1

¹ ܦܸܬ̣ܓ̣ܵܡܵܘ̈ܗܝ ܕܐܹܪܲܡܝܵܐ ܒܲܪ ܚܠܲܩܝܵܐ: ܡ̣ܢ ܟܵܗܢܹ̈ܐ ܕܒܲܥܢܵܬ̣ܘܿܬ̣ ܕܒܲܐܪܥܵܐ ܕܒܸܢܝܵܡܹܝܢ.

² ܕܲܗܘ̤ܵܐ ܦܸܬ݂ܓ݂ܵܡܸܗ ܕܡܵܪܝܵܐ ܥܠܵܘܗܝ: ܒܝܵܘܡܵܘ̈ܗܝ ܕܝܘܿܫܝܼܵܐ ܒܲܪ ܐܲܡܘܿܢ ܡܲܠܟܵܐ ܕܲܝܗܘܼܕܵܐ: ܒܲܬ݂ܠܵܬܲܥܸܣܖ̈ܐ ܫܢ̈ܝܼܢ ܠܡܲܠܟܘܼܬܹܗ.

³ ܘܲܗܘܵܐ ܒܝܵܘܡܵܘ̈ܗܝ ܕܝܘܿܝܵܩܝܼܡ ܒܲܪ ܝܘܿܫܝܼܵܐ ܡܲܠܟܵܐ ܕܲܝܗܘܼܕܵܐ: ܥܕܲܡܵܐ ܕܲܫܠܸܡ ܚܕܲܥܸܣܖܹ̈ܐ ܫܢ̈ܝܼܢ ܠܨܹܕܲܩܦܝܵܐ ܒܲܪ ܝܘܼܫܝܼܵܐ ܡܲܠܟܵܐ ܕܲܝܗܘܼܕܵܐ: ܥܕܲܡܵܐ ܕܐܸܫܬܲܳܒ݂ܝܲܬ ܐܘܿܪܸܫܠܸܡ ܒܝܲܪܚܵܐ ܚܡܝܼܫܵܝܵܐ.

⁴ ܘܲܗܘܵܐ ܥܠܲܝ ܦܸܬ݂ܓ݂ܵܡܹܗ ܕܡܲܪܝܵܐ ܠܡܹܐܡܲܪ.

⁵ ܥܲܕ݂ܠܵܐ ܐܹܨܘܼܪܟ݂ ܒܟܲܪܣܵܐ ܝܼܕܲܥܬܵܟ݂: ܘܥܲܕܠܵܐ ܬܸܦܘܿܩ ܡ̣ܢ ܡܲܪܒܥܵܐ ܩܲܕܸܫܬܵܟ݂: ܘܲܢܒ݂ܝܵܐ ܠܥܲܡܡܹ̈ܐ ܝܲܗܒܲܬܵܟ݂.

⁶ ܘܐܸܡ̇ܪܹܬ݂ ܒܒ݂ܥܘܼ ܡܵܪܝܵܐ ܐܲܠܵܗܵܐ: ܗܵܐ ܠܵܐ ܝܵܕܲܥ ܐ̄ܢܵܐ ܠܲܡܡܲܠܵܠܘܼ ܡܸܛܠ ܕܲܛܠܸܐ ܐܢܵܐ.

⁷ ܘܐܸܡܲܪ ܠܝܼ ܡܵܪܝܵܐ: ܠܵܐ ܬܹܐܡܲܪ ܕܲܛܠܸܐ ܐ̄ܢܵܐ: ܡܸܛܠ ܕܥܲܠ ܟܠ ܕܐܹܫܕܲܪܵܟ݂ ܬܹܐܙܲܠ: ܘܟ݂ܠ ܕܐܹܦܲܩܕܵܟ݂ ܬܡܲܠܸܠ.

⁸ ܠܵܐ ܬܹܕ݂ܚܲܠ ܡ̣ܢ ܩܕ݂ܵܡܲܝܗܘܿܢ: ܡܸܛܠ ܕܥܲܡܵܟ݂ ܐܢܵܐ ܠܲܡܦܲܨܝܘܼܬܵܟ݂. ܐܵܡܲܪ ܡܵܪܝܵܐ.

⁹ ܘܐܵܘܫܸܛ ܡܵܪܝܵܐ ܐܝܼܕܹܗ ܘܲܩܪܸܒ݂ ܠܦܘܼܡܝ. ܘܐܸܡܲܪ ܠܝܼ ܡܵܪܝܵܐ: ܗܵܐ ܝܸܗ̇ܒܹܬ݂ ܦܸܬ݂ܓ݂ܵܡܲܝ̈ ܒܦܘܼܡܵܟ݂.

¹⁰ ܚܙܝܼ ܕܐܲܫܠܸܛܬܵܟ݂ ܝܵܘܡܵܢܵܐ: ܥܲܠ ܥܲܡܡܹ̈ܐ ܘܥܲܠ ܡܲܠܟ̈ܘܵܬ݂ܵܐ: ܠܡܸܥܩܲܪ: ܘܲܠܡܸܣܬܲܪ: ܘܠܲܡܣܲܚܵܦܘܼ: ܘܲܠܡܵܘܒܵܕ݂ܘܼ ܘܲܠܡܸܒ݂ܢܵܐ: ܘܲܠܡܸܨܲܒ݂.

¹¹ ܘܲܗܘܵܐ ܥܠܲܝ ܦܬ݂ܓ݂ܵܡܹܗ ܕܡܵܪܝܵܐ ܠܡܹܐܡܲܪ: ܡܵܢܵܐ ܚܙܲܝܬܿ ܐܹܪܲܡܝܵܐ. ܘܐܸܡܪܹܬ݂ ܚܘܼܛܪܵܐ ܕܠܘܼܙܵܐ ܚܵܙܹܐ ܐ̄ܢܵܐ.

¹² ܘܐܸܡܲܪ ܠܝܼ ܡܵܪܝܵܐ ܫܲܦܝܼܪ ܚܙܲܝܬܿ: ܡܸܛܠ ܕܲܡܣܲܪܗܸܒ݂ ܐܢܵܐ ܥܲܠ ܦܸܬ݂ܓ݂ܵܡܝ ܠܡܸܥܒܿܕܹܗ.

¹³ ܘܲܗܘܵܐ ܥܠܲܝ ܦܸܬ݂ܓ݂ܵܡܹܗ ܕܡܵܪܝܵܐ ܕܬܲܪܬܹܿܝܢ ܙܲܒ݂ܢ̈ܝܼܢ: ܘܐܸܡܲܪ: ܡܵܢܵܐ ܚܵܙܹܐ ܐܲܢܬܿ: ܘܐܸܡܪܹܬ݂ ܩܲܕ݂ܣܵܐ ܕܲܬ݂ܦܸܐ ܚܵܙܹܐ ܐܢܵܐ: ܘܐܲܦܘ̈ܗܝ ܡܢ ܐܲܦܲܝ̈ ܓܲܪܒܿܝܵܐ.

¹⁴ ܘܐܸܡܲܪ ܠܝܼ ܡܵܪܝܵܐ: ܡ̣ܢ ܓܲܪܒܝܵܐ ܬܸܬ݂ܦܬܲܚ ܒܝܼܫܬܵܐ ܥܲܠ ܟܠܗܘܿܢ ܝܵܬ݂ܒܲܝ̈ ܐܲܪܥܵܐ.

¹⁵ ܡܸܛܠ ܕܗܵܐ ܡܫܲܕܲܪ ܐ̄ܢܵܐ: ܘܩܵܪܹܐ ܐܢܵܐ ܠܟ݂ܠܗܹܝܢ ܫܖ̈ܒ݂ܵܬ݂ܵܐ ܕܡܲܠܟ̈ܘܵܬܵܐ ܕܓܲܪܒܝܵܐ ܐܵܡܲܪ ܡܵܪܝܵܐ. ܘܢܹܐܬ݂ܘܿܢ ܘܢܲܪܡܘܿܢ ܓܒܲܪ ܟܘܼܪܣܝܹܗ: ܒܡܲܥܠܵܢܵܐ ܕܬܲܖ̈ܥܹܐ ܕܐܘܿܪܸܫܠܸܡ: ܘܥܲܠ ܟܠܗܘܿܢ ܫܘܿܖܹ̈ܝܗ̇ ܟܲܕ݂ ܚܵܕ݂ܪܵܐ: ܘܥܲܠ ܟܠܗܹܝܢ ܩܘܼܖ̈ܝܵܐ ܕܲܝܗܘܼܕܵܐ.

¹⁶ ܘܐܹܡܲܠܸܠ ܕܝܼܢܲܝ̈ ܥܲܡܗܘܿܢ: ܡܸܛܠ ܟܠܗܝܹܢ ܒܝܼ̈ܫܵܬ݂ܗܘܿܢ: ܕܫܲܒ݂ܩܘܼܢܝ ܘܣܵܡܘ ܒܸܣܡܸ̈ܐ ܠܐܲܠܵܗܹ̈ܐ ܐܚܖ̈ܵܢܹܐ: ܘܲܣܓܕ݂ܘ ܠܲܥܒ݂ܵܕ݂ ܐܝܼܕܲܝ̈ܗܘܿܢ.

¹⁷ ܘܐܲܢ̄ܬܿ ܐܲܣܘܿܪ ܚܲܨܲܝ̈ܟ: ܘܩܘܼܡ ܐܸܡܲܪ ܠܗܘܿܢ ܟܠܡܸܕܸܿܡ ܕܲܡܦܲܩܸܕ݂ ܐ̄ܢܵܐ ܠܵܟ݂. ܠܵܐ ܬܸܕ݂ܚܲܠ ܡܸܢܗܘܿܢ: ܕܲܠܡܵܐ ܐܸܬ݂ܒܿܪܟ݂ ܩܕܵܡܲܝܗܘܿܢ.

¹⁸ ܘܐܸܢܵܐ ܗܵܐ ܥܒܲܕܬܵܟ݂ ܐܲܝܟ݂ ܩܪܝܼܬ݂ܵܐ ܬܲܩܝܼܦܬܵܐ: ܘܐܲܝܟ݂ ܥܲܡܘܼܕ݂ܪܵܐ ܕܦܵܪܙܠܵܐ: ܘܐܲܝܟ݂ ܫܘܼܪܵܐ ܕܲܢܚܵܫܵܐ ܥܲܠ ܟܠܵܗ̇ ܐܲܪܥܵܐ: ܥܲܠ ܡܲܠܟܹ̈ܐ ܕܲܝܗܘܼܕܵܐ ܘܥܲܠ ܪܵܘܖ̈ܒ݂ܵܢܲܝܗܘܿܢ: ܘܥܲܠ ܟܵܗܢܲܝ̈ܗܘܿܢ: ܘܥܲܠ ܢܒ݂ܝܲܝ̈ܗܘܿܢ: ܘܥܲܠ ܟܠܹܗ ܥܲܡܵܐ ܕܐܲܪܥܵܐ.

¹⁹ ܘܢܸܬ݂ܟܲܬܿܫܘܼܢ ܥܲܡܵܟ݂: ܘܠܵܐ ܢܸܙܟܘܿܢܵܟ݂: ܡܸܛܠ ܕܥܲܡܵܟ݂ ܐܢܵܐ ܠܲܡܦܲܨܵܝܘܼܬ݂ܵܟ݂: ܐܵܡܲܪ ܡܵܪܝܵܐ.

2

¹ ܘܲܗܘܵܐ ܥܠܲܝ ܦܸܬ݂ܓ݂ܵܡܹܗ ܕܡܵܪܝܵܐ: ܠܡܹܐܡܲܪ.

² ܙܸܠ ܘܐܲܟ݂ܪܸܙ ܒܐܸܕ݂ܢܲܝ̈ ܐܘܿܪܸܫܠܸܡ: ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܝܵܐ: ܐܸܬܿܕܟ݂ܪܹܬ݂ ܠܹܟ݂ܝ ܛܲܝܒܿܘܼܬ݂ܵܐ ܕܛܲܠܝܘܼܬܹܟ݂ܝ: ܪܸܚܡܬܵܐ ܕܲܡܣܲܝܒܿܪܵܢܘܼܬܹܟ݂ܝ: ܕܗܲܠܸܟ݂ܬܿ ܒܵܬܲܪܝ ܒܡܲܕ݂ܒܿܪܵܐ: ܒܐܲܪܥܵܐ ܕܠܵܐ ܡܸܙܕܲܪܥܵܐ.

³ ܩܲܕܸܫ ܝܼܣܪܵܝܹܠ ܠܡܵܪܝܵܐ ܪܹܫ ܥܲܠ̈ܠܵܬܹܗ: ܟܠ ܐܵܟ݂ܘܿܠܲܝ̈ܗܘܿܢ ܢܸܬ݂ܚܲܝܒ݂ܘܼܢ. ܒܝܼܫܬܵܐ ܬܹܐܬܸܐ ܥܠܲܝܗܘܿܢ: ܐܵܡܲܪ ܡܵܪܝܵܐ.

⁴ ܫܡܲܥܘ ܦܸܬ݂ܓ݂ܵܡܹܗ ܕܡܵܪܝܵܐ ܒܲܝܬܹܿܗ ܕܝܲܥܩܘܿܒ݂: ܘܟ݂ܠܗܹܝܢ ܫܲܖ̈ܒ݂ܬܵܐ ܕܒܹܝܬ݂ ܝܼܣܪܵܝܹܠ.

⁵ ܗܵܟܲܢܵܐ ܐܵܡܲܪ ܡܵܪܝܵܐ: ܡܵܢܵܘ ܥܵܘܠܵܐ ܕܐܸܫܟܲܚܘ ܒܝܼ ܐܲܒ݂ܵܗܲܝ̈ܟܿܘܿܢ ܕܐܲܪܚܸܩܘ ܡܹܢܝ: ܘܐܸܙܲܠܘ ܒܵܬܲܪ ܠܵܐ ܡܸܕܸܡ: ܘܡܸܕܸܡ ܠܵܐ ܝܑܼܬܲܪܘ.

⁶ ܘܠܵܐ ܐܸܡܲܪܘ ܐܲܝܟܵܘ ܡܵܪܝܵܐ ܕܐܲܣܩܲܢ ܡܢ ܐܲܪܥܵܐ ܕܡܸܨܪܹܝܢ: ܕܕܲܒܪܲܢ ܒܡܲܕ݂ܒܪܵܐ ܒܐܲܪܥܵܐ ܚܲܪܒܿܬܵܐ ܘܫܵܗܝܼܬܵܐ: ܒܐܲܪܥܵܐ ܨܵܕ݂ܝܼܬܵܐ ܕܛܸܠܵܠܲܝ̈ ܡܵܘܬܵܐ: ܒܐܲܪܥܵܐ ܕܠܵܐ ܥܒܲܪ ܒܵܗ ܓܒܲܪ: ܘܠܵܐ ܝܼܬܸܒ݂ ܒܲܪܢܵܫ ܬܲܡܵܢ.

⁷ ܘܐܲܝܬܿܝܼܬܟ݂ܘܿܢ ܠܐܲܪܥܵܐ ܕܟܲܪܡܠܵܐ: ܠܡܹܐܟܲܠ ܦܹܐܖܹ̈ܝܗ̇ ܘܛܵܒ݂ܵـ̈ܬ݂ܵܗ̇. ܘܐܸܬܲܝܬܿܘܿܢ ܘܛܲܡܲܐܬܿܘܿܢ ܐܲܪܥܝ. ܘܝܵܪܬܿܘܼܬ݂ܝ ܣܵܡܬܿܘܿܢ ܠܛܲܢܦܘܼܬܵܐ.

⁸ ܟܵܗܢܹ̈ܐ ܠܵܐ ܐܸܡܲܪܘ ܐܝܟܵܘ ܡܵܪܝܵܐ. ܘܐܲܚܝܼܕܲܝ̈ ܢܵܡܘܿܣܵܐ ܠܵܐ ܝܲܕ݂ܥܘܼܢܝ. ܘܖ̈ܵܥܵܘܵܬܵܐ ܕܲܓܸܿܠܘ ܒܝܼ. ܘܲܢܒ݂ܝܹ̈ܐ ܐܹܬ݂ܢܲܒܿܝܼܘ ܒܒܲܠܠܵܐ. ܘܒ݂ܵܬܲܪ ܡܸܕܸܡ ܕܠܲܝܬܿ ܒܹܗ ܝܘܼܬ݂ܪܵܢ ܐܸܙܲܠܘ.

⁹ ܡܸܛܠ ܗܵܢܵܐ ܐܸܬܿܬܿܕܿܝܼܢ ܥܲܡܟ݂ܘܿܢ ܐܵܡܲܪ ܡܵܪܝܵܐ: ܘܥܲܡ ܒܢܲܝ̈ ܒܢܲܝ̈ܟܘܿܢ ܐܸܬܿܬܿܕܿܝܼܢ.

¹⁰ ܥܒܲܪܘ ܠܓ݂ܵܙܖ̈ܵܬܵܐ ܕܟܹܬܵܝܹ̈ܐ ܘܲܚܙܵܘ: ܘܲܠܩܹܕܲܪ ܫܲܕܲܪܘ: ܘܛܵܒ݂ ܐܸܣܬܲܟܲܠܘ: ܘܲܚܙܵܘ ܐܸܢ ܗܘܵܬ݂ ܐܲܝܟ݂ ܗܵܕܹܐ.

¹¹ ܡܚܲܠܦܝܼܢ ܥܲܡܡܹ̈ܐ ܐܲܠܵܗܲܝ̈ܗܘܿܢ ܐܲܝܠܹܝܢ ܕܠܵܐ ܗܘܵܘ ܐܲܠܵܗܹ̈ܐ: ܘܥܲܡܝ ܚܲܠܸܦ ܐܝܼܩܵܪܹܗ ܒܲܕ݂ܠܵܐ ܝܘܼܬ݂ܪܵܢ.

¹² ܬܡܲܗܘ ܫܡܲܝܵܐ ܥܲܠ ܗܵܕܹܐ: ܘܙܘܼܥܘ ܘܲܕ݂ܚܲܠܘ ܛܵܒ݂ ܐܵܡܲܪ ܡܵܪܝܵܐ.

¹³ ܡܸܛܠ ܕܬܲܪܬܹܿܝܢ ܒܝܼ̈ܫܵܢ ܥܒܲܕ݂ܘ ܥܲܡܝ: ܠܝܼ ܫܒܲܩܘ ܡܲܒܘܼܥܵܐ ܕܡܲܝ̈ܵܐ ܚܲܝܹ̈ܐ: ܘܐܸܙܲܠܘ ܚܦܲܪ ܠܗܘܿܢ ܓܘܼ̈ܒܹܿܐ: ܓܘܼ̈ܒܑܹܿ ܖ̈ܥܝܼܥܹܐ ܕܠܵܐ ܡܸܫܟܚܝܼܢ ܠܡܸܩܒܵܐ ܒܗܘܿܢ ܡܲܝ̈ܵܐ.

¹⁴ ܆ ܕܲܠܡܵܐ ܥܲܒ݂ܕܵܐ ܗ̄ܘ݂ ܝܼܣܪܵܝܹܠ: ܐܸܢ ܝܑܼܠܝܼܕ݂ ܒܲܝܬܵܐ ܗ̄ܘ: ܡܸܛܠ ܡܵܢܵܐ ܗܘ̤ܵܐ ܠܒܸܙܬ݂ܵܐ.

¹⁵ ܥܠܵܘܗܝ ܢܢܲܗܡܘܼܢ ܐܲܖ̈ܝܵܘܵܬܵܐ: ܘܲܢܪܝܼܡܘܼܢ ܩܵܠܗܘܿܢ: ܘܢܸܥܒܿܕ݂ܘܼܢ ܐܲܪܥܹܗ ܠܚܘܼܪܒܵܐ: ܘܩܘܼܖ̈ܝܹܗ ܢܸܨ̈ܕܿܝܵܢ ܡ̣ܢ ܒܠܲܝ ܕܝܵܬܹ݁ܒ݂.

¹⁶ ܐܵܦ ܒܢܲܝ̈ ܡܲܦܲܣ ܘܬܲܚܦܝܼܣ: ܢܸܪܥܘܼܢܹܟ݂ܝ ܪܹܫܵܐ ܪܹܫܵܐ.

¹⁷ ܗܵܐ ܗܵܟܲܢܵܐ ܢܸܬ݂ܥܒܸܕ݂ ܠܹܟ݂ܝ: ܥܲܠ ܕܲܫܒܲܩܬܿܝ ܠܡܵܪܝܵܐ ܐܲܠܵܗܹܟ݂ܝ: ܒܙܲܒ݂ܢܵܐ ܕܲܡܕܲܒܲܪ ܗ̄ܘܵܐ ܠܹܟ݂ܝ ܒܐܘܼܪܚܵܐ.

¹⁸ ܘܗܵܫܵܐ ܡܵܐ ܠܹܟ݂ܝ ܠܡܹܐܙܲܠ ܠܐܘܼܪܚܵܐ ܕܡܸܨܪܝܹܢ ܠܡܸܫܬܵܐ ܡܲܝ̈ܵܐ ܕܫܝܼܚܘܿܪ: ܘܡܵܐ ܠܹܟ݂ܝ ܠܡܹܐܙܲܠ ܠܐܘܼܪܚܵܐ ܕܐܵܬ݂ܘܿܪ: ܠܡܸܫܬܵܐ ܡܵܝ̈ܵܐ ܕܢܵܗܪܵܐ.

¹⁹ ܬܸܪܕܲܝܟ݂ܝ ܒܝܼܫܬܹܟ݂ܝ: ܘܲܬ̣ܝܵܒ̣ܘܼܬܹܟ݂ܝ ܬܲܟ̇ܣܹܟ݂ܝ. ܘܕܲܥܝ ܘܲܚܙܵܝ ܕܒ̣ܝܼܫ ܘܡܲܪܝܼܪ: ܥܲܠ ܕܲܫܒܲܩܬ̇ܝ ܠܡܵܪܝܵܐ ܐܲܠܵܗܹܟ݂ܝ: ܘܠܵܐ ܕܚܸܠܬ̇ܝ ܡܹܢܝ: ܐܵܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ.

²⁰ ܡܸܛܠ ܕܡ̣ܢ ܥܵܠܲܡ ܬܸܒ̣ܪܹܬ̣ ܢܝܼܪܹܟ݂ܝ. ܘܦܲܣܩܹ̇ܬ̣ ܚܢܵܩܵܝ̈ܟ̇ܝ. ܘܐܸܡܲܪܬ̇ܝ ܕܬ̣ܘܼܒ̣ ܠܐܲܠܵܗ ܐ̄ܚܪܹܝܢ ܠܵܐ ܐܸܦܠܘܿܚ. ܘܗܵܐ ܥܲܠ ܟܠ ܪܵܡܬ̣ܵܐ ܕܪܵܡܵܐ: ܘܲܬ̣ܚܹܝܬ̣ ܟܠ ܐܝܼܠܵܢ ܕܥܲܒ̇ܝܼܛ: ܐܲܢ̄ܬ̇ܝ ܛܵܥܝܵܐ ܘܲܡܙܲܢܝܵܐ.

²¹ ܘܐܸܢܵܐ ܢܨܲܒ݂ܬܹܟ݂ܝ ܫܲܒ̇ܘܼܩܵܐ ܕܟ݂ܠܹܗ ܙܲܪܥܵܐ ܕܩܘܼܫܬܵܐ. ܘܐܲܝܟܲܢܵܐ ܐܸܬ̣ܗ̱ܦܸܟ݂ܬ̇ܝ ܥܠܲܝ: ܘܲܡܪܲܕܬ̇ܝ ܐܲܝܟ݂ ܓܦܸܬܵܐ ܢܘܼܟ݂ܪܵܝܬܵܐ.

²² ܘܐܸܢ ܬܸܬ̣ܚܵܘܪܝܼܢ ܒܢܸܬ̣ܪܵܐ: ܘܬܲܣܓܹ̇ܝܢ ܠܹܟ݂ܝ ܟܸܒ̣ܪܝ̣ܬ̣ܵܐ: ܟܬܲܡ̣ܘ ܠܗܘܿܢ ܒܹܟ݂ܝ ܚܛܵܗܲܝܟܝ ܩܕ݂ܵܡܲܝ ܐܵܡܲܪ ܡܵܪܝܵܐ ܐܲܠܵܗܵܐ.

²³ ܐܲܝܟܲܢܵܐ ܬܹܐܡܪܝܼܢ ܕܠܵܐ ܐܸܬ̇ܛܲܡ̇ܐܸܬ̣: ܘܒ̣ܵܬܲܪ ܒܲܥܠܵܐ ܠܵܐ ܐܸܙܹܠ̄ܬ̣. ܚܙܵܝ ܐܘܼܖ̈ܚܵܬܸܟ݂ܝ ܒܢܲܚ̈ܠܹܐ: ܘܕܲܥܝ ܡܵܢܵܐ ܥܒܲܕ̇ܬ̇ܝ: ܐܲܪܝܼܡܬ̇ܝ ܒܩܵܠܹܟ݂ܝ ܡܥܲܩܡܲܬ̣ ܐܘܼܖ̈ܚܵܬ̣ܵܐ.

²⁴ ܐܲܝܟ݂ ܥܪܵܕ݂ܵܐ ܕܡܸܬ̣ܝܲܠܲܦ ܒܡܲܕ݂ܒܪܵܐ ܒܨܸܒ̣ܝܵܢܲܝ̈ ܢܲܦ̮ܫܹܗ: ܣܵܩ̣ܬ̇ܝ ܪܘܼܲܚܵܐ ܐܲܝܟ݂ ܝܵܪܘܼܪܵܐ. ܡܲܢ ܢܲܗܦܟ݂ܝܼܗ̇. ܟܠ ܡܵܢ ܕܒ̣ܵܥܹܐ݁ ܠܵܗ̇ ܠܵܐ ܢܸܬ̇ܛܲܪܲܦ: ܒܐܘܼܖ̈ܚܵܬ̣ܵܗ̇ ܢܸܫܟ̇ܚܝܼܗ̇.

²⁵ ܟܠܵܝ ܖ̈ܓ̣ܠܲܝܟ̇ܝ ܡ̣ܢ ܚܦܝܵܝܘܼܬ̣ܵܐ: ܘܓܲܓܲܪܬܹܟ݂ܝ ܡ̣ܢ ܨܵܗܝܵܐ. ܘܐܸܡܲܪܬ̇ܝ ܐܸܬ̣ܚܲܝܠܹ̇ܬ̣ ܠܵܐ ܨܵܒ̣ܝܵܐ ܐ̄ܢܵܐ. ܡܸܛܠ ܕܪܸܚܡܹܬ̣ ܢܘܼܟ݂ܖ̈ܵܝܹܐ: ܘܒ̣ܵܬܲܪܗܘܿܢ ܐܹܙܲܠ.

²⁶ ܐܲܝܟ݂ ܒܸܗܬܲܬ̣ ܓܲܢܵܒ̣ܵܐ ܟܲܪ ܕܡܸܫܬ̇ܟܲܚ: ܗܵܟ݂ܢܵܐ ܒܗܸܬ̣ܘ ܒܢܲܝ̈ ܝܼܣܪܵܝܹܠ: ܗܸܢܘܿܢ ܘܡܲܠܟܲܝ̈ܗܘܿܢ: ܘܪܵܘ̱ܖ̈ܒ̣ܵܢܲܝܗܘܿܢ: ܘܟ݂ܵܗܢܲܝ̈ܗܘܿܢ ܘܲܢܒ̣ܝܲܝ̈ܗܘܿܢ.

²⁷ ܕܐܵܡܪܝܼܢ ܠܩܲܝܣܵܐ ܐܲܒ̣ܘܼܢ ܐܲܢ̄ܬ̇: ܘܲܠܟܹܐܦܵܐ ܕܐܲܢ̄ܬ̇ܝ ܝܼܠܸܕ̇ܬ̇ܝܼܢ. ܡܸܛܠ ܕܐܲܦܢܝ̣ܘ ܠܝܼ ܩܕ݂ܵܠܗܘܿܢ: ܘܠܵܐ ܐܲܦܲܝ̈ܗܘܿܢ. ܘܲܒ̣ܙܲܒ̣ܢܵܐ ܕܒ̣ܝܼܫܘܬ̇ܗܘܿܢ ܐܵܡܪܝܼܢ: ܩܘܼܡ ܥܲܕܲܪܝܢ ܘܲܦܪܘܿܩܵܝܢ.

²⁸ ܘܐܲܝܟܵܐ ܐܸܢܘܿܢ ܐܲܠܵܗܲܝ̈ܟ ܕܲܥܒܲܕܬ̇ ܠܵܟ݂: ܢܩܘܼܡܘܼܢ ܘܢܸܦܪܩܘܼܢܵܟ݂ ܒܲܙܒܲܢ ܒܝܼܫܬܵܟ݂. ܡܸܛܠ ܕܐܲܝܟ݂ ܡܸܢܝܵܢܵܐ ܕܩܘܼܖ̈ܝܲܝܟ ܗܘܵܘ ܐܲܠܵܗܲܝ̈ܟ ܝܑܼܗܘܼܕ݂ܵܐ.

²⁹ ܠܡܵܢܵܐ ܕܵܝܢ̇ܝܼܢ ܐ̄ܢܬ̇ܘܿܢ ܥܲܡܝ ܟܠܟ݂ܘܿܢ ܕܲܓܹ̇ܬ̇ܘܿܢ ܒܝܼ: ܐܵܡܲܪ ܡܵܪܝܵܐ.

³⁰ ܣܪܝܼܩܵܐܝܼܬ̣ ܡܚܹ݁ܬ̣ ܠܲܒ̣ܢܲܝ̈ܟ̇ܘܿܢ. ܘܡܲܪܕܘܼܬ̣ܵܐ ܠܵܐ ܩܲܒܹ݁ܠ̣ܘ. ܐܸܟ݂ܠܲܬ̤ ܚܲܪܒܵܐ ܠܲܢܒ̣ܝܲܝ̈ܟ̇ܘܿܢ: ܐܲܝܟ݂ ܐܲܪܝܵܐ ܡܚܲܒ̇ܠܵܢܵܐ.

³¹ ܐܲܢ̄ܬ̇ܘܿܢ ܕܵܪܵܐ ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ: ܕܲܠܡܵܐ ܡܲܕ݂ܒ̇ܪܵܐ ܗ̄ܘܹܝܬ̣ ܠܝܼܣܪܵܝܹܠ: ܐܵܘ ܐܲܝܟ݂ ܐܲܪܝܵܐ ܚܲܪܒ̇ܬ̣ܵܐ: ܡܸܛܠ ܡܵܢܵܐ ܐܸܡܲܪ ܥܲܡܝ: ܢܚܸܬ̣ܢ ܠܵܐ ܢܹܐܬܸܐ ܬܘܼܒ ܠܘܵܬܵܟ݂.

³² ܕܲܠܡܵܐ ܛܵܥܝܵܐ ܒܬ̣ܘܼܠܬܵܐ ܥܘܼܢܕܵܢܵܗ̇: ܘܟܲܠܬ̣ܵܐ ܬܲܨܒ̇ܝܼܬ̣ܵܗ̇: ܥܲܡܝ ܕܝܹܢ ܛܥܵܐܘܼܢܝ ܝܵܘ̈ܡܵܬ̣ܵܐ ܕܠܲܝܬ̇ ܠܗܘܿܢ ܡܸܢܝܵܢ.

³³ ܡܵܢܵܐ ܬܘܼܒ̣ ܡܲܬ̣ܩܢܲܬ̇ܝ ܐܘܼܖ̈ܚܵܬܹܟ݂ܝ ܠܡܸܒ̣ܥܵܐ ܪܸܚ̱ܡܬ̣ܵܐ: ܕܗܵܐ ܐܵܦ ܒܝܼܫܬܵܐ ܝܼܠܸܦܬ̇ܝ ܒܐܘܼܖ̈ܚܵܬܹܟ݂ܝ.

³⁴ ܘܐܵܦ ܒܐܝܼܕܲܝ̈ܟ̇ܝ ܐܸܫܬ̇ܟܲܚ ܕܡܵܐ ܕܢܲܦ̮̈ܫܵܬ̣ܵܐ ܕܡܸܣܟܹ̇ܢܹ̈ܐ ܙܲܟܵܝܹ̈ܐ: ܠܵܐ ܗ̄ܘܵܐ ܒܦܘ̣ܠܫܬ̣ܵܐ ܐܸܫܟ̇ܚܹܬ̣ ܐܸܢܘܿܢ: ܐܸܠܵܐ ܬܚܹܬ̣ ܟܠ ܐܝܼܠܵܢ.

³⁵ ܘܐܸܡܲܪܬ̇ܝ ܕܲܡܚܲܣܝܵܐ ܐ̄ܢܵܐ: ܡܸܛܠ ܗܵܢܵܐ ܐܲܗ̣ܦܸܟ݂ ܪܘܼܓ̣ܙܹܗ ܡܹܢܝ: ܗܵܐ ܕܵܐܹܢ ܐ̄ܢܵܐ ܠܹܟ݂ܝ ܥܲܠ ܕܐܸܡܲܪܬ̇ܝ ܕܠܵܐ ܚܛܹ̇ܝܬ̣.

³⁶ ܡܵܢܵܐ ܡܸܙܕܲܠܠܲܬ̇ܝ ܛܵܒ̣ ܠܡܸܬ̣ܢܵܐ ܐܘܼܖ̈ܚܵܬܹܟ݂ܝ: ܐܵܦ ܡ̣ܢ ܡܸܨܪܹܝܢ ܬܸܒ̣ܗ̱ܬ̣ܝܼܢ ܐܲܝܟ݂ ܕܲܒ̣ܗܸܬ̇ܬ̇ܝ ܡ̣ܢ ܐܵܬܘܿܪ.

³⁷ ܐܵܦ ܡ̣ܢ ܠܘܵܬ̣ ܗܵܢܵܐ ܬܸܦܩܝܼܢ ܟܲܕ݂ ܐܝܼܕܲܝ̈ܟ̇ܝ ܥܲܠ ܪܹܫܹܟ݂ܝ: ܕܲܪܓܸـ̣ܙ ܡܵܪܝܵܐ ܥܲܠ ܡܲܬ̣ܟ̇ܠܵܢܲܝ̈ܟ̇ܝ: ܘܠܵܐ ܬܲܨܠܚܝܼܢ ܒܗܘܿܢ.

3

¹ ܐܸܢ ܢܸܫܒ̇ܘܼܩ ܓܲܒ̣ܪܵܐ ܐܲܢ̄ܬ̇ܬܹܗ: ܘܬܹܐܙܲܠ ܡ̣ܢ ܠܘܵܬܹܗ ܘܬܸܗܘܹܐ ܠܓܲܒ̣ܪܵܐ ܐ̄ܚܪܹܢܵܐ: ܐܸܢ ܡܸܬ̣ܦܢܸܐ ܠܘܵܬ̣ܵܗ̇ ܬܘܼܒ̣: ܗܵܐ ܡܸܬ̇ܛܲܢܵܦܘܼ ܬܸܬ̇ܛܲܢܲܦ ܐܲܪܥܵܐ ܗܝ̇. ܘܐܲܢ̄ܬ̇ܝ ܙܲܢ̣ܝܬ̇ܝ ܒܖ̈ܵܥܵܘܵܬ̣ܵܐ ܣܲܓܝܼ̈ܐܹܐ: ܬܘܼܒ̣ܝ ܠܘܵܬ̣ܝ. ܐܵܡܲܪ ܡܵܪܝܵܐ.

² ܐܲܪܝܼܡܝ ܥܲܝܢܲܝ̈ܟ̇ܝ ܥܲܠ ܫܒ̣ܝܼ̈ܠܹܐ܆ܘܲܚܙܵܝ ܐܲܝܟܵܐ ܠܵܐ ܐܸܬ̇ܛܲܢܲܦܬ̇ܝ: ܥܲܠ ܐܘܼܖ̈ܚܵܬ̣ܵܐ ܝܼܬܸܒ̣ܬ̇ܝ ܠܗܘܿܢ ܐܲܝܟ݂ ܢܲܥܒ̣ܵܐ ܒܡܲܕ݂ܒܪܵܐ: ܘܛܲܢܸܦـ̣ܬ̇ܝ ܐܲܪܥܵܐ ܒܙܵܢܝܘܼܬܹܟ݂ܝ.

³ ܘܲܒ̣ܒ̣ܝܼܫܘܼܬܹܟ݂ܝ ܐܸܬܟ̇ܠܝܼܘ ܖ̈ܣܝܼܣܹܐ: ܘܲܪܒ̣ܝܼܥܵܐ ܠܵܐ ܗܘ̤ܵܐ: ܘܒܹܝܬ̣ ܥܲܝܢܹ̈ܐ ܕܐܲܢ̄ܬ̇ܬ̣ܵܐ ܙܵܢܝܼܬ̣ܵܐ ܗܘܵܐ ܠܹܟ݂ܝ: ܘܠܵܐ ܨܒܲܝܬ̇ܝ ܠܡܸܬ̇ܬ̇ܟ݂ܵܣܘܼ.

⁴ ܗܵܐ ܡܸܟܹܝܠ ܩܵܪܝܵܐ ܐܲܢ̄ܬ̇ܝ ܠܝܼ: ܐܵܒ̣ܝ: ܘܲܡܪܲܒܝܵܢܝ ܕܡ̣ܢ ܛܲܠܝܘܼܬ̣ܝ ܐܲܢ̄ܬ̇ܝ.

⁵ ܕܲܠܡܵܐ ܢܸܬ̣ܢ̱ܛܲܪ ܠܥܵܠܡ: ܐܵܘ ܢܸܬ̣ܢ̱ܛܲܪ ܠܥܵܠܡܝܼܢ: ܗܵܐ ܡܲܠܸܠ̣ܬ̇ܝ ܘܲܥ̣ܒܲܕܬ̇ܝ ܒܝܼܫܬܵܐ ܘܐܸܬ̣ܚܲܝܲܠܬ̇ܝ.

⁶ ܘܐܸܡܲܪ ܠܝܼ ܡܵܪܝܵܐ ܒܝܵܘ̈ܡܵܘܗܝ ܕܝܘܿܫܝܵܐ ܡܲܠܟܵܐ: ܚ̣ܙܲܝܬ̇ ܡܸܕܸܡ ܕܥܸܒ̣ܕܲܬ̤ ܥܵܡܘܼܪܬܵܐ ܕܝܼܣܪܵܝܹܠ: ܐܸܙܲܠܬ̤ ܗܝ̤ ܠܟ݂ܠ ܛܘܼܪ ܕܪܵܡ: ܘܲܬ̣ܚܹܝܬ̣ ܟܠ ܐܝܼܠܵܢ ܕܥܲܒܝܼܛ: ܘܙܲܢܝܲܬ̤ ܬܲܡܵܢ.

⁷ ܘܐܸܡ̇ܪܹܬ̣ ܡ̣ܢ ܒܵܬܲܪ ܕܥܸܒ̣ܕܲܬ̤ ܗܵܠܹܝܢ ܟܠܗܹܝܢ: ܕܬ̣ܘܼܒ̣ܝ ܠܘܵܬ̣ܝ ܘܠܵܐ ܬܵܒܲܬ̤: ܘܲܚܙܵܬ̤ ܫܘܼܩܪܵܗ̇ ܚܵܬܵܗ̇ ܝܑܼܗܘܕ݂ܵܐ.

⁸ ܘܲܚܙܵܬ̤ ܟܠܗܹܝܢ ܨܸܒ̣̈ܘܵܬ̣ܵܗ̇. ܘܥܲܠ ܕܓ̣ܵܪܲܬ̤ ܥܵܡܘܿܪܬܵܐ ܕܝܼܣܪܵܝܹܠ ܫܒܲܩ̇ܬܵܗ̇: ܘܝܸܗ̇ܒܹܬ̣ ܠܵܗ̇ ܟܬܵܒ̣ܵܐ ܕܫܘܼܒ̣ܩܵܢܵܐ: ܘܠܵܐ ܕܸܚܠܲܬ̤ ܫܲܩܵܪܬܵܐ ܚܵܬ̣ܵܗ̇ ܝܑܼܗܘܼܕ݂ܵܐ: ܘܐܸܙܲܠ̄ܬ̤ ܘܙܲܢܝܲܬ̤ ܐܵܦ ܗܝ̤.

⁹ ܘܡܸܛܠ ܕܙܲܠܝܼܠܵܐ ܗ̄ܘܵܬ̣ ܙܵܢܝܘܼܬ̣ܵܗ̇ ܛܲܢܦܲܬ̤ ܐܲܪܥܵܐ: ܘܓ̣ܵܪܲܬ̤ ܒܟܹܐܦܹ̈ܐ ܘܲܒ̣ܩܲܝܣܹ̈ܐ.

¹⁰ ܘܐܵܦ ܡ̣ܢ ܒܵܬܲܪ ܗܵܠܹܝܢ ܟܠܗܹܝܢ: ܠܵܐ ܬܵܒܲܬ̤ ܠܘܵܬ̣ܝ ܫܲܩܵܪܬܵܐ ܚܵܬ̣ܵܗ̇ ܝܑܼܗܘܼܕ݂ܵܐ ܡ̣ܢ ܟܠܹܗ ܠܸܒܵܗ̇: ܐܸܠܵܐ ܐܸܢ ܒܕܲܓܵܠܘܼܬܑ̣ܵܐ ܐܵܡܲ݁ܪ ܡܵܪܝܵܐ.

¹¹ ܘܐܸܡܲܪ ܠܝܼ ܡܵܪܝܵܐ: ܙܲܕ̇ܩܲܬ̤ ܢܲܦ̮ܫܵܗ̇ ܥܵܡܘܿܪܬܵܐ ܕܝܼܣܪܵܝܹܠ: ܡ̣ܢ ܫܲܩܵܪܬܵܐ ܚܵܬ̣ܵܗ̇ ܝܑܼܗܘܼܕ݂ܵܐ.

¹² ܙܸܠ ܘܐܲܟ݂ܪܸܙ ܦܸܬ̣ܓ̣ܵܡܹ̈ܐ ܗܵܠܹܝܢ ܒܓܲܪܒܝܵܐ: ܘܐܸܡܲܪ: ܬܘܼܒ̣ܝ ܥܵܡܘܿܪܬܵܐ ܕܝܼܣܪܵܝܹܠ ܐܵܡ݁ܲܪ ܡܵܪܝܵܐ: ܘܠܵܐ ܐܹܩܲܫܹܐ ܐܲܦܲܝ̈ ܒܟ݂ܘܿܢ: ܡܸܛܠ ܕܛܵܒ̣ ܐ̄ܢܵܐ ܐܵܡ݁ܲܪ ܡܵܪܝܵܐ: ܘܠܵܐ ܐܵܠܹܡ ܐ̄ܢܵܐ ܠܥܵܠܲܡ.

¹³ ܒܪܲܡ ܕܲܥܝ ܚܛܵܗܲܝ̈ܟܝ: ܕܲܒܡܵܪܝܵܐ ܐܲܠܵܗܹܟ݂ܝ ܚ̣ܛܲܝܬ̇ܝ. ܘܒ̣ܲܕܲܪܬ̇ܝ ܐܘܼܖ̈ܚܵܬܹܟ݂ܝ ܠܢܘܼܟ݂ܖ̈ܵܝܹܐ ܬܚܹܝܬ̣ ܟܠ ܐܝܼܠܵܢ ܕܥܲܒܝܼܛ: ܘܲܒ̣ܩܵܠܝ ܠܵܐ ܫܡܲܥ̣ܬ̇ܘܿܢ ܐܵܡ݁ܲܪ ܡܵܪܝܵܐ.

¹⁴ ܬܘܼܒ̣ܘ ܒ̈ܢܲܝܵܐ ܬܲܝܵܒܹ̈ܐ ܐܵܡ݁ܲܪ ܡܵܪܝܵܐ: ܕܐܸܢܵܐ ܨܒܹ̇ܝܬ̣ ܒܟ݂ܘܿܢ: ܘܲܕ݂ܒܲܪܬ̇ܟ݂ܘܿܢ ܚܲܕ݂ ܡ̣ܢ ܩܪܝܼܬ̣ܵܐ: ܘܲܬ̣ܪܹܝܢ ܡ̣ܢ ܫܲܪܒ̇ܬ̣ܵܐ: ܘܐܲܝܬ̇ܝܼܬ̇ܟ݂ܘܿܢ ܠܨܸܗܝܘܿܢ.

¹⁵ ܘܐܸܬ̇ܠ ܠܟ݂ܘܿܢ ܖ̈ܥܵܘܵܬ̣ܵܐ ܐܲܝܟ݂ ܠܹܒ̇ܝ: ܘܢܸܪܥܘܿܢܵܟ݂ܘܿܢ ܒܝܼܕܲܥܬ݂ܵܐ ܘܲܒ̣ܣܘܼܟܵܠܵܐ.

¹⁶ ܘܢܸܗܘܹܐ ܟܲܕ݂ ܬܸܦܪܘܿܢ ܘܬܸܣܓ̇ܘܿܢ ܒܐܲܪܥܵܐ: ܒܝܵܘ̈ܡܵܬ̣ܵܐ ܗܵܢܘܿܢ ܐܵܡܲ݁ܪ ܡܵܪܝܵܐ: ܠܵܐ ܢܹܐܡܪܘܼܢ ܬܘܼܒ̣ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ: ܘܠܵܐ ܬܸܣܲܩ ܥܲܠ ܠܸܒܵܐ: ܘܠܵܐ ܢܸܬ̇ܕܲܟ݂ܪܘܼܢܵܗ̇ ܘܠܵܐ ܢܸܦܩܕ݂ܘܼܢܵܗ̇: ܘܠܵܐ ܬܸܬ̣ܥ̱ܒܸܕ݂ ܬܘܼܒ̣.

¹⁷ ܒܹܗ ܒܲܙܢܵܐ ܗܵܘ̇: ܢܸܩܪܘܿܢܵܗ̇ ܠܐܘܿܪܸܫܠܸܡ ܟܘܼܪܣܝܹܗ ܕܡܵܪܝܵܐ: ܘܲܢܣܲܟܘܿܢ ܟܠܗܘܿܢ ܥܲܡܡܹ̈ܐ ܠܲܫܡܹܗ ܕܡܵܪܝܵܐ: ܘܠܵܐ ܢܹܐܙܠܘܼܢ ܬܘܼܒ̣ ܒܵܬܲܪ ܨܸܒ̣ܝܵܢܲܝ̈ ܠܸܒ̇ܗܘܿܢ ܒܝܼܫܵܐ.

¹⁸ ܒܝܵܘ̈ܡܵܬ̣ܵܐ ܗܵܢ̇ܘܿܢ: ܢܹܐܙܠ̄ܘܼܢ ܕܒܹܝܬ̣ ܝܑܼܗܘܼܕ݂ܵܐ ܥܲܡ ܕܒܹܝܬ̣ ܝܑܼܣܪܵܝܹܠ: ܘܢܹܐܬ̣ܘܿܢ ܐܲܟ݂ܚܕ݂ܵܐ ܡ̣ܢ ܐܲܪܥܵܐ ܕܓܲܪܒ̇ܝܵܐ: ܠܐܲܪܥܵܐ ܕܐܵܘܪܬܹ̇ܬ̣ ܠܐܲܒ̣ܵܗܲܝ̈ܗܘܿܢ.

¹⁹ ܘܐܸܢܵܐ ܐܸܡ̇ܪܹܬ̣ ܕܐܸܚܫܒ̣ܵܟ݂ ܒܲܒ̣̈ܢܲܝܵܐ: ܘܐܸܬܸ̇ܠ ܠܵܟ݂ ܐܲܪܥܵܐ ܓܒ̣ܝܼܬ̣ܵܐ ܘܝܵܪܬ̇ܘܼܬ̣ܵܐ ܕܚܲܝ̈ܠܹܐ ܕܚܲܝ̈ܠܵܘܵܬ̣ܵܐ ܕܥܲܡܡܹ̈ܐ: ܘܐܸܡ̇ܪܹܬ̣ ܐܵܒ̣ܝ ܬܸܩܪܘܿܢܵܢܝ: ܘܡ̣ܢ ܒܵܬܲܪܝ ܠܵܐ ܬܸܗ̄ܦܟ݂ܘܼܢ.

²⁰ ܫܲܪܝܼܪܵܐܝܼܬ̣ ܐܲܝܟ݂ ܕܲܡܕܲܓ̇ܠܵܐ ܐܲܢ̄ܬ̇ܬ̣ܵܐ ܒܚܲܒ̣ܪܵܗ̇: ܗܵܟܲܢܵܐ ܕܲܓܸ̇ܠ̣ܘ ܒܝܼ ܒܢܲܝ̈ ܝܑܼܣܪܵܝܹܠ: ܐܵܡܲ݁ܪ ܡܵܪܝܵܐ.

²¹ ܩܵܠܵܐ ܥܲܠ ܫܒ̣ܝܼ̈ܠܹܐ ܐܸܫܬ̇ܡܲܥ: ܒܟ݂ܵܬ̣ܵܐ ܘܒ̣ܵܥܘܼܬ̣ܵܐ ܕܒܹܝܬ̣ ܝܑܼܣܪܵܝܹܠ: ܕܥܲܩܸܡ̣ܘ ܐܘܼܖ̈ܚܵܬ̣ܗܘܿܢ: ܘܲܛ̣ܥܵܘ ܠܡܵܪܝܵܐ ܐܲܠܵܗܗܘܿܢ.

²² ܬܘܼܒ̣ܘ ܒ̈ܢܲܝܵܐ ܬܲܝܵܒܹ̈ܐ: ܘܐܲܣܸܐ ܬܝܵܒ̣ܘܼܬ̣ܟ݂ܘܿܢ: ܘܐܸܡܲܪܘ ܗܸܢ̣ܘܿܢ ܗܵܐ ܚܢܲܢ ܕܝܼܠܵܟ݂: ܡܸܛܠ ܕܐܲܢ̄ܬ̇ ܗ̄ܘ̣ ܡܵܪܝܵܐ ܐܲܠܵܗܲܢ.

²³ ܫܲܪܝܼܪܵܐܝܼܬ̣ ܠܕܲܓܵܠܘܼܬܵܐ ܖ̈ܵܡܵܬ̣ܵܐ ܘܥܘܼܫܢܵܐ ܕܛܘܼܖܹ̈ܐ: ܫܲܪܝܼܪܵܐܝܼܬ̣ ܒܡܵܪܝܵܐ ܐܲܠܵܗܲܢ ܦܘܼܪܩܵܢܹܗ ܕܝܼܣܪܵܝܹܠ.

²⁴ ܘܒܸܗܬܲܬ̣ܵܐ ܐܸܟ݂ܠܲܬ̤ ܠܹܐܘܲܬ̣ ܐܲܒ̣ܵܗܲܝ̈ܢ ܡ̣ܢ ܛܲܠܝܘܼܬ̣ܗܘܿܢ: ܘܲܠܥܵܢ̈ܗܘܿܢ: ܘܲܠܬ̣ܵܘܖ̈ܲܝܗܘܿܢ: ܘܠܲܒ̣ܢܲܝ̈ܗܘܿܢ: ܘܠܲܒ̣̈ܢܵܬ̣ܗܘܿܢ.

²⁵ ܢܸܕ݂ܡܲܟ݂ ܒܒܸܗܬ̇ܬܲܢ: ܘܲܢܟܲܣܹܝܢ ܚܸܦܪܲܢ ܡܸܛܠ ܕܲܠܡܵܪܝܵܐ ܐܲܠܵܗܲܢ ܚ̣ܛܲܝܢ: ܚܢܲܢ ܘܐܲܒ̣ܵܗܲܝ̈ܢ ܡ̣ܢ ܛܲܠܝܘܼܬܲܢ ܘܲܥܕܲܡܵܐ ܠܝܵܘܡܵܢܵܐ: ܘܠܵܐ ܫܡܲܥܢ ܒܩܵܠܹܗ ܕܡܵܪܝܵܐ ܐܲܠܵܗܲܢ.

4

¹ ܐܸܢ ܬܬ̣ܘܼܒ̣ ܝܼܣܪܵܝܹܠ ܐܵܡ݁ܲܪ ܡܵܪܝܵܐ: ܠܘܵܬ̣ܝ ܬܬ̣ܘܼܒ̣. ܘܐܸܢ ܬܲܥܒܲܪ ܛܲܢܦܘܼܬ̣ܵܟ݂ ܡ̣ܢ ܩܕ݂ܵܡܲܝ ܠܵܐ ܬܙܘܼܥ.

² ܘܬܹܐܡܸܐ ܚܲܝ ܗ̄ܘ̣ ܡܵܪܝܵܐ: ܒܩܘܼܫܬܵܐ ܘܲܒ̣ܕ݂ܝܼܢܵܐ ܘܲܒ̣ܙܲܕ̇ܝ̣ܩܘܼܬ̣ܵܐ: ܘܢܸܬ̣ܒܲܪܟ݂ܘܼܢ ܒܹܗ ܥܲܡܡܹ̈ܐ ܘܒܹܗ ܢܸܫܬܲܒ̇ܚܘܼܢ.

³ ܡܸܛܠ ܕܗܵܟ݂ܢܵܐ ܐܵܡܲ݁ܪ ܡܵܪܝܵܐ: ܠܓܲܒ̣ܖܹ̈ܐ ܕܲܝܗܘܼܕ݂ܵܐ ܘܲܠܥܵܡܘܿܖܹ̈ܝܗ̇ ܕܐܘܿܪܸܫܠܸܡ: ܐܲܢܗܲܪܘ ܠܟ݂ܘܿܢ ܫܪܵܓ̣ܵܐ: ܘܠܵܐ ܬܸܙ̱ܪܥܘܼܢ ܥܲܠ ܟܘܼ̈ܒܹ̇ܐ.

⁴ ܓܙܘܿܪܘ ܠܡܵܪܝܵܐ ܘܐܲܥܒܲܪܘ ܥܘܼܪܠܘܼܬ̣ܵܐ ܕܠܸܒ̇ܟ݂ܘܿܢ: ܓܲܒ̣ܖܹ̈ܐ ܕܲܝܗܘܼܕ݂ܵܐ ܘܥܵܡܘܿܖܹ̈ܝܗ̇ ܕܐܘܿܪܸܫܠܸܡ: ܕܲܠܡܵܐ ܬܸܦܘܿܩ ܐܲܝܟ݂ ܢܘܼܪܵܐ ܚܸܡܬ̣ܝ: ܘܬ̣ܵܘܩܸܕ݂ ܘܠܲܝܬ̇ ܕܲܡܕܲܥܸܟ݂: ܡܸܛܠ ܒܝܼܫܘܼܬ݂ܵܐ ܕܲܥܒ̣ܵܕܲܝ̈ܟ̇ܘܿܢ.

⁵ ܚܵܘܵܘ ܒܲܝܗܘܼܕ݂ܵܐ: ܘܒ̣ܐܘܿܪܸܫܠܸܡ ܐܲܫܡܲܥܘ: ܘܐܸܡܲܪܘ: ܩܪܵܘ ܫܝܼܦܘܿܪܵܐ ܒܐܲܪܥܵܐ: ܩܪܵܘ ܒܩܵܠܵܐ ܪܵܡܵܐ: ܘܐܸܡܲܪܘ: ܐܸܬ̣ܟܲܢܲܫܘ ܘܢܸܥܘܿܠ ܠܩܘܼܖ̈ܝܵܐ ܥܲܫ̈ܝܼܢܵܬܵܐ.

⁶ ܫܩܘܿܠܘ ܐܵܬ̣ܵܐ ܠܨܸܗܝܘܿܢ: ܐܸܬ̣ܥܲܫܢܘ ܘܠܵܐ ܬܩܘܼܡܘܼܢ: ܡܸܛܠ ܕܒ̣ܝܼܫܬܵܐ ܡܲܝܬܹ̇ܐ ܐ̄ܢܵܐ ܡ̣ܢ ܓܲܪܒ̇ܝܵܐ ܘܲܬ̣ܒ̣ܵܪܵܐ ܪܲܒܵܐ.

⁷ ܡܠܸܟ݂ ܬܲܩܝܼܦ ܣܵܠܹ̇ܩ ܐܲܝܟ݂ ܐܲܪܥܵܐ ܡ̣ܢ ܥܵܒܹܗ: ܘܲܡܚܲܒܸ̇ܠ ܥܲܡܡܹ̈ܐ. ܫ̣ܩܲܠ ܘܲܢܦܲܩ̣ ܡ̣ܢ ܐܲܬ̣ܪܹܗ: ܠܡܸܥܒܲܕ݂ ܐܲܪܥܵܟ݂ ܠܚܘܼܪܒܵܐ: ܘܩܘܼܖ̈ܝܵܟ݂ ܢܸܨ̈ܕܝܵܢ ܡ̣ܢ ܒܠܲܝ ܕܝܵܬܹܒ̣.

⁸ ܥܲܠ ܗܵܕܹܐ ܐܸܬ̣ܟ̇ܒܸܢܘ ܣܲܩܹ̈ܐ: ܘܐܲܪܩܸܕ݂ܘ ܘܐܲܝܠܸܠܘ: ܡܸܛܠ ܕܠܵܐ ܗܸܦܟܲܬ̤ ܚܸܡܬ̣ܵܐ ܕܪܘܼܓ̣ܙܹܗ ܕܡܵܪܝܵܐ ܡܸܢܟ݂ܘܿܢ.

⁹ ܘܢܸܗܘܸܐ ܒܝܵܘܡܵܐ ܗܵܘ̇ ܐܵܡ݁ܲܪ ܡܵܪܝܵܐ: ܢܹܐܒܲܕ݂ ܠܸܒܵܐ ܕܡܲܠ̈ܟܹܐ: ܘܠܸܒܵܐ ܕܫܲܠܝܼܛܵܢܹ̈ܐ. ܘܢܸܬ̣ܡ̱ܗܘܼܢ ܟܵܗܢܹ̈ܐ: ܘܲܢܒ̣ܝܹ̈ܐ ܢܸܬ̇ܕܲܡܪܘܼܢ.

¹⁰ ܘܐܸܡ̇ܪܹܬ̣ ܒܒ̣ܵܥܘܼ ܡܵܪܝܵܐ ܐܲܠܵܗܵܐ: ܫܲܪܝܼܪܵܐܝܼܬ̣ ܡܲܛܥܵܝܘ ܐܲܛܥ̇ܝܼܬ̣ ܠܥܲܡܵܐ ܗܵܢܵܐ: ܘܠܐܘܿܪܸܫܠܸܡ: ܕܐܸܡ̇ܪܹܬ̣ ܫܠܵܡܵܐ ܢܸܗܘܸܐ ܠܟ݂ܘܿܢ: ܘܗܵܐ ܩܸܪܒܲܬ̤ ܚܲܪܒܵܐ ܥܕܲܡܵܐ ܠܢܲܦ̮ܫܵܐ.

¹¹ ܒܹܗ ܒܲܙܢܵܐ ܗܵܘ̇: ܢܸܬ̣ܐ̱ܡܲܪ ܠܥܲܡܵܐ ܗܵܢܵܐ: ܘܠܐܘܿܪܸܫܠܸܡ: ܐܲܝܟ݂ ܪܘܼܚܵܐ ܛܵܥܝܼܬ̣ܵܐ ܕܒܲܫܒ̣̈ܝܼܠܹܐ ܕܡܲܕ݂ܒ̇ܪܵܐ ܐܘܼܪܚܵܗ̇ ܕܒܲܪܬ̣ܝ ܥܲܡܝ: ܠܵܐ ܠܡܸܕ݂ܪܵܐ ܘܠܵܐ ܠܡܸܚܡܲܠ.

¹² ܪܘܼܚܵܐ ܕܡܲܠܝܵܐ ܡ̣ܢ ܗܵܠܹܝܢ ܬܹܐܬܸܐ ܠܝܼ: ܡܸܟܹ̇ܝܠ ܐܵܦ ܐܸܢܵܐ ܐܹܡܲܠܸܠ ܕܝܼܢܲܝ̈ ܥܲܡܗܘܿܢ.

¹³ ܗܵܐ ܐܲܝܟ݂ ܥܢܵܢܵܐ ܢܸܣܲܩ: ܘܐܲܝܟ݂ ܥܲܠܥܵܠܵܐ ܡܲܪܟܲܒ̣ܬܹܗ: ܩܲܠܝܼܠܝܼܢ ܡ̣ܢ ܢܸܫܖܹ̈ܐ ܖ̈ܟ݂ܫܹܗ: ܘܵܝ ܠܲܢ ܕܐܸܬ̣ܒ̇ܙܸܙܢ.

¹⁴ ܐܲܫܝܼܓ̣ܝ ܠܸܒܹܟ݂ܝ ܡ̣ܢ ܒܝܼܫܬܵܐ ܐܘܿܪܸܫܠܸܡ: ܡܸܛܠ ܕܬܸܬ̣ܦܲܪܩܝܼܢ: ܥܕܲܡܵܐ ܠܐܸܡܲܬ̣ ܢܒ̣ܘܼ̈ܬ̣ܵܢ ܒܓ̣ܵܘܹܟ݂ܝ ܡܲܚܫ̈ܒ̣ܵܬܹܟ݂ܝ ܒܝܼ̈ܫܵܬܵܐ.

¹⁵ ܡܸܛܠ ܩܵܠܵܐ ܕܲܡܚܵܘܸܐ ܡ̣ܢ ܕܵܢ: ܘܡܲܫܡܲܥ ܟܹܐܒ̣ܵܐ ܡ̣ܢ ܛܘܼܪܵܐ ܕܐܲܦܪܹܝܡ.

¹⁶ ܐܲܕ݂ܟܲܪܘ ܠܥܲܡܡܹ̈ܐ: ܘܐܲܫܡܲܥܘ ܠܐܘܿܪܸܫܠܸܡ: ܗܵܐ ܟܸܢܫܹ̈ܐ ܕܥܲܡܡܹ̈ܐ ܐܵܬܸ݁ܝܢ ܡ̣ܢ ܐܲܪܥܵܐ ܪܲܚܝܼܩܬܵܐ: ܘܲܢܪܝܼܡܘܼܢ ܩܵܠܗܘܿܢ ܥܲܠ ܩܘܼܖ̈ܝܵܐ ܕܲܝܗܘܼܕ݂ܵܐ.

