1

¹ ܡܛܠ ܕܣܲܓܝܼܐܹ̈ܐ ܨܒ݂ܵܘ. ܕܢܲܟ݂ܬ݁ܒ݂ܘܼܢ ܬܲܫ̈ܥܝܵܬ݂ܵܐ ܕܣܘܼܥܪ̈ܵܢܹܐ. ܐܲܝܠܹܝܢ ܕܲܚܢܲܢ ܡܦܵܣܝܼܢ ܚ̱ܢܲܢ ܒܗܘܿܢ:

² ܐܲܝܟ݂ ܡܸܕܸܡ ܕܐܲܫܠܸܡܘ ܠܲܢ ܗܵܢܘܿܢ ܕܡܸܢ ܩܕ݂ܝܼܡ ܗܘܵܘ ܚܲܙܵܝܹ̈ܐ ܘܲܡܫܲܡܫܵܢܹ̈ܐ ܕܝܼܠܵܗ̇ ܕܡܸܠܬ݂ܵܐ.

³ ܐܸܬ݂ܚܙܝܼ ܐܵܦ ܠܝܼ ܡܛܠ ܕܩܲܪܝܼܒ݂ ܗ̄ܘܹܝܬ݂ ܝܲܨܝܼܦܵܐܝܼܬ݂ ܠܟ݂ܠܗܘܿܢ: ܕܟܠ ܡܸܕܸܡ ܒܛܲܟ݂ܣܹܗ ܐܸܟ݂ܬܘܼܒ݂ ܠܵܟ݂ ܢܲܨܝܼܚܵܐ: ܬܹܐܘܿܦܝܼܠܵܐ.

⁴ ܕܬܸܕܲܥ ܫܪܵܪܵܐ ܕܡܸܠܹ̈ܐ ܕܐܬ݁ܬܲܠܡܲܕܬ݁ ܠܗܹܝܢ.

⁵ ܗܘ̣ܵܐ ܒܝܵܘ̈ܡܵܬܹܗ ܕܗܹܪܘܿܕܸܣ ܡܲܠܟܵܐ ܕܲܝܗ̄ܘܼܕ݂ܵܐ. ܟܵܗܢܵܐ ܚܲܕ݂ ܕܲܫܡܹܗ ܗܘ̣ܵܐ ܙܟܲܪܝܵܐ. ܡܸܢ ܬܸܫܡܸܫܬܵܐ ܕܒܹܝܬ݂ ܐܲܒ݂ܝܼܵܐ. ܘܐܲܢ̄ܬ݁ܬܹܗ. ܡܸܢ ܒ̈ܢܵܬܹܗ ܕܐܲܗܪܘܿܢ. ܫܡܵܗ̇ ܗܘ̣ܵܐ ܐܹܠܝܼܫܒܲܥ.

⁶ ܬܪ̈ܲܝܗܘܿܢ ܕܹܝܢ. ܙܲܕܝܼܩ̈ܝܼܢ ܗ̄ܘܼܵܘ ܩܕ݂ܵܡ ܐܲܠܵܗܵܐ. ܘܲܡܗܲܠܟ݂ܝܼܢ ܒܟ݂ܠܗܘܿܢ ܦܘܼܩܕܵܢܵܘ̈ܗܝ ܘܲܒ݂ܟܹܐܢܘܼܬܹܗ ܕܡܵܪܝܵܐ. ܕܠܵܐ ܥܸܕ݂ܠܵܝ.

⁷ ܒܪܵܐ ܕܹܝܢ. ܠܲܝܬ݁ ܗܘ̣ܵܐ ܠܗܘܿܢ. ܡܛܠ ܕܐܹܠܝܼܫܒܲܥ ܥܩܲܪܬ݂ܵܐ ܗ̄ܘܵܬ݂. ܘܲܬ݂ܪ̈ܲܝܗܘܿܢ. ܣܲܓܝܼܐܲܝ̈ ܒܝܵܘ̈ܡܵܬ݂ܗܘܿܢ ܗ̄ܘܼܵܘ.

⁸ ܗܘ̣ܵܐ ܗ̄ܘܵܐ ܕܹܝܢ ܟܲܕ݂ ܡܟܲܗܸܢ ܗܘ̣ܵܐ ܒܛܲܟ݂ܣܵܐ ܕܬܸܫܡܸܫܬܹ݁ܗ ܩܕ݂ܵܡ ܐܲܠܵܗܵܐ

⁹ ܒܲܥܝܵܕ݂ܵܐ ܕܟܵܗܢܘܼܬ݂ܵܐ. ܡܛܵܝܗܝ ܕܲܢܣܝܼܡ ܒܸܣܡܹ̈ܐ. ܘܥܲܠ ܠܗܲܝܟܠܹܗ ܕܡܵܪܝܵܐ.

¹⁰ ܘܟ݂ܠܹܗ ܟܸܢܫܵܐ ܕܥܲܡܵܐ. ܡܨܲܠܹܐ ܗܘ̣ܵܐ ܠܒܲܪ ܒܥܸܕܵܢܵܐ ܕܒܸܣܡܹ̈ܐ.

¹¹ ܘܐܸܬ݂ܚܙܝܼ ܠܹܗ ܠܲܙܟܲܪܝܵܐ ܡܲܠܲܐܟ݂ܵܐ ܕܡܵܪܝܵܐ ܕܩܵܐܹܡ ܡܸܢ ܝܲܡܝܼܢܵܐ ܕܡܲܕ݂ܒܚܵܐ ܕܒܸܣܡܹ̈ܐ.

¹² ܘܐܸܫܬ݁ܓܸܫ ܙܟܲܪܝܵܐ ܟܲܕ݂ ܚܙܵܝܗܝ. ܘܕܸܚܠܬ݂ܵܐ ܢܸܦܠܲܬ݂ ܥܠܵܘܗܝ.

¹³ ܘܐܸܡܲܪ ܠܹܗ ܡܲܠܲܐܟ݂ܵܐ. ܠܵܐ ܬܸܕ݂ܚܲܠ ܙܟܲܪܝܵܐ. ܡܛܠ ܕܐܫܬܲܡܥܲܬܸ ܨܠܘܿܬ݂ܵܟ݂. ܘܐܲܢ̄ܬ݁ܬ݂ܵܟ݂ ܐܹܠܝܼܫܒܲܥ ܬܹܐܠܲܕ݂ ܠܵܟ݂ ܒܪܵܐ. ܘܬܸܩܪܹܐ ܫܡܹܗ. ܝܘܿܚܲܢܵܢ.

¹⁴ ܘܬܸܗܘܹܐ ܠܵܟ݂ ܚܲܕ݂ܘܼܬ݂ܵܐ. ܘܐܲܪܘܵܙܵܐ (ܘܲܪܘܵܙܵܐ). ܘܣܲܓܝܼܐܹ̈ܐ ܢܸܚܕܿܘܿܢ ܒܡܵܘܠܵܕ݂ܗ.

¹⁵ ܢܸܗܘܹܐ ܓܹܝܪ ܪܲܒ ܩܕ݂ܵܡ ܡܵܪܝܵܐ. ܘܚܲܡܪܵܐ ܘܫܲܟ݂ܪܵܐ. ܠܵܐ ܢܸܫܬܹܐ. ܘܪܘܼܚܵܐ ܕܩܘܼܕ݂ܫܵܐ ܢܸܬ݂ܡܠܹܐ. ܥܲܕ݂ ܗܘܼ ܒܟܲܪܣܵܐ ܕܐܸܡܹܗ.

¹⁶ ܘܣܲܓܝܼܐܹ̈ܐ ܡܸܢ ܒܢܲܝ̈ ܝܼܣܪܵܝܹܠ ܢܲܦܢܹܐ ܠܘܵܬ݂ ܡܵܪܝܵܐ ܐܲܠܵܗܗܘܿܢ.

¹⁷ ܘܗܘܼ ܢܹܐܙܲܠ ܩܕ݂ܵܡܵܘܗܝ ܒܪܘܼܚܵܐ. ܘܲܒ݂ܚܲܝܠܵܐ ܕܐܹܠܝܼܵܐ ܢܒ݂ܝܼܵܐ. ܕܢܲܦܢܹܐ ܠܸܒܵܐ ܕܐܲܒ݂ܵܗܹ̈ܐ ܥܲܠ ܒ̈ܢܲܝܵܐ. ܘܠܲܐܝܠܹܝܢ ܕܠܵܐ ܡܸܬ݁ܛܦܝܼܣܝܼܢ. ܠܝܼܕ݂ܲܥܬ݂ܵܐ ܕܟܹܐܢܹ̈ܐ. ܘܲܢܛܲܝܸܒ݂ ܠܡܵܪܝܵܐ ܥܲܡܵܐ ܓܿܡܝܼܪܵܐ.

¹⁸ ܘܐܸܡܲܪ ܙܟܲܪܝܵܐ ܠܡܲܠܲܐܟ݂ܵܐ. ܐܲܝܟܲܢܵܐ ܐܸܕܲܥ ܗܵܕܹܐ. ܐܸܢܵܐ ܓܹܝܪ ܐܝܼܬܲܝ ܣܵܒ݂ܵܐ. ܘܐܲܢ̄ܬ݁ܬ݂ܝ. ܣܲܓܝܼܐܲܬ݂ ܒܝܵܘ̈ܡܵܬ݂ܵܗ̇ ܗ̄ܝܼ.

¹⁹ ܘܲܥܢܵܐ ܡܲܠܲܐܟ݂ܵܐ. ܘܐܸܡܲܪ ܠܹܗ. ܐܸܢܵܐ ܐ̄ܢܵܐ ܓܲܒ݂ܪܝܼܐܹܝܠ ܕܩܵܐܹܡ ܐ̄ܢܵܐ ܩܕ݂ܵܡ ܐܲܠܵܗܵܐ. ܘܐܸܫܬܲܠܚܹܬ݂ ܕܐܡܲܠܸܠ ܥܲܡܵܟ݂. ܘܐܸܣܲܒܪܵܟ݂ ܗܵܠܹܝܢ.

²⁰ ܡܸܟܹܝܠ ܬܸܗܘܹܐ ܫܲܬ݁ܝܼܩ. ܘܠܵܐ ܬܸܫܟܲܚ ܠܲܡܡܲܠܵܠܘܼ ܥܕ݂ܲܡܵܐ ܠܝܵܘܡܵܐ ܕܗܵܠܹܝܢ ܢܸܗܘܝܵܢ. ܥܲܠ ܕܠܵܐ ܗܲܝܡܸܢܬ݁ ܠܡܸܠܲܝ̈ ܗܵܠܹܝܢ ܕܡܸܬ݂ܡܲܠܝܵܢ ܒܙܲܒ݂ܢܗܹܝܢ.

²¹ ܥܲܡܵܐ ܕܹܝܢ ܩܵܐܹܡ ܗ̄ܘܵܐ. ܘܲܡܣܲܟܹܐ ܠܲܙܟܲܪܝܵܐ. ܘܬܲܡܝܼܗܝܼܢ ܗܘܵܘ ܥܲܠ ܬܵܘܚܵܪܬܹ݁ܗ ܕܲܒ݂ܗܲܝܟܠܵܐ.

²² ܟܲܕ݂ ܢܦܲܩ ܕܹܝܢ ܙܟܲܪܝܵܐ. ܠܵܐ ܡܸܫܟܲܚ ܗܘ̣ܵܐ ܕܲܢܡܲܠܸܠ ܥܲܡܗܘܿܢ. ܘܐܸܣܬܲܟܲܠܘ ܕܚܸܙܘܵܐ ܚܙܵܐ ܒܗܲܝܟܠܵܐ. ܘܗܘܼ ܡܸܪܡܲܙ ܪܵܡܹܙ ܗܘ̣ܵܐ ܠܗܘܿܢ. ܘܩܵܘܝܼ. ܟܲܕ݂ ܚܪܸܫ.

²³ ܘܟܲܕ݂ ܐܸܬ݂ܡܲܠܝܼܘ ܝܵܘ̈ܡܵܬ݂ܵܐ ܕܬܸܫܡܸܫܬܹ݁ܗ. ܐܸܙܲܠ ܠܒܲܝܬܹ݁ܗ.

²⁴ ܘܲܗܘܵܐ ܡܸܢ ܒܵܬܲܪ ܝܵܘ̈ܡܵܬ݂ܵܐ ܗܵܢܘܿܢ. ܒܸܛܢܲܬܸ ܐܹܠܝܼܫܒܲܥ ܐܲܢ̄ܬ݁ܬܹܗ. ܘܲܡܛܲܫܝܵܐ ܗ̄ܘܵܬ݂ ܢܲܦ̮ܫܵܗ̇ ܝܲܪ̈ܚܹܐ ܚܲܡܫܵܐ. ܘܐܵܡܪܵܐ ܗ̄ܘܵܬ݂.

²⁵ ܕܗܵܠܹܝܢ ܥܒܲܕ݂ ܠܝܼ ܡܵܪܝܵܐ ܒܝܵܘ̈ܡܵܬ݂ܵܐ ܕܚܵܪ ܒܝܼ ܠܡܸܣܲܒ݂ ܚܸܣܕܿܝ ܕܒܹܝܬ݂ ܒܢܲܝ̈ܢܵܫܵܐ.

²⁶ ܒܝܲܪܚܵܐ ܕܹܝܢ ܕܸܫܬܵܐ. ܐܸܫܬ݁ܠܲܚ ܓܲܒ݂ܪܝܼܐܹܝܠ ܡܲܠܲܐܟ݂ܵܐ ܡܸܢ ܠܘܵܬ݂ ܐܲܠܵܗܵܐ ܠܲܓ݂ܠܝܼܠܵܐ ܠܲܡܕ݂ܝܼܢ̄ܬܵܐ ܕܲܫܡܵܗ̇ ܢܵܨܪܲܬ݂.

²⁷ ܠܘܵܬ݂ ܒܬ݂ܘܼܠܬܵܐ ܕܲܡܟ݂ܝܼܪܵܐ ܠܓܲܒ݂ܪܵܐ ܕܲܫܡܹܗ ܝܵܘܣܸܦ. ܡܸܢ ܒܲܝܬܹ݁ܗ ܕܕ݂ܵܘܝܼܕ݂. ܘܲܫܡܵܗ̇ ܠܲܒ݂ܬ݂ܘܼܠܬܵܐ. ܡܲܪܝܲܡ.

²⁸ ܘܥܲܠ ܠܘܵܬ݂ܵܗ̇ ܡܲܠܲܐܟ݂ܵܐ. ܘܐܸܡܲܪ ܠܵܗ̇. ܫܠܵܡ ܠܹܟ݂ܝ ܡܲܠܝܲܬ݂ ܛܲܝܒܘܼܬ݂ܵܐ: ܡܵܪܲܢ ܥܲܡܹܟ݂ܝ ܒܪܝܼܟܲܬ݂ ܒܢܸܫܹ̈ܐ.

²⁹ ܗܝܼ ܕܹܝܢ ܟܲܕ݂ ܚܙܵܬܸ. ܐܸܬ݂ܪܲܗܒܲܬܸ ܒܡܸܠܬܹܗ. ܘܡܸܬ݂ܚܲܫܒ݂ܵܐ ܗ̄ܘܵܬ݂. ܕܡܵܢܵܐ ܗ̄ܘܼ ܫܠܵܡܵܐ ܗܵܢܵܐ.

³⁰ ܘܐܸܡܲܪ ܠܵܗ̇ ܡܲܠܲܐܟ݂ܵܐ. ܠܵܐ ܬܸܕ݂ܚܠܝܼܢ ܡܲܪܝܲܡ: ܐܸܫܟܲܚܬ݁ܝ ܓܹܝܪ ܛܲܝܒܘܼܬ݂ܵܐ ܠܘܵܬ݂ ܐܲܠܵܗܵܐ.

³¹ ܗܵܐ ܓܹܝܪ ܬܩܲܒܠܝܼܢ ܒܲܛܢܵܐ. ܘܬܹܐܠܕܝܼܢ ܒܪܵܐ. ܘܬܸܩܪܹܝܢ ܫܡܹܗ ܝܼܫܘܿܥ.

³² ܗܵܢܵܐ. ܢܸܗܘܹܐ ܪܲܒ. ܘܲܒ݂ܪܹܗ ܕܥܸܠܝܵܐ ܢܸܬ݂ܩܪܹܐ. ܘܢܸܬܸ݁ܠ ܠܹܗ ܡܵܪܝܵܐ ܐܲܠܵܗܵܐ. ܟܘܼܪܣܝܹܗ ܕܕ݂ܵܘܝܼܕ݂ ܐܲܒ݂ܘܼܗܝ.

³³ ܘܢܲܡܠܸܟ݂ ܥܲܠ ܒܲܝܬܹ݁ܗ ܕܝܲܥܩܘܿܒ݂. ܠܥܵܠܲܡ. ܘܲܠܡܲܠܟܘܼܬܹܗ ܣܘܿܦ ܠܵܐ ܢܸܗܘܹܐ.

³⁴ ܐܵܡܪܵܐ ܡܲܪܝܲܡ ܠܡܲܠܲܐܟ݂ܵܐ. ܐܲܝܟܲܢܵܐ ܬܸܗܘܹܐ ܗܵܕܹܐ. ܕܓܲܒ݂ܪܵܐ ܠܵܐ ܚܟ݂ܝܼܡ ܠܝܼ.

³⁵ ܥܢܵܐ ܡܲܠܲܐܟ݂ܵܐ. ܘܐܸܡܲܪ ܠܵܗ̇. ܪܘܼܚܵܐ ܕܩܘܼܕ݂ܫܵܐ ܬܹܐܬܹܐ. ܘܚܲܝܠܹܗ ܕܥܸܠܵܝܵܐ ܢܲܓܸܢ ܥܠܲܝܟܿܝ. ܡܛܠ ܗܵܢܵܐ ܗܵܘ ܕܡܸܬ݂ܝܠܸܕ݂ ܒܹܟ݂ܝ. ܩܲܕܝܼܫܵܐ ܗܘܼ: ܘܲܒ݂ܪܹܗ ܕܐܲܠܵܗܵܐ ܢܸܬ݂ܩܪܹܐ.

³⁶ ܘܗܵܐ ܐܹܠܝܼܫܒܲܥ ܐܲܚܝܵܢܬܹ݁ܟ݂ܝ. ܐܵܦ ܗܝܼ ܒܲܛܢܵܐ ܒܪܵܐ ܒܣܲܝܒܘܼܬ݂ܵܗ̇. ܘܗܵܢܵܐ ܝܲܪܚܵܐ ܕܫܬܵܐ ܠܵܗ̇ ܠܗܵܝ ܕܡܸܬ݂ܩܲܪܝܵܐ ܥܩܲܪܬ݂ܵܐ.

³⁷ ܡܛܠ ܕܠܵܐ ܥܛܸܠ ܠܐܲܠܵܗܵܐ ܡܸܕܸܡ.

³⁸ ܐܵܡܪܵܐ ܡܲܪܝܲܡ. ܗܵܐ ܐܸܢܵܐ ܐܲܡܬܹܗ ܕܡܵܪܝܵܐ. ܢܸܗܘܹܐ ܠܝܼ. ܐܲܝܟ݂ ܡܸܠܬ݂ܵܟ݂. ܘܐܸܙܲܠ ܡܲܠܲܐܟ݂ܵܐ ܡܸܢ ܠܘܵܬ݂ܵܗ̇.

³⁹ ܩܵܡܲܬܸ ܕܹܝܢ ܡܲܪܝܲܡ ܒܗܘܿܢ ܒܝܵܘ̈ܡܵܬ݂ܵܐ ܗܵܢܘܿܢ. ܘܐܸܙܲܠ̄ܬܸ ܒܛܝܼܠܵܐܝܼܬ݂ ܠܛܘܼܪܵܐ. ܠܲܡܕ݂ܝܼܢ̄ܬܵܐ ܕܲܝܗܘܼܕ݂.

⁴⁰ ܘܥܸܠܲܬܸ ܠܒܲܝܬܹ݁ܗ ܕܲܙܟܲܪܝܵܐ. ܘܫܸܐܠܲܬܸ ܫܠܵܡܵܗ̇ ܕܐܹܠܝܼܫܒܲܥ.

⁴¹ ܘܲܗܘܵܐ ܕܟܲܕ݂ ܫܸܡܥܲܬܸ ܐܹܠܝܼܫܒܲܥ ܫܠܵܡܵܗ̇ ܕܡܲܪܝܲܡ. ܕܵܨ ܥܘܸܠܵܐ ܒܟܲܪܣܵܗ̇. ܘܐܸܬ݂ܡܲܠܝܲܬܸ ܐܹܠܝܼܫܒܲܥ ܪܘܼܚܵܐ ܕܩܘܼܕ݂ܫܵܐ.

⁴² ܘܲܩܥܵܬܸ ܒܩܵܠܵܐ ܪܵܡܵܐ. ܘܐܸܡܪܲܬܸ ܠܡܲܪܝܲܡ. ܡܒܲܪܲܟ݂ܬܵܐ ܐܲܢ̄ܬ݁ܝ ܒܢܸܫܹ̈ܐ. ܘܲܡܒܲܪܲܟ݂ ܗܘܼ ܦܹܐܪܵܐ ܕܲܒ݂ܟܲܪܣܹܟ݂ܝ.

⁴³ ܐܲܝܡܸܟܵܐ ܠܝܼ ܗܵܕܹܐ ܕܐܸܡܹܗ ܕܡܵܪܝ ܬܹܐܬܹܐ ܠܘܵܬ݂ܝ.

⁴⁴ ܗܵܐ ܓܹܝܪ ܟܲܕ݂ ܢܦܲܠ ܩܵܠܵܐ ܕܲܫܠܵܡܹܟ݂ܝ ܒܐܸܕ݂ܢܲܝ̈. ܒܚܲܕ݂ܘܼܬ݂ܵܐ ܪܲܒܬ݂ܵܐ ܕܵܨ ܥܘܸܠܵܐ ܒܟܲܪܣܝ.

⁴⁵ ܘܛܘܼܒܹܝܗ̇ ܠܐܲܝܕ݂ܵܐ ܕܗܲܝܡܢܲܬܸ ܕܗܵܘܹܐ ܫܘܼܠܵܡܵܐ ܠܐܲܝܠܹܝܢ ܕܐܬ݂ܡܲܠܸܠ ܥܲܡܵܗ̇ ܡܸܢ ܠܘܵܬ݂ ܡܵܪܝܵܐ.

⁴⁶ ܘܐܸܡܪܲܬܸ ܡܲܪܝܲܡ. ܡܵܘܪܒ݂ܵܐ ܢܲܦ̮ܫܝ ܠܡܵܪܝܵܐ.

⁴⁷ ܘܚܸܕ݂ܝܲܬܸ ܪܘܼܚܝ ܒܐܲܠܵܗܵܐ. ܡܲܚܝܵܢܝ.

⁴⁸ ܕܚܵܪ ܒܡܘܼܟܵܟ݂ܵܐ ܕܐܲܡܬܹܗ. ܗܵܐ ܓܹܝܪ ܡܸܢ ܗܵܫܵܐ. ܛܘܼܒ݂ܵܐ ܢܸܬ݁ܠܵܢ ܠܝܼ ܫܲܪ̈ܒ݂ܵܬ݂ܵܐ ܟܠܗܹܝܢ.

⁴⁹ ܕܲܥܒܲܕ݂ ܠܘܵܬ݂ܝ ܪܵܘܪ̈ܒ݂ܵܬ݂ܵܐ. ܗܵܘ ܕܚܲܝܠܬ݂ܵܢ. ܘܩܲܕܝܼܫ ܫܡܹܗ.

⁵⁰ ܘܲܚܢܵܢܹܗ ܠܕ݂ܵܪܹ̈ܐ ܘܫܲܪ̈ܒ݂ܵܬ݂ܵܐ. ܥܲܠ ܐܲܝܠܹܝܢ ܕܕ݂ܵܚܠܝܼܢ ܠܹܗ.

⁵¹ ܥܒܲܕ݂ ܙܵܟܘܼܬ݂ܵܐ ܒܲܕ݂ܪܵܥܹܗ. ܘܒܲܕܲܪ ܚܬ݂ܝܼܪ̈ܲܝ ܒܬܲܪܥܝܼܬ݂ܵܐ ܕܠܸܒܗܘܿܢ.

⁵² ܣܲܚܸܦ ܬܲܩܝܼܦܹ̈ܐ ܡܸܢ ܟܘܼܪ̈ܣܵܘܵܬ݂ܵܐ. ܘܐܲܪܝܼܡ ܡܲܟܿܝܼܟܹ̈ܐ.

⁵³ ܟܲܦܢܹ̈ܐ. ܣܲܒܲܥ ܛܵܒ݂ܵܬ݂ܵܐ. ܘܥܲܬ݁ܝܼܪܹ̈ܐ ܫܪܵܐ ܣܦܝܼܩܵܐܝܼܬ݂.

⁵⁴ ܥܲܕܲܪ ܠܝܼܣܪܵܝܹܠ ܥܲܒ݂ܕܹܗ. ܘܐܸܬ݁ܕܟܲܪ ܚܢܵܢܹܗ.

⁵⁵ ܐܲܝܟ݂ ܕܡܲܠܸܠ ܥܲܡ ܐܲܒ݂ܵܗܲܝ̈ܢ ܥܲܡ ܐܲܒ݂ܪܵܗܵܡ ܘܥܲܡ ܙܲܪܥܹܗ ܠܥܵܠܲܡ.

⁵⁶ ܩܵܘܝܲܬܸ ܕܹܝܢ ܡܲܪܝܲܡ ܠܘܵܬ݂ ܐܹܠܝܼܫܒܲܥ ܐܲܝܟ݂ ܝܲܪ̈ܚܹܐ ܬܠܵܬ݂ܵܐ. ܘܗܸܦܟܲܬܸ ܠܒܲܝܬܵܗ̇.

⁵⁷ ܐܹܠܝܼܫܒܲܥ ܕܹܝܢ ܗܘ̣ܵܐ ܗ̄ܘܵܐ ܠܵܗ̇ ܙܲܒ݂ܢܵܐ ܕܬܹܐܠܲܕ݂. ܘܝܸܠܕܲܬ݂ ܒܪܵܐ.

⁵⁸ ܘܲܫܡܲܥܘ ܫܒ݂ܵܒܹܝ̈ܗ̇ ܘܲܒ݂ܢܲܝ̈ ܛܘܼܗܡܵܗ̇: ܕܐܲܣܓ݁ܝܼ ܐܲܠܵܗܵܐ ܚܢܵܢܹܗ ܠܘܵܬ݂ܵܗ̇. ܘܚܵܕ݂ܝܢ ܗ̄ܘܼܵܘ ܥܲܡܵܗ̇.

⁵⁹ ܘܲܗܘܵܐ ܠܝܵܘܡܵܐ ܕܲܬ݂ܡܵܢܝܵܐ. ܘܐܸܬ݂ܵܘ ܠܡܸܓ݂ܙܪܹܗ ܠܛܲܠܝܵܐ. ܘܩܵܪܹܝܢ ܗ̄ܘܼܵܘ ܠܹܗ ܒܲܫܡܵܐ ܕܐܲܒ݂ܘܼܗܝ ܙܟܲܪܝܵܐ.

⁶⁰ ܘܲܥܢܵܬܸ ܐܸܡܹܗ. ܘܐܵܡܪܵܐ ܠܗܘܿܢ. ܠܵܐ ܗܵܟܲܢܵܐ. ܐܸܠܵܐ ܢܸܬ݂ܩܪܹܐ ܝܘܿܚܲܢܵܢ.

⁶¹ ܘܐܸܡܲܪܘ ܠܵܗ̇. ܕܠܲܝܬ݁ ܐ̄ܢܵܫ ܒܫܲܪܒܿܬܹܟ݂ܝ ܕܡܸܬ݂ܩܪܹܐ ܒܲܫܡܵܐ ܗܵܢܵܐ.

⁶² ܘܲܪܡܲܙܘ ܠܐܲܒ݂ܘܼܗܝ. ܕܐܲܝܟܲܢܵܐ ܨܵܒܹܐ ܕܲܢܫܲܡܹܝܘܗܝ.

⁶³ ܘܲܫܐܸܠ ܦܸܢܩܝܼܬ݂ܵܐ. ܘܲܟ݂ܬܲܒ݂ ܘܐܸܡܲܪ. ܝܘܿܚܲܢܵܢ ܗ̄ܘܼ ܫܡܹܗ. ܘܐܸܬ݁ܕܲܡܲܪܘ ܟܠܢܵܫ.

⁶⁴ ܘܡܸܚܕ݂ܵܐ ܐܸܬ݂ܦܬܲܚ ܦܘܼܡܹܗ. ܘܠܸܫܵܢܹܗ. ܘܡܲܠܸܠ ܘܒܲܪܸܟ݂ ܠܐܲܠܵܗܵܐ.

⁶⁵ ܘܲܗܘܵܬܸ ܕܸܚܠܬ݂ܵܐ ܥܲܠ ܟܠܗܘܿܢ ܫܒ݂ܵܒܲܝ̈ܗܘܿܢ. ܘܲܒ݂ܟ݂ܠܹܗ ܛܘܼܪܵܐ ܕܲܝܗܘܼܕ݂. ܗܵܠܹܝܢ ܡܸܬ݂ܡܲܠܠܵܢ ܗ̄ܘܲܝ̈.

⁶⁶ ܘܟ݂ܠܗܘܿܢ ܕܲܫܡܲܥܘ. ܡܸܬ݂ܚܲܫܒ݂ܝܼܢ ܗ̄ܘܼܵܘ ܒܠܸܒܗܘܿܢ. ܘܐܵܡܪܝܼܢ. ܡܵܢܵܐ ܟܲܝ ܢܸܗܘܹܐ ܛܲܠܝܵܐ ܗܵܢܵܐ. ܘܐܝܼܕܹܗ ܕܡܵܪܝܵܐ ܐܝܼܬ݂ ܗ̄ܘܵܬ݂ ܥܲܡܹܗ.

⁶⁷ ܘܐܸܬ݂ܡܠܝܼ ܙܟܲܪܝܵܐ ܐܲܒ݂ܘܼܗܝ ܪܘܼܚܵܐ ܕܩܘܼܕ݂ܫܵܐ. ܘܐܸܬ݂ܢܲܒܝܼ. ܘܐܸܡܲܪ.

⁶⁸ ܡܒܲܪܲܟ݂ ܗܘܼ ܡܵܪܝܵܐ ܐܲܠܵܗܹܗ ܕܝܼܣܪܵܝܹܠ: ܕܲܣܥܲܪ ܥܲܡܹܗ ܘܲܥܒܲܕ݂ ܠܹܗ ܦܘܼܪܩܵܢܵܐ

⁶⁹ ܘܐܲܩܝܼܡ ܠܲܢ ܩܲܪܢܵܐ ܕܦܘܼܪܩܵܢܵܐ ܒܒܲܝܬܹ݁ܗ ܕܕ݂ܵܘܝܼܕ݂ ܥܲܒ݂ܕܹܗ

⁷⁰ ܐܲܝܟ݂ ܕܡܲܠܸܠ ܒܦܘܼܡܵܐ ܕܲܢܒ݂̈ܝܼܵܘܗܝ ܩܲܕܝܼܫܹ̈ܐ ܕܡܸܢ ܥܵܠܲܡ

⁷¹ ܕܢܸܦܪܩܲܢ ܡܸܢ ܒܥܸܠܕܒ݂ܵܒܲܝ̈ܢ ܘܡܸܢ ܐܝܼܕ݂ܵܐ ܕܟ݂ܠܗܘܿܢ ܣܵܢܐܲܝ̈ܢ.

⁷² ܘܲܥܒܲܕ݂ ܚܢܵܢܹܗ ܥܲܡ ܐܲܒ݂ܵܗܲܝ̈ܢ. ܘܲܥܗܲܕ݂ ܠܲܕ݂ܝܵܬܹܩܵܘ̈ܗܝ ܩܲܕܝܼ̈ܫܵܬ݂ܵܐ.

⁷³ ܘܡܵܘ̈ܡܵܬ݂ܵܐ ܕܝܼܡܵܐ ܠܐܲܒ݂ܪܵܗܵܡ ܐܲܒ݂ܘܼܢ ܕܢܸܬܸ݁ܠ ܠܲܢ.

⁷⁴ ܕܢܸܬ݂ܦܪܸܩ ܡܸܢ ܐܝܼܕ݂ܵܐ ܕܲܒ݂ܥܸܠܕܒ݂ܵܒܲܝ̈ܢ. ܘܲܕ݂ܠܵܐ ܕܸܚܠܵܐ ܢܸܦܠܘܿܚ ܩܕ݂ܵܡܵܘܗܝ.

⁷⁵ ܟܠܗܘܿܢ ܝܵܘ̈ܡܵܬܲܢ ܒܟܹܐܢܘܼܬ݂ܵܐ ܘܲܒ݂ܙܲܕܝܼܩܘܼܬ݂ܵܐ.

⁷⁶ ܘܐܲܢ̄ܬ݁ ܛܲܠܝܵܐ. ܢܒ݂ܝܹܼܗ ܕܥܸܠܵܝܵܐ ܬܸܬ݂ܩܪܹܐ. ܬܹܐܙܲܠ ܓܹܝܪ ܩܕ݂ܵܡ ܦܲܪܨܘܿܦܹܗ ܕܡܵܪܝܵܐ. ܕܲܬ݂ܛܲܝܸܒ݂ ܐܘܼܪܚܹܗ.

⁷⁷ ܕܢܸܬܸ݁ܠ ܡܲܕ݂ܥܵܐ ܕܚܲܝܹ̈ܐ ܠܥܲܡܹܗ. ܒܫܘܼܒ݂ܩܵܢܵܐ ܕܲܚܛܵܗܲܝ̈ܗܘܿܢ.

⁷⁸ ܒܪ̈ܲܚܡܹܐ ܕܲܚܢܵܢܵܐ ܕܐܲܠܵܗܲܢ ܕܲܒ݂ܗܘܿܢ ܢܸܣܥܪܲܢ ܕܸܢܚܵܐ ܡܸܢ ܪܵܘܡܵܐ.

⁷⁹ ܠܡܲܢܗܵܪܘܼ ܠܐܲܝܠܹܝܢ ܕܲܒ݂ܚܸܫܘܿܟ݂ܵܐ ܘܲܒ݂ܛܸܠܵܠܹ̈ܐ ܕܡܵܘܬܵܐ ܝܵܬ݂ܒܿܝܼܢ. ܕܢܸܬ݂ܪܘܿܨ ܪܸ̈ܓ݂ܠܲܝܢ ܒܐܘܼܪܚܵܐ ܕܲܫܠܵܡܵܐ.

⁸⁰ ܛܲܠܝܵܐ ܕܹܝܢ ܪܵܒܹܐ ܗ̄ܘܵܐ. ܘܡܸܬ݂ܚܲܝܲܠ ܒܪܘܼܚܵܐ. ܘܲܒ݂ܚܘܼܪܒܵܐ ܐܝܼܬ݂ܵܘܗܝ ܗ̄ܘܵܐ. ܥܕ݂ܲܡܵܐ ܠܝܵܘܡܵܐ ܕܬܲܚܘܝܼܬܹܗ ܕܲܠܘܵܬ݂ ܝܼܣܪܵܝܹܠ.

2

¹ ܗܘ̣ܵܐ ܕܹܝܢ ܒܝܵܘ̈ܡܵܬ݂ܵܐ ܗܵܢܘܿܢ. ܘܲܢܦܲܩ ܦܘܼܩܕܵܢܵܐ ܡܸܢ ܐܵܓ݂ܘܼܣܛܘܿܣ ܩܹܣܲܪ ܕܢܸܬ݂ܟܿܬܸܒ݂ ܟܠܹܗ ܥܲܡܵܐ ܕܐܘܼܚܕ݂ܵܢܹܗ.

² ܗܵܕܹܐ ܡܲܟ݂ܬ݁ܒ݂ܵܢܘܼܬ݂ܵܐ ܩܲܕ݂ܡܵܝܬܵܐ ܗܘܸܵܬ݂. ܒܗܸܓ݂ܡܘܿܢܘܼܬ݂ܵܐ ܕܩܘܼܪܝܼܢܘܿܣ ܒܣܘܼܪܝܼܵܐ.

³ ܘܐܵܙܹܠ ܗܘ̣ܵܐ ܟܠܢܵܫ ܕܢܸܬ݂ܟܿܬܸܒ݂ ܒܲܡܕ݂ܝܼܢ̄ܬܹ݁ܗ.

⁴ ܣܠܸܩ ܗܘ̣ܵܐ ܕܹܝܢ ܐܵܦ ܝܵܘܣܸܦ ܡܸܢ ܢܵܨܪܲܬ݂ ܡܕ݂ܝܼܢ̄ܬܵܐ ܕܲܓ݂ܠܝܼܠܵܐ. ܠܝܼܗܘܼܕ݂. ܠܲܡܕ݂ܝܼܢ̄ܬܹ݁ܗ ܕܕ݂ܵܘܝܼܕ݂ ܕܡܸܬ݂ܩܲܪܝܵܐ ܒܹܝܬ݂ ܠܚܸܡ. ܡܛܠ ܕܐܝܼܬ݂ܵܘܗܝ ܗ̄ܘܵܐ ܡܸܢ ܒܲܝܬܹ݁ܗ. ܘܡܸܢ ܫܲܪܒܿܬܹܗ ܕܕ݂ܵܘܝܼܕ݂.

⁵ ܥܲܡ ܡܲܪܝܲܡ ܡܟ݂ܝܼܪܬܹ݁ܗ ܟܲܕ݂ ܒܲܛܢܵܐ. ܕܬܲܡܵܢ ܢܸܬ݂ܟܿܬܸܒ݂.

⁶ ܘܲܗܘܵܐ ܕܟܲܕ݂ ܬܲܡܵܢ ܐܸܢܘܿܢ. ܐܸܬ݂ܡܲܠܝܼܘ ܝܵܘ̈ܡܵܬ݂ܵܗ̇ ܕܬܹܐܠܲܕ݂.

⁷ ܘܝܸܠܕܲܬܸ ܒܪܵܗ̇ ܒܘܼܟ݂ܪܵܐ. ܘܲܟ݂ܪܲܟ݂ܬܹ݁ܗ ܒܥܲܙܪܘܼܪܹ̈ܐ. ܘܐܲܪܡܝܵܬܹܗ ܒܐܘܿܪܝܵܐ. ܡܛܠ ܕܠܲܝܬ݁ ܗܘ̣ܵܐ ܠܗܘܿܢ ܕܘܼܟܬ݂ܵܐ. ܐܲܝܟܵܐ ܕܲܫܪܹܝܢ ܗ̄ܘܼܵܘ.

⁸ ܪ̈ܵܥܵܘܵܬ݂ܵܐ ܕܹܝܢ ܐܝܼܬ݂ ܗ̄ܘܼܵܘ ܒܹܗ ܒܐܲܬ݂ܪܵܐ ܕܲܫܪܹܝܢ ܗ̄ܘܼܵܘ ܬܲܡܵܢ. ܘܢܵܛܪܝܼܢ ܡܲܛܲܪܬ݂ܵܐ ܕܠܸܠܝܵܐ ܥܲܠ ܡܲܪ̈ܥܝܵܬ݂ܗܘܿܢ.

⁹ ܘܗܵܐ ܡܲܠܲܐܟ݂ܵܐ ܕܐܲܠܵܗܵܐ ܐܸܬ݂ܵܐ ܠܘܵܬ݂ܗܘܿܢ. ܘܬܸܫܒܘܼܚܬܹ݁ܗ ܕܡܵܪܝܵܐ ܐܲܢܗܪܲܬ݂ ܥܠܲܝܗܘܿܢ. ܘܲܕ݂ܚܸܠܘ ܕܸܚܠܬ݂ܵܐ ܪܲܒܬ݂ܵܐ.

¹⁰ ܘܐܸܡܲܪ ܠܗܘܿܢ ܡܲܠܲܐܟ݂ܵܐ. ܠܵܐ ܬܸܕ݂ܚܠܘܼܢ. ܗܵܐ ܓܹܝܪ ܡܣܲܒܲܪ ܐ̄ܢܵܐ ܠܟ݂ܘܿܢ ܚܲܕ݂ܘܼܬ݂ܵܐ ܪܲܒܬ݂ܵܐ. ܕܬܸܗܘܹܐ ܠܟ݂ܠܹܗ ܥܵܠܡܵܐ.

¹¹ ܐܸܬ݂ܝܼܠܸܕ݂ ܠܟ݂ܘܿܢ ܓܹܝܪ ܝܵܘܡܵܢܵܐ ܦܵܪܘܿܩܵܐ. ܕܐܝܼܬ݂ܵܘܗܝ ܡܵܪܝܵܐ ܡܫܝܼܚܵܐ. ܒܲܡܕ݂ܝܼܢ̄ܬܹ݁ܗ ܕܕ݂ܵܘܝܼܕ݂.

¹² ܘܗܵܕܹܐ ܠܟ݂ܘܿܢ ܐܵܬ݂ܵܐ. ܡܸܫܟܿܚܝܼܢ ܐܢ̄ܬܘܿܢ ܥܘܸܠܵܐ. ܕܲܟ݂ܪܝܼܟ݂ ܒܥܲܙܪܘܼܪܹ̈ܐ. ܘܣܝܼܡ ܒܐܘܿܪܝܵܐ.

¹³ ܘܡܸܢ ܫܹܠܝ ܐܸܬ݂ܚܙܝܼܘ ܥܲܡ ܡܲܠܲܐܟ݂ܵܐ ܚܲܝ̈ܠܵܘܵܬ݂ܵܐ ܣܲܓܝܼܐܹ̈ܐ ܕܲܫܡܲܝܵܐ: ܟܲܕ݂ ܡܫܲܒܚܝܼܢ ܠܐܲܠܵܗܵܐ. ܘܐܵܡܪܝܼܢ.

¹⁴ ܬܸܫܒܿܘܿܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ. ܘܥܲܠ ܐܲܪܥܵܐ ܫܠܵܡܵܐ. ܘܣܲܒ݂ܪܵܐ ܛܵܒ݂ܵܐ ܠܲܒ݂ܢܲܝ̈ܢܵܫܵܐ.

¹⁵ ܘܲܗܘܵܐ ܕܟܲܕ݂ ܐܸܙܲܠܘ ܡܸܢ ܠܘܵܬ݂ܗܘܿܢ ܡܲܠܲܐܟܹ̈ܐ ܠܲܫܡܲܝܵܐ. ܡܲܠܸܠܘ ܪ̈ܵܥܵܘܵܬ݂ܵܐ ܚܲܕ݂ ܥܲܡ ܚܲܕ݂. ܘܐܵܡܪܝܼܢ. ܢܸܪܕܹܐ ܥܕ݂ܲܡܵܐ ܠܒܹܝܬ݂ ܠܚܸܡ. ܘܢܸܚܙܹܐ ܠܡܸܠܬ݂ܵܐ ܗܵܕܹܐ ܕܲܗܘܵܬܸ. ܐܲܝܟ݂ ܕܡܵܪܝܵܐ ܐܵܘܕܲܥ ܠܲܢ.

¹⁶ ܘܐܸܬ݂ܵܘ ܡܣܲܪܗܒ݂ܵܐܝܼܬ݂. ܘܐܸܫܟܲܚܘ ܠܡܲܪܝܲܡ ܘܲܠܝܵܘܣܸܦ. ܘܲܠܥܘܸܠܵܐ ܕܣܝܼܡ ܒܐܘܿܪܝܵܐ.

¹⁷ ܘܟܲܕ݂ ܚܙܵܘ. ܐܵܘܕܲܥܘ ܠܡܸܠܬ݂ܵܐ ܕܐܬ݂ܡܲܠܠܲܬܸ ܥܲܡܗܘܿܢ ܥܠܵܘܗܝ ܥܲܠ ܛܲܠܝܵܐ.

¹⁸ ܘܟ݂ܠܗܘܿܢ ܕܲܫܡܲܥܘ. ܐܸܬ݁ܕܲܡܲܪܘ ܥܲܠ ܐܲܝܠܹܝܢ ܕܐܬ݂ܡܲܠܲܠ ܠܗܘܿܢ ܡܸܢ ܪ̈ܵܥܵܘܵܬ݂ܵܐ.

¹⁹ ܡܲܪܝܲܡ ܕܹܝܢ ܢܵܛܪܵܐ ܗ̄ܘܵܬ݂ ܟܠܗܹܝܢ ܡܸܠܹ̈ܐ ܗܵܠܹܝܢ. ܘܲܡܦܲܚܡܵܐ ܒܠܸܒܵܗ̇.

²⁰ ܘܲܗܦܲܟ݂ܘ ܪ̈ܵܥܵܘܵܬ݂ܵܐ ܗܵܢܘܿܢ. ܟܲܕ݂ ܡܫܲܒܚܝܼܢ. ܘܲܡܗܲܠܠܝܼܢ ܠܐܲܠܵܗܵܐ ܥܲܠ ܟܠ ܕܲܚܙܵܘ ܘܲܫܡܲܥܘ. ܐܲܝܟܲܢܵܐ ܕܐܸܬ݂ܡܲܠܲܠ ܥܲܡܗܘܿܢ.

²¹ ܘܟܲܕ݂ ܡܠܵܘ ܬܡܵܢܝܵܐ ܝܵܘܡ̈ܝܼܢ ܕܢܸܬ݂ܓ݁ܙܲܪ ܛܲܠܝܵܐ. ܐܸܬ݂ܩܪܝܼ ܫܡܹܗ. ܝܼܫܘܿܥ. ܕܐܬ݂ܩܪܝܼ ܡܸܢ ܡܲܠܲܐܟ݂ܵܐ ܩܕ݂ܵܡ ܕܢܸܬ݂ܒܛܸܢ ܒܟܲܪܣܵܐ.

²² ܘܟܲܕ݂ ܐܸܬ݂ܡܲܠܝܼܘ ܝܵܘ̈ܡܵܬ݂ܵܐ ܕܬܲܕ݂ܟ݂ܝܼܬ݂ܗܘܿܢ ܐܲܝܟ݂ ܢܵܡܘܿܣܵܐ ܕܡܘܼܫܹܐ. ܐܲܣܩܘܼܗܝ ܠܐܘܿܪܸܫܠܸܡ ܕܲܢܩܝܼܡܘܼܢܵܝܗܝ ܩܕ݂ܵܡ ܡܵܪܝܵܐ.

²³ ܐܲܝܟ݂ ܕܲܟ݂ܬ݂ܝܼܒ݂ ܒܢܵܡܘܿܣܵܐ ܕܡܵܪܝܵܐ. ܕܟܠ ܕܸܟ݂ܪܵܐ ܦܵܬܲܚ ܡܲܪܒܥܵܐ. ܩܲܕܝܼܫܵܐ ܕܡܵܪܝܵܐ ܢܸܬ݂ܩܪܹܐ.

²⁴ ܘܲܕ݂ܢܸܬ݁ܠܘܼܢ ܕܸܒ݂ܚܬ݂ܵܐ. ܐܲܝܟܲܢܵܐ ܕܐܲܡܝܼܪ ܒܢܵܡܘܿܣܵܐ ܕܡܵܪܝܵܐ. ܙܵܘܓܵܐ ܕܫܘܿܦܢܝܼܢܹ̈ܐ ܐܵܘ ܬܪܹܝܢ ܦܲܪ̈ܘܼܓܹܐ ܕܝܵܘܢܵܐ.

²⁵ ܓܲܒ݂ܪܵܐ ܕܹܝܢ ܚܲܕ݂ ܐܝܼܬ݂ ܗܘ̣ܵܐ ܒܐܘܿܪܸܫܠܸܡ. ܫܡܹܗ ܗܘ̣ܵܐ ܫܸܡܥܘܿܢ. ܘܓܲܒ݂ܪܵܐ ܗܵܢܵܐ ܟܹܐܝܢ ܗ̄ܘܵܐ. ܘܙܲܕܝܼܩ. ܘܲܡܣܲܟܹܐ ܗܘ̣ܵܐ ܠܒ݂ܘܼܝܵܐܹܗ ܕܝܼܣܪܵܝܹܠ. ܘܪܘܼܚܵܐ ܕܩܘܼܕ݂ܫܵܐ ܐܝܼܬ݂ ܗ̄ܘܵܬ݂ ܥܠܵܘܗܝ.

²⁶ ܘܐܲܡܝܼܪ ܗܘ̣ܵܐ ܠܹܗ ܡܸܢ ܪܘܼܚܵܐ ܕܩܘܼܕ݂ܫܵܐ. ܕܠܵܐ ܢܸܚܙܹܐ ܡܵܘܬܵܐ ܥܕ݂ܲܡܵܐ ܕܢܸܚܙܹܐ ܠܲܡܫܝܼܚܹܗ ܕܡܵܪܝܵܐ.

²⁷ ܗܘܼ ܗܵܢܵܐ ܐܸܬ݂ܵܐ ܗܘ̣ܵܐ ܒܪܘܼܚܵܐ ܠܗܲܝܟܠܵܐ. ܘܟܲܕ݂ ܡܲܥܠܝܼܢ ܠܹܗ ܐܲܒ݂ܵܗܵܘ̈ܗܝ ܠܝܼܫܘܿܥ ܛܲܠܝܵܐ: ܕܢܸܥܒܕ݂ܘܼܢ ܚܠܵܦܵܘܗܝ ܐܲܝܟܲܢܵܐ ܕܲܦܩܝܼܕ݂ ܒܢܵܡܘܿܣܵܐ.

²⁸ ܩܲܒܿܠܹܗ ܥܲܠ ܕܪ̈ܵܥܵܘܗܝ. ܘܒܲܪܸܟ݂ ܠܐܲܠܵܗܵܐ. ܘܐܸܡܲܪ.

²⁹ ܡܸܟܹܝܠ ܫܵܪܹܐ ܐܲܢ̄ܬ݁ ܠܹܗ ܠܥܲܒ݂ܕܵܟ݂ ܡܵܪܝ: ܐܲܝܟ݂ ܡܸܠܬ݂ܵܟ݂ ܒܲܫܠܵܡܵܐ.

³⁰ ܕܗܵܐ ܚܙܲܝ̈ ܥܲܝܢܲܝ̈ ܚܢܵܢܵܟ݂

³¹ ܗܵܘ ܕܛܲܝܸܒ݂ܬ݁ ܒܦܲܪܨܘܿܦܵܐ ܕܟܠܗܹܝܢ ܐܸܡ̈ܘܵܬ݂ܵܐ.

³² ܢܘܼܗܪܵܐ ܠܓܸܠܝܵܢܵܐ ܕܥܲܡ̈ܡܹܐ. ܘܫܘܼܒ݂ܚܵܐ ܠܥܲܡܵܟ݂ ܝܼܣܪܵܝܹܠ.

³³ ܝܵܘܣܸܦ ܕܹܝܢ ܘܐܸܡܹܗ. ܬܲܡܝܼܗܝܼܢ ܗ̄ܘܼܵܘ ܥܲܠ ܐܲܝܠܹܝܢ ܕܡܸܬ݂ܡܲܠܠܵܢ ܗ̄ܘܲܝ̈ ܥܠܵܘܗܝ.

³⁴ ܘܒܲܪܸܟ݂ ܐܸܢܘܿܢ ܫܸܡܥܘܿܢ. ܘܐܸܡܲܪ ܠܡܲܪܝܲܡ ܐܸܡܹܗ. ܗܵܐ ܗܵܢܵܐ ܣܝܼܡ ܠܡܲܦܘܼܠܬܵܐ. ܘܠܲܩܝܵܡܵܐ ܕܣܲܓܝܼܐܹ̈ܐ ܒܝܼܣܪܵܝܹܠ ܘܠܵܐܬ݂ܵܐ ܕܚܸܪܝܵܢܵܐ.

³⁵ ܘܲܒ݂ܢܲܦ̮ܫܹܟ݂ܝ ܕܹܝܢ ܕܝܼܠܹܟ݂ܝ ܬܸܥܒܲܪ ܪܘܼܡܚܵܐ. ܐܲܝܟ݂ ܕܢܸܬ݂ܓܲܠܝܵܢ ܡܲܚܫ̈ܒ݂ܵܬ݂ܵܐ ܕܠܸܒܵ̈ܘܵܬ݂ܵܐ ܕܣܲܓܝܼܐܹ̈ܐ.

³⁶ ܘܚܲܢܵܐ ܕܹܝܢ ܢܒ݂ܝܼܬ݂ܵܐ ܒܲܪܬܹܗ ܕܲܦܢܘܼܐܹܝܠ ܡܸܢ ܫܲܒ݂ܛܵܐ ܕܐܵܫܹܝܪ. ܐܵܦ ܗܝܼ ܩܲܫܝܼܫܲܬ݂ ܒܝܵܘ̈ܡܵܬ݂ܵܗ̇ ܗ̄ܘܵܬ݂. ܘܲܫܒܲܥ ܫܢ̈ܝܼܢ ܥܲܡ ܒܲܥܠܵܗ̇ ܚܝܵܬ݂ ܡܸܢ ܒܬ݂ܘܼܠܘܼܬ݂ܵܗ̇.

³⁷ ܘܲܗܘܵܬ݂ ܐܲܪܡܲܠܬܵܐ ܐܲܝܟ݂ ܫܢ̈ܝܼܢ ܬܡܵܢܐܝܼܢ ܘܐܲܪܒܲܥ. ܘܠܵܐ ܦܵܪܩܵܐ ܗ̄ܘܵܬ݂ ܡܸܢ ܗܲܝܟܠܵܐ. ܘܲܒ݂ܨܵܘܡܵܐܘܒܲܨܠܘܿܬ݂ܵܐ ܦܵܠܚܵܐ ܗ̄ܘܵܬ݂. ܒܐܝܼܡܵܡܵܐ. ܘܲܒ݂ܠܸܠܝܵܐ.

³⁸ ܘܐܵܦ ܗܝܼ ܩܵܡܲܬ݂ ܒܵܗ̇ ܒܫܵܥܬ݂ܵܐ. ܘܐܵܘܕܝܲܬ݂ ܠܡܵܪܝܵܐ. ܘܲܡܡܲܠܠܵܐ ܗ̄ܘܵܬ݂ ܥܠܵܘܗܝ ܥܲܡ ܟܠܢܵܫ ܕܲܡܣܲܟܹܐ ܗܘ̣ܵܐ ܠܦܘܼܪܩܵܢܵܗ̇ ܕܐܘܿܪܸܫܠܸܡ.

³⁹ ܘܟܲܕ݂ ܫܲܠܸܡܘ ܟܠ ܡܸܕܸܡ ܐܲܝܟ݂ ܕܲܒ݂ܢܵܡܘܿܣܵܐ ܕܡܵܪܝܵܐ. ܗܦܲܟ݂ܘ ܠܲܓ݂ܠܝܼܠܵܐ. ܠܢܵܨܪܲܬ݂ ܡܕ݂ܝܼܢ̄ܬ݁ܗܘܿܢ.

⁴⁰ ܛܲܠܝܵܐ ܕܹܝܢ ܪܵܒܹܐ ܗ̄ܘܵܐ. ܘܡܸܬ݂ܚܲܝܲܠ ܒܪܘܼܚܵܐ. ܘܡܸܬ݂ܡܠܸܐ ܚܸܟ݂ܡܬ݂ܵܐ. ܘܛܲܝܒܘܼܬ݂ܵܐ ܕܐܲܠܵܗܵܐ ܐܝܼܬ݂ ܗ̄ܘܵܬ݂ ܥܠܵܘܗܝ.

⁴¹ ܘܐ̄ܢܵܫܵܘ̈ܗܝ ܒܟ݂ܠ ܫܢܵܐ. ܐܵܙܠ̄ܝܼܢ ܗ̄ܘܼܵܘ ܠܐܘܿܪܸܫܠܸܡ ܒܥܲܕ݂ܥܹܕ݂ܵܐ ܕܦܸܨܚܵܐ.

⁴² ܘܟܲܕ݂ ܗܘ̣ܵܐ ܒܲܪ ܫܢ̈ܝܼܢ ܬܲܪܬܲܥܸܣܪܹ̈ܐ. ܣܠܸܩܘ ܐܲܝܟܲܢܵܐ ܕܲܡܥܵܕ݂ܝܼܢ ܗ̄ܘܼܵܘ ܠܥܲܕ݂ܥܹܕ݂ܵܐ.

⁴³ ܘܟܲܕ݂ ܫܠܸܡܘ ܝܵܘ̈ܡܵܬ݂ܵܐ. ܗܦܲܟ݂ܘ ܠܗܘܿܢ. ܝܼܫܘܿܥ ܕܹܝܢ ܛܲܠܝܵܐ. ܦܵܫ ܠܹܗ ܒܐܘܿܪܸܫܠܸܡ. ܘܝܵܘܣܸܦ ܘܐܸܡܹܗ. ܠܵܐ ܝܼܕ݂ܲܥܘ.

⁴⁴ ܣܵܒܿܪܝܼܢ ܗ̄ܘܼܵܘ ܓܹܝܪ ܕܥܲܡ ܒܢܲܝ̈ ܠܘܝܼܬ݂ܗܘܿܢ ܗ̄ܘܼ. ܘܟܲܕ݂ ܐܸܬ݂ܵܘ ܡܲܪܕܹܿܐ ܝܵܘܡܵܐ ܚܲܕ݂. ܒܥܵܐܘܼܗܝ ܠܘܵܬ݂ ܐ̄ܢܵܫ̈ܘܿܬ݂ܗܘܿܢ ܘܲܠܘܵܬ݂ ܡܲܢ ܕܝܵܕ݂ܲܥ ܠܗܘܿܢ.

⁴⁵ ܘܠܵܐ ܐܸܫܟܿܚܘܼܗܝ. ܘܲܗܦܲܟ݂ܘ ܠܗܘܿܢ ܬܘܼܒ݂ ܠܐܘܿܪܸܫܠܸܡ. ܘܒ݂ܵܥܹܝܢ ܗ̄ܘܼܵܘ ܠܹܗ.

⁴⁶ ܘܡܸܢ ܒܵܬܲܪ ܬܠܵܬ݂ܵܐ ܝܵܘܡ̈ܝܼܢ. ܐܸܫܟܿܚܘܼܗܝ ܒܗܲܝܟܠܵܐ ܟܲܕ݂ ܝܵܬܹ݁ܒ݂ ܡܸܨܥܲܬ݂ ܡܲܠܦܵܢܹ̈ܐ. ܘܫܵܡܲܥ ܡܸܢܗܘܿܢ. ܘܲܡܫܲܐܸܠ ܠܗܘܿܢ.

⁴⁷ ܘܬܲܡܝܼܗܝܼܢ ܗܘܵܘ ܟܠܗܘܿܢ ܐܲܝܠܹܝܢ ܕܫܵܡܥܝܼܢ ܗ̄ܘܼܵܘ ܠܹܗ ܒܚܸܟ݂ܡܬܹܗ ܘܲܒ݂ܦܸܬ݂̈ܓ݂ܵܡܵܘܗܝ.

⁴⁸ ܘܟܲܕ݂ ܚܙܵܐܘܼܗܝ. ܬܡܲܗܘ. ܘܐܸܡܪܲܬܸ ܠܹܗ ܐܸܡܹܗ. ܒܹܪܝ. ܠܡܵܢܵܐ ܥܒܲܕܬ݁ ܠܲܢ ܗܵܟܲܢܵܐ ܕܗܵܐ ܐܲܒ݂ܘܼܟ݂ ܘܐܸܢܵܐ ܒܛܘܼܪܵܦܵܐ ܣܲܓܿܝܼܐܵܐ ܒܵܥܹܝܢ ܗܘܲܝܢ ܠܵܟ݂.

⁴⁹ ܐܵܡܲܪ ܠܗܘܿܢ. ܡܵܢܵܐ ܒܵܥܹܝܢ ܗܘܲܝܬ݁ܘܿܢ ܠܝܼ. ܠܵܐ ܝܵܕ݂ܥܝܼܢ ܐܢ̄ܬܘܿܢ. ܕܒܹܝܬ݂ ܐܵܒ݂ܝ ܘܵܠܹܐ ܠܝܼ ܕܐܸܗܘܹܐ.

⁵⁰ ܗܸܢܘܿܢ ܕܹܝܢ ܠܵܐ ܐܸܫܬܵܘܕܲܥܘ ܠܡܸܠܬ݂ܵܐ. ܕܐܵܡܲܪ ܠܗܘܿܢ.

⁵¹ ܘܲܢܚܸܬ݂ ܥܲܡܗܘܿܢ. ܘܐܸܬ݂ܵܐ ܠܢܵܨܪܲܬ݂. ܘܡܸܫܬܲܥܒܲܕ݂ ܗܘ̣ܵܐ ܠܗܘܿܢ. ܐܸܡܹܗ ܕܹܝܢ ܢܵܛܪܵܐ ܗ̄ܘܵܬ݂ ܟܠܗܹܝܢ ܡܸܠܹ̈ܐ ܒܠܸܒܵܗ̇.

⁵² ܝܼܫܘܿܥ ܕܹܝܢ ܪܵܒܹܐ ܗ̄ܘܵܐ ܒܩܵܘܡܬܹܗ. ܘܲܒ݂ܚܸܟ݂ܡܬܹܗ. ܘܲܒ݂ܛܲܝܒܘܼܬ݂ܵܐ ܠܘܵܬ݂ ܐܲܠܵܗܵܐ. ܘܲܒ݂ܢܲܝ̈ܢܵܫܵܐ.

3

¹ ܒܲܫܢܲܬ݂ ܚܲܡܫܲܥܸܣܪܹ̈ܐ ܕܹܝܢ ܕܡܲܠܟܿܘܼܬܹܗ ܕܛܹܒܲܪܝܼܘܿܣ ܩܹܣܲܪ. ܒܗܸܓ݂ܡܘܿܢܘܼܬ݂ܵܐ ܕܦܲܢܛܝܼܘܿܣ ܦܝܼܠܵܛܘܿܣ ܒܲܝܗܘܼܕ݂: ܟܲܕ݂ ܪܹܫܵܐ ܪܒ݂ܝܼܥܵܝܵܐ ܗܹܪܘܿܕܸܣ ܒܲܓ݂ܠܝܼܠܵܐ: ܘܦܝܼܠܝܼܦܘܿܣ ܐܲܚܘܼܗܝ ܪܹܫܵܐ ܪܒ݂ܝܼܥܵܝܵܐ: ܒܐܝܼܛܘܿܪܝܼܵܐ. ܘܒܲܐܬ݂ܪܵܐ ܕܲܛܪܵܟ݂ܘܿܢܵܐ: ܘܠܘܼܣܵܢܝܼܵܐ ܪܹܫܵܐ ܪܒ݂ܝܼܥܵܝܵܐ ܕܐܲܒ݂ܝܼܠܵܢܹ̈ܐ.

² ܒܪܲܒܘܼܬ݂ ܟܵܗܢܘܼܬ݂ܵܐ ܕܚܲܢܵܢ ܘܲܕ݂ܩܲܝܵܦܵܐ. ܗܘܸܵܬ݂ ܡܸܠܬ݂ܵܐ ܕܐܲܠܵܗܵܐ ܥܲܠ ܝܘܿܚܲܢܵܢ ܒܲܪ ܙܟܲܪܝܵܐ ܒܚܘܼܪܒܵܐ.

³ ܘܐܸܬ݂ܵܐ ܒܟ݂ܠܹܗ ܐܲܬ݂ܪܵܐ ܕܲܚܕ݂ܵܪܲܝ ܝܘܿܪܕܢܵܢ. ܟܲܕ݂ ܡܲܟ݂ܪܸܙ ܡܲܥܡܘܿܕ݂ܝܼܬ݂ܵܐ ܕܲܬ݂ܝܵܒ݂ܘܼܬ݂ܵܐ. ܠܫܘܼܒ݂ܩܵܢܵܐ ܕܲܚܛܵܗܹ̈ܐ.

⁴ ܐܲܝܟܲܢܵܐ ܕܲܟ݂ܬ݂ܝܼܒ݂ ܒܲܟ݂ܬ݂ܵܒ݂ܵܐ ܕܡܸܠܹ̈ܐ ܕܐܹܫܲܥܝܵܐ ܢܒ݂ܝܼܵܐ. ܕܐܵܡܲܪ. ܩܵܠܵܐ ܕܩܵܪܹܐ ܒܚܘܼܪܒܵܐ. ܛܲܝܸܒ݂ܘ ܐܘܼܪܚܹܗ ܕܡܵܪܝܵܐ. ܘܲܬ݂ܪܘܿܨܘ ܒܲܦܩܲܥܬ݂ܵܐ ܫܒ݂ܝܼ̈ܠܹܐ ܠܐܲܠܵܗܲܢ.

⁵ ܟܠܗܘܿܢ ܢܲܚ̈ܠܹܐ ܢܸܬ݂ܡܠܘܼܢ. ܘܟ݂ܠܗܘܿܢ ܛܘܼܪܹ̈ܐ ܘܪ̈ܵܡܵܬ݂ܵܐ. ܢܸܬ݂ܡܲܟܿܟ݂ܘܿܢ. ܘܢܸܗܘܹܐ ܥܲܪܡܵܐ ܠܫܲܦܝܵܐ. ܘܐܲܬ݂ܪܵܐ ܥܲܣܩܵܐ ܠܲܦܩܲܥܬ݂ܵܐ.

⁶ ܘܢܸܚܙܹܐ ܟܠ ܒܣܲܪ ܚܲܝܹ̈ܐ ܕܐܲܠܵܗܵܐ.

⁷ ܘܐܸܡܲܪ ܗܘ̣ܵܐ ܠܟܸܢܫܹ̈ܐ. ܐܲܝܠܹܝܢ ܕܐܵܬܹܝܢ ܗ̄ܘܼܵܘ ܠܘܵܬܹܗ ܠܡܸܥܡܲܕ݂. ܝܲܠܕܵܐ ܕܐܵܟܸܕ݂ܢܹ̈ܐ. ܡܲܢܘܼ ܚܵܘܝܼܟ݂ܘܿܢ ܠܡܸܥܪܲܩ ܡܸܢ ܪܘܼܓ݂ܙܵܐ ܕܲܥܬ݂ܝܼܕ݂.

⁸ ܥܒܸܕ݂ܘ ܗܵܟܹܝܠ ܦܹܐܪܹ̈ܐ ܕܫܵܘܹܝܢ ܠܲܬ݂ܝܵܒ݂ܘܼܬ݂ܵܐ. ܘܠܵܐ ܬܫܲܪܘܿܢ ܠܡܹܐܡܲܪ ܒܢܲܦ̮ܫܟ݂ܘܿܢ ܕܐܲܒ݂ܵܐ ܐܝܼܬ݂ ܠܲܢ ܐܲܒ݂ܪܵܗܵܡ. ܐܵܡܲܪ ܐ̄ܢܵܐ ܠܟ݂ܘܿܢ ܓܹܝܪ. ܕܡܸܢ ܗܵܠܹܝܢ ܟܹܐܦܹ̈ܐ ܡܸܫܟܲܚ ܐܲܠܵܗܵܐ ܠܲܡܩܵܡܘܼ ܒ̈ܢܲܝܵܐ ܠܐܲܒ݂ܪܵܗܵܡ.

⁹ ܗܵܐ ܕܹܝܢ ܢܵܪܓ݂ܵܐ ܣܝܼܡ ܥܲܠ ܥܸܩܪܵܐ ܕܐܝܠܵܢܹ̈ܐ. ܟܠ ܐܝܼܠܵܢܵܐ ܗܵܟܹܝܠ ܕܦܹܐܪܹ̈ܐ ܛܵܒܹ̈ܐ ܠܵܐ ܥܵܒܹܿܕ݂. ܡܸܬ݂ܦܣܸܩ. ܘܲܒ݂ܢܘܼܪܵܐ ܢܵܦܹܿܠ.

¹⁰ ܘܲܡܫܲܐܠܝܼܢ ܗ̄ܘܼܵܘ ܠܹܗ ܟܸܢܫܹ̈ܐ. ܘܐܵܡܪܝܼܢ. ܡܵܢܵܐ ܗܵܟܹܝܠ ܢܸܥܒܸܕ݂.

¹¹ ܥܢܵܐ. ܘܐܸܡܲܪ ܠܗܘܿܢ. ܡܲܢ ܕܐܝܼܬ݂ ܠܹܗ ܬܲܪܬܹ݁ܝܢ ܟܘܬ݁ܝܼܢ̈ܝܵܢ. ܢܸܬܸ݁ܠ ܠܡܲܢ ܕܠܲܝܬ݁ ܠܹܗ. ܘܡܲܢ ܕܐܝܼܬ݂ ܠܹܗ ܣܲܝܒܵܪܬܵܐ. ܗܵܟܲܢܵܐ ܢܸܥܒܸܕ݂.

¹² ܘܐܸܬ݂ܵܘ ܐܵܦ ܡܵܟ݂ܣܹ̈ܐ ܠܡܸܥܡܲܕ݂. ܘܐܵܡܪܝܼܢ ܠܹܗ. ܡܲܠܦܵܢܵܐ. ܡܵܢܵܐ ܢܸܥܒܸܕ݂.

¹³ ܗܘܼ ܕܹܝܢ ܐܸܡܲܪ ܠܗܘܿܢ. ܠܵܐ ܬܸܬ݂ܒܿܥܘܼܢ ܡܸܕܸܡ ܝܲܬ݁ܝܼܪ ܥܲܠ ܡܵܐ ܕܲܦܩܝܼܕ݂ ܠܟ݂ܘܿܢ ܠܡܸܬ݂ܒܲܥ.

¹⁴ ܘܲܡܫܲܐܠܝܼܢ ܗ̄ܘܼܵܘ ܠܹܗ ܦܵܠܚܲܝ̈ ܐܸܣܛܪܵܛܝܼܵܐ. ܘܐܵܡܪܝܼܢ. ܡܵܢܵܐ ܢܸܥܒܸܕ݂ ܐܵܦ ܚܢܲܢ. ܐܵܡܲܪ ܠܗܘܿܢ. ܠܵܐ ܒܐ̄ܢܵܫ ܬܸܬ݁ܛܲܓܿܪܘܼܢ. ܘܲܠܐ̄ܢܵܫ ܠܵܐ ܬܸܥܫܩܘܼܢ. ܘܢܸܣܦܩܵܢ ܠܟ݂ܘܿܢ ܐܲܦܣܘܿܢ̈ܝܵܬ݂ܟ݂ܘܿܢ.

¹⁵ ܟܲܕ݂ ܕܹܝܢ ܡܲܣܒܲܪ ܗܘ̣ܵܐ ܥܲܡܵܐ ܥܲܠ ܝܘܿܚܲܢܵܢ: ܘܟ݂ܠܗܘܿܢ ܡܸܬ݂ܚܲܫܒ݂ܝܼܢ ܗ̄ܘܼܵܘ ܒܠܸܒܗܘܿܢ: ܕܕ݂ܲܠܡܵܐ ܗܘܸܝܘܼ ܡܫܝܼܚܵܐ.

¹⁶ ܥܢܵܐ ܝܘܿܚܲܢܵܢ ܘܐܸܡܲܪ ܠܗܘܿܢ. ܐܸܢܵܐ ܗܵܐ ܡܲܥܡܸܕ݂ ܐ̄ܢܵܐ ܠܟ݂ܘܿܢ ܒܡܲܝ̈ܵܐ. ܐܵܬܹܐ ܕܹܝܢ ܗܵܘ ܕܚܲܝܠܬ݂ܵܢ ܡܹܢܝ. ܗܵܘ ܕܠܵܐ ܫܵܘܹܐ ܐ̄ܢܵܐ ܕܐܸܫܪܹܐ ܥܲܪ̈ܩܹܐ ܕܲܡܣܵܢܵܘ̈ܗܝ. ܗܘܼ ܢܲܥܡܸܕ݂ܟ݂ܘܿܢ ܒܪܘܼܚܵܐ ܕܩܘܼܕ݂ܫܵܐ ܘܲܒ݂ܢܘܼܪܵܐ.

¹⁷ ܗܵܘ ܕܐܲܚܝܼܕ݂ ܪܲܦ̮ܫܵܐ ܒܐܝܕ݂ܗ. ܘܲܡܕ݂ܲܟܹܐ ܐܸܕ݂ܪ̈ܵܘܗܝ. ܘܚܸ̈ܛܹܐ ܟܵܢܹܫ ܠܐܵܘܨܪ̈ܵܘܗܝ. ܘܬܸܒ݂ܢܵܐ ܢܵܘܩܸܕ݂ ܒܢܘܼܪܵܐ ܕܠܵܐ ܕܵܥܟܵܐ.

¹⁸ ܐܵܦ ܐ̄ܚܪ̈ܵܢܝܵܬ݂ܵܐ ܕܹܝܢ ܣܲܓܝܼ̈ܐܵܬ݂ܵܐ ܡܲܠܸܦ ܗ̄ܘܵܐ. ܘܲܡܣܲܒܲܪ ܠܥܲܡܵܐ.

¹⁹ ܗܹܪܘܿܕܸܣ ܕܹܝܢ ܛܸܛܪܲܪܟܵܐ. ܡܛܠ ܕܡܸܬ݂ܟܿܣܸܣ ܗܘ̣ܵܐ ܡܸܢ ܝܘܿܚܲܢܵܢ ܥܲܠ ܗܹܪܘܿܕ݂ܝܼܵܐ ܐܲܢ̄ܬܲܬ݂ ܦܝܼܠܝܼܦܘܿܣ ܐܲܚܘܼܗܝ: ܘܥܲܠ ܟܠܗܹܝܢ ܒܝܼ̈ܫܵܬ݂ܵܐ ܕܥܵܒܹܿܕ݂ ܗ̄ܘܵܐ.

²⁰ ܐܵܘܣܸܦ ܐܵܦ ܗܵܕܹܐ ܥܲܠ ܟܠܗܹܝܢ. ܘܚܲܒ݂ܫܹܗ ܠܝܘܿܚܲܢܵܢ ܒܹܝܬ݂ ܐܲܣܝܼܪܹ̈ܐ.

²¹ ܗܘ̣ܵܐ ܕܹܝܢ ܟܲܕ݂ ܥܡܲܕ݂ ܟܠܹܗ ܥܲܡܵܐ. ܘܐܵܦ ܝܼܫܘܿܥ ܥܡܲܕ݂. ܘܟܲܕ݂ ܡܨܲܠܹܐ ܐܸܬ݂ܦܬܲܚܘ ܫܡܲܝܵܐ.

²² ܘܢܸܚܬܲܬ݂ ܪܘܼܚܵܐ ܕܩܘܼܕ݂ܫܵܐ ܥܠܵܘܗܝ. ܒܲܕ݂ܡܘܼܬ݂ ܓܘܼܫܡܵܐ ܕܝܵܘܢܵܐ. ܘܩܵܠܵܐ ܗܘ̣ܵܐ ܡܸܢ ܫܡܲܝܵܐ. ܕܐܵܡܲܪ. ܐܲܢ̄ܬ݁ ܗܘܼ ܒܹܪܝ ܚܲܒܝܼܒ݂ܵܐ ܕܒ݂ܵܟ݂ ܐܸܨܛܒ݂ܝܼܬ݂.

²³ ܗܘܼ ܕܹܝܢ ܝܼܫܘܿܥ ܐܝܼܬ݂ܵܘܗܝ ܗܘ̣ܵܐ ܐܲܝܟ݂ ܒܲܪ ܫܢ̈ܝܼܢ ܬܠܵܬ݂ܝܼܢ. ܘܡܸܣܬ݁ܒܲܪ ܗ̄ܘܵܐ. ܒܲܪ ܝܵܘܣܸܦ. ܒܲܪ ܗܹܠܝܼ.

