1

¹ ܟܬ݂ܵܒ݂ܵܐ ܩܲܕ݂ܡܵܝܵܐ ܟܸܬ݂ܒܹܬ݂ ܐܵܘ ܬܹܐܘܿܦܝܼܠܵܐ. ܥܲܠ ܟܠܗܹܝܢ ܐܲܝܠܹܝܢ ܕܫܲܪܝܼ ܡܵܪܲܢ ܝܼܫܘܿܥ ܡܫܝܼܚܵܐ ܠܡܸܥܒܲܕ݂ ܘܲܠܡܲܠܵܦܘܼ.

² ܥܕ݂ܲܡܵܐ ܠܝܵܘܡܵܐ ܗܵܘ ܕܒܹܗ ܐܸܣܬܲܠܲܩ. ܡܸܢ ܒܵܬܲܪ ܕܦܲܩܸܕ݂ ܗ̄ܘܵܐ ܐܸܢܘܿܢ ܠܲܫܠܝܼܚܹ̈ܐ. ܐܲܝܠܹܝܢ ܕܲܓ݂ܒ݂ܵܐ ܒܪܘܼܚܵܐ ܕܩܘܼܕ݂ܫܵܐ.

³ ܗܵܢܘܿܢ ܕܐܵܦ ܚܵܘܝܼ ܠܗܘܿܢ ܢܲܦ̮ܫܹܗ ܟܲܕ݂ ܚܲܝ ܡܸܢ ܒܵܬܲܪ ܕܚܲܫ. ܒܐܵܬ݂ܘܵܬ݂ܵܐ ܣܲܓܝܼ̈ܐܵܬ݂ܵܐ ܒܝܵܘܡ̈ܝܼܢ ܐܲܪܒܥܝܼܢ. ܟܲܕ݂ ܡܸܬ݂ܚܙܹܐ ܗ̄ܘܵܐ ܠܗܘܿܢ. ܘܐܵܡܲܪ ܥܲܠ ܡܲܠܟܘܼܬ݂ܵܐ ܕܐܲܠܵܗܵܐ.

⁴ ܘܟܲܕ݂ ܐܸܟܲܠ ܥܲܡܗܘܿܢ ܠܲܚܡܵܐ. ܦܲܩܸܕ݂ ܐܸܢܘܿܢ ܕܡܸܢ ܐܘܿܪܸܫܠܸܡ ܠܵܐ ܢܸܦܪܩܘܼܢ. ܐܸܠܵܐ ܕܲܢܩܵܘܘܿܢ ܠܫܘܼܘܕܵܝܹܗ ܕܐܲܒ݂ܵܐ. ܗܵܘ ܕܲܫܡܲܥܬܿܘܿܢ ܡܹܢܝ.

⁵ ܕܝܘܿܚܲܢܵܢ ܐܲܥܡܸܕ݂ ܒܡܲܝ̈ܵܐ. ܘܐܲܢ̄ܬܿܘܿܢ ܬܸܥܡܕ݂ܘܼܢ. ܒܪܘܼܚܵܐ ܕܩܘܼܕ݂ܫܵܐ. ܠܵܐ ܒܵܬܲܪ ܝܵܘ̈ܡܵܬ݂ܵܐ ܣܲܓܝܼܐܹ̈ܐ.

⁶ ܗܸܢܘܿܢ ܕܹܝܢ ܟܲܕ݂ ܟܢܝܼܫܝܼܢ. ܫܲܐܠܘܼܗܝ. ܘܐܵܡܪܝܼܢ ܠܹܗ. ܡܵܪܲܢ ܐܸܢ ܒܗܵܢܵܐ ܙܲܒ݂ܢܵܐ ܡܲܦܢܹܐ ܐܲܢ̄ܬܿ ܡܲܠܟܘܼܬ݂ܵܐ ܠܝܼܣܪܵܝܹܠ.

⁷ ܐܵܡܲܪ ܠܗܘܿܢ ܗܘܼ. ܠܵܐ ܗ̄ܘܵܬ݂ ܕܝܼܠܟ݂ܘܿܢ ܗܵܕܹܐ ܠܡܸܕ݂ܥ ܙܲܒ݂ܢܵܐ ܐܵܘ ܙܲܒ݂ܢܹ̈ܐ. ܐܲܝܠܹܝܢ ܕܐܲܒ݂ܵܐ ܣܵܡ ܐܸܢܘܿܢ ܒܫܘܼܠܛܵܢܵܐ ܕܢܲܦ̮ܫܹܗ.

⁸ ܐܸܠܵܐ ܟܲܕ݂ ܬܹܐܬܹܐ ܪܘܼܚܵܐ ܕܩܘܼܕ݂ܫܵܐ ܥܠܲܝܟܿܘܿܢ. ܬܿܩܲܒܠܘܼܢ ܚܲܝܠܵܐ. ܘܬܸܗܘܘܿܢ ܠܝܼ ܣܵܗܕܹ̈ܐ. ܒܐܘܿܪܸܫܠܸܡ ܘܲܒܟ݂ܠܵܗܿ ܝܼܗܘܼܕ݂. ܘܐܵܦ ܒܹܝܬ݂ ܫܵܡܪ̈ܵܝܹܐ. ܘܲܥܕ݂ܲܡܵܐ ܠܣܵܘܦܹܝ̈ܗܿ ܕܐܲܪܥܵܐ.

⁹ ܘܟܲܕ݂ ܗܵܠܹܝܢ ܐܸܡܲܪ. ܟܲܕ݂ ܚܵܙܹܝܢ ܠܹܗ. ܐܸܣܬܲܠܲܩ. ܘܲܥܢܵܢܵܐ ܩܲܒܸܠܬܹܗ. ܘܐܸܬ݂ܟܲܣܝܼ ܡܸܢ ܥܲܝܢܲܝ̈ܗܘܿܢ.

¹⁰ ܘܟܲܕ݂ ܚܵܝܪܝܼܢ ܗ̄ܘܼܵܘ ܒܲܫܡܲܝܵܐ ܟܲܕ݂ ܗܘܼ ܐܵܙܹܠ ܗ̄ܘܵܐ. ܐܸܫܬܿܟܲܚܘ ܬܪܹܝܢ ܓܲܒ݂ܪ̈ܝܼܢ ܩܵܝܡܝܼܢ ܠܘܵܬ݂ܗܘܿܢ. ܒܲܠܒ݂ܘܫܹ̈ܐ ܚܸܘܵܪܵܐ.

¹¹ ܘܐܵܡܪܝܼܢ ܠܗܘܿܢ. ܓܲܒ݂ܪܹ̈ܐ ܓܠܝܼܠܵܝܹ̈ܐ. ܡܵܢܵܐ ܩܵܝܡܝܼܢ ܐܢ̄ܬܘܿܢ ܘܚܵܝܪܝܼܢ ܒܲܫܡܲܝܵܐ. ܗܵܢܵܐ ܝܼܫܘܿܥ ܕܐܸܣܬܲܠܲܩ ܡܸܢܟ݂ܘܿܢ ܠܲܫܡܲܝܵܐ. ܗܵܟܲܢܵܐ ܢܹܐܬܹܐ. ܐܲܝܟ݂ ܡܵܐ ܕܲܚܙܲܝܬܿܘܢܵܝܗܝ ܕܲܣܠܸܩ ܠܲܫܡܲܝܵܐ.

¹² ܘܡܸܢ ܒܵܬܲܪܟܸܢ ܗܦܲܟ݂ܘ ܠܗܘܿܢ ܠܐܘܿܪܸܫܠܸܡ. ܡܸܢ ܛܘܼܪܵܐ ܕܡܸܬ݂ܩܪܹܐ ܕܒܹܝܬ݂ ܙܲܝ̈ܬܹܐ. ܕܐܝܼܬ݂ܵܘܗܝ ܥܲܠ ܓܸܢ̄ܒ݂ ܐܘܿܪܸܫܠܸܡ. ܘܦܲܪܝܼܩ ܡܸܢܵܗܿ ܐܲܝܟ݂ ܫܲܒ݂ܥܵܐ ܐܸܣ̈ܛܕ݂ܵܘܵܢ.

¹³ ܘܡܸܢ ܒܵܬܲܪ ܕܥܲܠܘ. ܣܠܸܩܘ ܠܗܘܿܢ ܠܥܸܠܝܼܬ݂ܵܐ ܗܵܝ ܕܗܵܘܹܝܢ ܗ̄ܘܼܵܘ ܒܵܗܿ. ܦܲܛܪܘܿܣ ܘܝܘܿܚܲܢܵܢ. ܘܝܲܥܩܘܿܒ݂ ܘܐܲܢܕܪܹܐܘܿܣ. ܘܦܝܼܠܝܼܦܘܿܣ ܘܲܬ݂ܐܘܿܡܵܐ. ܘܡܲܬܲܝ ܘܒܲܪ ܬܘܼܠܡܲܝ. ܘܝܲܥܩܘܿܒ݂ ܒܲܪ ܚܲܠܦܲܝ. ܘܫܸܡܥܘܿܢ ܛܲܢܵܢܵܐ. ܘܲܝܗܘܼܕ݂ܵܐ ܒܲܪ ܝܲܥܩܘܿܒ݂.

¹⁴ ܗܵܠܹܝܢ ܟܠܗܘܿܢ. ܐܲܟ݂ܚܕ݂ܵܐ ܐܲܡܝܼܢܝܼܢ ܗ̄ܘܼܵܘ ܒܲܨܠܘܿܬ݂ܵܐ ܒܲܚܕ݂ܵܐ ܢܦܸܫ. ܥܲܡ ܢܸܫܹ̈ܐ. ܘܥܲܡ ܡܲܪܝܲܡ ܐܸܡܹܗ ܕܝܼܫܘܿܥ. ܘܥܲܡ ܐܲܚܵܘ̈ܗܝ.

¹⁵ ܘܲܒ݂ܗܘܿܢ ܒܝܵܘ̈ܡܵܬ݂ܵܐ ܗܵܢܘܿܢ. ܩܵܡ ܫܸܡܥܘܿܢ ܟܹܐܦܵܐ ܡܸܨܥܲܬ݂ ܬܲܠܡܝܼܕܹ̈ܐ. ܐܝܼܬ݂ ܗ̄ܘܵܐ ܕܹܝܢ ܬܲܡܵܢ ܟܸܢܫܵܐ ܕܐ̄ܢܵܫܵܐ ܐܲܝܟ݂ ܡܵܐܐ ܘܥܸܣܪܝܼܢ. ܘܐܸܡܲܪ.

¹⁶ ܓܲܒ݂ܪܹ̈ܐ ܐܲܚܲܝ̈ܢ. ܙܵܕܹܩ ܗ̄ܘܵܐ ܕܢܸܬ݂ܡܲܠܹܐ ܟܬ݂ܵܒ݂ܵܐ. ܐܲܝܢܵܐ ܕܩܲܕܸܡ ܐܸܡܲܪ ܪܘܼܚܵܐ ܕܩܘܼܕ݂ܫܵܐ ܒܦܘܼܡܹܗ ܕܕ݂ܵܘܝܼܕ݂. ܥܲܠ ܝܼܗܘܼܕ݂ܵܐ ܗܵܘ ܕܲܗܘܵܐ ܡܕ݂ܲܒܪܵܢܵܐ ܠܗܵܢܘܿܢ ܕܐܸܚܲܕ݂ܘ ܠܝܼܫܘܿܥ.

¹⁷ ܡܛܠ ܕܲܡܢܹܐ ܗ̄ܘܵܐ ܥܲܡܲܢ. ܘܐܝܼܬ݂ ܗ̄ܘܵܐ ܠܹܗ ܦܸܣܵܐ ܒܬܸܫܡܸܫܬܵܐ ܗܵܕܹܐ.

¹⁸ ܗܵܢܵܘ ܕܲܩܢܵܐ ܠܹܗ ܩܪܝܼܬ݂ܵܐ ܡܸܢ ܐܲܓ݂ܪܵܐ ܕܲܚܛܝܼܬ݂ܵܐ. ܘܲܢܦܲܠ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ. ܘܐܸܬ݂ܦܪܸܬ݂ ܡܸܢ ܡܨܲܥܬܹܗ. ܘܐܸܬܸܐܫܸܕ݂ ܟܠܹܗ ܓܘܵܝܼܗ.

¹⁹ ܘܗܝܼ ܗܵܕܹܐ ܐܸܬ݂ܝܲܕ݂ܥܲܬ݂ ܠܟ݂ܠܗܘܿܢ ܕܥܵܡܪܝܼܢ ܒܐܘܿܪܸܫܠܸܡ. ܘܗܵܟܲܢܵܐ ܐܸܬ݂ܩܲܪܝܲܬ݂ ܩܪܝܼܬ݂ܵܐ ܗܵܝ ܒܠܸܫܢܹܗ ܕܐܲܬ݂ܪܵܐ ܚܩܲܠ ܕܡܵܐ. ܕܐܝܼܬ݂ܵܘܗܝ ܬܘܼܪܓܵܡܵܗܿ ܩܘܼܪܝܲܬ݂ ܕܸܡ.

²⁰ ܟܬ݂ܝܼܒ݂ ܓܹܝܪ ܒܣܸܦܪܵܐ ܕܡܲܙܡܘܿܪܹ̈ܐ. ܕܕ݂ܲܝܪܹܗ ܬܸܗܘܹܐ ܚܲܪܒܵܐ. ܘܥܵܡܘܿܪ ܠܵܐ ܢܸܗܘܹܐ ܒܵܗܿ. ܘܬܸܫܡܸܫܬܹܿܗ ܢܸܣܲܒ݂ ܐ̄ܚܪܹܝܢ.

²¹ ܘܵܠܝܵܐ ܗܝܼ ܗܵܟܹܝܠ ܠܚܲܕ݂ ܡܸܢ ܗܵܠܹܝܢ ܓܲܒ݂ܪܹ̈ܐ. ܕܲܗܘܵܘ ܥܲܡܲܢ ܒܗܵܢܵܐ ܙܲܒ݂ܢܵܐ ܟܠܹܗ. ܕܒܹܗ ܥܲܠ ܘܲܢܦܲܩ ܥܠܲܝܢ ܡܵܪܲܢ ܝܼܫܘܿܥ.

²² ܕܐܲܩܸܦ ܡܸܢ ܡܲܥܡܘܿܕ݂ܝܼܬܹܗ ܕܝܘܿܚܲܢܵܢ. ܥܕ݂ܲܡܵܐ ܠܝܵܘܡܵܐ ܕܐܸܣܬܲܠܲܩ ܡܸܢ ܠܘܵܬܲܢ. ܕܗܘܼ ܢܸܗܘܹܐ ܥܲܡܲܢ ܣܵܗܕܵܐ ܕܲܩܝܵܡܬܹܿܗ.

²³ ܘܐܲܩܝܼܡܘ ܬܪܹܝܢ. ܠܝܵܘܣܸܦ ܕܡܸܬ݂ܩܪܹܐ ܒܲܪܫܲܒܵܐ ܕܐܫܬܲܡܝܼ ܝܘܼܣܛܘܿܣ. ܘܲܠܡܲܬܿܝܼܵܐ.

²⁴ ܘܟܲܕ݂ ܨܲܠܝܼܘ. ܐܸܡܲܪܘ. ܐܲܢ̄ܬܿ ܡܵܪܝܵܐ ܝܵܕ݂ܲܥ ܕܲܒ݂̈ܠܸܒܵܘܵܬ݂ܵܐ ܕܟ݂ܠ. ܚܵܘܵܐ ܚܲܕ݂ ܐܲܝܢܵܐ ܕܓ݂ܵܒܹܐ ܐܲܢ̄ܬܿ ܡܸܢ ܗܵܠܹܝܢ ܬܿܪܲܝܗܘܿܢ.

²⁵ ܕܗܘܼ ܢܩܲܒܸܠ ܦܸܣܵܐ ܕܬܸܫܡܸܫܬܵܐ. ܘܲܫܠܝܼܚܘܼܬ݂ܵܐ ܕܡܸܢܵܗܿ ܦܪܲܩ ܝܼܗܘܼܕ݂ܵܐ. ܕܢܹܐܙܲܠ ܠܹܗ ܠܐܲܬ݂ܪܹܗ.

²⁶ ܘܐܲܪܡܝܼܘ ܦܸܨܵܐ. ܘܣܸܠܩܲܬ݂ ܠܡܲܬܿܝܼܵܐ. ܘܐܸܬ݂ܡܢܝܼ ܥܲܡ ܚܕ݂ܲܥܣܲܪ ܫܠܝܼܚܹ̈ܐ.

2

¹ ܘܟܲܕ݂ ܐܸܬ݂ܡܲܠܝܼܘ ܝܵܘ̈ܡܵܬ݂ܵܐ ܕܦܲܢܛܹܩܘܼܣܛܹܐ. ܟܲܕ݂ ܟܢܝܼܫܝܼܢ ܗ̄ܘܼܵܘ ܟܠܗܘܿܢ ܐܲܟ݂ܚܕ݂ܵܐ.

² ܗܘܵܐ ܡܸܢ ܫܸܠܝܵܐ ܡܸܢ ܫܡܲܝܵܐ ܩܵܠܵܐ. ܐܲܝܟ݂ ܪܘܼܚܵܐ ܥܲܙܝܼܙܬܵܐ. ܘܐܸܬ݂ܡܠܝܼ ܗ̄ܘܵܐ ܡܸܢܹܗ. ܟܠܹܗ ܒܲܝܬܵܐ ܗܵܘ ܕܒܹܗ ܝܵܬ݂ܒܝܼܢ ܗ̄ܘܼܵܘ.

³ ܘܐܸܬ݂ܚܙܝܼܘ ܠܗܘܿܢ ܠܸܫܵܢܹ̈ܐ ܕܡܸܬ݂ܦܲܠܓ݂ܝܼܢ ܗ̄ܘܼܵܘ ܐܲܝܟ݂ ܢܘܼܪܵܐ. ܘܝܼܬܸܒ݂ܘ ܥܲܠ ܚܲܕ݂ ܚܲܕ݂ ܡܸܢܗܘܿܢ.

⁴ ܘܐܸܬ݂ܡܠܝܼܘ ܟܠܗܘܿܢ ܒܪܘܼܚܵܐ ܕܩܘܼܕ݂ܫܵܐ. ܘܐܲܩܸܦܘ ܗ̄ܘܼܵܘ ܠܲܡܡܲܠܵܠܘܼ ܒܠܸܫܵܢ ܠܸܫܵܢ. ܐܲܝܟ݂ ܡܵܐ ܕܪܘܼܚܵܐ ܝܵܗܹܒ݂ ܗ̄ܘܵܐ ܠܗܘܿܢ ܠܲܡܡܲܠܵܠܘܼ.

⁵ ܐܝܼܬ݂ ܗ̄ܘܼܵܘ ܕܹܝܢ ܓܲܒ݂ܪܹ̈ܐ ܕܥܵܡܪܝܼܢ ܒܐܘܿܪܸܫܠܸܡ ܕܕ݂ܵܚܠܝܼܢ ܡܸܢ ܐܲܠܵܗܵܐ. ܝܗ̄ܘܼܕ݂ܵܝܹ̈ܐ ܡܸܢ ܟܠ ܥܲܡ̈ܡܹܐ ܕܲܬ݂ܚܹܝܬ݂ ܫܡܲܝܵܐ.

⁶ ܘܟܲܕ݂ ܗܘܵܐ ܩܵܠܵܐ ܗܵܘ. ܟܢܲܫ ܟܠܹܗ ܥܲܡܵܐ ܘܐܸܫܬܿܓܸܫ. ܡܛܠ ܕܫܵܡܲܥ ܗ̄ܘܵܐ ܐ̄ܢܵܫ ܐ̄ܢܵܫ ܡܸܢܗܘܿܢ ܕܲܡܡܲܠܠܝܼܢ ܗ̄ܘܼܵܘ ܒܠܸܫ̈ܢܲܝܗܘܿܢ.

⁷ ܬܲܗܝܼܪܝܼܢ ܗܘܵܘ ܕܹܝܢ ܟܠܗܘܿܢ ܘܡܸܬܿܕܲܡܪܝܼܢ ܟܲܕ݂ ܐܵܡܪܝܼܢ ܗ̄ܘܼܵܘ ܚܲܕ݂ ܠܚܲܕ݂. ܗܵܠܹܝܢ ܟܠܗܘܿܢ ܕܲܡܡܲܠܠܝܼܢ. ܠܵܐ ܗܵܐ ܓܠܝܼܠܵܝܹ̈ܐ ܐܸܢܘܿܢ.

⁸ ܐܲܝܟܲܢܵܐ ܚܢܲܢ ܫܵܡܥܝܼܢ ܚ̱ܢܲܢ ܐ̄ܢܵܫ ܐ̄ܢܵܫ ܠܸܫܵܢܹܗ ܕܒܹܗ ܝܼܠܝܼܕ݂ܝܼܢ ܚ̱ܢܲܢ.

⁹ ܦܲܪ̈ܬܘܵܝܹܐ ܘܡܵܕ݂ܵܝܹ̈ܐ ܘܐܵܠܵܢܵܝܹ̈ܐ. ܘܐܲܝܠܹܝܢ ܕܥܵܡܪܝܼܢ ܒܹܝܬ݂ ܢܲܗܪ̈ܝܼܢ. ܝܗ̄ܘܼܕ݂ܵܝܹ̈ܐ ܘܩܵܦܘܼܕܩܵܝܹ̈ܐ. ܘܲܕ݂ܡܸܢ ܐܲܬ݂ܪܵܐ ܕܦܘܼܢܛܘܿܣ. ܘܕ݂ܵܐܣܝܼܵܐ.

¹⁰ ܘܲܕ݂ܡܸܢ ܐܲܬ݂ܪܵܐ ܕܲܦܪܘܿܓ݂ܝܼܵܐ ܘܲܕ݂ܦܲܡܦܹܘܠܝܼܵܐ. ܘܲܕ݂ܡܸܨܪܹܝܢ. ܘܕ݂ܲܐܬ݂ܪ̈ܵܘܵܬ݂ܵܐ ܕܠܹܘܒܹܐ ܕܩܲܪܝܼܒ݂ܝܼܢ ܠܩܹܘܪܝܼܢܵܐ. ܘܐܲܝܠܹܝܢ ܕܐܸܬ݂ܵܘ ܡܸܢ ܪܗ̄ܘܿܡܹܐ. ܝܗ̄ܘܼܕ݂ܵܝܹ̈ܐ ܘܓ݂ܝܼܘܿܪܹ̈ܐ.

¹¹ ܘܲܕ݂ܡܸܢ ܩܪܹܛܹܐ ܘܥܲܪ̈ܒ݂ܵܝܹܐ. ܗܵܐ ܫܵܡܥܝܼܢ ܚ̱ܢܲܢ ܡܸܢܗܘܿܢ ܕܲܡܡܲܠܠܝܼܢ ܒܠܸܫܵܢܲܝ̈ܢ ܕܝܼܠܲܢ ܬܸܕ݂ܡܪܵܬܹܗ ܕܐܲܠܵܗܵܐ.

¹² ܡܸܬܿܕܲܡܪܝܼܢ ܗ̄ܘܼܵܘ ܕܹܝܢ ܟܠܗܘܿܢ. ܘܬ݂ܵܘܝܼܪܝܼܢ. ܟܲܕ݂ ܐܵܡܪܝܼܢ ܚܲܕ݂ ܠܚܲܕ݂. ܕܡܵܢܵܐ ܗܝܼ ܗܵܕܹܐ ܨܒ݂ܘܼܬ݂ܵܐ.

¹³ ܐ̄ܚܪܵܢܹ̈ܐ ܕܹܝܢ ܡܡܲܝܩܝܼܢ ܗ̄ܘܼܵܘ ܒܗܘܿܢ. ܟܲܕ݂ ܐܵܡܪܝܼܢ. ܗܵܠܹܝܢ ܡܹܐܪܝܼܬ݂ܵܐ ܐܸܫܬܿܝܼܘ ܘܲܪܘܝܼܘ.

¹⁴ ܒܵܬܲܪܟܸܢ ܩܵܡ ܫܸܡܥܘܿܢ ܟܹܐܦܵܐ ܥܲܡ ܚܕ݂ܲܥܣܲܪ ܫܠܝܼܚ̈ܝܼܢ. ܘܐܲܪܝܼܡ ܩܵܠܹܗ. ܘܐܸܡܲܪ ܠܗܘܿܢ. ܓܲܒ݂ܪܹ̈ܐ ܝܗ̄ܘܼܕ݂ܵܝܹ̈ܐ ܘܟ݂ܠܗܘܿܢ ܕܥܵܡܪܝܼܢ ܒܐܘܪܸܫܠܸܡ܅ ܗܵܕܹܐ ܬܸܬ݂ܝܼܕ݂ܲܥ ܠܟ݂ܘܿܢ. ܘܨܘܼܬ݂ܘ ܡܸܠܲܝ̈.

¹⁵ ܠܵܐ ܓܹܝܪ ܐܲܝܟܲܢܵܐ ܕܐܲܢ̄ܬܿܘܿܢ ܣܵܒ݂ܪܝܼܢ ܗܵܠܹܝܢ ܪܘܹܝܢ. ܕܗܵܐ ܥܕ݂ܲܡܵܐ ܠܗܵܫܵܐ ܬܿܠܵܬ݂ ܐܸܢܹܝܢ ܫܵܥܝܼ̈ܢ.

¹⁶ ܐܸܠܵܐ ܗܵܕܹܐ ܗ̄ܝܼ ܕܐܲܡܝܼܪܵܐ ܒܝܘܼܐܹܝܠ ܢܒ݂ܝܼܵܐ.

¹⁷ ܢܸܗܘܹܐ ܒܝܵܘ̈ܡܵܬ݂ܵܐ ܐ̄ܚܪ̈ܵܝܹܐ ܐܵܡܲܪ ܐܲܠܵܗܵܐ. ܐܹܫܘܿܕ݂ ܪܘܼܚܝ ܥܲܠ ܟܠ ܒܣܲܪ. ܘܢܸܬ݂ܢܲܒܘܼܢ ܒܢܲܝ̈ܟܿܘܿܢ. ܘܲܒ݂ܢܵܬ݂ܟ݂̈ܘܿܢ. ܘܓܲܕܘܼܕ݂ܲܝ̈ܟܿܘܿܢ ܚܸܙܘܵܢܹ̈ܐ ܢܸܚܙܘܿܢ. ܘܩܲܫܝܼܫܲܝ̈ܟܿܘܿܢ ܚܸܠܡܹ̈ܐ ܢܸܚܠܡܘܼܢ.

¹⁸ ܘܥܲܠ ܥܲܒ݂ܕܲܝ̈ ܘܥܲܠ ܐܲܡ̈ܗܵܬ݂ܝ ܐܹܫܘܿܕ݂ ܪܘܼܚܝ ܒܝܵܘ̈ܡܵܬ݂ܵܐ ܗܵܢܘܿܢ. ܘܢܸܬ݂ܢܲܒܘܼܢ.

¹⁹ ܘܐܸܬܸܿܠ ܐܵܬ݂ܘܵܬ݂ܵܐ ܒܲܫܡܲܝܵܐ. ܘܲܓ݂ܒܲܪ̈ܘܵܬ݂ܵܐ ܥܲܠ ܐܲܪܥܵܐ. ܕܡܵܐ ܘܢܘܼܪܵܐ ܘܥܸܛܪܵܐ ܕܬܸܢܵܢܵܐ.

²⁰ ܫܸܡܫܵܐ ܢܸܬ݂ܚܲܠܲܦ ܒܥܲܡܛܵܢܵܐ. ܘܣܲܗܪܵܐ ܒܲܕ݂ܡܵܐ. ܥܲܕ݂ܠܵܐ ܢܹܐܬܹܐ ܝܵܘܡܹܗ ܕܡܵܪܝܵܐ ܪܲܒܵܐ ܘܲܕ݂ܚܝܼܠܵܐ.

²¹ ܘܢܸܗܘܹܐ ܟܠ ܕܢܸܩܪܹܐ ܫܡܹܗ ܕܡܵܪܝܵܐ ܢܸܚܹܐ.

²² ܓܲܒ݂ܪܹ̈ܐ ܒܢܲܝ̈ ܝܼܣܪܵܝܹܠ. ܫܡܲܥܘ ܡܸܠܹ̈ܐ ܗܵܠܹܝܢ. ܝܼܫܘܿܥ ܢܵܨܪܵܝܵܐ. ܓܲܒ݂ܪܵܐ ܕܡܸܢ ܐܲܠܵܗܵܐ ܐܸܬ݂ܚܙܝܼ ܠܘܵܬ݂ܟ݂ܘܿܢ. ܒܚܲܝ̈ܠܹܐ ܘܒ݂ܐܵܬ݂ܘܵܬ݂ܵܐ ܘܒܲܓ݂ܒܲܪ̈ܘܵܬ݂ܵܐ. ܐܲܝܠܹܝܢ ܕܐܲܠܵܗܵܐ ܥܒܲܕ݂ ܒܲܝܢܵܬ݂ܟ݂ܘܿܢ ܒܐܝܼܕܹܗ. ܐܲܝܟ݂ ܕܐܲܢ̄ܬܿܘܿܢ ܝܵܕ݂ܥܝܼܢ ܐܢ̄ܬܘܿܢ.

²³ ܠܗܵܢܵܐ ܕܲܦܪܝܼܫ ܗ̄ܘܵܐ ܠܵܗܿ ܠܗܵܕܹܐ: ܒܲܡܩܲܕܡܘܼܬ݂ ܝܼܕ݂ܲܥܬܹܗ ܘܲܒ݂ܨܸܒ݂ܝܵܢܹܗ ܕܐܲܠܵܗܵܐ. ܐܲܫܠܸܡܬܿܘܿܢܵܝܗܝ ܒܐܝܼܕ݂ܲܝ̈ ܪ̈ܲܫܝܼܥܹܐ. ܘܲܙܩܲܦܬܿܘܢ. ܘܲܩܛܲܠܬܿܘܢ.

²⁴ ܐܲܠܵܗܵܐ ܕܹܝܢ ܐܲܩܝܼܡܹܗ. ܘܲܫܪܵܐ ܚܸܒ݂ܠܹܝ̈ܗܿ ܕܲܫܝܘܿܠ. ܡܛܠ ܕܠܵܐ ܡܸܫܟܚܵܐ ܗ̄ܘܵܬ݂ ܕܢܸܬܿܬܿܚܸܕ݂ ܒܵܗܿ ܒܲܫܝܘܿܠ.

²⁵ ܕܵܘܝܼܕ݂ ܓܹܝܪ ܐܸܡܲܪ ܥܠܵܘܗܝ. ܡܩܲܕܸܡ ܗ̄ܘܹܝܬ݂ ܚܵܙܹܐ ܠܡܵܪܝ ܒܟ݂ܠܙܒܲܢ. ܕܥܲܠ ܝܲܡܝܼܢܝ ܗ̄ܘܼ. ܕܠܵܐ ܐܹܙܘܼܥ.

²⁶ ܡܛܠ ܗܵܢܵܐ ܐܸܬ݂ܒܲܣܲܡ ܠܹܒܝ. ܘܪܸܘܙܲܬ݂ ܬܸܫܒܘܿܚܬܿܝ. ܘܐܵܦ ܦܲܓ݂ܪܝ ܢܲܓܸ݁ܢ ܥܲܠ ܣܲܒ݂ܪܵܐ.

²⁷ ܡܛܠ ܕܠܵܐ ܫܵܒܹܩ ܐܲܢ̄ܬܿ ܠܢܲܦ̮ܫܝ ܒܲܫܝܘܿܠ. ܘܠܵܐ ܝܵܗܹܒ݂ ܐܲܢ̄ܬܿ ܠܚܲܣܝܵܟ݂ ܕܢܸܚܙܹܐ ܚܒ݂ܵܠܵܐ.

²⁸ ܓ݁ܠܲܝܬܿ ܠܝܼ ܐܘܼܪܚܵܐ ܕܚܲܝܹ̈ܐ. ܬܸܡܠܹܝܢܝ ܒܲܣܝܼܡܘܼܬ݂ܵܐ ܥܲܡ ܦܲܪܨܘܿܦܵܟ݂.

²⁹ ܓܲܒ݂ܪܹ̈ܐ ܐܲܚܲܝ̈ܢ. ܡܲܦܲܣ ܠܡܹܐܡܲܪ ܥܹܝܢ ܒܲܓ݂ܠܹܐ ܠܘܵܬ݂ܟ݂ܘܿܢ. ܥܲܠ ܪܹܝܫ ܐܲܒ݂ܵܗ̈ܵܬ݂ܵܐ ܕܵܘܝܼܕ݂. ܕܡܝܼܬ݂ ܘܐܵܦ ܐܸܬ݂ܩܒܲܪ. ܘܒܹܝܬ݂ ܩܒ݂ܘܼܪܹܗ ܐܝܼܬ݂ܵܘܗܝ ܠܘܵܬܲܢ ܥܕ݂ܲܡܵܐ ܠܝܵܘܡܵܢܵܐ.

³⁰ ܢܒ݂ܝܼܵܐ ܗܘܵܐ ܓܹܝܪ. ܘܝܵܕ݂ܲܥ ܗ̄ܘܵܐ ܕܡܵܘ̈ܡܵܬ݂ܵܐ ܝܼܡܵܐ ܠܹܗ ܐܲܠܵܗܵܐ. ܕܡܸܢ ܦܹܐܪܹ̈ܐ ܕܟܲܪܣܵܟ݂. ܐܵܘܬܸܿܒ݂ ܥܲܠ ܟܘܪܣܝܵܟ݂.

³¹ ܘܩܲܕܡ ܚܙܵܐ. ܘܡܲܠܸܠ ܥܲܠ ܩܝܵܡܬܹܿܗ ܕܲܡܫܝܼܚܵܐ. ܕܠܵܐ ܐܸܫܬܿܒܸܩ ܒܲܫܝܘܿܠ. ܐܵܦܠܵܐ ܦܲܓ݂ܪܹܗ ܚܙܵܐ ܚܒ݂ܵܠܵܐ.

³² ܠܗܵܢܵܐ ܝܼܫܘܿܥ ܐܲܩܝܼܡ ܐܲܠܵܗܵܐ. ܘܲܚܢܲܢ ܟܠܲܢ ܣܵܗ̈ܕܵܘܗܝ.

³³ ܘܗܘܸܝܘܼ ܕܲܒ݂ܝܲܡܝܼܢܹܗ ܕܐܲܠܵܗܵܐ ܐܸܬܿܬܿܪܝܼܡ: ܘܲܢܣܲܒ݂ ܡܸܢ ܐܲܒ݂ܵܐ ܫܘܼܘܕܵܝܵܐ ܕܥܲܠ ܪܘܼܚܵܐ ܕܩܘܼܕ݂ܫܵܐ. ܘܐܸܫܲܕ݂ ܡܵܘܗܲܒ݂ܬܵܐ ܗܵܕܹܐ. ܕܗܵܐ ܚܵܙܹܝܢ ܐܢ̄ܬܘܿܢ ܘܫܵܡܥܝܼܢ ܐܢ̄ܬܘܿܢ.

³⁴ ܠܵܐ ܗ̄ܘܵܐ ܓܹܝܪ ܕܵܘܝܼܕ݂ ܣܠܸܩ ܠܲܫܡܲܝܵܐ. ܡܛܠ ܕܗܘܼ ܐܸܡܲܪ. ܕܐܵܡܲܪ ܡܵܪܝܵܐ ܠܡܵܪܝ. ܬܸܒ݂ ܠܵܟ݂ ܡܸܢ ܝܲܡܝܼܢܝ.

³⁵ ܥܕ݂ܲܡܵܐ ܕܐܹܣܝܼܡ ܒܥܸܠܕܒ݂ܵܒܲܝ̈ܟ ܟܘܼܒ݂ܫܵܐ ܠܪܸ̈ܓ݂ܠܲܝܟ.

³⁶ ܫܲܪܝܼܪܵܐܝܼܬ݂ ܗܵܟܹܝܠ ܢܸܕܲܥ ܟܠܹܗ ܒܹܝܬ݂ ܝܼܣܪܵܝܹܠ. ܕܡܵܪܝܵܐ ܘܲܡܫܝܼܚܵܐ ܥܲܒ݂ܕܹܗ ܐܲܠܵܗܵܐ. ܠܗܵܢܵܐ ܝܼܫܘܿܥ ܕܐܲܢ̄ܬܿܘܿܢ ܙܩܲܦܬܿܘܢ.

³⁷ ܘܟܲܕ݂ ܫܡܲܥܘ ܗܵܠܹܝܢ. ܐܸܬ݂ܓܢܲܚܘ ܒܠܸܒܗܘܿܢ. ܘܐܸܡܲܪܘ ܠܫܸܡܥܘܿܢ ܘܲܠܫܲܪܟܵܐ ܕܲܫܠܝܼܚܹ̈ܐ. ܡܵܢܵܐ ܢܸܥܒܸܕ݂ ܐܲܚܲܝ̈ܢ.

³⁸ ܐܵܡܲܪ ܠܗܘܿܢ ܫܸܡܥܘܿܢ. ܬܘܼܒ݂ܘ ܘܲܥܡܲܕ݂ܘ ܐ̄ܢܵܫ ܐ̄ܢܵܫ ܡܸܢܟ݂ܘܿܢ. ܒܲܫܡܹܗ ܕܡܵܪܝܵܐ ܝܼܫܘܿܥ. ܠܫܘܼܒ݂ܩܵܢ ܚܛܵܗܹ̈ܐ. ܕܲܬ݂ܩܲܒܠܘܼܢ ܡܵܘܗܲܒ݂ܬܵܐ ܕܪܘܼܚܵܐ ܕܩܘܼܕ݂ܫܵܐ.

³⁹ ܠܟ݂ܘܿܢ ܓܹܝܪ ܗܘܵܐ ܫܘܼܘܕܵܝܵܐ. ܘܠܲܒ݂ܢܲܝ̈ܟܿܘܿܢ. ܘܲܠܟ݂ܠܗܘܿܢ ܐܲܝܠܹܝܢ ܕܪܲܚܝܼܩܝܼܢ. ܐܲܝܠܹܝܢ ܕܗܘܼ ܐܲܠܵܗܵܐ ܢܸܩܪܹܐ ܐܸܢܘܿܢ.

⁴⁰ ܘܲܒ݂ܡܸܠܹ̈ܐ ܐ̄ܚܪ̈ܵܢܝܵܬ݂ܵܐ ܣܲܓܝܼ̈ܐܵܬ݂ܵܐ ܡܣܲܗܸܕ݂ ܗ̄ܘܵܐ ܠܗܘܿܢ. ܘܒ݂ܵܥܹܐ ܗ̄ܘܵܐ ܡܸܢܗܘܿܢ. ܟܲܕ݂ ܐܵܡܲܪ. ܚܝܵܘ ܡܸܢ ܫܲܪܒܿܬ݂ܵܐ ܗܵܕܹܐ ܡܥܲܩܲܡܬܵܐ.

⁴¹ ܘܐܢܵܫܝܼ̈ܢ ܡܸܢܗܘܿܢ ܥܬ݂ܝܼܕ݂ܵܐܝܼܬ݂ ܩܲܒܸܠܘ ܡܸܠܬܹܗ. ܘܗܲܝܡܸܢܘ. ܘܲܥܡܲܕ݂ܘ. ܘܐܸܬܿܬܵܘܣܲܦܘ ܒܗܵܘ ܝܵܘܡܵܐ. ܐܲܝܟ݂ ܬܿܠܵܬ݂ܵܐ ܐܲܠܦ̈ܝܼܢ ܢܲܦ̮ܫܵܢ.

⁴² ܘܐܲܡܝܼܢܝܼܢ ܗ̄ܘܼܵܘ ܒܝܘܼܠܦܵܢܵܐ ܕܲܫܠܝܼܚܹ̈ܐ. ܘܡܸܫܬܵܘܬܿܦܝܼܢ ܗ̄ܘܼܵܘ ܒܲܨܠܘܼܬ݂ܵܐ ܘܒܲܩܨܵܝܵܐ ܕܐܹܘܟ݂ܵܪܸܣܛܝܼܵܐ.

⁴³ ܘܗܵܘܝܵܐ ܗ̄ܘܵܬ݂ ܕܸܚܠܬ݂ܵܐ ܠܟ݂ܠ ܢܦܸܫ. ܘܐܵܬ݂ܘܵܬ݂ܵܐ ܣܲܓܝܼ̈ܐܵܬ݂ܵܐ ܘܲܓ݂ܒܲܪ̈ܘܵܬ݂ܵܐ. ܗܵܘܝܵܢ ܗ̄ܘܲܝ ܒܝܲܕ݂ ܫܠܝܼܚܹ̈ܐ ܒܐܘܿܪܸܫܠܸܡ.

⁴⁴ ܘܟ݂ܠܗܘܿܢ ܐܲܝܠܹܝܢ ܕܗܲܝܡܸܢܘ ܗ̄ܘܼܵܘ. ܐܲܟ݂ܚܕ݂ܵܐ ܗܘܵܘ. ܘܟ݂ܠ ܡܸܕܸܡ ܕܐܝܼܬ݂ ܗ̄ܘܵܐ ܠܗܘܿܢ ܕܓ݂ܵܘܵܐ ܗܘܵܐ.

⁴⁵ ܘܐܲܝܠܹܝܢ ܕܐܝܼܬ݂ ܗ̄ܘܵܐ ܠܗܘܿܢ ܩܸܢܝܵܢܵܐ ܡܙܲܒܢܝܼܢ ܗ̄ܘܼܵܘ ܠܹܗ. ܘܲܡܦܲܠܓ݂ܝܼܢ ܗ̄ܘܼܵܘ ܠܐ̄ܢܵܫ ܐ̄ܢܵܫ ܐܲܝܟ݂ ܡܸܕܸܡ ܕܲܣܢܝܼܩ ܗ̄ܘܵܐ.

⁴⁶ ܘܟ݂ܠܝܘܿܡ ܐܲܡܝܼܢܝܼܢ ܗ̄ܘܼܵܘ ܒܗܲܝܟܠܵܐ. ܒܲܚܕ݂ܵܐ ܢܦܸܫ. ܘܲܒ݂ܒܲܝܬܵܐ ܩܵܨܹܝܢ ܗ̄ܘܼܵܘ ܦܪܝܼܣܬܵܐ. ܘܲܡܩܲܒܠܝܼܢ ܗ̄ܘܼܵܘ ܣܲܝܒܵܪܬܵܐ. ܟܲܕ݂ ܪܵܘܙܝܼܢ. ܘܒܲܒ݂ܪܝܼܪܘܼܬ݂ܵܐ ܕܠܸܒܗܘܿܢ

⁴⁷ ܡܫܲܒܚܝܼܢ ܗ̄ܘܼܵܘ ܠܐܲܠܵܗܵܐ. ܟܲܕ݂ ܝܼܗܝܼܒ݂ܝܼܢ ܒܪ̈ܲܚܡܹܐ ܩܕ݂ܵܡ ܟܠܹܗ ܥܲܡܵܐ. ܘܡܵܪܲܢ ܡܵܘܣܸܦ ܗ̄ܘܵܐ ܟܠܝܘܿܡ ܠܐܲܝܠܹܝܢ ܕܚܵܐܹܝܢ ܒܥܹܕܬܵܐ.

3

¹ ܘܲܗܘܵܐ ܕܟܲܕ݂ ܣܵܠܩܝܼܢ ܫܸܡܥܘܿܢ ܟܹܐܦܵܐ ܘܝܘܿܚܲܢܵܢ ܐܲܟ݂ܚܕ݂ܵܐ ܠܗܲܝܟܠܵܐ: ܒܥܸܕܵܢܵܐ ܕܲܨܠܘܿܬ݂ܵܐ ܕܲܬ݂ܫܲܥ ܫܵܥܝܼ̈ܢ.

² ܘܗܵܐ ܓܲܒ݂ܪܵܐ ܚܲܕ݂ ܚܓ݂ܝܼܪܵܐ ܕܡܸܢ ܟܪܸܣ ܐܸܡܹܗ. ܫܩܝܼܠܝܼܢ ܗ̄ܘܼܵܘ ܐ̄ܢܵܫܵܐ ܐܲܝܠܹܝܢ ܕܲܡܥܵܕ݂ܝܼܢ ܗ̄ܘܼܵܘ ܡܲܝܬܿܝܢ ܘܣܵܝܡܝܼܢ ܠܹܗ. ܒܬܲܪܥܵܐ ܕܗܲܝܟܠܵܐ ܕܡܸܬ݂ܩܪܹܐ ܫܲܦܝܼܪܵܐ. ܕܢܸܗܘܹܐ ܫܵܐܹܠ ܙܸܕ݂ܩܬ݂ܵܐ ܡܸܢ ܗܵܢܘܿܢ ܕܥܵܐܠܝܼܢ ܠܗܲܝܟܠܵܐ.

³ ܗܵܢܵܐ ܟܲܕ݂ ܚܙܵܐ ܠܫܸܡܥܘܿܢ ܘܲܠܝܘܿܚܲܢܵܢ ܕܥܵܐܠܝܼܢ ܠܗܲܝܟܠܵܐ. ܒܵܥܹܐ ܗ̄ܘܵܐ ܡܸܢܗܘܿܢ. ܕܢܸܬܿܠܘܼܢ ܠܹܗ ܙܸܕ݂ܩܬ݂ܵܐ.

⁴ ܘܚܵܪܘ ܒܹܗ ܫܸܡܥܘܿܢ ܘܝܘܿܚܲܢܵܢ. ܘܐܸܡܲܪܘ ܠܹܗ. ܚܘܼܪ ܒܲܢ.

⁵ ܗܘܼ ܕܹܝܢ ܚܵܪ ܒܗܘܿܢ. ܟܲܕ݂ ܣܵܒܲܪ ܗ̄ܘܵܐ ܠܡܸܣܲܒ݂ ܡܸܢܗܘܿܢ ܡܸܕܸܡ.

⁶ ܐܵܡܲܪ ܠܹܗ ܫܸܡܥܘܿܢ. ܕܲܗܒ݂ܵܐ ܘܣܹܐܡܵܐ ܠܲܝܬܿ ܠܝܼ. ܐܸܠܵܐ ܡܸܕܸܡ ܕܐܝܼܬ݂ ܠܝܼ. ܝܵܗܹܒ݂ ܐ̄ܢܵܐ ܠܵܟ݂. ܒܲܫܡܹܗ ܕܝܼܫܘܿܥ ܡܫܝܼܚܵܐ ܢܵܨܪܵܝܵܐ. ܩܘܼܡ ܗܲܠܸܟ݂.

⁷ ܘܐܲܚܕܹܗ ܒܐܝܼܕ݂ܗ ܕܝܲܡܝܼܢܵܐ ܘܐܲܩܝܼܡܹܗ. ܘܒ݂ܵܗܿ ܒܫܵܥܬ݂ܵܐ ܫܲܪ ܪܸ̈ܓ݂ܠܵܘܗܝ ܘܥܸܩ̈ܒ݂ܵܘܗܝ.

⁸ ܘܲܫܘܲܪ ܩܵܡ ܘܗܲܠܸܟ݂. ܘܥܲܠ ܥܲܡܗܘܿܢ ܠܗܲܝܟܠܵܐ. ܟܲܕ݂ ܡܗܲܠܸܟ݂ ܘܲܡܫܵܘܲܪ ܘܲܡܫܲܒܲܚ ܠܐܲܠܵܗܵܐ.

⁹ ܘܲܚܙܵܐܘܼܗܝ ܟܠܹܗ ܥܲܡܵܐ ܟܲܕ݂ ܡܗܲܠܸܟ݂ ܘܲܡܫܲܒܲܚ ܠܐܲܠܵܗܵܐ.

¹⁰ ܘܐܸܫܬܵܘܕܲܥܘ ܕܗܘܸܝܘܼ ܗܵܘ ܚܵܕ݂ܘܼܪܵܐ. ܕܝܵܬܹܿܒ݂ ܗ̄ܘܵܐ ܟܠ ܝܘܿܡ ܘܫܵܐܹܠ ܙܸܕ݂ܩܬ݂ܵܐ. ܥܲܠ ܬܲܪܥܵܐ ܕܡܸܬ݂ܩܪܹܐ ܫܲܦܝܼܪܵܐ. ܘܐܸܬ݂ܡܠܝܼܘ ܬܸܡܗܵܐ ܘܕ݂ܘܼܡܵܪܵܐ ܥܲܠ ܡܸܕܸܡ ܕܲܗܘܵܐ.

¹¹ ܘܟܲܕ݂ ܐܲܚܝܼܕ݂ ܗܘܵܐ ܠܫܸܡܥܘܿܢ ܘܲܠܝܘܿܚܲܢܵܢ. ܪܗܸܛ ܟܠܹܗ ܥܲܡܵܐ ܟܲܕ݂ ܬܲܗܝܼܪ ܠܘܵܬ݂ܗܘܿܢ. ܠܐܸܣܛܘܵܐ ܕܡܸܬ݂ܩܪܹܐ ܕܲܫܠܹܝܡܘܿܢ.

¹² ܘܟܲܕ݂ ܚܙܵܐ ܫܸܡܥܘܿܢ ܥܢܵܐ ܘܐܸܡܲܪ ܠܗܘܿܢ. ܓܲܒ݂ܪܹ̈ܐ ܒܢܲܝ̈ ܝܼܣܪܵܝܹܠ. ܡܵܢܵܐ ܡܸܬܿܕܲܡܪܝܼܢ ܐܢ̄ܬܘܿܢ ܒܗܵܢܵܐ. ܐܵܘ ܒܲܢ. ܡܵܢܵܐ ܚܵܝܪܝܼܢ ܐܢ̄ܬܘܿܢ. ܐܲܝܟ݂ ܗܵܘ ܕܲܒ݂ܚܲܝܠܵܐ ܕܝܼܠܲܢ. ܐܵܘ ܒܫܘܼܠܛܵܢܲܢ. ܥܒܲܕ݂ܢ ܗܵܕܹܐ ܕܲܢܗܲܠܸܟ݂ ܗܵܢܵܐ.

¹³ ܐܲܠܵܗܹܗ ܗܘܼ ܕܐܲܒ݂ܪܵܗܵܡ ܘܕ݂ܐܝܼܣܚܵܩ ܘܲܕ݂ܝܲܥܩܘܿܒ݂. ܐܲܠܵܗܵܐ ܕܐܲܒ݂ܵܗܵܬܲܢ ܫܲܒܲܚ ܠܲܒ݂ܪܹܗ ܝܼܫܘܿܥ. ܗܵܘ ܕܐܲܢ̄ܬܿܘܿܢ ܐܲܫܠܸܡܬܿܘܢ ܘܲܟ݂ܦܲܪܬܿܘܢ ܒܹܗ ܩܕ݂ܵܡ ܐܲܦܵܘ̈ܗܝ ܕܦܝܼܠܵܛܘܿܣ. ܟܲܕ݂ ܗܘܼ ܙܲܕܩ ܗ̄ܘܵܐ ܕܢܸܫܪܹܝܘܗܝ.

¹⁴ ܐܲܢ̄ܬܿܘܿܢ ܕܹܝܢ ܒܩܲܕܝܼܫܵܐ ܘܙܲܕܝܼܩܵܐ ܟܦܲܪܬܿܘܢ. ܘܲܫܐܸܠܬܿܘܢ ܠܟ݂ܘܿܢ ܠܓܲܒ݂ܪܵܐ ܩܵܛܘܿܠܵܐ ܕܢܸܬ݂ܝܼܗܸܒ݂ ܠܟ݂ܘܿܢ.

¹⁵ ܘܲܠܗܵܘ ܪܹܫܵܐ ܕܚܲܝܹ̈ܐ ܩܛܲܠܬܿܘܢ. ܕܠܹܗ ܐܲܩܝܼܡ ܐܲܠܵܗܵܐ ܡܸܢ ܒܹܝܬ݂ ܡܝܼܬܹ̈ܐ. ܘܲܚܢܲܢ ܟܠܲܢ. ܣܵܗ̈ܕܵܘܗܝ.

¹⁶ ܘܲܒ݂ܗܲܝܡܵܢܘܼܬ݂ܵܐ ܕܲܫܡܹܗ. ܠܗܵܢܵܐ ܕܚܵܙܹܝܢ ܐܢ̄ܬܘܿܢ ܘܝܵܕ݂ܥܝܼܢ ܐܢ̄ܬܘܿܢ. ܗܘܼ ܐܲܫܲܪ. ܘܐܲܣܝܼ. ܘܗܲܝܡܵܢܘܼܬ݂ܵܐ ܕܒܹܗ ܝܸܗܒܲܬ݂ ܠܹܗ ܗܵܕܹܐ ܚܠܝܼܡܘܼܬ݂ܵܐ ܩܕ݂ܵܡ ܟܠܟ݂ܘܿܢ.

¹⁷ ܒܪܲܡ ܗܵܫܵܐ ܐܲܚܲܝ̈. ܝܵܕ݂ܲܥ ܐ̄ܢܵܐ ܕܲܒ݂ܛܘܼܥܝܲܝ ܥܒܲܕܬܿܘܢ ܗܵܕܹܐ. ܐܲܝܟ݂ ܕܲܥܒܲܕ݂ܘ ܪܹ̈ܫܲܝܟܿܘܿܢ.

¹⁸ ܘܐܲܠܵܗܵܐ ܐܲܝܟ݂ ܡܸܕܸܡ ܕܩܲܕܸܡ ܐܲܟ݂ܪܸܙ ܒܦܘܼܡ ܟܠܗܘܿܢ ܢܒ݂ܝܹ̈ܐ. ܕܢܸܚܲܫ ܡܫܝܼܚܹܗ. ܡܲܠܝܼ ܗܵܟܲܢܵܐ.

¹⁹ ܬܘܼܒ݂ܘ ܗܵܟܹܝܠ. ܘܐܸܬ݂ܦܢܵܘ. ܐܲܝܟܲܢܵܐ ܕܢܸܬ݂ܥܛܘܼܢ ܚܛܵܗܲܝ̈ܟܿܘܿܢ. ܘܢܹܐܬ݂ܘܢ ܠܟ݂ܘܿܢ ܙܲܒ݂ܢܹ̈ܐ ܕܲܢܝܵܚܬܵܐ ܡܸܢ ܩܕ݂ܵܡ ܦܲܪܨܘܿܦܹܗ ܕܡܵܪܝܵܐ.

²⁰ ܘܲܢܫܲܕܲܪ ܠܟ݂ܘܿܢ ܠܐܲܝܢܵܐ ܕܲܡܛܲܝܲܒ݂ ܗ̄ܘܵܐ ܠܟ݂ܘܿܢ. ܠܝܼܫܘܿܥ ܡܫܝܼܚܵܐ.

²¹ ܕܠܹܗ ܘܵܠܹܐ ܠܲܫܡܲܝܵܐ ܕܲܢܩܲܒܠܘܼܢ. ܥܕ݂ܲܡܵܐ ܠܡܘܼܠܵܝܵܐ ܕܙܲܒ݂ܢܹ̈ܐ. ܕܟ݂ܠܗܹܝܢ ܐܲܝܠܹܝܢ ܕܡܲܠܸܠ ܐܲܠܵܗܵܐ ܒܦܘܼܡܵܐ ܕܲܢܒ݂ܝܼܵܘ̈ܗܝ ܩܲܕܝܼܫܹ̈ܐ ܕܡܸܢ ܥܵܠܲܡ.

²² ܡܘܼܫܹܐ ܓܹܝܪ ܐܸܡܲܪ. ܕܲܢܒ݂ܝܼܵܐ ܢܩܝܼܡ ܠܟ݂ܘܿܢ ܡܵܪܝܵܐ ܡܸܢ ܐܲܚܲܝ̈ܟܿܘܿܢ. ܐܲܟ݂ܘܵܬ݂ܝ. ܠܹܗ ܫܡܲܥܘ. ܒܟ݂ܠ ܡܵܐ ܕܲܢܡܲܠܸܠ ܥܲܡܟ݂ܘܿܢ.

²³ ܘܬܸܗܘܹܐ ܟܠ ܢܲܦ̮ܫܵܐ ܐܲܝܕ݂ܵܐ ܕܠܵܐ ܬܸܫܡܲܥ ܠܲܢܒ݂ܝܼܵܐ ܗܵܘ. ܬܹܐܒܲܕ݂ ܢܲܦ̮ܫܵܐ ܗܵܝ ܡܸܢ ܥܲܡܵܗܿ.

²⁴ ܘܲܢܒ݂ܝܹ̈ܐ ܟܠܗܘܿܢ ܡܸܢ ܫܡܘܼܐܹܝܠ. ܘܐܲܝܠܹܝܢ ܕܡܸܢ ܒܵܬ݂ܪܹܗ ܗܘܵܘ. ܡܲܠܸܠܘ. ܘܐܲܟ݂ܪܸܙܘ ܥܲܠ ܝܵܘ̈ܡܵܬ݂ܵܐ ܗܵܢܘܿܢ.

²⁵ ܐܲܢ̄ܬܿܘܿܢ ܐܸܢܘܿܢ ܒܢܲܝ̈ܗܘܿܢ ܕܲܢܒ݂ܝܹ̈ܐ. ܘܲܕܲܕ݂ܝܵܬܹܩܹܐ ܐܲܝܕ݂ܵܐ ܕܣܵܡ ܐܲܠܵܗܵܐ ܠܐܲܒ݂ܵܗܵܬܲܢ. ܟܲܕ݂ ܐܸܡܲܪ ܠܐܲܒ݂ܪܵܗܵܡ. ܕܲܒ݂ܙܲܪܥܵܟ݂ ܢܸܬ݂ܒܲܪܟ݂ܵܢ ܟܠܗܹܝܢ ܫܲܪ̈ܒܵܬ݂ܵܐ ܕܐܲܪܥܵܐ.

²⁶ ܠܟ݂ܘܿܢ ܡܸܢ ܩܕ݂ܝܼܡ ܐܲܩܝܼܡ. ܘܫܲܕܲܪ ܐܲܠܵܗܵܐ ܠܲܒ݂ܪܹܗ ܟܲܕ݂ ܡܒܲܪܸܟ݂ ܠܟ݂ܘܿܢ. ܐܸܢ ܬܸܬ݂ܦܢܘܿܢ ܘܲܬܿܬ݂ܘܼܒ݂ܘܼܢ ܡܸܢ ܒܝܼ̈ܫܵܬ݂ܟ݂ܘܿܢ.

4

¹ ܘܟܲܕ݂ ܗܵܠܹܝܢ ܡܸܠܹ̈ܐ ܡܡܲܠܠܝܼܢ ܗ̄ܘܼܵܘ ܠܥܲܡܵܐ. ܩܵܡܘ ܥܠܲܝܗܘܿܢ ܟܵܗܢܹ̈ܐ ܘܙܲܕܘܼܩܵܝܹ̈ܐ ܘܐܲܪ̈ܟܘܿܢܹܐ ܕܗܲܝܟܠܵܐ.

² ܟܲܕ݂ ܡܸܬ݂ܚܲܡܬ݂ܝܼܢ ܗ̄ܘܼܵܘ ܥܠܲܝܗܘܿܢ ܕܡܲܠܦܝܼܢ ܠܥܲܡܵܐ. ܘܡܲܟ݂ܪܙܝܼܢ ܒܲܡܫܝܼܚܵܐ ܥܲܠ ܩܝܵܡܬܵܐ ܕܡܸܢ ܒܹܝܬ݂ ܡܝܼܬܹ̈ܐ.

³ ܘܐܲܪܡܝܼܘ ܥܠܲܝܗܘܿܢ ܐܝܼ̈ܕ݂ܲܝܵܐ. ܘܲܢܛܲܪܘ ܐܸܢܘܿܢ ܠܝܵܘܡܵܐ ܐ̄ܚܪܹܢܵܐ. ܡܛܠ ܕܲܩܪܸܒ݂ ܗ̄ܘܵܐ ܠܹܗ ܪܲܡܫܵܐ.

⁴ ܘܣܲܓܝܼܐܹ̈ܐ ܕܲܫܡܲܥܘ ܗ̄ܘܼܵܘ ܡܸܠܬ݂ܵܐ ܗܲܝܡܸܢܘ ܗ̄ܘܼܵܘ. ܘܐܼܝܬܲܝܗܘܿܢ ܗ̄ܘܼܵܘ ܒܡܸܢܝܵܢܵܐ. ܐܲܝܟ݂ ܚܲܡܫܵܐ ܐܲܠܦ̈ܝܼܢ ܓܲܒ݂ܪ̈ܝܼܢ.

⁵ ܘܲܠܝܵܘܡܵܐ ܐ̄ܚܪܹܢܵܐ. ܐܸܬ݂ܟܲܢܲܫܘ ܐܲܪ̈ܟܘܿܢܹܐ ܘܩܲܫܝܼܫܹ̈ܐ. ܘܣܵܦܪܹ̈ܐ.

⁶ ܘܐܵܦ ܚܲܢܵܢ ܪܲܒ ܟܵܗܢܹ̈ܐ ܘܩܲܝܵܦܵܐ. ܘܝܘܿܚܲܢܵܢ ܘܐܵܠܸܟ݂ܣܲܢܕܪܘܿܣ. ܘܐܲܝܠܹܝܢ ܕܐܝܼܬܲܝܗܘܿܢ ܗ̄ܘܼܵܘ ܡܸܢ ܫܲܪܒܿܬ݂ܵܐ ܕܪ̈ܲܒܲܝ ܟܵܗܢܹ̈ܐ.

⁷ ܘܟܲܕ݂ ܐܲܩܝܼܡܘ ܐܸܢܘܿܢ ܒܲܡܨܲܥܬ݂ܵܐ. ܡܫܲܐܠܝܼܢ ܗ̄ܘܼܵܘ ܠܗܘܿܢ. ܕܒܲܐܝܢܵܐ ܚܹܝܠ ܐܵܘ ܒܐܲܝܢܵܐ ܫܸܡ. ܥܒܲܕܬܿܘܢ ܗܵܕܹܐ.

⁸ ܗܵܝܕܹܝܢ ܫܸܡܥܘܿܢ ܟܹܐܦܵܐ. ܐܸܬ݂ܡܠܝܼ ܪܘܼܚܵܐ ܕܩܘܼܕ݂ܫܵܐ. ܘܐܸܡܲܪ ܠܗܘܿܢ. ܐܲܪ̈ܟܿܘܢܵܘܗܝ ܕܥܲܡܵܐ ܘܩܲܫܝܼܫܹ̈ܐ ܕܒܹܝܬ݂ ܝܼܣܪܵܝܹܠ. ܫܡܲܥܘ.

⁹ ܐܸܢ ܚܢܲܢ ܝܵܘܡܵܢܵܐ ܡܸܬܿܕ݂ܝܼܢܝܼܢ ܚ̱ܢܲܢ ܡܸܢܟ݂ܘܿܢ: ܥܲܠ ܫܲܦܝܼܪܬܵܐ ܕܲܗܘܵܬ݂ ܠܒܲܪܢܵܫܵܐ ܟܪܝܼܗܵܐ: ܕܲܒ݂ܡܵܢܵܐ ܗܵܢܵܐ ܐܸܬ݂ܐܲܣܝܼ.

¹⁰ ܗܵܕܹܐ ܬܸܬ݂ܝܼܕ݂ܲܥ ܠܟ݂ܘܿܢ ܘܲܠܟ݂ܠܹܗ ܥܲܡܵܐ ܕܝܼܣܪܵܝܹܠ. ܕܒܲܫܡܹܗ ܕܝܼܫܘܿܥ ܡܫܝܼܚܵܐ ܢܵܨܪܵܝܵܐ ܗܵܘ ܕܐܲܢ̄ܬܿܘܿܢ ܙܩܲܦܬܿܘܿܢܵܝܗܝ. ܗܵܘ ܕܐܲܩܝܼܡ ܐܲܠܵܗܵܐ ܡܸܢ ܒܹܝܬ݂ ܡܝܼܬܹ̈ܐ. ܒܹܗ ܒܗܵܘ ܗܵܐ ܩܵܐܹܡ ܗܵܢܵܐ ܩܕ݂ܵܡܲܝܟܿܘܿܢ ܟܲܕ݂ ܚܠܝܼܡ.

¹¹ ܗܵܢܵܘ ܟܹܐܦܵܐ ܕܐܲܣܠܝܼܬܿܘܢ ܐܲܢ̄ܬܿܘܿܢ ܒܲܢܵܝܹ̈ܐ. ܘܗܘܼ ܗܘܵܐ ܠܪܹܝܫ ܩܲܪܢܵܐ.

¹² ܘܠܲܝܬܿ ܒܐ̱ܢܵܫ ܐ̄ܚܪܹܝܢ ܦܘܼܪܩܵܢܵܐ. ܠܵܐ ܓܹܝܪ ܐܝܼܬ݂ ܫܡܵܐ ܐ̄ܚܪܹܢܵܐ ܬܚܹܝܬ݂ ܫܡܲܝܵܐ ܕܐܬ݂ܝܼܗܸܒ݂ ܠܲܒ݂ܢܲܝ̈ܢܵܫܵܐ. ܕܒܹܗ ܘܵܠܹܐ ܠܡܸܚܵܐ.

¹³ ܘܟܲܕ݂ ܫܡܲܥܘ ܡܸܠܬܹܗ ܕܫܸܡܥܘܿܢ ܘܲܕ݂ܝܘܿܚܲܢܵܢ. ܕܥܹܝܢ ܒܲܓ݂ܠܹܐ ܐܲܡܪܘܼܗܿ. ܐܸܣܬܲܟܲܠܘ ܕܠܵܐ ܝܵܕ݂ܥܝܼܢ ܣܸܦܪܵܐ ܘܗܸܕ݂ܝܘܼܛܹ̈ܐ ܐܸܢܘܿܢ. ܘܲܬ݂ܗܲܪܘ ܒܗܘܿܢ. ܘܐܸܫܬܵܘܕܲܥܘ ܐܸܢܘܿܢ. ܕܥܲܡ ܝܼܫܘܿܥ ܡܸܬ݂ܗܲܦܟ݂ܝܼܢ ܗ̄ܘܼܵܘ.

¹⁴ ܘܚܵܙܹܝܢ ܗ̄ܘܼܵܘ ܕܩܵܐܹܡ ܗ̄ܘܵܐ ܥܲܡܗܘܿܢ ܚܓ݂ܝܼܪܵܐ ܗܵܘ ܕܐܸܬ݂ܐܲܣܝܼ. ܘܠܵܐ ܡܸܫܟܿܚܝܼܢ ܗ̄ܘܼܵܘ ܡܸܕܸܡ ܠܡܹܐܡܲܪ ܠܘܼܩܒܲܠܗܘܿܢ.

¹⁵ ܗܵܝܕܹܝܢ ܦܩܲܕ݂ܘ. ܕܢܲܦܩܘܼܢ ܐܸܢܘܿܢ ܡܸܢ ܟܸܢܫܗܘܿܢ. ܘܐܵܡܪܝܼܢ ܗ̄ܘܼܵܘ ܚܲܕ݂ ܠܚܲܕ݂.

¹⁶ ܡܵܢܵܐ ܢܸܥܒܸܕ݂ ܠܗܘܿܢ ܠܓܲܒ݂ܪܹ̈ܐ ܗܵܠܹܝܢ. ܗܵܐ ܓܹܝܪ ܐܵܬ݂ܵܐ ܓܠܝܼܬ݂ܵܐ ܕܲܗܘܵܬ݂ ܒܐܝܼܕ݂ܲܝ̈ܗܘܿܢ. ܠܟ݂ܠܗܘܿܢ ܥܵܡܘܿܪܹ̈ܝܗܿ ܕܐܘܿܪܸܫܠܸܡ ܐܸܬ݂ܝܲܕ݂ܥܲܬ݂. ܘܠܵܐ ܡܸܫܟܿܚܝܼܢܲܢ ܕܢܸܟ݂ܦܘܼܪ.

¹⁷ ܐܸܠܵܐ ܕܠܵܐ ܝܲܬܝܼܪܵܐܝܼܬ݂ ܢܸܦܘܼܩ ܒܥܲܡܵܐ ܛܸܒܵܐ ܗܵܢܵܐ. ܢܸܬ݂ܠܲܚܲܡ ܠܗܘܿܢ. ܕܬ݂ܘܼܒ݂ ܠܵܐ ܢܡܲܠܠܘܼܢ ܒܲܫܡܵܐ ܗܵܢܵܐ ܠܐ̄ܢܵܫ ܡܸܢ ܒܢܲܝ̈ܢܵܫܵܐ.

¹⁸ ܘܲܩܪܵܘ ܐܸܢܘܿܢ ܘܦܲܩܸܕ݂ܘ ܐܸܢܘܿܢ. ܕܠܲܓ݂ܡܵܪ ܠܵܐ ܢܡܲܠܠܘܼܢ. ܘܠܵܐ ܢܲܠܦܘܼܢ ܒܫܸܡ ܝܼܫܘܿܥ.

¹⁹ ܥܢܵܘ ܫܸܡܥܘܿܢ ܟܹܐܦܵܐ ܘܝܘܿܚܲܢܵܢ. ܘܐܸܡܲܪܘ ܠܗܘܿܢ. ܐܸܢ ܟܹܐܢܵܐ ܩܕ݂ܵܡ ܐܲܠܵܗܵܐ ܕܲܠܟ݂ܘܿܢ ܢܸܫܡܲܥ ܝܲܬܿܝܼܪ ܡܸܢ ܐܲܠܵܗܵܐ. ܕܘܼܢܘ.

²⁰ ܠܵܐ ܓܹܝܪ ܡܸܫܟܿܚܝܼܢ ܚ̄ܢܲܢ. ܕܡܵܐ ܕܲܚܙܲܝܢ ܘܲܫܡܲܥܢ. ܕܠܵܐ ܢܡܲܠܠܝܼܘܗܝ.

²¹ ܘܐܸܬ݂ܠܲܚܲܡܘ ܠܗܘܿܢ. ܘܲܫܪܵܘ ܐܸܢܘܿܢ. ܠܵܐ ܓܹܝܪ ܐܸܫܟܲܚܘ ܠܗܘܿܢ ܥܸܠܬ݂ܵܐ ܕܲܢܣܝܼܡܘܿܢ ܒܪܹܫܗܘܿܢ. ܡܛܠ ܥܲܡܵܐ. ܟܠܢܵܫ ܓܹܝܪ ܡܫܲܒܲܚ ܗ̄ܘܵܐ ܠܐܲܠܵܗܵܐ ܥܲܠ ܡܸܕܸܡ ܕܲܗܘܵܐ.

²² ܝܲܬܿܝܼܪ ܓܹܝܪ ܡܸܢ ܒܲܪ ܐܲܪܒܥܝܼܢ ܫܢ̈ܝܼܢ ܐܝܼܬ݂ܵܘܗܝ ܗ̄ܘܵܐ ܓܲܒ݂ܪܵܐ ܗܵܘ. ܕܲܗܘܵܬ݂ ܒܹܗ ܗܵܕܹܐ ܐܵܬ݂ܵܐ ܕܐܵܣܝܘܼܬ݂ܵܐ.

²³ ܘܟܲܕ݂ ܐܸܫܬܿܪܝܼܘ. ܐܸܬ݂ܵܘ ܠܘܵܬ݂ ܐܲܚܲܝ̈ܗܘܿܢ. ܘܐܸܫܬܲܥܝܼܘ ܠܗܘܿܢ ܟܠܡܵܐ ܕܐܸܡܲܪܘ ܟܵܗܢܹ̈ܐ ܘܩܲܫܝܼܫܹ̈ܐ.

²⁴ ܘܗܸܢܘܿܢ ܟܲܕ݂ ܫܡܲܥܘ. ܐܲܟ݂ܚܲܕ݂ ܐܲܪܝܼܡܘ ܩܵܠܗܘܿܢ ܠܘܵܬ݂ ܐܲܠܵܗܵܐ. ܘܐܸܡܲܪܘ. ܡܵܪܝܵܐ. ܐܲܢ̄ܬܿ ܗܘܼ ܐܲܠܵܗܵܐ ܕܲܥܒܲܕܬܿ ܫܡܲܝܵܐ ܘܐܲܪܥܵܐ. ܘܝܲܡ̈ܡܹܐ. ܘܟ݂ܠ ܕܐܝܼܬ݂ ܒܗܘܿܢ.

²⁵ ܘܐܲܢ̄ܬܿ ܗܘܼ ܕܡܲܠܸܠܬܿ ܒܝܲܕ݂ ܪܘܼܚܵܐ ܕܩܘܼܕ݂ܫܵܐ ܒܦܘܼܡ ܕܵܘܝܼܕ݂ ܥܲܒ݂ܕܟ݂. ܠܡܵܢܵܐ ܪܓܲܫܘ ܥܲܡ̈ܡܹܐ. ܘܐܸܡ̈ܘܵܬ݂ܵܐ ܪ̈ܢܲܝ ܣܪܝܼܩܘܼܬ݂ܵܐ.

²⁶ ܩܵܡܘ ܡܲܠܟܹ̈ܐ ܕܐܲܪܥܵܐ ܘܫܲܠܝܼܛܵܢܹܐ. ܘܐܸܬ݂ܡܲܠܲܟܘܼ ܐܲܟ݂ܚܕ݂ܵܐ ܥܲܠ ܡܵܪܝܵܐ. ܘܥܲܠ ܡܫܝܼܚܹܗ.

²⁷ ܐܸܬ݂ܟܲܢܲܫܘ ܓܹܝܪ ܫܲܪܝܼܪܵܐܝܼܬ݂ ܒܲܡܕ݂ܝܼܢ̄ܬܵܐ ܗܵܕܹܐ. ܥܲܠ ܩܲܕܝܼܫܵܐ ܒܪܵܟ݂ ܝܼܫܘܿܥ. ܐܲܝܢܵܐ ܕܐܲܢ̄ܬܿ ܡܫܲܚܬܿ. ܗܹܪܘܿܕܸܣ ܘܦܝܼܠܵܛܘܿܣ ܥܲܡ ܥܲܡ̈ܡܹܐ ܘܟܸܢܫܵܐ ܕܝܼܣܪܵܝܹܠ.

²⁸ ܠܡܸܥܒܲܕ݂ ܟܠܡܵܐ ܕܐܝܼܕ݂ܵܟ݂ ܘܨܸܒ݂ܝܵܢܵܟ݂ ܩܲܕܸܡ ܪܫܲܡ ܕܢܸܗܘܹܐ.

²⁹ ܘܐܵܦ ܗܵܫܵܐ ܡܵܪܝܵܐ. ܚܘܼܪ. ܘܲܚܙܝܼ ܠܠܘܼܚܵܡܲܝ̈ܗܘܿܢ. ܘܗܲܒ݂ ܠܥܲܒ݂ܕܲܝ̈ܟ. ܕܥܹܝܢ ܒܲܓ݂ܠܹܐ ܢܸܗܘܘܿܢ ܡܲܟ݂ܪܙܝܼܢ ܡܸܠܬ݂ܵܟ݂.

³⁰ ܟܲܕ݂ ܐܝܼܕ݂ܵܟ݂ ܡܵܘܫܸܛ ܐܲܢ̄ܬܿ ܠܵܐܣ̈ܘܵܬ݂ܵܐ ܘܠܲܓ݂ܒܲܪ̈ܘܵܬ݂ܵܐ ܘܠܐܵܬ݂ܘܵܬ݂ܵܐ. ܕܢܸܗܘܝܵܢ ܒܲܫܡܹܗ ܕܲܒ݂ܪܵܟ݂ ܩܲܕܝܼܫܵܐ ܝܼܫܘܿܥ.

³¹ ܘܟܲܕ݂ ܒܥܵܘ ܘܐܸܬ݂ܟܲܫܲܦܘ. ܐܸܬܿܬܿܙܝܼܥ ܐܲܬ݂ܪܵܐ ܕܒܹܗ ܟܢܝܼܫܝܼܢ ܗ̄ܘܼܵܘ. ܘܐܸܬ݂ܡܠܝܼܘ ܟܠܗܘܿܢ ܒܪܘܼܚܵܐ ܕܩܘܼܕ݂ܫܵܐ. ܘܲܡܡܲܠܠܝܼܢ ܗ̄ܘܼܵܘ ܥܹܝܢ ܒܲܓ݂ܠܹܐ ܡܸܠܬ݂ܵܐ ܕܐܲܠܵܗܵܐ.

³² ܐܝܼܬ݂ ܗ̄ܘܵܐ ܕܹܝܢ ܠܟܸܢܫܵܐ ܕܐ̄ܢܵܫܵܐ. ܐܲܝܠܹܝܢ ܕܗܲܝܡܸܢܘ ܗ̄ܘܼܵܘ. ܚܕ݂ܵܐ ܢܦܸܫ. ܘܚܲܕ݂ ܪܸܥܝܵܢ. ܘܠܵܐ ܐ̄ܢܵܫ ܡܸܢܗܘܿܢ ܐܵܡܲܪ ܗ̄ܘܵܐ ܥܲܠ ܢܸܟ݂ܣܹ̈ܐ ܕܲܩܢܹܐ ܗ̄ܘܵܐ. ܕܕ݂ܝܼܠܹܗ ܐܸܢܘܿܢ. ܐܸܠܵܐ ܟܠ ܡܸܕܸܡ ܕܐܝܼܬ݂ ܗ̄ܘܵܐ ܠܗܘܿܢ. ܕܓ݂ܵܘܵܐ ܗܘܵܐ.

³³ ܘܲܒ݂ܚܲܝܠܵܐ ܪܲܒܵܐ ܡܲܣܗܕ݂ܝܼܢ ܗ̄ܘܼܵܘ ܗܸܢܘܿܢ ܫܠܝܼܚܹ̈ܐ. ܥܲܠ ܩܝܵܡܬܹܿܗ ܕܝܼܫܘܿܥ ܡܫܝܼܚܵܐ. ܘܛܲܝܒܘܼܬ݂ܵܐ ܪܲܒܬ݂ܵܐ ܐܝܼܬ݂ ܗ̄ܘܵܬ݂ ܥܲܡ ܟܠܗܘܿܢ.

