomuntfu labesibulala afuna kusicedza, kuze kungasali namunye wetfu aphila kulo lonkhe laka-Israyeli,
6 sicela kutsi sinikwe batukulu bakhe labasikhombisa labadvuna, batewulengiswa lapha embikwaSimakadze eGibeya, edolobheni lakhe Sawula, inkhosi leyakhetfwa nguSimakadze.” Inkhosi yabaphendvula yatsi: “Ngitaninika bona.”
7 Inkhosi yambonelela Mefiboshethi, umsa waJonathani, umsa waSawula, ngenca yesifungo labasenta embikwaSimakadze boDavide naJonathani, umsa waSawula.
8 Kodvwa inkhosi yatsatsa bo-Arimoni naMefiboshethi, emadvodzana lamabili aRispha, indvodzakati ya-Aya, labewatalele Sawula, watsatsa nemadvodzana lasihlanu aMerabi, indvodzakati yaSawula, labewatalele Adriyeli, umsa waBhazilayi, labewaseMehola.
9 Wabaniketela kubantfu baseGibeyoni lababatsatsa bababulala; babalengisa entsabeni embikwaSimakadze. Babulawelwa khona bonkhe bobasikhombisa. Babulawa ngemalanga anakucalwa kuvuna, ngaso leso sikhatsi nakucala kuvunwa ibhali.
10 Rispha, indvodzakati ya-Aya, watsatsa emasaka watentela yena umtfunti edvwaleni, lapho letidvumbu tatikhona. Wahlala lapho kusukela nakucala kuvunwa, kwaze kwefika timvula tekucala. Emini abelindza tinyoni kutsi tingadli letidvumbu, kutsi ebusuku ativikele etilwaneni tesiganga kutsi tingatidli.
11 Davide watsi kube atjelwe kutsi Rispha, liphovela laSawula, indvodzakati ya-Aya, wenteni,
12 Davide wahamba wayawutsatsa ematsambo aboSawula naJonathani, umsa waSawula, kutakhamiti taseJabeshi Gileyadi. Phela, bebawebe enkhundleni yaseBhethi Shani, lapho bebalengiswe ngemaFilisti khona, mhlazane emaFilisti abulala Sawula entsabeni yaseGilbowa.
13 Davide watsatsa lamatsambo aboSawula nemsa wakhe Jonathani, wabutsa nalamatsambo alamadvodza lasikhombisa labelengiswe eGibeyoni.
14 Base bangcwaba lamatsambo aboSawula nemsa wakhe Jonathani edlizeni laKhishi, uyise waSawula, eSela, kulakaBhenjamini, benta konkhe labebakutjelwa yinkhosi Davide. Emvakwaloko-ke Nkulunkulu wawuphendvula umthandazo welive.
15 Kwaphindza futsi kwabhedvuka imphi emkhatsini wemaFilisti nema-Israyeli. Davide wehla kanye nemabutfo akhe wayakulwa nemaFilisti. Kwatsi kulesinye siwombe Davide wase uyadzinwa.
16 Lesinye setichwaga takaRefa lekwakutsiwa ngu-Ishbi Benobi sasiphetse sikhali selitfusi lesasinesisindvo lesingemakhilogremu labengaba matsatfu nencenye, sihlome ngenkemba lensha; sasicabanga kutsi sitambulala Davide.
17 Kodvwa Abishayi, umsa waSeruya, welekelela Davide, wagadla lesichwaga wasibulala. Lamadvodza akaDavide afunga kuye atsi: “Ungabobe usaphuma natsi kuyakulwa imphi. Kuze ungasicimi sibane saka-Israyeli.”
18 Emvakwaloko kwaba nalenye imphi yemaFilisti eGobi. Ngaleso sikhatsi Sibhekayi, waseHusha, wabulala lesinye sichwaga lekwakutsiwa nguSiphayi, lomunye webatukulu baRefa.
19 Kwaba nalenye futsi imphi nemaFilisti eGobi, lapho Eli Hanani, umsa waJayire, umeluki, waseBhetlehema, abulala khona Goliyathi, waseGathi, labenesikhali lesasinelutsi lolwalungangelipulango lembongolo yemeluki.
20 Kwaphindza futsi kwaba nalenye imphi eGathi. Lapho-ke bekunalesinye sichwaga lesidze, sasinemino lesitfupha sandla sisinye netintwane letisitfupha lunyawo lulunye, kungema-24 sekukonkhe. Naso bekungumtukulu waRefa.
