1

¹ ܦܵܘܠܘܿܣ ܥܲܒ݂ܕܵܐ ܕܝܼܫܘܿܥ ܡܫܝܼܚܵܐ. ܩܲܪܝܵܐ. ܘܲܫܠܝܼܚܵܐ. ܕܐܸܬ݂ܦܪܸܫ ܠܐܹܘܲܢܓܲܠܝܼܘܿܢ ܕܐܲܠܵܗܵܐ.

² ܕܡܸܢ ܩܕ݂ܝܼܡ ܡܠܲܟ݂ ܒܝܲܕ݂ ܢܒ݂ܝܼܵܘܗܝ. ܒܲܟ݂ܬ݂ܵܒܹ̈ܐ ܩܲܕܝܼܫܹ̈ܐ.

³ ܥܲܠ ܒܪܹܗ ܗܵܘ ܕܐܬ݂ܝܼܠܸܕ݂ ܒܲܒ݂ܣܲܪ ܡܸܢ ܙܲܪܥܵܐ ܕܒܹܝܬ݂ ܕܵܘܝܼܕ݂.

⁴ ܘܐܸܬ݂ܝܼܕ݂ܲܥ ܒܪܵܐ ܕܐܲܠܵܗܵܐ. ܒܚܹܝܠ ܘܲܒ݂ܪܘܼܚ ܩܕ݂ܘܿܫ. ܕܩܵܡ ܡܸܢ ܒܹܝܬ݂ ܡܝܼܬܹ̈ܐ. ܝܼܫܘܿܥ ܡܫܝܼܚܵܐ ܡܵܪܲܢ.

⁵ ܕܒܹܗ ܢܣܲܒ݂ܢ ܛܲܝܒܘܼܬ݂ܵܐ ܘܲܫܠܝܼܚܘܼܬ݂ܵܐ. ܒܟ݂ܠܗܘܿܢ ܥܲܡ̈ܡܹܐ. ܐܲܝܟ݂ ܕܢܸܫܬܲܡܥܘܼܢ ܠܗܲܝܡܵܢܘܼܬ݂ܵܐ ܕܲܫܡܹܗ.

⁶ ܕܐܵܦ ܐܲܢ̄ܬܿܘܿܢ ܡܸܢܗܘܿܢ ܐܲܢ̄ܬܘܿܢ. ܩܪ̈ܲܝܵܐ ܒܝܼܫܘܿܥ ܡܫܝܼܚܵܐ.

⁷ ܠܟ݂ܠܗܘܿܢ ܕܒܲܪܗ̄ܘܿܡܝܼ. ܚܲܒܝܼܒ݂ܵܘ̈ܗܝ ܕܐܲܠܵܗܵܐ. ܩܪ̈ܲܝܵܐ. ܘܩܲܕܝܼܫܹ̈ܐ. ܫܠܵܡܵܐ ܘܛܲܝܒܘܼܬ݂ܵܐ ܥܲܡܟ݂ܘܿܢ ܡܸܢ ܐܲܠܵܗܵܐ ܐܲܒ݂ܘܼܢ. ܘܡܸܢ ܡܵܪܲܢ ܝܼܫܘܿܥ ܡܫܝܼܚܵܐ.

⁸ ܠܘܼܩܕ݂ܲܡ ܡܵܘܕܹܐ ܐ̄ܢܵܐ ܠܐܲܠܵܗܝ ܒܝܼܫܘܿܥ ܡܫܝܼܚܵܐ ܥܲܠ ܟܠܟ݂ܘܿܢ (ܥܲܠ ܐܲܦܲܝ̈ ܟܠܟ݂ܘܿܢ). ܕܗܲܝܡܵܢܘܼܬ݂ܟ݂ܘܿܢ ܐܸܫܬܲܡܥܲܬ݂ ܒܟ݂ܠܹܗ ܥܵܠܡܵܐ.

⁹ ܣܵܗܹܕ݂ ܗܘܼ ܠܝܼ ܓܹܝܪ ܐܲܠܵܗܵܐ ܕܠܹܗ ܡܫܲܡܸܫ ܐ̄ܢܵܐ ܒܪܘܼܚ ܒܐܹܘܲܢܓܲܠܝܼܘܿܢ ܕܲܒ݂ܪܹܗ. ܕܲܕ݂ܠܵܐ ܫܲܠܘܵܐ ܒܟ݂ܠܙܒܲܢ ܡܸܬܿܕܟܲܪ ܐ̄ܢܵܐ ܠܟ݂ܘܿܢ ܒܲܨ̈ܠܵܘܵܬ݂ܝ.

¹⁰ ܘܡܸܬ݂ܚܲܢܲܢ ܐ̄ܢܵܐ. ܕܐܸܢ ܡܸܢ ܟܲܕܘܼ ܬܸܬ݂ܦܬܲܚ ܠܝܼ ܐܘܼܪܚܵܐ ܒܨܸܒ݂ܝܵܢܹܗ ܕܐܲܠܵܗܵܐ. ܕܐܹܬܹܐ ܠܘܵܬ݂ܟ݂ܘܿܢ.

¹¹ ܡܛܠ ܕܛܵܒ݂ ܣܘܹܐ ܐ̄ܢܵܐ ܕܐܸܚܙܹܟ݂ܘܿܢ ܘܐܸܬܸܿܠ ܠܟ݂ܘܿܢ ܡܵܘܗܲܒ݂ܬܵܐ ܕܪܘܼܚ. ܕܒ݂ܵܗܿ ܬܸܫܬܲܪܪܘܼܢ.

¹² ܘܐܲܟ݂ܚܕ݂ܵܐ ܢܸܬ݂ܒܲܝܲܐ ܒܗܲܝܡܵܢܘܼܬ݂ܵܐ ܕܝܼܠܟ݂ܘܿܢ ܘܕ݂ܝܼܠܝ.

¹³ ܨܵܒܹܐ ܐ̄ܢܵܐ ܕܹܝܢ ܐܲܚܲܝ̈ ܕܬܸܕܥܘܼܢ. ܕܙܲܒ݂ܢ̈ܝܼܢ ܣܲܓܝܼܐܵܢ ܨܒܹܝܼܬ݂ ܕܐܹܬܹܐ ܠܘܵܬ݂ܟ݂ܘܿܢ: ܘܐܸܬ݂ܟܠܝܼܬ݂ ܥܕ݂ܲܡܵܐ ܠܗܵܫܵܐ. ܕܐܵܦ ܒܟ݂ܘܿܢ ܢܸܗܘܹܐ ܠܝܼ ܐܵܕ݂ܫܵܐ. ܐܲܝܟ݂ ܕܲܒ݂ܫܲܪܟܵܐ ܕܥܲܡ̈ܡܹܐ.

¹⁴ ܝܵܘܢܵܝܹ̈ܐ ܘܒܲܪܒܪ̈ܵܝܼܐ. ܚܲܟܝܼܡܹ̈ܐ ܘܣܲܟ݂ܠܹ̈ܐ. ܕܲܠܟ݂ܠܢܵܫ ܚܲܝܵܒ݂ ܐ̄ܢܵܐ ܕܐܲܟ݂ܪܸܙ.

¹⁵ ܘܗܵܟܲܢܵܐ ܡܸܬ݂ܚܲܦܲܛ ܐ̄ܢܵܐ. ܕܐܵܦ ܠܟ݂ܘܿܢ ܕܒܲܪܗ̄ܘܿܡܝܼ ܐܹܣܲܒܲܪ.

¹⁶ ܠܵܐ ܓܹܝܪ ܒܵܗܹܬ݂ ܐ̄ܢܵܐ ܒܹܗ ܒܐܹܘܲܢܓܲܠܝܼܘܿܢ. ܡܛܠ ܕܚܲܝܠܵܐ ܗ̄ܘܼ ܕܐܲܠܵܗܵܐ. ܠܚܲܝܹ̈ܐ ܕܟ̣ܠ ܕܲܡܗܲܝܡܢܝܼܢ ܒܹܗ. ܐܸܢ ܡܸܢ ܝܗ̄ܘܼܕ݂ܵܝܹ̈ܐ ܠܘܼܩܕ݂ܲܡ. ܘܐܸܢ ܡܸܢ ܐܲܪ̈ܡܵܝܹܐ.

¹⁷ ܟܹܐܢܘܼܬܹܗ ܓܹܝܪ ܕܐܲܠܵܗܵܐ ܒܹܗ ܡܸܬ݂ܓܲܠܝܵܐ. ܡܸܢ ܗܲܝܡܵܢܘܼܬ݂ܵܐ ܠܗܲܝܡܵܢܘܼܬ݂ܵܐ. ܐܲܝܟ݂ ܕܲܟ݂ܬ݂ܝܼܒ݂. ܕܟܹܐܢܵܐ ܡܸܢ ܗܲܝܡܵܢܘܼܬ݂ܵܐ ܢܸܚܹܐ.

¹⁸ ܡܸܬ݂ܓ݁ܠܹܐ ܗ̄ܘܼ ܓܹܝܪ ܪܘܼܓ݂ܙܹܗ ܕܐܲܠܵܗܵܐ ܡܸܢ ܫܡܲܝܵܐ. ܥܲܠ ܟܠܹܗ ܥܵܘܠܗܘܿܢ ܘܪܘܼܫܥܗܘܿܢ ܕܲܒ݂ܢܲܝ̈ܢܵܫܵܐ. ܗܵܢܘܿܢ ܕܩܘܼܫܬܵܐ ܒܥܵܘܠܵܐ ܐܲܚܝܼܕ݂ܝܼܢ.

¹⁹ ܡܛܠ ܕܝܼܕ݂ܝܼܥܘܼܬܹܗ ܕܐܲܠܵܗܵܐ ܓܲܠܝܵܐ ܗܝ ܒܗܘܿܢ. ܐܲܠܵܗܵܐ ܓܹܝܪ ܓܠܵܗܿ ܒܗܘܿܢ.

²⁰ ܟܲܣ̈ܝܵܬܹܗ ܓܹܝܪ ܕܐܲܠܵܗܵܐ ܡܸܢ ܬܲܪ̈ܡܝܵܬܹܗ ܕܥܵܠܡܵܐ. ܠܒܸܪ̈ܝܵܬܹܗ ܒܣܘܼܟܵܠܵܐ ܡܸܬ݂ܚܲܙܝܵܢ. ܘܚܲܝܠܹܗ ܘܐܲܠܵܗܘܼܬܹܗ ܕܲܠܥܵܠܲܡ. ܕܢܸܗܘܘܿܢ ܕܠܵܐ ܡܲܦܲܩ ܒܪܘܼܚ.

²¹ ܡܛܠ ܕܝܼܕ݂ܲܥܘ ܠܐܲܠܵܗܵܐ. ܘܠܵܐ ܐܲܝܟ݂ ܕܠܲܐܠܵܗܵܐ ܫܲܒܚܘܼܗܝ. ܘܐܵܘܕܝܼܘ ܠܹܗ. ܐܸܠܵܐ ܐܸܣܬܲܪܲܩܘ ܒܡܲܚܫ̈ܒ݂ܵܬ݂ܗܘܿܢ. ܘܐܸܬ݂ܚܲܫܲܟ݂ ܠܸܒܗܘܿܢ. ܕܠܵܐ ܡܸܣܬܲܟܲܠ.

²² ܘܟܲܕ݂ ܣܵܒ݂ܪܝܼܢ ܒܢܲܦ̮ܫܗܘܿܢ ܕܚܲܟܝܼܡ̈ܝܼܢ ܐܸܢܘܿܢ. ܫܛܵܘ ܠܗܘܿܢ.

²³ ܘܚܲܠܸܦܘ ܬܸܫܒܘܿܚܬܹܿܗ ܕܐܲܠܵܗܵܐ ܕܠܵܐ ܡܸܬ݂ܚܲܒܲܠ. ܒܲܕ݂ܡܘܼܬ݂ܵܐ ܕܨܲܠܡܵܐ ܕܒܲܪܢܵܫܵܐ ܕܡܸܬ݂ܚܲܒܲܠ: ܘܒܲܕ݂ܡܘܼܬ݂ܵܐ ܕܦܵܪܲܚܬ݂ܵܐ. ܘܕ݂ܲܐܪܒܥܲܬ݂ ܪܸ̈ܓ݂ܠܹܝܗܿ. ܘܲܕ݂ܪܲܚܫܵܐ ܕܐܲܪܥܵܐ.

²⁴ ܡܛܠ ܗܵܢܵܐ ܐܲܫܠܸܡ ܐܸܢܘܿܢ ܐܲܠܵܗܵܐ ܠܲܪ̈ܓ݂ܝܼܓ݂ܵܬ݂ܵܐ ܛܲܡ̈ܐܵܬ݂ܵܐ ܕܠܸܒܗܘܿܢ. ܕܲܢܨܲܥܪܘܼܢ ܦܲܓ݂ܪ̈ܲܝܗܘܿܢ ܒܗܘܿܢ.

²⁵ ܘܚܲܠܸܦܘ ܫܪܵܪܹܗ ܕܐܲܠܵܗܵܐ ܒܟܲܕܵܒ݂ܘܼܬ݂ܵܐ. ܘܲܕ݂ܚܸܠܘ ܘܫܲܡܸܫܘ ܠܒܸܪ̈ܝܵܬ݂ܵܐ. ܛܵܒ݂ ܡܸܢ ܕܲܠܒ݂ܵܪܘܿܝܗܹܝܢ: ܕܠܹܗ ܬܸܫܒ̈ܚܵܢ ܘܒ݂ܘܪ̈ܟܵܢ: ܠܥܵܠܲܡ ܥܵܠܡܝܼܢ ܐܵܡܹܝܢ.

²⁶ ܡܛܠ ܗܵܢܵܐ ܐܲܫܠܸܡ ܐܸܢܘܿܢ ܐܲܠܵܗܵܐ ܠܟܹܐܒܹ̈ܐ ܕܨܲܥܪܵܐ. ܢܸܩܒ݂ܵܬ݂ܗ̈ܘܿܢ ܓܹܝܪ ܚܲܠܸܦ ܚܫܲܚܬ݂ܵܐ ܕܲܟ݂ܝܵܢܗܹܝ̈ܢ. ܘܲܒ݂ܡܸܕܸܡ ܕܠܵܐ ܡܟ݂ܵܢ ܐܸܬ݂ܚܲܫܲܚ.

²⁷ ܘܬ݂ܘܼܒ݂ ܐܵܦ ܕܸܟ݂ܪ̈ܲܝܗܘܿܢ ܗܵܟܲܢܵܐ. ܫܒܲܩܘ ܚܫܲܚܬ݂ܵܐ ܕܲܟ݂ܝܵܢܵܐ ܕܢܸܩ̈ܒ݂ܵܬ݂ܵܐ. ܘܐܸܫܬܲܪܲܚܘ ܒܪܸܓܬ݂ܵܐ ܚܲܕ݂ ܥܲܠ ܚܲܕ݂. ܘܕܸܟ݂ܪܵܐ ܥܲܠ ܕܸܟ݂ܪܵܐ ܒܸܗܬܿܬ݂ܵܐ ܥܒܲܕ݂ܘ. ܘܦܘܼܪܥܵܢ̈ܵܐ ܕܙܵܕܹܩ ܗ̄ܘܵܐ ܠܛܵܥܝܘܼܬ݂ܗܘܿܢ. ܒܲܩܢܘܿܡܗܘܿܢ ܩܲܒܿܠܘܼܗܝ.

²⁸ ܘܐܲܝܟ݂ ܕܠܵܐ ܕܵܢܘ ܒܢܲܦ̮ܫܗܘܿܢ ܕܢܸܕ݂ܥܘܿܢ ܠܐܲܠܵܗܵܐ. ܐܲܫܠܸܡ ܐܸܢܘܿܢ ܐܲܠܵܗܵܐ ܠܡܲܕܥܵܐ ܕܲܣܪܝܼܩܘܼܬ݂ܵܐ. ܕܢܸܗܘܘܿܢ ܥܵܒ݂ܕܝܼܢ ܡܸܕܸܡ ܕܠܵܐ ܘܵܠܹܐ.

²⁹ ܟܲܕ݂ ܡܠܹܝܢ ܟܠ ܥܵܘܵܠܘܼܬ݂ܵܐ. ܘܙܵܢܝܘܼܬ݂ܵܐ. ܘܡܲܪܝܼܪܘܼܬ݂ܵܐ. ܘܒ݂ܝܼܫܘܼܬ݂ܵܐ. ܘܥܵܠܘܿܒ݂ܘܼܬ݂ܵܐ. ܘܲܚܣܵܡܵܐ. ܘܩܸܛܠܵܐ. ܘܚܸܪܝܵܢܵܐ. ܘܢܸܟ݂ܠܵܐ. ܘܡܲܚܫ̈ܒ݂ܵܬ݂ܵܐ ܒ̈ܝܼܫܵܬ݂ܵܐ.

³⁰ ܘܪܸܛܢܵܐ. ܘܡܹܐܟܲܠܩܲܪܨܵܐ. ܘܲܣܢܝܼܐܝܼܢ ܠܐܲܠܵܗܵܐ. ܡܨܲܥܪܵܢܹܐ. ܚܬ݂ܝܼܪܹ̈ܐ. ܫܲܒ݂ܗܪ̈ܵܢܹܐ. ܡܸܫܟܚܲܝ̈ ܒ̈ܝܼܫܵܬ݂ܵܐ. ܚܲܣܝܼܪ̈ܲܝ ܪܸܥܝܵܢܵܐ. ܕܠܲܐܒ݂ܵܗܲܝ̈ܗܘܿܢ ܠܵܐ ܡܸܬܿܛܦܝܼܣܝܼܢ.

³¹ ܘܕ݂ܲܩܝܵܡܵܐ ܠܲܝܬܿ ܠܗܘܿܢ. ܘܠܵܐ ܚܘܼܒܵܐ. ܘܠܵܐ ܫܲܝܢܵܐ. ܘܠܵܐ ܪ̈ܲܚܡܹܐ. ܐܝܼܬ݂ ܒܗܘܿܢ.

³² ܐܲܝܠܹܝܢ ܕܟܲܕ݂ ܝܵܕ݂ܥܝܼܢ ܕܝܼܢܹܗ ܕܐܲܠܵܗܵܐ: ܕܠܲܐܝܠܹܝܢ ܕܐܲܝܟ݂ ܗܵܠܹܝܢ ܣܵܥܪܝܼܢ ܠܡܵܘܬܵܐ ܡܚܲܝܸܒ݂. ܠܵܐ ܗ̄ܘܵܐ ܒܲܠܚܘܿܕ݂ ܥܵܒ݂ܕܝܼܢ ܠܗܹܝܢ. ܐܸܠܵܐ ܐܵܦ ܡܸܫܬܵܘܬܿܦܝܼܢ ܠܐܲܝܠܹܝܢ ܕܗܵܠܹܝܢ ܥܵܒ݂ܕܝܼܢ.

2

¹ ܡܛܠ ܗܵܢܵܐ ܠܲܝܬܿ ܠܵܟ݂ ܡܲܦܲܩ ܒܪܘܼܚܵܐ. ܐܘܿ ܒܲܪܢܵܫܵܐ ܕܵܐܹܢ ܚܲܒ݂ܪܹܗ: ܒܗܵܘ ܓܹܝܪ ܕܕ݂ܵܐܹܢ ܐܲܢ̄ܬܿ ܚܲܒ݂ܪܵܟ݂. ܢܲܦ̮ܫܵܟ݂ ܗܘܼ ܡܚܲܝܸܒ݂ ܐܲܢ̄ܬܿ. ܐܵܦ ܐܲܢ̄ܬܿ ܓܹܝܪ ܕܕ݂ܵܐܹܢ ܐܲܢ̄ܬܿ. ܒܗܹܝܢ ܗܘܼ ܡܸܬ݂ܗܲܦܲܟ݂ ܐܲܢ̄ܬܿ.

² ܘܝܵܕ݂ܥܝܼܢܲܢ ܕܐܝܼܬ݂ܵܘܗܝ ܕܝܼܢܹܗ ܕܐܲܠܵܗܵܐ ܒܩܘܼܫܬܵܐ. ܥܲܠ ܐܲܝܠܹܝܢ ܕܲܒ݂ܗܵܠܹܝܢ ܡܸܬ݂ܗܲܦܟ݂ܝܼܢ.

³ ܡܵܢܵܐ ܕܹܝܢ ܡܸܬ݂ܚܲܫܲܒ݂ ܐܲܢ̄ܬܿ ܐܘܿ ܒܲܪܢܵܫܵܐ. ܕܕ݂ܵܐܹܢ ܐܲܢ̄ܬܿ ܠܐܲܝܠܹܝܢ ܕܲܒ݂ܗܵܠܹܝܢ ܡܸܬ݂ܗܲܦܟ݂ܝܼܢ. ܟܲܕ݂ ܐܵܦ ܐܲܢ̄ܬܿ ܒܗܹܝܢ ܡܸܬ݂ܗܲܦܲܟ݂ ܐܲܢ̄ܬܿ. ܕܐܲܢ̄ܬܿ ܬܸܥܪܘܿܩ ܡܸܢ ܕܝܼܢܹܗ ܕܐܲܠܵܗܵܐ.

⁴ ܐܵܘ ܥܲܠ ܥܘܼܬ݂ܪܵܐ ܕܒܲܣܝܼܡܘܼܬܹܗ. ܘܥܲܠ ܡܲܓ݁ܪܲܬ݂ ܪܘܼܚܹܗ. ܘܥܲܠ ܐܲܬ݂ܪܵܐ ܕܝܲܗ̄ܒ݂ ܠܵܟ݂. ܡܲܡܪܲܚ ܐܲܢ̄ܬܿ. ܘܠܵܐ ܝܵܕ݂ܲܥ ܐܲܢ̄ܬܿ. ܕܒܲܣܝܼܡܘܼܬܹܗ ܕܐܲܠܵܗܵܐ. ܠܲܬ݂ܝܵܒ݂ܘܼܬ݂ܵܐ ܗܘܼ ܡܲܝܬܿܝܵܐ ܠܵܟ݂.

⁵ ܐܸܠܵܐ ܡܛܠ ܩܲܫܝܘܼܬ݂ ܠܸܒܵܟ݂ ܕܠܵܐ ܬܵܐܹܒ݂. ܣܵܐܹܡ ܐܲܢ̄ܬܿ ܠܵܟ݂ ܣܝܼܡܬ݂ܵܐ ܕܪܘܼܓ݂ܙܵܐ. ܠܝܵܘܡܵܐ ܕܪܘܼܓ݂ܙܵܐ. ܘܲܠܓܸܠܝܵܢܵܐ ܕܕ݂ܝܼܢܵܐ ܟܹܐܢܵܐ ܕܐܲܠܵܗܵܐ.

⁶ ܗܵܘ ܕܦܵܪܲܥ ܠܟ݂ܠܢܵܫ ܐܲܝܟ݂ ܥܒ݂ܵܕ݂ܵܘ̈ܗܝ.

⁷ ܠܐܲܝܠܹܝܢ ܕܒܲܡܣܲܝܒܪܵܢܘܼܬ݂ܵܐ ܕܲܥܒ݂ܵܕܹ̈ܐ ܛܵܒܹ̈ܐ: ܬܸܫܒܿܘܿܚܬܵܐ ܘܐܝܼܩܵܪܵܐ ܘܠܵܐ ܡܸܬ݂ܚܲܒܠܵܢܘܼܬ݂ܵܐ ܒܵܥܹܝܢ. ܝܵܗܹܒ݂ ܠܗܘܿܢ ܚܲܝܹ̈ܐ ܕܲܠܥܵܠܲܡ.

⁸ ܐܲܝܠܹܝܢ ܕܹܝܢ ܕܥܵܨܹܝܢ. ܘܠܵܐ ܡܸܬܿܛܦܝܼܣܝܼܢ ܠܲܫܪܵܪܵܐ. ܐܸܠܵܐ ܠܥܵܘܠܵܐ ܡܸܬܿܛܦܝܼܣܝܼܢ. ܢܸܦܪܘܿܥ ܐܸܢܘܿܢ ܪܘܼܓ݂ܙܵܐ ܘܚܸܡܬ݂ܵܐ

⁹ ܘܐܘܼܠܨܵܢܵܐ ܘܛܘܼܪܵܦܵܐ. ܠܟ݂ܠ ܒܲܪܢܵܫ ܕܦܵܠܲܚ ܒ̈ܝܼܫܵܬ݂ܵܐ. ܠܝܗ̄ܘܼܕ݂ܵܝܹ̈ܐ ܠܘܼܩܕ݂ܲܡ. ܘܠܲܐܪ̈ܡܵܝܹܐ.

¹⁰ ܬܸܫܒܿܘܿܚܬܵܐ ܕܹܝܢ. ܘܐܝܼܩܵܪܵܐ ܘܲܫܠܵܡܵܐ. ܠܟ݂ܠ ܕܦܵܠܲܚ ܛܵܒ݂ܵܬ݂ܵܐ. ܠܝܗ̄ܘܼܕ݂ܵܝܹ̈ܐ ܠܘܼܩܕ݂ܲܡ. ܘܠܲܐܪ̈ܡܵܝܹܐ.

¹¹ ܠܵܐ ܓܹܝܪ ܐܝܼܬ݂ ܡܲܣܲܒ݂ ܒܐܲܦܹ̈ܐ ܠܘܵܬ݂ ܐܲܠܵܗܵܐ.

¹² ܐܲܝܠܹܝܢ ܓܹܝܪ ܕܲܕ݂ܠܵܐ ܢܵܡܘܿܣܵܐ ܚܛܵܘ. ܐܵܦ ܕܠܵܐ ܢܵܡܘܿܣܵܐ ܢܹܐܒ݂ܕܘܼܢ. ܘܐܲܝܠܹܝܢ ܕܲܒ݂ܢܵܡܘܿܣܵܐ ܚܛܵܘ. ܡܸܢ ܢܵܡܘܿܣܵܐ ܢܸܬܿܬܿܕ݂ܝܼܢܘܼܢ.

¹³ ܠܵܐ ܗ̄ܘܵܐ ܓܹܝܪ ܫܵܡܘܿܥܵܘ̈ܗܝ ܕܢܵܡܘܿܣܵܐ ܟܹܐܢ̈ܝܼܢ ܩܕ݂ܵܡ ܐܲܠܵܗܵܐ. ܐܸܠܵܐ ܥܵܒ݂ܘܿܕ݂ܵܘ̈ܗܝ ܕܢܵܡܘܿܣܵܐ ܡܸܙܕܲܕܩܝܼܢ.

¹⁴ ܐܸܢ ܓܹܝܪ ܥܲܡ̈ܡܹܐ ܕܢܵܡܘܿܣܵܐ ܠܲܝܬܿ ܠܗܘܿܢ. ܡܸܢ ܟܝܵܢܗܘܿܢ ܢܸܥܒܕ݂ܘܼܢ ܕܢܵܡܘܿܣܵܐ. ܗܵܢܘܿܢ ܕܟܲܕ݂ ܢܵܡܘܿܣܵܐ ܠܲܝܬܿ ܗ̄ܘܵܐ ܠܗܘܿܢ. ܠܢܲܦ̮ܫܗܘܿܢ ܗܘܵܘ ܢܵܡܘܿܣܵܐ.

¹⁵ ܘܗܸܢܘܿܢ ܡܚܵܘܹܝܢ ܥܒ݂ܵܕ݂̈ܗ ܕܢܵܡܘܿܣܵܐ. ܟܲܕ݂ ܟܬ݂ܝܼܒ݂ ܥܲܠ ܠܸܒܗܘܿܢ. ܘܡܲܣܗܕ݂ܵܐ ܥܠܲܝܗܘܿܢ ܬܹܐܪܬܿܗܘܿܢ. ܟܲܕ݂ ܡܲܚܫ̈ܒ݂ܵܬ݂ܗܘܿܢ ܡܟ݂ܵܘܢܵܢ. ܐܵܘ ܢܵܦ݂ܩܵܢ ܪܘܼܚܵܐ. ܠܲܚܕ݂ܵܕܹ̈ܐ:

¹⁶ ܒܝܵܘܡܵܐ ܕܕ݂ܵܐܸܢ ܐܲܠܵܗܵܐ ܟܲܣ̈ܝܵܬ݂ܵܐ ܕܲܒ݂ܢܲܝ̈ܢܵܫܵܐ: ܐܲܝܟ݂ ܐܹܘܲܢܓܲܠܝܼܘܿܢ ܕܝܼܠܝ ܒܝܲܕ݂ ܝܼܫܘܿܥ ܡܫܝܼܚܵܐ.

¹⁷ ܐܸܢ ܐܲܢ̄ܬܿ ܕܹܝܢ ܕܝܼܗܘܼܕ݂ܵܝܵܐ ܡܸܬ݂ܩܪܹܐ ܐܲܢ̄ܬܿ: ܘܡܸܬܿܬܿܢܝܼܚ ܐܲܢ̄ܬܿ ܥܲܠ ܢܵܡܘܿܣܵܐ: ܘܡܸܫܬܲܒ݂ܗܲܪ ܐܲܢ̄ܬܿ ܒܐܲܠܵܗܵܐ.

