1

¹ ܦܵܘܠܘܿܣ ܫܠܝܼܚܵܐ. ܠܵܐ ܡܸܢ ܒܢܲܝ̈ܢܵܫܵܐ. ܘܠܵܐ ܒܝܲܕ݂ ܒܲܪܢܵܫܵܐ. ܐܸܠܵܐ ܒܝܲܕ݂ ܝܼܫܘܿܥ ܡܫܝܼܚܵܐ ܘܐܲܠܵܗܵܐ ܐܲܒ݂ܘܼܗܝ. ܗܵܘ ܕܐܲܩܝܼܡܹܗ ܡܸܢ ܒܹܝܬ݂ ܡܝܼܬܹ̈ܐ.

² ܘܟ݂ܠܗܘܿܢ ܐܲܚܹ̈ܐ ܕܥܲܡܝ. ܠܥܹܕܬܵܐ ܕܐܝܼܬ݂ ܒܓ̣ܵܠܵܛܝܼܵܐ.

³ ܛܲܝܒܘܼܬ݂ܵܐ ܥܲܡܟ݂ܘܿܢ. ܘܲܫܠܵܡܵܐ ܡܸܢ ܐܲܠܵܗܵܐ ܐܲܒ݂ܵܐ. ܘܡܸܢ ܡܵܪܲܢ ܝܼܫܘܿܥ ܡܫܝܼܚܵܐ.

⁴ ܗܵܘ ܕܝܲܗ̄ܒ݂ ܢܲܦ̮ܫܹܗ ܚܠܵܦ ܚܛܵܗܲܝ̈ܢ: ܕܲܢܦܲܨܹܝܢ ܡܸܢ ܥܵܠܡܵܐ ܗܵܢܵܐ ܒܝܼܫܵܐ. ܐܲܝܟ݂ ܨܸܒ݂ܝܵܢܹܗ ܕܐܲܠܵܗܵܐ ܐܲܒ݂ܘܼܢ.

⁵ ܕܠܹܗ ܫܘܼܒ݂ܚܵܐ ܠܥܵܠܲܡ ܥܵܠܡܝܼܢ ܐܵܡܹܝܢ.

⁶ ܡܸܬܿܕܲܡܲܪ ܐ̄ܢܵܐ ܐܲܝܟܲܢܵܐ ܒܲܥܓܲܠ ܡܸܬ݂ܗܲܦܟ݁ܝܼܢ ܐ̄ܢܬܘܿܢ ܡܸܢ ܡܫܝܼܚܵܐ. ܗܵܘ ܕܲܩܪܵܟ݂ܘܿܢ ܒܛܲܝܒܘܼܬܹܗ. ܠܲܐ̄ܚܪܹܬ݂ܵܐ ܣܒܲܪܬ݂ܵܐ (ܠܲܣܒܲܪܬ݂ܵܐ ܐ̄ܚܪܹܬ݂ܵܐ).

⁷ ܐܲܝܕ݂ܵܐ ܕܠܵܐ ܐܝܼܬܹܝܗ̇. ܐܸܠܵܐ ܐ̄ܢܵܫܵܐ ܗ̄ܘܼ ܐܝܼܬ݂ ܕܕ݂ܵܠܚܝܼܢ ܠܟ݂ܘܿܢ. ܘܨܵܒܹܝܢ ܕܲܢܫܲܚܠܦܘܼܢ ܣܒܲܪܬܹܗ ܕܲܡܫܝܼܚܵܐ.

⁸ ܐܵܦ ܐܸܢ (ܐܵܦܸܢ) ܚܢܲܢ ܕܹܝܢ. ܐܵܘ ܡܲܠܲܐܟ݂ܵܐ ܡܸܢ ܫܡܲܝܵܐ ܢܣܲܒܲܪܟ݂ܘܿܢ ܠܒܲܪ ܡܸܢ ܡܵܐ ܕܣܲܒܲܪܢܵܟ݂ܘܿܢ. ܢܸܗܘܹܐ ܚܪܸܡ.

⁹ ܐܲܝܟܲܢܵܐ ܕܡܸܢ ܠܘܼܩܕ݂ܲܡ ܐܸܡܪܹܬ݂. ܘܗܵܫܵܐ ܬܘܼܒ݂ ܐܵܡܲܪ ܐ̄ܢܵܐ. ܕܐܸܢ ܐ̄ܢܵܫ ܡܣܲܒܲܪ ܠܟ݂ܘܿܢ ܠܒܲܪ ܡܸܢ ܡܵܐ ܕܩܲܒܸܠܬܿܘܢ. ܢܸܗܘܹܐ ܚܪܸܡ.

¹⁰ ܗܵܫܵܐ ܓܹܝܪ ܠܲܒ̣ܢܲܝ̈ܢܵܫܵܐ ܗܘܼ ܡܦܝܼܣ ܐ̄ܢܵܐ ܐܵܘ ܠܐܲܠܵܗܵܐ. ܐܵܘ ܠܲܒ̣ܢܲܝ̈ܢܵܫܵܐ ܒܵܥܹܐ ܐ̄ܢܵܐ ܕܐܸܫܦܲܪ. ܐܸܠܘܼ ܓܹܝܪ ܥܕ݂ܲܡܵܐ ܠܗܵܫܵܐ ܠܲܒ̣ܢܲܝ̈ܢܵܫܵܐ ܫܵܦܲܪ ܗ̄ܘܹܝܬ݂. ܥܲܒ̣ܕܵܐ ܕܲܡܫܝܼܚܵܐ ܠܵܐ ܗܵܘܹܐ ܗ̄ܘܹܝܬ݂.

¹¹ ܡܵܘܕܲܥ ܐ̄ܢܵܐ ܠܟ݂ܘܿܢ ܕܹܝܢ ܐܲܚܲܝ̈. ܕܲܣܒܲܪܬ݂ܵܐ ܕܐܸܣܬܲܒܪܲܬ݂ ܡܹܢܝ. ܠܵܐ ܗܘܸܵܬ݂ ܡܸܢ ܒܲܪܢܵܫܵܐ.

¹² ܐܵܦܠܵܐ ܓܹܝܪ ܐܸܢܵܐ ܡܸܢ ܒܲܪܢܵܫܵܐ ܩܲܒܸܠܬܵܗܿ ܘܝܼܠܸܦܬܵܗܿ. ܐܸܠܵܐ ܒܓܸܠܝܵܢܵܐ ܕܝܼܫܘܿܥ ܡܫܝܼܚܵܐ.

¹³ ܫܡܲܥܬܿܘܿܢ ܓܹܝܪ ܗܘܼܦܵܟܲܝ̈ ܕܡܸܢ ܩܕ݂ܝܼܡ ܕܒܲܝܗܘܼܕ݂ܵܝܘܼܬ݂ܵܐ. ܕܝܲܬܝܼܪܵܐܝܼܬ݂ ܪܵܕܹܦ ܗ̄ܘܹܝܬ݂ ܥܹܕܬܹ݁ܗ ܕܐܲܠܵܗܵܐ. ܘܚܵܪܹܒ݂ ܗ̄ܘܹܝܬ݂ ܠܵܗܿ.

¹⁴ ܘܡܸܬ݂ܝܲܬܲܪ ܗ̄ܘܹܝܬ݂ ܒܲܝܗܘܼܕ݂ܵܝܘܼܬ݂ܵܐ. ܛܵܒ݂ ܡܸܢ ܣܲܓܝܼ̈ܐܹܐ ܒܢܲܝ̈ ܫܢܲܝ̈ ܕܐܝܼܬ݂ ܗ̄ܘܵܐ ܒܛܘܼܗܡܝ. ܘܝܲܬܝܼܪܵܐܝܼܬ݂ ܛܵܐܹܢ ܗ̄ܘܹܝܬ݂ ܒܝܘܼܠܦܵܢܵܐ ܕܐܲܒ݂ܵܗܲܝ̈.

¹⁵ ܟܲܕ݂ ܨܒ݂ܵܐ ܕܹܝܢ ܗܵܘ ܡܲܢ ܕܦܲܪܫܲܢܝ ܡܸܢ ܟܪܸܣ ܐܹܡܝ. ܘܲܩܪܵܢܝ ܒܛܲܝܒܘܼܬܹܗ.

¹⁶ ܕܢܸܓ݂ܠܹܐ ܒܪܹܗ ܒܝܼ. ܕܐܹܣܲܒܪܝܼܘܗܝ ܒܥܲܡ̈ܡܹܐ. ܒܲܪ ܫܵܥܬܹܗ ܠܵܐ ܓܠܝܼܬ݂ ܠܒܸܣܪܵܐ ܘܠܲܕ݂ܡܵܐ.

¹⁷ ܘܠܵܐ ܐܸܙܹܠ̄ܬ݂ ܠܐܘܿܪܸܫܠܸܡ ܠܘܵܬ݂ ܫܠܝܼܚܹ̈ܐ ܕܡܸܢ ܩܕ݂ܵܡܲܝ. ܐܸܠܵܐ ܐܸܙܸܠ̄ܬ݂ ܠܐܵܪܵܒ݂ܝܼܵܐ. ܘܬ݂ܘܼܒ݂ ܗܸܦܟܹܬ݂ ܠܕ݂ܲܪܡܣܘܿܩ.

¹⁸ ܘܡܸܢ ܒܵܬܲܪ ܬܿܠܵܬ݂ ܫܢ̈ܝܼܢ. ܐܸܙܹܠ̄ܬ݂ ܠܐܘܿܪܸܫܠܸܡ ܕܐܸܚܙܹܐ ܠܟܹܐܦܵܐ. ܘܩܵܘܝܼܬ݂ ܠܘܵܬܹܗ ܝܵܘ̈ܡܵܬ݂ܵܐ ܚܲܡܸܫܬܲܥܣܲܪ.

¹⁹ ܠܲܐ̄ܚܪܹܝܢ ܕܹܝܢ ܡܸܢ ܫܠܝܼܚܹ̈ܐ ܠܵܐ ܚܙܹܝܬ݂. ܐܸܠܵܐ ܐܸܢ ܠܝܲܥܩܘܿܒ݂ ܐܲܚܘܼܗܝ ܕܡܵܪܲܢ.

