1

¹ ܒܪܵܫܝܼܬ݂ ܐܝܼܬ݂ܵܘܗܝ ܗܘ̣ܵܐ ܡܸܠܬ݂ܵܐ. ܘܗܘܼ ܡܸܠܬ݂ܵܐ. ܐܝܼܬ݂ܵܘܗܝ ܗܘ̣ܵܐ ܠܘܵܬ݂ ܐܲܠܵܗܵܐ. ܘܐܲܠܵܗܵܐ ܐܝܼܬ݂ܵܘܗܝ ܗܘ̣ܵܐ ܗܸܘ ܡܸܠܬ݂ܵܐ.

² ܗܵܢܵܐ. ܐܝܼܬ݂ܵܘܗܝ ܗܘ̣ܵܐ ܒܪܵܫܝܼܬ݂ ܠܘܵܬ݂ ܐܲܠܵܗܵܐ.

³ ܟܠ ܒܐܝܕ݂ܗ ܗܘܵܐ. ܘܒܸܠܥܵܕ݂ܵܘܗܝ ܐܵܦܠܵܐ ܚܕ݂ܵܐ ܗܘܵܬ݂ ܡܸܕܸܡ ܕܲܗܘܵܐ.

⁴ ܒܹܗ ܚܲܝܹ̈ܐ ܗܘܵܐ. ܘܚܲܝܹ̈ܐ ܐܝܼܬܲܝܗܘܿܢ. ܢܘܼܗܪܵܐ ܕܲܒ݂ܢܲܝ̈ܢܵܫܵܐ.

⁵ ܘܗܘܼ ܢܘܼܗܪܵܐ ܒܚܸܫܘܿܟ݂ܵܐ ܡܲܢܗܲܪ. ܘܚܸܫܘܿܟ݂ܵܐ ܠܵܐ ܐܲܕ݂ܪܟܹܗ.

⁶ ܗܘ̣ܵܐ ܒܲܪܢܵܫܵܐ ܕܐܫܬܲܕܲܪ ܡܸܢ ܐܲܠܵܗܵܐ. ܫܡܹܗ ܝܘܿܚܲܢܵܢ.

⁷ ܗܵܢܵܐ ܐܸܬ݂ܵܐ ܠܣܵܗܕܘܼܬ݂ܵܐ. ܕܢܸܣܗܲܕ݂ ܥܲܠ ܢܘܼܗܪܵܐ. ܕܟ݂ܠܢܵܫ ܢܗܲܝܡܸܢ ܒܐܝܕ݂ܗ. ܠܵܐ ܗܘܼ ܗܘ̣ܵܐ ܢܘܼܗܪܵܐ. ܐܸܠܵܐ ܕܢܸܣܗܲܕ݂ ܥܲܠ ܢܘܼܗܪܵܐ.

⁸

⁹ ܐܝܼܬ݂ܵܘܗܝ ܗܘ̣ܵܐ ܓܹܝܪ ܢܘܼܗܪܵܐ ܕܲܫܪܵܪܵܐ ܕܡܲܢܗܲܪ ܠܟ݂ܠܢܵܫ ܕܐܵܬܹܐ ܠܥܵܠܡܵܐ.

¹⁰ ܒܥܵܠܡܵܐ ܗ̄ܘܵܐ. ܘܥܵܠܡܵܐ ܒܐܝܕ݂ܗ ܗܘܵܐ. ܘܥܵܠܡܵܐ ܠܵܐ ܝܲܕ݂ܥܹܗ.

¹¹ ܠܕ݂ܝܼܠܹܗ ܐܸܬ݂ܵܐ. ܘܕ݂ܝܼܠܹܗ ܠܵܐ ܩܲܒܿܠܘܼܗܝ.

¹² ܐܲܝܠܹܝܢ ܕܹܝܢ ܕܩܲܒܿܠܘܼܗܝ. ܝܲܗ̄ܒ݂ ܠܗܘܿܢ ܫܘܼܠܛܵܢܵܐ. ܕܲܒ݂̈ܢܲܝܵܐ ܕܐܲܠܵܗܵܐ ܢܸܗܘܘܿܢ. ܠܐܲܝܠܹܝܢ ܕܲܡܗܲܝܡܢܝܼܢ ܒܲܫܡܹܗ.

¹³ ܐܲܝܠܹܝܢ ܕܠܵܘ ܡܸܢ ܕܡܵܐ. ܘܠܵܐ ܡܸܢ ܨܸܒ݂ܝܵܢܵܐ ܕܒܸܣܪܵܐ. ܘܠܵܐ ܡܸܢ ܨܸܒ݂ܝܵܢܵܐ ܕܓܲܒ݂ܪܵܐ. ܐܸܠܵܐ. ܡܸܢ ܐܲܠܵܗܵܐ ܐܸܬ݂ܝܼܠܸܕ݂ܘ.

¹⁴ ܘܡܸܠܬ݂ܵܐ ܒܸܣܪܵܐ ܗܘܵܐ. ܘܐܲܓܸ݁ܢ ܒܲܢ. ܘܲܚܙܲܝܢ ܫܘܼܒ݂ܚܹܗ. ܫܘܼܒ݂ܚܵܐ ܐܲܝܟ݂ ܕܝܼܚܝܼܕ݂ܵܝܵܐ ܕܡܸܢ ܐܲܒ݂ܵܐ ܕܲܡܠܹܐ ܛܲܝܒܘܼܬ݂ܵܐ ܘܩܘܼܫܬܵܐ.

¹⁵ ܝܘܿܚܲܢܵܢ ܣܗܸܕ݂ ܥܠܵܘܗܝ. ܘܲܩܥܵܐ ܘܐܸܡܲܪ. ܗܵܢܵܘ ܗܵܘ ܕܐܸܡܪܹܬ݂ ܕܒܵܬܲܪܝ ܐܵܬܹܐ. ܘܲܗܘܵܐ ܠܹܗ ܩܕ݂ܵܡܲܝ. ܡܛܠ ܕܩܲܕ݂ܡܵܝ ܗ̄ܘܼ ܡܹܢܝ.

¹⁶ ܘܡܸܢ ܡܲܠܝܘܼܬܹܗ ܚܢܲܢ ܟܠܲܢ ܢܣܲܒ݂ܢ. ܘܛܲܝܒܘܼܬ݂ܵܐ ܚܠܵܦ ܛܲܝܒܘܼܬ݂ܵܐ.

¹⁷ ܡܛܠ ܕܢܵܡܘܿܣܵܐ ܒܝܲܕ݂ ܡܘܼܫܹܐ ܐܸܬ݂ܝܼܗܸܒ݂. ܫܪܵܪܵܐ ܕܹܝܢ ܘܛܲܝܒܘܼܬ݂ܵܐ. ܒܝܲܕ݂ ܝܼܫܘܿܥ ܡܫܝܼܚܵܐ ܗܘܵܐ.

¹⁸ ܐܲܠܵܗܵܐ ܠܵܐ ܚܙܵܐ ܐ̄ܢܵܫ ܡܸܡܬ݂ܘܿܡ. ܝܼܚܝܼܕ݂ܵܝܵܐ ܐܲܠܵܗܵܐ. ܗܵܘ ܕܐܝܼܬ݂ܵܘܗܝ ܒܥܘܼܒܵܐ ܕܐܲܒ݂ܘܼܗܝ. ܗܘܼ ܐܸܫܬܲܥܝܼ.

¹⁹ ܘܗܵܕܹܐ ܗܝܼ ܣܵܗܕܘܼܬܹܗ ܕܝܘܿܚܲܢܵܢ ܟܲܕ݂ ܫܲܕܲܪܘ ܠܘܵܬܹܗ ܝܗ̄ܘܼܕ݂ܵܝܹ̈ܐ ܡܸܢ ܐܘܿܪܸܫܠܸܡ. ܟܵܗܢܹ̈ܐ ܘܠܹܘܵܝܹ̈ܐ ܕܲܢܫܲܐܠܘܼܢܵܝܗܝ. ܐܲܢ̄ܬ݁ ܡܲܢ ܐܲܢ̄ܬ݁.

²⁰ ܘܐܵܘܕܝܼ. ܘܠܵܐ ܟܦܲܪ. ܘܐܵܘܕܝܼ. ܕܠܵܘ ܐܸܢܵܐ ܐ̄ܢܵܐ ܡܫܝܼܚܵܐ.

²¹ ܘܫܲܐܠܘܼܗܝ ܬܘܼܒ݂. ܡܵܢܵܐ ܗܵܟܹܝܠ. ܐܹܠܝܼܵܐ ܐܲܢ̄ܬ݁. ܘܐܸܡܲܪ ܠܵܐ ܐܝܼܬܲܝ. ܢܒ݂ܝܼܵܐ ܐܲܢ̄ܬ݁. ܘܐܸܡܲܪ ܠܵܐ.

²² ܘܐܸܡܲܪܘ ܠܹܗ. ܘܡܲܢܘܼ ܐܲܢ̄ܬ݁ ܕܢܸܬܸ݁ܠ ܦܸܬ݂ܓ݂ܵܡܵܐ ܠܐܲܝܠܹܝܢ ܕܫܲܕܪܘܼܢ. ܡܵܢܵܐ ܐܵܡܲܪ ܐܲܢ̄ܬ݁ ܥܲܠ ܢܲܦ̮ܫܵܟ݂.

²³ ܐܸܡܲܪ. ܐܸܢܵܐ ܩܵܠܵܐ ܕܩܵܪܹܐ ܒܡܲܕ݂ܒܪܵܐ. ܕܐܲܫܘܵܘ ܐܘܼܪܚܹܗ ܕܡܵܪܝܵܐ. ܐܲܝܟܲܢܵܐ ܕܐܵܡܲܪ ܐܹܫܲܥܝܵܐ ܢܒ݂ܝܼܵܐ.

²⁴ ܗܵܢܘܿܢ ܕܹܝܢ ܕܐܸܫܬܲܕܲܪܘ. ܡܸܢ ܦܪ̈ܝܼܫܹܐ ܗ̄ܘܼܵܘ.

²⁵ ܘܫܲܐܠܘܼܗܝ. ܘܐܸܡܲܪܘ ܠܹܗ. ܡܵܢܵܐ ܗܵܟܹܝܠ ܡܲܥܡܸܕ݂ ܐܲܢ̄ܬ݁ ܐܸܢ ܐܲܢ̄ܬ݁ ܠܵܐ ܐܝܼܬܲܝܟ ܡܫܝܼܚܵܐ. ܘܠܵܐ ܐܹܠܝܼܵܐ. ܘܠܵܐ ܢܒ݂ܝܼܵܐ.

²⁶ ܥܢܵܐ ܝܘܿܚܲܢܵܢ. ܘܐܸܡܲܪ ܠܗܘܿܢ. ܐܸܢܵܐ ܡܲܥܡܸܕ݂ ܐ̄ܢܵܐ ܒܡܲܝ̈ܵܐ. ܒܲܝܢܵܬ݂ܟ݂ܘܿܢ ܕܹܝܢ ܩܵܐܹܡ. ܗܵܘ ܕܐܲܢ̄ܬ݁ܘܿܢ ܠܵܐ ܝܵܕ݂ܥܝܼܢ ܐܢ̄ܬܘܿܢ ܠܹܗ.

²⁷ ܗܵܢܵܘ ܗܵܘ ܕܒܵܬܲܪܝ ܐܵܬܹܐ. ܘܲܗܘܵܐ ܠܹܗ ܩܕ݂ܵܡܲܝ. ܗܵܘ ܕܐܸܢܵܐ. ܠܵܐ ܫܵܘܹܐ ܐ̄ܢܵܐ ܕܐܸܫܪܹܐ ܥܲܪ̈ܩܹܐ ܕܲܡܣܵܢܵܘ̈ܗܝ.

²⁸ ܗܵܠܹܝܢ ܒܒܹܝܬ݂ ܥܲܢܝܵܐ ܗܘܲܝ̈. ܒܥܸܒ݂ܪܵܐ ܕܝܘܿܪܕܢܵܢ. ܐܲܝܟܵܐ ܕܡܲܥܡܸܕ݂ ܗܘ̣ܵܐ ܝܘܿܚܲܢܵܢ.

²⁹ ܘܲܠܝܵܘܡܵܐ ܕܒ݂ܵܬ݂ܪܹܗ. ܚܙܵܐ ܝܘܿܚܲܢܵܢ ܠܝܼܫܘܿܥ ܕܐܵܬܹܐ ܠܘܵܬܹܗ. ܘܐܸܡܲܪ. ܗܵܐ ܐܸܡܪܹܗ ܕܐܲܠܵܗܵܐ. ܗܵܘ ܕܫܵܩܹܠ ܚܛܝܼܬܹܗ ܕܥܵܠܡܵܐ.

³⁰ ܗܵܢܵܘ ܕܐܸܢܵܐ ܐܸܡܪܹܬ݂ ܥܠܵܘܗܝ ܕܒܵܬܲܪܝ ܐܵܬܹܐ ܓܲܒ݂ܪܵܐ. ܘܲܗܘܵܐ ܠܹܗ ܩܕ݂ܵܡܲܝ. ܡܛܠ ܕܩܲܕ݂ܡܵܝ ܗܘܼ ܡܹܢܝ.

³¹ ܘܐܸܢܵܐ ܠܵܐ ܝܵܕ݂ܲܥ ܗ̄ܘܹܝܬ݂ ܠܹܗ. ܐܸܠܵܐ ܕܢܸܬ݂ܝܕ݂ܲܥ ܠܝܼܣܪܵܝܹܠ. ܡܛܠ ܗܵܢܵܐ ܐܸܬܹܝܬ݂ ܐܸܢܵܐ. ܕܲܒ݂ܡܲܝ̈ܵܐ ܐܲܥܡܸܕ݂.

³² ܘܐܲܣܗܸܕ݂ ܝܘܿܚܲܢܵܢ. ܘܐܸܡܲܪ. ܕܲܚܙܹܝܬ݂ ܠܪܘܼܚܵܐ ܕܢܵܚܬܵܐ ܡܸܢ ܫܡܲܝܵܐ. ܐܲܝܟ݂ ܝܵܘܢܵܐ. ܘܩܵܘܝܲܬ݂ ܥܠܵܘܗܝ.

³³ ܘܐܸܢܵܐ ܠܵܐ ܝܵܕ݂ܲܥ ܗ̄ܘܹܝܬ݂ ܠܹܗ. ܐܸܠܵܐ ܡܲܢ ܕܫܲܕܪܲܢܝ ܕܐܲܥܡܸܕ݂ ܒܡܲܝ̈ܵܐ. ܗܘܼ ܐܸܡܲܪ ܠܝܼ. ܕܐܲܝܢܵܐ ܕܚܵܙܹܐ ܐܲܢ̄ܬ݁ ܕܢܵܚܬܵܐ ܪܘܼܚܵܐ. ܘܲܡܩܵܘܝܵܐ ܥܠܵܘܗܝ. ܗܵܢܵܘ ܡܲܥܡܸܕ݂ ܒܪܘܼܚܵܐ ܕܩܘܼܕ݂ܫܵܐ.

³⁴ ܘܐܸܢܵܐ ܚܙܹܝܬ݂ ܘܐܲܣܗܕ݂ܬ݂. ܕܗܵܢܵܘ ܒܪܹܗ ܕܐܲܠܵܗܵܐ.

³⁵ ܘܲܠܝܵܘܡܵܐ ܐ̄ܚܪܹܢܵܐ. ܩܵܐܹܡ ܗܘ̣ܵܐ ܝܘܿܚܲܢܵܢ ܘܲܬ݂ܪܹܝܢ ܡܸܢ ܬܲܠܡܝܼܕ݂ܵܘ̈ܗܝ.

³⁶ ܘܚܵܪ ܒܝܼܫܘܿܥ. ܟܲܕ݂ ܡܗܲܠܸܟ݂. ܘܐܸܡܲܪ. ܗܵܐ ܐܸܡܪܹܗ ܕܐܲܠܵܗܵܐ.

³⁷ ܘܲܫܡܲܥܘ ܬܪܲܝܗܘܿܢ ܬܲܠܡܝܼܕ݂ܵܘ̈ܗܝ ܟܲܕ݂ ܐܸܡܲܪ. ܘܐܸܙܲܠܘ ܠܗܘܿܢ ܒܵܬ݂ܪܹܗ ܕܝܼܫܘܿܥ.

³⁸ ܘܐܸܬ݂ܦܢܝܼ ܝܼܫܘܿܥ. ܘܲܚܙܵܐ ܐܸܢܘܿܢ ܕܐܵܬܹܝܢ ܒܵܬ݂ܪܹܗ. ܘܐܸܡܲܪ ܠܗܘܿܢ. ܡܵܢܵܐ ܒܵܥܹܝܢ ܐܢ̄ܬܘܿܢ. ܐܵܡܪܝܼܢ ܠܹܗ. ܪܲܒܲܢ. ܐܲܝܟܵܐ ܗܵܘܹܐ ܐܲܢ̄ܬ݁.

³⁹ ܐܵܡܲܪ ܠܗܘܿܢ ܬܵܘ ܘܬܸܚܙܘܿܢ. ܗܸܢܘܿܢ ܕܹܝܢ ܐܸܬ݂ܵܘ. ܘܲܚܙܵܘ ܐܲܝܟܵܐ ܕܗܵܘܹܐ. ܘܲܠܘܵܬܹܗ ܗܘܵܘ ܝܵܘܡܵܐ ܗܵܘ. ܘܐܝܼܬ݂ ܗ̄ܘܲܝ̈ ܐܲܝܟ݂ ܫܵܥܹ̈ܐ ܥܣܲܪ.

⁴⁰ ܚܲܕ݂ ܕܹܝܢ ܡܸܢ ܗܵܢܘܿܢ ܕܲܫܡܲܥܘ ܡܸܢ ܝܘܿܚܲܢܵܢ. ܘܐܸܙܲܠܘ ܒܵܬ݂ܪܹܗ ܕܝܼܫܘܿܥ. ܐܝܼܬ݂ܵܘܗܝ ܗܘ̣ܵܐ ܐܲܢܕܪܹܐܘܿܣ ܐܲܚܘܼܗܝ ܕܫܸܡܥܘܿܢ.

⁴¹ ܗܵܢܵܐ ܚܙܵܐ ܠܘܼܩܕ݂ܲܡ ܠܫܸܡܥܘܿܢ ܐܲܚܘܼܗܝ. ܘܐܸܡܲܪ ܠܹܗ. ܐܸܫܟܲܚܢܵܝܗܝ ܠܲܡܫܝܼܚܵܐ.

⁴² ܘܐܲܝܬ݁ܝܹܗ ܠܘܵܬ݂ ܝܼܫܘܿܥ. ܘܚܵܪ ܒܹܗ ܝܼܫܘܿܥ. ܘܐܸܡܲܪ. ܐܲܢ̄ܬ݁ ܗܘܼ ܫܸܡܥܘܿܢ ܒܪܹܗ ܕܝܵܘܢܵܐ. ܐܲܢ̄ܬ݁ ܬܸܬ݂ܩܪܹܐ ܟܹܐܦܵܐ.

⁴³ ܘܲܠܝܵܘܡܵܐ ܐ̄ܚܪܹܢܵܐ. ܨܒ݂ܵܐ ܝܼܫܘܿܥ ܠܡܸܦܲܩ ܠܲܓ݂ܠܝܼܠܵܐ. ܘܐܸܫܟܲܚ ܠܦܝܼܠܝܼܦܘܿܣ. ܘܐܸܡܲܪ ܠܹܗ. ܬܵܐ ܒܵܬܲܪܝ.

⁴⁴ ܗܘܼ ܕܹܝܢ ܦܝܼܠܝܼܦܘܿܣ ܐܝܼܬ݂ܵܘܗܝ ܗܘ̣ܵܐ ܡܸܢ ܒܹܝܬ݂ ܨܲܝܵܕ݂ܵܐ. ܡܸܢ ܡܕ݂ܝܼܢ̱ܬܹ݁ܗ ܕܐܲܢܕܪܹܐܘܿܣ ܘܲܕ݂ܫܸܡܥܘܿܢ.

⁴⁵ ܘܦܝܼܠܝܼܦܘܿܣ ܐܸܫܟܲܚ ܠܢܵܬ݂ܢܝܼܐܹܝܠ. ܘܐܸܡܲܪ ܠܹܗ. ܗܵܘ ܕܲܟ݂ܬܲܒ݂ ܥܠܵܘܗܝ ܡܘܼܫܹܐ ܒܢܵܡܘܿܣܵܐ ܘܒܲܢܒ݂ܝܹ̈ܐ. ܐܸܫܟܲܚܢܵܝܗܝ. ܕܝܼܫܘܿܥ ܗܘܼ ܒܲܪ ܝܵܘܣܸܦ ܡܸܢ ܢܵܨܪܲܬ݂.

⁴⁶ ܐܵܡܲܪ ܠܹܗ ܢܵܬ݂ܢܝܼܐܹܝܠ: ܡܸܢ ܢܵܨܪܲܬ݂ ܡܸܫܟܲܚ ܡܸܕܸܡ ܕܛܵܒ݂ ܢܸܗܘܹܐ. ܐܵܡܲܪ ܠܹܗ ܦܝܼܠܝܼܦܘܿܣ. ܬܵܐ ܘܬܸܚܙܹܐ.

⁴⁷ ܘܲܚܙܵܝܗܝ ܝܼܫܘܿܥ ܠܢܵܬ݂ܢܝܼܐܹܝܠ ܟܲܕ݂ ܐܵܬܹܐ ܠܘܵܬܹܗ. ܘܐܸܡܲܪ ܥܠܵܘܗܝ. ܗܵܐ ܫܲܪܝܼܪܵܐܝܼܬ݂ ܒܲܪ ܝܼܣܪܵܝܹܠ. ܕܢܸܟ݂ܠܵܐ ܠܲܝܬ݁ ܒܹܗ.

⁴⁸ ܐܵܡܲܪ ܠܹܗ ܢܵܬ݂ܢܝܼܐܹܝܠ. ܡܸܢ ܐܲܝܡܸܟܵܐ ܝܵܕ݂ܲܥ ܐܲܢ̄ܬ݁ ܠܝܼ. ܐܵܡܲܪ ܠܹܗ ܝܼܫܘܿܥ. ܥܲܕ݂ܠܵܐ ܢܸܩܪܹܝܟ݂ ܦܝܼܠܝܼܦܘܿܣ ܟܲܕ݂ ܬܚܹܝܬ݂ ܬܹܬܵܐ ܐܲܢ̄ܬ݁ ܚܙܹܝܬ݂ܵܟ݂.

⁴⁹ ܥܢܵܐ ܢܵܬ݂ܢܝܼܐܹܝܠ. ܘܐܸܡܲܪ ܠܹܗ. ܪܲܒܝܼ. ܐܲܢ̄ܬ݁ ܗܘܼ ܒܪܹܗ ܕܐܲܠܵܗܵܐ. ܐܲܢ̄ܬ݁ ܗܘܼ ܡܲܠܟܹܗ ܕܝܼܣܪܵܝܹܠ.

⁵⁰ ܐܵܡܲܪ ܠܹܗ ܝܼܫܘܿܥ. ܥܲܠ ܕܐܸܡܪܹܬ݂ ܠܵܟ݂ ܕܲܚܙܹܝܬ݂ܵܟ݂ ܬܚܹܝܬ݂ ܬܹܬܵܐ ܡܗܲܝܡܸܢ ܐܲܢ̄ܬ݁. ܕܪܵܘܪ̈ܒ݂ܵܢ ܡܸܢ ܗܵܠܹܝܢ ܬܸܚܙܹܐ.

⁵¹ ܐܵܡܲܪ ܠܹܗ. ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܡܸܢ ܗܵܫܵܐ ܬܸܚܙܘܿܢ ܫܡܲܝܵܐ ܕܲܦܬ݂ܝܼܚܝܼܢ. ܘܡܲܠܲܐܟ݂ܵܘ̈ܗܝ ܕܐܲܠܵܗܵܐ ܟܲܕ݂ ܣܵܠܩܝܼܢ ܘܢܵܚܬ݁ܝܼܢ ܠܘܵܬ݂ ܒܪܹܗ ܕܐ̄ܢܵܫܵܐ.

2

¹ ܘܲܠܝܵܘܡܵܐ ܕܲܬ݂ܠܵܬ݂ܵܐ. ܗܘܸܵܬ݂ ܡܸܫܬܘܼܬ݂ܵܐ ܒܩܵܛܢܹ̈ܐ ܡܕ݂ܝܼܢ̄ܬܵܐ ܕܲܓ݂ܠܝܼܠܵܐ. ܘܐܸܡܹܗ ܕܝܼܫܘܿܥ ܬܲܡܵܢ ܗ̄ܘܵܬ݂.

² ܘܐܵܦ ܗܘܼ ܝܼܫܘܿܥ ܘܬܲܠܡܝܼܕ݂ܵܘ̈ܗܝ. ܐܸܬ݂ܩܪܝܼܘ ܠܵܗ̇ ܠܡܸܫܬܘܼܬ݂ܵܐ.

³ ܘܲܚܣܲܪ ܗܘ̣ܵܐ ܚܲܡܪܵܐ. ܘܐܵܡܪܵܐ ܠܹܗ ܐܸܡܹܗ ܠܝܼܫܘܿܥ. ܚܲܡܪܵܐ ܠܲܝܬ݁ ܠܗܘܿܢ.

⁴ ܐܵܡܲܪ ܠܵܗ̇ ܝܼܫܘܿܥ: ܡܵܐ ܠܝܼ ܘܠܹܟ݂ܝ. ܐܲܢ̄ܬ݁ܬ݂ܵܐ. ܠܵܐ ܥܕ݂ܲܟܹܝܠ ܐܸܬܲܬܸ ܫܵܥܲܬ݂ܝ.

⁵ ܐܵܡܪܵܐ ܐܸܡܹܗ ܠܲܡܫܲܡܫܵܢܹ̈ܐ. ܡܸܕܸܡ ܕܐܵܡܲܪ ܠܟ݂ܘܿܢ. ܥܒܸܕ݂ܘ.

⁶ ܐܝܼܬ݂ ܗ̄ܘܲܝ̈ ܕܹܝܢ ܬܲܡܵܢ. ܐܲܓ݂ܵܢܹ̈ܐ ܕܟܹܐܦܵܐ ܫܸܬ݂. ܕܣܝܼܡܵܢ ܠܬܲܕ݂ܟܿܝܼܬ݂ܵܐ ܕܲܝܗ̄ܘܼܕ݂ܵܝܹ̈ܐ. ܕܐܵܚܕܵܢ ܬܪܹܝܢ ܬܪܹܝܢ ܪܸܒ݂ܥܝܼܢ. ܐܵܘ ܬܠܵܬ݂ܵܐ.

⁷ ܐܵܡܲܪ ܠܗܘܿܢ ܝܼܫܘܿܥ. ܡܠܵܘ ܐܸܢܹܝܢ ܡܲܝ̈ܵܐ ܠܐܲܓ݂ܵܢܹ̈ܐ. ܘܲܡܠܵܘ ܐܸܢܹܝܢ ܥܕ݂ܲܡܵܐ ܠܥܸܠ.

⁸ ܐܵܡܲܪ ܠܗܘܿܢ. ܙܠܘܿܥܘ ܡܸܟܹܝܠ. ܘܐܲܝܬܵܘ ܠܪܹܝܫ ܣܡܵܟ݂ܵܐ. ܘܐܲܝܬ݁ܝܼܘ.

⁹ ܘܟܲܕ݂ ܛܥܸܡ ܗܵܘ ܪܹܝܫ ܣܡܵܟ݂ܵܐ ܡܲܝ̈ܵܐ ܗܵܢܘܿܢ ܕܲܗܘܵܘ ܚܲܡܪܵܐ: ܘܠܵܐ ܝܵܕ݂ܲܥ ܗܘ̣ܵܐ ܡܸܢ ܐܲܝܡܸܟܵܐ ܗ̄ܘܵܐ: ܡܫܲܡܫܵܢܹ̈ܐ ܕܹܝܢ ܝܵܕ݂ܥܝܼܢ ܗ̄ܘܼܵܘ. ܕܗܸܢܘܿܢ ܡܠܵܘ ܐܸܢܘܿܢ ܠܡܲܝ̈ܵܐ. ܩܪܵܐ ܪܹܝܫ ܣܡܵܟ݂ܵܐ ܠܚܲܬ݂ܢܵܐ.

¹⁰ ܘܐܸܡܲܪ ܠܹܗ. ܟܠ ܐ̄ܢܵܫ ܠܘܼܩܕ݂ܲܡ ܚܲܡܪܵܐ ܛܵܒ݂ܵܐ ܡܲܝܬܹܐ. ܘܡܵܐ ܕܲܪܘܝܼܘ ܗܵܝܕܹܝܢ ܐܲܝܢܵܐ ܕܲܒ݂ܨܝܼܪ. ܐܲܢ̄ܬ݁ ܕܹܝܢ ܢܛܲܪܬܵܝܗܝ ܠܚܲܡܪܵܐ ܛܵܒ݂ܵܐ ܥܕ݂ܲܡܵܐ ܠܗܵܫܵܐ.

¹¹ ܗܵܕܹܐ ܗܝܼ ܐܵܬ݂ܵܐ ܩܲܕ݂ܡܵܝܬܵܐ ܕܲܥܒܲܕ݂ ܝܼܫܘܿܥ ܒܩܵܛܢܹ̈ܐ ܕܲܓ݂ܠܝܼܠܵܐ ܘܐܵܘܕܲܥ ܫܘܼܒ݂ܚܹܗ. ܘܗܲܝܡܸܢܘ ܒܹܗ ܬܲܠܡܝܼܕ݂ܵܘ̈ܗܝ.

¹² ܒܵܬܲܪ ܗܵܕܹܐ ܢܚܸܬ݂ ܠܲܟ݂ܦܲܪܢܵܚܘܿܡ ܗܘܼ ܘܐܸܡܹܗ ܘܐܲܚܵܘܗܝ ܘܬܲܠܡܝܼܕ݂ܵܘ̈ܗܝ. ܘܬܲܡܵܢ ܗ̄ܘܼܵܘ ܩܲܠܝܼܠ ܝܵܘ̈ܡܵܬ݂ܵܐ.

¹³ ܘܩܲܪܝܼܒ݂ ܗܘ̣ܵܐ ܦܸܨܚܵܐ ܕܲܝܗ̄ܘܼܕ݂ܵܝܹ̈ܐ. ܘܲܣܠܸܩ ܠܐܘܿܪܸܫܠܸܡ ܝܼܫܘܿܥ.

¹⁴ ܘܐܸܫܟܲܚ ܒܗܲܝܟܠܵܐ ܠܗܵܠܹܝܢ ܕܲܡܙܲܒܢܝܼܢ ܬܵܘܪܹ̈ܐ ܘܥܸܪ̈ܒܹܐ ܘܝܵܘܢܹ̈ܐ. ܘܠܲܡܥܲܪ̈ܦܵܢܹܐ ܕܝܵܬ݂ܒܝܼܢ.

¹⁵ ܘܲܥܒܲܕ݂ ܠܹܗ ܦܪܵܓܸܠܵܐ ܡܸܢ ܚܲܒ݂ܠܵܐ. ܘܲܠܟ݂ܠܗܘܿܢ ܐܲܦܸܩ ܡܸܢ ܗܲܝܟܠܵܐ. ܘܲܠܥܸܪ̈ܒܹܐ ܘܲܠܬ݂ܵܘܪܹ̈ܐ ܘܠܲܡܥܲܪ̈ܦܵܢܹܐ. ܘܐܸܫܲܕ݂ ܥܘܼܪܦܵܢܗܘܿܢ. ܘܦܵܬ݂ܘܿܪ̈ܲܝܗܘܿܢ ܗܦܲܟ݂.

¹⁶ ܘܲܠܗܵܢܘܿܢ ܕܲܡܙܲܒܢܝܼܢ ܝܵܘܢܹ̈ܐ. ܐܸܡܲܪ. ܫܩܘܿܠܘ ܗܵܠܹܝܢ ܡܸܟܵܐ. ܘܠܵܐ ܬܸܥܒܕ݂ܘܼܢܹܗ ܠܒܲܝܬܹ݁ܗ ܕܐܵܒ݂ܝ ܒܹܝܬ݂ ܬܸܐܓ݂ܘܼܪܬܵܐ.

¹⁷ ܘܐܸܬ݁ܕܟܲܪܘ ܬܲܠܡܝܼܕ݂ܵܘ̈ܗܝ ܕܲܟ݂ܬ݂ܝܼܒ݂ ܕܲܛܢܵܢܹܗ ܕܒܲܝܬܵܟ݂ ܐܲܟ݂ܠܲܢܝ.

¹⁸ ܥܢܵܘ ܕܹܝܢ ܝܗ̄ܘܼܕ݂ܵܝܹ̈ܐ. ܘܐܸܡܲܪܘ ܠܹܗ. ܡܵܢܵܐ ܐܵܬ݂ܵܐ ܡܚܵܘܹܐ ܐܲܢ̄ܬ݁ ܠܲܢ. ܕܗܵܠܹܝܢ ܥܵܒܹܿܕ݂ ܐܲܢ̄ܬ݁.

¹⁹ ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܣܬ݂ܘܿܪܘ ܗܲܝܟܠܵܐ ܗܵܢܵܐ. ܘܠܲܬ݂ܠܵܬ݂ܵܐ ܝܵܘܡ̈ܝܼܢ. ܐܸܢܵܐ ܡܩܝܼܡ ܐ̄ܢܵܐ ܠܹܗ.

²⁰ ܐܵܡܪܝܼܢ ܠܹܗ ܝܗ̄ܘܼܕ݂ܵܝܹ̈ܐ. ܠܐܲܪܒܥܝܼܢ ܘܫܸܬ݂ ܫܢ̈ܝܼܢ ܐܸܬ݂ܒܢܝܼ ܗܲܝܟܠܵܐ ܗܵܢܵܐ: ܘܐܲܢ̄ܬ݁. ܠܲܬ݂ܠܵܬ݂ܵܐ ܝܵܘܡ̈ܝܼܢ ܡܩܝܼܡ ܐܲܢ̄ܬ݁ ܠܹܗ.

²¹ ܗܘܼ ܕܹܝܢ ܐܸܡܲܪ ܗܘ̣ܵܐ ܥܲܠ ܗܲܝܟܠܵܐ ܕܦܲܓ݂ܪܹܗ.

²² ܟܲܕ݂ ܩܵܡ ܕܹܝܢ ܡܸܢ ܒܹܝܬ݂ ܡܝܼܬܹ̈ܐ. ܐܸܬ݁ܕܟܲܪܘ ܬܲܠܡܝܼܕ݂ܵܘ̈ܗܝ ܕܗܵܕܹܐ ܐܸܡܲܪ ܗ̄ܘܵܐ. ܘܗܲܝܡܸܢܘ ܠܲܟ݂ܬ݂ܵܒܹ̈ܐ. ܘܲܠܡܸܠܬ݂ܵܐ ܕܐܵܡܲܪ ܝܼܫܘܿܥ.

²³ ܟܲܕ݂ ܐܝܼܬ݂ܵܘܗܝ ܗܘ̣ܵܐ ܕܹܝܢ ܝܼܫܘܿܥ ܒܐܘܿܪܸܫܠܸܡ. ܒܦܸܨܚܵܐ ܒܥܲܕ݂ܥܹܕ݂ܵܐ. ܣܲܓܝܼܐܹ̈ܐ ܗܲܝܡܸܢܘ ܒܹܗ. ܕܲܚܙܵܘ ܐܵܬ݂ܘܵܬ݂ܵܐ ܕܥܵܒܹܿܕ݂.

²⁴ ܗܘܼ ܕܹܝܢ ܝܼܫܘܿܥ. ܠܵܐ ܡܗܲܝܡܸܢ ܗܘ̣ܵܐ ܠܗܘܿܢ ܢܲܦ̮ܫܹܗ. ܡܛܠ ܕܗܘܼ ܝܵܕ݂ܲܥ ܗܘ̣ܵܐ ܠܟ݂ܠܢܵܫ.

²⁵ ܘܠܵܐ ܣܢܝܼܩ ܗܘ̣ܵܐ ܕܐ̄ܢܵܫ ܢܸܣܗܲܕ݂ ܠܹܗ ܥܲܠ ܟܠ ܒܲܪܢܵܫ. ܗܘܼ ܓܹܝܪ ܝܵܕ݂ܲܥ ܗܘ̣ܵܐ ܡܵܢܵܐ ܐܝܼܬ݂ ܒܒܲܪܢܵܫܵܐ.

3

¹ ܐܝܼܬ݂ ܗܘ̣ܵܐ ܕܹܝܢ ܬܲܡܵܢ ܚܲܕ݂ ܓܲܒ݂ܪܵܐ ܡܸܢ ܦܪ̈ܝܼܫܹܐ. ܢܝܼܩܵܕܹܡܘܿܣ ܫܡܹܗ ܗ̄ܘܵܐ. ܐܲܪܟܘܿܢܵܐ ܕܲܝܗ̄ܘܼܕ݂ܵܝܹ̈ܐ.

² ܗܵܢܵܐ ܐܸܬ݂ܵܐ ܠܘܵܬ݂ ܝܼܫܘܿܥ ܒܠܸܠܝܵܐ. ܘܐܸܡܲܪ ܠܹܗ. ܪܲܒܝܼ. ܝܵܕ݂ܥܝܼܢܲܢ ܕܡܸܢ ܐܲܠܵܗܵܐ ܐܸܫܬܲܕܲܪܬ݁ ܡܲܠܦܵܢܵܐ. ܠܵܐ ܓܹܝܪ ܐ̄ܢܵܫ ܡܸܫܟܲܚ ܗܵܠܹܝܢ ܐܵܬ݂ܘܵܬ݂ܵܐ ܠܡܸܥܒܲܕ݂ ܕܐܲܢ̄ܬ݁ ܥܵܒܹܿܕ݂ ܐܲܢ̄ܬ݁ ܐܸܠܵܐ ܡܲܢ ܕܐܲܠܵܗܵܐ ܥܲܡܹܗ.

³ ܥܢܵܐ ܝܼܫܘܿܥ. ܘܐܸܡܲܪ ܠܹܗ. ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܵܟ݂. ܕܐܸܢ ܐ̄ܢܵܫ ܠܵܐ ܡܸܬ݂ܝܼܠܸܕ݂ ܡܸܢ ܕܪܹܝܫ. ܠܵܐ ܡܸܫܟܲܚ ܕܢܸܚܙܹܐ ܡܲܠܟܘܼܬܹܗ ܕܐܲܠܵܗܵܐ.

⁴ ܐܵܡܲܪ ܠܹܗ ܢܝܼܩܵܕܹܡܘܿܣ. ܐܲܝܟܲܢܵܐ ܡܸܫܟܲܚ ܕܢܸܬ݂ܝܼܠܸܕ݂ ܓܲܒ݂ܪܵܐ ܣܵܒ݂ܵܐ. ܕܲܠܡܵܐ. ܡܸܫܟܲܚ ܬܘܼܒ݂ ܠܟܲܪܣܵܐ ܕܐܡܹܗ ܕܬܲܪܬܹ݁ܝܢ ܙܲܒ݂ܢ̈ܝܼܢ. ܠܡܸܥܲܠ. ܘܢܸܬ݂ܝܼܠܸܕ.

⁵ ܥܢܵܐ ܝܼܫܘܿܥ. ܘܐܸܡܲܪ ܠܹܗ. ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܵܟ݂. ܕܐܸܢ ܐ̄ܢܵܫ ܠܵܐ ܡܸܬ݂ܝܼܠܸܕ݂ ܡܸܢ ܡܲܝ̈ܵܐ ܘܪܘܼܚܵܐ. ܠܵܐ ܡܸܫܟܲܚ ܕܢܸܥܘܿܠ ܠܡܲܠܟܘܼܬ݂ܵܐ ܕܐܲܠܵܗܵܐ.

⁶ ܡܸܕܸܡ ܕܝܼܠܝܼܕ݂ ܡܸܢ ܒܸܣܪܵܐ. ܒܸܣܪܵܐ ܗܘܼ. ܘܡܸܕܸܡ ܕܝܼܠܝܼܕ݂ ܡܸܢ ܪܘܼܚܵܐ. ܪܘܼܚܵܐ ܗܘܼ.

⁷ ܠܵܐ ܬܸܬ݁ܕܲܡܲܪ ܕܐܸܡܪܹܬ݂ ܠܵܟ݂. ܕܘܵܠܹܐ ܠܟ݂ܘܿܢ ܠܡܸܬ݂ܝܼܠܵܕ݂ܘܼ ܡܸܢ ܕܪܹܝܫ.

⁸ ܪܘܼܚܵܐ ܐܲܬܲܪ ܕܨܵܒ݂ܝܵܐ ܢܵܫܒܵܐ. ܘܩܵܠܵܗ̇ ܫܵܡܲܥ ܐܲܢ̄ܬ݁. ܐܸܠܵܐ ܠܵܐ ܝܵܕ݂ܲܥ ܐܲܢ̄ܬ݁ ܐܲܝܡܸܟܵܐ ܐܵܬ݂ܝܵܐ. ܘܠܲܐܝܟܵܐ ܐܵܙܵܠ̄ܐ. ܗܵܟܲܢܵܐ ܐܝܼܬ݂ܵܘܗܝ ܟܠܢܵܫ ܕܝܼܠܝܼܕ݂ ܡܸܢ ܪܘܼܚܵܐ.

⁹ ܥܢܵܐ ܢܝܼܩܵܕܹܡܘܿܣ. ܘܐܸܡܲܪ ܠܹܗ. ܐܲܝܟܲܢܵܐ ܡܸܫܟܚܵܢ ܗܵܠܹܝܢ ܠܡܸܗܘܵܐ.

¹⁰ ܥܢܵܐ ܝܼܫܘܿܥ. ܘܐܸܡܲܪ ܠܹܗ. ܐܲܢ̄ܬ݁ ܗܘܼ ܡܲܠܦܵܢܹܗ ܕܝܼܣܪܵܝܹܠ. ܘܗܵܠܹܝܢ ܠܵܐ ܝܵܕ݂ܲܥ ܐܲܢ̄ܬ݁.

¹¹ ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܵܟ݂. ܕܡܸܕܸܡ ܕܝܵܕ݂ܥܝܼܢ ܚ̱ܢܲܢ ܡܡܲܠܠܝܼܢ ܚ̱ܢܲܢ. ܘܡܸܕܸܡ ܕܲܚܙܲܝܢ ܡܲܣܗܕ݂ܝܼܢ ܐܸܢܚܢܲܢ. ܘܣܵܗܕܘܬܲܢ ܠܵܐ ܡܩܲܒܠܝܼܢ ܐܢ̄ܬܘܿܢ.

¹² ܐܸܢ ܕܒܲܐܪܥܵܐ ܐܸܡܪܹܬ݂ ܠܟ݂ܘܿܢ. ܘܠܵܐ ܡܗܲܝܡܢܝܼܢ ܐܢ̄ܬܘܿܢ. ܐܲܝܟܲܢܵܐ ܐܸܢ ܐܹܡܲܪ ܠܟ݂ܘܿܢ ܕܒܲܫܡܲܝܵܐ. ܬܗܲܝܡܢܘܼܢܵܢܝ.

¹³ ܘܠܵܐ ܐ̄ܢܵܫ ܣܠܸܩ ܠܲܫܡܲܝܵܐ. ܐܸܠܵܐ ܗܵܘ ܕܲܢܚܸܬ݂ ܡܸܢ ܫܡܲܝܵܐ. ܒܪܹܗ ܕܐ̄ܢܵܫܵܐ ܗܵܘ ܕܐܝܼܬ݂ܵܘܗܝ ܒܲܫܡܲܝܵܐ.

¹⁴ ܘܐܲܝܟܲܢܵܐ ܕܐܲܪܝܼܡ ܡܘܼܫܹܐ ܚܸܘܝܵܐ ܒܡܲܕ݂ܒܪܵܐ. ܗܵܟܲܢܵܐ ܥܬ݂ܝܼܕ݂ ܠܡܸܬ݁ܬ݁ܪܵܡܘܼ ܒܪܹܗ ܕܐ̄ܢܵܫܵܐ.

¹⁵ ܕܟܠ ܐ̄ܢܵܫ ܕܲܡܗܲܝܡܸܢ ܒܹܗ. ܠܵܐ ܢܹܐܒܲܕ݂. ܐܸܠܵܐ ܢܸܗܘܘܿܢ ܠܹܗ ܚܲܝܹ̈ܐ ܕܲܠܥܵܠܲܡ.

¹⁶ ܗܵܟܲܢܵܐ ܓܹܝܪ ܐܲܚܸܒ݂ ܐܲܠܵܗܵܐ ܠܥܵܠܡܵܐ. ܐܲܝܟܲܢܵܐ ܕܠܲܒ݂ܪܹܗ ܝܼܚܝܼܕ݂ܵܝܵܐ ܢܸܬܸ݁ܠ. ܕܟܠ ܡܲܢ ܕܲܡܗܲܝܡܸܢ ܒܹܗ. ܠܵܐ ܢܹܐܒܲܕ݂. ܐܸܠܵܐ ܢܸܗܘܘܿܢ ܠܹܗ ܚܲܝܹ̈ܐ ܕܲܠܥܵܠܲܡ.

¹⁷ ܠܵܐ ܓܹܝܪ ܫܲܕܲܪ ܐܲܠܵܗܵܐ ܠܲܒ݂ܪܹܗ ܠܥܵܠܡܵܐ ܕܲܢܕ݂ܘܼܢܝܼܘܗܝ ܠܥܵܠܡܵܐ. ܐܸܠܵܐ ܕܢܸܚܹܐ ܠܥܵܠܡܵܐ ܒܐܝܼܕ݂ܗ.

¹⁸ ܡܲܢ ܕܲܡܗܲܝܡܸܢ ܒܹܗ. ܠܵܐ ܡܸܬ݁ܬ݁ܕ݂ܝܼܢ. ܘܡܲܢ ܕܠܵܐ ܡܗܲܝܡܸܢ. ܡܸܢ ܟܲܕܘ ܕܝܼܢ ܗ̄ܘܼ. ܕܠܵܐ ܗܲܝܡܸܢ ܒܲܫܡܹܗ ܕܝܼܚܝܼܕ݂ܵܝܵܐ ܒܪܹܗ ܕܐܲܠܵܗܵܐ.

¹⁹ ܗܵܢܵܘ ܕܹܝܢ ܕܝܼܢܵܐ. ܕܢܘܼܗܪܵܐ ܐܸܬ݂ܵܐ ܠܥܵܠܡܵܐ. ܘܐܲܚܸܒ݂ܘ ܒܢܲܝ̈ܢܵܫܵܐ ܠܚܸܫܘܿܟ݂ܵܐ. ܝܲܬ݁ܝܼܪ ܡܸܢ ܕܲܠܢܘܼܗܪܵܐ. ܐܝܼܬܲܝܗܘܿܢ ܗ̄ܘܼܵܘ ܓܹܝܪ ܥܒ݂ܵܕ݂ܲܝ̈ܗܘܿܢ ܒܝܼܫܹ̈ܐ.

²⁰ ܟܠ ܓܹܝܪ ܕܣܲܢ̈ܝܵܬ݂ܵܐ ܥܵܒܹܿܕ݂. ܣܵܢܹܐ ܠܢܘܼܗܪܵܐ. ܘܠܵܐ ܐܵܬܹܐ ܠܢܘܼܗܪܵܐ. ܕܠܵܐ ܢܸܬ݂ܟܲܣܣܘܼܢ ܥܒ݂ܵܕ݂ܵܘ̈ܗܝ.

²¹ ܗܵܘ ܕܹܝܢ ܕܥܵܒܹܿܕ݂ ܫܪܵܪܵܐ. ܐܵܬܹܐ ܠܘܵܬ݂ ܢܘܼܗܪܵܐ. ܕܢܸܬ݂ܝܕ݂ܥܘܼܢ ܥܒ݂ܵܕ݂ܵܘ̈ܗܝ ܕܒܲܐܠܵܗܵܐ ܥܒ݂ܝܼܕ݂ܝܼܢ.

²² ܒܵܬܲܪ ܗܵܠܹܝܢ. ܐܸܬ݂ܵܐ ܝܼܫܘܿܥ ܘܬܲܠܡܝܼܕ݂ܵܘ̈ܗܝ ܠܐܲܪܥܵܐ ܕܲܝܗܘܼܕ݂. ܘܬܲܡܵܢ ܡܸܬ݂ܗܲܦܲܟ݂ ܗܘ̣ܵܐ ܥܲܡܗܘܿܢ. ܘܡܲܥܡܸܕ݂.

²³ ܐܵܦ ܝܘܿܚܲܢܵܢ ܕܹܝܢ ܡܲܥܡܸܕ݂ ܗܘ̣ܵܐ ܒܥܹܝܢ ܝܘܿܢ. ܕܥܲܠ ܓܸܢ̄ܒ݂ ܫܵܠܝܼܡ. ܡܛܠ ܕܡܲܝ̈ܵܐ ܐܝܼܬ݂ ܗ̄ܘܼܵܘ ܬܲܡܵܢ ܣܲܓܝܼܐܹ̈ܐ. ܘܐܵܬܹܝܢ ܗ̄ܘܼܵܘ ܘܥܵܡܕܝܼܢ.

²⁴ ܠܵܐ ܓܹܝܪ ܥܕ݂ܲܟܹܝܠ ܢܦܲܠ ܗܘ̣ܵܐ ܝܘܿܚܲܢܵܢ ܒܹܝܬ݂ ܐܲܣܝܼܪܹ̈ܐ.

²⁵ ܗܘܸܵܬ݂ ܗ̄ܘܵܬ݂ ܕܹܝܢ ܒܥܵܬ݂ܵܐ ܠܚܲܕ݂ ܡܸܢ ܬܲܠܡܝܼܕ݂ܵܘ̈ܗܝ ܕܝܘܿܚܲܢܵܢ ܥܲܡ ܝܗܘܼܕ݂ܵܝܵܐ ܚܲܕ݂ ܥܲܠ ܬܲܕ݂ܟܝܼܬ݂ܵܐ.

²⁶ ܘܐܸܬ݂ܵܘ ܠܘܵܬ݂ ܝܘܿܚܲܢܵܢ ܘܐܸܡܲܪܘ ܠܹܗ. ܪܲܒܲܢ. ܗܵܘ ܕܥܲܡܵܟ݂ ܗܘ̣ܵܐ ܒܥܸܒ݂ܪܵܐ ܕܝܘܿܪܕܢܵܢ: ܕܐܲܢ̄ܬ݁ ܣܗܸܕ݂ܬ݁ ܥܠܵܘܗܝ. ܗܵܐ ܐܵܦ ܗܘܼ ܡܲܥܡܸܕ݂. ܘܣܲܓܝܼܐܹ̈ܐ ܐܵܬܹ݁ܝܢ ܠܘܵܬܹܗ.

²⁷ ܥܢܵܐ ܝܘܿܚܲܢܵܢ ܘܐܸܡܲܪ ܠܗܘܿܢ. ܠܵܐ ܡܸܫܟܲܚ ܒܲܪܢܵܫܵܐ ܠܡܸܣܲܒ݂ ܡܸܢ ܨܒ݂ܘܬ݂ ܢܲܦ̮ܫܹܗ ܡܸܕܸܡ ܐܸܠܵܐ ܐܸܢ ܐܸܬ݂ܝܼܗܸܒ݂ ܠܹܗ ܡܸܢ ܫܡܲܝܵܐ.

²⁸ ܐܲܢ̄ܬ݁ܘܿܢ ܣܵܗܕܝܼܢ ܐܢ̄ܬܘܿܢ ܠܝܼ. ܕܐܸܡܪܹܬ݂. ܕܐܸܢܵܐ ܠܵܐ ܗ̄ܘܹܝܬ݂ ܡܫܝܼܚܵܐ. ܐܸܠܵܐ ܫܠܝܼܚܵܐ ܐ̄ܢܵܐ ܕܲܩܕ݂ܵܡܵܘܗܝ.

²⁹ ܡܲܢ ܕܐܝܼܬ݂ ܠܹܗ ܟܲܠܬ݂ܵܐ. ܚܲܬ݂ܢܵܐ ܗܘܼ. ܪܵܚܡܹܗ ܕܹܝܢ ܕܚܲܬ݂ܢܵܐ. ܗܵܘ ܕܩܵܐܹܡ ܘܨܵܐܸܬ݂ ܠܹܗ. ܚܲܕ݂ܘܼܬ݂ܵܐ ܪܲܒܬ݂ܵܐ ܚܵܕܹܐ ܡܛܠ ܩܵܠܹܗ ܕܚܲܬ݂ܢܵܐ. ܗܵܕܹܐ ܗܵܟܹܝܠ ܚܲܕ݂ܘܼܬ݂ܵܐ ܕܝܼܠܝ ܗܵܐ ܡܡܲܠܝܵܐ.

³⁰ ܠܗܵܘ ܗܘܼ ܘܵܠܹܐ ܠܡܸܪܒܵܐ. ܘܠܝܼ ܠܡܸܒ݂ܨܲܪ.

³¹ ܗܵܘ ܓܹܝܪ ܕܡܸܢ ܠܥܸܠ ܐܸܬ݂ܵܐ. ܠܥܸܠ ܡܸܢ ܟܠ ܗ̄ܘܼ. ܘܗܵܘ ܕܡܸܢ ܐܲܪܥܵܐ. ܡܸܢ ܐܲܪܥܵܐ ܗܘܼ. ܘܡܸܢ ܐܲܪܥܵܐ ܡܡܲܠܸܠ. ܗܵܘ ܕܡܸܢ ܫܡܲܝܵܐ ܐܸܬ݂ܵܐ. ܠܥܸܠ ܡܸܢ ܟܠ ܗ̄ܘ.

³² ܘܡܸܕܸܡ ܕܲܚܙܵܐ ܘܲܫܡܲܥ ܡܲܣܗܸܕ݂. ܘܣܵܗܕܘܼܬܹܗ ܠܵܐ ܐ̄ܢܵܫ ܡܩܲܒܸܠ.

³³ ܗܵܘ ܕܹܝܢ ܕܩܲܒܸܠ ܣܵܗܕܘܼܬܹܗ. ܚܬܲܡ ܕܐܲܠܵܗܵܐ ܫܲܪܝܼܪܵܐ ܗܘܼ.

³⁴ ܐܲܝܢܵܐ ܓܹܝܪ ܕܐܲܠܵܗܵܐ ܫܲܕܪܹܗ. ܡܸܠܹ̈ܐ ܗ̄ܘܼ ܕܐܲܠܵܗܵܐ ܡܡܲܠܸܠ. ܠܵܐ ܗܘ̣ܵܐ ܓܹܝܪ ܒܟܲܝܠܵܐ ܝܲܗ̄ܒ݂ ܐܲܠܵܗܵܐ ܪܘܼܚܵܐ.

³⁵ ܐܲܒ݂ܵܐ ܡܲܚܸܒ݂ ܠܲܒ݂ܪܵܐ. ܘܟ݂ܠ ܡܸܕܸܡ ܝܲܗ̄ܒ݂ ܒܐܝܼܕ݂ܵܘ̈ܗܝ.

³⁶ ܡܲܢ ܕܲܡܗܲܝܡܸܢ ܒܲܒ݂ܪܵܐ. ܐܝܼܬ݂ ܠܹܗ ܚܲܝܹ̈ܐ ܕܲܠܥܵܠܲܡ. ܘܡܲܢ ܕܠܵܐ ܡܸܬ݁ܛܦܝܼܣ ܠܲܒ݂ܪܵܐ. ܠܵܐ ܢܸܚܙܹܐ ܚܲܝܹ̈ܐ. ܐܸܠܵܐ ܪܘܼܓ݂ܙܹܗ ܕܐܲܠܵܗܵܐ ܢܩܵܘܐ ܥܠܵܘܗܝ.

4

¹ ܝܼܕ݂ܲܥ ܕܹܝܢ ܝܼܫܘܿܥ ܕܲܫܡܲܥܘ ܦܪ̈ܝܼܫܹܐ ܕܬܲܠܡܝܼܕܹ̈ܐ ܣܲܓܝܼܐܹ̈ܐ ܥܒܲܕ݂. ܘܡܲܥܡܸܕ݂ ܝܲܬ݁ܝܼܪ ܡܸܢ ܝܘܿܚܲܢܵܢ.

² ܟܲܕ݂ ܠܵܐ ܗܘ̣ܵܐ ܗܘܼ ܝܼܫܘܿܥ ܡܲܥܡܸܕ݂ ܗ̄ܘܵܐ. ܐܸܠܵܐ ܬܲܠܡܝܼܕ݂ܵܘ̈ܗܝ.

³ ܘܫܲܒ݂ܩܵܗ̇ ܠܝܼܗܘܼܕ݂. ܘܐܸܙܲܠ ܠܹܗ ܬܘܼܒ݂ ܠܲܓ݂ܠܝܼܠܵܐ.

⁴ ܡܲܥܒܕ݂ܵܐ ܗ̄ܘܵܬ݂ ܠܹܗ ܕܹܝܢ ܕܢܹܐܬܹܐ ܢܸܥܒܲܪ ܥܲܠ ܒܹܝܬ݂ ܫܵܡܪ̈ܵܝܹܐ.

⁵ ܘܐܸܬ݂ܵܐ ܠܲܡܕ݂ܝܼܢ̄ܬܵܐ ܕܫܵܡܪ̈ܵܝܹܐ. ܕܡܸܬ݂ܩܲܪܝܵܐ ܫܵܟ݂ܵܪ. ܥܲܠ ܓܸܢ̄ܒ݂ ܩܪܝܼܬ݂ܵܐ. ܕܝܲܗ̄ܒ݂ ܗܘ̣ܵܐ ܝܲܥܩܘܿܒ݂ ܠܝܵܘܣܸܦ ܒܪܹܗ.

⁶ ܘܐܝܼܬ݂ ܗܘ̣ܵܐ ܬܲܡܵܢ ܡܥܝܼܢܵܐ ܕܡܲܝ̈ܵܐ ܕܝܲܥܩܘܿܒ݂. ܗܘܼ ܕܹܝܢ ܝܼܫܘܿܥ ܠܐܹܐ ܗܘ̣ܵܐ ܡܸܢ ܥܲܡܠܵܐ ܕܐܘܼܪܚܵܐ. ܘܝܼܬܸܒ݂ ܗܘ̣ܵܐ ܠܹܗ ܥܲܠ ܡܥܝܼܢܵܐ. ܘܐܝܼܬ݂ ܗ̄ܘܲܝ ܫܸܬ݂ ܫܵܥܝܼ̈ܢ.