²⁴ ܒܲܪ ܡܲܛܬܲܬ݂. ܒܲܪ ܠܹܘܝܼ. ܒܲܪ ܡܲܠܟܝܼ. ܒܲܪ ܝܲܐܢܝܼ. ܒܲܪ ܝܵܘܣܸܦ.

²⁵ ܒܲܪ ܡܲܬ݁ܬ݂ܵܐ. ܒܲܪ ܥܲܡܘܿܨ. ܒܲܪ ܢܵܚܘܿܡ. ܒܲܪ ܚܲܣܠܝܼ. ܒܲܪ ܢܲܓ݁ܝܼ.

²⁶ ܒܲܪ ܡܵܐܲܬ݂. ܒܲܪ ܡܲܛܲܬ݂. ܒܲܪ ܫܲܡܥܝܼ. ܒܲܪ ܝܵܘܣܸܦ. ܒܲܪ ܝܼܗܘܼܕ݂ܵܐ.

²⁷ ܒܲܪ ܝܘܿܚܲܢܵܢ. ܒܲܪ ܪܵܣܵܐ. ܒܲܪ ܙܘܿܪܒܵܒܹܠ. ܒܲܪ ܫܸܠܲܬ݂ܐܹܝܠ. ܒܲܪ ܢܹܪܝܼ.

²⁸ ܒܲܪ ܡܲܠܟܿܝܼ. ܒܲܪ ܐܲܕܿܝܼ. ܒܲܪ ܩܘܿܣܲܡ. ܒܲܪ ܐܸܠܡܘܿܕܵܕ݂. ܒܲܪ ܥܝܼܪ.

²⁹ ܒܲܪ ܝܘܿܣܹܐ. ܒܲܪ ܐܹܠܝܼܥܵܙܲܪ. ܒܲܪ ܝܘܿܪܵܡ. ܒܲܪ ܡܲܬ݁ܝܼܬ݂ܵܐ. ܒܲܪ ܠܹܘܝܼ.

³⁰ ܒܲܪ ܫܸܡܥܘܿܢ. ܒܲܪ ܝܼܗܘܼܕ݂ܵܐ. ܒܲܪ ܝܵܘܣܸܦ. ܒܲܪ ܝܘܿܢܵܡ. ܒܲܪ ܐܹܠܝܵܩܝܼܡ

³¹ ܒܲܪ ܡܲܠܝܵܐ. ܒܲܪ ܡܵܐܢܝܼ. ܒܲܪ ܡܲܛܬ݂ܵܐ. ܒܲܪ ܢܵܬ݂ܵܢ. ܒܲܪ ܕܵܘܝܼܕ݂.

³² ܒܲܪ ܐܝܼܫܲܝ. ܒܲܪ ܥܘܿܒ݂ܝܼܕ݂. ܒܲܪ ܒܵܥܵܙ. ܒܲܪ ܣܲܠܡܘܿܢ. ܒܲܪ ܢܸܚܫܘܿܢ.

³³ ܒܲܪ ܥܲܡܝܼܢܵܕ݂ܵܒ݂. ܒܲܪ ܐܵܪܵܡ. ܒܲܪ ܚܸܨܪܘܿܢ. ܒܲܪ ܦܲܪܨ. ܒܲܪ ܝܼܗܘܼܕ݂ܵܐ.

³⁴ ܒܲܪ ܝܲܥܩܘܿܒ݂. ܒܲܪ ܐܝܼܣܚܵܩ. ܒܲܪ ܐܲܒ݂ܪܵܗܵܡ. ܒܲܪ ܬܲܪܚ. ܒܲܪ ܢܵܚܘܿܪ.

³⁵ ܒܲܪ ܣܵܪܘܿܓ݂. ܒܲܪ ܐܲܪܥܘܿ. ܒܲܪ ܦܵܠܵܓ݂. ܒܲܪ ܥܵܒ݂ܵܪ. ܒܲܪ ܫܵܠܵܚ.

³⁶ ܒܲܪ ܩܲܝܢܲܢ. ܒܲܪ ܐܲܪܦܲܟ݂ܫܵܪ. ܒܲܪ ܫܹܝܡ. ܒܲܪ ܢܘܿܚ. ܒܲܪ ܠܲܡܟ.

³⁷ ܒܲܪ ܡܲܬ݁ܘܼܫܠܲܚ. ܒܲܪ ܚܢܘܿܟ݂. ܒܲܪ ܝܲܪܕ. ܒܲܪ ܡܲܗܠܵܠܵܐܹܝܠ. ܒܲܪ ܩܲܝܢܲܢ.

³⁸ ܒܲܪ ܐܵܢܘܿܫ. ܒܲܪ ܫܹܝܬ݂. ܒܲܪ ܐܵܕ݂ܵܡ. ܕܡܸܢ ܐܲܠܵܗܵܐ.

4

¹ ܝܼܫܘܿܥ ܕܹܝܢ ܟܲܕ݂ ܡܠܸܐ ܪܘܼܚܵܐ ܕܩܘܼܕ݂ܫܵܐ. ܗܦܲܟ݂ ܡܸܢ ܝܘܿܪܕܢܵܢ. ܘܲܕ݂ܒܲܪܬܹܗ ܪܘܼܚܵܐ ܠܚܘܼܪܒܵܐ.

² ܝܵܘ̈ܡܵܬ݂ܵܐ ܐܲܪܒܥܝܼܢ. ܕܢܸܬ݂ܢܲܣܹܐ ܡܸܢ ܐܵܟܹܠܩܲܪܨܵܐ. ܘܠܵܐ ܠܥܸܣ ܡܸܕܸܡ ܒܗܵܢܘܿܢ ܝܵܘ̈ܡܵܬ݂ܵܐ. ܘܟܲܕ݂ ܫܲܠܸܡ ܐܸܢܘܿܢ. ܠܚܲܪܬ݂ܵܐ ܟܦܸܢ.

³ ܘܐܸܡܲܪ ܠܹܗ ܐܵܟܹܠܩܲܪܨܵܐ. ܐܸܢ ܒܪܹܗ ܐܲܢ̄ܬ݁ ܕܐܲܠܵܗܵܐ. ܐܸܡܲܪ ܠܟܹܐܦܵܐ ܗܵܕܹܐ ܕܬܸܗܘܹܐ ܠܲܚܡܵܐ.

⁴ ܥܢܵܐ ܝܼܫܘܿܥ. ܘܐܸܡܲܪ ܠܹܗ. ܟܬ݂ܝܼܒ݂ ܗ̄ܘܼ. ܕܠܵܐ ܗܘ̣ܵܐ ܒܠܲܚܡܵܐ ܒܲܠܚܘܿܕ݂ ܚܵܝܹܿܐ ܒܲܪܢܵܫܵܐ. ܐܸܠܵܐ ܒܟ݂ܠ ܦܸܬ݂ܓ݂ܵܡ ܕܐܲܠܵܗܵܐ.

⁵ ܘܐܲܣܩܹܗ ܣܵܛܵܢܵܐ ܠܛܘܼܪܵܐ ܪܵܡܵܐ. ܘܚܵܘܝܹܗ ܟܠܗܹܝܢ ܡܲܠܟ̈ܘܵܬ݂ܵܐ ܕܐܲܪܥܵܐ ܒܥܸܕܵܢܵܐ ܙܥܘܿܪܵܐ.

⁶ ܘܐܸܡܲܪ ܠܹܗ ܐܵܟܹܠܩܲܪܨܵܐ. ܠܵܟ݂ ܐܸܬܸ݁ܠ ܫܘܼܠܛܵܢܵܐ ܗܵܢܵܐ ܟܠܹܗ ܘܫܘܼܒ݂ܚܹܗ. ܕܠܝܼ ܡܲܫܠܲܡ ܘܲܠܡܲܢ ܕܐܸܨܒܹܐ. ܝܵܗܹܒ݂ ܐ̄ܢܵܐ ܠܹܗ.

⁷ ܐܸܢ ܗܵܟܹܝܠ ܬܸܣܓܿܘܿܕ݂ ܩܕ݂ܵܡܲܝ. ܕܝܼܠܵܟ݂ ܢܸܗܘܹܐ ܟܠܹܗ.

⁸ ܥܢܵܐ ܝܼܫܘܿܥ. ܘܐܸܡܲܪ ܠܹܗ. ܟܬ݂ܝܼܒ݂ ܗ̄ܘܼ ܕܲܠܡܵܪܝܵܐ ܐܲܠܵܗܵܟ݂ ܬܸܣܓܿܘܿܕ݂. ܘܠܹܗ ܒܲܠܚܘܿܕ݂ܵܘܗܝ ܬܸܦܠܘܿܚ.

⁹ ܘܐܲܝܬ݁ܝܹܗ ܠܐܘܿܪܸܫܠܸܡ. ܘܐܲܩܝܼܡܹܗ ܥܲܠ ܟܸܢܦܵܐ ܕܗܲܝܟܠܵܐ. ܘܐܸܡܲܪ ܠܹܗ. ܐܸܢ ܒܪܹܗ ܐܲܢ̄ܬ݁ ܕܐܲܠܵܗܵܐ. ܐܲܪܡܵܐ ܢܲܦ̮ܫܵܟ݂ ܡܸܟܵܐ ܠܬܲܚܬ݁.

¹⁰ ܟܬ݂ܝܼܒ݂ ܓܹܝܪ. ܕܲܠܡܲܠܲܐܟ݂ܵܘ̈ܗܝ. ܢܦܲܩܸܕ݂ ܥܠܲܝܟ ܕܲܢܢܲܛܪܘܼܢܵܟ݂.

¹¹ ܘܥܲܠ ܕܪ̈ܵܥܲܝܗܘܿܢ ܢܸܫܩܠܘܼܢܵܟ݂. ܕܠܵܐ ܬܸܬ݁ܩܸܠ ܪܸܓ݂ܠܵܟ݂ ܒܟܹܐܦܵܐ.

¹² ܥܢܵܐ ܕܹܝܢ ܝܼܫܘܿܥ. ܘܐܸܡܲܪ ܠܹܗ. ܐܲܡܝܼܪ ܗ̄ܘܼ. ܕܠܵܐ ܬܢܲܣܹܐ ܠܡܵܪܝܵܐ ܐܲܠܵܗܵܟ݂.

¹³ ܘܟܲܕ݂ ܫܲܠܸܡ ܐܵܟܹܠܩܲܪܨܵܐ ܟܠܗܘܿܢ ܢܸܣܝܘܿܢܵܘ̈ܗܝ. ܦܪܲܩ ܡܸܢ ܠܘܵܬܹܗ ܥܲܕ݂ ܙܲܒ݂ܢܵܐ.

¹⁴ ܘܲܗܦܲܟ݂ ܝܼܫܘܿܥ ܒܚܲܝܠܵܐ ܕܪܘܼܚܵܐ ܠܲܓ݂ܠܝܼܠܵܐ. ܘܲܢܦܲܩ ܥܠܵܘܗܝ ܛܸܒܵܐ. ܒܟ݂ܠܹܗ ܐܲܬ݂ܪܵܐ ܕܲܚܕ݂ܵܪܲܝܗܘܿܢ.

¹⁵ ܘܗܘܼ ܡܲܠܸܦ ܗܘ̣ܵܐ ܒܲܟ݂ܢܘܼܫܵܬ݂̈ܗܘܿܢ. ܘܡܸܫܬܲܒܲܚ ܗܘ̣ܵܐ ܡܸܢ ܟܠ ܐ̄ܢܵܫ.

¹⁶ ܘܐܸܬ݂ܵܐ ܠܢܵܨܪܲܬ݂ ܐܲܝܟܵܐ ܕܐܬ݂ܪܲܒܝܼ. ܘܥܲܠ ܐܲܝܟܲܢܵܐ ܕܲܡܥܵܕ݂ ܗܘ̣ܵܐ ܠܲܟ݂ܢܘܼܫܬܵܐ. ܒܝܵܘܡܵܐ ܕܫܲܒܿܬ݂ܵܐ. ܘܩܼܵܡ ܠܡܸܩܪܵܐ.

¹⁷ ܘܐܸܬ݂ܝܼܗܸܒ݂ ܠܹܗ ܣܸܦܪܵܐ ܕܐܹܫܲܥܝܵܐ ܢܒ݂ܝܼܵܐ. ܘܲܦܬܲܚ ܝܼܫܘܿܥ ܣܸܦܪܵܐ. ܘܐܸܫܟܲܚ ܕܘܼܟܬ݂ܵܐ. ܐܲܝܟܵܐ ܕܲܟܬ݂ܝܼܒ݂.

¹⁸ ܪܘܼܚܹܗ ܕܡܵܪܝܵܐ ܥܠܲܝ. ܘܡܛܠ ܗܵܕܹܐ ܡܲܫܚܲܢܝ. ܠܲܡܣܲܒܵܪܘܼ ܠܡܸܣܟܹܢܹ̈ܐ. ܘܫܲܠܚܲܢܝ. ܠܡܲܐܣܵܝܘܼ ܠܲܬ݂ܒ݂ܝܼܪ̈ܲܝ ܠܸܒܵܐ. ܘܲܠܡܲܟ݂ܪܵܙܘܼ ܠܲܫ̈ܒܲܝܵܐ ܫܘܼܒ݂ܩܵܢܵܐ. ܘܠܲܥܘܝܼܪܹ̈ܐ ܚܙܵܝܵܐ. ܘܠܲܡܫܲܪܵܪܘܼ ܠܲܬ݂ܒ݂ܝܼܪܹ̈ܐ ܒܫܘܼܒ݂ܩܵܢܵܐ.

¹⁹ ܘܲܠܡܲܟ݂ܪܵܙܘܼ ܫܲܢ̄ܬܵܐ ܡܩܲܒܲܠܬܵܐ ܠܡܵܪܝܵܐ.

²⁰ ܘܲܟ݂ܪܲܟ݂ ܣܸܦܪܵܐ. ܘܝܲܗܒܹܗ ܠܲܡܫܲܡܫܵܢܵܐ. ܘܐܸܙܲܠ ܝܼܬܸܒ݂. ܟܠܗܘܿܢ ܕܹܝܢ ܕܒܲܟ݂ܢܘܼܫܬܵܐ. ܥܲܝܢܲܝ̈ܗܘܿܢ ܚܵܝܪܵܢ ܗ̄ܘܲܝ ܒܹܗ.

²¹ ܘܫܲܪܝܼ ܠܡܹܐܡܲܪ ܠܘܵܬ݂ܗܘܿܢ. ܕܝܵܘܡܵܢܵܐ ܐܸܫܬܲܠܲܡ ܟܬ݂ܵܒ݂ܵܐ ܗܵܢܵܐ ܒܐܕ݂ܢܲܝ̈ܟܿܘܿܢ.

²² ܘܣܵܗܕܝܼܢ ܗܘܵܘ ܠܹܗ ܟܠܗܘܿܢ. ܘܡܸܬ݁ܕܲܡܪܝܼܢ ܗ̄ܘܼܵܘ ܒܡܸܠܹ̈ܐ ܕܛܲܝܒܘܼܬ݂ܵܐ ܕܢܵܦܩܵܢ ܗ̄ܘܲܝ ܡܸܢ ܦܘܼܡܹܗ. ܘܐܵܡܪܝܼܢ ܗ̄ܘܼܵܘ. ܠܵܐ ܗܘ̣ܵܐ ܗܵܢܵܐ ܒܲܪ ܝܵܘܣܸܦ.

²³ ܐܵܡܲܪ ܠܗܘܿܢ ܝܼܫܘܿܥ. ܟܒܲܪ ܬܹܐܡܪܘܼܢ ܠܝܼ ܡܲܬ݂ܠܵܐ ܗܵܢܵܐ. ܐܵܣܝܵܐ ܐܲܣܵܐ ܢܲܦ̮ܫܵܟ݂. ܘܟ݂ܠ ܕܲܫܡܲܥܢ ܕܲܥܒܲܕܬ݁ ܒܲܟ݂ܦܲܪܢܵܚܘܿܡ. ܥܒܸܕ݂ ܐܵܦ ܗܵܪܟܵܐ ܒܲܡܕ݂ܝܼܢ̄ܬܵܟ݂.

²⁴ ܗܘܼ ܕܹܝܢ ܐܸܡܲܪ. ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܠܲܝܬ݁ ܢܒ݂ܝܼܵܐ ܕܡܸܬ݂ܩܲܒܲܠ ܒܲܡܕ݂ܝܼܢ̄ܬܹ݁ܗ.

²⁵ ܫܪܵܪܵܐ ܓܹܝܪ ܐܵܡܲܪ ܐ̄ܢܵܐ ܠܟ݂ܘܿܢ. ܕܣܲܓܝܼ ܐܲܪ̈ܡܠܵܬ݂ܵܐ ܐܝܼܬ݂ ܗ̄ܘܲܝ ܒܝܼܣܪܵܝܹܠ. ܒܝܵܘܡܲܝ̈ ܐܹܠܝܼܵܐ ܢܒ݂ܝܼܵܐ ܟܲܕ݂ ܐܸܬ݁ܬ݁ܚܸܕ݂ܘ ܫܡܲܝܵܐ ܫܢ̈ܝܼܢ ܬܠܵܬ݂ ܘܝܲܪ̈ܚܹܐ ܫܬܵܐ ܘܲܗܘܵܐ ܟܲܦܢܵܐ ܪܲܒܵܐ ܒܟ݂ܠܵܗ̇ ܐܲܪܥܵܐ.

²⁶ ܘܲܠܘܵܬ݂ ܚܕ݂ܵܐ ܡܸܢܗܹܝܢ ܠܵܐ ܐܸܫܬܲܕܲܪ ܐܹܠܝܼܵܐ. ܐܸܠܵܐ ܠܨܲܪܦܲܬ݂ ܕܨܲܝܕܵܢ. ܠܘܵܬ݂ ܐܲܢ̄ܬ݁ܬ݂ܵܐ ܐܲܪܡܲܠܬܵܐ.

²⁷ ܘܣܲܓܝܼܐܹ̈ܐ ܓܲܪ̈ܒܹܐ ܐܝܼܬ݂ ܗ̄ܘܼܵܘ ܒܹܝܬ݂ ܝܼܣܪܵܝܹܠ. ܒܝܵܘܡܲܝ̈ ܐܹܠܝܼܫܲܥ ܢܒ݂ܝܼܵܐ ܘܚܲܕ݂ ܡܸܢܗܘܿܢ ܠܵܐ ܐܸܬ݁ܕܲܟܝܼ. ܐܸܠܵܐ ܐܸܢ ܢܲܥܡܵܢ ܐܲܪܡܵܝܵܐ.

²⁸ ܘܟܲܕ݂ ܫܡܲܥܘ ܗܵܠܹܝܢ ܗܵܢܘܿܢ ܕܒܲܟ݂ܢܘܼܫܬܵܐ. ܐܸܬ݂ܡܠܝܼܘ ܚܸܡܬܵܐ ܟܠܗܘܿܢ:

²⁹ ܘܩܵܡܘ ܐܲܦܩܘܼܗܝ ܠܒܲܪ ܡܸܢ ܡܕ݂ܝܼܢ̄ܬܵܐ. ܘܐܲܝܬ݁ܝܘܼܗܝ ܥܕ݂ܲܡܵܐ ܠܲܓ݂ܒ݂ܝܼܢܵܐ ܕܛܘܼܪܵܐ ܗܵܘ ܕܲܡܕ݂ܝܼܢ̄ܬ݁ܗܘܿܢ ܒܲܢܝܵܐ ܗ̄ܘܵܬ݂ ܥܠܵܘܗܝ. ܕܢܸܫܕ݂ܘܢܵܝܗܝ ܡܸܢ ܫܩܝܼܦܵܐ.

³⁰ ܗܘܼ ܕܹܝܢ ܥܒܲܪ ܒܲܝܢܵܬ݂ܗܘܿܢ ܘܐܸܙܲܠ.

³¹ ܘܲܢܚܸܬ݂ ܠܲܟ݂ܦܲܪܢܵܚܘܿܡ ܡܕ݂ܝܼܢ̄ܬܵܐ ܕܲܓ݂ܠܝܼܠܵܐ. ܘܡܲܠܸܦ ܗܘ̣ܵܐ ܠܗܘܿܢ ܒܫܲܒܹ̈ܐ.

³² ܘܬܲܡܝܼܗܝܼܢ ܗܘܵܘ ܒܝܘܼܠܦܵܢܹܗ. ܕܲܡܫܲܠܛܵܐ ܗ̄ܘܵܬ݂ ܡܸܠܬܹܗ.

³³ ܘܐܝܼܬ݂ ܗܘ̣ܵܐ ܒܲܟ݂ܢܘܼܫܬܵܐ ܓܲܒ݂ܪܵܐ ܕܐܝܼܬ݂ ܗܘ̣ܵܐ ܒܹܗ. ܪܘܼܚܵܐ ܕܫܹܐܕ݂ܵܐ ܛܲܢܦܵܐ. ܘܲܙܥܲܩ ܒܩܵܠܵܐ ܪܵܡܵܐ.

³⁴ ܘܐܸܡܲܪ. ܫܒ݂ܘܿܩܲܝܢܝ. ܡܵܐ ܠܲܢ ܘܠܵܟ݂ ܝܼܫܘܿܥ ܢܵܨܪܵܝܵܐ. ܐܸܬܲܝܬ݁ ܠܡܵܘܒܵܕ݂ܘܼܬܲܢ. ܝܵܕ݂ܲܥ ܐ̄ܢܵܐ ܠܵܟ݂ ܡܲܢ ܐܲܢ̄ܬ݁ ܩܲܕܝܼܫܹܗ ܕܐܲܠܵܗܵܐ.

³⁵ ܘܲܟ݂ܐܵܐ ܒܹܗ ܝܼܫܘܿܥ. ܘܐܸܡܲܪ. ܣܟ݂ܘܿܪ ܦܘܼܡܵܟ݂. ܘܦܘܿܩ ܡܸܢܹܗ. ܘܲܫܕ݂ܵܝܗܝ ܫܹܐܕ݂ܵܐ ܒܲܡܨܲܥܬ݂ܵܐ. ܘܲܢܦܲܩ ܡܸܢܹܗ. ܟܲܕ݂ ܠܵܐ ܣܪܲܚ ܒܹܗ ܡܸܕܸܡ.

³⁶ ܘܬܸܡܗܵܐ ܪܲܒܵܐ ܐܸܚܲܕ݂ ܠܟ݂ܠܢܵܫ. ܘܲܡܡܲܠܠܝܼܢ ܗ̄ܘܼܵܘܥܲܡ ܚܕ݂ܵܕܹ̈ܐ ܘܐܵܡܪܝܼܢ. ܡܵܢܵܐ ܗܝܼ ܟܲܝ ܡܸܠܬ݂ܵܐ ܗܵܕܹܐ ܕܲܒ݂ܫܘܼܠܛܵܢܵܐ ܘܲܒ݂ܚܲܝܠܵܐ ܦܵܩܕܵܐ ܠܪ̈ܘܼܚܹ̈ܐ ܛܲܢ̈ܦܵܬ݂ܵܐ. ܘܢܵܦܩܵܢ.

³⁷ ܘܲܢܦܲܩ ܥܠܵܘܗܝ ܛܸܒܵܐ ܒܟ݂ܠܹܗ ܐܲܬ݂ܪܵܐ ܕܲܚܕ݂ܵܪܲܝܗܘܿܢ.

³⁸ ܘܟܲܕ݂ ܢܦܲܩ ܝܼܫܘܿܥ ܡܸܢ ܟܢܘܼܫܬܵܐ. ܥܲܠ ܠܒܲܝܬܹ݁ܗ ܕܫܸܡܥܘܿܢ. ܘܲܚܡܵܬܹܗ ܕܫܸܡܥܘܿܢ. ܐܲܠܝܼܨܵܐ ܗ̄ܘܵܬ݂ ܒܐܸܫܵܬ݂ܵܐ ܪܲܒܬ݂ܵܐ. ܘܲܒ݂ܥܵܘ ܡܸܢܹܗ ܡܛܠܵܬ݂ܵܗ̇.

³⁹ ܘܩܼܵܡ ܠܥܸܠ ܡܸܢܵܗ̇. ܘܲܟ݂ܐܵܐ ܒܐܸܫܵܬ݂ܵܗ̇. ܘܲܫܒܲܩܬܵܗ̇. ܘܡܸܚܕ݂ܵܐ ܩܵܡܲܬܸ. ܘܲܡܫܲܡܫܵܐ ܗ̄ܘܵܬ݂ ܠܗܘܿܢ.

⁴⁰ ܡܲܥܪ̈ܵܒܲܝ ܫܸܡܫܵܐ ܕܹܝܢ. ܟܠܗܘܿܢ ܐܲܝܠܹܝܢ ܕܐܝܼܬ݂ ܗܘ̣ܵܐ ܠܗܘܿܢ ܟܪ̈ܝܼܗܹܐ ܕܲܟ݂ܪ̈ܝܼܗܝܼܢ ܒܟ݂ܘܼܪ̈ܗܵܢܹܐ ܡܫܲܚܠܦܹ̈ܐ. ܐܲܝܬ݁ܝܼܘ ܐܸܢܘܿܢ ܠܘܵܬܹܗ. ܗܘܼ ܕܹܝܢ ܥܲܠ ܚܲܕ݂ ܚܲܕ݂ ܡܸܢܗܘܿܢ ܐܝܼܕ݂ܗ ܣܵܐܹܡ ܗ̄ܘܵܐ. ܘܡܲܐܣܹܐ ܗܘ̣ܵܐ ܠܗܘܿܢ.

⁴¹ ܘܢܵܦܩܝܼܢ ܗ̄ܘܼܵܘ ܐܵܦ ܫܹܐܕܹ̈ܐ ܡܸܢ ܣܲܓܝܼܐܹ̈ܐ. ܟܲܕ݂ ܡܲܙܥܩܝܼܢ. ܘܐܵܡܪܝܼܢ. ܕܐܲܢ̄ܬ݁ ܗܘܼ ܡܫܝܼܚܵܐ ܒܪܹܗ ܕܐܲܠܵܗܵܐ. ܘܟܵܐܹܐ ܗܘ̣ܵܐ ܒܗܘܿܢ. ܘܠܵܐ ܫܵܒܹܩ ܗܘ̣ܵܐ ܠܗܘܿܢ ܕܢܹܐܡܪܘܼܢ. ܕܝܵܕ݂ܥܝܼܢ ܕܗܸܘܝܘܼ ܡܫܝܼܚܵܐ.

⁴² ܘܲܠܨܲܦܪܹܗ ܕܝܵܘܡܵܐ. ܢܦܲܩ ܐܸܙܲܠ ܠܹܗ ܠܐܲܬ݂ܪܵܐ ܚܘܼܪܒܵܐ. ܘܟܸܢܫܹ̈ܐ ܒܵܥܹܝܢ ܗ̄ܘܼܵܘ ܠܹܗ. ܘܐܸܬ݂ܵܘ ܥܕ݂ܲܡܵܐ ܠܘܵܬܹܗ. ܘܐܲܚܕܘܼܗܝ. ܕܠܵܐ ܢܹܐܙܲܠ ܠܹܗ ܡܸܢ ܠܘܵܬ݂ܗܘܿܢ.

⁴³ ܗܘܼ ܕܹܝܢ ܝܼܫܘܿܥ ܐܸܡܲܪ ܠܗܘܿܢ. ܕܐܵܦ ܠܲܡܕ݂ܝܼ̈ܢܵܬ݂ܵܐ ܐ̄ܚܪ̈ܵܢܝܵܬ݂ܵܐ ܘܵܠܹܐ ܠܝܼ ܠܲܡܣܲܒܵܪܘܼ ܡܲܠܟܿܘܼܬܹܗ ܕܐܲܠܵܗܵܐ. ܕܥܲܠ ܗܵܕܹܐ ܗ̄ܘܼ ܐܸܫܬܲܕܪܹܬ݂.

⁴⁴ ܘܗܘܼ ܡܲܟ݂ܪܸܙ ܗܘ̣ܵܐ ܒܲܟ݂ܢ̈ܘܼܫܵܬ݂ܵܐ ܕܲܓ݂ܠܝܼܠܵܐ.

5

¹ ܗܘ̣ܵܐ ܕܹܝܢ ܟܲܕ݂ ܟܢܲܫ ܥܠܵܘܗܝ ܟܸܢܫܵܐ ܠܡܸܫܡܲܥ ܡܸܠܬ݂ܵܐ ܕܐܲܠܵܗܵܐ. ܘܗܘܼ ܩܵܐܹܡ ܗܘ̣ܵܐ ܥܲܠ ܝܲܕ݂ ܝܲܡܬ݂ܵܐ ܕܓܹܢܹܣܵܪ.

² ܚܙܵܐ ܣܦܝܼܢܹ̈ܐ ܬܲܪܬܹ݁ܝܢ. ܕܩܵܝܡܵܢ ܥܲܠ ܓܸܢ̄ܒ݂ ܝܲܡܬ݂ܵܐ. ܘܨܲܝܵܕܹ̈ܐ ܕܲܣܠܸܩܘ ܡܸܢܗܹܝܢ. ܘܲܡܫܝܼܓ݂ܝܼܢ ܡܨܝܼܕ݂ܵܬ݂ܗ̈ܘܿܢ.

³ ܘܲܚܕ݂ܵܐ ܡܸܢܗܹܝܢ. ܕܫܸܡܥܘܿܢ ܗܘܸܵܬ݂ ܟܹܐܦܵܐ. ܘܲܣܠܸܩ ܝܼܫܘܿܥ ܝܼܬܸܒ݂ ܒܵܗ̇. ܘܐܸܡܲܪ ܕܢܸܕ݂ܒܪܘܼܢܵܗ̇ ܩܲܠܝܼܠ ܡܸܢ ܝܲܒ݂ܫܵܐ ܠܡܲܝ̈ܵܐ. ܘܝܵܬܹ݁ܒ݂ ܗ̄ܘܵܐ. ܘܡܲܠܸܦ ܡܸܢ ܣܦܝܼܢ̄ܬܵܐ ܠܟܸܢܫܵܐ.

⁴ ܘܟܲܕ݂ ܫܬܸܩ ܡܸܢ ܡܲܡܠ̱ܠܹܗ. ܐܸܡܲܪ ܠܫܸܡܥܘܿܢ. ܕܒܲܪܘ ܠܥܘܼܡܩܵܐ. ܘܐܲܪܡܵܘ ܡܨܝܼܕܿܬ݁ܟ݂ܘܿܢ ܠܨܲܝܕܵܐ.

⁵ ܥܢܵܐ ܫܸܡܥܘܿܢ. ܘܐܸܡܲܪ ܠܹܗ. ܪܲܒܝܼ: ܠܸܠܝܵܐ ܟܠܹܗ ܠܐܝܼܢ ܘܡܸܕܸܡ ܠܵܐ ܐܸܚܲܕ݂ܢ. ܥܲܠ ܡܸܠܬ݂ܵܟ݂ ܕܹܝܢ. ܪܵܡܹܐ ܐ̄ܢܵܐ ܡܨܝܼܕܿܬܵܐ.

⁶ ܘܟܲܕ݂ ܗܵܕܹܐ ܥܒܲܕ݂ܘ. ܚܒܲܫܘ ܢܘܼܢܹ̈ܐ ܣܲܓܝܼܐܹ̈ܐ ܕܛܵܒ݂. ܘܡܸܨܛܲܪܝܵܐ ܗ̄ܘܵܬ݂ ܡܨܝܼܕܿܬ݁ܗܘܿܢ.

⁷ ܘܲܪܡܲܙܘ ܠܚܲܒ݂ܪ̈ܲܝܗܘܿܢ ܕܒܲܣܦܝܼܢ̄ܬܵܐ ܐ̄ܚܪܹܬ݂ܵܐ ܕܢܹܐܬ݂ܘܼܢ ܢܥܲܕܪܘܼܢ ܐܸܢܘܿܢ. ܘܟܲܕ݂ ܐܸܬ݂ܵܘ. ܡܠܵܘ ܐܸܢܹܝܢ ܣܦܝܼܢܹ̈ܐ ܬܲܪܬܲܝܗܹܝܢ. ܐܲܝܟ݂ ܕܩܲܪ̈ܝܼܒ݂ܵܢ ܗ̄ܘܲܝ̈ ܠܡܸܛܒܲܥ.

⁸ ܟܲܕ݂ ܚܙܵܐ ܕܹܝܢ ܫܸܡܥܘܿܢ ܟܹܐܦܵܐ. ܢܦܲܠ ܩܕ݂ܵܡ ܪܸ̈ܓ݂ܠܵܘܗܝ ܕܝܼܫܘܿܥ. ܘܐܸܡܲܪ ܠܹܗ. ܒܵܥܹܐ ܐ̄ܢܵܐ ܡܸܢܵܟ݂ ܡܵܪܝ. ܦܪܘܿܩ ܠܵܟ݂ ܡܹܢܝ. ܕܓܲܒ݂ܪܵܐ ܐ̄ܢܵܐ ܚܲܛܵܝܵܐ.

⁹ ܬܸܡܗܵܐ ܓܹܝܪ ܐܲܚܕܹܗ ܗ̄ܘܵܐ. ܘܲܠܟ݂ܠܗܘܿܢ ܕܥܲܡܹܗ ܥܲܠ ܨܲܝܕܵܐ ܗܵܘ ܕܢܘܼܢܹ̈ܐ ܕܨܵܕ݂ܘ.

¹⁰ ܗܵܟ݂ܘܵܬ݂ ܕܹܝܢ ܐܵܦ ܠܝܲܥܩܘܿܒ݂ ܘܲܠܝܘܿܚܲܢܵܢ. ܒܢܲܝ̈ ܙܲܒ݂ܕ݂ܲܝ ܕܐܝܬܲܝܗܘܿܢ ܗ̄ܘܼܵܘ ܫܵܘܬܵܦܹ̈ܐ ܕܫܸܡܥܘܿܢ. ܐܸܡܲܪ ܕܹܝܢ ܝܼܫܘܿܥ ܠܫܸܡܥܘܿܢ. ܠܵܐ ܬܸܕ݂ܚܲܠ. ܡܸܢ ܗܵܫܵܐ ܒܢܲܝ̈ܢܵܫܵܐ ܬܸܗܘܹܐ ܨܵܐܹܕ݂ ܠܚܲܝܹ̈ܐ.

¹¹ ܘܩܲܪܸܒ݂ܘ ܐܸܢܹܝܢ ܣܦܝܼܢܹ̈ܐ ܠܐܲܪܥܵܐ. ܘܲܫܒܲܩܘ ܟܠ ܡܸܕ݂ܡ. ܘܐܸܬ݂ܵܘ ܒܵܬ݂ܪܹܗ.

¹² ܘܟܲܕ݂ ܗܘ̣ܵܐ ܝܼܫܘܿܥ ܒܲܚܕ݂ܵܐ ܡܸܢ ܡܕ݂ܝܼ̈ܢܵܬ݂ܵܐ. ܐܸܬ݂ܵܐ ܓܲܒ݂ܪܵܐ ܕܲܡܠܹܐ ܟܠܹܗ ܓܲܪܒܵܐ. ܚܙܵܐ ܠܝܼܫܘܿܥ. ܘܲܢܦܲܠ ܥܲܠ ܐܲܦܵܘ̈ܗܝ ܘܒ݂ܵܥܹܐ ܗܘ̣ܵܐ ܡܸܢܹܗ. ܘܐܸܡܲܪ ܠܹܗ. ܡܵܪܝ. ܐܸܢ ܨܵܒܹܐ ܐܲܢ̄ܬ݁. ܡܸܫܟܲܚ ܐܲܢ̄ܬ݁ ܠܲܡܕ݂ܲܟܵܝܘܼܬ݂ܝ.

¹³ ܘܲܦܫܲܛ ܐܝܼܕ݂ܗ ܝܼܫܘܿܥ ܩܪܸܒ݂ ܠܹܗ. ܘܐܸܡܲܪ ܠܹܗ. ܨܵܒܹܐ ܐ̄ܢܵܐ ܐܸܬ݁ܕܲܟܵܐ. ܘܒܲܪ ܫܵܥܬܹܗ ܐܸܙܲܠ ܡܸܢܹܗ ܓܲܪܒܹܗ. ܘܐܸܬ݁ܕܲܟܝܼ.

¹⁴ ܘܦܲܩܕܹܗ. ܕܲܠܐ̄ܢܵܫ ܠܵܐ ܬܹܐܡܲܪ. ܐܸܠܵܐ ܙܸܠ. ܚܵܘܵܐ ܢܲܦ̮ܫܵܟ݂ ܠܟ݂ܵܗܢܹ̈ܐ. ܘܩܲܪܸܒ݂ ܚܠܵܦ ܬܲܕ݂ܟܿܝܼܬ݂ܵܟ݂ ܐܲܝܟܲܢܵܐ ܕܦܲܩܸܕ݂ ܡܘܼܫܹܐ. ܠܣܵܗܕ݂ܘܬ݂ܗܘܿܢ.

¹⁵ ܘܲܢܦܲܩ ܥܠܵܘܗܝ ܛܸܒܵܐ ܝܲܬ݁ܝܼܪܵܐܝܼܬ݂. ܘܡܸܬ݂ܟܲܢܲܫ ܗܘ̣ܵܐ ܥܲܡܵܐ ܣܲܓܿܝܼܐܵܐ ܠܡܸܫܡܲܥ ܡܸܢܹܗ. ܘܲܠܡܸܬ݂ܐܲܣܵܝܘܼ ܡܸܢ ܟܘܪ̈ܗܵܢܲܝܗܘܿܢ.

¹⁶ ܗܘܼ ܕܹܝܢ ܡܫܲܢܹܐ ܗܘ̣ܵܐ ܠܕ݂ܲܒ݂ܪܵܐ. ܘܲܡܨܲܠܹܐ.

¹⁷ ܘܲܗܘܵܐ ܒܚܲܕ݂ ܡܸܢ ܝܵܘ̈ܡܵܬ݂ܵܐ. ܟܲܕ݂ ܡܲܠܸܦ ܗܘ̣ܵܐ ܝܼܫܘܿܥ. ܝܵܬ݂ܒܿܝܼܢ ܗ̄ܘܼܵܘ ܦܪ̈ܝܼܫܹܐ ܘܡܲܠܦܲܝ̈ ܢܵܡܘܿܣܵܐ ܕܐܸܬ݂ܵܘ ܗ̄ܘܼܵܘ ܡܸܢ ܟܠ ܩܘܼܪ̈ܝܵܐ ܕܲܓ݂ܠܝܼܠܵܐ ܘܕܲܝܗܘܼܕ݂ ܘܕ݂ܐܘܿܪܸܫܠܸܡ. ܘܚܲܝܠܵܐ ܕܡܵܪܝܵܐ. ܐܝܼܬ݂ܵܘܗܝ ܗܘ̣ܵܐ ܠܡܲܐܣܵܝܘܼܬ݂ܗܘܿܢ.

¹⁸ ܘܐ̄ܢܵܫܵܐ ܐܲܝܬ݁ܝܼܘ ܒܥܲܪܣܵܐ ܓܲܒ݂ܪܵܐ ܚܲܕ݂. ܡܫܲܪܝܵܐ. ܘܒ݂ܵܥܹܝܢ ܗ̄ܘܼܵܘ ܕܢܲܥܠܘܼܢ. ܢܣܝܼܡܘܼܢܵܝܗܝ ܩܕ݂ܵܡܵܘܗܝ.

¹⁹ ܘܟܲܕ݂ ܠܵܐ ܐܸܫܟܲܚܘ ܕܐܲܝܟܲܢܵܐ ܢܲܥܠܘܼܢܵܝܗܝ: ܡܛܠ ܣܘܿܓ݂ܵܐܐ ܕܥܲܡܵܐ. ܣܠܸܩܘ ܠܗܘܿܢ ܠܐܸܓܵܪܵܐ. ܘܫܲܒܿܘܼܗܝ ܥܲܡ ܥܲܪܣܹܗ ܡܸܢ ܬܲܛܠܝܼܠܵܐ ܠܲܡܨܲܥܬ݂ܵܐ. ܩܕ݂ܵܡܵܘܗܝ ܕܝܼܫܘܿܥ.

²⁰ ܟܲܕ݂ ܚܙܵܐ ܕܹܝܢ ܝܼܫܘܿܥ ܗܲܝܡܵܢܘܼܬ݂ܗܘܿܢ. ܐܸܡܲܪ ܠܗܵܘ ܡܫܲܪܝܵܐ. ܓܲܒ݂ܪܵܐ. ܫܒ݂ܝܼܩܝܼܢ ܠܵܟ݂ ܚܛܵܗܲܝ̈ܟ.

²¹ ܘܫܲܪܝܼܘ ܣܵܦܪܹ̈ܐ ܘܲܦܪ̈ܝܼܫܹܐ ܡܸܬ݂ܚܲܫܒ݂ܝܼܢ. ܘܐܵܡܪܝܼܢ. ܡܲܢܘܼ ܗܵܢܵܐ ܕܲܡܡܲܠܸܠ ܓܘܼܕܦܵܐ. ܡܲܢܘܼ ܡܸܫܟܲܚ ܠܡܸܫܒܲܩ ܚܛܵܗܹ̈ܐ ܐܸܠܵܐ ܐܸܢ ܐܲܠܵܗܵܐ ܒܲܠܚܘܿܕ݂.

²² ܝܼܫܘܿܥ ܕܹܝܢ ܝܼܕ݂ܲܥ ܡܲܚܫ̈ܒ݂ܵܬ݂ܗܘܿܢ. ܘܲܥܢܵܐ. ܘܐܸܡܲܪ ܠܗܘܿܢ. ܡܵܢܵܐ ܡܸܬ݂ܚܲܫܒ݂ܝܼܢ ܐܢ̄ܬܘܿܢ ܒܠܸܒܟ݂ܘܿܢ.

²³ ܐܲܝܕ݂ܵܐ ܦܫܝܼܩܵܐ ܠܡܹܐܡܲܪ. ܕܲܫܒ݂ܝܼܩܝܼܢ ܠܵܟ݂ ܚܛܵܗܲܝ̈ܟ. ܐܵܘ ܠܡܹܐܡܲܪ. ܩܘܼܡ ܗܲܠܸܟ݂.

²⁴ ܕܬܸܕܿܥܘܼܢ ܕܹܝܢ ܕܫܲܠܝܼܛ ܗܘܼ ܒܪܹܗ ܕܐ̄ܢܵܫܵܐ ܒܐܲܪܥܵܐ ܕܢܸܫܒܘܼܩ ܚܛܵܗܹ̈ܐ. ܐܵܡܲܪ ܠܲܡܫܲܪܝܵܐ. ܠܵܟ݂ ܐܵܡܲܪ ܐ̄ܢܵܐ. ܩܘܼܡ ܫܩܘܿܠ ܥܲܪܣܵܟ݂. ܘܙܸܠ ܠܒܲܝܬܵܟ݂.

²⁵ ܘܡܸܚܕ݂ܵܐ ܩܵܡ ܠܥܹܢܲܝ̈ܗܘܿܢ ܘܲܫܩܲܠ ܥܲܪܣܹܗ ܘܐܸܙܲܠ ܠܒܲܝܬܹ݁ܗ. ܟܲܕ݂ ܡܫܲܒܲܚ ܠܐܲܠܵܗܵܐ.

²⁶ ܘܬܸܡܗܵܐ ܐܸܚܲܕ݂ ܠܟ݂ܠܢܵܫ. ܘܲܡܫܲܒܚܝܼܢ ܗ̄ܘܼܵܘ ܠܐܲܠܵܗܵܐ. ܘܐܸܬ݂ܡܠܝܼܘ ܕܸܚܠܬ݂ܵܐ ܘܐܵܡܪܝܼܢ. ܕܲܚܙܲܝܢ ܝܵܘܡܵܢܵܐ ܬܸܕ݂ܡܪ̈ܵܬ݂ܵܐ.

²⁷ ܒܵܬܲܪ ܗܵܠܹܝܢ ܢܦܲܩ ܝܼܫܘܿܥ. ܘܲܚܙܵܐ ܡܵܟ݂ܣܵܐ ܕܲܫܡܹܗ ܠܹܘܝܼ. ܕܝܵܬܹ݁ܒ݂ ܒܹܝܬ݂ ܡܵܟ݂ܣܹ̈ܐ. ܘܐܸܡܲܪ ܠܹܗ. ܬܵܐ ܒܵܬܲܪܝ.

²⁸ ܘܲܫܒܲܩ ܟܠ ܡܸܕ݂ܡ. ܘܩܼܵܡ ܐܸܙܲܠ ܒܵܬ݂ܪܹܗ.

²⁹ ܘܲܥܒܲܕ݂ ܠܹܗ ܠܹܘܝܼ ܒܒܲܝܬܹ݁ܗ ܩܘܼܒܵܠܵܐ ܪܲܒܵܐ. ܘܐܝܼܬ݂ ܗܘ̣ܵܐ ܟܸܢܫܵܐ ܣܲܓܿܝܼܐܵܐ ܕܡܵܟ݂ܣܹ̈ܐ ܘܕ݂ܲܐ̄ܚܪ̈ܵܢܹܐ. ܕܲܣܡܝܼܟ݂ܝܼܢ ܗܘܵܘ ܥܲܡܗܘܿܢ.

³⁰ ܘܪܵܛܢܝܼܢ ܗ̄ܘܼܵܘ ܣܵܦܪܹ̈ܐ ܘܲܦܪ̈ܝܼܫܹܐ. ܘܐܵܡܪܝܼܢ ܠܬܲܠܡܝܼܕ݂ܵܘ̈ܗܝ. ܠܡܵܢܵܐ ܥܲܡ ܡܵܟ݂ܣܹ̈ܐ ܘܚܲܛܵܝܹ̈ܐ ܐܵܟ݂ܠܝܼܢ ܐܢ̄ܬܘܿܢ ܘܫܵܬܹܝܢ.

³¹ ܘܲܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܠܵܐ ܡܸܬ݂ܒܥܹܐ ܐܵܣܝܵܐ ܠܲܚܠܝܼܡܹ̈ܐ. ܐܸܠܵܐ ܠܐܲܝܠܹܝܢ ܕܒ݂ܝܼܫ ܒܝܼܫ ܥܒ݂ܝܼܕ݂ܝܼܢ.

³² ܠܵܐ ܐܸܬܹܝܬ݂ ܕܐܸܩܪܹܐ ܠܙܲܕܝܼܩܹ̈ܐ. ܐܸܠܵܐ ܠܚܲܛܵܝܹ̈ܐ ܠܲܬ݂ܝܵܒ݂ܘܼܬ݂ܵܐ.

³³ ܗܸܢܘܿܢ ܕܹܝܢ ܐܵܡܪܝܼܢ ܠܹܗ. ܠܡܵܢܵܐ ܬܲܠܡܝܼܕ݂ܵܘ̈ܗܝ ܕܝܘܿܚܲܢܵܢ ܨܵܝܡܝܼܢ ܐܲܡܝܼܢܵܐܝܼܬ݂ ܘܲܡܨܲܠܹܝܢ. ܐܵܦ ܕܲܦܪ̈ܝܼܫܹܐ ܕܝܼܠܵܟ݂ ܕܹܝܢ ܐܵܟ݂ܠܝܼܢ ܘܫܵܬܹܝܢ.

³⁴ ܗܘܼ ܕܹܝܢ ܐܸܡܲܪ ܠܗܘܿܢ. ܠܵܐ ܡܸܫܟܿܚܝܼܢ ܐܢ̄ܬܘܿܢ ܠܲܒ݂ܢܵܘ̈ܗܝ ܕܲܓ݂ܢܘܿܢܵܐ ܟܡܵܐ ܕܚܲܬ݂ܢܵܐ ܥܲܡܗܘܿܢ. ܕܬܸܥܒܕ݂ܘܼܢ ܕܲܢܨܘܼܡܘܼܢ.

³⁵ ܢܹܐܬ݂ܘܿܢ ܕܹܝܢ ܝܵܘ̈ܡܵܬ݂ܵܐ ܟܲܕ݂ ܢܸܬ݁ܬ݁ܪܝܼܡ ܚܲܬ݂ܢܵܐ ܡܸܢܗܘܿܢ. ܗܵܝܕܹܝܢ ܢܨܘܼܡܘܼܢ ܒܗܵܢܘܿܢ ܝܵܘ̈ܡܵܬ݂ܵܐ.

³⁶ ܘܐܸܡܲܪ ܠܗܘܿܢ ܡܲܬ݂ܠܵܐ. ܕܠܵܐ ܐ̄ܢܵܫ ܩܵܐܹܕ݂ ܐܘܼܪܩܲܥܬ݂ܵܐ ܡܸܢ ܡܵܐܢܵܐ ܚܲܕ݂ܬ݂ܵܐ ܘܪܵܡܹܐ ܥܲܠ ܡܵܐܢܵܐ ܒܠܵܝܵܐ. ܕܠܵܐ ܠܚܲܕ݂ܬ݂ܵܐ ܩܵܐܹܕ݂ ܘܠܲܒ݂ܠܵܝܵܐ. ܠܵܐ ܫܵܠܡܵܐ ܐܘܼܪܩܲܥܬ݂ܵܐ ܕܡܸܢ ܚܲܕ݂ܬ݂ܵܐ.

³⁷ ܘܠܵܐ ܐ̄ܢܵܫ ܪܵܡܹܐ ܚܲܡܪܵܐ ܚܲܕ݂ܬ݂ܵܐ ܒܙܸܩܹ̈ܐ ܒ̈ܠܵܝܵܬ݂ܵܐ. ܘܐܸܢ ܕܹܝܢ ܠܵܐ. ܡܒܲܙܲܥ ܚܲܡܪܵܐ ܚܲܕ݂ܬ݂ܵܐ ܠܙܸܩܹ̈ܐ. ܘܗܘܼ ܚܲܡܪܵܐ ܡܸܬ݂ܐܫܸܕ݂ ܘܙܸܩܹ̈ܐ ܐܵܒ݂ܕ݂ܵܢ.

³⁸ ܐܸܠܵܐ ܚܲܡܪܵܐ ܚܲܕ݂ܬ݂ܵܐ ܒܙܸܩܹ̈ܐ ܚܲܕ݂̈ܬ݂ܵܬ݂ܵܐ ܪܵܡܹܝܢ. ܘܲܬ݂ܪܲܝܗܘܿܢ ܡܸܬ݂ܢܲܛܪܝܼܢ.

³⁹ ܘܠܵܐ ܐ̄ܢܵܫ ܫܵܬܹܐ ܚܲܡܪܵܐ ܥܲܬ݁ܝܼܩܵܐ ܘܡܸܚܕ݂ܵܐ ܒܵܥܹܐ ܚܲܕ݂ܬ݂ܵܐ. ܐܵܡܲܪ ܓܹܝܪ. ܥܲܬ݁ܝܼܩܵܐ ܒܲܣܝܼܡ.

6

¹ ܗܘ̣ܵܐ ܕܹܝܢ ܒܫܲܒܿܬ݂ܵܐ ܟܲܕ݂ ܡܗܲܠܸܟ݂ ܝܼܫܘܿܥ ܒܹܝܬ݂ ܙܲܪ̈ܥܹܐ. ܬܲܠܡܝܼܕ݂ܵܘ̈ܗܝ ܡܵܠܓ݁ܝܼܢ ܗ̄ܘܼܵܘ ܫܸܒ̈ܠܹܐ. ܘܦܵܪܟܿܝܼܢ ܒܐܝܼܕ݂ܲܝ̈ܗܘܿܢ. ܘܐܵܟ݂ܠܝܼܢ.

² ܐ̄ܢܵܫ̈ܝܼܢ ܕܹܝܢ ܡܸܢ ܦܪ̈ܝܼܫܹܐ ܐܵܡܪܝܼܢ ܠܗܘܿܢ. ܡܵܢܵܐ ܥܵܒ݂ܕܝܼܢ ܐܢ̄ܬܘܿܢ ܡܸܕܸܡ ܕܠܵܐ ܫܲܠܝܼܛ ܠܡܸܥܒܲܕ݂ ܒܫܲܒܿܬ݂ܵܐ.

³ ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܘܠܵܐ ܗܵܕܹܐ ܩܪܲܝܬ݁ܘܿܢ. ܡܸܕܸܡ ܕܲܥܒܲܕ݂ ܕܵܘܝܼܕ݂: ܟܲܕ݂ ܟܦܸܢ ܗܘܼ ܘܐܲܝܠܹܝܢ ܕܥܲܡܹܗ:

⁴ ܕܥܲܠ ܠܒܲܝܬܹ݁ܗ ܕܐܲܠܵܗܵܐ: ܘܠܲܚܡܵܐ ܕܦܵܬ݂ܘܿܪܹܗ ܕܡܵܪܝܵܐ ܢܣܲܒ݂ ܐܸܟ݂ܲܠ: ܘܝܲܗ̄ܒ݂ ܠܐܲܝܠܹܝܢ ܕܥܲܡܹܗ. ܗܵܘ ܕܠܵܐ ܫܲܠܝܼܛ ܗܘ̣ܵܐ ܠܡܹܐܟܲܠ ܐܸܠܵܐ ܠܟ݂ܵܗܢܹ̈ܐ ܒܲܠܚܘܿܕ݂.

⁵ ܘܐܸܡܲܪ ܠܗܘܿܢ. ܕܡܵܪܵܗ̇ ܗܘܼ ܕܫܲܒܿܬ݂ܵܐ ܒܪܹܗ ܕܐ̄ܢܵܫܵܐ.

⁶ ܗܘ̣ܵܐ ܕܹܝܢ ܠܫܲܒܿܬ݂ܵܐ ܐ̄ܚܪܹܬ݂ܵܐ. ܥܲܠ ܠܲܟ݂ܢܘܼܫܬܵܐ. ܘܡܲܠܸܦ ܗ̄ܘܵܐ. ܘܐܝܼܬ݂ ܗܘ̣ܵܐ ܬܲܡܵܢ ܓܲܒ݂ܪܵܐ. ܕܐܝܕ݂ܗ ܕܝܲܡܝܼܢܵܐ ܝܲܒܿܝܼܫܵܐ ܗ̄ܘܵܬ݂.

⁷ ܘܣܵܦܪܹ̈ܐ ܘܲܦܪ̈ܝܼܫܹܐ ܢܵܛܪܝܼܢ ܗ̄ܘܼܵܘ ܠܹܗ. ܕܐܸܢ ܗܘܼ ܕܡܲܐܣܹܐ ܒܫܲܒܿܬ݂ܵܐ. ܕܢܸܫܟܚܘܼܢ ܢܹܐܟ݂ܠܘܼܢ ܩܲܪ̈ܨܵܘܗܝ.

⁸ ܗܘܼ ܕܹܝܢ ܝܼܕ݂ܲܥ ܡܲܚܫ̈ܒ݂ܵܬ݂ܗܘܿܢ. ܘܐܸܡܲܪ ܠܗܵܘ ܓܲܒ݂ܪܵܐ. ܕܝܲܒܿܝܼܫܵܐ ܐܝܼܕܹܗ. ܩܘܼܡ ܬܵܐ ܠܵܟ݂ ܠܡܸܨܥܲܬ݂ ܟܢܘܼܫܬܵܐ. ܘܟܲܕ݂ ܐܸܬ݂ܵܐ ܘܩ̣ܵܡ.

⁹ ܐܸܡܲܪ ܠܗܘܿܢ ܝܼܫܘܿܥ. ܐܹܫܲܐܸܠܟ݂ܘܿܢ. ܡܵܢܵܐ ܫܲܠܝܼܛ ܒܫܲܒܿܬ݂ܵܐ ܕܛܵܒ݂ ܠܡܸܥܒܲܕ݂ ܐܵܘ ܕܒ݂ܝܼܫ. ܢܲܦ̮ܫܵܐ ܠܡܲܚܵܝܘܼ ܐܵܘ ܠܡܵܘܒܵܕ݂ܘܼ.

¹⁰ ܘܚܵܪ ܒܗܘܿܢ. ܒܟ݂ܠܗܘܿܢ. ܘܐܸܡܲܪ ܠܹܗ ܦܫܘܿܛ ܐܝܼܕ݂ܵܟ݂. ܘܲܦܫܲܛ. ܘܬܸܩܢܲܬ݂ ܐܝܼܕܹܗ. ܐܲܝܟ݂ ܚܒܲܪܬܵܗ̇.

¹¹ ܗܸܢܘܿܢ ܕܹܝܢ ܐܸܬ݂ܡܠܝܼܘ ܚܣܵܡܵܐ. ܘܲܡܡܲܠܠܝܼܢ ܗ̄ܘܼܵܘ ܚܲܕ݂ ܥܲܡ ܚܲܕ݂. ܕܡܵܢܵܐ ܢܸܥܒܕ݂ܘܼܢ ܠܹܗ ܠܝܼܫܘܿܥ.

¹² ܗܘ̣ܵܐ ܕܹܝܢ ܒܝܵܘ̈ܡܵܬ݂ܵܐ ܗܵܢܘܿܢ. ܢܦܲܩ ܝܼܫܘܿܥ ܠܛܘܼܪܵܐ ܠܲܡܨܲܠܵܝܘܼ. ܘܬܲܡܵܢ ܐܲܓܲܗ ܗ̄ܘܵܐ. ܒܲܨܠܘܿܬܹܗ ܕܐܲܠܵܗܵܐ.

¹³ ܘܟܲܕ݂ ܢܸܓ݂ܗܲܬܸ. ܩܪܵܐ ܠܬܲܠܡܝܼܕ݂ܵܘ̈ܗܝ. ܘܲܓ݂ܒ݂ܵܐ ܡܸܢܗܘܿܢ. ܬܪܸܥܣܲܪ. ܗܵܢܘܿܢ ܕܲܫܠܝܼܚܹ̈ܐ ܫܲܡܝܼ ܐܸܢܘܿܢ.

¹⁴ ܫܸܡܥܘܿܢ ܗܵܘ ܕܫܲܡܝܼ ܟܹܐܦܵܐ. ܘܐܲܢܕܪܹܐܘܿܣ ܐܲܚܘܼܗܝ. ܘܝܲܥܩܘܿܒ݂ ܘܝܘܿܚܲܢܵܢ. ܘܦܝܼܠܝܼܦܘܿܣ ܘܒܲܪ ܬܘܼܠܡܲܝ.

¹⁵ ܘܡܲܬܲܝ ܘܲܬ݂ܐܘܿܡܵܐ. ܘܝܲܥܩܘܿܒ݂ ܒܲܪ ܚܲܠܦܲܝ. ܘܫܸܡܥܘܿܢ ܕܡܸܬ݂ܩܪܹܐ ܛܲܢܵܢܵܐ.

¹⁶ ܘܝܼܗܘܼܕ݂ܵܐ ܒܲܪ ܝܲܥܩܘܿܒ݂. ܘܝܼܗܘܼܕ݂ܵܐ ܣܟܲܪܝܘܿܛܵܐ ܗܵܘ ܕܲܗܘܵܐ ܡܲܫܠܡܵܢܵܐ.

¹⁷ ܘܲܢܚܸܬ݂ ܥܲܡܗܘܿܢ ܝܼܫܘܿܥ. ܘܩܼܵܡ ܒܲܦܩܲܥܬ݂ܵܐ. ܘܟܸܢܫܵܐ ܣܲܓܿܝܼܐܵܐ ܕܬܲܠܡܝܼܕ݂ܵܘ̈ܗܝ. ܘܣܘܿܓ݂ܵܐܐ ܕܟܸܢܫܵܐ ܕܥܲܡܵܐ. ܡܸܢ ܟܠܵܗ̇ ܝܼܗܘܼܕ݂ ܘܡܸܢ ܐܘܿܪܸܫܠܸܡ. ܘܡܸܢ ܣܦܵܪ ܝܲܡܵܐ ܕܨܘܿܪ ܘܲܕ݂ܨܲܝܕܵܢ.

¹⁸ ܕܐܸܬ݂ܵܘ ܕܢܸܫܡܥܘܼܢ ܡܸܠܬܹܗ. ܘܲܕ݂ܢܸܬ݂ܐܲܣܘܿܢ ܡܸܢ ܟܘܪ̈ܗܵܢܲܝܗܘܿܢ. ܘܐܲܝܠܹܝܢ ܕܡܸܬ݂ܐܲܠܨܝܼܢ ܡܸܢ ܪ̈ܘܼܚܹܐ ܛܲܢ̈ܦܵܬ݂ܵܐ. ܘܡܸܬ݂ܐܲܣܹܝܢ ܗ̄ܘܼܵܘ.

¹⁹ ܘܟ݂ܠܹܗ ܟܸܢܫܵܐ. ܒܵܥܹܝܢ ܗ̄ܘܼܵܘ ܠܡܸܬ݂ܩܲܪܵܒ݂ܘܼ ܠܹܗ. ܚܲܝܠܵܐ ܓܹܝܪ ܢܵܦܹܩ ܗܘ̣ܵܐ ܡܸܢܹܗ. ܘܲܠܟ݂ܠܗܘܿܢ ܡܲܐܣܹܐ ܗ̄ܘܵܐ.

²⁰ ܘܐܲܪܝܼܡ ܥܲܝ̈ܢܵܘܗܝ ܥܲܠ ܬܲܠܡܝܼܕ݂ܵܘ̈ܗܝ. ܘܐܸܡܲܪ. ܛܘܼܒܲܝܟܿܘܿܢ ܡܸܣܟܹܢܹ̈ܐ. ܕܕ݂ܝܼܠܟ݂ܘܿܢ ܗ̄ܝܼ ܡܲܠܟܘܼܬ݂ܵܐ ܕܐܲܠܵܗܵܐ.

²¹ ܛܘܼܒܲܝܟܿܘܿܢ ܐܲܝܠܹܝܢ ܕܟܲܦܢܝܼܢ ܗܵܫܵܐ. ܕܬܸܣܒܿܥܘܼܢ. ܛܘܼܒܲܝܟܿܘܿܢ ܠܲܕ݂ܒ݂ܵܟܹܝܢ ܗܵܫܵܐ. ܕܬܸܓ݂ܚܟ݂ܘܿܢ.

²² ܛܘܼܒܲܝܟܿܘܿܢ ܡܵܐ ܕܣܵܢܹܝܢ ܠܟ݂ܘܿܢ ܒܢܲܝ̈ܢܵܫܵܐ ܘܲܡܦܲܪܫܝܼܢ ܠܟ݂ܘܿܢ. ܘܲܡܚܲܣܕ݂ܝܼܢ ܠܟ݂ܘܿܢ ܘܡܲܦܩܝܼܢ ܫܸܡܟ݂ܘܿܢ ܐܲܝܟ݂ ܒܝܼܫܹ̈ܐ ܚܠܵܦ ܒܪܹܗ ܕܐ̄ܢܵܫܵܐ.

²³ ܚܕ݂ܵܘ ܒܗܵܘ ܝܵܘܡܵܐ. ܘܕ݂ܘܼܨܘ. ܕܐܲܓ݂ܪܟ݂ܘܿܢ ܣܓ݂ܝܼ ܒܲܫܡܲܝܵܐ. ܗܵܟܲܢܵܐ ܓܹܝܪ ܥܵܒ݂ܕܝܼܢ ܗ̄ܘܼܵܘ ܐܲܒ݂ܵܗܵܬ݂ܗ̈ܘܿܢ ܠܲܢܒ݂ܝܹ̈ܐ.

²⁴ ܒܪܲܡ ܘܵܝ ܠܟ݂ܘܿܢ ܥܲܬ݁ܝܼܪܹ̈ܐ ܕܩܲܒܸܠܬ݁ܘܿܢ ܒܘܼܝܵܐܟ݂ܘܿܢ.

²⁵ ܘܵܝ ܠܟ݂ܘܿܢ ܣܲܒ݂ܥܹܐ ܕܬܸܟ݂ܦܢܘܼܢ. ܘܵܝ ܠܟ݂ܘܿܢ ܠܲܕ݂ܓ݂ܵܚܟ݂ܝܼܢ ܗܵܫܵܐ. ܕܬܸܒ݂ܟܿܘܿܢ. ܘܬܸܬ݂ܐܲܒ݂ܠܘܼܢ.

²⁶ ܘܵܝ ܠܟ݂ܘܿܢ. ܟܲܕ݂ ܢܸܗܘܘܿܢ ܐܵܡܪܝܼܢ ܥܠܲܝܟܿܘܿܢ ܒܢܲܝ̈ܢܵܫܵܐ ܕܫܲܦܝܼܪ. ܗܵܟܲܢܵܐ ܓܹܝܪ ܥܵܒ݂ܕܝܼܢ ܗ̄ܘܼܵܘ ܠܲܢܒ݂ܝܹ̈ܐ ܕܕ݂ܲܓܵܠܘܼܬ݂ܵܐ ܐܲܒ݂ܵܗܵܬ݂ܗ̈ܘܿܢ.

²⁷ ܠܟ݂ܘܿܢ ܕܹܝܢ ܐܵܡܲܪ ܐ̄ܢܵܐ ܠܲܕ݂ܫܵܡܥܝܼܢ. ܐܲܚܸܒ݂ܘ ܠܲܒ݂ܥܸܠܕܒ݂ܵܒܲܝ̈ܟܿܘܿܢ. ܘܲܥܒܸܕ݂ܘ ܕܫܲܦܝܼܪ ܠܐܲܝܠܹܝܢ ܕܣܵܢܹܝܢ ܠܟ݂ܘܿܢ.

²⁸ ܘܒܲܪܸܟ݂ܘ ܠܐܲܝܠܹܝܢ ܕܠܵܝܛܝܼܢ ܠܟ݂ܘܿܢ. ܘܨܲܠܵܘ ܥܲܠ ܐܲܝܠܹܝܢ ܕܕ݂ܵܒ݂ܪܝܼܢ ܠܟ݂ܘܿܢ ܒܲܩܛܝܼܪܵܐ.

²⁹ ܘܠܲܕ݂ܡܵܚܹܐ ܠܵܟ݂ ܥܲܠ ܦܲܟܵܟ݂. ܩܲܪܸܒ݂ ܠܹܗ ܐ̄ܚܪܹܢܵܐ. ܘܡܸܢ ܡܲܢ ܕܫܵܩܸܠ ܡܲܪܛܘܼܛܵܟ݂. ܠܵܐ ܬܸܟ݂ܠܹܐ ܐܵܦ ܟܘܿܬ݁ܝܼܢܵܟ݂.

³⁰ ܠܟ݂ܠ ܕܫܵܐܹܠ ܠܵܟ݂. ܗܲܒ݂ ܠܹܗ. ܘܡܸܢ ܡܲܢ ܕܫܵܩܹܠ ܕܝܼܠܵܟ݂. ܠܵܐ ܬܸܬ݂ܒܲܥ.

³¹ ܘܐܲܝܟܲܢܵܐ ܕܨܵܒܹܝܢ ܐܢ̄ܬܘܿܢ ܕܢܸܥܒܕ݂ܘܼܢ ܠܟ݂ܘܿܢ ܒܢܲܝ̈ܢܵܫܵܐ. ܗܵܟ݂ܘܵܬ݂ ܥܒܸܕ݂ܘ ܠܗܘܿܢ. ܐܵܦ ܐܲܢ̄ܬܘܿܢ.

³² ܐܸܢ ܓܹܝܪ ܡܲܚܒ݂ܝܼܢ ܐܢ̄ܬܘܿܢ ܠܐܲܝܠܹܝܢ ܕܡܲܚܒ݂ܝܼܢ ܠܟ݂ܘܿܢ. ܐܲܝܕ݂ܵܐ ܗܝܼ ܛܲܝܒܿܘܼܬ݂ܟ݂ܘܿܢ. ܐܵܦ ܓܹܝܪ ܚܲܛܵܝܹ̈ܐ ܠܐܲܝܠܹܝܢ ܕܡܲܚܒ݂ܝܼܢ ܠܗܘܿܢ. ܪܵܚܡܝܼܢ.

³³ ܘܐܸܢ ܥܵܒ݂ܕܝܼܢ ܐܢ̄ܬܘܿܢ ܕܛܵܒ݂ ܠܐܲܝܠܹܝܢ ܕܡܲܛܸܐܒ݂ܝܼܢ ܠܟ݂ܘܿܢ. ܐܲܝܕ݂ܵܐ ܗܝ ܛܲܝܒܿܘܼܬ݂ܟ݂ܘܿܢ. ܐܵܦ ܚܲܛܵܝܹ̈ܐ ܓܹܝܪ ܗܵܟܲܢܵܐ ܥܵܒ݂ܕܝܼܢ.

³⁴ ܘܐܸܢ ܡܵܘܙܦܝܼܢ ܐܢ̄ܬܘܿܢ ܠܡܲܢ ܕܣܵܒ݂ܪܝܼܢ ܐܢ̄ܬܘܿܢ ܕܬܸܬ݂ܦܲܪܥܘܼܢ ܡܸܢܹܗ. ܐܲܝܕ݂ܵܐ ܗܝܼ ܛܲܝܒܿܘܼܬ݂ܟ݂ܘܿܢ. ܐܵܦ ܚܲܛܵܝܹ̈ܐ ܓܹܝܪ ܠܚܲܛܵܝܹ̈ܐ ܡܵܘܙܦܝܼܢ. ܕܗܵܟ݂ܘܵܬ݂ ܢܸܬ݂ܦܲܪܥܘܼܢ.

³⁵ ܒܪܲܡ ܐܲܚܸܒ݂ܘ ܠܲܒ݂ܥܸܠܕܒ݂ܵܒܲܝ̈ܟܿܘܿܢ. ܘܐܲܛܐܸܒ݂ܘ ܠܗܘܿܢ. ܘܐܵܘܙܸܦܘ. ܘܠܵܐ ܬܸܦܣܩܘܼܢ ܣܲܒ݂ܪܵܐ ܕܐ̄ܢܵܫ. ܘܢܸܗܘܹܐ ܣܲܓܝܼ ܐܲܓ݂ܪܟ݂ܘܿܢ. ܘܬܸܗܘܘܿܢ ܒܢܵܘ̈ܗܝ ܕܪܵܡܵܐ. ܕܗܘܼ ܒܲܣܝܼܡ ܗ̄ܘܼ ܥܲܠ ܒܝܼܫܹ̈ܐ ܘܥܲܠ ܟܵܦܘܿܪܹ̈ܐ.

³⁶ ܗܘܵܘ ܗܵܟܹܝܠ ܡܪ̈ܲܚܡܵܢܹܐ. ܐܲܝܟܲܢܵܐ ܕܐܵܦ ܐܲܒ݂ܘܼܟ݂ܘܼܢ ܡܪܲܚܡܵܢܵܐ ܗ̄ܘܼ.

³⁷ ܠܵܐ ܬܕ݂ܘܼܢܘܼܢ. ܘܠܵܐ ܡܸܬ݁ܬ݁ܕܝܼܢܝܼܢ ܐܢ̄ܬܘܿܢ. ܠܵܐ ܬܚܲܝܒ݂ܘܼܢ. ܘܠܵܐ ܡܸܬ݂ܚܲܝܒ݂ܝܼܢ ܐܢ̄ܬܘܿܢ. ܫܪܵܘ. ܘܬܸܫܬ݁ܪܘܿܢ.

³⁸ ܗܲܒ݂ܘ. ܘܡܸܬ݂ܝܼܗܸܒ݂ ܠܟ݂ܘܿܢ. ܒܲܟ݂ܝܵܠܬܵܐ ܛܵܒ݂ܬ݂ܵܐ ܘܲܪܩܝܼܥܬܵܐ ܘܲܡܫܲܦܲܥܬܵܐ ܢܲܪܡܘܿܢ ܒܥܘܼܒܲܝ̈ܟܿܘܿܢ. ܒܗܵܝ ܓܹܝܪ ܟܝܵܠܬܵܐ ܕܲܡܟ݂ܝܼܠܝܼܢ ܐܢ̄ܬܘܿܢ. ܡܸܬ݁ܬ݁ܟ݂ܝܼܠ ܠܟ݂ܘܿܢ.

³⁹ ܘܐܸܡܲܪ ܗܘ̣ܵܐ ܠܗܘܿܢ ܡܲܬ݂ܠܵܐ. ܠܡܵܐ. ܡܸܫܟܲܚ ܣܲܡܝܵܐ ܠܣܲܡܝܵܐ ܠܲܡܕ݂ܲܒܵܪܘܼ. ܠܵܐ ܬܪܲܝܗܘܿܢ ܒܓ݂ܘܼܡܵܨܵܐ ܢܵܦܠܝܼܢ.

⁴⁰ ܠܲܝܬ݁ ܬܲܠܡܝܼܕ݂ܵܐ ܕܝܲܬ݁ܝܼܪ ܡܸܢ ܪܲܒܹܗ. ܟܠܢܵܫ ܓܹܝܪ ܕܲܓ݂ܡܝܼܪ ܢܸܗܘܹܐ ܐܲܝܟ݂ ܪܲܒܹܗ.

⁴¹ ܡܵܢܵܐ ܕܹܝܢ ܚܵܙܹܐ ܐܲܢ̄ܬ݁ ܓܸܠܵܐ ܕܲܒ݂ܥܲܝܢܹܗ ܕܐܲܚܘܼܟ݂. ܩܵܪܝܼܬ݂ܵܐ ܕܹܝܢ ܕܲܒ݂ܥܲܝܢܵܟ݂ ܠܵܐ ܡܸܬ݂ܚܲܙܝܵܐ ܠܵܟ݂.

⁴² ܐܵܘ ܐܲܝܟܲܢܵܐ ܡܸܫܟܲܚ ܐܲܢ̄ܬ݁ ܠܡܹܐܡܲܪ ܠܐܲܚܘܼܟ݂ ܐܵܚܝ. ܫܒ݂ܘܿܩ ܐܲܦܸܩ ܓܸܠܵܐ ܡܸܢ ܥܲܝܢܵܟ݂ ܕܗܵܐ ܩܵܪܝܼܬ݂ܵܐ ܕܲܒ݂ܥܲܝܢܵܟ݂ ܕܝܼܠܵܟ݂ ܠܵܐ ܡܸܬ݂ܚܲܙܝܵܐ ܠܵܟ݂. ܢܵܣܹܒ݂ ܒܐܲܦܹ̈ܐ. ܐܲܦܸܩ ܠܘܼܩܕ݂ܲܡ ܩܵܪܝܼܬ݂ܵܐ ܡܸܢ ܥܲܝܢܵܟ݂. ܘܗܵܝܕܹܝܢ ܢܸܬ݂ܚܙܹܐ ܠܵܟ݂ ܠܡܲܦܵܩܘܼ ܓܸܠܵܐ ܡܸܢ ܥܲܝܢܹܗ ܕܐܲܚܘܼܟ݂.

⁴³ ܠܵܐ ܐܝܼܬ݂ ܐܝܼܠܵܢܵܐ ܛܵܒ݂ܵܐ ܕܥܵܒܹܿܕ݂ ܦܹܐܪܹ̈ܐ ܒܝܼܫܹ̈ܐ. ܐܵܦ ܠܵܐ ܐܝܼܠܵܢܵܐ ܒܝܼܫܵܐ ܕܥܵܒܹܿܕ݂ ܦܹܐܪܹ̈ܐ ܛܵܒܹ̈ܐ.