³⁴ ܘܐ̄ܢܵܫ ܠܲܝܬܿ ܗ̄ܘܵܐ ܒܗܘܿܢ ܕܲܨܪܝܼܟ݂. ܐܲܝܠܹܝܢ ܓܹܝܪ ܕܲܩܢܹܝܢ ܗ̄ܘܼܵܘ ܩܘܼܪ̈ܝܵܐ ܘܒܵܬܹ̈ܐ. ܡܙܲܒܢܝܼܢ ܗ̄ܘܼܵܘ ܘܡܲܝܬܿܝܢ ܕܡܲܝ̈ܵܐ ܕܡܸܕܸܡ ܕܡܸܙܕܲܒܲܢ.

³⁵ ܘܣܵܝܡܝܼܢ ܠܘܵܬ݂ ܪܸ̈ܓ݂ܠܲܝܗܘܿܢ ܕܲܫܠܝܼܚܹ̈ܐ. ܘܡܸܬ݂ܝܼܗܸܒ݂ ܗ̄ܘܵܐ ܠܐ̄ܢܵܫ ܐ̄ܢܵܫ. ܐܲܝܟ݂ ܡܸܕܸܡ ܕܲܣܢܝܼܩ ܗ̄ܘܵܐ.

³⁶ ܝܵܘܣܸܦ ܕܹܝܢ ܗܵܘ ܕܐܬ݂ܟܲܢܝܼ ܒܲܪܢܒ݂ܵܐ ܡܸܢ ܫܠܝܼܚܹ̈ܐ: ܕܡܸܬܿܬܲܪܓܲܡ ܒܪܵܐ ܕܒ݂ܘܝܵܐܵܐ: ܠܹܘܵܝܵܐ ܡܸܢ ܐܲܬ݂ܪܵܐ ܕܩܹܘܦܪܘܿܣ.

³⁷ ܐܝܼܬ݂ ܗ̄ܘܵܐ ܠܹܗ ܩܪܝܼܬ݂ܵܐ. ܘܙܲܒܢܵܗܿ. ܘܐܲܝܬܿܝܼ ܕܡܹܝ̈ܗܿ. ܘܣܵܡ ܩܕ݂ܵܡ ܪܸ̈ܓ݂ܠܲܝܗܘܿܢ ܕܲܫܠܝܼܚܹ̈ܐ.

5

¹ ܘܓܲܒ݂ܪܵܐ ܚܲܕ݂ ܕܲܫܡܹܗ ܗܘܵܐ ܚܲܢܲܢܝܵܐ. ܥܲܡ ܐܲܢ̄ܬܿܬܹܗ ܕܲܫܡܵܗܿ ܗܘܵܐ ܫܲܦܝܼܪܵܐ. ܙܲܒܸܢ ܗ̄ܘܵܐ ܩܪܝܼܬܹܗ.

² ܘܲܫܩܲܠ ܡܸܢ ܛܝܼܡܹܝ̈ܗܿ. ܘܛܲܫܝܼ. ܟܲܕ݂ ܪܓ݂ܝܼܫܵܐ ܗ̄ܘܵܬ݂ ܒܹܗ ܐܲܢ̄ܬܿܬܹܗ. ܘܐܲܝܬܿܝܼ ܡܸܢܹܗ ܡܸܢ ܟܸܣܦܵܐ. ܘܣܵܡ ܩܕ݂ܵܡ ܪܸ̈ܓ݂ܠܲܝܗܘܿܢ ܕܲܫܠܝܼܚܹ̈ܐ.

³ ܘܐܸܡܲܪ ܠܹܗ ܫܸܡܥܘܿܢ. ܚܲܢܲܢܝܵܐ. ܡܵܢܵܘ ܕܗܵܟܲܢܵܐ ܡܠܵܐ ܣܵܛܵܢܵܐ ܠܸܒܵܟ݂. ܕܲܬܿܕ݂ܲܓܸܠ ܒܪܘܼܚܵܐ ܕܩܘܼܕ݂ܫܵܐ. ܘܲܬܿܛܲܫܹܐ ܡܸܢ ܟܸܣܦܵܐ ܕܲܕ݂ܡܹܝ̈ܗܿ ܕܲܩܪܝܼܬ݂ܵܐ.

⁴ ܠܵܐ ܗ̄ܘܵܐ ܕܝܼܠܵܟ݂ ܗܘܸܵܬ݂ ܥܲܕ݂ܠܵܐ ܬܸܙܕܲܒܲܢ. ܘܡܸܢ ܕܐܸܙܕܲܒܢܲܬ݂ ܬܘܼܒ݂ ܐܲܢ̄ܬܿ ܫܲܠܝܼܛ ܗ̄ܘܲܝܬܿ ܥܲܠ ܕܡܹܝ̈ܗܿ. ܠܡܵܢܵܐ ܣܵܡܬܿ ܒܠܸܒܵܟ݂ ܕܬܸܥܒܸܿܕ݂ ܨܒ݂ܘܼܬ݂ܵܐ ܗܵܕܹܐ. ܠܵܐ ܕܲܓܸܠܬܿ ܒܲܒܢܲܝ̈ܢܵܫܵܐ. ܐܸܠܵܐ ܒܐܲܠܵܗܵܐ.

⁵ ܘܟܲܕ݂ ܫܡܲܥ ܚܲܢܲܢܝܵܐ ܗܵܠܹܝܢ ܡܸܠܹ̈ܐ. ܢܦܲܠ. ܘܡܝܼܬ݂. ܘܲܗܘܵܬ݂ ܕܸܚܠܬ݂ܵܐ ܪܲܒܬ݂ܵܐ ܒܟ݂ܠܗܘܿܢ ܗܵܠܹܝܢ ܕܲܫܡܲܥܘ.

⁶ ܘܩܵܡܘ ܐܲܝܠܹܝܢ ܕܲܥܠܲܝܡܝܼܢ ܒܗܘܿܢ. ܘܟܲܢܫܘܿܗܝ. ܘܐܲܦܸܩܘ ܩܲܒ݂ܪܘܼܗܝ.

⁷ ܘܡܸܢ ܒܵܬܲܪ ܕܲܗܘܲܝ̈ ܬܿܠܵܬ݂ ܫܵܥܝܼ̈ܢ. ܐܵܦ ܐܲܢ̄ܬܿܬܹܗ ܥܸܠܲܬ݂. ܟܲܕ݂ ܠܵܐ ܝܵܕ݂ܥܵܐ ܗ̄ܘܵܬ݂ ܡܵܢܵܐ ܗܘܵܐ.

⁸ ܐܵܡܲܪ ܠܵܗܿ ܫܸܡܥܘܿܢ. ܐܸܡܲܪ ܠܝܼ ܐܸܢ ܒܗܵܠܹܝܢ ܕܡܲܝ̈ܵܐ ܙܲܒܸܢܬܿܘܢ ܩܪܝܼܬ݂ܵܐ. ܗܝܼ ܕܹܝܢ ܐܸܡܪܲܬ݂. ܐܹܝܢ ܒܗܵܠܹܝܢ ܕܡܲܝ̈ܵܐ.

⁹ ܐܵܡܲܪ ܠܵܗܿ ܫܸܡܥܘܿܢ. ܡܛܠ ܕܐܸܫܬܿܘܝܼܬܿܘܢ ܠܲܡܢܲܣܵܝܘܼ ܪܘܼܚܹܗ ܕܡܵܪܝܵܐ. ܗܵܐ ܪܸ̈ܓ݂ܠܲܝܗܘܿܢ ܕܩܵܒ݂ܘܿܪ̈ܵܘܗܝ ܕܒܲܥܠܹܟ݂ܝ ܒܬܲܪܥܵܐ. ܘܗܸܢܘܿܢ ܢܲܦܩܘܼܢܹܟ݂ܝ.

¹⁰ ܘܒ݂ܵܗܿ ܒܫܵܥܬ݂ܵܐ ܢܸܦܠܲܬ݂ ܩܕ݂ܵܡ ܪܸ̈ܓ݂ܠܲܝܗܘܿܢ. ܘܡܝܼܬܲܬܸ. ܘܥܲܠܘ ܥܠܲܝܡܹ̈ܐ ܗܵܢܘܿܢ ܘܐܸܫܟܿܚܘܼܗܿ ܟܲܕ݂ ܡܝܼܬ݂ܵܐ. ܘܲܩܦܲܣܘ ܐܵܘܒܸܠܘ ܩܲܒ݂ܪܘܼܗܿ ܥܲܠ ܓܸܢ̄ܒ ܒܲܥܠܵܗܿ.

¹¹ ܘܲܗܘܵܬ݂ ܕܸܚܠܬ݂ܵܐ ܪܲܒܬ݂ܵܐ ܒܟ݂ܠܵܗܿ ܥܹܕܬܵܐ. ܘܲܒ݂ܟ݂ܠܗܘܿܢ ܗܵܢܘܿܢ ܕܲܫܡܲܥܘ.

¹² ܘܗܵܘܝܵܢ ܗ̄ܘܲܝ̈ ܒܝܲܕ݂ ܫܠܝܼܚܹ̈ܐ. ܐܵܬ݂ܘܵܬ݂ܵܐ ܘܲܓ݂ܒܲܪ̈ܘܵܬ݂ܵܐ ܣܲܓܝܼ̈ܐܵܬ݂ܵܐ ܒܥܲܡܵܐ. ܘܟ݂ܠܗܘܿܢ ܟܢܝܼܫܝܼܢ ܗ̄ܘܼܵܘ ܐܲܟ݂ܚܕ݂ܵܐ ܒܐܸܣܛܘܵܐ ܕܲܫܠܹܝܡܘܿܢ.

¹³ ܘܡܸܢ ܐ̄ܢܵܫܵܐ ܐ̄ܚܪܵܢܹܐ. ܐ̄ܢܵܫ ܠܵܐ ܡܲܡܪܲܚ ܗ̄ܘܵܐ ܕܢܸܬ݂ܩܲܪܲܒ݂ ܠܘܵܬ݂ܗܘܿܢ. ܐܸܠܵܐ ܡܵܘܪܸܒ݂ ܗ̄ܘܵܐ ܠܗܘܿܢ ܥܲܡܵܐ.

¹⁴ ܘܝܲܬܿܝܼܪ ܡܸܬܿܬܵܘܣܦܝܼܢ ܗ̄ܘܼܵܘ ܐܲܝܠܹܝܢ ܕܲܡܗܲܝܡܢܝܼܢ ܗ̄ܘܼܵܘ ܒܡܵܪܝܵܐ. ܟܸܢܫܵܐ ܕܓܲܒ݂ܪܹ̈ܐ ܘܲܕ݂ܢܸܫܹ̈ܐ.

¹⁵ ܐܲܝܟܲܢܵܐ ܕܲܒ݂ܫܘܼܩܹ̈ܐ ܡܲܦܩܝܼܢ ܗ̄ܘܼܵܘ ܠܲܟ݂ܪ̈ܝܼܗܹܐ. ܟܲܕ݂ ܪܡܹܝܢ ܗ̄ܘܼܵܘ ܒܥܲܪ̈ܣܵܬ݂ܵܐ. ܕܐܸܡܲܬ݂ܝ ܕܢܸܗܘܹܐ ܐܵܬܹܐ ܫܸܡܥܘܿܢ. ܐܵܦܸܢ ܛܸܠܵܢܝܼܬܹܗ ܬܲܓܸ݁ܢ ܥܠܲܝܗܘܿܢ.

¹⁶ ܐܵܬܹܿܝܢ ܗ̄ܘܼܵܘ ܕܹܝܢ ܣܲܓܝܼܐܹ̈ܐ ܠܘܵܬ݂ܗܘܿܢ. ܡܸܢ ܡܕ݂ܝܼ̈ܢܵܬ݂ܵܐ ܐ̄ܚܪ̈ܵܢܝܵܬ݂ܵܐ ܕܲܚܕ݂ܵܪܲܝ ܐܘܿܪܸܫܠܸܡ. ܟܲܕ݂ ܡܲܝܬܿܝܢ ܗ̄ܘܼܵܘ ܟܪ̈ܝܼܗܹܐ. ܘܐܲܝܠܹܝܢ ܕܗܵܘܝܵܢ ܗ̄ܘܲܝ ܠܗܘܿܢ ܪܘܼܚܵܐ ܛܲܢ̈ܦܵܬ݂ܵܐ. ܘܡܸܬ݂ܚܲܠܡܝܼܢ ܗ̄ܘܼܵܘ ܟܠܗܘܿܢ.

¹⁷ ܘܐܸܬ݂ܡܠܝܼ ܗ̄ܘܵܐ ܚܣܵܡܵܐ ܪܲܒ ܟܵܗܢܹ̈ܐ ܘܟ݂ܠܗܘܿܢ ܕܥܲܡܹܗ. ܕܐܝܼܬܲܝܗܘܿܢ ܗ̄ܘܼܵܘ ܡܸܢ ܝܘܼܠܦܵܢܵܐ ܕܙܲܕܘܼܩܵܝܹ̈ܐ.

¹⁸ ܘܐܲܪܡܝܼܘ ܐܝܼ̈ܕ݂ܲܝܵܐ ܥܲܠ ܫܠܝܼܚܹ̈ܐ. ܘܐܸܚܲܕ݂ܘ ܐܸܣܲܪܘ ܐܸܢܘܿܢ ܒܹܝܬ݂ ܐܲܣܝܼܪܹ̈ܐ.

¹⁹ ܗܵܝܕܹܝܢ ܒܠܸܠܝܵܐ ܡܲܠܲܐܟ݂ܵܐ ܕܡܵܪܝܵܐ. ܦܬܲܚ ܬܲܪܥܵܐ ܕܒܹܝܬ݂ ܐܲܣܝܼܪܹ̈ܐ. ܘܐܲܦܸܩ ܐܸܢܘܿܢ. ܘܐܸܡܲܪ ܠܗܘܿܢ.

²⁰ ܙܸܠܘ ܩܘܼܡܘ ܒܗܲܝܟܠܵܐ. ܘܡܲܠܸܠܘ ܠܥܲܡܵܐ ܟܠܗܹܝܢ ܡܸܠܹ̈ܐ ܗܵܠܹܝܢ ܕܚܲܝܹ̈ܐ.

²¹ ܘܲܢܦܲܩܘ ܥܸܕܵܢ ܫܲܦܪܵܐ. ܘܥܲܠܘ ܠܗܲܝܟܠܵܐ. ܘܡܲܠܦܝܼܢ ܗ̄ܘܼܵܘ. ܪܲܒ ܟܵܗܢܹ̈ܐ ܕܹܝܢ ܘܐܲܝܠܹܝܢ ܕܥܲܡܹܗ. ܩܪܵܘ ܠܚܲܒ݂ܪ̈ܲܝܗܘܿܢ ܘܲܠܩܲܫܝܼܫܹ̈ܐ ܕܝܼܣܪܵܝܹܠ. ܘܫܲܕܲܪܘ ܠܒܹܝܬ݂ ܐܲܣܝܼܪܹ̈ܐ ܕܢܲܝܬܿܘܢ ܐܸܢܘܿܢ ܠܲܫܠܝܼܚܹ̈ܐ.

²² ܘܟܲܕ݂ ܐܸܙܲܠܘ ܐܲܝܠܹܝܢ ܕܐܫܬܲܕܲܪܘ ܡܸܢܗܘܿܢ. ܠܵܐ ܐܸܫܟܲܚܘ ܐܸܢܘܿܢ ܒܹܝܬ݂ ܐܲܣܝܼܪܹ̈ܐ. ܘܲܗܦܲܟ݂ܘ ܐܸܬ݂ܵܘ.

²³ ܐܵܡܪܝܼܢ. ܐܸܫܟܲܚܢ ܒܹܝܬ݂ ܐܲܣܝܼܪܹ̈ܐ ܕܐܲܚܝܼܕ݂ ܙܗܝܼܪܵܐܝܼܬ݂. ܘܐܵܦ ܠܢܵܛܘܿܪܹ̈ܐ ܕܩܵܝܡܝܼܢ ܥܲܠ ܬܲܪ̈ܥܹܐ. ܘܲܦܬܲܚܢ. ܘܐ̱ܢܵܫ ܠܵܐ ܐܸܫܟܲܚܢ ܬܲܡܵܢ.

²⁴ ܘܟܲܕ݂ ܫܡܲܥܘ ܗܵܠܹܝܢ ܡܸܠܹ̈ܐ ܪ̈ܲܒܲܝ ܟܵܗܢܹ̈ܐ ܘܐܲܪ̈ܟܘܿܢܹܐ ܕܗܲܝܟܠܵܐ. ܬܵܘܝܼܪܝܼܢ ܗ̄ܘܼܵܘ ܥܠܲܝܗܘܿܢ. ܘܡܸܬ݂ܚܲܫܒ݂ܝܼܢ ܗ̄ܘܼܵܘ. ܕܡܵܢܵܐ ܗܝܼ ܗܵܕܹܐ.

²⁵ ܘܐܸܬ݂ܵܐ ܐ̄ܢܵܫ ܐܵܘܕܲܥ ܐܸܢܘܿܢ. ܕܗܵܢܘܿܢ ܓܲܒ݂ܪܹ̈ܐ ܕܲܚܒܲܫܬܿܘܢ ܒܹܝܬ݂ ܐܲܣܝܼܪܹ̈ܐ. ܗܵܐ ܩܵܝܡܝܼܢ ܒܗܲܝܟܠܵܐ. ܘܡܲܠܦܝܼܢ ܠܥܲܡܵܐ.

²⁶ ܗܵܝܕܹܝܢ ܐܸܙܲܠܘ ܐܲܪ̈ܟܘܿܢܹܐ ܥܲܡ ܕܲܚܫܹ̈ܐ ܕܢܲܝܬܿܘܢ ܐܸܢܘܿܢ. ܠܵܐ ܒܲܩܛܝܼܪܵܐ. ܕܵܚܠܝܼܢ ܗ̄ܘܼܵܘ ܓܹܝܪ. ܕܲܠܡܵܐ ܢܸܪܓܘܿܡ ܐܸܢܘܿܢ ܥܲܡܵܐ.

²⁷ ܘܟܲܕ݂ ܐܲܝܬܿܝܼܘ ܐܸܢܘܿܢ. ܐܲܩܝܼܡܘ ܐܸܢܘܿܢ ܩܕ݂ܵܡ ܟܠܹܗ ܟܸܢܫܵܐ. ܘܐܲܩܸܦ ܗ̄ܘܵܐ ܪܲܒ ܟܵܗܢܹ̈ܐ ܠܡܹܐܡܲܪ ܠܗܘܿܢ.

²⁸ ܠܵܐ ܗ̄ܘܵܐ ܡܸܦܩܲܕ݂ ܦܩܲܕ݂ܢ ܗ̄ܘܲܝܢ ܠܟ݂ܘܿܢ. ܕܲܠܐ̄ܢܵܫ ܠܵܐ ܬܲܠܦܘܼܢ ܒܲܫܡܵܐ ܗܵܢܵܐ. ܐܲܢ̄ܬܿܘܿܢ ܕܹܝܢ. ܗܵܐ ܡܠܲܝܬܿܘܿܢܵܗܿ ܠܐܘܿܪܸܫܠܸܡ ܡܸܢ ܝܘܼܠܦܵܢܟ݂ܘܿܢ. ܘܨܵܒܹܝܢ ܐܢ̄ܬܘܿܢ ܕܬܲܝܬܿܘܢ ܥܠܲܝܢ ܕܡܹܗ ܕܓܲܒ݂ܪܵܐ ܗܵܢܵܐ.

²⁹ ܥܢܵܐ ܫܸܡܥܘܿܢ ܥܲܡ ܫܠܝܼܚܹ̈ܐ. ܘܐܸܡܲܪ ܠܗܘܿܢ. ܠܐܲܠܵܗܵܐ ܘܵܠܹܐ ܠܡܸܬܿܛܦܵܣܘܼ ܝܲܬܿܝܼܪ ܡܸܢ ܕܠܲܒ݂ܢܲܝ̈ܢܵܫܵܐ.

³⁰ ܐܲܠܵܗܵܐ ܕܐܲܒ݂ܵܗܵܬܲܢ ܐܲܩܝܼܡ ܠܝܼܫܘܿܥ. ܐܲܝܢܵܐ ܕܐܲܢ̄ܬܿܘܿܢ ܩܛܲܠܬܿܘܢ. ܟܲܕ݂ ܬܿܠܲܝܬܿܘܿܢܵܝܗܝ ܥܲܠ ܩܲܝܣܵܐ.

³¹ ܠܹܗ ܠܗܵܢܵܐ ܐܲܩܝܼܡ ܐܲܠܵܗܵܐ ܪܹܫܵܐ ܘܡܲܚܝܵܢܵܐ. ܘܐܲܪܝܼܡܹܗ ܒܝܲܡܝܼܢܹܗ. ܐܲܝܟ݂ ܕܢܸܬܸܿܠ ܬܝܵܒܘܼܬ݂ܵܐ. ܘܫܘܼܒ݂ܩܵܢ ܚܛܵܗܹ̈ܐ. ܠܝܼܣܪܵܝܹܠ.

³² ܘܲܚܢܲܢ ܣܵܗܕܹ̈ܐ ܚ̄ܢܲܢ ܕܡܸܠܹ̈ܐ ܗܵܠܹܝܢ. ܘܪܘܼܚܵܐ ܕܩܘܼܕ݂ܫܵܐ. ܗܵܘ ܕܝܲܗ̄ܒ݂ ܐܲܠܵܗܵܐ ܠܐܲܝܠܹܝܢ ܕܲܡܗܲܝܡܢܝܼܢ ܒܹܗ.

³³ ܘܟܲܕ݂ ܫܡܲܥܘ ܗ̄ܘܼܵܘ ܗܵܠܹܝܢ ܡܸܠܹ̈ܐ. ܡܸܬ݂ܓܵܘܙܠܝܼܢ ܗ̄ܘܼܵܘ ܒܪܘܼܓ݂ܙܵܐ. ܘܡܸܬ݂ܚܲܫܒ݂ܝܼܢ ܗ̄ܘܼܵܘ ܠܡܸܩܛܲܠ ܐܸܢܘܿܢ.

³⁴ ܘܩܼܵܡ ܗ̄ܘܵܐ ܚܲܕ݂ ܡܸܢ ܦܪ̈ܝܼܫܹܐ ܕܲܫܡܹܗ ܗܘܵܐ ܓܲܡܠܝܼܐܹܝܠ ܡܲܠܸܦ ܢܵܡܘܿܣܵܐ ܘܲܡܝܲܩܲܪ ܡܸܢ ܟܠܹܗ ܥܲܡܵܐ. ܘܲܦܩܲܕ݂ ܕܢܲܦܩܘܼܢ ܐܸܢܘܿܢ ܠܲܫܠܝܼܚܹ̈ܐ ܠܒܲܪ ܥܸܕܵܢܵܐ ܙܥܘܿܪܵܐ.

³⁵ ܘܐܸܡܲܪ ܠܗܘܿܢ. ܓܲܒ݂ܪܹ̈ܐ ܒܢܲܝ̈ ܝܼܣܪܵܝܹܠ. ܐܸܙܕܲܗ̄ܪܘ ܒܢܲܦ̮ܫܟ݂ܘܿܢ ܘܲܚܙܵܘ ܡܵܢܵܐ ܘܵܠܹܐ ܠܟ݂ܘܿܢ ܠܡܸܥܒܲܕ݂ ܥܲܠ ܗܵܠܹܝܢ ܐ̄ܢܵܫܵܐ.

³⁶ ܡܸܢ ܩܕ݂ܵܡ ܓܹܝܪ ܗܵܢܵܐ ܙܲܒ݂ܢܵܐ. ܩܵܡ ܗ̄ܘܵܐ ܬܵܘܕܵܐ. ܘܐܸܡܲܪ ܥܲܠ ܢܲܦ̮ܫܹܗ ܕܡܸܕܸܡ ܗܘܼ ܪܲܒ. ܘܐܸܙܲܠܘ ܒܵܬ݂ܪܹܗ ܐܲܝܟ݂ ܐܲܪܒܲܥܡܵܐܐ ܓܲܒ݂ܪ̈ܝܼܢ. ܘܗܘܼ ܐܸܬ݂ܩܛܸܠ. ܘܐܲܝܠܹܝܢ ܕܐܵܙܠ̄ܝܼܢ ܗ̄ܘܼܵܘ ܒܵܬ݂ܪܹܗ. ܐܸܬ݂ܒܲܕܲܪܘ. ܘܲܗܘܵܘ ܐܲܝܟ݂ ܠܵܐ ܡܸܕܸܡ.

³⁷ ܘܩܵܡ ܡܸܢ ܒܵܬ݂ܪܹܗ ܝܼܗܘܼܕ݂ܵܐ ܓܠܝܼܠܵܝܵܐ. ܒܝܵܘ̈ܡܵܬ݂ܵܐ ܕܡܸܬ݂ܟܲܬ݂ܒܝܼܢ ܗ̄ܘܼܵܘ ܐ̄ܢܵܫܵܐ ܒܲܟ݂ܣܸܦ ܪܹܫܵܐ. ܘܐܲܣܛܝܼ ܥܲܡܵܐ ܣܲܓܿܝܼܐܵܐ ܒܵܬ݂ܪܹܗ. ܘܗܘܼ ܡܝܼܬ݂. ܘܟ݂ܠܗܘܿܢ ܐܲܝܠܹܝܢ ܕܐܵܙܠ̄ܝܼܢ ܗ̄ܘܼܵܘ ܒܵܬ݂ܪܹܗ. ܐܸܬ݂ܒܲܕܲܪܘ.

³⁸ ܘܗܵܫܵܐ ܐܵܡܲܪ ܐ̄ܢܵܐ ܠܟ݂ܘܿܢ. ܦܪܘܿܩܘ ܠܟ݂ܘܿܢ ܡܸܢ ܗܵܠܹܝܢ ܐ̄ܢܵܫܵܐ. ܘܲܫܒ݂ܘܿܩܘ ܠܗܘܿܢ. ܕܐܸܢ ܗܘܼ ܕܡܸܢ ܒܢܲܝ̈ܢܵܫܵܐ ܐܝܼܬܹܝܗܿ ܗܵܕܹܐ ܡܲܚܫܲܒ݂ܬܵܐ. ܘܗܵܢܵܐ ܥܒ݂ܵܕ݂ܵܐ. ܡܸܫܬܪܹܝܢ ܘܥܵܒ݂ܪܝܼܢ.

³⁹ ܐܸܢ ܕܹܝܢ ܡܸܢ ܐܲܠܵܗܵܐ ܗ̄ܘܼ. ܠܵܐ ܡܵܛܝܵܐ ܒܐܝܼܕ݂ܲܝ̈ܟܿܘܿܢ ܕܲܬ݂ܒܲܛܠܘܼܢܵܝܗܝ. ܕܲܠܡܵܐ ܬܸܫܬܲܟ݂ܚܘܼܢ ܠܟ݂ܘܿܢ. ܕܠܘܼܩܒܲܠ ܐܲܠܵܗܵܐ ܩܵܝܡܝܼܢ ܐܢ̄ܬܘܿܢ.

⁴⁰ ܘܐܸܬܿܛܦܝܼܣܘ ܠܹܗ. ܘܲܩܪܵܘ ܐܸܢܘܿܢ ܠܲܫܠܝܼܚܹ̈ܐ. ܘܢܲܓܸܕ݂ܘ ܐܸܢܘܿܢ. ܘܦܲܩܸܕ݂ܘ ܐܸܢܘܿܢ. ܕܠܵܐ ܢܸܗܘܘܿܢ ܡܡܲܠܠܝܼܢ ܒܲܫܡܵܐ ܕܝܼܫܘܿܥ. ܘܲܫܪܵܘ ܐܸܢܘܿܢ.

⁴¹ ܘܲܢܦܲܩܘ ܡܸܢ ܩܕ݂ܵܡܲܝܗܘܿܢ. ܟܲܕ݂ ܚܵܕ݂ܝܢ ܕܲܫܘܵܘ ܗ̄ܘܼܵܘ ܡܛܠ ܫܡܵܐ ܕܢܸܨܛܲܥܪܘܼܢ.

⁴² ܘܠܵܐ ܫܵܠܹܝܢ ܗ̄ܘܼܵܘ ܟܠܝܘܿܡ ܠܡܲܠܵܦܘܼ ܒܗܲܝܟܠܵܐ. ܘܲܒ݂ܒܲܝܬܵܐ. ܘܠܲܡܣܲܒܵܪܘܼ ܥܲܠ ܡܵܪܲܢ ܝܼܫܘܿܥ ܡܫܝܼܚܵܐ.

6

¹ ܘܲܒ݂ܗܘܿܢ ܒܝܵܘ̈ܡܵܬ݂ܵܐ ܗܵܢܘܿܢ. ܟܲܕ݂ ܣܓ݂ܝܼܘ ܬܲܠܡܝܼܕܹ̈ܐ. ܪܲܛܸܢܘ ܗ̄ܘܼܵܘ ܝܵܘܢܵܝܹ̈ܐ ܬܲܠܡܝܼܕܹ̈ܐ ܥܲܠ ܥܸܒ݂ܪܵ̈ܝܹܐ. ܕܡܸܬ݂ܒܲܣܝܵܢ ܗ̄ܘܲܝ̈ ܐܲܪ̈ܡܠܵܬ݂ܗܘܿܢ ܒܬܸܫܡܸܫܬܵܐ ܕܟ݂ܠܝܘܿܡ.

² ܘܲܩܪܵܘ ܬܪܸܥܣܲܪ ܫܠܝܼܚܹ̈ܐ ܠܟ݂ܠܹܗ ܟܸܢܫܵܐ ܕܬܲܠܡܝܼܕܹ̈ܐ. ܘܐܸܡܲܪܘ ܠܗܘܿܢ. ܠܵܐ ܫܲܦܝܼܪ ܕܢܸܫܒܘܼܩ ܡܸܠܬ݂ܵܐ ܕܐܲܠܵܗܵܐ. ܘܲܢܫܲܡܸܫ ܦܵܬ݂ܘܿܪܹ̈ܐ.

³ ܒܨܵܘ ܗܵܟܹܝܠ ܐܲܚܲܝ̈. ܘܲܓ݂ܒ݂ܵܘ ܫܲܒ݂ܥܵܐ ܓܲܒ݂ܪ̈ܝܼܢ ܡܸܢܟ݂ܘܿܢ. ܕܐܝܼܬ݂ ܥܠܲܝܗܘܿܢ ܣܵܗܕܘܼܬ݂ܵܐ. ܘܲܡܠܹܝܢ ܪܘܼܚܹܗ ܕܡܵܪܝܵܐ ܘܚܸܟ݂ܡܬ݂ܵܐ. ܘܲܢܩܝܼܡ ܐܸܢܘܿܢ ܥܲܠ ܗܵܕܹܐ ܨܒ݂ܘܼܬ݂ܵܐ.

⁴ ܘܲܚܢܲܢ. ܢܸܗܘܹܐ ܐܲܡܝܼܢܝܼܢ ܒܲܨܠܘܿܬ݂ܵܐ. ܘܲܒ݂ܬܸܫܡܸܫܬܵܐ ܕܡܸܠܬ݂ܵܐ.

⁵ ܘܫܸܦܪܲܬ݂ ܗܵܕܹܐ ܡܸܠܬ݂ܵܐ. ܩܕ݂ܵܡ ܟܠܹܗ ܥܲܡܵܐ. ܘܲܓ݂ܒ݂ܵܘ ܠܐܸܣܛܲܦܵܢܘܿܣ. ܓܲܒ݂ܪܵܐ ܕܲܡܠܹܐ ܗ̄ܘܵܐ ܗܲܝܡܵܢܘܼܬ݂ܵܐ. ܘܪܘܼܚܵܐ ܕܩܘܼܕ݂ܫܵܐ. ܘܲܠܦܝܼܠܝܼܦܘܿܣ. ܘܠܲܦܪܵܟ݂ܵܪܘܿܣ. ܘܲܠܢܝܼܩܵܢܘܿܪ. ܘܲܠܛܝܼܡܘܿܢ. ܘܲܠܦܲܪܡܹܢܵܐ. ܘܲܠܢܝܼܩܵܠܹܐܘܿܣ. ܓܝܼܘܼܪܵܐ ܐܲܢܛܝܘܿܟ݂ܵܝܵܐ.

⁶ ܗܵܠܹܝܢ ܩܵܡܘ ܩܕ݂ܵܡܲܝܗܘܿܢ ܕܲܫܠܝܼܚܹ̈ܐ. ܘܟܲܕ݂ ܨܲܠܝܼܘ. ܣܵܡܘ ܥܠܲܝܗܘܿܢ ܐܝܼܕ݂ܵܐ.

⁷ ܘܡܸܠܬܹܗ ܕܐܲܠܵܗܵܐ ܪܵܒ݂ܝܵܐ ܗ̄ܘܵܬ݂. ܘܣܵܓܹܐ ܗ̄ܘܵܐ ܡܸܢܝܵܢܵܐ ܕܬܲܠܡܝܼܕܹ̈ܐ ܒܐܘܿܪܸܫܠܸܡ ܛܵܒ݂. ܘܥܲܡܵܐ ܣܲܓܿܝܼܐܵܐ ܡܸܢ ܝܗ̄ܘܼܕ݂ܵܝܹ̈ܐ ܡܸܫܬܿܡܲܥ ܗ̄ܘܵܐ ܠܗܲܝܡܵܢܘܼܬ݂ܵܐ.

⁸ ܐܸܣܛܲܦܵܢܘܿܣ ܕܹܝܢ. ܡܠܹܐ ܗ̄ܘܵܐ ܛܲܝܒܘܼܬ݂ܵܐ. ܘܚܲܝܠܵܐ. ܘܥܵܒܹܿܕ݂ ܗ̄ܘܵܐ ܐܵܬ݂ܘܵܬ݂ܵܐ. ܘܬܸܕ݂ܡܪ̈ܵܬ݂ܵܐ ܒܥܲܡܵܐ.

⁹ ܘܩܵܡܘ ܗ̄ܘܼܵܘ ܐ̄ܢܵܫܵܐ ܡܸܢ ܟܢܘܼܫܬܵܐ ܕܡܸܬ݂ܩܲܪܝܵܐ ܕܠܹܝܒܲܪܛܝܼܢܘܿ. ܘܩܹܘܼܪ̈ܝܼܢܵܝܹܐ (ܩܹܘܼܪ̈ܝܼܢܵܝܹܐ) ܘܐܵܠܸܟ݂ܣܲܢܕܪ̈ܵܝܹܐ. ܘܲܕ݂ܡܸܢ ܩܝܼܠܝܼܩܝܼܵܐ ܘܡܸܢ ܐܵܣܝܼܵܐ. ܘܕ݂ܵܪܫܝܼܢ ܗ̄ܘܼܵܘ ܥܲܡ ܐܸܣܛܲܦܵܢܘܿܣ.

¹⁰ ܘܠܵܐ ܡܸܫܟܿܚܝܼܢ ܗ̄ܘܼܵܘ ܠܲܡܩܵܡ ܠܘܼܩܒܲܠ ܚܸܟ݂ܡܬ݂ܵܐ ܘܪܘܼܚܵܐ. ܕܲܡܡܲܠܠܵܐ ܗ̄ܘܵܬ݂ ܒܹܗ.

¹¹ ܗܵܝܕܹܝܢ ܫܲܕܲܪܘ ܠܓܲܒ݂ܪܹ̈ܐ. ܘܐܲܠܸܦܘ ܐܸܢܘܿܢ ܕܢܹܐܡܪܘܼܢ. ܕܲܚܢܲܢ ܫܡܲܥܢܵܝܗܝ ܕܐܵܡܲܪ ܡܸܠܹ̈ܐ ܕܓ݂ܘܕܦܵܐ ܥܲܠ ܡܘܼܫܹܐ. ܘܥܲܠ ܐܲܠܵܗܵܐ.

¹² ܘܲܫܓܲܫܘ ܠܥܲܡܵܐ ܘܲܠܩܲܫܝܼܫܹ̈ܐ. ܘܲܠܣܵܦܪܹ̈ܐ. ܘܐܸܬ݂ܵܘ. ܘܩܵܡܘ ܥܠܵܘܗܝ. ܘܲܚܛܲܦܘ ܐܲܝܬܿܝܘܼܗܝ ܠܡܸܨܥܲܬ݂ ܟܸܢܫܵܐ.

¹³ ܘܐܲܩܝܼܡܘ ܣܵܗܕܹ̈ܐ ܕܲܓܵܠܹܐ ܕܐܵܡܪܝܼܢ. ܗܵܢܵܐ ܓܲܒ݂ܪܵܐ. ܠܵܐ ܫܵܠܹܐ ܠܲܡܡܲܠܵܠܘܼ ܡܸܠܹ̈ܐ ܠܘܼܩܒܲܠ ܢܵܡܘܿܣܵܐ. ܘܥܲܠ ܐܲܬ݂ܪܵܐ ܗܵܢܵܐ ܩܲܕܝܼܫܵܐ.

¹⁴ ܚܢܲܢ ܓܹܝܪ ܫܡܲܥܢܵܝܗܝ. ܕܐܵܡܲܪ. ܕܝܼܫܘܿܥ ܗܵܢܵܐ ܢܵܨܪܵܝܵܐ. ܗܘܼ ܢܸܫܪܹܝܘܗܝ ܠܐܲܬ݂ܪܵܐ ܗܵܢܵܐ. ܘܲܢܚܲܠܸܦ ܥܝܵܕܹ̈ܐ ܕܐܲܫܠܸܡ ܠܟ݂ܘܿܢ ܡܘܼܫܹܐ.

¹⁵ ܘܚܵܪܘ ܒܹܗ ܟܠܗܘܿܢ ܗܵܢܘܿܢ ܕܝܵܬ݂ܒܝܼܢ ܗ̄ܘܼܵܘ ܒܲܟ݂ܢ̈ܘܼܫܵܬ݂ܵܐ. ܘܲܚܙܵܘ ܦܲܪܨܘܿܦܹܗ. ܐܲܝܟ݂ ܦܲܪܨܘܿܦܵܐ ܕܡܲܠܲܐܟ݂ܵܐ.

7

¹ ܘܫܲܐܠܹܗ ܪܲܒ ܟܵܗܢܹ̈ܐ ܕܐܸܢ ܗ̄ܘܼ ܕܗܵܠܹܝܢ ܗܵܟܲܢܵܐ ܐܸܢܹܝܢ.

² ܗܘܼ ܕܹܝܢ ܐܸܡܲܪ. ܓܲܒ݂ܪܹ̈ܐ ܐܲܚܲܝ̈ܢ ܘܐܲܒ݂ܵܗܵܬܲܢ. ܫܡܲܥܘ. ܐܲܠܵܗܵܐ ܕܬܸܫܒܿܘܿܚܬܵܐ ܐܸܬ݂ܚܙܝܼ ܠܐܲܒ݂ܘܼܢ ܐܲܒ݂ܪܵܗܵܡ. ܟܲܕ݂ ܐܝܼܬ݂ܵܘܗܝ ܗ̄ܘܵܐ ܒܹܝܬ݂ ܢܲܗܪܹ̈ܝܢ. ܥܲܕ݂ ܠܵܐ ܢܹܐܬܹܐ ܢܸܥܡܲܪ ܒܚܵܪܵܢ.

³ ܘܐܸܡܲܪ ܗ̄ܘܵܐ ܠܹܗ. ܕܦܘܿܩ ܡܸܢ ܐܲܪܥܵܟ݂. ܘܡܸܢ ܠܘܵܬ݂ ܒܢܲܝ̈ ܛܘܼܗܡܵܟ݂. ܘܬ݂ܵܐ ܠܐܲܪܥܵܐ ܐܲܝܕ݂ܵܐ ܕܐܹܚܵܘܹܝܟ݂.

⁴ ܘܗܵܝܕܹܝܢ ܢܦܲܩ ܐܲܒ݂ܪܵܗܵܡ ܡܸܢ ܐܲܪܥܵܐ ܕܟܲܠܕ݂ܵܝܹ̈ܐ. ܘܐܸܬ݂ܵܐ ܥܡܲܪ ܒܚܵܪܵܢ. ܘܡܸܢ ܬܲܡܵܢ ܟܲܕ݂ ܡܝܼܬ݂ ܐܲܒ݂ܘܼܗܝ. ܫܲܢܝܹܗ ܐܲܠܵܗܵܐ ܠܐܲܪܥܵܐ ܗܵܕܹܐ. ܕܒ݂ܵܗܿ ܥܵܡܪܝܼܢ ܐܢ̄ܬܘܿܢ ܝܵܘܡܵܢܵܐ.

⁵ ܘܠܵܐ ܝܲܗ̄ܒ݂ ܠܹܗ ܝܵܪܬܘܼܬ݂ܵܐ ܒܵܗܿ. ܐܵܦ ܠܵܐ ܕܘܼܪܟܿܬ݂ܵܐ ܕܪܸܓ݂ܠܵܐ. ܘܐܸܫܬܵܘܕܝܼ ܗ̄ܘܵܐ ܕܢܸܬܿܠܝܼܗܿ ܠܹܗ ܐܲܝܟ݂ ܕܲܠܡܹܐܪܬ݂ܵܗܿܠܹܗ. ܘܲܠܙܲܪܥܹܗ. ܟܲܕ݂ ܠܲܝܬܿ ܗ̄ܘܵܐ ܠܹܗ ܒܪܵܐ.

⁶ ܘܡܲܠܸܠ ܗ̄ܘܵܐ ܥܲܡܹܗ ܐܲܠܵܗܵܐ ܟܲܕ݂ ܐܵܡܲܪ ܠܹܗ. ܕܢܸܗܘܹܐ ܙܲܪܥܵܟ݂ ܬܵܘܬܵܒ݂ܵܐ ܒܐܲܪܥܵܐ ܢܘܼܟ݂ܪܵܝܬܵܐ. ܘܲܢܫܲܥܒܕ݂ܘܼܢܵܝܗܝ. ܘܢܲܒ݂ܐܫܘܿܢ ܠܹܗ ܐܲܪܒܲܥܡܵܐܐ ܫܢ̈ܝܼܢ.

⁷ ܘܲܠܥܲܡܵܐ ܕܢܸܦܠܚܘܼܢ ܥܲܒ݂ܕܘܬ݂ܵܐ. ܐܸܕܿܘܼܢܝܼܘܗܝ ܐܸܢܵܐ. ܐܵܡܲܪ ܐܲܠܵܗܵܐ. ܘܡܸܢ ܒܵܬܲܪ ܗܵܠܹܝܢ. ܢܸܦܩܘܼܢܘܢܸܦܠܚܘܼܢ ܠܝܼ ܒܐܲܬ݂ܪܵܐ ܗܵܢܵܐ.

⁸ ܘܝܲܗ̄ܒ݂ ܠܹܗ ܕܝܼܵܬܹܩܹܐ ܕܲܓ݂ܙܘܼܪܬܵܐ. ܘܗܵܝܕܹܝܢ ܐܵܘܠܸܕ݂ ܠܐܝܼܣܚܵܩ. ܘܓܲܙܪܹܗ ܒܝܵܘܡܵܐ ܬܡܝܼܢܵܝܵܐ. ܘܐܝܼܣܚܵܩ ܐܵܘܠܸܕ݂ ܠܝܲܥܩܘܿܒ݂. ܘܝܲܥܩܘܿܒ݂ ܐܵܘܠܸܕ݂ ܠܲܬ݂ܪܸܥܣܲܪ ܐܲܒ݂ܵܗܵܬܲܢ.

⁹ ܘܗܸܢܘܿܢ ܐܲܒ݂ܵܗܵܬܲܢ ܛܲܢܘ ܒܝܵܘܣܸܦ. ܘܙܲܒܢܘܼܗܝ ܠܡܸܨܪܹܝܢ. ܘܐܲܠܵܗܵܐ ܥܲܡܹܗ ܗܘܵܐ.

¹⁰ ܘܦܲܪܩܹܗ ܗ̄ܘܵܐ ܡܸܢ ܟܠܗܘܿܢ ܐܘܼܠܨܵܢܵܘ̈ܗܝ. ܘܝܲܗ̄ܒ݂ ܠܹܗ ܛܲܝܒܘܼܬ݂ܵܐ ܘܚܸܟ݂ܡܬ݂ܵܐ. ܩܕ݂ܵܡ ܦܸܪܥܘܿܢ ܡܲܠܟܵܐ ܕܡܸܨܪܹܝܢ. ܘܐܲܩܝܼܡܹܗ ܪܹܫܵܐ ܥܲܠ ܡܸܨܪܹܝܢ. ܘܥܲܠ ܒܲܝܬܹܿܗ ܟܠܹܗ.

¹¹ ܘܲܗܘܵܐ ܟܲܦܢܵܐ ܘܽܐܘܠܨܵܢܵܐ ܪܲܒܵܐ ܒܟ݂ܠܵܗܿ ܡܸܨܪܹܝܢ. ܘܒܲܐܪܥܵܐ ܕܲܟ݂ܢܲܥܢ. ܘܠܲܝܬܿ ܗ̄ܘܵܐ ܠܗܘܿܢ ܠܡܸܣܒܲܥ ܠܐܲܒ݂ܵܗܵܬܲܢ.

¹² ܘܟܲܕ݂ ܫܡܲܥ ܝܲܥܩܘܿܒ݂ ܕܐܝܼܬ݂ ܥܒ݂ܘܪܵܐ ܒܡܸܨܪܹܝܢ. ܫܲܕܲܪ ܗ̄ܘܵܐ ܠܐܲܒ݂ܵܗܵܬܲܢ ܠܘܼܩܕ݂ܲܡ.

¹³ ܘܟܲܕ݂ ܐܸܙܲܠܘ ܕܬܲܪܬܹܿܝܢ ܙܲܒ݂ܢ̈ܝܼܢ. ܐܵܘܕܲܥ ܝܵܘܣܸܦ ܢܲܦ̮ܫܹܗ ܠܐܲܚܵܘ̈ܗܝ. ܘܐܸܬ݂ܝܼܕ݂ܲܥ ܠܦܸܪܥܘܿܢ ܛܘܼܗܡܹܗ ܕܝܵܘܣܸܦ.

¹⁴ ܘܫܲܕܲܪ ܗ̄ܘܵܐ ܝܵܘܣܸܦ. ܘܐܲܝܬܿܝܹܗ ܠܐܲܒ݂ܘܼܗܝ ܝܲܥܩܘܿܒ݂. ܘܲܠܟ݂ܠܹܗ ܛܘܼܗܡܹܗ. ܘܗܵܘܹܝܢ ܗ̄ܘܼܵܘ ܒܡܸܢܝܵܢܵܐ. ܫܲܒ݂ܥܝܼܢ ܘܚܲܡܸܫ ܢܲܦ̮ܫܵܢ.

¹⁵ ܘܲܢܚܸܬ݂ ܝܲܥܩܘܿܒ݂ ܠܡܸܨܪܹܝܢ. ܘܡܝܼܬ݂ ܬܲܡܵܢ ܗܘܼ ܘܐܲܒ݂ܵܗܵܬܲܢ.

¹⁶ ܘܐܸܫܬܲܢܝܼ ܠܲܫܟܹܝܡ. ܘܐܸܬܿܬܿܣܝܼܡ ܒܩܲܒ݂ܪܵܐ ܕܲܙܒܲܢ ܗ̄ܘܵܐ ܐܲܒ݂ܪܵܗܵܡ ܒܟܸܣܦܵܐ. ܡܸܢ ܒܢܲܝ̈ ܚܡܘܿܪ.

¹⁷ ܘܟܲܕ݂ ܡܲܛܝܼ ܗ̄ܘܵܐ ܙܲܒ݂ܢܵܐ ܕܡܸܕܸܡ ܕܐܸܫܬܵܘܕܝܼ ܗ̄ܘܵܐ ܒܡܵܘ̈ܡܵܬ݂ܵܐ ܐܲܠܵܗܵܐ ܠܐܲܒ݂ܪܵܗܵܡ. ܣܓ݂ܝܼ ܗ̄ܘܵܐ ܥܲܡܵܐ. ܘܲܬ݂ܩܸܦ ܒܡܸܨܪܹܝܢ.

¹⁸ ܥܕ݂ܲܡܵܐ ܕܩܵܡ ܡܲܠܟܵܐ ܐ̄ܚܪܹܢܵܐ ܥܲܠ ܡܸܨܪܹܝܢ. ܐܲܝܢܵܐ ܕܠܵܐ ܝܵܕ݂ܲܥ ܗ̄ܘܵܐ ܠܹܗ ܠܝܵܘܣܸܦ.

¹⁹ ܘܐܸܨܛܲܢܲܥ ܥܲܠ ܛܘܼܗܡܲܢ. ܘܐܲܒ݂ܐܸܫ ܠܐܲܒ݂ܵܗܵܬܲܢ. ܘܲܦܩܲܕ݂ ܕܢܸܗܘܘܿܢ ܡܸܫܬܿܕ݂ܝܢ ܝܲܠܘܼܕ݂ܲܝ̈ܗܘܿܢ. ܕܠܵܐ ܢܸܚܘܿܢ.

²⁰ ܒܹܗ ܒܙܲܒ݂ܢܵܐ ܗܵܘ. ܐܸܬ݂ܝܼܠܸܕ݂ ܡܘܼܫܹܐ. ܘܲܪܚܝܼܡ ܗ̄ܘܵܐ ܠܐܲܠܵܗܵܐ. ܘܐܸܬ݂ܪܲܒܝܼ ܝܲܪ̈ܚܹܐ ܬܠܵܬ݂ܵܐ ܒܹܝܬ݂ ܐܲܒ݂ܘܼܗܝ.

²¹ ܘܟܲܕ݂ ܐܸܫܬܿܕ݂ܝܼ ܡܸܢ ܐܸܡܹܗ. ܐܸܫܟܲܚܬܹܗ ܒܲܪ̱ܬ݂ ܦܸܪܥܘܿܢ. ܘܪܲܒܝܵܬܹܗ ܠܵܗܿ ܠܲܒ݂ܪܵܐ.

²² ܘܐܸܬ݂ܪܕ݂ܝܼ ܡܘܼܫܹܐ ܒܟ݂ܠܵܗܿ ܚܸܟ݂ܡܬ݂ܵܐ ܕܡܸܨܪ̈ܵܝܹܐ. ܘܲܥܬ݂ܝܼܕ݂ ܗ̄ܘܵܐ ܒܡܸܠܵܘ̈ܗܝ. ܘܐܵܦ ܒܲܥܒ݂ܵܕ݂ܵܘ̈ܗܝ.

²³ ܘܟܲܕ݂ ܗܘܵܐ ܒܲܪ ܐܲܪܒܥܝܼܢ ܫܢ̈ܝܼܢ. ܣܠܸܩ ܗ̄ܘܵܐ ܥܲܠ ܠܸܒܹܗ. ܕܢܸܣܥܘܿܪ ܠܐܲܚܵܘ̈ܗܝ ܒܢܲܝ̈ ܝܼܣܪܵܝܹܠ.

²⁴ ܘܲܚܙܵܐ ܠܚܲܕ݂ ܡܸܢ ܒܢܲܝ̈ ܫܲܪܒܬܹܗ ܕܡܸܬܿܕܒܲܪ ܒܲܩܛܝܼܪܵܐ. ܘܬܲܒ݂ܥܹܗ. ܘܲܥܒܲܕ݂ ܠܹܗ ܕܝܼܢܵܐ. ܘܩܲܛܠܹܗ ܠܡܸܨܪܵܝܵܐ ܗܵܘ. ܕܡܲܣܟܸܠ ܗ̄ܘܵܐ ܒܹܗ.

²⁵ ܘܲܣܒܲܪ ܕܡܸܣܬܲܟܠܝܼܢ ܐܲܚܵܘ̈ܗܝ ܒܢܲܝ̈ ܝܼܣܪܵܝܹܠ. ܕܐܲܠܵܗܵܐ ܒܐܝܼܕ݂ܗ ܝܵܗܹܒ݂ ܠܗܘܿܢ ܦܘܼܪܩܵܢܵܐ. ܘܠܵܐ ܐܸܣܬܲܟܲܠܘ.

²⁶ ܘܲܠܝܵܘܡܵܐ ܐ̄ܚܪܹܢܵܐ. ܐܸܬ݂ܚܙܝܼ ܠܗܘܿܢ ܟܲܕ݂ ܢܵܨܹܝܢ ܗܸܢܘܿܢ ܚܲܕ݂ ܥܲܡ ܚܲܕ݂. ܘܲܡܦܝܼܣ ܗ̄ܘܵܐ ܠܗܘܿܢ ܕܢܸܫܬܲܝܢܘܼܢ. ܟܲܕ݂ ܐܵܡܲܪ. ܓܲܒ݂ܪܹ̈ܐ ܐܲܚܹ̈ܐ ܐܲܢ̄ܬܘܿܢ. ܡܛܠ ܡܵܢܵܐ ܡܲܣܟܠܝܼܢ ܐܢ̄ܬܘܿܢ ܚܲܕ݂ ܒܚܲܕ݂.

²⁷ ܗܵܘ ܕܹܝܢ ܕܡܲܣܟܸܠ ܗ̄ܘܵܐ ܒܚܲܒ݂ܪܹܗ. ܕܲܚܩܹܗ ܡܸܢ ܠܘܵܬܹܗ. ܘܐܸܡܲܪ ܠܹܗ. ܡܲܢܘܼ ܐܲܩܝܼܡܵܟ݂ ܥܠܲܝܢ ܪܹܫܵܐ ܘܕ݂ܲܝܵܢܵܐ.

²⁸ ܕܲܠܡܵܐ ܠܡܸܩܛܠܲܢܝ ܒܵܥܹܐ ܐܲܢ̄ܬܿ. ܐܲܝܟ݂ ܕܲܩܛܲܠܬܿ ܐܸܬ݂ܡܵܠܝ ܠܡܸܨܪܵܝܵܐ.

²⁹ ܘܲܥܪܲܩ ܡܘܼܫܹܐ ܒܡܸܠܬ݂ܵܐ ܗܵܕܹܐ. ܘܲܗܘܵܐ ܬܵܘܬܵܒ݂ܵܐ ܒܐܲܪܥܵܐ ܕܡܸܕ݂ܝܲܢ. ܘܲܗܘܵܘ ܠܹܗ ܬܪܹܝܢ ܒܢ̈ܝܼܢ.

³⁰ ܘܟܲܕ݂ ܡܠܲܝ̈ ܠܹܗ ܬܲܡܵܢ ܐܲܪܒܥܝܼܢ ܫܢ̈ܝܼܢ. ܐܸܬ݂ܚܙܝܼ ܠܹܗ ܒܡܲܕ݂ܒܪܵܐ ܕܛܘܼܪ ܣܝܼܢܲܝ. ܡܲܠܲܐܟܹܗ ܕܡܵܪܝܵܐ ܒܢܘܼܪܵܐ ܕܝܵܩܕܵܐ ܒܣܲܢܝܵܐ.

³¹ ܘܟܲܕ݂ ܚܙܵܐ ܡܘܼܫܹܐ. ܐܸܬܿܕܲܡܲܪ ܒܚܸܙܘܵܐ. ܘܟܲܕ݂ ܐܸܬ݂ܩܲܪܲܒ݂ ܕܢܸܚܙܹܐ. ܐܸܡܲܪ ܠܹܗ ܡܵܪܝܵܐ ܒܩܵܠܵܐ.

³² ܐܸܢܵܐ ܐ̄ܢܵܐ ܐܲܠܵܗܵܐ ܕܐܲܒ݂ܵܗܲܝ̈ܟ. ܐܲܠܵܗܹܗ ܕܐܲܒ݂ܪܵܗܵܡ ܘܕ݂ܐܝܼܣܚܵܩ. ܘܲܕ݂ܝܲܥܩܘܿܒ݂. ܘܟܲܕ݂ ܪܲܬܿܝܼܬ݂ ܗ̄ܘܵܐ ܡܘܼܫܹܐ. ܠܵܐ ܡܲܡܪܲܚ ܗ̄ܘܵܐ ܕܲܢܚܘܼܪ ܒܚܸܙܘܵܐ.

³³ ܘܐܸܡܲܪ ܠܹܗ ܡܵܪܝܵܐ. ܫܪܝܼ ܡܣܵܢܲܝ̈ܟ ܡܸܢ ܪܸ̈ܓ݂ܠܲܝܟ. ܐܲܪܥܵܐ ܓܹܝܪ ܕܩܵܐܹܡ ܐܲܢ̄ܬܿ ܒܵܗܿ. ܩܲܕܝܼܫܵܐ ܗܝܼ.

³⁴ ܡܸܚܙܵܐ ܚܙܹܝܬ݂ ܐܘܼܠܨܵܢܹܗ ܕܥܲܡܝ ܕܲܒ݂ܡܸܨܪܹܝܢ. ܘܬܸܢ̈ܚܵܬܹܗ ܫܸܡܥܹܬ݂. ܘܢܸܚܬܹܬ݂ ܕܐܸܦܪܘܿܩ ܐܸܢܘܿܢ. ܘܗܵܫܵܐ ܬܵܐ ܐܹܫܲܕܪܵܟ݂ ܠܡܸܨܪܹܝܢ.

³⁵ ܠܗܵܢܵܐ ܡܘܼܫܹܐ ܕܲܟ݂ܦܲܪܘ ܒܹܗ ܟܲܕ݂ ܐܵܡܪܝܼܢ: ܕܡܲܢܘܼ ܐܲܩܝܼܡܵܟ݂ ܥܠܲܝܢ ܪܹܫܵܐ ܘܕ݂ܲܝܵܢܵܐ. ܠܹܗ ܠܗܵܢܵܐ ܐܲܠܵܗܵܐ ܪܹܫܵܐ. ܘܦܵܪܘܿܩܵܐ ܫܲܕܲܪ ܠܗܘܿܢ. ܒܐܝܼܕ݂ܲܝ̈ ܡܲܠܲܐܟ݂ܵܐ. ܗܵܘ ܕܐܬ݂ܚܙܝܼ ܠܹܗ ܒܣܲܢܝܵܐ.

³⁶ ܗܵܢܵܘ ܕܐܲܦܸܩ ܐܸܢܘܿܢ. ܟܲܕ݂ ܥܒܲܕ݂ ܐܵܬ݂ܘܵܬ݂ܵܐ ܘܬܸܕ݂ܡܪ̈ܵܬ݂ܵܐ ܘܲܓ݂ܒܲܪ̈ܘܵܬ݂ܵܐ. ܒܐܲܪܥܵܐ ܕܡܸܨܪܹܝܢ. ܘܲܒ݂ܝܲܡܵܐ ܕܣܘܿܦ. ܘܲܒ݂ܡܲܕ݂ܒܪܵܐ ܫܢ̈ܝܼܢ ܐܲܪܒܥܝܼܢ.

³⁷ ܗܵܢܵܘ ܡܘܼܫܹܐ. ܗܵܘ ܕܐܵܡܲܪ ܠܲܒ݂ܢܲܝ̈ ܝܼܣܪܵܝܹܠ. ܕܲܢܒ݂ܝܼܵܐ ܢܩܝܼܡ ܠܟ݂ܘܿܢ ܡܵܪܝܵܐ ܐܲܠܵܗܵܐ ܡܸܢ ܐܲܚܲܝ̈ܟܿܘܿܢ ܐܲܟ݂ܘܵܬ݂ܝ ܠܹܗ ܬܸܫܡܥܘܼܢ.

³⁸ ܗܵܢܵܘ ܕܲܗܘܵܐ ܒܲܟ݂ܢ̈ܘܼܫܵܬ݂ܵܐ ܒܡܲܕ݂ܒܪܵܐ. ܥܲܡ ܡܲܠܲܐܟ݂ܵܐ ܗܵܘ ܕܡܲܠܸܠ ܗ̄ܘܵܐ ܥܲܡܹܗ. ܘܥܲܡ ܐܲܒ݂ܵܗܵܬܲܢ. ܒܛܘܼܪܵܐ ܕܣܝܼܢܲܝ. ܘܗܘܸܝܘܼ ܕܩܲܒܸܠ ܡܸܠܹ̈ܐ ܚܲ̈ܝܵܬ݂ܵܐ ܕܠܲܢ ܢܸܬܸܿܠ.

³⁹ ܘܠܵܐ ܨܒ݂ܵܘ ܠܡܸܬܿܕܿܢܵܝܘܼ ܠܹܗ ܐܲܒ݂ܵܗܵܬܲܢ. ܐܸܠܵܐ ܫܲܒ݂ܩܘܼܗܝ. ܘܲܒ݂ܠܸܒܵܘܵܬ݂ܗ̈ܘܿܢ ܗܦܲܟ݂ܘ ܠܗܘܿܢ ܠܡܸܨܪܹܝܢ.

⁴⁰ ܟܲܕ݂ ܐܵܡܪܝܼܢ ܠܐܲܗܪܘܿܢ. ܥܒܸܕ݂ ܠܲܢ ܐܲܠܵܗܹ̈ܐ ܕܢܹܐܙܠ̄ܘܼܢ ܩܕ݂ܵܡܲܝܢ. ܡܛܠ ܕܗܵܢܵܐ ܡܘܼܫܹܐ ܕܐܲܦܩܲܢ ܡܸܢ ܐܲܪܥܵܐ ܕܡܸܨܪܹܝܢ. ܠܵܐ ܝܵܕ݂ܥܝܼܢ ܚ̄ܢܲܢ ܡܵܢܵܐ ܗܘܵܝܗܝ.

⁴¹ ܘܲܥܒܲܕ݂ܘ ܠܗܘܿܢ ܥܸܓ݂ܠܵܐ ܒܝܵܘ̈ܡܵܬ݂ܵܐ ܗܵܢܘܿܢ. ܘܕ݂ܲܒܲܚܘ ܕܒ݂ܚܹ̈ܐ ܠܲܦܬܲܟ݂ܪܹ̈ܐ. ܘܡܸܬ݂ܒܲܣܡܝܼܢ ܗ̄ܘܼܵܘ ܒܲܥܒ݂ܵܕ݂ ܐܝܼܕ݂ܲܝ̈ܗܘܿܢ.

⁴² ܘܲܗܦܲܟ݂ ܐܲܠܵܗܵܐ ܘܐܲܫܠܸܡ ܐܸܢܘܿܢ. ܕܢܸܗܘܘܿܢ ܦܵܠܚܝܼܢ ܠܚܲܝ̈ܠܵܘܵܬ݂ܵܐ ܕܲܫܡܲܝܵܐ. ܐܲܝܟ݂ ܕܲܟ݂ܬ݂ܝܼܒ݂ ܒܲܟ݂ܬ݂ܵܒ݂ܵܐ ܕܲܢܒ݂ܝܹ̈ܐ. ܠܡܵܐ ܐܲܪܒܥܝܼܢ ܫܢ̈ܝܼܢ ܒܡܲܕ݂ܒܪܵܐ: ܢܸܟ݂ܣܬ݂ܵܐ ܐܵܘ ܕܸܒ݂ܚܬ݂ܵܐ ܩܲܪܸܒ݂ܬܿܘܢ ܠܝܼ ܒܢܲܝ̈ ܝܼܣܪܵܝܹܠ.

⁴³ ܐܸܠܵܐ ܫܩܲܠܬܿܘܿܢ ܡܲܫܟܢܹܗ ܕܡܲܠܟܘܿܡ. ܘܟ݂ܵܘܟܒܹܗ ܕܐܲܠܵܗܵܐ ܕܲܪܦܵܢ. ܕܸܡ̈ܘܵܬ݂ܵܐ ܕܲܥܒܲܕܬܿܘܿܢ ܕܬܸܗܘܘܿܢ ܣܵܓ݂ܕܝܼܢ ܠܗܹܝܢ. ܐܹܫܲܢܹܝܟ݂ܘܿܢ ܠܗܲܠ ܡܸܢ ܒܵܒܹܠ.

⁴⁴ ܗܵܐ ܡܲܫܟܢܵܐ ܕܣܵܗܕܘܼܬ݂ܵܐ ܕܐܲܒ݂ܵܗܵܬܲܢ. ܒܡܲܕ݂ܒܪܵܐ ܐܝܼܬ݂ܵܘܗܝ ܗ̄ܘܵܐ. ܐܲܝܟ݂ ܡܵܐ ܕܦܲܩܸܕ݂ ܗܵܘ ܕܡܲܠܸܠ ܥܲܡ ܡܘܼܫܹܐ ܠܡܸܥܒܕ݂ܗ ܒܲܕ݂ܡܘܼܬ݂ܵܐ ܕܚܵܘܝܹܗ.

⁴⁵ ܘܠܹܗ ܠܗܵܢܵܐ ܡܲܫܟܢܵܐ. ܐܵܦ ܡܲܥܵܠܘܼ ܐܲܥܠܘܼܗܝ ܐܲܒ݂ܵܗܵܬܲܢ ܥܲܡ ܝܼܫܘܿܥ. ܠܐܲܪܥܵܐ ܕܝܲܗ̄ܒ݂ ܠܗܘܿܢ ܐܲܠܵܗܵܐ ܝܘܼܪܬܵܢܵܐ. ܡܸܢ ܥܲܡ̈ܡܹܐ ܗܵܢܘܿܢ ܕܲܫܕ݂ܵܐ ܡܸܢ ܩܕ݂ܵܡܲܝܗܘܿܢ. ܘܐܸܬ݂ܝܲܒܲܠ ܥܕ݂ܲܡܵܐ ܠܝܵܘܡܵܘ̈ܗܝ ܕܕ݂ܵܘܝܼܕ݂.

⁴⁶ ܗܵܘ ܕܐܸܫܟܲܚ ܪ̈ܲܚܡܹܐ ܩܕ݂ܵܡܵܘܗܝ ܕܐܲܠܵܗܵܐ. ܘܲܫܐܸܠ ܕܢܸܫܟܲܚ ܡܲܫܟܢܵܐ ܠܐܲܠܵܗܹܗ ܕܝܲܥܩܘܿܒ݂.

⁴⁷ ܫܠܹܝܡܘܿܢ ܕܹܝܢ. ܒܢܵܐ ܠܹܗ ܒܲܝܬܵܐ.

⁴⁸ ܘܲܡܪܲܝܡܵܐ ܠܵܐ ܫܪܵܐ ܒܲܥܒ݂ܵܕ݂ ܐܝܼ̈ܕ݂ܲܝܵܐ. ܐܲܝܟ݂ ܕܐܵܡܲܪ ܢܒ݂ܝܼܵܐ.

⁴⁹ ܕܲܫܡܲܝܵܐ ܟܘܼܪܣܲܝ. ܘܐܲܪܥܵܐ ܟܘܼܒ݂ܫܵܐ ܕܲܬ݂ܚܹܝܬ݂ ܪܸ̈ܓ݂ܠܲܝ. ܐܲܝܢܵܘ ܒܲܝܬܵܐ ܕܬܸܒ݂ܢܘܿܢ ܠܝܼ. ܐܵܡܲܪ ܡܵܪܝܵܐ. ܐܵܘ ܐܲܝܢܵܘ ܐܲܬ݂ܪܵܐ ܕܲܢܝܵܚܬܿܝ.

⁵⁰ ܠܵܐ ܗܵܐ ܐܝܼܕ݂ܵܐ ܕܝܼܠܝ. ܥܸܒ݂ܕܲܬ݂ ܗܵܠܹܝܢ ܟܠܗܹܝܢ.

⁵¹ ܐܵܘ ܩܲܫܝܲܝ̈ ܩܕ݂ܵܠܵܐ. ܘܲܕ݂ܠܵܐ ܓܙܝܼܪܝܼܢ ܒܠܸܒܗܘܿܢ. ܘܲܒ݂ܡܲܫܡܲܥܬ݂ܗܘܿܢ܅ ܐܲܢ̄ܬܿܘܿܢ ܒܟ݂ܠܙܒܲܢ ܠܘܼܩܒܲܠ ܪܘܼܚܵܐ ܕܩܘܼܕ݂ܫܵܐ ܩܵܝܡܝܼܢ ܐܢ̄ܬܘܿܢ. ܐܲܝܟ݂ ܐܲܒ݂ܵܗܲܝ̈ܟܿܘܿܢ. ܐܵܦ ܐܲܢ̄ܬܘܿܢ.

⁵² ܠܐܲܝܢܵܐ ܓܹܝܪ ܡܸܢ ܢܒ݂ܝܹ̈ܐ ܕܠܵܐ ܪܕ݂ܲܦܘ ܘܲܩܛܲܠܘ ܐܲܒ݂ܵܗܲܝ̈ܟܿܘܿܢ. ܠܐܲܝܠܹܝܢ ܕܩܲܕܸܡܘ ܒܲܕܸܩܘ ܥܲܠ ܡܹܐܬ݂ܝܼܬܹܗ ܕܙܲܕܝܼܩܵܐ. ܗܵܘ ܕܐܲܢ̄ܬܿܘܿܢ ܐܲܫܠܸܡܬܿܘܢ ܘܲܩܛܲܠܬܿܘܿܢܵܝܗܝ.

⁵³ ܘܩܲܒܸܠܬܿܘܢ ܢܵܡܘܿܣܵܐ ܒܝܲܕ݂ ܦܘܼܩܕܵܢܵܐ ܕܡܲܠܲܐܟܹ̈ܐ. ܘܠܵܐ ܢܛܲܪܬܿܘܢܵܝܗܝ.

⁵⁴ ܘܟܲܕ݂ ܫܡܲܥܘ ܗ̄ܘܼܵܘ ܗܵܠܹܝܢ. ܐܸܬ݂ܡܠܝܼܘ ܚܸܡܬܵܐ ܒܢܲܦ̮ܫܗܘܿܢ. ܘܲܡܚܲܪܩܝܼܢ ܗ̄ܘܼܵܘ ܫܸܢܲܝ̈ܗܘܿܢ ܥܠܵܘܗܝ.

⁵⁵ ܘܗܘܼ ܟܲܕ݂ ܡܠܹܐ ܗ̄ܘܵܐ ܗܲܝܡܵܢܘܼܬ݂ܵܐ ܘܪܘܼܚܵܐ ܕܩܘܼܕ݂ܫܵܐ. ܚܵܪ ܒܲܫܡܲܝܵܐ. ܘܲܚܙܵܐ ܬܸܫܒܿܘܿܚܬܵܐ ܕܐܲܠܵܗܵܐ. ܘܲܠܝܼܫܘܿܥ ܟܲܕ݂ ܩܵܐܹܡ ܡܸܢ ܝܲܡܝܼܢܵܐ ܕܐܲܠܵܗܵܐ.

⁵⁶ ܘܐܸܡܲܪ. ܗܵܐ ܚܵܙܹܐ ܐ̄ܢܵܐ ܫܡܲܝܵܐ ܟܲܕ݂ ܦܬ݂ܝܼܚܝܼܢ. ܘܠܲܒ݂ܪܹܗ ܕܐ̄ܢܵܫܵܐ ܟܲܕ݂ ܩܵܐܹܡ ܡܸܢ ܝܲܡܝܼܢܵܐ ܕܐܲܠܵܗܵܐ.

⁵⁷ ܘܲܩܥܵܘ ܒܩܵܠܵܐ ܪܵܡܵܐ. ܘܣܲܟܲܪܘ ܐܸܕ݂ܢܲܝ̈ܗܘܿܢ. ܘܲܓ݂ܙܲܡܘ ܥܠܵܘܗܝ ܟܠܗܘܿܢ.

⁵⁸ ܘܐܸܚܲܕ݂ܘ ܐܲܦܩܘܼܗܝ ܠܒܲܪ ܡܸܢ ܡܕ݂ܝܼܢ̄ܬܵܐ. ܘܪܵܓ݂ܡܝܼܢ ܗ̄ܘܼܵܘ ܠܹܗ. ܘܐܲܝܠܹܝܢ ܕܐܲܣܗܸܕ݂ܘ ܥܠܵܘܗܝ. ܣܵܡܘ ܢܲܚܬܲܝ̈ܗܘܿܢ ܠܘܵܬ݂ ܪܸ̈ܓ݂ܠܵܘܗܝ ܕܲܥܠܲܝܡܵܐ ܚܲܕ݂. ܕܡܸܬ݂ܩܪܹܐ ܫܵܐܘܿܠ.

⁵⁹ ܘܪܵܓ݂ܡܝܼܢ ܗ̄ܘܼܵܘ ܠܹܗ ܠܐܸܣܛܲܦܵܢܘܿܣ ܟܲܕ݂ ܡܨܲܠܹܐ ܘܐܵܡܲܪ. ܡܵܪܲܢ ܝܼܫܘܿܥ. ܩܲܒܸܠ ܪܘܼܚܝ.

⁶⁰ ܘܟܲܕ݂ ܣܵܡ ܒܘܼܪܟܵܐ. ܩܥܵܐ ܒܩܵܠܵܐ ܪܵܡܵܐ. ܘܐܸܡܲܪ. ܡܵܪܲܢ ܠܵܐ ܬܩܝܼܡ ܠܗܘܿܢ ܗܵܕܹܐ ܚܛܝܼܬ݂ܵܐ. ܘܟܲܕ݂ ܗܵܕܹܐ ܐܸܡܲܪ. ܫܟܸܒ݂.

8

¹ ܫܵܐܘܿܠ ܕܹܝܢ ܨܵܒܹܐ ܗ̄ܘܵܐ. ܘܲܡܫܵܘܬܲܦ ܗ̄ܘܵܐ ܒܩܸܛܠܹܗ. ܘܲܗܘܵܐ ܗ̄ܘܵܐ ܒܗܵܘ ܝܵܘܡܵܐ ܪܕ݂ܘܼܦܝܵܐ ܪܲܒܵܐ ܠܥܹܕܬܵܐ ܕܒ݂ܐܘܿܪܸܫܠܸܡ. ܘܐܸܬ݂ܒܲܕܲܪܘ ܟܠܗܘܿܢ ܒܩܘܼܪ̈ܝܵܐ ܕܲܝܗܘܼܕ݂. ܘܐܵܦ ܒܹܝܬ݂ ܫܵܡܪ̈ܵܝܹܐ. ܠܒܲܪ ܡܸܢ ܫܠܝܼܚܹ̈ܐ ܒܲܠܚܘܿܕ݂.

² ܘܲܩܦܲܣܘ ܩܲܒ݂ܪܘܼܗܝ ܠܐܸܣܛܲܦܵܢܘܿܣ ܓܲܒ݂ܪܹ̈ܐ ܡܗܲܝܡܢܹ̈ܐ. ܘܐܸܬ݂ܐܒܸܠܘ ܥܠܵܘܗܝ ܪܵܘܪܒ݂ܵܐܝܼܬ݂.

³ ܫܵܐܘܿܠ ܕܹܝܢ ܪܵܕ݂ܦ ܗ̄ܘܵܐ ܠܥܹܕܬܹܿܗ ܕܐܲܠܵܗܵܐ. ܟܲܕ݂ ܥܵܐܹܠ ܗ̄ܘܵܐ ܠܒܵܬܹ̈ܐ. ܘܲܡܓܲܪܓܲܪ ܠܓܲܒ݂ܪܹ̈ܐ ܘܲܠܢܸܫܹ̈ܐ. ܘܲܡܫܲܠܡܝܼܢ ܗ̄ܘܵܐ ܠܒܹܝܬ݂ ܐܲܣܝܼܪܹ̈ܐ.

⁴ ܘܗܵܢܘܿܢ ܕܐܬ݂ܒܲܕܲܪܘ. ܡܸܬ݂ܟܲܪܟܝܼܢ ܗ̄ܘܼܵܘ. ܘܡܲܟ݂ܪܙܝܼܢ ܡܸܠܬ݂ܵܐ ܕܐܲܠܵܗܵܐ.

⁵ ܦܝܼܠܝܼܦܘܿܣ ܕܹܝܢ ܢܚܸܬ݂ ܠܹܗ ܠܲܡܕ݂ܝܼܢ̄ܬܵܐ ܕܫܵܡܪ̈ܵܝܹܐ. ܘܡܲܟ݂ܪܸܙ ܗ̄ܘܵܐ ܠܗܘܿܢ ܥܲܠ ܡܫܝܼܚܵܐ.

⁶ ܘܟܲܕ݂ ܫܵܡܥܝܼܢ ܗ̄ܘܼܵܘ ܡܸܠܬܹܗ ܒܢܲܝ̈ܢܵܫܵܐ ܕܬܲܡܵܢ. ܨܵܝܬܿܝܼܢ ܗ̄ܘܼܵܘ ܠܹܗ. ܘܡܸܬܿܛܦܝܼܣܝܼܢ ܗ̄ܘܼܵܘ. ܠܟ݂ܠ ܕܐܵܡܲܪ ܗ̄ܘܵܐ. ܕܚܵܙܹܝܢ ܗ̄ܘܼܵܘ ܐܵܬ݂ܘܵܬ݂ܵܐ ܕܥܵܒܹܿܕ݂ ܗ̄ܘܵܐ.

⁷ ܣܲܓܝܼܐܹ̈ܐ ܓܹܝܪ ܕܐܲܚܝܼܕ݂ܵܢ ܗ̄ܘܲܝ̈ ܠܗܘܿܢ ܪ̈ܘܼܚܹ̈ܐ ܛܲܢ̈ܦܵܬ݂ܵܐ. ܩܵܥܹܝܢ ܗ̄ܘܼܵܘ ܒܩܵܠܵܐ ܪܵܡܵܐ. ܘܢܵܦܩܵܢ ܗ̄ܘܲܝ̈ ܡܸܢܗܘܿܢ. ܘܐܲܚܪ̈ܵܢܹܐ ܡܫܲܪ̈ܲܝܵܐ ܘܲܡܚܲܓܪܹ̈ܐ. ܐܸܬ݂ܐܣܝܼܘ.

⁸ ܘܚܲܕ݂ܘܼܬ݂ܵܐ ܪܲܒܬ݂ܵܐ ܗܘܸܵܬ݂ ܒܗܵܝ ܡܕ݂ܝܼܢ̄ܬܵܐ.