⁷ ܘܐܸܬ݂ܵܬ݂ ܐܲܢ̄ܬ݁ܬ݂ܵܐ ܡܸܢ ܫܵܡܪܝܼܢ ܕܬܸܡܠܹܐ ܡܲܝ̈ܵܐ. ܘܐܸܡܲܪ ܠܵܗ̇ ܝܼܫܘܿܥ. ܗܲܒ݂ ܠܝܼ ܡܲܝ̈ܵܐ ܐܸܫܬܹܐ.

⁸ ܬܲܠܡܝܼܕ݂ܵܘ̈ܗܝ ܓܹܝܪ ܥܲܠܘ ܗ̄ܘܼܵܘ ܠܲܡܕ݂ܝܼܢ̄ܬܵܐ. ܕܢܸܙܒܢܘܼܢ ܠܗܘܿܢ ܣܲܝܒܵܪܬܵܐ.

⁹ ܐܵܡܪܵܐ ܠܹܗ ܗܵܝ ܐܲܢ̄ܬ݁ܬ݂ܵܐ ܫܵܡܪܵܝܬܵܐ. ܐܲܝܟܲܢܵܐ ܐܲܢ̄ܬ݁ ܝܗ̄ܘܼܕ݂ܝܵܐ ܐܲܢ̄ܬ݁ ܘܡܹܢܝ ܫܵܐܹܠ ܐܲܢ̄ܬ݁ ܠܡܸܫܬܵܐ. ܕܐܝܬܲܝ ܐܲܢ̄ܬ݁ܬ݂ܵܐ ܫܵܡܪܵܝܬܵܐ. ܠܵܐ ܓܹܝܪ ܡܸܬ݂ܚܲܫܚܝܼܢ ܝܗ̄ܘܼܕ݂ܵܝܹ̈ܐ ܥܲܡ ܫܵܡܪ̈ܵܝܹܐ.

¹⁰ ܥܢܵܐ ܝܼܫܘܿܥ. ܘܐܸܡܲܪ ܠܵܗ̇. ܐܸܠܘܼ ܝܵܕ݂ܥܵܐ ܗ̄ܘܲܝܬ݁ܝ ܡܵܘܗܲܒ݂ܬܵܐ ܕܐܲܠܵܗܵܐ: ܘܡܲܢܘܼ ܗܵܢܵܐ ܕܐܵܡܲܪ ܠܹܟ݂ܝ. ܗܲܒ݂ ܠܝܼ ܐܸܫܬܹܐ. ܐܲܢ̄ܬ݁ܝ ܫܵܐܠܵܐ ܗ̄ܘܲܝܬ݁ܝ ܠܹܗ. ܘܝܵܗܹܒ݂ ܗܘ̣ܵܐ ܠܹܟ݂ܝ ܡܲܝ̈ܵܐ ܚܲܝܹ̈ܐ.

¹¹ ܐܵܡܪܵܐ ܠܹܗ ܐܲܢ̄ܬ݁ܬ݂ܵܐ ܗܵܝ. ܡܵܪܝ. ܠܵܐ ܕܵܘܠܵܐ ܐܝܼܬ݂ ܠܵܟ݂. ܘܒܹܪܵܐ ܥܲܡܝܼܩܵܐ. ܐܲܝܡܸܟܵܐ ܠܵܟ݂ ܡܲܝ̈ܵܐ ܚܲܝܹ̈ܐ.

¹² ܠܡܵܐ ܐܲܢ̄ܬ݁ ܪܲܒ ܐܲܢ̄ܬ݁ ܡܸܢ ܐܲܒ݂ܘܼܢ ܝܲܥܩܘܿܒ݂: ܗܵܘ ܕܗܘܼ ܝܲܗ̄ܒ݂ ܠܲܢ ܒܪܵܐ ܗܵܕܹܐ: ܘܗܘܼ ܡܸܢܹܗ ܐܸܫܬ݁ܝܼ ܘܲܒ݂ܢܵܘ̈ܗܝ ܘܥܵܢܹ̈ܗ.

¹³ ܥܢܵܐ ܝܼܫܘܿܥ ܘܐܸܡܲܪ ܠܵܗ̇. ܟܠ ܕܢܸܫܬܹܐ ܡܸܢ ܗܵܠܹܝܢ ܡܲܝ̈ܵܐ. ܬܘܼܒ݂ ܢܸܨܗܹܐ.

¹⁴ ܟܠ ܕܹܝܢ ܕܢܸܫܬܹܐ ܡܸܢ ܡܲܝ̈ܵܐ ܕܐܸܢܵܐ ܐܸܬܸ݁ܠ ܠܹܗ. ܠܵܐ ܢܸܨܗܹܐ ܠܥܵܠܲܡ. ܐܸܠܵܐ ܡܲܝ̈ܵܐ ܗܵܢܘܿܢ ܕܝܵܗܹܒ݂ ܐ̄ܢܵܐ ܠܹܗ. ܢܸܗܘܘܿܢ ܒܹܗ ܡܥܝܼܢܵܐ ܕܡܲܝ̈ܵܐ. ܕܢܵܒ݂ܥܝܼܢ ܠܚܲܝܹ̈ܐ ܕܲܠܥܵܠܲܡ.

¹⁵ ܐܵܡܪܵܐ ܠܹܗ ܐܲܢ̄ܬ݁ܬ݂ܵܐ ܗܵܝ. ܡܵܪܝ. ܗܲܒ݂ ܠܝܼ ܡܸܢ ܗܵܠܹܝܢ ܡܲܝ̈ܵܐ. ܕܠܵܐ ܬܘܼܒ݂ ܐܸܨܗܹܐ. ܘܠܵܐ ܗ̄ܘܹܝܬ݂ ܐܵܬ݂ܝܵܐ ܕܵܠܝܵܐ ܡܸܢ ܗܵܪܟܵܐ.

¹⁶ ܐܵܡܲܪ ܠܵܗ̇ ܝܼܫܘܿܥ. ܙܸܠܝ ܩܪܵܝ ܠܒܲܥܠܹܟ݂ܝ. ܘܬ݂ܵܝ ܠܗܵܪܟܵܐ.

¹⁷ ܐܵܡܪܵܐ ܠܹܗ. ܠܲܝܬ݁ ܠܝܼ ܒܲܥܠܵܐ. ܐܵܡܲܪ ܠܵܗ̇ ܝܼܫܘܿܥ. ܫܲܦܝܼܪ ܐܸܡܲܪܬ݁ܝ. ܕܠܲܝܬ݁ ܠܝܼ ܒܲܥܠܵܐ.

¹⁸ ܚܲܡܫܵܐ ܓܹܝܪ ܒܲܥ̈ܠܝܼܢ ܗܘܵܘ ܠܹܟ݂ܝ. ܘܗܵܢܵܐ ܕܐܝܼܬ݂ ܠܹܟ݂ܝ ܗܵܫܵܐ. ܠܵܐ ܗܘ̣ܵܐ ܒܲܥܠܹܟ݂ܝ. ܗܵܕܹܐ. ܫܲܪܝܼܪܬܵܐ ܐܸܡܲܪܬ݁ܝ.

¹⁹ ܐܵܡܪܵܐ ܠܹܗ ܗܵܝ ܐܲܢ̄ܬ݁ܬ݂ܵܐ. ܡܵܪܝ. ܚܵܙܝܵܐ ܐ̄ܢܵܐ ܕܲܢܒ݂ܝܼܵܐ ܐܲܢ̄ܬ݁.

²⁰ ܐܲܒ݂ܵܗܲܝ̈ܢ ܒܗܵܢܵܐ ܛܘܼܪܵܐ ܣܓܸܕ݂ܘ. ܘܐܲܢ̄ܬ݁ܘܿܢ ܐܵܡܪܝܼܢ ܐܢ̄ܬܘܿܢ. ܕܒ݂ܐܘܿܪܸܫܠܸܡ ܗܘܼ ܐܲܬܲܪ ܕܘܵܠܹܐ ܠܡܸܣܓܲܕ݂.

²¹ ܐܵܡܲܪ ܠܵܗ̇ ܝܼܫܘܿܥ. ܐܲܢ̄ܬ݁ܬ݂ܵܐ. ܗܲܝܡܢܝܼܢܝ ܕܐܵܬ݂ܝܵܐ ܫܵܥܬ݂ܵܐ. ܕܠܵܐ ܒܗܵܢܵܐ ܛܘܼܪܵܐ. ܘܐܵܦ ܠܵܐ ܒܐܘܿܪܸܫܠܸܡ ܬܸܣܓ݁ܕ݂ܘܼܢ ܠܐܲܒ݂ܵܐ.

²² ܐܲܢ̄ܬ݁ܘܿܢ ܣܵܓ݂ܕܝܼܢ ܐܢ̄ܬܘܿܢ. ܠܡܸܕܸܡ ܕܠܵܐ ܝܵܕ݂ܥܝܼܢ ܐܢ̄ܬܘܿܢ. ܚܢܲܢ ܕܹܝܢ ܣܵܓ݂ܕܝܼܢ ܚ̱ܢܲܢ. ܠܡܵܐ ܕܝܵܕ݂ܥܝܼܢ ܚ̱ܢܲܢ. ܕܚܲܝܹ̈ܐ ܡܸܢ ܝܗ̄ܘܼܕ݂ܵܝܹ̈ܐ ܐܸܢܘܿܢ.

²³ ܐܸܠܵܐ ܐܵܬ݂ܝܵܐ ܫܵܥܬ݂ܵܐ. ܘܗܵܫܵܐ ܐܝܼܬܹܝܗ̇. ܐܸܡܲܬ݂ܝ ܕܣܵܓ݂ܘܕܹ̈ܐ ܫܲܪܝܼܪܹ̈ܐ ܢܸܣܓ݁ܕ݂ܘܼܢ ܠܐܲܒ݂ܵܐ ܒܪܘܼܚܵܐ. ܘܒܲܫܪܵܪܵܐ. ܐܵܦ ܐܲܒ݂ܵܐ ܓܹܝܪ ܕܐܲܝܟ݂ ܗܵܠܹܝܢ ܗܘܼ ܣܵܓ݂ܘܕܹ̈ܐ ܒܵܥܹܐ.

²⁴ ܪܘܼܚܵܐ ܗܘܼ ܓܹܝܪ ܐܲܠܵܗܵܐ. ܘܐܲܝܠܹܝܢ ܕܣܵܓ݂ܕܝܼܢ ܠܹܗ. ܒܪܘܼܚܵܐ ܘܒܲܫܪܵܪܵܐ ܘܵܠܹܐ ܕܢܸܣܓ݁ܕ݂ܘܼܢ.

²⁵ ܐܵܡܪܵܐ ܠܹܗ ܐܲܢ̄ܬ݁ܬ݂ܵܐ ܗܵܝ. ܝܵܕ݂ܥܵܐ ܐ̄ܢܵܐ ܕܲܡܫܝܼܚܵܐ ܐܵܬܹܐ. ܘܡܵܐ ܕܐܸܬ݂ܵܐ. ܗܘܼ ܡܲܠܸܦ ܠܲܢ ܟܠ ܡܸܕ݂ܡ.

²⁶ ܐܵܡܲܪ ܠܵܗ̇ ܝܼܫܘܿܥ. ܐܸܢܵܐ ܐ̄ܢܵܐ. ܕܲܡܡܲܠܸܠ ܐ̄ܢܵܐ ܥܲܡܹܟ݂ܝ.

²⁷ ܘܟܲܕ݂ ܡܡܲܠܸܠ. ܐܸܬ݂ܵܘ ܬܲܠܡܝܼܕ݂ܵܘ̈ܗܝ. ܘܡܸܬ݁ܕܲܡܪܝܼܢ ܗ̄ܘܼܵܘ ܕܥܲܡ ܐܲܢ̄ܬ݁ܬ݂ܵܐ ܡܡܲܠܸܠ. ܠܵܐ ܕܹܝܢ ܐ̄ܢܵܫ ܐܸܡܲܪ. ܡܵܢܵܐ ܒܵܥܹܐ ܐܲܢ̄ܬ݁ ܐܵܘ ܡܵܢܵܐ ܡܡܲܠܸܠ ܐܲܢ̄ܬ݁ ܥܲܡܵܗ̇.

²⁸ ܘܫܸܒ݂ܩܲܬ݂ ܩܘܼܠܬ݂ܵܗ̇ ܐܲܢ̄ܬ݁ܬ݂ܵܐ. ܘܐܸܙܲܠ̱ܬ݂ ܠܲܡܕ݂ܝܼܢ̄ܬܵܐ. ܘܐܵܡܪܵܐ ܠܐ̄ܢܵܫܵܐ.

²⁹ ܬܵܘ ܚܙܵܘ ܓܲܒ݂ܪܵܐ. ܕܐܵܡܲܪ ܠܝܼ ܟܠ ܡܸܕܸܡ ܕܥܸܒ݂ܕܹܬ݂. ܠܡܵܐ ܗܘܸܝܘܼ ܡܫܝܼܚܵܐ.

³⁰ ܘܲܢܦܲܩܘ ܐ̄ܢܵܫܵܐ ܡܸܢ ܡܕ݂ܝܼܢ̄ܬܵܐ. ܘܐܵܬܹܝܢ ܗ̄ܘܼܵܘ ܠܘܵܬܹܗ.

³¹ ܘܒܲܝܢܵܬ݂ ܗܵܠܹܝܢ ܒܵܥܹܝܢ ܗ̄ܘܼܵܘ ܡܸܢܹܗ ܬܲܠܡܝܼܕ݂ܵܘ̈ܗܝ. ܘܐܵܡܪܝܼܢ ܠܹܗ. ܪܲܒܲܢ ܠܥܲܣ.

³² ܗܘܼ ܕܹܝܢ ܐܸܡܲܪ ܠܗܘܿܢ. ܐܝܼܬ݂ ܠܝܼ ܡܹܐܟ݂ܘܼܠܬܵܐ ܕܐܹܟ݂ܘܿܠ. ܐܲܝܕ݂ܵܐ ܕܐܲܢ̄ܬܘܿܢ. ܠܵܐ ܝܵܕ݂ܥܝܼܢ ܐܢ̄ܬܘܿܢ.

³³ ܐܵܡܪܝܼܢ ܬܲܠܡܝܼܕܹ̈ܐ ܒܲܝܢܲܝܗܘܿܢ. ܠܡܵܐ. ܐ̄ܢܵܫ ܐܲܝܬ݁ܝܼ ܠܹܗ ܡܸܕܸܡ ܠܡܹܐܟܲܠ.

³⁴ ܐܵܡܲܪ ܠܗܘܿܢ ܝܼܫܘܿܥ. ܡܹܐܟ݂ܘܼܠܬ݁ܝ. ܕܝܼܠܝ ܐܝܼܬܹܝܗ̇. ܕܐܸܥܒܸܕ݂ ܨܸܒ݂ܝܵܢܹܗ ܕܡܲܢ ܕܫܲܕܪܲܢܝ. ܘܐܸܫܲܠܡܝܼܘܗܝ ܠܲܥܒ݂ܵܕ݂ܗ.

³⁵ ܠܵܐ ܐܲܢ̄ܬ݁ܘܿܢ ܐܵܡܪܝܼܢ ܕܒܵܬܲܪ ܐܲܪܒܥܵܐ ܝܲܪ̈ܚܝܼܢ. ܐܵܬܹܐ ܚܨܵܕ݂ܵܐ. ܗܵܐ ܐܵܡܲܪ ܐ̄ܢܵܐ ܠܟ݂ܘܿܢ. ܕܐܲܪܝܼܡܘ ܥܲܝܢܲܝ̈ܟܿܘܿܢ. ܘܲܚܙܵܘ ܐܲܪ̈ܥܵܬ݂ܵܐ ܕܲܚܘܲܪ ܘܡܲܛܝܼ ܠܲܚܨܵܕ݂ܵܐ. ܡܸܢ ܟܲܕܘܼ.

³⁶ ܘܐܲܝܢܵܐ ܕܚܵܨܸܕ݂. ܐܲܓ݂ܪܵܐ ܢܵܣܹܒ݂. ܘܟ݂ܵܢܹܫ ܦܹܐܪܹ̈ܐ. ܠܚܲܝܹ̈ܐ ܕܲܠܥܵܠܲܡ. ܘܙܵܪܘܿܥܵܐ ܘܚܵܨܘܿܕ݂ܵܐ. ܐܲܟ݂ܚܕ݂ܵܐ ܢܸܚܕܘܢ.

³⁷ ܒܗܵܕܹܐ ܓܹܝܪ ܐܝܼܬܹܝܗ̇ ܡܸܠܬ݂ܵܐ ܕܲܫܪܵܪܵܐ. ܕܐܲܚܪܹܝܢ ܗܘܼ ܙܵܪܲܥ. ܘܐܲܚܪܹܝܢ ܚܵܨܸܕ݂.

³⁸ ܐܸܢܵܐ ܫܲܕܲܪܬ݁ܟ݂ܘܿܢ ܠܡܸܚܨܲܕ݂. ܡܸܕܸܡ ܕܠܵܐ ܗܘ̣ܵܐ ܐܲܢ̄ܬ݁ܘܿܢ ܠܐܝܼܬ݁ܘܿܢ ܒܹܗ. ܐ̄ܚܪܵ̈ܢܹܐ ܓܹܝܪ ܠܐܝܼܘ. ܘܐܲܢ̄ܬ݁ܘܿܢ ܥܲܠܬ݁ܘܢ ܥܲܠ ܥܲܡܠܗܘܿܢ ܕܗܵܢܘܿܢ.

³⁹ ܡܸܢ ܗܵܝ ܡܕ݂ܝܼܢ̄ܬܵܐ ܕܹܝܢ ܣܲܓܝܼܐܹ̈ܐ ܗܲܝܡܸܢܘ ܒܹܗ ܫܵܡܪ̈ܵܝܹܐ. ܡܛܠ ܡܸܠܬ݂ܵܗ̇ ܕܐܲܢ̄ܬ݁ܬ݂ܵܐ ܗܵܝ. ܕܡܲܣܗܕ݂ܵܐ ܗ̄ܘܵܬ݂ ܕܐܵܡܲܪ ܠܝܼ ܟܠ ܡܸܕܸܡ ܕܥܸܒ݂ܕܹܬ݂.

⁴⁰ ܘܟܲܕ݂ ܐܸܬ݂ܵܘ ܠܘܵܬܹܗ ܗܵܢܘܿܢ ܫܵܡܪ̈ܵܝܹܐ. ܒܥܵܘ ܡܸܢܹܗ ܕܢܸܗܘܹܐ ܠܘܵܬ݂ܗܘܿܢ. ܘܲܗܘܵܐ ܠܘܵܬ݂ܗܘܿܢ ܬܪܹܝܢ ܝܵܘܡ̈ܝܼܢ.

⁴¹ ܘܣܲܓܝܼܐܹ̈ܐ ܗܲܝܡܸܢܘ ܒܹܗ ܡܛܠ ܡܸܠܬܹܗ

⁴² ܘܐܵܡܪܝܼܢ ܗ̄ܘܼܵܘ ܠܐܲܢ̄ܬ݁ܬ݂ܵܐ ܗܵܝ. ܕܡܸܟܹܝܠ ܠܵܐ ܗܘ̣ܵܐ ܡܛܠ ܡܸܠܬܹܟ݂ܝ ܡܗܲܝܡܢܝܼܢ ܚ̄ܢܲܢ ܒܹܗ. ܚܢܲܢ ܓܹܝܪ ܫܡܲܥܢ ܘܝܼܕ݂ܲܥܢ. ܕܗܵܢܵܘ ܫܲܪܝܼܪܵܐܝܼܬ݂ ܡܫܝܼܚܵܐ. ܡܲܚܝܵܢܹܗ ܕܥܵܠܡܵܐ.

⁴³ ܘܒܵܬܲܪ ܬܪܹܝܢ ܝܵܘܡ̈ܝܼܢ. ܢܦܲܩ ܝܼܫܘܿܥ ܡܸܢ ܬܲܡܵܢ. ܘܐܸܙܲܠ ܠܲܓ݂ܠܝܼܠܵܐ.

⁴⁴ ܗܘܼ ܓܹܝܪ ܝܼܫܘܿܥ ܣܗܸܕ݂. ܕܲܢܒ݂ܝܼܵܐ ܒܲܡܕ݂ܝܼܢ̱ܬܹ݁ܗ ܠܵܐ ܡܸܬ݂ܝܲܩܲܪ.

⁴⁵ ܟܲܕ݂ ܕܹܝܢ ܐܸܬ݂ܵܐ ܠܲܓ݂ܠܝܼܠܵܐ. ܩܲܒܿܠܘܼܗܝ ܓܠܝܼܠܵܝܹ̈ܐ. ܕܲܚܙܵܘ ܐܵܬ݂ܘܵܬ݂ܵܐ ܟܠ ܕܲܥܒܲܕ݂ ܒܐܘܿܪܸܫܠܸܡ ܒܥܲܕ݂ܥܹܕ݂ܵܐ. ܐܸܬ݂ܵܘ ܗ̄ܘܼܵܘ ܓܹܝܪ ܘܐܵܦ ܗܸܢܘܿܢ ܠܥܲܕ݂ܥܹܕ݂ܵܐ.

⁴⁶ ܐܸܬ݂ܵܐ ܕܹܝܢ ܬܘܼܒ݂ ܝܼܫܘܿܥ ܠܩܵܛܢܹ̈ܐ ܕܲܓ݂ܠܝܼܠܵܐ ܐܲܝܟܵܐ ܕܲܥܒܲܕ݂ ܡܲܝ̈ܵܐ ܚܲܡܪܵܐ. ܘܐܝܼܬ݂ ܗܘ̣ܵܐ ܒܲܟ݂ܦܲܪܢܵܚܘܿܡ ܥܒܸܕ݂ ܡܲܠܟܵܐ ܚܲܕ݂. ܕܲܒ݂ܪܹܗ ܟܪܝܼܗ ܗ̄ܘܵܐ.

⁴⁷ ܗܵܢܵܐ ܫܡܲܥ ܕܐܸܬ݂ܵܐ ܝܼܫܘܿܥ ܡܸܢ ܝܼܗܘܼܕ݂ ܠܲܓ݂ܠܝܼܠܵܐ. ܘܐܸܙܲܠ ܠܘܵܬܹܗ. ܘܒ݂ܵܥܹܐ ܗܘ̣ܵܐ ܡܸܢܹܗ. ܕܢܸܚܘܬ݂ ܘܢܲܐܣܹܐ ܠܲܒ݂ܪܹܗ. ܩܲܪܝܼܒ݂ ܗܘ̣ܵܐ ܓܹܝܪ ܠܲܡܡܵܬ݂.

⁴⁸ ܐܵܡܲܪ ܠܹܗ ܝܼܫܘܿܥ. ܐܸܢ ܐܵܬ݂ܘܵܬ݂ܵܐ ܘܬܸܕ݂ܡܪ̈ܵܬ݂ܵܐ ܠܵܐ ܬܸܚܙܘܿܢ. ܠܵܐ ܬܗܲܝܡܢܘܼܢ.

⁴⁹ ܐܵܡܲܪ ܠܹܗ ܗܵܘ ܥܒܸܕ݂ ܡܲܠܟܵܐ. ܡܵܪܝ. ܚܘܿܬ݂. ܥܲܕ݂ܠܵܐ ܡܵܐܹܬ݂ ܠܹܗ ܛܲܠܝܵܐ.

⁵⁰ ܐܵܡܲܪ ܠܹܗ ܝܼܫܘܿܥ. ܙܸܠ. ܒܪܵܟ݂ ܚܲܝ ܗ̄ܘܼ. ܘܗܲܝܡܸܢ ܗܵܘ ܓܲܒ݂ܪܵܐ ܒܡܸܠܬ݂ܵܐ ܕܐܵܡܲܪ ܠܹܗ ܝܼܫܘܿܥ. ܘܐܸܙܲܠ.

⁵¹ ܟܲܕ݂ ܕܹܝܢ ܢܚܸܬ݂ ܗ̄ܘܵܐ. ܐܲܪܥܘܼܗܝ ܥܲܒ݂ܕܵܘ̈ܗܝ. ܘܣܲܒܪܘܼܗܝ ܘܐܵܡܪܝܼܢ ܠܹܗ. ܒܪܵܟ݂ ܚܝܵܐ.

⁵² ܘܫܲܐܸܠ ܐܸܢܘܿܢ. ܒܐܲܝܢܵܐ ܥܸܕܵܢܵܐ ܐܸܬ݂ܚܠܸܡ. ܐܵܡܪܝܼܢ ܠܹܗ. ܐܸܬ݂ܡܵܠܝ. ܒܲܫܒܲܥ ܫܵܥܝܼ̈ܢ ܫܒܲܩܬܹܗ ܐܸܫܵܬ݂ܵܐ.

⁵³ ܘܝܼܕ݂ܲܥ ܐܲܒ݂ܘܼܗܝ. ܕܲܒ݂ܗܵܝ ܫܵܥܬ݂ܵܐ ܕܒ݂ܵܗ̇ ܐܸܡܲܪ ܠܹܗ ܝܼܫܘܿܥ ܕܲܒ݂ܪܵܟ݂ ܚܝܵܐ. ܘܗܲܝܡܸܢ ܗܘܼ ܘܒܲܝܬܹ݁ܗ ܟܠܹܗ.

⁵⁴ ܗܵܕܹܐ ܬܘܼܒ݂ ܐܵܬ݂ܵܐ ܕܬܲܪܬܹ݁ܝܢ ܥܒܲܕ݂ ܝܼܫܘܿܥ: ܟܲܕ݂ ܐܸܬ݂ܵܐ ܡܸܢ ܝܼܗܘܼܕ݂ ܠܲܓ݂ܠܝܼܠܵܐ.

5

¹ ܒܵܬܲܪ ܗܵܠܹܝܢ. ܗܘ̣ܵܐ ܥܲܕ݂ܥܹܕ݂ܵܐ ܕܲܝܗ̄ܘܼܕ݂ܵܝܹ̈ܐ. ܘܲܣܠܸܩ ܝܼܫܘܿܥ ܠܐܘܿܪܸܫܠܸܡ.

² ܐܝܼܬ݂ ܗܘ̣ܵܐ ܕܹܝܢ ܬܲܡܵܢ ܒܐܘܿܪܸܫܠܸܡ ܕܘܼܟܬ݂ܵܐ ܚܕ݂ܵܐ ܕܡܲܥܡܘܿܕ݂ܝܼܬ݂ܵܐ. ܕܡܸܬ݂ܩܲܪܝܵܐ ܥܸܒ݂ܪܵܐܝܼܬ݂. ܒܹܝܬ݂ ܚܸܣܕܵܐ. ܘܐܝܼܬ݂ ܗܘ̣ܵܐ ܒܵܗ̇ ܚܲܡܫܵܐ ܐܸܣ̈ܛܘܝܼܢ.

³ ܘܲܒ݂ܗܵܠܹܝܢ ܪܡܹܝܢ ܗ̄ܘܼܵܘ ܥܲܡܵܐ ܣܲܓܿܝܼܐܵܐ ܕܲܟܪ̈ܝܼܗܹܐ ܘܲܣܡܲܝ̈ܵܐ ܘܲܚܓ݂ܝܼܣܹ̈ܐ ܘܝܲܒܝܼܫܹ̈ܐ. ܘܲܡܣܲܟܹܝܢ ܗ̄ܘܼܵܘ ܠܙܵܘܥܵܐ ܕܡܲܝ̈ܵܐ.

⁴ ܡܲܠܲܐܟ݂ܵܐ ܓܹܝܪ ܒܲܙܒܲܢ ܙܒܲܢ ܢܵܚܹܬ݂ ܗܘ̣ܵܐ ܠܵܗ̇ ܠܡܲܥܡܘܿܕ݂ܝܼܬ݂ܵܐ. ܘܲܡܙܝܼܥ ܗܘ̣ܵܐ ܠܗܘܿܢ ܠܡܲܝ̈ܵܐ. ܘܐܲܝܢܵܐ ܕܩܲܕ݂ܡܵܝܵܐ ܢܚܸܬ݂ ܗܘ̣ܵܐ ܡܸܢ ܒܵܬܲܪ ܙܵܘܥܵܐ ܕܡܲܝ̈ܵܐ. ܡܸܬ݂ܚܠܸܡ ܗܘ̣ܵܐ ܟܠ ܟܹܐܒ݂ܵܐ ܐܲܝܢܵܐ ܕܐܝܼܬ݂ ܗܘ̣ܵܐ ܠܹܗ.

⁵ ܐܝܼܬ݂ ܗܘ̣ܵܐ ܕܹܝܢ ܬܲܡܵܢ ܓܲܒ݂ܪܵܐ ܚܲܕ݂. ܕܲܬ݂ܠܵܬ݂ܝܼܢ ܘܲܬ݂ܡܵܢܹܐ ܫܢ̈ܝܼܢ ܐܝܼܬ݂ܵܘܗܝ ܗܘ̣ܵܐ ܒܟ݂ܘܼܪܗܵܢܵܐ.

⁶ ܠܗܵܢܵܐ ܚܙܵܐ ܝܼܫܘܿܥ ܕܲܪܡܹܐ. ܘܝܼܕ݂ܲܥ ܕܙܲܒ݂ܢܵܐ ܣܲܓܿܝܼܐܵܐ ܐܝܼܬ݂ ܠܹܗ. ܘܐܸܡܲܪ ܠܹܗ. ܨܵܒܹܐ ܐܲܢ̄ܬ݁ ܕܬܸܬ݂ܚܠܸܡ.

⁷ ܥܢܵܐ ܗܵܘ ܟܪܝܼܗܵܐ. ܘܐܸܡܲܪ. ܐܹܝܢ ܡܵܪܝ. ܠܲܝܬ݁ ܠܝܼ ܕܹܝܢ ܐ̄ܢܵܫ. ܕܡܵܐ ܕܐܸܬ݁ܬ݁ܙܝܼܥܘ ܡܲܝ̈ܵܐ ܢܲܪܡܹܝܢܝ ܒܡܲܥܡܘܿܕ݂ܝܼܬ݂ܵܐ. ܐܸܠܵܐ ܥܲܕ݂ ܐܸܢܵܐ ܐܵܬܹܐ ܐ̄ܢܵܐ. ܐ̄ܚܪܹܝܢ ܡܸܢ ܩܕ݂ܵܡܲܝ ܢܵܚܹܬ݂.

⁸ ܐܵܡܲܪ ܠܹܗ ܝܼܫܘܿܥ. ܩܘܼܡ ܫܩܘܿܠ ܥܲܪܣܵܟ݂. ܘܗܲܠܸܟ݂.

⁹ ܘܒܲܪ ܫܵܥܬܹܗ ܐܸܬ݂ܚܠܸܡ ܓܲܒ݂ܪܵܐ ܗܵܘ. ܘܩܼܵܡ ܫܩܲܠ ܥܲܪܣܹܗ. ܘܗܲܠܸܟ݂. ܘܗܘܼ ܗܵܘ ܝܵܘܡܵܐ ܫܲܒܿܬ݂ܵܐ ܗ̄ܘܵܬ݂.

¹⁰ ܘܐܵܡܪܝܼܢ ܠܹܗ ܝܗ̄ܘܼܕ݂ܵܝܹ̈ܐ ܠܗܵܘ ܕܐܸܬ݂ܐܲܣܝܼ. ܫܲܒܿܬ݂ܵܐ ܗܝ. ܠܵܐ ܫܲܠܝܼܛ ܠܵܟ݂ ܕܬܸܫܩܘܿܠ ܥܲܪܣܵܟ݂.

¹¹ ܗܘܼ ܕܹܝܢ ܥܢܵܐ ܘܐܸܡܲܪ ܠܗܘܿܢ. ܗܵܘ ܕܥܲܒ݂ܕܲܢܝ ܚܠܝܼܡܵܐ. ܗܘܼ ܐܸܡܲܪ ܠܝܼ ܕܲܫܩܘܿܠ ܥܲܪܣܵܟ݂. ܘܗܲܠܸܟ݂.

¹² ܘܫܲܐܠܘܼܗܝ ܡܲܢܘܼ ܗܵܢܵܐ ܓܲܒ݂ܪܵܐ ܕܐܵܡܲܪ ܠܵܟ݂. ܕܲܫܩܘܿܠ ܥܲܪܣܵܟ݂ ܘܗܲܠܸܟ݂.

¹³ ܗܵܘ ܕܹܝܢ ܕܐܸܬ݂ܐܲܣܝܼ. ܠܵܐ ܝܵܕ݂ܲܥ ܗܘ̣ܵܐ ܡܲܢܘܼ. ܝܼܫܘܿܥ ܓܹܝܪ ܐܸܬ݂ܓ݁ܢܝܼ ܗܘ̣ܵܐ ܠܹܗ ܒܟܸܢܫܵܐ ܣܲܓܿܝܼܐܵܐ ܕܐܝܼܬ݂ ܗܘ̣ܵܐ ܒܕܘܼܟܬ݂ܵܐ ܗܵܝ.

¹⁴ ܒܵܬܲܪ ܙܒܲܢ. ܐܸܫܟܚܹܗ ܝܼܫܘܿܥ ܒܗܲܝܟܠܵܐ. ܘܐܸܡܲܪ ܠܹܗ. ܗܵܐ ܚܠܝܼܡ ܐܲܢ̄ܬ݁. ܬܘܼܒ݂ ܠܵܐ ܬܸܚܛܹܐ. ܕܲܠܡܵܐ ܢܸܗܘܹܐ ܠܵܟ݂ ܡܸܕܸܡ ܕܒ݂ܝܼܫ ܡܸܢ ܩܲܕ݂ܡܵܝܵܐ.

¹⁵ ܘܐܸܙܲܠ ܗܵܘ ܓܲܒ݂ܪܵܐ. ܘܐܸܡܲܪ ܠܲܝܗ̄ܘܼܕ݂ܵܝܹ̈ܐ. ܕܝܼܫܘܿܥ ܗܘܼ ܗܵܘ ܕܐܲܚܠܡܹܗ.

¹⁶ ܘܡܛܠ ܗܵܕܹܐ ܪܵܕ݂ܦܝܼܢ ܗ̄ܘܼܵܘ ܝܗ̄ܘܼܕ݂ܵܝܹ̈ܐ ܠܝܼܫܘܿܥ. ܘܒ݂ܵܥܹܝܢ ܗ̄ܘܼܵܘ ܠܡܸܩܛܠܹܗ. ܕܗܵܠܹܝܢ ܥܵܒܹܿܕ݂ ܗܘ̣ܵܐ ܒܫܲܒܿܬ݂ܵܐ.

¹⁷ ܗܘܼ ܕܹܝܢ ܝܼܫܘܿܥ ܐܸܡܲܪ ܠܗܘܿܢ. ܐܵܒ݂ܝ ܥܕ݂ܲܡܵܐ ܠܗܵܫܵܐ ܥܵܒܹܿܕ݂. ܐܵܦ ܐܸܢܵܐ ܥܵܒܹܿܕ݂ ܐ̄ܢܵܐ.

¹⁸ ܘܡܛܠ ܗܵܕܹܐ ܝܲܬ݁ܝܼܪܵܐܝܼܬ݂ ܒܵܥܹܝܢ ܗ̄ܘܼܵܘ ܝܗ̄ܘܼܕ݂ܵܝܹ̈ܐ ܠܡܸܩܛܠܹܗ. ܠܵܐ ܒܲܠܚܘܿܕ݂ ܕܫܵܪܹܐ ܗܘ̣ܵܐ ܫܲܒܿܬ݂ܵܐ. ܐܸܠܵܐ ܐܵܦ ܕܥܲܠ ܐܲܠܵܗܵܐ ܕܐܲܒ݂ܘܼܗܝ ܐܝܼܬ݂ܵܘܗܝ. ܐܵܡܲܪ ܗ̄ܘܵܐ. ܘܡܲܫܘܹܐ ܗܘ̣ܵܐ ܢܲܦ̮ܫܹܗ ܥܲܡ ܐܲܠܵܗܵܐ.

¹⁹ ܥܢܵܐ ܕܹܝܢ ܝܼܫܘܿܥ. ܘܐܸܡܲܪ ܠܗܘܿܢ. ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܠܵܐ ܡܸܫܟܲܚ ܒܪܵܐ ܥܵܒܹܿܕ݂ ܡܸܕܸܡ ܡܸܢ ܨܒ݂ܘܬ݂ ܢܲܦ̮ܫܹܗ. ܐܸܠܵܐ ܡܸܕܸܡ ܕܚܵܙܹܐ ܠܐܲܒ݂ܵܐ ܕܥܵܒܹܿܕ݂. ܐܲܝܠܹܝܢ ܓܹܝܪ ܕܐܲܒ݂ܵܐ ܥܵܒܹܿܕ݂. ܗܵܠܹܝܢ ܐܵܦ ܒܪܵܐ ܐܲܟ݂ܘܵܬܹܗ ܥܵܒܹܿܕ݂.

²⁰ ܐܲܒ݂ܵܐ ܓܹܝܪ ܪܵܚܹܡ ܠܲܒ݂ܪܹܗ. ܘܟ݂ܠ ܡܸܕܸܡ ܕܥܵܒܹܿܕ݂ ܡܚܵܘܹܐ ܠܹܗ. ܘܲܕ݂ܝܲܬܝܼܪܝܼܢ ܡܸܢ ܗܵܠܹܝܢ ܥܒ݂ܵܕܹ̈ܐ ܡܚܵܘܹܐ ܠܹܗ. ܕܐܲܢ̄ܬ݁ܘܿܢ ܬܸܬ݁ܕܲܡܪܘܼܢ.

²¹ ܐܲܝܟܲܢܵܐ ܓܹܝܪ ܕܐܲܒ݂ܵܐ ܡܩܝܼܡ ܡܝܼܬܹ̈ܐ ܘܡܲܚܹܐ ܠܗܘܿܢ. ܗܵܟܲܢܵܐ ܐܵܦ ܒܪܵܐ ܠܐܲܝܠܹܝܢ ܕܨܵܒܹܐ ܡܲܚܹܐ.

²² ܠܵܐ ܗܘ̣ܵܐ ܓܹܝܪ ܐܲܒ݂ܵܐ ܕܵܐܸܢ ܠܐ̄ܢܵܫ. ܐܸܠܵܐ ܟܠܹܗ ܕܝܼܢܵܐ ܝܲܗܒܹܗ ܠܲܒ݂ܪܵܐ.

²³ ܕܟ݂ܠܢܵܫ ܢܝܲܩܲܪ ܠܲܒ݂ܪܵܐ. ܐܲܝܟ݂ ܕܲܡܝܲܩܲܪ ܠܐܲܒ݂ܵܐ. ܗܵܘ ܕܠܵܐ ܡܝܲܩܲܪ ܠܲܒ݂ܪܵܐ. ܠܵܐ ܡܝܲܩܲܪ ܠܐܲܒ݂ܵܐ ܕܫܲܕܪܹܗ.

²⁴ ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܡܲܢ ܕܫܵܡܲܥ ܡܸܠܲܬ݂ܝ. ܘܲܡܗܲܝܡܸܢ ܠܡܲܢ ܕܫܲܕܪܲܢܝ. ܐܝܼܬ݂ ܠܹܗ ܚܲܝܹ̈ܐ ܕܲܠܥܵܠܲܡ. ܘܲܠܕ݂ܝܼܢܵܐ ܠܵܐ ܐܵܬܹܐ. ܐܸܠܵܐ ܫܲܢܝܼ ܠܹܗ ܡܸܢ ܡܵܘܬܵܐ ܠܚܲܝܹ̈ܐ.

²⁵ ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܐܵܬ݂ܝܵܐ ܫܵܥܬ݂ܵܐ. ܐܵܦ ܗܵܫܵܐ ܐܝܼܬܹܝܗ̇. ܐܸܡܲܬ݂ܝ ܕܡܝܼܬܹ̈ܐ ܢܸܫܡܥܘܼܢ ܩܵܠܹܗ ܕܲܒ݂ܪܹܗ ܕܐܲܠܵܗܵܐ. ܘܗܵܢܘܿܢ ܕܫܵܡܥܝܼܢ ܢܸܚܘܿܢ.

²⁶ ܐܲܝܟܲܢܵܐ ܓܹܝܪ ܕܠܲܐܒ݂ܵܐ ܐܝܼܬ݂ ܚܲܝܹ̈ܐ ܒܲܩܢܘܿܡܹܗ. ܗܵܟܲܢܵܐ ܝܲܗ̄ܒ݂ ܐܵܦ ܠܲܒ݂ܪܵܐ. ܕܢܸܗܘܘܿܢ ܚܲܝܹ̈ܐ ܒܲܩܢܘܿܡܹܗ.

²⁷ ܘܐܲܫܠܛܹܗ ܕܢܸܗܘܹܐ ܥܵܒܹܿܕ݂ ܐܵܦ ܕܝܼܢܵܐ.

²⁸ ܕܲܒ݂ܪܹܗ ܗܘܼ ܕܹܝܢ ܕܐ̄ܢܵܫܵܐ. ܠܵܐ ܬܸܬ݁ܕܲܡܪܘܼܢ ܒܗܵܕܹܐ ܕܐܵܬ݂ܝܵܐ ܫܵܥܬ݂ܵܐ ܐܸܡܲܬ݂ܝ ܕܟ݂ܠܗܘܿܢ ܐܲܝܠܹܝܢ ܕܲܒ݂ܩܲܒ݂ܪܹ̈ܐ ܐܸܢܘܿܢ ܢܸܫܡܥܘܼܢ ܩܵܠܹܗ.

²⁹ ܘܢܸܦܩܘܼܢ. ܐܲܝܠܹܝܢ ܕܲܥܒܲܕ݂ܘ ܛܵ̈ܒ݂ܵܬ݂ܵܐ ܠܲܩܝܵܡܬܵܐ ܕܚܲܝܹ̈ܐ ܘܐܲܝܠܹܝܢ ܕܲܥܒܲܕ݂ܘ ܒ̈ܝܼܫܵܬ݂ܵܐ ܠܲܩܝܵܡܬܵܐ ܕܕ݂ܝܼܢܵܐ.

³⁰ ܠܵܐ ܡܸܫܟܲܚ ܐ̄ܢܵܐ ܡܸܕܸܡ ܡܸܢ ܨܒ݂ܘܬ݂ ܢܲܦ̮ܫܝ ܠܡܸܥܒܲܕ݂. ܐܸܠܵܐ ܐܲܝܟܲܢܵܐ ܕܫܵܡܲܥ ܐ̄ܢܵܐ ܕܵܐܸܢ ܐ̄ܢܵܐ. ܘܕ݂ܝܼܢܝ ܟܹܐܝܢ ܗ̄ܘܼ. ܠܵܐ ܓܹܝܪ ܒܵܥܹܐ ܐ̄ܢܵܐ ܨܸܒ݂ܝܵܢܝ. ܐܸܠܵܐ ܨܸܒ݂ܝܵܢܹܗ ܕܡܲܢ ܕܫܲܕܪܲܢܝ.

³¹ ܐܸܢ ܐܸܢܵܐ ܡܲܣܗܸܕ݂ ܐ̄ܢܵܐ ܥܲܠ ܢܲܦ̮ܫܝ. ܣܵܗܕܘܼܬ݂ܝ ܠܵܐ ܗܘܸܵܬ݂ ܫܲܪܝܼܪܵܐ.

³² ܐ̄ܚܪܹܝܢ ܗܘܼ ܗܵܘ ܕܡܲܣܗܸܕ݂ ܥܠܲܝ. ܘܝܵܕ݂ܲܥ ܐ̄ܢܵܐ. ܕܫܲܪܝܼܪܵܐ ܗܝܼ ܣܵܗܕܘܼܬܹܗ ܕܡܲܣܗܸܕ݂ ܥܠܲܝ.

³³ ܐܲܢ̄ܬ݁ܘܿܢ ܫܲܕܲܪܬ݁ܘܢ ܠܘܵܬ݂ ܝܘܿܚܲܢܵܢ. ܘܐܲܣܗܸܕ݂ ܥܲܠ ܫܪܵܪܵܐ.

³⁴ ܐܸܢܵܐ ܕܹܝܢ ܠܵܐ ܗܘ̣ܵܐ ܡܸܢ ܒܲܪܢܵܫܵܐ ܢܵܣܹܒ݂ ܐ̄ܢܵܐ ܣܵܗܕܘܼܬ݂ܵܐ. ܐܸܠܵܐ ܗܵܠܹܝܢ ܐܵܡܲܪ ܐ̄ܢܵܐ. ܕܐܲܢ̄ܬ݁ܘܿܢ ܬܸܚܘܿܢ.

³⁵ ܗܵܘ ܫܪܵܓ݂ܵܐ ܗܘ̣ܵܐ ܕܕ݂ܵܠܹܩ. ܘܡܲܢܗܲܪ. ܘܐܲܢ̄ܬ݁ܘܿܢ ܨܒܲܝܬ݁ܘܢ. ܕܬܸܫܬܲܒ݂ܗܪܘܼܢ ܕܫܵܥܬ݂ܵܐ ܒܢܘܼܗܪܹܗ.

³⁶ ܠܝܼ ܕܹܝܢ ܐܝܼܬ݂ ܠܝܼ. ܣܵܗܕܘܼܬ݂ܵܐ ܕܪܲܒܵܐ ܡܸܢ ܕܝܘܿܚܲܢܵܢ. ܥܒ݂ܵܕܹ̈ܐ ܓܹܝܪ ܕܝܲܗ̄ܒ݂ ܠܝܼ ܐܵܒ݂ܝ. ܕܐܹܫܲܠܸܡ ܐܸܢܘܿܢ ܗܸܢܘܿܢ ܥܒ݂ܵܕܹ̈ܐ ܕܥܵܒܹܿܕ݂ ܐ̄ܢܵܐ ܣܵܗܕܝܼܢ ܥܠܲܝ. ܕܐܲܒ݂ܵܐ ܫܲܠܚܲܢܝ.

³⁷ ܘܐܲܒ݂ܵܐ ܕܫܲܠܚܲܢܝ. ܗܘܼ ܣܵܗܹܕ݂ ܥܠܲܝ. ܠܵܐ ܩܵܠܹܗ ܡܸܡܬ݂ܘܿܡ ܫܡܲܥܬ݁ܘܿܢ. ܘܠܵܐ ܚܸܙܘܹܗ ܚܙܲܝܬ݁ܘܿܢ.

³⁸ ܘܡܸܠܬܹܗ ܠܵܐ ܡܩܵܘܝܵܐ ܒܟ݂ܘܿܢ. ܡܛܠ ܕܲܒܗܵܘ ܕܗܘܼ ܫܲܕܲܪ. ܐܲܢ̄ܬ݁ܘܿܢ ܠܵܐ ܡܗܲܝܡܢܝܼܢ ܐܢ̄ܬܘܿܢ.

³⁹ ܒܨܵܘ ܟܬ݂ܵܒܹ̈ܐ ܕܲܒ݂ܗܘܿܢ ܡܲܣܒܪܝܼܢ ܐܢ̄ܬܘܿܢ. ܕܚܲܝܹ̈ܐ ܕܲܠܥܵܠܲܡ ܐܝܼܬ݂ ܠܟ݂ܘܿܢ. ܘܗܸܢܘܿܢ ܣܵܗܕܝܼܢ ܥܠܲܝ.

⁴⁰ ܘܠܵܐ ܨܵܒܹܝܢ ܐܢ̄ܬܘܿܢ ܕܬܹܐܬ݂ܘܿܢ ܠܘܵܬ݂ܝ ܕܚܲܝܹ̈ܐ ܕܲܠܥܵܠܲܡ ܢܸܗܘܘܿܢ ܠܟ݂ܘܿܢ.

⁴¹ ܫܘܼܒ݂ܚܵܐ ܡܸܢ ܒܢܲܝ̈ܢܵܫܵܐ ܠܵܐ ܢܵܣܹܒ݂ ܐ̄ܢܵܐ.

⁴² ܐܸܠܵܐ ܝܼܕ݂ܲܥܬ݁ܟ݂ܘܿܢ. ܕܚܘܼܒܹܗ ܕܐܲܠܵܗܵܐ ܠܲܝܬ݁ ܒܟ݂ܘܿܢ.

⁴³ ܐܸܢܵܐ ܐܸܬܹܝܬ݂ ܒܲܫܡܹܗ ܕܐܵܒ݂ܝ. ܘܠܵܐ ܡܩܲܒܠܝܼܢ ܐܢ̄ܬܘܿܢ ܠܝܼ. ܘܐܸܢ ܐ̄ܚܪܹܝܢ ܢܹܐܬܹܐ ܒܫܸܡ ܢܲܦ̮ܫܹܗ. ܠܗܵܘ ܬܩܲܒܠܘܼܢ.

⁴⁴ ܐܲܝܟܲܢܵܐ ܡܸܫܟܿܚܝܼܢ ܐܢ̄ܬܘܿܢ ܠܲܡܗܲܝܡܵܢܘܼ. ܕܫܘܼܒ݂ܚܵܐ ܚܲܕ݂ ܡܸܢ ܚܲܕ݂ ܡܩܲܒܠܝܼܢ ܐܢ̄ܬܘܿܢ ܘܫܘܼܒ݂ܚܵܐ ܕܡܸܢ ܚܲܕ݂ ܐܲܠܵܗܵܐ. ܠܵܐ ܒܵܥܹܝܢ ܐܢ̄ܬܘܿܢ.

⁴⁵ ܠܡܵܐ ܣܵܒ݂ܪܝܼܢ ܐܢ̄ܬܘܿܢ. ܕܐܸܢܵܐ ܐܵܟܹܠ ܐ̄ܢܵܐ ܩܲܪ̈ܨܲܝܟܿܘܿܢ (ܕܐܸܢܵܐ ܡܩܲܛܪܸܓ݂ ܐ݇ܢܵܐ ܠܟ݂ܘܿܢ) ܩܕ݂ܵܡ ܐܲܒ݂ܵܐ. ܐܝܼܬ݂ܵܘܗܝ ܡܲܢ ܕܐܵܟܹܠ ܩܲܪ̈ܨܲܝܟܿܘܢ (ܡ݂ܢ ܕܲܡܩܲܛܪܸܓ݂ ܠܟ݂ܘܿܢ): ܡܘܼܫܹܐ ܗܵܘ ܕܒܹܗ ܣܲܒܲܪܬ݁ܘܿܢ.

⁴⁶ ܐܸܠܘܼ ܓܹܝܪ ܒܡܘܼܫܹܐ ܗܲܝܡܸܢܬ݁ܘܿܢ. ܐܵܦ ܒܝܼ ܡܗܲܝܡܢܝܼܢ ܗ̄ܘܲܝܬ݁ܘܢ. ܡܘܼܫܹܐ ܓܹܝܪ ܥܠܲܝ ܟܬܲܒ݂.

⁴⁷ ܘܐܸܢ ܠܲܟ݂ܬ݂ܵܒ݂ܵܘ̈ܗܝ ܕܗܵܘ ܠܵܐ ܡܗܲܝܡܢܝܼܢ ܐܢ̄ܬܘܿܢ. ܐܲܝܟܲܢܵܐ ܠܡܸܠܲܝ̈ ܕܝܼܠܝ ܬܗܲܝܡܢܘܼܢ.

6

¹ ܒܵܬܲܪ ܗܵܠܹܝܢ. ܐܸܙܲܠ ܝܼܫܘܿܥ ܠܥܸܒ݂ܪܵܐ ܕܝܲܡܵܐ ܕܲܓ݂ܠܝܼܠܵܐ. ܛܹܒܲܪܝܼܘܿܣ.

² ܘܐܸܙܲܠܘ ܒܵܬ݂ܪܹܗ ܟܸܢܫܹ̈ܐ ܣܲܓܝܼܐܹ̈ܐ. ܡܛܠ ܕܚܵܙܹܝܢ ܗ̄ܘܼܵܘ ܐܵܬ݂ܘܵܬ݂ܵܐ ܕܥܵܒܹܿܕ݂ ܒܲܟܪ̈ܝܼܗܹܐ.

³ ܘܲܣܠܸܩ ܝܼܫܘܿܥ ܠܛܘܼܪܵܐ. ܘܬܲܡܵܢ ܝܵܬܹ݁ܒ݂ ܗ̄ܘܵܐ. ܥܲܡ ܬܲܠܡܝܼܕ݂ܵܘ̈ܗܝ.

⁴ ܩܲܪܝܼܒ݂ ܗܘ̣ܵܐ ܕܹܝܢ ܥܲܕ݂ܥܹܕ݂ܵܐ ܕܦܸܨܚܵܐ ܕܲܝܗ̄ܘܼܕ݂ܵܝܹ̈ܐ.

⁵ ܘܐܲܪܝܼܡ ܥܲܝܢܵܘ̈ܗܝ ܝܼܫܘܿܥ. ܘܲܚܙܵܐ ܟܸܢܫܵܐ ܣܲܓܿܝܼܐܵܐ ܕܐܵܬܹܐ ܠܘܵܬܹܗ. ܘܐܸܡܲܪ ܠܦܝܼܠܝܼܦܘܿܣ. ܐܲܝܡܸܟܵܐ ܢܸܙܒܸܢ ܠܲܚܡܵܐ ܕܢܹܐܟ݂ܠܘܼܢ ܗܵܠܹܝܢ.

⁶ ܗܵܕܹܐ ܕܹܝܢ. ܐܸܡܲܪ ܟܲܕ݂ ܡܢܲܣܹܐ ܠܹܗ. ܗܘܼ ܓܹܝܪ ܝܵܕ݂ܲܥ ܗܘ̣ܵܐ ܡܵܢܵܐ ܥܬ݂ܝܼܕ݂ ܠܡܸܥܒܲܕ݂.

⁷ ܐܵܡܲܪ ܠܹܗ ܦܝܼܠܝܼܦܘܿܣ. ܕܡܲܐܬܹܝܢ ܕܝܼܢܵܪ̈ܝܼܢ ܠܲܚܡܵܐ. ܠܵܐ ܣܵܦܹܩ ܠܗܘܿܢ ܟܲܕ݂ ܩܲܠܝܼܠ ܩܲܠܝܼܠ ܚܲܕ݂ ܚܲܕ݂ ܡܸܢܗܘܿܢ ܢܸܣܲܒ݂.

⁸ ܐܵܡܲܪ ܠܹܗ ܚܲܕ݂ ܡܸܢ ܬܲܠܡܝܼܕ݂ܵܘ̈ܗܝ. ܐܲܢܕܪܹܐܘܿܣ ܐܲܚܘܼܗܝ ܕܫܸܡܥܘܿܢ ܟܹܐܦܵܐ.

⁹ ܐܝܼܬ݂ ܬܢܵܢ ܛܲܠܝܵܐ ܚܲܕ݂. ܕܐܝܼܬ݂ ܥܠܵܘܗܝ ܚܲܡܸܫ ܓ݁ܪ̈ܝܼܨܵܢ ܕܲܣܥܵܪܹ̈ܐ. ܘܲܬ݂ܪܹܝܢ ܢܘܼܢ̈ܝܼܢ. ܐܸܠܵܐ ܗܵܠܹܝܢ ܡܵܢܵܐ ܐܸܢܘܿܢ ܠܗܵܠܹܝܢ ܟܠܗܘܿܢ.

¹⁰ ܐܵܡܲܪ ܠܗܘܿܢ ܝܼܫܘܿܥ. ܥܒܸܕ݂ܘ ܐ̄ܢܵܫܵܐ ܟܠܗܘܿܢ ܕܢܸܣܬܲܡܟܿܘܼܢ. ܥܸܣܒܵܐ ܕܹܝܢ ܣܲܓܝܼ ܗܘ̣ܵܐ ܒܵܗ̇ ܒܕܘܼܟܬ݂ܵܐ ܗܵܝ. ܘܐܸܣܬ݁ܡܸܟ݂ܘ ܓܲܒ݂ܪܹ̈ܐ ܒܡܸܢܝܵܢܵܐ. ܚܲܡܫܵܐ ܐܲܠܦ̈ܝܼܢ.

¹¹ ܘܲܫܩܲܠ ܝܼܫܘܿܥ ܠܲܚܡܵܐ. ܘܒܲܪܸܟ݂. ܘܦܲܠܸܓ݂ ܠܗܵܢܘܿܢ ܕܲܣܡܝܼܟ݂ܝܼܢ. ܘܗܵܟܲܢܵܐ ܐܵܦ ܡܸܢ ܢܘܼܢܹ̈ܐ. ܟܡܵܐ ܕܲܨܒ݂ܵܘ.

¹² ܘܟܲܕ݂ ܣܒܲܥܘ. ܐܸܡܲܪ ܠܬܲܠܡܝܼܕ݂ܵܘ̈ܗܝ. ܟܲܢܸܫܘ ܩܨܵܝܹ̈ܐ ܕܝܼܬܲܪܘ. ܕܠܵܐ ܢܹܐܒܲܕ݂ ܡܸܕܸܡ.

¹³ ܘܟܲܢܸܫܘ ܘܲܡܠܵܘ ܬܪܸܥܣܲܪ ܩܘܿܦܝܼܢ̈ܝܼܢ ܩܨܵܝܹ̈ܐ ܐܲܝܠܹܝܢ ܕܝܼܬܲܪܘ ܠܗܵܢܘܿܢ ܕܐܟܲܠܘ ܡܸܢ ܚܲܡܫܵܐ ܠܲܚ̈ܡܝܼܢ ܕܲܣܥܵܪܹ̈ܐ.

¹⁴ ܗܵܢܘܿܢ ܕܹܝܢ ܐ̄ܢܵܫܵܐ. ܕܲܚܙܵܘ ܐܵܬ݂ܵܐ ܕܲܥܒܲܕ݂ ܝܼܫܘܿܥ. ܐܵܡܪܝܼܢ ܗ̄ܘܼܵܘ. ܫܲܪܝܼܪܵܐܝܼܬ݂. ܗܵܢܵܘ ܢܒ݂ܝܼܵܐ ܕܐܵܬܹܐ ܠܥܵܠܡܵܐ.

¹⁵ ܝܼܫܘܿܥ ܕܹܝܢ ܝܼܕ݂ܲܥ. ܕܲܥܬ݂ܝܼܕ݂ܝܼܢ ܕܢܹܐܬ݂ܘܢ ܢܸܚܛܦܘܼܢܵܝܗܝ. ܘܢܸܥܒܕ݂ܘܼܢܵܝܗܝ ܡܲܠܟܵܐ. ܘܫܲܢܝܼ ܠܹܗ ܠܛܘܼܪܵܐ. ܗܘܼ ܒܲܠܚܘܿܕ݂ܘܗܝ.