⁴⁴ ܟܠ ܐܝܼܠܵܢܵܐ ܓܹܝܪ ܡܸܢ ܦܹܐܪ̈ܵܘܗܝ ܗ̄ܘܼ ܡܸܬ݂ܝܼܕ݂ܲܥ. ܠܵܐ ܓܹܝܪ ܠܵܩܛܝܼܢ ܡܸܢ ܟܘܼܒܹ̈ܐ ܬܹܐܢܹ̈ܐ. ܐܵܦ ܠܵܐ ܡܸܢ ܣܲܢܝܵܐ ܩܵܛܦܝܼܢ ܥܸܢܒܹ̈ܐ.

⁴⁵ ܓܲܒ݂ܪܵܐ ܛܵܒ݂ܵܐ. ܡܸܢ ܣܝܼ̈ܡܵܬ݂ܵܐ ܛܵܒ݂ܵܬ݂ܵܐ ܕܲܒ݂ܠܸܒܹܗ ܡܲܦܸܩ ܛܵܒ݂ܵܬ݂ܵܐ. ܘܓܲܒ݂ܪܵܐ ܒܝܼܫܵܐ. ܡܸܢ ܣܝܼ̈ܡܵܬ݂ܵܐ ܒܝܼ̈ܫܵܬ݂ܵܐ ܕܲܒ݂ܠܸܒܹܗ ܡܲܦܸܩ ܒܝܼ̈ܫܵܬ݂ܵܐ. ܡܸܢ ܬܵܘܬܵܪ̈ܲܝ ܠܸܒܵܐ ܓܹܝܪ ܡܡܲܠܠܵܢ ܣܸܦ̈ܘܵܬ݂ܵܐ.

⁴⁶ ܡܵܢܵܐ ܩܵܪܹܝܢ ܐܢ̄ܬܘܿܢ ܠܝܼ ܡܵܪܝ ܡܵܪܝ ܘܡܸܕܸܡ ܕܐܵܡܲܪ ܐ̄ܢܵܐ ܠܵܐ ܥܵܒ݂ܕܝܼܢ ܐܢ̄ܬܘܿܢ.

⁴⁷ ܟܠ ܐ̄ܢܵܫ ܕܐܵܬܹܐ ܠܘܵܬ݂ܝ ܘܫܵܡܲܥ ܡܸܠܲܝ̈ ܘܥܵܒܹܿܕ݂ ܠܗܹܝܢ. ܐܹܚܵܘܹܝܟ݂ܘܿܢ ܠܡܵܢܵܐ ܕܵܡܹܐ.

⁴⁸ ܕܵܡܹܐ ܠܓܲܒ݂ܪܵܐ ܕܲܒ݂ܢܵܐ ܒܲܝܬܵܐ. ܘܲܚܦܲܪ ܘܥܲܡܸܩ. ܘܣܵܡ ܫܲܬ݂ܐܸܣܹ̈ܐ (ܫܲܬ݂ܐܸܣܬܵܐ). ܥܲܠ ܫܘܿܥܵܐ. ܟܲܕ݂ ܗܘ̣ܵܐ ܕܹܝܢ ܡܸܠܐܵܐ. ܐܸܬ݁ܛܲܪܝܼ ܡܸܠܐܵܐ ܒܒܲܝܬܵܐ ܗܵܘ. ܘܠܵܐ ܐܸܫܟܲܚ ܕܲܢܙܝܼܥܝܼܘܗܝ. ܣܝܼܡܵܐ ܗ̄ܘܵܬ݂ ܓܹܝܪ ܫܲܬ݂ܐܸܣܬܹ݁ܗ. ܥܲܠ ܫܘܿܥܵܐ.

⁴⁹ ܘܗܵܘ ܕܫܵܡܲܥ ܘܠܵܐ ܥܵܒܹܿܕ݂. ܕܵܡܹܐ ܠܓܲܒ݂ܪܵܐ ܕܲܒ݂ܢܵܐ ܒܲܝܬܹ݁ܗ ܥܲܠ ܥܲܦܪܵܐ. ܕܠܵܐ ܫܲܬ݂ܐܸܣܬܵܐ. ܘܟܲܕ݂ ܐܸܬ݁ܛܲܪܝܼ ܒܹܗ ܢܲܗܪܵܐ ܒܲܪ ܫܵܥܬܹܗ ܢܦܲܠ. ܘܲܗܘܵܬ݂ ܡܲܦܘܼܠܬܹ݁ܗ ܪܲܒܵܐ ܕܒܲܝܬܵܐ ܗܵܘ.

7

¹ ܘܟܲܕ݂ ܫܲܠܸܡ ܡܸܠܹ̈ܐ ܟܠܗܹܝܢ ܠܡܲܫܡܲܥܬܹܗ ܕܥܲܡܵܐ. ܥܲܠ ܝܼܫܘܿܥ ܠܲܟ݂ܦܲܪܢܵܚܘܿܡ.

² ܥܲܒ݂ܕܹܗ ܕܹܝܢ ܕܩܸܢܛܪܘܿܢܵܐ ܚܲܕ݂ ܥܒ݂ܝܼܕ݂ ܗܘ̣ܵܐ ܒܝܼܫܵܐܝܼܬ݂. ܐܲܝܢܵܐ ܕܝܲܩܝܼܪ ܗܘ̣ܵܐ ܥܠܵܘܗܝ. ܘܩܲܪܝܼܒ݂ ܗܘ̣ܵܐ ܠܲܡܡܵܬ݂.

³ ܘܲܫܡܲܥ ܥܲܠ ܝܼܫܘܿܥ. ܘܫܲܕܲܪ ܠܘܵܬܹܗ ܩܲܫܝܼܫܹ̈ܐ ܕܲܝܗ̄ܘܼܕ݂ܵܝܹ̈ܐ. ܘܒ݂ܵܥܹܐ ܗܘ̣ܵܐ ܡܸܢܹܗ. ܐܲܝܟ݂ ܕܢܹܐܬܹܐ ܢܲܚܹܐ ܠܥܲܒ݂ܕܹܗ.

⁴ ܗܸܢܘܿܢ ܕܹܝܢ ܟܲܕ݂ ܐܸܬ݂ܵܘ ܠܘܵܬ݂ ܝܼܫܘܿܥ. ܒܵܥܹܝܢ ܗ̄ܘܼܵܘ ܡܸܢܹܗ ܒܛܝܼܠܵܐܝܼܬ݂. ܘܐܵܡܪܝܼܢ. ܫܵܘܹܐ ܗ̄ܘܼ ܕܬܸܥܒܸܿܕ݂ ܠܹܗ ܗܵܕܹܐ.

⁵ ܪܵܚܹܡ ܓܹܝܪ ܠܥܲܡܲܢ. ܘܐܵܦ ܒܹܝܬ݂ ܟܢܘܼܫܬܵܐ. ܗܘܼ ܒܢܵܐ ܠܲܢ.

⁶ ܝܼܫܘܿܥ ܕܹܝܢ ܐܵܙܹܠ ܗܘ̣ܵܐ ܥܲܡܗܘܿܢ. ܟܲܕ݂ ܕܹܝܢ ܠܵܐ ܣܲܓܝܼ ܪܲܚܝܼܩ ܡܸܢ ܒܲܝܬܵܐ. ܫܲܕܲܪ ܠܘܵܬܹܗ ܩܸܢܛܪܘܿܢܵܐ ܪ̈ܵܚܡܵܘܗܝ. ܘܐܸܡܲܪ ܠܹܗ. ܡܵܪܝ. ܠܵܐ ܬܸܥܡܲܠ. ܠܵܐ ܓܹܝܪ ܫܵܘܹܐ ܐ̄ܢܵܐ ܕܬܸܥܘܿܠ ܬܚܹܝܬ݂ ܡܲܛܲܠ̄ܠܝ.

⁷ ܡܛܠ ܗܵܘ ܐܸܢܵܐ ܠܵܐ ܫܘܹܝܬ݂ ܕܲܠܘܵܬ݂ܵܟ݂ ܐܹܬܹܐ. ܐܸܠܵܐ ܐܸܡܲܪ ܒܡܸܠܬ݂ܵܐ. ܘܢܸܬ݂ܐܲܣܹܐ ܛܲܠܝܝ.

⁸ ܐܵܦ ܐܸܢܵܐ ܓܹܝܪ ܓܲܒ݂ܪܵܐ ܐ̄ܢܵܐ ܕܲܡܫܲܥܒܲܕ݂ ܐ̄ܢܵܐ ܬܚܹܝܬ݂ ܫܘܼܠܛܵܢܵܐ. ܘܐܝܼܬ݂ ܬܚܹܝܬ݂ ܐܝܼܕ݂ܲܝ̈ ܐܸܣܛܪ̈ܵܛܝܼܘܼܛܹܐ. ܘܐܵܡܲܪ ܐ̄ܢܵܐ ܠܗܵܢܵܐ ܕܙܸܠ. ܘܐܵܙܹܠ. ܘܠܲܐ̄ܚܪܹܢܵܐ ܕܬ݂ܵܐ. ܘܐܵܬܹܐ. ܘܲܠܥܲܒ݂ܕܝ ܥܒܸܕ݂ ܗܵܕܹܐ. ܘܥܵܒܹܿܕ݂.

⁹ ܟܲܕ݂ ܫܡܲܥ ܕܹܝܢ ܝܼܫܘܿܥ ܗܵܠܹܝܢ. ܐܸܬ݁ܕܲܡܲܪ ܒܹܗ. ܘܐܸܬ݂ܦܢܝܼ. ܘܐܸܡܲܪ ܠܟܸܢܫܵܐ ܕܐܵܬܹܐ ܒܵܬ݂ܪܹܗ. ܐܵܡܲܪ ܐ̄ܢܵܐ ܠܟ݂ܘܿܢ. ܕܐܵܦ ܠܵܐ ܒܹܝܬ݂ ܝܼܣܪܵܝܹܠ ܐܸܫܟܚܹܬ݂ ܐܲܝܟ݂ ܗܵܕܹܐ ܗܲܝܡܵܢܘܼܬ݂ܵܐ.

¹⁰ ܘܲܗܦܲܟ݂ܘ ܗܵܢܘܿܢ ܕܐܫܬܲܕܲܪܘ ܠܒܲܝܬܵܐ. ܘܐܸܫܟܲܚܘ ܠܥܲܒ݂ܕܵܐ ܗܵܘ ܕܲܟ݂ܪܝܼܗ ܗܘܵܐ. ܟܲܕ݂ ܚܠܝܼܡ.

¹¹ ܘܲܗܘܵܐ ܠܝܵܘܡܵܐ ܕܒ݂ܵܬ݂ܪܹܗ. ܐܵܙܹܠ ܗܘ̣ܵܐ ܠܲܡܕ݂ܝܼܢ̄ܬܵܐ ܕܲܫܡܵܗ̇. ܢܵܐܹܝܢ. ܘܬܲܠܡܝܼܕ݂ܵܘ̈ܗܝ ܥܲܡܹܗ. ܘܟܸܢܫܵܐ ܣܲܓܿܝܼܐܵܐ.

¹² ܘܟܲܕ݂ ܩܪܸܒ݂ ܠܬܲܪܥܵܐ ܕܲܡܕ݂ܝܼܢ̄ܬܵܐ. ܚܙܵܐ ܟܲܕ݂ ܡܠܵܘܹܝܢ ܡܝܼܬ݂ܵܐ. ܕܝܼܚܝܼܕ݂ܵܝܵܐ ܗܘ̣ܵܐ ܠܐܸܡܹܗ. ܘܗܝܼ ܐܸܡܹܗ. ܐܲܪܡܲܠܬܵܐ ܗܘܸܵܬ݂. ܘܟܸܢܫܵܐ ܣܲܓܿܝܼܐܵܐ ܕܲܒ݂ܢܲܝ̈ ܡܕ݂ܝܼܢ̄ܬܵܐ ܥܲܡܵܗ̇.

¹³ ܚܙܵܗ̇ ܕܹܝܢ ܝܼܫܘܿܥ. ܘܐܸܬ݂ܪܲܚܲܡ ܥܠܹܝܗ̇. ܘܐܸܡܲܪ ܠܵܗ̇. ܠܵܐ ܬܸܒ݂ܟܝܹܢ.

¹⁴ ܘܐܸܙܲܠ ܩܪܸܒ݂ ܠܥܲܪܣܵܐ. ܘܗܵܢܘܿܢ ܕܲܫܩܝܼܠܝܼܢ ܗ̄ܘܼܵܘ ܠܹܗ ܩܵܡܘ. ܘܐܵܡܲܪ. ܥܠܲܝܡܵܐ ܠܵܟ݂ ܐܵܡܲܪ ܐ̄ܢܵܐ. ܩܘܼܡ.

¹⁵ ܘܝܼܬܸܒ݂ ܗܵܘ ܡܝܼܬ݂ܵܐ. ܘܫܲܪܝܼ ܠܲܡܡܲܠܵܠܘܼ. ܘܝܲܗܒܹܗ ܠܐܸܡܹܗ.

¹⁶ ܘܐܸܚܕܲܬ݂ ܕܸܚܠܬ݂ܵܐ ܠܐ̄ܢܵܫܵܐ ܟܠܗܘܿܢ. ܘܲܡܫܲܒܚܝܼܢ ܗ̄ܘܼܵܘ ܠܐܲܠܵܗܵܐ. ܘܐܵܡܪܝܼܢ. ܕܲܢܒ݂ܝܼܵܐ ܪܲܒܵܐ ܩܵܡ ܒܲܢ: ܘܲܣܥܲܪ ܐܲܠܵܗܵܐ ܠܥܲܡܹܗ.

¹⁷ ܘܢܸܦܩܲܬܸ ܥܠܵܘܗܝ ܡܸܠܬ݂ܵܐ ܗܵܕܹܐ. ܒܟ݂ܠܵܗ̇ ܝܼܗܘܼܕ݂. ܘܲܒ݂ܟ݂ܠܹܗ ܐܲܬ݂ܪܵܐ ܕܲܚܕ݂ܵܪܲܝܗܘܿܢ.

¹⁸ ܘܐܸܫܬܲܥܝܼܘ ܠܝܘܿܚܲܢܵܢ ܬܲܠܡܝܼܕ݂ܵܘ̈ܗܝ ܗܵܠܹܝܢ ܟܠܗܹܝܢ.

¹⁹ ܘܲܩܪܵܐ ܝܘܿܚܲܢܵܢ ܠܲܬ݂ܪܹܝܢ ܡܸܢ ܬܲܠܡܝܼܕ݂ܵܘ̈ܗܝ. ܘܫܲܕܲܪ ܐܸܢܘܿܢ ܠܘܵܬ݂ ܝܼܫܘܿܥ. ܘܐܸܡܲܪ. ܐܲܢ̄ܬ݁ ܗܘܼ ܗܵܘ ܕܐܵܬܹܐ. ܐܵܘ ܠܐܲܚܪܹܝܢ ܗܘܼ ܡܣܲܟܹܝܢ ܚ̄ܢܲܢ.

²⁰ ܘܐܸܬ݂ܵܘ ܠܘܵܬ݂ ܝܼܫܘܿܥ. ܘܐܵܡܪܝܼܢ ܠܹܗ. ܝܘܿܚܲܢܵܢ ܡܲܥܡܕ݂ܵܢܵܐ ܫܲܕܪܲܢ ܠܘܵܬ݂ܵܟ݂. ܘܐܵܡܲܪ. ܐܲܢ̄ܬ݁ ܗܘܼ ܗܵܘ ܕܐܵܬܹܐ. ܐܵܘ ܠܐܲܚܪܹܝܢ ܗܘܼ ܡܣܲܟܹܝܢ ܚ̄ܢܲܢ.

²¹ ܒܵܗ̇ ܕܹܝܢ ܒܗܵܝ ܫܵܥܬ݂ܵܐ. ܣܲܓܝܼܐܹ̈ܐ ܐܲܣܝܼ ܡܸܢ ܟܘܼܪ̈ܗܵܢܹܐ ܘܡܸܢ ܡܲܚ̈ܘܵܬ݂ܵܐ ܘܡܸܢ ܪ̈ܘܼܚܹܐ ܒܝܼ̈ܫܵܬ݂ܵܐ. ܘܲܠܣܲܓܝܼܐܹ̈ܐ ܣܡܲܝ̈ܵܐ ܝܲܗ̄ܒ݂ ܗܘ̣ܵܐ ܠܡܸܚܙܵܐ.

²² ܘܲܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܙܸܠܘ ܐܸܡܲܪܘ ܠܝܘܿܚܲܢܵܢ ܟܠ ܡܸܕܸܡ ܕܲܚܙܲܝܬ݁ܘܿܢ. ܘܲܫܡܲܥܬ݁ܘܿܢ. ܕܲܣ̈ܡܲܝܵܐ. ܚܵܙܹܝܢ. ܘܲܚܓ݂ܝܼܪܹ̈ܐ. ܡܗܲܠܟ݂ܝܼܢ. ܘܓܲܪ̈ܒܹܐ. ܡܸܬ݁ܕܲܟܹܝܢ. ܘܚܲܪ̈ܫܹܐ. ܫܵܡܥܝܼܢ. ܘܡܝܼܬܹ̈ܐ. ܩܵܝܡܝܼܢ. ܘܡܸܣܟܹܢܹ̈ܐ. ܡܸܣܬܲܒܪܝܼܢ.

²³ ܘܛܘܼܒ݂ܵܘܗܝ ܠܡܲܢ ܕܠܵܐ ܢܸܬ݂ܟܫܸܠ ܒܝܼ.

²⁴ ܟܲܕ݂ ܕܹܝܢ ܐܸܙܲܠܘ ܬܲܠܡܝܼܕ݂ܵܘ̈ܗܝ ܕܝܘܿܚܲܢܵܢ. ܫܲܪܝܼ ܠܡܹܐܡܲܪ ܠܟܸܢܫܹ̈ܐ ܥܲܠ ܝܘܿܚܲܢܵܢ. ܡܵܢܵܐ ܢܦܲܩܬ݁ܘܿܢ ܠܚܘܼܪܒܵܐ ܠܡܸܚܙܵܐ. ܩܲܢܝܵܐ. ܕܡܸܢ ܪܘܼܚܵܐ ܡܸܬ݁ܬ݁ܙܝܼܥ.

²⁵ ܘܐܸܠܵܐ ܡܵܢܵܐ ܢܦܲܩܬ݁ܘܿܢ ܠܡܸܚܙܵܐ. ܓܲܒ݂ܪܵܐ. ܕܢܲܚ̈ܬܹܐ ܪܲܟܿܝܼܟܹܐ ܠܒ݂ܝܼܫ. ܗܵܐ ܐܲܝܠܹܝܢ ܕܒܲܠܒ݂ܘܼܫܹ̈ܐ ܡܫܲܒܿܚܹ̈ܐ ܘܲܒ݂ܦܘܼܢܵܩܹ̈ܐ ܐܝܼܬܲܝܗܘܿܢ. ܒܹܝܬ݂ ܡܲܠܟܹ̈ܐ ܐܸܢܘܿܢ.

²⁶ ܘܐܸܠܵܐ ܡܵܢܵܐ ܢܦܲܩܬ݁ܘܿܢ ܠܡܸܚܙܵܐ. ܢܒ݂ܝܼܵܐ. ܐܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܘܝܲܬ݁ܝܼܪ ܡܸܢ ܢܒ݂ܝܼܵܐ.

²⁷ ܗܵܢܵܘ ܕܲܥܠܵܘܗܝ ܟܬ݂ܝܼܒ݂ ܕܗܵܐ ܐܸܢܵܐ ܡܫܲܕܲܪ ܐ̄ܢܵܐ ܡܲܠܲܐܟ݂ܝ ܩܕ݂ܵܡ ܦܲܪܨܘܿܦܵܟ݂ ܕܢܲܬ݂ܩܸܢ ܐܘܼܪܚܵܐ ܩܕ݂ܵܡܲܝܟ.

²⁸ ܐܵܡܲܪ ܐ̄ܢܵܐ ܠܟ݂ܘܿܢ. ܕܠܲܝܬ݁ ܢܒ݂ܝܼܵܐ ܒܝܼܠܝܼܕ݂ܲܝ̈ ܢܸܫܹ̈ܐ ܕܪܲܒ ܡܸܢ ܝܘܿܚܲܢܵܢ ܡܲܥܡܕ݂ܵܢܵܐ. ܙܥܘܿܪܵܐ ܕܹܝܢ ܒܡܲܠܟܘܼܬ݂ܵܐ ܕܐܲܠܵܗܵܐ. ܪܲܒ ܗܘܼ ܡܸܢܹܗ.

²⁹ ܘܟ݂ܠܹܗ ܥܲܡܵܐ ܕܲܫܡܲܥܘ. ܐܵܦ ܡܵܟ݂ܣܹ̈ܐ. ܙܲܕܸܩܘ ܠܐܲܠܵܗܵܐ ܕܲܥܡܲܕ݂ܘ ܡܲܥܡܘܿܕ݂ܝܼܬܹܗ ܕܝܘܿܚܲܢܵܢ.

³⁰ ܦܪ̈ܝܼܫܹܐ ܕܹܝܢ ܘܣܵܦܪܹ̈ܐ. ܛܠܲܡܘ ܒܢܲܦ̮ܫܗܘܿܢ ܨܸܒ݂ܝܵܢܵܐ ܕܐܲܠܵܗܵܐ ܕܠܵܐ ܐܸܬ݂ܥܡܸܕ݂ܘ ܡܸܢܹܗ.

³¹ ܠܡܲܢ ܗܵܟܹܝܠ ܐܹܕܲܡܹܐ ܠܐ̄ܢܵܫܵܐ ܕܫܲܪܒܿܬ݂ܵܐ ܗܵܕܹܐ. ܘܲܠܡܲܢ ܕܵܡܹܝܢ.

³² ܕܵܡܹܝܢ ܠܲܛܠܵܝܹ̈ܐ ܕܝܵܬ݂ܒܿܝܼܢ ܒܫܘܼܩܵܐ ܘܩܵܥܹܝܢ ܠܚܲܒ݂ܪ̈ܲܝܗܘܿܢ. ܘܐܵܡܪܝܼܢ. ܙܡܲܪܢ ܠܟ݂ܘܿܢ. ܘܠܵܐ ܪܲܩܸܕ݂ܬ݁ܘܿܢ. ܘܐܸܠܲܝܢ ܠܟ݂ܘܿܢ. ܘܠܵܐ ܒܟܲܝܬ݁ܘܿܢ.

³³ ܐܸܬ݂ܵܐ ܓܹܝܪ ܝܘܿܚܲܢܵܢ ܡܲܥܡܕ݂ܵܢܵܐ: ܠܵܐ ܐܵܟܹܠ ܠܲܚܡܵܐ ܘܠܵܐ ܫܵܬܹܐ ܚܲܡܪܵܐ. ܘܐܵܡܪܝܼܢ ܐܢ̄ܬܘܿܢ. ܫܹܐܕ݂ܵܐ ܐܝܼܬ݂ ܒܹܗ.

³⁴ ܐܸܬ݂ܵܐ ܒܪܹܗ ܕܐ̄ܢܵܫܵܐ. ܐܵܟܹܠ ܘܫܵܬܹܐ. ܘܐܵܡܪܝܼܢ ܐܢ̄ܬܘܿܢ. ܗܵܐ ܓܲܒ݂ܪܵܐ ܐܵܟ݂ܘܿܠܵܐ. ܘܫܵܬܹܐ ܚܲܡܪܵܐ ܘܪܵܚܡܵܐ ܕܡܵܟ݂ܣܹ̈ܐ. ܘܲܕܚܲܛܵܝܹ̈ܐ.

³⁵ ܘܐܸܙܕܲܕܩܲܬܸ ܚܸܟ݂ܡܬ݂ܵܐ. ܡܸܢ ܟܠܗܘܿܢ ܒܢܹܝ̈ܗ̇.

³⁶ ܐܸܬ݂ܵܐ ܕܹܝܢ ܒܥܵܐ ܡܸܢܹܗ ܚܲܕ݂ ܡܸܢ ܦܪ̈ܝܼܫܹܐ. ܕܢܸܠܥܲܣ ܥܲܡܹܗ. ܘܥܲܠ ܠܒܲܝܬܹ݁ܗ ܕܲܦܪܝܼܫܵܐ ܗܵܘ. ܘܐܸܣܬ݁ܡܸܟ݂.

³⁷ ܘܐܲܢ̄ܬ݁ܬ݂ܵܐ ܚܲܛܵܝܬܵܐ ܐܝܼܬ݂ ܗ̄ܘܵܬ݂ ܒܲܡܕ݂ܝܼܢ̄ܬܵܐ ܗܵܝ. ܘܟܲܕ݂ ܝܸܕ݂ܥܲܬܸ ܕܲܒܒܲܝܬܹ݁ܗ ܕܲܦܪܝܼܫܵܐ ܗܵܘ ܣܡܝܼܟ݂. ܢܸܣܒܲܬܸ ܫܵܛܝܼܦ̮ܬܵܐ ܕܒܸܣܡܵܐ.

³⁸ ܘܩܵܡܲܬܸ ܒܸܣܬ݁ܪܹܗ ܠܘܵܬ݂ ܪܸ̈ܓ݂ܠܵܘܗܝ. ܘܒ݂ܵܟ݂ܝܵܐ ܗ̄ܘܵܬ݂. ܘܫܲܪܝܲܬ݂ ܒܕܸܡ̈ܥܹܝܗ̇ ܡܨܲܒܥܵܐ ܪܸ̈ܓ݂ܠܵܘܗܝ. ܘܲܒ݂ܣܲܥܪܵܐ ܕܪܹܫܵܗ̇ ܡܫܘܝܢ (ܡܫܲܘܝܵܐ) ܠܗܹܝܢ. ܘܲܡܢܲܫܩܵܐ ܗ̄ܘܵܬ݂ ܪܸ̈ܓ݂ܠܵܘܗܝ. ܘܡܵܫܚܵܐ ܒܸܣܡܵܐ.

³⁹ ܟܲܕ݂ ܚܙܵܐ ܕܹܝܢ ܦܪܝܼܫܵܐ ܗܵܘ ܕܲܩܪܵܝܗܝ. ܐܸܬ݂ܚܲܫܲܒ݂ ܒܢܲܦ̮ܫܹܗ. ܘܐܸܡܲܪ. ܗܵܢܵܐ ܐܸܠܘܼ ܢܒ݂ܝܼܵܐ ܗܘܵܐ. ܝܵܕ݂ܲܥ ܗܘ̣ܵܐ ܡܲܢ ܗܝܼ. ܘܡܵܐ ܛܸܒܵܗ̇. ܕܚܲܛܵܝܬܵܐ ܗܝܼ. ܐܲܢ̄ܬ݁ܬ݂ܵܐ ܗܵܝ ܕܩܸܪܒܲܬܸ ܠܹܗ.

⁴⁰ ܥܢܵܐ ܕܹܝܢ ܝܼܫܘܿܥ. ܘܐܸܡܲܪ ܠܹܗ. ܫܸܡܥܘܿܢ. ܡܸܕܸܡ ܐܝܼܬ݂ ܠܝܼ ܕܐܵܡܲܪ ܠܵܟ݂. ܗܘܼ ܕܹܝܢ ܐܸܡܲܪ ܠܹܗ. ܐܸܡܲܪ ܪܲܒܝܼ: ܐܵܡܲܪ ܠܹܗ ܝܼܫܘܿܥ.

⁴¹ ܬܪܹܝܢ ܚܲܝܵܒܹ̈ܐ ܐܝܼܬ݂ ܗ̄ܘܼܵܘ. ܠܚܲܕ݂ ܡܵܪܹܐ ܚܵܘܒܵܐ. ܚܲܕ݂ ܚܲܝܵܒ݂ ܗܘ̣ܵܐ ܕܝܼܢܵܪܹ̈ܐ ܚܲܡܸܫܡܵܐܐ. ܘܐܲܚܪܹܢܵܐ ܕܝܼܢܵܪܹ̈ܐ ܚܲܡܫܝܼܢ.

⁴² ܘܲܕ݂ܠܲܝܬ݁ ܗܘ̣ܵܐ ܠܗܘܿܢ ܠܡܸܦܪܲܥ. ܠܲܬ݂ܪܲܝܗܘܿܢ ܫܒܲܩ. ܐܲܝܢܵܐ ܗܵܟܹܝܠ ܡܸܢܗܘܿܢ ܝܲܬ݁ܝܼܪ ܢܲܚܒ݂ܝܼܘܗܝ.

⁴³ ܥܢܵܐ ܫܸܡܥܘܿܢ. ܘܐܸܡܲܪ. ܣܵܒܲܪ ܐ̄ܢܵܐ. ܕܗܵܘ ܕܐܸܫܬ݁ܒܸܩ ܠܹܗ ܣܲܓܝܼ. ܐܵܡܲܪ ܠܹܗ ܝܼܫܘܿܥ ܬܪܝܼܨܵܐܝܼܬ݂ ܕܵܢܬ݁.

⁴⁴ ܘܐܸܬ݂ܦܢܝܼ ܠܘܵܬ݂ ܗܵܝ ܐܲܢ̄ܬ݁ܬ݂ܵܐ. ܘܐܸܡܲܪ ܠܫܸܡܥܘܿܢ. ܚܵܙܹܐ ܐܲܢ̄ܬ݁ ܐܲܢ̄ܬ݁ܬ݂ܵܐ ܗܵܕܹܐ: ܠܒܲܝܬܵܟ݂ ܥܸܠܹܬ݂. ܡܲܝ̈ܵܐ ܠܪܸ̈ܓ݂ܠܲܝ ܠܵܐ ܝܲܗ̄ܒ݂ܬ݁. ܗܵܕܹܐ ܕܹܝܢ ܒܕܸܡ̈ܥܹܝܗ̇ ܪܸ̈ܓ݂ܠܲܝ ܨܲܒ݂ܥܲܬ݂. ܘܲܒ݂ܣܲܥܪܵܗ̇ ܫܵܘܝܲܬ݂ ܐܸܢܹܝܢ.

⁴⁵ ܐܲܢ̄ܬ݁ ܠܵܐ ܢܫܲܩܬܵܢܝ. ܗܵܕܹܐ ܕܹܝܢ ܗܵܐ ܡܸܢ ܕܥܸܠܹܬ݂. ܠܵܐ ܫܸܠܝܲܬ݂ ܪܸ̈ܓ݂ܠܲܝ ܠܲܡܢܲܫܵܩܘܼ.

⁴⁶ ܐܲܢ̄ܬ݁ ܡܸܫܚܵܐ ܠܪܹܫܝ ܠܵܐ ܡܫܲܚܬ݁. ܗܵܕܹܐ ܕܹܝܢ ܒܡܸܫܚܵܐ ܕܒܸܣܡܵܐ. ܪܸ̈ܓ݂ܠܲܝ ܡܸܫܚܲܬܸ.

⁴⁷ ܚܠܵܦ ܗܵܕܹܐ ܐܵܡܲܪ ܐ̄ܢܵܐ ܠܵܟ݂. ܕܲܫܒ݂ܝܼܩܝܼܢ ܠܵܗ̇ ܚܛܵܗܹܝ̈ܗ̇ ܣܲܓܝܼܐܹ̈ܐ: ܡܛܠ ܕܐܲܚܒܲܬ݂ ܣܲܓܝܼ. ܗܵܘ ܕܹܝܢ ܕܩܲܠܝܼܠ ܡܸܫܬ݁ܒܸܩ ܠܹܗ. ܩܲܠܝܼܠ ܡܲܚܸܒ݂.

⁴⁸ ܘܐܸܡܲܪ ܠܗܵܝ ܐܲܢ̄ܬ݁ܬ݂ܵܐ. ܫܒ݂ܝܼܩܝܼܢ ܠܹܟ݂ܝ ܚܛܵܗܲܝ̈ܟܿܝ.

⁴⁹ ܫܲܪܝܼܘ ܕܹܝܢ ܗܵܢܘܿܢ ܕܲܣܡܝܼܟ݂ܝܼܢ ܐܵܡܪܝܼܢ ܒܢܲܦ̮ܫܗܘܿܢ. ܡܲܢܘܼ ܗܵܢܵܐ ܕܐܵܦ ܚܛܵܗܹ̈ܐ ܫܵܒܹܩ.

⁵⁰ ܝܼܫܘܿܥ ܕܹܝܢ ܐܸܡܲܪ ܠܗܵܝ ܐܲܢ̄ܬ݁ܬ݂ܵܐ. ܗܲܝܡܵܢܘܼܬܹܟ݂ܝ ܐܲܚܝܵܬܹܟ݂ܝ ܙܸܠܝ ܒܲܫܠܵܡܵܐ.

8

¹ ܘܲܗܘܵܐ ܡܸܢ ܒܵܬܲܪ ܗܵܠܹܝܢ. ܡܸܬ݂ܟܿܪܸܟ݂ ܗܘ̣ܵܐ ܝܼܫܘܿܥ ܒܲܡܕ݂ܝܼ̈ܢܵܬ݂ܵܐ ܘܲܒ݂ܩܘܼܪ̈ܝܵܐ. ܘܡܲܟ݂ܪܸܙ ܗܘ̣ܵܐ ܘܲܡܣܲܒܲܪ ܡܲܠܟܘܼܬ݂ܵܐ ܕܐܲܠܵܗܵܐ. ܘܲܬ݂ܪܸܥܣܲܪܬܹ݁ܗ ܥܲܡܹܗ.

² ܘܢܸܫܹ̈ܐ ܗܵܠܹܝܢ ܕܐܬ݂ܐܲܣܝܼ̈ ܡܸܢ ܟܘܼܪ̈ܗܵܢܹܐ. ܘܡܸܢ ܪ̈ܘܼܚܹ̈ܐ ܒܝܼ̈ܫܵܬ݂ܵܐ. ܡܲܪܝܲܡ ܕܡܸܬ݂ܩܲܪܝܵܐ ܡܲܓ݂ܕܠܵܝܬܵܐ. ܗܵܝ ܕܫܲܒ݂ܥܵܐ ܫܹܐܕ݂ܝܼ̈ܢ ܢܦܲܩܘ ܡܸܢܵܗ̇.

³ ܘܝܘܿܚܲܢ ܐܲܢ̄ܬܲܬ݂ ܟܘܼܙܵܐ ܪܲܒܲܝܬܹ݁ܗ ܕܗܹܪܘܿܕܸܣ. ܘܫܘܿܫܲܢ. ܘܐܲܚܪ̈ܵܢܝܵܬ݂ܵܐ ܣܲܓܝܼ̈ܐܵܬ݂ܵܐ. ܐܲܝܠܹܝܢ ܕܲܡܫܲܡܫܵܢ ܗ̄ܘܲܝ̈ ܠܗܘܿܢ ܡܸܢ ܩܸܢܝܵܢܲܝܗܹܝ̈ܢ.

⁴ ܘܟܲܕ݂ ܟܸܢܫܵܐ ܣܲܓܿܝܼܐܵܐ ܟܢܲܫ ܗ̄ܘܵܐ: ܘܡܸܢ ܟܠ ܡܕ݂ܝܼ̈ܢܵܢ ܐܵܬܹ݁ܝܢ ܗ̄ܘܼܵܘ ܠܘܵܬܹܗ. ܐܸܡܲܪ ܒܡܲܬ݂ܠܹ̈ܐ.

⁵ ܢܦܲܩ ܙܵܪܘܿܥܵܐ ܠܡܸܙܪܲܥ ܙܲܪܥܹܗ. ܘܟܲܕ݂ ܙܪܲܥ. ܐܝܼܬ݂ ܕܲܢܦܲܠ ܥܲܠ ܝܲܕ݂ ܐܘܼܪܚܵܐ. ܘܐܸܬ݁ܕ݂ܝܼܫ. ܘܐܸܟܲܠܬܹܗ ܦܵܪܲܚܬ݂ܵܐ.

⁶ ܘܲܐ̄ܚܪܹܢܵܐ ܢܦܲܠ ܥܲܠ ܫܘܿܥܵܐ. ܘܒܲܪ ܫܵܥܬܹܗ ܝܼܥܵܐ. ܘܲܕ݂ܠܲܝܬ݁ ܗܘ̣ܵܐ ܠܹܗ ܬܲܠܝܼܠܘܼܬ݂ܵܐ. ܝܼܒܸܫ.

⁷ ܘܲܐ̄ܚܪܹܢܵܐ ܢܦܲܠ ܒܹܝܬ݂ ܟܘܼܒܹ̈ܐ. ܘܝܼܥܵܘ ܥܲܡܹܗ ܟܘܼܒܹ̈ܐ. ܘܚܲܢܩܘܼܗܝ.

⁸ ܘܲܐ̄ܚܪܹܢܵܐ ܢܦܲܠ ܒܐܲܪܥܵܐ ܛܵܒ݂ܬ݂ܵܐ ܘܫܲܦܝܼܪܬܵܐ. ܘܝܼܥܵܐ ܘܲܥܒܲܕ݂ ܦܹܐܪܹ̈ܐ. ܚܲܕ݂ ܒܲܡܵܐܐ. ܗܵܠܹܝܢ ܟܲܕ݂ ܐܵܡܲܪ. ܩܵܥܹܐ ܗ̄ܘܵܐ. ܕܡܲܢ ܕܐܝܼܬ݂ ܠܹܗ ܐܸܕ݂ܢܹ̈ܐ ܕܢܸܫܡܲܥ. ܢܸܫܡܲܥ.

⁹ ܘܫܲܐܠܘܼܗܝ ܬܲܠܡܝܼܕ݂ܵܘ̈ܗܝ. ܕܡܵܢܵܘ ܡܲܬ݂ܠܵܐ ܗܵܢܵܐ.

¹⁰ ܗܘܼ ܕܹܝܢ ܐܸܡܲܪ ܠܗܘܿܢ. ܠܟ݂ܘܿܢ ܗܘܼ ܝܼܗܝܼܒ݂ ܠܡܸܕ݂ܥ ܐ̄ܪܵܙܵܐ ܕܡܲܠܟܘܼܬܹܗ ܕܐܲܠܵܗܵܐ. ܠܗܵܢܘܿܢ ܕܹܝܢ ܫܲܪܟܵܐ. ܒܦܸܠܐܬ݂ܵܐ ܡܸܬ݂ܐܡܲܪ. ܕܟܲܕ݂ ܚܵܙܹܝܢ. ܠܵܐ ܢܸܚܙܘܿܢ. ܘܟܲܕ݂ ܫܵܡܥܝܼܢ. ܠܵܐ ܢܸܣܬܲܟܠܘܼܢ.

¹¹ ܗܵܢܵܘ ܕܹܝܢ ܡܲܬ݂ܠܵܐ. ܙܲܪܥܵܐ ܐܝܼܬ݂ܵܘܗܝ. ܡܸܠܬ݂ܵܐ ܕܐܲܠܵܗܵܐ.

¹² ܗܵܢܘܿܢ ܕܹܝܢ ܕܥܲܠ ܝܲܕ݂ ܐܘܼܪܚܵܐ. ܐܝܼܬܲܝܗܘܿܢ ܗܵܢܘܿܢ ܕܫܵܡܥܝܼܢ ܡܸܠܬ݂ܵܐ ܘܐܵܬܹܐ ܒܥܸܠܕܒ݂ܵܒ݂ܵܐ ܫܵܩܹܠ ܡܸܠܬ݂ܵܐ ܡܸܢ ܠܸܒܗܘܿܢ ܕܠܵܐ ܢܗܲܝܡܢܘܼܢ ܘܢܸܚܘܿܢ.

¹³ ܗܵܠܹܝܢ ܕܹܝܢ ܕܥܲܠ ܫܘܿܥܵܐ. ܗܵܠܹܝܢ ܐܸܢܘܿܢ ܕܡܵܐ ܕܲܫܡܲܥܘ. ܒܚܲܕ݂ܘܼܬ݂ܵܐ ܡܩܲܒܠܝܼܢ ܠܵܗ̇ ܠܡܸܠܬ݂ܵܐ ܘܥܸܩܪܵܐ ܠܲܝܬ݁ ܠܗܘܿܢ. ܐܸܠܵܐ ܕܙܲܒ݂ܢܵܐ ܗܝܼ ܗܲܝܡܵܢܘܼܬ݂ܗܘܿܢ. ܘܒܲܙܒܲܢ ܢܸܣܝܘܼܢܵܐ. ܡܸܬ݂ܟܲܫܠܝܼܢ.

¹⁴ ܗܵܘ ܕܹܝܢ ܕܲܢܦܲܠ ܒܹܝܬ݂ ܟܘܼܒܹ̈ܐ. ܗܵܠܹܝܢ ܐܸܢܘܿܢ. ܐܲܝܠܹܝܢ ܕܫܵܡܥܝܼܢ ܡܸܠܬ݂ܵܐ ܘܲܒ݂ܨܸܦܬ݂ܵܐ ܘܲܒ݂ܥܘܼܬ݂ܪܵܐ ܘܒܲܪ̈ܓ݂ܝܼܓ݂ܵܬܹܗ ܕܥܵܠܡܵܐ ܡܸܬ݂ܚܲܢܩܝܼܢ ܘܦܹܐܪܹ̈ܐ ܠܵܐ ܝܵܗܒܿܝܼܢ.

¹⁵ ܗܵܘ ܕܹܝܢ ܕܒܲܐܪܥܵܐ ܛܵܒ݂ܬ݂ܵܐ. ܗܵܠܹܝܢ ܐܸܢܘܿܢ. ܐܲܝܠܹܝܢ ܕܲܒ݂ܠܸܒܵܐ ܫܲܦܝܵܐ ܘܛܵܒ݂ܵܐ ܫܵܡܥܝܼܢ ܡܸܠܬ݂ܵܐ ܘܐܵܚܕܿܝܼܢ. ܘܝܵܗܒܿܝܼܢ ܦܹܐܪܹ̈ܐ ܒܲܡܣܲܝܒܪܵܢܘܼܬ݂ܵܐ.

¹⁶ ܠܵܐ ܐ̄ܢܵܫ ܡܲܢܗܲܪ ܫܪܵܓ݂ܵܐ. ܘܲܡܚܲܦܹ݁ܐ ܠܹܗ ܒܡܵܐܢܵܐ ܐܵܘ ܣܵܐܹܡ ܠܹܗ ܬܚܹܝܬ݂ ܥܲܪܣܵܐ. ܐܸܠܵܐ ܣܵܐܹܡ ܠܹܗ ܠܥܸܠ ܡܸܢ ܡܢܵܪܬܵܐ. ܕܟܠ ܕܥܵܐܹܠ. ܢܸܚܙܹܐ ܢܘܼܗܪܹܗ.

¹⁷ ܠܲܝܬ݁ ܓܹܝܪ ܡܸܕܸܡ ܕܲܟ݂ܣܹܐ. ܕܠܵܐ ܢܸܬ݂ܓ݁ܠܹܐ. ܘܠܵܐ ܕܲܡܛܲܫܲܝ ܕܠܵܐ ܢܸܬ݂ܝܼܕ݂ܲܥ. ܘܢܹܐܬܹܐ ܠܓܸܠܝܵܐ.

¹⁸ ܚܙܵܘ ܐܲܝܟܲܢܵܐ ܫܡܲܥܬ݁ܘܿܢ. ܡܲܢ ܕܐܝܼܬ݂ ܠܹܗ ܓܹܝܪ. ܢܸܬ݂ܝܼܗܸܒ݂ ܠܹܗ. ܘܡܲܢ ܕܠܲܝܬ݁ ܠܹܗ. ܐܵܦ ܗܵܘ ܕܣܵܒܲܪ ܕܐܝܼܬ݂ ܠܹܗ. ܢܸܫܬ݁ܩܸܠ ܡܸܢܹܗ.

¹⁹ ܐܸܬ݂ܵܘ ܕܹܝܢ ܠܘܵܬܹܗ ܐܸܡܹܗ ܘܐܲܚܵܘ̈ܗܝ. ܘܠܵܐ ܡܸܫܟܿܚܝܼܢ ܗ̄ܘܼܵܘ ܕܲܢܡܲܠܠܘܼܢ ܥܲܡܹܗ. ܡܛܠ ܟܸܢܫܵܐ.

²⁰ ܘܐܸܡܲܪܘ ܠܹܗ. ܐܸܡܵܟ݂ ܘܐܲܚܲܝ̈ܟ ܩܵܝܡܝܼܢ ܠܒܲܪ. ܘܨܵܒܹܝܢ ܠܡܸܚܙܝܵܟ݂.

²¹ ܗܘܼ ܕܹܝܢ ܥܢܵܐ. ܘܐܸܡܲܪ ܠܗܘܿܢ. ܗܵܠܹܝܢ ܐܸܢܘܿܢ ܐܹܡܝ ܘܐܲܚܲܝ̈. ܐܲܝܠܹܝܢ ܕܫܵܡܥܝܼܢ ܡܸܠܬ݂ܵܐ ܕܐܲܠܵܗܵܐ. ܘܥܵܒ݂ܕܝܼܢ ܠܵܗ̇.

²² ܗܘ̣ܵܐ ܕܹܝܢ ܒܚܲܕ݂ ܡܸܢ ܝܵܘ̈ܡܵܬ݂ܵܐ. ܣܠܸܩ ܝܼܫܘܿܥ ܝܼܬܸܒ݂ ܒܲܣܦܝܼܢ̄ܬܵܐ ܗܘܼ ܘܬܲܠܡܝܼܕ݂ܵܘ̈ܗܝ. ܘܐܸܡܲܪ ܠܗܘܿܢ. ܢܸܥܒܲܪ ܠܗܵܘ ܥܸܒ݂ܪܵܐ ܕܝܲܡܬ݂ܵܐ.

²³ ܘܟܲܕ݂ ܪܵܕܹܝܢ. ܕܡܸܟ݂ ܠܹܗ ܗܘܼ ܝܼܫܘܿܥ. ܘܲܗܘܵܬ݂ ܥܲܠܥܵܠܵܐ ܕܪܘܼܚܵܐ ܒܝܲܡܬ݂ܵܐ. ܘܩܲܪܝܼܒ݂ܵܐ ܗ̄ܘܵܬ݂ ܣܦܝܼܢ̄ܬܵܐ ܠܡܸܛܒܲܥ.

²⁴ ܘܲܩܪܸܒ݂ܘ ܐܲܥܝܼܪܘܼܗܝ. ܘܐܵܡܪܝܼܢ ܠܹܗ. ܪܲܒܲܢ ܪܲܒܲܢ. ܐܵܒ݂ܕܝܼܢܲܢ. ܗܘܼ ܕܹܝܢ ܩܵܡ ܘܲܟ݂ܐܵܐ ܒܪܘܼܚܵܐ ܘܲܒ݂ܡܲܚܫ̈ܘܼܠܹܐ ܕܝܲܡܵܐ. ܘܢܵܚܘ. ܘܲܗܘܵܐ ܫܸܠܝܵܐ.

²⁵ ܘܐܸܡܲܪ ܠܗܘܿܢ. ܐܲܝܟܵܐ ܗܝܼ ܗܲܝܡܵܢܘܼܬ݂ܟ݂ܘܿܢ. ܗܸܢܘܿܢ ܕܹܝܢ ܟܲܕ݂ ܕܲܚܝܼܠܝܼܢ. ܡܸܬ݁ܕܲܡܪܝܼܢ ܗ̄ܘܼܵܘ ܘܐܵܡܪܝܼܢ ܚܲܕ݂ ܠܚܲܕ݂. ܡܲܢܘܼ ܟܲܝ ܗܵܢܵܐ ܕܐܵܦ ܠܪܘܼܚܵܐ ܦܵܩܹܕ݂ ܘܲܠܡܲܚܫ̈ܘܼܠܹܐ ܘܲܠܝܲܡܵܐ. ܘܡܸܫܬܲܡܥܝܼܢ ܠܹܗ.

²⁶ ܘܲܪܕ݂ܵܘ ܘܐܸܬ݂ܵܘ ܠܐܲܬ݂ܪܵܐ ܕܓ݂ܵܕ݂ܪ̈ܵܝܹܐ ܕܐܝܼܬ݂ܵܘܗܝ ܒܥܸܒ݂ܪܵܐ. ܠܘܼܩܒܲܠ ܓܠܝܼܠܵܐ.

²⁷ ܘܟܲܕ݂ ܢܦܲܩ ܠܐܲܪܥܵܐ. ܦܓܲܥ ܒܹܗ ܓܲܒ݂ܪܵܐ ܚܲܕ݂ ܡܸܢ ܡܕ݂ܝܼܢ̄ܬܵܐ ܕܐܝܼܬ݂ ܒܹܗ ܕܲܝܘܵܐ. ܡܸܢ ܙܲܒ݂ܢܵܐ ܣܲܓܿܝܼܐܵܐ. ܘܡܵܐܢܹ̈ܐ ܠܵܐ ܠܵܒܹܫ ܗ̄ܘܵܐ. ܘܲܒ݂ܒܲܝܬܵܐ ܠܵܐ ܥܵܡܲܪ ܗ̄ܘܵܐ. ܐܸܠܵܐ ܒܒܹܝܬ݂ ܩܒ݂ܘܪܹ̈ܐ.

²⁸ ܟܲܕ݂ ܚܙܵܐ ܕܹܝܢ ܠܝܼܫܘܿܥ. ܩܥܵܐ. ܘܲܢܦܲܠ ܩܕ݂ܵܡܵܘܗܝ. ܘܲܒ݂ܩܵܠܵܐ ܪܵܡܵܐ ܐܸܡܲܪ. ܡܵܐ ܠܲܢ ܘܠܵܟ݂ ܝܼܫܘܿܥ: ܒܪܹܗ ܕܐܲܠܵܗܵܐ ܡܪܲܝܡܵܐ. ܒܵܥܹܐ ܐ̄ܢܵܐ ܡܸܢܵܟ݂. ܠܵܐ ܬܫܲܢܩܲܢܝ.

²⁹ ܦܵܩܹܕ݂ ܗܘ̣ܵܐ ܠܹܗ ܓܹܝܪ ܝܼܫܘܿܥ ܠܪܘܼܚܵܐ ܛܲܢܦܵܐ. ܠܡܸܦܲܩ ܡܸܢ ܒܲܪܢܵܫܵܐ. ܣܲܓܝܼ ܗܘ̣ܵܐ ܓܹܝܪ ܙܲܒ݂ܢܵܐ. ܡܸܢ ܕܲܫܒܹܐ ܗܘ̣ܵܐ ܠܹܗ. ܘܡܸܬ݂ܐܣܲܪ ܗܘ̣ܵܐ ܒܫܸܫ̈ܠܵܬ݂ܵܐ. ܘܲܒ݂ܟܲܒ݂̈ܠܹܐ ܡܸܬ݂ܢܛܲܪ ܗ̄ܘܵܐ. ܘܲܡܦܲܣܸܩ ܗܘ̣ܵܐ ܐܲܣܘܼܪ̈ܵܘܗܝ. ܘܡܸܬ݁ܕܒܲܪ ܗܘ̣ܵܐ ܡܸܢ ܫܹܐܕ݂ܵܐ ܠܚܘܼܪܒܵܐ.

³⁰ ܫܲܐܠܹܗ ܕܹܝܢ ܝܼܫܘܿܥ. ܡܲܢ ܫܡܵܟ݂. ܐܵܡܲܪ ܠܹܗ. ܠܸܓ݂ܝܘܿܢ: ܡܛܠ ܕܕ݂ܲܝ̈ܘܹܐ ܣܲܓܝܼܐܹ̈ܐ ܥܲܠܝܼܠܝܼܢ ܗ̄ܘܼܵܘ ܒܹܗ.

³¹ ܘܒ݂ܵܥܹܝܢ ܗ̄ܘܼܵܘ ܡܸܢܹܗ. ܕܠܵܐ ܢܸܦܩܘܿܕ݂ ܠܗܘܿܢ ܠܡܹܐܙܲܠ ܠܲܬ݂ܗܘܿܡܵܐ.

³² ܐܝܼܬ݂ ܗܘ̣ܵܐ ܕܹܝܢ ܬܲܡܵܢ. ܒܲܩܪܵܐ ܕܲܚܙܝܼܪܹ̈ܐ ܣܲܓܝܼܐܹ̈ܐ. ܕܪܵܥܝܵܐ ܒܛܘܼܪܵܐ. ܘܒ݂ܵܥܹܝܢ ܗ̄ܘܼܵܘ ܡܸܢܹܗ. ܕܢܲܦܸܣ ܠܗܘܿܢ. ܕܒܲܚܙܝܼܪܹ̈ܐ ܢܸܥܠܘܼܢ. ܘܐܲܦܸܣ ܠܗܘܿܢ.

³³ ܘܲܢܦܲܩܘ ܫܹܐܕܹ̈ܐ ܡܸܢ ܓܲܒ݂ܪܵܐ. ܘܥܲܠܘ ܒܲܚܙܝܼܪܹ̈ܐ. ܘܬܸܪܨܲܬܸ ܒܲܩܪܵܐ ܗܵܝ ܟܠܵܗ̇ ܠܲܫܩܝܼܦܵܐ. ܘܲܢܦܲܠܘ ܒܝܲܡܬ݂ܵܐ. ܘܐܸܬ݂ܚܲܢܲܩܘ.

³⁴ ܟܲܕ݂ ܚܙܵܘ ܕܹܝܢ ܪ̈ܵܥܵܘܵܬ݂ܵܐ ܡܸܕܸܡ ܕܲܗܘܵܐ. ܥܪܲܩܘ. ܘܐܸܫܬܲܥܝܼܘ ܒܲܡܕ݂ܝܼ̈ܢܵܬ݂ܵܐ. ܘܲܒ݂ܩܘܼܪ̈ܝܵܐ.

³⁵ ܘܲܢܦܲܩܘ ܐ̄ܢܵܫܵܐ ܕܢܸܚܙܘܿܢ ܡܸܕܸܡ ܕܲܗܘܵܐ. ܘܐܸܬ݂ܵܘ ܠܘܵܬ݂ ܝܼܫܘܿܥ. ܘܐܸܫܟܚܘܼܗܝ ܠܓܲܒ݂ܪܵܐ ܗܵܘ ܕܲܢܦܲܩܘ ܫܹܐܕ݂ܵܘ̈ܗܝ. ܟܲܕ݂ ܠܒ݂ܝܼܫ ܘܲܡܢܲܟܲܦ. ܘܝܵܬܹ݁ܒ݂ ܠܘܵܬ݂ ܪܸ̈ܓ݂ܠܵܘܗܝ ܕܝܼܫܘܿܥ. ܘܲܕ݂ܚܸܠܘ.

³⁶ ܘܐܸܫܬܲܥܝܼܘ ܠܗܘܿܢ ܐܲܝܠܹܝܢ ܕܲܚܙܵܘ ܐܲܝܟܲܢܵܐ ܐܸܬ݂ܐܲܣܝܼ ܓܲܒ݂ܪܵܐ ܗܵܘ ܕܲܝܘܵܢܵܐ.

³⁷ ܘܒ݂ܵܥܹܝܢ ܗ̄ܘܼܵܘ ܡܸܢܹܗ ܟܠܹܗ ܟܸܢܫܵܐ ܕܓ݂ܵܕ݂ܪ̈ܵܝܹܐ. ܕܢܹܐܙܲܠ ܠܹܗ ܡܸܢ ܠܘܵܬ݂ܗܘܿܢ. ܡܛܠ ܕܕܸܚܠܬ݂ܵܐ ܪܲܒܬ݂ܵܐ ܐܸܚܕܲܬܸ ܐܸܢܘܿܢ. ܗܘܼ ܕܹܝܢ ܝܼܫܘܿܥ ܣܠܸܩ ܠܲܣܦܝܼܢ̄ܬܵܐ. ܘܲܗܦܲܟ݂ ܡܸܢ ܠܘܵܬ݂ܗܘܿܢ.

³⁸ ܗܵܘ ܕܹܝܢ ܓܲܒ݂ܪܵܐ ܕܲܢܦܲܩܘ ܡܸܢܹܗ ܫܹܐܕܹ̈ܐ. ܒܵܥܹܐ ܗܘ̣ܵܐ ܡܸܢܹܗ. ܕܲܠܘܵܬܹܗ ܢܸܗܘܹܐ. ܘܲܫܪܵܝܗܝ ܝܼܫܘܿܥ. ܘܐܸܡܲܪ ܠܹܗ.

³⁹ ܗܦܘܼܟ݂ ܠܒܲܝܬܵܟ݂. ܘܐܸܫܬܲܥܵܐ ܡܸܕܸܡ ܕܲܥܒܲܕ݂ ܠܵܟ݂ ܐܲܠܵܗܵܐ. ܘܐܸܙܲܠ. ܘܡܲܟ݂ܪܸܙ ܗܘ̣ܵܐ ܒܟ݂ܠܵܗ̇ ܡܕ݂ܝܼܢ̄ܬܵܐ. ܡܸܕܸܡ ܕܲܥܒܲܕ݂ ܠܹܗ ܝܼܫܘܿܥ.

⁴⁰ ܟܲܕ݂ ܗܦܲܟ݂ ܕܹܝܢ ܝܼܫܘܿܥ. ܩܲܒܠܹܗ ܟܸܢܫܵܐ ܣܲܓܿܝܼܐܵܐ. ܟܠܗܘܿܢ ܓܹܝܪ ܠܹܗ ܚܵܝܪܝܼܢ ܗ̄ܘܼܵܘ.

⁴¹ ܘܓܲܒ݂ܪܵܐ ܚܲܕ݂ ܕܲܫܡܹܗ ܝܘܼܐܵܪܵܫ. ܪܹܝܫ ܟܢܘܼܫܬܵܐ. ܢܦܲܠ ܩܕ݂ܵܡ ܪܸ̈ܓ݂ܠܵܘܗܝ ܕܝܼܫܘܿܥ. ܘܒ݂ܵܥܹܐ ܗܘ̣ܵܐ ܡܸܢܹܗ ܕܢܸܥܘܿܠ ܠܒܲܝܬܹ݁ܗ.

⁴² ܒܲܪܬ݂ܵܐ ܓܹܝܪ ܝܼܚܝܼܕ݂ܵܝܬܵܐ ܐܝܼܬ݂ ܗ̄ܘܵܬ݂ ܠܹܗ. ܐܲܝܟ݂ ܒܲܪ̄ܬ݂ ܫܢ̈ܝܼܢ ܬܲܪܬܲܥܸܣܪܹ̈ܐ. ܘܩܲܪܝܼܒ݂ܵܐ ܗ̄ܘܵܬ݂ ܠܲܡܡܵܬ݂. ܘܟܲܕ݂ ܐܵܙܹܠ ܥܲܡܹܗ ܗܘܼ ܝܼܫܘܿܥ. ܟܸܢܫܵܐ ܣܲܓܿܝܼܐܵܐ ܚܵܒܹܨ ܗܘ̣ܵܐ ܠܹܗ.

⁴³ ܐܲܢ̄ܬ݁ܬ݂ܵܐ ܕܹܝܢ ܚܕ݂ܵܐ ܕܲܬ݂ܪܝܼܥ ܗܘ̣ܵܐ ܕܡܵܗ̇ ܫܢ̈ܝܼܢ ܬܲܪܬܲܥܸܣܪܹ̈ܐ: ܗܵܝ ܕܒܹܝܬ݂ ܐܵܣܵ̈ܘܵܬ݂ܵܐ ܟܠܹܗ ܩܸܢܝܵܢܵܗ̇ ܐܲܦܩܲܬܸ: ܘܠܵܐ ܐܸܫܟܚܲܬ݂ ܕܡܸܢ ܐ̄ܢܵܫ ܬܸܬ݂ܐܲܣܹܐ.

⁴⁴ ܐܸܬ݂ܩܲܪܒܲܬܸ ܡܸܢ ܒܸܣܬܪܹܗ. ܘܩܸܪܒܲܬܸ ܠܟܸܢܦܵܐ ܕܡܵܐܢܹܗ. ܘܡܸܚܕ݂ܵܐ. ܩܵܡܲܬܸ ܡܲܪܕܝܼܬ݂ܵܐ ܕܲܕ݂ܡܵܗ̇.

⁴⁵ ܘܐܸܡܲܪ ܝܼܫܘܿܥ. ܡܲܢܘܼ ܩܪܸܒ݂ ܠܝܼ. ܘܟܲܕ݂ ܟܠܗܘܿܢ ܟܵܦܪܝܼܢ. ܐܵܡܲܪ ܠܹܗ ܫܸܡܥܘܿܢ ܟܹܐܦܵܐ. ܘܲܕ݂ܥܲܡܹܗ. ܪܲܒܲܢ ܟܸܢܫܹ̈ܐ ܐܵܠܨܝܼܢ ܠܵܟ݂ ܘܚܵܒ݂ܨܝܼܢ. ܘܐܵܡܲܪ ܐܲܢ̄ܬ݁. ܡܲܢܘܼ ܩܪܸܒ݂ ܠܝܼ.

⁴⁶ ܗܘܼ ܕܹܝܢ ܐܸܡܲܪ. ܐ̄ܢܵܫ ܩܪܸܒ݂ ܠܝܼ. ܐܸܢܵܐ ܓܹܝܪ ܝܸܕ݂ܥܹܬ݂ ܕܚܲܝܠܵܐ ܢܦܲܩ ܡܹܢܝ.

⁴⁷ ܗܵܝ ܕܹܝܢ ܐܲܢ̄ܬ݁ܬ݂ܵܐ ܟܲܕ݂ ܚܙܵܬ݂ ܕܠܵܐ ܛܥܵܬܹܗ. ܐܸܬܲܬܸ ܟܲܕ݂ ܪܲܬ݁ܝܼܬ݂ܵܐ ܘܢܸܦܠܲܬܸ ܣܸܓ݂ܕܲܬܸ ܠܹܗ (ܐܸܬܲܬܸ ܟܲܕ݂ ܪܲܬ݁ܝܼܬ݂ܵܐ ܣܸܓ݂ܕܲܬܸ ܠܹܗ). ܘܐܸܡܪܲܬܸ ܠܥܹܝܢ ܥܲܡܵܐ ܟܠܹܗ ܡܛܠ ܐܲܝܕ݂ܵܐ ܥܸܠܬ݂ܵܐ ܩܸܪܒܲܬ݂. ܘܐܲܝܟܲܢܵܐ ܡܸܚܕ݂ܵܐ ܐܸܬ݂ܐܲܣܝܲܬܸ.

⁴⁸ ܗܘܼ ܕܹܝܢ ܝܼܫܘܿܥ. ܐܸܡܲܪ ܠܵܗ̇. ܐܸܬ݂ܠܲܒܲܒ݂ܝ ܒܪܲܬ݂ܝ: ܗܲܝܡܵܢܘܼܬܹܟ݂ܝ ܐܲܚܝܵܬܹܟ݂ܝ. ܙܸܠܝ ܒܲܫܠܵܡܵܐ.

⁴⁹ ܘܥܲܕ݂ ܗܘܼ ܡܡܲܠܸܠ. ܐܸܬ݂ܵܐ ܐ̄ܢܵܫ ܡܸܢ ܕܒܹܝܬ݂ ܪܲܒ ܟܢܘܼܫܬܵܐ. ܘܐܸܡܲܪ ܠܹܗ. ܡܝܼܬܲܬܸ ܠܵܗ̇ ܒܲܪܬ݂ܵܟ݂. ܠܵܐ ܬܲܥܡܸܠ ܠܡܲܠܦܵܢܵܐ.

⁵⁰ ܝܼܫܘܿܥ ܕܹܝܢ ܫܡܲܥ. ܘܐܸܡܲܪ ܠܐܲܒ݂ܘܼܗ ܕܲܛܠܝܼܬ݂ܵܐ. ܠܵܐ ܬܸܕ݂ܚܲܠ. ܒܲܠܚܘܿܕ݂ ܗܲܝܡܸܢ. ܘܚܵܝܵܐ.

⁵¹ ܐܸܬ݂ܵܐ ܕܹܝܢ ܝܼܫܘܿܥ ܠܒܲܝܬܵܐ. ܘܠܵܐ ܫܒܲܩ ܠܐ̄ܢܵܫ ܕܢܸܥܘܿܠ ܥܲܡܹܗ ܐܸܠܵܐ ܠܫܸܡܥܘܿܢ ܘܲܠܝܲܥܩܘܿܒ݂. ܘܲܠܝܘܿܚܲܢܵܢ. ܘܠܲܐܒ݂ܘܼܗ ܕܲܛܠܝܼܬ݂ܵܐ. ܘܠܸܐܡܵܗ̇.

⁵² ܟܠܗܘܿܢ ܕܹܝܢ ܒܵܟܹܝܢ ܗ̄ܘܼܵܘ. ܘܡܲܪܩܕ݂ܝܼܢ ܥܠܹܝܗ̇. ܝܼܫܘܿܥ ܕܹܝܢ ܐܸܡܲܪ. ܠܵܐ ܬܸܒ݂ܟܿܘܿܢ. ܠܵܐ ܓܹܝܪ ܡܝܼܬܲܬܸ ܐܸܠܵܐ ܕܲܡܟܵܐ ܗ̄ܝܼ.

⁵³ ܘܓ݂ܚܟܿܝܼܢ ܗ̄ܘܼܵܘ ܥܠܵܘܗܝ. ܕܝܵܕ݂ܥܝܼܢ ܕܡܝܼܬܲܬܸ ܠܵܗ̇.

⁵⁴ ܗܘܼ ܕܹܝܢ ܐܲܦܸܩ ܠܟ݂ܠܢܵܫ ܠܒܲܪ. ܘܐܲܚܕ݂ܗ̇ ܒܐܝܼܕ݂ܵܗ̇. ܘܲܩܪܵܗ̇. ܘܐܸܡܲܪ. ܛܠܝܼܬ݂ܵܐ. ܩܘܼܡܝ.

⁵⁵ ܘܗܸܦܟܲܬܸ ܪܘܼܚܵܗ̇ ܘܡܸܚܕ݂ܵܐ ܩܵܡܲܬܸ. ܘܲܦܩܲܕ݂ ܕܢܸܬ݁ܠܘܼܢ ܠܵܗ̇ ܠܡܹܐܟܲܠ.

⁵⁶ ܘܲܬ݂ܡܲܗܘ ܐܲܒ݂ܵܗܹܝ̈ܗ̇. ܗܘܼ ܕܹܝܢ ܙܲܗܲܪ ܐܸܢܘܿܢ. ܕܲܠܐ̄ܢܵܫ. ܠܵܐ ܢܹܐܡܪܘܼܢ ܡܵܐ ܕܲܗܘܵܐ.

9

¹ ܘܲܩܪܵܐ ܝܼܫܘܿܥ ܠܲܬ݂ܪܸܥܣܲܪܬܹ݁ܗ. ܘܝܲܗ̄ܒ݂ ܠܗܘܿܢ ܚܲܝܠܵܐ ܘܫܘܼܠܛܵܢܵܐ ܥܲܠ ܟܠܗܘܿܢ ܫܹܐܕܹ̈ܐ ܘܟ݂ܘܼܪ̈ܗܵܢܹܐ. ܠܡܲܐܣܵܝܘܼ.

² ܘܫܲܕܲܪ ܐܸܢܘܿܢ ܠܡܲܟ݂ܪܵܙܘܼ ܡܲܠܟܘܼܬܹܗ ܕܐܲܠܵܗܵܐ. ܘܲܠܡܲܐܣܵܝܘܼ ܟܪ̈ܝܼܗܹܐ.

³ ܘܐܸܡܲܪ ܠܗܘܿܢ. ܡܸܕܸܡ ܠܵܐ ܬܸܫܩܠܘܼܢ ܠܐܘܼܪܚܵܐ. ܠܵܐ ܫܲܒ݂ܛܵܐ. ܘܠܵܐ ܬܲܪܡܵܠܵܐ. ܘܠܵܐ ܠܲܚܡܵܐ. ܘܠܵܐ ܟܸܣܦܵܐ. ܘܠܵܐ ܬܲܪܬܹ݁ܝܢ ܟܘܿܬ݁ܝܼܢ̈ܝܵܢ ܢܸܗܘܝܵܢ ܠܟ݂ܘܿܢ.

⁴ ܘܠܲܐܝܢܵܐ ܒܲܝܬܵܐ ܕܥܵܐܠܝܼܢ ܐܢ̄ܬܘܿܢ ܠܹܗ. ܬܲܡܵܢ ܗܘܵܘ. ܘܡܸܢ ܬܲܡܵܢ ܦܘܿܩܘ.

⁵ ܘܲܠܡܲܢ ܕܠܵܐ ܡܩܲܒܠܝܼܢ ܠܟ݂ܘܿܢ: ܡܵܐ ܕܢܵܦܩܝܼܢ ܐܢ̄ܬܘܿܢ ܡܸܢ ܡܕ݂ܝܼܢ̄ܬܵܐ ܗܵܝ. ܐܵܦ ܚܸܠܐ ܡܸܢ ܪܸ̈ܓ݂ܠܲܝܟܿܘܿܢ. ܦܸܨܘ ܥܠܲܝܗܘܿܢ ܠܣܵܗܕܘܬ݂ܵܐ.

⁶ ܘܲܢܦܲܩܘ ܫܠܝܼܚܹ̈ܐ. ܘܡܸܬ݂ܟܲܪܟܿܝܼܢ ܗ̄ܘܼܵܘ ܒܩܘܼܪ̈ܝܵܐ ܘܒܲܡܕ݂ܝܼ̈ܢܵܬ݂ܵܐ. ܘܲܡܣܲܒܪܝܼܢ ܗ̄ܘܼܵܘ ܘܡܲܐܣܹܝܢ ܒܟ݂ܠ ܕܘܼܟ.

⁷ ܫܡܲܥ ܕܹܝܢ ܗܹܪܘܿܕܸܣ ܛܸܛܪܲܪܟܵܐ ܟܠܗܹܝܢ ܕܗܵܘܝܵܢ ܗ̄ܘܲܝ̈ ܒܐܝܕܹܗ. ܘܡܸܬ݁ܕܲܡܲܪ ܗ̄ܘܵܐ. ܡܛܠ ܕܐܵܡܪܝܼܢ ܗ̄ܘܼܵܘ ܐ̄ܢܵܫ̈ܝܼܢ. ܕܝܘܿܚܲܢܵܢ ܩܵܡ ܡܸܢ ܒܹܝܬ݂ ܡܝܼܬܹ̈ܐ.

⁸ ܐ̄ܚܪܵܢܹ̈ܐ ܕܹܝܢ ܐܵܡܪܝܼܢ ܗ̄ܘܼܵܘ. ܕܐܹܠܝܼܵܐ ܐܸܬ݂ܚܙܝܼ. ܘܐܲܚܪܵܢܹܐ. ܕܲܢܒ݂ܝܼܵܐ ܡܸܢ ܢܒ݂ܝܹ̈ܐ ܩܲܕ݂ܡܵܝܹ̈ܐ. ܩܵܡ.

⁹ ܘܐܸܡܲܪ ܗܹܪܘܿܕܸܣ. ܪܹܫܹܗ ܕܝܘܿܚܲܢܵܢ. ܐܸܢܵܐ ܦܸܣܩܹܬ݂. ܡܲܢܘܼ ܕܹܝܢ ܗܵܢܵܐ ܕܗܵܠܹܝܢ ܫܵܡܲܥ ܐ̄ܢܵܐ ܥܠܵܘܗܝ. ܘܨܵܒܹܐ ܗܘ̣ܵܐ ܕܢܸܚܙܹܝܘܗܝ.

¹⁰ ܘܟܲܕ݂ ܗܦܲܟ݂ܘ ܫܠܝܼܚܹ̈ܐ. ܐܸܫܬܲܥܝܼܘ ܠܝܼܫܘܿܥ ܟܠ ܡܸܕܸܡ ܕܲܥܒܲܕ݂ܘ. ܘܲܕ݂ܒܲܪ ܐܸܢܘܿܢ ܒܲܠܚܘܿܕ݂ܲܝܗܘܿܢ. ܠܐܲܬ݂ܪܵܐ ܚܘܼܪܒܵܐ ܕܒܹܝܬ݂ ܨܲܝܵܕ݂ܵܐ.

¹¹ ܟܸܢܫܹ̈ܐ ܕܹܝܢ ܟܲܕ݂ ܝܼܕ݂ܲܥܘ. ܐܸܙܲܠܘ ܒܵܬ݂ܪܹܗ. ܘܩܲܒܸܠ ܐܸܢܘܿܢ ܘܲܡܡܲܠܸܠ ܗܘ̣ܵܐ ܥܲܡܗܘܿܢ ܥܲܠ ܡܲܠܟܘܼܬ݂ܵܐ ܕܐܲܠܵܗܵܐ. ܘܠܲܐܝܠܹܝܢ ܕܲܣܢܝܼܩܝܼܢ ܗ̄ܘܼܵܘ ܥܲܠ ܐܵܣܝܘܼܬ݂ܵܐ. ܡܲܐܣܹܐ ܗ̄ܘܵܐ.

¹² ܟܲܕ݂ ܕܹܝܢ ܫܲܪܝܼ ܝܵܘܡܵܐ ܠܡܸܨܠܵܐ. ܩܪܸܒ݂ܘ ܬܲܠܡܝܼܕ݂ܵܘ̈ܗܝ. ܘܐܵܡܪܝܼܢ ܠܹܗ. ܫܪܝܼ ܠܟܸܢܫܹ̈ܐ ܕܢܹܐܙܠ̄ܘܼܢ ܠܩܘܼܪ̈ܝܵܐ ܕܲܚܕ݂ܵܪܲܝܢ ܘܲܠܟܲܦܪ̈ܘܿܢܹܐ ܕܢܸܫܪܘܿܢ ܒܗܘܿܢ ܘܢܸܫܟܚܘܼܢ ܠܗܘܿܢ ܣܲܝܒܵܪܬܵܐ. ܡܛܠ ܕܒܲܐܬ݂ܪܵܐ ܚܘܼܪܒܵܐ ܐܝܼܬܲܝܢ.

¹³ ܐܵܡܲܪ ܠܗܘܿܢ ܝܼܫܘܿܥ. ܗܲܒ݂ܘ ܠܗܘܿܢ ܐܲܢ̄ܬ݁ܘܿܢ ܠܡܹܐܟܲܠ. ܗܸܢܘܿܢ ܕܹܝܢ ܐܵܡܪܝܼܢ. ܠܲܝܬ݁ ܠܲܢ ܝܲܬ݁ܝܼܪ ܡܸܢ ܚܲܡܫܵܐ ܠܲܚ̈ܡܝܼܢ ܘܲܬ݂ܪܹܝܢ ܢܘܼܢ̈ܝܼܢ. ܐܸܠܵܐ ܐܸܢ ܐܸܙܲܠܢܲܢ ܘܲܙܒܲܢܲܢ ܣܲܝܒܵܪܬܵܐ ܠܗܵܢܵܐ ܟܠܹܗ ܥܲܡܵܐ.

¹⁴ ܗܵܘܹܝܢ ܗ̄ܘܼܵܘ ܓܹܝܪ ܐܲܝܟ݂ ܚܲܡܫܵܐ ܐܲܠܦ̈ܝܼܢ ܓܲܒ݂ܪ̈ܝܼܢ. ܐܵܡܲܪ ܠܗܘܿܢ ܝܼܫܘܿܥ. ܐܲܣܡܸܟ݂ܘ ܐܸܢܘܿܢ ܣܡܵܟܹ̈ܐ. ܚܲܡܫܝܼܢ ܐ̄ܢܵܫ̈ܝܼܢ ܒܲܣܡܵܟ݂ܵܐ.

¹⁵ ܘܲܥܒܲܕ݂ܘ ܗܵܟ݂ܘܵܬ݂ ܬܲܠܡܝܼܕܹ̈ܐ. ܘܐܲܣܡܸܟ݂ܘ ܠܟ݂ܠܗܘܿܢ.