¹⁸ ܕܝܵܕ݂ܲܥ ܐܲܢ̄ܬܿ ܨܸܒ݂ܝܵܢܹܗ: ܘܦܵܪܹܫ ܐܲܢ̄ܬܿ ܘܵܠ̈ܝܵܬ݂ܵܐ. ܕܝܲܠܝܼܦ ܐܲܢ̄ܬܿ ܡܸܢ ܢܵܡܘܿܣܵܐ:

¹⁹ ܘܐܸܬܿܬܿܟܸܠܬܿ ܥܲܠ ܢܲܦ̮ܫܵܟ݂. ܕܲܡܕ݂ܲܒܪܵܢܵܐ ܐܲܢ̄ܬܿ ܕܲܥܘܝܼܪܹ̈ܐ: ܘܢܘܼܗܪܵܐ ܕܐܲܝܠܹܝܢ ܕܐܝܼܬܲܝܗܘܿܢ ܒܚܸܫܘܿܟ݂ܵܐ:

²⁰ ܘܪܵܕ݂ܘܿܝܵܐ ܕܚܲܣܝܼܪ̈ܲܝ ܪܸܥܝܵܢܵܐ: ܘܡܲܠܦܵܢܵܐ ܕܲܛܠܵܝܹ̈ܐ: ܘܐܝܼܬ݂ ܠܵܟ݂ ܕܘܼܡܝܵܐ ܕܝܼܕ݂ܲܥܬ݂ܵܐ. ܘܕ݂ܲܫܪܵܪܵܐ ܒܢܵܡܘܿܣܵܐ.

²¹ ܐܲܢ̄ܬܿ ܗܵܟܹܝܠ ܕܡܲܠܸܦ ܐܲܢ̄ܬܿ ܠܐܲܚܪ̈ܵܢܹܐ. ܠܢܲܦ̮ܫܵܟ݂ ܠܵܐ ܡܲܠܸܦ ܐܲܢ̄ܬܿ. ܘܲܕ݂ܡܲܟ݂ܪܸܙ ܐܲܢ̄ܬܿ ܕܠܵܐ ܢܸܓ݂ܢܒ݂ܘܢ. ܐܲܢ̄ܬܿ ܓܵܢܹܒ݂ ܐܲܢ̄ܬܿ.

²² ܘܕܐܵܡܲܪ ܐܲܢ̄ܬܿ ܕܠܵܐ ܢܓ݂ܘܪܘܼܢ. ܐܲܢ̄ܬܿ ܓܵܐܲܪ ܐܲܢ̄ܬܿ. ܘܐܲܢ̄ܬܿ ܕܫܵܐܹܛ ܐܲܢ̄ܬܿ ܦܬܲܟ݂ܪܹ̈ܐ. ܡܚܲܠܸܨ ܐܲܢ̄ܬܿ ܒܹܝܬ݂ ܡܲܩܕܫܵܐ.

²³ ܘܐܲܢ̄ܬܿ ܕܡܸܫܬܲܒ݂ܗܲܪ ܐܲܢ̄ܬܿ ܒܢܵܡܘܿܣܵܐ. ܒܗܵܘ ܕܥܵܒܲܪ ܐܲܢ̄ܬܿ ܥܲܠ ܢܵܡܘܿܣܵܐ. ܠܐܲܠܵܗܵܐ ܗ̄ܘܼ ܡܨܲܥܲܪ ܐܲܢ̄ܬܿ.

²⁴ ܫܡܹܗ ܓܹܝܪ ܕܐܲܠܵܗܵܐ. ܡܛܠܵܬ݂ܟ݂ܘܿܢ ܗܘܼ ܡܸܬ݂ܓܲܕܲܦ ܒܹܝܬ݂ ܥܲܡ̈ܡܹܐ. ܐܲܝܟ݂ ܕܲܟܬ݂ܝܼܒ݂.

²⁵ ܓܙܘܼܪܬܵܐ ܓܹܝܪ ܡܲܗܢܝܵܐ. ܐܸܢ ܢܵܡܘܿܣܵܐ ܬܸܓ݂ܡܘܼܪ. ܐܸܢ ܬܸܥܒܲܪ ܠܵܟ݂ ܕܹܝܢ ܡܸܢ ܢܵܡܘܿܣܵܐ. ܓܙܘܼܪܬܵܟ݂ ܗܘܸܵܬ݂ ܠܵܗܿ ܥܘܼܪܠܘܼܬ݂ܵܐ.

²⁶ ܐܸܢ ܗܘܼ ܕܹܝܢ ܕܥܘܼܪܠܘܼܬ݂ܵܐ ܬܸܛܲܪ ܦܘܼܩܕܵܢܹܗ ܕܢܵܡܘܿܣܵܐ. ܠܵܐ ܗܵܐ ܥܘܼܪܠܘܼܬ݂ܵܐ ܡܸܬ݂ܚܲܫܒܵܐ ܠܵܗܿ ܓܙܘܼܪܬܵܐ.

²⁷ ܘܲܬܿܕ݂ܘܼܢ ܥܘܼܪܠܘܼܬ݂ܵܐ ܕܡܸܢ ܟܝܵܢܵܗܿ ܓܵܡܪܵܐ ܢܵܡܘܿܣܵܐ. ܠܵܟ݂ ܕܒܲܟ݂ܬ݂ܵܒ݂ܵܐ ܘܒܲܓ݂ܙܘܼܪܬܵܐ ܥܵܒܲܪ ܐܲܢ̄ܬܿ ܥܲܠ ܢܵܡܘܿܣܵܐ.

²⁸ ܠܵܐ ܗ̄ܘܵܐ ܓܹܝܪ ܡܲܢ ܕܲܒ݂ܓܸܠܝܵܐ. ܗܵܘ ܗܘܼ ܝܗܘܼܕ݂ܵܝܵܐ. ܐܵܦܠܵܐ ܐܲܝܕ݂ܵܐ ܕܡܸܬ݂ܚܲܙܝܵܐ ܒܒܸܣܪܵܐ ܓܙܘܼܪܬܵܐ.

²⁹ ܐܸܠܵܐ ܗܵܘ ܗܘܼ ܝܗܘܼܕ݂ܵܝܵܐ. ܐܲܝܢܵܐ ܕܲܒ݂ܟܸܣܝܵܐ ܗܘܼ. ܘܲܓ݂ܙܘܼܪܬܵܐ ܐܲܝܕ݂ܵܐ ܕܲܕ݂ܠܸܒܵܐ ܗܝܼ. ܒܪܘܼܚ ܘܠܵܐ ܒܲܟ݂ܬ݂ܵܒ݂ܵܐ. ܐܲܝܕ݂ܵܐ ܕܬܸܫܒܘܿܚܬܵܗܿ ܠܵܐ ܗ̄ܘܵܬ݂ ܡܸܢ ܒܢܲܝ̈ܢܵܫܵܐ. ܐܸܠܵܐ ܡܸܢ ܐܲܠܵܗܵܐ.

3

¹ ܡܵܢܵܐ ܗܝ ܗܵܟܹܝܠ ܝܲܬܝܼܪܘܼܬܹܗ ܕܝܗܘܼܕ݂ܵܝܵܐ. ܐܵܘ ܡܵܢܵܐ ܝܘܼܬ݂ܪܵܢܵܗܿ ܕܲܓ݂ܙܘܼܪܬܵܐ.

² ܣܲܓܝܼ ܒܟ݂ܠ ܡܸܕܸܡ. ܠܘܼܩܕ݂ܲܡ ܕܐܸܬ݂ܗܲܝܡܲܢ ܡܸܠܵܘ̈ܗܝ ܕܐܲܠܵܗܵܐ.

³ ܐܸܢ ܡܸܢܗܘܿܢ ܓܹܝܪ ܠܵܐ ܗܲܝܡܸܢܘ. ܕܲܠܡܵܐ ܒܲܕ݂ܠܵܐ ܗܲܝܡܸܢܘ. ܗܲܝܡܵܢܘܼܬܹܗ ܕܐܲܠܵܗܵܐ ܒܲܛܸܠܘ.

⁴ ܚܵܣ. ܐܝܼܬ݂ܵܘܗܝ ܓܹܝܪ ܐܲܠܵܗܵܐ ܫܲܪܝܼܪܵܐ. ܘܟ݂ܠ ܒܲܪܢܵܫ ܕܲܓܵܠ. ܐܲܝܟܲܢܵܐ ܕܲܟܬ݂ܝܼܒ݂. ܕܬܸܗܘܹܐ ܟܹܐܝܢ ܒܡܸܠܲܝ̈ܟ. ܘܬܸܙܟܹܐ ܟܲܕ݂ ܕܵܝܢܝܼܢ ܠܵܟ݂.

⁵ ܐܸܢ ܕܹܝܢ ܥܵܘܠܲܢ ܟܹܐܢܘܼܬܹܗ ܕܐܲܠܵܗܵܐ ܡܩܝܼܡ. ܡܵܢܵܐ ܢܹܐܡܲܪ. ܠܡܵܐ ܥܵܘܵܠ ܗܘܼ ܐܲܠܵܗܵܐ. ܕܡܲܝܬܹܐ ܪܘܼܓ݂ܙܹܗ. ܐܲܝܟ݂ ܒܲܪܢܵܫܵܐ ܗܘܼ ܡܡܲܠܸܠ ܐ̄ܢܵܐ.

⁶ ܚܵܣ. ܘܐܸܢ ܠܵܐ. ܐܲܝܟܲܢܵܐ ܢܕ݂ܘܼܢ ܐܲܠܵܗܵܐ ܠܥܵܠܡܵܐ.

⁷ ܐܸܢ ܓܹܝܪ ܫܪܵܪܹܗ ܕܐܲܠܵܗܵܐ. ܐܸܬ݂ܝܲܬܲܪ ܒܕ݂ܲܓܵܠܘܼܬ݂ܝ ܠܬܸܫܒܘܿܚܬܹܿܗ ܕܝܼܠܹܗ. ܠܡܵܢܵܐ ܗܵܟܹܝܠ ܐܸܢܵܐ ܐܲܝܟ݂ ܚܲܛܵܝܵܐ. ܡܸܬܿܬܿܕ݂ܝܼܢ ܐ̄ܢܵܐ.

⁸ ܐܵܘ ܕܲܠܡܵܐ ܐܲܝܟ݂ ܕܲܡܓܲܕܦܝܼܢ ܥܠܲܝܢ. ܘܐܵܡܪܝܼܢ. ܕܐܵܡܪܝܼܢܲܢ ܕܢܸܥܒܸܕ݂ ܒ̈ܝܼܫܵܬ݂ܵܐ. ܕܢܹܐܬ݂ܝܵܢ ܛܵܒ݂ܵܬ݂ܵܐ. ܗܵܢܘܿܢ ܕܕ݂ܝܼܢܗܘܿܢ ܢܛܝܼܪ ܗܘܼ ܠܟܹܐܢܘܼܬ݂ܵܐ.

⁹ ܡܵܢܵܐ ܗܵܟܹܝܠ ܐܲܚܝܼܕ݂ܝܼܢܲܢ ܝܲܬܝܼܪܵܐ. ܕܩܲܕܸܡܢ ܦܣܲܩܢ ܥܲܠ ܝܗ̄ܘܼܕ݂ܵܝܹ̈ܐ ܘܥܲܠ ܐܲܪ̈ܡܵܝܹܐ: ܕܲܬ݂ܚܹܝܬ݂ ܚܛܝܼܬ݂ܵܐ ܐܸܢܘܿܢ ܟܠܗܘܿܢ.

¹⁰ ܐܲܝܟ݂ ܕܲܟܬ݂ܝܼܒ݂. ܕܠܲܝܬܿ ܟܹܐܢܵܐ. ܐܵܦܠܵܐ ܚܲܕ݂.

¹¹ ܘܠܵܐ ܕܡܸܣܬܲܟܲܠ ܘܠܵܐ ܕܒ݂ܵܥܹܐ ܠܐܲܠܵܗܵܐ.

¹² ܟܠܗܘܿܢ ܣܛܵܘ ܐܲܟ݂ܚܕ݂ܵܐ. ܘܐܸܣܬܿܠܝܼܘ. ܘܠܲܝܬܿ ܕܥܵܒܹܿܕ݂ ܛܵܒ݂ܬ݂ܵܐ. ܐܵܦܠܵܐ ܚܲܕ݂.

¹³ ܩܲܒ݂ܪܹ̈ܐ ܦܬ݂ܝܼܚܹ̈ܐ ܓܲܓ݁ܪ̈ܵܬ݂ܗܘܿܢ. ܘܠܸܫܵܢܲܝ̈ܗܘܿܢ ܢܲܟܘܼܠܬ݂ܵܢܝܼ̈ܢ. ܘܚܸܡܬ݂ܵܐ ܕܐܸܣܦܸܣ ܬܚܹܝܬ݂ ܣܸܦܘܵܬ݂ܗ̈ܘܿܢ.

¹⁴ ܦܘܼܡܗܘܿܢ ܡܠܹܐ ܠܵܘܛܬ݂ܵܐ. ܘܡܸܪܬ݂ܵܐ.

¹⁵ ܘܪܸ̈ܓ݂ܠܲܝܗܘܿܢ ܩܲܠܝܼܠܵܢ ܠܡܹܐܫܲܕ݂ ܕܡܵܐ.

¹⁶ ܫܚܵܩܵܐ ܘܕ݂ܘܼܘܵܢܵܐ ܒܐܘܼܪ̈ܚܵܬ݂ܗܘܿܢ.

¹⁷ ܘܐܘܼܪܚܵܐ ܕܲܫܠܵܡܵܐ ܠܵܐ ܝܼܕ݂ܲܥܘ.

¹⁸ ܘܕܸܚܠܬܹܗ ܕܐܲܠܵܗܵܐ ܠܲܝܬܿ ܩܕ݂ܵܡ ܥܲܝܢܲܝ̈ܗܘܿܢ.

¹⁹ ܝܵܕ݂ܥܝܼܢܲܢ ܕܹܝܢ. ܕܡܸܕܸܡ ܕܐܵܡܲܪ ܢܵܡܘܿܣܵܐ. ܠܐܲܝܠܹܝܢ ܕܲܒ݂ܢܵܡܘܿܣܵܐ ܐܸܢܘܿܢ ܐܸܡܲܪ. ܕܟܠ ܦܘܼܡ ܢܸܣܬܿܟܲܪ. ܘܥܵܠܡܵܐ ܟܠܹܗ ܢܸܬ݂ܚܲܝܲܒ݂ ܠܐܲܠܵܗܵܐ.

²⁰ ܡܛܠ ܕܡܸܢ ܥܒ݂ܵܕ݂ܵܘ̈ܗܝ ܕܢܵܡܘܿܣܵܐ. ܠܵܐ ܡܸܙܕܲܕܲܩ ܟܠ ܒܣܲܪ ܩܕ݂ܵܡܵܘܗܝ. ܡܸܢ ܢܵܡܘܿܣܵܐ ܓܹܝܪ ܐܸܬ݂ܝܲܕ݂ܥܲܬ݂ ܚܛܝܼܬ݂ܵܐ.

²¹ ܗܵܫܵܐ ܕܹܝܢ ܕܠܵܐ ܢܵܡܘܿܣܵܐ. ܟܹܐܢܘܼܬܹܗ ܕܐܲܠܵܗܵܐ ܐܸܬ݂ܓܲܠܝܲܬ݂. ܘܡܲܣܗܸܕ݂ ܥܠܹܝܗܿ ܗܘܼ ܢܵܡܘܿܣܵܐ. ܘܲܢܒ݂ܝܹ̈ܐ.

²² ܟܹܐܢܘܼܬܹܗ ܕܹܝܢ ܕܐܲܠܵܗܵܐ. ܒܝܲܕ݂ ܗܲܝܡܵܢܘܼܬ݂ܵܐ ܗܝ ܕܝܼܫܘܿܥ ܡܫܝܼܚܵܐ. ܠܟ݂ܠܢܵܫ. ܐܵܦ ܥܲܠ ܟܠܢܵܫ. ܕܲܡܗܲܝܡܸܢ ܒܹܗ. ܠܲܝܬܿ ܓܹܝܪ ܦܘܼܪܫܵܢܵܐ.

²³ ܡܛܠ ܕܟ݂ܠܗܘܿܢ ܚܛܵܘ. ܘܚܲܣܝܼܪܝܼܢ ܡܸܢ ܬܸܫܒܘܿܚܬܹܿܗ ܕܐܲܠܵܗܵܐ.

²⁴ ܘܡܸܙܕܲܕܩܝܼܢ ܒܛܲܝܒܘܼܬ݂ܵܐ. ܡܲܓܵܢ. ܘܲܒ݂ܦܘܼܪܩܵܢܵܐ ܕܐܝܼܬ݂ܵܘܗܝ ܒܝܼܫܘܿܥ ܡܫܝܼܚܵܐ.

²⁵ ܗܵܢܵܐ ܕܩܲܕܸܡ ܣܵܡܹܗ ܐܲܠܵܗܵܐ. ܚܘܼܣܵܝܵܐ ܒܗܲܝܡܵܢܘܼܬ݂ܵܐ ܕܲܕ݂ܡܹܗ. ܡܛܠ ܚܛܵܗܲܝ̈ܢ ܕܡܸܢ ܩܕ݂ܝܼܡ ܚܛܲܝܢ.

²⁶ ܒܐܲܬ݂ܪܵܐ ܕܝܲܗ̄ܒ݂ ܠܲܢ ܐܲܠܵܗܵܐ. ܒܡܲܓ݁ܪܲܬ݂ ܪܘܼܚܹܗ. ܠܬܲܚܘܝܼܬ݂ܵܐ ܕܟܹܐܢܘܼܬܹܗ ܕܲܒ݂ܙܲܒ݂ܢܵܐ ܗܵܢܵܐ. ܕܗܘܼ ܢܸܗܘܹܐ ܟܹܐܢܵܐ. ܘܲܢܙܲܕܸܩ ܒܟܹܐܢܘܼܬ݂ܵܐ. ܠܡܲܢ ܕܲܒ݂ܗܲܝܡܵܢܘܼܬ݂ܵܐ ܗܘܼ ܕܡܵܪܲܢ ܝܼܫܘܿܥ ܡܫܝܼܚܵܐ.

²⁷ ܐܲܝܟܵܘ ܗܵܟܹܝܠ ܫܘܼܒ݂ܗܵܪܵܐ. ܐܸܬ݂ܒܲܛܲܠ ܠܹܗ. ܒܐܲܝܢܵܐ ܢܵܡܘܿܣܵܐ: ܕܲܥܒ݂ܵܕܹ̈ܐ. ܠܵܐ. ܐܸܠܵܐ ܒܢܵܡܘܿܣܵܐ ܕܗܲܝܡܵܢܘܼܬ݂ܵܐ.

²⁸ ܡܸܬ݂ܪܲܥܹܝܢܲܢ (ܡܸܬ݂ܪܲܥܹܝܢ ܚ̄ܢܲܢ) ܗܵܟܹܝܠ. ܕܲܒ݂ܗܲܝܡܵܢܘܼܬ݂ܵܐ ܗܘܼ ܡܸܙܕܲܕܲܩ ܒܲܪܢܵܫܵܐ. ܘܠܵܐ ܒܲܥܒ݂ܵܕܹ̈ܐ ܕܢܵܡܘܿܣܵܐ.

²⁹ ܠܡܵܐ ܓܹܝܪ ܐܲܠܵܗܵܐ ܕܝܗ̄ܘܼܕ݂ܵܝܹ̈ܐ ܗ̄ܘܼ ܒܲܠܚܘܿܕ݂. ܘܲܕ݂ܥܲܡ̈ܡܹܐ ܠܵܐ. ܐܹܝܢ ܐܵܦ ܕܥܲܡ̈ܡܹܐ.

³⁰ ܡܛܠ ܕܚܲܕ݂ ܗܘܼ ܐܲܠܵܗܵܐ. ܕܲܡܙܲܕܸܩ ܓܙܘܼܪܬܵܐ ܒܗܲܝܡܵܢܘܼܬ݂ܵܐ. ܐܵܦ ܥܘܼܪܠܘܼܬ݂ܵܐ ܒܵܗܿ ܒܗܲܝܡܵܢܘܼܬ݂ܵܐ.

³¹ ܠܡܵܐ ܗܵܟܹܝܠ ܢܵܡܘܿܣܵܐ ܗܘܼ ܡܒܲܛܠܝܼܢܲܢ ܒܗܲܝܡܵܢܘܼܬ݂ܵܐ. ܚܵܣ. ܐܸܠܵܐ ܢܵܡܘܿܣܵܐ ܗܘܼ ܡܩܝܼܡܝܼܢܲܢ.

4

¹ ܡܵܢܵܐ ܗܵܟܹܝܠ ܐܵܡܪܝܼܢܲܢ ܥܲܠ ܐܲܒ݂ܪܵܗܵܡ ܪܹܫܵܐ ܕܐܲܒ݂ܵܗ̈ܵܬ݂ܵܐ. ܕܐܸܫܟܲܚ ܒܲܒ݂ܣܲܪ.

² ܐܸܠܘܼ ܓܹܝܪ ܐܲܒ݂ܪܵܗܵܡ ܡܸܢ ܥܒ݂ܵܕܹ̈ܐ ܐܸܙܕܲܕܲܩ ܗ̄ܘܵܐ. ܐܝܼܬ݂ ܗ̄ܘܵܐ ܠܹܗ ܫܘܼܒ݂ܗܵܪܵܐ. ܐܸܠܵܐ ܠܵܐ ܠܘܵܬ݂ ܐܲܠܵܗܵܐ.

³ ܡܵܢܵܐ ܓܹܝܪ ܐܸܡܲܪ ܟܬ݂ܵܒ݂ܵܐ. ܕܗܲܝܡܸܢ ܐܲܒ݂ܪܵܗܵܡ ܠܐܲܠܵܗܵܐ. ܘܐܸܬ݂ܚܲܫܒܲܬ݂ ܠܹܗ ܠܙܲܕܝܼܩܘܼ.

⁴ ܠܡܲܢ ܕܦܵܠܲܚ ܕܹܝܢ. ܠܵܐ ܡܸܬ݂ܚܫܸܒ݂ ܠܹܗ ܐܲܓ݂ܪܹܗ ܐܲܝܟ݂ ܕܲܒ݂ܛܲܝܒܘܼ. ܐܸܠܵܐ ܐܲܝܟ݂ ܡܲܢ ܕܡܸܬܿܬܿܚܝܼܒ݂ ܠܹܗ.

⁵ ܠܗܵܘ ܕܹܝܢ ܕܠܵܐ ܦܠܲܚ. ܐܸܠܵܐ ܗܲܝܡܸܢ ܒܲܠܚܘܿܕ݂ ܒܡܲܢ ܕܲܡܙܲܕܸܩ ܠܚܲܛܵܝܹ̈ܐ. ܡܸܬ݂ܚܲܫܒܵܐ ܠܹܗ ܗܲܝܡܵܢܘܼܬܹܗ ܠܟܹܐܢܘܼ.

⁶ ܐܲܝܟܲܢܵܐ ܕܐܵܦ ܕܵܘܝܼܕ݂ ܐܸܡܲܪ ܥܲܠ ܛܘܼܒܹܗ ܕܓܲܒ݂ܪܵܐ: ܐܲܝܢܵܐ ܕܐܲܠܵܗܵܐ ܚܵܫܹܒ݂ ܠܹܗ ܙܲܕܝܼܩܘܼܬ݂ܵܐ ܕܠܵܐ ܥܒ݂ܵܕܹ̈ܐ: ܟܲܕ݂ ܐܵܡܲܪ.

⁷ ܕܛܘܼܒܲܝܗܘܿܢ ܠܐܲܝܠܹܝܢ ܕܐܸܫܬܿܒܸܩ ܠܗܘܿܢ ܥܵܘܠܗܘܿܢ. ܘܐܸܬ݂ܟܲܣܝܼܘ ܚܛܵܗܲܝ̈ܗܘܿܢ.

⁸ ܘܛܘܼܒ݂ܵܘܗܝ ܠܓܲܒ݂ܪܵܐ ܕܠܵܐ ܢܸܚܫܘܼܒ݂ ܠܹܗ ܐܲܠܵܗܵܐ ܚܛܝܼܬܹܗ.

⁹ ܗܵܢܵܐ ܗܵܟܹܝܠ ܛܘܼܒ݂ܵܐ. ܥܲܠ ܓܙܘܼܪܬܵܐ ܗܘܼ. ܐܵܘ ܥܲܠ ܥܘܼܪܠܘܼܬ݂ܵܐ. ܐܵܡܪܝܼܢܲܢ ܓܹܝܪ. ܕܐܸܬ݂ܚܲܫܒܲܬ݂ ܠܐܲܒ݂ܪܵܗܵܡ ܗܲܝܡܵܢܘܼܬܹܗ ܠܟܹܐܢܘܼ.

¹⁰ ܐܲܝܟܲܢܵܐ ܗܵܟܹܝܠ ܐܸܬ݂ܚܲܫܒܲܬ݂ ܠܹܗ: ܒܲܓܙܘܼܪܬܵܐ ܐܵܘ ܒܥܘܼܪܠܘܼܬ݂ܵܐ. ܠܵܐ ܗ̄ܘܵܐ ܒܲܓܙܘܼܪܬܵܐ ܐܸܠܵܐ ܒܥܘܼܪܠܘܼܬ݂ܵܐ.

¹¹ ܐܵܬ݂ܵܐ ܗܘܼ ܓܹܝܪ ܫܲܩܠܵܗܿ. ܠܲܓܙܘܼܪܬܵܐ: ܘܚܵܬ݂ܡܵܐ ܕܟܹܐܢܘܼܬ݂ܵܐ ܕܗܲܝܡܵܢܘܼܬܹܗ ܕܲܒ݂ܥܘܼܪܠܘܼܬ݂ܵܐ: ܕܢܸܗܘܹܐ ܐܲܒ݂ܵܐ ܠܟ݂ܠܗܘܿܢ ܐܲܝܠܹܝܢ ܕܲܡܗܲܝܡܢܝܼܢ ܡܸܢ ܥܘܼܪܠܘܼܬ݂ܵܐ. ܕܬܸܬ݂ܚܫܸܒ݂ ܐܵܦ ܠܗܘܿܢ ܠܟܹܐܢܘܼ.

¹² ܘܐܲܒ݂ܵܐ ܠܲܓܙܘܼܪܬܵܐ ܠܵܐ ܗ̄ܘܵܐ ܠܐܲܝܠܹܝܢ ܕܡܸܢ ܓܙܘܼܪܬܵܐ ܐܸܢܘܿܢ ܒܲܠܚܘܿܕ݂. ܐܸܠܵܐ ܐܵܦ ܠܐܲܝܠܹܝܢ ܕܫܵܠܡܝܼܢ ܠܥܸܩ̈ܒ݂ܵܬ݂ܵܐ ܕܗܲܝܡܵܢܘܼܬ݂ܵܐ ܕܥܘܼܪܠܘܼܬ݂ܵܐ ܕܐܲܒ݂ܘܼܢ ܐܲܒ݂ܪܵܗܵܡ.

¹³ ܠܵܐ ܗ̄ܘܵܐ ܓܹܝܪ ܒܢܵܡܘܿܣܵܐ ܗܘܵܐ ܡܘܼܠܟܵܢܵܐ ܠܐܲܒ݂ܪܵܗܵܡ ܘܲܠܙܲܪܥܹܗ. ܕܢܸܗܘܹܐ ܝܵܪܬܵܐ ܠܥܵܠܡܵܐ. ܐܸܠܵܐ ܒܟܹܐܢܘܼܬ݂ܵܐ ܕܗܲܝܡܵܢܘܼܬܹܗ.

¹⁴ ܐܸܠܘܼ ܓܹܝܪ ܗܵܠܹܝܢ ܕܡܸܢ ܢܵܡܘܿܣܵܐ. ܗܘܵܘ ܝܵܪ̈ܬܹܐ. ܣܪܝܼܩܵܐ ܗ̄ܘܵܬ݂ ܗܲܝܡܵܢܘܼܬ݂ܵܐ. ܘܲܡܒܲܛܲܠ ܗ̄ܘܵܐ ܡܘܼܠܟܵܢܵܐ.

¹⁵ ܢܵܡܘܿܣܵܐ ܓܹܝܪ ܡܲܥܒܕ݂ܵܢܵܐ ܗܘܼ ܕܪܘܼܓ݂ܙܵܐ. ܟܲܪ ܕܠܲܝܬܿ ܓܹܝܪ ܢܵܡܘܿܣܵܐ. ܐܵܦܠܵܐ ܥܒ݂ܵܪ ܢܵܡܘܿܣܵܐ.

¹⁶ ܡܛܠ ܗܵܢܵܐ ܒܗܲܝܡܵܢܘܼܬ݂ܵܐ ܕܲܒ݂ܛܲܝܒܘܼܬ݂ܵܐ ܢܸܙܕܲܕܲܩ. ܘܢܸܗܘܹܐ ܫܲܪܝܼܪ ܡܘܼܠܟܵܢܵܐ ܠܟ݂ܠܹܗ ܙܲܪܥܹܗ. ܠܵܐ ܠܐܲܝܢܵܐ ܕܡܸܢ ܢܵܡܘܿܣܵܐ ܗܘܼ ܒܲܠܚܘܿܕ݂. ܐܸܠܵܐ ܐܵܦ ܠܐܲܝܢܵܐ ܕܡܸܢ ܗܲܝܡܵܢܘܼܬ݂ܵܐ ܗܘܼ ܕܐܲܒ݂ܪܵܗܵܡ. ܕܐܝܼܬ݂ܵܘܗܝ ܐܲܒ݂ܵܐ ܕܟ݂ܠܲܢ.

¹⁷ ܐܲܝܟܲܢܵܐ ܕܲܟܬ݂ܝܼܒ݂. ܕܣܵܡܬܵܟ݂ ܐܲܒ݂ܵܐ ܠܣܘܿܓ݂ܵܐܐ ܕܥܲܡ̈ܡܹܐ. ܩܕ݂ܵܡ ܐܲܠܵܗܵܐ. ܗܵܘ ܕܗܲܝܡܸܢܬܿ ܒܹܗ. ܕܡܲܚܹܐ ܡܝܼܬܹ̈ܐ: ܘܩܵܪܹܐ ܠܐܲܝܠܹܝܢ ܕܠܵܐ ܐܝܼܬܲܝܗܘܿܢ. ܐܲܝܟ݂ ܐܝܼܬܲܝܗܘܿܢ.