¹⁷ ܐܲܝܟ݂ ܢܲܛܖ̈ܲܝ ܚܲܩ̈ܠܵܬ̣ܵܐ ܗܘ̤ܵܘ ܥܠܹܝܗ̇ ܡ̣ܢ ܚܕ݂ܵܖܹ̈ܝܗ: ܡܸܛܠ ܕܠܝܼ ܡܲܪܡܪܲܬ̤ ܐܵܡܲ݁ܪ ܡܵܪܝܵܐ.

¹⁸ ܐܘܼܖ̈ܚܵܬܹܟ݂ܝ ܘܲܥܒ̣ܵܕܲܝ̈ܟ̇ܝ ܥ̣ܒܲܕ݂ܘ ܠܹܟ݂ܝ ܗܵܠܹܝܢ: ܗܵܕܲܐ ܗ̄ܝ̣ ܒܝܼܫܬܹ̇ܟ݂ܝ ܕܡܸܪܲܬ̤ ܘܩܸܪܒܲܬ̤ ܥܕܲܡܵܐ ܠܠܸܒܹ̇ܟ݂ܝ.

¹⁹ ܡܥܲܝ̈ ܡܥܲܝ̈ ܟܵܝ݁ܒ̇ܝܼܢ ܠܝܼ ܘܬ̣ܵܠܵܘܵܬ̣ܝ̈. ܠܸܒ̇ܝ: ܡܫܵܘܲܪ ܠܝܼ ܠܹܒ̇ܝ ܘܠܵܐ ܫܵܬܹ̇ܩ: ܡܸܛܠ ܕܩܵܠܵܐ ܕܫܝܼܦܘܿܪܵܐ ܫܸܡܥܲܬ̤ ܢܲܦ̮ܫܝ: ܘܝܘܼܒܵܒ̣ܵܐ ܕܲܩܪܵܒ̣ܵܐ.

²⁰ ܬܒ̣ܵܪܵܐ ܥܲܠ ܬܒ̣ܵܪܵܐ ܢܹܐܬܹܐ: ܡܸܛܠ ܕܐܸܬ̣ܒܲܙܙܲܬ̤ ܟܠܵܗ̇ ܐܲܪܥܵܐ: ܡ̣ܢ ܫܹܠܝ ܐܸܬ̣ܒ̇ܙܸܙ ܡܲܫܟܲܢܝ: ܘܲܢܦܲܠ ܝܵܖ̈ܝܼܥܵܬ̣ܝ.

²¹ ܥܕܲܡܵܐ ܠܐܸܡܲܬ̣ܝ ܐܸܚܙܸܐ ܠܲܕ݂ܥܵܪܹܩ: ܘܐܸܫܡܲܥ ܩܵܠܵܐ ܕܫܝܼܦܘܿܪܵܐ.

²² ܡܸܛܠ ܕܲܫ̣ܛܵܘ ܥܲܡܝ: ܘܠܝܼ ܠܵܐ ܝܼܕܲܥܘ. ܐܸܢܘܿܢ ܣܲܟ݂̈ܠܹܐ: ܘܠܵܐ ܗ̄ܘ̣ܵܘ ܚܲܟ̇ܝܼܡܹ̈ܐ. ܚܲܟ̇ܝܼܡܝܼܢ ܐܸܢܘܿܢ ܠܒ̣ܝܼܫܬܵܐ: ܘܛܵܒ̣ܬ̣ܵܐ ܠܵܐ ܝܵܕ݂ܥܝܼܢ.

²³ ܚܵܪܹܬ̣ ܒܐܲܪܥܵܐ: ܘܗܵܐ ܬܘܿܗ̇ ܘܒ̣ܘ̇ܗ̇: ܘܠܲܫܡܲܝܵܐ ܘܠܲܝܬ̇ ܢܘܼܗ̱ܪܗܘܿܢ.

²⁴ ܚܙܹ̇ܝܬ̣ ܛܘܼܖܹ̈ܐ ܘܗܵܐ ܙܵܝ݁ܥܝܼܢ: ܘܟ݂ܠܗܹܝܢ ܖ̈ܵܡܵܬ̣ܵܐ ܐܸܬ̣ܦܲܪܲܩ.

²⁵ ܚܵܪܹܬ̣ ܘܗܵܐ ܠܲܝܬ̇ ܒܲܪܢܵܫ: ܘܟ݂ܠܵܗ̇ ܦܵܪܚܬ̣ܵܐ ܕܲܫܡܲܝܵܐ ܦܸܪܕܲܬ̤.

²⁶ ܚܙܹ̇ܝܬ̣ ܘܗܵܐ ܟܲܪܡܠܵܐ ܚܪܸܒ̣ ܐܲܝܟ݂ ܡܲܕ݂ܒ̇ܪܵܐ: ܘܟ݂ܠܗܹܝܢ ܩܘܼܪܝܹܗ ܐܸܬ̣ܥ̱ܩܲܪ: ܡ̣ܢ ܩܕܵܡ ܡܵܪܝܵܐ: ܘܡ̣ܢ ܩܕܵܡ ܚܸܡܬ݂ܵܐ ܕܪܘܼܓ̣ܙܹܗ.

²⁷ ܡܸܛܠ ܕܗܵܟܲܢܵܐ ܐܵܡ݁ܲܪ ܡܵܪܝܵܐ ܐܲܠܵܗܵܐ: ܠܲܚܒ̣ܵܠܵܐ ܬܸܗܘܸܐ ܟܠܵܗ̇ ܐܲܪܥܵܐ: ܘܲܓ̣ܡܘܼܪܝܵܐ ܠܵܐ ܐܸܥܒܸ̇ܕ݂.

²⁸ ܡܸܛܠ ܗܵܠܹܝܢ ܬܸܬ̣ܐ̱ܒܸܠ ܐܲܪܥܵܐ: ܘܢܸܚܫܟ݂ܘܼܢ ܫܡܲܝܵܐ ܡ̣ܢ ܠܥܸܠ. ܟܠ ܕܡܲܠܠܹ̇ܬ̣ ܘܐܸܬ̣ܪܲܥܝܼ̇ܬ̣: ܠܵܐ ܐܸܬ̇ܬ̇ܘܸܐ ܘܠܵܐ ܐܲܗܦܸܟ݂ ܡܸܢܵܗ̇.

²⁹ ܡ̣ܢ ܩܵܠܵܐ ܕܦܲܖ̈ܵܫܹܐ ܘܲܕ݂ܫܵܕܹܝܢ ܒܩܸܫܬܵܐ: ܥܸܪܩܲܬ̤ ܟܠܵܗ̇ ܩܪܝܼܬ̣ܵܐ: ܥܲܠ̣ܘ ܒܥܵܒܹ̈ܐ: ܘܒܲܫܩܝܼܦܹ̈ܐ ܣܠܸܩ̣ܘ: ܟܠܗܹܝܢ ܩܘܼܖ̈ܝܵܐ ܐܸܫܬ̇ܒܸܩ: ܘܠܲܝܬ̇ ܒܲܪܢܵܫ ܕܝܵܬܹ݁ܒ̣ ܒܗܹܝܢ.

³⁰ ܘܐܲܢ̄ܬ̇ܝ ܒܙܝܼܙܬܵܐ ܡܵܢܵܐ ܬܸܥܒ̇ܕ݂ܝܼܢ: ܟܲܕ݂ ܬܸܠܒ̇ܫܝܼܢ ܙܚܘܿܖ̈ܝܵܬ̣ܵܐ: ܟܲܕ݂ ܬܸܨܛܲܒ̇ܬ̣ܝܼܢ ܒܬܲܨܒ̇ܝܼܬܵܐ ܕܕܲܗܒ̣ܵܐ: ܟܲܕ݂ ܬܸܟ݂ܚ̄ܠܝܼܢ ܒܲܨܕ݂ܝܼܕ݂ܵܐ ܥܲܝܢܲܝ̈ܟ̇ܝ: ܠܲܣܪܝܼܩܘܼܬܵܐ ܗ̄ܘ ܡܸܨܛܲܒ̇ܬ̣ܵܐ ܐܲܢ̄ܬܝ: ܫܲܒ̣ܩ̣ܘܼܟ݂ܝ ܚܲܒ̣ܖ̈ܲܝܟ̇ܝ: ܘܢܲܦ̮ܫܹܟ݂ܝ ܒܵܥܹ̇ܝܢ.

³¹ ܡܸܛܠ ܕܩܵܠܵܐ ܐܲܝܟ݂ ܟܪܝܼܗܬܵܐ ܫܸܡܥܸ̇ܬ̣: ܘܥܵܩܬ̣ܵܐ ܐܲܝܟ݂ ܐܲܢ̄ܬ̇ܬ̣ܵܐ ܕܲܡܚܲܒ̇ܠܵܐ ܠܡܹܐܠܲܕ݂: ܩܵܠܵܐ ܕܒܲܪܬ̣ ܨܸܗܝܘܿܢ ܕܡܸܬ̇ܛܲܪܦܵܐ: ܘܲܡܦܲܪܣܵܐ ܐܝܼܕܹܝ̈ܗ̇ ܘܐܵܡ̇ܪܵܐ: ܘܵܝ ܠܝܼ ܕܐܸܬ̇ܛܲܪܦܲܬ̤ ܢܲܦ̮ܫܝ ܥܲܠ ܩܛܝܼ̈ܠܲܝ.

5

¹ ܐܸܬ̣ܟܲܪܟ̇ܘ ܒܫܘܼܩܹ̈ܝܗ̇ ܕܐܘܿܪܸܫܠܸܡ ܘܲܚܙܵܘ: ܘܕܲܥܘ: ܘܲܒ̣ܥܵܘ ܒܲܦ̈ܠܵܛܵܘܵܬ̣ܵܗ̇: ܐܸܢ ܬܸܫܟ̇ܚܘܼܢ ܓܲܒ̣ܪܵܐ: ܐܸܢ ܐܝܼܬ̣ ܕܥܵܒܹ̇ܕ݂ ܕܝܼܢܵܐ: ܘܒ̣ܵܥܹ̇ܐ ܗܲܝܡܵܢܘܼܬ̣ܵܐ: ܐܸܫܒ̇ܘܿܩܝ ܠܵܗ̇.

² ܘܐܸܢ ܚܲܝ ܡܵܪܝܵܐ ܢܹܐܡܪܘܼܢ: ܫܲܪܝܼܪܵܐܝܼܬ̣ ܒܕܲܓܵܠܘܼܬ̣ܵܐ ܝܵܡܹ̇ܝܢ.

³ ܡܵܪܝܵܐ ܥܲܝܢܲܝ̈ܟ ܥܲܠ ܗܲܝܡܵܢܘܼܬ̣ܵܐ: ܡ̣ܚܲܝܬ̇ ܐܸܢܘܿܢ ܘܠܵܐ ܐܸܬ̣ܟ̇ܪܲܗܘ: ܓܲܡܲܪܬ̇ ܐܸܢܘܿܢ ܘܠܵܐ ܨܒ̣ܵܘ ܠܲܡܩܲܒܵܠܘܼ ܡܲܪܕ̇ܘܼܬ̣ܵܐ: ܩܲܫ̣ܝܘܼ ܐܲܦܲܝ̈ܗܘܿܢ ܡ̣ܢ ܟܹܐܦܵܐ: ܘܠܵܐ ܨܒ̣ܵــ̣ܘ ܠܲܡܬ̣ܵܒ̣.

⁴ ܘܐܸܢܵܐ ܐܸܡ̇ܪܹܬ̣ ܡܸܛܠ ܕܡܸܣܟܹ̇ܢܝܼܢ ܐܸܢܘܿܢ ܣܛ̣ܵܘ: ܡܸܛܠ ܕܠܵܐ ܝܼܕܲܥ̣ܘ ܐܘܼܪܚܹܗ ܕܡܵܪܝܵܐ ܘܕ݂ܝܼܢܵܐ ܕܐܲܠܵܗܘܿܢ.

⁵ ܐܹܙܲܠ ܠܝܼ ܠܘܵܬ̣ ܪܵܘܖ̈ܒ̣ܵܢܹܐ ܘܐܹܡܲܠܸܠ ܥܲܡܗܘܿܢ: ܡܸܛܠ ܕܗܸܢ̣ܘܿܢ ܝܼܕܲܥ̣ܘ ܐܘܼܪܚܹܗ ܕܡܵܪܝܵܐ: ܘܕ݂ܝܼܢܵܐ ܕܐܲܠܵܗܗܘܿܢ: ܫܲܪܝܼܪܵܐܝܼܬ̣ ܟܠܗܘܿܢ ܐܲܟ݂ܚܕ݂ܵܐ: ܬܒܲܪܘ ܢܝܼܪܵܐ ܘܦܲܣܸܩ̣ܘ ܚܢܵܩܹ̈ܐ.

⁶ ܡܸܛܠ ܗܵܢܵܐ ܢܸܬ̣ܒܲܪ ܐܸܢܘܿܢ ܐܲܪܝܵܐ ܡ̣ܢ ܥܵܒ̣ܵܐ: ܘܕܹܐܒܲܝ̈ ܪܲܡܫܵܐ ܢܒܲܙܥܘܼܢ ܐܸܢܘܿܢ: ܢܸܡܪܵܐ ܢܸܟ݂ܡܲܢ ܥܲܠ ܩܘܼܖ̈ܝܼܗܘܿܢ: ܟܠ ܕܢܸܦܘܿܩ ܡܸܢܗܘܿܢ ܢܸܬ̇ܬ̇ܒܲܪ: ܡܸܛܠ ܕܲܣܓ̣ܝܼܘ ܚܵܘ̈ܒܵܝܗܘܿܢ ܘܲܥ̣ܫܸܢܘ ܕܠܵܐ ܢܬ̣ܘܼܒ̣ܘܼܢ.

⁷ ܥܲܠ ܐܲܝܕܵܐ ܐܸܫܒܘܿܩ ܠܹܟ݂ܝ: ܒܢܲܝ̈ܟ̇ܝ ܫܲܒ̣ܩ̣ܘܼܢܝ ܘܝܼܡ̣ܵܘ ܒܐܲܝܠܹܝܢ ܕܠܵܐ ܗܘ̤ܵܘ ܐܲܠܵܗܹ̈ܐ: ܘܣܲܒ̇ــܥܹ̇ܬ̣ ܐܸܢܘܿܢ ܘܓ̣ܵܪܘ: ܘܒܹܝܬ̣ ܙܵܢ̈ܝܵܬ̣ܵܐ ܐܸܬ̣ܟܲܬܲܫܘ.

⁸ ܐܲܝܟ݂ ܖ̈ܲܟ݂ܫܵܐ ܐܘܿܫ̈ܢܹܐ ܥܵܗܖܹ̈ܐ ܗܘ̤ܵܘ: ܓܒܲܪ ܥܲܠ ܐܲܢ̄ܬܲܬ̣ ܚܲܒ̣ܪܹܗ ܨܵܗ̇ܠܝܼܢ ܗ̄ܘܵܘ.

⁹ ܥܲܠ ܗܵܠܹܝܢ ܠܵܐ ܐܸܦܩܘܿܕ݂ ܐܵܡܲܪ ܡܵܪܝܵܐ: ܘܲܒ̣ܥܲܡܵܐ ܕܗܵܟ݂ܢܵܐ ܠܵܐ ܬܸܬ̣ܢܲܩܲܡ ܢܲܦ̮ܫܝ.

¹⁰ ܣܲܩܘ ܒܫܘܼܖܹ̈ܝܗ̇ ܘܲܥܩܘܿܪܘ: ܘܲܓ̣ܡܘܼܪܝܵܐ ܠܵܐ ܬܸܥܒ̇ܕ݂ܘܼܢ: ܫܒ̣ܘܿܩܘ ܫܲܬ̣ܐ̱ܣܹ̈ܝܗ̇ ܡܸܛܠ ܕܲܕ݂ܡܵܪܝܵܐ ܐܸܢܹܝܢ.

¹¹ ܡܸܛܠ ܕܲܡܕܲܓܵܠܘܼ ܕܲܓܸܠ̣ܘ ܒܝܼ ܒܢܲܝ̈ ܝܼܣܪܵܝܹܠ ܘܲܒ݂ܢܲܝ̈ ܝܼܗܘܼܕܵܐ . ܐܵܡܲܪ ܡܵܪܝܵܐ .

¹² ܕܲܓܸܠ̣ܘ ܒܡܵܪܝܵܐ ܘܐܵܡ̇ܪܵܝܼܢ ܠܵܐ ܗܘ̤ܵܐ ܗܘ̤: ܠܵܐ ܬܹܐܬܸܐ ܥܠܲܝܢ ܒܝܼܫܬܵܐ : ܘܚܲܪܒܵܐ ܘܟܲܦܢܵܐ ܠܵܐ ܢܸܚܙܸܐ.

¹³ ܘܲܢܒ݂ܝܹܐ ܢܸܗܘܘܿܢ ܠܥܲܠܥܵܠܵܐ: ܘܐܲܝܠܹܝܢ ܕܡܸܠܬ̣ܵܐ ܠܲܝܬ ܠܗܘܿܢ: ܗܵܟܲܢܵܐ ܢܸܬ݂ܥ̱ܒܸܕ݂ ܠܗܘܿܢ.

¹⁴ ܡܸܛܠ ܗܵܢܵܐ ܗܵܟܲܢܵܐ ܐܵܡ̇ܪ ܡܵܪܿܝܵܐ ܐܲܠܵܗܵܐ ܚܲܝܠܬ݂ܵܢܵܐ: ܚܠܵܦ ܕܡܲܠܸܠ̣ܗܘܿܢ ܡܸܠܬ݂ܵܐ ܗܵܕܹܐ: ܗܵܐ ܝܵܗܹܒ݂ ܐ̄ܢܵܐ ܦܸܬ̣ܓ̣ܵܡܲܝ̈ ܒܦܘܼܡܵܟ݂ ܢܘܼܪܵܐ: ܘܥܲܡܵܐ ܗܵܢܵܐ ܩܲܝܣܹ̈ܐ. ܘܬܹܐܟ݂ܘܿܠ ܐܸܢܘܿܢ.

¹⁵ ܗܵܐ ܡܲܝܬܸ̇ܐ ܐ̄ܢܵܐ ܥܠܲܝܟܘܿܢ ܒܹܝܬ̣ ܝܼܣܪܵܝܹܠ: ܥܲܡܵܐ ܡ̣ܢ ܪܘܼܚܩܵܐ ܐܵܡܲܪ ܡܵܪܝܵܐ: ܥܲܡܵܐ ܗ̄ܘ̣ ܥܲܫܝܼܢܵܐ: ܥܲܡܵܐ ܗ̄ܘ ܡ̣ܢ ܥܵܠܡܵܐ: ܥܲܡܵܐ ܕܠܵܐ ܬܸܕܲܥ ܠܸܫܵܢܹܗ: ܘܠܵܐ ܬܸܫܡܲܥ ܡܸܕܸܡ ܕܲܡܡܲܠܸܠ.

¹⁶ ܓܲܓܖ̈ܵܬܹܗ ܐܲܝܟ݂ ܩܲܒ̣ܖܹ̈ܐ ܦܬ̣̈ܝܼܚܵܢ: ܘܟ݂ܠܗܘܿܢ ܓܲܢ̄ܒܵܪܝܼܢ.

¹⁷ ܢܹܐܟ݂ܘܿܠ ܚܨܵܕ݂ܵܟ݂ ܘܠܲܚܡܵܟ݂: ܢܹܐܟ݂ܘܿܠ ܒܢܲܝ̈ܟ ܘܲܒ̈ܢܵܬ̣ܵܟ݂: ܢܹܐܟ݂ܘܿܠ ܥܵـ̈ܢܵܟ݂ ܘܬ̣ܵܘܖ̈ܲܝܟ: ܢܹܐܟ݂ܘܿܠ ܓܘܼܦ̈ܢܲܝܟ ܘܬܹܐܢܲܝ̈ܟ: ܢܡܲܣܟܸܢ ܩܘܼܖ̈ܝܵܐ ܕܬ̣ܘܼܩܦܵܟ݂ ܕܐܲܢ̄ܬ̇ ܬܟ݂ܝܼܠ ܥܠܲܝܗܹܝܢ ܒܚܲܪܒܵܐ.

¹⁸ ܘܐܵܦ ܒܝܵܘ̈ܡܵܬ̣ܵܐ ܗܵܢ̇ܘܿܢ ܐܵܡ݁ܲܪ ܡܵܪܝܵܐ ܠܵܐ ܐܲܣܝܼܦܟ݂ܘܿܢ.

¹⁹ ܘܢܸܗܘܸܐ ܟܲܕ݂ ܬܹܐܡܪܘܿܢ ܡܸܛܠ ܡܵܢܵܐ ܥܒܲܕ݂ ܠܲܢ ܡܵܪܝܵܐ ܐܵܠܵܗܲܢ ܗܵܠܹܝܢ ܟܠܗܹܝܢ: ܬܹܐܡܲܪ ܠܗܘܿܢ: ܗܵܟ݂ܢܵܐ ܐܵܡܲܪ ܡܵܪܝܵܐ: ܥܲܠ ܕܲܫܒܲܩ̣ܬ̇ܘܿܢܵܝ ܘܲܦܠܲܚܬ̇ܘܿܢ ܠܐܲܠܵܗܹ̈ܐ ܢܘܼܟ݂ܖ̈ܵܝܹܐ ܒܐܲܪܥ̱ܟ݂ܘܿܢ: ܗܵܟܲܢܵܐ ܬܸܦܠ̱ܚܘܼܢ ܠܢܘܼܟ݂ܖ̈ܵܝܹܐ ܒܐܲܪܥܵܐ ܕܠܵܐ ܕܝܼܠܟ݂ܘܿܢ.

²⁰ ܚܵܘܵܘ ܗܵܕܹܐ ܒܒܹܝܬ̣ ܝܲܥܩܘܿܒ̣: ܘܐܲܫܡ̱ܥܘܼܗ̇ ܒܲܝܗܘܼܕ݂ܵܐ: ܘܐܸܡܲܪܘ.

²¹ ܫܡܲܥܘ ܗܵܕܹܐ ܥܲܡܵܐ ܣܲܟ݂ܠܵܐ ܕܠܲܝܬ̇ ܒܹܗ ܠܸܒܵܐ: ܕܥܲܝܢܹ̈ܐ ܐܝܼܬ ܠܗܘܿܢ ܘܠܵܐ ܚܵـ̇ܙܹܝܢ: ܘܐܸܕ݂ܢܹ̈ܐ ܐܝܼܬ̣ ܠܗܘܿܢ ܘܠܵܐ ܫܵܡ̇ܥܝܼܢ.

²² ܡܹܢܝ ܠܵܐ ܬܸܕ݂ܚ̄ܠܘܼܢ ܐܵܡ݁ܲܪ ܡܵܪܝܵܐ: ܘܡ̣ܢ ܩܕܵܡܲܝ ܠܵܐ ܬܙܘܼܥܘܼܢ: ܕܣܵܡܹ̇ܬ̣ ܚܵܠܵܐ ܬܚܘܼܡܵܐ ܠܝܲܡܵܐ: ܢܵܡܘܿܣܵܐ ܠܥܵܠܲܡ ܘܠܵܐ ܥܵــ݁ܒܲܪ ܠܹܗ: ܘܡܸܬ̣ܟܲܬܲܫ ܘܠܵܐ ܡܸܫܟܲܚ: ܘܡܸܬ̇ܬ̇ܪܝܼܡܝܼܢ ܓܲܠܵܘ̈ܗܝ ܘܠܵܐ ܥܵــ݁ܒ̣ܪܝܼܢ ܠܹܗ.

²³ ܘܲܠܥܲܡܵܐ ܗܵܢܵܐ: ܗܘ̤ܵܐ ܠܸܒܵܐ ܡܵܪܘܿܕ݂ܵܐ ܘܲܡܡܲܪܡܪܵܢܵܐ: ܣܛܵܘ̣ ܘܐܸܙܲܠ̣ܘ.

²⁴ ܘܠܵܐ ܐܸܡܲܪܘ ܒܠܸܒ̇ܗܘܿܢ ܢܸܕ݂ܚܲܠ ܠܡܵܪܝܵܐ ܐܲܠܵܗܲܢ: ܕܝܵܗܹ̇ܒ̣ ܡܸܛܪܵܐ ܒܟ݂ܝܼܪܵܝܵܐ ܘܲܠܩܝܼܫܵܝܵܐ ܒܙܲܒ̣ܢܹܗ: ܘܥܲܠܵ̈ܬ̣ܵܐ ܕܩܲܝܛܵܐ ܠܣܲܬ̣ܘܵܐ ܢܵــ݁ܛܲܪܠܲܢ.

²⁶

²⁷ ܘܐܲܝܟ݂ ܩܠܘܼܒܝܵܐ ܕܲܡܠܸܐ ܦܵܪܲܚܬ̣ܵܐ: ܗܵܟܲܢܵܐ ܒܵܬܲܝ̈ܗܘܿܢ ܡܠܸܝܢ ܢܸܟ݂ܠܵܐ.

²⁸ ܡܸܛܠ ܗܵܢܵܐ ܝܼܪܸܒ̣ܘ ܘܲܥܬܲܪܘ ܘܲܥ̣ܒܲܪܘ ܥܲܠ ܕܝܼܢܵܐ: ܕܝܼܢܵܐ ܠܵܐ ܕܵܢ̣ܘ: ܘܕ݂ܝܼܢܵܐ ܕܝܲܬ̣ܡܹ̈ܐ ܠܵܐ ܬܲܪܸܨܘ: ܘܕ݂ܝܼܢܵܐ ܕܒ̣ܵܝ̈ܫܹܐ ܠܵܐ ܕܵܢ̣ܘ.

²⁹ ܥܲܠ ܗܵܠܹܝܢ ܠܵܐ ܐܸܦܩܘܿܕ݂ ܐܵܡ݁ܲܪ ܡܵܪܝܵܐ: ܘܲܒ̣ܥܲܡܵܐ ܕܗܵܟ݂ܢܵܐ ܠܵܐ ܬܸܬ̣ܢܲܩܡ ܢܲܦ̮ܫܝ.

³⁰ ܬܸܡܗܵܐ ܘܫܵܛܝܘܼܬ̣ܵܐ ܗܘܵܐ ܒܐܲܪܥܵܐ.

³¹ ܢܒ̣ܝܹ̈ܐ ܐܸܬ̣ܢܲܒܝܼܘ ܫܘܼܩܪܵܐ: ܘܟܲܗ̈ܢܹܐ ܐܸܚܲܕ݂ܘ ܐܝܼܕܲܝ̈ܗܘܿܢ: ܘܥܲܡܝ ܪܚܸܡ̣ܘ ܗܵܟܲܢܵܐ: ܘܡܵܢܵܐ ܬܸܥܒܕ݂ܘܼܢ ܠܚܲܪܬ̣ܵܐ.

6

¹ ܓܵـ̣ܙܘ ܒܢܵܝ̈ ܒܸܢܝܵܡܹܝܢ ܡ̣ܢ ܓܵܘ ܐܘܿܪܸܫܠܸܡ: ܘܲܒ̣ܩܵܠܵܐ ܩܪܵܘ ܫܝܼܦܘܿܪܵܐ: ܘܥܲܠ ܒܹܝܬ̣ ܟܪܲܡ ܫـ̣ܩܲܠܘ ܐܵܬ̤ܵܐ: ܡܸܛܠ ܕܒ̣ܝܼܫܬܵܐ ܡܲܝܬܸ̇ܐ ܐ̄ܢܵܐ ܡ̣ܢ ܓܲܪܒܝܵܐ ܘܲܬ̣ܒ̣ܵܪܵܐ ܪܲܒܵܐ.

² ܠܲܡܥܲܕܲܢܬܵܐ ܘܠܲܡܦܲܢܲܩܬܵܐ ܕܡܲܝܬ̇ܝ ܒܲܪܬ̣ ܨܸܗܝܘܿܢ.

³ ܥܠܹܝܗ̇ ܢܹܐܬ̣ܘܿܢ ܖ̈ܥܵܘܵܬ̣ܵܐ ܘܲܓ̣ܙܵܖ̈ܵܝܗܘܿܢ ܐܲܟ݂ܚܕ݂ܵܐ: ܘܢܸܩܫܘܼܢ ܥܠܹܝܗ̇ ܡܲܫܟ̇ܢܲܝ̈ܗܘܿܢ ܟܲܕ݂ ܚܵܕ݂ܪܵܐ: ܘܢܸܪܥܘܿܢ ܓܒܲܪ ܠܓܲܒܹ̇ܗ.

⁴ ܛܲܝܸܒ̣ܘ ܥܠܹܝܗ̇ ܩܪܵܒ̣ܵܐ: ܘܐܸܡܲܪܘ ܩܘܼܡܘ ܢܸܣܲܩ ܒܛܲܗܪܵܐ: ܘܵܝ ܠܲܢ ܕܲܦـ̣ܢܵܐ ܝܵܘܡܵܐ ܘܲܪܟܸܢܘ ܛܸܠܵܠܲܝ̈ ܪܲܡܫܵܐ.

⁵ ܩܘܼܡܘ ܢܸܣܲܩ ܥܠܹܝܗ̇ ܒܠܸܠܝܵܐ ܘܲܢܚܲܒܸ̇ܠ ܣܵܚܖ̈ܵܬ̣ܵܗ̇.

⁶ ܡܸܛܠ ܕܗܵܟܲܢܵܐ ܐܵܡ݁ܲܪ ܡܵܪܝܵܐ ܚܲܝܠܬ̣ܵܢܵܐ: ܦܣܘܿܩܘ ܩܲܝܣܸ̈ܝܗ̇: ܘܐܲܟ݂ܡܸܢܘ ܥܲܠ ܐܘܿܪܸܫܠܸܡ ܟܡܹܐܢܹ̈ܐ: ܗܵܝ ܩܪܝܼܬ̣ܵܐ ܕܐܸܬ̣ܦܲܩܕܲܬ̤. ܘܟ݂ܠܹܗ ܥܘܼܫܩܵܐ ܒܓ̣ܵܘܵܗ̇.

⁷ ܐܲܝܟ݂ ܕܟܲܢܹ̇ܫ ܓܘܼܒܵܐ ܡܵܘ̈ܗܝ: ܗܵܟܲܢܵܐ ܟܲܢܫܲܬ̤ ܒܝܼܫܬܵܗ̇: ܚܛܘܼܦܝܵܐ ܘܒܸܙܬ̣ܵܐ ܡܸܫܬ̇ܡܲܥ ܒܵܗ̇ ܩܕ݂ܵܡ ܐܲܦܲܝ̈ ܐܲܡܝܼܢܵܐܝܼܬ̣.

⁸ ܒܟܹܐܒܹ̈ܐ ܘܒ̣ܡܲܚ̈ܘܵܬ̣ܵܐ ܐܸܬ̣ܪ̱ܕ݂ܵܝ ܐܘܿܪܸܫܠܸܡ: ܕܲܠܡܵܐ ܬܸܢܲܕ݂ ܢܲܦ̮ܫܝ ܡܸܢܹܟ݂ܝ: ܕܲܠܡܵܐ ܐܸܥܒ̇ܕܹܟ݂ܝ ܠܚܘܼܪܒܵܐ ܐܲܝܟ݂ ܐܲܪܥܵܐ ܕܠܵܐ ܐܬ̣ܝܲܬ̇ܒܲܬ̤.

⁹ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ: ܡܸܬ̣ܒܲܥܵܪܘܼ ܢܸܬ̣ܒܲܥܪܘܼܢ: ܐܲܝܟ݂ ܓܸܦܬܵܐ ܫܲܪܟܹ̇ܗ ܕܝܼܣܪܵܝܹܠ: ܐܲܗܦܸܟ݂ ܐܝܼܕ݂ܵܟ݂ ܐܲܝܟ݂ ܩܵܛ̇ܘܿܦܵܐ ܥܲܠ ܒܘܼܥܵܪܵܐ.

¹⁰ ܠܡܲܢ ܐܹܡܲܪ ܘܐܹܣܲܗܸܕ݂ ܕܢܸܫܡ̱ܥܘܼܢ: ܗܵܐ ܐܸܕ݂ܢܲܝ̈ܗܘܿܢ ܥܘܼܖ̈ܠܵܢ: ܘܠܵܐ ܡܸܫܟ̇ܚܝܼܢ ܠܲܡܨܵܬ̣: ܗܵܐ ܦܸܬ̣ܓ̣ܵܡܹܗ ܕܡܵܪܝܵܐ ܗܘ̤ܵܐ ܠܗܘܿܢ ܠܚܸܣܕܵܐ ܘܠܵܐ ܨܵܒܹ̇ܝܢ ܒܹܗ.

¹¹ ܘܐܲܢ̄ܬ̇ܝ ܚܸܡܬܹܗ ܕܡܵܪܝܵܐ ܐܸܬ̣ܡ̱ܠܝܼܬ̇ܝ: ܘܲܠܐܝܼܬ̇ܝ: ܐܲܟ̇ܝܼܠܝ ܘܐܲܫܘܿܕ݂ܝ ܥܲܠ ܛܠܵܝܹ̈ܐ ܒܫܘܼܩܹ̈ܐ: ܘܥܲܠ ܟܢܘܼ̈ܫܵܬ̣ܵܐ ܕܓܲܕܘܼ̈ܕܹܐ ܐܲܟ݂ܚ̄ܕ݂ܵܐ: ܡܸܛܠ ܕܐܵܦ ܓܲܒܖܹ̈ܐ ܥܲܡ ܢܸܫܹ̈ܐ ܢܸܬ̇ܬܲܚܕܘܼܢ: ܘܣܵܒܵܐ ܥܲܡ ܛܠܸܐ ܝܵܘ̈ܡܵܬ̣ܵܐ.

¹² ܢܸܬ̣ܝܲܗ̄ܒܘܼܢ ܒܵܬܲܝ̈ܗܘܿܢ ܠܐܲܚܖ̈ܵܢܹܐ: ܘܚܲܩ̈ܠܵܬ̣ܵܐ ܘܢܸܫܹ̈ܐ ܐܲܟ݂ܚ̄ܕ݂ܵܐ: ܡܸܛܠ ܕܲܡܪܝܼܡ ܐ̄ܢܵܐ ܐܝܼܕ݂ܝ ܥܲܠ ܥܵܡܘܿܖܹ̈ܝܗ̇ ܕܐܲܪܥܵܐ ܐܵܡܲ݁ܪ ܡܵܪܝܵܐ.

¹³ ܡܸܛܠ ܕܡ̱ܢ ܙܥܘܿܪܗܘܿܢ ܘܲܥܕܲܡܵܐ ܠܪܲܒܗܘܿܢ: ܟܠܗܘܿܢ ܢܵܟ݂ܠ̇ܝ̣ܢ ܢܸܟ݂ܠܵܐ: ܘܡ̣ܢ ܢܒ̣ܝܹ̈ܐ ܕܲܓܵܠܹ̈ܐ ܘܲܥܕܲܡܵܐ ܠܟ݂ܵܗ̈ܢܹܐ: ܟܠܗܘܿܢ ܥܵܒ̣ܕܝܼܢ ܫܘܼܩܪܵܐ.

¹⁴ ܘܡܲܐܣܹܝܢ ܬܒܲܪܵܗ̇ ܕܒܲܪܬ̣ ܥܲܡܝ ܒܒܸܙܚܵܐ: ܘܐܵܡ̇ܪܝܼܢ: ܫܠܵܡܵܐ: ܫܠܵܡܵܐ: ܘܠܲܝܬ̇ ܫܠܵܡܵܐ.

¹⁵ ܒـ̣ܗܸܬ̣ܘ ܡܸܛܠ ܕܛܲܢܦܘܼܬ̣ܵܐ ܥ̣ܒܲܕ݂ܘ: ܘܒܲܗܝܼܬܹ̈ܐ ܠܵܐ ܒܵܗ̇ܬ̇ܝܼܢ: ܘܲܠܡܸܬ̇ܬ̇ܟ݂ܵܣܘܼ ܠܵܐ ܝܵـ̇ܕ݂ܥܝܼܢ: ܡܸܛܠ ܗܵܢܵܐ ܢܸܦܠܘܼܢ ܥܲܡ ܢܵܦ̈ܠܹܐ: ܘܲܒ̣ܙܲܒ̣ܢܵܐ ܕܡܸܬ̣ܦܲܩܕܝܼܢ ܢܸܣܬܲܚܦܘܼܢ ܐܵܡܲ݁ܪ ܡܵܪܝܵܐ.

¹⁶ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܩܘܼܡܘ ܥܲܠ ܐܘܼܖ̈ܚܵܬ̣ܵܐ: ܘܲܚܙܵܘ: ܘܫܲܐܸܠܘ ܥܲܠ ܫܒ̣̈ܝܼܠܝ ܥܵܠܡܵܐ: ܘܲܚܙܵܐ ܐܝܕܵܐ ܐܘܼܪܚܵܐ ܫܲܦܝܼܪܵܐ ܙܸܠ ܒܵܗ̇: ܘܐܸܫܟܲܚܘ ܢܝܵܚܵܐ ܠܢܲܦ̮ـ̈ܫܵܬ̣ܟ݂ܘܿܢ: ܘܐܸܡܲܪܬ̇ܘܿܢ ܠܵܐ ܐܵܙܠ̄ܝܼܢܲܢ.

¹⁷ ܘܐܲܩܝܼܡܹ̇ܬ̣ ܥܠܲܝܟܘܿܢ ܕܵܘܩܹ̈ܐ ܕܬܸܫܡ̱ܥܘܿܢ ܠܩܵܠ ܫܝܼܦܘܿܪܵܐ: ܘܐܵܡܪܝܼܢ ܐ̄ܢܬ̇ܘܿܢ ܠܵܐ ܫܵܡ̇ܥܝܼܢܲܢ.

¹⁸ ܡܸܛܠ ܗܵܢܵܐ ܫܡܲܥܘ ܥܲܡܡܹ̈ܐ. ܘܕܲܥܝ ܥܹܕܬܵܐ ܕܲܒ̣ܗܘܿܢ.

¹⁹ ܫܡܲܥܝ ܐܲܪܥܵܐ: ܗܵܐ ܡܲܝܬܸ̇ ܐ̄ܢܵܐ ܒܝܼܫܬܵܐ ܥܲܠ ܥܲܡܵܐ ܗܵܢܵܐ ܐܲܝܟ݂ ܦܹܐܖ̈ܲܝ ܡܲܚܫ̈ܒ̣ܵܬ̣ܗܘܿܢ: ܕܲܠܦܸܬ̣ܓ̣ܵܡܲܝ̈ ܠܵܐ ܫܡܲܥ̣ܘ: ܘܲܠܢܵܡܘܿܣܝ ܐܲܣܠܝܼܘ.

²⁰ ܠܡܵܢܵܐ ܗܵܘ̇ܝܵܐ ܠܝܼ ܠܒ̣ܘܿܢ̄ܬܵܐ ܕܡܲܝܬܹ̄ܝܢ ܐ̄ܢܬ̇ܘܿܢ ܡ̣ܢ ܫܒ̣ܵܐ: ܘܩܲܢܝܵܐ ܕܒܸܣܡܵܐ ܡ̣ܢ ܐܲܪܥܵܐ ܪܲܚܝܼܩܬܵܐ: ܒܲܥ̈ܠܵܘܵܬ̣ܟ݂ܘܿܢ ܠܵܐ ܨܒܹ̇ܝܬ̣: ܘܕܸܒ̣ܚܲܝ̈ܟܘܿܢ ܠܵܐ ܒܣܸܡ̣ܘ ܠܝܼ.

²¹ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܗܵܐ ܝܵܗܹܒ̣ ܐ̄ܢܵܐ ܠܥܲܡܵܐ ܗܵܢܵܐ ܬܘܼܩ̈ܠܵܬ̣ܵܐ: ܘܢܸܬ̇ܬܲܩܠܘܼܢ ܒܗܹܝܢ ܐܲܒ̣ܵܗܹ̈ܐ ܘܲܒ̣̈ܢܲܝܵܐ ܐܲܟ݂ܚ̄ܕ݂ܵܐ: ܘܲܫܒ̣ܵܒ̣ܵܐ ܘܪܵܚ̇ܡܹܗ ܢܹܐܒ̣ܕܘܼܢ.

²² ܗܵܟܲܢܵܐ ܐܵܡܲ݁ܪ ܡܵܪܝܵܐ: ܗܵܐ ܥܲܡܵܐ ܐܵܬܹ̇ܐ ܡ̣ܢ ܐܲܪܥܵܐ ܕܓܲܪܒ̇ܝܵܐ: ܘܥܲܡܵܐ ܪܲܒܵܐ ܢܕ݂ܘܼܠ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ.

²³ ܒܩܸܫ̈ܬܵܬ̣ܵܐ ܘܲܒ̣ܢܲܝܙܟܹ̈ܐ ܡܙܲܝܢܝܼܢ: ܒܝܼܫܝܼܢ ܐܸܢܘܿܢ ܘܠܵܐ ܡܪܲܚܡܵܢܝܼܢ: ܘܩܵܠܗܘܿܢ ܐܲܝܟ݂ ܝܲܡܵܐ ܕܡܸܬ̣ܟ̇ܬܸܫ: ܘܥܲܠ ܖ̈ܲܟ݂ܫܵܐ ܪܟ݂ܝܼܒ̣ܝܼܢ: ܘܲܡܛܲܝܒ̣ܝܼܢ ܐܲܝܟ݂ ܓܲܢ̄ܒܵܪܹܐ ܠܲܩܪܵܒ̣ܵܐ: ܥܠܲܝܟܝ ܒܲܪܬ̣ ܨܸܗܝܘܿܢ.

²⁴ ܫـ̣ܡܲܥܢ ܫܸܡ̱ܥܗܘܿܢ ܘܐܸܬ̣ܪܲܦܝܼ ܐܝܼܕܲܝ̈ܢ: ܘܥܵܩܬ̣ܵܐ ܐܸܚܲܕ݂ܬܲܢ: ܘܚܸܒ̣̈ܠܹܐ ܐܲܝܟ݂ ܕܝܵܠܹܕܬܵܐ.

²⁵ ܠܵܐ ܬܸܦܩܘܼܢ ܠܚܲܩܠܵܐ: ܘܒ̣ܐܘܼܪܚܵܐ ܠܵܐ ܬܹܐܙܠ̄ܘܼܢ: ܡܸܛܠ ܚܲܪܒܵܐ ܕܲܒ̣ܥܸܠܕܒ̣ܵܒܹ̈ܐ ܕܲܟ݂ܪܝܼܟ݂ܵܐ ܡ̣ܢ ܚܕܵܖ̈ܲܝܟ̇ܝ ܒܲܪܬ̣ ܥܲܡܝ.

²⁶ ܐܸܬܸܟܲܒ̣ܢܝ ܣܲܩܹ̈ܐ ܘܐܸܬ̇ܬ̇ܦܝܼܠܝ ܒܩܸܛܡܵܐ: ܐܸܒ̣ܠܵܐ ܐܲܝܟ݂ ܕܜܲܠ ܝܼܚܝܼܕ݂ܵܐ ܥܒܸܕ݂ܝ ܠܹܟ݂ܝ: ܘܡܲܪܩܕܘܼܬ̣ܵܐ ܡܲܪܝܼܪܬܵܐ: ܡܸܛܠ ܕܡ̣ܢ ܫܸܠܝܵܐ ܢܹܐܬ̣ܘܿܢ ܥܠܲܝܟ̇ܝ ܒܵܙܘܿܙܹ̈ܐ.

²⁷ ܒܵܚܘܿܪܵܐ ܝܲܗܒܲܬܵܟ݂ ܒܥܲܡܝ ܥܲܫܝܼܢܵܐ: ܕܬܸܕܲܥ ܘܲܬ̣ܒܲܚܸܢ ܐܘܼܖ̈ܚܵܬ̣ܗܘܿܢ.

²⁸ ܟܠܗܘܿܢ ܫܲܠܝܼܛܵܢܲܝ̈ܗܘܿܢ ܡܵܪܘܿܕ݂ܝܼܢ: ܘܲܡܗܲܠܟ݂ܝܼܢ ܒܢܸܟ݂ܠܵܐ: ܘܐܲܝܟ݂ ܢܚܵܫܵܐ ܘܦܲܪܙܠܵܐ ܟܠܗܘܿܢ ܡܚܲܒ̇ܠܵܢܝܼܢ.

²⁹ ܓܲܪܕܝܼ ܡܲܦܘܼܚܵܐ ܡ̣ܢ ܢܘܼܪܗܘܿܢ: ܘܐܲܒ̣ܵܪܵܐ: ܘܲܣܪܝܼܩܵܐܝܼܬ̣ ܨܵܪܹܦ ܨܵܪܘܿܦܵܐ: ܘܒ̣ܝܼܫܬ̇ܥܘܿܢ ܠܵܐ ܓܵܡ̇ܪܵܐ.

³⁰ ܟܸܣܦܵܐ ܡܲܣܠ̱ܝܵܐ ܩ̣ܪܵܘ ܐܸܢܘܿܢ: ܡܸܛܠ ܕܐܲܣܠܝܼ ܐܲܢܘܿܢ ܡܵܪܝܵܐ.

7

¹ ܦܬ̣ܓ̣ܵܡܵܐ ܕܲܗܘ̤ܵܐ ܥܲܠ ܐܸܪܲܡܝܵܐ ܡ̣ܢ ܩܕܵܡ ܡܵܪܝܵܐ: ܠܡܹܐܡܲܪ.

² ܩܘܼܡ ܒܲܬ̣ܪܲܥ ܒܲܝܬܹ̇ܗ ܕܡܵܪܝܵܐ: ܘܲܩܪܝܼ ܬܲܡܵܢ ܦܸܬ̣ܓ̣ܵܡܵܐ ܗܵܢܵܐ: ܘܐܸܡܲܪ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܕܥܵܐ̇ܠܝܼܢ ܒܬܲܖ̈ܥܹܐ ܗܵܠܹܝܢ ܠܡܸܣܓܲܕ݂ ܠܡܵܪܝܵܐ.

³ ܗܵܟܲܢܵܐ ܐܲܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܐܲܛܐܸܒ̣ܘ ܐܘܼܖ̈ܚܵܬ̣ܟ݂ܘܿܢ ܘܲܥܒ̣ܕܲܝ̈ܟܘܿܢ: ܘܐܲܫܪܹܝܟ݂ܘܿܢ ܒܐܲܬ̣ܪܵܐ ܗܵܢܵܐ.

⁴ ܘܠܵܐ ܬܸܬܲܟ݂ܠܘܿܢ ܠܟ݂ܘܿܢ ܥܲܠ ܦܸܬ̣ܓ̣ܵܡܹ̈ܐ ܕܫܘܼܩܪܵܐ: ܕܐܵܡܪܝܼܢ ܠܟ݂ܘܿܢ: ܗܲܝܟ̇ܠܹܗ ܕܡܵܪܝܵܐ: ܗܲܝܟ̇ܠܹܗ ܕܡܵܪܝܵܐ.

⁵ ܗܲܝܟ̇ܠܹܗ ܐܲܢ̄ܬ̇ܘܿܢ ܕܡܵܪܝܵܐ ܐܸܢ ܬܲܫܦܪܘܼܢ ܐܘܼܖ̈ܚܵܬ̣ܟ݂ܘܿܢ ܘܲܥܒ̣ܵܕܲܝ̈ܟ̇ܘܿܢ: ܘܐܸܢ ܬܸܥܒ̣ܕ݂ܘܼܢ ܕܝܼܢܵܐ ܒܹܝܬ̣ ܓܒ̣ܪܵܐ ܠܚܲܒ̣ܪܹܗ.

⁶ ܘܲܠܥܵܡܘܿܖܹ̈ܐ ܘܲܠܝܲܬ̣ܡܹ̈ܐ ܘܠܲܐܖ̈ܡܠܵܬ̣ܵܐ: ܠܵܐ ܬܸܥܠ̱ܒ̣ܘܼܢ ܘܠܵܐ ܬܸܛܠ̱ܡܘܼܢ: ܘܲܕ݂ܡܵܐ ܙܲܟܵܝܵܐ ܠܵܐ ܬܹܐܫܕܘܼܢ ܒܐܲܬ̣ܪܵܐ ܗܵܢܵܐ: ܘܒ̣ܵܬܲܪ ܐܲܠܵܗܹ̈ܐ ܐ̄ܚܖ̈ܵܢܹܐ ܬܹܐܙܠܘܼܢ ܕܢܸܒ̣ܐܲܫ ܠܟ݂ܘܿܢ.

⁷ ܘܐܲܫܪܹܝܟ݂ܘܿܢ ܒܐܲܬ̣ܪܵܐ ܗܵܢܵܐ ܒܐܲܪܥܵܐ ܕܝܸܗ̄ܒܹܬ̣ ܠܐܲܒ̣ܵܗܲܝ̈ܟ̇ܘܿܢ: ܡ̣ܢ ܥܵܠܲܡ ܘܲܥܕܲܡܵܐ ܠܥܵܠܲܡ.

⁸ ܘܗܵܐ ܐܲܢ̄ܬ̇ܘܿܢ ܡܸܬ̇ܬܲܟ݂ܠܝܼܢ ܥܲܠ ܦܸܬ̣ܓ̣ܵܡܹ̈ܐ ܕܫܘܼܩܪܵܐ ܕܠܵܐ ܡܵܘܬ̇ܪܝܼܢ.

⁹ ܓܲܢܵܒ̣ܝ̣ܢ ܐ̄ܢܬ̇ܘܿܢ: ܘܩܵܛܘܿܠܝܼܢ ܐ̄ܢܬ̇ܘܿܢ: ܘܓܲܝܵܪܝܼܢ ܐ̄ܢܬ̇ܘܿܢ: ܘܝܵܡܝܼܢ ܐ̄ܢܬ̇ܘܿܢ ܒܫܘܼܩܪܵܐ: ܘܣܵܝ̇ܡܝܼܢ ܐ̄ܢܬ̇ܘܿܢ ܒܸܣܡܹ̈ܐ ܠܒܲܥܠܵܐ: ܘܐܵܙ̇ܠ̄ܝܼܢ ܐ̄ܢܬ̇ܘܿܢ ܒܵܬܲܪ ܐܲܠܵܗܹ̈ܐ ܐ̄ܚܖ̈ܵܢܹܐ ܕܠܵܐ ܝܼܕܲܥـ̣ܬ̇ܘܿܢ.

¹⁰ ܘܐܵܬܹ݁ܝܢ ܐ̄ܢܬ̇ܘܿܢ ܘܩܵܝܡ̇ܝܼܢ ܐ̄ܢܬ̇ܘܿܢ ܩܕܵܡܲܝ ܒܒܲܝܬܵܐ ܗܵܢܵܐ ܕܐܸܬ̣ܩܪܝܼ ܫܹܡܝ ܥܠܵܘܗܝ: ܘܐܵܡܪܝܼܬ̇ܘܿܢ ܦܲܨܵܢ: ܘܥܵܒ̣ܕ̇ܝܼܬ̇ܘܿܢ ܗܵܠܹܝܢ ܟܠܗܹܝܢ ܒܝܼ̈ܫܵܬܵܐ.

¹¹ ܕܲܠܡܵܐ ܡܥܲܪܬ̣ܵܐ ܕܓܲܢܵܒܹ̈ܐ ܗܘ̤ܵܐ ܒܲܝܬܵܐ ܗܵܢܵܐ ܕܐܹܬ̣ܩܪܝܼ ܫܹܡܝ ܥܠܵܘܗܝ ܒܥܲܝ̈ܢܲܝܟܘܿܢ: ܐܵܦ ܐܹܢܵܐ ܗܵܐ ܚܙܹ̇ܝܬ̣ ܐܵܡܲ݁ܪ ܡܵܪܝܵܐ.

¹² ܡܸܛܠ ܗܵܢܵܐ ܙܹܠܘ ܠܐܲܬ̣ܪܝ ܕܲܒ̣ܫܝܼܠܘܿ ܕܐܲܫܪܝܼـ̇ܬ̣ ܫܹܡܝ ܬܲܡܵܢ ܒܩܲܕ݂ܡܵܝܬܵܐ: ܘܲܚܙܵܘ ܡܸܕܸܡ ܕܥܸـ̇ܒ̣ܕܹܬ̣ ܠܹܗ: ܡܸܛܠ ܒܝܼܫܘܼܬܹܗ ܕܥܲܡܝ ܝܼܣܪܵܝܹܠ.

¹³ ܘܗܵܫܵܐ ܚܠܵܦ ܕܲܥ̣ܒܲܕ̇ܬ̇ܘܿܢ ܥܒ̣ܵܕܹ̈ܐ ܗܵܠܹܝܢ ܟܠܗܘܿܢ ܐܵܡܲ݁ܪ ܡܵܪܝܵܐ: ܘܩܲܕ̇ܡܹ̇ܬ̣ ܘܐܸܡ̇ܪܹܬ̣ ܠܟ݂ܘܿܢ ܘܠܵܐ ܫܡܲܥܬ̇ܘܿܢ: ܘܲܩܪܹܝ̇ܬ̣ ܠܟ݂ܘܿܢ ܘܠܵܐ ܥ̣ܢܲܝܬ̇ܘܿܢ.

¹⁴ ܐܸܥܒ̇ܕ݂ܝܘܼܗܝ ܠܒܲܝܬܵܐ ܗܵܢܵܐ ܕܐܸܬ̣ܩܪܝܼ ܫܸܡܝ ܥܠܵܘܗܝ ܕܐܲܢ̄ܬ̇ܘܿܢ ܬܟ݂ܝܼܠܝܼܢ ܥܠܵܘܗܝ: ܘܠܲܩܪܝ̣ܬ̣ܵܐ ܗܵܕܹܐ ܕܝܸܗ̄ܒܹ݁ܬ̣ ܠܟ݂ܘܿܢ ܘܠܐܲܒ̣ܵܗܲܝ̈ܟ̇ܘܿܢ: ܐܲܝܟ݂ ܕܥܸ̇ܒ̣ܕܹܬ̣ ܠܫܝܼܠܘܿ.

¹⁵ ܘܐܸܫܕܹܝܟ݂ܘܿܢ ܡ̣ܢ ܩܕ݂ܵܡ ܐܲܦܲܝ̈: ܐܲܝܟ݂ ܕܲܫܕܹܝ݁ܬ̣ ܠܟ݂ܠܗܘܿܢ ܐܲܚܲܝ̈ܟ̇ܘܿܢ ܠܟ݂ܠܹܗ ܙܲܪܥܹܗ ܕܐܲܦܪܹܝܡ.

¹⁶ ܘܐܲܢ̄ܬ̇ ܠܵܐ ܬܨܲܠܸܐ ܥܲܠ ܥܲܡܵܐ ܗܵܢܵܐ: ܘܠܵܐ ܬܸܒ̣ܥܸܐ ܥܠܲܝܗܘܿܢ: ܘܠܵܐ ܬܸܒ̣ܥܸܐ ܡܹܢܝ: ܡܸܛܠ ܕܠܵܐ ܫܵܡܲܥ ܐ̄ܢܵܐ ܠܵܟ݂.

¹⁷ ܠܵܐ ܚܵܙܹ݁ܐ ܐܲܢ̄ܬ̇ ܡܸܕܸܡ ܕܥܵܒ̣݁ܕܝܼܢ ܒܩܘܼܖ̈ܝܵܐ ܕܲܝܗܘܼܕ݂ܵܐ ܘܲܒ̣ܫܘܼܩܹ̈ܝܗ̇ ܕܐܘܿܪܸܫܠܸܡ.

¹⁸ ܒ̈ܢܲܝܵܐ ܡܠܲܩܛܝܼܢ ܩܲܝܣܹ̈ܐ: ܘܐܲܒ̣ܵܗܹ̈ܐ ܡܵܘܩܕ݂ܝܼܢ ܢܘܼܪܵܐ: ܘܢܸܫܹ̈ܐ ܠܵܝ̈ܫܵܢ ܠܲܝܫܵܐ: ܠܡܸܥܒ̇ܕ݂ ܙܵܘܬ̇ܖܹ̈ܐ ܠܦܘܼܠܚܵܢ ܫܡܲܝܵܐ: ܘܠܲܡܢܲܩܵܝܘܼ ܢܘܼܩܵܝܹ̈ܐ ܠܐܲܠܵܗܹ̈ܐ ܐ̄ܚܖ̈ܵܢܹܐ ܕܢܲܪܓ̇ܙܘܼܢܵܢܝ.

¹⁹ ܠܵܐ ܗ̄ܘܵܐ ܠܝܼ ܡܲܪܓ̇ܙܝܼܢ ܐܵܡܲ݁ܪ ܡܵܪܝܵܐ: ܐܸܠܵܐ ܠܢܲܦ̮ܫܗܘܿܢ ܕܢܸܒ̈ܗ̱ܬ̣ܵܢ ܐܲܦܲܝ̈ܗܘܼܢ.

²⁰ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ: ܗܵܐ ܪܘܼܓ̣ܙܝ ܘܚܸܡܬ̣ܝ ܡܸܬ̇ܬ̇ܢܝܼܚܝܼܢ ܥܲܠ ܐܲܬ̣ܪܵܐ ܗܵܢܵܐ: ܥܲܠ ܒܢܲܝ̈ܢܵܫܵܐ ܘܥܲܠ ܒܥܝܼܲܪܵܐ: ܘܥܲܠ ܐܝܼܠܵܢܹ̈ܐ ܕܕܲܒ̣ܪܵܐ ܘܥܲܠ ܦܹܐܖܹ̈ܐ ܕܐܲܪܥܵܐ: ܘܬܵܘܩܸܕ݂ ܘܠܵܐ ܬܸܕ݂ܥܲܟ݂.

²¹ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬܵܢܵܐ ܐܲܠܵܗܵܐ ܕܝܼܣܪܵܝܹܠ: ܥܠܵـ̈ܘܵܬ̣ܗܘܿܢ ܐܵܘܣܸܦܘ ܥܲܠ ܕܸܒ̣ܚܲܝ̈ܗܘܿܢ: ܘܐܸܟܲܠܘ ܒܸܣܪܵܐ ܕܠܵܐ ܐܸܡ̇ܪܹܬ̣ ܠܐܲܒ̣ܵܗܲܝ̈ܗܘܿܢ.

²² ܘܠܵܐ ܦܲܩ̇ܕܹܬ̣ ܐܸܢܘܿܢ ܒܝܵܘܡܵܐ ܕܐܲܣܩܹ̇ܬ̣ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܠܵܐ ܥܲܠ ܥܠܵܬ̣ܵܐ: ܘܠܵܐ ܥܲܠ ܕܸܒ̣ܚܹ̈ܐ.

²³ ܐܸܠܵܐ ܐܸܢܵܐ ܗܵܢܵܐ ܦܸܬ̣ܓ̣ܵܡܵܐ ܦܸܩ̇ܕܹܬ̣ ܐܸܢܘܿܢ: ܘܐܸܡ̇ܪܹܬ̣ ܫܡܲܥܘ ܒܩܵܠܝ: ܘܐܸܗܘܸܐ ܠܟ݂ܘܿܢ ܐܲܠܵܗܵܐ: ܘܐܲܢ̄ܬ̇ܘܿܢ ܬܸܗܘܘܿܢ ܠܝܼ ܥܲܡܵܐ: ܘܗܲܠܸܟ݂ܘ ܒܟ݂ܠܵܗ̇ ܐܘܼܪܚܵܐ ܕܲܡܦܲܩܸܕ݂ܢ ܐ̄ܢܵܐ ܠܟ݂ܘܿܢ ܕܢܸܛܐܲܒ̣ ܠܟ݂ܘܿܢ.

²⁴ ܘܠܵܐ ܫܡܲܥܘ: ܘܠܵܐ ܐܪܟܸ̇ܢܘ ܐܸܕ݂ܢ̱ܗܘܿܢ ܠܡܸܫܡܲܥ: ܐܸܠܵܐ ܐܸܙܲܠ̣ܘ ܒܵܬܲܪ ܬܲܖ̈ܥܝܵܬ̣ܗܘܿܢ: ܘܒ̣ܵܬܲܪ ܨܸܒ̣ܝܵܢܲܝ̈ ܠܸܒܗܘܿܢ ܒܝܼܫܵܐ: ܘܲܗܦܲܟ݂ܘ ܠܒܸܣܬܲܪܗܘܿܢ ܘܠܵܐ ܠܲܩܕܵܡܲܝܗܘܿܢ.

²⁵ ܡ̣ܢ ܝܵܘܡܵܐ ܕܲܢܦܲܩ̣ܘ ܐܲܒ̣ܵܗܲܝ̈ܗܘܿܢ ܡ̣ܢ ܐܲܪܥܵܐ ܕܡܸܨܪܹܝܢ ܘܲܥܕܲܡܵܐ ܠܝܵܘܡܵܢܵܐ: ܘܫܕ̇ܪܸܬ̣ ܠܘܵܬ̣ܗܘܿܢ ܟܠܗܘܿܢ ܥܲܒ̣̈ܕܲܝ ܢܒ̣ܝܹ̈ܐ ܒܟ݂ܠܝܘܿܡ.

²⁶ ܩܲܕܡܹ̇ܬ̣ ܘܫܲܕܪܹܬ̣ ܘܠܵܐ ܫܡܲܥܘ܆ܘܠܵܐ ܐܲܪܟܸ̇ܢܘ ܐܸܕ݂ܢܗܘܿܢ ܠܘܵܬ̣ܝ: ܘܩܲܫܝܼܘ ܩܕ݂ܵܠܗܘܿܢ ܛܵܒ̣ ܡ̣ܢ ܐܲܒ̣ܵܗܲܝ̈ܗܘܿܢ.

²⁷ ܘܬܹܐܡܲܪ ܠܗܘܿܢ ܗܵܠܹܝܢ ܟܠܗܘܿܢ ܦܸܬ̣ܓ̣ܵܡܹ̈ܐ ܘܠܵܐ ܢܸܫ̱ܡܥܘܼܢܵܟ݂: ܘܩܵـ̇ܪܹܐ ܐܲܢ̄ܬ̇ ܠܗܘܿܢ ܘܠܵܐ ܥܵـ̇ܢܸܝܢ ܠܵܟ݂.