¹⁶ ܘܲܢܣܲܒ݂ ܝܼܫܘܿܥ ܗܵܢܘܿܢ ܚܲܡܫܵܐ ܠܲܚ̈ܡܝܼܢ ܘܲܬ݂ܪܹܝܢ ܢܘܼܢ̈ܝܼܢ. ܘܚܵܪ ܒܲܫܡܲܝܵܐ. ܘܒܲܪܸܟ݂ ܘܲܩܨܵܐ ܘܝܲܗ̄ܒ݂ ܠܬܲܠܡܝܼܕ݂ܵܘ̈ܗܝ. ܕܲܢܣܝܼܡܘܼܢ ܠܟܸܢܫܹ̈ܐ.

¹⁷ ܘܐܸܟܲܠܘ ܟܠܗܘܿܢ ܘܲܣܒܲܥܘ. ܘܲܫܩܲܠܘ ܩܨܵܝܹ̈ܐ ܡܸܕܸܡ ܕܐܵܘܬܲܪܘ. ܬܪܸܥܣܲܪ ܩܘܿܦܝܼܢ̈ܝܼܢ.

¹⁸ ܘܟܲܕ݂ ܡܨܲܠܹܐ ܒܲܠܚܘܿܕ݂ܵܘܗܝ ܘܬܲܠܡܝܼܕ݂ܵܘ̈ܗܝ ܥܲܡܹܗ. ܫܲܐܸܠ ܐܸܢܘܿܢ ܘܐܸܡܲܪ. ܡܲܢܘܼ ܐܵܡܪܝܼܢ ܥܠܲܝ ܟܸܢܫܹ̈ܐ ܕܐܝܼܬܲܝ.

¹⁹ ܥܢܵܘ ܘܐܵܡܪܝܼܢ ܠܹܗ. ܕܝܘܿܚܲܢܵܢ ܡܲܥܡܕ݂ܵܢܵܐ. ܘܐܲܚܪܵܢܹܐ. ܕܐܹܠܝܼܵܐ. ܐ̄ܚܪܵܢܹ̈ܐ ܕܹܝܢ. ܕܲܢܒ݂ܝܼܵܐ ܚܲܕ݂ ܡܸܢ ܢܒ݂ܝܹ̈ܐ ܩܲܕ݂ܡܵܝܹ̈ܐ ܩܵܡ.

²⁰ ܐܵܡܲܪ ܠܗܘܿܢ ܐܲܢ̄ܬ݁ܘܿܢ ܕܹܝܢ. ܡܲܢܘܼ ܐܵܡܪܝܼܢ ܐܢ̄ܬܘܿܢ ܕܐܝܼܬܲܝ. ܥܢܵܐ ܫܸܡܥܘܿܢ. ܘܐܸܡܲܪ. ܡܫܝܼܚܹܗ ܕܐܲܠܵܗܵܐ.

²¹ ܗܘܼ ܕܹܝܢ ܟܐܵܐ ܒܗܘܿܢ ܘܙܲܗܲܪ ܐܸܢܘܿܢ. ܕܗܵܕܹܐ ܠܐ̄ܢܵܫ. ܠܵܐ ܢܹܐܡܪܘܼܢ.

²² ܘܐܸܡܲܪ ܠܗܘܿܢ. ܕܲܥܬ݂ܝܼܕ݂ ܗܘܼ ܒܪܹܗ ܕܐ̄ܢܵܫܵܐ ܕܣܲܓܝܼ̈ܐܵܬ݂ܵܐ ܢܸܚܲܫ. ܘܲܕ݂ܢܸܣܬ݁ܠܹܐ ܡܸܢ ܩܲܫܝܼܫܹ̈ܐ ܘܪ̈ܲܒܲܝ ܟܵܗܢܹ̈ܐ ܘܣܵܦܪܹ̈ܐ. ܘܢܸܩܛܠܘܼܢܵܝܗܝ ܘܲܠܝܵܘܡܵܐ ܕܲܬ݂ܠܵܬ݂ܵܐ. ܢܩܘܼܡ.

²³ ܘܐܵܡܲܪ ܗܘ̣ܵܐ ܩܕ݂ܵܡ ܟܠܢܵܫ. ܡܲܢ ܕܨܵܒܹܐ ܕܢܹܐܬܹܐ ܒܵܬܲܪܝ. ܢܸܟ݂ܦܘܿܪ ܒܢܲܦ̮ܫܹܗ. ܘܢܸܫܩܘܿܠ ܙܩܝܼܦܹܗ ܟܠܝܘܿܡ. ܘܢܹܐܬܹܐ ܒܵܬܲܪܝ.

²⁴ ܡܲܢ ܓܹܝܪ ܕܨܵܒܹܐ ܕܢܲܦ̮ܫܹܗ ܢܲܚܹܐ. ܡܵܘܒܸܕ݂ ܠܵܗ̇. ܡܲܢ ܕܹܝܢ ܕܢܵܘܒܸܕ݂ ܢܲܦ̮ܫܹܗ ܡܛܠܵܬ݂ܝ. ܗܵܢܵܐ ܡܲܚܹܐ ܠܵܗ̇.

²⁵ ܡܵܢܵܐ ܓܹܝܪ ܢܸܬ݂ܥܲܕܲܪ ܒܲܪ ܐ̄ܢܵܫܵܐ ܕܢܹܐܬܲܪ ܥܵܠܡܵܐ ܟܠܹܗ ܢܲܦ̮ܫܹܗ ܕܹܝܢ ܢܵܘܒܸܕ݂. ܐܵܘ ܢܸܚܣܲܪ.

²⁶ ܡܲܢ ܕܢܸܒ݂ܗܲܬ݂ ܒܝܼ ܕܹܝܢ ܘܲܒ݂ܡܸܠܲܝ̈. ܢܸܒ݂ܗܲܬ݂ ܒܹܗ ܒܪܹܗ ܕܐ̄ܢܵܫܵܐ ܡܵܐ ܕܐܵܬܹܐ ܒܫܘܼܒ݂ܚܵܐ ܕܐܲܒ݂ܘܼܗܝ. ܥܲܡ ܡܲܠܲܐܟ݂ܵܘ̈ܗܝ ܩܲܕܝܼܫܹ̈ܐ.

²⁷ ܫܪܵܪܵܐ ܐܵܡܲܪ ܐ̄ܢܵܐ ܠܟ݂ܘܿܢ ܕܐܝܼܬ݂ ܐ̄ܢܵܫܵܐ ܕܩܵܝܡܝܼܢ ܗܵܪܟܵܐ. ܕܠܵܐ ܢܸܛܥܡܘܼܢ ܡܵܘܬܵܐ ܥܕܲܡܵܐ ܕܢܸܚܙܘܿܢ ܡܲܠܟܘܼܬܹܗ ܕܐܲܠܵܗܵܐ.

²⁸ ܗܘ̣ܵܐ ܕܹܝܢ ܒܵܬܲܪ ܡܸܠܹ̈ܐ ܗܵܠܹܝܢ ܐܲܝܟ݂ ܬܡܵܢܝܵܐ ܝܵܘܡ̈ܝܼܢ. ܕܒܲܪ ܝܼܫܘܿܥ ܠܫܸܡܥܘܿܢ ܘܲܠܝܲܥܩܘܿܒ݂ ܘܲܠܝܘܿܚܲܢܵܢ. ܘܲܣܠܸܩ ܠܛܘܼܪܵܐ ܠܲܡܨܲܠܵܝܘܼ.

²⁹ ܘܟܲܕ݂ ܗܘܼ ܡܨܲܠܹܐ. ܐܸܬ݂ܚܲܠܲܦ ܚܸܙܘܵܐ ܕܐܲܦܵܘ̈ܗܝ. ܘܢܲܚ̈ܬܵܘܗܝ ܚܘܲܪܘ. ܘܡܲܒ݂ܪܩܝܼܢ ܗ̄ܘܼܵܘ.

³⁰ ܘܗܵܐ ܬܪܹܝܢ ܓܲܒ݂ܪ̈ܝܼܢ ܡܡܲܠܠܝܼܢ ܗ̄ܘܼܵܘ ܥܲܡܹܗ. ܕܐܝܼܬܲܝܗܘܿܢ ܡܘܼܫܹܐ ܘܐܹܠܝܼܵܐ.

³¹ ܕܐܸܬ݂ܚܙܝܼܘ ܒܬܸܫܒܿܘܿܚܬܵܐ. ܐܵܡܪܝܼܢ ܗ̄ܘܼܵܘ ܕܹܝܢ ܥܲܠ ܡܲܦܩܵܢܹܗ. ܕܲܥܬ݂ܝܼܕ݂ ܗܘ̣ܵܐ ܕܢܸܫܬܲܠܲܡ ܒܐܘܿܪܸܫܠܸܡ.

³² ܘܝܼܩܲܪܘ ܗ̄ܘܼܵܘ ܠܗܘܿܢ ܒܫܸܢܬ݂ܵܐ ܫܸܡܥܘܿܢ ܘܗܵܢܘܿܢ ܕܥܲܡܹܗ. ܘܲܠܡܲܚܣܸܢ ܐܸܬ݁ܬ݁ܥܝܼܪܘ ܘܲܚܙܵܘ ܫܘܼܒ݂ܚܹܗ ܘܲܠܗܵܢܘܿܢ ܬܪܹܝܢ ܐ̄ܢܵܫ̈ܝܼܢ ܕܩܵܝܡܝܼܢ ܗ̄ܘܼܵܘ ܠܘܵܬܹܗ.

³³ ܘܟܲܕ݂ ܫܲܪܝܼܘ ܠܡܸܦܪܲܫ ܡܸܢܹܗ. ܐܸܡܲܪ ܫܸܡܥܘܿܢ ܠܝܼܫܘܿܥ. ܪܲܒܝܼ. ܫܲܦܝܪ ܗ̄ܘܼ ܠܲܢ ܕܗܵܪܟܵܐ ܢܸܗܘܹܐ. ܘܢܸܥܒܸܕ݂ ܬܠܵܬ݂ ܡܲܛ̈ܠܝܼܢ. ܠܵܟ݂ ܚܕ݂ܵܐ ܘܲܠܡܘܼܫܹܐ ܚܕ݂ܵܐ. ܘܠܹܐܠܝܼܵܐ ܚܕ݂ܵܐ. ܘܠܵܐ ܝܵܕ݂ܲܥ ܗܘ̣ܵܐ ܡܵܢܵܐ ܐܵܡܲܪ.

³⁴ ܘܟܲܕ݂ ܐܸܡܲܪ ܗܵܠܹܝܢ. ܗܘܸܵܬ݂ ܥܢܵܢܵܐ ܘܐܲܛܠܲܬܸ ܥܠܲܝܗܘܿܢ. ܘܲܕ݂ܚܸܠܘ ܟܲܕ݂ ܚܙܵܘ ܠܡܘܼܫܹܐ ܘܠܹܐܠܝܼܵܐ ܕܥܲܠܘ ܒܲܥܢܵܢܵܐ.

³⁵ ܘܩܵܠܵܐ ܗܘ̣ܵܐ ܡܸܢ ܥܢܵܢܵܐ ܕܐܵܡܲܪ. ܗܵܢܵܘ ܒܹܪܝ ܚܲܒܝܼܒ݂ܵܐ. ܠܹܗ ܫܡܲܥܘ.

³⁶ ܘܟܲܕ݂ ܗܘ̣ܵܐ ܩܵܠܵܐ. ܐܸܫܬ݁ܟܲܚ ܝܼܫܘܿܥ ܒܲܠܚܘܿܕ݂ܵܘܗܝ. ܘܗܸܢܘܿܢ ܫܬܸܩܘ. ܘܲܠܐ̄ܢܵܫ ܠܵܐ ܐܸܡܲܪܘ ܒܗܵܢܘܿܢ ܝܵܘ̈ܡܵܬ݂ܵܐ ܡܸܕܸܡ ܕܲܚܙܵܘ.

³⁷ ܘܲܗܘܵܐ ܠܝܵܘܡܵܐ ܕܒ݂ܵܬ݂ܪܹܗ ܟܲܕ݂ ܢܵܚܬ݁ܝܼܢ ܡܸܢ ܛܘܼܪܵܐ. ܦܓܲܥ ܒܗܘܿܢ ܟܸܢܫܵܐ ܣܲܓܿܝܼܐܵܐ.

³⁸ ܘܓܲܒ݂ܪܵܐ ܚܲܕ݂ ܡܸܢ ܟܸܢܫܵܐ ܗܵܘ ܩܥܵܐ. ܘܐܸܡܲܪ. ܡܲܠܦܵܢܵܐ. ܒܵܥܹܐ ܐ̄ܢܵܐ ܡܸܢܵܟ݂ ܐܸܬ݂ܦܲܢܝ ܥܠܲܝ. ܒܹܪܝ ܕܝܼܚܝܼܕ݂ܵܝܵܐ ܗ̄ܘܼ ܠܝܼ.

³⁹ ܘܪܘܼܚܵܐ ܥܵܕ݂ܝܵܐ ܥܠܵܘܗܝ. ܘܡܸܢ ܫܸܠܝܵܐ ܩܵܥܹܐ ܘܲܡܚܲܪܸܩ ܫܸܢܵܘ̈ܗܝ. ܘܡܲܪܥܸܬ݂. ܘܲܠܡܲܚܣܸܢ ܦܵܪܩܵܐ ܡܸܢܹܗ ܡܵܐ ܕܲܫܚܲܩܬܹܗ.

⁴⁰ ܘܲܒ݂ܥܹܝܬ݂ ܡܸܢ ܬܲܠܡܝܼܕ݂ܲܝ̈ܟ ܕܢܲܦܩܘܼܢܵܝܗܝ. ܘܠܵܐ ܐܸܫܟܲܚܘ.

⁴¹ ܥܢܵܐ ܕܹܝܢ ܝܼܫܘܿܥ. ܘܐܸܡܲܪ. ܐܘܿܢ ܫܲܪܒܿܬ݂ܵܐ ܕܠܵܐ ܡܗܲܝܡܢܵܐ ܘܲܡܥܲܩܲܠܬܵܐ: ܥܕ݂ܲܡܵܐ ܠܐܸܡܲܬ݂ܝ ܐܸܗܘܹܐ ܠܘܵܬ݂ܟ݂ܘܿܢ. ܘܐܸܣܲܝܒܲܪܟ݂ܘܿܢ. ܩܲܪܸܒܲܝܗܝ ܠܟ݂ܵܐ ܠܲܒ݂ܪܵܟ݂.

⁴² ܘܟܲܕ݂ ܡܩܲܪܸܒ݂ ܠܹܗ. ܐܲܪܡܝܹܗ ܕܲܝܘܵܐ ܗܵܘ ܘܡܲܥܣܹܗ. ܘܲܟ݂ܐܵܐ ܝܼܫܘܿܥ ܒܪܘܼܚܵܐ ܗܵܝ ܛܲܢܦܬ݂ܵܐ. ܘܐܲܣܝܹܗ ܠܛܲܠܝܵܐ. ܘܝܲܗܒܹܗ ܠܐܲܒ݂ܘܼܗܝ.

⁴³ ܘܐܸܬ݁ܕܲܡܲܪܘ ܟܠܗܘܿܢ ܒܪܲܒܘܼܬܹܗ ܕܐܲܠܵܗܵܐ. ܘܟܲܕ݂ ܟܠܢܵܫ ܡܸܬ݁ܕܲܡܲܪ ܗܘ̣ܵܐ ܥܲܠ ܟܠ ܕܥܵܒܹܿܕ݂ ܝܼܫܘܿܥ. ܐܸܡܲܪ ܠܬܲܠܡܝܼܕ݂ܵܘ̈ܗܝ.

⁴⁴ ܣܝܼܡܘ ܐܲܢ̄ܬ݁ܘܿܢ ܡܸܠܹ̈ܐ ܗܵܠܹܝܢ ܒܐܕ݂ܢܲܝ̈ܟܿܘܿܢ. ܒܪܹܗ ܓܹܝܪ ܕܐ̄ܢܵܫܵܐ. ܥܬ݂ܝܼܕ݂ ܕܢܸܫܬ݁ܠܸܡ ܒܐܝܕ݂ܲܝ̈ ܒܢܲܝ̈ܢܵܫܵܐ.

⁴⁵ ܗܸܢܘܿܢ ܕܹܝܢ ܠܵܐ ܐܸܫܬܵܘܕܥܘܼܗ̇ ܠܡܸܠܬ݂ܵܐ ܗܵܕܹܐ. ܡܛܠ ܕܲܡܟܲܣܝܵܐ ܗ̄ܘܵܬ݂ ܡܸܢܗܘܿܢ. ܕܠܵܐ ܢܸܕ݂ܥܘܼܢܵܗ̇. ܘܕ݂ܵܚܠܝܼܢ ܗ̄ܘܼܵܘ ܕܲܢܫܲܐܠܘܼܢܵܝܗܝ ܥܠܹܝܗ̇ ܥܲܠ ܡܸܠܬ݂ܵܐ ܗܵܕܹܐ.

⁴⁶ ܘܥܸܠܲܬܸ ܒܗܘܿܢ ܡܲܚܫܲܒ݂ܬܵܐ. ܕܡܲܢܘܼ ܟܲܝ ܪܲܒ ܒܗܘܿܢ.

⁴⁷ ܝܼܫܘܿܥ ܕܹܝܢ ܝܼܕ݂ܲܥ ܡܲܚܫܲܒ݂ܬ݂ܐ ܕܠܸܒܗܘܿܢ. ܘܲܢܣܲܒ݂ ܛܲܠܝܵܐ ܘܐܲܩܝܼܡܹܗ ܠܘܵܬܹܗ.

⁴⁸ ܘܐܸܡܲܪ ܠܗܘܿܢ. ܡܲܢ ܕܲܡܩܲܒܸܠ ܛܲܠܝܵܐ ܐܲܝܟ݂ ܗܵܢܵܐ ܒܫܹܡܝ. ܠܝܼ ܗ̄ܘܼ ܡܩܲܒܸܿܠ. ܘܡܲܢ ܕܠܝܼ ܡܩܲܒܸܿܠ. ܡܩܲܒܸܿܠ ܠܡܲܢ ܕܫܲܕܪܲܢܝ. ܐܲܝܢܵܐ ܓܹܝܪ ܕܲܙܥܘܿܪ ܒܟ݂ܠܟ݂ܘܿܢ. ܗܵܢܵܐ ܢܸܗܘܹܐ ܪܲܒ.

⁴⁹ ܘܲܥܢܵܐ ܝܘܿܚܲܢܵܢ. ܘܐܸܡܲܪ. ܪܲܒܲܢ. ܚܙܲܝܢ ܐ̄ܢܵܫ ܕܡܲܦܸܩ ܕܲܝ̈ܘܹܐ ܒܲܫܡܵܟ݂. ܘܲܟ݂ܠܲܝܢܵܝܗܝ. ܥܲܠ ܕܠܵܐ ܐܸܬ݂ܵܐ ܥܲܡܲܢ ܒܵܬ݂ܪܵܟ݂.

⁵⁰ ܐܵܡܲܪ ܠܗܘܿܢ ܝܼܫܘܿܥ. ܠܵܐ ܬܸܟ݂ܠܘܼܢ ܡܲܢ ܓܹܝܪ ܕܠܵܐ ܗܘ̣ܵܐ ܠܘܼܩܒܲܠܟ݂ܘܿܢ. ܚܠܵܦܲܝܟܿܘܿܢ ܗ̄ܘܼ.

⁵¹ ܘܲܗܘܵܐ ܕܟܲܕ݂ ܡܸܬ݂ܡܲܠܹܝܢ ܝܵܘ̈ܡܵܬ݂ܵܐ ܕܣܘܼܠܵܩܹܗ. ܐܲܬ݂ܩܸܢ ܦܲܪܨܘܿܦܹܗ ܕܢܹܐܙܲܠ ܠܐܘܿܪܸܫܠܸܡ.

⁵² ܘܫܲܕܲܪ ܡܲܠܲܐܟܹ̈ܐ ܩܕ݂ܵܡ ܦܲܪܨܘܿܦܹܗ. ܘܐܸܙܲܠܘ ܥܲܠܘ ܠܲܩܪܝܼܬ݂ܵܐ ܕܫܵܡܪ̈ܵܝܹܐ ܐܲܝܟ݂ ܕܢܲܬ݂ܩܢܘܼܢ ܠܹܗ.

⁵³ ܘܠܵܐ ܩܲܒܿܠܘܼܗܝ. ܡܛܠ ܕܦܲܪܨܘܿܦܹܗ. ܠܐܘܿܪܸܫܠܸܡ ܣܝܼܡ ܗܘ̣ܵܐ ܠܡܹܐܙܲܠ.

⁵⁴ ܘܟܲܕ݂ ܚܙܵܘ ܝܲܥܩܘܿܒ݂ ܘܝܘܿܚܲܢܵܢ ܬܲܠܡܝܼܕ݂ܵܘ̈ܗܝ. ܐܵܡܪܝܼܢ ܠܹܗ. ܡܵܪܲܢ. ܨܵܒܹܐ ܐܲܢ̄ܬ݁ ܕܢܹܐܡܲܪ: ܘܬܸܚܘܿܬ݂ ܢܘܼܪܵܐ ܡܸܢ ܫܡܲܝܵܐ ܘܲܬ݁ܣܝܼܦ ܐܸܢܘܿܢ: ܐܲܝܟ݂ ܕܐܵܦ ܐܹܠܝܼܵܐ ܥܒܲܕ݂.

⁵⁵ ܘܐܸܬ݂ܦܢܝܼ ܘܲܟ݂ܐܵܐ ܒܗܘܿܢ. ܘܐܸܡܲܪ. ܠܵܐ ܝܵܕ݂ܥܝܼܢ ܐܢ̄ܬܘܿܢ ܕܐܲܝܕ݂ܵܐ ܐܲܢ̄ܬ݁ܘܿܢ ܪܘܼܚܵܐ.

⁵⁶ ܒܪܹܗ ܓܹܝܪ ܕܐ̄ܢܵܫܵܐ. ܠܵܐ ܐܸܬ݂ܵܐ ܠܡܵܘܒܵܕ݂ܘܼ ܢܲܦ̮̈ܫܵܬ݂ܵܐ ܐܸܠܵܐ ܠܡܲܚܵܝܘܼ. ܘܐܸܙܲܠܘ ܠܗܘܿܢ ܠܲܩܪܝܼܬ݂ܵܐ ܐ̄ܚܪܹܬ݂ܵܐ.

⁵⁷ ܘܟܲܕ݂ ܐܵܙܠ̄ܝܼܢ ܒܐܘܼܪܚܵܐ. ܐܸܡܲܪ ܠܹܗ ܐ̄ܢܵܫ. ܐܹܬܹܐ ܒܵܬ݂ܪܵܟ݂ ܠܐܲܬܲܪ ܕܐܵܙܹܠ ܐܲܢ̄ܬ݁. ܡܵܪܝ.

⁵⁸ ܐܵܡܲܪ ܠܹܗ ܝܼܫܘܿܥ. ܠܬܲܥܠܹ̈ܐ. ܢܸܩܥܹ̈ܐ ܐܝܼܬ݂ ܠܗܘܿܢ. ܘܲܠܦܵܪܲܚܬ݂ܵܐ ܕܲܫܡܲܝܵܐ. ܡܲܛܠܠܵܐ. ܠܲܒ݂ܪܹܗ ܕܹܝܢ ܕܐ̄ܢܵܫܵܐ. ܠܲܝܬ݁ ܠܹܗ ܐܲܝܟܵܐ ܕܢܸܣܡܘܿܟ݂ ܪܹܫܹܗ.

⁵⁹ ܘܐܸܡܲܪ ܠܐܲܚܪܹܢܵܐ ܬܵܐ ܒܵܬܲܪܝ. ܗܘܼ ܕܹܝܢ ܐܸܡܲܪ ܠܹܗ. ܡܵܪܝ. ܐܲܦܸܣ ܠܝܼ ܠܘܼܩܕ݂ܲܡ ܐܹܙܲܠ ܐܸܩܒܿܘܼܪ ܐܵܒ݂ܝ.

⁶⁰ ܐܵܡܲܪ ܠܹܗ ܝܼܫܘܿܥ. ܫܒ݂ܘܿܩ ܡܝܼܬܹ̈ܐ ܩܵܒ݂ܪܝܼܢ ܡܝܼܬܲܝ̈ܗܘܿܢ. ܘܐܲܢ̄ܬ݁ ܙܸܠ ܣܲܒܲܪ ܡܲܠܟܘܼܬܹܗ ܕܐܲܠܵܗܵܐ.

⁶¹ ܐܵܡܲܪ ܠܹܗ ܐ̄ܚܪܹܢܵܐ. ܐܹܬܹܐ ܒܵܬ݂ܪܵܟ݂ ܡܵܪܝ. ܠܘܼܩܕ݂ܲܡ ܕܹܝܢ ܐܲܦܸܣ ܠܝܼ ܐܹܙܲܠ ܐܹܫܲܠܸܡ ܠܲܒ݂ܢܲܝ̈ ܒܲܝܬ݁ܝ. ܘܐܹܬܹܐ.

⁶² ܐܵܡܲܪ ܠܹܗ ܝܼܫܘܿܥ. ܠܵܐ ܐ̄ܢܵܫ ܪܵܡܹܐ ܐܝܼܕܹܗ ܥܲܠ ܚܲܪܒܵܐ ܕܦܲܕܵܢܵܐ. ܘܚܵܐܲܪ ܠܒܸܣܬ݁ܪܹܗ ܘܚܵܫܲܚ ܠܡܲܠܟܿܘܼܬܹܗ ܕܐܲܠܵܗܵܐ.

10

¹ ܒܵܬܲܪ ܗܵܠܹܝܢ. ܦܪܲܫ ܝܼܫܘܿܥ ܡܸܢ ܬܲܠܡܝܼܕ݂ܵܘ̈ܗܝ ܐ̄ܚܪ̈ܵܢܹܐ. ܫܲܒ݂ܥܝܼܢ. ܘܫܲܕܲܪ ܐܸܢܘܿܢ ܬܪܹܝܢ ܬܪܹܝܢ ܩܕ݂ܵܡ ܦܲܪܨܘܿܦܹܗ ܠܟ݂ܠ ܐܲܬܲܪ ܘܲܡܕ݂ܝܼܢܵܐ. ܕܲܥܬ݂ܝܼܕ݂ ܗܘ̣ܵܐ ܠܡܹܐܙܲܠ.

² ܘܐܸܡܲܪ ܠܗܘܿܢ ܚܨܵܕ݂ܵܐ ܣܲܓܝܼ ܘܦܵܥ̈ܠܹܐ ܙܥܘܿܪ̈ܝܼܢ. ܒܥܵܘ ܗܵܟܹܝܠ ܡܸܢ ܡܵܪܹܐ ܚܨܵܕ݂ܵܐ. ܕܢܲܦܸܩ ܦܵܥ̈ܠܹܐ ܠܲܚܨܵܕ݂ܗ.

³ ܙܸܠܘ. ܗܵܐ ܐܸܢܵܐ ܡܫܲܕܲܪ ܐ̄ܢܵܐ ܠܟ݂ܘܿܢ. ܐܲܝܟ݂ ܐܸܡܪܹ̈ܐ ܒܲܝܢܲܝ ܕܹܐܒܹ̈ܐ.

⁴ ܠܵܐ ܬܸܫܩܠܘܼܢ ܠܟ݂ܘܿܢ ܟܝܼܣܹ̈ܐ. ܘܠܵܐ ܬܲܪ̈ܡܵܠܹܐ ܘܠܵܐ ܡܣܵܢܹ̈ܐ. ܘܒܲܫܠܵܡܵܐ ܕܐ̄ܢܵܫ ܒܐܘܼܪܚܵܐ. ܠܵܐ ܬܸܫܐܠܘܼܢ.

⁵ ܘܠܲܐܝܢܵܐ ܒܲܝܬܵܐ ܕܥܵܐܠܝܼܢ ܐܢ̄ܬܘܿܢ. ܠܘܼܩܕ݂ܲܡ ܐܸܡܲܪܘ. ܫܠܵܡܵܐ ܠܒܲܝܬܵܐ ܗܵܢܵܐ.

⁶ ܘܐܸܢ ܐܝܼܬ݂ ܬܲܡܵܢ ܒܲܪ ܫܠܵܡܵܐ. ܢܸܬ݁ܬ݁ܢܝܼܚ ܥܠܵܘܗܝ ܫܠܵܡܟ݂ܘܿܢ. ܐܸܢ ܕܹܝܢ ܠܵܐ. ܥܠܲܝܟܿܘܿܢ ܢܸܗܦܘܼܟ݂.

⁷ ܒܹܗ ܕܹܝܢ ܒܒܲܝܬܵܐ ܗܘܵܘ. ܟܲܕ݂ ܠܵܥܣܝܼܢ ܐܢ̄ܬܘܿܢ ܘܫܵܬܹܝܢ ܡܸܢ ܕܝܼܠܗܘܿܢ. ܫܵܘܹܐ ܗ̄ܘܼ ܓܹܝܪ ܦܵܥܠܵܐ ܐܲܓ݂ܪܹܗ. ܘܠܵܐ ܬܫܲܢܿܘܢ ܡܸܢ ܒܲܝܬܵܐ ܠܒܲܝܬܵܐ.

⁸ ܘܠܲܐܝܕ݂ܵܐ ܡܕ݂ܝܼܢ̄ܬܵܐ ܕܥܵܐܠܝܼܢ ܐܢ̄ܬܘܿܢ ܘܲܡܩܲܒܠܝܼܢ ܠܟ݂ܘܿܢ. ܠܥܲܣܘ ܡܸܕܸܡ ܕܡܸܬ݁ܬ݁ܣܝܼܡ ܠܟ݂ܘܿܢ.

⁹ ܘܐܲܣܵܘ ܠܐܲܝܠܹܝܢ ܕܲܟ݂ܪ̈ܝܼܗܝܼܢ ܒܵܗ̇. ܘܐܸܡܲܪܘ ܠܗܘܿܢ. ܩܸܪܒܲܬ݂ ܥܠܲܝܟܿܘܿܢ ܡܲܠܟܘܼܬܹܗ ܕܐܲܠܵܗܵܐ.

¹⁰ ܠܐܲܝܕ݂ܵܐ ܡܕ݂ܝܼܢ̄ܬܵܐ ܕܹܝܢ ܕܥܵܐܠܝܼܢ ܐܢ̄ܬܘܿܢ ܘܠܵܐ ܢܩܲܒܠܘܼܢܵܟ݂ܘܿܢ. ܦܘܿܩܘ ܠܟ݂ܘܿܢ ܠܫܘܼܩܵܐ. ܘܐܸܡܲܪܘ.

¹¹ ܘܐܵܦ ܚܸܠܐ ܕܲܕ݂ܒܸܩ ܠܲܢ ܒܪܸܓ݂ܠܲܝܢ ܡܸܢ ܡܕ݂ܝܼܢ̱ܬ݁ܟ݂ܘܿܢ. ܢܵܦܨܝܼܢ ܚ̱ܢܲܢ ܠܟ݂ܘܿܢ. ܒܪܲܡ ܗܵܕܹܐ ܕܲܥܘ. ܕܩܸܪܒܲܬ݂ ܠܵܗ̇ ܥܠܲܝܟܿܘܿܢ ܡܲܠܟܘܼܬܹܗ ܕܐܲܠܵܗܵܐ.

¹² ܐܵܡܲܪ ܐ̄ܢܵܐ ܠܟ݂ܘܿܢ. ܕܠܲܣܕ݂ܘܼܡ ܢܸܗܘܹܐ ܢܝܼܚ ܒܝܵܘܡܵܐ ܗܵܘ. ܐܵܘ ܠܲܡܕ݂ܝܼܢ̄ܬܵܐ ܗܵܝ.

¹³ ܘܵܝ ܠܹܟ݂ܝ ܟܘܼܪܙܝܼܢ: ܘܵܝ ܠܹܟ݂ܝ ܒܹܝܬ݂ ܨܲܝܵܕ݂ܵܐ: ܕܐܸܠܘܼ ܒܨܘܿܪ ܘܲܒ݂ܨܲܝܕܵܢ ܗܘܵܘ ܚܲܝ̈ܠܹܐ ܕܲܗܘܵܘ ܒܟܹܝܢ. ܟܒܲܪ ܕܹܝܢ ܒܣܲܩܹ̈ܐ ܘܲܒ݂ܩܸܛܡܵܐ. ܬܵܒ݂ܘ.

¹⁴ ܒܪܲܡ ܠܨܘܿܪ ܘܲܠܨܲܝܕܵܢ ܢܸܗܘܹܐ ܢܝܼܚ ܒܕ݂ܝܼܢܵܐ. ܐܵܘ ܠܟܹܝܢ.

¹⁵ ܘܐܲܢ̄ܬ݁ܝ ܟܦܲܪܢܵܚܘܿܡ ܗܵܝ ܕܲܥܕ݂ܲܡܵܐ ܠܲܫܡܲܝܵܐ ܐܸܬ݁ܬ݁ܪܝܼܡܬ݁ܝ. ܥܕ݂ܲܡܵܐ ܠܲܫܝܘܿܠ ܬܸܬܲܚܬܹ݁ܝܢ.

¹⁶ ܡܲܢ ܕܲܠܟ݂ܘܿܢ ܫܵܡܲܥ. ܠܝܼ ܫܵܡܲܥ. ܘܡܲܢ ܕܲܠܟ݂ܘܿܢ ܛܵܠܹܡ. ܠܝܼ ܗܘܼ ܛܵܠܹܡ. ܘܡܲܢ ܕܠܝܼ ܛܵܠܹܡ. ܛܵܠܹܡ ܠܡܲܢ ܕܫܲܠܚܲܢܝ.

¹⁷ ܘܲܗܦܲܟ݂ܘ ܗܵܢܘܿܢ ܫܲܒ݂ܥܝܼܢ ܕܫܲܕܲܪ ܒܚܲܕ݂ܘܼܬ݂ܵܐ ܪܲܒܬ݂ܵܐ. ܘܐܵܡܪܝܼܢ ܠܹܗ. ܡܵܪܲܢ. ܐܵܦ ܫܹܐܕܹ̈ܐ ܡܸܫܬܲܥܒܕ݂ܝܼܢ ܠܲܢ ܒܲܫܡܵܟ݂.

¹⁸ ܗܘܼ ܕܹܝܢ ܐܸܡܲܪ ܠܗܘܿܢ. ܚܵܙܹܐ ܗ̄ܘܹܝܬ݂ ܠܹܗ ܠܣܵܛܵܢܵܐ. ܕܲܢܦܲܠ ܐܲܝܟ݂ ܒܲܪܩܵܐ ܡܸܢ ܫܡܲܝܵܐ.

¹⁹ ܗܵܐ ܝܵܗܹܒ݂ ܐ̄ܢܵܐ ܠܟ݂ܘܿܢ ܫܘܼܠܛܵܢܵܐ. ܕܲܗܘܲܝܬ݁ܘܿܢ ܕܵܝܫܝܼܢ ܚ̈ܘܵܘܵܬ݂ܵܐ ܘܲܥܩܲܪ̈ܒܹܐ. ܘܟ݂ܠܹܗ ܚܲܝܠܹܗ ܕܲܒ݂ܥܸܠܕܒ݂ܵܒ݂ܵܐ. ܘܡܸܕܸܡ ܠܵܐ ܢܲܗܲܪܟ݂ܘܿܢ.

²⁰ ܒܪܲܡ ܒܗܵܕܹܐ ܠܵܐ ܬܸܚܕܘܿܢ. ܕܫܹܐܕܹ̈ܐ ܡܸܫܬܲܥܒܕ݂ܝܼܢ ܠܟ݂ܘܿܢ ܐܸܠܵܐ ܚܕ݂ܵܘ ܕܲܫܡܵܗܲܝ̈ܟܘܿܢ ܐܸܬ݂ܟܬܸܒ݂ܘ ܒܲܫܡܲܝܵܐ.

²¹ ܒܵܗ̇ ܒܫܵܥܬ݂ܵܐ ܪܘܲܙ ܝܼܫܘܿܥ ܒܪܘܼܚܵܐ ܕܩܘܼܕ݂ܫܵܐ. ܘܐܸܡܲܪ. ܡܵܘܕܹܐ ܐ̄ܢܵܐ ܠܵܟ݂ ܐܵܒ݂ܝ: ܡܵܪܵܐ ܕܲܫܡܲܝܵܐ ܘܕ݂ܲܐܪܥܵܐ. ܕܟܲܣܝܼܬ݁ ܗܵܠܹܝܢ ܡܸܢ ܚܲܟܝ̈ܡܹܐ ܘܣܲܟܘܼܠܬ݂ܵܢܹ̈ܐ. ܘܲܓ݂ܠܲܝܬ݁ ܐܸܢܹܝܢ ܠܝܲܠܘܼܕܹ̈ܐ. ܐܹܝܢ ܐܵܒ݂ܝ: ܕܗܵܟܲܢܵܐ ܗܘ̣ܵܐ ܨܸܒ݂ܝܵܢܵܐ ܩܕ݂ܵܡܲܝܟ.

²² ܘܐܸܬ݂ܦܢܝܼ ܠܘܵܬ݂ ܬܲܠܡܝܼܕ݂ܵܘ̈ܗܝ. ܘܐܸܡܲܪ ܠܗܘܿܢ. ܟܠܡܸܕܸܡ ܐܸܫܬ݁ܠܸܡ ܠܝܼ ܡܸܢ ܐܵܒ݂ܝ. ܘܠܵܐ ܐ̄ܢܵܫ ܝܵܕ݂ܲܥ ܡܲܢܘܼ ܒܪܵܐ ܐܸܠܵܐ ܐܸܢ ܐܲܒ݂ܵܐ ܘܡܲܢܘܼ ܐܲܒ݂ܵܐ ܐܸܠܵܐ ܐܸܢ ܒܪܵܐ. ܘܲܠܡܲܢ ܕܐܸܢ ܢܸܨܒܹܐ ܒܪܵܐ ܕܢܸܓ݂ܠܹܐ.

²³ ܘܐܸܬ݂ܦܢܝܼ ܠܘܵܬ݂ ܬܲܠܡܝܼܕ݂ܵܘ̈ܗܝ ܒܲܠܚܘܿܕ݂ܲܝܗܘܿܢ. ܘܐܸܡܲܪ. ܛܘܼܒܲܝܗܹܝܢ ܠܥܲܝܢܹ̈ܐ ܕܚܵܙܝܵܢ ܡܸܕܸܡ ܕܐܲܢ̄ܬ݁ܘܿܢ ܚܵܙܹܝܢ.

²⁴ ܐܵܡܲܪ ܐ̄ܢܵܐ ܠܟ݂ܘܿܢ ܓܹܝܪ. ܕܲܢܒ݂ܝܹ̈ܐ ܣܲܓܝܼܐܹ̈ܐ ܘܡܲܠܟܹ̈ܐ ܨܒ݂ܵܘ ܕܢܸܚܙܘܿܢ ܡܸܕܸܡ ܕܚܵܙܹܝܢ ܐܢ̄ܬܘܿܢ. ܘܠܵܐ ܚܙܵܘ ܘܲܠܡܸܫܡܲܥ ܡܸܕܸܡ ܕܐܲܢ̄ܬ݁ܘܿܢ ܫܵܡܥܝܼܢ. ܘܠܵܐ ܫܡܲܥܘ.

²⁵ ܘܗܵܐ ܣܵܦܪܵܐ ܚܲܕ݂ ܩܵܡ ܕܲܢܢܲܣܹܝܘܗܝ. ܘܐܸܡܲܪ. ܡܲܠܦܵܢܵܐ. ܡܵܢܵܐ ܐܸܥܒܸܕ݂ ܕܐܹܪܲܬ݂ ܚܲܝܹ̈ܐ ܕܲܠܥܵܠܲܡ.

²⁶ ܗܘܼ ܕܹܝܢ ܝܼܫܘܿܥ ܐܸܡܲܪ ܠܹܗ. ܒܢܵܡܘܿܣܵܐ ܐܲܝܟܲܢܵܐ ܟܬ݂ܝܼܒ݂. ܐܲܝܟܲܢܵܐ ܩܵܪܹܐ ܐܲܢ̄ܬ݁.

²⁷ ܥܢܵܐ. ܘܐܸܡܲܪ ܠܹܗ. ܕܬܸܪܚܲܡ ܠܡܵܪܝܵܐ ܐܲܠܵܗܵܟ݂. ܡܸܢ ܟܠܹܗ ܠܸܒܵܟ݂. ܘܡܸܢ ܟܠܵܗ̇ ܢܲܦ̮ܫܵܟ݂. ܘܡܸܢ ܟܠܹܗ ܚܲܝܠܵܟ݂. ܘܡܸܢ ܟܠܹܗ ܪܸܥܝܵܢܵܟ݂. ܘܲܠܩܲܪܝܼܒ݂ܵܟ݂. ܐܲܝܟ݂ ܢܲܦ̮ܫܵܟ݂.

²⁸ ܐܵܡܲܪ ܠܹܗ ܝܼܫܘܿܥ. ܬܪܝܼܨܵܐܝܼܬ݂ ܐܸܡܲܪܬ݁. ܗܵܕܹܐ ܥܒܸܕ݂. ܘܬܸܚܹܐ.

²⁹ ܗܘܼ ܕܹܝܢ ܟܲܕ݂ ܨܒ݂ܵܐ ܠܲܡܙܲܕܵܩܘܼ ܢܲܦ̮ܫܹܗ. ܐܸܡܲܪ ܠܹܗ. ܘܡܲܢܘܼ ܩܲܪܝܼܒ݂ܝ.

³⁰ ܐܵܡܲܪ ܠܹܗ ܝܼܫܘܿܥ. ܓܲܒ݂ܪܵܐ ܚܲܕ݂ ܢܚܸܬ݂ ܗܘ̣ܵܐ ܡܸܢ ܐܘܿܪܸܫܠܸܡ ܠܐܝܼܪܝܼܚܘܿ. ܘܲܢܦܲܠܘ ܥܠܵܘܗܝ ܠܸܣܛܵܝܹ̈ܐ. ܘܫܲܠܚܘܼܗܝ ܘܲܡܚܵܐܘܼܗܝ. ܘܫܲܒ݂ܩܘܼܗܝ ܟܲܕ݂ ܩܲܠܝܼܠ ܩܲܝܵܡܵܐ ܒܹܗ ܢܲܦ̮ܫܵܐ. ܘܐܸܙܲܠܘ.

³¹ ܘܲܓ݂ܕ݂ܲܫ ܟܵܗܢܵܐ ܚܲܕ݂ ܢܚܸܬ݂ ܗܘ̣ܵܐ ܒܐܘܼܪܚܵܐ ܗܵܝ. ܘܲܚܙܵܝܗܝ. ܘܲܥܒܲܪ.

³² ܘܗܵܟܲܢܵܐ ܐܵܦ ܠܹܘܵܝܵܐ. ܐܸܬ݂ܵܐ ܡܛܵܐ ܠܗܵܝ ܕܘܼܟܬ݂ܵܐ ܘܲܚܙܵܝܗܝ. ܘܲܥܒܲܪ.

³³ ܐ̄ܢܵܫ ܕܹܝܢ ܫܵܡܪܵܝܵܐ ܟܲܕ݂ ܪܵܕܹܐ ܗ̄ܘܵܐ. ܐܸܬ݂ܵܐ ܐܲܝܟܵܐ ܕܐܝܼܬ݂ܵܘܗܝ ܗ̄ܘܵܐ. ܘܲܚܙܵܝܗܝ. ܘܐܸܬ݂ܪܲܚܲܡ ܥܠܵܘܗܝ.

³⁴ ܘܐܸܬ݂ܩܲܪܲܒ݂. ܘܲܥܨܲܒ݂ ܡܲܚ̈ܘܵܬܹܗ. ܘܲܢܨܲܠ ܥܠܲܝܗܹܝܢ ܚܲܡܪܵܐ ܘܡܸܫܚܵܐ. ܘܣܵܡܹܗ ܥܲܠ ܚܡܵܪܹܗ. ܘܐܲܝܬ݁ܝܼܗ ܠܦܘܼܬ݁ܩܵܐ. ܘܐܸܬ݂ܒܛܸܠ ܠܹܗ ܥܠܵܘܗܝ.

³⁵ ܘܲܠܨܲܦܪܹܗ ܕܝܵܘܡܵܐ. ܐܲܦܸܩ ܬܪܹܝܢ ܕܝܼܢܵܪ̈ܝܼܢ. ܝܲܗ̄ܒ݂ ܠܦܘܼܬ݁ܩܵܝܵܐ. ܘܐܸܡܲܪ ܠܹܗ. ܝܼܨܲܦ ܕܝܼܠܹܗ. ܘܐܸܢ ܡܸܕܸܡ ܝܲܬ݁ܝܼܪ ܬܲܦܸܩ. ܡܵܐ ܕܗܵܦ݂ܹܟ݂ ܐ̄ܢܵܐ ܝܵܗܹܒ݂ ܐ̄ܢܵܐ ܠܵܟ݂.

³⁶ ܡܲܢܘܼ ܗܵܟܹܝܠ ܡܸܢ ܗܵܠܹܝܢ ܬܠܵܬ݂ܵܐ ܡܸܬ݂ܚܙܹܐ ܠܵܟ݂ ܕܲܗܘܵܐ ܩܲܪܝܼܒ݂ܵܐ ܠܗܵܘ ܕܲܢܦܲܠ ܒܐܝܕ݂ܲܝ̈ ܓܲܝܵܣܹ̈ܐ.

³⁷ ܗܘܼ ܕܹܝܢ ܐܸܡܲܪ. ܗܵܘ ܕܐܬ݂ܪܲܚܲܡ ܥܠܵܘܗܝ. ܐܵܡܲܪ ܠܹܗ ܝܼܫܘܿܥ. ܙܸܠ. ܐܵܦ ܐܲܢ̄ܬ݁ ܗܵܟܲܢܵܐ ܗܘܲܝܬ݁ ܥܵܒܹܿܕ݂.

³⁸ ܘܲܗܘܵܐ ܕܟܲܕ݂ ܗܸܢܘܿܢ ܪܵܕ݂ܝܢ ܒܐܘܼܪܚܵܐ. ܥܲܠ ܠܲܩܪܝܼܬ݂ܵܐ ܚܕ݂ܵܐ. ܘܐܲܢ̄ܬ݁ܬ݂ܵܐ ܕܲܫܡܵܗ̇ ܡܵܪܬܵܐ. ܩܲܒܸܠܬܹܗ ܒܒܲܝܬܵܗ̇.

³⁹ ܘܐܝܼܬ݂ ܗ̄ܘܵܬ݂ ܠܵܗ̇ ܚܵܬ݂ܵܐ ܕܲܫܡܵܗ̇ ܡܲܪܝܲܡ. ܘܐܸܬ݂ܵܬ݂ ܝܼܬ݂ܒܲܬ݂ ܠܵܗ̇ ܠܘܵܬ݂ ܪܸ̈ܓ݂ܠܵܘܗܝ ܕܡܵܪܲܢ. ܘܫܵܡܥܵܐ ܗ̄ܘܵܬ݂ ܡܸܠܵܘ̈ܗܝ.

⁴⁰ ܡܵܪܬܵܐ ܕܹܝܢ ܥܲܢܝܵܐ ܗ̄ܘܵܬ݂ ܒܬܸܫ̈ܡܫܵܬ݂ܵܐ ܣܲܓܝܼ̈ܐܵܬ݂ܵܐ. ܘܐܸܬ݂ܵܬ݂ ܐܵܡܪܵܐ ܠܹܗ. ܡܵܪܝ. ܠܵܐ ܒܛܝܼܠ ܠܵܟ݂. ܕܚܵܬ݂ܝ ܫܒܲܩܬܲܢܝ ܒܲܠܚܘܿܕܿܝ ܠܲܡܫܲܡܵܫܘܼ. ܐܸܡܲܪ ܠܵܗ̇ ܡܥܲܕܪܵܐ ܠܝܼ.

⁴¹ ܥܢܵܐ ܕܹܝܢ ܝܼܫܘܿܥ. ܘܐܸܡܲܪ ܠܵܗ̇. ܡܵܪܬܵܐ ܡܵܪܬܵܐ. ܝܵܨܦܲܬ݁ܝ ܘܲܪܗܝܼܒܲܬ݁ܝ. ܥܲܠ ܣܲܓܝܼ̈ܐܵܬ݂ܵܐ.

⁴² ܚܕ݂ܵܐ ܗ̄ܝܼ ܕܹܝܢ ܕܡܸܬ݂ܒܲܥܝܵܐ. ܡܲܪܝܲܡ ܕܹܝܢ ܡܢܵܬ݂ܵܐ ܛܵܒ݂ܬ݂ܵܐ ܓ݁ܒ݂ܵܬ݂ ܠܵܗ̇. ܗܵܝ ܕܠܵܐ ܬܸܬ݂ܢܣܸܒ݂ ܡܸܢܵܗ̇.

11

¹ ܘܲܗܘܵܐ ܕܟܲܕ݂ ܗܘܼ ܡܨܲܠܹܐ ܒܕܘܼܟܬ݂ܵܐ ܚܕ݂ܵܐ. ܟܲܕ݂ ܫܲܠܸܡ. ܐܸܡܲܪ ܠܹܗ ܚܲܕ݂ ܡܸܢ ܬܲܠܡܝܼܕ݂ܵܘ̈ܗܝ. ܡܵܪܲܢ. ܐܲܠܸܦܲܝܢ ܠܲܡܨܲܠܵܝܘܼ: ܐܲܝܟܲܢܵܐ ܕܐܵܦ ܝܘܿܚܲܢܵܢ ܐܲܠܸܦ ܠܬܲܠܡܝܼܕ݂ܵܘ̈ܗܝ.

² ܐܵܡܲܪ ܠܗܘܿܢ ܝܼܫܘܿܥ. ܐܸܡܲܬ݂ܝ ܕܲܡܨܲܠܹܝܢ ܐܢ̄ܬܘܿܢ: ܗܵܟܲܢܵܐ ܗܘܲܝܬ݁ܘܿܢ ܐܵܡܪܝܼܢ. ܐܲܒ݂ܘܼܢ ܕܒܲܫܡܲܝܵܐ. ܢܸܬ݂ܩܲܕܲܫ ܫܡܵܟ݂. ܬܹܐܬܹܐ ܡܲܠܟܘܬ݂ܵܟ݂. ܢܸܗܘܹܐ ܨܸܒ݂ܝܵܢܵܟ݂. ܐܲܝܟ݂ ܕܒܲܫܡܲܝܵܐ. ܐܵܦ ܒܐܲܪܥܵܐ.

³ ܗܲܒ݂ ܠܲܢ ܠܲܚܡܵܐ ܕܣܘܼܢܩܵܢܲܢ ܟܠܝܘܼܡ.

⁴ ܘܲܫܒ݂ܘܿܩ ܠܲܢ ܚܛܵܗܲܝܢ. ܐܵܦ ܐܸܢܚܢܲܢ ܓܹܝܪ ܫܒܲܩܢ ܠܟ݂ܠ ܕܚܲܝܵܒ݂ܝܼܢ ܠܲܢ. ܘܠܵܐ ܬܲܥܠܲܢ ܠܢܸܣܝܘܿܢܵܐ. ܐܸܠܵܐ ܦܪܘܿܩܲܝܢ ܡܸܢ ܒܝܼܫܵܐ.

⁵ ܘܐܸܡܲܪ ܠܗܘܿܢ. ܡܲܢܘܼ ܡܸܢܟ݂ܘܿܢ ܕܐܝܼܬ݂ ܠܹܗ ܪܵܚܡܵܐ ܘܢܹܐܙܲܠ ܠܘܵܬܹܗ ܒܦܸܠܓܿܘܼܬ݂ ܠܸܠܝܵܐ. ܘܢܹܐܡܲܪ ܠܹܗ. ܪܵܚܹܡܝ. ܐܲܫܸܐܠܲܝܢܝ ܬܠܵܬ݂ ܓܪ̈ܝܼܨܵܢ.

⁶ ܡܛܠ ܕܪܵܚܡܵܐ ܐܸܬ݂ܵܐ ܠܘܵܬ݂ܝ ܡܸܢ ܐܘܼܪܚܵܐ. ܘܠܲܝܬ݁ ܠܝܼ ܡܸܕܸܡ ܕܐܹܣܝܼܡ ܠܹܗ.

⁷ ܘܗܵܘ ܪܵܚܡܹܗ ܡܸܢ ܠܓ݂ܵܘ ܢܸܥܢܹܐ. ܘܢܹܐܡܲܪ ܠܹܗ. ܠܵܐ ܬܲܗܲܪܲܝܢܝ. ܕܗܵܐ ܬܲܪܥܵܐ ܐܲܚܝܼܕ݂ ܗ̄ܘܼ. ܘܲܒܢܲܝ̈ ܥܲܡܝ ܒܥܲܪܣܵܐ. ܠܵܐ ܡܸܫܟܲܚ ܐ̄ܢܵܐ ܕܐܹܩܘܼܡ ܘܐܸܬܸ݁ܠ ܠܵܟ݂.

⁸ ܐܵܡܲܪ ܐ̄ܢܵܐ ܠܟ݂ܘܿܢ. ܕܐܸܢ ܡܛܠ ܪܵܚܡܘܼܬ݂ܵܐ ܠܵܐ ܢܸܬܸ݁ܠ ܠܹܗ. ܡܛܠ ܚܲܨܝܼܦܘܼܬܹܗ ܢܩܘܼܡ ܘܢܸܬܸ݁ܠ ܠܹܗ. ܟܡܵܐ ܕܡܸܬ݂ܒܥܹܐ ܠܹܗ.

⁹ ܐܵܦ ܐܸܢܵܐ ܐܵܡܲܪ ܐ̄ܢܵܐ ܠܟ݂ܘܿܢ. ܫܐܲܠܘ. ܘܢܸܬ݂ܝܼܗܸܒ݂ ܠܟ݂ܘܿܢ. ܒܥܵܘ. ܘܬܸܫܟܚܘܼܢ. ܩܘܿܫܘ. ܘܢܸܬ݂ܦܬܲܚ ܠܟ݂ܘܿܢ.

¹⁰ ܟܠ ܓܹܝܪ ܕܫܵܐܹܠ. ܢܵܣܹܒ݂. ܘܲܕ݂ܒ݂ܵܥܹܐ. ܡܸܫܟܲܚ. ܘܲܕ݂ܢܵܩܹܫ. ܡܸܬ݂ܦܬܲܚ ܠܹܗ.

¹¹ ܐܲܝܢܵܐ ܓܹܝܪ ܡܸܢܟ݂ܘܿܢ ܐܲܒ݂ܵܐ ܕܢܸܫܐܠܝܼܘܗܝ ܒܪܹܗ ܠܲܚܡܵܐ ܠܡܵܐ. ܟܹܐܦܵܐ ܡܵܘܫܸܛ ܠܹܗ. ܘܐܸܢ ܢܘܼܢܵܐ ܢܸܫܐܠܝܼܘܗܝ: ܠܡܵܐ. ܚܠܵܦ ܢܘܼܢܵܐ ܚܸܘܝܵܐ ܡܵܘܫܸܛ ܠܹܗ.

¹² ܘܐܸܢ ܒܲܪܬ݂ܵܐ ܢܸܫܐܠܝܼܘܗܝ: ܠܡܵܐ. ܗܘܼ ܥܩܲܪܒ݂ܵܐ ܡܵܘܫܸܛ ܠܹܗ.

¹³ ܘܐܸܢ ܐܲܢ̄ܬ݁ܘܿܢ ܕܒ݂ܝܼܫܹ̈ܐ ܐܝܼܬܲܝܟܿܘܿܢ (ܐܲܢ݇ܬܘܿܢ) ܝܵܕ݂ܥܝܼܢ ܐܢ̄ܬܘܿܢ ܡܵܘܗ̈ܒ݂ܵܬ݂ܵܐ ܛܵܒ݂̈ܵܬ݂ܵܐ ܠܡܸܬܲܠ ܠܲܒ݂ܢܲܝ̈ܟܿܘܿܢ. ܟܡܵܐ ܝܲܬܝܼܪܵܐܝܼܬ݂ ܐܲܒ݂ܘܼܟ݂ܘܼܢ ܡܸܢ ܫܡܲܝܵܐ ܢܸܬܸ݁ܠ ܪܘܼܚܵܐ ܕܩܘܼܕ݂ܫܵܐ ܠܐܲܝܠܹܝܢ ܕܫܵܐܠܝܼܢ ܠܹܗ.

¹⁴ ܘܟܲܕ݂ ܡܲܦܸܩ ܫܹܐܕ݂ܵܐ ܕܐܝܼܬ݂ܵܘܗܝ ܚܲܪܫܵܐ. ܗܘ̣ܵܐ ܕܟܲܕ݂ ܢܦܲܩ ܗܵܘ ܫܹܐܕ݂ܵܐ. ܡܲܠܸܠ ܗܵܘ ܚܲܪܫܵܐ. ܘܐܸܬ݁ܕܲܡܲܪܘ ܟܸܢܫܹ̈ܐ.

¹⁵ ܐ̄ܢܵܫܵܐ ܕܹܝܢ ܡܸܢܗܘܿܢ. ܐܸܡܲܪܘ. ܒܲܒ݂ܥܸܠܙܒ݂ܘܿܒ݂ ܪܹܫܵܐ ܕܕ݂ܲܝ̈ܘܹܐ ܡܲܦܸܩ ܗܵܢܵܐ ܕܲܝ̈ܘܹܐ.

¹⁶ ܐ̄ܚܪܵܢܹ̈ܐ ܕܹܝܢ ܟܲܕ݂ ܡܢܲܣܹܝܢ ܠܹܗ. ܐܵܬ݂ܵܐ ܡܸܢ ܫܡܲܝܵܐ ܫܵܐܠܝܼܢ ܗ̄ܘܼܵܘ ܠܹܗ.

¹⁷ ܝܼܫܘܿܥ ܕܹܝܢ ܕܝܵܕ݂ܲܥ ܗܘ̣ܵܐ ܡܲܚܫ̈ܒ݂ܵܬ݂ܗܘܿܢ. ܐܸܡܲܪ ܠܗܘܿܢ. ܟܠ ܡܲܠܟܘܼ ܕܬܸܬ݂ܦܲܠܲܓ݂ ܥܲܠ ܢܲܦ̮ܫܵܗ̇. ܬܸܚܪܲܒ݂. ܘܒܲܝܬܵܐ ܕܥܲܠ ܩܢܘܿܡܹܗ ܡܸܬ݂ܦܲܠܲܓ݂. ܢܸܦܸܠ.

¹⁸ ܘܐܸܢ ܣܵܛܵܢܵܐ ܥܲܠ ܢܲܦ̮ܫܹܗ ܐܸܬ݂ܦܲܠܲܓ݂. ܐܲܝܟܲܢܵܐ ܬܩܘܼܡ ܡܲܠܟܘܼܬܹܗ: ܕܐܵܡܪܝܼܢ ܐܢ̄ܬܘܿܢ ܕܒܲܒ݂ܥܸܠܙܒ݂ܘܿܒ݂ ܡܲܦܸܩ ܐ̄ܢܵܐ ܕܲܝ̈ܘܹܐ.

¹⁹ ܘܐܸܢ ܐܸܢܵܐ ܒܲܒ݂ܥܸܠܙܒ݂ܘܿܒ݂ ܡܲܦܸܩ ܐ̄ܢܵܐ ܕܲܝ̈ܘܹܐ. ܒܢܲܝ̈ܟܿܘܿܢ. ܒܡܵܢܵܐ ܡܲܦܩܝܼܢ. ܡܛܠ ܗܵܢܵܐ. ܗܸܢܘܿܢ ܢܸܗܘܘܿܢ ܠܟ݂ܘܿܢ ܕܲܝܵܢܹ̈ܐ.

²⁰ ܐܸܢ ܕܹܝܢ ܒܨܸܒ݂ܥܵܐ ܕܐܲܠܵܗܵܐ ܡܲܦܸܩ ܐ̄ܢܵܐ ܕܲܝ̈ܘܹܐ. ܩܸܪܒܲܬ݂ ܠܵܗ̇ ܥܠܲܝܟܿܘܿܢ ܡܲܠܟܘܼܬܹܗ ܕܐܲܠܵܗܵܐ.

²¹ ܐܸܡܲܬ݂ܝ ܕܚܲܣܝܼܢܵܐ ܟܲܕ݂ ܡܙܲܝܲܢ ܢܸܛܲܪ ܕܵܪܬܹ݁ܗ. ܒܫܲܝܢܵܐ ܗ̄ܘܼ ܩܸܢܝܵܢܹܗ.

²² ܐܸܢ ܕܹܝܢ ܢܹܐܬܹܐ ܡܲܢ ܕܚܲܣܝܼܢ ܡܸܢܹܗ ܢܸܙܟܹܝܘܗܝ. ܟܠܹܗ ܙܲܝܢܹܗ ܫܵܩܹܠ ܗܵܘ ܕܲܬ݂ܟ݂ܝܼܠ ܗܘ̣ܵܐ ܥܠܵܘܗܝ. ܘܒܸܙܬܹܗ ܡܦܲܠܸܓ݂.

²³ ܡܲܢ ܕܠܵܐ ܗܘ̣ܵܐ ܥܲܡܝ. ܠܘܼܩܒܲܠܝ ܗ̄ܘܼ. ܘܡܲܢ ܕܠܵܐ ܟܵܢܹܫ ܥܲܡܝ. ܡܒܲܕܵܪܘܼ ܡܒܲܕܲܪ.

²⁴ ܪܘܼܚܵܐ ܛܲܢܦܬ݂ܵܐ ܡܵܐ ܕܢܸܦܩܲܬ݂ ܡܸܢ ܒܲܪ ܐ̄ܢܵܫܵܐ. ܐܵܙܵܠ̄ܐ ܡܸܬ݂ܟܲܪܟܵܐ ܒܐܲܬ݂ܪ̈ܵܘܵܬ݂ܵܐ ܕܡܲܝ̈ܵܐ ܠܲܝܬ݁ ܒܗܘܿܢ. ܕܬܸܒ݂ܥܹܐ ܠܵܗ̇ ܢܝܵܚܵܐ. ܘܡܵܐ ܕܠܵܐ ܐܸܫܟܚܲܬ݂. ܐܵܡܪܵܐ. ܐܸܗܦܘܼܟ݂ ܠܒܲܝܬ݁ܝ ܐܲܝܡܸܟܵܐ ܕܢܸܦܩܹܬ݂.

²⁵ ܘܐܸܢ ܐܸܬܲܬܸ ܐܸܫܟܲܚܬܹܗ ܕܲܚܡܝܼܡ ܘܲܡܨܲܒܲܬ݂.

²⁶ ܗܵܝܕܹܝܢ ܐܵܙܵܠ̄ܐ ܕܵܒ݂ܪܵܐ ܫܒܲܥ ܪ̈ܘܼܚܝܼܢ ܐ̄ܚܪ̈ܵܢܝܵܢ ܕܒ݂ܝܼܫܵܢ ܡܸܢܵܗ̇. ܘܥܵܐܠܵܢ. ܘܥܵܡܪܵܢ ܬܲܡܵܢ. ܘܗܵܘܝܵܐ ܚܲܪܬܹܗ ܕܒܲܪܢܵܫܵܐ ܗܵܘ. ܒܝܼܫܵܐ ܡܸܢ ܩܲܕ݂ܡܵܝܬܹ݁ܗ.

²⁷ ܘܟܲܕ݂ ܗܵܠܹܝܢ ܡܡܲܠܸܠ ܗ̄ܘܵܐ. ܐܲܪܝܼܡܲܬ݂ ܐܲܢ̄ܬ݁ܬ݂ܵܐ ܚܕ݂ܵܐ ܩܵܠܵܗ̇ ܡܸܢ ܟܸܢܫܵܐ. ܘܐܸܡܪܲܬ݂ ܠܹܗ. ܛܘܼܒܹܝܗ̇ ܠܟܲܪܣܵܐ ܕܲܛܥܸܢܬ݂ܵܟ݂. ܘܠܲܬ݁ܕ݂ܲܝܵܐ ܕܐܲܝܢܩܘܼܟ݂.

²⁸ ܐܵܡܲܪ ܠܵܗ̇ ܗܘܼ. ܛܘܼܒܲܝܗܘܿܢ. ܠܐܲܝܠܹܝܢ ܕܲܫܡܲܥܘ ܡܸܠܬܹܗ ܕܐܲܠܵܗܵܐ. ܘܢܵܛܪܝܼܢ ܠܵܗ̇.

²⁹ ܘܟܲܕ݂ ܡܸܬ݂ܟܲܢܫܝܼܢ ܗ̄ܘܼܵܘ ܟܸܢܫܹ̈ܐ. ܫܲܪܝܼ ܠܡܹܐܡܲܪ. ܫܲܪܒܿܬ݂ܵܐ ܗܵܕܹܐ ܒܝܼܫܬܵܐ. ܐܵܬ݂ܵܐ ܒܵܥܝܵܐ. ܘܐܵܬ݂ܵܐ ܠܵܐ ܬܸܬ݂ܝܼܗܸܒ݂ ܠܵܗ̇. ܐܸܠܵܐ ܐܵܬܹܗ ܕܝܵܘܢܵܢ ܢܒ݂ܝܼܵܐ.

³⁰ ܐܲܝܟܲܢܵܐ ܓܹܝܪ ܕܲܗܘܵܐ ܝܵܘܢܵܢ ܐܵܬ݂ܵܐ ܠܢܝܼܢܘܵܝܹ̈ܐ. ܗܵܟܲܢܵܐ ܢܸܗܘܹܐ ܐܵܦ ܒܪܹܗ ܕܐ̄ܢܵܫܵܐ ܠܫܲܪܒܿܬ݂ܵܐ ܗܵܕܹܐ.

³¹ ܡܲܠܟܬ݂ܵܐ ܕܬܲܝܡܢܵܐ ܬܩܘܼܡ ܒܕ݂ܝܼܢܵܐ ܥܲܡ ܐ̄ܢܵܫܵܐ ܕܫܲܪܒܿܬ݂ܵܐ ܗܵܕܹܐ. ܘܲܬ݂ܚܲܝܼܒ݂ ܐܸܢܘܿܢ. ܕܐܸܬ݂ܵܬ݂ ܡܸܢ ܥܸܒ݂ܪܹ̈ܝܗ̇ ܕܐܲܪܥܵܐ. ܕܬܸܫܡܲܥ ܚܸܟ݂ܡܬܹܗ ܕܲܫܠܹܝܡܘܿܢ :ܘܗܵܐ ܕܝܲܬ݁ܝܼܪ ܡܸܢ ܫܠܹܝܡܘܿܢ ܗܵܪܟܵܐ.

³² ܓܲܒ݂ܪܹ̈ܐ ܢܝܼܢܘܵܝܹ̈ܐ ܢܩܘܼܡܘܼܢ ܒܕ݂ܝܼܢܵܐ ܥܲܡ ܫܲܪܒܿܬ݂ܵܐ ܗܵܕܹܐ. ܘܲܢܚܲܝܒ݂ܘܢܵܗ̇. ܕܬ݂ܵܒ݂ܘ ܒܟ݂ܵܪܘܿܙܘܼܬܹܗ ܕܝܵܘܢܵܢ. ܘܗܵܐ ܕܝܲܬ݁ܝܼܪ ܡܸܢ ܝܵܘܢܵܢ ܗܵܪܟܵܐ.

³³ ܠܵܐ ܐ̄ܢܵܫ ܡܲܢܗܲܪ ܫܪܵܓ݂ܵܐ ܘܣܵܐܹܡ ܠܹܗ ܒܟܸܣܝܵܐ ܐܵܘ ܬܚܹܝܬ݂ ܣܲܐܬ݂ܵܐ. ܐܸܠܵܐ ܠܥܸܠ ܡܸܢ ܡܢܵܪܬܵܐ. ܕܐܲܝܠܹܝܢ ܕܥܵܐܠܝܼܢ. ܢܸܚܙܘܿܢ ܢܘܼܗܪܹܗ.

³⁴ ܫܪܵܓܹܗ ܕܦܲܓ݂ܪܵܟ݂ ܐܝܼܬܹܝܗ̇ ܥܲܝܢܵܟ݂. ܐܸܡܲܬ݂ܝ ܗܵܟܹܝܠ ܕܥܲܝܢܵܟ݂ ܦܫܝܼܛܵܐ. ܐܵܦ ܟܠܹܗ ܦܲܓ݂ܪܵܟ݂ ܢܸܗܘܹܐ ܢܲܗܝܼܪ. ܐܸܢ ܕܹܝܢ ܬܸܗܘܹܐ ܒܝܼܫܵܐ. ܘܐܵܦ ܦܲܓ݂ܪܵܟ݂ ܢܸܗܘܹܐ ܚܸܫܘܿܟ݂.

³⁵ ܐܸܙܕܲܗ̄ܪ ܗܵܟܹܝܠ ܕܲܠܡܵܐ ܢܘܼܗܪܵܐ ܕܒ݂ܵܟ݂ ܚܸܫܘܿܟ݂ܵܐ ܗ̄ܘܼ.

³⁶ ܐܸܢ ܕܹܝܢ ܦܲܓ݂ܪܵܟ݂ ܟܠܹܗ ܢܲܗܝܼܪ: ܘܠܲܝܬ݁ ܒܹܗ ܡܢܵܬ݂ܵܐ ܡܸܕܸܡ ܚܸܫܘܿܟ݂ܵܐ. ܢܸܗܘܹܐ ܡܲܢܗܲܪ ܟܠܹܗ. ܐܲܝܟ݂ ܕܲܫܪܵܓ݂ܵܐ ܒܕ݂ܲܠܩܹܗ ܡܲܢܗܲܪ ܠܵܟ݂.

³⁷ ܟܲܕ݂ ܕܹܝܢ ܡܡܲܠܸܠ. ܒܥܵܐ ܡܸܢܹܗ ܦܪܝܼܫܵܐ ܚܲܕ݂ ܕܢܸܫܬܲܪܹܐ ܠܘܵܬܹܗ. ܘܥܲܠ ܐܸܣܬ݁ܡܸܟ݂.

³⁸ ܗܵܘ ܕܹܝܢ ܦܪܝܼܫܵܐ ܟܲܕ݂ ܚܙܵܝܗܝ. ܐܸܬ݁ܕܲܡܲܪ. ܕܠܵܐ ܠܘܼܩܕ݂ܲܡ ܥܡܲܕ݂ ܡܸܢ ܩܕ݂ܵܡ ܫܵܪܘܼܬܹܗ.

³⁹ ܐܸܡܲܪ ܠܹܗ ܕܹܝܢ ܝܼܫܘܿܥ. ܗܵܫܵܐ ܐܲܢ̄ܬ݁ܘܿܢ ܦܪ̈ܝܼܫܹܐ. ܒܲܪܹܗ ܕܟ݂ܵܣܵܐ ܘܲܕ݂ܦܝܼܢܟ݂ܐ ܡܕ݂ܲܟܹܝܢ ܐܢ̄ܬܘܿܢ. ܠܓ݂ܵܘ ܡܸܢܟ݂ܘܿܢ ܕܹܝܢ ܡܠܹܐ ܚܛܘܼܦܝܵܐ ܘܒ݂ܝܼܫܬܵܐ.

⁴⁰ ܚܲܣܝܼܪܲ̈ܝ ܪܸܥܝܵܢܵܐ: ܠܵܐ ܗܘ̣ܵܐ ܡܲܢ ܕܲܥܒܲܕ݂ ܕܲܠܒܲܪ. ܘܕ݂ܲܠܓ݂ܵܘ ܗܘܼ ܥܒܲܕ݂.

⁴¹ ܒܪܲܡ ܡܸܕܸܡ ܕܐܝܼܬ݂ ܗܲܒ݂ܘܼܗܝ ܒܙܸܕ݂ܩܬ݂ܵܐ. ܘܗܵܐ ܟܠ ܡܸܕܸܡ ܕܟܹܐ ܗܘܼ ܠܟ݂ܘܿܢ.

⁴² ܐܸܠܵܐ ܘܵܝ ܠܟ݂ܘܿܢ ܦܪ̈ܝܼܫܹܐ: ܕܲܡܥܲܣܪܝܼܢ ܐܢ̄ܬܘܿܢ ܢܵܢܥܵܐ ܘܦܸܓ݂ܢܵܐ ܘܟ݂ܠ ܝܘܼܪܵܩ. ܘܥܵܒ݂ܪܝܼܢ ܐܢ̄ܬܘܿܢ ܥܲܠ ܕܝܼܢܵܐ ܘܥܲܠ ܚܘܼܒܵܐ ܕܐܲܠܵܗܵܐ. ܗܵܠܹܝܢ ܕܹܝܢ ܘܵܠܹܐ ܗܘ̣ܵܐ ܕܬܸܥܒܕ݂ܘܼܢ. ܘܗܵܠܹܝܢ ܠܵܐ ܬܸܫܒܩܘܼܢ.

⁴³ ܘܵܝ ܠܟ݂ܘܿܢ ܦܪ̈ܝܼܫܹܐ: ܕܪܵܚܡܝܼܢ ܐܢ̄ܬܘܿܢ ܪܹܝܫ ܡܵܘܬ݁ܒܹ̈ܐ ܒܲܟ݂ܢ̈ܘܼܫܵܬ݂ܵܐ. ܘܲܫܠܵܡܵܐ ܒܫܘܼܩܹ̈ܐ.

⁴⁴ ܘܵܝ ܠܟ݂ܘܿܢ ܣܵܦܪܹ̈ܐ ܘܲܦܪ̈ܝܼܫܹܐ ܢܵܣܒܲܝ̈ ܒܐܲܦܹ̈ܐ. ܕܐܝܬܲܝܟܿܘܿܢ ܐܲܝܟ݂ ܩܲܒ݂ܪܹ̈ܐ ܕܠܵܐ ܝܼܕ݂ܝܼܥܝܼܢ. ܘܲܒ݂ܢܲܝ̈ܢܵܫܵܐ ܡܗܲܠܟ݂ܝܼܢ ܥܠܲܝܗܘܿܢ. ܘܠܵܐ ܝܵܕ݂ܥܝܼܢ.

⁴⁵ ܘܲܥܢܵܐ ܚܲܕ݂ ܡܸܢ ܣܵܦܪܹ̈ܐ. ܘܐܸܡܲܪ ܠܹܗ. ܡܲܠܦܵܢܵܐ. ܟܲܕ݂ ܗܵܠܹܝܢ ܐܵܡܲܪ ܐܲܢ̄ܬ݁. ܐܵܦ ܠܲܢ ܡܨܲܥܲܪ ܐܲܢ̄ܬ݁.

⁴⁶ ܗܘܼ ܕܹܝܢ ܐܸܡܲܪ. ܐܵܦ ܠܟ݂ܘܿܢ ܣܵܦܪܹ̈ܐ. ܘܵܝ. ܕܡܲܛܥܢܝܼܢ ܐܢ̄ܬܘܿܢ ܠܲܒܢܲܝ̈ܢܵܫܵܐ ܡܵܘܒ̈ܠܹܐ ܝܲܩܝܼܪ̈ܵܬ݂ܵܐ. ܘܐܲܢ̄ܬ݁ܘܿܢ ܒܲܚܕ݂ܵܐ ܡܸܢ ܨܸܒ݂̈ܥܵܬ݂ܟ݂ܘܿܢ. ܠܵܐ ܩܵܪܒܝܼܢ ܐܢ̄ܬܘܿܢ ܠܗܹܝܢ ܠܡܵܘܒܠܹ̈ܐ.