²⁰ ܗܵܠܹܝܢ ܕܹܝܢ ܕܟ݂ܵܬܹܒ݂ ܐ̄ܢܵܐ ܠܟ݂ܘܿܢ. ܗܵܐ ܩܕ݂ܵܡ ܐܲܠܵܗܵܐ ܕܠܵܐ ܡܟܲܕܸܒ݂ ܐ̄ܢܵܐ.

²¹ ܡܸܢ ܒܵܬܲܪ ܗܵܠܹܝܢ. ܐܸܬܹܝܬ݂ ܠܐܲܬ݂ܪ̈ܵܘܵܬ݂ܵܐ ܕܣܘܼܪܝܼܵܐ ܘܲܕ݂ܩܝܼܠܝܼܩܝܼܵܐ.

²² ܘܠܵܐ ܝܵܕ݂̈ܥܵܢ ܗ̄ܘܲܝ̈ ܠܝܼ ܒܐܲܦܝܼ̈ܢ ܥܹ̈ܕܵܬܵܐ ܕܒܲܝܗܘܼܕ݂. ܗܵܠܹܝܢ ܕܒܲܡܫܝܼܚܵܐ.

²³ ܐܸܠܵܐ ܗܵܕܹܐ ܒܲܠܚܘܿܕ݂ ܫܵܡܥܝܼܢ ܗ̄ܘܼܵܘ. ܕܗܵܘ ܕܡܸܢ ܩܕ݂ܝܼܡ ܪܵܕܹܦ ܗ̄ܘܵܐ ܠܲܢ. ܗܵܫܵܐ ܗܵܐ ܡܣܲܒܲܪ ܗܲܝܡܵܢܘܼܬ݂ܵܐ. ܗܵܝ ܕܡܸܢ ܩܕ݂ܵܡ ܙܲܒ݂ܢܵܐ ܡܣܲܚܸܦ ܗ̄ܘܵܐ.

²⁴ ܘܲܡܫܲܒܚܝܼܢ ܗ̄ܘܼܵܘ ܒܝܼ ܠܐܲܠܵܗܵܐ.

2

¹ ܬܘܼܒ݂ ܕܹܝܢ ܡܸܢ ܒܵܬܲܪ ܐܲܪܒܲܥܸܣܪܹܐ ܫܢ̈ܝܼܢ. ܣܸܠܩܹܬ݂ ܠܐܘܿܪܸܫܠܸܡ. ܥܲܡ ܒܲܪܢܒ̣ܵܐ. ܘܕܸܒ݂ܪܹܬ݂ ܥܲܡܝ ܠܛܸܛܘܿܣ.

² ܣܸܠܩܹܬ݂ ܕܹܝܢ ܒܓܸܠܝܵܢܵܐ. ܘܲܓ݂ܠܹܝܬ݂ ܠܗܘܿܢ ܣܒܲܪܬ݂ܵܐ ܕܡܲܟ݂ܪܸܙ ܐ̄ܢܵܐ ܒܥܲܡ̈ܡܹܐ. ܘܚܵܘܝܼܬ݂ܵܗܿ ܠܐܲܝܠܹܝܢ ܕܡܸܣܬܲܒ݂ܪܝܼܢ ܗ̄ܘܼܵܘ ܕܡܸܕܸܡ ܐܝܼܬܲܝܗܘܿܢ ܒܲܝܢܲܝ ܘܲܠܗܘܿܢ. ܕܲܡ ܣܪܝܼܩܵܐܝܼܬ݂ ܪܹܗܛܹܬ݂. ܐܵܘ ܪܵܗܹܛ ܐ̄ܢܵܐ.

³ ܐܵܦ ܛܸܛܘܿܣ ܕܥܲܡܝ ܕܐܲܪܡܵܝܵܐ ܗ̄ܘܵܐ. ܠܵܐ ܐܸܬ݂ܐܢܸܣ ܕܢܸܓ݂ܙܘܿܪ.

⁴ ܡܛܠ ܕܹܝܢ ܐܲܚܹ̈ܐ ܕܲܓܵܠܹ̈ܐ ܕܥܲܠܘ ܥܠܲܝܢ. ܕܢܸܓ݁ܫܘܼܢ ܚܹܐܪܘܼܬ݂ܵܐ ܕܐܝܼܬ݂ ܠܲܢ ܒܝܼܫܘܿܥ ܡܫܝܼܚܵܐ. ܐܲܝܟܲܢܵܐ ܕܲܢܫܲܥܒܕ݂ܘܼܢܵܢܝ.

⁵ ܐܵܦܠܵܐ ܡܠܹܐ ܫܵܥܵܐ ܐܸܬ݂ܪܡܝܼܢ ܠܫܘܼܥܒܵܕ݂ܗܘܿܢ. ܕܲܫܪܵܪܵܗܿ ܕܲܣܒܲܪܬ݂ܵܐ ܢܩܵܘܹܐ ܠܘܵܬ݂ܟ݂ܘܿܢ.

⁶ ܗܵܢܘܿܢ ܕܹܝܢ ܕܡܸܣܬܲܒ݂ܪܝܼܢ ܕܐܝܼܬܲܝܗܘܿܢ ܡܸܕܸܡ. ܡܲܢ ܕܹܝܢ ܐܝܼܬܲܝܗܘܿܢ ܠܵܐ ܒܛܝܼܠ ܠܝܼ. ܐܲܠܵܗܵܐ ܓܹܝܪ ܒܐܲܦܲܝ̈ ܒܢܲܝ̈ܢܵܫܵܐ ܠܵܐ ܢܵܣܹܒ݂. ܗܸܢܘܿܢ ܕܹܝܢ ܗܵܠܹܝܢ. ܡܸܕܸܡ ܠܵܐ ܐܵܘܣܸܦܘ ܠܝܼ.

⁷ ܐܸܠܵܐ ܐ̄ܚܪܵܢܝܵܐܝܼܬ݂. ܚܙܵܘ ܓܹܝܪ ܕܐܸܬ݂ܗܲܝܡܢܹܬ݂ ܣܒܲܪܬ݂ܵܐ ܕܥܘܼܪܠܘܼܬ݂ܵܐ. ܐܲܝܟ݂ ܕܐܸܬ݂ܗܲܝܡܲܢ ܟܹܐܦܵܐ ܒܲܓܙܘܼܪܬܵܐ.

⁸ ܗܵܘ ܓܹܝܪ ܕܚܲܦܸܛ ܠܟܹܐܦܵܐ ܒܲܫܠܝܼܚܘܬ݂ܵܐ ܕܲܓܙܘܼܪܬܵܐ. ܚܲܦܸܛ ܐܵܦ ܠܝܼ ܒܲܫܠܝܼܚܘܬ݂ܵܐ ܕܥܲܡ̈ܡܹܐ.

⁹ ܘܟܲܕ݂ ܝܼܕ݂ܲܥܘ ܛܲܝܒܘܼܬ݂ܵܐ ܕܐܸܬ݂ܝܲܗܒܲܬ݂ ܠܝܼ. ܝܲܥܩܘܿܒ݂ ܘܟܹܐܦܵܐ ܘܝܘܿܚܲܢܵܢ. ܗܵܢܘܿܢ ܕܡܸܣܬܲܒ݂ܪܝܼܢ ܗ̄ܘܼܵܘ ܕܐܝܼܬܲܝܗܘܿܢ ܥܲܡܘܼܕܹ̈ܐ. ܝܲܡܝܼܢܵܐ ܕܫܵܘܬܵܦܘܼܬ݂ܵܐ ܝܲܗ̄ܒ݂ܘ ܠܝܼ ܘܲܠܒܲܪܢܒ̣ܵܐ. ܕܲܚܢܲܢ ܒܥܲܡ̈ܡܹܐ. ܘܗܸܢܘܿܢ ܒܲܓ̣ܙܘܼܪܬܵܐ.

¹⁰ ܒܲܠܚܘܿܕ݂ ܕܲܠܡܸܣܟܹܢܹ̈ܐ ܗܘܲܝܢ ܥܵܗܕܝܼܢ ܚ̄ܢܲܢ. ܘܐܸܬ݂ܒܛܸܠ ܠܝܼ ܕܗܝܼ ܗܵܕܹܐ ܐܸܥܒܕ݂ܝܼܗܿ.

¹¹ ܟܲܕ݂ ܐܸܬ݂ܵܐ ܕܹܝܢ ܟܹܐܦܵܐ ܠܐܲܢܛܝܼܘܿܟ݂ܝܼ. ܒܐܲܦܵܘ̈ܗܝ ܐܲܟܸܣܬܹ݁ܗ. ܡܛܠ ܕܡܸܬܿܬܲܩܠܝܼܢ ܗ̄ܘܼܵܘ ܒܹܗ.

¹² ܕܥܲܕ݂ܠܵܐ ܢܹܐܬ݂ܘܿܢ ܐ̄ܢܵܫܵܐ ܡܸܢ ܠܘܵܬ݂ ܝܲܥܩܘܿܒ݂. ܥܲܡ ܥܲܡ̈ܡܹܐ ܐܵܟܹܠ ܗ̄ܘܵܐ. ܟܲܕ݂ ܐܸܬ݂ܵܘ ܕܹܝܢ. ܢܓܲܕ݂ ܗ̄ܘܵܐ ܢܲܦ̮ܫܹܗ. ܘܲܦܪܲܫ. ܡܛܠ ܕܕ݂ܵܚܹܠ ܗ̄ܘܵܐ ܡܸܢ ܗܵܢܘܿܢ ܕܡܸܢ ܓܙܘܼܪܬܵܐ.