¹⁶ ܘܟܲܕ݂ ܗܘ̣ܵܐ ܪܲܡܫܵܐ. ܢܚܸܬ݂ܘ ܬܲܠܡܝܼܕ݂ܵܘ̈ܗܝ ܠܝܲܡܵܐ.

¹⁷ ܘܝܼܬܸܒ݂ܘ ܒܲܣܦܝܼܢ̄ܬܵܐ. ܘܐܵܬܹܝܢ ܗ̄ܘܼܵܘ ܠܥܸܒ݂ܪܵܐ ܠܲܟ݂ܦܲܪܢܵܚܘܿܡ. ܘܚܸܫܟܲܬ݂ ܗ̄ܘܵܬ݂ ܠܵܗ̇. ܘܠܵܐ ܐܲܬ݁ܝܼ ܗܘ̣ܵܐ ܠܘܵܬ݂ܗܘܿܢ ܝܼܫܘܿܥ.

¹⁸ ܝܲܡܵܐ ܕܹܝܢ ܐܸܙܕܩܸܦ ܗܘ̣ܵܐ ܥܠܲܝܗܘܿܢ. ܡܛܠ ܕܪܘܼܚܵܐ ܪܲܒܬ݂ܵܐ ܢܸܫܒܲܬ݂ ܗ̄ܘܵܬ݂.

¹⁹ ܘܲܕ݂ܒܲܪܘ ܐܲܝܟ݂ ܐܸܣ̈ܛܕ݂ܵܘܵܬ݂ܵܐ ܥܸܣܪܝܼܢ ܘܚܲܡܫܵܐ. ܐܵܘ ܬܠܵܬ݂ܝܼܢ. ܘܲܚܙܵܘ ܠܝܼܫܘܿܥ ܟܲܕ݂ ܡܗܲܠܸܟ݂ ܥܲܠ ܝܲܡܬ݂ܵܐ. ܘܟܲܕ݂ ܩܪܸܒ݂ ܠܘܵܬ݂ ܣܦܝܼܢ̄ܬ݁ܗܘܿܢ. ܕܚܸܠܘ.

²⁰ ܗܘܼ ܕܹܝܢ ܝܼܫܘܿܥ ܐܸܡܲܪ ܠܗܘܿܢ. ܐܸܢܵܐ ܐ̄ܢܵܐ ܠܵܐ ܬܸܕ݂ܚܠܘܼܢ.

²¹ ܘܲܨܒ݂ܵܘ ܗ̄ܘܼܵܘ ܕܲܢܩܲܒܠܘܼܢܵܝܗܝ ܒܲܣܦܝܼܢ̄ܬܵܐ. ܘܒ݂ܵܗ̇ ܒܫܵܥܬ݂ܵܐ ܣܦܝܼܢ̄ܬܵܐ ܗܵܝ ܗܘܸܵܬ݂ ܠܘܵܬ݂ ܐܲܪܥܵܐ. ܗܵܝ ܕܐܵܙܠ̄ܝܼܢ ܗ̄ܘܵܘ ܠܵܗ̇.

²² ܘܲܠܝܵܘܡܵܐ ܕܒ݂ܵܬ݂ܪܹܗ. ܗܵܘ ܟܸܢܫܵܐ ܕܩܵܐܹܡ ܗܘ̣ܵܐ ܒܥܸܒ݂ܪܵܐ ܕܝܲܡܵܐ. ܚܙܵܘ ܕܲܣܦܝܼܢ̄ܬܵܐ ܐ̄ܚܪܹܬ݂ܵܐ ܠܲܝܬ݁ ܗܘ̣ܵܐ ܬܲܡܵܢ. ܐܸܠܵܐ ܐܸܢ ܗܵܝ ܕܲܣܠܸܩܘ ܠܵܗ̇ ܬܲܠܡܝܼܕܹ̈ܐ. ܘܲܕ݂ܠܵܐ ܥܲܠ ܗܘ̣ܵܐ ܥܲܡܗܘܿܢ ܝܼܫܘܿܥ ܥܲܡ ܬܲܠܡܝܼܕ݂ܵܘ̈ܗܝ ܠܲܣܦܝܼܢ̄ܬܵܐ.

²³ ܐܸܬܲܝ̈ ܗ̄ܘܲܝ̈ ܕܹܝܢ ܐܸܠܦܹ̈ܐ ܐ̄ܚܪ̈ܵܢܝܵܬ݂ܵܐ ܡܸܢ ܛܹܒܲܪܝܼܘܿܣ ܥܲܠ ܓܸܢ̄ܒ݂ ܕܘܼܟܬ݂ܵܐ ܗܵܝ ܕܐܸܟܲܠܘ ܒܵܗ̇ ܠܲܚܡܵܐ. ܟܲܕ݂ ܒܲܪܸܟ݂ ܝܼܫܘܿܥ.

²⁴ ܘܟܲܕ݂ ܚܙܵܐ ܗܵܘ ܟܸܢܫܵܐ ܕܠܵܐ ܗܘ̣ܵܐ ܬܲܡܵܢ ܝܼܫܘܿܥ. ܐܵܦܠܵܐ ܬܲܠܡܝܼܕ݂ܵܘ̈ܗܝ. ܣܠܸܩܘ ܠܗܵܠܹܝܢ ܐܸܠܦܹ̈ܐ. ܘܐܸܬ݂ܵܘ ܠܲܟ݂ܦܲܪܢܵܚܘܿܡ. ܘܒ݂ܵܥܹܝܢ ܗ̄ܘܼܵܘ ܠܹܗ ܠܝܼܫܘܿܥ.

²⁵ ܘܟܲܕ݂ ܐܸܫܟܚܘܼܗܝ ܒܥܸܒ݂ܪܵܐ ܕܝܲܡܵܐ. ܐܵܡܪܝܼܢ ܠܹܗ. ܪܲܒܲܢ. ܐܸܡܲܬ݂ܝ ܐܸܬܲܝܬ݁ ܠܗܵܪܟܵܐ.

²⁶ ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܒ݂ܵܥܹܝܢ ܐܢ̄ܬܘܿܢ ܠܝܼ. ܠܵܐ ܗܘ̣ܵܐ ܡܛܠ ܕܲܚܙܲܝܬ݁ܘܿܢ ܐܵܬ݂ܘܵܬ݂ܵܐ. ܐܸܠܵܐ ܕܐܸܟܲܠܬ݁ܘܢ ܠܲܚܡܵܐ ܘܲܣܒܲܥܬ݁ܘܿܢ.

²⁷ ܠܵܐ ܬܸܦܠܚܘܼܢ ܡܹܐܟ݂ܘܼܠܬܵܐ ܕܐܵܒ݂ܕ݂ܐ. ܐܸܠܵܐ ܡܹܐܟ݂ܘܼܠܬܵܐ ܕܲܡܩܵܘܝܵܐ ܠܚܲܝܹ̈ܐ ܕܲܠܥܵܠܲܡ. ܐܲܝܕ݂ܵܐ ܕܲܒ݂ܪܹܗ ܕܐ̄ܢܵܫܵܐ ܢܸܬܸ݁ܠ ܠܟ݂ܘܿܢ. ܠܗܵܢܵܐ ܓܹܝܪ ܐܲܒ݂ܵܐ ܚܬܲܡ ܐܲܠܵܗܵܐ.

²⁸ ܐܵܡܪܝܼܢ ܠܹܗ. ܡܵܢܵܐ ܢܸܥܒܸܕ݂ ܕܢܸܦܠܘܿܚ ܥܒ݂ܵܕܹ̈ܐ ܕܐܲܠܵܗܵܐ.

²⁹ ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܗܵܢܵܘ ܥܒ݂ܵܕ݂ܵܐ ܕܐܲܠܵܗܵܐ. ܕܲܬ݂ܗܲܝܡܢܘܼܢ ܒܡܲܢ ܕܗܘܼ ܫܲܕܲܪ.

³⁰ ܐܵܡܪܝܼܢ ܠܹܗ. ܡܵܢܵܐ ܐܵܬ݂ܵܐ ܥܵܒܹܿܕ݂ ܐܲܢ̄ܬ݁ ܕܢܸܚܙܹܐ ܘܲܢܗܲܝܡܸܢ ܒܵܟ݂. ܡܵܢܵܐ ܣܵܥܲܪ ܐܲܢ̄ܬ݁.

³¹ ܐܲܒ݂ܵܗܲܝ̈ܢ ܡܲܢܢܵܐ ܐܸܟ݂ܲܠܘ ܒܡܲܕ݂ܒܪܵܐ. ܐܲܝܟܲܢܵܐ ܕܲܟ݂ܬ݂ܝܼܒ݂. ܕܠܲܚܡܵܐ ܡܸܢ ܫܡܲܝܵܐ. ܝܲܗ̄ܒ݂ ܠܗܘܿܢ ܠܡܹܐܟܲܠ.

³² ܐܵܡܲܪ ܠܗܘܿܢ ܝܼܫܘܿܥ. ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܠܵܐ ܗܘ̣ܵܐ ܡܘܼܫܹܐ ܝܲܗ̄ܒ݂ ܠܟ݂ܘܿܢ ܠܲܚܡܵܐ ܡܸܢ ܫܡܲܝܵܐ. ܐܸܠܵܐ ܐܵܒ݂ܝ ܝܵܗܹܒ݂ ܠܟ݂ܘܿܢ ܠܲܚܡܵܐ ܕܩܘܼܫܬܵܐ ܡܸܢ ܫܡܲܝܵܐ.

³³ ܠܲܚܡܹܗ ܓܹܝܪ ܕܐܲܠܵܗܵܐ ܐܝܼܬ݂ܵܘܗܝ. ܗܵܘ ܕܲܢܚܸܬ݂ ܡܸܢ ܫܡܲܝܵܐ. ܘܝܵܗܹܒ݂ ܚܲܝܹ̈ܐ ܠܥܵܠܡܵܐ.

³⁴ ܐܵܡܪܝܼܢ ܠܹܗ. ܡܵܪܲܢ. ܒܟ݂ܠܙܒܲܢ ܗܲܒ݂ ܠܲܢ ܠܲܚܡܵܐ ܗܵܢܵܐ.

³⁵ ܐܵܡܲܪ ܠܗܘܿܢ ܝܼܫܘܿܥ. ܐܸܢܵܐ ܐ̄ܢܵܐ ܠܲܚܡܵܐ ܕܚܲܝܹ̈ܐ. ܡܲܢ ܕܐܵܬܹܐ ܠܘܵܬ݂ܝ ܠܵܐ ܢܸܟ݂ܦܲܢ. ܘܡܲܢ ܕܲܡܗܲܝܡܸܢ ܒܝܼ. ܠܵܐ ܢܸܨܗܹܐ ܠܥܵܠܲܡ.

³⁶ ܐܸܠܵܐ ܐܸܡܪܹܬ݂ ܠܟ݂ܘܿܢ. ܕܲܚܙܲܝܬ݁ܘܿܢܵܢܝ ܘܠܵܐ ܡܗܲܝܡܢܝܼܢ ܐܢ̄ܬܘܿܢ.

³⁷ ܟܠ ܕܝܲܗ̄ܒ݂ ܠܝܼ ܐܵܒ݂ܝ. ܠܘܵܬ݂ܝ ܢܹܐܬܹܐ. ܘܡܲܢ ܕܲܠܘܵܬ݂ܝ ܢܹܐܬܹܐ. ܠܵܐ ܐܲܦܩܹܗ ܠܒܲܪ.

³⁸ ܕܢܸܚܬܹ݁ܬ݂ ܡܸܢ ܫܡܲܝܵܐ. ܠܵܐ ܗܘ̣ܵܐ ܕܐܸܥܒܸܕ݂ ܨܸܒ݂ܝܵܢܝ. ܐܸܠܵܐ ܕܐܸܥܒܸܕ݂ ܨܸܒ݂ܝܵܢܹܗ ܕܡܲܢ ܕܫܲܕܪܲܢܝ.

³⁹ ܗܵܢܵܘ ܕܹܝܢ ܨܸܒ݂ܝܵܢܹܗ ܕܡܲܢ ܕܫܲܕܪܲܢܝ. ܕܟܠ ܕܝܲܗ̄ܒ݂ ܠܝܼ. ܠܵܐ ܐܵܘܒܸܕ݂ ܡܸܢܹܗ. ܐܸܠܵܐ ܐܲܩܝܼܡܝܼܘܗܝ ܒܝܵܘܡܵܐ ܐ̄ܚܪܵܝܵܐ.

⁴⁰ ܗܵܢܵܘ ܓܹܝܪ ܨܸܒ݂ܝܵܢܹܗ ܕܐܵܒ݂ܝ. ܕܟܠ ܕܚܵܙܹܐ ܠܲܒ݂ܪܵܐ ܘܲܡܗܲܝܡܸܢ ܒܹܗ. ܢܸܗܘܘܿܢ ܠܹܗ ܚܲܝܹ̈ܐ ܕܲܠܥܵܠܲܡ. ܘܐܸܢܵܐ ܐܲܩܝܼܡܝܼܘܗܝ ܒܝܵܘܡܵܐ ܐ̄ܚܪܵܝܵܐ.

⁴¹ ܝܗ̄ܘܼܕ݂ܵܝܹ̈ܐ ܕܹܝܢ ܪܵܛܢܝܼܢ ܗ̄ܘܼܵܘ ܥܠܵܘܗܝ ܕܐܵܡܲܪ ܕܐܸܢܵܐ ܐ̄ܢܵܐ ܠܲܚܡܵܐ ܕܢܸܚܬܹ݁ܬ݂ ܡܸܢ ܫܡܲܝܵܐ.

⁴² ܘܐܵܡܪܝܼܢ ܗ̄ܘܼܵܘ. ܠܵܐ ܗܘ̣ܵܐ ܗܵܢܵܐ ܝܼܫܘܿܥ. ܒܪܹܗ ܕܝܵܘܣܸܦ. ܗܵܘ ܕܲܚܢܲܢ ܝܵܕ݂ܥܝܼܢ ܠܐܲܒ݂ܘܼܗܝ ܘܠܸܐܡܹܗ. ܘܐܲܝܟܲܢܵܐ ܐܵܡܲܪ ܗܵܢܵܐ ܕܡܸܢ ܫܡܲܝܵܐ ܢܸܚܬܹ݁ܬ݂.

⁴³ ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܠܵܐ ܬܸܪܛܢܘܼܢ ܚܲܕ݂ ܥܲܡ ܚܲܕ݂.

⁴⁴ ܠܵܐ ܐ̄ܢܵܫ ܡܸܫܟܲܚ ܕܢܹܐܬܹܐ ܠܘܵܬ݂ܝ ܐܸܠܵܐ ܐܸܢ ܢܲܓ݂ܕܹܗ ܐܲܒ݂ܵܐ ܕܫܲܕܪܲܢܝ. ܘܐܸܢܵܐ ܐܲܩܝܼܡܝܼܘܗܝ. ܒܝܵܘܡܵܐ ܐ̄ܚܪܵܝܵܐ.

⁴⁵ ܟܬ݂ܝܼܒ݂ ܓܹܝܪ ܒܲܢܒ݂ܝܼܵܐ. ܕܢܸܗܘܘܿܢ ܟܠܗܘܿܢ ܡܲܠܦܹ̈ܐ ܕܐܲܠܵܗܵܐ. ܟܠܡܲܢ ܕܫܵܡܲܥ ܗܵܟܹܝܠ ܡܸܢ ܐܲܒ݂ܵܐ ܘܝܵܠܹܦ ܡܸܢܹܗ. ܐܵܬܹܐ ܠܘܵܬ݂ܝ.

⁴⁶ ܠܵܐ ܗܘ̣ܵܐ ܕܚܵܙܹܐ ܐ̄ܢܵܫ ܠܐܲܒ݂ܵܐ. ܐܸܠܵܐ ܡܲܢ ܕܡܸܢ ܐܲܠܵܗܵܐ ܐܝܼܬ݂ܵܘܗܝ. ܗܵܘ ܗܘܼ ܚܵܙܹܐ ܠܐܲܒ݂ܵܐ.

⁴⁷ ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܡܲܢ ܕܲܡܗܲܝܡܸܢ ܒܝܼ. ܐܝܼܬ݂ ܠܹܗ ܚܲܝܹ̈ܐ ܕܲܠܥܵܠܲܡ.

⁴⁸ ܐܸܢܵܐ ܐ̄ܢܵܐ ܠܲܚܡܵܐ ܕܚܲܝܹ̈ܐ.

⁴⁹ ܐܲܒ݂ܵܗܲܝ̈ܟܿܘܿܢ ܐܸܟ݂ܲܠܘ ܡܲܢܢܵܐ ܒܡܲܕ݂ܒܪܵܐ. ܘܡܝܼܬ݂ܘ.

⁵⁰ ܗܵܢܵܘ ܕܹܝܢ ܠܲܚܡܵܐ ܕܲܢܚܸܬ݂ ܡܸܢ ܫܡܲܝܵܐ. ܕܢܹܐܟ݂ܘܿܠ ܐ̄ܢܵܫ ܡܸܢܹܗ. ܘܠܵܐ ܢܡܘܼܬ݂.

⁵¹ ܐܸܢܵܐ ܐ̄ܢܵܐ ܠܲܚܡܵܐ ܚܲܝܵܐ. ܕܡܸܢ ܫܡܲܝܵܐ ܢܸܚܬܹ݁ܬ݂. ܘܐܸܢ ܐ̄ܢܵܫ ܢܹܐܟ݂ܘܿܠ ܡܸܢ ܗܵܢܵܐ ܠܲܚܡܵܐ ܢܸܚܹܐ ܠܥܵܠܲܡ. ܘܠܲܚܡܵܐ ܐܲܝܢܵܐ ܕܐܸܢܵܐ ܐܸܬܸ݁ܠ. ܦܲܓ݂ܪܝ ܗ̄ܘܼ. ܕܥܲܠ ܐܲܦܲܝ̈ ܚܲܝܵܘ̈ܗܝ ܕܥܵܠܡܵܐ ܝܵܗܹܒ݂ ܐ̄ܢܵܐ.

⁵² ܢܵܨܹܝܢ ܗ̄ܘܼܵܘ ܕܹܝܢ ܝܗ̄ܘܼܕ݂ܵܝܹ̈ܐ ܚܲܕ݂ ܥܲܡ ܚܲܕ݂. ܘܐܵܡܪܝܼܢ. ܐܲܝܟܲܢܵܐ ܡܸܫܟܲܚ ܗܵܢܵܐ ܦܲܓ݂ܪܹܗ ܕܢܸܬܸ݁ܠ ܠܲܢ ܠܡܹܐܟܲܠ.

⁵³ ܘܐܸܡܲܪ ܠܗܘܿܢ ܝܼܫܘܿܥ. ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܐܸܠܵܐ ܬܸܐܟ݂ܠܘܼܢ ܦܲܓ݂ܪܹܗ ܕܲܒ݂ܪܹܗ ܕܐ̄ܢܵܫܵܐ. ܘܬܸܫܬ݁ܘܿܢ ܕܡܹܗ. ܠܲܝܬ݁ ܠܟ݂ܘܿܢ ܚܲܝܹ̈ܐ ܒܲܩܢܘܿܡܟ݂ܘܿܢ.

⁵⁴ ܡܲܢ ܕܐܵܟܹܠ ܕܹܝܢ ܡܸܢ ܦܲܓ݂ܪܝ. ܘܫܵܬܹܐ ܡܸܢ ܕܹܡܝ. ܐܝܼܬ݂ ܠܹܗ ܚܲܝܹ̈ܐ ܕܲܠܥܵܠܲܡ. ܘܐܸܢܵܐ ܐܲܩܝܼܡܝܼܘܗܝ ܒܝܵܘܡܵܐ ܐ̄ܚܪܵܝܵܐ.

⁵⁵ ܦܲܓ݂ܪܝ ܓܹܝܪ. ܫܲܪܝܼܪܵܐܝܼܬ݂ ܐܝܼܬ݂ܵܘܗܝ ܡܹܐܟ݂ܘܼܠܬܵܐ. ܘܕ݂ܡܝ. ܫܲܪܝܼܪܵܐܝܼܬ݂ ܐܝܼܬ݂ܵܘܗܝ ܡܲܫܬ݁ܝܵܐ.

⁵⁶ ܡܲܢ ܕܐܵܟܹܠ ܦܲܓ݂ܪܝ. ܘܫܵܬܹܐ ܕܹܡܝ. ܒܝܼ ܡܩܵܘܐ. ܘܐܸܢܵܐ ܒܹܗ.

⁵⁷ ܐܲܝܟܲܢܵܐ ܕܫܲܕܪܲܢܝ ܐܲܒ݂ܵܐ ܚܲܝܵܐ. ܘܐܸܢܵܐ ܚܲܝ ܐ̄ܢܵܐ ܡܛܠ ܐܲܒ݂ܵܐ. ܘܡܲܢ ܕܢܹܐܟ݂ܠܲܢܝ. ܐܵܦ ܗܘܼ ܢܸܚܹܐ ܡܛܠܵܬ݂ܝ.

⁵⁸ ܗܵܢܵܘ ܠܲܚܡܵܐ ܕܲܢܚܸܬ݂ ܡܸܢ ܫܡܲܝܵܐ. ܠܵܐ ܗܘ̣ܵܐ ܐܲܝܟ݂ ܕܐܟܲܠܘ ܐܲܒ݂ܵܗܲܝ̈ܟܿܘܿܢ ܡܲܢܢܵܐ. ܘܡܝܼܬ݂ܘ. ܡܲܢ ܕܐܵܟܹܠ ܗܵܢܵܐ ܠܲܚܡܵܐ. ܢܸܚܹܐ ܠܥܵܠܲܡ.

⁵⁹ ܗܵܠܹܝܢ ܐܸܡܲܪ ܒܲܟ݂ܢ̈ܘܼܫܵܬ݂ܵܐ. ܟܲܕ݂ ܡܲܠܸܦ ܒܲܟ݂ܦܲܪܢܵܚܘܿܡ.

⁶⁰ ܘܣܲܓܝܼܐܹ̈ܐ ܕܲܫܡܲܥܘ ܡܸܢ ܬܲܠܡܝܼܕ݂ܵܘ̈ܗܝ. ܐܵܡܪܝܼܢ. ܩܲܫܝܵܐ ܗܝ ܡܸܠܬ݂ܵܐ ܗܵܕܹܐ. ܡܲܢܘܼ ܡܸܫܟܲܚ ܠܡܸܫܡܥܵܗ̇.

⁶¹ ܝܼܫܘܿܥ ܕܹܝܢ. ܝܼܕ݂ܲܥ ܒܢܲܦ̮ܫܹܗ ܕܪܵܛܢܝܼܢ ܥܲܠ ܗܵܕܹܐ ܬܲܠܡܝܼܕ݂ܵܘ̈ܗܝ. ܘܐܸܡܲܪ ܠܗܘܿܢ. ܗܵܕܹܐ ܡܲܟ݂ܫܠܵܐ ܠܟ݂ܘܿܢ.

⁶² ܐܸܢ ܬܸܚܙܘܿܢ ܗܵܟܹܝܠ ܠܲܒ݂ܪܹܗ ܕܐ̄ܢܵܫܵܐ ܕܣܵܠܹܩ ܠܐܲܬܲܪ ܕܐܝܼܬ݂ܵܘܗܝ ܗܘ̣ܵܐ ܡܸܢ ܩܕ݂ܝܼܡ.

⁶³ ܪܘܼܚܵܐ ܗܝ ܕܡܲܚܝܵܐ. ܦܲܓ݂ܪܵܐ. ܠܵܐ ܡܲܗܢܹܐ ܡܸܕܸܡ. ܡܸܠܹ̈ܐ ܕܐܸܢܵܐ ܡܲܠܠܹܬ݂ ܥܲܡܟ݂ܘܿܢ. ܪܘܼܚܵܐ ܐܸܢܹܝܢ. ܘܚܲܝܹ̈ܐ ܐܸܢܹܝܢ.

⁶⁴ ܐܸܠܵܐ ܐܝܼܬ݂ ܐ̄ܢܵܫܵܐ ܡܸܢܟ݂ܘܿܢ. ܕܠܵܐ ܡܗܲܝܡܢܝܼܢ. ܝܵܕ݂ܲܥ ܗܘ̣ܵܐ ܓܹܝܪ ܝܼܫܘܿܥ ܡܸܢ ܩܕ݂ܝܼܡ. ܡܲܢ ܐܸܢܘܿܢ ܐܲܝܠܹܝܢ ܕܠܵܐ ܡܗܲܝܡܢܝܼܢ ܘܡܲܢܘܼ ܗܵܘ ܕܡܲܫܠܸܡ ܠܹܗ.

⁶⁵ ܘܐܸܡܲܪ ܗܘ̣ܵܐ ܠܗܘܿܢ. ܡܛܠ ܗܵܢܵܐ ܐܸܡܪܹܬ݂ ܠܟ݂ܘܿܢ: ܕܠܵܐ ܐ̄ܢܵܫ ܡܸܫܟܲܚ ܕܢܹܐܬܹܐ ܠܘܵܬ݂ܝ ܐܸܠܵܐ ܝܼܗܝܼܒ݂ ܠܹܗ ܡܸܢ ܐܵܒ݂ܝ.

⁶⁶ ܡܛܠ ܗܵܕܹܐ ܡܸܠܬ݂ܵܐ. ܣܲܓܝܼܐܹ̈ܐ ܡܸܢ ܬܲܠܡܝܼܕ݂ܵܘ̈ܗܝ ܐܸܙܲܠܘ ܠܒܸܣܬܲܪܗܘܿܢ. ܘܠܵܐ ܡܗܲܠܟ݂ܝܼܢ ܗ̄ܘܼܵܘ ܥܲܡܹܗ.

⁶⁷ ܘܐܸܡܲܪ ܝܼܫܘܿܥ ܠܲܬ݂ܪܸܥܣܲܪܬܹ݁ܗ. ܠܡܵܐ ܐܵܦ ܐܲܢ̄ܬ݁ܘܿܢ ܨܵܒܹܝܢ ܐܢ̄ܬܘܿܢ ܠܡܹܐܙܲܠ.

⁶⁸ ܥܢܵܐ ܫܸܡܥܘܿܢ ܟܹܐܦܵܐ. ܘܐܸܡܲܪ. ܡܵܪܝ. ܠܘܵܬ݂ ܡܲܢ ܢܹܐܙܲܠ. ܡܸܠܹ̈ܐ ܕܚܲܝܹ̈ܐ ܕܲܠܥܵܠܲܡ ܐܝܼܬ݂ ܠܵܟ݂.

⁶⁹ ܘܲܚܢܲܢ ܗܲܝܡܸܢܢ ܘܝܼܕ݂ܲܥܢ. ܕܐܲܢ̄ܬ݁ ܗܘܼ ܡܫܝܼܚܵܐ. ܒܪܹܗ ܕܐܲܠܵܗܵܐ ܚܲܝܵܐ.

⁷⁰ ܐܵܡܲܪ ܠܗܘܿܢ ܝܼܫܘܿܥ. ܠܵܐ ܗܘ̣ܵܐ ܐܸܢܵܐ ܓܒ݂ܝܼܬ݂ܟ݂ܘܿܢ ܠܲܬ݂ܪܸܥܣܲܪ. ܘܡܸܢܟ݂ܘܿܢ ܚܲܕ݂ ܣܵܛܵܢܵܐ ܗܘܼ.

⁷¹ ܐܸܡܲܪ ܗܘ̣ܵܐ ܕܹܝܢ. ܥܲܠ ܝܼܗܘܼܕ݂ܵܐ ܒܲܪ ܫܸܡܥܘܿܢ ܣܟܲܪܝܘܿܛܵܐ. ܗܘܼ ܓܹܝܪ ܥܬ݂ܝܼܕ݂ ܗܘ̣ܵܐ ܕܢܲܫܠܡܝܼܘܗܝ. ܚܲܕ݂ ܡܸܢ ܬܪܸܥܣܲܪ.

7

¹ ܒܵܬܲܪ ܗܵܠܹܝܢ. ܡܗܲܠܸܟ݂ ܗܘ̣ܵܐ ܝܼܫܘܿܥ ܒܲܓ݂ܠܝܼܠܵܐ. ܠܵܐ ܓܹܝܪ ܨܵܒܹܐ ܗܘ̣ܵܐ ܠܲܡܗܲܠܵܟ݂ܘ ܒܲܝܗܘܼܕ݂. ܡܛܠ ܕܲܝܗ̄ܘܼܕ݂ܵܝܹ̈ܐ ܒܵܥܹܝܢ ܗ̄ܘܼܵܘ ܠܡܸܩܛܠܹܗ.

² ܘܩܲܪܝܼܒ݂ ܗܘ̣ܵܐ ܥܲܕ݂ܥܹܕ݂ܵܐ ܕܲܡܛܲܠܠܹܐ ܕܲܝܗ̄ܘܼܕ݂ܵܝܹ̈ܐ.

³ ܘܐܸܡܲܪܘ ܠܹܗ ܐܲܚܵܘ̈ܗܝ ܠܝܼܫܘܿܥ. ܫܲܢܵܐ ܠܵܟ݂ ܡܸܟܵܐ. ܘܙܸܠ ܠܝܼܗܘܼܕ݂. ܕܢܸܚܙܘܿܢ ܬܲܠܡܝܼܕ݂ܲܝ̈ܟ ܥܒ݂ܵܕܹ̈ܐ ܕܥܵܒܹܿܕ݂ ܐܲܢ̄ܬ݁.

⁴ ܠܲܝܬ݁ ܓܹܝܪ ܐ̄ܢܵܫ ܕܥܵܒܹܿܕ݂ ܡܸܕܸܡ ܒܛܘܼܫܝܵܐ ܘܨܵܒܹܐ ܗܘܼ ܕܲܒ݂ܓܸܠܝܵܐ ܢܸܗܘܹܐ. ܐܸܢ ܗܵܠܹܝܢ ܥܵܒܹܿܕ݂ ܐܲܢ̄ܬ݁. ܚܵܘܵܐ ܢܲܦ̮ܫܵܟ݂ ܠܥܵܠܡܵܐ.

⁵ ܐܵܦ ܠܵܐ ܓܹܝܪ ܐܲܚܵܘ̈ܗܝ ܗܲܝܡܸܢܘ ܗ̄ܘܼܵܘ ܒܹܗ ܒܝܼܫܘܿܥ.

⁶ ܐܵܡܲܪ ܠܗܘܿܢ ܝܼܫܘܿܥ. ܙܲܒ݂ܢܝ ܕܝܼܠܝ ܥܕ݂ܲܡܵܐ ܠܗܵܫܵܐ ܠܵܐ ܡܛܵܐ. ܙܲܒ݂ܢܟ݂ܘܿܢ ܕܹܝܢ ܕܝܼܠܟ݂ܘܿܢ. ܒܟ݂ܠ ܥܸܕ݂ܢ ܡܛܲܝܲܒ݂.

⁷ ܠܵܐ ܡܸܫܟܲܚ ܥܵܠܡܵܐ ܠܡܸܣܢܵܟ݂ܘܿܢ. ܠܝܼ ܕܹܝܢ. ܣܵܢܹܐ. ܡܛܠ ܕܐܸܢܵܐ ܡܲܣܗܸܕ݂ ܐ̄ܢܵܐ ܥܠܵܘܗܝ. ܕܲܥܒ݂ܵܕ݂ܵܘ̈ܗܝ ܒܝܼܫܝܼܢ ܐܸܢܘܿܢ.

⁸ ܐܲܢ̄ܬ݁ܘܿܢ ܣܲܩܘ ܠܥܲܕ݂ܥܹܕ݂ܵܐ ܗܵܢܵܐ. ܐܸܢܵܐ ܠܵܐ ܣܵܠܹܩ ܐ̄ܢܵܐ ܗܵܫܵܐ ܠܥܲܕ݂ܥܹܕ݂ܵܐ ܗܵܢܵܐ. ܡܛܠ ܕܙܲܒ݂ܢܵܐ ܕܝܼܠܝ ܠܵܐ ܥܕ݂ܲܟܹܝܠ ܫܠܸܡ.

⁹ ܗܵܠܹܝܢ ܐܸܡܲܪ. ܘܦܵܫ ܠܹܗ ܒܲܓ݂ܠܝܼܠܵܐ.

¹⁰ ܟܲܕ݂ ܕܹܝܢ ܣܠܸܩܘ ܐܲܚܵܘ̈ܗܝ ܠܥܲܕ݂ܥܹܕ݂ܵܐ. ܗܵܝܕܹܝܢ ܐܵܦ ܗܘܼ ܣܠܸܩ. ܠܵܐ ܒܓܸܠܝܵܐ. ܐܸܠܵܐ ܐܲܝܟ݂ ܕܲܒ݂ܛܘܼܫܝܵܐ.

¹¹ ܝܗ̄ܘܼܕ݂ܵܝܹ̈ܐ ܕܹܝܢ ܒܵܥܹܝܢ ܗ̄ܘܼܵܘ ܠܹܗ ܒܥܲܕ݂ܥܹܕ݂ܵܐ. ܘܐܵܡܪܝܼܢ ܗ̄ܘܼܵܘ. ܐܲܝܟܵܘ ܗܵܘ.

¹² ܘܪܸܛܢܵܐ ܣܲܓܿܝܼܐܵܐ ܡܛܠܵܬܹܗ ܐܝܼܬ݂ ܗܘ̣ܵܐ ܒܟܸܢܫܵܐ. ܐܝܼܬ݂ ܗ̄ܘܼܵܘ ܓܹܝܪ ܕܐܵܡܪܝܼܢ. ܕܛܵܒ݂ ܗ̄ܘܼ. ܘܐܲܚܪ̈ܵܢܹܐ ܐܵܡܪܝܼܢ ܗ̄ܘܼܵܘ. ܠܵܐ. ܐܸܠܵܐ ܡܲܛܥܹܐ ܠܥܲܡܵܐ.

¹³ ܠܵܐ ܕܹܝܢ ܐ̄ܢܵܫ ܓܲܠܝܵܐܝܼܬ݂ ܡܡܲܠܸܠ ܗܘ̣ܵܐ ܥܠܵܘܗܝ ܡܛܠ ܕܸܚܠܬ݂ܵܐ ܕܲܝܗ̄ܘܼܕ݂ܵܝܹ̈ܐ.

¹⁴ ܟܲܕ݂ ܕܹܝܢ ܦܠܲܓ݂ܘ ܝܵܘ̈ܡܵܬ݂ܵܐ ܕܥܲܕ݂ܥܹܕ݂ܵܐ. ܣܠܸܩ ܝܼܫܘܿܥ ܠܗܲܝܟܠܵܐ. ܘܡܲܠܸܦ ܗ̄ܘܵܐ.

¹⁵ ܘܡܸܬ݁ܕܲܡܪܝܼܢ ܗ̄ܘܼܵܘ ܝܗ̄ܘܼܕ݂ܵܝܹ̈ܐ. ܘܐܵܡܪܝܼܢ. ܐܲܝܟܲܢܵܐ ܝܵܕ݂ܲܥ ܗܵܢܵܐ ܣܸܦܪܵܐ. ܟܲܕ݂ ܠܵܐ ܝܼܠܸܦ.

¹⁶ ܥܢܵܐ ܝܼܫܘܿܥ. ܘܐܸܡܲܪ. ܝܘܼܠܦܵܢܝ ܠܵܐ ܗܘ̣ܵܐ ܕܝܼܠܝ. ܐܸܠܵܐ ܕܗܵܘ ܕܫܲܕܪܲܢܝ.

¹⁷ ܡܲܢ ܕܨܵܒܹܐ ܕܢܸܥܒܸܕ݂ ܨܸܒ݂ܝܵܢܹܗ. ܡܸܣܬܲܟܲܠ ܝܘܼܠܦܵܢܝ ܐܸܢ ܡܸܢ ܐܲܠܵܗܵܐ ܗܘܼ ܐܵܘ ܐܸܢܵܐ ܡܸܢ ܨܒ݂ܘܬ݂ ܢܲܦ̮ܫܝ ܡܡܲܠܸܠ ܐ̄ܢܵܐ.

¹⁸ ܡܲܢ ܕܡܸܢ ܨܒ݂ܘܬ݂ ܪܸܥܝܵܢܹܗ ܡܡܲܠܸܠ. ܫܘܼܒ݂ܚܵܐ ܠܢܲܦ̮ܫܹܗ ܒܵܥܹܐ. ܗܵܘ ܕܹܝܢ ܕܫܘܼܒ݂ܚܵܐ ܕܡܲܢ ܕܫܲܕܪܹܗ ܒܵܥܹܐ. ܫܲܪܝܼܪ ܗ̄ܘܼ. ܘܥܵܘܠܵܐ ܒܠܸܒܹܗ ܠܵܐ ܐܝܼܬ݂.

¹⁹ ܠܵܐ ܗܘ̣ܵܐ ܡܘܼܫܹܐ ܝܲܗ̄ܒ݂ ܠܟ݂ܘܿܢ ܢܵܡܘܿܣܵܐ. ܘܠܵܐ ܐ̄ܢܵܫ ܡܸܢܟ݂ܘܿܢ ܢܵܛܲܪ ܢܵܡܘܿܣܵܐ.

²⁰ ܡܵܢܵܐ ܒܵܥܹܝܢ ܐܢ̄ܬܘܿܢ ܠܡܸܩܛܠܲܢܝ. ܥܢܵܐ ܟܸܢܫܵܐ. ܘܐܵܡܪܝܼܢ. ܕܲܝܘܵܐ ܐܝܼܬ݂ ܠܵܟ݂. ܡܲܢܘܼ ܒܵܥܹܐ ܠܡܸܩܛܠܵܟ݂.

²¹ ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܚܲܕ݂ ܥܒ݂ܵܕ݂ܵܐ ܥܸܒ݂ܕܹܬ݂. ܘܟ݂ܠܟ݂ܘܿܢ ܡܸܬ݁ܕܲܡܪܝܼܢ ܐܢ̄ܬܘܿܢ.

²² ܡܛܠ ܗܵܢܵܐ ܡܘܼܫܹܐ ܝܲܗ̄ܒ݂ ܠܟ݂ܘܿܢ ܓܙܘܼܪܬܵܐ. ܠܵܐ ܗܘ̣ܵܐ ܡܛܠ ܕܡܸܢܹܗ ܗ̄ܝܼ ܡܸܢ ܡܘܼܫܹܐ. ܐܸܠܵܐ ܕܡܸܢ ܐܲܒ݂ܵܗ̈ܵܬ݂ܵܐ ܗܝ ܘܲܒ݂ܫܲܒܿܬ݂ܵܐ ܓܵܙܪܝܼܢ ܐܢ̄ܬܘܿܢ ܒܲܪܢܵܫܵܐ.

²³ ܐܸܢ ܒܲܪܢܵܫܵܐ ܡܸܬ݂ܓܙܲܪ ܒܝܵܘܡܵܐ ܕܫܲܒܿܬ݂ܵܐ. ܡܛܠ ܕܠܵܐ ܢܸܫܬ݁ܪܹܐ ܢܵܡܘܿܣܵܐ ܕܡܘܼܫܹܐ: ܥܠܲܝ ܪܵܛܢܝܼܢ ܐܢ̄ܬܘܿܢ. ܕܟ݂ܠܹܗ ܒܲܪܢܵܫܵܐ ܐܲܚܠܡܹܬ݂ ܒܝܵܘܡܵܐ ܕܫܲܒܿܬ݂ܵܐ.

²⁴ ܠܵܐ ܬܸܗܘܘܿܢ ܕܝܢܝܼܢ ܒܡܲܣܲܒ݂ ܒܐܲܦܹ̈ܐ. ܐܸܠܵܐ ܕܝܼܢܵܐ ܟܹܐܢܵܐ ܕܘܼܢܘ.

²⁵ ܘܐܵܡܪܝܼܢ ܗ̄ܘܼܵܘ ܐ̄ܢܵܫܵܐ ܡܸܢ ܐܘܿܪܸܫܠܸܡ. ܠܵܘ ܗܵܢܵܘ ܗܵܘ ܕܒ݂ܵܥܹܝܢ ܠܡܸܩܛܲܠ.

²⁶ ܘܗܵܐ ܓܲܠܝܵܐܝܼܬ݂ ܡܡܲܠܸܠ ܘܡܸܕܸܡ ܠܵܐ ܐܵܡܪܝܼܢ ܠܹܗ. ܕܲܠܡܵܐ ܝܼܕ݂ܲܥܘ ܩܲܫܝܼܫܲܝ̈ܢ ܕܗܵܢܵܘ ܫܲܪܝܼܪܵܐܝܼܬ݂ ܡܫܝܼܚܵܐ.

²⁷ ܐܸܠܵܐ ܠܗܵܢܵܐ ܝܵܕ݂ܥܝܼܢ ܚ̄ܢܲܢ. ܡܸܢ ܐܲܝܡܸܟܵܐ ܗܘܼ. ܡܫܝܼܚܵܐ ܕܹܝܢ ܐܸܡܲܬ݂ܝ ܕܐܵܬܹܐ ܠܵܐ ܐ̄ܢܵܫ ܝܵܕ݂ܲܥ ܡܸܢ ܐܲܝܡܸܟܵܐ ܗܘܼ.

²⁸ ܘܐܲܪܝܼܡ ܝܼܫܘܿܥ ܩܵܠܹܗ ܟܲܕ݂ ܡܲܠܸܦ ܒܗܲܝܟܠܵܐ. ܘܐܸܡܲܪ. ܘܠܝܼ ܝܵܕ݂ܥܝܼܢ ܐܢ̄ܬܘܿܢ. ܘܡܸܢ ܐܲܝܡܸܟܵܐ ܐ̄ܢܵܐ. ܝܵܕ݂ܥܝܼܢ ܐܢ̄ܬܘܿܢ. ܘܡܸܢ ܨܒ݂ܘܬ݂ ܢܲܦ̮ܫܝ ܠܵܐ ܐܸܬܹܝܬ݂. ܐܸܠܵܐ ܫܲܪܝܼܪ ܗܘܼ ܡܲܢ ܕܫܲܕܪܲܢܝ. ܗܵܘ ܕܐܢ̄ܬܘܿܢ. ܠܵܐ ܝܵܕ݂ܥܝܼܢ ܐܢ̄ܬܘܿܢ ܠܹܗ.

²⁹ ܐܸܢܵܐ ܕܹܝܢ ܝܵܕ݂ܲܥ ܐ̄ܢܵܐ ܠܹܗ. ܕܡܸܢ ܠܘܵܬܹܗ ܐܸܢܵܐ. ܘܗܘܼ ܫܲܕܪܲܢܝ.

³⁰ ܘܲܒ݂ܥܵܘ ܠܡܹܐܚܕܹܿܗ. ܘܠܵܐ ܐ̄ܢܵܫ ܐܲܪܡܝܼ ܥܠܵܘܗܝ ܐܝܼ̈ܕ݂ܲܝܵܐ. ܡܛܠ ܕܠܵܐ ܥܕ݂ܲܟܹܝܠ ܐܸܬܲܬܸ ܗ̄ܘܵܬ݂ ܫܵܥܬܹܗ.

³¹ ܣܲܓܝܼܐܹ̈ܐ ܕܹܝܢ ܡܸܢ ܟܸܢܫܵܐ ܗܲܝܡܸܢܘ ܒܹܗ. ܘܐܵܡܪܝܼܢ. ܡܫܝܼܚܵܐ ܡܵܐ ܕܐܵܬܹܐ: ܠܡܵܐ. ܕܝܲܬܝܼܪܵܢ ܡܸܢ ܗܵܠܹܝܢ ܐܵܬ݂ܘܵܬ݂ܵܐ ܕܥܵܒܹܿܕ݂ ܗܵܢܵܐ ܥܵܒܹܿܕ݂.

³² ܘܲܫܡܲܥܘ ܦܪ̈ܝܼܫܹܐ ܠܟܸܢܫܹ̈ܐ ܕܲܡܡܲܠܠܝܼܢ ܥܠܵܘܗܝ ܗܵܠܹܝܢ. ܘܫܲܕܲܪܘ ܗܸܢܘܿܢ ܘܪ̈ܲܒܲܝ ܟܵܗܢܹ̈ܐ ܕܲܚܫܹ̈ܐ ܕܢܹܐܚܕܘܼܢܵܝܗܝ.

³³ ܘܐܸܡܲܪ ܝܼܫܘܿܥ. ܩܲܠܝܼܠ ܬܘܼܒ݂ ܙܲܒ݂ܢܵܐ ܥܲܡܟ݂ܘܿܢ ܐܸܢܵܐ. ܘܐܵܙܹܠ ܐ̄ܢܵܐ ܠܘܵܬ݂ ܡܲܢ ܕܫܲܕܪܲܢܝ.

³⁴ ܘܬܸܒ݂ܥܘܿܢܵܢܝ. ܘܠܵܐ ܬܸܫܟܚܘܼܢܵܢܝ. ܘܐܲܝܟܵܐ ܕܐܸܢܵܐ ܐܝܼܬܲܝ. ܠܵܐ ܡܸܫܟܿܚܝܼܢ ܐܢ̄ܬܘܿܢ ܠܡܹܐܬ݂ܵܐ.

³⁵ ܐܵܡܪܝܼܢ ܝܗ̄ܘܼܕ݂ܵܝܹ̈ܐ ܒܢܲܦ̮ܫܗܘܿܢ. ܠܐܲܝܟܵܐ ܥܬ݂ܝܼܕ݂ ܗܵܢܵܐ ܠܡܹܐܙܲܠ ܕܲܚܢܲܢ ܠܵܐ ܡܸܫܟܿܚܝܼܢ ܚ̄ܢܲܢ ܠܹܗ. ܠܡܵܐ ܟܲܝ ܠܐܲܬ݂ܪ̈ܵܘܵܬ݂ܵܐ ܕܥܲܡ̈ܡܹܐ. ܥܬ݂ܝܼܕ݂ ܕܢܹܐܙܲܠ. ܘܢܲܠܸܦ ܠܚܲܢܦܹ̈ܐ.

³⁶ ܡܵܢܵܐ ܗܝܼ ܗܵܕܹܐ ܡܸܠܬ݂ܵܐ ܕܐܵܡܲܪ. ܕܬܸܒ݂ܥܘܿܢܵܢܝ ܘܠܵܐ ܬܸܫܟܚܘܼܢܵܢܝ ܘܐܲܝܟܵܐ ܕܐܸܢܵܐ ܐܝܼܬܲܝ. ܐܲܢ̄ܬ݁ܘܿܢ ܠܵܐ ܡܸܫܟܿܚܝܼܢ ܐܢ̄ܬܘܿܢ ܠܡܹܐܬ݂ܵܐ.

³⁷ ܒܝܵܘܡܵܐ ܕܹܝܢ ܪܲܒܵܐ. ܕܐܝܼܬ݂ܵܘܗܝ ܐ̄ܚܪܵܝܵܐ ܕܥܲܕ݂ܥܹܕ݂ܵܐ. ܩܵܐܹܡ ܗܘ̣ܵܐ ܝܼܫܘܿܥ ܘܩܵܥܹܐ. ܘܐܵܡܲܪ. ܐܸܢ ܐ̄ܢܵܫ ܨܗܹܐ. ܢܹܐܬܹܐ ܠܘܵܬ݂ܝ. ܘܢܸܫܬܹܐ.

³⁸ ܟܠܡܲܢ ܕܲܡܗܲܝܡܸܢ ܒܝܼ. ܐܲܝܟܲܢܵܐ ܕܐܸܡܲܪܘ ܟܬ݂ܵܒܹ̈ܐ. ܢܲܗܪ̈ܵܘܵܬ݂ܵܐ ܕܡܲܝ̈ܵܐ ܚܲܝܹ̈ܐ ܢܸܪܕܘܿܢ ܡܸܢ ܟܲܪܣܹܗ.

³⁹ ܗܵܕܹܐ ܕܹܝܢ ܐܸܡܲܪ ܥܲܠ ܪܘܼܚܵܐ ܕܲܥܬ݂ܝܼܕ݂ܝܼܢ ܗ̄ܘܼܵܘ ܠܲܡܩܲܒܵܠܘܼ: ܐܲܝܠܹܝܢ ܕܲܡܗܲܝܡܢܝܼܢ ܒܹܗ. ܠܵܐ ܓܹܝܪ ܥܕ݂ܲܟܹܝܠ ܐܸܬ݂ܝܲܗܒܲܬ݂ ܗ̄ܘܵܬ݂ ܪܘܼܚܵܐ. ܡܛܠ ܕܠܵܐ ܥܕ݂ܲܟܹܝܠ ܐܸܫܬܲܒܲܚ ܗܘ̣ܵܐ ܝܼܫܘܿܥ.

⁴⁰ ܣܲܓܝܼܐܹ̈ܐ ܕܹܝܢ ܡܸܢ ܟܸܢܫܹ̈ܐ ܕܲܫܡܲܥܘ ܡܸܠܵܘ̈ܗܝ. ܐܵܡܪܝܼܢ ܗ̄ܘܼܵܘ. ܗܵܢܵܘ ܫܲܪܝܼܪܵܐܝܼܬ݂ ܢܒ݂ܝܼܵܐ.

⁴¹ ܐ̄ܚܪܵܢܹ̈ܐ ܐܵܡܪܝܼܢ ܗ̄ܘܼܵܘ. ܗܵܢܵܘ ܡܫܝܼܚܵܐ. ܐ̄ܚܪܵܢܹ̈ܐ ܐܵܡܪܝܼܢ. ܕܲܠܡܵܐ. ܡܸܢ ܓܠܝܼܠܵܐ ܐܵܬܹܐ ܡܫܝܼܚܵܐ.

⁴² ܠܵܐ ܗܘ̣ܵܐ ܟܬ݂ܵܒ݂ܵܐ ܐܸܡܲܪ. ܕܡܸܢ ܙܲܪܥܹܗ ܕܕ݂ܵܘܝܼܕ݂: ܘܡܸܢ ܒܹܝܬ݂ ܠܚܸܡ ܩܪܝܼܬ݂ܵܐ ܕܝܼܠܹܗ ܕܕ݂ܵܘܝܼܕ݂ ܐܵܬܹܐ ܡܫܝܼܚܵܐ.

⁴³ ܘܲܗܘܵܬ݂ ܗ̄ܘܵܬ݂ ܦܵܠܓܘܼܬ݂ܵܐ ܒܟܸܢܫܹ̈ܐ ܡܛܠܵܬܹܗ.

⁴⁴ ܘܐܝܼܬ݂ ܗ̄ܘܼܵܘ ܐ̄ܢܵܫ̈ܝܼܢ ܡܸܢܗܘܿܢ. ܕܨܵܒܹܝܢ ܗ̄ܘܼܵܘ ܕܢܹܐܚܕܿܘܼܢܵܝܗܝ. ܐܸܠܵܐ ܠܵܐ ܐ̄ܢܵܫ ܐܲܪܡܝܼ ܥܠܵܘܗܝ ܐܝܼ̈ܕ݂ܲܝܵܐ.

⁴⁵ ܘܐܸܬ݂ܵܘ ܕܲܚܫܹ̈ܐ ܗܵܢܘܿܢ ܠܘܵܬ݂ ܪ̈ܲܒܲܝ ܟܵܗܢܹ̈ܐ ܘܲܦܪ̈ܝܼܫܹܐ. ܘܐܸܡܲܪܘ ܠܗܘܿܢ ܟܵܗܢܹ̈ܐ. ܠܡܵܢܵܐ ܠܵܐ ܐܲܝܬ݁ܝܼܬ݁ܘܼܢܵܝܗܝ.

⁴⁶ ܐܵܡܪܝܼܢ ܠܗܘܿܢ ܕܲܚܫܹ̈ܐ. ܠܵܐ ܡܸܡܬ݂ܘܿܡ ܗܵܟܲܢܵܐ ܡܲܠܸܠ ܒܲܪܢܵܫܵܐ ܐܲܝܟ݂ ܕܲܡܡܲܠܸܠ ܓܲܒ݂ܪܵܐ ܗܵܢܵܐ.

⁴⁷ ܐܵܡܪܝܼܢ ܠܗܘܿܢ ܦܪ̈ܝܼܫܹܐ. ܠܡܵܐ. ܐܵܦ ܐܲܢ̄ܬ݁ܘܿܢ ܛܥܲܝܬ݁ܘܢ.

⁴⁸ ܠܡܵܐ. ܐ̄ܢܵܫ ܡܸܢ ܪܹ̈ܫܹܐ ܐܵܘ ܡܸܢ ܦܪ̈ܝܼܫܹܐ ܗܲܝܡܸܢܘ ܒܹܗ.

⁴⁹ ܐܸܠܵܐ ܐܸܢ ܥܲܡܵܐ ܗܵܢܵܐ. ܕܠܵܐ ܝܵܕ݂ܲܥ ܢܵܡܘܿܣܵܐ. ܠܝܼܛܝܼܢ ܐܸܢܘܿܢ.

⁵⁰ ܐܵܡܲܪ ܠܗܘܿܢ ܢܝܼܩܵܕܹܡܘܿܣ ܚܲܕ݂ ܡܸܢܗܘܿܢ. ܗܵܘ ܕܐܸܬ݂ܵܐ ܗܘ̣ܵܐ ܠܘܵܬ݂ ܝܼܫܘܿܥ ܒܠܸܠܝܵܐ.

⁵¹ ܕܲܠܡܵܐ ܢܵܡܘܿܣܵܐ ܕܝܼܠܲܢ ܡܚܲܝܸܒ݂ ܠܒܲܪܢܵܫܵܐ. ܐܸܠܵܐ ܐܸܢ ܢܸܫܡܲܥ ܡܸܢܹܗ ܠܘܼܩܕ݂ܲܡ ܘܢܸܕ݂ܥ ܡܵܢܵܐ ܥܒܲܕ݂.

⁵² ܥܢܵܘ ܘܐܵܡܪܝܼܢ ܠܹܗ. ܠܡܵܐ. ܐܵܦ ܐܲܢ̄ܬ݁ ܡܸܢ ܓܠܝܼܠܵܐ ܐܲܢ̄ܬ݁. ܒܨܝܼ ܘܲܚܙܝܼ. ܕܲܢܒ݂ܝܼܵܐ ܡܸܢ ܓܠܝܼܠܵܐ. ܠܵܐ ܩܵܐܹܡ.

⁵³ ܐܸܙܲܠ ܗܵܟܹܝܠ ܟܠܚܲܕ݂ ܠܒܲܝܬܹ݁ܗ.

8

¹ ܝܼܫܘܿܥ ܕܹܝܢ ܐܸܙܲܠ ܠܛܘܼܪܵܐ ܕܙܲܝ̈ܬܹܐ.

² ܒܨܲܦܪܵܐ ܕܹܝܢ ܬܘܼܒ݂ ܐܸܬ݂ܵܐ ܠܗܲܝܟܠܵܐ ܘܟ݂ܠܹܗ ܥܲܡܵܐ ܐܵܬܹܐ ܗܘ̣ܵܐ ܠܘܵܬܹܗ. ܘܟܲܕ݂ ܝܵܬܹ݁ܒ݂ ܡܲܠܸܦ ܗܘ̣ܵܐ ܠܗܘܿܢ.

³ ܐܲܝܬ݁ܝܼܘ ܕܹܝܢ ܣܵܦܪܹ̈ܐ ܘܲܦܪ̈ܝܼܫܹܐ ܠܐܲܢ̄ܬ݁ܬ݂ܵܐ ܕܐܬ݁ܬܲܚܕܲܬ݂ ܒܓ݂ܵܘܪܵܐ. ܘܟܲܕ݂ ܐܲܩܝܼܡܘܼܗ̇ ܒܲܡܨܲܥܬ݂ܵܐ.

⁴ ܐܵܡܪܝܼܢ ܠܹܗ. ܡܲܠܦܵܢܵܐ. ܗܵܕܹܐ ܐܲܢ̄ܬ݁ܬ݂ܵܐ ܐܸܬ݁ܬܲܚܕܲܬ݂ ܓܲܠܝܵܐܝܼܬ݂ ܒܹܗ ܒܣܘܼܥܪܵܢܵܐ ܕܓ݂ܵܘܪܵܐ.

⁵ ܘܲܒ݂ܢܵܡܘܿܣܵܐ ܕܹܝܢ ܕܡܘܼܫܹܐ ܦܲܩܸܕ݂ ܕܲܠܕ݂ܲܐܝܟ݂ ܗܵܠܹܝܢ ܢܸܪܓܘܿܡ. ܐܲܢ̄ܬ݁ ܗܵܟܹܝܠ ܡܵܢܵܐ ܐܵܡܲܪ ܐܲܢ̄ܬ݁.

⁶ ܗܵܕܹܐ ܐܸܡܲܪܘ ܟܲܕ݂ ܡܢܲܣܹܝܢ ܠܹܗ. ܐܲܝܟܲܢܵܐ ܕܬܸܗܘܹܐ ܠܗܘܿܢ ܕܲܢܩܲܛܪܓ݂ܘܢܵܝܗܝ. ܝܼܫܘܿܥ ܕܹܝܢ ܟܲܕ݂ ܠܬܲܚܬ݁ ܐܸܬ݂ܓܗܸܢ ܡܲܟ݂ܬܸ݁ܒ݂ ܗܘ̣ܵܐ ܒܨܸܒ݂ܥܹܗ ܥܲܠ ܐܲܪܥܵܐ.

⁷ ܟܲܕ݂ ܕܹܝܢ ܟܲܬܲܪܘ ܟܲܕ݂ ܡܫܲܐܠܝܼܢ ܠܹܗ. ܐܸܬ݂ܦܫܸܛ ܘܐܸܡܲܪ ܠܗܘܿܢ. ܐܲܝܢܵܐ ܡܸܢܟ݂ܘܿܢ ܕܐܝܼܬ݂ܵܘܗܝ ܕܠܵܐ ܚܛܵܗ. ܩܲܕ݂ܡܵܝܵܐ ܢܸܫܕܹܐ ܥܠܹܝܗ̇ ܟܹܐܦܵܐ.

⁸ ܘܬ݂ܘܼܒ݂ ܟܲܕ݂ ܐܸܬ݂ܓܗܸܢ ܟܵܬܹܒ݂ ܗܘ̣ܵܐ ܥܲܠ ܐܲܪܥܵܐ.