¹⁸ ܘܲܕ݂ܠܵܐ ܣܲܒ݂ܪܵܐ. ܠܣܲܒ݂ܪܵܐ ܗܲܝܡܸܢ. ܕܢܸܗܘܹܐ ܐܲܒ݂ܵܐ ܠܣܘܿܓ݂ܵܐܐ ܕܥܲܡ̈ܡܹܐ: ܐܲܝܟ݂ ܕܲܟ݂ܬ݂ܝܼܒ݂. ܕܗܵܟܲܢܵܐ ܢܸܗܘܹܐ ܙܲܪܥܵܟ݂.

¹⁹ ܘܠܵܐ ܐܸܬ݂ܟܪܲܗ ܒܗܲܝܡܵܢܘܼܬܹܗ. ܟܲܕ݂ ܡܸܬ݂ܒܲܩܹܐ ܒܦܲܓ݂ܪܹܗ ܡܝܼܬ݂ܵܐ. ܕܲܗܘܵܐ ܒܲܪ ܡܵܐܐ ܫܢ̈ܝܼܢ. ܘܲܒ݂ܡܲܪܒܥܵܐ ܡܝܼܬ݂ܵܐ ܕܣܲܪܵܐ.

²⁰ ܘܲܒ݂ܡܘܼܠܟܵܢܵܐ ܕܐܲܠܵܗܵܐ ܠܵܐ ܐܸܬ݂ܦܲܠܲܓ݂. ܐܲܝܟ݂ ܚܲܣܝܼܪ ܗܲܝܡܵܢܘܼܬ݂ܵܐ. ܐܸܠܵܐ ܐܸܬ݂ܚܲܝܲܠ ܒܗܲܝܡܵܢܘܼܬ݂ܵܐ. ܘܝܲܗ̄ܒ݂ ܬܸܫܒܿܘܿܚܬܵܐ ܠܐܲܠܵܗܵܐ.

²¹ ܘܐܲܫܲܪ ܕܡܸܕܸܡ ܕܲܡܠܲܟ݂ ܠܹܗ ܐܲܠܵܗܵܐ. ܡܸܫܟܲܚ ܠܡܸܓ݂ܡܲܪ.

²² ܡܛܠ ܗܵܢܵܐ ܐܸܬ݂ܚܲܫܒܲܬ݂ ܠܹܗ ܠܟܹܐܢܘܼ.

²³ ܘܠܵܐ ܗ̄ܘܵܐ ܡܛܠܵܬܹܗ ܒܲܠܚܘܿܕ݂ ܐܸܬ݂ܟܲܬ݂ܒܲܬ݂ ܗܵܕܹܐ: ܕܐܬ݂ܚܲܫܒܲܬ݂ ܗܲܝܡܵܢܘܼܬܹܗ ܠܟܹܐܢܘܼ.

²⁴ ܐܸܠܵܐ ܐܵܦ ܡܛܠܵܬܲܢ. ܕܐܵܦܠܲܢ ܥܬ݂ܝܼܕ݂ ܗܘܼ ܕܢܸܚܫܘܼܒ݂ ܐܲܝܠܹܝܢ ܕܗܲܝܡܸܢܢ ܒܡܲܢ ܕܐܲܩܝܼܡ ܠܡܵܪܲܢ ܝܼܫܘܿܥ ܡܫܝܼܚܵܐ ܡܸܢ ܒܹܝܬ݂ ܡܝܼܬܹ̈ܐ.

²⁵ ܕܗܘܼ ܐܸܫܬܿܠܸܡ ܡܛܠ ܚܛܵܗܲܝ̈ܢ. ܘܩܼܵܡ ܡܛܠ ܕܲܢܙܲܕܩܲܢ.

5

¹ ܡܛܠ ܕܐܸܙܕܲܕܲܩܢ ܗܵܟܹܝܠ ܒܗܲܝܡܵܢܘܼܬ݂ܵܐ. ܢܸܗܘܹܐ ܠܲܢ ܫܠܵܡܵܐ ܠܘܵܬ݂ ܐܲܠܵܗܵܐ. ܒܡܵܪܲܢ ܝܼܫܘܿܥ ܡܫܝܼܚܵܐ.

² ܕܒܹܗ ܐܸܬ݂ܩܲܪܲܒ݂ܢ ܒܗܲܝܡܵܢܘܼܬ݂ܵܐ ܠܛܲܝܒܘܼܬ݂ܵܐ ܗܵܕܹܐ. ܕܒ݂ܵܗܿ ܩܵܝܡܝܼܢܲܢ. ܘܡܸܫܬܲܒ݂ܗܪܝܼܢܲܢ ܒܣܲܒ݂ܪܵܐ ܕܬܸܫܒܘܿܚܬܹܿܗ ܕܐܲܠܵܗܵܐ.

³ ܘܠܵܐ ܗܵܟܲܢܵܐ ܒܲܠܚܘܿܕ݂. ܐܸܠܵܐ ܐܵܦ ܒܐܘܼܠܨܵܢܲܝ̈ܢ ܡܸܫܬܲܒ݂ܗܪܝܼܢܲܢ. ܕܝܵܕ݂ܥܝܼܢܲܢ ܕܐܘܼܠܨܵܢܵܐ. ܡܣܲܝܒܪܵܢܘܼܬ݂ܵܐ ܓܵܡܲܪ ܒܲܢ.

⁴ ܘܲܡܣܲܝܒܪܵܢܘܼܬ݂ܵܐ. ܒܘܼܩܝܵܐ. ܘܒ݂ܘܩܝܵܐ ܣܲܒ݂ܪܵܐ.

⁵ ܣܲܒ݂ܪܵܐ ܕܹܝܢ. ܠܵܐ ܡܲܒ݂ܗܸܬ݂. ܡܛܠ ܕܚܘܼܒܹܗ ܕܐܲܠܵܗܵܐ ܡܫܲܦܲܥ ܥܲܠ ܠܸܒ̈ܵܘܵܬܲܢ. ܒܪܘܼܚܵܐ ܕܩܘܼܕ݂ܫܵܐ ܕܐܬ݂ܝܲܗܒܲܬ݂ ܠܲܢ.

⁶ ܐܸܢ ܕܹܝܢ ܡܫܝܼܚܵܐ ܡܛܠ ܟܪܝܼܗܘܼܬܲܢ ܒܙܲܒ݂ܢܵܐ ܗܵܢܵܐ. ܚܠܵܦ ܪܲܫܝܼܥܹܐ ܡܝܼܬ݂.

⁷ ܠܡܲܚܣܸܢ ܓܹܝܪ ܐ̄ܢܵܫ ܚܠܵܦ ܪܲܫܝܼܥܹܐ ܡܵܐܹܬ݂. ܚܠܵܦ ܛܵܒܹ̈ܐ ܓܹܝܪ ܛܵܟ݂ ܡܲܡܪܲܚ ܐ̄ܢܵܫ ܠܲܡܡܵܬ݂.

⁸ ܗܵܪܟܵܐ ܡܚܵܘܹܐ ܐܲܠܵܗܵܐ ܚܘܼܒܹܗ ܕܲܠܘܵܬܲܢ. ܕܐܸܢ ܟܲܕ݂ ܚܲܛܵܝܹ̈ܐ ܐܝܼܬܲܝܢ ܗ̄ܘܲܝܢ. ܡܫܝܼܚܵܐ ܚܠܵܦܲܝܢ ܡܝܼܬ݂.

⁹ ܟܡܵܐ ܗܵܟܹܝܠ ܝܲܬܝܼܪܵܐܝܼܬ݂ ܢܸܙܕܲܕܲܩ ܗܵܫܵܐ ܒܲܕ݂ܡܹܗ. ܘܒܹܗ ܢܸܬ݂ܦܲܨܹܐ ܡܸܢ ܪܘܼܓ݂ܙܵܐ.

¹⁰ ܐܸܢ ܓܹܝܪ ܟܲܕ݂ ܐܝܼܬܲܝܢ ܒܥܸܠܕܒ݂ܵܒܹ̈ܐ ܐܸܬ݂ܪܲܥܝܼ ܥܲܡܲܢ ܐܲܠܵܗܵܐ ܒܡܵܘܬܵܐ ܕܲܒ݂ܪܹܗ. ܟܡܵܐ ܗܵܟܹܝܠ ܝܲܬܝܼܪܵܐܝܼܬ݂ ܒܬܲܪܥܘܼܬܹܗ ܢܸܚܹܐ ܒܚܲܝܵܘܗ̈ܝ.

¹¹ ܘܠܵܐ ܗܵܟܲܢܵܐ ܒܲܠܚܘܿܕ݂. ܐܸܠܵܐ ܐܵܦ ܢܸܫܬܲܒ݂ܗܲܪ ܒܐܲܠܵܗܵܐ ܒܝܲܕ݂ ܡܵܪܲܢ ܝܼܫܘܿܥ ܡܫܝܼܚܵܐ. ܕܒܹܗ ܗܘܼ ܗܵܫܵܐ ܩܲܒܸܠܢ ܬܲܪܥܘܼܬ݂ܵܐ.

¹² ܐܲܝܟܲܢܵܐ ܓܹܝܪ ܕܲܒ݂ܝܲܕ݂ ܚܲܕ݂ ܒܲܪܢܵܫܵܐ ܥܸܠܲܬ݂ ܚܛܝܼܬ݂ܵܐ ܠܥܵܠܡܵܐ. ܘܲܒ݂ܝܲܕ݂ ܚܛܝܼܬ݂ܵܐ ܡܵܘܬܵܐ. ܘܗܵܟܲܢܵܐ ܒܟ݂ܠܗܘܿܢ ܒܢܲܝ̈ܢܵܫܵܐ ܥܒܲܪ ܡܵܘܬܵܐ. ܒܗܵܝ ܕܟ݂ܠܗܘܿܢ ܚܛܵܘ.

¹³ ܥܕ݂ܲܡܵܐ ܓܹܝܪ ܠܢܵܡܘܿܣܵܐ. ܚܛܝܼܬ݂ܵܐ ܟܲܕ݂ ܐܝܼܬܹܝܗܿ ܗ̄ܘܵܬ݂ ܒܥܵܠܡܵܐ. ܠܵܐ ܚܫܝܼܒ݂ܵܐ ܗ̄ܘܵܬ݂ ܚܛܝܼܬ݂ܵܐ. ܡܛܠ ܕܠܲܝܬܿ ܗ̄ܘܵܐ ܢܵܡܘܿܣܵܐ

¹⁴ ܐܸܠܵܐ ܐܲܡܠܸܟ݂ ܡܵܘܬܵܐ ܡܸܢ ܐܵܕ݂ܵܡ ܘܲܥܕ݂ܲܡܵܐ ܠܡܘܼܫܹܐ. ܐܵܦ ܥܲܠ ܐܲܝܠܹܝܢ ܕܠܵܐ ܚܛܵܘ. ܒܲܕ݂ܡܘܼܬ݂ܵܐ ܕܲܥܒ݂ܵܪ ܢܵܡܘܿܣܹܗ ܕܐܵܕ݂ܵܡ. ܗܵܘ ܕܐܝܼܬ݂ܵܘܗܝ ܕܡܘܼܬ݂ܵܐ ܕܗܵܘ ܕܲܥܬ݂ܝܼܕ݂.

¹⁵ ܐܸܠܵܐ ܠܵܐ ܗ̄ܘܵܐ ܐܲܝܟ݂ ܫܘܿܪܲܥܬ݂ܵܐ ܗܵܟܲܢܵܐ ܡܵܘܗܲܒ݂ܬܵܐ. ܐܸܢ ܓܹܝܪ ܡܛܠ ܫܘܿܪܲܥܬܹܗ ܕܚܲܕ݂ ܣܲܓܝܼܐܹ̈ܐ ܡܝܼܬ݂ܘ. ܟܡܵܐ ܗܵܟܹܝܠ ܝܲܬܝܼܪܵܐܝܼܬ݂ ܛܲܝܒܘܼܬܹܗ ܕܐܲܠܵܗܵܐ ܘܡܵܘܗܲܒ݂ܬܹܗ. ܡܛܠ ܚܲܕ݂ ܒܲܪܢܵܫܵܐ ܝܼܫܘܿܥ ܡܫܝܼܚܵܐ. ܒܣܲܓܝܼ̈ܐܹܐ ܬܸܬ݂ܝܲܬܲܪ.

¹⁶ ܘܠܵܐ ܐܲܝܟ݂ ܣܲܟ݂ܠܘܼܬ݂ܵܐ ܕܚܲܕ݂. ܗܵܟܲܢܵܐ ܡܵܘܗܲܒ݂ܬܵܐ. ܕܝܼܢܵܐ ܓܹܝܪ ܕܲܗܘܵܐ ܡܸܢ ܚܲܕ݂. ܠܚܘܼܝܵܒ݂ܵܐ ܗܘܵܐ. ܡܵܘܗܲܒ݂ܬܵܐ ܕܹܝܢ. ܡܸܢ ܚܛܵܗܹ̈ܐ ܣܲܓܝܼ̈ܐܹܐ ܗܘܸܵܬ݂ ܠܟܹܐܢܘܼ.

¹⁷ ܐܸܢ ܓܹܝܪ ܡܛܠ ܣܲܟ݂ܠܘܼܬ݂ܵܐ ܕܚܲܕ݂ ܐܲܡܠܸܟ݂ ܡܵܘܬܵܐ. ܝܲܬܝܼܪܵܐܝܼܬ݂ ܐܲܝܠܹܝܢ ܕܲܢܣܲܒ݂ܘ ܣܘܿܓ݂ܵܐܐ ܕܛܲܝܒܘܼܬ݂ܵܐ ܘܲܕ݂ܡܵܘܗܲܒ݂ܬ݂ܵܐ ܘܲܕ݂ܟܹܐܢܘܼܬ݂ܵܐ. ܒܚܲܝܹ̈ܐ ܢܲܡܠܟ݂ܘܿܢ ܒܝܲܕ݂ ܚܲܕ݂. ܝܼܫܘܿܥ ܡܫܝܼܚܵܐ.

¹⁸ ܐܲܟ݂ܙܢܵܐ ܗܵܟܹܝܠ ܕܡܛܠ ܣܲܟ݂ܠܘܼܬ݂ܵܐ ܕܚܲܕ݂ ܗܘܵܐ ܚܘܼܝܵܒ݂ܵܐ ܠܟ݂ܠܗܘܿܢ ܒܢܲܝ̈ܢܵܫܵܐ. ܗܵܟܲܢܵܐ ܡܛܠ ܟܹܐܢܘܼܬ݂ܵܐ ܕܚܲܕ݂ ܬܸܗܘܹܐ ܙܵܟ݂ܘܼܬ݂ܵܐ ܠܚܲܝܹ̈ܐ ܠܟ݂ܠܗܘܿܢ ܒܢܲܝ̈ܢܵܫܵܐ.

¹⁹ ܐܲܝܟܲܢܵܐ ܓܹܝܪ ܕܡܛܠ ܠܵܐ ܡܸܫܬܲܡܥܵܢܘܼܬܹܗ ܕܚܲܕ݂ ܒܲܪܢܵܫܵܐ ܚܲܛܵܝܹ̈ܐ ܣܲܓܝܼ̈ܐܹܐ ܗܘܵܘ. ܗܵܟܲܢܵܐ ܐܵܦ ܡܛܠ ܡܸܫܬܲܡܥܵܢܘܼܬܹܗ ܕܚܲܕ݂ ܣܲܓܝܼ̈ܐܹܐ ܟܹܐܢܹ̈ܐ ܗܵܘܹܝܢ.

²⁰ ܡܲܥܠܵܢܵܐ ܕܹܝܢ ܕܲܗܘܵܐ ܠܢܵܡܘܿܣܵܐ ܕܬܸܣܓܹܐ ܚܛܝܼܬ݂ܵܐ. ܘܟܲܪ ܕܣܸܓ݂ܝܲܬ݂ ܚܛܝܼܬ݂ܵܐ. ܬܲܡܵܢ ܐܸܬ݂ܝܲܬܿܪܲܬ݂ ܛܲܝܒܘܼܬ݂ܵܐ.

²¹ ܕܐܲܝܟ݂ ܕܐܲܡܠܟܲܬ݂ ܚܛܝܼܬ݂ܵܐ ܒܡܵܘܬܵܐ. ܗܵܟܲܢܵܐ ܬܲܡܠܸܟ݂ ܛܲܝܒܘܼܬ݂ܵܐ ܒܟܹܐܢܘܼܬ݂ܵܐ ܠܚܲܝܹ̈ܐ ܕܲܠܥܵܠܲܡ. ܒܝܲܕ݂ ܡܵܪܲܢ ܝܼܫܘܿܥ ܡܫܝܼܚܵܐ.

6

¹ ܡܵܢܵܐ ܗܵܟܹܝܠ ܢܹܐܡܲܪ. ܢܩܵܘܹܐ. ܒܵܗܿ ܒܲܚܛܝܼܬ݂ܵܐ ܕܛܲܝܒܘܼܬ݂ܵܐ ܬܸܬ݂ܝܲܬܲܪ.

² ܚܵܣ. ܐܲܝܠܹܝܢ ܓܹܝܪ ܕܡܝܼܬ݂ܢ ܠܲܚܛܝܼܬ݂ܵܐ. ܐܲܝܟܲܢܵܐ ܢܸܚܹܐ ܒܵܗܿ ܬܘܼܒ݂.

³ ܐܵܘ ܠܵܐ ܝܵܕ݂ܥܝܼܢ ܐܢ̄ܬܘܿܢ ܕܐܲܝܠܹܝܢ ܕܲܥܡܲܕ݂ܢ ܒܝܼܫܘܿܥ ܡܫܝܼܚܵܐ. ܒܡܵܘܬܹܿܗ ܗܘܼ ܥܡܲܕ݂ܢ.

⁴ ܐܸܬ݂ܩܒܲܪܢ ܥܲܡܹܗ ܒܡܲܥܡܘܿܕ݂ܝܼܬ݂ܵܐ ܠܡܵܘܬܵܐ. ܕܐܲܝܟܲܢܵܐ ܕܩܵܡ ܝܼܫܘܿܥ ܡܫܝܼܚܵܐ ܡܸܢ ܒܹܝܬ݂ ܡܝܼܬܹ̈ܐ ܒܬܸܫܒܿܘܿܚܬܵܐ ܕܐܲܒ݂ܘܼܗܝ. ܗܵܟܲܢܵܐ ܐܵܦ ܚܢܲܢ ܒܚܲܝܹ̈ܐ ܚܲܕ݂ܬܹܐ ܢܗܲܠܸܟ݂.

⁵ ܐܸܢ ܓܹܝܪ ܐܲܟ݂ܚܲܕ݂ ܐܸܬ݂ܢܨܸܒ݂ܢ ܥܲܡܹܗ ܒܲܕ݂ܡܘܼܬ݂ܵܐ ܕܡܵܘܬܹܿܗ. ܗܵܟܲܢܵܐ ܐܵܦ ܒܲܩܝܵܡܬܹܿܗ ܢܸܗܘܹܐ.

⁶ ܝܵܕ݂ܥܝܼܢܲܢ ܓܹܝܪ ܕܒܲܪܢܵܫܲܢ ܥܲܬܿܝܼܩܵܐ ܐܸܙܕܩܸܦ ܥܲܡܹܗ. ܕܢܸܬ݂ܒܲܛܲܠ ܦܲܓ݂ܪܵܐ ܕܲܚܛܝܼܬ݂ܵܐ. ܕܬ݂ܘܼܒ݂ ܠܵܐ ܢܫܲܡܸܫ ܠܲܚܛܝܼܬ݂ܵܐ.

⁷ ܐܲܝܢܵܐ ܕܡܝܼܬ݂ ܓܹܝܪ. ܐܸܬ݂ܚܲܪܲܪ ܠܹܗ ܡܸܢ ܚܛܝܼܬ݂ܵܐ.

⁸ ܐܸܢ ܗܵܟܹܝܠ ܡܝܼܬ݂ܢ ܥܲܡ ܡܫܝܼܚܵܐ. ܢܗܲܝܡܸܢ ܕܥܲܡܹܗ ܥܲܡ ܡܫܝܼܚܵܐ ܢܸܚܹܐ.

⁹ ܝܵܕ݂ܥܝܼܢܲܢ ܓܹܝܪ ܕܲܡܫܝܼܚܵܐ ܩܵܡ ܡܸܢ ܒܹܝܬ݂ ܡܝܼܬܹ̈ܐ. ܘܬ݂ܘܼܒ݂ ܠܵܐ ܡܵܐܹܬ݂. ܘܡܵܘܬܵܐ ܠܵܐ ܡܸܫܬܲܠܲܛ ܒܹܗ.

¹⁰ ܕܡܝܼܬ݂ ܓܹܝܪ ܠܲܚܛܝܼܬ݂ܵܐ ܗܘܼ ܡܝܼܬ݂. ܚܕ݂ܵܐ ܙܒܲܢ. ܘܲܕ݂ܚܲܝ ܚܲܝ ܗܘܼ ܠܐܲܠܵܗܵܐ.

¹¹ ܗܵܟܲܢܵܐ ܐܵܦ ܐܢ̄ܬܘܿܢ: ܚܫܘܼܒ݂ܘ ܢܲܦ̮ܫܟ݂ܘܿܢ ܕܡܝܼܬܹ̈ܐ ܐܢ̄ܬܘܿܢ ܠܲܚܛܝܼܬ݂ܵܐ. ܘܚܲܝܹ̈ܐ ܐܢ̄ܬܘܿܢ ܠܐܲܠܵܗܵܐ. ܒܡܵܪܲܢ ܝܼܫܘܿܥ ܡܫܝܼܚܵܐ.

¹² ܠܵܐ ܗܵܟܹܝܠ ܬܲܡܠܸܟ݂ ܚܛܝܼܬ݂ܵܐ ܒܦܲܓ݂ܪܟ݂ܘܿܢ ܡܝܼܬ݂ܵܐ. ܐܲܝܟ݂ ܕܬܸܫܬܲܡܥܘܼܢ ܠܲܪ̈ܓ݂ܝܼܓ݂ܵܬܹܗ.

¹³ ܘܐܵܦ ܠܵܐ ܬܛܲܝܒ݂ܘܼܢ ܗܲܕܵܡܲܝ̈ܟܘܿܢ ܙܲܝܢܵܐ ܕܥܵܘܠܵܐ ܠܲܚܛܝܼܬ݂ܵܐ. ܐܸܠܵܐ ܛܲܝܸܒ݂ܘ ܢܲܦ̮ܫܟ݂ܘܿܢ ܠܐܲܠܵܗܵܐ. ܐܲܝܟ݂ ܐ̄ܢܵܫܵܐ ܕܡܸܢ ܡܝܼܬܹ̈ܐ ܚܝܲܝܬܿܘܢ. ܘܗܲܕܵܡܲܝ̈ܟܘܿܢ ܙܲܝܢܵܐ ܢܸܗܘܘܿܢ ܠܟܹܐܢܘܼܬܹܗ ܕܐܲܠܵܗܵܐ.

¹⁴ ܘܲܚܛܝܼܬ݂ܵܐ ܠܵܐ ܡܸܫܬܲܠܛܵܐ ܥܠܲܝܟܿܘܿܢ. ܠܵܐ ܓܹܝܪ ܐܝܼܬܲܝܟܘܿܢ ܬܚܹܝܬ݂ ܢܵܡܘܿܣܵܐ. ܐܸܠܵܐ ܬܚܹܝܬ݂ ܛܲܝܒܘܼܬ݂ܵܐ.

¹⁵ ܡܵܢܵܐ ܗܵܟܹܝܠ. ܢܸܚܛܹܐ ܕܠܵܐ ܗܘܲܝܢ ܬܚܹܝܬ݂ ܢܵܡܘܿܣܵܐ. ܐܸܠܵܐ ܬܚܹܝܬ݂ ܛܲܝܒܘܼܬ݂ܵܐ. ܚܵܣ.

¹⁶ ܠܵܐ ܝܵܕ݂ܥܝܼܢ ܐܢ̄ܬܘܿܢ ܕܲܠܡܲܢ ܕܲܡܛܲܝܒ݂ܝܼܢ ܐܢ̄ܬܘܿܢ ܢܲܦ̮ܫܟ݂ܘܿܢ ܕܬܸܫܬܲܡܥܘܼܢ ܠܹܗ ܠܥܲܒ݂ܕܘܼܬ݂ܵܐ. ܕܝܼܠܹܗ ܐܲܢ̄ܬܿܘܿܢ ܥܲܒ݂ܕܹ̈ܐ ܕܗܵܘ ܕܡܸܫܬܲܡܥܝܼܢ ܐܢ̄ܬܘܿܢ ܠܹܗ. ܐܸܢ ܠܲܚܛܝܼܬ݂ܵܐ. ܘܐܸܢ ܠܡܲܫܡܲܥ ܐܸܕ݂ܢܵܐ ܕܟܹܐܢܘܼܬ݂ܵܐ.

¹⁷ ܛܲܝܒܘܼ ܕܹܝܢ ܠܐܲܠܵܗܵܐ. ܕܥܲܒ݂ܕܹ̈ܐ ܗܘܲܝܬܿܘܿܢ ܕܲܚܛܝܼܬ݂ܵܐ. ܘܐܸܫܬܿܡܲܥܬܿܘܿܢ ܡܸܢ ܠܸܒܵܐ ܠܲܕ݂ܡܘܼܬ݂ܵܐ ܕܝܘܼܠܦܵܢܵܐ. ܕܐܸܫܬܿܠܸܡܬܿܘܢ ܠܹܗ.

¹⁸ ܘܟܲܕ݂ ܐܸܬ݂ܚܲܪܲܪܬܿܘܿܢ ܡܸܢ ܚܛܝܼܬ݂ܵܐ. ܐܸܫܬܲܥܒܲܕܬܿܘܿܢ ܠܟܹܐܢܘܼܬ݂ܵܐ.

¹⁹ ܐܲܝܟ݂ ܕܒܹܝܬ݂ ܒܢܲܝ̈ܢܵܫܵܐ ܐܵܡܲܪ ܐ̄ܢܵܐ. ܡܛܠ ܟܪܝܼܗܘܼܬ݂ܵܐ ܕܒܸܣܪܟ݂ܘܿܢ. ܕܐܲܝܟܲܢܵܐ ܕܛܲܝܸܒ݂ܬܿܘܢ ܗܲܕܵܡܲܝ̈ܟ̇ܘܿܢ ܠܥܲܒ݂ܕܘܼܬ݂ܵܐ ܕܛܲܢܦܘܼܬ݂ܵܐ ܘܲܕ݂ܥܵܘܠܵܐ. ܗܵܟܲܢܵܐ ܐܵܦ ܗܵܫܵܐ ܛܲܝܸܒ݂ܘ ܗܲܕܵܡܲܝ̈ܟ̇ܘܿܢ ܠܥܲܒ݂ܕܘܼܬ݂ܵܐ ܕܟܹܐܢܘܼܬ݂ܵܐ. ܘܲܕ݂ܩܲܕܝܼܫܘܼܬ݂ܵܐ.

²⁰ ܟܲܕ݂ ܥܲܒ݂ܕܹ̈ܐ ܗܘܲܝܬܿܘܿܢ ܓܹܝܪ ܕܲܚܛܝܼܬ݂ܵܐ. ܡܚܲܪܪܹ̈ܐ ܗܘܲܝܬܿܘܿܢ ܠܟܹܐܢܘܼܬ݂ܵܐ.

²¹ ܘܡܵܢܵܐ ܐܵܕ݂ܫܵܐ ܐܝܼܬ݂ ܗ̄ܘܵܐ ܠܟ݂ܘܿܢ ܗܵܝܕܹܝܢ. ܐܲܝܢܵܐ ܕܝܵܘܡܵܢܵܐ ܒܵܗܬܿܝܼܢ ܐܢ̄ܬܘܿܢ ܒܹܗ. ܚܲܪܬܹܗ ܓܹܝܪ ܐܝܼܬܹܝܗܿ ܡܵܘܬܵܐ.

²² ܘܗܵܫܵܐ ܕܐܸܬ݂ܚܲܪܲܪܬܿܘܿܢ ܡܸܢ ܚܛܝܼܬ݂ܵܐ. ܘܲܗܘܲܝܬܿܘܿܢ ܥܲܒ݂ܕܹ̈ܐ ܠܐܲܠܵܗܵܐ. ܐܝܼܬ݂ ܠܟ݂ܘܿܢ ܦܹܐܪܹ̈ܐ ܩܲܕܝܼܫܹ̈ܐ: ܕܚܲܪܬ݂ܗܘܿܢ. ܚܲܝܹ̈ܐ ܕܲܠܥܵܠܲܡ.

²³ ܬܹܐܓ݂ܘܼܪܬܵܐ ܕܹܝܢ ܕܲܚܛܝܼܬ݂ܵܐ. ܡܵܘܬܵܐ ܗ̄ܘܼ. ܘܡܵܘܗܲܒ݂ܬܹܗ ܕܐܲܠܵܗܵܐ ܚܲܝܹ̈ܐ ܕܲܠܥܵܠܲܡ. ܒܡܵܪܲܢ ܝܼܫܘܿܥ ܡܫܝܼܚܵܐ.