²⁸ ܐܲܒ̣ܕܲܬ̤ ܗܲܝܡܵܢܘܼܬܵܐ: ܘܓ̣ܵܙܲܬ̤ ܡ̣ܢ ܦܘܼܡܗܘܿܢ.

²⁹ ܓܘܿܙܝ ܣܲܥܪܹܟ݂ܝ ܘܲܫܕ݂ܵܝ: ܘܲܫܩܘܿܠܝ ܥܲܠ ܫܒ̣̈ܝܼܠܹܐ ܐܘܿܠܝܼܬ̣ܵܐ ܕܲܪܓܸܙ ܡܵܪܝܵܐ ܘܫܲܒ̣ܩܹܗ ܠܕ݂ܵܪܵܐ ܥܵܒ̣ܘܿܪܵܐ.

³⁰ ܡܸܛܠ ܕܲܥܒܲܕ݂ܘ ܒܢܲܝ̈ ܝܼܗܘܕ݂ܵܐ ܕܒ̣ܝܼܫ ܩܕ݂ܵܡܲܝ ܐܵܡܲ݁ܪ ܡܵܪܝܵܐ: ܘܣܵـ̣ܡܘ ܛܲܢܦܘܼܬ̣ܗܘܿܢ ܒܒܲܝܬܵܐ ܕܐܸܬ̣ܩܪܝܼ ܫܹܡܝ ܥܠܵܘܗܝ ܘܛܲܢܦܘܼܗܝ.

³¹ ܘܲܒ̣ܢ̣ܵܘ ܥ̈ܠܵܘܵܬ̣ܵܐ ܒܬܲܦܲܬ̣ ܕܲܒ̣ܢܲܚܠܵܐ ܕܒܲܪܗܵܢܘܿܡ: ܠܡܵܘܩܵܕ݂ܘܼ ܒܢܲܝ̈ܗܘܿܢ ܘܲܒ̣̈ܢܵܬ̣ܗܘܿܢ ܒܢܘܼܪܵܐ: ܕܠܵܐ ܦܲܩـ̇ܕܹܬ̣ ܐܸܢܘܿܢ ܘܠܵܐ ܣܸܠܩܲܬ̤ ܥܲܠ ܠܸܒܝ.

³² ܡܸܛܠ ܗܵܢܵܐ ܗܵܐ ܝܵܘ̈ܡܵܬܵܐ ܐܵܬܹܝܢ ܐܵܡ݁ܲܪ ܡܵܪܝܵܐ: ܘܠܵܐ ܢܸܬ̣ܐ̱ܡܲܪ ܬܘܼܒ̣ ܬܲܦܲܬ̣ ܘܢܲܚܠܵܐ ܕܒܲܪܗܵܢܘܿܡ: ܐܸܠܵܐ ܐܸܢ ܢܲܚܠܵܐ ܕܲܩܛܝܼ̈ܠܹܐ܆ܘܢܸܩܒ̇ܪܘܼܢ ܒܬܲܦܲܬ̣ ܡ̣ܢ ܒܠܲܝ ܐܲܬ̣ܪܵܐ.

³³ ܘܢܸܗ̈ܘ̱ܝܵܢ ܫܠܲܕܲܝ̈ܗܘܿܢ ܕܥܲܡܵܐ ܗܵܢܵܐ ܡܹܐܟ݂ܘܼܠܬܵܐ: ܠܦܵܪܚܬ̣ܵܐ ܕܲܫܡܲܝܵܐ: ܘܲܠܚܲܝ̄ܘܬ̣ܵܐ ܕܐܲܪܥܵܐ: ܙܠܲܝܬ̇ ܡܦܲܨܝܵܢܵܐ.

³⁴ ܘܐܹܒܲܛܸܠ ܡ̣ܢ ܩܘ̣ܖ̈ܝܵܐ ܕܲܝܗܘܼܕ݂ܵܐ: ܘܡ̣ܢ ܫܘܼܩܹ̈ܝܗ̇ ܕܐܘܿܪܸܫܠܸܡ: ܩܵܠܵܐ ܕܲܕ݂ܝܵܨܵܐ: ܘܩܵܠܵܐ ܕܚܲܕܘܼܬܵܐ: ܩܵܠܵܐ ܕܚܲܬ̣ܢܵܐ: ܘܩܵܠܵܐ ܕܟܲܠܬ̣ܵܐ: ܡܸܛܠ ܕܲܠܚܘܼܪܒܵܐ ܬܸܗܘܸܐ ܟܠܵܗ̇ ܐܲܪܥܵܐ.

8

¹ ܒܙܲܒ̣ܢܵܐ ܗ̇ܘ ܐܵܡܲ݁ܪ ܡܵܪܝܵܐ ܢܲܦܩܘܼܢ ܓܲܖ̈ܡܹܐ ܕܡܲܠܟܹ̈ܐ ܕܲܝܗܘܼܕ݂ܵܐ: ܘܓܲܖ̈ܡܹܐ ܕܪܵܘܖ̈ܒ̣ܵܢܲܝܗܘܿܢ: ܘܓܲܖ̈ܡܹܐ ܕܟ݂ܵܗܢܲܝ̈ܗܘܿܢ: ܘܓܲܖ̈ܡܹܐ ܕܲܢܒ̣ܝܲܝ̈ܗܘܿܢ: ܘܓܲܖ̈ܡܹܐ ܕܥܵܡܘܿܖܹ̈ܝܗ̇ ܕܐܘܿܪܸܫܠܸܡ ܡ̣ܢ ܩܲܒ̣ܖ̈ܲܝܗܘܿܢ.

² ܘܢܸܫܛܚܘܼܢ ܐܸܢܘܿܢ ܠܫܸܡܫܵܐ ܘܲܠܣܲܗܪܵܐ: ܘܲܠܟ݂ܠ ܚܲܝ̈ܠܵܘܵܬ̣ܵܐ ܕܲܫܡܲܝܵܐ: ܕܲܪܚܸܡ̣ܘ ܐܸܢܘܿܢ: ܘܲܦܠܲܚܘ ܐܸܢ̣ܘܿܢ: ܘܐܹܙܲܠ̣ܘ ܒܵܬܲܪܗܘܿܢ: ܘܲܫܐܸܠ̣ܘ ܒܗܘܿܢ: ܘܲܣܓܸܕ݂ ܠܗܘܿܢ: ܠܵܐ ܢܸܬ̣ܟܲܢܫܘܼܢ ܘܠܵܐ ܢܸܬ̣ܩܲܒ̣ܪܘܼܢ: ܐܸܠܵܐ ܐܲܝܟ݂ ܙܸܒ̣ܠܵܐ ܥܲܠ ܐܲܦܲܝ̈ ܐܲܪܥܵܐ ܢܸܗܘܘܿܢ.

³ ܘܢܸܒ̇ܘܿܢ ܠܗܘܿܢ ܡܵܘܬܵܐ ܡ̣ܢ ܚܲܝܹ̈ܐ: ܟܠ ܫܲܪܟܵܐ ܕܐܸܫܬ̇ܚܲܪܘ ܡ̣ܢ ܫܲܪܒ̇ܬ̣ܵܐ ܗܵܕܹܐ ܒܝܼܫܬܵܐ: ܒܟ݂ܠ ܐܲܬ̣ܖ̈ܵܘܵܬ̣ܵܐ ܕܒܲـ̇ܕܪܹܬ̣ ܐܸܢܘܿܢ ܠܬܲܡܵܢ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ.

⁴ ܘܬܹܐܡܲܪ ܠܗܘܿܢ: ܗܵܟܲܢܵܐ ܐܵܡܲ݁ܪ ܡܵܪܝܵܐ: ܢܸܦܠܘܼܢ ܘܠܵܐ ܢܩܘܼܡܘܼܢ: ܘܐܸܢ ܢܬ̣ܘܼܒ̣ܘܼܢ ܠܵܐ ܢܬ̣ܘܼܒ̣ܘܼܢ.

⁵ ܡܸܛܠ ܡܵܢܵܐ ܬܵܒ̣ܘ ܥܲܡܵܐ ܗܵܢܵܐ ܕܐܘܿܪܸܫܠܸܡ ܬܝܵܒ̣ܘܼܬ̣ܵܐ ܚܲܨܝܼܦܬܵܐ: ܚܲܡܣ̣ܢܘ ܒܢܸܟ݂ܠܵܐ ܘܠܵܐ ܨܒ̣ܵܘ ܠܲܡܬܵܒ̣.

⁶ ܐܲܨܬܹ̇ܬ̣ ܘܫܸܡ̇ܥܹܬ̣ ܘܠܵܐ ܗ̄ܘܵܐ ܟܹܐܢܵܐܝܼܬ̣ ܡܡܲܠܠܝܼܢ: ܠܲܝܬ̇ ܓܹܝܪ ܕܢܸܬ̇ܬ̇ܘܸܐ ܥܲܠ ܒܝܼܫܬܹ̇ܗ: ܘܢܹܐܡܲܪ ܡܵܢܵܐ ܥܸـ̇ܒ̣ܕܲܬ̣: ܟܠܗܘܿܢ ܡܗܲܠܟ݂ܝܼܢ ܒܨܸܒ̣ܝܵܢܗܘܿܢ: ܐܲܝܟ݂ ܣܘܼܣܝܵܐ ܕܢܵـ̇ܓܹܕ݂ ܒܲܩܪܵܒ̣ܵܐ.

⁷ ܐܵܦ ܚܘܼܪܒ̣ܵܐ ܒܲܫܡܲܝܵܐ ܝܵܕ݂ܥܵܐ ܙܲܒ̣ܢܵܗ̇: ܘܫܘܿܦܢܝܼܢܵܐ ܘܟ݂ܘܼܪܟ̇ܝܵܐ ܘܲܣܢܘܿܢܝܼܬ̣ܵܐ: ܢܵܛ݁ܪܝܼܢ ܙܲܒ̣ܢܵܐ ܕܡܲܥܲܠܗܘܿܢ: ܘܥܲܡܝ ܠܵܐ ܝܼܕܲܥܘ ܕܝܼܢܹܗ ܕܡܵܪܝܵܐ.

⁸ ܐܲܝܟܲܢܵܐ ܐܵܡ̇ܪܝܼܢ ܐ̄ܢܬ̇ܘܿܢ ܕܚܲܟ̇ܝܼܡܹ̈ܐ ܚܢܲܢ: ܘܢܵܡܘܿܣܹܗ ܕܡܵܪܝܵܐ ܥܲܡܲܢ: ܫܲܪܝܼܪܵܐܝܼܬ̣ ܠܕܲܓܵܠܘܼܬ̣ܵܐ ܥܒ̣ܝܼܕ݂ ܩܲܢܝܵܐ ܕܲܓܵܠܵܐ ܠܣܵܦܪܵܐ.

⁹ ܒܗܸܬ̣ܘ ܚܲܟܝܼܡܹ̈ܐ ܘܐܸܬ̇ܬ̇ܒܲܪܘ ܘܐܸܬ̇ܬ̇ܚܸܕ݂ܘ: ܡܸܛܠ ܕܦܸܬ̣ܓ̣ܵܡܸܗ ܕܡܵܪܝܵܐ ܐܲܣܠܝܼܘ: ܘܚܸܟ݂ܡ̱ܬ̣ܵܐ ܠܵܐ ܗܘ̤ܵܬ̣ ܒܗܘܿܢ.

¹⁰ ܡܸܛܠ ܗܵܢܵܐ ܐܸܬܸ̇ܠ ܢܸܫܲܝ̈ܗܘܿܢ ܠܐܲܚܖ̈ܵܢܹܐ: ܘܚܲܩ̈ܠܵܬ̣ܗܘܿܢ ܠܒܸܙܬ̣ܵܐ: ܡܸܟܠ ܕܡ̣ܢ ܙܥܘܿܪܗܘܿܢ ܘܲܥܕܲܡܵܐ ܠܪܲܒܗܘܿܢ: ܟܠܗܘܿܢ ܢܲܟ݂ܠܝܼܢ ܢܸܟ݂ܠܵܐ: ܘܡ̣ܢ ܢܒ̣ܝܹ̈ܐ ܕܲܓܵܠܹ̈ܐ ܘܲܥܕܲܡܵܐ ܠܟ݂ܵܗܢܹ̈ܐ: ܟܠܗܘܿܢ ܥܵܒ̣ܕܝܼܢ ܫܘܼܩܪܵܐ.

¹¹ ܘܡܲܐܣܹܝܢ ܬܐܒ̣ܵܪܵܗ̇ ܕܒܲܪܬ̣ ܥܲܡܝ ܒܒܸܙܚܵܐ: ܘܐܵܡ̇ܪܝܼܢ: ܫܠܵܡܵܐ: ܫܠܵܡܵܐ: ܘܠܲܝܬ̇ ܫܠܵܡܵܐ.

¹² ܒܗܸܬ̣ܘ ܡܸܛܠ ܕܛܲܢܦܘܼܬ̣ܵܐ ܥܒܲܕ݂ܘ: ܘܒܲܗܝܼ̈ܬܹܐ ܠܵܐ ܒܗ̇ܬ̇ܝܼܢ: ܘܲܠܡܸܬ̇ܬ̇ܟ݂ܵܣܘܼ ܠܵܐ ܝܵـ݁ܕ݂ܥܝܼܢ: ܡܸܛܠ ܗܵܢܵܐ ܢܸܦܠܘܼܢ ܥܲܡ ܢܵܦ̈ܠܹܐ: ܘܲܒ̣ܙܲܒ̣ܢܵܐ ܕܡܸܬ̣ܦܲܩܕܝܼܢ ܢܸܣܬ̇ܚܦܘܼܢ ܐܵܡܲ݁ܪ ܡܵܪܝܵܐ: ܡܣܵܦܘܼ ܐܣܝܼܦ ܐܸܢܘܿܢ ܐܵܡܲ݁ܪ ܡܵܪܝܵܐ.

¹³ ܠܲܝܬ̇ ܥܸܢ̈ܒܹܐ ܒܲܓ̣ܦܸܬܵܐ: ܘܠܲܝܬ̇ ܬܹܐܢܹ̈ܐ ܒܬܹܝܬܵܐ: ܘܛܲܖ̈ܦܹܐ ܢܬܲܪܘ: ܘܝܸܗ̄ܒܹܬ̣ ܠܗܘܿܢ ܘܲܥ̣ܒܲܪܘ ܐܸܢܘܿܢ.

¹⁴ ܘܢܹܐܡܪܘܼܢ ܥܲܠ ܡܵܢܵܐ ܝܵـ̇ܬ̣ܒܝܼܢܲܢ: ܐܸܬ̣ܟܲܢܲܫܘ ܘܢܸܥܘܿܠ ܠܩܘܼܖ̈ܝܵܐ ܥܲܫ̈ܝܼܢܵܬ̣ܵܐ ܘܢܸܫܬ̇ܘܿܩ ܬܲܡܵܢ: ܡܸܛܠ ܕܡܵܪܝܵܐ ܐܲܠܵܗܲܢ ܫܲܬ̇ܩܲܢ: ܘܐܲܫܩܝܲܢ ܡܲܝ̈ܵܐ ܡܲܪܝܼܖܹ̈ܐ ܥܲܠ ܕܲܚܛܲܝܢ ܠܡܵܪܝܵܐ.

¹⁵ ܣܲܟܝܼܢ ܠܲܫܠܵܡܵܐ ܘܠܲܝܬ̇ ܛܵܒ̣ܬ̣ܵܐ: ܘܲܠܙܲܒ̣ܢܵܐ ܕܐܲܣܝܘܼܬ̣ܵܐ ܘܲܗܘ̤ܵܬ̣ ܠܲܢ ܥܵܩܬ̣ܵܐ.

¹⁶ ܡ̣ܢ ܕܵܢ ܐܸܫܬ̇ܡܲܥ ܨܲܗܠܵܐ ܕܖ̈ܲܟ݂ܫܹܗ: ܡ̣ܢ ܩܵܠܵܐ ܕܡܲܡܠܠܵܐ ܕܓܲܢ̄ܒܵܖ̈ܵܘܗܝ: ܙܵܥܲܬ̤ ܟܠܵܗ̇ ܐܲܪܥܵܐ: ܘܐܸܬ̣ܵܐ ܘܐܸܟܲܠ̣ܘ ܐܵܘ̇ܥܵܐ ܘܲܡܠܹܐܵܗ̇: ܩܪܝܼܬ̣ܵܐ ܘܥܵܡܘܿܖܹ̈ܝܗ̇.

¹⁷ ܡܸܛܠ ܕܗܵܐ ܡܫܲܕܲܪ ܐ̄ܢܵܐ ܥܠܲܝܟܘܿܢ ܚ̈ܘܵܘܵܬ̣ܵܐ ܚܲܖ̈ܡܵܢܹܐ ܕܠܵܐ ܡܩܲܒ̇ܠܝܼܢ ܠܘܼܚ̈ܫܵܬ̣ܵܐ: ܘܲܢܢܲܟܬ̣ܘܼܢܵܟ݂ܘܿܢ ܐܵܡܲ݁ܪ ܡܵܪܝܵܐ.

¹⁸ ܒـ̇ܠܝܼܬ̣ ܒܥܵܩܲܬ̣ܝ: ܘܠܹܒܝ ܕܘ̤ܵܐ ܥܠܲܝ.

¹⁹ ܗܵܐ ܩܵܠ ܓܥܵܬ̣ܵܗ̇ ܕܒܲܪܬ̣ ܥܲܡܝ ܡ̣ܢ ܐܲܪܥܵܐ ܪܲܚܝܼܩܬܵܐ: ܕܐܵܡ̇ܪܝܼܢ ܡܵܪܝܵܐ ܠܲܝܬ̇ ܒܨܸܗܝܘܿܢ: ܐܵܘ ܡܲܠܟܵܗ̇ ܠܲܝܬ̇ ܒܵܗ̇: ܡܸܛܠ ܕܐܲܪܓ̇ܙܘܼܢܝ ܒܲܓ̣ܠܝܼܦܲܝ̈ܗܘܿܢ ܘܲܒ̣ܕܸܚ̈ܠܵܬ̣ܵܐ ܢܘܼܟ݂ܖ̈ܵܝܵܬ̣ܵܐ.

²⁰ ܥ̣ܒܲܪ ܚܨܵܕ݂ܵܐ ܘܲܓ̣ܡܲܪ ܩܛܵܦܵܐ: ܘܲܚܢܲܢ ܠܵܐ ܐܸܬ̣ܦܪܸܩܢ.

²¹ ܥܲܠ ܬܒ̣ܵܪܵܗ̇ ܕܒܲܪܬ̣ ܥܲܡܝ ܐܸܬ̣ܟܲܡܪܹܬ̣ ܘܬܸܡܗܵܐ ܐܲܚܕܲܢܝ.

²² ܫܥܘܿܬ̣ܵܐ ܠܲܝܬ̇ ܒܓܸܠܥܵܕ݂: ܐܵܘ ܐܵܣܝܵܐ ܠܲܝܬ̇ ܬܲܡܵܢ: ܡܸܛܠ ܡܵܢܵܐ ܠܵܐ ܣܸܠܩܲܬ̤ ܐܵܣܝܘܼܬ̣ܵܗ̇ ܕܒܲܪܬ̣ ܥܲܡܝ.

9

¹ ܡܲܢ ܕܸܝܢ ܝܲܗ̣̄ܒ̣ ܪܹܫܝ ܡܲܝ̈ܵܐ: ܘܥܲܝ̈ܢܲܝ ܡܲܒܘܼ̈ܥܹܐ ܕܕܸܡ̱ܥܬ̣ܵܐ: ܘܲܒ̣ܟܹ̇ܝܬ̣ ܕܸܝܢ ܒܐܝܼܡܵܡܵܐ ܘܲܒ̣ܠܸܠܝܵܐ ܥܲܠ ܩܛܝܼ̈ܠܹܐ ܕܒܲܪܬ̣ ܥܲܡܝ.

² ܡܲܢ ܕܸܝܢ ܫܲܒ̣ܩܲܢܝ ܒܡܲܕ݂ܒܪܵܐ ܒܹܝܬ̣ ܒܵܘܬܵܐ ܕܥܵܒ̣ܖ̈ܲܝ ܐܘܼܪܚܵܐ: ܘܫܸܒ̣ـ̇ܩܹܬ̣ ܠܥܲܡܝ ܘܐܸܙܹ̇ܠ̄ܬ̣ ܠܝܪ ܡ̣ܢ ܠܘܵܬ̣ܗܘܿܢ: ܡܸܛܠ ܕܟ݂ܠܗܘܿܢ ܓܲܝܵܪܝܼܢ: ܘܲܟ݂ܢܘܼܫܬܵܐ ܐܸܢܘܿܢ ܕܕܲܓܵܠܹ̈ܐ.

³ ܘܲܫܕ݂ܵܘ ܠܸܫܵܢܗܘܿܢ ܐܲܝܟ݂ ܕܲܒ̣ܩܸܫܬ̇ܗܘܿܢ: ܒܫܘܼܩܪܵܐ ܘܠܵܐ ܒܗܲܝܡܵܢܘܼܬ̣ܵܐ ܥ̣ܫܸܢܘ ܒܐܲܪܥܵܐ: ܡܸܛܠ ܕܡ̣ܢ ܒܝܼܫܬܵܐ ܠܒ̣ܝܼܫܬܵܐ ܢܦܲܩ̣ܘ: ܘܠܝܼ ܠܵܐ ܝܼܕܲܥ̣ܘ ܐܵܡܲ݁ܪ ܡܵܪܝܵܐ.

⁴ ܓܒܲܪ ܡ̣ܢ ܚܲܒ̣ܪܹܗ ܐܲܙܕܲܗ̄ܪܘ: ܘܥܲܠ ܟܠ ܐܵܚ ܠܵܐ ܬܸܬܲܟ݂ܠܘܼܢ: ܡܸܛܠ ܕܟ݂ܠ ܐܵܚ ܡܸܟܲܠ ܢܵܟܹ̇ܠ: ܘܟ݂ܠ ܪܵܚ̇ܡܵܐ ܒܢܸܟ݂ܠܵܐ ܡܗܲܠܸܟ݂.

⁵ ܘܲܓ̣ܒܲܪ ܒܚܲܒ̣ܪܹܗ ܡܕܲܓ̇ܠܝܼܢ: ܘܩܘܼܫܬܵܐ ܠܵܐ ܡܡܲܠܠܝܼܢ: ܐܲܠܸܦ̣ܘ ܠܸܫܵܢܗܘܿܢ ܠܲܡܡܲܠܵܠܘܼ ܫܘܼܩܪܵܐ: ܘܐܸܬ̇ܛܲܪܲܦܘ ܘܲܠܐܝܼܘ.

⁶ ܡܵܘܬ̇ܒ̣ܵܟ݂ ܒܓ̣ܵܘ ܢܸܟ݂ܠܵܐ: ܒܢܸܟ݂ܠܗܘܿܢ ܠܵܐ ܨܒ̣ܵܘ ܠܡܸܕܥܲܢܝ ܐܵܡܲ݁ܪ ܡܵܪܝܵܐ.

⁷ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ: ܗܵܐ ܨܵܪܸܦ ܐ̄ܢܵܐ ܠܗܘܿܢ ܘܒ̣ܵܚܲܪ ܐ̄ܢܵܐ ܠܗܘܿܢ: ܡܸܛܠ ܕܐܲܝܟܲܢܵܐ ܐܸܥܒܸ̇ܕ݂ ܡ̣ܢ ܩܕ݂ܵܡ ܒܲܪܬ̣ ܥܲܡܝ.

⁸ ܐܲܝܟ݂ ܓܹܐܪܵܐ ܫܢܝܼܢܵܐ ܠܸܫܵܢܗܘܿܢ: ܘܢܸܟ݂ܠܵܐ ܡܡܲܠܸܠ: ܒܦܘܼܡܹܗ ܫܠܵܡܵܐ ܓܒܲܪ ܥܲܡ ܚܲܒ̣ܪܹܗ ܡܡܲܠܸܠ: ܘܲܒ̣ܓܵܘܹܗ ܟܡܝܼܢ ܟܡܹܐܢܵܐ.

⁹ ܥܲܠ ܗܵܠܹܝܢ ܠܵܐ ܐܸܦܩܘܿܕ݂ ܐܵܡܲ݁ܪ ܡܵܪܝܵܐ: ܘܲܒ̣ܥܲܡܵܐ ܕܗܵܟܲܢܵܐ ܠܵܐ ܬܸܬ̣ܢܲܩܲܡ ܢܲܦ̮ܫܝ.

¹⁰ ܥܲܠ ܛܘܼܖܹ̈ܐ ܫܩܘܿܠܘ ܒܟ݂ܵܬ̣ܵܐ ܘܐܘܿܠܝܼܬܵܐ: ܘܥܲܠ ܕܲܝܖܹ̈ܐ ܕܡܲܕ݂ܒܪܵܐ ܐܘܿܠܝܼܬ̣ܵܐ: ܕܲܨܕܲܝ̈ ܡ̣ܢ ܒܠܲܝ ܐ̄ܢܵܫ ܕܥܵـ̇ܒܲܪ: ܘܠܵܐ ܫܡܲܥܘ ܩܵܠܵܐ ܕܩܸܢܝܵܢܵܐ. ܡ̣ܢ ܦܵܪܲܚܬ̣ܵܐ ܕܲܫܡܲܝܵܐ ܘܲܥܕܲܡܵܐ ܠܲܒ̣ܥܝܼܪܵܐ ܐܸܬ̣ܒܲܕܲܪܘ ܘܐܸܙܲܠܘ.

¹¹ ܘܐܸܥܒ̇ܕ݂ܝܼܗ̇ ܠܐܘܿܪܸܫܠܸܡ ܚܲܪܒܬ̣ܵܐ ܡܲܥܡܪܵܐ ܠܝܵܪܘܖܹ̈ܐ: ܘܩܘܼܖ̈ܝܵܐ ܕܲܝܗܘܼܕ݂ܵܐ ܐܸܬܸ̇ܠ ܠܚܘܼܪܒܵܐ ܡ̣ܢ ܒܠܲܝ ܕܝܵܬܹ̇ܒ̣.

¹² ܡܲܢܘܼ ܓܲܒ̣ܪܵܐ ܕܚܲܟ̇ܝܼܡ ܢܸܣܬܲܟܲܠ ܗܵܕܹܐ: ܘܲܕ݂ܡܸܠܲܬ̣ ܦܘܼܡܹܗ ܕܡܵܪܝܵܐ ܥܠܵܘܗܝ ܢܚܵܘܹܝܗ̇: ܥܲܠ ܡܵܢܵܐ ܐܸܒ̣ܕܲܬ̤ ܐܲܪܥܵܐ: ܘܲܨܕ݂ܵܬ̤ ܐܲܝܟ݂ ܡܲܕ݂ܒܪܵܐ ܡ̣ܢ ܒܠܲܝ ܕܥܵܒܲܪ.

¹³ ܘܐܸܡܲܪ ܡܵܪܝܵܐ: ܥܲܠ ܕܲܫܒܲܩ̣ܘ ܢܵܡܘܿܣܝ ܕܝܸܗ̄ܒܹ̇ܬ̣ ܠܗܘܿܢ ܘܠܲܐܒ̣ܵܗܲܝ̈ܗܘܿܢ: ܘܠܵܐ ܫ̣ܡܲܥܘ ܒܩܵܠܝ ܘܠܵܐ ܗܲܠܸܟ݂ܘ ܒܹܗ.

¹⁴ ܘܐܸܙܲܠ̣ܘ ܒܵܬܲܪ ܨܸܒ̣ܝܵܢܲܝ̈ ܠܸܒܗܘܿܢ ܒܝܼܫܵܐ: ܘܒ̣ܵܬܲܪ ܦܬܲܟ݂ܖܹ̈ܐ ܕܐܲܠܸܦ̣ܘ ܐܸܢܘܿܢ ܐܲܒ̣ܵܗܲܝ̈ܗܘܿܢ.

¹⁵ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܡܵܘܟܸ̇ܠ ܐ̄ܢܵܐ ܠܗܘܿܢ ܠܥܲܡܵܐ ܗܵܢܵܐ ܡܪܵܖܹ̈ܐ: ܘܐܲܫܩܸܐ ܐܸܢܘܿܢ ܡܲܝ̈ܵܐ ܡܲܪܝܼܖܹ̈ܐ.

¹⁶ ܘܐܹܒܲܕܲܪ ܐܸܢܘܿܢ ܒܥܲܡܡܸ̈ܐ ܕܠܵܐ ܝܼܕܲܥ̣ܘ ܐܸܢܘܿܢ ܗܸܢ̣ܘܿܢ ܘܐܲܒ̣ܵܗܲܝ̈ܗܘܿܢ: ܘܐܹܫܲܕܲܪ ܒܵܬ̣ܪܗܘܿܢ ܚܲܪܒܵܐ ܥܕܲܡܵܐ ܕܐܹܓܲܡܲܪ ܐܸܢܘܿܢ.

¹⁷ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ: ܩܪܵܘ ܠܐܲܠܵܝ̈ܵܬ̣ܵܐ: ܘܢܹܐܬ̣̈ܝܵܢ: ܘܥܲܠ ܚܲܟ̇ܝܼ̈ܡܵܬ̣ܵܐ ܫܲܕܲܪܘ: ܘܢܹܐܬ̣̈ܝܵܢ.

¹⁸ ܘܢܸܣܬܲܖ̈ܗܒ̣ܵܢ ܘܢܸܫܩ̈ܠܵܢ ܥܠܲܝܢ ܐܘܿܠ̈ܝܵܬ̣ܵܐ: ܘܢܲܚ̈ܬ̣ܵܢ ܥܲܝ̈ܢܲܝܢ ܕܸܡ̈ܥܹܐ: ܘܒ̣ܵــ̈ܒ̣ܵܬܲܢ ܢܲܖ̈ܕܝܵܢ ܡܲܝ̈ܵܐ.

¹⁹ ܡܸܛܠ ܩܵܠܵܐ ܕܐܘܿܠܝܼܬ̣ܵܐ ܐܸܫܬ̇ܡܲܥ ܡ̣ܢ ܨܸܗܝܘܿܢ: ܕܐܵܡܲ݁ܪ ܐܲܝܟܲܢܵܐ ܐܸܬ̣ܒܵܙܸܙܢ: ܒܗܸܬ̣ܢ ܛܵܒ̣ ܛܵܒ̣: ܕܲܫ̣ܒܲܩܢ ܐܲܪܥܵܐ ܘܲܢܦܲܠ̣ܘ ܡܲܫ̈ܟ̇ܢܲܝܢ.

²⁰ ܡܸܛܠ ܗܵܢܵܐ ܫܡܲܥܹܝ̈ܢ ܢܸܫܹ̈ܐ ܦܸܬ̣ܓ̣ܵܡܹܗ ܕܡܵܪܝܵܐ: ܘܲܢܩܲܒ̈ܠܵܢ ܐܸܕ݂ܢܲܝ̈ܟܹ̇ܝܢ ܡܸܠܲܬ̣ ܦܘܼܡܹܗ: ܘܐܲܠܸܦܹܝ̈ܢ ܒܢܵܬ̣̈ܟܹܝܢ ܐܘܿܠ̈ܝܵܬ̣ܵܐ: ܘܐܲܢ̄ܬ̇ܬ̣ܵܐ ܠܲܚܒܲܪܬ̣ܵܗ̇ ܩܝܼܢܬܵܐ.

²¹ ܡܸܛܠ ܕܲܣܠܸܩ̣ ܡܵܘܬܵܐ ܠܟܵܘܲܝ̈ܢ܆ܘܥܲܠ̣ ܒܣܵܚܖ̈ܵܬܲܢ: ܠܡܵܘܒܵܕ݂ܘܼ ܛܠܵܝܹ̈ܐ ܡ̣ܢ ܫܘܼ̈ܩܹܐ: ܘܲܥܠܲܝܡܹ̈ܐ ܡ̣ܢ ܦܠܵܛܵـ̈ܘܵܬ̣ܵܐ.

²² ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ: ܢܸܦ̈ܠܵܢ ܫܠܲܕܲܝ̈ܗܘܿܢ ܕܲܒ̣ܢܲܝ̈ܢܵܫܵܐ ܐܲܝܟ݂ ܙܸܒܠܵܐ ܥܲܠ ܐܲܦܲܝ̈ ܚܲܩܠܵܐ: ܘܐܲܝܟ݂ ܥܡܝܼܪܵܐ ܒܵܬܲܪ ܚܵܨܘܿܕ݂ܵܐ: ܘܠܲܝܬ̇ ܡܟܲܢܫܵܢܵܐ.

²³ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܠܵܐ ܢܸܫܬܲܒ̣ܗܲܪ ܚܲܟ̇ܝܼܡܵܐ ܒܚܸܟ݂ܡ̱ܬܹܗ: ܘܠܵܐ ܢܸܫܬܲܒ̣ܗܲܪ ܓܲܢ̄ܒܵܪܵܐ ܒܓܲܢ̄ܒܵܪܘܼܬܹܗ: ܘܠܵܐ ܢܸܫܬܲܒ̣ܗܲܪ ܥܲܬ̇ܝܼܪܵܐ ܒܥܘܼܬ̣ܪܹܗ.

²⁴ ܐܸܠܵܐ ܒܗܵܕܹܐ ܢܸܫܬܲܒ̣ܗܲܪ ܡܲܢ ܕܡܸܫܬܲܒ̣ܗܲܪ: ܡܲܢ ܕܡܸܣܬܲܟܲܠ ܘܝܵܕܲܥ̇ ܠܝܼ ܕܐܸܢܵܐ ܐ̄ܢܵܐ ܡܵܪܝܵܐ: ܥܵܒܹ̇ܕ݂ ܛܲܝܒܘܼܬ̣ܵܐ ܘܕ݂ܝܼܢܵܐ ܘܙܲܕܝܼܩܘܼܬ̣ܵܐ ܒܐܲܪܥܵܐ: ܘܲܒ̣ܗܵܠܹܝܢ ܨܒܹ̇ܝܬ̣ ܐܵܡ݁ܲܪ ܡܵܪܝܵܐ.

²⁵ ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܐܵܡܲ݁ܪ ܡܵܪܝܵܐ: ܘܐܸܦܩܘܿܕ݂ ܥܲܠ ܟܠ ܕܓ̣ܵܙܲܪ ܒܥܘܼܪܠܘܼܬ̣ܵܐ.

²⁶ ܥܲܠ ܡܸܨܖ̈ܵܝܹܐ: ܘܥܲܠ ܝܗ̄ܘܼ̈ܕܵܝܹܐ: ܘܥܲܠ ܐܲܕ݂ܘܿܡ ܘܥܲܠ ܒܢܲܝ̈ ܥܲܡܘܿܢ: ܘܥܲܠ ܡܘܼܐܵܒ̣ ܘܥܲܠ ܟܠ ܩܨܝܼܨܲܝ̈ ܦܐܲܬ̣ܵܐ ܕܝܵـ̇ܬ̣ܒ̇ܝܼܢ ܒܡܲܕ݂ܒܪܵܐ: ܡܸܛܠ ܕܟ݂ܠܗܘܿܢ ܥܲܡܡܹ̈ܐ ܥܘܼܪܠܝܼܢ ܒܒܸܣ̱ܪܗܘܿܢ: ܘܟ݂ܠܗܘܿܢ ܕܒܹܝܬ̣ ܝܼܣܪܵܝܹܠ ܥܘܼܪܠܝܼܢ ܒܠܸܒܗܘܿܢ.

10

¹ ܫܡܲܥܘ ܦܸܬ̣ܓ̣ܵܡܵܐ ܕܐܸܡܲܪ ܡܵܪܝܵܐ ܥܠܲܝܟ̇ܘܿܢ ܕܒܹܝܬ̣ ܝܼܣܪܵܝܹܠ.

² ܗܵܟܲܢܵܐ ܐܵܡܲ݁ܪ ܡܵܪܝܵܐ: ܐܘܼܪܚܵܐ ܕܥܲܡܡܹ̈ܐ ܠܵܐ ܬܹܐܠܦܘܼܢ: ܘܡ̣ܢ ܐܲܬ̣̈ܘܵܬ̣ܵܐ ܕܲܫܡܲܝܵܐ ܠܵܐ ܬܸܕ݂ܚ̄ܠܘܼܢ: ܡܸܛܠ ܕܥܲܡܡܹ̈ܐ ܗ̄ܘ̣ ܕܵܚ̇ܠܝܼܢ ܡܸܢܗܹܝܢ.

³ ܡܸܛܠ ܕܕ݂ܚ̈ܠܵܬ̣ܵܐ ܕܥܲܡܡܹ̈ܐ ܠܵܐ ܡܸܕܸ̇ܡ ܐܸܢܹܝܢ: ܡܸܛܠ ܕܩܲܝܣܵܐ ܡ̣ܢ ܥܵܒ̣ܵܐ ܦܣܝܼܩ: ܥܒ̣ܵــ̇ܕ݂ ܐܝܼܕܲܝ̈ ܢܲܓܵܪܵܐ ܒܥܸܫܦܵܐ.

⁴ ܒܟܸܣܦܵܐ ܘܲܒ̣ܕܲܗܒ̣ܵܐ ܩܪܝܼܡܝܼܢ: ܒܩܲܦ̈ܠܘܼܛܹܐ ܘܲܒ̣ܨܸܨܹ̈ܐ ܡܫܲܪܪܝܼܢ ܠܗܘܿܢ ܕܠܵܐ ܢܸܬ̣ܦܲܪܩܘܼܢ.

⁵ ܐܲܝܟ݂ ܕܸܩ̈ܠܹܐ ܙܩܝܼܦܝܼܢ ܘܠܵܐ ܡܡܲܠܠܝܼܢ: ܡܸܫܩܲܠ ܫܵܩ̇ܠܝܼܢ ܠܗܘܿܢ ܡܸܛܠ ܕܠܵܐ ܡܗܲܠܟ݂ܝܼܢ. ܠܵܐ ܬܸܕ݂ܚ̄ܠܘܼܢ ܡܸܢܗܘܿܢ: ܡܸܛܠ ܕܠܵܐ ܡܲܒ̣ܐ̱ܫܝܼܢ ܐܵܦܠܵܐ ܡܲܛܐ̱ܒ̣ܝܼܢ.

⁶ ܠܲܝܬ̇ ܐܲܟ݂ܘܵܬ̣ܵܟ݂ ܡܵܪܝܵܐ: ܕܪܲܒ̇ ܐܲܢ̄ܬ̇ ܘܪܲܒ̇ ܫܡܵܟ݂ ܒܓܲܢ̄ܒܵܪܘܼܬ̣ܵܐ.

⁷ ܡܲܢ ܠܵܐ ܢܸܕ݂ܚܲܠ ܠܵܟ݂ ܡܲܠܟܵܐ ܕܟ݂ܠܗܘܿܢ ܥܵܠܡܹ̈ܐ: ܕܠܵܟ݂ ܗ̄ܘ̣ ܝܵܐܝܵܐ ܡܲܠܟ̇ܘܼܬ̣ܵܐ: ܡܸܛܠ ܕܲܒ̣ܟ݂ܠܗܘܿܢ ܚܲܟ̇ܝܼܡܹ̈ܐ ܕܥܲܡܡܹ̈ܐ: ܘܲܒ̣ܟ݂ܠܵܗ̇ ܡܲܠܟ̇ܘܼܬ̣ܗܘܿܢ ܠܲܝܬ̇ ܐܲܟ݂ܘܵܬ̣ܵܟ݂.

⁸ ܘܐܲܟ݂ܚ̄ܕ݂ܵܐ ܢܹܐܒ̣ܕܘܼܢ ܘܲܢܣܘܼܦܘܼܢ ܝܘܼܠܦܵܢܹ̈ܐ ܣܖ̈ܝܼܩܹܐ ܕܕܸܚ̈ܠܵܬ̣ܵܐ ܕܩܲܝܣܵܐ.

⁹ ܣܹܐܡܵܐ ܛܵܒܵܐ ܡ̣ܢ ܬܲܪܫܝܼܫ ܐܵܬܹܐ: ܘܕܲܗܒ̣ܵܐ ܡ̣ܢ ܐܵܘܦܹܝܪ: ܒܲܕ݂ ܢܲܓܵܪܵܐ ܘܐܝܼܕܲܝ̈ ܩܲܢܵܝܵܐ: ܬܸܟ݂ܠ̱ܬ̣ܵܐ ܘܐܲܪܓ̇ܘܵܢܵܐ ܠܒ̣ܘܼܫܗܘܿܢ: ܙܩܘܿܪܵܐ ܕܚܲܟܝܼܡܹ̈ܐ.

¹⁰ ܘܡܵܪܝܵܐ ܐܲܠܵܗܵܐ ܕܩܘܼܫܬܵܐ܆ܗܘ̤ܝܘܼ ܐܲܠܵܗܵܐ ܕܚܲܝܹ̈ܐ: ܘܡܲܠܟܵܐ ܕܥܲܠܡܹ̈ܐ: ܡ̣ܢ ܪܘܓ̣ܙܹܐ ܙܵܝ̇ܥܵܐ ܐܲܪܥܵܐ: ܘܠܵܐ ܡܚܲܡܣܢܝܼܢ ܥܲܡܡܹ̈ܐ ܪܘܼܓ̣ܙܹܐ.

¹¹ ܗܵܟܲܢܵܐ ܐܸܡܲܪ ܠܗܘܿܢ: ܐܲܠܵܗܹ̈ܐ ܕܲܫܡܲܝܵܐ ܘܐܲܪܥܵܐ ܠܵܐ ܥ̣ܒܲܕ݂ܘ: ܢܹܐܒ̣ܕܘܼܢ ܡ̣ܢ ܐܲܪܥܵܐ: ܘܡ̣ܢ ܬܚܹܝܬ̣ ܫܡܲܝܵܐ ܗܵܠܹܝܢ.

¹² ܡܵܪܝܵܐ ܥ̣ܒܲܕ݂ ܐܲܪܥܵܐ ܒܚܲܝܠܹܗ: ܘܐܲܬ̣ܩܸܢ ܬܸܒܹܝܠ ܒܚܸܟ݂ܡ̱ܬܹܗ: ܘܲܒ̣ܬܲܪܥܝܼܬܹܗ ܡ̣ܬܲܚ ܫܡܲܝܵܐ.

¹³ ܝܵـ̇ܗܹܒ̣ ܩܵܠܵܐ ܕܲܪܓ̣ܘܼܫܝܵܐ ܕܡܲܝ̈ܵܐ ܒܲܫܡܲܝܵܐ: ܡܲܣܸܩ ܥܢܵܢܹ̈ܐ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ: ܘܒܲܖ̈ܩܹܐ ܠܡܸܛܪܵܐ ܥ̣ܒܲܕ݂: ܡܲܦܸܩ ܖ̈ܘܼܚܹܐ ܡ̣ܢ ܐܵܘܨܖܹ̈ܘܗܝ.

¹⁴ ܫ̣ܛܵܐ ܟܠ ܒܲܪܢܵܫܵܐ ܡ̣ܢ ܝܼܕܲܥܬ̣ܵܐ: ܒܗܸܬ̣ܘ ܟܠ ܥܵܒ̣ܕܲܝ̈ ܕܲܗܘܵܐ ܡ̣ܢ ܓܠܝܼܦܹ̈ܐ ܕܲܥ̣ܒܲܕ݂ܘ: ܡܸܛܠ ܕܫܘܼܩܪܵܐ ܢܣܲܟܹܘ: ܘܪܘܼܚܵܐ ܠܲܝܬ̇ ܒܗܘܿܢ.

¹⁵ ܠܵܐ ܡܸܕܸܡ ܐܸܢܘܿܢ: ܘܲܥܒ̣ܵܕܹ̈ܐ ܐܸܢܘܿܢ ܫܵܛܲــ̈ܝܵܐ: ܒܙܲܒ̣ܢܵܐ ܕܡܸܬ̣ܦܲܩܕܝܼܢ ܢܹܐܒ̣ܕܘܼܢ.

¹⁶ ܠܵܐ ܐܲܝܟ݂ ܕܗܵܠܹܝܢ ܡܢܵܬܹܗ ܕܝܲܥܩܘܿܒ̣: ܡܸܛܠ ܡ̣ܢ ܕܲܒ̣ــ̣ܪܵܐ ܟܠ: ܗܘ̤ܝܘܼ ܡܢܵܬ̣ܗܘܿܢ: ܘܝܼܣܪܵܝܹܠ ܫܲܒ̣ܛܵܐ ܕܝܵܪܬ̇ܘܼܬܹܗ: ܡܵܪܝܵܐ ܚܲܝܠܬ̣ܵܢܵܐ ܫܡܹܗ.

¹⁷ ܟܲܢܸܫܝ ܡ̣ܢ ܐܲܪܥܵܐ ܨܲܥܪܹܝܟܝ ܝܵܬ̣ܒܲܬ̣ ܒܐܘܼܠܨܵܢܵܐ.

¹⁸ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ: ܗܵܐ ܡܥܲܪܩܸܠ ܐ̄ܢܵܐ ܠܥܵܡܘܿܖܹ̈ܝܗ̇ ܕܐܲܪܥܵܐ ܗܵܕܹܐ ܒܙܲܒ̣ܢܵܐ ܗܵܢܵܐ: ܕܢܸܒ̣ܥܘܿܢܵܢܝ ܘܢܸܫܟ̇ܚܘܿܢܵܢܝ.

¹⁹ ܘܵܝ ܠܝܼ ܥܲܠ ܬܒ̣ܵܪܝ: ܟܵܝ̇ܒܵܐ ܗ̄ܝ̣ ܡܚܘܿܬ̣ܝ: ܘܐܸܢܵܐ ܐܸܡ̇ܪܹܬ̣ ܗܵܢܵܘ ܟܹܐܒ̣ܝ ܐܹܣܲܝܒ̇ܪܝܼܘܗܝ.

²⁰ ܡܲܫܟܲܢܝ ܐܸܬ̣ܒ̇ܙܸܙ: ܘܟ݂ܠܗܘܿܢ ܛܘܼܢܒܵܘ̈ܗܝ ܐܸܬ̣ܦܲܣܲܩܘ: ܒܢܲܝ̈ ܢܦܲܩ̣ܘ ܡܹܢܝ ܘܠܲܝܬ̇ ܐܸܢܘܿܢ: ܠܲܝܬ̇ ܕܢܵܩܹ̇ܫ ܬܘܼܒ̣ ܡܲܫܟܲܢܝ ܘܲܢܩܝܼܡ ܝܵܖ̈ܝܼܥܵܬ̣ܝ.

²¹ ܡܸܛܠ ܕܲܫـ̣ܛܵܘ ܖ̈ܥܵܘܵܬ̣ܵܐ: ܘܲܠܡܵܪܝܵܐ ܠܵܐ ܒܥ̣ܵܘ. ܡܸܛܠ ܕܠܵܐ ܐܲܟ݂ܫܲܪܘ: ܟܠܗ̇ ܡܲܪܥܝܼܬ̣ܗܘܿܢ ܐܸܬ̣ܒܲܕܪܲܬ̤.

²² ܩܵܠܵܐ ܕܲܫܡܘܼܥܬ̣ܵܐ ܗܵܐ ܐܸܬܵܐ: ܘܙܵܘܥܵܐ ܪܲܒܵܐ ܡ̣ܢ ܐܲܪܥܵܐ ܕܓܲܪܒܝܵܐ: ܠܡܸܥܒܲܕ݂ ܩܘܼܖ̈ܝܵܐ ܕܲܝܗܘܼܕ݂ܵܐ ܠܚܘܼܪܒܵܐ ܡܲܥܡܪܵܐ ܠܝܵܪܘܿܖܹ̈ܐ.

²³ ܝܵܕܲܥ̇ ܐ̄ܢܵܐ ܕܐܘܼܖ̈ܚܵܬܹܗ ܕܡܵܪܝܵܐ ܠܵܐ ܗ̤ܘܲܝ̈ ܐܲܝܟ݂ ܕܒܲܪܢܵܫܵܐ: ܘܠܵܐ ܐܲܝܟ݂ ܓܲܒ̣ܪܵܐ ܕܐܵܙܹ̇ܠ ܘܡܲܬ̣ܩܸܢ ܨܒ̣ܘܼܬܹܗ.

²⁴ ܪܕ݂ܝܼܢܝ ܡܵܪܝܵܐ ܒܕ݂ܝܼܢܵܐ ܘܠܵܐ ܒܪܘܼܓ̣ܙܵܟ݂: ܕܲܠܡܵܐ ܬܲܙ̱ܥܪܲܢܝ.

²⁵ ܐܲܫܘܿܕ݂ ܚܸܡܬ̣ܵܟ݂ ܥܲܠ ܥܲܡܡܹ̈ܐ ܕܠܵܐ ܝܲܕ݂ܥܘܼܟ݂: ܘܥܲܠ ܫܲܖ̈ܒ̣ܵܬܵܐ ܕܒܲܫܡܵܟ݂ ܠܵܐ ܩܖ̈ܲܝ: ܕܐܲܟ݂ܠܘܼܗܝ ܠܝܲܥܩܘܿܒ̣: ܐܲܟ݂ܠܘܼܗܝ ܘܓܲܡܪܘܼܗܝ: ܘܕܲܝܪܹܗ ܐܲܚܪܸܒ̣ܘ.

11

¹ ܦܸܬ̣ܓ̣ܵܡܵܐ ܕܲܗܘ̤ܵܐ ܥܲܠ ܐܹܪܲܡܝܵܐ ܡ̣ܢ ܡܵܪܝܵܐ ܠܡܹܐܡܲܪ.

² ܫܡܲܥ ܦܸܬ̣ܓ̣ܵܡܲܝ̈ ܩܝܵܡܵܐ ܗܵܢܵܐ: ܘܐܸܡܲܪ ܠܓ̣ܵܒ̣ܖܹ̈ܐ ܕܲܝܗܘܼܕ݂ܵܐ: ܘܲܠܥܵܡܘܼܖܹ̈ܝܗ̇ ܕܐܘܿܪܸܫܠܸܡ.

³ ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܹ̈ܐ ܕܝܼܣܪܵܝܹܠ: ܠܝܼܛ ܗ̄ܘ̣ ܓܲܒ̣ܪܵܐ ܕܠܵܐ ܢܸܫܡܲܥ ܦܸܬ̣ܓ̣ܵܡܲܝ̈ ܩܝܵܡܵܐ ܗܵܢܵܐ.

⁴ ܕܦܸـ̇ܩܕܸܬ̣ ܠܐܲܒ̣ܵܗܲܝ̈ܟ̇ܘܿܢ: ܒܝܵܘܡܵܐ ܕܐܲܦܸ̇ܩܬ̣ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ ܡ̣ܢ ܟܘܼܪܵܐ ܕܦܲܪܙܠܵܐ: ܘܐܸܡܪܹܝܬ̣ ܫܡܲܥܘ ܒܩܵܠܝ: ܘܬܸܥܒܕ݂ܘܼܢ ܐܲܢ̄ܬܘܿܢ ܟܠ ܕܐܹܦܲܩܕ݂ܟ݂ܘܿܢ: ܘܬܸܗܘܘܿܢ ܠܝܼ ܥܲܡܵܐ܆ܘܐܸܢܵܐ ܐܸܗܘܸܐ ܠܟ݂ܘܿܢ ܐܲܠܵܗܵܐ.

⁵ ܘܐܲܩܝܼܡ ܡܵܘ̈ܡܵܬ̣ܵܐ ܕܝܼܡ̇ܝܼܬ̣ ܠܐܲܒ̣ܵܗܲܝ̈ܟ̇ܘܿܢ: ܠܡܸܬܲܠ ܠܟ݂ܘܼܢ ܐܲܪܥܵܐ ܕܡܲܪܕܝܵܐ ܚܲܠܒ̣ܵܐ ܘܕܸܒ̣ܫܵܐ ܐܲܝܟ݂ ܕܝܵܘܡܵܢܵܐ: ܘܲܥܢܹ̇ܝܬ̣ ܘܐܸܡ̇ܪܹܝܬ̣: ܐܵܡܹܝܢ: ܡܵܪܝܵܐ.

⁶ ܘܐܸܡܲـ̣ܪ ܠܝܼ ܡܵܪܝܵܐ: ܩܪܝܼ ܟܠܗܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ ܒܩܘܼܖ̈ܝܵܐ ܕܲܝܗܘܼܕ݂ܵܐ ܘܲܒ̣ܫܘܼܩܹ̈ܝܗ̇ ܕܐܘܿܪܸܫܠܸܡ: ܘܐܸܡܲܪ: ܫܡܲܥܘ ܦܸܬ̣ܓ̣ܵܡܹ̈ܐ ܕܲܕ݂ܝܵܬܹܩܹ̈ܐ ܗܵܕܹܐ ܘܬܸܥܒ̇ܕ݂ܘܼܢ ܐܸܢܘܿܢ.

⁷ ܡܸܛܠ ܕܲܡܣܲܗܵܕ݂ܘܼ ܣܲܗ̇ܕܹܬ̣ ܒܐܲܒ̣ܵܗܲܝ̈ܟܘܿܢ: ܒܝܵܘܡܵܐ ܕܐܲܣـ̇ܩܹܬ̣ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ ܘܲܥܕܲܡܵܐ ܠܝܵܘܡܵܢܵܐ: ܩܲܕ݂ܡܹ̇ܬ̣ ܘܫܲܕ̇ܪܹܬ̣ ܘܐܸܡ̇ܪܹܬ̣ ܫܡܲܥܘ ܒܩܵܠܝ.

⁸ ܘܠܵܐ ܫܡܲܥܘ: ܘܠܵܐ ܐܲܪܟܸ̇ܢܘ ܐܸܕ݂ܢ̱ܗܘܿܢ: ܘܗܲܠܸܟ݂ܘ ܓܒܲܪ ܒܨܸܒ̣̈ܝܵܢܲܝ ܠܸܒܗܘܿܢ ܒܝܼܫܵܐ. ܘܐܲܝܬ̇ܝܼܬ̇ ܥܠܲܝܗܘܿܢ ܟܠ ܦܸܬ̣ܓ̣ܵܡܲܝ̈ ܩܝܵܡܵܐ ܗܵܢܵܐ: ܕܦܲܩ̇ܕܸܬ̣ ܠܡܸܫܡܲܥ ܘܠܵܐ ܫܡܲܥܘ.

⁹ ܘܐܸܡܲܪ ܠܝܼ ܡܵܪܝܵܐ: ܐܸܫܬ̇ܟܲܚ ܡܸܪܕܵܐ ܒܓܲܒ̣ܖܹ̈ܐ ܕܲܝܗܘܼܕ݂ܵܐ: ܘܲܒ̣ܥܵܡܘܼܖܹ̈ܝܗ̇ ܕܐܘܿܪܸܫܠܸܡ.

¹⁰ ܬܵܒ̣ܘ ܠܲܚܛܵܗܹ̈ܐ ܕܐܲܒ̣ܵܗܲܝ̈ܗܘܿܢ ܩܲܕ݂ܡܵܝܹ̈ܐ: ܘܠܵܐ ܨܒ̣ܵܘ ܠܡܸܫܡܲܥ ܦܸܬ̣ܓ̣ܵܡܲܝ̈: ܘܗܸܢـ̣ܘܿܢ ܐܸܙܲܠ̣ܘ ܒܵܬܲܪ ܐܲܠܵܗܹ̈ܐ ܐ̄ܚܖ̈ܵܢܹܐ ܠܡܸܦܠܲܚ ܐܹܢܘܿܢ: ܘܒܲܛܸܠܘ ܒܢܲܝ̈ ܝܼܣܪܵܝܹܠ ܘܲܒ̣ܢܲܝ̈ ܝܼܗܘܼܕ݂ܵܐ ܕܝܼܵܬܹܩܹܐ ܕܝܼܠܝ: ܕܐܲܩܝܼܡܹ̇ܬ̣ ܥܲܡ ܐܲܒ̣ܵܗܲܝ̈ܗܘܿܢ.

¹¹ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܡܲܝܬܸ̇ܐ ܐ̄ܢܵܐ ܥܠܲܝܗܘܿܢ ܒܝܼܫܬܵܐ: ܕܠܵܐ ܢܸܫܟ̇ܚܘܼܢ ܠܡܸܦܲܩ ܡܸܢܵܗ̇: ܘܢܸܓ̣ܥܘܿܢ ܠܘܵܬ̣ܝ ܘܠܵܐ ܐܸܫܡܲܥ ܐܸܢܘܿܢ.

¹² ܘܢܹܐ̈ܙܵܠ̄ܢ ܩܘܼܖ̈ܝܵܐ ܕܲܝܗܘܕ݂ܵܐ ܘܥܵܡܘܿܖܹ̈ܝܗ̇ ܕܐܘܿܪܸܫܠܸܡ: ܘܢܸܓ̣ܥܘܿܢ ܠܘܵܬ̣ ܐܲܠܵܗܹ̈ܐ ܕܣܵܝ̇ܡܝܼܢ ܗ̄ܘ̤ܵܘ ܠܗܘܿܢ ܒܸܣܡܹ̈ܐ: ܘܡܸܦܪܲܩ ܠܵܐ ܢܸܦ̱ܪܩܘܼܢ ܐܸܢܘܿܢ ܒܙܲܒ̣ܢܵܐ ܕܒ̣ܝܼܫܬ̇ܗܘܿܢ.

¹³ ܡܸܛܠ ܕܐܲܝܟ݂ ܡܸܢܝܵܢܵܐ ܕܩܘܼܖ̈ܝܲܝܟ ܗܘ̤ܵܘ ܐܲܠܵܗܲܝ̈ܟ ܝܼܗܘܼܕ݂ܵܐ: ܘܐܲܝܟ݂ ܡܸܢܝܵܢܵܐ ܕܫܘܼܩܹ̈ܝܗ̇ ܕܐܘܿܪܸܫܠܸܡ: ܣܵܡܬ̇ܘܿܢ ܡܲܕ݂ܒ̇ܚܹ̈ܐ ܠܒܸܗܬ̇ܬ̣ܵܐ: ܡܲܕ݂ܒ̇ܚܹ̈ܐ ܠܲܡܣܵܡ ܒ݂ܣܡܹ̈ܐ ܠܒܲܥܠܵܐ.

¹⁴ ܘܐܲܢ̄ܬ̇ ܠܵܐ ܬܨܲܠܹܐ ܥܲܠ ܥܲܡܵܐ ܗܵܢܵܐ: ܘܠܵܐ ܬܸܒ̣ܥܹܐ ܥܠܲܝܗܘܿܢ ܒܵܥܘܼܬ̣ܵܐ ܘܲܨܠܘܿܬ̣ܵܐ: ܡܸܛܠ ܕܠܵܐ ܫܵـ̇ܡܲܥ ܐ̄ܢܵܐ ܒܙܲܒ̣ܢܵܐ ܕܩܵܪܹܝܢ ܠܝܼ ܒܲܙܒܲܢ ܒܝܼܫܬ̇ܗܘܿܢ.

¹⁵ ܠܡܵܢܵܐ ܚܲܒ̇ܝܼܒ̣ܬ̇ܝ ܒܒܲܝܬ̇ܝ ܥ̣ܒܲܕܬ̇ܝ ܛܲܢܦܘܼܬ̣ܵܐ ܣܲܓܝܼܐܬ̣ܵܐ: ܘܲܒ̣ܣܲܪ ܩܘܼܕ݂ܫܵܐ ܢܲܥܒ̇ܪܘܼܢ ܡܸܢܹܟ݂ܝ: ܡܸܛܠ ܒܝܼܫܬܹ̇ܟ݂ܝ ܕܥܸܫܢܲܬ̣.

¹⁶ ܙܲܝܬܵܐ ܥܲܒܝܼܛܵܐ ܫܲܦܝܼܪ ܦܹܐܖܹ̈ܐ ܘܫܲܦܝܼܪ ܚܸܙܘܵܐ ܩ̣ܪܵܐ ܡܵܪܝܵܐ ܫܡܹܟ݂ܝ: ܠܩܵܠܵܐ ܕܲܓ̣ܙܝܼܪܬܵܐ ܪܲܒܵܬ̣ܵܐ: ܫܒ̣ܘܿܩܘ ܢܘܼܪܵܐ ܥܠܹܝܗ̇ ܘܲܬ̣ܚܲܒܸ̇ܠ ܣܵܘ̈ܟܹ̇ܝܗ̇.

¹⁷ ܘܡܵܪܝܵܐ ܨܒ̣ܵܐܘܼܬ̣ ܕܢܲܨܒܹ̇ܝܟ݂ܝ: ܡܲܠܸܠ̣ ܥܠܲܝܟ̇ܝ ܒܝܼܫܬܵܐ: ܡܸܛܠ ܒܝܼܫܘܼܬ̣ܵܐ ܕܒܹܝܬ̣ ܝܼܣܪܵܝܹܠ ܘܕ݂ܫܹܝܬ̣ ܝܼܗܘܼܕ݂ܵܐ: ܕܲܥܒܲܕ݂ܘ ܠܗܘܿܢ ܠܡܲܪܓܵܙܘܼܬܲܢܝ: ܠܲܡܣܵܡ ܒܸܣܡܹ̈ܐ ܠܒܲܥܠܵܐ.

¹⁸ ܡܵܪܝܵܐ ܚܵܘܵܢܝ ܘܐܸܕܲܥ ܫܲܪܝܼܪܵܐܝܼܬ̣. ܚܵܘ̣ܝܼܬܵܢܝ ܥܒ̣ܵܕܲܝ̈ܗܘܿܢ.

¹⁹ ܘܐܸܢܵܐ ܐܲܝܟ݂ ܐܸܡܪܵܐ ܒܪܝܼܪܵܐ ܕܡܸܬ̇ܕܒܲܪ ܠܢܸܟ݂ܣܬ̣ܵܐ: ܘܠܵܐ ܝܸܕ݂ܥܹ̇ܬ̣ ܕܲܥܠܲܝ ܐܹܬ̣ܚܲܫܲܒ̣ܘ ܡܲܚܫܲܒ̣ܬ̣ܵܐ: ܘܐܸܡܲܪܘ ܢܲܒܹ̇ܠ ܩܲܝܣܵܐ ܒܠܲܚܡܸܗ: ܘܢܵܘܒ̇ܕ݂ܝܘܗܝ ܡ̣ܢ ܐܲܪܥܵܐ ܕܚܲܝܹ̈ܐ: ܘܲܫܡܹܗ ܬܘܼܒ̣ ܠܵܐ ܢܸܬ̇ܕ̇ܟܲܪ.