⁹ ܐܝܼܬ݂ ܗ̄ܘܵܐ ܕܹܝܢ ܬܲܡܵܢ ܓܲܒ݂ܪܵܐ ܚܲܕ݂. ܕܲܫܡܹܗ ܣܝܼܡܘܿܢ. ܕܲܥܡܝܼܪ ܗ̄ܘܵܐ ܠܹܗ ܒܵܗܿ ܒܲܡܕ݂ܝܼܢ̄ܬܵܐ ܙܲܒ݂ܢܵܐ ܣܲܓܿܝܼܐܵܐ. ܘܲܒ݂ܚܲܪ̈ܫܵܘܗܝ ܡܲܛܥܹܐ ܗ̄ܘܵܐ ܠܥܲܡܵܐ ܕܫܵܡܪ̈ܵܝܹܐ. ܟܲܕ݂ ܡܵܘܪܸܒ݂ ܗ̄ܘܵܐ ܢܲܦ̮ܫܹܗ ܘܐܵܡܲܪ. ܕܐܸܢܵܐ ܐ̄ܢܵܐ ܪܲܒܵܐ.

¹⁰ ܘܲܨܠܹܝܢ ܗ̄ܘܼܵܘ ܠܘܵܬܹܗ ܟܠܗܘܿܢ ܪܵܘܪ̈ܒܹܐ. ܘܕ݂ܲܩܕܩܹ̈ܐ. ܘܐܵܡܪܝܼܢ ܗ̄ܘܼܵܘ. ܗܵܢܵܘ ܚܲܝܠܹܗ ܪܲܒܵܐ ܕܐܲܠܵܗܵܐ.

¹¹ ܘܡܸܬܿܛܦܝܼܣܝܼܢ ܗ̄ܘܼܵܘ ܠܹܗ ܟܠܗܘܿܢ. ܡܛܠ ܕܙܲܒ݂ܢܵܐ ܣܲܓܿܝܼܐܵܐ ܒܚܲܪ̈ܫܵܘܗܝ ܐܲܬ݂ܡܲܗ ܗ̄ܘܵܐ ܐܸܢܘܿܢ.

¹² ܟܲܕ݂ ܕܹܝܢ ܗܲܝܡܸܢܘ ܠܦܝܼܠܝܼܦܘܿܣ ܕܲܡܣܲܒܲܪ ܗ̄ܘܵܐ ܡܲܠܟܘܼܬ݂ܵܐ ܕܐܲܠܵܗܵܐ. ܒܲܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܵܡܕܝܼܢ ܗ̄ܘܼܵܘ ܓܲܒ݂ܪܹ̈ܐ ܘܢܸܫܹ̈ܐ.

¹³ ܘܐܵܦ ܗܘܼ ܣܝܼܡܘܿܢ ܗܲܝܡܸܢ ܗ̄ܘܵܐ ܘܲܥܡܲܕ݂. ܘܢܲܩܝܼܦ ܗ̄ܘܵܐ ܠܹܗ ܠܦܝܼܠܝܼܦܘܿܣ. ܘܟܲܕ݂ ܚܙܵܐ ܗ̄ܘܵܐ ܐܵܬ݂ܘܵܬ݂ܵܐ ܘܚܲܝ̈ܠܹܐ ܪܵܘܪ̈ܒܹܐ ܕܗܵܘܹܝܢ ܗ̄ܘܼܵܘ ܒܐܝܼܕܹܗ. ܬܵܡܲܗ ܗ̄ܘܵܐ ܘܡܸܬܿܕܲܡܲܪ.

¹⁴ ܘܟܲܕ݂ ܫܡܲܥܘ ܫܠܝܼܚܹ̈ܐ ܕܒ݂ܐܘܿܪܸܫܠܸܡ. ܕܩܲܒܸܠܘ ܥܲܡܵܐ ܕܫܵܡܪ̈ܵܝܹܐ ܡܸܠܬ݂ܵܐ ܕܐܲܠܵܗܵܐ. ܫܲܕܲܪܘ ܠܘܵܬ݂ܗܘܿܢ ܠܫܸܡܥܘܿܢ ܟܹܐܦܵܐ ܘܲܠܝܘܿܚܲܢܵܢ.

¹⁵ ܘܲܢܚܸܬ݂ܘ ܘܨܲܠܝܼܘ ܥܠܲܝܗܘܿܢ. ܐܲܝܟ݂ ܕܲܢܩܲܒܠܘܼܢ ܪܘܼܚܵܐ ܕܩܘܼܕ݂ܫܵܐ.

¹⁶ ܠܲܝܬܿ ܗ̄ܘܵܐ ܓܹܝܪ ܥܲܠ ܚܲܕ݂ ܡܸܢܗܘܿܢ ܥܕ݂ܲܟܹܝܠ. ܒܲܠܚܘܿܕ݂ ܕܹܝܢ ܥܵܡܕܝܼܢ ܗ̄ܘܼܵܘ ܒܲܫܡܹܗ ܕܡܵܪܲܢ ܝܼܫܘܿܥ.

¹⁷ ܗܵܝܕܹܝܢ ܣܵܝܡܝܼܢ ܗ̄ܘܼܵܘ ܥܠܲܝܗܘܿܢ ܐܝܼܕ݂ܵܐ. ܘܲܡܩܲܒܠܝܼܢ ܗ̄ܘܼܵܘ ܪܘܼܚܵܐ ܕܩܘܼܕ݂ܫܵܐ.

¹⁸ ܘܟܲܕ݂ ܚܙܵܐ ܣܝܼܡܘܿܢ ܕܒܲܣܝܵܡ ܐܝܼܕ݂ܵܐ ܕܲܫܠܝܼܚܹ̈ܐ ܡܸܬ݂ܝܲܗ̄ܒ݂ܵܐ ܪܘܼܚܵܐ ܕܩܘܼܕ݂ܫܵܐ. ܩܲܪܸܒ݂ ܠܗܘܿܢ ܟܸܣܦܵܐ

¹⁹ ܟܲܕ݂ ܐܵܡܲܪ. ܗܲܒ݂ܘ ܐܵܦ ܠܝܼ ܫܘܼܠܛܵܢܵܐ ܗܵܢܵܐ. ܕܐܲܝܢܵܐ ܕܐܹܣܝܼܡ ܥܠܵܘܗܝ ܐܝܼܕ݂ܵܐ. ܢܸܗܘܹܐ ܡܩܲܒܸܠ ܪܘܼܚܵܐ ܕܩܘܼܕ݂ܫܵܐ.

²⁰ ܐܵܡܲܪ ܠܹܗ ܫܸܡܥܘܿܢ ܟܹܐܦܵܐ. ܟܸܣܦܵܟ݂ ܥܲܡܵܟ݂ ܢܹܐܙܲܠ ܠܐܲܒ݂ܕ݂ܵܢܵܐ. ܡܛܠ ܕܲܣܒܲܪܬܿ ܕܡܵܘܗܲܒ݂ܬܹܗ ܕܐܲܠܵܗܵܐ ܒܩܸܢܝܵܢ ܥܵܠܡܵܐ ܡܸܬ݂ܩܲܢܝܵܐ.

²¹ ܠܲܝܬܿ ܠܵܟ݂ ܡܢܵܬ݂ܵܐ ܐܵܦܠܵܐ ܦܸܣܵܐ ܒܗܲܝܡܵܢܘܼܬ݂ܵܐ ܗܵܕܹܐ. ܡܛܠ ܕܠܸܒܵܟ݂ ܠܵܐ ܗ̄ܘܵܐ ܬܿܪܝܼܨ ܩܕ݂ܵܡ ܐܲܠܵܗܵܐ.

²² ܒܪܲܡ ܬܘܼܒ݂ ܡܸܢ ܒܝܼܫܘܼܬ݂ܵܟ݂ ܗܵܕܹܐ. ܘܲܒ݂ܥܝܼ ܡܸܢ ܐܲܠܵܗܵܐ. ܕܲܠܡܵܐ ܢܸܫܬܿܒܸܩ ܠܵܟ݂ ܢܸܟ݂ܠܵܐ ܕܠܸܒܵܟ݂.

²³ ܒܟܲܒ݂ܕܵܐ ܓܹܝܪ ܡܲܪܝܼܪܬܵܐ ܘܲܒ݂ܩܸܛܪܹ̈ܐ ܕܥܵܘܠܵܐ ܚܵܙܹܐ ܐ̄ܢܵܐ ܕܐܝܼܬܲܝܟ.

²⁴ ܥܢܵܐ ܣܝܼܡܘܿܢ ܘܐܸܡܲܪ. ܒܥܵܘ ܐܲܢ̄ܬܿܘܿܢ ܚܠܵܦܲܝ ܡܸܢ ܐܲܠܵܗܵܐ. ܕܠܵܐ ܢܹܐܬܹܐ ܥܠܲܝ ܡܸܕܸܡ ܡܸܢ ܗܵܠܹܝܢ ܕܐܸܡܲܪܬܿܘܢ.

²⁵ ܫܸܡܥܘܿܢ ܕܹܝܢ ܘܝܘܿܚܲܢܵܢ ܟܲܕ݂ ܣܲܗܸܕ݂ܘ ܐܸܢܘܿܢ ܘܐܲܠܸܦܘ ܡܸܠܬ݂ܵܐ ܕܐܲܠܵܗܵܐ. ܗܦܲܟ݂ܘ ܠܗܘܿܢ ܠܐܘܿܪܸܫܠܸܡ. ܘܲܒ݂ܩܘܼܪ̈ܝܵܐ ܣܲܓܝܼ̈ܐܵܬ݂ܵܐ ܕܫܵܡܪ̈ܵܝܹܐ ܣܲܒܲܪܘ.

²⁶ ܘܡܲܠܸܠ ܡܲܠܲܐܟ݂ܵܐ ܕܡܵܪܝܵܐ ܥܲܡ ܦܝܼܠܝܼܦܘܿܣ ܘܐܸܡܲܪ ܠܹܗ. ܩܘܼܡ ܙܸܠ ܠܬܲܝܡܢܵܐ ܒܐܘܼܪܚܵܐ ܡܲܕ݂ܒܪܵܝܬܵܐ ܕܢܵܚܬܵܐ ܡܸܢ ܐܘܿܪܸܫܠܸܡ ܠܓܲܙܲܐ.

²⁷ ܘܩܵܡ ܐܸܙܲܠ. ܘܐܲܪܥܹܗ ܡܗܲܝܡܢܵܐ ܚܲܕ݂ ܕܐܵܬܹܐ ܗ̄ܘܵܐ ܡܸܢ ܟܘܼܫ. ܫܲܠܝܼܛܵܐ ܕܩܲܢܕ݂ܲܩ ܡܲܠܟܬ݂ܵܐ ܕܟ݂ܘܫܵܝܹ̈ܐ. ܘܗܘܼ ܫܲܠܝܼܛ ܗ̄ܘܵܐ ܥܲܠ ܟܠܹܗ ܓܲܙܵܗܿ. ܘܐܸܬ݂ܵܐ ܗ̄ܘܵܐ. ܕܢܸܣܓܘܼܕ݂ ܒܐܘܿܪܸܫܠܸܡ.

²⁸ ܘܟܲܕ݂ ܗܦܲܟ݂ ܕܢܹܐܙܲܠ. ܝܵܬܹܿܒ݂ ܗ̄ܘܵܐ ܥܲܠ ܡܲܪܟܲܒ݂ܬ݂ܵܐ ܘܩܵܪܹܐ ܗ̄ܘܵܐ ܒܐܹܫܲܥܝܵܐ ܢܒ݂ܝܼܵܐ.

²⁹ ܘܐܸܡܪܲܬ݂ ܪܘܼܚܵܐ ܠܦܝܼܠܝܼܦܘܿܣ. ܐܸܬ݂ܩܲܪܲܒ݂ ܘܩܲܦ ܠܡܲܪܟܲܒ݂ܬ݂ܵܐ.

³⁰ ܘܟܲܕ݂ ܐܸܬ݂ܩܲܪܲܒ݂. ܫܡܲܥ ܕܩܵܪܹܐ ܒܐܹܫܲܥܝܵܐ ܢܒ݂ܝܼܵܐ. ܘܐܸܡܲܪ ܠܹܗ. ܕܐܸܢ ܡܸܣܬܲܟܲܠ ܐܲܢ̄ܬܿ ܡܵܢܵܐ ܩܵܪܹܐ ܐܲܢ̄ܬܿ.

³¹ ܘܗܘܼ ܐܸܡܲܪ. ܐܲܝܟܲܢܵܐ ܡܸܫܟܲܚ ܐ̄ܢܵܐ ܕܐܸܣܬܲܟܲܠ. ܐܸܠܵܐ ܐܸܢ ܐ̄ܢܵܫ ܢܲܪܬܹܿܝܢܝ. ܘܲܒ݂ܥܵܐ ܡܸܢܹܗ ܡܸܢ ܦܝܼܠܝܼܦܘܿܣ. ܕܢܸܣܲܩ ܘܢܸܬܸܿܒ݂ ܥܲܡܹܗ.

³² ܦܵܣܘܿܩܵܐ ܕܹܝܢ ܕܲܟ݂ܬ݂ܵܒ݂ܵܐ ܕܩܵܪܹܐ ܗ̄ܘܵܐ ܒܹܗ. ܐܝܼܬ݂ܵܘܗܝ ܗ̄ܘܵܐ ܗܵܢܵܐ. ܐܲܝܟ݂ ܐܸܡܪܵܐ ܠܢܸܟ݂ܣܬ݂ܵܐ ܐܸܬ݂ܕܒܲܪ. ܘܐܲܝܟ݂ ܢܸܩܝܵܐ ܩܕ݂ܵܡ ܓܵܙܘܿܙܵܐ ܫܲܬܿܝܼܩ ܗ̄ܘܵܐ. ܘܗܵܟܲܢܵܐ ܠܵܐ ܦܬܲܚ ܦܘܼܡ

³³ ܒܡܘܼܟܵܟܹܗ. ܡܸܢ ܚܒ݂ܘܼܫܝܵܐ ܘܡܸܢ ܕܝܼܢܵܐ ܐܸܬ݂ܕܒܲܪ. ܘܕ݂ܵܪܹܗ ܡܲܢܘܼ ܢܸܫܬܲܥܹܐ. ܕܡܸܫܬܲܩܠܝܼܢ ܚܲܝܵܘ̈ܗܝ ܡܸܢ ܐܲܪܥܵܐ.

³⁴ ܘܐܸܡܲܪ ܗܵܘ ܡܗܲܝܡܢܵܐ ܠܦܝܼܠܝܼܦܘܿܣ. ܒܵܥܹܐ ܐ̄ܢܵܐ ܡܸܢܵܟ݂. ܥܲܠ ܡܲܢܘܼ ܐܲܡܪܵܗܿ ܗܵܕܹܐ ܢܒ݂ܝܼܵܐ. ܥܲܠ ܢܲܦ̮ܫܹܗ ܐܵܘ ܥܲܠ ܐ̄ܢܵܫ ܐ̄ܚܪܹܝܢ.

³⁵ ܗܵܝܕܹܝܢ ܦܝܼܠܝܼܦܘܿܣ ܦܬܲܚ ܦܘܼܡܹܗ. ܘܫܲܪܝܼ ܡܸܢܹܗ ܡܸܢ ܗܵܢܵܐ ܟܬ݂ܵܒ݂ܵܐ. ܡܣܲܒܲܪ ܠܹܗ ܥܲܠ ܡܵܪܲܢ ܝܼܫܘܿܥ.

³⁶ ܘܟܲܕ݂ ܗܸܢܘܿܢ ܐܵܙܠ̄ܝܼܢ ܒܐܘܼܪܚܵܐ. ܡܲܛܝܼܘ ܗ̄ܘܼܵܘ ܠܕܘܼܟܬ݂ܵܐ ܚܕ݂ܵܐ ܕܐܝܼܬ݂ ܒܵܗܿ ܡܲܝ̈ܵܐ. ܘܐܸܡܲܪ ܗܵܘ ܡܗܲܝܡܢܵܐ. ܗܵܐ ܡܲܝ̈ܵܐ ܡܵܢܵܐ ܗ̄ܝܼ ܟܵܠܝܼܬ݂ܵܐ. ܕܐܸܥܡܲܕ݂.

³⁷ ܘܐܸܡܲܪ ܦܝܼܠܝܼܦܘܿܣ. ܐܸܢ ܡܗܲܝܡܸܢ ܐܲܢ̄ܬܿ ܡܸܢ ܟܠܹܗ ܠܸܒܵܐ. ܫܲܠܝܼܛ. ܘܲܥܢܵܐ ܘܐܸܡܲܪ. ܐܸܢܵܐ ܡܗܲܝܡܸܢ ܐ̄ܢܵܐ ܕܝܼܫܘܿܥ ܡܫܝܼܚܵܐ ܒܪܹܗ ܕܐܲܠܵܗܵܐ ܗ̄ܘܼ.

³⁸ ܘܲܦܩܲܕ݂ ܗ̄ܘܵܐ ܕܲܬ݂ܩܘܼܡ ܡܲܪܟܲܒ݂ܬ݂ܵܐ. ܘܲܢܚܸܬ݂ܘ ܬܿܪܲܝܗܘܿܢ ܠܡܲܝ̈ܵܐ. ܘܐܲܥܡܕ݂ܗ ܦܝܼܠܝܼܦܘܿܣ ܠܲܡܗܲܝܡܢܵܐ ܗܵܘ.

³⁹ ܘܟܲܕ݂ ܣܠܸܩܘ ܡܸܢ ܡܲܝ̈ܵܐ. ܪܘܼܚܹܗ ܕܡܵܪܝܵܐ ܚܸܛܦܲܬ݂ ܠܦܝܼܠܝܼܦܘܿܣ. ܘܬ݂ܘܼܒ݂ ܠܵܐ ܚܙܵܝܗܝ ܡܗܲܝܡܢܵܐ ܗܵܘ. ܐܸܠܵܐ ܐܵܙܹܠ ܗ̄ܘܵܐ ܒܐܘܼܪܚܹܗ. ܟܲܕ݂ ܚܵܕܹܐ.

⁴⁰ ܦܝܼܠܝܼܦܘܿܣ ܕܹܝܢ ܐܸܫܬܿܟܲܚ ܒܐܵܙܘܿܛܘܿܣ. ܘܡܸܢ ܬܲܡܵܢ ܡܸܬ݂ܟܪܸܟ݂ ܗ̄ܘܵܐ ܘܲܡܣܲܒܲܪ ܒܲܡܕ݂ܝܼ̈ܢܵܬ݂ܵܐ ܟܠܗܹܝܢ. ܥܕ݂ܲܡܵܐ ܕܐܸܬ݂ܵܐ ܠܩܹܣܲܪܝܵܐ.

9

¹ ܫܵܐܘܿܠ ܕܹܝܢ ܥܕ݂ܲܟܹܝܠ ܡܠܹܐ ܗ̄ܘܵܐ ܠܘܼܚܵܡܵܐ ܘܚܸܡܬ݂ܵܐ ܕܩܸܛܠܵܐ ܥܲܠ ܬܲܠܡܝܼܕ݂ܵܘ̈ܗܝ ܕܡܵܪܲܢ.

² ܘܲܫܐܸܠ ܠܹܗ ܐܸܓܪ̈ܵܬ݂ܵܐ ܡܸܢ ܪܲܒ ܟܵܗܢܹ̈ܐ. ܕܢܸܬܸܿܠ ܠܹܗ ܠܕ݂ܲܪܡܣܘܿܩ ܠܲܟ݂ܢܘܼܫܬܵܐ. ܕܐܸܢ ܗܘܼ ܕܢܸܫܟܲܚ ܕܪܵܕܹܝܢ ܒܗܵܕܹܐ ܐܘܼܪܚܵܐ ܓܲܒ݂ܪܹ̈ܐ ܐܵܘ ܢܸܫܹ̈ܐ. ܢܹܐܣܘܿܪ ܢܲܝܬܹܐ ܐܸܢܘܿܢ ܠܐܘܿܪܸܫܠܸܡ.

³ ܘܟܲܕ݂ ܐܵܙܹܠ ܗ̄ܘܵܐ ܘܫܲܪܝܼ ܡܡܲܛܹܐ ܠܕ݂ܲܪܡܣܘܿܩ. ܡܸܢ ܬܚܹܝܬ݂ ܫܸܠܝܵܐ ܐܲܙܠܸܓ݂ ܗ̄ܘܵܐ ܥܠܵܘܗܝ ܢܘܼܗܪܵܐ ܡܸܢ ܫܡܲܝܵܐ.

⁴ ܘܲܢܦܲܠ ܥܲܠ ܐܲܪܥܵܐ. ܘܲܫܡܲܥ ܩܵܠܵܐ ܕܐܵܡܲܪ ܠܹܗ. ܫܵܐܘܿܠ ܫܵܐܘܿܠ. ܡܵܢܵܐ ܪܵܕܹܦ ܐܲܢ̄ܬܿ ܠܝܼ. ܩܫܹܐ ܗ̄ܘܼ ܠܵܟ݂ ܠܲܡܒܲܥܵܛܘܼ ܠܥܘܼܩܣܹ̈ܐ.

⁵ ܥܢܵܐ ܗܘܼ ܘܐܸܡܲܪ. ܡܲܢ ܐܲܢ̄ܬܿ ܡܵܪܝ. ܘܡܵܪܲܢ ܐܸܡܲܪ. ܐܸܢܵܐ ܐ̄ܢܵܐ ܝܼܫܘܿܥ ܢܵܨܪܵܝܵܐ ܗܵܘ ܕܐܲܢ̄ܬܿ ܪܵܕܹܦ ܐܲܢ̄ܬܿ.

⁶ ܐܸܠܵܐ ܩܘܼܡ ܥܘܿܠ ܠܲܡܕ݂ܝܼܢ̄ܬܵܐ. ܘܬܲܡܵܢ ܢܸܬ݂ܡܲܠܲܠ ܥܲܡܵܟ݂ ܥܲܠ ܡܵܐ ܕܘܵܠܹܐ ܠܵܟ݂ ܠܡܸܥܒܲܕ݂.

⁷ ܘܓܲܒ݂ܪܹ̈ܐ ܕܐܵܙܠ̄ܝܼܢ ܗ̄ܘܼܵܘ ܥܲܡܹܗ ܒܐܘܼܪܚܵܐ. ܩܵܝܡܝܼܢ ܗ̄ܘܼܵܘ ܟܲܕ݂ ܬܲܡܝܼܗܝܼܢ. ܡܛܠ ܕܩܵܠܵܐ ܒܲܠܚܘܿܕ݂ ܫܵܡܥܝܼܢ ܗ̄ܘܼܵܘ. ܐ̄ܢܵܫ ܕܹܝܢ ܠܵܐ ܡܸܬ݂ܚܙܹܐ ܗ̄ܘܵܐ ܠܗܘܿܢ.

⁸ ܘܩ̣ܵܡ ܫܵܐܘܿܠ ܡܸܢ ܐܲܪܥܵܐ ܘܠܵܐ ܡܸܬ݂ܚܙܹܐ ܗ̄ܘܵܐ ܠܹܗ ܡܸܕܸܡ. ܟܲܕ݂ ܥܲܝܢܵܘ̈ܗܝ ܦܬ݂ܝܼܚܵܢ ܗ̄ܘܲܝ. ܘܟܲܕ݂ ܐܲܚܝܼܕ݂ܝܼܢ ܒܐܝܼܕ݂ܵܘ̈ܗܝ ܐܲܥܠܘܼܗܝ ܠܕ݂ܲܪܡܣܘܿܩ.

⁹ ܘܠܵܐ ܡܸܬ݂ܚܙܹܐ ܗ̄ܘܵܐ ܠܹܗ ܬܠܵܬ݂ܵܐ ܝܵܘܡ̈ܝܼܢ ܘܠܵܐ ܐܸܟܲܠ. ܘܠܵܐ ܐܸܫܬܿܝܼ.

¹⁰ ܐܝܼܬ݂ ܗ̄ܘܵܐ ܕܹܝܢ ܒܵܗܿ ܒܕ݂ܲܪܡܣܘܿܩ ܬܲܠܡܝܼܕ݂ܵܐ ܚܲܕ݂ ܕܲܫܡܹܗ ܗܘܵܐ ܚܲܢܲܢܝܵܐ. ܘܡܵܪܝܵܐ ܐܸܡܲܪ ܠܹܗ ܒܚܸܙܘܵܐ. ܚܲܢܲܢܝܵܐ. ܘܐܸܡܲܪ. ܗܵܐ ܐܸܢܵܐ ܡܵܪܝ.

¹¹ ܘܡܵܪܲܢ ܐܸܡܲܪ ܠܹܗ. ܩܘܼܡ ܙܸܠ ܠܫܘܼܩܵܐ ܕܡܸܬ݂ܩܪܹܐ ܬܿܪܝܼܨܵܐ. ܘܲܒ݂ܥܝܼ ܒܒܲܝܬܵܐ ܕܲܝܗ̄ܘܼܕ݂ܵܐ ܠܫܵܐܘܿܠ ܕܐܝܼܬ݂ܵܘܗܝ ܡܸܢ ܛܲܪܣܘܿܣ ܡܕ݂ܝܼܢ̄ܬܵܐ. ܗܵܐ ܓܹܝܪ ܟܲܕ݂ ܗܘܼ ܡܨܲܠܹܐ.

¹² ܚܙܵܐ ܒܚܸܙܘܵܐ ܠܓܲܒ݂ܪܵܐ ܕܲܫܡܹܗ ܚܲܢܲܢܝܵܐ. ܕܥܲܠ ܘܣܵܡ ܥܠܵܘܗܝ ܐܝܼܕ݂ܵܐ. ܐܲܝܟ݂ ܕܢܸܬ݂ܦܲܬܿܚܵܢ ܥܲܝܢܵܘ̈ܗܝ.

¹³ ܘܐܸܡܲܪ ܚܲܢܲܢܝܵܐ. ܡܵܪܝ ܫܸܡܥܹܬ݂ ܡܸܢ ܣܲܓܝܼܐܹ̈ܐ ܥܲܠ ܓܲܒ݂ܪܵܐ ܗܵܢܵܐ. ܕܲܟ݂ܡܵܐ ܒ̈ܝܼܫܵܬ݂ܵܐ ܐܲܣܒܸܠ ܠܩܲܕܝܼܫܲܝ̈ܟ ܒܐܘܿܪܸܫܠܸܡ.

¹⁴ ܘܗܵܐ ܐܵܦ ܗܵܪܟܵܐ ܐܝܼܬ݂ ܠܹܗ ܫܘܼܠܛܵܢܵܐ ܡܸܢ ܪ̈ܲܒܲܝ ܟܵܗܢܹ̈ܐ. ܕܢܹܐܣܘܿܪ ܠܟ݂ܠܗܘܿܢ ܐܲܝܠܹܝܢ ܕܩܵܪܹܝܢ ܫܡܵܟ݂.

¹⁵ ܘܐܸܡܲܪ ܠܹܗ ܡܵܪܝܵܐ. ܩܘܼܡ ܙܸܠ ܡܛܠ ܕܡܵܐܢܵܐ ܗܘܼ ܠܝܼ ܓܲܒ݂ܝܵܐ. ܕܢܸܫܩܘܿܠ ܫܹܡܝ ܒܥܲܡ̈ܡܹܐ ܘܲܒ݂ܡܲܠܟܹ̈ܐ. ܘܒܹܝܬ݂ ܒܢܲܝ̈ ܝܼܣܪܵܝܹܠ.

¹⁶ ܐܸܢܵܐ ܓܹܝܪ ܐܸܚܵܘܝܘܗܝ. ܟܡܵܐ ܥܬ݂ܝܼܕ݂ ܠܡܸܚܲܫ ܡܛܠ ܫܹܡܝ.

¹⁷ ܗܵܝܕܹܝܢ ܚܲܢܲܢܝܵܐ ܐܸܙܲܠ ܠܒܲܝܬܵܐ ܠܘܵܬܹܗ. ܘܣܵܡ ܥܠܵܘܗܝ ܐܝܼܕ݂ܵܐ ܘܐܸܡܲܪ ܠܹܗ. ܫܵܐܘܿܠ ܐܵܚܝ. ܡܵܪܲܢ ܝܼܫܘܿܥ ܫܲܕܪܲܢܝ. ܗܵܘ ܕܐܬ݂ܚܙܝܼ ܠܵܟ݂ ܒܐܘܼܪܚܵܐ ܟܲܕ݂ ܐܵܬܹܐ ܐܲܢ̄ܬܿ. ܐܲܝܟ݂ ܕܢܸܬ݂ܦܲܬܿܚܵܢ ܥܲܝܢܲܝ̈ܟ ܘܬܸܬ݂ܡܠܹܐ ܪܘܼܚܵܐ ܕܩܘܼܕ݂ܫܵܐ.

¹⁸ ܘܒܲܪ ܫܵܥܬܹܗ ܢܦܲܠ ܡܸܢ ܥܲܝܢܵܘ̈ܗܝ ܡܸܕܸܡ ܕܕ݂ܵܡܹܐ ܠܲܩܠܵܦܹ̈ܐ. ܘܐܸܬ݂ܦܲܬܲܚ ܥܲܝܢܵܘ̈ܗܝ. ܘܩܵܡ ܥܡܲܕ݂.

¹⁹ ܘܩܲܒܸܠ ܣܲܝܒܵܪܬܵܐ ܘܐܸܬ݂ܚܲܝܲܠ. ܘܲܗܘܵܐ ܝܵܘ̈ܡܵܬ݂ܵܐ ܠܘܵܬ݂ ܬܲܠܡܝܼܕܹ̈ܐ ܗܵܢܘܿܢ ܕܐܝܼܬ݂ ܗ̄ܘܼܵܘ ܒܕ݂ܲܪܡܣܘܿܩ.

²⁰ ܘܒܲܪ ܫܵܥܬܹܗ ܡܲܟ݂ܪܸܙ ܗ̄ܘܵܐ ܒܲܟ݂ܢ̈ܘܼܫܵܬ݂ܵܐ ܕܲܝܗ̄ܘܼܕ݂ܵܝܹ̈ܐ ܥܲܠ ܝܼܫܘܿܥ. ܕܗܘܸܝܘܼ ܒܪܹܗ ܕܐܲܠܵܗܵܐ.

²¹ ܘܬܲܡܝܼܗܝܼܢ ܗ̄ܘܼܵܘ ܟܠܗܘܿܢ ܐܲܝܠܹܝܢ ܕܫܵܡܥܝܼܢ ܗ̄ܘܼܵܘ ܠܹܗ. ܘܐܵܡܪܝܼܢ ܗ̄ܘܼܵܘ. ܠܵܐ ܗ̄ܘܵܐ ܗܵܢܵܐ. ܗܵܘ ܕܪܵܕܹܦ ܗ̄ܘܵܐ ܠܟ݂ܠܗܘܿܢ ܐܲܝܠܹܝܢ ܕܩܵܪܹܝܢ ܗ̄ܘܼܵܘ ܠܲܫܡܵܐ ܗܵܢܵܐ ܒܐܘܿܪܸܫܠܸܡ. ܐܵܦ ܠܗܵܪܟܵܐ ܥܠܹܝܗܿ ܥܲܠ ܗܵܕܹܐ ܡܫܲܕܲܪ ܗ̄ܘܵܐ. ܐܲܝܟ݂ ܕܢܹܐܣܘܿܪ ܢܵܘܒܸܠ ܐܸܢܘܿܢ ܠܪ̈ܲܒܲܝ ܟܵܗܢܹ̈ܐ.

²² ܫܵܐܘܿܠ ܕܹܝܢ ܝܲܬܿܝܼܪ ܡܸܬ݂ܚܲܝܲܠ ܗ̄ܘܵܐ. ܘܲܡܙܝܼܥ ܗ̄ܘܵܐ ܠܗܘܿܢ ܠܝܗ̄ܘܼܕ݂ܵܝܹ̈ܐ ܗܵܢܘܿܢ ܕܥܵܡܪܝܼܢ ܗ̄ܘܼܵܘ ܒܕ݂ܲܪܡܣܘܿܩ. ܟܲܕ݂ ܡܚܵܘܹܐ ܗ̄ܘܵܐ ܕܗܵܢܵܘ ܡܫܝܼܚܵܐ.

²³ ܘܟܲܕ݂ ܣܓ݂ܝܼܘ ܠܹܗ ܬܲܡܵܢ ܝܵܘ̈ܡܵܬ݂ܵܐ. ܥܒܲܕ݂ܘ ܥܠܵܘܗܝ ܢܸܟ݂ܠܵܐ ܝܗ̄ܘܼܕ݂ܵܝܹ̈ܐ. ܕܢܸܩܛܠܘܼܢܵܝܗܝ.

²⁴ ܐܸܬ݂ܒܲܕܲܩ ܠܹܗ ܕܹܝܢ ܠܫܵܐܘܿܠ ܐܲܦܲܪܣܵܢܵܐ. ܕܒ݂ܵܥܹܝܢ ܗ̄ܘܼܵܘ ܠܡܸܥܒܲܕ݂ ܠܹܗ. ܘܢܵܛܪܝܼܢ ܗ̄ܘܼܵܘ ܬܲܪ̈ܥܹܐ ܕܲܡܕ݂ܝܼܢ̄ܬܵܐ ܐܝܼܡܵܡܵܐ ܘܠܸܠܝܵܐ. ܕܢܸܩܛܠܘܼܢܵܝܗܝ.

²⁵ ܗܵܝܕܹܝܢ ܣܵܡܘܼܗܝ ܬܲܠܡܝܼܕܹ̈ܐ ܒܐܸܣܦܪܝܼܕ݂ܵܐ. ܘܫܲܒܘܼܗܝ ܡܸܢ ܫܘܼܪܵܐ ܒܠܸܠܝܵܐ.

²⁶ ܘܐܸܙܲܠ ܠܹܗ ܠܐܘܿܪܸܫܠܸܡ. ܘܨܵܒܹܐ ܗ̄ܘܵܐ ܠܡܸܬ݂ܢܲܩܵܦܘܼ ܠܬܲܠܡܝܼܕܹ̈ܐ. ܘܟ݂ܠܗܘܿܢ ܕܵܚܠܝܼܢ ܗ̄ܘܼܵܘ ܡܸܢܹܗ ܘܠܵܐ ܡܗܲܝܡܢܝܼܢ ܗ̄ܘܼܵܘ ܕܬܲܠܡܝܼܕ݂ܵܐ ܗܘܼ.

²⁷ ܒܲܪܢܒ݂ܵܐ ܕܹܝܢ ܐܲܚܕܹܗ ܘܐܲܝܬܿܝܹܗ ܠܘܵܬ݂ ܫܠܝܼܚܹ̈ܐ. ܘܐܸܫܬܲܥܝܼ ܠܗܘܿܢ ܐܲܝܟܲܢܵܐ ܒܐܘܼܪܚܵܐ ܚܙܵܐ ܠܡܵܪܝܵܐ. ܘܕ݂ܲܐܝܟܲܢܵܐ ܡܲܠܸܠ ܥܲܡܹܗ. ܘܐܲܝܟܲܢܵܐ ܒܕ݂ܲܪܡܣܘܿܩ ܥܹܝܢ ܒܲܓ݂ܠܹܐ ܡܲܠܸܠ ܒܲܫܡܹܗ ܕܝܼܫܘܿܥ.

²⁸ ܘܥܵܐܹܠ ܗ̄ܘܵܐ ܥܲܡܗܘܿܢ ܘܢܵܦܹܩ ܒܐܘܿܪܸܫܠܸܡ.

²⁹ ܘܲܡܡܲܠܸܠ ܗ̄ܘܵܐ ܒܲܫܡܹܗ ܕܝܼܫܘܿܥ ܥܹܝܢ ܒܲܓ݂ܠܹܐ. ܘܕ݂ܵܪܹܫ ܗ̄ܘܵܐ ܥܲܡ ܝܗ̄ܘܼܕ݂ܵܝܹ̈ܐ ܐܲܝܠܹܝܢ ܕܝܵܕ݂ܥܝܼܢ ܗ̄ܘܼܵܘ ܝܵܘܢܵܐܝܼܬ݂. ܗܸܢܘܿܢ ܕܹܝܢ ܨܵܒܹܝܢ ܗ̄ܘܼܵܘ ܠܡܸܩܛܠܹܗ.

³⁰ ܘܟܲܕ݂ ܝܼܕ݂ܲܥܘ ܐܲܚܹ̈ܐ. ܐܲܝܬܿܝܘܼܗܝ ܒܠܸܠܝܵܐ ܠܩܹܣܲܪܝܵܐ. ܘܡܸܢ ܬܲܡܵܢ ܫܲܕܿܪܘܼܗܝ ܠܛܲܪܣܘܿܣ.

³¹ ܒܪܲܡ ܕܹܝܢ ܥܹܕܬܵܐ ܕܲܒ݂ܟ݂ܠܵܗܿ ܝܼܗܘܼܕ݂ ܘܒܲܓ݂ܠܝܼܠܵܐ ܘܲܒ݂ܫܵܡܪܝܼܢ. ܐܝܼܬ݂ ܗ̄ܘܵܐ ܒܵܗܿ ܫܠܵܡܵܐ. ܟܲܕ݂ ܡܸܬ݂ܒܲܢܝܵܐ ܗ̄ܘܵܬ݂ ܘܪܵܕ݂ܝܵܐ ܒܕ݂ܚܠܲܬ݂ ܐܲܠܵܗܵܐ. ܘܲܒ݂ܒ݂ܘܝܵܐܵܐ ܕܪܘܼܚܵܐ ܕܩܘܼܕ݂ܫܵܐ ܣܵܓ݂ܝܵܐ ܗ̄ܘܵܬ݂.

³² ܘܲܗܘܵܐ ܕܟܲܕ݂ ܡܸܬ݂ܟܪܸܟ݂ ܗ̄ܘܵܐ ܫܸܡܥܘܿܢ ܒܲܡܕ݂ܝܼ̈ܢܵܬ݂ܵܐ. ܢܚܸܬ݂ ܐܵܦ ܠܘܵܬ݂ ܩܲܕܝܼܫܹ̈ܐ ܕܥܵܡܪܝܼܢ ܒܠܘܿܕ݂ ܡܕ݂ܝܼܢ̄ܬܵܐ.

³³ ܘܐܸܫܟܲܚ ܓܲܒ݂ܪܵܐ ܚܲܕ݂ ܕܲܫܡܹܗ ܐܲܢܝܼܵܣ. ܕܲܪܡܹܐ ܗ̄ܘܵܐ ܒܥܲܪܣܵܐ ܘܲܡܫܲܪܲܝ ܫܢ̈ܝܼܢ ܬܿܡܵܢܹܐ.

³⁴ ܘܐܸܡܲܪ ܠܹܗ ܫܸܡܥܘܿܢ. ܐܲܢܝܼܵܐ ܡܲܐܣܹܐ ܠܵܟ݂ ܝܼܫܘܿܥ ܡܫܝܼܚܵܐ. ܩܘܼܡ ܘܫܵܘܵܐ ܥܲܪܣܵܟ݂. ܘܒܲܪ ܫܵܥܬܹܗ ܩܵܡ.

³⁵ ܘܲܚܙܵܐܘܼܗܝ ܟܠܗܘܿܢ ܕܥܵܡܪܝܼܢ ܒܠܘܿܕ݂ ܘܲܒ݂ܣܵܪܘܿܢܵܐ. ܘܐܸܬ݂ܦܢܝܼܘ ܠܘܵܬ݂ ܐܲܠܵܗܵܐ.

³⁶ ܐܝܼܬ݂ ܗ̄ܘܵܐ ܕܹܝܢ ܬܲܠܡܝܼܕܬܵܐ ܚܕ݂ܵܐ ܒܝܘܿܦܹܐ ܡܕ݂ܝܼܢ̄ܬܵܐ ܕܲܫܡܵܗܿ ܗܘܵܐ ܛܒ݂ܝܼܬ݂ܵܐ. ܗܵܕܹܐ ܥܲܬܿܝܼܪܵܐ ܗ̄ܘܵܬ݂ ܒܲܥܒ݂ܵܕܹ̈ܐ ܛܵܒܹ̈ܐ ܘܲܒ݂ܙܸܕ݂̈ܩܵܬ݂ܵܐ. ܕܥܵܒ݂ܕܵܐ ܗ̄ܘܵܬ݂.

³⁷ ܐܸܬ݂ܟܲܪܗܲܬ݂ ܕܹܝܢ ܒܗܘܿܢ ܒܗܵܢܘܿܢ ܝܵܘ̈ܡܵܬ݂ܵܐ ܘܡܝܼܬܲܬܸ. ܘܐܲܣܚܝܘܼܗܿ ܘܣܵܡܘܼܗܿ ܒܥܸܠܝܼܬ݂ܵܐ.

³⁸ ܘܲܫܡܲܥܘ ܗ̄ܘܼܵܘ ܬܲܠܡܝܼܕܹ̈ܐ ܕܫܸܡܥܘܿܢ ܒܠܘܿܕ݂ ܗܘܼ ܡܕ݂ܝܼܢ̄ܬܵܐ. ܗܵܝ ܕܐܝܼܬܹܝܗܿ ܥܲܠ ܓܸܢ̄ܒ݂ ܝܘܿܦܹܐ. ܘܫܲܕܲܪܘ ܗ̄ܘܼܵܘ ܠܘܵܬܹܗ ܓܲܒ݂ܪܹ̈ܐ ܬܪܹܝܢ ܕܢܸܒ݂ܥܘܿܢ ܡܸܢܹܗ. ܕܠܵܐ ܬܸܡܲܐܢ ܠܹܗ ܕܢܹܐܬܹܐ ܨܸܐܕ݂ܲܝܗܘܿܢ.

³⁹ ܘܩܵܡ ܫܸܡܥܘܿܢ ܐܸܙܲܠ ܥܲܡܗܘܿܢ. ܘܟܲܕ݂ ܐܸܬ݂ܵܐ ܐܲܣܩܘܼܗܝ ܠܥܸܠܝܼܬ݂ܵܐ. ܘܲܟ݂ܢܲܫ ܩܵܡ ܠܗܹܝܢ ܚܕ݂ܵܪ̈ܵܘܗܝ ܟܠܗܹܝܢ ܐܲܪ̈ܡܠܵܬ݂ܵܐ ܟܲܕ݂ ܒܵܟ݂ܝܵܢ ܘܲܡܚܵܘܝܵܢ ܠܹܗ. ܟܘܿܬܿܝܼܢ̈ܝܵܬ݂ܵܐ ܘܡܲܪ̈ܛܘܼܛܹܐ. ܗܵܠܹܝܢ ܕܝܵܗܒܵܐ ܗ̄ܘܵܬ݂ ܠܗܹܝܢ ܛܒ݂ܝܼܬ݂ܵܐ. ܟܲܕ݂ ܚܲܝܵܐ.

⁴⁰ ܫܸܡܥܘܿܢ ܕܹܝܢ ܐܲܦܸܩ ܠܟ݂ܠܗܘܿܢ ܐ̄ܢܵܫܵܐ ܠܒܲܪ. ܘܲܩܥܸܕ݂ ܥܲܠ ܒܘܼܪ̈ܟܵܘܗܝ ܘܨܲܠܝܼ. ܘܐܸܬ݂ܦܢܝܼ ܠܘܵܬ݂ ܫܠܲܕܵܐ ܘܐܸܡܲܪ. ܛܒ݂ܝܼܬ݂ܵܐ. ܩܘܼܡܝ. ܗܝܼ ܕܹܝܢ ܦܸܬ݂ܚܲܬ݂ ܥܲܝܢܹܝ̈ܗܿ. ܘܟܲܕ݂ ܚܙܵܬܹܗ ܠܫܸܡܥܘܿܢ ܝܸܬ݂ܒܲܬܸ.

⁴¹ ܘܐܵܘܫܸܛ ܠܵܗܿ ܐܝܼܕ݂ܗ ܘܐܲܩܝܼܡܵܗܿ. ܘܲܩܪܵܐ ܠܩܲܕܝܼܫܹ̈ܐ ܘܠܲܐܪ̈ܡܠܵܬ݂ܵܐ. ܘܝܲܗܒܵܗܿ ܠܗܘܿܢ. ܟܲܕ݂ ܚܲܝܵܐ.

⁴² ܘܐܸܬ݂ܝܲܕ݂ܥܲܬ݂ ܗܵܕܹܐ ܒܟ݂ܠܵܗܿ ܡܕ݂ܝܼܢ̄ܬܵܐ. ܘܣܲܓܝܼܐܹ̈ܐ ܗܲܝܡܸܢܘ ܒܡܵܪܲܢ.

⁴³ ܗܘܵܐ ܕܹܝܢ ܒܵܗܿ ܒܝܘܿܦܹܐ ܝܵܘ̈ܡܵܬ݂ܵܐ ܠܵܐ ܙܥܘܿܪܝܼܢ. ܟܲܕ݂ ܫܪܹܐ ܗ̄ܘܵܐ ܒܹܝܬ݂ ܫܸܡܥܘܿܢ ܒܘܼܪܣܵܝܵܐ.

10

¹ ܒܩܹܣܲܪܝܵܐ ܕܹܝܢ ܐܝܼܬ݂ ܗ̄ܘܵܐ ܓܲܒ݂ܪܵܐ ܚܲܕ݂ ܩܸܢܛܪܘܿܢܵܐ. ܕܲܫܡܹܗ ܗ̄ܘܵܐ ܩܘܼܪܢܹܠܝܼܘܿܣ. ܡܸܢ ܣܦܹܝܪܵܐ ܗܵܝ ܕܡܸܬ݂ܩܲܪܝܵܐ ܐܝܼܛܵܠܝܼܩܹܐ.

² ܘܙܲܕܝܼܩ ܗ̄ܘܵܐ ܘܕ݂ܵܚܹܠ ܗ̄ܘܵܐ ܡܸܢ ܐܲܠܵܗܵܐ. ܗܘܼ ܘܒܲܝܬܹܿܗ ܟܠܹܗ. ܘܥܵܒܹܿܕ݂ ܗ̄ܘܵܐ ܙܸܕ݂̈ܩܵܬ݂ܵܐ ܣܲܓܝܼ̈ܐܵܬ݂ܵܐ ܒܥܲܡܵܐ. ܘܲܒܟ݂ܠܙܒܲܢ ܒܵܥܹܐ ܗ̄ܘܵܐ ܡܸܢ ܐܲܠܵܗܵܐ.

³ ܗܵܢܵܐ ܚܙܵܐ ܡܲܠܲܐܟ݂ܵܐ ܕܐܲܠܵܗܵܐ ܒܚܸܙܘܵܐ ܓܲܠܝܵܐܝܼܬ݂. ܠܐܲܦܲܝ̈ ܬܫܲܥ ܫܵܥܝܼ̈ܢ ܒܐܝܼܡܵܡܵܐ. ܕܥܲܠ ܠܘܵܬܹܗ ܘܐܸܡܲܪ ܠܹܗ. ܩܘܼܪܢܹܠܝܼܵܐ.

⁴ ܘܗܘܼ ܚܵܪ ܒܹܗ ܘܲܕ݂ܚܸܠ. ܘܐܸܡܲܪ. ܡܵܢܵܐ ܡܵܪܝ. ܘܐܸܡܲܪ ܠܹܗ ܡܲܠܲܐܟ݂ܵܐ. ܨܠܵܘ̈ܵܬ݂ܵܟ݂ ܘܙܸܕ݂̈ܩܵܬ݂ܵܟ݂ ܣܠܸܩ ܠܕ݂ܘܼܟ݂ܪܵܢܵܐ ܩܕ݂ܵܡ ܐܲܠܵܗܵܐ.

⁵ ܘܗܵܫܵܐ ܫܲܕܲܪ ܓܲܒ݂ܪܹ̈ܐ ܠܝܘܿܦܹܐ ܡܕ݂ܝܼܢ̄ܬܵܐ. ܘܐܲܝܬܵܐ ܠܫܸܡܥܘܿܢ ܕܡܸܬ݂ܩܪܹܐ ܟܹܐܦܵܐ.

⁶ ܗܵܐ ܫܪܹܐ ܒܒܲܝܬܹܿܗ ܕܫܸܡܥܘܿܢ ܒܘܼܪܣܵܝܵܐ ܗܵܘ ܕܐܝܼܬ݂ܵܘܗܝ ܥܲܠ ܝܲܕ݂ ܝܲܡܵܐ.

⁷ ܘܟܲܕ݂ ܐܸܙܲܠ ܠܹܗ ܡܲܠܲܐܟ݂ܵܐ ܕܡܲܠܸܠ ܥܲܡܹܗ. ܩܪܵܐ ܬܪܹܝܢ ܡܸܢ ܒܢܲܝ̈ ܒܲܝܬܹܿܗ ܘܦܵܠܚܵܐ ܚܲܕ݂ ܕܕ݂ܵܚܹܠ ܠܐܲܠܵܗܵܐ ܐܲܝܢܵܐ ܕܡܸܬܿܕܿܢܹܐ ܗ̄ܘܵܐ ܠܹܗ.

⁸ ܘܐܸܫܬܲܥܝܼ ܠܗܘܿܢ ܟܠ ܡܸܕܸܡ ܕܲܚܙܵܐ. ܘܫܲܕܲܪ ܐܸܢܘܿܢ ܠܝܘܿܦܹܐ.

⁹ ܘܲܠܝܵܘܡܵܐ ܐ̄ܚܪܹܢܵܐ ܟܲܕ݂ ܗܸܢܘܿܢ ܪܵܕܹܝܢ ܒܐܘܼܪܚܵܐ ܘܩܲܪܝܼܒ݂ܝܼܢ ܠܲܡܕ݂ܝܼܢ̄ܬܵܐ. ܣܠܸܩ ܫܸܡܥܘܿܢ ܠܐܸܓܵܪܵܐ ܕܲܢܨܲܠܹܐ ܒܫܸܬ݂ ܫܵܥܝܼ̈ܢ.

¹⁰ ܘܲܟ݂ܦܸܢ ܘܨܵܒܹܐ ܗ̄ܘܵܐ ܕܢܸܠܥܲܣ. ܘܟܲܕ݂ ܗܸܢܘܿܢ ܡܲܬ݂ܩܢܝܼܢ ܠܹܗ. ܢܦܲܠ ܥܠܵܘܗܝ ܬܸܡܗܵܐ.

¹¹ ܘܲܚܙܵܐ ܫܡܲܝܵܐ ܟܲܕ݂ ܦܬ݂ܝܼܚܝܼܢ. ܘܡܵܐܢܵܐ ܚܲܕ݂ ܟܲܕ݂ ܐܲܣܝܼܪ ܒܐܲܪܒܲܥ ܩܲܪ̈ܢܵܢ. ܘܕ݂ܵܡܹܐ ܗ̄ܘܵܐ ܠܟܸܬܵܢܵܐ ܪܲܒܵܐ. ܘܫܵܐܹܒ݂ ܗ̄ܘܵܐ ܡܸܢ ܫܡܲܝܵܐ ܥܲܠ ܐܲܪܥܵܐ.

¹² ܘܐܝܼܬ݂ ܗ̄ܘܵܐ ܒܹܗ ܟܠܗܹܝܢ ܚܲܝ̈ܘܵܬ݂ܵܐ ܕܐܲܪܒܥܵܬ݂ ܪܸ̈ܓ݂ܠܹ̈ܐ. ܘܪܲܚܫܵܐ ܕܐܲܪܥܵܐ. ܘܦܵܪܲܚܬ݂ܵܐ ܕܲܫܡܲܝܵܐ.

¹³ ܘܩܵܠܵܐ ܐܸܬ݂ܵܐ ܠܹܗ ܕܐܵܡܲܪ. ܫܸܡܥܘܿܢ. ܩܘܼܡ ܟܘܿܣ ܘܐܲܟ݂ܘܿܠ.

¹⁴ ܘܫܸܡܥܘܿܢ ܐܸܡܲܪ. ܚܵܣ ܡܵܪܝ. ܕܡܸܡܬ݂ܘܿܡ ܠܵܐ ܐܸܟ݂ܠܹܬ݂ ܟܠ ܕܲܡܣܲܝܲܒ݂ ܘܲܛܡܲܐ.

¹⁵ ܘܬ݂ܘܼܒ݂ ܕܬܲܪܬܹܝܢ ܙܲܒ݂ܢ̈ܝܼܢ ܩܵܠܵܐ ܗܘܵܐ ܠܘܵܬܹܗ. ܐܲܝܠܹܝܢ ܕܐܲܠܵܗܵܐ ܕܲܟܝܼ. ܐܲܢ̄ܬܿ ܠܵܐ ܬܣܲܝܼܒ݂.

¹⁶ ܗܵܕܹܐ ܕܹܝܢ ܗܘܸܵܬ݂ ܬܿܠܵܬ݂ ܙܲܒ݂ܢ̈ܝܼܢ. ܘܐܸܬ݂ܥܲܠܝܼ ܠܹܗ ܡܵܐܢܵܐ ܠܲܫܡܲܝܵܐ.

¹⁷ ܘܟܲܕ݂ ܡܸܬܿܕܲܡܲܪ ܫܸܡܥܘܿܢ ܒܢܲܦ̮ܫܹܗ ܕܡܵܢܵܘ ܚܸܙܘܵܐ ܕܲܚܙܵܐ. ܡܲܛܝܼܘ ܓܲܒ݂ܪܹ̈ܐ ܗܵܢܘܿܢ ܕܐܸܫܬܲܕܲܪܘ ܗ̄ܘܼܵܘ ܡܸܢ ܩܘܼܪܢܹܠܝܼܘܿܣ. ܘܫܲܐܸܠܘ ܥܲܠ ܒܲܝܬܵܐ ܕܲܫܪܹܐ ܒܹܗ ܫܸܡܥܘܿܢ. ܘܐܸܬ݂ܵܘ ܘܩܵܡܘ ܥܲܠ ܬܲܪܥܵܐ ܕܕ݂ܵܪܬܵܐ.

¹⁸ ܘܩܵܪܹܝܢ ܗ̄ܘܼܵܘ ܬܲܡܵܢ ܘܲܡܫܲܐܠܝܼܢ. ܕܐܸܢ ܫܸܡܥܘܿܢ ܕܡܸܬ݂ܩܪܹܐ ܟܹܐܦܵܐ ܗܵܪܟܵܐ ܫܪܹ̈ܐ.

¹⁹ ܘܟܲܕ݂ ܫܸܡܥܘܿܢ ܪܵܢܹܐ ܗ̄ܘܵܐ ܒܚܸܙܘܵܐ. ܐܸܡܲܪ ܠܹܗ ܪܘܼܚܵܐ. ܗܵܐ ܓܲܒ݂ܪܹ̈ܐ ܬܠܵܬ݂ܵܐ ܒܵܥܹܝܢ ܠܵܟ݂.

²⁰ ܩܘܼܡ ܚܘܼܬ݂ ܘܙܸܠ ܥܲܡܗܘܿܢ ܟܲܕ݂ ܠܵܐ ܡܸܬ݂ܦܲܠܲܓ݂ ܪܸܥܝܵܢܵܟ݂. ܡܛܠ ܕܐܸܢܵܐ ܗܘܼ ܫܲܕܪܹܬ݂ ܐܸܢܘܿܢ.

²¹ ܗܵܝܕܹܝܢ ܢܚܸܬ݂ ܫܸܡܥܘܿܢ ܠܘܵܬ݂ ܓܲܒ݂ܪܹ̈ܐ ܗܵܢܘܿܢ ܘܐܸܡܲܪ ܠܗܘܿܢ. ܐܸܢܵܐ ܗܘܼ ܕܒ݂ܵܥܹܝܢ ܐܢ̄ܬܘܿܢ. ܐܲܝܕ݂ܵܐ ܗܝܼ ܥܸܠܬ݂ܵܐ ܕܡܛܠܬ݂ܵܗܿ ܐܸܬܲܝܬܿܘܿܢ.

²² ܐܵܡܪܝܼܢ ܠܹܗ. ܓܲܒ݂ܪܵܐ ܚܲܕ݂ ܕܲܫܡܹܗ ܩܘܼܪܢܹܠܝܼܘܿܣ. ܩܸܢܛܪܘܿܢܵܐ ܟܹܐܢܵܐ ܕܕ݂ܵܚܹܠ ܡܸܢ ܐܲܠܵܗܵܐ. ܘܡܲܣܗܸܕ݂ ܥܠܵܘܗܝ ܟܠܹܗ ܥܲܡܵܐ ܕܲܝܗ̄ܘܼܕ݂ܵܝܹ̈ܐ. ܐܸܬ݂ܐܡܲܪ ܠܹܗ ܒܚܸܙܘܵܐ ܡܸܢ ܡܲܠܲܐܟ݂ܵܐ ܩܲܕܝܼܫܵܐ. ܕܲܢܫܲܕܲܪ ܢܲܥܠܵܟ݂ ܠܒܲܝܬܹܿܗ. ܘܢܸܫܡܲܥ ܡܸܠܬ݂ܵܐ ܡܸܢܵܟ݂.

²³ ܘܐܲܥܸܠ ܐܸܢܘܿܢ ܫܸܡܥܘܿܢ. ܘܩܲܒܸܠ ܐܸܢܘܿܢ ܟܲܪ ܕܲܫܪܹܐ ܗ̄ܘܵܐ. ܘܩܵܡ ܠܒ݂ܵܬ݂ܪܹܗ ܕܝܵܘܡܵܐ. ܘܲܢܦܲܩ ܐܸܙܲܠ ܥܲܡܗܘܿܢ. ܘܐܸܙܲܠܘ ܥܲܡܹܗ ܐ̄ܢܵܫ ܐ̄ܢܵܫ ܡܸܢ ܐܲܚܹ̈ܐ ܕܝܘܿܦܹܐ.

²⁴ ܘܲܠܝܵܘܡܵܐ ܐ̄ܚܪܹܢܵܐ ܥܲܠ ܠܩܹܣܲܪܝܵܐ. ܩܘܼܪܢܹܠܝܼܘܿܣ ܕܹܝܢ ܡܩܵܘܹܐ ܗ̄ܘܵܐ ܠܗܘܿܢ. ܟܲܕ݂ ܡܟܲܢܫܝܼܢ ܠܹܗ ܟܠܗܘܿܢ ܒܢܲܝ̈ ܛܘܼܗܡܹܗ. ܘܐܵܦ ܪ̈ܵܚܡܹܐ ܚܲܒܝܼܒܹ̈ܐ ܕܐܝܼܬ݂ ܗ̄ܘܼܵܘ ܠܹܗ.

²⁵ ܘܟܲܕ݂ ܥܵܐܹܠ ܫܸܡܥܘܿܢ. ܐܲܪܥܹܗ ܩܘܼܪܢܹܠܝܼܘܿܣ. ܘܲܢܦܲܠ ܣܓܸܕ݂ ܠܪܸ̈ܓ݂ܠܵܘܗܝ.

²⁶ ܘܫܸܡܥܘܿܢ ܐܲܩܝܼܡܹܗ ܘܐܸܡܲܪ ܠܹܗ. ܩܘܼܡ ܠܵܟ݂. ܘܐܵܦ ܐܸܢܵܐ ܒܲܪܢܵܫܵܐ ܐ̄ܢܵܐ.

²⁷ ܘܟܲܕ݂ ܡܡܲܠܸܠ ܥܲܡܹܗ. ܥܲܠ ܘܐܸܫܟܲܚ ܣܲܓܝܼܐܹ̈ܐ ܕܐܸܬ݂ܵܘ ܗ̄ܘܼܵܘ ܠܬܲܡܵܢ.

²⁸ ܘܐܸܡܲܪ ܠܗܘܿܢ. ܐܲܢ̄ܬܿܘܿܢ ܝܵܕ݂ܥܝܼܢ ܐܢ̄ܬܘܿܢ. ܕܠܵܐ ܡܲܦܲܣ ܠܓܲܒ݂ܪܵܐ ܝܗܘܼܕ݂ܵܝܵܐ. ܕܢܸܩܲܦ ܠܐ̄ܢܵܫܵܐ ܢܘܼܟ݂ܪܵܝܵܐ ܕܠܵܐ ܗ̄ܘܵܐ ܒܲܪ ܫܲܪܒܬܹܗ. ܘܠܝܼ ܐܲܠܵܗܵܐ ܚܵܘܝܲܢܝ. ܕܠܵܐ ܐܹܡܲܪ ܥܲܠ ܐ̄ܢܵܫ ܕܲܛܡܲܐ ܐܵܘ ܡܣܲܝܲܒ݂.

²⁹ ܡܛܠ ܗܵܢܵܐ ܥܬ݂ܝܼܕ݂ܵܐܝܼܬ݂ ܐܸܬܹܝܬ݂. ܟܲܕ݂ ܫܲܕܲܪܬܿܘܢ ܒܵܬܲܪܝ. ܒܪܲܡ ܡܫܲܐܸܠ ܐ̄ܢܵܐ ܠܟ݂ܘܿܢ. ܡܛܠ ܡܵܢܵܐ ܫܲܕܲܪܬܿܘܢ ܒܵܬܲܪܝ.

³⁰ ܐܵܡܲܪ ܠܹܗ ܩܘܼܪܢܹܠܝܼܘܿܣ. ܐܲܪܒܥܵܐ ܝܵܘܡ̈ܝܼܢ ܐܝܼܬ݂ ܥܕ݂ܲܡܵܐ ܠܗܵܫܵܐ ܗܵܐ ܡܸܢ ܕܨܵܐܹܡ ܐ̄ܢܵܐ. ܘܒܲܬ݂ܫܲܥ ܫܵܥܝܼ̈ܢ ܟܲܕ݂ ܡܨܲܠܹܐ ܐ̄ܢܵܐ ܒܒܲܝܬܿܝ. ܩܵܡ ܓܲܒ݂ܪܵܐ ܚܲܕ݂ ܩܕ݂ܵܡܲܝ ܟܲܕ݂ ܠܒ݂ܝܼܫ ܚܸܘܵܪܹ̈ܐ.

³¹ ܘܐܸܡܲܪ ܠܝܼ. ܩܘܪܢܠܝܼܐ. ܐܸܫܬܲܡܥܲܬ݂ ܨܠܘܿܬ݂ܵܟ݂. ܘܲܠܙܸ̈ܕ݂ܩܵܬ݂ܵܟ݂ ܕܘܟ݂ܪܵܢܵܐ ܗܘܵܐ ܩܕ݂ܵܡ ܐܲܠܵܗܵܐ.

³² ܒܪܲܡ ܫܲܕܲܪ ܠܝܘܿܦܹܐ ܡܕ݂ܝܼܢ̄ܬܵܐ. ܘܐܲܝܬܵܐ ܠܫܸܡܥܘܿܢ ܕܡܸܬ݂ܩܪܹܐ ܟܹܐܦܵܐ. ܗܵܐ ܫܪܹܐ ܒܒܲܝܬܹܿܗ ܕܫܸܡܥܘܿܢ ܒܘܼܪܣܵܝܵܐ ܕܥܲܠ ܝܲܕ݂ ܝܲܡܵܐ. ܘܗܘܼ ܢܹܐܬܹܐ ܢܡܲܠܸܠ ܥܲܡܵܟ݂.

³³ ܘܒܲܪ ܫܵܥܬܹܗ ܫܲܕܪܹܬ݂ ܠܘܵܬ݂ܵܟ݂. ܘܐܲܢ̄ܬܿ ܫܲܦܝܼܪ ܥܒܲܕܬܿ ܕܐܸܬܲܝܬܿ. ܘܗܵܐ ܚܢܲܢ ܟܠܲܢ ܩܕ݂ܵܡܲܝܟ. ܘܨܵܒܹܝܢܲܢ ܕܢܸܫܡܲܥ ܟܠ ܡܵܐ ܕܐܬ݂ܦܩܸܕ݂ ܠܵܟ݂ ܡܸܢ ܠܘܵܬ݂ ܐܲܠܵܗܵܐ.

³⁴ ܦܬܲܚ ܕܹܝܢ ܫܸܡܥܘܿܢ ܦܘܼܡܹܗ ܘܐܸܡܲܪ. ܒܲܫܪܵܪܵܐ ܐܲܕ݂ܪܟܹܬ݂. ܕܐܲܠܵܗܵܐ ܠܵܐ ܗ̄ܘܵܐ ܢܵܣܹܒ݂ ܒܐܲܦܹ̈ܐ.

³⁵ ܐܸܠܵܐ ܒܟ݂ܠܗܘܿܢ ܥܲܡ̈ܡܹܐ ܐܲܝܢܵܐ ܕܕ݂ܵܚܹܠ ܡܸܢܹܗ ܘܦܵܠܲܚ ܟܹܐܢܘܼܬ݂ܵܐ. ܡܩܲܒܲܠ ܗܘܼ ܠܘܵܬܹܗ.

³⁶ ܡܸܠܬ݂ܵܐ ܓܹܝܪ ܕܫܲܕܲܪ ܠܲܒ݂ܢܲܝ̈ ܝܼܣܪܵܝܹܠ. ܘܣܲܒܲܪ ܐܸܢܘܿܢ ܫܠܵܡܵܐ ܘܫܲܝܢܵܐ ܒܝܲܕ݂ ܝܼܫܘܿܥ ܡܫܝܼܚܵܐ. ܗܵܢܵܘ ܡܵܪܝܵܐ ܕܟ݂ܠ.

³⁷ ܘܐܵܦ ܐܲܢ̄ܬܿܘܿܢ ܝܵܕ݂ܥܝܼܢ ܐܢ̄ܬܘܿܢ ܒܡܸܠܬ݂ܵܐ ܕܲܗܘܵܬ݂ ܒܟ݂ܠܵܗܿ ܝܼܗܘܼܕ݂. ܕܐܲܩܦܲܬ݂ ܡܸܢ ܓܠܝܼܠܵܐ ܒܵܬܲܪ ܡܲܥܡܘܿܕ݂ܝܼܬ݂ܵܐ ܕܐܲܟ݂ܪܸܙ ܝܘܿܚܲܢܵܢ.

³⁸ ܥܲܠ ܝܼܫܘܿܥ ܕܡܸܢ ܢܵܨܪܲܬ݂. ܕܐܲܠܵܗܵܐ ܡܲܫܚܹܗ ܒܪܘܼܚܵܐ ܕܩܘܼܕ݂ܫܵܐ ܘܲܒ݂ܚܲܝܠܵܐ. ܘܗܘܸܝܘܼ ܕܡܸܬ݂ܟܪܸܟ݂ ܗ̄ܘܵܐ ܘܡܲܐܣܹܐ ܠܗܵܢܘܿܢ ܕܐܬ݂ܢܟ݂ܝܼܘ ܡܸܢ ܒܝܼܫܵܐ. ܡܛܠ ܕܐܲܠܵܗܵܐ ܗ̄ܘܵܐ ܥܲܡܹܗ.

³⁹ ܘܲܚܢܲܢ ܣܵܗܕܵܘ̈ܗܝ ܥܲܠ ܟܠ ܡܵܐ ܕܲܥܒܲܕ݂. ܒܟ݂ܠܵܗܿ ܐܲܪܥܵܐ ܕܲܝܗܘܼܕ݂ ܘܕ݂ܐܘܿܪܸܫܠܸܡ. ܠܹܗ ܠܗܵܢܵܐ ܬܠܵܐܘܼܗܝ ܝܗ̄ܘܼܕ݂ܵܝܹ̈ܐ ܥܲܠ ܩܲܝܣܵܐ ܘܩܲܛܠܘܼܗܝ.

⁴⁰ ܘܠܹܗ ܐܲܩܝܼܡ ܐܲܠܵܗܵܐ ܠܲܬ݂ܠܵܬ݂ܵܐ ܝܵܘܡ̈ܝܼܢ. ܘܝܲܗܒܹܗ ܕܢܸܬ݂ܚܙܹܐ ܥܹܝܢ ܒܲܓ݂ܠܹܐ.

⁴¹ ܠܵܐ ܕܹܝܢ ܠܟ݂ܠܹܗ ܥܲܡܵܐ. ܐܸܠܵܐ ܠܲܢ ܐܲܝܠܹܝܢ ܕܡܸܢ ܐܲܠܵܗܵܐ ܐܸܬ݂ܓ݁ܒ݂ܝܼܢ ܕܢܸܗܘܹܐ ܠܹܗ ܣܵܗܕܹ̈ܐ. ܕܐܸܟܲܠܢ ܥܲܡܹܗ ܘܐܸܫܬܿܝܼܢ ܡܸܢ ܒܵܬܲܪ ܩܝܵܡܬܹܿܗ ܕܡܸܢ ܒܹܝܬ݂ ܡܝܼܬܹ̈ܐ.

⁴² ܘܦܲܩܕ݂ܲܢ ܕܢܲܟ݂ܪܸܙ ܘܲܢܣܲܗܸܕ݂ ܠܥܲܡܵܐ. ܕܗܵܢܵܘ ܕܐܸܬ݂ܦܪܸܫ ܡܸܢ ܐܲܠܵܗܵܐ ܕܲܝܵܢܵܐ ܕܚܲܝܹ̈ܐ ܘܲܕ݂ܡܝܼܬܹ̈ܐ.

⁴³ ܘܲܥܠܵܘܗܝ ܐܲܣܗܸܕ݂ܘ ܟܠܗܘܿܢ ܢܒ݂ܝܹ̈ܐ. ܕܟ݂ܠܡܲܢ ܕܲܡܗܲܝܡܸܢ ܒܲܫܡܹܗ. ܢܩܲܒܸܠ ܫܘܼܒ݂ܩܵܢ ܚܛܵܗܹ̈ܐ.

⁴⁴ ܘܟܲܕ݂ ܗܘܼ ܫܸܡܥܘܿܢ ܡܡܲܠܸܠ ܗ̄ܘܵܐ ܗܵܠܹܝܢ ܡܸܠܹ̈ܐ. ܐܲܓ݁ܢܲܬ݂ ܪܘܼܚܵܐ ܕܩܘܼܕ݂ܫܵܐ ܥܲܠ ܟܠܗܘܿܢ ܕܫܵܡܥܝܼܢ ܗ̄ܘܼܵܘ ܡܸܠܬ݂ܵܐ.

⁴⁵ ܘܲܬ݂ܡܲܗܘ ܘܲܬ݂ܗܲܪܘ ܐܲܚܹ̈ܐ ܓܙܝܼܪܹ̈ܐ ܗܵܢܘܿܢ ܕܐܸܬ݂ܵܘ ܥܲܡܹܗ. ܕܐܵܦ ܥܲܠ ܥܲܡ̈ܡܹܐ ܡܵܘܗܲܒ݂ܬܵܐ ܕܪܘܼܚܵܐ ܕܩܘܼܕ݂ܫܵܐ ܐܸܫܬܲܦܥܲܬ݂.

⁴⁶ ܫܵܡܥܝܼܢ ܗ̄ܘܼܵܘ ܠܗܘܿܢ ܓܹܝܪ ܟܲܕ݂ ܡܡܲܠܠܝܼܢ ܒܠܸܫܵܢ ܠܸܫܵܢ. ܘܡܵܘܪܒ݂ܝܼܢ ܗ̄ܘܼܵܘ ܠܐܲܠܵܗܵܐ. ܘܐܸܡܲܪ ܗ̄ܘܵܐ ܫܸܡܥܘܿܢ.

⁴⁷ ܕܲܠܡܵܐ ܡܲܝ̈ܵܐ ܡܸܫܟܲܚ ܐ̄ܢܵܫ ܟܵܠܹܐ. ܕܠܵܐ ܢܸܥܡܕ݂ܘܼܢ ܗܵܢܘܿܢ. ܕܗܵܐ ܩܲܒܸܠܘ ܪܘܼܚܵܐ ܕܩܘܼܕ݂ܫܵܐ ܐܲܝܟ݂ ܡܵܐ ܕܲܚܢܲܢ.

⁴⁸ ܗܵܝܕܹܝܢ ܦܩܲܕ݂ ܠܗܘܿܢ. ܕܢܸܥܡܕ݂ܘܼܢ ܒܲܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܘܲܒ݂ܥܵܘ ܡܸܢܹܗ ܐܲܝܟ݂ ܕܲܢܩܵܘܐ ܠܘܵܬ݂ܗܘܿܢ ܝܵܘ̈ܡܵܬ݂ܵܐ.

11

¹ ܘܐܸܫܬܲܡܥܲܬ݂ ܗ̄ܘܵܬ݂ ܠܲܫܠܝܼܚܹ̈ܐ ܘܠܲܐܚܹ̈ܐ ܕܒܲܝܗܘܼܕ݂. ܕܐܵܦ ܥܲܡ̈ܡܹܐ ܩܲܒܸܠܘ ܡܸܠܬ݂ܵܐ ܕܐܲܠܵܗܵܐ.

² ܘܟܲܕ݂ ܣܠܸܩ ܫܸܡܥܘܿܢ ܠܐܘܿܪܸܫܠܸܡ. ܕܵܝܢܝܼܢ ܗ̄ܘܼܵܘ ܥܲܡܹܗ ܗܵܢܘܿܢ ܕܡܸܢ ܓܙܘܼܪܬܵܐ

³ ܟܲܕ݂ ܐܵܡܪܝܼܢ. ܕܲܠܘܵܬ݂ ܐ̄ܢܵܫܵܐ ܥܘܼܪ̈ܠܹܐ ܥܲܠ ܘܲܠܥܸܣ ܥܲܡܗܘܿܢ.

⁴ ܘܐܲܩܸܦ ܗ̄ܘܵܐ ܫܸܡܥܘܿܢ ܒܵܬܲܪ ܒܵܬܲܪ ܠܡܹܐܡܲܪ ܠܗܘܿܢ.

⁵ ܕܟܲܕ݂ ܡܨܲܠܹܐ ܗ̄ܘܹܝܬ݂ ܒܝܘܿܦܹܐ. ܚܙܹܝܬ݂ ܒܚܸܙܘܵܐ. ܕܲܢܚܸܬ݂ ܗ̄ܘܵܐ ܡܵܐܢܵܐ ܚܲܕ݂. ܐܲܝܢܵܐ ܕܕ݂ܵܡܹܐ ܗ̄ܘܵܐ ܠܟܸܬܵܢܵܐ. ܘܐܲܣܝܼܪ ܗ̄ܘܵܐ ܒܐܲܪܒܲܥ ܩܲܪ̈ܢܵܬܹܗ. ܘܫܵܐܹܒ݂ ܗ̄ܘܵܐ ܡܸܢ ܫܡܲܝܵܐ. ܘܐܸܬ݂ܵܐ ܥܕ݂ܲܡܵܐ ܠܘܵܬ݂ܝ.

⁶ ܘܚܵܪܹܬ݂ ܒܹܗ. ܘܚܵܙܹܐ ܗ̄ܘܹܝܬ݂ ܕܐܝܼܬ݂ ܒܹܗ ܚܲܝ̈ܘܵܬ݂ܵܐ ܕܐܲܪܒܥܵܬ݂ ܪܸ̈ܓ݂ܠܲܝܗܹܝܢ. ܘܪܲܚܫܵܐ ܕܐܲܪܥܵܐ. ܘܐܵܦ ܦܵܪܲܚܬ݂ܵܐ ܕܲܫܡܲܝܵܐ.

⁷ ܘܫܸܡܥܹܬ݂ ܗ̄ܘܹܝܬ݂ ܩܵܠܵܐ ܕܐܵܡܲܪ ܗ̄ܘܵܐ ܠܝܼ. ܫܸܡܥܘܿܢ. ܩܘܼܡ ܟܘܿܣ ܘܐܲܟ݂ܘܠ.

⁸ ܘܐܸܡܪܹܬ݂. ܚܵܣ ܡܵܪܝ. ܕܡܸܡܬ݂ܘܿܡ ܠܵܐ ܥܲܠ ܠܦܘܼܡܝ ܕܲܛܡܲܐ ܘܕ݂ܲܡܣܲܝܲܒ݂.

⁹ ܘܬ݂ܘܼܒ݂ ܩܵܠܵܐ ܐܸܡܲܪ ܠܝܼ ܡܸܢ ܫܡܲܝܵܐ. ܕܡܸܕܸܡ ܕܐܲܠܵܗܵܐ ܕܲܟܝܼ. ܐܲܢ̄ܬܿ ܠܵܐ ܬܣܲܝܸܒ݂.

¹⁰ ܗܵܕܹܐ ܗܘܸܵܬ݂ ܬܠܵܬ݂ ܙܲܒ݂ܢ̈ܝܼܢ. ܘܐܸܣܬܲܠܲܩ ܠܹܗ ܟܠ ܡܸܕܸܡ ܠܲܫܡܲܝܵܐ.

¹¹ ܘܒ݂ܵܗܿ ܒܫܵܥܬ݂ܵܐ. ܬܠܵܬ݂ܵܐ ܓܲܒ݂ܪ̈ܝܼܢ ܕܐܫܬܲܕܲܪܘ ܠܘܵܬ݂ܝ ܡܸܢ ܩܘܼܪܢܹܠܝܼܘܿܣ ܡܸܢ ܩܹܣܲܪܝܵܐ. ܐܸܬ݂ܵܘ ܘܩܵܡܘ ܥܲܠ ܬܲܪܥܵܐ ܕܕ݂ܵܪܬܵܐ. ܕܲܫܪܹܐ ܗ̄ܘܹܝܬ݂ ܒܵܗܿ.

¹² ܘܐܸܡܲܪ ܠܝܼ ܪܘܼܚܵܐ. ܕܙܸܠ ܥܲܡܗܘܿܢ ܕܠܵܐ ܦܘܼܠܵܓ݂ܵܐ. ܘܐܸܬ݂ܵܘ ܥܲܡܝ ܐܵܦ ܗܵܠܹܝܢ ܫܬܵܐ ܐܲܚ̈ܝܼܢ. ܘܥܲܠܢ ܠܒܲܝܬܹܿܗ ܕܓܲܒ݂ܪܵܐ.

¹³ ܘܐܸܫܬܲܥܝܼ ܠܲܢ. ܐܲܝܟܲܢܵܐ ܚܙܵܐ ܒܒܲܝܬܹܿܗ ܡܲܠܲܐܟ݂ܵܐ. ܕܩܵܡ ܘܐܸܡܲܪ ܠܹܗ. ܕܫܲܕܲܪ ܠܝܘܿܦܹܐ ܡܕ݂ܝܼܢ̄ܬܵܐ. ܘܐܲܝܬܵܐ ܠܫܸܡܥܘܿܢ ܕܡܸܬ݂ܩܪܹܐ ܟܹܐܦܵܐ.

