1 ܐܲܝܟܲܢܵܐ ܝܸܬ̣ܒܲܬ̤ ܒܲܠܚܘܿܕܹܝܗ̇ ܡܕ݂ܝܼܢ̄ܬܵܐ ܣܲܓ̇ܝܲܐܬ̣ ܒܥܲܡܵܐ: ܗܘ̤ܵܬ̣ ܐܲܝܟ݂ ܐܲܪܡܲܠܬܵܐ ܣܲܓ̇ܝܼܐܬ̣ ܒܥܲܡܡܹ̈ܐ: ܪܹܫܵܐ ܕܲܡܕ݂ܝܼ̈ܢܵܬ̣ܵܐ ܗܘ̤ܵܬ̣ ܠܡܲܕܲܐܬ̣ܵܐ.
2 ܒܟ݂ܵܬ̤ ܒܠܸܠܝܵܐ ܘܕܸܡܥܹ̈ܝܗ̇ ܫ̣ܚܸܠ ܥܲܠ ܦܲܟ̇ܝ̈ܗ̇: ܘܠܲܝܬ̇ ܠܵܗ̇ ܡܒܲܝܐܵܢܵܐ ܡ̣ܢ ܟܠܗܘܿܢ ܪ̈ܵܚܡܹܝܗ̇. ܟܠܗܘܿܢ ܪ̈ܵܚܡܹܝܗ̇ ܕܲܓܸ̇ܠ̣ܘ ܒܵܗ̇ ܘܲܗܘ̤ܵܘ ܠܵܗ̇ ܒܥܸܠܕ̇ܒ̣ܵܒܹ̈ܐ.
3 ܓܲܠܝܲܬ̤ ܝܑܼܗܘܼܕ݂ܵܐ ܡ̣ܢ ܫܘܼܥܒܵܕ݂ܵܐ ܘܡ̣ܢ ܣܘܿܓܲܐܬ̣ ܥܲܒ̣ܕ̇ܘܼܬ̣ܵܐ: ܗ̤ܝ ܝܸܬ̣ܒܲܬ̤ ܒܹܝܬ̣ ܥܲܡܡܹ̈ܐ: ܘܠܵܐ ܐܸܫܟ̇ܚܲܬ̤ ܠܵܗ̇ ܢܝܵܚܵܐ: ܟܠܗܘܿܢ ܪ̈ܵܕ݂ܘܿܦܹܝܗ̇ ܐܲܕܪ̱ܟ݂ܘܼܗ̇ ܒܹܝܬ̣ ܐܘܼܠܨܵܢܵܐ.
4 ܐܘܼܪ̈ܚܵܬ̣ܵܗ̇ ܕܨܸܗܝܘܿܢ ܒܐܸܒ̣ܠܵܐ: ܡ̣ܢ ܒܠܲܝ ܕܐܵܬܹ̇ܝܢ ܠܥܲܕ݂ܥܹܕ݂ܵܐ: ܟܠܗܘܿܢ ܬܲܪ̈ܥܹܝܗ̇ ܨܕܹܝܢ: ܘܟ݂ܵܗܢܹ̈ܝܗ̇ ܡܸܬ̇ܬܲܢܚܝܼܢ: ܘܲܒ̣ܬ̣ܘܼ̈ܠܵܬ̣ܵܗ̇ ܡܡܲܟ̇ܟ݂ܵܢ: ܘܗ̤ܝ ܡܲܪܝܼܪ ܠܵܗ̇.
5 ܗܘ̤ܵܘ ܐܵܠܘܿܨܹܝ̈ܗ̇ ܠܪܹܫ: ܘܲܒ̣ܥܸܠܕ̇ܒ̣ܵܒܹ̈ܝܗ̇ ܫܠܝܼܘ: ܡܸܛܠ ܕܡܵܪܝܵܐ ܡܲܟ̇ܟ݂ܵܗ̇ ܥܲܠ ܣܘܿܓܲܐܬ̣ ܚܛܵܗܹ̈ܝܗ̇: ܘܝܲܠܘܼܕܹܝ̈ܗ̇ ܐܸܙܲܠ̣ܘ ܒܫܸܒ̣ܝܵܐ ܩܕ݂ܵܡ ܐܵܠܘܿܨܵܐ.
6 ܘܲܢܦܲܩ̣ ܡ̣ܢ ܒܲܪܬ̣ ܨܸܗܝܘܿܢ ܟܠܹܗ ܗܸܕ݂ܪܵܗ̇: ܗܘ̤ܵܘ ܪܵܘܪ̈ܒ̣ܵܢܹܝܗ̇ ܐܲܝܟ݂ ܐܲܝ̈ܠܹܐ: ܘܠܵܐ ܐܸܫܟܲܚܘ ܡܲܪܥܝܼܬ̣ܵܐ: ܘܐܸܙܲܠ̣ܘ ܕܠܵܐ ܚܲܝܠܵܐ ܩܕ݂ܵܡ ܪܵܕ݂ܘܿܦܵܐ.
7 ܐܸܬ̇ܕܲܟ݂ܪܲܬ̤ ܐܘܿܪܸܫܠܸܡ ܝܵܘ̈ܡܲܝ ܫܘܼܥܒܵܕ݂ܵܗ̇ ܘܡܲܪܕ̇ܘܼܬ̣ܵܗ̇: ܘܟ݂ܠܗܹܝܢ ܪ̈ܓ̣ܝܼܓ̣ܵܬ̣ܵܗ̇ ܕܲܗ̤ܘܲܝ̈ ܡ̣ܢ ܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ: ܟܲܕ݂ ܢܦܲܠ ܥܲܡܵܗ̇ ܒܝܲܕ݂ ܐܵܠܘܿܨܵܐ ܘܠܲܝܬ̇ ܠܵܗ̇ ܡܥܲܕ̇ܪܵܢܵܐ: ܚ̣ܙܵܐܘܼܗ̇ ܐܵܠܘܿܨܹ̈ܝܗ̇ ܘܲܓ̣ܚܸܟ݂ܘ ܥܲܠ ܬܒ̣ܵܪܵܗ̇.
8 ܚܛܵܗܵܐ ܚܛܵܬ̤ ܐܘܿܪܸܫܠܸܡ: ܡܸܛܠ ܗܵܢܵܐ ܗܘ̤ܵܬ̣ ܢܸܕ̇ܬ̣ܵܐ: ܟܠܗܘܿܢ ܡܝܲܩܪ̈ܵܢܹܝܗ̇ ܨܲܥ̣ܪܘܼܗ̇ ܡܸܛܠ ܕܲܚܙܵܘ ܦܘܼܪܣܵܝܵܗ̇: ܐܵܦ ܗ̤ܝ ܐܸܬ̇ܬܲܢܚܲܬ̤: ܘܗܸܦܟܲܬ̤ ܠܒܸܣܬ̇ܪܵܗ̇.
9 ܛܲܡܐܘܼܬ̣ܵܗ̇ ܒܲܫܦܘܿܠܹ̈ܝܗ̇ ܘܠܵܐ ܐܸܬ̇ܕܲܟ݂ܪܲܬ̤ ܚܲܪܬ̣ܵܗ̇: ܘܢܸܚܬܲܬ̤ ܬܸܫܒ̇ܘܿܚܬܵܗ̇ ܘܠܲܝܬ̇ ܠܵܗ̇ ܡܒܲܝܐܵܢܵܐ. ܚܙܝܼ ܡܵܪܝܵܐ ܫܘܼܥܒܵܕ݂ܝ ܕܐܸܬ̇ܬ̇ܪܝܼܡ ܒܥܸܠܕ̇ܒ̣ܵܒ̣ܵܐ.
10 ܐܝܼܕ݂ܵܘ̈ܗܝ ܦܪܲܣ̣ ܐܵܠܘܿܨܵܐ ܥܲܠ ܟܠܗܹܝܢ ܪ̈ܓ̣ܝܼܓ̣ܵܬ̣ܵܗ̇: ܘܲܚܙܹ̇ܝܬ̣ ܥܲܡܡܹ̈ܐ ܕܥܲܠ̣ܘ ܠܡܲܩܕ̇ܫܵܟ݂: ܕܦܲܩܸܕ̇ܬ̇ ܕܠܵܐ ܢܸܥܠܘܿܢ ܒܲܟ݂ܢܘܼܫܬܵܟ݂.
11 ܟܠܹܗ ܥܲܡܵܐ ܡܸܬ̇ܬܲܢܚܝܼܢ ܘܒ̣ܵܥܹ̇ܝܢ ܠܲܚܡܵܐ: ܝܲܗ̄ܒ̣ܘ ܪܸܓܲܬ̣ܗܘܿܢ ܒܡܹܐܟ݂ܘܼܠܬܵܐ ܠܡܲܦܢܵܝܘܼ ܢܲܦ̮ܫܵܐ: ܚܙܝܼ ܡܵܪܝܵܐ ܘܚܘܼܪ ܕܲܗܘܹ̇ܝܬ̣ ܙܲܠܝܼܠܬܵܐ.
12 ܠܵܐ ܠܟ݂ܘܿܢ ܟܠ ܥܵܒ̣ܪ̈ܲܝ ܐܘܼܪܚܵܐ: ܐܸܣܬܲܟܲܠܘ ܘܲܚܙܵܘ: ܐܸܢ ܐܝܼܬ̣ ܟܹܐܒܵܐ ܐܲܝܟ݂ ܟܹܐܒ̣ܝ ܕܲܥ̣ܒܲܕ݂ ܠܝܼ ܡܵܪܝܵܐ: ܘܡܲܟ̇ܟܲܢܝ ܡܵܪܝܵܐ ܒܝܵܘܡܵܐ ܕܚܸܡܬ̣ܵܐ ܕܪܘܼܓ̣ܙܹܗ.
13 ܡ̣ܢ ܡܪܵܘܡܵܐ ܫܲܕܲܪ ܢܘܼܪܵܐ ܒܓܲܪ̈ܡܲܝ ܘܐܲܚ̣ܬܲܢܝ: ܦ̣ܪܲܣ ܡܨܝܼܕ̇ܬܵܐ ܠܪܸ̈ܓ̣ܠܲܝ ܘܐܲܗܦܟܲܝܢܝ ܠܒܸܣܬܲܪܝ: ܘܝܲܗ̄ܒܲܢܝ ܠܚܲܪܒܵܐ ܘܟ݂ܠܝܘܿܡ ܕܵܘܝܵܐ ܐ̄ܢܵܐ.
14 ܐܸܬ̇ܬ̇ܥܝܼܪܘ ܥܠܲܝ ܚܛܵܗܲܝ̈: ܘܒ̣ܐܝܼܕ݂ܵܘ̈ܗܝ ܐܸܣܬ̇ܪܸܓ̣ܘ ܢܝܼܪ̈ܵܘܗܝ ܥܲܠ ܨܵܘܪܝ: ܘܐܸܬ̣ܟ̇ܪܲܗ ܚܲܝܠܝ ܘܐܲܫܠ̱ܡܲܢܝ ܡܵܪܝܵܐ ܒܐܝܼܕ݂ܵܐ ܕܡܲܢ ܕܠܵܐ ܡܲܨܝܵܐ ܐ̄ܢܵܐ ܚܲܝܠܹܗ.
15 ܟܒܲܫ ܟܠܗܘܿܢ ܥܲܫܝܼ̈ܢܲܝ ܡܵܪܝܵܐ ܒܓ̣ܵܘܝ: ܩ̣ܪܵܐ ܥܠܲܝ ܥܲܕ݂ܥܹܕ݂ܵܐ ܠܡܵܘܒܵܕ݂ܘܼ ܓܲܕ̇ܘܼ̈ܕܲܝ: ܡܲܥܨܲܪܬܵܐ ܕܵܫ̣ ܡܵܪܝܵܐ ܠܲܒ̣ܬ̣ܘܼܠܬܵܐ ܒܲܪܬ̣ ܝܑܼܗܘܼܕ݂ܵܐ.
16 ܥܲܠ ܗܵܠܹܝܢ ܒܵܟ݂ܝܵܐ ܐ̄ܢܵܐ ܘܥܲܝ̈ܢܲܝ ܡܲܪ̈ܕ̇ܝܵܢ ܡܲـ̈ـܝܵܐ: ܕܐܲܪܚܸܩ̣ ܡܹܢܝ ܡܒܲܝܐܵܢܵܐ ܡܲܦܢܸܐ ܢܲܦ̮ܫܝ. ܗܘ̤ܵܘ ܒܢܲܝ̈ ܫܲܩܡܝܼܢ: ܡܸܛܠ ܕܲܥܫܸܢ ܒܥܸܠܕ̇ܒ̣ܵܒ̣ܵܐ.
17 ܦܸܪܣܲܬ̤ ܨܸܗܝܘܿܢ ܐܝܼܕܹܝ̈ܗ̇ ܘܠܲܝܬ̇ ܠܵܗ̇ ܡܒܲܝܐܵܢܵܐ: ܦ̣ܩܲܕ݂ ܡܵܪܝܵܐ ܥܲܠ ܝܲܥܩܘܿܒ̣ ܘܚܲܕ݂ܪܘܼܗܝ ܐܵܠܘܿܨܵܘ̈ܗܝ: ܗܘ̤ܵܬ̣ ܐܘܿܪܸܫܠܸܡ ܢܸܕ̇ܬ̣ܵܐ ܒܲܝܢܵܬ̣ܗܘܿܢ.
18 ܙܲܕ̇ܝܼܩ ܗ̄ܘܼ ܡܵܪܝܵܐ ܕܠܹܗ ܡܲܪܡ̇ܪܹܬ̣: ܫܡܲܥܘ ܟܠܟ݂ܘܿܢ ܥܲܡܡܹ̈ܐ ܘܲܚܙܵܘ ܟܹܐܒ̣ܝ: ܒܬ̣ܘܼ̈ܠܵܬ̣ܝ ܘܓܲܕ̇ܘܼ̈ܕܲܝ ܐܸܙܲܠ̣ܘ ܒܫܸܒ̣ܝܵܐ.
19 ܩܪܹܝ̇ܬ̣ ܠܪ̈ܵܚܡܲܝ ܘܗܸܢܘܿܢ ܢܲܟ݂ܠܘܼܢܝ: ܟܵܗ̈ܢܲܝ ܘܩܲܫܝܼ̈ܫܲܝ ܣܵܦ̣ܘ ܒܓ̣ܵܘ: ܕܲܒ̣ܥ̣ܵܘ ܠܗܘܿܢ ܡܹܐܟ݂ܘܼܠܬܵܐ ܕܢܲܦܢܘܿܢ ܢܲܦ̮ܫܗܘܿܢ ܘܠܵܐ ܐܸܫܟ̇ܚ̣ܘ.