⁴⁷ ܘܵܝ ܠܟ݂ܘܿܢ. ܕܒ݂ܵܢܹܝܢ ܐܢ̄ܬܘܿܢ ܩܲܒ݂ܪܹ̈ܐ ܕܲܢܒ݂ܝܹ̈ܐ ܕܐܲܒ݂ܵܗܲܝ̈ܟܿܘܿܢ ܩܲܛܸܠܘ ܐܸܢܘܿܢ.

⁴⁸ ܣܵܗܕܝܼܢ ܐܢ̄ܬܘܿܢ ܗܵܟܹܝܠ. ܘܨܵܒܹܝܢ ܐܢ̄ܬܘܿܢ ܒܲܥܒ݂ܵܕܹ̈ܐ ܕܐܲܒ݂ܵܗܲܝ̈ܟܿܘܿܢ. ܕܗܸܢܘܿܢ ܩܲܛܸܠܘ ܐܸܢܘܿܢ. ܘܐܲܢ̄ܬ݁ܘܿܢ ܒܵܢܹܝܢ ܐܢ̄ܬܘܿܢ ܩܲܒ݂ܪ̈ܲܝܗܘܿܢ.

⁴⁹ ܡܛܠ ܗܵܢܵܐ ܐܵܦ ܚܸܟ݂ܡܬ݂ܵܐ ܕܐܲܠܵܗܵܐ ܐܸܡܪܲܬ݂. ܕܗܵܐ ܐܸܢܵܐ ܐܹܫܲܕܲܪ ܠܗܘܿܢ ܢܒ݂ܝܹ̈ܐ. ܘܲܫܠܝܼܚܹ̈ܐ. ܡܸܢܗܘܿܢ ܢܸܪܕܦܘܼܢ. ܘܢܸܩܛܠܘܼܢ.

⁵⁰ ܕܢܸܬ݁ܬ݁ܒܲܥ ܕܡܵܐ ܕܟ݂ܠܗܘܿܢ ܢܒ݂ܝܹ̈ܐ ܕܐܸܬ݂ܐܫܸܕ݂ ܡܸܢ ܕܐܬ݂ܒܪܝܼ ܥܵܠܡܵܐ ܡܸܢ ܫܲܪܒܿܬ݂ܵܐ ܗܵܕܹܐ

⁵¹ ܡܸܢ ܕܡܹܗ ܕܗܵܒܹܝܠ. ܥܕ݂ܲܡܵܐ ܠܲܕ݂ܡܹܗ ܕܲܙܟܲܪܝܵܐ ܗܵܘ ܕܐܸܬ݂ܩܛܸܠ ܒܲܝܢܲܝ ܗܲܝܟܠܵܐ ܠܡܲܕ݂ܒܚܵܐ. ܐܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܡܸܬ݁ܬ݁ܒܲܥ ܡܸܢ ܫܲܪܒܿܬ݂ܵܐ ܗܵܕܹܐ.

⁵² ܘܵܝ ܠܟ݂ܘܿܢ ܣܵܦܪܹ̈ܐ: ܕܲܫܩܲܠܬ݁ܘܿܢ ܩܠܝܼܕܹ̈ܐ ܕܝܼܕ݂ܲܥܬ݂ܵܐ. ܐܲܢ̄ܬ݁ܘܿܢ ܠܵܐ ܥܲܠܬ݁ܘܢ. ܘܠܲܐܝܠܹܝܢ ܕܥܵܐܠܝܼܢ. ܟܠܲܝܬ݁ܘܢ.

⁵³ ܘܟܲܕ݂ ܗܵܠܹܝܢ ܐܸܡܲܪ ܗܘ̣ܵܐ ܠܗܘܿܢ ܫܲܪܝܼܘ ܣܵܦܪܹ̈ܐ ܘܲܦܪ̈ܝܼܫܹܐ ܡܸܬ݂ܒܐܸܫ ܠܗܘܿܢ ܘܡܸܬ݂ܚܲܡܬ݂ܝܼܢ ܘܲܡܬܲܟܣܝܼܢ ܡܸܠܵܘ̈ܗܝ

⁵⁴ ܘܢܵܟ݂ܠܝܼܢ ܠܹܗ ܒܣܲܓܝܼ̈ܐܵܬ݂ܵܐ. ܟܲܕ݂ ܒܵܥܹܝܢ ܠܡܹܐܚܲܕ݂ ܡܸܕܸܡ ܡܸܢ ܦܘܼܡܹܗ. ܕܢܸܫܟܿܚܘܼܢ ܢܹܐܟ݂ܠܘܼܢ ܩܲܪ̈ܨܵܘܗܝ.

12

¹ ܘܟܲܕ݂ ܐܸܬ݂ܟܲܢܲܫܘ ܪܸ̈ܒܘܵܬ݂ܵܐ ܕܟܸܢܫܹ̈ܐ ܣܲܓܝܼܐܹ̈ܐ. ܐܲܝܟܲܢܵܐ ܕܲܢܕ݂ܲܝܫܘܿܢ ܚܲܕ݂ ܠܚܲܕ݂. ܫܲܪܝܼ ܝܼܫܘܿܥ ܠܡܹܐܡܲܪ ܠܬܲܠܡܝܼܕ݂ܵܘ̈ܗܝ. ܠܘܼܩܕ݂ܲܡ ܐܸܙܕܲܗ̄ܪܘ ܒܢܲܦ̮ܫܟ݂ܘܿܢ ܡܸܢ ܚܡܝܼܪܵܐ ܕܲܦܪ̈ܝܼܫܹܐ ܕܐܝܼܬ݂ܵܘܗܝ ܡܲܣܲܒ݂ ܒܐܲܦܹ̈ܐ.

² ܠܲܝܬ݁ ܕܹܝܢ ܡܸܕܸܡ ܕܲܟ݂ܣܹܐ. ܕܠܵܐ ܢܸܬ݂ܓ݁ܠܹܐ. ܘܠܵܐ ܕܲܡܛܲܫܲܝ. ܕܠܵܐ ܢܸܬ݂ܝܕ݂ܲܥ.

³ ܟܠ ܓܹܝܪ ܕܲܒ݂ܚܸܫܘܿܟ݂ܵܐ ܐܸܡܲܪܬ݁ܘܢ. ܒܢܲܗܝܼܪܵܐ ܢܸܫܬ݁ܡܲܥ. ܘܡܸܕܸܡ ܕܲܒ݂ܬ݂ܵܘܵܢܹ̈ܐ ܒܐܕ݂ܢܹ̈ܐ ܠܲܚܸܫܬ݁ܘܢ. ܥܲܠ ܐܸܓܵܪܹ̈ܐ ܢܸܬ݂ܟܪܸܙ.

⁴ ܐܵܡܲܪ ܐ̄ܢܵܐ ܠܟ݂ܘܿܢ ܕܹܝܢ ܠܪ̈ܵܚܡܲܝ. ܠܵܐ ܬܸܕ݂ܚܠܘܼܢ ܡܸܢ ܐܲܝܠܹܝܢ ܕܩܵܛܠܝܼܢ ܦܲܓ݂ܪܵܐ ܘܡܸܢ ܒܵܬܲܪܟܸܢ ܠܲܝܬ݁ ܠܗܘܿܢ ܡܸܕܸܡ ܝܲܬ݁ܝܼܪ ܠܡܸܥܒܲܕ݂.

⁵ ܐܹܚܵܘܹܝܟ݂ܘܿܢ ܕܹܝܢ ܡܸܢ ܡܲܢ ܬܸܕ݂ܚܠܘܼܢ. ܡܸܢ ܗܵܘ ܕܡܸܢ ܒܵܬܲܪ ܕܩܵܛܹܠ ܫܲܠܝܼܛ ܠܡܲܪܡܵܝܘܼ ܒܓܹܗܲܢܵܐ. ܐܹܝܢ ܐܵܡܲܪ ܐ̄ܢܵܐ ܠܟ݂ܘܿܢ ܕܡܸܢ ܗܵܢܵܐ ܕܚܲܠܘ.

⁶ ܠܵܐ ܚܲܡܸܫ ܨܸܦܪ̈ܝܼܢ ܡܸܙܕܲܒܢܵܢ ܒܲܬ݂ܪܹܝܢ ܐܲܣܵܪ̈ܝܼܢ. ܘܲܚܕ݂ܵܐ ܡܸܢܗܹܝܢ. ܠܵܐ ܛܵܥܝܵܐ ܩܕ݂ܵܡ ܐܲܠܵܗܵܐ.

⁷ ܕܝܼܠܟ݂ܘܿܢ ܕܹܝܢ ܐܵܦ ܡܸܢܐ ܕܣܲܥܪܵܐ ܕܪܹܫܟ݂ܘܿܢ. ܟܠܗܹܝܢ ܡܲܢܝܵܢ ܐܸܢܹܝܢ. ܠܵܐ ܗܵܟܹܝܠ ܬܸܕ݂ܚܠܘܼܢ. ܕܡܸܢ ܣܘܿܓ݂ܵܐܐ ܕܨܸܦܪܹ̈ܐ ܡܝܲܬ݁ܪܝܼܢ ܐܢ̄ܬܘܿܢ.

⁸ ܐܵܡܲܪ ܐ̄ܢܵܐ ܠܟ݂ܘܿܢ ܕܹܝܢ. ܕܟ݂ܠ ܕܢܵܘܕܹܐ ܒܝܼ ܩܕ݂ܵܡ ܒܢܲܝ̈ܢܵܫܵܐ. ܐܵܦ ܒܪܹܗ ܕܐ̄ܢܵܫܵܐ ܢܵܘܕܹܐ ܒܹܗ. ܩܕ݂ܵܡ ܡܲܠܲܐܟ݂ܵܘ̈ܗܝ ܕܐܲܠܵܗܵܐ.

⁹ ܐܲܝܢܵܐ ܕܹܝܢ ܕܟ݂ܵܦܲܪ ܒܝܼ ܩܕ݂ܵܡ ܒܢܲܝ̈ܢܵܫܵܐ. ܢܸܬ݂ܟܦܲܪ ܒܹܗ ܩܕ݂ܵܡ ܡܲܠܲܐܟ݂ܵܘ̈ܗܝ ܕܐܲܠܵܗܵܐ.

¹⁰ ܘܟ݂ܠ ܕܢܹܐܡܲܪ ܡܸܠܬ݂ܵܐ ܥܲܠ ܒܪܹܗ ܕܐ̄ܢܵܫܵܐ. ܢܸܫܬ݁ܒܸܩ ܠܹܗ. ܡܲܢ ܕܥܲܠ ܪܘܼܚܵܐ ܕܹܝܢ ܕܩܘܼܕ݂ܫܵܐ ܢܓܲܕܦ. ܠܵܐ ܢܸܫܬ݁ܒܸܩ ܠܹܗ.

¹¹ ܡܵܐ ܕܲܡܩܲܪܒ݂ܝܼܢ ܠܟ݂ܘܿܢ ܕܹܝܢ ܠܲܟ݂ܢܘܼܫܬܵܐ ܩܕ݂ܵܡ ܪܹ̈ܫܹܐ ܘܫܲܠܝܼܛܵܢܹ̈ܐ. ܠܵܐ ܬܹܐܨܦܘܼܢ ܐܲܝܟܲܢܵܐ ܬܲܦܩܘܼܢ ܪܘܼܚܵܐ. ܐܵܘ ܡܵܢܵܐ ܬܹܐܡܪܘܼܢ.

¹² ܪܘܼܚܵܐ ܓܹܝܪ ܕܩܘܼܕ݂ܫܵܐ ܢܲܠܸܦܟ݂ܘܿܢ ܒܗܵܝ ܫܵܥܬ݂ܵܐ. ܡܸܕܸܡ ܕܘܵܠܹܐ ܕܬܹܐܡܪܘܼܢ.

¹³ ܐܸܡܲܪ ܠܹܗ ܕܹܝܢ ܐ̄ܢܵܫ ܡܸܢ ܗܵܘ ܟܸܢܫܵܐ. ܡܲܠܦܵܢܵܐ. ܐܸܡܲܪ ܠܐܵܚܝ ܦܵܠܹܓ݂ ܥܲܡܝ ܝܵܪܬܘܼܬ݂ܵܐ.

¹⁴ ܝܼܫܘܿܥ ܕܹܝܢ ܐܸܡܲܪ ܠܹܗ. ܓܲܒ݂ܪܵܐ. ܡܲܢܘܼ ܐܲܩܝܼܡܲܢܝ ܥܠܲܝܟܿܘܿܢ ܕܲܝܵܢܵܐ ܘܲܡܦܲܠܓ݂ܵܢܵܐ.

¹⁵ ܘܐܸܡܲܪ ܠܬܲܠܡܝܼܕ݂ܵܘ̈ܗܝ. ܐܸܙܕܲܗ̄ܪܘ ܡܸܢ ܟܠܵܗ̇ ܝܲܥܢܘܼܬ݂ܵܐ. ܡܛܠ ܕܠܵܐ ܗܘ̣ܵܐ ܒܝܲܬܝܼܪܘܼܬ݂ܵܐ ܕܢܸܟ݂ܣܹ̈ܐ ܐܝܼܬ݂ ܚܲܝܹ̈ܐ.

¹⁶ ܘܐܸܡܲܪ ܡܲܬ݂ܠܵܐ ܠܘܵܬ݂ܗܘܿܢ. ܓܲܒ݂ܪܵܐ ܚܲܕ݂ ܥܲܬ݁ܝܼܪܵܐ. ܐܲܥܠܲܬ݂ ܠܹܗ ܐܲܪܥܹܗ ܥܲܠ̈ܠܵܬ݂ܵܐ ܣܲܓܝܼ̈ܐܵܬ݂ܵܐ.

¹⁷ ܘܡܸܬ݂ܚܲܫܲܒ݂ ܗܘ̣ܵܐ ܒܢܲܦ̮ܫܹܗ. ܘܐܸܡܲܪ. ܡܵܢܵܐ ܐܸܥܒܸܕ݂ ܕܠܲܝܬ݁ ܠܝܼ ܐܲܝܟܵܐ ܕܐܸܚܡܘܿܠ ܥܲܠ̱ܠܵܬ݂ܝ.

¹⁸ ܘܐܸܡܲܪ. ܗܵܕܹܐ ܐܸܥܒܸܕ݂. ܐܸܣܬ݁ܘܼܪ ܒܹܝܬ݂ ܩܦܵܣܲܝ̈. ܘܐܸܒ݂ܢܹܐ ܘܐܵܘܪܸܒ݂ ܐܸܢܘܿܢ. ܘܐܸܚܡܘܿܠ ܬܲܡܵܢ ܟܠܹܗ ܥܒ݂ܘܪܝ ܘܛ̈ܵܒ݂ܵܬ݂ܝ.

¹⁹ ܘܐܹܡܲܪ ܠܢܲܦ̮ܫܝ. ܢܲܦ̮ܫܝ. ܐܝܼܬ݂ ܠܹܟ݂ܝ ܛܵܒ݂̈ܵܬ݂ܵܐ ܣܲܓܝܼ̈ܐܵܬ݂ܵܐ ܕܣܝܼܡܵܢ ܠܲܫ̈ܢܲܝܵܐ ܣܲܓܝܼ̈ܐܵܬ݂ܵܐ. ܐܸܬ݁ܬ݁ܢܝܼܚܝ. ܐܲܟ݂ܘܠܝ. ܐܸܫܬܵܝ. ܐܸܬ݂ܒܲܣܲܡܝ.

²⁰ ܐܵܡܲܪ ܠܹܗ ܕܹܝܢ ܐܲܠܵܗܵܐ. ܚܣܝܼܪ ܪܸܥܝܵܢܵܐ. ܒܗܵܢܵܐ ܠܸܠܝܵܐ ܢܲܦ̮ܫܵܟ݂. ܬܵܒ݂ܥܝܼܢ ܠܵܗ̇ ܡܸܢܵܟ݂. ܘܗܵܠܹܝܢ ܕܛܲܝܸܒ݂ܬ݁ ܠܡܲܢ ܢܸܗܘܝܵܢ.

²¹ ܗܵܟܲܢܵܐ ܗ̄ܘܼ ܡܲܢ ܕܣܵܐܹܡ ܠܹܗ ܣܝܼ̈ܡܵܬ݂ܵܐ ܘܒܲܐܠܵܗܵܐ ܠܵܐ ܥܲܬ݁ܝܼܪ.

²² ܘܐܸܡܲܪ ܠܬܲܠܡܝܼܕ݂ܵܘ̈ܗܝ. ܡܛܠ ܗܵܢܵܐ ܠܟ݂ܘܿܢ ܐܵܡܲܪ ܐ̄ܢܵܐ. ܠܵܐ ܬܹܐܨܦܘܼܢ ܠܢܲܦ̮ܫܟ݂ܘܿܢ. ܡܵܢܵܐ ܬܹܐܟ݂ܠܘܼܢ. ܘܠܵܐ ܠܦܲܓ݂ܪܟ݂ܘܿܢ. ܡܵܢܵܐ ܬܸܠܒܫܘܿܢ.

²³ ܢܲܦ̮ܫܵܐ ܓܹܝܪ ܝܲܬܝܼܪܵܐ ܡܸܢ ܣܲܝܒܵܪܬܵܐ. ܘܦܲܓ݂ܪܵܐ ܡܸܢ ܠܒ݂ܘܼܫܵܐ.

²⁴ ܐܸܬ݂ܒܲܩܵܘ ܒܢܲܥܒܹ̈ܐ. ܕܠܵܐ ܙܵܪܥܝܼܢ. ܘܠܵܐ ܚܵܨܕܝܼܢ. ܘܠܲܝܬ݁ ܠܗܘܿܢ ܬܵܘܵܢܹ̈ܐ ܘܒܹܝܬ݂ ܩܦܵܣܹ̈ܐ. ܘܐܲܠܵܗܵܐ ܡܬܲܪܣܹܐ ܠܗܘܿܢ. ܟܡܵܐ ܗܵܟܹܝܠ ܐܲܢ̄ܬ݁ܘܿܢ ܝܲܬܝܼܪܝܼܢ ܐܢ̄ܬܘܿܢ ܡܸܢ ܦܵܪ̈ܚܵܬ݂ܵܐ.

²⁵ ܐܲܝܢܵܐ ܕܹܝܢ ܡܸܢܟ݂ܘܿܢ ܟܲܕ݂ ܝܵܨܹܦ ܡܸܫܟܲܚ ܠܡܵܘܣܵܦܘܼ ܥܲܠ ܩܵܘܡܬܹܗ ܐܲܡܬ݂ܵܐ ܚܕ݂ܵܐ.

²⁶ ܐܸܢ ܕܹܝܢ ܐܵܦ ܠܵܐ ܙܥܘܿܪܬܵܐ ܡܸܫܟܿܚܝܼܢ ܐܢ̄ܬܘܿܢ. ܡܵܢܵܐ ܥܲܠ ܫܲܪܟܵܐ ܝܵܨܦܝܼܢ ܐܢ̄ܬܘܿܢ.

²⁷ ܐܸܬ݂ܒܲܩܵܘ ܒܫܘܿܫܲܢܹ̈ܐ ܐܲܝܟܲܢܵܐ ܪܵܒ݂ܝܵܢ. ܕܠܵܐ ܠܵܐܝܵܢ ܘܠܵܐ ܥܵܙܠܵܢ. ܐܵܡܲܪ ܐ̄ܢܵܐ ܠܟ݂ܘܿܢ ܕܹܝܢ. ܕܐܵܦ ܠܵܐ ܫܠܹܝܡܘܿܢ ܒܟ݂ܠܹܗ ܫܘܼܒ݂ܚܹܗ. ܐܸܬ݂ܟܲܣܝܼ ܐܲܝܟ݂ ܚܕ݂ܵܐ ܡܸܢ ܗܵܠܹܝܢ.

²⁸ ܐܸܢ ܕܹܝܢ ܠܲܥܡܝܼܪܵܐ ܕܝܵܘܡܵܢܵܐ ܐܝܼܬ݂ܵܘܗܝ ܒܚܲܩܠܵܐ: ܘܲܡܚܵܪ ܢܵܦܹܿܠ ܒܬܲܢܘܼܪܵܐ: ܐܲܠܵܗܵܐ ܗܵܟܲܢܵܐ ܡܲܠܒܸܫ. ܟܡܵܐ ܝܲܬ݁ܝܼܪ ܠܟ݂ܘܿܢ ܙܥܘܿܪ̈ܲܝ ܗܲܝܡܵܢܘܼܬ݂ܵܐ:

²⁹ ܘܐܲܢ̄ܬ݁ܘܿܢ ܠܵܐ ܬܸܒ݂ܥܘܿܢ ܡܵܢܵܐ ܬܹܐܟ݂ܠܘܼܢ. ܘܡܵܢܵܐ ܬܸܫܬ݁ܘܿܢ. ܘܠܵܐ ܢܸܦܗܹܐ ܪܸܥܝܵܢܟ݂ܘܿܢ ܒܗܵܠܹܝܢ.

³⁰ ܗܵܠܹܝܢ ܓܹܝܪ ܟܠܗܹܝܢ. ܥܲܡ̈ܡܹܐ ܗ̄ܘܼ ܕܥܵܠܡܵܐ ܒܵܥܹܝܢ. ܐܵܦ ܠܟ݂ܘܿܢ ܕܹܝܢ ܐܲܒ݂ܘܼܟ݂ܘܼܢ ܝܵܕ݂ܲܥ ܕܡܸܬ݂ܒܲܥܝܵܢ ܠܟ݂ܘܿܢ ܗܵܠܹܝܢ.

³¹ ܒܪܲܡ ܒܥܵܘ ܡܲܠܟܘܼܬܹܗ ܕܐܲܠܵܗܵܐ. ܘܗܵܠܹܝܢ ܟܠܗܹܝܢ ܡܸܬ݁ܬܵܘܣܦܵܢ ܠܟ݂ܘܿܢ.

³² ܠܵܐ ܬܸܕ݂ܚܲܠ ܓ݁ܙܵܪܵܐ ܙܥܘܿܪܵܐ. ܕܲܨܒ݂ܵܐ ܐܲܒ݂ܘܼܟ݂ܘܼܢ ܕܢܸܬܸ݁ܠ ܠܟ݂ܘܿܢ ܡܲܠܟܘܼܬ݂ܵܐ.

³³ ܙܲܒܸܢܘ ܩܸܢܝܵܢܟ݂ܘܿܢ. ܘܗܲܒ݂ܘ ܙܸܕ݂ܩܬ݂ܵܐ. ܥܒܸܕ݂ܘ ܠܟ݂ܘܿܢ ܟܝܼܣܹ̈ܐ ܕܠܵܐ ܒܵܠܹܝܢ ܘܣܝܼܡܬ݂ܵܐ ܕܠܵܐ ܓܵܝܙܵܐ. ܒܲܫܡܲܝܵܐ. ܐܲܝܟܵܐ ܕܓܲܢܵܒ݂ܵܐ ܠܵܐ ܩܵܪܹܒ݂. ܘܣܵܣܵܐ ܠܵܐ ܡܚܲܒܸܠ.

³⁴ ܐܲܝܟܵܐ ܓܹܝܪ ܕܐܝܼܬܹܝܗ̇ ܣܝܼܡܲܬ݂ܟ݂ܘܿܢ. ܬܲܡܵܢ ܢܸܗܘܹܐ ܐܵܦ ܠܸܒܟ݂ܘܿܢ.

³⁵ ܢܸܗܘܘܿܢ ܐܲܣܝܼܪܝܼܢ ܚܲܨܲܝ̈ܟܿܘܿܢ. ܘܡܲܢܗܪܝܼܢ ܫܪ̈ܵܓܲܝܟܿܘܿܢ.

³⁶ ܘܲܗܘܵܘ ܕܵܡܹܝܢ ܠܐ̄ܢܵܫܵܐ ܕܲܡܣܲܟܹܝܢ ܠܡܵܪܗܘܿܢ. ܕܐܡܲܬ݂ܝ ܢܸܦܢܹܐ ܡܸܢ ܒܹܝܬ݂ ܡܸܫܬܘܼܬ݂ܵܐ. ܕܡܵܐ ܕܐܸܬ݂ܵܐ ܘܲܢܩܲܫ. ܡܸܚܕ݂ܵܐ ܢܸܦ̮ܬ݁ܚܘܼܢ ܠܹܗ.

³⁷ ܛܘܼܒܲܝܗܘܿܢ ܠܥܲܒ݂ܕܹ̈ܐ ܗܵܢܘܿܢ. ܐܲܝܠܹܝܢ ܕܢܹܐܬܹܐ ܡܵܪܗܘܿܢ ܘܢܸܫܟܲܚ ܐܸܢܘܿܢ ܟܲܕ݂ ܥܝܼܪܝܼܢ. ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܢܹܐܣܘܿܪ ܚܲܨܵܘܗܝ. ܘܢܲܣܡܸܟ݂ ܐܸܢܘܿܢ. ܘܢܸܥܒܲܪ ܢܫܲܡܸܫ ܐܸܢܘܿܢ.

³⁸ ܘܐܸܢ ܒܡܲܛܲܪܬ݂ܵܐ ܕܬܲܪܬܹ݁ܝܢ ܐܵܘ ܕܲܬ݂ܠܵܬ݂ ܢܹܐܬܹܐ. ܘܢܸܫܟܲܚ ܗܵܟܲܢܵܐ. ܛܘܼܒܲܝܗܘܿܢ ܠܥܲܒ݂ܕܹ̈ܐ ܗܵܢܘܿܢ.

³⁹ ܗܵܕܹܐ ܕܹܝܢ ܕܲܥܘ. ܕܐܸܠܘܼ ܝܵܕ݂ܲܥ ܗܘ̣ܵܐ ܡܵܪܹܐ ܒܲܝܬܵܐ ܒܐܲܝܕ݂ܵܐ ܡܲܛܲܪܬ݂ܵܐ ܐܵܬܹܐ ܓܲܢܵܒ݂ܵܐ. ܡܸܬ݁ܬ݁ܥܝܼܪ ܗ̄ܘܵܐ ܘܠܵܐ ܫܵܒܹܩ ܗܘ̣ܵܐ ܕܢܸܬ݂ܦܠܸܫ ܒܲܝܬܹ݁ܗ.

⁴⁰ ܐܵܦ ܐܲܢ̄ܬ݁ܘܿܢ ܗܵܟܹܝܠ ܗܘܵܘ ܡܛܲܝܒܹ̈ܐ. ܕܲܒ݂ܗܵܝ ܫܵܥܬ݂ܵܐ ܕܠܵܐ ܣܵܒ݂ܪܝܼܢ ܐܢ̄ܬܘܿܢ. ܐܵܬܹܐ ܒܪܹܗ ܕܐ̄ܢܵܫܵܐ.

⁴¹ ܐܵܡܲܪ ܠܹܗ ܫܸܡܥܘܿܢ ܟܹܐܦܵܐ. ܡܵܪܲܢ. ܠܘܵܬܲܢ ܐܵܡܲܪ ܐܲܢ̄ܬ݁ ܠܹܗ ܠܡܲܬ݂ܠܵܐ ܗܵܢܵܐ. ܐܵܘ ܐܵܦ ܠܘܵܬ݂ ܟܠܢܵܫ.

⁴² ܐܵܡܲܪ ܠܹܗ ܝܼܫܘܿܥ. ܡܲܢܘܼ ܟܲܝ ܐܝܼܬ݂ ܪܲܒܲܝܬܵܐ ܡܗܲܝܡܢܵܐ ܘܚܲܟܝܼܡܵܐ ܕܲܢܩܝܼܡܝܼܘܗܝ ܡܵܪܹܗ ܥܲܠ ܬܸܫܡܸܫܬܹ݁ܗ ܕܢܸܬܸ݁ܠ ܦܵܪܣܵܐ ܒܙܲܒ݂ܢܹܗ.

⁴³ ܛܘܼܒ݂ܵܘܗܝ ܠܗܵܘ ܥܲܒ݂ܕܵܐ ܕܢܹܐܬܹܐ ܡܵܪܹܗ ܢܸܫܟܚܝܼܘܗܝ. ܕܥܵܒܹܿܕ݂ ܗܵܟܲܢܵܐ.

⁴⁴ ܫܲܪܝܼܪܵܐܝܼܬ݂ ܐܵܡܲܪ ܐ̄ܢܵܐ ܠܟ݂ܘܿܢ. ܕܲܢܩܝܼܡܝܼܘܗܝ ܥܲܠ ܟܠܹܗ ܩܸܢܝܵܢܹܗ.

⁴⁵ ܐܸܢ ܕܹܝܢ ܢܹܐܡܲܪ ܥܲܒ݂ܕܵܐ ܗܵܘ ܒܠܸܒܹܗ: ܕܡܵܪܝ ܡܵܘܚܲܪ ܠܡܹܐܬ݂ܵܐ: ܘܲܢܫܲܪܹܐ ܠܡܸܡܚܵܐ ܠܥܲܒ݂ܕܹ̈ܐ ܘܠܲܐܡ̈ܗܵܬ݂ܵܐ ܕܡܵܪܹܗ: ܘܲܢܫܲܪܹܐ ܠܡܸܠܥܲܣ ܘܲܠܡܸܫܬܵܐ ܘܲܠܡܸܪܘܵܐ.

⁴⁶ ܢܹܐܬܹܐ ܡܵܪܹܗ ܕܥܲܒ݂ܕܵܐ ܗܵܘ ܒܝܵܘܡܵܐ ܕܠܵܐ ܣܵܒܲܪ. ܘܲܒ݂ܫܵܥܬ݂ܵܐ ܕܠܵܐ ܝܵܕ݂ܲܥ. ܘܢܸܦܠܓ݂ܝܼܘܗܝ. ܘܲܢܣܝܼܡ ܡܢܵܬܹܗ ܥܲܡ ܗܵܢܘܿܢ ܕܠܵܐ ܡܗܲܝܡܢܝܼܢ.

⁴⁷ ܥܲܒ݂ܕܵܐ ܕܹܝܢ ܐܲܝܢܵܐ ܕܝܵܕ݂ܲܥ ܨܸܒ݂ܝܵܢܵܐ ܕܡܵܪܹܗ: ܘܠܵܐ ܛܲܝܸܒ݂ ܠܹܗ ܐܲܝܟ݂ ܨܸܒ݂ܝܵܢܹܗ. ܢܸܒ݂ܠܲܥ ܣܲܓܝܼ̈ܐܵܬ݂ܵܐ.

⁴⁸ ܗܵܘ ܕܹܝܢ ܕܠܵܐ ܝܵܕ݂ܲܥ ܘܥܵܒܹܿܕ݂ ܡܸܕܸܡ ܕܫܵܘܹܐ ܠܡܲܚ̈ܘܵܬ݂ܵܐ. ܢܸܒ݂ܠܲܥ ܡܲܚ̈ܘܵܬ݂ܵܐ ܙܥܘܿܪ̈ܝܵܬ݂ܵܐ. ܟܠ ܓܹܝܪ ܕܐܸܬ݂ܝܼܗܸܒ݂ ܠܹܗ ܣܲܓܝܼ. ܣܲܓܝܼ ܢܸܬ݁ܬ݁ܒܲܥ ܡܸܢܹܗ. ܘܲܠܗܵܘ ܕܐܲܓ݂ܥܸܠܘ ܠܹܗ ܣܲܓܝܼ. ܝܲܬܝܼܪܵܐܝܼܬ݂ ܢܸܬ݂ܒܥܘܼܢ ܒܐܝܕ݂ܗ.

⁴⁹ ܢܘܼܪܵܐ ܐܸܬܹܝܬ݂ ܕܐܲܪܡܹܐ ܒܐܲܪܥܵܐ. ܘܨܵܒܹܐ ܐ̄ܢܵܐ. ܐܸܠܘܼ ܡܸܢ ܟܲܕܘ ܚܸܒܲܬ݂.

⁵⁰ ܘܡܲܥܡܘܿܕ݂ܝܼܬ݂ܵܐ ܐܝܼܬ݂ ܠܝܼ ܕܐܸܥܡܲܕ݂. ܘܣܲܓܝܼ ܐܲܠܝܼܨ ܐ̄ܢܵܐ. ܥܕ݂ܲܡܵܐ ܕܬܸܫܬܲܡܠܹܐ.

⁵¹ ܣܵܒ݂ܪܝܼܢ ܐܢ̄ܬܘܿܢ. ܕܫܲܝܢܵܐ ܐܸܬܹܝܬ݂ ܕܐܲܪܡܹܐ ܒܐܲܪܥܵܐ. ܐܵܡܲܪ ܐ̄ܢܵܐ ܠܟ݂ܘܿܢ. ܕܠܵܐ ܐܸܠܵܐ ܦܵܠܓ̈ܘܵܬ݂ܵܐ.

⁵² ܡܸܢ ܗܵܫܵܐ ܓܹܝܪ ܢܸܗܘܘܿܢ ܚܲܡܫܵܐ ܒܒܲܝܬܵܐ ܚܲܕ݂. ܕܲܦܠܝܼܓ݂ܝܼܢ ܬܠܵܬ݂ܵܐ ܥܲܠ ܬܪܹܝܢ. ܘܲܬ݂ܪܹܝܢ ܥܲܠ ܬܠܵܬ݂ܵܐ.

⁵³ ܢܸܬ݂ܦܠܸܓ݂ ܓܹܝܪ ܐܲܒ݂ܵܐ ܥܲܠ ܒܪܹܗ. ܘܲܒ݂ܪܵܐ ܥܲܠ ܐܲܒ݂ܘܼܗܝ. ܐܸܡܵܐ ܥܲܠ ܒܲܪܬ݂ܵܗ̇. ܘܒܲܪܬ݂ܵܐ ܥܲܠ ܐܸܡܵܗ̇. ܚܡܵܬ݂ܵܐ ܥܲܠ ܟܲܠܬ݂ܵܗ̇. ܘܟܲܠܬ݂ܵܐ ܥܲܠ ܚܡܵܬ݂ܵܗ̇.

⁵⁴ ܘܐܸܡܲܪ ܠܟܸܢܫܹ̈ܐ. ܡܵܐ ܕܲܚܙܲܝܬ݁ܘܿܢ ܥܢܵܢܵܐ ܕܕ݂ܵܢܚܵܐ ܡܸܢ ܡܲܥܪܒ݂ܵܐ. ܡܸܚܕ݂ܵܐ ܐܵܡܪܝܼܢ ܐܢ̄ܬܘܿܢ. ܡܸܛܪܵܐ ܐܵܬܹܐ. ܘܗܵܘܹܐ ܗܵܟܲܢܵܐ.

⁵⁵ ܘܡܵܐ ܕܢܵܫܒܵܐ ܬܲܝܡܢܵܐ. ܐܵܡܪܝܼܢ ܐܢ̄ܬܘܿܢ. ܚܘܼܡܵܐ ܗܵܘܹܐ ܘܗܵܘܹܐ.

⁵⁶ ܢܵܣܒܲܝ̈ ܒܐܲܦܹ̈ܐ. ܦܲܪܨܘܿܦܵܐ ܕܐܲܪܥܵܐ ܘܕ݂ܲܫܡܲܝܵܐ ܝܵܕ݂ܥܝܼܢ ܐܢ̄ܬܘܿܢ ܕܬܸܦܪܫܘܿܢ ܙܲܒ݂ܢܵܐ ܕܹܝܢ ܗܵܢܵܐ ܐܲܝܟܲܢܵܐ ܠܵܐ ܦܵܪܫܝܼܢ ܐܢ̄ܬܘܿܢ.

⁵⁷ ܠܡܵܢܵܐ ܕܹܝܢ ܡܸܢ ܢܲܦ̮ܫܟ݂ܘܿܢ ܠܵܐ ܕܵܝܢܝܼܢ ܐܢ̄ܬܘܿܢ ܩܘܼܫܬܵܐ.

⁵⁸ ܡܵܐ ܓܹܝܪ ܕܐܵܙܹܠ ܐܲܢ̄ܬ݁ ܥܲܡ ܒܥܸܠܕܝܼܢܵܟ݂ ܠܘܵܬ݂ ܐܲܪܟܿܘܿܢܵܐ. ܥܲܕ݂ ܒܐܘܼܪܚܵܐ ܐܲܢ̄ܬ݁. ܗܲܒ݂ ܬܹܐܓ݂ܘܪܬܵܐ ܘܬܸܬ݂ܦܲܪܲܩ ܡܸܢܹܗ. ܕܲܠܡܵܐ ܢܵܘܒܠܵܟ݂ ܠܘܵܬ݂ ܕܲܝܵܢܵܐ ܘܕ݂ܲܝܵܢܵܐ ܢܲܫܠܡܵܟ݂ ܠܓܲܒܵܝܵܐ ܘܓܲܒܵܝܵܐ ܢܲܪܡܹܝܟ݂ ܒܹܝܬ݂ ܐܲܣܝܼܪܹ̈ܐ.

⁵⁹ ܘܐܵܡܲܪ ܐ̄ܢܵܐ ܠܵܟ݂. ܕܠܵܐ ܬܸܦܘܼܩ ܡܸܢ ܬܲܡܵܢ. ܥܕ݂ܲܡܵܐ ܕܬܸܬܸ݁ܠ ܫܵܡܘܿܢܵܐ ܐ̄ܚܪܵܝܵܐ.

13

¹ ܒܗܵܘ ܕܹܝܢ ܙܲܒ݂ܢܵܐ. ܐܸܬ݂ܵܘ ܐ̄ܢܵܫ̈ܝܼܢ ܐܸܡܲܪܘ ܠܹܗ ܥܲܠ ܓܠܝܼܠܵܝܹ̈ܐ ܗܵܢܘܿܢ ܕܦܝܼܠܵܛܘܿܣ ܚܠܲܛ ܕܡܗܘܿܢ ܥܲܡ ܕܸܒ݂ܚܲܝ̈ܗܘܿܢ.

² ܘܲܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ ܣܵܒ݂ܪܝܼܢ ܐܢ̄ܬܘܿܢ. ܕܗܵܠܹܝܢ ܓܠܝܼܠܵܝܹ̈ܐ: ܚܲܛܵܝܼܝܢ ܗ̄ܘܼܵܘ ܝܲܬ݁ܝܼܪ ܡܸܢ ܟܠܗܘܿܢ ܓܠܝܼܠܵܝܹ̈ܐ. ܕܗܵܟܲܢܵܐ ܗܘ̣ܵܐ ܐܸܢܘܿܢ.

³ ܠܵܐ. ܐܵܡܲܪ ܐ̄ܢܵܐ ܠܟ݂ܘܿܢ ܕܹܝܢ. ܕܐܵܦ ܟܠܟ݂ܘܿܢ ܐܸܠܵܐ ܬܬ݂ܘܒ݂ܘܢ. ܗܵܟܲܢܵܐ ܬܹܐܒ݂ܕܿܘܼܢ.

⁴ ܐܵܘ ܗܵܢܘܿܢ ܬܡܵܢܬܲܥܣܲܪ ܕܲܢܦܲܠ ܥܠܲܝܗܘܿܢ ܡܲܓ݂ܕܠܵܐ ܒܫܝܼܠܘܿܚܵܐ ܘܩܲܛܸܠ ܐܸܢܘܿܢ: ܣܵܒ݂ܪܝܼܢ ܐܢ̄ܬܘܿܢ. ܕܚܲܛܵܝܼܝܢ ܗ̄ܘܼܵܘ ܝܲܬ݁ܝܼܪ ܡܸܢ ܟܠܗܘܿܢ ܒܢܲܝ̈ܢܵܫܵܐ ܕܥܵܡܪܝܼܢ ܒܐܘܿܪܸܫܠܸܡ.

⁵ ܠܵܐ. ܐܵܡܲܪ ܐ̄ܢܵܐ ܠܟ݂ܘܿܢ ܕܹܝܢ. ܕܐܠܵܐ ܬܬ݂ܘܼܒ݂ܘܼܢ. ܟܠܟ݂ܘܿܢ ܐܲܟ݂ܘܵܬ݂ܗܘܿܢ ܬܹܐܒ݂ܕܿܘܼܢ.

⁶ ܘܐܸܡܲܪ ܡܲܬ݂ܠܵܐ ܗܵܢܵܐ. ܬܹܬܵܐ ܐܝܼܬ݂ ܗ̄ܘܵܬ݂ ܠܐ̄ܢܵܫ ܕܲܢܨܝܼܒ݂ܵܐ ܒܟܲܪܡܹܗ. ܘܐܸܬ݂ܵܐ ܒܥܵܐ ܒܵܗ̇ ܦܹܐܪܹ̈ܐ. ܘܠܵܐ ܐܸܫܟܲܚ.

⁷ ܘܐܸܡܲܪ ܠܦܲܠܵܚܵܐ. ܗܵܐ ܬܠܵܬ݂ ܫܢ̈ܝܼܢ ܐܵܬܹܐ ܐ̄ܢܵܐ ܒܵܥܹܐ ܐ̄ܢܵܐ ܦܹܐܪܹ̈ܐ ܒܬܹܬܵܐ ܗܵܕܹܐ. ܘܠܵܐ ܡܸܫܟܲܚ ܐ̄ܢܵܐ. ܦܣܘܿܩܹܝܗ̇ ܠܡܵܢܵܐ ܡܒܲܛܠܵܐ ܐܲܪܥܵܐ.

⁸ ܐܵܡܲܪ ܠܹܗ ܦܲܠܵܚܵܐ. ܡܵܪܝ. ܫܒ݂ܘܿܩܹܝܗ̇. ܐܵܦ ܗܵܕܹܐ ܫܲܢ̄ܬܵܐ. ܥܲܕ݂ ܐܸܦܠܚܝܼܗ̇ ܘܐܸܙܲܒܠܝܼܗ̇.

⁹ ܘܐܸܢ ܥܸܒ݂ܕܲܬ݂ ܦܹܐܪܹ̈ܐ. ܘܐܸܠܵܐ ܠܡܲܢܚܲܝ. ܬܸܦܣܩܝܼܗ̇.

¹⁰ ܟܲܕ݂ ܕܹܝܢ ܡܲܠܸܦ ܝܼܫܘܿܥ ܒܫܲܒܿܬ݂ܵܐ ܒܲܚܕ݂ܵܐ ܡܸܢ ܟܢ̈ܘܼܫܵܬ݂ܵܐ.

¹¹ ܐܝܼܬ݂ ܗ̄ܘܵܬ݂ ܬܲܡܵܢ ܐܲܢ̄ܬ݁ܬ݂ܵܐ ܕܐܝܼܬ݂ ܗ̄ܘܵܬ݂ ܠܵܗ̇ ܪܘܼܚܵܐ ܕܟ݂ܘܼܪܗܵܢܵܐ ܫܢ̈ܝܼܢ ܬܡܵܢܲܥܸܣܪܹ̈ܐ. ܘܲܟ݂ܦܝܼܦܵܐ ܗܘܸܵܬ݂ ܘܠܵܐ ܡܸܫܟܚܵܐ ܗ̄ܘܵܬ݂ ܕܬܸܬ݂ܦܫܸܛ ܠܲܓ݂ܡܵܪ.

¹² ܚܙܵܗ̇ ܕܹܝܢ ܝܼܫܘܿܥ ܘܲܩܪܵܗ̇. ܘܐܸܡܲܪ ܠܵܗ̇. ܐܲܢ̄ܬ݁ܬ݂ܵܐ. ܫܲܪܝܲܬ݁ܝ ܡܸܢ ܟܘܪܗܵܢܹܟ݂ܝ.

¹³ ܘܣܵܡ ܐܝܼܕ݂ܗ ܥܠܹܝܗ̇. ܘܡܸܚܕ݂ܵܐ ܐܸܬ݂ܦܲܫܛܲܬ݂. ܘܫܲܒܚܲܬ݂ ܠܐܲܠܵܗܵܐ.

¹⁴ ܥܢܵܐ ܕܹܝܢ ܪܲܒ ܟܢܘܼܫܬܵܐ ܟܲܕ݂ ܡܸܬ݂ܚܲܡܲܬ݂. ܥܲܠ ܕܐܲܣܝܼ ܒܫܲܒܿܬ݂ܵܐ ܝܼܫܘܿܥ ܘܐܸܡܲܪ ܠܟܸܢܫܹ̈ܐ. ܫܬܵܐ ܐܸܢܘܿܢ ܝܵܘܡ̈ܝܼܢ ܕܲܒ݂ܗܘܿܢ ܘܵܠܹܐ ܠܡܸܦܠܲܚ. ܒܗܘܿܢ ܗܘܲܝܬ݁ܘܿܢ ܐܵܬܹ݁ܝܢ ܡܸܬ݂ܐܲܣܹܝܢ. ܘܠܵܐ ܒܝܵܘܡܵܐ ܕܫܲܒܿܬ݂ܵܐ.

¹⁵ ܝܼܫܘܿܥ ܕܹܝܢ ܥܢܵܐ. ܘܐܸܡܲܪ ܠܹܗ. ܢܵܣܹܒ݂ ܒܐܲܦܹ̈ܐ: ܚܲܕ݂ ܚܲܕ݂ ܡܸܢܟ݂ܘܿܢ ܒܫܲܒܿܬ݂ܵܐ ܠܵܐ ܫܵܪܹܐ ܬܵܘܪܹܗ ܐܵܘ ܚܡܵܪܹܗ ܡܸܢ ܐܘܿܪܝܵܐ ܘܐܵܙܹܠ ܡܲܫܩܹܐ.

¹⁶ ܗܵܕܹܐ ܕܹܝܢ ܕܒܲܪܬܹܗ ܗ̄ܝܼ ܕܐܲܒ݂ܪܵܗܵܡ: ܘܐܲܣܪܵܗ̇ ܐܵܟܹܠܩܲܪܨܵܐ ܗܵܐ ܬܡܵܢܲܥܸܣܪܹ̈ܐ ܫܢ̈ܝܼܢ: ܠܵܐ ܘܵܠܹܐ ܗܘ̣ܵܐ ܕܬܸܫܬ݁ܪܹܐ ܡܸܢ ܗܵܢܵܐ ܐܲܣܘܼܪܝܵܐ. ܒܝܵܘܡܵܐ ܕܫܲܒܿܬ݂ܵܐ.

¹⁷ ܘܟܲܕ݂ ܗܵܠܹܝܢ ܐܵܡܲܪ ܗ̄ܘܵܐ. ܒܵܗܬ݁ܝܼܢ ܗ̄ܘܼܵܘ ܟܠܗܘܿܢ ܐܲܝܠܹܝܢ ܕܩܵܝܡܝܼܢ ܗ̄ܘܼܵܘ ܠܩܘܼܒ݂ܠܹܗ. ܘܟ݂ܠܹܗ ܥܲܡܵܐ. ܚܵܕܹܐ ܗܘ̣ܵܐ ܒܟܠܗܹܝܢ ܬܡܝܼ̈ܗܵܬ݂ܵܐ ܕܗܵܘܝܵܢ ܗ̄ܘܲܝ̈ ܒܐܝܕ݂ܗ.

¹⁸ ܐܸܡܲܪ ܗܘ̣ܵܐ ܕܹܝܢ ܝܼܫܘܿܥ. ܠܡܵܢܵܐ ܕܵܡܝܵܐ ܡܲܠܟܘܼܬ݂ܵܐ ܕܐܲܠܵܗܵܐ ܘܲܠܡܵܢܵܐ ܐܸܕܲܡܹܝܗ̇.

¹⁹ ܕܵܡܝܵܐ ܠܲܦܪܸܕ݂ܬܵܐ ܕܚܲܪܕܠܵܐ ܗܵܝ ܕܲܢܣܲܒ݂ ܓܲܒ݂ܪܵܐ ܐܲܪܡܝܵܗ̇ ܒܓܲܢܬܹܗ. ܘܲܪܒ݂ܵܬ݂ ܘܲܗܘܵܬ݂ ܐܝܼܠܵܢܵܐ ܪܲܒܵܐ. ܘܦܵܪܲܚܬ݂ܵܐ ܕܲܫܡܲܝܵܐ ܐܲܩܢܲܬ݂ ܒܣܵܘܟܹܝ̈ܗ̇.

²⁰ ܬܘܼܒ݂ ܐܸܡܲܪ ܝܼܫܘܿܥ. ܠܡܵܢܵܐ ܐܸܕܲܡܹܝܗ̇ ܠܡܲܠܟܘܼܬ݂ܵܐ ܕܐܲܠܵܗܵܐ.

²¹ ܕܵܡܝܵܐ ܠܲܚܡܝܼܪܵܐ ܕܢܸܣܒܲܬ݂ ܐܲܢ̄ܬ݁ܬ݂ܵܐ. ܛܸܡܪܲܬ݂ ܒܩܲܡܚܵܐ ܕܲܬ݂ܠܵܬ݂ ܣܐ̈ܝܼܢ ܥܕ݂ܲܡܵܐ ܕܟ݂ܠܹܗ ܚܡܲܥ.

²² ܘܪܵܕܹܐ ܗܘ̣ܵܐ ܒܩܘܼܪ̈ܝܵܐ ܘܒܲܡܕ݂ܝܼ̈ܢܵܬ݂ܵܐ ܟܲܕ݂ ܡܲܠܸܦ. ܘܐܵܙܹܠ ܠܐܘܿܪܸܫܠܸܡ.

²³ ܫܲܐܠܹܗ ܕܹܝܢ ܐ̄ܢܵܫ. ܕܐܸܢ ܙܥܘܿܪ̈ܝܼܢ ܐܸܢܘܿܢ ܐܲܝܠܹܝܢ ܕܚܵܐܹܝܢ.

²⁴ ܝܼܫܘܿܥ ܕܹܝܢ ܐܸܡܲܪ ܠܗܘܿܢ. ܐܸܬ݂ܟܲܬ݁ܫܘ ܠܡܸܥܲܠ ܒܬܲܪܥܵܐ ܐܲܠܝܼܨܵܐ. ܐܵܡܲܪ ܐ̄ܢܵܐ ܠܟ݂ܘܿܢ ܓܹܝܪ. ܕܣܲܓܝܼܐܹ̈ܐ ܢܸܒ݂ܥܘܿܢ ܠܡܸܥܲܠ. ܘܠܵܐ ܢܸܫܟܚܘܼܢ.

²⁵ ܡܸܢ ܫܵܥܬ݂ܵܐ ܕܲܢܩܘܼܡ ܡܵܪܹܐ ܒܲܝܬܵܐ. ܘܢܹܐܚܘܿܕ݂ ܬܲܪܥܵܐ. ܘܬܸܗܘܘܿܢ ܩܵܝܡܝܼܢ ܠܒܲܪ. ܘܢܵܩܫܝܼܢ ܒܬܲܪܥܵܐ. ܘܲܬ݂ܫܲܪܘܿܢ ܠܡܹܐܡܲܪ. ܡܵܪܲܢ ܡܵܪܲܢ. ܦܬܲܚ ܠܲܢ. ܘܢܸܥܢܹܐ ܗܘܼ. ܘܢܹܐܡܲܪ. ܐܵܡܲܪ ܐ̄ܢܵܐ ܠܟ݂ܘܿܢ. ܕܠܵܐ ܝܵܕ݂ܲܥ ܐ̄ܢܵܐ ܠܟ݂ܘܿܢ. ܐܲܝܡܸܟܵܐ ܐܢ̄ܬܘܿܢ.

²⁶ ܘܲܬ݂ܫܲܪܘܿܢ ܠܡܹܐܡܲܪ. ܩܕ݂ܵܡܲܝܟ ܐܸܟ݂ܲܠܢ. ܘܐܸܫܬ݁ܝܼܢ. ܘܲܒ݂ܫܘܼܩܲܝ̈ܢ ܐܲܠܸܦܬ݁.

²⁷ ܘܢܹܐܡܲܪ ܠܟ݂ܘܿܢ. ܕܠܵܐ ܝܵܕ݂ܲܥ ܐ̄ܢܵܐ ܠܟ݂ܘܿܢ. ܐܲܝܡܸܟܵܐ ܐܢ̄ܬܘܿܢ. ܦܪܘܿܩܘ ܠܟ݂ܘܿܢ ܡܹܢܝ ܦܵܠܚܲܝ̈ ܫܘܼܩܪܵܐ.

²⁸ ܬܲܡܵܢ ܢܸܗܘܹܐ ܒܸܟ݂ܝܵܐ. ܘܚܘܼܪܵܩ ܫܸܢܹ̈ܐ. ܟܲܕ݂ ܬܸܚܙܘܿܢ ܠܐܲܒ݂ܪܵܗܵܡ ܘܠܐܝܼܣܚܵܩ ܘܲܠܝܲܥܩܘܿܒ݂ ܘܲܠܟ݂ܠܗܘܿܢ ܢܒ݂ܝܹ̈ܐ ܒܡܲܠܟܘܼܬ݂ܵܐ ܕܐܲܠܵܗܵܐ. ܐܲܢ̄ܬ݁ܘܿܢ ܕܹܝܢ ܬܸܗܘܘܿܢ ܡܲܦܩܝܼܢ ܠܒܲܪ.

²⁹ ܘܢܹܐܬ݂ܘܢ ܡܸܢ ܡܲܕ݂ܢܚܵܐ ܘܡܸܢ ܡܲܥܪܒ݂ܵܐ. ܘܡܸܢ ܬܲܝܡܢܵܐ ܘܡܸܢ ܓܲܪܒ݂ܝܵܐ. ܘܢܸܣܬܲܡܟܿܘܼܢ ܒܡܲܠܟܘܼܬ݂ܵܐ ܕܐܲܠܵܗܵܐ.

³⁰ ܘܗܵܐ ܐܝܼܬ݂ ܐ̄ܚܪ̈ܵܝܹܐ ܕܢܸܗܘܘܿܢ ܩܲܕ݂ܡܵܝܹ̈ܐ. ܘܐܝܼܬ݂ ܩܲܕ݂ܡܵܝܹ̈ܐ ܕܢܸܗܘܘܿܢ ܐ̄ܚܪ̈ܵܝܹܐ.

³¹ ܒܹܗ ܒܗܵܘ ܝܵܘܡܵܐ. ܩܪܸܒ݂ܘ ܐ̄ܢܵܫܵܐ ܡܸܢ ܦܪ̈ܝܼܫܹܐ. ܘܐܵܡܪܝܼܢ ܠܹܗ. ܦܘܿܩ ܙܸܠ ܠܵܟ݂ ܡܸܟܵܐ. ܡܛܠ ܕܗܹܪܘܿܕܸܣ ܨܵܒܹܐ ܠܡܸܩܛܠܵܟ݂.

³² ܐܵܡܲܪ ܠܗܘܿܢ ܝܼܫܘܿܥ. ܙܸܠܘ ܐܸܡܲܪܘ ܠܬܲܥܠܵܐ ܗܵܢܵܐ. ܕܗܵܐ ܡܲܦܸܩ ܐ̄ܢܵܐ ܫܹܐܕܹ̈ܐ. ܘܐܵܣ̈ܘܵܬ݂ܵܐ ܥܵܒܹܿܕ݂ ܐ̄ܢܵܐ ܝܵܘܡܵܢܵܐ ܘܲܡܚܵܪ. ܘܲܠܝܵܘܡܵܐ ܕܲܬ݂ܠܵܬ݂ܵܐ ܡܸܫܬܲܡܠܹܐ ܐ̄ܢܵܐ.

³³ ܒܪܲܡ ܘܵܠܹܐ ܠܝܼ ܕܝܵܘܡܵܢܵܐ ܘܲܡܚܵܪ ܐܸܣܥܘܿܪ. ܘܲܠܝܵܘܡܵܐ ܐ̄ܚܪܹܢܵܐ ܐܹܙܲܠ. ܡܛܠ ܕܠܵܐ ܡܸܫܟܚܵܐ ܕܲܢܒ݂ܝܼܵܐ ܢܹܐܒܲܕ݂ ܠܒܲܪ ܡܸܢ ܐܘܿܪܸܫܠܸܡ.

³⁴ ܐܘܿܪܸܫܠܸܡ ܐܘܿܪܸܫܠܸܡ. ܩܵܛܠܲܬ݂ ܢܒ݂ܝܹ̈ܐ: ܘܪܵܓ݂ܡܲܬ݂ ܠܐܲܝܠܹܝܢ ܕܲܫܠܝܼܚܝܼܢ ܠܘܵܬ݂ܵܗ̇. ܟܡܵܐ ܙܲܒ݂ܢ̈ܝܼܢ ܨܒܹܝܬ݂ ܠܲܡܟܲܢܵܫܘܼ ܒܢܲܝ̈ܟܝ: ܐܲܝܟ݂ ܬܲܪܢܵܓ݂ܘܼܠܬܵܐ ܕܟ݂ܵܢܫܵܐ ܦܲܪ̈ܘܼܓܹܝܗ̇ ܬܚܹܝܬ݂ ܓܸܦܹܝ̈ܗ̇: ܘܠܵܐ ܨܒܲܝܬ݁ܘܢ.

³⁵ ܗܵܐ ܡܸܫܬ݁ܒܸܩ ܠܟ݂ܘܿܢ ܒܲܝܬ݁ܟ݂ܘܿܢ. ܚܲܪܒܵܐ. ܐܵܡܲܪ ܐ̄ܢܵܐ ܠܟ݂ܘܿܢ ܓܹܝܪ ܕܠܵܐ ܬܸܚܙܘܿܢܵܢܝ ܥܕ݂ܲܡܵܐ ܕܬܹܐܡܪܘܼܢ ܒܪܝܼܟ݂ ܗܘܼ ܕܐܵܬܹܐ ܒܲܫܡܹܗ ܕܡܵܪܝܵܐ.

14

¹ ܘܲܗܘܵܐ ܕܟܲܕ݂ ܥܲܠ ܠܒܲܝܬܵܐ ܕܚܲܕ݂ ܡܸܢ ܪܹ̈ܫܹܐ ܕܲܦܪ̈ܝܼܫܹܐ ܕܢܹܐܟ݂ܘܿܠ ܠܲܚܡܵܐ ܒܝܵܘܡܵܐ ܕܫܲܒܿܬ݂ܵܐ. ܘܗܸܢܘܿܢ ܢܵܛܪܝܼܢ ܗ̄ܘܼܵܘ ܠܹܗ.

² ܘܗܵܐ ܓܲܒ݂ܪܵܐ ܚܲܕ݂ ܕܲܟ݂ܢܝܼܫ ܗܘ̣ܵܐ ܡܲܝ̈ܵܐ. ܐܝܼܬ݂ ܗܘ̣ܵܐ ܩܕ݂ܵܡܵܘܗܝ.

³ ܘܲܥܢܵܐ ܝܼܫܘܿܥ. ܘܐܸܡܲܪ ܠܣܵܦܪܹ̈ܐ ܘܠܲܦܪ̈ܝܼܫܹܐ. ܕܐܸܢ ܫܲܠܝܼܛ ܒܫܲܒܿܬ݂ܵܐ ܠܡܲܐܣܵܝܘܼ.

⁴ ܗܸܢܘܿܢ ܕܹܝܢ ܫܬܸܩܘ. ܘܐܲܚܕܹܗ ܗܘܼ. ܘܐܲܣܝܹܗ. ܘܲܫܪܵܝܗܝ.

⁵ ܘܐܸܡܲܪ ܠܗܘܿܢ. ܡܲܢܘܼ ܡܸܢܟ݂ܘܿܢ ܕܢܸܦܸܠ ܒܪܹܗ ܐܵܘ ܬܵܘܪܹܗ. ܒܒܹܪܵܐ ܒܝܵܘܡܵܐ ܕܫܲܒܿܬ݂ܵܐ ܘܠܵܐ ܡܸܚܕ݂ܵܐ ܕܵܠܹܐ ܡܲܣܸܩ ܠܹܗ.

⁶ ܘܠܵܐ ܐܸܫܟܲܚܘ ܠܡܸܬܲܠ ܠܹܗ ܦܸܬ݂ܓ݂ܵܡܵܐ ܥܲܠ ܗܵܕܹܐ.

⁷ ܘܐܸܡܲܪ ܗܘ̣ܵܐ ܡܲܬ݂ܠܵܐ ܠܘܵܬ݂ ܗܵܢܘܿܢ ܕܲܡܙܲܡܢܝܼܢ ܬܲܡܵܢ ܥܲܠ ܕܚܵܙܹܐ ܗܘ̣ܵܐ ܠܗܘܿܢ ܕܲܡܓܲܒܹܝܢ ܕܘܟ̈ܝܵܬ݂ܵܐ ܕܪܹܝܫ ܣܡܵܟܹ̈ܐ.

⁸ ܐܸܡܲܬ݂ܝ ܕܡܸܙܕ݂ܲܡܲܢ ܐܲܢ̄ܬ݁ ܡܸܢ ܐ̄ܢܵܫ ܠܒܹܝܬ݂ ܡܸܫܬܘܼܬ݂ܵܐ. ܠܵܐ ܬܹܐܙܲܠ ܬܸܣܬ݁ܡܸܟ݂ ܠܵܟ݂ ܒܪܹܝܫ ܣܡܵܟ݂ܵܐ. ܕܲܠܡܵܐ ܢܸܗܘܹܐ ܡܙܲܡܲܢ ܬܲܡܵܢ ܐ̄ܢܵܫ ܕܲܡܝܲܩܲܪ ܡܸܢܵܟ݂

⁹ ܘܢܹܐܬܹܐ ܗܵܘ ܡܲܢ ܕܠܵܟ݂ ܘܠܹܗ ܩܪܵܐ ܘܢܹܐܡܲܪ ܠܵܟ݂. ܕܗܲܒ݂ ܕܘܼܟܬ݂ܵܐ ܠܗܵܢܵܐ ܘܬܸܒ݂ܗܲܬ݂ ܟܲܕ݂ ܩܵܐܹܡ ܐܲܢ̄ܬ݁ ܘܐܵܚܹܕ݂ ܐܲܢ̄ܬ݁ ܕܘܼܟܬ݂ܵܐ ܐ̄ܚܪܵܝܬܵܐ.

¹⁰ ܐܸܠܵܐ ܡܵܐ ܕܐܙܕܲܡܲܢܬ݁. ܙܸܠ ܐܸܣܬܲܡ̱ܟ ܠܵܟ݂ ܒܚܲܪܬ݂ܵܐ. ܕܡܵܐ ܕܐܵܬܹܐ ܗܵܘ ܕܲܩܪܵܟ݂ ܢܹܐܡܲܪ ܠܵܟ݂. ܪܵܚܹܡܝ. ܐܸܬ݂ܥܲܠܵܐ ܠܥܸܠ. ܘܐܸܣܬ݁ܡܸܟ݂. ܘܬܸܗܘܹܐ ܠܵܟ݂ ܬܸܫܒܿܘܿܚܬܵܐ. ܩܕ݂ܵܡ ܟܠܗܘܿܢ ܕܲܣܡܝܼܟ݂ܝܼܢ ܥܲܡܵܟ݂.

¹¹ ܡܛܠ ܕܟܠ ܕܲܢܪܝܼܡ ܢܲܦ̮ܫܹܗ ܢܸܬ݂ܡܲܟܲܟ݂. ܘܟ݂ܠ ܕܢܲܡܸܟ݂ ܢܲܦ̮ܫܹܗ ܢܸܬ݁ܬ݁ܪܝܼܡ.

¹² ܐܸܡܲܪ ܕܹܝܢ ܐܵܦ ܠܗܵܘ ܕܲܩܪܵܝܗܝ. ܡܵܐ ܕܥܵܒܹܿܕ݂ ܐܲܢ̄ܬ݁ ܫܵܪܘܼܬ݂ܵܐ ܐܵܘ ܐܚܫܵܡܝܼܬ݂ܵܐ (ܚܫܵܡܝܼܬ݂ܵܐ). ܠܵܐ ܬܸܗܘܹܐ ܩܵܪܹܐ ܪ̈ܵܚܡܲܝܟ. ܐܵܦܠܵܐ ܐܲܚܲܝ̈ܟ. ܐܵܘ ܐ̄ܚܝܵܢܲܝ̈ܟ. ܘܠܵܐ ܫܒ݂ܵܒܲܝ̈ܟ ܥܲܬ݁ܝܼܪܹ̈ܐ. ܕܲܠܡܵܐ ܘܐܵܦ ܗܸܢܘܿܢ ܢܸܩܪܘܿܢܵܟ݂ ܘܢܸܗܘܹܐ ܠܵܟ݂ ܦܘܼܪܥܵܢܵܐ ܗܵܢܵܐ.

¹³ ܐܸܠܵܐ ܡܵܐ ܕܥܵܒܹܿܕ݂ ܐܲܢ̄ܬ݁ ܩܘܼܒܵܠܵܐ. ܩܪܝܼ ܠܡܸܣܟܹܢܹ̈ܐ. ܣܓ݂ܝܼܦܹ̈ܐ. ܚܓ݂ܝܼܣܹ̈ܐ. ܣܡܲܝ̈ܵܐ.

¹⁴ ܘܛܘܼܒܲܝܟ ܕܠܲܝܬ݁ ܠܗܘܿܢ ܕܢܸܦܪܥܘܼܢܵܟ݂. ܢܸܗܘܹܐ ܓܹܝܪ ܦܘܼܪܥܵܢܵܟ݂. ܒܲܩܝܵܡܵܐ ܕܙܲܕܝܼܩܹ̈ܐ.

¹⁵ ܟܲܕ݂ ܫܡܲܥ ܕܹܝܢ ܚܲܕ݂ ܡܸܢ ܗܵܢܘܿܢ ܕܲܣܡܝܼܟ݂ܝܼܢ ܗܵܠܹܝܢ. ܐܸܡܲܪ ܠܹܗ. ܛܘܼܒ݂ܵܘܗܝ ܠܡܲܢ ܕܢܹܐܟ݂ܘܿܠ ܠܲܚܡܵܐ ܒܡܲܠܟܘܼܬܹܗ ܕܐܲܠܵܗܵܐ.

¹⁶ ܐܵܡܲܪ ܠܹܗ ܝܼܫܘܿܥ. ܓܲܒ݂ܪܵܐ ܚܲܕ݂ ܥܒܲܕ݂ ܐܚܫܵܡܝܼܬ݂ܵܐ (ܚܫܵܡܝܼܬ݂ܵܐ) ܪܲܒܬ݂ܵܐ. ܘܲܩܪܵܐ ܠܣܲܓܝܼܐܹ̈ܐ.

¹⁷ ܘܫܲܕܲܪ ܥܲܒ݂ܕܹܗ ܒܥܸܕܵܢܵܐ ܕܲܐܚܫܵܡܝܼܬ݂ܵܐ (ܚܫܵܡܝܼܬ݂ܵܐ) ܕܢܹܐܡܲܪ ܠܐܲܝܠܹܝܢ ܕܲܩܪܹܝܢ. ܗܵܐ ܟܠ ܡܸܕܸܡ ܡܛܲܝܲܒ݂ ܠܟ݂ܘܿܢ. ܬܵܘ.

¹⁸ ܘܫܲܪܝܼܘ ܡܸܢ ܚܲܕ݂ ܟܠܗܘܿܢ ܠܡܸܫܬܐܵܠܘܼ. ܐܵܡܲܪ ܠܹܗ ܩܲܕ݂ܡܵܝܵܐ. ܩܪܝܼܬ݂ܵܐ ܙܸܒ݂ܢܹܬ݂. ܘܐܲܠܝܼܨ ܐ̄ܢܵܐ ܕܐܹܦܘܼܩ ܐܸܚܙܹܝܗ̇. ܒܵܥܹܐ ܐ̄ܢܵܐ ܡܸܢܵܟ݂. ܫܒ݂ܘܿܩܲܝܢܝ ܕܡܸܫܬ݁ܐܸܠ ܐ̄ܢܵܐ.

¹⁹ ܐ̄ܚܪܹܢܵܐ ܐܵܡܲܪ. ܚܲܡܫܵܐ ܙܵܘܓܿܝܼ̈ܢ ܬܵܘܪܹ̈ܐ ܙܸܒ݂ܢܹܬ݂. ܘܐܵܙܹܠ ܐ̄ܢܵܐ ܕܐܸܒ݂ܩܹ̈ܐ ܐܸܢܘܿܢ. ܒܵܥܹܐ ܐ̄ܢܵܐ ܡܸܢܵܟ݂. ܫܒ݂ܘܿܩܲܝܢܝ ܕܡܸܫܬ݁ܐܸܠ ܐ̄ܢܵܐ.

²⁰ ܘܐ̄ܚܪܹܢܵܐ ܐܵܡܲܪ. ܐܲܢ̄ܬ݁ܬ݂ܵܐ ܢܸܣܒܹܬ݂. ܘܡܛܠ ܗܵܕܹܐ ܠܵܐ ܡܸܫܟܲܚ ܐ̄ܢܵܐ ܕܐܵܬܹܐ.

²¹ ܘܐܸܬ݂ܵܐ ܗܵܘ ܥܲܒ݂ܕܵܐ. ܘܐܸܡܲܪ ܠܡܵܪܹܗ ܗܵܠܹܝܢ. ܗܵܝܕܹܝܢ ܪܓܸܙ ܡܵܪܹܐ ܒܲܝܬܵܐ. ܘܐܸܡܲܪ ܠܥܲܒ݂ܕܹܗ. ܦܘܿܩ ܒܲܥܓܲܠ ܠܫܘܼܩܹ̈ܐ ܘܲܠܒܹܪ̈ܝܵܬ݂ܵܐ ܕܲܡܕ݂ܝܼܢ̄ܬܵܐ. ܘܐܲܥܸܠ ܠܟ݂ܵܐ ܠܡܸܣܟܹܢܹ̈ܐ. ܘܲܠܡܲܟ݂ܐܒܹ̈ܐ. ܘܠܲܡܚܲܓܪܹ̈ܐ ܘܠܲܥܘܝܼܪܹ̈ܐ.

²² ܘܐܸܡܲܪ ܥܲܒ݂ܕܵܐ. ܡܵܪܝ. ܗܘ̣ܵܐ ܐܲܝܟ݂ ܕܲܦܩܲܕܬ݁. ܘܬ݂ܘܼܒ݂ ܐܝܼܬ݂ ܐܲܬ݂ܪܵܐ.

²³ ܘܐܸܡܲܪ ܡܵܪܵܐ ܠܥܲܒ݂ܕܹܗ. ܦܘܿܩ ܠܐܘܼܪ̈ܚܵܬ݂ܵܐ. ܘܲܠܒܹܝܬ݂ ܣܝܵܓܹ̈ܐ. ܘܐܲܠܘܿܨ ܕܢܸܥܠܘܼܢ. ܕܢܸܬ݂ܡܠܹܐ ܒܲܝܬ݁ܝ.

²⁴ ܐܵܡܲܪ ܐ̄ܢܵܐ ܠܟ݂ܘܿܢ ܓܹܝܪ. ܕܚܲܕ݂ ܡܸܢ ܗܵܢܘܿܢ ܐ̄ܢܵܫܵܐ ܕܲܩܪܹܝܢ ܗ̄ܘܼܵܘ. ܠܵܐ ܢܸܛܥܡܘܼܢ ܡܸܢ ܐܚܫܵܡܝܼܬ݂ܝ (ܚܫܵܡܝܼܬ݂ܝ).

²⁵ ܘܟܲܕ݂ ܐܵܙܠ̄ܝܼܢ ܗ̄ܘܼܵܘ ܥܲܡܹܗ ܟܸܢܫܹ̈ܐ ܣܲܓܝܼܐܹ̈ܐ. ܐܸܬ݂ܦܢܝܼ. ܘܐܸܡܲܪ ܠܗܘܿܢ.

²⁶ ܡܲܢ ܕܐܵܬܹܐ ܠܘܵܬ݂ܝ ܘܠܵܐ ܣܵܢܹܐ ܠܐܲܒ݂ܘܼܗܝ ܘܠܸܐܡܹܗ: ܘܠܲܐܚܵܘܗܝ ܘܠܲܐܚ̈ܘܵܬܹܗ: ܘܠܲܐܢ̱ܬ݁ܬܹܗ ܘܠܲܒ݂ܢܵܘ̈ܗܝ. ܘܐܵܦ ܠܢܲܦ̮ܫܹܗ. ܬܲܠܡܝܼܕ݂ܵܐ. ܠܵܐ ܡܸܫܟܲܚ ܕܢܸܗܘܹܐ ܠܝܼ.

²⁷ ܘܡܲܢ ܕܠܵܐ ܫܵܩܹܠ ܨܠܝܼܒܹܗ ܘܐܵܬܹܐ ܒܵܬܲܪܝ. ܬܲܠܡܝܼܕ݂ܵܐ. ܠܵܐ ܡܸܫܟܲܚ ܕܢܸܗܘܹܐ ܠܝܼ.

²⁸ ܡܲܢܘܼ ܓܹܝܪ ܡܸܢܟ݂ܘܿܢ ܕܨܵܒܹܐ ܕܢܸܒ݂ܢܹܐ ܡܲܓ݂ܕܠܵܐ ܘܠܵܐ ܠܘܼܩܕ݂ܲܡ ܝܵܬܹ݁ܒ݂ ܚܵܫܹܒ݂ ܢܲܦ̈ܩܵܬܹܗ ܐܸܢ ܐܝܼܬ݂ ܠܹܗ ܠܲܡܫܲܠܵܡܘܼܬܹܗ.

²⁹ ܕܠܵܐ ܟܲܕ݂ ܢܣܝܼܡ ܫܲܬ݂ܐܣܬܵܐ ܘܠܵܐ ܢܸܫܟܲܚ ܠܲܡܫܲܠܵܡܘܼ. ܟܠ ܕܚܵܙܹܝܢ ܢܸܗܘܘܿܢ ܡܒܲܙܚܝܼܢ ܒܹܗ.

³⁰ ܘܐܵܡܪܝܼܢ. ܕܗܵܢܵܐ ܓܲܒ݂ܪܵܐ ܫܲܪܝܼ ܠܡܸܒ݂ܢܵܐ. ܘܠܵܐ ܐܸܫܟܲܚ ܠܲܡܫܲܠܵܡܘܼ.

³¹ ܐܵܘ ܡܲܢܘܼ ܡܲܠܟܵܐ ܕܐܵܙܸܠ ܠܲܩܪܵܒ݂ܵܐ ܠܡܸܬ݂ܟܲܬܵܫܘܼ ܥܲܡ ܡܲܠܟܵܐ ܚܲܒ݂ܪܹܗ ܘܠܵܐ ܠܘܼܩܕ݂ܲܡ ܡܸܬ݂ܪܲܥܹܐ ܕܐܸܢ ܡܸܫܟܲܚ ܒܥܸܣܪܵܐ ܐܲܠܦ̈ܝܼܢ ܠܡܹܐܪܲܥ ܠܗܵܘ ܕܐܵܬܹܐ ܥܠܵܘܗܝ ܒܥܸܣܪܝܼܢ ܐܲܠܦ̈ܝܼܢ.

³² ܘܐܸܢ ܕܹܝܢ ܠܵܐ ܥܲܕ݂ ܗܘܼ ܪܲܚܝܼܩ ܡܸܢܹܗ. ܡܫܲܕܲܪ ܐܝܼܙܓܲܕܹ̈ܐ. ܘܒ݂ܵܥܹܐ ܥܲܠ ܫܠܵܡܵܐ.