²⁰ ܘܡܵܪܝܵܐ ܚܲܝܠܬ̣ܵܢܵܐ ܕܲܝܵܢܵܐ ܕܩܘܼܫܬܵܐ: ܒܵــ̇ܚܲܪ ܟܘܿܠ̈ܝܵܬ̣ܵܐ ܘܠܸܒܵܐ: ܐܸܚܙܸܐ ܦܘܼܪܥܵܢܵܟ݂ ܡܸܢܗܘܿܢ: ܡܸܛܠ ܕܠܵܟ݂ ܓܠܹـ̇ܝܬ̣ ܕܝܼܢܲܝ̈.

²¹ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܥܲܠ ܐ̄ܢܵܫܲܝ̈ ܥܢܵܬ̣ܘܿܬ̣ ܕܒ̣ܵܥܹܝܢ ܢܲܦ̮ܫܵܟ݂: ܘܐܵܡ̇ܪܝܼܢ ܠܵܐ ܬܸܬ̣ܢܲܒܸ̇ܐ ܒܲܫܡܹܗ ܕܡܵܪܝܵܐ ܕܠܵܐ ܬܡܘܼܬ̣ ܒܐܝܼ̈ܕܲܝܢ.

²² ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܨܒ̣ܵܐܘܼܬ̣: ܗܵܐ ܦܵܩܹ̇ܕ݂ ܐ̄ܢܵܐ ܥܠܲܝܗܘܿܢ: ܥܠܲܝܡܹ̈ܐ ܢܡܘܼܬ̣ܘܼܢ ܒܚܲܪܒܵܐ: ܘܐܵܦ ܒܢܲܝ̈ܗܘܿܢ ܘܲܒ̣̈ܢܵܬ̣ܗܘܿܢ ܢܡܘܼܬܘܼܢ ܒܟܲܦܢܵܐ.

²³ ܘܚܲܪܬ̣ܵܐ ܠܵܐ ܬܸܗܘܹܐ ܠܗܘܿܢ: ܡܸܛܠ ܕܡܲܝܬܹ̇ܐ ܐ̄ܢܵܐ ܒܝܼܫܬܵܐ ܥܲܠ ܐ̄ܢܵܫܲܝ̈ ܥܢܵܬ̣ܘܿܬ̣ ܫܲܢ̄ܬܵܐ ܕܦܘܼܩܕܵܢܗܘܿܢ.

12

¹ ܙܲܕܝܼܩ ܐܲܢ̄ܬ̇ ܡܵܪܝܵܐ ܕܐܹܕ̇ܘܼܢ ܥܲܡܵܟ݂: ܒܪܲܡ ܕܝܼܢܵܐ ܡܡܲܠܸܠ ܐ̄ܢܵܐ ܩܕ݂ܵܡܲܝܟ: ܡܸܛܠ ܡܵܢܵܐ ܐܘܼܚܹܗ ܕܪܲܫܝܼܥܵܐ ܡܨܲܠ̱ܚܵܐ: ܘܟܲܗܝܼܢܝܼܢ ܟܠܗܘܿܢ ܫܲܩܵܖܹ̈ܐ.

² ܢܨܲܒ̣ــ̣ܬ̇ ܐܸܢܘܿܢ: ܘܐܲܫܲܪܘ ܥܸܩܵܖ̈ܲܝܗܘܿܢ: ܩܢ̣ܵܘ ܘܐܵܦ ܥـ̣ܒܲܕ݂ܘ ܦܹܐܖܹ̈ܐ: ܩܲܪܝܼܒ̣ ܐܲܢ̄ܬ̇ ܒܦܘܼܡܗܘܿܢ: ܘܪܲܚܝܼܩ ܐܲܢ̄ܬ̇ ܡ̣ܢ ܟܘܿܠܝܵܬ̣̈ܗܘܿܢ.

³ ܘܐܲܢ̄ܬ̇ ܡܵܪܝܵܐ ܝܼܕܲܥܬܵܢܝ ܘܲܚ̣ܙܲܝܬܵܢܝ. ܘܲܒ̣ܚܲܪܬ̇ ܠܸܒ̇ܝ ܩܕ݂ܵܡܲܝܟ: ܛܲܝܸܒ̣ ܐܸܢܘܿܢ ܐܲܝܟ݂ ܥܵـ̈ـܢܵܐ ܠܢܸܟ݂ܣܬ̣ܵܐ: ܘܙܲܡܸܢ ܐܸܢܘܿܢ ܠܝܘܿܡ ܩܸܛܠܵܐ.

⁴ ܥܕܲܡܵܐ ܠܐܸܡܲܬ̣ ܬܸܬ̣ܐ̱ܒܸܠ ܐܲܪܥܵܐ: ܘܥܸܣܒܵܐ ܟܠܹܗ ܕܚܲܩܠܵܐ ܝܼܒܸܫ̣: ܡ̣ܢ ܒܝܼܫܬܵܐ ܕܥܵܡܘܿܖܹ̈ܝܗ̇: ܣܵܦܲܬ̤ ܒܥܝܼܪܵܐ ܘܦܵܪܲܚܬ̣ܵܐ: ܕܐܸܡܲܪܘ ܠܵܐ ܢܸܚܙܸܐ ܚܲܪܬܲܢ.

⁵ ܗܵܐ ܥܲܡ ܖܸ̈ܓ̣ܠܵܝܹܐ ܪܗܸܛ̣ܬ̇ ܘܐܲܠܐ̱ܝܘܼܟ݂: ܘܐܲܝܟܲܢܵܐ ܡܸܬ̣ܚܪܸܐ ܐܲܢ̄ܬ̇ ܥܲܡ ܖ̈ܲܟ݂ܫܵܐ: ܘܒ̣ܪܥܵܐ ܕܲܫܠܵܡܵܐ ܬܟ݂ܝܼܠ ܐܲܢ̄ܬ̇: ܘܐܲܝܟܲܢܵܐ ܥܵـ̇ܒܲܪ ܐܲܢ̄ܬ̇ ܒܥܘܼܫܢܹܗ ܕܝܘܿܪܕܢܵܢ.

⁶ ܡܸܛܠ ܕܐܵܦ ܐܲܚܲܝ̈ܟ ܘܒܹܝܬ̣ ܐܲܒ̣ܘܼܟ݂: ܐܵܦ ܗܸܢ̣ܘܿܢ ܕܲܓܸ̇ܠܘ ܒܵܟ݂: ܐܵܦ ܗܸܢ̣ܘܿܢ ܐܸܡܲܪܘ ܒܵܬ̣ܪܵܟ݂ ܡܸܠܹ̈ܐ: ܠܵܐ ܬܗܲܝܡܸܢ ܐܸܢܘܿܢ ܟܲܕ݂ ܢܡܲܠܠܘܼܢ ܥܠܲܝܟ ܛܵܒ̣ܬ̣ܵܐ.

⁷ ܫܸܒ̣ܩܹܬ̣ ܒܲܝܬ̇ܝ: ܫܸܒ̣ܩܹ̇ܬ̣ ܝܵܪܬܘܼܬ̣ܝ: ܝܸܗ̄ܒܹـ̇ܬ̣ ܚܲܒ̇ܝܼܒܲܬ̣ ܢܲܦ̮ܫܝ ܒܐܝܼܕ݂ܵܐ ܕܲܒ̣ܥܸܠܕ̇ܒ̣ܵܒܹܝ̈ܗ̇.

⁸ ܗܘ̤ܵܬ݂ ܠܝܼ ܝܵܪܬ̇ܘܼܬ݂ܝ ܐܲܝܟ݂ ܐܲܪܝܵܐ ܒܥܵܒ̣ܵܐ: ܐܲܪܝܼܡܲܬ̤ ܥܠܲܝ ܒܩܵܠܵܗ̇: ܡܸܛܠ ܗܵܢܵܐ ܣܢܹܝ̇ܬ̣ܵܗ̇.

⁹ ܛܲܝܪܵܐ ܡܨܲܝܲܪܬܵܐ ܗܘ̤ܵܬ̣ ܠܝܼ ܝܵܪܬܘܬ݂ܝ: ܘܛܲܝܪܵܐ ܚܵܕ݂ܪܵܐ ܠܵܗ̇: ܙܸܠܘ ܟܲܢܸܫܘ ܟܠܵܗ̇ ܚܲܝ̄ܘܬ݂ܵܐ ܕܕܲܒ̣ܪܵܐ ܐܲܝܬܵܘ ܠܡܹܐܟ݂ܠܵܗ̇.

¹⁰ ܖ̈ܵܥܵܘܵܬ̣ܵܐ ܣܸܓܲܝܹ̈ܐܐ ܚܲܒܸ̇ܠ̣ܘ ܟܲܪܡܝ: ܕܵܫ̣ܘ ܦܵܠܓܘܼܬ݂ܝ: ܥ̣ܒܲܕ݂ܘ ܦܵܠܓܘܼܬ݂ܵܐ: ܕܪܸܓܲܬ݂ܝ ܐܲܝܟ݂ ܡܲܕ݂ܒܪܵܐ ܚܲܪܒܵܐ.

¹¹ ܐܲܨܕ̇ܝܼܘ ܘܐܲܚ̱ܪܒ̣ܘܼܗ̇: ܐܸܬ݂ܐܲܒ̣ܠܲܬ̤ ܥܠܲܝ ܚܲܪܒܬ̣ܵܐ: ܨܕ݂ܵܬ̤ ܟܠܵܗ̇ ܐܲܪܥܵܐ: ܡܸܛܠ ܕܠܲܝܬ̇ ܐ̄ܢܵܫ ܕܡܲܝܬܸ̇ܐ ܥܲܠ ܒܵܠܹܗ.

¹² ܥܲܠ ܟܠܗܘܿܢ ܫܒ̣ܝܼ̈ܠܹܐ ܕܡܲܕ݂ܒܪܵܐ ܐܸܬ݂ܵܘ ܒܵܙܘܿܙܹ̈ܐ: ܡܸܛܠ ܕܚܲܪܒܹܗ ܕܡܵܪܝܵܐ ܐܵܟ݂ܠܵܐ: ܡ̣ܢ ܣܵܘܦܹܝܗ̇ ܕܐܲܪܥܵܐ ܘܲܥܕܲܡܵܐ ܠܣܵܘܦܹ̈ܝܗ̇ ܕܐܲܪܥܵܐ: ܘܠܲܝܬ̇ ܫܠܵܡܵܐ ܠܟ݂ܠ ܒܣܲܪ.

¹³ ܙܪܘܿܥܘ ܚܸܛܹ̈ܐ ܘܲܚܨܘܿܕ݂ܘ ܟܘܼ̈ܒܹܐ: ܘܲܠܐܵܘ ܘܡܸܕܸܡ ܠܵܐ ܡܵܘܬܪܝܼܢ ܐ̄ܢܬܘܿܢ: ܘܲܒ̣ܗܲܬ݂ܘ ܡ̣ܢ ܥܲܠ̈ܠܵܬ݂ܟ݂ܘܿܢ: ܡܸܛܠ ܚܸܡܬ݂ܵܐ ܕܪܘܼܓ̣ܙܹܗ ܕܡܵܪܝܵܐ.

¹⁴ ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܟܠܗܘܿܢ ܫܒ̣ܵܒܲܝ̈ ܖ̈ܵܥܵܘܵܬ݂ܵܐ: ܕܲܩܪܸܒ̣ܘ ܒܝܵܪܬܘܼܬ݂ܵܐ ܕܐܵܘܪܬܹܬ݂ ܠܥܲܡܝ ܝܼܣܪܵܝܹܠ: ܗܵܐ ܥܵܩܲܪ ܐ̄ܢܵܐ ܠܗܘܢ ܡܼܢ ܐܲܬ݂ܪ̱ܗܘܿܢ: ܘܠܲܕ݂ܒܹܝܬ݂ ܝܼܗܘܼܕ݂ܵܐ ܐܸܥܩܘܿܪ ܡܼܢ ܒܲܝܢܵܬ݂ܗܘܿܢ.

¹⁵ ܘܡ̣ܢ ܒܵܬܲܪ ܕܐܸܥܩܘܿܪ ܐܸܢܘܿܢ: ܐܹܬ̇ܘܼܒ̣ ܘܐܹܪܲܚܸܡ ܥܠܲܝܗܘܿܢ: ܘܐܲܗܦܸܟ݂ ܐܸܢܘܿܢ ܓܒܲܪ ܠܝܵܪܬ̇ܘܼܬܹܗ: ܘܲܓ̣ܒܲܪ ܠܐܲܪܥܵܗ.

¹⁶ ܘܐܸܢ ܢܲܠܦܘܼܢ ܐܘܼܖ̈ܚܵܬ̣ܝ ܠܥܲܡܝ: ܕܢܹܐܡܘܿܢ ܒܫܹܡܝ ܚܲܝ ܗ̄ܘ̣ ܡܵܪܝܵܐ: ܐܲܝܟ݂ ܕܐܲܠܸܦ̣ܘ ܐܸܢܘܿܢ ܕܢܹܐܡܘܿܢ ܒܒܲܥܠܵܐ: ܢܸܬ̇ܒ̣ܘܼܢ ܒܓ̣ܵܘ ܥܲܡܝ.

¹⁷ ܘܐܸܢ ܠܵܐ ܢܸܫܡ̱ܥܘܼܢ ܐܸܥܩ̄ܪܝܼܘܗܝ ܠܥܲܡܵܐ ܗܵܢܵܐ ܡܸܥܩܲܪ: ܘܡܵܘܒܵܕ݂ܘܼ ܐܵܘܒ̇ܕ݂ܝܼܘܗܝ ܐܵܡܲ݁ܪ ܡܵܪܝܵܐ.

13

¹ ܗܵܟܲܢܵܐ ܐܸܡܲܪ ܠܝܼ ܡܵܪܝܵܐ ܙܸܠ ܙܒܸܢ ܠܵܟ݂ ܣܘܼܕܵܪܵܐ ܕܟܸܬܵܢܵܐ ܘܐܲܣܘܿܪܲܝܗܝ ܒܚܲܨܲܝ̈ܟ: ܘܲܒ̣ܡܲـ̈ܝܵܐ ܠܵܐ ܬܸܨܒ̇ܥܝܼܘܗܝ.

² ܘܙܸܒ̣ܢܹ̇ܬ̣ ܣܘܼܪܵܕܵܐ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܘܐܸܣ݁ܪܹܬ̣ ܒܚܲܨܲܝ̈.

³ ܘܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܕܬܲܪܬܹ̇ܝܢ ܙܲܒ̣̈ܢܝܼܢ: ܘܐܸܡܲܪ ܠܝܼ.

⁴ ܣܲܒ̣ ܣܘܼܕܵܪܵܐ ܕܲܙܒܲܢـ̣ܬ̇ ܕܲܒ̣ܚܲܨܲܝ̈ܟ: ܘܩܘܼܡ ܙܸܠ ܠܲܦܪܵܬ̣: ܘܛܲܡܘܿܪܲܝܗܝ ܬܲܡܵܢ ܒܨܸܪܝܵܐ ܕܟܹܐܦܵܐ.

⁵ ܘܐܸܙܹ̇ܠ̄ܬ̣ ܘܲܛܡܲܪܬܹ̇ܗ ܒܲܦܪܵܬ̣ ܐܲܝܟ݂ ܕܦܲܩܕܲܢܝ ܡܵܪܝܵܐ.

⁶ ܘܡ̣ܢ ܒܵܬܲܪ ܝܵܘ̈ܡܵܬ̣ܵܐ ܣܲܓܝܹ̈ܐܐ ܐܸܡܲܪ ܠܝܼ ܡܵܪܝܵܐ: ܩܘܼܡ ܙܸܠ ܠܲܦܪܵܬ̣: ܘܣܲܒ̣ ܡ̣ܢ ܬܲܡܵܢ ܣܘܼܕܵܪܵܐ ܕܦܵܩܸـ̇ܕܬܵܟ݂ ܕܬܸܛܡ̱ܪܝܼܘܗܝ ܬܲܡܵܢ.

⁷ ܘܸܙܹ̇ܠ̄ܬ̣ ܠܲܦܪܵܬ̣: ܘܚܸܦ̇ܪܹܬ̣ ܘܲܢܣܲܒ̣ܬܹ̇ܗ ܠܣܘܼܪܵܕܵܐ ܡ̣ܢ ܟܲܪ ܕܲܛܡܲܪܬܹ̇ܗ: ܘܗܵܐ ܐܸܬ̣ܚܲܒܸܠ ܣܘܼܕܵܪܵܐ: ܘܲܠܡܸܕܸܡ ܠܵܐ ܟܵܫܲܪ.

⁸ ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܠܲܝ: ܘܐܸܡܲܪ.

⁹ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܗܵܟܲܢܵܐ ܐܹܚܲܒܸ̇ܠ ܠܲܓ̣̈ܐܲܝܵܐ ܕܲܝܗܘܼܕ݂ܵܐ: ܘܠܲܓ̣̈ܐܲܝܵܐ ܕܐܘܿܪܸܫܠܸܡ ܣܲܓ̇ܝܹ̈ܐܐ.

¹⁰ ܥܲܡܵܐ ܗܵܢܵܐ ܒܝܼܫܵܐ ܕܠܵܐ ܨܒ̣ܵܘ ܠܡܸܫܡܲܥ ܦܸܬ̣ܓ̣ܵܡܲܝ̈: ܕܲܡܗܲܠܟ݂ܝܼܢ ܒܨܸܒ̣ܝܵܢܵܐ ܕܠܸܒ̇ܗܘܿܢ: ܘܐܸܙܲܠ̣ܘ ܒܵܬܲܪ ܐܲܠܵܗܹ̈ܐ ܐ̄ܚܖ̈ܵܢܹܐ: ܠܡܸܦܠܲܚ ܐܸܢܘܿܢ: ܘܲܠܡܸܣܓܲܕ݂ ܠܗܘܿܢ܆ܢܸܗܘܘܿܢ ܐܲܝܟ݂ ܣܘܼܕܵܪܵܐ ܗܵܢܵܐ ܕܲܠܡܸܕܸܡ ܠܵܐ ܟܵܫܲܪ.

¹¹ ܡܸܛܠ ܕܐܲܝܟܲܢܵܐ ܕܢܵܩܹ̇ܦ ܣܘܼܕܵܪܵܐ ܠܚܲܨܵܘ̈ܗܝ ܕܓܲܒ̣ܪܵܐ: ܗܵܟܲܢܵܐ ܐܲܩـ̇ܦܹܬ̣ ܠܝܼ ܠܟ݂ܠܹܗ ܒܹܝܬ̣ ܝܼܣܪܵܝܹܠ: ܘܲܠܟ݂ܠܹܗ ܒܹܝܬ̣ ܝܼܗܘܼܕ݂ܵܐ ܐܵܡܲ݁ܪ ܡܵܪܝܵܐ: ܕܢܸܗܘܘܿܢ ܠܝܼ ܥܲܡܵܐ: ܘܠܲܫܡܵܐ: ܘܠܐܝܼܩܵܪܵܐ: ܘܲܠܬܸܫܒ̇ܘܿܚܬܵܐ: ܘܠܵܐ ܫ̣ܡܲܥܘ.

¹² ܘܐܸܡܲܪ ܠܗܘܿܢ ܦܸܬ̣ܓ̣ܵܡܵܐ ܗܵܢܵܐ: ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܟܠ ܓܪܵܒ̣ ܢܸܬ̣ܡ̱ܠܸܐ ܚܲܡܪܵܐ: ܗܵܐ ܐܵܡ̇ܪܝܼܢ ܠܵܟ݂: ܡܸܕܲܥ ܓܹܝܪ ܠܵܐ ܝܵܕ݂ܥ̇ܝܼܢܲܢ ܕܟ݂ܠܗܘܿܢ ܓܖ̈ܵܒܹܐ ܡܸܬ̣ܡ̱ܠܹܝܢ ܚܲܡܪܵܐ.

¹³ ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲ݁ܪ ܡܵܪܝܵܐ: ܗܵܐ ܡܵـ̇ܠܹܐ ܐ̄ܢܵܐ ܠܟ݂ܠܗܘܿܢ ܗܵܡܘܿܖܹ̈ܝܗ̇ ܕܐܲܪܥܵܐ ܗܵܕܹܐ: ܘܲܠܡܲܠ̈ܟܹ̇ܐ ܕܝܵـ̇ܬ̣ܒܝܼܢ ܥܲܠ ܟܘܼܪܣܝܹܗ ܕܕ݂ܵܘܝܼܕ݂: ܘܲܠܟ݂ܵܗ̈ܢܹܐ ܘܠܲܢܒ̣ܝܹ̈ܐ: ܘܲܠܟ݂ܠܗܘܿܢ ܥܵܡܘܿܖܹ̈ܝܗ̇ ܕܐܘܿܪܸܫܠܸܡ ܪܵܘܵܝܘܼܬ̣ܵܐ.

¹⁴ ܘܐܹܒܲܕܲܪ ܐܸܢܘܿܢ ܓܒܲܪ ܡ̣ܢ ܠܘܵܬ݂ܵܟ݂ ܐܲܚܘܼܗܝ: ܘܐܲܒ̣ܵܗܹ̈ܐ ܘܒ̣ܢܲـ̈ܝܵܐ ܐܲܟ݂ܚ̄ܕ݂ܵܐ ܐܵܡ݁ܲܪ ܡܵܪܝܵܐ: ܠܵܐ ܐܹܪܲܚܸܡ ܘܠܵܐ ܐܹܪܲܚܸܦ: ܘܠܵܐ ܐܹܚܘܼܣ ܠܲܡܚܲܒܵܠܘܼ ܐܸܢܘܿܢ.

¹⁵ ܫܡܲܥܘ ܘܨܘܼܬ̣ܘ ܘܠܵܐ ܬܸܬ̇ܪܝܼܡܘܼܢ: ܡܸܛܠ ܕܡܵܪܝܵܐ ܡܲܠܸܠ̣

¹⁶ ܗܲܒ̣ܘ ܠܡܵܪܝܵܐ ܐܲܠܵܗܟ݂ܘܿܢ ܐܝܼܩܵܪܵܐ ܥܲܕ݂ܠܵܐ ܢܸܚܫܸܟ݂: ܘܥܲܕ݂ܠܵܐ ܢܸܬ̇ܬܲܒ̣ܖ̈ܵܢ ܖ̈ܓ̣ܠܲܝܟ̇ܘܿܢ ܥܲܠ ܛܘܼܖܹ̈ܐ ܒܚܸܫܘܿܟ݂ܵܐ: ܘܲܬ̣ܣܲܟܘܿܢ ܠܢܘܼܗܪܵܐ ܘܢܸܥܒ̇ܕ݂ܝܼܘܗܝ ܚܸܫܘܿܟ݂ܵܐ ܘܛܸܠܵܠܲܝ̈ ܡܵܘܬܵܐ.

¹⁷ ܘܐܸܢ ܠܵܐ ܬܸܫ̱ܡܥܘܼܢܹܗ: ܡܲܛܫܝܵܐܝܼܬ̣ ܬܸܒ̣ܟܸ̇ܐ ܢܲܦܫܝ ܡ̣ܢ ܩܕܵܡ ܥܵܩܬ̣ܵܐ: ܘܲܡܕܲܡܵܥܘܼ ܐܹܕܡܲܥ: ܘܢܸܫ̄ܚ̈ܠܵܢ ܥܲܝܢܲܝ̈ ܕܸܡ̈ܥܹܐ: ܥܲܠ ܕܐܸܫܬ̇ܒ̣ܝܼ ܓܙܵܪܹܗ ܕܡܵܪܝܵܐ.

¹⁸ ܐܸܡܲܪ ܠܡܲܠܟܵܐ ܘܲܠܪܵܘܖ̈ܒ̣ܵܢܹܐ: ܐܸܬ̣ܡܲܟܲܟ݂ܘ: ܘܬ̣ܘܼܒ̣ܘ: ܡܸܛܠ ܕܲܢܦܲܠ̣ ܡ̣ܢ ܪܸܫܟ݂ܘܿܢ ܟܠܝܼܠܵܐ ܕܬܸܫܒܘܿܚܬ̇ܟ݂ܘܿܢ.

¹⁹ ܩܘܼܖ̈ܝܵܐ ܕܬܲܝܡܢܵܐ ܐܸܬ̇ܬ̇ܚܸܕ݂: ܘܠܲܝܬ̇ ܕܦܵܬ݁ܲܚ: ܐܸܫܬܲܒ̣ܝܲܬ̤ ܝܼܗܘܼܕ݂ܵܐ ܟܠܵܗ̇ ܫܒ̣ܝܼܬ̣ܵܐ ܫܲܠܡ̄ܬ̣ܵܐ.

²⁰ ܐܲܪܝܼܡܘ ܥܲܝܢܲܝ̈ܟ̇ܘܿܢ ܘܲܚܙܵܘ ܠܕ݂ܵܐܬܹ̇ܝܢ ܡ̣ܢ ܓܲܪܒܝܵܐ: ܐܲܝܢܵܘ ܓܙܵܪܵܐ ܕܐܸܬ̱ܝܼܗܸܒ̣ ܠܹܟ݂ܝ ܥܵـ̈ܢܵܐ ܕܬܸܫܒ̇ܘܿܚܬܹ̇ܟ݂ܝ.

²¹ ܡܵܢܵܐ ܬܹܐܡܪܝܼܢ ܟܲܕ݂ ܢܸܦܩܘܿܕ݂ ܥܠܲܝܟܝ: ܘܐܲܢ̄ܬ̇ܝ ܐܲܠܸܦ̣ܬ̇ܝ ܐܸܢܘܿܢ ܝܘܼܠܦܵܢܵܐ ܕܢܸܗܘܘܿܢ ܠܲܕ݂ܝܵܫܵܐ: ܗܵܐ ܚܸܒ̣̈ܠܹܐ ܢܹܐܚܕ̇ܘܼܢܹܟ݂ܝ: ܐܲܝܟ݂ ܐܲܢ̄ܬ̇ܬ̣ܵܐ ܕܲܡܚܲܒ̇ܠܵܐ ܠܡܹܐܠܲܕ݂.

²² ܘܐܸܢ ܬܹܐܡܪܝܼܢ ܒܠܸܒܹ̇ܟ݂ܝ ܡܸܛܠ ܡܵܢܵܐ ܓܕܲܫ̣ ܠܝܼ ܗܵܠܹܝܢ: ܒܣܘܿܓܲܐܬ̣ ܚܵܘ̈ܒܲܝܟܝ ܐܸܬ̣ܓܲܠܲܓ̣ܘ ܫܦܘܿܠܲܝܟܝ̈: ܘܐܹܬ̣ܓ̇ܠܝܼ ܥܸܩܒܲܝ̈ܟ̇ܝ.

²³ ܘܐܲܝܟ݂ ܕܠܵܐ ܡܸܫܟܲܚ ܗܸܢܕ̇ܘܵܝܵܐ ܕܲܢܫܲܚܠܸܦ ܡܸܫܟܹ̇ܗ: ܘܢܸܡܪܵܐ ܟܵܟ̈ܠܵܬܹܗ: ܘܐܵܦ ܐܲܢ̄ܬ̇ܘܿܢ ܠܵܐ ܡܸܫܟ̇ܚܝܼܢ ܐܲܢ̄ܬ̇ܘܿܢ ܠܡܲܛܐܵܒ̣ܘܼ: ܡܸܛܠ ܕܝܼܠ̣ܦܬ̇ܘܿܢ ܒܝܼܫܬܵܐ.

²⁴ ܘܐܹܒܲܕܲܪ ܐܹܢܘܿܢ ܐܲܝܟ݂ ܓܸܠܵܐ ܕܥܵـ̇ܒܲܪ ܩܕ݂ܵܡ ܪܘܼܚܵܐ ܒܡܲܕ݂ܒ̇ܪܵܐ.

²⁵ ܗܵܕܲܐ ܗ̄ܝ̣ ܦܸܨܬܹܟ݂ܝ ܘܲܡܢܵܬ̣ܵܐ ܕܝܵܪܬ̇ܘܼܬܹܟ݂ܝ ܡ̣ܢ ܩܕ݂ܵܡܲܝ ܐܵܡܲ݁ܪ ܡܵܪܝܵܐ: ܥܲܠ ܕܲܛܥܲܝܬ̇ܝܼܢܝ ܘܐܹܬ̇ܬ̇ܟܸܠܬ̇ܝ ܥܲܠ ܫܘܼܩܪܵܐ.

²⁶ ܘܐܵܦ ܐܹܢܵܐ ܐܹܓܲܠܸܓ̣ ܫܦܘܿܠܲܝ̈ܟ̇ܝ ܘܐܲܪܡܸܐ ܥܲܠ ܐܲܦܲܝ̈ܟ̇ܝ: ܘܢܸܬ̣ܚܙܸܐ ܨܲܥܪܹܟ݂ܝ.

²⁷ ܘܓ̣ܵܘܪܹܟ݂ܝ: ܘܨܲܗܠܹܟ݂ܝ: ܘܙܵܢܝܘܼܬ̣ܵܐ ܕܙܵܢܝܘܼܬܹܟ݂ܝ: ܥܲܠ ܖ̈ܵܡܵܬ̣ܵܐ ܒܡܲܕ݂ܒ̇ܪܵܐ ܚܙܹ̇ܝܬ̣ ܛܲܢܦܘܼܬܹܟ݂ܝ: ܘܵܝ ܠܹܟ݂ܝ ܐܘܿܪܸܫܠܸܡ ܕܠܵܐ ܬܸܬ̇ܕܲܟܹ̇ܝܢ: ܥܕܲܡܵܐ ܠܐܸܡܲܬ̣ܝ: ܬܘܼܒ̣ܝ.

14

¹ ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܥܲܠ ܒܨܝܼܪܘܼܬ̣ ܡܸܛܪܵܐ.

² ܐܸܬ̣ܐܲܒ̣ܠܲܬ̤ ܝܼܗܘܼܕ݂ܵܐ: ܘܬܲܖ̈ܥܹܝܗܚ ܨܕ݂ܵܘ ܘܲܢܦܲܠܘ ܒܐܲܪܥܵܐ: ܘܲܨܘܲܚܬ̣ܵܗ̇ ܕܐܘܿܪܸܫܠܸܡ ܣܸܠܩܲܬ̤.

³ ܪܵܘܖ̈ܒ̣ܵܢܲܝܗܘܿܢ ܫܲܕܲܪܘ ܒܨܝܼܖ̈ܲܝܗܘܿܢ ܠܡܲـ̈ܝܵܐ: ܐܸܬ̣ܵܘ ܠܓ̣ܘܼ̈ܒܹ̇ܐ ܘܠܵܐ ܐܸܫܟܲܚܘ ܡܲـ̈ܝܵܐ: ܗܦܲܟ݂ܘ ܡܵܐܢܲܝ̈ܗܘܿܢ ܣܪܝܼܩܵܐܝܼܬ̣: ܒܗܸܬ̣ܘ ܘܐܸܬ̇ܬ̇ܟܸܣܘ ܘܚܲܦܝܼܘ ܖܹ̈ܫܲܝܗܘܿܢ.

⁴ ܡܸܛܠ ܥܒ̣ܵܕܹܝ̈ܗ̇ ܕܐܲܪܥܵܐ ܠܵܐ ܗܘ̤ܵܐ ܡܸܛܪܵܐ: ܒܗܸܬ̣ܘ ܐܲܟܵܖܹ̈ܐ ܘܚܲܦܝܼܘ ܖܹ̈ܫܲܝܗܘܿܢ.

⁵ ܘܐܵܦ ܐܲܝ̈ܠܵܬ̣ܵܐ ܒܕܲܒ̣ܪܵܐ ܝܼܠܸܕ݂ ܘܲܫܒܲܩ ܒܢܲܝ̈ܗܹܝܢ: ܡܸܛܠ ܕܠܵܐ ܗܘ̤ܵܐ ܬܸܕ݂ܐܵܐ.

⁶ ܘܲܥܖ̈ܵܕܹܐ ܩܵـ̣ܡܘ ܥܲܠ ܫܒ̣̈ܝܼܠܹܐ: ܣܵـ̣ܩܘ ܪܘܼܚܵܐ ܐܲܝܟ݂ ܝܵܪܘܿܖܹ̈ܐ: ܚܫܸܟ݂ ܥܲܝܢܲܝ̈ܗܘܿܢ ܡܸܛܠ ܕܠܲܝܬ̇ ܥܸܣܒܵܐ.

⁷ ܐܸܢ ܚܛܵܗܲܝ̈ܢ ܣܗܸܕ݂ܘ ܒܲܢ: ܡܵܪܝܵܐ ܚܘܼܣ ܡܸܛܠ ܫܡܵܟ݂: ܡܸܛܠ ܕܣܲܓ̇ܝܼܵܐܐ ܗ̄ܝ̣ ܛܲܝܒܘܼܬ̣ܵܟ݂: ܘܠܵܟ݂ ܚ̣ܛܲܝܢ.

⁸ ܣܲܒ̣ܪܹܗ ܕܝܼܣܪܵܝܹܠ ܘܦܵܪܘܿܩܹܗ ܒܙܲܒ̣ܢܵܐ ܕܐܘܼܠܨܵܢܵܐ: ܠܵܐ ܬܸܗܘܸܐ ܐܲܝܟ݂ ܬܵܘܬܵܒ̣ܵܐ ܒܐܲܪܥܵܐ: ܘܐܲܝܟ݂ ܐܵܪܚܵܐ ܕܣܵܛܹ݁ܐ ܠܲܡܒ̣ܵܬ̣.

⁹ ܠܵܐ ܬܸܗܘܸܐ ܐܲܝܟ݂ ܓܲܒ̣ܪܵܐ ܒܨܝܼܪܵܐ: ܘܐܲܝܟ݂ ܓܲܒ̣ܪܵܐ ܕܠܵܐ ܡܸܫܟܲܚ ܠܡܸܦܪܲܩ: ܘܐܲܢ̄ܬ̇ ܡܵܪܝܵܐ ܒܓܵܘܲܢ ܐܲܢ̄ܬ̇: ܘܲܫܡܵܟ݂ ܐܸܬ̣ܩܪܝܼ ܥܠܲܝܢ ܠܵܐ ܬܸܫܒ̇ܩܲܢ.

¹⁰ ܗܵܟܲܢܵܐ ܐܵܡܲ݁ܪ ܡܵܪܝܵܐ ܠܥܲܡܵܐ ܗܵܢܵܐ: ܗܸܢ̣ܘܿܢ ܪܚܸܡ̣ܘ ܠܲܡܙܵܥ: ܖܸ̈ܓ̣ܠܲܝܗܘܿܢ ܠܵܐ ܚ̣ܣܲܟ݂ܘ: ܘܡܵܪܝܵܐ ܠܵܐ ܨܵܒܹ̇ܐ ܒܗܘܿܢ: ܡܸܟܹ̇ܝܠ ܢܸܬ̇ܕܲܟܲܪ ܥܵܘ̣ܠܗܘܿܢ ܘܢܸܦܩܘܿܕ݂ ܚܛܵܗܲܝ̈ܗܘܿܢ.

¹¹ ܘܐܸܡܲܪ ܠܝܼ ܡܵܪܝܵܐ: ܠܵܐ ܬܨܲܠܸܐ ܥܲܠ ܥܲܡܵܐ ܗܵܢܵܐ ܠܛܵܒ̣ܬ̣ܵܐ.

¹² ܡܸܛܠ ܕܐܸܢ ܨܵܝܡܝܼܢ ܠܵܐ ܫܵـ̇ܡܲܥ ܐ̄ܢܵܐ ܨܠܘܿܬ̣ܗܘܿܢ. ܘܐܸܢ ܡܲܣܩܝܼܢ ܝܲܩ̈ܕܹܐ ܘܩܘܼܖ̈ܒܵܢܹܐ ܠܵܐ ܨܵܒܹ̇ܐ ܐ̄ܢܵܐ ܒܗܘܿܢ: ܡܸܛܠ ܕܲܒ̣ܚܲܪܒܵܐ ܘܲܒ̣ܟܲܦܢܵܐ ܘܲܒ̣ܡܵܘܬܵܢܵܐ ܐܹܢܵܐ ܡܓܲܡܲܪ ܐ̄ܢܵܐ ܠܗܘܿܢ.

¹³ ܘܐܸܡ̇ܪܹܬ̣ ܒܒ̣ܵܥܘܼ ܡܵܪܝܵܐ ܐܲܠܵܗܵܐ: ܗܵܐ ܢܒ̣̈ܝܹܐ ܗ̄ܘ̣ ܐܵܡ̇ܪܝܼܢ ܠܗܘܿܢ ܕܠܵܐ ܬܸܚܙܘܿܢ ܚܲܪܒܵܐ: ܘܟܲܦܢܵܐ ܠܵܐ ܢܸܗܘܸܐ ܠܟ݂ܘܿܢ: ܐܸܠܵܐ ܫܠܵܡܵܐ ܘܩܘܼܫܬܵܐ ܐܸܬܸ̇ܠ ܠܟ݂ܘܿܢ ܒܐܲܬ̣ܪܵܐ ܗܵܢܵܐ.

¹⁴ ܘܐܸܡܲܪ ܠܝܼ ܡܵܪܝܵܐ: ܒܕܲܓܵܠܘܼܬ̣ܵܐ ܢܒ̣ܝܹ̈ܐ ܡܸܬ̣ܢܲܒܹ̇ܝܢ ܒܫܹܡܝ: ܕܐܸܢܵܐ ܫܲܕܪܹܬ̣ ܐܹܢܘܿܢ: ܘܠܵܐ ܦܲܩ̇ܕܹܬ̣ ܐܸܢܘܿܢ ܘܠܵܐ ܐܸܡ̇ܪܹܬ̣ ܠܗܘܿܢ: ܚܸܙ̈ܘܵܢܹܐ ܕܲܓܵܠܹ̈ܐ: ܘܩܸܨܡܹ̈ܐ: ܘܢܸܚܫܹ̈ܐ. ܘܢܸܟ݂ܠܵܐ ܕܠܸܒܗܘܿܢ ܗܸܢ̣ܘܿܢ ܡܸܬ̣ܢܲܒܹ̇ܝܢ ܠܟ݂ܘܿܢ.

¹⁵ ܡܸܛܠ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܥܲܠ ܢܒ̣ܝܹ̈ܐ ܕܡܸܬ̣ܢܲܒܹ̇ܝܢ ܒܫܹܡܝ: ܕܐܹܢܵܐ ܠܵܐ ܫܲܕܪܹܬ̣ ܐܸܢܘܿܢ: ܘܗܸܢ̣ܘܿܢ ܐܵܡ̇ܪܝܼܢ ܚܲܪܒܵܐ ܘܟܲܦܢܵܐ ܠܵܐ ܢܸܗܘܸܐ ܒܐܲܪܥܵܐ ܗܵܕܹܐ: ܒܚܲܪܒܵܐ ܘܲܒ̣ܟܲܦܢܵܐ ܢܣܘܼܦܘܼܢ ܢܒ̣̈ܝܹܐ ܗܵܢ̇ܘܿܢ.

¹⁶ ܘܥܲܡܵܐ ܕܗܸܢ̣ܘܿܢ ܡܸܬ̣ܢܲܒܹ̇ܝܢ ܠܗܘܿܢ: ܢܸܗܘܘܿܢ ܪܡܹܝܢ ܒܫܘܼܩܹ̈ܝܗ̇ ܕܐܘܿܪܸܫܠܸܡ: ܡ̣ܢ ܩܕ݂ܵܡ ܚܲܪܒܵܐ: ܘܟܲܦܢܵܐ: ܘܡܵܘܬܵܢܵܐ: ܘܠܲܝܬ̇ ܠܗܘܿܢ ܩܵܒ̣ܘܿܪ: ܗܸܢ̣ܘܿܢ ܘܢܸܫܲܝ̈ܗܘܿܢ: ܘܲܒ̣ܢܲܝ̈ܗܘܿܢ: ܘܲܒ̣̈ܢܵܬ̣ܗܘܿܢ: ܘܐܹܫܘܿܕ݂ ܥܠܲܝܗܘܿܢ ܒܝܼܫܘܼܬ̣ܗܘܿܢ.

¹⁷ ܘܐܸܡܲܪ ܠܗܘܿܢ ܦܸܬ̣ܓܵܡܵܐ ܗܵܢܵܐ: ܢܸܫ̄ܚ̈ܠܵܢ ܥܲܝ̈ܢܲܝ ܕܸܡܥܹ̈ܐ ܒܐܝܼܡܵܡܵܐ ܘܲܒ̣ܠܸܠܝܵܐ ܘܠܵܐ ܢܸܫ̈ܬ̇ܩܵܢ: ܡܸܛܠ ܕܲܬ̣ܒ̣ܵܪܵܐ ܪܲܒܵܐ ܐܸܬ̇ܬܲܒ̣ܪܲܬ̤ ܒܬ̣ܘܼܠܬܵܐ ܒܲܪܬ̣ ܥܲܡܝ: ܡܚܘܿܬ̣ܵܐ ܘܟ݂ܵܝ̇ܒܵܐ ܛܵܒ̣.

¹⁸ ܐܸܢ ܢܸܦܩܹ̇ܬ̣ ܠܡܲܕܲܒܪܵܐ ܗܵܐ ܩܛܝܼܠܲܝ̈ ܚܲܪܒܵܐ: ܘܐܸܢ ܥܸܠܹ̇ܬ̣ ܠܲܩܪܝܼܬ̣ܵܐ: ܗܵܐ ܡܛܲܖ̈ܦܲܝ ܟܲܦܢܵܐ: ܡܸܛܠ ܕܐܵܦ ܢܒ̣̈ܝܹܐ ܘܐܵܦ ܟܲܗ̈ܢܹܐ: ܚܕܲܪܘ ܒܐܲܪܥܵܐ ܘܠܵܐ ܝܼܕܲܥ̣ܘ.

¹⁹ ܡܲܣܠܵܝܘܼ ܐܲܣܠܝܼܬ̇ ܠܲܝܗܘܼܕ݂ܵܐ: ܐܵܘ ܒܨܸܗܝܘܿܢ ܓܸܥܨܲܬ̤ ܢܲܦ̮ܫܵܟ݂: ܡܸܛܠ ܡܵܢܵܐ ܡܚܲܝܬܵܢ ܘܠܲܝܬ̇ ܠܲܢ ܐܵܣܝܘܼܬ̣ܵܐ: ܣܲܟ̇ܝܼܢ ܠܲܫܠܵܡܵܐ ܘܠܲܝܬ̇ ܛܵܒ̣ܬ̣ܵܐ: ܘܲܠܙܲܒ̣ܢܵܐ ܕܐܵܣܝܘܼܬ̣ܵܐ ܘܗܵܐ ܕܸܚܠ̱ܬ̣ܵܐ.

²⁰ ܝܵܕ݂ܥ̇ܝܼܢܲܢ ܡܵܪܝܵܐ ܚܛܵܗܲܝ̈ܢ: ܘܲܚܛܵܗܹ̈ܐ ܕܐܲܒ̣ܵܗܲܝ̈ܢ: ܡܸܛܠ ܕܲܚ̣ܛܲܝܢ ܠܵܟ݂.

²¹ ܠܵܐ ܬܸܪܓܲܙ ܡܸܛܠ ܫܡܵܟ݂: ܘܠܵܐ ܬܨܲܥܲܪ ܟܘܼܪܣܝܵܐ ܕܐܝܼܩܵܪܵܟ݂: ܐܸܬ̇ܕܲܟ݂ܪ ܘܠܵܐ ܬܒܲܛܹܠ ܩܝܵܡܵܟ݂ ܕܥܲܡܲܢ.

²² ܠܵܐ ܓܹܝܪ ܡܸܫ̈ܟܚܵܢ ܕܸܚ̈ܠܵܬ̣ܵܐ ܕܥܲܡܡܸ̈ܐ ܕܢܲܚ̈ܬ̣ܵܢ ܡܸܛܪܵܐ: ܐܵܦܠܵܐ ܫܡܲܝܵܐ ܕܢܸܬ̇ܠܘܼܢ ܖ̈ܣܝܼܣܹܐ: ܐܸܠܵܐ ܐܲܢ̄ܬ̇ ܗ̄ܘ̣ ܡܵܪܝܵܐ ܐܲܠܵܗܲܢ ܘܲܢܣܲܟܸ̇ܐ ܠܵܟ݂. ܕܐܲܢ̄ܬ̇ ܥܵܒܹܕ݂ ܐܲܢ̄ܬ̇ ܗܵܠܹܝܢ ܟܠܗܹܝܢ.

15

¹ ܘܐܸܡܲܪ ܠܝܼ ܡܵܪܝܵܐ: ܐܸܢ ܢܩܘܼܡ ܡܘܼܫܹܐ ܘܲܫܡܘܼܐܹܝܠ ܩܕ݂ܵܡܲܝ: ܠܵܐ ܨܵܒ̣ܝܵܐ ܢܲܦ̮ܫܝ ܒܥܲܡܵܐ ܗܵܢܵܐ: ܐܲܦܸܩ ܐܸܢܘܿܢ ܡ̣ܢ ܩܕ݂ܵܡ ܐܲܦܲܝ̈ ܘܢܸܦܩܘܼܢ.

² ܘܐܸܢ ܢܸܡܪܘܼܢ ܠܵܟ݂ ܠܐܲܝܟܵܐ ܢܸܦܘܿܩ: ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲ݁ܪ ܡܵܪܝܵܐ: ܕܲܠܡܵܘܬܵܐ ܠܡܵܘܬܵܐ: ܘܕܲܠܚܲܪܒܵܐ ܠܚܲܪܒܵܐ: ܘܕܲܠܟܲܦܢܵܐ ܠܟܲܦܢܵܐ: ܘܕܲܠܫܸܒ̣ܝܵܐ ܠܫܸܒ̣ܝܵܐ.

³ ܘܐܸܦܩܘܿܕ݂ ܥܠܲܝܗܘܿܢ ܐܲܪܒܲܥ ܡܲܚ̈ܘܵܢ ܐܵܡܲ݁ܪ ܡܵܪܝܵܐ: ܚܲܪܒܵܐ ܠܡܸܩܛܲܠ: ܘܟܲܠܒܹ̈ܐ ܠܡܸܓܲܪ: ܘܦܵܪܲܚܬ̣ܵܐ ܕܲܫܡܲܝܵܐ: ܘܚܝ̄ܘܼܬ̣ܵܐ ܕܐܲܪܥܵܐ ܠܡܹܐܟܲܠ ܘܠܲܡܚܲܒܵܠܘܼ.

⁴ ܘܐܸܬܸ̇ܠ ܐܸܢܘܿܢ ܠܙܵܘܸܥܬ̣ܵܐ ܒܲܝܢܵܬ̣ ܟܠܗܹܝܢ ܡܲܠ̈ܟܘܵܬ̣ܵܐ ܕܐܲܪܥܵܐ: ܡܸܛܠ ܚܲܘ̈ܒܵܘܗܝ ܕܲܡܢܲܫܹܐ ܒܲܪ ܚܹܙܲܩܝܵܐ ܡܲܠܟܵܐ ܕܲܝܗܘܼܕ݂: ܥܲܠ ܟܠ ܡܸܕܸܡ ܕܲܥ̣ܒܲܕ݂ ܒܐܘܿܪܸܫܠܸܡ.

⁵ ܡܲܢܘܼ ܢܚܘܼܣ ܥܠܲܝܟ̇ܝ ܐܘܿܪܸܫܠܸܡ: ܘܲܠܡܲܢ ܬܸܟ݂ܪܸܐ ܥܠܲܝܟ̇ܝ: ܘܡܲܢـ̣ܘܼ ܢܸܣܛܹܐ ܠܡܸܫܐܲܠ ܒܲܫܠܵܡܹܟ݂ܝ.

⁶ ܐܲܢ̄ܬ̇ܝ ܫ̣ܒܲܩܬ̇ܝܼܢܝ ܐܵܡܲ݁ܪ ܡܵܪܝܵܐ: ܘܲܠܒܸܣܬ̇ܪܹܟ݂ܝ ܐܹܙܲܠ̣ܬ̇ܝ: ܘܐܲܪܝܼܡ ܐܝܼܕ݂ ܥܠܲܝܟ̇ܝ ܘܐܹܚܲܒ̇ܠܹܟ݂ܝ: ܘܬ̣ܘܼܒ̣ ܠܵܐ ܐܸܫܒ̇ܘܿܩ ܠܗܘܿܢ.

⁷ ܘܐܸܕ݂ܪܸܐ ܐܸܢܘܿܢ ܒܡܲܕ݂ܪ̱ܝܵܐ ܒܩܘܼܖ̈ܝܵܗ̇ ܕܐܲܪܥܵܐ: ܓܲܙܝܼـ̇ܬ̣ ܘܐܵܘܒ̇ܕܹܬ̣ ܥܲܡܝ: ܡ̣ܢ ܐܘܼܖ̈ܚܵܬ̣ܗܘܿܢ ܠܵܐ ܬܵܒ̣ܘ.

⁸ ܣܓ̣ܝܼ̈ ܐܲܖ̈ܡܠܵܬ̣ܗܘܿܢ ܡ̣ܢ ܚܵܠܵܐ ܕܝܲܡܵܐ: ܐܲܝܬ̇ܝܹ̇ܬ̣ ܥܠܲܝܗܘܿܢ ܥܲܠ ܐܸܡܵܐ ܘܥܲܠ ܥܠܲܝܡܹ̈ܐ ܒܵܙܘܿܙܹ̈ܐ ܒܛܲܗܪܵܐ: ܐܲܪܡ̇ܝܼܬ̣ ܥܠܲܝܗܘܿܢ ܡ̣ܢ ܫܸܠܝܵܐ ܕܠܘܼܚܝܵܐ ܘܲܪܬܲܝܬܵܐ̣.

⁹ ܐܲܠܲܬ̤ ܝܵܠܕܲܬ̣ ܫܲܘܥܵܐ: ܢܸܦܚܲܬ̤ ܟܲܪܣܵܗ̇: ܥܸܪܒܲܬ̤ ܫܸܡܫܵܗ̇ ܒܦܸܠܓ̇ܘܼܬ̣ ܝܵܘ̈ܡܹܝܗ̇: ܒܸܗܬܲܬ̤ ܘܐܲܚܦܪܲܬ̤: ܘܫܲܪܟ̇ܗܘܿܢ ܠܚܲܪܒܵܐ ܐܲܫܠܸܡ ܩܕ݂ܵܡ ܒܥܸܠܕܒ̣ܵܒܲܝ̈ܗܘܿܢ ܐܵܡܲ݁ܪ ܡܵܪܝܵܐ.

¹⁰ ܘܵܝ ܠܝܼ ܐܹܡܝ ܕܝܼܠܸܕܬ̇ܝܼܢܝ: ܓܒܲܪ ܕܲܝܵܢ: ܘܲܓ̣ܒܲܪ ܡܲܟ̇ܣܵܢ ܒܟ݂ܠܵܗ̇ ܐܲܪܥܵܐ: ܠܵܐ ܚܲܝܵܒ̣ ܐ̄ܢܵܐ ܘܠܵܐ ܚܲܝܵܒ̣ܝܼܢ ܠܝܼ: ܘܟ݂ܠܗܘܿܢ ܡܨܲܚܹܝܢ ܠܝܼ.

¹¹ ܐܵܡܲ݁ܪ ܡܵܪܝܵܐ ܠܵܐ ܐܹܫܒ̇ܩܵܟ݂ ܒܛܵܒ̣ܬ̣ܵܐ: ܐܸܠܵܐ ܐܲܦܓܲܥ ܒܵܟ݂ ܒܥܸܠܕ̇ܒ̣ܵܒ̣ܵܐ ܡ̣ܢ ܓܲܪܒܝܵܐ: ܒܙܲܒ̣ܢܵܐ ܕܐܘܼܠܨܵܢܵܐ: ܒܙܲܒ̣ܢܵܐ ܕܒ̣ܝܼܫܬܵܐ.

¹² ܕܲܩܫܸܐ ܐܲܝܟ݂ ܦܲܪܙܠܵܐ ܘܐܲܝܟ݂ ܢܚܵܫܵܐ:

¹³ ܢܸܟ݂ܣܲܝ̈ܟ ܘܓܲܙܲܝ̈ܟ ܘܟ݂ܠܹܗ ܬܚܘܼܡܵܟ݂: ܠܒܹܙܬ̣ܵܐ ܐܸܬܸ̇ܠ ܡܸܛܠ ܚܛܵܗܲܝ̈ܟ.

¹⁴ ܘܐܹܫܲܥܒ̇ܕ݂ܵܟ݂ ܠܲܒ̣ܥܸܠܕ̇ܒ̣ܵܒܲܝ̈ܟ ܒܐܲܪܥܵܐ ܕܠܵܐ ܝܵܕܲܥ̇ ܐܲܢ̄ܬ̇: ܡܸܛܠ ܕܢܘܼܪܵܐ ܩܸܕ݂ܚܲܬ̤ ܒܪܘܼܓ̣ܙܝ ܥܠܲܝܟ̇ܘܿܢ ܘܬܹܐܩܲܕ݂.

¹⁵ ܐܲܢ̄ܬ̇ܝ ܡܵܪܝܵܐ ܝܵܕܲܥ̇ ܐܲܢ̄ܬ̇: ܐܸܕܲܟ݂ܪܲܝܢܝ ܘܲܦܪܘܿܩܲܝܢܝ: ܘܐܹܬ̣ܢܲܩܲܡ ܠܝܪ ܡ̣ܢ ܖ̈ܵܕ݂ܘܿܦܲܝ: ܠܵܐ ܒܢܲܓ̇ܝܼܪܘܼܬ̣ ܪܘܼܚܵܟ݂ ܬܕܲܒ̇ܪܲܢܝ. ܕܲܥ ܕܩܲܒܠܹܬ̣ ܥܲܠ ܐܲܦܲܝ̈ܟ ܚܸܣܕܵܐ.

¹⁶ ܘܢܸـ̇ܛܪܹܬ̣ ܦܘܼܩ̈ܕܵܢܲܝܟ ܘܥܸـ̇ܒ̣ܕܹܬ̣ ܐܸܢܘܿܢ: ܘܲܗܘ̤ܵܐ ܠܝܼ ܦܸܬ̣ܓ̣ܵܡܵܟ݂ ܠܒ̣ܘܼܣܵܡܵܐ ܘܲܠܚܲܕ݂ܘܼܬܹܗ ܕܠܹܒ̇ܝ: ܡܸܛܠ ܕܐܸܬ̣ܩܪܝܼ ܫܡܵܟ݂ ܥܠܲܝ.

¹⁷ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܠܵܐ ܝܸܬ̣ܒܹ݁ܬ̣ ܒܲܟ݂ܢܘܼܫܬܵܐ ܕܲܡܒܲܙܚܵܢܹ̈ܐ: ܐܸܠܵܐ ܕܸܚـ̇ܠܹܬ̣ ܡ̣ܢ ܩܕ݂ܵܡ ܐܝܼܕ݂ܵܟ݂ ܘܒܲܠܚܘܿܕܲܝ ܝܸܬ̣ܒܹ݁ܬ̣: ܡܸܛܠ ܕܪܘܼܓ̣ܙܵܐ ܡܠܲܝܬܵܢܝ.

¹⁸ ܠܡܵܢܵܐ ܗ̤ܘܵܐ ܟܹܐܒ̣ܝ ܥܲܫܝܼܢ: ܘܲܡܚܘܿܬ̣ܝ ܚܲܣܝܼܢܵܐ ܘܠܵܐ ܨܵܒ̣݁ܝܵܐ ܠܡܸܬ̣ܐܲܣܵܝܘܼ: ܘܲܗܘܹ̇ܝܬ̣ ܠܝܼ ܐܲܝܟ݂ ܡܲـ̈ܝܵܐ ܟܲܕܵܒܹ̈ܐ ܕܠܵܐ ܡܸܬ̣ܗܲܝܡܢܝܼܢ.

¹⁹ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܐܸܢ ܬܬ̣ܘܼܒ̣ ܐܲܦܢܹܝܟ݂ ܘܲܩܕ݂ܵܡܲܝ ܬܩܘܼܡ. ܘܐܸܢ ܬܲܦܸܩ ܝܲܩܝܪܵܐ ܡ̣ܢ ܙܲܠܝܼܠܵܐ: ܐܲܝܟ݂ ܦܘܼܡܝ ܬܸܗܘܸܐ ܐܵܡܲ݁ܪ ܡܵܪܝܵܐ: ܘܢܸܬ̣ܦ̄ܢܘܿܢ ܗܸܢܘܿܢ ܠܘܵܬ̣ܵܟ݂: ܘܐܲܢ̄ܬ̇ ܠܵܐ ܬܸܬ̣ܦ̄ܢܸܐ ܠܘܵܬ̣ܗܘܿܢ.

²⁰ ܝܲܗ̄ܒܹ̇ܬܵܟ݂ ܠܥܲܡܵܐ ܗܵܢܵܐ: ܐܲܝܟ݂ ܫܘܼܪܵܐ ܥܲܫܝܼܢܵܐ ܕܲܢܚܵܫܵܐ: ܘܢܸܬ̣ܟܲܬܫܘܼܢ ܥܲܡܵܟ݂ ܘܠܵܐ ܢܸܙܟ̇ܘܼܢܵܟ݂: ܡܸܛܠ ܕܥܲܡܵܟ݂ ܐ̄ܢܵܐ: ܠܡܸܦ̱ܪܩܵܟ݂ ܘܠܲܡܦܲܨܵܝܘܼܬ̣ܵܟ݂ ܐܵܡܲ݁ܪ ܡܵܪܝܵܐ.

²¹ ܘܐܹܦܲܨܹܝܟ݂ ܡ̣ܢ ܐܝܼܕ݂ܵܐ ܕܒ̣ܝܼ̈ܫܹܐ: ܘܐܸܦܸܪܩܵܟ݂ ܡ̣ܢ ܐܝܼܕ݂ܵܐ ܕܥܲܫܝܼ̈ܢܹܐ.

16

¹ ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

² ܠܵܐ ܬܸܣܲܒ̣ ܠܵܟ݂ ܐܲܢ̄ܬ̇ܬ̣ܵܐ: ܘܠܵܐ ܢܸܗܘܘܿܢ ܠܵܟ݂ ܒܢܲܝ̈ܵܐ ܘܒ̣̈ܢܵܬ̣ܵܐ ܒܐܲܬ̣ܪܵܐ ܗܵܢܵܐ.

³ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ: ܥܲܠ ܒܢܲـ̈ܝܵܐ ܘܥܲܠ ܒ̈ܢܵܬ̣ܵܐ ܕܡܸܬ̣ܝܲܠܕ̇ܝܼܢ ܒܐܲܬ̣ܪܵܐ ܗܵܢܵܐ: ܘܥܲܠ ܐܸܡ̈ܗܵܬ̣ܗܘܿܢ ܕܝܵܠ̈ܕܵܢ ܠܗܘܿܢ: ܘܥܲܠ ܐܲܒ̣ܵܗܝ̈ܗܘܿܢ ܕܡܵܘܠܕ݂ܝ̣ܢ ܠܗܘܿܢ ܒܐܲܬ̣ܪܵܐ ܗܵܢܵܐ.

⁴ ܡܵܘܬܵܐ ܕܲܡܛܲܖ̈ܦܲܝ ܟܲܦܢܵܐ ܢܡܘܼܬ̣ܘܼܢ: ܘܠܵܐ ܢܲܪܩ̄ܕܘܼܢ ܥܠܲܝܗܘܿܢ: ܘܠܵܐ ܢܸܬ̣ܩܲܒ̣ܪܘܼܢ: ܐܸܠܵܐ ܐܲܝܟ݂ ܙܸܒ̣ܠܵܐ ܥܲܠ ܐܲܦܲܝܗ ܐܲܪܥܵܐ ܢܸܗܘܘܿܢ: ܘܲܒ̣ܚܲܪܒܵܐ ܘܲܒ̣ܟܲܦܢܵܐ ܢܣܘܼܦܘܼܢ: ܘܢܸܗܘ̈ܝܵܢ ܫܠܲܕܲܝ̈ܗܘܿܢ ܡܹܐܟ݂ܘܼܠܬܵܐ ܠܦܵܪܲܚܬ̣ܵܐ ܕܲܫܡܲܝܵܐ: ܘܲܠܚܲܝ̄ܘܬ̣ܵܐ ܕܐܲܪܥܵܐ.

⁵ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ: ܠܵܐ ܬܹܐܙܲܠ ܠܒܹܝܬ̣ ܡܲܪܩܘܼܕ̇ܬܵܐ: ܘܠܵܐ ܬܹܐܙܲܠ ܠܡܲܪܩܵܕ݂ܘܼ: ܘܠܵܐ ܬܢܘܼܕ݂ ܥܠܲܝܗܘܿܢ: ܡܸܛܠ ܕܐܲܪܥ̇ܒ̇ܪܹܬ̣ ܫܠܵܡܝ ܡ̣ܢ ܥܲܡܵܐ ܗܵܢܵܐ ܐܵܡܲ݁ܪ ܡܵܪܝܵܐ: ܘܛܲܝܒܘܼܬ̣ܵܐ ܘܖ̈ܲܚܡܹܐ.

⁶ ܘܲܢܡܘܼܬ̣ܘܼܢ ܪܵܘܖ̈ܒܹܐ ܘܕܲܩ̈ܕܩܹܐ ܒܐܲܪܥܵܐ ܗܵܕܹܐ: ܠܵܐ ܢܸܬ̣ܩܲܒ̣ܪܘܼܢ: ܘܠܵܐ ܢܲܪܩ̄ܕ݂ܘܼܢ ܥܠܲܝܗܘܿܢ: ܘܠܵܐ ܢܲܝܠܠܘܼܢ: ܘܠܵܐ ܢܸܩܕ̇ܚܘܼܢ ܥܠܲܝܗܘܿܢ.