¹³ ܘܐܸܬ݂ܪܡܝܼܘ ܗ̄ܘܼܵܘ ܥܲܡܹܗ ܠܗܵܕܹܐ ܐܵܦ ܫܲܪܟܵܐ ܕܲܝܗ̄ܘܼܕ݂ܵܝܹ̈ܐ. ܗܵܟܲܢܵܐ ܕܐܵܦ ܒܲܪܢܒ̣ܵܐ ܐܸܬ݂ܕܒܲܪ ܗ̄ܘܵܐ ܠܡܸܣܲܒ݂ ܒܐܲܦܲܝ̈ܗܘܿܢ.

¹⁴ ܘܟܲܕ݂ ܚܙܹܝܬ݂ ܕܠܵܐ ܐܵܙܠ̄ܝܼܢ ܬܿܪܝܼܨܵܐܝܼܬ݂ ܒܲܫܪܵܪܹܗ ܕܐܹܘܲܢܓܲܠܝܼܘܿܢ. ܐܸܡܪܹܬ݂ ܠܟܹܐܦܵܐ ܠܥܹܝܢ ܟܠܗܘܿܢ. ܐܸܢ ܐܲܢ̄ܬܿ ܕܲܝܗܘܼܕ݂ܵܝܵܐ ܐܲܢ̄ܬܿ ܐܲܪܡܵܐܝܼܬ݂ ܚܵܝܹܿܐ ܐܲܢ̄ܬܿ. ܘܠܵܐ ܝܗ̄ܘܼܕ݂ܵܐܝܼܬ݂. ܐܲܝܟܲܢܵܐ ܐܵܠܹܨ ܐܲܢ̄ܬܿ ܠܥܲܡ̈ܡܹܐ ܕܲܝܗ̄ܘܼܕ݂ܵܐܝܼܬ݂ ܢܸܚܘܿܢ.

¹⁵ ܚܢܲܢ ܓܹܝܪ ܕܡܸܢ ܟܝܵܢܲܢ ܝܗ̄ܘܼܕ݂ܵܝܹ̈ܐ ܚ̄ܢܲܢ ܘܠܵܐ ܗܘܲܝܢ ܡܸܢ ܥܲܡ̈ܡܹܐ ܚܲܛܵܝܹ̈ܐ:

¹⁶ ܡܛܠ ܕܝܵܕ݂ܥܝܼܢ ܚ̄ܢܲܢ ܕܠܵܐ ܡܸܙܕܲܕܲܩ ܒܲܪܢܵܫܵܐ ܡܸܢ ܥܒ݂ܵܕܹ̈ܐ ܕܢܵܡܘܿܣܵܐ. ܐܸܠܵܐ ܒܗܲܝܡܵܢܘܼܬ݂ܵܐ ܕܝܼܫܘܿܥ ܡܫܝܼܚܵܐ. ܐܵܦ ܚܢܲܢ ܒܹܗ ܒܝܼܫܘܿܥ ܡܫܝܼܚܵܐ ܗܲܝܡܸܢ̄ܢ. ܕܡܸܢ ܗܲܝܡܵܢܘܼܬܹܗ ܕܲܡܫܝܼܚܵܐ ܢܸܙܕܲܕܲܩ. ܘܠܵܐ ܡܸܢ ܥܒ݂ܵܕܹ̈ܐ ܕܢܵܡܘܿܣܵܐ. ܡܛܠ ܕܡܸܢ ܥܒ݂ܵܕܹ̈ܐ ܕܢܵܡܘܿܣܵܐ. ܠܵܐ ܡܸܙܕܲܕܲܩ ܟܠ ܒܣܲܪ.

¹⁷ ܐܸܢ ܕܹܝܢ ܟܲܕ݂ ܒܵܥܹܝܢ ܚ̄ܢܲܢ ܕܢܸܙܕܲܕܲܩ ܒܲܡܫܝܼܚܵܐ. ܐܸܫܬܿܟܲܚܢ ܠܲܢ ܐܵܦ ܚܢܲܢ ܚܲܛܵܝܹ̈ܐ. ܡܵܕܹܝܢ ܝܼܫܘܿܥ ܡܫܝܼܚܵܐ ܡܫܲܡܫܵܢܵܐ ܗ̄ܘܼ ܕܲܚܛܝܼܬ݂ܵܐ. ܚܵܣ.

¹⁸ ܐܸܢ ܓܹܝܪ ܠܐܲܝܠܹܝܢ ܕܣܸܬ݂ܪܹܬ݂ ܬܘܼܒ݂ ܠܗܹܝܢ ܒܵܢܹܐ ܐ̄ܢܵܐ. ܚܵܘܝܼܬ݂ ܥܲܠ ܢܲܦ̮ܫܝ ܕܥܵܒܲܪ ܥܲܠ ܦܘܼܩܕܵܢܵܐ ܐ̄ܢܵܐ.

¹⁹ ܐܸܢܵܐ ܓܹܝܪ ܒܢܵܡܘܿܣܵܐ ܠܢܵܡܘܿܣܵܐ ܡܝܼܬܹܬ݂. ܕܠܲܐܠܵܗܵܐ ܐܸܚܹܐ.

²⁰ ܘܥܲܡ ܡܫܝܼܚܵܐ ܙܩܝܼܦ ܐ̄ܢܵܐ. ܘܡܸܟܹܝܠ ܠܵܐ ܗ̄ܘܵܐ ܐܸܢܵܐ ܚܲܝ ܐ̄ܢܵܐ. ܐܸܠܵܐ ܚܲܝ ܒܝܼ ܡܫܝܼܚܵܐ. ܘܗܵܢܵܐ ܕܗܵܫܵܐ ܚܲܝ ܐ̄ܢܵܐ ܒܲܒ݂ܣܲܪ. ܒܗܲܝܡܵܢܘܼܬ݂ܵܐ ܗ̄ܘܼ ܕܲܒ݂ܪܹܗ ܕܐܲܠܵܗܵܐ ܚܲܝ ܐ̄ܢܵܐ. ܗܵܘ ܕܐܲܚܒܲܢ (ܕܐܲܚܒܲܢܝ). ܘܝܲܗ̄ܒ݂ ܢܲܦ̮ܫܹܗ ܚܠܵܦܲܝܢ (ܚܠܵܦܲܝ).

²¹ ܠܵܐ ܛܵܠܹܡ ܐ̄ܢܵܐ ܛܲܝܒܘܼܬܹܗ ܕܐܲܠܵܗܵܐ. ܐܸܢ ܓܹܝܪ ܒܝܲܕ݂ ܢܵܡܘܿܣܵܐ ܗܝܼ ܙܲܕܝܼܩܘܼܬ݂ܵܐ. ܡܫܝܼܚܵܐ ܡܲܓܵܢ ܡܝܼܬ݂.

3

¹ ܐܘܿ ܚܲܣܝܼܪ̈ܲܝ ܪܸܥܝܵܢܵܐ ܓܵܠܵܛܵܝܹ̈ܐ. ܡܲܢܘܼ ܚܣܲܡ ܒܟ݂ܘܿܢ. ܕܗܵܐ ܐܲܝܟ݂ ܗܵܘ ܕܲܡܨܵܪ. ܨܝܼܪ ܗ̄ܘܵܐ ܩܕ݂ܵܡ ܥܲܝܢܲܝ̈ܟܿܘܿܢ ܝܼܫܘܿܥ ܡܫܝܼܚܵܐ. ܟܲܕ݂ ܨܠܝܼܒ݂.

² ܗܵܕܹܐ ܒܲܠܚܘܿܕ݂ ܨܵܒܹܐ ܐ̄ܢܵܐ ܕܐܸܕܲܥ ܡܸܢܟ݂ܘܿܢ. ܡܸܢ ܥܒ݂ܵܕܹ̈ܐ ܕܢܵܡܘܿܣܵܐ ܢܣܲܒ݂ܬܿܘܢ ܪܘܼܚܵܐ. ܐܵܘ ܡܸܢ ܫܸܡܥܵܐ ܕܗܲܝܡܵܢܘܼܬ݂ܵܐ.

³ ܗܵܟܲܢܵܐ ܣܲܟ݂ܠܝܼܢ ܐ̄ܢܬܘܿܢ. ܕܫܲܪܝܼܬܿܘܢ ܒܪܘܼܚܵܐ. ܘܗܵܫܵܐ ܒܲܒ݂ܣܲܪ ܡܫܲܠܡܝܼܢ ܐ̄ܢܬܘܿܢ.

⁴ ܗܵܠܹܝܢ ܟܠܗܹܝܢ ܐܝܼܩܹܐ (ܐܝܼܩܹܐ ܗ̄ܘ̣) ܣܲܝܒܲܪܬܿܘܢ. ܘܐܸܫܬܿܘܦ ܕܹܝܢ ܐܝܼܩܹܐ.

⁵ ܗܵܘ ܗܵܟܹܝܠ ܕܝܲܗ̄ܒ݂ ܒܟ݂ܘܿܢ ܪܘܼܚܵܐ. ܘܣܵܥܲܪ ܒܟ݂ܘܿܢ ܚܲܝ̈ܠܹܐ. ܡܸܢ ܥܒ݂ܵܕܹ̈ܐ ܕܢܵܡܘܿܣܵܐ ܐܵܘ ܡܸܢ ܫܸܡܥܵܐ ܕܗܲܝܡܵܢܘܼܬ݂ܵܐ.

⁶ ܐܲܝܟܲܢܵܐ ܕܗܲܝܡܸܢ ܐܲܒ݂ܪܵܗܵܡ ܠܐܲܠܵܗܵܐ. ܘܐܸܬ݂ܚܲܫܒܲܬ݂ ܠܹܗ ܠܙܲܕܝܼܩܘܼ.

⁷ ܕܲܥܘ ܗܵܟܹܝܠ ܕܐܲܝܠܹܝܢ ܕܡܸܢ ܗܲܝܡܵܢܘܼܬ݂ܵܐ ܐܸܢܘܿܢ. ܗܸܢܘܿܢ ܐܸܢܘܿܢ ܒ̈ܢܲܝܵܐ ܕܐܲܒ݂ܪܵܗܵܡ.