⁹ ܗܸܢܘܿܢ ܕܹܝܢ ܟܲܕ݂ ܫܡܲܥܘ ܢܵܦܩܝܼܢ ܗ̄ܘܼܵܘ ܚܲܕ݂ ܚܲܕ݂ ܟܲܕ݂ ܫܲܪܝܼܘ ܡܸܢ ܩܲܫܝܼܫܹ̈ܐ. ܘܦܵܫ̣ ܝܼܫܘܿܥ ܒܲܠܚܘܿܕ݂ܵܘܗܝ. ܘܐܲܢ݇ܬ݁ܬ݂ܵܐ ܟܲܕ݂ ܩܵܝܡܵܐ ܒܲܡܨܲܥܬ݂ܵܐ.

¹⁰ ܟܲܕ݂ ܕܹܝܢ ܐܸܬ݂ܦܫܸܛ ܝܼܫܘܿܥ ܐܸܡܲܪ ܠܵܗ̇ ܠܐܲܢ̄ܬ݁ܬ݂ܵܐ. ܐܲܝܟܵܐ ܐܝܼܬܲܝܗܘܿܢ. ܠܵܐ ܐ̄ܢܵܫ ܚܲܝܒܹܟ݂ܝ.

¹¹ ܗܵܝ ܕܹܝܢ ܐܸܡܪܲܬ݂. ܘܠܵܐ ܐ̄ܢܵܫ ܡܵܪܝܵܐ. ܐܸܡܲܪ ܕܹܝܢ ܝܼܫܘܿܥ. ܐܵܦܠܵܐ ܐܸܢܵܐ ܡܚܲܝܸܒ݂ ܐ̄ܢܵܐ ܠܹܟ݂ܝ. ܙܸܠܝ ܘܡܸܢ ܗܵܫܵܐ ܬܘܼܒ݂ ܠܵܐ ܬܸܚܛܹܝܢ.

¹² ܬܘܼܒ݂ ܕܹܝܢ ܡܲܠܸܠ ܥܲܡܗܘܿܢ ܝܼܫܘܿܥ. ܘܐܸܡܲܪ. ܐܸܢܵܐ ܐ̄ܢܵܐ ܢܘܼܗܪܹܗ ܕܥܵܠܡܵܐ. ܡܲܢ ܕܒܵܬܲܪܝ ܐܵܬܹܐ. ܠܵܐ ܢܗܲܠܸܟ݂ ܒܚܸܫܘܿܟ݂ܵܐ. ܐܸܠܵܐ ܢܸܫܟܲܚ ܠܹܗ ܢܘܼܗܪܵܐ ܕܚܲܝܹ̈ܐ.

¹³ ܐܵܡܪܝܼܢ ܠܹܗ ܦܪ̈ܝܼܫܹܐ. ܐܲܢ̄ܬ݁ ܥܲܠ ܢܲܦ̮ܫܵܟ݂ ܡܲܣܗܸܕ݂ ܐܲܢ̄ܬ݁. ܣܵܗܕܘܼܬ݂ܵܟ݂. ܠܵܐ ܗܘܸܵܬ݂ ܫܲܪܝܼܪܵܐ.

¹⁴ ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܐܵܦܸܢ ܐܸܢܵܐ ܡܲܣܗܸܕ݂ ܐ̄ܢܵܐ ܥܲܠ ܢܲܦ̮ܫܝ. ܫܲܪܝܼܪܵܐ ܗܝܼ ܣܵܗܕܘܼܬ݂ܝ. ܡܛܠ ܕܝܵܕ݂ܲܥ ܐ̄ܢܵܐ ܡܸܢ ܐܲܝܡܸܟܵܐ ܐܸܬܹܝܬ݂. ܘܠܲܐܝܟܵܐ ܐܵܙܹܠ ܐ̄ܢܵܐ. ܐܲܢ̄ܬ݁ܘܿܢ ܕܹܝܢ. ܠܵܐ ܝܵܕ݂ܥܝܼܢ ܐܢ̄ܬܘܿܢ ܡܸܢ ܐܲܝܡܸܟܵܐ ܐܸܬܹܝܬ݂. ܘܠܵܐ ܠܐܲܝܟܵܐ ܐܵܙܹܠ ܐ̄ܢܵܐ.

¹⁵ ܐܲܢ̄ܬܘܿܢ. ܦܲܓ݂ܪܵܢܵܐܝܼܬ݂ ܕܵܝܢܝܼܢ ܐܢ̄ܬܘܿܢ. ܐܸܢܵܐ. ܠܐ̄ܢܵܫ ܠܵܐ ܕܵܐܹܢ ܐ̄ܢܵܐ.

¹⁶ ܘܐܸܢ ܕܵܐܹܢ ܐ̄ܢܵܐ ܕܹܝܢ. ܕܝܼܢܝ. ܫܲܪܝܼܪ ܗ̄ܘܼ. ܡܛܠ ܕܠܵܐ ܗ̄ܘܹܝܬ݂ ܒܲܠܚܘܿܕ݂ܝ. ܐܸܠܵܐ ܐܸܢܵܐ ܘܐܵܒ݂ܝ ܕܫܲܕܪܲܢܝ.

¹⁷ ܘܲܒ݂ܢܵܡܘܿܣܟ݂ܘܿܢ ܕܹܝܢ ܟܬ݂ܝܼܒ݂. ܕܣܵܗܕܘܼܬ݂ܵܐ ܕܲܬ݂ܪܹܝܢ ܓܲܒ݂ܪ̈ܝܼܢ ܫܲܪܝܼܪܵܐ ܗܝ.

¹⁸ ܐܸܢܵܐ ܐ̄ܢܵܐ ܕܣܵܗܹܕ݂ ܐ̄ܢܵܐ ܥܲܠ ܢܲܦ̮ܫܝ. ܘܐܵܒ݂ܝ ܕܫܲܕܪܲܢܝ. ܣܵܗܹܕ݂ ܥܠܲܝ.

¹⁹ ܐܵܡܪܝܼܢ ܠܹܗ. ܐܲܝܟܵܘ ܐܲܒ݂ܘܼܟ݂. ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܘܠܵܐ ܠܝܼ ܝܵܕ݂ܥܝܼܢ ܐܢ̄ܬܘܿܢ. ܘܠܵܐ ܠܐܵܒ݂ܝ. ܐܸܠܘܼ ܠܝܼ ܝܵܕ݂ܥܝܼܢ ܗ̄ܘܲܝܬ݁ܘܢ. ܐܵܦ ܠܐܵܒ݂ܝ ܝܵܕ݂ܥܝܼܢ ܗ̄ܘܲܝܬ݁ܘܢ.

²⁰ ܗܵܠܹܝܢ ܡܸܠܹ̈ܐ ܡܲܠܸܠ ܒܹܝܬ݂ ܓܲܙܵܐ. ܟܲܕ݂ ܡܲܠܸܦ ܒܗܲܝܟܠܵܐ. ܘܠܵܐ ܐ̄ܢܵܫ ܐܲܚܕܹܗ. ܠܵܐ ܓܹܝܪ ܥܕ݂ܲܟܹܝܠ ܐܸܬܲܬܸ ܗ̄ܘܵܬ݂ ܫܵܥܬܹܗ.

²¹ ܐܵܡܲܪ ܠܗܘܿܢ ܬܘܼܒ݂ ܝܼܫܘܿܥ. ܐܸܢܵܐ ܐܵܙܹܠ ܐ̄ܢܵܐ. ܘܬܸܒ݂ܥܘܿܢܵܢܝ. ܘܲܬ݂ܡܘܼܬ݂ܘܢ ܒܲܚܛܵܗܲܝ̈ܟܿܘܿܢ. ܘܐܲܝܟܵܐ ܕܐܸܢܵܐ ܐܵܙܹܠ ܐ̄ܢܵܐ. ܐܲܢ̄ܬ݁ܘܿܢ ܠܵܐ ܡܸܫܟܿܚܝܼܢ ܐܢ̄ܬܘܿܢ ܠܡܹܐܬ݂ܵܐ.

²² ܐܵܡܪܝܼܢ ܝܗ̄ܘܼܕ݂ܵܝܹ̈ܐ. ܠܡܵܐ ܟܲܝ ܢܲܦ̮ܫܹܗ ܩܵܛܹܠ: ܕܐܵܡܲܪ ܕܐܲܝܟܵܐ ܕܐܸܢܵܐ ܐܵܙܹܠ ܐ̄ܢܵܐ. ܐܲܢ̄ܬ݁ܘܿܢ ܠܵܐ ܡܸܫܟܿܚܝܼܢ ܐܢ̄ܬܘܿܢ ܠܡܹܐܬ݂ܵܐ.

²³ ܘܐܸܡܲܪ ܠܗܘܿܢ. ܐܲܢ̄ܬܘܿܢ. ܡܸܢ ܕܲܠܬܲܚܬ݁ ܐܲܢ̄ܬܘܿܢ. ܘܐܸܢܵܐ. ܡܸܢ ܕܲܠܥܸܠ ܐ̄ܢܵܐ. ܐܲܢ̄ܬ݁ܘܿܢ ܡܸܢ ܗܵܢܵܐ ܐܲܢ̄ܬ݁ܘܿܢ ܥܵܠܡܵܐ. ܐܸܢܵܐ ܠܵܐ ܗ̄ܘܹܝܬ݂ ܡܸܢ ܗܵܢܵܐ ܥܵܠܡܵܐ.

²⁴ ܐܸܡܪܹܬ݂ ܠܟ݂ܘܿܢ. ܕܲܬ݂ܡܘܼܬ݂ܘܢ ܒܲܚܛܵܗܲܝ̈ܟܿܘܿܢ. ܐܸܠܵܐ ܓܹܝܪ ܬܗܲܝܡܢܘܼܢ ܕܐܸܢܵܐ ܐ̄ܢܵܐ. ܬܡܘܼܬ݂ܘܢ ܒܲܚܛܵܗܲܝ̈ܟܿܘܿܢ.

²⁵ ܐܵܡܪܝܼܢ ܝܗ̄ܘܼܕ݂ܵܝܹ̈ܐ. ܐܲܢ̄ܬ݁ ܡܲܢ ܐܲܢ̄ܬ݁. ܐܵܡܲܪ ܠܗܘܿܢ ܝܼܫܘܿܥ. ܐܵܦܸܢ ܕܫܲܪܝܼܬ݂ ܕܐܹܡܲܠܸܠ ܥܲܡܟ݂ܘܿܢ.

²⁶ ܣܲܓܝܼ ܐܝܼܬ݂ ܠܝܼ ܥܠܲܝܟܿܘܿܢ ܠܡܹܐܡܲܪ ܘܠܲܡܕ݂ܵܢ. ܐܸܠܵܐ ܡܲܢ ܕܫܲܕܪܲܢܝ. ܫܲܪܝܼܪ ܗ̄ܘܼ. ܘܐܸܢܵܐ ܐܲܝܠܹܝܢ ܕܫܸܡܥܹܬ݂ ܡܸܢܹܗ. ܗܵܠܹܝܢ ܗܘܼ ܡܡܲܠܸܠ ܐ̄ܢܵܐ ܒܥܵܠܡܵܐ.

²⁷ ܘܠܵܐ ܝܼܕ݂ܲܥܘ ܕܥܲܠ ܐܲܒ݂ܵܐ ܐܸܡܲܪ ܠܗܘܿܢ.

²⁸ ܐܵܡܲܪ ܠܗܘܿܢ ܬܘܼܒ݂ ܝܼܫܘܿܥ. ܐܸܡܲܬ݂ܝ ܕܲܬ݂ܪܝܼܡܘܼܢܹܗ ܠܲܒ݂ܪܹܗ ܕܐ̄ܢܵܫܵܐ. ܗܵܝܕܹܝܢ ܬܸܕ݂ܥܘܼܢ ܕܐܸܢܵܐ ܐ̄ܢܵܐ. ܘܡܸܕܸܡ ܡܸܢ ܨܒ݂ܘܬ݂ ܢܲܦ̮ܫܝ. ܠܵܐ ܥܵܒܹܿܕ݂ ܐ̄ܢܵܐ. ܐܸܠܵܐ ܐܲܝܟܲܢܵܐ ܕܐܲܠܦܲܢܝ ܐܵܒ݂ܝ. ܗܵܟ݂ܘܵܬ݂ ܗܘܼ ܡܡܲܠܸܠ ܐ̄ܢܵܐ.

²⁹ ܘܡܲܢ ܕܫܲܕܪܲܢܝ ܥܲܡܝ ܐܝܼܬ݂ܵܘܗܝ. ܘܠܵܐ ܫܲܒ݂ܩܲܢܝ ܒܲܠܚܘܿܕ݂ܝ ܐܵܒ݂ܝ. ܡܛܠ ܕܐܸܢܵܐ ܡܸܕܸܡ ܕܫܵܦܲܪ ܠܹܗ ܥܵܒܹܿܕ݂ ܐ̄ܢܵܐ ܒܟ݂ܠܙܒܲܢ.

³⁰ ܟܲܕ݂ ܗܵܠܹܝܢ ܡܡܲܠܸܠ ܗ̄ܘܵܐ. ܣܲܓܝܼܐܹ̈ܐ ܗܲܝܡܸܢܘ ܒܹܗ.

³¹ ܘܐܸܡܲܪ ܝܼܫܘܿܥ ܠܗܵܢܘܿܢ ܝܗ̄ܘܼܕ݂ܵܝܹ̈ܐ ܕܗܲܝܡܸܢܘ ܒܹܗ: ܐܸܢ ܐܲܢ̄ܬ݁ܘܿܢ ܬܟܲܬ݁ܪܘܼܢ ܒܡܸܠܲܬ݂ܝ. ܫܲܪܝܼܪܵܐܝܼܬ݂ ܬܲܠܡܝܼ̈ܕ݂ܲܝ ܐܲܢ̄ܬܘܿܢ.

³² ܘܬܸܕ݂ܥܘܼܢ ܫܪܵܪܵܐ. ܘܗܘܼ ܫܪܵܪܵܐ ܢܚܲܪܲܪܟ݂ܘܿܢ.

³³ ܐܵܡܪܝܼܢ ܠܹܗ. ܙܲܪܥܹܗ ܚܢܲܢ ܕܐܲܒ݂ܪܵܗܵܡ. ܘܡܸܢ ܡܬ݂ܘܿܡ ܥܲܒ݂ܕܘܼܬ݂ܵܐ ܠܐ̄ܢܵܫ. ܠܵܐ ܦܠܝܼܚܵܐ ܠܲܢ. ܐܲܝܟܲܢܵܐ ܐܵܡܲܪ ܐܲܢ̄ܬ݁ ܕܬܸܗܘܘܿܢ ܒܢܲܝ̈ ܚܹܐܪܹ̈ܐ.

³⁴ ܐܵܡܲܪ ܠܗܘܿܢ ܝܼܫܘܿܥ. ܐܵܡܹܝܢ ܐܵܡܹܝܢ ܐܵܡܲܪܢܵܐ ܠܟ݂ܘܿܢ. ܕܟ݂ܠ ܡܲܢ ܕܥܵܒܹܿܕ݂ ܚܛܝܼܬ݂ܵܐ. ܥܲܒ݂ܕܹܗ ܗܘܼ ܕܲܚܛܝܼܬ݂ܵܐ.

³⁵ ܘܥܲܒ݂ܕܵܐ ܠܵܐ ܡܩܵܘܹܐ ܠܥܵܠܲܡ ܒܒܲܝܬܵܐ. ܒܪܵܐ ܕܹܝܢ ܠܥܵܠܲܡ ܡܩܵܘܹܐ.

³⁶ ܐܸܢ ܗܘܼ ܗܵܟܹܝܠ ܕܲܒ݂ܪܵܐ ܢܚܲܪܲܪܟ݂ܘܿܢ. ܫܲܪܝܼܪܵܐܝܼܬ݂ ܬܸܗܘܘܿܢ ܒܢܲܝ̈ ܚܹܐܪܹ̈ܐ.

³⁷ ܝܵܕ݂ܲܥ ܐ̄ܢܵܐ ܕܙܲܪܥܹܗ ܐܲܢ̄ܬ݁ܘܿܢ ܕܐܲܒ݂ܪܵܗܵܡ. ܐܸܠܵܐ ܒܵܥܹܝܢ ܐܢ̄ܬܘܿܢ ܠܡܸܩܛܠܲܢܝ. ܡܛܠ ܕܲܠܡܸܠܲܬ݂ܝ ܠܵܐ ܣܵܦܩܝܼܢ ܐܢ̄ܬܘܿܢ.

³⁸ ܐܸܢܵܐ ܡܸܕܸܡ ܕܲܚܙܹܝܬ݂ ܠܘܵܬ݂ ܐܵܒ݂ܝ ܡܡܲܠܸܠ ܐ̄ܢܵܐ. ܘܐܲܢ̄ܬ݁ܘܿܢ ܡܸܕܸܡ ܕܲܚܙܲܝܬ݁ܘܿܢ ܠܘܵܬ݂ ܐܲܒ݂ܘܼܟ݂ܘܼܢ ܥܵܒ݂ܕܝܼܢ ܐܢ̄ܬܘܿܢ.

³⁹ ܥܢܵܘ. ܘܐܵܡܪܝܼܢ ܠܹܗ. ܐܲܒ݂ܘܼܢ ܕܝܼܠܲܢ ܐܲܒ݂ܪܵܗܵܡ ܗ̄ܘܼ. ܐܵܡܲܪ ܠܗܘܿܢ ܝܼܫܘܿܥ. ܐܸܠܘܼ ܒܢܵܘ̈ܗܝ ܗܘܲܝܬ݁ܘܿܢ ܕܐܲܒ݂ܪܵܗܵܡ. ܥܒ݂ܵܕ݂ܵܘ̈ܗܝ ܕܐܲܒ݂ܪܵܗܵܡ ܥܵܒ݂ܕܝܼܢ ܗ̄ܘܲܝܬ݁ܘܢ.

⁴⁰ ܗܵܫܵܐ ܕܹܝܢ ܗܵܐ ܒܵܥܹܝܢ ܐܢ̄ܬܘܿܢ ܠܡܸܩܛܠܲܢܝ. ܠܓܲܒ݂ܪܵܐ ܕܫܲܪܝܼܪܬܵܐ ܡܲܠܠܹܬ݂ ܥܲܡܟ݂ܘܿܢ ܐܲܝܕ݂ܵܐ ܕܫܸܡܥܹܬ݂ ܡܸܢ ܐܲܠܵܗܵܐ. ܗܵܕܹܐ ܐܲܒ݂ܪܵܗܵܡ ܠܵܐ ܥܒܲܕ݂.

⁴¹ ܐܲܢ̄ܬ݁ܘܿܢ ܕܹܝܢ ܥܵܒ݂ܕܝܼܢ ܐܢ̄ܬܘܿܢ ܥܒ݂ܵܕܹ̈ܐ ܕܐܲܒ݂ܘܼܟ݂ܘܼܢ. ܐܵܡܪܝܼܢ ܠܹܗ. ܚܢܲܢ ܡܸܢ ܙܵܢܝܘܼܬ݂ܵܐ ܠܵܐ ܗܘܲܝܢ. ܚܲܕ݂ ܐܲܒ݂ܵܐ ܐܝܼܬ݂ ܠܲܢ. ܐܲܠܵܗܵܐ.

⁴² ܐܵܡܲܪ ܠܗܘܿܢ ܝܼܫܘܿܥ. ܐܸܠܘܼ ܐܲܠܵܗܵܐ ܗܘ̣ܵܐ ܐܲܒ݂ܘܼܟ݂ܘܼܢ. ܡܲܚܒ݂ܝܼܢ ܗܘܲܝܬ݁ܘܿܢ ܠܝܼ. ܐܸܢܵܐ ܓܹܝܪ ܡܸܢ ܐܲܠܵܗܵܐ ܢܸܦܩܹܬ݂ ܘܐܸܬܹܝܬ݂. ܘܠܵܐ ܗܘ̣ܵܐ ܡܸܢ ܨܒ݂ܘܬ݂ ܢܲܦ̮ܫܝ ܐܸܬܹܝܬ݂. ܐܸܠܵܐ ܗܘܼ ܫܲܕܪܲܢܝ.

⁴³ ܡܛܠ ܡܵܢܵܐ ܡܸܠܲܬ݂ܝ ܠܵܐ ܡܸܫܬܵܘܕܥܝܼܢ ܐܢ̄ܬܘܿܢ. ܥܲܠ ܕܠܵܐ ܡܸܫܟܿܚܝܼܢ ܐܢ̄ܬܘܿܢ ܫܵܡܥܝܼܢ ܡܸܠܲܬ݂ܝ.

⁴⁴ ܐܲܢ̄ܬ݁ܘܿܢ ܡܸܢ ܐܲܒ݂ܵܐ ܐܵܟܹܠܩܲܪܨܵܐ ܐܝܼܬܲܝܟܿܘܿܢ. ܘܪܸܓܬܹܗ ܕܐܲܒ݂ܘܼܟ݂ܘܼܢ ܨܵܒܹܝܢ ܐܢ̄ܬܘܿܢ ܠܡܸܥܒܲܕ݂. ܗܵܘ ܕܡܸܢ ܒܪܵܫܝܼܬ݂ ܩܵܛܹܠ ܐ̄ܢܵܫܵܐ ܗܘܼ. ܘܒܲܫܪܵܪܵܐ ܠܵܐ ܩܵܐܹܡ. ܡܛܠ ܕܲܫܪܵܪܵܐ ܠܲܝܬ݁ ܒܹܗ. ܐܸܡܲܬ݂ܝ ܕܲܡܡܲܠܸܠ ܟܲܕܵܒ݂ܘܼܬ݂ܵܐ. ܡܸܢ ܕܝܼܠܹܗ ܗܘܼ ܡܡܲܠܸܠ. ܡܛܠ ܕܕ݂ܲܓܵܠܵܐ ܗܘܼ. ܐܵܦ ܐܲܒ݂ܘܼܗ̇.

⁴⁵ ܐܸܢܵܐ ܕܹܝܢ ܕܲܫܪܵܪܵܐ ܡܡܲܠܸܠ ܐ̄ܢܵܐ. ܠܵܐ ܡܗܲܝܡܢܝܼܢ ܐܢ̄ܬܘܿܢ ܠܝܼ.

⁴⁶ ܡܲܢܘܼ ܡܸܢܟ݂ܘܿܢ ܡܲܟܸܣ ܠܝܼ ܥܲܠ ܚܛܝܼܬ݂ܵܐ. ܘܐܸܢ ܫܪܵܪܵܐ ܡܡܲܠܸܠ ܐ̄ܢܵܐ. ܐܲܢ̄ܬ݁ܘܿܢ ܠܡܵܢܵܐ ܠܵܐ ܡܗܲܝܡܢܝܼܢ ܐܢ̄ܬܘܿܢ ܠܝܼ.

⁴⁷ ܡܲܢ ܕܡܸܢ ܐܲܠܵܗܵܐ ܐܝܼܬ݂ܵܘܗܝ. ܡܸܠܹ̈ܐ ܕܐܲܠܵܗܵܐ ܫܵܡܲܥ. ܡܛܠ ܗܵܢܵܐ ܐܲܢ̄ܬ݁ܘܿܢ ܠܵܐ ܫܵܡܥܝܼܢ ܐܢ̄ܬܘܿܢ. ܡܛܠ ܕܠܵܐ ܗܘܲܝܬ݁ܘܿܢ ܡܸܢ ܐܲܠܵܗܵܐ.

⁴⁸ ܥܢܵܘ ܝܗ̄ܘܼܕ݂ܵܝܹ̈ܐ ܘܐܵܡܪܝܼܢ ܠܹܗ. ܠܵܐ ܫܲܦܝܼܪ ܐܵܡܪܝܼܢ ܐܸܢܚܢܲܢ. ܕܫܵܡܪܵܝܵܐ ܐܲܢ̄ܬ݁. ܘܕ݂ܲܝܘܵܐ ܐܝܼܬ݂ ܠܵܟ݂.

⁴⁹ ܐܵܡܲܪ ܠܗܘܿܢ ܝܼܫܘܿܥ. ܠܝܼ ܕܲܝܘܵܐ ܠܵܐ ܐܝܼܬ݂. ܐܸܠܵܐ ܠܐܵܒ݂ܝ ܡܝܲܩܲܪ ܐ̄ܢܵܐ. ܘܐܲܢ̄ܬ݁ܘܿܢ ܡܨܲܥܪܝܼܢ ܠܝܼ.

⁵⁰ ܐܸܢܵܐ ܕܹܝܢ ܠܵܐ ܒܵܥܹܐ ܐ̄ܢܵܐ ܫܘܼܒ݂ܚܝ. ܐܝܼܬ݂ ܗܘܼ ܕܒ݂ܵܥܹܐ ܘܕ݂ܵܐܸܢ.

⁵¹ ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܡܲܢ ܕܡܸܠܲܬ݂ܝ ܢܵܛܲܪ. ܡܵܘܬܵܐ ܠܵܐ ܢܸܚܙܹܐ ܠܥܵܠܲܡ.

⁵² ܐܵܡܪܝܼܢ ܠܹܗ ܝܗ̄ܘܼܕ݂ܵܝܹ̈ܐ. ܗܵܫܵܐ ܝܼܕ݂ܲܥܢ ܕܕ݂ܲܝܘܵܐ ܐܝܼܬ݂ ܠܵܟ݂. ܐܲܒ݂ܪܵܗܵܡ ܡܝܼܬ݂ ܘܲܢܒ݂ܝܹ̈ܐ: ܘܐܲܢ̄ܬ݁ ܐܵܡܲܪ ܐܲܢ̄ܬ݁ ܕܡܲܢ ܕܡܸܠܲܬ݂ܝ ܢܵܛܲܪ ܡܵܘܬܵܐ ܠܵܐ ܢܸܛܥܲܡ ܠܥܵܠܲܡ.

⁵³ ܠܡܵܐ ܐܲܢ̄ܬ݁ ܪܲܒ ܐܲܢ̄ܬ݁ ܡܸܢ ܐܲܒ݂ܘܼܢ ܐܲܒ݂ܪܵܗܵܡ ܕܡܝܼܬ݂. ܘܡܸܢ ܢܒ݂ܝܹ̈ܐ ܕܡܝܼܬ݂ܘ. ܡܲܢܘܼ ܥܵܒܹܿܕ݂ ܐܲܢ̄ܬ݁ ܢܲܦ̮ܫܵܟ݂.

⁵⁴ ܐܵܡܲܪ ܠܗܘܿܢ ܝܼܫܘܿܥ. ܐܸܢ ܐܸܢܵܐ ܡܫܲܒܲܚ ܐ̄ܢܵܐ ܢܲܦ̮ܫܝ. ܫܘܼܒ݂ܚܝ ܠܵܐ ܗܘ̣ܵܐ ܡܸܕܸܡ. ܐܝܼܬ݂ܵܘܗܝ ܐܵܒ݂ܝ ܕܲܡܫܲܒܲܚ ܠܝܼ. ܗܵܘ ܕܐܵܡܪܝܼܢ ܐܢ̄ܬܘܿܢ ܕܐܲܠܵܗܲܢ ܗ̄ܘܼ.

⁵⁵ ܘܠܵܐ ܝܼܕ݂ܲܥܬ݁ܘܿܢܵܝܗܝ. ܐܸܢܵܐ ܕܹܝܢ ܝܵܕ݂ܲܥ ܐ̄ܢܵܐ ܠܹܗ. ܘܐܸܢ ܐܵܡܲܪ ܐ̄ܢܵܐ ܕܠܵܐ ܝܵܕ݂ܲܥ ܐ̄ܢܵܐ ܠܹܗ. ܗܵܘܹܐ ܐ̄ܢܵܐ ܠܝܼ ܟܲܕܵܒ݂ܵܐ. ܐܲܟ݂ܘܵܬ݂ܟ݂ܘܿܢ. ܐܸܠܵܐ ܝܵܕ݂ܲܥ ܐ̄ܢܵܐ ܠܹܗ. ܘܡܸܠܬܹܗ ܢܵܛܲܪ ܐ̄ܢܵܐ.

⁵⁶ ܐܲܒ݂ܪܵܗܵܡ ܐܲܒ݂ܘܼܟ݂ܘܼܢ ܡܣܵܘܲܚ ܗܘ̣ܵܐ ܕܢܸܚܙܹܐ ܝܵܘܡܝ. ܘܲܚܙܵܐ. ܘܲܚܕ݂ܝܼ.

⁵⁷ ܐܵܡܪܝܼܢ ܠܹܗ ܝܗ̄ܘܼܕ݂ܵܝܹ̈ܐ. ܥܕ݂ܲܟܹܝܠ ܒܲܪ ܚܲܡܫܝܼܢ ܫܢ̈ܝܼܢ ܠܵܐ ܗ̄ܘܲܝܬ݁. ܘܠܲܐܒ݂ܪܵܗܵܡ ܚܙܲܝܬ݁.

⁵⁸ ܐܵܡܲܪ ܠܗܘܿܢ ܝܼܫܘܿܥ. ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܥܲܕ݂ܠܵܐ ܢܸܗܘܹܐ ܐܲܒ݂ܪܵܗܵܡ ܐܸܢܵܐ ܐܝܼܬܲܝ.

⁵⁹ ܘܲܫܩܲܠܘ ܟܹܐܦܹ̈ܐ ܕܢܸܪܓܡܘܼܢܵܝܗܝ. ܘܝܼܫܘܿܥ ܐܸܬ݁ܛܲܫܝܼ. ܘܲܢܦܲܩ ܡܸܢ ܗܲܝܟܠܵܐ. ܘܲܥܒܲܪ ܒܲܝܢܵܬ݂ܗܘܿܢ. ܘܐܸܙܲܠ.

9

¹ ܘܟܲܕ݂ ܥܵܒܲܪ. ܚܙܵܐ ܓܲܒ݂ܪܵܐ ܣܲܡܝܵܐ ܕܡܸܢ ܟܪܸܣ ܐܸܡܹܗ.

² ܘܫܲܐܠܘܼܗܝ ܬܲܠܡܝܼܕ݂ܵܘ̈ܗܝ. ܘܐܵܡܪܝܼܢ. ܪܲܒܲܢ. ܡܲܢܘܼ ܚܛܵܐ. ܗܵܢܵܐ. ܐܵܘ ܐܲܒ݂ܵܗܵܘܗܝ. ܕܟܲܕ݂ ܣܡܹܐ ܢܸܬ݂ܝܼܠܸܕ݂.

³ ܐܵܡܲܪ ܠܗܘܿܢ ܝܼܫܘܿܥ. ܠܵܐ ܗܘܼ ܚܛܵܐ. ܘܠܵܐ ܐܲܒ݂ܵܗܵܘܗܝ. ܐܸܠܵܐ ܕܢܸܬ݂ܚܙܘܿܢ ܒܹܗ ܥܒ݂ܵܕ݂ܵܘ̈ܗܝ ܕܐܲܠܵܗܵܐ.

⁴ ܠܝܼ ܘܵܠܹܐ ܠܡܸܥܒܲܕ݂ ܥܒ݂ܵܕܹ̈ܐ ܕܡܲܢ ܕܫܲܕܪܲܢܝ. ܥܲܕ݂ ܐܝܼܡܵܡܵܐ ܗܘܼ. ܐܵܬܹܐ ܠܸܠܝܵܐ. ܕܐ̄ܢܵܫ ܠܵܐ ܡܸܫܟܲܚ ܠܡܸܦܠܲܚ.

⁵ ܟܡܵܐ ܕܲܒ݂ܥܵܠܡܵܐ ܐ̄ܢܵܐ. ܢܘܼܗܪܹܗ ܐ̄ܢܵܐ ܕܥܵܠܡܵܐ.

⁶ ܘܟܲܕ݂ ܐܸܡܲܪ ܗܵܠܹܝܢ. ܪܲܩ ܥܲܠ ܐܲܪܥܵܐ. ܘܲܓ݂ܒܲܠ ܛܝܼܢܵܐ ܡܸܢ ܪܘܼܩܹܗ. ܘܛܵܫ ܥܲܠ ܥܲܝܢܵܘ̈ܗܝ ܕܗܵܘ ܣܲܡܝܵܐ.

⁷ ܘܐܸܡܲܪ ܠܹܗ. ܙܸܠ ܐܲܫܝܼܓ݂ ܒܡܲܥܡܘܿܕ݂ܝܼܬ݂ܵܐ ܕܫܝܼܠܘܿܚܵܐ. ܘܐܸܙܲܠ ܐܲܫܝܼܓ݂ ܘܐܸܬ݂ܵܐ ܟܲܕ݂ ܚܵܙܹܐ.

⁸ ܫܒ݂ܵܒ݂ܵܘ̈ܗܝ ܕܹܝܢ. ܘܐܲܝܠܹܝܢ ܕܲܚܙܹܐ ܗܘ̣ܵܐ ܠܗܘܿܢ ܡܸܢ ܩܕ݂ܝܼܡ ܕܚܵܕ݂ܲܪ ܗ̄ܘܵܐ. ܐܵܡܪܝܼܢ ܗ̄ܘܼܵܘ. ܠܵܐ ܗܘ̣ܵܐ ܗܵܢܵܘ ܗܵܘ ܕܝܵܬܹ݁ܒ݂ ܗ̄ܘܵܐ. ܘܚܵܕ݂ܲܪ.

⁹ ܐܝܼܬ݂ ܕܐܵܡܪܝܼܢ ܗ̄ܘܼܵܘ ܕܗܘܸܝܘܼ. ܘܐܝܼܬ݂ ܕܐܵܡܪܝܼܢ ܗ̄ܘܼܵܘ. ܠܵܐ. ܐܸܠܵܐ ܡܸܕ݂ܡܵܐ ܕܵܡܹܐ ܠܹܗ. ܗܘܼ ܕܹܝܢ ܐܵܡܲܪ ܗ̄ܘܵܐ. ܕܐܸܢܵܐ ܐ̄ܢܵܐ.

¹⁰ ܐܵܡܪܝܼܢ ܠܹܗ. ܐܲܝܟܲܢܵܐ ܐܸܬ݂ܦܲܬܲܚ ܥܲܝܢܲܝ̈ܟ.

¹¹ ܥܢܵܐ. ܘܐܸܡܲܪ ܠܗܘܿܢ. ܓܲܒ݂ܪܵܐ ܕܲܫܡܹܗ ܝܼܫܘܿܥ. ܥܒܲܕ݂ ܛܝܼܢܵܐ ܘܛܵܫ ܠܝܼ ܥܲܠ ܥܲܝܢܲܝ̈. ܘܐܸܡܲܪ ܠܝܼ. ܙܸܠ ܐܲܫܝܼܓ݂ ܒܡܲܝ̈ܵܐ ܕܫܝܼܠܘܿܚܵܐ. ܘܐܸܙܸܠܬ݂ ܐܲܫܝܼܓܹܬ݂. ܘܐܸܬ݂ܚܙܝܼ ܠܝܼ.

¹² ܐܵܡܪܝܼܢ ܠܹܗ ܐܲܝܟܵܘ. ܐܵܡܲܪ ܠܗܘܿܢ ܠܵܐ ܝܵܕ݂ܲܥ ܐ̄ܢܵܐ.

¹³ ܘܐܲܝܬ݁ܝܘܼܗܝ ܠܗܵܘ ܕܡܸܢ ܩܕ݂ܝܼܡ ܣܲܡܝܵܐ ܗ̄ܘܵܐ. ܠܘܵܬ݂ ܦܪ̈ܝܼܫܹܐ.

¹⁴ ܐܝܼܬܹܝܗ̇ ܗ̄ܘܵܬ݂ ܕܹܝܢ ܫܲܒܿܬ݂ܵܐ. ܟܲܕ݂ ܥܒܲܕ݂ ܛܝܼܢܵܐ ܝܼܫܘܿܥ. ܘܦܲܬܲܚ ܠܹܗ ܥܲܝܢܵܘ̈ܗܝ.

¹⁵ ܘܬ݂ܘܼܒ݂ ܫܲܐܠܘܼܗܝ ܦܪ̈ܝܼܫܹܐ. ܐܲܝܟܲܢܵܐ ܐܸܬ݂ܚܙܝܼ ܠܵܟ݂. ܗܘܼ ܕܹܝܢ ܐܸܡܲܪ ܠܗܘܿܢ. ܛܝܼܢܵܐ ܣܵܡ ܥܲܠ ܥܲܝܢܲܝ̈. ܘܐܲܫܝܼܓܹܬ݂. ܘܐܸܬ݂ܚܙܝܼ ܠܝܼ.

¹⁶ ܘܐܵܡܪܝܼܢ ܗ̄ܘܼܵܘ ܐ̄ܢܵܫܵܐ ܡܸܢ ܦܪ̈ܝܼܫܹܐ. ܗܵܢܵܐ ܓܲܒ݂ܪܵܐ ܠܵܐ ܗܘ̣ܵܐ ܡܸܢ ܐܲܠܵܗܵܐ ܗܘܼ. ܕܫܲܒܿܬ݂ܵܐ ܠܵܐ ܢܵܛܲܪ. ܐ̄ܚܪܵܢܹ̈ܐ ܕܹܝܢ ܐܵܡܪܝܼܢ ܗ̄ܘܼܵܘ. ܐܲܝܟܲܢܵܐ ܡܸܫܟܲܚ ܓܲܒ݂ܪܵܐ ܚܲܛܵܝܵܐ. ܗܵܠܹܝܢ ܐܵܬ݂ܘܵܬ݂ܵܐ ܠܡܸܥܒܲܕ݂. ܘܦܵܠܓܘܼܬ݂ܵܐ ܐܝܼܬ݂ ܗ̄ܘܵܬ݂ ܒܲܝܢܵܬ݂ܗܘܿܢ.

¹⁷ ܐܵܡܪܝܼܢ ܬܘܼܒ݂ ܠܗܵܘ ܣܲܡܝܵܐ. ܐܲܢ̄ܬ݁ ܡܵܢܵܐ ܐܵܡܲܪ ܐܲܢ̄ܬ݁ ܥܠܵܘܗܝ ܕܦܲܬܲܚ ܠܵܟ݂ ܥܲܝܢܲܝ̈ܟ. ܐܵܡܲܪ ܠܗܘܿܢ. ܐܸܢܵܐ ܐܵܡܲܪ ܐ̄ܢܵܐ. ܕܲܢܒ݂ܝܼܵܐ ܗܘܼ.

¹⁸ ܠܵܐ ܕܹܝܢ ܗܲܝܡܸܢܘ ܗ̄ܘܼܵܘ ܥܠܵܘܗܝ ܝܗ̄ܘܼܕ݂ܵܝܹ̈ܐ ܕܣܲܡܝܵܐ ܗܘ̣ܵܐ ܘܲܚܙܵܐ ܥܕ݂ܲܡܵܐ ܕܲܩܪܵܘ ܠܐܲܒ݂ܵܗܵܘ̈ܗܝ ܕܗܵܘ ܕܲܚܙܵܐ

¹⁹ ܘܫܲܐܸܠܘ ܐܸܢܘܿܢ. ܐܸܢ. ܗܵܢܵܘ ܒܹܪܟ݂ܘܿܢ. ܗܵܘ ܕܐܲܢ̄ܬ݁ܘܿܢ ܐܵܡܪܝܼܢ ܐܢ̄ܬܘܿܢ. ܕܟܲܕ݂ ܣܡܹܐ ܐܸܬ݂ܝܼܠܸܕ݂. ܐܲܝܟܲܢܵܐ ܗܵܫܵܐ ܚܵܙܹܐ.

²⁰ ܥܢܵܘ ܕܹܝܢ ܐܲܒ݂ܵܗܵܘ̈ܗܝ. ܘܐܸܡܲܪܘ. ܝܵܕ݂ܥܝܼܢܲܢ ܕܗܵܢܵܘ ܒܪܲܢ. ܘܲܕ݂ܟܲܕ݂ ܣܡܹܐ ܐܸܬ݂ܝܼܠܸܕ݂.

²¹ ܐܲܝܟܲܢܵܐ ܕܹܝܢ ܗܵܫܵܐ ܚܵܙܹܐ: ܐܵܘ ܡܲܢܘܼ ܦܲܬܲܚ ܠܹܗ ܥܲܝܢܵܘ̈ܗܝ: ܠܵܐ ܝܵܕ݂ܥܝܼܢܲܢ. ܐܵܦ ܗܘܼ ܥܲܠ ܠܹܗ ܠܲܫ̈ܢܵܘܗܝ. ܠܹܗ ܫܲܐܸܠܘ. ܗܘܼ ܚܠܵܦ ܢܲܦ̮ܫܹܗ ܢܡܲܠܸܠ.

²² ܗܵܠܹܝܢ ܐܸܡܲܪܘ ܐܲܒ݂ܵܗܵܘ̈ܗܝ. ܡܛܠ ܕܕ݂ܵܚܠܝܼܢ ܗ̄ܘܼܵܘ ܡܸܢ ܝܗ̄ܘܼܕ݂ܵܝܹ̈ܐ. ܦܣܲܩܘ ܗ̄ܘܼܵܘ ܓܹܝܪ ܝܗ̄ܘܼܕ݂ܵܝܹ̈ܐ. ܕܐܸܢ ܐ̄ܢܵܫ ܢܵܘܕܹܐ ܒܹܗ ܕܲܡܫܝܼܚܵܐ ܗܘܼ. ܢܲܦܩܘܼܢܵܝܗܝ ܡܸܢ ܟܢܘܼܫܬܵܐ.

²³ ܡܛܠ ܗܵܢܵܐ ܐܸܡܲܪܘ ܐܲܒ݂ܵܗܵܘ̈ܗܝ. ܕܥܲܠ ܠܹܗ ܠܲܫ̈ܢܵܘܗܝ. ܠܹܗ ܫܲܐܸܠܘ.

²⁴ ܘܲܩܪܵܐܘܼܗܝ ܠܓܲܒ݂ܪܵܐ ܕܬܲܪܬܹ݁ܝܢ ܙܲܒ݂ܢ̈ܝܼܢ. ܠܗܵܘ ܕܐܝܼܬ݂ܵܘܗܝ ܗܘ̣ܵܐ ܣܲܡܝܵܐ. ܘܐܵܡܪܝܼܢ ܠܹܗ. ܫܲܒܲܚ ܠܐܲܠܵܗܵܐ. ܚܢܲܢ ܓܹܝܪ ܝܵܕ݂ܥܝܼܢܲܢ. ܕܗܵܢܵܐ ܓܲܒ݂ܪܵܐ ܚܲܛܵܝܵܐ ܗܘܼ.

²⁵ ܥܢܵܐ ܗܘܼ ܘܐܸܡܲܪ ܠܗܘܿܢ. ܐܸܢ ܚܲܛܵܝܵܐ ܗܘܼ ܠܵܐ ܝܵܕ݂ܲܥ ܐ̄ܢܵܐ. ܚܕ݂ܵܐ ܕܹܝܢ ܝܵܕ݂ܲܥ ܐ̄ܢܵܐ. ܕܣܲܡܝܵܐ ܗ̄ܘܹܝܬ݂ ܘܗܵܫܵܐ. ܗܵܐ ܚܵܙܹܐ ܐ̄ܢܵܐ.

²⁶ ܐܵܡܪܝܼܢ ܠܹܗ ܬܘܼܒ݂. ܡܵܢܵܐ ܥܒܲܕ݂ ܠܵܟ݂. ܐܲܝܟܲܢܵܐ ܦܲܬܲܚ ܠܵܟ݂ ܥܲܝܢܲܝ̈ܟ.

²⁷ ܐܵܡܲܪ ܠܗܘܿܢ. ܐܸܡܪܹܬ݂ ܠܟ݂ܘܿܢ. ܘܠܵܐ ܫܡܲܥܬ݁ܘܿܢ. ܡܵܢܵܐ ܬܘܼܒ݂ ܨܵܒܹܝܢ ܐܢ̄ܬܘܿܢ ܠܡܸܫܡܲܥ. ܠܡܵܐ. ܐܵܦ ܐܲܢ̄ܬ݁ܘܿܢ ܬܲܠܡܝܼܕܹ̈ܐ ܨܵܒܹܝܢ ܐܢ̄ܬܘܿܢ ܠܡܸܗܘܵܐ ܠܹܗ.

²⁸ ܗܸܢܘܿܢ ܕܹܝܢ ܨܲܚܝܘܼܗܝ. ܘܐܵܡܪܝܼܢ ܠܹܗ. ܐܲܢ̄ܬ݁ ܗܘܼ ܬܲܠܡܝܼܕ݂ܗ ܕܗܵܘ. ܚܢܲܢ ܓܹܝܪ ܬܲܠܡܝܼܕܹ̈ܐ ܚܢܲܢ ܕܡܘܼܫܹܐ.

²⁹ ܘܝܵܕ݂ܥܝܼܢܲܢ ܕܥܲܡ ܡܘܼܫܹܐ. ܐܲܠܵܗܵܐ ܡܲܠܸܠ. ܠܗܵܢܵܐ ܕܹܝܢ. ܠܵܐ ܝܵܕ݂ܥܝܼܢܲܢ ܡܸܢ ܐܲܝܡܸܟܵܐ ܗܘܼ.

³⁰ ܥܢܵܐ ܗܵܘ ܓܲܒ݂ܪܵܐ. ܘܐܸܡܲܪ ܠܗܘܿܢ. ܒܗܵܕܹܐ ܗ̄ܘܼ ܗܵܟܹܝܠ ܠܡܸܬ݁ܕܲܡܵܪܘܼ. ܕܐܲܢ̄ܬ݁ܘܿܢ. ܠܵܐ ܝܵܕ݂ܥܝܼܢ ܐܢ̄ܬܘܿܢ ܡܸܢ ܐܲܝܡܸܟܵܐ ܗܘܼ ܘܥܲܝܢܲܝ̈ ܕܝܼܠܝ ܦܲܬܲܚ.

³¹ ܝܵܕ݂ܥܝܼܢ ܚ̱ܢܲܢ ܕܹܝܢ ܕܐܲܠܵܗܵܐ ܒܩܵܠܵܐ ܕܚܲܛܵܝܹ̈ܐ ܠܵܐ ܫܵܡܲܥ. ܐܸܠܵܐ ܠܡܲܢ ܕܕ݂ܵܚܹܠ ܡܸܢܹܗ. ܘܥܵܒܹܿܕ݂ ܨܸܒ݂ܝܵܢܹܗ. ܠܗܵܘ ܗܘܼ ܫܵܡܲܥ.

³² ܡܸܢ ܥܵܠܲܡ ܠܵܐ ܐܸܫܬܲܡܥܲܬ݂ ܕܦܲܬܲܚ ܐ̄ܢܵܫ ܥܲܝܢܹ̈ܐ ܕܣܲܡܝܵܐ ܕܐܬ݂ܝܼܠܸܕ݂.

³³ ܐܸܠܘܼ ܠܵܐ ܡܸܢ ܐܲܠܵܗܵܐ ܗܘ̣ܵܐ ܗܵܢܵܐ. ܠܵܐ ܡܸܫܟܲܚ ܗܘ̣ܵܐ ܗܵܕܹܐ ܠܡܸܥܒܲܕ݂.

³⁴ ܥܢܵܘ. ܘܐܵܡܪܝܼܢ ܠܹܗ. ܐܲܢ̄ܬ݁ ܟܠܵܟ݂ ܒܲܚܛܵܗܹ̈ܐ ܐܸܬ݂ܝܼܠܸܕ݂ܬ݁: ܘܐܲܢ̄ܬ݁. ܡܲܠܸܦ ܐܲܢ̄ܬ݁ ܠܲܢ. ܘܐܲܦܩܘܼܗܝ ܠܒܲܪ.

³⁵ ܘܲܫܡܲܥ ܝܼܫܘܿܥ ܕܐܲܦܩܘܼܗܝ ܠܒܲܪ. ܘܐܸܫܟܚܹܗ. ܘܐܸܡܲܪ ܠܹܗ. ܐܲܢ̄ܬ݁ ܡܗܲܝܡܸܢ ܐܲܢ̄ܬ݁ ܒܲܒ݂ܪܹܗ ܕܐܲܠܵܗܵܐ.

³⁶ ܥܢܵܐ ܗܵܘ ܕܐܸܬ݂ܐܲܣܝܼ. ܘܐܸܡܲܪ. ܡܲܢܘܼ ܡܵܪܝ. ܕܐܹܗܲܝܡܸܢ ܒܹܗ.

³⁷ ܐܵܡܲܪ ܠܹܗ ܝܼܫܘܿܥ. ܚܙܲܝܬܵܝܗܝ. ܘܗܵܘ ܕܲܡܡܲܠܸܠ ܥܲܡܵܟ݂. ܗܘܸܝܘܼ.

³⁸ ܗܘܼ ܕܹܝܢ ܐܸܡܲܪ. ܡܗܲܝܡܸܢ ܐ̄ܢܵܐ ܡܵܪܝ. ܘܲܢܦܲܠ ܣܓܸܕ݂ ܠܹܗ.

³⁹ ܘܐܸܡܲܪ ܝܼܫܘܿܥ. ܠܕ݂ܝܼܢܹܗ ܕܥܵܠܡܵܐ ܗܵܢܵܐ ܐܸܬܹܝܬ݂. ܕܐܲܝܠܹܝܢ ܕܠܵܐ ܚܵܙܹܝܢ. ܢܸܚܙܘܿܢ. ܘܐܲܝܠܹܝܢ ܕܚܵܙܹܝܢ. ܢܸܣܡܘܿܢ.

⁴⁰ ܘܲܫܡܲܥܘ ܡܸܢ ܦܪ̈ܝܼܫܹܐ. ܐܲܝܠܹܝܢ ܕܥܲܡܹܗ ܗ̄ܘܼܵܘ ܗܵܠܹܝܢ. ܘܐܸܡܲܪܘ ܠܹܗ. ܠܡܵܐ. ܐܵܦ ܚܢܲܢ ܣܡܲܝ̈ܵܐ ܚܢܲܢ.

⁴¹ ܐܵܡܲܪ ܠܗܘܿܢ ܝܼܫܘܿܥ. ܐܸܠܘܼ ܣܡܲܝ̈ܵܐ ܗ̄ܘܲܝܬ݁ܘܢ. ܠܲܝܬ݁ ܗ̄ܘܵܬ݂ ܠܟ݂ܘܿܢ ܚܛܝܼܬ݂ܵܐ. ܗܵܫܵܐ ܕܹܝܢ. ܐܵܡܪܝܼܢ ܐܢ̄ܬܘܿܢ. ܕܚܵܙܹܝܢܲܢ. ܡܛܠ ܗܵܢܵܐ ܚܛܝܼܬ݂ܟ݂ܘܿܢ ܩܲܝܵܡܵܐ ܗܝ.

10

¹ ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܡܲܢ ܕܠܵܐ ܥܵܐܹܠ ܡܸܢ ܬܲܪܥܵܐ ܠܲܛܝܵܪܵܐ ܕܥܵܢ̈ܵܐ: ܐܸܠܵܐ ܣܵܠܹܩ ܡܸܢ ܕܘܼܟܵܐ ܐ̄ܚܪܵܢܝܵܐ. ܗܵܘ ܓܲܢܵܒ݂ܵܐ ܗܘܼ ܘܓܲܝܵܣܵܐ.

² ܗܵܘ ܕܹܝܢ ܕܥܵܐܹܠ ܡܸܢ ܬܲܪܥܵܐ. ܪܵܥܝܵܐ ܗܘܼ ܕܥܵܢ̈ܵܐ.

³ ܘܲܠܗܵܢܵܐ ܢܵܛܲܪ ܬܲܪܥܵܐ ܦܵܬܲܚ ܠܹܗ ܬܲܪܥܵܐ. ܘܥܵܢ̈ܵܐ ܫܵܡܥܵܐ ܩܵܠܹܗ. ܘܥܸܪ̈ܒܵܘܗܝ ܩܵܪܹܐ ܒܲܫܡܵܗܲܝ̈ܗܘܿܢ. ܘܡܲܦܸܩ ܠܗܘܿܢ.

⁴ ܘܡܵܐ ܕܐܲܦܸܩ ܥܵܢܹ̈ܗ. ܩܕ݂ܵܡܹܝܗ̇ ܐܵܙܹܠ. ܘܥܸܪ̈ܒܵܘܗܝ ܕܝܼܠܹܗ. ܐܵܙܠ̄ܝܼܢ ܒܵܬ݂ܪܹܗ. ܡܛܠ ܕܝܵܕ݂ܥܝܼܢ ܩܵܠܹܗ.

⁵ ܒܵܬܲܪ ܢܘܼܟ݂ܪܵܝܵܐ ܕܹܝܢ. ܠܵܐ ܐܵܙܵܠ̱ܐ ܥܵܢ̈ܵܐ. ܐܸܠܵܐ ܥܵܪܩܵܐ ܡܸܢܹܗ. ܕܠܵܐ ܝܵܕ݂ܥܵܐ ܩܵܠܹܗ ܕܢܘܼܟ݂ܪܵܝܵܐ.

⁶ ܗܵܕܹܐ ܦܸܠܐܬ݂ܵܐ ܐܸܡܲܪ ܠܗܘܿܢ ܝܼܫܘܿܥ. ܗܸܢܘܿܢ ܕܹܝܢ. ܠܵܐ ܝܼܕ݂ܲܥܘ ܡܵܢܵܐ ܡܲܠܸܠ ܥܲܡܗܘܿܢ.

⁷ ܐܵܡܲܪ ܠܗܘܿܢ ܕܹܝܢ ܬܘܼܒ݂ ܝܼܫܘܿܥ. ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܐܸܢܵܐ ܐ̄ܢܵܐ ܬܲܪܥܹܗ ܕܥܵܢ̈ܵܐ.

⁸ ܘܟ݂ܠܗܘܿܢ ܐܲܝܠܹܝܢ ܕܐܸܬ݂ܵܘ. ܓܲܢܵܒܹ̈ܐ ܐܸܢܘܿܢ ܘܓܲܝܵܣܹܐ. ܐܸܠܵܐ ܠܵܐ ܫܸܡܥܲܬ݂ ܐܸܢܘܿܢ ܥܵܢ̈ܵܐ.

⁹ ܐܸܢܵܐ ܐ̄ܢܵܐ ܬܲܪܥܵܐ. ܘܒ݂ܝܼ ܐܸܢ ܐ̄ܢܵܫ ܢܸܥܘܿܠ. ܢܸܚܹܐ. ܘܢܸܥܘܿܠ ܘܢܸܦܘܼܩ. ܘܪܸܥܝܵܐ ܢܸܫܟܲܚ.

¹⁰ ܓܲܢܵܒ݂ܵܐ ܠܵܐ ܐܵܬܹܐ. ܐܸܠܵܐ ܕܢܸܓ݂ܢܘܿܒ݂. ܘܲܕ݂ܢܸܩܛܘܼܠ. ܘܲܕ݂ܢܵܘܒܸܕ݂. ܐܸܢܵܐ ܐܸܬܹܝܬ݂. ܕܚܲܝܹ̈ܐ ܢܸܗܘܘܿܢ ܠܗܘܿܢ. ܘܡܸܕܸܡ ܕܝܲܬ݁ܝܼܪ ܢܸܗܘܹܐ ܠܗܘܿܢ.

¹¹ ܐܸܢܵܐ ܐ̄ܢܵܐ ܪܵܥܝܵܐ ܛܵܒ݂ܵܐ. ܪܵܥܝܵܐ ܛܵܒ݂ܵܐ ܢܲܦ̮ܫܹܗ ܣܵܐܹܡ ܚܠܵܦ ܥܵܢܹ̈ܗ.

¹² ܐܲܓ݂ܝܼܪܵܐ ܕܹܝܢ ܕܠܵܐ ܗܘ̣ܵܐ ܪܵܥܝܵܐ: ܘܠܵܘ ܕܝܼܠܹܗ ܐܸܢܘܿܢ ܥܸܪ̈ܒܸܐ: ܡܵܐ ܕܲܚܙܵܐ ܕܐܒ݂ܵܐ ܕܐܵܬܹܐ. ܫܵܒܹܩ ܥܵܢ̈ܵܐ. ܘܥܵܪܹܩ. ܘܐܵܬܹܐ ܕܹܐܒ݂ܵܐ ܚܵܛܹܦ. ܘܲܡܒܲܕܲܪ ܠܵܗ̇ ܠܥܵܢ̈ܵܐ.

¹³ ܐܲܓ݂ܝܼܪܵܐ ܕܹܝܢ ܥܵܪܹܩ. ܡܛܠ ܕܐܲܓ݂ܝܼܪܵܐ ܗܘܼ. ܘܠܵܐ ܒܛܝܼܠ ܠܹܗ ܥܲܠ ܥܵܢ̈ܵܐ.

¹⁴ ܐܸܢܵܐ ܐ̄ܢܵܐ ܪܵܥܝܵܐ ܛܵܒ݂ܵܐ. ܘܝܵܕ݂ܲܥ ܐ̄ܢܵܐ ܠܕ݂ܝܼܠܝ. ܘܡܸܬ݂ܝܼܕ݂ܲܥ ܐ̄ܢܵܐ ܡܸܢ ܕܝܼܠܝ.

¹⁵ ܐܲܝܟܲܢܵܐ ܕܝܵܕ݂ܲܥ ܠܝܼ ܐܵܒ݂ܝ. ܘܐܸܢܵܐ ܝܵܕ݂ܲܥ ܐ̄ܢܵܐ ܠܐܵܒ݂ܝ. ܘܢܲܦ̮ܫܝ ܣܵܐܹܡ ܐ̄ܢܵܐ ܚܠܵܦ ܥܵܢ̈ܵܐ.

¹⁶ ܐܝܼܬ݂ ܠܝܼ ܕܹܝܢ ܐܵܦ ܥܸܪ̈ܒܹܐ ܐ̄ܚܪܵܢܹܐ. ܐܲܝܠܹܝܢ ܕܠܵܐ ܗܘܵܘ ܡܸܢ ܛܝܵܪܵܐ ܗܵܢܵܐ. ܘܐܵܦ ܠܗܘܿܢ ܘܵܠܹܐ ܠܝܼ ܠܡܲܝܬܵܝܘܼ ܐܸܢܘܿܢ. ܘܢܸܫܡܥܘܼܢ ܩܵܠܝ. ܘܬܸܗܘܹܐ ܥܵܢ̈ܵܐ ܟܠܵܗ̇ ܚܕ݂ܵܐ. ܘܚܲܕ݂ ܪܵܥܝܵܐ.

¹⁷ ܡܛܠ ܗܵܢܵܐ ܐܵܒ݂ܝ ܪܵܚܹܡ ܠܝܼ. ܕܐܸܢܵܐ ܣܵܐܹܡ ܐ̄ܢܵܐ ܢܲܦ̮ܫܝ. ܕܬ݂ܘܼܒ݂ ܐܸܣܒ݂ܝܼܗ̇.