¹⁴ ܘܗܘܼ ܢܡܲܠܸܠ ܥܲܡܵܟ݂ ܡܸܠܹ̈ܐ ܕܲܒ݂ܗܹܝܢ ܬܸܚܹܐ. ܐܲܢ̄ܬܿ ܘܟ݂ܠܹܗ ܒܲܝܬܵܟ݂.

¹⁵ ܘܟܲܕ݂ ܐܲܩܦܹܬ݂ ܗ̄ܘܹܝܬ݂ ܬܲܡܵܢ ܠܲܡܡܲܠܵܠܘܼ. ܐܲܓܢܲܬ݂ ܪܘܼܚܵܐ ܕܩܘܼܕ݂ܫܵܐ ܥܠܲܝܗܘܿܢ ܐܲܝܟ݂ ܡܵܐ ܕܲܥܠܲܝܢ ܡܸܢ ܩܕ݂ܝܼܡ.

¹⁶ ܘܐܸܬܿܕܲܟ݂ܪܹܬ݂ ܡܸܠܬܹܗ ܕܡܵܪܲܢ ܕܐܵܡܲܪ ܗ̄ܘܵܐ. ܕܝܘܿܚܲܢܵܢ ܐܲܥܡܸܕ݂ ܒܡܲܝ̈ܵܐ. ܐܲܢ̄ܬܿܘܿܢ ܕܹܝܢ ܬܸܥܡܕ݂ܘܼܢ ܒܪܘܼܚܵܐ ܕܩܘܼܕ݂ܫܵܐ.

¹⁷ ܐܸܢ ܗܵܟܹܝܠ ܐܲܠܵܗܵܐ ܫܲܘܝܵܐܝܼܬ݂ ܝܲܗܒܵܗܿ ܡܵܘܗܲܒ݂ܬܵܐ ܠܥܲܡ̈ܡܹܐ. ܐܲܝܠܹܝܢ ܕܗܲܝܡܸܢܘ ܒܡܵܪܲܢ ܝܼܫܘܿܥ ܡܫܝܼܚܵܐ ܐܲܝܟ݂ ܕܐܵܦ ܠܲܢ. ܐܸܢܵܐ ܡܲܢ ܗ̄ܘܹܝܬ݂ ܕܐܸܣܦܲܩ ܗ̄ܘܹܝܬ݂ ܕܐܸܟ݂ܠܹܐ ܠܐܲܠܵܗܵܐ.

¹⁸ ܘܟܲܕ݂ ܗܵܠܹܝܢ ܡܸܠܹ̈ܐ ܫܡܲܥܘ. ܫܠܝܼܘ ܠܗܘܿܢ ܘܫܲܒܲܚܘ ܠܐܲܠܵܗܵܐ. ܘܐܵܡܪܝܼܢ ܗ̄ܘܼܵܘ. ܕܲܟ݂ܒܲܪ ܐܵܦ ܠܥܲܡ̈ܡܹܐ ܐܲܠܵܗܵܐ ܝܲܗ̄ܒ݂ ܬܝܵܒ݂ܘܼܬ݂ܵܐ ܠܚܲܝܹ̈ܐ.

¹⁹ ܗܵܢܘܿܢ ܕܹܝܢ ܕܐܬ݂ܒܲܕܲܪܘ ܗ̄ܘܼܵܘ ܡܸܢ ܐܘܼܠܨܵܢܵܐ ܕܲܗܘܵܐ ܗ̄ܘܵܐ ܥܲܠ ܐܸܣܛܲܦܵܢܘܿܣ. ܡܲܛܝܼܘ ܗ̄ܘܼܵܘ ܥܕ݂ܲܡܵܐ ܠܦܘܼܢܝܼܩܹܐ. ܘܐܵܦ ܠܐܲܬ݂ܪܵܐ ܕܩܹܘܦܪܘܿܣ. ܘܠܲܐܢܛܝܵܟ݂ܝܵܐ. ܟܲܕ݂ ܥܲܡ ܐ̄ܢܵܫ ܠܵܐ ܡܡܲܠܠܝܼܢ ܗ̄ܘܼܵܘ ܡܸܠܬ݂ܵܐ. ܐܸܠܵܐ ܒܲܠܚܘܿܕ݂ ܥܲܡ ܝܗ̄ܘܼܕ݂ܵܝܹ̈ܐ.

²⁰ ܐܝܼܬ݂ ܗ̄ܘܼܵܘ ܕܹܝܢ ܐ̄ܢܵܫܵܐ ܡܸܢܗܘܿܢ ܡܸܢ ܩܹܘܦܪܘܿܣ ܘܡܸܢ ܩܹܘܪܝܼܢܹܐ. ܗܵܠܹܝܢ ܥܲܠܘ ܗ̄ܘܼܵܘ ܠܐܲܢܛܝܘܿܟ݂ܝ. ܘܲܡܡܲܠܠܝܼܢ ܗ̄ܘܼܵܘ ܥܲܡ ܝܵܘܢܵܝܹ̈ܐ. ܘܲܡܣܲܒܪܝܼܢ ܗ̄ܘܼܵܘ ܥܲܠ ܡܵܪܲܢ ܝܼܫܘܿܥ.

²¹ ܘܐܝܼܬ݂ ܗ̄ܘܵܬ݂ ܥܲܡܗܘܿܢ ܐܝܼܕ݂ܗ ܕܡܵܪܝܵܐ. ܘܣܲܓܝܼܐܹ̈ܐ ܗܲܝܡܸܢܘ ܘܐܸܬ݂ܦܢܝܼܘ ܠܘܵܬ݂ ܡܵܪܝܵܐ.

²² ܘܐܸܫܬܲܡܥܲܬ݂ ܗ̄ܘܵܬ݂ ܗܝܼ ܗܵܕܹܐ ܠܐܸܕ݂ܢܲܝ̈ܗܘܿܢ ܕܲܒ݂ܢܲܝ̈ ܥܹܕܬܵܐ ܕܒ݂ܐܘܿܪܸܫܠܸܡ. ܘܫܲܕܲܪܘ ܠܒܲܪܢܒ݂ܵܐ ܠܐܲܢܛܝܘܿܟ݂ܝ.

²³ ܘܟܲܕ݂ ܐܸܬ݂ܵܐ ܠܬܲܡܵܢ ܘܲܚܙܵܐ ܛܲܝܒܘܼܬܹܗ ܕܐܲܠܵܗܵܐ. ܚܕ݂ܝܼ ܘܒ݂ܵܥܹܐ ܗ̄ܘܵܐ ܡܸܢܗܘܿܢ. ܕܲܒ݂ܟ݂ܠܹܗ ܠܸܒܗܘܿܢ ܢܸܗܘܘܿܢ ܢܲܩܝܼܦܝܼܢ ܠܡܵܪܲܢ.

²⁴ ܡܛܠ ܕܓܲܒ݂ܪܵܐ ܗ̄ܘܵܐ ܛܵܒ݂ܵܐ. ܘܲܡܫܲܡܠܲܝ ܗ̄ܘܵܐ ܒܪܘܼܚܵܐ ܕܩܘܼܕ݂ܫܵܐ ܘܲܒ݂ܗܲܝܡܵܢܘܼܬ݂ܵܐ. ܘܐܸܬܿܬܵܘܣܲܦ ܗ̄ܘܵܐ ܥܲܡܵܐ ܣܲܓܿܝܼܐܵܐ ܠܡܵܪܲܢ.

²⁵ ܘܗܘܼ ܢܦܲܩ ܗ̄ܘܵܐ ܠܛܲܪܣܘܿܣ ܠܡܸܒ݂ܥܵܐ ܠܫܵܐܘܿܠ.

²⁶ ܘܟܲܕ݂ ܐܸܫܟܚܹܗ. ܐܲܝܬܿܝܼܗ ܥܲܡܹܗ ܠܐܲܢܛܝܵܟ݂ܝܵܐ. ܘܫܲܢ̄ܬܵܐ ܟܠܵܗܿ ܐܲܟ݂ܚܕ݂ܵܐ ܟܢܝܼܫܝܼܢ ܗ̄ܘܼܵܘ ܒܥܹܕܬܵܐ. ܘܐܲܠܸܦܘ ܥܲܡܵܐ ܣܲܓܿܝܼܐܵܐ. ܡܸܢ ܗܵܝܕܹܝܢ ܩܲܕ݂ܡܵܝܲܬ݂ ܐܸܬ݂ܩܪܝܼܘ ܒܐܲܢܛܝܼܘܟ݂ܝܼ ܬܲܠܡܝܼܕܹ̈ܐ ܟܪܸ̈ܣܛܝܵܢܹܐ.

²⁷ ܘܲܒ݂ܝܵܘ̈ܡܵܬ݂ܵܐ ܗܵܢܘܿܢ. ܐܸܬ݂ܵܘ ܡܸܢ ܐܘܿܪܸܫܠܸܡ ܠܬܲܡܵܢ ܢܒ݂ܝܹ̈ܐ.

²⁸ ܘܩܼܵܡ ܚܲܕ݂ ܡܸܢܗܘܿܢ ܕܲܫܡܹܗ ܗܘܵܐ ܐܵܓ݂ܵܒ݂ܘܿܣ. ܘܐܵܘܕܲܥ ܐܸܢܘܿܢ ܒܪܘܼܚ. ܕܟܲܦܢܵܐ ܪܲܒܵܐ ܗܵܘܹܐ ܒܟ݂ܠܵܗܿ ܐܲܪܥܵܐ. ܘܲܗܘܵܐ ܟܲܦܢܵܐ ܗܵܢܵܐ ܒܝܵܘܡܲܝ ܩܠܵܘܕܝܼܘܿܣ ܩܹܣܲܪ.

²⁹ ܒܪܲܡ ܕܹܝܢ ܬܲܠܡܝܼܕܹ̈ܐ ܐܲܝܟ݂ ܡܵܐ ܕܐܝܼܬ݂ ܗ̄ܘܵܐ ܠܐ̄ܢܵܫ ܐ̄ܢܵܫ ܡܸܢܗܘܿܢ. ܦܪܲܫܘ ܕܲܢܫܲܕܪܘܼܢ ܠܬܸܫܡܸܫܬܵܐ ܕܐܲܚܹ̈ܐ ܐܲܝܠܹܝܢ ܕܥܵܡܪܝܼܢ ܒܝܼܗܘܼܕ݂.

³⁰ ܘܫܲܕܲܪܘ ܒܝܲܕ݂ ܒܲܪܢܒ݂ܵܐ ܘܫܵܐܘܿܠ ܠܩܲܫܝܼܫܹ̈ܐ ܕܬܲܡܵܢ.

12

¹ ܒܗܵܘ ܕܹܝܢ ܙܲܒ݂ܢܵܐ. ܐܲܪܡܝܼ ܗ̄ܘܵܐ ܐܝܼ̈ܕ݂ܲܝܵܐ ܥܲܠ ܐ̄ܢܵܫ̈ܝܼܢ ܕܲܒ݂ܥܹܕܬܵܐ. ܐܲܝܟ݂ ܕܢܲܒ݂ܐܸܫ ܠܗܘܿܢ ܗܹܪܘܿܕܸܣ ܡܲܠܟܵܐ. ܗܵܘ ܕܡܸܬ݂ܟܲܢܹܐ ܗ̄ܘܵܐ ܐܲܓ݂ܪܹܦܘܿܣ.

² ܘܲܩܛܲܠ ܒܣܲܝܦܵܐ ܠܝܲܥܩܘܿܒ݂ ܐܲܚܘܼܗܝ ܕܝܘܿܚܲܢܵܢ.

³ ܘܟܲܕ݂ ܚܙܵܐ ܕܫܸܦܪܲܬ݂ ܗܵܕܹܐ ܠܝܗ̄ܘܼܕ݂ܵܝܹ̈ܐ. ܐܵܘܣܸܦ ܗ̄ܘܵܐ ܠܡܹܐܚܲܕ݂ ܐܵܦ ܠܫܸܡܥܘܿܢ ܟܹܐܦܵܐ. ܘܐܝܼܬܲܝܗܘܿܢ ܗ̄ܘܼܵܘ ܝܵܘ̈ܡܵܬ݂ܵܐ ܕܦܲܛܝܼܪܹ̈ܐ.

⁴ ܘܐܲܚܕܹܗ ܘܐܲܪܡܝܹܗ ܒܹܝܬ݂ ܐܲܣܝܼܪܹ̈ܐ. ܘܐܲܫܠܸܡ ܠܹܗ ܫܬ݂ܬܲܥܣܲܪ ܐܸܣܛܪ̈ܵܛܝܼܘܿܛܝܼܢ ܕܢܸܛܪܘܼܢܹܗ. ܕܡܸܢ ܒܵܬܲܪ ܦܸܨܚܵܐ ܢܲܫܠܡܝܼܘܗܝ ܠܥܲܡܵܐ ܕܝܗ̄ܘܼܕ݂ܵܝܹ̈ܐ.

⁵ ܘܟܲܕ݂ ܗܘܼ ܫܸܡܥܘܿܢ ܡܸܬ݂ܢܛܲܪ ܗ̄ܘܵܐ ܒܹܝܬ݂ ܐܲܣܝܼܪܹ̈ܐ. ܨܠܘܿܬ݂ܵܐ ܐܲܡܝܼܢܬܵܐ ܡܸܬ݂ܩܲܪܒ݂ܵܐ ܗ̄ܘܵܬ݂ ܡܸܢ ܥܹܕܬܵܐ ܚܠܵܦܵܘܗܝ ܠܐܲܠܵܗܵܐ.

⁶ ܘܒܹܗ ܒܗܵܘ ܠܸܠܝܵܐ ܕܲܠܨܲܦܪܵܐ ܥܬ݂ܝܼܕ݂ ܗ̄ܘܵܐ ܕܢܲܫܠܡܝܼܘܗܝ. ܟܲܕ݂ ܕܡܸܟ݂ ܗ̄ܘܵܐ ܫܸܡܥܘܿܢ ܒܹܝܬ݂ ܬܪܹܝܢ ܐܸܣܛܪ̈ܵܛܝܼܘܿܛܝܼܢ. ܘܐܲܣܝܼܪ ܗ̄ܘܵܐ ܒܬܲܪܬܹܿܝܢ ܫܸܫ̈ܠܵܢ. ܘܐܲܚܪ̈ܵܢܹܐ ܢܵܛܪܝܼܢ ܗ̄ܘܼܵܘ ܬܲܪ̈ܥܹܐ ܕܒܹܝܬ݂ ܐܲܣܝܼܪܹ̈ܐ.

⁷ ܡܲܠܲܐܟ݂ܵܐ ܕܡܵܪܝܵܐ ܩܵܡ ܠܥܸܠ ܡܸܢܹܗ. ܘܢܘܼܗܪܵܐ ܐܲܙܠܸܓ݂ ܒܟ݂ܠܹܗ ܒܲܝܬܵܐ. ܘܕ݂ܲܩܪܹܗ ܒܓܲܒܹܗ ܘܐܲܩܝܼܡܹܗ. ܘܐܸܡܲܪ ܠܹܗ. ܩܘܼܡ ܥܓܲܠ. ܘܲܢܦܲܠ ܫܸܫ̈ܠܵܬ݂ܵܐ ܡܸܢ ܐܝܼܕ݂ܵܘ̈ܗܝ.

⁸ ܘܐܸܡܲܪ ܠܹܗ ܡܲܠܲܐܟ݂ܵܐ. ܐܲܣܘܿܪ ܚܲܨܲܝ̈ܟ ܘܣܲܐܸܢ ܛܸܠܪ̈ܲܝܟ. ܘܲܥܒܲܕ݂ ܗܵܟܲܢܵܐ. ܘܬ݂ܘܼܒ݂ ܐܸܡܲܪ ܠܹܗ. ܐܸܬ݂ܥܲܛܦ ܬܲܟ݂ܣܝܼܬ݂ܵܟ݂ ܘܬ݂ܵܐ ܒܵܬܲܪܝ.

⁹ ܘܲܢܦܲܩ ܘܐܵܙܹܠ ܗ̄ܘܵܐ ܒܵܬ݂ܪܹܗ. ܟܲܕ݂ ܠܵܐ ܝܵܕ݂ܲܥ ܗ̄ܘܵܐ ܕܫܲܪܝܼܪܵܐ ܗ̄ܘܵܬ݂ ܗܵܝܼ ܕܗܵܘܝܵܐ ܗ̄ܘܵܬ݂ ܒܝܲܕ݂ ܡܲܠܲܐܟ݂ܵܐ. ܣܵܒܲܪ ܗ̄ܘܵܐ ܓܹܝܪ ܕܚܸܙܘܵܐ ܚܵܙܹܐ ܗ̄ܘܵܐ.

¹⁰ ܘܟܲܕ݂ ܥܒܲܪܘ ܡܲܛܲܪܬ݂ܵܐ ܩܲܕ݂ܡܵܝܬܵܐ ܘܲܕ݂ܬܲܪܬܿܝܢ. ܐܸܬ݂ܵܘ ܥܕ݂ܲܡܵܐ ܠܬܲܪܥܵܐ ܕܦܲܪܙܠܵܐ. ܘܐܸܬ݂ܦܬܲܚ ܠܗܘܿܢ ܡܸܢ ܨܒ݂ܘܬ݂ ܢܲܦ̮ܫܹܗ. ܘܟܲܕ݂ ܢܦܲܩܘ ܘܲܥܒܲܪܘ ܫܘܼܩܵܐ ܚܲܕ݂. ܦܪܲܩ ܡܸܢ ܠܘܵܬܹܗ ܡܲܠܲܐܟ݂ܵܐ.

¹¹ ܗܵܝܕܹܝܢ ܐܸܫܬܵܘܕܲܥ ܫܸܡܥܘܿܢ ܘܐܸܡܲܪ. ܗܵܫܵܐ ܝܸܕ݂ܥܹܬ݂ ܒܩܘܼܫܬܵܐ ܕܡܵܪܝܵܐ ܫܲܕܲܪ ܡܲܠܲܐܟܹܗ ܘܦܲܠܛܲܢܝ ܡܸܢ ܐܝܼܕ݂ܗ ܕܗܹܪܘܿܕܸܣ ܡܲܠܟܵܐ. ܘܡܸܢ ܡܸܕܸܡ ܕܡܸܬ݂ܚܲܫܒ݂ܝܼܢ ܗ̄ܘܼܵܘ ܥܠܲܝ ܝܗ̄ܘܼܕ݂ܵܝܹ̈ܐ.

¹² ܘܟܲܕ݂ ܐܸܣܬܲܟܲܠ. ܐܸܬ݂ܵܐ ܠܹܗ ܠܒܲܝܬܵܐ ܕܡܲܪܝܲܡ ܐܸܡܹܗ ܕܝܘܿܚܲܢܵܢ ܗܵܘ ܕܐܬ݂ܟܲܢܝܼ ܡܲܪܩܘܿܣ. ܡܛܠ ܕܐܲܚܹ̈ܐ ܣܲܓܝܼܐܹ̈ܐ ܬܲܡܵܢ ܟܢܝܼܫܝܼܢ ܗ̄ܘܼܵܘ. ܘܲܡܨܲܠܹܝܢ.

¹³ ܘܲܢܩܲܫ ܒܬܲܪܥܵܐ ܕܕ݂ܵܪܬܵܐ. ܘܢܸܦܩܲܬ݂ ܕܬܸܥܢܹܝܘܗܝ ܛܠܝܼܬ݂ܵܐ ܕܲܫܡܵܗܿ ܪܘܿܕ݂ܵܐ.

¹⁴ ܘܐܸܫܬܵܘܕܥܲܬ݂ ܩܵܠܹܗ ܕܫܸܡܥܘܿܢ. ܘܲܒ݂ܚܲܕ݂ܘܼܬ݂ܵܗܿ ܠܵܐ ܦܸܬ݂ܚܲܬ݂ ܠܹܗ ܬܲܪܥܵܐ. ܐܸܠܵܐ ܗܸܦܟܲܬ݂ ܒܪܸܗܛܵܐ ܘܐܵܡܪܵܐ ܠܗܘܿܢ. ܫܸܡܥܘܿܢ ܗܵܐ ܩܵܐܹܡ ܥܲܠ ܬܲܪܥܵܐ ܕܕ݂ܵܪܬܵܐ.

¹⁵ ܐܵܡܪܝܼܢ ܠܵܗܿ. ܡܙܵܥ ܙܵܥܬܿܝ ܠܹܟ݂ܝ. ܘܗܝܼ ܡܸܬ݂ܚܲܪܝܵܐ ܗ̄ܘܵܬ݂. ܕܗܵܕܹܐ ܗܵܟܲܢܵܐ ܗܝܼ. ܐܵܡܪܝܼܢ ܠܵܗܿ. ܟܒܲܪ ܡܲܠܲܐܟܹܗ ܗ̄ܘܼ.

¹⁶ ܘܫܸܡܥܘܿܢ ܢܵܩܹܫ ܗ̄ܘܵܐ ܒܬܲܪܥܵܐ. ܘܲܢܦܲܩܘ ܚܙܵܐܘܼܗܝ ܘܲܬ݂ܡܲܗܘ ܠܗܘܿܢ.

¹⁷ ܘܲܡܢܝܼܦ ܗ̄ܘܵܐ ܠܗܘܿܢ ܐܝܼܕܹܗ. ܐܲܝܟ݂ ܕܢܸܫܬܿܩܘܼܢ ܠܗܘܿܢ. ܘܥܲܠ ܘܐܸܫܬܲܥܝܼ ܠܗܘܿܢ. ܐܲܝܟܲܢܵܐ ܡܵܪܝܵܐ ܐܲܦܩܹܗ ܡܸܢ ܒܹܝܬ݂ ܐܲܣܝܼܪܹ̈ܐ. ܘܐܸܡܲܪ ܠܗܘܿܢ. ܐܸܫܬܲܥܵܘ ܗܵܠܹܝܢ ܠܝܲܥܩܘܿܒ݂ ܘܠܲܐܚܲܝ̈ܢ. ܘܲܢܦܲܩ ܐܸܙܲܠ ܠܹܗ ܠܐܲܬܲܪ ܐ̄ܚܪܹܝܢ.

¹⁸ ܘܟܲܕ݂ ܗܘܵܐ ܨܲܦܪܵܐ. ܗܘܵܐ ܗ̄ܘܵܐ ܪܵܘܒܵܐ ܣܲܓܿܝܼܐܵܐ ܒܹܝܬ݂ ܐܸܣܛܪ̈ܵܛܝܼܘܿܛܹܐ. ܥܲܠ ܫܸܡܥܘܿܢ ܕܡܵܢܵܐ ܗܘܵܐ ܠܹܗ.

¹⁹ ܗܹܪܘܿܕܸܣ ܕܹܝܢ ܟܲܕ݂ ܒܥܵܝܗܝ ܘܠܵܐ ܐܸܫܟܚܹܗ. ܕܵܢ ܐܸܢܘܿܢ ܠܢܵܛܘܿܪܹ̈ܐ ܘܲܦܩܲܕ݂ ܕܲܢܡܘܼܬ݂ܘܢ. ܘܲܢܦܲܩ ܠܹܗ ܡܸܢ ܝܼܗܘܼܕ݂. ܘܐܝܼܬ݂ܵܘܗܝ ܗ̄ܘܵܐ ܒܩܹܣܲܪܝܵܐ.

²⁰ ܘܡܛܠ ܕܲܪܓ݂ܝܼܙ ܗ̄ܘܵܐ ܥܲܠ ܨܘܿܪ̈ܵܝܹܐ ܘܥܲܠ ܨܲܝܕܢܵܝܹ̈ܐ. ܐܸܬ݂ܟܲܢܲܫܘ ܘܐܸܬ݂ܵܘ ܠܘܵܬܹܗ ܐܲܟ݂ܚܕ݂ܵܐ ܘܐܲܦܝܼܣܘ ܠܲܒ݂ܠܸܣܛܘܿܣ ܩܲܝܛܘܿܢܩܵܢܹܗ ܕܡܲܠܟܵܐ. ܘܲܫܐܸܠܘ ܡܸܢܹܗ. ܕܢܸܗܘܹܐ ܠܗܘܿܢ ܫܲܝܢܵܐ. ܡܛܠ ܕܦܘܼܪܢܵܣܵܐ ܕܐܲܬ݂ܪܗܘܿܢ ܡܸܢ ܡܲܠܟܘܼܬܹܗ ܗ̄ܘܵܐ ܕܗܹܪܘܿܕܸܣ.

²¹ ܒܝܵܘܡܵܐ ܕܹܝܢ ܝܼܕ݂ܝܼܥܵܐ. ܠܒܸܫ ܗ̄ܘܵܐ ܗܹܪܘܿܕܸܣ ܠܒ݂ܘܼܫܵܐ ܕܡܲܠܟܘܼܬ݂ܵܐ ܘܝܼܬܸܒ݂ ܥܲܠ ܒܹܝܡ. ܘܲܡܡܲܠܸܠ ܗ̄ܘܵܐ ܥܲܡ ܟܸܢܫܵܐ.

²² ܥܲܡܵܐ ܕܹܝܢ ܟܠܹܗ ܩܵܥܹܐ ܗ̄ܘܵܐ ܘܐܵܡܲܪ. ܗܵܠܹܝܢ ܒܢܵܬ݂̈ ܩܵܠܹܐ ܕܐܲܠܵܗܵܐ ܐܸܢܹܝܢ ܘܠܵܐ ܗ̄ܘܲܝ ܕܲܒ݂ܢܲܝ̈ܢܵܫܵܐ.

²³ ܘܲܚܠܵܦ ܕܠܵܐ ܝܲܗ̄ܒ݂ ܬܸܫܒܿܘܿܚܬܵܐ ܠܐܲܠܵܗܵܐ. ܒܵܗܿ ܒܫܵܥܬ݂ܵܐ ܡܚܵܝܗܝ ܡܲܠܲܐܟܹܗ ܕܡܵܪܝܵܐ. ܘܲܪܦܲܬ݂ ܒܬ݂ܵܘܠܥܹ̈ܐ ܘܡܝܼܬ݂.

²⁴ ܘܲܣܒܲܪܬ݂ܵܐ ܕܐܲܠܵܗܵܐ ܡܸܬ݂ܟܲܪܙܵܐ ܗ̄ܘܵܬ݂ ܘܪܵܒ݂ܝܵܐ.

²⁵ ܒܲܪܢܒ݂ܵܐ ܕܹܝܢ ܘܫܵܐܘܿܠ ܦܢܵܘ ܡܸܢ ܐܘܿܪܸܫܠܸܡ ܠܐܲܢܛܝܘܿܟ݂ܝ. ܡܸܢ ܒܵܬܲܪ ܕܫܲܠܸܡܘ ܬܸܫܡܸܫܬܿܗܘܿܢ. ܘܲܕ݂ܒܲܪܘ ܥܲܡܗܘܿܢ ܠܝܘܿܚܲܢܵܢ. ܗܵܘ ܕܐܬ݂ܟܲܢܝܼ ܡܲܪܩܘܿܣ.

13

¹ ܐܝܼܬ݂ ܗ̄ܘܵܐ ܕܹܝܢ ܒܥܹܕܬܵܐ ܕܐܲܢܛܝܵܟ݂ܝܵܐ. ܢܒ݂ܝܹ̈ܐ ܘܡܲܠܦܵܢܹ̈ܐ. ܒܲܪܢܒ݂ܵܐ. ܘܫܸܡܥܘܿܢ ܕܡܸܬ݂ܩܪܹܐ ܢܝܼܓܲܪ. ܘܠܘܼܩܝܼܘܿܣ ܕܡܸܢ ܩܹܘܪܝܼܢܹܐ ܡܕ݂ܝܼܢ̄ܬܵܐ. ܘܡܵܢܲܐܹܝܠ ܒܲܪ ܡܪܲܒܝܵܢܵܘ̈ܗܝ ܕܗܹܪܘܿܕܸܣ ܛܸܛܪܲܪܟܵܐ. ܘܫܵܐܘܿܠ.

² ܘܟܲܕ݂ ܗܸܢܘܿܢ ܨܵܝܡܝܼܢ ܗ̄ܘܼܵܘ ܘܡܸܬ݂ܟܲܫܦܝܼܢ ܠܐܲܠܵܗܵܐ. ܐܸܡܪܲܬ݂ ܠܗܘܿܢ ܪܘܼܚܵܐ ܕܩܘܼܕ݂ܫܵܐ. ܦܪܘܿܫܘ ܠܝܼ ܠܫܵܐܘܿܠ ܘܲܠܒܲܪܢܒ݂ܵܐ. ܠܲܥܒ݂ܵܕ݂ܵܐ ܐܲܝܢܵܐ ܕܐܸܢܵܐ ܩܪܹܝܬ݂ ܐܸܢܘܿܢ.

³ ܘܒܵܬܲܪ ܕܨܵܡܘ ܘܨܲܠܝܼܘ. ܣܵܡܘ ܥܠܲܝܗܘܿܢ ܐܝܼܕ݂ܵܐ ܘܫܲܕܲܪܘ ܐܸܢܘܿܢ.

⁴ ܘܗܸܢܘܿܢ ܟܲܕ݂ ܐܸܫܬܿܠܲܚܘ ܡܸܢ ܪܘܼܚܵܐ ܕܩܘܼܕ݂ܫܵܐ. ܢܚܸܬ݂ܘ ܠܗܘܿܢ ܠܣܹܠܵܘܩܝܵܐ. ܘܡܸܢ ܬܲܡܵܢ ܪܕ݂ܵܘ ܒܝܲܡܵܐ ܥܕ݂ܲܡܵܐ ܠܩܹܘܦܪܘܿܣ.

⁵ ܘܟܲܕ݂ ܥܲܠܘ ܠܣܵܠܵܡܹܢܵܐ ܡܕ݂ܝܼܢ̄ܬܵܐ. ܡܣܲܒܪܝܼܢ ܗ̄ܘܼܵܘ ܡܸܠܬܹܗ ܕܡܵܪܲܢ ܒܲܟ݂ܢ̈ܘܼܫܵܬ݂ܵܐ ܕܝܗ̄ܘܼܕ݂ܵܝܹ̈ܐ. ܘܝܘܿܚܲܢܵܢ ܡܫܲܡܸܫ ܗ̄ܘܵܐ ܠܗܘܿܢ.

⁶ ܘܟܲܕ݂ ܐܸܬ݂ܟܲܪܟ݁ܘܼܗܿ ܠܟ݂ܠܵܗܿ ܓܵܙܲܪܬܵܐ ܥܕ݂ܲܡܵܐ ܠܦܵܦܘܿܣ ܡܕ݂ܝܼܢ̄ܬܵܐ. ܐܸܫܟܲܚܘ ܓܲܒ݂ܪܵܐ ܚܲܕ݂ ܚܲܪܵܫܵܐ ܝܼܗܘܼܕ݂ܵܝܵܐ ܕܐܝܼܬ݂ܵܘܗܝ ܗ̄ܘܵܐ ܢܒ݂ܝܼܵܐ ܕܲܓܵܠܵܐ. ܕܲܫܡܹܗ ܗܘܵܐ ܒܲܪܫܘܿܡܵܐ.

⁷ ܗܵܢܵܐ ܕܲܒܝܼܩ ܗ̄ܘܵܐ ܠܓܲܒ݂ܪܵܐ ܚܲܟܝܼܡܵܐ ܕܐܝܼܬ݂ܵܘܗܝ ܗ̄ܘܵܐ ܐܲܢܬܹܘܦܵܛܘܿܣ. ܘܡܸܬ݂ܩܪܹܐ ܗ̄ܘܵܐ ܣܲܪܓܿܝܼܘܿܣ ܦܵܘܠܘܿܣ. ܘܲܩܪܵܐ ܗ̄ܘܵܐ ܐܲܢܬܹܘܦܵܛܘܿܣ ܠܫܵܐܘܿܠ ܘܲܠܒܲܪܢܒ݂ܵܐ. ܘܒ݂ܵܥܹܐ ܗ̄ܘܵܐ. ܕܢܸܫܡܲܥ ܡܸܢܗܘܿܢ ܡܸܠܬ݂ܵܐ ܕܐܲܠܵܗܵܐ.

⁸ ܩܵܐܹܡ ܗ̄ܘܵܐ ܕܹܝܢ ܠܘܼܩܒܲܠܗܘܿܢ ܗܘܼ ܗܵܢܵܐ ܚܲܪܵܫܵܐ ܒܲܪܫܘܿܡܵܐ. ܕܡܸܬܿܬܲܪܓܲܡ ܫܡܹܗ ܐܵܠܘܼܡܘܿܣ. ܡܛܠ ܕܨܵܒܹܐ ܗ̄ܘܵܐ ܕܲܢܥܲܩܡܝܼܘܗܝ ܠܐܲܢܬܹܘܦܵܛܘܿܣ ܡܸܢ ܗܲܝܡܵܢܘܼܬ݂ܵܐ.

⁹ ܫܵܐܘܿܠ ܕܹܝܢ ܗܵܘ ܕܐܸܬ݂ܩܪܝܼ ܦܵܘܠܘܿܣ. ܐܸܬ݂ܡܠܝܼ ܗ̄ܘܵܐ ܒܪܘܼܚܵܐ ܕܩܘܼܕ݂ܫܵܐ. ܘܚܵܪ ܒܹܗ.

¹⁰ ܘܐܸܡܲܪ. ܐܵܘ ܕܲܡܠܹܐ ܟܠ ܢܸܟ݂ܠܝܼ̈ܢ ܘܟܠܗܹܝܢ ܒ̈ܝܼܫܵܬ݂ܵܐ. ܒܪܹܗ ܕܐܵܟܹܠ ܩܲܪܨܵܐ. ܘܲܒ݂ܥܸܠܕܒ݂ܵܒ݂ܵܐ ܕܟ݂ܠܵܗܿ ܟܹܐܢܘܼܬ݂ܵܐ. ܠܵܐ ܫܵܠܹܐ ܐܲܢ̄ܬܿ ܠܲܡܥܲܩܵܡܘܼ. ܐܘܼܪ̈ܚܵܬܹܗ ܬܪ̈ܝܼܨܵܬ݂ܵܐ ܕܡܵܪܝܵܐ.

¹¹ ܘܗܵܫܵܐ ܐܝܼܕ݂ܗ ܕܡܵܪܝܵܐ ܥܠܲܝܟ. ܘܬܸܗܘܹܐ ܣܡܹܐ ܘܠܵܐ ܬܸܚܙܹܐ ܫܸܡܫܵܐ ܥܕ݂ܲܡܵܐ ܠܙܲܒ݂ܢܵܐ. ܘܒ݂ܵܗܿ ܒܫܵܥܬ݂ܵܐ ܢܦܲܠ ܥܠܵܘܗܝ ܥܲܡܛܵܢܵܐ ܘܚܸܫܘܿܟ݂ܵܐ. ܘܡܸܬ݂ܟܪܸܟ݂ ܗ̄ܘܵܐ ܘܒ݂ܵܥܹܐ ܕܡܲܢܘܼ ܢܹܐܚܘܿܕ݂ ܒܐܝܼܕܹܗ.

¹² ܘܟܲܕ݂ ܚܙܵܐ ܐܲܢܬܹܘܦܵܛܘܿܣ ܡܸܕܸܡ ܕܲܗܘܵܐ. ܐܸܬܿܕܲܡܲܪ ܘܗܲܝܡܸܢ ܒܝܘܼܠܦܵܢܹܗ ܕܡܵܪܝܵܐ.

¹³ ܦܵܘܠܘܿܣ ܕܹܝܢ ܘܒܲܪܢܒ݂ܵܐ ܪܕ݂ܵܘ ܒܝܲܡܵܐ ܡܸܢ ܦܵܦܘܿܣ ܡܕ݂ܝܼܢ̄ܬܵܐ. ܘܐܸܬ݂ܵܘ ܠܗܘܿܢ ܠܦܲܪܓܹܐ ܡܕ݂ܝܼܢ̄ܬܵܐ ܕܦܵܡܦܹܘܠܝܼܵܐ. ܘܲܦܪܲܫ ܡܸܢܗܘܿܢ ܝܘܿܚܲܢܵܢ. ܘܐܸܙܲܠ ܠܹܗ ܠܐܘܿܪܸܫܠܸܡ.

¹⁴ ܗܸܢܘܿܢ ܕܹܝܢ ܢܦܲܩܘ ܡܸܢ ܦܸܪܓܹܐ. ܘܐܸܬ݂ܵܘ ܠܐܲܢܛܝܵܟ݂ܝܵܐ ܡܕ݂ܝܼܢ̄ܬܵܐ ܕܦܝܼܣܝܼܕ݂ܝܼܵܐ. ܘܥܲܠܘ ܠܲܟ݂ܢܘܼܫܬܵܐ. ܘܝܼܬܸܒ݂ܘ ܒܝܵܘܡܵܐ ܘܫܲܒܿܬ݂ܵܐ.

¹⁵ ܘܒܵܬܲܪ ܕܐܬ݂ܩܪܝܼ ܢܵܡܘܿܣܵܐ ܘܲܢܒ݂ܝܹ̈ܐ. ܫܠܲܚܘ ܠܗܘܿܢ ܩܲܫܝܼܫܹ̈ܐ ܕܲܟ݂ܢܘܼܫܬܵܐ ܘܐܸܡܲܪܘ. ܓܲܒ݂ܪܹ̈ܐ ܐܲܚܲܝ̈ܢ. ܐܸܢ ܗܘܼ ܕܐܝܼܬ݂ ܠܟ݂ܘܿܢ ܡܸܠܬ݂ܵܐ ܕܒ݂ܘܝܵܐܵܐ. ܡܲܠܸܠܘ ܥܲܡ ܥܲܡܵܐ.

¹⁶ ܘܩܼܵܡ ܦܵܘܠܘܿܣ ܘܐܲܢܝܼܦ ܐܝܼܕ݂ܗ ܘܐܸܡܲܪ. ܓܲܒ݂ܪܹܐ ܒܢܲܝ̈ ܝܼܣܪܵܝܹܠ ܘܐܲܝܠܹܝܢ ܕܕ݂ܵܚܠܝܼܢ ܡܸܢ ܐܲܠܵܗܵܐ. ܫܡܲܥܘ.

¹⁷ ܐܲܠܵܗܹܗ ܕܥܲܡܵܐ ܗܵܢܵܐ ܓܒ݂ܵܐ ܠܐܲܒ݂ܵܗܵܬܲܢ. ܘܐܲܪܝܼܡ ܘܐܵܘܪܸܒ݂ ܐܸܢܘܿܢ. ܟܲܕ݂ ܗܘܵܘ ܬܵܘܬܵܒܹ̈ܐ ܒܐܲܪܥܵܐ ܕܡܸܨܪܹܝܢ. ܘܒܲܕ݂ܪܵܥܵܐ ܪܵܡܵܐ ܐܲܦܸܩ ܐܸܢܘܿܢ ܡܸܢܹܗ.

¹⁸ ܘܬܲܪܣܝܼ ܐܸܢܘܿܢ ܒܡܲܕ݂ܒܪܵܐ ܐܲܪܒܥܝܼܢ ܫܢ̈ܝܼܢ.

¹⁹ ܘܲܗܓܲܡ ܫܲܒ݂ܥܵܐ ܥܲܡ̈ܡܝܼܢ ܒܐܲܪܥܵܐ ܕܲܟ݂ܢܲܥܢ. ܘܝܲܗ̄ܒ݂ ܠܗܘܿܢ ܐܲܪܥܗܘܿܢ ܠܝܘܼܪܬܵܢܵܐ.

²⁰ ܘܐܲܪܒܲܥ ܡܵܐܐ ܘܚܲܡܫܝܼܢ ܫܢ̈ܝܼܢ ܝܲܗ̄ܒ݂ ܠܗܘܿܢ ܕܲܝܵܢܹ̈ܐ. ܥܕ݂ܲܡܵܐ ܠܲܫܡܘܼܐܹܝܠ ܢܒ݂ܝܼܵܐ.

²¹ ܘܗܵܝܕܹܝܢ ܫܐܸܠܘ ܠܗܘܿܢ ܡܲܠܟܵܐ. ܘܝܲܗ̄ܒ݂ ܠܗܘܿܢ ܐܲܠܵܗܵܐ ܠܫܵܐܘܿܠ ܒܲܪ ܩܝܼܫ ܓܲܒ݂ܪܵܐ ܡܸܢ ܫܲܪܒܿܬ݂ܵܐ ܕܒܸܢܝܵܡܹܝܢ. ܫܢ̈ܝܼܢ ܐܲܪܒܥܝܼܢ.

²² ܘܢܲܣܒܹܗ. ܘܐܲܩܝܼܡ ܠܗܘܿܢ ܠܕ݂ܵܘܝܼܕ݂ ܡܲܠܟܵܐ. ܘܐܲܣܗܸܕ݂ ܥܠܵܘܗܝ ܘܐܸܡܲܪ. ܕܐܸܫܟܚܹܬ݂ ܠܕ݂ܵܘܝܼܕ݂ ܒܪܹܗ ܕܐܝܼܫܲܝ ܓܲܒ݂ܪܵܐ ܐܲܝܟ݂ ܠܹܒܝ. ܗܘܼ ܢܸܥܒܸܕ݂ ܟܠܗܘܿܢ ܨܸܒ݂ܝܵܢܲܝ̈.

²³ ܡܸܢ ܙܲܪܥܹܗ ܕܗܵܢܵܐ ܐܲܩܝܼܡ ܐܲܠܵܗܵܐ ܠܝܼܣܪܵܝܹܠ ܐܲܝܟ݂ ܡܵܐ ܕܐܸܫܬܵܘܕܝܼ. ܠܝܼܫܘܿܥ ܦܵܪܘܿܩܵܐ.

²⁴ ܘܫܲܕܲܪ ܠܝܘܿܚܲܢܵܢ ܕܢܲܟ݂ܪܸܙ ܩܕ݂ܵܡ ܡܹܐܬ݂ܝܼܬܹܗ. ܡܲܥܡܘܿܕ݂ܝܼܬ݂ܵܐ ܕܲܬ݂ܝܵܒ݂ܘܼܬ݂ܵܐ ܠܟ݂ܠܹܗ ܥܲܡܵܐ ܕܝܼܣܪܵܝܹܠ.

²⁵ ܘܟܲܕ݂ ܡܫܲܠܸܡ ܗ̄ܘܵܐ ܝܘܿܚܲܢܵܢ ܬܸܫܡܸܫܬܹܿܗ. ܐܵܡܲܪ ܗ̄ܘܵܐ. ܡܲܢܘܼ ܣܵܒ݂ܪܝܼܢ ܐܢ̄ܬܘܿܢ ܕܐܝܼܬܲܝ. ܠܵܐ ܗ̄ܘܹܝܬ݂ ܐܸܢܵܐ. ܐܸܠܵܐ ܗܵܐ ܐܵܬܹܐ ܒܵܬܲܪܝ. ܗܵܘ ܕܠܵܐ ܫܵܘܹܐ ܐ̄ܢܵܐ. ܕܐܸܫܪܹܐ ܥܲܪ̈ܩܹܐ ܕܲܡܣܵܢܵܘ̈ܗܝ.

²⁶ ܓܲܒ݂ܪܹ̈ܐ ܐܲܚܲܝ̈ܢ ܒܢܲܝ̈ ܫܲܪܒܬܹܗ ܕܐܲܒ݂ܪܵܗܵܡ ܘܐܲܝܠܹܝܢ ܕܕ݂ܵܚܠܝܼܢ ܥܲܡܟ݂ܘܿܢ ܠܐܲܠܵܗܵܐ. ܠܟ݂ܘܿܢ ܗܘܼ ܐܸܫܬܲܕܪܲܬ݂ ܡܸܠܬ݂ܵܐ ܕܚܲܝܹ̈ܐ.

²⁷ ܗܵܠܹܝܢ ܓܹܝܪ ܥܵܡܘܿܪܹ̈ܐ ܕܐܘܿܪܸܫܠܸܡ ܘܪܹ̈ܫܵܢܲܝܗܘܿܢ. ܠܵܐ ܐܲܪܓܸܫܘ ܒܵܗܿ. ܐܵܦܠܵܐ ܒܲܟܬ݂ܵܒܹ̈ܐ ܕܲܢܒ݂ܝܹ̈ܐ ܕܡܸܬ݂ܩܪܹܝܢ ܒܟ݂ܠ ܫܲܒܵܐ. ܐܸܠܵܐ ܕܵܢܘܼܗܝ ܘܫܲܠܸܡܘ ܗܵܠܹܝܢ ܕܲܟܬ݂ܝܼܒ݂ܵܢ.

²⁸ ܘܟܲܕ݂ ܠܵܐ ܐܸܫܟܲܚܘ ܥܸܠܬ݂ܵܐ ܕܡܵܘܬܵܐ ܡܸܕܸܡ. ܫܐܸܠܘ ܡܸܢ ܦܝܼܠܵܛܘܿܣ ܕܢܸܩܛܠܘܼܢܵܝܗܝ.

²⁹ ܘܟܲܕ݂ ܫܲܠܸܡܘ ܟܠ ܡܸܕܸܡ ܕܲܟܬ݂ܝܼܒ݂ ܗ̄ܘܵܐ ܥܠܵܘܗܝ. ܐܲܚܬ݂ܘܼܗܝ ܡܸܢ ܨܠܝܼܒ݂ܵܐ ܘܣܵܡܘܼܗܝ ܒܹܝܬ݂ ܩܒ݂ܘܼܪܵܐ.

³⁰ ܐܲܠܵܗܵܐ ܕܹܝܢ ܐܲܩܝܼܡܹܗ ܡܸܢ ܒܹܝܬ݂ ܡܝܼܬܹ̈ܐ.

³¹ ܘܐܸܬ݂ܚܙܝܼ ܝܵܘ̈ܡܵܬ݂ܵܐ ܣܲܓܝܼܐܹ̈ܐ. ܠܐܲܝܠܹܝܢ ܕܲܣܠܸܩܘ ܥܲܡܹܗ ܡܸܢ ܓܠܝܼܠܵܐ ܠܐܘܿܪܸܫܠܸܡ. ܘܗܸܢܘܿܢ ܐܸܢܘܿܢ ܗܵܫܵܐ ܣܵܗܕܵܘ̈ܗܝ ܠܘܵܬ݂ ܥܲܡܵܐ.

³² ܘܐܵܦ ܚܢܲܢ ܗܵܐ ܡܣܲܒܪܝܼܢܲܢ ܠܟ݂ܘܿܢ. ܕܫܘܼܘܕܵܝܵܐ ܗܵܘ ܕܲܗܘܵܐ ܠܘܵܬ݂ ܐܲܒ݂ܵܗܵܬܲܢ.

³³ ܗܵܐ ܫܲܡܠܝܹܗ ܐܲܠܵܗܵܐ ܠܲܢ ܠܲܒ݂ܢܲܝ̈ܗܘܿܢ. ܕܐܲܩܝܼܡ ܠܝܼܫܘܿܥ. ܐܲܝܟ݂ ܕܲܟܬ݂ܝܼܒ݂ ܒܡܲܙܡܘܿܪܵܐ ܕܲܬ݂ܪܹܝܢ. ܕܒܹܪܝ ܐܲܢ̄ܬܿ ܐܸܢܵܐ ܝܵܘܡܵܢܵܐ ܝܼܠܸܕ݂ܬܵܟ݂.

³⁴ ܘܗܵܟܲܢܵܐ ܐܲܩܝܼܡܹܗ ܐܲܠܵܗܵܐ ܡܸܢ ܒܹܝܬ݂ ܡܝܼܬܹ̈ܐ. ܕܬ݂ܘܼܒ݂ ܠܵܐ ܢܸܗܦܘܼܟ݂ ܢܸܚܙܹܐ ܚܒ݂ܵܠܵܐ. ܐܲܝܟ݂ ܕܐܵܡܲܪ. ܕܐܬܸܿܠ ܠܟ݂ܘܿܢ ܛܲܝܒܘܼܬܹܗ ܕܕ݂ܵܘܝܼܕ݂ ܡܗܲܝܡܲܢܬܵܐ.

³⁵ ܘܬ݂ܘܼܒ݂ ܐܸܡܲܪ ܒܕܘܼܟܬ݂ܵܐ ܐ̄ܚܪܹܬ݂ܵܐ. ܕܠܵܐ ܝܲܗ̄ܒ݂ܬܿ ܠܚܲܣܝܵܟ݂ ܕܢܸܚܙܹܐ ܚܒ݂ܵܠܵܐ.

³⁶ ܕܵܘܝܼܕ݂ ܓܹܝܪ ܒܫܲܪܒܬܹܗ ܫܲܡܸܫ ܨܸܒ݂ܝܵܢܹܗ ܕܐܲܠܵܗܵܐ ܘܲܫܟܸܒ݂. ܘܐܸܬܿܬܵܘܣܲܦ ܥܲܠ ܐܲܒ݂ܵܗܵܘ̈ܗܝ ܘܲܚܙܵܐ ܚܒ݂ܵܠܵܐ.

³⁷ ܗܵܢܵܐ ܕܹܝܢ ܕܐܲܩܝܼܡ ܐܲܠܵܗܵܐ ܠܵܐ ܚܙܵܐ ܚܒ݂ܵܠܵܐ.

³⁸ ܕܲܥܘ ܗܵܟܹܝܠ ܐܲܚܲܝ̈. ܕܒܹܗ ܒܗܵܢܵܐ ܡܸܬ݂ܟܪܸܙ ܠܟ݂ܘܿܢ ܫܘܼܒ݂ܩܵܢ ܚܛܵܗܹ̈ܐ.

³⁹ ܘܡܸܢ ܟܠ ܕܠܵܐ ܐܸܫܟܲܚܬܿܘܢ ܒܢܵܡܘܿܣܵܐ ܕܡܘܼܫܹܐ ܕܬܸܙܕܲܕܩܘܼܢ. ܒܗܵܢܵܐ ܟܠ ܕܲܡܗܲܝܡܸܢ ܡܸܙܕܲܕܲܩ.

⁴⁰ ܐܸܙܕܲܗ̄ܪܘ ܗܵܟܹܝܠ. ܕܲܠܡܵܐ ܢܹܐܬܹܐ ܥܠܲܝܟܿܘܿܢ ܡܸܕܸܡ ܕܲܟ݂ܬ݂ܝܼܒ݂ ܒܲܢܒ݂ܝܹ̈ܐ.

⁴¹ ܕܲܚܙܵܘ ܡܒܲܣܪ̈ܵܢܹܐ. ܘܬܸܬ݂ܡܗܘܿܢ ܘܬܸܬ݂ܚܲܒܠܘܼܢ. ܕܲܥܒ݂ܵܕ݂ܵܐ ܥܵܒܹܿܕ݂ ܐ̄ܢܵܐ ܒܝܵܘܡܲܝ̈ܟܿܘܿܢ. ܐܲܝܢܵܐ ܕܠܵܐ ܬܗܲܝܡܢܘܼܢ. ܐܸܢ ܐ̄ܢܵܫ ܡܸܫܬܲܥܹܐ ܠܟ݂ܘܿܢ.

⁴² ܘܟܲܕ݂ ܢܵܦܩܝܼܢ ܗ̄ܘܼܵܘ ܡܸܢ ܨܸܐܕ݂ܲܝܗܘܿܢ. ܒܥܵܘ ܡܸܢܗܘܿܢ ܕܲܠܫܲܒܿܬ݂ܵܐ ܐ̄ܚܪܹܬ݂ܵܐ ܢܡܲܠܠܘܼܢ ܥܲܡܗܘܿܢ ܡܸܠܹ̈ܐ ܗܵܠܹܝܢ.

⁴³ ܘܡܸܢ ܕܐܸܫܬܲܪܝܲܬ݂ ܟܢܘܼܫܬܵܐ. ܣܲܓܝܼܐܹ̈ܐ ܝܗ̄ܘܼܕ݂ܵܝܹ̈ܐ ܐܸܙܲܠܘ ܒܵܬܲܪܗܘܿܢ. ܘܐܵܦ ܓܝܼܘܼܪܹ̈ܐ ܕܕ݂ܵܚܠܝܼܢ ܗ̄ܘܼܵܘ ܡܸܢ ܐܲܠܵܗܵܐ. ܘܗܸܢܘܿܢ ܡܡܲܠܠܝܼܢ ܗ̄ܘܼܵܘ ܘܲܡܦܝܼܣܝܼܢ ܠܗܘܿܢ. ܕܢܸܗܘܘܿܢ ܢܲܩܝܼܦܝܼܢ ܠܛܲܝܒܘܼܬܹܗ ܕܐܲܠܵܗܵܐ.

⁴⁴ ܘܲܠܫܲܒܿܬ݂ܵܐ ܐ̄ܚܪܹܬ݂ܵܐ. ܟܸܢܫܲܬ݂ ܟܠܵܗܿ ܡܕ݂ܝܼܢ̄ܬܵܐ ܠܡܸܫܡܲܥ ܡܸܠܬܹܗ ܕܐܲܠܵܗܵܐ.

⁴⁵ ܘܟܲܕ݂ ܚܙܵܘ ܝܗ̄ܘܼܕ݂ܵܝܹ̈ܐ ܟܸܢܫܵܐ ܣܲܓܿܝܼܐܵܐ. ܐܸܬ݂ܡܠܝܼܘ ܚܣܵܡܵܐ. ܘܩܵܝܡܝܼܢ ܗ̄ܘܼܵܘ ܠܘܼܩܒܲܠ ܡܸܠܹ̈ܐ ܕܐܵܡܲܪ ܗ̄ܘܵܐ ܦܵܘܠܘܿܣ. ܘܲܡܓܲܕܦܝܼܢ ܗ̄ܘܼܵܘ.

⁴⁶ ܐܸܡܲܪ ܕܹܝܢ ܦܵܘܠܘܿܣ ܘܒܲܪܢܒ݂ܵܐ ܥܹܝܢ ܒܲܓ݂ܠܹܐ. ܠܟ݂ܘܿܢ ܗܘܼ ܘܵܠܹܐ ܗ̄ܘܵܐ ܩܲܕ݂ܡܵܝܲܬ݂. ܕܬܸܬ݂ܐܡܲܪ ܡܸܠܬܹܗ ܕܐܲܠܵܗܵܐ. ܐܸܠܵܐ ܡܛܠ ܕܕ݂ܵܚܹܝܢ ܐܢ̄ܬܘܿܢ ܠܵܗܿ ܡܸܢܟ݂ܘܿܢ. ܘܲܦܣܲܩܬܿܘܢ ܥܲܠ ܢܲܦ̮ܫܟ݂ܘܿܢ ܕܠܵܐ ܫܵܘܹܝܢ ܐܢ̄ܬܘܿܢ ܠܚܲܝܹ̈ܐ ܕܲܠܥܵܠܲܡ. ܗܵܐ ܡܸܬ݂ܦܢܹܝܢܲܢ ܠܲܢ ܠܘܵܬ݂ ܥܲܡ̈ܡܹܐ.

⁴⁷ ܗܵܟܲܢܵܐ ܓܹܝܪ ܦܲܩܕܲܢ ܡܵܪܲܢ ܐܲܝܟ݂ ܕܲܟ݂ܬ݂ܝܼܒ݂. ܕܣܵܡܬܵܟ݂ ܢܘܼܗܪܵܐ ܠܥܲܡ̈ܡܹܐ. ܕܬܸܗܘܹܐ ܠܚܲܝܹ̈ܐ ܥܕ݂ܲܡܵܐ ܠܣܵܘܦܹܝ̈ܗܿ ܕܐܲܪܥܵܐ.

⁴⁸ ܘܟܲܕ݂ ܫܵܡܥܝܼܢ ܗ̄ܘܼܵܘ ܥܲܡ̈ܡܹܐ. ܚܵܕܹܝܢ ܗ̄ܘܼܵܘ. ܘܲܡܫܲܒܚܝܼܢ ܠܐܲܠܵܗܵܐ . ܘܗܲܝܡܸܢܘ ܐܲܝܠܹܝܢ ܕܣܝܼܡܝܼܢ ܗ̄ܘܼܵܘ ܠܚܲܝܹ̈ܐ ܕܲܠܥܵܠܲܡ.

⁴⁹ ܘܡܸܠܬܹܗ ܕܡܵܪܝܵܐ ܡܸܬ݂ܡܲܠܠܵܐ ܗ̄ܘܵܬ݂ ܒܟ݂ܠܹܗ ܗܵܘ ܐܲܬ݂ܪܵܐ.

⁵⁰ ܝܗ̄ܘܼܕ݂ܵܝܹ̈ܐ ܕܹܝܢ ܓܲܪܸܓ݂ܘ ܠܪܹ̈ܫܹܐ ܕܲܡܕ݂ܝܼܢ̄ܬܵܐ ܘܲܠܢܸܫܹ̈ܐ ܥܲܬܿܝܼܪ̈ܵܬ݂ܵܐ ܐܲܝܠܹܝܢ ܕܕ݂ܵܚܠܵܢ ܗ̄ܘܲܝ̈ ܥܲܡܗܘܿܢ ܠܐܲܠܵܗܵܐ. ܘܐܲܩܝܼܡܘ ܪܕ݂ܘܼܦܝܵܐ ܥܲܠ ܦܵܘܠܘܿܣ ܘܥܲܠ ܒܲܪܢܒ݂ܵܐ. ܘܐܲܦܸܩܘ ܐܸܢܘܿܢ ܡܸܢ ܬܚܘܼܡܲܝ̈ܗܘܿܢ.

⁵¹ ܘܟܲܕ݂ ܢܦܲܩܘ. ܢܦܲܨܘ ܥܠܲܝܗܘܿܢ ܚܸܠܵܐ ܕܪܸ̈ܓ݂ܠܲܝܗܘܿܢ. ܘܐܸܬ݂ܵܘ ܠܗܘܿܢ ܠܐܝܼܩܵܢܘܿܢ ܡܕ݂ܝܼܢ̄ܬܵܐ.

⁵² ܘܬܲܠܡܝܼܕܹ̈ܐ ܡܸܬ݂ܡܠܹܝܢ ܗ̄ܘܼܵܘ ܚܲܕ݂ܘܼܬ݂ܵܐ ܘܪܘܼܚܵܐ ܕܩܘܼܕ݂ܫܵܐ.

14

¹ ܘܐܸܬ݂ܵܘ ܘܥܲܠܘ ܠܗܘܿܢ ܠܲܟ݂ܢܘܼܫܬܵܐ ܕܝܗ̄ܘܼܕ݂ܵܝܹ̈ܐ. ܘܗܵܟܲܢܵܐ ܡܲܠܸܠܘ ܥܲܡܗܘܿܢ. ܐܲܝܟ݂ ܕܲܢܗܲܝܡܢܘܼܢ ܣܲܓܝܼܐܹ̈ܐ ܡܸܢ ܝܗ̄ܘܼܕ݂ܵܝܹ̈ܐ ܘܡܸܢ ܝܵܘܢܵܝܹ̈ܐ.

² ܝܗ̄ܘܼܕ݂ܵܝܹ̈ܐ ܕܹܝܢ ܐܲܝܠܹܝܢ ܕܠܵܐ ܡܸܬܿܛܦܝܼܣܝܼܢ ܗ̄ܘܼܵܘ. ܓܲܪܸܓ݂ܘ ܠܥܲܡ̈ܡܹܐ. ܕܢܲܒ݂ܐܫܘܿܢ ܠܗܘܿܢ ܠܐܲܚܹ̈ܐ.

³ ܘܗܸܢܘܿܢ ܙܲܒ݂ܢܵܐ ܣܲܓܿܝܼܐܵܐ ܗ̄ܘܼܵܘ ܬܲܡܵܢ. ܘܥܹܝܢ ܒܲܓ݂ܠܹܐ ܡܡܲܠܠܝܼܢ ܗ̄ܘܼܵܘ ܥܲܠ ܡܵܪܝܵܐ. ܘܗܘܼ ܡܲܣܗܸܕ݂ ܗ̄ܘܵܐ ܥܲܠ ܡܸܠܬ݂ܵܐ ܕܛܲܝܒܘܼܬܹܗ. ܒܐܵܬ݂ܘܵܬ݂ܵܐ ܘܲܒ݂ܬܸܕ݂ܡܪ̈ܵܬ݂ܵܐ ܕܥܵܒܹܿܕ݂ ܗ̄ܘܵܐ ܒܐܝܼܕ݂ܲܝ̈ܗܘܿܢ.

⁴ ܘܟ݂ܠܹܗ ܟܸܢܫܵܐ ܕܲܡܕ݂ܝܼܢ̄ܬܵܐ ܦܠܝܼܓ݂ ܗ̄ܘܵܐ. ܡܸܢܗܘܿܢ ܐܝܼܬ݂ ܗ̄ܘܼܵܘ ܥܲܡ ܝܗ̄ܘܼܕ݂ܵܝܹ̈ܐ. ܘܡܸܢܗܘܿܢ ܢܲܩܝܼܦܝܼܢ ܗ̄ܘܼܵܘ ܠܲܫܠܝܼܚܹ̈ܐ.

⁵ ܗܘܵܐ ܕܹܝܢ ܥܠܲܝܗܘܿܢ ܓܙܵܡܵܐ ܡܸܢ ܥܲܡ̈ܡܹܐ. ܘܡܸܢ ܝܗ̄ܘܼܕ݂ܵܝܹ̈ܐ ܘܪܹ̈ܫܵܢܲܝܗܘܿܢ. ܕܲܢܨܲܥܪܘܼܢ ܐܸܢܘܿܢ ܘܢܸܪܓܡܘܼܢ ܐܸܢܘܿܢ ܒܟܹܐܦܹ̈ܐ.

⁶ ܘܟܲܕ݂ ܝܼܕ݂ܲܥܘ. ܫܲܢܝܼܘ ܘܐܸܬ݂ܓܵܘܲܣܘ ܒܲܡܕ݂ܝܼ̈ܢܵܬ݂ܵܐ ܕܠܘܼܩܵܢܝܼܵܐ. ܠܘܼܣܛܪܵܐ ܘܕܲܪܒܹܐ ܘܩܘܼܪ̈ܝܵܐ ܕܲܚܕ݂ܵܪܲܝܗܹܝܢ.

⁷ ܘܬܲܡܵܢ ܡܣܲܒܪܝܼܢ ܗ̄ܘܼܵܘ.

⁸ ܘܓܲܒ݂ܪܵܐ ܚܲܕ݂ ܝܵܬܹܒ݂ ܗ̄ܘܵܐ ܒܠܘܼܣܛܪܵܐ ܡܕ݂ܝܼܢ̄ܬܵܐ. ܕܲܣܓ݂ܝܼܦ ܗ̄ܘܵܐ ܒܪܸ̈ܓ݂ܠܵܘܗܝ. ܚܓ݂ܝܼܪܵܐ ܕܡܸܢ ܟܪܸܣ ܐܸܡܹܗ. ܕܡܸܡܬ݂ܘܿܡ ܠܵܐ ܗܲܠܸܟ݂ ܗ̄ܘܵܐ.

⁹ ܗܵܢܵܐ ܫܡܲܥ ܠܦܵܘܠܘܿܣ ܕܲܡܡܲܠܸܠ. ܘܟܲܕ݂ ܚܙܵܝܗܝ ܦܵܘܠܘܿܣ ܘܐܸܫܬܵܘܕܲܥ ܕܐܝܼܬ݂ ܒܹܗ ܗܲܝܡܵܢܘܼܬ݂ܵܐ ܕܢܸܚܹܐ.

¹⁰ ܐܸܡܲܪ ܠܹܗ ܒܩܵܠܵܐ ܪܵܡܵܐ. ܠܵܟ݂ ܐܵܡܲܪ ܐ̄ܢܵܐ. ܒܲܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܩܘܼܡ ܥܲܠ ܪܸ̈ܓ݂ܠܲܝܟ. ܘܲܫܘܲܪ ܩܵܡ ܘܗܲܠܸܟ݂.

¹¹ ܘܟܸܢܫܵܐ ܕܥܲܡܵܐ ܟܲܕ݂ ܚܙܵܘ ܡܸܕܸܡ ܕܲܥܒܲܕ݂ ܦܵܘܠܘܿܣ. ܐܲܪܝܼܡܘ ܩܵܠܗܘܿܢ ܒܠܸܫܵܢܹܗ ܕܐܲܬ݂ܪܵܐ ܘܐܵܡܪܝܼܢ. ܐܲܠܵܗܹ̈ܐ ܐܸܬܿܕܲܡܝܼܘ ܒܲܒܢܲܝ̈ܢܵܫܵܐ ܘܲܢܚܸܬ݂ܘ ܠܘܵܬܲܢ.

¹² ܘܫܲܡܝܼܘ ܗ̄ܘܼܵܘ ܠܒܲܪܢܒ݂ܵܐ ܡܵܪܹܐ ܐܲܠܵܗܹ̈ܐ. ܘܲܠܦܵܘܠܘܿܣ ܗܲܪܡܝܼܣ. ܡܛܠ ܕܗܘܼ ܡܫܲܪܹܐ ܗ̄ܘܵܐ ܒܡܸܠܬ݂ܵܐ.

¹³ ܘܟ݂ܘܡܪܵܐ ܕܡܵܪܹܐ ܐܲܠܵܗܹ̈ܐ ܗܵܘ ܕܐܝܼܬ݂ ܗ̄ܘܵܐ ܠܒܲܪ ܡܸܢ ܡܕ݂ܝܼܢ̄ܬܵܐ. ܐܲܝܬܿܝܼ ܬܵܘܪܹ̈ܐ ܘܲܟ݂ܠܝܼܠܹ̈ܐ ܠܬܲܪܥܵܐ ܕܕ݂ܵܪܬܵܐ ܐܲܬܲܪ ܕܲܫܪܹܝܢ ܗ̄ܘܼܵܘ. ܘܨܵܒܹܐ ܗ̄ܘܵܐ ܕܲܢܕ݂ܲܒܲܚ ܠܗܘܿܢ.

¹⁴ ܒܲܪܢܒ݂ܵܐ ܕܹܝܢ ܘܦܵܘܠܘܿܣ ܟܲܕ݂ ܫܡܲܥܘ. ܣܲܕܸܩܘ ܢܲܚܬܲܝ̈ܗܘܿܢ. ܘܲܫܘܲܪܘ ܘܲܢܦܲܩܘ ܠܗܘܿܢ ܠܘܵܬ݂ ܐܵܟ݂ܠܘܿܣ. ܘܩܵܥܹܝܢ ܗ̄ܘܵܘ

¹⁵ ܘܐܵܡܪܝܼܢ. ܓܲܒ݂ܪܹ̈ܐ. ܡܵܢܵܐ ܥܵܒ݂ܕܝܼܢ ܐܢ̄ܬܘܿܢ. ܐܵܦ ܚܢܲܢ ܒܢܲܝ̈ܢܵܫܵܐ ܚ̄ܢܲܢ ܚܵܫܘܿܫܹܐ ܐܲܟ݂ܘܵܬ݂ܟ݂ܘܿܢ. ܕܲܡܣܲܒܪܝܼܢܲܢ ܠܟ݂ܘܿܢ. ܕܡܸܢ ܗܵܠܹܝܢ ܒܲܛ̈ܵܠܵܬ݂ܵܐ ܬܸܬ݂ܦܢܘܿܢ ܠܘܵܬ݂ ܐܲܠܵܗܵܐ ܚܲܝܵܐ. ܗܵܘ ܕܲܥܒܲܕ݂ ܫܡܲܝܵܐ ܘܐܲܪܥܵܐ. ܘܝܲܡ̈ܡܹܐ ܘܟ݂ܠ ܕܐܝܼܬ݂ ܒܗܘܿܢ.

¹⁶ ܗܵܘ ܕܲܒ݂ܕ݂ܵܪܹ̈ܐ ܩܲܕ݂ܡܵܝܹ̈ܐ ܫܒܲܩ ܗ̄ܘܵܐ ܐܸܢܘܿܢ ܠܟ݂ܠܗܘܿܢ ܥܲܡ̈ܡܹܐ. ܕܢܹܐܙܠ̄ܘܼܢ ܒܐܘܼܪ̈ܚܵܬ݂ܵܐ ܕܢܲܦ̮ܫܗܘܿܢ.

¹⁷ ܟܲܕ݂ ܠܵܐ ܫܒܲܩ ܢܲܦ̮ܫܹܗ ܕܠܵܐ ܣܵܗܕܘܼ. ܒܲܕ݂ܥܵܒܹܿܕ݂ ܗ̄ܘܵܐ ܠܗܘܿܢ ܛ̈ܵܒ݂ܵܬ݂ܵܐ ܡܸܢ ܫܡܲܝܵܐ. ܘܡܲܚܸܬ݂ ܗ̄ܘܵܐ ܠܗܘܿܢ ܡܸܛܪܵܐ. ܘܲܡܪܲܒܹܐ ܗ̄ܘܵܐ ܦܹܐܪܹ̈ܐ ܒܙܲܒ݂ܢܲܝ̈ܗܘܿܢ. ܘܡܵܠܹܐ ܗ̄ܘܵܐ ܬܘܼܪܣܵܝܵܐ ܘܒܲܣܝܼܡܘܼܬ݂ܵܐ ܠܸܒܵܘܵܬ݂ܗ̈ܘܿܢ.

¹⁸ ܘܟܲܕ݂ ܗܵܠܹܝܢ ܐܵܡܪܝܼܢ ܗ̄ܘܼܵܘ. ܡܸܢ ܡܲܚܣܸܢ ܟܠܵܘ ܠܥܲܡܵܐ. ܕܐ̄ܢܵܫ ܠܵܐ ܢܕ݂ܲܒܲܚ ܠܗܘܿܢ.

¹⁹ ܐܸܬ݂ܵܘ ܕܹܝܢ ܠܬܲܡܵܢ ܝܗ̄ܘܼܕ݂ܵܝܹ̈ܐ ܡܸܢ ܐܝܼܩܵܢܘܿܢ ܘܡܸܢ ܐܲܢܛܝܵܟ݂ܝܵܐ. ܘܲܫܓܲܫܘ ܥܠܲܝܗܘܿܢ ܠܥܲܡܵܐ ܘܪܲܓ݂ܡܘܼܗܝ ܠܦܵܘܠܘܿܣ ܘܓܲܪܘܼܗܝ ܠܒܲܪ ܡܸܢ ܡܕ݂ܝܼܢ̄ܬܵܐ. ܡܛܠ ܕܣܵܒ݂ܪܝܼܢ ܗ̄ܘܼܵܘ ܕܡܝܼܬ݂ ܠܹܗ.

²⁰ ܘܲܟ݂ܢܲܫܘ ܥܠܵܘܗܝ ܬܲܠܡܝܼܕܹ̈ܐ. ܘܩܼܵܡ ܥܲܠ ܠܲܡܕ݂ܝܼܢ̄ܬܵܐ. ܘܲܠܝܵܘܡܵܐ ܐ̄ܚܪܹܢܵܐ. ܢܦܲܩ ܠܹܗ ܡܸܢ ܬܲܡܵܢ ܥܲܡ ܒܲܪܢܒ݂ܵܐ. ܘܐܸܬ݂ܵܘ ܠܕܲܪܒܹܐ ܡܕ݂ܝܼܢ̄ܬܵܐ.

²¹ ܘܟܲܕ݂ ܡܣܲܒܪܝܼܢ ܗ̄ܘܼܵܘ ܠܲܒ݂ܢܲܝ̈ ܡܕ݂ܝܼܢ̄ܬܵܐ ܗܵܝ. ܬܲܠܡܸܕ݂ܘ ܗ̄ܘܼܵܘ ܠܣܲܓܝܼܐܹ̈ܐ. ܘܲܗܦܲܟ݂ܘ ܐܸܬ݂ܵܘ ܠܗܘܿܢ ܠܠܘܼܣܛܪܵܐ ܡܕ݂ܝܼܢ̄ܬܵܐ ܘܠܐܝܼܩܵܢܘܿܢ ܘܠܲܐܢܛܝܵܟ݂ܝܵܐ.

²² ܟܲܕ݂ ܡܫܲܪܪܝܼܢ ܗ̄ܘܼܵܘ ܢܲܦ̮ܫܵܬ݂ܗܘܿܢ ܕܬܲܠܡܝܼܕܹ̈ܐ. ܘܒ݂ܵܥܹܝܢ ܗ̄ܘܼܵܘ ܡܸܢܗܘܿܢ ܕܲܢܩܵܘܘܢ ܒܗܲܝܡܵܢܘܼܬ݂ܵܐ. ܘܐܵܡܪܝܼܢ ܗ̄ܘܼܵܘ ܠܗܘܿܢ ܕܒ݂ܐܘܠܨܵܢܵܐ ܣܲܓܿܝܼܐܵܐ ܘܵܠܹܐ ܠܡܸܥܲܠ ܠܡܲܠܟܿܘܼܬܹܗ ܕܐܲܠܵܗܵܐ.

²³ ܘܐܲܩܝܼܡܘ ܠܗܘܿܢ ܒܟ݂ܠ ܥܹܕܬܵܐ ܩܲܫܝܼܫܹ̈ܐ. ܟܲܕ݂ ܨܵܝܡܝܼܢ ܗ̄ܘܼܵܘ ܥܲܡܗܘܿܢ ܘܲܡܨܲܠܹܝܢ. ܘܡܲܓ݂ܥܠܝܼܢ ܗ̄ܘܼܵܘ ܠܗܘܿܢ ܠܡܵܪܲܢ. ܗܵܘ ܕܗܲܝܡܸܢܘ ܒܹܗ.

²⁴ ܘܟܲܕ݂ ܐܸܬ݂ܟܪܸܟ݂ܘ ܒܐܲܬ݂ܪܵܐ ܕܦܝܼܣܝܼܕ݂ܝܼܵܐ. ܐܸܬ݂ܵܘ ܠܗܘܿܢ ܠܦܵܡܦܹܘܠܝܼܵܐ.

²⁵ ܘܟܲܕ݂ ܡܲܠܸܠܘ ܒܦܲܪܓܹܐ ܡܕ݂ܝܼܢ̄ܬܵܐ ܡܸܠܬ݂ܵܐ ܕܡܵܪܝܵܐ. ܢܚܸܬ݂ܘ ܠܗܘܿܢ ܠܐܝܼܛܵܠܝܼܵܐ.

²⁶ ܘܡܸܢ ܬܲܡܵܢ ܪܕ݂ܵܘ ܒܝܲܡܵܐ. ܘܐܸܬ݂ܵܘ ܠܗܘܿܢ ܠܐܲܢܛܝܵܟ݂ܝܵܐ. ܡܛܠ ܕܡܸܢ ܬܲܡܵܢ ܡܲܓ݂ܥܠܝܼܢ ܗ̄ܘܼܵܘ ܠܛܲܝܒܘܼܬܹܗ ܕܡܵܪܝܵܐ ܠܲܥܒ݂ܵܕ݂ܵܐ ܗܵܘ ܕܫܲܠܸܡܘ.

²⁷ ܘܟܲܕ݂ ܟܢܲܫܘ ܟܠܵܗܿ ܥܹܕܬܵܐ. ܡܸܫܬܲܥܹܝܢ ܗ̄ܘܼܵܘ ܟܠ ܡܸܕܸܡ ܕܲܥܒܲܕ݂ ܥܲܡܗܘܿܢ ܐܲܠܵܗܵܐ. ܘܕ݂ܲܦܬܲܚ ܬܲܪܥܵܐ ܕܗܲܝܡܵܢܘܼܬ݂ܵܐ ܠܥܲܡ̈ܡܹܐ.

²⁸ ܘܙܲܒ݂ܢܵܐ ܣܲܓܿܝܼܐܵܐ ܗ̄ܘܼܵܘ ܬܲܡܵܢ ܠܘܵܬ݂ ܬܲܠܡܝܼܕܹ̈ܐ.

15

¹ ܢܚܸܬ݂ܘ ܗ̄ܘܼܵܘ ܕܹܝܢ ܐ̄ܢܵܫܵܐ ܡܸܢ ܝܼܗܘܼܕ݂. ܘܡܲܠܦܝܼܢ ܗ̄ܘܼܵܘ ܠܗܘܿܢ ܠܐܲܚܹ̈ܐ. ܕܐܸܢ ܗܘܼ ܕܠܵܐ ܓܵܙܪܝܼܢ ܐܢ̄ܬܘܿܢ ܒܲܥܝܵܕ݂ܵܐ ܕܢܵܡܘܿܣܵܐ. ܠܵܐ ܡܸܫܟܿܚܝܼܢ ܐܢ̄ܬܘܿܢ ܠܡܸܚܵܐ.

² ܘܲܗܘܵܐ ܫܓ݂ܘܼܫܝܵܐ ܣܲܓܿܝܼܐܵܐ ܘܲܒ݂ܥܵܬ݂ܵܐ. ܠܦܵܘܠܘܿܣ ܘܲܠܒܲܪܢܒ݂ܵܐ ܥܲܡܗܘܿܢ. ܘܲܗܘܵܬ݂ ܕܢܸܣܩܘܼܢ ܦܵܘܠܘܿܣ ܘܒܲܪܢܲܒܲܐ ܘܐܲܚܪ̈ܵܢܹܐ ܥܲܡܗܘܿܢ. ܠܘܵܬ݂ ܫܠܝܼܚܹ̈ܐ ܘܩܲܫܝܼܫܹ̈ܐ ܕܒ݂ܐܘܿܪܸܫܠܸܡ ܡܛܠ ܗܵܕܹܐ ܒܥܵܬ݂ܵܐ.

³ ܘܠܵܘܝܲܬ݂ ܫܲܕܪܲܬ݂ ܐܸܢܘܿܢ ܥܹܕܬܵܐ. ܘܪܵܕ݂ܝܢ ܗ̄ܘܼܵܘ ܒܟ݂ܠܵܗܿ ܦܹܘܢܝܼܩܹܐ. ܘܐܵܦ ܒܹܝܬ݂ ܫܵܡܪ̈ܵܝܹܐ. ܟܲܕ݂ ܡܸܫܬܲܥܹܝܢ ܗ̄ܘܼܵܘ ܥܲܠ ܦܘܼܢܵܝܵܐ ܕܥܲܡ̈ܡܹܐ. ܘܥܵܒ݂ܕܝܼܢ ܗ̄ܘܼܵܘ ܚܲܕ݂ܘܼܬ݂ܵܐ ܪܲܒܬ݂ܵܐ ܠܟ݂ܠܗܘܿܢ ܐܲܚܹ̈ܐ.