21 Watsi nakedzelela ema-Israyeli, Jonathani, umsa waShama, umnakaboDavide, wamsukela wambulala.
22 Labo-ke bobane babeyintalelwane yaRefa waseGathi. Bafa babulawa nguDavide nemadvodza akakhe.
1 Davide wahlabela kuSimakadze emagama anansi ingoma, ngesikhatsi Simakadze amephula etandleni tato tonkhe titsa takhe nasesandleni saSawula.
2 Davide watsi: “Simakadze ulidvwala lami, nenqaba yami, neMkhululi wami;
3 Nkulunkulu wami, ulidvwala lami lengiphephela kulo. Usihlangu sami sekungivikela nemandla ensindziso yami. Yena ungumgedze wami wekubhaca. Usiphephelo sami neMsindzisi wami. Etigebengwini, wena uyangisindzisa.
4 Ngikhala kuSimakadze, bese uyangephula etitseni tami. Akadvunyiswe Simakadze!
5 “Emagagasi ekufa angitungeleta; tikhukhula tembhubhiso tangigabudzela.
6 Tintsambo telithuna tatingitsandzele, tingibe tekufa tangintfonya.
7 Ngakhala kuSimakadze ngisekudzangaleni kwami, ngacela lusito kuNkulunkulu wami. Waliva livi lami asendlini yakhe. Kuncusa kwami, nekukhala kwami, nekuthandaza kwami kwangena etindlebeni takhe.
8 “Umhlaba watfutfumela, watamatama, tisekelo temazulu tatfutfumela, tatamatama, ngobe Somandla abesatfukutsele.
9 Emakhala akhe akhafula intfutfu; umlomo wakhe wakhephuta umlilo locotfulako, kuwo kwakhehleka emalahle labovu.
10 Wabhobosa emazulu, wehlela phansi. Emafu lamnyama abengaphansi kwetinyawo takhe.
11 Wagibela likherubhi wandiza; wantjuza asetikwemaphiko emoya.
12 Wenta bumnyama baba yingubo yakhe, watungeletwa ngemafu lahlomile, lamnyama.
13 Ebukhatikhatini bebukhona bakhe kwaphambana imibane nemalahle lavutsako.
14 Simakadze wabhavumula asezulwini. Losetikwako Konkhe walivakalisa livi lakhe.
15 Wajijimeta ngemicibisholo, kwasakateka titsa. Ngebumanyamanya bemibane watidzidzitelisa tasiphuka.
16 Kujula kwetilwandle kwenekeka ebaleni, tisekelo temhlaba tembuleka, ngenca yekutsetsa kwaSimakadze, nangenca yekufutsa kwemakhala akhe.
17 “Welula ingalo yakhe akulelisetulu, wayehlisela phansi, wangibamba, wangenyula ekujuleni kwemanti.
18 Wangephula esitseni sami lesinemandla, wangephula nakulabangitondzako, ngobe babenemandla kakhulu kunami.
19 Bangidvumela ngesikhatsi ngehlelwa sehlakalo; kodvwa Simakadze waba sihlangu sami.
20 Wangikhiphela endzaweni lebanti; wangephula, ngobe abejabula ngami.
21 “Simakadze wangiphatsa njengekulunga kwami, wangivuza njengebumsulwa betandla tami,
22 ngobe imiyalo yaSimakadze ngiyigcinile. Angikenti lutfo lolubi, angikamfulatseli Nkulunkulu wami.
23 Yonkhe imiyalo yaNkulunkulu isembikwami. Angikagucuki etimisweni takhe.
24 Bengisolo ngite sici embikwakhe, ngitigcinile ngangete ngona.
25 Ngako-ke Simakadze ungivuze njengekulunga kwami, wangivuza njengebumsulwa bami emehlweni akhe.
26 “Kulowetsembekile wena utibonakalisa wetsembekile; kulongenacala wena utibonakalisa ucotfo.
27 Kulohlantekile wena utibonakalisa uhlantekile, kodvwa kulosigwegwe wena utibonakalisa ulukhuni.
28 Uyabasindzisa labatfobekile, kodvwa emehlo akho akulabatiphakamisako, kuze ubatfobise.
29 Awu! Simakadze, wena usibane sami, Simakadze ugucula bumnyama bami abente bube kukhanya.
30 Ngawe ngisengayidvungulula imphi. NgaNkulunkulu wami ngisengagalaja lubondza lwetitsa.
31 “Indlela yaNkulunkulu ilungile. Livi laSimakadze letsembekile. Yena usihlangu sabo bonkhe labaphephela kuye.