⁸ ܡܛܠ ܓܹܝܪ ܕܩܲܕܸܡ ܝܼܕ݂ܲܥ ܐܲܠܵܗܵܐ. ܕܲܒ݂ܗܲܝܡܵܢܘܼܬ݂ܵܐ ܗ̄ܘܼ ܡܸܙܕܲܕܩܝܼܢ ܥܲܡ̈ܡܹܐ. ܩܲܕܸܡ ܣܲܒܲܪ ܠܐܲܒ݂ܪܵܗܵܡ. ܐܲܝܟ݂ ܕܐܵܡܲܪ ܟܬ݂ܵܒ݂ܵܐ ܩܲܕܝܼܫܵܐ. ܕܒ݂ܵܟ݂ ܢܸܬ݂ܒܲܪܟ݂ܘܼܢ ܟܠܗܘܿܢ ܥܲܡ̈ܡܹܐ.

⁹ ܡܵܕܹܝܢ ܡܗܲܝܡܢܹ̈ܐ ܗ̄ܘܼ ܡܸܬ݂ܒܲܪܟ݂ܝܼܢ ܒܐܲܒ݂ܪܵܗܵܡ ܡܗܲܝܡܢܵܐ.

¹⁰ ܐܲܝܠܹܝܢ ܓܹܝܪ ܕܡܸܢ ܥܒ݂ܵܕܹ̈ܐ ܐܸܢܘܿܢ ܕܢܵܡܘܿܣܵܐ. ܬܚܹܝܬ݂ ܠܵܘܛܬ݂ܵܐ ܐܸܢܘܿܢ. ܟܬ݂ܝܼܒ݂ ܓܹܝܪ. ܕܠܝܼܛ ܗܘܼ ܟܠܡܲܢ ܕܠܵܐ ܢܸܥܒܸܕ݂ ܟܠ ܕܲܟ̣ܬ݂ܝܼܒ݂ ܒܢܵܡܘܿܣܵܐ ܗܵܢܵܐ.

¹¹ ܕܠܵܐ ܕܹܝܢ ܡܸܙܕܲܕܲܩ ܐ̄ܢܵܫ ܒܢܵܡܘܿܣܵܐ ܠܘܵܬ݂ ܐܲܠܵܗܵܐ. ܗܵܕܹܐ ܓܲܠܝܵܐ ܗ̄ܝܼ. ܡܛܠ ܕܲܟ̣ܬ݂ܝܼܒ݂. ܕܙܲܕܝܼܩܵܐ ܒܗܲܝܡܵܢܘܼܬ݂ܵܐ ܢܸܚܹܐ.

¹² ܢܵܡܘܿܣܵܐ ܕܹܝܢ ܠܵܐ ܗ̄ܘܵܐ ܡܸܢ ܗܲܝܡܵܢܘܼܬ݂ܵܐ. ܐܸܠܵܐ ܡܲܢ ܕܢܸܥܒܸܕ݂ ܐܲܝܠܹܝܢ ܕܲܟ̣ܬ݂ܝܼ̈ܒ݂ܵܢ ܒܹܗ. ܢܸܚܹܐ ܒܗܹܝܢ.

¹³ ܠܲܢ ܕܹܝܢ ܡܫܝܼܚܵܐ ܙܲܒ݂ܢܲܢ ܡܸܢ ܠܵܘܛܬ݂ܵܐ ܕܢܵܡܘܿܣܵܐ. ܘܗܘܼ ܗܘܵܐ ܚܠܵܦܲܝܢ ܠܵܘܛܬ݂ܵܐ. ܟܬ݂ܝܼܒ݂ ܓܹܝܪ. ܕܠܝܼܛ ܗܘܼ ܟܠܡܲܢ ܕܡܸܬ݁ܬ݁ܠܹܐ ܒܩܲܝܣܵܐ.

¹⁴ ܕܲܒ݂ܥܲܡ̈ܡܹܐ ܬܸܗܘܹܐ ܒܘܼܪܟܬܹܗ ܕܐܲܒ݂ܪܵܗܵܡ ܒܝܼܫܘܿܥ ܡܫܝܼܚܵܐ. ܘܲܚܢܲܢ ܢܸܣܲܒ݂ ܫܘܼܘܕܵܝܵܐ ܕܪܘܼܚܵܐ ܒܗܲܝܡܵܢܘܼܬ݂ܵܐ.

¹⁵ ܐܲܚܲܝ̈. ܐܲܝܟ݂ ܕܒܹܝܬ݂ ܒܢܲܝ̈ܢܵܫܵܐ ܐܵܡܲܪ ܐ̄ܢܵܐ. ܕܲܕ݂ܝܵܬܹܩܹܐ ܕܒܲܪܢܵܫܵܐ ܕܐܸܫܬܲܪܪܲܬ݂. ܐ̄ܢܵܫ ܠܵܐ ܡܲܣܠܹܐ ܐܵܘ ܡܫܲܚܠܸܦ ܒܵܗܿ ܡܸܕܸܡ.

¹⁶ ܠܐܲܒ݂ܪܵܗܵܡ ܕܹܝܢ ܐܸܬ݂ܡܠܸܟ݂ ܡܘܼܠܟܵܢܵܐ. ܘܲܠܙܲܪܥܹܗ. ܘܠܵܐ ܐܸܡܲܪ ܠܹܗ ܕܲܠܙܲܪ̈ܥܲܝܟ. ܐܲܝܟ݂ ܕܲܠܣܲܓܝܼ̈ܐܹܐ. ܐܸܠܵܐ ܠܙܲܪܥܵܟ݂. ܐܲܝܟ݂ ܕܲܠܚܲܕ݂. ܗܵܘ ܕܐܝܼܬ݂ܵܘܗܝ ܡܫܝܼܚܵܐ.

¹⁷ ܗܵܕܹܐ ܕܹܝܢ ܐܵܡܲܪ ܐ̄ܢܵܐ. ܕܲܕ݂ܝܵܬܹܩܹܐ ܕܡܸܢ ܩܕ݂ܝܼܡ ܐܸܫܬܲܪܪܲܬ݂ ܡܸܢ ܐܲܠܵܗܵܐ ܒܲܡܫܝܼܚܵܐ. ܢܵܡܘܿܣܵܐ ܗܘܼ ܕܲܗܘܵܐ ܡܸܢ ܒܵܬܲܪ ܐܲܪܒܲܥܡܵܐܐ ܘܲܬ݂ܠܵܬ݂ܝܼܢ ܫܢ̈ܝܼܢ: ܠܵܐ ܡܸܫܟܲܚ ܕܢܲܣܠܹܝܗ̇ ܘܲܢܒܲܛܸܠ ܡܘܼܠܟܵܢܵܐ.

¹⁸ ܐܸܢ ܕܹܝܢ ܡܸܢ ܢܵܡܘܿܣܵܐ ܗ̄ܝܼ ܝܵܪܬܘܼܬ݂ܵܐ. ܡܸܟܹܝܠ ܠܵܐ ܗ̄ܘܵܬ݂ ܡܸܢ ܡܘܼܠܟܵܢܵܐ. ܠܐܲܒ݂ܪܵܗܵܡ ܕܹܝܢ ܒܡܘܼܠܟܵܢܵܐ ܗ̄ܘܼ ܝܲܗ̄ܒ݂ ܠܹܗ ܐܲܠܵܗܵܐ.

¹⁹ ܡܵܢܵܐ ܗܵܟܹܝܠ ܢܵܡܘܿܣܵܐ. ܡܛܠ ܡܲܣܛܝܵܢܘܼܬ݂ܵܐ ܐܸܬܿܬܵܘܣܲܦ. ܥܕ݂ܲܡܵܐ ܕܢܹܐܬܹܐ ܙܲܪܥܵܐ. ܗܵܘ ܕܠܹܗ ܗܘܵܐ ܫܘܼܘܕܵܝܵܐ. ܘܐܸܬ݂ܝܼܗܸܒ݂ ܗܘ݀ ܢܵܡܘܿܣܵܐ ܒܝܲܕ݂ ܡܲܠܲܐܟܹ̈ܐ. ܒܐܝܼܕ݂ܵܐ ܕܡܸܨܥܵܝܵܐ.

²⁰ ܡܸܨܥܵܝܵܐ ܕܹܝܢ ܠܵܐ ܗ̄ܘܵܐ ܕܚܲܕ݂. ܐܲܠܵܗܵܐ ܕܹܝܢ ܚܲܕ݂ ܗ̄ܘܼ.

²¹ ܢܵܡܘܿܣܵܐ ܗܵܟܹܝܠ ܣܲܩܘܼܒ݂ܠܵܐ ܗ̄ܘܼ ܕܡܘܼܠܟܵܢܵܐ ܕܐܲܠܵܗܵܐ. ܚܵܣ. ܐܸܠܘܼ ܓܹܝܪ ܐܸܬ݂ܝܼܗܸܒ݂ ܗ̄ܘܵܐ ܢܵܡܘܿܣܵܐ. ܐܲܝܢܵܐ ܕܡܸܫܟܲܚ ܗ̄ܘܵܐ ܠܡܲܚܵܝܘܼ. ܫܲܪܝܼܪܵܐܝܼܬ݂ ܡܸܢ ܢܵܡܘܿܣܵܐ ܗܵܘܝܵܐ ܗ̄ܘܵܬ݂ ܙܲܕܝܼܩܘܼܬ݂ܵܐ.

²² ܐܸܠܵܐ ܚܒܲܫ ܟܬ݂ܵܒ݂ܵܐ ܟܠܡܸܕܸܡ ܬܚܹܝܬ݂ ܚܛܝܼܬ݂ܵܐ. ܕܡܘܼܠܟܵܢܵܐ ܒܗܲܝܡܵܢܘܼܬ݂ܵܐ ܕܝܼܫܘܿܥ ܡܫܝܼܚܵܐ ܢܸܬ݂ܝܼܗܸܒ݂ ܠܐܲܝܠܹܝܢ ܕܲܡܗܲܝܡܢܝܼܢ.