⁴ ܘܟܲܕ݂ ܐܸܬ݂ܵܘ ܠܐܘܿܪܸܫܠܸܡ. ܐܸܬ݂ܩܲܒܲܠܘ ܡܸܢ ܥܹܕܬܵܐ ܘܡܸܢ ܫܠܝܼܚܹ̈ܐ ܘܡܸܢ ܩܲܫܝܼܫܹ̈ܐ. ܘܐܸܫܬܲܥܝܼܘ ܠܗܘܿܢ ܟܠ ܡܵܐ ܕܲܥܒܲܕ݂ ܥܲܡܗܘܿܢ ܐܲܠܵܗܵܐ.

⁵ ܩܵܡܘ ܗ̄ܘܼܵܘ ܕܹܝܢ ܐ̄ܢܵܫܵܐ ܐܲܝܠܹܝܢ ܕܗܲܝܡܸܢܘ ܗ̄ܘܼܵܘ ܡܸܢ ܝܘܼܠܦܵܢܵܐ ܕܲܦܪ̈ܝܼܫܹܐ ܘܐܵܡܪܝܼܢ. ܕܘܵܠܹܐ ܗܘܼ ܠܟ݂ܘܿܢ ܠܡܸܓ݂ܙܲܪ ܐܸܢܘܿܢ. ܘܲܬ݂ܦܲܩܕ݂ܘܼܢ ܐܸܢܘܿܢ. ܕܢܸܛܪܘܼܢ ܢܵܡܘܿܣܵܐ ܕܡܘܼܫܹܐ.

⁶ ܐܸܬ݂ܟܲܢܲܫܘ ܕܹܝܢ ܫܠܝܼܚܹ̈ܐ ܘܩܲܫܝܼܫܹ̈ܐ. ܕܢܸܚܙܘܿܢ ܥܲܠ ܡܸܠܬ݂ܵܐ ܗܵܕܹܐ.

⁷ ܘܟܲܕ݂ ܗܘܸܵܬ݂ ܒܥܵܬ݂ܵܐ ܣܲܓܝܼܐܬ݂ܵܐ. ܩܵܡ ܫܸܡܥܘܿܢ ܘܐܸܡܲܪ ܠܗܘܿܢ. ܓܲܒ݂ܪܹ̈ܐ ܐܲܚ̈ܝܼܢ. ܐܲܢ̄ܬܿܘܿܢ ܝܵܕ݂ܥܝܼܢ ܐܢ̄ܬܘܿܢ. ܕܡܸܢ ܝܵܘ̈ܡܵܬ݂ܵܐ ܩܲܕ݂ܡܵܝܹ̈ܐ. ܡܸܢ ܦܘܼܡܝ ܕܝܼܠܝ ܓܒ݂ܵܐ ܐܲܠܵܗܵܐ ܕܢܸܫܡܥܘܼܢ ܥܲܡ̈ܡܹܐ. ܡܸܠܬ݂ܵܐ ܕܲܣܒܲܪܬ݂ܵܐ ܘܲܢܗܲܝܡܢܘܼܢ.

⁸ ܘܐܲܠܵܗܵܐ ܕܝܵܕ݂ܲܥ ܕܲܒ݂ܠܸܒ̈ܵܘܵܬ݂ܵܐ ܐܲܣܗܸܕ݂ ܥܠܲܝܗܘܿܢ. ܘܝܲܗ̄ܒ݂ ܠܗܘܿܢ ܪܘܼܚܵܐ ܕܩܘܼܕ݂ܫܵܐ ܐܲܝܟ݂ ܕܠܲܢ.

⁹ ܘܡܸܕܸܡ ܠܵܐ ܦܪܲܫ ܒܲܝܢܲܝܢ ܘܲܠܗܘܿܢ. ܡܛܠ ܕܕ݂ܲܟܝܼ ܒܗܲܝܡܵܢܘܼܬ݂ܵܐ ܠܸܒܵܘܵܬ݂ܗ̈ܘܿܢ.

¹⁰ ܘܗܵܫܵܐ ܐܲܢ̄ܬܿܘܿܢ ܡܵܢܵܐ ܡܢܲܣܹܝܢ ܐܢ̄ܬܘܿܢ ܠܐܲܠܵܗܵܐ. ܐܲܝܟ݂ ܕܲܬ݂ܣܝܼܡܘܼܢ ܢܝܼܪܵܐ ܥܲܠ ܨܵܘܪ̈ܲܝܗܘܿܢ ܕܬܲܠܡܝܼܕܹ̈ܐ. ܐܲܝܢܵܐ ܕܐܵܦܠܵܐ ܐܲܒ݂ܵܗܵܬܲܢ ܐܵܦܠܵܐ ܚܢܲܢ. ܐܸܫܟܲܚܢ ܠܡܸܛܥܲܢ.

¹¹ ܐܸܠܵܐ ܒܛܲܝܒܘܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܡܗܲܝܡܢܝܼܢܲܢ. ܕܢܸܚܹܐ ܐܲܟ݂ܘܵܬ݂ܗܘܿܢ.

¹² ܘܲܫܬܸܩܘ ܟܠܹܗ ܟܸܢܫܵܐ. ܘܫܵܡܥܝܼܢ ܗ̄ܘܼܵܘ ܠܦܵܘܠܘܿܣ ܘܲܠܒܲܪܢܒ݂ܵܐ. ܕܡܸܫܬܲܥܹܝܢ ܗ̄ܘܼܵܘ ܟܠ ܡܵܐ ܕܲܥܒܲܕ݂ ܐܲܠܵܗܵܐ ܒܐܝܼܕ݂ܲܝ̈ܗܘܿܢ. ܐܵܬ݂ܘܵܬ݂ܵܐ ܘܲܓ݂ܒܲܪ̈ܘܵܬ݂ܵܐ ܒܥܲܡ̈ܡܹܐ.

¹³ ܘܒܵܬܲܪ ܕܲܫܬܸܩܘ. ܩܵܡ ܝܲܥܩܘܿܒ݂ ܘܐܸܡܲܪ. ܓܲܒ݂ܪܹ̈ܐ ܐܲܚܲܝ̈ܢ. ܫܘܼܡܥܘܼܢܝ.

¹⁴ ܫܸܡܥܘܿܢ ܐܸܫܬܲܥܝܼ ܠܟ݂ܘܿܢ. ܐܲܝܟܲܢܵܐ ܫܲܪܝܼ ܐܲܠܵܗܵܐ ܠܡܸܓ݂ܒܵܐ ܡܸܢ ܥܲܡ̈ܡܹܐ ܥܲܡܵܐ ܠܲܫܡܹܗ.

¹⁵ ܘܲܠܗܵܕܹܐ ܫܵܠܡܵܢ ܡܸܠܲܝ̈ܗܘܿܢ ܕܲܢܒ݂ܝܹ̈ܐ. ܐܲܝܟ݂ ܡܵܐ ܕܲܟ݂ܬ݂ܝܼܒ݂.

¹⁶ ܕܡܸܢ ܒܵܬܲܪ ܗܵܠܹܝܢ ܐܸܗܦܘܼܟ݂ ܘܐܲܩܝܼܡ ܡܲܫܟܢܹܗ ܕܕ݂ܵܘܝܼܕ݂ ܐܲܝܢܵܐ ܕܲܢܦܲܠ. ܘܐܸܒ݂ܢܹܐ ܡܸܕܸܡ ܕܲܢܦܲܠ ܡܸܢܹܗ. ܘܐܲܩܝܼܡܝܼܘܗܝ.

¹⁷ ܐܲܝܟ݂ ܕܢܸܒ݂ܥܘܿܢ ܫܲܪܟܗܘܿܢ ܕܲܒ݂ܢܲܝ̈ܢܵܫܵܐ ܠܡܵܪܝܵܐ. ܘܟ݂ܠܗܘܿܢ ܥܲܡ̈ܡܹܐ ܐܲܝܠܹܝܢ ܕܐܸܬ݂ܩܪܝܼ ܫܹܡܝ ܥܠܲܝܗܘܿܢ. ܐܵܡܲܪ ܡܵܪܝܵܐ ܕܲܥܒܲܕ݂ ܗܵܠܹܝܢ ܟܠܗܹܝܢ.

¹⁸ ܝܼܕ݂ܝܼܥܝܼܢ ܡܸܢ ܥܵܠܲܡ ܥܒ݂ܵܕ݂ܵܘ̈ܗܝ ܕܐܲܠܵܗܵܐ.

¹⁹ ܡܛܠ ܗܵܕܹܐ ܐܸܢܵܐ ܐܵܡܲܪ ܐ̄ܢܵܐ. ܕܠܵܐ ܢܸܗܘܘܿܢ ܫܵܚܩܝܼܢ ܠܐܲܝܠܹܝܢ ܕܡܸܢ ܥܲܡ̈ܡܹܐ ܡܸܬ݂ܦܢܹܝܢ ܠܘܵܬ݂ ܐܲܠܵܗܵܐ.

²⁰ ܐܸܠܵܐ ܢܸܫܬܿܠܲܚ ܠܗܘܿܢ. ܕܢܸܗܘܘܿܢ ܦܲܪܝܼܩܝܼܢ ܡܸܢ ܛܲܡܐܘܼܬ݂ܵܐ ܕܲܕ݂ܒ݂ܝܼܚܵܐ. ܘܡܸܢ ܙܵܢܝܘܼܬ݂ܵܐ. ܘܡܸܢ ܕܲܚܢܝܼܩܵܐ. ܘܡܸܢ ܕܡܵܐ.

²¹ ܡܘܼܫܹܐ ܓܹܝܪ ܡܸܢ ܕܵܪܹ̈ܐ ܩܲܕ݂ܡܵܝܹ̈ܐ. ܒܟ݂ܠ ܡܕ݂ܝܼܢܵܐ ܐܝܼܬ݂ ܗ̄ܘܵܐ ܠܹܗ ܟܵܪ̈ܘܿܙܹܐ ܒܲܟ݂ܢ̈ܘܼܫܵܬ݂ܵܐ. ܕܲܒܟ݂ܠ ܫܲܒܝܼ̈ܢ ܩܵܪܹܝܢ ܠܹܗ.

²² ܗܵܝܕܹܝܢ ܫܠܝܼܚܹ̈ܐ ܘܩܲܫܝܼܫܹ̈ܐ ܥܲܡ ܟܠܵܗܿ ܥܹܕܬܵܐ. ܓܒ݂ܵܘ ܓܲܒ݂ܪܹ̈ܐ ܡܸܢܗܘܿܢ. ܘܫܲܕܲܪܘ ܠܐܲܢܛܝܘܿܟ݂ܝ ܥܲܡ ܦܵܘܠܘܿܣ ܘܒܲܪܢܒ݂ܵܐ. ܠܝܼܗܘܼܕ݂ܵܐ ܕܡܸܬ݂ܩܪܹܐ ܒܲܪ ܫܲܒܵܐ. ܘܲܠܫܝܼܠܵܐ. ܓܲܒ݂ܪܹ̈ܐ ܕܪܹ̈ܫܹܐ ܗ̄ܘܼܵܘ ܒܗܘܿܢ ܒܐܲܚܹ̈ܐ.

²³ ܘܲܟ݂ܬܲܒ݂ܘ ܐܸܓܲܪܬܵܐ ܒܐܝܼܕ݂ܲܝ̈ܗܘܿܢ ܗܵܟܲܢܵܐ. ܫܠܝܼܚܹ̈ܐ ܘܩܲܫܝܼܫܹ̈ܐ ܘܐܲܚܹ̈ܐ. ܠܐܲܝܠܹܝܢ ܕܐܝܼܬ݂ ܒܐܲܢܛܝܘܿܟ݂ܝ ܘܲܒ݂ܣܘܼܪܝܼܵܐ ܘܲܒ݂ܩܝܼܠܝܼܩܝܼܵܐ. ܐܲܚܹ̈ܐ ܕܡܸܢ ܥܲܡ̈ܡܹܐ. ܫܠܵܡ.

²⁴ ܫܡܝܼܥ ܠܲܢ. ܕܐ̄ܢܵܫ̈ܝܼܢ ܡܸܢܢ ܢܦܲܩܘ ܘܕ݂ܲܠܲܚܟ݂ܘܿܢ ܒܡܸܠܹ̈ܐ. ܘܐܲܗܦܸܟ݂ܘ ܢܲܦ̮ܫܵܬ݂̈ܟ݂ܘܿܢ ܟܲܕ݂ ܐܵܡܪܝܼܢ. ܕܬܸܗܘܘܿܢ ܓܵܙܪܝܼܢ ܘܢܵܛܪܝܼܢ ܢܵܡܘܿܣܵܐ. ܐܲܝܠܹܝܢ ܕܲܚܢܲܢ ܠܵܐ ܦܲܩܸܕ݂ܢ ܐܸܢܘܿܢ.

²⁵ ܡܛܠ ܗܵܢܵܐ ܐܸܬ݂ܚܲܫܲܒ݂ܢ ܟܠܲܢ ܟܲܕ݂ ܟܢܝܼܫܝܼܢܲܢ. ܘܲܓ݂ܒܲܝܢ ܓܲܒ݂ܪܹ̈ܐ ܘܫܲܕܲܪܢ ܠܘܵܬ݂ܟ݂ܘܿܢ. ܥܲܡ ܦܵܘܠܘܿܣ ܘܒܲܪܢܒ݂ܵܐ ܚܲܒܝܼܒܲܝ̈ܢ.

²⁶ ܐ̄ܢܵܫܵܐ ܕܐܲܫܠܸܡܘ ܢܲܦ̮ܫܵܬ݂̈ܗܘܿܢ ܚܠܵܦ ܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ.

²⁷ ܘܫܲܕܲܪܢ ܥܲܡܗܘܿܢ ܠܝܼܗܘܼܕ݂ܵܐ ܘܲܠܫܝܼܠܵܐ. ܕܗܸܢܘܿܢ ܒܡܸܠܬ݂ܵܐ ܢܹܐܡܪܘܼܢ ܠܟ݂ܘܿܢ ܗܸܢܹܝܢ ܗܵܠܹܝܢ.

²⁸ ܗܘܵܐ ܓܹܝܪ ܨܸܒ݂ܝܵܢܵܐ ܠܪܘܼܚܵܐ ܕܩܘܼܕ݂ܫܵܐ ܘܐܵܦ ܠܲܢ. ܕܠܵܐ ܢܸܬܿܬܿܣܝܼܡ ܥܠܲܝܟܿܘܿܢ ܝܘܼܩܪܵܐ ܝܲܬܝܼܪܵܐ ܠܒܲܪ ܡܸܢ ܗܵܠܹܝܢ ܕܐܵܠܨܵܢ.

²⁹ ܕܬܸܬ݂ܪܲܚܩܘܼܢ ܡܸܢ ܕܲܕ݂ܒ݂ܝܼܚܵܐ. ܘܡܸܢ ܕܡܵܐ. ܘܡܸܢ ܚܢܝܼܩܵܐ. ܘܡܸܢ ܙܵܢܝܘܼܬ݂ܵܐ. ܕܟܲܕ݂ ܬܸܛܪܘܼܢ ܢܲܦ̮ܫܟ݂ܘܿܢ ܡܸܢ ܗܵܠܹܝܢ ܫܲܦܝܼܪ ܬܸܗܘܘܿܢ. ܗܘܵܘ ܫܲܪܝܼܪ̈ܝܼܢ ܒܡܵܪܲܢ.

³⁰ ܗܵܢܘܿܢ ܕܹܝܢ ܕܐܸܫܬܿܠܲܚܘ ܐܸܬ݂ܵܘ ܠܐܲܢܛܝܵܟ݂ܝܵܐ. ܘܲܟ݂ܢܲܫܘ ܟܠܹܗ ܥܲܡܵܐ ܘܝܲܗ̄ܒ݂ܘ ܐܸܓܲܪܬܵܐ.

³¹ ܘܟܲܕ݂ ܩܪܵܘ. ܚܕ݂ܝܼܘ ܘܐܸܬ݂ܒܲܝܲܐܘ.

³² ܘܲܒ݂ܡܸܠܬ݂ܵܐ ܥܲܬܿܝܼܪܬܵܐ ܚܲܝܸܠܘ ܠܐܲܚܹ̈ܐ ܘܩܲܝܸܡܘ ܐܸܢܘܿܢ ܕܒܹܝܬ݂ ܝܼܗܘܼܕ݂ܵܐ ܘܫܝܼܠܵܐ. ܡܛܠ ܕܐܵܦ ܗܸܢܘܿܢ ܢܒ݂ܝܹ̈ܐ ܗ̄ܘܼܵܘ.

³³ ܘܟܲܕ݂ ܗܘܵܘ ܬܲܡܵܢ ܙܲܒ݂ܢܵܐ. ܫܪܵܘ ܐܸܢܘܿܢ ܐܲܚܹ̈ܐ ܒܲܫܠܵܡܵܐ ܠܘܵܬ݂ ܫܠܝܼܚܹ̈ܐ.

³⁴ ܒܪܲܡ ܗܘܵܐ ܨܸܒ݂ܝܵܢܹܗ ܕܫܝܼܠܵܐ ܕܲܢܩܵܘܹܐ ܬܲܡܵܢ.

³⁵ ܦܵܘܠܘܿܣ ܕܹܝܢ ܘܒܲܪܢܒ݂ܵܐ ܩܵܘܝܼܘ ܗ̄ܘܼܵܘ ܒܐܲܢܛܝܼܘܟ݂ܝܼ. ܘܡܲܠܦܝܼܢ ܗ̄ܘܼܵܘ ܘܲܡܣܲܒܪܝܼܢ ܥܲܡ ܐ̄ܚܪܵܢܹ̈ܐ ܣܲܓܝܼܐܹ̈ܐ. ܡܸܠܬܹܗ ܕܐܲܠܵܗܵܐ.

³⁶ ܘܒܵܬܲܪ ܝܵܘ̈ܡܵܬ݂ܵܐ ܐܸܡܲܪ ܦܵܘܠܘܿܣ ܠܒܲܪܢܒ݂ܵܐ. ܢܸܬ݂ܦܢܹܐ ܘܢܸܣܥܘܿܪ ܠܐܲܚܹ̈ܐ ܕܲܒܟ݂ܠ ܡܕ݂ܝܼܢܵܐ ܕܐܲܟ݂ܪܸܙܢ ܒܵܗܿ ܡܸܠܬ݂ܵܐ ܕܐܲܠܵܗܵܐ. ܘܢܸܚܙܹܐ ܡܵܢܵܐ ܥܒ݂ܝܼܕ݂ܝܼܢ.

³⁷ ܒܲܪܢܒ݂ܵܐ ܕܹܝܢ ܨܵܒܹܐ ܗ̄ܘܵܐ. ܕܢܸܕ݂ܒܲܪ ܠܝܘܿܚܲܢܵܢ ܗܵܘ ܕܐܬ݂ܟܲܢܝܼ ܡܲܪܩܘܿܣ.

³⁸ ܦܵܘܠܘܿܣ ܕܹܝܢ ܠܵܐ ܨܵܒܹܐ ܗ̄ܘܵܐ. ܕܢܸܕ݂ܒܪܹܗ ܥܲܡܗܘܿܢ. ܡܛܠ ܕܲܫܒܲܩ ܗ̄ܘܵܐ ܐܸܢܘܿܢ. ܟܲܕ݂ ܗܸܢܘܿܢ ܒܦܲܡܦܹܘܠܝܼܵܐ. ܘܠܵܐ ܐܸܙܲܠ ܥܲܡܗܘܿܢ.

³⁹ ܡܛܠ ܗܵܢܵܐ ܚܸܪܝܵܢܵܐ ܦܪܲܫܘ ܚܲܕ݂ ܡܸܢ ܚܲܕ݂. ܘܒܲܪܢܒ݂ܵܐ ܕܒܲܪ ܠܡܲܪܩܘܿܣ ܘܲܪܕ݂ܵܘ ܒܝܲܡܵܐ ܘܐܸܙܲܠܘ ܠܗܘܿܢ ܠܩܹܘܦܪܘܿܣ.

⁴⁰ ܦܵܘܠܘܿܣ ܕܹܝܢ ܓܒ݂ܵܐ ܠܹܗ ܠܫܝܼܠܵܐ. ܘܲܢܦܲܩ ܟܲܕ݂ ܡܲܓ݂ܥܸܠ ܡܸܢ ܐܲܚܹ̈ܐ ܠܛܲܝܒܘܼܬ݂ܵܐ ܕܐܲܠܵܗܵܐ.

⁴¹ ܘܪܵܕܹܐ ܗ̄ܘܵܐ ܒܣܘܼܪܝܼܵܐ ܘܲܒ݂ܩܝܼܠܝܼܩܝܼܵܐ ܘܲܡܩܲܝܸܡ ܥܹ̈ܕܵܬܵܐ.

16

¹ ܘܡܲܛܝܼ ܗ̄ܘܵܐ ܠܕܲܪܒܹܐ ܡܕ݂ܝܼܢ̄ܬܵܐ ܘܲܠܠܘܼܣܛܪܵܐ. ܐܝܼܬ݂ ܗ̄ܘܵܐ ܕܹܝܢ ܬܲܡܵܢ ܬܲܠܡܝܼܕ݂ܵܐ ܚܲܕ݂ ܕܲܫܡܹܗ ܛܝܼܡܵܬܹܐܘܿܣ. ܒܪܵܗܿ ܕܝܼܗܘܼܕ݂ܝܬܵܐ ܚܕ݂ܵܐ ܡܗܲܝܡܲܢܬܵܐ. ܘܐܲܒ݂ܘܼܗܝ ܐܲܪܡܵܝܵܐ ܗ̄ܘܵܐ.

² ܘܟ݂ܠܗܘܿܢ ܬܲܠܡܝܼܕܹ̈ܐ ܕܡܸܢ ܠܘܼܣܛܪܵܐ ܘܡܸܢ ܐܝܼܩܵܢܘܿܢ. ܡܲܣܗܕ݂ܝܼܢ ܗ̄ܘܼܵܘ ܥܠܵܘܗܝ.

³ ܠܗܵܢܵܐ ܨܒ݂ܵܐ ܗ̄ܘܵܐ ܦܵܘܠܘܿܣ. ܕܢܸܕ݂ܒܪܝܼܘܗܝ ܥܲܡܹܗ. ܘܲܢܣܲܒ݂ ܓܲܙܪܹܗ. ܡܛܠ ܝܗ̄ܘܼܕ݂ܵܝܹ̈ܐ ܕܐܝܼܬ݂ ܗ̄ܘܼܵܘ ܒܐܲܬ݂ܪܵܐ. ܝܵܕ݂ܥܝܼܢ ܗ̄ܘܼܵܘ ܓܹܝܪ ܟܠܗܘܿܢ ܠܐܲܒ݂ܘܗܝ ܕܐܲܪܡܵܝܵܐ ܗ̄ܘܵܐ.

⁴ ܘܟܲܕ݂ ܐܵܙܠ̄ܝܼܢ ܗ̄ܘܼܵܘ ܒܲܡܕ݂ܝܼ̈ܢܵܬ݂ܵܐ. ܡܲܟ݂ܪܙܝܼܢ ܗ̄ܘܼܵܘ ܘܡܲܠܦܝܼܢ ܠܗܘܿܢ. ܕܢܸܗܘܘܿܢ ܢܵܛܪܝܼܢ ܦܘܼܩܕܵܢܹ̈ܐ ܐܲܝܠܹܝܢ ܕܲܟ݂ܬܲܒ݂ܘ ܫܠܝܼܚܹ̈ܐ ܘܩܲܫܝܼܫܹ̈ܐ ܕܒ݂ܐܘܿܪܸܫܠܸܡ.

⁵ ܒܪܲܡ ܥܹ̈ܕ݂ܵܬܵܐ ܡܸܬ݂ܩܲܝܡܵܢ ܗ̄ܘܲܝ̈ ܒܗܲܝܡܵܢܘܼܬ݂ܵܐ. ܘܣܵܓ݂ܝܵܢ ܗ̄ܘܲܝ̈ ܒܡܸܢܝܵܢܵܐ ܟܠܝܘܿܡ.

⁶ ܗܲܠܸܟ݂ܘ ܕܹܝܢ ܒܲܦܪܘܿܓ݂ܝܼܵܐ ܘܲܒ݂ܓ݂ܵܠܵܛܝܼܵܐ ܐܲܬ݂ܪ̈ܵܘܵܬ݂ܵܐ. ܘܲܟ݂ܠܵܬ݂ ܐܸܢܘܿܢ ܪܘܼܚܵܐ ܕܩܘܼܕ݂ܫܵܐ. ܕܠܵܐ ܢܡܲܠܠܘܼܢ ܡܸܠܬ݂ܵܐ ܕܐܲܠܵܗܵܐ ܒܐܵܣܝܼܵܐ.

⁷ ܘܟܲܕ݂ ܐܸܬ݂ܵܘ ܠܡܘܼܣܝܼܵܐ ܐܲܬ݂ܪܵܐ. ܨܵܒܹܝܢ ܗ̄ܘܼܵܘ ܕܢܹܐܙܠ̄ܘܼܢ ܡܸܢ ܬܲܡܵܢ ܠܒܹܝܬ݂ܘܿܢܝܼܵܐ. ܘܠܵܐ ܐܲܦܣܲܬ݂ ܠܗܘܿܢ ܪܘܼܚܹܗ ܕܝܼܫܘܿܥ.

⁸ ܘܟܲܕ݂ ܢܦܲܩܘ ܡܸܢ ܡܘܼܣܝܼܵܐ. ܢܚܸܬ݂ܘ ܠܗܘܿܢ ܠܲܛܪܘܿܐܘܿܣ ܐܲܬ݂ܪܵܐ.

⁹ ܘܲܒ݂ܚܸܙܘܵܐ ܕܠܸܠܝܵܐ. ܐܸܬ݂ܚܙܝܼ ܠܦܵܘܠܘܿܣ ܐܲܝܟ݂ ܓܲܒ݂ܪܵܐ ܚܲܕ݂ ܡܵܩܹܕ݂ܘܿܢܵܝܵܐ. ܕܩܵܐܹܡ ܘܒ݂ܵܥܹܐ ܡܸܢܹܗ ܟܲܕ݂ ܐܵܡܲܪ. ܕܬ݂ܵܐ ܠܡܵܩܹܕܿܘܿܢܝܼܵܐ ܘܥܲܕܲܪܲܝܢܝ.

¹⁰ ܟܲܕ݂ ܕܹܝܢ ܚܙܵܐ ܦܵܘܠܘܿܣ ܗܵܢܵܐ ܚܸܙܘܵܐ. ܡܸܚܕ݂ܵܐ ܨܒܲܝܢ ܠܡܸܦܲܩ ܠܡܵܩܹܕܿܘܿܢܝܼܵܐ. ܡܛܠ ܕܐܸܣܬܲܟܲܠܢ ܕܡܵܪܲܢ ܩܪܵܢ ܕܲܢܣܲܒܲܪ ܐܸܢܘܿܢ.

¹¹ ܘܲܪܕ݂ܲܝܢ ܡܸܢ ܛܪܘܿܐܘܿܣ ܘܲܬ݂ܪܲܨܢ ܠܣܵܡܘܼܬ݂ܪܵܩܹܐ. ܘܡܸܢ ܬܲܡܵܢ ܠܝܵܘܡܵܐ ܐ̄ܚܪܹܢܵܐ. ܐܸܬܲܝܢ ܠܢܝܼܐܵܦܘܿܠܝܼܣ ܡܕ݂ܝܼܢ̄ܬܵܐ.

¹² ܘܡܸܢ ܬܲܡܵܢ ܠܦܝܼܠܝܼܦܘܿܣ. ܕܗܝܼ ܗ̄ܝܼ ܪܹܫܵܐ ܕܡܵܩܹܕܿܘܿܢܝܼܵܐ. ܘܐܝܼܬܹܝܗܿ ܩܘܿܠܘܿܢܝܼܵܐ. ܗܘܲܝܢ ܕܹܝܢ ܒܵܗܿ ܒܗܵܕܹܐ ܡܕ݂ܝܼܢ̄ܬܵܐ ܝܵܘ̈ܡܵܬ݂ܵܐ ܝܼܕ݂ܝܼܥܹ̈ܐ.

¹³ ܘܲܢܦܲܩܢ ܒܝܵܘܡܵܐ ܕܫܲܒܿܬ݂ܵܐ ܠܒܲܪ ܡܸܢ ܬܲܪܥܵܐ ܕܲܡܕ݂ܝܼܢ̄ܬܵܐ ܥܲܠ ܝܲܕ݂ ܢܲܗܪܵܐ. ܡܛܠ ܕܬܲܡܵܢ ܡܸܬ݂ܚܙܹܐ ܗ̄ܘܵܐ ܒܹܝܬ݂ ܨܠܘܿܬ݂ܵܐ. ܘܟܲܕ݂ ܝܼܬܸܒ݂ܢ. ܡܡܲܠܠܝܼܢ ܗ̄ܘܲܝܢ ܥܲܡ ܢܸܫܹ̈ܐ ܕܲܟ݂ܢܝܼܫܵܢ ܗ̄ܘܲܝ̈ ܬܲܡܵܢ.

¹⁴ ܘܐܲܢ̄ܬܿܬ݂ܵܐ ܚܕ݂ܵܐ ܡܙܲܒܢܲܬ݂ ܐܲܪܓܘܵܢܵܐ ܕܕ݂ܵܚܠܵܐ ܗ̄ܘܵܬ݂ ܡܸܢ ܐܲܠܵܗܵܐ. ܫܡܵܗܿ ܗܘܵܐ ܠܘܿܕ݂ܝܼܵܐ. ܡܸܢ ܬܹܐܘܿܛܝܼܪܵܐ ܡܕ݂ܝܼܢ̄ܬܵܐ. ܕܗܵܕܹܐ ܦܬܲܚ ܠܸܒܵܗܿ ܡܵܪܲܢ. ܘܫܵܡܥܵܐ ܗ̄ܘܵܬ݂ ܡܸܕܸܡ ܕܐܵܡܲܪ ܦܵܘܠܘܿܣ.

¹⁵ ܘܥܸܡܕܲܬ݂ ܗ̄ܘܵܬ݂ ܗܝܼ ܘܲܒܢܲܝ̈ ܒܲܝܬܵܗܿ. ܘܒ݂ܵܥܝܵܐ ܗ̄ܘܵܬ݂ ܡܸܢܲܢ ܘܐܵܡܪܵܐ. ܕܐܸܢ ܗܘܼ ܕܫܲܪܝܼܪܵܐܝܼܬ݂ ܬܟ݂ܝܼܠܝܼܢ ܐܢ̄ܬܘܿܢ ܕܗܲܝܡܢܹܬ݂ ܒܡܵܪܲܢ. ܬܵܘ ܫܪܵܘ ܠܟ݂ܘܿܢ ܒܒܲܝܬܿܝ. ܘܣܲܓܝܼ ܐܲܠܲܨܬܲܢ.

¹⁶ ܘܲܗܘܵܐ ܕܟܲܕ݂ ܐܵܙܠ̄ܝܼܢܲܢ ܠܒܹܝܬ݂ ܨܠܘܿܬ݂ܵܐ. ܦܸܓ݂ܥܲܬ݂ ܒܲܢ ܥܠܲܝܡܬ݂ܵܐ ܚܕ݂ܵܐ. ܕܐܝܼܬ݂ ܗ̄ܘܵܐ ܠܵܗܿ ܪܘܼܚܵܐ ܕܩܸܨܡܹ̈ܐ. ܘܥܵܒ݂ܕܵܐ ܗ̄ܘܵܬ݂ ܠܡܵܪܹܝܗܿ ܬܸܐܓ݂ܘܼܪܬܵܐ ܣܲܓܝܼܐܬ݂ܵܐ ܒܩܸܨܡܹ̈ܐ ܕܩܵܨܡܵܐ ܗ̄ܘܵܬ݂.

¹⁷ ܘܐܵܬ݂ܝܵܐ ܗ̄ܘܵܬ݂ ܒܵܬܲܪ ܦܵܘܠܘܿܣ ܘܒ݂ܵܬ݂ܪܲܢ. ܘܩܵܥܝܵܐ ܗ̄ܘܵܬ݂ ܘܐܵܡܪܵܐ. ܗܵܠܹܝܢ ܐ̄ܢܵܫܵܐ ܥܲܒ݂ܕܵܘ̈ܗܝ ܐܸܢܘܿܢ ܕܐܲܠܵܗܵܐ ܡܪܲܝܡܵܐ. ܘܲܡܣܲܒܪܝܼܢ ܠܟ݂ܘܿܢ ܐܘܼܪܚܵܐ ܕܚܲܝܹ̈ܐ.

¹⁸ ܘܗܵܟܲܢܵܐ ܥܵܒ݂ܕܵܐ ܗ̄ܘܵܬ݂ ܝܵܘ̈ܡܵܬ݂ܵܐ ܣܲܓܝܼܐܹ̈ܐ. ܘܐܸܬܿܬܿܦܝܼܪ ܦܵܘܠܘܿܣ ܘܐܸܡܲܪ ܠܵܗܿ ܠܪܘܼܚܵܐ ܗܵܝ. ܦܵܩܹܕ݂ ܐ̄ܢܵܐ ܠܹܟ݂ܝ ܒܲܫܡܹܗ ܕܝܼܫܘܿܥ ܡܫܝܼܚܵܐ. ܕܬܸܦܩܝܼܢ ܡܸܢܵܗܿ. ܘܒ݂ܵܗܿ ܒܫܵܥܬ݂ܵܐ ܢܸܦܩܲܬ݂.

¹⁹ ܘܟܲܕ݂ ܚܙܵܘ ܡܵܪܹ̈ܝܗܿ ܕܲܢܦܲܩ ܠܹܗ ܡܸܢܵܗܿ ܣܲܒ݂ܪܵܐ ܕܬܹܐܓ݂ܘܪܬܿܗܘܿܢ. ܐܲܚܕܘܼܗܝ ܠܦܵܘܠܘܿܣ ܘܲܠܫܝܼܠܵܐ. ܘܲܢܓܲܕ݂ܘ ܐܲܝܬܿܝܼܘ ܐܸܢܘܿܢ ܠܫܘܼܩܵܐ.

²⁰ ܘܩܲܪܸܒ݂ܘ ܐܸܢܘܿܢ ܠܐܸܣܛܪ̈ܵܛܹܓܹܐ ܘܲܠܪܹ̈ܫܹܐ ܕܲܡܕ݂ܝܼܢ̄ܬܵܐ. ܘܐܵܡܪܝܼܢ ܗ̄ܘܼܵܘ. ܕܗܵܠܹܝܢ ܐ̄ܢܵܫܵܐ ܡܕ݂ܲܠܚܝܼܢ ܠܵܗܿ ܠܲܡܕ݂ܝܼܢ̄ܬܲܢ. ܡܛܠ ܕܝܗ̄ܘܼܕ݂ܵܝܹ̈ܐ ܐܸܢܘܿܢ.

²¹ ܘܡܲܟ݂ܪܙܝܼܢ ܠܲܢ ܥܝܵܕܹ̈ܐ ܐܲܝܠܹܝܢ ܕܠܵܐ ܡܲܦܲܣ ܠܲܢ ܠܲܡܩܲܒܵܠܘܼ ܘܲܠܡܸܥܒܲܕ݂. ܡܛܠ ܕܪ̈ܗ̄ܘܿܡܵܝܹܐ ܚ̄ܢܲܢ.

²² ܘܟܸܢܫܵܐ ܣܲܓܿܝܼܐܵܐ ܐܸܬ݂ܟܲܢܲܫܘ ܥܠܲܝܗܘܿܢ. ܗܵܝܕܹܝܢ ܐܸܣܛܪ̈ܵܛܹܓܹܐ ܣܲܕܸܩܘ ܢܲܚܬܲܝ̈ܗܘܿܢ. ܘܲܦܩܲܕ݂ܘ ܕܲܢܢܲܓܕ݂ܘܼܢ ܐܸܢܘܿܢ.

²³ ܘܟܲܕ݂ ܢܲܓܸܕ݂ܘ ܐܸܢܘܿܢ ܣܲܓܝܼ. ܐܲܪܡܝܼܘ ܐܸܢܘܿܢ ܒܹܝܬ݂ ܐܲܣܝܼܪܹ̈ܐ. ܘܦܲܩܸܕ݂ܘ ܠܢܵܛܲܪ ܒܹܝܬ݂ ܐܲܣܝܼܪܹ̈ܐ. ܕܢܸܛܲܪ ܐܸܢܘܿܢ ܙܗܝܼܪܵܐܝܼܬ݂.

²⁴ ܗܘܼ ܕܹܝܢ ܟܲܕ݂ ܩܲܒܸܠ ܗܵܢܵܐ ܦܘܼܩܕܵܢܵܐ. ܐܲܥܸܠ ܚܒܲܫ ܐܸܢܘܿܢ ܒܒܲܝܬܵܐ ܓܵܘܵܝܵܐ ܕܒܹܝܬ݂ ܐܲܣܝܼܪܹ̈ܐ. ܘܐܸܣܲܪ ܪܸ̈ܓ݂ܠܲܝܗܘܿܢ ܒܣܲܕܵܐ.

²⁵ ܘܲܒ݂ܦܸܠܓܹܗ ܕܠܸܠܝܵܐ. ܦܵܘܠܘܿܣ ܘܫܝܼܠܵܐ ܡܨܲܠܹܝܢ ܗ̄ܘܼܵܘ ܘܲܡܫܲܒܚܝܼܢ ܗ̄ܘܼܵܘ ܠܐܲܠܵܗܵܐ. ܘܫܵܡܥܝܼܢ ܗ̄ܘܼܵܘ ܠܗܘܿܢ ܐܲܣܝܼܪܹ̈ܐ.

²⁶ ܘܡܸܢ ܫܸܠܝܵܐ ܙܵܘܥܵܐ ܪܲܒܵܐ ܗܘܵܐ. ܘܐܸܬܿܬܿܙܝܼܥ ܫܲܬ݂ܐܣܹ̈ܐ ܕܒܹܝܬ݂ ܐܲܣܝܼܪܹ̈ܐ. ܘܐܸܬ݂ܦܬܲܚܘ ܡܸܚܕ݂ܵܐ ܬܲܪ̈ܥܹܐ ܟܠܗܘܿܢ. ܘܐܲܣܘܼܪ̈ܲܝܗܘܿܢ ܕܟ݂ܠܗܘܿܢ ܐܸܫܬܿܪܝܼܘ.

²⁷ ܘܟܲܕ݂ ܐܸܬܿܬܿܥܝܼܪ ܢܵܛܲܪ ܒܹܝܬ݂ ܐܲܣܝܼܪܹ̈ܐ. ܘܲܚܙܵܐ ܕܲܦܬ݂ܝܼܚܝܼܢ ܬܲܪ̈ܥܹܐ ܕܒܹܝܬ݂ ܐܲܣܝܼܪܹ̈ܐ. ܢܣܲܒ݂ ܣܲܦ̮ܣܹܪܵܐ ܘܲܒ݂ܥܵܐ ܕܢܸܩܛܘܼܠ ܢܲܦ̮ܫܹܗ. ܡܛܠ ܕܣܵܒܲܪ ܗ̄ܘܵܐ ܕܲܥܪܲܩܘ ܠܗܘܿܢ ܐܲܣܝܼܪܹ̈ܐ.

²⁸ ܘܲܩܪܵܝܗܝ ܦܵܘܠܘܿܣ ܒܩܵܠܵܐ ܪܵܡܵܐ ܘܐܸܡܲܪ ܠܹܗ. ܠܵܐ ܬܸܥܒܸܿܕ݂ ܠܢܲܦ̮ܫܵܟ݂ ܡܸܕܸܡ ܕܒ݂ܝܼܫ. ܡܛܠ ܕܟ݂ܠܲܢ ܗܵܪܟܵܐ ܚܢܲܢ.

²⁹ ܘܐܲܢܗܲܪ ܠܹܗ ܫܪܵܓ݂ܵܐ ܘܲܫܘܲܪ ܘܥܲܠ ܟܲܕ݂ ܪܵܐܹܬ݂. ܘܲܢܦܲܠ ܥܲܠ ܪܸ̈ܓ݂ܠܲܝܗܘܿܢ ܕܦܵܘܠܘܿܣ ܘܲܕ݂ܫܝܼܠܵܐ.

³⁰ ܘܐܲܦܸܩ ܐܸܢܘܿܢ ܠܒܲܪ. ܘܐܸܡܲܪ ܗ̄ܘܵܐ ܠܗܘܿܢ. ܡܵܪ̈ܲܝ. ܡܵܢܵܐ ܘܵܠܹܐ ܠܝܼ ܠܡܸܥܒܲܕ݂ ܐܲܝܟ݂ ܕܐܸܚܹܐ.

³¹ ܘܗܸܢܘܿܢ ܐܵܡܪܝܼܢ ܗ̄ܘܼܵܘ ܠܹܗ. ܗܲܝܡܸܢ ܒܡܵܪܲܢ ܝܼܫܘܿܥ ܡܫܝܼܚܵܐ. ܘܬܸܚܹܐ ܐܲܢ̄ܬܿ ܘܒܲܝܬܵܟ݂.

³² ܘܡܲܠܸܠܘ ܥܲܡܹܗ ܡܸܠܬ݂ܵܐ ܕܡܵܪܝܵܐ ܘܥܲܡ ܟܠܗܘܿܢ ܒܢܲܝ̈ ܒܲܝܬܹܿܗ.

³³ ܘܒ݂ܵܗܿ ܒܫܵܥܬ݂ܵܐ ܒܹܗ ܒܠܸܠܝܵܐ. ܕܒܲܪ ܐܲܣܚܝܼ ܐܸܢܘܿܢ ܡܸܢ ܢܸܓ݂ܕܗܘܿܢ. ܘܒܲܪ ܫܵܥܬܹܗ ܥܡܲܕ݂ ܗܘܼ ܘܲܒܢܲܝ̈ ܒܲܝܬܹܿܗ ܟܠܗܘܿܢ.

³⁴ ܘܲܕ݂ܒܲܪ ܐܲܣܸܩ ܐܸܢܘܿܢ ܠܒܲܝܬܹܿܗ. ܘܣܵܡ ܠܗܘܿܢ ܦܵܬ݂ܘܿܪܵܐ. ܘܪܵܘܹܙ ܗ̄ܘܵܐ ܗܘܼ ܘܲܒܢܲܝ̈ ܒܲܝܬܹܿܗ ܒܗܲܝܡܵܢܘܼܬ݂ܵܐ ܕܐܲܠܵܗܵܐ.

³⁵ ܘܟܲܕ݂ ܗܘܵܐ ܨܲܦܪܵܐ. ܫܲܕܲܪܘ ܐܸܣܛܪ̈ܵܛܹܓܹܐ ܠܫܵܩܠܲܝ̈ ܫܲܒ݂̈ܛܹܐ. ܕܢܹܐܡܪܘܼܢ ܠܪܲܒ ܐܲܣܝܼܪܹ̈ܐ. ܫܪܝܼ ܠܗܵܠܹܝܢ ܐ̄ܢܵܫܵܐ.

³⁶ ܘܟܲܕ݂ ܫܡܲܥ ܪܲܒ ܒܹܝܬ݂ ܐܲܣܝܼܪܹ̈ܐ. ܥܲܠ ܐܸܡܲܪ ܠܹܗ ܗܝܼ ܗܵܕܹܐ ܡܸܠܬ݂ܵܐ ܠܦܵܘܠܘܿܣ. ܕܫܲܕܲܪܘ ܐܸܣܛܪ̈ܵܛܹܓܹܐ. ܐܲܝܟ݂ ܕܬܸܫܬܿܪܘܿܢ. ܘܗܵܫܵܐ ܦܘܼܩܘ ܙܸܠܘ ܒܲܫܠܵܡܵܐ.

³⁷ ܐܵܡܲܪ ܠܹܗ ܦܵܘܠܘܿܣ. ܕܠܵܐ ܣܲܟ݂ܠܘܼ ܢܲܓܕ݂ܘܼܢ ܠܥܹܝܢ ܥܵܠܡܵܐ ܟܠܹܗ ܠܐ̄ܢܵܫܵܐ ܪ̈ܗ̄ܘܿܡܵܝܹܐ. ܘܐܲܪܡܝܘܼܢ ܒܹܝܬ݂ ܐܲܣܝܼܪܹ̈ܐ. ܘܗܵܫܵܐ ܡܲܛܫܝܵܐܝܼܬ݂ ܡܲܦܩܝܼܢ ܠܲܢ. ܠܵܐ ܓܹܝܪ. ܐܸܠܵܐ ܗܸܢܘܿܢ ܢܹܐܬ݂ܘܿܢ ܢܲܦܩܘܼܢܵܢ.

³⁸ ܘܐܸܙܲܠܘ ܫܵܩܠܲܝ̈ ܫܲܒ݂̈ܛܹܐ. ܘܐܸܡܲܪܘ ܠܐܸܣܛܪܲܛܓ݂ܐ ܡܸܠܹ̈ܐ ܗܵܠܹܝܢ ܕܐܸܬ݂ܐܡܲܪ ܠܗܘܿܢ. ܘܟܲܕ݂ ܫܡܲܥܘ ܕܪ̈ܗ̄ܘܿܡܵܝܹܐ ܐܸܢܘܿܢ. ܕܚܸܠܘ.

³⁹ ܘܐܸܬ݂ܵܘ ܠܘܵܬ݂ܗܘܿܢ ܘܲܒ݂ܥܵܘ ܡܸܢܗܘܿܢ. ܕܢܸܦܩܘܼܢ ܘܲܢܫܲܢܘܿܢ ܠܗܘܿܢ ܡܸܢ ܡܕ݂ܝܼܢ̄ܬܵܐ.

⁴⁰ ܘܟܲܕ݂ ܢܦܲܩܘ ܡܸܢ ܒܹܝܬ݂ ܐܲܣܝܼܪܹ̈ܐ. ܥܲܠܘ ܠܘܵܬ݂ ܠܘܼܕ݂ܝܼܵܐ. ܘܲܚܙܵܘ ܬܲܡܵܢ ܠܐܲܚܹ̈ܐ ܘܒܲܝܲܐܘ ܐܸܢܘܿܢ. ܘܲܢܦܲܩܘ.

17

¹ ܘܲܥܒܲܪܘ ܥܲܠ ܐܵܡܦܝܼܦܘܿܠܝܼܣ ܘܐܵܦܘܿܠܘܿܢܝܼܵܐ ܡܕ݂ܝܼ̈ܢܵܬ݂ܵܐ. ܘܐܸܬ݂ܵܘ ܠܬܸܣܵܠܘܿܢܝܼܩܹܐ. ܐܲܝܟܵܐ ܕܐܝܼܬ݂ ܗ̄ܘܵܐ ܟܢܘܼܫܬܵܐ ܕܝܗ̄ܘܼܕ݂ܵܝܹ̈ܐ.

² ܘܥܲܠ ܦܵܘܠܘܿܣ ܐܲܝܟܲܢܵܐ ܕܲܡܥܵܕ݂ ܗ̄ܘܵܐ. ܠܘܵܬ݂ܗܘܿܢ. ܘܫܲܒܹ̈ܐ ܬܠܵܬ݂ ܡܲܠܸܠ ܥܲܡܗܘܿܢ ܡܸܢ ܟܬ݂ܵܒܹ̈ܐ.

³ ܟܲܕ݂ ܡܦܲܫܸܩ ܗ̄ܘܵܐ ܘܲܡܚܵܘܹܐ. ܕܲܥܬ݂ܝܼܕ݂ ܗ̄ܘܵܐ ܡܫܝܼܚܵܐ ܕܢܸܚܲܫ ܘܕ݂ܲܢܩܘܼܡ ܡܸܢ ܒܹܝܬ݂ ܡܝܼܬܹ̈ܐ. ܘܗܘܸܝܘܼ ܝܼܫܘܿܥ ܡܫܝܼܚܵܐ ܗܵܢܵܐ ܕܲܡܣܲܒܲܪ ܐ̄ܢܵܐ ܠܟ݂ܘܿܢ.

⁴ ܘܐ̄ܢܵܫܝܼܢ ܡܸܢܗܘܿܢ ܗܲܝܡܸܢܘ ܘܲܢܩܸܦܘ ܠܦܵܘܠܘܿܣ ܘܲܠܫܝܼܠܵܐ. ܘܣܲܓܝܼܐܹ̈ܐ ܡܸܢ ܝܵܘܢܵܝܹ̈ܐ ܐܲܝܠܹܝܢ ܕܕ݂ܵܚܠܝܼܢ ܗ̄ܘܼܵܘ ܡܸܢ ܐܲܠܵܗܵܐ. ܘܐܵܦ ܢܸܫܹ̈ܐ ܝܼܕ݂ܝܼ̈ܥܵܬ݂ܵܐ ܠܵܐ ܙܥܘܿܪ̈ܝܵܢ.

⁵ ܘܲܚܣܲܡܘ ܗ̄ܘܼܵܘ ܝܗ̄ܘܼܕ݂ܵܝܹ̈ܐ ܘܐܲܩܸܦܘ ܠܗܘܿܢ ܐ̄ܢܵܫܵܐ ܒܝܼܫܹ̈ܐ ܡܸܢ ܫܘܼܩܹ̈ܐ̈ ܕܲܡܕ݂ܝܼܢ̄ܬܵܐ. ܘܲܥܒܲܕ݂ܘ ܐܵܟ݂ܠܘܿܣ ܣܲܓܿܝܼܐܵܐ. ܘܕ݂ܲܠܲܚܘ ܗ̄ܘܼܵܘ ܠܲܡܕ݂ܝܼܢ̄ܬܵܐ. ܘܐܸܬ݂ܵܘ ܘܩܵܡܘ ܠܗܘܿܢ ܥܲܠ ܒܲܝܬܹܿܗ ܕܐܝܼܵܣܘܿܢ. ܘܒ݂ܵܥܹܝܢ ܗ̄ܘܼܵܘ. ܕܢܲܦܩܘܼܢ ܐܸܢܘܿܢ ܡܸܢ ܬܲܡܵܢ. ܘܢܲܫܠܡܘܼܢ ܐܸܢܘܿܢ ܠܐܵܟ݂ܠܘܿܣ.

⁶ ܘܟܲܕ݂ ܠܵܐ ܐܸܫܟܲܚܘ ܐܸܢܘܿܢ ܬܲܡܵܢ. ܓܲܪܘܼܗܝ ܗ̄ܘܼܵܘ ܠܐܝܼܵܣܘܿܢ ܘܠܲܐܚܹ̈ܐ ܕܐܝܼܬ݂ ܗ̄ܘܼܵܘ ܬܲܡܵܢ. ܘܐܲܝܬܿܝܼܘ ܐܸܢܘܿܢ ܠܘܵܬ݂ ܪܹ̈ܫܹܐ ܕܲܡܕ݂ܝܼܢ̄ܬܵܐ. ܟܲܕ݂ ܩܵܥܹܝܢ ܗ̄ܘܼܵܘ. ܕܗܵܠܹܝܢ ܐܸܢܘܿܢ ܕܲܠܟ݂ܠܵܗܿ ܐܲܪܥܵܐ ܕܲܠܲܚܘ. ܘܗܵܐ ܬܘܼܒ݂ ܠܗܵܪܟܵܐ ܐܸܬ݂ܵܘ.

⁷ ܘܲܡܩܲܒܠܵܢܗܘܿܢ ܗܵܢܵܘ ܐܝܼܵܣܘܿܢ. ܘܟ݂ܠܗܘܿܢ ܗܵܠܹܝܢ ܠܘܼܩܒܲܠ ܦܘܼܩܕܵܢܵܘ̈ܗܝ ܕܩܹܣܲܪ ܩܵܝܡܝܼܢ. ܟܲܕ݂ ܐܵܡܪܝܼܢ. ܕܐܝܼܬ݂ ܡܲܠܟܵܐ ܐ̄ܚܪܹܢܵܐ ܝܼܫܘܿܥ.

⁸ ܐܸܬܿܕܲܠܲܚܘ ܕܹܝܢ ܪܹ̈ܫܹܐ ܕܲܡܕ݂ܝܼܢ̄ܬܵܐ ܘܟ݂ܠܹܗ ܥܲܡܵܐ. ܟܲܕ݂ ܫܡܲܥܘ ܗܵܠܹܝܢ.

⁹ ܘܲܢܣܲܒ݂ܘ ܥܲܪ̈ܵܒܹܐ ܡܸܢ ܐܝܼܣܵܘܢ ܘܐܵܦ ܡܸܢ ܐܲܚܹ̈ܐ. ܘܗܵܝܕܹܝܢ ܫܪܵܘ ܐܸܢܘܿܢ.

¹⁰ ܐܲܚܹ̈ܐ ܕܹܝܢ ܒܲܪ ܫܵܥܬܹܗ ܒܹܗ ܒܠܸܠܝܵܐ. ܫܪܵܘ ܠܦܵܘܠܘܿܣ ܘܲܠܫܝܼܠܵܐ ܠܒܹܪܘܿܐܵܐ ܡܕ݂ܝܼܢ̄ܬܵܐ. ܘܟܲܕ݂ ܐܸܬ݂ܵܘ ܠܬܲܡܵܢ. ܥܵܐܠܝܼܢ ܗ̄ܘܼܵܘ ܠܲܟ݂ܢܘܼܫܬܵܐ ܕܝܗ̄ܘܼܕ݂ܵܝܹ̈ܐ.

¹¹ ܚܹܐܪܝܼܝܢ (ܚܹܐܪܝܼܢ) ܗ̄ܘܼܵܘ ܓܹܝܪ ܗܵܢܘܿܢ ܝܗ̄ܘܼܕ݂ܵܝܹ̈ܐ ܕܬܲܡܵܢ. ܡܸܢ ܝܗ̄ܘܼܕ݂ܵܝܹ̈ܐ ܗܵܢܘܿܢ ܕܐܝܼܬ݂ ܗ̄ܘܼܵܘ ܒܬܸܣܵܠܘܿܢܝܼܩܹܐ. ܘܫܵܡܥܝܼܢ ܗ̄ܘܼܵܘ ܡܸܢܗܘܿܢ ܡܸܠܬ݂ܵܐ ܟܠܝܘܿܡ ܚܵܕ݂ܝܵܐܝܼܬ݂. ܟܲܕ݂ ܡܦܲܪܫܝܼܢ ܗ̄ܘܼܵܘ ܡܸܢ ܟܬ݂ܵܒܹ̈ܐ. ܕܐܸܢ ܗܵܠܹܝܢ ܗܵܟܲܢܵܐ ܐܝܼܬܲܝܗܹܝܢ.

¹² ܘܣܲܓܝܼܐܹ̈ܐ ܡܸܢܗܘܿܢ ܗܲܝܡܸܢܘ. ܘܗܵܟܲܢܵܐ ܐܵܦ ܡܸܢ ܝܵܘܢܵܝܹ̈ܐ. ܓܲܒ݂ܪܹ̈ܐ ܣܲܓܝܼܐܹ̈ܐ ܘܢܸܫܹ̈ܐ ܝܼܕ݂ܝܼ̈ܥܵܬ݂ܵܐ.

¹³ ܘܟܲܕ݂ ܝܼܕ݂ܲܥܘ ܗܵܢܘܿܢ ܝܗ̄ܘܼܕ݂ܵܝܹ̈ܐ ܕܡܸܢ ܬܸܣܵܠܘܿܢܝܼܩܹܐ: ܕܡܸܠܬܹܗ ܕܐܲܠܵܗܵܐ ܐܸܬ݂ܟܲܪܙܲܬ݂ ܡܸܢ ܦܵܘܠܘܿܣ ܒܒܹܪܘܿܐܵܐ ܡܕ݂ܝܼܢ̄ܬܵܐ. ܐܸܬ݂ܵܘ ܐܵܦ ܠܬܲܡܵܢ. ܘܠܵܐ ܫܠܝܼܘ ܠܲܡܙܵܥܘܿ ܘܠܲܡܕ݂ܲܠܚܘܼ ܠܐ̄ܢܵܫܘܿܬ݂ܵܐ.

¹⁴ ܘܲܠܦܵܘܠܘܿܣ ܫܪܵܐܘܼܗܝ ܐܲܚܹ̈ܐ. ܕܢܸܚܘܼܬ݂ ܠܹܗ ܠܝܲܡܵܐ. ܘܩܵܘܝܼ ܗ̄ܘܵܐ ܒܵܗܿ ܒܲܡܕ݂ܝܼܢ̄ܬܵܐ ܗܵܝ. ܫܝܼܠܵܐ ܘܛܝܼܡܵܬܹܐܘܿܣ.

¹⁵ ܘܗܵܢܘܿܢ ܕܐܸܬ݂ܠܵܘܝܼܘ ܠܹܗ ܠܦܵܘܠܘܿܣ. ܐܸܬ݂ܵܘ ܥܲܡܹܗ ܥܕ݂ܲܡܵܐ ܠܐܵܬܹܢܘܿܣ ܡܕ݂ܝܼܢ̄ܬܵܐ. ܘܟܲܕ݂ ܢܵܦܩܝܼܢ ܡܸܢ ܨܸܐܕ݂ܵܘܗܝ. ܩܲܒܸܠܘ ܡܸܢܹܗ ܐܸܓܲܪܬܵܐ ܠܘܵܬ݂ ܫܝܼܠܵܐ ܘܛܝܼܡܵܬܹܐܘܿܣ. ܕܒܲܥܓܲܠ ܢܹܐܙܠ̄ܘܼܢ ܠܘܵܬܹܗ.

¹⁶ ܗܘܼ ܕܹܝܢ ܦܵܘܠܘܿܣ ܟܲܕ݂ ܡܩܵܘܹܐ ܗ̄ܘܵܐ ܒܐܵܬܹܢܘܿܣ. ܡܸܬ݂ܡܲܪܡܲܪ ܗ̄ܘܵܐ ܒܪܘܼܚܹܗ. ܟܲܕ݂ ܚܵܙܹܐ ܗ̄ܘܵܐ ܕܲܡܕ݂ܝܼܢ̄ܬܵܐ ܟܠܵܗܿ ܡܲܠܝܵܐ ܦܬܲܟ݂ܪܹ̈ܐ.

¹⁷ ܘܲܡܡܲܠܸܠ ܗ̄ܘܵܐ ܒܲܟ݂ܢ̈ܘܼܫܵܬ݂ܵܐ ܥܲܡ ܝܗ̄ܘܼܕ݂ܵܝܹ̈ܐ ܘܥܲܡ ܐܲܝܠܹܝܢ ܕܕ݂ܵܚܠܝܼܢ ܡܸܢ ܐܲܠܵܗܵܐ. ܘܲܒ݂ܫܘܼܩܵܐ ܥܲܡ ܐܲܝܠܹܝܢ ܕܡܸܣܬܲܩܒܠܝܼܢ ܗ̄ܘܼܵܘ ܟܠܝܘܿܡ.

¹⁸ ܘܐܵܦ ܦܝܼܠܵܣܘܿܦܹ̈ܐ ܕܡܸܢ ܝܘܼܠܦܵܢܹܗ ܕܐܲܦܝܼܩܘܿܪܘܿܣ ܘܐܲܚܪ̈ܵܢܹܐ ܕܡܸܬ݂ܩܪܹܝܢ ܐܸܣܛܘܿܐܝܼ̈ܩܘܿ. ܕܵܪܫܿܝܼܢ ܗ̄ܘܼܵܘ ܥܲܡܹܗ. ܘܐ̄ܢܵܫ ܐ̄ܢܵܫ ܡܸܢܗܘܿܢ ܐܵܡܪܝܼܢ ܗ̄ܘܼܵܘ. ܡܵܢܵܐ ܨܵܒܹܐ ܗܵܢܵܐ ܡܠܲܩܸܛ ܡܸܠܹ̈ܐ. ܘܐܲܚܪ̈ܵܢܹܐ ܐܵܡܪܝܼܢ ܗ̄ܘܼܵܘ. ܕܐܲܠܵܗܹ̈ܐ ܢܘܼܟ݂ܪ̈ܵܝܹܐ ܡܲܟ݂ܪܸܙ. ܡܛܠ ܕܲܠܝܼܫܘܿܥ ܘܠܲܩܝܵܡܬܹܿܗ ܡܲܟ݂ܪܸܙ ܗ̄ܘܵܐ ܠܗܘܿܢ.

¹⁹ ܘܐܲܚܕܘܼܗܝ ܘܐܲܝܬܿܝܘܼܗܝ ܠܒܹܝܬ݂ ܕܝܼܢܵܐ ܕܡܸܬ݂ܩܪܹܐ ܐܵܪܝܼܘܿܣ ܦܵܓ݂ܘܿܣ. ܟܲܕ݂ ܐܵܡܪܝܼܢ ܠܹܗ. ܡܸܫܟܿܚܝܼܢܲܢ ܠܡܸܕ݂ܥ ܡܵܢܵܘ ܗܵܢܵܐ ܝܘܼܠܦܵܢܵܐ ܚܲܕ݂ܬ݂ܵܐ ܕܡܲܟ݂ܪܸܙ ܐܲܢ̄ܬܿ.

²⁰ ܡܸܠܹ̈ܐ ܓܹܝܪ ܢܘܼܟ݂ܪ̈ܵܝܵܬ݂ܵܐ ܙܵܪܲܥ ܐܲܢ̄ܬܿ ܒܡܲܫܡܲܥܬܲܢ. ܘܨܵܒܹܝܢܲܢ ܠܡܸܕ݂ܥ ܡܵܢܵܐ ܐܸܢܹܝܢ ܗܵܠܹܝܢ.

²¹ ܐܵܬܹܢܵܝܹ̈ܐ ܕܹܝܢ ܟܠܗܘܿܢ ܘܐܲܝܠܹܝܢ ܕܐܵܬܹܝܢ ܠܬܲܡܵܢ ܢܘܼܟ݂ܪ̈ܵܝܹܐ. ܥܲܠ ܡܸܕܸܡ ܐ̄ܚܪܹܝܢ ܠܵܐ ܒܛܝܼܠ ܠܗܘܿܢ. ܐܸܠܵܐ ܠܡܹܐܡܲܪ ܘܲܠܡܸܫܡܲܥ ܡܸܕܸܡ ܚܕܸܬ݂.

²² ܘܟܲܕ݂ ܩܵܡ ܦܵܘܠܘܿܣ ܒܐܵܪܝܼܘܿܣ ܦܵܓ݂ܘܿܣ. ܐܸܡܲܪ. ܓܲܒ݂ܪܹ̈ܐ ܐܵܬܹܢܵܝܹ̈ܐ. ܚܵܙܹܐ ܐ̄ܢܵܐ ܠܟ݂ܘܿܢ. ܕܲܒ݂ܟܠܗܹܝܢ ܝܲܬܝܼܪܝܼܢ ܐܢ̄ܬܘܿܢ ܒܕܸܚܠܲܬ݂ ܫܹܐܕܹ̈ܐ.

²³ ܟܲܕ݂ ܓܹܝܪ ܡܸܬ݂ܟܪܸܟ݂ ܗ̄ܘܹܝܬ݂ ܘܚܵܙܹܐ ܗ̄ܘܹܝܬ݂ ܒܹܝܬ݂ ܕܸܚܠܵܬ݂ܟ݂ܘܿܢ. ܐܸܫܟܚܹܬ݂ ܥܠܵܬ݂ܵܐ ܚܕ݂ܵܐ. ܕܲܟܬ݂ܝܼܒ݂ ܗ̄ܘܵܐ ܥܠܹܝܗܿ. ܕܐܲܠܵܗܵܐ ܓܢܝܼܙܵܐ. ܗܵܘ ܗܵܟܹܝܠ ܕܟܲܕ݂ ܠܵܐ ܝܵܕ݂ܥܝܼܢ ܐܢ̄ܬܘܿܢ ܕܵܚܠܝܼܢ ܐܢ̄ܬܘܿܢ ܠܹܗ. ܠܹܗ ܠܗܵܢܵܐ ܐܸܢܵܐ ܡܣܲܒܲܪ ܐ̄ܢܵܐ ܠܟ݂ܘܿܢ.

²⁴ ܐܲܠܵܗܵܐ ܓܹܝܪ ܕܲܥܒܲܕ݂ ܥܵܠܡܵܐ ܘܟ݂ܠ ܡܵܐ ܕܐܝܼܬ݂ ܒܹܗ: ܘܗܘܸܝܘܼ ܡܵܪܵܐ ܕܲܫܡܲܝܵܐ ܘܕ݂ܲܐܪܥܵܐ. ܒܗܲܝܟ̈ܠܹܐ ܕܲܥܒ݂ܵܕ݂ ܐܝܼ̈ܕ݂ܲܝܵܐ. ܠܵܐ ܫܵܪܹܐ.

²⁵ ܘܠܵܐ ܡܸܫܬܲܡܲܫ ܡܸܢ ܐܝܼܕ݂ܲܝ̈ ܒܢܲܝ̈ܢܵܫܵܐ. ܘܥܲܠ ܡܸܕܸܡ ܠܵܐ ܣܢܝܼܩ. ܡܛܠ ܕܗܘܼ ܝܲܗ̄ܒ݂ ܠܟ݂ܠܢܵܫ ܚܲܝܹ̈ܐ ܘܢܲܦ̮ܫܵܐ.

²⁶ ܘܡܸܢ ܚܲܕ݂ ܕܸܡ ܥܒܲܕ݂ ܥܵܠܡܵܐ ܟܠܹܗ ܕܲܒ݂ܢܲܝ̈ܢܵܫܵܐ. ܕܢܸܗܘܘܿܢ ܥܵܡܪܝܼܢ ܥܲܠ ܐܲܦܲܝ̈ ܐܲܪܥܵܐ ܟܠܵܗܿ. ܘܦܲܪܸܫ ܙܲܒ݂ܢܹ̈ܐ ܒܦܘܼܩܕܵܢܹܗ. ܘܣܵܡ ܬܚܘܼܡܹ̈ܐ ܕܥܘܼܡܪܵܐ ܕܲܒ݂ܢܲܝ̈ܢܵܫܵܐ.

²⁷ ܕܢܸܗܘܘܿܢ ܒܵܥܹܝܢ ܠܐܲܠܵܗܵܐ ܘܲܡܥܲܩܒ݂ܝܼܢ. ܘܡܸܢ ܒܸܪ̈ܝܵܬܹܗ ܡܸܫܟܿܚܝܼܢ ܠܹܗ. ܡܛܠ ܕܐܵܦ ܠܵܐ ܗ̄ܘܵܐ ܪܲܚܝܼܩ ܡܸܢ ܟܠ ܡܸܢܢ.

²⁸ ܒܹܗ ܗܘܼ ܓܹܝܪ ܚܲܝܼܝܢܲܢ ܘܡܸܬܿܬܿܙܝܼܥܝܼܢܲܢ ܘܐܝܼܬܲܝܢ. ܐܲܝܟ݂ ܕܐܵܦ ܐ̄ܢܵܫܵܐ ܡܸܢ ܚܲܟܝܼܡܹ̈ܐ ܕܲܠܘܵܬ݂ܟ݂ܘܿܢ ܐܸܡܲܪܘ. ܕܡܸܢܹܗ ܗܘܼ ܛܘܼܗܡܲܢ.

²⁹ ܐ̄ܢܵܫܵܐ ܗܵܟܹܝܠ ܕܛܘܼܗܡܲܢ ܡܸܢ ܐܲܠܵܗܵܐ ܗ̄ܘܼ. ܠܵܐ ܚܲܝܵܒ݂ܝܼܢܲܢ ܠܡܸܣܒܲܪ. ܕܲܠܕ݂ܲܗܒ݂ܵܐ. ܐܵܘ ܠܣܹܐܡܵܐ. ܐܵܘ ܠܟܹܐܦܵܐ ܕܲܓ݂ܠܝܼܦܵܐ ܒܐܘܼܡܵܢܘܼܬ݂ܵܐ ܘܒ݂ܝܼܕ݂ܲܥܬ݂ܵܐ ܕܒܲܪܢܵܫܵܐ. ܕܵܡܝܵܐ ܐܲܠܵܗܘܼܬ݂ܵܐ.

³⁰ ܙܲܒ݂ܢܹ̈ܐ ܓܹܝܪ ܕܛܵܥܝܘܼܬ݂ܵܐ ܐܲܥܒܲܪ ܐܲܠܵܗܵܐ. ܘܲܒ݂ܙܲܒ݂ܢܵܐ ܗܵܢܵܐ ܡܦܲܩܸܕ݂ ܠܟ݂ܠܗܘܿܢ ܒܢܲܝ̈ܢܵܫܵܐ. ܕܟܠ ܐ̄ܢܵܫ ܒܟ݂ܠ ܕܘܼܟܵܐ ܢܬ݂ܘܼܒ݂.

³¹ ܡܛܠ ܕܐܲܩܝܼܡ ܝܵܘܡܵܐ ܕܒܹܗ ܥܬ݂ܝܼܕ݂ ܕܲܢܕ݂ܘܼܢ ܐܲܪܥܵܐ ܟܠܵܗܿ ܒܟܹܐܢܘܼܬ݂ܵܐ. ܒܝܲܕ݂ ܓܲܒ݂ܪܵܐ ܐܲܝܢܵܐ ܕܲܦܪܲܫ. ܘܐܲܦܢܝܼ ܠܟ݂ܠ ܐ̄ܢܵܫ ܠܗܲܝܡܵܢܘܼܬܹܗ ܒܕ݂ܲܐܩܝܼܡܹܗ ܡܸܢ ܒܹܝܬ݂ ܡܝܼܬܹ̈ܐ.

³² ܘܟܲܕ݂ ܫܡܲܥܘ ܩܝܵܡܬܵܐ ܕܡܸܢ ܒܹܝܬ݂ ܡܝܼܬܹ̈ܐ. ܡܸܢܗܘܿܢ ܡܡܲܝܩܝܼܢ ܗ̄ܘܼܵܘ. ܘܡܸܢܗܘܿܢ ܐܵܡܪܝܼܢ ܗ̄ܘܼܵܘ. ܒܲܙܒܲܢ ܐ̄ܚܪܹܝܢ ܫܵܡܥܝܼܢܲܢ ܠܵܟ݂ ܥܲܠ ܗܵܕܹܐ.

³³ ܘܗܵܟܲܢܵܐ ܢܦܲܩ ܦܵܘܠܘܿܣ ܡܸܢ ܒܲܝܢܵܬ݂ܗܘܿܢ.

³⁴ ܘܐ̄ܢܵܫܝܼܢ ܡܸܢܗܘܿܢ ܢܲܩܦܘܼܗܝ ܘܗܲܝܡܸܢܘ. ܚܲܕ݂ ܕܹܝܢ ܡܸܢܗܘܿܢ ܐܝܼܬ݂ܵܘܗܝ ܗ̄ܘܵܐ ܕܝܵܢܹܘܣܝܼܘܿܣ. ܡܸܢ ܕܲܝܵܢܹ̈ܐ ܕܐܵܪܝܼܘܿܣ ܦܵܓ݂ܘܿܣ. ܘܐܲܢ̄ܬܿܬ݂ܵܐ ܚܕ݂ܵܐ ܕܲܫܡܵܗܿ ܗܘܵܐ ܕܵܡܵܪܝܼܣ. ܘܐܲܚܪ̈ܵܢܹܐ ܥܲܡܗܘܿܢ.

18

¹ ܘܟܲܕ݂ ܢܦܲܩ ܦܵܘܠܘܿܣ ܡܸܢ ܐܵܬܹܢܘܿܣ. ܐܸܬ݂ܵܐ ܠܹܗ ܠܩܘܼܪܲܢܬܘܿܣ.

² ܘܐܸܫܟܲܚ ܬܲܡܵܢ ܓܲܒ݂ܪܵܐ ܚܲܕ݂ ܝܼܗܘܼܕ݂ܵܝܵܐ. ܕܲܫܡܹܗ ܗܘܵܐ ܐܵܩܸܠܘܿܣ. ܕܐܝܼܬ݂ܵܘܗܝ ܗ̄ܘܵܐ ܡܸܢ ܦܘܿܢܛܘܿܣ ܐܲܬ݂ܪܵܐ. ܕܒܹܗ ܒܗܵܘ ܙܲܒ݂ܢܵܐ ܐܸܬ݂ܵܐ ܗ̄ܘܵܐ ܡܸܢ ܐܲܬ݂ܪܵܐ ܕܐܝܼܛܵܠܝܼܵܐ. ܗ̄ܘܼ ܘܲܦܪܝܼܣܩܸܠܵܐ ܐܲܢ̄ܬܿܬܹܗ. ܡܛܠ ܕܲܦܩܲܕ݂ ܗ̄ܘܵܐ ܩܠܵܘܕ݂ܝܼܘܿܣ ܩܹܣܲܪ. ܕܢܸܦܩܘܼܢ ܟܠܗܘܿܢ ܝܗ̄ܘܼܕ݂ܵܝܹ̈ܐ ܡܸܢ ܪܗ̄ܘܿܡܹܐ. ܘܐܸܬ݂ܩܲܪܲܒ݂ ܠܘܵܬ݂ܗܘܿܢ.

³ ܘܡܛܠ ܕܒܲܪ ܐܘܼܡܵܢܘܼܬ݂ܗܘܿܢ ܗ̄ܘܵܐ. ܫܪܵܐ ܠܹܗ ܠܘܵܬ݂ܗܘܿܢ. ܘܦܵܠܲܚ ܗ̄ܘܵܐ ܥܲܡܗܘܿܢ ܒܐܘܼܡܵܢܘܼܬ݂ܗܘܿܢ ܕܹܝܢ ܠܵܘܠܵܪܹ̈ܐ ܗܘܵܘ.

⁴ ܘܲܡܡܲܠܸܠ ܗ̄ܘܵܐ ܒܲܟ݂ܢ̈ܘܼܫܵܬ݂ܵܐ ܒܟ݂ܠ ܫܲܒܵܐ. ܘܲܡܦܝܼܣ ܗ̄ܘܵܐ ܠܝܗ̄ܘܼܕ݂ܵܝܹ̈ܐ ܘܲܠܚܲܢܦܹ̈ܐ.

⁵ ܘܟܲܕ݂ ܐܸܬ݂ܵܘ ܗ̄ܘܼܵܘ ܡܸܢ ܡܵܩܹܕܘܿܢܝܼܵܐ ܫܝܼܠܵܐ ܘܛܝܼܡܵܬܹܐܘܿܣ. ܐܲܠܝܼܨ ܗ̄ܘܵܐ ܒܡܸܠܬ݂ܵܐ ܗ̄ܘܼ ܦܵܘܠܘܿܣ. ܡܛܠ ܕܩܵܝܡܝܼܢ ܗ̄ܘܼܵܘ ܠܩܘܼܒ݂ܠܹܗ ܝܗ̄ܘܼܕ݂ܵܝܹ̈ܐ ܘܲܡܓܲܕܦܝܼܢ ܗ̄ܘܼܵܘ. ܟܲܕ݂ ܡܣܲܗܸܕ݂ ܗ̄ܘܵܐ ܠܗܘܿܢ ܕܝܼܫܘܿܥ ܗܘܸܝܘܼ ܡܫܝܼܚܵܐ.

⁶ ܘܲܢܦܲܨ ܡܵܐܢܵܘ̈ܗܝ ܘܐܸܡܲܪ ܠܗܘܿܢ. ܡܸܢ ܗܵܫܵܐ ܐܸܢܵܐ ܕܟܹܐ ܐ̄ܢܵܐ. ܐܵܙܹܠ ܐ̄ܢܵܐ ܠܝܼ ܠܘܵܬ݂ ܥܲܡ̈ܡܹܐ.

⁷ ܘܲܢܦܲܩ ܡܸܢ ܬܲܡܵܢ ܘܥܲܠ ܠܒܲܝܬܹܿܗ ܕܓܲܒ݂ܪܵܐ ܕܲܫܡܹܗ ܛܸܛܘܿܣ. ܐܲܝܢܵܐ ܕܕ݂ܵܚܹܠ ܗ̄ܘܵܐ ܡܸܢ ܐܲܠܵܗܵܐ. ܘܒܲܝܬܹܿܗ ܢܲܩܝܼܦ ܗ̄ܘܵܐ ܠܲܟ݂ܢܘܼܫܬܵܐ.

⁸ ܘܲܟܪܝܼܣܦܘܿܣ (ܘܲܩܪܝܼܣܦܘܿܣ) ܪܲܒ ܟܢܘܼܫܬܵܐ ܗܲܝܡܸܢ ܗ̄ܘܵܐ ܒܡܵܪܲܢ. ܗܘܼ ܘܲܒ݂ܢܲܝ̈ ܒܲܝܬܹܿܗ ܟܠܗܘܿܢ. ܘܣܲܓܝܼܐܹ̈ܐ ܩܘܿܪ̈ܲܢܬ݂ܵܝܹܐ ܫܵܡܥܝܼܢ ܗ̄ܘܼܵܘ ܘܲܡܗܲܝܡܢܝܼܢ ܒܐܲܠܵܗܵܐ ܘܥܵܡܕܝܼܢ.

⁹ ܘܐܸܡܲܪ ܡܵܪܝܵܐ ܒܚܸܙܘܵܐ ܠܦܵܘܠܘܿܣ. ܠܵܐ ܬܸܕ݂ܚܲܠ. ܐܸܠܵܐ ܡܲܠܸܠ ܘܠܵܐ ܬܸܫܬܿܘܿܩ.

¹⁰ ܡܛܠ ܕܐܸܢܵܐ ܥܲܡܵܟ݂ ܐ̄ܢܵܐ. ܘܐ̄ܢܵܫ ܠܵܐ ܡܸܫܟܲܚ ܠܡܲܗܵܪܘܼܬ݂ܵܟ݂. ܘܥܲܡܵܐ ܣܲܓܿܝܼܐܵܐ ܐܝܼܬ݂ ܠܝܼ ܒܲܡܕ݂ܝܼܢ̄ܬܵܐ ܗܵܕܹܐ.