32 Kambe nje ngubani longuNkulunkulu ngaphandle kwaSimakadze? Ngubani lolidvwala ngaphandle kwaNkulunkulu wetfu?
33 Nguye loNkulunkulu longihlomisa ngemandla, ente indlela yami icondze, ibe msulwa.
34 Wenta tinyawo tami tibe lula njengetenyamatane, angente ngiphephele ekuphakameni.
35 Yena wenta tandla tami tifundzele kulwa, kuze imikhono yami yetayele kugoba butjoki belitfusi.
36 Ungihlomisa ngesihlangu sensindziso yakho; utehlisa wena kuze uphakamise mine.
37 “Wentele tinyatselo tami indzawo lebanti, kuze emacakala ami angabhinyiliki.
38 “Ngaticosha titsa tami, ngatifihlita, angizange ngincandzeke, ngingakaticedzi.
39 Ngatiphahlata tonkhe ngaticedza. Tatingeke tiphindze tivuke, tawela ngaphansi kwetinyawo tami.
40 Wangihlomisa ngemandla ekulwa imphi. Titsa tami watitfobisa ngaphansi kwami.
41 Titsa tami watidvungulula, tabaleka, ngabacedza bonkhe labangitondzako.
42 Bakhala bacela lusito, kodvwa kwabate lobasindzisako. Bahlaba inyandzaleyo kuSimakadze, kodvwa akazange abaphendvule.
43 Ngabagaya baba njengelutfuli, baba njengelutfuli lwemhlaba. Ngabagcobagcoba ngagidza etikwabo njengeludzaka lwendlela.
44 “Wangisindzisa embangweni wesive sakitsi, wangigcina ngaba yinhloko yetive. Sive lengingazange sengisati sangikhotsama.
45 Betive beta kimi bakhasa, batsi bangangiva, bangihloniphe masinyane.
46 Bonkhe baphelelwa ngemandla, beta bachachatela, baphuma emigedzeni yabo.
47 “Simakadze uyaphila! Alidvunyiswe lidvwala lami! Akaphakanyiswe Nkulunkulu, Lidvwala lami, neMsindzisi wami!
48 UnguNkulunkulu longiphindziselelako, lobeka tive ngaphansi kwami.
49 Wangikhulula etitseni tami. Wangiphakamisa ngaba ngetulu kwalabo labemelene nami, wangephula kubantfu belutfutfuva.
50 Ngako-ke ngiyawukudvumisa wena, Simakadze, emkhatsini wetive, ngikugambute ngetibongelelo teLibito lakho.
51 Nguwe, Nkhosi, umenti wankhulu, inkhosi yakho uyiphe kuncoba timphi ngetimphi, wentele logcotjiwe wakho umusa wakho longapheli, yebo, Davide netitukulwane takhe phakadze naphakadze.”
1 Lawa ngemavi ekugcina enkhosi Davide: “Inkhulumo yaDavide, umsa waJese, inkhulumo yalowo lowaphakanyiswa nguLosetikwako Konkhe. Ungumuntfu lowagcotjwa nguNkulunkulu waJakobe, umhlabeleli wetingoma ka-Israyeli.
2 “Moya waSimakadze wakhuluma ngami. Livi lakhe labaselulwimini lwami.
3 Nkulunkulu wema-Israyeli wakhuluma, Lidvwala laka-Israyeli latsi kimi: ‘Nangabe umuntfu ahola sive ngekulunga, asibuse ngekwesaba Nkulunkulu,
4 ufanana nekukhanya kwekusa nakuphuma lilanga, lakute khona emafu; unjengekukhanya emvakwemvula lokumilisa tjani emhlabatsini.’
5 “Indlu yami ayikalungi yini kuNkulunkulu? Akenti nami yini sivumelwane saphakadze naphakadze, lesihlelwe kahle savikeleka macala onkhana? Akayikuphumelelisa yini kusindziswa kwami, anginike konkhe lengikufisako?