²³ ܥܲܕ݂ܠܵܐ ܕܹܝܢ ܬܹܐܬܹܐ ܗܲܝܡܵܢܘܼܬ݂ܵܐ. ܢܵܡܘܿܣܵܐ ܢܵܛܲܪ ܗ̄ܘܵܐ ܠܲܢ. ܟܲܕ݂ ܚܒ݂ܝܼܫܝܼܢ ܚ̄ܢܲܢ ܠܗܲܝܡܵܢܘܼܬ݂ܵܐ. ܕܲܥܬ݂ܝܼܕ݂ܵܐ ܗܘܸܵܬ݂ ܠܡܸܬ݂ܓ݁ܠܵܝܘܼ.

²⁴ ܢܵܡܘܿܣܵܐ ܗܵܟܹܝܠ ܬܵܪܐܵܐ ܗܘܵܐ ܠܲܢ ܠܘܵܬ݂ ܡܫܝܼܚܵܐ. ܕܡܸܢ ܗܲܝܡܵܢܘܼܬ݂ܵܐ ܢܸܙܕܲܕܲܩ.

²⁵ ܟܲܕ݂ ܐܸܬܲܬܸ ܕܹܝܢ ܗܲܝܡܵܢܘܼܬ݂ܵܐ. ܠܵܐ ܗܘܲܝܢ ܬܚܹܝܬ݂ ܬܵܪ̈ܐܹܐ.

²⁶ ܟܠܟ݂ܘܿܢ ܓܹܝܪ ܒ̈ܢܲܝܵܐ ܐܲܢ̄ܬܿܘܿܢ ܕܐܲܠܵܗܵܐ ܒܗܲܝܡܵܢܘܼܬ݂ܵܐ ܕܝܼܫܘܿܥ ܡܫܝܼܚܵܐ.

²⁷ ܐܲܝܠܹܝܢ ܓܹܝܪ ܕܒܲܡܫܝܼܚܵܐ ܥܡܲܕܬܿܘܢ. ܠܲܡܫܝܼܚܵܐ ܠܒܸܫܬܿܘܢ.

²⁸ ܠܲܝܬܿ ܝܗ̄ܘܼܕ݂ܵܝܵܐ. ܘܠܵܐ ܐܲܪܡܵܝܵܐ. ܠܲܝܬܿ ܥܲܒ݂ܕܵܐ. ܘܠܵܐ ܒܲܪ ܚܹܐܪܹ̈ܐ. ܠܲܝܬܿ ܕܸܟ݂ܪܵܐ. ܘܠܵܐ ܢܸܩܒ݁ܬ݂ܵܐ. ܟܠܟ݂ܘܿܢ ܓܹܝܪ ܚܲܕ݂ ܐܲܢ̄ܬܿܘܿܢ ܒܝܼܫܘܿܥ ܡܫܝܼܚܵܐ.

²⁹ ܘܐܸܢ ܕܲܡܫܝܼܚܵܐ ܐܲܢ̄ܬܘܿܢ. ܡܸܟܹܝܠ ܙܲܪܥܹܗ ܐܲܢ̄ܬܿܘܿܢ ܕܐܲܒ݂ܪܵܗܵܡ. ܘܝܵܪ̈ܬܹܐ ܒܡܘܼܠܟܵܢܵܐ.

4

¹ ܐܵܡܲܪ ܐ̄ܢܵܐ ܕܹܝܢ ܕܲܟ݂ܡܵܐ ܙܲܒ݂ܢܵܐ ܕܝܵܪܬܵܐ ܛܠܹܐ. ܠܵܐ ܦܪܝܼܫ ܡܸܢ ܥܲܒ݂ܕܵܐ: ܟܲܕ݂ ܡܵܪܹܐ ܗܘܼ ܕܟ݂ܠܗܘܿܢ.

² ܐܸܠܵܐ ܬܚܹܝܬ݂ ܐܲܦܸܛܪ̈ܘܿܦܹܐ ܐܝܼܬ݂ܵܘܗܝ. ܘܪ̈ܲܒܲܝ ܒܵܬܹ̈ܐ. ܥܕ݂ܲܡܵܐ ܠܙܲܒ݂ܢܵܐ ܕܣܵܡ ܐܲܒ݂ܘܼܗܝ.

³ ܗܵܟܲܢܵܐ ܐܵܦ ܚܢܲܢ. ܟܲܕ݂ ܝܲܠܘܼܕܹ̈ܐ ܗ̄ܘܲܝܢ. ܬܚܹܝܬ݂ ܐܸܣܛܘܼܟ̣ܣܵܘ̈ܗܝ ܕܥܵܠܡܵܐ ܡܫܲܥܒ݁ܕ݂ܝܼܢ ܗܘܲܝܢ.

⁴ ܟܲܕ݂ ܡܛܵܐ ܕܹܝܢ ܫܘܼܠܵܡܹܗ ܕܙܲܒ݂ܢܵܐ. ܫܲܕܲܪ ܐܲܠܵܗܵܐ ܠܲܒ݂ܪܹܗ. ܘܲܗܘܵܐ ܡܸܢ ܐܲܢ̄ܬܿܬ݂ܵܐ. ܘܲܗܘܵܐ ܬܚܹܝܬ݂ ܢܵܡܘܿܣܵܐ.

⁵ ܕܠܲܐܝܠܹܝܢ ܕܲܬ݂ܚܹܝܬ݂ ܢܵܡܘܿܣܵܐ ܐܸܢܘܿܢ ܢܸܙܒܸܢ. ܘܲܢܩܲܒܸܠ ܣܝܼܡܲܬ݂ ܒ̈ܢܲܝܵܐ.

⁶ ܘܕ݂ܐܝܼܬܲܝܟܘܿܢ ܕܹܝܢ ܒ̈ܢܲܝܵܐ. ܫܲܕܲܪ ܐܲܠܵܗܵܐ ܪܘܼܚܵܐ ܕܲܒ݂ܪܹܗ ܠܠܸܒܵܘܵܬ݂̈ܟ݂ܘܿܢ. ܗܵܝ ܕܩܵܪܝܵܐ ܐܲܒܵܐ ܐܲܒ݂ܘܼܢ.

⁷ ܡܸܟܹܝܠ ܠܵܐ ܗܘܲܝܬܿܘܿܢ ܥܲܒ݂ܕܹ̈ܐ. ܐܸܠܵܐ ܒ̈ܢܲܝܵܐ. ܘܐܸܢ ܒ̈ܢܲܝܵܐ. ܐܵܦ ܝܵܪ̈ܬܹܐ ܕܐܲܠܵܗܵܐ ܒܝܲܕ݂ ܝܼܫܘܿܥ ܡܫܝܼܚܵܐ.

⁸ ܗܵܝܕܹܝܢ ܓܹܝܪ ܟܲܕ݂ ܠܵܐ ܝܵܕ݂ܥܝܼܢ ܗܘܲܝܬܿܘܿܢ ܠܐܲܠܵܗܵܐ. ܦܠܲܚܬܿܘܢ ܠܗܵܢܘܿܢ. ܕܡܸܢ ܟܝܵܢܗܘܿܢ ܠܵܐ ܗ̄ܘܵ݀ܘ ܐܲܠܵܗܹ̈ܐ.

⁹ ܗܵܫܵܐ ܕܹܝܢ ܕܝܼܕ݂ܲܥܬܿܘܿܢ ܠܐܲܠܵܗܵܐ: ܘܝܲܬܝܼܪܵܐܝܼܬ݂ ܕܐܸܬ݂ܝܼܕ݂ܲܥܬܿܘܿܢ ܡܸܢ ܐܲܠܵܗܵܐ. ܬܘܼܒ݂ ܗܦܲܟ݂ܬܿܘܿܢ ܠܟ݂ܘܿܢ ܥܲܠ ܗܵܢܘܿܢ ܐܸܣܛܘܼܟ̣ܣܹ̈ܐ ܡܲܪ̈ܥܹܐ ܘܡܸܣܟܹܢܹ̈ܐ: ܘܡܸܢ ܕܪܹܫ ܨܵܒܹܝܢ ܐ̄ܢܬܿܘܿܢ ܠܡܸܫܬܲܥܒܵܕ݂ܘܼ ܠܗܘܿܢ.

¹⁰ ܝܵܘܡܹ̈ܐ ܘܝܲܪ̈ܚܹܐ ܘܙܲܒ݂ܢܹ̈ܐ ܘܲܫ̈ܢܲܝܵܐ. ܢܵܛܪܝܼܬܿܘܢ.

¹¹ ܕܵܚܹܠ ܐ̄ܢܵܐ. ܕܲܠܡܵܐ ܣܪܝܼܩܵܐܝܼܬ݂ ܠܐܝܼܬ݂ ܒܟ݂ܘܿܢ.

¹² ܗܘܵܘ ܐܲܟ݂ܘܵܬ݂ܝ. ܡܛܠ ܕܐܵܦ ܐܸܢܵܐ ܐܲܟ݂ܘܵܬ݂ܟ݂ܘܿܢ ܗ̄ܘܹܝܬ݂. ܐܲܚܲܝ̈. ܒܵܥܹܐ ܐ̄ܢܵܐ ܡܸܢܟ݂ܘܿܢ. ܠܵܐ ܡܸܕܸܡ ܐܲܣܟܠܬܿܘܿܢ ܒܝܼ.

¹³ ܝܵܕ݂ܥܝܼܢ ܐ̄ܢܬܘܿܢ ܓܹܝܪ ܕܒܲܟ݂ܪܝܼܗܘܼܬ݂ ܒܸܣܪܝ ܣܲܒܲܪܬܿܟ݂ܘܿܢ ܗ̄ܘܹܝܬ݂ ܡܸܢ ܩܕ݂ܝܼܡ.

¹⁴ ܘܢܸܣܝܘܿܢܵܐ ܕܒܸܣܪܝ ܠܵܐ ܫܵܛܬܿܘܿܢ. ܘܠܵܐ ܢܲܕܬܿܘܿܢ. ܐܸܠܵܐ ܐܲܝܟ݂ ܕܲܠܡܲܠܲܐܟ݂ܵܐ ܕܐܲܠܵܗܵܐ ܩܲܒܸܠܬܿܘܿܢܵܢܝ. ܘܐܲܝܟ݂ ܕܲܠܝܼܫܘܿܥ ܡܫܝܼܚܵܐ.