¹¹ ܝܼܬܸܒ݂ ܗ̄ܘܵܐ ܕܹܝܢ ܫܲܢ̄ܬܵܐ ܚܕ݂ܵܐ ܘܝܲܪ̈ܚܹܐ ܫܬܵܐ ܒܩܘܿܪܲܢܬܿܘܿܣ. ܘܡܲܠܸܦ ܗ̄ܘܵܐ ܠܗܘܿܢ ܡܸܠܬ݂ܵܐ ܕܐܲܠܵܗܵܐ.

¹² ܘܟܲܕ݂ ܐܝܼܬ݂ܵܘܗܝ ܗ̄ܘܵܐ ܓܵܐܠܝܼܘܿܢ ܐܵܢܬܹܘܦܵܛܘܿܣ ܕܐܵܟ݂ܵܐܝܼܵܐ. ܐܸܬ݂ܟܲܢܲܫܘ ܐܲܟ݂ܚܕ݂ܵܐ ܝܗ̄ܘܼܕ݂ܵܝܹ̈ܐ ܥܲܠ ܦܵܘܠܘܿܣ. ܘܐܲܝܬܿܝܘܼܗܝ ܩܕ݂ܵܡ ܒܹܝܡ

¹³ ܟܲܕ݂ ܐܵܡܪܝܼܢ. ܕܗܵܢܵܐ ܠܒܲܪ ܡܸܢ ܢܵܡܘܿܣܵܐ ܡܦܝܼܣ ܠܲܒܢܲܝ̈ܢܵܫܵܐ. ܕܢܸܗܘܘܿܢ ܕܵܚܠܝܼܢ ܠܐܲܠܵܗܵܐ.

¹⁴ ܘܟܲܕ݂ ܒܵܥܹܐ ܗ̄ܘܵܐ ܦܵܘܠܘܿܣ ܕܢܸܦ̮ܬܲܚ ܦܘܼܡܹܗ ܘܲܢܡܲܠܸܠ. ܐܸܡܲܪ ܓܵܐܠܝܼܘܿܢ ܠܝܗ̄ܘܼܕ݂ܵܝܹ̈ܐ. ܐܸܠܘܼ ܥܲܠ ܡܸܕܸܡ ܕܒ݂ܝܼܫ ܐܵܘ ܕܲܢܟ݂ܝܼܠ ܐܵܘ ܕܲܣܢܹܐ ܡܩܲܛܪܓ݂ܝܼܢ ܗ̄ܘܲܝܬܿܘܢ. ܐܵܘ ܝܗܘܼܕ݂ܵܝܹ̈ܐ܅ ܒܘܵܠܝܼܬ݂ܵܐ ܡܩܲܒܸܠ ܗ̄ܘܹܝܬ݂ ܠܟ݂ܘܿܢ.

¹⁵ ܐܸܢ ܕܹܝܢ ܙܹܐܛܹܡܹ̈ܐ ܐܸܢܘܿܢ ܥܲܠ ܡܸܠܬ݂ܵܐ ܘܥܲܠ ܫܡܵܗܹ̈ܐ ܘܥܲܠ ܢܵܡܘܿܣܵܐ ܕܝܼܠܟ݂ܘܿܢ. ܐܲܢ̄ܬܿܘܿܢ ܝܵܕ݂ܥܝܼܢ ܐܢ̄ܬܘܿܢ ܒܲܝܢܵܬ݂ܟ݂ܘܿܢ. ܐܸܢܵܐ ܓܹܝܪ ܠܵܐ ܨܵܒܹܐ ܐ̄ܢܵܐ. ܕܐܸܗܘܹܐ ܕܲܝܵܢܵܐ ܕܗܵܠܹܝܢ ܨܸܒ݂ܘܵܬ݂ܵܐ.

¹⁶ ܘܲܛܪܲܕ݂ ܐܸܢܘܿܢ ܡܸܢ ܒܹܝܡ ܕܝܼܠܹܗ.

¹⁷ ܘܐܸܚܲܕ݂ܘ ܗ̄ܘܼܵܘ ܟܠܗܘܿܢ ܚܲܢܦܹ̈ܐ. ܠܣܘܼܣܬܹܿܢܝܼܣ ܩܲܫܝܼܫܵܐ ܕܲܟܢܘܼܫܬܵܐ. ܘܡܵܚܹܝܢ ܗ̄ܘܼܵܘ ܠܹܗ ܩܕ݂ܵܡ ܒܹܝܡ. ܘܓܵܐܠܝܼܘܿܢ ܡܲܗܡܹܐ ܗ̄ܘܵܐ ܒܗܵܠܹܝܢ.

¹⁸ ܘܟܲܕ݂ ܗܘܵܐ ܦܵܘܠܘܿܣ ܬܲܡܵܢ ܝܵܘ̈ܡܵܬ݂ܵܐ ܣܲܓܝܼܐܹ̈ܐ. ܝܲܗ̄ܒ݂ ܫܠܵܡܵܐ ܠܐܲܚܹ̈ܐ. ܘܲܪܕ݂ܵܐ ܒܝܲܡܵܐ ܕܢܹܐܙܲܠ ܠܣܘܼܪܝܼܵܐ. ܘܐܸܬ݂ܵܘ ܥܲܡܹܗ ܦܪܝܼܣܩܸܠܵܐ ܘܐܵܩܸܠܘܿܣ. ܟܲܕ݂ ܣܲܦܲܪ ܪܹܫܹܗ ܒܩܲܢܟܿܪܹܐܘܿܣ. ܡܛܠ ܕܢܸܕ݂ܪܵܐ ܢܕ݂ܝܼܪ ܗ̄ܘܵܐ ܠܹܗ.

¹⁹ ܘܡܲܛܝܼܘ ܠܐܲܦܸܣܘܿܣ. ܘܥܲܠ ܦܵܘܠܘܿܣ ܠܲܟ݂ܢܘܼܫܬܵܐ. ܘܲܡܡܲܠܸܠ ܗ̄ܘܵܐ ܥܲܡ ܝܗ̄ܘܼܕ݂ܵܝܹ̈ܐ.

²⁰ ܘܒ݂ܵܥܹܝܢ ܗ̄ܘܼܵܘ ܡܸܢܹܗ. ܕܢܲܓܲܪ ܠܘܵܬ݂ܗܘܿܢ. ܘܠܵܐ ܐܸܬܿܛܦܝܼܣ

²¹ ܟܲܕ݂ ܐܵܡܲܪ. ܕܘܵܠܹܐ ܠܝܼ ܐܲܡܝܼܢܵܐܝܼܬ݂. ܕܥܹܐܕ݂ܵܐ ܕܐܵܬܹܐ ܒܐܘܿܪܸܫܠܸܡ ܐܸܥܒܕ݂ܝܼܘܗܝ. ܘܐܸܢ ܐܲܠܵܗܵܐ ܢܸܨܒܹܐ. ܐܸܦܢܹܐ ܬܘܼܒ݂ ܠܘܵܬ݂ܟ݂ܘܿܢ. ܘܠܵܐܩܸܠܘܿܣ ܘܠܲܦܪܝܼܣܩܸܠܵܐ. ܫܒܲܩ ܐܸܢܘܿܢ ܒܐܲܦܸܣܘܿܣ.

²² ܘܗܘܼ ܪܕ݂ܵܐ ܒܝܲܡܵܐ ܘܐܸܬ݂ܵܐ ܠܩܹܣܲܪܝܵܐ. ܘܲܣܠܸܩ ܘܲܫܐܸܠ ܒܲܫܠܵܡܵܐ ܕܲܒ݂ܢܲܝ̈ ܥܹܕܬܵܐ. ܘܐܸܙܲܠ ܠܹܗ ܠܐܲܢܛܝܘܿܟ݂ܝ.

²³ ܘܟܲܕ݂ ܗܘܵܐ ܬܲܡܵܢ ܝܵܘ̈ܡܵܬ݂ܵܐ ܝܼܕ݂ܝܼܥܹ̈ܐ. ܢܦܲܩ ܘܐܸܬ݂ܟܪܸܟ݂ ܒܵܬܲܪ ܒܵܬܲܪ. ܒܐܲܬ݂ܪܵܐ ܕܓ݂ܵܠܵܛܝܼܵܐ ܘܕ݂ܲܦܪܘܿܓ݂ܝܼܵܐ. ܟܲܕ݂ ܡܩܲܝܸܡ ܗ̄ܘܵܐ ܠܟ݂ܠܗܘܿܢ ܬܲܠܡܝܼܕܹ̈ܐ.

²⁴ ܘܓܲܒ݂ܪܵܐ ܚܲܕ݂ ܕܲܫܡܹܗ ܗ̄ܘܵܐ ܐܵܦܲܠܘܿ ܝܼܗܘܼܕ݂ܵܝܵܐ. ܕܐܝܼܬ݂ܵܘܗܝ ܗ̄ܘܵܐ ܛܘܼܗܡܹܗ ܡܸܢ ܐܵܠܸܟ݂ܣܲܢܕܪܝܼܵܐ. ܘܲܪܕܹܐ ܗ̄ܘܵܐ ܒܡܸܠܬ݂ܵܐ ܘܲܡܕ݂ܵܩ ܗ̄ܘܵܐ ܒܲܟܬ݂ܵܒܹ̈ܐ. ܐܸܬ݂ܵܐ ܠܐܲܦܸܣܘܿܣ.

²⁵ ܗܵܢܵܐ ܡܬܲܠܡܲܕ݂ ܗ̄ܘܵܐ ܠܐܼܘܪܚܹܗ ܕܡܵܪܝܵܐ. ܘܪܵܬܲܚ ܗ̄ܘܵܐ ܒܪܘܼܚ. ܘܲܡܡܲܠܸܠ ܗ̄ܘܵܐ ܘܡܲܠܸܦ ܡܲܠܝܵܐܝܼܬ݂ ܥܲܠ ܝܼܫܘܿܥ. ܟܲܕ݂ ܡܸܕܸܡ ܠܵܐ ܝܵܕ݂ܲܥ ܗ̄ܘܵܐ. ܐܸܠܵܐ ܐܸܢ ܡܲܥܡܘܿܕ݂ܝܼܬ݂ܵܐ ܕܝܘܿܚܲܢܵܢ.

²⁶ ܘܫܲܪܝܼ ܥܹܝܢ ܒܲܓ݂ܠܹܐ ܡܡܲܠܸܠ ܒܲܟ݂ܢ̈ܘܼܫܵܬ݂ܵܐ. ܘܟܲܕ݂ ܫܲܡܥܘܼܗܝ ܐܵܩܸܠܘܿܣ ܘܲܦܪܝܼܣܩܸܠܵܐ. ܐܲܝܬܿܝܘܼܗܝ ܠܒܲܝܬܿܗܘܿܢ. ܘܡܲܠܝܵܐܝܼܬ݂ ܚܵܘܝܼܘܗܝ ܐܘܼܪܚܹܗ ܕܡܵܪܝܵܐ.

²⁷ ܘܟܲܕ݂ ܨܒ݂ܵܐ ܕܢܹܐܙܲܠ ܠܐܵܟ݂ܵܐܝܼܵܐ. ܚܲܦܛܘܼܗܝ ܐܲܚܹ̈ܐ. ܘܲܟ݂ܬܲܒ݂ܘ ܠܬܲܠܡܝܼܕܹ̈ܐ ܕܲܢܩܲܒܠܘܼܢܵܝܗܝ. ܘܟܲܕ݂ ܐܸܙܲܠ. ܥܲܕܲܪ ܣܲܓܝܼ ܒܝܲܕ݂ ܛܲܝܒܘܼܬ݂ܵܐ ܠܟ݂ܠܗܘܿܢ ܡܗܲܝܡܢܹ̈ܐ.

²⁸ ܬܲܩܝܼܦܵܐܝܼܬ݂ ܓܹܝܪ ܕܵܪܹܫ ܗ̄ܘܵܐ ܠܘܼܩܒܲܠ ܝܗ̄ܘܼܕ݂ܵܝܹ̈ܐ ܩܕ݂ܵܡ ܟܸܢܫܹ̈ܐ. ܟܲܕ݂ ܡܚܵܘܹܐ ܗ̄ܘܵܐ ܡܸܢ ܟܬ݂ܵܒܹ̈ܐ ܥܲܠ ܝܼܫܘܿܥ ܕܲܡܫܝܼܚܵܐ ܗ̄ܘܼ.

19

¹ ܘܟܲܕ݂ ܐܝܼܬ݂ܵܘܗܝ ܗ̄ܘܵܐ ܐܵܦܲܠܘܿ ܒܩܘܿܪܲܢܬܿܘܿܣ. ܐܸܬ݂ܟܪܸܟ݂ ܦܵܘܠܘܿܣ ܒܐܲܬ݂ܪ̈ܵܘܵܬ݂ܵܐ ܥܸܠܵܝܹ̈ܐ ܘܐܸܬ݂ܵܐ ܠܐܲܦܸܣܘܿܣ. ܘܲܡܫܲܐܸܠ ܗ̄ܘܵܐ ܠܬܲܠܡܝܼܕܹ̈ܐ ܐܲܝܠܹܝܢ ܕܐܸܫܟܲܚ ܬܲܡܵܢ.

² ܕܐܸܢ ܩܲܒܸܠܬܿܘܢ ܪܘܼܚܵܐ ܕܩܘܼܕ݂ܫܵܐ ܡܸܢ ܕܗܲܝܡܸܢܬܿܘܢ. ܥܢܵܘ ܘܐܵܡܪܝܼܢ ܠܹܗ. ܘܐܵܦܠܵܐ ܐܸܢ ܐܝܼܬ݂ ܪܘܼܚܵܐ ܕܩܘܼܕ݂ܫܵܐ ܫܡܝܼܥ ܠܲܢ.

³ ܐܵܡܲܪ ܠܗܘܿܢ. ܘܲܒ݂ܡܵܢܵܐ ܥܡܲܕܬܿܘܢ. ܐܵܡܪܝܼܢ. ܒܡܲܥܡܘܿܕ݂ܝܼܬܹܗ ܕܝܘܿܚܲܢܵܢ.

⁴ ܐܵܡܲܪ ܠܗܘܿܢ ܦܵܘܠܘܿܣ. ܝܘܿܚܲܢܵܢ ܐܲܥܡܸܕ݂ ܡܲܥܡܘܿܕ݂ܝܼܬ݂ܵܐ ܕܲܬ݂ܝܵܒ݂ܘܼܬ݂ܵܐ ܠܥܲܡܵܐ. ܟܲܕ݂ ܐܵܡܲܪ ܗ̄ܘܵܐ. ܕܲܢܗܲܝܡܢܘܼܢ ܒܐܲܝܢܵܐ ܕܐܵܬܹܐ ܒܵܬ݂ܪܹܗ. ܕܐܝܼܬ݂ܵܘܗܝ ܝܼܫܘܿܥ ܡܫܝܼܚܵܐ.

⁵ ܘܟܲܕ݂ ܗܵܠܹܝܢ ܫܡܲܥܘ. ܥܡܲܕ݂ܘ ܒܲܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ.

⁶ ܘܣܵܡ ܥܠܲܝܗܘܿܢ ܐܝܼܕ݂ܵܐ ܦܵܘܠܘܿܣ. ܘܐܸܬ݂ܵܐ ܪܘܼܚܵܐ ܕܩܘܼܕ݂ܫܵܐ ܥܠܲܝܗܘܿܢ. ܘܲܡܡܲܠܠܝܼܢ ܗ̄ܘܼܵܘ ܒܠܸܫܵܢ ܠܸܫܵܢ. ܘܡܸܬ݂ܢܲܒܹܝܢ ܗ̄ܘܼܵܘ.

⁷ ܗܵܘܶܝܢ ܗ̄ܘܼܵܘ ܕܹܝܢ ܟܠܗܘܿܢ ܐ̄ܢܵܫܵܐ ܬܪܸܥܣܲܪ.

⁸ ܘܥܲܠ ܗ̄ܘܵܐ ܦܵܘܠܘܿܣ ܠܲܟ݂ܢܘܼܫܬܵܐ. ܘܲܡܡܲܠܸܠ ܗ̄ܘܵܐ ܥܹܝܢ ܒܲܓ݂ܠܹܐ ܝܲܪ̈ܚܹܐ ܬܠܵܬ݂ܵܐ . ܘܲܡܦܝܼܣ ܗ̄ܘܵܐ ܥܲܠ ܡܲܠܟܘܼܬܹܗ ܕܐܲܠܵܗܵܐ.

⁹ ܘܐ̄ܢܵܫܝܼܢ ܡܸܢܗܘܿܢ ܡܸܬ݂ܩܲܫܹܝܢ ܗ̄ܘܼܵܘ ܘܡܸܬ݂ܚܪܹܝܢ. ܘܲܡܨܲܚܹܝܢ ܠܐܘܼܪܚܵܐ ܕܐܲܠܵܗܵܐ ܩܕ݂ܵܡ ܟܸܢܫܵܐ ܕܥܲܡ̈ܡܹܐ. ܗܵܝܕܹܝܢ ܐܲܪܚܸܩ ܦܵܘܠܘܿܣ. ܘܲܦܪܲܫ ܡܸܢܗܘܿܢ ܠܬܲܠܡܝܼܕܹ̈ܐ. ܘܟܠܝܘܿܡ ܡܡܲܠܸܠ ܗ̄ܘܵܐ ܥܲܡܗܘܿܢ. ܒܐܸܣܟܘܿܠܹܐ ܕܓܲܒ݂ܪܵܐ ܕܲܫܡܹܗ ܛܘܼܪܵܢܘܿܣ.

¹⁰ ܘܗܵܕܹܐ ܗܘܸܵܬ݂ ܫܢ̈ܝܼܢ ܬܲܪܬܿܝܢ. ܥܕ݂ܲܡܵܐ ܕܲܫܡܲܥܘ ܡܸܠܬ݂ܵܐ ܕܡܵܪܝܵܐ ܟܠܗܘܿܢ ܕܥܵܡܪܝܼܢ ܒܐܵܣܝܼܵܐ. ܝܗ̄ܘܼܕ݂ܵܝܹ̈ܐ. ܘܐܲܪ̈ܡܵܝܹܐ.

¹¹ ܘܚܲܝ̈ܠܹܐ ܪܵܘܪ̈ܒܹܐ ܥܵܒܹܿܕ݂ ܗ̄ܘܵܐ ܐܲܠܵܗܵܐ ܒܐܝܼܕ݂ܗ ܕܦܵܘܠܘܿܣ.

¹² ܗܵܟܲܢܵܐ ܕܐܵܦ ܡܸܢ ܢܲܚ̈ܬܹܐ ܕܥܲܠ ܓܘܼܫܡܹܗ. ܣܘܼܕ݂ܵܪܹ̈ܐ ܐܵܘ ܪ̈ܘܼܩܥܹܐ ܡܲܝܬܹܿܝܢ ܗ̄ܘܼܵܘ ܘܣܵܝܡܝܼܢ ܥܲܠ ܟܪ̈ܝܼܗܹܐ. ܘܦܵܪܩܝܼܢ ܗ̄ܘܼܵܘ ܡܸܢܗܘܿܢ ܟܘܼܪ̈ܗܵܢܹܐ. ܘܐܵܦ ܫܹܐܕܹ̈ܐ ܢܵܦܩܝܼܢ ܗ̄ܘܼܵܘ.

¹³ ܨܒ݂ܵܘ ܗ̄ܘܼܵܘ ܕܹܝܢ ܐܵܦ ܐ̄ܢܵܫܵܐ ܝܗ̄ܘܼܕ݂ܵܝܹ̈ܐ: ܐܲܝܠܹܝܢ ܕܡܸܬ݂ܟܲܪܟܿܝܼܢ ܗ̄ܘܼܵܘ ܘܡܵܘܡܹܝܢ ܥܲܠ ܫܹܐܕܹ̈ܐ. ܕܢܵܘܡܘܿܢ ܒܲܫܡܹܗ ܕܡܵܪܲܢ ܝܼܫܘܿܥ. ܥܲܠ ܐܲܝܠܹܝܢ ܕܐܝܼܬ݂ ܗ̄ܘܲܝ ܠܗܘܿܢ ܪ̈ܘܼܚܹܐ ܛܲܢ̈ܦܵܬ݂ܵܐ. ܟܲܕ݂ ܐܵܡܪܝܼܢ ܗ̄ܘܼܵܘ. ܡܵܘܡܹܝܢܲܢ ܠܟ݂ܘܿܢ ܒܲܫܡܹܗ ܕܝܼܫܘܿܥ ܐܲܝܢܵܐ ܕܡܲܟ݂ܪܸܙ ܦܵܘܠܘܿܣ.

¹⁴ ܐܝܼܬ݂ ܗ̄ܘܵܐ ܕܹܝܢ ܫܲܒ݂ܥܵܐ ܒܢܵܘ̈ܗܝ ܕܓܲܒ݂ܪܵܐ ܚܲܕ݂ ܝܗܘܼܕ݂ܝܵܐ ܪܲܒ ܟܵܗܢܹ̈ܐ ܕܲܫܡܹܗ ܗܘܵܐ ܣܩܹܘܵܐ. ܕܥܵܒ݂ܕܝܼܢ ܗ̄ܘܼܵܘ ܗܵܕܹܐ.

¹⁵ ܘܲܥܢܵܐ ܫܹܐܕ݂ܵܐ ܗܵܘ ܒܝܼܫܵܐ ܘܐܸܡܲܪ ܠܗܘܿܢ. ܠܝܼܫܘܿܥ ܡܸܫܬܵܘܕܲܥ ܐ̄ܢܵܐ. ܘܲܠܦܵܘܠܘܿܣ ܝܵܕ݂ܲܥ ܐ̄ܢܵܐ. ܐܲܢ̄ܬܿܘܿܢ ܕܹܝܢ ܡܲܢ ܐܢ̄ܬܘܿܢ.

¹⁶ ܘܲܫܘܲܪ ܥܠܲܝܗܘܿܢ ܓܲܒ݂ܪܵܐ ܗܵܘ ܕܐܝܼܬ݂ ܗ̄ܘܵܐ ܒܹܗ ܪܘܼܚܵܐ ܒܝܼܫܬܵܐ. ܘܐܸܬ݂ܚܲܝܲܠ ܥܠܲܝܗܘܿܢ. ܘܫܲܦܸܠ ܐܸܢܘܿܢ. ܘܟܲܕ݂ ܫܠܝܼܚܝܼܢ ܘܲܦܥܝܼܥܝܼܢ ܥܪܲܩܘ ܡܸܢ ܒܲܝܬܵܐ ܗܵܘ.

¹⁷ ܘܗܵܕܹܐ ܐܸܬ݂ܝܲܕ݂ܥܲܬ݂ ܗ̄ܘܵܬ݂ ܠܟ݂ܠܗܘܿܢ ܝܗ̄ܘܼܕ݂ܵܝܹ̈ܐ ܘܐܲܪ̈ܡܵܝܹܐ ܕܥܵܡܪܝܼܢ ܒܐܲܦܸܣܘܿܣ. ܘܢܸܦܠܲܬ݂ ܕܸܚܠܬ݂ܵܐ ܥܲܠ ܟܠܗܘܿܢ. ܘܡܸܬ݂ܪܲܡܪܲܡ ܗ̄ܘܵܐ ܫܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ.

¹⁸ ܘܣܲܓܝܼܐܹ̈ܐ ܡܸܢ ܐܲܝܠܹܝܢ ܕܗܲܝܡܸܢܘ. ܐܵܬܹܿܝܢ ܗ̄ܘܼܵܘ ܘܡܸܫܬܲܥܹܝܢ ܣܲܟ݂ܠܘܵܬ݂ܗ̈ܘܿܢ. ܘܡܵܘܕܹܝܢ ܒܡܸܕܸܡ ܕܥܵܒ݂ܕܝܼܢ ܗ̄ܘܼܵܘ.

¹⁹ ܣܲܓܝܼܐܹ̈ܐ ܕܹܝܢ ܐܵܦ ܚܲܪ̈ܵܫܹܐ ܟܲܢܸܫܘ ܟܬ݂ܵܒܲܝ̈ܗܘܿܢ. ܘܐܲܝܬܿܝܼܘ ܐܵܘܩܸܕ݂ܘ ܐܸܢܘܿܢ ܩܕ݂ܵܡ ܟܠܢܵܫ. ܘܲܚܫܲܒ݂ܘ ܕܡܲܝ̈ܗܘܿܢ. ܘܲܣܠܸܩ ܟܸܣܦܵܐ ܪܸ̈ܒܘܵܬ݂ܵܐ ܚܲܡܸܫ.

²⁰ ܘܗܵܟܲܢܵܐ ܒܚܲܝܠܵܐ ܪܲܒܵܐ ܬܵܩܦܵܐ ܗ̄ܘܵܬ݂ ܘܣܵܓ݂ܝܵܐ ܗܲܝܡܵܢܘܼܬܹܗ ܕܐܲܠܵܗܵܐ.

²¹ ܟܲܕ݂ ܕܹܝܢ ܐܸܫܬܲܠܲܡ ܗܵܠܹܝܢ. ܣܵܡ ܦܵܘܠܘܿܣ ܒܪܸܥܝܵܢܹܗ. ܕܢܸܬ݂ܟܪܸܟ݂ ܒܟ݂ܠܵܗܿ ܡܵܩܹܕܿܘܿܢܝܼܵܐ ܘܒ݂ܐܵܟ݂ܵܐܝܼܵܐ. ܘܢܹܐܙܲܠ ܠܐܘܿܪܸܫܠܸܡ. ܘܐܸܡܲܪ. ܕܡܵܐ ܕܐܸܙܹܠܬ݂ ܠܬܲܡܵܢ. ܘܵܠܹܐ ܠܝܼ ܕܐܵܦ ܪܗ̄ܘܡܝ ܐܸܚܙܹܐ.

²² ܘܫܲܕܲܪ ܗ̄ܘܵܐ ܬܪܹܝܢ ܐ̄ܢܵܫ̈ܝܼܢ ܡܸܢ ܗܵܢܘܿܢ ܕܲܡܫܲܡܫܝܼܢ ܗ̄ܘܼܵܘ ܠܹܗ ܠܡܵܩܹܕܿܘܿܢܝܼܵܐ. ܠܛܝܼܡܵܬܹܐܘܿܣ. ܘܠܵܐܪܸܣܛܘܿܣ. ܗܘܼ ܕܹܝܢ ܩܵܘܝܼ ܙܲܒ݂ܢܵܐ ܒܐܲܣܝܼܐ.

²³ ܗܘܵܐ ܗ̄ܘܵܐ ܕܹܝܢ ܒܗܵܘ ܙܲܒ݂ܢܵܐ ܫܓ݂ܘܼܫܝܵܐ ܣܲܓܿܝܼܐܵܐ ܥܲܠ ܐܘܼܪܚܹܗ ܕܐܲܠܵܗܵܐ.

²⁴ ܐܝܼܬ݂ ܗ̄ܘܵܐ ܕܹܝܢ ܬܲܡܵܢ ܥܵܒܹܿܕ݂ ܣܹܐܡܵܐ ܚܲܕ݂. ܕܲܫܡܹܗ ܗ̄ܘܵܐ ܕܹܡܲܛܪܝܼܘܿܣ. ܕܥܵܒܹܿܕ݂ ܗ̄ܘܵܐ ܢܵܘܣܹ̈ܐ ܕܣܹܐܡܵܐ ܠܐܲܪܛܹܡܝܼܣ. ܘܡܵܘܬܲܪ ܗ̄ܘܵܐ ܠܲܒ݂ܢܲܝ̈ ܐܘܼܡܵܢܘܼܬܹܗ ܝܘܼܬ݂ܪܵܢܵܐ ܪܲܒܵܐ.

²⁵ ܗܵܢܵܐ ܟܲܢܸܫ ܐܸܢܘܿܢ ܠܲܒ݂ܢܲܝ̈ ܐܘܼܡܵܢܘܼܬܹܗ ܟܠܗܘܿܢ ܘܠܲܐܝܠܹܝܢ ܕܦܵܠܚܝܼܢ ܥܲܡܗܘܿܢ. ܘܐܸܡܲܪ ܠܗܘܿܢ. ܓܲܒ݂ܪܹ̈ܐ. ܝܵܕ݂ܥܝܼܢ ܐܢ̄ܬܘܿܢ. ܕܬܹܐܓ݂ܘܪܬܲܢ ܟܠܵܗܿ ܡܸܢ ܗܵܢܵܐ ܗܝܼ ܦܘܼܠܚܵܢܵܐ.

²⁶ ܘܐܵܦ ܐܲܢ̄ܬܿܘܿܢ ܫܵܡܥܝܼܢ ܐܢ̄ܬܘܿܢ ܘܚܵܙܹܝܢ ܐܢ̄ܬܘܿܢ. ܕܠܵܐ ܗ̄ܘܵܐ ܒܲܠܚܘܿܕ݂ ܠܲܒ݂ܢܲܝ̈ ܐܲܦܸܣܘܿܣ. ܐܸܠܵܐ ܐܵܦ ܠܣܘܿܓ݂ܵܐܐ ܕܟ݂ܠܵܗܿ ܐܵܣܝܼܵܐ. ܐܲܦܝܼܣ ܗܵܢܵܐ ܦܵܘܠܘܿܣ. ܘܐܲܗܦܸܟ݂ ܟܲܕ݂ ܐܵܡܲܪ. ܕܠܵܘ ܐܲܠܵܗܹ̈ܐ ܐܸܢܘܿܢ ܗܵܢܘܿܢ ܕܒ݂ܐܝܕ݂ܲܝ̈ ܒܢܲܝ̈ܢܵܫܵܐ ܡܸܬ݂ܥܲܒ݂ܕܝܼܢ.

²⁷ ܘܠܵܘ ܗܵܕܹܐ ܨܒ݂ܘܼܬ݂ܵܐ ܒܲܠܚܘܿܕ݂ ܡܸܬ݂ܦܲܪܣܝܵܐ ܘܒ݂ܵܛܠܵܐ. ܐܸܠܵܐ ܐܵܦ ܗܘܼ ܗܲܝܟܠܵܐ ܕܐܲܪܛܹܡܝܼܣ ܐܲܠܵܗܬܵܐ ܪܲܒܬ݂ܵܐ ܡܸܬ݂ܚܫܸܒ݂ ܠܹܗ. ܐܲܝܟ݂ ܠܵܐ ܡܸܕܸܡ. ܘܐܵܦ ܗܝܼ ܐܲܠܵܗܬܵܐ ܕܟ݂ܠܵܗܿ ܐܵܣܝܼܵܐ. ܘܟ݂ܠܗܘܿܢ ܥܲܡ̈ܡܹܐ ܣܵܓ݂ܕܝܼܢ ܠܵܗܿ. ܡܸܬܿܫܝܼܛܵܐ.

²⁸ ܘܟܲܕ݂ ܫܡܲܥܘ ܗܵܠܹܝܢ. ܐܸܬ݂ܡܠܝܼܘ ܚܸܡܬܵܐ. ܘܩܵܥܹܝܢ ܗ̄ܘܼܵܘ ܘܐܵܡܪܝܼܢ. ܪܲܒܵܐ ܗܝܼ ܐܲܪܛܹܡܝܼܣ ܕܐܲܦܸܣܵܝܹ̈ܐ.

²⁹ ܘܐܸܫܬܲܓ݂ܫܲܬ݂ ܟܠܵܗܿ ܡܕ݂ܝܼܢ̄ܬܵܐ. ܘܲܪܗܸܛܘ ܐܲܟ݂ܚܕ݂ܵܐ ܘܐܸܙܲܠܘ ܠܬܹܐܵܛܪܘܿܢ. ܘܲܚܛܲܦܘ ܐܵܘܒܸܠܘ ܥܲܡܗܘܿܢ. ܠܓ݂ܵܐܝܼܘܿܣ ܘܠܲܐܪܹܣܛܲܪܟ݂ܘܿܣ. ܓܲܒ݂ܪܹ̈ܐ ܡܵܩܹܕܿܘܿܢܵܝܹ̈ܐ ܒܢܲܝ̈ ܠܘܝܼܬܹܗ ܕܦܵܘܠܘܿܣ.

³⁰ ܘܦܵܘܠܘܿܣ ܨܵܒܹܐ ܗ̄ܘܵܐ. ܕܢܸܥܘܿܠ ܠܬܹܐܵܛܪܘܿܢ. ܘܲܟ݂ܠܵܐܘܼܗܝ ܬܲܠܡܝܼܕܹ̈ܐ.

³¹ ܘܐܵܦ ܪܹ̈ܫܹܐ ܕܐܵܣܝܼܵܐ ܡܛܠ ܕܪ̈ܵܚܡܵܘܗܝ ܗ̄ܘܼܵܘ. ܫܲܕܲܪܘ ܒܥܵܘ ܡܸܢܹܗ. ܕܠܵܐ ܢܸܬܸܿܠ ܢܲܦ̮ܫܹܗ ܕܢܸܥܘܿܠ ܠܬܹܐܵܛܪܘܿܢ.

³² ܟܸܢܫܹ̈ܐ ܕܹܝܢ ܕܐܝܼܬ݂ ܗ̄ܘܼܵܘ ܒܬܹܐܵܛܪܘܿܢ ܛܵܒ݂ ܫܓ݂ܝܼܫܝܼܢ ܗ̄ܘܼܵܘ. ܘܐܲܚܪ̈ܵܢܹܐ ܐ̄ܚܪ̈ܵܢܝܵܬ݂ܵܐ ܩܵܥܹܝܢ ܗ̄ܘܼܵܘ. ܣܲܓܝܼܐܹ̈ܐ ܓܹܝܪ ܡܸܢܗܘܿܢ ܠܵܐ ܝܵܕ݂ܥܝܼܢ ܗ̄ܘܼܵܘ. ܡܛܠ ܡܵܢܵܐ ܐܸܬ݂ܟܲܢܲܫܘ.

³³ ܥܲܡܵܐ ܕܹܝܢ ܕܝܗ̄ܘܼܕ݂ܵܝܹ̈ܐ ܕܐܝܼܬ݂ ܗ̄ܘܼܵܘ ܬܲܡܵܢ. ܐܲܩܝܼܡܘ ܡܸܢܗܘܿܢ ܠܓܲܒ݂ܪܵܐ ܝܼܗܘܼܕ݂ܝܵܐ ܕܲܫܡܹܗ ܐܵܠܸܟ݂ܣܲܢܕܪܘܿܣ. ܘܟܲܕ݂ ܩܵܡ ܐܲܢܝܼܦ ܐܝܼܕܹܗ. ܘܨܵܒܹܐ ܗ̄ܘܵܐ ܕܢܸܦܘܼܩ ܪܘܼܚܵܐ ܠܥܲܡܵܐ.

³⁴ ܘܟܲܕ݂ ܝܼܕ݂ܲܥܘ ܕܝܗ̄ܘܼܕ݂ܵܝܵܐ ܗ̄ܘܼ. ܩܥܵܘ ܟܠܗܘܿܢ ܒܚܲܕ݂ ܩܵܠܵܐ ܐܲܝܟ݂ ܫܵܥܝܼ̈ܢ ܬܲܪܬܿܝܢ. ܕܪܲܒܵܐ ܗܝ ܐܲܪܛܹܡܝܼܣ ܕܐܲܦܸܣܵܝܹ̈ܐ.

³⁵ ܘܫܲܠܝܼ ܐܸܢܘܿܢ ܪܹܫܵܐ ܕܲܡܕ݂ܝܼܢ̄ܬܵܐ ܟܲܕ݂ ܐܵܡܲܪ. ܓܲܒ݂ܪܹ̈ܐ ܐܵܦܸܣܝܹ̈ܐ. ܡܲܢܘܼ ܓܹܝܪ ܡܸܢ ܒܢܲܝ̈ܢܵܫܵܐ ܕܠܵܐ ܝܵܕ݂ܲܥ ܠܲܡܕ݂ܝܼܢ̄ܬܵܐ ܕܐܵܦܸܣܵܝܹ̈ܐ. ܕܟ݂ܘܡܪܬ݂ܵܐ ܗܝ ܕܐܲܪܛܹܡܝܼܣ ܪܲܒܬ݂ܵܐ. ܘܲܠܨܲܠܡܵܗܿ ܕܡܸܢ ܫܡܲܝܵܐ ܢܚܸܬ݂.

³⁶ ܡܛܠ ܗܵܟܹܝܠ ܕܠܘܼܩܒܲܠ ܗܵܕܹܐ ܐ̄ܢܵܫ ܠܵܐ ܡܸܫܟܲܚ ܠܡܹܐܡܲܪ. ܘܵܠܹܐ ܠܟ݂ܘܿܢ ܕܬܸܗܘܘܿܢ ܫܠܹܝܢ ܘܠܵܐ ܬܸܥܒܕ݂ܘܼܢ ܡܸܕܸܡ ܒܣܘܼܪܗܵܒ݂ܵܐ.

³⁷ ܐܲܝܬܿܝܼܬܿܘܢ ܓܹܝܪ ܠܓܲܒ݂ܪܹ̈ܐ ܗܵܠܹܝܢ. ܟܲܕ݂ ܠܵܐ ܗܲܝܟ̈ܠܹܐ ܚܲܠܸܨܘ. ܘܠܵܐ ܨܲܚܝܼܘ ܠܐܲܠܵܗܬܲܢ.

³⁸ ܐܸܢ ܕܹܝܢ ܗܵܢܵܐ ܕܹܡܲܛܪܝܼܘܿܣ ܘܲܒ݂ܢܲܝ̈ ܐܘܼܡܵܢܘܼܬܹܗ ܐܝܼܬ݂ ܠܗܘܿܢ ܕܝܼܢܵܐ ܥܲܡ ܐ̄ܢܵܫ. ܗܵܐ ܐܲܢܬܹܿܘܦܵܛܘܿܣ ܒܲܡܕ݂ܝܼܢ̄ܬܵܐ. ܐܘܼܡܵܢܹ̈ܐ ܐܸܢܘܿܢ. ܢܸܩܪܒ݂ܘܼܢ ܘܲܢܕ݂ܘܼܢܘܼܢ ܚܲܕ݂ ܥܲܡ ܚܲܕ݂.

³⁹ ܘܐܸܢ ܗܘܼ ܕܡܸܕܸܡ ܐ̄ܚܪܹܝܢ ܒܵܥܹܝܢ ܐܢ̄ܬܘܿܢ. ܒܕ݂ܘܼܟܬ݂ܵܐ ܕܝܼܗܝܼܒ݂ܵܐ ܡܸܢ ܢܵܡܘܿܣܵܐ ܠܲܟ݂ܢܘܼܫܝܵܐ ܡܸܫܬܿܪܹܐ.

⁴⁰ ܡܛܠ ܕܐܵܦ ܗܵܫܵܐ ܒܩܹܘܲܢܕܹܿܝܢܘܿܣ ܩܵܝܡܝܼܢܲܢ. ܕܢܸܬ݂ܪܫܹܐ ܐܲܝܟ݂ ܫܵܓ݂ܘܫܹ̈ܐ. ܕܠܵܐ ܡܸܫܟܿܚܝܼܢܢ ܕܢܸܦܘܼܩ ܪܘܼܚܵܐ ܥܲܠ ܟܸܢܫܵܐ ܕܝܵܘܡܵܐ ܗܵܢܵܐ ܕܐܬ݂ܟܲܢܲܫܢ ܒܲܛܵܠܵܐܝܼܬ݂. ܘܐܸܫܬܿܓܸܫܢ ܕܠܵܐ ܥܸܠܬ݂ܵܐ.

⁴¹ ܘܟܲܕ݂ ܗܵܠܹܝܢ ܐܸܡܲܪ. ܫܪܵܐ ܠܟܸܢܫܵܐ.

20

¹ ܘܒܵܬܲܪ ܕܲܫܠܝܼ ܫܓ݂ܘܼܫܝܵܐ. ܩܪܵܐ ܦܵܘܠܘܿܣ ܠܬܲܠܡܝܼܕܹ̈ܐ. ܘܒܲܝܲܐ ܐܸܢܘܿܢ ܘܢܲܫܸܩ ܐܸܢܘܿܢ. ܘܲܢܦܲܩ ܐܸܙܲܠ ܠܹܗ ܠܡܵܩܹܕܿܘܿܢܝܼܵܐ.

² ܘܟܲܕ݂ ܐܸܬ݂ܟܪܸܟ݂ ܐܸܢܘܿܢ ܠܐܲܬ݂ܪ̈ܵܘܵܬ݂ܵܐ ܗܵܠܹܝܢ. ܘܒܲܝܲܐ ܐܸܢܘܿܢ ܒܡܸܠܹ̈ܐ ܣܲܓܝܼ̈ܐܵܬ݂ܵܐ. ܐܸܬ݂ܵܐ ܠܹܗ ܠܗܲܠܸܣ ܐܲܬ݂ܪܵܐ.

³ ܘܲܗܘܵܐ ܬܲܡܵܢ ܬܠܵܬ݂ܵܐ ܝܲܪ̈ܚܝܼܢ. ܥܒܲܕ݂ܘ ܕܹܝܢ ܥܠܵܘܗܝ ܢܸܟ݂ܠܵܐ ܝܗ̄ܘܼܕ݂ܵܝܹ̈ܐ. ܟܲܕ݂ ܥܬ݂ܝܼܕ݂ ܗ̄ܘܵܐ ܠܡܹܐܙܲܠ ܠܣܘܼܪܝܼܵܐ. ܘܐܸܬ݂ܚܲܫܲܒ݂ ܕܢܸܗܦܘܼܟ݂ ܠܹܗ ܠܡܵܩܹܕܿܘܿܢܝܼܵܐ.

⁴ ܘܲܢܦܲܩܘ ܥܲܡܹܗ ܥܕ݂ܲܡܵܐ ܠܐܵܣܝܼܵܐ. ܣܹܘܦܲܛܪܘܿܣ ܕܡܸܢ ܒܹܪܘܿܐܵܐ ܡܕ݂ܝܼܢ̄ܬܵܐ. ܘܐܵܪܹܣܛܲܪܟ݂ܘܿܣ. ܘܣܲܩܘܼܢܕܿܘܿܣ ܕܡܸܢ ܬܸܣܵܠܘܿܢܝܼܩܹܐ. ܘܓ݂ܵܐܝܼܘܿܣ ܕܡܸܢ ܕܲܪܒܹܿܐ ܡܕ݂ܝܼܢ̄ܬܵܐ. ܘܛܝܼܡܵܬܹܐܘܿܣ ܕܡܸܢ ܠܘܼܣܛܪܵܐ. ܘܡܸܢ ܐܵܣܝܼܵܐ ܛܘܼܟ݂ܝܼܩܘܿܣ ܘܲܛܪܘܿܦܝܼܡܘܿܣ.

⁵ ܗܵܠܹܝܢ ܐܸܙܲܠܘ ܩܕ݂ܵܡܲܝܢ. ܘܩܵܘܝܼܘ ܠܲܢ ܒܲܛܪܘܿܐܘܿܣ.

⁶ ܚܢܲܢ ܕܹܝܢ ܢܦܲܩܢ ܡܸܢ ܦܝܼܠܝܼܦܘܿܣ ܡܕ݂ܝܼܢ̄ܬܵܐ ܕܡܵܩܹܕܿܘܿܢܝܼܵܐ ܒܵܬܲܪ ܝܵܘ̈ܡܵܬ݂ܵܐ ܕܦܲܛܝܼܪܹ̈ܐ. ܘܲܪܕ݂ܲܝܢ ܒܝܲܡܵܐ. ܘܐܸܬܲܝܢ ܠܲܛܪܘܿܐܘܿܣ ܠܝܵܘ̈ܡܵܬ݂ܵܐ ܚܲܡܫܵܐ. ܘܲܗܘܲܝܢ ܬܲܡܵܢ ܝܵܘ̈ܡܵܬ݂ܵܐ ܫܲܒ݂ܥܵܐ.

⁷ ܘܲܒ݂ܝܵܘܡܵܐ ܕܚܲܕ݂ ܒܫܲܒܵܐ ܟܲܕ݂ ܟܢܝܼܫܝܼܢܲܢ ܕܢܸܩܨܹܐ ܐܹܘܟ݂ܵܪܸܣܛܝܼܵܐ. ܡܡܲܠܸܠ ܗ̄ܘܵܐ ܥܲܡܗܘܿܢ ܦܵܘܠܘܿܣ. ܡܛܠ ܕܲܠܝܵܘܡܵܐ ܐ̄ܚܪܹܢܵܐ ܥܬ݂ܝܼܕ݂ ܗ̄ܘܵܐ ܕܢܸܦܘܼܩ ܠܹܗ. ܘܐܲܓܲܪ ܗ̄ܘܵܐ ܠܲܡܡܲܠܵܠܘܼ. ܥܕ݂ܲܡܵܐ ܠܦܸܠܓܹ݁ܗ ܕܠܸܠܝܵܐ.

⁸ ܘܐܝܼܬ݂ ܗ̄ܘܵܐ ܬܲܡܵܢ ܠܲܡܦܹܐܕܹ̈ܐ (ܠܲܡܦܹܝܕܹ̈ܐ) ܕܢܘܼܪܵܐ ܣܲܓܝܼ̈ܐܹܐ. ܒܥܸܠܝܼܬ݂ܵܐ ܗܵܝ ܕܲܟ݂ܢܝܼܫܝܼܢ ܗܘܲܝܢ ܒܵܗܿ.

⁹ ܘܝܵܬܹܿܒ݂ ܗ̄ܘܵܐ ܥܠܲܝܡܵܐ ܚܲܕ݂ ܕܲܫܡܹܗ ܗܘܵܐ ܐܹܘܛܝܼܟ݂ܘܿܣ ܒܟ݂ܵܘܬ݂ܵܐ. ܘܫܵܡܲܥ. ܘܲܛܒܲܥ ܒܫܸܢܬ݂ܵܐ ܝܲܩܝܼܪܬܵܐ. ܟܲܕ݂ ܐܲܓܲܪ ܗ̄ܘܵܐ ܒܡܸܠܬ݂ܵܐ ܦܵܘܠܘܿܣ. ܘܲܒ݂ܫܸܢܬܹܗ ܢܦܲܠ ܗ̄ܘܵܐ ܡܸܢ ܬܠܵܬ݂ܵܐ ܡܸܕ݂ܝܵܪ̈ܝܼܢ. ܘܐܸܫܬܿܩܸܠ ܟܲܕ݂ ܡܝܼܬ݂.

¹⁰ ܘܲܢܚܸܬ݂ ܦܵܘܠܘܿܣ ܢܦܲܠ ܠܥܸܠ ܡܸܢܹܗ. ܘܥܲܦܩܹܗ ܘܐܸܡܲܪ. ܠܵܐ ܬܸܬܿܙܝܼܥܘܼܢ ܡܛܠ ܕܢܲܦ̮ܫܹܗ ܒܹܗ ܗܝܼ.

¹¹ ܟܲܕ݂ ܣܠܸܩ ܕܹܝܢ ܩܨܵܐ ܠܲܚܡܵܐ ܘܲܛܥܸܡ . ܘܲܗܘܵܐ ܡܡܲܠܸܠ ܥܕ݂ܲܡܵܐ ܕܲܣܠܸܩ ܨܲܦܪܵܐ. ܘܗܵܝܕܹܝܢ ܢܦܲܩ. ܕܢܹܐܙܲܠ ܒܝܲܒ݂ܫܵܐ.

¹² ܘܕ݂ܲܒ݂ܪܘܼܗܝ ܠܲܥܠܲܝܡܵܐ ܟܲܕ݂ ܚܲܝ. ܘܲܚܕ݂ܝܼܘ ܒܹܗ ܪܵܘܪܒ݂ܵܐܝܼܬ݂.

¹³ ܚܢܲܢ ܕܹܝܢ ܢܚܸܬ݂ܢ ܠܐܸܠܦܵܐ. ܘܲܪܕ݂ܲܝܢ ܠܘܲܥܕܵܐ ܕܬܸܣܘܿܣ. ܡܛܠ ܕܡܸܢ ܬܲܡܵܢ ܥܬ݂ܝܼܕ݂ܝܼܢ ܗ̄ܘܲܝܢ ܕܲܢܩܲܒܠܝܼܘܗܝ ܠܦܵܘܠܘܿܣ. ܗܵܟܲܢܵܐ ܓܹܝܪ ܦܩܲܕ݂ ܗ̄ܘܵܐ ܠܲܢ. ܟܲܕ݂ ܐܸܙܲܠ ܗ̄ܘܵܐ ܗܘܼ ܒܝܲܒ݂ܫܵܐ.

¹⁴ ܟܲܕ݂ ܕܹܝܢ ܩܲܒܸܠܢܵܝܗܝ ܡܸܢ ܬܸܣܘܿܣ. ܫܩܲܠܢܵܝܗܝ ܒܐܸܠܦܵܐ. ܘܐܸܬܲܝܢ ܠܡܝܼܛܘܿܠܝܼܢܹܐ.

¹⁵ ܘܡܸܢ ܬܲܡܵܢ ܠܝܵܘܡܵܐ ܐ̄ܚܪܹܢܵܐ. ܪܕ݂ܲܝܢ ܠܘܼܩܒܲܠ ܟܝܼܘܿܣ ܓܵܙܲܪܬܵܐ. ܘܬ݂ܘܼܒ݂ ܠܝܵܘܡܵܐ ܐ̄ܚܪܹܢܵܐ. ܐܸܬ݂ܝܢ ܠܣܵܡܘܿܣ. ܘܩܵܘܝܼܢ ܒܲܛܪܲܓ݂ܠܝܼܘܿܢ. ܘܲܠܝܵܘܡܵܐ ܐ̄ܚܪܹܢܵܐ ܐܸܬ݂ܝܢ ܠܡܝܼܠܹܛܘܿܣ.

¹⁶ ܦܣܝܼܩ ܗ̄ܘܵܐ ܠܹܗ ܓܹܝܪ ܠܦܵܘܠܘܿܣ. ܕܢܸܥܒܪܝܼܗܿ ܠܐܲܦܸܣܘܿܣ. ܕܲܠܡܵܐ ܢܸܫܬܵܘܚܲܪ ܠܹܗ ܬܲܡܵܢ. ܡܛܠ ܕܲܡܣܲܪܗܲܒ݂ ܗ̄ܘܵܐ ܕܐܸܢ ܡܸܫܟܚܵܐ. ܝܵܘܡܵܐ ܕܦܸܢܛܹܩܘܿܣܛܹܐ ܒܐܘܿܪܸܫܠܸܡ ܢܸܥܒܕ݂ܝܼܘܗܝ.

¹⁷ ܘܡܸܢܵܗܿ ܡܸܢ ܡܝܼܠܹܛܘܿܣ. ܫܲܕܲܪ ܐܲܝܬܿܝܼ ܠܩܲܫܝܼܫܹ̈ܐ ܕܥܹܕܬܵܐ ܕܐܲܦܸܣܘܿܣ.

¹⁸ ܘܟܲܕ݂ ܐܸܬ݂ܵܘ ܠܘܵܬܹܗ. ܐܸܡܲܪ ܠܗܘܿܢ. ܐܲܢ̄ܬܿܘܿܢ ܝܵܕ݂ܥܝܼܢ ܐܢ̄ܬܘܿܢ ܕܡܸܢ ܝܵܘܡܵܐ ܩܲܕ݂ܡܵܝܵܐ ܕܥܸܠܹܬ݂ ܠܐܵܣܝܼܵܐ. ܐܲܝܟܲܢܵܐ ܗ̄ܘܹܝܬ݂ ܥܲܡܟ݂ܘܿܢ ܟܠܹܗ ܙܲܒ݂ܢܵܐ.

¹⁹ ܟܲܕ݂ ܦܵܠܲܚ ܐ̄ܢܵܐ ܠܐܲܠܵܗܵܐ ܒܡܲܟܿܝܼܟ݂ܘܼܬ݂ܵܐ ܣܲܓܝܼܐܬ݂ܵܐ ܘܲܒ݂ܕܸܡ̈ܥܹܐ ܘܲܒ݂ܢܸܣܝܘܿܢܹ̈ܐ ܐܲܝܠܹܝܢ ܕܥܵܕܹܝܢ ܗ̄ܘܼܵܘ ܥܠܲܝ ܒܢܸܟ݂ܠܲܝ̈ܗܘܿܢ ܕܝܗ̄ܘܼܕ݂ܵܝܹ̈ܐ.

²⁰ ܘܠܵܐ ܒܣܝܼܬ݂ ܒܡܸܕܸܡ ܕܦܲܩܵܚ ܗ̄ܘܵܐ ܠܢܲܦ̮ܫܵܬ݂ܟ݂ܘܿܢ ܕܐܲܟ݂ܪܸܙ ܠܟ݂ܘܿܢ. ܘܐܲܠܸܦ ܒܫܘܼܩܹ̈ܐ ܘܲܒ݂ܒܵܬܹ̈ܐ.

²¹ ܟܲܕ݂ ܡܣܲܗܸܕ݂ ܗ̄ܘܹܝܬ݂ ܠܝܗ̄ܘܼܕ݂ܵܝܹ̈ܐ ܘܠܲܐܪ̈ܡܵܝܹܐ ܥܲܠ ܬܝܵܒܘܼܬ݂ܵܐ ܕܲܠܘܵܬ݂ ܐܲܠܵܗܵܐ. ܘܗܲܝܡܵܢܘܼܬ݂ܵܐ ܕܲܒ݂ܡܵܪܲܢ ܝܼܫܘܿܥ ܡܫܝܼܚܵܐ.

²² ܗܵܫܵܐ ܐܸܢܵܐ ܐܲܣܝܼܪ ܐ̄ܢܵܐ ܒܪܘܼܚܵܐ. ܘܐܵܙܹܠ ܐ̄ܢܵܐ ܠܐܘܿܪܸܫܠܸܡ. ܘܠܵܐ ܝܵܕ݂ܲܥ ܐ̄ܢܵܐ ܡܵܢܵܐ ܐܵܪܲܥ ܠܝܼ ܒܵܗܿ.

²³ ܒܪܲܡ ܪܘܼܚܵܐ ܕܩܘܼܕ݂ܫܵܐ ܒܟ݂ܠ ܡܕ݂ܝܼܢܵܐ ܡܣܲܗܸܕ݂ ܠܝܼ ܘܐܵܡܲܪ. ܕܐܲܣܘܼܪܹ̈ܐ ܘܐܘܼܠܨܵܢܹ̈ܐ ܥܬ݂ܝܼܕ݂ܝܼܢ ܠܵܟ݂.

²⁴ ܐܸܠܵܐ ܠܝܼ ܠܵܐ ܚܫܝܼܒ݂ܵܐ ܢܲܦ̮ܫܝ ܡܸܕܸܡ. ܐܲܝܟ݂ ܕܐܹܫܲܠܸܡ ܪܲܗܛܝ ܘܬܸܫܡܸܫܬܵܐ ܕܩܲܒܠܹܬ݂ ܡܸܢ ܡܵܪܲܢ ܝܼܫܘܿܥ. ܕܐܲܣܗܸܕ݂ ܥܲܠ ܣܒܲܪܬ݂ܵܐ ܕܛܲܝܒܘܼܬܹܗ ܕܐܲܠܵܗܵܐ.

²⁵ ܘܗܵܫܵܐ ܐܸܢܵܐ ܝܵܕ݂ܲܥ ܐ̄ܢܵܐ. ܕܬ݂ܘܼܒ݂ ܦܲܪܨܘܿܦܝ ܠܵܐ ܚܵܙܹܝܢ ܐܢ̄ܬܘܿܢ. ܟܠܟ݂ܘܿܢ ܐܲܝܠܹܝܢ ܕܐܬ݂ܟܲܪܟܹܬ݂ ܐܲܟ݂ܪܙܹܬ݂ ܠܟ݂ܘܿܢ ܡܲܠܟܘܼܬ݂ܵܐ.

²⁶ ܘܡܛܠ ܗܵܢܵܐ ܡܣܲܗܸܕ݂ ܐ̄ܢܵܐ ܠܟ݂ܘܿܢ ܝܵܘܡܵܐ ܕܝܵܘܡܵܢܵܐ. ܕܲܕ݂ܟܹܐ ܐ̄ܢܵܐ ܡܸܢ ܕܡܵܐ ܕܟ݂ܠܟ݂ܘܼܢ.

²⁷ ܠܵܐ ܓܹܝܪ ܐܸܫܬܲܐܠܹܬ݂. ܕܐܵܘܕܲܥܟ݂ܘܿܢ ܟܠܹܗ ܨܸܒ݂ܝܵܢܹܗ ܕܐܲܠܵܗܵܐ.

²⁸ ܐܸܙܕܲܗ̄ܪܘ ܗܵܟܹܝܠ ܒܢܲܦ̮ܫܟ݂ܘܿܢ ܘܲܒ݂ܟ݂ܠܵܗܿ ܡܲܪܥܝܼܬ݂ܵܐ. ܗܵܝ ܕܐܲܩܝܼܡܟ݂ܘܿܢ ܒܵܗܿ ܪܘܼܚܵܐ ܕܩܘܼܕ݂ܫܵܐ ܐܲܦܸܣܩܘܿܦܹ̈ܐ. ܕܬܸܪܥܘܿܢ ܠܥܹܕܬܹܿܗ ܕܐܲܠܵܗܵܐ. ܗܵܝ ܕܲܩܢܵܗܿ ܒܲܕ݂ܡܹܗ.

²⁹ ܐܸܢܵܐ ܝܵܕ݂ܲܥ ܐ̄ܢܵܐ. ܕܡܸܢ ܒܵܬܲܪ ܕܐܵܙܹܠ ܐ̄ܢܵܐ. ܢܸܥܠܘܼܢ ܥܲܡܟ݂ܘܿܢ ܕܹܐܒܹ̈ܐ ܬܲܩܝܼܦܹ̈ܐ. ܕܠܵܐ ܚܵܝܣܝܼܢ ܥܲܠ ܡܲܪܥܝܼܬ݂ܵܐ.

³⁰ ܘܐܵܦ ܡܸܢܟ݂ܘܿܢ ܕܝܼܠܟ݂ܘܿܢ ܢܩܘܼܡܘܼܢ ܓܲܒ݂ܪܹ̈ܐ ܡܡܲܠܠܲܝ̈ ܡܥܲܩ̈ܡܵܬ݂ܵܐ. ܐܲܝܟ݂ ܕܢܲܗܦܟ݂ܘܿܢ ܠܬܲܠܡܝܼܕܹ̈ܐ ܕܢܹܐܙܠ̄ܘܼܢ ܒܵܬܲܪܗܘܿܢ.

³¹ ܡܛܠ ܗܵܢܵܐ ܗܘܲܝܬܿܘܿܢ ܥܝܼܪܝܼܢ ܘܥܲܗܝܼܕ݂ܝܼܢ. ܕܲܫܢܲܝܵܐ ܬܠܵܬ݂ ܠܵܐ ܫܠܝܼܬ݂ ܒܠܸܠܝܵܐ ܘܒܐܝܼܡܵܡܵܐ. ܟܲܕ݂ ܒܕܸܡ̈ܥܹܐ ܡܲܪܬܹܐ ܐܸܢܵܐ ܠܐ̄ܢܵܫ ܐ̄ܢܵܫ ܡܸܢܟ݂ܘܿܢ.

³² ܘܗܵܫܵܐ ܡܲܓ݂ܥܸܠ ܐ̄ܢܵܐ ܠܟ݂ܘܿܢ ܠܐܲܠܵܗܵܐ ܘܲܠܡܸܠܬ݂ܵܐ ܕܛܲܝܒܘܼܬܹܗ. ܕܗܝܼ ܡܸܫܟܚܵܐ ܒܵܢܝܵܐ ܠܟ݂ܘܿܢ. ܘܝܵܗܒܵܐ ܠܟ݂ܘܿܢ ܝܘܼܪܬܵܢܵܐ ܥܲܡ ܟܠܗܘܿܢ ܩܲܕܝܼܫܹ̈ܐ.

³³ ܟܸܣܦܵܐ ܐܵܘ ܕܲܗܒ݂ܵܐ ܐܵܘ ܢܲܚ̈ܬܹܐ ܠܵܐ ܪܸܓܹܬ݂.

³⁴ ܘܐܲܢ̄ܬܿܘܿܢ ܝܵܕ݂ܥܝܼܢ ܐܢ̄ܬܘܿܢ. ܕܠܲܣܢܝܼܩܘܼܬ݂ܝ ܘܠܲܐܝܠܹܝܢ ܕܐܝܼܬ݂ ܥܲܡܝ. ܫܲܡܸܫ ܗܵܠܹܝܢ ܐܝܼܕ݂ܲܝ̈.

³⁵ ܘܟ݂ܠ ܡܸܕܸܡ ܚܵܘܝܼܬ݂ܟ݂ܘܿܢ. ܕܗܵܟܲܢܵܐ ܘܵܠܹܐ ܠܡܸܠܐܵܐ ܘܲܠܡܹܐܨܲܦ ܕܐܲܝܠܹܝܢ ܕܲܟ݂ܪ̈ܝܼܗܝܼܢ. ܘܠܲܡܥܲܗܵܕ݂ܘܼ ܡܸܠܵܘ̈ܗܝ ܕܡܵܪܲܢ ܝܼܫܘܿܥ. ܡܛܠ ܕܗܘܼ ܐܸܡܲܪ. ܕܛܘܼܒ݂ܵܘܗܝ ܠܐܲܝܢܵܐ ܕܝܵܗܹܒ݂ ܝܲܬܿܝܼܪ ܡܸܢ ܐܲܝܢܵܐ ܕܢܵܣܹܒ݂.

³⁶ ܘܟܲܕ݂ ܗܵܠܹܝܢ ܐܸܡܲܪ. ܩܥܸܕ݂ ܥܲܠ ܒܘܼܪ̈ܟܵܘܗܝ ܘܨܲܠܝܼ. ܘܟ݂ܠܗܘܿܢ ܐ̄ܢܵܫܵܐ ܥܲܡܹܗ.

³⁷ ܘܲܗܘܵܬ݂ ܒܟ݂ܵܬ݂ܵܐ ܪܲܒܬ݂ܵܐ ܒܟ݂ܠܗܘܿܢ. ܘܥܲܦܩܘܼܗܝ ܘܲܡܢܲܫܩܝܼܢ ܗ̄ܘܼܵܘ ܠܹܗ.

³⁸ ܝܲܬܝܼܪܵܐܝܼܬ݂ ܕܹܝܢ ܡܸܫܬܲܢܩܝܼܢ ܗ̄ܘܼܵܘ ܥܲܠ ܗܵܝ ܡܸܠܬ݂ܵܐ ܕܐܵܡܲܪ. ܕܠܵܐ ܬܘܼܒ݂ ܥܬ݂ܝܼܕ݂ܝܼܢ ܕܢܸܚܙܘܿܢ ܦܲܪܨܘܿܦܹܗ. ܘܠܵܘܝܘܼܗܝ ܥܕ݂ܲܡܵܐ ܠܐܸܠܦܵܐ.

21

¹ ܘܲܦܪܲܫܢ ܡܸܢܗܘܿܢ. ܘܲܪܕ݂ܲܝܢ ܬܪܝܼܨܵܐܝܼܬ݂ ܠܩܘܿ ܓܵܙܲܪܬܵܐ. ܘܲܠܝܵܘܡܵܐ ܐ̄ܚܪܹܢܵܐ. ܐܸܬ݂ܝܢ ܠܪܘܿܕ݂ܘܿܣ. ܘܡܸܢ ܬܲܡܵܢ ܠܦܵܐܛܵܪܵܐ (ܠܦܵܛܵܪܵܐ).

² ܘܐܸܫܟܲܚܢ ܬܲܡܵܢ ܐܸܠܦܵܐ ܕܐܵܙܵܠ̄ܐ ܠܦܹܘܢܝܼܩܹܐ. ܘܲܣܠܸܩܢ ܠܵܗܿ. ܘܲܪܕ݂ܲܝܢ

³ ܘܡܲܛܝܼܢ ܥܕ݂ܲܡܵܐ ܠܘܵܬ݂ ܩܘܦܪܘܿܣ ܓܵܙܲܪܬܵܐ. ܘܲܫܒܲܩܢܵܗܿ ܠܣܸܡܵܠܵܐ. ܘܐܸܬܲܝܢ ܠܣܘܼܪܝܼܵܐ. ܘܡܸܢ ܬܲܡܵܢ ܡܲܛܝܼܢ ܠܨܘܿܪ. ܬܲܡܵܢ ܓܹܝܪ ܐܝܼܬ݂ ܗ̄ܘܵܐ ܠܵܗܿ ܠܐܸܠܦܵܐ ܠܲܡܢܵܚܘܼ ܛܲܥܢܵܗܿ.

⁴ ܘܟܲܕ݂ ܐܸܫܟܲܚܢ ܬܲܡܵܢ ܬܲܠܡܝܼܕܹ̈ܐ. ܩܵܘܝܼܢ ܠܘܵܬ݂ܗܘܿܢ ܝܵܘ̈ܡܵܬ݂ܵܐ ܫܲܒ݂ܥܵܐ. ܘܗܵܠܹܝܢ ܐܵܡܪܝܼܢ ܗ̄ܘܼܵܘ ܟܠܝܘܿܡ ܠܦܵܘܠܘܿܣ ܒܪܘܼܚ. ܕܠܵܐ ܢܹܐܙܲܠ ܠܐܘܿܪܸܫܠܸܡ.

⁵ ܘܡܸܢ ܒܵܬܲܪ ܗܵܠܹܝܢ ܝܵܘ̈ܡܵܬ݂ܵܐ. ܢܦܲܩܢ ܕܢܹܐܙܲܠ ܒܐܘܼܪܚܵܐ. ܘܲܡܠܵܘܝܢ ܗ̄ܘܼܵܘ ܠܲܢ ܟܠܗܘܿܢ ܗܸܢܘܿܢ ܘܢܸܫܲܝ̈ܗܘܿܢ ܘܲܒ݂ܢܲܝ̈ܗܘܿܢ. ܥܕ݂ܲܡܵܐ ܠܒܲܪ ܡܸܢ ܡܕ݂ܝܼܢ̄ܬܵܐ. ܘܲܩܥܸܕ݂ܘ ܥܲܠ ܒܘܼܪ̈ܟܲܝܗܘܿܢ ܥܲܠ ܝܲܕ݂ ܝܲܡܵܐ ܘܨܲܠܝܼܘ.

⁶ ܘܢܲܫܸܩܢ ܠܲܚܕ݂ܵܕܹ̈ܐ. ܘܲܣܠܸܩܢ ܠܐܸܠܦܵܐ. ܘܲܗܦܲܟ݂ܘ ܗܸܢܘܿܢ ܠܒ݂ܵܬܲܝ̈ܗܘܿܢ.

⁷ ܚܢܲܢ ܕܹܝܢ ܪܕ݂ܲܝܢ ܡܸܢ ܨܘܿܪ. ܘܐܸܬܲܝܢ ܠܥܲܟܿܘܿ ܡܕ݂ܝܼܢ̄ܬܵܐ. ܘܝܲܗ̄ܒ݂ܢ ܫܠܵܡܵܐ ܠܐܲܚܹ̈ܐ ܕܬܲܡܵܢ. ܘܲܫܪܲܝܢ ܨܸܐܕ݂ܲܝܗܘܿܢ. ܝܵܘܡܵܐ ܚܲܕ݂.

⁸ ܘܲܠܝܵܘܡܵܐ ܐ̄ܚܪܹܢܵܐ. ܢܦܲܩܢ ܘܐܸܬܲܝܢ ܠܩܹܣܲܪܝܵܐ. ܘܥܲܠܢ ܫܪܲܝܢ ܒܒܲܝܬܹܿܗ ܕܦܝܼܠܝܼܦܘܿܣ ܡܣܲܒܪܵܢܵܐ. ܐܲܝܢܵܐ ܕܐܝܼܬ݂ܵܘܗܝ ܗ̄ܘܵܐ ܡܸܢ ܫܲܒ݂ܥܵܐ.

⁹ ܘܐܝܼܬ݂ ܗ̄ܘܲܝ ܠܹܗ ܒܢܵܬ݂ܵܐ ܒܬ݂̈ܘܼܠܵܬܵܐ ܐܲܪܒܲܥ ܕܡܸܬ݂ܢܲܒܝܵܢ ܗ̄ܘܲܝ.

¹⁰ ܘܟܲܕ݂ ܐܝܼܬܲܝܢ ܬܲܡܵܢ ܝܵܘ̈ܡܵܬ݂ܵܐ ܣܲܓܝܼܐܹ̈ܐ. ܢܚܸܬ݂ ܗ̄ܘܵܐ ܡܸܢ ܝܼܗܘܼܕ݂ ܢܒ݂ܝܼܵܐ ܚܲܕ݂. ܕܲܫܡܹܗ ܗܘܵܐ ܐܵܓ݂ܵܒ݂ܘܿܣ.

¹¹ ܘܥܲܠ ܠܘܵܬܲܢ. ܘܲܫܩܲܠ ܥܸܪܩܬ݂ܵܐ ܕܚܲܨܵܘ̈ܗܝ ܕܦܵܘܠܘܿܣ. ܘܐܸܣܲܪ ܪܸ̈ܓ݂ܠܹܐ ܕܢܲܦ̮ܫܹܗ ܘܐܝܼܕ݂ܵܘ̈ܗܝ. ܘܐܸܡܲܪ. ܗܵܟܲܢܵܐ ܐܵܡܲܪ ܪܘܼܚܵܐ ܕܩܘܼܕ݂ܫܵܐ. ܕܓܲܒ݂ܪܵܐ ܡܵܪܵܗܿ ܕܥܸܪܩܬ݂ܵܐ ܗܵܕܹܐ ܗܵܟܲܢܵܐ ܢܹܐܣܪܘܼܢܹܗ ܝܗ̄ܘܼܕ݂ܵܝܹ̈ܐ ܒܐܘܿܪܸܫܠܸܡ. ܘܢܲܫܠܡܘܼܢܹܗ ܒܐܝܼܕ݂ܲܝ̈ ܥܲܡ̈ܡܹܐ.

¹² ܘܟܲܕ݂ ܗܵܠܹܝܢ ܡܸܠܹ̈ܐ ܫܡܲܥܢ. ܒܥܲܝܢ ܡܸܢܹܗ ܚܢܲܢ ܘܲܒܢܲܝ̈ ܐܲܬ݂ܪܵܐ. ܕܠܵܐ ܢܹܐܙܲܠ ܠܐܘܿܪܸܫܠܸܡ.

¹³ ܗܵܝܕܹܝܢ ܥܢܵܐ ܘܐܸܡܲܪ ܦܵܘܠܘܿܣ. ܡܵܢܵܐ ܥܵܒ݂ܕܝܼܢ ܐܢ̄ܬܘܿܢ ܕܒ݂ܵܟ݂ܝܢ ܐܢ̄ܬܘܿܢ ܘܫܵܚܩܝܼܢ ܐܢ̄ܬܘܿܢ ܠܹܗ ܠܠܹܒܝ. ܐܸܢܵܐ ܓܹܝܪ ܠܵܐ ܗ̄ܘܵܐ ܕܐܸܬ݂ܐܣܲܪ ܒܲܠܚܘܿܕ݂ ܡܛܲܝܲܒ݂ ܐ̄ܢܵܐ. ܐܸܠܵܐ ܐܵܦ ܕܐܹܡܘܼܬ݂ ܒܐܘܿܪܸܫܠܸܡ ܚܠܵܦ ܫܡܹܗ ܕܡܵܪܲܢ ܝܼܫܘܿܥ.

¹⁴ ܘܟܲܕ݂ ܠܵܐ ܐܸܬܿܛܦܝܼܣ ܠܲܢ. ܒܗܸܠܢ ܠܲܢ. ܘܐܸܡܲܪܢ ܕܨܸܒ݂ܝܵܢܹܗ ܕܡܵܪܲܢ ܢܸܗܘܹܐ.

¹⁵ ܘܒܵܬܲܪ ܝܵܘ̈ܡܵܬ݂ܵܐ ܗܵܠܹܝܢ. ܐܸܬܿܛܲܝܲܒ݂ܢ ܘܲܣܠܸܩܢ ܠܲܢ ܠܐܘܿܪܸܫܠܸܡ.

¹⁶ ܘܐܸܬ݂ܵܘ ܗ̄ܘܼܵܘ ܥܲܡܲܢ ܐ̄ܢܵܫܵܐ ܬܲܠܡܝܼܕܹ̈ܐ ܡܸܢ ܩܹܣܲܪܝܵܐ. ܟܲܕ݂ ܕܒ݂ܝܼܪܝܼܢ ܥܲܡܗܘܿܢ ܐܲܚܵܐ ܚܲܕ݂ ܡܸܢ ܬܲܠܡܝܼܕܹ̈ܐ ܩܲܕ݂ܡܵܝܹ̈ܐ. ܕܲܫܡܹܗ ܗܘܵܐ ܡܢܵܣܘܿܢ. ܘܐܝܼܬ݂ܵܘܗܝ ܗ̄ܘܵܐ ܡܸܢ ܩܹܘܦܪܘܿܣ. ܕܲܢܩܲܒܠܲܢ ܒܒܲܝܬܹܿܗ.

¹⁷ ܘܟܲܕ݂ ܐܸܬܲܝܢ ܠܐܘܿܪܸܫܠܸܡ. ܩܲܒܠܘܼܢ ܐܲܚܹ̈ܐ ܚܵܕ݂ܝܵܐܝܼܬ݂.

¹⁸ ܘܲܠܝܵܘܡܵܐ ܐ̄ܚܪܹܢܵܐ. ܥܲܠܢ ܥܲܡ ܦܵܘܠܘܿܣ ܠܘܵܬ݂ ܝܲܥܩܘܿܒ݂. ܟܲܕ݂ ܐܝܼܬ݂ ܗ̄ܘܵܐ ܠܘܵܬܹܗ ܟܠܗܘܿܢ ܩܲܫܝܼܫܹ̈ܐ.

¹⁹ ܘܝܲܗ̄ܒ݂ܢ ܠܗܘܿܢ ܫܠܵܡܵܐ. ܘܡܸܫܬܲܥܹܐ ܗ̄ܘܵܐ ܠܗܘܿܢ ܦܵܘܠܘܿܣ ܒܵܬܲܪ ܒܵܬܲܪ. ܟܠܡܵܐ ܕܲܥܒܲܕ݂ ܐܲܠܵܗܵܐ ܒܥܲܡ̈ܡܹܐ ܒܬܸܫܡܸܫܬܹܿܗ.

²⁰ ܘܟܲܕ݂ ܫܡܲܥܘ. ܫܲܒܲܚܘ ܠܐܲܠܵܗܵܐ ܘܐܸܡܲܪܘ ܠܹܗ. ܚܵܙܹܐ ܐܲܢ̄ܬܿ ܐܲܚܘܼܢ. ܟܡܵܐ ܪܸ̈ܒܿܘܵܢ ܐܝܼܬ݂ ܒܝܼܗܘܼܕ݂ ܐܲܝܠܹܝܢ ܕܗܲܝܡܸܢܘ. ܘܟ݂ܠܗܘܿܢ ܗܵܠܹܝܢ ܛܲܢܵܢܹ̈ܐ ܐܸܢܘܿܢ ܕܢܵܡܘܿܣܵܐ.

²¹ ܐܸܬ݂ܐܡܲܪ ܠܗܘܿܢ ܕܹܝܢ ܥܠܲܝܟ. ܕܡܲܠܸܦ ܐܲܢ̄ܬܿ ܕܢܸܦܪܩܘܼܢ ܡܸܢ ܡܘܼܫܹܐ ܟܠܗܘܿܢ ܝܗ̄ܘܼܕ݂ܵܝܹ̈ܐ ܕܲܒ݂ܥܲܡ̈ܡܹܐ. ܟܲܕ݂ ܐܵܡܲܪ ܐܲܢ̄ܬܿ ܕܠܵܐ ܢܸܗܘܘܿܢ ܓܵܙܪܝܼܢ ܒܢܲܝ̈ܗܘܿܢ. ܘܠܵܐ ܒܲܥܝܵܕܹ̈ܐ ܕܢܵܡܘܿܣܵܐ ܢܸܗܘܘܿܢ ܡܗܲܠܟ݂ܝܼܢ.

²² ܡܛܠ ܗܵܟܹܝܠ ܕܡܸܫܬܲܡܥܵܐ ܗܝ ܠܗܘܿܢ ܕܐܸܬܲܝܬܿ ܠܟ݂ܵܐ.

²³ ܥܒܸܕ݂ ܡܸܕܸܡ ܕܐܵܡܪܝܼܢܲܢ ܠܵܟ݂. ܐܝܼܬ݂ ܠܲܢ ܓܲܒ݂ܪܹ̈ܐ ܐܲܪܒܥܵܐ. ܕܲܢܕ݂ܝܼܪ ܠܗܘܿܢ ܕܢܸܬܿܕܲܟܿܘܿܢ.

²⁴ ܕܒܲܪ ܐܸܢܘܿܢ ܘܙܸܠ ܐܸܬܿܕܲܟܵܐ ܥܲܡܗܘܿܢ. ܘܐܲܦܸܩ ܥܠܲܝܗܘܿܢ ܢܲܦ̈ܩܵܬ݂ܵܐ. ܐܲܝܟ݂ ܕܢܸܓ݂ܪܥܘܼܢ ܪܹ̈ܫܲܝܗܘܿܢ. ܘܡܸܬ݂ܝܲܕ݂ܥܵܐ ܠܟ݂ܠܢܵܫ. ܕܡܸܕܸܡ ܕܐܸܬ݂ܐܡܲܪ ܥܠܲܝܟ ܕܲܓܵܠ ܗ̄ܘܼ. ܘܐܲܢ̄ܬܿ ܠܢܵܡܘܿܣܵܐ ܫܵܠܹܡ ܐܲܢ̄ܬܿ ܘܢܵܛܲܪ.