7

¹ ܐܵܘ ܠܵܐ ܝܵܕ݂ܥܝܼܢ ܐܢ̄ܬܘܿܢ ܐܲܚܲܝ̈. ܠܝܵܕ݂ܥܲܝ̈ ܢܵܡܘܿܣܵܐ ܓܹܝܪ ܡܡܲܠܸܠ ܐ̄ܢܵܐ. ܕܢܵܡܘܿܣܵܐ ܫܲܠܝܼܛ ܗ̄ܘܼ. ܥܲܠ ܓܲܒ݂ܪܵܐ ܟܡܵܐ ܕܚܲܝ.

² ܐܲܝܟ݂ ܐܲܢ̄ܬܿܬ݂ܵܐ ܕܐܲܣܝܼܪܵܐ ܗܝ ܒܒܲܥܠܵܗܿ ܟܡܵܐ ܕܚܲܝ. ܒܢܵܡܘܿܣܵܐ. ܐܸܢ ܕܹܝܢ ܡܝܼܬ݂ ܒܲܥܠܵܗܿ. ܐܸܬ݂ܚܲܪܪܲܬ݂ ܡܸܢ ܢܵܡܘܿܣܵܐ ܕܒܲܥܠܵܗܿ.

³ ܐܸܢ ܕܹܝܢ ܟܲܕ݂ ܚܲܝ ܒܲܥܠܵܗܿ ܬܸܩܲܦ ܠܲܓ݂ܒܲܪ ܐ̄ܚܪܹܝܢ. ܗܘܵܬ݂ ܠܵܗܿ ܓܲܝܵܪܬܵܐ. ܐܸܢ ܕܹܝܢ ܢܡܘܼܬ݂ ܒܲܥܠܵܗܿ. ܐܸܬ݂ܚܲܪܪܲܬ݂ ܡܸܢ ܢܵܡܘܿܣܵܐ. ܘܠܵܐ ܐܝܼܬܹܝܗܿ ܓܲܝܵܪܬܵܐ. ܐܸܢ ܬܸܗܘܹܐ ܠܓܲܒ݂ܪܵܐ ܐ̄ܚܪܹܢܵܐ.

⁴ ܘܗܵܫܵܐ ܐܲܚܲܝ̈. ܐܵܦ ܐܲܢ̄ܬܿܘܿܢ ܡܝܼܬܿܬܿܘܿܢ ܠܢܵܡܘܿܣܵܐ ܒܦܲܓ݂ܪܹܗ ܕܲܡܫܝܼܚܵܐ. ܕܬܸܗܘܘܿܢ ܠܐܲܚܪܹܝܢ. ܐܲܝܢܵܐ ܕܩܵܡ ܡܸܢ ܒܹܝܬ݂ ܡܝܼܬܹ̈ܐ: ܕܬܸܬܿܠܘܼܢ ܦܹܐܪܹ̈ܐ ܠܐܲܠܵܗܵܐ.

⁵ ܟܲܕ݂ ܒܒܸܣܪܵܐ ܗ̄ܘܲܝܢ ܓܹܝܪ. ܟܹܐܒܹ̈ܐ ܕܲܚܛܵܗܹ̈ܐ ܕܲܒ݂ܢܵܡܘܿܣܵܐ. ܡܸܬ݂ܚܲܦܛܝܼܢ ܗ̄ܘܼܵܘ ܒܗܲܕܵܡܲܝ̈ܢ. ܕܦܹܐܪܹ̈ܐ ܢܸܬܸܿܠ ܠܡܵܘܬܵܐ.

⁶ ܗܵܫܵܐ ܕܹܝܢ ܐܸܬ݂ܒܲܛܲܠܢ ܡܸܢ ܢܵܡܘܿܣܵܐ. ܘܡܝܼܬ݂ܢ ܠܗܵܘ ܕܐܲܚܝܼܕ݂ ܗ̄ܘܵܐ ܠܲܢ. ܕܲܢܫܲܡܸܫ ܡܸܟܹܝܠ ܒܚܲܕ݂ܬ݂ܘܼܬ݂ܵܐ ܕܪܘܼܚܵܐ. ܘܠܵܐ ܒܥܲܬܿܝܼܩܘܼܬ݂ ܟܬ݂ܵܒ݂ܵܐ.

⁷ ܡܵܢܵܐ ܗܵܟܹܝܠ ܐܵܡܪܝܼܢܲܢ. ܢܵܡܘܿܣܵܐ ܚܛܝܼܬ݂ܵܐ ܗܘܼ. ܚܵܣ. ܐܸܠܵܐ ܠܲܚܛܝܼܬ݂ܵܐ ܠܵܐ ܝܸܠܦܹܬ݂ ܐܸܠܵܐ ܒܝܲܕ݂ ܢܵܡܘܿܣܵܐ. ܠܵܐ ܓܹܝܪ ܪܸܓܬ݂ܵܐ ܝܵܕ݂ܲܥ ܗ̄ܘܹܝܬ݂. ܐܸܠܘܼ ܠܵܐ ܢܵܡܘܿܣܵܐ ܕܐܵܡܲܪ. ܕܠܵܐ ܬܸܪܲܓ݂.

⁸ ܘܲܒ݂ܗܵܢܵܐ ܦܘܼܩܕܵܢܵܐ ܐܸܫܟܚܲܬ݂ ܠܵܗܿ ܚܛܝܼܬ݂ܵܐ ܥܸܠܬ݂ܵܐ. ܘܲܓ݂ܡܪܲܬ݂ ܒܝܼ ܟܠ ܪܸܓܵܐ. ܒܸܠܥܵܕ݂ ܢܵܡܘܿܣܵܐ ܓܹܝܪ ܚܛܝܼܬ݂ܵܐ ܡܝܼܬ݂ܵܐ ܗ̄ܘܵܬ݂.

⁹ ܐܸܢܵܐ ܕܹܝܢ ܚܲܝ ܗ̄ܘܹܝܬ݂ ܕܠܵܐ ܢܵܡܘܿܣܵܐ ܡܸܢ ܩܕ݂ܝܼܡ. ܟܲܕ݂ ܐܸܬ݂ܵܐ ܕܹܝܢ ܦܘܼܩܕܵܢܵܐ. ܚܛܝܼܬ݂ܵܐ ܚܝܵܬ݂ ܘܐܸܢܵܐ ܡܝܼܬ݂ܬ݂.

¹⁰ ܘܐܸܫܬܿܟܲܚ ܠܝܼ ܦܘܼܩܕܵܢܵܐ ܗܵܘ ܕܚܲܝܹ̈ܐ. ܠܡܵܘܬܵܐ.

¹¹ ܚܛܝܼܬ݂ܵܐ ܓܹܝܪ ܒܥܸܠܬ݂ܵܐ ܕܐܸܫܟܚܲܬ݂ ܠܵܗܿ ܒܝܲܕ݂ ܦܘܼܩܕܵܢܵܐ. ܐܲܛܥܝܵܬܲܢܝ. ܘܒܹܗ ܩܛܲܠܬܲܢܝ.

¹² ܢܵܡܘܿܣܵܐ ܡܵܕܹܝܢ ܩܲܕܝܼܫ ܗ̄ܘܼ. ܘܦܘܼܩܕܵܢܵܐ ܩܲܕܝܼܫ ܗ̄ܘܼ. ܘܟܹܐܝܢ ܘܛܵܒ݂.

¹³ ܛܵܒ݂ܬ݂ܵܐ ܗܵܟܹܝܠ ܠܝܼ. ܠܡܵܘܬܵܐ ܗܘܼ ܗܘܸܵܬ݂. ܚܵܣ. ܐܸܠܵܐ ܚܛܝܼܬ݂ܵܐ. ܕܬܸܬ݂ܚܙܹܐ ܕܲܚܛܝܼܬ݂ܵܐ ܗܝܼ. ܕܲܒ݂ܛܵܒ݂ܬ݂ܵܐ ܓܸܡܪܲܬ݂ ܒܝܼ ܡܵܘܬܵܐ. ܕܝܲܬܝܼܪܵܐܝܼܬ݂ ܬܸܬ݂ܚܲܝܲܒ݂ ܚܛܝܼܬ݂ܵܐ ܒܦܘܼܩܕܵܢܵܐ.

¹⁴ ܝܵܕ݂ܥܝܼܢܲܢ ܓܹܝܪ ܕܢܵܡܘܿܣܵܐ ܕܪܘܼܚ ܗ̄ܘܼ. ܐܸܢܵܐ ܕܹܝܢ ܕܲܒ݂ܣܲܪ ܐ̄ܢܵܐ. ܘܲܡܙܲܒܲܢ ܐ̄ܢܵܐ ܠܲܚܛܝܼܬ݂ܵܐ.

¹⁵ ܡܸܕܸܡ ܕܣܵܥܲܪ ܐ̄ܢܵܐ ܓܹܝܪ. ܠܵܐ ܝܵܕ݂ܲܥ ܐ̄ܢܵܐ. ܘܠܵܐ ܗ̄ܘܵܐ ܡܸܕܸܡ ܕܨܵܒܹܐ ܐ̄ܢܵܐ. ܥܵܒܹܿܕ݂ ܐ̄ܢܵܐ. ܐܸܠܵܐ ܡܸܕܸܡ ܕܣܵܢܹܐ ܐ̄ܢܵܐ. ܗܵܘ ܗܘܼ ܥܵܒܹܿܕ݂ ܐ̄ܢܵܐ.

¹⁶ ܘܐܸܢ ܡܸܕܸܡ ܕܠܵܐ ܨܵܒܹܐ ܐ̄ܢܵܐ. ܥܵܒܹܿܕ݂ ܐ̄ܢܵܐ. ܣܵܗܹܕ݂ ܐ̄ܢܵܐ ܥܲܠ ܢܵܡܘܿܣܵܐ. ܕܫܲܦܝܼܪ ܗ̄ܘܼ.

¹⁷ ܗܵܫܵܐ ܕܹܝܢ ܠܵܐ ܗ̄ܘܵܐ ܐܸܢܵܐ ܣܵܥܲܪ ܐ̄ܢܵܐ ܗܵܕܹܐ. ܐܸܠܵܐ ܚܛܝܼܬ݂ܵܐ ܕܥܵܡܪܵܐ ܒܝܼ.

¹⁸ ܝܵܕ݂ܲܥ ܐ̄ܢܵܐ ܗܘܼ ܓܹܝܪ ܕܠܵܐ ܥܵܡܪܵܐ ܒܝܼ. ܗܵܢܵܘ ܕܹܝܢ ܒܒܸܣܪܝ. ܛܵܒ݂ܬ݂ܵܐ. ܕܐܸܨܒܹܐ ܓܹܝܪ ܒܛܵܒ݂ܬ݂ܵܐ. ܦܫܝܼܩ ܠܝܼ. ܕܐܸܣܥܪܝܼܗܿ ܕܹܝܢ. ܠܵܐ ܡܸܫܟܲܚ ܐ̄ܢܵܐ.

¹⁹ ܠܵܐ ܗ̄ܘܵܐ ܓܹܝܪ ܠܛܵܒ݂ܬ݂ܵܐ ܕܨܵܒܹܐ ܐ̄ܢܵܐ ܕܐܸܥܒܸܕ݂. ܥܵܒܹܿܕ݂ ܐ̄ܢܵܐ. ܐܸܠܵܐ ܒܝܼܫܬܵܐ ܕܠܵܐ ܨܵܒܹܐ ܐ̄ܢܵܐ ܕܐܸܥܒܸܕ݂. ܠܵܗܿ ܥܵܒܹܿܕ݂ ܐ̄ܢܵܐ.

²⁰ ܘܐܸܢ ܡܸܕܸܡ ܕܠܵܐ ܨܵܒܹܐ ܐ̄ܢܵܐ ܥܵܒܹܿܕ݂ ܐ̄ܢܵܐ. ܠܵܐ ܗ̄ܘܵܐ ܐܸܢܵܐ ܥܵܒܹܿܕ݂ ܐ̄ܢܵܐ. ܐܸܠܵܐ ܚܛܝܼܬ݂ܵܐ ܕܥܵܡܪܵܐ ܒܝܼ.

²¹ ܡܸܫܟܲܚ ܐ̄ܢܵܐ ܗܵܟܹܝܠ ܠܢܵܡܘܿܣܵܐ. ܕܫܵܠܹܡ ܠܪܸܥܝܵܢܝ. ܗܵܘ ܕܨܵܒܹܐ ܕܢܸܥܒܸܕ݂ ܛܵܒ݂ܬ݂ܵܐ. ܡܛܠ ܕܒ݂ܝܼܫܬܵܐ ܩܲܪܝܼܒ݂ܵܐ ܗܝ ܠܝܼ.

²² ܚܵܕܹܐ ܐ̄ܢܵܐ ܓܹܝܪ ܒܢܵܡܘܿܣܹܗ ܕܐܲܠܵܗܵܐ ܒܒܲܪܢܵܫܵܐ ܕܲܠܓ݂ܵܘ.

²³ ܚܵܙܹܐ ܐ̄ܢܵܐ ܕܹܝܢ ܢܵܡܘܿܣܵܐ ܐ̄ܚܪܹܢܵܐ ܒܗܲܕܵܡܲܝ̈. ܕܡܲܩܪܸܒ݂ ܠܘܼܩܒܲܠ ܢܵܡܘܿܣܵܐ ܕܪܸܥܝܵܢܝ. ܘܫܵܒܹܐ ܠܝܼ ܠܢܵܡܘܿܣܵܐ ܕܲܚܛܝܼܬ݂ܵܐ ܕܐܝܼܬ݂ ܒܗܲܕܵܡܲܝ̈.

²⁴ ܕܵܘܝܵܐ ܐ̄ܢܵܐ ܒܲܪܢܵܫܵܐ. ܡܲܢܘܼ ܢܦܲܨܹܝܢܝ ܡܸܢ ܦܲܓ݂ܪܵܐ ܗܵܢܵܐ ܕܡܵܘܬܵܐ.

²⁵ ܡܵܘܕܹܐ ܐ̄ܢܵܐ ܠܐܲܠܵܗܵܐ ܒܝܲܕ݂ ܡܵܪܲܢ ܝܼܫܘܿܥ ܡܫܝܼܚܵܐ. ܗܵܫܵܐ ܗܵܟܹܝܠ ܐܸܢܵܐ ܒܪܸܥܝܵܢܝ. ܥܲܒ݂ܕܹ̈ܐ ܐ̄ܢܵܐ ܕܢܵܡܘܿܣܵܐ ܕܐܲܠܵܗܵܐ. ܒܒܸܣܪܝ ܕܹܝܢ. ܐܝܼܬܲܝ ܥܲܒ݂ܕܹ̈ܐ ܕܢܵܡܘܿܣܵܐ ܕܲܚܛܝܼܬ݂ܵܐ.

8

¹ ܡܸܟܹܝܠ ܠܲܝܬܿ ܚܲܝܵܒ݂ܘܼܬ݂ܵܐ ܠܐܲܝܠܹܝܢ ܕܠܵܐ ܡܗܲܠܟ݂ܝܼܢ ܒܲܒ݂ܣܲܪ. ܒܝܼܫܘܿܥ ܡܫܝܼܚܵܐ.

² ܢܵܡܘܿܣܵܐ ܓܹܝܪ ܕܪܘܼܚܵܐ ܕܚܲܝܹ̈ܐ. ܕܲܒ݂ܝܼܫܘܿܥ ܡܫܝܼܚܵܐ. ܚܲܪܪܵܟ݂ ܡܸܢ ܢܵܡܘܿܣܵܐ ܕܲܚܛܝܼܬ݂ܵܐ. ܘܲܕ݂ܡܵܘܬܵܐ.

³ ܡܛܠ ܕܲܡܚܝܼܠ ܗ̄ܘܵܐ ܓܹܝܪ ܢܵܡܘܿܣܵܐ. ܒܝܲܕ݂ ܟܪܝܼܗܘܼܬܹܗ ܕܒܸܣܪܵܐ. ܫܲܕܲܪ ܐܲܠܵܗܵܐ ܠܲܒ݂ܪܹܗ ܒܲܕ݂ܡܘܼܬ݂ܵܐ ܕܒܸܣܪܵܐ ܕܲܚܛܝܼܬ݂ܵܐ. ܡܛܠܬ݂ܵܗܿ ܕܲܚܛܝܼܬ݂ܵܐ. ܕܲܢܚܲܝܒ݂ܝܼܗܿ ܠܲܚܛܝܼܬ݂ܵܐ ܒܒܸܣܪܹܗ.

⁴ ܕܟܹܐܢܘܼܬ݂ܵܐ ܕܢܵܡܘܿܣܵܐ ܒܲܢ ܬܸܬ݂ܡܲܠܹܐ. ܕܠܵܐ ܗ̄ܘܵܐ ܒܲܒ݂ܣܲܪ ܡܗܲܠܟ݂ܝܼܢܲܢ. ܐܸܠܵܐ ܒܪܘܼܚ.

⁵ ܐܲܝܠܹܝܢ ܓܹܝܪ ܕܒܲܒ݂ܣܲܪ ܐܸܢܘܿܢ. ܕܲܒ݂ܣܲܪ ܗܘܼ ܡܸܬ݂ܪܲܥܹܝܢ. ܘܐܲܝܠܹܝܢ ܕܲܕ݂ܪܘܼܚ ܐܸܢܘܿܢ. ܕܪܘܼܚ ܗܘܼ ܡܸܬ݂ܪܲܥܹܝܢ.

⁶ ܬܲܪܥܝܼܬ݂ܵܐ ܓܹܝܪ ܕܒܸܣܪܵܐ. ܡܵܘܬܵܐ ܗܘܼ. ܘܬܲܪܥܝܼܬ݂ܵܐ ܕܪܘܼܚܵܐ. ܚܲܝܹ̈ܐ ܘܲܫܠܵܡܵܐ.

⁷ ܡܛܠ ܕܬܲܪܥܝܼܬ݂ܵܐ ܕܒܸܣܪܵܐ. ܒܥܸܠܕܒ݂ܵܒ݂ܘܼܬ݂ܵܐ ܗܝ ܠܘܵܬ݂ ܐܲܠܵܗܵܐ. ܠܢܵܡܘܿܣܵܐ ܓܹܝܪ ܕܐܲܠܵܗܵܐ ܠܵܐ ܡܸܫܬܲܥܒܕ݂ܵܐ. ܡܛܠ ܕܠܵܐ ܡܸܫܟܚܵܐ.

⁸ ܘܐܲܝܠܹܝܢ ܕܒܲܒ݂ܣܲܪ ܐܸܢܘܿܢ. ܠܡܸܫܦܲܪ ܠܐܲܠܵܗܵܐ ܠܵܐ ܡܸܫܟܿܚܝܼܢ.

⁹ ܐܲܢ̄ܬܿܘܿܢ ܕܹܝܢ ܠܵܐ ܗܘܲܝܬܿܘܿܢ ܒܲܒ݂ܣܲܪ. ܐܸܠܵܐ ܒܪܘܼܚ. ܐܸܢ ܫܲܪܝܼܪܵܐܝܼܬ݂ ܪܘܼܚܹܗ ܕܐܲܠܵܗܵܐ ܥܵܡܪܵܐ ܒܟ݂ܘܿܢ. ܐܸܢ ܕܹܝܢ ܐ̄ܢܵܫ ܠܲܝܬܿ ܒܹܗ ܪܘܼܚܹܗ ܕܲܡܫܝܼܚܵܐ. ܗܵܢܵܐ ܠܵܐ ܗ̄ܘܵܐ ܕܝܼܠܹܗ.

¹⁰ ܘܐܸܢ ܕܹܝܢ ܡܫܝܼܚܵܐ ܒܟ݂ܘܿܢ. ܦܲܓ݂ܪܵܐ ܡܝܼܬ݂ ܗܘܼ ܡܛܠ ܚܛܝܼܬ݂ܵܐ. ܪܘܼܚܵܐ ܕܹܝܢ ܚܲܝܵܐ ܗܝ ܡܛܠ ܟܹܐܢܘܼܬ݂ܵܐ.

¹¹ ܘܐܸܢ ܪܘܼܚܹܗ ܕܗܵܘ ܡܲܢ ܕܐܲܩܝܼܡ ܠܡܵܪܲܢ ܝܼܫܘܿܥ ܡܫܝܼܚܵܐ ܡܸܢ ܒܹܝܬ݂ ܡܝܼܬܹ̈ܐ. ܥܵܡܪܵܐ ܒܟ݂ܘܿܢ. ܗܵܘ ܡܲܢ ܕܐܲܩܝܼܡܹܗ ܠܝܼܫܘܿܥ ܡܫܝܼܚܵܐ ܡܸܢ ܒܹܝܬ݂ ܡܝܼܬܹ̈ܐ. ܐܵܦ ܠܦܲܓ݂ܪ̈ܲܝܟܘܿܢ ܡܝܼܬܹ̈ܐ ܢܲܚܹܐ. ܡܛܠ ܪܘܼܚܹܗ ܕܥܵܡܪܵܐ ܒܟ݂ܘܿܢ.

¹² ܗܵܫܵܐ ܐܲܚܲܝ̈. ܚܲܝܵܒ݂ܝܼܢܲܢ. ܠܵܘ ܠܒܸܣܪܵܐ ܕܒܲܒ݂ܣܲܪ ܢܗܲܠܸܟ݂.

¹³ ܐܸܢ ܓܹܝܪ ܒܲܒ݂ܣܲܪ ܚܵܐܹܝܢ ܐܢ̄ܬܘܿܢ. ܥܬ݂ܝܼܕ݂ܝܼܢ ܐܢ̄ܬܘܿܢ ܗܘܼ ܠܲܡܡܵܬ݂. ܘܐܸܢ ܒܪܘܼܚ ܗܘܼܦܵܟܲܝ̈ ܦܲܓ݂ܪܵܐ ܡܡܝܼܬ݂ܝܼܢ ܐܢ̄ܬܘܿܢ. ܚܵܐܹܝܢ ܐܢ̄ܬܘܿܢ.

¹⁴ ܐܲܝܠܹܝܢ ܓܹܝܪ ܕܲܒ݂ܪܘܼܚܵܐ ܕܐܲܠܵܗܵܐ ܡܸܬܿܕܲܒܪܝܼܢ. ܗܵܠܹܝܢ ܒ̈ܢܲܝܵܐ ܐܸܢܘܿܢ ܕܐܲܠܵܗܵܐ.

¹⁵ ܠܵܐ ܓܹܝܪ ܢܣܲܒ݂ܬܿܘܼܢ ܪܘܼܚܵܐ ܕܥܲܒ݂ܕܘܼܬ݂ܵܐ ܬܘܼܒ݂. ܠܕܸܚܠܬ݂ܵܐ. ܐܸܠܵܐ ܢܣܲܒ݂ܬܿܘܼܢ ܪܘܼܚܵܐ ܕܣܝܼܡܲܬ݂ ܒ̈ܢܲܝܵܐ: ܕܒ݂ܵܗܿ ܩܵܪܹܝܢܲܢ. ܐܲܒܵܐ ܐܲܒ݂ܘܼܢ.

¹⁶ ܘܗܝܼ ܪܘܼܚܵܐ ܡܲܣܗܕ݂ܵܐ ܠܪܘܼܚܲܢ. ܕܐܝܼܬܲܝܢ ܒ̈ܢܲܝܵܐ ܕܐܲܠܵܗܵܐ.

¹⁷ ܘܐܸܢ ܒ̈ܢܲܝܵܐ. ܐܵܦ ܝܵܪ̈ܬܹܐ. ܝܵܪ̈ܬܹܐ ܕܐܲܠܵܗܵܐ. ܘܲܒܢܲܝ̈ ܝܵܪܬܿܘܼܬܹܗ ܕܝܼܫܘܿܥ ܡܫܝܼܚܵܐ. ܕܐܸܢ ܢܸܚܲܫ ܥܲܡܹܗ. ܐܵܦ ܥܲܡܹܗ ܢܸܫܬܲܒܲܚ.

¹⁸ ܡܸܬ݂ܪܲܥܹܐ ܐ̄ܢܵܐ ܓܹܝܪ. ܕܠܵܐ ܫܵܘܹܝܢ ܚܲܫܵܘ̈ܗܝ ܕܙܲܒ݂ܢܵܐ ܗܵܢܵܐ. ܠܬܸܫܒܿܘܿܚܬܵܐ ܐܲܝܕ݂ܵܐ ܕܲܥܬ݂ܝܼܕ݂ܵܐ ܕܬܸܬ݂ܓܠܹܐ ܒܲܢ.

¹⁹ ܟܠܵܗܿ ܓܹܝܪ ܒܪܝܼܬ݂ܵܐ ܡܣܲܒܪܵܐ ܘܲܡܣܲܟܝܵܐ. ܠܓܸܠܝܵܢܵܐ ܕܲܒ݂ܢܵܘ̈ܗܝ ܕܐܲܠܵܗܵܐ.

²⁰ ܒܪܝܼܬ݂ܵܐ ܓܹܝܪ ܐܸܫܬܲܥܒܕ݂ܲܬ݂ ܠܲܣܪܝܼܩܘܼܬ݂ܵܐ. ܠܵܐ ܒܨܸܒ݂ܝܵܢܵܗܿ. ܐܸܠܵܐ ܡܛܠ ܡܲܢ ܕܫܲܥܒܕ݂ܵܗܿ ܥܲܠ ܣܲܒ݂ܪܵܐ.

²¹ ܕܐܵܦ ܗܝܼ ܒܪܝܼܬ݂ܵܐ ܬܸܬ݂ܚܲܪܲܪ ܡܸܢ ܥܲܒ݂ܕܘܼܬ݂ܵܐ ܕܲܚܒ݂ܵܠܵܐ. ܒܲܚܪܘܼܪܹ̈ܐ ܕܬܸܫܒܿܘܿܚܬܵܐ ܕܲܒ̈ܢܲܝܵܐ ܕܐܲܠܵܗܵܐ.

²² ܝܵܕ݂ܥܝܼܢܲܢ ܓܹܝܪ ܕܟܠܗܹܝܢ ܒܪܝܵܬ݂ܵܐ. ܡܸܬܿܬܲܢܚܵܢ ܘܲܡܚܲܒܠܵܢ ܥܕ݂ܲܡܵܐ ܠܝܵܘܡܵܢܵܐ.

²³ ܘܠܵܐ ܒܲܠܚܘܿܕ݂ ܗܸܢܹܝܢ ܐܸܠܵܐ ܐܵܦ ܚܢܲܢ ܕܐܝܼܬ݂ ܒܲܢ ܪܹܫܝܼܬ݂ܵܐ ܕܪܘܼܚܵܐ. ܡܸܬܿܬܲܢܚܝܼܢܲܢ ܒܢܲܦ̮ܫܲܢ. ܘܲܡܣܲܟܹܝܢܲܢ (ܘܲܡܣܲܟܹܝܢ ܚ̄ܢܲܢ) ܠܣܝܼܡܲܬ݂ ܒ̈ܢܲܝܵܐ. ܘܲܠܦܘܼܪܩܵܢܵܐ ܕܦܲܓ݂ܪ̈ܲܝܢ.

²⁴ ܡܛܠ ܕܲܒ݂ܣܲܒ݂ܪܵܐ ܗ̄ܘܼ ܚܝܲܝܢ. ܣܲܒ݂ܪܵܐ ܕܹܝܢ ܕܡܸܬ݂ܚܙܹܐ. ܠܵܐ ܗ̄ܘܵܐ ܣܲܒ݂ܪܵܐ. ܐܸܢ ܓܹܝܪ ܚܵܙܹܝܢܲܢ ܠܹܗ. ܡܵܢܵܐ ܡܣܲܟܹܝܢܲܢ (ܡܣܲܟܹܝܢ ܚ̄ܢܲܢ) ܠܹܗ.

²⁵ ܐܸܢ ܕܹܝܢ ܠܡܸܕܸܡ ܕܠܵܐ ܡܸܬ݂ܚܙܹܐ ܡܣܲܒܪܝܼܢܲܢ. ܒܲܡܣܲܝܒܪܵܢܘܼܬ݂ܵܐ ܡܩܵܘܹܝܢܲܢ.

²⁶ ܗܵܟܲܢܵܐ ܐܵܦ ܗܝܼ ܪܘܼܚܵܐ ܡܥܲܕܪܵܐ ܠܲܟܪܝܼܗܘܼܬܲܢ. ܡܵܢܵܐ ܓܹܝܪ ܢܨܲܠܹܐ ܐܲܝܟ݂ ܡܵܐ ܕܘܵܠܹܐ. ܠܵܐ ܝܵܕ݂ܥܝܼܢܲܢ. ܐܸܠܵܐ ܗܝܼ ܪܘܼܚܵܐ ܡܨܲܠܝܵܐ ܚܠܵܦܲܝܢ. ܒܬܸܢ̈ܚܵܬ݂ܵܐ ܕܠܵܐ ܡܸܬ݂ܡܲܠܠܵܢ.

²⁷ ܕܡܵܐܹܫ ܕܹܝܢ ܠܸܒ̈ܵܘܵܬ݂ܵܐ. ܗܘܼ ܝܵܕ݂ܲܥ ܡܵܢܵܐ ܗ̄ܝܼ ܬܲܪܥܝܼܬ݂ܵܐ ܕܪܘܼܚܵܐ. ܕܐܲܝܟ݂ ܨܸܒ݂ܝܵܢܹܗ ܗܘܼ ܕܐܲܠܵܗܵܐ ܡܨܲܠܝܵܐ ܚܠܵܦ ܩܲܕܝܼܫܹ̈ܐ.