¹⁵ ܐܲܝܟܵܘ ܗܵܟܹܝܠ ܛܘܼܒ݂ܟ݂ܘܿܢ. ܣܵܗܹܕ݂ ܐ̄ܢܵܐ ܓܹܝܪ ܥܠܲܝܟܿܘܿܢ ܕܐܸܠܘܼ ܡܸܫܟܚܵܐ ܗ̄ܘܵܬ݂. ܥܲܝܢܲܝ̈ܟܿܘܿܢ ܚܵܨܹܝܢ ܗܘܲܝܬܿܘܢ. ܘܝܵܗܒ̇ܝܼܢ ܠܝܼ.

¹⁶ ܕܲܠܡܵܐ ܒܥܸܠܕܒ݂ܵܒ݂ܵܐ ܗ̄ܘܹܝܬ݂ ܠܟ݂ܘܿܢ ܕܐܲܟ݂ܪܙܹܬ݂ ܠܟ݂ܘܿܢ ܫܪܵܪܵܐ.

¹⁷ ܚܵܣܡܝܼܢ ܒܟ݂ܘܿܢ. ܠܵܐ ܗ̄ܘܵܐ ܠܫܲܦܝܼܪܬܵܐ. ܐܸܠܵܐ ܠܡܸܚܒܲܫܟ݂ܘܿܢ ܗܘܼ ܨܵܒܹܝܢ. ܕܐܲܢ̄ܬܿܘܿܢ ܬܸܗܘܘܿܢ ܚܵܣܡܝܼܢ ܒܗܘܿܢ.

¹⁸ ܫܲܦܝܼܪ ܗܘܼ ܕܹܝܢ ܕܬܸܬ݂ܚܲܣܡܘܼܢ ܒܫܲܦܝܼܪ̈ܵܬ݂ܵܐ ܒܟ݂ܠܙܒܲܢ. ܘܠܵܐ ܐܸܡܲܬ݂ܝ ܕܲܠܘܵܬ݂ܟ݂ܘܿܢ ܐ̄ܢܵܐ ܒܲܠܚܘܿܕ݂.

¹⁹ ܒܢܲܝ̈. ܐܲܝܠܹܝܢ ܕܡܸܢ ܕܪܹܫ ܡܚܲܒܸܠ ܐ̄ܢܵܐ. ܥܕ݂ܲܡܵܐ ܕܢܸܬ݁ܬ݁ܨܝܼܪ ܒܟ݂ܘܿܢ ܡܫܝܼܚܵܐ.

²⁰ ܨܵܒܹܐ ܗ̄ܘܹܝܬ݂ ܕܹܝܢ ܕܐܸܗܘܹܐ ܠܘܵܬ݂ܟ݂ܘܿܢ ܗܵܫܵܐ. ܘܐܹܫܲܚܠܸܦ ܒܲܪܬ݂ ܩܵܠܝ: ܡܛܠ ܕܬܲܡܝܼܗ ܐ̄ܢܵܐ ܒܟ݂ܘܿܢ.

²¹ ܐܸܡܲܪܘ ܠܝܼ. ܐܲܢ̄ܬܿܘܿܢ ܐܲܝܠܹܝܢ ܕܨܵܒܹܝܢ ܕܢܸܗܘܘܿܢ ܬܚܹܝܬ݂ ܢܵܡܘܿܣܵܐ. ܠܹܗ ܠܢܵܡܘܿܣܵܐ ܠܵܐ ܫܵܡܥܝܼܢ ܐܢ̄ܬܘܿܢ.

²² ܟܬ݂ܝܼܒ݂ ܓܹܝܪ ܕܠܲܐܒ݂ܪܵܗܵܡ ܬܪܹܝܢ ܒܢܝܼ̈ܢ ܗܘܵܘ ܠܹܗ. ܚܲܕ݂ ܡܸܢ ܐܲܡܬ݂ܵܐ. ܘܚܲܕ݂ ܡܸܢ ܚܹܐܪܬܵܐ.

²³ ܐܸܠܵܐ ܗܵܘ ܕܡܸܢ ܐܲܡܬ݂ܵܐ ܒܲܒ݂ܣܲܪ ܐܸܬ݂ܝܼܠܸܕ݂. ܗܵܘ ܕܹܝܢ ܕܡܸܢ ܚܹܐܪܬܵܐ ܒܡܘܼܠܟܵܢܵܐ ܗܘܵܐ.

²⁴ ܗܵܠܹܝܢ ܕܹܝܢ ܐܝܼܬܲܝܗܹܝܢ ܦܸ̈ܠܐܵܬ݂ܵܐ ܕܬܲܪܬܹܿܝܢ ܕܝܼܵܬܹܩ̈ܘܿܣ. ܚܕ݂ܵܐ ܕܡܸܢ ܛܘܼܪ ܣܝܼܢܲܝ. ܝܵܠܕܵܐ ܠܥܲܒ݂ܕܘܼܬ݂ܵܐ. ܕܐܝܼܬܹܝܗܿ ܗܵܓ݂ܵܪ.

²⁵ ܗܵܓ݂ܵܪ ܓܹܝܪ ܛܘܼܪܵܐ ܗܘܼ ܕܣܝܼܢܲܝ. ܕܒܲܐܪܵܒ݂ܝܼܵܐ. ܘܫܵܠܡܵܐ ܠܗܵܕܹܐ ܐܘܿܪܸܫܠܸܡ. ܘܦܵܠܚܵܐ ܥܲܒ݂ܕܘܼܬ݂ܵܐ ܗܝ݀ ܘܲܒ̣ܢܹܝ̈ܗܿ.

²⁶ ܗܵܝ ܕܹܝܢ ܐܘܿܪܸܫܠܸܡ ܥܸܠܵܝܬܵܐ. ܚܹܐܪܬ̣ܵܐ ܗ̄ܝܼ. ܕܐܝܼܬܹܝܗܿ ܐܸܡܲܢ.

²⁷ ܟܬ݂ܝܼܒ݂ ܓܹܝܪ. ܕܐܸܬ݂ܒܲܣܲܡܝ ܥܩܲܪܬ݂ܵܐ. ܗܵܝ ܕܠܵܐ ܝܵܠܕܵܐ. ܘܐܸܬ݂ܦܲܨܚܝ ܘܲܓ݂ܥܵܝ. ܗܵܝ ܕܠܵܐ ܡܚܲܒܠܵܐ. ܡܛܠ ܕܲܣܓ݂ܝܼܘ ܒܢܹܝ̈ܗܿ ܕܨܵܕ݂ܝܼܬ݂ܵܐ. ܝܲܬܿܝܼܪ ܡܸܢ ܒܢܹܝ̈ܗܿ ܕܲܒ݂ܥܝܼܠܬܵܐ.

²⁸ ܚܢܲܢ ܕܹܝܢ ܐܲܚܲܝ̈. ܐܲܝܟ݂ ܐܝܼܣܚܵܩ. ܒܢܲܝ̈ ܡܘܼܠܟܵܢܵܐ ܚܢܲܢ.

²⁹ ܘܐܲܝܟ݂ ܕܗܵܝܕܹܝܢ. ܗܵܘ ܕܝܼܠܝܼܕ݂ ܗ̄ܘܵܐ ܒܒܸܣܪܵܐ ܪܵܕܹܦ ܗ̄ܘܵܐ ܠܗܵܘ ܕܲܒ݂ܪܘܼܚܵܐ. ܗܵܟܲܢܵܐ ܐܵܦ ܗܵܫܵܐ.

³⁰ ܐܸܠܵܐ ܡܵܢܵܐ ܐܸܡܲܪ ܟܬ݂ܵܒ݂ܵܐ. ܐܲܦܸܩܹܝܗ̇ ܠܐܲܡܬ݂ܵܐ ܘܠܲܒ݂ܪܵܗܿ. ܡܛܠ ܕܠܵܐ ܢܹܐܪܲܬ݂ ܒܪܵܗܿ ܕܐܲܡܬ݂ܵܐ ܥܲܡ ܒܪܵܗܿ ܕܚܹܐܪܬ̣ܵܐ.

³¹ ܚܢܲܢ ܗܵܟܹܝܠ ܐܲܚܲܝ̈. ܠܵܐ ܗܘܲܝܢ ܒܢܲܝ̈ ܐܲܡܬ݂ܵܐ ܐܸܠܵܐ ܒܢܲܝ̈ ܚܹܐܪܬ̣ܵܐ.

5

¹ ܩܘܼܡܘ ܗܵܟܹܝܠ ܒܚܹܐܪܘܼܬ݂ܵܐ ܗܵܝ ܕܲܡܫܝܼܚܵܐ ܚܲܪܪܲܢ. ܘܠܵܐ ܬܸܬ݂ܟܲܕ݂ܢܘܼܢ ܬܘܼܒ݂ ܒܢܝܼܪܵܐ ܕܥܲܒ݂ܕܘܼܬ݂ܵܐ.

² ܗܵܐ ܐܸܢܵܐ ܦܵܘܠܘܿܣ ܐܵܡܲܪ ܐ̄ܢܵܐ ܠܟ݂ܘܿܢ. ܕܐܸܢ ܬܸܬ݂ܓܲܙܪܘܼܢ. ܡܫܝܼܚܵܐ ܡܸܕܸܡ ܠܵܐ ܡܲܗܢܹܐ ܠܟ݂ܘܿܢ.

³ ܡܣܲܗܸܕ݂ ܐ̄ܢܵܐ ܕܹܝܢ ܬܘܼܒ݂ ܠܟ݂ܠ ܒܲܪܢܵܫ ܕܡܸܬ݂ܓ݁ܙܲܪ. ܕܚܲܝܵܒ݂ ܗܘܼ ܕܟ݂ܠܹܗ ܢܵܡܘܿܣܵܐ ܢܸܥܒܸܕ݂.