20 ܚܙܝܼ ܡܵܪܝܵܐ: ܕܥܵܩܲܬ̤ ܠܝܼ: ܘܲܡܥܲܝ̈ ܐܸܬ̇ܕܲܠܲܚܘ ܐܸܬ̣ܗ̱ܦܸܟ݂ ܠܹܒ̇ܝ ܒܓ̣ܵܘܝ: ܡܸܛܠ ܕܲܡܡܲܪܡܵܪܘܼ ܡܲܪܡ̇ܪܹܬ̣ ܡ̣ܢ ܠܒܲܪ ܐܵܘܒ̇ܕܲܬ̤ ܚܲܪܒܵܐ: ܘܕܲܒ̣ܒܲܝܬܵܐ ܡܵܘܬܵܐ.
21 ܫ̣ܡܲܥ ܕܡܸܬ̇ܬܲܢܚܵܐ ܐ̄ܢܵܐ: ܘܠܲܝܬ̇ ܠܝܼ ܡܒܲܝܐܵܢܵܐ. ܟܠܗܘܿܢ ܒܥܸܠܕ̇ܒ̣ܵܒܲܝ̈ ܫ̣ܡܲܥܘ ܒܒ̣ܝܼܫܬ̇ܝ: ܘܲܚܕ݂ܝܼܘ ܕܐܲܢ̄ܬ̇ ܥ̣ܒܲܕ̇ܬ̇ ܠܝܼ: ܐܝܬܵܐ ܝܵܘܡܵܐ ܕܲܩ̣ܪܲܝܬ̇ ܘܢܸܗܘܘܿܢ ܐܲܟ݂ܘܵܬ̣ܝ.
22 ܬܸܥܘܿܠ ܟܠܵܗ̇ ܒܝܼܫܘܼܬ̣ܗܘܿܢ ܩܕ݂ܵܡܲܝܟ: ܛܲܪܸܦ ܐܸܢܘܿܢ ܐܲܝܟܲܢܵܐ ܕܛܲܪܸܦܬܵܢܝ ܥܲܠ ܟܠܗܘܿܢ ܚܛܵܗܲܝ̈: ܡܸܛܠ ܕܲܣ̈ܓ̣ܝܼ ܬܸܢܚܵܬ̣̈ܝ ܘܠܹܒ̇ܝ ܕܵܘܹܐ. ܕܬܲܪܬܹ̇ܝܢ.
1 ܐܲܝܟܲܢܵܐ ܐܲܥܝܼܒ̣ ܡܵܪܝܵܐ ܒܪܘܼܓ̣ܙܹܗ ܠܒܲܪܬ̣ ܨܸܗܝܘܿܢ: ܐܲܪܡܝܼ ܡ̣ܢ ܫܡܲܝܵܐ ܠܐܲܪܥܵܐ ܬܸܫܒ̇ܘܿܚܬܹ̇ܗ ܕܝܼܣܪܵܝܹܠ: ܘܠܵܐ ܐܸܬ̇ܕ̇ܟܲܪ ܟܘܼܒ̣ܫܵܐ ܕܪܸ̈ܓ̣ܠܵܘܗܝ ܒܝܵܘܡܵܐ ܕܚܸܡܬ̣ܵܐ ܕܪܘܼܓ̣ܙܹܗ.
2 ܛܲܒܲܥ̣ ܡܵܪܝܵܐ ܘܠܵܐ ܚܵܣ ܠܟ݂ܠܵܗ̇ ܕܲܝܪܹܗ ܕܝܲܥܩܘܿܒ̣: ܣܚܲܦ̣ ܒܚܸܡܬܹܗ ܠܟܲܪܟ݂ܵܐ ܕܒܲܪܬ̣ ܝܑܼܗܘܼܕ݂ܵܐ: ܐܲܪܡܝܼ ܥܲܠ ܐܲܪܥܵܐ ܩܛܝܼ̈ܠܹܝܗ̇ ܡܲܠܟܹ̇ܝ̈ܗ̇ ܘܪܵܘܪ̈ܒ̣ܵܢܹܝܗ̇.
3 ܓܕܲܡ ܒܚܸܡܬ̣ܵܐ ܕܪܘܼܓ̣ܙܹܗ ܟܠܵܗ̇ ܩܲܪܢܹܗ ܕܝܼܣܪܵܝܹܠ: ܐܲܗܦܸܟ݂ ܝܲܡܝܼܢܹܗ ܠܒܸܣܬ̇ܪܹܗ ܡ̣ܢ ܩܕ݂ܵܡ ܒܥܸܠܕ̇ܒ̣ܵܒ̣ܵܐ: ܘܲܫܒܲܩ̣ ܢܘܼܪܵܐ ܒܝܲܥܩܘܿܒ̣: ܘܫܲܠܗܹܒ̣ܝܼܬ̣ܵܐ ܐܸܟ݂ܠܲܬ̤ ܐܝܼܕ݂ܵܘܗܝ.
4 ܡ̣ܠܵܐ ܩܸܫܬܹ̇ܗ ܐܲܝܟ݂ ܐܵܠܘܿܨܵܐ: ܐܲܩܝܼܡ ܝܲܡܝܼܢܹܗ ܐܲܝܟ݂ ܒܥܸܠܕ̇ܒ̣ܵܒ̣ܵܐ: ܘܩܲܛܸܠ ܟܠ ܪܸܓܲܬ̣ ܥܲܝܢܹ̈ܐ ܒܡܲܫܟ̇ܢܵܐ ܕܒܲܪܬ̣ ܨܸܗܝܘܿܢ: ܘܐܸܫܲܕ݂ ܐܲܝܟ݂ ܢܘܼܪܵܐ ܪܘܼܓ̣ܙܹܗ.
5 ܗܘ̤ܵܐ ܡܵܪܝܵܐ ܒܥܸܠܕ̇ܒ̣ܵܒ̣ܵܐ ܘܛܲܒ̇ܥܹܗ ܠܝܼܣܪܵܝܹܠ: ܘܛܲܒܲܥ̣ ܟܠܗܹܝܢ ܣܵܚܪ̈ܵܬܹܗ ܘܚܲܒܸ̇ܠ̣ ܟܲܪ̈ܟ݂ܵܘ̈ܗܝ. ܘܐܲܣܓ̇ܝܼ ܒܒܲܪܬ̣ ܝܑܼܗܘܼܕ݂ܵܐ ܬܘܼܢܵܝܵܐ ܘܐܘܿܠ̈ܝܵܬ̣ܵܐ.
6 ܘܲܥ̣ܩܲܪ ܐܲܝܟ݂ ܓܲܢܬ̣ܵܐ ܡܛܲܠܬ̣ܵܗ̇: ܘܚܲܒܸ̇ܠ̣ ܥܲܕ݂ܥܹܕܹܝ̈ܗ̇: ܘܐܲܛܥܝܼ ܡܵܪܝܵܐ ܡ̣ܢ ܨܸܗܝܘܿܢ ܥܲܕ݂ܥܹܕܹ̈ܐ ܘܫܲܒ̇ܬ̣ܵܐ: ܘܐܲܣܠܝܼ ܒܚܸܡܬ̣ܵܐ ܕܪܘܼܓ̣ܙܹܗ ܡܲܠ̈ܟܹ̇ܐ ܘܟ݂ܵܗ̈ܢܹܐ.
7 ܛ̣ܥܵܐ ܡܵܪܝܵܐ ܡܲܩܕ̇ܫܹܗ: ܘܐܲܣܠܝܼ ܡܲܕ݂ܒ̇ܚܹܗ: ܘܐܲܫܠܸܡ̣ ܒܐܝܼܕ݂ܵܐ ܕܲܒ̣ܥܸܠܕ̇ܒ̣ܵܒܹ̈ܐ ܫܘܼܪܹ̈ܐ ܕܣܵܚܪ̈ܵܬ̣ܵܗ̇: ܩܵܠܵܐ ܝܲܗ̄ܒ̣ܘ ܒܒܲܝܬܹ̇ܗ ܕܡܵܪܝܵܐ ܐܲܝܟ݂ ܕܲܒ̣ܝܵܘܡܵܐ ܕܥܲܕ݂ܥܹܕ݂ܵܐ.
8 ܐܸܬ̣ܚܲܫܲܒ̣ ܡܵܪܝܵܐ ܠܲܡܚܲܒܵܠܘܼ ܫܘܼܪܹ̈ܐ ܕܒܲܪܬ̣ ܨܸܗܝܘܿܢ: ܐܲܪܡܝܼ ܚܘܼܛܵܐ ܘܠܵܐ ܐܲܗܦܸܟ݂ ܐܝܼܕܹܗ ܡ̣ܢ ܛܘܼܒܵܥܵܗ̇: ܘܐܵܘܬܸ̇ܒ̣ ܒܐܒ̣ܠܵܐ ܚܲܝ̈ܠܹܗ: ܘܫܘܼܪܹ̈ܝܗ̇ ܐܲܟ݂ܚ̄ܕ݂ܵܐ ܨܕ݂ܵܘ.
9 ܛܲܒܲܥ̣ܘ ܒܐܲܪܥܵܐ ܬܲܪ̈ܥܹܝܗ̇: ܐܵܘܒܸ̇ܕ݂ܘ ܘܬܲܒܲܪܘ ܣܘܼܟ̇ܪܹ̈ܝܗ̇: ܡܲܠ̈ܟܹ̇ܝܗ̇ ܘܪܵܘܪ̈ܒ̣ܵܢܹܝܗ̇ ܒܥܲܡܡܹ̈ܐ: ܠܲܝܬ̇ ܢܵܡܘܿܣܵܐ: ܘܐܵܦ ܢܒ̣ܝܹ̈ܝܗ̇ ܠܵܐ ܐܸܫ̣ܟܲܚܘ ܚܸܙܘܵܐ ܡ̣ܢ ܡܵܪܝܵܐ.
10 ܝܸܬܸܒ̣ܘ ܒܐܲܪܥܵܐ ܘܲܫܬܸܩ̣ܘ ܩܲܫܝܼܫܹ̈ܐ ܕܒܲܪܬ̣ ܨܸܗܝܘܿܢ: ܐܲܪܡܝܼܘ ܥܲܦܪܵܐ ܒܪܹ̈ܫܲܝܗܘܿܢ ܘܐܸܬ̣ܟ̇ܒܸܢܘ ܣܲܩܹ̈ܐ: ܣ̣ܡܲܟ݂ ܠܐܲܪܥܵܐ ܪܹ̈ܫܲܝܗܹܝܢ ܒܬ̣ܘܼ̈ܠܵܬ̣ܵܐ ܕܐܘܿܪܸܫܠܸܡ.
11 ܚ̣ܫܸܟ݂ ܒܕܸܡܥܹ̈ܐ ܥܲܝ̈ܢܲܝ ܘܐܸܬ̇ܕܲܠܲܚܘ ܡܥܲܝ̈: ܐܸܬ̣ܗ̱ܦܸܟ݂ ܠܐܲܪܥܵܐ ܐܝܼܩܵܪܝ ܥܲܠ ܬܒ̣ܵܪܵܗ̇ ܕܒܲܪܬ̣ ܥܲܡܝ: ܟܲܕ݂ ܐܸܬ̇ܛܲܪܲܦܘ ܛܠܵܝܹ̈ܐ ܘܝܲܠܘܼ̈ܕܹܐ ܒܫܘܼܩܹܝ̈ܗ̇ ܕܲܩܪܝܼܬ̣ܵܐ.
12 ܠܐܸܡ̈ܗܵܬ̣ܗܘܿܢ ܐܵܡ̇ܪܝܼܢ: ܐܲܝܟܵܘ ܥܒ̣ܘܼܪܵܐ ܘܚܲܡܪܵܐ ܘܡܸܫܚܵܐ: ܟܲܕ݂ ܐܸܬ̇ܛܲܪܲܦܘ ܐܲܝܟ݂ ܩܛܝܼ̈ܠܹܐ ܒܫܘܼܩܹܝ̈ܗ̇ ܕܲܩܪܝܼܬ̣ܵܐ: ܟܲܕ݂ ܐܸܬ̣ܐ̱ܫܸܕ݂ ܢܲܦ̮̈ܫܵܬ̣ܗܘܿܢ ܒܥܘܼܒܵܐ ܕܐܸܡ̈ܗܵܬ̣ܗܘܿܢ.
13 ܡܵܢܵܐ ܐܹܣܲܗܕܹܟ݂ܝ ܘܲܠܡܲܢ ܐܹܕܲܡܸܐ ܠܹܟ݂ܝ ܒܲܪܬ̣ ܐܘܿܪܸܫܠܸܡ: ܡ̣ܢ ܐܹܦܲܚܸܡ ܠܹܟ݂ܝ ܘܐܹܒܲܝܐܹܟ݂ܝ ܒܬ̣ܘܼܠܬܵܐ ܒܲܪܬ̣ ܨܸܗܝܘܿܢ: ܕܲܣܓܝܼ ܐܲܝܟ݂ ܝܲܡܵܐ ܬܒ̣ܵܪܹܟ݂ܝ ܡܲܢ̣ܘܼ ܢܸܣܟ̇ܘܿܪ.
14 ܢܒܲܝܲܝ̈ܟ̇ܝ ܚ̣ܙܵܘ ܠܹܟܝ ܕܲܓܵܠܘܼܬ̣ܵܐ ܘܡܲܛܥ̱ܝܵܢܘܼܬ̣ܵܐ: ܘܠܵܐ ܓ̣ܠܵܘ ܠܹܟ݂ܝ ܥܲܠ ܚܛܵܗܲܝ̈ܟ̇ܝ ܕܲܬ̇ܬ̣ܘܼܒ̣ܝܼܢ. ܘܐܲܗܦܸܟ݂ ܫܒ̣ܝܼܬܹܟ݂ܝ: ܘܲܚ̣ܙܵܘ ܠܹܟ݂ܝ ܢܒ̣̈ܝܼܵܘܵܬ̣ܵܐ ܕܲܓܵܠܵـ̈ـܬ̣ܵܐ ܘܡܲܛܥ̱ܝܵܢ̈ܝܵܬ̣ܵܐ.
15 ܛܲܪܸܦ̣ܘ ܥܠܲܝܟ̇ܝ ܐܝܼܕܲܝ̈ܗܘܿܢ ܟܠ ܥܵܒ̣ܪ̈ܲܝ ܐܘܼܪܚܵܐ: ܐܫܪܸܩ̣ܘ ܘܐܲܢܝܼܕ݂ܘ ܪܹ̈ܫܲܝܗܘܿܢ ܥܲܠ ܒܲܪܬ̣ ܐܘܿܪܸܫܠܸܡ: ܘܐܸܡܲܪܘ: ܗܵܕܲܐ ܗ̄ܝܼ ܩܪܝܼܬ̣ܵܐ ܕܐܵܡ̇ܪܝܼܢ ܗ̄ܘܼܵܘ ܓܡܝܼܪܲܬ̤ ܫܘܼܦܪܵܐ ܘܚܲܕ݂ܘܼܬ̣ܵܐ ܕܟ݂ܠܵܗ̇ ܐܲܪܥܵܐ.