³³ ܗܵܟܲܢܵܐ ܟܠܢܵܫ ܡܸܢܟ݂ܘܿܢ ܕܠܵܐ ܫܵܒܹܩ ܟܠܹܗ ܩܸܢܝܵܢܹܗ. ܠܵܐ ܡܸܫܟܲܚ ܕܢܸܗܘܹܐ ܠܝܼ ܬܲܠܡܝܼܕ݂ܵܐ.

³⁴ ܫܲܦܝܼܪܵܐ ܗܝ ܡܸܠܚܵܐ. ܐܸܢ ܕܹܝܢ ܐܵܦ ܡܸܠܚܵܐ ܬܸܦ̮ܟܲܗ. ܒܡܵܢܵܐ ܬܸܬ݂ܡܠܲܚ.

³⁵ ܠܵܐ ܠܐܲܪܥܵܐ. ܘܠܵܐ ܠܙܸܒ݂ܠܵܐ ܐܵܙܵܠ̄ܐ. ܠܒܲܪ ܫܵܕ݂ܝܢ ܠܵܗ̇. ܡܲܢ ܕܐܝܼܬ݂ ܠܹܗ ܐܸܕ݂ܢܹ̈ܐ ܕܢܸܫܡܲܥ. ܢܸܫܡܲܥ.

15

¹ ܡܸܬ݂ܩܲܪܒ݂ܝܼܢ ܗ̄ܘܼܵܘ ܕܹܝܢ ܠܘܵܬܹܗ ܡܵܟ݂ܣܹ̈ܐ ܘܚܲܛܵܝܹ̈ܐ ܕܢܸܫܡܥܘܼܢܵܝܗܝ.

² ܘܣܵܦܪܹ̈ܐ ܘܲܦܪ̈ܝܼܫܹܐ ܪܵܛܢܝܼܢ ܗ̄ܘܼܵܘ. ܘܐܵܡܪܝܼܢ. ܗܵܢܵܐ ܠܚܲܛܵܝܹ̈ܐ ܡܩܲܒܸܠ. ܘܐܵܟܹܠ ܥܲܡܗܘܿܢ.

³ ܘܐܸܡܲܪ ܠܗܘܿܢ ܝܼܫܘܿܥ ܡܲܬ݂ܠܵܐ ܗܵܢܵܐ.

⁴ ܡܲܢܘܼ ܡܸܢܟ݂ܘܿܢ ܓܲܒ݂ܪܵܐ ܕܐܝܼܬ݂ ܠܹܗ ܡܵܐܐ ܥܸܪ̈ܒܝܼܢ ܘܐܸܢ ܢܹܐܒܲܕ݂ ܚܲܕ݂ ܡܸܢܗܘܿܢ ܠܵܐ ܫܵܒܹܩ ܬܸܫܥܝܼܢ ܘܬܸܫܥܵܐ ܒܕ݂ܲܒ݂ܪܵܐ: ܘܐܵܙܹܠ ܒܵܥܹܐ ܠܗܵܘ ܕܐܸܒܲܕ݂ ܥܕ݂ܲܡܵܐ ܕܢܸܫܟܚܝܼܘܗܝ.

⁵ ܘܡܵܐ ܕܐܸܫܟܚܹܗ. ܚܵܕܹܐ ܘܫܵܩܹܠ ܠܹܗ ܥܲܠ ܟܲܬ݂̈ܦܵܬܹܗ.

⁶ ܘܐܵܬܹܐ ܠܒܲܝܬܹ݁ܗ. ܘܩܵܪܹܐ ܠܪ̈ܵܚܡܵܘܗܝ ܘܠܲܫ̈ܒ݂ܵܒ݂ܵܘܗܝ. ܘܐܵܡܲܪ ܠܗܘܿܢ ܚܕ݂ܵܘ ܥܲܡܝ ܕܐܸܫܟܚܹܬ݂ ܥܸܪܒܝ ܕܐܲܒܝܼܕ݂ ܗܘܵܐ.

⁷ ܐܵܡܲܪ ܐ̄ܢܵܐ ܠܟ݂ܘܿܢ. ܕܗܵܟܲܢܵܐ ܬܸܗܘܹܐ ܚܲܕ݂ܘܼܬ݂ܵܐ ܒܲܫܡܲܝܵܐ ܥܲܠ ܚܲܕ݂ ܚܲܛܵܝܵܐ ܕܬ݂ܵܐܹܒ݂ ܐܵܘ ܥܲܠ ܬܸܫܥܝܼܢ ܘܬܸܫܥܵܐ ܙܲܕܝܼܩ̈ܝܼܢ ܕܠܵܐ ܡܸܬ݂ܒܲܥܝܵܐ ܠܗܘܿܢ ܬܝܵܒ݂ܘܼܬ݂ܵܐ.

⁸ ܐܵܘ ܐܲܝܕ݂ܵܐ ܗܝ ܐܲܢ̄ܬ݁ܬ݂ܵܐ ܕܐܝܼܬ݂ ܠܵܗ̇ ܥܸܣܪܵܐ ܙܘܼܙ̈ܝܼܢ. ܘܬ݂ܵܘܒܸܕ݂ ܚܲܕ݂ ܡܸܢܗܘܿܢ. ܘܠܵܐ ܡܲܢܗܪܵܐ ܫܪܵܓ݂ܵܐ ܘܚܵܡܵܐ ܒܲܝܬܵܐ ܘܒ݂ܵܥܝܵܐ ܠܹܗ ܒܛܝܼܠܵܐܝܼܬ݂. ܥܕ݂ܲܡܵܐ ܕܬܸܫܟܚܝܼܘܗܝ.

⁹ ܘܡܵܐ ܕܐܸܫܟܲܚܬܹܗ. ܩܵܪܝܵܐ ܠܪ̈ܵܚܡܵܬ݂ܵܗ̇ ܘܠܲܫ̈ܒ݂ܵܒ݂ܵܬ݂ܵܗ̇. ܘܐܵܡܪܵܐ ܠܗܹܝܢ. ܚܕ݂ܵܝܼܝܢ ܥܲܡܝ ܕܐܸܫܟܚܹܬ݂ ܙܘܼܙܝ ܕܐܲܒܝܼܕ݂ ܗ̄ܘܵܐ.

¹⁰ ܐܵܡܲܪ ܐ̄ܢܵܐ ܠܟ݂ܘܿܢ. ܕܗܵܟܲܢܵܐ ܬܸܗܘܹܐ ܚܲܕ݂ܘܼܬ݂ܵܐ ܩܕ݂ܵܡ ܡܲܠܲܐܟ݂ܵܘ̈ܗܝ ܕܐܲܠܵܗܵܐ ܥܲܠ ܚܲܕ݂ ܚܲܛܵܝܵܐ ܕܬ݂ܵܐܹܒ݂.

¹¹ ܘܐܸܡܲܪ ܗܘ̣ܵܐ ܠܗܘܿܢ ܬܘܼܒ݂ ܝܼܫܘܿܥ. ܠܓܲܒ݂ܪܵܐ ܚܲܕ݂ ܐܝܼܬ݂ ܗܘ̣ܵܐ ܠܹܗ ܒ̈ܢܲܝܵܐ ܬܪܹܝܢ.

¹² ܘܐܸܡܲܪ ܠܹܗ ܒܪܹܗ ܙܥܘܿܪܵܐ. ܐܵܒ݂ܝ. ܗܲܒ݂ ܠܝܼ ܦܵܠܓܘܼܬ݂ܵܐ ܕܡܵܛܝܵܐ ܠܝܼ ܡܸܢ ܒܲܝܬܵܟ݂. ܘܦܲܠܸܓ݂ ܠܗܘܿܢ ܩܸܢܝܵܢܹܗ.

¹³ ܘܡܸܢ ܒܵܬܲܪ ܝܵܘ̈ܡܵܬ݂ܵܐ ܩܲܠܝܼܠ. ܟܲܢܸܫ ܗܵܘ ܒܪܹܗ ܙܥܘܿܪܵܐ ܟܠ ܡܸܕܸܡ ܕܲܡܛܵܝܗܝ. ܘܐܸܙܲܠ ܠܐܲܬ݂ܪܵܐ ܪܲܚܝܼܩܵܐ. ܘܬܲܡܵܢ ܒܲܕܲܪ ܩܸܢܝܵܢܹܗ. ܟܲܕ݂ ܚܵܝܹܿܐ ܦܲܪܵܚܵܐܝܼܬ݂.

¹⁴ ܘܟܲܕ݂ ܓܲܡܲܪ ܟܠ ܡܸܕܸܡ ܕܐܝܼܬ݂ ܗܘ̣ܵܐ ܠܹܗ. ܗܘ̣ܵܐ ܟܲܦܢܵܐ ܪܲܒܵܐ ܒܐܲܬ݂ܪܵܐ ܗܵܘ. ܘܫܲܪܝܼ ܚܵܣܲܪ ܠܹܗ.

¹⁵ ܘܐܸܙܲܠ ܢܩܸܦ ܠܹܗ ܠܚܲܕ݂ ܡܸܢ ܒܢܲܝ̈ ܡܕ݂ܝܼܢ̄ܬܵܐ ܕܐܲܬ݂ܪܵܐ ܗܵܘ. ܘܗܘܼ ܫܲܕܪܹܗ ܠܲܩܪܝܼܬ݂ܵܐ. ܠܡܸܪܥܵܐ ܚܙܝܼܪܹ̈ܐ.

¹⁶ ܘܡܸܬ݂ܪܲܓ݂ܪܲܓ݂ ܗܘ̣ܵܐ ܠܡܸܡܠܵܐ ܟܲܪܣܹܗ ܡܸܢ ܚܲܪ̈ܘܼܒܹܐ ܗܵܢܘܿܢ ܕܐܵܟ݂ܠܝܼܢ ܗ̄ܘܼܵܘ ܚܙܝܼܪܹ̈ܐ. ܘܠܵܐ ܐ̄ܢܵܫ ܝܵܗܹܒ݂ ܗܘ̣ܵܐ ܠܹܗ.

¹⁷ ܘܟܲܕ݂ ܐܸܬ݂ܵܐ ܠܘܵܬ݂ ܢܲܦ̮ܫܹܗ. ܐܸܡܲܪ. ܟܡܵܐ ܗܵܫܵܐ ܐܲܓ݂ܝܼܪܹ̈ܐ ܐܝܼܬ݂ ܒܹܝܬ݂ ܐܵܒ݂ܝ ܕܝܲܬ݁ܝܼܪ ܠܗܘܿܢ ܠܲܚܡܵܐ ܘܐܸܢܵܐ ܗܵܪܟܵܐ. ܠܟܲܦܢܝ ܐܵܒܸܕ݂ ܐ̄ܢܵܐ.

¹⁸ ܐܹܩܘܡ ܐܹܙܲܠ ܠܘܵܬ݂ ܐܵܒ݂ܝ. ܘܐܹܡܲܪ ܠܹܗ. ܐܵܒ݂ܝ. ܚܛܝܼܬ݂ ܒܲܫܡܲܝܵܐ ܘܲܩܕ݂ܵܡܲܝܟ.

¹⁹ ܘܠܵܐ ܡܸܟܹܝܠ ܫܵܘܹܐ ܐ̄ܢܵܐ ܕܲܒ݂ܪܵܟ݂ ܐܸܬ݂ܩܪܹܐ. ܥܒܸܕܲܝܢܝ ܐܲܝܟ݂ ܚܲܕ݂ ܡܸܢ ܐܲܓ݂ܝܼܪ̈ܲܝܟ.

²⁰ ܘܩ̣ܵܡ ܐܸܬ݂ܵܐ ܠܘܵܬ݂ ܐܲܒ݂ܘܼܗܝ. ܘܥܲܕ݂ ܗܘܼ ܪܲܚܝܼܩ. ܚܙܵܝܗܝ ܐܲܒ݂ܘܼܗܝ. ܘܐܸܬ݂ܪܲܚܲܡ ܥܠܵܘܗܝ. ܘܲܪܗܸܛ ܢܦܲܠ ܥܲܠ ܨܵܘܪܹܗ. ܘܢܲܫܩܹܗ.

²¹ ܘܐܸܡܲܪ ܠܹܗ ܒܪܹܗ. ܐܵܒ݂ܝ. ܚܛܝܼܬ݂ ܒܲܫܡܲܝܵܐ ܘܲܩܕ݂ܵܡܲܝܟ. ܘܠܵܐ ܫܵܘܹܐ ܐ̄ܢܵܐ ܕܲܒ݂ܪܵܟ݂ ܐܸܬ݂ܩܪܹܐ.

²² ܐܸܡܲܪ ܕܹܝܢ ܐܲܒ݂ܘܼܗܝ ܠܥܲܒ݂ܕܵܘ̈ܗܝ. ܐܲܦܸܩܘ ܐܸܣܛܠܵܐ ܪܹܫܵܝܬ݂ܵܐ. ܐܲܠܒܿܫܘܿܗܝ. ܘܣܝܼܡܘ ܥܹܙܸܩܬ݂ܵܐ ܒܐܝܼܕ݂ܗ. ܘܐܲܣܐܢܘܼܗܝ ܡܣܵܢܹ̈ܐ.

²³ ܘܐܲܝܬܵܘ ܩܛܘܿܠܘ ܬܵܘܪܵܐ ܕܦܸܛܡܵܐ. ܘܢܹܐܟ݂ܘܿܠ ܘܢܸܬ݂ܒܲܣܲܡ.

²⁴ ܕܗܵܢܵܐ ܒܹܪܝ ܡܝܼܬ݂ܵܐ ܗܘܵܐ. ܘܲܚܝܵܐ. ܘܐܲܒܝܼܕ݂ܵܐ ܗܘܵܐ. ܘܐܸܫܬ݁ܟܲܚ. ܘܫܲܪܝܼܘ ܠܡܸܬ݂ܒܲܣܵܡܘܼ.

²⁵ ܗܵܘ ܕܹܝܢ ܒܪܹܗ ܩܲܫܝܼܫܵܐ. ܒܲܩܪܝܼܬ݂ܵܐ ܗ̄ܘܵܐ. ܘܟܲܕ݂ ܐܸܬ݂ܵܐ ܘܲܩܪܸܒ݂ ܠܘܵܬ݂ ܒܲܝܬܵܐ. ܫܡܲܥ ܩܵܠ ܙܡܵܪܵܐ ܕܣܲܓܝܼܐܹ̈ܐ.

²⁶ ܘܲܩܪܵܐ ܠܚܲܕ݂ ܡܸܢ ܛܠܵܝܹ̈ܐ. ܘܫܲܐܠܹܗ. ܡܵܢܵܘ ܗܵܢܵܐ.

²⁷ ܐܵܡܲܪ ܠܹܗ. ܐܲܚܘܼܟ݂ ܐܸܬ݂ܵܐ. ܘܲܩܛܲܠ ܐܲܒ݂ܘܼܟ݂ ܬܵܘܪܵܐ ܕܦܸܛܡܵܐ. ܕܟܲܕ݂ ܚܠܝܼܡ ܐܲܩܒܠܹܗ.

²⁸ ܘܲܪܓܸܙ. ܘܠܵܐ ܨܵܒܹܐ ܗܘ̣ܵܐ ܠܡܸܥܲܠ. ܘܲܢܦܲܩ ܐܲܒ݂ܘܼܗܝ ܒܥܵܐ ܡܸܢܹܗ.

²⁹ ܗܘܼ ܕܹܝܢ ܐܸܡܲܪ ܠܐܲܒ݂ܘܼܗܝ. ܗܵܐ ܟܡܵܐ ܫܢ̈ܝܼܢ ܦܵܠܲܚ ܐ̄ܢܵܐ ܠܵܟ݂ ܥܲܒ݂ܕܘܬ݂ܵܐ. ܘܠܵܐ ܡܸܡܬ݂ܘܿܡ ܥܸܒ݂ܪܹܬ݂ ܦܘܼܩܕܵܢܵܟ݂. ܘܡܸܢ ܡܬ݂ܘܿܡ ܓܲܕ݂ܝܵܐ ܠܵܐ ܝܲܗ̄ܒ݂ܬ݁ ܠܝܼ ܕܐܬ݂ܒܲܣܲܡ ܥܲܡ ܪܵܚܡܲܝ.

³⁰ ܠܗܵܢܵܐ ܕܹܝܢ ܒܪܵܟ݂. ܟܲܕ݂ ܦܲܪܲܚ ܩܸܢܝܵܢܵܟ݂ ܥܲܡ ܙܵܢ̈ܝܵܬ݂ܵܐ. ܘܐܸܬ݂ܵܐ. ܢܟܲܣܬ݁ ܠܹܗ ܬܵܘܪܵܐ ܕܦܸܛܡܵܐ.

³¹ ܐܵܡܲܪ ܠܹܗ ܐܲܒ݂ܘܼܗܝ. ܒܹܪܝ. ܐܲܢ̄ܬ݁ ܒܟ݂ܠܙܒܲܢ ܥܲܡܝ ܐܲܢ̄ܬ݁. ܘܟ݂ܠ ܡܸܕܸܡ ܕܝܼܠܝ. ܕܝܼܠܵܟ݂ ܗ̄ܘܼ.

³² ܠܡܸܒ݂ܣܲܡ ܕܹܝܢ ܘܵܠܹܐ ܗܘ̣ܵܐ ܠܲܢ. ܘܲܠܡܸܚܕܵܐ. ܕܗܵܢܵܐ ܐܲܚܘܼܟ݂ ܡܝܼܬ݂ܵܐ ܗܘܵܐ. ܘܲܚܝܵܐ. ܘܐܲܒܝܼܕ݂ܵܐ ܗܘܵܐ. ܘܐܸܫܬ݁ܟܲܚ.

16

¹ ܘܐܸܡܲܪ ܡܲܬ݂ܠܵܐ ܠܘܵܬ݂ ܬܲܠܡܝܼܕ݂ܵܘ̈ܗܝ. ܓܲܒ݂ܪܵܐ ܚܲܕ݂ ܐܝܼܬ݂ ܗܘ̣ܵܐ ܥܲܬ݁ܝܼܪܵܐ . ܘܐܝܼܬ݂ ܗܘ̣ܵܐ ܠܹܗ ܪܲܒܲܝܬܵܐ. ܘܐܸܬ݂ܐܟܸܠܘ ܠܹܗ ܩܲܪ̈ܨܵܘܗܝ. ܕܩܸܢܝܵܢܹܗ ܡܦܲܪܲܚ.

² ܘܲܩܪܵܝܗܝ ܡܵܪܹܗ. ܘܐܸܡܲܪ ܠܹܗ. ܡܵܢܵܘ ܗܵܢܵܐ ܕܫܵܡܲܥ ܐ̄ܢܵܐ ܥܠܲܝܟ. ܗܲܒ݂ ܠܝܼ ܚܘܼܫܒܵܢܵܐ ܕܪܲܒܲܬ݂ ܒܲܝܬ݁ܘܬ݂ܵܟ݂. ܠܵܐ ܓܹܝܪ ܡܸܫܟܲܚ ܐܲܢ̄ܬ݁ ܡܸܟܹܝܠ ܪܲܒܲܝܬܵܐ ܕܬܸܗܘܹܐ ܠܝܼ.

³ ܐܵܡܲܪ ܗܵܘ ܪܲܒܲܝܬܵܐ ܒܢܲܦ̮ܫܹܗ. ܡܵܢܵܐ ܐܸܥܒܸܕ݂. ܕܡܵܪܝ ܫܵܩܹܠ ܠܵܗ̇ ܡܹܢܝ ܪܲܒܲܬ݂ ܒܲܝܬܘܼܬ݂ܵܐ. ܕܐܸܚܦܘܼܪ ܠܵܐ ܡܸܫܟܲܚ ܐ̄ܢܵܐ. ܘܲܠܡܸܚܕܲܪ ܒܵܗܹܬ݂ ܐ̄ܢܵܐ.

⁴ ܝܸܕ݂ܥܹܬ݂ ܡܵܢܵܐ ܐܸܥܒܸܿܕ݂. ܕܡܵܐ ܕܢܸܦܩܹܬ݂ ܡܸܢ ܪܲܒܲܬ݂ ܒܲܝܬܘܼܬ݂ܵܐ ܢܩܲܒܠܘܼܢܵܢܝ ܒܒ݂ܵܬܲܝ̈ܗܘܿܢ.

⁵ ܘܲܩܪܵܐ ܚܲܕ݂ ܚܲܕ݂ ܡܸܢ ܚܲܝܵܒܹ̈ܐ ܕܡܵܪܹܗ. ܘܐܸܡܲܪ ܠܩܲܕ݂ܡܵܝܵܐ. ܟܡܵܐ ܚܲܝܵܒ݂ ܐܲܢ̄ܬ݁ ܠܡܵܪܝ.

⁶ ܐܵܡܲܪ ܠܹܗ. ܡܵܐܐ ܡܲܬ݂ܪ̈ܝܵܢ ܡܸܫܚܵܐ. ܐܵܡܲܪ ܠܹܗ. ܣܲܒ݂ ܟܬ݂ܵܒ݂ܵܟ݂ ܘܬܸܒ݂ ܒܲܥܓܲܠ ܟܬ݂ܘܿܒ݂. ܚܲܡܫܝܼܢ ܡܲܬ݂ܪ̈ܝܵܢ.

⁷ ܘܐܸܡܲܪ ܠܐܲܚܪܹܢܵܐ. ܘܐܲܢ̄ܬ݁. ܡܵܢܵܐ ܚܲܝܵܒ݂ ܐܲܢ̄ܬ݁ ܠܡܵܪܝ. ܐܵܡܲܪ ܠܹܗ. ܡܵܐܐ ܟܘܿܪ̈ܝܼܢ ܚܸ̈ܛܹܐ. ܐܵܡܲܪ ܠܹܗ. ܩܲܒܸܠ ܟܬ݂ܵܒ݂ܵܟ݂ ܘܬܸܒ݂ ܟܬ݂ܘܿܒ݂. ܬܡܵܢܐܝܼܢ ܟܘܿܪ̈ܝܼܢ.

⁸ ܘܫܲܒܲܚ ܡܵܪܲܢ ܠܪܲܒܲܝܬܵܐ ܕܥܵܘܠܵܐ. ܕܚܲܟܝܼܡܵܐܝܼܬ݂ ܥܒܲܕ݂. ܒܢܵܘ̈ܗܝ ܓܹܝܪ ܕܥܵܠܡܵܐ ܗܵܢܵܐ. ܚܲܟܿܝܼܡܝܼܢ ܐܸܢܘܿܢ ܡܸܢ ܒܢܵܘ̈ܗܝ ܕܢܘܼܗܪܵܐ ܒܫܲܪܒܲܬ݂ܗܘܿܢ ܗܵܕܹܐ.

⁹ ܘܐܵܦ ܐܸܢܵܐ ܐܵܡܲܪ ܐ̄ܢܵܐ ܠܟ݂ܘܿܢ. ܕܲܥܒܸܕ݂ܘ ܠܟ݂ܘܿܢ ܪ̈ܵܚܡܹܐ ܡܸܢ ܡܵܡܘܿܢܵܐ ܗܵܢܵܐ ܕܥܵܘܠܵܐ. ܕܡܵܐ ܕܲܓ݂ܡܲܪ ܢܩܲܒܠܘܼܢܵܟ݂ܘܿܢ ܒܲܡܛܲܠܠܲܝ̈ܗܘܿܢ ܕܲܠܥܵܠܲܡ.

¹⁰ ܡܲܢ ܕܲܒ݂ܩܲܠܝܼܠ ܡܗܲܝܡܲܢ ܐܵܦ ܒܣܲܓܝܼ. ܡܗܲܝܡܲܢ ܗ̄ܘܼ. ܘܡܲܢ ܕܲܒ݂ܩܲܠܝܼܠ ܥܵܘܵܠ ܐܵܦ ܒܣܲܓܝܼ. ܥܵܘܵܠ ܗ̄ܘܼ.

¹¹ ܐܸܢ ܗܵܟܹܝܠ ܒܡܵܡܘܿܢܵܐ ܕܥܵܘܠܵܐ ܡܗܲܝܡܢܹ̈ܐ ܠܵܐ ܗܘܲܝܬ݁ܘܢ. ܫܪܵܪܵܐ ܠܟ݂ܘܿܢ. ܡܲܢܘܼ ܡܗܲܝܡܸܢ.

¹² ܘܐܸܢ ܒܲܕ݂ܠܵܐ ܕܝܼܠܟ݂ܘܿܢ ܠܵܐ ܐܸܫܬ݁ܟܲܚܬ݁ܘܿܢ ܡܗܲܝܡܢܹ̈ܐ. ܕܝܼܠܟ݂ܘܿܢ. ܡܲܢܘܼ ܢܸܬܸ݁ܠ ܠܟ݂ܘܿܢ.

¹³ ܠܲܝܬ݁ ܥܲܒ݂ܕܹ̈ܐ ܕܡܸܫܟܲܚ ܠܲܬ݂ܪܹܝܢ ܡܵܪ̈ܵܘܵܢ ܠܡܸܦܠܲܚ. ܐܵܘ ܓܹܝܪ ܠܚܲܕ݂ ܢܸܣܢܹܐ. ܘܠܲܐ̄ܚܪܹܢܵܐ ܢܸܪܚܲܡ. ܐܵܘ ܠܚܲܕ݂ ܢܝܲܩܲܪ. ܘܠܲܐ̄ܚܪܹܢܵܐ ܢܫܘܿܛ. ܠܵܐ ܡܸܫܟܿܚܝܼܢ ܐܢ̄ܬܘܿܢ ܠܡܸܦܠܲܚ ܠܐܲܠܵܗܵܐ ܘܲܠܡܵܡܘܿܢܵܐ.

¹⁴ ܦܪ̈ܝܼܫܹܐ ܕܹܝܢ ܟܲܕ݂ ܫܡܲܥܘ ܗܵܠܹܝܢ ܟܠܗܹܝܢ. ܡܛܠ ܕܪܵܚܡܝܼܢ ܗ̄ܘܼܵܘ ܟܸܣܦܵܐ. ܡܡܲܝܩܝܼܢ ܗ̄ܘܼܵܘ ܒܹܗ.

¹⁵ ܝܼܫܘܿܥ ܕܹܝܢ ܐܸܡܲܪ ܠܗܘܿܢ ܐܲܢ̄ܬ݁ܘܿܢ ܐܸܢܘܿܢ ܕܲܡܙܲܕܩܝܼܢ ܢܲܦ̮ܫܗܘܿܢ ܩܕ݂ܵܡ ܒܢܲܝ̈ܢܵܫܵܐ. ܐܲܠܵܗܵܐ ܕܹܝܢ ܝܵܕ݂ܲܥ ܠܸܒܵܘܵܬ݂ܟ݂̈ܘܿܢ. ܕܡܸܕܸܡ ܕܪܵܡ ܒܹܝܬ݂ ܒܢܲܝ̈ܢܵܫܵܐ. ܩܕ݂ܵܡ ܐܲܠܵܗܵܐ ܢܕ݂ܝܼܕ݂ ܗ̄ܘܼ.

¹⁶ ܢܵܡܘܿܣܵܐ ܘܲܢܒ݂ܝܹ̈ܐ ܥܕ݂ܲܡܵܐ ܠܝܘܿܚܲܢܵܢ. ܡܸܢ ܗܵܝܕܹܝܢ ܡܲܠܟܘܼܬ݂ܵܐ ܕܐܲܠܵܗܵܐ ܡܸܣܬܲܒܪܵܐ. ܘܟ݂ܠ ܠܵܗ̇ ܚܵܒܹܨ ܕܢܸܥܘܿܠ.

¹⁷ ܦܫܝܼܩ ܗܘܼ ܕܹܝܢ ܕܲܫܡܲܝܵܐ ܘܐܲܪܥܵܐ ܢܸܥܒܪܘܼܢ. ܐܵܘ ܐܵܬ݂ܘܼܬ݂ܵܐ ܚܕ݂ܵܐ ܡܸܢ ܢܵܡܘܿܣܵܐ ܬܸܥܒܲܪ.

¹⁸ ܟܠܡܲܢ ܕܫܵܪܹܐ ܐܲܢ̄ܬ݁ܬܹܗ ܘܢܵܣܹܒ݂ ܐ̄ܚܪܹܬ݂ܵܐ. ܓܵܐܲܪ. ܘܟ݂ܠ ܡܲܢ ܕܢܵܣܹܒ݂ ܫܒ݂ܝܼܩܬܵܐ ܓܵܐܲܪ.

¹⁹ ܓܲܒ݂ܪܵܐ ܕܹܝܢ ܚܲܕ݂ ܥܲܬ݁ܝܼܪܵܐ ܐܝܼܬ݂ ܗ̄ܘܵܐ. ܘܠܵܒܹܫ ܗܘ̣ܵܐ ܒܘܼܨܵܐ ܘܐܲܪܓ݁ܘܵܢܵܐ. ܘܟ݂ܠܝܘܿܡ ܡܸܬ݂ܒܲܣܡܝܼܢ ܗܘ̣ܵܐ ܓܲܐܝܵܐܝܼܬ݂.

²⁰ ܘܡܸܣܟܹܢܵܐ ܚܲܕ݂ ܐܝܼܬ݂ ܗ̄ܘܵܐ ܕܲܫܡܹܗ ܠܵܥܵܙܲܪ. ܘܲܪܡܹܐ ܗܘ̣ܵܐ ܠܘܵܬ݂ ܬܲܪܥܹܗ ܕܗܵܘ ܥܲܬ݁ܝܼܪܵܐ. ܟܲܕ݂ ܡܡܲܚܲܝ ܒܫܘܼܚܢܹ̈ܐ.

²¹ ܘܡܸܬ݂ܝܲܐܲܒ݂ ܗܘ̣ܵܐ ܕܢܸܡܠܹܐ ܟܲܪܣܹܗ ܡܸܢ ܦܲܪ̈ܬ݁ܘܼܬܹܐ ܕܢܵܦܠܝܼܢ ܡܸܢ ܦܵܬ݂ܘܿܪܹܗ ܕܗܵܘ ܥܲܬ݁ܝܼܪܵܐ. ܐܸܠܵܐ ܐܵܦ ܟܲܠܒܹ̈ܐ ܐܵܬܹ݁ܝܢ ܗ̄ܘܼܵܘ. ܡܠܲܚܟ݂ܝܼܢ ܫܘܼܚ̈ܢܵܘܗܝ.

²² ܗܘ̣ܵܐ ܕܹܝܢ ܘܡܝܼܬ݂ ܗܵܘ ܡܸܣܟܹܢܵܐ. ܘܐܵܘܒܠܘܼܗܝ ܡܲܠܲܐܟܹ̈ܐ ܠܥܘܼܒܹܗ ܕܐܲܒ݂ܪܵܗܵܡ. ܐܵܦ ܗܵܘ ܕܹܝܢ ܥܲܬ݁ܝܼܪܵܐ ܡܝܼܬ݂. ܘܐܸܬ݂ܩܒܲܪ.

²³ ܘܟܲܕ݂ ܡܸܫܬܲܢܲܩ ܒܲܫܝܘܿܠ. ܐܲܪܝܼܡ ܥܲܝ̈ܢܵܘܗܝ ܡܸܢ ܪܘܼܚܩܵܐ. ܘܲܚܙܵܐ ܠܐܲܒ݂ܪܵܗܵܡ ܘܲܠܠܵܥܵܙܲܪ ܒܥܘܼܒܹܗ.

²⁴ ܘܲܩܪܵܐ ܒܩܵܠܵܐ ܪܵܡܵܐ. ܘܐܸܡܲܪ. ܐܵܒ݂ܝ ܐܲܒ݂ܪܵܗܵܡ. ܐܸܬ݂ܪܲܚܲܡ ܥܠܲܝ. ܘܫܲܕܲܪ ܠܠܵܥܵܙܲܪ. ܕܢܸܨܒܘܿܥ ܪܹܝܫ ܨܸܒ݂ܥܹܗ ܒܡܲܝ̈ܵܐ ܘܲܢܪܲܛܸܒ݂ ܠܝܼ ܠܸܫܵܢܝ ܕܗܵܐ ܡܸܫܬܲܢܲܩ ܐ̄ܢܵܐ ܒܫܲܠܗܹܒ݂ܝܼܬ݂ܵܐ ܗܵܕܹܐ.

²⁵ ܐܵܡܲܪ ܠܹܗ ܐܲܒ݂ܪܵܗܵܡ. ܒܹܪܝ. ܐܸܬ݁ܕܲܟ݂ܪ ܕܩܲܒܸܠܬ݁ ܛܵܒ݂̈ܵܬ݂ܵܟ݂ ܒܚܲܝܲܝ̈ܟ. ܘܠܵܥܵܙܲܪ ܒܝܼ̈ܫܵܬܹܗ. ܘܗܵܫܵܐ ܗܵܐ ܡܸܬ݁ܬ݁ܢܝܼܚ ܗܵܪܟܵܐ. ܘܐܲܢ̄ܬ݁ ܡܸܫܬܲܢܲܩ.

²⁶ ܘܥܲܡ ܗܵܠܹܝܢ ܟܠܗܹܝܢ. ܗܵܘܬ݂ܵܐ ܪܲܒܬ݂ܵܐ ܣܝܼܡܵܐ ܒܲܝܢܲܝܢ ܘܲܠܟ݂ܘܿܢ. ܕܐܲܝܠܹܝܢ ܕܨܵܒܹܝܢ ܡܸܟܵܐ ܕܢܸܥܒܪܘܼܢ ܠܘܵܬ݂ܟ݂ܘܿܢ. ܠܵܐ ܢܸܫܟܿܚܘܼܢ. ܘܐܵܦܠܵܐ ܕܡܸܢ ܬܲܡܵܢ ܢܸܥܒܪܘܼܢ ܠܘܵܬܲܢ.

²⁷ ܐܵܡܲܪ ܠܹܗ. ܡܵܕܹܝܢ ܒܵܥܹܐ ܐ̄ܢܵܐ ܡܸܢܵܟ݂ ܐܵܒ݂ܝ. ܕܲܬ݂ܫܲܕܪܝܼܘܗܝ ܠܒܹܝܬ݂ ܐܵܒ݂ܝ.

²⁸ ܚܲܡܫܵܐ ܓܹܝܪ ܐܲܚ̈ܝܼܢ ܐܝܼܬ݂ ܠܝܼ. ܢܹܐܙܲܠ ܢܣܲܗܸܕ݂ ܐܸܢܘܿܢ. ܕܠܵܐ ܐܵܦ ܗܸܢܘܿܢ ܢܹܐܬ݂ܘܿܢ ܠܕܘܼܟܬ݂ܵܐ ܗܵܕܹܐ ܕܬܲܫܢܝܼܩܵܐ.

²⁹ ܐܵܡܲܪ ܠܹܗ ܐܲܒ݂ܪܵܗܵܡ. ܐܝܼܬ݂ ܠܗܘܿܢ ܡܘܼܫܹܐ ܘܲܢܒ݂ܝܹ̈ܐ. ܢܸܫܡܥܘܼܢ ܐܸܢܘܿܢ.

³⁰ ܗܘܼ ܕܹܝܢ ܐܸܡܲܪ ܠܹܗ. ܠܵܐ ܐܵܒ݂ܝ: ܐܲܒ݂ܪܵܗܵܡ. ܐܸܠܵܐ ܐܸܢ ܐ̄ܢܵܫ ܡܸܢ ܡܝܼܬܹ̈ܐ ܢܹܐܙܲܠ ܠܘܵܬ݂ܗܘܿܢ. ܬܵܝܒܿܝܼܢ.

³¹ ܐܵܡܲܪ ܠܹܗ ܐܲܒ݂ܪܵܗܵܡ. ܐܸܢ ܠܡܘܼܫܹܐ ܘܠܲܢܒ݂ܝܹ̈ܐ ܠܵܐ ܫܵܡܥܝܼܢ. ܐܵܦ ܠܵܐ ܐܸܢ ܐ̄ܢܵܫ ܡܸܢ ܡܝܼܬܹ̈ܐ ܢܩܘܼܡ. ܡܗܲܝܡܢܝܼܢ ܠܹܗ.

17

¹ ܘܐܸܡܲܪ ܗܘ̣ܵܐ ܝܼܫܘܿܥ ܠܬܲܠܡܝܼܕ݂ܵܘ̈ܗܝ. ܠܵܐ ܡܸܫܟܚܵܐ ܕܠܵܐ ܢܹܐܬ݂ܘܿܢ ܡܲܟ݂ܫܘܼ̈ܠܹܐ. ܘܵܝ ܕܹܝܢ ܠܗܵܘ ܕܒ݂ܐܝܼܕ݂ܗ ܢܹܐܬ݂ܘܿܢ.

² ܦܲܩܵܚ ܗܘ̣ܵܐ ܠܹܗ. ܐܸܠܘ ܪܲܚܝܵܐ ܕܲܚܡܵܪܵܐ ܬܲܠܝܵܐ ܒܨܵܘܪܹܗ ܘܲܫܕܹ̈ܐ ܒܝܲܡܵܐ. ܐܵܘ ܕܢܲܟ݂ܫܸܠ ܠܚܲܕ݂ ܡܸܢ ܗܵܠܹܝܢ ܙܥܘܿܪܹ̈ܐ.

³ ܐܸܙܕܲܗ̄ܪܘ ܒܢܲܦ̮ܫܟ݂ܘܿܢ. ܐܸܢ ܢܸܚܛܹܐ ܐܲܚܘܼܟ݂. ܟܐܝܼ ܒܹܗ. ܘܐܸܢ ܬܵܐܹܒ݂. ܫܒ݂ܘܿܩ ܠܹܗ.

⁴ ܘܐܸܢ ܫܒܲܥ ܙܲܒ݂ܢ̈ܝܼܢ ܒܝܵܘܡܵܐ ܢܲܣܟܸܠ ܒܵܟ݂: ܘܲܫܒܲܥ ܙܲܒ݂ܢ̈ܝܼܢ ܒܝܵܘܡܵܐ ܢܸܬ݂ܦܢܹܐ ܠܘܵܬ݂ܵܟ݂: ܘܢܹܐܡܲܪ ܕܬ݂ܵܐܹܒ݂ ܐ̄ܢܵܐ. ܫܒ݂ܘܿܩ ܠܹܗ.

⁵ ܘܐܸܡܲܪܘ ܫܠܝܼܚܹ̈ܐ ܠܡܵܪܲܢ ܐܵܘܣܸܦ ܠܲܢ ܗܲܝܡܵܢܘܼܬ݂ܵܐ.

⁶ ܐܵܡܲܪ ܠܗܘܿܢ ܐܸܢ ܐܝܼܬ݂ ܗ̄ܘܵܬ݂ ܠܟ݂ܘܿܢ ܗܲܝܡܵܢܘܼܬ݂ܵܐ ܐܲܝܟ݂ ܦܪܸܕ݂ܬܵܐ ܕܚܲܪܕܠܵܐ. ܐܵܡܪܝܼܢ ܗܘܲܝܬ݁ܘܿܢ ܠܬ݂ܘܼܬ݂ܵܐ ܗܵܢܵܐ ܕܐܬ݂ܥܲܩܪ ܘܐܸܬ݂ܢܲܨܒ݂ ܒܝܲܡܵܐ. ܘܡܸܫܬ݁ܡܲܥ ܗܘ̣ܵܐ ܠܟ݂ܘܿܢ.

⁷ ܡܲܢܘܼ ܕܹܝܢ ܡܸܢܟ݂ܘܿܢ ܕܐܝܼܬ݂ ܠܹܗ ܥܲܒ݂ܕܵܐ. ܕܕ݂ܵܒܲܪ ܦܲܕܵܢܵܐ ܐܵܘ ܕܪܵܥܹܐ ܥܵܢܵܐ ܘܐܸܢ ܢܹܐܬܹܐ ܡܸܢ ܚܲܩܠܵܐ ܐܵܡܲܪ ܠܹܗ ܡܸܚܕ݂ܵܐ. ܥܒܲܪ ܐܸܣܬܲܡܟ݂.

⁸ ܐܸܠܵܐ ܐܵܡܲܪ ܠܹܗ. ܛܲܝܸܒ݂ ܠܝܼ ܡܸܕܸܡ ܕܐܲܚܫܸܡ. ܘܐܲܣܘܿܪ ܚܲܨܲܝ̈ܟ ܫܲܡܸܫܲܝܢܝ. ܥܕ݂ܲܡܵܐ ܕܐܸܠܥܲܣ ܘܐܸܫܬܹܐ. ܘܒܵܬܲܪܟܸܢ ܐܵܦ ܐܲܢ̄ܬ݁ ܬܸܠܥܲܣ ܘܬܸܫܬܹܐ.

⁹ ܠܡܵܐ. ܛܲܝܒܘܼܬܹܗ ܡܩܲܒܸܠ ܕܗܵܘ ܥܲܒ݂ܕܵܐ ܕܲܥܒܲܕ݂ ܡܸܕܸܡ ܕܐܬ݂ܦܩܸܕ݂ ܠܹܗ. ܠܵܐ ܣܵܒܲܪ ܐ̄ܢܵܐ.

¹⁰ ܗܵܟܲܢܵܐ ܐܵܦ ܐܲܢ̄ܬ݁ܘܿܢ ܡܵܐ ܕܲܥܒܲܕܬ݁ܘܢ ܟܠܗܹܝܢ ܐܲܝܠܹܝܢ ܕܲܦܩܝܼܕ݂ܵܢ ܠܟ݂ܘܿܢ. ܐܸܡܲܪܘ. ܕܥܲܒ݂ܕܹ̈ܐ ܚܢܲܢ ܒܲܛܝܼܠܹ̈ܐ. ܕܡܸܕܸܡ ܕܚܲܝܵܒ݂ܝܼܢ ܗ̄ܘܲܝܢ ܠܡܸܥܒܲܕ݂ ܥܒܲܕ݂ܢ.

¹¹ ܘܲܗܘܵܐ ܕܟܲܕ݂ ܐܵܙܹܠ ܝܼܫܘܿܥ ܠܐܘܿܪܸܫܠܸܡ. ܥܵܒܲܪ ܗܘ̣ܵܐ ܒܹܝܬ݂ ܫܵܡܪ̈ܵܝܹܐ ܠܲܓ݂ܠܝܼܠܵܐ.

¹² ܘܟܲܕ݂ ܩܲܪܝܼܒ݂ ܠܡܸܥܲܠ ܠܲܩܪܝܼܬ݂ܵܐ ܚܕ݂ܵܐ. ܐܲܪܥܘܼܗܝ ܥܸܣܪܵܐ ܐ̄ܢܵܫ̈ܝܼܢ ܓܲܪ̈ܒܹܐ. ܘܩܵܡܘ ܡܸܢ ܪܘܼܚܩܵܐ.

¹³ ܘܐܲܪܝܼܡܘ ܩܵܠܗܘܿܢ. ܘܐܵܡܪܝܼܢ. ܪܲܒܲܢ ܝܼܫܘܿܥ. ܐܸܬ݂ܪܲܚܲܡ ܥܠܲܝܢ.

¹⁴ ܘܟܲܕ݂ ܚܙܵܐ ܐܸܢܘܿܢ. ܐܸܡܲܪ ܠܗܘܿܢ. ܙܸܠܘ ܚܵܘܘ ܢܲܦ̮ܫܟ݂ܘܿܢ ܠܟ݂ܵܗܢܹ̈ܐ. ܘܟܲܕ݂ ܐܵܙܠ̄ܝܼܢ. ܐܸܬ݁ܕܲܟܝܼܘ.

¹⁵ ܚܲܕ݂ ܕܹܝܢ ܡܸܢܗܘܿܢ ܟܲܕ݂ ܚܙܵܐ ܕܐܸܬ݁ܕܲܟܝܼ. ܗܦܲܟ݂ ܠܹܗ. ܘܲܒ݂ܩܵܠܵܐ ܪܵܡܵܐ ܡܫܲܒܲܚ ܗܘ̣ܵܐ ܠܐܲܠܵܗܵܐ.

¹⁶ ܘܲܢܦܲܠ ܥܲܠ ܐܲܦܵܘ̈ܗܝ ܩܕ݂ܵܡ ܪܸ̈ܓ݂ܠܵܘܗܝ ܕܝܼܫܘܿܥ. ܟܲܕ݂ ܡܵܘܕܹܐ ܠܹܗ. ܘܗܘܼ ܗܵܢܵܐ. ܫܵܡܪܵܝܵܐ ܗܘܵܐ.

¹⁷ ܥܢܵܐ ܕܹܝܢ ܝܼܫܘܿܥ. ܘܐܸܡܲܪ. ܠܵܐ ܗ̄ܘܵܐ. ܥܸܣܪܵܐ ܗܵܘܹܝܢ ܗܵܠܹܝܢ ܕܐܸܬ݁ܕܲܟܝܼܘ. ܐܲܝܟܵܐ ܐܸܢܘܿܢ ܬܸܫܥܵܐ.

¹⁸ ܠܡܵܐ ܦܪܲܫܘ. ܕܢܹܐܬ݂ܘܼܢ ܢܸܬ݁ܠܘܼܢ ܬܸܫܒܿܘܿܚܬܵܐ ܠܐܲܠܵܗܵܐ. ܐܸܠܵܐ ܗܵܢܵܐ ܕܡܸܢ ܥܲܡܵܐ ܗ̄ܘܼ ܢܘܼܟ݂ܪܵܝܵܐ.

¹⁹ ܘܐܸܡܲܪ ܠܹܗ. ܩܘܼܡ ܙܸܠ ܗܲܝܡܵܢܘܼܬ݂ܵܟ݂ ܐܲܚܝܵܬ݂ܵܟ݂.

²⁰ ܘܟܲܕ݂ ܫܲܐܠܘܼܗܝ ܠܝܼܫܘܿܥ ܡܸܢ ܦܪ̈ܝܼܫܹܐ: ܐܸܡܲܬ݂ܝ ܐܵܬ݂ܝܵܐ ܡܲܠܟܘܼܬܹܗ ܕܐܲܠܵܗܵܐ. ܥܢܵܐ. ܘܐܸܡܲܪ ܠܗܘܿܢ. ܠܵܐ ܐܵܬ݂ܝܵܐ ܡܲܠܟܘܼܬܹܗ ܕܐܲܠܵܗܵܐ ܒܲܢܛܘܼܪ̈ܵܬ݂ܵܐ.

²¹ ܘܠܵܐ ܐܵܡܪܝܼܢ. ܗܵܐ ܗܵܪܟܵܐ ܗܝܼ. ܘܗܵܐ ܗܵܪ ܬܲܡܵܢ ܗܝܼ. ܗܵܐ ܓܹܝܪ ܡܲܠܟܘܼܬܹܗ ܕܐܲܠܵܗܵܐ. ܠܓ݂ܵܘ ܡܸܢܟ݂ܘܿܢ ܗܝܼ.

²² ܘܐܸܡܲܪ ܠܬܲܠܡܝܼܕ݂ܵܘ̈ܗܝ. ܢܹܐܬ݂ܘܿܢ ܝܵܘ̈ܡܵܬ݂ܵܐ. ܕܬܸܬ݂ܪܲܓ݂ܪܓ݂ܘܼܢ ܠܡܸܚܙܵܐ ܚܲܕ݂ ܡܸܢ ܝܵܘ̈ܡܵܬ݂ܵܐ ܕܲܒ݂ܪܹܗ ܕܐ̄ܢܵܫܵܐ. ܘܠܵܐ ܬܸܚܙܘܿܢ.

²³ ܘܐܸܢ ܢܹܐܡܪܘܼܢ ܠܟ݂ܘܿܢ. ܗܵܐ ܗܵܪܟܵܐ ܗ̄ܘܼ ܘܗܵܐ ܗܵܪ ܬܲܡܵܢ ܗ̄ܘܼ. ܠܵܐ ܬܹܐܙܠ̄ܘܼܢ.

²⁴ ܐܲܝܟܲܢܵܐ ܓܹܝܪ ܕܒܲܪܩܵܐ ܒܵܪܹܩ ܡܸܢ ܫܡܲܝܵܐ: ܘܟ݂ܠܹܗ ܬܚܹܝܬ݂ ܫܡܲܝܵܐ ܡܲܢܗܲܪ. ܗܵܟܲܢܵܐ ܢܸܗܘܹܐ ܒܪܹܗ ܕܐ̄ܢܵܫܵܐ ܒܝܵܘܡܹܗ.

²⁵ ܠܘܼܩܕ݂ܲܡ ܕܹܝܢ ܥܬ݂ܝܼܕ݂ ܗܘܼ ܕܢܸܚܲܫ ܣܲܓܝܼ̈ܐܵܬ݂ܵܐ. ܘܢܸܣܬ݁ܠܹܐ ܡܸܢ ܫܲܪܒܿܬ݂ܵܐ ܗܵܕܹܐ.

²⁶ ܘܐܲܝܟܲܢܵܐ ܕܲܗܘܵܐ ܒܝܵܘܡܵܬܹ̈ܗ ܕܢܘܿܚ. ܗܵܟܲܢܵܐ ܢܸܗܘܹܐ ܒܝܵܘܡܵܬܹ̈ܗ ܕܲܒ݂ܪܹܗ ܕܐ̄ܢܵܫܵܐ.

²⁷ ܕܐܵܟ݂ܠܝܼܢ ܗ̄ܘܼܵܘ ܘܫܵܬܹܝܢ ܘܢܵܣܒܝܼܢ ܢܸܫܹ̈ܐ. ܘܝܵܗܒܝܼܢ ܠܓܲܒ݂ܪܹ̈ܐ ܥܕ݂ܲܡܵܐ ܠܝܵܘܡܵܐ ܕܥܲܠ ܢܘܿܚ ܠܟܹܘܹܝܠܵܐ (ܠܟܹܘܸܠܵܐ). ܘܐܸܬ݂ܵܐ ܛܵܘܦܵܢܵܐ. ܘܐܵܘܒܸܕ݂ ܠܟ݂ܠ ܐ̄ܢܵܫ.

²⁸ ܘܐܲܝܟܲܢܵܐ ܬܘܼܒ݂ ܕܲܗܘܵܐ ܒܝܵܘܡܵܬܹ̈ܗ ܕܠܘܿܛ: ܕܐܵܟ݂ܠܝܼܢ ܗ̄ܘܼܵܘ ܘܫܵܬܹܝܢ: ܘܙܵܒ݂ܢܝܼܢ ܘܲܡܙܲܒܢܝܼܢ: ܘܢܵܨܒܝܼܢ ܗ̄ܘܼܵܘ ܘܒ݂ܵܢܹܝܢ:

²⁹ ܒܝܵܘܡܵܐ ܕܹܝܢ ܕܲܢܦܲܩ ܠܘܿܛ ܡܸܢ ܣܕ݂ܘܿܡ. ܐܲܡܛܲܪ ܡܵܪܝܵܐ ܢܘܼܪܵܐ ܘܟܸܒ݂ܪܝܼܬ݂ܵܐ ܡܸܢ ܫܡܲܝܵܐ. ܘܐܵܘܒܸܕ݂ ܠܟ݂ܠܗܘܿܢ.

³⁰ ܗܵܟܲܢܵܐ ܢܸܗܘܹܐ ܒܝܵܘܡܵܐ ܕܡܸܬ݂ܓ݁ܠܹܐ ܒܪܹܗ ܕܐ̄ܢܵܫܵܐ.

³¹ ܒܗܵܘ ܝܵܘܡܵܐ ܡܲܢ ܕܒܸܐܓܵܪܵܐ ܗ̄ܘܼ ܘܡܵܐܢܵܘ̈ܗܝ ܒܒܲܝܬܵܐ. ܠܵܐ ܢܸܚܘܿܬ݂ ܕܢܸܫܩܘܿܠ ܐܸܢܘܿܢ. ܘܡܲܢ ܕܲܒ݂ܚܲܩܠܵܐ ܗ̄ܘܼ. ܠܵܐ ܢܸܬ݂ܗܦ݂ܸܟ݂ ܠܒܸܣܬ݁ܪܹܗ.

³² ܐܸܬ݁ܕܲܟ݂ܪܘ ܠܐܲܢ̄ܬ݁ܬܹܗ ܕܠܘܿܛ.

³³ ܡܲܢ ܕܨܵܒܹܐ ܕܢܲܚܹܐ ܢܲܦ̮ܫܹܗ. ܢܵܘܒܕ݂ܝܼܗ̇. ܘܡܲܢ ܕܢܵܘܒܸܕ݂ ܢܲܦ̮ܫܹܗ ܢܲܚܹܝܗ̇.

³⁴ ܐܵܡܲܪ ܐ̄ܢܵܐ ܠܟ݂ܘܿܢ ܕܲܒ݂ܗܵܘ ܠܸܠܝܵܐ. ܬܪܹܝܢ ܢܸܗܘܘܿܢ ܒܲܚܕ݂ܵܐ ܥܲܪܣܵܐ. ܚܲܕ݂ ܢܸܬ݁ܕܒܲܪ. ܘܐܲܚܪܹܢܵܐ ܢܸܫܬ݁ܒܸܩ.

³⁵ ܬܲܪܬܹ݁ܝܢ ܢܸܗܘܝܵܢ ܛܵܚܢܵܢ ܐܲܟ݂ܚܕ݂ܵܐ. ܚܕ݂ܵܐ ܬܸܬ݁ܕܒܲܪ. ܘܐܲܚܪܹܬ݂ܵܐ ܬܸܫܬ݁ܒܸܩ.

³⁶ ܬܪܹܝܢ ܢܸܗܘܘܿܢ ܒܚܲܩܠܵܐ. ܚܲܕ݂ ܢܸܬ݁ܕܒܲܪ. ܘܐܲܚܪܹܢܵܐ ܢܸܫܬ݁ܒܸܩ.

³⁷ ܥܢܵܘ. ܘܐܵܡܪܝܼܢ ܠܹܗ. ܠܐܲܝܟܵܐ ܡܵܪܲܢ: ܐܵܡܲܪ ܠܗܘܿܢ. ܐܲܝܟܵܐ ܕܦܲܓ݂ܪܵܐ. ܬܲܡܵܢ ܢܸܬ݂ܟܲܢܫܘܿܢ ܢܸܫܪܹ̈ܐ.

18

¹ ܐܸܡܲܪ ܠܗܘܿܢ ܕܹܝܢ ܐܵܦ ܡܲܬ݂ܠܵܐ. ܕܲܒܟ݂ܠ ܥܸܕ݂ܢ ܢܨܲܠܘܼܢ. ܘܠܵܐ ܬܸܡܲܐܢ ܠܗܘܿܢ.

² ܕܲܝܵܢܵܐ ܚܲܕ݂ ܐܝܼܬ݂ ܗܘ̣ܵܐ ܒܲܡܕ݂ܝܼܢ̄ܬܵܐ ܚܕ݂ܵܐ. ܕܡܸܢ ܐܲܠܵܗܵܐ. ܠܵܐ ܕܵܚܹܠ ܗ̄ܘܵܐ. ܘܡܸܢ ܒܢܲܝ̈ܢܵܫܵܐ. ܠܵܐ ܡܸܬ݂ܟܲܚܲܕ݂ ܗ̄ܘܵܐ.

³ ܐܲܪܡܲܠܬܵܐ ܕܹܝܢ ܚܕ݂ܵܐ ܐܝܼܬ݂ ܗ̄ܘܵܬ݂ ܒܲܡܕ݂ܝܼܢ̄ܬܵܐ ܗܵܝ. ܘܐܵܬ݂ܝܵܐ ܗ̄ܘܵܬ݂ ܠܘܵܬܹܗ. ܘܐܵܡܪܵܐ. ܬܒܲܥܲܝܢܝ ܡܸܢ ܒܥܸܠ ܕܝܼܢܝ.

⁴ ܘܠܵܐ ܨܵܒܹܐ ܗ̄ܘܵܐ. ܙܲܒ݂ܢܵܐ ܣܲܓܿܝܼܐܵܐ. ܒܵܬܲܪܟܸܢ ܕܹܝܢ. ܐܸܡܲܪ ܒܢܲܦ̮ܫܹܗ. ܐܸܢ ܡܸܢ ܐܲܠܵܗܵܐ ܠܵܐ ܕܚܸܠ ܐ̄ܢܵܐ: ܘܡܸܢ ܒܢܲܝ̈ܢܵܫܵܐ ܠܵܐ ܡܸܬ݂ܟܲܚܲܕ݂ ܐ̄ܢܵܐ.

⁵ ܐܵܦܸܢ ܡܛܠ ܕܡܲܠܸܐܝܵܐ ܠܝܼ ܗܵܕܹܐ ܐܲܪܡܲܠܬܵܐ. ܐܸܬ݂ܒܥܝܼܗ̇. ܕܠܵܐ ܒܟ݂ܠ ܥܸܕ݂ܢ ܬܸܗܘܹܐ ܐܵܬ݂ܝܵܐ ܡܲܗܪܵܐ ܠܝܼ.

⁶ ܘܐܸܡܲܪ ܡܵܪܲܢ. ܫܡܲܥܘ ܡܵܢܵܐ ܐܸܡܲܪ ܕܲܝܵܢܵܐ ܕܥܵܘܠܵܐ.

⁷ ܐܲܠܵܗܵܐ ܕܹܝܢ. ܠܵܐ ܝܲܬܝܼܪܵܐܝܼܬ݂ ܢܸܥܒܸܕ݂ ܬܒܲܥܬ݂ܵܐ ܠܲܓ݂ܒ݂ܵܘ̈ܗܝ ܕܩܵܪܹܝܢ ܠܹܗ ܒܐܝܼܡܵܡܵܐ ܘܲܒ݂ܠܸܠܝܵܐ: ܘܡܲܓܲܪ ܪܘܼܚܹܗ ܥܠܲܝܗܘܿܢ.

⁸ ܐܵܡܲܪ ܐ̄ܢܵܐ ܠܟ݂ܘܿܢ ܕܢܸܥܒܸܕ݂ ܬܒܲܥܬ݂ܗܘܿܢ ܒܲܥܓܲܠ. ܒܪܲܡ ܢܹܐܬܹܐ ܒܪܹܗ ܕܐ̄ܢܵܫܵܐ. ܘܢܸܫܟܲܚ ܟܲܝ ܗܲܝܡܵܢܘܼܬ݂ܵܐ ܥܲܠ ܐܲܪܥܵܐ.

⁹ ܘܐܸܡܲܪ ܗܘ̣ܵܐ ܡܲܬ݂ܠܵܐ ܗܵܢܵܐ ܠܘܼܩܒܲܠ ܐ̄ܢܵܫܵܐ. ܐܲܝܠܹܝܢ ܕܲܬ݂ܟ݂ܝܼܠܝܼܢ ܥܲܠ ܢܲܦ̮ܫܗܘܿܢ ܕܐܝܼܬܲܝܗܘܿܢ ܙܲܕܝܼܩܹ̈ܐ. ܘܒ݂ܵܣܹܝܢ ܥܲܠ ܟܠܢܵܫ.

¹⁰ ܬܪܹܝܢ ܓܲܒ݂ܪ̈ܝܼܢ ܣܠܸܩܘ ܠܗܲܝܟܠܵܐ. ܠܲܡܨܲܠܵܝܘܼ. ܚܲܕ݂ ܦܪܝܼܫܵܐ. ܘܐܲܚܪܹܢܵܐ ܡܵܟ݂ܣܵܐ.

¹¹ ܘܗܵܘ ܦܪܝܼܫܵܐ ܩܵܐܹܡ ܗܘ̣ܵܐ ܒܲܝܢܵܘܗܝ ܠܢܲܦ̮ܫܹܗ. ܘܗܵܠܹܝܢ ܡܨܲܠܹܐ ܗ̄ܘܵܐ. ܐܲܠܵܗܵܐ ܡܵܘܕܹܐ ܐ̄ܢܵܐ ܠܵܟ݂. ܕܠܵܐ ܗ̄ܘܹܝܬ݂ ܐܲܝܟ݂ ܫܲܪܟܵܐ ܕܐ̄ܢܵܫܵܐ. ܚܵܛܘܿܦܹ̈ܐ ܘܥܵܠܘܿܒܹ̈ܐ ܘܓܲܝܵܪܹ̈ܐ. ܘܠܵܐ ܐܲܝܟ݂ ܗܵܢܵܐ ܡܵܟ݂ܣܵܐ.

¹² ܐܸܠܵܐ ܨܵܐܹܡ ܐ̄ܢܵܐ ܬܪܹܝܢ ܒܫܲܒܿܬ݂ܵܐ. ܘܲܡܥܲܣܲܪ ܐ̄ܢܵܐ ܟܠ ܡܸܕܸܡ ܕܩܵܢܹܐ ܐ̄ܢܵܐ.

¹³ ܗܵܘ ܕܹܝܢ ܡܵܟ݂ܣܵܐ ܩܵܐܹܡ ܗܘ̣ܵܐ ܡܸܢ ܪܘܼܚܩܵܐ. ܘܠܵܐ ܨܵܒܹܐ ܗ̄ܘܵܐ. ܐܵܦ ܠܵܐ ܥܲܝܢܵܘ̈ܗܝ ܢܪܝܼܡ ܠܲܫܡܲܝܵܐ. ܐܸܠܵܐ ܛܵܪܹܦ ܗܘ̣ܵܐ ܥܲܠ ܚܲܕ݂ܝܹܗ. ܘܐܵܡܲܪ. ܐܲܠܵܗܵܐ ܚܘܼܢܲܝܢܝ ܠܚܲܛܵܝܵܐ.

¹⁴ ܐܵܡܲܪ ܐ̄ܢܵܐ ܠܟ݂ܘܿܢ. ܕܲܢܚܸܬ݂ ܗܵܢܵܐ ܡܙܲܕܲܩ ܠܒܲܝܬܹ݁ܗ. ܝܲܬ݁ܝܼܪ ܡܸܢ ܗܵܘ ܦܪܝܼܫܵܐ. ܟܠ ܐ̄ܢܵܫ ܓܹܝܪ ܕܲܢܪܝܼܡ ܢܲܦ̮ܫܹܗ. ܢܸܬ݂ܡܲܟܲܟ݂. ܘܟ݂ܠ ܕܢܲܡܸܟ݂ ܢܲܦ̮ܫܹܗ. ܢܸܬ݁ܬ݁ܪܝܼܡ.

¹⁵ ܩܲܪܸܒ݂ܘ ܗ̄ܘܼܵܘ ܠܹܗ ܕܹܝܢ ܐܵܦ ܝܲܠܘܼܕܹ̈ܐ. ܕܢܸܩܪܘܿܒ݂ ܠܗܘܿܢ. ܘܲܚܙܵܘ ܐܸܢܘܿܢ ܬܲܠܡܝܼܕ݂ܵܘ̈ܗܝ. ܘܲܟ݂ܐܵܘ ܒܗܘܿܢ.

¹⁶ ܗܘܼ ܕܹܝܢ ܝܼܫܘܿܥ ܩܪܵܐ ܐܸܢܘܿܢ. ܘܐܸܡܲܪ ܠܗܘܿܢ. ܫܒ݂ܘܿܩܘ ܛܠܵܝܹ̈ܐ ܐܵܬܹ݁ܝܢ ܠܘܵܬ݂ܝ. ܘܠܵܐ ܬܸܟ݂ܠܘܼܢ ܐܸܢܘܿܢ. ܕܕ݂ܲܐܝܠܹܝܢ ܓܹܝܪ. ܕܐܲܝܟ݂ ܗܵܠܹܝܢ ܐܸܢܘܿܢ. ܕܝܼܠܗܘܿܢ ܗܝܼ ܡܲܠܟܘܼܬ݂ܵܐ ܕܲܫܡܲܝܵܐ.

¹⁷ ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܡܲܢ ܕܠܵܐ ܢܩܲܒܸܠ ܡܲܠܟܘܼܬ݂ܵܐ ܕܐܲܠܵܗܵܐ ܐܲܝܟ݂ ܛܲܠܝܵܐ. ܠܵܐ ܢܸܥܘܿܠ ܠܵܗ̇.

¹⁸ ܘܫܲܐܠܹܗ ܚܲܕ݂ ܡܸܢ ܪܹ̈ܫܵܢܹܐ. ܘܐܸܡܲܪ ܠܹܗ. ܡܲܠܦܵܢܵܐ ܛܵܒ݂ܵܐ. ܡܵܢܵܐ ܐܸܥܒܸܕ݂ ܕܐܹܪܲܬ݂ ܚܲܝܹ̈ܐ ܕܲܠܥܵܠܲܡ.

¹⁹ ܐܵܡܲܪ ܠܹܗ ܝܼܫܘܿܥ. ܡܵܢܵܐ ܩܵܪܹܐ ܐܲܢ̄ܬ݁ ܠܝܼ ܛܵܒ݂ܵܐ. ܠܲܝܬ݁ ܛܵܒ݂ܵܐ. ܐܸܠܵܐ ܐܸܢ ܚܲܕ݂. ܐܲܠܵܗܵܐ.

²⁰ ܦܘܼܩܕܵܢܹ̈ܐ ܝܵܕ݂ܲܥ ܐܲܢ̄ܬ݁. ܠܵܐ ܬܸܩܛܘܼܠ. ܘܠܵܐ ܬܓ݂ܘܼܪ. ܘܠܵܐ ܬܸܓ݂ܢܘܿܒ݂. ܘܠܵܐ ܬܸܣܗܲܕ݂ ܣܵܗܕܘܬ݂ܵܐ ܕܫܘܼܩܪܵܐ. ܝܲܩܲܪ ܠܐܲܒ݂ܘܼܟ݂. ܘܠܸܐܡܵܟ݂.

²¹ ܐܵܡܲܪ ܠܹܗ. ܗܵܠܹܝܢ ܟܠܗܹܝܢ ܢܸܛܪܹܬ݂ ܐܸܢܹܝܢ. ܡܸܢ ܛܲܠܝܘܼܬ݂ܝ.

²² ܟܲܕ݂ ܫܡܲܥ ܕܹܝܢ ܗܵܠܹܝܢ ܝܼܫܘܿܥ. ܐܸܡܲܪ ܠܹܗ. ܚܕ݂ܵܐ ܚܲܣܝܼܪܵܐ ܠܵܟ݂. ܙܸܠ ܙܲܒܸܢ ܟܠ ܡܸܕܸܡ ܕܐܝܼܬ݂ ܠܵܟ݂. ܘܗܲܒ݂ ܠܡܸܣܟܹܢܹ̈ܐ. ܘܬܸܗܘܹܐ ܠܵܟ݂ ܣܝܼܡܬ݂ܵܐ ܒܲܫܡܲܝܵܐ. ܘܬ݂ܵܐ ܒܵܬܲܪܝ.

²³ ܗܘܼ ܕܹܝܢ ܟܲܕ݂ ܫܡܲܥ ܗܵܠܹܝܢ. ܟܸܪܝܲܬ݂ ܠܹܗ. ܥܲܬ݁ܝܼܪ ܗܘ̣ܵܐ ܓܹܝܪ ܛܵܒ݂.

²⁴ ܘܟܲܕ݂ ܚܙܵܐ ܝܼܫܘܿܥ ܕܟܸܪܝܲܬ݂ ܠܹܗ. ܐܸܡܲܪ. ܐܲܝܟܲܢܵܐ ܥܲܛܠܵܐ ܠܐܲܝܠܹܝܢ ܕܐܝܼܬ݂ ܠܗܘܿܢ ܢܸܟ݂ܣܹ̈ܐ ܕܢܸܥܠܘܼܢ ܠܡܲܠܟܿܘܼܬܹܗ ܕܐܲܠܵܗܵܐ.

²⁵ ܕܠܝܼܠܵܐ ܗܝ ܠܓܲܡܠܵܐ ܕܒܲܚܪܘܿܪܵܐ ܕܲܡܚܲܛܵܐ ܢܸܥܘܿܠ. ܐܵܘ ܥܲܬ݁ܝܼܪܵܐ ܠܡܲܠܟܿܘܼܬܹܗ ܕܐܲܠܵܗܵܐ.

²⁶ ܐܵܡܪܝܼܢ ܠܹܗ ܐܲܝܠܹܝܢ ܕܲܫܡܲܥܘ. ܘܡܲܢܘܼ ܡܸܫܟܲܚ ܠܡܸܚܵܐ.

²⁷ ܝܼܫܘܿܥ ܕܹܝܢ ܐܸܡܲܪ. ܐܲܝܠܹܝܢ ܕܲܠܘܵܬ݂ ܒܢܲܝ̈ܢܵܫܵܐ ܠܵܐ ܡܸܫܟܚܵܢ. ܠܘܵܬ݂ ܐܲܠܵܗܵܐ ܡܸܫܟܚܵܢ ܠܡܸܗܘܵܐ.

²⁸ ܐܵܡܲܪ ܠܹܗ ܫܸܡܥܘܿܢ ܟܹܐܦܵܐ . ܗܵܐ ܚܢܲܢ ܫܒܲܩܢ ܟܠ ܡܸܕܸܡ. ܘܐܸܬܲܝܢ ܒܵܬ݂ܪܵܟ݂.

²⁹ ܐܵܡܲܪ ܠܹܗ ܝܼܫܘܿܥ. ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܠܲܝܬ݁ ܐ̄ܢܵܫ ܕܫܵܒܹܩ ܒܵܬܹ̈ܐ: ܐܵܘ ܐܲܒ݂ܵܗܹ̈ܐ: ܐܵܘ ܐܲܚܹ̈ܐ: ܐܵܘ ܐܲܢ̄ܬ݁ܬ݂ܵܐ: ܐܵܘ ܒ̈ܢܲܝܵܐ: ܡܛܠ ܡܲܠܟܘܼܬ݂ܵܐ ܕܐܲܠܵܗܵܐ

³⁰ ܘܠܵܐ ܢܩܲܒܸܠ ܒܐܲܥܦܹ̈ܐ ܣܲܓܝܼܐܹ̈ܐ ܒܗܵܢܵܐ ܙܲܒ݂ܢܵܐ. ܘܲܒ݂ܥܵܠܡܵܐ ܕܐܵܬܹܐ. ܚܲܝܹ̈ܐ ܕܲܠܥܵܠܲܡ.

³¹ ܘܲܕ݂ܒܲܪ ܝܼܫܘܿܥ ܠܲܬ݂ܪܸܥܣܲܪܬܹ݁ܗ. ܘܐܸܡܲܪ ܠܗܘܿܢ. ܗܵܐ ܣܵܠܩܝܼܢܲܢ ܠܐܘܿܪܸܫܠܸܡ. ܘܡܸܫܬܲܠܡܵܢ ܟܠܗܹܝܢ ܕܲܟܬ݂ܝܼܒ݂ܵܢ ܒܲܢܒ݂ܝܹ̈ܐ. ܥܲܠ ܒܪܹܗ ܕܐ̄ܢܵܫܵܐ.

³² ܢܸܫܬ݁ܠܸܡ ܓܹܝܪ ܠܥܲܡ̈ܡܹܐ. ܘܲܢܒܲܙܚܘܼܢ ܒܹܗ. ܘܢܸܪܩܘܼܢ ܒܐܲܦܵܘ̈ܗܝ.

³³ ܘܲܢܢܲܓ݁ܕ݂ܘܼܢܵܝܗܝ ܘܲܢܨܲܥܪܘܼܢܵܝܗܝ. ܘܢܸܩܛܠܘܼܢܵܝܗܝ. ܘܲܠܝܵܘܡܵܐ ܕܲܬ݂ܠܵܬ݂ܵܐ ܢܩܘܼܡ.

³⁴ ܗܸܢܘܿܢ ܕܹܝܢ ܚܕ݂ܵܐ ܡܸܢ ܗܵܠܹܝܢ ܠܵܐ ܐܸܣܬܲܟܲܠܘ. ܐܸܠܵܐ ܡܟܲܣܝܵܐ ܗ̄ܘܵܬ݂ ܡܸܢܗܘܿܢ ܡܸܠܬ݂ܵܐ ܗܵܕܹܐ. ܘܠܵܐ ܝܵܕ݂ܥܝܼܢ ܗ̄ܘܼܵܘ ܗܵܠܹܝܢ ܕܡܸܬ݂ܡܲܠܠܵܢ ܥܲܡܗܘܿܢ.

³⁵ ܘܟܲܕ݂ ܩܲܪܝܼܒ݂ ܠܐܝܼܪܝܼܚܘܿ. ܣܲܡܝܵܐ ܚܲܕ݂ ܝܵܬܹ݁ܒ݂ ܗܘ̣ܵܐ ܥܲܠ ܝܲܕ݂ ܐܘܼܪܚܵܐ. ܘܚܵܕ݂ܲܪ.

³⁶ ܘܲܫܡܲܥ ܩܵܠ ܟܸܢܫܵܐ. ܕܥܵܒܲܪ. ܘܲܡܫܲܐܸܠ ܗ̄ܘܵܐ. ܕܡܲܢܘܼ ܗܵܢܵܐ.

³⁷ ܐܵܡܪܝܼܢ ܠܹܗ. ܝܼܫܘܿܥ ܢܵܨܪܵܝܵܐ ܥܵܒܲܪ.

³⁸ ܘܲܩܥܵܐ. ܘܐܸܡܲܪ. ܝܼܫܘܿܥ ܒܪܹܗ ܕܕ݂ܵܘܝܼܕ݂: ܐܸܬ݂ܪܲܚܲܡ ܥܠܲܝ.

³⁹ ܘܐܲܝܠܹܝܢ ܕܐܵܙܠ̄ܝܼܢ ܗ̄ܘܼܵܘ ܩܕ݂ܵܡܵܘܗܝ ܕܝܼܫܘܿܥ. ܟܵܐܹܝܢ ܗ̄ܘܼܵܘ ܒܹܗ. ܕܢܸܫܬ݁ܘܿܩ. ܗܘܼ ܕܹܝܢ ܝܲܬ݁ܝܼܪܵܐܝܼܬ݂ ܩܵܥܹܐ ܗ̄ܘܵܐ. ܒܪܹܗ ܕܕ݂ܵܘܝܼܕ݂: ܐܸܬ݂ܪܲܚܲܡ ܥܠܲܝ.

⁴⁰ ܘܩܼܵܡ ܝܼܫܘܿܥ. ܘܲܦܩܲܕ݂ ܕܢܲܝܬ݁ܘܿܢܵܝܗܝ ܠܘܵܬܹܗ. ܘܟܲܕ݂ ܩܪܸܒ݂ ܠܘܵܬܹܗ. ܫܲܐܠܹܗ.

⁴¹ ܘܐܸܡܲܪ ܠܹܗ. ܡܵܢܵܐ ܨܵܒܹܐ ܐܲܢ̄ܬ݁ ܐܸܥܒܸܕ݂ ܠܵܟ݂. ܗܘܼ ܕܹܝܢ ܐܸܡܲܪ. ܡܵܪܝ. ܕܐܸܚܙܹܐ.

⁴² ܘܝܼܫܘܿܥ ܐܸܡܲܪ ܠܹܗ. ܚܙܝܼ ܗܲܝܡܵܢܘܼܬ݂ܵܟ݂ ܐܲܚܝܵܬ݂ܵܟ݂.

⁴³ ܘܒܲܪ ܫܵܥܬܹܗ ܚܙܵܐ. ܘܐܵܬܹܐ ܗܘ̣ܵܐ ܒܵܬ݂ܪܹܗ. ܘܲܡܫܲܒܲܚ ܠܐܲܠܵܗܵܐ. ܘܟ݂ܠܹܗ ܥܲܡܵܐ ܕܲܚܙܵܐ. ܝܲܗ̄ܒ݂ ܗܘ̣ܵܐ ܫܘܼܒ݂ܚܵܐ ܠܐܲܠܵܗܵܐ.