¹⁸ ܠܵܐ ܗܘ̣ܵܐ ܐ̄ܢܵܫ ܫܵܩܹܠ ܠܵܗ̇ ܡܹܢܝ. ܐܸܠܵܐ ܐܸܢܵܐ ܣܵܐܹܡ ܐ̄ܢܵܐ ܠܵܗ̇ ܡܸܢ ܨܸܒ݂ܝܵܢܝ. ܫܲܠܝܼܛ ܐ̄ܢܵܐ ܓܹܝܪ ܕܐܹܣܝܼܡܝܼܗ̇. ܘܫܲܠܝܼܛ ܐ̄ܢܵܐ ܕܬ݂ܘܼܒ݂ ܐܸܣܒ݂ܝܼܗ̇. ܕܗܵܢܵܐ ܦܘܼܩܕܵܢܵܐ ܩܲܒܠܹܬ݂ ܡܸܢ ܐܵܒ݂ܝ.

¹⁹ ܘܲܗܘܵܬ݂ ܬܘܼܒ݂ ܦܵܠܓܘܼܬ݂ܵܐ ܒܲܝܢܲܝ ܝܗ̄ܘܼܕ݂ܵܝܹ̈ܐ ܡܛܠ ܡܸܠܹ̈ܐ ܗܵܠܹܝܢ.

²⁰ ܘܐܵܡܪܝܼܢ ܗ̄ܘܼܵܘ ܣܲܓܝܼܐܹ̈ܐ ܡܸܢܗܘܿܢ. ܕܕ݂ܲܝܘܵܐ ܐܝܼܬ݂ ܠܹܗ ܘܡܸܫܢܵܐ ܫܢܵܐ. ܡܵܢܵܐ ܫܵܡܥܝܼܢ ܐܢ̄ܬܘܿܢ ܠܹܗ.

²¹ ܐ̄ܚܪ̈ܵܢܹܐ ܕܹܝܢ ܐܵܡܪܝܼܢ ܗ̄ܘܼܵܘ. ܗܵܠܹܝܢ ܡܸܠܹ̈ܐ. ܠܵܐ ܗ̄ܘܲܝ̈ ܕܕ݂ܲܝܘܵܢܵܐ. ܠܡܵܐ. ܕܲܝܘܵܐ ܡܸܫܟܲܚ ܥܲܝܢܹ̈ܐ ܕܣܲܡܝܵܐ ܠܲܡܦܲܬܵܚܘܼ.

²² ܗܘ̣ܵܐ ܕܹܝܢ ܥܹܐܕ݂ܵܐ ܕܚܘܼܕ݂ܵܬ݂ܵܐ ܒܐܘܿܪܸܫܠܸܡ. ܘܣܲܬ݂ܘܵܐ ܗ̄ܘܵܐ.

²³ ܘܲܡܗܲܠܸܟ݂ ܗܘ̣ܵܐ ܝܼܫܘܿܥ ܒܗܲܝܟܠܵܐ ܒܸܐܣܛܘܵܐ ܕܲܫܠܹܝܡܘܿܢ.

²⁴ ܘܚܲܕ݂ܪܘܼܗܝ ܝܗ̄ܘܼܕ݂ܵܝܹ̈ܐ. ܘܐܵܡܪܝܼܢ ܠܹܗ. ܥܕ݂ܲܡܵܐ ܠܐܸܡܲܬ݂ܝ ܢܵܣܹܒ݂ ܐܲܢ̄ܬ݁ ܢܲܦ̮ܫܲܢ. ܐܸܢ ܐܲܢ̄ܬ݁ ܗܘܼ ܡܫܝܼܚܵܐ. ܐܸܡܲܪ ܠܲܢ ܓܲܠܝܵܐܝܼܬ݂.

²⁵ ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܐܸܡܪܹܬ݂ ܠܟ݂ܘܿܢ. ܘܠܵܐ ܡܗܲܝܡܢܝܼܢ ܐܢ̄ܬܘܿܢ. ܘܲܥܒ݂ܵܕܹ̈ܐ ܕܐܸܢܵܐ ܥܵܒܹܿܕ݂ ܐ̄ܢܵܐ ܒܲܫܡܹܗ ܕܐܵܒ݂ܝ. ܗܸܢܘܿܢ ܣܵܗܕܝܼܢ ܥܠܲܝ.

²⁶ ܐܸܠܵܐ ܐܲܢ̄ܬ݁ܘܿܢ ܠܵܐ ܡܗܲܝܡܢܝܼܢ ܐܢ̄ܬܘܿܢ. ܡܛܠ ܕܠܵܐ ܗܘܲܝܬ݁ܘܿܢ ܡܸܢ ܥܸܪ̈ܒܲܝ. ܐܲܝܟܲܢܵܐ ܕܐܸܡܪܹܬ݂ ܠܟ݂ܘܿܢ.

²⁷ ܥܸܪ̈ܒܹܐ ܕܝܼܠܝ ܩܵܠܝ ܫܵܡܥܝܼܢ. ܘܐܸܢܵܐ ܝܵܕ݂ܲܥ ܐ̄ܢܵܐ ܠܗܘܿܢ. ܘܗܸܢܘܿܢ ܐܵܬܹ݁ܝܢ ܒܵܬܲܪܝ.

²⁸ ܘܐܸܢܵܐ ܝܵܗܹܒ݂ ܐ̄ܢܵܐ ܠܗܘܿܢ. ܚܲܝܹ̈ܐ ܕܲܠܥܵܠܲܡ. ܘܠܵܐ ܢܹܐܒ݂ܕܘܼܢ ܠܥܵܠܲܡ. ܘܠܵܐ ܐ̄ܢܵܫ ܢܸܚܛܘܼܦ ܐܸܢܘܿܢ ܡܸܢ ܐܝܼܕ݂ܲܝ̈.

²⁹ ܐܵܒ݂ܝ ܓܹܝܪ ܕܝܲܗ̄ܒ݂ ܠܝܼ ܡܸܢ ܟܠ ܪܲܒ ܗ̄ܘܼ. ܘܠܵܐ ܐ̄ܢܵܫ ܡܸܫܟܲܚ ܕܡܸܢ ܐܝܼܕ݂ܗ ܕܐܵܒ݂ܝ ܢܸܚܛܘܼܦ.

³⁰ ܐܸܢܵܐ ܘܐܵܒ݂ܝ. ܚܲܕ݂ ܚܢܲܢ.

³¹ ܘܲܫܩܲܠܘ ܬܘܼܒ݂ ܝܗ̄ܘܼܕ݂ܵܝܹ̈ܐ ܟܹܐܦܹ̈ܐ ܠܡܸܪܓܡܹܗ.

³² ܐܵܡܲܪ ܠܗܘܿܢ ܝܼܫܘܿܥ. ܣܲܓܝܼܐܹ̈ܐ ܥܒ݂ܵܕܹ̈ܐ ܫܲܦܝܼܪܹ̈ܐ ܡܸܢ ܠܘܵܬ݂ ܐܵܒ݂ܝ ܚܵܘܝܼܬ݂ܟ݂ܘܿܢ. ܡܛܠ ܐܲܝܢܵܐ ܥܒ݂ܵܕ݂ܵܐ ܡܸܢܗܘܿܢ ܪܵܓ݂ܡܝܼܢ ܐܢ̄ܬܘܿܢ ܠܝܼ.

³³ ܐܵܡܪܝܼܢ ܠܹܗ ܝܗ̄ܘܼܕ݂ܵܝܹ̈ܐ. ܠܵܐ ܗܘ̣ܵܐ ܡܛܠ ܥܒ݂ܵܕܹ̈ܐ ܫܲܦܝܼܪܹ̈ܐ ܪܵܓ݂ܡܝܼܢ ܚ̄ܢܲܢ ܠܵܟ݂. ܐܸܠܵܐ ܡܛܠ ܕܲܡܓܲܕܦ ܐܲܢ̄ܬ݁. ܘܟܲܕ݂ ܐܝܼܬܲܝܟ ܒܲܪ ܐ̄ܢܵܫܵܐ. ܥܵܒܹܿܕ݂ ܐܲܢ̄ܬ݁ ܢܲܦ̮ܫܵܟ݂ ܐܲܠܵܗܵܐ.

³⁴ ܐܵܡܲܪ ܠܗܘܿܢ ܝܼܫܘܿܥ. ܠܵܐ ܗܘ̣ܵܐ ܗܵܟܲܢܵܐ ܟܬ݂ܝܼܒ݂ ܒܢܵܡܘܿܣܟ݂ܘܿܢ. ܕܐܸܢܵܐ ܐܸܡܪܹܬ݂ ܕܐܲܠܵܗܹ̈ܐ ܐܲܢ̄ܬܘܿܢ.

³⁵ ܐܸܢ ܠܗܵܢܘܿܢ ܐܸܡܲܪ ܐܲܠܵܗܹ̈ܐ: ܡܛܠ ܕܲܠܘܵܬ݂ܗܘܿܢ ܗܘܸܵܬ݂ ܡܸܠܬ݂ܵܐ ܕܐܲܠܵܗܵܐ: ܘܠܵܐ ܡܸܫܟܲܚ ܟܬ݂ܵܒ݂ܵܐ ܕܢܸܫܬ݁ܪܹܐ

³⁶ ܠܐܲܝܢܵܐ ܕܐܲܒ݂ܵܐ ܩܲܕܫܹܗ ܘܫܲܕܪܹܗ ܠܥܵܠܡܵܐ: ܐܲܢ̄ܬ݁ܘܿܢ ܐܵܡܪܝܼܢ ܐܢ̄ܬܘܿܢ. ܕܲܡܓܲܕܦ ܐܲܢ̄ܬ݁: ܥܲܠ ܕܐܸܡܪܹܬ݂ ܠܟ݂ܘܿܢ. ܕܲܒ݂ܪܹܗ ܐ̄ܢܵܐ ܕܐܲܠܵܗܵܐ.

³⁷ ܐܸܠܵܐ ܥܵܒܹܿܕ݂ ܐ̄ܢܵܐ ܥܒ݂ܵܕܹ̈ܐ ܕܐܵܒ݂ܝ. ܠܵܐ ܬܗܲܝܡܢܘܼܢܵܢܝ.

³⁸ ܐܸܢ ܕܹܝܢ ܥܵܒܹܿܕ݂ ܐ̄ܢܵܐ. ܐܵܦܸܢ ܠܝܼ ܠܵܐ ܡܗܲܝܡܢܝܼܢ ܐܢ̄ܬܘܿܢ. ܠܗܘܿܢ ܠܲܥܒ݂ܵܕܹ̈ܐ ܗܲܝܡܸܢܘ. ܕܬܸܕ݂ܥܘܼܢ ܘܲܬ݂ܗܲܝܡܢܘܼܢ. ܕܐܵܒ݂ܝ ܒܝܼ. ܘܐܸܢܵܐ ܒܐܵܒ݂ܝ.

³⁹ ܘܲܒ݂ܥܵܘ ܗ̄ܘܼܵܘ ܬܘܼܒ݂ ܕܢܹܐܚܕܘܼܢܵܝܗܝ. ܘܲܢܦܲܩ ܠܹܗ ܡܸܢ ܒܹܝܬ݂ ܐܝܼܕ݂ܲܝ̈ܗܘܿܢ.

⁴⁰ ܘܐܸܙܲܠ ܠܹܗ ܠܥܸܒ݂ܪܵܐ ܕܝܘܿܪܕܢܵܢ ܠܕܘܼܟܬ݂ܵܐ ܐܲܝܟܵܐ ܕܐܝܼܬ݂ܵܘܗܝ ܗܘ̣ܵܐ ܝܘܿܚܲܢܵܢ ܡܸܢ ܩܕ݂ܝܼܡ ܟܲܕ݂ ܡܲܥܡܸܕ݂ ܗ̄ܘܵܐ. ܘܲܗܘܵܐ ܬܲܡܵܢ.

⁴¹ ܘܐܸܬ݂ܵܘ ܐ̄ܢܵܫܵܐ ܣܲܓܝܼܐܹ̈ܐ ܠܘܵܬܹܗ. ܘܐܵܡܪܝܼܢ ܗ̄ܘܼܵܘ. ܕܝܘܿܚܲܢܵܢ. ܐܵܦ ܠܵܐ ܚܕ݂ܵܐ ܐܵܬ݂ܵܐ ܥܒܲܕ݂. ܟܠ ܡܸܕܸܡ ܕܹܝܢ ܕܐܵܡܲܪ ܝܘܿܚܲܢܵܢ ܥܲܠ ܓܲܒ݂ܪܵܐ ܗܵܢܵܐ. ܫܲܪܝܼܪ ܗ̄ܘܼ.

⁴² ܘܣܲܓܝܼܐܹ̈ܐ ܗܲܝܡܸܢܘ ܒܹܗ.

11

¹ ܐܝܼܬ݂ ܗܘ̣ܵܐ ܕܹܝܢ ܚܲܕ݂ ܕܲܟ݂ܪܝܼܗ. ܠܵܥܵܙܲܪ ܡܸܢ ܒܹܝܬ݂ ܥܲܢܝܵܐ ܩܪܝܼܬ݂ܵܐ ܐܲܚܘܼܗ ܕܡܲܪܝܲܡ ܘܲܕ݂ܡܵܪܬܵܐ.

² ܡܲܪܝܲܡ ܕܹܝܢ ܗܵܕܹܐ ܐܝܼܬܹܝܗ̇. ܗܵܝ ܕܡܸܫܚܲܬ݂ ܒܒܸܣܡܵܐ ܪܸ̈ܓ݂ܠܵܘܗܝ ܕܝܼܫܘܿܥ. ܘܫܵܘܝܲܬ݂ ܒܣܲܥܪܵܗ̇. ܐܲܚܘܼܗ̇ ܗܘ̣ܵܐ ܕܗܵܕܹܐ ܠܵܥܵܙܲܪ ܕܲܟ݂ܪܝܼܗ ܗ̄ܘܵܐ.

³ ܘܫܲܕܲܪܹܝܢ ܬܲܪܬܲܝܗܹܝܢ ܐܲܚܘܵܬܹܗ ܠܘܵܬ݂ ܝܼܫܘܿܥ. ܘܐܵܡܪ̈ܵܢ. ܡܵܪܲܢ. ܗܵܐ ܗܵܘ ܕܪܵܚܹܿܡ ܐܲܢ̄ܬ݁ ܟܪܝܼܗ.

⁴ ܝܼܫܘܿܥ ܕܹܝܢ ܐܸܡܲܪ. ܗܵܢܵܐ ܟܘܼܪܗܵܢܵܐ ܠܵܐ ܗܘ̣ܵܐ ܕܡܵܘܬܵܐ. ܐܸܠܵܐ ܚܠܵܦ ܬܸܫܒܿܘܿܚܬܵܐ ܕܐܲܠܵܗܵܐ. ܕܢܸܫܬܲܒܲܚ ܒܪܹܗ ܕܐܲܠܵܗܵܐ ܡܛܠܵܬܹܗ.

⁵ ܡܲܚܸܒ݂ ܗܘ̣ܵܐ ܕܹܝܢ ܗܘܼ ܝܼܫܘܿܥ ܠܡܵܪܬܵܐ ܘܲܠܡܲܪܝܲܡ ܘܲܠܠܵܥܵܙܲܪ.

⁶ ܘܟܲܕ݂ ܫܡܲܥ ܕܲܟ݂ܪܝܼܗ. ܟܲܬܲܪ ܒܕܘܼܟܬ݂ܵܐ ܕܐܝܼܬ݂ܵܘܗܝ ܗ̄ܘܵܐ. ܬܪܹܝܢ ܝܵܘܡ̈ܝܼܢ.

⁷ ܘܒܵܬܲܪܟܸܢ ܐܸܡܲܪ ܠܬܲܠܡܝܼܕ݂ܵܘ̈ܗܝ. ܬܵܘ ܢܹܐܙܲܠ ܬܘܼܒ݂ ܠܝܼܗܘܼܕ݂.

⁸ ܐܵܡܪܝܼܢ ܠܹܗ ܬܲܠܡܝܼܕ݂ܵܘ̈ܗܝ. ܪܲܒܲܢ. ܗܵܫܵܐ ܝܗ̄ܘܼܕ݂ܵܝܹ̈ܐ ܒܵܥܹܝܢ ܗ̄ܘܼܵܘ ܠܡܸܪܓ݁ܡܵܟ݂. ܘܬ݂ܘܼܒ݂. ܐܵܙܹܠ ܐܲܢ̄ܬ݁ ܠܬܲܡܵܢ.

⁹ ܐܵܡܲܪ ܠܗܘܿܢ ܝܼܫܘܿܥ. ܠܵܐ ܬܲܪܬܲܥܸܣܪܹ̈ܐ ܫܵܥܝܼ̈ܢ ܐܝܼܬ݂ ܒܝܵܘܡܵܐ. ܘܐܸܢ ܐ̄ܢܵܫ ܡܗܲܠܸܟ݂ ܒܐܝܼܡܵܡܵܐ. ܠܵܐ ܡܸܬ݁ܬ݁ܩܸܠ. ܡܛܠ ܕܚܵܙܹܐ ܢܘܼܗܪܹܗ ܕܥܵܠܡܵܐ ܗܵܢܵܐ.

¹⁰ ܐܸܢ ܐ̄ܢܵܫ ܕܹܝܢ ܒܠܸܠܝܵܐ ܢܗܲܠܸܟ݂. ܡܸܬ݁ܬ݁ܩܸܠ. ܡܛܠ ܕܢܲܗܝܼܪܵܐ ܠܲܝܬ݁ ܒܹܗ.

¹¹ ܗܵܠܹܝܢ ܐܸܡܲܪ ܝܼܫܘܿܥ. ܘܒܵܬܲܪܟܸܢ ܐܸܡܲܪ ܠܗܘܿܢ. ܠܵܥܵܙܲܪ ܪܵܚܡܲܢ ܫܟܸܒ݂. ܐܸܠܵܐ ܐܵܙܹܠ ܐ̄ܢܵܐ. ܕܐܲܥܝܼܪܝܼܘܗܝ.

¹² ܐܵܡܪܝܼܢ ܠܹܗ ܬܲܠܡܝܼܕ݂ܵܘ̈ܗܝ. ܡܵܪܲܢ. ܐܸܢ ܕܡܸܟ݂. ܡܸܬ݂ܚܠܸܡ.

¹³ ܗܘܼ ܕܹܝܢ ܝܼܫܘܿܥ ܐܸܡܲܪ ܥܲܠ ܡܵܘܬܹ݁ܗ. ܘܗܸܢܘܿܢ ܣܒܲܪܘ. ܕܥܲܠ ܡܲܕ݂ܡܟ݂ܵܐ ܗܘܼ ܕܫܸܢܬ݂ܵܐ ܐܸܡܲܪ.

¹⁴ ܗܵܝܕܹܝܢ ܐܸܡܲܪ ܠܗܘܿܢ ܝܼܫܘܿܥ. ܦܫܝܼܩܵܐܝܼܬ݂. ܠܵܥܵܙܲܪ ܡܝܼܬ݂ ܠܹܗ.

¹⁵ ܘܚܵܕܹ̈ܐ ܐ̄ܢܵܐ ܕܠܵܐ ܗ̄ܘܹܝܬ݂ ܬܲܡܵܢ ܡܛܠܵܬ݂ܟ݂ܘܿܢ. ܕܲܬ݂ܗܲܝܡܢܘܼܢ. ܐܸܠܵܐ ܗܲܠܸܟ݂ܘ ܠܬܲܡܵܢ.

¹⁶ ܐܵܡܲܪ ܬܐܘܿܡܵܐ. ܕܡܸܬ݂ܐܡܲܪ ܬܵܐܡܵܐ. ܠܬܲܠܡܝܼܕܹ̈ܐ ܚܲܒ݂ܪ̈ܵܘܗܝ. ܢܹܐܙܲܠ ܐܵܦ ܚܢܲܢ ܢܡܘܼܬ݂ ܥܲܡܹܗ.

¹⁷ ܘܐܸܬ݂ܵܐ ܝܼܫܘܿܥ ܠܒܹܝܬ݂ ܥܲܢܝܵܐ. ܘܐܸܫܟܲܚ ܕܐܲܪܒܥܵܐ ܠܹܗ ܝܵܘܡ̈ܝܼܢ ܕܐܝܼܬ݂ܵܘܗܝ ܒܒܹܝܬ݂ ܩܒ݂ܘܼܪܵܐ.

¹⁸ ܐܝܼܬܹܝܗ̇ ܗ̄ܘܵܬ݂ ܕܹܝܢ ܒܹܝܬ݂ ܥܲܢܝܵܐ. ܥܲܠ ܓܸܢ̄ܒ݂ ܐܘܿܪܸܫܠܸܡ. ܟܲܕ݂ ܦܲܪܝܼܩܵܐ ܡܸܢܹܗ ܐܲܝܟ݂ ܐܸܣ̈ܛܕ݂ܵܘܵܬ݂ܵܐ ܚܲܡܸܫܬܲܥܣܲܪ.

¹⁹ ܘܣܲܓܝܼܐܹ̈ܐ ܡܸܢ ܝܗ̄ܘܼܕ݂ܵܝܹ̈ܐ ܐܲܬ݁ܝܼܐܝܼܢ ܗ̄ܘܼܵܘ ܠܘܵܬ݂ ܡܵܪܬܵܐ ܘܡܲܪܝܲܡ ܕܢܸܡܠܘܼܢ ܒܠܸܒܗܹܝܢ ܡܛܠ ܐܲܚܘܼܗܹܝܢ.

²⁰ ܡܵܪܬܵܐ ܕܹܝܢ ܟܲܕ݂ ܫܸܡܥܲܬ݂ ܕܝܼܫܘܿܥ ܐܸܬ݂ܵܐ. ܢܸܦܩܲܬ݂ ܠܐܘܼܪܥܹܗ. ܡܲܪܝܲܡ ܕܹܝܢ ܒܒܲܝܬܵܐ ܝܵܬ݂ܒܵܐ ܗ̄ܘܵܬ݂.

²¹ ܘܐܸܡܪܲܬ݂ ܡܵܪܬܵܐ ܠܝܼܫܘܿܥ. ܡܵܪܝ. ܐܸܠܘܼ ܬܢܵܢ ܗ̄ܘܲܝܬ݁. ܠܵܐ ܡܵܐܹܬ݂ ܗܘ̣ܵܐ ܐܵܚܝ.

²² ܐܸܠܵܐ ܐܵܦ ܗܵܫܵܐ ܝܵܕ݂ܥܵܐ ܐ̄ܢܵܐ. ܕܲܟ݂ܡܵܐ ܕܬܸܫܐܲܠ ܠܐܲܠܵܗܵܐ. ܝܵܗܹܒ݂ ܠܵܟ݂.

²³ ܐܵܡܲܪ ܠܵܗ̇ ܝܼܫܘܿܥ. ܩܵܐܹܡ ܐܲܚܘܼܟ݂ܝ.

²⁴ ܐܵܡܪܵܐ ܠܹܗ ܡܵܪܬܵܐ: ܝܵܕ݂ܥܵܐܢܵܐ (ܝܵܕ݂ܥܵܐ ܐ݇ܢܵܐ) ܕܩܵܐܹܡ ܒܢܘܼܚܵܡܵܐ ܒܝܵܘܡܵܐ ܐ̄ܚܪܵܝܵܐ.

²⁵ ܐܵܡܲܪ ܠܵܗ̇ ܝܼܫܘܿܥ. ܐܸܢܵܐ ܐ̄ܢܵܐ ܢܘܼܚܵܡܵܐ. ܘܚܲܝܹ̈ܐ. ܡܲܢ ܕܲܡܗܲܝܡܸܢ ܒܝܼ. ܐܵܦܸܢ ܢܡܘܼܬ݂ ܢܸܚܹܐ.

²⁶ ܘܟ݂ܠ ܕܚܲܝ ܘܲܡܗܲܝܡܸܢ ܒܝܼ. ܠܥܵܠܲܡ. ܠܵܐ ܢܡܘܼܬ݂. ܡܗܲܝܡܢܲܬ݁ܝ ܗܵܕܹܐ.

²⁷ ܐܵܡܪܵܐ ܠܹܗ. ܐܹܝܢ ܡܵܪܝ. ܐܸܢܵܐ ܡܗܲܝܡܢܵܐ ܐ̄ܢܵܐ. ܕܐܲܢ̄ܬ݁ ܗܘܼ ܡܫܝܼܚܵܐ ܒܪܹܗ ܕܐܲܠܵܗܵܐ ܕܐܵܬܹܐ ܠܥܵܠܡܵܐ.

²⁸ ܘܟܲܕ݂ ܐܸܡܪܲܬ݂ ܗܵܠܹܝܢ. ܐܸܙܲܠܬ݂ ܩܪܵܬ݂ ܠܡܲܪܝܲܡ ܚܵܬ݂ܵܗ̇ ܟܲܣܝܵܐܝܼܬ݂. ܘܐܵܡܪܵܐ ܠܵܗ̇. ܪܲܒܲܢ ܐܸܬ݂ܵܐ. ܘܩܵܪܹܐ ܠܹܟ݂ܝ.

²⁹ ܘܡܲܪܝܲܡ ܟܲܕ݂ ܫܸܡܥܲܬ݂. ܩܵܡܲܬ݂ ܥܓܲܠ. ܘܐܵܬ݂ܝܵܐ ܗ̄ܘܵܬ݂ ܠܘܵܬܹܗ.

³⁰ ܗܘܼ ܕܹܝܢ ܝܼܫܘܿܥ. ܠܵܐ ܥܕ݂ܲܟܹܝܠ ܐܸܬ݂ܵܐ ܗܘ̣ܵܐ ܠܲܩܪܝܼܬ݂ܵܐ. ܐܸܠܵܐ ܒܵܗ̇ ܗܘ̣ܵܐ ܒܗܵܝ ܕܘܼܟܬ݂ܵܐ ܕܐܲܪܲܥܬܹܗ ܡܵܪܬܵܐ.

³¹ ܐܵܦ ܗܵܢܘܿܢ ܕܹܝܢ ܝܗ̄ܘܼܕ݂ܵܝܹ̈ܐ. ܕܐܝܼܬ݂ ܗ̄ܘܼܵܘ ܥܲܡܵܗ̇ ܒܒܲܝܬܵܐ ܕܲܡܒܲܝܐܝܼܢ ܗ̄ܘܼܵܘ ܠܵܗ̇. ܕܲܚܙܵܘ ܠܡܲܪܝܲܡ ܕܲܥܓܲܠ ܩܵܡܲܬ݂ ܢܸܦܩܲܬ݂: ܐܸܙܲܠܘ ܠܗܘܿܢ ܒܵܬ݂ܪܵܗ̇. ܣܒܲܪܘ ܓܹܝܪ ܕܲܠܩܲܒ݂ܪܵܐ ܐܵܙܵܠ̄ܐ ܠܡܸܒ݂ܟܵܐ.

³² ܗܝܼ ܕܹܝܢ ܡܲܪܝܲܡ ܟܲܕ݂ ܐܸܬܲܬܸ ܐܲܝܟܵܐ ܕܐܝܼܬ݂ܵܘܗܝ ܗܘ̣ܵܐ ܝܼܫܘܿܥ. ܘܲܚܙܵܬܹܗ. ܢܸܦܠܲܬ݂ ܥܲܠ ܪܸ̈ܓ݂ܠܵܘܗܝ. ܘܐܵܡܪܵܐ ܠܹܗ. ܐܸܠܘܼ ܬܢܵܢ ܗ̄ܘܲܝܬ݁ ܡܵܪܝ. ܠܵܐ ܡܵܐܹܬ݂ ܗܘ̣ܵܐ ܐܵܚܝ.

³³ ܝܼܫܘܿܥ ܕܹܝܢ ܟܲܕ݂ ܚܙܵܗ̇ ܕܒ݂ܵܟ݂ܝܵܐ: ܘܲܠܝܗ̄ܘܼܕ݂ܵܝܹ̈ܐ ܗܵܢܘܿܢ ܕܐܸܬ݂ܵܘ ܥܲܡܵܗ̇ ܕܒ݂ܵܟܹܝܢ. ܐܸܬ݂ܥܲܙܲܙ ܒܪܘܼܚܹܗ. ܘܐܲܙܝܼܥ ܢܲܦ̮ܫܹܗ.

³⁴ ܘܐܸܡܲܪ. ܐܲܝܟܵܐ ܣܵܡܬ݁ܘܿܢܵܝܗܝ. ܘܐܵܡܪܝܼܢ ܠܹܗ. ܡܵܪܲܢ ܬܵܐ ܚܙܝܼ.

³⁵ ܘܐܵܬ݂ܝܵܢ ܗ̄ܘܲܝ̈ ܕܸܡ̈ܥܵܘܗܝ ܕܝܼܫܘܿܥ.

³⁶ ܘܐܵܡܪܝܼܢ ܗ̄ܘܼܵܘ ܝܗ̄ܘܼܕ݂ܵܝܹ̈ܐ. ܚܙܵܘ ܟܡܵܐ ܪܵܚܹܡ ܗܘ̣ܵܐ ܠܹܗ.

³⁷ ܐ̄ܢܵܫ̈ܝܼܢ ܕܹܝܢ ܡܸܢܗܘܿܢ ܐܸܡܲܪܘ. ܠܵܐ ܡܸܫܟܲܚ ܗܘ̣ܵܐ ܗܵܢܵܐ ܕܦܲܬܲܚ ܥܲܝܢܵܘ̈ܗܝ ܕܗܵܘ ܣܲܡܝܵܐ: ܢܸܥܒܸܕ݂. ܕܐܵܦ ܗܵܢܵܐ ܠܵܐ ܢܡܘܼܬ݂.

³⁸ ܝܼܫܘܿܥ ܕܹܝܢ ܟܲܕ݂ ܡܸܬ݂ܥܲܙܲܙ ܒܲܝܢܵܘܗܝ ܘܠܹܗ. ܐܸܬ݂ܵܐ ܠܒܹܝܬ݂ ܩܒ݂ܘܼܪܵܐ. ܘܗܘܼ ܒܹܝܬ݂ ܩܒ݂ܘܼܪܵܐ ܐܝܼܬ݂ܵܘܗܝ ܗܘ̣ܵܐ ܡܥܲܪܬ݂ܵܐ. ܘܟܹܐܦܵܐ ܣܝܼܡܵܐ ܗ̄ܘܵܬ݂ ܥܲܠ ܬܲܪܥܹܗ.

³⁹ ܘܐܸܡܲܪ ܝܼܫܘܿܥ. ܫܩܘܿܠܘ ܟܹܐܦܵܐ ܗܵܕܹܐ. ܐܵܡܪܵܐ ܠܹܗ ܡܵܪܬܵܐ ܚܵܬܹܗ ܕܗܵܘ ܡܝܼܬ݂ܵܐ. ܡܵܪܝ. ܡܸܢ ܟܲܕܘ ܣܪܝܼ ܠܹܗ. ܐܲܪܒܥܵܐ ܠܹܗ ܓܹܝܪ ܝܵܘܡ̈ܝܼܢ.

⁴⁰ ܐܵܡܲܪ ܠܵܗ̇ ܝܼܫܘܿܥ. ܠܵܐ ܐܸܡܪܹܬ݂ ܠܹܟ݂ܝ. ܕܐܸܢ ܬܗܲܝܡܢܝܼܢ ܬܸܚܙܹܝܢ ܫܘܼܒ݂ܚܹܗ ܕܐܲܠܵܗܵܐ.

⁴¹ ܘܲܫܩܲܠܘ ܟܹܐܦܵܐ ܗܵܝ. ܘܗܘܼ ܝܼܫܘܿܥ ܐܲܪܝܼܡ ܥܲܝܢܵܘ̈ܗܝ ܠܥܸܠ. ܘܐܸܡܲܪ. ܐܲܒ݂ܵܐ. ܡܵܘܕܹܐ ܐ̄ܢܵܐ ܠܵܟ݂ ܕܲܫܡܲܥܬܵܢܝ.

⁴² ܘܐܸܢܵܐ ܝܵܕ݂ܲܥ ܐ̄ܢܵܐ. ܕܲܒܟ݂ܠܙܒܲܢ ܫܵܡܲܥ ܐܲܢ̄ܬ݁ ܠܝܼ. ܐܸܠܵܐ ܡܛܠ ܟܸܢܫܵܐ ܗܵܢܵܐ ܕܩܵܐܹܡ ܐܵܡܲܪ ܐ̄ܢܵܐ ܗܵܠܹܝܢ. ܕܲܢܗܲܝܡܢܘܼܢ. ܕܐܲܢ̄ܬ݁ ܫܲܕܲܪܬܵܢܝ.

⁴³ ܘܟܲܕ݂ ܐܸܡܲܪ ܗܵܠܹܝܢ. ܩܥܵܐ ܒܩܵܠܵܐ ܪܵܡܵܐ. ܠܵܥܵܙܲܪ ܬܵܐ ܠܒܲܪ.

⁴⁴ ܘܲܢܦܲܩ ܗܵܘ ܡܝܼܬ݂ܵܐ. ܟܲܕ݂ ܐܲܣܝܼܪ̈ܵܢ ܐܝܼܕ݂ܵܘ̈ܗܝ ܘܪܸܓ݂ܠܵܘܗ̄ܝ̈ ܒܦܸܣ̈ܩܝܵܬ݂ܵܐ. ܘܐܲܦܵܘ̈ܗܝ ܐܲܣܝܼܪܵ̈ܢ ܒܣܘܼܕ݂ܵܪܵܐ. ܐܵܡܲܪ ܠܗܘܿܢ ܝܼܫܘܿܥ. ܫܪܵܐܘܼܗܝ ܘܲܫܒ݂ܘܿܩܘ ܐܵܙܹܠ.

⁴⁵ ܘܣܲܓܝܼܐܹ̈ܐ ܡܸܢ ܝܗ̄ܘܼܕ݂ܵܝܹ̈ܐ. ܕܐܬ݂ܵܘ ܠܘܵܬ݂ ܡܲܪܝܲܡ. ܟܲܕ݂ ܚܙܵܘ ܡܸܕܸܡ ܕܲܥܒܲܕ݂ ܝܼܫܘܿܥ. ܗܲܝܡܸܢܘ ܒܹܗ.

⁴⁶ ܘܐ̄ܢܵܫܝܼܢ ܡܸܢܗܘܿܢ ܐܸܙܲܠܘ ܠܘܵܬ݂ ܦܪ̈ܝܼܫܹܐ. ܘܐܸܡܲܪܘ ܠܗܘܿܢ ܡܸܕܸܡ ܕܲܥܒܲܕ݂ ܝܼܫܘܿܥ.

⁴⁷ ܘܐܸܬ݂ܟܲܢܲܫܘ ܪ̈ܲܒܲܝ ܟܵܗܢܹ̈ܐ ܘܲܦܪ̈ܝܼܫܹܐ ܘܐܵܡܪܝܼܢ ܗ̄ܘܼܵܘ. ܡܵܢܵܐ ܢܸܥܒܸܕ݂. ܕܗܵܢܵܐ ܓܲܒ݂ܪܵܐ ܐܵܬ݂ܘܵܬ݂ܵܐ ܣܲܓܝܼ̈ܐܵܬ݂ܵܐ ܥܵܒܹܿܕ݂.

⁴⁸ ܘܐܸܢ ܫܵܒ݂ܩܝܼܢ ܚ̄ܢܲܢ ܠܹܗ ܗܵܟܲܢܵܐ. ܟܠܗܘܿܢ ܐ̄ܢܵܫܵܐ ܡܗܲܝܡܢܝܼܢ ܒܹܗ. ܘܐܵܬܹܝܢ ܪ̈ܗ̄ܘܿܡܵܝܹܐ. ܫܵܩܠܝܼܢ ܐܲܬ݂ܪܲܢ ܘܥܲܡܲܢ.

⁴⁹ ܚܲܕ݂ ܕܹܝܢ ܡܸܢܗܘܿܢ ܕܲܫܡܹܗ ܩܲܝܵܦܵܐ. ܪܲܒ ܟܵܗܢܹ̈ܐ ܗܘ̣ܵܐ ܕܗܵܝ ܫܲܢ̄ܬܵܐ. ܘܐܸܡܲܪ ܠܗܘܿܢ. ܐܲܢ̄ܬ݁ܘܿܢ ܠܵܐ ܝܵܕ݂ܥܝܼܢ ܐܢ̄ܬܘܿܢ ܡܸܕܸܡ.

⁵⁰ ܘܠܵܐ ܡܸܬ݂ܚܲܫܒ݂ܝܼܢ ܐܢ̄ܬܘܿܢ ܕܦܲܩܵܚ ܠܲܢ ܕܚܲܕ݂ ܓܲܒ݂ܪܵܐ ܢܡܘܼܬ݂ ܚܠܵܦ ܥܲܡܵܐ ܘܠܵܐ ܟܠܹܗ ܥܲܡܵܐ ܢܹܐܒܲܕ݂.

⁵¹ ܗܵܕܹܐ ܕܹܝܢ ܡܸܢ ܨܒ݂ܘܬ݂ ܢܲܦ̮ܫܹܗ ܠܵܐ ܐܸܡܲܪ. ܐܸܠܵܐ ܡܛܠ ܕܪܲܒ ܟܵܗܢܹ̈ܐ ܗܘ̣ܵܐ ܕܗܵܝ ܫܲܢ̄ܬܵܐ. ܐܸܬ݂ܢܲܒܝܼ. ܕܲܥܬ݂ܝܼܕ݂ ܗܘ̣ܵܐ ܝܼܫܘܿܥ ܕܲܢܡܘܼܬ݂ ܚܠܵܦ ܥܲܡܵܐ.

⁵² ܘܠܵܐ ܒܲܠܚܘܿܕ݂ ܚܠܵܦ ܥܲܡܵܐ. ܐܸܠܵܐ ܕܐܵܦ ܒ̈ܢܲܝܵܐ ܕܐܲܠܵܗܵܐ ܕܲܡܒܲܕܪܝܼܢ. ܢܟܲܢܸܫ ܠܲܚܕ݂ܵܐ.

⁵³ ܘܡܸܢ ܗܵܘ ܝܵܘܡܵܐ. ܐܸܬ݂ܚܲܫܲܒ݂ܘ ܗ̄ܘܼܵܘ ܕܢܸܩܛܠܘܼܢܵܝܗܝ.

⁵⁴ ܗܘܼ ܕܹܝܢ ܝܼܫܘܿܥ ܠܵܐ ܡܗܲܠܸܟ݂ ܗܘ̣ܵܐ ܓܲܠܝܵܐܝܼܬ݂ ܒܹܝܬ݂ ܝܗ̄ܘܼܕ݂ܵܝܹ̈ܐ. ܐܸܠܵܐ ܐܸܙܲܠ ܠܹܗ ܡܸܢ ܬܲܡܵܢ ܠܐܲܬ݂ܪܵܐ ܕܩܲܪܝܼܒ݂ ܠܚܘܼܪܒܵܐ. ܠܟܲܪܟ݂ܵܐ ܕܡܸܬ݂ܩܪܹܐ ܐܲܦܪܹܝܡ. ܘܬܲܡܵܢ ܡܸܬ݂ܗܲܦܲܟ݂ ܗܘ̣ܵܐ ܥܲܡ ܬܲܠܡܝܼܕ݂ܵܘ̈ܗܝ.

⁵⁵ ܩܲܪܝܼܒ݂ ܗܘ̣ܵܐ ܕܹܝܢ ܦܸܨܚܵܐ ܕܝܗ̄ܘܼܕ݂ܵܝܹ̈ܐ. ܘܲܣܠܸܩܘ ܣܲܓܝܼܐܹ̈ܐ ܡܸܢ ܩܘܼܪ̈ܝܵܐ ܠܐܘܿܪܸܫܠܸܡ ܩܕ݂ܵܡ ܥܲܕ݂ܥܹܕ݂ܵܐ. ܕܲܢܕ݂ܲܟܘܢ ܢܲܦ̮ܫܗܘܿܢ.

⁵⁶ ܘܒ݂ܵܥܹܝܢ ܗ̄ܘܼܵܘ ܠܹܗ ܠܝܼܫܘܿܥ. ܘܐܵܡܪܝܼܢ ܗ̄ܘܼܵܘ ܚܲܕ݂ ܠܚܲܕ݂ ܒܗܲܝܟܠܵܐ. ܡܵܢܵܐ ܣܵܒ݂ܪܝܼܢ ܐܢ̄ܬܘܿܢ. ܕܠܵܐ ܐܵܬܹܐ ܠܥܲܕ݂ܥܹܕ݂ܵܐ.

⁵⁷ ܪ̈ܲܒܲܝ ܟܵܗܢܹ̈ܐ ܕܹܝܢ ܘܲܦܪ̈ܝܼܫܹܐ ܦܩܲܕ݂ܘ ܗ̄ܘܼܵܘ. ܕܐܸܢ ܐ̄ܢܵܫ ܢܸܕ݂ܥ ܐܲܝܟܵܘ. ܢܒܲܕܸܩ ܠܗܘܿܢ. ܐܲܝܟ݂ ܕܢܹܐܚܕܘܼܢܵܝܗܝ.

12

¹ ܝܼܫܘܿܥ ܕܹܝܢ ܩܕ݂ܵܡ ܫܬܵܐ ܝܵܘܡ̈ܝܼܢ ܕܦܸܨܚܵܐ. ܐܸܬ݂ܵܐ ܠܒܹܝܬ݂ ܥܲܢܝܵܐ. ܐܲܝܟܵܐ ܕܐܝܼܬ݂ܵܘܗܝ ܗܘ̣ܵܐ ܠܵܥܵܙܲܪ: ܗܵܘ ܕܐܲܩܝܼܡ ܡܸܢ ܒܹܝܬ݂ ܡܝܼܬܹ̈ܐ ܗܘܼ ܝܼܫܘܿܥ.

² ܘܲܥܒܲܕ݂ܘ ܠܹܗ ܬܲܡܵܢ ܚܫܵܡܝܼܬ݂ܵܐ. ܘܡܵܪܬܵܐ ܡܫܲܡܫܵܐ ܗ̄ܘܵܬ݂. ܘܠܵܥܵܙܲܪ ܚܲܕ݂ ܡܸܢ ܣܡܝܼܟܹ̈ܐ ܗܘ̣ܵܐ ܕܥܲܡܹܗ.

³ ܡܲܪܝܲܡ ܕܹܝܢ. ܫܸܩܠܲܬ݂ ܫܵܛܝܼܦ̮ܬܵܐ ܕܒܸܣܡܵܐ ܕܢܵܪܕܝܼܢ ܪܹܫܵܝܵܐ ܣܲܓܝܼ ܕܡܲܝ̈ܵܐ. ܘܡܸܫܚܲܬ݂ ܪܸ̈ܓ݂ܠܵܘܗܝ ܕܝܼܫܘܿܥ. ܘܫܵܘܝܲܬ݂ ܒܣܲܥܪܵܗ̇ ܪܸ̈ܓ݂ܠܵܘܗܝ. ܘܐܸܬ݂ܡܠܝܼ ܒܲܝܬܵܐ ܡܸܢ ܪܹܝܚܹܗ ܕܒܸܣܡܵܐ.

⁴ ܘܐܸܡܲܪ ܝܼܗܘܼܕ݂ܵܐ ܣܟܲܪܝܘܿܛܵܐ ܚܲܕ݂ ܡܸܢ ܬܲܠܡܝܼܕ݂ܵܘ̈ܗܝ ܗܵܘ ܕܲܥܬ݂ܝܼܕ݂ ܗܘ̣ܵܐ ܕܢܲܫܠܡܝܼܘܗܝ.

⁵ ܠܡܵܢܵܐ ܠܵܐ ܐܸܙܕܲܒܲܢ ܡܸܫܚܵܐ ܗܵܢܵܐ ܒܲܬ݂ܠܵܬ݂ ܡܵܐܐ ܕܝܼܢܵܪ̈ܝܼܢ. ܘܐܸܬ݂ܝܼܗܸܒ݂ ܠܡܸܣܟܹܢܹ̈ܐ.

⁶ ܗܵܕܹܐ ܕܹܝܢ ܐܸܡܲܪ. ܠܵܐ ܗܘ̣ܵܐ ܡܛܠ ܕܥܲܠ ܡܸܣܟܹܢܹ̈ܐ ܒܛܝܼܠ ܗܘ̣ܵܐ ܠܹܗ. ܐܸܠܵܐ ܡܛܠ ܕܓܲܢܵܒ݂ܵܐ ܗ̄ܘܵܐ. ܘܲܓ݂ܠܘܼܣܩܡܵܐ. ܠܘܵܬܹܗ ܗ̄ܘܵܐ. ܘܡܸܕܸܡ ܕܢܵܦܹܿܠ ܗܘ̣ܵܐ ܒܹܗ. ܗܘܼ ܛܥܝܼܢ ܗ̄ܘܵܐ.

⁷ ܐܸܡܲܪ ܕܹܝܢ ܝܼܫܘܿܥ. ܫܒ݂ܘܿܩܹܝܗ̇. ܠܝܵܘܡܵܐ ܕܲܩܒ݂ܘܼܪܝ ܢܛܲܪܬܹܗ.

⁸ ܒܟ݂ܠܙܒܲܢ ܓܹܝܪ ܡܸܣܟܹܢܹ̈ܐ ܐܝܼܬ݂ ܠܟ݂ܘܿܢ ܥܲܡܟ݂ܘܿܢ. ܠܝܼ ܕܹܝܢ ܠܵܐ ܒܟ݂ܠܙܒܲܢ ܐܝܼܬ݂ ܠܟ݂ܘܿܢ.

⁹ ܘܲܫܡܲܥܘ ܟܸܢܫܹ̈ܐ ܣܲܓܝܼܐܹ̈ܐ ܡܸܢ ܝܗ̄ܘܼܕ݂ܵܝܹ̈ܐ. ܕܬܲܡܵܢ ܗܘܼ ܝܼܫܘܿܥ. ܘܐܸܬ݂ܵܘ. ܠܵܐ ܡܛܠ ܝܼܫܘܿܥ ܒܲܠܚܘܿܕ݂. ܐܸܠܵܐ ܐܵܦ ܕܢܸܚܙܘܿܢ ܠܠܵܥܵܙܲܪ ܗܵܘ ܕܐܲܩܝܼܡ ܡܸܢ ܒܹܝܬ݂ ܡܝܼܬܹ̈ܐ.

¹⁰ ܘܐܸܬ݂ܪܲܥܝܼܘ ܗ̄ܘܼܵܘ ܪ̈ܲܒܲܝ ܟܵܗܢܹ̈ܐ. ܕܐܵܦ ܠܠܵܥܵܙܲܪ ܢܸܩܛܠܘܼܢܵܝܗܝ.

¹¹ ܡܛܠ ܕܣܲܓܝܼܐܹ̈ܐ ܡܸܢ ܝܗ̄ܘܼܕ݂ܵܝܹ̈ܐ ܡܛܠܵܬܹܗ ܐܵܙܠ̄ܝܼܢ ܗ̄ܘܼܵܘ. ܘܲܡܗܲܝܡܢܝܼܢ ܒܝܼܫܘܿܥ.

¹² ܘܲܠܝܵܘܡܵܐ ܐ̄ܚܪܹܢܵܐ. ܟܸܢܫܵܐ ܣܲܓܿܝܼܐܵܐ ܐܲܝܢܵܐ ܕܐܵܬܹܐ ܗܘ̣ܵܐ ܠܥܲܕ݂ܥܹܕ݂ܵܐ. ܟܲܕ݂ ܫܡܲܥܘ ܕܝܼܫܘܿܥ ܐܵܬܹܐ ܠܐܘܿܪܸܫܠܸܡ.

¹³ ܫܩܲܠܘ ܣܵܘܟܹ̈ܐ ܕܕܸܩܠܹ̈ܐ. ܘܲܢܦܲܩܘ ܠܐܘܼܪܥܹܗ. ܘܩܵܥܹܝܢ ܗ̄ܘܼܵܘ ܘܐܵܡܪܝܼܢ. ܐܘܿܫܲܥܢܵܐ. ܒܪܝܼܟ݂ ܗܘܼ ܕܐܵܬܹܐ ܒܲܫܡܹܗ ܕܡܵܪܝܵܐ. ܡܲܠܟܵܐ ܕܝܼܣܪܵܝܹܠ.

¹⁴ ܐܸܫܟܲܚ ܕܹܝܢ ܝܼܫܘܿܥ ܚܡܵܪܵܐ. ܘܝܼܬܸܒ݂ ܥܠܵܘܗܝ. ܐܲܝܟܲܢܵܐ ܕܲܟ݂ܬ݂ܝܼܒ݂.

¹⁵ ܠܵܐ ܬܸܕ݂ܚܠܝܼܢ ܒܲܪ̄ܬ݂ ܨܸܗܝܘܿܢ. ܗܵܐ ܡܲܠܟܹܟ݂ܝ ܐܵܬܹܐ ܠܹܟ݂ܝ. ܘܲܪܟ݂ܝܼܒ݂ ܥܲܠ ܥܝܼܠܵܐ ܒܲܪ ܐܲܬܵܢܵܐ.

¹⁶ ܗܵܠܹܝܢ ܕܹܝܢ ܠܵܐ ܝܼܕ݂ܲܥܘ ܬܲܠܡܝܼܕ݂ܵܘ̈ܗܝ ܒܗܵܘ ܙܲܒ݂ܢܵܐ. ܐܸܠܵܐ ܟܲܕ݂ ܐܸܫܬܲܒܲܚ ܝܼܫܘܿܥ. ܐܸܬ݁ܕܟܲܪܘ ܬܲܠܡܝܼܕ݂ܵܘ̈ܗܝ ܕܗܵܠܹܝܢ ܟܬ݂ܝܼܒ݂ܵܢ ܗ̄ܘܲܝ̈ ܥܠܵܘܗܝ. ܘܗܵܠܹܝܢ ܥܒܲܕ݂ܘ ܠܹܗ.

¹⁷ ܘܣܵܗܹܕ݂ ܗܘ̣ܵܐ ܟܸܢܫܵܐ ܗܵܘ ܕܥܲܡܹܗ ܗ̄ܘܵܐ. ܕܲܩܪܵܐ ܠܠܵܥܵܙܲܪ ܡܸܢ ܩܲܒ݂ܪܵܐ ܘܐܲܩܝܼܡܹܗ ܡܸܢ ܒܹܝܬ݂ ܡܝܼܬܹ̈ܐ.

¹⁸ ܘܡܛܠ ܗܵܕܹܐ ܢܦܲܩܘ ܠܩܘܼܒ݂ܠܹܗ ܟܸܢܫܹ̈ܐ ܣܲܓܝܼܐܹ̈ܐ. ܕܲܫܡܲܥܘ ܕܐܵܬ݂ܵܐ ܗܵܕܹܐ ܥܒܲܕ݂.

¹⁹ ܦܪ̈ܝܼܫܹܐ ܕܹܝܢ ܐܵܡܪܝܼܢ ܗ̄ܘܼܵܘ ܚܲܕ݂ ܠܚܲܕ݂. ܚܵܙܹܝܢ ܐܢ̄ܬܘܿܢ ܕܠܵܐ ܡܵܘܬ݁ܪܝܼܢ ܐܲܢ̄ܬܘܿܢ ܡܸܕܸܡ: ܕܗܵܐ ܥܵܠܡܵܐ ܟܠܹܗ ܐܸܙܲܠ ܠܹܗ ܒܵܬ݂ܪܹܗ.

²⁰ ܐܝܼܬ݂ ܗ̄ܘܼܵܘ ܕܹܝܢ ܐܵܦ ܡܸܢ ܥܲܡ̈ܡܹܐ ܐ̄ܢܵܫܵܐ ܒܗܘܿܢ ܕܲܣܠܸܩܘ ܠܡܸܣܓܲܕ݂ ܒܥܲܕ݂ܥܹܕ݂ܵܐ.

²¹ ܗܵܠܹܝܢ ܐܸܬ݂ܵܘ ܩܪܸܒ݂ܘ ܠܘܵܬ݂ ܦܝܼܠܝܼܦܘܿܣ: ܗܵܘ ܕܡܸܢ ܒܹܝܬ݂ ܨܲܝܵܕ݂ܵܐ ܕܲܓ݂ܠܝܼܠܵܐ. ܘܫܲܐܠܘܼܗܝ. ܘܐܵܡܪܝܼܢ ܠܹܗ. ܡܵܪܝ. ܨܵܒܹܝܢ ܚ̄ܢܲܢ ܢܸܚܙܹܐ ܠܝܼܫܘܿܥ.

²² ܘܐܸܬ݂ܵܐ ܗܘܼ ܦܝܼܠܝܼܦܘܿܣ. ܘܐܸܡܲܪ ܠܐܲܢܕܪܹܐܘܿܣ. ܘܐܲܢܕܪܹܐܘܿܣ ܘܦܝܼܠܝܼܦܘܿܣ ܐܸܡܲܪܘ ܠܝܼܫܘܿܥ.

²³ ܝܼܫܘܿܥ ܕܹܝܢ ܥܢܵܐ. ܘܐܸܡܲܪ ܠܗܘܿܢ. ܐܸܬܲܬܸ ܫܵܥܬ݂ܵܐ ܕܢܸܫܬܲܒܲܚ ܒܪܹܗ ܕܐ̄ܢܵܫܵܐ.

²⁴ ܐܵܡܹܝܢ ܐܵܡܹܝܢ. ܐܵܡܲܪ ܐ̄ܢܵܐ ܠܟ݂ܘܿܢ. ܕܲܦܪܸܕ݂ܬܵܐ ܕܚܸܛܬ݂ܵܐ. ܐܸܠܵܐ ܢܵܦܠܵܐ ܘܡܵܝܬܵܐ ܒܐܲܪܥܵܐ. ܒܲܠܚܘܿܕܹܝܗ̇ ܦܵܝܫܵܐ. ܐܸܢ ܕܹܝܢ ܡܵܝܬܵܐ. ܦܹܐܪܹ̈ܐ ܣܲܓܝܼܐܹ̈ܐ ܡܲܝܬ݁ܝܵܐ.

²⁵ ܡܲܢ ܕܪܵܚܹܿܡ ܢܲܦ̮ܫܹܗ. ܢܵܘܒܿܕ݂ܝܼܗ̇. ܘܡܲܢ ܕܣܵܢܹܐ ܢܲܦ̮ܫܹܗ ܒܥܵܠܡܵܐ ܗܵܢܵܐ. ܢܸܛܪܹܝܗ̇ ܠܚܲܝܹ̈ܐ ܕܲܠܥܵܠܲܡ.

²⁶ ܐܸܢ ܠܝܼ ܐ̄ܢܵܫ ܡܫܲܡܸܫ. ܢܹܐܬܹܐ ܒܵܬܲܪܝ. ܘܐܲܝܟܵܐ ܕܐܸܢܵܐ ܐܝܼܬܲܝ. ܬܲܡܵܢ ܢܸܗܘܹܐ ܐܵܦ ܡܫܲܡܫܵܢܝ. ܡܲܢ ܕܠܝܼ ܡܫܲܡܸܫ. ܢܝܲܩܪܝܼܘܗܝ ܐܲܒ݂ܵܐ.

²⁷ ܗܵܫܵܐ ܢܲܦ̮ܫܝ. ܗܵܐ ܫܓ݂ܝܼܫܵܐ. ܘܡܵܢܵܐ ܐܹܡܲܪ. ܐܵܒ݂ܝ ܦܲܨܵܢܝ ܡܸܢ ܗܵܕܹܐ ܫܵܥܬ݂ܵܐ. ܐܸܠܵܐ ܡܛܠ ܗܵܢܵܐ ܐܸܬܹܝܬ݂ ܠܗܵܕܹܐ ܫܵܥܬ݂ܵܐ.

²⁸ ܐܲܒ݂ܵܐ. ܫܲܒܲܚ ܫܡܵܟ݂. ܘܩܵܠܵܐ ܐܸܫܬ݁ܡܲܥ ܡܸܢ ܫܡܲܝܵܐ. ܫܲܒܚܹܬ݂. ܘܬ݂ܘܼܒ݂ ܡܫܲܒܲܚ ܐ̄ܢܵܐ.

²⁹ ܘܟܸܢܫܵܐ ܕܩܵܐܹܡ ܗܘ̣ܵܐ ܫܡܲܥܘ. ܘܐܵܡܪܝܼܢ. ܪܲܥܡܵܐ ܗܘܵܐ. ܐ̄ܚܪܵܢܹ̈ܐ ܕܹܝܢ ܐܵܡܪܝܼܢ. ܡܲܠܲܐܟ݂ܵܐ ܡܲܠܸܠ ܥܲܡܹܗ.

³⁰ ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܠܵܐ ܗܘ̣ܵܐ ܡܛܠܵܬ݂ܝ ܗܘ̣ܵܐ ܩܵܠܵܐ ܗܵܢܵܐ. ܐܸܠܵܐ ܡܛܠܵܬ݂ܟ݂ܘܿܢ.

³¹ ܗܵܫܵܐ ܕܝܼܢܹܗ ܗܘܼ ܕܥܵܠܡܵܐ ܗܵܢܵܐ. ܗܵܫܵܐ ܐܲܪܟܘܿܢܵܐ ܕܥܵܠܡܵܐ ܗܵܢܵܐ ܡܸܫܬ݁ܕܹܐ ܠܒܲܪ.

³² ܘܐܸܢܵܐ ܡܵܐ ܕܐܬ݁ܬ݁ܪܝܼܡܹܬ݂ ܡܸܢ ܐܲܪܥܵܐ. ܐܸܓܸܕ݂ ܟܠܢܵܫ ܠܘܵܬ݂ܝ.

³³ ܗܵܕܹܐ ܕܹܝܢ ܐܸܡܲܪ. ܕܲܢܚܵܘܐ ܒܐܲܝܢܵܐ ܡܵܘܬܵܐ ܡܵܐܹܬ݂.

³⁴ ܐܵܡܪܝܼܢ ܠܹܗ ܟܸܢܫܹ̈ܐ. ܚܢܲܢ ܫܡܲܥܢ ܡܸܢ ܢܵܡܘܿܣܵܐ. ܕܲܡܫܝܼܚܵܐ ܠܥܵܠܲܡ ܡܩܵܘܹܐ. ܐܲܝܟܲܢܵܐ ܐܵܡܲܪ ܐܲܢ̄ܬ݁ ܕܲܥܬ݂ܝܼܕ݂ ܗܘܼ ܕܢܸܬ݁ܬ݁ܪܝܼܡ ܒܪܹܗ ܕܐ̄ܢܵܫܵܐ. ܡܲܢܘܼ ܗܵܢܵܐ ܒܪܹܗ ܕܐ̄ܢܵܫܵܐ.