16 ܥ̣ܒܲܕ݂ ܡܵܪܝܵܐ ܡܸܕܸ̇ܡ ܕܐܸܬ̣ܚܲܫܲܒ̣: ܘܫܲܡ̣ܠܝܼ ܡܸܠܬܹܗ: ܐܲܝܟ݂ ܕܲܦ̣ܩܲܕ݂ ܡ̣ܢ ܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ: ܣܲܚܦܵܗ̇ ܘܠܵܐ ܚܵܣ: ܘܐܲܚܕ̇ܝܼ ܥܠܲܝܟ̇ܝ ܒܥܸܠܕ̇ܒ̣ܵܒܹ̈ܐ: ܘܐܲܪܝܼܡ ܩܲܪܢܵܐ ܕܐܵܠܘܿܨܲܝ̈ܟ̇ܝ.
17 ܦܬܲܚ̣ܘ ܥܠܲܝܟ̇ܝ ܦܘܼܡܗܘܿܢ ܟܠܗܘܿܢ ܒܥܸܠܕ̇ܒ̣ܵܒܲܝ̈ܟ̇ܝ: ܐܲܫܪܸܩ̣ܘ ܘܚܲܪܸܩ̣ܘ ܫܸܢܲܝ̈ܗܘܿܢ: ܘܐܵܡ̇ܪܝܼܢ ܒܠܲܥܢܵܗ̇: ܒܪܲܡ ܗܵܢܵܘ ܝܵܘܡܵܐ ܕܣܲܟ̇ܝܼܢ: ܐܸܫܟܲܚܢ ܘܲܚܙܲܝܢ.
18 ܓܥ̣ܵܐ ܠܸܒ̇ܗܘܿܢ ܠܘܵܬ̣ ܡܵܪܝܵܐ ܕܫܘܼܪܹ̈ܐ ܕܒܲܪܬ̣ ܨܸܗܝܘܿܢ: ܐܲܪܕܵܝ ܐܲܝܟ݂ ܢܲܚܠܵܐ ܕܸܡ̱ܥܬܹܟ݂ܝ ܒܐܝܼܡܵܡܵܐ ܘܲܒ̣ܠܸܠܝܵܐ: ܠܵܐ ܬܸܬ̇ܠܝܼܢ ܠܹܟܝ ܦܘܼܝܵܓ̣ܵܐ: ܘܠܵܐ ܬܸܫܠܸܐ ܒܵܒܲܬ̤ ܥܲܝܢܹܟ݂ܝ.
19 ܩܘܼܡܝ ܫܲܒܲܚܝ ܒܠܸܠܝܵܐ ܒܪܹܫ ܡܲܛܲܪܬܵܐ: ܐܲܫܘܿܕ݂ܝ ܐܲܝܟ݂ ܡܲـ̈ـܝܵܐ ܠܹܒ̇ܟ݂ܝ ܠܘܼܩܒܲܠ ܐܲܦܲܝ̈ ܡܵܪܝܵܐ: ܐܲܪܝܼܡܝ ܠܘܵܬܹܗ ܐܝܼܕܲܝ̈ܟ̇ܝ ܥܲܠ ܢܲܦ̮̈ܫܵܬ̣ܵܐ ܕܝܲܠܘܼܕܲܝ̈ܟ̇ܝ: ܕܡܸܬ̇ܛܲܪܦܝܼܢ ܠܟܲܦܢܵܐ ܒܪܹܫ ܟܠܗܘܿܢ ܫܘܼܩܹ̈ܐ:
20 ܚܙܝܼ ܡܵܪܝܵܐ ܘܚܘܼܪ ܠܡܲܢ ܥ̣ܒܲܕܬ̇ ܗܵܟܲܢܵܐ: ܐܹܝܢ ܢܹܐܟ݂̈ܠܵܢ ܢܸܫܹ̈ܐ ܦܹܐܪ̈ܲܝܗܹܝܢ ܘܝܲܠܘܼ̈ܕܹܐ ܕܡܸܫܬܲܩܦܝܼܢ: ܐܹܝܢ ܢܸܬ̣ܩ̄ܛܸܠ ܒܡܲܫܟ̇ܢܹܗ ܕܡܵܪܝܵܐ ܟܵܗܢܵܐ ܘܲܢܒ̣ܝܼܵܐ.
21 ܫܟܸܒ̣ܘ ܥܲܠ ܐܲܪܥܵܐ ܒܫܘܼܩܹ̈ܐ ܛܠܵܝܹ̈ܐ ܘܣܵܒܹ̈ܐ: ܒܬܘܼ̈ܠܵܬ̣ܝ ܘܓܲܕ̇ܘܼ̈ܕܲܝ ܢܦܲܠ̣ܘ ܒܚܲܪܒܵܐ: ܩܲܛܸܠܬ̇ ܒܝܵܘܡܵܐ ܕܪܘܼܓ̣ܙܵܟ݂: ܛܲܒܲܚ̣ܬ̇ ܘܠܵܐ ܚܵܣܬ̇.
22 ܩܸܪܲܝܬ̇ ܐܲܝܟ݂ ܝܵܘܡܵܐ ܕܥܲܕ݂ܥܹܕܵܐ ܒܥܸܠܕ̇ܒ̣ܵܒܲܝ̈ ܡ̣ܢ ܚܕ݂ܵܪܲܝ: ܘܠܵܐ ܗܘ̤ܵܐ ܒܝܵܘܡܵܐ ܕܪܘܼܓ̣ܙܹܗ ܕܡܵܪܝܵܐ ܦܠܝܼܛܵܐ ܘܲܣܪܝܼܕ݂ܵܐ: ܕܫܸܩܠܹ̇ܬ̣ ܘܪܲܒ̇ܝܹܬ̣ ܒܥܸܠܕ̇ܒ̣ܵܒܲܝ̈ ܓܲܡܲܪܘ ܐܸܢܘܿܢ.
1 ܐܹܝܠ ܓܲܢ̄ܒܵܪܵܐ ܚܙܝܼ ܫܘܼܥܒܵܕ݂ܝ: ܒܫܲܒ̣ܛܵܐ ܕܪܘܼܓ̣ܙܹܗ.
2 ܠܝܼ ܕܒܲܪ: ܘܗܲܠܟܲܢܝ ܒܚܸܫܘܿܟ݂ܵܐ ܘܠܵܐ ܒܢܲܗܝܼܪܵܐ.
3 ܒܪܲܡ ܒܝܼ ܢܬ̣ܘܼܒ̣: ܘܢܲܗܦܸܟ݂ ܐܝܼܕܹܗ ܟܠܹܗ ܝܵܘܡܵܐ.
4 ܒܲܠܝܼ ܡܸܫܟ̇ܝ ܘܒܸܣܪܝ: ܘܬܲܒܲܪ ܓܲܪ̈ܡܲܝ.
5 ܒܢ̣ܵܐ ܥܠܲܝ: ܘܐܲܟ݂ܪ̱ܟܲܢܝ ܡܸܪܕܵܐ ܘܚܘܼܪܒܵܐ.
6 ܒܚܸܫܘܿܟ݂ܵܐ ܐܵܘܬ̇ܒܲܝܝ ܐܲܝܟ݂ ܡܝܼܬ̣ܵܐ ܠܥܵܠܲܡ.
7 ܣܵܓ̣ ܒܐܲܦܲܝ̈ ܕܠܵܐ ܐܸܦܘܿܩ: ܘܐܲܥܫܸܢ ܐܲܣܘܼܪ̈ܲܝ.
8 ܘܐܵܦܸܢ ܐܸܒ̣ܥܸܐ ܘܐܹܨܲܠܹܐ ܠܵܐ ܫܵܡܲܥ ܨܠܘܿܬ̣ܝ.
9 ܣܵܓ̣ ܐܘܼܪ̈ܚܵܬ̣ܝ ܒܟ݂ܘܼ̈ܒܹ̇ܐ: ܘܲܫܒ̣ܝܼ̈ܠܲܝ ܥܲܩܸܡ.
10 ܕܹܐܒ̣ܵܐ ܟܲܡܵܢܵܐ ܗܘ̤ܵܐ ܠܝܼ: ܘܐܲܪܝܵܐ ܒܛܘܼܫܝܵܐ.
11 ܐܘܼܪ̈ܚܵܬ̣ܝ ܥܲܩܸܡ̣: ܦܲܫܚܲܢܝ ܘܣܵܡܲܢܝ ܠܲܚܒ̣ܵܠܵܐ.
12 ܡ̣ܠܵܐ ܩܸܫܬܹ̇ܗ ܘܐܲܩܝܼܡܲܢܝ ܐܲܝܟ݂ ܢܝܼܫܵܐ ܠܓܹܐܪܹ̈ܐ.
13 ܗܵܐ ܐܲܥܸܠ ܒܟ݂ܘܿܠ̈ܝܵܬ̣ܝ ܓܹܐܪ̈ܵܘܗܝ.
14 ܗܘܹ̇ܝܬ̣ ܓܘܼܚܟܵܐ ܒܟ݂ܠܗܘܿܢ ܥܲܡܡܹ̈ܐ: ܘܲܙܡܝܼܪ̈ܵܬ̣ܗܘܿܢ ܟܠܹܗ ܝܵܘܡܵܐ.
15 ܐܲܣܒ̇ܥܲܢܝ ܡܪܵܪܹ̈ܐ: ܘܐܲܪ̱ܘܝܲܢܝ ܓܸܕ̇ܕܹ̈ܐ.
16 ܘܬܲܒܲܪ ܒܟܹܐܦܵܐ ܫܸܢܲܝ̈: ܘܦܵܠܢܝ ܒܩܸܛܡܵܐ.
17 ܘܐܸܬ̇ܛܲܥܝܲܬ̤ ܡ̣ܢ ܫܠܵܡܵܐ ܢܲܦ̮ܫܝ: ܘܲܛܥܹ̇ܝܬ̣ ܛܵܒ̣ܬ̣ܵܐ.
18 ܘܐܸܡ̇ܪܹܬ̣ ܕܐܸܒܲܕ݂ܘ ܢܸܨܚܵܢܲܝ̈: ܘܣܲܒ̣ܪܝ ܡ̣ܢ ܡܵܪܝܵܐ.
19 ܐܸܬ̇ܕܲܟ݂ܪ ܫܘܼܥܒܵܕ݂ܝ ܘܡܲܪܕ̇ܘܼܬ̣ܝ: ܕܲܡܪܵܪܹ̈ܐ ܘܲܕ݂ܓܸܕ̇ܕܹ̈ܐ.
20 ܐܸܬ̇ܕܲܟ݂ܪ ܘܐܲܦܢܵܐ ܢܲܦ̮ܫܝ ܥܠܲܝ.
21 ܗܵܕܹܐ ܐܲܬ̣ܝܼܒ̣ ܥܲܠ ܠܹܒ̇ܝ: ܡܸܛܠ ܗܵܢܵܐ ܐܹܣܲܟܹ̇ܐ ܠܹܗ.
22 ܚܸܣܕ݂ܵܘ̈ܗܝ ܕܡܵܪܝܵܐ ܕܠܵܐ ܛܵܠܩܝܼܢ: ܘܠܵܐ ܓܵܡ̇ܪܝܼܢ ܪ̈ܲܚܡܵܘܗܝ.
23 ܒܚܘܼܕܵܬ̣ܵܐ ܕܨܲܦܪܵܐ ܣܲܓ̇ܝܼܵܐܐ ܗܲܝܡܵܢܘܼܬ̣ܵܟ݂ ܡܵܪܝܵܐ.
24 ܐܸܡܪܲܬ̤ ܢܲܦ̮ܫܝ ܡܢܵܬ̣ܝ ܗ̄ܘܼ. ܡܸܛܠ ܗܵܢܵܐ ܐܹܣܲܟܸ̇ܐ ܠܹܗ.
25 ܛܵܒ̣ ܡܵܪܝܵܐ ܠܡܲܢ ܕܲܡܣܲܟܸ̇ܐ ܠܹܗ ܘܲܠܢܲܦ̮ܫܵܐ ܕܒ̣ܵܥ̇ܝܵܐ ܠܹܗ.
26 ܛܵܒ̣ ܠܡܲܢ ܕܲܡܣܲܒܲܪ ܒܩܘܼܫܬܵܐ ܠܦܘܼܪܩܵܢܹܗ ܕܡܵܪܝܵܐ.
27 ܛܵܒ̣ ܠܓܲܒ̣ܪܵܐ ܟܲܕ݂ ܢܸܫܩܘܿܠ ܢܝܼܪܵܟ݂ ܒܛܲܠܝܘܼܬܹܗ.
28 ܘܢܸܬܸ̇ܒ̣ ܒܲܠܚܘܿܕ݂ܵܘܗܝ ܘܢܸܫܬ̇ܘܿܩ: ܡܸܛܠ ܕܩܲܒܸ̇ܠ ܥܠܵܘܗܝ ܢܝܼܪܵܟ݂.
29 ܢܸܬܸ̇ܠ ܒܥܲܦܪܵܐ ܦܘܼܡܹܗ ܡܸܛܠ ܕܐܝܼܬ̣ ܣܲܒ̣ܪܵܐ.
30 ܢܸܬܸ̇ܠ ܦܲܟܹ̇ܗ ܠܡܲܢ ܕܡܵܚܹ̇ܐ ܠܹܗ: ܘܢܸܣܒܲܥ ܚܸܣܕܵܐ.
31 ܡܸܛܠ ܕܠܵܐ ܛܵܥܹ̇ܐ ܡܵܪܝܵܐ ܠܥܵܠܲܡ.
32 ܐܸܠܵܐ ܡܡܲܟܸ̇ܟ݂ ܘܲܡܪܲܚܸܡ: ܐܲܝܟ݂ ܣܘܿܓ̣ܵܐܬ̣ ܪ̈ܲܚܡܵܘܗܝ.
33 ܡܸܛܠ ܕܠܵܐ ܥܵܢܹ̇ܐ ܡ̣ܢ ܠܸܒܹ̇ܗ: ܘܲܡܡܟܸ̇ܟ݂ ܒܢܲܝ̈ ܓܲܢ̄ܒܵܪܹ̈ܐ.
34 ܠܲܡܟܲܒܵܫܘܼ ܬܚܹܝܬ̣ ܪܸ̈ܓ̣ܠܵܘܗܝ ܟܠܗܘܿܢ ܐܲܣܝܼܪܹ̈ܐ ܕܐܲܪܥܵܐ.
35 ܠܡܸܨܠܵܐ ܕܝܼܢܵܐ ܕܓܲܒ̣ܪܵܐ ܠܘܼܩܒܲܠ ܐܲܦܲܝ̈ ܥܸܠܵܝܵܐ.
36 ܠܲܡܚܲܝܵܒ̣ܘܼ ܒܲܪܢܵܫܵܐ ܒܕ݂ܝܼܢܹܗ ܡܵܪܝܵܐ ܠܵܐ ܚܵܙܹ̇ܐ.