6 Kodvwa bonkhe lababi bayawulahlwa njengemanyeva, wona angabutfwa ngesandla.
7 Wonkhe lotsintsa emanyeva usebentisa ludlawu lwensimbi, nome siphandla sesikhali; ashiselwa khona lapho alahlelwe khona.”
8 Lawa-ke ngemabito etingwazi takaDavide letatidvumile: wekucala kwakunguJoshebi Bashebethi, umThakhemoni, abeyindvuna yaLabatsatfu. Yena-ke wagwaza ngesikhali sakhe emadvodza labengema-800, wawabulala onkhe emphini yinye.
9 Wesibili kwakungu-Eleyazare, umsa waDodo, welusendvo lwaka-Ahohi. Yena abengulomunye waletingwazi letintsatfu. Ngalelinye lilanga yena naDavide bake besukela emaFilisti labebutsanele imphi. Ema-Israyeli onkhe abaleka,
10 kodvwa yena wema endzaweni yakhe walwa nemaFilisti, sandla sakhe saze somelela enkembeni yakhe, sesigongobele singaseluleki. Simakadze wancoba imphi lenkhulu ngalelo langa. Yatsi kube imphi iphele, ema-Israyeli abuya eta lapho bekuna-Eleyazare khona, atewuphanga tikhali kuletidvumbu.
11 Wesitsatsu bekunguShama, umsa wa-Age, waseHarari. EmaFilisti abebutsene eLehi, lapho bekunensimi yemalentili khona. Emabutfo ema-Israyeli awabalekela emaFilisti,
12 kodvwa Shama yena wema endzaweni yakhe ekhatsi nekhatsi nensimi, wayivikela, wabulala lamaFilisti. Simakadze wancoba imphi lenkhulu ngalelo langa.
13 Ngesikhatsi sanakuvunwako tingwazi letintsatfu kuleti letatingema-30 tehlela kuDavide ngasemgedzeni wase-Adulamu, incumbi yemaFilisti isakambe eSigodzini semaRefa.
14 Ngaleso sikhatsi Davide abesekhatsi enqabeni, kantsi libutfo lemaFilisti lona laliseBhetlehema.
15 Davide wativela asomile, wase utsi: “Awu! Kube mane kungaba khona loyangikhelela emanti ekunatsa; ngomele emanti asemtfonjeni longasesangweni laseBhetlehema!”
16 Ngako letingwazi letintsatfu tesuka lapho tabhidla ticheme temabutfo emaFilisti ngenkhani taphumela ngale, taze tefika emtfonjeni longasesangweni laseBhetlehema, takha emanti, tabuya nawo kuDavide. Kodvwa Davide wala kuwanatsa lamanti, esikhundleni saloko wawatfululela phansi embikwaSimakadze.
17 Davide watsi: “Awu, Simakadze! Akube khashane nami kutsi ngiwanatse lamanti. Kimi kungabe kufanana nekunatsa ingati yalamadvodza latilahle ematsambo ngemphilo yawo.” Ngako Davide akazange awanatse. Nguleto-ke tento taletingwazi letintsatfu.
18 Abishayi, umnakaboJowabe, umsa waSeruya, abengumholi walaba labangema-30. Wagwaza ngesikhali sakhe, alwa nemadvodza langema-300 wawabulala onkhe, waze wadvuma kakhulu njengaletingwazi letingema-30.
19 Abishayi abengulodvume kakhulu kuletingwazi letingema-30, waze wabekwa waba yindvuna yato, lite nome yena abengakabalwa nalaba Labatsatfu.
20 Bhenaya, umsa waJehoyada, waseKhabsiyeli, naye abengulomunye wetingwazi letatatiwa. Wenta tigemegeme letinyenti naye, njengekubulala kwakhe tingwazi letimbili letatatiwa takaMowabi. Wake wehlela phansi emgodzini ngalelinye lilanga kunangcocwane, wafike wabulala libhubesi.
21 Wabulala sichwaga lesikhulu saseGibhithe lesasihlome ngesikhali, sisibambe ngesandla, Bhenaya yena wasisukela aphetse simunya. Wahlutfula lesikhali esandleni salomGibhithe, wambulala ngaso lesikhali sakhe.
22 Lobo-ke kwaba buchawe baBhenaya, umsa waJehoyada. Naye wadvuma njengalaba Labatsatfu labebatiwa kakhulu.
23 Abehlonishwa kakhulu kunato tonkhe letingwazi letatingema-30, kodvwa yena akabalwanga kanye nalaba Labatsatfu. Davide wamenta indvuna yaleti letatisingatsa yena.