³⁵ ܐܵܡܲܪ ܠܗܘܿܢ ܝܼܫܘܿܥ. ܩܲܠܝܼܠ ܐ̄ܚܪܹܝܢ ܙܲܒ݂ܢܵܐ ܢܘܼܗܪܵܐ ܥܲܡܟ݂ܘܿܢ ܗ̄ܘܼ. ܗܲܠܸܟ݂ܘ ܥܲܕ݂ ܐܝܼܬ݂ ܠܟ݂ܘܿܢ ܢܘܼܗܪܵܐ. ܕܠܵܐ ܚܸܫܘܿܟ݂ܵܐ ܢܲܕ݂ܪܸܟ݂ܟ݂ܘܿܢ. ܘܡܲܢ ܕܲܡܗܲܠܸܟ݂ ܒܚܸܫܘܿܟ݂ܵܐ. ܠܵܐ ܝܵܕ݂ܲܥ ܠܐܲܝܟܵܐ ܐܵܙܹܠ.

³⁶ ܥܲܕ݂ ܐܝܼܬ݂ ܠܟ݂ܘܿܢ ܢܘܼܗܪܵܐ. ܗܲܝܡܸܢܘ ܒܢܘܼܗܪܵܐ. ܕܲܒ݂ܢܵܘ̈ܗܝ ܕܢܘܼܗܪܵܐ ܬܸܗܘܘܿܢ. ܗܵܠܹܝܢ ܡܲܠܸܠ ܝܼܫܘܿܥ. ܘܐܸܙܲܠ. ܐܸܬ݁ܛܲܫܝܼ ܡܸܢܗܘܿܢ.

³⁷ ܘܟܲܕ݂ ܗܵܠܹܝܢ ܟܠܗܹܝܢ ܐܵܬ݂ܘܵܬ݂ܵܐ ܥܒܲܕ݂ ܩܕ݂ܵܡܲܝܗܘܿܢ. ܠܵܐ ܗܲܝܡܸܢܘ ܒܹܗ.

³⁸ ܕܬܸܬ݂ܡܲܠܹܐ ܡܸܠܬ݂ܵܐ ܕܐܹܫܲܥܝܵܐ ܢܒ݂ܝܼܵܐ ܕܐܵܡܲܪ. ܡܵܪܝ. ܡܲܢܘܼ ܗܲܝܡܸܢ ܠܫܸܡܥܲܢ ܘܲܕ݂ܪܵܥܹܗ ܕܡܵܪܝܵܐ ܠܡܲܢ ܐܸܬ݂ܓܠܝܼ.

³⁹ ܡܛܠ ܗܵܢܵܐ ܠܵܐ ܡܸܫܟܿܚܝܼܢ ܗ̄ܘܼܵܘ ܕܲܢܗܲܝܡܢܘܼܢ. ܡܛܠ ܕܬ݂ܘܼܒ݂ ܐܸܡܲܪ ܐܹܫܲܥܝܵܐ.

⁴⁰ ܕܥܵܘܲܪܘ ܥܲܝܢܲܝ̈ܗܘܿܢ ܘܐܲܚܫܸܟ݂ܘ ܠܸܒܗܘܿܢ. ܕܠܵܐ ܢܸܚܙܘܿܢ ܒܥܲܝܢܲܝ̈ܗܘܿܢ ܘܢܸܣܬܲܟܠܘܼܢ ܒܠܸܒܗܘܿܢ: ܘܢܸܬ݂ܦܢܘܿܢ ܘܐܲܣܹܐ ܐܸܢܘܿܢ.

⁴¹ ܗܵܠܹܝܢ ܐܸܡܲܪ ܐܹܫܲܥܝܵܐ. ܟܲܕ݂ ܚܙܵܐ ܫܘܼܒ݂ܚܹܗ. ܘܡܲܠܸܠ ܥܠܵܘܗܝ.

⁴² ܐܵܦ ܡܸܢ ܪܹ̈ܫܹܐ ܕܹܝܢ ܣܲܓܝܼܐܹ̈ܐ ܗܲܝܡܸܢܘ ܒܹܗ. ܐܸܠܵܐ ܡܛܠ ܦܪ̈ܝܼܫܹܐ. ܠܵܐ ܡܵܘܕܹܝܢ ܗ̄ܘܼܵܘ. ܕܠܵܐ ܢܸܗܘܘܿܢ ܠܒܲܪ ܡܸܢ ܟܢܘܼܫܬܵܐ.

⁴³ ܪܚܸܡܘ ܓܹܝܪ ܫܘܼܒ݂ܚܵܐ ܕܲܒ݂ܢܲܝ̈ܢܵܫܵܐ ܝܲܬ݁ܝܼܪ ܡܸܢ ܫܘܼܒ݂ܚܹܗ ܕܐܲܠܵܗܵܐ.

⁴⁴ ܝܼܫܘܿܥ ܕܹܝܢ ܩܥܵܐ. ܘܐܸܡܲܪ. ܡܲܢ ܕܲܡܗܲܝܡܸܢ ܒܝܼ. ܠܵܐ ܗܘ̣ܵܐ ܒܝܼ ܡܗܲܝܡܸܢ. ܐܸܠܵܐ ܒܡܲܢ ܕܫܲܕܪܲܢܝ.

⁴⁵ ܘܡܲܢ ܕܠܝܼ ܚܵܙܹܐ. ܚܙܵܐ ܠܡܲܢ ܕܫܲܕܪܲܢܝ.

⁴⁶ ܐܸܢܵܐ ܢܘܼܗܪܵܐ ܐܸܬܹܝܬ݂ ܠܥܵܠܡܵܐ. ܕܟܠ ܡܲܢ ܕܲܡܗܲܝܡܸܢ ܒܝܼ. ܠܵܐ ܢܩܵܘܹܐ ܒܚܸܫܘܿܟ݂ܵܐ.

⁴⁷ ܘܡܲܢ ܕܫܵܡܲܥ ܡܸܠܲܝ̈. ܘܠܵܐ ܢܵܛܲܪ ܠܗܹܝܢ. ܐܸܢܵܐ ܠܵܐ ܕܵܐܹܢ ܐ̄ܢܵܐ ܠܹܗ. ܠܵܐ ܓܹܝܪ ܐܸܬܹܝܬ݂ ܕܐܹܕܘܼܢ ܠܥܵܠܡܵܐ. ܐܸܠܵܐ ܕܐܲܚܹܐ ܠܥܵܠܡܵܐ.

⁴⁸ ܡܲܢ ܕܛܵܠܸܡ ܠܝܼ. ܘܠܵܐ ܡܩܲܒܸܠ ܡܸܠܲܝ̈. ܐܝܼܬ݂ ܡܲܢ ܕܕ݂ܵܐܹܢ ܠܹܗ. ܡܸܠܬ݂ܵܐ ܕܡܲܠܠܹܬ݂. ܗܝܼ ܕܝܼܢܵܐ ܠܹܗ ܒܝܵܘܡܵܐ ܐ̄ܚܪܵܝܵܐ.

⁴⁹ ܕܐܸܢܵܐ ܡܸܢ ܢܲܦ̮ܫܝ ܠܵܐ ܡܲܠܠܹܬ݂. ܐܸܠܵܐ ܐܲܒ݂ܵܐ ܕܫܲܕܪܲܢܝ. ܗܘܼ ܝܲܗ̄ܒ݂ ܠܝܼ ܦܘܼܩܕܵܢܵܐ. ܡܵܢܵܐ ܐܹܡܲܪ. ܘܡܵܢܵܐ ܐܹܡܲܠܸܠ.

⁵⁰ ܘܝܵܕ݂ܲܥ ܐ̄ܢܵܐ ܕܦܘܼܩܕܵܢܹܗ ܚܲܝܹ̈ܐ ܐܸܢܘܿܢ ܕܲܠܥܵܠܲܡ. ܐܲܝܠܹܝܢ ܗܵܟܹܝܠ ܕܲܡܡܲܠܸܠ ܐ̄ܢܵܐ. ܐܲܝܟܲܢܵܐ ܕܐܵܡܲܪ ܠܝܼ ܐܵܒ݂ܝ. ܗܵܟܲܢܵܐ ܡܡܲܠܸܠ ܐ̄ܢܵܐ.

13

¹ ܩܕ݂ܵܡ ܕܹܝܢ ܥܹܐܕ݂ܵܐ ܕܦܸܨܚܵܐ. ܝܵܕ݂ܲܥ ܗܘ̣ܵܐ ܝܼܫܘܿܥ ܕܲܡܛܵܬ݂ ܫܵܥܬ݂ܵܐ ܕܲܢܫܲܢܹܐ ܡܸܢ ܗܵܢܵܐ ܥܵܠܡܵܐ ܠܘܵܬ݂ ܐܲܒ݂ܘܼܗܝ. ܘܐܲܚܸܒ݂ ܠܕ݂ܝܼܠܹܗ ܕܲܒ݂ܗܵܢܵܐ ܥܵܠܡܵܐ. ܘܲܥܕ݂ܲܡܵܐ ܠܚܲܪܬ݂ܵܐ. ܐܲܚܸܒ݂ ܐܸܢܘܿܢ.

² ܘܟܲܕ݂ ܗܘܸܵܬ݂ ܚܫܵܡܝܼܬ݂ܵܐ. ܪܡܹܐ ܗܘ̣ܵܐ ܠܹܗ ܠܣܵܛܵܢܵܐ ܒܠܸܒܹܗ ܕܲܝܗܘܼܕ݂ܵܐ. ܒܲܪ ܫܸܡܥܘܿܢ ܣܟܲܪܝܘܿܛܵܐ. ܕܢܲܫܠܡܝܼܘܗܝ.

³ ܗܘܼ ܕܹܝܢ ܝܼܫܘܿܥ. ܡܛܠ ܕܝܵܕ݂ܲܥ ܗܘ̣ܵܐ ܕܟܠ ܡܸܕܸܡ ܝܲܗ̄ܒ݂ ܐܲܒ݂ܵܐ ܒܐܝܕ݂ܵܘ̈ܗܝ: ܘܲܕ݂ܡܸܢ ܐܲܠܵܗܵܐ ܢܦܲܩ ܘܲܠܘܵܬ݂ ܐܲܠܵܗܵܐ ܐܵܙܹܠ:

⁴ ܩܵܡ ܡܸܢ ܚܫܵܡܝܼܬ݂ܵܐ. ܘܣܵܡ ܢܲܚ̈ܬܵܘܗܝ. ܘܲܫܩܲܠ ܣܸܕܿܘܿܢܵܐ. ܡܚܵܐ ܒܚܲܨܵܘ̈ܗܝ.

⁵ ܘܐܲܪܡܝܼ ܡܲܝ̈ܵܐ ܒܲܡܫܵܓ݂ܬܵܐ. ܘܫܲܪܝܼ ܠܲܡܫܵܓ݂ܘ ܪܸ̈ܓ݂ܠܹܐ ܕܬܲܠܡܝܼܕ݂ܵܘ̈ܗܝ. ܘܲܡܫܵܘܹܐ ܗܘ̣ܵܐ ܒܣܸܕܿܘܿܢܵܐ ܕܲܡܚܹܐ ܒܚܲܨܵܘ̈ܗܝ.

⁶ ܟܲܕ݂ ܕܹܝܢ ܐܸܬ݂ܵܐ ܠܘܵܬ݂ ܫܸܡܥܘܿܢ ܟܹܐܦܵܐ. ܐܵܡܲܪ ܠܹܗ ܫܸܡܥܘܿܢ. ܐܲܢ̄ܬ݁ ܡܵܪܝ. ܪܸ̈ܓ݂ܠܲܝ ܡܫܝܼܓ݂ ܐܲܢ̄ܬ݁ ܠܝܼ.

⁷ ܥܢܵܐ ܝܼܫܘܿܥ. ܘܐܸܡܲܪ ܠܹܗ. ܡܸܕܸܡ ܕܥܵܒܹܿܕ݂ ܐ̄ܢܵܐ ܐܲܢ̄ܬ݁ ܠܵܐ ܝܵܕ݂ܲܥ ܐܲܢ̄ܬ݁ ܗܵܫܵܐ. ܒܵܬܲܪܟܸܢ ܕܹܝܢ ܬܸܕܲܥ.

⁸ ܐܵܡܲܪ ܠܹܗ ܫܸܡܥܘܿܢ ܟܹܐܦܵܐ. ܠܥܵܠܲܡ ܠܵܐ ܡܫܝܼܓ݂ ܐܲܢ̄ܬ݁ ܠܝܼ ܪܸ̈ܓ݂ܠܲܝ. ܐܵܡܲܪ ܠܹܗ ܝܼܫܘܿܥ. ܐܸܢ ܠܵܐ ܡܫܝܼܓ݂ ܐ̄ܢܵܐ ܠܵܟ݂. ܠܲܝܬ݁ ܠܵܟ݂ ܥܲܡܝ ܡܢܵܬ݂ܵܐ.

⁹ ܐܵܡܲܪ ܠܹܗ ܫܸܡܥܘܿܢ ܟܹܐܦܵܐ. ܡܵܕܹܝܢ ܡܵܪܝ. ܠܵܐ ܒܲܠܚܘܿܕ݂ ܪܸ̈ܓ݂ܠܲܝ ܬܫܝܼܓ݂ ܠܝܼ. ܐܸܠܵܐ ܐܵܦ ܐܝܼܕ݂ܲܝ̈ ܐܵܦ ܪܹܫܝ.

¹⁰ ܐܵܡܲܪ ܠܹܗ ܝܼܫܘܿܥ. ܗܵܘ ܕܲܣܚܹܐ. ܠܵܐ ܣܢܝܼܩ ܐܸܠܵܐ ܪܸ̈ܓ݂ܠܵܘܗܝ ܒܲܠܚܘܿܕ݂ ܢܫܝܼܓ݂. ܟܠܹܗ ܓܹܝܪ ܕܟܹܐ ܗ̄ܘܼ. ܐܵܦ ܐܲܢ̄ܬ݁ܘܿܢ ܟܠܟ݂ܘܿܢ ܕܟܲܝܵܐ ܐܢ̄ܬܘܿܢ. ܐܸܠܵܐ ܠܵܐ ܟܠܟ݂ܘܿܢ.

¹¹ ܝܵܕ݂ܲܥ ܗܘ̣ܵܐ ܓܹܝܪ ܝܼܫܘܿܥ ܠܗܵܘ ܕܡܲܫܠܸܡ ܠܹܗ. ܡܛܠ ܗܵܢܵܐ ܐܸܡܲܪ. ܕܠܵܐ ܗܘ̣ܵܐ ܟܠܟ݂ܘܿܢ ܕܟܲ̈ܝܵܐ ܐܲܢ̄ܬܘܿܢ.

¹² ܟܲܕ݂ ܕܹܝܢ ܐܲܫܝܼܓ݂ ܪܸ̈ܓ݂ܠܲܝܗܘܿܢ. ܫܩܲܠ ܢܲܚ̈ܬܵܘܗܝ. ܘܐܸܣܬ݁ܡܸܟ݂. ܘܐܸܡܲܪ ܠܗܘܿܢ. ܝܵܕ݂ܥܝܼܢ ܐܢ̄ܬܘܿܢ. ܡܵܢܵܐ ܥܸܒ݂ܕܹܬ݂ ܠܟ݂ܘܿܢ.

¹³ ܐܲܢ̄ܬ݁ܘܿܢ ܩܵܪܹܝܢ ܐܢ̄ܬܘܿܢ ܠܝܼ. ܪܲܒܲܢ. ܘܡܵܪܲܢ. ܘܫܲܦܝܼܪ ܐܵܡܪܝܼܢ ܐܢ̄ܬܘܿܢ. ܐܝܼܬܲܝ ܓܹܝܪ.

¹⁴ ܐܸܢ ܐܸܢܵܐ ܗܵܟܹܝܠ ܡܵܪܟ݂ܘܿܢ ܘܪܲܒܟ݂ܘܿܢ. ܐܲܫܝܼܓܹܬ݂ ܠܟ݂ܘܿܢ ܪܸ̈ܓ݂ܠܲܝܟܿܘܿܢ. ܟܡܵܐ ܐܲܢ̄ܬ݁ܘܿܢ ܚܲܝܵܒ݂ܝܼܢ ܐܢ̄ܬܘܿܢ ܕܲܬ݂ܫܝܼܓ݂ܘܢ ܪܸ̈ܓ݂ܠܹܐ ܚܲܕ݂ ܕܚܲܕ݂.

¹⁵ ܗܵܢܵܐ ܓܹܝܪ ܛܘܼܦ̮ܣܵܐ ܝܸܗܒܹܬ݂ ܠܟ݂ܘܿܢ. ܕܐܲܝܟܲܢܵܐ ܕܐܸܢܵܐ ܥܸܒ݂ܕܹܬ݂ ܠܟ݂ܘܿܢ. ܐܵܦ ܐܲܢ̄ܬ݁ܘܿܢ ܬܸܥܒܕ݂ܘܼܢ.

¹⁶ ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܠܲܝܬ݁ ܥܲܒ݂ܕܵܐ ܕܪܲܒ ܡܸܢ ܡܵܪܹܗ. ܘܠܵܐ ܫܠܝܼܚܵܐ ܕܪܲܒ ܡܸܢ ܡܲܢ ܕܫܲܕܪܹܗ.

¹⁷ ܐܸܢ ܗܵܠܹܝܢ ܬܸܕܥܘܼܢ. ܛܘܼܒ݂ܵܢܹ̈ܐ ܐܲܢ̄ܬ݁ܘܿܢ ܐܸܢ ܬܸܥܒܕ݂ܘܼܢ ܐܸܢܹܝܢ.

¹⁸ ܠܵܐ ܗܘ̣ܵܐ ܥܲܠ ܟܠܟ݂ܘܿܢ ܐܵܡܲܪ ܐ̄ܢܵܐ. ܝܵܕ݂ܲܥ ܐ̄ܢܵܐ ܓܹܝܪ ܠܐܲܝܠܹܝܢ ܕܲܓ݂ܒ݂ܝܼܬ݂. ܐܸܠܵܐ ܕܲܟ݂ܬ݂ܵܒ݂ܵܐ ܢܸܫܠܲܡ. ܕܗܵܘ ܕܐܵܟܹܠ ܥܲܡܝ ܠܲܚܡܵܐ. ܐܲܪܝܼܡ ܥܠܲܝ ܥܸܩܒܹܗ.

¹⁹ ܡܸܢ ܗܵܫܵܐ ܐܵܡܲܪ ܐ̄ܢܵܐ ܠܟ݂ܘܿܢ. ܡܸܢ ܩܕ݂ܵܡ ܕܢܸܗܘܹܐ. ܕܡܵܐ ܕܲܗܘܵܐ. ܬܗܲܝܡܢܘܼܢ ܕܐܸܢܵܐ ܐ̄ܢܵܐ.

²⁰ ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܡܲܢ ܕܲܡܩܲܒܸܠ ܠܡܲܢ ܕܲܡܫܲܕܲܪ ܐ̄ܢܵܐ. ܠܝܼ ܡܩܲܒܸܠ. ܘܡܲܢ ܕܠܝܼ ܡܩܲܒܸܠ. ܡܩܲܒܸܠ ܠܡܲܢ ܕܫܲܕܪܲܢܝ.

²¹ ܗܵܠܹܝܢ ܐܸܡܲܪ ܝܼܫܘܿܥ. ܘܐܸܬ݂ܥܲܙܲܙ ܒܪܘܼܚܹܗ ܘܐܲܣܗܸܕ݂. ܘܐܸܡܲܪ. ܐܵܡܹܝܢ ܐܵܡܹܝܢ. ܐܵܡܲܪ ܐ̄ܢܵܐ ܠܟ݂ܘܿܢ. ܕܚܲܕ݂ ܡܸܢܟ݂ܘܿܢ ܢܲܫܠܡܲܢܝ.

²² ܚܵܪܘ ܕܹܝܢ ܬܲܠܡܝܼܕܹ̈ܐ ܚܲܕ݂ ܒܚܲܕ݂. ܡܛܠ ܕܠܵܐ ܝܵܕ݂ܥܝܼܢ ܗ̄ܘܼܵܘ ܕܥܲܠ ܡܲܢܘܼ ܐܸܡܲܪ.

²³ ܐܝܼܬ݂ ܗܘ̣ܵܐ ܕܹܝܢ ܡܸܢ ܬܲܠܡܝܼܕ݂ܵܘ̈ܗܝ. ܚܲܕ݂ ܕܲܣܡܝܼܟ݂ ܗܘ̣ܵܐ ܒܥܘܼܒܹܗ ܗܵܘ ܕܪܵܚܹܿܡ ܗܘ̣ܵܐ ܠܹܗ ܝܼܫܘܿܥ.

²⁴ ܠܗܵܢܵܐ ܪܡܲܙ ܫܸܡܥܘܿܢ ܟܹܐܦܵܐ. ܕܲܢܫܲܐܠܝܼܘܗܝ. ܕܡܲܢܘܼ ܗܵܘ ܕܐܵܡܲܪ ܥܠܵܘܗܝ.

²⁵ ܘܲܢܦܲܠ ܗܵܘ ܬܲܠܡܝܼܕ݂ܵܐ ܥܲܠ ܚܲܕ݂ܝܹܗ ܕܝܼܫܘܿܥ. ܘܐܸܡܲܪ ܠܹܗ. ܡܵܪܝ. ܡܲܢܘܼ ܗܵܢܵܐ.

²⁶ ܥܢܵܐ ܝܼܫܘܿܥ. ܘܐܸܡܲܪ. ܗܵܘ ܗܘܼ ܕܨܵܒܲܥ ܐ̄ܢܵܐ ܠܲܚܡܵܐ ܝܵܗܹܒ݂ ܐ̄ܢܵܐ ܠܹܗ. ܘܲܨܒܲܥ ܝܼܫܘܿܥ ܠܲܚܡܵܐ. ܘܝܲܗ̄ܒ݂ ܠܝܼܗܘܼܕ݂ܵܐ ܒܲܪ ܫܸܡܥܘܿܢ ܣܟܲܪܝܘܿܛܵܐ.

²⁷ ܘܒܵܬܲܪ ܠܲܚܡܵܐ. ܗܵܝܕܹܝܢ ܐܸܬ݂ܥܲܠܲܠ ܒܹܗ ܣܵܛܵܢܵܐ. ܘܐܸܡܲܪ ܠܹܗ ܝܼܫܘܿܥ. ܡܸܕܸܡ ܕܥܵܒܹܿܕ݂ ܐܲܢ̄ܬ݁. ܥܒܸܕ݂ ܒܲܥܓܲܠ.

²⁸ ܗܵܕܹܐ ܕܹܝܢ ܠܵܐ ܐ̄ܢܵܫ ܝܼܕ݂ܲܥ. ܡܸܢ ܗܵܢܘܿܢ ܣܡܝܼܟܹ̈ܐ. ܕܥܲܠ ܡܵܢܵܐ ܐܸܡܲܪ ܠܹܗ.

²⁹ ܐ̄ܢܵܫ̈ܝܼܢ ܓܹܝܪ ܣܒܲܪܘ. ܡܛܠ ܕܲܓ݂ܠܘܼܣܩܡܵܐ ܨܸܐܕ݂ܵܘܗܝ ܗܘ̣ܵܐ ܕܲܝܗ̄ܘܼܕ݂ܵܐ. ܕܡܸܦܩܲܕ݂ ܦܩܲܕ݂ ܠܹܗ ܕܢܸܙܒܸܢ ܡܸܕܸܡ ܕܡܸܬ݂ܒܿܥܹܐ ܠܥܲܕ݂ܥܹܕ݂ܵܐ ܐܵܘ ܕܢܸܬܸ݁ܠ ܡܸܕܸܡ ܠܡܸܣܟܹܢܹ̈ܐ.

³⁰ ܗܘܼ ܕܹܝܢ ܝܼܗܘܼܕ݂ܵܐ ܢܣܲܒ݂ ܠܲܚܡܵܐ ܒܲܪ ܫܵܥܬܹܗ. ܘܲܢܦܲܩ ܠܹܗ ܠܒܲܪ. ܠܸܠܝܵܐ ܗܘ̣ܵܐ ܕܹܝܢ ܟܲܕ݂ ܢܦܲܩ.

³¹ ܘܐܸܡܲܪ ܝܼܫܘܿܥ. ܗܵܫܵܐ ܐܸܫܬܲܒܲܚ ܒܪܹܗ ܕܐ̄ܢܵܫܵܐ. ܘܐܲܠܵܗܵܐ ܐܸܫܬܲܒܲܚ ܒܹܗ.

³² ܘܐܸܢ ܐܲܠܵܗܵܐ ܐܸܫܬܲܒܲܚ ܒܹܗ. ܘܐܵܦ ܐܲܠܵܗܵܐ ܡܫܲܒܲܚ ܠܹܗ ܒܹܗ. ܘܡܸܚܕ݂ܵܐ ܡܫܲܒܲܚ ܠܹܗ.

³³ ܒܢܲܝ̈. ܩܲܠܝܼܠ ܐ̄ܚܪܹܝܢ ܥܲܡܟ݂ܘܿܢ ܐ̄ܢܵܐ. ܘܬܸܒ݂ܥܘܿܢܵܢܝ. ܘܐܲܝܟܲܢܵܐ ܕܐܸܡܪܹܬ݂ ܠܝܗ̄ܘܼܕ݂ܵܝܹ̈ܐ ܕܠܲܐܝܟܵܐ ܕܐܸܢܵܐ ܐܵܙܹܠ ܐ̄ܢܵܐ. ܐܲܢ̄ܬܘܿܢ. ܠܵܐ ܡܸܫܟܿܚܝܼܢ ܐܢ̄ܬܘܿܢ ܠܡܹܐܬ݂ܵܐ. ܘܐܵܦ ܠܟ݂ܘܿܢ ܐܵܡܲܪ ܐ̄ܢܵܐ ܗܵܫܵܐ.

³⁴ ܦܘܼܩܕܵܢܵܐ ܚܲܕ݂ܬ݂ܵܐ ܝܵܗܹܒ݂ ܐ̄ܢܵܐ ܠܟ݂ܘܿܢ. ܕܲܗܘܲܝܬ݁ܘܿܢ ܡܲܚܒ݂ܝܼܢ ܚܲܕ݂ ܠܚܲܕ݂. ܐܲܝܟܲܢܵܐ ܕܐܸܢܵܐ ܐܲܚܸܒ݂ܬ݁ܟ݂ܘܿܢ. ܐܵܦ ܐܲܢ̄ܬ݁ܘܿܢ ܬܲܚܒ݂ܘܢ ܚܲܕ݂ ܠܚܲܕ݂.

³⁵ ܒܗܵܕܹܐ ܢܸܕܲܥ ܟܠ ܐ̄ܢܵܫ ܕܬܲܠܡܝܼ̈ܕ݂ܲܝ ܐܲܢ̄ܬܘܿܢ. ܐܸܢ ܚܘܼܒܵܐ ܢܸܗܘܹܐ ܒܟ݂ܘܿܢ ܚܲܕ݂ ܠܘܵܬ݂ ܚܲܕ݂.

³⁶ ܐܵܡܲܪ ܠܹܗ ܫܸܡܥܘܿܢ ܟܹܐܦܵܐ. ܡܵܪܲܢ. ܠܐܲܝܟܵܐ ܐܵܙܹܠ ܐܲܢ̄ܬ݁. ܥܢܵܐ ܝܼܫܘܿܥ. ܘܐܸܡܲܪ ܠܹܗ. ܠܐܲܝܟܵܐ ܕܐܵܙܸܠ ܐ̄ܢܵܐ. ܠܵܐ ܡܸܫܟܲܚ ܐܲܢ̄ܬ݁ ܗܵܫܵܐ ܕܬܹܐܬܹܐ ܒܵܬܲܪܝ. ܠܚܲܪܬ݂ܵܐ ܕܹܝܢ ܬܹܐܬܹܐ.

³⁷ ܐܵܡܲܪ ܠܹܗ ܫܸܡܥܘܿܢ ܟܹܐܦܵܐ. ܡܵܪܝ. ܠܡܵܢܵܐ ܠܵܐ ܡܸܫܟܲܚ ܐ̄ܢܵܐ ܕܐܵܬܹܐ ܒܵܬ݂ܪܵܟ݂ ܗܵܫܵܐ. ܢܲܦ̮ܫܝ ܚܠܵܦܲܝܟ ܣܵܐܹܡ ܐ̄ܢܵܐ.

³⁸ ܐܵܡܲܪ ܠܹܗ ܝܼܫܘܿܥ. ܢܲܦ̮ܫܵܟ݂ ܚܠܵܦܲܝ ܣܵܐܹܡ ܐܲܢ̄ܬ݁. ܐܵܡܹܝܢ ܐܵܡܹܝܢ. ܐܵܡܲܪ ܐ̄ܢܵܐ ܠܵܟ݂. ܕܠܵܐ ܢܸܩܪܹܐ ܬܲܪܢܵܓ݂ܠܵܐ ܥܕ݂ܲܡܵܐ ܕܬܸܟ݂ܦܘܿܪ ܒܝܼ ܬܠܵܬ݂ ܙܲܒ݂ܢ̈ܝܼܢ.

14

¹ ܠܵܐ ܢܸܬ݁ܕܵܘܲܕ݂ ܠܸܒܟ݂ܘܿܢ. ܗܲܝܡܸܢܘ ܒܐܲܠܵܗܵܐ. ܘܒ݂ܝܼ ܗܲܝܡܸܢܘ.

² ܣܲܓܝܼܐܝܼܢ ܐܸܢܘܿܢ ܐܵܘܵܢܹ̈ܐ ܒܹܝܬ݂ ܐܵܒ݂ܝ. ܘܐܸܠܵܐ ܐܵܡܲܪ ܗ̄ܘܹܝܬ݂ ܠܟ݂ܘܿܢ. ܕܐܵܙܹܠ ܐ̄ܢܵܐ ܕܐܹܛܲܝܸܒ݂ ܠܟ݂ܘܿܢ ܐܲܬ݂ܪܵܐ.

³ ܘܐܸܢ ܐܹܙܲܠ ܐܹܛܲܝܸܒ݂ ܠܟ݂ܘܿܢ ܐܲܬ݂ܪܵܐ. ܬܘܼܒ݂ ܐܹܬܹܐ. ܘܐܸܕ݂ܒܲܪܟ݂ܘܿܢ ܠܘܵܬ݂ܝ. ܕܐܲܝܟܵܐ ܕܐܸܢܵܐ ܐܝܼܬܲܝ. ܐܵܦ ܐܲܢ̄ܬ݁ܘܿܢ ܬܸܗܘܘܿܢ.

⁴ ܘܠܲܐܝܟܵܐ ܕܐܵܙܹܠ ܐ̄ܢܵܐ ܝܵܕ݂ܥܝܼܢ ܐܢ̄ܬܘܿܢ. ܘܐܘܼܪܚܵܐ ܝܵܕ݂ܥܝܼܢ ܐܢ̄ܬܘܿܢ.

⁵ ܐܵܡܲܪ ܠܹܗ ܬܐܘܿܡܵܐ. ܡܵܪܲܢ. ܠܵܐ ܝܵܕ݂ܥܝܼܢܲܢ ܠܐܲܝܟܵܐ ܐܵܙܹܠ ܐܲܢ̄ܬ݁. ܘܐܲܝܟܲܢܵܐ ܡܸܫܟܿܚܝܼܢ ܚ̄ܢܲܢ ܐܘܼܪܚܵܐ ܠܡܸܕܲܥ.

⁶ ܐܵܡܲܪ ܠܹܗ ܝܼܫܘܿܥ. ܐܸܢܵܐ ܐ̄ܢܵܐ ܐܘܼܪܚܵܐ ܘܲܫܪܵܪܵܐ ܘܚܲܝܹ̈ܐ. ܠܵܐ ܐ̄ܢܵܫ ܐܵܬܹܐ ܠܘܵܬ݂ ܐܵܒ݂ܝ. ܐܸܠܵܐ ܐܸܢ ܒܝܼ.

⁷ ܐܸܠܘܼ ܠܝܼ ܝܵܕ݂ܥܝܼܢ ܗ̄ܘܲܝܬ݁ܘܿܢ. ܐܵܦ ܠܐܵܒ݂ܝ ܝܵܕ݂ܥܝܼܢ ܗ̄ܘܲܝܬ݁ܘܿܢ. ܘܡܸܢ ܗܵܫܵܐ ܝܵܕ݂ܥܝܼܢ ܐܢ̄ܬܘܿܢ ܠܹܗ. ܘܲܚܙܲܝܬ݁ܘܿܢܵܝܗܝ.

⁸ ܐܵܡܲܪ ܠܹܗ ܦܝܼܠܝܼܦܘܿܣ. ܡܵܪܲܢ. ܚܵܘܵܢ ܐܲܒ݂ܵܐ. ܘܟܲܕܘܼ ܠܲܢ.

⁹ ܐܵܡܲܪ ܠܹܗ ܝܼܫܘܿܥ. ܗܵܢܵܐ ܟܠܹܗ ܙܲܒ݂ܢܵܐ ܥܲܡܟ݂ܘܿܢ ܐ̄ܢܵܐ: ܘܠܵܐ ܝܼܕ݂ܲܥܬܵܢܝ ܦܝܼܠܝܼܦܵܐ. ܡܲܢ ܕܠܝܼ ܚܵܙܹܐ. ܚܙܵܐ ܠܐܲܒ݂ܵܐ. ܘܐܲܝܟܲܢܵܐ ܐܲܢ̄ܬ݁ ܐܵܡܲܪ ܐܲܢ̄ܬ݁ ܚܵܘܵܢ ܐܲܒ݂ܵܐ.

¹⁰ ܠܵܐ ܡܗܲܝܡܸܢ ܐܲܢ̄ܬ݁ ܕܐܸܢܵܐ ܒܐܸܒ݂ܝ. ܘܐܵܒ݂ܝ ܒܝܼ. ܡܸܠܹ̈ܐ ܐܲܝܠܹܝܢ ܕܐܸܢܵܐ ܡܡܲܠܸܠ ܐ̄ܢܵܐ. ܡܸܢ ܢܲܦ̮ܫܝ. ܠܵܐ ܡܡܲܠܸܠ ܐ̄ܢܵܐ. ܐܵܒ݂ܝ ܕܹܝܢ ܕܒ݂ܝܼ ܥܵܡܲܪ. ܗܘܼ ܥܵܒܹܿܕ݂ ܥܒ݂ܵܕܹ̈ܐ ܗܵܠܹܝܢ.

¹¹ ܗܲܝܡܸܢܘ ܕܐܸܢܵܐ ܒܐܵܒ݂ܝ. ܘܐܵܒ݂ܝ ܒܝܼ. ܘܐܸܠܵܐ. ܐܵܦܸܢ ܡܛܠ ܥܒ݂ܵܕܹ̈ܐ ܗܲܝܡܸܢܘ.

¹² ܐܵܡܹܝܢ ܐܵܡܹܝܢ. ܐܵܡܲܪ ܐ̄ܢܵܐ ܠܟ݂ܘܿܢ. ܕܡܲܢ ܕܲܡܗܲܝܡܸܢ ܒܝܼ. ܥܒ݂ܵܕܹ̈ܐ ܐܲܝܠܹܝܢ ܕܐܸܢܵܐ ܥܵܒܹܿܕ݂ ܐ̄ܢܵܐ ܐܵܦ ܗܘܼ ܢܸܥܒܸܕ݂. ܘܲܕ݂ܝܲܬܝܼܪܝܼܢ ܡܸܢ ܗܵܠܹܝܢ ܢܸܥܒܸܕ݂. ܕܐܸܢܵܐ ܠܘܵܬ݂ ܐܲܒ݂ܵܐ ܐܵܙܹܠ ܐ̄ܢܵܐ.

¹³ ܘܡܸܕܸܡ ܕܬܸܫܐܠܘܼܢ ܒܫܹܡܝ. ܐܸܥܒܸܕ݂ ܠܟ݂ܘܿܢ. ܕܢܸܫܬܲܒܲܚ ܐܲܒ݂ܵܐ ܒܲܒ݂ܪܹܗ.

¹⁴ ܘܐܸܢ ܬܸܫܐܠܘܼܢܵܢܝ ܒܫܹܡܝ ܐܸܢܵܐ ܥܵܒܹܿܕ݂ܢܵܐ.

¹⁵ ܐܸܢ ܪܵܚܡܝܼܢ ܐܢ̄ܬܘܿܢ ܠܝܼ. ܦܘܼܩܕܵܢܲܝ̈ ܛܲܪܘ.

¹⁶ ܘܐܸܢܵܐ ܐܸܒ݂ܥܹܐ ܡܸܢ ܐܵܒ݂ܝ. ܘܐܲܚܪܹܢܵܐ ܦܵܪܲܩܠܹܝܛܵܐ ܢܸܬܸ݁ܠ ܠܟ݂ܘܿܢ ܕܢܸܗܘܹܐ ܥܲܡܟ݂ܘܿܢ ܠܥܵܠܲܡ.

¹⁷ ܪܘܼܚܵܐ ܕܲܫܪܵܪܵܐ. ܗܵܘ ܕܥܵܠܡܵܐ ܠܵܐ ܡܸܫܟܲܚ ܠܲܡܩܲܒܵܠܘܼܬܹܗ. ܡܛܠ ܕܠܵܐ ܚܙܵܝܗܝ. ܘܠܵܐ ܝܲܕ݂ܥܹܗ. ܐܲܢ̄ܬ݁ܘܿܢ ܕܹܝܢ ܝܵܕ݂ܥܝܼܢ ܐܢ̄ܬܘܿܢ ܠܹܗ. ܕܲܠܘܵܬ݂ܟ݂ܘܿܢ ܥܵܡܲܪ. ܘܲܒ݂ܟ݂ܘܿܢ ܗ̄ܘܼ.

¹⁸ ܠܵܐ ܫܵܒܹܩ ܐ̄ܢܵܐ ܠܟ݂ܘܿܢ ܝܲܬ݂ܡܹ̈ܐ. ܐܵܬܹܐ ܐ̄ܢܵܐ ܓܹܝܪ ܠܘܵܬ݂ܟ݂ܘܿܢ. ܩܲܠܝܼܠ ܐ̄ܚܪܹܝܢ.

¹⁹ ܘܥܵܠܡܵܐ. ܠܵܐ ܚܵܙܹܐ ܠܝܼ. ܐܲܢ̄ܬ݁ܘܿܢ ܕܹܝܢ. ܬܸܚܙܘܿܢܵܢܝ. ܕܐܸܢܵܐ ܚܲܝ. ܐܵܦ ܐܲܢ̄ܬ݁ܘܿܢ ܬܸܚܘܿܢ.

²⁰ ܒܗܵܘ ܝܵܘܡܵܐ ܬܸܕ݂ܥܘܼܢ. ܕܐܸܢܵܐ ܒܐܵܒ݂ܝ ܘܐܲܢ̄ܬ݁ܘܿܢ ܒܝܼ ܐܲܢ̄ܬܘܿܢ ܘܐܸܢܵܐ ܒܟ݂ܘܿܢ ܐ̄ܢܵܐ.

²¹ ܡܲܢ ܕܐܝܼܬ݂ ܠܘܵܬܹܗ ܦܘܼܩܕܵܢܲܝ̈. ܘܢܵܛܲܪ ܠܗܘܿܢ. ܗܵܘ ܗܘܼ ܡܲܚܸܒ݂ ܠܝܼ. ܗܵܘ ܕܹܝܢ ܕܪܵܚܹܿܡ ܠܝܼ. ܢܸܬ݂ܪܚܸܡ ܡܸܢ ܐܵܒ݂ܝ. ܘܐܸܢܵܐ ܐܹܪܚܡܝܼܘܗܝ. ܘܐܹܚܵܘܝܼܘܗܝ ܢܲܦ̮ܫܝ.

²² ܐܵܡܲܪ ܠܹܗ ܝܼܗܘܼܕ݂ܵܐ. ܠܵܐ ܗܘ̣ܵܐ ܣܟܲܪܝܘܿܛܵܐ. ܡܵܪܝ. ܡܵܢܵܘ ܠܲܢ ܥܬ݂ܝܼܕ݂ ܐܲܢ̄ܬ݁ ܠܲܡܚܵܘܵܝܘܼ ܢܲܦ̮ܫܵܟ݂. ܘܠܵܐ ܗܘ̣ܵܐ ܠܥܵܠܡܵܐ.

²³ ܥܢܵܐ ܝܼܫܘܿܥ ܘܐܸܡܲܪ ܠܹܗ. ܡܲܢ ܕܪܵܚܹܿܡ ܠܝܼ. ܡܸܠܲܬ݂ܝ ܢܵܛܲܪ. ܘܐܵܒ݂ܝ ܢܸܪܚܡܝܼܘܗܝ. ܘܲܠܘܵܬܹܗ ܐܵܬܹ݁ܝܢ ܚ̱ܢܲܢ. ܘܐܵܘܵܢܵܐ ܠܘܵܬܹܗ ܥܵܒ݂ܕܝܼܢ ܚ̱ܢܲܢ.

²⁴ ܗܵܘ ܕܹܝܢ ܕܠܵܐ ܪܵܚܹܡ ܠܝܼ. ܡܸܠܲܬ݂ܝ ܠܵܐ ܢܵܛܲܪ. ܘܡܸܠܬ݂ܵܐ ܗܵܕܹܐ ܕܫܵܡܥܝܼܢ ܐܢ̄ܬܘܿܢ. ܠܵܐ ܗܘܸܵܬ݂ ܕܝܼܠܝ. ܐܸܠܵܐ ܕܐܲܒ݂ܵܐ ܕܫܲܕܪܲܢܝ.

²⁵ ܗܵܠܹܝܢ ܡܲܠܠܹܬ݂ ܥܲܡܟ݂ܘܿܢ. ܟܲܕ݂ ܠܘܵܬ݂ܟ݂ܘܿܢ ܐܝܼܬܲܝ.

²⁶ ܗܵܘ ܕܹܝܢ ܦܵܪܲܩܠܹܝܛܵܐ ܪܘܼܚܵܐ ܕܩܘܼܕ݂ܫܵܐ: ܗܵܘ ܕܲܡܫܲܕܲܪ ܐܵܒ݂ܝ ܒܫܹܡܝ. ܗܘܼ ܢܲܠܸܦܟ݂ܘܿܢ ܟܠܡܸܕ݂ܡ. ܘܗܘܼ ܢܲܥܗܸܕ݂ܟ݂ܘܿܢ. ܟܠܡܵܐ ܕܐܵܡܲܪ ܐ̄ܢܵܐ ܠܟ݂ܘܿܢ.

²⁷ ܫܠܵܡܵܐ ܫܵܒܹܩ ܐ̄ܢܵܐ ܠܟ݂ܘܿܢ. ܫܠܵܡܵܐ ܕܝܼܠܝ ܝܵܗܹܒ݂ ܐ̄ܢܵܐ ܠܟ݂ܘܿܢ. ܠܵܐ ܗܘ̣ܵܐ ܐܲܝܟܲܢܵܐ ܕܝܵܗܹܒ݂ ܥܵܠܡܵܐ. ܐܸܢܵܐ ܝܵܗܹܒ݂ ܐ̄ܢܵܐ ܠܟ݂ܘܿܢ. ܠܵܐ ܢܸܬ݁ܕܵܘܲܕ݂ ܠܸܒܟ݂ܘܿܢ ܘܠܵܐ ܢܸܕ݂ܚܲܠ.

²⁸ ܫܡܲܥܬ݁ܘܿܢ ܕܐܸܢܵܐ ܐܸܡܪܹܬ݂ ܠܟ݂ܘܿܢ. ܕܐܵܙܹܠ ܐ̄ܢܵܐ ܘܐܵܬܹܐ ܐ̄ܢܵܐ ܠܘܵܬ݂ܟ݂ܘܿܢ. ܐܸܠܘܼ ܪܵܚܡܝܼܢ ܗܘܲܝܬ݁ܘܿܢ ܠܝܼ. ܚܵܕ݂ܝܢ ܗܘܲܝܬ݁ܘܿܢ ܕܐܵܙܹܠ ܐ̄ܢܵܐ ܠܘܵܬ݂ ܐܵܒ݂ܝ. ܕܐܵܒ݂ܝ. ܪܲܒ ܗܘܼ ܡܹܢܝ.

²⁹ ܘܗܵܫܵܐ ܗܵܐ ܐܸܡܪܹܬ݂ ܠܟ݂ܘܿܢ. ܥܲܕ݂ܠܵܐ ܢܸܗܘܹܐ. ܕܡܵܐ ܕܲܗܘܵܐ ܬܗܲܝܡܢܘܼܢ.

³⁰ ܡܸܟܹܝܠ ܠܵܐ ܐܹܡܲܠܸܠ ܥܲܡܟ݂ܘܿܢ ܣܲܓܝܼ̈ܐܵܬ݂ܵܐ. ܐܵܬܹܐ ܓܹܝܪ ܐܲܪܟܘܿܢܹܗ ܕܥܵܠܡܵܐ. ܘܒ݂ܝܼ ܠܲܝܬ݁ ܠܹܗ ܡܸܕܸܡ.

³¹ ܐܸܠܵܐ ܕܢܸܕܲܥ ܥܵܠܡܵܐ. ܕܪܵܚܹܿܡ ܐ̄ܢܵܐ ܠܐܵܒ݂ܝ. ܘܐܲܝܟܲܢܵܐ ܕܦܲܩܕܲܢܝ ܐܵܒ݂ܝ. ܗܵܟ݂ܘܵܬ݂ ܥܵܒܹܿܕ݂ ܐ̄ܢܵܐ. ܩܘܼܡܘ ܢܹܐܙܲܠ ܡܸܟܵܐ.

15

¹ ܐܸܢܵܐ ܐ̄ܢܵܐ. ܓ݁ܦܸܬܵܐ ܕܲܫܪܵܪܵܐ. ܘܐܵܒ݂ܝ ܗܘܼ ܦܲܠܵܚܵܐ.

² ܟܠ ܫܒܸܫܬܵܐ ܕܒ݂ܝܼ ܦܹܐܪܹ̈ܐ ܠܵܐ ܝܵܗܒܵܐ. ܫܵܩܹܠ ܠܵܗ̇. ܘܐܲܝܕ݂ܵܐ ܕܝܵܗܒܵܐ ܦܹܐܪܹ̈ܐ. ܡܕ݂ܲܟܹܐ ܠܵܗ: ܕܦܹܐܪܹ̈ܐ ܣܲܓܝܼܐܹ̈ܐ ܬܲܝܬܹܐ.

³ ܐܲܢ̄ܬ݁ܘܿܢ ܡܸܢ ܟܲܕܘܼ ܕܟܹܝܢ ܐܢ̄ܬܘܿܢ. ܡܛܠ ܡܸܠܬ݂ܵܐ ܕܡܲܠܠܹܬ݂ ܥܲܡܟ݂ܘܿܢ.

⁴ ܩܵܘܘ ܒܝܼ. ܘܐܸܢܵܐ ܒܟ݂ܘܿܢ. ܐܲܝܟܲܢܵܐ ܕܲܫܒܸܫܬܵܐ ܠܵܐ ܡܸܫܟܚܵܐ ܕܬܸܬܸ݁ܠ ܦܹܐܪܹ̈ܐ ܡܸܢ ܢܲܦ̮ܫܵܗ̇. ܐܸܠܵܐ ܡܩܵܘܝܵܐ ܒܲܓ݂ܦܸܬܵܐ. ܗܵܟܲܢܵܐ ܐܵܦ ܠܵܐ ܐܲܢ̄ܬܘܿܢ. ܐܸܠܵܐ ܬܩܵܘܘܿܢ ܒܝܼ.

⁵ ܐܸܢܵܐ ܐ̄ܢܵܐ ܓ݁ܦܸܬܵܐ. ܘܐܲܢ̄ܬ݁ܘܿܢ ܫܒܸܫܬܹ̈ܐ. ܡܲܢ ܕܲܡܩܵܘܹܐ ܒܝܼ ܘܐܸܢܵܐ ܒܹܗ. ܗܵܢܵܐ ܡܲܝܬܹܐ ܦܹܐܪܹ̈ܐ ܣܲܓܝܼܐܹ̈ܐ. ܡܛܠ ܕܲܕ݂ܠܵܐ ܐܸܢܵܐ. ܠܵܐ ܡܸܫܟܿܚܝܼܢ ܐܢ̄ܬܘܿܢ ܠܡܸܥܒܲܕ݂ ܡܸܕܸܡ.

⁶ ܐܸܠܵܐ ܕܹܝܢ ܐ̄ܢܵܫ ܡܩܵܘܹܐ ܒܝܼ. ܡܸܫܬ݁ܕܹܐ ܠܒܲܪ. ܐܲܝܟ݂ ܫܒܸܫܬܵܐ ܕܝܵܒ݂ܫܵܐ ܘܠܵܩܛܝܼܢ ܪܵܡܹܝܢ ܠܵܗ̇ ܒܢܘܼܪܵܐ ܕܬܹܐܩܲܕ݂.

⁷ ܐܸܢ ܕܹܝܢ ܬܩܵܘܘܿܢ ܒܝܼ. ܘܡܸܠܲܝ̈ ܢܩܵܘ̈ܝܵܢ ܒܟ݂ܘܿܢ. ܟܠܡܵܐ ܕܬܸܨܒܿܘܼܢ ܠܡܸܫܐܲܠ. ܢܸܗܘܹܐ ܠܟ݂ܘܿܢ.

⁸ ܒܗܵܕܹܐ ܡܸܫܬܲܒܲܚ ܐܲܒ݂ܵܐ. ܕܦܹܐܪܹ̈ܐ ܣܲܓܝܼܐܹ̈ܐ ܬܲܝܬ݁ܘܿܢ. ܘܬܸܗܘܘܿܢ ܬܲܠܡܝܼ̈ܕ݂ܲܝ.

⁹ ܐܲܝܟܲܢܵܐ ܕܐܲܚܒܲܢܝ ܐܵܒ݂ܝ. ܐܵܦ ܐܸܢܵܐ ܐܲܚܸܒ݂ܬ݁ܟ݂ܘܿܢ. ܩܵܘܘ ܒܪܸܚܡܲܬ݂ܝ ܕܝܼܠܝ.

¹⁰ ܐܸܢ ܦܘܼܩܕܵܢܲܝ̈ ܬܸܛܪܘܼܢ. ܬܩܵܘܘܢ ܒܚܘܼܒܵܐ ܕܝܼܠܝ. ܐܲܝܟܲܢܵܐ ܕܐܸܢܵܐ ܢܸܛܪܹܬ݂ ܦܘܼܩܕܵܢܵܘ̈ܗܝ ܕܐܵܒ݂ܝ ܘܲܡܩܵܘܹܐ ܐ̄ܢܵܐ ܒܚܘܼܒܹܗ.

¹¹ ܗܵܠܹܝܢ ܡܲܠܠܹܬ݂ ܥܲܡܟ݂ܘܿܢ. ܕܚܲܕ݂ܘܲܬ݂ܝ ܬܸܗܘܹܐ ܒܟ݂ܘܿܢ. ܘܬܸܫܬܲܡܠܹܐ ܚܲܕ݂ܘܲܬ݂ܟ݂ܘܿܢ.

¹² ܗܵܢܵܘ ܦܘܼܩܕܵܢܝ. ܕܬܲܚܒ݂ܘܢ ܚܲܕ݂ ܠܚܲܕ݂. ܐܲܝܟܲܢܵܐ ܕܐܸܢܵܐ ܐܲܚܸܒ݂ܬ݁ܟ݂ܘܿܢ.

¹³ ܚܘܼܒܵܐ ܕܪܲܒ ܡܸܢ ܗܵܢܵܐ ܠܲܝܬ݁. ܕܐ̄ܢܵܫ ܢܲܦ̮ܫܹܗ ܢܣܝܼܡ ܚܠܵܦ ܪ̈ܵܚܡܵܘܗܝ.

¹⁴ ܐܲܢ̄ܬ݁ܘܿܢ ܪ̈ܵܚܡܲܝ ܐܲܢ̄ܬܘܿܢ. ܐܸܢ ܬܸܥܒܕ݂ܘܼܢ ܟܠ ܕܲܡܦܲܩܸܕ݂ ܐ̄ܢܵܐ ܠܟ݂ܘܿܢ.

¹⁵ ܠܵܐ ܡܸܟܹܝܠ ܩܵܪܹܐ ܐ̄ܢܵܐ ܠܟ݂ܘܿܢ ܥܲܒ݂ܕܹ̈ܐ. ܡܛܠ ܕܥܲܒ݂ܕܵܐ ܠܵܐ ܝܵܕ݂ܲܥ ܡܵܢܵܐ ܥܵܒܹܿܕ݂ ܡܵܪܹܗ. ܪܵܚܡܲܝ ܕܹܝܢ ܩܪܹܝܬ݂ܟ݂ܘܿܢ. ܡܛܠ ܕܟܠ ܕܫܸܡܥܹܬ݂ ܡܸܢ ܐܵܒ݂ܝ. ܐܵܘܕܲܥܬ݁ܟ݂ܘܿܢ.

¹⁶ ܠܵܐ ܗܘ̣ܵܐ ܐܲܢ̄ܬ݁ܘܿܢ ܓܒܲܝܬ݁ܘܿܢܵܢܝ. ܐܸܠܵܐ ܐܸܢܵܐ ܗ̄ܘܼ ܓܒܹܝܼܬ݂ܟ݂ܘܿܢ. ܘܣܵܡܬ݁ܟ݂ܘܿܢ. ܕܐܵܦ ܐܲܢ̄ܬ݁ܘܿܢ ܬܹܐܙܠ̄ܘܼܢ ܬܲܝܬ݁ܘܿܢ ܦܹܐܪܹ̈ܐ. ܘܦܹܐܪܲ̈ܝܟܘܿܢ ܢܩܵܘܘܢ. ܕܟܠ ܕܬܸܫܐܠܘܼܢ ܠܐܵܒ݂ܝ ܒܫܹܡܝ. ܢܸܬܸ݁ܠ ܠܟ݂ܘܿܢ.

¹⁷ ܗܵܠܹܝܢ ܡܦܲܩܸܕ݂ ܐ̄ܢܵܐ ܠܟ݂ܘܿܢ. ܕܬܲܚܒ݂ܘܼܢ ܚܲܕ݂ ܠܚܲܕ݂.

¹⁸ ܘܐܸܢ ܥܵܠܡܵܐ ܣܵܢܹܐ ܠܟ݂ܘܿܢ. ܕܲܥܘ ܕܲܩܕ݂ܵܡܲܝܟܿܘܿܢ ܠܝܼ ܣܢܵܐ.

¹⁹ ܘܐܸܠܘܼ ܡܸܢ ܥܵܠܡܵܐ ܗ̄ܘܲܝܬ݁ܘܢ. ܥܵܠܡܵܐ ܠܕ݂ܝܼܠܹܗ ܪܵܚܹܡ ܗ̄ܘܵܐ. ܐܸܠܵܐ ܠܵܐ ܗܘܲܝܬ݁ܘܿܢ ܡܸܢ ܥܵܠܡܵܐ. ܐܸܢܵܐ ܓܹܝܪ ܓܒܹܝܬ݂ܟ݂ܘܿܢ ܡܸܢ ܥܵܠܡܵܐ. ܡܛܠ ܗܵܢܵܐ ܣܵܢܹܐ ܠܟ݂ܘܿܢ ܥܵܠܡܵܐ.

²⁰ ܥܗܲܕ݂ܘ ܡܸܠܬ݂ܵܐ ܕܐܸܢܵܐ ܐܸܡܪܹܬ݂ ܠܟ݂ܘܿܢ. ܕܠܲܝܬ݁ ܥܲܒ݂ܕܵܐ ܕܪܲܒ ܡܸܢ ܡܵܪܹܗ. ܐܸܢ ܠܝܼ ܪܕ݂ܲܦܘ. ܐܵܦ ܠܟ݂ܘܿܢ ܢܸܪܕܦܘܼܢ. ܘܐܸܢ ܡܸܠܲܬ݂ܝ ܢܛܲܪܘ. ܐܵܦ ܕܝܼܠܟ݂ܘܿܢ ܢܸܛܪܘܼܢ.

²¹ ܐܸܠܵܐ ܗܵܠܹܝܢ ܟܠܗܹܝܢ ܢܸܥܒܕ݂ܘܼܢ ܒܟ݂ܘܿܢ. ܡܛܠ ܫܹܡܝ ܕܝܼܠܝ. ܕܠܵܐ ܝܵܕ݂ܥܝܼܢ ܠܡܲܢ ܕܫܲܕܪܲܢܝ.

²² ܐܸܠܘܼ ܐܸܢܵܐ ܠܵܐ ܐܸܬܹܝܬ݂ ܡܲܠܠܹܬ݂ ܥܲܡܗܘܿܢ. ܠܲܝܬ݁ ܗ̄ܘܵܬ݂ ܠܗܘܿܢ ܚܛܝܼܬ݂ܵܐ. ܗܵܫܵܐ ܕܹܝܢ ܠܲܝܬ݁ ܠܗܘܿܢ ܥܸܠܬ݂ܵܐ ܥܲܠ ܐܲܦܲܝ̈ ܚܛܝܼܬ݂ܗܘܿܢ.

²³ ܡܲܢ ܕܠܝܼ ܣܵܢܹܐ. ܘܐܵܦ ܠܐܵܒ݂ܝ ܣܵܢܹܐ.

²⁴ ܘܐܸܠܘܼ ܥܒ݂ܵܕܹ̈ܐ ܠܵܐ ܥܸܒ݂ܕܹܬ݂ ܠܥܹܢܲܝ̈ܗܘܿܢ: ܐܲܝܠܹܝܢ ܕܐ̄ܢܵܫ ܐ̄ܚܪܹܝܢ ܠܵܐ ܥܒܲܕ݂. ܠܲܝܬ݁ ܗܘ̣ܵܐ ܠܗܘܿܢ ܚܛܝܼܬ݂ܵܐ. ܗܵܫܵܐ ܕܹܝܢ ܘܲܚܙܵܘ. ܘܲܣܢܵܘ. ܐܵܦ ܠܝܼ ܘܐܵܦ ܠܐܵܒ݂ܝ.

²⁵ ܕܬܸܬ݂ܡܲܠܹܐ ܡܸܠܬ݂ܵܐ ܕܲܟ݂ܬ݂ܝܼܒ݂ܵܐ ܒܢܵܡܘܿܣܗܘܿܢ ܕܲܣܢܲܐܘܼܢܝ ܡܲܓܵܢ.