²⁸ ܝܵܕ݂ܥܝܼܢܲܢ ܕܹܝܢ ܕܐܲܝܠܹܝܢ ܕܡܲܚܒ݂ܝܼܢ ܠܐܲܠܵܗܵܐ. ܒܟ݂ܠ ܡܸܕܸܡ ܡܥܲܕܲܪ ܠܗܘܿܢ ܠܛܵܒ݂ܬ݂ܵܐ. ܠܐܲܝܠܹܝܢ ܕܩܲܕܸܡ ܣܵܡ ܕܢܸܗܘܘܿܢ ܩܪ̈ܲܝܵܐ:

²⁹ ܘܡܸܢ ܠܘܼܩܕ݂ܲܡ ܝܼܕ݂ܲܥ ܐܸܢܘܿܢ. ܘܲܪܫܲܡ ܐܸܢܘܿܢ ܒܲܕ݂ܡܘܼܬ݂ܵܐ ܕܨܘܼܪܬܵܐ ܕܲܒ݂ܪܹܗ. ܕܗܘܼ ܢܸܗܘܹܐ ܒܘܼܟ݂ܪܵܐ ܕܐܲܚܹ̈ܐ ܣܲܓܝܼ̈ܐܹܐ.

³⁰ ܠܐܲܝܠܹܝܢ ܕܹܝܢ ܕܩܲܕܸܡ ܪܫܲܡ. ܠܗܘܿܢ ܩܪܵܐ. ܘܠܐܲܝܠܹܝܢ ܕܲܩܪܵܐ. ܠܗܘܿܢ ܙܲܕܸܩ. ܘܠܐܲܝܠܹܝܢ ܕܙܲܕܸܩ. ܠܗܘܿܢ ܫܲܒܲܚ.

³¹ ܡܵܢܵܐ ܗܵܟܹܝܠ ܢܹܐܡܲܪ ܥܲܠ ܗܵܠܹܝܢ. ܐܸܢ ܐܲܠܵܗܵܐ ܚܠܵܦܲܝܢ. ܡܲܢܘܼ ܕܲܠܩܘܼܒ݂ܠܲܢ.

³² ܘܐܸܢ ܥܲܠ ܒܪܹܗ ܠܵܐ ܚܵܣ. ܐܸܠܵܐ ܚܠܵܦ ܟܠܲܢ ܐܲܫܠܡܹܗ. ܐܲܝܟܲܢܵܐ ܠܵܐ ܟܠ ܡܸܕܸܡ ܥܲܡܹܗ ܢܸܬܸܿܠ ܠܲܢ.

³³ ܡܲܢܘܼ ܢܸܩܒܘܼܠ ܥܲܠ ܓܒܲܝܵܐ ܕܐܲܠܵܗܵܐ. ܐܲܠܵܗܵܐ ܡܙܲܕܸܩ.

³⁴ ܡܲܢܘܼ ܡܚܲܝܸܒ݂. ܡܫܝܼܚܵܐ ܡܝܼܬ݂. ܘܩܼܵܡ. ܘܐܝܼܬ݂ܵܘܗܝ ܥܲܠ ܝܲܡܝܼܢܵܐ ܕܐܲܠܵܗܵܐ. ܘܒ݂ܵܥܹܐ ܚܠܵܦܲܝܢ.

³⁵ ܡܲܢܘܼ ܢܸܦܪܫܲܢܝ ܡܸܢ ܚܘܼܒܹܗ ܕܲܡܫܝܼܚܵܐ. ܐܘܼܠܨܵܢܵܐ. ܐܵܘ ܚܒ݂ܘܼܫܝܵܐ. ܐܵܘ ܪܕ݂ܘܼܦܝܵܐ. ܐܵܘ ܟܲܦܢܵܐ. ܐܵܘ ܥܲܪܛܸܠܝܘܼܬ݂ܵܐ. ܐܵܘ ܩܹܘܲܢܕܹܝܢܘܿܣ. ܐܵܘ ܣܲܝܦܵܐ.

³⁶ ܐܲܝܟ݂ ܕܲܟܬ݂ܝܼܒ݂. ܕܡܛܠܵܬ݂ܵܟ݂ ܟܠܝܘܿܡ ܡܵܝܬܿܝܼܢܲܢ. ܘܐܸܬ݂ܚܫܸܒ݂ܢ ܐܲܝܟ݂ ܐܸܡܪܹ̈ܐ ܠܢܸܟ݂ܣܬ݂ܵܐ.

³⁷ ܐܸܠܵܐ ܒܗܵܠܹܝܢ ܟܠܗܹܝܢ. ܙܲܟܵܝܝܼܢܲܢ. ܒܝܲܕ݂ ܡܲܢ ܕܐܲܚܒܲܢ.

³⁸ ܡܦܵܣ ܐ̄ܢܵܐ ܓܹܝܪ. ܕܠܵܐ ܡܵܘܬܵܐ. ܘܠܵܐ ܚܲܝܹ̈ܐ. ܘܠܵܐ ܡܲܠܲܐܟܹ̈ܐ. ܘܠܵܐ ܫܘܼܠܛܵܢܹ̈ܐ. ܘܠܵܐ ܚܲܝ̈ܠܹܐ. ܘܠܵܐ ܕܩܵܝܡܵܢ. ܘܠܵܐ ܕܲܥܬ݂ܝܼܕ݂ܵܢ.

³⁹ ܘܠܵܐ ܪܵܘܡܵܐ. ܘܠܵܐ ܥܘܼܡܩܵܐ. ܐܵܦܠܵܐ ܒܪܝܼܬ݂ܵܐ ܐ̄ܚܪܹܬ݂ܵܐ. ܬܸܫܟܲܚ ܬܸܦܪܫܲܢܝ ܡܸܢ ܚܘܼܒܹܗ ܕܐܲܠܵܗܵܐ. ܕܲܒ݂ܡܵܪܲܢ ܝܼܫܘܿܥ ܡܫܝܼܚܵܐ.

9

¹ ܩܘܼܫܬܵܐ ܐܵܡܲܪ ܐ̄ܢܵܐ ܒܲܡܫܝܼܚܵܐ. ܘܠܵܐ ܡܕ݂ܲܓܸܠ ܐ̄ܢܵܐ. ܘܪܸܥܝܵܢܝ ܡܲܣܗܸܕ݂ ܥܠܲܝ. ܒܪܘܼܚܵܐ ܕܩܘܼܕ݂ܫܵܐ.

² ܕܟܲܪܝܘܼܬ݂ܵܐ ܗܝ ܠܝܼ ܪܲܒܬ݂ܵܐ. ܘܟܹܐܒ݂ܵܐ ܕܡܸܢ ܠܹܒܝ ܠܵܐ ܫܵܠܹܐ.

³ ܡܨܲܠܹܐ ܗ̄ܘܹܝܬ݂ ܓܹܝܪ. ܕܐܸܢܵܐ ܩܢܘܿܡܝ ܚܸܪܡܵܐ ܐܸܗܘܹܐ ܡܸܢ ܡܫܝܼܚܵܐ. ܚܠܵܦ ܐܲܚܲܝ̈ ܘܐܲܚܝܵܢܲܝ̈. ܕܒܲܒ݂ܣܲܪ.

⁴ ܕܐܝܼܬܲܝܗܘܿܢ ܒܢܲܝ̈ ܝܼܣܪܵܝܹܠ. ܕܕ݂ܝܼܠܗܘܿܢ ܗܘܸܵܬ݂ ܣܝܼܡܲܬ݂ ܒ̈ܢܲܝܵܐ. ܘܬܸܫܒܿܘܿܚܬܵܐ. ܘܲܩܝܵܡܹܐ. ܘܢܵܡܘܿܣܵܐ. ܘܬܸܫܡܸܫܬܵܐ ܕܒܹܗ ܘܡܘܼܠܟܵܢܹ̈ܐ (ܘܬܸܫܡܸܫܬܵܐ ܘܡܘܼܠܟܵܢܹ̈ܐ).

⁵ ܘܐܲܒ݂ܵܗܵܬ݂ܵܐ. ܘܡܸܢܗܘܿܢ ܐܸܬ݂ܚܙܝܼ ܡܫܝܼܚܵܐ ܒܲܒ݂ܣܲܪ. ܕܐܝܼܬ݂ܵܘܗܝ ܐܲܠܵܗܵܐ ܕܥܲܠ ܟܠ. ܕܠܹܗ ܬܸܫܒ̈ܚܵܢ ܘܒ݂ܘܪ̈ܟܵܢ: ܠܥܵܠܲܡ ܥܵܠܡܝܼܢ ܐܵܡܹܝܢ.

⁶ ܠܵܐ ܗ̄ܘܵܐ ܕܹܝܢ ܡܸܦܲܠ ܢܸܦܠܲܬ݂ ܡܸܠܬܹܗ ܕܐܲܠܵܗܵܐ. ܠܵܐ ܗ̄ܘܵܐ ܓܹܝܪ ܟܠܗܘܿܢ ܕܡܸܢ ܝܼܣܪܵܝܹܠ. ܐܝܼܬܲܝܗܘܿܢ ܝܼܣܪܵܝܹܠ.

⁷ ܐܵܦܠܵܐ ܡܛܠ ܕܡܸܢ ܙܲܪܥܹܗ ܐܸܢܘܿܢ ܕܐܲܒ݂ܪܵܗܵܡ. ܟܠܗܘܿܢ ܒ̈ܢܲܝܵܐ. ܡܛܠ ܕܐܸܬ݂ܐܡܲܪ. ܕܒ݂ܐܝܼܣܚܵܩ ܢܸܬ݂ܩܪܹܐ ܠܵܟ݂ ܙܲܪܥܵܐ.

⁸ ܗܵܢܵܘ ܕܹܝܢ. ܠܵܐ ܗ̄ܘܵܐ ܒ̈ܢܲܝܵܐ ܕܒܸܣܪܵܐ. ܐܝܼܬܲܝܗܘܿܢ ܒ̈ܢܲܝܵܐ ܕܐܲܠܵܗܵܐ. ܐܸܠܵܐ ܒ̈ܢܲܝܵܐ ܕܡܘܼܠܟܵܢܵܐ ܡܸܬ݂ܚܲܫܒܝܼܢ ܠܙܲܪܥܵܐ.

⁹ ܕܡܘܼܠܟܵܢܵܐ ܓܹܝܪ ܐܝܼܬܹܝܗܿ ܡܸܠܬ݂ܵܐ ܗܵܕܹܐ. ܕܲܒ݂ܙܲܒ݂ܢܵܐ ܗܵܢܵܐ ܐܹܬܹܐ. ܘܢܸܗܘܹܐ ܒܪܵܐ ܠܣܲܪܵܐ.

¹⁰ ܘܠܵܘ ܗܵܕܹܐ ܒܲܠܚܘܿܕ݂. ܐܸܠܵܐ ܐܵܦ ܪܲܦܩܵܐ. ܟܲܕ݂ ܥܲܡ ܚܲܕ݂ ܐܲܒ݂ܘܼܢ ܐܝܼܣܚܵܩ. ܐܝܼܬ݂ ܗ̄ܘܵܐ ܠܵܗܿ ܫܵܘܬܵܦܘܼܬ݂ܵܐ.

¹¹ ܥܲܕ݂ܠܵܐ ܢܸܬ݂ܝܲܠܕܘܢ ܒܢܹܝ̈ܗܿ: ܘܠܵܐ ܢܸܣܥܪܽܘܢ ܛܵܒ݂ܬ݂ܵܐ ܐܵܘ ܒܝܼܫܬܵܐ. ܩܲܕܡܲܬ݂ ܐܸܬ݂ܝܲܕ݂ܥܲܬ݂ ܓܲܒ݂ܝܘܼܬܹܗ ܕܐܲܠܵܗܵܐ. ܕܗܝܼ ܬܿܩܵܘܐ. ܠܵܐ ܒܲܥܒ݂ܵܕܹ̈ܐ: ܐܸܠܵܐ ܒܝܲܕ݂ ܡܲܢ ܕܲܩܪܵܐ.

¹² ܐܸܬ݂ܐܡܲܪ ܓܹܝܪ. ܕܩܲܫܝܼܫܵܐ ܢܸܗܘܹܐ ܥܲܒ݂ܕܹ̈ܐ ܠܲܙܥܘܿܪܵܐ.

¹³ ܐܲܝܟ݂ ܕܲܟܬ݂ܝܼܒ݂. ܕܲܠܝܲܥܩܘܿܒ݂ ܪܸܚܡܸܬ݂. ܘܲܠܥܺܣܽܘ ܣܢܝܼܬ݂.

¹⁴ ܡܵܢܵܐ ܗܵܟܹܝܠ ܢܹܐܡܲܪ. ܕܲܠܡܵܐ ܥܵܘܠܵܐ ܐܝܼܬ݂ ܠܘܵܬ݂ ܐܲܠܵܗܵܐ. ܚܵܣ.

¹⁵ ܗܵܐ ܐܵܦ ܠܡܘܼܫܹܐ ܐܸܡܲܪ. ܐܹܪܲܚܸܡ ܥܲܠ ܐܲܝܢܵܐ ܕܲܡܪܲܚܸܡ ܐ̄ܢܵܐ. ܘܐܸܚܽܘܢ ܠܐܲܝܢܵܐ ܕܚܵܐܸܢ ܐ̄ܢܵܐ.

¹⁶ ܠܵܐ ܗܵܟܹܝܠ ܒܐܝܕ݂ܲܝ̈ ܡܲܢ ܕܨܵܒܹܐ. ܘܠܵܐ ܒܐܝܕ݂ܲܝ̈ ܡܲܢ ܕܪܗܸܛ. ܐܸܠܵܐ ܒܐܝܕ݂ܲܝ̈ ܐܲܠܵܗܵܐ ܡܪܲܚܡܵܢܵܐ.

¹⁷ ܐܸܡܲܪ ܓܹܝܪ ܒܲܟ݂ܬ݂ܵܒ݂ܵܐ ܠܦܸܪܥܘܿܢ. ܕܠܵܗܿ ܠܗܵܕܹܐ ܐܲܩܝܼܡܬܵܟ݂. ܕܐܹܚܵܘܹܐ ܒܵܟ݂ ܚܲܝܠܝ. ܘܲܕ݂ܢܸܬ݂ܟܪܸܙ ܫܹܡܝ ܒܐܲܪܥܵܐ ܟܠܹܗ.

¹⁸ ܡܵܕܹܝܢ ܥܲܠ ܡܲܢ ܕܨܵܒܹܐ ܗ̄ܘܼ ܡܪܲܚܸܡ. ܘܥܲܠ ܡܲܢ ܕܨܵܒܹܐ ܡܩܲܫܹܐ.

¹⁹ ܘܲܟ݂ܒܲܪ ܬܹܐܡܲܪ. ܕܲܠܡܵܢܵܐ ܪܵܫܹܐ. ܡܲܢܘܼ ܓܹܝܪ ܕܲܢܩܘܼܡ ܠܘܼܩܒܲܠ ܨܸܒ݂ܝܵܢܹܗ.

²⁰ ܐܲܢ̄ܬܿ ܗܵܟܹܝܠ ܡܲܢ ܐܲܢ̄ܬܿ ܐܵܘ ܒܲܪܢܵܫܵܐ. ܕܦܸܬ݂ܓ݂ܵܡܵܐ ܠܐܲܠܵܗܵܐ ܝܵܗܹܒ݂ ܐܲܢ̄ܬܿ. ܕܲܠܡܵܐ ܐܵܡܪܵܐ ܓܒ݂ܝܼܠܬܵܐ ܠܡܲܢ ܕܓܲܒ݂ܠܵܗܿ ܕܲܠܡܵܢܵܐ ܗܵܟܲܢܵܐ ܓܒܲܠܬܵܢܝ.

²¹ ܐܵܘ ܠܵܐ ܫܲܠܝܼܛ ܦܲܚܵܪܵܐ ܥܲܠ ܛܝܼܢܹܗ. ܕܡܸܢܹܗ ܡܸܢ ܓܒ݂ܝܼܠܬܵܐ ܢܸܥܒܸܕ݂ ܡܵܐܢܹ̈ܐ: ܚܲܕ݂ ܠܐܝܼܩܵܪܵܐ. ܘܚܲܕ݂ ܠܨܲܥܪܵܐ.

²² ܐܸܢ ܕܹܝܢ ܨܒ݂ܵܐ ܐܲܠܵܗܵܐ ܕܲܢܚܵܘܹܐ ܪܘܼܓ݂ܙܹܗ. ܘܢܵܘܕܲܥ ܚܲܝܠܹܗ. ܐܲܝܬܿܝܼ ܒܣܘܿܓ݂ܵܐܐ ܕܡܲܓ݁ܪܲܬ݂ ܪܘܼܚܹܗ ܪܘܼܓ݂ܙܵܐ. ܥܲܠ ܡܵܐܢܹ̈ܐ ܕܪܘܼܓ݂ܙܵܐ ܕܲܓ݂ܡܝܼܪܝܼܢ ܠܐܲܒ݂ܕ݂ܵܢܵܐ.

²³ ܘܐܲܫܦܲܥ ܪ̈ܲܚܡܵܘܗܝ ܥܲܠ ܡܵܐܢܹ̈ܐ ܕܪ̈ܲܚܡܹܐ. ܕܲܡܛܲܝܒ݂ܝܼܢ ܗ̄ܘܼܵܘ ܠܐܲܠܵܗܵܐ ܠܬܸܫܒܿܘܿܚܬܵܐ.

²⁴ ܕܐܝܼܬܲܝܢ ܚ̄ܢܲܢ ܩܪ̈ܲܝܵܐ. ܠܵܐ ܗ̄ܘܵܐ ܒܲܠܚܘܿܕ݂ ܡܸܢ ܝܗ̄ܘܼܕ݂ܵܝܹ̈ܐ: ܐܸܠܵܐ ܐܵܦ ܡܸܢ ܥܲܡ̈ܡܹܐ.

²⁵ ܐܲܝܟܲܢܵܐ ܕܐܵܦ ܒܗܘܿܫܵܥ ܐܸܡܲܪ. ܕܐܸܩܪܹܐ ܠܐܲܝܠܹܝܢ ܕܠܵܐ ܗ̄ܘܵܘ ܥܲܡܝ. ܥܲܡܵܐ ܕܝܼܠܝ. ܘܲܠܠܵܐ ܐܸܬ݂ܪܲܚܡܲܬ݀. ܐܸܬ݂ܪܲܚܡܲܬ݀.

²⁶ ܢܸܗܘܹܐ ܓܹܝܪ ܒܕܘܼܟܬ݂ܵܐ ܟܲܪ ܕܡܸܬ݂ܩܪܹܝܢ ܗ̄ܘܼܵܘ ܠܵܐ ܥܲܡܝ. ܬܲܡܵܢ ܢܸܬ݂ܩܪܘܿܢ ܒ̈ܢܲܝܵܐ ܠܐܲܠܵܗܵܐ ܚܲܝܵܐ.

²⁷ ܐܹܫܲܥܝܵܐ ܕܹܝܢ ܐܲܟ݂ܪܸܙ ܥܲܠ ܒܢܲܝ̈ ܝܼܣܪܵܝܹܠ. ܕܐܸܢ ܢܸܗܘܹܐ ܡܸܢܝܵܢܵܐ ܕܲܒ݂ܢܲܝ̈ ܝܼܣܪܵܝܹܠ ܐܲܝܟ݂ ܚܵܠܵܐ ܕܲܒ݂ܝܲܡܵܐ. ܫܲܪܟܵܢܵܐ ܕܡܸܢܗܘܿܢ ܢܸܚܹܐ.

²⁸ ܡܸܠܬ݂ܵܐ ܓܪܲܡ ܘܲܦܣܲܩ. ܘܢܸܥܒܕ݂ܝܼܗܿ ܡܵܪܝܵܐ ܥܲܠ ܐܲܪܥܵܐ.

²⁹ ܘܐܲܝܟ݂ ܡܸܕܸܡ ܕܩܲܕܸܡ ܐܸܡܲܪ ܗܘܼ ܐܹܫܲܥܝܵܐ. ܕܐܸܠܘܼ ܠܵܐ ܡܵܪܝܵܐ ܨܒ݂ܵܐܘܼܬ݂ ܐܵܘܬܲܪ ܠܲܢ ܣܪܝܼܕ݂ܵܐ. ܐܲܝܟ݂ ܣܕ݂ܘܼܡ ܗܵܘܹܝܢ ܗ̄ܘܲܝܢ. ܘܲܠܥܵܡܘܿܪܵܐ ܡܸܬܿܕܲܡܹܝܢ ܗ̄ܘܲܝܢ.

³⁰ ܡܵܢܵܐ ܗܵܟܹܝܠ ܢܹܐܡܲܪ. ܕܥܲܡ̈ܡܹܐ ܕܠܵܐ ܪܵܗܛܝܼܢ ܗ̄ܘܼܵܘ ܒܵܬܲܪ ܟܹܐܢܘܼܬ݂ܵܐ. ܐܲܕ݂ܪܸܟ݂ܘ ܟܹܐܢܘܼܬ݂ܵܐ. ܟܹܐܢܘܼܬ݂ܵܐ ܕܹܝܢ ܐܲܝܕ݂ܵܐ ܕܡܸܢ ܗܲܝܡܵܢܘܼܬ݂ܵܐ ܗܝ.

³¹ ܝܼܣܪܵܝܹܠ ܕܹܝܢ ܕܲܪܗܸܛ ܗ̄ܘܵܐ ܒܵܬܲܪ ܢܵܡܘܿܣܵܐ ܕܟܹܐܢܘܼܬ݂ܵܐ. ܠܢܵܡܘܿܣܵܐ ܕܟܹܐܢܘܼܬ݂ܵܐ ܠܵܐ ܐܲܕ݂ܪܸܟ݂.

³² ܡܛܠ ܡܵܢܵܐ. ܡܛܠ ܕܠܵܐ ܗ̄ܘܵܐ ܡܸܢ ܗܲܝܡܵܢܘܼܬ݂ܵܐ. ܐܸܠܵܐ ܡܸܢ ܥܒ݂ܵܕ݂ܵܘ̈ܗܝ ܕܢܵܡܘܿܣܵܐ. ܐܸܬܿܬܿܩܸܠܘ ܓܹܝܪ ܒܟܹܐܦܵܐ ܕܬ݂ܘܩܲܠܬ݂ܵܐ.

³³ ܐܲܝܟ݂ ܕܲܟܬ݂ܝܼܒ݂. ܕܗܵܐ ܣܵܐܹܡ ܐ̄ܢܵܐ ܒܨܸܗܝܘܿܢ. ܟܹܐܦܵܐ ܕܬ݂ܘܼܩܲܠܬ݂ܵܐ. ܘܟܹܐܦܵܐ ܕܡܲܟ݂ܫܘܿܠܵܐ. ܘܡܲܢ ܕܒ݂ܵܗܿ ܢܗܲܝܡܸܢ ܠܵܐ ܢܸܒ݂ܗܲܬ݂.

10

¹ ܐܲܚܲܝ̈. ܨܸܒ݂ܝܵܢܵܐ ܕܠܹܒܝ. ܘܒ݂ܵܥܘܼܬ݂ܝ ܕܲܠܘܵܬ݂ ܐܲܠܵܗܵܐ. ܚܠܵܦܲܝܗܘܿܢ ܕܢܸܚܘܿܢ.

² ܡܲܣܗܸܕ݂ ܐ̄ܢܵܐ ܓܹܝܪ ܥܠܲܝܗܘܿܢ. ܕܲܛܢܵܢܵܐ ܕܐܲܠܵܗܵܐ ܐܝܼܬ݂ ܒܗܘܿܢ. ܐܸܠܵܐ ܠܵܘ ܒܝܼܕ݂ܲܥܬ݂ܵܐ.

³ ܟܹܐܢܘܼܬܹܗ ܓܹܝܪ ܕܐܲܠܵܗܵܐ ܠܵܐ ܝܼܕ݂ܲܥܘ. ܐܸܠܵܐ ܒܥܵܘ ܕܟܹܐܢܘܼܬ݂ܵܐ ܕܢܲܦ̮ܫܗܘܿܢ ܢܩܝܼܡܘܼܢ. ܘܡܛܠ ܗܵܢܵܐ ܠܟܹܐܢܘܼܬܹܗ ܕܐܲܠܵܗܵܐ ܠܵܐ ܐܸܫܬܲܥܒܲܕ݂ܘ.

⁴ ܣܵܟܹܗ ܓܹܝܪ ܕܢܵܡܘܿܣܵܐ. ܡܫܝܼܚܵܐ ܗܘܼ. ܠܟܹܐܢܘܼܬ݂ܵܐ ܠܟ݂ܠ ܕܲܡܗܲܝܡܸܢ.

⁵ ܡܘܼܫܹܐ ܓܹܝܪ ܗܵܟܲܢܵܐ ܟܬܲܒ݂ ܟܹܐܢܘܼܬ݂ܵܐ ܕܲܒ݂ܢܵܡܘܿܣܵܐ. ܕܡܲܢ ܕܢܸܥܒܸܕ݂ ܗܵܠܹܝܢ. ܢܸܚܹܐ ܒܗܹܝܢ.

⁶ ܟܹܐܢܘܼܬ݂ܵܐ ܕܹܝܢ ܕܲܒ݂ܗܲܝܡܵܢܘܼܬ݂ܵܐ. ܗܵܟܲܢܵܐ ܐܵܡܪܵܐ. ܕܠܵܐ ܬܹܐܡܲܪ ܒܠܸܒܵܟ݂. ܕܡܲܢܘܼ ܣܠܸܩ ܠܲܫܡܲܝܵܐ. ܘܐܲܚܸܬ݂ ܠܲܡܫܝܼܚܵܐ.

⁷ ܘܡܲܢܘܼ ܢܚܸܬ݂ ܠܲܬ݂ܗܘܿܡܵܐ ܕܲܫܝܘܿܠ. ܘܐܲܣܸܩ ܠܲܡܫܝܼܚܵܐ. ܡܸܢ ܒܹܝܬ݂ ܡܝܼܬܹ̈ܐ.

⁸ ܐܸܠܵܐ ܡܵܢܵܐ ܐܸܡܲܪ. ܩܲܪܝܼܒ݂ ܗܘܼ ܠܵܟ݂ ܦܸܬ݂ܓ݂ܵܡܵܐ. ܠܦܘܼܡܵܟ݂ ܘܲܠܠܸܒܵܟ݂. ܗܵܕܹܐ ܗܝ ܡܸܠܬ݂ܵܐ ܕܗܲܝܡܵܢܘܼܬ݂ܵܐ. ܕܡܲܟ݂ܪܙܝܼܢܲܢ.

⁹ ܘܐܸܢ ܬܵܘܕܹܐ ܒܦܘܼܡܵܟ݂ ܒܡܵܪܲܢ ܝܼܫܘܿܥ. ܘܲܬ݂ܗܲܝܡܸܢ ܒܠܸܒܵܟ݂. ܕܐܲܠܵܗܵܐ ܐܲܩܝܼܡܹܗ ܡܸܢ ܒܹܝܬ݂ ܡܝܼܬܹ̈ܐ. ܬܸܚܹܐ.

¹⁰ ܠܸܒܵܐ ܓܹܝܪ ܕܲܡܗܲܝܡܸܢ. ܒܹܗ ܡܸܙܕܲܕܲܩ. ܘܦܘܼܡܵܐ ܕܡܵܘܕܹܐ. ܒܹܗ ܚܵܝܹܿܐ.

¹¹ ܐܸܡܲܪ ܓܹܝܪ ܟܬ݂ܵܒ݂ܵܐ. ܕܟܠ ܕܲܡܗܲܝܡܸܢ ܒܹܗ. ܠܵܐ ܢܸܒ݂ܗܲܬ݂.

¹² ܘܲܒ݂ܗܵܕܹܐ ܠܵܐ ܦܪܲܫ. ܠܵܐ ܠܝܗ̄ܘܼܕ݂ܵܝܹ̈ܐ ܘܠܵܐ ܠܐܲܪ̈ܡܵܝܹܐ. ܚܲܕ݂ ܗܘܼ ܓܹܝܪ ܡܵܪܝܵܐ ܕܟ݂ܠܗܘܿܢ. ܕܥܲܬܿܝܼܪ ܒܟ݂ܠ ܕܩܵܪܹܐ ܠܹܗ.

¹³ ܟܠ ܓܹܝܪ ܕܢܸܩܪܹܐ ܫܡܹܗ ܕܡܵܪܝܵܐ. ܢܸܚܹܐ.

¹⁴ ܐܲܝܟܲܢܵܐ ܗܵܟܹܝܠ ܢܸܩܪܘܿܢ ܠܐܲܝܢܵܐ ܕܠܵܐ ܗܲܝܡܸܢܘ ܒܹܗ. ܐܵܘ ܐܲܝܟܲܢܵܐ ܢܗܲܝܡܢܘܼܢ ܠܗܵܘ ܕܠܵܐ ܫܲܡܥܘܼܗܝ. ܐܵܘ ܐܲܝܟܲܢܵܐ ܢܸܫܡܥܘܼܢ ܕܠܵܐ ܡܲܟ݂ܪܙܵܢܵܐ.

¹⁵ ܐܵܘ ܐܲܝܟܲܢܵܐ ܢܲܟ݂ܪܙܘܼܢ ܐܸܢ ܠܵܐ ܢܸܫܬܲܠܚܘܼܢ. ܐܲܝܟ݂ ܕܲܟܬ݂ܝܼܒ݂. ܕܡܵܐ ܝܵܐܝܵܢ ܪܸ̈ܓ݂ܠܲܝܗܘܿܢ ܕܲܡܣܲܒܪ̈ܲܝ ܫܠܵܡܵܐ. ܘܕ݂ܲܡܣܲܒܪ̈ܲܝ ܛܵܒ݂ܵܬ݂ܵܐ.