19

¹ ܘܟܲܕ݂ ܥܲܠ ܝܼܫܘܿܥ. ܘܲܥܒܲܪ ܒܐܝܼܪܝܼܚܘܿ.

² ܓܲܒ݂ܪܵܐ ܚܲܕ݂ ܕܲܫܡܹܗ ܙܲܟܲܝ ܥܲܬ݁ܝܼܪܵܐ ܗ̄ܘܵܐ. ܘܪܲܒ ܡܵܟ݂ܣܹ̈ܐ:

³ ܘܨܵܒܹܐ ܗܘ̣ܵܐ ܕܢܸܚܙܹܐ ܠܝܼܫܘܿܥ ܕܡܲܢܘܼ. ܘܠܵܐ ܡܸܫܟܲܚ ܗܘ̣ܵܐ ܡܸܢ ܟܸܢܫܵܐ. ܡܛܠ ܕܲܒ݂ܩܵܘܡܬܹܗ. ܙܥܘܿܪ ܗܘ̣ܵܐ ܙܲܟܲܝ.

⁴ ܘܲܪܗܸܛ ܩܲܕܡܹܗ ܠܝܼܫܘܿܥ. ܘܲܣܠܸܩ ܠܹܗ ܠܬܹܬܵܐ ܦܲܟܝܼܗܬܵܐ ܕܢܸܚܙܹܝܘܗܝ. ܡܛܠ ܕܗܵܟ݂ܘܵܬ݂ ܥܬ݂ܝܼܕ݂ ܗܘ̣ܵܐ ܕܢܸܥܒܲܪ.

⁵ ܘܟܲܕ݂ ܐܸܬ݂ܵܐ ܠܗܵܝ ܕܘܼܟܬ݂ܵܐ ܝܼܫܘܿܥ. ܚܙܵܝܗܝ. ܘܐܸܡܲܪ ܠܹܗ. ܐܸܣܬܲܪܗ̄ܒ݂ ܚܘܿܬ݂ ܙܲܟܲܝ: ܝܵܘܡܵܢܵܐ ܓܹܝܪ ܘܵܠܹܐ ܕܲܒ݂ܒܲܝܬܵܟ݂ ܐܸܗܘܹܐ

⁶ ܘܐܸܣܬܲܪܗܲܒ݂ ܢܚܸܬ݂. ܘܩܲܒܠܹܗ ܟܲܕ݂ ܚܵܕܹܐ.

⁷ ܟܲܕ݂ ܚܙܵܘ ܕܹܝܢ ܟܠܗܘܿܢ. ܪܵܛܢܝܼܢ ܗ̄ܘܼܵܘ. ܘܐܵܡܪܝܼܢ. ܕܲܠܘܵܬ݂ ܓܲܒ݂ܪܵܐ ܚܲܛܵܝܵܐ ܥܲܠ ܫܪܵܐ.

⁸ ܩܵܡ ܕܹܝܢ ܙܲܟܲܝ. ܘܐܸܡܲܪ ܠܝܼܫܘܿܥ. ܗܵܐ ܡܵܪܝ: ܦܸܠܓܘܼܬ݂ ܢܸܟ݂ܣܲܝ̈ ܝܵܗܹܒ݂ ܐ̄ܢܵܐ ܠܡܸܣܟܹܢܹ̈ܐ. ܘܲܠܟ݂ܠܢܵܫ ܡܸܕܸܡ ܕܓܸܠܙܹܬ݂. ܚܲܕ݂ ܒܐܲܪܒܥܵܐ ܦܵܪܲܥ ܐ̄ܢܵܐ.

⁹ ܐܵܡܲܪ ܠܹܗ ܝܼܫܘܿܥ. ܝܵܘܡܵܢܵܐ ܗܘܵܘ ܚܲܝܹ̈ܐ ܠܒܲܝܬܵܐ ܗܵܢܵܐ. ܡܛܠ ܕܐܵܦ ܗܵܢܵܐ ܒܪܹܗ ܗܘܼ ܕܐܲܒ݂ܪܵܗܵܡ.

¹⁰ ܐܸܬ݂ܵܐ ܓܹܝܪ ܒܪܹܗ ܕܐ̄ܢܵܫܵܐ. ܕܢܸܒ݂ܥܹܐ ܘܢܲܚܹܐ. ܗܵܘ ܡܸܕܸܡ ܕܐܲܒܝܼܕ݂ ܗ̄ܘܵܐ.

¹¹ ܘܟܲܕ݂ ܫܵܡܥܝܼܢ ܗ̄ܘܼܵܘ ܗܵܠܹܝܢ. ܐܵܘܣܸܦ ܠܡܹܐܡܲܪ ܡܲܬ݂ܠܵܐ. ܡܛܠ ܕܩܲܪܝܼܒ݂ ܗܘ̣ܵܐ ܠܐܘܿܪܸܫܠܸܡ ܘܣܵܒ݂ܪܝܼܢ ܗ̄ܘܼܵܘ. ܕܲܒ݂ܗܵܝ ܫܵܥܬ݂ܵܐ ܥܬ݂ܝܼܕ݂ܵܐ ܕܬܸܬ݂ܓ݁ܠܹܐ ܡܲܠܟܘܼܬܹܗ ܕܐܲܠܵܗܵܐ.

¹² ܘܐܸܡܲܪ. ܓܲܒ݂ܪܵܐ ܚܲܕ݂ ܒܲܪ ܛܘܼܗܡܵܐ ܪܲܒܵܐ. ܐܸܙܲܠ ܠܐܲܬ݂ܪܵܐ ܪܲܚܝܼܩܵܐ. ܕܢܸܣܲܒ݂ ܠܹܗ ܡܲܠܟܘܼܬ݂ܵܐ. ܘܢܸܗܦܘܼܟ݂.

¹³ ܘܲܩܪܵܐ ܥܸܣܪܵܐ ܥܲܒ݂ܕܵܘ̈ܗܝ. ܘܝܲܗ̄ܒ݂ ܠܗܘܿܢ. ܥܸܣܪܵܐ ܡܢ̈ܝܼܢ. ܘܐܸܡܲܪ ܠܗܘܿܢ. ܐܸܬ݁ܬܲܓܲܪܘ ܥܲܕ݂ ܐܵܬܹܐ ܐ̄ܢܵܐ.

¹⁴ ܒܢܲܝ̈ ܡܕ݂ܝܼܢ̄ܬܹ݁ܗ ܕܹܝܢ. ܣܵܢܹܝܢ ܗ̄ܘܼܵܘ ܠܹܗ. ܘܫܲܕܲܪܘ ܐܝܼܙܓܲܕܹ̈ܐ ܒܵܬ݂ܪܹܗ. ܘܐܵܡܪܝܼܢ. ܠܵܐ ܨܵܒܹܝܢ ܚ̄ܢܲܢ ܕܢܲܡܠܸܟ݂ ܥܠܲܝܢ ܗܵܢܵܐ.

¹⁵ ܘܟܲܕ݂ ܢܣܲܒ݂ ܡܲܠܟܘܼܬ݂ܵܐ ܘܲܗܦܲܟ݂. ܐܸܡܲܪ ܕܢܸܩܪܘܿܢ ܠܹܗ ܗܵܢܘܿܢ ܥܲܒ݂ܕܵܘ̈ܗܝ. ܕܝܲܗ̄ܒ݂ ܠܗܘܿܢ ܟܸܣܦܵܐ ܕܢܸܕ݂ܥ ܡܵܢܵܐ ܟܠܚܲܕ݂ ܚܲܕ݂ ܡܸܢܗܘܿܢ ܐܸܬ݁ܬܲܓܲܪ.

¹⁶ ܘܐܸܬ݂ܵܐ ܩܲܕ݂ܡܵܝܵܐ. ܘܐܸܡܲܪ. ܡܵܪܝ. ܡܲܢܝܵܟ݂. ܥܸܣܪܵܐ ܡܢ̈ܝܼܢ ܐܵܘܬܲܪ.

¹⁷ ܐܵܡܲܪ ܠܹܗ. ܐܹܝܘ ܥܲܒ݂ܕܵܐ ܛܵܒ݂ܵܐ. ܕܲܒ݂ܩܲܠܝܼܠ ܐܸܫܬ݁ܟܲܚܬ݁ ܡܗܲܝܡܲܢ. ܬܸܗܘܹܐ ܫܲܠܝܼܛ ܥܲܠ ܥܸܣܪܵܐ ܟܲܪ̈ܟ݂ܝܼܢ.

¹⁸ ܘܐܸܬ݂ܵܐ ܕܲܬ݂ܪܹܝܢ ܘܐܸܡܲܪ. ܡܵܪܝ. ܡܲܢܝܵܟ݂. ܚܲܡܫܵܐ ܡܢ̈ܝܼܢ ܥܒܲܕ݂.

¹⁹ ܐܸܡܲܪ ܐܵܦ ܠܗܵܢܵܐ. ܐܵܦ ܐܲܢ̄ܬ݁ ܬܸܗܘܹܐ ܫܲܠܝܼܛ. ܥܲܠ ܚܲܡܫܵܐ ܟܲܪ̈ܟ݂ܝܼܢ.

²⁰ ܘܐܸܬ݂ܵܐ ܐ̄ܚܪܹܢܵܐ. ܘܐܸܡܲܪ. ܡܵܪܝ. ܗܵܐ ܡܲܢܝܵܟ݂ ܗܵܘ ܕܐܝܼܬ݂ ܗܘ̣ܵܐ ܠܘܵܬ݂ܝ. ܟܲܕ݂ ܣܝܼܡ ܒܣܸܕܿܘܿܢܵܐ.

²¹ ܕܸܚܠܹܬ݂ ܓܹܝܪ ܡܸܢܵܟ݂ ܕܓܲܒ݂ܪܵܐ ܐܲܢ̄ܬ݁ ܩܲܫܝܵܐ. ܘܫܵܩܹܠ ܐܲܢ̄ܬ݁ ܡܸܕܸܡ ܕܠܵܐ ܣܵܡܬ݁. ܘܚܵܨܹܕ݂ ܐܲܢ̄ܬ݁ ܡܸܕܸܡ ܕܠܵܐ ܙܪܲܥܬ݁.

²² ܐܵܡܲܪ ܠܹܗ. ܡܸܢ ܦܘܼܡܵܟ݂ ܐܹܕ݂ܘܢܵܟ݂ ܥܲܒ݂ܕܵܐ ܒܝܼܫܵܐ. ܝܵܕ݂ܲܥ ܗ̄ܘܲܝܬ݁ ܠܝܼ ܕܓܲܒ݂ܪܵܐ ܐ̄ܢܵܐ ܩܲܫܝܵܐ: ܘܫܵܩܹܠ ܐ̄ܢܵܐ ܡܸܕܸܡ ܕܠܵܐ ܣܵܡܹܬ݂: ܘܚܵܨܹܕ݂ ܐ̄ܢܵܐ ܡܸܕܸܡ ܕܠܵܐ ܙܸܪܥܹܬ݂.

²³ ܠܡܵܢܵܐ ܠܵܐ ܝܲܗ̄ܒ݂ܬ݁ ܟܸܣܦܝ ܥܲܠ ܦܵܬ݂ܘܿܪܵܐ. ܘܐܸܢܵܐ ܐܵܬܹܐ ܗ̄ܘܹܝܬ݂ ܬܵܒܲܥ ܠܹܗ. ܥܲܡ ܪܸ̈ܒܝܵܬܹܗ.

²⁴ ܘܲܠܗܵܢܘܿܢ ܕܩܵܝܡܝܼܢ ܩܕ݂ܵܡܵܘܗܝ. ܐܸܡܲܪ. ܣܲܒ݂ܘ ܡܸܢܹܗ ܡܲܢܝܵܐ. ܘܗܲܒ݂ܘ ܠܗܵܘ ܕܐܝܼܬ݂ ܠܘܵܬܹܗ ܥܸܣܪܵܐ ܡܢ̈ܝܼܢ.

²⁵ ܐܵܡܪܝܼܢ ܠܹܗ. ܡܵܪܲܢ. ܐܝܼܬ݂ ܠܘܵܬܹܗ ܥܸܣܪܵܐ ܡܢ̈ܝܼܢ.

²⁶ ܐܵܡܲܪ ܠܗܘܿܢ. ܐܵܡܲܪ ܐ̄ܢܵܐ ܠܟ݂ܘܿܢ. ܕܲܠܟ݂ܠ ܡܲܢ ܕܐܝܼܬ݂ ܠܹܗ. ܢܸܬ݂ܝܼܗܸܒ݂ ܠܹܗ. ܘܡܸܢ ܗܵܘ ܕܠܲܝܬ݁ ܠܹܗ. ܐܵܦ ܗܵܘ ܕܐܝܼܬ݂ ܠܹܗ. ܢܸܬ݂ܢܣܸܒ݂ ܡܸܢܹܗ.

²⁷ ܒܪܲܡ ܠܗܵܢܘܿܢ ܒܥܸܠܕܒ݂ܵܒܲܝ̈ ܐܲܝܠܹܝܢ ܕܠܵܐ ܨܒ݂ܵܘ ܕܐܲܡܠܸܟ݂ ܥܠܲܝܗܘܿܢ. ܐܲܝܬܵܘ ܐܸܢܘܿܢ. ܘܩܲܛܸܠܘ ܐܸܢܘܿܢ ܩܕ݂ܵܡܲܝ.

²⁸ ܘܟܲܕ݂ ܐܸܡܲܪ ܗܵܠܹܝܢ ܝܼܫܘܿܥ. ܢܦܲܩ ܠܲܩܕ݂ܵܡܵܘܗܝ ܕܢܹܐܙܲܠ ܠܐܘܿܪܸܫܠܸܡ.

²⁹ ܘܟܲܕ݂ ܡܲܛܝܼ ܠܒܹܝܬ݂ ܦܵܓܹ̈ܐ ܘܒܹܝܬ݂ ܥܲܢܝܵܐ. ܥܲܠ ܓܸܢ̄ܒ݂ ܛܘܼܪܵܐ ܕܡܸܬ݂ܩܪܹܐ ܕܒܹܝܬ݂ ܙܲܝ̈ܬܹܐ. ܫܲܕܲܪ ܬܪܹܝܢ ܡܸܢ ܬܲܠܡܝܼܕ݂ܵܘ̈ܗܝ.

³⁰ ܘܐܸܡܲܪ ܠܗܘܿܢ. ܙܸܠܘ ܠܲܩܪܝܼܬ݂ܵܐ ܗܵܝ ܕܲܠܩܘܼܒ݂ܠܲܢ. ܘܟܲܕ݂ ܥܵܐܠܝܼܢ ܐܢ̄ܬܘܿܢ ܠܵܗ̇. ܗܵܐ ܡܸܫܟܿܚܝܼܢ ܐܢ̄ܬܘܿܢ ܥܝܼܠܵܐ ܕܐܲܣܝܼܪ. ܕܐ̄ܢܵܫ ܡܸܡܬ݂ܘܿܡ ܠܵܐ ܪܟܸܒ݂ ܥܠܵܘܗܝ. ܫܪܵܘ ܐܲܝܬܵܐܘܼܗܝ.

³¹ ܘܐܸܢ ܐ̄ܢܵܫ ܡܫܲܐܸܠ ܠܟ݂ܘܿܢ ܠܡܵܢܵܐ ܫܵܪܹܝܢ ܐܢ̄ܬܘܿܢ ܠܹܗ. ܗܵܟܲܢܵܐ ܐܸܡܲܪܘ ܠܹܗ. ܠܡܵܪܲܢ ܡܸܬ݂ܒܥܹܐ.

³² ܘܐܸܙܲܠܘ ܗܵܢܘܿܢ ܕܐܫܬܲܕܲܪܘ. ܘܐܸܫܟܲܚܘ ܐܲܝܟܲܢܵܐ ܕܐܵܡܲܪ ܠܗܘܿܢ.

³³ ܘܟܲܕ݂ ܫܵܪܹܝܢ ܠܹܗ ܠܥܝܼܠܵܐ. ܐܵܡܪܝܼܢ ܠܗܘܿܢ ܡܵܪ̈ܵܘܗܝ. ܡܵܢܵܐ ܫܵܪܹܝܢ ܐܢ̄ܬܘܿܢ ܥܝܼܠܵܐ ܗܵܘ.

³⁴ ܘܐܸܡܲܪܘ ܠܗܘܿܢ. ܕܲܠܡܵܪܲܢ ܡܸܬ݂ܒܥܹܐ.

³⁵ ܘܐܲܝܬ݁ܝܘܼܗܝ ܠܘܵܬ݂ ܝܼܫܘܿܥ. ܘܐܲܪܡܝܼܘ ܥܲܠ ܥܝܼܠܵܐ ܡܵܐܢܲܝ̈ܗܘܿܢ. ܘܐܲܪܟܒ݂ܘܼܗܝ ܠܝܼܫܘܿܥ ܥܠܵܘܗܝ.

³⁶ ܟܲܕ݂ ܕܹܝܢ ܐܵܙܹܠ. ܦܵܪܣܝܼܢ ܗ̄ܘܼܵܘ ܡܵܐܢܲܝ̈ܗܘܿܢ ܒܐܘܼܪܚܵܐ.

³⁷ ܘܟܲܕ݂ ܩܪܸܒ݂ ܠܡܲܚܲܬ݁ܬ݂ܵܐ ܕܛܘܼܪܵܐ ܕܒܹܝܬ݂ ܙܲܝ̈ܬܹܐ. ܫܲܪܝܼܘ ܟܠܹܗ ܟܸܢܫܵܐ ܕܬܲܠܡܝܼܕܹ̈ܐ ܚܵܕ݂ܝܢ ܘܲܡܫܲܒܚܝܼܢ ܠܐܲܠܵܗܵܐ ܒܩܵܠܵܐ ܪܵܡܵܐ ܥܲܠ ܟܠ ܚܲܝ̈ܠܹܐ ܕܲܚܙܵܘ.

³⁸ ܘܐܵܡܪܝܼܢ ܗ̄ܘܼܵܘ. ܒܪܝܼܟ݂ ܗܘܼ ܡܲܠܟܵܐ ܕܐܵܬܹܐ ܒܲܫܡܹܗ ܕܡܵܪܝܵܐ. ܫܠܵܡܵܐ ܒܲܫܡܲܝܵܐ. ܘܫܘܼܒ݂ܚܵܐ ܒܲܡܪ̈ܵܘܡܹܐ.

³⁹ ܐ̄ܢܵܫܵܐ ܕܹܝܢ ܡܸܢ ܦܪ̈ܝܼܫܹܐ ܡܸܢ ܒܲܝܢܲܝ ܟܸܢܫܹ̈ܐ. ܐܵܡܪܝܼܢ ܠܹܗ. ܪܲܒܝܼ. ܟܐܝܼ ܒܬܲܠܡܝܼܕ݂ܲܝ̈ܟ.

⁴⁰ ܐܵܡܲܪ ܠܗܘܿܢ. ܐܵܡܲܪ ܐ̄ܢܵܐ ܠܟ݂ܘܿܢ. ܕܐܸܢ ܗܵܠܹܝܢ ܢܸܫܬ݁ܩܘܼܢ. ܟܹܐܦܹ̈ܐ ܢܸܩܥܝܵܢ.

⁴¹ ܘܟܲܕ݂ ܩܪܸܒ݂ ܘܲܚܙܵܗ̇ ܠܲܡܕ݂ܝܼܢ̄ܬܵܐ. ܒܟ݂ܵܐ ܥܠܹܝܗ̇.

⁴² ܘܐܸܡܲܪ. ܐܸܠܘܼ ܟܲܝ ܝܼܕ݂ܲܥܬ݁ܝ ܐܲܝܠܹܝܢ ܕܐܝܼܬܲܝܗܹܝܢ ܕܲܫܠܵܡܹܟ݂ܝ: ܐܵܦܸܢ ܒܗܵܢܵܐ ܝܵܘܡܹܟ݂ܝ. ܗܵܫܵܐ ܕܹܝܢ ܐܸܬ݂ܟܲܣܝܼ ܠܗܹܝܢ ܡܸܢ ܥܲܝܢܲܝ̈ܟܿܝ.

⁴³ ܢܹܐܬ݂ܘܿܢ ܠܹܟ݂ܝ ܕܹܝܢ ܝܵܘ̈ܡܵܬ݂ܵܐ. ܕܢܸܚܕܪܘܼܢܹܟ݂ܝ ܒܥܸܠܕܒ݂ܵܒܲܝ̈ܟܿܝ. ܘܢܹܐܠܨܘܼܢܹܟ݂ܝ ܡܸܢ ܟܠ ܕܘܼܟܵܐ.

⁴⁴ ܘܢܸܣܚܦܘܼܢܹܟ݂ܝ ܘܠܲܒ݂ܢܲܝ̈ܟܝ ܒܓ݂ܵܘܹܟ݂ܝ. ܘܠܵܐ ܢܸܫܒܩܘܼܢ ܒܹܟ݂ܝ ܟܹܐܦ ܥܲܠ ܟܹܐܦ. ܚܠܵܦ ܕܠܵܐ ܝܼܕ݂ܲܥܬ݁ܝ ܙܲܒ݂ܢܵܐ ܕܣܘܼܥܪܵܢܹܟ݂ܝ.

⁴⁵ ܘܟܲܕ݂ ܥܲܠ ܠܗܲܝܟܠܵܐ. ܫܲܪܝܼ ܠܡܲܦܵܩܘܼ ܠܐܲܝܠܹܝܢ ܕܙܵܒ݂ܢܝܼܢ ܒܹܗ ܘܲܡܙܲܒܢܝܼܢ.

⁴⁶ ܘܐܸܡܲܪ ܠܗܘܿܢ. ܟܬ݂ܝܼܒ݂ ܕܒܲܝܬ݁ܝ. ܒܹܝܬ݂ ܨܠܘܼܬ݂ܵܐ ܐܝܼܬ݂ܵܘܗܝ. ܐܲܢ̄ܬ݁ܘܿܢ ܕܹܝܢ ܥܒܲܕܬ݁ܘܼܢܵܝܗܝ ܡܥܲܪܬ݂ܵܐ ܕܠܸܣܛܵܝܹ̈ܐ.

⁴⁷ ܘܗܘܼ ܡܲܠܸܦ ܗܘ̣ܵܐ ܟܠܝܘܼܡ ܒܗܲܝܟܠܵܐ. ܪ̈ܲܒܲܝ ܟܵܗܢܹ̈ܐ ܕܹܝܢ ܘܣܵܦܪܹ̈ܐ ܘܩܲܫܝܼܫܹ̈ܐ ܕܥܲܡܵܐ. ܒܵܥܹܝܢ ܗ̄ܘܼܵܘ ܠܡܵܘܒܵܕ݂ܘܼܬܹܗ.

⁴⁸ ܘܠܵܐ ܡܸܫܟܿܚܝܼܢ ܗ̄ܘܼܵܘ ܡܵܢܵܐ ܢܸܥܒܕ݂ܘܼܢ ܠܹܗ. ܟܠܹܗ ܓܹܝܪ ܥܲܡܵܐ ܬܠܹܐ ܗܘ̣ܵܐ ܒܹܗ ܠܡܸܫܡܥܹܗ.

20

¹ ܘܲܗܘܵܐ ܒܚܲܕ݂ ܡܸܢ ܝܵܘ̈ܡܵܬ݂ܵܐ ܟܲܕ݂ ܡܲܠܸܦ ܒܗܲܝܟܠܵܐ ܠܥܲܡܵܐ ܘܲܡܣܲܒܲܪ. ܩܵܡܘ ܥܠܵܘܗܝ ܪ̈ܲܒܲܝ ܟܵܗܢܹ̈ܐ ܘܣܵܦܪܹ̈ܐ ܥܲܡ ܩܲܫܝܼܫܹ̈ܐ.

² ܘܐܵܡܪܝܼܢ ܠܹܗ. ܐܸܡܲܪ ܠܲܢ ܒܐܲܝܢܵܐ ܫܘܼܠܛܵܢܵܐ ܗܵܠܹܝܢ ܥܵܒܹܿܕ݂ ܐܲܢ̄ܬ݁. ܘܡܲܢܘܼ ܗܵܘ ܕܝܲܗ̄ܒ݂ ܠܵܟ݂ ܫܘܼܠܛܵܢܵܐ ܗܵܢܵܐ.

³ ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܐܹܫܲܐܸܠܟ݂ܘܿܢ ܐܵܦ ܐܸܢܵܐ ܡܸܠܬ݂ܵܐ. ܘܐܸܡܲܪܘ ܠܝܼ.

⁴ ܡܲܥܡܘܿܕ݂ܝܼܬܹܗ ܕܝܘܿܚܲܢܵܢ ܡܸܢ ܫܡܲܝܵܐ ܗ̄ܘܵܬ݂ ܐܵܘ ܡܸܢ ܒܢܲܝ̈ܢܵܫܵܐ.

⁵ ܗܸܢܘܿܢ ܕܹܝܢ ܡܸܬ݂ܚܲܫܒ݂ܝܼܢ ܗ̄ܘܼܵܘ ܒܢܲܦ̮ܫܗܘܿܢ. ܘܐܵܡܪܝܼܢ. ܕܐܸܢ ܢܹܐܡܲܪ ܡܸܢ ܫܡܲܝܵܐ. ܐܵܡܲܪ ܠܲܢ. ܘܡܛܠ ܡܵܢܵܐ ܠܵܐ ܗܲܝܡܸܢܬ݁ܘܿܢܵܝܗܝ.

⁶ ܐܸܢ ܕܹܝܢ ܢܹܐܡܲܪ ܡܸܢ ܒܢܲܝ̈ܢܵܫܵܐ. ܪܵܓܹܡ ܠܲܢ ܥܲܡܵܐ ܟܠܹܗ. ܡܦܵܣܝܼܢ ܓܹܝܪ ܕܝܘܿܚܲܢܵܢ ܢܒ݂ܝܼܵܐ ܗܘܼ.

⁷ ܘܐܸܡܲܪܘ ܠܹܗ. ܕܠܵܐ ܝܵܕ݂ܥܝܼܢܲܢ ܡܸܢ ܐܲܝܡܸܟܵܐ ܗܝܼ.

⁸ ܐܵܡܲܪ ܠܗܘܿܢ ܝܼܫܘܿܥ. ܘܠܵܐ ܐܸܢܵܐ ܐܵܡܲܪ ܐ̄ܢܵܐ ܠܟ݂ܘܿܢ. ܒܐܲܝܢܵܐ ܫܘܼܠܛܵܢܵܐ ܗܵܠܹܝܢ ܥܵܒܹܿܕ݂ ܐ̄ܢܵܐ.

⁹ ܘܫܲܪܝܼ ܕܢܹܐܡܲܪ ܠܥܲܡܵܐ ܡܲܬ݂ܠܵܐ ܗܵܢܵܐ. ܓܲܒ݂ܪܵܐ ܚܲܕ݂ ܢܨܲܒ݂ ܟܲܪܡܵܐ. ܘܐܵܘܚܕ݂ܗ ܠܦܲܠܵܚܹ̈ܐ. ܘܐܲܒ݂ܥܸܕ݂ ܙܲܒ݂ܢܵܐ ܣܲܓܿܝܼܐܵܐ.

¹⁰ ܘܲܒ݂ܙܲܒ݂ܢܵܐ ܫܲܕܲܪ ܥܲܒ݂ܕܹܗ ܠܘܵܬ݂ ܦܲܠܵܚܹ̈ܐ ܕܢܸܬ݁ܠܘܼܢ ܠܹܗ ܡܸܢ ܦܹܐܪܹ̈ܐ ܕܟܲܪܡܵܐ. ܦܲܠܵܚܹ̈ܐ ܕܹܝܢ ܡܚܵܐܘܼܗܝ. ܘܫܲܕܿܪܘܼܗܝ ܟܲܕ݂ ܣܪܝܼܩ.

¹¹ ܘܐܵܘܣܸܦ. ܘܫܲܕܲܪ ܠܥܲܒ݂ܕܹܗ ܐ̄ܚܪܹܢܵܐ. ܗܸܢܘܿܢ ܕܹܝܢ ܐܵܦ ܠܗܵܘ. ܡܚܵܐܘܼܗܝ ܘܨܲܥܪܘܼܗܝ. ܘܫܲܕܿܪܘܼܗܝ ܟܲܕ݂ ܣܪܝܼܩ.

¹² ܘܐܵܘܣܸܦ. ܘܫܲܕܲܪ ܕܲܬ݂ܠܵܬ݂ܵܐ. ܗܸܢܘܿܢ ܕܹܝܢ ܘܐܵܦ ܠܗܵܘ ܨܲܠܦܘܼܗܝ. ܘܐܲܦܩܘܼܗܝ.

¹³ ܐܵܡܲܪ ܡܵܪܹܐ ܟܲܪܡܵܐ. ܡܵܢܵܐ ܐܸܥܒܸܕ݂. ܐܹܫܲܕܲܪ ܒܹܪܝ ܚܲܒܝܼܒ݂ܵܐ. ܟܒܲܪ ܢܸܚܙܘܿܢܵܝܗܝ. ܘܢܸܬ݂ܟܲܚܕ݂ܘܼܢ.

¹⁴ ܟܲܕ݂ ܚܙܵܐܘܼܗܝ ܕܹܝܢ ܦܲܠܵܚܹ̈ܐ. ܡܸܬ݂ܚܲܫܒ݂ܝܼܢ ܗ̄ܘܼܵܘ ܒܢܲܦ̮ܫܗܘܿܢ. ܘܐܵܡܪܝܼܢ. ܗܵܢܵܘ ܝܵܪܬܵܐ. ܬܵܘ ܢܸܩܛܠܝܼܘܗܝ. ܘܬܸܗܘܹܐ ܝܵܪܬܘܼܬ݂ܵܐ ܕܝܼܠܲܢ.

¹⁵ ܘܐܲܦܩܘܼܗܝ ܠܒܲܪ ܡܸܢ ܟܲܪܡܵܐ. ܘܩܲܛܠܘܼܗܝ. ܡܵܢܵܐ ܗܵܟܹܝܠ ܢܸܥܒܸܕ݂ ܠܗܘܿܢ ܡܵܪܹܐ ܟܲܪܡܵܐ.

¹⁶ ܢܹܐܬܹܐ ܘܢܵܘܒܸܕ݂ ܠܦܲܠܵܚܹ̈ܐ ܗܵܢܘܿܢ ܘܢܸܬܸ݁ܠ ܟܲܪܡܵܐ ܠܐܲܚܪ̈ܵܢܹܐ. ܟܲܕ݂ ܫܡܲܥܘ ܕܹܝܢ. ܐܸܡܲܪܘ. ܠܵܐ ܬܸܗܘܹܐ ܗܵܕܹܐ.

¹⁷ ܗܘܼ ܕܹܝܢ ܚܵܪ ܒܗܘܿܢ. ܘܐܸܡܲܪ. ܘܡܵܢܵܐ ܗܝܼ ܗܵܝ ܕܲܟܬ݂ܝܼܒ݂ܵܐ ܕܟܹܐܦܵܐ ܕܐܲܣܠܝܼܘ ܒܲܢܵܝܹ̈ܐ ܗܝܼ ܗܘܸܵܬ݂ ܠܪܹܝܫ ܩܲܪܢܵܐ ܕܙܵܘܝܼܬ݂ܵܐ.

¹⁸ ܘܟ݂ܠ ܕܢܸܦܸܠ ܥܲܠ ܗܵܝ ܟܹܐܦܵܐ. ܢܸܬ݂ܪܥܲܥ. ܘܟ݂ܠ ܡܲܢ ܕܗܝܼ ܬܸܦܸܠ ܥܠܵܘܗܝ ܬܸܕ݂ܪܹܝܘܗܝ.

¹⁹ ܒܥܵܘ ܗ̄ܘܼܵܘ ܕܹܝܢ ܪ̈ܲܒܲܝ ܟܵܗܢܹ̈ܐ ܘܣܵܦܪܹ̈ܐ ܕܢܲܪܡܘܿܢ ܥܠܵܘܗܝ ܐܝܼ̈ܕ݂ܲܝܵܐ ܒܗܵܝ ܫܵܥܬ݂ܵܐ. ܘܲܕ݂ܚܸܠܘ ܡܸܢ ܥܲܡܵܐ. ܝܼܕ݂ܲܥܘ ܓܹܝܪ ܕܲܥܠܲܝܗܘܿܢ ܐܸܡܲܪ ܡܲܬ݂ܠܵܐ ܗܵܢܵܐ.

²⁰ ܘܫܲܕܲܪܘ ܠܘܵܬܹܗ ܓܵܫܘܿܫܹ̈ܐ. ܕܡܸܬ݁ܕܲܡܹܝܢ ܒܙܲܕܝܼܩܹ̈ܐ ܕܢܹܐܚܕܘܼܢܵܝܗܝ ܒܡܸܠܬ݂ܵܐ. ܘܢܲܫܠܡܘܼܢܵܝܗܝ ܠܕ݂ܲܝܵܢܵܐ ܘܲܠܫܘܼܠܛܵܢܹܗ ܕܗܸܓ݂ܡܘܿܢܵܐ.

²¹ ܘܫܲܐܠܘܼܗܝ. ܘܐܵܡܪܝܼܢ ܠܹܗ. ܡܲܠܦܵܢܵܐ. ܝܵܕ݂ܥܝܼܢܲܢ. ܕܲܬ݂ܪܝܼܨܵܐܝܼܬ݂ ܡܡܲܠܸܠ ܐܲܢ̄ܬ݁ ܘܡܲܠܸܦ. ܘܠܵܐ ܢܵܣܹܒ݂ ܐܲܢ̄ܬ݁ ܒܐܲܦܹ̈ܐ. ܐܸܠܵܐ ܒܩܘܼܫܬܵܐ. ܐܘܼܪܚܵܐ ܕܐܲܠܵܗܵܐ ܡܲܠܸܦ ܐܲܢ̄ܬ݁.

²² ܫܲܠܝܼܛ ܠܲܢ ܕܢܸܬܸ݁ܠ ܟܣܸܦ ܪܹܫܵܐ ܠܩܹܣܲܪ. ܐܵܘ ܠܵܐ.

²³ ܗܘܼ ܕܹܝܢ ܐܸܣܬܲܟܲܠ ܚܵܪܥܘܼܬ݂ܗܘܿܢ. ܘܐܸܡܲܪ. ܡܵܢܵܐ ܡܢܲܣܹܝܢ ܐܢ̄ܬܘܿܢ ܠܝܼ.

²⁴ ܚܵܘܵܐܘܼܢܝ ܕܝܼܢܵܪܵܐ. ܕܡܲܢ ܐܝܼܬ݂ ܒܹܗ ܨܲܠܡܵܐ ܘܲܟܬ݂ܝܼܒ݂ܬ݂ܵܐ. ܗܸܢܘܿܢ ܕܹܝܢ ܐܸܡܲܪܘ. ܕܩܹܣܲܪ.

²⁵ ܐܵܡܲܪ ܠܗܘܿܢ ܝܼܫܘܿܥ. ܗܲܒ݂ܘ ܗܵܟܹܝܠ ܕܩܹܣܲܪ ܠܩܹܣܲܪ ܘܕ݂ܲܐܠܵܗܵܐ ܠܐܲܠܵܗܵܐ.

²⁶ ܘܠܵܐ ܐܸܫܟܲܚܘ ܠܡܹܐܚܲܕ݂ ܡܸܢܹܗ ܡܸܠܬ݂ܵܐ ܩܕ݂ܵܡ ܥܲܡܵܐ. ܘܐܸܬ݁ܕܲܡܲܪܘ ܥܲܠ ܦܸܬ݂ܓ݂ܵܡܹܗ. ܘܲܫܬܸܩܘ.

²⁷ ܩܪܸܒ݂ܘ ܕܹܝܢ ܐ̄ܢܵܫ̈ܝܼܢ ܡܸܢ ܙܲܕܘܼܩܵܝܹ̈ܐ ܗܵܢܘܿܢ ܕܐܵܡܪܝܼܢ ܕܲܩܝܵܡܬܵܐ ܠܲܝܬ݁. ܘܫܲܐܠܘܼܗܝ.

²⁸ ܘܐܵܡܪܝܼܢ ܠܹܗ. ܡܲܠܦܵܢܵܐ. ܡܘܼܫܹܐ ܟܬܲܒ݂ ܠܲܢ. ܕܐܸܢ ܐ̄ܢܵܫ ܢܡܘܼܬ݂ ܐܲܚܘܼܗܝ ܕܐܝܼܬ݂ ܠܹܗ ܐܲܢ̄ܬ݁ܬ݂ܵܐ ܕܠܵܐ ܒ̈ܢܲܝܵܐ. ܢܸܣܲܒ݂ ܐܲܚܘܼܗܝ ܐܲܢ̄ܬ݁ܬܹܗ. ܘܲܢܩܝܼܡ ܙܲܪܥܵܐ ܠܐܲܚܘܼܗܝ.

²⁹ ܫܲܒ݂ܥܵܐ ܕܹܝܢ ܐܲܚ̈ܝܼܢ ܐܝܼܬ݂ ܗ̄ܘܼܵܘ. ܩܲܕ݂ܡܵܝܵܐ ܢܣܲܒ݂ ܐܲܢ̄ܬ݁ܬ݂ܵܐ. ܘܡܝܼܬ݂ ܕܠܵܐ ܒ̈ܢܲܝܵܐ.

³⁰ ܘܢܲܣܒܵܗ̇ ܕܲܬ݂ܪܹܝܢ ܠܐܲܢ̄ܬ݁ܬܹܗ. ܘܗܵܢܵܐ ܡܝܼܬ݂ ܕܠܵܐ ܒ̈ܢܲܝܵܐ.

³¹ ܘܕ݂ܲܬ݂ܠܵܬ݂ܵܐ ܬܘܼܒ݂ ܢܲܣܒܵܗ̇. ܘܗܵܟ݂ܘܵܬ݂ ܘܐܵܦ ܫܲܒ݂ܥܵܬܲܝܗܘܿܢ. ܘܡܝܼܬ݂ܘ. ܘܠܵܐ ܫܒܲܩܘ ܒ̈ܢܲܝܵܐ.

³² ܘܡܝܼܬܲܬܸ ܒܚܲܪܬ݂ܵܐ ܐܵܦ ܐܲܢ̄ܬ݁ܬ݂ܵܐ.

³³ ܒܲܩܝܵܡܬܵܐ ܗܵܟܹܝܠ. ܕܐܲܝܢܵܐ ܡܸܢܗܘܿܢ ܬܸܗܘܹܐ ܐܲܢ̄ܬ݁ܬ݂ܵܐ. ܫܲܒ݂ܥܵܬܲܝܗܘܿܢ ܓܹܝܪ ܢܲܣܒܿܘܼܗ̇.

³⁴ ܐܵܡܲܪ ܠܗܘܿܢ ܝܼܫܘܿܥ. ܒܢܵܘ̈ܗܝ ܕܥܵܠܡܵܐ ܗܵܢܵܐ. ܢܵܣܒܝܼܢ ܢܸܫܹ̈ܐ. ܘܢܸܫܹ̈ܐ ܗܵܘܝܵܢ ܠܓܲܒ݂ܪܹ̈ܐ.

³⁵ ܗܵܢܘܿܢ ܕܹܝܢ ܕܲܠܗܵܘ ܥܵܠܡܵܐ ܫܘܵܘ ܘܠܲܩܝܵܡܬܵܐ ܕܡܸܢ ܒܹܝܬ݂ ܡܝܼܬܹ̈ܐ. ܠܵܐ ܢܵܣܒܝܼܢ ܢܸܫܹ̈ܐ. ܘܐܵܦ ܠܵܐ ܢܸܫܹ̈ܐ ܗܵܘܝܵܢ ܠܓܲܒ݂ܪܹ̈ܐ.

³⁶ ܐܵܦܠܵܐ ܓܹܝܪ ܬܘܼܒ݂ ܠܲܡܡܵܬ݂ ܡܸܫܟܿܚܝܼܢ. ܐܲܝܟ݂ ܡܲܠܲܐܟܹ̈ܐ ܐܸܢܘܿܢ ܓܹܝܪ. ܘܲܒ݂ܢܲܝܵܐ ܐܝܼܬܲܝܗܘܿܢ ܕܐܲܠܵܗܵܐ. ܡܛܠ ܕܲܗܘܵܘ ܒ̈ܢܲܝܵܐ ܕܲܩܝܵܡܬܵܐ.

³⁷ ܕܩܵܝܡܝܼܢ ܕܹܝܢ ܡܝܼܬܹ̈ܐ ܐܵܦ ܡܘܼܫܹܐ ܒܲܕܸܩ. ܐܲܕ݂ܟܲܪ ܓܹܝܪ ܒܣܲܢܝܵܐ ܟܲܕ݂ ܐܵܡܲܪ. ܡܵܪܝܵܐ ܐܲܠܵܗܹܗ ܕܐܲܒ݂ܪܵܗܵܡ ܘܐܲܠܵܗܹܗ ܕܐܝܼܣܚܵܩ. ܘܐܲܠܵܗܹܗ ܕܝܲܥܩܘܿܒ݂.

³⁸ ܐܲܠܵܗܵܐ ܕܹܝܢ ܠܵܐ ܗܘ̣ܵܐ ܕܡܝܼܬܹ̈ܐ ܐܸܠܵܐ ܕܚܲܝܹ̈ܐ. ܟܠܗܘܿܢ ܓܹܝܪ ܚܲܝܝܼܢ ܐܸܢܘܿܢ ܠܹܗ.

³⁹ ܘܲܥܢܵܘ ܐ̄ܢܵܫ̈ܝܼܢ ܡܸܢ ܣܵܦܪܹ̈ܐ. ܘܐܵܡܪܝܼܢ ܠܹܗ. ܡܲܠܦܵܢܵܐ. ܫܲܦܝܼܪ ܐܵܡܲܪ ܐܲܢ̄ܬ݁.

⁴⁰ ܘܠܵܐ ܬܘܼܒ݂ ܐܲܡܪܲܚܘ ܠܲܡܫܲܐܵܠܘܼܬܹܗ ܥܲܠ ܡܸܕܸܡ.

⁴¹ ܘܐܸܡܲܪ ܗܘ̣ܵܐ ܠܗܘܿܢ ܐܲܝܟܲܢܵܐ ܐܵܡܪܝܼܢ ܣܵܦܪܹ̈ܐ ܥܲܠ ܡܫܝܼܚܵܐ ܕܲܒ݂ܪܹܗ ܗܘܼ ܕܕ݂ܵܘܝܼܕ݂.

⁴² ܘܗܘܼ ܕܵܘܝܼܕ݂ ܐܸܡܲܪ ܒܲܟ݂ܬ݂ܵܒ݂ܵܐ ܕܡܲܙܡܘܿܪܹ̈ܐ. ܕܐܵܡܲܪ ܡܵܪܝܵܐ ܠܡܵܪܝ. ܬܸܒ݂ ܠܵܟ݂ ܡܸܢ ܝܲܡܝܼܢܝ

⁴³ ܥܕ݂ܲܡܵܐ ܕܐܹܣܝܼܡ ܒܥܸܠܕܒ݂ܵܒܲܝ̈ܟ ܬܚܹܝܬ݂ ܪܸ̈ܓ݂ܠܲܝܟ.

⁴⁴ ܐܸܢ ܗܵܟܹܝܠ ܕܵܘܝܼܕ݂ ܡܵܪܝ ܩܵܪܹܐ ܠܹܗ. ܐܲܝܟܲܢܵܐ ܒܪܹܗ ܗ̄ܘܼ.

⁴⁵ ܘܟܲܕ݂ ܟܠܹܗ ܥܲܡܵܐ ܫܵܡܲܥ ܗ̄ܘܵܐ. ܐܸܡܲܪ ܠܬܲܠܡܝܼܕ݂ܵܘ̈ܗܝ.

⁴⁶ ܐܸܙܕܲܗ̄ܪܘ ܡܸܢ ܣܵܦܪܹ̈ܐ ܕܨܵܒܹܝܢ ܠܲܡܗܲܠܵܟ݂ܘ ܒܸܐܣܛܠܹ̈ܐ ܘܪܵܚܡܝܼܢ ܫܠܵܡܵܐ ܒܫܘܼܩܹ̈ܐ ܘܪܹܫ ܡܵܘܬ݁ܒܹ̈ܐ ܒܲܟ݂ܢ̈ܘܼܫܵܬ݂ܵܐ ܘܪܹܫ ܣܡܵܟܹ̈ܐ ܒܐܲܚܫܵܡ̈ܝܵܬ݂ܵܐ (ܒܲܚܫܵܡ̈ܝܵܬ݂ܵܐ).

⁴⁷ ܗܵܢܘܿܢ ܕܐܵܟ݂ܠܝܼܢ ܒܵܬܹ̈ܐ ܕܐܲܪ̈ܡܠܵܬ݂ܵܐ. ܒܥܸܠܬ݂ܵܐ ܕܡܵܘܪܟ݂ܝܼܢ ܨܠܵܘܵܬ݂ܗ̈ܘܿܢ. ܗܸܢܘܿܢ ܢܩܲܒܠܘܼܢ ܕܝܼܢܵܐ ܝܲܬܝܼܪܵܐ.

21

¹ ܚܵܪ ܕܹܝܢ ܝܼܫܘܿܥ ܒܥܲܬ݁ܝܼܪܹ̈ܐ. ܐܲܝܠܹܝܢ ܕܪܵܡܹܝܢ ܗ̄ܘܼܵܘ ܒܹܝܬ݂ ܓܲܙܵܐ ܩܘܼܪ̈ܒܵܢܲܝܗܘܿܢ.

² ܘܲܚܙܵܐ ܐܵܦ ܐܲܪܡܲܠܬܵܐ ܚܕ݂ܵܐ ܡܸܣܟܹܢܬܵܐ. ܕܐܲܪܡܝܲܬ݂ ܫܵܡܘܿܢܹ̈ܐ ܬܪܹܝܢ.

³ ܘܐܸܡܲܪ. ܫܪܵܪܵܐ ܐܵܡܲܪ ܐ̄ܢܵܐ ܠܟ݂ܘܿܢ. ܕܗܵܕܹܐ ܐܲܪܡܲܠܬܵܐ ܡܸܣܟܹܢܬܵܐ ܐܲܪܡܝܲܬ݂ ܝܲܬ݁ܝܼܪ ܡܸܢ ܟܠܢܵܫ.

⁴ ܟܠܗܘܿܢ ܓܹܝܪ ܗܵܠܹܝܢ. ܡܸܢ ܡܵܐ ܕܝܲܬ݁ܝܼܪ ܗܘ̣ܵܐ ܠܗܘܿܢ ܐܲܪܡܝܼܘ ܒܹܝܬ݂ ܩܘܼܪܒܵܢܵܐ ܕܐܲܠܵܗܵܐ. ܗܵܕܹܐ ܕܹܝܢ ܡܸܢ ܚܲܣܝܼܪܘܼܬ݂ܵܗ̇. ܟܠ ܕܩܲܢܝܵܐ ܗ̄ܘܵܬ݂. ܐܲܪܡܝܵܬܹܗ.

⁵ ܘܟܲܕ݂ ܐܵܡܪܝܼܢ ܗ̄ܘܼܵܘ ܐ̄ܢܵܫ̈ܝܼܢ ܥܲܠ ܗܲܝܟܠܵܐ ܕܲܒ݂ܟܹܐܦܹ̈ܐ ܫܲܦܝܼܪ̈ܵܬ݂ܵܐ ܘܲܒ݂ܩܘܼܪܒܵܢܹ̈ܐ ܡܨܲܒܲܬ݂. ܐܸܡܲܪ ܠܗܘܿܢ ܝܼܫܘܿܥ.

⁶ ܗܵܠܹܝܢ ܕܚܵܙܹܝܢ ܐܢ̄ܬܘܿܢ ܢܹܐܬ݂ܘܿܢ ܝܵܘ̈ܡܵܬ݂ܵܐ. ܕܲܒ݂ܗܘܿܢ. ܠܵܐ ܬܸܫܬ݁ܒܸܩ ܟܹܐܦ ܥܲܠ ܟܹܐܦ ܕܠܵܐ ܬܸܣܬ݁ܬܲܪ.

⁷ ܘܲܡܫܲܐܠܝܼܢ ܗ̄ܘܼܵܘ ܠܹܗ. ܘܐܵܡܪܝܼܢ. ܡܲܠܦܵܢܵܐ. ܐܸܡܲܬ݂ܝ ܗܵܠܹܝܢ ܢܸܗܘܝܵܢ. ܘܡܵܢܵܐ ܗܝ ܐܵܬ݂ܵܐ ܡܵܐ ܕܩܲܪܝܼܒ݂ܵܢ ܗܵܠܹܝܢ ܕܢܸܗܘܝܵܢ.

⁸ ܗܘܼ ܕܹܝܢ ܐܸܡܲܪ ܠܗܘܿܢ. ܚܙܵܘ ܠܡܵܐ ܬܸܛܥܘܿܢ. ܣܲܓܝܼܐܹ̈ܐ ܓܹܝܪ ܢܹܐܬ݂ܘܿܢ ܒܫܹܡܝ. ܘܢܹܐܡܪܘܼܢ. ܕܐܸܢܵܐ ܐ̄ܢܵܐ ܡܫܝܼܚܵܐ. ܘܙܲܒ݂ܢܵܐ ܩܪܸܒ݂. ܠܵܐ ܕܹܝܢ ܬܹܐܙܠ̄ܘܼܢ ܒܵܬܲܪܗܘܿܢ.

⁹ ܘܡܵܐ ܕܫܵܡܥܝܼܢ ܐܢ̄ܬܘܿܢ ܩܪ̈ܵܒܹܐ ܘܲܫܓ݂ܘܼܫܝܹ̈ܐ. ܠܵܐ ܬܸܕ݂ܚܠܘܼܢ. ܥܬ݂ܝܼܕ݂ܵܢ ܐܸܢܹܝܢ ܓܹܝܪ ܗܵܠܹܝܢ ܠܘܼܩܕ݂ܲܡ ܠܡܸܗܘܵܐ. ܐܸܠܵܐ ܠܵܐ ܥܕ݂ܲܟܹܝܠ ܡܛܵܬ݂ ܚܲܪܬ݂ܵܐ.

¹⁰ ܢܩܘܼܡ ܓܹܝܪ ܥܲܡܵܐ ܥܲܠ ܥܲܡܵܐ. ܘܡܲܠܟܘܼ ܥܲܠ ܡܲܠܟܘܼ.

¹¹ ܘܙܵܘܥܹ̈ܐ ܪܵܘܪ̈ܒܹܐ ܢܸܗܘܘܿܢ ܒܕܘܼܟܵܐ ܕܘܼܟܵܐ. ܘܟܲܦܢܹ̈ܐ ܘܡܵܘܬܵܢܹ̈ܐ. ܘܢܸܗܘܝܵܢ ܕܸܚܠܵܬ݂ܵܐ. ܘܣܘܼܪܵܕܹ̈ܐ. ܘܐܵܬ݂ܘܵܬ݂ܵܐ ܪܵܘܪܒ݂ܵܬ݂ܵܐ. ܡܸܢ ܫܡܲܝܵܐ ܢܸܬ݂ܚܲܙܝܵܢ. ܘܣܲܬ݂ܘܹܐ ܪܵܘܪ̈ܒܹܐ ܢܸܗܘܘܿܢ.

¹² ܩܕ݂ܵܡ ܕܹܝܢ ܗܵܠܹܝܢ ܟܠܗܹܝܢ. ܢܲܪܡܘܿܢ ܥܠܲܝܟܿܘܿܢ ܐܝܼ̈ܕ݂ܲܝܵܐ. ܘܢܸܪܕܦܘܼܢܵܟ݂ܘܿܢ. ܘܢܲܫܠܡܘܼܢܵܟ݂ܘܿܢ ܠܲܟܢ̈ܘܼܫܵܬ݂ܵܐ. ܘܲܠܒܹܝܬ݂ ܐܲܣܝܼܪܹ̈ܐ. ܘܲܢܩܲܪܒ݂ܘܢܵܟ݂ܘܿܢ ܩܕ݂ܵܡ ܡܲܠܟܹ̈ܐ ܘܗܸܓ݂ܡܘܿܢܹ̈ܐ. ܡܛܠ ܫܹܡܝ.

¹³ ܗܵܘܝܵܐ ܠܟ݂ܘܿܢ ܕܹܝܢ ܠܣܵܗܕܘܼܬ݂ܵܐ.

¹⁴ ܣܝܼܡܘ ܕܹܝܢ ܒܠܸܒܟ݂ܘܿܢ. ܕܠܵܐ ܬܸܗܘܘܿܢ ܡܸܬ݂ܝܲܠܦܝܼܢ ܠܡܲܦܲܩ ܪܘܼܚܵܐ.

¹⁵ ܐܸܢܵܐ ܓܹܝܪ ܐܸܬܸ݁ܠ ܠܟ݂ܘܿܢ ܦܘܼܡܵܐ ܘܚܸܟ݂ܡܬ݂ܵܐ. ܐܲܝܕ݂ܵܐ ܕܠܵܐ ܢܸܫܟܚܘܼܢ ܠܲܡܩܵܡ ܠܩܘܼܒ݂ܠܵܗ̇. ܟܠܗܘܿܢ ܒܥܸܠܕܒ݂ܵܒܲܝ̈ܟܿܘܿܢ.

¹⁶ ܢܲܫܠܡܘܼܢܵܟ݂ܘܿܢ ܕܹܝܢ ܐܲܒ݂ܵܗܲܝ̈ܟܿܘܿܢ. ܘܐܲܚܲܝ̈ܟܿܘܿܢ ܘܐܲܚܝܵܢܲܝ̈ܟܿܘܿܢ ܘܪ̈ܵܚܡܲܝܟܿܘܿܢ. ܘܲܢܡܝܼܬ݂ܘܢ ܡܸܢܟ݂ܘܿܢ.

¹⁷ ܘܬܸܗܘܘܿܢ ܣܢܝܼܐܝܼܢ ܡܸܢ ܟܠ ܐ̄ܢܵܫ. ܡܛܠ ܫܹܡܝ.

¹⁸ ܘܡܸܢܬ݂ܵܐ ܡܸܢ ܪܹܫܟ݂ܘܿܢ. ܠܵܐ ܬܹܐܒܲܕ݂.

¹⁹ ܒܲܡܣܲܝܒܪܵܢܘܼܬ݂ܟ݂ܘܿܢ ܕܹܝܢ ܬܸܩܢܘܿܢ ܢܲܦ̮ܫܟ݂ܘܿܢ.

²⁰ ܡܵܐ ܕܹܝܢ ܕܲܚܙܲܝܬ݁ܘܿܢ ܠܐܘܿܪܸܫܠܸܡ ܕܲܚܕ݂ܝܼܪܝܼܢ ܠܵܗ̇ ܚܲܝܠܵܐ. ܗܵܝܕܹܝܢ ܕܲܥܘ. ܕܲܩܪܸܒ݂ ܠܹܗ ܚܘܼܪܒܵܗ̇.

²¹ ܗܵܝܕܹܝܢ ܐܲܝܠܹܝܢ ܕܒܲܝܗܘܼܕ݂ ܐܸܢܘܿܢ ܢܸܥܪܩܘܼܢ ܠܛܘܼܪܵܐ. ܘܐܲܝܠܹܝܢ ܕܲܒ݂ܓ݂ܵܘܵܗ̇ ܐܸܢܘܿܢ. ܢܸܥܪܩܘܼܢ. ܘܕ݂ܲܒ݂ܩܘܼܪ̈ܝܵܐ. ܠܵܐ ܢܸܥܠܘܼܢ ܠܵܗ̇.

²² ܕܝܵܘ̈ܡܵܬ݂ܵܐ ܐܸܢܘܿܢ ܗܵܠܹܝܢ ܕܲܬ݂ܒܲܥܬ݂ܵܐ. ܕܢܸܫܠܲܡ ܟܠ ܡܵܐ ܕܲܟ݂ܬ݂ܝܼܒ݂.

²³ ܘܵܝ ܕܹܝܢ ܠܐܲܝܠܹܝܢ ܕܒܲܛܢܵܢ. ܘܠܲܐܝܠܹܝܢ ܕܡܲܝܢܩܵܢ ܒܗܵܢܘܿܢ ܝܵܘ̈ܡܵܬ݂ܵܐ. ܢܸܗܘܹܐ ܓܹܝܪ ܐܘܼܠܨܵܢܵܐ ܪܲܒܵܐ ܒܐܲܪܥܵܐ. ܘܪܘܼܓ݂ܙܵܐ ܥܲܠ ܥܲܡܵܐ ܗܵܢܵܐ.

²⁴ ܘܢܸܦܠܘܼܢ ܒܦܘܼܡܵܐ ܕܚܲܪܒܵܐ. ܘܢܸܫܬ݁ܒ݂ܘܼܢ ܠܟ݂ܠ ܐܲܬܲܪ. ܘܐܘܿܪܸܫܠܸܡ ܬܸܗܘܹܐ ܡܸܬ݁ܕ݂ܝܼܫܵܐ ܡܸܢ ܥܲܡ̈ܡܹܐ. ܥܕ݂ܲܡܵܐ ܕܢܸܫܠܡܘܼܢ ܙܲܒ݂ܢܹ̈ܐ ܕܥܲܡ̈ܡܹܐ.

²⁵ ܘܢܸܗܘܝܵܢ ܐܵܬ݂ܘܵܬ݂ܵܐ ܒܫܸܡܫܵܐ ܘܲܒ݂ܣܲܗܪܵܐ. ܘܲܒ݂ܟ݂ܘܟܿܒܹ̈ܐ. ܘܒܲܐܪܥܵܐ ܐܘܼܠܨܵܢܵܐ ܕܥܲܡ̈ܡܹܐ. ܘܦܘܼܫܵܟ݂ ܐܝܼ̈ܕ݂ܲܝܵܐ. ܡܸܢ ܬܵܘܗܬ݂ܵܐ ܕܩܵܠܵܐ ܕܝܲܡܵܐ

²⁶ ܘܙܵܘܥܵܐ ܕܡܲܦܸܩ ܢܲܦ̮̈ܫܵܬ݂ܵܐ ܕܲܒ݂ܢܲܝ̈ܢܵܫܵܐ. ܡܸܢ ܕܸܚܠܬ݂ܵܐ ܕܡܸܕܸܡ ܕܲܥܬ݂ܝܼܕ݂ ܠܡܹܐܬ݂ܵܐ ܥܲܠ ܐܲܪܥܵܐ. ܘܢܸܬ݁ܬ݁ܙܝܼܥܘܼܢ ܚܲܝ̈ܠܹܐ ܕܲܫܡܲܝܵܐ.

²⁷ ܘܗܵܝܕܹܝܢ ܢܸܚܙܘܿܢܵܝܗܝ ܠܲܒ݂ܪܹܗ ܕܐ̄ܢܵܫܵܐ ܕܐܵܬܹܐ ܒܲܥܢܵܢܹ̈ܐ ܥܲܡ ܚܲܝܠܵܐ ܣܲܓܿܝܼܐܵܐ ܘܫܘܼܒ݂ܚܵܐ ܪܲܒܵܐ.

²⁸ ܡܵܐ ܕܹܝܢ ܕܫܲܪܝܼ ܗܵܠܹܝܢ ܕܢܸܗܘܝܵܢ ܐܸܬ݂ܠܲܒܲܒ݂ܘ ܘܐܲܪܝܼܡܘ ܪܹ̈ܫܲܝܟܿܘܿܢ. ܡܛܠ ܕܲܩܪܸܒ݂ ܠܹܗ ܦܘܼܪܩܵܢܟ݂ܘܿܢ.

²⁹ ܘܐܸܡܲܪ ܗܘ̣ܵܐ ܠܗܘܿܢ ܡܲܬ݂ܠܵܐ. ܚܙܵܘ ܠܬܹܬܵܐ ܘܲܠܟ݂ܠܗܘܿܢ ܐܝܼܠܵܢܹ̈ܐ.

³⁰ ܕܡܵܐ ܕܡܲܦܪܥܝܼܢ. ܡܸܚܕ݂ܵܐ ܡܸܢܗܘܿܢ ܡܸܣܬܲܟܠܝܼܢ ܐܢ̄ܬܘܿܢ. ܕܲܩܪܸܒ݂ ܠܹܗ ܩܲܝܛܵܐ.

³¹ ܗܵܟܲܢܵܐ ܐܵܦ ܐܲܢ̄ܬ݁ܘܿܢ ܡܵܐ ܕܲܚܙܲܝܬ݁ܘܿܢ ܗܵܠܹܝܢ ܕܗܵܘܝܵܢ. ܕܲܥܘ ܕܩܲܪܝܼܒ݂ܵܐ ܗܝܼ ܡܲܠܟܘܼܬ݂ܵܐ ܕܐܲܠܵܗܵܐ.

³² ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ. ܕܠܵܐ ܬܸܥܒܲܪ ܫܲܪܒܿܬ݂ܵܐ ܗܵܕܹܐ ܥܕ݂ܲܡܵܐ ܕܗܵܠܹܝܢ ܟܠܗܹܝܢ ܢܸܗܘܝܵܢ.

³³ ܫܡܲܝܵܐ ܘܐܲܪܥܵܐ ܢܸܥܒܪܘܼܢ. ܘܡܸܠܲܝ̈ ܠܵܐ ܢܸܥܒܿܪ̈ܵܢ.

³⁴ ܐܸܙܕܲܗ̄ܪܘ ܕܹܝܢ ܒܢܲܦ̮ܫܟ݂ܘܿܢ ܕܠܵܐ ܡܬ݂ܘܿܡ ܢܹܐܩܪܘܼܢ ܠܸܒܵܘܵܬ݂̈ܟ݂ܘܿܢ ܒܵܐܣܘܿܛܘܼܬ݂ܵܐ ܘܲܒ݂ܪܵܘܵܝܘܼܬ݂ܵܐ ܘܲܒ݂ܨܸܦܬ݂ܵܐ ܕܥܵܠܡܵܐ ܘܡܸܢ ܫܸܠܝܵܐ ܢܹܐܬܹܐ ܥܠܲܝܟܿܘܿܢ ܝܵܘܡܵܐ ܗܵܘ.

³⁵ ܐܲܝܟ݂ ܨܵܦܲܚܬ݂ܵܐ ܓܹܝܪ ܢܸܨܦܲܚ ܥܲܠ ܟܠܗܘܿܢ ܐܲܝܠܹܝܢ ܕܝܵܬ݂ܒܿܝܼܢ. ܥܲܠ ܐܲܦܹܝ̈ܗ̇ ܕܟ݂ܠܵܗ̇ ܐܲܪܥܵܐ.

³⁶ ܗܘܵܘ ܗܵܟܹܝܠ ܫܵܗܪܝܼܢ ܒܟ݂ܠܙܒܲܢ ܘܲܡܨܲܠܹܝܢ. ܕܬܸܫܘܘܿܢ ܠܡܸܥܪܲܩ ܡܸܢ ܗܵܠܹܝܢ ܕܲܥܬ݂ܝܼܕ݂ܵܢ ܠܡܹܗܘܵܐ. ܘܲܬ݂ܩܘܼܡܘܼܢ ܩܕ݂ܵܡ ܒܪܹܗ ܕܐ̄ܢܵܫܵܐ.

³⁷ ܒܐܝܼܡܵܡܵܐ ܕܹܝܢ ܡܲܠܸܦ ܗܘ̣ܵܐ ܒܗܲܝܟܠܵܐ. ܘܲܒ݂ܠܸܠܝܵܐ. ܢܵܦܹܩ ܗܘ̣ܵܐ ܒܵܐܹܬ݂ ܒܛܘܼܪܵܐ ܕܡܸܬ݂ܩܪܹܐ ܕܒܹܝܬ݂ ܙܲܝ̈ܬܹܐ.

³⁸ ܘܟ݂ܠܹܗ ܥܲܡܵܐ ܡܩܲܕܡܝܼܢ ܗ̄ܘܼܵܘ ܠܘܵܬܹܗ ܠܗܲܝܟܠܵܐ. ܠܡܸܫܡܲܥ ܡܸܠܬܹܗ.

22

¹ ܩܲܪܝܼܒ݂ ܗܘ̣ܵܐ ܕܹܝܢ ܥܲܕ݂ܥܹܕ݂ܵܐ ܕܦܲܛܝܼܪܹ̈ܐ. ܕܡܸܬ݂ܩܪܹܐ ܦܸܨܚܵܐ.

² ܘܒ݂ܵܥܹܝܢ ܗ̄ܘܼܵܘ ܪ̈ܲܒܲܝ ܟܵܗܢܹ̈ܐ ܘܣܵܦܪܹ̈ܐ. ܕܐܲܝܟܲܢܵܐ ܢܸܩܛܠܘܼܢܵܝܗܝ. ܕܵܚܠܝܼܢ ܗ̄ܘܼܵܘ ܓܹܝܪ ܡܸܢ ܥܲܡܵܐ.

³ ܥܲܠ ܗܘ̣ܵܐ ܕܹܝܢ ܣܵܛܵܢܵܐ ܒܝܼܗܘܼܕ݂ܵܐ ܕܡܸܬ݂ܩܪܹܐ ܣܟܲܪܝܘܿܛܵܐ. ܕܐܝܼܬ݂ܵܘܗܝ ܗܘ̣ܵܐ ܡܸܢ ܡܸܢܝܵܢܵܐ ܕܲܬ݂ܪܸܥܣܲܪ.

⁴ ܘܐܸܙܲܠ ܡܲܠܸܠ ܥܲܡ ܪ̈ܲܒܲܝ ܟܵܗܢܹ̈ܐ ܘܣܵܦܪܹ̈ܐ ܘܪ̈ܲܒܲܝ ܚܲܝ̈ܠܹܐ ܕܗܲܝܟܠܵܐ. ܐܲܝܟ݂ ܕܢܲܫܠܡܝܼܘܗܝ ܠܗܘܿܢ.

⁵ ܘܲܚܕ݂ܝܼܘ ܘܐܲܩܝܼܡܘ ܕܢܸܬ݁ܠܘܼܢ ܠܹܗ ܟܸܣܦܵܐ.

⁶ ܘܐܸܫܬܵܘܕܝܼ ܠܗܘܿܢ. ܘܒ݂ܵܥܹܐ ܗܘ̣ܵܐ ܦܸܠܥܵܐ ܕܢܲܫܠܡܝܼܘܗܝ ܠܗܘܿܢ. ܒܸܠܥܵܕ݂ ܡܸܢ ܟܸܢܫܵܐ.

⁷ ܘܡܲܛܝܼ ܝܵܘܡܵܐ ܕܦܲܛܝܼܪܹ̈ܐ ܕܒܹܗ ܐܝܼܬ݂ ܗܘ̣ܵܐ ܥܝܵܕ݂ܵܐ ܕܢܸܬ݂ܢܟܸܣ ܦܸܨܚܵܐ.

⁸ ܘܫܲܕܲܪ ܝܼܫܘܿܥ ܠܟܹܐܦܵܐ ܘܲܠܝܘܿܚܲܢܵܢ. ܘܐܸܡܲܪ ܠܗܘܿܢ. ܙܸܠܘ ܛܲܝܸܒ݂ܘ ܠܲܢ ܦܸܨܚܵܐ ܕܢܸܠܥܲܣ.

⁹ ܗܸܢܘܿܢ ܕܹܝܢ ܐܸܡܲܪܘ ܠܹܗ. ܐܲܝܟܵܐ ܨܵܒܹܐ ܐܲܢ̄ܬ݁ ܕܲܢܛܲܝܸܒ݂.

¹⁰ ܐܵܡܲܪ ܠܗܘܿܢ ܗܵܐ ܡܵܐ ܕܥܵܐܠܝܼܢ ܐܢ̄ܬܘܿܢ ܠܲܡܕ݂ܝܼܢ̄ܬܵܐ. ܦܵܓܲܥ ܒܟ݂ܘܿܢ ܓܲܒ݂ܪܵܐ ܕܲܫܩܝܼܠ ܓܪܵܒ݂ܵܐ ܕܡܲܝ̈ܵܐ. ܙܸܠܘ ܒܵܬ݂ܪܹܗ.

¹¹ ܘܐܲܝܟܵܐ ܕܥܵܐܹܠ. ܐܸܡܲܪܘ ܠܡܵܪܹܗ ܕܒܲܝܬܵܐ. ܪܲܒܲܢ ܐܵܡܲܪ. ܐܲܝܢܵܘ ܒܹܝܬ݂ ܡܲܫܪܝܵܐ. ܐܲܝܟܵܐ ܕܐܹܟ݂ܘܿܠ ܦܸܨܚܵܐ ܥܲܡ ܬܲܠܡܝܼ̈ܕ݂ܲܝ.

¹² ܘܗܵܐ ܗܘܼ ܡܚܵܘܐ ܠܟ݂ܘܿܢ ܥܸܠܝܼܬ݂ܵܐ ܚܕ݂ܵܐ ܪܲܒܬ݂ܵܐ ܕܲܡܫܵܘܝܵܐ. ܬܲܡܵܢ ܛܲܝܸܒ݂ܘ.

¹³ ܘܐܸܙܲܠܘ ܐܸܫܟܲܚܘ ܐܲܝܟ݂ ܕܐܵܡܲܪ ܠܗܘܿܢ. ܘܛܲܝܸܒ݂ܘ ܦܸܨܚܵܐ.

¹⁴ ܘܟܲܕ݂ ܗܘ̣ܵܐ ܥܸܕܵܢܵܐ. ܐܸܬ݂ܵܐ ܝܼܫܘܿܥ ܐܸܣܬ݁ܡܸܟ݂. ܘܲܬ݂ܪܸܥܣܲܪ ܫܠܝܼܚܹ̈ܐ ܥܲܡܹܗ.

¹⁵ ܘܐܸܡܲܪ ܠܗܘܿܢ. ܪܸܓ݁ܬ݂ܵܐ ܪܲܓ݂ܬܲܢܝ. ܕܗܵܢܵܐ ܦܸܨܚܵܐ ܐܹܟ݂ܘܠ ܥܲܡܟ݂ܘܿܢ ܩܕ݂ܵܡ ܕܐܸܚܲܫ.

¹⁶ ܐܵܡܲܪ ܐ̄ܢܵܐ ܠܟ݂ܘܿܢ ܓܹܝܪ. ܕܡܸܟܹܝܠ ܠܵܐ ܐܸܟ݂ܠܝܼܘܗܝ. ܥܕ݂ܲܡܵܐ ܕܢܸܫܠܲܡ ܒܡܲܠܟܘܼܬܹܗ ܕܐܲܠܵܗܵܐ.

¹⁷ ܘܲܢܣܲܒ݂ ܟܵܣܵܐ ܘܐܵܘܕܝܼ ܘܐܸܡܲܪ ܣܲܒ݂ܘ ܗܵܢܵܐ ܘܦܲܠܸܓ݂ܘ ܒܲܝܢܵܬ݂ܟ݂ܘܿܢ.

¹⁸ ܐܵܡܲܪ ܐ̄ܢܵܐ ܓܹܝܪ ܠܟ݂ܘܿܢ ܕܠܵܐ ܐܸܫܬܹܐ ܡܸܢ ܝܲܠܕܵܐ ܕܲܓ݂ܦܸܬܵܐ ܥܕ݂ܲܡܵܐ ܕܬܹܐܬܹܐ ܡܲܠܟܘܼܬ݂ܵܐ ܕܐܲܠܵܗܵܐ.

¹⁹ ܘܲܢܣܲܒ݂ ܠܲܚܡܵܐ ܘܐܵܘܕܝܼ. ܘܲܩܨܵܐ. ܘܝܲܗ̄ܒ݂ ܠܗܘܿܢ. ܘܐܸܡܲܪ. ܗܵܢܵܘ ܦܲܓ݂ܪܝ ܕܥܲܠ ܐܲܦܲܝ̈ܟܿܘܿܢ ܡܸܬ݂ܝܼܗܸܒ݂. ܗܵܕܹܐ ܗܘܲܝܬ݁ܘܿܢ ܥܵܒ݂ܕܝܼܢ ܠܕ݂ܘܼܟ݂ܪܵܢܝ.

²⁰ ܘܗܵܟ݂ܘܵܬ݂ ܐܵܦ ܥܲܠ ܟܵܣܵܐ. ܡܸܢ ܒܵܬܲܪ ܕܐܲܚܫܸܡܘ. ܐܸܡܲܪ. ܗܵܢܵܐ ܟܵܣܵܐ ܕܝܼܵܬܹܩܹܐ ܚܕ݂ܲܬ݂ܵܐ ܒܕ݂ܡܝ. ܕܲܚܠܵܦܲܝܟܿܘܿܢ ܡܸܬ݂ܐܫܸܕ݂.

²¹ ܒܪܲܡ ܗܵܐ ܐܝܼܕ݂ܗ ܕܡܲܫܠܡܵܢܝ ܥܲܠ ܦܵܬ݂ܘܿܪܵܐ.

²² ܘܲܒ݂ܪܹܗ ܕܐ̄ܢܵܫܵܐ ܐܵܙܹܠ. ܐܲܝܟܲܢܵܐ ܕܐܸܬ݂ܦܪܸܫ. ܒܪܲܡ ܘܵܝ ܠܗܵܘ ܓܲܒ݂ܪܵܐ ܕܒ݂ܐܝܼܕ݂ܗ ܡܸܫܬ݁ܠܸܡ.

²³ ܘܫܲܪܝܼܘ ܕܲܢܥܲܩܒ݂ܘܢ ܒܲܝܢܵܬ݂ܗܘܿܢ. ܕܡܲܢܘܼ ܟܲܝ ܡܸܢܗܘܿܢ ܗܵܘ ܕܗܵܕܹܐ ܥܬ݂ܝܼܕ݂ ܠܡܸܣܥܲܪ.

²⁴ ܗܘ̣ܵܐ ܕܹܝܢ ܐܵܦ ܚܸܪܝܵܢܵܐ ܒܲܝܢܵܬ݂ܗܘܿܢ. ܕܡܲܢ ܐܝܼܬ݂ ܒܗܘܿܢ ܕܪܲܒ.

²⁵ ܗܘܼ ܕܹܝܢ ܝܼܫܘܿܥ. ܐܸܡܲܪ ܠܗܘܿܢ. ܡܲܠܟܲܝ̈ܗܘܿܢ ܕܥܲܡ̈ܡܹܐ. ܡܵܪ̈ܲܝܗܘܿܢ ܐܸܢܘܿܢ ܘܲܕ݂ܫܲܠܝܼܛܝܼܢ ܥܠܲܝܗܘܿܢ. ܥܵܒ݂ܕܲܝ ܛܵ̈ܒ݂ܵܬ݂ܵܐ ܡܸܬ݂ܩܪܹܝܢ.

²⁶ ܐܲܢ̄ܬ݁ܘܿܢ ܕܹܝܢ. ܠܵܐ ܗܵܟܲܢܵܐ. ܐܸܠܵܐ ܐܲܝܢܵܐ ܕܪܲܒ ܒܟ݂ܘܿܢ. ܢܸܗܘܹܐ ܐܲܝܟ݂ ܙܥܘܿܪܵܐ. ܘܐܲܝܢܵܐ ܕܪܹܫܵܐ ܗ̄ܘܼ. ܐܲܝܟ݂ ܡܫܲܡܫܵܢܵܐ.