37 ܡܲܢܘܼ ܗܵܢܵܐ ܕܐܸܡܲܪ ܘܲܗ̤ܘܵܐ: ܕܡܵܪܝܵܐ ܠܵܐ ܦܩܲܕ݂.
38 ܡ̣ܢ ܦܘܼܡܹܗ ܕܥܸܠܵܝܵܐ ܠܵܐ ܢܵܦ̈ܩܵܢ ܒܝܼ̈ܫܵܬ̣ܵܐ ܘܛܵـ̈ـܒ̣ܵܬ̣ܵܐ.
39 ܡܵܢܵܐ ܡܸܬ̣ܚܲܫܲܒ̣ ܒܲܪܢܵܫܵܐ ܕܚܲܝ: ܘܓܲܒ̣ܪܵܐ ܥܲܠ ܚܛܵܗܵܘ̈ܗܝ.
40 ܢܸܒ̣ܨܹܐ ܐܘܼܪ̈ܚܵܬ̣ܲܢ ܘܢܸܒ̣ܕ̇ܘܿܩ: ܘܢܸܬ̣ܦܢܸܐ ܠܘܵܬ̣ ܡܵܪܝܵܐ.
41 ܢܸܫܩܘܿܠ ܠܸܒܲܝ̈ܢ ܥܲܠ ܐܝܼܕܲܝ̈ܢ ܠܘܵܬ̣ ܐܲܠܵܗܵܐ ܠܲܫܡܲܝܵܐ.
42 ܚܢܲܢ ܐܲܥܠ̣ܝܼܢ ܘܡܲܪܡܲܪܢܵܟ݂: ܘܐܲܢ̄ܬ̇ ܠܵܐ ܫܒܲܩܬ̇.
43 ܛܲܠܸܠ̣ܬ̇ ܒܪܘܼܓ̣ܙܵܟ݂ ܘܲܪܕܲܦ̣ܬܵܢ: ܘܩܲܛܸܠ̣ܬ̇ ܘܠܵܐ ܚܵܣܬ̇.
44 ܛܲܠܸܠܬ̇ ܒܲܥܢܵܢܵܟ݂: ܘܐܲܥ̣ܒܲܪܬ̇ ܨܠܘܿܬܲܢ.
45 ܥܩܝܼܪܹ̈ܐ ܘܡܲܣ̈ܠܲܝܵܐ ܥ̣ܒܲܕ̇ܬܵܢ ܒܹܝܬ̣ ܥܲܡܡܹ̈ܐ.
46 ܥܲܝܢܝ ܕܵܡ̇ܥܵܐ ܘܠܵܐ ܫܵܠܝܵܐ: ܡ̣ܢ ܕܠܲܝܬ̇ ܦܘܼܝܵܓ̣ܵܐ.
47 ܥܕܲܡܵܐ ܕܲܢܕ݂ܝܼܩ ܘܢܸܚܙܹܐ ܡܵܪܝܵܐ ܡ̣ܢ ܫܡܲܝܵܐ.
48 ܥܲܝܢܝ ܐܸܬ̇ܛܲܪܦܲܬ̤ ܥܲܠ ܢܲܦ̮ܫܝ: ܡ̣ܢ ܟܠܗܹܝܢ ܒ̈ܢܵܬ̣ ܩܘܼܪ̈ܝܵܐ ܕܝܼܠܝ.
49 ܦܬܲܚ̣ܘ ܥܠܲܝܢ ܦܘܼܡܗܘܿܢ ܟܠܗܘܿܢ ܒܥܸܠܕ̇ܒ̣ܵܒܲܝ̈ܢ.
50 ܕܸܚ̱ܠܬ̣ܵܐ ܘܙܵܘܸܥܬ̣ܵܐ ܗܘ̤ܵܬ̣ ܠܲܢ ܓܘܼܡܵܨܵܐ ܘܲܬ̣ܒ̣ܵܪܵܐ.
51 ܬܲܦܹ̈ܐ ܕܡܲـ̈ـܝܵܐ ܐܲܪ̈ܕ̇ܝ ܥܲܝ̈ܢܲܝ ܥܲܠ ܬܒ̣ܵܪܵܗ̇ ܕܒܲܪܬ̣ ܥܲܡܝ.
52 ܡܨܵܕ݂ ܨܵܕ݂ܘܼܢܝ ܐܲܝܟ݂ ܨܸܦܪܵܐ ܒܥܸܠܕ̇ܒ̣ܵܒܲܝ̈ ܡܲܓܵܢ.
53 ܫܲܬܸ̇ܩ̣ܘ ܒܓ̣ܘܼܒܵܐ ܚܲܝܲܝ̈: ܫܕ݂ܵܘ ܒܝܼ ܟܹܐܦܹ̈ܐ.
54 ܛܵܦ̣ܘ ܡܲـ̈ـܝܵܐ ܠܥܸܠ ܡ̣ܢ ܪܹܫܝ: ܐܸܡ̇ܪܹܬ̣ ܐܸܬ̣ܪܲܚܩܹ̇ܬ̣.
55 ܩܪܹܝܬ̣ ܫܡܵܟ݂ ܡܵܪܝܵܐ: ܡ̣ܢ ܓܘܼܒܵܐ ܬܲܝܬܵܝܵܐ.
56 ܩܵܠܝ ܫ̣ܡܲܥܬ̇: ܠܵܐ ܬܲܪܟܸ̇ܢ ܐܸܕ݂ܢܵܟ݂. ܐܸܠܵܐ ܐܲܪܘܲܚ ܠܝܼ ܘܲܦܪܘܿܩܲܝܢܝ.
57 ܩ̣ܪܸܒ̣ܬ̇ ܒܝܵܘܡܵܐ ܕܲܩܪܹܝܬ̣ܵܟ݂: ܘܐܸܡܲܪܬ̇ ܠܝܼ ܠܵܐ ܬܸܕ݂ܚܲܠ.
58 ܕܵܢܬ̇ ܡܵܪܝܵܐ ܕܝܼܢܵܐ ܕܢܲܦ̮ܫܝ ܘܲܦܪܲܩ̣ܬ̇ ܚܲܝܲܝ̈.
59 ܚ̣ܙܲܝܬ̇ ܡܵܪܝܵܐ ܡܘܼܟܵܟ݂ܝ ܘܕ݂ܵܢ̣ܬ̇ ܕܝܼܢܝ.
60 ܚ̣ܙܲܝܬ̇ ܟܠܵܗ̇ ܢܩܲܡܬ̣ܗܘܿܢ: ܘܟ݂ܠ ܕܐܸܬ̣ܚܲܫܲܒ̣ܘ ܥܠܲܝ.
61 ܫ̣ܡܲܥܬ̇ ܚܸܣܕ̇ܗܘܿܢ ܡܵܪܝܵܐ: ܘܟ݂ܠ ܕܐܸܬ̣ܚܲܫܲܒ̣ܘ ܥܠܲܝ.
62 ܣܸܦ̈ܘܵܬ̣ܵܐ ܕܩܵܝ̈ܡܵܢ: ܘܪ̈ܵܢܝܵܢ ܥܠܲܝ ܟܠܹܗ ܝܵܘܡܵܐ.
63 ܡܵܘܬܲܒ̣ܗܘܿܢ ܘܲܡܩܵܡܗܘܿܢ: ܐܸܣܬܲܟ̇ܠܹܬ̣ ܐܸܢܵܐ ܡ̣ܢ ܪܸܢܝܼܗܘܿܢ.
64 ܬܲܗܦܸܟ݂ ܠܗܘܿܢ ܦܘܼܪܥܵܢܗܘܿܢ ܡܵܪܝܵܐ: ܐܲܝܟ݂ ܡܲܥܒܸ̇ܕ݂ ܐܝܼܕܲܝ̈ܗܘܿܢ.
65 ܬܸܬܸ̇ܠ ܠܗܘܿܢ ܟܲܪܝܘܼܬ̣ܵܐ ܕܠܒܵܐ: ܘܲܡܚܘܿܬ̣ܵܟ݂ ܠܗܘܿܢ ܬܸܪܕ̇ܘܿܦ.
66 ܘܲܒ̣ܪܘܼܓ̣ܙܵܟ݂ ܬܵܘܒܸ̇ܕ݂ ܐܸܢܘܿܢ ܡ̣ܢ ܬܚܹܝܬ̣ ܫܡܲܝ̈ܟ ܡܵܪܝܵܐ.
1 ܐܲܝܟܲܢܵܐ ܡܸܣܬ̇ܠܹܐ ܕܲܗܒ̣ܵܐ ܛܵܒ̣ܵܐ: ܘܫܵܢܹ̇ܐ ܨܘܼܒ̣ܥܵܐ ܫܲܦܝܼܪܵܐ: ܡܸܫ̈ܬܲܕ݂ܝܵܢ ܟܹܐܦܹ̈ܐ ܕܩܘܼܕ݂ܫܵܐ ܒܪܹܫ ܟܠܗܘܿܢ ܫܘܼܩܹ̈ܐ.
2 ܒܢܲܝ̈ ܨܸܗܝܘܿܢ ܝܲܩܝܼܪܹ̈ܐ ܕܲܡܝܲܬ̇ܪܝܼܢ ܗ̄ܘܼܵܘ ܡ̣ܢ ܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܐܲܝܟܲܢܵܐ ܐܸܬ̣ܚ̄ܫܸܒ̣ܘ ܐܲܝܟ݂ ܡܵܐܢܹ̈ܐ ܕܚܸܨܦܵܐ: ܥܒ̣ܵܕ݂ ܐܝܼ̈ܕܲܝܵܐ ܕܦܲܚܵܪܵܐ.
3 ܓܠܲܝ̈ ܐܲܝܟ݂ ܝܵܪܘܿܪܹ̈ܐ ܬܕܲܝܗܹܝ̈ܢ: ܘܐܲܝܢܸܩ ܓܪ̈ܲܝܗܹܝܢ. ܗܘ̤ܵܬ̣ ܥܲܡܝ ܠܲܡܚܘܿܬ̣ܵܐ ܕܠܲܝܬ̇ ܠܵܗ̇ ܐܵܣܝܘܼܬ̣ܵܐ: ܘܐܲܝܟ݂ ܢܲܥܵܡܵܐ ܒܡܲܕ݂ܒ̇ܪܵܐ.
4 ܕܒܸܩ ܠܸܫܵܢܹܗ ܕܝܲܥܩܘܿܒ̣ ܕܝܲܠܘܼܕ݂ܵܐ ܠܲܫܡܲܝ̈ ܚܸܟܹ̇ܗ ܒܨܲܗܝܵܐ: ܛܠܵܝܹ̈ܐ ܫܐܸܠ̣ܘ ܠܲܚܡܵܐ: ܘܠܲܝܬ̇ ܕܩܵܨܹ̇ܐ ܘܝܵܗܹ̇ܒ̣ ܠܗܘܿܢ.
5 ܗܵܢ̇ܘܿܢ ܕܐܵܟ݂ܠܝܼܢ ܗ̄ܘܼܵܘ ܦܘܼܢܵܩܹ̈ܐ: ܗܵܐ ܣܝܼܡܝܼܢ ܒܫܘܼܩܹ̈ܐ. ܕܐܸܬ̣ܪܲܒ̇ܝܼܘ ܥܲܠ ܙܚܘܿܪ̈ܝܵܬ̣ܵܐ: ܗܵܐ ܕܵܡ̇ܟ̇ܝܼܢ ܒܩܸܩ̈ܠܵܬ̣ܵܐ.
6 ܘܲܣܓ̣ܝܼ ܥܵܘܼܠܵܗ̇ ܕܒܲܪܬ̣ ܥܲܡܝ ܡ̣ܢ ܚܛܝܼܬ̣ܵܗ̇ ܕܲܣܕ݂ܘܿܡ: ܕܐܸܬ̣ܗܲܦܟܲܬ̤ ܡ̣ܢ ܫܸܠܝܵܐ ܘܠܵܐ ܠܐ̈ܝܼ ܒܵܗ̇ ܐܝܼ̈ܕܲܝܵܐ.
7 ܙܟ݂ܝܼܘ ܢܙܝܼܪܹ̈ܝܗ̇ ܡ̣ܢ ܬܲܠܓܵܐ: ܘܲܚܘܲܪܘ ܡ̣ܢ ܚܲܠܒ̣ܵܐ ܒܡܲܪ̈ܗܝܵܬ̣ܗܘܿܢ: ܣ̣ܡܲܩܘ ܓܲܪ̈ܡܲܝܗܘܿܢ ܡ̣ܢ ܣܲܪܕ̇ܘܿܢ ܘܡ̣ܢ ܣܲܦܝܼܠܵܐ ܓܘܼܫ̱ܡܗܘܿܢ.
8 ܚܫܸܟ݂ ܡ̣ܢ ܫܘܼܚܵܪܹ̈ܐ ܚܸܙ̱ܘܗܘܿܢ: ܘܠܵܐ ܐܸܬ̣̱ܝܼܕܲܥܘ ܒܫܘܼܩܹ̈ܐ: ܩܦܘܿܕ݂ ܡܸܫܟ̇ܗܘܿܢ ܥܲܠ ܓܲܪ̈ܡܲܝܗܘܿܢ: ܝܼܒܸܫ̣ ܘܲܗܘ̤ܵܐ ܐܲܝܟ݂ ܩܲܝܣܵܐ.
9 ܛܵܒ̣ܝܼܢ ܗ̄ܘܼܵܘ ܩܛܝܼ̈ܠܲܝ ܚܲܪܒܵܐ ܡ̣ܢ ܩܛܝܼܠܲܝ̈ ܟܲܦܢܵܐ: ܕܕ݂ܵܒ̣ܘ ܐܲܝܟ݂ ܗܵܢ̇ܘܿܢ ܕܲܡܡܲܚܹܝܢ ܘܲܫܕܹܝܢ ܒܚܲܩܠܵܐ.
10 ܐܝܼܕܲܝ̈ ܢܸܫܹ̈ܐ ܡܪ̈ܲܚܡܵܢܝܵܬ̣ܵܐ ܒܲܫܸܠ̣ ܒܢܲܝ̈ܗܹܝܢ: ܘܲܗܘ̤ܵܘ ܠܗܹܝܢ ܠܡܹܐܟ݂ܘܼܠܬܵܐ ܒܲܬ̣ܒ̣ܵܪܵܗ̇ ܕܒܲܪܬ̣ ܥܲܡܝ.
11 ܫܲܡܠܝܼ ܡܵܪܝܵܐ ܚܸܡܬܹܗ: ܘܐܸܫܲܕ݂ ܚܸܡܬ̣ܵܐ ܕܪܘܼܓ̣ܙܹܗ: ܘܲܫܒܲܩ ܢܘܼܪܵܐ ܒܨܸܗܝܘܿܢ: ܘܫܲܠܗܹܒ̣ܝܼܬ̣ܵܐ ܐܸܟ݂ܠܲܬ̤ ܫܲܬ̣ܐ̱ܣܹ̈ܝܗ̇.