¹⁶ ܐܸܠܵܐ ܠܵܐ ܗ̄ܘܵܐ ܟܠܗܘܿܢ ܐܸܫܬܿܡܲܥܘ ܠܲܣܒܲܪܬ݂ܵܐ ܕܐܹܘܲܢܓܲܠܝܼܘܿܢ. ܐܹܫܲܥܝܵܐ ܓܹܝܪ ܐܸܡܲܪ. ܡܵܪܝ. ܡܲܢܘܼ ܗܲܝܡܸܢ ܠܒܲܪܬ݂ ܩܵܠܲܢ.

¹⁷ ܡܸܟܹܝܠ ܗܲܝܡܵܢܘܼܬ݂ܵܐ ܡܸܢ ܡܲܫܡܲܥ ܐܸܕ݂ܢܵܐ ܗܝ. ܘܡܲܫܡܲܥ ܐܸܕ݂ܢܵܐ ܡܸܢ ܡܸܠܬ݂ܵܐ ܕܐܲܠܵܗܵܐ.

¹⁸ ܐܸܠܵܐ ܐܵܡܲܪ ܐ̄ܢܵܐ. ܕܲܠܡܵܐ ܠܵܐ ܫܡܲܥܘ. ܘܗܵܐ ܒܟ݂ܠܵܗܿ ܐܲܪܥܵܐ ܢܸܦܩܲܬ݂ ܒܲܪܬ݂ ܩܵܠܗܘܿܢ. ܘܲܒ݂ܣܵܘܦܹܝ̈ܗܿ ܕܬܹܒܹܝܠ ܡܸܠܲܝ̈ܗܘܿܢ.

¹⁹ ܐܸܠܵܐ ܐܵܡܲܪ ܐ̄ܢܵܐ. ܕܲܠܡܵܐ ܠܵܐ ܝܼܕ݂ܲܥ ܝܼܣܪܵܝܹܠ. ܩܲܕ݂ܡܵܝܵܐ ܡܘܼܫܹܐ ܗܵܟܲܢܵܐ ܐܸܡܲܪ. ܐܲܛܸܢܟ݂ܘܿܢ ܒܥܲܡ ܕܠܵܐ ܥܲܡ. ܘܲܒ݂ܥܲܡܵܐ ܕܠܵܐ ܡܸܬܿܛܦܝܼܣ ܐܲܪܓܸ݁ܙܟ݂ܘܿܢ.

²⁰ ܐܹܫܲܥܝܵܐ ܕܹܝܢ ܐܲܡܪܲܚ. ܘܐܸܡܲܪ. ܕܐܸܬ݂ܚܙܝܼܬ݂ ܠܐܲܝܠܹܝܢ ܕܠܵܐ ܒܥܵܐܘܼܢܝ. ܘܐܸܫܬܲܟ݂ܚܹܬ݂ ܠܐܲܝܠܹܝܢ ܕܲܥܠܲܝ ܠܵܐ ܫܲܐܸܠܘ.

²¹ ܠܝܼܣܪܵܝܹܠ ܕܹܝܢ ܐܸܡܲܪ. ܕܦܸܫܛܹܬ݂ ܐܝܼܕ݂ܲܝ ܝܵܘܡܵܐ ܟܠܹܗ. ܠܘܵܬ݂ ܥܲܡܵܐ ܕܡܸܬ݂ܚܪܼܐ. ܘܠܵܐ ܡܸܬܿܛܦܝܼܣ.

11

¹ ܐܸܠܵܐ ܐܵܡܲܪ ܐ̄ܢܵܐ. ܕܲܠܡܵܐ ܕܲܚܩܹܗ ܐܲܠܵܗܵܐ ܠܥܲܡܹܗ. ܚܵܣ. ܐܵܦ ܐܸܢܵܐ ܓܹܝܪ ܡܸܢ ܝܼܣܪܵܝܹܠ ܐ̄ܢܵܐ. ܡܸܢ ܙܲܪܥܹܗ ܕܐܲܒ݂ܪܵܗܵܡ. ܡܸܢ ܫܲܪܒܿܬ݂ܵܐ ܕܒܸܢܝܵܡܹܝܢ.

² ܠܵܐ ܕܚܲܩ ܐܲܠܵܗܵܐ ܠܥܲܡܹܗ. ܐܲܝܢܵܐ ܕܡܸܢ ܩܕ݂ܝܼܡ ܝܼܕ݂ܝܼܥ ܗ̄ܘܵܐ ܠܹܗ. ܐܵܘ ܠܵܐ ܝܵܕ݂ܥܝܼܢ ܐܢ̄ܬܘܿܢ ܒܲܟ݂ܬ݂ܵܒ݂ܵܐ ܕܐܹܠܝܼܵܐ. ܡܵܢܵܐ ܐܸܡܲܪ. ܟܲܕ݂ ܩܵܒܹ݁ܠ ܗ̄ܘܵܐ ܠܐܲܠܵܗܵܐ ܥܲܠ ܝܼܣܪܵܝܹܠ. ܘܐܵܡܲܪ.

³ ܡܵܪܝ ܠܲܢܒ݂ܝܼܲܝ̈ܟ ܩܲܛܸܠܘ. ܘܲܠܡܲܕ݂ܒܚܲܝ̈ܟ ܣܲܚܸܦܘ. ܘܐܸܢܵܐ ܗܘܼ ܒܲܠܚܘܿܕ݂ܝ ܐܸܫܬܲܚܪܹܬ݂. ܘܒ݂ܵܥܹܝܢ ܠܢܲܦ̮ܫܝ.

⁴ ܘܐܸܬ݂ܐܡܲܪ ܠܹܗ ܒܓܸܠܝܵܢܵܐ. ܕܗܵܐ ܫܸܒ݂ܩܹܬ݂ ܠܢܲܦ̮ܫܝ ܫܲܒ݂ܥܵܐ ܐܲܠܦ̈ܝܼܢ ܓܲܒ݂ܪ̈ܝܼܢ: ܐܲܝܠܹܝܢ ܕܥܲܠ ܒܘܼܪ̈ܟܲܝܗܘܿܢ ܠܵܐ ܒܪܸܟ݂ܘ. ܘܠܵܐ ܣܓܸܕ݂ܘ ܠܒܲܥܠܵܐ.

⁵ ܗܵܟܲܢܵܐ ܐܵܦ ܒܗܵܢܵܐ ܙܲܒ݂ܢܵܐ. ܫܲܪܟܵܢܵܐ ܗܘܼ ܐܸܫܬܿܚܲܪ ܒܲܓ݂ܒ݂ܝܼܬ݂ܵܐ ܕܛܲܝܒܘܼܬ݂ܵܐ.

⁶ ܐܸܢ ܕܹܝܢ ܒܛܲܝܒܘܼܬ݂ܵܐ. ܠܵܐ ܗ̄ܘܵܐ ܡܸܢ ܥܒ݂ܵܕܹ̈ܐ. ܘܐܸܢ ܠܵܐ. ܛܲܝܒܘܼܬ݂ܵܐ ܠܵܐ ܐܝܼܬܹܝܗܿ ܛܲܝܒܘܼܬ݂ܵܐ. ܐܸܢ ܕܹܝܢ ܒܲܥܒ݂ܵܕܹ̈ܐ. ܠܵܐ ܗ̄ܘܵܐ ܡܸܢ ܛܲܝܒܘܼܬ݂ܵܐ. ܘܐܸܢ ܠܵܐ. ܥܒ݂ܵܕ݂ܵܐ ܠܵܐ ܐܝܼܬ݂ܵܘܗܝ ܥܒ݂ܵܕ݂ܵܐ.

⁷ ܡܵܢܵܐ ܗܵܟܹܝܠ. ܗܵܝ ܕܒ݂ܵܥܹܐ ܗ̄ܘܵܐ ܝܼܣܪܵܝܹܠ. ܠܵܐ ܐܸܫܟܲܚ. ܓܒ݂ܝܼܬ݂ܵܐ ܕܹܝܢ ܐܸܫܟܚܲܬ݂. ܫܲܪܟܗܘܿܢ ܕܹܝܢ ܐܸܬ݂ܥܵܘܲܪܘ ܒܠܸܒܗܘܿܢ.

⁸ ܐܲܝܟܲܢܵܐ ܕܲܟܬ݂ܝܼܒ݂. ܕܝܲܗ̄ܒ݂ ܠܗܘܿܢ ܐܲܠܵܗܵܐ ܪܘܼܚܵܐ ܡܕ݂ܲܥܪܵܢܝܼܬ݂ܵܐ. ܘܥܲܝܢܹ̈ܐ ܕܠܵܐ ܢܸܒ݂ܚܪܘܼܢ ܒܗܹܝܢ. ܘܐܸܕ݂ܢܹ̈ܐ ܕܠܵܐ ܢܸܫܡܥܘܼܢ. ܥܕ݂ܲܡܵܐ ܠܝܵܘܡܵܐ ܕܝܵܘܡܵܢܵܐ.

⁹ ܘܕ݂ܵܘܝܼܕ݂ ܬܘܼܒ݂ ܐܸܡܲܪ. ܢܸܗܘܹܐ ܦܵܬ݂ܘܿܪܗܘܿܢ ܩܕ݂ܵܡܲܝܗܘܿܢ ܠܦܲܚܵܐ. ܘܦܘܼܪܥܵܢܗܘܿܢ ܠܬ݂ܘܩܲܠܬ݂ܵܐ.

¹⁰ ܢܸܚܫܟ݂ܵܢ ܥܲܝܢܲܝ̈ܗܘܿܢ ܕܠܵܐ ܢܸܚܙܘܿܢ. ܘܚܲܨܗܘܿܢ ܒܟ݂ܠܙܒܲܢ ܢܸܗܘܹܐ ܟܦܝܼܦ.

¹¹ ܐܵܡܲܪ ܐ̄ܢܵܐ ܕܹܝܢ. ܕܲܠܡܵܐ ܐܸܬܿܬܿܩܸܠܘ ܐܲܝܟ݂ ܕܢܸܦܠܘܼܢ. ܚܵܣ. ܐܸܠܵܐ ܒܬ݂ܘܩܠܲܬ݂ܗܘܿܢ ܕܝܼܠܗܘܿܢ. ܗܘܵܘ ܚܲܝܹ̈ܐ ܠܥܲܡ̈ܡܹܐ. ܠܲܛܢܵܢܗܘܿܢ.

¹² ܘܐܸܢ ܬܿܘܩܠܲܬ݂ܗܘܿܢ ܗܘܸܵܬ݂ ܥܘܼܬ݂ܪܵܐ ܠܥܵܠܡܵܐ. ܘܚܲܝܵܒ݂ܘܬ݂ܗܘܿܢ ܥܘܼܬ݂ܪܵܐ ܠܥܲܡ̈ܡܹܐ. ܟܡܵܐ ܗܵܟܹܝܠ ܫܘܼܡܠܵܝܗܘܿܢ.

¹³ ܠܟ݂ܘܿܢ ܕܹܝܢ ܐܵܡܲܪ ܐ̄ܢܵܐ ܠܥܲܡ̈ܡܹܐ. ܐܸܢܵܐ ܕܐܝܼܬܲܝ ܫܠܝܼܚܵܐ ܕܥܲܡ̈ܡܹܐ. ܠܬܸܫܡܸܫܬܿܝ ܡܫܲܒܲܚ ܐ̄ܢܵܐ.

¹⁴ ܕܲܠܡܵܐ ܐܲܛܸܢ ܠܲܒ݂ܢܲܝ̈ ܒܸܣܪܝ. ܘܐܲܚܹ̈ܐ ܐ̄ܢܵܫ̈ܝܼܢ ܡܸܢܗܘܿܢ.

¹⁵ ܐܸܢ ܓܹܝܪ ܡܸܣܬܲܠܝܵܢܘܼܬ݂ܗܘܿܢ ܬܲܪܥܘܼܬ݂ܵܐ ܠܥܵܠܡܵܐ ܗܘܵܬ݂. ܟܡܵܐ ܗܵܟܹܝܠ ܦܘܼܢܵܝܗܘܿܢ. ܐܸܠܵܐ ܚܲܝܹ̈ܐ ܕܡܸܢ ܒܹܝܬ݂ ܡܝܼܬܹ̈ܐ.

¹⁶ ܘܐܸܢ ܕܹܝܢ ܪܹܫܝܼܬ݂ܵܐ ܩܲܕܝܼܫܵܐ. ܐܵܦ ܓܒ݂ܝܼܠܬܵܐ. ܘܐܸܢ ܥܸܩܪܵܐ ܩܲܕܝܼܫ ܗ̄ܘܼ. ܐܵܦ ܣܵܘܟܹ̈ܐ.

¹⁷ ܘܐܸܢ ܡܸܢ ܣܵܘܟܹ̈ܐ ܐܸܬ݂ܦܫܲܚ. ܘܐܲܢ̄ܬܿ ܕܙܲܝܬܵܐ ܐܲܢ̄ܬܿ ܕܒܲܪܵܐ ܐܸܬܿܛܥܸܡܬܿ ܒܕ݂ܘܼܟܝܵܬ݂ܗܹܝ̈ܢ: ܘܲܗܘܲܝܬܿ ܫܵܘܬܵܦܵܐ ܠܥܸܩܪܹܗ ܘܲܠܫܘܼܡܢܹܗ ܕܙܲܝܬܵܐ.

¹⁸ ܠܵܐ ܬܸܫܬܲܒ݂ܗܲܪ ܥܲܠ ܣܵܘܟܹ̈ܐ. ܐܸܢ ܕܹܝܢ ܡܸܫܬܲܒ݂ܗܲܪ ܐܲܢ̄ܬܿ. ܠܵܐ ܗ̄ܘܵܐ ܐܲܢ̄ܬܿ ܫܩܝܼܠ ܠܹܗ ܠܥܸܩܪܵܐ. ܐܸܠܵܐ ܗܘܼ ܥܸܩܪܵܐ ܫܩܝܼܠ ܠܵܟ݂.

¹⁹ ܘܲܟ݂ܒܲܪ ܬܹܐܡܲܪ ܕܣܵܘܟܹ̈ܐ ܕܐܸܬ݂ܦܫܲܚ. ܕܐܸܢܵܐ ܒܕ݂ܘܼܟܝܵܬ݂ܗܹܝ̈ܢ ܐܸܬܿܛܥܸܡ.

²⁰ ܫܲܦܝܼܪ. ܗܵܠܹܝܢ ܡܛܠ ܕܠܵܐ ܗܲܝܡܸܢ. ܐܸܬ݂ܦܫܲܚ. ܐܲܢ̄ܬܿ ܕܹܝܢ ܒܗܲܝܡܵܢܘܼܬ݂ܵܐ ܩܵܡܬܿ. ܠܵܐ ܬܸܬܿܪܝܼܡ ܒܪܸܥܝܵܢܵܟ݂. ܐܸܠܵܐ ܕܚܲܠ.

²¹ ܐܸܢ ܐܲܠܵܗܵܐ ܓܹܝܪ ܥܲܠ ܣܵܘܟܹ̈ܐ ܕܡܸܢ ܟܝܵܢܗܹܝܢ ܠܵܐ ܚܵܣ. ܕܲܠܡܵܐ ܐܵܦܠܵܐ ܥܠܲܝܟ ܢܚܘܼܣ.

²² ܚܙܝܼ ܗܵܟܹܝܠ ܒܲܣܝܼܡܘܼܬܹܗ ܘܩܲܫܝܘܼܬܹܗ ܕܐܲܠܵܗܵܐ. ܥܲܠ ܐܲܝܠܹܝܢ ܕܲܢܦܲܠܘ. ܩܲܫܝܘܼܬ݂ܵܐ. ܥܠܲܝܟ ܕܹܝܢ ܒܲܣܝܼܡܘܼܬ݂ܵܐ. ܐܸܢ ܬܩܵܘܹܐ ܒܵܗܿ ܒܒܲܣܝܼܡܘܼܬ݂ܵܐ. ܘܐܸܢ ܠܵܐ. ܐܵܦ ܐܲܢ̄ܬܿ ܬܸܬ݂ܦܫܲܚ.

²³ ܘܗܵܢܘܿܢ ܐܸܢ ܠܵܐ ܢܩܵܘܘܼܢ ܒܚܲܣܝܼܪܘܼܬ݂ ܗܲܝܡܵܢܘܼܬ݂ܗܘܿܢ. ܐܵܦ ܗܸܢܘܿܢ ܢܸܬܿܛܲܥܡܘܼܢ. ܡܸܫܟܲܚ ܓܹܝܪ ܐܲܠܵܗܵܐ ܕܬ݂ܘܼܒ݂ ܢܲܛܥܸܡ ܐܸܢܘܿܢ.

²⁴ ܐܸܢ ܓܹܝܪ ܐܲܢ̄ܬܿ ܕܡܸܢ ܙܲܝܬܵܐ ܐܲܢ̄ܬܿ ܕܒܲܪܵܐ. ܗܵܘ ܕܒܲܟ݂ܝܵܢܵܟ݂ ܐܸܬ݂ܦܫܲܚܬܿ. ܘܲܕ݂ܠܵܐ ܒܲܟ݂ܝܵܢܵܟ݂ ܐܸܬܿܛܥܸܡܬܿ ܒܙܲܝܬܵܐ ܛܵܒ݂ܵܐ. ܟܡܵܐ ܗܵܟܹܝܠ ܗܵܢܘܿܢ ܐܸܢ ܢܸܬܿܛܲܥܡܘܼܢ ܒܙܲܝܬܵܐ ܕܲܟ݂ܝܵܢܗܘܿܢ.

²⁵ ܨܵܒܹܐ ܐ̄ܢܵܐ ܓܹܝܪ ܕܬܸܕ݁ܥܘܼܢ ܐܲܚܲܝ̈ ܐ̄ܪܵܙܵܐ ܗܵܢܵܐ. ܕܠܵܐ ܬܸܗܘܘܿܢ ܚܲܟܝܼܡ̈ܝܼܢ ܒܪܸܥܝܵܢ ܢܲܦ̮ܫܟ݂ܘܿܢ. ܕܲܥܘܝܼܪܘܼܬ݂ ܠܸܒܵܐ ܡܸܢ ܐܲܬܲܪ ܩܲܠܝܼܠ ܗܘܵܬ݂ ܠܝܼܣܪܵܝܹܠ. ܥܕ݂ܲܡܵܐ ܕܢܸܥܘܿܠ ܡܘܼܠܵܝܵܐ ܕܥܲܡ̈ܡܹܐ.

²⁶ ܘܗܵܝܕܹܝܢ ܟܠܹܗ ܝܼܣܪܵܝܹܠ ܢܸܚܹܐ. ܐܲܝܟܲܢܵܐ ܕܲܟܬ݂ܝܼܒ݂. ܕܢܹܐܬܹܐ ܡܸܢ ܨܸܗܝܘܿܢ ܦܵܪܘܿܩܵܐ. ܘܢܲܗܦܸܟ݂ ܥܵܘܠܵܐ ܡܸܢ ܝܲܥܩܘܿܒ݂.

²⁷ ܘܗܵܝܕܹܝܢ ܬܸܗܘܹܐ ܠܗܘܿܢ ܕܝܵܬܹܩܹܐ ܗܵܝ ܕܡܸܢ ܠܘܵܬ݂ܝ. ܡܵܐ ܕܫܸܒ݂ܩܹܬ݂ ܠܗܘܿܢ ܚܛܵܗܲܝ̈ܗܘܿܢ.

²⁸ ܒܐܹܘܲܢܓܲܠܝܼܘܿܢ ܕܹܝܢ. ܒܥܸܠܕܒ݂ܵܒܹ̈ܐ ܐܸܢܘܿܢ ܡܛܠܵܬ݂ܟ݂ܘܿܢ. ܘܲܒ݂ܓܲܒ݂ܝܘܼܬ݂ܵܐ ܚܲܒܝܼܒܲܝ̈ܢ ܐܸܢܘܿܢ ܡܛܠ ܐܲܒ݂ܵܗ̈ܵܬ݂ܵܐ.

²⁹ ܠܵܐ ܓܹܝܪ ܗܵܦܹ݁ܟ ܐܲܠܵܗܵܐ ܒܡܵܘܗܲܒ݂ܬܹܗ ܘܲܒ݂ܩܸܪܝܵܢܹܗ.

³⁰ ܐܲܝܟܲܢܵܐ ܓܹܝܪ ܕܐܵܦ ܐܲܢ̄ܬܿܘܿܢ ܠܵܐ ܡܸܬܿܛܦܝܼܣܝܼܢ ܗܘܲܝܬܿܘܿܢ ܠܐܲܠܵܗܵܐ ܡܸܢ ܩܕ݂ܝܼܡ. ܘܗܵܫܵܐ ܐܸܬ݂ܚܢܸܢܬܿܘܢ ܡܛܠ ܠܵܐ ܡܸܬܿܛܦܝܼܣܵܢܘܼܬ݂ܗܘܿܢ ܕܗܵܢܘܿܢ.

³¹ ܗܵܟܲܢܵܐ ܐܵܦ ܗܵܠܹܝܢ ܠܵܐ ܐܸܬܿܛܦܝܼܣܘ ܗܵܫܵܐ ܠܪ̈ܲܚܡܹܐ ܕܲܥܠܲܝܟܿܘܿܢ. ܕܐܵܦ ܥܠܲܝܗܘܿܢ ܢܸܗܘܘܿܢ ܪ̈ܲܚܡܹܐ.

³² ܚܒܲܫ ܓܹܝܪ ܐܲܠܵܗܵܐ ܠܟ݂ܠܢܵܫ ܒܠܵܐ ܡܸܬܿܛܦܝܼܣܵܢܘܼܬ݂ܵܐ. ܕܥܲܠ ܟܠ ܐ̄ܢܵܫ ܢܪܲܚܸܡ.

³³ ܐܘܿ ܥܘܼܡܩܵܐ ܕܥܘܼܬ݂ܪܵܐ ܘܚܸܟ݂ܡܬ݂ܵܐ ܘܡܲܕܥܵܐ ܕܐܲܠܵܗܵܐ. ܕܐ̄ܢܵܫ ܠܵܐ ܡܵܫ ܕܝܼܢܵܘ̈ܗܝ: ܘܐܘܼܪ̈ܚܵܬܹܗ ܠܵܐ ܡܸܬ݂ܥܲܩܒ݂ܵܢ.

³⁴ ܡܲܢܘܼ ܓܹܝܪ ܝܼܕ݂ܲܥ ܪܸܥܝܵܢܹܗ ܕܡܵܪܝܵܐ. ܐܵܘ ܡܲܢܘܼ ܗܘܵܐ ܠܹܗ ܒܥܸܠ ܡܸܠܟܵܐ.

³⁵ ܘܡܲܢܘܼ ܩܲܕܸܡ ܝܲܗ̄ܒ݂ ܠܹܗ. ܘܟܸܢ ܢܣܲܒ݂ ܡܸܢܹܗ.

³⁶ ܡܛܠ ܕܟܠ ܡܸܢܹܗ ܘܟ݂ܠ ܒܹܗ. ܘܟ݂ܠ ܒܐܝܼܕܹܗ. ܕܠܹܗ ܬܸܫܒ̈ܚܵܢ ܘܒ݂ܘܪ̈ܟܵܢ: ܠܥܵܠܲܡ ܥܵܠܡܝܼܢ ܐܵܡܹܝܢ.

12

¹ ܒܵܥܹܢܵܐ ܗܵܟܹܝܠ ܡܸܢܟ݂ܘܿܢ ܐܲܚܲܝ̈ ܒܪܲܚܡܵܘܗܝ ܕܐܲܠܵܗܵܐ. ܕܲܬ݂ܩܝܼܡܘܼܢ ܦܲܓ݂ܪ̈ܲܝܟܘܿܢ ܕܸܒ݂ܚܬ݂ܵܐ ܚܲܝܬ݂ܵܐ ܘܩܲܕܝܼܫܬܵܐ ܘܲܡܩܲܒܲܠܬܵܐ ܠܐܲܠܵܗܵܐ. ܒܬܸܫܡܸܫܬܵܐ ܡܠܝܼܠܬܵܐ.

² ܘܠܵܐ ܬܸܬܿܕܲܡܘܼܢ ܠܥܵܠܡܵܐ ܗܵܢܵܐ. ܐܸܠܵܐ ܐܸܫܬܲܚܠܲܦܘ ܒܚܘܼܕܵܬ݂ܵܐ ܕܪܸ̈ܥܝܵܢܲܝܟܿܘܿܢ. ܘܲܗܘܲܝܬܿܘܿܢ ܦܵܪܫܝܼܢ ܐܲܝܢܵܐ ܗܘܼ ܨܸܒ݂ܝܵܢܵܐ ܕܐܲܠܵܗܵܐ. ܛܵܒ݂ܵܐ ܘܲܡܩܲܒܠܵܐ ܘܲܓ݂ܡܝܼܪܵܐ.

³ ܐܵܡܲܪ ܐ̄ܢܵܐ ܕܹܝܢ ܒܛܲܝܒܘܼܬ݂ܵܐ ܕܐܬ݂ܝܲܗܒܲܬ݂ ܠܝܼ ܠܟ݂ܠܟ݂ܘܿܢ. ܕܠܵܐ ܬܸܗܘܘܿܢ ܡܸܬ݂ܪܲܥܹܝܢ ܠܒܲܪ ܡܸܢ ܡܵܐ ܕܘܵܠܹܐ ܕܬܸܬ݂ܪܲܥܘܼܢ. ܐܸܠܵܐ ܬܸܗܘܘܿܢ ܡܸܬ݂ܪܲܥܹܝܢ ܒܢܲܟ݂ܦܘܼܬ݂ܵܐ. ܟܠܢܵܫ ܐܲܝܟ݂ ܕܲܦܠܲܓ݂ ܠܹܗ ܐܲܠܵܗܵܐ ܗܲܝܡܵܢܘܼܬ݂ܵܐ ܒܲܡܫܘܿܚܬ݂ܵܐ.

⁴ ܐܲܝܟܲܢܵܐ ܓܹܝܪ ܕܲܒ݂ܚܲܕ݂ ܦܲܓ݂ܪܵܐ ܗܲܕܵܡܹ̈ܐ ܣܲܓܝܼ̈ܐܹܐ ܐܝܼܬ݂ ܠܲܢ: ܘܟ݂ܠܗܘܿܢ ܗܲܕܵܡܹ̈ܐ ܠܵܐ ܗ̄ܘܵܐ ܚܲܕ݂ ܣܘܼܥܪܵܢܵܐ ܐܝܼܬ݂ ܠܗܘܿܢ.

⁵ ܗܵܟܲܢܵܐ ܐܵܦ ܚܢܲܢ ܕܣܲܓܝܼ̈ܐܹܐ ܚܢܲܢ. ܚܲܕ݂ ܚܢܲܢ ܦܓܲܪ ܒܲܡܫܝܼܚܵܐ. ܚܲܕ݂ ܚܲܕ݂ ܡܸܢܲܢ ܕܹܝܢ. ܗܲܕܵܡܹ̈ܐ ܚܢܲܢ ܕܲܚܕ݂ܵܕܹ̈ܐ.

⁶ ܐܸܠܵܐ ܐܝܼܬ݂ ܠܲܢ ܡܵܘܗ̈ܒ݂ܵܬ݂ܵܐ ܡܫܲܚ̈ܠܦܵܬ݂ܵܐ. ܐܲܝܟ݂ ܛܲܝܒܘܼܬ݂ܵܐ ܕܐܬ݂ܝܲܗܒܲܬ݂ ܠܲܢ. ܐܝܼܬ݂ ܕܲܢܒ݂ܝܼܘܼܬ݂ܵܐ. ܐܲܝܟ݂ ܡܫܘܿܚܬ݂ܵܐ ܕܗܲܝܡܵܢܘܼܬܹܗ.

⁷ ܘܐܝܼܬ݂ ܕܬܸܫܡܸܫܬܵܐ ܐܝܼܬ݂ ܠܹܗ. ܒܬܸܫܡܸܫܬܹܿܗ. ܘܐܝܼܬ݂ ܕܡܲܠܦܵܢܵܐ ܗܘܼ. ܒܝܘܼܠܦܵܢܹܗ.

⁸ ܘܐܝܼܬ݂ ܕܲܡܒܲܝܐܵܢܵܐ ܗܘܼ. ܒܒ݂ܘܝܵܐܹܗ. ܘܲܕ݂ܝܵܗܹܒ݂. ܒܲܦܫܝܼܛܘܼܬ݂ܵܐ. ܘܲܕ݂ܩܵܐܹܡ ܒܪܹܫܵܐ. ܒܲܚܦܝܼܛܘܼܬ݂ܵܐ. ܘܕ݂ܲܡܪܲܚܸܡ. ܒܲܦܨܝܼܚܘܼܬ݂ܵܐ.

⁹ ܘܠܵܐ ܢܸܗܘܹܐ ܢܟ݂ܝܼܠ ܚܘܼܒܟ݂ܘܿܢ. ܐܸܠܵܐ ܗܘܲܝܬܿܘܿܢ ܣܵܢܹܝܢ ܠܒ̈ܝܼܫܵܬ݂ܵܐ. ܘܡܸܬ݂ܢܲܩܦܝܼܢ ܠܛܵܒ݂ܵܬ݂ܵܐ.

¹⁰ ܗܘܲܝܬܿܘܿܢ ܪܵܚܡܝܼܢ ܠܐܲܚܲܝ̈ܟܘܿܢ. ܘܡܲܚܒ݂ܝܼܢ ܚܲܕ݂ ܠܚܲܕ݂. ܗܘܲܝܬܿܘܿܢ ܡܩܲܕܡܝܼܢ ܡܝܲܩܪܝܼܢ ܚܲܕ݂ ܠܚܲܕ݂.