²⁵ ܥܲܠ ܐܲܝܠܹܝܢ ܕܹܝܢ ܕܗܲܝܡܸܢܘ ܡܸܢ ܥܲܡ̈ܡܹܐ. ܚܢܲܢ ܟܬܲܒ݂ܢ. ܕܢܸܗܘܘܿܢ ܢܵܛܪܝܼܢ ܢܲܦ̮ܫܗܘܿܢ. ܡܸܢ ܕܲܕ݂ܒ݂ܝܼܚܵܐ. ܘܡܸܢ ܙܵܢܝܘܼܬ݂ܵܐ. ܘܡܸܢ ܚܢܝܼܩܵܐ. ܘܡܸܢ ܕܡܵܐ.

²⁶ ܗܵܝܕܹܝܢ ܦܵܘܠܘܿܣ ܕܒܲܪ ܐܸܢܘܿܢ ܠܓܲܒ݂ܪܹ̈ܐ ܗܵܠܹܝܢ ܠܝܵܘܡܵܐ ܐ̄ܚܪܹܢܵܐ. ܘܐܸܬܿܕܲܟܝܼ ܥܲܡܗܘܿܢ. ܘܥܲܠ ܐܸܙܲܠ ܠܗܲܝܟܠܵܐ ܟܲܕ݂ ܡܵܘܕܲܥ ܠܗܘܿܢ ܡܘܼܠܵܝܵܐ ܕܝܵܘ̈ܡܵܬ݂ܵܐ ܕܬܲܕ݂ܟܝܼܬ݂ܵܐ. ܥܕ݂ܲܡܵܐ ܕܐܬ݂ܩܲܪܲܒ݂ ܩܘܼܪܒܵܢܵܐ ܕܐ̄ܢܵܫ ܐ̄ܢܵܫ ܡܸܢܗܘܿܢ.

²⁷ ܘܟܲܕ݂ ܡܲܛܝܼ ܝܵܘܡܵܐ ܕܫܲܒ݂ܥܵܐ. ܝܗ̄ܘܼܕ݂ܵܝܹ̈ܐ ܕܡܸܢ ܐܵܣܝܼܵܐ ܚܙܵܐܘܼܗܝ ܒܗܲܝܟܠܵܐ. ܘܓܲܪܝܼܘ ܥܠܵܘܗܝ ܥܲܡܵܐ ܟܠܹܗ. ܘܐܲܪܡܝܼܘ ܥܠܵܘܗܝ ܐܝܼ̈ܕ݂ܲܝܵܐ.

²⁸ ܟܲܕ݂ ܡܒܲܓ݁ܢܝܼܢ ܘܐܵܡܪܝܼܢ. ܓܲܒ݂ܪܹ̈ܐ ܒܢܲܝ̈ ܝܼܣܪܵܝܹܠ. ܥܲܕܲܪܘ. ܗܵܢܵܐ ܗ̄ܘܼ ܓܲܒ݂ܪܵܐ ܕܠܘܼܩܒܲܠ ܥܲܡܵܐ ܕܝܼܠܲܢ ܡܲܠܸܦ ܒܟ݂ܠ ܕܘܼܟܵܐ. ܘܠܘܼܩܒܲܠ ܢܵܡܘܿܣܵܐ. ܘܠܘܼܩܒܲܠ ܐܲܬ݂ܪܵܐ ܗܵܢܵܐ. ܘܐܵܦ ܠܐܲܪ̈ܡܵܝܹܐ ܐܲܥܸܠ ܠܗܲܝܟܠܵܐ. ܘܣܲܝܒܹܗ ܠܐܲܬ݂ܪܵܐ ܗܵܢܵܐ ܩܲܕܝܼܫܵܐ.

²⁹ ܩܲܕܸܡܘ ܗ̄ܘܼܵܘ ܓܹܝܪ ܚܙܵܘ ܥܲܡܹܗ ܠܲܛܪܘܿܦܝܼܡܘܿܣ ܐܲܦܸܣܵܝܵܐ ܒܲܡܕ݂ܝܼܢ̄ܬܵܐ. ܘܣܵܒ݂ܪܝܼܢ ܗ̄ܘܼܵܘ ܕܥܲܡ ܦܵܘܠܘܿܣ ܥܲܠ ܠܗܲܝܟܠܵܐ.

³⁰ ܘܐܸܫܬܲܓ݂ܫܲܬ݂ ܟܠܵܗܿ ܡܕ݂ܝܼܢ̄ܬܵܐ ܘܐܸܬ݂ܟܲܢܲܫܘ. ܟܠܹܗ ܥܲܡܵܐ ܘܐܲܚܕܘܼܗܝ. ܠܦܵܘܠܘܿܣ ܘܓܲܪܘܼܗܝ ܠܒܲܪ ܡܸܢ ܗܲܝܟܠܵܐ ܘܒܲܪ ܫܵܥܬܹܗ ܐܸܬܿܬܿܚܸܕ݂ܘ ܬܲܪ̈ܥܹܐ.

³¹ ܘܟܲܕ݂ ܒܵܥܹܐ ܗ̄ܘܵܐ ܟܸܢܫܵܐ ܠܡܸܩܛܠܹܗ. ܐܸܫܬܲܡܥܲܬ݂ ܠܟ݂ܝܼܠܝܼܵܪܟܵܐ ܕܐܸܣܦܹܝܪ. ܕܟ݂ܠܵܗܿ ܡܕ݂ܝܼܢ̄ܬܵܐ ܐܸܬܿܬܿܙܝܼܥܲܬ݂ ܠܵܗܿ.

³² ܘܒܲܪ ܫܵܥܬܹܗ ܕܒܲܪ ܠܩܸܢܛܪܘܿܢܵܐ ܘܠܸܐܣܛܪ̈ܵܛܝܼܘܿܛܹܐ ܣܲܓܝܼܐܹ̈ܐ. ܘܲܪܗܸܛܘ ܥܠܲܝܗܘܿܢ. ܘܟܲܕ݂ ܚܙܵܘ ܠܟ݂ܝܼܠܝܼܵܪܟܵܐ ܘܠܸܐܣܛܪ̈ܵܛܝܼܘܿܛܹܐ. ܒܗܸܠܘ ܡܸܢ ܕܡܵܚܹܝܢ ܗ̄ܘܼܵܘ ܠܹܗ ܠܦܵܘܠܘܿܣ.

³³ ܘܲܩܪܸܒ݂ ܠܘܵܬܹܗ ܟܝܼܠܝܼܵܪܟܵܐ ܘܐܲܚܕܹܗ. ܘܲܦܩܲܕ݂ ܕܢܹܐܣܪܘܼܢܹܗ ܒܬܲܪܬܹܿܝܢ ܫܸܫܠܵܢ. ܘܲܡܫܲܐܸܠ ܗ̄ܘܵܐ ܥܠܵܘܗܝ. ܕܡܲܢܘܼ ܘܡܵܢܵܐ ܥܒܲܕ݂.

³⁴ ܘܩܵܥܹܝܢ ܗ̄ܘܼܵܘ ܥܠܵܘܗܝ ܐ̄ܢܵܫܵܐ ܡܸܢ ܐܵܟ݂ܠܘܿܣ ܡܸܕܸܡ ܡܸܕܸܡ. ܘܡܛܠ ܩܥܵܬ݂ܗܘܿܢ ܠܵܐ ܡܸܫܟܲܚ ܗ̄ܘܵܐ ܠܡܸܕ݂ܥ ܐܲܝܕ݂ܵܐ ܗܝ ܫܲܪܝܼܪܬܵܐ. ܘܲܦܩܲܕ݂ ܗ̄ܘܵܐ ܕܢܵܘܒܠܘܼܢܹܗ ܠܡܲܫܪܝܼܬ݂ܵܐ.

³⁵ ܘܟܲܕ݂ ܡܲܛܝܼ ܦܵܘܠܘܿܣ ܠܕ݂ܲܪ̈ܓܹܐ. ܛܲܥܢܘܼܗܝ ܐܸܣܛܪ̈ܵܛܝܼܘܿܛܹܐ ܡܛܠ ܩܛܝܼܪܵܐ ܕܥܲܡܵܐ.

³⁶ ܐܵܬܹܐ ܗ̄ܘܵܐ ܓܹܝܪ ܒܵܬ݂ܪܹܗ ܥܲܡܵܐ ܣܲܓܿܝܼܐܵܐ. ܘܩܵܥܹܝܢ ܗ̄ܘܼܵܘ ܘܐܵܡܪܝܼܢ. ܫܩܘܿܠܲܝܗܝ.

³⁷ ܘܟܲܕ݂ ܡܲܛܝܼ ܠܡܸܥܲܠ ܠܡܲܫܪܝܼܬ݂ܵܐ. ܗܘܼ ܦܵܘܠܘܿܣ. ܐܸܡܲܪ ܠܟ݂ܝܼܠܝܼܵܪܟܵܐ. ܐܸܢ ܡܲܦܸܣ ܐܲܢ̄ܬܿ ܠܝܼ. ܐܹܡܲܠܸܠ ܥܲܡܵܟ݂. ܗܘܼ ܕܹܝܢ ܐܸܡܲܪ ܠܹܗ. ܝܵܘܢܵܐܝܼܬ݂ ܝܵܕ݂ܲܥ ܐܲܢ̄ܬܿ.

³⁸ ܠܵܐ ܗ̄ܘܲܝܬܿ ܐܲܢ̄ܬܿ ܗܵܘ ܡܸܨܪܵܝܵܐ. ܕܲܩܕ݂ܵܡ ܝܵܘ̈ܡܵܬ݂ܵܐ ܗܵܠܹܝܢ ܐܲܙܝܼܥܬܿ ܘܐܲܦܸܩܬܿ ܠܡܲܕ݂ܒܪܵܐ. ܐܲܪܒܥܵܐ ܐܲܠܦ̈ܝܼܢ ܓܲܒ݂ܪܹ̈ܐ. ܥܵܒ݂ܕܲܝ̈ ܒ̈ܝܼܫܵܬ݂ܵܐ.

³⁹ ܐܵܡܲܪ ܠܹܗ ܦܵܘܠܘܿܣ. ܐܸܢܵܐ ܓܲܒ݂ܪܵܐ ܐ̄ܢܵܐ ܝܗܘܼܕ݂ܵܝܵܐ. ܡܸܢ ܛܲܪܣܘܿܣ ܕܩܝܼܠܝܼܩܝܼܵܐ ܡܕ݂ܝܼܢ̄ܬܵܐ ܝܼܕ݂ܝܼܥܬܵܐ ܕܒ݂ܵܗܿ ܝܼܠܝܼܕ݂ ܐ̄ܢܵܐ. ܒܵܥܹܐ ܐ̄ܢܵܐ ܡܸܢܵܟ݂. ܐܲܦܸܣ ܠܝܼ ܠܲܡܡܲܠܵܠܘܼ ܠܥܲܡܵܐ.

⁴⁰ ܘܟܲܕ݂ ܐܲܦܸܣ ܠܹܗ. ܩܵܡ ܦܵܘܠܘܿܣ ܥܲܠ ܕܲܪ̈ܓܹܐ. ܘܐܲܙܝܼܥ ܗ̄ܘܵܐ ܠܗܘܿܢ ܐܝܼܕܹܗ. ܘܟܲܕ݂ ܒܗܸܠܘ. ܡܲܠܸܠ ܥܲܡܗܘܿܢ ܥܸܒ݂ܪܵܐܝܼܬ݂ ܘܐܸܡܲܪ ܠܗܘܿܢ.

22

¹ ܐܲܚܹ̈ܐ ܘܐܲܒ݂ܵܗ̈ܵܬ݂ܵܐ. ܫܡܲܥܘ ܡܲܦܲܩ ܒܪܘܼܚ (ܒܪܘܼܚܝ) ܕܲܠܘܵܬ݂ܟ݂ܘܿܢ.

² ܘܟܲܕ݂ ܫܡܲܥܘ ܕܥܸܒ݂ܪܵܐܝܼܬ݂ ܡܡܲܠܸܠ ܗ̄ܘܵܐ ܥܲܡܗܘܿܢ. ܝܲܬܝܼܪܵܐܝܼܬ݂ ܒܗܸܠܘ. ܘܐܸܡܲܪ ܠܗܘܿܢ.

³ ܐܸܢܵܐ ܓܲܒ݂ܪܵܐ ܐ̄ܢܵܐ ܝܗ̄ܘܼܕ݂ܝܵܐ. ܘܝܼܠܝܼܕ݂ ܐ̄ܢܵܐ ܒܛܲܪܣܘܿܣ ܕܩܝܼܠܝܼܩܝܼܵܐ. ܐܸܬ݂ܪܲܒܝܼܬ݂ ܕܹܝܢ ܒܗܵܕܹܐ ܡܕ݂ܝܼܢ̄ܬܵܐ ܥܲܠ ܓܸܢ̄ܒ݂ ܪܸ̈ܓ݂ܠܵܘܗܝ ܕܓܲܡܠܝܼܐܹܝܠ. ܘܐܸܬ݂ܪܕ݂ܝܼܬ݂ ܓܡܝܼܪܵܐܝܼܬ݂ ܒܢܵܡܘܿܣܵܐ ܕܐܲܒ݂ܵܗܵܬܲܢ. ܘܐܝܼܬܲܝ ܗ̄ܘܹܝܬ݂ ܛܲܢܵܢܵܐ ܕܐܲܠܵܗܵܐ. ܐܲܝܟ݂ ܡܵܐ ܕܐܵܦ ܐܲܢ̄ܬܿܘܿܢ ܟܠܟ݂ܘܿܢ ܐܝܼܬܲܝܟܘܿܢ.

⁴ ܘܲܠܗܵܕܹܐ ܐܘܼܪܚܵܐ ܪܸܕ݂ܦܹܬ݂ ܥܕ݂ܲܡܵܐ ܠܡܵܘܬܵܐ. ܟܲܕ݂ ܐܵܣܲܪ ܗ̄ܘܹܝܬ݂ ܘܡܲܫܠܸܡ ܗ̄ܘܹܝܬ݂ ܠܒܹܝܬ݂ ܐܲܣܝܼܪܹ̈ܐ ܓܲܒ݂ܪܹ̈ܐ ܘܢܸܫܹ̈ܐ.

⁵ ܐܲܝܟ݂ ܡܵܐ ܕܣܵܗܹܕ݂ ܥܠܲܝ ܪܲܒ ܟܵܗܢܹ̈ܐ ܘܟ݂ܠܗܘܿܢ ܩܲܫܝܼܫܹ̈ܐ. ܕܡܸܢܗܘܿܢ ܩܲܒܠܹܬ݂ ܐܸܓܪ̈ܵܬ݂ܵܐ ܕܐܹܙܲܠ ܠܘܵܬ݂ ܐܲܚܹ̈ܐ ܕܲܒ݂ܕ݂ܲܪܡܣܘܿܩ. ܕܐܵܦ ܠܗܵܢܘܿܢ ܕܐܝܼܬ݂ ܗ̄ܘܼܵܘ ܬܲܡܵܢ. ܐܲܝܬܹܐ ܐܸܢܘܿܢ ܠܐܘܿܪܸܫܠܸܡ ܟܲܕ݂ ܐܲܣܝܼܪܝܼܢ. ܘܲܢܩܲܒܠܘܼܢ ܡܣܵܡ ܒܪܹܫܵܐ.

⁶ ܘܟܲܕ݂ ܐܵܙܹܠ ܗ̄ܘܹܝܬ݂ ܘܫܲܪܝܼܬ݂ ܡܡܲܛܹܐ ܐ̄ܢܵܐ ܠܕ݂ܲܪܡܣܘܿܩ: ܒܦܸܠܓܹܗ ܕܝܵܘܡܵܐ ܡܸܢ ܬܚܹܝܬ݂ ܫܸܠܝܵܐ ܡܸܢ ܫܡܲܝܵܐ. ܐܲܙܠܸܓ݂ ܥܠܲܝ ܢܘܼܗܪܵܐ ܣܲܓܿܝܼܐܵܐ.

⁷ ܘܢܸܦܠܹܬ݂ ܥܲܠ ܐܲܪܥܵܐ. ܘܫܸܡܥܹܬ݂ ܩܵܠܵܐ ܕܐܵܡܲܪ ܗ̄ܘܵܐ ܠܝܼ. ܫܵܐܘܿܠ ܫܵܐܘܿܠ. ܡܵܢܵܐ ܪܵܕܹܦ ܐܲܢ̄ܬܿ ܠܝܼ.

⁸ ܐܸܢܵܐ ܕܹܝܢ ܥܢܝܼܬ݂ ܘܐܸܡܪܹܬ݂. ܡܲܢ ܐܲܢ̄ܬܿ ܡܵܪܝ. ܘܗܘܼ ܐܸܡܲܪ ܠܝܼ. ܐܸܢܵܐ ܗܘܼ ܝܼܫܘܿܥ ܢܵܨܪܵܝܵܐ ܕܐܲܢ̄ܬܿ ܪܵܕܹܦ ܐܲܢ̄ܬܿ.

⁹ ܘܐ̄ܢܵܫܵܐ ܕܐܝܼܬ݂ ܗ̄ܘܼܵܘ ܥܲܡܝ ܚܙܵܘ ܢܘܼܗܪܵܐ. ܩܵܠܵܐ ܕܹܝܢ ܠܵܐ ܫܡܲܥܘ ܕܗܵܘ ܕܲܡܡܲܠܸܠ ܗ̄ܘܵܐ ܥܲܡܝ.

¹⁰ ܘܐܸܡܪܹܬ݂ ܡܵܢܵܐ ܐܸܥܒܸܕ݂ ܡܵܪܝ. ܘܡܵܪܲܢ ܐܸܡܲܪ ܠܝܼ. ܩܘܼܡ ܙܸܠ ܠܕ݂ܲܪܡܣܘܿܩ. ܘܬܲܡܵܢ ܢܸܬ݂ܡܲܠܲܠ ܥܲܡܵܟ݂ ܥܲܠ ܟܠ ܡܸܕܸܡ ܕܡܸܬ݂ܦܩܸܕ݂ ܠܵܟ݂ ܕܬܸܥܒܸܿܕ݂.

¹¹ ܘܟܲܕ݂ ܠܵܐ ܡܸܬ݂ܚܙܹܐ ܗ̄ܘܵܐ ܠܝܼ ܡܛܠ ܬܸܫܒܘܼܚܬܹܿܗ ܕܢܘܼܗܪܵܐ ܗܵܘ. ܐܲܚܕܘܼܢܝ ܒܐܝܼܕ݂ܲܝ̈ ܗܵܢܘܿܢ ܕܥܲܡܝ ܗ̄ܘܼܵܘ. ܘܥܸܠܹܬ݂ ܠܕ݂ܲܪܡܣܘܿܩ.

¹² ܘܓܲܒ݂ܪܵܐ ܚܲܕ݂ ܚܲܢܲܢܝܵܐ ܟܹܐܢܵܐ ܒܢܵܡܘܿܣܵܐ. ܐܲܝܟ݂ ܕܣܵܗܕܝܼܢ ܗ̄ܘܼܵܘ ܥܠܵܘܗܝ ܟܠܗܘܿܢ ܝܗ̄ܘܼܕ݂ܵܝܹ̈ܐ ܕܬܲܡܵܢ.

¹³ ܐܸܬ݂ܵܐ ܠܘܵܬ݂ܝ. ܘܐܸܡܲܪ ܠܝܼ. ܫܵܐܘܿܠ ܐܵܚܝ. ܦܬܲܚ ܥܲܝܢܲܝ̈ܟ. ܘܒ݂ܵܗܿ ܒܫܵܥܬ݂ܵܐ ܐܸܬ݂ܦܲܬܲܚ ܥܲܝܢܲܝ̈ ܘܚܵܪܹܬ݂ ܒܹܗ.

¹⁴ ܘܐܸܡܲܪ ܠܝܼ. ܐܲܠܵܗܵܐ ܕܐܲܒ݂ܵܗ̈ܵܬܲܢ ܐܲܩܝܼܡܵܟ݂ ܠܡܸܕ݂ܥ ܨܸܒ݂ܝܵܢܹܗ. ܘܬܸܚܙܹܐ ܠܙܲܕܝܼܩܵܐ ܘܬܸܫܡܲܥ ܩܵܠܵܐ ܡܸܢ ܦܘܼܡܹܗ.

¹⁵ ܘܬܸܗܘܹܐ ܠܹܗ ܣܵܗܕܵܐ ܠܘܵܬ݂ ܟܠܗܘܿܢ ܒܢܲܝ̈ܢܵܫܵܐ. ܥܲܠ ܟܘܼܠ ܡܵܐ ܕܲܚܙܲܝܬܿ ܘܲܫܡܲܥܬܿ.

¹⁶ ܘܗܵܫܵܐ ܡܵܢܵܐ ܡܸܫܬܵܘܚܲܪ ܐܲܢ̄ܬܿ. ܩܘܼܡ ܥܡܲܕ݂ ܘܐܸܬܿܕܲܟܵܐ ܡܸܢ ܚܛܵܗܲܝ̈ܟ. ܟܲܕ݂ ܩܵܪܹܐ ܐܲܢ̄ܬܿ ܫܡܹܗ.

¹⁷ ܘܗܸܦܟܹܬ݂ ܐܸܬܹܝܬ݂ ܠܟ݂ܵܐ ܠܐܘܿܪܸܫܠܸܡ. ܘܨܲܠܝܼܬ݂ ܒܗܲܝܟܠܵܐ.

¹⁸ ܘܲܚܙܹܝܬܹܗ ܒܚܸܙܘܵܐ ܟܲܕ݂ ܐܵܡܲܪ ܠܝܼ. ܐܸܣܬܲܪܗܲܒ݂ ܘܦܘܼܩ ܠܵܟ݂ ܡܸܢ ܐܘܿܪܸܫܠܸܡ. ܡܛܠ ܕܠܵܐ ܡܩܲܒܠܝܼܢ ܣܵܗܕܘܬ݂ܵܟ݂ ܕܲܥܠܲܝ.

¹⁹ ܘܐܸܢܵܐ ܐܸܡܪܹܬ݂. ܡܵܪܝ ܐܵܦ ܗܸܢܘܿܢ ܝܵܕ݂ܥܝܼܢ. ܕܐܸܢܵܐ ܡܲܫܠܸܡ ܗ̄ܘܹܝܬ݂ ܠܒܹܝܬ݂ ܐܲܣܝܼܪܹ̈ܐ. ܘܡܵܚܹܐ ܗ̄ܘܹܝܬ݂ ܒܟ݂ܠ ܟܢ̈ܘܼܫܵܢ ܠܐܲܝܠܹܝܢ ܕܲܡܗܲܝܡܢܝܼܢ ܗ̄ܘܼܵܘ ܒܵܟ݂.

²⁰ ܘܟܲܕ݂ ܡܸܬ݂ܐܫܸܕ݂ ܗ̄ܘܵܐ ܕܡܹܗ ܕܐܸܣܛܲܦܵܢܘܿܣ ܣܵܗܕܵܟ݂. ܘܐܵܦ ܐܸܢܵܐ ܥܲܡܗܘܿܢ ܩܵܐܹܡ ܗ̄ܘܹܝܬ݂ ܘܫܵܠܹܡ ܗ̄ܘܹܝܬ݂ ܠܨܸܒ݂ܝܵܢܗܘܿܢ ܕܩܵܛܘܼܠܵܘ̈ܗܝ. ܘܢܵܛܲܪ ܗ̄ܘܹܝܬ݂ ܡܵܐܢܹ̈ܐ ܕܐܲܝܠܹܝܢ ܕܪܵܓ݂ܡܝܼܢ ܗ̄ܘܼܵܘ ܠܹܗ.

²¹ ܘܐܸܡܲܪ ܠܝܼ. ܙܸܠ. ܕܐܸܢܵܐ ܡܫܲܕܲܪ ܐ̄ܢܵܐ ܠܵܟ݂ ܠܪܘܼܚܩܵܐ ܠܡܲܟ݂ܪܵܙܘܼ ܠܥܲܡ̈ܡܹܐ.

²² ܘܟܲܕ݂ ܫܲܡܥܘܼܗܝ ܠܦܵܘܠܘܿܣ ܥܕ݂ܲܡܵܐ ܠܗܵܕܹܐ ܡܸܠܬ݂ܵܐ. ܐܲܪܝܼܡܘ ܩܵܠܗܘܿܢ ܘܲܩܥܵܘ. ܢܸܫܬܿܩܸܠ ܡܸܢ ܐܲܪܥܵܐ ܐܲܝܢܵܐ ܕܗܵܟܲܢܵܐ ܗ̄ܘܼ. ܠܵܐ ܓܹܝܪ ܘܵܠܹܐ ܠܹܗ ܠܡܸܚܵܐ.

²³ ܘܟܲܕ݂ ܡܒܲܓ݁ܢܝܼܢ ܗ̄ܘܼܵܘ. ܘܲܡܫܲܕܹܝܢ ܗ̄ܘܼܵܘ ܡܵܐܢܲܝ̈ܗܘܿܢ. ܘܡܲܣܩܝܼܢ ܗ̄ܘܼܵܘ ܚܸܠܵܐ ܠܲܫܡܲܝܵܐ.

²⁴ ܦܩܲܕ݂ ܟܝܼܠܝܼܵܪܟܵܐ ܕܢܲܥܠܘܼܢܹܗ ܠܡܲܫܪܝܼܬ݂ܵܐ. ܘܲܦܩܲܕ݂ ܕܲܒ݂ܢܸܓ݂ܕܹ̈ܐ ܢܸܫܬܲܐܲܠ. ܐܲܝܟ݂ ܕܢܸܕܲܥ ܡܛܠ ܐܲܝܕ݂ܵܐ ܥܸܠܬ݂ܵܐ ܩܵܥܹܝܢ ܗ̄ܘܼܵܘ ܥܠܵܘܗܝ.

²⁵ ܘܟܲܕ݂ ܡܲܬ݂ܚܘܼܗܝ ܒܥܲܪܩܹ̈ܐ. ܐܸܡܲܪ ܗܘܼ ܦܵܘܠܘܿܣ ܠܩܸܢܛܪܘܿܢܵܐ ܕܩܵܐܹܡ ܗ̄ܘܵܐ ܥܠܵܘܗܝ. ܡܲܦܲܣ ܠܟ݂ܘܿܢ. ܕܲܠܓܲܒ݂ܪܵܐ ܪܗ̄ܘܿܡܵܝܵܐ ܕܠܵܐ ܡܚܲܝܲܒ݂ ܕܲܬ݂ܢܲܓܕ݂ܘܼܢ.

²⁶ ܘܟܲܕ݂ ܫܡܲܥ ܩܸܢܛܪܘܿܢܵܐ. ܩܪܸܒ݂ ܠܘܵܬ݂ ܟܝܼܠܝܼܵܪܟܵܐ ܘܐܸܡܲܪ ܠܹܗ. ܡܵܢܵܐ ܥܵܒܹܿܕ݂ ܐܲܢ̄ܬܿ. ܗܵܢܵܐ ܓܹܝܪ ܓܲܒ݂ܪܵܐ ܪܗ̄ܘܿܡܵܝܵܐ ܗ̄ܘܼ.

²⁷ ܘܲܩܪܸܒ݂ ܠܘܵܬܹܗ ܟܝܼܠܝܼܵܪܟܵܐ ܘܐܸܡܲܪ ܠܹܗ. ܐܸܡܲܪ ܠܝܼ ܐܲܢ̄ܬܿ ܪܗ̄ܘܿܡܵܝܵܐ ܐܲܢ̄ܬܿ. ܘܐܸܡܲܪ ܠܹܗ. ܐܹܝܢ.

²⁸ ܘܲܥܢܵܐ ܟܝܼܠܝܼܵܪܟܵܐ ܘܐܸܡܲܪ. ܐܸܢܵܐ ܒܟܸܣܦܵܐ ܣܲܓܿܝܼܐܵܐ ܩܢܹܝܬ݂ܵܗܿ ܠܪܗ̄ܘܿܡܵܝܘܼܬ݂ܵܐ. ܐܵܡܲܪ ܠܹܗ ܦܵܘܠܘܿܣ. ܐܸܢܵܐ ܕܹܝܢ ܐܵܦ ܒܵܗܿ ܐܸܬ݂ܝܲܠܕܹܿܬ݂.

²⁹ ܘܡܸܚܕ݂ܵܐ ܦܪܲܩܘ ܠܗܘܿܢ ܡܸܢܹܗ ܗܵܢܘܿܢ ܕܒ݂ܵܥܹܝܢ ܗ̄ܘܼܵܘ ܠܲܡܢܲܓܵܕ݂ܘܼܬܹܗ. ܘܲܕ݂ܚܸܠ ܟܝܼܠܝܼܵܪܟܵܐ. ܟܲܕ݂ ܝܼܠܸܦ ܕܪܗ̄ܘܿܡܵܝܵܐ ܗ̄ܘܼ. ܥܲܠ ܕܦܲܟ݂ܪܹܗ ܗ̄ܘܵܐ.

³⁰ ܘܲܠܝܵܘܡܵܐ ܐ̄ܚܪܹܢܵܐ. ܨܒ݂ܵܐ ܗ̄ܘܵܐ ܠܡܸܕ݂ܥ ܫܲܪܝܼܪܵܐܝܼܬ݂. ܕܡܵܢܵܐ ܗܝ ܩܛܸܓ݂ܪܵܢܘܼܬ݂ܵܐ ܕܡܲܝܬܹܿܝܢ ܗ̄ܘܼܵܘ ܥܠܵܘܗܝ ܝܗ̄ܘܼܕ݂ܵܝܹ̈ܐ. ܘܲܫܪܵܝܗܝ ܘܲܦܩܲܕ݂. ܕܢܹܐܬ݂ܘܢ ܪ̈ܲܒܲܝ ܟܵܗܢܹ̈ܐ ܘܟ݂ܠܹܗ ܟܸܢܫܵܐ ܕܪܹ̈ܫܲܝܗܘܿܢ. ܘܲܕ݂ܒܲܪ ܠܦܵܘܠܘܿܣ ܘܐܲܚܸܬ݂ ܐܲܩܝܼܡܹܗ ܒܲܝܢܵܬ݂ܗܘܿܢ.

23

¹ ܘܟܲܕ݂ ܚܵܪ ܦܵܘܠܘܿܣ ܒܟܸܢܫܗܘܿܢ. ܐܸܡܲܪ. ܓܲܒ݂ܪܹ̈ܐ ܐܲܚܲܝ̈. ܐܸܢܵܐ ܒܟ݂ܠ ܬܹܐܪܬܵܐ ܛܵܒ݂ܬ݂ܵܐ ܐܸܬܿܕܲܒܪܹܬ݂ ܩܕ݂ܵܡ ܐܲܠܵܗܵܐ ܥܕ݂ܲܡܵܐ ܠܝܵܘܡܵܢܵܐ.

² ܘܚܲܢܲܢܝܵܐ ܟܵܗܢܵܐ ܦܩܲܕ݂ ܠܗܵܢܘܿܢ ܕܩܵܝܡܝܼܢ ܥܲܠ ܓܲܒܹܗ. ܕܢܸܡܚܘܿܢܹܗ ܠܦܵܘܠܘܿܣ ܥܲܠ ܦܘܼܡܹܗ.

³ ܘܦܵܘܠܘܿܣ ܐܸܡܲܪ ܠܹܗ. ܥܬ݂ܝܼܕ݂ ܗܘܼ ܐܲܠܵܗܵܐ ܕܢܸܡܚܹܝܟ݂. ܐܸܣܬ݂ܵܐ ܡܚܵܘܲܪܬܵܐ. ܘܐܲܢ̄ܬܿ ܝܵܬܹܿܒ݂ ܐܲܢ̄ܬܿ ܕܵܐܹܢ ܐܲܢ̄ܬܿ ܠܝܼ ܐܲܝܟ݂ ܕܲܒ݂ܢܵܡܘܿܣܵܐ. ܟܲܕ݂ ܥܵܒܲܪ ܐܲܢ̄ܬܿ ܥܲܠ ܢܵܡܘܿܣܵܐ ܘܦܵܩܹܕ݂ ܐܲܢ̄ܬܿ ܕܢܸܡܚܘܿܢܵܢܝ.

⁴ ܘܐܲܝܠܹܝܢ ܕܩܵܝܡܝܼܢ ܗ̄ܘܼܵܘ ܬܲܡܵܢ ܐܵܡܪܝܼܢ ܠܹܗ. ܠܟ݂ܵܗܢܵܐ ܕܐܲܠܵܗܵܐ ܡܨܲܚܹܐ ܐܲܢ̄ܬܿ.

⁵ ܐܵܡܲܪ ܠܗܘܿܢ ܦܵܘܠܘܿܣ. ܠܵܐ ܝܵܕ݂ܲܥ ܗ̄ܘܹܝܬ݂ ܐܲܚܲܝ̈. ܕܟ݂ܵܗܢܵܐ ܗ̄ܘܼ. ܟܬ݂ܝܼܒ݂ ܗܘܼ ܓܹܝܪ ܕܲܠܪܹܫܵܐ ܕܥܲܡܵܟ݂ ܠܵܐ ܬܿܠܘܼܛ.

⁶ ܘܟܲܕ݂ ܝܼܕ݂ܲܥ ܦܵܘܠܘܿܣ ܕܡܸܢܹܗ ܕܥܲܡܵܐ ܐܝܼܬ݂ܵܘܗܝ ܕܙܲܕܘܼܩܵܝܹ̈ܐ ܘܡܸܢܹܗ ܕܲܦܪ̈ܝܼܫܹܐ. ܩܥܵܐ ܗ̄ܘܵܐ ܒܟܸܢܫܵܐ. ܓܲܒ݂ܪܹ̈ܐ ܐܲܚܲܝ̈. ܐܸܢܵܐ ܦܪܝܼܫܵܐ ܐ̄ܢܵܐ ܒܲܪ ܦܪ̈ܝܼܫܹܐ. ܘܥܲܠ ܣܲܒ݂ܪܵܐ ܕܲܩܝܵܡܬܵܐ ܕܡܝܼܬܹ̈ܐ ܡܸܬܿܕ݂ܝܼܢ ܐ̄ܢܵܐ.

⁷ ܘܟܲܕ݂ ܗܵܕܹܐ ܐܸܡܲܪ. ܢܦܲܠܘ ܚܲܕ݂ ܒܚܲܕ݂ ܦܪ̈ܝܼܫܹܐ ܘܙܲܕܘܼܩܵܝܹ̈ܐ. ܘܐܸܬ݂ܦܠܸܓ݂ ܥܲܡܵܐ.

⁸ ܙܲܕܘܼܩܵܝܹ̈ܐ ܓܹܝܪ ܐܵܡܪܝܼܢ. ܕܠܲܝܬܿ ܩܝܵܡܬܵܐ ܘܠܵܐ ܡܲܠܲܐܟܹ̈ܐ ܘܠܵܐ ܪܘܼܚܵܐ. ܦܪ̈ܝܼܫܹܐ ܕܹܝܢ ܡܵܘܕܹܝܢ ܒܟ݂ܠܗܹܝܢ.

⁹ ܘܲܗܘܵܐ ܩܵܠܵܐ ܪܲܒܵܐ. ܘܩܵܡܘ ܐ̄ܢܵܫܵܐ ܣܵܦܪܹ̈ܐ ܡܸܢ ܓܲܒܵܐ ܕܲܦܪ̈ܝܼܫܹܐ. ܘܢܵܨܹܝܢ ܗ̄ܘܼܵܘ ܥܲܡܗܘܿܢ. ܘܐܵܡܪܝܼܢ. ܠܵܐ ܡܸܫܟܿܚܝܼܢܲܢ ܡܸܕܸܡ ܕܒ݂ܝܼܫ ܒܗܵܢܵܐ ܓܲܒ݂ܪܵܐ. ܐܸܢ ܕܹܝܢ ܪܘܼܚܵܐ ܐܵܘ ܡܲܠܲܐܟ݂ܵܐ ܡܲܠܸܠ ܥܲܡܹܗ. ܡܵܢܵܐ ܐܝܼܬ݂ ܒܵܗܿ ܒܗܵܕܹܐ.

¹⁰ ܘܟܲܕ݂ ܗܘܵܐ ܫܓ݂ܘܼܫܝܵܐ ܪܲܒܵܐ ܒܲܝܢܵܬ݂ܗܘܿܢ. ܕܚܸܠ ܗ̄ܘܵܐ ܟܝܼܠܝܼܵܪܟܵܐ. ܕܲܠܡܵܐ ܢܦܲܫܚܘܼܢܹܗ ܠܦܵܘܠܘܿܣ. ܘܲܫܠܲܚ ܠܪ̈ܗ̄ܘܿܡܵܝܹܐ. ܕܢܹܐܬ݂ܘܢ ܢܸܚܛܦܘܼܢܹܗ ܡܸܢ ܡܨܲܥܬ݂ܗܘܿܢ. ܘܢܲܥܠܘܼܢܹܗ ܠܡܲܫܪܝܼܬ݂ܵܐ.

¹¹ ܘܟܲܕ݂ ܗܘܵܐ ܠܸܠܝܵܐ. ܐܸܬ݂ܚܙܝܼ ܠܹܗ ܡܵܪܲܢ ܠܦܵܘܠܘܿܣ. ܘܐܸܡܲܪ ܠܹܗ. ܐܸܬ݂ܚܲܝܲܠ. ܡܛܠ ܕܐܲܝܟ݂ ܕܐܲܣܗܸܕ݂ܬܿ ܥܠܲܝ ܒܐܘܿܪܸܫܠܸܡ. ܗܵܟܲܢܵܐ ܥܬ݂ܝܼܕ݂ ܐܲܢ̄ܬܿ ܕܐܵܦ ܒܪܗ̄ܘܿܡܹܐ ܬܲܣܗܸܕ݂.

¹² ܘܟܲܕ݂ ܗܘܵܐ ܨܲܦܪܵܐ. ܐܸܬ݂ܟܲܢܲܫܘ ܗ̄ܘܼܵܘ ܐ̄ܢܵܫ̈ܝܼܢ ܡܸܢ ܝܗ̄ܘܼܕ݂ܵܝܹ̈ܐ. ܘܐܲܚܪܸܡܘ ܥܠܲܝܗܘܿܢ. ܕܠܵܐ ܢܹܐܟ݂ܠܘܼܢ ܘܠܵܐ ܢܸܫܬܿܘܢ ܥܕ݂ܲܡܵܐ ܕܢܸܩܛܠܘܼܢܹܗ ܠܦܵܘܠܘܿܣ.

¹³ ܗܵܘܹܝܢ ܗ̄ܘܼܵܘ ܕܹܝܢ ܗܵܢܘܿܢ ܕܐܲܩܝܼܡܘ ܒܡܵܘ̈ܡܵܬ݂ܵܐ ܗܵܢܵܐ ܩܝܵܡܵܐ. ܝܲܬܿܝܼܪ ܡܸܢ ܐܲܪܒܥܝܼܢ ܓܲܒ݂ܪ̈ܝܼܢ.

¹⁴ ܘܐܸܬ݂ܩܲܪܲܒ݂ܘ ܠܘܵܬ݂ ܟܵܗܢܹ̈ܐ ܘܲܠܘܵܬ݂ ܩܲܫܝܼܫܹ̈ܐ. ܘܐܵܡܪܝܼܢ ܗ̄ܘܼܵܘ. ܕܚܸܪܡܵܐ ܐܲܚܪܸܡܢ ܥܠܲܝܢ. ܕܡܸܕܸܡ ܠܵܐ ܢܸܛܥܲܡ ܥܕ݂ܲܡܵܐ ܕܢܸܩܛܘܼܠ ܠܦܵܘܠܘܿܣ.

¹⁵ ܘܗܵܫܵܐ ܒܥܵܘ ܐܲܢ̄ܬܿܘܿܢ ܘܪܹ̈ܫܹܐ ܕܲܟܢܘܼܫܬܵܐ ܡܸܢ ܟܝܼܠܝܼܵܪܟܵܐ. ܕܢܲܝܬܿܝܼܘܗܝ ܠܘܵܬ݂ܟ݂ܘܿܢ ܐܲܝܟ݂ ܒܵܥܹܝܢ ܐܢ̄ܬܘܿܢ ܕܬܸܒ݂ܨܘܿܢ ܫܲܪܝܼܪܵܐܝܼܬ݂ ܣܘܼܥܪܵܢܹܗ. ܘܲܚܢܲܢ ܡܛܲܝܒ݂ܝܼܢܲܢ ܕܢܸܩܛܠܝܼܘܗܝ ܥܲܕ݂ܠܵܐ ܢܸܡܛܹܐ ܠܘܵܬ݂ܟ݂ܘܿܢ.

¹⁶ ܘܲܫܡܲܥ ܗ̄ܘܵܐ ܒܲܪ ܚܵܬܹܗ ܕܦܵܘܠܘܿܣ ܐܵܦܲܪܣܢܵܐ ܗܵܢܵܐ. ܘܥܲܠ ܠܡܲܫܪܝܼܬ݂ܵܐ ܘܒܲܕܸܩ ܠܦܵܘܠܘܿܣ.

¹⁷ ܘܫܲܕܲܪ ܦܵܘܠܘܿܣ ܩܪܵܐ ܠܚܲܕ݂ ܡܸܢ ܩܸܢܛܪ̈ܘܿܢܹܐ ܘܐܸܡܲܪ ܠܹܗ. ܐܵܘܒܸܠ ܠܲܥܠܲܝܡܵܐ ܗܵܢܵܐ ܠܘܵܬ݂ ܟܝܼܠܝܼܵܪܟܵܐ. ܐܝܼܬ݂ ܠܹܗ ܓܹܝܪ ܡܸܕܸܡ ܕܢܹܐܡܲܪ ܠܹܗ.

¹⁸ ܘܕ݂ܲܒ݂ܪܹܗ ܩܸܢܛܪܘܿܢܵܐ ܠܲܥܠܲܝܡܵܐ. ܘܐܲܥܠܹܗ ܠܘܵܬ݂ ܟܝܼܠܝܼܵܪܟܵܐ ܘܐܸܡܲܪ. ܦܵܘܠܘܿܣ ܐܲܣܝܼܪܵܐ ܩܪܵܢܝ. ܘܒ݂ܵܥܹܐ ܡܹܢܝ. ܕܐܲܝܬܹܐ ܗܵܢܵܐ ܥܠܲܝܡܵܐ ܠܘܵܬ݂ܵܟ݂. ܕܐܝܼܬ݂ ܠܹܗ ܡܸܕܸܡ ܕܢܹܐܡܲܪ ܠܵܟ݂.

¹⁹ ܘܐܲܚܕܹܗ ܒܐܝܼܕ݂ܗ ܟܝܼܠܝܼܵܪܟܵܐ ܠܲܥܠܲܝܡܵܐ. ܘܢܲܓ݂ܕܹܗ ܠܚܲܕ݂ ܓܲܒܵܐ. ܘܲܡܫܲܐܸܠ ܗ̄ܘܵܐ ܠܹܗ. ܕܡܵܢܵܐ ܐܝܼܬ݂ ܠܵܟ݂ ܕܬܹܐܡܲܪ ܠܝܼ.

²⁰ ܘܐܸܡܲܪ ܠܹܗ ܥܠܲܝܡܵܐ. ܝܗ̄ܘܼܕ݂ܵܝܹ̈ܐ ܐܸܬ݂ܚܲܫܲܒ݂ܘ ܕܢܸܒ݂ܥܘܼܢ ܡܸܢܵܟ݂. ܕܬܲܚܸܬ݂ ܠܦܵܘܠܘܿܣ ܡܚܵܪ ܠܟܸܢܫܗܘܿܢ. ܐܲܝܟ݂ ܨܵܒܹܝܢ ܡܸܕܸܡ ܝܲܬܿܝܼܪ ܕܢܹܐܠܦܘܼܢ ܡܸܢܹܗ.

²¹ ܐܲܢ̄ܬܿ ܗܵܟܹܝܠ ܠܵܐ ܬܸܬܿܛܦܝܼܣ ܠܗܘܿܢ. ܗܵܐ ܓܹܝܪ ܝܲܬܿܝܼܪ ܡܸܢ ܐܲܪܒܥܝܼܢ ܓܲܒ݂ܪ̈ܝܼܢ ܡܸܢܗܘܿܢ ܢܵܛܪܝܼܢ ܠܹܗ ܒܲܟ݂ܡܹܐܢܵܐ. ܘܐܲܚܪܸܡܘ ܥܲܠ ܢܲܦ̮ܫܗܘܿܢ. ܕܠܵܐ ܢܹܐܟ݂ܠܘܼܢ ܘܠܵܐ ܢܸܫܬܿܘܢ ܥܕ݂ܲܡܵܐ ܕܢܸܩܛܠܘܼܢܹܗ. ܘܗܵܐ ܡܛܲܝܒ݂ܝܼܢ ܘܲܡܩܵܘܹܝܢ ܠܫܘܼܘܕܵܝܵܟ݂.

²² ܘܲܫܪܵܝܗܝ ܟܝܼܠܝܼܵܪܟܵܐ ܠܲܥܠܲܝܡܵܐ ܟܲܕ݂ ܦܲܩܕܹܗ. ܕܐ̄ܢܵܫ ܠܵܐ ܢܸܕ݂ܥ ܕܗܵܠܹܝܢ ܒܲܕܸܩܬܿ ܠܝܼ.

²³ ܘܲܩܪܵܐ ܠܲܬ݂ܪܹܝܢ ܩܸܢܛܪ̈ܘܿܢܝܼܢ ܘܐܸܡܲܪ ܠܗܘܿܢ. ܙܸܠܘ ܥܲܬܸܿܕ݂ܘ ܪ̈ܗ̄ܘܿܡܵܝܹܐ ܡܲܐܬܹܝܢ ܕܢܹܐܙܠ̄ܘܼܢ ܠܩܹܣܲܪܝܵܐ. ܘܦܲܪ̈ܵܫܹܐ ܫܲܒ݂ܥܝܼܢ. ܘܫܵܕ݂ܝܲܝ̈ ܒܝܲܡܝܼܢܵܐ ܡܲܐܬܹܝܢ. ܕܢܸܦܩܘܼܢ ܡܸܢ ܬܿܠܵܬ݂ ܫܵܥܝܼ̈ܢ ܒܠܸܠܝܵܐ.

²⁴ ܛܲܝܸܒ݂ܘ ܕܹܝܢ ܐܵܦ ܒܥܝܼܪܵܐ. ܐܲܝܟ݂ ܕܢܲܪܟܒ݂ܘܼܢ ܠܦܵܘܠܘܿܣ ܘܲܢܦܲܠܛܘܼܢܹܗ ܠܘܵܬ݂ ܦܝܼܠܸܟܿܣ ܗܸܓ݂ܡܘܿܢܵܐ.

²⁵ ܘܲܟܬܲܒ݂ ܐܸܓܲܪܬܵܐ ܝܲܗ̄ܒ݂ ܠܗܘܿܢ. ܕܐܝܼܬ݂ ܒܵܗܿ ܗܵܟܲܢܵܐ.

²⁶ ܩܠܵܘܕ݂ܝܼܘܿܣ ܠܘܼܣܝܼܘܿܣ. ܠܦܝܼܠܸܟܿܣ ܗܸܓ݂ܡܘܿܢܵܐ ܢܲܨܝܼܚܵܐ. ܫܠܵܡ.

²⁷ ܠܓܲܒ݂ܪܵܐ ܗܵܢܵܐ ܐܸܚܲܕ݂ܘ ܝܗ̄ܘܼܕ݂ܵܝܹ̈ܐ. ܐܲܝܟ݂ ܕܢܸܩܛܠܘܼܢܹܗ. ܘܩܵܡܹܬ݂ ܐܸܢܵܐ ܥܲܡ ܪ̈ܗ̄ܘܿܡܵܝܹܐ ܘܦܲܪܸܩܬܹܿܗ. ܟܲܕ݂ ܝܸܠܦܹܬ݂ ܕܪܗ̄ܘܿܡܵܝܵܐ ܗ̄ܘܼ.

²⁸ ܘܟܲܕ݂ ܒܵܥܹܐ ܗ̄ܘܹܝܬ݂ ܠܡܸܕܲܥ ܥܸܠܬ݂ܵܐ ܕܡܛܠܬ݂ܵܗܿ ܪܵܫܹܝܢ ܗ̄ܘܼܵܘ ܠܹܗ. ܐܲܚܸܬܿܬܹܿܗ ܠܟܸܢܫܗܘܿܢ.

²⁹ ܘܐܸܫܟܚܹܬ݂ ܕܥܲܠ ܙܹܐܛܹܡܹ̈ܐ ܕܢܵܡܘܿܣܗܘܿܢ ܪܵܫܹܝܢ ܗ̄ܘܼܵܘ ܠܹܗ. ܘܥܸܠܬ݂ܵܐ ܕܫܵܘܝܵܐ ܠܐܲܣܘܼܪܹ̈ܐ ܐܵܘ ܠܡܵܘܬܵܐ ܠܲܝܬܿ ܗ̄ܘܵܐ ܠܘܵܬܹܗ.

³⁰ ܘܟܲܕ݂ ܐܸܬ݂ܒܲܕܲܩ ܠܝܼ ܢܸܟ݂ܠܵܐ ܒܲܟ݂ܡܹܐܢܵܐ ܕܲܥܒܲܕ݂ܘ ܥܠܵܘܗܝ ܝܗ̄ܘܼܕ݂ܵܝܹ̈ܐ. ܡܸܚܕ݂ܵܐ ܫܲܕܲܪܬܹܿܗ ܠܘܵܬ݂ܵܟ݂. ܘܦܸܩܕܹܬ݂ ܠܲܩܛܸܓ݂ܪ̈ܵܢܵܘܗܝ. ܕܢܹܐܬ݂ܘܢ ܘܢܹܐܡܪܘܼܢ ܥܲܡܹܗ ܩܕ݂ܵܡܲܝܟ. ܗܘܝܼ ܚܠܝܼܡ.

³¹ ܗܵܝܕܹܝܢ ܪ̈ܗ̄ܘܿܡܵܝܹܐ ܐܲܝܟ݂ ܕܐܬ݂ܦܲܩܲܕ݂ܘ. ܕܲܒ݂ܪܘܼܗܝ ܠܦܵܘܠܘܿܣ ܒܠܸܠܝܵܐ. ܘܐܲܝܬܿܝܘܼܗܝ ܠܐܲܢܛܝܼܦܲܛܪܘܿܣ ܡܕ݂ܝܼܢ̄ܬܵܐ.

³² ܘܲܠܝܵܘܡܵܐ ܐ̄ܚܪܹܢܵܐ. ܫܪܵܘ ܦܲܪܵܫܹܐ ܠܪ̈ܲܓܵܠܹܐ ܚܲܒ݂ܪ̈ܲܝܗܘܿܢ. ܕܢܸܗܦܟ݂ܘܿܢ ܠܡܲܫܪܝܼܬ݂ܵܐ.

³³ ܘܐܲܝܬܿܝܘܼܗܝ ܠܩܹܣܲܪܝܵܐ. ܘܝܲܗ̄ܒ݂ܘ ܐܸܓܲܪܬܵܐ ܠܗܸܓ݂ܡܘܿܢܵܐ. ܘܐܲܩܝܼܡܘܼܗܝ ܩܕ݂ܵܡܵܘܗܝ ܠܦܵܘܠܘܿܣ.

³⁴ ܘܟܲܕ݂ ܩܪܵܐ ܐܸܓܲܪܬܵܐ. ܡܫܲܐܸܠ ܗ̄ܘܵܐ ܠܹܗ. ܕܡܸܢ ܐܲܝܕ݂ܵܐ ܗܹܘܦܲܪܟܿܝܼܵܐ ܐܝܼܬ݂ܵܘܗܝ. ܘܟܲܕ݂ ܝܼܠܸܦ ܕܡܸܢ ܩܝܼܠܝܼܩܝܼܵܐ.

³⁵ ܐܸܡܲܪ ܠܹܗ. ܫܵܡܲܥ ܐ̄ܢܵܐ ܠܵܟ݂. ܡܵܐ ܕܐܸܬ݂ܵܘ ܩܛܸܓ݂ܪ̈ܵܢܲܝܟ. ܘܲܦܩܲܕ݂ ܕܢܸܛܪܘܼܢܹܗ ܒܲܦܪܵܛܘܿܪܝܼܢ ܕܗܹܪܘܿܕܸܣ.

24

¹ ܘܡܸܢ ܒܵܬܲܪ ܝܵܘ̈ܡܵܬ݂ܵܐ ܚܲܡܫܵܐ. ܢܚܸܬ݂ ܚܲܢܲܢܝܵܐ ܪܲܒ ܟܵܗܢܹ̈ܐ ܥܲܡ ܩܲܫܝܼܫܹ̈ܐ. ܘܥܲܡ ܛܲܪܛܹܠܘܿܣ ܪܗܸܛܪܵܐ. ܘܐܵܘܕܲܥܘ ܠܗܸܓ݂ܡܘܿܢܵܐ ܥܲܠ ܦܵܘܠܘܿܣ.

² ܘܟܲܕ݂ ܐܸܬ݂ܩܪܝܼ. ܐܲܩܸܦ ܗ̄ܘܵܐ ܛܲܪܛܹܠܘܿܣ ܡܩܲܛܪܸܓ݂ ܠܹܗ ܘܐܵܡܲܪ. ܒܣܘܿܓ݂ܵܐܐ ܕܫܲܝܢܵܐ ܥܵܡܪܝܼܢܲܢ ܡܛܠܬ݂ܵܟ݂. ܘܬܲܩ̈ܢܵܬ݂ܵܐ ܣܲܓܝܼ̈ܐܵܬ݂ܵܐ ܗ̄ܘܲܝ ܠܥܲܡܵܐ ܗܵܢܵܐ ܒܲܫܩܵܠ ܛܲܥܢܵܟ݂.

³ ܘܟ݂ܠܲܢ ܒܟ݂ܠ ܕܘܼܟ ܡܩܲܒܠܝܼܢܲܢ ܛܲܝܒܘܼܬ݂ܵܟ݂. ܢܲܨܝܼܚܵܐ ܦܝܼܠܸܟܿܣ.

⁴ ܕܠܵܐ ܕܹܝܢ ܢܲܠܐܹܝܟ݂ ܒܣܲܓܝܼ̈ܐܵܬ݂ܵܐ. ܒܵܥܹܐ ܐ̄ܢܵܐ ܡܸܢܵܟ݂ ܕܬܸܫܡܲܥ ܠܡܲܟܝܼܟ݂ܘܼܬܲܢ ܒܦܵܣܝܼ̈ܩܵܬ݂ܵܐ.

⁵ ܐܸܫܟܲܚܢ ܓܹܝܪ ܠܓܲܒ݂ܪܵܐ ܗܵܢܵܐ ܕܐܝܼܬ݂ܵܘܗܝ ܡܫܲܚܛܵܢܵܐ. ܘܲܡܥܝܼܪ ܫܓ݂ܘܼܫܝܵܐ ܠܟ݂ܠܗܘܿܢ ܝܗ̄ܘܼܕ݂ܵܝܹ̈ܐ ܕܲܒ݂ܟ݂ܠܵܗܿ ܐܲܪܥܵܐ. ܪܹܫܵܐ ܗ̄ܘܼ ܓܹܝܪ ܕܝܘܼܠܦܵܢܵܐ ܕܢܵܨܪ̈ܵܝܹܐ.

⁶ ܘܲܠܗܲܝܟܠܲܢ ܨܒ݂ܵܐ ܠܲܡܣܲܝܵܒ݂ܘܼ. ܘܟܲܕ݂ ܐܸܚܲܕ݂ܢܵܝܗܝ. ܒܥܲܝܢ ܕܲܢܕ݂ܘܼܢܝܼܘܗܝ ܐܲܝܟ݂ ܕܲܒ݂ܢܵܡܘܿܣܲܢ.

⁷ ܐܸܬ݂ܵܐ ܕܹܝܢ ܠܘܼܣܝܼܘܿܣ ܟܝܼܠܝܼܵܪܟܵܐ. ܘܒܲܩܛܝܼܪܵܐ ܣܲܓܿܝܼܐܵܐ ܡܸܢ ܐܝܼܕ݂ܲܝ̈ܢ ܐܲܥܕܝܹܗ. ܘܠܵܟ݂ ܫܲܕܪܹܗ.

⁸ ܘܲܦܩܲܕ݂ ܠܲܩܛܸܪ̈ܓ݂ܵܢܵܘܗܝ (ܠܲܩܛܸܓ݂ܪ̈ܵܢܵܘܗܝ) ܕܢܹܐܬ݂ܘܢ ܠܘܵܬ݂ܵܟ݂. ܘܡܸܫܟܲܚ ܐܲܢ̄ܬܿ ܟܲܕ݂ ܡܫܲܐܸܠ ܐܲܢ̄ܬܿ ܠܹܗ. ܕܬܹܐܠܲܦ ܡܸܢܹܗ. ܥܲܠ ܟܠܗܹܝܢ ܗܵܠܹܝܢ ܕܲܡܩܲܛܪܓ݂ܝܼܢܲܢ ܠܹܗ.

⁹ ܐܲܪܝܼܒ݂ܘ ܕܹܝܢ ܥܠܵܘܗܝ ܐܵܦ ܗܸܢܘܿܢ ܝܗ̄ܘܼܕ݂ܵܝܹ̈ܐ ܟܲܕ݂ ܐܵܡܪܝܼܢ. ܕܗܵܠܹܝܢ ܗܵܟܲܢܵܐ ܐܸܢܹܝܢ.

¹⁰ ܘܲܪܡܲܙ ܗܸܓ݂ܡܘܿܢܵܐ ܠܦܵܘܠܘܿܣ ܕܲܢܡܲܠܸܠ. ܘܲܥܢܵܐ ܦܵܘܠܘܿܣ ܘܐܸܡܲܪ. ܡܸܢ ܫܢܲܝܵܐ ܣܲܓܝܼ̈ܐܵܬ݂ܵܐ ܝܵܕ݂ܲܥ ܐ̄ܢܵܐ. ܕܐܝܼܬܲܝܟ ܕܲܝܵܢܵܐ ܕܥܲܡܵܐ ܗܵܢܵܐ. ܘܡܛܠ ܗܵܢܵܐ ܚܵܕ݂ܝܵܐܝܼܬ݂ ܢܵܦܹܩ ܐ̄ܢܵܐ ܪܘܼܚܵܐ ܥܲܠ ܐܲܦܲܝ̈ ܢܲܦ̮ܫܝ.

¹¹ ܟܲܕ݂ ܡܸܫܟܲܚ ܐܲܢ̄ܬܿ ܠܡܸܕ݂ܥ ܕܠܲܝܬܿ ܠܝܼ ܝܲܬܿܝܼܪ ܡܸܢ ܬܿܪܹܥܣܲܪ ܝܵܘܡ̈ܝܼܢ ܕܣܸܠܩܹܬ݂ ܠܐܘܿܪܸܫܠܸܡ ܠܡܸܣܓܲܕ݂.

¹² ܘܠܵܐ ܐܸܫܟܚܘܼܢܝ ܕܲܡܡܲܠܸܠ ܐ̄ܢܵܐ ܥܲܡ ܐ̄ܢܵܫ ܒܗܲܝܟܠܵܐ. ܘܐܵܦܠܵܐ ܟܸܢܫܵܐ ܕܟ݂ܵܢܹܫ ܐ̄ܢܵܐ. ܠܵܐ ܒܲܟ݂ܢܘܼܫܬܿܗܘܿܢ. ܘܠܵܐ ܒܲܡܕ݂ܝܼܢ̄ܬܵܐ.

¹³ ܘܠܵܐ ܕܲܢܚܵܘܘܿܢ ܡܵܛܝܵܐ ܒܐܝܼܕ݂ܲܝ̈ܗܘܿܢ ܩܕ݂ܵܡܲܝܟ. ܥܲܠ ܡܸܕܸܡ ܕܗܵܫܵܐ ܡܩܲܛܪܓ݂ܝܼܢ ܠܝܼ.

¹⁴ ܒܪܲܡ ܕܹܝܢ ܗܵܕܹܐ ܡܵܘܕܹܐ ܐ̄ܢܵܐ. ܕܒܹܗ ܒܗܵܢܵܐ ܝܘܼܠܦܵܢܵܐ ܕܐܵܡܪܝܼܢ ܒܹܗ ܦܵܠܲܚ ܐ̄ܢܵܐ ܠܐܲܠܵܗܵܐ ܕܐܲܒ݂ܵܗܲܝ̈. ܟܲܕ݂ ܡܗܲܝܡܸܢ ܐ̄ܢܵܐ ܠܟ݂ܠܗܹܝܢ ܕܲܟܬ݂ܝܼ̈ܒ݂ܵܢ ܒܢܵܡܘܿܣܵܐ ܘܒܲܢܒ݂ܝܹ̈ܐ.

¹⁵ ܘܟܲܕ݂ ܐܝܼܬ݂ ܠܝܼ ܣܲܒ݂ܪܵܐ ܥܲܠ ܐܲܠܵܗܵܐ. ܐܲܝܢܵܐ ܕܐܵܦ ܗܸܢܘܿܢ ܗܵܠܹܝܢ ܡܣܲܒܪܝܼܢ. ܕܲܥܬ݂ܝܼܕ݂ܵܐ ܕܬܸܗܘܹܐ ܩܝܵܡܬܵܐ ܕܡܸܢ ܒܹܝܬ݂ ܡܝܼܬܹ̈ܐ ܕܟܹܐܢܹ̈ܐ. ܘܲܕ݂ܥܵܘܵܠܹ̈ܐ.

¹⁶ ܡܛܠ ܗܵܢܵܐ ܐܵܦ ܥܵܡܹܠ ܐ̄ܢܵܐ. ܕܬܹܐܪܬܵܐ ܕܟ݂ܝܼܬ݂ܵܐ ܬܸܗܘܹܐ ܠܝܼ ܩܕ݂ܵܡ ܐܲܠܵܗܵܐ. ܘܲܩܕ݂ܵܡ ܒܢܲܝ̈ܢܵܫܵܐ ܐܲܡܝܼܢܵܐܝܼܬ݂.

¹⁷ ܠܲܫܢ̈ܝܼܢ ܕܹܝܢ ܣܲܓܝܼܐܵܢ ܐܸܬܹܝܬ݂ ܠܘܵܬ݂ ܒܢܲܝ̈ ܥܲܡܵܐ ܕܝܼܠܝ. ܕܐܸܬܸܿܠ ܙܸܕ݂ܩܬ݂ܵܐ ܘܐܹܩܲܪܸܒ݂ ܩܘܼܪܒܵܢܵܐ.

¹⁸ ܘܐܸܫܟܚܘܼܢܝ ܗܵܠܹܝܢ ܒܗܲܝܟܠܵܐ ܟܲܕ݂ ܡܕ݂ܲܟܲܝ ܐ̄ܢܵܐ. ܠܵܐ ܥܲܡ ܟܸܢܫܵܐ ܐܵܦܠܵܐ ܒܲܫܓ݂ܘܼܫܝܵܐ.

¹⁹ ܐܸܠܵܐ ܐܸܢ ܕܲܫܓܲܫܘ ܐ̄ܢܵܫ̈ܝܼܢ ܝܗ̄ܘܼܕ݂ܵܝܹ̈ܐ ܕܐܸܬ݂ܵܘ ܡܸܢ ܐܵܣܝܼܵܐ. ܐܲܝܠܹܝܢ ܕܘܵܠܹܐ ܗ̄ܘܵܐ ܕܲܢܩܘܼܡܘܼܢ ܥܲܡܝ ܩܕ݂ܵܡܲܝܟ. ܘܲܢܩܲܛܪܓ݂ܘܢ ܡܸܕܸܡ ܕܐܝܼܬ݂ ܠܗܘܿܢ.

²⁰ ܐܵܘ ܗܸܢܘܿܢ ܗܵܠܹܝܢ ܢܹܐܡܪܘܼܢ. ܡܵܢܵܐ ܐܸܫܟܲܚܘ ܒܝܼ ܣܲܟ݂ܠܘܼܬ݂ܵܐ. ܟܲܕ݂ ܩܵܡܹܬ݂ ܩܕ݂ܵܡ ܟܸܢܫܗܘܿܢ.

²¹ ܐܸܠܵܐ ܐܸܢ ܗܵܕܹܐ ܚܕ݂ܵܐ ܡܸܠܬ݂ܵܐ ܕܲܩܥܹܝܬ݂ ܟܲܕ݂ ܩܵܐܹܡ ܐ̄ܢܵܐ ܒܲܝܢܵܬ݂ܗܘܿܢ. ܕܥܲܠ ܩܝܵܡܬܵܐ ܕܡܝܼܬܹ̈ܐ ܡܸܬܿܕ݂ܝܼܢ ܐ̄ܢܵܐ ܝܵܘܡܵܢܵܐ ܩܕ݂ܵܡܲܝܟܘܿܢ.

²² ܦܝܼܠܸܟܿܣ ܕܹܝܢ ܡܛܠ ܕܝܵܕ݂ܲܥ ܗ̄ܘܵܐ ܠܵܗܿ ܠܐܘܼܪܚܵܐ ܗܵܕܹܐ ܡܲܠܝܵܐܝܼܬ݂. ܬܲܗܝܼ ܐܸܢܘܿܢ ܟܲܕ݂ ܐܵܡܲܪ. ܕܡܵܐ ܕܐܸܬ݂ܵܐ ܟܝܼܠܝܼܵܪܟܵܐ. ܫܵܡܲܥ ܐ̄ܢܵܐ ܒܲܝܢܵܬ݂ܟ݂ܘܿܢ.

²³ ܘܲܦܩܲܕ݂ ܠܩܸܢܛܪܘܿܢܵܐ. ܕܢܸܛܪܝܼܘܗܝ ܠܦܵܘܠܘܿܣ ܒܲܢܝܵܚܵܐ. ܘܲܕ݂ܠܵܐ ܐ̄ܢܵܫ ܡܸܢ ܝܵܕ݂ܘܿܥܵܘ̈ܗܝ ܢܸܬ݂ܟܠܹܐ ܕܢܸܗܘܹܐ ܡܫܲܡܸܫ ܠܹܗ.

²⁴ ܘܡܸܢ ܒܵܬܲܪ ܩܲܠܝܼܠ ܝܵܘ̈ܡܵܬ݂ܵܐ. ܫܲܕܲܪ ܦܝܼܠܸܟܿܣ ܘܕ݂ܘܼܪܣܸܠܵܐ (ܘܲܕ݂ܪܘܼܪܣܸܠܵܐ) ܐܲܢ̄ܬܿܬܹܗ ܕܐܝܼܬܹܝܗܿ ܗ̄ܘܵܬ݂ ܝܗ̄ܘܼܕ݂ܵܝܬܵܐ. ܘܲܩܪܵܘ ܠܹܗ ܠܦܵܘܠܘܿܣ. ܘܲܫܡܲܥܘ ܡܸܢܹܗ ܥܲܠ ܗܲܝܡܵܢܘܼܬ݂ܵܐ ܕܲܡܫܝܼܚܵܐ.

²⁵ ܘܟܲܕ݂ ܡܡܲܠܸܠ ܥܲܡܗܘܿܢ ܥܲܠ ܙܲܕܝܼܩܘܼܬ݂ܵܐ ܘܥܲܠ ܩܲܕܝܼܫܘܼܬ݂ܵܐ ܘܥܲܠ ܕܝܼܢܵܐ ܕܲܥܬ݂ܝܼܕ݂. ܐܸܬ݂ܡܠܝܼ ܕܸܚܠܬ݂ܵܐ ܦܝܼܠܸܟܿܣ. ܘܐܸܡܲܪ. ܕܗܵܫܵܐ ܙܸܠ. ܘܐܸܡܲܬ݂ܝ ܕܢܸܗܘܹܐ ܠܝܼ ܐܲܬ݂ܪܵܐ. ܐܸܫܲܕܲܪ ܒܵܬ݂ܪܵܟ݂.

²⁶ ܣܵܒܲܪ ܗ̄ܘܵܐ ܓܹܝܪ. ܕܫܘܼܚܕܵܐ ܡܸܬ݂ܝܼܗܸܒ݂ ܗ̄ܘܵܐ ܠܹܗ ܡܸܢ ܦܵܘܠܘܿܣ. ܡܛܠ ܗܵܕܹܐ ܐܵܦ ܐܲܡܝܼܢܵܐܝܼܬ݂ ܡܫܲܕܲܪ ܗ̄ܘܵܐ ܡܲܝܬܹܐ ܠܹܗ ܘܲܡܡܲܠܸܠ ܥܲܡܹܗ.

²⁷ ܘܟܲܕ݂ ܡܲܠܝܼ ܠܹܗ ܬܲܪܬܹܿܝܢ ܫܢ̈ܝܼܢ. ܐ̄ܚܪܹܢܵܐ ܗܸܓ݂ܡܘܿܢܵܐ ܐܸܬ݂ܵܐ ܗ̄ܘܵܐ ܠܕ݂ܘܼܟܬܹܗ. ܕܡܸܬ݂ܩܪܹܐ ܗ̄ܘܵܐ ܦܲܪܩܝܼܘܿܣ ܦܹܗܹܣܛܘܿܣ. ܦܝܼܠܸܟܿܣ ܕܹܝܢ ܐܲܝܟ݂ ܕܢܸܥܒܸܕ݂ ܛܲܝܒܘܼܬ݂ܵܐ ܒܝܗ̄ܘܼܕ݂ܵܝܹ̈ܐ. ܫܲܒ݂ܩܹܗ ܠܦܵܘܠܘܿܣ ܟܲܕ݂ ܐܲܣܝܼܪ.

25

¹ ܘܟܲܕ݂ ܐܸܬ݂ܵܐ ܦܹܗܹܣܛܘܿܣ ܠܩܹܣܲܪܝܵܐ. ܒܵܬܲܪ ܬܿܠܵܬ݂ܵܐ ܝܵܘܡ̈ܝܼܢ ܣܠܸܩ ܠܐܘܿܪܸܫܠܸܡ.

² ܘܐܵܘܕܥܘܼܗܝ ܪ̈ܲܒܲܝ ܟܵܗܢܹ̈ܐ ܘܪܹ̈ܫܹܐ ܕܝܗ̄ܘܼܕ݂ܵܝܹ̈ܐ ܥܲܠ ܦܵܘܠܘܿܣ. ܘܒ݂ܵܥܹܝܢ ܗ̄ܘܼܵܘ ܡܸܢܹܗ

³ ܟܲܕ݂ ܫܵܐܠܝܼܢ ܠܹܗ ܗܵܕܹܐ ܛܲܝܒܘܼܬ݂ܵܐ. ܕܲܢܫܲܕܲܪ ܢܲܝܬܿܝܼܘܗܝ ܠܐܘܿܪܸܫܠܸܡ. ܟܲܕ݂ ܥܵܒ݂ܕܝܼܢ ܗ̄ܘܼܵܘ ܟܡܹܐܢܹ̈ܐ ܒܐܘܼܪܚܵܐ ܕܢܸܩܛܠܘܼܢܵܝܗܝ.

⁴ ܘܦܹܗܹܣܛܘܿܣ ܦܲܢܝܼ ܦܸܬ݂ܓ݂ܵܡܵܐ. ܕܦܵܘܠܘܿܣ ܡܸܬ݂ܢܛܲܪ ܒܩܹܣܲܪܝܵܐ. ܘܐܸܢܵܐ ܡܣܲܪܗܲܒ݂ ܐ̄ܢܵܐ ܕܐܸܚܙܘܿܩ.

⁵ ܐܲܝܠܹܝܢ ܗܵܟܹܝܠ ܕܐܝܼܬ݂ ܒܟ݂ܘܿܢ ܕܡܵܛܝܵܐ ܒܐܝܼܕ݂ܲܝ̈ܗܘܿܢ. ܢܸܚܬ݂ܘܼܢ ܥܲܡܲܢ. ܘܥܲܠ ܟܠ ܣܲܟ݂ܠܘܼ ܕܐܝܼܬ݂ ܒܹܗ ܒܓܲܒ݂ܪܵܐ. ܢܩܲܛܪܓ݂ܘܼܢ.

⁶ ܘܟܲܕ݂ ܗܘܵܐ ܬܲܡܵܢ ܝܵܘ̈ܡܵܬ݂ܵܐ ܬܿܡܵܢܝܵܐ ܐܵܘ ܥܸܣܪܵܐ. ܢܚܸܬ݂ ܠܹܗ ܠܩܹܣܲܪܝܵܐ. ܘܲܠܝܵܘܡܵܐ ܐ̄ܚܪܹܢܵܐ. ܝܼܬܸܒ݂ ܥܲܠ ܒܹܝܡ. ܘܲܦܩܲܕ݂ ܕܢܲܝܬܿܘܢ ܠܦܵܘܠܘܿܣ.

⁷ ܘܟܲܕ݂ ܐܸܬ݂ܵܐ. ܚܲܕ݂ܪܘܼܗܝ ܝܗ̄ܘܼܕ݂ܵܝܹ̈ܐ ܕܲܢܚܸܬ݂ܘ ܡܸܢ ܐܘܿܪܸܫܠܸܡ. ܘܪܹ̈ܫܹܐ ܣܲܓܝܼܐܹ̈ܐ ܘܲܩ̈ܫܲܝܵܐ ܡܲܝܬܿܝܢ ܗ̄ܘܼܵܘ ܒܵܬ݂ܪܹܗ. ܐܲܝܠܹܝܢ ܕܠܵܐ ܡܸܫܟܿܚܝܼܢ ܗ̄ܘܼܵܘ ܕܲܢܚܵܘܘܿܢ.

⁸ ܘܟܲܕ݂ ܦܵܘܠܘܿܣ ܢܵܦܹܩ ܗ̄ܘܵܐ ܪܘܼܚܵܐ ܕܠܵܐ ܐܲܣܟܸܠ ܡܸܕܸܡ. ܠܵܐ ܒܢܵܡܘܿܣܵܐ ܕܝܗ̄ܘܼܕ݂ܵܝܹ̈ܐ ܘܠܵܐ ܒܗܲܝܟܠܵܐ ܘܠܵܐ ܒܩܹܣܲܪ.

⁹ ܦܹܗܹܣܛܘܿܣ ܕܹܝܢ ܡܛܠ ܕܨܵܒܹܐ ܗ̄ܘܵܐ ܕܢܲܪܫܹܐ ܛܲܝܒܘܼܬ݂ܵܐ ܒܝܗ̄ܘܼܕ݂ܵܝܹ̈ܐ. ܐܸܡܲܪ ܠܹܗ ܠܦܵܘܠܘܿܣ. ܨܵܒܹܐ ܐܲܢ̄ܬܿ ܕܬܸܣܲܩ ܠܐܘܿܪܸܫܠܸܡ. ܘܬܲܡܵܢ ܥܲܠ ܗܵܠܹܝܢ ܬܸܬܿܕ݂ܝܼܢ ܩܕ݂ܵܡܲܝ.

¹⁰ ܥܢܵܐ ܦܵܘܠܘܿܣ ܘܐܸܡܲܪ. ܥܲܠ ܒܹܝܡ ܕܩܹܣܲܪ ܩܵܐܹܡ ܐ̄ܢܵܐ. ܗܵܪܟܵܐ ܗܘܼ ܙܵܕ݂ܩ ܠܝܼ ܠܡܸܬܿܕ݂ܵܢܘܼ. ܠܵܐ ܡܸܕܸܡ ܚܛܝܼܬ݂ ܠܝܗ̄ܘܼܕ݂ܵܝܹ̈ܐ. ܐܲܝܟ݂ ܕܐܵܦ ܐܲܢ̄ܬܿ ܝܵܕ݂ܲܥ ܐܲܢ̄ܬܿ.

¹¹ ܘܐܸܢ ܣܲܟ݂ܠܘܼܬ݂ܵܐ ܥܒ݂ܝܼܕ݂ܵܐ ܠܝܼ ܐܵܘ ܡܸܕܸܡ ܕܫܵܘܹܐ ܠܡܵܘܬܵܐ. ܠܵܐ ܡܸܫܬܿܐܸܠ ܐ̄ܢܵܐ ܡܸܢ ܡܵܘܬܵܐ. ܐܸܢ ܕܹܝܢ ܠܲܝܬܿ ܡܸܕܸܡ ܨܸܐܕ݂ܲܝ ܡܸܢ ܗܵܠܹܝܢ ܕܲܡܩܲܛܪܓ݂ܝܼܢ ܠܝܼ. ܠܵܐ ܐ̄ܢܵܫ ܝܵܗܹܒ݂ ܠܝܼ ܠܗܘܿܢ ܡܵܘܗܒܲܬ݂. ܒܓܲܢܵܘ̈ܗܝ ܕܩܹܣܲܪ ܩܵܪܹܐ ܐ̄ܢܵܐ.

¹² ܗܵܝܕܹܝܢ ܦܹܗܹܣܛܘܿܣ ܡܲܠܸܠ ܥܲܡ ܒܢܲܝ̈ ܡܸܠܟܹܗ ܘܐܸܡܲܪ. ܒܓܸܢ ܩܹܣܲܪ ܩܪܲܝܬܿ. ܠܘܵܬ݂ ܩܹܣܲܪ ܐܵܙܹܠ ܐܲܢ̄ܬܿ.

¹³ ܘܟܲܕ݂ ܗܘܵܘ ܝܵܘ̈ܡܵܬ݂ܵܐ. ܢܚܸܬ݂ ܐܵܓܹܪܦܘܿܣ ܡܲܠܟܵܐ ܘܒܲܪܢܝܼܩܹܐ ܠܩܹܣܲܪܝܵܐ ܕܢܸܫܐܠܘܼܢ ܫܠܵܡܹܗ ܕܦܹܗܹܣܛܘܿܣ.

¹⁴ ܘܟܲܕ݂ ܗܘܵܘ ܠܘܵܬܹܗ ܝܵܘ̈ܡܵܬ݂ܵܐ. ܐܸܫܬܲܥܝܼ ܦܹܗܹܣܛܘܿܣ ܠܡܲܠܟܵܐ ܕܝܼܢܹܗ ܕܦܵܘܠܘܿܣ ܟܲܕ݂ ܐܵܡܲܪ. ܓܲܒ݂ܪܵܐ ܚܲܕ݂ ܐܲܣܝܼܪܵܐ ܐܸܫܬܿܒܸܩ ܡܸܢ ܐܝܼܕ݂ܲܝ̈ ܦܝܼܠܸܟܿܣ.