12 ܠܵܐ ܗܲܝܡܸܢܘ ܡܲܠ̈ܟܹ̇ܐ ܕܐܲܪܥܵܐ: ܘܟ݂ܠܗܘܿܢ ܥܵܡܘܿܪܹ̈ܝܗ̇ ܕܬܸܒܹܝܠ: ܕܐܵܬܹ̇ܐ ܘܥܵܐܹ̇ܠ ܒܥܸܠܕ̇ܒ̣ܵܒ̣ܵܐ ܘܐܵܠܘܿܨܵܐ ܒܬܲܪ̈ܥܹܝܗ̇ ܕܐܘܿܪܸܫܠܸܡ.
13 ܡܸܛܠ ܚܛܵܗܹ̈ܐ ܕܲܢܒ̣̈ܝܹܝܗ̇: ܘܥܵܘܼܠܵܐ ܕܟ݂ܵܗ̈ܢܹܝܗ̇: ܕܐܸܫܲܕ݂ܘ ܒܓ̣ܵܘܵܗ̇ ܕܡܵܐ ܕܙܲܕ̇ܝܼܩܹ̈ܐ.
14 ܢܲܕ݂ܘ ܪܵܘܪ̈ܒ̣ܵܢܹܝܗ̇ ܒܫܘܼܩܹ̈ܝܗ̇: ܘܐܸܬ̣ܦܲܠܦܲܠܘ ܒܲܕ݂ܡܵܐ: ܘܠܵܐ ܐܸܫܟܲܚ̣ܘ ܕܢܸܩ̱ܪܒ̣ܘܼܢ ܠܲܠܒ̣ܘܼܫܲܝ̈ܗܘܿܢ.
15 ܦܪܘܿܩ ܡܸܢܗܘܿܢ: ܘܛܲܡܹ̈ܐܐ ܩܪܵܘ ܐܸܢܘܿܢ. ܥܒܲܪܘ ܥܒܲܪܘ ܘܠܵܐ ܬܸܬ̣ܩܲܪܒ̣ܘܼܢ ܠܗܘܿܢ: ܡܸܛܠ ܕܐܲܪܓܸ̇ܙܘ ܐܵܦ ܐܸܬ̇ܛܲܪܲܦܘ: ܐܸܡܲܪܘ ܒܹܝܬ̣ ܥܲܡܡܹ̈ܐ ܕܬ̣ܘܼܒ̣ ܠܵܐ ܢܵܘܣܦܘܼܢ ܠܡܸܥܡܲܪ.
16 ܥܲܕ݂ ܩܵܝܡ̇ܝܼܢ ܚ̄ܢܲܢ ܚ̣ܫܸܟ݂ ܥܲܝܢܲܝ̈ܢ ܡ̣ܢ ܥܘܼܕ݂ܪܵܢܲܢ: ܣܪܝܼܩܵܐܝܼܬ̣ ܕܵܩ̣ܘ ܕܵܘ̈ܩܲܝܢ ܠܘܵܬ̣ ܥܲܡܵܐ ܕܠܵܐ ܦܵܪܹܩ.
17 ܦܲܪܨܘܿܦܹܗ ܕܡܵܪܝܵܐ ܦܲܠܸܓ̣ ܐܸܢܘܿܢ: ܘܠܵܐ ܢܵܘܣܸܦ ܠܲܡܚܵܪ ܒܗܘܿܢ: ܒܐܲܦܲܝ̈ ܟܵܗ̈ܢܹܐ ܠܵܐ ܢܣܲܒ̣ܘ: ܘܥܲܠ ܣܵܒܹ̈ܐ ܠܵܐ ܪܲܚܸܡ̣ܘ.
18 ܨܵܕ݂ܘ ܠܲܕ̇ܕܲܩܕ̇ܝܼܢ ܠܕܲܡܗܲܠܟ݂ܝܼܢ ܒܫܘܼܩܹ̈ܐ. ܩ̣ܪܸܒ̣ ܩܸܨܲܝܢ: ܡܠܵܘ ܝܵܘ̈ܡܲܝܢ: ܡܸܛܠ ܕܐܸܬ̣ܵܐ ܥܸܕܵܢܲܢ.
19 ܩܲܠܝܼܠܝܼܢ ܗ̄ܘܼܵܘ ܪ̈ܵܕ݂ܦܲܝܢ ܡ̣ܢ ܢܸܫܪ̈ܲܝ ܫܡܲܝܵܐ: ܥܲܠ ܛܘܼܪܹ̈ܐ ܪܲܕ݂ܦܘܼܢ: ܘܲܒ̣ܡܲܕ݂ܒ̇ܪܵܐ ܐܸܬ̣ܟܲܡܲܢܘ ܠܲܢ.
20 ܪܘܼܚܵܐ ܕܐܲܦܲܝ̈ܢ ܡܫܝܼܚܹܗ ܕܡܵܪܝܵܐ: ܐܸܬ̇ܬ̇ܚܸܕ݂ ܒܓ̣ܘܼܡܵܨܗܘܿܢ: ܗܵܘܿ ܕܐܸܡܲܪܢ ܕܲܒ̣ܛܸܠܵܠܹܗ ܢܸܚܹܐ ܒܹܝܬ̣ ܥܲܡܡܹ̈ܐ.
21 ܕܘܼܨܝ ܘܲܚܕ݂ܵܝ ܒܲܪܬ̣ ܐܲܕ݂ܘܿܡ ܕܝܵܬ̣ܒܵܐ ܒܐܲܪܥܵܐ ܕܥܘܿܨ: ܐܵܦ ܠܹܟ݂ܝ ܢܸܡܛܸܐ ܟܵܣܵܐ: ܬܸܪܘܹܝܢ ܘܬܸܬ̇ܛܲܪܦܝܼܢ.
22 ܓܡܲܪܘ ܚܛܵܗܲܝ̈ܟ̇ܝ ܒܲܪܬ̣ ܨܸܗܝܘܿܢ: ܬܘܼܒ̣ ܠܵܐ ܢܵܘܣܸܦ ܠܲܡܓܲܠܵܝܘܼܬܹܟ݂ܝ ܐܸܬ̣ܦܩܸܕ݂ܘ ܚܵܘܒܲܝ̈ܟ̇ܝ ܒܲܪܬ̣ ܐܲܕ݂ܘܿܡ: ܘܐܸܬ̣ܓ̇ܠܝܼܘ ܚܛܵܗܲܝ̈ܟ̇ܝ.
1 ܐܸܬ̇ܕܲܟ݂ܪ ܡܵܪܝܵܐ ܡܵܢܵܐ ܗܘ̤ܵܐ ܠܲܢ: ܚܘܼܪ ܘܲܚܙܝܼ ܚܸܣܕܲܢ.
2 ܝܵܪܬ̇ܘܼܬܲܢ ܐܸܬ̣ܗܲܦܟܲܬ̤ ܠܢܘܼܟ݂ܪ̈ܵܝܹܐ: ܘܒ̣ܵܬܲܝ̈ܢ ܠܢܘܼܟ݂ܪ̈ܵܝܹܐ.
3 ܝܲܬ̣ܡܹ̈ܐ ܗ̤ܘܲܝܢ ܕܠܵܐ ܐܲܒ̣ܵܐ: ܘܐܸܡ̈ܗܵܬܲܢ ܐܲܝܟ݂ ܐܲܪ̈ܡܠܵܬ̣ܵܐ.
4 ܡܲܝ̈ܢ ܒܟܸܣܦܵܐ ܐܸܫ̣ܬ̇ܝܼܢ: ܘܩܲܝ̈ܣܲܝܢ ܒܲـ̈ـܕ݂ܡܲܝܵܐ.
5 ܐܸܬ̣ܵܘ ܥܲܠ ܨܵܘܪܲܢ: ܐܸܬ̣̱ܪܕܸܦܢ ܘܲܠܐ̣ܝܼܢ ܘܠܵܐ ܐܸܬ̇ܬ̇ܢܝܼܚܝܢ.
6 ܡܸܨܪ̈ܵܝܹܐ ܝܲܗ̄ܒ̣ܘ ܐܝܼܕ݂ܵܐ: ܘܐܵܬ̣ܘܿܪ̈ܵܝܹܐ ܠܲܡܣܲܒܵܥܘܼ ܠܲܚܡܵܐ.
7 ܐܲܒ̣ܵܗܲܝ̈ܢ ܚܛܵܘ ܘܠܲܝܬ̇ ܐܸܢܘܿܢ: ܘܲܚܢܲܢ ܚܛܵܗܲܝ̈ܗܘܿܢ ܣܒܲܠܢ.
8 ܓܲܒ̣ܕܹ̇ܐ ܐܸܫܬܲܠܲܛܘ ܒܲܢ: ܘܠܲܝܬ̇ ܕܦܵܪܹܩ ܠܲܢ ܡ̣ܢ ܐܝܼܕܲܝ̈ܗܘܿܢ.
9 ܒܢܲܦ̮ܫܲܢ ܢܲܥܸܠ ܠܲܚܡܵܐ ܡ̣ܢ ܩܕ݂ܵܡ ܚܲܪܒܵܐ ܕܲܒ̣ܡܲܕ݂ܒ̇ܪܵܐ.
10 ܡܸܫܟܲܝ̈ܢ ܐܲܝܟ݂ ܕܡ̣ܢ ܬܲܢܘܼܪܵܐ ܐܸܬ̣ܩ̄ܦܸܕ݂ܘ: ܘܲܩܢܵܐܘܼ ܡ̣ܢ ܩܕ݂ܵܡ ܛܘܼܪܵܦܵܐ ܕܟܲܦܢܵܐ.
11 ܢܸܫܹ̈ܐ ܒܨܸܗܝܘܿܢ ܨܲܥܲܪܘ: ܘܲܒ̣ܬ̣ܘܼ̈ܠܵܬ̣ܵܐ ܒܩܘܼܪ̈ܝܵܐ ܕܲܝܗܘܼܕ݂ܵܐ.
12 ܪܵܘܪ̈ܒ̣ܵܢܹܐ ܒܐܝܼܕܲܝ̈ܗܘܿܢ ܐܸܬ̇ܬܲܠܝܼܘ: ܘܐܲܦܲܝ̈ ܣܵܒܹ̈ܐ ܠܵܐ ܝܲܩܲܪܘ.
13 ܓܲܕ̇ܘܼ̈ܕܹܐ ܛܚܲܢܘ ܪܲܚܝܵܐ: ܘܲܥܠܲܝ̈ܡܹܐ ܒܩܲܝܣܹ̈ܐ ܐܸܬ̇ܬܲܩܲܠܘ.
14 ܣܵܒܹ̈ܐ ܡ̣ܢ ܬܲܪܥܵܐ ܒܛܸܠܘ: ܘܓܲܕ̇ܘܼ̈ܕܹܐ ܡ̣ܢ ܚܲܕ݂ܘܲܬ̣ܗܘܿܢ.
15 ܒܸܛܠܲܬ̤ ܚܲܕ݂ܘܼܬ̣ܵܐ ܕܠܸܒܲܢ: ܐܸܬ̣ܗܲܦܟܲܬ̤ ܠܐܸܒ̣ܠܵܐ ܚܲܕ݂ܘܼܬܲܢ.
16 ܢܦܲܠ̣ ܟܠܝܼܠܵܐ ܕܪܹܫܲܢ: ܘܵܝ ܠܲܢ ܥܲܠ ܕܲܚܛܲܝܢ.
17 ܡܸܛܠ ܗܵܢܵܐ ܗܵܐ ܕܵܘܹ̇ܐ ܠܸܒܲܢ: ܡܸܛܠ ܗܵܢܵܐ ܗܵܐ ܚܸܫ̈ܘܿܟ݂ܵܢ ܥܲܝ̈ܢܲܝܢ.
18 ܥܲܠ ܛܘܼܪܵܐ ܕܨܸܗܝܘܿܢ ܕܲܚܪܸܒ̣: ܘܬܲܥ̈ܠܹܐ ܗܲܠܸܟ݂ܘ ܒܹܗ.
19 ܘܐܲܢ̄ܬ̇ ܡܵܪܝܵܐ ܠܥܵܠܲܡ ܐܝܼܬܲܝܟ: ܘܟ݂ܘܼܪܣܝܵܟ݂ ܠܕ݂ܵܪܕܵܪ̈ܝܼܢ.
20 ܠܵܐ ܠܥܵܠܲܡ ܬܸܫܒ̇ܩܲܢ: ܘܬܸܛܥܹܝܢ ܢܘܼܓ̣ܪܵܐ ܕܝܵܘ̈ܡܵܬ̣ܵܐ.
21 ܐܲܦܢܵܢ ܡܵܪܝܵܐ ܠܘܵܬ̣ܵܟ݂ ܘܢܸܬ̣ܦ̄ܢܸܐ: ܚܲܕܸ̇ܬ̣ ܝܵܘ̈ܡܵܬܲܢ ܐܲܝܟ݂ ܕܡ̣ܢ ܩܕ݂ܝܼܡ.
22 ܡܸܛܠ ܕܡܲܣܠܵܝܘܼ ܐܲܣܠܝܼܬܵܢ: ܘܲܪܓܸܙܬ̇ ܥܠܲܝܢ ܛܵܒ̣.
1 ܦܸܚܡܵܐ ܕܐܸܓܲܪܬܵܐ ܕܫܲܕܲܪ ܐܹܪܲܡܝܵܐ ܠܲܫ̈ܒܲܝܵܐ ܕܐܸܫܬ̇ܒ̣ܝܼܘ ܠܒܵܒܹܠ: ܕܲܫܒ̣ܵܐ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܠܲܡܚܵܘܵܝܘܼ ܐܸܢܘܿܢ ܐܲܝܟ݂ ܕܐܸܬ̣ܦܩܸܕ݂ ܡ̣ܢ ܡܵܪܝܵܐ. ܡܸܛܠ ܚܛܵܗܹ̈ܐ ܕܲܚ̣ܛܲܝܬ̇ܘܿܢ ܩܕ݂ܵܡ ܡܵܪܝܵܐ ܐܸܫܬ̇ܒ̣ܝܼܬ̇ܘܿܢ ܠܒ̣ܵܒܹܠ: ܡ̣ܢ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ.
2 ܡܵܐ ܕܥܲܠ̣ܬ̇ܘܿܢ ܠܒ̣ܵܒܹܠ: ܬܸܗܘܘܿܢ ܬܲܡܵܢ ܫܢܲـ̈ـܝܵܐ ܣܲܓ̇ܝܼܵܐ̈ܬ̣ܵܐ ܘܙܲܒ̣ܢܵܐ ܢܲܓ̇ܝܼܪܵܐ ܥܕܲܡܵܐ ܠܫܲܒ̣ܥܝܼܢ ܫܢ̈ܝܼܢ. ܘܡ̣ܢ ܒܵܬܲܪ ܫܲܒ̣ܥܝܼܢ ܫܢܝܼ̈ܢ ܐܲܦܸܩܟ݂ܘܿܢ ܡ̣ܢ ܬܲܡܵܢ ܒܲܫܠܵܡܵܐ.