24 Kuletingwazi letatingema-30 kwakunalaba: Asaheli, umnakaboJowabe, na-Eli Hanani, umsa waDodo, waseBhetlehema,
25 naboShama na-Elika baseHarodi,
26 naHelesi waseBhethi Phelethi, na-Ira, umsa wa-Ikheshi, waseThekhowa,
27 na-Abiyezeri wase-Anathothi, naSibhekhayi waseHusha,
28 naSalmoni wase-Ahoha, naMaharayi waseNethofa,
29 naHeledi, umsa waBhana, waseNethofa, na-Ithayi, umsa waRibayi, waseGibeya kulakaBhenjamini,
30 naBhenaya wasePhirathoni, naHidayi wasetihosheni taseGashi,
31 na-Abiyalboni wase-Abha, na-Azmavethi waseBhahurimu,
32 na-Eliyaba waseShalbimu, nemadvodzana aJasheni, naJonathani,
33 umsa waShama, waseHarari, na-Ahiyamu, umsa waSharari, waseHarari,
34 na-Elifeleti, umsa wa-Ahasbayi, waseMakha, na-Eliyamu, umsa wa-Ahithofeli, waseGilo,
35 na-Hesro waseKhameli, na-Pharayi wase-Arabu,
36 na-Igali, umsa waNathani, waseSobha, lotalwa nguHagri,
37 naSeleki, um-Amoni, naNaharayi waseBherothi, labeludzibi lwaJowabe, umsa waSeruya,
38 na-Ira waseJetheri, naGarebi waseJetheri,
39 na-Uriya, umHethi. Babe ngema-37 sebabonkhe.
1 Lulaka lwaSimakadze lwasivutsela sive sema-Israyeli, wachukuluta Davide kutsi abavukele, watsi: “Hamba uyewubala bonkhe baka-Israyeli nebakaJuda.”
2 Ngako inkhosi Davide yatjela Jowabe netindvuna temabutfo akhe, yatsi: “Hambani niye kuto tonkhe tive tema-Israyeli, kusukela kaDani kuze kuyewufika eBherisheba, nibhalise bonkhe bantfu, kuze ngati kutsi bangaki.”
3 Kodvwa Jowabe wayiphendvula inkhosi, watsi: “Shangatsi Simakadze Nkulunkulu wakho angawandzisa lamabutfo awaphindze kalikhulu, shangatsi futsi nemehlo enkhosi yami, inkhosi, angakubona loko. Kodvwa ngempela inkhosi yami, inkhosi, ifunelani kwenta intfo lenje?”
4 Noko livi lenkhosi lamehlulekisa Jowabe kanye naletindvuna takhe. Ngako besuka enkhosini bayawubhalisa onkhe emadvodza emphi aka-Israyeli.
5 Batsi nase bangesheya kwemfula iJordane, base bemisa eceleni kwe-Aroyeri ngaseningizimu yelidolobha esihosheni, bahamba bengca eGadi, bendlulela naseJazeri.
6 Baya nakaGileyadi, nasesifundzeni saseThathimu Hodishi bachubekela kaDani Jani, bajika base bacondza eSidoni.
7 Base baya ngasenqabeni yaseThire nakuwo onkhe emadolobha emaHivi, newemaKhenani. Ekugcineni base baya eBherisheba, eningizimu nelive lakaJuda.
8 Kwatsi sebalidzabule lonkhe lelo live, base babuyela emuva eJerusalema, emvakwetinyanga letiyimfica nemalanga langema-20.
9 Jowabe wabikela inkhosi linani lemadvodza emphi labalwa: Ka-Israyeli abeti-800 000, imiswahla yodvwa yemadvodza leyayingabamba inkemba; kaJuda khona abeti-500 000.
10 Kodvwa, emvakwekube Davide asalwentile lubalo, nembeza wakhe wacala kumehlulela, wakhuluma kuSimakadze watsi: “Ngonile kakhulu ngaloku lengikwentile. Manje! Awu! Simakadze! Ngiyakuncenga, susa licala lenceku yakho. Vele, ngente intfo lebulima kakhulu.”