¹⁵ ܘܟܲܕ݂ ܗ̄ܘܹܝܬ݂ ܒܐܘܿܪܸܫܠܸܡ. ܐܵܘܕܲܥܘ ܠܝܼ ܥܠܵܘܗܝ ܪ̈ܲܒܲܝ ܟܵܗܢܹ̈ܐ ܘܩܲܫܝܼܫܹ̈ܐ ܕܝܗ̄ܘܼܕ݂ܵܝܹ̈ܐ. ܘܲܒ݂ܥܵܘ ܕܐܸܥܒܸܕ݂ ܠܗܘܿܢ ܕܝܼܢܵܐ ܡܸܢܹܗ.

¹⁶ ܘܐܸܡܪܹܬ݂ ܠܗܘܿܢ. ܕܠܲܝܬܿ ܥܝܵܕ݂ܵܐ ܠܪ̈ܗ̄ܘܿܡܵܝܹܐ ܕܢܸܬܿܠܘܼܢ ܒܲܪܢܵܫܵܐ ܡܵܘܗܒܲܬ݂ ܠܩܸܛܠܵܐ. ܥܕ݂ܲܡܵܐ ܕܢܹܐܬܹܐ ܒܥܸܠ ܕܝܼܢܹܗ ܘܢܲܟܣܝܼܘܗܝ ܒܐܲܦܵܘ̈ܗܝ. ܘܢܸܬ݂ܝܼܗܸܒ݂ ܠܹܗ ܐܲܬ݂ܪܵܐ ܠܡܲܦܲܩ ܒܪܘܼܚܵܐ ܥܲܠ ܡܵܐ ܕܡܸܬ݂ܪܫܹܐ.

¹⁷ ܘܟܲܕ݂ ܐܸܬܹܝܬ݂ ܠܟ݂ܵܐ. ܕܠܵܐ ܬܘܼܗܵܝܵܐ ܠܝܵܘܡܵܐ ܐ̄ܚܪܹܢܵܐ ܝܸܬ݂ܒܹܿܬ݂ ܥܲܠ ܒܹܝܡ. ܘܦܸܩܕܹܬ݂ ܕܢܲܝܬܿܘܿܢܵܝܗܝ ܠܝܼ ܠܓܲܒ݂ܪܵܐ.

¹⁸ ܘܩܵܡܘ ܥܲܡܹܗ ܩܛܸܪ̈ܓ݂ܵܢܵܘܗܝ. ܘܠܵܐ ܐܸܫܟܲܚܘ ܡܸܕܸܡ ܪܸܫܝܵܢܵܐ ܒܝܼܫܵܐ ܕܲܢܚܵܘܘܿܢ ܥܠܵܘܗܝ. ܐܲܝܟ݂ ܡܵܐ ܕܣܵܒܲܪ ܗ̄ܘܹܝܬ݂.

¹⁹ ܙܹܐܛܹܡܹ̈ܐ ܕܹܝܢ ܡܸܕܸܡ ܡܸܕܸܡ ܥܲܠ ܕܸܚܠܲܬ݂ܗܘܿܢ ܐܝܼܬ݂ ܗ̄ܘܵܐ ܠܗܘܿܢ ܠܘܵܬܹܗ. ܘܥܲܠ ܝܼܫܘܿܥ ܐ̄ܢܵܫ ܕܡܝܼܬ݂. ܗܵܘ ܕܐܵܡܲܪ ܗ̄ܘܵܐ ܦܵܘܠܘܿܣ ܕܚܲܝ ܗ̄ܘܼ.

²⁰ ܘܡܛܠ ܕܠܵܐ ܩܵܐܹܡ ܗ̄ܘܹܝܬ݂ ܐܸܢܵܐ ܥܲܠ ܒܥܵܬ݂ܵܐ ܕܗܵܠܹܝܢ. ܐܸܡܪܹܬ݂ ܗ̄ܘܹܝܬ݂ ܠܦܵܘܠܘܿܣ. ܕܐܸܢ ܒܵܥܹܐ ܐܲܢ̄ܬܿ. ܕܬܹܐܙܲܠ ܠܐܘܿܪܸܫܠܸܡ. ܘܬܲܡܵܢ ܬܸܬܿܕ݂ܝܼܢ ܥܲܠ ܗܵܠܹܝܢ.

²¹ ܗܘܼ ܕܹܝܢ ܒܥܵܐ ܕܢܸܬ݂ܢܛܲܪ ܠܕ݂ܝܼܢܹܗ ܕܩܹܣܲܪ. ܘܦܸܩܕܹܬ݂ ܕܢܸܬ݂ܢܛܲܪ. ܥܕ݂ܲܡܵܐ ܕܐܹܫܲܕܪܝܼܘܗܝ ܠܘܵܬ݂ ܩܹܣܲܪ.

²² ܘܐܸܡܲܪ ܐܵܓܹܪܦܘܿܣ. ܨܵܒܹܐ ܗ̄ܘܹܝܬ݂ ܕܐܸܫܡܥܝܼܘܗܝ ܠܓܲܒ݂ܪܵܐ ܗܵܢܵܐ. ܘܦܹܗܹܣܛܘܿܣ ܐܸܡܲܪ. ܕܠܲܡܚܵܪ ܫܵܡܲܥ ܐܲܢ̄ܬܿ ܠܹܗ.

²³ ܘܲܠܝܵܘܡܵܐ ܐ̄ܚܪܹܢܵܐ. ܐܸܬ݂ܵܐ ܐܵܓܹܪܦܘܿܣ ܘܒܲܪܢܝܼܩܹܐ ܒܙܵܘܚܵܐ ܣܲܓܿܝܼܐܵܐ. ܘܥܲܠ ܠܒܹܝܬ݂ ܕܝܼܢܵܐ ܥܲܡ ܟܝܼܠܝܼܵܪ̈ܟܹܐ ܘܪܹ̈ܫܹܐ ܕܲܡܕ݂ܝܼܢ̄ܬܵܐ. ܘܲܦܩܲܕ݂ ܦܹܗܹܣܛܘܿܣ ܘܐܸܬ݂ܵܐ ܦܵܘܠܘܿܣ.

²⁴ ܘܐܸܡܲܪ ܦܹܗܹܣܛܘܿܣ. ܐܵܓܹܪܦܘܿܣ ܡܲܠܟܵܐ ܘܟܠܟ݂ܘܿܢ ܓܲܒ݂ܪܹ̈ܐ ܕܐܝܼܬܲܝܟܘܿܢ ܥܲܡܲܢ. ܥܲܠ ܗܵܢܵܐ ܓܲܒ݂ܪܵܐ ܕܚܵܙܹܝܢ ܐܢ̄ܬܘܿܢ. ܟܠܹܗ ܥܲܡܵܐ ܕܝܗ̄ܘܼܕ݂ܵܝܹ̈ܐ ܩܲܒܠܲܢܝ ܒܐܘܿܪܸܫܠܸܡ ܘܗܵܪܟܵܐ. ܟܲܕ݂ ܩܵܥܹܝܢ ܕܠܵܐ ܬܘܼܒ݂ ܘܵܠܹܐ ܠܗܵܢܵܐ ܕܢܸܚܹܐ.

²⁵ ܐܸܢܵܐ ܕܹܝܢ ܐܲܕ݂ܪܟܹܬ݂. ܕܡܸܕܸܡ ܕܫܵܘܹܐ ܠܡܵܘܬܵܐ ܠܵܐ ܣܥܝܼܪ ܠܹܗ. ܘܡܛܠ ܕܗܘܼ ܒܥܵܐ ܕܢܸܬ݂ܢܛܲܪ ܠܕ݂ܝܼܢܹܗ ܕܩܹܣܲܪ. ܦܸܩܕܹܬ݂ ܕܢܸܫܬܲܕܲܪ.

²⁶ ܘܠܵܐ ܝܵܕ݂ܲܥ ܐ̄ܢܵܐ ܡܵܢܵܐ ܐܸܟ݂ܬܘܼܒ݂ ܥܠܵܘܗܝ ܠܩܹܣܲܪ. ܡܛܠ ܗܵܢܵܐ ܨܒ݂ܝܼܬ݂ ܠܡܲܝܬܵܝܘܼܬܹܗ ܩܕ݂ܵܡܲܝܟܘܿܢ. ܘܝܲܬܝܼܪܵܐܝܼܬ݂ ܩܕ݂ܵܡܲܝܟ ܡܲܠܟܵܐ ܐܲܓܹܪܦܲܐ. ܕܡܵܐ ܕܐܸܫܬܲܐܲܠ ܕܝܼܢܹܗ. ܐܸܫܟܲܚ ܡܵܢܵܐ ܐܸܟ݂ܬܿܘܼܒ݂.

²⁷ ܠܵܐ ܓܹܝܪ ܘܵܠܹܐ ܕܟܲܕ݂ ܡܫܲܕܪܝܼܢܲܢ ܓܲܒ݂ܪܵܐ ܐܲܣܝܼܪܵܐ. ܕܠܵܐ ܢܸܟ݂ܬܘܼܒ݂ ܣܲܟ݂ܠܘܼܬܹܗ.

26

¹ ܘܐܸܡܲܪ ܐܵܓܹܪܦܘܿܣ ܠܦܵܘܠܘܿܣ. ܡܲܦܲܣ ܠܵܟ݂ ܠܲܡܡܲܠܵܠܘܼ ܥܲܠ ܐܲܦܲܝ̈ ܢܲܦ̮ܫܵܟ݂. ܗܵܝܕܹܝܢ ܦܵܘܠܘܿܣ ܦܫܲܛ ܐܝܼܕܹܗ. ܘܢܵܦܹܩ ܗ̄ܘܵܐ ܪܘܼܚܵܐ ܘܐܵܡܲܪ.

² ܥܲܠ ܟܠܡܵܐ ܕܡܸܬ݂ܪܫܹܐ ܐ̄ܢܵܐ ܡܸܢ ܝܗ̄ܘܼܕ݂ܵܝܹ̈ܐ ܡܲܠܟܵܐ ܐܵܓܹܪܦܲܐ. ܣܵܒܲܪ ܐ̄ܢܵܐ ܥܲܠ ܢܲܦ̮ܫܝ ܕܛܘܼܒ݂ܵܢܵܐ ܐ̄ܢܵܐ. ܕܲܩܕ݂ܵܡܲܝܟ ܝܵܘܡܵܢܵܐ ܢܵܦܹܩ ܐ̄ܢܵܐ ܪܘܼܚܵܐ.

³ ܝܲܬܝܼܪܵܐܝܼܬ݂ ܕܝܵܕ݂ܲܥ ܐ̄ܢܵܐ ܕܲܡܦܵܣ ܐܲܢ̄ܬܿ ܒܟ݂ܠܗܘܿܢ ܙܹܐܛܹܡܹ̈ܐ ܘܢܵܡܘܿܣܹ̈ܐ ܕܲܝܗܘܼܕ݂ܵܝܹ̈ܐ. ܡܛܠ ܗܵܢܵܐ ܒܵܥܹܐ ܐ̄ܢܵܐ ܡܸܢܵܟ݂. ܕܲܒ݂ܡܲܓܪܲܬ݂ ܪܘܼܚܵܐ ܬܸܫܡܥܲܢܝ.

⁴ ܝܵܕ݂ܥܝܼܢ ܐܸܢܘܿܢ ܓܹܝܪ ܐܵܦ ܗܸܢܘܿܢ ܝܗ̄ܘܼܕ݂ܵܝܹ̈ܐ ܐܸܢ ܨܵܒܹܝܢ ܕܢܸܣܗܕ݂ܘܼܢ. ܕܘܒܵܪ̈ܲܝ ܕܡܸܢ ܛܲܠܝܘܼܬ݂ܝ ܕܲܗܘܵܘ ܠܝܼ ܡܸܢ ܫܘܼܪܵܝܵܐ ܒܥܲܡܝ ܘܒܐܘܿܪܸܫܠܸܡ.

⁵ ܡܛܠ ܕܡܸܢ ܢܘܼܓ݂ܪܵܐ ܡܦܵܣܝܼܢ ܒܝܼ. ܘܝܵܕ݂ܥܝܼܢ ܕܲܒ݂ܝܘܼܠܦܵܢܵܐ ܪܹܫܵܝܵܐ ܕܲܦܪ̈ܝܼܫܹܐ ܚܝܹܝܬ݂.

⁶ ܘܗܵܫܵܐ ܥܲܠ ܣܲܒ݂ܪܵܐ ܕܫܘܼܘܕܵܝܵܐ ܕܲܗܘܵܐ ܗ̄ܘܵܐ ܠܐܲܒ݂ܵܗ̈ܵܬܲܢ ܡܸܢ ܐܲܠܵܗܵܐ. ܩܵܐܹܡ ܐ̄ܢܵܐ ܘܡܸܬܿܕ݂ܝܼܢ ܐ̄ܢܵܐ.

⁷ ܕܥܲܠ ܗܵܢܵܐ ܣܲܒ݂ܪܵܐ. ܬܲܪܬܲܥܸܣܪܹ̈ܐ ܫܲܪ̈ܒ݂ܵܢ ܡܣܲܒܪܵܢ ܕܲܢܡܲܢܥܵܢ: ܒܲܨ̈ܠܵܘܵܬ݂ܵܐ ܚܦ̈ܝܼܛܵܬ݂ܵܐ ܕܐܝܼܡܵܡܵܐ ܘܲܕ݂ܠܸܠܝܵܐ. ܘܲܥܠܵܘܗܝ ܥܲܠ ܗܵܢܵܐ ܣܲܒ݂ܪܵܐ ܡܸܬ݂ܪܫܹܐ ܐ̄ܢܵܐ ܡܸܢ ܐܝܼܕ݂ܲܝ̈ ܝܗ̄ܘܼܕ݂ܵܝܹ̈ܐ. ܡܲܠܟܵܐ ܐܵܓܹܪܦܲܐ.

⁸ ܡܵܢܵܐ ܕܵܝܢܝܼܢ ܐܢ̄ܬܘܿܢ. ܠܵܐ ܘܵܠܹܐ ܕܲܢܗܲܝܡܸܢ. ܕܲܡܩܝܼܡ ܐܲܠܵܗܵܐ ܡܝܼܬܹ̈ܐ.

⁹ ܐܸܢܵܐ ܓܹܝܪ ܡܸܢ ܩܕ݂ܝܼܡ ܣܵܡܹܬ݂ ܒܪܸܥܝܵܢܝ. ܕܣܲܩܘܼܒ݂ܠܹܐ ܣܲܓܝܼܐܹ̈ܐ ܐܸܣܥܘܿܪ ܠܘܼܩܒܲܠ ܫܡܹܗ ܕܝܼܫܘܿܥ ܢܵܨܪܵܝܵܐ.

¹⁰ ܗܵܕܹܐ ܕܥܸܒ݂ܕܹܬ݂ ܐܵܦ ܒܐܘܿܪܸܫܠܸܡ. ܘܩܲܕܝܼܫܹ̈ܐ ܣܲܓܝܼ̈ܐܹܐ ܐܲܪܡܝܼܬ݂ ܒܹܝܬ݂ ܐܲܣܝܼܪܹ̈ܐ. ܒܫܘܼܠܛܵܢܵܐ ܕܩܲܒܠܹܬ݂ ܡܸܢ ܪ̈ܲܒܲܝ ܟܵܗܢܹ̈ܐ. ܘܟܲܕ݂ ܡܸܬ݂ܩܲܛܠܝܼܢ ܗ̄ܘܼܵܘ ܡܸܢܗܘܿܢ. ܐܸܫܬܵܘܬܿܦܹܬ݂ ܠܐܲܝܠܹܝܢ ܕܚܲܝܸܒ݂ܘ ܐܸܢܘܿܢ.

¹¹ ܘܲܒܟ݂ܠ ܟܢܘܼܫܵܐ ܡܸܫܬܲܢܲܕ݂ ܗ̄ܘܹܝܬ݂ ܒܗܘܿܢ. ܟܲܕ݂ ܐܵܠܹܨ ܗ̄ܘܹܝܬ݂ ܕܢܸܗܘܘܿܢ ܡܓܲܕܦܝܼܢ ܒܲܫܡܹܗ ܕܝܼܫܘܿܥ. ܘܲܒ݂ܪܘܼܓ݂ܙܵܐ ܣܲܓܿܝܼܐܵܐ ܕܲܡܠܹܐ ܗ̄ܘܹܝܬ݂ ܥܠܲܝܗܘܿܢ. ܐܵܦ ܠܲܡܕ݂ܝܼ̈ܢܵܬ݂ܵܐ ܐ̄ܚܪ̈ܵܢܝܵܬ݂ܵܐ ܢܵܦܹܩ ܗ̄ܘܹܝܬ݂ ܠܡܸܪܕܲܦ ܐܸܢܘܿܢ.

¹² ܘܟܲܕ݂ ܐܵܙܹܠ ܗ̄ܘܹܝܬ݂ ܡܛܠ ܗܵܕܹܐ ܠܕ݂ܲܪܡܣܘܿܩ ܒܫܘܼܠܛܵܢܵܐ ܘܲܒ݂ܡܲܦܣܵܢܘܼܬ݂ܵܐ ܕܪ̈ܲܒܲܝ ܟܵܗܢܹ̈ܐ.

¹³ ܒܦܸܠܓܹ݁ܗ ܕܝܵܘܡܵܐ ܒܐܘܼܪܚܵܐ ܚܙܹܝܬ݂ ܡܸܢ ܫܡܲܝܵܐ ܐܵܘ ܡܲܠܟܵܐ. ܕܐܲܙܠܸܓ݂ ܥܠܲܝ ܘܥܲܠ ܟܠ ܕܥܲܡܝ ܗ̄ܘܼܵܘ. ܢܘܼܗܪܵܐ ܕܲܡܝܲܬܲܪ ܡܸܢ ܕܫܸܡܫܵܐ.

¹⁴ ܘܲܢܦܲܠܢ ܟܠܲܢ ܥܲܠ ܐܲܪܥܵܐ. ܘܫܸܡܥܹܬ݂ ܩܵܠܵܐ ܟܲܕ݂ ܐܵܡܲܪ ܠܝܼ ܥܸܒ݂ܪܵܐܝܼܬ݂. ܫܵܐܘܿܠ ܫܵܐܘܿܠ ܡܵܢܵܐ ܪܵܕܹܦ ܐܲܢ̄ܬܿ ܠܝܼ. ܩܫܹܐ ܗܘܼ ܠܵܟ݂ ܠܲܡܒܲܥܵܛܘܼ ܠܥܘܼܩܣܹ̈ܐ.

¹⁵ ܘܐܸܢܵܐ ܐܸܡܪܹܬ݂. ܡܲܢ ܐܲܢ̄ܬܿ ܡܵܪܝ. ܘܡܵܪܲܢ ܐܸܡܲܪ ܠܝܼ. ܐܸܢܵܐ ܗܘܼ ܝܼܫܘܿܥ ܢܵܨܪܵܝܵܐ ܕܐܲܢ̄ܬܿ ܪܵܕܹܦ ܐܲܢ̄ܬܿ.

¹⁶ ܘܐܸܡܲܪ ܠܝܼ. ܩܘܼܡ ܥܲܠ ܪܸ̈ܓ݂ܠܲܝܟ. ܡܛܠ ܗܵܕܹܐ ܓܹܝܪ ܐܸܬ݂ܚܙܹܝܬ݂ ܠܵܟ݂. ܕܐܲܩܝܼܡܵܟ݂ ܡܫܲܡܫܵܢܵܐ ܘܣܵܗܕܵܐ ܕܡܸܕܸܡ ܕܲܚܙܲܝܬܵܢܝ. ܘܕ݂ܲܥܬ݂ܝܼܕ݂ ܐܲܢ̄ܬܿ ܕܬܸܚܙܹܝܢܝ.

¹⁷ ܘܐܸܦܲܨܹܝܟ݂ ܡܸܢ ܥܲܡܵܐ ܕܝܗ̄ܘܼܕ݂ܵܝܹ̈ܐ. ܘܡܸܢ ܥܲܡ̈ܡܹܐ ܐ̄ܚܪ̈ܵܢܹܐ ܕܲܠܘܵܬ݂ܗܘܿܢ ܡܫܲܕܲܪ ܐ̄ܢܵܐ ܠܵܟ݂.

¹⁸ ܕܲܬ݂ܦܲܬܲܚ ܥܲܝܢܲܝ̈ܗܘܿܢ. ܐܲܝܟ݂ ܕܢܸܗܦܟ݂ܘܿܢ ܡܸܢ ܚܸܫܘܿܟ݂ܵܐ ܠܢܲܗܝܼܪܵܐ. ܘܡܸܢ ܫܘܼܠܛܵܢܹܗ ܕܣܵܛܵܢܵܐ ܠܘܵܬ݂ ܐܲܠܵܗܵܐ. ܘܲܢܩܲܒܠܘܼܢ ܫܘܼܒ݂ܩܵܢ ܚܛܵܗܹ̈ܐ. ܘܦܸܣܵܐ ܥܲܡ ܩܲܕܝܼܫܹ̈ܐ ܒܗܲܝܡܵܢܘܼܬ݂ܵܐ ܕܒ݂ܝܼ.

¹⁹ ܡܛܠ ܗܵܕܹܐ ܡܲܠܟܵܐ ܐܵܓܹܪܦܲܐ. ܠܵܐ ܩܵܡܹܬ݂ ܒܚܸܪܝܵܢܵܐ ܠܘܼܩܒܲܠ ܚܸܙܘܵܐ ܫܡܲܝܵܢܵܐ.

²⁰ ܐܸܠܵܐ ܐܲܟ݂ܪܙܹܬ݂ ܡܸܢ ܠܩܘܼܕ݂ܡܝܼܢ. ܠܗܵܢܘܿܢ ܕܲܒ݂ܕ݂ܲܪܡܣܘܿܩ. ܘܲܠܗܵܢܘܿܢ ܕܒܐܘܿܪܸܫܠܸܡ. ܘܕ݂ܲܒ݂ܟܠܗܹܝܢ ܩܘܼܪ̈ܝܵܐ ܕܲܝܗܘܼܕ݂. ܘܐܵܦ ܠܥܲܡ̈ܡܹܐ ܐܲܟ݂ܪܙܹܬ݂. ܕܲܢܬ݂ܘܼܒ݂ܘܼܢ ܘܢܸܬ݂ܦܢܘܼܢ ܠܘܵܬ݂ ܐܲܠܵܗܵܐ. ܘܢܸܥܒܕ݂ܘܼܢ ܥܒ݂ܵܕܹ̈ܐ ܕܫܵܘܹܝܢ ܠܲܬ݂ܝܵܒ݂ܘܼܬ݂ܵܐ.

²¹ ܘܥܲܠ ܐܲܦܲܝ̈ ܗܵܠܹܝܢ. ܐܲܚܕܘܼܢܝ ܝܗ̄ܘܼܕ݂ܵܝܹ̈ܐ ܒܗܲܝܟܠܵܐ ܘܨܵܒܹܝܢ ܗ̄ܘܼܵܘ ܠܡܸܩܛܠܲܢܝ.

²² ܥܲܕܪܲܢܝ ܕܹܝܢ ܐܲܠܵܗܵܐ ܥܕ݂ܲܡܵܐ ܠܝܵܘܡܵܐ ܗܵܢܵܐ. ܘܗܵܐ ܩܵܐܹܡ ܐ̄ܢܵܐ ܘܲܡܣܲܗܸܕ݂ ܐ̄ܢܵܐ ܠܲܙܥܘܿܪܵܐ ܘܲܠܪܲܒܵܐ. ܟܲܕ݂ ܡܸܕܸܡ ܠܒܲܪ ܡܸܢ ܡܘܼܫܹܐ ܘܲܢܒ݂ܝܹ̈ܐ ܠܵܐ ܐܵܡܲܪ ܐ̄ܢܵܐ. ܐܸܠܵܐ ܐܲܝܠܹܝܢ ܕܗܸܢܘܿܢ ܐܸܡܲܪܘ ܕܲܥܬ݂ܝܼܕ݂ܵܢ ܕܢܸܗܘܝܵܢ.

²³ ܕܢܸܚܲܫ ܡܫܝܼܚܵܐ. ܘܢܸܗܘܹܐ ܪܹܫܝܼܬ݂ܵܐ ܕܲܩܝܵܡܬܵܐ ܕܡܸܢ ܒܹܝܬ݂ ܡܝܼܬܹ̈ܐ. ܘܕ݂ܲܥܬ݂ܝܼܕ݂ ܕܢܲܟ݂ܪܸܙ ܢܘܼܗܪܵܐ ܠܥܲܡܵܐ ܘܲܠܥܲܡ̈ܡܹܐ.

²⁴ ܘܟܲܕ݂ ܗܵܟܲܢܵܐ ܢܵܦܹܩ ܗ̄ܘܵܐ ܦܵܘܠܘܿܣ ܪܘܼܚܵܐ. ܩܥܵܐ ܦܹܗܹܣܛܘܿܣ ܒܩܵܠܵܐ ܪܵܡܵܐ. ܫܢܲܝܬܿ ܠܵܟ݂ ܦܵܘܠܹܐ. ܣܸܦܪܵܐ ܣܲܓܿܝܼܐܵܐ ܥܲܒ݂ܕܵܟ݂ ܕܬܸܫܢܹܐ.

²⁵ ܐܵܡܲܪ ܦܵܘܠܘܿܣ. ܠܵܐ ܫܢܝܼܬ݂ ܢܲܨܝܼܚܵܐ ܦܹܗܹܣܛܘܿܣ. ܐܸܠܵܐ ܡܸܠܲܝ̈ ܫܪܵܪܵܐ ܘܬܲܩܢܘܼܬ݂ܵܐ ܡܡܲܠܸܠ ܐ̄ܢܵܐ.

²⁶ ܘܐܵܦ ܡܲܠܟܵܐ ܐܵܓܹܪܦܘܿܣ ܝܲܬܝܼܪܵܐܝܼܬ݂ ܝܵܕ݂ܲܥ ܥܠܲܝܗܹܝܢ ܕܗܵܠܹܝܢ. ܘܡܛܠ ܗܵܢܵܐ ܥܹܝܢ ܒܲܓ݂ܠܹܐ ܡܡܲܠܸܠ ܐ̄ܢܵܐ ܩܕ݂ܵܡܵܘܗܝ. ܡܛܠ ܕܲܚܕ݂ܵܐ ܡܸܢ ܗܵܠܹܝܢ ܡܸܠܹ̈ܐ ܠܵܐ ܣܵܒܲܪ ܐ̄ܢܵܐ ܕܛܲܥܝܵܢ ܠܹܗ. ܕܠܵܐ ܗ̄ܘܵܐ ܒܛܘܼܫܝܵܐ ܣܥܝܼܪܵܢ.

²⁷ ܡܗܲܝܡܸܢ ܐܲܢ̄ܬܿ ܡܲܠܟܵܐ ܐܵܓܹܪܦܲܐ ܠܲܢܒ݂ܝܹ̈ܐ. ܝܵܕ݂ܲܥ ܐ̄ܢܵܐ ܕܲܡܗܲܝܡܸܢ ܐܲܢ̄ܬܿ.

²⁸ ܐܵܡܲܪ ܠܹܗ ܐܵܓܹܪܦܘܿܣ. ܒܩܲܠܝܼܠ ܡܸܕܸܡ ܡܦܝܼܣ ܐܲܢ̄ܬܿ ܠܝܼ ܕܐܸܗܘܹܐ ܟܪܸܣܛܝܵܢܵܐ.

²⁹ ܘܦܵܘܠܘܿܣ ܐܸܡܲܪ. ܒܵܥܹܐ ܗ̄ܘܹܝܬ݂ ܡܸܢ ܐܲܠܵܗܵܐ ܒܩܲܠܝܼܠ ܘܲܒ݂ܣܲܓܝܼ. ܠܵܐ ܗ̄ܘܵܐ ܠܵܟ݂ ܒܲܠܚܘܿܕ݂ ܐܸܠܵܐ ܐܵܦ ܠܟ݂ܠܗܘܿܢ ܐܲܝܠܹܝܢ ܕܫܵܡܥܝܼܢ ܠܝܼ ܝܵܘܡܵܢܵܐ. ܕܢܸܗܘܘܿܢ ܐܲܟ݂ܘܵܬ݂ܝ ܠܒܲܪ ܡܸܢ ܐܲܣܘܼܪܹ̈ܐ ܗܵܠܹܝܢ.

³⁰ ܘܩܼܵܡ ܠܹܗ ܡܲܠܟܵܐ ܘܗܸܓ݂ܡܘܿܢܵܐ ܘܒܲܪܢܝܼܩܹܐ. ܘܐܲܝܠܹܝܢ ܕܝܵܬ݂ܒܝܼܢ ܗ̄ܘܼܵܘ ܥܲܡܗܘܿܢ.

³¹ ܘܟܲܕ݂ ܦܪܲܩܘ ܡܸܢ ܬܲܡܵܢ. ܡܡܲܠܠܝܼܢ ܗ̄ܘܼܵܘ ܚܲܕ݂ ܥܲܡ ܚܲܕ݂ ܘܐܵܡܪܝܼܢ. ܕܡܸܕܸܡ ܕܫܵܘܹܐ ܠܡܵܘܬܵܐ ܐܵܘ ܠܐܲܣܘܼܪܹ̈ܐ. ܠܵܐ ܥܒܲܕ݂ ܓܲܒ݂ܪܵܐ ܗܵܢܵܐ.

³² ܘܐܸܡܲܪ ܐܵܓܹܪܦܘܿܣ ܠܦܹܗܹܣܛܘܿܣ. ܡܸܫܟܲܚ ܗ̄ܘܵܐ ܓܲܒ݂ܪܵܐ ܗܵܢܵܐ ܕܢܸܫܬܿܪܹܐ. ܐܸܠܘܼ ܒܓܲܢ ܩܹܣܲܪ ܠܵܐ ܩܪܵܐ.

27

¹ ܘܲܦܩܲܕ݂ ܥܠܵܘܗܝ ܦܹܗܹܣܛܘܿܣ. ܕܢܸܫܬܲܕܲܪ ܠܘܵܬ݂ ܩܹܣܲܪ ܠܐܝܼܛܵܠܝܼܵܐ. ܘܐܲܫܠܡܹܗ ܠܦܵܘܠܘܿܣ ܘܠܲܐܣܝܼܪܹ̈ܐ ܐ̄ܚܪ̈ܵܢܹܐ ܥܲܡܹܗ. ܠܓܲܒ݂ܪܵܐ ܚܲܕ݂ ܩܸܢܛܪܘܿܢܵܐ ܡܸܢ ܐܸܣܦܹܝܪ ܣܹܒܲܣܛܹܐ. ܕܲܫܡܹܗ ܗܘܵܐ ܝܘܼܠܝܼܘܿܣ.

² ܘܟܲܕ݂ ܗܘܸܵܬ݂ ܕܢܸܪܕܹܐ. ܢܚܸܬ݂ܢ ܠܐܸܠܦܵܐ ܕܐܝܼܬܹܝܗܿ ܗ̄ܘܵܬ݂ ܡܸܢ ܐܵܕ݂ܪܵܡܸܢܛܘܿܣ ܡܕ݂ܝܼܢ̄ܬܵܐ. ܘܐܵܙܵܠ̄ܐ ܗ̄ܘܵܬ݂ ܠܐܲܬ݂ܪܵܐ ܕܐܵܣܝܼܵܐ. ܘܥܲܠ ܗ̄ܘܵܐ ܥܲܡܲܢ ܠܐܸܠܦܵܐ. ܐܵܪܹܣܛܲܪܟ݂ܘܿܣ ܡܵܩܹܕܿܘܿܢܵܝܵܐ ܕܡܸܢ ܬܸܣܵܠܘܿܢܝܼܩܹܐ ܡܕ݂ܝܼܢ̄ܬܵܐ.

³ ܘܲܠܝܵܘܡܵܐ ܐ̄ܚܪܹܢܵܐ. ܡܲܛܝܼܢ ܠܨܲܝܕܵܢ. ܘܐܸܬ݂ܚܲܫܲܚ ܩܸܢܛܪܘܿܢܵܐ ܒܲܡܪܲܚܡܵܢܘܼܬ݂ܵܐ ܠܘܵܬ݂ ܦܵܘܠܘܿܣ. ܘܐܲܦܸܣ ܠܹܗ ܕܢܹܐܙܲܠ ܠܘܵܬ݂ ܪ̈ܵܚܡܵܘܗܝ. ܘܢܸܬܿܬܿܢܝܼܚ.

⁴ ܘܡܸܢ ܬܲܡܵܢ ܪܕ݂ܲܝܢ. ܘܡܛܠ ܕܪ̈ܘܼܚܹܐ ܣܲܩܘܼܒ݂ܠܵܢ ܗ̄ܘܲܝ̈. ܐܸܬ݂ܟܪܸܟ݂ܢ ܥܲܠ ܩܹܘܦܪܘܿܣ.

⁵ ܘܲܥܒܲܪܢ ܝܲܡܵܐ ܕܩܝܼܠܝܼܩܝܼܵܐ ܘܲܕ݂ܦܲܡܦܹܘܠܝܼܵܐ. ܘܡܲܛܝܼܢ ܠܡܹܘܪܵܐ ܡܕ݂ܝܼܢ̄ܬܵܐ ܕܠܘܼܩܝܼܵܐ.

⁶ ܘܐܸܫܟܲܚ ܬܲܡܵܢ ܩܸܢܛܪܘܿܢܵܐ ܐܸܠܦܵܐ ܡܸܢ ܐܵܠܸܟ݂ܣܲܢܕܪܝܼܵܐ. ܕܐܵܙܵܠ̄ܐ ܗ̄ܘܵܬ݂ ܠܐܝܼܛܵܠܝܼܵܐ. ܘܐܵܘܬܿܒܲܢ ܒܵܗܿ.

⁷ ܘܡܛܠ ܕܝܲܩܝܼܪܵܐܝܼܬ݂ ܪܵܕ݂ܝܵܐ ܗ̄ܘܵܬ݂ ܠܝܵܘ̈ܡܵܬ݂ܵܐ ܣܲܓܝܼܐܹ̈ܐ. ܠܡܲܚܣܸܢ ܡܲܛܝܼܢ ܠܘܼܩܒܲܠ ܩܢܝܼܕ݂ܘܿܣ ܓܵܙܲܪܬܵܐ. ܘܡܛܠ ܕܠܵܐ ܫܵܒ݂ܩܵܐ ܗ̄ܘܵܬ݂ ܪܘܼܚܵܐ ܕܢܹܐܙܲܠ ܬܿܪܝܼܨܵܐܝܼܬ݂. ܐܸܬ݂ܟܪܸܟ݂ܢ ܥܲܠ ܩܪܹܛܹܐ. ܠܘܼܩܒܲܠ ܣܵܠܵܡܘܿܢܵܐ ܡܕ݂ܝܼܢ̄ܬܵܐ.

⁸ ܘܲܠܡܲܚܣܸܢ ܟܲܕ݂ ܪܵܕܹܝܢܲܢ ܚܕ݂ܵܪܹܝܗܿ. ܡܲܛܝܼܢ ܠܕܘܼܟܬ݂ܵܐ ܕܡܸܬ݂ܩܲܪܝܵܐ ܠܡܹܐܢܹ̈ܐ ܫܲܦܝܼܪܹ̈ܐ. ܘܩܲܪܝܼܒ݂ܵܐ ܗ̄ܘܵܬ݂ ܠܵܗܿ ܡܕ݂ܝܼܢ̄ܬܵܐ ܕܲܫܡܵܗܿ ܠܵܐܣܹܐܵܐ.

⁹ ܘܲܗܘܲܝܢ ܬܲܡܵܢ ܙܲܒ݂ܢܵܐ ܣܲܓܿܝܼܐܵܐ. ܥܕ݂ܲܡܵܐ ܕܲܥܒܲܪ ܐܵܦ ܝܵܘܡܵܐ ܕܨܵܘܡܵܐ ܕܝܗ̄ܘܼܕ݂ܵܝܹ̈ܐ. ܘܲܗܘܵܐ ܠܹܗ ܩܸܢܛܵܐ ܕܢܸܪܕܹܐ ܐ̄ܢܵܫ ܒܝܲܡܵܐ. ܘܡܵܠܹܟ݂ ܗ̄ܘܵܐ ܠܗܘܿܢ ܦܵܘܠܘܿܣ

¹⁰ ܘܐܵܡܲܪ. ܓܲܒ݂ܪܹ̈ܐ. ܚܵܙܹܐ ܐ̄ܢܵܐ ܕܒ݂ܐܘܼܠܨܵܢܵܐ ܘܲܒ݂ܚܘܼܣܪܵܢܵܐ ܣܲܓܿܝܼܐܵܐ ܗܵܘܝܵܐ ܡܲܪܕܝܼܬܲܢ. ܠܵܘ ܒܲܠܚܘܿܕ݂ ܕܡܵܘܒܠܵܗܿ ܕܐܸܠܦܲܢ ܐܸܠܵܐ ܐܵܦ ܕܢܲܦ̮̈ܫܵܬܲܢ ܕܝܼܠܲܢ.

¹¹ ܩܸܢܛܪܘܿܢܵܐ ܕܹܝܢ ܠܩܹܘܒܲܪܢܹܛܵܐ ܘܲܠܡܵܪܵܗܿ ܕܐܸܠܦܵܐ ܫܵܡܲܥ ܗ̄ܘܵܐ ܝܲܬܿܝܼܪ ܡܸܢ ܡܸܠܵܘ̈ܗܝ ܕܦܵܘܠܘܿܣ.

¹² ܘܡܛܠ ܕܠܵܐ ܥܵܗܹܢ ܗ̄ܘܵܐ ܗܵܘ ܠܡܹܐܢܵܐ ܠܡܲܣܬܵܝܘܼ ܒܹܗ ܣܲܬ݂ܘܵܐ. ܣܲܓܝܼܐܹ̈ܐ ܡܸܢܲܢ ܨܵܒܹܝܢ ܗ̄ܘܼܵܘ ܕܢܸܪܕܹܐ ܡܸܢ ܬܲܡܵܢ. ܘܐܸܢܗܘܼ ܕܡܸܫܟܿܚܝܼܢ. ܕܲܢܡܲܢܥܘܼܢ ܘܢܲܣܬܿܘܼܢ ܒܲܠܡܹܐܢܵܐ ܚܲܕ݂ ܕܐܝܼܬ݂ܵܘܗܝ ܗ̄ܘܵܐ ܒܲܩܪܹܛܹܐ. ܘܡܸܬ݂ܩܪܹܐ ܗ̄ܘܵܐ ܦܹܘܢܸܟܿܣ. ܘܚܵܐܲܪ ܗ̄ܘܵܐ ܠܬܲܝܡܢܵܐ.

¹³ ܘܟܲܕ݂ ܢܸܫܒܲܬ݂ ܪܘܼܚܵܐ ܕܬܲܝܡܢܵܐ. ܘܲܣܒܲܪܘ ܕܲܡܡܲܛܹܝܢ ܐܲܝܟ݂ ܨܸܒ݂ܝܵܢܗܘܿܢ. ܪܵܕܹܝܢ ܗ̄ܘܼܵܘ ܚܕ݂ܵܪܲܝ ܩܪܹܛܹܐ.

¹⁴ ܘܡܸܢ ܒܵܬܲܪ ܩܲܠܝܼܠ ܢܦܲܩ ܥܠܲܝܢ ܡܲܫܒ݂ܵܐ ܕܥܲܠܥܵܠܵܐ. ܕܡܸܬ݂ܩܪܹܐ ܛܹܘܦܹܘܢܝܼܩܘܿܣ ܐܹܘܪܲܩܠܝܼܕ݂ܘܿܢ.

¹⁵ ܘܐܸܬ݂ܚܲܛܦܲܬ݂ ܐܸܠܦܵܐ. ܘܠܵܐ ܐܸܫܟܚܲܬ݂ ܕܲܬ݂ܩܘܼܡ ܠܘܼܩܒܲܠ ܪܘܼܚܵܐ. ܘܝܲܗ̄ܒ݂ܢ ܠܐܲܝܕ݂ܵܐ ܕܗܝܼ.

¹⁶ ܘܟܲܕ݂ ܥܒܲܪܢ ܓܵܙܲܪܬܵܐ ܚܕ݂ܵܐ ܕܡܸܬ݂ܩܲܪܝܵܐ ܩܹܘܕ݂ܵܐ. ܠܡܲܚܣܸܢ ܐܸܫܟܲܚܢ ܐܸܚܲܕ݂ܢ ܠܩܲܪܩܘܼܪܵܐ.

¹⁷ ܘܟܲܕ݂ ܫܩܲܠܢܵܗܿ. ܡܚܲܝܨܝܼܢ ܗ̄ܘܲܝܢ ܘܡܲܬ݂ܩܢܝܼܢ ܠܵܗܿ ܠܐܸܠܦܵܐ. ܘܡܛܠ ܕܕ݂ܵܚܠܝܼܢ ܗ̄ܘܲܝܢ ܕܕ݂ܲܠܡܵܐ ܢܸܦܠ ܒܡܲܚܲܬܿܬܹܿܗ ܕܝܲܡܵܐ. ܐܲܚܸܬ݂ܢܵܝܗܝ ܠܐܲܪܡܹܢܘܿܢ. ܘܗܵܟ݂ܘܵܬ݂ ܪܵܕ݂ܝܢ ܗ̄ܘܲܝܢ.

¹⁸ ܘܟܲܕ݂ ܩܵܡ ܠܹܗ ܥܠܲܝܢ ܟܝܼܡܘܿܢܵܐ ܩܲܫܝܵܐ. ܠܝܵܘܡܵܐ ܐ̄ܚܪܹܢܵܐ ܫܕ݂ܲܝܢ ܡܵܐܢܲܝ̈ܢ ܒܝܲܡܵܐ.

¹⁹ ܘܲܠܝܵܘܡܵܐ ܕܲܬ݂ܠܵܬ݂ܵܐ. ܡܵܐܢܹ̈ܐ ܕܝܼܠܵܗܿ ܕܐܸܠܦܵܐ ܒܐܝܼܕ݂ܲܝ̈ܢ ܫܕ݂ܲܝܢ.

²⁰ ܘܟܲܕ݂ ܐܸܚܲܕ݂ ܠܹܗ ܣܲܬ݂ܘܵܐ ܝܵܘ̈ܡܵܬ݂ܵܐ ܝܲܬܝܼܪܹ̈ܐ. ܘܠܵܐ ܫܸܡܫܵܐ ܡܸܬ݂ܚܙܹܐ ܗ̄ܘܵܐ ܘܠܵܐ ܣܲܗܪܵܐ ܘܠܵܐ ܟܵܘܟܒܹ̈ܐ. ܣܲܒ݂ܪܵܐ ܕܚܲܝܲܝ̈ܢ ܟܠ ܟܠܹܗ ܐܸܬ݂ܦܣܸܩ ܗ̄ܘܵܐ ܠܹܗ.

²¹ ܘܟܲܕ݂ ܐ̄ܢܵܫ ܡܸܕܸܡ ܠܵܐ ܡܸܣܬܲܝܒܲܪ ܗ̄ܘܵܐ. ܗܵܝܕܹܝܢ ܩܵܡ ܦܵܘܠܘܿܣ ܒܲܝܢܵܬ݂ܗܘܿܢ ܘܐܸܡܲܪ. ܐܸܠܘܼ ܐܸܬܿܛܦܝܼܣܬܿܘܢ ܠܝܼ ܓܲܒ݂ܪܹ̈ܐ. ܠܵܐ ܪܵܕܹܝܢ ܗ̄ܘܲܝܢ ܡܸܢ ܩܪܹܛܹܐ. ܘܡܸܬ݂ܚܲܣܟ݂ܝܼܢ ܗ̄ܘܲܝܢ ܡܸܢ ܚܘܼܣܪܵܢܵܐ ܘܡܸܢ ܐܘܼܠܨܵܢܵܐ ܗܵܢܵܐ.

²² ܘܗܵܫܵܐ ܡܵܠܹܟ݂ ܐ̄ܢܵܐ ܕܬܸܗܘܘܿܢ ܕܠܵܐ ܥܵܩܵܐ. ܢܲܦ̮ܫܵܐ ܓܹܝܪ ܡܸܢܟ݂ܘܿܢ ܚܕ݂ܵܐ ܠܵܐ ܐܵܒ݂ܕܵܐ. ܐܸܠܵܐ ܐܸܢ ܐܸܠܦܵܐ.

²³ ܐܸܬ݂ܚܙܝܼ ܠܝܼ ܓܹܝܪ ܒܠܸܠܝܵܐ ܗܵܢܵܐ ܡܲܠܲܐܟܹܗ ܕܐܲܠܵܗܵܐ. ܗܵܘ ܕܕ݂ܝܼܠܹܗ ܐ̄ܢܵܐ ܘܠܹܗ ܦܵܠܲܚ ܐ̄ܢܵܐ.

²⁴ ܘܐܸܡܲܪ ܠܝܼ. ܠܵܐ ܬܸܕ݂ܚܲܠ ܦܵܘܠܹܐ. ܥܬ݂ܝܼܕ݂ ܗܘܼ ܠܵܟ݂ ܠܲܡܩܵܡ ܩܕ݂ܵܡ ܩܹܣܲܪ. ܘܗܵܐ ܝܲܗ̄ܒ݂ ܠܵܟ݂ ܐܲܠܵܗܵܐ ܡܵܘܗܲܒ݂ܬܵܐ ܠܟ݂ܠ ܕܪܵܕܹܝܢ ܥܲܡܵܟ݂.

²⁵ ܡܛܠ ܗܵܢܵܐ ܐܸܬ݂ܠܲܒܲܒ݂ܘ ܓܲܒ݂ܪܹ̈ܐ. ܡܗܲܝܡܸܢ ܐ̄ܢܵܐ ܓܹܝܪ ܒܐܲܠܵܗܵܐ. ܕܗܵܟܲܢܵܐ ܗܵܘܹܐ ܐܲܝܟ݂ ܡܵܐ ܕܐܸܬ݂ܡܲܠܲܠ ܥܲܡܝ.

²⁶ ܒܪܲܡ ܠܓ݂ܵܙܲܪܬܵܐ ܚܕ݂ܵܐ ܐܝܼܬ݂ ܠܲܢ ܕܢܸܫܬܿܕܹܐ.

²⁷ ܘܡܸܢ ܒܵܬܲܪ ܐܲܪܒܬܲܥܣܲܪ ܝܵܘܡ̈ܝܼܢ ܕܲܛܥܲܝܢ ܘܐܸܬܿܛܲܪܲܦܢ ܒܗܸܕܿܪܝܼܘܿܣ ܝܲܡܵܐ. ܒܦܸܠܓܹܗ ܕܠܸܠܝܵܐ ܣܒܲܪܘ ܡܲܠܵܚܹ̈ܐ ܕܠܲܐܪܥܵܐ ܡܸܬ݂ܩܲܪܒ݂ܝܼܢ ܗ̄ܘܼܵܘ.

²⁸ ܘܐܲܪܡܝܼܘ ܐܹܘܩܝܼܢܘܿܣ. ܘܐܸܫܟܲܚܘ ܩܵܘܡ̈ܝܼܢ ܥܸܣܪܝܼܢ. ܘܬ݂ܘܼܒ݂ ܩܲܠܝܼܠ ܪܕ݂ܵܘ. ܘܐܸܫܟܲܚܘ ܩܵܘܡ̈ܝܼܢ ܚܲܡܫܲܥܸܣܪܹ̈ܐ.

²⁹ ܘܟܲܕ݂ ܕܲܚܝܼܠܝܼܢ ܗ̄ܘܲܝܢ ܕܲܠܡܵܐ ܢܸܫܬܿܟܲܚ ܠܲܢ ܒܕ݂ܘܼܟ̈ܝܵܬ݂ܵܐ ܕܐܝܼܬ݂ ܒܗܹܝܢ ܫܘܿܥܹ̈ܐ. ܐܲܪܡܝܼܘ ܡܸܢ ܚܲܪܬ݂ܵܗܿ ܕܐܸܠܦܵܐ ܐܹܘܩܝܼܢܘܿܣ ܐܲܪܒܲܥ. ܘܲܡܨܲܠܹܝܢ ܗ̄ܘܼܵܘ ܕܢܸܗܘܹܐ ܝܵܘܡܵܐ.

³⁰ ܡܲܠܵܚܹ̈ܐ ܕܹܝܢ ܒܥܵܘ ܠܡܸܥܪܲܩ ܡܸܢܹܗ ܡܸܢ ܐܸܠܦܵܐ. ܘܐܲܚܸܬ݂ܘ ܡܸܢܹܗ ܠܩܲܪܩܘܼܪܵܐ ܠܝܲܡܵܐ. ܒܥܸܠܬ݂ܵܐ ܕܢܹܐܙܠ̄ܘܼܢ ܒܵܗܿ ܘܢܹܐܣܪܘܼܢܵܗܿ ܠܐܸܠܦܵܐ ܒܐܲܪܥܵܐ.

³¹ ܘܟܲܕ݂ ܚܙܵܐ ܦܵܘܠܘܿܣ. ܐܸܡܲܪ ܠܩܸܢܛܪܘܿܢܵܐ ܘܠܐܸܣܛܪ̈ܵܛܝܼܘܛܹܐ. ܕܐܸܢ ܗܵܠܹܝܢ ܒܐܸܠܦܵܐ ܠܵܐ ܡܟܲܬܿܪܝܼܢ. ܐܲܢ̄ܬܿܘܿܢ ܠܵܐ ܡܸܫܟܿܚܝܼܢ ܐܢ̄ܬܘܿܢ ܕܬܸܚܘܿܢ.

³² ܗܵܝܕܹܝܢ ܦܣܲܩܘ ܐܸܣܛܪ̈ܵܛܝܼܘܛܹܐ ܠܚܲܒ݂ܠܹܝ̈ܗܿ ܕܩܲܪܩܘܼܪܵܐ ܡܸܢ ܐܸܠܦܵܐ ܘܫܲܒ݂ܩܘܼܗܿ ܛܵܥܝܵܐ.

³³ ܗܘܼ ܕܹܝܢ ܦܵܘܠܘܿܣ ܥܕ݂ܲܡܵܐ ܕܲܗܘܵܐ ܨܲܦܪܵܐ. ܡܦܝܼܣ ܗ̄ܘܵܐ ܠܟ݂ܠܗܘܿܢ ܕܲܢܩܲܒܠܘܼܢ ܣܲܝܒܵܪܬܵܐ ܟܲܕ݂ ܐܵܡܲܪ ܠܗܘܿܢ. ܝܵܘܡܵܢܵܐ ܗܵܐ ܐܲܪܒܬܲܥܣܲܪ ܝܵܘܡ̈ܝܼܢ. ܡܸܢ ܩܸܢܛܵܐ ܡܸܕܸܡ ܠܵܐ ܛܥܝܼܡ ܠܟ݂ܘܿܢ.

³⁴ ܡܛܠ ܗܵܕܹܐ ܒܵܥܹܐ ܐ̄ܢܵܐ ܡܸܢܟ݂ܘܿܢ. ܕܲܬ݂ܩܲܒܠܘܼܢ ܡܹܐܟ݂ܘܼܠܬܵܐ ܠܩܘܼܝܵܡܵܐ ܕܚܲܝܲܝ̈ܟܘܿܢ. ܡܸܢܬ݂ܵܐ ܓܹܝܪ ܡܸܢ ܪܹܫܵܐ ܕܚܲܕ݂ ܡܸܢܟ݂ܘܿܢ ܠܵܐ ܐܵܒ݂ܕܵܐ.

³⁵ ܘܟܲܕ݂ ܗܵܠܹܝܢ ܐܸܡܲܪ. ܢܣܲܒ݂ ܠܲܚܡܵܐ ܘܫܲܒܲܚ ܠܐܲܠܵܗܵܐ ܩܕ݂ܵܡ ܟܠܗܘܿܢ. ܘܲܩܨܵܐ ܘܐܲܩܸܦ ܠܡܹܐܟܲܠ.

³⁶ ܘܐܸܬ݂ܒܲܝܲܐܘ ܟܠܗܘܿܢ ܘܩܲܒܸܠܘ ܬܘܼܪܣܵܝܵܐ.

³⁷ ܐܝܼܬܲܝܢ ܗ̄ܘܲܝܢ ܕܹܝܢ ܒܐܸܠܦܵܐ. ܡܲܐܬܹܝܢ ܘܫܲܒ݂ܥܝܼܢ ܘܫܸܬ݂ ܢܲܦ̮̈ܫܵܢ.

³⁸ ܘܟܲܕ݂ ܣܒܲܥܘ ܡܹܐܟ݂ܘܼܠܬܵܐ. ܐܲܩܸܠܘ ܡܸܢ ܐܸܠܦܵܐ. ܘܲܫܩܲܠܘ ܚܸܛܹ̈ܐ ܘܲܫܕ݂ܵܘ ܒܝܲܡܵܐ.

³⁹ ܘܟܲܕ݂ ܗܘܵܐ ܝܵܘܡܵܐ. ܣܲܦܵܢܹ̈ܐ ܐܲܝܕ݂ܵܐ ܗܝ ܐܲܪܥܵܐ ܠܵܐ ܐܸܫܬܵܘܕܲܥܘ. ܐܸܠܵܐ ܚܵܪܘ ܥܲܠ ܓܸܢ̄ܒ݂ ܝܲܒ݂ܫܵܐ ܟܸܢܦܵܐ ܚܕ݂ܵܐ ܕܝܲܡܵܐ. ܐܲܝܟܵܐ ܕܪܵܢܹܝܢ ܗ̄ܘܼܵܘ ܕܐܸܢ ܡܸܫܟܚܵܐ. ܢܸܕܚܘܼܢܵܗܿ ܠܐܸܠܦܵܐ.

⁴⁰ ܘܲܦܣܲܩܘ ܐܹܘܩܝܼܢܘܿܣ ܡܸܢ ܐܸܠܦܵܐ. ܘܐܲܪܦܝܼܘ ܐܸܢܹܝܢ ܒܝܲܡܵܐ. ܘܲܫܪܵܘ ܪ̈ܵܟ݂ܒܹܐ ܕܣܵܘܟܵܢܹ̈ܐ. ܘܲܬ݂ܠܵܘ ܐܲܪܡܹܢܘܿܢ ܙܥܘܿܪܵܐ ܠܪܘܼܚܵܐ ܕܢܵܫܒܵܐ. ܘܪܵܕܹܝܢ ܗ̄ܘܼܵܘ ܠܐܲܦܲܝ ܝܲܒ݂ܫܵܐ.

⁴¹ ܘܓܸܫܲܬ݂ ܐܸܠܦܵܐ ܒܕܘܼܟܬ݂ܵܐ ܕܪܵܡܵܐ. ܒܲܝܢܵܬ݂ ܬܪܹܝܢ ܥܘܼܡܩ̈ܝܼܢ ܕܝܲܡܵܐ. ܘܐܸܬ݂ܚܲܪܝܲܬ݂ ܒܵܗܿ. ܘܩܼܵܡ ܥܠܹܝܗܿ ܓܲܒܵܗܿ ܩܲܕ݂ܡܵܝܵܐ. ܘܠܵܐ ܡܸܬܿܬܿܙܝܼܥ ܗ̄ܘܵܐ. ܓܲܒܵܗܿ ܕܹܝܢ ܐ̄ܚܪܵܝܵܐ ܐܸܫܬܿܪܝܼ ܡܸܢ ܩܛܝܼܪܵܐ ܕܓܲܠ̱ܠܹ̈ܐ.

⁴² ܘܲܨܒ݂ܵܘ ܗ̄ܘܼܵܘ ܐܸܣܛܪ̈ܵܛܝܼܘܛܹܐ. ܕܲܢܩܲܛܠܘܼܢ ܐܸܢܘܿܢ ܠܐܲܣܝܼܪܹ̈ܐ. ܕܠܵܐ ܢܲܪܡܘܼܢ ܣܲܚܘܵܐ ܘܢܸܥܪܩܘܼܢ ܠܗܘܿܢ ܡܸܢܗܘܿܢ.

⁴³ ܘܩܸܢܛܪܘܿܢܵܐ ܟܠܵܐ ܐܸܢܘܿܢ ܡܸܢ ܗܵܕܹܐ. ܡܛܠ ܕܨܵܒܹܐ ܗ̄ܘܵܐ ܕܢܲܚܹܐ ܠܦܵܘܠܘܿܣ. ܘܠܲܐܝܠܹܝܢ ܕܡܸܫܟܿܚܝܼܢ ܗ̄ܘܼܵܘ ܠܡܲܪܡܵܝܘܼ ܣܲܚܘܵܐ. ܦܩܲܕ݂ ܠܗܘܿܢ ܕܲܒ݂ܩܲܕ݂ܡܵܝܹ̈ܐ ܢܸܣܚܘܿܢ ܘܢܸܥܒܿܪܘܼܢ ܠܐܲܪܥܵܐ.

⁴⁴ ܘܲܠܫܲܪܟܵܐ ܥܲܠ ܕܲܦܹ̈ܐ ܘܥܲܠ ܩܲܝܣܹ̈ܐ ܐ̄ܚܪ̈ܵܢܹܐ ܕܐܸܠܦܵܐ. ܐܲܥܒܲܪܘ ܐܸܢܘܿܢ. ܘܗܵܟܲܢܵܐ ܟܠܗܘܿܢ ܐܸܫܬܵܘܙܲܒ݂ܘ ܠܐܲܪܥܵܐ.

28

¹ ܘܡܸܢ ܒܵܬܲܪܟܸܢ ܝܼܠܸܦܢ. ܕܡܝܼܠܹܼܛܹܐ ܡܸܬ݂ܩܲܪܝܵܐ ܗܵܝ ܓܵܙܲܪܬܵܐ.

² ܘܒܲܪܒܪ̈ܵܝܹܐ ܕܥܵܡܪܝܼܢ ܗ̄ܘܼܵܘ ܒܵܗܿ. ܪ̈ܲܚܡܹܐ ܣܲܓܝܼ̈ܐܹܐ ܚܵܘܝܼܘ ܠܘܵܬܲܢ. ܘܐܵܘܚܸܕ݂ܘ ܢܘܼܪܵܐ. ܘܲܩܪܵܐܘܼܢ ܠܟ݂ܠܲܢ ܕܢܸܫܚܲܢ. ܡܛܠ ܡܸܛܪܵܐ ܣܲܓܿܝܼܐܵܐ ܘܩܘܼܪܫܵܐ ܕܐܝܼܬ݂ ܗ̄ܘܵܐ.

³ ܘܦܵܘܠܘܿܣ ܫܩܲܠ ܣܘܿܓ݂ܵܐܐ ܕܚܲܒܘܼܒܹ̈ܐ ܘܣܵܡ ܥܲܠ ܢܘܼܪܵܐ. ܘܢܸܦܩܲܬ݂ ܡܸܢܗܘܿܢ ܐܵܟܸܕ݂ܢܵܐ ܡܸܢ ܪܲܬ݂ܚܵܐ ܕܢܘܼܪܵܐ ܘܢܸܟ݂ܬܲܬ݂ ܒܐܝܼܕܹܗ.

⁴ ܘܟܲܕ݂ ܚܙܵܐܘܼܗܿ ܒܲܪܒܪ̈ܵܝܹܐ ܕܬܲܠܝܵܐ ܒܐܝܼܕܹܗ. ܐܵܡܪܝܼܢ ܗ̄ܘܼܵܘ. ܟܒܲܪ ܗܵܢܵܐ ܓܲܒ݂ܪܵܐ ܩܵܛܘܼܠܵܐ ܗ̄ܘܼ. ܕܟܲܕ݂ ܐܸܫܬܵܘܙܲܒ݂ ܡܸܢ ܝܲܡܵܐ. ܟܹܐܢܘܼܬ݂ܵܐ ܠܵܐ ܫܒܲܩܬܹܗ ܕܢܸܚܹܐ.

⁵ ܗܘܼ ܕܹܝܢ ܦܵܘܠܘܿܣ ܐܲܢܝܼܦ ܐܝܼܕܹܗ. ܘܲܫܕ݂ܵܗܿ ܠܵܐܟܸܕ݂ܢܵܐ ܒܢܘܼܪܵܐ. ܘܡܸܕܸܡ ܕܲܣܢܹܐ ܠܵܐ ܗܘܵܝܗܝ.

⁶ ܣܵܒ݂ܪܝܼܢ ܗ̄ܘܼܵܘ ܕܹܝܢ ܒܲܪܒܪ̈ܵܝܹܐ. ܕܒܲܪ ܫܵܥܬܹܗ ܡܸܬ݂ܡܣܹܐ ܘܢܵܦܹܿܠ ܟܲܕ݂ ܡܝܼܬ݂ ܥܲܠ ܐܲܪܥܵܐ. ܘܟܲܕ݂ ܥܸܕܵܢܵܐ ܣܲܓܿܝܼܐܵܐ ܣܲܟܝܼܘ ܘܲܚܙܵܘ ܕܡܸܕܸܡ ܕܲܣܢܹܐ ܠܵܐ ܗܘܵܝܗܝ. ܫܲܚܠܸܦܘ ܡܸܠܲܝ̈ܗܘܿܢ ܘܐܸܡܲܪܘ ܕܐܲܠܵܗܵܐ ܗ̄ܘܼ.

⁷ ܐܝܼܬ݂ ܗ̄ܘܵܐ ܕܹܝܢ ܩܘܼܪ̈ܝܵܐ ܒܹܗ ܒܗܵܘ ܐܲܬ݂ܪܵܐ. ܠܓܲܒ݂ܪܵܐ ܚܲܕ݂ ܕܲܫܡܹܗ ܗܘܵܐ ܦܘܼܦܠܝܼܘܿܣ. ܕܗܘܼ ܗܘܵܐ ܪܹܫܵܗܿ ܕܓ݂ܵܙܲܪܬܵܐ. ܘܩܲܒܠܲܢ ܒܒܲܝܬܹܿܗ ܬܠܵܬ݂ܵܐ ܝܵܘܡ̈ܝܼܢ. ܚܵܕ݂ܝܵܐܝܼܬ݂.

⁸ ܐܲܒ݂ܘܼܗܝ ܕܹܝܢ ܕܦܘܼܦܠܝܼܘܿܣ ܒܐܸܫܵܬ݂ܵܐ ܘܲܒ݂ܟܹܐܒ݂ ܡ̈ܥܲܝܵܐ ܟܪܝܼܗ ܗ̄ܘܵܐ. ܘܥܲܠ ܠܘܵܬܹܗ ܦܵܘܠܘܿܣ ܘܨܲܠܝܼ. ܘܣܵܡ ܥܠܵܘܗܝ ܐܝܼܕ݂ܗ ܘܐܲܚܠܡܹܗ.

⁹ ܘܟܲܕ݂ ܗܘܵܬܸ ܗܵܕܹܐ. ܐܵܦ ܫܲܪܟܵܐ ܐܲܝܠܹܝܢ ܕܐܝܼܬ݂ ܗ̄ܘܼܵܘ ܒܵܗܿ ܒܓ݂ܵܙܲܪܬܵܐ ܟܪ̈ܝܼܗܹܐ. ܩܵܪܒܝܼܢ ܗ̄ܘܼܵܘ ܠܘܵܬܹܗ ܘܡܸܬ݂ܐܲܣܹܝܢ ܗ̄ܘܼܵܘ.

¹⁰ ܘܐܝܼܩܵܪܹ̈ܐ ܪܵܘܪ̈ܒܹܐ ܝܲܩܪܘܼܢ. ܘܟܲܕ݂ ܢܵܦܩܝܼܢ ܗ̄ܘܲܝܢ ܡܸܢ ܬܲܡܵܢ. ܙܵܘܕ݂ܘܼܢ.

¹¹ ܢܦܲܩܢ ܕܹܝܢ ܒܵܬܲܪ ܝܲܪ̈ܚܹܐ ܬܠܵܬ݂ܵܐ. ܘܲܪܕ݂ܲܝܢ ܒܐܸܠܦܵܐ ܐܵܠܹܟ݂ܣܲܢܕܪܵܝܬܵܐ. ܕܐܲܣܬܿܝܲܬ݂ ܗ̄ܘܵܬ݂ ܒܵܗܿ ܒܓ݂ܵܙܲܪܬܵܐ. ܘܐܝܼܬ݂ ܗ̄ܘܵܬ݂ ܥܠܹܝܗܿ ܐܵܬ݂ܵܐ ܕܲܬ݂ܐܵܡܹ̈ܐ.

¹² ܘܐܸܬܲܝܢ ܠܣܵܪܵܩܘܿܣܵܐ ܡܕ݂ܝܼܢ̄ܬܵܐ. ܘܩܵܘܝܼܢ ܬܲܡܵܢ ܝܵܘ̈ܡܵܬ݂ܵܐ ܬܠܵܬ݂ܵܐ.

¹³ ܘܡܸܢ ܬܲܡܵܢ ܐܸܬ݂ܟܪܸܟ݂ܢ. ܘܡܲܢܲܥܢ ܠܪܸܓ݂ܝܘܿܢ ܡܕ݂ܝܼܢ̄ܬܵܐ. ܘܒܵܬܲܪ ܝܵܘܡܵܐ ܚܲܕ݂. ܢܸܫܒܲܬ݂ ܠܲܢ ܪܘܼܚܵܐ ܕܬܲܝܡܢܵܐ. ܘܠܲܬ݂ܪܹܝܢ ܝܵܘܡ̈ܝܼܢ. ܐܸܬ݂ܝܢ ܠܦܘܼܛܝܼܐܹܠܘܿܣ ܡܕ݂ܝܼܢ̄ܬܵܐ ܕܐܝܼܛܵܠܝܼܵܐ.

¹⁴ ܘܐܸܫܟܲܚܢ ܬܲܡܵܢ ܐܲܚܹ̈ܐ. ܘܲܒ݂ܥܵܘ ܡܸܢܲܢ. ܘܲܗܘܲܝܢ ܠܘܵܬ݂ܗܘܿܢ ܝܵܘ̈ܡܵܬ݂ܵܐ ܫܲܒ݂ܥܵܐ. ܘܗܵܝܕܹܝܢ ܐܸܙܲܠܢ ܠܪܗ̄ܘܿܡܹܐ.

¹⁵ ܘܟܲܕ݂ ܫܡܲܥܘ ܐܲܚܹ̈ܐ ܕܬܲܡܵܢ. ܢܦܲܩܘ ܠܐܘܼܪܥܲܢ ܥܕ݂ܲܡܵܐ ܠܫܘܼܩܵܐ ܕܡܸܬ݂ܩܪܹܐ ܐܵܦܝܼܘܿܣ ܦܘܿܪܘܿܣ. ܘܲܥܕ݂ܲܡܵܐ ܠܲܬ݂ܠܵܬ݂ ܚܵܢ̈ܘܵܢ. ܘܟܲܕ݂ ܚܙܵܐ ܐܸܢܘܿܢ ܦܵܘܠܘܿܣ. ܐܵܘܕܝܼ ܠܐܲܠܵܗܵܐ ܘܐܸܬ݂ܚܲܝܲܠ.

¹⁶ ܘܥܲܠܢ ܠܪܗ̄ܘܿܡܹܐ. ܘܐܲܦܸܣ ܩܸܢܛܪܘܿܢܵܐ ܠܦܵܘܠܘܿܣ. ܕܢܸܫܪܹܐ ܐܲܝܟܵܐ ܕܨܵܒܹܐ. ܥܲܡ ܐܸܣܛܪܵܛܝܼܘܛܵܐ ܗܵܘ ܕܢܵܛܲܪ ܗ̄ܘܵܐ ܠܹܗ.

¹⁷ ܘܡܸܢ ܒܵܬܲܪ ܬܠܵܬ݂ܵܐ ܝܵܘܡ̈ܝܼܢ. ܫܲܕܲܪ ܦܵܘܠܘܿܣ ܩܪܵܐ ܠܪܹ̈ܫܵܢܲܝܗܘܿܢ ܕܝܗ̄ܘܼܕ݂ܵܝܹ̈ܐ. ܘܟܲܕ݂ ܐܸܬ݂ܟܲܢܲܫܘ. ܐܸܡܲܪ ܠܗܘܿܢ. ܓܲܒ݂ܪܹ̈ܐ ܐܲܚܲܝ̈. ܐܸܢܵܐ ܟܲܕ݂ ܒܡܸܕܸܡ ܠܵܐ ܩܵܡܹܬ݂ ܠܘܼܩܒܲܠ ܥܲܡܵܐ ܘܢܵܡܘܿܣܵܐ ܕܐܲܒ݂ܵܗܲܝ̈. ܒܐܲܣܘܼܪܹ̈ܐ ܐܸܫܬܲܠܡܹܬ݂ ܡܸܢ ܐܘܿܪܸܫܠܸܡ ܒܐܝܼܕ݂ܵܐ ܕܪ̈ܗ̄ܘܿܡܵܝܹܐ.

¹⁸ ܘܗܸܢܘܿܢ ܟܲܕ݂ ܫܲܐܠܘܼܢܝ. ܨܒ݂ܵܘ ܕܢܸܫܪܘܼܢܵܢܝ. ܡܛܠ ܕܠܵܐ ܐܸܫܟܲܚܘ ܒܵܬܲܪܝ ܪܸܫܝܵܢܵܐ ܡܸܕܸܡ ܕܫܵܘܹܐ ܠܡܵܘܬܵܐ.

¹⁹ ܘܟܲܕ݂ ܩܵܝܡܝܼܢ ܗ̄ܘܼܵܘ ܠܘܼܩܒܲܠܝ ܝܗ̄ܘܼܕ݂ܵܝܹ̈ܐ. ܐܸܬ݂ܐܲܠܨܹܬ݂ ܕܐܸܩܥܹܐ ܒܓܸܢ ܩܹܣܲܪ. ܠܵܐ ܐܲܝܟ݂ ܐܝܼܬ݂ ܠܝܼ ܕܐܹܩܲܛܪܸܓ݂ ܒܡܸܕܸܡ ܠܲܒ݂ܢܲܝ̈ ܥܲܡܝ.

²⁰ ܡܛܠ ܗܵܢܵܐ ܒܥܹܝܬ݂ ܡܸܢܟ݂ܘܿܢ. ܕܬܹܐܬ݂ܘܢ ܘܐܸܚܙܹܝܟ݂ܘܿܢ ܘܐܸܫܬܲܥܹܐ ܠܟ݂ܘܿܢ ܗܵܠܹܝܢ. ܡܛܠ ܣܲܒ݂ܪܵܐ ܓܹܝܪ ܕܝܼܣܪܵܝܹܠ ܐܲܣܝܼܪ ܐ̄ܢܵܐ ܒܫܸܫܲܠܬܵܐ ܗܵܕܹܐ.

²¹ ܐܵܡܪܝܼܢ ܠܹܗ ܗܸܢܘܿܢ. ܚܢܲܢ ܐܸܓܲܪܬܵܐ ܥܠܲܝܟ ܠܵܐ ܩܲܒܸܠܢ ܡܸܢ ܝܼܗܘܼܕ݂. ܘܠܵܐ ܐ̄ܢܵܫ ܡܸܢ ܐܲܚܹ̈ܐ ܕܐܸܬ݂ܵܘ ܡܸܢ ܐܘܿܪܸܫܠܸܡ. ܐܸܡܲܪܘ ܠܲܢ ܡܸܕܸܡ ܕܒ݂ܝܼܫ ܥܠܲܝܟ.

²² ܨܵܒܹܝܢܲܢ (ܨܵܒܹܝܢ ܚܢܲܢ) ܕܹܝܢ ܕܢܸܫܡܲܥ ܡܸܢܵܟ݂ ܡܸܕܸܡ ܕܡܸܬ݂ܪܲܥܹܐ ܐܲܢ̄ܬܿ. ܡܛܠ ܕܝܘܼܠܦܵܢܵܐ ܗܵܢܵܐ. ܝܵܕ݂ܥܝܼܢܲܢ ܕܥܲܠ ܐ̄ܢܵܫ ܠܵܐ ܡܩܲܒܲܠ.

²³ ܘܐܲܩܝܼܡܘ ܠܹܗ ܝܵܘܡܵܐ. ܘܲܟ݂ܢܲܫܘ ܘܐܸܬ݂ܵܘ ܠܘܵܬܹܗ ܣܲܓܝܼ̈ܐܹܐ ܟܲܪ ܕܲܫܪܹܐ ܗ̄ܘܵܐ. ܘܲܓ݂ܠܵܐ ܠܗܘܿܢ ܥܲܠ ܡܲܠܟܘܼܬ݂ܵܐ ܕܐܲܠܵܗܵܐ ܟܲܕ݂ ܡܣܲܗܸܕ݂ ܘܲܡܦܝܼܣ ܠܗܘܿܢ ܥܲܠ ܝܼܫܘܿܥ. ܡܸܢ ܢܵܡܘܿܣܵܐ ܕܡܘܼܫܹܐ ܘܡܸܢ ܢܒ݂ܝܹ̈ܐ. ܡܸܢ ܨܲܦܪܵܐ ܘܲܥܕ݂ܲܡܵܐ ܠܪܲܡܫܵܐ.

²⁴ ܘܐ̄ܢܵܫܝܼ̈ܢ ܡܸܢܗܘܿܢ ܡܸܬܿܛܦܝܼܣܝܼܢ ܗ̄ܘܼܵܘ ܠܡܸܠܵܘ̈ܗܝ. ܘܐܲܚܪ̈ܵܢܹܐ ܠܵܐ ܡܸܬܿܛܦܝܼܣܝܼܢ ܗ̄ܘܼܵܘ.

²⁵ ܘܐܸܫܬܿܪܝܼܘ ܡܸܢ ܠܘܵܬܹܗ ܟܲܕ݂ ܠܵܐ ܫܵܠܡܝܼܢ ܠܲܚܕ݂ܵܕܹ̈ܐ. ܘܐܸܡܲܪ ܠܗܘܿܢ ܗܘܼ ܦܵܘܠܘܿܣ ܡܸܠܬ݂ܵܐ ܗܵܕܹܐ. ܫܲܦܝܼܪ ܡܲܠܸܠ ܪܘܼܚܵܐ ܕܩܘܼܕ݂ܫܵܐ. ܒܦܘܼܡ ܐܹܫܲܥܝܵܐ ܢܒ݂ܝܼܵܐ ܠܘܼܩܒܲܠ ܐܲܒ݂ܵܗܵܬ݂ܟ݂̈ܘܿܢ.

²⁶ ܟܲܕ݂ ܐܵܡܲܪ. ܕܙܸܠ ܠܘܵܬ݂ ܥܲܡܵܐ ܗܵܢܵܐ ܘܐܸܡܲܪ ܠܗܘܿܢ. ܕܫܸܡܥܵܐ ܬܸܫܡܥܘܼܢ ܘܠܵܐ ܬܸܣܬܲܟܠܘܼܢ. ܘܬܸܚܙܘܿܢ ܘܠܵܐ ܬܸܒ݂ܚܪܘܼܢ.

²⁷ ܐܸܬ݂ܥܲܒܝܼ ܠܹܗ ܓܹܝܪ ܠܸܒܹܗ ܕܥܲܡܵܐ ܗܵܢܵܐ. ܘܡܲܫܡܲܥܬ݂ܗܘܿܢ ܐܵܘܩܲܪܘ. ܘܥܲܝܢܲܝ̈ܗܘܿܢ ܥܲܡܸܨܘ. ܕܠܵܐ ܢܸܚܙܘܿܢ ܒܥܲܝܢܲܝ̈ܗܘܿܢ ܘܢܸܫܡܥܘܼܢ ܒܐܸܕ݂ܢܲܝ̈ܗܘܿܢ. ܘܢܸܣܬܲܟܠܘܼܢ ܒܠܸܒܗܘܿܢ ܘܲܢܬ݂ܘܒ݂ܘܼܢ ܠܘܵܬ݂ܝ ܘܐܸܫܒܘܼܩ ܠܗܘܿܢ.

²⁸ ܬܸܬ݂ܝܼܕ݂ܲܥ ܠܟ݂ܘܿܢ ܗܵܟܹܝܠ ܗܵܕܹܐ. ܕܲܠܥܲܡ̈ܡܹܐ ܗ̄ܘܼ ܐܸܫܬܲܕܲܪ ܗܵܢܵܐ ܦܘܼܪܩܵܢܵܐ ܕܐܲܠܵܗܵܐ. ܗܸܢܘܿܢ ܓܹܝܪ ܐܵܦ ܫܵܡܥܝܼܢ ܠܹܗ.

²⁹ ܘܟܲܕ݂ ܗܵܠܹܝܢ ܐܸܡܲܪ. ܢܦܲܩܘ ܝܗ̄ܘܼܕ݂ܵܝܹ̈ܐ. ܘܣܲܓܝܼ ܕܵܪܫܿܝܼܢ ܗ̄ܘܼܵܘ ܒܲܝܢܵܬ݂ܗܘܿܢ.

³⁰ ܘܐܸܓܲܪ ܠܹܗ ܦܵܘܠܘܿܣ ܡܸܢ ܕܝܼܠܹܗ ܒܲܝܬܵܐ. ܘܲܗܘܵܐ ܒܹܗ ܬܲܪܬܹܝܢ ܫܢ̈ܝܼܢ. ܘܲܡܩܲܒܸܠ ܗ̄ܘܵܐ ܬܲܡܵܢ ܠܟ݂ܠܗܘܿܢ ܐܲܝܠܹܝܢ ܕܐܵܬܹܝܢ ܗ̄ܘܼܵܘ ܠܘܵܬܹܗ.

³¹ ܘܡܲܟ݂ܪܸܙ ܗ̄ܘܵܐ ܥܲܠ ܡܲܠܟܘܼܬܹܗ ܕܐܲܠܵܗܵܐ. ܘܡܲܠܸܦ ܗ̄ܘܵܐ ܥܹܝܢ ܒܲܓ݂ܠܹܐ ܥܲܠ ܡܵܪܲܢ ܝܼܫܘܿܥ ܡܫܝܼܚܵܐ ܕܠܵܐ ܟܸܠܝܵܢ.