3 ܗܵܫܵܐ ܕܹܝܢ ܗܵܐ ܚܵܙܹ̇ܝܢ ܐ̄ܢܬ̇ܘܿܢ ܒܒ̣ܵܒܹܠ ܐܲܠܵܗܹ̈ܐ ܕܣܹܐܡܵܐ ܘܲܕ̇ܕܲܗܒ̣ܵܐ ܘܲܕ݂ܩܲܝܣܵܐ ܘܲܕ݂ܟܹܐܦܹ̈ܐ: ܕܡܸܫܬܲܩܠܝܼܢ ܥܲܠ ܟܲܬ̣̈ܦܵܬ̣ܵܐ: ܘܲܡܚܵܘܹ̇ܝܢ ܕܸܚ̈ܠܵܬ̣ܵܐ ܠܥܲܡܡܹ̈ܐ.
4 ܐܸܙܕܲܗ̄ܪܘ ܗܵܟܹܝܠ ܕܲܠܡܵܐ ܐܵܦ ܐܲܢ̄ܬ̇ܘܿܢ ܬܸܬ̇ܕܲܡܘܿܢ ܠܗܘܿܢ ܠܥܲܡܡܹ̈ܐ. ܠܵܐ ܬܸܕ݂ܚ̄ܠܘܼܢ ܡܸܢܗܘܿܢ: ܘܠܵܐ ܬܙܘܼܥܘܼܢ.
5 ܟܲܕ݂ ܬܸܚܙܘܿܢ ܟܸܢܫܹ̈ܐ ܣܲܓ̇ܝܼ̈ܐܹܐ ܩܕ݂ܵܡܲܝܗܘܿܢ ܘܒܸܣܬܲܪܗܘܿܢ ܕܣܵܓ̣ܕ̇ܝܼܢ ܠܗܘܿܢ: ܐܸܠܵܐ ܐܸܡܲܪܘ ܐܲܢ̄ܬ̇ܘܿܢ ܒܬܲܪ̈ܥܝܵܬ̣ܟ݂ܘܿܢ: ܠܵܟ݂ ܗ̄ܘܼ ܡܵܪܝܵܐ ܘܵܠܹ̇ܐ ܠܡܸܣܓܲܕ݂ ܒܲܠܚܘܿܕ݂.
6 ܡܸܛܠ ܕܡܲܠܲܐܟܹܗ ܕܡܵܪܝܵܐ ܥܲܡܟ݂ܘܿܢ ܗ̄ܘܼ. ܘܗ̤ܘ ܢܸܬ̣ܒܲܥ ܢܲܦ̮̈ܫܵܬ̣ܟ݂ܘܿܢ.
7 ܠܸܫܵܢܵܐ ܓܹܝܪ ܐܝܼܬ̣ ܠܗܘܿܢ ܕܲܓ̣ܠܝܼܦ ܒܝܲܕ݂ ܢܲܓܵܪܵܐ. ܘܲܩܪܝܼܡܝܼܢ ܒܕܲܗܒ̣ܵܐ ܘܲܒ̣ܣܹܐܡܵܐ. ܘܠܵܐ ܡܸܫܟ̇ܚܝܼܢ ܠܲܡܡܲܠܵܠܘܼ. ܡܸܛܠ ܕܲܣܪ̈ܝܼܩܹܐ ܐܸܢܘܿܢ ܘܡܝܼ̈ܬܹܐ.
8 ܘܐܲܝܟ݂ ܕܫܲܦܝܼܪ ܨܸܒ̣ܬܵܐ ܠܲܒ̣ܬ̣ܘܼܠܬܵܐ: ܗܵܟܲܢܵܐ ܫܵܩ̇ܠܝܼܢ ܕܲܗܒ̣ܵܐ.
9 ܘܚܵܫܠܝܼܢ ܟܠܝܼ̈ܠܹܐ: ܘܣܵܝ̇ܡܝܼܢ ܒܪܹ̈ܫܹܐ ܕܐܲܠܵܗܲܝ̈ܗܘܿܢ. ܝܼܕ݂ܝܼܥܵܐ ܗ̄ܝܼ ܕܹܝܢ ܕܡܵܐ ܕܟ݂ܘܼܡܪ̈ܲܝܗܘܿܢ ܒܵܣܡܝܼܢ: ܡܪܝܼܡܝܼܢ ܕܲܗܒ̣ܵܐ ܘܣܹܐܡܵܐ ܡ̣ܢ ܐܲܠܵܗܲܝ̈ܗܘܿܢ: ܘܲܥܠܲܝܗܘܿܢ ܡܲܦܩܝܼܢ.
10 ܘܝܵܗ̄ܒ̇ܝܼܢ ܡܸܢܹܗ ܡ̣ܢ ܥܒ̣ܵܕ݂ܵܐ ܠܙܵܢܝܼܬ̣ܵܐ. ܘܲܡܨܲܒ̇ܬ̣ܝܼܢ ܠܗܘܿܢ ܐܲܝܟ݂ ܒܢܲܝ̈ܢܵܫܵܐ ܒܲܠܒ̣ܘܼܫܹ̈ܐ: ܠܐܲܠܵܗܹ̈ܐ ܕܕܲܗܒ̣ܵܐ ܘܲܕ݂ܣܹܐܡܵܐ ܘܲܕ݂ܩܲܝܣܵܐ.
11 ܗܸܢܘܿܢ ܕܹܝܢ ܠܵܐ ܡܸܬ̣ܦܲܪܩܝܼܢ ܡ̣ܢ ܫܘܼܚܬܵܐ ܘܡ̣ܢ ܚܒ̣ܵܠܵܐ. ܠܲܒ̣ܫܝܼܢ ܠܒ̣ܘܼܫܵܐ ܕܐܲܪܓ̇ܘܵܢܵܐ.
12 ܘܡܵܪܩܝܼܢ ܐܲܦܲܝ̈ܗܘܿܢ ܡܸܛܠ ܚܸܠܵܐ ܕܣܵܠܹ̇ܩ ܥܠܲܝܗܘܿܢ ܡ̣ܢ ܒܲܝܬܵܐ.
13 ܘܫܲܒ̣ܛܵܐ ܐܲܚܝܼܕ݂ ܐܲܝܟ݂ ܓܲܒ̣ܪܵܐ ܕܲܝܵܢܵܐ ܕܐܲܬ̣ܪܵܐ: ܗܵܢܵܐ ܕܠܲܐܝܠܹܝܢ ܕܚܵܛܹ̇ܝܢ ܒܹܗ ܠܡܵܘܒܵܕ݂ܘܼ ܠܵܐ ܡܸܫܟܲܚ.
14 ܘܐܲܚܝܼܕ݂ ܚܲܪܒܵܐ ܒܝܲܡܝܼܢܹܗ: ܘܢܵܪܓܵܐ ܒܣܸܡܵܠܹܗ. ܘܢܲܦ̮ܫܹܗ ܡ̣ܢ ܩܪܵܒ̣ܵܐ ܘܡ̣ܢ ܠܸܣܛܵܝܹ̈ܐ ܠܵܐ ܡܸܫܟܲܚ ܠܲܡܫܵܘܙܵܒ̣ܘܼ ܕܡ̣ܢ ܗܵܠܹܝܢ ܢܸܬ̣ܝܲܕ݂ܥܘܼܢ ܕܠܵܐ ܗܘ̤ܵܘ ܐܲܠܵܗܹ̈ܐ. ܠܵܐ ܬܸܕ݂ܚ̄ܠܘܼܢ ܠܗܘܿܢ.
15 ܐܲܝܟܲܢܵܐ ܓܹܝܪ ܕܡܵܐܢܵܐ ܕܦܲܚܵܪܵܐ ܡܵܐ ܕܐܸܬ̇ܬ̇ܒܲܪ ܠܲܝܬ̇ ܒܹܗ ܚܲܫܚܘܼ.
16 ܗܵܟܲܢܵܐ ܐܸܢܘܿܢ ܐܲܠܵܗܲܝ̈ܗܘܿܢ. ܙܵܩ̇ܦܝܼܢ ܠܗܘܿܢ ܒܒ̣ܵـ̈ـܬܹ̇ܐ. ܥܝܢܲܝ̈ܗܘܿܢ ܡܲܠ̈ܝܵܢ ܥܲܦܪܵܐ: ܡ̣ܢ ܚܸܠܵܐ ܕܪܸ̈ܓ̣ܠܲܝܗܘܿܢ ܕܐܲܝܠܹܝܢ ܕܥܵܐܠܝܼܢ ܘܲܕ݂ܢܵܦܩܝܼܢ.
17 ܘܐܲܝܟ݂ ܐ̄ܢܵܫ ܕܡܸܬ̣ܚܲܝܲܒ̣ ܡ̣ܢ ܡܲܠܟܵܐ: ܗܵܟܲܢܵܐ ܡܬܲܚܡܝܼܢ ܕܪ̈ܵܥܲܝܗܘܿܢ ܐܲܝܟ݂ ܡܚܲܝ̈ܒܹܐ ܠܡܵܘܬܵܐ. ܒܵܬܲܝ̈ܗܘܿܢ ܡܫܲܪܪܝܼܢ ܟܘܼܡܪ̈ܲܝܗܘܿܢ. ܘܐܵܚܕ̇ܝܼܢ ܒܣܘܼܟ̇ܪܹ̈ܐ ܘܲܒ̣ܡܘܼܟ݂̈ܠܹܐ: ܕܠܵܐ ܢܸܓ̣ܢܒ̣ܘܼܢ ܐܸܢܘܿܢ ܠܸܣܛܵܝܹ̈ܐ.
18 ܘܲܫܪ̈ܵܓܹܐ ܣܲܓ̇ܝܼ̈ܐܹܐ ܡܲܢ̱ܗܪܝܼܢ ܠܗܘܿܢ ܠܐܲܝܠܹܝܢ ܕܥܲܝܢܲܝ̈ܗܘܿܢ ܠܵܐ ܚܵܙ̈ܝܵܢ.
19 ܐܝܼܬܲܝܗܘܿܢ ܕܹܝܢ ܐܲܝܟ݂ ܩܵܪ̈ܝܵܬ̣ܵܐ ܕܡ̣ܢ ܒܲܝܬܵܐ. ܘܠܸܒ̇ܗܘܿܢ ܫܵܛܹ̇ܐ ܘܛܵܥܹ̇ܐ. ܘܡܸܬ̣ܚܲܒ̇ܠܝܼܢ ܡ̣ܢ ܝܲܕ݂ ܪ̈ܲܚܫܵܐ ܕܐܲܪܥܵܐ. ܘܡܸܬ̣ܐܲܟ݂ܠܝܼܢ ܗܸܢܘܿܢ ܘܲܠܒ̣ܘܼܫܗܘܿܢ. ܘܠܵܐ ܝܵܕ݂ܥܝܼܢ.
20 ܕܲܡܫܲܚܪ̈ܵܢ ܐܲܦܲܝ̈ܗܘܿܢ ܘܐܘܼ̈ܟܵܡܵܢ ܡ̣ܢ ܬܸܢܵܢܵܐ ܕܣܵܠܹ̇ܩ ܡ̣ܢ ܒܲܝܬܵܐ ܥܲܠ ܓܘܼܫ̱ܡܗܘܿܢ.
21 ܘܥܲܠ ܪܹ̈ܫܲܝܗܘܿܢ ܝܵܬ̣ܒ̇ܝܼܢ ܦܪ̈ܲܚܕ̇ܘܿܕܹܐ ܘܲܣܢܘܿܢ̈ܝܵܬ̣ܵܐ: ܘܢܲܥܒܹ̈ܐ ܐܲܟ݂ܚ̄ܕ݂ܵܐ ܘܐܵܦ ܓܘܼܡܪܵܪܹ̈ܐ.
22 ܘܡ̣̤ܢ ܗܵܠܹܝܢ ܬܸܫܬܵܘܕ̇ܥܘܼܢ. ܕܠܵܐ ܗܘ̤ܵܘ ܐܲܠܵܗܹ̈ܐ. ܘܠܵܐ ܬܸܕ݂ܚ̄ܠܘܼܢ ܠܗܘܿܢ.
23 ܕܲܗܒ̣ܵܐ ܓܹܝܪ ܕܲܩܪܝܼܡ ܥܠܲܝܗܘܿܢ ܠܫܘܼܦܪܵܐ: ܐܸܢܗ̤ܘ ܕܐ̄ܢܵܫ ܠܵܐ ܢܸܡ̱ܪܩܝܼܘܗܝ ܡ̣ܢ ܫܘܼܚܬܹ̇ܗ: ܠܵܐ ܡܲܒ̣ܪܸܩ. ܐܵܦܠܵܐ ܟܲܕ݂ ܡܸܬ̣ܦܲܫܪܝܼܢ ܗ̄ܘܼܵܘ ܡܲܪܓ̇ܫܝܼܢ ܗ̄ܘܼܵܘ.
24 ܡܸܛܠ ܕܒܲܕ݂ܡܲـ̈ـܝܵܐ ܣܲܓ̇ܝܼ̈ܐܹܐ ܙܒ̣ܝܼܢܝܼܢ. ܘܪܘܼܚܵܐ ܠܲܝܬ̇ ܒܗܘܿܢ.
25 ܥܲܠ ܟܲܬ̣̈ܦܵܬ̣ܵܐ ܡܸܫܬܲܩܠܝܼܢ. ܡܸܛܠ ܕܠܵܐ ܡܗܲܠܟ݂ܝܼܢ ܘܡܚܵܘܹܝܢ ܒܸܗܬܲܬ̣ܗܘܿܢ ܠܲܒ̣̈ܢܲܝ ܐ̄ܢܵܫܵܐ. ܢܸܒ̣ܗ̱ܬ̣ܘܼܢ ܕܹܝܢ ܐܵܦ ܡܫܲܡܫܵܢܲܝ̈ܗܘܿܢ.
26 ܡܸܛܠ ܕܐܸܢ ܢܸܦܠܘܼܢ ܥܲܠ ܐܲܪܥܵܐ: ܠܵܐ ܡܸܫܟ̇ܚܝܼܢ ܠܲܡܩܵܡ ܐܵܦܠܵܐ ܐܸܢ ܐ̄ܢܵܫ ܢܸܙܩܘܿܦ ܐܸܢܘܿܢ: ܢܸܬ̇ܬ̇ܙܝܼܥܘܼܢ. ܐܵܦܠܵܐ ܐܸܢ ܡܸܨܛܠܸܐ: ܡܸܫܟܲܚ ܠܡܸܬ̇ܬ̇ܪܵܨܘܼ. ܐܸܠܵܐ ܐܲܝܟ݂ ܡܝܼ̈ܬܹܐ ܣܵܝܡܝܼܢ ܠܗܘܿܢ ܡܹܐܟ݂̈ܠܵܬ̣ܵܐ.