⁴ ܐܸܬ݂ܒܲܛܲܠܬܿܘܿܢ ܠܟ݂ܘܿܢ ܡܸܢ ܡܫܝܼܚܵܐ. ܐܲܝܠܹܝܢ ܕܲܒ݂ܢܵܡܘܿܣܵܐ ܡܸܙܕܲܕܩܝܼܬܿܘܢ. ܘܡܸܢ ܛܲܝܒܘܼܬ݂ܵܐ ܢܦܲܠܬܿܘܿܢ.

⁵ ܚܢܲܢ ܓܹܝܪ ܒܪܘܼܚܵܐ ܕܡܸܢ ܗܲܝܡܵܢܘܼܬ݂ܵܐ. ܠܣܲܒ݂ܪܵܐ ܕܙܲܕܝܼܩܘܼܬ݂ܵܐ ܡܩܵܘܹܝܢ ܚ̄ܢܲܢ.

⁶ ܒܲܡܫܝܼܚܵܐ ܓܹܝܪ ܝܼܫܘܿܥ. ܠܵܐ ܓܙܘܼܪܬܵܐ ܡܸܕܸܡ ܐܝܼܬܹܝܗܿ. ܘܠܵܐ ܥܘܼܪܠܘܼܬ݂ܵܐ. ܐܸܠܵܐ ܗܲܝܡܵܢܘܼܬ݂ܵܐ ܕܡܸܬ݂ܓܲܡܪܵܐ ܒܚܘܼܒܵܐ.

⁷ ܫܲܦܝܼܪ ܪܵܗܛܝܼܢ ܗܘܲܝܬܿܘܿܢ. ܡܲܢܘܼ ܕܵܘܸܕ݂ܟ݂ܘܿܢ. ܕܠܲܫܪܵܪܵܐ ܠܵܐ ܬܸܬܿܛܦܝܼܣܘܼܢ.

⁸ ܦܝܵܣܟ݂ܘܿܢ ܠܵܐ ܗ̄ܘܵܐ ܡܸܢ ܗܵܘ ܕܲܩܪܵܟ݂ܘܿܢ.

⁹ ܚܡܝܼܪܵܐ ܩܲܠܝܼܠ ܟܠܵܗܿ ܓܒ݂ܝܼܠܬܵܐ ܡܲܚܡܲܥ.

¹⁰ ܐܸܢܵܐ ܬܿܟ݂ܝܼܠ ܐ̄ܢܵܐ ܥܠܲܝܟܿܘܿܢ ܒܡܵܪܲܢ. ܕܡܸܕܸܡ ܐ̄ܚܪܹܝܢ ܠܵܐ ܡܸܬ݂ܪܲܥܹܝܢ ܐ̄ܢܬܿܘܢ. ܘܐܲܝܢܵܐ ܕܕ݂ܵܠܲܚ ܠܟ݂ܘܿܢ. ܗܘܼ ܢܣܲܝܒܪܝܼܘܗܝ ܠܕ݂ܝܼܢܵܐ. ܡܲܢ ܕܐܝܼܬ݂ܵܘܗܝ.

¹¹ ܐܸܢܵܐ ܕܹܝܢ ܐܲܚܲܝ̈. ܐܸܠܘܼ ܥܕ݂ܲܟܹܝܠ ܓܙܘܼܪܬܵܐ ܡܲܟ݂ܪܸܙ ܗ̄ܘܹܝܬ݂. ܠܡܵܢܵܐ ܡܸܬ݂ܪܕܸܦ ܗ̄ܘܹܝܬ݂. ܕܲܠܡܵܐ ܐܸܬ݂ܒܲܛܲܠ ܠܹܗ ܟܸܫܠܹܗ ܕܲܙܩܝܼܦܵܐ.

¹² ܐܸܫܬܿܘܦ ܕܹܝܢ ܐܵܦ ܡܸܦܣܲܩ ܢܸܦܣܩܘܼܢ ܗܵܢܘܿܢ ܕܕ݂ܵܠܚܝܼܢ ܠܟ݂ܘܿܢ.

¹³ ܐܲܢ̄ܬܿܘܿܢ ܕܹܝܢ ܠܚܹܐܪܘܼܬ݂ܵܐ ܗ̄ܘܼ ܐܸܬ݂ܩܪܝܼܬܿܘܿܢ ܐܲܚܲܝ̈. ܒܲܠܚܘܿܕ݂ ܠܵܐ ܬܸܗܘܹܐ ܚܹܐܪܘܼܬ݂ܟ݂ܘܿܢ ܠܥܸܠܲܬ݂ ܒܸܣܪܵܐ. ܐܸܠܵܐ ܒܚܘܼܒܵܐ ܗܘܲܝܬܿܘܿܢ ܡܸܫܬܲܥܒܕ݂ܝܼܢ ܚܲܕ݂ ܠܚܲܕ݂.

¹⁴ ܟܠܹܗ ܓܹܝܪ ܢܵܡܘܿܣܵܐ ܒܲܚܕ݂ܵܐ ܡܸܠܬ݂ܵܐ ܡܸܬ݂ܡܲܠܹܐ. ܒܗܵܝ. ܕܬܲܚܸܒ݂ ܠܩܲܪܝܼܒ݂ܵܟ݂ ܐܲܝܟ݂ ܢܲܦ̮ܫܵܟ݂.

¹⁵ ܐܸܢ ܕܹܝܢ ܚܲܕ݂ ܠܚܲܕ݂ ܡܢܲܟ̇ܬ݂ܝܼܢ ܐ̄ܢܬܿܘܢ ܘܐܵܟ݂ܠܝܼܢ ܐ̄ܢܬܿܘܢ. ܚܙܵܘ ܕܲܠܡܵܐ ܚܲܕ݂ ܡܸܢ ܚܲܕ݂ ܬܿܣܘܼܦܘܼܢ.

¹⁶ ܐܵܡܲܪ ܐ̄ܢܵܐ ܕܹܝܢ ܕܲܒ݂ܪܘܼܚܵܐ ܗܘܲܝܬܿܘܿܢ ܡܗܲܠܟ݂ܝܼܢ. ܘܪܸܓ݁ܬ݂ܵܐ ܕܒܸܣܪܵܐ ܠܵܐ ܡܸܢ ܡܬ݂ܘܿܡ ܬܸܥܒܕ݂ܘܼܢ.

¹⁷ ܒܸܣܪܵܐ ܓܹܝܪ ܪܵܐܹܓ݂ ܡܸܕܸܡ ܕܢܵܟܹܐ ܠܪܘܼܚܵܐ. ܘܪܘܼܚܵܐ ܪܵܓܵܐ ܡܸܕܸܡ ܕܢܵܟܹܐ ܠܒܸܣܪܵܐ. ܘܲܬ݂ܪܲܝܗܘܿܢ ܣܲܩܘܼܒ݂ܠܹܐ ܐܸܢܘܿܢ ܚܲܕ݂ ܕܚܲܕ݂. ܕܠܵܐ ܡܸܕܸܡ ܕܨܵܒܹܝܢ ܐ̄ܢܬܿܘܢ ܬܸܗܘܘܿܢ ܥܵܒ݂ܕܝܼܢ.

¹⁸ ܐܸܢ ܕܹܝܢ ܒܪܘܼܚܵܐ ܡܸܬܿܕܲܒܪܝܼܢ ܐܢ̄ܬܘܿܢ. ܠܵܐ ܗܘܲܝܬܿܘܿܢ ܬܚܹܝܬ݂ ܢܵܡܘܿܣܵܐ.

¹⁹ ܝܼܕ݂ܝܼܥܝܼܢ ܐܸܢܘܿܢ ܓܹܝܪ ܥܒ݂ܵܕ݂ܵܘ̈ܗܝ ܕܒܸܣܪܵܐ. ܕܐܝܼܬܲܝܗܘܿܢ. ܙܵܢܝܘܼܬ݂ܵܐ. ܛܲܢܦܘܼܬ݂ܵܐ. ܨܲܚܢܘܼܬ݂ܵܐ.

²⁰ ܦܘܼܠܚܵܢܵܐ ܕܲܦܬܲܟ݂ܪܹ̈ܐ. ܚܲܪܵܫܘܿܬ݂ܵܐ. ܒܥܸܠܕܒ݂ܵܒ݂ܘܼܬ݂ܵܐ. ܚܸܪܝܵܢܵܐ. ܛܢܵܢܵܐ. ܚܸܡܬܵܐ. ܥܸܨܝܵܢܵܐ. ܦܵܠܓ̈ܘܵܬ݂ܵܐ. ܣܸܕ݂ܩܹ̈ܐ.

²¹ ܚܣܵܡܵܐ. ܩܸܛܠܵܐ. ܪܵܘܵܝܘܼܬ݂ܵܐ. ܙܡܵܪܵܐ. ܘܟ݂ܠ ܕܲܠܗܵܠܹܝܢ ܕܵܡܹܝܢ. ܘܐܲܝܠܹܝܢ ܕܗܵܠܹܝܢ ܣܵܥܪܝܼܢ. ܐܲܝܟ݂ ܕܡܸܢ ܠܘܼܩܕ݂ܲܡ ܐܸܡܪܹܬ݂ ܠܟ݂ܘܿܢ. ܐܵܦ ܗܵܫܵܐ ܐܵܡܲܪ ܐ̄ܢܵܐ. ܕܡܲܠܟܘܼܬܹܗ ܕܐܲܠܵܗܵܐ ܠܵܐ ܝܵܪܬܿܝܼܢ.

²² ܦܹܐܪܹ̈ܐ ܕܹܝܢ ܕܪܘܼܚܵܐ ܐܝܼܬܲܝܗܘܿܢ. ܚܘܼܒܵܐ. ܚܲܕ݂ܘܼܬ݂ܵܐ. ܫܠܵܡܵܐ. ܡܲܓ݁ܪܲܬ݂ ܪܘܼܚܵܐ. ܒܲܣܝܼܡܘܼܬ݂ܵܐ. ܛܵܒ݂ܘܼܬ݂ܵܐ. ܗܲܝܡܵܢܘܼܬ݂ܵܐ.