⁷ ܘܠܵܐ ܢܸܩܨܘܼܢ ܥܠܲܝܗܘܿܢ ܒܐܸܒ̣ܠܵܐ: ܕܢܸܬ̣ܒܲܝܐܘܼܢ ܥܲܠ ܡܝܼܬ̣ܵܐ: ܘܠܵܐ ܢܲܫܩܘܿܢ ܐܸܢܘܿܢ ܟܵܣܵܐ ܕܒ̣ܘܼܝܵܐܵܐ: ܥܲܠ ܐܲܒ̣ܵܗܲܝ̈ܗܘܿܢ ܘܥܲܠ ܐܸܡ̈ܗܵܬ̣ܗܘܿܢ.

⁸ ܘܲܠܒܹܝܬ̣ ܡܲܫܬ̇ܝܵܐ ܠܵܐ ܬܸܥܘܿܠ: ܠܡܸܬܲܒ̣ ܥܲܡܗܘܿܢ ܠܡܸܠܥܲܣ ܘܲܠܡܸܫܬܵܐ.

⁹ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܗܵܢܵܐ ܡܒܲܛܸܠ ܐ̄ܢܵܐ ܡ̣ܢܬ ܐܲܬ̣ܪܵܐ ܗܵܢܵܐ ܠܥܹܢܲܝܟ̇ܘܿܢ ܘܲܒ̣ܝܵܘ̈ܡܵܬ̣ܟ݂ܘܿܢ: ܩܵܠܵܐ ܕܲܕ݂ܝܵܨܵܐ ܘܩܵܠܵܐ ܕܚܲܕ݂ܘܼܬ̣ܵܐ: ܩܵܠܵܐ ܕܚܲܬ̣ܢܵܐ: ܘܩܵܠܵܐ ܕܟܲܠܬ̣ܵܐ.

¹⁰ ܘܐܸܢ ܬܚܵܘܸܐ ܠܥܲܡܵܐ ܗܵܢܵܐ ܗܵܠܹܝܢ ܟܠܗܘܿܢ ܦܸܬ̣ܓ̣ܵܡܹ̈ܐ: ܢܹܐܡܪܘܼܢ ܠܵܟ݂: ܡܸܛܠ ܡܵܢܵܐ ܐܸܡܲܪ ܡܵܪܝܵܐ ܥܠܲܝܢ ܟܠܵܗ̇ ܒܝܼܫܬܵܐ ܗܵܕܹܐ ܪܲܒܬ̣ܵܐ: ܡܵܢܵܐ ܚܵـ̣ܒ̣̄ܢ: ܘܡܵܢܲܐ ܗ̄ܝ̣ ܚܛܝܼܬܲܢ ܕܲܚ̣ܛܲܝܢ ܠܡܵܪܝܵܐ ܐܲܠܵܗܲܢ.

¹¹ ܐܸܡܲܪ ܠܗܘܿܢ: ܥܲܠ ܕܫܲܒ̣ܩ̣ܘܼܢܝ ܐܲܒ̣ܵܗܲܝ̈ܟ̇ܘܿܢ ܐܵܡܲ݁ܪ ܡܵܪܝܵܐ: ܘܐܸܙܲܠ̣ܘ ܒܵܬܲܪ ܐܲܠܵܗܹ̈ܐ ܐ̄ܚܖ̈ܵܢܹܐ: ܘܲܦܠܲܚ̣ܘ ܐܸܢܘܿܢ ܘܲܣܓܸܕ݂ܘ ܠܗܘܿܢ: ܘܠܝܼ ܫܒܲــ̣ܩܘ ܘܢܵܡܘܿܣܝ ܠܵܐ ܢܛܲܪܘ.

¹² ܘܐܲܢ̄ܬ̇ܘܿܢ ܐܲܒ̣ܐܹܫـ̣ܬ̇ܘܿܢ ܠܡܸܥܒܲܕ݂ ܝܲܬ̇ܝܼܪ ܡ̣ܢ ܐܲܒ̣ܵܗܲܝ̈ܟ̇ܘܿܢ: ܘܗܵܐ ܐܵܙ̄ܠܝܼܢ ܐܲܢ̄ܬ̇ܘܿܢ ܓܒܲܪ ܒܵܬܲܪ ܨܸܒ̣ܝܵܢܲܝ̈ ܠܸܒܹܗ ܒܝܼܫܵܐ ܕܠܵܐ ܬܸܫ̱ܡܥܘܼܢܵܢܝ.

¹³ ܘܐܸܫܕܹܝܟ݂ܘܿܢ ܡ̣ܢ ܐܲܪܥܵܐ ܗܵܕܹܐ: ܠܐܲܪܥܵܐ ܕܠܵܐ ܝܼܕܲܥ̣ܬ̇ܘܿܢ ܐܲܢ̄ܬ̇ܘܿܢ ܘܐܲܒ̣ܵܗܲܝ̈ܟ̇ܘܿܢ: ܘܬܸܦ̱ܠܚܘܼܢ ܬܲܡܵܢ ܠܐܲܠܵܗܹ̈ܐ ܐ̄ܚܖ̈ܵܢܹܐ ܒܐܝܼܡܵܡܵܐ ܘܲܒ̣ܠܸܠܝܵܐ: ܘܠܵܐ ܐܸܬܸ̇ܠܟ݂ܘܿܢ ܠܖ̈ܲܚܡܹܐ.

¹⁴ ܡܸܛܠ ܗܵܢܵܐ ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܐܵܡܲ݁ܪ ܡܵܪܝܵܐ: ܘܠܵܐ ܢܸܬ̣ܐ̱ܡܲܪ ܬܘܼܒ̣ ܚܲܝܘܼ ܡܵܪܝܵܐ ܕܐܲܣܸܩ̣ ܠܲܕ݂ܒܹܝܬ̣ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ.

¹⁵ ܐܸܠܵܐ ܚܲܝ ܗ̄ܘ̣ ܡܵܪܝܵܐ: ܕܢܲܣܸܩ ܘܢܲܝܬܸ̇ܐ ܠܲܕ݂ܒܹܝܬ̣ ܝܼܣܪܵܝܹܠ ܡ̣ܢ ܐܵܪܥܵܐ ܕܓܲܪܒ̇ܝܵܐ: ܡ̣ܢ ܟܠ ܐܲܬܖ̈ܵܘܵܬ̣ܵܐ ܕܕܸܚـ̇ܩܹܬ̣ ܐܸܢܘܿܢ ܠܬܲܡܵܢ: ܘܐܲܗܦܸܟ݂ ܐܸܢܘܿܢ ܠܐܲܪ̱ܥܗܘܿܢ ܕܝܸـ̇ܗ̄ܒܹ̇ܬ̣ ܠܐܲܒ̣ܵܗܲܝ̈ܗܘܿܢ.

¹⁶ ܗܵܐ ܡܫܲܕܪ ܐ̄ܢܵܐ ܠܨܲܝܵܕܹ̈ܐ ܣܲܓ̇ܝܹ̈ܐܐ ܐܵܡܲ݁ܪ ܡܵܪܝܵܐ: ܘܲܢܨܘܼܕ݂ܘܼܢ ܐܸܢܘܿܢ: ܘܒ̣ܵܬܲܪܟܸ̇ܢ ܐܹܫܲܕܲܪ ܠܨܲܝܵܕܹ̈ܐ ܣܲܓ̇ܝܹ̈ܐܐ ܘܲܢܨܘܼܕ݂ܘܼܢ ܐܸܢܘܿܢ: ܡ̣ܢ ܟܠ ܛܘܼܪ ܘܡ̣ܢ ܟܠ ܪܵܡܵܐ: ܘܡ̣ܢ ܢܸܩܥܹ̈ܐ ܕܲܫܩܝܼ̈ܦܹܐ.

¹⁷ ܡܸܛܠ ܕܥܲܝܢܲܝ̈ ܥܲܠ ܟܠܗܹܝܢ ܐܘܼܖ̈ܚܵܬ̣ܗܘܿܢ: ܘܠܵܐ ܛܵـ̇ܫܹܝܢ ܡ̣ܢ ܩܕ݂ܵܡܲܝ: ܘܠܵܐ ܡܸܬ̇ܛܲܫܸܐ ܥܵܘܸܠ̱ܗܘܿܢ ܡ̣ܢ ܩܕ݂ܵܡ ܥܲܝܢܲܝ̈.

¹⁸ ܘܐܸܦܪܘܿܥ ܐܸܢܘܿܢ ܩܲܕ݂ܡܵܝܼܬ̣ ܚܲܕ݂ ܬܪܹܝܢ: ܚܵܘ̈ܒܲܝܗܘܿܢ ܘܲܚܛܵܗܲܝ̈ܗܘܿܢ: ܥܲܠ ܕܛܵܘܸܫܘ ܐܲܪܥܝ ܒܕܸܒ̣ܚܹ̈ܐ ܕܲܦܬܲܟ݂ܪ̈ܲܝܗܘܿܢ: ܘܲܒ̣ܛܲܢܦܘ̣ܬ̣ܗܘܿܢ ܡ̣ܠܵܘ ܝܵܪܬ̇ܘܼܬܲܝ.

¹⁹ ܡܵܪܝܵܐ ܚܲܝܠܝ ܘܲܡܥܲܕܪܢܵܝ: ܘܒܹܝܬ̣ ܓܵܘܣܝ ܒܝܵܘܡܵܐ ܕܐܘܼܠܨܵܢܵܐ: ܠܘܵܬ݂ܵܟ݂ ܥܲܡܡܹ̈ܐ ܢܹܐܬ̣ܘܿܢ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ: ܘܢܹܐܡܪܘܼܢ: ܫܲܪܝܼܪܵܐܝܼܬ̣ ܦܬܲܟ݂ܖܹ̈ܐ ܕܕܲܓܵܠܘܼܬ̣ܵܐ ܕܐܵܘܪܬ̣ܘܼܢ ܐܲܒ̣ܵܗܲܝ̈ܢ ܠܵܐ ܡܸܕܸܡ ܐܸܢܘܿܢ: ܘܠܲܝܬ̇ ܒܗܘܿܢ ܝܘܼܬ̣ܪܵܢ.

²⁰ ܗܵܐ ܒܢܲܝ̈ܢܵܫܵܐ ܥܵܒ̣ܕܲܝܼܢ ܠܗܘܿܢ ܐܲܠܵܗܹ̈ܐ: ܘܗܸܢ̣ܘܿܢ ܠܵܐ ܗܘ̤ܵܘ ܐܲܠܵܗܹ̈ܐ.

²¹ ܡܸܛܠ ܗܵܢܵܐ ܗܵܐ ܡܚܵܘܸܐ ܐ̄ܢܵܐ ܠܗܘܿܢ: ܘܲܒ̣ܙܲܒ̣ܢܵܐ ܗܵܢܵܐ ܐܵܘܕܲܥ ܐܸܢܘܿܢ ܐܝܼܕ݂ܝ ܘܓܲܢ̄ܒܵܪܘܼܬ̣ܝ: ܘܢܸܕܥܘܼܢ ܕܡܵܪܝܵܐ ܫܡܲܢܝ.

17

¹ ܚܛܝܼܬܹܗ ܕܲܝܗܘܼܕ݂ܵܐ ܟܬ̣ܝܼܒ̣ܵܐ ܒܩܲܢܝܵܐ ܕܦܲܪܙܠܵܐ: ܘܲܒ̣ܛܸܦܪܵܐ ܕܫܵܡܝܼܪܵܐ: ܘܲܪܫܝܼܡܵܐ ܥܲܠ ܠܘܼܚܹ̈ܐ ܕܠܸܒܗܘܿܢ: ܘܥܲܠ ܩܲܖ̈ܢܵܬ̣ܵܐ ܕܡܲܕ݂ܒ̇ܚܲܝ̈ܗܘܿܢ.

² ܡܵܐ ܕܡܸܬ̇ܕܲܟ݂ܪܝܼܢ ܒܠܸܒܗܘܿܢ ܡܲܕ݂ܒܚܲܝ̈ܗܘܿܢ ܘܕܸܚ̈ܠܵܬ̣ܗܘܿܢ: ܬܚܹܝܬ̣ ܟܠ ܐܝܼܠܵܢ ܕܥܲܒ̇ܝܼܛ: ܘܥܲܠ ܟܠ ܪܵܡܬ̣ܵܐ ܕܪܵܡܵܐ: ܘܲܒ̣ܛܘܼܖܹ̈ܐ ܘܲܒ̣ܕܲܒ̣ܪܵܐ .

³ ܢܸܟ݂ܣܲܝ̈ܟ ܘܟ݂ܠܗܘܿܢ ܓܲܙܲܝ̈ـܟ: ܘܲܬ̣ܚܘܼܡܲܝ̈ܟ ܠܒܸܙܬ̣ܵܐ ܐܹܬܸ̇ܠ ܡܸܛܠ ܚܛܵܗܲܝ̈ـܟ.

⁴ ܘܐܲܥܒ̇ܪܵܟ݂ ܡ̣ܢ ܝܵܪܬ̇ܘܼܬ̣ܵܐ ܕܝܸـ̇ܗ̄ܒܹ̇ܬ̣ ܠܵܟ݂: ܘܐܹܫܲܥܒܕ݂ܵܟ݂ ܠܲܒ̣ܥܸܠܕܒ̣ܵܒܲܝ̈ـܟ ܒܐܲܪܥܵܐ ܕܠܵܐ ܝܵـ̇ܕܲܥ ܐܲܢ̄ܬ̇: ܡܸܛܠ ܕܢܘܼܪܵܐ ܐܲܩܕܲܚܬܘܿܢ ܒܪܘܼܓ̣ܙܝ: ܥܕܲܡܵܐ ܠܥܵܠܲܡ ܬܹܐܩܲܕ݂.

⁵ ܗܵܟܲܢܵܐ ܐܵܡܲܥܪ ܡܵܪܝܵܐ: ܠܝܼܛ ܗ̄ܘ̣ ܓܲܒ̣ܪܵܐ ܕܢܸܬ̇ܬ̇ܟܸܠ ܥܲܠ ܒܲܪܢܵܫܵܐ: ܘܢܸܥܒܸ̇ܕܪ ܒܲܪ ܒܸܣܪܵܐ ܕܪܵܥܹܗ: ܘܡ̣ܢ ܡܵܪܝܵܐ ܢܸܣܛܹܐ ܠܸܒܹܗ̇.

⁶ ܢܸܗܘܸܐ ܐܲܝܟ݂ ܥܸܩܪܵܐ ܒܲܦܩܲܥܬ̣ܵܐ: ܘܠܵܐ ܢܸܚܙܸܐ ܟܲܕ݂ ܬܹܐܬܸܐ ܛܵܒ̣ܬ̣ܵܐ: ܘܢܸܫܪܸܐ ܒܚܘܼܠܵܢܹ̈ܐ ܒܡܲܕ݂ܒܪܵܐ: ܒܐܲܪܥܵܐ ܡܵܠܲܚܬ̣ܵܐ ܕܠܵܐ ܐܸܬ̣ܝܲܬ̇ܒܲܬ̤.

⁷ ܒܪܝܼܟ݂ ܗ̄ܘ̣ ܓܲܒ̣ܪܵܐ ܕܢܸܬ̇ܬ̇ܟܸܠ ܥܲܠ ܡܵܪܝܵܐ: ܘܢܸܗܘܸܐ ܡܵܪܝܵܐ ܬܘܼܟ݂ܠܵܢܹܗ.

⁸ ܢܸܗܘܸܐ ܐܲܝܟ݂ ܐܝܼܠܵܢܵܐ ܕܲܢܨܝܼܒ̣ ܥܲܠ ܡܲܝ̈ـܵܐ: ܘܥܲܠ ܝܲܒ̣ܠܵܐ ܡܫܲܕܲܪ ܥܸܩܵܖ̈ܵܘܗܝ: ܘܠܵܐ ܢܸܕ݂ܚܲܠ ܟܲܕ݂ ܢܹܐܬܸܐ ܚܘܼܡܵܐ: ܘܢܸܗܘܘܿܢ ܛܲܖ̈ܦܵܘܗܝ ܪܵܘ̇ܙܝܼܢ: ܘܲܒ̣ܫܲܢ̄ܬܵܐ ܕܲܒ̣ܨܝܼܪ ܒܵܗ ܡܸܛܪܵܐ ܠܵܐ ܢܸܕܚܲܠ: ܘܠܵܐ ܢܸܬ̣ܒܲܨܲܪ ܡ̣ܢ ܕܲܠܡܸܥܒܲܕ݂ ܦܹܐܖܹ̈ܐ.

⁹ ܥܲܫܝܼܢ ܠܸܒܵܐ ܡ̣ܢ ܟܠ ܐ̄ܢܵܫܵܐ ܗ̄ܘ̣: ܡܲܢܘܼ ܝܵـ̇ܕܲܥ ܠܹܗ.

¹⁰ ܐܸܢܵܐ ܡܵܪܝܵܐ ܒܵـ̇ܨܹܐ ܠܸܒܵܐ ܘܒ̣ܵܚܲܪ ܟܘܿܠܝ̈ܵܬ̣ܵܐ: ܘܝܵـ̇ܗܹܒ̣ ܠܓܲܒ̣ܪܵܐ ܐܲܝܟ݂ ܐܘܼܖ̈ܚܵܬܹܗ: ܘܐܲܝܟ݂ ܦܹܐܖ̈ܲܝ ܥܒ̣ܵܕ݂ܵܘ̈ܗܝ.

¹¹ ܐܲܝܟ݂ ܚܲܓ̣ܠܵܐ ܕܩܵـ̇ܪܹܐ ܠܐܲܝܝܠܹܝܢ ܕܠܵܐ ܝܼܠܸܕ݂: ܗܵܟܲܢܵܐ ܡܲܢ ܕܩܵـ̇ܢܹܐ ܥܘܼܬ̣ܪܵܐ ܕܠܵܐ ܒܕ݂ܝܼܢܵܐ: ܒܦܸܠܓ̇ܘܼܬ̣ ܝܵܘ̈ܡܵܘܗܝ ܢܸܫܒ̇ܩܝܼܘܗܝ: ܘܚܲܪܬܹܗ ܬܸܗܘܸܐ ܡܨܲܥܪܵܐ.

¹² ܟܘܼܪܣܝܵܐ ܕܐܝܼܩܵܪܵܐ ܐܸܬ̇ܬ̇ܪܝܼܡ ܡ̣ܢ ܠܘܼܩܕܲܡ܆ܡ̣ܢ ܐܲܬ̣ܪܵܐ ܕܡܲܩܕ̇ܫܲܢ.

¹³ ܣܲܒ̣ܪܹܗ ܕܝܼܣܪܵܝܹܠ ܡܵܪܝܵܐ ܗ̄ܘ̣: ܟܠ ܕܫܒ̣ܩ̣ܘܼܟ݂ ܢܸܒ̣ܗ̱ܬ̣ܗܘܼܢ: ܘܡܵܖ̈ܘܿܕܹܐ ܒܐܲܪܥܵܐ ܢܸܬ̣ܟܲܬ̣ܒ̇ܘܼܢ: ܡܸܛܠ ܕܲܫܒܲܩ̣ܘ ܠܡܵܪܝܵܐ ܡܲܒܘܼܥܵܐ ܕܡܲܝ̈ܵܐ ܚܲܝܹ̈ܐ.

¹⁴ ܐܲܣܵܢܝ ܡܵܪܝܵܐ ܘܐܸܬ̣ܐܲܣܸܐ: ܦܪܘܿܩܲܝܢܝ ܘܐܸܬ̣ܦܪܸܩ: ܡܸܛܠ ܕܬܸܫܒܘܿܚܬ̇ܝ ܐܲܢ̄ܬ̇ ܗ̄ܘ̣.

¹⁵ ܗܵܐ ܗܸܢ̣ܘܿܢ ܐܵܡܪܝܼܢ ܠܝܼ: ܐܲܝܟܵܘ ܦܸܬ̣ܓ̣ܵܡܹܗ ܕܡܵܪܝܵܐ: ܢܹܐܬܸܐ ܗܵܫܵܐ.

¹⁶ ܘܐܸܢܵܐ ܒܒ̣ܝܼܫܬܵܐ ܠܵܐ ܦܵܫܹ̇ܬ̣ ܡܸܢܵܟ݂: ܐܲܢ̄ܬ̇ ܝܵܕܲܥ̇ ܐܲܢ̄ܬ̇ ܕܝܵܘܡܹܗ . ܕܒܲܪܢܵܫܵܐ ܠܵܐ ܪܸܓܹ̇ـ̇ܬ̣: ܘܡܸܕܸ̇ܡ ܕܲܢܦܲܩ̣ ܡ̣ܢ ܣܸܦ̈ܘܵܬ̣ܝ ܩܕ݂ܵܡ ܐܲܦܲܝ̈ܟ ܗ̄ܘ̣ܵܐ.

¹⁷ ܠܵܐ ܬܸܗܘܸܐ ܠܝܼ ܠܲܬ̣ܒ̣ܵܪܵܐ: ܐܸܠܵܐ ܐܲܓܸ̇ܢ ܥܠܲܝ ܒܝܵܘܡܵܐ ܒܝܼܫܵܐ.

¹⁸ ܢܸܒ̣ܗ̱ܬ̣ܗܘܿܢ ܖ̈ܵܕ݂ܘܦܲܝ ܘܠܵܐ ܐܸܒ̣ܗܲܬ̣ ܐܸܢܵܐ: ܢܸܬ̇ܬ̇ܒ̣ܪܘܼܢ ܗܸܢ̣ܘܿܢ ܘܠܵܐ ܐܸܬ̇ܬ̇ܒܲܪ ܐܸܢܵܐ: ܐܲܝܬܵܐ ܥܠܲܝܗܘܿܢ ܝܵܘܡܵܐ ܕܒ̣ܝܼܫܬܵܐ: ܘܚܲܕ݂ ܬܪܹܝܢ ܬܒ̣ܵܪܵܐ ܬܒܲܪ ܐܸܢܘܿܢ.

¹⁹ ܗܵܟܲܢܵܐ ܐܸܡܲܪ ܠܝܼ ܡܵܪܝܵܐ ܙܸܠ ܩܘܼܡ ܒܬܲܪܥܵܐ ܕܲܒ̣ܢܲܝ̈ ܥܲܡܵܐ: ܕܥܵܐ̇ܠܝܼܢ ܒܹܗ ܡܲܠ̈ܟܹܐ ܕܲܝܗܘܼܕ݂ܵܐ ܘܲܕ݂ܢܵܦ̇ܩܝܼܢ ܒܹܗ: ܘܲܒ̣ܟ݂ܠܗܘܿܢ ܬܲܖ̈ܥܹܝܗ̇ ܕܐܘܿܪܸܫܠܸܡ.

²⁰ ܘܐܸܡܲܪ ܠܗܘܿܢ: ܫܡܲܥ ܦܸܬ̣ܓ̣ܵܡܹܗ ܕܡܵܪܝܵܐ ܡܲܠ̈ܟܹ̇ܗ ܕܲܝܗܘܼܕ݂ܵܐ: ܘܟ݂ܠܹܗ ܒܹܝܬ̣ ܝܼܗܘܼܕ݂ܵܐ: ܘܟ݂ܠܗܘܿܢ ܥܵܡܘܿܖܹ̈ܝܗ̇ ܕܐܘܿܪܸܫܠܸܡ: ܕܥܵܐ̇ܠܹܝܢ ܒܬܲܖ̈ܥܹܐ ܗܵܠܹܝܢ.

²¹ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܐܸܙܕܲܗ̈ܪܘ ܒܢܲܦ̮ܫܟ݂ܘܿܢ: ܘܠܵܐ ܬܸܫܩܠܘܿܢ ܫܩܘܼܠܬܵܐ ܒܝܵܘܡܵܐ ܕܫܲܒ̇ܬ̣ܵܐ: ܘܬܲܥܠܘܼܢ ܒܬܲܖ̈ܥܹܝܗ̇ ܕܐܘܿܪܸܫܠܸܡ.

²² ܘܠܵܐ ܬܲܦܩܘܼܢ ܫܩܘܼܠܬܵܐ ܡ̣ܢ ܒܵܬܲܝ̈ܟ̇ܘܿܢ ܒܝܵܘܡܵܐ ܕܫܲܒ̇ܬ̣ܵܐ: ܘܟ݂ܠ ܥܒ̣ܵـ̇ܕ݂ ܠܵܐ ܬܸܥܒ̇ܕ݂ܘܼܢ: ܘܲܬ̣ܩܲܕܫܘܼܢ ܝܵܘܡܵܐ ܕܫܲܒ̇ܬ̣ܵܐ: ܐܲܝܟ݂ ܕܦܲـ̇ܩܕܹܬ̣ ܠܐܲܒ̣ܵܗܲܝ̈ܟ̇ܘܿܢ.

²³ ܘܠܵܐ ܫܡܲܥ̣ܘ: ܘܠܵܐ ܐܲܪܟܸ̇ܢܘ ܐܸܕ݂ܢܗ̱ܘܿܢ ܠܡܸܫܡܲܥ: ܘܩܲܫܝܼܘ ܩܕ݂ܵܠܗܘܿܢ ܕܠܵܐ ܢܸܫܡܥ̱ܘܼܢ: ܘܠܵܐ ܢܩܲܒ̇ܠܘܼܢ ܡܲܪܕܘܼܬ̣ܵܐ.

²⁴ ܘܐܸܢ ܡܸܫܡܲܥ ܬܸܫܡܥ̱ܘܼܢܵܢܝ ܐܵܡܲ݁ܪ ܡܵܪܝܵܐ: ܕܠܵܐ ܬܲܥܠܘܼܢ ܫܩܘܼܠܬܵܐ ܒܬܲܖ̈ܥܹܝܗ̇ ܕܲܩܪܝܼܬ̣ܵܐ ܗܵܕܹܐ ܒܝܵܘܡܵܐ ܕܫܲܒܬ̣ܵܐ: ܘܲܬ̣ܩܲܕܫܘܼܢ ܝܵܘܡܵܐ ܕܫܲܒܬ̣ܵܐ: ܘܠܵܐ ܬܸܥܒ̇ܕ݂ܘܼܢ ܒܹܗ ܟܠ ܥܒ̣ܵـ̇ܕ݂.

²⁵ ܢܸܥܠܘܼܢ ܒܬܲܖ̈ܥܹܝܗ̇ ܕܲܩܪܝܼܬ̣ܵܐ ܗܵܕܹܐ: ܡܲܠܟܹ̈ܐ ܘܪܵܘܖ̈ܒ̣ܵܢܹܐ ܕܝܵـ̇ܬ̣ܒ̇ܝܼܢ ܥܲܠ ܟܘܼܪܣܝܹܗ ܕܕ݂ܵܘܝܼܕ݂: ܟܲܕ݂ ܪܟ݂ܝܼܒ̣ܝܼܢ ܒܡܲܖ̈ܟ̇ܒ̣ܵܬ̣ܵܐ ܘܲܒ̣ܖ̈ܲܟ݂ܫܹܐ: ܗܸܢـ̣ܘܿܢ ܘܪܵܘܖ̈ܒ̣ܵܢܲܝܗܘܿܢ: ܘܓܲܒ̣ܖܹ̈ܐ ܕܲܝܗܘܼܕ݂ܵܐ: ܘܥܵܡܘܿܖܹܷ̈ܝܗ̇ ܕܐܘܿܪܸܫܠܸܡ: ܘܬܸܬܸ̇ܒ̣ ܩܪܝܼܬ̣ܵܐ ܗܵܕܹܐ ܠܥܵܠܲܡ.

²⁶ ܘܢܹܐܬ̣ܘܿܢ ܡ̣ܢ ܩܘܼܖ̈ܝܵܐ ܕܲܝܗܘܼܕ݂ܵܐ ܡ̣ܢ ܚܕ݂ܵܖ̈ܲܝ ܐܘܿܪܸܫܠܸܡ: ܘܡ̣ܢ ܐܲܪܥܵܐ ܕܒ̣ܢܝܵܡܹܝܢ ܘܡ̣ܢ ܦܩܲܥܬ̣ܵܐ: ܘܡ̣ܢ ܛܘܼܖ̈ܵܐ ܘܡ̣ܢ ܬܲܝܡܢܵܐ: ܕܡܲܝܬܹ̇ܝܢ ܕܸܒ̣ܚܹ̈ܐ ܘܩܘܼܖ̈ܒܵܢܹܐ ܘܲܠܒ̣ܘܿܢ̄ܬܵܐ: ܘܡܲܝܬܹ̇ܝܢ ܬܲܘܕܝܼܬ̣ܵܐ ܠܒܲܝܬܹܗ ܕܡܵܪܝܵܐ.

²⁷ ܘܐܸܢ ܠܵܐ ܬܸܫܡ̱ܥܘܼܢܵܢܝ ܠܲܡܩܲܕܵܫܘܼ ܝܵܘܡܵܐ ܕܫܲܒܬ̣ܵܐ: ܕܠܵܐ ܬܸܫܩܠܘܼܢ ܫܩܘܼܠܬܵܐ ܘܬܸܥܠܘܼܢ ܒܬܲܖ̈ܥܹܷܝܗ̇ ܕܐܘܿܪܸܫܠܸܡ ܒܝܵܘܡܵܐ ܕܫܲܒ̇ܬ̣ܵܐ: ܐܸܫܒ̇ܘܿܩ ܢܘܼܪܵܐ ܒܬܲܖ̈ܥܹܝܗ̇: ܘܬܹܐܟ݂ܘܿܠ ܣܵܚܖ̈ܵܬ̣ܵܗ̇ ܕܐܘܿܪܸܫܠܸܡ ܘܠܵܐ ܬܸܕ݂ܥܲܟ݂.

18

¹ ܦܸܬ̣ܓ̣ܵܡܵܐ ܕܲܗܘ̤ܵܐ ܥܲܠ ܐܹܪܲܡܝܵܐ ܡ̣ܢ ܩܕ݂ܵܡ ܡܵܪܝܵܐ: ܠܡܹܐܡܲܪ.

² ܩܘܼܡ ܚܘܿܬ̣ ܠܒܹܝܬ̣ ܦܲܚܵܪܵܐ: ܘܬܲܡܵܢ ܐܲܫ̱ܡܥܵܟ݂ ܦܸܬ̣ܓ̣ܵܡܲܝ̈.

³ ܘܢܸܚ̇ܬܹ̇ܬ̣ ܠܒܹܝܬ̣ ܦܲܚܵܪܵܐ ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ: ܘܗܵܐ ܗܘ̤ ܥܵܒܹ̇ܕ݂ ܥܒ̣ܵـ̇ܕ݂ܵܐ ܥܲܠ ܣܲܕܵܢܵܐ.

⁴ ܘܐܸܬ̣ܚܲܒܲܠ ܗ̄ܘ̣ܵܐ ܡܵܐܢܵܐ ܕܛܝܼܢܵܐ ܕܥܵܒܹ݁ܕ݂ ܗ̄ܘܵܐ ܒܐܝܼܕܹܗ ܕܦܲܚܵܪܵܐ: ܘܲܗܦܲـ̣ــܟ݂ ܘܥܲܒ̣ܕܹܗ ܡܵܐܢܵܐ ܐ̄ܚܪܹܢܵܐ ܐܲܝܟ݂ ܕܲܨܒ̣ܵܐ.

⁵ ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ: ܠܡܹܐܡܲܪ.

⁶ ܐܲܝܟ݂ ܦܲܚܵܪܵܐ ܗܵܢܵܐ ܠܵܐ ܡܸܫܟܲܚ ܐ̄ܢܵܐ ܕܐܸܥܒܸ̇ܕ݂ ܠܟ݂ܘܿܢ ܒܹܝܬ̣ ܝܼܣܪܵܝܹܠ: ܐܵܡ݁ܲܪ ܡܵܪܝܵܐ: ܗܵܐ ܐܲܝܟ݂ ܛܝܼܢܵܐ ܒܐܝܼܕܲܝ̈ ܦܲܚܵܪܵܐ: ܗܵܟܲܢܵܐ ܐܲܢ̄ܬ̇ܘܿܢ ܒܐܝܼܕܲܝ̈ ܒܹܝܬ̣ ܝܼܣܪܵܝܹܠ.

⁷ ܐܸܢ ܡ̣ܢ ܫܸܠܝܵܐ ܐܹܡܲܪ ܥܲܠ ܥܲܡܵܐ ܘܥܲܠ ܡܲܠܟܘܼܬ̣ܵܐ: ܠܡܸܥܩܲܪ ܘܲܠܡܸܣܬܲܪ: ܘܠܲܡܣܲܚܵܦܘܼ ܘܲܠܡܵܘܒܵܕ݂ܘܼ.

⁸ ܘܲܢܬ̣ܘܼܒ̣ ܥܲܡܵܐ ܗܵܘ̇ ܡ̣ܢ ܒܝܼܫܬܹ̇ܗ: ܐܲܗܦܸܟ݂ ܡܸܢܹܗ ܒܝܼܫܬܵܐ ܕܐܸܬ̣ܚܲܫ̇ܒܹܬ̣ ܠܡܸܥܒܲܕ݂ ܠܹܗ.

⁹ ܘܐܸܢ ܐܹܡܲܪ ܥܲܠ ܥܲܡܵܐ ܘܥܲܠ ܡܲܠܟܘܼܬ̣ܵܐ ܠܡܸܒ̣ܢܵܐ ܘܲܠܡܸܨܲܒ̣.

¹⁰ ܘܢܸܥܒܸ̇ܕ݂ ܕܒ̣ܝܼܫ ܩܕ݂ܵܡܲܝ: ܘܠܵܐ ܢܸܫܡܲܥ ܒܩܵܠܝ: ܐܲܗܦܸܟ݂ ܡܸܢܹܗ ܛܵܒ̣ܬ̣ܵܐ ܕܐܸܡ̇ܪܹܬ̣ ܠܡܲܛܐܵܒ̣ܘܼ ܠܹܗ.

¹¹ ܘܗܵܫܵܐ ܐܸܡܲܪ ܠܓܲܒ̣ܖ̈ܪܹܐ ܕܲܝܗܘܼܕ݂ܵܐ: ܘܲܠܥܵܡܘܿܖܹ̈ܝܗ̇ ܕܐܘܿܪܸܫܠܸܡ: ܗܵܟܲܢܵܐ ܐܵܡ݁ܲܪ ܡܵܪܝܵܐ: ܗܵܐ ܒܵـ̇ܪܹܐ ܐ̄ܢܵܐ ܥܠܲܝܟ̇ܘܿܢ ܒܝܼܫܬܵܐ: ܘܡܸܬ̣ܚܲܫܲܒ̣ ܐ̄ܢܵܐ ܥܠܲܝܟ̇ܘܿܢ ܡܲܚܫܲܒ̣ܬ̣ܵܐ: ܬܘܼܒ̣ܘ ܘܐܸܬ̣ܦܢܵܘ ܓܒܲܪ ܡ̣ܢ ܐܘܼܪܚܹܗ ܒܝܼܫܬܵܐ: ܘܐܲܛܐܸܒ̣ܘ ܐܘܼܖ̈ܚܵܬ̣ܟ݂ܘܿܢ ܘܲܥܒ̣ܵܕܲܝ̈ܟ̇ܘܿܢ.

¹² ܘܐܸܡ̣ܡܲܪܘ ܗܸܢ̣ܘܿܢ ܢܸܬ̣ܚܲܝܲܠ: ܘܒ̣ܵܬܲܪ ܡܲܚ̈ܫܒ̣ܵܬܲܢ ܢܹܐܙܲܠ: ܘܐ̄ܢܵܫ ܨܸܒ̣ܝܵܢܲܝ̈ ܠܸܒܹܗ ܒܝܼܫܵܐ ܢܸܥܒܸ̇ܕ݂.

¹³ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܫܲܐܸܠܘ ܒܹܝܬ̣ ܥܲܡܡܹ̈ܐ ܡܲܢ̣ܘܼ ܥ̣ܒܲܕ݂ ܐܲܝܟ݂ ܗܵܠܹܝܢ: ܫܵܛܝܘܼܬ̣ܵܐ ܪܲܒ̇ܬ̣ܵܐ ܥܸܒ̣ܕܲܬ̤ ܒܬ̣ܘܼܠܬܵܐ ܕܝܼܣܪܵܝܹܠ.

¹⁴ ܐܸܢ ܥܵ̇ـ̇ܢܹܕ݂ ܡ̣ܢ ܛܘܼܪ ܬܕܲܝ̈ܵܐ ܬܲܠܓܵܐ ܘܡ̣ܢ ܠܸܒ̣ܢܲܢ: ܘܐܸܢ ܡܸܬ̣ܟ̇ܠܹܝܢ ܡܲܝ̈ܵܐ ܩܲܪܝܼܖܹ̈ܐ ܢܘܼܟ݂ܖ̈ܵܝܹܐ ܕܪܵܕܹܝܢ.

¹⁵ ܡܸܛܠ ܕܲܛܥ̣ܵܐܘܼܢܝ ܥܲܡܝ: ܘܠܲܣܪܝܼܩܘܼܬܵܐ ܣܵܡ̣ܘ ܒܸܣܡܹ̈ܐ: ܘܐܸܬ̇ܬ̇ܩܸܠܘ ܒܐܘܼܖ̈ܚܵܬ̣ܗܘܿܢ ܒܲܫܒ̣ܝܼ̈ܠܹܐ ܕܥܵܠܲܡ: ܠܡܹܐܙܲܠ ܒܲܫܒ̣ܝܼ̈ܠܹܐ ܒܐܘܼܪܚܵܐ ܕܠܵܐ ܕܪܝܼܫܵܐ.

¹⁶ ܠܡܸܥܒܲܕ݂ ܐܲܪ̱ܥܗܘܿܢ ܠܬܸܡܗܵܐ ܘܲܠܡܲܫܪܘܿܩܝܼܬ̣ܵܐ ܠܥܵܠܲܡ: ܘܟ݂ܠ ܕܢܸܥܒܲܪ ܥܠܹܝܗ̇: ܢܸܬ̣ܡܲܗ ܘܲܢܢܝܼܕ݂ ܒܪܹܫܹܗ.

¹⁷ ܐܲܝܟ݂ ܪܘܼܚܵܐ ܕܫܵܘܒܵܐ: ܐܹܒܲܕܲܪ ܐܸܢܘܿܢ ܩܕܵܡ ܒܥܸܠܕܒ̣ܵܒܹ̈ܐ: ܩܕ݂ܵܠܵܐ ܘܠܵܐ ܐܲܦܹ̈ܐ ܐܹܚܵܘܸܐ ܐܸܢܘܿܢ ܒܝܵܘܡܵܐ ܕܥܵܩܲܬ̣ܗܘܿܢ.

¹⁸ ܘܐܸܡܲܪܘ ܬܵܘ ܢܸܬ̣ܚܲܫܲܒ̣ ܡܲܚܫܲܒ̣ܬ̣ܵܥܲܠ ܐܹܪܲܡܝܵܐ: ܕܠܵܐ ܢܸܐܒܲܕ݂ ܢܵܡܘܿܣܵܐ ܡ̣ܢ ܟܲܗܢܹ̈ܐ: ܘܬܲܪܥܝܼܬ̣ܵܐ ܡ̣ܢ ܚܲܟܝܼܡܹ̈ܐ: ܙܡܸܠܬ̣ܵܐ ܡ̣ܢ ܢܒ̣ܝܹ̈ܐ: ܬܵܘ ܢܸܡܚܹܝܘܗܝ ܒܠܫܵܢܹܗ: ܘܠܵܐ ܢܨܘܼܬ̣ ܟܠܗܘܿܢ ܦܸܬ̣ܓ̣ܵܡܵܘ̈ܗܝ.

¹⁹ ܨܘܼܬܲܝܢܝ ܡܵܪܝܵܐ ܘܲܫܡܲܥ ܩܵܠ ܥܘܼܠܒܵܢܝ.

²⁰ ܐܸܬ̣ܦܪܲܥ ܒܝܼܫܬܵܐ ܚܠܵܦ ܛܵܒ̣ܬ̣ܵܐ: ܕܲܚ݂ܦܲܪܘ ܓܘܼܡܵܨܵܐ ܠܢܲܦ̮ܫܝ: ܐܸܬ̇ܕܲܟ݂ܪ ܕܩܵܡܹ̇ܬ̣ ܩܕ݂ܵܡܲܝܟ ܘܡܲܠܠܹܬ̣ ܥܠܲܝܗܘܿܢ ܛܵܒ̣ܬ̣ܵܐ: ܠܡܲܗܦܵܟ݂ܘ ܚܸܡܬ̣ܵܐ ܡܸܢܗܘܿܢ.

²¹ ܡܸܛܠ ܗܵܢܵܐ ܗܲܒ̣ ܒܢܲܝ̈ܗܘܿܢ ܠܟܲܦܢܵܐ: ܘܐܲܫܠܸܡ ܐܸܢܘܿܢ ܠܐܝܼܕܲܝ̈ ܚܲܪܒܵܐ: ܢܸܗܘ̈ܝܵܢ ܢܸܫܲܝ̈ܗܘܿܢ ܡܓܲܙ̈ܝܵܢ ܘܐܲܖ̈ܡܠܵܢ: ܘܓܲܒ̣ܖ̈ܲܝܗܘܿܢ ܢܸܗܘܘܿܢ ܩܛܝܼܠܲܝ̈ ܡܵܘܬܵܐ: ܘܲܥܠܲܝܡܲܝ̈ܗܘܿܢ ܩܛܝܼܠܲܝ̈ ܚܲܪܒܵܐ ܒܲܩܪܵܒ̣ܵܐ.

²² ܬܸܫܬ̇ܡܲܥ ܝܑܼܠܲܠܬܵܐ ܡ̣ܢ ܒܵܬܲܝ̈ܗܘܿܢ: ܟܲܕ݂ ܬܲܝܬܸ̇ܐ ܥܠܲܝܗܘܿܢ ܓܲܝܣܵܐ ܡ̣ܢ ܫܸܠܝܵܐ: ܡܸܛܠ ܕܲܚܦܲܪ ܓܘܡܵܨܵܐ ܠܢܲܦ̮ܫܝ ܠܡܹܐܚܕܲܢܝ: ܘܦܲܚܹ̈ܐ ܛܡ݂ܲܪܘ ܠܖܸ̈ܓ̣ܠܲܝ.

²³ ܘܐܲܢ̄ܬ̇ ܡܵܪܝܵܐ ܝܵــ̇ܕܲܥ ܐܲܢ̄ܬ̇ ܟܠ ܕܐܸܬ̣ܪܲܥܝܼܘ ܥܠܲܝ ܠܡܵܘܬܵܐ: ܠܵܐ ܬܚܲܣܸܐ ܥܲܠ ܥܵܘ̣ܠ̱ܗܘܿܢ: ܘܲܚܛܵܗܲܝ̈ܗܘܿܢ ܡ̣ܢ ܩܕ݂ܵܡܲܝܟ ܠܵܐ ܬܸܥܛܸܐ: ܢܸܗܘܘܿܢ ܪܡܹܝܢ ܩܕ݂ܵܡܲܝܟ: ܘܒܲܙܒܲܢ ܪܘܼܓ̣ܙܵܟ݂ ܥܒܸܕ݂ ܒܗܘܿܢ.

19

¹ ܗܟܲܢܵܐ ܐܸܡܲ݁ܪ ܠܝܼ ܡܵܪܝܵܐ: ܙܸܠ ܘܲܙܒܸܢ ܒܲܓ̣ܒܘܼܓ̣ܵܐ ܕܦܲܚܵܪܵܐ: ܘܲܕ݂ܒܲܪ ܥܲܡܵܟ݂ ܡ̣ܢ ܣܵܒܹ̈ܐ ܕܥܲܡܵܐ: ܘܡ̣ܢ ܣܵܒܹ̈ܐ ܕܟܲܗ̈ܢܹܐ.

² ܘܦܘܿܩ ܠܢܲܚܠܵܐ ܕܒܲܪܗܵܢܘܿܡ: ܕܲܒ̣ܡܲܥܠܵܢܵܐ ܕܬܲܪܥܵܐ ܕܚܲܕ݂ܣܝܼܬ̣: ܘܐܲܟ݂ܪܸܙ ܬܲܡܵܢ ܦܸܬ̣ܓ̣ܵܡܹܐ ܕܐܹܡܲܪ ܠܵܟ݂.

³ ܘܐܹܡܲܪ: ܫܡܲܥܘ ܦܹܬ̣ܓ̣ܵܡܹܐ ܕܡܲܪܝܵܐ ܡܲܠ̈ܟܹܐ ܕܲܝܗܘܼܕ݂ܵܐ: ܥܵܡܘܿܖܹ̈ܝܗ̇ ܕܐܘܿܪܸܫܠܸܡ: ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܡܲܝܬܸܐ ܐ̄ܢܵܐ ܒܝܼܫܬܵܐ ܥܲܠ ܐܲܬ̣ܪܵܐ ܗܵܢܵܐ: ܕܟ݂ܠ ܕܢܸܫ̱ܡܥܝܼܗ̇ ܢܸܨ̈ܠܵܢ ܐܸܕ݂ܢܵܘܗܝ.

⁴ ܥܲܠ ܕܫܲܒ̣ܩ̣ܘܼܢܝ ܘܛܲܢܦܘܼܗܝ ܠ̣ܐܲܬ̣ܪܵܐ ܗܵܢܵܐ ܘܣ̣ܵܡܘ ܒܹܗ ܒܸܣܡܸ̈ܐ ܠܐܲܠܵܗܹ̈ܐ ܐ̄ܚܖ̈ܵܢܹܐ: ܕܠܵܐ ܝܼܕܲܥܘ ܐܸܢܘܿܢ ܗܸܢܘܿܢ ܘܐܲܒ̣ܵܗܲܝ̈ܗܘܿܢ: ܘܡܲܠ̈ܟܹܐ ܕܲܝܗܘܼܕ݂ܵܐ: ܘܲܡ̣ܠܵܐܘܼܗܝ ܠܐܲܬ̣ܪܵܐ ܗܵܢܵܐ ܕܡܵܐ ܙܲܟܵܝܵܐ.

⁵ ܘܲܒ̣ܢ̣ܵܘ ܥ̈ܠܵܘܵܬ̣ܵܐ ܠܒܲܥܠܵܐ: ܠܡܵܘܩܵܕ݂ܘܼ ܒܢܲܝ̈ܗܘܿܢ ܒܢܘܼܪܵܐ ܝܲܩܕܵܐ ܠܒܲܥܠܵܐ: ܕܠܵܐ ܦܲܩ̇ܕܹܬ̣: ܘܠܵܐ ܐܸܡـ̇ܪܹܬ̣: ܘܠܵܐ ܣܸܠܩܲܬ̣ ܥܲܠ ܠܸܒ̇ܝ.

⁶ ܡܸܛܠ ܗܵܢܵܐ ܗܵܐ ܝܵܘ̈ܡܵܬ̣ܵܐ ܐܵܬܹܝܢ ܐܵܡܲ݁ܪ ܡܵܪܝܵܐ: ܕܠܵܐ ܢܸܬ̣ܩܪܸܐ ܬܘܼܒ̣ ܐܲܬ̣ܪܵܐ ܗܵܢܵܐ ܬܲܦܲܬ̣ ܘܢܲܚܠܵܐ ܕܒܲܪܗܵܢܘܿܡ: ܐܸܠܵܐ ܐܸܢ ܢܲܚܠܵܐ ܕܲܩܛܝܼ̈ܠܹܐ.

⁷ ܘܐܹܒܲܛܸܠ ܬܲܪܥܝܼܬ̣ܵܐ ܕܲܝܗܘܼܕ݂ܵܐ ܘܕ݂ܐܘܿܪܸܫܠܸܡ ܒܐܲܬ̣ܪܵܐ ܗܵܢܵܐ: ܘܐܲܪܡܸܐ ܐܸܢܘܿܢ ܒܚܲܪܒܵܐ ܩܕ݂ܵܡ ܒܥܸܠܕܒ̣ܵܒܲܝ̈ܗܘܿܢ: ܘܒ̣ܐܝܼܕ݂ܵܐ ܕܐܲܝܠܹܝܢ ܕܒ̣ܵــ̇ܥܹܝܢ ܢܲܦ̮ܫܗܘܿܢ: ܘܐܸܬܸ̇ܠ ܫܠܲܕܲܝ̈ܗܘܿܢ ܡܹܐܟ݂ܘܼܠܬܵܐ ܠܦܵܪܲܚܬ̣ܵܐ ܕܲܫܡܲܝܵܐ: ܘܲܠܚܲܝܘܼܬܵܐ ܕܐܲܪܥܵܐ.

⁸ ܘܐܸܥܒܕ݂ܝܼܗ̇ ܠܲܩܪܝܼܬ̣ܵܐ ܗܵܕܹܐ ܠܬܸܡܗܵܐ ܘܲܠܡܲܫܪܘܿܩܝܼܬ̣ܵܐ: ܘܟ݂ܠ ܡܲܢ ܕܢܸܥܒܲܪ ܥܠܹܝܗ̇. ܢܸܬ̣ܡܲܗ ܘܢܲܫܪܸܩ ܥܲܠ ܟܠܗܹܝܢ ܡܲܚ̈ܘܵܬ̣ܵܗ̇.

⁹ ܘܐܵܘܟܸܠ ܐܸܢܘܿܢ ܒܸܣܪܵܐ ܕܲܒ̣ܢܲܝ̈ܗܘܿܢ ܘܕܲܒ̣̈ܢܲܬ̣ܗܘܿܢ: ܘܲܓ̣ܒܲܪ ܒܣܲܪ ܚܲܒ̣ܪܹܗ ܢܹܐܟ݂ܠܘܼܢ: ܒܐܘܼܠܨܵܢܵܐ ܘܲܒ̣ܥܵܩܬ̣ܵܐ ܕܲܢܥܝܼܩܘܼܢ ܠܗܘܿܢ ܒܥܸܠܕܒ̣ܵܒܲܝ̈ܗܘܿܢ: ܘܐܲܝܠܹܝܢ ܕܒ̣ܵܥܹܝܢ ܢܲܦ̮ܫܗܘܿܢ.

¹⁰ ܕܲܬ̣ܒܲܪܲܝܗܝ ܠܒܲܓ̣ܒܘܼܓ̣ܵܐ ܠܥܹܝܢ ܓܲܒ̣ܖܹ̈ܐ ܕܐܵܙ̇ܠ̄ܝܼܢ ܥܲܡܵܟ݂.

¹¹ ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ: ܗܵܟܲܢܵܐ ܐܸܬ̣ܒ̇ܪܝܼܘܗܝ ܠܥܲܡܵܐ ܗܵܢܵܐ: ܘܠܲܩܪܝܼܬ̣ܵܐ ܗܵܕܹܐ. ܐܲܝܟ݂ ܕܐܸܬ̇ܬ̇ܒܲܪ ܡܵܐܢܵܐ ܗܵܢܵܐ ܕܦܲܚܵܪܵܐ: ܕܬ̣ܘܼܒ̣ ܠܵܐ ܡܸܫܟܲܚ ܠܡܸܬ̣ܐܲܣܵܝܘܼ: ܘܲܒ̣ܬܲܦܲܬ̣ ܢܸܩܪܒ̇ܘܼܢ ܡ̣ܢ ܒܠܲܝ ܐܲܬ̣ܪܵܐ ܠܡܸܩܒܲܪ.

¹² ܗܵܟܲܢܵܐ ܐܸܥܒܸ̇ܕ݂ ܠܐܲܬ̣ܪܵܐ ܗܵܢܵܐ ܘܲܠܥܵܡܘܿܖ̈ܵܘܗܝ ܐܵܡܲ݁ܪ ܡܵܪܝܵܐ: ܘܐܸܥܒ̇ܕ݂ܝܼܗ̇ ܠܲܩܪܝܼܬ̣ܵܐ ܗܵܕܹܐ ܐܲܝܟ݂ ܬܲܦܲܬ̣.

¹³ ܘܢܸܗܘܘܿܢ ܒܵــ̈ܬܹ̇ܐ ܕܐܘܿܪܸܫܠܸܡ: ܘܒ̣ܵـ̈ܬܹ̇ܐ ܕܡܲܠ̈ܟܹܐ ܕܲܝܗܘܼܕ݂ܵܐ: ܐܲܝܟ݂ ܐܲܬ̣ܪܵܐ ܕܬܲܦܲܬ̣ ܡܛܲܡܐܝܼܢ: ܟܠ ܒܵـ̈ܬܹܐ ܕܣܵܡ̣ܘ ܒܸܣܡܹ̈ܐ ܥܲܠ ܐܸܓܵܖ̈ܲܝܗܘܿܢ ܠܟ݂ܠ ܚܲܝ̈ܠܵܘܵܬ̣ܵܐ ܕܲܫܡܲܝܵܐ: ܘܢܲܩ̣ܝܼܘ ܢܘܼܩܵܝܹ̈ܐ ܠܐܲܠܵܗܹ̈ܐ ܐ̄ܚܖ̈ܵܢܹܐ.

¹⁴ ܘܐܸܬ̣ܵܐ ܐܹܪܲܡܝܵܐ ܡ̣ܢ ܬܲܦܲܬ̣ ܕܫܲܕܪܸܗ ܡܵܪܝܵܐ: ܠܡܸܬ̣ܢܲܒܵܝܘܼ ܬܲܡܵܢ: ܘܩ̣ܵܡ ܒܕ݂ܵܪܬܵܐ ܕܒܲܝܬܹ̇ܗ ܕܡܵܪܝܵܐ: ܘܐܸܡ݂ܲܪ ܠܟ݂ܠܹܗ ܥܲܡܵܐ.

¹⁵ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܡܲܝܬܸ̇ܐ ܐ̄ܢܵܐ ܥܲܠ ܡܕ݂ܝܼܢ̄ܬܵܐ ܗܵܕܹܐ ܘܥܲܠ ܟܠܗܹܝܢ ܩܘܼܖ̈ܝܵܗ̇: ܟܠܵܗ̇ ܒܝܼܫܬܵܐ ܕܐܸܡܪܹܬ̣ ܥܠܹܝܗ̇: ܥܲܠ ܕܩܲܫ̣ܝܼܘ ܩܕ݂ܵܠܗܘܿܢ ܕܠܵܐ ܢܸܫܡ̱ܥܘܼܢ ܦܹܬ̣ܓ̣ܵܡܲܝ̈.

20

¹ ܘܲܫـ̣ܡܲܥ ܦܸܫܚܘܿܪ ܒܲܪ ܐܲܡܲܪܝܵܐ ܟܵܗܢܵܐ: ܘܗ̤ܘ ܦܵܩܘܿܕ݂ܵܐ ܗ̄ܘ̣ܵܐ ܘܫܲܠܝܼܛܵܐ ܒܒܲܝܬܹܗ̇ ܕܡܵܪܝܵܐ: ܠܐܹܪܲܡܝܵܐ ܢܒ̣ܝܼܵܐ ܟܲܕ݂ ܡܸܬ̣ܢܲܒܸ̇ܐ ܦܸܬ̣ܓ̣ܵܡܹ̈ܐ ܗܵܠܹܝܢ.

² ܘܲܡܚ̣ܵܝܗܝ ܦܸܫܚܘܿܪ ܠܐܹܪܲܡܝܵܐ ܢܒ̣ܝܼܵܐ: ܘܐܲܪܡܝܹܗ ܒܚܵܕܲܪܬܵܐ ܕܲܒ̣ܬܲܪܥܵܐ ܕܒܹܝܬ̣ ܒܸܢܝܵܡܸܝܢ ܥܸܠܵܝܵܐ: ܕܲܒ̣ܒܲܝܬܹ̇ܗ ܕܡܵܪܝܵܐ.

³ ܘܲܗܘ̤ܵܐ ܠܒ̣ܵܬܲܪ ܝܵܘܡܵܐ: ܘܐܲܦ̣ܩܹܗ ܦܸܫܚܘܿܪ ܠܐܹܪܲܡܝܵܐ ܡ̣ܢ ܚܵܕܲܪܬܵܐ: ܘܐܸܡ݂ܲܪ ܠܹܗ ܐܹܪܲܡܝܵܐ: ܠܵܐ ܗ̄ܘ̤ܵܐ ܦܸܫܚܘܿܪ ܩ̣ܪܵܐ ܡܵܪܝܵܐ ܫܡܵܟ݂: ܐܸܠܵܐ ܬܵܘܬܵܒ̣ܵܐ ܘܚܵܕܘܿܪܵܐ.

⁴ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܗܵܐ ܥܵܒܹܕ݂ ܐ̄ܢܵܐ ܠܵܟ݂: ܬܵܘܬܵܒ̣ܵܐ ܠܵܟ݂ ܘܲܠܟ݂ܠܗܘܿܢ ܪܲܚܡܲܝܟ: ܘܢܸܦܠܘܼܢ ܒܚܲܪܒܵܐ ܕܲܒ̣ܥܸܠܕܒ̣ܵܒܲܝ̈ܗܘܿܢ: ܘܥܲܝܢܲܝ̈ܟ ܢܸܚܙ̈ܝܵܢ: ܘܲܠܟ݂ܠܹܗ ܝܼܗܘܼܕ݂ܵܐ ܐܲܫܠܸܡ ܒܐܝܼܕܹܗ ܕܡܲܠܟܵܐ ܕܒ̣ܵܒܹܠ: ܘܢܸܫܒܹ̇ܐ ܐܸܢܘܿܢ ܠܒ̣ܵܒܹܠ: ܘܲܢܩܲܛܸܠ ܐܸܢܘܿܢ ܒܚܲܪܒܵܐ.

⁵ ܘܐܲܫܠܸܡ ܟܠܗܘܿܢ ܚܸܣܢܲܝ̈ ܩܪܝܼܬ̣ܵܐ ܗܵܕܹܐ: ܘܟ݂ܠܵܗ̇ ܠܹܐܘܬ̣ܵܗ̇: ܘܟ݂ܠܹܗ ܐܝܼܩܵܪܵܗ̇: ܘܟ݂ܠܗܘܿܢ ܓܲܙܹ̈ܐ ܕܡܲܠ̈ܟܹ̇ܐ ܕܲܝܗܘܼܕ݂ܵܐ: ܐܲܫܠܸܡ ܒܐܝܼܕ݂ܵܐ ܕܲܒ̣ܥܸܠܕܒ̣ܵܒܲܝ̈ܗܘܿܢ: ܘܢܸܫܒ̇ܘܿܢ ܐܸܢܘܿܢ: ܘܢܸܒ̇ܙܘܼܢ ܐܸܢܘܿܢ: ܘܢܵܘܒ̇ܠܘܼܢ ܐܸܢܘܿܢ ܠܒ̣ܵܒܹܠ.

⁶ ܘܐܲܢ̄ܬ̇ ܦܸܫܚܘܿܪ ܘܟ݂ܠܗܘܿܢ ܐ̄ܢܵܫܲܝ̈ ܒܲܝܬܵܟ݂ ܬܹܐ̄ܙܠܘܼܢ ܒܫܸܒ݂ܝܵܐ: ܘܲܠܒ̣ܵܒܹܠ ܬܹܐܙܲܠ: ܙܬܲܡܵܢ ܬܡܘܼܬ̣: ܘܬܲܡܵܢ ܬܸܬ̣ܩܒܲܪ: ܐܲܢ̄ܬ̇ ܘܟ݂ܠܗܘܿܢ ܖ̈ܵܚܡܲܝܟ ܕܐܸܬ̣ܢܲܒ̇ܝܼܬ̇ ܠܗܘܿܢ ܒܫܘܼܩܪܵܐ.

⁷ ܫܲܕܸܠܬܵܢܝ ܡܵܪܝܵܐ ܘܐܸܫܬܲܕܠܹ̇ܬ̣: ܚܣܲܢ̣ܬܵܢܝ ܘܲܙܟ݂ܝܬܵܢܝ: ܗܘܹ݁ܝܬ̣ ܓܘܼܚܟܵܐ ܟܠܝܘܿܡ: ܘܟ݂ܠܗܘܿܢ ܡܡܲܝܩܝܢ ܒܝܼ.

⁸ ܘܒܲܙܒܲܢ ܕܲܡܡܲܠܸܠ ܗ̄ܘܹ̇ܝܬ̣ ܘܡܲܙܥܸܩ: ܥܲܠ ܚܵܛ݁ܘܿܦܹ̈ܐ ܘܥܲܠ ܒܵܙܘܿܙܹ̈ܐ ܩܵــ݁ܪܹܐ ܗ̄ܘܹ̇ܝܬ̣: ܡܸܛܠ ܕܲܗܘ̤ܵܐ ܠܝܼ ܦܸܬ̣ܓ̣ܵܡܹܗ ܕܡܵܪܝܵܐ ܠܚܸܣܕܵܐ ܘܲܠܡܘܼܝܵܩܵܐ ܟܠܝܘܿܡ.

⁹ ܘܐܸܡ̇ܪܹܬ̣ ܕܠܵܐ ܐܸܕܲܟ݂ܪܝܼܘܗܝ: ܘܠܵܐ ܐܹܡܲܠܸܠ ܬܘܼܒ̣ ܒܲܫܡܹܗ: ܘܲܗܘ̤ܵܐ ܒܠܹܒ̇ܝ ܐܲܝܟ݂ ܢܘܼܪܵܐ ܕܝܵــ̇ܩܕܵܐ ܘܚܵܒܵܐ ܒܓܲܖ̈ܡܲܝ: ܘܲܒ̣ܥܹܝ̇ܬ̣ ܠܲܡܣܲܝܒܵܪܘܼ ܘܠܵܐ ܐܹܫܟ̇ܚܹ̇ܬ̣.