27 ܡ̣ܢ ܕܸܒ̣ܚܵܬ̣̈ܗܘܿܢ ܕܹܝܢ ܕܲܡܩܲܪܒ̣ܝܼܢ ܠܗܘܿܢ: ܟܘܼܡܪܲܝܗܘܿܢ ܐܲܟ݂ܠܝܼܢ ܠܗܹܝܢ. ܘܢܸܫܲܝ̈ܗܘܿܢ ܡܸܬ̣ܠܲܥ̈ܒܵܢ ܡܸܢܗܹܝܢ. ܘܡܸܕܸ̇ܡ ܠܡܸܣܟܹ̇ܢܹ̈ܐ ܘܲܠܒ̣ܵܝܫܹ̈ܐ ܠܵܐ ܝܵܗ̄ܒ̇ܝܼܢ ܡ̣ܢ ܕܸܒ̣ܚܲܝ̈ܗܘܿܢ.
28 ܘܐܲܢ̄ܬ̇ܬ̣ܵܐ ܒܟܸܦ̮ܣܵܗ̇ ܘܲܒ̣ܚܲܝܘܼܬ̣ܵܗ̇ ܘܲܒ̣ܛܲܢܦܘܼܬ̣ܵܗ̇ ܡܸܬ̣ܩܲܪܒ̣ܵܐ ܠܗܘܿܢ. ܬܸܕ̇ܥܘܼܢ ܕܹܝܢ ܡ̣ܢ ܗܵܠܹܝܢ ܕܠܵܐ ܗܘ̤ܵܘ ܐܲܠܵܗܹ̈ܐ. ܘܠܵܐ ܬܸܕ݂ܚ̄ܠܘܼܢ ܠܗܘܿܢ.
29 ܐܲܝܟܲܢܵܐ ܓܹܝܪ ܢܸܬ̣ܩ̄ܪܘܿܢ ܐܲܠܵܗܹ̈ܐ: ܕܗܵܐ ܢܸܫܹ̈ܐ ܡܲܬ̣ܩ̈ܢܵܢ ܠܗܘܿܢ ܠܐܲܠܵܗܹ̈ܐ ܕܕܲܗܒ̣ܵܐ ܘܲܕ݂ܟܸܣܦܵܐ ܘܲܕ݂ܩܲܝܣܵܐ.
30 ܘܲܒ̣ܡܵܘܬܲܒ̣ܗܘܿܢ ܟܘܼܡܪܹ̈ܐ ܡܵܘܬ̇ܒ̣ܝܼܢ ܠܗܘܿܢ: ܟܲܕ݂ ܡܨܲܪܹܝܢ ܢܲܚܬܲܝ̈ܗܘܿܢ: ܘܪܹ̈ܫܲܝܗܘܿܢ ܓܙܝܼܙܝܼܢ: ܘܲܓ̣ܙܝܼܙܝܼܢ ܕܲܩܢܲܝ̈ܗܘܿܢ ܘܲܓ̣ܪܝܼܥܝܼܢ: ܘܲܓ̣ܠܹܝܢ ܪܹ̈ܫܲܝܗܘܿܢ.
31 ܘܢܵܗ̇ܡܝܼܢ ܒܲܩܥܵܬ̣ܵܐ ܩܕ݂ܵܡ ܐܲܠܵܗܲܝ̈ܗܘܿܢ ܐܲܝܟ݂ ܕܐ̄ܢܵܫܝܼ̈ܢ ܥܲܠ ܫܵܪܘܼܬ̣ ܡܝܼ̈ܬܹܐ.
32 ܘܡ̣ܢ ܠܒ̣ܘܼܫܲܝ̈ܗܘܿܢ ܢܵܣܒ̇ܝܼܢ ܟܘܼܡܪܹ̈ܐ: ܘܡܲܠܒ̇ܫܝܼܢ ܢܸܫܲܝ̈ܗܘܿܢ ܘܲܒ̣ܢܲܝ̈ܗܘܿܢ.
33 ܐܵܦܠܵܐ ܐܸܢ ܐ̄ܢܵܫ ܢܸܥܒܸ̇ܕ݂ ܠܗܘܿܢ ܒܝܼܫܬܵܐ ܐܵܘ ܛܵܒ̣ܬ̣ܵܐ: ܡܸܫܟ̇ܚܝܼܢ ܕܢܸܦ̱ܪܥܘܼܢܵܝܗܝ. ܐܵܦܠܵܐ ܡܲܠܟܵܐ ܡܸܫܟ̇ܚܝܼܢ ܕܲܢܩܝܼܡܘܼܢ ܐܵܘ ܕܢܸܥܒ̇ܕ݂ܘܼܢ.
34 ܗܵܟܲܢܵܐ ܐܵܦܠܵܐ ܥܘܼܬ̣ܪܵܐ ܐܵܦܠܵܐ ܟܸܣܦܵܐ ܡܸܫܟ̇ܚܝܼܢ ܠܡܸܬܲܠ ܠܐ̄ܢܵܫ. ܘܐܸܢ ܐ̄ܢܵܫ ܢܵܕܲܪ ܠܗܘܿܢ ܢܸܕ݂ܪܵܐ ܘܠܵܐ ܢܸܦ̱ܪܥܝܼܘܗܝ: ܠܵܐ ܢܸܬ̣ܒ̇ܥܘܼܢܹܗ.
35 ܠܒܲܪܢܵܫܵܐ ܡ̣ܢ ܡܵܘܬܵܐ ܠܵܐ ܢܸܦ̱ܪܩܘܼܢ ܘܠܵܐ ܠܲܒ̣ܨܝܼܪܵܐ ܡ̣ܢ ܥܲܫܝܼܢܵܐ ܢܦܲܨܘܿܢ.
36 ܘܲܠܓܲܒ̣ܪܵܐ ܣܲܡܝܵܐ ܠܵܐ ܡܸܫܟ̇ܚܝܼܢ ܠܡܸܬܲܠ ܠܹܗ ܚܙܵܬ̣ܵܐ. ܘܲܠܒ̣ܵܝܫܵܐ ܡ̣ܢ ܐܲܢܲܢܩܹܐ ܠܵܐ ܢܲܦܩܘܼܢ.
37 ܥܲܠ ܐܲܪ̈ܡܠܵܬ̣ܵܐ ܠܵܐ ܡܪܲܚܡܝܼܢ ܘܠܵܐ ܠܝܲܬ̣ܡܹ̈ܐ ܡܲܛܐ̱ܒ̣ܝܼܢ. ܘܠܵܐ ܠܡܸܣܟܹ̇ܢܹ̈ܐ ܡܦܲܪܢܣܝܼܢ.
38 ܠܟܹܐܦܹ̈ܐ ܕܫܲـ̈ـܕ݂ܝܵܢ ܒܛܘܼܪܵܐ ܕܵܡܹ̇ܝܢ ܐܲܠܵܗܹ̈ܐ ܕܩܲܝܣܵܐ ܘܲܕ݂ܣܹܐܡܵܐ ܘܲܕ̇ܕܲܗܒ̣ܵܐ. ܡܫܲܡܫܵܢܲܝ̈ܗܘܿܢ ܕܹܝܢ ܢܸܒ̣ܗ̱ܬ̣ܘܼܢ: ܕܝܵܕ݂ܥܝܼܢ ܕܚܲܫܚܘܼ ܠܲܝܬ̇ ܒܗܘܿܢ. ܘܡܲܛܥܹܝܢ ܒܗܘܿܢ ܠܲܒ̣ܢܲܝ̈ܢܵܫܵܐ.
39 ܐܲܝܟܲܢܵܐ ܢܸܬ̣ܝܲܕ݂ܥܘܼܢ ܕܐܲܠܵܗܹ̈ܐ ܐܸܢܘܿܢ.
40 ܕܗܵܐ ܐܵܦ ܟܲܠܕ݂ܵܝܹ̈ܐ ܫܵܝ̇ܛܝܼܢ ܠܗܘܿܢ. ܕܡܵܐ ܕܲܚܙ̣ܵܘ ܦܹܐܩܵܐ ܕܠܵܐ ܡܸܫܟܲܚ ܠܲܡܡܲܠܵܠܘܼ: ܡܩܲܪܒ̣ܝܼܢ ܠܹܗ ܠܘܵܬ̣ ܐܲܦܲܝ̈ ܬܲܪܥܵܐ. ܘܒ̣ܵܥܹ̇ܝܢ ܕܲܢܡܲܠܸܠ: ܘܢܸܩܪܹܐ ܐܲܝܟ݂ ܕܡܸܫܟܲܚ ܠܡܸܕܲܥ.
41 ܘܠܵܐ ܡܸܫܟ̇ܚܝܼܢ ܗܵܢ̇ܘܿܢ ܕܢܸܕ̇ܥܘܼܢ ܠܡܸܫܒܲܩ ܐܸܢܘܿܢ. ܣܘܼܟܵܠܵܐ ܓܹܝܪ ܠܲܝܬ̇ ܒܗܘܿܢ.
42 ܢܸܫܹ̈ܐ ܕܹܝܢ ܡܨܲܒ̇ـ̈ـܬ̣ܵܢ ܒܚܲܒ̣ܠܹ̈ܐ ܘܝܵܬ̣̈ܒܵܢ ܒܐܘܼܪ̈ܚܵܬ̣ܵܐ. ܘܣܵܝ̈ܡܵܢ ܒܸܣܡܹ̈ܐ ܦܹܐܪܹ̈ܐ.
43 ܡܵܐ ܕܹܝܢ ܕܐܸܬ̣ܢܲܓ̣ܕܲܬ̤ ܚܕ݂ܵܐ ܡܸܢܗܹܝܢ ܡ̣ܢ ܐ̄ܢܵܫ ܡ̣ܢ ܥܵܒ̣ܘܿܪܹ̈ܐ ܕܬܸܫܟܲܒ̣ ܥܲܡܹܗ: ܡܚܲܣܕ݂ܵܐ ܠܲܚܒ̣ܵܪܬ̣ܵܗ̇ ܘܐܵܡ̇ܪܵܐ. ܕܠܵܐ ܐܲܫ̱ܘܝܹܟ݂ܝ ܐܲܟ݂ܘܿܬ̣ܝ. ܐܵܦܠܵܐ ܚܲܒ̣ܠܵܗ̇ ܐܸܬ̣ܦܣܸܩ.
44 ܟܠ ܡܸܕܸ̇ܡ ܕܹܝܢ ܕܡܸܬ̣ܥ̱ܒܸܕ݂ ܠܗܘܿܢ ܣܪܝܼܩ ܗ̄ܘܼ. ܐܲܝܟܲܢܵܐ ܗܵܟܹܝܠ ܢܸܣ̱ܗܕ݂ܘܼܢ ܥܠܲܝܗܘܿܢ: ܕܐܲܠܵܗܹ̈ܐ ܐܸܢܘܿܢ. ܐܵܘ ܐܲܝܟܲܢܐ ܢܸܬ̣ܩܪܘܿܢ ܐܲܠܵܗܹ̈ܐ.
45 ܕܒ̣ܐܝܼ̈ܕܲܝ ܢܲܓܵܪܵܐ ܘܩܲܝܢܵܝܵܐ ܐܸܬ̣ܥ̱ܒܸܕ݂ܘ. ܐܸܠܵܐ ܐܲܝܟ݂ ܕܨܵܒ̇ܝܼܢ ܐܘܼܡܵܢܲܝ̈ܗܘܿܢ ܥܵܒ̣ܕܝܼܢ ܠܗܘܿܢ.
46 ܐܵܦ ܗܵܢܘܿܢ ܕܹܝܢ ܐܘܼܡܵܢܲܝ̈ܗܘܿܢ ܠܵܐ ܡܟܲܬ̇ܪܝܼܢ ܙܲܒ̣ܢܵܐ ܣܲܓ̇ܝܼܵܐܐ.
47 ܐܲܝܟܲܢܵܐ ܗܵܟܹܝܠ ܡܸܫܟ̇ܚܵܐ ܕܗܵܢܘܿܢ ܕܲܥ̣ܒܲܕ݂ܘ ܢܸܗܘܘܿܢ ܐܲܠܵܗܹ̈ܐ. ܫܒܲܩ̣ܘ ܓܹܝܪ ܕܲܓܵܠܘܼܬ̣ܵܐ ܘܚܸܣܕܵܐ ܠܐܲܝܠܹܝܢ ܕܡܸܬ̣ܝܲܠܕ̇ܝܼܢ.
48 ܡܵܐ ܓܹܝܪ ܕܢܹܐܬܹܐ ܥܠܲܝܗܘܿܢ ܩܪܵܒ̣ܵܐ ܘܒ̣ܝܼܫܬܵܐ: ܡܸܬ̣ܪܲܥܹܝܢ ܟܘܼܡܪ̈ܲܝܗܘܿܢ ܒܝܢܲܝܗܘܿܢ ܠܢܲܦ̮ܫܗܘܿܢ: ܕܐܲܝܟܵܐ ܢܛܲܫܘܼܢ ܐܸܢܘܿܢ ܥܲܡܗܘܿܢ.
49 ܐܲܝܟܲܢܵܐ ܗܵܟܹܝܠ ܠܵܐ ܘܵܠܹܐ ܠܡܸܕܲܥ ܕܠܵܐ ܗܘ̤ܵܘ ܐܲܠܵܗܹ̈ܐ: ܐܸܠܵܐ ܥܒ̣ܵܕ݂ ܐܝܼ̈ܕܲܝܵܐ ܕܐ̄ܢܵܫܵܐ. ܘܠܵܐ ܡܫܵܘܙܒ̣ܝܼܢ ܢܲܦ̮ܫܗܘܿܢ ܡ̣ܢ ܩܪܵܒ̣ܵܐ: ܐܵܦܠܐ ܡ̣ܢ ܒܝܼܫܬܵܐ.
50 ܥܒ̣ܝܼ̈ܕܹܐ ܓܹܝܪ ܕܩܲܝܣܵܐ ܘܲܕ݂ܟܸܣܦܵܐ ܘܲܕ̇ܕܲܗܒ̣ܵܐ: ܢܸܬ̣ܝܲܕ݂ܥܘܼܢ ܠܐܲܚܪܵܝܬܵܐ ܠܟܠܗܘܿܢ ܥܲܡܡܹ̈ܐ ܕܕܲܓܵܠܘܼܬ̣ܵܐ ܐܸܢܘܿܢ. ܠܡܲܠܟܵܐ ܕܹܝܢ ܓܲܠܝܵܐܝܼܬ̣ ܢܸܬ̣ܚܙܹܐ: ܕܠܵܐ ܗܘ̤ܵܘ ܐܲܠܵܗܹ̈ܐ. ܐܸܠܵܐ ܥܒ̣ܵܕ݂ ܐܝܼ̈ܕܲܝܵܐ ܕܲܒ̣ܢܲܝ̈ܢܵܫܵܐ. ܘܡܸܕܸ̇ܡ ܡ̣ܢ ܥܒ̣ܵܕܹ̈ܐ ܕܐܲܠܵܗܵܐ ܠܲܝܬ̇ ܒܗܘܿܢ.