²⁶ ܡܵܐ ܕܹܝܢ ܕܐܸܬ݂ܵܐ ܦܵܪܲܩܠܹܝܛܵܐ: ܗܵܘ ܕܐܸܢܵܐ ܡܫܲܕܲܪ ܐ̄ܢܵܐ ܠܟ݂ܘܿܢ ܡܸܢ ܠܘܵܬ݂ ܐܵܒ݂ܝ. ܪܘܼܚܵܐ ܕܲܫܪܵܪܵܐ: ܗܵܘ ܕܡܸܢ ܠܘܵܬ݂ ܐܵܒ݂ܝ ܢܵܦܹܩ. ܗܘܼ ܢܲܣܗܸܕ݂ ܥܠܲܝ.

²⁷ ܐܵܦ ܐܲܢ̄ܬ݁ܘܿܢ ܣܵܗܕܝܼܢ ܐܢ̄ܬܘܿܢ. ܕܡܸܢ ܫܘܼܪܵܝܵܐ. ܥܲܡܝ ܐܲܢ̄ܬܘܿܢ.

16

¹ ܗܵܠܹܝܢ ܡܲܠܠܹܬ݂ ܥܲܡܟ݂ܘܿܢ ܕܠܵܐ ܬܸܬ݂ܟܲܫܠܘܼܢ.

² ܢܲܦܩܘܼܢܵܟ݂ܘܿܢ ܓܹܝܪ ܡܸܢ ܟܢ̈ܘܼܫܵܬ݂ܗܘܿܢ. ܘܬܹܐܬܹܐ ܫܵܥܬ݂ܵܐ ܕܟܠ ܕܢܸܩܛܘܿܠܟ݂ܘܿܢ. ܢܸܣܒܲܪ ܕܩܘܼܪܒܵܢܵܐ ܡܩܲܪܸܒ݂ ܠܐܲܠܵܗܵܐ.

³ ܘܗܵܠܹܝܢ ܢܸܥܒܕ݂ܘܼܢ. ܡܛܠ ܕܠܵܐ ܝܼܕ݂ܲܥܘ ܘܠܵܐ ܠܵܐܒ݂ܝ. ܘܠܵܐ ܠܝܼ.

⁴ ܗܵܠܹܝܢ ܡܲܠܠܹܬ݂ ܥܲܡܟ݂ܘܿܢ: ܕܡܵܐ ܕܐܸܬ݂ܵܐ ܥܸܕܵܢܗܹܝܢ ܬܸܥܗܕܪܘܼܢ ܐܸܢܹܝܢ. ܕܐܸܢܵܐ ܐܸܡܪܹܬ݂ ܠܟ݂ܘܿܢ ܗܵܠܹܝܢ ܕܹܝܢ ܡܸܢ ܩܕ݂ܝܼܡ ܠܵܐ ܐܸܡܪܹܬ݂ ܠܟ݂ܘܿܢ ܕܥܲܡܟ݂ܘܿܢ ܗ̄ܘܹܝܬ݂.

⁵ ܗܵܫܵܐ ܕܹܝܢ ܐܵܙܹܠ ܐ̄ܢܵܐ ܠܘܵܬ݂ ܡܲܢ ܕܫܲܕܪܲܢܝ. ܘܠܵܐ ܐ̄ܢܵܫ ܡܸܢܟ݂ܘܿܢ ܡܫܲܐܸܠ ܠܝܼ. ܠܐܲܝܟܵܐ ܐܵܙܹܠ ܐܲܢ̄ܬ݁.

⁶ ܐܸܡܪܹܬ݂ ܠܟ݂ܘܿܢ ܓܹܝܪ ܗܵܠܹܝܢ. ܘܐܸܬ݂ܵܬ݂ ܟܲܪܝܘܼܬ݂ܵܐ. ܘܲܡܠܵܬ݂ ܠܸܒܵܘܵܬ݂̈ܟ݂ܘܿܢ.

⁷ ܐܸܠܵܐ ܐܸܢܵܐ ܫܪܵܪܵܐ ܐܵܡܲܪ ܐ̄ܢܵܐ ܠܟ݂ܘܿܢ. ܕܦܲܩܵܚ ܠܟ݂ܘܿܢ. ܕܐܸܢܵܐ ܐܹܙܲܠ. ܐܸܢ ܓܹܝܪ ܐܸܢܵܐ ܠܵܐ ܐܵܙܹܠ ܐ̄ܢܵܐ. ܦܵܪܲܩܠܹܝܛܵܐ ܠܵܐ ܐܵܬܹܐ ܠܘܵܬ݂ܟ݂ܘܿܢ. ܐܸܢ ܕܹܝܢ ܐܹܙܲܠ. ܐܹܫܲܕܪܝܼܘܗܝ ܠܘܵܬ݂ܟ݂ܘܿܢ.

⁸ ܘܡܵܐ ܕܐܸܬ݂ܵܐ ܗܘܼ ܢܲܟܣܝܼܘܗܝ ܠܥܵܠܡܵܐ. ܥܲܠ ܚܛܝܼܬ݂ܵܐ ܘܥܲܠ ܙܲܕܝܼܩܘܼܬ݂ܵܐ ܘܥܲܠ ܕܝܼܢܵܐ.

⁹ ܥܲܠ ܚܛܝܼܬ݂ܵܐ. ܕܠܵܐ ܡܗܲܝܡܢܝܼܢ ܒܝܼ.

¹⁰ ܥܲܠ ܙܲܕܝܼܩܘܼܬ݂ܵܐ ܕܹܝܢ. ܕܲܠܘܵܬ݂ ܐܵܒ݂ܝ ܐܵܙܹܠ ܐ̄ܢܵܐ. ܘܠܵܐ ܬܘܼܒ݂ ܚܵܙܹܝܢ ܐܢ̄ܬܘܿܢ ܠܝܼ.

¹¹ ܥܲܠ ܕܝܼܢܵܐ ܕܹܝܢ. ܕܐܲܪܟܘܿܢܵܐ ܕܥܵܠܡܵܐ ܗܵܢܵܐ ܕܝܼܢ ܗ̄ܘܼ.

¹² ܬܘܼܒ݂ ܣܲܓܝܼ ܐܝܼܬ݂ ܠܝܼ ܠܡܹܐܡܲܪ ܠܟ݂ܘܿܢ. ܐܸܠܵܐ ܠܵܐ ܡܸܫܟܿܚܝܼܢ ܐܢ̄ܬܘܿܢ ܠܡܹܐܚܲܕ݂ ܗܵܫܵܐ.

¹³ ܡܵܐ ܕܐܸܬ݂ܵܐ ܕܹܝܢ ܪܘܼܚܵܐ ܕܲܫܪܵܪܵܐ. ܗܘܼ ܢܕ݂ܲܒܲܪܟ݂ܘܿܢ ܒܟ݂ܠܹܗ ܫܪܵܪܵܐ. ܠܵܐ ܓܹܝܪ ܢܡܲܠܸܠ ܡܸܢ ܪܸܥܝܵܢ ܢܲܦ̮ܫܹܗ. ܐܸܠܵܐ ܟܠ ܕܢܸܫܡܲܥ ܗܵܘ ܢܡܲܠܸܠ. ܘܲܥ̈ܬ݂ܝܼܕ݂ܵܬ݂ܵܐ ܢܵܘܕܲܥܟ݂ܘܿܢ.

¹⁴ ܘܗܘܼ ܢܫܲܒܚܲܢܝ. ܡܛܠ ܕܡܸܢ ܕܝܼܠܝ ܢܸܣܲܒ݂. ܘܲܢܚܵܘܹܝܟ݂ܘܿܢ.

¹⁵ ܟܠ ܡܸܕܸܡ ܕܐܝܼܬ݂ ܠܐܵܒ݂ܝ. ܕܝܼܠܝ ܗ̄ܘܼ. ܡܛܠ ܗܵܢܵܐ ܐܸܡܪܹܬ݂ ܠܟ݂ܘܿܢ. ܕܡܸܢ ܕܝܼܠܝ ܢܸܣܲܒ݂. ܘܲܢܚܵܘܹܝܟ݂ܘܿܢ.

¹⁶ ܩܲܠܝܼܠ. ܘܠܵܐ ܬܸܚܙܘܿܢܵܢܝ. ܘܬ݂ܘܼܒ݂ ܩܲܠܝܼܠ. ܘܬܸܚܙܘܿܢܵܢܝ. ܕܐܵܙܹܠ ܐ̄ܢܵܐ ܠܘܵܬ݂ ܐܲܒ݂ܵܐ.

¹⁷ ܘܐܸܡܲܪܘ ܗ̄ܘܼܵܘ ܬܲܠܡܝܼܕ݂ܵܘ̈ܗܝ ܚܲܕ݂ ܠܚܲܕ݂. ܡܵܢܵܐ ܗܝ ܗܵܕܹܐ ܕܐܵܡܲܪ ܠܲܢ ܕܩܲܠܝܼܠ ܘܠܵܐ ܬܸܚܙܘܿܢܵܢܝ ܘܬ݂ܘܼܒ݂ ܩܲܠܝܼܠ ܘܬܸܚܙܘܿܢܵܢܝ. ܘܕ݂ܐܵܙܹܠ ܐ̄ܢܵܐ ܠܘܵܬ݂ ܐܵܒ݂ܝ.

¹⁸ ܘܐܵܡܪܝܼܢ ܗ̄ܘܼܵܘ. ܡܵܢܵܐ ܗܝ ܗܵܕܹܐ ܩܲܠܝܼܠ ܕܐܵܡܲܪ. ܠܵܐ ܝܵܕ݂ܥܝܼܢܲܢ ܡܵܢܵܐ ܡܡܲܠܸܠ.

¹⁹ ܝܼܫܘܿܥ ܕܹܝܢ ܝܼܕ݂ܲܥ ܕܒ݂ܵܥܹܝܢ ܗ̄ܘܼܵܘ ܠܲܡܫܲܐܵܠܘܼܬܹܗ. ܘܐܸܡܲܪ ܠܗܘܿܢ. ܥܲܠ ܗܵܕܹܐ ܒܵܥܹܝܢ ܐܢ̄ܬܘܿܢ ܥܲܡ ܚܕ݂ܵܕܹ̈ܐ ܕܐܸܡܪܹܬ݂ ܠܟ݂ܘܿܢ: ܕܩܲܠܝܼܠ ܘܠܵܐ ܬܸܚܙܘܿܢܵܢܝ: ܘܬ݂ܘܼܒ݂ ܩܲܠܝܼܠ ܘܬܸܚܙܘܿܢܵܢܝ.

²⁰ ܐܵܡܹܝܢ ܐܵܡܹܝܢ. ܐܵܡܲܪ ܐ̄ܢܵܐ ܠܟ݂ܘܿܢ. ܕܬܸܒ݂ܟܿܘܿܢ ܐܲܢ̄ܬ݁ܘܿܢ ܘܬܹܐܠܘܼܢ. ܘܥܵܠܡܵܐ ܢܸܚܕܹܐ. ܘܲܠܟ݂ܘܿܢ ܬܸܟ݂ܪܹܐ. ܐܸܠܵܐ ܟܲܪܝܘܼܬ݂ܟ݂ܘܿܢ ܠܚܲܕ݂ܘܼܬ݂ܵܐ ܬܸܗܘܹܐ.

²¹ ܐܲܢ̄ܬ݁ܬ݂ܵܐ ܡܵܐ ܕܝܵܠܕܵܐ. ܟܵܪܝܵܐ ܠܵܗ̇ ܕܲܡܛܵܐ ܝܵܘܡܵܐ ܕܡܵܘܠܵܕ݂ܵܗ̇. ܡܵܐ ܕܝܸܠܕܲܬ݂ ܕܹܝܢ ܒܪܵܐ. ܠܵܐ ܥܵܗܕܵܐ ܐܘܼܠܨܵܢܵܗ̇: ܡܛܠ ܚܲܕ݂ܘܼܬ݂ܵܐ ܕܐܬ݂ܝܼܠܸܕ݂ ܒܲܪܢܵܫܵܐ ܒܥܵܠܡܵܐ.

²² ܐܵܦ ܐܲܢ̄ܬ݁ܘܿܢ ܗܵܫܵܐ ܟܲܪܝܵܐ ܠܟ݂ܘܿܢ. ܬܘܼܒ݂ ܕܹܝܢ ܐܸܚܙܹܝܟ݂ܘܿܢ. ܘܢܸܚܕܐ ܠܸܒܟ݂ܘܿܢ. ܘܚܲܕ݂ܘܲܬ݂ܟ݂ܘܿܢ. ܠܵܐ ܐ̄ܢܵܫ ܢܵܣܹܒ݂ ܡܸܢܟ݂ܘܿܢ.

²³ ܘܲܒ݂ܗܵܘ ܝܵܘܡܵܐ ܠܝܼ ܠܵܐ ܬܸܫܐܠܘܼܢ ܡܸܕܸܡ. ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܟܠ ܡܸܕܸܡ ܕܬܸܫܐܠܘܼܢ ܠܐܵܒ݂ܝ ܒܫܹܡܝ. ܢܸܬܸ݁ܠ ܠܟ݂ܘܿܢ.

²⁴ ܥܕ݂ܲܡܵܐ ܠܗܵܫܵܐ ܠܵܐ ܫܐܸܠܬ݁ܘܿܢ ܡܸܕܸܡ ܒܫܹܡܝ. ܫܐܲܠܘ ܘܬܸܣܒ݂ܘܢ. ܕܬܸܗܘܹܐ ܚܲܕ݂ܘܲܬ݂ܟ݂ܘܿܢ ܡܫܲܡܠܝܵܐ.

²⁵ ܗܵܠܹܝܢ ܒܦܸܠ̈ܐܵܬ݂ܵܐ ܡܲܠܠܹܬ݂ ܥܲܡܟ݂ܘܿܢ. ܐܵܬ݂ܝܵܐ ܕܹܝܢ ܫܵܥܬ݂ܵܐ. ܐܸܡܲܬ݂ܝ ܕܠܵܐ ܐܹܡܲܠܸܠ ܥܲܡܟ݂ܘܿܢ ܒܦܸܠ̈ܐܵܬ݂ܵܐ. ܐܸܠܵܐ ܥܹܝܢ ܒܲܓ݂ܠܹܐ ܐܹܒܲܕܸܩ ܠܟ݂ܘܿܢ ܥܲܠ ܐܲܒ݂ܵܐ.

²⁶ ܒܗܵܘ ܝܵܘܡܵܐ ܕܬܸܫܐܠܘܼܢ ܒܫܹܡܝ. ܘܠܵܐ ܐܵܡܲܪ ܐ̄ܢܵܐ ܠܟ݂ܘܿܢ ܕܐܸܢܵܐ ܐܸܒ݂ܥܹܐ ܡܸܢ ܐܲܒ݂ܵܐ ܥܠܲܝܟܿܘܿܢ

²⁷ ܗܘܼ ܓܹܝܪ ܐܲܒ݂ܵܐ ܪܵܚܹܡ ܠܟ݂ܘܿܢ. ܕܐܲܢ̄ܬ݁ܘܿܢ ܪܚܸܡܬ݁ܘܼܢܵܢܝ. ܘܗܲܝܡܸܢܬ݁ܘܿܢ ܕܐܸܢܵܐ ܡܸܢ ܠܘܵܬ݂ ܐܲܠܵܗܵܐ ܢܸܦܩܹܬ݂.

²⁸ ܢܸܦܩܹܬ݂ ܡܸܢ ܠܘܵܬ݂ ܐܲܒ݂ܵܐ. ܘܐܸܬܹܝܬ݂ ܠܥܵܠܡܵܐ. ܘܬ݂ܘܼܒ݂ ܫܵܒܹܩ ܐ̄ܢܵܐ ܠܥܵܠܡܵܐ. ܘܐܵܙܹܠ ܐ̄ܢܵܐ ܠܝܼ ܠܘܵܬ݂ ܐܲܒ݂ܵܐ.

²⁹ ܐܵܡܪܝܼܢ ܠܹܗ ܬܲܠܡܝܼܕ݂ܵܘ̈ܗܝ. ܗܵܐ ܗܵܫܵܐ ܓܲܠܝܵܐܝܼܬ݂ ܡܡܲܠܸܠ ܐܲܢ̄ܬ݁. ܘܦܸܠ̈ܐܵܬ݂ܵܐ ܘܠܵܐ ܚܕ݂ܵܐ ܐܵܡܲܪ ܐܲܢ̄ܬ݁.

³⁰ ܗܵܫܵܐ ܝܵܕ݂ܥܝܼܢ ܚ̱ܢܲܢ ܕܟܠ ܡܸܕܸܡ ܝܵܕ݂ܲܥ ܐܲܢ̄ܬ݁. ܘܠܵܐ ܣܢܝܼܩ ܐܲܢ̄ܬ݁ ܕܐ̄ܢܵܫ ܢܫܲܐܠܵܟ݂. ܒܗܵܕܹܐ ܡܗܲܝܡܢܝܼܢ ܚ̱ܢܲܢ ܕܡܸܢ ܐܲܠܵܗܵܐ ܢܦܲܩܬ݁.

³¹ ܐܵܡܲܪ ܠܗܘܿܢ ܝܼܫܘܿܥ. ܗܲܝܡܸܢܘ.

³² ܕܗܵܐ ܐܵܬ݂ܝܵܐ ܫܵܥܬ݂ܵܐ ܘܗܵܫܵܐ ܐܸܬܲܬܸ. ܕܬܸܬ݂ܒܲܕܪܘܼܢ ܐ̄ܢܵܫ ܠܐܲܬ݂ܪܹܗ. ܘܬܸܫܒܩܘܼܢܵܢܝ ܒܲܠܚܘܿܕܲܝ. ܘܠܵܐ ܗ̄ܘܹܝܬ݂ ܒܲܠܚܘܿܕܲܝ. ܕܐܲܒ݂ܵܐ ܥܲܡܝ ܗ̄ܘܼ.

³³ ܗܵܠܹܝܢ ܐܸܡܪܹܬ݂ ܠܟ݂ܘܿܢ. ܕܒ݂ܝܼ ܢܸܗܘܹܐ ܠܟ݂ܘܿܢ ܫܠܵܡܵܐ. ܒܥܵܠܡܵܐ ܗܵܘܹܐ ܠܟ݂ܘܿܢ ܐܘܼܠܨܵܢܵܐ. ܐܸܠܵܐ ܐܸܬ݂ܠܲܒܲܒ݂ܘ. ܐܸܢܵܐ ܙܟܹܝܬܹܗ ܠܥܵܠܡܵܐ.

17

¹ ܗܵܠܹܝܢ ܡܲܠܸܠ ܝܼܫܘܿܥ. ܘܐܲܪܝܼܡ ܥܲܝܢܵܘ̈ܗܝ ܠܲܫܡܲܝܵܐ. ܘܐܸܡܲܪ. ܐܵܒ݂ܝ. ܐܸܬܲܬܸ ܫܵܥܬ݂ܵܐ. ܫܲܒܲܚ ܒܪܵܟ݂. ܕܲܒ݂ܪܵܟ݂ ܢܫܲܒܚܵܟ݂.

² ܐܲܝܟܲܢܵܐ ܕܝܲܗ̄ܒ݂ܬ݁ ܠܹܗ ܫܘܼܠܛܵܢܵܐ ܥܲܠ ܟܠ ܒܣܲܪ. ܕܟܠ ܡܵܐ ܕܝܲܗ̄ܒ݂ܬ݁ ܠܹܗ. ܢܸܬܸ݁ܠ ܠܹܗ ܚܲܝܹ̈ܐ ܕܲܠܥܵܠܲܡ.

³ ܗܵܠܹܝܢ ܐܸܢܘܿܢ ܕܹܝܢ ܚܲܝܹ̈ܐ ܕܲܠܥܵܠܲܡ. ܕܢܸܕ݂ܥܘܼܢܵܟ݂. ܕܐܲܢ̄ܬ݁ ܐܲܢ̄ܬ݁ ܐܲܠܵܗܵܐ ܕܲܫܪܵܪܵܐ ܒܲܠܚܘܿܕܲܝܟ ܘܡܲܢ ܕܫܲܕܲܪܬ݁ ܝܼܫܘܿܥ ܡܫܝܼܚܵܐ.

⁴ ܐܸܢܵܐ ܫܲܒܲܚܬܵܟ݂ ܒܐܲܪܥܵܐ. ܥܒ݂ܵܕ݂ܵܐ ܗܵܘ ܕܝܲܗ̄ܒ݂ܬ݁ ܠܝܼ ܕܐܸܥܒܸܕ݂. ܫܲܠܸܡܬܹ݁ܗ.

⁵ ܘܗܵܫܵܐ ܫܲܒܲܚܲܝܢܝ ܐܲܢ̄ܬ݁ ܐܵܒ݂ܝ ܠܘܵܬ݂ܵܟ݂: ܒܗܵܘ ܫܘܼܒ݂ܚܵܐ ܕܐܝܼܬ݂ ܗܘ̣ܵܐ ܠܝܼ ܠܘܵܬ݂ܵܟ݂ ܡܸܢ ܩܕ݂ܵܡ ܕܢܸܗܘܹܐ ܥܵܠܡܵܐ.

⁶ ܐܵܘܕܥܹܬ݂ ܫܡܵܟ݂ ܠܲܒܢܲܝ̈ܢܵܫܵܐ: ܗܵܢܘܿܢ ܕܝܲܗ̄ܒ݂ܬ݁ ܠܝܼ ܡܸܢ ܥܵܠܡܵܐ. ܕܝܼܠܵܟ݂ ܗ̄ܘܼܵܘ. ܘܠܝܼ ܝܲܗ̄ܒ݂ܬ݁ ܐܸܢܘܿܢ. ܘܲܢܛܲܪܘ ܡܸܠܬ݂ܵܟ݂.

⁷ ܗܵܫܵܐ ܝܸܕ݂ܥܹܬ݂ ܕܟܠ ܡܵܐ ܕܝܲܗ̄ܒ݂ܬ݁ ܠܝܼ ܡܸܢ ܠܘܵܬ݂ܵܟ݂ ܗ̄ܘܼ.

⁸ ܕܡܸܠܹ̈ܐ ܕܝܲܗ̄ܒ݂ܬ݁ ܠܝܼ. ܝܸܗܒܹܬ݂ ܠܗܘܿܢ. ܘܗܸܢܘܿܢ ܩܲܒܸܠܘ. ܘܝܼܕ݂ܲܥܘ ܫܲܪܝܼܪܵܐܝܼܬ݂ ܕܡܸܢ ܠܘܵܬ݂ܵܟ݂ ܢܸܦܩܹܬ݂. ܘܗܲܝܡܸܢܘ ܕܐܲܢ̄ܬ݁ ܫܲܕܲܪܬܵܢܝ.

⁹ ܘܐܸܢܵܐ ܥܠܲܝܗܘܿܢ ܒܵܥܹܐ ܐ̄ܢܵܐ. ܠܵܐ ܗܘ̣ܵܐ ܥܲܠ ܥܵܠܡܵܐ ܒܵܥܹܐ ܐ̄ܢܵܐ. ܐܸܠܵܐ ܥܲܠ ܗܵܢܘܿܢ ܕܝܲܗ̄ܒ݂ܬ݁ ܠܝܼ. ܕܕ݂ܝܼܠܵܟ݂ ܐܸܢܘܿܢ.

¹⁰ ܘܟ݂ܠ ܡܸܕܸܡ ܕܕ݂ܝܼܠܝ ܗ̄ܘܼ. ܕܝܼܠܵܟ݂ ܗ̄ܘܼ. ܘܕ݂ܝܼܠܵܟ݂. ܕܝܼܠܝ ܗ̄ܘܼ. ܘܲܡܫܲܒܲܚ ܐ̄ܢܵܐ ܒܗܘܿܢ.

¹¹ ܡܸܟܹܝܠ ܠܵܐ ܗ̄ܘܹܝܬ݂ ܒܥܵܠܡܵܐ. ܘܗܵܠܹܝܢ ܒܥܵܠܡܵܐ ܐܸܢܘܿܢ. ܘܐܸܢܵܐ ܠܘܵܬ݂ܵܟ݂ ܐܵܬܹܐ ܐ̄ܢܵܐ. ܐܲܒ݂ܵܐ ܩܲܕܝܼܫܵܐ. ܛܲܪ ܐܸܢܘܿܢ ܒܲܫܡܵܟ݂ ܗܵܘ ܕܝܲܗ̄ܒ݂ܬ݁ ܠܝܼ. ܕܢܸܗܘܘܿܢ ܚܲܕ݂ ܐܲܝܟܲܢܵܐ ܕܲܚܢܲܢ.

¹² ܟܲܕ݂ ܥܲܡܗܘܿܢ ܗ̄ܘܹܝܬ݂ ܒܥܵܠܡܵܐ. ܐܸܢܵܐ ܢܵܛܲܪ ܗ̄ܘܹܝܬ݂ ܠܗܘܿܢ ܒܲܫܡܵܟ݂. ܠܐܲܝܠܹܝܢ ܕܝܲܗ̄ܒ݂ܬ݁ ܠܝܼ ܢܸܛܪܹܬ݂. ܘܐ̄ܢܵܫ ܡܸܢܗܘܿܢ ܠܵܐ ܐܸܒܲܕ݂. ܐܸܠܵܐ ܒܪܹܗ ܕܐܲܒ݂ܕ݂ܵܢܵܐ. ܕܢܸܬ݂ܡܲܠܹܐ ܟܬ݂ܵܒ݂ܵܐ.

¹³ ܗܵܫܵܐ ܕܹܝܢ ܠܘܵܬ݂ܵܟ݂ ܐܵܬܹܐ ܐ̄ܢܵܐ ܘܗܵܠܹܝܢ ܡܡܲܠܸܠ ܐ̄ܢܵܐ ܒܥܵܠܡܵܐ. ܕܬܸܗܘܹܐ ܚܲܕ݂ܘܲܬ݂ܝ ܡܫܲܡܠܝܵܐ ܒܗܘܿܢ.

¹⁴ ܐܸܢܵܐ ܝܸܗܒܹܬ݂ ܠܗܘܿܢ ܡܸܠܬ݂ܵܟ݂. ܘܥܵܠܡܵܐ ܣܢܵܐ ܐܸܢܘܿܢ. ܕܠܵܐ ܗ̄ܘܼܵܘ ܡܸܢ ܥܵܠܡܵܐ. ܐܲܝܟܲܢܵܐ ܕܐܸܢܵܐ ܠܵܐ ܗ̄ܘܹܝܬ݂ ܡܸܢ ܥܵܠܡܵܐ.

¹⁵ ܠܵܐ ܗܘ̣ܵܐ ܕܬܸܫܩܘܿܠ ܐܸܢܘܿܢ ܡܸܢ ܥܵܠܡܵܐ ܒܵܥܹܐ ܐ̄ܢܵܐ. ܐܸܠܵܐ ܕܬܸܛܲܪ ܐܸܢܘܿܢ ܡܸܢ ܒܝܼܫܵܐ.

¹⁶ ܠܵܐ ܗ̄ܘܼܵܘ ܓܹܝܪ ܡܸܢ ܥܵܠܡܵܐ. ܐܲܝܟܲܢܵܐ ܕܐܸܢܵܐ ܠܵܐ ܗ̄ܘܹܝܬ݂ ܡܸܢ ܥܵܠܡܵܐ.

¹⁷ ܐܲܒ݂ܵܐ. ܩܲܕܸܫ ܐܸܢܘܿܢ ܒܲܫܪܵܪܵܟ݂. ܕܡܸܠܬ݂ܵܟ݂ ܕܝܼܠܵܟ݂. ܫܪܵܪܵܐ ܗܝܼ.

¹⁸ ܐܲܝܟܲܢܵܐ ܕܠܝܼ ܫܲܕܲܪܬ݁ ܠܥܵܠܡܵܐ. ܐܵܦ ܐܸܢܵܐ ܫܲܕܪܹܬ݂ ܐܸܢܘܿܢ ܠܥܵܠܡܵܐ.

¹⁹ ܘܥܲܠ ܐܲܦܲܝ̈ܗܘܿܢ ܐܸܢܵܐ ܡܩܲܕܸܫ ܐ̄ܢܵܐ ܢܲܦ̮ܫܝ. ܕܢܸܗܘܘܿܢ ܐܵܦ ܗܸܢܘܿܢ ܡܩܲܕܫܝܼܢ ܒܲܫܪܵܪܵܐ.

²⁰ ܘܠܵܐ ܗܘ̣ܵܐ ܥܲܠ ܐܲܦܲܝ̈ ܗܵܠܹܝܢ ܒܵܥܹܐ ܐ̄ܢܵܐ ܒܲܠܚܘܿܕ݂. ܐܸܠܵܐ ܐܵܦ ܥܲܠ ܐܲܦܲܝ ܐܲܝܠܹܝܢ ܕܲܡܗܲܝܡܢܝܼܢ ܒܝܼ ܒܡܸܠܲܬ݂ܗܘܿܢ.

²¹ ܕܟ݂ܠܗܘܿܢ ܢܸܗܘܘܿܢ ܚܲܕ݂. ܐܲܝܟܲܢܵܐ ܕܐܲܢ̄ܬ݁ ܐܵܒ݂ܝ ܒܝܼ. ܘܐܸܢܵܐ ܒܵܟ݂. ܕܐܵܦ ܗܸܢܘܿܢ ܒܲܢ. ܚܲܕ݂ ܢܸܗܘܘܿܢ. ܕܲܢܗܲܝܡܸܢ ܥܵܠܡܵܐ ܕܐܲܢ̄ܬ݁ ܫܲܕܲܪܬܵܢܝ.

²² ܘܐܸܢܵܐ ܫܘܼܒ݂ܚܵܐ ܕܝܲܗ̄ܒ݂ܬ݁ ܠܝܼ. ܝܸܗܒܹܬ݂ ܠܗܘܿܢ. ܕܢܸܗܘܘܿܢ ܚܲܕ݂. ܐܲܝܟܲܢܵܐ ܕܲܚܢܲܢ ܚܲܕ݂ ܚܢܲܢ.

²³ ܐܸܢܵܐ ܒܗܘܿܢ. ܘܐܲܢ̄ܬ݁ ܒܝܼ. ܕܢܸܗܘܘܿܢ ܓܡܝܼܪܝܼܢ ܠܚܲܕ݂. ܘܲܕ݂ܢܸܕܲܥ ܥܵܠܡܵܐ ܕܐܲܢ̄ܬ݁ ܫܲܕܲܪܬܵܢܝ. ܘܕ݂ܲܐܚܸܒ݂ܬ݂ ܐܸܢܘܿܢ. ܐܲܝܟܲܢܵܐ ܕܐܵܦ ܠܝܼ ܐܲܚܸܒ݂ܬ݁.

²⁴ ܐܲܒ݂ܵܐ. ܗܵܢܘܿܢ ܕܝܲܗ̄ܒ݂ܬ݁ ܠܝܼ. ܨܵܒܹܐ ܐ̄ܢܵܐ ܕܐܲܬܲܪ ܕܐܸܢܵܐ. ܐܵܦ ܗܸܢܘܿܢ ܢܸܗܘܘܿܢ ܥܲܡܝ. ܕܢܸܗܘܘܿܢ ܚܵܙܹܝܢ ܫܘܼܒ݂ܚܵܐ ܕܝܼܠܝ. ܗܵܘ ܕܝܲܗ̄ܒ݂ܬ݁ ܠܝܼ. ܕܐܲܚܸܒ݂ܬܵܢܝ ܡܸܢ ܩܕ݂ܵܡ ܬܲܪ̈ܡܝܵܬܹܗ ܕܥܵܠܡܵܐ.

²⁵ ܐܵܒ݂ܝ ܟܹܐܢܵܐ. ܘܥܵܠܡܵܐ ܠܵܐ ܝܲܕ݂ܥܵܟ݂. ܐܸܢܵܐ ܕܹܝܢ ܝܼܕ݂ܲܥܬܵܟ݂. ܘܗܸܢܘܿܢ ܝܼܕ݂ܲܥܘ. ܕܐܲܢ̄ܬ݁ ܫܲܕܲܪܬܵܢܝ.

²⁶ ܘܐܵܘܕܥܹܬ݂ ܐܸܢܘܿܢ ܫܡܵܟ݂. ܘܡܵܘܕܲܥ ܐ̄ܢܵܐ. ܕܚܘܼܒܵܐ ܗܵܘ ܕܐܲܚܸܒ݂ܬܵܢܝ. ܢܸܗܘܹܐ ܒܗܘܿܢ. ܘܐܸܢܵܐ ܐܸܗܘܹܐ ܒܗܘܿܢ.

18

¹ ܗܵܠܹܝܢ ܐܸܡܲܪ ܝܼܫܘܿܥ. ܘܲܢܦܲܩ ܥܲܡ ܬܲܠܡܝܼܕ݂ܵܘ̈ܗܝ ܠܥܸܒ݂ܪܵܐ ܕܲܪܓܸܠܬܵܐ ܕܩܸܕ݂ܪܘܿܢ. ܐܲܬܲܪ ܕܐܝܼܬ݂ ܗ̄ܘܵܬ݂ ܓܲܢܬ݂ܵܐ. ܐܲܝܟܵܐ ܕܥܲܠ ܗܘܼ ܘܬܲܠܡܝܼܕ݂ܵܘ̈ܗܝ.

² ܝܵܕ݂ܲܥ ܗܘ̣ܵܐ ܕܹܝܢ ܐܵܦ ܝܼܗܘܼܕ݂ܵܐ ܡܲܫܠܡܵܢܵܐ ܠܕܘܼܟܬ݂ܵܐ ܗܵܝ. ܡܛܠ ܕܣܲܓܝܼ ܙܲܒ݂ܢܵܐ ܟܵܢܹܫ ܗܘ̣ܵܐ ܬܲܡܵܢ ܝܼܫܘܿܥ ܥܲܡ ܬܲܠܡܝܼܕ݂ܵܘ̈ܗܝ.

³ ܗܘܼ ܗܵܟܹܝܠ ܝܼܗܘܼܕ݂ܵܐ ܕܒܲܪ ܐܸܣܦܹܝܪ. ܘܡܸܢ ܠܘܵܬ݂ ܪ̈ܲܒܲܝ ܟܵܗܢܹ̈ܐ ܘܲܦܪ̈ܝܼܫܹܐ ܕܒܲܪ ܕܲܚܫܹ̈ܐ. ܘܐܸܬ݂ܵܐ ܠܬܲܡܵܢ. ܥܲܡ ܢܲܦ̮ܛܹܪܹ̈ܐ ܘܠܲܡܦܹܝܝܕܹ̈ܐ ܘܙܲܝܢܵܐ.

⁴ ܝܼܫܘܿܥ ܕܹܝܢ ܕܝܵܕ݂ܲܥ ܗܘ̣ܵܐ ܟܠ ܡܸܕܸܡ ܕܐܵܬܹܐ ܥܠܵܘܗܝ. ܢܦܲܩ ܘܐܸܡܲܪ ܠܗܘܿܢ. ܠܡܲܢ ܒܵܥܹܝܢ ܐܢ̄ܬܘܿܢ.

⁵ ܐܵܡܪܝܼܢ ܠܹܗ. ܠܝܼܫܘܿܥ ܢܵܨܪܵܝܵܐ. ܐܵܡܲܪ ܠܗܘܿܢ ܝܼܫܘܿܥ. ܐܸܢܵܐ ܐ̄ܢܵܐ. ܩܵܐܹܡ ܗܘ̣ܵܐ ܕܹܝܢ ܐܵܦ ܝܼܗܘܼܕ݂ܵܐ ܡܲܫܠܡܵܢܵܐ ܥܲܡܗܘܿܢ.

⁶ ܘܟܲܕ݂ ܐܸܡܲܪ ܠܗܘܿܢ ܝܼܫܘܿܥ. ܕܐܸܢܵܐ ܐ̄ܢܵܐ. ܐܸܙܲܠܘ ܠܒܸܣܬܲܪܗܘܿܢ. ܘܲܢܦܲܠܘ ܥܲܠ ܐܲܪܥܵܐ.

⁷ ܬܘܼܒ݂ ܫܲܐܸܠ ܐܸܢܘܿܢ ܝܼܫܘܿܥ. ܠܡܲܢ ܒܵܥܹܝܢ ܐܢ̄ܬܘܿܢ. ܗܸܢܘܿܢ ܕܹܝܢ ܐܸܡܲܪܘ. ܠܝܼܫܘܿܥ ܢܵܨܪܵܝܵܐ.

⁸ ܐܵܡܲܪ ܠܗܘܿܢ ܝܼܫܘܿܥ. ܐܸܡܪܹܬ݂ ܠܟ݂ܘܿܢ ܕܐܸܢܵܐ ܐ̄ܢܵܐ. ܘܐܸܢ ܠܝܼ ܒܵܥܹܝܢ ܐܢ̄ܬܘܿܢ. ܫܒ݂ܘܿܩܘ ܠܗܵܠܹܝܢ ܐܵܙܠ̄ܝܼܢ.

⁹ ܕܬܸܫܠܲܡ ܡܸܠܬ݂ܵܐ ܕܐܵܡܲܪ. ܕܐܲܝܠܹܝܢ ܕܝܲܗ̄ܒ݂ܬ݁ ܠܝܼ. ܠܵܐ ܐܵܘܒܕ݂ܬ݂ ܡܸܢܗܘܿܢ ܐܵܦܠܵܐ ܚܲܕ݂.

¹⁰ ܫܸܡܥܘܿܢ ܕܹܝܢ ܟܹܐܦܵܐ. ܐܝܼܬ݂ ܗܘ̣ܵܐ ܥܠܵܘܗܝ ܣܲܦ̮ܣܹܪܵܐ. ܘܫܲܡܛܵܗ̇. ܘܲܡܚܵܝܗܝ ܠܥܲܒ݂ܕܹܗ ܕܪܲܒ ܟܵܗܢܹ̈ܐ. ܘܫܲܩܠܵܗ̇ ܐܸܕ݂ܢܹܗ ܕܝܲܡܝܼܢܵܐ. ܫܡܹܗ ܕܹܝܢ ܕܥܲܒ݂ܕܵܐ. ܡܵܠܹܟ.

¹¹ ܘܐܸܡܲܪ ܝܼܫܘܿܥ ܠܟܹܐܦܵܐ. ܣܝܼܡ ܣܲܦ̮ܣܹܪܵܐ ܒܚܸܠܬ݂ܵܗ̇. ܟܵܣܵܐ ܕܝܲܗ̄ܒ݂ ܠܝܼ ܐܵܒ݂ܝ. ܠܵܐ ܐܸܫܬܹ݁ܝܘܗܝ.

¹² ܗܵܝܕܹܝܢ ܐܸܣܦܹܝܪ ܘܟ݂ܝܼܠܝܼܵܪ̈ܟܹܐ. ܘܕ݂ܲܚܫܹ̈ܐ ܕܲܝܗ̄ܘܼܕ݂ܵܝܹ̈ܐ. ܐܲܚܕܘܼܗܝ ܠܝܼܫܘܿܥ. ܘܐܲܣܪܘܼܗܝ.

¹³ ܘܐܲܝܬ݁ܝܘܼܗܝ ܠܘܵܬ݂ ܚܲܢܵܢ ܠܘܼܩܕ݂ܲܡ. ܡܛܠ ܕܲܚܡܘܼܗܝ ܗܘ̣ܵܐ ܕܩܲܝܵܦܵܐ ܗܵܘ ܕܐܝܼܬ݂ܵܘܗܝ ܗܘ̣ܵܐ ܪܲܒ ܟܵܗܢܹ̈ܐ ܕܫܲܢ̄ܬܵܐ ܗܵܝ.

¹⁴ ܐܝܼܬ݂ܵܘܗܝ ܗܘ̣ܵܐ ܕܹܝܢ ܩܲܝܵܦܵܐ. ܗܵܘ ܕܲܡܠܲܟ݂ ܠܲܝܗ̄ܘܼܕ݂ܵܝܹ̈ܐ ܕܦܲܩܵܚ ܕܚܲܕ݂ ܓܲܒ݂ܪܵܐ ܢܡܘܼܬ݂ ܚܠܵܦ ܥܲܡܵܐ.

¹⁵ ܫܸܡܥܘܿܢ ܕܹܝܢ ܟܹܐܦܵܐ. ܘܚܲܕ݂ ܡܸܢ ܬܲܠܡܝܼܕܹ̈ܐ ܐ̄ܚܪ̈ܵܢܹܐ. ܐܵܬܹ݁ܝܢ ܗ̄ܘܼܵܘ ܒܵܬ݂ܪܹܗ ܕܝܼܫܘܿܥ. ܠܗܵܘ ܕܹܝܢ ܬܲܠܡܝܼܕ݂ܵܐ. ܝܵܕ݂ܲܥ ܗܘ̣ܵܐ ܠܹܗ ܪܲܒ ܟܵܗܢܹ̈ܐ. ܘܥܲܠ ܥܲܡ ܝܼܫܘܿܥ ܠܕ݂ܵܪܬܵܐ.

¹⁶ ܫܸܡܥܘܿܢ ܕܹܝܢ ܩܵܐܹܡ ܗܘ̣ܵܐ ܠܒܲܪ ܠܘܵܬ݂ ܬܲܪܥܵܐ. ܘܲܢܦܲܩ ܗܵܘ ܬܲܠܡܝܼܕ݂ܵܐ ܐ̄ܚܪܹܢܵܐ. ܕܝܵܕ݂ܲܥ ܗܘ̣ܵܐ ܠܹܗ ܪܲܒ ܟܵܗܢܹ̈ܐ. ܘܐܸܡܲܪ ܠܢܵܛܪܲܬ݂ ܬܲܪܥܵܐ. ܘܐܲܥܠܹܗ ܠܫܸܡܥܘܿܢ.

¹⁷ ܐܸܡܪܲܬ݂ ܕܹܝܢ ܥܠܲܝܡܬ݂ܵܐ ܢܵܛܪܲܬ݂ ܬܲܪܥܵܐ ܠܫܸܡܥܘܿܢ. ܠܡܵܐ. ܐܵܦ ܐܲܢ̄ܬ݁ ܡܸܢ ܬܲܠܡܝܼܕ݂ܵܘ̈ܗܝ ܐܲܢ̄ܬ݁ ܕܗܵܢܵܐ ܓܲܒ݂ܪܵܐ. ܐܵܡܲܪ ܠܵܗ̇ ܠܵܐ.

¹⁸ ܘܩܵܝܡܝܼܢ ܗ̄ܘܼܵܘ ܥܲܒ݂ܕܹ̈ܐ ܘܕ݂ܲܚܫܹ̈ܐ. ܘܣܵܝܡܝܼܢ ܗ̄ܘܼܵܘ ܢܘܼܪܵܐ ܕܢܸܫܚܢܘܼܢ. ܡܛܠ ܕܩܲܪܝܼܫ ܗ̄ܘܵܐ. ܩܵܐܹܡ ܗܘ̣ܵܐ ܕܹܝܢ ܐܵܦ ܫܸܡܥܘܿܢ ܥܲܡܗܘܿܢ. ܘܫܵܚܹܿܢ.

¹⁹ ܪܲܒ ܟܵܗܢܹ̈ܐ ܕܹܝܢ ܫܲܐܠܹܗ ܠܝܼܫܘܿܥ. ܥܲܠ ܬܲܠܡܝܼܕ݂ܵܘ̈ܗܝ ܘܥܲܠ ܝܘܼܠܦܵܢܹܗ.

²⁰ ܘܐܸܡܲܪ ܠܹܗ ܝܼܫܘܿܥ. ܐܸܢܵܐ ܥܹܝܢ ܒܲܓ݂ܠܹܐ ܡܲܠܠܹܬ݂ ܥܲܡ ܥܲܡܵܐ. ܘܲܒܟ݂ܠܙܒܲܢ ܐܲܠܦܹܬ݂ ܒܲܟ݂ܢ̈ܘܼܫܵܬ݂ܵܐ. ܘܲܒ݂ܗܲܝܟܠܵܐ. ܐܲܝܟܵܐ ܕܟ݂ܠܗܘܿܢ ܝܗ̄ܘܼܕ݂ܵܝܹ̈ܐ ܡܸܬ݂ܟܲܢܫܝܼܢ. ܘܡܸܕܸܡ ܒܛܘܼܫܝܵܐ ܠܵܐ ܡܲܠܠܹܬ݂.

²¹ ܡܵܢܵܐ ܡܫܲܐܸܠ ܐܲܢ̄ܬ݁ ܠܝܼ. ܫܲܐܸܠ ܠܗܵܢܘܿܢ ܕܲܫܡܲܥܘ. ܡܵܢܵܐ ܡܲܠܠܹܬ݂ ܥܲܡܗܘܿܢ. ܗܵܐ ܗܸܢܘܿܢ ܝܵܕ݂ܥܝܼܢ. ܟܠ ܡܸܕܸܡ ܕܐܸܡܪܹܬ݂.

²² ܘܟܲܕ݂ ܗܵܠܹܝܢ ܐܸܡܲܪ. ܚܲܕ݂ ܡܸܢ ܕܲܚܫܹ̈ܐ ܕܩܵܐܹܡ ܗ̄ܘܵܐ. ܡܚܵܝܗܝ ܥܲܠ ܦܲܟܹܗ ܠܝܼܫܘܿܥ. ܘܐܸܡܲܪ ܠܹܗ. ܗܵܟܲܢܵܐ ܝܵܗܹܒ݂ ܐܲܢ̄ܬ݁ ܦܸܬ݂ܓ݂ܵܡܵܐ ܠܪܲܒ ܟܵܗܢܹ̈ܐ.

²³ ܥܢܵܐ ܝܼܫܘܿܥ. ܘܐܸܡܲܪ ܠܹܗ. ܐܸܢ ܒܝܼܫܵܐܝܼܬ݂ ܡܲܠܠܹܬ݂. ܐܲܣܗܸܕ݂ ܥܲܠ ܒܝܼܫܬܵܐ. ܘܐܸܢ ܕܹܝܢ ܫܲܦܝܼܪ. ܠܡܵܢܵܐ ܡܚܲܝܬܵܢܝ.

²⁴ ܚܲܢܵܢ ܕܹܝܢ ܫܲܕܲܪ ܠܝܼܫܘܿܥ. ܟܲܕ݂ ܐܲܣܝܼܪ ܠܘܵܬ݂ ܩܲܝܵܦܵܐ ܪܲܒ ܟܵܗܢܹ̈ܐ.

²⁵ ܘܫܸܡܥܘܿܢ ܟܹܐܦܵܐ ܩܵܐܹܡ ܗܘ̣ܵܐ ܘܫܵܚܹܿܢ. ܘܐܵܡܪܝܼܢ ܠܹܗ. ܠܡܵܐ. ܐܵܦ ܐܲܢ̄ܬ݁ ܚܲܕ݂ ܡܸܢ ܬܲܠܡܝܼܕ݂ܵܘ̈ܗܝ ܐܲܢ̄ܬ݁. ܘܗܘܼ ܟܦܲܪ. ܘܐܸܡܲܪ ܠܵܐ ܗ̄ܘܹܝܬ݂.

²⁶ ܐܵܡܲܪ ܠܹܗ ܚܲܕ݂ ܡܸܢ ܥܲܒ݂ܕܹ̈ܐ ܕܪܲܒ ܟܵܗܢܹ̈ܐ. ܐ̄ܚܝܵܢܹܗ ܕܗܵܘ ܕܲܦܣܲܩ ܗܘ̣ܵܐ ܫܸܡܥܘܿܢ ܐܸܕ݂ܢܹܗ. ܠܵܐ ܐܸܢܵܐ ܚܙܹܝܬ݂ܵܟ݂ ܥܲܡܹܗ ܒܓܲܢܬ݂ܵܐ.

²⁷ ܘܬ݂ܘܼܒ݂ ܟܦܲܪ ܫܸܡܥܘܿܢ. ܘܒ݂ܵܗ̇ ܒܫܵܥܬ݂ܵܐ ܩܪܵܐ ܬܲܪܢܵܓ݂ܠܵܐ. .

²⁸ ܐܲܝܬ݁ܝܘܼܗܝ ܕܹܝܢ ܠܝܼܫܘܿܥ ܡܸܢ ܠܘܵܬ݂ ܩܲܝܵܦܵܐ ܠܲܦܪܲܛܘܿܪܝܼܢ. ܘܐܝܼܬ݂ܵܘܗܝ ܗܘ̣ܵܐ ܨܲܦܪܵܐ. ܘܗܸܢܘܿܢ ܠܵܐ ܥܲܠܘ ܠܲܦܪܲܛܘܿܪܝܼܢ. ܕܠܵܐ ܢܸܬ݂ܛܵܘܫܘܿܢ. ܥܲܕ݂ ܐܵܟ݂ܠܝܼܢ ܦܸܨܚܵܐ.

²⁹ ܢܦܲܩ ܕܹܝܢ ܦܝܼܠܵܛܘܿܣ ܠܒܲܪ ܠܘܵܬ݂ܗܘܿܢ. ܘܐܸܡܲܪ ܠܗܘܿܢ. ܡܵܢܵܐ ܡܹܐܟܲܠ ܩܲܪܨܵܐ ܐܝܼܬ݂ ܠܟ݂ܘܿܢ ܥܲܠ ܓܲܒ݂ܪܵܐ ܗܵܢܵܐ.

³⁰ ܥܢܵܘ. ܘܐܵܡܪܝܼܢ ܠܹܗ. ܐܸܠܘܼ ܠܵܐ ܥܵܒܹܿܕ݂ ܒ̈ܝܼܫܵܬ݂ܵܐ ܗ̄ܘܵܐ. ܐܵܦܠܵܐ ܠܵܟ݂ ܡܲܫܠܡܝܼܢ ܗ̄ܘܲܝܢ ܠܹܗ.

³¹ ܐܵܡܲܪ ܠܗܘܿܢ ܦܝܼܠܵܛܘܿܣ. ܕܘܒ݂ܪܘܼܗܝ ܐܲܢ̄ܬ݁ܘܿܢ. ܘܕ݂ܘܼܢܘܼܗܝ ܐܲܝܟ݂ ܢܵܡܘܿܣܟ݂ܘܿܢ. ܐܵܡܪܝܼܢ ܠܹܗ ܝܗ̄ܘܼܕ݂ܵܝܹ̈ܐ. ܠܵܐ ܫܲܠܝܼܛ ܠܲܢ ܠܡܸܩܛܲܠ ܠܐ̄ܢܵܫ.

³² ܕܬܸܫܠܲܡ ܡܸܠܬ݂ܵܐ ܕܐܵܡܲܪ ܝܼܫܘܿܥ ܟܲܕ݂ ܡܵܘܕܲܥ ܒܐܲܝܢܵܐ ܡܵܘܬܵܐ ܥܬ݂ܝܼܕ݂ ܕܲܢܡܘܼܬ݂.

³³ ܥܲܠ ܕܹܝܢ ܦܝܼܠܵܛܘܿܣ ܠܲܦܪܸܛܵܘܪܝܼܢ. ܘܲܩܪܵܐ ܠܝܼܫܘܿܥ. ܘܐܸܡܲܪ ܠܹܗ. ܐܲܢ̄ܬ݁ ܗܘܼ ܡܲܠܟܗܘܿܢ ܕܲܝܗ̄ܘܼܕ݂ܵܝܹ̈ܐ.

³⁴ ܐܵܡܲܪ ܠܹܗ ܝܼܫܘܿܥ. ܡܸܢ ܢܲܦ̮ܫܵܟ݂ ܐܸܡܲܪܬ݁ ܗܵܕܹܐ. ܐܵܘ ܐ̄ܚܪܵܢܹ̈ܐ ܐܸܡܲܪܘ ܠܵܟ݂ ܥܠܲܝ.

³⁵ ܐܵܡܲܪ ܠܹܗ ܦܝܼܠܵܛܘܿܣ. ܠܡܵܐ ܐܸܢܵܐ ܝܗܘܼܕ݂ܝܵܐ ܐ̄ܢܵܐ. ܒܢܲܝ̈ ܥܲܡܵܟ݂ ܗ̄ܘܼ. ܘܪ̈ܲܒܲܝ ܟܵܗܢܹ̈ܐ ܐܲܫܠܡܘܼܟ݂ ܠܝܼ. ܡܵܢܵܐ ܥܒܲܕܬ݁.

³⁶ ܐܵܡܲܪ ܠܹܗ ܝܼܫܘܿܥ. ܡܲܠܟܘܼܬ݂ܝ ܕܝܼܠܝ. ܠܵܐ ܗܘܸܵܬ݂ ܡܸܢ ܗܵܢܵܐ ܥܵܠܡܵܐ. ܐܸܠܘܼ ܡܸܢ ܥܵܠܡܵܐ ܗ̄ܘܵܬ݂ ܗܵܢܵܐ ܡܲܠܟܘܼܬ݂ܝ. ܡܸܬ݂ܟܲܬ݁ܫܝܼܢ ܗ̄ܘܼܵܘ ܡܫܲܡ̈ܫܵܢܲܝ. ܕܠܵܐ ܐܸܫܬ݁ܠܸܡ ܠܲܝܗ̄ܘܼܕ݂ܵܝܹ̈ܐ. ܗܵܫܵܐ ܕܹܝܢ ܡܲܠܟܘܼܬ݂ܝ ܕܝܼܠܝ. ܠܵܐ ܗ̄ܘܵܬ݂ ܡܸܟܵܐ.

³⁷ ܐܵܡܲܪ ܠܹܗ ܦܝܼܠܵܛܘܿܣ. ܡܵܕܹܝܢ ܡܲܠܟܵܐ ܐܲܢ̄ܬ݁. ܐܵܡܲܪ ܠܹܗ ܝܼܫܘܿܥ. ܐܲܢ̄ܬ݁ ܐܸܡܲܪܬ݁ ܕܡܲܠܟܵܐ ܐ̄ܢܵܐ. ܐܸܢܵܐ ܠܗܵܕܹܐ ܝܼܠܝܼܕ݂ ܐ̄ܢܵܐ. ܘܲܠܗܵܕܹܐ ܐܸܬܹܝܬ݂ ܠܥܵܠܡܵܐ. ܕܐܲܣܗܸܕ݂ ܥܲܠ ܫܪܵܪܵܐ. ܟܠܡܲܢ ܕܐܝܼܬ݂ܵܘܗܝ ܡܸܢ ܫܪܵܪܵܐ. ܫܵܡܲܥ ܩܵܠܝ.

³⁸ ܐܵܡܲܪ ܠܹܗ ܦܝܼܠܵܛܘܿܣ. ܡܵܢܵܘ ܫܪܵܪܵܐ. ܘܟܲܕ݂ ܐܸܡܲܪ ܗܵܕܹܐ. ܢܦܲܩ ܠܹܗ ܬܘܼܒ݂ ܠܘܵܬ݂ ܝܗ̄ܘܼܕ݂ܵܝܹ̈ܐ. ܘܐܸܡܲܪ ܠܗܘܿܢ. ܐܸܢܵܐ ܐܵܦܠܵܐ ܚܕ݂ܵܐ ܥܸܠܬ݂ܵܐ ܡܸܫܟܲܚ ܐ̄ܢܵܐ ܒܹܗ.

³⁹ ܥܝܵܕ݂ܵܐ ܕܹܝܢ ܐܝܼܬ݂ ܠܟ݂ܘܿܢ. ܕܚܲܕ݂ ܐܸܫܪܹܐ ܠܟ݂ܘܿܢ ܒܦܸܨܚܵܐ. ܨܵܒܹܝܢ ܐܢ̄ܬܘܿܢ ܗܵܟܹܝܠ. ܐܸܫܪܹܐ ܠܟ݂ܘܿܢ ܠܗܵܢܵܐ ܡܲܠܟܵܐ ܕܲܝܗ̄ܘܼܕ݂ܵܝܹ̈ܐ.

⁴⁰ ܘܲܩܥܵܘ ܟܠܗܘܿܢ. ܘܐܵܡܪܝܼܢ. ܠܵܐ ܠܗܵܢܵܐ. ܐܸܠܵܐ ܠܒܲܪ ܐܲܒܵܐ. ܐܝܼܬ݂ܵܘܗܝ ܗܘ̣ܵܐ ܕܹܝܢ ܗܵܢܵܐ. ܒܲܪ ܐܲܒܵܐ. ܓܲܝܵܣܵܐ.

19

¹ ܗܵܝܕܹܝܢ ܦܝܼܠܵܛܘܿܣ ܢܲܓܕ݂ܗ ܠܝܼܫܘܿܥ.

² ܘܐܸܣܛܪܼܵܛܝܼܘܼܛܹܐ ܓܕ݂ܲܠܘ ܟܠܝܼܠܵܐ ܡܸܢ ܟܘܼܒܹ̈ܐ. ܘܣܵܡܘ ܠܹܗ ܒܪܹܫܹܗ. ܘܟܲܣܝܘܼܗܝ ܢܲܚ̈ܬܹܐ ܕܐܲܪܓܘܵܢܵܐ.

³ ܘܐܵܡܪܝܼܢ ܗ̄ܘܼܵܘ. ܫܠܵܡ ܠܵܟ݂. ܡܲܠܟܵܐ. ܕܲܝܗ̄ܘܼܕ݂ܵܝܹ̈ܐ. ܘܡܵܚܹܝܢ ܗ̄ܘܼܵܘ ܠܹܗ ܥܲܠ ܦܲܟܵܘ̈ܗܝ.

⁴ ܘܲܢܦܲܩ ܦܝܼܠܵܛܘܿܣ ܬܘܼܒ݂ ܠܒܲܪ. ܘܐܸܡܲܪ ܠܗܘܿܢ. ܗܵܐ ܡܲܦܸܩ ܐ̄ܢܵܐ ܠܹܗ ܠܟ݂ܘܿܢ. ܠܒܲܪ. ܕܬܸܕ݂ܥܘܼܢ. ܕܠܵܐ ܡܸܫܟܲܚ ܐ̄ܢܵܐ ܒܵܬ݂ܪܹܗ. ܐܵܦܠܵܐ ܚܕ݂ܵܐ ܥܸܠܬ݂ܵܐ.

⁵ ܘܲܢܦܲܩ ܝܼܫܘܿܥ ܠܒܲܪ. ܟܲܕ݂ ܐܝܼܬ݂ ܥܠܵܘܗܝ ܟܠܝܼܠܵܐ ܕܟ݂ܘܒܹ̈ܐ. ܘܢܲܚ̈ܬܹܐ ܕܐܲܪܓܘܵܢܵܐ. ܘܐܸܡܲܪ ܠܗܘܿܢ ܦܝܼܠܵܛܘܿܣ. ܗܵܐ ܓܲܒ݂ܪܵܐ.