²³ ܡܲܟܝܼܟ̣ܘܼܬ݂ܵܐ. ܡܣܲܝܒܪܵܢܘܼܬ݂ܵܐ. ܥܲܠ ܗܵܠܹܝܢ ܢܵܡܘܿܣܵܐ ܠܵܐ ܣܝܼܡ.

²⁴ ܐܲܝܠܹܝܢ ܕܹܝܢ ܕܕ݂ܲܡܫܝܼܚܵܐ ܐܸܢܘܿܢ. ܒܸܣܪܗܘܿܢ ܙܩܲܦܘ. ܥܲܡ ܟܠܗܘܿܢ ܟܹܐܒ݂ܵܘ̈ܗܝ ܘܲܪ̈ܓ݂ܝܼܓ݂ܵܬܹܗ.

²⁵ ܢܸܚܹܐ ܗܵܟܹܝܠ ܒܪܘܼܚܵܐ. ܘܲܠܪܘܼܚܵܐ ܢܸܫܠܲܡ.

²⁶ ܘܠܵܐ ܢܸܗܘܹܐ ܣܪ̈ܝܼܩܲܝ ܫܘܼܒ݂ܚܵܐ. ܕܡܲܩܠܝܼܢ ܚܲܕ݂ ܥܲܠ ܚܲܕ݂. ܘܚܵܣܡܝܼܢ ܚܲܕ݂ ܒܚܲܕ݂.

6

¹ ܐܲܚܲܝ̈. ܐܸܢ ܐ̄ܢܵܫ ܡܸܢܟ݂ܘܿܢ ܢܸܬ݂ܩܲܕܲܡ ܒܣܲܟ݂ܠܘܼܬ݂ܵܐ. ܐܲܢ̄ܬܿܘܿܢ ܐܲܝܠܹܝܢ ܕܲܒܪܘܼܚ ܐܲܢ̄ܬܘܿܢ. ܐܲܬ݂ܩܢܘܼܗܝ ܒܪܘܼܚܵܐ ܡܲܟܝܼܟ݂ܬܵܐ. ܘܲܗܘܲܝܬܿܘܿܢ ܙܗܝܼܪܝܼܢ. ܕܕ݂ܲܠܡܵܐ ܐܵܦ ܐܲܢ̄ܬܿܘܿܢ ܬܸܬ݂ܢܲܣܘܿܢ.

² ܘܲܛܥܲܢܘ ܝܘܼܩܪܵܐ ܕܲܚܕ݂ܵܕܹ̈ܐ. ܕܗܵܟܲܢܵܐ ܡܡܲܠܹܝܢ ܐ̄ܢܬܿܘܢ ܢܵܡܘܿܣܹܗ ܕܲܡܫܝܼܚܵܐ.

³ ܐܸܢ ܓܹܝܪ ܐ̄ܢܵܫ ܣܵܒܲܪ ܕܐܝܼܬ݂ܵܘܗܝ ܡܸܕܸܡ. ܟܲܕ݂ ܠܵܐ ܐܝܼܬ݂ܵܘܗܝ. ܢܲܦ̮ܫܹܗ ܡܲܛܥܹܐ.

⁴ ܐܸܠܵܐ ܐ̄ܢܵܫ ܥܒ݂ܵܕ݂ܹܗ ܢܸܗܘܹܐ ܒܵܩܹܐ. ܘܗܵܝܕܹܝܢ ܒܲܝܢܵܘܗܝ ܠܢܲܦ̮ܫܹܗ ܢܸܗܘܹܐ ܫܘܼܒ݂ܗܵܪܹܗ. ܘܠܵܐ ܒܲܐ̄ܚܪܵܢܹܐ.

⁵ ܟܠܢܵܫ ܓܹܝܪ ܡܵܘܒܠܵܐ ܕܢܲܦ̮ܫܹܗ ܢܸܫܩܘܿܠ.

⁶ ܢܸܫܬܵܘܬܲܦ ܕܹܝܢ ܗܵܘ ܕܫܵܡܲܥ ܡܸܠܬ݂ܵܐ ܠܗܵܘ ܡܲܢ ܕܡܲܫܡܲܥ ܠܹܗ. ܒܟ̣ܠܗܹܝܢ ܛܵܒ݂ܵܬ݂ܵܐ.

⁷ ܠܵܐ ܬܸܛܥܘܿܢ. ܐܲܠܵܗܵܐ ܠܵܐ ܡܸܬ݂ܒܲܙܲܚ. ܡܸܕܸܡ ܕܙܵܪܲܥ ܓܹܝܪ ܒܲܪ ܐ̄ܢܵܫܵܐ. ܗܵܘ ܗܘܼ ܚܵܨܹܕ݂.

⁸ ܡܲܢ ܕܒܲܒ݂ܣܲܪ ܙܵܪܲܥ. ܡܸܢ ܒܸܣܪܵܐ ܚܒ݂ܵܠܵܐ ܗ̄ܘܼ ܚܵܨܹܕ݂. ܘܡܲܢ ܕܲܒ̣ܪܘܼܚ ܙܵܪܲܥ. ܡܸܢ ܪܘܼܚܵܐ ܚܲܝܹ̈ܐ ܕܲܠܥܵܠܲܡ ܢܸܚܨܘܿܕ݂.

⁹ ܘܟܲܕ݂ ܥܵܒ݂ܕܝܼܢ ܚ̄ܢܲܢ ܕܛܵܒ݂. ܠܵܐ ܗ̄ܘܵܬ݂ ܡܵܐܢܵܐ ܠܲܢ. ܢܸܗܘܹܐ ܓܹܝܪ ܙܲܒ݂ܢܵܐ ܕܢܸܚܨܘܿܕ݂. ܘܠܵܐ ܬܸܡܲܐܢ ܠܲܢ.

¹⁰ ܗܵܫܵܐ ܗܵܟܹܝܠ ܥܲܕ݂ ܙܲܒ݂ܢܵܐ ܐܝܼܬ݂ ܠܲܢ. ܢܸܦܠܘܿܚ ܛܵܒ݂ܵܬ݂ܵܐ ܠܘܵܬ݂ ܟܠܢܵܫ. ܝܲܬܝܼܪܵܐܝܼܬ݂ ܠܘܵܬ݂ ܒܢܲܝ̈ ܒܲܝܬܵܐ ܕܗܲܝܡܵܢܘܼܬ݂ܵܐ.

¹¹ ܚܙܵܘ ܐܲܝܠܹܝܢ ܟܬ݂ܝܼ̈ܒ݂ܵܢ ܟܸܬ݂ܒܹܬ݂ ܠܟ݂ܘܿܢ ܒܐܝܼܕ݂ܲܝ̈.

¹² ܐܲܝܠܹܝܢ ܕܨܵܒܹܝܢ ܕܢܸܫܬܲܒ݂ܗܪܘܼܢ ܒܒܸܣܪܵܐ. ܗܸܢܘܿܢ ܐܵܠܨܝܼܢ ܠܟ݂ܘܿܢ ܕܬܸܬ݂ܓܲܙܪܘܼܢ. ܕܒܲܠܚܘܿܕ݂ ܒܲܙܩܝܼܦܹܗ ܕܲܡܫܝܼܚܵܐ ܠܵܐ ܢܸܬ݂ܪܲܕ݂ܦܘܼܢ.

¹³ ܐܵܦܠܵܐ ܓܹܝܪ ܗܸܢܘܿܢ ܗܵܠܹܝܢ ܕܓ݂ܵܙܪܝܼܢ ܢܵܛܪܝܼܢ ܢܵܡܘܿܣܵܐ. ܐܸܠܵܐ ܨܵܒܹܝܢ ܕܬܸܬ݂ܓܲܙܪܘܼܢ. ܕܲܒ݂ܒܸܣܪܟ݂ܘܿܢ ܕܝܼܠܟ݂ܘܿܢ ܢܸܫܬܲܒ݂ܗܪܘܼܢ.

¹⁴ ܠܝܼ ܕܹܝܢ ܠܵܐ ܢܸܗܘܹܐ ܠܝܼ ܕܐܸܫܬܲܒ݂ܗܲܪ. ܐܸܠܵܐ ܒܲܙܩܝܼܦܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܕܒܹܗ ܥܵܠܡܵܐ ܙܩܝܼܦ ܠܝܼ. ܘܐܸܢܵܐ ܙܩܝܼܦ ܐ̄ܢܵܐ ܠܥܵܠܡܵܐ.

¹⁵ ܠܵܐ ܓܹܝܪ ܓܙܘܼܪܬܵܐ ܐܝܼܬܹܝܗܿ ܡܸܕܸܡ. ܘܠܵܐ ܥܘܼܪܠܘܼܬ݂ܵܐ. ܐܸܠܵܐ ܒܪܝܼܬ݂ܵܐ ܚܕ݂ܲܬ݂ܵܐ.

¹⁶ ܘܐܲܝܠܹܝܢ ܕܲܠܗܵܢܵܐ ܫܒ݂ܝܼܠܵܐ ܫܵܠܡܝܼܢ. ܫܠܵܡܵܐ ܢܸܗܘܹܐ ܥܠܲܝܗܘܿܢ ܘܪ̈ܲܚܡܹܐ. ܘܥܲܠ ܝܼܣܪܵܝܹܠ ܕܐܲܠܵܗܵܐ.

¹⁷ ܡܸܟܹܝܠ ܠܝܼ ܐ̄ܢܵܫ ܥܲܡܠܵܐ ܠܵܐ ܢܲܪܡܹܐ. ܐܸܢܵܐ ܓܹܝܪ ܟܘܼܬ݂̈ܡܵܬܹܗ ܕܡܵܪܲܢ ܝܼܫܘܿܥ ܒܦܲܓ݂ܪܝ ܫܩܝܼܠ ܐ̄ܢܵܐ.

¹⁸ ܛܲܝܒܘܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܪܘܼܚܟ݂ܘܿܢ ܐܲܚܲܝ̈. ܐܵܡܹܝܢ.