¹⁰ ܡܸܛܠ ܕܫܸܡ̇ܥܹܬ̣ ܪܸܢܝܵܐ ܕܣܲܓ̇ܝܹ̈ܐܐ ܕܡܸܬ̣ܟܲܢܫܝܼܢ ܡ̣ܢ ܚܕܵܖ̈ܲܝ: ܘܐܵܡ݁ܪܝܼܢ ܟܠܗܘܿܢ ܕܫܵܐܠ̇ܝܼܢ ܒܲܫܠܵܡܝ ܒܦܘܼܡܗܘܿܢ: ܘܣܵܢܹ݁ܝܢ ܠܝܼ ܒܠܸܒ̇ܗܘܿܢ: ܚܵܘܵܐܘܼܗܝ ܠܲܢ ܘܲܢܩܘܼܡ ܥܠܵܘܗܝ: ܟܒܲܪ ܢܸܫܬܲܕܲܠ ܠܲܢ: ܘܢܸܬ̣ܒܲܥ ܥܝܵܪܬܲܢ ܡܸܢܹܗ.

¹¹ ܘܡܵܪܝܵܐ ܥܲܡܝ ܐܲܝܟ݂ ܓܲܢ̄ܒܵܪܵܐ ܥܲܫܝܼܢܵܐ: ܡܸܛܠ ܗܵܢܵܐ ܟܠܗܘܿܢ ܖ̈ܵܕ݂ܘܿܦܲܝ ܢܸܒ̣ܗ̱ܬ̣ܘܼܢ ܘܠܵܐ ܢܸܫܬܲܟ݂ܚܘܼܢ: ܒܗܸܬ̣ܘ ܛܵܒ̣ ܡܸܛܠ ܕܠܵܐ ܐܸܣܬܲܟܲܠܘ: ܒܸܗܬ̇ܬ̣ܵܐ ܕܥܵܠܲܡ ܕܠܵܐ ܡܸܬ̇ܛܲܥܝܵܐ.

¹² ܘܡܵܪܝܵܐ ܚܲܝܠܬ̣ܵܢܵܐ ܒܵـ̇ܚܲܪ ܙܸܕ݂ܩܵܐ: ܚܵـ̇ܙܹܐ ܟܘܿܠܝܵ̈ܬ̣ܵܐ ܘܠܸܒܵܐ: ܐܸܚܙܸܐ ܦܘܼܪܥܵܢܵܟ݂ ܡܸܢܗܘܿܢ: ܡܸܛܠ ܕܠܵܟ݂ ܚܠܹـ̇ܝܬ̣ ܕܝܼ̈ܢܲܝ.

¹³ ܫܲܒܲܚܘ ܠܡܵܪܝܵܐ ܫܲܒܲܚܘ ܠܡܵܪܝܵܐ: ܕܦܲܨܝܼ ܢܲܦ̮ܫܹܗ ܕܡܸܣܟܹܢܵܐ ܡ̣ܢ ܐܝܼܕ݂ܵܐ ܕܡܲܒ̣ܐ̱ܫܵܢܹ̈ܐ.

¹⁴ ܠܝܼܛ ܗ̄ܘ̣ ܝܵܘܡܵܐ ܕܐܸܬ̣ܝܲـ̇ܠܕܹܬ̣ ܒܹܗ: ܝܵܘܡܵܐ ܕܝܼܠܸܕ݂ܬܲܢܝ ܐܹܡܝ ܠܵܐ ܢܸܗܘܸܐ ܒܪܝܼــܟ݂.

¹⁵ ܠܝܼܛ ܗ̄ܘ̣ ܓܲܒ̣ܪܵܐ ܕܣܲܒܲܪ ܠܐܵܒ̣ܝ: ܘܐܸܡ݂ܲܪ ܠܹܗ ܕܐܸܬ̣̱ܝܼܠܸܕ݂ ܠܵܟ݂ ܒܪܵܐ ܕܸܟ݂ܪܵܐ: ܘܲܣـ݂ܒܲܪ ܕܲܡܚܲܕܵܝܘܼ ܚܲܕ̇ܝܹܗ.

¹⁶ ܢܸܗܘܸܐ ܓܲܒ̣ܪܵܐ ܗܵܘ̇ ܐܲܝܟ݂ ܩܘܼܖ̈ܝܵܐ ܕܲܗܦܲܟ݂ ܡܵܪܝܵܐ: ܘܠܵܐ ܐܸܬ̣ܪܲܥܝܼ ܠܗܹܝܢ: ܢܸܫܡܲܥ ܝܑܼܠܲܠܬܵܐ ܒܨܲܦܪܵܐ: ܘܝܘܼܒܵܒ̣ܵܐ ܒܛܲܗܪܵܐ.

¹⁷ ܕܠܵܐ ܐܲܡܝܼܬܲܢܝ ܒܡܲܪܒܥܵܐ: ܘܲܗܘ̤ܵܬ̣ ܠܝܼ ܕܸܝܢ ܐܹܡܝ ܩܲܒ̣ܪܵܐ: ܘܲܒ̣ܡܲܪܒܥܵܐ ܒܲܛܢܘܼܬ̣ܝ ܠܥܵܠܲܡ.

¹⁸ ܠܡܵܢܵܐ ܢܸܦܩܹ̇ܬ̣ ܡ̣ܢ ܡܲܪܒ̇ܥܵܐ: ܠܡܸܚܙܵܐ ܥܲܡܠܵܐ ܘܕ݂ܵܘܘܿܢܵܐ: ܘܲܓ̣ـ݂ܡܲܪܘ ܒܒܸܗܬ̇ܬ̣ܵܐ ܝܵܘ̈ܡܲܝ.

21

¹ ܦܸܬ̣ܓ̣ܵܡܵܐ ܕܲܗܘ̤ܵܐ ܥܲܠ ܐܹܪܲܡܝܵܐ ܡ̣ܢ ܩܕ݂ܵܡ ܡܵܪܝܵܐ: ܟܲܕ݂ ܫܲܕܲܪ ܠܘܵܬܹܗ ܨܹܕܲܩܝܵܐ ܡܲܠܟܵܐ: ܠܦܸܫܚܘܿܪ ܒܲܪ ܡܠܲܟ݂ܝܵܐ: ܘܠܲܨܦܲܢܝܵܐ ܒܲܪ ܡܥܲܝܣܵܐ ܟܵܗܢܹ̈ܐ: ܠܡܹܐܡܲܪ.

² ܒܥܝܼ ܥܠܲܝܢ ܡ̣ܢ ܩܕ݂ܵܡ ܡܵܪܝܵܐ: ܡܸܛܠ ܕܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܡܸܬ̣ܟܲܬܲܫ ܥܲܡܲܢ: ܛܵܟ݂ ܢܸܥܒܸ̇ܕ݂ ܥܲܡܲܢ ܡܵܪܝܵܐ ܐܲܝܟ݂ ܟܠܗܹܝܢ ܬܸܕܪܡܖ̈ܵܬܹܗ: ܘܢܸܦ̱ܪܩܝܼܘܗܝ ܡܸܢܲܢ.

³ ܘܐܸܡ݂ܲܪ ܠܗܘܿܢ ܐܹܪܲܡܝܵܐ: ܗܵܟܲܢܵܐ ܬܹܐܡܪܘܼܢ ܠܨܹܕܲܩܝܵܐ ܡܲܠܟܵܐ.

⁴ ܗܵܟܲܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܡܲܗܦܸـܟ݂ ܐ̄ܢܵܐ ܡܵܐܢܲܝ̈ ܩܪܵܒ̣ܵܐ ܕܒ̣ܐܝܼܕܲܝ̈ܟ̇ܘܿܢ ܕܡܸܬ̣ܟܲܬ̇ܫܝܼܢ ܐ̄ܢܬ̇ܘܿܢ ܒܗܘܿܢ ܥܲܡ ܡܲܠܟܵܐ ܕܒ̣ܵܒܹܠ: ܘܥܲܡ ܟܲܠܕܵܝܹ̈ܐ ܕܲܟ݂ܪܝܼܟ݂ܝܼܢ ܠܟ݂ܘܿܢ ܠܒܲܪ ܡ̣ܢ ܩܪܝܼܬ̣ܵܐ: ܘܐܹܟܲܢܸܫ ܐܸܢܘܿܢ ܠܓ̣ܵܘ ܩܪܝܼܬ̣ܵܐ ܗܵܕܹܐ.

⁵ ܘܐܸܬ̣ܟܲܬܲܫ ܐܸܢܵܐ ܥܲܡܟ݂ܘܿܢ: ܒܐܝܼܕ݂ܵܐ ܬܲܩܝܼܦܬܵܐ ܘܒܲܕ݂ܪܵܥܵܐ ܪܵܡܵܐ: ܒܪܘܼܓ̣ܙܵܐ ܘܲܒ̣ܚܸܡܬ̣ܵܐ.

⁶ ܘܲܒ̣ܪܘܼܓ̣ܙܵܐ ܪܲܒܵܐ ܐܸܡܚܸܐ ܠܝܵܬ̣ܒܲܝ̈ ܩܪܝܼܬ̣ܵܐ ܗܵܕܹܐ: ܒܢܲܝ̈ܢܵܫܵܐ ܘܒ̣ܥܝܼܪܵܐ ܒܡܵܘܬܵܐ ܪܲܒܵܐ ܢܡܘܼܬ̣ܘܼܢ.

⁷ ܘܒ̣ܵܬ̣ܪܟܸ̇ܢ ܐܵܡܲ݁ܪ ܡܵܪܝܵܐ: ܐܲܫ̱ܠܡܝܼܘܗܝ ܠܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ ܘܲܠܥܲܒ̣ܕܵܘ̈ܗܝ: ܘܲܠܥܲܡܵܐ ܕܐܸܫܬ̇ܚܲܪ ܒܲܩܪܝܼܬ̣ܵܐ ܗܵܕܹܐ: ܡ̣ܢ ܚܲܪܒܵܐ: ܘܡ̣ܢ ܟܲܦܢܵܐ: ܘܡ̣ܢ ܡܵܘܬܵܢܵܐ: ܐܲܫܠܸܡ ܒܐܝܼܕ݂ܵܐ ܕܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܘܒ̣ܐܝܼܕ݂ܵܐ ܕܐܲܝܠܹܝܢ ܕܒ̣ܵــ̇ܥܝܹܢ ܢܲܦ̮ܫܗܘܿܢ: ܘܢܸܡܚܸܐ ܐܸܢܘܿܢ ܒܦܘܼܡܵܐ ܕܚܲܪܒܵܐ: ܘܠܵܐ ܢܚܘܼܣ ܥܠܲܝܗܘܿܢ: ܘܠܵܐ ܢܪܲܚܸܦ ܘܠܵܐ ܢܪܲܚܸܡ ܥܠܲܝܗܘܿܢ.

⁸ ܘܲܠܥܲܡܵܐ ܗܵܢܵܐ ܐܸܡܲܪ: ܗܲܟܲܢܵܐ ܐܵܡܲ݁ܪ ܡܵܪܝܵܐ: ܗܵܐ ܝܵـ̇ܗܹܒ̣ ܐ̄ܢܵܐ ܩܕ݂ܵܡܲܝܟ̇ܘܿܢ ܐܘܼܪܚܵܐ ܕܚܲܝܹ̈ܐ ܘܐܘܼܪܚܵܐ ܕܡܵܘܬܵܐ.

⁹ ܡܲܢ ܕܝܵܬ݁ܒ̣ ܒܲܩܪܝܼܬ̣ܵܐ ܗܵܕܹܐ: ܢܡܘܼܬ̣ ܒܚܲܪܒܵܐ: ܘܲܒ̣ܟܲܦܢܵܐ: ܘܲܒ̣ܡܵܘܬܵܢܵܐ: ܘܡܲܢ ܕܢܵـ̇ܦܹܩ ܠܘܵܬ̣ ܟܲܠܕܵܝܹ̈ܐ ܕܲܟ݂ܪܝܼܟ݂ܝܼܢ ܠܟ݂ܘܿܢ: ܚܵـ̇ܝܹܐ ܘܲܡܫܵܒ̣ܙܸܒ̣ ܢܲܦ̮ܫܹܗ.

¹⁰ ܡܸܛܠ ܕܣܵـ̇ܡܹܬ̣ ܐܲܦܲܝ̈ ܒܲܩܪܝܼܬ̣ܵܐ ܗܵܕܹܐ ܠܒ̣ܝܼܫܬܵܐ ܘܠܵܐ ܠܛܵܒ̣ܬ̣ܵܐ ܐܵܡܲ݁ܪ ܡܵܪܝܵܐ: ܘܒ̣ܐܝܼܕܹܗ ܕܡܲܠܟܵܐ ܕܒ̣ܵܒܹܠ ܬܸܫܬ̇ܠܸܡ: ܘܢܵܘܩ̄ܕ݂ܝܼܗ̇ ܒܢܘܼܪܵܐ.

¹¹ ܘܲܠܒܹܝܬ̣ ܡܲܠܟܵܐ ܕܲܝܗܘܼܕ݂ܵܐ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ ܕܒܹܝܬ̣ ܕܵܘܝܼܕ݂: ܗܵܟܲܢܵܐ ܐܵܡܲ݁ܪ ܡܵܪܝܵܐ.

¹² ܕܘܼܢܘ ܒܨܲܦܪܵܐ ܕܝܼܢܵܐ: ܘܦܲܨܵܘ ܠܲܛܠܝܼܡܵܐ ܡ̣ܢ ܡܲܢ ܕܛܵܠܹ̇ܡ ܠܹܗ: ܕܲܠܡܵܐ ܬܸܦܘܿܩ ܐܲܝܟ݂ ܢܘܼܪܵܐ ܚܸܡܬ̣ܝ: ܘܬ̣ܵܘܩܸܕ݂ ܘܠܲܝܬ̇ ܕܲܡܕܲܥܸـܟ݂: ܡܸܛܠ ܒܝܼܫܘܼܬ̣ܵܐ ܕܲܥܒ̣ܵܕܲܝ̈ܟ̇ܘܿܢ.

¹³ ܗܵܐ ܐܸܢܵܐ ܥܠܲܝܟ̇ܝ ܝܵـ̇ܬ̣ܒܲܬ̣ ܒܥܘܼܡܩܵܐ: ܥܲܡܝܼܩܲܬ̣ ܦܩܲܥܬ̣ܵܐ ܐܵܡܲ݁ܪ ܡܵܪܝܵܐ: ܕܐܵܡ̇ܪܝܼܢ ܡܲܢ ܢܹܐܬܸܐ ܥܠܲܝܢ. ܘܡܲܢ̣ܘܼ ܢܸܥܘܿܠ ܠܡܲܥܡܪܲܢ.

¹⁴ ܐܸܦܩܘܿܕ݂ ܥܠܲܝܟ̇ܘܿܢ ܐܲܝܟ݂ ܦܹܐܖ̈ܲܝ ܥܒ̣ܵܕܲܝ̈ܟ̇ܘܿܢ ܐܵܡܲ݁ܪ ܡܵܪܝܵܐ: ܘܐܸܫܒܘܿܩ ܢܘܼܪܵܐ ܒܩܘܼܖ̈ܝܵܗ̇: ܘܬܸܐܟ݂ܘܿܠ ܟܠܗܘܿܢ ܚܕܵܖܹ̈ܝܗ̇.

22

¹ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܚܘܿܬ̣ ܠܒܹܝܬ̣ ܡܲܠܟܵܐ ܕܲܝܗܘܼܕ݂ܵܐ: ܘܡܲܠܸܠ ܬܲܡܵܢ ܦܸܬ̣ܓ̣ܵܡܵܐ ܗܵܢܵܐ: ܘܐܸܡܲܪ.

² ܫܡܲܥ ܦܸܬ̣ܓ̣ܵܡܹܗ ܕܡܵܪܝܵܐ ܡܲܠܟܵܐ ܕܲܝܗܘܼܕ݂ܵܐ ܕܝܵـ̇ܬܹܒ̣ ܥܲܠ ܟܘܼܪܣܝܹܗ ܕܕ݂ܵܘܝܼܕ݂: ܐܲܢ̄ܬ̇ ܘܥܲܒ̣ܕܲܝ̈ـܟ ܘܥܲܡܵܟ݂ ܕܥܵܐܠ̇ܝܼܢ ܒܬܲܖ̈ܥܹܐ ܗܵܠܹܝܢ.

³ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܥܒܸܕ݂ܘ ܕܝܼܢܵܐ ܘܙܲܕܝܼܩܘܼܬ̣ܵܐ: ܘܦܲܨܵܘ ܠܲܛܠܝܼܡܵܐ ܡ̣ܢ ܡܲܢ ܕܛܵـ̇ܠܹܡ ܠܹܗ: ܘܲܠܥܵܡܘܿܖܹ̈ܐ ܘܲܠܝܲܬ̣ܡܹ̈ܐ ܘܠܲܐܖ̈ܡܠܵܬ̣ܵܐ: ܠܵܐ ܬܸܥ̱ܠܒ̣ܘܼܢ ܘܠܵܐ ܬܸܛܠ̱ܡܘܼܢ: ܘܲܕ݂ܡܵܐ ܙܲܟܵܝܵܐ ܠܵܐ ܬܹܐܫܕ̇ܘܼܢ ܒܐܲܬ̣ܪܵܐ ܗܵܢܵܐ.

⁴ ܘܐܸܢ ܡܸܥܒܲܕ݂ ܬܸܥܒ̇ܕ݂ܘܼܢ ܦܸܬ̣ܓ̣ܵܡܵܐ ܗܵܢܵܐ: ܢܸܥܠܘܼܢ ܒܬܲܖ̈ܥܵܘܗܝ ܕܒܲܝܬܵܐ ܗܵܢܵܐ: ܡܲܠ̈ܟܹ̇ܐ ܘܪܵܘܖ̈ܒ̣ܵܢܹܐ ܕܝܵܬ̣ܒ̇ܝܼܢ ܥܲܠ ܟܘܼܪܣܝܹܗ ܕܕ݂ܵܘܝܼܕ݂: ܟܲܕ݂ ܪܟ݂ܝܼܒ̣ܝܼܢ ܒܡܲܖ̈ܟ̇ܒ̣ܵܬ̣ܵܐ ܘܲܒ̣ܖ̈ܲܟ݂ܫܵܐ: ܗܘ̤ ܘܥܲܒ̣ܕܵܘ̈ܗܝ ܘܥܲܡܹܗ.

⁵ ܘܐܸܢ ܠܵܐ ܬܸܫ̱ܡܥܘܼܢ ܦܸܬ̣ܓ̣ܵܡܵܐ ܗܵܢܵܐ: ܒܝܼ ܝܑܼܡ̣ܝܼܬ̣ ܐܵܡܲ݁ܪ ܡܵܪܝܵܐ: ܕܲܠܚܘܼܪܒܵܐ ܢܸܗܘܸܐ ܒܲܝܬܵܐ ܗܵܢܵܐ.

⁶ ܡܸܛܠ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܥܲܠ ܒܹܝܬ̣ ܡܲܠܟܵܐ ܕܲܝܗܘܼܕ݂ܵܐ: ܓܸܠܥܵܕ݂ ܐܲܢ̄ܬ̇ ܗ̄ܘ̣ ܪܹܫ ܠܸܒ̣ܢܵܢ: ܐܸܠܵܐ ܐܸܥܒ̇ܕ݂ܵܟ݂ ܡܲܕ݂ܒܪܵܐ ܐܲܝܟ݂ ܩܘܼܖ̈ܝܵܐ ܕܠܵܐ ܐܸܬ̣ܝܲܬܲܒ̣.

⁷ ܘܐܸܛܲܝܸܒ̣ ܥܠܲܝܟ ܡܚܲܒܠܵܢܹ̈ܐ: ܓܲܒ̣ܪܵܐ ܘܢܵܪܓܹ̇ܗ ܒܐܝܼܕܹܗ: ܘܢܸܦܣܩܘܼܢ ܓܒܲـ̈ܝܵܐ ܕܐܲܖ̈ܙܲܝܟ ܘܢܲܪܡܘܿܢ ܒܢܘܼܪܵܐ.

⁸ ܘܢܸܥܒ̇ܪܘܼܢ ܥܲܡܡܹ̈ܐ ܣܲܓ̇ܝܹ̈ܐܐ ܥܲܠ ܩܪܝܼܬ̣ܵܐ ܗܵܕܹܐ ܪܲܒ̇ܬ̣ܵܐ: ܘܢܹܐܡܪܘܼܢ ܓܒܲܪ ܠܚܲܒ̣ܪܹܗ: ܥܲܠ ܡܵܢܵܐ ܥ̣ܒܲܕ݂ ܡܵܪܝܵܐ ܗܵܟܲܢܵܐ ܠܲܩܪܝܼܬ̣ܵܐ ܗܵܕܹܐ ܪܲܒ̇ܬ̣ܵܐ.

⁹ ܘܢܹܐܡܪܘܼܢ ܥܲܠ ܕܲܫ̣ܒܲܩܘ ܩܝܵܡܹܗ ܕܡܵܪܝܵܐ ܐܲܠܵܗܗܘܿܢ: ܘܲܣܓܸܕ݂ܘ ܠܐܲܠܵܗܹ̈ܐ ܐ̄ܚܖ̈ܵܢܹܐ ܘܲܦܠܲܚ̣ܘ ܐܸܢܘܿܢ.

¹⁰ ܠܵܐ ܬܸܒ̣ܟ̇ܘܿܢ ܥܲܠ ܡܝܼܬ̣ܵܐ: ܘܠܵܐ ܬܢܘܼܕ݂ܘܼܢ ܥܠܵܘܗܝ: ܡܸܒ̣ܟܵܐ ܒܟ݂ܵܘ ܥܲܠ ܡܲܢ ܕܐܸܙܲܠ̣ ܘܬ̣ܘܼܒ̣ ܠܵܐ ܗܵܦܹ̇ـܟ݂: ܘܠܵܐ ܚܵܙܹ̇ܐ ܐܲܪܥܵܐ ܕܐܸܬ̣̤ܝܼܠܸܕ݂ ܒܵܗ̇.

¹¹ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ: ܥܲܠ ܫܵܠܘܿܡ ܒܲܪ ܝܘܿܫܝܼܵܐ ܕܐܲܡ̣ܠܸܟ݂ ܚܠܵܦ ܝܘܿܫܝܼܵܐ ܐܲܒ̣ܘܼܗܝ: ܕܲܢܦܲܩ̣ ܡ̣ܢ ܐܲܬ̣ܪܵܐ ܗܵܢܵܐ: ܠܵܐ ܢܸܗܦܘܿܟ݂ ܠܬܲܡܵܢ ܬܘܼܒ̣.

¹² ܐܸܠܵܐ ܒܐܲܬ̣ܪܵܐ ܕܐܸܫܬ̇ܒ̣ܝܼ ܬܲܡܵܢ ܢܡܘܼܬ̣: ܘܐܲܪܥܵܐ ܗܵܕܹܐ ܬܘ̣ܒ̣ ܠܵܐ ܢܸܚܙܸܐ.

¹³ ܘܵܝ ܠܲܕ݂ܒ̣ܵـ̇ܢܹܐ: ܒܲܝܬܹ̇ܗ ܕܠܵܐ ܒܙܸܕ݂ܩܵܐ: ܘܥܸܠܵܝܵــ̈ܬܹܗ ܕܠܵܐ ܒܕ݂ܝܼܢܵܐ: ܚܲܒ̣ܪܹܗ ܦܵـ̇ܠܲܚ ܠܹܗ ܡܲܓܵܢ: ܘܐܲܓ̣ܪܹܗ ܠܵܐ ܝܵܗܹ̇ܒ̣ ܠܹܗ.

¹⁴ ܕܐܵܡܲ݁ܪ ܐܸܒ̣ܢܸܐ ܠܝܼ ܒܵܬܹ̈ܐ ܕܡܘܫ̈ܚܵܬ̣ܵܐ: ܘܥܸܠܵܝܵـ̈ܬ̣ܵܐ ܡܖ̈ܵܘܚܵܬ̣ܵܐ: ܘܦܵـ̇ܬܲܚ ܠܗܹܝܢ ܟܵܘܹ̈ܐ: ܘܲܡܛܲܠܹܠ ܠܗܹܝܢ ܒܐܲܖ̈ܙܹܐ: ܘܨܵܐܲܪ ܠܗܹܝܢ ܨܘܼܖ̈ܵܬ̣ܵܐ.

¹⁵ ܡܲܡܠܸܟ݂ ܐܲܢ̄ܬ̇: ܕܐܲܢ̄ܬ̇ ܡܸܬ̣ܚܲܕܸܐ ܒܐܲܖ̈ܙܹܐ: ܐܲܒ̣ܘܼܟ݂ ܐܸܟܲܠ̣ ܘܐܸܫܬ̇ܝܼ: ܘܲܥ̣ܒܲܕܪ ܕܝܼܢܵܐ ܘܙܲܕܝܼܩܘܼܬܵܐ: ܡܸܛܠ ܗܵܢܵܐ ܐܲܛ̱ܐܒܹ̇ܬ̣ ܠܹܗ.

¹⁶ ܕܵܢ ܕܝܼܢܵܐ ܕܡܸܣܟܹ̇ܢܹ̈ܐ ܘܲܕ݂ܒ̣ܵܝ̈ܫܹܐ: ܘܲܥ̣ܒܲܕ݂ ܕܫܲܦܝܼܪ: ܡܲܢ ܕܗܵܠܹܝܢ ܥܵـ̇ܒܹܕ݂: ܝܵܕܲܥ̇ ܠܝܪ ܐܵܡܲ݁ܪ ܡܵܪܝܵܐ.

¹⁷ ܕܝܼܠܵܟ݂ ܕܹܝܢ ܥܲܝܢܲܝ̈ܟ ܘܠܸܒܵܟ݂: ܠܲܝܬ̇ ܥܲܠ ܡܸܕܸ̇ܡ ܐ̄ܚܪܹܝܢ: ܐܸܠܵܐ ܥܲܠ ܩܸܢܝܵܢܵܟ݂: ܘܥܲܠ ܕܡܵܐ ܙܲܟܵܝܵܐ ܠܡܹܐܫܲܕ݂: ܘܥܲܠ ܥܫܘܼܩܝܵܐ: ܘܥܲܠ ܛܠܘܼܡܝܵܐ ܠܡܸܥܒܲܕ݂.

¹⁸ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ: ܥܲܠ ܝܘܿܝܵܩܝܼܡ ܒܲܪ ܝܘܿܫܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܠܵܐ ܢܲܪܩܕ݂ܘܼܢ ܥܠܵܘܗܝ: ܘܠܵܐ ܢܹܐܡܪܘܼܢ: ܘܵܝ ܐܵܚܝ: ܘܵܝ ܐܵܚܝ: ܘܠܵܐ ܢܲܪܩܕ݂ܘܼܢ ܥܠܵܘܗܝ: ܘܵܝ ܡܵܪܵܐ: ܘܵܝ ܡܵܪܵܐ.

¹⁹ ܩܒ̣ܘܼܪܲܬ̣ ܚܡܵܪ ܢܸܬ̣ܩܒܲܪ ܘܢܸܓ̇ܪܘܼܢ ܘܢܸܫܕ̇ܘܿܢܹܗ ܠܗܲܠ ܡ̣ܢ ܬܲܖ̈ܥܹܝܗ̇ ܕܐܘܿܪܸܫܠܸܡ.

²⁰ ܣܲܩܝ ܠܸܠܒ̣ܢܵܢ ܘܐܲܙܥܸܩܝ: ܘܲܒ̣ܡܲܬ̣ܢܝܼܢ ܐܲܪܝܼܡܝ ܩܵܠܹܟ݂ܝ: ܘܐܲܙܥܸܩܝ ܡ̣ܢ ܥܸܒ̣ܖ̈ܲܝ ܝܲܡܵܐ: ܕܐܸܬ̇ܬ̇ܒܲܪܘ ܟܠܗܘܿܢ ܖ̈ܵܚܡܲܝܟ̇ܝ.

²¹ ܘܐܸܡ̇ܪܹܬ̣ ܠܹܟ݂ܝ ܒܟܲܗܝܼܢܘܼܬܹܟ݂ܝ: ܘܐܸܡ݂ܲܪܬ̇ܝ ܕܠܵܐ ܐܸܫܡܲܥ: ܗܵܕܲܐ ܗ̄ܝ̣ ܐܘܼܪܚܹܟ݂ܝ: ܡ̣ܢ ܛܲܠܝܘܼܬܹܟ݂ܝ: ܘܠܵܐ ܫܡܲܥܬ̇ܝ ܒܩܵܠܝ.

²² ܠܟ݂ܠܗܘܿܢ ܖ̈ܵܥܵܘܵܬܹܟ݂ܝ ܬܸܪܥܸܐ ܐܸܢܘܿܢ ܪܘܼܚܵܐ: ܘܖ̈ܵܚܡܲܝܟ̇ܝ ܒܫܸܒ̣ܝܵܐ ܢܹܐܙ̄ܠܘܼܢ: ܘܗܵܝܕܹܝܢ ܬܸܒ̣ܗ̱ܬ̣ܝܼܢ ܘܬܸܬܲܟ݂ܣܝܼܢ ܡ̣ܢ ܟܠܗܹܝܢ ܒܝܼ̈ܫܵܬܹܟ݂ܝ.

²³ ܝܵـ̇ܬ̣ܒܲܬ̣ ܒܠܸܒ̣ܢܵܢ: ܡܲܩܢܲܬ̣ ܒܐܲܖ̈ܙܹܐ: ܡܵܢܵܐ ܡܸܬ̇ܬܲܢܚܵܐ ܐܲܢ̄ܬ̇ܝ ܟܲܕ݂ ܢܹܐܬ̣ܘܿܢ ܥܠܲܝܟ̇ܝ ܚܸܒ̣̈ܠܹܐ ܘܙܵܘܸܥܬ̣ܵܐ ܐܲܝܟ݂ ܕܝܵܠܹܕܬܵܐ.

²⁴ ܚܲܝ ܐ̄ܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ: ܐܸܢ ܢܸܗܘܸܐ ܝܘܿܟܲܢܝܵܐ ܒܲܪ ܝܘܿܝܵܩܝܼܡ ܡܲܠܟܵܐ ܕܲܝܗܘܼܕ݂ܵܐ: ܚܵܬ̣ܡܵܐ ܥܲܠ ܐܝܼܕ݂ܝ ܕܝܲܡܝܼܢܵܐ: ܐܸܠܵܐ ܡ̣ܢ ܬܲܡܵܢ ܐܸܥܩ̄ܪܵܟ݂.

²⁵ ܘܐܲܫܠ̱ܡܵܟ݂ ܒܝܲܕ݂ ܐ̄ܢܵܫܵܐ ܐܲܝܠܹܝܢ ܕܒ̣ܵܥܹ̇ܝܢ ܢܲܦ̮ܫܵܟ݂ ܘܒܲܐܝܼܕ݂ܵܐ ܕܐܲܝܠܹܝܢ ܕܕ݂ܵܚܹ̇ܠ ܐܲܢ̄ܬ̇ ܡ̣ܢ ܩܕ݂ܵܡܲܝܗܘܿܢ: ܒܐܝܼܕ݂ܵܐ ܕܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܘܒ̣ܐܝܼܕ݂ܵܐ ܕܟܲܠܕ݂ܵܝܹ̈ܐ.

²⁶ ܘܐܸܕܹ̇ܝܟ ܠܵܟ݂ ܘܠܸܐܡܵܟ݂ ܕܝܼܠܸܕ݂ܬ̣ܵܟ݂: ܠܐܲܪܥܵܐ ܐ̄ܚܪܹܬ̣ܵܐ ܕܠܵܐ ܐܸܬ̣̱ܝܼܠܸܕܬ̇ܘܿܢ ܬܲܡܵܢ: ܘܬܲܡܵܢ ܬܡܘܼܬ̣ܘܼܢ.

²⁷ ܘܠܲܐܪܥܵܐ ܕܣܵܒ̣ܖ̈ܵܢ ܢܲܦ̮ـ̈ܫܲܬ̣ܟ݂ܘܿܢ ܠܡܸܗܦܲܟ݂ ܠܬܲܡܵܢ: ܠܵܐ ܬܸܗܦ̄ܟ݂ܘܼܢ.

²⁸ ܒܨܝܼܪܵܐ ܘܫܝܼܛܵܐ ܓܲܒ̣ܪܵܐ ܗܵܢܵܐ ܝܘܿܟܲܢܝܵܐ: ܐܲܝܟ݂ ܡܵܐܢܵܐ ܕܠܲܝܬ̇ ܒܹܗ ܚܲܫܚܘܼ: ܡܸܛܠ ܗܵܢܵܐ ܐܸܫܬ̇ܩܸܠ ܗ̤ܘ ܘܙܲܪܥܹܗ: ܘܐܸܫܬ̇ܕ݂ܝܼܘܼ ܠܐܲܪܥܵܐ: ܕܠܵܐ ܝܵܕ݂ܥ̇ܝܼܢ.

²⁹ ܐܲܪܥܵܐ: ܐܲܪܥܵܐ: ܐܲܪܥܵܐ: ܫܡܲܥܝ ܦܸܬ̣ܓ̣ܵܡܹܗ ܕܡܵܪܝܵܐ.

³⁰ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܟܘܼܬ̣ܒܘܼܗܝ ܠܓܲܒ̣ܪܵܐ ܗܵܢܵܐ ܡܲܟ݂ܪ̱ܙܵܐ ܕܠܵܐ ܒܢܝܼ̈ܢ: ܡܸܛܠ ܕܓܲܒ̣ܪܵܐ ܒܝܵܘ̈ܡܵܬܹܗ: ܠܵܐ ܢܲܨܠܲܚ ܡ̣ܢ ܙܲܪܥܹܗ ܓܲܒ̣ܪܵܐ ܕܝܵـ̇ܬܹܒ̣ ܥܲܠ ܟܘܼܪܣܝܹܗ ܕܕ݂ܵܘܝܼܕ݂: ܘܡܸܫܬܲܠܲܛ ܬܘܼܒ̣ ܒܲܝܗܘܼܕ݂ܵܐ.

23

¹ ܐܘܿ ܖ̈ܵܥܵܘܵܬ̣ܵܐ ܕܡܵܘܒܕ݂ܝܼܢ ܘܲܡܒܲܕܪܝܼܢ ܥܵܢ̈ܵܐ ܕܡܲܪܥܝܼܬ̣ܝ ܐܵܡܲ݁ܪ ܡܵܪܝܵܐ.

² ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܥܲܠ ܖ̈ܵܥܵܘܵܬ̣ܵܐ ܕܪܵܥܹ̇ܝܢ ܠܥܲܡܝ: ܐܲܢ̄ܬ̇ܘܿܢ ܒܲܕܪܬ̇ܘܿܢ ܠܥܵܢܝ̈: ܘܐܲܛܥܝܼܬ̇ܘܿܢ ܐܸܢܹܝܢ ܘܠܵܐ ܦܩܲܕ̇ܬ̇ܘܿܢ ܐܸܢܹܝܢ: ܗܵܐ ܦܵܩܹܕ݂ܐ̄ܢܵܐ ܥܠܲܝܟ̇ܘܿܢ: ܐܲܝܟ݂ ܒܝܼܫܘܼܬ̣ ܥܒܵܕܲܝ̈ܟ̇ܘܼܢ ܐܵܡܲܪ ܡܵܪܝܵܐ.

³ ܘܐܸܢܵܐ ܐܸܟܲܢܸܫ ܫܲܪܟܵܐ ܕܥܵܢܝ̈ ܡ̣ܢ ܟܠܗܘܿܢ ܐܲܬ̣ܖ̈ܵܘܵܬ̣ܵܐ ܕܒܲܕ̇ܪܹܬ̣ܐܸܢܘܿܢ ܠܬܲܡܵܢ: ܘܐܲܗܦܸܟ݂ ܐܸܢܘܿܢ ܠܕܲܝܗܘܿܢ: ܘܢܸܟ݂ܒܪܘܿܢ ܘܢܸܣܓ̇ܘܿܢ.

⁴ ܘܐܲܩܝܼܡ ܥܠܲܝܗܘܿܢ ܖ̈ܵܥܵܘܵܬ̣ܵܐ ܘܢܸܪܥܘܿܢ ܐܸܢܘܿܢ: ܘܠܵܐ ܢܸܕ݂ܚ̄ܠܘܼܢ ܬܘܼܒ̣ ܘܠܵܐ ܢܸܬ̣ܒܲܕ̇ܪܘܼܢ: ܘܠܵܐ ܢܸܛܥܘܿܢ ܐܵܡܲ݁ܪ ܡܵܪܝܵܐ.

⁵ ܗܵܐ ܝܵܘ̈ܡܵܬ̣ܵܐ ܐܵܬܹ݁ܝܢ ܐܵܡܲ݁ܪ ܡܵܪܝܵܐ: ܘܐܲܩܝܼܡ ܠܕ݂ܵܘܝܼܕܪ ܨܸܡܚܵܐ ܕܙܲܕܝܼܩܘܼܬ̣ܵܐ: ܘܢܲܡܠܸܟ݂ ܒܡܲܠܟܘܼܬ̣ܵܐ ܘܢܸܣܬܲܟܲܠ: ܘܢܸܥܒܸܕ݂ ܕܝܼܢܵܐ ܘܙܲܕܝܼܩܘܼܬ̣ܵܐ ܒܐܲܪܥܵܐ.

⁶ ܒܝܵܘ̈ܡܵܘܗܝ ܢܸܬ̣ܦܪܸܩ ܝܼܗܘܼܕ݂ܵܐ: ܘܝܼܣܪܵܝܹܠ ܢܸܫܪܸܐ ܒܫܸܠܝܵܐ: ܘܗܵܢ݁ـܵܘ ܫܡܹܗ ܕܢܸܩܪܘܿܢܹܗ ܡܵܪܝܵܐ ܙܸܕ݂ܩܲܢ.

⁷ ܡܸܛܠ ܗܵܢܵܐ ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܐܵܡܲ݁ܪ ܡܵܪܝܵܐ: ܘܠܵܐ ܢܸܬ̣ܐ̱ܡܲܪ ܬܘܼܒ̣ ܚܲܝ ܗ̄ܘ̣ ܡܵܪܝܵܐܕܐܲܣܸܩ̣ ܠܲܕ݂ܒܹܝܬ̣ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ.

⁸ ܐܸܠܵܐ ܚܲܝ ܗ̄ܘ̣ ܡܵܪܝܵܐ: ܕܢܲܣܸܩ ܘܢܲܝܬܸ̇ܐ ܠܲܒ̣ܢܲܝ̈ ܝܼܣܪܵܝܹܠ ܡ̣ܢ ܐܲܪܥܵܐ ܕܓܲܪܒ̇ܝܵܐ: ܘܡ̣ܢ ܟܠܗܘܿܢ ܐܲܬ̣ܖ̈ܵܘܵܬ̣ܵܐ ܕܐܸܬ̣ܒܲܕܲܪܘ ܒܗܘܿܢ: ܘܢܸܬ̇ܒ̣ܘܼܢ ܒܐܲܪ̱ܥܗܘܿܢ.

⁹ ܥܲܠ ܢܒ̣ܝܹ̈ܐ ܐܸܬ̇ܬܲܒܲܪ ܠܹܒ̇ܝ ܒܓ̣ܵܘܝ: ܘܙܵܥ̣ܘ ܟܠܗܘܿܢ ܓܲܖ̈ܡܲܝ: ܘܲܗܘܹܝܬ̣ ܐܲܝܟ݂ ܓܲܒ̣ܪܵܐ ܪܵܘܝܵܐ: ܘܐܲܝܟ݂ ܓܲܒ̣ܪܵܐ ܕܥܲܒ̣ܪܹܗ ܚܲܡܪܹܗ: ܡ̣ܢ ܩܕ݂ܵܡ ܡܵܪܝܵܐ ܘܡ̣ܢ ܩܕ݂ܵܡ ܦܸܬ̣ܓ̣ܵܡܲܝ̈ ܩܘܼܕ݂ܫܹܗ.

¹⁰ ܡܸܛܠ ܕܓܲܝܵܖܹ̈ܐ ܘܚܵܛܘܿܦܹ̈ܐ ܐܸܬ̣ܡܲܠܝܲܬ̤ ܐܲܪܥܵܐ: ܡܸܛܠ ܗܵܠܹܝܢ ܐܸܬ̣ܐܲܒ̣ܠܲܬ̤ ܐܲܪܥܵܐ: ܘܝܼܒܸܫ̣ ܕܲܝܖܹ̈ܐ ܕܡܲܕ݂ܒ̇ܪܵܐ: ܘܲܗܘ̤ܵܐ ܪܲܗܛܵܢܗܘܿܢ ܒܝܼܫ: ܘܲܒ̣ܓܲܢ̄ܒܵܪܘܼܬ̣ܗܘܿܢ ܠܵܐ ܐܲܟ݂ܫܲܪܘ.

¹¹ ܡܸܛܠ ܕܐܵܦ ܢܒ̣ܝܹ̈ܐ ܘܐܵܦ ܟܵܗܢܹ̈ܐ ܐܸܬ̣ܚܲܢܲܦܘ: ܘܐܵܦ ܒܒܲܝܬ̇ܝ ܐܸܫܟ̇ــ̇ܚܹܬ̣ ܒܝܼܫܘܼܬ̣ܗܘܿܢ ܐܵܡܲ݁ܪ ܡܵܪܝܵܐ.

¹² ܡܸܛܠ ܗܵܢܵܐ ܢܸܗܘ̈ܝܵܢ ܠܗܘܿܢ ܐܘܼܖ̈ܚܵܬ̣ܗܘܿܢ ܡܲܫܖ̈ܘܿܥܝܵܬ̣ܵܐ: ܘܲܠܚܸܫܘܿܟ݂ܵܐ ܢܸܬ̇ܕ̇ܚܘܿܢ ܘܢܸܦܠܘܼܢ ܒܗܹܝܢ: ܡܸܛܠ ܕܡܲܝܬܸ̇ܐ ܐ̄ܢܵܐ ܥܠܲܝܗܘܿܢ ܒܝܼܫܬܵܐ: ܫܲܢ̄ܬܵܐ ܕܦܘܼܩܕܵܢܗܘܿܢ ܐܵܡܲ݁ܪ ܡܵܪܝܵܐ.

¹³ ܘܒܲܢ̈ܒ̣ܝܲܝ ܫܵܡܪܹܝܢ ܚ̇ܙܹܝܬ̣ ܕܲܓܵܠܘܼܬ̣ܵܐ: ܐܸܬ̣ܢܲܒܝܼܘ ܒܒܲܥܠܵܐ ܘܐܲܛܥܝܼܘ ܠܲܡܝ ܝܼܣܪܵܝܹܠ.

¹⁴ ܘܒܲܢ̈ܒ̣ܝܲܝ ܐܘܿܪܸܫܠܸܡ ܚ̇ܙܹܝܬ̣ ܫܵܛܝܘܼܬ̣ܵܐ: ܓܲܝܵܪܝܼܢ ܘܲܡܗܲܠܟ݂ܝܼܢ ܒܫܘܼܩܪܵܐ: ܘܲܡܚܲܡܣܢܝܼܢ ܐܝܼܕܲܝ̈ܗܘܿܢ ܡ̣ܢ ܖ̈ܵܚܡܲܝܗܘܿܢ: ܕܠܵܐ ܢܸܗܦ̄ܟ݂ܘܼܢ ܓܒܲܪ ܡ̣ܢ ܐܘܼܪܚܹܗ ܒܝܼܫܬܵܐ: ܘܲܗܘ̤ܵܘ ܠܝܼ ܟܠܗܘܿܢ ܐܲܝܟ݂ ܣܕ݂ܘܿܡ: ܘܝܲܬܵܒܹܝ̈ܗ̇ ܐܲܝܟ݂ ܥܵܡܘܿܪܵܐ.

¹⁵ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ ܨܒ̣ܵܐܘܼܬ̣ ܥܲܠ ܢܒ̣ܝܹ̈ܐ: ܗܵܐ ܡܵܘܟܸ̇ܠ ܐ̄ܢܵܐ ܠܗܘܿܢ ܡܪܵܖܹ̈ܐ: ܘܐܲܫܩܹܐ ܐܸܢܘܿܢ ܡܲܝ̈ܵܐ ܡܲܪܝܼܖܹ̈ܐ: ܡܸܛܠ ܕܡ̣ܢ ܠܘܵܬ̣ ܢܒ̣ܝܹ̈ܐ ܕܐܘܿܪܸܫܠܸܡ ܢܸܦܩܲܬ̤ ܚܲܢܦܘܼܬ̣ܵܐ ܒܟ݂ܠܵܗ̇ ܐܲܪܥܵܐ.

¹⁶ ܗܵܟܲܢܵܐ ܐܵܡܲ݁ܪ ܡܵܪܝܵܐ ܨܒ̣ܵܐܘܼܬ̣: ܠܵܐ ܬܸܫ̱ܡܥܘܼܢ ܠܦܸܬ̣ܓ̣ܵܡܹ̈ܐ ܕܲܢܒ̣ܝܹ̈ܐ ܕܲܓܵܠܹ̈ܐ: ܕܡܸܬ̣ܢܲܒܸ̇ܝܢ ܠܟ݂ܘܿܢ ܘܡܲܛܥܹܝܢ ܠܟ݂ܘܿܢ: ܚܸܙܘܵܐ ܗ̄ܘ̣ ܕܠܸܒܗܘܿܢ ܡܡܲܠܠܝܼܢ: ܘܠܵܐ ܗ̄ܘܵܐ ܡ̣ܢ ܦܘܼܡ ܡܵܪܝܵܐ.

¹⁷ ܘܐܵܡ̇ܪܝܼܢ ܠܐܲܝܠܹܝܢ ܕܡܲܪܓ̇ܙܝܼܢ: ܒܦܸܬ̣ܓ̣ܵܡܹܗ ܕܡܵܪܝܵܐ ܫܠܵܡܵܐ ܢܸܗܘܸܐ ܠܟ݂ܘܿܢ: ܘܟ݂ܠ ܕܲܡܗܲܠܸܟ݂ ܒܨܸܒ̣ܝܵܢܵܐ ܕܠܸܒܹ̇ܗ ܐܵܡ̇ܪܝܼܢ ܠܹܗ: ܠܵܐ ܬܹܐܬܸܐ ܥܠܲܝܟ̇ܘܿܢ ܒܝܼܫܬܵܐ.

¹⁸ ܡܲـ̣ܢܘܼ ܓܹܝܪ ܩܵـ̣ܡ ܒܐ̄ܪܵܙܹܗ ܕܡܵܪܝܵܐ: ܘܲܚܙܵܝܗܝ ܘܲܫ̣ܡܲܥ ܦܸܬ̣ܓ̣ܵܡܹܗ: ܐܵܘ ܡܲـ̣ܢܘܼܨܵܬ̣ ܦܸܬ̣ܓܵܡܹܗ ܘܫܲܡ̣ܥܹܗ.

¹⁹ ܗܵܐ ܣܘܼܥܪܵܢܹܗ ܕܡܵܪܝܵܐ ܒܪܘܼܓ̣ܙܵܐ ܢܵـ̇ܦܹܩ: ܘܣܘܼܥܪܵܢܵܐ ܡܸܬ̣ܓܵܘܙܲܠ: ܥܲܠ ܪܹܫܵܐ ܕܖ̈ܲܫܝܼܥܹܐ ܢܸܬ̇ܬ̇ܢܝܼܚ.

²⁰ ܠܵܐ ܬܸܗܦܘܿܟ݂ ܚܸܡܬ̣ܵܐ ܕܪܘܼܓ̣ܙܹܗ ܕܡܵܪܝܵܐ ܥܕܲܡܵܐ ܕܢܸܥܒܸ̇ܕ݂: ܘܲܥܕܲܡܵܐ ܕܲܢܩܝܼܡ ܬܲܪܥܝܼܬ̣ܵܐ ܕܠܸܒܹܗ: ܒܐܲܚܪܵܝܑܼܬ̣ ܝܵܘ̈ܡܵܬ̣ܵܐ ܬܸܬ̣ܒܲܝܢܘܼܢ ܒܹܗ.

²¹ ܠܵܐ ܫܲܕ̇ܪܹܬ̣ ܠܲܢܒ̣ܝܹ̈ܐ ܘܗܸܢ̣ܘܿܢ ܐܸܙܲܠ̣ܘ: ܘܠܵܐ ܐܸܡ̇ܪܹܬ̣ ܠܗܘܿܢ ܘܗܸܢܘ̣ܿܢ ܐܸܬ̣ܢܲܒ̇ܝܼܘ.

²² ܘܠܵܐ ܩܵـ̣ܡܘ ܒܐ̄ܖ̈ܵܙܲܝ: ܘܐܲܫ̣ܡܲܥܘ ܦܸܬ̣ܓ̣ܵܡܲܝ̈ ܠܥܲܡܝ: ܘܐܲܬ̣ܝܼܒ̣ܘ ܐܸܢܘܿܢ ܡ̣ܢ ܐܘܼܖ̈ܚܵܬ̣ܗܘܿܢ ܒܝܼ̈ܫܵܬ̣ܵܐ: ܘܡ̣ܢ ܒܝܼܫܘܼܬ̣ ܥܒ̣ܵܕܲܝ̈ܗܘܿܢ.

²³ ܐܲܠܵܗܵܐ ܐ̄ܢܵܐ ܕܡ̣ܢ ܩܘܼܪܒܵܐ ܐܵܡܲ݁ܪ ܡܵܪܝܵܐ: ܘܠܵܐ ܗ̄ܘܹ̇ܝܬ̣ ܐܲܠܵܗܵܐ ܕܡ̣ܢ ܪܘܼܚܩܵܐ.

²⁴ ܐܸܢ ܢܸܛܫܸܐ ܓܲܒ̣ܪܵܐ ܒܛܘܼܫܝܲܝ: ܐܸܢܵܐ ܠܵܐ ܚܵܙܹ̇ܐ ܐ̄ܢܵܐ ܠܹܗ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ.

²⁵ ܫܸܡ̇ܥܹܬ̣ ܡܸܕܸܡ ܕܐܸܡ݂ܲܪܘ ܢܒ̣ܝܹ̈ܐ ܕܡܸܬ̣ܢܲܒܹ̇ܝܢ ܒܫܹܡܝ ܒܕܲܓܵܠܘܼܬ̣ܵܐ: ܘܐܵܡ̇ܪܝܼܢ ܚܸܠܡܵܐ ܚܸܠܡܹ̇ܬ̣.

²⁶ ܥܕܲܡܵܐ ܠܐܸܡܲܬ̣ܝ ܐܝܼܬ̣ ܒܦܘܼܡܗܘܿܢ ܕܲܢܒ̣ܝܹ̈ܐ ܕܲܓܵܠܹ̈ܐ ܢܒ̣̈ܝܼܵܘܵܬ̣ܵܐ ܕܲܓܵܠܵـ̈ܬ̣ܵܐ: ܢܒ̣̈ܝܼܵܘܵܬ̣ܵܐ ܕܢܸܟ݂ܠܵܐ ܕܠܸܒܗܘܿܢ.

²⁷ ܕܡܸܬ̣ܚܲܫܒ̣ܝܼܢ ܠܡܲܛܥܵܝܘܼ ܒܫܹܝܡܝ ܠܥܲܡܝ: ܒܚܸܠܡܲܝ̈ܗܘܿܢ ܕܡܸܫܬܲܥܹܝܢ ܓܒܲܪ ܠܚܲܒ̣ܪܹܗ: ܐܲܝܟ݂ ܕܲܛܥ̣ܵܘ ܐܲܒ̣ܵܗܲܝ̈ܗܘܿܢ ܫܹܡܝ ܘܲܦܠܲܚ̣ܘ ܠܒܲܥܠܵܐ.

²⁸ ܢܒ̣ܝܵܐ ܕܚܵܙܹ̇ܐ ܚܸܠܡܵܐ ܢܸܫܬܲܥܸܐ ܚܸܠܡܵܐ: ܘܲܕ݂ܦܸܬ̣ܓ̣ܵܡܲܝ̈ ܥܲܡܹܗ ܢܡܲܠܸܠ ܦܸܬ̣ܓ̣ܵܡܲܝ̈ ܒܩܘܼܫܬܵܐ: ܠܡܵܢܵܐ ܚܵـ̇ܠܟܝܪܢ ܐ̄ܢܬ̇ܘܿܢ ܬܸܒ̣ܢܵܐ ܒܲܥܒ̣ܘܼܪܵܐ ܐܵܡܲ݁ܪ ܡܵܪܝܵܐ.

²⁹ ܗܵܐ ܦܸܬ̣ܓ̣ܵܡܲܝ̈ ܐܲܝܟ݂ ܢܘܼܪܵܐ ܢܵܦ̇ܩܝܼܢ ܐܵܡܲ݁ܪ ܡܵܪܝܵܐ: ܘܐܲܝܟ݂ ܦܲܪܙܠܵܐ ܕܓ̣ܵܙܲܪ ܟܹܐܦܵܐ.

³⁰ ܡܸܛܠ ܗܵܢܵܐ ܗܵܐ ܐܸܢܵܐ ܥܲܠ ܢܒ̣ܝܹ̈ܐ ܐܵܡܲ݁ܪ ܡܵܪܝܵܐ: ܕܲܡܓܲܢܒ̣ܝܼܢ ܦܸܬ̣ܓ̣ܵܡܲܝ̈ ܐ̄ܢܵܫ ܡ̣ܢ ܚܲܒ̣ܪܹܗ.

³¹ ܗܵܐ ܐܸܢܵܐ ܥܲܠ ܢܒ̣ܝܹ̈ܐ ܐܵܡܲ݁ܪ ܡܵܪܝܵܐ: ܕܲܡܗܲܦܟ݂ܝܪܢ ܠܸܫܵܢܲܝ̈ܗܘܿܢ ܘܐܵܡܪܝܼܢ ܡܵܪܝܵܐ ܐܸܡ݂ܲܪ ܗܵܟܲܢܵܐ.

³² ܗܵܐ ܐܸܢܵܐ ܥܲܠ ܢܒ̣ܝܹ̈ܐ ܕܚܵܙܹ̇ܝܢ ܚܸܠܡܹ̈ܐ ܕܲܓܵܠܹ̈ܐ ܐܵܡܲ݁ܪ ܡܵܪܝܵܐ: ܘܡܸܫܬܲܥܹܝܢ ܠܗܘܿܢ: ܘܡܲܛܥܹܝܢ ܠܥܲܡܝ ܒܕܲܓܵܠܘܼܬ̣ܗܘܿܢ ܘܒ̣ܦܲܚܙܘܼܬ̣ܗܘܿܢ: ܘܐܸܢܵܐ ܠܵܐ ܦܲܩܕܹܬ̣ ܐܸܢܘܿܢ ܘܠܵܐ ܫܲܕܪܹܬ̣ ܐܸܢܘܿܢ: ܘܡܸܕܸܡ ܠܵܐ ܡܵܘܬ̇ܪܝܼܢ ܠܥܲܡܵܐ ܗܵܢܵܐ.

³³ ܘܟܲܕ݂ ܢܫܲܐܠܵܟ݂ ܥܲܡܵܐ ܗܵܢܵܐ: ܐܵܘ ܢܒ̣ܝܼܵܐ: ܐܵܘ ܟܲܗܢܵܐ: ܘܢܹܐܡܲܪ ܠܵܟ݂ ܡܵـ̇ܢܵܘ ܦܸܬ̣ܓ̣ܵܡܹܗ ܕܡܵܪܝܵܐ: ܐܸܡܲܪ ܠܗܘܿܢ ܐܲܢ̄ܬ̇: ܗܵܢ݁ܵܘ ܦܸܬ̣ܓ̣ܵܡܹܗ ܕܡܵܪܝܵܐ: ܕܐܸܥܩܘܿܪܟ݂ܘܿܢ ܐܵܡܲ݁ܪ ܡܵܪܝܵܐ.

³⁴ ܘܲܢܒ̣ܝܼܵܐ: ܐܵܘ ܟܵܗܢܵܐ: ܐܵܘ ܥܲܡܵܐ: ܕܢܹܐܡܲܪ ܦܸܬ̣ܓ̣ܵܡܹܗ ܕܡܵܪܝܵܐ: ܐܸܦܩܘܿܕ݂ ܥܲܠ ܓܲܒ̣ܪܵܐ ܗܵܘ̇ ܘܥܲܠ ܒܲܝܬܹܗ.

³⁵ ܗܵܟܲܢܵܐ ܬܹܐܡܪܘܼܢ ܓܒܲܪ ܠܚܲܒ̣ܪܹܗ ܘܲܓ̣ܒܲܪ ܠܐܲܚܘܼܗܝ: ܡܵܢܵܐ ܥ̣ܢܵܐ ܡܵܪܝܵܐ ܘܡܵܢܵܐ ܡܲܠܸܠ̣ ܡܵܪܝܵܐ.

³⁶ ܘܦܸܬ̣ܓ̣ܵܡܹܗ ܕܡܵܪܝܵܐ ܠܵܐ ܬܸܬ̇ܕܲܟܟܪܘܼܢ ܬܘܼܒ̣: ܡܸܛܠ ܕܦܸܬ̣ܓܵܟܡܵܐ ܢܸܗܘܸܐ ܠܓܲܒ̣ܪܵܐ ܢܒ̣ܝܘܼܬܹܗ: ܘܗܵܦܟ̇ܝܼܢ ܐܲܢ̄ܬ̇ܘܿܢ ܦܸܬ̣ܓ̣ܵܡܵܘ̈ܗܝ ܕܐܲܠܵܗܵܐ ܚܲܝܵܐ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܲܢ.

³⁷ ܗܵܟܲܢܵܐ ܬܹܐܡܪܘܼܢ ܠܓܲܒ̣ܪܵܐ: ܡܵܢܵܐ ܥܢܵܟ݂ ܡܵܪܝܵܐ ܘܡܵܢܵܐ ܡܲܠܸܠ̣ ܡܵܪܝܵܐ.

³⁸ ܘܐܸܢ ܦܸܬ̣ܓ̣ܵܡܹܗ ܕܡܵܪܝܵܐ ܬܹܐܡܪܘܼܢ: ܗܵܟܲܢܵܐ ܐܵܡܲ݁ܪ ܡܵܪܝܵܐ: ܥܲܠ ܕܐܸܡ݂ܲܪܬ̇ܘܿܢ ܦܸܬ̣ܓ̣ܵܡܵܐ ܗܵܢܵܐ: ܘܫܸܠܚܸ̇ܬ̣ ܠܟ݂ܘܿܢ ܕܠܵܐ ܬܹܐܡܪܘܼܢ.

³⁹ ܡܸܛܠ ܗܵܢܵܐ ܐܸܫܩܘܿܠܟ݂ܘܿܢ ܡܸܫܩܲܠ ܘܐܸܫܕܹܝܟ݂ܘܿܢ: ܘܠܲܩܪܝܼܬ̣ܵܐ ܕܝܸܗ̄ܒܹ݁ܬ̣ ܠܟ݂ܘܿܢ ܘܠܲܐܒ̣ܵܗܲܝ̈ܟ̇ܘܿܢ ܡ̣ܢ ܩܕ݂ܵܡ ܐܲܦܲܝ̈.

⁴⁰ ܘܐܸܬܸ̇ܠ ܥܠܲܝܟ̇ܘܿܢ ܚܸܣܕܵܐ ܕܥܵܠܲܡ: ܘܒܸܗܬ̇ܬ̣ܵܐ ܕܲܠܥܵܠܲܡ ܕܠܵܐ ܡܸܬ̇ܛܲܥܝܵܐ.

24

¹ ܚ̣ܵܘܝܲܢܝ ܡܵܪܝܵܐ ܬܲܪܬܹܝܢ ܡܣܲܢܹ̈ܐ ܕܬܹܐܢܹ̈ܐ: ܣܝܼ̈ܡܵܢ ܩܕܵܡ ܗܲܝܟ̇ܠܹܗ ܕܡܵܪܝܵܐ: ܡ̣ܢ ܒܵܬܲܪ ܕܲܫ̣ܒ̣ܵܐ ܢܒ̣ܘܼܟܲܕܢܵܨܲܪ ܡܲܠܟܵܐ ܕܒ̣ܵܒܹܠ: ܠܝܘܿܟܲܢܵܐ ܒܲܪ ܝܘܿܝܵܩܝܼܡ ܡܲܠܟܵܐ ܕܲܝܗܘܼܕ݂ܵܐ: ܘܠܐܘܼܡܵܢܹ̈ܐ ܘܲܠܕܲܚܫܹ̈ܐ ܡ̣ܢ ܐܘܿܪܸܫܠܸܡ: ܘܐܵܘܒܸ̇ܠ ܐܸܢܘܿܢ ܠܒ̣ܵܒܹܠ.

² ܡܣܲܢܬ̣ܵܐ ܚܕ݂ܵܐ ܕܬܹܐܢܹ̈ܐ ܕܛܵܒ̣ܵــ̈ܢ ܛܵܒ̣: ܐܲܝܟ݂ ܬܹܐܢܹ̈ܐ ܒܲܟܵܖ̈ܵܬ̣ܵܐ. ܘܲܡܣܲܢܬ̣ܵܐ ܐ̄ܚܪܹܝܬ̣ܵܐ ܕܬܹܐܢܹ̈ܐ: ܕܒ̣ܝܼܫܵܢ ܛܵܒ̣: ܕܠܵܐ ܡܸܬ̣ܐܲܟ݂̈ܠܵܢ ܡ̣ܢ ܒܝܼܫܘܼܬ̣ܗܹܝܢ.

³ ܘܐܸܡ݂ܲܪ ܠܝܪ ܡܵܪܝܵܐ: ܡܵܢܵܐ ܚ̣ܙܲܝܬ̇ ܐܹܪܲܡܝܵܐ: ܘܐܸܡ̇ܪܹܬ̣: ܬܹܐܢܹ̈ܐ ܕܛܵܒ̣ܵـ̈ܢ: ܛܵܒ̣ܵـ̈ܢ ܛܵܒ̣ ܘܲܕ݂ܒ̣ܝܼ̈ܫܵܢ: ܒܝܼ̈ܫܵܢ ܛܵܒ̣: ܕܠܵܐ ܡܸܬ̣ܐܲܟ݂̈ܠܵܢ ܡ̣ܢ ܒܝܼܫܘܼܬ̣ܗܹܝܢ.