11 Davide watsi asengakavuki nakuvuka ngakusasa ekuseni, livi laSimakadze labeselifikile kuGadi, umphrofethi, umboniswa waDavide, latsi:
12 “Hamba utjele Davide utsi: ‘Naku lokushiwo nguSimakadze, utsi: “Ngikunika tintfo letintsatfu lokumele ukhetse kuto. Khetsa kunye kwato ngitekujezisa ngako.” ’ ”
13 Ngako Gadi wahamba waya kuDavide, wamtjela konkhe lobekushiwo nguSimakadze, wase uyambuta watsi: “Ngukuphi-ke lokukhetsako: Kutsi kube nendlala lenkhulu eveni lakho iminyaka lemitsatfu, nome kuphele tinyanga letintsatfu solomane ubaleka ugijinyiswa titsa takho, nome emalanga lamatsatfu uhlaselwe sifo lesingujubajece eveni lakho? Manje-ke, cabangisisa kutsi ngitawufike ngitsini kulona longitfumile.”
14 Davide watsi kuGadi: “Ngiselusizini lolukhulu asimane siwele etandleni taSimakadze, ngobe umusa wakhe mkhulu, kodvwa ungavumi siwele etandleni tebantfu.”
15 Ngako Simakadze watfumela sifo lesingujubajece esiveni sema-Israyeli, lesacala ekuseni ngalelo langa, kwaze kwaphela leso sikhatsi labesimisile. Bantfu labafa kusukela kaDani kuze kuyewufika eBherisheba baba ti-70 000.
16 Kwatsi nje ingilosi yaSimakadze nayelula sandla sayo seyitawubhubhisa iJerusalema, Simakadze wadzabuka, nakabona lobusacasaca bekufa kwesive sakhe, wase ukhuluma kulengilosi yakhe leyayibulala labantfu, watsi: “Sekwenele! Susa sandla sakho!” Ngaleso sikhatsi lengilosi yaSimakadze yase ime ebaleni lekubhulela kolo laka-Arawuna, umJebhusi.
17 Davide watsi nakabona lengilosi leyayigawula labantfu, wakhuluma kuSimakadze watsi: “Ngimi lowonile, ngenta lokubi. Kodvwa laba batimvu nje. Bona-ke boneni? Sandla sakho asehlele etikwami ngedvwa kanye nasetikwendlu yami, kuphela.”
18 Ngalelo langa Gadi waya kuDavide, wafike watsi: “Khuphuka uyekwakhela Simakadze lilati lena ebaleni lekubhulela kolo laka-Arawuna, umJebhusi.”
19 Davide wakhuphuka, njengobe Simakadze abesamtjelile ngaGadi.
20 Arawuna watsi nakaphakamisa emehlo wabona kuta inkhosi, Davide, kanye netindvuna tayo, kuye, waphuma wayawukhotsamisa inhloko yakhe embikwayo, buso bakhe bubheke phansi.
21 Arawuna watsi: “Nkhosi! Inkhosi yami iteleni encekwini yayo?” Davide waphendvula watsi: “Kutawutsenga libala lakho lekubhulela kolo, kuze ngitekwakha khona lilati laSimakadze, khona kutewuncamuka lesifo lesibulala sive.”
22 Arawuna wakhuluma kuDavide, watsi: “Nkhosi! Inkhosi yami ayitsatse nome yini leyitsandzako, iyinikele kuSimakadze. Nati tinkhabi tekwenta umnikelo wekushiswa, nati netihliphi tekubhula nemajoko etinkhabi kutsi abe tinkhuni.
23 Awu! Nkhosi: Konkhe loku Arawuna ukunika inkhosi.” Arawuna wachubeka watsi: “Shangatsi Simakadze, Nkulunkulu wakho, angakwemukela.”
24 Kodvwa inkhosi, Davide, yaphendvula Arawuna, yatsi: “Cha! Ngitakukhokhela ngaloku. Ngingeke ngente umhlatjelo kuSimakadze Nkulunkulu wami, umnikelo wekushiswa lengingakawukhokheli lutfo.” Ngako Davide watsenga libala lekubhulela kolo naletinkhabi, wakukhokhela ngetinhlavu tesiliva letatingaba ngema-50.
25 Davide wase wakha lilati kuSimakadze khona lapho, wenta iminikelo yekushiswa neyebudlelwane. Simakadze wase uyawuva umthandazo lowawentelwa lelo live, lesifo lesase sicedze sive sema-Israyeli sancamuka.