²⁷ ܡܲܢܘܼ ܓܹܝܪ ܪܲܒ. ܗܵܘ ܕܲܣܡܝܼܟ݂. ܐܵܘ ܗܵܘ ܕܲܡܫܲܡܸܫ. ܠܵܐ ܗܘ̣ܵܐ ܗܵܘ ܕܲܣܡܝܼܟ݂. ܐܸܢܵܐ ܕܹܝܢ ܐܝܼܬܲܝ ܒܲܝܢܵܬ݂ܟ݂ܘܿܢ. ܐܲܝܟ݂ ܗܵܘ ܕܲܡܫܲܡܸܫ.

²⁸ ܐܲܢ̄ܬ݁ܘܿܢ ܐܸܢܘܿܢ ܕܹܝܢ ܕܟܲܬܲܪܬ݁ܘܢ ܠܘܵܬ݂ܝ ܒܢܸܣܝ̈ܘܿܢܲܝ.

²⁹ ܘܐܸܢܵܐ ܡܸܫܬܵܘܕܹܐ ܐ̄ܢܵܐ ܠܟ݂ܘܿܢ. ܐܲܝܟ݂ ܕܐܸܫܬܵܘܕܝܼ ܠܝܼ ܐܵܒ݂ܝ ܡܲܠܟܘܼܬ݂ܵܐ.

³⁰ ܕܬܹܐܟ݂ܠܘܼܢ ܘܬܸܫܬ݁ܘܿܢ ܥܲܠ ܦܵܬ݂ܘܿܪܵܐ ܕܡܲܠܟܘܼܬ݂ܵܐ ܕܝܼܠܝ. ܘܬܸܬ݁ܒ݂ܘܼܢ ܥܲܠ ܟܘܼܪ̈ܣܵܘܵܬ݂ܵܐ. ܘܲܬ݁ܕ݂ܘܼܢܘܼܢ ܬܪܸܥܣܲܪ ܫܲܒ݂ܛܹܐ ܕܝܼܣܪܵܝܹܠ.

³¹ ܘܐܸܡܲܪ ܝܼܫܘܿܥ ܠܫܸܡܥܘܿܢ. ܫܸܡܥܘܿܢ. ܗܵܐ ܣܵܛܵܢܵܐ ܫܵܐܹܠ ܕܢܸܥܪܘܿܒ݂ܟ݂ܘܿܢ ܐܲܝܟ݂ ܕܲܠܚܸ̈ܛܹܐ.

³² ܘܐܸܢܵܐ ܒܥܹܝܬ݂ ܥܠܲܝܟ ܕܠܵܐ ܬܸܚܣܲܪ ܗܲܝܡܵܢܘܼܬ݂ܵܟ݂. ܐܵܦ ܐܲܢ̄ܬ݁ ܒܲܙܒܲܢ ܐܸܬ݂ܦܲܢܝ. ܘܫܲܪܲܪ ܐܲܚܲܝ̈ܟ.

³³ ܫܸܡܥܘܿܢ ܕܹܝܢ ܐܸܡܲܪ ܠܹܗ. ܡܵܪܝ ܥܲܡܵܟ݂ ܡܛܲܝܲܒ݂ ܐ̄ܢܵܐ. ܘܲܠܒܹܝܬ݂ ܐܲܣܝܼܪܹ̈ܐ. ܘܲܠܡܵܘܬܵܐ.

³⁴ ܐܵܡܲܪ ܠܹܗ ܝܼܫܘܿܥ. ܐܵܡܲܪ ܐ̄ܢܵܐ ܠܵܟ݂ ܫܸܡܥܘܿܢ. ܕܠܵܐ ܢܸܩܪܹܐ ܬܲܪܢܵܓ݂ܠܵܐ ܝܵܘܡܵܢܵܐ ܥܕ݂ܲܡܵܐ ܕܲܬ݂ܠܵܬ݂ ܙܲܒ݂ܢ̈ܝܼܢ ܬܸܟ݂ܦܘܿܪ ܕܠܵܐ ܝܵܕ݂ܲܥ ܐܲܢ̄ܬ݁ ܠܝܼ.

³⁵ ܘܐܸܡܲܪ ܠܗܘܿܢ. ܟܲܕ݂ ܫܲܕܲܪܬ݁ܟ݂ܘܿܢ ܕܠܵܐ ܟܝܼܣܹ̈ܐ ܘܲܕ݂ܠܵܐ ܬܲܪ̈ܡܵܠܹܐ ܘܲܡܣܵܢܹ̈ܐ. ܠܡܵܐ. ܚܣܲܪ ܠܟ݂ܘܿܢ ܡܸܕܸܡ. ܐܵܡܪܝܼܢ ܠܹܗ. ܘܠܵܐ ܡܸܕܸܡ.

³⁶ ܐܵܡܲܪ ܠܗܘܿܢ. ܡܸܢ ܗܵܫܵܐ ܡܲܢ ܕܐܝܼܬ݂ ܠܹܗ ܟܝܼܣܵܐ. ܢܸܣܲܒ݂. ܘܗܵܟܲܢܵܐ ܐܵܦ ܬܲܪܡܵܠܵܐ. ܘܡܲܢ ܕܠܲܝܬ݁ ܠܹܗ ܣܲܝܦܵܐ. ܢܙܲܒܸܢ ܢܲܚ̈ܬܹ݁ܗ ܘܢܸܙܒܸܢ ܠܹܗ ܣܲܝܦܵܐ.

³⁷ ܐܵܡܲܪ ܐ̄ܢܵܐ ܠܟ݂ܘܿܢ ܓܹܝܪ. ܕܐܵܦ ܗܵܕܹܐ ܕܲܟ݂ܬ݂ܝܼܒ݂ܵܐ. ܘܵܠܹܐ ܕܬܸܬ݂ܡܲܠܹܐ ܒܝܼ: ܕܥܲܡ ܥܵܘܵܠܹ̈ܐ ܐܸܬ݂ܡܢܹܐ. ܟܠܗܹܝܢ ܓܹܝܪ ܕܲܥܠܲܝ ܐܸܫܬܲܠܲܡ.

³⁸ ܘܗܸܢܘܿܢ ܐܵܡܪܝܼܢ ܠܹܗ. ܡܵܪܲܢ. ܗܵܐ ܗܵܪܟܵܐ ܐܝܼܬ݂ ܬܪܹܝܢ ܣܲܝܦ̈ܝܼܢ. ܐܵܡܲܪ ܠܗܘܿܢ ܣܵܦܩܝܼܢ.

³⁹ ܘܲܢܦܲܩ ܘܐܸܙܲܠ ܐܲܝܟ݂ ܕܲܡܥܵܕ݂ ܗܘ̣ܵܐ ܠܛܘܼܪܵܐ ܕܒܹܝܬ݂ ܙܲܝ̈ܬܹܐ. ܘܐܸܙܲܠܘ ܒܵܬ݂ܪܹܗ ܐܵܦ ܬܲܠܡܝܼܕ݂ܵܘ̈ܗܝ.

⁴⁰ ܘܟܲܕ݂ ܡܲܛܝܼ ܠܕܘܼܟܬ݂ܵܐ. ܐܸܡܲܪ ܠܗܘܿܢ. ܨܲܠܵܘ. ܕܠܵܐ ܬܸܥܠܘܼܢ ܠܢܸܣܝܘܿܢܵܐ.

⁴¹ ܘܗܘܼ ܦܪܲܩ ܡܸܢܗܘܿܢ. ܐܲܝܟ݂ ܡܲܫܕܹܐ ܟܹܐܦܵܐ. ܘܣܵܡ ܒܘܼܪ̈ܟܵܘܗܝ ܘܲܡܨܲܠܹܐ ܗ̄ܘܵܐ.

⁴² ܘܐܵܡܲܪ. ܐܲܒ݂ܵܐ. ܐܸܢ ܨܵܒܹܐ ܐܲܢ̄ܬ݁. ܢܸܥܒܪܲܢܝ ܟܵܣܵܐ ܗܵܢܵܐ. ܒܪܲܡ. ܠܵܐ ܨܸܒ݂ܝܵܢܝ ܐܸܠܵܐ ܕܝܼܠܵܟ݂ ܢܸܗܘܹܐ.

⁴³ ܘܐܸܬ݂ܚܙܝܼ ܠܹܗ ܡܲܠܲܐܟ݂ܵܐ. ܡܸܢ ܫܡܲܝܵܐ ܕܲܡܚܲܝܸܠ ܠܹܗ.

⁴⁴ ܘܟܲܕ݂ ܗܘ̣ܵܐ ܒܕܸܚܠܬ݂ܵܐ ܬܟ݂ܝܼܒ݂ܵܐܝܼܬ݂ ܡܨܲܠܹܐ ܗ̄ܘܵܐ. ܘܲܗܘܵܬ݂ ܕܘܼܥܬܹ݁ܗ ܐܲܝܟ݂ ܫܸܠܬܹ̈ܐ ܕܲܕ݂ܡܵܐ. ܘܲܢܦܲܠ ܥܲܠ ܐܲܪܥܵܐ.

⁴⁵ ܘܩܼܵܡ ܡܸܢ ܨܠܘܿܬܹܗ. ܘܐܸܬ݂ܵܐ ܠܘܵܬ݂ ܬܲܠܡܝܼܕ݂ܵܘ̈ܗܝ. ܘܐܸܫܟܲܚ ܐܸܢܘܿܢ ܟܲܕ݂ ܕܲܡܟܝܼܢ ܡܸܢ ܥܵܩܬ݂ܵܐ.

⁴⁶ ܘܐܸܡܲܪ ܠܗܘܿܢ ܡܵܢܵܐ ܕܲܡܟܿܝܼܢ ܐܢ̄ܬܘܿܢ. ܩܘܼܡܘ ܨܲܠܵܘ ܕܠܵܐ ܬܸܥܠܘܼܢ ܠܢܸܣܝܘܿܢܵܐ.

⁴⁷ ܘܥܲܕ݂ ܗܘܼ ܡܡܲܠܸܠ. ܗܵܐ ܟܸܢܫܵܐ. ܘܗܵܘ ܕܡܸܬ݂ܩܪܹܐ ܝܼܗܘܼܕ݂ܵܐ ܚܲܕ݂ ܡܸܢ ܬܪܸܥܣܲܪ ܐܵܬܹܐ ܩܕ݂ܵܡܲܝܗܘܿܢ ܘܲܩܪܸܒ݂ ܠܘܵܬ݂ ܝܼܫܘܿܥ. ܘܢܲܫܩܹܗ. ܗܵܕܹܐ ܓܹܝܪ ܐܵܬ݂ܵܐ ܝܲܗ̄ܒ݂ ܗܘ̣ܵܐ ܠܗܘܿܢ. ܕܐܲܝܢܵܐ ܕܢܵܫܹܩ ܐ̄ܢܵܐ. ܗܘܸܝܘܼ.

⁴⁸ ܐܵܡܲܪ ܠܹܗ ܝܼܫܘܿܥ. ܝܼܗܘܼܕ݂ܵܐ: ܒܢܘܼܫܩܬܵܐ ܡܲܫܠܸܡ ܐܲܢ̄ܬ݁ ܠܹܗ ܠܲܒ݂ܪܹܗ ܕܐ̄ܢܵܫܵܐ.

⁴⁹ ܟܲܕ݂ ܚܙܵܘ ܕܹܝܢ ܐܲܝܠܹܝܢ ܕܥܲܡܹܗ ܡܸܕܸܡ ܕܲܗܘܵܐ. ܐܵܡܪܝܼܢ ܠܹܗ. ܡܵܪܲܢ. ܢܸܡܚܹܐ ܐܸܢܘܿܢ ܒܣܲܝܦܹ̈ܐ.

⁵⁰ ܘܲܡܚܵܐ ܚܲܕ݂ ܡܸܢܗܘܿܢ ܠܥܲܒ݂ܕܹܗ ܕܪܲܒ ܟܵܗܢܹ̈ܐ. ܘܢܲܣܒܵܗ̇ ܐܸܕ݂ܢܹܗ ܕܝܲܡܝܼܢܵܐ.

⁵¹ ܥܢܵܐ ܕܹܝܢ ܝܼܫܘܿܥ. ܘܐܸܡܲܪ. ܟܲܕܘܼ ܥܕ݂ܲܡܵܐ ܠܗܵܕܹܐ. ܘܲܩܪܸܒ݂ ܠܐܸܕ݂ܢܹܗ ܕܗܵܘ ܕܲܒ݂ܠܲܥ. ܘܐܲܣܝܵܗ̇.

⁵² ܘܐܸܡܲܪ ܝܼܫܘܿܥ ܠܗܵܢܘܿܢ ܕܐܸܬ݂ܵܘ ܥܠܵܘܗܝ ܪ̈ܲܒܲܝ ܟܵܗܢܹ̈ܐ ܘܩܲܫܝܼܫܹ̈ܐ ܘܪ̈ܲܒܲܝ ܚܲܝ̈ܠܹܐ ܕܗܲܝܟܠܵܐ ܐܲܝܟ݂ ܕܥܲܠ ܠܸܣܛܵܝܵܐ ܢܦܲܩܬ݁ܘܿܢ ܥܠܲܝ ܒܣܲܝܦܹ̈ܐ ܘܲܒ݂ܚܘܼܛܪܹ̈ܐ ܕܬܹܐܚܕܿܘܼܢܵܢܝ.

⁵³ ܟܠܝܘܿܡ ܥܲܡܟ݂ܘܿܢ ܗ̄ܘܹܝܬ݂ ܒܗܲܝܟܠܵܐ. ܘܠܵܐ ܐܵܘܫܸܛܬ݁ܘܿܢ ܥܠܲܝ ܐܝܼ̈ܕ݂ܲܝܵܐ. ܐܸܠܵܐ ܗܵܕܹܐ ܗ̄ܝܼ ܫܵܥܲܬ݂ܟ݂ܘܿܢ ܘܫܘܼܠܛܵܢܵܐ ܕܚܸܫܘܿܟ݂ܵܐ.

⁵⁴ ܘܐܸܚܲܕ݂ܘ ܐܲܝܬ݁ܝܘܼܗܝ ܠܒܲܝܬܹ݁ܗ ܕܪܲܒ ܟܵܗܢܹ̈ܐ. ܘܫܸܡܥܘܿܢ ܐܵܬܹܐ ܗܘ̣ܵܐ ܒܵܬ݂ܪܹܗ ܡܸܢ ܪܘܼܚܩܵܐ.

⁵⁵ ܐܵܘܚܸܕ݂ܘ ܕܹܝܢ ܢܘܼܪܵܐ ܡܸܨܥܲܬ݂ ܕܵܪܬܵܐ. ܘܝܵܬ݂ܒܿܝܼܢ ܗ̄ܘܼܵܘ ܚܕ݂ܵܪܹܝܗ̇. ܘܝܵܬܹ݁ܒ݂ ܗܘ̣ܵܐ ܐܵܦ ܗܘܼ ܫܸܡܥܘܿܢ ܒܲܝܢܵܬ݂ܗܘܿܢ.

⁵⁶ ܘܲܚܙܵܬܹܗ ܥܠܲܝܡܬ݂ܵܐ ܚܕ݂ܵܐ ܕܝܵܬܹ݁ܒ݂ ܠܘܵܬ݂ ܢܘܼܪܵܐ. ܘܚܵܪܲܬ݂ ܒܹܗ. ܘܐܵܡܪܵܐ. ܐܵܦ ܗܵܢܵܐ. ܥܲܡܹܗ ܗܘܵܐ.

⁵⁷ ܗܘܼ ܕܹܝܢ ܟܦܲܪ ܘܐܸܡܲܪ. ܐܲܢ̄ܬ݁ܬ݂ܵܐ. ܠܵܐ ܝܵܕ݂ܲܥ ܐ̄ܢܵܐ ܠܹܗ.

⁵⁸ ܘܒܵܬܲܪ ܩܲܠܝܼܠ ܚܙܵܝܗܝ ܐ̄ܚܪܹܢܵܐ. ܘܐܸܡܲܪ ܠܹܗ. ܐܵܦ ܐܲܢ̄ܬ݁ ܡܸܢܗܘܿܢ ܐܲܢ̄ܬ݁. ܟܹܐܦܵܐ ܕܹܝܢ ܐܸܡܲܪ. ܠܵܐ ܗ̄ܘܹܝܬ݂.

⁵⁹ ܘܒܵܬܲܪ ܫܵܥܵܐ ܚܕ݂ܵܐ. ܐ̄ܚܪܹܢܵܐ ܡܸܬ݂ܚܪܹܐ ܗ̄ܘܵܐ. ܘܐܵܡܲܪ. ܫܲܪܝܼܪܵܐܝܼܬ݂ ܐܵܦ ܗܵܢܵܐ. ܥܲܡܹܗ ܗ̄ܘܵܐ. ܐܵܦ ܓ݁ܠܝܼܠܵܝܵܐ ܗ̄ܘܼ ܓܹܝܪ.

⁶⁰ ܐܵܡܲܪ ܟܹܐܦܵܐ. ܓܲܒ݂ܪܵܐ. ܠܵܐ ܝܵܕ݂ܲܥ ܐ̄ܢܵܐ ܡܵܢܵܐ ܐܵܡܲܪ ܐܲܢ̄ܬ݁. ܘܡܸܚܕ݂ܵܐ ܟܲܕ݂ ܗܘܼ ܡܡܲܠܸܠ. ܩܪܵܐ ܬܲܪܢܵܓ݂ܠܵܐ.

⁶¹ ܘܐܸܬ݂ܦܢܝܼ ܝܼܫܘܿܥ. ܘܚܵܪ ܒܟܹܐܦܵܐ. ܘܐܸܬ݁ܕܟܲܪ ܫܸܡܥܘܿܢ ܡܸܠܬܹܗ ܕܡܵܪܲܢ ܕܐܵܡܲܪ ܗܘ̣ܵܐ ܠܹܗ ܕܲܩܕ݂ܵܡ ܕܢܸܩܪܹܐ ܬܲܪܢܵܓ݂ܠܵܐ ܬܸܟ݂ܦܘܿܪ ܒܝܼ ܬܠܵܬ݂ ܙܲܒ݂ܢ̈ܝܼܢ.

⁶² ܘܲܢܦܲܩ ܠܒܲܪ ܫܸܡܥܘܿܢ ܒܟ݂ܵܐ ܡܲܪܝܼܪܵܐܝܼܬ݂.

⁶³ ܘܓܲܒ݂ܪܹ̈ܐ ܕܐܲܚܝܼܕ݂ܝܼܢ ܗܘܵܘ ܠܝܼܫܘܿܥ. ܡܒܲܙܚܝܼܢ ܗ̄ܘܼܵܘ ܒܹܗ. ܘܲܡܚܲܦܹܝܢ ܗ̄ܘܼܵܘ ܠܹܗ.

⁶⁴ ܘܡܵܚܹܝܢ ܗ̄ܘܼܵܘ ܠܹܗ ܥܲܠ ܐܲܦܵܘ̈ܗܝ. ܘܐܵܡܪܝܼܢ. ܐܸܬ݂ܢܲܒܵܐ ܡܲܢܘܼ ܡܚܵܟ݂.

⁶⁵ ܘܐܲܚܪ̈ܵܢܝܵܬ݂ܵܐ ܣܲܓܝܼ̈ܐܵܬ݂ܵܐ ܡܓܲܕܦܝܼܢ ܗ̄ܘܼܵܘ ܘܐܵܡܪܝܼܢ ܥܠܵܘܗܝ.

⁶⁶ ܘܟܲܕ݂ ܢܸܓ݂ܗܲܬ݂. ܐܸܬ݂ܟܲܢܲܫܘ ܩܲܫܝܼܫܹ̈ܐ ܘܪ̈ܲܒܲܝ ܟܵܗܢܹ̈ܐ ܘܣܵܦܪܹ̈ܐ. ܘܐܲܣܩܘܼܗܝ ܠܒܹܝܬ݂ ܟܢܘܼܫܬ݁ܗܘܿܢ.

⁶⁷ ܘܐܵܡܪܝܼܢ ܠܹܗ. ܐܸܢ ܐܲܢ̄ܬ݁ ܗܘܼ ܡܫܝܼܚܵܐ. ܐܸܡܲܪ ܠܲܢ. ܐܵܡܲܪ ܠܗܘܿܢ. ܐܸܢ ܐܹܡܲܪ ܠܟ݂ܘܿܢ. ܠܵܐ ܬܗܲܝܡܢܘܼܢܵܢܝ.

⁶⁸ ܘܐܸܢ ܐܹܫܲܐܸܠܟ݂ܘܿܢ. ܠܵܐ ܡܦܲܢܹܝܢ ܐܢ̄ܬܘܿܢ ܠܝܼ ܦܸܬ݂ܓ݂ܵܡܵܐ ܐܵܘ ܫܵܪܹܝܢ ܐܢ̄ܬܘܿܢ ܠܝܼ.

⁶⁹ ܡܸܢ ܗܵܫܵܐ ܢܸܗܘܹܐ ܒܪܹܗ ܕܐ̄ܢܵܫܵܐ ܝܵܬܹ݁ܒ݂ ܡܸܢ ܝܲܡܝܼܢܵܐ ܕܚܲܝܠܵܐ ܕܐܲܠܵܗܵܐ.

⁷⁰ ܐܵܡܪܝܼܢ ܕܹܝܢ ܟܠܗܘܿܢ. ܐܲܢ̄ܬ݁ ܗܘܼ ܗܵܟܹܝܠ ܒܪܹܗ ܕܐܲܠܵܗܵܐ. ܐܵܡܲܪ ܠܗܘܿܢ ܝܼܫܘܿܥ. ܐܲܢ̄ܬ݁ܘܿܢ ܐܵܡܪܝܼܢ ܐܢ̄ܬܘܿܢ ܕܐܸܢܵܐ ܐ̄ܢܵܐ.

⁷¹ ܐܵܡܪܝܼܢ. ܡܵܢܵܐ ܬܘܼܒ݂ ܡܸܬ݂ܒܥܹܝܢ ܠܲܢ ܣܵܗܕܹ̈ܐ. ܚܢܲܢ ܓܹܝܪ ܫܡܲܥܢ ܡܸܢ ܦܘܼܡܹܗ.

23

¹ ܘܩܵܡܘ ܟܠܹܗ ܟܸܢܫܗܘܿܢ. ܘܐܲܝܬ݁ܝܘܼܗܝ ܠܘܵܬ݂ ܦܝܼܠܵܛܘܿܣ.

² ܘܫܲܪܝܼܘ ܐܵܟ݂ܠܝܼܢ ܩܲܪ̈ܨܵܘܗܝ. ܘܐܵܡܪܝܼܢ. ܠܗܵܢܵܐ ܐܸܫܟܲܚܢ ܕܡܲܛܥܹܐ ܥܲܡܲܢ. ܘܟ݂ܵܠܹܐ ܕܲܟ݂ܣܸܦ ܪܹܫܵܐ ܠܩܹܣܲܪ ܠܵܐ ܢܸܬܸ݁ܠ. ܘܐܵܡܲܪ ܥܲܠ ܢܲܦ̮ܫܹܗ. ܕܡܲܠܟܵܐ ܗ̄ܘܼ ܡܫܝܼܚܵܐ.

³ ܦܝܼܠܵܛܘܿܣ ܕܹܝܢ ܫܲܐܠܹܗ. ܘܐܸܡܲܪ ܠܹܗ. ܐܲܢ̄ܬ݁ ܗܘܼ ܡܲܠܟܵܐ ܕܲܝܗ̄ܘܼܕ݂ܵܝܹ̈ܐ. ܐܵܡܲܪ ܠܹܗ. ܐܲܢ̄ܬ݁ ܐܸܡܲܪܬ݁.

⁴ ܘܐܸܡܲܪ ܦܝܼܠܵܛܘܿܣ ܠܪ̈ܲܒܲܝ ܟܵܗܢܹ̈ܐ. ܘܲܠܟܸܢܫܵܐ. ܐܸܢܵܐ ܡܸܕܸܡ ܥܸܠܬ݂ܵܐ. ܠܵܐ ܡܸܫܟܲܚ ܐ̄ܢܵܐ ܥܲܠ ܓܲܒ݂ܪܵܐ ܗܵܢܵܐ.

⁵ ܗܸܢܘܿܢ ܕܹܝܢ ܡܲܙܥܩܝܼܢ ܗ̄ܘܼܵܘ. ܘܐܵܡܪܝܼܢ. ܕܫܲܓ݂ܫܹܗ ܠܥܲܡܲܢ. ܟܲܕ݂ ܡܲܠܸܦ ܒܟ݂ܠܵܗ̇ ܝܼܗܘܼܕ݂. ܘܫܲܪܝܼ ܡܸܢ ܓ݁ܠܝܼܠܵܐ. ܘܲܥܕ݂ܲܡܵܐ ܠܗܵܪܟܵܐ.

⁶ ܦܝܼܠܵܛܘܿܣ ܕܹܝܢ ܟܲܕ݂ ܫܡܲܥ ܫܡܵܐ ܕܲܓ݂ܠܝܼܠܵܐ. ܫܲܐܸܠ. ܕܐܸܢ ܓܲܒ݂ܪܵܐ ܗܘܼ ܓܠܝܼܠܵܝܵܐ.

⁷ ܘܟܲܕ݂ ܝܼܕ݂ܲܥ ܕܡܸܢ ܬܚܹܝܬ݂ ܫܘܼܠܛܵܢܵܐ ܗܘܼ ܕܗܹܪܘܿܕܸܣ. ܫܲܕܪܹܗ ܠܘܵܬܹܗ ܕܗܹܪܘܿܕܸܣ. ܡܛܠ ܕܒ݂ܐܘܿܪܸܫܠܸܡ ܗܘ̣ܵܐ ܒܗܵܢܘܿܢ ܝܵܘ̈ܡܵܬ݂ܵܐ.

⁸ ܗܹܪܘܿܕܸܣ ܕܹܝܢ ܟܲܕ݂ ܚܙܵܝܗܝ ܠܝܼܫܘܿܥ ܚܕ݂ܝܼ ܛܵܒ݂. ܨܵܒܹܐ ܗܘ̣ܵܐ ܓܹܝܪ ܠܡܸܚܙܝܹܗ ܡܸܢ ܙܲܒ݂ܢܵܐ ܣܲܓܿܝܼܐܵܐ. ܡܛܠ ܕܫܵܡܲܥ ܗܘ̣ܵܐ ܥܠܵܘܗܝ ܣܲܓܝܼ̈ܐܵܬ݂ܵܐ. ܘܡܲܣܒܲܪ ܗ̄ܘܵܐ. ܕܡܸܕܸܡ ܐܵܬ݂ܵܐ ܢܸܚܙܹܐ ܡܸܢܹܗ.

⁹ ܘܡܸܠܹ̈ܐ ܣܲܓܝܼ̈ܐܵܬ݂ܵܐ ܡܫܲܐܸܠ ܗܘ̣ܵܐ ܠܹܗ. ܝܼܫܘܿܥ ܕܹܝܢ ܡܸܕܸܡ ܦܸܬ݂ܓ݂ܵܡܵܐ ܠܵܐ ܐܲܬ݂ܝܼܒܹܗ.

¹⁰ ܩܵܝܡܝܼܢ ܗ̄ܘܼܵܘ ܕܹܝܢ ܪ̈ܲܒܲܝ ܟܵܗܢܹ̈ܐ ܘܣܵܦܪܹ̈ܐ. ܘܥܲܙܝܼܙܵܐܝܼܬ݂ ܐܵܟ݂ܠܝܼܢ ܗ̄ܘܼܵܘ ܩܲܪ̈ܨܵܘܗܝ.

¹¹ ܗܹܪܘܿܕܸܣ ܕܹܝܢ ܫܵܛܹܗ ܗܘܼ ܘܦܵܠܚܵܘܗܝ. ܘܟܲܕ݂ ܡܒܲܙܲܚ. ܐܲܠܒܿܫܹܗ ܢܲܚ̈ܬܹܐ ܕܲܙܚܘܿܪܝܼܬ݂ܵܐ. ܘܫܲܕܪܹܗ ܠܘܵܬ݂ ܦܝܼܠܵܛܘܿܣ.

¹² ܘܲܒ݂ܗܵܘ ܝܵܘܡܵܐ. ܗܘܵܘ ܪ̈ܵܚܡܹܐ ܦܝܼܠܵܛܘܿܣ ܘܗܹܪܘܿܕܸܣ ܥܲܡ ܚܕ݂ܵܕܹ̈ܐ. ܒܥܸܠܕܒ݂ܵܒ݂ܘܼܬ݂ܵܐ ܗܘܸܵܬ݂ ܓܹܝܪ ܡܸܢ ܩܕ݂ܝܼܡ ܒܲܝܢܵܬ݂ܗܘܿܢ.

¹³ ܩܪܵܐ ܕܹܝܢ ܦܝܼܠܵܛܘܿܣ ܠܪ̈ܲܒܲܝ ܟܵܗܢܹ̈ܐ ܘܠܲܐܪ̈ܟ݂ܘܢܹܐ ܘܲܠܥܲܡܵܐ.

¹⁴ ܘܐܸܡܲܪ ܠܗܘܿܢ. ܩܲܪܸܒ݂ܬ݁ܘܢ ܠܝܼ ܓܲܒ݂ܪܵܐ ܗܵܢܵܐ. ܐܲܝܟ݂ ܡܲܗܦܸܟ݂ ܥܲܡܟ݂ܘܿܢ. ܘܗܵܐ ܐܸܢܵܐ ܥܲܩܸܒ݂ܬܹ݁ܗ ܠܥܹܢܲܝ̈ܟܿܘܿܢ. ܘܥܸܠܬ݂ܵܐ ܡܸܕܸܡ ܠܵܐ ܐܸܫܟܚܹܬ݂ ܒܓܲܒ݂ܪܵܐ ܗܵܢܵܐ. ܡܸܢ ܟܠ ܕܡܲܪܫܹܝܢ ܐܢ̄ܬܘܿܢ ܒܹܗ.

¹⁵ ܐܸܠܵܐ ܐܵܦܠܵܐ ܗܹܪܘܿܕܸܣ. ܫܲܕܲܪܬܹ݁ܗ ܓܹܝܪ ܠܘܵܬܹܗ. ܘܗܵܐ. ܠܵܐ ܡܸܕܸܡ ܕܫܵܘܹܐ ܠܡܵܘܬܵܐ ܣܥܝܼܪ ܠܹܗ.

¹⁶ ܐܸܪܕܹܝܘܗܝ ܗܵܟܹܝܠ. ܘܐܸܫܒܿܩܝܼܘܗܝ.

¹⁷ ܥܝܵܕ݂ܵܐ ܓܹܝܪ ܐܝܼܬ݂ ܗ̄ܘܵܐ ܕܢܸܫܪܹܐ ܠܗܘܿܢ ܚܲܕ݂ ܒܥܲܕ݂ܥܹܕ݂ܵܐ.

¹⁸ ܩܥܵܘ ܕܹܝܢ ܟܠܹܗ ܟܸܢܫܵܐ. ܘܐܵܡܪܝܼܢ. ܫܩܘܿܠܲܝܗܝ ܠܗܵܢܵܐ. ܘܲܫܪܝܼ ܠܲܢ ܠܒܲܪ ܐܲܒܵܐ.

¹⁹ ܗܵܘ ܐܲܝܢܵܐ ܕܡܛܠ ܐܸܣܛܵܣܝܼܣ ܕܲܗܘܵܬ݂ ܒܲܡܕ݂ܝܼܢ̄ܬܵܐ ܘܩܸܛܠܵܐ. ܪܡܹܐ ܗܘ̣ܵܐ ܒܹܝܬ݂ ܐܲܣܝܼܪܹ̈ܐ.

²⁰ ܬܘܼܒ݂ ܕܹܝܢ ܡܲܠܸܠ ܥܲܡܗܘܿܢ ܦܝܼܠܵܛܘܿܣ. ܟܲܕ݂ ܨܵܒܹܐ ܕܢܸܫܪܹܐ ܠܝܼܫܘܿܥ.

²¹ ܗܸܢܘܿܢ ܕܹܝܢ ܩܵܥܹܝܢ ܗ̄ܘܼܵܘ. ܘܐܵܡܪܝܼܢ. ܙܩܘܿܦܲܝܗܝ ܙܩܘܿܦܲܝܗܝ.

²² ܗܘܼ ܕܹܝܢ ܕܲܬ݂ܠܵܬ݂ ܙܲܒ݂ܢ̈ܝܼܢ. ܐܸܡܲܪ ܠܗܘܿܢ. ܡܵܢܵܐ ܓܹܝܪ ܕܒ݂ܝܼܫ ܥܒܲܕ݂ ܗܵܢܵܐ. ܡܸܕܸܡ ܥܸܠܬ݂ܵܐ ܕܫܵܘܝܵܐ ܠܡܵܘܬܵܐ. ܠܵܐ ܐܸܫܟܚܹܬ݂ ܒܹܗ. ܐܸܪܕܹܝܘܗܝ ܗܵܟܹܝܠ. ܘܐܸܫܒܿܩܝܼܘܗܝ.

²³ ܗܸܢܘܿܢ ܕܹܝܢ. ܬܵܟ݂ܒܿܝܼܢ ܗ̄ܘܼܵܘ ܒܩܵܠܵܐ ܪܵܡܵܐ. ܘܫܵܐܠܝܼܢ ܗ̄ܘܼܵܘ ܠܹܗ ܕܢܸܙܩܦܘܼܢܵܝܗܝ. ܘܲܥܫܸܢ ܗܘ̣ܵܐ ܩܵܠܗܘܿܢ ܕܝܼܠܗܘܿܢ ܘܲܕ݂ܪ̈ܲܒܲܝ ܟܵܗܢܹ̈ܐ.

²⁴ ܦܝܼܠܵܛܘܿܣ ܕܹܝܢ ܦܩܲܕ݂ ܕܬܸܗܘܹܐ ܫܸܐܠܲܬ݂ܗܘܿܢ.

²⁵ ܘܲܫܪܵܐ ܠܗܘܿܢ ܠܗܵܘ ܕܡܛܠ ܐܸܣܛܵܣܝܼܣ ܘܩܸܛܠܵܐ ܪܡܹܐ ܗܘ̣ܵܐ ܒܹܝܬ݂ ܐܲܣܝܼܪܹ̈ܐ. ܗܵܘ ܕܲܫܐܸܠܘ. ܠܝܼܫܘܿܥ ܕܹܝܢ ܐܲܫܠܸܡ ܠܨܸܒ݂ܝܵܢܗܘܿܢ.

²⁶ ܘܟܲܕ݂ ܡܵܘܒܠܝܼܢ ܠܹܗ. ܐܸܚܲܕ݂ܘ ܠܫܸܡܥܘܿܢ ܩܹܘܪܝܼܢܵܝܵܐ ܕܐܵܬܹܐ ܡܸܢ ܩܪܝܼܬ݂ܵܐ ܘܣܵܡܘ ܥܠܵܘܗܝ ܙܩܝܼܦܵܐ ܕܢܸܛܥܲܢ ܒܵܬ݂ܪܹܗ ܕܝܼܫܘܿܥ.

²⁷ ܘܐܵܬܹܐ ܗܘ̣ܵܐ ܒܵܬ݂ܪܹܗ ܣܘܿܓ݂ܵܐܐ ܕܥܲܡܵܐ. ܘܢܸܫܹ̈ܐ ܐܲܝܠܹܝܢ ܕܡܲܪܩܕ݂ܵܢ ܗ̄ܘܲܝ. ܘܐܵܠܝܵܢ ܥܠܵܘܗܝ.

²⁸ ܘܐܸܬ݂ܦܢܝܼ ܝܼܫܘܿܥ ܠܘܵܬ݂ܗܹܝܢ ܘܐܸܡܲܪ. ܒ̈ܢܵܬ݂ ܐܘܿܪܸܫܠܸܡ. ܠܵܐ ܬܸܒ݂ܟܝܵܢ ܥܠܲܝ. ܒܪܲܡ ܥܲܠ ܢܲܦ̮ܫܟܹܝܢ ܒܟ݂ܵܝܹܝ̈ܢ. ܘܥܲܠ ܒܢܲܝ̈ܟܹܿܝܢ.

²⁹ ܕܗܵܐ ܐܵܬܹ݁ܝܢ ܝܵܘ̈ܡܵܬ݂ܵܐ ܕܲܒ݂ܗܘܿܢ ܢܹܐܡܪܘܼܢ. ܛܘܼܒܲܝܗܹܝܢ ܠܥܲܩܪ̈ܵܬ݂ܵܐ ܘܲܠܟܲܪ̈ܣܵܬ݂ܵܐ ܕܠܵܐ ܝܼܠܸܕ݂ ܘܠܲܬ݁ܕ݂ܲܝܵ̈ܐ ܕܠܵܐ ܐܲܝܢܸܩܘ.

³⁰ ܗܵܝܕܹܝܢ ܬܫܲܪܘܿܢ ܠܡܹܐܡܲܪ ܠܛܘܼܪܹܐ ܕܦܸܠܘ ܥܠܲܝܢ. ܘܲܠܪ̈ܵܡܵܬ݂ܵܐ. ܕܟܲܣܵܝܹ̈ܢܵܢ.

³¹ ܕܐܸܢ ܒܩܲܝܣܵܐ ܪܲܛܝܼܒ݂ܵܐ ܗܵܠܹܝܢ ܥܵܒ݂ܕܝܼܢ. ܒܝܲܒܝܼܫܵܐ ܡܵܢܵܐ ܢܸܗܘܹܐ.

³² ܘܐܵܬܹܝܢ ܗ̄ܘܼܵܘ ܥܲܡܹܗ ܬܪܹܝܢ ܐ̄ܚܪ̈ܵܢܝܼܢ ܥܵܒ݂ܕܲܝ̈ ܒ̈ܝܼܫܵܬ݂ܵܐ. ܕܢܸܬ݂ܩܲܛܠܘܼܢ.

³³ ܘܟܲܕ݂ ܐܸܬ݂ܵܘ ܠܕܘܼܟܬ݂ܵܐ ܚܕ݂ܵܐ ܕܡܸܬ݂ܩܲܪܝܵܐ ܩܲܪܩܲܦܬ݂ܵܐ. ܙܲܩܦܘܼܗܝ ܬܲܡܵܢ. ܘܲܠܗܵܢܘܿܢ ܥܵܒ݂ܕܲܝ̈ ܒ̈ܝܼܫܵܬ݂ܵܐ. ܚܲܕ݂ ܡܸܢ ܝܲܡܝܼܢܹܗ. ܘܚܲܕ݂ ܡܸܢ ܣܸܡܵܠܹܗ.

³⁴ ܗܘܼ ܕܹܝܢ ܝܼܫܘܿܥ ܐܸܡܲܪ ܗ̄ܘܵܐ. ܐܲܒ݂ܵܐ. ܫܒ݂ܘܿܩ ܠܗܘܿܢ. ܠܵܐ ܓܹܝܪ ܝܵܕ݂ܥܝܼܢ ܡܵܢܵܐ ܥܵܒ݂ܕܝܼܢ. ܘܦܲܠܸܓ݂ܘ ܢܲܚ̈ܬܵܘܗܝ. ܘܐܲܪܡܝܼܘ ܥܠܲܝܗܘܿܢ ܦܸܣܵܐ.

³⁵ ܩܵܐܹܡ ܗܘ̣ܵܐ ܕܹܝܢ ܥܲܡܵܐ. ܘܚܵܙܹܐ. ܘܲܡܡܲܝܩܝܼܢ ܗ̄ܘܼܵܘ ܒܹܗ ܐܵܦ ܐܲܪ̈ܟܘܿܢܹܐ. ܘܐܵܡܪܝܼܢ. ܠܐܲܚܪ̈ܵܢܹܐ ܐܲܚܝܼ. ܢܲܚܹܐ ܢܲܦ̮ܫܹܗ. ܐܸܢ ܗܘܸܝܘܼ ܡܫܝܼܚܵܐ ܓܲܒ݂ܝܹܗ ܕܐܲܠܵܗܵܐ.

³⁶ ܘܲܡܒܲܙܚܝܼܢ ܗ̄ܘܼܵܘ ܒܹܗ ܐܵܦ ܐܸܣܛܪ̈ܵܛܝܼܘܼܛܹܐ. ܟܲܕ݂ ܩܵܪܒܝܼܢ ܠܘܵܬܹܗ. ܘܲܡܩܲܪܒ݂ܝܼܢ ܠܹܗ ܚܲܠܵܐ.

³⁷ ܘܐܵܡܪܝܼܢ ܠܹܗ. ܐܸܢ ܐܲܢ̄ܬ݁ ܗܘܼ ܡܲܠܟܵܐ ܕܲܝܗ̄ܘܼܕ݂ܵܝܹ̈ܐ. ܐܲܚܵܐ ܢܲܦ̮ܫܵܟ݂.

³⁸ ܐܝܼܬ݂ ܗܘ̣ܵܐ ܕܹܝܢ ܐܵܦ ܟܬ݂ܵܒ݂ܵܐ ܕܲܟ݂ܬ݂ܝܼܒ݂ ܠܥܸܠ ܡܸܢܹܗ. ܝܵܘܢܵܐܝܼܬ݂ ܘܲܪܗ̄ܘܿܡܵܐܝܼܬ݂. ܘܥܸܒ݂ܪܵܐܝܼܬ݂. ܗܵܢܵܘ ܡܲܠܟܵܐ ܕܲܝܗ̄ܘܼܕ݂ܵܝܹ̈ܐ.

³⁹ ܚܲܕ݂ ܕܹܝܢ ܡܸܢ ܗܵܢܘܿܢ ܥܵܒ݂ܕܲܝ̈ ܒ̈ܝܼܫܵܬ݂ܵܐ ܕܲܨܠܝܼܒ݂ܝܼܢ ܗ̄ܘܼܵܘ ܥܲܡܹܗ. ܡܓܲܕܸܦ ܗܘ̣ܵܐ ܥܠܵܘܗܝ. ܘܐܵܡܲܪ. ܐܸܢ ܐܲܢ̄ܬ݁ ܗܘܼ ܡܫܝܼܚܵܐ. ܦܲܨܵܐ ܢܲܦ̮ܫܵܟ݂. ܘܦܲܨܵܐ ܐܵܦ ܠܲܢ.

⁴⁰ ܘܲܟ݂ܐܵܐ ܒܹܗ ܚܲܒ݂ܪܹܗ. ܘܐܸܡܲܪ ܠܹܗ. ܐܵܦ ܠܵܐ ܡܸܢ ܐܲܠܵܗܵܐ ܕܵܚܹܠ ܐܲܢ̄ܬ݁: ܕܐܵܦ ܐܲܢ̄ܬ݁ ܒܹܗ ܐܲܢ̄ܬ݁ ܒܕ݂ܝܼܢܵܐ.

⁴¹ ܘܲܚܢܲܢ ܟܹܐܢܵܐܝܼܬ݂. ܐܲܝܟ݂ ܕܫܵܘܹܝܢ ܗ̄ܘܲܝܢ ܓܹܝܪ. ܘܐܲܝܟ݂ ܕܲܥܒܲܕ݂ܢ ܐܸܬ݂ܦܪܲܥܢ. ܗܵܢܵܐ ܕܹܝܢ ܡܸܕܸܡ ܕܲܣܢܹܐ. ܠܵܐ ܥܒ݂ܝܼܕ݂ ܠܹܗ.

⁴² ܘܐܸܡܲܪ ܠܝܼܫܘܿܥ. ܐܸܬ݁ܕܲܟ݂ܪܲܝܢܝ ܡܵܪܝ: ܡܵܐ ܕܐܵܬܹܐ ܐܲܢ̄ܬ݁ ܒܡܲܠܟܘܬ݂ܵܟ݂.

⁴³ ܐܵܡܲܪ ܠܹܗ ܝܼܫܘܿܥ. ܐܵܡܹܝܢ ܐܵܡܲܪ ܐ̄ܢܵܐ ܠܵܟ݂. ܕܝܵܘܡܵܢܵܐ ܥܲܡܝ ܬܸܗܘܹܐ ܒܦܲܪܕܲܝܣܵܐ.

⁴⁴ ܐܝܼܬ݂ ܗ̄ܘܲܝ̈ ܕܹܝܢ ܐܲܝܟ݂ ܫܵܥܹ̈ܐ ܫܸܬ݂. ܘܲܗܘܵܐ ܚܸܫܘܿܟ݂ܵܐ ܥܲܠ ܟܠܵܗ̇ ܐܲܪܥܵܐ. ܥܕ݂ܲܡܵܐ ܠܲܬ݂ܫܲܥ ܫܵܥܝܼ̈ܢ.

⁴⁵ ܘܫܸܡܫܵܐ ܚܫܸܟ݂. ܘܐܸܨܛܪܝܼ ܐܲܦܲܝ̈ ܬܲܪܥܵܐ ܕܗܲܝܟܠܵܐ. ܡܸܢ ܡܨܲܥܬܹܗ.

⁴⁶ ܘܲܩܥܵܐ ܝܼܫܘܿܥ ܒܩܵܠܵܐ ܪܵܡܵܐ. ܘܐܸܡܲܪ. ܐܵܒ݂ܝ. ܒܐܝܕ݂ܲܝ̈ܟ ܣܵܐܹܡ ܐ̄ܢܵܐ ܪܘܼܚܝ. ܗܵܕܹܐ ܐܸܡܲܪ. ܘܲܫܠܸܡ.

⁴⁷ ܟܲܕ݂ ܚܙܵܐ ܕܹܝܢ ܩܸܢܛܪܘܿܢܵܐ ܡܸܕܸܡ ܕܲܗܘܵܐ. ܫܲܒܲܚ ܠܐܲܠܵܗܵܐ. ܘܐܸܡܲܪ. ܫܲܪܝܼܪܵܐܝܼܬ݂ ܗܵܢܵܐ ܓܲܒ݂ܪܵܐ. ܙܲܕܝܼܩܵܐ ܗ̄ܘܵܐ.

⁴⁸ ܘܟ݂ܠܗܘܿܢ ܟܸܢܫܹ̈ܐ ܐܲܝܠܹܝܢ ܕܲܟ݂ܢܝܼܫܝܼܢ ܗ̄ܘܼܵܘ ܠܲܚܙܵܬ݂ܵܐ ܗܵܕܹܐ: ܟܲܕ݂ ܚܙܵܘ ܡܸܕܸܡ ܕܲܗܘܵܐ. ܗܦܲܟ݂ܘ ܟܲܕ݂ ܛܵܪܦܝܼܢ ܥܲܠ ܚܲܕ݂ܝܼܗܘܿܢ.

⁴⁹ ܘܩܵܝܡܝܼܢ ܗ̄ܘܼܵܘ ܡܸܢ ܪܘܼܚܩܵܐ ܟܠܗܘܿܢ ܝܵܕ݂ܘܼܥܵܘ̈ܗܝ ܕܝܼܫܘܿܥ. ܘܢܸܫܹ̈ܐ ܐܲܝܠܹܝܢ ܕܐܸܬܲܝ̈ ܗ̄ܘܲܝ ܥܲܡܹܗ ܡܸܢ ܓܠܝܼܠܵܐ ܘܚܵܙܹܝܢ ܗ̄ܘܼܵܘ ܗܵܠܹܝܢ.

⁵⁰ ܓܲܒ݂ܪܵܐ ܕܹܝܢ ܚܲܕ݂ ܕܲܫܡܹܗ ܝܵܘܣܸܦ ܒܘܼܠܹܘܛܵܐ. ܡܸܢ ܪܵܡܬ݂ܵܐ ܡܕ݂ܝܼܢ̄ܬܵܐ ܕܲܝܗܘܼܕ݂. ܓܲܒ݂ܪܵܐ ܗܘ̣ܵܐ ܛܵܒ݂ܵܐ ܘܙܲܕܝܼܩܵܐ.

⁵¹ ܗܵܢܵܐ ܠܵܐ ܫܵܠܸܡ ܗܘ̣ܵܐ ܠܨܸܒ݂ܝܵܢܗܘܿܢ ܘܲܠܣܘܼܥܪܵܢܗܘܿܢ. ܘܲܡܣܲܟܹܐ ܗܘ̣ܵܐ ܠܡܲܠܟܘܼܬ݂ܵܐ ܕܐܲܠܵܗܵܐ.

⁵² ܗܵܢܵܐ ܩܪܸܒ݂ ܠܘܵܬ݂ ܦܝܼܠܵܛܘܿܣ. ܘܲܫܐܸܠ ܦܲܓ݂ܪܹܗ ܕܝܼܫܘܿܥ.

⁵³ ܘܐܲܚܬܹܗ ܘܟܲܪܟܹܗ ܒܲܚܝܵܨܵܐ ܕܟܸܬܵܢܵܐ. ܘܣܵܡܹܗ ܒܒܹܝܬ݂ ܩܒ݂ܘܼܪܵܐ ܢܩܝܼܪܵܐ. ܗܵܘ ܕܠܵܐ ܐ̄ܢܵܫ ܥܕ݂ܲܟܹܝܠ ܐܸܬ݁ܬ݁ܣܝܼܡ ܗܘ̣ܵܐ ܒܹܗ.

⁵⁴ ܘܝܵܘܡܵܐ ܥܪܘܼܒ݂ܬܵܐ ܗ̄ܘܵܬ݂. ܘܫܲܒܿܬ݂ܵܐ ܢܵܓ݂ܗܵܐ ܗ̄ܘܵܬ݂.

⁵⁵ ܩܲܪܝܼܒ݂ܵܢ ܗ̄ܘܲܝ̈ ܕܹܝܢ ܢܸܫܹ̈ܐ ܗܵܠܹܝܢ ܕܐܸܬܲܝ̈ ܥܲܡܹܗ ܡܸܢ ܓܠܝܼܠܵܐ. ܘܲܚ̈ܙܲܝܵܝܗܝ ܠܩܲܒ݂ܪܵܐ ܘܐܲܝܟܲܢܵܐ ܐܸܬ݁ܬ݁ܣܝܼܡ ܦܲܓ݂ܪܹܗ.

⁵⁶ ܘܲܗܦܲܟ݂ ܛܲܝܸܒ݂ ܗܹܪ̈ܘܿܡܹܐ ܘܒܸܣܡܹ̈ܐ. ܘܲܒ݂ܫܲܒܿܬ݂ܵܐ ܫܠܲܝ̈ ܐܲܝܟ݂ ܕܲܦܩܝܼܕ݂.

24

¹ ܒܚܲܕ݂ ܒܫܲܒܵܐ ܕܹܝܢ ܒܫܲܦܪܵܐ ܥܲܕ݂ ܚܸܫܘܿܟ݂. ܐܸܬܲܝ̈ ܠܒܹܝܬ݂ ܩܒ݂ܘܼܪܵܐ. ܘܐܲܝܬ݁ܝܼ ܗܹܪ̈ܘܿܡܹܐ ܗܵܠܹܝܢ ܕܛܲܝܸܒ݂ ܗ̄ܘܲܝ̈. ܘܐܝܼܬ݂ ܗ̄ܘܲܝ̈ ܥܲܡܗܹܝܢ ܢܸܫܹ̈ܐ ܐ̄ܚܪ̈ܵܢܝܵܬ݂ܵܐ.

² ܘܐܸܫܟܲܚ ܟܹܐܦܵܐ. ܕܲܡܥܲܓ݁ܠܵܐ ܡܸܢ ܒܹܝܬ݂ ܩܒ݂ܘܼܪܵܐ.

³ ܘܥܲܠܹܝܢ. ܘܠܵܐ ܐܸܫܟܚܵܝܗܝ ܠܦܲܓ݂ܪܵܐ ܕܝܼܫܘܿܥ.

⁴ ܘܲܗܘܵܐ ܕܟܲܕ݂ ܗܸܢܝܢ ܬܲܡܝܼܗܵܢ ܥܲܠ ܗܵܕܹܐ. ܗܵܐ ܬܪܹܝܢ ܓܲܒ݂ܪ̈ܝܼܢ ܩܵܡܘ ܠܥܸܠ ܡܸܢܗܹܝܢ. ܘܡܲܒ݂ܪܸܩ ܗܘ̣ܵܐ ܠܒ݂ܘܫܗܘܿܢ.

⁵ ܘܲܗܘܲܝ̈ ܒܕ݂ܚܠܬ݂ܵܐ. ܘܲܟ݂ܦܲܝ̈ ܐܲܦܲܝ̈ܗܹܝܢ ܒܐܲܪܥܵܐ. ܘܐܵܡܪܝܼܢ ܠܗܹܝܢ. ܡܵܢܵܐ ܒܵܥܝܵܢ ܐܢ̱ܬܹ݁ܝܢ ܚܲܝܵܐ ܥܲܡ ܡܝܼܬܹ̈ܐ.

⁶ ܠܲܝܬܵܘܗܝ ܬܢܵܢ ܩܵܡ ܠܹܗ. ܥܸܗܲܕܹܝ̈ܢ ܕܡܲܠܸܠ ܥܲܡܟܹܝܢ ܟܲܕ݂ ܗܘܼ ܒܲܓ݂ܠܝܼܠܵܐ.

⁷ ܘܐܸܡܲܪ ܗ̄ܘܵܐ. ܕܲܥܬ݂ܝܼܕ݂ ܗܘܼ ܒܪܹܗ ܕܐ̄ܢܵܫܵܐ ܕܢܸܫܬ݁ܠܸܡ ܒܐܝܕ݂ܲܝ̈ ܐ̄ܢܵܫܵܐ ܚܲܛܵܝܹ̈ܐ ܘܢܸܨܛܠܸܒ݂. ܘܠܲܬ݂ܠܵܬ݂ܵܐ ܝܵܘܡ̈ܝܼܢ ܢܩܘܼܡ.

⁸ ܘܗܸܢܝܢ ܐܸܬ݁ܕܟܲܪܹܝܢ ܠܡܸܠܵܘ̈ܗܝ.

⁹ ܘܲܗܦܲܟ݂ ܡܸܢ ܩܲܒ݂ܪܵܐ. ܘܐܸܡܲܪܹ̈ܝܢ ܗܵܠܹܝܢ ܟܠܗܹܝܢ ܠܲܚܕ݂ܲܥܣܲܪ. ܘܲܠܫܲܪܟܵܐ.

¹⁰ ܐܝܼܬܲܝܗܹܝܢ ܗ̄ܘܲܝ̈ ܕܹܝܢ. ܡܲܪܝܲܡ ܡܲܓ݂ܕܠܵܝܬܵܐ. ܘܝܘܿܚܲܢ. ܘܡܲܪܝܲܡ ܐܸܡܹܗ ܕܝܲܥܩܘܿܒ݂. ܘܫܲܪܟܵܐ ܕܥܲܡܗܹܝܢ. ܗܵܠܹܝܢ ܕܐܸܡܲܪ ܗ̄ܘܲܝ̈ ܠܲܫܠܝܼܚܹ̈ܐ.

¹¹ ܘܐܸܬ݂ܚܙܝܼ ܒܥܲܝܢܲܝ̈ܗܘܿܢ ܡܸܠܹ̈ܐ ܗܵܠܹܝܢ. ܐܲܝܟ݂ ܫܵܢ̈ܝܵܬ݂ܵܐ. ܘܠܵܐ ܗܲܝܡܸܢܘ ܐܸܢܹܝܢ.

¹² ܫܸܡܥܘܿܢ ܕܹܝܢ ܩܵܡ ܘܲܪܗܸܛ ܠܩܲܒ݂ܪܵܐ. ܘܐܲܕ݂ܝܼܩ ܚܙܵܐ ܟܸܬܵܢܹ̈ܐ ܕܣܝܼܡܝܼܢ ܒܲܠܚܘܿܕ݂. ܘܐܸܙܲܠ. ܟܲܕ݂ ܡܸܬ݁ܕܲܡܲܪ ܒܢܲܦ̮ܫܹܗ. ܥܲܠ ܡܸܕܸܡ ܕܲܗܘܵܐ.

¹³ ܘܗܵܐ ܬܪܹܝܢ ܡܸܢܗܘܿܢ ܒܹܗ ܒܝܵܘܡܵܐ. ܐܵܙܠ̄ܝܼܢ ܗ̄ܘܼܵܘ ܠܲܩܪܝܼܬ݂ܵܐ ܕܲܫܡܵܗ̇ ܥܲܡܵܐܘܿܣ. ܘܦܲܪܝܼܩܵܐ ܡܸܢ ܐܘܿܪܸܫܠܸܡ ܐܸܣ̈ܛܕ݂ܵܘܵܬ݂ܵܐ ܫܬ݁ܝܼܢ.

¹⁴ ܘܗܸܢܘܿܢ ܡܡܲܠܠܝܼܢ ܗ̄ܘܼܵܘ ܚܲܕ݂ ܥܲܡ ܚܲܕ݂. ܥܲܠ ܗܵܠܹܝܢ ܟܠܗܹܝܢ ܕܲܓ݂ܕ݂ܲܫ.

¹⁵ ܘܟܲܕ݂ ܗܸܢܘܿܢ ܡܡܲܠܠܝܼܢ ܘܒ݂ܵܥܹܝܢ ܚܲܕ݂ ܥܲܡ ܚܲܕ݂. ܐܸܬ݂ܵܐ ܗܘܼ ܝܼܫܘܿܥ. ܘܡܲܛܝܼ ܐܸܢܘܿܢ ܘܲܡܗܲܠܸܟ݂ ܗܘ̣ܵܐ ܥܲܡܗܘܿܢ.

¹⁶ ܘܥܲܝܢܲܝ̈ܗܘܿܢ ܐܲܚܝܼܕ݂ܵܢ ܗܘܲܝ ܕܠܵܐ ܢܸܣܬܲܟܠܘܼܢܵܝܗܝ.

¹⁷ ܘܐܸܡܲܪ ܠܗܘܿܢ ܡܵܢܵܐ ܐܸܢܹܝܢ ܡܸܠܹ̈ܐ ܗܵܠܹܝܢ ܕܲܡܡܲܠܠܝܼܢ ܐܢ̄ܬܘܿܢ ܚܲܕ݂ ܥܲܡ ܚܲܕ݂ ܟܲܕ݂ ܡܗܲܠܟ݂ܝܼܢ ܐܢ̄ܬܘܿܢ. ܘܲܟ݂ܡܝܼܪܝܼܢ ܐܢ̄ܬܘܿܢ.

¹⁸ ܥܢܵܐ ܚܲܕ݂ ܡܸܢܗܘܿܢ ܕܲܫܡܹܗ ܩܲܠܝܘܿܦܵܐ. ܘܐܸܡܲܪ ܠܹܗ. ܐܲܢ̄ܬ݁ ܗܘܼ ܟܲܝ ܒܲܠܚܘܿܕ݂ܝܟ ܢܘܼܟ݂ܪܵܝܵܐ ܡܸܢ ܐܘܿܪܸܫܠܸܡ. ܕܠܵܐ ܝܵܕ݂ܲܥ ܐܲܢ̄ܬ݁ ܡܸܕܸܡ ܕܲܗܘܵܐ ܒܵܗ̇ ܒܗܵܢܘܿܢ ܝܵܘ̈ܡܵܬ݂ܵܐ.

¹⁹ ܐܵܡܲܪ ܠܗܘܿܢ ܡܵܢܵܐ. ܐܵܡܪܝܼܢ ܠܹܗ. ܥܲܠ ܝܼܫܘܿܥ ܗܵܘ ܕܡܸܢ ܢܵܨܪܲܬ݂. ܓܲܒ݂ܪܵܐ ܕܲܗܘܵܐ ܢܒ݂ܝܼܵܐ. ܘܚܲܝܠܬ݂ܵܢ ܗܘ̣ܵܐ ܒܡܸܠܬ݂ܵܐ ܘܒܲܥܒ݂ܵܕܹ̈ܐ ܩܕ݂ܵܡ ܐܲܠܵܗܵܐ ܘܲܩܕ݂ܵܡ ܟܠܹܗ ܥܲܡܵܐ.

²⁰ ܘܐܲܫܠܡܘܼܗܝ ܪ̈ܲܒܲܝ ܟܵܗܢܹ̈ܐ ܘܩܲܫܝܼܫܹ̈ܐ ܠܕ݂ܝܼܢܵܐ ܕܡܵܘܬܵܐ. ܘܙܲܩܦܘܼܗܝ.

²¹ ܚܢܲܢ ܕܹܝܢ ܣܵܒ݂ܪܝܼܢ ܗ̄ܘܲܝܢ. ܕܗܘܸܝܘܼ ܥܬ݂ܝܼܕ݂ ܗܘ̣ܵܐ ܕܢܸܦܪܩܝܼܘܗܝ ܠܝܼܣܪܵܝܹܠ. ܘܗܵܐ ܬܠܵܬ݂ܵܐ ܝܵܘܡ̈ܝܼܢ ܗܵܐ ܡܸܢ ܕܗܵܠܹܝܢ ܟܠܗܹܝܢ ܗܘܲܝ̈.

²² ܐܸܠܵܐ ܐܵܦ ܢܸܫܹ̈ܐ ܡܸܢܲܢ. ܐܲܬ݂ܡܗܵܢ. ܩܲܕܸܡ ܗ̄ܘܲܝ̈ ܓܹܝܪ ܠܒܹܝܬ݂ ܩܒ݂ܘܼܪܵܐ.

²³ ܘܟܲܕ݂ ܠܵܐ ܐܸܫܟܲܚ ܦܲܓ݂ܪܹܗ. ܐܸܬܲܝ̈ ܐܵܡܪܵܢ ܠܲܢ. ܕܡܲܠܲܐܟܹ̈ܐ ܚܙܲܝܢ ܬܲܡܵܢ ܘܐܵܡܪܝܼܢ ܥܠܵܘܗܝ. ܕܚܲܝ ܗ̄ܘܼ.

²⁴ ܘܐܵܦ ܐ̄ܢܵܫܵܐ ܡܸܢܲܢ ܐܸܙܲܠܘ ܠܒܹܝܬ݂ ܩܒ݂ܘܼܪܵܐ. ܘܐܸܫܟܲܚܘ ܗܵܟܲܢܵܐ. ܐܲܝܟ݂ ܡܵܐ ܕܐܸܡܲܪ ܢܸܫܹ̈ܐ. ܠܹܗ ܕܹܝܢ ܠܵܐ ܚܙܵܘ.

²⁵ ܗܵܝܕܹܝܢ ܐܸܡܲܪ ܠܗܘܿܢ ܝܼܫܘܿܥ. ܐܵܘ ܚܲܣܝܼܪ̈ܲܝ ܪܸܥܝܵܢܵܐ: ܘܝܲܩܝܼܪ̈ܲܝ ܠܸܒܵܐ ܠܲܡܗܲܝܡܵܢܘܼ ܒܟ݂ܠܗܹܝܢ ܐܲܝܠܹܝܢ ܕܡܲܠܸܠܘ ܢܒ݂ܝܹ̈ܐ:

²⁶ ܠܵܐ ܗܘ̣ܵܐ ܗܵܠܹܝܢ ܥܬ݂ܝܼܕ݂ ܗܘ̣ܵܐ ܕܲܢܣܲܝܒܲܪ ܡܫܝܼܚܵܐ. ܘܲܕ݂ܢܸܥܘܿܠ ܠܬܸܫܒܿܘܿܚܬܹ݁ܗ.

²⁷ ܘܫܲܪܝܼ ܗܘ̣ܵܐ ܡܸܢ ܡܘܼܫܹܐ. ܘܡܸܢ ܟܠܗܘܿܢ ܢܒ݂ܝܹ̈ܐ. ܘܲܡܦܲܫܸܩ ܗܘ̣ܵܐ ܠܗܘܿܢ ܥܲܠ ܢܲܦ̮ܫܹܗ. ܡܸܢ ܟܠܗܘܿܢ ܟܬ݂ܵܒܹ̈ܐ.

²⁸ ܘܲܩܪܸܒ݂ܘ ܗ̄ܘܼܵܘ ܠܲܩܪܝܼܬ݂ܵܐ ܗܵܝ ܕܐܵܙܠ̄ܝܼܢ ܗ̄ܘܼܵܘ ܠܵܗ̇. ܘܗܘܼ ܡܲܣܒܲܪ ܗܘ̣ܵܐ ܠܗܘܿܢ. ܕܐܲܝܟ݂ ܕܲܠܕܘܼܟܵܐ ܪܲܚܝܼܩܵܐ ܐܵܙܹܠ ܗ̄ܘܵܐ.

²⁹ ܘܐܲܠܨܘܼܗܝ ܘܐܵܡܪܝܼܢ ܠܹܗ. ܦܘܼܫ ܠܘܵܬܲܢ ܡܛܠ ܕܝܵܘܡܵܐ ܗܵܫܵܐ. ܪܟܸܢ ܠܹܗ ܠܡܸܚܫܲܟ݂. ܘܥܲܠ ܕܲܢܩܵܘܹܐ ܠܘܵܬ݂ܗܘܿܢ.

³⁰ ܘܲܗܘܵܐ ܕܟܲܕ݂ ܐܸܣܬ݁ܡܸܟ݂ ܥܲܡܗܘܿܢ. ܢܣܲܒ݂ ܠܲܚܡܵܐ ܘܒܲܪܸܟ݂ ܘܲܩܨܵܐ. ܘܝܲܗ̄ܒ݂ ܠܗܘܿܢ.

³¹ ܘܡܸܚܕ݂ܵܐ ܐܸܬ݂ܦܲܬܲܚ ܥܲܝܢܲܝ̈ܗܘܿܢ. ܘܐܸܫܬܵܘܕܥܘܼܗܝ. ܘܗܘܼ ܐܸܫܬ݁ܩܸܠ ܠܹܗ ܡܸܢܗܘܿܢ.

³² ܘܐܵܡܪܝܼܢ ܗ̄ܘܼܵܘ ܚܲܕ݂ ܠܚܲܕ݂. ܠܵܐ ܗܘ̣ܵܐ ܠܸܒܲܢ ܝܲܩܝܼܪ ܗܘ̣ܵܐ ܒܓ݂ܵܘܲܢ: ܟܲܕ݂ ܡܡܲܠܸܠ ܥܲܡܲܢ ܒܐܘܼܪܚܵܐ: ܘܲܡܦܲܫܸܩ ܠܲܢ ܟܬ݂ܵܒܹ̈ܐ.

³³ ܘܩܵܡܘ ܒܵܗ̇ ܒܫܵܥܬ݂ܵܐ. ܘܲܗܦܲܟ݂ܘ ܠܐܘܿܪܸܫܠܸܡ. ܘܐܸܫܟܲܚܘ ܠܲܚܕ݂ܲܥܣܲܪ ܕܲܟ݂ܢܝܼܫܝܼܢ. ܘܠܲܐܝܠܹܝܢ ܕܥܲܡܗܘܿܢ

³⁴ ܟܲܕ݂ ܐܵܡܪܝܼܢ. ܕܫܲܪܝܼܪܵܐܝܼܬ݂ ܩܵܡ ܡܵܪܲܢ. ܘܐܸܬ݂ܚܙܝܼ ܠܫܸܡܥܘܿܢ.

³⁵ ܘܐܵܦ ܗܸܢܘܿܢ. ܐܸܫܬܲܥܝܼܘ ܐܲܝܠܹܝܢ ܕܲܗܘܲܝ̈ ܒܐܘܼܪܚܵܐ ܘܐܲܝܟܲܢܵܐ ܐܸܬ݂ܝܼܕ݂ܲܥ ܠܗܘܿܢ ܟܲܕ݂ ܩܨܵܐ ܠܲܚܡܵܐ.

³⁶ ܘܟܲܕ݂ ܗܵܠܹܝܢ ܡܡܲܠܠܝܼܢ ܗ̄ܘܼܵܘ. ܝܼܫܘܿܥ ܩܵܡ ܒܲܝܢܵܬ݂ܗܘܿܢ. ܘܐܸܡܲܪ ܠܗܘܿܢ. ܫܠܵܡܵܐ ܥܲܡܟ݂ܘܿܢ. ܐܸܢܵܐ ܐ̄ܢܵܐ. ܠܵܐ ܬܸܕ݂ܚܠܘܼܢ.

³⁷ ܘܗܸܢܘܿܢ ܐܸܬ݂ܪܗܸܒ݂ܘ. ܘܲܗܘܵܘ ܒܕܸܚܠܬ݂ܵܐ. ܣܵܒ݂ܪܝܼܢ ܗ̄ܘܼܵܘ ܓܹܝܪ ܕܪܘܼܚܵܐ ܚܵܙܹܝܢ.

³⁸ ܘܐܵܡܲܪ ܠܗܘܿܢ ܝܼܫܘܿܥ. ܡܵܢܵܐ ܡܸܬ݁ܬ݁ܙܝܼܥܝܼܢ ܐܢ̄ܬܘܿܢ. ܘܡܵܢܵܐ ܣܵܠܩܵܢ ܡܲܚܫ̈ܒ݂ܵܬ݂ܵܐ ܥܲܠ ܠܸܒܵܘܵܬ݂̈ܟ݂ܘܿܢ.

³⁹ ܚܙܵܘ ܐܝܼܕ݂ܲܝ̈ ܘܪܸ̈ܓ݂ܠܲܝ. ܕܐܸܢܵܐ ܐ̄ܢܵܐ. ܓܘܿܫܘܼܢܵܢܝ ܘܕ݂ܲܥܘ. ܕܲܠܪܘܼܚܵܐ ܒܸܣܪܵܐ ܘܓܲܪ̈ܡܹܐ ܠܲܝܬ݁ ܠܵܗ̇ ܐܲܝܟ݂ ܕܚܵܙܹܝܢ ܐܢ̄ܬܘܿܢ ܕܐܝܼܬ݂ ܠܝܼ.

⁴⁰ ܘܟܲܕ݂ ܗܵܠܹܝܢ ܐܸܡܲܪ. ܚܵܘܝܼ ܐܸܢܘܿܢ ܐܝܼܕ݂ܵܘ̈ܗܝ. ܘܪܸܓ݂ܠܵܘܗܝ.

⁴¹ ܘܟܲܕ݂ ܥܕ݂ܲܡܵܐ ܠܗܵܫܵܐ ܠܵܐ ܡܗܲܝܡܢܝܼܢ ܗ̄ܘܼܵܘ ܡܸܢ ܚܲܕ݂ܘܲܬ݂ܗܘܿܢ. ܘܡܸܬ݁ܬܲܡܗܝܼܢ ܗ̄ܘܼܵܘ. ܐܸܡܲܪ ܠܗܘܿܢ. ܐܝܼܬ݂ ܠܟ݂ܘܿܢ ܬܢܵܢ ܡܸܕܸܡ ܠܡܹܐܟܲܠ.

⁴² ܗܸܢܘܿܢ ܕܹܝܢ ܝܲܗ̄ܒ݂ܘ ܠܹܗ ܡܢܵܬ݂ܵܐ ܡܸܢ ܢܘܼܢܵܐ ܕܛܵܘܝܵܐ. ܘܡܸܢ ܟܲܟܵܪܝܼܬ݂ܵܐ ܕܕܸܒ݂ܫܵܐ.

⁴³ ܘܲܢܣܲܒ݂ ܐܸܟ݂ܲܠ ܠܥܹܢܲܝ̈ܗܘܿܢ.

⁴⁴ ܘܐܸܡܲܪ ܠܗܘܿܢ ܗܵܠܹܝܢ ܐܸܢܹܝܢ ܡܸܠܹ̈ܐ ܕܡܲܠܠܹܬ݂ ܥܲܡܟ݂ܘܿܢ. ܟܲܕ݂ ܠܘܵܬ݂ܟ݂ܘܿܢ ܗ̄ܘܹܝܬ݂. ܕܘܵܠܹܐ ܗ̄ܘܼ ܕܢܸܫܬܲܠܲܡ ܟܠ ܡܸܕܸܡ ܕܲܟ݂ܬ݂ܝܼܒ݂ ܒܢܵܡܘܿܣܵܐ ܕܡܘܼܫܹܐ ܘܒܲܢܒ݂ܝܹ̈ܐ ܘܲܒ݂ܡܲܙܡܘܿܪܹ̈ܐ ܥܠܲܝ.

⁴⁵ ܗܵܝܕܹܝܢ ܦܬܲܚ ܪܸܥܝܵܢܗܘܿܢ ܠܡܸܣܬܲܟܵܠܘܼ ܟܬ݂ܵܒܹ̈ܐ.

⁴⁶ ܘܐܸܡܲܪ ܠܗܘܿܢ. ܕܗܵܟܲܢܵܐ ܟܬ݂ܝܼܒ݂. ܘܗܵܟܲܢܵܐ ܙܵܕܹܩ ܗܘ̣ܵܐ ܕܢܸܚܲܫ ܡܫܝܼܚܵܐ. ܘܕ݂ܲܢܩܘܼܡ ܡܸܢ ܒܹܝܬ݂ ܡܝܼܬܹ̈ܐ ܠܲܬ݂ܠܵܬ݂ܵܐ ܝܵܘܡ̈ܝܼܢ.

⁴⁷ ܘܲܕ݂ܢܸܬ݂ܟܪܸܙ ܒܲܫܡܹܗ ܬܝܵܒ݂ܘܼܬ݂ܵܐ ܠܫܘܼܒ݂ܩܵܢܵܐ ܕܲܚܛܵܗܹ̈ܐ. ܒܟ݂ܠܗܘܿܢ ܥܲܡ̈ܡܹܐ. ܘܫܘܼܪܵܝܵܐ ܢܸܗܘܹܐ. ܡܸܢ ܐܘܿܪܸܫܠܸܡ.

⁴⁸ ܘܐܲܢ̄ܬ݁ܘܿܢ ܐܸܢܘܿܢ ܣܵܗܕܹ̈ܐ ܕܗܵܠܹܝܢ.

⁴⁹ ܘܐܸܢܵܐ ܐܹܫܲܕܲܪ ܥܠܲܝܟܿܘܿܢ ܡܘܼܠܟܵܢܵܐ ܕܐܵܒ݂ܝ. ܐܲܢ̄ܬ݁ܘܿܢ ܕܹܝܢ ܩܵܘܵܘ ܒܐܘܿܪܸܫܠܸܡ ܡܕ݂ܝܼܢ̄ܬܵܐ. ܥܕ݂ܲܡܵܐ ܕܬܸܠܒܿܫܘܿܢ ܚܲܝܠܵܐ ܡܸܢ ܪܵܘܡܵܐ.

⁵⁰ ܘܐܲܦܸܩ ܐܸܢܘܿܢ ܥܕ݂ܲܡܵܐ ܠܒܹܝܬ݂ ܥܲܢܝܵܐ. ܘܐܲܪܝܼܡ ܐܝܼܕ݂ܵܘ̈ܗܝ. ܘܒܲܪܸܟ݂ ܐܸܢܘܿܢ.

⁵¹ ܘܲܗܘܵܐ ܕܟܲܕ݂ ܡܒܲܪܸܟ݂ ܠܗܘܿܢ. ܐܸܬ݂ܦܪܸܫ ܡܸܢܗܘܿܢ. ܘܲܣܠܸܩ ܠܲܫܡܲܝܵܐ.

⁵² ܗܸܢܘܿܢ ܕܹܝܢ ܣܓܸܕ݂ܘ ܠܹܗ. ܘܲܗܦܲܟ݂ܘ ܠܐܘܿܪܸܫܠܸܡ. ܒܚܲܕ݂ܘܼܬ݂ܵܐ ܪܲܒܬ݂ܵܐ.

⁵³ ܘܲܒܟ݂ܠܙܒܲܢ ܐܝܼܬܲܝܗܘܿܢ ܗ̄ܘܼܵܘ ܒܗܲܝܟܠܵܐ. ܟܲܕ݂ ܡܫܲܒܚܝܼܢ ܘܲܡܒܲܪܟ݂ܝܼܢ ܠܐܲܠܵܗܵܐ. ܐܵܡܹܝܢ.