⁶ ܟܲܕ݂ ܕܹܝܢ ܚܙܵܐܘܼܗܝ ܪ̈ܲܒܲܝ ܟܵܗܢܹ̈ܐ ܘܕ݂ܲܚܫܹ̈ܐ. ܩܥܵܘ ܘܐܵܡܪܝܼܢ. ܨܠܘܿܒܲܝܗܝ. ܨܠܘܿܒܲܝܗܝ. ܐܵܡܲܪ ܠܗܘܿܢ ܦܝܼܠܵܛܘܿܣ. ܕܒܲܪܘ ܐܲܢ̄ܬ݁ܘܿܢ ܘܙܘܼܩܦܘܼܗܝ. ܐܸܢܵܐ ܓܹܝܪ ܠܵܐ ܡܸܫܟܲܚ ܐ̄ܢܵܐ ܒܹܗ ܥܸܠܬ݂ܵܐ.

⁷ ܐܵܡܪܝܼܢ ܠܹܗ ܝܗ̄ܘܼܕ݂ܵܝܹ̈ܐ. ܠܲܢ ܢܵܡܘܿܣܵܐ ܐܝܼܬ݂ ܠܲܢ. ܘܐܲܝܟ݂ ܕܲܒ݂ܢܵܡܘܿܣܲܢ. ܚܲܝܵܒ݂ ܗܘܼ ܡܵܘܬܵܐ. ܕܲܥܒܲܕ݂ ܢܲܦ̮ܫܹܗ ܒܪܹܗ ܕܐܲܠܵܗܵܐ.

⁸ ܟܲܕ݂ ܫܡܲܥ ܕܹܝܢ ܦܝܼܠܵܛܘܿܣ ܗܵܕܹܐ ܡܸܠܬ݂ܵܐ. ܝܲܬܝܼܪܵܐܝܼܬ݂ ܕܚܸܠ.

⁹ ܘܥܲܠ ܬܘܼܒ݂ ܠܲܦܪܸܛܵܘܪܝܼܢ. ܘܐܸܡܲܪ ܠܝܼܫܘܿܥ. ܐܲܝܡܸܟܵܐ ܐܲܢ̄ܬ݁. ܝܼܫܘܿܥ ܕܹܝܢ ܦܸܬ݂ܓ݂ܵܡܵܐ ܠܵܐ ܝܲܗ̄ܒ݂ ܠܹܗ.

¹⁰ ܐܵܡܲܪ ܠܹܗ ܦܝܼܠܵܛܘܿܣ. ܥܲܡܝ. ܠܵܐ ܡܡܲܠܸܠ ܐܲܢ̄ܬ݁. ܠܵܐ ܝܵܕ݂ܲܥ ܐܲܢ̄ܬ݁ ܕܫܲܠܝܼܛ ܐ̄ܢܵܐ ܕܐܸܫܪܹܝܟ݂ ܘܫܲܠܝܼܛ ܐ̄ܢܵܐ ܕܐܸܙܩܦܵܟ݂.

¹¹ ܐܵܡܲܪ ܠܹܗ ܝܼܫܘܿܥ. ܠܲܝܬ݁ ܗܘ̣ܵܐ ܠܵܟ݂ ܥܠܲܝ ܫܘܼܠܛܵܢܵܐ ܐܵܦ ܠܵܐ ܚܲܕ݂ ܐܸܠܘܼ ܠܵܐ ܝܼܗܝܼܒ݂ ܗܘ̣ܵܐ ܠܵܟ݂ ܡܸܢ ܠܥܸܠ. ܡܛܠ ܗܵܢܵܐ ܗܵܘ ܡܲܢ ܕܐܲܫܠܡܲܢܝ ܠܵܟ݂. ܪܲܒܵܐ ܗܝܼ ܚܛܝܼܬܹܗ ܡܸܢ ܕܝܼܠܵܟ݂.

¹² ܘܡܛܠ ܗܵܕܹܐ. ܨܵܒܹܐ ܗܘ̣ܵܐ ܦܝܼܠܵܛܘܿܣ ܕܢܸܫܪܹܝܘܗܝ. ܝܗ̄ܘܼܕ݂ܵܝܹ̈ܐ ܕܹܝܢ ܩܵܥܹܝܢ ܗ̄ܘܼܵܘ. ܕܐܸܢ ܠܗܵܢܵܐ ܫܵܪܹܐ ܐܲܢ̄ܬ݁. ܠܵܐ ܗܘܲܝܬ݁ ܪܵܚܡܹܗ ܕܩܹܣܲܪ. ܟܠܡܲܢ ܓܹܝܪ ܕܢܲܦ̮ܫܹܗ ܡܲܠܟܵܐ ܥܵܒܹܿܕ݂. ܣܲܩܘܼܒ݂ܠܵܐ ܗܘܼ ܕܩܹܣܲܪ.

¹³ ܟܲܕ݂ ܫܡܲܥ ܕܹܝܢ ܦܝܼܠܵܛܘܿܣ ܗܵܕܹܐ ܡܸܠܬ݂ܵܐ. ܐܲܦܩܹܗ ܠܝܼܫܘܿܥ ܠܒܲܪ. ܘܝܼܬܸܒ݂ ܥܲܠ ܒܝܼܡ. ܒܕܘܼܟܬ݂ܵܐ ܕܡܸܬ݂ܩܲܪܝܵܐ. ܪܨܝܼܦܬܵܐ ܕܟܹܐܦܹ̈ܐ. ܥܸܒ݂ܪܵܐܝܼܬ݂ ܕܹܝܢ ܡܸܬ݂ܐܲܡܪܵܐ. ܓܦܝܼܦܬܵܐ.

¹⁴ ܘܲܥܪܘܼܒ݂ܬܵܐ ܗ̄ܘܵܬ݂ ܕܦܸܨܚܵܐ. ܘܐܝܼܬ݂ ܗ̄ܘܲܝ̈ ܐܲܝܟ݂ ܫܵܥܹ̈ܐ ܫܸܬ݂. ܘܐܸܡܲܪ ܠܲܝܗ̄ܘܼܕ݂ܵܝܹ̈ܐ. ܗܵܐ ܡܲܠܟܟ݂ܘܿܢ.

¹⁵ ܗܸܢܘܿܢ ܕܹܝܢ ܩܵܥܹܝܢ ܗ̄ܘܼܵܘ. ܫܩܘܿܠܲܝܗܝ. ܫܩܘܿܠܲܝܗܝ. ܨܠܘܿܒܲܝܗܝ. ܨܠܘܿܒܲܝܗܝ. ܐܵܡܲܪ ܠܗܘܿܢ ܦܝܼܠܵܛܘܿܣ. ܠܡܲܠܟܟ݂ܘܿܢ ܐܸܙܩܘܿܦ. ܐܵܡܪܝܼܢ ܪ̈ܲܒܲܝ ܟܵܗܢܹ̈ܐ. ܠܲܝܬ݁ ܠܲܢ ܡܲܠܟܵܐ. ܐܸܠܵܐ ܐܸܢ ܩܹܣܲܪ.

¹⁶ ܗܵܝܕܹܝܢ ܐܲܫܠܡܹܗ ܠܗܘܿܢ ܕܢܸܙܩܦܘܼܢܵܝܗܝ . ܘܕ݂ܲܒ݂ܪܘܼܗܝ ܠܝܼܫܘܿܥ ܘܐܲܦܩܘܼܗܝ.

¹⁷ ܟܲܕ݂ ܫܩܝܼܠ ܙܩܝܼܦܹܗ ܠܕܘܼܟܬ݂ܵܐ ܕܡܸܬ݂ܩܲܪܝܵܐ. ܩܲܪܩܲܦܬ݂ܵܐ. ܥܸܒ݂ܪܵܐܝܼܬ݂ ܕܹܝܢ ܡܸܬ݂ܐܲܡܪܵܐ. ܓܵܓ݂ܘܼܠܬܵܐ.

¹⁸ ܐܲܬܲܪ ܕܙܲܩܦܘܼܗܝ. ܘܥܲܡܹܗ ܬܪܹܝܢ ܐ̄ܚܪܵܢܝܼܢ. ܚܲܕ݂ ܡܸܟܵܐ ܘܚܲܕ݂ ܡܸܟܵܐ. ܘܲܠܝܼܫܘܿܥ ܒܲܡܨܲܥܬ݂ܵܐ.

¹⁹ ܘܲܟܬܲܒ݂ ܐܵܦ ܠܘܼܚܵܐ ܦܝܼܠܵܛܘܿܣ. ܘܣܵܡ ܥܲܠ ܙܩܝܼܦܹܗ. ܟܬ݂ܝܼܒ݂ ܗܘ̣ܵܐ ܕܹܝܢ ܗܵܟܲܢܵܐ. ܗܵܢܵܐ ܝܼܫܘܿܥ ܢܵܨܪܵܝܵܐ ܡܲܠܟܵܐ ܕܲܝܗ̄ܘܼܕ݂ܵܝܹ̈ܐ.

²⁰ ܘܲܠܗܵܢܵܐ ܕܲܦܵܐ. ܣܲܓܝܼܐܹ̈ܐ ܡܸܢ ܝܗ̄ܘܼܕ݂ܵܝܹ̈ܐ ܩܪܵܐܘܼܗܝ. ܡܛܠ ܕܩܲܪܝܼܒ݂ܵܐ ܗ̄ܘܵܬ݂ ܠܲܡܕ݂ܝܼܢ̄ܬܵܐ ܕܘܼܟܬ݂ܵܐ ܕܐܸܙܕܩܸܦ ܒܵܗ̇ ܝܼܫܘܿܥ. ܘܲܟܬ݂ܝܼܒ݂ܵܐ ܗܘ̣ܵܐ ܥܸܒ݂ܪܵܐܝܼܬ݂. ܘܝܵܘܢܵܐܝܼܬ݂. ܘܪܗ̄ܘܿܡܵܐܝܼܬ݂.

²¹ ܘܐܸܡܲܪܘ ܪ̈ܲܒܲܝ ܟܵܗܢܹ̈ܐ ܠܦܝܼܠܵܛܘܿܣ. ܠܵܐ ܬܸܟ݂ܬܘܼܒ݂ ܕܡܲܠܟܵܐ ܗܘܼ ܕܲܝܗ̄ܘܼܕ݂ܵܝܹ̈ܐ. ܐܸܠܵܐ ܕܗܘܼ ܐܸܡܲܪ. ܕܡܲܠܟܵܐ ܐܸܢܵܐ ܕܲܝܗ̄ܘܼܕ݂ܵܝܹ̈ܐ.

²² ܐܵܡܲܪ ܦܝܼܠܵܛܘܿܣ. ܡܸܕܸܡ ܕܟܸܬ݂ܒܹܬ݂. ܟܸܬ݂ܒܹܬ݂.

²³ ܐܸܣܛܪ̈ܵܛܝܼܘܼܛܹܐ ܕܹܝܢ. ܟܲܕ݂ ܙܲܩܦܘܼܗܝ ܠܝܼܫܘܿܥ. ܫܩܲܠܘ ܢܲܚ̈ܬܵܘܗܝ. ܘܲܥܒܲܕ݂ܘ ܠܐܲܪܒܲܥ ܡ̈ܢܵܘܵܢ. ܡܢܵܬ݂ܵܐ ܠܚܲܕ݂ ܡܸܢ ܐܸܣܛܪ̈ܵܛܝܼܘܼܛܹܐ. ܟܘܿܬ݁ܝܼܢܹܗ ܕܹܝܢ ܐܝܼܬܹܝܗ̇ ܗ̄ܘܵܬ݂ ܕܠܵܐ ܚܝܼܛܵܐ ܡܸܢ ܠܥܸܠ. ܙܩܝܼܪܬܵܐ ܟܠܵܗ̇.

²⁴ ܘܐܸܡܲܪܘ ܚܲܕ݂ ܠܚܲܕ݂. ܠܵܐ ܢܸܣܕܩܝܼܗ̇. ܐܸܠܵܐ ܢܲܦܸܣ ܥܠܹܝܗ̇ ܡܸܦܲܣ. ܕܡܲܢܘܼ ܬܸܗܘܹܐ. ܘܲܫܠܸܡ ܟܬ݂ܵܒ݂ܵܐ ܕܐܵܡܲܪ ܕܦܲܠܸܓ݂ܘ ܢܲܚ̈ܬܲܝ ܒܲܝܢܵܬ݂ܗܘܿܢ ܘܥܲܠ ܠܒ݂ܘܼܫܝ ܐܲܪܡܝܼܘ ܦܸܣܵܐ. ܗܵܠܹܝܢ ܥܒܲܕ݂ܘ ܐܸܣܛܪ̈ܵܛܝܼܘܼܛܹܐ.

²⁵ ܩܵܝ̈ܡܵܢ ܗ̄ܘܲܝ̈ ܕܹܝܢ ܠܘܵܬ݂ ܙܩܝܼܦܹܗ ܕܝܼܫܘܿܥ. ܐܸܡܹܗ. ܘܚܵܬ݂ܵܗ̇ ܕܐܸܡܹܗ. ܘܡܲܪܝܲܡ ܗܵܝ ܕܩܲܠܝܘܿܦܵܐ. ܘܡܲܪܝܲܡ ܡܲܓ݂ܕܠܵܝܬܵܐ.

²⁶ ܝܼܫܘܿܥ ܕܹܝܢ ܚܙܵܐ ܠܐܸܡܹܗ. ܘܲܠܬܲܠܡܝܼܕ݂ܵܐ ܗܵܘ ܕܪܵܚܹܿܡ ܗܘ̣ܵܐ ܕܩܵܐܹܡ. ܘܐܸܡܲܪ ܠܐܸܡܹܗ. ܐܲܢ̄ܬ݁ܬ݂ܵܐ ܗܵܐ ܒܪܹܟ݂ܝ.

²⁷ ܘܐܸܡܲܪ ܠܬܲܠܡܝܼܕ݂ܵܐ ܗܵܘ. ܗܵܐ ܐܸܡܵܟ݂. ܘܡܸܢ ܗܵܝ ܫܵܥܬ݂ܵܐ. ܕܲܒ݂ܪܵܗ̇ ܬܲܠܡܝܼܕ݂ܵܐ ܗܵܘ ܠܘܵܬܹܗ. .

²⁸ ܒܵܬܲܪ ܗܵܠܹܝܢ. ܝܼܕ݂ܲܥ ܝܼܫܘܿܥ ܕܟ݂ܠ ܡܸܕܸܡ ܐܸܫܬܲܠܲܡ. ܘܲܕ݂ܢܸܬ݂ܡܲܠܹܐ ܟܬ݂ܵܒ݂ܵܐ ܐܸܡܲܪ. ܨܗܹܐ ܐ̄ܢܵܐ.

²⁹ ܘܡܵܐܢܵܐ ܣܝܼܡ ܗܘ̣ܵܐ ܕܲܡܠܹܐ ܚܲܠܵܐ. ܗܸܢܘܿܢ ܕܹܝܢ ܡܠܵܘ ܐܸܣܦܘܼܓܵܐ ܡܸܢ ܚܲܠܵܐ. ܘܣܵܡܘ ܥܲܠ ܙܘܿܦܵܐ. ܘܩܲܪܸܒ݂ܘ ܠܘܵܬ݂ ܦܘܼܡܹܗ.

³⁰ ܟܲܕ݂ ܕܹܝܢ ܫܩܲܠ ܗܵܘ ܚܲܠܵܐ ܝܼܫܘܿܥ. ܐܸܡܲܪ. ܗܵܐ ܡܫܲܠܲܡ. ܘܐܲܪܟܸܢ ܪܹܫܹܗ. ܘܐܲܫܠܸܡ ܪܘܼܚܹܗ.

³¹ ܝܗ̄ܘܼܕ݂ܵܝܹ̈ܐ ܕܹܝܢ ܡܛܠ ܕܲܥܪܘܼܒ݂ܬܵܐ ܗ̄ܘܵܬ݂. ܐܵܡܪܝܼܢ. ܠܵܐ ܢܒ݂ܘܬ݂ܘܼܢ ܦܲܓ݂ܪܹ̈ܐ ܗܵܠܹܝܢ ܥܲܠ ܙܩܝܼܦܲܝ̈ܗܘܿܢ. ܡܛܠ ܕܫܲܒܿܬ݂ܵܐ ܢܵܓ݂ܗܵܐ. ܝܵܘܡܵܐ ܗܘ̣ܵܐ ܓܹܝܪ ܪܲܒܵܐ. ܝܵܘܡܵܐ ܕܫܲܒܿܬ݂ܵܐ ܗܵܝ. ܘܲܒ݂ܥܵܘ ܡܸܢ ܦܝܼܠܵܛܘܿܣ. ܕܲܢܬܲܒܪܘܼܢ ܫܵܩܲܝ̈ܗܘܿܢ. ܕܗܵܢܘܿܢ ܙܩܝܼܦܹ̈ܐ. ܘܢܲܚܬ݂ܘܢ ܐܸܢܘܿܢ.

³² ܘܐܸܬ݂ܵܘ ܐܸܣܛܪ̈ܵܛܝܼܘܼܛܹܐ. ܘܬܲܒܲܪܘ ܫܵܩܵܘ̈ܗܝ ܕܩܲܕ݂ܡܵܝܵܐ. ܘܲܕ݂ܗܵܘ ܐ̄ܚܪܹܢܵܐ ܕܐܸܙܕܩܸܦ ܥܲܡܹܗ.

³³ ܘܟܲܕ݂ ܐܸܬ݂ܵܘ ܠܘܵܬ݂ ܝܼܫܘܿܥ. ܚܙܵܘ ܕܡܝܼܬ݂ ܠܹܗ ܡܸܢ ܟܲܕܘܼ. ܘܠܵܐ ܬܲܒܲܪܘ ܫܵܩܵܘ̈ܗܝ.

³⁴ ܐܸܠܵܐ ܚܲܕ݂ ܡܸܢ ܐܸܣܛܪ̈ܵܛܝܼܘܼܛܹܐ. ܡܚܵܝܗܝ ܒܕ݂ܲܦܢܹܗ ܒܠܘܿܟܵܝܬܵܐ. ܘܡܸܚܕ݂ܵܐ ܢܦܲܩ ܕܡܵܐ ܘܡܲܝ̈ܵܐ.

³⁵ ܘܡܲܢ ܕܲܚܙܵܐ ܐܲܣܗܸܕ݂. ܘܫܲܪܝܼܪܵܐ ܗܝܼ ܣܵܗܕܘܼܬܹܗ. ܘܗܘܼ ܝܵܕ݂ܲܥ. ܕܲܫܪܵܪܵܐ ܐܸܡܲܪ. ܕܐܵܦ ܐܲܢ̄ܬ݁ܘܿܢ ܬܗܲܝܡܢܘܼܢ.

³⁶ ܗܵܠܹܝܢ ܓܹܝܪ ܗܘܲܝ̈. ܕܢܸܬ݂ܡܲܠܹܐ ܟܬ݂ܵܒ݂ܵܐ ܕܐܵܡܲܪ ܕܓܲܪܡܵܐ ܠܵܐ ܢܸܬ݁ܬ݁ܒܲܪ ܒܹܗ.

³⁷ ܘܬ݂ܘܼܒ݂ ܟܬ݂ܵܒ݂ܵܐ ܐ̄ܚܪܹܢܵܐ. ܕܐܵܡܲܪ ܕܲܢܚܘܼܪܘܼܢ ܒܡܲܢ ܕܲܕ݂ܩܲܪܘ.

³⁸ ܒܵܬܲܪ ܗܵܠܹܝܢ. ܝܵܘܣܸܦ ܗܵܘ ܕܡܸܢ ܪܵܡܬ݂ܵܐ. ܒܥܵܐ ܡܸܢ ܦܝܼܠܵܛܘܿܣ. ܡܛܠ ܕܬܲܠܡܝܼܕ݂ܵܐ ܗܘ̣ܵܐ ܕܝܼܫܘܿܥ: ܘܲܡܛܲܫܹܐ ܗ̄ܘܵܐ. ܡܸܢ ܕܸܚܠܬ݂ܵܐ ܕܲܝܗ̄ܘܼܕ݂ܵܝܹ̈ܐ. ܕܢܸܫܩܘܿܠ ܦܲܓ݂ܪܹܗ ܕܝܼܫܘܿܥ. ܘܐܲܦܸܣ ܦܝܼܠܵܛܘܿܣ. ܘܐܸܬ݂ܵܐ ܘܲܫܩܲܠ ܦܲܓ݂ܪܹܗ ܕܝܼܫܘܿܥ.

³⁹ ܘܐܸܬ݂ܵܐ ܐܵܦ ܢܝܼܩܵܕܹܡܘܿܣ. ܗܵܘ ܕܐܬ݂ܵܐ ܗܘ̣ܵܐ ܡܸܢ ܩܕ݂ܝܼܡ ܠܘܵܬ݂ ܝܼܫܘܿܥ ܒܠܸܠܝܵܐ ܘܐܲܝܬ݁ܝܼ ܥܲܡܹܗ ܚܘܼܢܛܬ݂ܵܐ ܕܡܘܼܪܵܐ ܘܲܕ݂ܥܸܠܘܲܝ. ܐܲܝܟ݂ ܡܵܐܐ ܠܝܼܛܪ̈ܝܼܢ.

⁴⁰ ܘܫܲܩܠܘܼܗܝ ܠܦܲܓ݂ܪܹܗ ܕܝܼܫܘܿܥ. ܘܟܲܪܟ݂ܘܼܗܝ ܒܟܸܬܵܢܹ̈ܐ ܘܲܒ݂ܒܸܣ̈ܡܹܐ. ܐܲܝܟܲܢܵܐ ܕܐܝܼܬ݂ ܥܝܵܕ݂ܵܐ ܠܲܝܗ̄ܘܼܕ݂ܵܝܹ̈ܐ ܕܢܸܩܒܪܘܼܢ.

⁴¹ ܐܝܼܬ݂ ܗ̄ܘܵܬ݂ ܕܹܝܢ. ܒܗܵܝ ܕܘܼܟܬ݂ܵܐ ܕܐܸܙܕܩܸܦ ܒܵܗ̇ ܝܼܫܘܿܥ. ܓܲܢܬ݂ܵܐ. ܘܒ݂ܵܗ̇ ܒܓܲܢܬ݂ܵܐ. ܒܹܝܬ݂ ܩܒ݂ܘܼܪܵܐ ܚܲܕ݂ܬ݂ܵܐ. ܕܐ̄ܢܵܫ ܥܕ݂ܲܟܹܝܠ ܠܵܐ ܐܸܬ݁ܬ݁ܣܝܼܡ ܗܘ̣ܵܐ ܒܹܗ.

⁴² ܘܣܵܡܘܼܗܝ ܬܲܡܵܢ ܠܝܼܫܘܿܥ. ܡܛܠ ܕܫܲܒܿܬ݂ܵܐ ܥܵܐܠܵܐ ܗ̄ܘܵܬ݂. ܘܡܛܠ ܕܩܲܪܝܼܒ݂ ܗܘ̣ܵܐ ܩܲܒ݂ܪܵܐ.

20

¹ ܒܚܲܕ݂ ܒܫܲܒܵܐ ܕܹܝܢ ܐܸܬܲܬܸ ܡܲܪܝܲܡ ܡܲܓ݂ܕܠܵܝܬܵܐ ܒܨܲܦܪܵܐ ܥܲܕ݂ ܚܸܫܘܿܟ݂. ܠܒܹܝܬ݂ ܩܒ݂ܘܼܪܵܐ. ܘܲܚܙܵܬ݂ ܠܟܹܐܦܵܐ. ܕܲܫܩܝܼܠܵܐ ܡܸܢ ܩܲܒ݂ܪܵܐ.

² ܘܪܹܗܛܲܬ݂ ܐܸܬܲܬܸ ܠܘܵܬ݂ ܫܸܡܥܘܿܢ ܟܹܐܦܵܐ. ܘܲܠܘܵܬ݂ ܗܵܘ ܬܲܠܡܝܼܕ݂ܵܐ ܐ̄ܚܪܹܢܵܐ ܕܪܵܚܹܿܡ ܗܘ̣ܵܐ ܝܼܫܘܿܥ. ܘܐܵܡܪܵܐ ܠܗܘܿܢ. ܕܫܲܩܠܘܼܗܝ ܠܡܵܪܲܢ ܡܸܢ ܗܵܘ ܒܹܝܬ݂ ܩܒ݂ܘܼܪܵܐ. ܘܠܵܐ ܝܵܕ݂ܥܵܐ ܐ̄ܢܵܐ ܐܲܝܟܵܐ ܣܵܡܘܼܗܝ.

³ ܘܲܢܦܲܩ ܫܸܡܥܘܿܢ ܘܗܵܘ ܬܲܠܡܝܼܕ݂ܵܐ ܐ̄ܚܪܹܢܵܐ. ܘܐܵܬܹܝܢ ܗ̄ܘܼܵܘ ܠܒܹܝܬ݂ ܩܒ݂ܘܼܪܵܐ.

⁴ ܘܪܵܗܛܝܼܢ ܗ̄ܘܼܵܘ ܬܪܲܝܗܘܿܢ ܐܲܟ݂ܚܕ݂ܵܐ. ܗܵܘ ܕܹܝܢ ܬܲܠܡܝܼܕ݂ܵܐ ܪܗܸܛ ܩܲܕܡܹܗ ܠܫܸܡܥܘܿܢ. ܘܐܸܬ݂ܵܐ ܩܲܕ݂ܡܵܝܵܐ ܠܒܹܝܬ݂ ܩܒ݂ܘܼܪܵܐ.

⁵ ܘܐܲܕ݂ܝܼܩ ܚܙܵܐ ܟܸܬܵܢܹ̈ܐ ܟܲܕ݂ ܣܝܼܡܝܼܢ. ܡܸܥܲܠ ܕܹܝܢ ܠܵܐ ܥܲܠ.

⁶ ܐܸܬ݂ܵܐ ܕܹܝܢ ܫܸܡܥܘܿܢ ܒܵܬ݂ܪܹܗ. ܘܥܲܠ ܠܒܹܝܬ݂ ܩܒ݂ܘܼܪܵܐ. ܘܲܚܙܵܐ ܟܸܬܵܢܹ̈ܐ ܟܲܕ݂ ܣܝܼܡܝܼܢ.

⁷ ܘܣܘܼܕ݂ܵܪܵܐ ܗܵܘ ܕܲܚܙܝܼܩ ܗܘ̣ܵܐ ܒܪܹܫܹܗ. ܠܵܐ ܥܲܡ ܟܸܬܵܢܹ̈ܐ. ܐܸܠܵܐ ܟܲܕ݂ ܟܪܝܼܟ݂ ܘܣܝܼܡ ܠܲܣܛܲܪ ܒܲܚܕ݂ܵܐ ܕܘܼܟܵܐ.

⁸ ܗܵܝܕܹܝܢ ܥܲܠ ܐܵܦ ܗܵܘ ܬܲܠܡܝܼܕ݂ܵܐ ܕܐܸܬ݂ܵܐ ܩܲܕ݂ܡܵܝܵܐ ܠܒܹܝܬ݂ ܩܒ݂ܘܼܪܵܐ. ܘܲܚܙܵܐ. ܘܗܲܝܡܸܢ.

⁹ ܠܵܐ ܓܹܝܪ ܥܕ݂ܲܟܹܝܠ ܝܵܕ݂ܥܝܼܢ ܗ̄ܘܼܵܘ ܡܸܢ ܟܬ݂ܵܒܹ̈ܐ ܕܲܥܬ݂ܝܼܕ݂ ܗܘ̣ܵܐ ܠܲܡܩܵܡ ܡܸܢ ܡܝܼܬܹ̈ܐ.

¹⁰ ܘܐܸܙܲܠܘ ܗܸܢܘܿܢ ܬܲܠܡܝܼܕܹ̈ܐ ܬܘܼܒ݂ ܠܕ݂ܘܼܟܲܬ݂ܗܘܿܢ.

¹¹ ܡܲܪܝܲܡ ܕܹܝܢ ܩܵܝܡܵܐ ܗ̄ܘܵܬ݂ ܠܘܵܬ݂ ܩܲܒ݂ܪܵܐ. ܘܒ݂ܵܟ݂ܝܵܐ. ܘܟܲܕ݂ ܒܵܟ݂ܝܵܐ. ܐܲܕܝܼܩܲܬ݂ ܒܩܲܒ݂ܪܵܐ.

¹² ܘܲܚܙܵܬ݂ ܬܪܹܝܢ ܡܲܠܲܐܟܹ̈ܐ ܒܚܸܘܵܪܹ̈ܐ ܕܝܵܬ݂ܒܝܼܢ. ܚܲܕ݂ ܡܸܢ ܐܸܣܕ݂ܵܘܗܝ. ܘܚܲܕ݂ ܡܸܢ ܪܸ̈ܓ݂ܠܵܘܗܝ. ܐܲܝܟܵܐ ܕܣܝܼܡ ܗܘ̣ܵܐ ܦܲܓ݂ܪܹܗ ܕܝܼܫܘܿܥ.

¹³ ܘܐܵܡܪܝܼܢ ܠܵܗ̇. ܐܲܢ̄ܬ݁ܬ݂ܵܐ. ܡܵܢܵܐ ܒܵܟ݂ܝܵܐ ܐܲܢ̄ܬ݁ܝ. ܐܵܡܪܵܐ ܠܗܘܿܢ. ܕܫܲܩܠܘܼܗܝ ܠܡܵܪܝ. ܘܠܵܐ ܝܵܕ݂ܥܵܐ ܐ̄ܢܵܐ ܐܲܝܟܵܐ ܣܵܡܘܼܗܝ.

¹⁴ ܗܵܕܹܐ ܐܸܡܪܲܬ݂ ܘܐܸܬ݂ܦܲܢܝܲܬ݂ ܠܒܸܣܬ݁ܪܵܗ̇ ܘܲܚܙܵܬ݂ ܠܝܼܫܘܿܥ ܕܩܵܐܹܡ. ܘܠܵܐ ܝܵܕ݂ܥܵܐ ܗ̄ܘܵܬ݂ ܕܝܼܫܘܿܥ ܗ̄ܘܼ.

¹⁵ ܐܵܡܲܪ ܠܵܗ̇ ܝܼܫܘܿܥ. ܐܲܢ̄ܬ݁ܬ݂ܵܐ. ܡܵܢܵܐ ܒܵܟ݂ܝܵܐ ܐܲܢ̄ܬ݁ܝ. ܘܲܠܡܲܢ ܒܵܥܝܵܐ ܐܲܢ̄ܬ݁ܝ. ܗܝܼ ܕܹܝܢ ܣܸܒ݂ܪܲܬ݂. ܕܓܲܢܵܢܵܐ ܗܘܼ. ܘܐܵܡܪܵܐ ܠܹܗ. ܡܵܪܝ. ܐܸܢ ܐܲܢ̄ܬ݁ ܫܩܲܠܬܵܝܗܝ. ܐܸܡܲܪ ܠܝܼ ܐܲܝܟܵܐ ܣܵܡܬܵܝܗܝ. ܐܹܙܲܠ ܐܸܫܩܠܝܼܘܗܝ.

¹⁶ ܐܵܡܲܪ ܠܵܗ̇ ܝܼܫܘܿܥ. ܡܲܪܝܲܡ. ܘܐܸܬ݂ܦܲܢܝܲܬ݂ ܘܐܵܡܪܵܐ ܠܹܗ ܥܸܒ݂ܪܵܐܝܼܬ݂. ܪܲܒܘܼܠܝܼ. ܕܡܸܬ݂ܐܡܲܪ ܡܲܠܦܵܢܵܐ.

¹⁷ ܐܵܡܲܪ ܠܵܗ̇ ܝܼܫܘܿܥ. ܠܵܐ ܬܸܬ݂ܩܲܪܒ݂ܝܼܢ ܠܝܼ. ܠܵܐ ܓܹܝܪ ܥܕ݂ܲܟܹܝܠ ܣܸܠܩܹܬ݂ ܠܘܵܬ݂ ܐܵܒ݂ܝ. ܙܸܠܝ ܕܹܝܢ ܠܘܵܬ݂ ܐܲܚܲܝ̈. ܘܐܸܡܲܪܝ ܠܗܘܿܢ. ܣܵܠܹܩ ܐ̄ܢܵܐ ܠܘܵܬ݂ ܐܵܒ݂ܝ. ܘܐܲܒ݂ܘܼܟ݂ܘܼܢ. ܘܐܲܠܵܗܝ. ܘܐܲܠܵܗܟ݂ܘܿܢ.

¹⁸ ܗܵܝܕܹܝܢ ܐܸܬܲܬܸ ܡܲܪܝܲܡ ܡܲܓ݂ܕܠܵܝܬܵܐ. ܘܣܲܒܪܲܬ݂ ܠܬܲܠܡܝܼܕܹ̈ܐ. ܕܲܚܙܵܬ݂ ܠܡܵܪܲܢ. ܘܲܕ݂ܗܵܠܹܝܢ ܐܸܡܲܪ ܠܵܗ̇.

¹⁹ ܟܲܕ݂ ܗܘ̣ܵܐ ܕܹܝܢ ܪܲܡܫܵܐ ܕܝܵܘܡܵܐ ܗܵܘ ܕܚܲܕ݂ ܒܫܲܒܵܐ: ܘܬܲܪ̈ܥܹܐ ܐܲܚܝܼܕ݂ܝܼܢ ܗ̄ܘܼܵܘ ܕܐܲܝܟܵܐ ܕܐܝܼܬܲܝܗܘܿܢ ܗ̄ܘܼܵܘ ܬܲܠܡܝܼܕܹ̈ܐ: ܡܛܠ ܕܸܚܠܬ݂ܵܐ ܕܲܝܗ̄ܘܼܕ݂ܵܝܹ̈ܐ. ܐܸܬ݂ܵܐ ܝܼܫܘܿܥ ܩܵܡ ܒܲܝܢܵܬ݂ܗܘܿܢ. ܘܐܸܡܲܪ ܠܗܘܿܢ. ܫܠܵܡܵܐ ܥܲܡܟ݂ܘܿܢ.

²⁰ ܗܵܕܹܐ ܐܸܡܲܪ. ܘܚܵܘܝܼ ܐܸܢܘܿܢ ܐܝܼܕ݂ܵܘ̈ܗܝ. ܘܣܸܛܪܹܗ. ܘܲܚܕ݂ܝܼܘ ܬܲܠܡܝܼܕܹ̈ܐ ܕܲܚܙܵܘ ܠܡܵܪܲܢ.

²¹ ܐܸܡܲܪ ܠܗܘܿܢ ܕܹܝܢ ܬܘܼܒ݂ ܝܼܫܘܿܥ. ܫܠܵܡܵܐ ܥܲܡܟ݂ܘܿܢ. ܐܲܝܟܲܢܵܐ ܕܫܲܕܪܲܢܝ ܐܵܒ݂ܝ. ܐܵܦ ܐܸܢܵܐ ܡܫܲܕܲܪ ܐ̄ܢܵܐ ܠܟ݂ܘܿܢ.

²² ܘܟܲܕ݂ ܐܸܡܲܪ ܗܵܠܹܝܢ. ܢܦܲܚ ܒܗܘܿܢ. ܘܐܸܡܲܪ ܠܗܘܿܢ. ܩܲܒܸܠܘ ܪܘܼܚܵܐ ܕܩܘܼܕ݂ܫܵܐ.

²³ ܐܸܢ ܬܸܫܒܩܘܼܢ ܚܛܵܗܹ̈ܐ ܠܐ̄ܢܵܫ. ܢܸܫܬܲܒ݂ܩܘܼܢ ܠܹܗ. ܘܐܸܢ ܬܸܐܚܕܘܼܢ ܕܐ̄ܢܵܫ. ܐܲܚܝܼܕ݂ܝܼܢ.

²⁴ ܬܐܘܿܡܵܐ ܕܹܝܢ ܚܲܕ݂ ܡܸܢ ܬܪܸܥܣܲܪܬܵܐ: ܗܵܘ ܕܡܸܬ݂ܐܡܲܪ ܬܐܵܡܵܐ. ܠܵܐ ܗܘ̣ܵܐ ܬܲܡܵܢ ܗܘ̣ܵܐ ܥܲܡܗܘܿܢ ܟܲܕ݂ ܐܸܬ݂ܵܐ ܝܼܫܘܿܥ.

²⁵ ܘܐܵܡܪܝܼܢ ܠܹܗ ܬܲܠܡܝܼܕܹ̈ܐ. ܚܙܲܝܢ ܠܡܵܪܲܢ. ܗܘܼ ܕܹܝܢ ܐܸܡܲܪ ܠܗܘܿܢ. ܐܸܠܵܐ ܚܵܙܹܐ ܐ̄ܢܵܐ ܒܐܝܼܕ݂ܵܘ̈ܗܝ ܕܘܟܝܵܬ݂ܵܐ ܕܨܸܨܹ̈ܐ: ܘܪܵܡܹܐ ܐ̄ܢܵܐ ܒܗܹܝܢ ܨܸܒ݂̈ܥܵܬ݂ܝ: ܘܡܵܘܫܸܛ ܐ̄ܢܵܐ ܐܝܼܕ݂ܝ ܒܕ݂ܲܦܢܹܗ. ܠܵܐ ܡܗܲܝܡܸܢ ܐ̄ܢܵܐ.

²⁶ ܘܒܵܬܲܪ ܬܡܵܢܝܵܐ ܝܵܘܡ̈ܝܼܢ. ܬܘܼܒ݂ ܠܓ݂ܵܘ ܗ̄ܘܼܵܘ ܬܲܠܡܝܼܕܹ̈ܐ. ܘܬ݂ܐܘܿܡܵܐ ܥܲܡܗܘܿܢ. ܘܐܸܬ݂ܵܐ ܝܼܫܘܿܥ. ܟܲܕ݂ ܐܲܚܝܼܕ݂ܝܼܢ ܬܲܪ̈ܥܹܐ. ܩܵܡ ܒܲܡܨܲܥܬ݂ܵܐ. ܘܐܸܡܲܪ ܠܗܘܿܢ. ܫܠܵܡܵܐ ܥܲܡܟ݂ܘܿܢ.

²⁷ ܘܐܸܡܲܪ ܠܬ݂ܐܘܿܡܵܐ. ܐܲܝܬܵܐ ܨܸܒ݂ܥܵܟ݂ ܠܗܵܪܟܵܐ. ܘܲܚܙܝܼ ܐܝܼܕ݂ܲܝ̈. ܘܐܲܝܬܵܐ ܐܝܼܕ݂ܵܟ݂. ܘܐܵܘܫܸܛ ܒܓܲܒܝ. ܘܠܵܐ ܬܸܗܘܹܐ ܠܵܐ ܡܗܲܝܡܢܵܐ. ܐܸܠܵܐ ܡܗܲܝܡܢܵܐ.

²⁸ ܘܲܥܢܵܐ ܬܐܘܿܡܵܐ. ܘܐܸܡܲܪ ܠܹܗ. ܡܵܪܝ. ܘܐܲܠܵܗܝ.

²⁹ ܐܵܡܲܪ ܠܹܗ ܝܼܫܘܿܥ. ܗܵܫܵܐ ܕܲܚܙܲܝܬܵܢܝ. ܗܲܝܡܸܢܬ݁. ܛܘܼܒܲܝܗܘܿܢ ܠܐܲܝܠܹܝܢ ܕܠܵܐ ܚܙܵܐܘܼܢܝ ܘܗܲܝܡܸܢܘ.

³⁰ ܣܲܓܝܼ̈ܐܵܬ݂ܵܐ ܕܹܝܢ ܐܵܬ݂ܘܵܬ݂ܵܐ ܐ̄ܚܪ̈ܵܢܝܵܬ݂ܵܐ ܥܒܲܕ݂ ܝܼܫܘܿܥ ܩܕ݂ܵܡ ܬܲܠܡܝܼܕ݂ܵܘ̈ܗܝ ܐܲܝܠܹܝܢ ܕܠܵܐ ܟܬ݂ܝܼܒ݂ܵܢ ܒܲܟ݂ܬ݂ܵܒ݂ܵܐ ܗܵܢܵܐ.

³¹ ܐܵܦ ܗܵܠܹܝܢ ܕܹܝܢ ܕܲܟܬ݂ܝܼܒ݂ܵܢ. ܕܲܬ݂ܗܲܝܡܢܘܼܢ. ܕܝܼܫܘܿܥ ܗܘܼ ܡܫܝܼܚܵܐ ܒܪܹܗ ܕܐܲܠܵܗܵܐ. ܘܡܵܐ ܕܗܲܝܡܸܢܬ݁ܘܢ. ܢܸܗܘܘܿܢ ܠܟ݂ܘܿܢ ܒܲܫܡܹܗ ܚܲܝܹ̈ܐ ܕܲܠܥܵܠܲܡ.

21

¹ ܒܵܬܲܪ ܗܵܠܹܝܢ. ܚܵܘܝܼ ܬܘܼܒ݂ ܢܲܦ̮ܫܹܗ ܝܼܫܘܿܥ ܠܬܲܠܡܝܼܕ݂ܵܘ̈ܗܝ ܥܲܠ ܝܲܡܵܐ ܕܛܹܒܲܪܝܼܘܿܣ. ܚܵܘܝܼ ܕܹܝܢ ܗܵܟܲܢܵܐ.

² ܐܝܼܬܲܝܗܘܿܢ ܗ̄ܘܼܵܘ ܐܲܟ݂ܚܕ݂ܵܐ. ܫܸܡܥܘܿܢ ܟܹܐܦܵܐ. ܘܬ݂ܐܘܿܡܵܐ ܕܡܸܬ݂ܐܡܲܪ ܬܐܵܡܵܐ. ܘܢܲܬ݂ܢܝܼܐܹܝܠ ܗܵܘ ܕܡܸܢ ܩܵܛܢܹ̈ܐ ܕܲܓ݂ܠܝܼܠܵܐ. ܘܲܒ݂ܢܲܝ̈ ܙܲܒ݂ܕ݂ܲܝ. ܘܲܬ݂ܪܹܝܢ ܐ̄ܚܪ̈ܵܢܝܼܢ ܡܸܢ ܬܲܠܡܝܼܕܹ̈ܐ.

³ ܐܵܡܲܪ ܠܗܘܿܢ ܫܸܡܥܘܿܢ ܟܹܐܦܵܐ. ܐܵܙܹܠ ܐ̄ܢܵܐ ܐܸܨܘܼܕ݂ ܢܘܼܢܹ̈ܐ. ܐܵܡܪܝܼܢ ܠܹܗ ܐܵܦ ܚܢܲܢ ܐܵܬܹܝܢܲܢ ܥܲܡܵܟ݂. ܘܲܢܦܲܩܘ ܘܲܣܠܸܩܘ ܠܲܣܦܝܼܢ̄ܬܵܐ. ܘܲܒ݂ܗܵܘ ܠܸܠܝܵܐ ܡܸܕܸܡ ܠܵܐ ܨܵܕ݂ܘ.

⁴ ܟܲܕ݂ ܕܹܝܢ ܗܘ̣ܵܐ ܨܲܦܪܵܐ. ܩܵܡ ܝܼܫܘܿܥ ܥܲܠ ܝܲܕ݂ ܝܲܡܵܐ. ܘܠܵܐ ܝܼܕ݂ܲܥܘ ܬܲܠܡܝܼܕܹ̈ܐ ܕܝܼܫܘܿܥ ܗ̄ܘܼ.

⁵ ܘܐܸܡܲܪ ܠܗܘܿܢ ܝܼܫܘܿܥ. ܛܠܵܝܹ̈ܐ. ܠܡܵܐ. ܐܝܼܬ݂ ܠܟ݂ܘܿܢ ܡܸܕܸܡ ܠܡܸܠܥܲܣ. ܐܵܡܪܝܼܢ ܠܹܗ ܠܵܐ.

⁶ ܐܵܡܲܪ ܠܗܘܿܢ. ܐܲܪܡܵܘ ܡܨܝܼܕ݂ܬ݁ܟ݂ܘܿܢ ܡܸܢ ܓܲܒܵܐ ܕܝܲܡܝܼܢܵܐ ܕܲܣܦܝܼܢ̄ܬܵܐ. ܘܡܸܫܟܿܚܝܼܢ ܐܢ̄ܬܘܿܢ. ܘܐܲܪܡܝܼܘ. ܘܠܵܐ ܐܸܫܟܲܚܘ ܠܡܸܓ݁ܕ݂ܵܗ̇ ܠܲܡܨܝܼܕ݂ܬܵܐ ܡܸܢ ܣܘܿܓ݂ܵܐܐ ܕܢܘܼܢܹ̈ܐ ܕܐܸܚܕܲܬ݂.

⁷ ܘܐܸܡܲܪ ܬܲܠܡܝܼܕ݂ܵܐ ܗܵܘ ܕܪܵܚܹܡ ܗܘ̣ܵܐ ܠܹܗ ܝܼܫܘܿܥ ܠܟܹܐܦܵܐ. ܗܵܢܵܐ. ܡܵܪܲܢ ܗ̄ܘܼ. ܫܸܡܥܘܿܢ ܕܹܝܢ ܟܲܕ݂ ܫܡܲܥ ܕܡܵܪܲܢ ܗ̄ܘܼ. ܢܣܲܒ݂ ܟܘܿܬ݁ܝܼܢܹܗ. ܡܚܵܐ ܒܚܲܨܵܘ̈ܗܝ. ܡܛܠ ܕܥܲܪܛܸܠܝܵܐ ܗ̄ܘܵܐ. ܘܲܫܕ݂ܵܐ ܢܲܦ̮ܫܹܗ ܒܝܲܡܵܐ. ܕܢܹܐܬܹܐ ܠܘܵܬ݂ ܝܼܫܘܿܥ.

⁸ ܐ̄ܚܪܵܢܹ̈ܐ ܕܹܝܢ ܬܲܠܡܝܼܕܹ̈ܐ. ܒܲܣܦܝܼܢ̄ܬܵܐ ܐܸܬ݂ܵܘ. ܠܵܐ ܓܹܝܪ ܪܲܚܝܼܩܝܼܢ ܗ̄ܘܼܵܘ ܣܲܓܝܼ ܡܸܢ ܐܲܪܥܵܐ ܐܸܠܵܐ ܐܲܝܟ݂ ܡܲܐܬܹܝܢ ܐܲܡ̈ܝܼܢ. ܘܢܵܓ݂ܕܝܼܢ ܗ̄ܘܼܵܘ ܠܵܗ̇ ܠܲܡܨܝܼܕ݂ܬܵܐ ܗܵܝ ܕܢܘܼܢܹ̈ܐ.

⁹ ܟܲܕ݂ ܕܹܝܢ ܣܠܸܩܘ ܠܐܲܪܥܵܐ. ܚܙܵܘ ܓܘܼܡܪܹ̈ܐ ܟܲܕ݂ ܣܝܼܡܵܢ. ܘܢܘܼܢܵܐ ܟܲܕ݂ ܣܝܼܡ ܥܠܲܝܗܹܝܢ ܘܠܲܚܡܵܐ.

¹⁰ ܘܐܸܡܲܪ ܠܗܘܿܢ ܝܼܫܘܿܥ. ܐܲܝܬܵܘ ܡܸܢ ܗܵܢܘܿܢ ܢܘܼܢܹ̈ܐ ܕܨܵܕ݂ܬ݁ܘܢ ܗܵܫܵܐ.

¹¹ ܘܲܣܠܸܩ ܫܸܡܥܘܿܢ ܟܹܐܦܵܐ. ܘܢܲܓ݂ܕܵܗ̇ ܠܲܡܨܝܼܕ݂ܬܵܐ ܠܐܲܪܥܵܐ. ܟܲܕ݂ ܡܲܠܝܵܐ ܢܘܼܢܹ̈ܐ ܪܵܘܪ̈ܒܹܐ. ܡܵܐܐ ܘܚܲܡܫܝܼܢ ܘܲܬ݂ܠܵܬ݂ܵܐ. ܘܲܒ݂ܗܵܢܵܐ ܟܠܹܗ ܝܘܼܩܪܵܐ ܠܵܐ ܐܸܨܛܲܪܝܲܬ݂ ܡܨܝܼܕ݂ܬܵܐ ܗܵܝ.

¹² ܘܐܸܡܲܪ ܠܗܘܿܢ ܝܼܫܘܿܥ. ܬܵܘ ܐܸܫܬܲܪܵܘ. ܐ̄ܢܵܫ ܕܹܝܢ ܡܸܢ ܬܲܠܡܝܼܕܹ̈ܐ. ܠܵܐ ܡܲܡܪܲܚ ܗܘ̣ܵܐ ܕܲܢܫܲܐܠܝܼܘܗܝ ܕܡܲܢܘܼ. ܕܝܵܕ݂ܥܝܼܢ ܗ̄ܘܼܵܘ ܕܡܵܪܲܢ ܗ̄ܘܼ.

¹³ ܩܪܸܒ݂ ܕܹܝܢ ܝܼܫܘܿܥ. ܘܲܫܩܲܠ ܠܲܚܡܵܐ ܘܢܘܼܢܹ̈ܐ. ܘܝܲܗ̄ܒ݂ ܠܗܘܿܢ.

¹⁴ ܗܵܕܹܐ ܕܲܬ݂ܠܵܬ݂ ܙܲܒ݂ܢ̈ܝܼܢ ܐܸܬ݂ܚܙܝܼ ܝܼܫܘܿܥ ܠܬܲܠܡܝܼܕ݂ܵܘ̈ܗܝ. ܟܲܕ݂ ܩܵܡ ܡܸܢ ܒܹܝܬ݂ ܡܝܼܬܹ̈ܐ. .

¹⁵ ܟܲܕ݂ ܕܹܝܢ ܐܸܫܬܲܪܝܼܘ. ܐܸܡܲܪ ܝܼܫܘܿܥ ܠܫܸܡܥܘܿܢ ܟܹܐܦܵܐ. ܫܸܡܥܘܿܢ ܒܲܪ ܝܵܘܢܵܐ. ܪܵܚܹܡ ܐܲܢ̄ܬ݁ ܠܝܼ ܝܲܬ݁ܝܼܪ ܡܸܢ ܗܵܠܹܝܢ. ܐܵܡܲܪ ܠܹܗ. ܐܹܝܢ ܡܵܪܝ. ܐܲܢ̄ܬ݁ ܝܵܕ݂ܲܥ ܐܲܢ̄ܬ݁. ܕܪܵܚܹܡ ܐ̄ܢܵܐ ܠܵܟ݂. ܐܵܡܲܪ ܠܹܗ. ܪܥܝܼ ܠܝܼ ܐܸܡܪ̈ܲܝ.

¹⁶ ܐܵܡܲܪ ܠܹܗ ܬܘܼܒ݂ ܕܬܲܪܬܹ݁ܝܢ ܙܲܒ݂ܢ̈ܝܼܢ. ܫܸܡܥܘܿܢ ܒܲܪ ܝܵܘܢܵܐ. ܪܵܚܹܡ ܐܲܢ̄ܬ݁ ܠܝܼ. ܐܵܡܲܪ ܠܹܗ ܐܹܝܢ ܡܵܪܝ. ܐܲܢ̄ܬ݁ ܝܵܕ݂ܲܥ ܐܲܢ̄ܬ݁ ܕܪܵܚܹܡ ܐ̄ܢܵܐ ܠܵܟ݂. ܐܵܡܲܪ ܠܹܗ ܝܼܫܘܿܥ. ܪܥܝܼ ܠܝܼ ܥܸܪ̈ܒܲܝ.

¹⁷ ܐܵܡܲܪ ܠܹܗ ܕܲܬ݂ܠܵܬ݂ ܙܲܒ݂ܢ̈ܝܼܢ. ܫܸܡܥܘܿܢ ܒܲܪ ܝܵܘܢܵܐ. ܪܵܚܹܡ ܐܲܢ̄ܬ݁ ܠܝܼ. ܘܟܸܪܝܲܬ݂ ܠܹܗ ܠܟܹܐܦܵܐ ܕܐܵܡܲܪ ܠܹܗ ܕܲܬ݂ܠܵܬ݂ ܙܲܒ݂ܢ̈ܝܼܢ ܕܪܵܚܹܡ ܐܲܢ̄ܬ݁ ܠܝܼ. ܘܐܸܡܲܪ ܠܹܗ. ܡܵܪܝ. ܟܠ ܡܸܕܸܡ ܐܲܢ̄ܬ݁ ܚܵܟܹܡ ܐܲܢ̄ܬ݁. ܐܲܢ̄ܬ݁ ܝܵܕ݂ܲܥ ܐܲܢ̄ܬ݁. ܕܪܵܚܹܡ ܐ̄ܢܵܐ ܠܵܟ݂. ܐܵܡܲܪ ܠܹܗ ܝܼܫܘܿܥ. ܪܥܝܼ ܠܝܼ ܢܩܵܘܵܬ݂̈ܝ.

¹⁸ ܐܵܡܹܝܢ ܐܵܡܹܝܢ ܐܵܡܲܪ ܐ̄ܢܵܐ ܠܵܟ݂. ܕܟܲܕ݂ ܛܠܹܐ ܗ̄ܘܲܝܬ݁. ܐܲܢ̄ܬ݁ ܠܢܲܦ̮ܫܵܟ݂ ܐܵܣܲܪ ܗ̄ܘܲܝܬ݁ ܚܲܨܲܝ̈ܟ. ܘܲܡܗܲܠܸܟ݂ ܗ̄ܘܲܝܬ݁ ܠܐܲܝܟܵܐ ܕܨܵܒܹܐ ܐܲܢ̄ܬ݁. ܡܵܐ ܕܹܝܢ ܕܲܣܐܸܒ݂ܬ݁. ܬܸܦܫܘܿܛ ܐܝܼܕ݂ܲܝ̈ܟ. ܘܐܲܚܪܹܝܢ ܢܹܐܣܘܿܪ ܠܵܟ݂ ܚܲܨܲܝ̈ܟ. ܘܢܵܘܒܠܵܟ݂. ܠܐܲܝܟܵܐ ܕܠܵܐ ܨܵܒܹܐ ܐܲܢ̄ܬ݁.

¹⁹ ܗܵܕܹܐ ܕܹܝܢ ܐܸܡܲܪ. ܕܲܢܚܵܘܐ ܒܐܲܝܢܵܐ ܡܵܘܬܵܐ ܥܬ݂ܝܼܕ݂ ܕܲܢܫܲܒܲܚ ܠܐܲܠܵܗܵܐ. ܘܟܲܕ݂ ܐܸܡܲܪ ܗܵܠܹܝܢ. ܐܸܡܲܪ ܠܹܗ. ܬܵܐ ܒܵܬܲܪܝ.

²⁰ ܘܐܸܬ݂ܦܢܝܼ ܫܸܡܥܘܿܢ ܟܹܐܦܵܐ. ܘܲܚܙܵܐ ܠܬܲܠܡܝܼܕ݂ܵܐ ܗܵܘ ܕܪܵܚܹܡ ܗܘ̣ܵܐ ܝܼܫܘܿܥ ܕܐܵܬܹܐ ܒܵܬ݂ܪܹܗ. ܗܵܘ ܕܲܢܦܲܠ ܗܘ̣ܵܐ ܒܲܚܫܵܡܝܼܬ݂ܵܐ ܥܲܠ ܚܲܕ݂ܝܹܗ ܕܝܼܫܘܿܥ. ܘܐܸܡܲܪ. ܡܵܪܝ. ܡܲܢܘܼ ܡܲܫܠܸܡ ܠܵܟ݂.

²¹ ܠܗܵܢܵܐ ܟܲܕ݂ ܚܙܵܐ ܟܹܐܦܵܐ. ܐܸܡܲܪ ܠܝܼܫܘܿܥ. ܡܵܪܝ. ܘܗܵܢܵܐ. ܡܵܢܵܐ.

²² ܐܵܡܲܪ ܠܹܗ ܝܼܫܘܿܥ. ܐܸܢ ܨܵܒܹܐ ܐ̄ܢܵܐ ܕܲܢܩܵܘܹܐ ܗܵܢܵܐ ܥܕ݂ܲܡܵܐ ܕܐܵܬܹܐ ܐ̄ܢܵܐ. ܠܵܟ݂ ܡܵܐ ܠܵܟ݂. ܐܲܢ̄ܬ݁ ܬܵܐ ܒܵܬܲܪܝ.

²³ ܘܢܸܦܩܲܬ݂ ܗܵܕܹܐ ܡܸܠܬ݂ܵܐ ܒܹܝܬ݂ ܐܲܚܹ̈ܐ. ܕܗܵܘ ܬܲܠܡܝܼܕ݂ܵܐ ܠܵܐ ܡܵܐܹܬ݂. ܝܼܫܘܿܥ ܕܹܝܢ. ܠܵܐ ܗܘ̣ܵܐ ܕܠܵܐ ܡܵܐܹܬ݂ ܐܸܡܲܪ. ܐܸܠܵܐ ܕܐܸܢ ܨܵܒܹܐ ܐ̄ܢܵܐ ܕܲܢܩܵܘܹܐ ܗܵܢܵܐ ܥܕ݂ܲܡܵܐ ܕܐܵܬܹܐ ܐ̄ܢܵܐ. ܠܵܟ݂ ܡܵܐ ܠܵܟ݂.

²⁴ ܗܵܢܵܘ ܬܲܠܡܝܼܕ݂ܵܐ ܕܐܲܣܗܸܕ݂ ܥܲܠ ܗܵܠܹܝܢ ܟܠܗܹܝܢ. ܘܐܵܦ ܟܬܲܒ݂ ܐܸܢܹܝܢ. ܘܝܵܕ݂ܥܝܼܢ ܚ̱ܢܲܢ ܕܫܲܪܝܼܪܵܐ ܗܝܼ ܣܵܗܕܘܼܬܹܗ.

²⁵ ܐܝܼܬ݂ ܕܹܝܢ ܐܵܦ ܐ̄ܚܪ̈ܵܢܝܵܬ݂ܵܐ ܣܲܓܝܼ̈ܐܵܬ݂ܵܐ ܕܲܥܒܲܕ݂ ܝܼܫܘܿܥ. ܐܲܝܠܹܝܢ ܕܐܸܠܘܼ ܚܕ݂ܵܐ ܚܕ݂ܵܐ ܡܸܬ݂ܟܲܬ݂ܒܵܢ ܗ̄ܘܲܝ̈: ܐܵܦ ܠܵܐ ܗܘܼ ܥܵܠܡܵܐ ܐܲܝܟ݂ ܕܣܵܒܲܪ ܐ̄ܢܵܐ ܣܵܦܸܩ ܗܘ̣ܵܐ ܠܲܟܬ݂ܵܒܹ̈ܐ ܕܡܸܬ݂ܟܲܬ݂ܒܝܼܢ ܗ̄ܘܼܵܘ.