¹¹ ܗܘܲܝܬܿܘܿܢ ܚܦܝܼܛܝܼܢ. ܘܠܵܐ ܚܒܸܢܵܢܝܼܢ. ܗܘܲܝܬܿܘܿܢ ܪܵܬ݂ܚܝܼܢ ܒܪܘܼܚ. ܗܘܲܝܬܿܘܿܢ ܦܵܠܚܝܼܢ ܠܡܵܪܟ݂ܘܿܢ.

¹² ܗܘܲܝܬܿܘܿܢ ܚܵܕܹܝܢ ܒܣܲܒ݂ܪܟ݂ܘܿܢ. ܗܘܲܝܬܿܘܿܢ ܡܣܲܝܒܪܝܼܢ ܐܘܼܠܨܵܢܲܝ̈ܟܿܘܿܢ. ܗܘܲܝܬܿܘܿܢ ܐܲܡܝܼܢܝܼܢ ܒܲܨܠܘܿܬ݂ܵܐ.

¹³ ܗܘܲܝܬܿܘܿܢ ܡܸܫܬܵܘܬܿܦܝܼܢ ܠܲܣܢܝܼܩܘܼܬ݂ܵܐ ܕܩܲܕܝܼܫܹ̈ܐ. ܗܘܲܝܬܿܘܿܢ ܪܵܚܡܝܼܢ ܐܲܟ݂ܣܢܵܝܹ̈ܐ.

¹⁴ ܒܲܪܸܟ݂ܘ ܠܪ̈ܵܕ݂ܘܿܦܲܝܟܘܿܢ. ܒܲܪܸܟ݂ܘ ܘܠܵܐ ܬܠܘܼܛܘܼܢ.

¹⁵ ܚܕ݂ܵܘ ܥܲܡ ܕܚܵܕܹܝܢ. ܘܲܒ݂ܟ݂ܵܘ ܥܲܡ ܕܒ݂ܵܟܹܝܢ.

¹⁶ ܘܡܸܕܸܡ ܕܡܸܬ݂ܪܲܥܹܝܢ ܐܢ̄ܬܘܿܢ ܥܲܠ ܢܲܦ̮ܫܟ݂ܘܿܢ. ܐܵܦ ܥܲܠ ܐܲܚܲܝ̈ܟܘܿܢ. ܘܠܵܐ ܬܸܬ݂ܪܲܥܘܿܢ ܪܸܥܝܵܢܵܐ ܪܵܡܵܐ. ܐܸܠܵܐ ܩܲܦܘ ܠܐܲܝܠܹܝܢ ܕܡܲܟܝܼܟ݂ܝܼ̈ܢ. ܘܠܵܐ ܗܘܲܝܬܿܘܿܢ ܚܲܟܝܼܡܝܼܢ ܒܪܸܥܝܵܢ ܢܲܦ̮ܫܟ݂ܘܿܢ.

¹⁷ ܘܠܵܐ ܬܸܦܪܥܘܼܢ ܠܐ̄ܢܵܫ ܒܝܼܫܬܵܐ ܚܠܵܦ ܒܝܼܫܬܵܐ. ܐܸܠܵܐ ܢܸܬ݂ܒܛܸܠ ܠܟ݂ܘܿܢ. ܕܬܸܥܒܕ݂ܘܼܢ ܛܵܒ݂ܵܬ݂ܵܐ ܩܕ݂ܵܡ ܒܢܲܝ̈ܢܵܫܵܐ ܟܠܗܘܿܢ.

¹⁸ ܘܐܸܢ ܡܸܫܟܚܵܐ. ܐܲܝܟ݂ ܕܡܸܢ ܠܘܵܬ݂ܟ݂ܘܿܢ. ܥܲܡ ܟܠ ܒܲܪܢܵܫ ܫܠܵܡܵܐ ܥܒܸܕ݂ܘ.

¹⁹ ܘܠܵܐ ܗܘܲܝܬܿܘܿܢ ܬܵܒ݂ܥܝܼܢ ܢܲܦ̮ܫܟ݂ܘܿܢ ܚܲܒܝܼܒܲܝ̈. ܐܸܠܵܐ ܗܲܒ݂ܘ ܐܲܬ݂ܪܵܐ ܠܪܘܼܓ݂ܙܵܐ. ܟܬ݂ܝܼܒ݂ ܗܘܼ ܓܹܝܪ. ܕܐܸܢ ܠܵܐ ܬܸܥܒܸܿܕ݂ ܕܝܼܢܵܐ ܠܢܲܦ̮ܫܵܟ݂. ܐܸܢܵܐ ܐܸܥܒܸܕ݂ ܕܝܼܢܵܟ݂. ܐܵܡܲܪ ܐܲܠܵܗܵܐ.

²⁰ ܘܐܸܢ ܟܦܸܢ ܒܥܸܠܕܒ݂ܵܒ݂ܵܟ݂. ܐܵܘܟܠܝܼܗܝ. ܘܐܸܢ ܨܗܹܐ. ܐܲܫܩܵܝܗܝ. ܘܐܸܢ ܗܵܠܹܝܢ ܬܸܥܒܸܿܕ݂ ܠܹܗ. ܓܘܼܡܪܹ̈ܐ ܕܢܘܼܪܵܐ ܬܩܲܒܲܪ ܥܲܠ ܩܲܪܩܲܦܬܹܗ.

²¹ ܘܠܵܐ ܬܸܙܟܹܝܟ݂ܘܿܢ ܒܝܼܫܬܵܐ. ܐܸܠܵܐ ܙܟ݂ܵܐܘܼܗܿ ܠܒ݂ܝܼܫܬܵܐ ܒܛܵܒ݂ܬ݂ܵܐ.

13

¹ ܟܠ ܢܦܸܫ ܠܫܘܼܠܛܵܢܹ̈ܐ ܕܪܲܒܘܼܬ݂ܵܐ ܬܸܫܬܲܥܒܲܕ݂. ܠܲܝܬܿ ܓܹܝܪ ܫܘܼܠܛܵܢܵܐ ܕܠܵܐ ܗ̄ܘܵܐ ܡܸܢ ܐܲܠܵܗܵܐ ܗܘܼ. ܘܐܲܝܠܹܝܢ ܫܘܼܠܛܵܢܹ̈ܐ ܕܐܝܼܬܲܝܗܘܿܢ ܡܸܢ ܐܲܠܵܗܵܐ ܗܘܼ ܦܩܝܼܕ݂ܝܼܢ.

² ܡܲܢ ܕܩܵܐܹܡ ܗܵܟܹܝܠ ܠܘܼܩܒܲܠ ܫܘܼܠܛܵܢܵܐ. ܠܘܼܩܒܲܠ ܦܘܼܩܕܵܢܵܐ ܕܐܲܠܵܗܵܐ ܩܵܐܹܡ. ܘܗܵܠܹܝܢ ܕܩܵܝܡܝܼܢ ܠܘܼܩܒܲܠܗܘܿܢ. ܕܝܼܢܵܐ ܢܸܣܒ݂ܘܢ.

³ ܕܲܝܵܢܹ̈ܐ ܓܹܝܪ ܠܵܐ ܗ̄ܘܼܵܘ ܕܸܚܠܬ݂ܵܐ ܠܲܥܒ݂ܵܕܹ̈ܐ ܛܵܒܹ̈ܐ. ܐܸܠܵܐ ܠܒܝܼܫܹ̈ܐ. ܨܵܒܹܐ ܐܲܢ̄ܬܿ ܗܵܟܹܝܠ ܕܠܵܐ ܬܸܕ݂ܚܲܠ ܡܸܢ ܫܘܼܠܛܵܢܵܐ. ܥܒܸܕ݂ ܛܵܒ݂ܬ݂ܵܐ. ܘܬܸܫܒܿܘܿܚܬܵܐ ܬܸܗܘܹܐ ܠܵܟ݂ ܡܸܢܹܗ.

⁴ ܡܫܲܡܫܵܢܵܐ ܗܘܼ ܓܹܝܪ ܕܐܲܠܵܗܵܐ. ܐܸܠܵܐ ܠܵܟ݂ ܠܛܵܒ݂ܵܬ݂ܵܐ. ܘܐܸܢ ܒܝܼܫܬܵܐ ܥܵܒܹܿܕ݂ ܐܲܢ̄ܬܿ. ܕܚܲܠ. ܠܵܐ ܗ̄ܘܵܐ ܓܹܝܪ ܣܪܝܼܩܵܐܝܼܬ݂ ܐܲܣܝܼܪ ܠܣܲܦ̮ܣܹܪܵܐ. ܡܫܲܡܫܵܢܵܐ ܗܘܼ ܓܹܝܪ ܕܐܲܠܵܗܵܐ. ܘܬ݂ܵܒ݂ܘܥܵܐ ܕܪܘܼܓ݂ܙܵܐ ܠܐܲܝܠܹܝܢ ܕܥܵܒ݂ܕܝܼܢ ܒ̈ܝܼܫܵܬ݂ܵܐ.

⁵ ܘܡܛܠ ܗܵܢܵܐ ܐܵܠܨܵܐ ܠܲܢ ܕܢܸܫܬܲܥܒܲܕ݂. ܠܵܐ ܡܛܠ ܪܘܼܓ݂ܙܵܐ ܒܲܠܚܘܿܕ݂. ܐܸܠܵܐ ܐܵܦ ܡܛܠ ܬܹܐܪܬܲܢ.

⁶ ܡܛܠ ܗܵܢܵܐ ܐܵܦ ܟܣܸܦ ܪܹܫܵܐ ܝܵܗܒܝܼܢ ܐܢ̄ܬܘܿܢ. ܡܫܲܡܫܵܢܹ̈ܐ ܐܸܢܘܿܢ ܓܹܝܪ ܕܐܲܠܵܗܵܐ. ܕܲܥܠܲܝܗܹܝܢ ܕܗܵܠܹܝܢ ܩܵܝܡܝܼܢ.

⁷ ܦܪܘܿܥܘ ܗܵܟܹܝܠ ܠܟ݂ܠܢܵܫ ܐܲܝܟ݂ ܕܡܸܬܿܚܝܼܒ݂ ܠܹܗ. ܠܡܲܢ ܕܲܟ݂ܣܸܦ ܪܹܫܵܐ. ܟܣܸܦ ܪܹܫܵܐ. ܘܲܠܡܲܢ ܕܡܲܟ݂ܣܵܐ. ܡܲܟ݂ܣܵܐ. ܘܲܠܡܲܢ ܕܕܸܚܠܬ݂ܵܐ. ܕܸܚܠܬ݂ܵܐ. ܘܲܠܡܲܢ ܕܐܝܼܩܵܪܵܐ. ܐܝܼܩܵܪܵܐ.

⁸ ܘܲܠܐ̄ܢܵܫ ܡܸܕܸܡ ܠܵܐ ܬܚܘܼܒ݂ܘܢ. ܐܸܠܵܐ ܚܲܕ݂ ܠܚܲܕ݂ ܠܡܲܚܵܒ݂ܘܼ. ܡܲܢ ܕܡܲܚܸܒ݂ ܓܹܝܪ ܚܲܒ݂ܪܹܗ. ܢܵܡܘܿܣܵܐ ܡܲܠܝܼ.

⁹ ܘܐܵܦ ܗܵܝ ܓܹܝܪ ܕܐܸܡܲܪ. ܕܠܵܐ ܬܓ݂ܘܼܪ. ܘܠܵܐ ܬܸܩܛܘܿܠ. (ܕܠܵܐ ܬܸܩܛܘܿܠ. ܘܠܵܐ ܬܓ݂ܘܼܪ.) ܘܠܵܐ ܬܸܓ݂ܢܘܿܒ݂. ܘܠܵܐ ܬܸܪܲܓ݂. ܘܐܸܢ ܐܝܼܬ݂ ܦܘܼܩܕܵܢܵܐ ܐ̄ܚܪܹܢܵܐ ܒܗܵܕܹܐ ܡܸܠܬ݂ܵܐ ܡܸܫܬܲܠܲܡ. ܕܬܸܪܚܲܡ ܠܩܲܪܝܼܒ݂ܵܟ݂ ܐܲܝܟ݂ ܢܲܦ̮ܫܵܟ݂.

¹⁰ ܚܘܼܒܵܐ ܠܩܲܪܝܼܒܹܗ ܒܝܼܫܬܵܐ ܠܵܐ ܣܵܥܲܪ. ܡܛܠ ܕܚܘܼܒܵܐ ܡܘܼܠܵܝܹܗ ܗܘܼ ܕܢܵܡܘܿܣܵܐ.

¹¹ ܘܐܵܦ ܗܵܕܹܐ ܕܲܥܘ. ܕܙܲܒ݂ܢܵܐ ܗܘܼ ܘܫܵܥܬ݂ܵܐ ܗܝ. ܡܸܟܝܠ ܕܢܸܬܿܥܝܼܪ ܡܸܢ ܫܸܢܬܲܢ. ܗܵܫܵܐ ܗܘܼ ܓܹܝܪ ܐܸܬ݂ܩܲܪܲܒ݂ܘ ܠܲܢ ܚܲܝܲܝ̈ܢ ܝܲܬܿܝܼܪ ܡܸܢ ܕܟܲܕ݂ ܗܲܝܡܸܢܢ.

¹² ܠܸܠܝܵܐ ܡܸܟܹܝܠ ܥܒܲܪ. ܘܐܝܼܡܵܡܵܐ ܩܪܸܒ݂. ܢܢܝܼܚ ܡܸܢܲܢ ܗܵܟܹܝܠ ܥܒ݂ܵܕܹ̈ܐ ܕܚܸܫܘܿܟ݂ܵܐ. ܘܢܸܠܒܲܫ ܙܲܝܢܹܗ ܕܢܘܼܗܪܵܐ.

¹³ ܘܐܲܝܟ݂ ܕܒܐܝܼܡܵܡܵܐ ܒܐܸܣܟܹܡܵܐ ܢܗܲܠܸܟ݂. ܠܵܐ ܒܲܙܡܵܪܵܐ ܘܠܵܐ ܒܪܵܘܵܝܘܼܬ݂ܵܐ. ܘܠܵܐ ܒܡܲܕ݂ܡܟ݂ܵܐ ܛܲܢܦܵܐ. ܘܠܵܐ ܒܲܚܣܵܡܵܐ ܘܲܒ݂ܚܸܪܝܵܢܵܐ.

¹⁴ ܐܸܠܵܐ ܠܘܼܒ݂ܫܘܿܗܝ ܠܡܵܪܲܢ ܝܼܫܘܿܥ ܡܫܝܼܚܵܐ. ܘܠܵܐ ܬܹܐܨܦܘܼܢ ܕܒܸܣܪܟ݂ܘܿܢ ܠܲܪ̈ܓ݂ܝܼܓ݂ܵܬ݂ܵܐ.

14

¹ ܠܐܲܝܢܵܐ ܕܹܝܢ ܕܲܟ݂ܪܝܼܗ ܒܗܲܝܡܵܢܘܼܬ݂ܵܐ. ܗܲܒ݂ܘ ܠܹܗ ܐܝܼܕ݂ܵܐ. ܘܠܵܐ ܬܸܗܘܘܿܢ ܡܸܬ݂ܦܲܠܓ݂ܝܼܢ ܒܡܲܚ̈ܫܒ݂ܵܬ݂ܟ݂ܘܿܢ.

² ܐܝܼܬ݂ ܓܹܝܪ ܕܲܡܗܲܝܡܸܢ ܕܟ݂ܠ ܡܸܕܸܡ ܢܹܐܟ݂ܘܿܠ. ܘܕ݂ܲܟ݂ܪܝܼܗ ܝܲܪܩܵܐ ܗܘܼ ܐܵܟܹܠ.

³ ܗܵܘ ܕܹܝܢ ܕܐܵܟܹܠ ܠܗܵܘ ܡܲܢ ܕܠܵܐ ܐܵܟܹܠ. ܠܵܐ ܢܫܘܿܛ. ܘܗܵܘ ܡܲܢ ܕܠܵܐ ܐܵܟܹܠ ܠܗܵܘ ܡܲܢ ܕܐܵܟܹܠ. ܠܵܐ ܢܕ݂ܘܼܢ. ܐܲܠܵܗܵܐ ܓܹܝܪ ܩܲܪܒܹܗ.

⁴ ܐܲܢ̄ܬܿ ܡܲܢ ܐܲܢ̄ܬܿ ܕܕ݂ܵܐܹܢ ܐܲܢ̄ܬܿ ܠܥܲܒ݂ܕܹ̈ܐ ܕܠܵܐ ܕܝܼܠܵܟ݂. ܕܐܸܢ ܩܵܐܹܡ. ܠܡܵܪܹܗ ܩܵܐܹܡ. ܘܐܸܢ ܢܵܦܹܿܠ. ܠܡܵܪܹܗ ܢܵܦܹܿܠ. ܡܩܵܡ ܗܘܼ ܕܹܝܢ ܩܵܐܹܡ. ܡܵܛܹܐ ܓܹܝܪ ܒܐܝܼܕ݂ܲܝ̈ ܡܵܪܹܗ ܕܲܢܩܝܼܡܝܼܘܗܝ.

⁵ ܐܝܼܬ݂ ܕܕ݂ܵܐܹܢ ܝܵܘܡܵܐ ܡܸܢ ܝܵܘܡܵܐ. ܘܐܝܼܬ݂ ܕܕ݂ܵܐܹܢ ܟܠܗܘܿܢ ܝܵܘ̈ܡܵܬ݂ܵܐ. ܟܠܢܵܫ ܕܹܝܢ ܒܡܲܕܥܵܐ ܕܢܲܦ̮ܫܹܗ ܢܸܫܬܲܪܲܪ.

⁶ ܡܲܢ ܕܡܸܬ݂ܪܲܥܹܐ ܕܝܵܘܡܵܐ. ܠܡܵܪܹܗ ܡܸܬ݂ܪܲܥܹܐ. ܘܟ݂ܠ ܕܠܵܐ ܡܸܬ݂ܪܲܥܹܐ ܕܝܵܘܡܵܐ. ܠܡܵܪܹܗ ܠܵܐ ܡܸܬ݂ܪܲܥܹܐ. ܘܕܐܵܟܹܠ ܠܡܵܪܹܗ ܐܵܟܹܠ. ܘܠܲܐܠܵܗܵܐ ܡܵܘܕܹܐ. ܘܲܕ݂ܠܵܐ ܐܵܟܹܠ ܠܡܵܪܹܗ ܠܵܐ ܐܵܟܹܠ. ܘܡܵܘܕܹܐ ܠܐܲܠܵܗܵܐ.

⁷ ܠܲܝܬܿ ܓܹܝܪ ܐ̄ܢܵܫ ܡܸܢܲܢ ܕܲܠܢܲܦ̮ܫܹܗ ܚܲܝ. ܘܠܲܝܬܿ ܐ̄ܢܵܫ ܕܲܠܢܲܦ̮ܫܹܗ ܡܵܐܹܬ݂.

⁸ ܡܛܠ ܕܐܸܢ ܚܵܐܹܝܢܲܢ. ܠܡܵܪܲܢ ܚܵܐܹܝܢܲܢ. ܘܐܸܢ ܡܵܝܬܿܝܼܢܲܢ. ܠܡܵܪܲܢ ܗܘܼ ܡܵܝܬܿܝܼܢܲܢ. ܘܐܸܢ ܚܲܝܝܼܢܲܢ ܗܵܟܹܝܠ ܘܐܸܢ ܡܵܝܬܿܝܼܢܲܢ. ܕܡܵܪܲܢ ܚܢܲܢ.

⁹ ܡܛܠ ܗܵܢܵܐ ܐܵܦ ܡܫܝܼܚܵܐ ܡܝܼܬ݂ ܘܲܚܝܵܐ ܘܩܼܵܡ. ܕܗܘܼ ܢܸܗܘܹܐ ܡܵܪܝܵܐ ܠܡܝܼܬܹ̈ܐ ܘܲܠܚܲܝܹ̈ܐ.

¹⁰ ܐܲܢ̄ܬܿ ܕܹܝܢ. ܡܵܢܵܐ ܕܵܐܹܢ ܐܲܢ̄ܬܿ ܠܐܲܚܘܼܟ݂. ܐܵܘ ܐܵܦ ܐܲܢ̄ܬܿ. ܠܡܵܢܵܐ ܫܵܐܹܛ ܐܲܢ̄ܬܿ ܠܐܲܚܘܼܟ݂. ܟܠܲܢ ܓܹܝܪ ܥܬ݂ܝܼܕ݂ܝܼܢܲܢ ܠܲܡܩܵܡ ܩܕ݂ܵܡ ܒܹܝܡ ܕܲܡܫܝܼܚܵܐ.

¹¹ ܐܲܝܟ݂ ܕܲܟܬ݂ܝܼܒ݂. ܕܚܲܝ ܐ̄ܢܵܐ ܐܵܡܲܪ ܡܵܪܝܵܐ. ܕܠܝܼ ܬܸܟܘܿܦ ܟܠ ܒܪܘܿܟ. ܘܠܝܼ ܢܵܘܕܹܐ ܟܠ ܠܸܫܵܢ.

¹² ܡܵܕܹܝܢ ܟܠ ܐ̄ܢܵܫ ܡܸܢܲܢ. ܦܸܬ݂ܓ݂ܵܡܵܐ ܚܠܵܦ ܢܲܦ̮ܫܹܗ ܝܵܗܹܒ݂ ܠܐܲܠܵܗܵܐ.

¹³ ܠܵܐ ܡܸܟܹܝܠ ܢܕ݂ܘܼܢ ܚܲܕ݂ ܠܚܲܕ݂. ܐܸܠܵܐ ܗܵܕܹܐ ܕܘܼܢܘ ܝܲܬܝܼܪܵܐܝܼܬ݂. ܕܬ݂ܘܩܲܠܬ݂ܵܐ ܠܐܲܚܘܼܟ݂ ܠܵܐ ܬܿܣܝܼܡ.

¹⁴ ܝܵܕ݂ܲܥ ܐ̄ܢܵܐ ܓܹܝܪ ܘܲܡܦܵܣ ܐ̄ܢܵܐ ܒܡܵܪܝܵܐ ܝܼܫܘܿܥ. ܕܡܸܕܸܡ ܕܲܡܣܲܝܲܒ݂ ܡܸܢ ܠܘܵܬܹܗ. ܠܲܝܬܿ. ܐܸܠܵܐ ܠܐܲܝܢܵܐ ܕܪܵܢܹܐ ܥܲܠ ܡܸܕܸܡ ܕܲܛܡܲܐ. ܠܗܵܘ ܗܘܼ ܒܲܠܚܘܿܕ݂ ܛܡܲܐ.

¹⁵ ܐܸܢ ܕܹܝܢ ܡܛܠ ܡܹܐܟ݂ܘܼܠܬܵܐ ܡܥܝܼܩ ܐܲܢ̄ܬܿ ܠܐܲܚܘܼܟ݂. ܠܵܐ ܗ̄ܘܵܐ ܒܚܘܼܒܵܐ ܡܗܲܠܸܟ݂ ܐܲܢ̄ܬܿ. ܠܵܐ ܬܵܘܒܸܕ݂ ܒܡܹܐܟ݂ܘܼܠܬܵܟ݂ ܠܗܵܘ ܕܡܛܠܵܬܹܗ ܡܝܼܬ݂ ܡܫܝܼܚܵܐ.

¹⁶ ܘܠܵܐ ܬܸܬ݂ܓܲܕܲܦ ܛܵܒ݂ܬܲܢ.

¹⁷ ܡܲܠܟܘܼܬܹܗ ܓܹܝܪ ܕܐܲܠܵܗܵܐ. ܠܵܐ ܗ̄ܘܵܬ݂ ܡܹܐܟ݂ܠܵܐ ܘܡܲܫܬܿܝܵܐ. ܐܸܠܵܐ ܟܹܐܢܘܼܬ݂ܵܐ ܘܲܫܠܵܡܵܐ. ܘܚܲܕ݂ܘܼܬ݂ܵܐ ܒܪܘܼܚܵܐ ܕܩܘܼܕ݂ܫܵܐ.

¹⁸ ܡܲܢ ܕܲܒ݂ܗܵܠܹܝܢ ܓܹܝܪ ܡܫܲܡܸܫ ܠܲܡܫܝܼܚܵܐ. ܫܵܦܲܪ ܠܐܲܠܵܗܵܐ. ܘܲܩܕ݂ܵܡ ܒܢܲܝ̈ܢܵܫܵܐ ܒܩܹܐ.

¹⁹ ܗܵܫܵܐ ܒܵܬܲܪ ܫܠܵܡܵܐ ܢܸܪܗܲܛ. ܘܒܵܬܲܪ ܒܸܢܝܵܢܵܐ. ܚܲܕ݂ ܕܚܲܕ݂.

²⁰ ܘܠܵܐ ܡܛܠ ܡܹܐܟ݂ܘܼܠܬܵܐ ܢܸܫܪܹܐ ܥܒ݂ܵܕܹ̈ܐ ܕܐܲܠܵܗܵܐ. ܟܠ ܡܸܕܸܡ ܓܹܝܪ ܕܟܹܐ ܗ̄ܘܼ. ܐܸܠܵܐ ܒܝܼܫ ܗܘܼ ܠܒܲܪܢܵܫܵܐ ܕܲܒ݂ܬ݂ܘܼܩܲܠܬ݂ܵܐ ܐܵܟܹܠ.

²¹ ܫܲܦܝܼܪ ܗܘܼ ܕܠܵܐ ܢܹܐܟ݂ܘܿܠ ܒܸܣܪܵܐ ܘܠܵܐ ܢܸܫܬܹܐ ܚܲܡܪܵܐ. ܘܠܵܐ ܡܸܕܸܡ ܕܡܸܬܿܬܿܩܸܠ ܒܹܗ ܐܲܚܘܼܢ.

²² ܐܲܢ̄ܬܿ ܕܐܝܼܬ݂ ܒܵܟ݂ ܗܲܝܡܵܢܘܼܬ݂ܵܐ. ܒܢܲܦ̮ܫܵܟ݂ ܐܲܚܘܿܕܹܝܗܿ ܩܕ݂ܵܡ ܐܲܠܵܗܵܐ. ܛܘܼܒ݂ܵܘܗܝ ܠܡܲܢ ܕܠܵܐ ܕܵܢ ܢܲܦ̮ܫܹܗ ܒܡܸܕܸܡ ܕܲܦܪܲܫ.

²³ ܐܲܝܢܵܐ ܓܹܝܪ ܕܡܸܬ݂ܦܲܠܲܓ݂ ܘܐܵܟܹܠ. ܐܸܬ݂ܚܲܝܲܒ݂ ܠܹܗ. ܡܛܠ ܕܠܵܘ ܒܗܲܝܡܵܢܘܼܬ݂ܵܐ. ܟܠ ܡܸܕܸܡ ܓܹܝܪ ܕܠܵܐ ܗ̄ܘܵܐ ܡܸܢ ܗܲܝܡܵܢܘܼܬ݂ܵܐ. ܚܛܝܼܬ݂ܵܐ ܗܘܼ.

15

¹ ܚܲܝܵܒ݂ܝܼܢܲܢ ܗܵܟܹܝܠ ܚܢܲܢ ܚܲܝܠܬ݂ܵܢܹ̈ܐ. ܕܟ݂ܘܼܪܗܵܢܵܐ ܕܲܡܚ̈ܝܼܠܹܐ ܢܸܫܩܘܿܠ. ܘܠܵܐ ܠܢܲܦ̮ܫܲܢ ܢܸܫܦܲܪ.

² ܐܸܠܵܐ ܐ̄ܢܵܫ ܡܸܢܲܢ ܠܩܲܪܝܼܒܹܗ ܢܸܫܦܲܪ ܒܛܵܒ݂ܵܬ݂ܵܐ: ܐܲܝܟ݂ ܕܲܠܒܸܢܝܵܢܵܐ.

³ ܡܛܠ ܕܐܵܦ ܡܫܝܼܚܵܐ ܠܵܐ ܗ̄ܘܵܐ ܠܢܲܦ̮ܫܹܗ ܫܦܲܪ. ܐܸܠܵܐ ܐܲܝܟ݂ ܕܲܟܬ݂ܝܼܒ݂. ܕܚܸܣܕܵܐ ܕܲܡܚܲܣܕ݂ܵܢܲܝ̈ܟ ܢܦܲܠ ܥܠܲܝ.

⁴ ܟܠ ܡܸܕܸܡ ܓܹܝܪ ܕܡܸܢ ܩܕ݂ܝܼܡ ܐܸܬ݂ܟܬܸܒ݂. ܠܝܘܼܠܦܵܢܵܐ ܗܘܼ ܕܝܼܠܲܢ ܐܸܬ݂ܟܬܸܒ݂. ܕܒܲܡܣܲܝܒܪܵܢܘܼܬ݂ܵܐ ܘܲܒ݂ܒ݂ܘܝܵܐܵܐ ܕܲܟܬ݂ܵܒܹ̈ܐ. ܣܲܒ݂ܪܵܐ ܢܸܗܘܹܐ ܠܲܢ.

⁵ ܐܲܠܵܗܵܐ ܕܹܝܢ ܕܲܡܣܲܝܒܪܵܢܘܼܬ݂ܵܐ ܘܲܕ݂ܒ݂ܘܝܵܐܵܐ. ܢܸܬܸܿܠ ܠܟ݂ܘܿܢ ܕܫܵܘܝܘܼܬ݂ܵܐ ܬܸܬ݂ܚܲܫܒ݂ܘܼܢ ܚܲܕ݂ ܥܲܠ ܚܲܕ݂. ܒܝܼܫܘܿܥ ܡܫܝܼܚܵܐ.

⁶ ܕܲܒ݂ܚܲܕ݂ ܪܸܥܝܵܢ ܘܲܒ݂ܚܲܕ݂ ܦܘܼܡ. ܬܫܲܒܚܘܼܢ ܠܐܲܠܵܗܵܐ. ܐܲܒ݂ܘܼܗܝ ܕܡܵܪܲܢ ܝܼܫܘܿܥ ܡܫܝܼܚܵܐ.