51 ܗܵܐ ܠܟ݂ܠ ܐ̄ܢܵܫ ܝܼܕ݂ܝܼܥܵܐ ܗ̄ܝܼ ܗܵܕܹܐ: ܕܠܵܐ ܗ̄ܘܼܵܘ ܐܲܠܵܗܹ̈ܐ.
52 ܡܸܛܠ ܕܡܲܠܟܵܐ ܥܲܠ ܐܲܪܥܵܐ ܠܵܐ ܢܩܝܼܡܘܿܢ ܘܠܵܐ ܕܢܲܒ̣ܐ̱ܫܘܼܢ ܘܢܸܦ̱ܪܩܘܼܢ ܡܸܫܟ̇ܚܝܼܢ. ܘܡܸܛܪܵܐ ܠܲܒ̣ܢܲܝ̈ ܐ̄ܢܵܫܵܐ ܠܵܐ ܢܸܬ̇ܠܘܼܢ.
53 ܕܝܼܢܵܐ ܕܹܝܢ ܠܵܐ ܢܕ݂ܘܼܢܘܼܢ ܐܵܦܠܵܐ ܕܢܲܦ̮ܫܗܘܿܢ. ܐܵܦܠܵܐ ܠܲܛܠܝܼܡܵܐ ܢܸܫܟ̇ܚܘܼܢ ܠܲܡܦܲܨܵܝܘܼ ܡ̣ܢ ܡܲܢ ܕܥܲܫܝܼܢ ܡܸܢܹܗ: ܡܸܛܠ ܕܠܵܐ ܡܸܫܟ̇ܚܝܼܢ.
54 ܘܠܵܐ ܐܲܝܟ݂ ܢܲܥܒܹ̈ܐ ܒܹܝܬ̣ ܫܡܲܝܵܐ ܠܐܲܪܥܵܐ ܦܵܪܚܝܼܢ ܒܐܵܐܲܪ. ܗܵܐ ܓܹܝܪ ܡܵܐ ܕܢܸܦܠܲܬ̤ ܢܘܼܪܵܐ ܒܒܲܝܬܵܐ ܕܐܲܠܵܗܹ̈ܐ: ܟܘܼܡܪ̈ܲܝܗܘܿܢ ܥܵܪܩܝܼܢ ܢܵܦ̇ܩܝܼܢ ܠܒܲܪ. ܘܲܡܫܵܘܙܒ̣ܝܼܢ ܢܲܦ̮ܫܗܘܿܢ. ܗܸܢܘܿܢ ܕܹܝܢ ܐܲܝܟ݂ ܩܵܪ̈ܝܵܬ̣ܵܐ ܒܲܡܨܲܥܬ̣ܵܐ ܝܵܩܕ̇ܝܼܢ.
55 ܠܘܼܩܒܲܠ ܡܲܠܟܵܐ ܕܹܝܢ ܐܵܘ ܩܕ݂ܵܡ ܩܪܲܒ̣ܬ̣ܵܢܵܐ ܠܵܐ ܢܩܘܼܡܘܼܢ.
56 ܐܲܝܟܲܢܵܐ ܗܵܟܹܝܠ ܢܸܬ̣ܝܲܕ݂ܥܘܼܢ ܐܵܘ ܢܸܬ̣ܗܲܝܡܢܘܼܢ ܕܐܲܠܵܗܹ̈ܐ ܐܸܢܘܿܢ. ܕܗܵܐ ܐܵܦܠܵܐ ܡ̣ܢ ܓܲܢܵܒܹ̈ܐ ܐܵܦܠܵܐ ܡ̣ܢ ܠܸܣܛܵܝܹ̈ܐ ܡܨܹܝܢ ܕܲܢܫܵܘܙܒ̣ܘܼܢ ܢܲܦ̮ܫܗܘܿܢ: ܐܲܠܵܗܹ̈ܐ ܕܩܲܝܣܵܐ ܘܲܕ݂ܟܸܣܦܵܐ ܘܲܕ̇ܕܲܗܒ̣ܵܐ.
57 ܕܗܵܐ ܐܲܝܠܹܝܢ ܕܥܲܫܝܼܢܝܼܢ ܘܚܲܝܠܬ̣ܵܢܝܼܢ: ܫܵܩ̇ܠܝܼܢ ܕܲܗܒ̣ܵܐ ܘܟܸܣܦܵܐ ܘܲܠܒ̣ܘܼܫܵܐ ܕܲܥܠܲܝܗܘܿܢ ܘܐܵܙ̇ܠ̄ܝܼܢ. ܘܐ̄ܢܵܫ ܡܸܢܗܘܿܢ ܠܵܐ ܡܸܫܟܲܚ ܡܥܲܕܲܪ ܢܲܦ̮ܫܹܗ.
58 ܡܝܲܬܲܪ ܗ̄ܘܼ ܕܹܝܢ ܡܸܢܗܘܿܢ ܡܲܠܟܵܐ ܐܲܝܢܵܐ ܕܲܡܚܵܘܹܐ ܓܲܢ̄ܒܵܪܘܼܬ̣ܵܐ. ܘܡܵܐܢܵܐ ܕܚܘܼܫܵܚܵܐ ܕܐܝܼܬ̣ ܒܒܲܝܬܵܐ ܕܡܸܬ̣ܚܲܫܲܚ ܒܹܗ ܡܵܪܹܗ: ܝܲܬ̇ܝܼܪ ܡ̣ܢ ܐܲܠܵܗܹ̈ܐ ܕܕܲܓܵܠܘܼܬ̣ܵܐ. ܘܲܡܝܲܬܲܪ ܗ̄ܘܼ ܬܲܪܥܵܐ ܕܢܵܛܲܪ ܠܡܵܪܹܗ: ܝܲܬ̇ܝܼܪ ܡ̣ܢ ܐܲܠܵܗܹ̈ܐ ܕܕܲܓܵܠܘܼܬ̣ܵܐ.
59 ܫܸܡܫܵܐ ܕܹܝܢ ܘܣܲܗܪܵܐ ܘܟ݂ܵܘܟ̇ܒܹ̈ܐ: ܐܝܼܬܲܝܗܘܿܢ ܡܲܢ̱ܗܪ̈ܵܢܹܐ ܒܲܫܡܲܝܵܐ ܥܲܠ ܐܲܪܥܵܐ. ܘܡܸܫܬܲܕ̇ܪܝܼܢ ܠܨܸܒ̣̈ܘܵܬ̣ܗܘܿܢ ܘܡܸܫܬܲܡܥܝܼܢ.
60 ܐܵܦ ܒܲܪܩܵܐ ܡܵܐ ܕܐܲܒ̣ܪܸܩ: ܗܕ݂ܝܼܪ ܗ̄ܘܼ ܛܵܒ̣. ܗܵܟܲܢܵܐ ܐܵܦ ܪܘܼܚܵܐ ܕܢܵܫ̇ܒܵܐ ܒܟ݂ܠܹܗ ܟܘܼܪܵܐ.
61 ܘܲܥܢܵܢܹ̈ܐ ܡܵܐ ܕܐܸܬ̣ܦܩܸܕ݂ܘ ܡ̣ܢ ܐܲܠܵܗܵܐ ܕܢܹܐ̈ܙܵܠ̄ܢ ܘܢܲܝ̈ܬ̇ܝܵܢ ܡܸܛܪܵܐ ܥܲܠ ܟܠܵܗ̇ ܬܹܒܝܠ: ܐܵܙܵܠ̄ܢ ܘܲܡܫܲܠ̈ܡܵܢ ܡܸܕܸ̇ܡ ܕܡܸܬ̣ܦܲܩ̈ܕܵܢ.
62 ܘܐܵܦ ܢܘܼܪܵܐ ܕܡܸܫܬܲܕ̇ܪܵܐ ܡ̣ܢ ܠܥܸܠ ܕܬ̣ܵܘܩܸܕ݂ ܛܘܼܪܹ̈ܐ ܘܪ̈ܵܡܵܬ̣ܵܐ ܘܥܵܒܹ̈ܐ: ܥܵܒ̣ܕܵܐ ܡܸܕܸ̇ܡ ܕܐܸܬ̣ܦܩܸܕ݂ ܠܵܗ̇. ܗܵܠܝܢ ܕܹܝܢ ܐܵܦܠܵܐ ܒܲܕ݂ܡܘܼܬ̣ܵܐ: ܐܵܦܠܵܐ ܒܚܲܝܠܵܐ: ܘܠܵܐ ܒܲܥܒ̣ܵܕ݂ܵܐ ܕܵܡܹ̇ܝܢ ܠܚܲܕ݂ ܡ̣ܢ ܗܵܠܹܝܢ ܥܒ̣ܵܕܹ̈ܐ.
63 ܡܸܛܠ ܗܵܢܵܐ ܐܲܝܟܢܵܐ ܢܸܬ̣ܩܪܘܿܢ ܐܵܘ ܢܸܣܒ̇ܪܘܿܢ ܥܠܲܝܗܘܿܢ ܕܐܲܠܵܗܹ̈ܐ ܐܸܢܘܿܢ: ܕܗܵܐ ܠܵܐ ܡܸܫܟ̇ܚܝܼܢ ܐܵܦܠܵܐ ܕܝܼܢܵܐ ܕܲܢܕ݂ܘܼܢܘܼܢ: ܘܠܵܐ ܕܢܲܛ̱ܐܒ̣ܘܼܢ ܘܠܵܐ ܕܢܲܒ̣ܐ̱ܫܘܼܢ ܠܲܒ̣ܢܲܝ̈ ܐ̄ܢܵܫܵܐ.
64 ܕܲܥܘ ܗܵܟܹܝܠ ܕܠܵܐ ܗܘ̤ܵܘ ܐܲܠܵܗܹ̈ܐ. ܘܠܵܐ ܬܸܕ݂ܚ̄ܠܘܼܢ ܠܗܘܿܢ.
65 ܠܵܐ ܓܹܝܪ ܕܲܢܒܲܪܟ݂ܘܼܢ ܠܡܲܠܟܵܐ ܡܸܫܟ̇ܚܝܼܢ: ܘܠܵܐ ܕܲܢܠܘܼܛܘܼܢ.
66 ܘܐܵܬ̣̈ܘܵܬ̣ܵܐ ܠܥܲܡܡܹ̈ܐ ܒܲܫܡܲܝܵܐ ܠܵܐ ܢܚܵܘܘܿܢ. ܘܐܵܦܠܵܐ ܐܲܝܟ݂ ܫܸܡܫܵܐ ܢܲܕ݂ܢ̱ܚܘܼܢ ܢܘܼܗ̱ܪܗܘܿܢ. ܘܠܵܐ ܡܲܢ̱ܗܪܝܼܢ ܐܲܝܟ݂ ܣܲܗܪܵܐ.
67 ܚܲܝ̈ܘܵܬ̣ܵܐ ܕܒܲܪܵܐ ܡܝܲܬ̇ܪ̈ܵܢ ܐܸܢܹܝܢ ܡܸܢܗܘܿܢ. ܕܗܵܠܹܝܢ ܡܸܫ̈ܟ̇ܚܵܢ ܕܢܸܥ̱ܪ̈ܩܵܢ ܘܲܢܫܵܘ̈ܙܒ̣ܵܢ ܢܲܦ̮ܫܗܹܝܢ.
68 ܡܸܕܸ̇ܡ ܕܹܝܢ ܠܵܐ ܡܸܬ̣ܚܙܹܐ ܠܲܢ ܕܐܲܠܵܗܹ̈ܐ ܐܸܢܘܿܢ. ܡܸܛܠ ܗܵܢܵܐ ܠܵܐ ܬܸܕ݂ܚ̄ܠܘܼܢ ܡܸܢܗܘܿܢ.
69 ܐܲܝܟ݂ ܥܲܪܙܵܠܵܐ ܓܹܝܪ ܕܡܲܩܛܝܵܐ ܕܡܸܕܸ̇ܡ ܠܵܐ ܢܵܛܲܪ: ܗܵܟܲܢܵܐ ܐܸܢܘܿܢ: ܐܵܦ ܐܲܠܵܗܲܝ̈ܗܘܿܢ ܕܩܲܝܣܵܐ ܘܲܕ݂ܟܸܣܦܵܐ ܘܲܕ̇ܕܲܗܒ̣ܵܐ. ܠܲܝܬ̇ ܒܗܘܿܢ ܝܘܼܬ̣ܪܵܢ.
70 ܘܐܲܝܟ݂ ܗܲܛܛܵܐ ܕܲܒ̣ܓܲܢ̄ܬ̣ܵܐ: ܕܟ݂ܠ ܦܵܪܲܚܬ̣ܵܐ ܥܠܵܘܗܝ ܝܵܬ̣ܒܵܐ: ܗܵܟܲܢܵܐ ܐܸܢܘܿܢ. ܘܲܠܡܝܼܬ̣ܵܐ ܕܲܫܘܸܐ ܒܚܸܫܘܿܟ݂ܵܐ: ܗܵܟܲܢܵܐ ܕܵܡܹ̇ܝܢ ܐܲܠܵܗܲܝ̈ܗܘܿܢ ܕܩܲܝܣܵܐ ܘܲܕ݂ܟܸܣܦܵܐ ܘܲܕ̇ܕܲܗܒ̣ܵܐ.
71 ܡ̣ܢ ܐܲܪܓ̇ܘܵܢܵܐ ܓܹܝܪ ܘܡ̣ܢ ܫܝܼܫܵܐ ܕܲܥܠܲܝܗܘܿܢ ܕܡܸܬ̣ܚܲܒܲܠ: ܬܸܕ̇ܥܘܼܢ ܕܠܵܐ ܗܘ̤ܘ ܐܲܠܵܗܹ̈ܐ. ܐܵܦ ܗܸܢܘܿܢ ܕܹܝܢ ܠܚܲܪܬܵܐ ܠܥܵܠܲܡ ܢܸܬ̣ܚܲܒ̇ܠܘܼܢ ܘܢܸܗܘܘܿܢ ܠܚܸܣܕܵܐ ܒܐܲܪܥܵܐ.
72 ܛܵܒ̣ ܕܹܝܢ ܠܓܲܒ̣ܪܵܐ ܙܲܕ̇ܝܼܩܵܐ ܕܠܲܝܬ̇ ܒܹܗ ܦܬܲܟ݂ܪܵܐ: ܕܪܲܚܝܼܩ ܡ̣ܢ ܚܸܣܕܵܐ: ܘܲܡܣܲܟܹ̇ܐ ܠܡܵܪܝܵܐ ܐܲܠܵܗܵܐ.