⁷ ܡܛܠ ܗܵܕܹܐ ܗܘܵܘ ܡܩܲܪܒ݂ܝܼܢ ܘܛܵܥܢܝܼܢ ܠܲܚܕ݂ܵܕܹ̈ܐ. ܐܲܝܟܲܢܵܐ ܕܐܵܦ ܡܫܝܼܚܵܐ ܩܲܪܸܒ݂ܟ݂ܘܿܢ ܠܬܸܫܒܘܼܚܬܹܿܗ ܕܐܲܠܵܗܵܐ.

⁸ ܐܵܡܲܪ ܐ̄ܢܵܐ ܕܹܝܢ. ܕܝܼܫܘܿܥ ܡܫܝܼܚܵܐ ܫܲܡܸܫ ܓܙܘܼܪܬܵܐ. ܚܠܵܦ ܫܪܵܪܹܗ ܕܐܲܠܵܗܵܐ. ܐܲܝܟܲܢܵܐ ܕܢܲܫܲܪ ܡܘܼܠܟܵܢܵܐ ܕܐܲܒ݂ܵܗ̈ܵܬ݂ܵܐ.

⁹ ܘܥܲܡ̈ܡܹܐ ܢܫܲܒܚܘܼܢ ܠܐܲܠܵܗܵܐ ܚܠܵܦ ܪ̈ܲܚܡܹܐ ܕܲܗܘܵܘ ܥܠܲܝܗܘܿܢ. ܐܲܝܟ݂ ܕܲܟܬ݂ܝܼܒ݂. ܕܐܵܘܕܹܐ ܠܵܟ݂ ܒܥܲܡ̈ܡܹܐ. ܘܠܲܫܡܵܟ݂ ܐܹܙܲܡܲܪ.

¹⁰ ܘܬ݂ܘܼܒ݂ ܐܸܡܲܪ. ܐܸܬ݂ܒܲܣܲܡܘ ܥܲܡ̈ܡܹܐ ܥܲܡ ܥܲܡܹܗ.

¹¹ ܘܬ݂ܘܼܒ݂ ܐܸܡܲܪ. ܫܲܒܲܚܘ ܠܡܵܪܝܵܐ ܟܠܟ݂ܘܿܢ ܥܲܡ̈ܡܹܐ. ܫܲܒܚܵܝܗܝ ܟܠܗܹܝܢ ܐܸܡ̈ܘܵܬ݂ܵܐ.

¹² ܘܬ݂ܘܼܒ݂ ܐܹܫܲܥܝܵܐ ܐܸܡܲܪ. ܕܢܸܗܘܹܐ ܥܸܩܪܵܐ ܠܐܝܼܫܲܝ. ܘܡܲܢ ܕܲܢܩܘܼܡ ܢܸܗܘܹܐ ܪܹܫܵܐ ܠܥܲܡ̈ܡܹܐ. ܘܲܥܠܵܘܗܝ ܢܣܲܒܪܘܼܢ ܥܲܡ̈ܡܹܐ.

¹³ ܐܲܠܵܗܵܐ ܕܹܝܢ ܕܣܲܒ݂ܪܵܐ. ܢܸܡܠܹܝܟ݂ܘܿܢ ܟܠܵܗܿ ܚܲܕ݂ܘܼܬ݂ܵܐ ܘܲܫܠܵܡܵܐ ܒܗܲܝܡܵܢܘܼܬ݂ܵܐ. ܕܬܸܬ݂ܝܲܬܿܪܘܼܢ ܒܣܲܒ݂ܪܹܗ. ܒܚܲܝܠܵܐ ܕܪܘܼܚܵܐ ܕܩܘܼܕ݂ܫܵܐ.

¹⁴ ܡܦܵܣ ܐ̄ܢܵܐ ܕܹܝܢ ܐܵܦ ܐܸܢܵܐ ܥܠܲܝܟܿܘܿܢ ܐܲܚܲܝ̈. ܕܐܵܦ ܐܲܢ̄ܬܿܘܿܢ ܡܠܹܝܢ ܐܢ̄ܬܘܿܢ ܗܘܼ ܛܵܒ݂ܬ݂ܵܐ. ܘܲܡܫܲܡܠܹܝܬܿܘܢ ܒܟ݂ܠܵܗܿ ܝܼܕ݂ܲܥܬ݂ܵܐ. ܘܡܸܫܟܿܚܝܼܢ ܐܢ̄ܬܘܿܢ ܐܵܦ ܠܐܲܚܪ̈ܵܢܹܐ ܠܡܲܪܬܵܝܘܼ.

¹⁵ ܩܲܠܝܼܠ ܕܹܝܢ ܡܲܪܵܚܵܐܝܼܬ݂ ܟܸܬ݂ܒܹܬ݂ ܠܟ݂ܘܿܢ ܐܲܚܲܝ̈. ܐܲܝܟܲܢܵܐ ܕܐܲܥܗܸܕ݂ܟ݂ܘܿܢ ܒܛܲܝܒܘܼܬ݂ܵܐ ܕܐܸܬ݂ܝܲܗܒܲܬ݂ ܠܝܼ ܡܸܢ ܐܲܠܵܗܵܐ.

¹⁶ ܕܐܸܗܘܹܐ ܡܫܲܡܫܵܢܵܐ ܠܝܼܫܘܿܥ ܡܫܝܼܚܵܐ ܒܥܲܡ̈ܡܹܐ. ܘܐܸܦܠܘܿܚ ܠܐܹܘܲܢܓܲܠܝܼܘܿܢ ܕܐܲܠܵܗܵܐ. ܕܢܸܗܘܹܐ ܩܘܼܪܒܵܢܵܐ ܕܥܲܡ̈ܡܹܐ. ܡܩܲܒܲܠ ܘܲܡܩܲܕܲܫ ܒܪܘܼܚܵܐ ܕܩܘܼܕ݂ܫܵܐ.

¹⁷ ܐܝܼܬ݂ ܠܝܼ ܗܵܟܹܝܠ ܫܘܼܒ݂ܗܵܪܵܐ ܒܝܼܫܘܿܥ ܡܫܝܼܚܵܐ ܠܘܵܬ݂ ܐܲܠܵܗܵܐ.

¹⁸ ܠܵܐ ܓܹܝܪ ܡܲܡܪܲܚ ܐ̄ܢܵܐ ܕܐܹܡܲܪ ܡܸܕܸܡ ܕܠܵܐ ܣܥܲܪ ܒܐܝܼܕ݂ܲܝ̈ ܡܫܝܼܚܵܐ. ܠܡܲܫܡܥܵܐ ܕܥܲܡ̈ܡܹܐ. ܒܡܸܠܬ݂ܵܐ ܘܒܲܥܒ݂ܵܕܹ̈ܐ.

¹⁹ ܒܚܲܝܠܵܐ ܕܐܵܬ݂ܘܵܬ݂ܵܐ ܘܲܕܬܸܕ݂ܡܪ̈ܵܬ݂ܵܐ. ܘܲܒ݂ܚܲܝܠܵܐ ܕܪܘܼܚܹܗ ܕܐܲܠܵܗܵܐ. ܐܲܝܟܲܢܵܐ ܕܡܸܢ ܐܘܿܪܸܫܠܸܡ ܐܸܬ݂ܟܪܸܟ݂ ܥܕ݂ܲܡܵܐ ܠܐܸܠܘܿܪܝܼܩܘܿܢ. ܘܐܹܡܲܠܹܐ ܣܒܲܪܬܹܗ ܕܲܡܫܝܼܚܵܐ.

²⁰ ܟܲܕ݂ ܡܸܬ݂ܚܲܦܲܛ ܐ̄ܢܵܐ ܐܹܣܲܒܲܪ (ܕܐܹܣܲܒܲܪ). ܠܵܐ ܟܲܪ ܕܐܸܬ݂ܩܪܝܼ ܫܡܹܗ ܕܲܡܫܝܼܚܵܐ. ܕܠܵܐ ܐܸܒ݂ܢܹܐ ܥܲܠ ܫܲܬ݂ܐܣܬܵܐ ܢܘܼܟ݂ܪܵܝܬܵܐ

²¹ ܐܸܠܵܐ ܐܲܝܟܲܢܵܐ ܕܲܟ݂ܬ݂ܝܼܒ݂. ܕܐܲܝܠܹܝܢ ܕܠܵܐ ܐܸܬ݂ܐܡܲܪ ܠܗܘܿܢ ܥܠܵܘܗܝ ܢܸܚܙܘܿܢܹܗ. ܘܐܲܝܠܹܝܢ ܕܠܵܐ ܫܡܲܥܘ ܢܸܬܿܛܦܝܼܣܘܼܢ.

²² ܡܛܠ ܗܵܢܵܐ ܐܸܬܿܬܲܟ݂ܣܹܬ݂ ܙܲܒ݂ܢ̈ܝܼܢ ܣܲܓܝܼ̈ܐܵܢ. ܕܐܹܬܹܐ ܠܘܵܬ݂ܟ݂ܘܿܢ.

²³ ܗܵܫܵܐ ܕܹܝܢ ܡܛܠ ܕܕܘܼܟܵܐ ܠܲܝܬܿ ܠܝܼ ܒܗܵܠܹܝܢ ܐܲܬ݂ܪ̈ܵܘܵܬ݂ܵܐ: ܘܲܣܘܹܐ ܗ̄ܘܹܝܬ݂ ܡܸܢ ܩܕ݂ܵܡ ܫ̈ܢܲܝܵܐ ܣܲܓܝܼ̈ܐܵܬ݂ܵܐ. ܕܐܹܬܹܐ ܠܘܵܬ݂ܟ݂ܘܿܢ.

²⁴ ܡܵܐ ܕܐܵܙܹ݁ܠ ܐ̄ܢܵܐ ܠܐܸܣܦܵܢܝܼܵܐ. ܡܣܲܒܲܪ ܐ̄ܢܵܐ ܕܐܹܬܹܐ ܘܐܸܚܙܹܝܟ݂ܘܿܢ. ܘܐܲܢ̄ܬܿܘܿܢ ܬܠܵܘܘܿܢܵܢܝ ܠܬܲܡܵܢ. ܡܵܐ ܕܩܲܠܝܼܠ ܡܸܢ ܣܲܓܝܼ ܐܸܬ݂ܒܲܣܡܹܬ݂ ܒܲܚܙܵܬ݂ܟ݂ܘܿܢ.

²⁵ ܗܵܫܵܐ ܕܹܝܢ ܐܵܙܹܠ ܐ̄ܢܵܐ ܠܐܘܿܪܸܫܠܸܡ ܕܐܹܫܲܡܸܫ ܠܩܲܕܝܼܫܹ̈ܐ.

²⁶ ܨܒ݂ܵܘ ܓܹܝܪ ܗܵܠܹܝܢ ܕܲܒ݂ܡܵܩܹܕܘܿܢܝܼܵܐ. ܘܒ݂ܵܐܟ݂ܵܐܝܼܵܐ. ܕܫܵܘܬܵܦܘܼܬ݂ܵܐ ܬܸܗܘܹܐ ܠܗܘܿܢ ܥܲܡ ܡܸܣܟܹܢܹ̈ܐ ܩܲܕܝܼܫܹ̈ܐ ܕܐܝܼܬ݂ ܒܐܘܿܪܸܫܠܸܡ.

²⁷ ܨܒ݂ܵܘ ܡܛܠ ܕܐܵܦ ܚܲܝܵܒ݂ܝܼܢ ܠܗܘܿܢ. ܐܸܢ ܓܹܝܪ ܒܲܕ݂ܪܘܼܚ ܐܸܫܬܵܘܬܲܦܘ ܥܲܡܗܘܿܢ ܥܲܡ̈ܡܹܐ. ܚܲܝܵܒ݂ܝܼܢ ܐܸܢܘܿܢ ܕܐܵܦ ܒܕ݂ܲܒ݂ܣܲܪ ܢܫܲܡܫܘܿܢ ܐܸܢܘܿܢ.

²⁸ ܗܵܕܹܐ ܗܵܟܹܝܠ ܡܵܐ ܕܓܲܡܪܹܬ݂. ܘܚܲܬܿܡܹܬ݂ ܠܗܘܿܢ ܐܵܕ݂ܫܵܐ ܗܵܢܵܐ. ܥܵܒܲܪ ܐ̄ܢܵܐ ܥܠܲܝܟܿܘܿܢ ܠܐܸܣܦܵܢܝܼܵܐ.

²⁹ ܝܵܕ݂ܲܥ ܐ̄ܢܵܐ ܕܹܝܢ. ܕܐܸܡܲܬ݂ܝ ܕܐܵܬܹܐ ܐ̄ܢܵܐ ܠܘܵܬ݂ܟ݂ܘܿܢ. ܒܡܘܼܠܵܝܵܐ ܗܘܼ ܕܒ݂ܘܪܟܬ݂ܵܐ ܕܐܹܘܲܢܓܲܠܝܼܘܿܢ ܕܲܡܫܝܼܚܵܐ. ܐܵܬܹܐ ܐ̄ܢܵܐ.

³⁰ ܒܵܥܹܐ ܐ̄ܢܵܐ ܕܹܝܢ ܡܸܢܟ݂ܘܿܢ ܐܲܚܲܝ̈ ܒܡܵܪܲܢ ܝܼܫܘܿܥ ܡܫܝܼܚܵܐ. ܘܲܒܚܘܼܒܵܐ ܕܪܘܼܚܵܐ. ܕܬܸܥܡܠܘܼܢ ܥܲܡܝ ܒܲܨܠܘܿܬ݂ܵܐ ܕܲܚܠܵܦܲܝ ܠܘܵܬ݂ ܐܲܠܵܗܵܐ.

³¹ ܕܐܸܬ݂ܦܲܨܹܐ ܡܸܢ ܐܲܝܠܹܝܢ ܕܠܵܐ ܡܸܬܿܛܦܝܼܣܝܼܢ ܕܒܲܝܗܘܼܕ݂. ܘܬܸܫܡܸܫܬܵܐ ܕܡܵܘܒܸܠ ܐ̄ܢܵܐ ܠܩܲܕܝܼܫܹ̈ܐ ܕܒܐܘܿܪܸܫܠܸܡ ܬܸܬ݂ܩܲܒܲܠ ܫܲܦܝܼܪ.

³² ܘܐܹܬܹܐ ܠܘܵܬ݂ܟ݂ܘܿܢ ܒܚܲܕ݂ܘܼܬ݂ܵܐ ܒܨܸܒ݂ܝܵܢܹܗ ܕܐܲܠܵܗܵܐ. ܘܐܸܬܿܬܿܢܝܼܚ ܥܲܡܟ݂ܘܿܢ.

³³ ܐܲܠܵܗܵܐ ܕܹܝܢ ܕܲܫܠܵܡܵܐ ܢܸܗܘܹܐ ܥܲܡ ܟܠܟ݂ܘܿܢ. ܐܵܡܹܝܢ.

16

¹ ܡܲܓ݂ܥܸܠ ܐ̄ܢܵܐ ܠܟ݂ܘܿܢ ܕܹܝܢ ܠܦܹܘܒܹ݁ܐ ܚܵܬܲܢ. ܕܐܝܼܬܹܝܗܿ ܡܫܲܡܫܵܢܝܼܬ݂ܵܐ ܕܥܹܕܬܵܐ ܕܩܵܢܟ݁ܪܹܐܘܿܣ.

² ܕܲܬ݂ܩܲܒ݁ܠܘܼܢܵܗܿ ܒܡܵܪܲܢ. ܐܲܝܟ݂ ܕܙܵܕܹܩ ܠܩܲܕܝܼܫܹ̈ܐ. ܘܲܒܟ݂ܠ ܨܒ݂ܘܼ ܕܒ݂ܵܥܝܵܐ ܡܸܢܟ݂ܘܿܢ ܬܩܘܼܡܘܼܢ ܠܵܗܿ. ܡܛܠ ܕܐܵܦ ܗܝܼ ܩܵܝܘܼܡܬܵܐ ܗܘܵܬ݂ ܠܣܲܓܝܼ̈ܐܹܐ. ܐܵܦ ܠܝܼ.

³ ܫܲܐܸܠܘ ܒܲܫܠܵܡܵܐ ܕܲܦܪܝܼܣܩܸܠܵܐ ܘܕ݂ܵܐܩܸܠܘܿܣ. ܦܵܠܚܹ̈ܐ ܕܥܲܡܝ ܒܝܼܫܘܿܥ ܡܫܝܼܚܵܐ.

⁴ ܕܗܸܢܘܿܢ ܗܵܠܹܝܢ ܚܠܵܦ ܢܲܦ̮ܫܝ ܨܵܘܪ̈ܲܝܗܘܿܢ ܝܲܗ̄ܒ݂ܘ. ܘܠܵܐ ܗ̄ܘܵܐ ܐܸܢܵܐ ܒܲܠܚܘܿܕ݂ܝ ܡܵܘܕܹܐ ܐ̄ܢܵܐ ܠܗܘܿܢ. ܐܸܠܵܐ ܐܵܦ ܟܠܗܹܝܢ ܥܹ̈ܕ݂ܵܬܵܐ. ܕܥܲܡ̈ܡܹܐ.

⁵ ܘܗܲܒ݂ܘ ܫܠܵܡܵܐ ܠܥܹܕܬܵܐ ܕܐܝܼܬ݂ ܒܒܲܝܬܿܗܘܿܢ. ܫܲܐܸܠܘ ܒܲܫܠܵܡܵܐ ܕܐܵܦܹܢܛܘܿܣ ܚܲܒܝܼܒ݂ܝ. ܐܲܝܢܵܐ ܕܐܝܼܬ݂ܵܘܗܝ ܪܹܫܝܼܬ݂ܵܐ ܕܐܲܟ݂ܵܐܝܼܵܐ ܒܲܡܫܝܼܚܵܐ.

⁶ ܫܲܐܸܠܘ ܒܲܫܠܵܡܵܐ ܕܡܵܪܝܼܵܐ. ܐܲܝܕ݂ܵܐ ܕܣܲܓܝܼ ܠܸܐܝܲܬ݂ ܒܟ݂ܘܿܢ.

⁷ ܫܲܐܸܠܘ ܒܲܫܠܵܡܵܐ ܕܐܵܢܕܪܘܿܢܝܼܩܘܿܣ. ܘܲܕ݂ܝܘܿܢܝܼܵܐ ܐ̄ܚܝܵܢܲܝ̈. ܕܲܗܘܵܘ ܫ̈ܒܲܝܵܐ ܥܲܡܝ. ܘܝܼܕ݂ܝܼܥܝܼܢ ܐܸܢܘܿܢ ܒܲܫܠܝܼܚܹ̈ܐ. ܘܒܲܡܫܝܼܚܵܐ ܩܕ݂ܵܡܲܝ ܗܘܵܘ.

⁸ ܫܲܐܸܠܘ ܒܲܫܠܵܡܵܐ ܕܐܲܡܦܠܹܐܘܿܣ ܚܲܒܝܼܒ݂ܝ ܒܡܵܪܲܢ.

⁹ ܫܲܐܸܠܘ ܒܲܫܠܵܡܵܐ ܕܐܘܼܪܒܵܢܘܿܣ. ܦܵܠܚܵܐ ܕܥܲܡܲܢ ܒܲܡܫܝܼܚܵܐ. ܘܕܸܐܣܛܵܟ݂ܝܼܘܿܣ ܚܲܒܝܼܒ݂ܝ.

¹⁰ ܫܲܐܸܠܘ ܒܲܫܠܵܡܵܐ ܕܐܵܦܲܠܹܐ ܓܲܒ݂ܝܵܐ ܒܡܵܪܲܢ. ܫܲܐܸܠܘ ܒܲܫܠܵܡܵܐ ܕܲܒܢܲܝ̈ ܒܲܝܬܹܿܗ ܕܐܵܪܹܣܛܵܒ݂ܘܿܠܘܿܣ.

¹¹ ܫܲܐܸܠܘ ܒܲܫܠܵܡܵܐ ܕܗܹܪܘܿܕ݂ܝܼܘܿܢ ܐ̄ܚܝܵܢܝ. ܫܲܐܸܠܘ ܒܲܫܠܵܡܵܐ ܕܲܒ݂ܢܲܝ̈ ܒܲܝܬܹܿܗ ܕܢܲܪܩܹܣܘܿܣ. ܐܲܝܠܹܝܢ ܕܐܝܼܬܲܝܗܘܿܢ ܒܡܵܪܲܢ.

¹² ܫܲܐܸܠܘ ܒܲܫܠܵܡܵܐ ܕܲܛܪܘܿܦܸܢܵܐ ܘܕ݂ܲܛܪܘܿܦܸܣܵܐ. ܕܲܠܐܝܼܝܹ̈ܢ ܒܡܵܪܲܢ. ܫܲܐܸܠܘ ܒܲܫܠܵܡܵܐ ܕܦܲܪܣܸܣ ܚܲܒܝܼܒ݂ܬܿܝ. ܐܲܝܕ݂ܵܐ ܕܣܲܓܝܼ ܠܸܐܝܲܬ݀ ܒܡܵܪܲܢ.

¹³ ܫܲܐܸܠܘ ܒܲܫܠܵܡܵܐ ܕܪܘܿܦܘܿܣ ܓܲܒ݂ܝܵܐ ܒܡܵܪܲܢ. ܘܕܸܐܡܹܗ ܕܝܼܠܹܗ ܘܕ݂ܝܼܠܝ.

¹⁴ ܫܲܐܸܠܘ ܒܲܫܠܵܡܵܐ ܕܐܵܣܘܼܢܩܪܹܛܘܿܣ ܘܕ݂ܵܐܦܹܠܹܓ݂ܘܿܢ ܘܲܕ݂ܗܲܪܡܵܐ ܘܲܕ݂ܦܲܛܪܵܒܲܐ ܘܲܕ݂ܗܲܪܡܹܐ. ܘܕ݂ܲܐܚܹ̈ܐ ܕܥܲܡܗܘܿܢ.

¹⁵ ܫܲܐܸܠܘ ܒܲܫܠܵܡܵܐ ܕܦܝܼܠܵܠܵܓ݂ܘܿܣ ܘܲܕ݂ܝܘܿܠܝܼܵܐ ܘܲܕ݂ܢܹܐܪܘܿܣ ܘܲܕ݂ܚܵܬܹܗ ܘܕ݂ܵܐܠܘܼܡܦܵܐ. ܘܲܕ݂ܟ݂ܠܗܘܿܢ ܩܲܕܝܼܫܹ̈ܐ ܕܥܲܡܗܘܿܢ.

¹⁶ ܫܲܐܸܠܘ ܒܲܫܠܵܡܵܐ ܚܲܕ݂ ܕܚܲܕ݂ ܒܢܘܼܫܲܩܬܵܐ ܩܲܕܝܼܫܬܵܐ. ܫܵܐܠܵܢ ܒܲܫܠܵܡܟ݂ܘܿܢ ܟܠܗܹܝܢ ܥܹ̈ܕ݂ܵܬܹܗ ܕܲܡܫܝܼܚܵܐ.

¹⁷ ܒܵܥܹܐ ܐ̈ܢܵܐ ܕܹܝܢ ܡܸܢܟ݂ܘܿܢ ܐܲܚܲܝ̈. ܕܬܸܙܕܲܗܪܘܼܢ ܡܸܢ ܐܲܝܠܹܝܢ ܕܦܵܠܓ̈ܘܵܬ݂ܵܐ ܘܡܲܟ݂ܫ̈ܘܿܠܹܐ ܥܵܒ݂ܕܝܼܢ. ܠܒܲܪ ܡܸܢ ܝܘܼܠܦܵܢܵܐ ܕܐܲܢ̄ܬܿܘܿܢ ܝܼܠܸܦܬܿܘܢ. ܕܬܸܬ݂ܪܲܚܩܘܼܢ ܠܟ݂ܘܿܢ ܡܸܢܗܘܿܢ.

¹⁸ ܐܲܝܠܹܝܢ ܓܹܝܪ ܕܗܵܟܲܢܵܐ ܐܸܢܘܿܢ. ܠܵܐ ܡܫܲܡܫܝܼܢ ܠܡܵܪܲܢ ܝܼܫܘܿܥ ܡܫܝܼܚܵܐ. ܐܸܠܵܐ ܠܟܲܪܣܗܘܿܢ. ܘܲܒ݂ܡܸܠܹ̈ܐ ܒܲܣܝܼ̈ܡܵܬ݂ܵܐ ܘܲܒ݂ܒ݂ܘܪ̈ܟܵܬ݂ܵܐ ܡܲܛܥܹܝܢ ܠܸܒ̈ܵܘܵܬ݂ܵܐ ܕܲܦܫܝܼ̈ܛܹܐ.

¹⁹ ܡܸܫܬܲܡܥܵܢܘܼܬ݂ܟ݂ܘܿܢ ܕܹܝܢ ܕܝܼܠܟ݂ܘܿܢ. ܠܟ݂ܠ ܒܲܪܢܵܫ ܐܸܬ݂ܝܲܕ݂ܥܲܬ݂. ܚܵܕܹܐ ܐ̄ܢܵܐ ܗܵܟܹܝܠ ܒܟ݂ܘܿܢ. ܘܨܵܒܹܐ ܐ̄ܢܵܐ ܕܬܸܗܘܘܿܢ ܚܲܟܝܼܡܝܼ̈ܢ ܠܛܵܒ݂ܵܬ݂ܵܐ. ܘܬܲܡܝܼܡܝܼ̈ܢ ܠܒ݂̈ܝܼܫܵܬ݂ܵܐ.

²⁰ ܐܲܠܵܗܵܐ ܕܹܝܢ ܕܲܫܠܵܡܵܐ. ܢܸܫܚܩܝܼܘܗܝ ܒܲܥܓܲܠ ܠܣܵܛܵܢܵܐ ܬܚܹܝܬ݂ ܪܸ̈ܓ݂ܠܲܝܟܘܿܢ. ܛܲܝܒܘܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܬܸܗܘܹܐ ܥܲܡܟ݂ܘܿܢ.

²¹ ܫܵܐܠܝܼܢ ܒܲܫܠܵܡܟ݂ܘܿܢ ܛܝܼܡܵܬܹܐܘܿܣ. ܦܵܠܚܵܐ ܕܥܲܡܝ. ܘܠܘܼܩܝܼܘܿܣ ܘܐܝܼܵܣܘܿܢ ܘܣܘܼܣܝܼܦܲܛܪܘܿܣ ܐ̄ܚܝܵܢܲܝ̈.

²² ܫܵܐܹܠ ܐ̄ܢܵܐ ܒܲܫܠܵܡܟ݂ܘܿܢ ܐܸܢܵܐ ܛܲܪܛܝܼܘܿܣ. ܕܟܸܬ݂ܒܹܬ݂ ܐܸܓܲܪܬܵܐ ܒܡܵܪܲܢ.

²³ ܫܵܐܹܠ ܒܲܫܠܵܡܟ݂ܘܿܢ ܓܵܐܝܼܘܿܣ. ܡܩܲܒܠܵܢܝ ܘܲܕ݂ܟ݂ܠܵܗܿ ܥܹܕܬܵܐ. ܫܵܐܹܠ ܒܲܫܠܵܡܟ݂ܘܿܢ ܐܵܪܹܣܛܘܿܣ. ܪܲܒܒܲܝܬܵܐ ܕܲܡܕ݂ܝܼܢ̄ܬܵܐ. ܘܩܘܼܐܲܪܛܘܿܣ (ܘܩܘܼܪܐܲܛܘܿܣ) ܐܲܚܵܐ.

²⁴ ܠܐܲܠܵܗܵܐ ܕܹܝܢ. ܗܵܘ ܕܡܸܫܟܲܚ ܕܲܢܫܲܪܲܪܟ݂ܘܿܢ ܒܐܹܘܲܢܓܲܠܝܼܘܿܢ ܕܝܼܠܝ. ܗܵܘ ܕܐܸܬ݂ܟܪܸܙ ܥܲܠ ܝܼܫܘܿܥ ܡܫܝܼܚܵܐ ܒܓܸܠܝܵܢܵܐ ܕܐ̄ܪܵܙܵܐ: ܕܡܸܢ ܙܲܒ݂ܢܲܝ̈ ܥܵܠܡܹܐ ܡܟܲܣܲܝ ܗ̄ܘܵܐ:

²⁵ ܐܸܬ݂ܓܠܝܼ ܕܹܝܢ ܒܙܲܒ݂ܢܵܐ ܗܵܢܵܐ ܒܝܲܕ݂ ܟܬ݂ܵܒܹ̈ܐ ܕܲܢܒ݂ܝܹ̈ܐ. ܘܲܒ݂ܦܘܼܩܕܵܢܹܗ ܕܐܲܠܵܗܵܐ ܕܲܠܥܵܠܲܡ. ܐܸܬ݂ܝܼܕ݂ܲܥ ܠܟ݂ܠܗܘܿܢ ܥܲܡ̈ܡܹܐ ܠܡܲܫܡܥܵܐ ܕܗܲܝܡܵܢܘܼܬ݂ܵܐ.

²⁶ ܕܗܘܸܝܘܼ ܚܲܟܝܼܡܵܐ ܒܲܠܚܘܿܕ݂ܵܘܗܝ. ܫܘܼܒ݂ܚܵܐ ܒܝܲܕ݂ ܝܼܫܘܿܥ ܡܫܝܼܚܵܐ ܠܥܵܠܲܡ ܥܵܠܡܝܼܢ ܐܵܡܹܝܢ.

²⁷ ܛܲܝܒܘܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܟܠܟ݂ܘܿܢ. ܐܵܡܹܝܢ.