⁴ ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

⁵ ܗܵܟܲܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܲܝܟ݂ ܬܹܐܢܹ̈ܐ ܛܵܒ̣ܵـ̈ـܬܵܐ ܗܵܠܝܹܢ: ܗܵܟܲܢܵܐ ܐܸܫܬܵܘܕ̇ܥܝܼܗ̇ ܠܲܫܒ̣ܝܼܬ̣ܵܐ ܕܲܝܗܘܼܕ݂ܵܐ ܕܫܲܕ̇ܪܹܬ̣ ܡ̣ܢ ܐܲܬ̣ܪܵܐ ܗܵܢܵܐ: ܠܐܲܪܥܵܐ ܕܟܲܠܕܵܝܹ̈ܐ ܠܛܵܒ̣ܬ̣ܵܐ.

⁶ ܘܐܹܣܝܼܡ ܥܲܝܢܝ ܥܠܲܝܗܘܿܢ ܠܛܵܒ̣ܬ̣ܵܐ ܘܠܵܐ ܠܒ̣ܝܼܫܬܵܐ ܐܵܡܲ݁ܪ ܡܵܪܝܵܐ: ܘܐܲܗܦܸܟ݂ ܐܹܢܘܿܢ ܠܐܲܬ̣ܪܵܐ ܗܵܢܵܐ: ܘܐܹܒ̣ܢܸܐ ܐܸܢܘܿܢ ܘܠܵܐ ܐܸܣܚܘܿܦ: ܘܐܹܨܘܿܒ̣ ܐܸܢܘܿܢ ܘܠܵܐ ܐܸܥܩܘܿܪ.

⁷ ܘܐܸܬܸܠ ܠܗܘܧܢ ܠܸܒܵܐ ܕܢܸܕܥܘܼܢܵܢܝ ܕܐܸܢܵܐ ܐ̄ܢܵܐ ܡܵܪܝܵܐ: ܘܢܸܗܘܘܿܢ ܠܝܼ ܡܵܪܝܵܐ ܥܲܡܵܐ: ܘܐܸܢܵܐ ܐܸܗܘܸܐ ܠܗܘܿܢ ܐܲܠܵܗܵܐ: ܟܲܕ݂ ܢܬ̣ܘܼܒ̣ܘܼܢ ܠܘܵܬܝ ܡ̣ܢ ܟܠܹܗ ܠܸܒܗܘܿܢ.

⁸ ܘܐܲܝܟ݂ ܬܹܢܹ̈ܐ ܒܝܼܫܵܬ̣ܵܐ ܕܠܵܐ ܡܸܬ̣ܐܲܟ݂̈ܠܵܢ ܡ̣ܢ ܒܝܼܫܘܼܬ̣ܗܹܝܢ: ܗܵܟܲܢܵܐ ܐܵܡܲܥ ܡܵܪܝܵܐ: ܗܵܟܲܢܵܐ ܐܸܫܠ̱ܡܝܼܘܗܝ ܠܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ ܘܲܠܪܵܘܖ̈ܒ̣ܵܢܵܘܗܝ: ܘܲܠܫܲܪܟܵܐ ܕܥܲܡܵܐ ܕܐܹܫܬ̇ܚܲܪܘ ܒܲܩܪܝܼܬ̣ܵܐ ܗܵܕܹܐ: ܘܲܕ݂ܝܵـ̇ܬ̣ܒ̇ܝܼܢ ܒܐܲܪܥܵܐ ܕܡܸܨܪܹܝܢ.

⁹ ܘܐܹܬܸ̇ܠ ܐܸܢܘܿܢ ܠܙܵܘܸܥܬ̣ܵܐ: ܘܠܲܢܝܵܕ݂ܵܐ: ܘܲܠܒ̣ܝܼܫܬܵܐ: ܒܲܝܢܵܬ݂ܵܟ݂ ܟܠܗܹܝܢ ܡܲܠـ̈ܟ̇ܘܵܬ̣ܵܐ ܕܐܲܪܥܵܐ: ܠܚܸܣܕ݂ܵܐ: ܘܲܠܡܲܬ̣ܠܵܐ: ܘܲܠܬ̣ܘܼܢܵܝܵܐ: ܘܲܠܠܵܘܛܵܬ̣ܵܐ: ܒܟ݂ܠܗܘܿܢ ܐܲܬ̣ܖ̈ܵܘܵܬ̣ܵܐ ܕܒܲܕ̇ܪܹܬ̣ ܐܸܢܘܿܢ ܠܬܲܡܵܢ.

¹⁰ ܘܐܹܫܲܕܲܪ ܒܵܬܲܪܗܘܿܢ ܚܲܪܒܵܐ: ܘܟܲܦܢܵܐ: ܘܡܵܘܬܵܢܵܐ: ܥܕܲܡܵܐ ܕܐܹܓܲܡܲܪ ܐܸܢܘܧܢ ܡ̣ܢ ܐܲܪܥܵܐ: ܕܝܸܗ̄ܒܹ݁ܬ̣ ܠܗܘܿܢ ܘܠܲܐܒ̣ܵܗܲܝ̈ܗܘܿܢ.

25

¹ ܦܸܬ̣ܓ̣ܵܡܵܐ ܕܲܗܘ̤ܵܐ ܥܲܠ ܐܸܪܲܡܝܵܐ ܥܲܠ ܟܠܹܗ ܥܲܡܵܐ ܕܲܝܗܘܼܕ݂ܵܐ: ܒܫܲܢ̄ܬܵܐ ܪܒ̣ܝܼܥܵܝܬܵܐ ܕܝܘܿܝܵܩܝܼܡ ܒܲܪ ܝܘܿܫܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܗ̤ܝ ܗܞܝ̣ ܫܲܢ̄ܬܵܐ ܩܲܕ݂ܡܵܝܬܵܐ ܕܲܢܒ̣ܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ.

² ܕܐܸܡ݂ܲܪ ܐܹܪܲܡܝܵܐ ܢܒ̣ܝܵܐ ܥܲܠ ܟܠܹܗ ܥܲܡܵܐ ܕܲܝܗܘܼܕ݂ܵܐ: ܘܥܲܠ ܟܠܗܘܿܢ ܥܲܡܘܿܖܹ̈ܝܗ̇ ܕܐܘܿܪܸܫܠܸܡ ܠܡܹܐܡܲܪ.

³ ܡ̣ܢ ܬܠܵܬܲܥܸܣܖܹ̈ܐ ܫܢܝܼ̈ܢ ܠܝܘܿܫܝܼܵܐ ܒܲܪ ܐܲܡܘܿܢ ܡܲܠܟܵܐ ܕܲܝܗܘܼܕ݂ܵܐ: ܘܲܥܕܲܡܵܐ ܠܝܵܘܡܵܐ ܗܵܢܵܐ: ܗܵܐ ܥܸܣܪܝܼܢ ܘܲܬ̣ܠܵܬ̣ ܫܢܝܼ̈ܢ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܘܐܸܡ̇ܪܹܬ̣ ܠܟ݂ܘܿܢ: ܩܲܕ̇ܡܹ̇ܬ̣ ܟܠܝܘܿܡ ܘܐܸܡ̇ܪܹܬ̣ ܘܠܵܐ ܫـ̣ܡܲܥܬ̇ܘܿܢ.

⁴ ܘܫܲܕܲܪ ܡܵܪܝܵܐ ܠܘܵܬ̣ܟ݂ܘܿܢ ܟܠܗܘܿܢ ܥܲܒ̣ܕܵܘ̈ܗܝ ܢܒ݂ܝܹ̈ܐ: ܩܲܕܸܡ ܘܫܲܕܲܪ ܘܠܵܐ ܫـ̣ܡܲܥܬ̇ܘܿܢ: ܘܠܵܐ ܐܲܪܟܸ̇ܢܬ̇ܘܿܢ ܐܸܕ݂ܢ̱ܟ݂ܘܿܢ ܠܡ̱ܫܡܲܥ.

⁵ ܘܲܠܡܹܐܡܲܪ ܬܘܼܒ̣ܘ ܓܒܲܪ ܡ̣ܢ ܐܘܼܪܚܹܗ ܒܝܼܫܬܵܐ: ܘܡ̣ܢ ܒܝܼܫܘܼܬ̣ ܥܒ̣ܵܕܲܝ̈ܟ̇ܘܿܢ: ܘܬܸܒ̣ܘ ܒܐܲܪܥܵܐ ܕܝܲܗ̄ܒ̣ ܡܵܪܝܵܐ ܠܟ݂ܘܿܢ ܘܠܲܐܒ̣ܵܗܲܝ̈ܟ̇ܘܿܢ: ܡ̣ܢ ܥܵܠܲܡ ܘܲܥܕܲܡܵܐ ܠܥܵܠܲܡ.

⁶ ܘܠܵܐ ܬܹܐܙ̄ܠܘܼܢ ܒܵܬܲܪ ܐܲܠܵܗܹ̈ܐ ܐ̄ܚܖ̈ܵܢܹܐ: ܐܡܸܦܠܲܚ ܐܸܢܘܿܢ ܘܲܠܡܸܣܓܲܕܪ ܠܗܘܿܢ: ܘܠܵܐ ܬܲܪܓ̇ܙܘܼܢܵܢܝ ܒܲܥـ̇ܒ̣ܵܕ݂ ܐܝܼܕܲܝ̈ܟ̇ܘܿܢ: ܕܠܵܐ ܐܲܒ̣ܐܸܫ ܠܟ݂ܘܿܢ.

⁷ ܘܠܵܐ ܫ̣ܡܲܥܬ̇ܘܿܢܵܢܝ ܐܵܡܲ݁ܪ ܡܵܪܝܵܐ: ܘܐܲܪܓܸ̇ܙܬ̇ܘܿܢܵܢܝ ܒܲܥـ̇ܒ̣ܵܕ݂ ܐܝܼܕܲܝ̈ܟ̇ܘܿܢ ܕܢܸܒ̣ܐܲܫ ܠܟ݂ܘܿܢ.

⁸ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ ܨܒ̣ܵܐܘܼܬ̣: ܥܲܠ ܕܠܵܐ ܫܡܲܥܬ̇ܘܿܢ ܦܸܬ̣ܓ̣ܵܡܲܝ̈.

⁹ ܗܵܐ ܡܫܲܕܲܪ ܐ̄ܢܵܐ ܘܕܲܒܲܪ ܐ̄ܢܵܐ ܠܟ݂ܠܗܹܝܢ ܫܲܖ̈ܒ̣ܵܬ̣ܵܐ ܕܡܲܠ̈ܟ̇ܘܵܬ̣ܵܐ ܕܓܲܪܒ̇ܝܵܐ ܐܵܡܲ݁ܪ ܡܵܪܝܵܐ: ܘܠܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܥܲܒ̣ܕܝ: ܘܐܲܝܬܸ̇ܝ ܐܸܢܘܿܢ ܥܲܠ ܐܲܪܥܵܐ ܗܵܕܹܐ ܘܥܲܠ ܥܵܡܘܿܖܹ̈ܝܗ̇: ܘܥܲܠ ܟܠܗܘܿܢ ܥܲܡܡܹ̈ܐ ܗܵܠܹܝܢ ܕܒܲܚܕ݂ܵܖܹ̈ܝܗ̇: ܘܐܸܚܪܘܿܒ̣ ܐܸܢܘܿܢ: ܘܐܸܥܒܸ̇ܕܪ ܐܸܢܘܿܢ ܠܬܸܡܗܵܐ ܘܲܠܡܲܫܪܘܿܩܝܼܬ̣ܵܐ: ܘܲܠܚܘܿܪܒܵܐ ܠܥܵܠܲܡ.

¹⁰ ܘܐܵܘܒܸ̇ܕ݂ ܡܸܢܗܘܿܢ ܩܵܠܵܐ ܕܲܕ݂ܝܵܨܵܐ: ܘܩܵܠܵܐ ܕܚܵܕ݂ܘܼܬ̣ܵܐ: ܩܵܠܵܐ ܕܚܲܬ̣ܢܵܐ ܘܩܵܠܵܐ ܕܟܲܠܬ̣ܵܐ: ܩܵܠܵܐ ܕܪܲܚܝܵܐ : ܘܢܘܼܗܪܵܐ ܕܲܫܪܵܓ̣ܵܐ.

¹¹ ܘܬܸܗܘܸܐ ܐܲܪܥܵܐ ܗܵܕܹܐ ܟܠܵܗܚ ܠܚܘܼܪܒܵܐ ܘܲܠܬܸܡܗܵܐ: ܘܢܸܦ̱ܠܚܘܼܢ ܥܲܡܡܹ̈ܐ ܗܵܠܹܝܢ ܠܡܲܠܟܵܐ ܕܒ̣ܵܒܹܠ ܫܲܒ̣ܥܝܼܢ ܫܢܝܼ̈ܢ.

¹² ܘܡܵܐ ܕܲܫܠܸـ̣ܡ ܫܲܒ̣ܥܝܼܢ ܫܢܝܼ̈ܢ: ܐܸܦܩܘܿܕ݂ ܥܲܠ ܡܲܠܟܵܐ ܕܒ̣ܵܒܹܠ ܘܥܲܠ ܥܲܡܹܗ ܚܵܘ̈ܒܲܝܗܘܿܢ ܐܵܡܲ݁ܪ ܡܵܪܝܵܐ: ܘܥܲܠ ܐܲܪܥܵܐ ܕܟܲܠܕܵܝܹ̈ܐ: ܘܐܸܥܒ̇ܕ݂ܝܼܗ̇ ܠܬܸܡܗܵܐ ܠܥܵܠܲܡ.

¹³ ܘܐܲܝܬܸ̇ܐ ܥܲܠ ܐܲܪܥܵܐ ܗܵܝ̇: ܟܠܗܘܿܢ ܦܸܬ̣ܓ̣ܵܡܹ̈ܐ ܕܐܸܡ̇ܪܹܬ̣ ܥܠܹܝܗ̇: ܟܠ ܡܸܕܸܡ ܕܲܟ݂ܬ̣ܝܼܒ̣ ܒܣܸܦܪܵܐ ܗܵܢܵܐ: ܕܐܸܬ̣ܢܲܒ̇ܝܼ ܐܹܪܲܡܝܵܐ ܥܲܠ ܟܠܗܘܿܢ ܥܲܡܡܹ̈ܐ.

¹⁴ ܡܸܛܠ ܕܫܲܥܒܸ̇ܕ݂ܘ ܐܸܢܘܿܢ ܐܵܦ ܠܗܘܿܢ: ܥܲܡܡܹ̈ܐ ܣܲܓ̇ܝܼ̈ܐܹܐ: ܘܡܲܠ̈ܟܹ̇ܐ ܪܵܘܖ̈ܒܹܐ: ܘܐܸܦܪܘܿܥ ܐܸܢܘܿܢ ܐܲܝܟ݂ ܦܲܥܠܗܘܿܢ: ܘܐܲܝܟ݂ ܥܒ̣ܵـ̇ܕ݂ܵܐ ܕܐܝܼܕܲܝ̈ܗܘܿܢ.

¹⁵ ܡܸܛܠ ܕܗܵܟܲܢܵܐ ܐܵܡ݁ܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܣܲܒ̣ ܟܵܣܵܐ ܕܚܲܡܪܵܐ ܕܚܸܡܬ̣ܵܐ ܗܵܕܹܐ ܡ̣ܢ ܐܝܼܕܿܝ: ܘܐܲܫܩܵܝܗܝ ܠܟ݂ܠܗܘܿܢ ܥܲܡܡܹ̈ܐ ܐܲܝܠܹܝܢ ܕܲܡܫܲܕܲܪ ܐ̄ܢܵܐ ܠܵܟ݂ ܥܠܲܝܗܘܿܢ.

¹⁶ ܘܢܸܫܬ̇ܘܿܢ ܘܢܸܬ̣ܘ̱ܪܘܼܢ: ܘܢܸܬ̇ܛܲܪܦܘܼܢ: ܡ̣ܢ ܩܕ݂ܵܡ ܚܲܪܒܵܐ ܕܲܡܫܲܕܲܪ ܐ̄ܢܵܐ ܒܲܝܢܵܬ̣ܗܘܿܢ.

¹⁷ ܘܢܸܣܒܹ̇ــ̇ܬ̣ ܟܵܣܵܐ ܡ̣ܢ ܐܝܼܕܹܗ ܕܡܵܪܝܵܐ: ܘܐܲܫܩ̇ܝܼܬ̇ ܠܟ݂ܠܗܘܿܢ ܥܲܡܡܹ̈ܐ ܕܫܲܕܪܲܢܝ ܡܵܪܝܵܐ ܥܠܲܝܗܘܿܢ.

¹⁸ ܠܐܘܿܪܸܫܠܸܡ ܘܲܠܩܘܼܖ̈ܝܵܐ ܕܲܝܗܘܼܕ݂ܵܐ: ܘܲܠܡܲܠܟܹ̇ܝ̈ܗ̇ ܘܲܠܪܵܘܖ̈ܒ̣ܵܢܹܝܗ̇: ܠܡܸܥܒܲܕ݂ ܐܸܢܘܿܢ ܠܚܘܼܪܒܵܐ ܘܲܠܬܸܡܗܵܐ: ܘܲܠܡܲܫܪܘܿܩܝܼܬ̣ܵܐ ܥܕܲܡܵܐ ܠܝܵܘܡܵܢܵܐ.

¹⁹ ܠܦܸܪܥܘܿܢ ܡܲܠܟܵܐ ܕܡܸܨܪܹܝܢ ܘܲܠܟ݂ܠܗܘܿܢ ܥܲܒ̣ܕܵܘ̈ܗܝ: ܘܲܠܪܵܘܖ̈ܒ̣ܵܢܵܘܗܝ ܘܲܠܟ݂ܠܹܗ ܥܲܡܹܗ.

²⁰ ܘܲܠܟ݂ܠܗܘܿܢ ܬܚܘܼܡܵܘ̈ܗܝ: ܘܠܟ݂ܠܗܘܿܢ ܡܲܠ̈ܟܹܐ ܕܐܲܪܥܵܐ ܕܥܘܿܨ: ܘܲܠܟ݂ܠܗܘܿܢ ܡܲܠ̈ܟܹ̇ܐ ܕܐܲܪܥܵܐ ܕܲܦܠܸܫܬܵܝܹ̈ܐ: ܘܠܲܐܫܩܵܠܘܿܢ ܘܲܠܥܵܐܙܵܐ: ܘܲܠܥܸܩܪܘܿܢ ܘܲܠܫܲܪܟܵܐ ܕܐܲܫܕ̇ܘܿܕ݂.

²¹ ܘܠܲܐܕ݂ܘܿܡ ܘܲܠܡܘܼܐܵܒ̣ ܘܠܲܒܢܲܝ̈ ܥܲܡܘܿܢ.

²² ܘܲܠܟ݂ܠܗܘܿܢ ܡܲܠ̈ܟܹ̇ܐ ܕܨܘܿܪ: ܘܲܠܟ݂ܠܗܘܿܢ ܡܲܠ̈ܟܹ̇ܐ ܕܨܲܝܕܵܢ: ܘܲܠܡܲܠ̈ܟܹ̇ܐ ܕܓ̣ܵܙܖ̈ܵܬ̣ܵܐ ܕܲܒ̣ܥܸܒ̣ܪܵܐ ܕܝܲܡܵܐ.

²³ ܘܲܠܕ݂ܵܪܵܢ: ܘܲܠܬܲܝܡܢܵܐ: ܘܲܠܒ̣ܘܿܙ: ܘܲܠܟ݂ܠܗܘܿܢ ܩܨܝܼ̈ܨܲܝ ܦܲܐܬ̣ܵܐ.

²⁴ ܘܲܠܟ݂ܠܗܘܿܢ ܡܲܠ̈ܟܹ̇ܐ ܕܲܡܬܲܚܡܝܼܢ ܚܲܕ݂ ܥܲܡ ܚܲܕ݂: ܘܲܠܟ݂ܠܗܘܿܢ ܡܲܠ̈ܟܹ̇ܐ ܕܥܲܖ̈ܒ̣ܵܝܹܐ ܕܲܫܪܹܝܢ ܒܡܲܕ݂ܒ̇ܪܵܐ.

²⁵ ܘܲܠܟ݂ܠܗܘܿܢ ܡܲܠ̈ܟܹ̇ܐ ܕܙܲܡܪܵܢ ܘܲܠܟ݂ܠܗܘܿܢ ܡܲܠ̈ܟܹ̇ܐ ܕܥܝܼܠܲܡ: ܘܲܠܟ݂ܠܗܘܿܢ ܡܲܠ̈ܟܹ̇ܐ ܕܡܵܕܲܝ.

²⁶ ܘܠܟ݂ܠܗܘܿܢ ܡܲܠ̈ܟܹ̇ܐ ܕܓܲܪܒ̇ܝܵܐ ܕܪܲܚܝܼܩܝܼܢ ܘܲܕ݂ܩܲܪܝܼܒ̣ܝܼܢ ܓܒܲܪ ܠܚܲܒ̣ܪܹܗ: ܘܲܠܟ݂ܠܗܹܝܢ ܡܲܠܟ̇ـܘ̈ܵܬ̣ܵܐ ܕܐܝܼܬ̣ ܥܲܠ ܐܲܦܲܝ̈ ܐܲܪܥܵܐ ܟܠܵܗ̇: ܘܡܲܠܟܵܐ ܐܵܪܹܫܟ݂ܵܝܵܐ ܢܸܫܬܸ̇ܐ ܒܵܬܲܪܗܘܿܢ.

²⁷ ܘܐܸܡܲܪ ܠܗܘܿܢ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܐܸܫܬܵܘ ܘܲܪܘܵܘ ܘܐܸܬ̣ܛܲܪܲܦܘ ܘܦܸܠܘ ܘܠܵܐ ܬܩܘܼܡܘܼܢ: ܡ̣ܢ ܩܕ݂ܵܡ ܚܲܪܒܵܐ ܕܲܡܫܲܕܲܪ ܐ̄ܢܵܐ ܒܲܝܢܵܬ̣ܟ݂ܘܿܢ.

²⁸ ܘܐܸ ܠܵܐ ܢܸܨܒ̇ܘܿܢ ܠܡܸܣܲܒ̣ ܟܵܣܵܐ ܡ̣ܢ ܐܝܼܕܵܟ݂ ܠܡܵܫܬܵܐ: ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܡܸܫܬܵܐ ܬܸܫܬ̇ܘܿܢ.

²⁹ ܡܸܛܠ ܕܗܵܐ ܩܪܝܼܬ̣ܵܐ ܕܐܸܬ̣ܩܪܝܼ ܫܹܡܝ ܥܠܹܝܗ̇: ܡܸܢܵܗ̇ ܡܫܲܪܸܐ ܐ̄ܢܵܐ ܠܡܲܒ̣ܐܵܫܘܼ ܠܵܗ̇: ܘܐܲܢ̄ܬ̇ܘܿܢ ܡܸܙܟܵܐ ܬܸܙܟ̇ܘܿܢ: ܠܵܐ ܬܸܙܟ̇ܘܿܢ: ܡܸܛܠ ܕܚܲܪܒܵܐ ܩܵـ̇ـܪܹܐ ܐ̄ܢܵܐ ܥܲܠ ܟܠܗܘܿܢ ܥܵܡܘܿܖܹ̈ܝܗ̇ ܕܐܲܪܥܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ.

³⁰ ܘܐܲܢ̄ܬ̇ ܬܸܬ̣ܢܲܒܹ̇ܐ ܥܠܲܝܗܘܿܢ ܟܠܗܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ: ܘܬܹܐܡܲܪ ܠܗܘܿܢ: ܡܵܪܝܵܐ ܡ̣ܢ ܪܵܘܡܵܐ ܢܸܢܗܲܡ: ܘܡ̣ܢ ܡܲܥܡܪܵܐ ܕܩܘܼܕ݂ܫܹܗ ܢܸܬܸ̇ܠ ܩܵܠܹܗ: ܡܸܢܗܲܡ ܢܸܢܗܲܡ ܥܲܠ ܕܲܝܪܹܗ: ܝܵܗܵܝ ܝܵܗܵܝ ܐܲܝܟ݂ ܥܵܨܘܿܪܵܐ ܢܸܥܢܸܐ: ܥܲܠ ܟܠܗܘܿܢ ܥܵܡܘܿܖܹ̈ܝܗ̇ ܕܐܲܪܥܵܐ.

³¹ ܡ̣ܛܵܐ ܪܓ̣ܘܼܫܝܵܐ ܥܕܲܡܵܐ ܠܣܵܘ̈ܦܹܝܗ̇ ܕܐܲܪܥܵܐ: ܡܸܛܠ ܕܕ݂ܝܼܢܵܐ ܠܡܵܪܝܵܐ ܥܲܡ ܥܲܡܡܹ̈ܐ: ܘܕ݂ܵܐܹܢ ܗ̄ܘ ܠܟ݂ܠ ܒܣܲܪ: ܘܖ̈ܲܫܝܼܥܹܐ ܐܲܫܠܸܡ ܐܸܢܘܿܢ ܠܚܲܪܒܵܐ: ܐܵܡܲ݁ܪ ܡܵܪܝܵܐ.

³² ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܒܝܼܫܬܵܐ ܢܵܦ̇ܩܵܐ ܡ̣ܢ ܥܲܡܵܐ ܠܥܲܡܵܐ: ܘܥܲܠܥܵܠܵܐ ܪܲܒܬ̣ܵܐ ܬܕ݂ܘܼܠ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ.

³³ ܘܢܸܗܘܘܿܢ ܩܛܝܼܠܵܘ̈ܗܝ ܕܡܵܪܝܵܐ ܒܝܵܘܡܵܐ ܗܵܘ̇: ܡ̣ܢ ܣܵܘ̈ܦܹܝܗ̇ ܕܐܲܪܥܵܐ ܘܲܥܕܲܡܵܐ ܠܣܵܘ̈ܦܹܝܗ̇ ܕܐܲܪܥܵܐ: ܠܵܐ ܢܲܝܠܠܘܼܢ ܘܠܵܐ ܢܲܪܩܕ݂ܘܼܢ: ܘܠܵܐ ܢܸܒ̣ܟ̇ܘܿܢ ܥܠܲܝܗܘܿܢ: ܘܠܵܐ ܢܸܬ̣ܟܲܢܫܘܿܢ ܘܠܵܐ ܢܸܬ̣ܩܲܒ̣ܪܘܿܢ: ܐܸܠܵܐ ܐܲܝܟ݂ ܙܸܒ̣ܠܵܐ ܥܲܠ ܐܲܦܲܝ̈ ܐܲܪܥܵܐ ܢܸܗܘܘܿܢ.

³⁴ ܐܲܝܠܸܠܘ ܖ̈ܵܥܵܘܵܬ̣ܵܐ ܘܐܲܙܥܸܩܘ: ܘܐܸܬ̣ܦܲܠܦܲܠܘ ܥܲܫܝܼܢܲܝ̈ ܥܵـ̈ـܢܵܐ: ܕܲܡ̣ܠܵܘ ܝܵܘ̈ܡܵܬ̣ܟ݂ܘܿܢ ܠܩܸܛܠܵܐ: ܘܬܸܬܲܒ̣ܘܼܢ ܘܬܸܦܠܘܼܢ ܐܲܝܟ݂ ܡܵܐܢܲܝ̈ ܪܸܓ̇ܬ̣ܵܐ.

³⁵ ܘܢܹܐܒܲܕ݂ ܒܹܝܬ̣ ܥܪܘܼܩܝܵܐ ܡ̣ܢ ܖ̈ܵܥܵܘܵܬ̣ܵܐ: ܘܦܘܼܠܵܛܵܐ ܡ̣ܢ ܕܸܟ݂ܖܹ̈ܐ ܕܥܵـ̈ـܢܵܐ.

³⁶ ܩܵܠ ܙܥܵܩܬ̣ܵܐ ܕܖ̈ܵܥܵܘܵܬ̣ܵܐ: ܘܝܑܼܠܲܠܬܵܐ ܕܕܸܟ݂ܖܹ̈ܐ ܕܥܵـ̈ـܢܵܐ ܕܒܲـ̣ܙ ܡܵܪܝܵܐ ܡܲܖ̈ܥܝܵܬ̣ܗܘܿܢ.

³⁷ ܘܢܸܬ̇ܬܲܒ̣ܖ̈ܵܢ ܕܲܝܖܹ̈ܐ ܕܲܫܠܵܡܵܐ: ܡ̣ܢ ܩܕ݂ܵܡ ܚܸܡܬ̣ܵܐ ܕܪܘܼܓ̣ܙܹܗ ܕܡܵܪܝܵܐ.

³⁸ ܡܸܛܠ ܕܲܫ̣ܒܲܩܘ ܕܲܝܪܹܗ: ܐܲܝܟ݂ ܐܲܪܝܵܐ ܕܫܵـ̇ܒܹܩ ܡܲܪܒܘܿܥܝܼܬܹܗ: ܡܸܛܠ ܕܲܗܘ̤ܵܬ̣ ܐܲܪܥ̱ܗܘܿܢ ܠܚܘܼܪܒܵܐ ܡ̣ܢ ܩܕ݂ܵܡ ܪܘܼܓ̣ܙܹܗ ܕܡܵܪܝܵܐ: ܘܡ̣ܢ ܩܕ݂ܵܡ ܚܸܡܬ̣ܵܐ ܕܪܘܼܓ̣ܙܹܗ.

26

¹ ܒܪܹܫ ܡܲܠܟܘܼܬܹܗ ܕܝܘܿܝܵܩܝܪܡ ܒܲܪ ܝܘܿܫܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ ܥܲܠ ܐܹܪܲܡܝܵܐ ܡ̣ܢ ܩܕ݂ܵܡ ܡܵܪܝܵܐ: ܘܐܸܡ݂ܲܪ.

² ܗܵܟܲܢܵܐ ܐܵܡܲ݁ܪ ܡܵܪܝܵܐ: ܩܘܼܡ ܒܕ݂ܵܪܬܵܐ ܕܒܲܝܬܹܗ ܕܡܵܪܝܵܐ: ܘܐܸܡܲܪ ܠܟ݂ܠܗܹܝܢ ܩܘܼܖ̈ܝܵܐ ܕܲܝܗܘܼܕ݂ܵܐ ܕܐܵܬܹ݁ܝܢ ܠܡܸܣܓܲܕ݂ ܒܒܲܝܹ̇ܗ ܕܡܵܪܝܵܐ: ܟܠܗܘܿܢ ܦܸܬ̣ܓ̣ܵܡܹ̈ܐ ܕܦܲܩܸܕܬܵܟ݂ ܠܡܹܐܡܲܪ ܠܗܘܿܢ: ܠܵܐ ܬܒܲܨܲܪ ܐܵܦܠܵܐ ܚܕ݂ܵ ܡܸܠܵܐ.

³ ܛܵܟ݂ ܢܸܫ̱ܡܥܘܼܢ ܘܲܢܬ̣ܘܼܒ̣ܘܼܢ ܓܒܲܪ ܡ̣ܢ ܐܘܼܪܚܹܗ ܒܝܼܫܬܵܐ: ܘܐܸܫܠܸܐ ܡ̣ܢ ܒܝܼܫܬܵܐ ܕܐܸܬ̣ܚܲܫܒܹ̇ܬ̣ ܠܡܸܥܒܲܕ݂ ܠܗܘܿܢ: ܡܸܛܠ ܒܝܼܫܘܼܬ̣ܵܐ ܕܲܥܒ̣ܵܕܲܝ̈ܗܘܿܢ.

⁴ ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲ݁ܪ ܡܵܪܝܵܐ: ܐܸܢ ܠܵܐ ܬܸܫ̱ܡܥܘܼܢܵܢܝ ܘܲܬ̣ܗܲܠܟ݂ܘܼܢ ܒܢܵܡܘܿܣܝ ܕܝܸܗ̄ܒܹ̇ܬ̣ ܩܕ݂ܵܡܲܝܟ̇ܘܿܢ.

⁵ ܘܬܸܫ̱ܡܥܘܼܢ ܠܦܸܬ̣ܓ̣ܵܡܹ̈ܐ ܕܥܲܒ̣̈ܕܲܝ ܢܒ̣ܝܹ̈ܐ ܕܐܸܢܵܐ ܡܫܲܕܲܪ ܠܘܵܬ̣ܟ݂ܘܿܢ: ܩܲܕܡܹـ̇ܬ̣ ܟܠܝܘܿܡ ܘܫܲܕܪܹܬ̣ ܘܠܵܐ ܫܡܲـ̣ܥܬ̇ܘܿܢ.

⁶ ܐܸܥܒ̇ܕ݂ܝܼܘܗܝ ܠܒܲܝܬܵܐ ܗܵܢܵܐ ܐܲܝܟ݂ ܫܝܼܠܘܿ: ܘܠܲܩܪܝܼܬ̣ܵܐ ܗܵܕܹܐ ܐܸܬܸ̇ܠ ܠܠܵܘܛܬ̣ܵܐ ܠܟ݂ܠܗܘܿܢ ܥܲܡܡܹ̈ܐ ܕܐܲܪܥܵܐ.

⁷ ܘܲܫـ̣ܡܲܥܘ ܟܵܗܢܹ̈ܐ ܘܲܢܒ̣ܝܹ̈ܐ ܕܲܓܵܠܹ̈ܐ ܘܟ݂ܠܹܗ ܥܲܡܵܐ: ܠܐܹܪܲܡܝܵܐ ܢܒ̣ܝܼܵܐ ܟܲܕ݂ ܡܡܲܠܸܠ ܦܸܬ̣ܓ̣ܵܡܹ̈ܐ ܗܵܠܹܝܢ ܒܒܲܝܬܹ̇ܗ ܕܡܵܪܝܵܐ.

⁸ ܘܟܲܕ݂ ܫܲܠܸـ̣ܡ ܐܹܪܲܡܵܐ ܠܡܹܐܡܲܪ ܟܠܡܸܕܸܡ ܕܦܲܩ̣ܕܹܗ ܡܵܪܝܵܐ ܠܡܹܐܡܲܪ ܠܟ݂ܠܹܗ ܥܲܡܵܐ: ܐܲܚܕܘܼܗܝ ܟܵܗܢܹ̈ܐ ܘܲܢܒ̣ܝܹ̈ܐ ܕܲܓܵܠܹ̈ܐ ܘܟ݂ܠܹܗ ܥܲܡܵܐ: ܘܐܸܡ݂ܪܘ.

⁹ ܢܸܬ̣ܩܛܸܠ ܕܐܸܬ̣ܢܲܒ̇ܝܼ ܒܲܫܡܹܗ ܕܡܵܪܝܵܐ: ܘܐܸܡ݂ܪ: ܕܐܲܝܟ݂ ܫܝܼܠܘܿ ܢܸܗܘܸܐ ܒܲܝܬܵܐ ܗܵܢܵܐ: ܘܲܩܪܝܼܬ̣ܵܐ ܗܵܕܹܐ ܬܸܚܪܲܒ̣ ܡ̣ܢ ܒܠܲܝ ܕܝܵـ̇ܬܹܒ̣: ܘܐܸܬ̣ܟܲܢܲܫܘ ܟܠܹܗ ܥܲܡܵܐ ܥܲܠ ܐܹܪܲܡܝܵܐ ܒܒܲܝܬܹ̇ܗ ܕܡܵܪܝܵܐ.

¹⁰ ܘܲܫ̣ܡܲܥܘ ܪܵܘܖ̈ܒ̣ܵܢܹܐ ܕܲܝܗܘܼܕ݂ܵܐ ܦܸܬ̣ܓ̣ܵܡܹ̈ܐ ܗܵܠܹܝܢ ܘܲܣܠܸܩ̣ܘ ܡ̣ܢ ܒܹܝܬ̣ ܡܲܠܟܵܐ ܠܒܲܝܬܹ̇ܗ ܕܡܵܪܝܵܐ: ܘܝܼܬܸܒ̣ܘ ܒܡܲܥܠܵܢܵܐ ܕܬܲܪܥܵܐ ܚܲܕ݂ܬ̣ܵܐ ܕܒܲܝܬܹܗ ܕܡܵܪܝܵܐ.

¹¹ ܘܐܸܡ݂ܲܪܘ ܟܵܗܢܹ̈ܐ ܘܲܢܒ̣ܝܹ̈ܐ ܕܲܓܵܠܹ̈ܐ ܠܪܵܘܖ̈ܒ̣ܵܢܹܐ: ܘܲܠܟ݂ܠܹܗ ܥܲܡܵܐ ܠܡܹܐܡܲܪ: ܕܝܼܢܵܐ ܕܡܵܘܬܵܐ ܚܲܝܵܒ̣ ܓܲܒ̣ܪܵܐ ܗܵܢܵܐ: ܕܐܸܬ̣ܢܲܒ̇ܝܼ ܥܲܠ ܩܪܝܼܬܵܐ ܗܵܕܹܐ ܘܥܲܠ ܥܵܡܘܿܖܹ̈ܝܗ̇: ܐܲܝܟ݂ ܡܸܕܸܡ ܕܲܫ̣ܡܲܥܬ̇ܘܿܢ ܒܐܸܕ݂ܢܲܝ̈ܟ̇ܘܿܢ.

¹² ܘܐܸܡ݂ܲܪ ܐܹܪܲܡܝܵܐ ܠܟ݂ܠܗܘܿܢ ܪܵܘܖ̈ܒ̣ܵܢܹܐ ܘܲܠܟ݂ܠܹܗ ܥܲܡܵܐ: ܡܵܪܝܵܐ ܗ̄ܘ̣ ܫܲܕܪܲܢܝ ܠܡܸܬ̣ܢܲܒܵܝܘܼ ܥܲܠ ܒܲܝܬܵܐ ܗܵܢܵܐ ܘܥܲܠ ܩܪܝܼܬ̣ܵܐ ܗܵܕܹܐ: ܟܠܗܘܿܢ ܦܸܬ̣ܓ̣ܵܡܹ̈ܐ ܕܲܫ̣ܡܲܥܬ̇ܘܿܢ.

¹³ ܘܗܵܫܵܐ ܐܲܛܐܸܒ̣ܘ ܐܘܼܖ̈ܚܵܬ̣ܟ݂ܘܿܢ ܘܲܥܒ̣ܵܕܲܝ̈ܟ̇ܘܿܢ: ܘܲܫܡܲܥܘ ܒܩܵܠܹܗ ܕܡܵܪܝܵܐ ܐܲܠܵܗܟ݂ܘܿܢ: ܘܢܸܬ̇ܬ̇ܢܝܼܚ ܡܵܪܝܵܐ ܡ̣ܢ ܒܝܼܫܬܵܐ ܕܐܸܡ݂ܲܪ ܥܠܲܝܟ̇ܘܿܢ.

¹⁴ ܘܐܸܢܵܐ ܗܵܐ ܒܐܝܼܕܲܝ̈ܟܘܿܢ ܐ̄ܢܵܐ: ܥܒܸܕܘ ܠܝܼ ܐܲܝܟ݂ ܕܛܵܘ ܘܐܲܝܟ݂ ܕܫܲܦܝܼܪ ܒܥܲܝ̈ܢܲܝܟܘܿܢ.

¹⁵ ܒܪܲܡ ܡܸܕܲܥ ܬܸܕܥܘܼܢ: ܕܐܸܢ ܩܵܛܠܝܼܢ ܐ̄ܢܬܘܿܢ ܠܝܼ: ܕܡܵܐ ܗ̄ܘܼ ܙܲܟܵܝܵܐ ܚܵܫܒ̇ܝܼܢ ܐ̄ܢܬܘܿܢ ܥܠܲܝܟܘܿܢ ܘܥܲܠ ܩܪܝܼܬ̣ܵܐ ܗܵܕܹܐ ܘܥܲܠ ܥܵܡܘܿܖܹ̈ܝܗ̇: ܡܸܛܠ ܕܲܒ̣ܩܘܼܫܬܵܐ ܗ̄ܘܼ ܫܲܕܪܲܢܝ ܡܵܪܝܵܐ ܥܠܲܝܟܘܿܢ: ܕܐܹܡܲܪ ܒܐܸܕܢܲܝܟܘܿܢ ܟܠܗܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ.

¹⁶ ܘܐܸܡܲܪܘ ܪܵܘܖ̈ܒ̣ܵܢܹܐ ܘܟ݂ܠܹܗ ܥܲܡܵܐ ܠܟ݂ܵܗ̈ܢܹܐ ܘܠܲܢܒ̣ܝܹ̈ܐ ܕܲܓܵܠܹ̈ܐ: ܠܵܐ ܚܲܝܵܒ̣ ܓܲܒ̣ܪܵܐ ܗܵܢܵܐ ܡܵܘܬܵܐ: ܡܸܛܠ ܕܒܲܫܡܹܗ ܗ̄ܘܼ ܕܡܵܪܝܵܐ ܐܲܠܵܗܲܢ ܐܸܡܲܪ ܠܲܢ.

¹⁷ ܘܩܵܡܘ ܓܲܒ̣ܖܹ̈ܐ ܡ̣ܢ ܣܵܒܹ̈ܐ ܕܐܲܪܥܵܐ: ܘܐܸܡܲܪܘ ܠܟ݂ܠܹܗ ܟܸܢܫܵܐ ܕܥܲܡܵܐ.

¹⁸ ܡܝܼܟ݂ܵܐ ܡܹܐܪܫܵܝܵܐ ܐܸܬ̣ܢܲܒܝܼ ܗ̄ܘܼ ܒܝܵܘ̈ܡܵܘܗܝ ܕܚܹܙܲܩܝܵܐ ܡܲܠܟܵܐ ܕܲܝܗܘܼܕܵܐ: ܘܐܸܡܲܪ ܠܟ݂ܠܹܗ ܥܲܡܵܐ ܕܲܝܗܘܼܕܵܐ: ܗܵܟܲܢܵܐ ܐܵܡܲܪ ܡܵܪܝܵܐ ܨܒ̣ܵܐܘܼܬ̣ ܐܲܠܵܗܵܐ ܕܝܼܣܪܵܝܹܠ: ܨܸܗܝܘܿܢ ܚܲܩܠܵܐ ܬܸܬܒܲܪ: ܘܐܘܿܪܸܫܠܸܡ ܚܲܪܒܬ̣ܵܐ ܬܸܗܘܹܐ: ܘܛܘܼܪ ܒܲܝܬܵܐ ܠܒܹܝܬ̣ ܥܵܒ̣ܵܐ.

¹⁹ ܕܲܠܡܵܐ ܡܸܩܛܲܠ ܩܲܛܠܹܗ ܗ̄ܘܼ ܚܹܙܲܩܝܵܐ ܡܲܠܟܵܐ ܕܲܝܼܗܘܼܕܵܐ: ܘܟ݂ܠܹܗ ܝܼܗܘܼܕܵܐ: ܐܸܠܵܐ ܕܚܸܠ̣ܘ ܡ̣ܢ ܡܵܪܝܵܐ: ܘܨܲܠܝܼܘ ܩܕܵܡܘܗܝ: ܘܐܸܬܬܢܝܼܚ ܡܵܪܝܵܐ ܡ̣ܢ ܒܝܼܫܬܵܐ ܕܐܸܡܲܪ ܥܠܲܝܗܘܿܢ: ܘܲܚܢܲܢ ܕܹܝܢ ܒܵܥܹܝܢܲܢ ܠܡܸܥܒܲܕ݂ ܒܝܼܫܬܵܐ ܪܲܒܬ̣ܵܐ ܥܲܠ ܢܲܦ̈ܫܵܬܲܢ.

²⁰ ܘܐܵܦ ܓܲܒ̣ܪܵܐ ܐܝܼܬ̣ ܗ̄ܘ̣ܵܐ ܕܡܸܬ̣ܢܲܒܹܐ ܒܲܫܡܹܗ ܕܡܵܪܝܵܐ: ܐܘܿܪܝܼܵܐ ܒܲܪ ܫܡܲܥܝܵܐ ܡ̣ܢ ܢܲܥܪܹܝܢ: ܘܐܸܬ̣ܢܲܒܝܼ ܥܲܠ ܩܪܝܼܬ̣ܵܐ ܗܲܕܹܐ ܘܥܲܠ ܐܲܪܥܵܐ ܗܵܕܹܐ: ܐܲܝܟ݂ ܦܸܬ̣ܓ̣ܵܡܵܘ̈ܗܝ ܕܐܹܪܲܡܝܵܐ.

²¹ ܘܲܫ̣ܡܲܥ ܡܲܠܟܵܐ ܝܘܿܝܵܩܝܼܡ ܘܟ݂ܠܗܘܿܢ ܥܲܒ̣ܕܵܘ̈ܗܝ ܘܟ݂ܠܗܘܿܢ ܪܵܘܖ̈ܒ̣ܵܢܘܗܝܦܸܬ̣ܓ̣ܵܡܵܘ̈ܗܝ: ܘܲܒ̣ܥܵܐ ܡܲܠܟܵܐ ܠܡܸܩܛܠܹܗ: ܘܲܫـ̣ܡܲܥ ܐܘܿܪܝܵܐ ܘܲܕ݂ܚܸܠ̣: ܘܲܥܪܲܩ̣ ܘܐܸܙܲܠ̣ ܠܡܸܨܪܹܝܢ.

²² ܘܫܲܕܲܪ ܡܲܠܟܵܐ ܝܘܿܝܵܩܝܼܡ ܠܐ̄ܢܵܫܵܐ ܡܸܨܖ̈ܵܝܹܐ: ܠܐܸܠܝܵܬܲܢܒܲܪܥܒܲܟ̇ܘܿܪ ܘܐ̄ܢܵܫܵܐ ܥܲܡܹܗ ܠܡܸܨܪܹܝܢ.

²³ ܘܐܲܦܩ̣ܘܼܗܝ ܠܐܘܿܪܝܼܵܐ ܡ̣ܢ ܡܸܨܪܹܝܢ: ܘܐܲܝܬ̇ܝܘܼܗܝ ܠܘܵܬ̣ ܡܲܠܟܵܐ ܝܘܿܝܵܩܝܼܡ: ܘܩܲܛܠܹܗ ܒܚܲܪܒܵܐ: ܘܐܲܪܡܝܼ ܫܠܲܕ܀ ܗ ܥܲܠ ܩܒ̣ܖܹ̈ܐ ܕܲܒܢܲܝ̈ ܥܲܡܵܐ.

²⁴ ܒܪܲܡ ܐܝܼܕܹܗ ܕܐܲܚܝܼܩܲܡ ܒܲܪ ܫܵܦܵܢ ܗܘ̤ܵܬ̣ ܥܲܠ ܐܹܪܲܡܝܵܐ: ܕܠܵܐ ܢܲܫ̱ܠܡܝܼܘܗܝ ܒܐܝܼܕ݂ܵܐ ܕܥܲܡܵܐ ܠܡܸܩܛܠܹܗ.

27

¹ ܒܪܹܫ ܡܲܠܟܘܼܬ̣ܵܐ ܕܨܹܕܲܩܝܵܐ ܒܲܪ ܝܘܿܫܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ ܥܲܠ ܐܹܪܲܡܝܵܐ ܡ̣ܢ ܩܕ݂ܵܡ ܡܵܪܝܵܐ: ܘܐܸܡ݂ܲܪ.

² ܗܵܟܲܢܵܐ ܐܸܡ݂ܲܪ ܠܝܼ ܡܵܪܝܵܐ: ܥܸܕ݂ ܠܵܟ݂ ܢܝܼܪܵܐ ܘܲܚܢܵܩܹ̈ܐ: ܘܐܲܪܡܵܐ ܐܸܢܘܿܢ ܒܨܵܘܪܵܟ݂.

³ ܘܫܲܕܲܪ ܐܸܢܘܿܢ ܠܡܲܠܟܵܐ ܕܐܲܕ݂ܘܿܡ: ܘܲܠܡܲܠܟܵܐ ܕܡܘܼܐܵܒ̣: ܘܲܠܡܲܠܟܵܐ ܕܲܒ̣ܢܲܝ̈ ܥܲܡܘܿܢ: ܘܲܠܡܲܠܟܵܐ ܕܨܘܿܪ: ܘܲܠܡܲܠ̣ܵܐ ܕܨܲܝܕܵܢ: ܒܐܝܼܕ݂ܵܐ ܕܐܝܼܙ̈ܓܲܕܹܐ ܕܐܵܬܹܝܢ ܠܐܘܿܪܸܫܠܸܡ ܠܘܵܬ̣ ܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ.

⁴ ܘܦܲܩܸܕ݂ ܐܸܢܘܿܢ ܕܢܹܐܡܪܘܼܢ ܠܡܵܖ̈ܲܝܗܘܿܢ: ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܗܵܟܲܢܵܐ ܬܹܐܡܪܘܼܢ ܠܡܵܖ̈ܲܝܟ̇ܘܿܢ.

⁵ ܐܸܢܵܐ ܥܸـ̇ܒ̣ܕܹܬ̣ ܐܲܪܥܵܐ ܘܲܒ̣ܢܲܝ̈ܢܵܫܵܐ: ܘܲܒ̣ܥܝܼܪܵܐ ܕܥܲܠ ܐܲܦܲܝ̈ ܐܲܪܥܵܐ: ܒܚܲܝܠܝ ܪܲܒܵܐ ܘܲܕ݂ܪܵܥܝ ܪܵܡܵܐ: ܘܝܲܗ̇ܒܬܵܗ̇ ܠܡܲܢ ܕܲܫܦܲܪ ܒܥܲܝ̈ܢܲܝ.

⁶ ܘܗܵܫܵܐ ܐܸܢܵܐ ܝܸܗ̄ܒܹ̇ܬ̣ ܟܠܗܹܝܢ ܐܲܖ̈ܥܵܬ̣ܵܐ ܗܵܠܹܝܢ: ܠܡܸܦܠܲܚ ܠܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܥܲܒ̣ܕܝ ܘܢܸܦ̱ܠܚܹܗ.

⁷ ܘܢܸܦ̱ܠܚܘܼܢܹܗ ܥܲܡܡܹ̈ܐ ܠܹܗ ܘܠܲܒ̣ܪܹܗ ܘܲܠܒܲܪ ܒܪܹܗ: ܥܕܲܡܵܐ ܕܢܸܡܛܸܐ ܙܲܒ̣ܢܵܐ ܕܐܲܪܥܹܗ ܐܵܦ ܕܝܼܠܹܗ: ܘܢܸܦ̱ܠܚܘܼܢܹܗ ܥܲܡܡܹ̈ܐ ܣܲܓ̇ܝܼ̈ܐܹܐ ܘܡܲܠ̈ܟܹ̇ܐ ܪܵܘܖ̈ܒܹܐ.

⁸ ܘܥܲܡܵܐ ܘܡܲܠܟܘܼܬ̣ܵܐ ܕܠܵܐ ܢܸܦ̱ܠܚܘܼܢܹܗ ܠܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܘܡܲܢ ܕܠܵܐ ܢܲܥܸܠ ܨܵܘܪܹܗ ܒܢܝܼܪܹܗ ܕܡܲܠܟܵܐ ܕܒ̣ܵܒܹܠ: ܒܚܲܪܒܵܐ ܘܲܒ̣ܟܲܦܢܵܐ ܘܲܒ̣ܡܵܘܬܵܢܵܐ ܐܸܦܩܘܿܕ݂ ܥܲܠ ܥܲܡܵܐ ܗܵܘ̇ ܐܲܡܲ݁ܪ ܡܵܪܝܵܐ: ܥܕܲܡܵܐ ܕܐܲܫܠܸܡ ܐܸܢܘܿܢ ܒܐܝܼܕܹܗ.

⁹ ܘܐܲܬ̇ܢ̄ܘܿܢ ܠܵܐ ܬܸܫ̱ܡܥܘܼܢ ܠܲܢܒ̣̈ܝܲܝܟ̇ܘܿܢ ܕܲܓܵܠܹ̈ܐ: ܘܲܠܩܵܨܘܿܡܲܝ̈ܟ̇ܘܿܢ: ܘܲܠܚܵܠܡܲܝ̈ܟ̇ܘܿܢ: ܘܲܠܢܵܚܫܲܝ̈ܟ̇ܘܿܢ: ܘܲܠܚܲܖ̈ܵܫܲܝܟ̇ܘܿܢ: ܕܗܸܢ̣ܘܿܢ ܐܵܡ̇ܪܝܼܢ ܠܟ݂ܘܿܢ ܠܵܐ ܬܸܦܠܚܘܼܢ ܠܡܲܠܟܵܐ ܕܒ̣ܵܒܹܠ.

¹⁰ ܡܸܛܠ ܕܫܘܼܩܪܵܐ ܗܸܢ̣ܘܿܢ ܡܸܬ̣ܢܲܒܹ̇ܝܢ ܠܟ݂ܘܿܢ: ܕܐܸܕ݂ܚܘܿܩܟ݂ܘܿܢ ܡ̣ܢ ܐܲܪܥܟ݂ܘܿܢ: ܕܐܸܕ݂ܚܘܿܩܟ݂ܘܿܢ ܘܬܹܐܒ̣ܕܘܼܢ.

¹¹ ܘܥܲܡܵܐ ܕܢܲܥܸܠ ܨܵܘܪܹܗ ܒܢܝܼܪܵܐ ܕܡܲܠܟܵܐ ܕܒ̣ܵܒܹܠ: ܘܢܸܦ̱ܠܚܝܼܘܗܝ: ܢܸܫܒܩܝܼܘܗܝ ܒܐܲܪܥܹܗ ܐܵܡܲ݁ܪ ܡܵܪܝܵܐ: ܘܢܸܦ̱ܠܚܝܼܗ̇: ܘܢܸܬܸ̇ܒ̣ ܒܵܗ̇.

¹² ܘܲܠܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ ܐܸܡ̇ܪܹܬ̣ ܐܲܝܟ݂ ܟܠܗܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ: ܘܐܸܡ̇ܪܹܬ̣ ܐܲܥܸܠܘ ܨܵܘܪܟ݂ܘܿܢ ܒܢܝܼܪܹܗ ܕܡܲܠܟܵܐ ܕܒ̣ܵܒܹܠ: ܘܦܘܼܠܚܘܼܗܝ ܠܹܗ ܘܲܠܥܲܡܹܗ: ܘܲܚܝܵܘ.

¹³ ܘܠܵܐ ܬܡܘܼܬ̣ܘܼܢ: ܐܲܢ̄ܬ̇ ܘܥܲܡܵܟ݂ ܒܚܲܪܒܵܐ ܘܲܒ̣ܟܲܦܢܵܐ ܘܲܒ̣ܡܵܘܬܵܢܵܐ: ܐܲܝܟ݂ ܕܐܸܡ݂ܲܪ ܡܵܪܝܵܐ ܥܲܠ ܥܲܡܵܐ ܕܠܵܐ ܢܸܦܠܘܿܚ ܠܡܲܠܟܵܐ ܕܒܵܒܹܠ.

¹⁴ ܘܐܲܢ̄ܬ̇ܘܿܢ ܠܵܐ ܬܸܫ̱ܡܥܘܼܢ ܠܦܸܬ̣ܓ̣ܵܡܹ̈ܐ ܕܲܢܒ̣ܝܹ̈ܐ ܕܲܓܵܠܹ̈ܐ: ܕܐܵܡܪܝܼܢ ܠܟ݂ܘܿܢ ܠܵܐ ܬܸܦ̱ܠܚܘܼܢ ܠܡܲܠܟܵܐ ܕܒܵܒܹܠ: ܡܸܛܠ ܕܫܘܼܩܪܵܐ ܗܸܢ̣ܘܿܢ ܡܸܬ̣ܢܲܒܹ̇ܝܢ ܠܟ݂ܘܿܢ.

¹⁵ ܠܵܐ ܫܲܕܪܹܬ̣ ܐܸܢܘܿܢ ܐܵܡܲ݁ܪ ܡܵܪܝܵܐ: ܘܗܸܢܘܿܢ ܡܸܬ̣ܢܲܒܹܝܢ ܒܫܹܡܝ ܒܫܘܼܩܪܵܐ: ܕܐܸܕ݂ܚܘܿܩܟ݂ܘܿܢ ܘܬܹܐܒ̣ܕܘܼܢ ܐܲܢ̄ܬ̇ܘܿܢ ܘܲܢܒ̣ܝܹ̈ܐ ܕܡܸܬ̣ܢܲܒܹܝܢ ܠܟ݂ܘܿܢ.

¹⁶ ܘܲܠܟ݂ܵܗܢܹ̈ܐ ܘܠܟ݂ܠܹܗ ܥܲܡܵܐ ܗܵܢܵܐ: ܗܵܟܲܢܵܐ ܐܵܡܲܥܪ ܡܵܪܝܵܐ ܠܵܐ ܬܸܫ̱ܡܗܘܼܢ ܠܦܸܬ̣ܓ̣ܵܡܹ̈ܐ ܕܲܢܒ̣ܝܲܝ̈ܟ̇ܘܿܢ ܕܡܸܬ̣ܢܲܒܹܝܢ ܠܟ݂ܘܿܢ: ܘܐܵܡ̇ܪܝܼܢ: ܗܵܐ ܡܵܐܢܹ̈ܐ ܕܒܲܝܬܹ̇ܗ ܕܡܵܪܝܵܐ ܗܵܦ̇ܟ̇ܝܼܢ ܡ̣ܢ ܒܵܒܹܠ ܒܲܥܓܲܠ. ܡܸܛܠ ܕܫܘܼܩܪܵܐ ܗܸܢ̣ܘܿܢ ܡܸܬ̣ܢܲܒܹܝܢ ܠܟ݂ܘܿܢ.

¹⁷ ܠܵܐ ܬܸܫ̱ܡܥܘܼܢ ܐܸܢܘܿܢ ܐܵܡܲ݁ܪ ܡܵܪܝܵܐ: ܦܠܘܿܚܘ ܠܡܲܠܟܵܐ ܕܒ̣ܵܒܹܠ: ܘܲܚܝܵܘ: ܘܠܵܐ ܬܸܗܘܸܐ ܩܪܝܼܬ̣ܵܐ ܗܵܕܹܐ ܚܲܪܒ̇ܬ̣ܵܐ.

¹⁸ ܘܐܸܢ ܢܒ̣ܝܹ̈ܐ ܐܸܢܘܿܢ ܘܐܝܼܬ̣ ܦܸܬ̣ܓ̣ܵܡܹܗ ܕܡܵܪܝܵܐ ܒܗܘܿܢ: ܢܸܒ̣ܥܘܿܢ ܡ̣ܢ ܡܵܪܝܵܐ ܚܲܝܠܬ̣ܵܢܵܐ: ܕܠܵܐ ܢܹܐܙܠ̄ܘܼܢ ܡܵܐܢܹ̈ܐ ܕܐܸܫܬ̇ܚܲܪܘ ܒܒܲܝܬܹ̇ܗ ܕܡܵܪܝܵܐ: ܘܲܒ̣ܒܹܝܬ̣ ܡܲܠܟܵܐ ܕܲܝܗܘܼܕ݂ܵܐ ܘܒ̣ܐܘܿܪܸܫܠܸܡ ܠܒ̣ܵܒܹܠ.

¹⁹ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܥܲܠ ܥܵܡܘܼ̈ܕܹܐ: ܘܥܲܠ ܝܲܡܵܐ: ܘܥܲܠ ܡܲܓ̇ܣܹ̈ܐ: ܘܥܲܠ ܫܲܪܟܵܐ ܕܡܵܐܢܹ̈ܐ ܕܐܸܫܬ̇ܚܲܪܘ ܒܲܩܪܝܼܬ̣ܵܐ ܗܵܕܹܐ.

²⁰ ܕܠܵܐ ܢ̣ܣܲܒ݂ ܐܸܢܘܿܢ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܟܲܕ݂ ܫ̣ܒ̣ܵܐ ܠܝܘܿܟܲܢܝܵܐ ܒܲܪ ܝܘܿܝܵܩܝܼܡ ܡܲܠܟܵܐ ܕܲܝܗܘܼܕ݂ܵܐ ܡ̣ܢ ܐܘܿܪܸܫܠܸܡ ܠܒ̣ܵܒܹܠ: ܘܲܠܟ݂ܠܗܘܿܢ ܪܵܘܖ̈ܒ̣ܵܢܹܐ ܕܲܝܗܘܼܕ݂ܵܐ ܘܕ݂ܐܘܿܪܸܫܠܸܡ.

²¹ ܗܵܟܲܢܵܐ ܐܵܡܲܥܪ ܡܵܪܝܵܐ ܚܲܝܠܬܵܢܵܐ ܐܲܠܵܗܵܐ ܕܝܼܣܪܵܝܹܠ: ܥܲܠ ܡܵܐܢܹ̈ܐ ܕܐܸܫܬ̇ܚܲܪ ܒܒܲܝܬܹ̇ܗ ܕܡܵܪܝܵܐ: ܘܲܒ̣ܒܹܝܬ̣ ܡܲܠܟܵܐ ܕܲܝܗܘܼܕ݂ܵܐ: ܘܕ݂ܐܘܿܪܸܫܠܸܡ.

²² ܠܒ̣ܵܒܹܠ ܢܸܙܠ̄ܘܼܢ: ܘܬܲܡܵܢ ܢܸܗܘܘܿܢ ܥܕܲܡܵܐ ܠܝܵܘܡܵܐ ܕܐܸܦܩܘܿܕ݂ ܐܸܢܘܿܢ ܐܵܡܲ݁ܪ ܡܵܪܝܵܐ: ܘܐܲܣܸܩ ܐܸܢܘܿܢ ܘܐܲܗܦܸܟ݂ ܐܸܢܘܿܢ ܠܐܲܬ̣ܪܵܐ ܗܵܢܵܐ .

28

¹ ܘܲܗܘ̤ܵܐ ܒܫܲܢ̄ܬܵܐ ܗܵܝ̇: ܒܪܹܫ ܡܲܠܟܘ̇ܬܹܗ ܕܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܒܫܲܢ̄ܬܵܐ ܪܒ̣ܝܼܥܵܝܬܵܐ ܒܝܲܪܚܵܐ ܕܚܲܡܫܵܐ: ܐܸܡ݂ܲܪ ܠܝܼ ܚܲܢܲܢܝܵܐ ܒܲܪ ܥܵܙܘܿܪ ܢܒ̣ܝܵܐ ܕܲܓܵܠܵܐ ܕܡ̣ܢ ܓܲܒ̣ܥܘܿܢ: ܒܒܲܝܬܹ̇ܗ ܕܡܵܪܝܵܐ: ܠܥܹܝܢ ܟܵܗܢܹ̈ܐ ܘܲܠܥܹܝܢ ܟܠܹܗ ܥܲܡܵܐ.

² ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܬܸܒ̣ܪܹܬ̣ ܢܝܼܪܹܗ ܕܡܲܠܟܵܐ ܕܒ̣ܵܒܹܠ.

³ ܡܸܟܵܐ ܠܬܲܪܬܹ̇ܝܢ ܫܢܝܼ̈ܢ: ܡܲܗܦܸــܟ݂ ܐ̄ܢܵܐ ܠܐܲܬ̣ܪܵܐ ܗܵܢܵܐ: ܟܠܗܘܿܢ ܡܵܐܢܹ̈ܐ ܕܒܲܝܬܹ̇ܗ ܕܡܵܪܝܵܐ: ܕܲܢܣܲܒ̣ ܢܒ̣ܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܡ̣ܢ ܐܲܬ̣ܪܵܐ ܗܵܢܵܐ: ܘܐܵܘܒܸ̇ܠ ܐܸܢܘܿܢ ܠܒ̣ܵܒܹܠ.

⁴ ܥܲܡ ܝܘܿܟܲܢܝܵܐ ܒܲܪ ܝܘܿܝܵܩܝܼܡ ܡܲܠܟܵܐ ܕܲܝܗܘܼܕ݂ܵܐ: ܘܲܠܟ݂ܠܵܗ̇ ܫܒ̣ܝܼܬ̣ܵܐ ܕܲܝܗܘܼܕ݂ܵܐ ܕܐܸܙܲܠ̣ܘ ܠܒ̣ܵܒܹܠ: ܡܲܗܦܸـܟ݂ ܐ̄ܢܵܐ ܠܐܲܬ̣ܪܵܐ ܗܵܢܵܐ ܐܵܡܲ݁ܪ ܡܵܪܝܵܐ: ܡܸܛܠ ܕܬ̣ܵܒܲܪ ܐ̄ܢܵܐ ܢܝܼܪܹܗ ܕܡܲܠܟܵܐ ܕܒ̣ܵܒܹܠ.

⁵ ܘܐܸܡ݂ܲܪ ܐܹܪܲܡܝܵܐ ܢܒ̣ܝܵܐ ܠܚܲܢܲܢܝܵܐ ܢܒ̣ܝܵܐ ܕܲܓܵܠܵܐ: ܠܥܹܝܢ ܟܲܗܢܹ̈ܐ ܘܲܠܥܹܝܢ ܟܠܹܗ ܥܲܡܵܐ ܕܩܵܝ̇ܡܝܼܢ ܒܒܲܝܬܹ̇ܗ ܕܡܵܪܝܵܐ.

⁶ ܘܐܸܡ݂ܲܪ ܐܸܪܲܡܝܵܐ ܐܵܡܹܝܢ: ܗܵܟܲܢܵܐ ܢܸܥܒܸ̇ܕ݂ ܡܵܪܝܵܐ܆ܢܩܝܼܡ ܡܵܪܝܵܐ ܦܸܬ̣ܓ̣ܵܡܹ̈ܐ ܕܐܸܬ̣ܢܲܒ̇ܝܼܬ̇: ܠܡܲܗܦܵܟ݂ܘܼ ܡܵܐܢܹ̈ܐ ܕܒܲܝܬܹ̇ܗ ܕܡܵܪܝܵܐ: ܘܟ݂ܠܵܗ̇ ܫܒ̣ܝܼܬܵܐ ܡ̣ܢ ܒܵܒܹܠ ܠܐܲܬ̣ܪܵܐ ܗܵܢܵܐ.

⁷ ܒܪܲܡ ܫܡܲܥ ܦܸܬ̣ܓ̣ܵܘܵܐ ܗܵܢܵܐ ܕܐܵܡܲ݁ܪ ܐ̄ܢܵܐ ܩܕ݂ܵܡܲܝܟ: ܘܲܩܕ݂ܵܡ ܟܠܹܗ ܥܲܡܵܐ ܗܵܢܵܐ.

⁸ ܢܒ̣ܝܹ̈ܐ ܕܲܗܘ̤ܵܘ ܩܕ݂ܵܡܲܝ ܘܲܩܕ݂ܵܡܲܝܟ ܡ̣ܢ ܥܵܠܲܡ: ܘܐܸܢܲܒ̇ܝܼܘ ܥܲܠ ܐܲܖ̈ܥܵܬ̣ܵܐ ܣܲܓ̇ܝܼܵܐ̈ܬ̣ܵܐ ܘܥܲܠ ܡܲܠܟ̇ــ̈ܘܵܬܵܟܐ ܪܘܖ̈ܒ̣ܵܬ̣ܵܐ: ܠܲܩܪܵܒ̣ܵܐ ܘܲܠܒ̣ܝܼܫܬܵܐ ܘܲܠܡܵܘܬܵܢܵܐ.

⁹ ܢܒ̣ܝܼܵܐ ܕܡܸܬ̣ܢܲܒܸ̇ܐ ܫܠܵܡܵܐ: ܡܵܐ ܕܲܗܘ̤ܵܐ ܦܸܬ̣ܓ̣ܵܡܹܗ ܕܲܢܒ̣ܝܼܵܐ: ܐܸܬ̣̱ܝܼܕܲܥ ܢܒ̣ܝܵܐ ܗܵܘ̇ ܕܫܲܕ̇ܪܹܗ ܡܵܪܝܵܐ ܒܩܘܼܫܬܵܐ.

¹⁰ ܘܲܢܣܲܒ̣ ܚܲܢܲܢܝܵܐ ܢܒ̣ܝܵܐ ܕܲܓܵܠܵܐ ܚܢܵܩܹ̈ܐ: ܡ̣ܢ ܨܵܘܪܹܗ ܕܐܹܪܲܡܝܵܐ ܢܒ̣ܝܼܵܐ: ܘܬܲܒܲܪ ܐܸܢܘܿܢ.

¹¹ ܘܐܸܡ݂ܲܪ ܚܲܢܲܢܝܵܐ ܠܥܹܝܢ ܟܠܹܗ ܥܲܡܵܐ: ܗܵܟܲܢܵܐ ܐܵܡܲ݁ܪ ܡܵܪܝܵܐ: ܗܵܟܲܢܵܐ ܐܸܬ̣ܒ̇ܪܝܼܘܗܝ ܠܢܝܼܪܹܗ ܕܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܡܸܟܵܐ ܠܬܲܪܬܹ̇ܝܢ ܫܢ̈ܝܼܢ ܡ̣ܢ ܨܵܘܪܵܐ ܕܟ݂ܠܗܘܿܢ ܥܲܡܡܹ̈ܐ: ܘܐܸܙܲܠ̣ ܐܹܪܲܡܝܵܐ ܢܒ̣ܝܵܐ ܠܐܘܼܪܚܹܗ.

¹² ܘܲܗܘ̤ܵܐ ܦܸܬ̣ܓܵܡܹܗ ܕܡܵܪܝܵܐ ܥܲܠ ܐܸܪܲܡܝܵܐ ܢܒ̣ܝܼܵܐ: ܡ̣ܢ ܒܵܬܲܪ ܕܬܲܒܲܪ ܚܲܢܲܢܝܵܐ ܢܒ̣ܝܼܵܐ ܕܲܓܵܠܵܐ ܚܢܵܩܹ̈ܐ ܡ̣ܢ ܨܵܘܪܹܗ ܕܐܹܪܲܡܝܵܐ ܢܒ̣ܝܼܵܐ.

¹³ ܙܸܠ ܘܐܸܡ݂ܲܪ ܠܚܲܢܲܢܝܵܐ ܢܒ̣ܝܼܵܐ ܕܲܓܵܠܵܐ: ܗܵܟܲܢܵܐ ܐܵܡܲ݁ܪ ܡܵܪܝܵܐ: ܚܢܵܩܹ̈ܐ ܕܩܲܝܣܵܐ ܕܬܲܒܲـ̣ܪܬ̇: ܥܒܸܕ݂ ܚܠܵܦܲܝܗܘܿܢ ܢܝܼܪܵܐ ܕܦܲܪܙܠܵܐ.

¹⁴ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ ܨܒ̣ܵܐܘܼܬ̣ ܐܲܠܵܗܵܐ ܕܝܼܣܪܵܝܹܠ: ܢܝܼܪܵܐ ܕܦܲܪܙܠܵܐ ܝܸܗ̄ܒܹ̇ܬ̣ ܥܲܠ ܨܵܘܪܵܐ ܕܟ݂ܠܗܘܿܢ ܥܲܡܡܹ̈ܐ ܗܵܠܹܝܢ: ܠܡܸܦܠܲܚ ܠܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܘܢܸܦ̱ܠܚܘܼܢܹܗ. ܘܐܵܦ ܚܲܝ̄ܘܬ̣ܵܐ ܕܕܲܒ̣ܪܵܐ ܝܸܗ̄ܒܹ̇ܬ̣ ܠܹܗ ܠܡܸܦ̱ܠܚܹܗ.

¹⁵ ܘܐܸܡ݂ܲܪ ܐܹܪܲܡܝܵܐ ܢܒ̣ܝܼܵܐ ܠܚܲܢܲܢܝܵܐ ܢܒ̣ܝܼܵܐ ܕܲܓܵܠܵܐ: ܫܡܲܥ ܚܲܢܲܢܝܵܐ: ܫܲܕ̇ܪܵܟ݂ ܡܵܪܝܵܐ: ܘܐܲܢ̄ܬ̇ ܐܲܬ̣ܟܸܠܬܵܝܗܝ ܠܥܲܡܵܐ ܗܵܢܵܐ ܥܲܠ ܫܘܼܩܪܵܐ.

¹⁶ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܗܵܐ ܫܵـ̇ܕܹܐ ܐ̄ܢܵܐ ܠܵܟ݂ ܡ̣ܢ ܐܲܦܲܝ̈ ܐܲܪܥܵܐ: ܫܲܢ̄ܬܵܐ ܗܵܕܹܐ ܡܵـ̇ܐܹܬ̣ ܐܲܢ̄ܬ̇: ܕܥܵܘ̣ܠܵܐ ܡܲܠܸܠܬ̇ ܩܕ݂ܵܡ ܡܵܪܝܵܐ.

¹⁷ ܘܡܝܼܬ̣ ܚܲܢܲܢܝܵܐ ܢܒ̣ܝܼܵܐ ܕܲܓܵܠܵܐ ܒܫܲܢ̄ܬܵܐ ܗܵܝ̇ ܒܝܲܪܚܵܐ ܕܫܲܒ̣ܥܵܐ.

29

¹ ܘܗܵܠܹܝܢ ܦܸܬ̣ܓ̣ܵܡܲܝ̈ ܐܸܓܲܪܬܵܐ ܕܫܲܕܲܪ ܐܹܪܲܡܝܵܐ ܢܒ̣ܝܼܵܐ ܡ̣ܢ ܐܘܿܪܸܫܠܸܡ ܠܒ̣ܵܒܹܠ: ܠܘܵܬ̣ ܫܲܪܟܵܐ ܕܣܵܒܹ̈ܐ ܕܲܫܒ̣ܝܼܬܵܐ: ܘܲܠܘܵܬ̣ ܟܵܗܢܹ̈ܐ: ܘܲܠܘܵܬ̣ ܢܒ̣ܝܹ̈ܐ ܕܲܓܵܠܹ̈ܐ: ܘܲܠܘܵܬ̣ ܟܠܹܗ ܥܲܡܵܐ ܕܲܫܒ̣ܵܐ ܢܒ̣ܘܼܟܲܕ݂ܢܵܨܲܪܡܲܠܟܵܐ ܕܒ̣ܵܒܹܠ ܡ̣ܢ ܐܘܿܪܹܫܠܹܡ ܠܒ̣ܵܒܹܠ.

² ܡ̣ܢ ܒܵܬܲܪ ܕܲܢ̣ܦܲܩ ܝܘܿܟܲܢܝܵܐ ܡܲܠܟܵܐ ܘܡܲܠܟܬ̣ܵܐ: ܘܲܡܗܲܝܡܢܹ̈ܐ ܘܪܵܘܖ̈ܒ̣ܵܢܹܐ ܕܲܝܗܘܼܕ݂ܵܐ ܘܕ݂ܐܘܿܪܸܫܠܸܡ: ܘܐܘܼܡܵܢܹ̈ܐ ܘܕܲܚܫܹ̈ܐ ܡ̣ܢ ܐܘܿܪܸܫܠܸܡ.

³ ܒܝܲܕ݂ ܐܲܠܲܥܣܵܐ ܒܲܪ ܫܵܦܵܢ: ܘܲܓ̣ܡܲܪܝܵܐ ܒܲܪ ܚܹܠܲܩܝܵܐ: ܕܫܲܕܲܪ ܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ ܠܘܵܬ̣ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܠܒ̣ܵܒܹܠ.

⁴ ܗܵܟܲܢܵܐ ܐܵܡܲ݁ܪ ܡܵܪܝܵܐ ܨܒ̣ܵܐܘܼܬ̣ ܐܲܠܵܗܵܐ ܕܝܼܣܪܵܝܹܠ: ܠܟ݂ܠܵܗ̇ ܫܒ̣ܝܼܬ̣ܵܐ ܕܐܸܫܬܲܒ̣ܝܲܬ̤ ܡ̣ܢ ܐܘܿܪܸܫܠܸܡ ܠܒ̣ܵܒܹܠ.

⁵ ܒܢܵܘ ܒܵــ̈ܬܹ̇ܐ ܘܬܸܒ̣ܘ: ܘܨܘܿܒ̣ܘ ܓܲܢܹ̈ܐ ܘܐܲܟ݂ܘܿܠܘ ܦܹܐܖ̈ܲܝܗܹܝܢ.

⁶ ܘܣܲܒ̣ܘ ܢܸܫܹ̈ܐ ܘܐܵܘܠܸܕ݂ܘ ܒ̈ܢܲܝܵܐ ܘܲܒ̣̈ܢܵܬ̣ܵܐ: ܣܲܒ̣ܘ ܠܲܒ̣ܢܲܝ̈ܟ̇ܘܿܢ ܢܸܫܹ̈ܐ: ܘܲܒ̣̈ܢܵܬ̣ܟ݂ܘܿܢ ܗܲܒ̣ܘ ܠܓܲܒ̣ܖܹ̈ܐ: ܘܢܵܘܠܕ݂ܘܼܢ ܒ̈ܢܲܝܵܐ ܘܲܒ̣̈ܢܵܬ̣ܵܐ: ܘܲܣܓ̣ܵܘ ܬܲܡܵܢ ܘܠܵܐ ܬܸܙ̱ܥܪܘܼܢ.

⁷ ܘܲܫܐܲܠܘ ܒܲܫܠܵܡܵܗ̇ ܕܲܩܪܝܼܬ̣ܵܐ ܕܲܫܒ̣ܝܼܬ̣ܟ݂ܘܿܢ ܬܲܡܵܢ: ܘܨܲܠܵܘ ܥܠܹܝܗ̇ ܩܕ݂ܵܡ ܡܵܪܝܵܐ: ܕܒܲܫܠܵܡܵܗ̇ ܢܸܗܘܸܐ ܠܟ݂ܘܿܢ ܫܠܵܡܵܐ.

⁸ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܠܵܐ ܢܲܛܥܘܿܢܵܟ݂ܘܿܢ ܢܒ̣ܝܹ̈ܐ ܕܒܲܝܢܵܬ̣ܟ݂ܘܿܢ: ܘܩܵܨܘܿܡܲܝ̈ܟ̇ܘܿܢ: ܘܠܵܐ ܬܸܫ̱ܡܥܘܼܢ ܠܚܸܠܡܲܝ̈ܟ̇ܘܿܢ ܕܐܲܢ̄ܬ̇ܘܿܢ ܚܵܠܡܝܼܢ.

⁹ ܡܸܛܠ ܕܫܘܼܩܪܵܐ ܗܸܢ̣ܘܿܢ ܡܸܬ̣ܢܲܒܹ̇ܝܢ ܠܟ݂ܘܿܢ ܒܫܸܡܝ: ܘܐܸܢܵܐ ܠܵܐ ܫܲـ̇ܕ̇ܪܹܬ̣ ܐܸܢܘܿܢ ܐܵܡܲ݁ܪ ܡܵܪܝܵܐ.

¹⁰ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ: ܐܸܡܲܬ̣ܝ ܕܡܲܠ̈ܝܵܢ ܠܒ̣ܵܒܹܠ ܫܲܒ̣ܥܝܼܢ ܫܢܝܼ̈ܢ: ܐܸܦܪܘܿܩܟ݂ܘܿܢܘܐܲܩܝܼܡ ܥܠܲܝܟ̇ܘܿܢ ܦܸܬ̣ܓ̣ܵܡܹ̈ܐ ܛܵܒܹ̈ܐ: ܠܡܲܗܦܵܟ݂ܘܼܬ̣ܟ݂ܘܿܢ ܠܐܲܬ̣ܪܵܐ ܗܵܢܵܐ.

¹¹ ܡܸܛܠ ܕܐܸܢܵܐ ܝܵܕܲܥ ܐ̄ܢܵܐ ܡܲܚܫܲܒ̣ܬ̣ܵܐ ܕܡܵܬ̣ܚܲܫܲܒ̣ ܐ̄ܢܵܐ ܥܠܲܝܟ̇ܘܿܢ ܐܵܡܲ݁ܪ ܡܵܪܝܵܐ: ܡܲܚܫܲܒ̣ܬ̣ܵܐ ܕܲܫܠܵܡܵܐ ܘܠܵܐ ܕܒ̣ܝܼܫܬܵܐ: ܠܡܸܬܲܠ ܠܟ݂ܘܿܢ ܠܚܲܪܬ̣ܵܐ ܣܲܒ̣ܪܵܐ.

¹² ܘܬܸܩܪܘܿܢܵܢܝ ܘܲܬ̣ܨܲܠܘܿܢ ܩܕ݂ܵܡܲܝ.

¹³ ܘܟܲܕ݂ ܬܸܒ̣ܥܘܿܢܵܢܝ ܡ̣ܢ ܟܠܹܗ ܠܸܒ̇ܟ݂ܘܿܢ: ܬܸܫܟ̇ܚܘܼܢܵܢܝ ܐܵܡܲ݁ܪ ܡܵܪܝܵܐ.

¹⁴ ܘܐܲܗܦܸـܟ݂ ܫܒ̣ܝܼܬ̣ܟ݂ܘܿܢ: ܘܐܹܟܲܢܸܫܟ݂ܘܿܢ ܡ̣ܢ ܟܠܗܘܿܢ ܥܲܡܡܹ̈ܐ: ܘܡ̣ܢ ܟܠ ܬܲܖ̈ܥܵܬ̣ܵܐ ܕܒܲܕܲܪܬ̇ܟ݂ܘܿܢ ܠܬܲܡܵܐ ܐܵܡܲ݁ܪ ܡܵܪܝܵܐ: ܘܐܲܗܦܸܟ݂ܘܿܢ ܠܐܲܬ̣ܪܵܐ ܕܐܲܫܒ̇ܝܼܬ̇ܟ݂ܘܿܢ ܡ̣ܢ ܬܲܡܵܢ.

¹⁵ ܡܸܛܠ ܕܐܸܡ݂ܲܪܬ̇ܘܿܢ ܕܐܲܩܝܼܡ ܠܲܢ ܡܵܪܝܵܐ ܢܒ̣ܝܹ̈ܐ ܒܒ̣ܵܒܹܠ.

¹⁶ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ: ܥܲܠ ܡܲܠܟܵܐ ܕܝܵـ̇ܬܹܒ̣ ܥܲܠ ܟܘܼܪܣܝܹܗ ܕܕ݂ܵܘܝܼܕ݂: ܘܥܲܠ ܟܠܹܗ ܥܲܡܵܐ ܕܝܵـ̇ܬܹܒ̣ ܒܲܩܪܝܼܬ̣ܵܐ ܗܵܕܹܐ: ܐܲܚܲܝ̈ܟ̇ܘܿܢ ܐܲܝܠܹܝܢ ܕܠܵܐ ܢܦܲܩ̣ܘ ܥܲܡܟ݂ܘܿܢ ܒܲܫܒ̣ܝܼܬ̣ܵܐ.

¹⁷ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ: ܗܵܐ ܡܫܲܕܲܪ ܐ̄ܢܵܐ ܥܠܲܝܗܘܿܢ ܚܲܪܒܵܐ: ܘܟܲܦܢܵܐ: ܘܡܲܘܬܵܢܵܐ: ܘܐܸܥܒܸ̇ܕ݂ ܐܸܢܘܿܢ ܐܲܝܟ݂ ܬܹܐܢܹ̈ܐ ܒܝܼ̈ܫܵܬ̣ܵܐ ܕܠܵܐ ܡܸܬ̣ܐܲܟ݂̈ܠܵܢ ܡ̣ܢ ܒܝܼܫܘܼܬ̣ܗܹܝܢ.

¹⁸ ܘܐܸܪܕ̇ܘܿܦ ܒܵܬ̣ܲܪܗܘܿܢ ܒܚܲܪܒܵܐ: ܘܲܒ̣ܟܲܦܢܵܐ: ܘܲܒ̣ܡܵܘܬܵܢܵܐ: ܘܐܸܬܸ̇ܠ ܐܸܢܘܿܢܠܙܵܘܸܥܬ̣ܵܐ ܠܟ݂ܠܗܹܝܢ ܡܲܠ̈ܟ̇ܘܵܬ̣ܵܐ ܕܐܲܪܥܵܐ: ܠܬܸܡܗܵܐ ܘܲܠܠܵܘܛܬ̣ܵܐ: ܘܲܠܚܸܣܕܵܐ: ܘܲܠܡܲܫܪܘܿܩܝܼܬ̣ܵܐ: ܒܟ݂ܠܗܘܿܢ ܥܲܡܡܹ̈ܐ ܕܒܲܕܪܹܬ̣ ܐܸܢܘܿܢ ܠܬܲܡܵܢ

¹⁹ ܥܲܠ ܕܠܵܐ ܫ̣ܡܲܥܘܦܸܬ̣ܓ̣ܵܡܲܝ̈: ܘܫܲـ̇ܕ̇ܪܹܬ̣ ܠܘܵܬ̣ܗܘܿܢ ܟܠܗܘܿܢ ܥܲܒ̣ܕܲܝ̈ ܢܒ̣ܝܹ̈ܐ: ܩܲܕ̇ܡܹ̇ܬ̣ ܘܫܲܕܪܹܬ̣: ܘܠܵܐ ܫ̣ܡܲܥܘ ܐܸܢܘܿܢ ܐܵܡܲ݁ܪ ܡܵܪܝܵܐ.

²⁰ ܘܐܲܢ̄ܬ̇ܘܿܢ ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ ܟܠܵܗ ܫܒ̣ܝܼܬ̣ܵܐ ܕܐܸܫܬܲܒ̣ܝܲܬ̤ ܡ̣ܢ ܐܘܿܪܸܫܠܸܡ ܠܒ̣ܵܒܹܠ.

²¹ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܥܲܠ ܐܵܚܵܒ̣ ܒܲܪ ܩܘܿܠܝܼܵܐ: ܘܥܲܠ ܨܹܕܲܩܝܵܐ ܒܲܪ ܡܥܲܣܝܵܐ: ܕܡܸܬ̣ܢܲܒܹ̇ܝܢ ܠܟ݂ܘܿܢ ܒܫܹܡܝ ܒܫܘܼܩܪܵܐ: ܗܵܐ ܡܲܫܠܸܡ ܐ̄ܢܵܐ ܠܗܘܿܢ ܒܐܝܕ݂ܵܐ ܕܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܘܲܢܩܲܛܸܠ ܐܸܢܘܿܢ ܒܚܲܪܒܵܐ ܠܥܹܢܲܝ̈ܟ̇ܘܿܢ.

²² ܘܢܸܗܘܘܿܢ ܠܠܵܘܛܬܵܐ ܠܟ݂ܠܵܗ̇ ܫܒ̣ܝܼܬ̣ܵܐ ܕܲܝܗܘܼܕ݂ܵܐ ܕܲܒ̣ܒ̣ܵܒܹܠ: ܘܢܹܐܡܪܘܼܢ ܥܲـ̣ܒ̣ܕܲܟ݂ ܡܵܪܝܵܐ ܐܲܝܟ݂ ܨܹܕܲܩܝܵܐ ܘܐܲܝܟ݂ ܐܲܚܵܒ̣: ܕܛܲܓܸ̇ܢ ܐܸܢܘܿܢ ܡܲܠܟܵܐ ܕܒ̣ܵܒܹܠ ܒܢܘܼܪܵܐ.

²³ ܥܲܠ ܕܲܥܒܲܕ݂ܘ ܥܵܘ̣ܠܵܐ ܒܝܼܣܪܵܝܹܠ: ܘܓ̣ܵܪܘ ܢܸܫܲܝ̈ ܚܲܒ̣ܖ̈ܲܝܗܘܿܢ: ܘܡܲܠܸܠ̣ܘ ܦܸܬ̣ܓ̣ܵܡܹ̈ܐ ܒܫܹܡܝ ܒܫܘܼܩܪܵܐ ܕܠܵܐ ܦܲـ̇ܩܕܹܬ̣ ܐܸܢܘܿܢ: ܘܐܸܢܵܐ ܝܵܕܲܥ ܐ̄ܢܵܐ ܘܣܵـ̇ܗܹܕ݂ ܐ̄ܢܵܐ ܐܵܡܲ݁ܪ ܡܵܪܝܵܐ.

²⁴ ܘܲܫܡܲܥܝܵܐ ܢܲܚܡ̄ܠܵܝܵܐ ܐܸܡ݂ܲܪ.

²⁵ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܘܫܲܕܲܪ ܒܲܫܡܹܗ ܐܸܓܲܪܬܵܐ ܠܟ݂ܠܹܗ ܥܲܡܵܐ ܕܒ̣ܐܘܿܪܸܫܠܸܡ: ܘܠܲܨܦܲܢܝܵܐ ܒܲܪ ܡܥܲܣܝܵܐ ܟܵܗܢܵܐ: ܘܲܠܟ݂ܵܗܢܹ̈ܐ.

²⁶ ܡܵܪܝܵܐ ܐܲܩܝܼܡܵܟ݂ ܟܵܗܢܵܐ ܚܠܵܦ ܝܘܿܝܵܕ݂ܵܥ ܟܵܗܢܵܐ: ܕܬܸܗܘܸܐ ܦܵܩܘܿܕ݂ܵܐ ܒܒܲܝܬܹ̇ܗ ܕܡܵܪܝܵܐ: ܥܲܠ ܟܠ ܐ̄ܢܵܫ ܕܡܸܬ̣ܢܲܒܸ̇ܐ ܘܡܸܫܬܲܛܹܐ ܒܕܲܓܵܠܘܼܬ̣ܵܐ: ܘܬܲܪܡܹܝܘܗܝ ܒܹܝܬ̣ ܐܲܣܝܼܖܹ̈ܐ: ܘܒܲܚܒ̣ܘܼܫܝܵܐ.

²⁷ ܘܗܵܫܵܐ ܠܡܵܢܵܐ ܠܵܐ ܟܵܐܹ̇ܐ ܐܲܢ̄ܬ̇ ܒܐܹܪܲܡܝܵܐ ܕܡ̣ܢ ܥܢܵܬ̣ܘܿܬ̣ ܕܡܸܬ̣ܢܲܒܸ̇ܐ ܠܟ݂ܘܿܢ.

²⁸ ܡܸܛܠ ܕܗܵܐ ܫܵـ̇ܠܲܚ ܠܲܢ ܠܒ̣ܵܒܹܠ: ܕܢܘܼܓ̣ܪܵܐ ܗܵܘܹ̇ܝܢ ܐܲܢ̄ܬ̇ܘܿܢ ܬܲܡܵܢ: ܒܢܵܘ ܒܵـ̈ܬܹ̇ܐ ܘܬܸܒ̣ܘ: ܘܨܘܿܒ̣ܘ ܓܲܢܹ̈ܐ ܘܐܲܟ݂ܘܿܠܘ ܦܹܐܖ̈ܲܝܗܹܝܢ.

²⁹ ܘܲܩ̣ܪܵܐ ܨܦܲܢܝܵܐ ܟܵܗܢܵܐ ܐܸܓܲܪܬܵܐ ܗܵܕܹܐ ܒܐܸܕ݂ܢܵܘ̈ܗܝ ܕܐܹܪܲܡܝܵܐ ܢܒ̣ܝܼܵܐ.

³⁰ ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܢܒ̣ܝܼܵܐ ܠܡܹܐܡܲܪ.

³¹ ܫܠܘܿܚ ܠܟ݂ܠܵܗ̇ ܫܒ̣ܝܼܬ̣ܵܐ: ܗܵܟܲܢܵܐ ܐܵܡܲ݁ܪ ܡܵܪܝܵܐ ܠܲܫܡܲܥܝܵܐ ܢܲܚܡ̄ܠܵܝܵܐ: ܥܲܠ ܕܐܸܬ̣ܢܲܒ̇ܝܼ ܠܟ݂ܘܿܢ ܫܡܲܥܝܵܐ ܡܸܕܸܡ ܕܐܸܢܵܐ ܠܵܐ ܫܲܕܲܪܬܹ̇ܗ: ܘܐܲܬ̣ܟܸ̇ܠܟ݂ܘܿܢ ܥܲܠ ܫܘܼܩܪܵܐ.

³² ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܗܵܐ ܦܵܩܹܕ݂ ܐ̄ܢܵܐ ܥܲܠ ܫܡܲܥܝܵܐ ܢܲܚܡ̄ܠܵܝܵܐ: ܘܥܲܠ ܙܲܪܥܹܗ: ܕܠܵܐ ܢܸܗܘܸܐ ܠܹܗ ܓܒܲܪ ܕܝܵـ̇ܬܹܒ̣ ܒܓ̣ܵܘ ܥܲܡܵܐ ܗܵܢܵܐ: ܘܠܵܐ ܢܸܚܙܸܐ ܒܛܵܒ̣ܬ̣ܵܐ ܕܥܵܒܹܕ݂ ܐ̄ܢܵܐ ܠܥܲܡܝ ܐܵܡܲ݁ܪ ܡܵܪܝܵܐ: ܡܸܛܠ ܕܥܵܘ̣ܠܵܐ ܡܲܠܸܠ̣ ܥܲܠ ܡܵܪܝܵܐ.

30

¹ ܦܸܬ̣ܓܵܡܵܐ ܕܲܗܘ̤ܵ ܥܲܠ ܐܹܪܲܡܝܵܐ ܡ̣ܢ ܩܕ݂ܵܡ ܡܵܪܝܵܐ: ܘܐܸܡ݂ܲܪ.

² ܗܵܟܲܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܟܬ̣ܘܒ̣ ܠܵܟ݂ ܟܠܗܘܿܢ ܦܸܬ̣ܓ̣ܵܡܹ̈ܐ ܕܐܸܡ̇ܪܸܬ̣ ܠܵܟ݂ ܥܲܠ ܣܸܦܪܵܐ.

³ ܡܸܛܠ ܕܗܵܐ ܝܵܘ̈ܡܵܬ̣ܵܐ ܐܵܬܹ݁ܝܢ ܐܵܡܲ݁ܪ ܡܵܪܝܵܐ: ܘܐܲܗܦܸـܟ݂ ܫܒ̣ܝܼܬ̣ܵܐ ܕܥܲܡܝ ܝܼܣܪܵܝܹܠ: ܘܕܲܝܗܘܼܕ݂ܵܐ ܐܵܡܲ݁ܪ ܡܵܪܝܵܐ: ܘܐܲܗܦܸـܟ݂ ܐܸܢܘܿܢ ܠܐܲܪܥܵܐ ܕܝܸܗ̄ܒܹ̇ܬ̣ ܠܐܲܒ̣ܵܗܲܝ̈ܗܘܿܢ: ܘܢܹܐܪܬ̇ܘܢܵܗ̇.

⁴ ܘܗܵܠܹܝܢ ܦܸܬ̣ܓ̣ܵܡܹ̈ܐ ܕܐܸܡ݂ܲܪ ܡܵܪܝܵܐ ܥܲܠ ܝܼܣܪܵܝܹܠ: ܘܥܲܠ ܝܑܼܗܘܼܕ݂ܵܐ.

⁵ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܩܵܠܵܐ ܕܙܵܘܸܥܬ̣ܵܐ ܫـ̣ܡܲܥܢ: ܕܸܚܠ̱ܬ̣ܵܐ ܘܠܸܝܬ̇ ܫܠܵܡܵܐ.

⁶ ܫܲܐܸܠܘ ܘܲܚܙܵܘ ܐܸܢ ܝܵـ̇ܠܹܕ݂ ܕܸܟ݂ܪܵܐ܆ܡܸܛܠ ܡܵܢܵܐ ܚܙܹܝ̇ܬ̣ ܟܠ ܓܒܲܪ ܣܝܼ̈ܡܵܢ ܐܝܼܕ݂ܵܘ̈ܗܝ ܥܲܠ ܓܸܣܵܘ̈ܗܝ ܐܲܝܟ݂ ܝܵܠܹܕܬܵܐ: ܘܐܸܬ̣ܗ̱ܦܸܟ݂ ܟܠܗܹܝܢ ܐܲܦܹ̈ܐ ܠܝܲܩܕܵܢܵܐ.

⁷ ܘܵܝ ܕܪܲܒ̇ ܗ̄ܘ̣ ܝܵܘܡܵܐ ܗܵܘ̇ ܘܠܲܝܬ̇ ܐܲܟ݂ܘܵܬܹܗ: ܘܲܙܒܲܢ ܥܵܩܬ̣ܵܐ ܗ̇ܘ̣ ܠܝܲܥܩܘܿܒ̣: ܘܡܸܢܸܗ ܢܸܬ̣ܦܪܸܩ.

⁸ ܘܢܸܗܘܸܐ ܒܝܵܘܡܵܐ ܗܵܘ̇ ܐܵܡܲ݁ܪ ܡܵܪܝܵܐ ܨܒ̣ܵܐܘܼܬ̣: ܐܸܬ̣ܒܲܪ ܢܝܼܪܹܗ ܡ̣ܢ ܨܵܘܪܵܟ݂: ܘܲܚܢܵܩܲܝ̈ܟ ܐܹܦܲܣܸܩ: ܘܠܵܐ ܢܫܲܥܒ̇ܕ݂ܘܼܢ ܐܸܢܘܿܢ ܬܘܼܒ̣ ܢܘܼܟ݂ܖ̈ܵܝܹܐ.

⁹ ܐܸܠܵܐ ܢܸܦܠ̱ܚܘܼܢ ܠܡܵܪܝܵܐ ܐܲܠܵܗܗܘܿܢ: ܘܲܠܕ݂ܵܘܝܼܕ݂ ܡܲܠܟ̇ܗܘܿܢ ܕܐܲܩܝܼܡ ܠܗܘܿܢ.

¹⁰ ܘܐܲܢ̄ܬ̇ ܠܵܐ ܬܸܕ݂ܚܲܠ ܥܲܒ̣ܕ̇ܝ ܝܲܥܩܘܿܒ̣ ܐܵܡܲ݁ܪ ܡܵܪܝܵܐ: ܘܠܵܐ ܬܵܬ̇ܒܲܪ ܝܼܣܪܵܝܹܠ: ܕܗܵܐ ܦܵܪܹܩ ܐ̄ܢܵܐ ܠܵܟ݂ ܡ̣ܢ ܪܘܼܚܩܵܐ: ܘܲܠܙܲܪܥܵܟ݂ ܡ̣ܢ ܐܲܪܥܵܐ ܕܲܫܒ̣ܝܼܬ̣ܗܘܿܢ: ܘܢܸܬܸ̇ܒ̣ ܝܲܥܩܘܿܒ̣ ܘܢܸܫܠܸܐ ܘܢܸܫܟܲܬ̣ ܘܢܸܬ̇ܬ̇ܢܝܼܚ: ܘܠܵܐ ܢܸܗܘܸܐ ܠܹܗ ܡܲܗܪܵܢܵܐ.

¹¹ ܘܐܲܢ̄ܬ̇ ܠܵܐ ܬܸܕ݂ܚܲܠ ܥܲܒ̣ܕܝ ܝܲܥܩܘܿܒ̣ ܐܵܡܲ݁ܪ ܡܵܪܝܵܐ: ܡܸܛܠ ܕܥܲܡܵܟ݂ ܐ̄ܢܵܐ ܠܡܸܦ̱ܪܩܵܟ݂ ܐܵܡܲ݁ܪ ܡܵܪܝܵܐ: ܡܸܛܠ ܕܐܸܥܒܹ̇ܕ݂ ܓܡܘܼܪܝܵܐ ܒܟ݂ܠܗܘܿܢ ܥܲܡܡܹ̈ܐ ܕܒܲܕܲܪܬܵܟ݂ ܬܲܡܵܢ: ܘܠܵܟ݂ ܠܵܐ ܐܸܥܒܸܕ݂ ܓܡܘܼܪܝܵܐ: ܘܐܸܪܕܹܝܟ݂ ܒܕ݂ܝܼܢܵܐ ܘܲܡܙܲܟܵܝܘܼ ܠܵܐ ܐܹܙܲܟܹ̇ܝܟ݂.

¹² ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ: ܟܵܐܹ̇ܒ̣ ܗ̄ܘ̣ ܬܒ̣ܵܪܹܟ݂ܝ: ܘܚܲܣܝܼܢܵܐ ܗ̄ܝ̣ ܡܚܘܿܬܹܟ݂ܝ.

¹³ ܘܠܲܝܬ̇ ܕܕܵܐ܀ ܝܢ ܕܝܼܢܹܟ݂ܝ: ܕܲܢܥܲܕܪܹܟ݂ܝ ܘܢܲܐܣܹܝܟ݂ܝ.

¹⁴ ܟܠܗܘܿܢ ܖ̈ܵܚܡܲܝܟ̇ܝ ܛܥ̣ܵܐܘܼܟ݂ܝ: ܘܢܲܦ̮ܫܹܟ݂ܝ ܒܵـ̇ܥܹܝܢ. ܡܸܛܠ ܕܲܡܚܘܿܬ̣ܵܐ ܕܲܒ̣ܥܸܠܕܒ̣ܵܒܹ̈ܐ ܡܚܹܝ̇ܬܹܟ݂ܝ: ܘܡܲܪܕܘܼܬ̣ܵܐ ܬܲܩܝܼܦܬܵܐ: ܥܲܠ ܕܲܣܓ̣ܝܼܘ ܚܵܘܒܲܝ̈ܟ̇ܝ: ܘܲܥ̣ܫܸܢܘ ܚܛܵܗܲܝ̈ܟ̇ܝ ܕܠܵܐ ܬܬ̣ܘܼܒ̣ܝܼܢ.

¹⁵ ܡܵܢܵܐ ܡܲܝܠܠܲܬ̄ܝ ܥܲܠ ܬܒ̣ܵܪܹܟ݂ܝ. ܟܵܐܹ̇ܒ̣ ܗ̄ܘ̣ ܟܹܐܒܹܟ݂ܝ: ܥܲܠ ܣܘܿܓܲܐܬ̣ ܚܵܘܒܲܝ̈ܟ̇ܝ: ܘܕܲܥ̣ܸܫܸܢܘ ܚܛܵܗܲܝ̈ܟ̇ܝ: ܥܸـ̇ܒ̣ܕܹܬ̣ ܠܹܟ݂ܝ ܗܵܠܹܝܢ.

¹⁶ ܡܸܛܠ ܗܵܢܵܐ ܟܠ ܐܵܟ݂ܘܿܠܲܝ̈ܟ̇ܝ ܢܸܬ̣ܐܲܟ݂ܠܘܼܢ: ܘܟ݂ܠܗܘܿܢ ܒܥܸܠܕܒ̣ܵܒܲܝ̈ܟ̇ܝ ܒܫܸܒ̣ܝܵܐ ܢܹܐܙܠܘܼܢ: ܘܢܸܗܘܘܿܢ ܕܵܝܘܿܫܲܝ̈ܟ̇ܝ ܠܲܕܝܵܫܵܐ: ܘܟ݂ܠܗܘܿܢ ܒܵܙܘܿܙܲܝ̈ܟ̇ܝ ܐܸܬܸ̇ܠ ܠܒܸܙܬ̣ܵܐ.

¹⁷ ܡܸܛܠ ܕܐܲܣܸܩ ܠܹܟ݂ܝ ܐܵܣܝܘܼܬ̣ܵܐ: ܘܡ̣ܢ ܡܚܘܿܬܹܟ݂ܝ ܐܲܣܹܝܟ݂ܝ ܐܵܡܲ݁ܪ ܡܵܪܝܵܐ: ܡܸܛܠ ܕܲܕ݂ܚܝܼܩܬܵܐ ܩ̣ܪܵܐܘܼܟ݂ܝ: ܨܸܗܝܘܿܢ ܗܵܝ̇ ܕܬ̣ܵܒ̣ܘܿܥܵܐ ܠܲܝܬ̇ ܠܵܗ̇.

¹⁸ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܗܵܐ ܡܲܗܦܸـܟ݂ ܐ̄ܢܵܐ ܫܒ݂ܝܼܬ̣ܵܐ ܕܡܲܫܟ̇ܢܹܗ ܕܝܲܥܩܘܿܒ̣: ܘܥܵـ̇ܒܹܕ݂ ܐ̄ܢܵܐ ܠܹܗ ܐܲܝܟ݂ ܕܡ̣ܢ ܩܕ݂ܝܼܡ: ܘܥܲܠ ܡܲܫܟ̇ܢܵܘ̈ܗܝ ܐܹܪܲܚܹܡ: ܘܬܸܬ̣ܒ̇ܢܸܐ ܩܪܝܼܬ̣ܵܐ ܥܲܠ ܬܸܠܠܵܗ̇: ܘܢܵܘܣܵܐ ܒܙܸܕ݂ܩܹܗ ܢܸܬ̣ܩܲܢ.

¹⁹ ܘܬܸܦܘܿܩ ܡܸܢܗܘܧܢ ܬܵܘܕܝܼܬ̣ܵܐ: ܘܩܵܠܵܐ ܕܲܡܫܲܒ̇ܚܵܢܹ̈ܐ: ܘܐܲܣܓܸ̇ܐ ܐܸܢܘܿܢ ܘܠܵܐ ܢܸܙܥ̱ܪܘܼܢ: ܘܐܲܥܫܸܢ ܐܸܢܘܿܢ ܘܠܵܐ ܢܵܒ̣ܨܪܘܼܢ.

²⁰ ܘܢܸܗܘܘܿܢ ܒܢܲܝ̈ܗܘܿܢ ܐܲܝܟ݂ ܕܡ̣ܢ ܩܕ݂ܝܼܡ: ܘܥܹܕܲܬ̣ܗܘܿܢ ܩܕ݂ܵܡܲܝ ܬܸܬ̣ܩܲܢ: ܘܐܸܦܩܘܿܕ݂ ܥܲܠ ܟܠܗܘܿܢ ܐܵܠܘܿܨܲܝ̈ܗܘܿܢ.

²¹ ܘܢܸܗܘܸܐ ܡܲܠܟ̇ܗܘܿܢ ܡܸܢܗܘܿܢ: ܘܫܲܠܝܼܛܗܘܿܢ ܡ̣ܢ ܒܲܝܢܲܬ̣ܗܘܿܢ ܢܸܦܘܿܩ: ܘܐܹܩܲܪܒ̣ܝܼܘܗܝ ܘܢܸܬ̣ܩܲܪܲܒ̣ ܠܘܵܬ̣ܝ: ܡܸܛܠ ܕܐܲܦܢܸܐ ܠܸܒܹ̇ܗ ܐܵܡܲ݁ܪ ܡܵܪܝܵܐ.

²² ܘܬܸܗܘܘܿܢ ܠܝܼ ܥܲܡܵܐ܆ܘܐܸܢܵܐ ܐܸܗܘܸܐ ܠܟ݂ܘܿܢ ܐܲܠܵܗܵܐ.

²³ ܡܲـ̣ܢܘܼ ܓܹܝܪ ܐܲܦܢܝܼ ܠܸܒܹ̇ܗ ܠܕܸܚܠܲܬ̣ܝ ܘܐܸܢܵܐ ܕܚܲܩ̇ܬܹ̇ܗ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ.
ܗܵܐ ܥܲܠܥܵܠܹܗ ܒܚܸܡܬ̣ܵܐ ܢܵܦ̇ܩܵܐ: ܘܥܲܠܥܵܠܵܐ ܡܸܬ̣ܓܵܘܙܠܵܐ: ܥܲܠ ܪܹܫܵܐ ܕܖ̈ܲܫܝܼܥܹܐ ܬܸܬ̇ܢܝܼܚ.

²⁴ ܠܵܐ ܬܸܗܦܘܿܟ݂ ܚܸܡܬ̣ܵܐ ܕܪܘܼܓ̣ܙܹܗ ܕܡܵܪܝܵܐ ܥܕܲܡܵܐ ܕܢܸܥܒܸ̇ܕ݂: ܘܲܥܕܲܡܵܐ ܕܲܢܩܝܼܡ ܬܲܪܥܝܼܬ̣ܵܐ ܕܠܸܒܹ̇ܗ: ܒܐܚܪܵܝܑܼܬ̣ ܝܵܘ̈ܡܵܬ̣ܵܐ ܬܸܬ̣ܒܲܝܢܘܼܢ ܒܹܗ.

31

¹ ܒܙܲܒ̣ܢܵܐ ܗܵܘ ܐܵܡܲ݁ܪ ܡܵܪܝܵܐ: ܐܸܗܘܸܐ ܐܲܠܵܗܵܐ ܠܟܵܠܗܹܝܢ ܫܲܖ̈ܒ̣ܵܬ̣ܵܐ ܕܝܼܣܪܵܝܹܠ: ܘܗܸܢ̣ܘܿܢ ܢܸܗܘܘܿܢ ܠܝܼ ܥܲܡܵܐ.

² ܗܵܟܲܢܵܐ ܐܵܡܲ݁ܪ ܡܵܪܝܵܐ: ܐܸܫـ̣ܟܲܚ ܖ̈ܲܚܡܹܐ ܒܡܲܕ݂ܒܪܵܐ ܥܲܡܵܐ ܕܐܸܬ̣ܦܲܨܝܼ ܡ̣ܢ ܚܲܪܒܵܐ: ܐܸܙܲܠ̣ ܒܫܸܒ̣ܝܵܐ ܝܼܣܪܵܝܹܠ.

³ ܡ̣ܢ ܪܘܼܚܩܵܐ ܡܵܪܝܵܐ ܐܸܬ̣ܚ̄ܙܝܼ ܠܝܼ: ܘܐܸܡ݂ܲܪ ܠܝܼ: ܪܸܚ̱ܡܬ̣ܵܐ ܕܥܵܠܡܵܐ ܪܚܸܡ̇ܬܹ̇ܟ݂ܝ: ܡܸܛܠ ܗܵܢܵܐ ܢܓܲܕܬܹ̇ܟ݂ܝ ܠܛܲܝܒ̇ܘܼܬ̣ܵܐ.

⁴ ܬܸܘ̣ܒ̣ ܐܹܒ̣ܢܹܝܟ݂ܝ ܘܬܸܬ̣ܒ̇ܢܹܝܢ ܒܬ̣ܘܼܠܬܵܐ ܕܝܼܣܪܵܝܹܠ: ܬܘܼܒ݂ ܬܸܨܛܲܒ̇ܬ̣ܝܼܢ ܒܬܲܨܒ̇ܝܼܬ̣ܵܐ: ܘܬܸܦܩܝܼܢ ܒܲܟ݂ܢܘܼܫܬܵܐ ܕܲܡܫܲܒ̇ܚܵܢܹ̈ܐ.

⁵ ܬܘܼܒ̣ ܬܸܨܒ̣ܝܼܢ ܟܲܪܡܵܐ ܒܛܘܼܪܵܐ ܕܫܵܡܪܹܝܢ ܨܘܿܒ̣ܝ ܢܸܨܒ̇ܬ̣ܵܐ ܘܫܲܒܲܚܝ.

⁶ ܡܸܛܠ ܕܲܥܬ̣ܝܪܕ݂ ܗ̄ܘ̣ ܝܵܘܡܵܐ ܕܢܸܩܪܘܿܢ ܢܵܛܘܿܖܹ̈ܐ ܒܛܘܼܪܵܐ ܕܐܲܦܪܹܝܡ: ܘܢܹܐܡܪܘܼܢ: ܩܘܼܡܘ ܢܸܣܲܩ ܠܨܸܗܝܘܿܢ ܠܘܵܬ̣ ܡܵܪܝܵܐ ܐܲܠܵܗܲܢ.

⁷ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ: ܫܲܒܲܚܘ ܕܒܹܝܬ̣ ܝܵܥܩܘܼܒ̣ ܒܚܲܕܘܼܬ̣ܵܐ: ܘܕ݂ܘܼܨܘ ܒܪܹܫ ܥܲܡܡܹ̈ܐ: ܐܲܫܡܲܥܘ ܘܫܲܒܲܚܘ: ܘܐܸܡܲܪܘ: ܦܪܘܿܩ ܡܵܪܝܵܐ ܠܥܲܡܵܟ݂ ܠܫܲܪܟܹ̇ܗ ܕܝܼܣܪܵܝܹܠ.

⁸ ܗܵܐ ܡܲܝܬܹ̇ܐ ܐ̄ܢܵܐ ܠܗܘܿܢ ܡ̣ܢ ܐܲܪܥܵܐ ܕܓܲܪܒܝܵܐ: ܘܐܹܟܲܢܸܫ ܐܸܢܘܿܢ ܡ̣ܢ ܣܵܘܦܹ̈ܝܗ̇ ܕܐܲܪܥܵܐ: ܘܐܵܦ ܚܓ̣ܝܼܖܹ̈ܐ ܘܲܥܘܝܼܖܹ̈ܐ ܕܐܝܼܬ̣ ܒܗܘܿܢ: ܘܲܕ݂ܒܲܛܢܵܐ ܘܲܕ݂ܝܲܠܕܵܐ ܐܲܟ݂ܚ̄ܕ݂ܵܐ: ܟܸܢܫܵܐ ܪܲܒܵܐ ܢܸܗ̄ܦܟ݂ܘܼܢ ܠܗܵܪܟܵܐ.

⁹ ܒܲܒ̣ܟ݂ܵܬ̣ܵܐ ܢܹܐܙܠ̄ܘܼܢ: ܘܲܒ̣ܬܲܚܢܲܢܬܵܐ ܢܹܐܬ̣ܘܿܢ: ܐܹܕܲܒܲܪ ܐܸܢܘܿܢ ܥܲܠ ܫܒ̣̈ܝܼܠܹܐ ܕܡܲܝ̈ܵܐ: ܒܐܘܼܖ̈ܚܵܬ̣ܵܐ ܬܖ̈ܝܼܨܵܬ̣ܵܐ ܕܠܵܐ ܢܸܬ̇ܬܲܩܠܘܼܢ ܒܗܹܝܢ: ܡܸܛܠ ܕܲܗܘܹ̇ܝܬ̣ ܠܝܼܣܪܵܝܹܠ ܠܐܲܒ̣ܵܐ: ܘܐܲܦܪܹܝܡ ܗܘ̤ܵܐ ܒܘܼܟ݂ܪܝ.

¹⁰ ܫܡܲܥܘ ܦܸܬ̣ܓܵܡܹܗ ܕܡܵܪܝܵܐ ܥܲܡܹܗ: ܘܚܵܘܵܘ ܒܓ̣ܵܙܖ̈ܵܬ̣ܵܐ ܖ̈ܲܚܝܼܩܵܬ̣ܵܐ: ܘܐܸܡܲܪܘ: ܡܲܢ ܕܒܲܕܪܹܗ ܠܝܼܣܪܵܝܹܠ ܢܟܲܢܫܝܪܘܗܝ: ܘܲܢܢܲܛܪܝܼܘܗܝ ܐܲܝܟ݂ ܪܵܥܝܵܐ ܠܲܓ̣ܙܵܪܹܗ.

¹¹ ܡܸܛܠ ܕܲܦܪܲܩ̣ ܡܵܪܝܵܐ ܠܝܲܥܩܘܿܒ̣ ܥܲܒ̣ܕܹܗ: ܘܦܲܨܝܹܗ ܡ̣ܢ ܐܝܼܕܲܝ̈ ܡܲܢ ܕܥܲܫܝܪܢ ܡܸܢܹܗ.

¹² ܘܢܹܐܬ̣ܘܿܢ ܘܲܢܫܲܒ̇ܚܘܿܢ ܒܪܵܘܡܵܗ̇ ܕܨܸܗܝܘܿܢ: ܘܢܸܬ̣ܒܲܣܡܘܿܢ ܡ̣ܢ ܛܵܒ̣ܵـ̈ܬܹܗ ܕܡܵܪܝܵܐ: ܡ̣ܢ ܥܒ̣ܘܼܪܵܐ: ܘܡ̣̤ ܚܲܡܪܵܐ: ܘܡ̣ܢ ܡܸܫܚܵܐ: ܘܡ̣ܢ ܒܢܲܝ̈ ܥܵܢܵـ̈ܐ: ܘܬ̣ܵܘܖܹ̈ܐ: ܘܬܸܗܘܸܐ ܢܲܦ̮ܫܗܘܿܢ ܐܲܝܟ݂ ܓܲܢܲܬ̣ ܫܸܩܝܵܐ: ܘܠܵܐ ܢܵܘܣܦܘܼܢ ܬܘܼܒ̣ ܠܡܸܣܬܲܪܵܩܘܼ.

¹³ ܗܵܝܕܹܝܢ ܬܸܚܕܸܐ ܒܬ̣ܘܼܠܬܵܐ ܒܚܲܕܘܼܬ̣ܵܐ: ܘܓܲܕܘܼ̈ܕܹܐ ܘܣܵܒܹ̈ܐ ܐܲܟ݂ܚ̄ܕܵܐ ܢܸܚܕ̇ܘܿܢ. ܘܐܲܗܦܸـܟ݂ ܐܸܒ̣ܠ̱ܗܘܿܢ ܠܚܲܕ݂ܘܼܬ̣ܵܐ: ܘܐܹܒܲܝܲܐ ܐܸܢܘܿܢ ܘܐܹܚܲܕܸܐ ܐܸܢܘܿܢ ܡ̣ܢ ܕܵܘܘܿܢܗܘܿܢ.

¹⁴ ܘܐܲܪܘܸܐ ܢܲܦ̮ܫܵܐ ܕܟܲܗܢܹ̈ܐ ܕܘܼܗܵܢܵܐ: ܘܥܲܡܝ ܡ̣ܢ ܛܘܼܒ̣ܝ ܢܸܣܒ̇ܥܘܼܢ ܐܵܡܲ݁ܪ ܡܵܪܝܵܐ.

¹⁵ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܩܵܠܵܐ ܒܪܵܡܬܵܐ ܐܸܫܬ̇ܡܲܥ: ܐܸܠܝܵܐ ܘܲܒ̣ܟ݂ܵܬܵܐ ܡܲܪܝܼܪܬܵܐ: ܪܵܚܹܝܠ ܒܵـ̇ܟ݂ܝܵܐ ܥܲܠ ܒܢܹ̈ܝܗ̇: ܘܠܵܐ ܨܵܒ̣ܝܵܐ ܠܡܸܬ̣ܒܲܝܵܐܘܼ ܡܸܛܠ ܕܠܲܝܬ̇ ܐܸܢܘܿܢ.

¹⁶ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܟܠܵܝ ܩܵܠܹܟ݂ܝ ܡ̣ܢ ܒܸܟ݂ܝܵܐ: ܘܥܲܝ̈ܢܲܝܟ̇ܝ ܡ̣ܢ ܕܸܡ̱ܥܬܵܐ: ܡܸܛܠ ܕܐܝܼܬ̣ ܐܲܓ̣ܪܵܐ ܠܕܸܡܥܲܝ̈ܟ̇ܝ ܐܵܡܲ݁ܪ ܡܵܪܝܵܐ: ܘܢܸܗܦܟ݂ܘܼܢ ܡ̣ܢ ܐܲܪܥܵܠ ܕܲܒ̣ܥܸܠܕܒ̣ܵܒܹ̈ܐ.

¹⁷ ܘܐܝܼܬ̣ ܣܲܒ̣ܪܵܐ ܠܚܲܪܬܹܟ݂ܝ ܐܵܡܲ݁ܪ ܡܵܪܝܵܐ: ܘܢܸܗ̄ܦܟ݂ܘܼܢ ܒܢܲܝ̈ܵܐ ܠܲܬ̣ܚܘܼܡܗܘܿܢ.

¹⁸ ܡܸܫܡܲܥ ܫܸܡܥܹ̇ܬ̣ ܠܐܲܦܪܹܝܡ ܕܐܵܠܹ̇ܐ: ܘܐܵܡܲ݁ܪ: ܪܕܲܝܬܵܢܝ ܡܵܪܝܵܐ ܘܐܸܬ̣ܪ̱ܕ݂ܝܼܬ̣: ܐܲܝܟܥܸܓ̣ܠܵܐ ܗܘܹ̇ܝܬ̣ ܕܠܵܐ ܡܟܲܒܲܫ: ܐܲܬ̣ܝܼܒܲܝܢܝ ܘܐܹܬ̇ܘܼܒ̣: ܡܸܛܠ ܕܐܲܢ̄ܬ̇ܘܼ ܡܵܪܝܵܐ ܐܲܠܵܗܝ.

¹⁹ ܡܸܛܠ ܕܡ̣ܢ ܒܵܬܲܪ ܕܬ̣ܵܒܹـ̇ܬ̣ ܐܸܬ̣ܒܲܝ̇ܐܹܬ̣: ܘܡ̣ܢ ܒܵܬܲܪ ܕܝܸܕ݂ܥܹ̇ܬ̣ ܐܸܬ̇ܬ̇ܢܝܼܚܸ̇ܬ: ܒܸܗ̇ܬܹ̇ܬ̣ ܘܐܵܦ ܐܸܬ̇ܬܲܟ݂ـ̇ܣܹܬ̣: ܕܩܲܒ̇ܠܹܬ̣ ܚܸܣܕܵܐ ܕܛܲܠܝܘܼܬ̣ܝ.

²⁰ ܒܪܵܐ ܗ̄ܘ̣ ܠܝܼ ܝܲܩܝܼܪܵܐ ܐܲܦܪܹܝܡ: ܘܝܲܠܕܵܐ ܚܲܒ̇ܝܼܒ̣ܵܐ: ܡܸܛܠ ܕܲܒ̣ܙܲܒ̣ܢܵܐ ܕܲܡܡܲܠܸܠ ܐ̄ܢܵܐ ܒܹܗ ܡܸܬ̇ܕܟܲܪ ܐ̄ܢܵܐ ܠܹܗ: ܡܸܛܠ ܗܵܢܵܐ ܗܘ̤ܵܘ ܖ̈ܲܚܡܲܝ ܥܠܵܘܗܝ: ܘܐܹܪܲܚܸܡ ܥܠܵܘܗܝ ܐܵܡܲ݁ܪ ܡܵܪܝܵܐ.

²¹ ܐܲܩܝܼܡܝ ܠܹܟ݂ܝ ܐܵܬ̤ܵܐ ܘܬܸܒ̣ܝ ܒܡܲܕ݂ܒܪܵܐ: ܗܲܒ̣ܝ ܠܸܒܹܟ݂ܝ ܠܐܘܼܪܚܵܐ ܬܪܝܼܨܬܵܐ: ܬܘܼܒ̣ܝ ܒܬ̣ܘܼܠܬܵܐ ܕܝܼܣܪܵܝܹܠ ܐܵܡܲ݁ܪ ܡܵܪܝܵܐ: ܘܬܸܒ̣ܝ ܒܩܘܼܖ̈ܝܲܝܟ̇ܝ ܗܵܠܹܝܢ.

²² ܥܕܲܡܵܐ ܠܐܸܡܲܬ̣ܝ ܡܸܬ̣ܦܲܠܓ̣ܵܐ ܐܲܢ̄ܬ̇ܝ ܒܲܪܬ̣ܵܐ ܬܲܝܵܒ̣ܬܵܐ: ܡܸܛܠ ܕܒ̣ܵܪܹܐ ܡܵܪܝܵܐ ܚܕܲܬܵܐ ܒܐܲܪܥܵܐ: ܢܸܩܒ̇ܬ̣ܵܐ ܬܚܲܒܸ̇ܒ̣ ܓܲܒ̣ܪܵܐ.

²³ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܡܸܟܹ̇ܝܠ ܢܹܐܡܪܘܼܢ ܦܸܬ̣ܓܵܡܵܐ ܗܵܢܵܐ ܒܐܲܪܥܵܐ ܕܲܝܗܘܼܕ݂ܵܐ: ܘܲܒ̣ܩܘܼܖ̈ܝܵܗ̇: ܡܵܐ ܕܡܲܗܦܸـܟܐ̄ܢܵܐ ܫܒ̣ܝܼܬ̣ܗܘܿܢ: ܢܒܲܪܟ݂ܵܟ݂ ܡܵܪܝܵܐ ܕܲܝܪܵܐ ܙܲܕܝܼܩܵܐ ܛܘܼܪܵܐ ܩܲܕܝܼܫܵܐ.

²⁴ ܘܢܸܬ̇ܒ̣ܘܼܢ ܒܵܗ ܝܑܼܘܼܕ݂ܵܐ: ܘܟ݂ܠܗܹܝܢ ܩܘܼܖܹ̈ܝܗ̇ ܐܲܟ݂ܚܕ݂ܵܐ: ܐܲܟܵܖܹ̈ܐ ܘܖ̈ܵܥܝܲܝ ܓܙܵܖܹ̈ܐ.

²⁵ ܡܸܛܠ ܕܐܲܪܘ̇ܝܼܬ̣ ܢܲܦ̮ܫܵܐ ܕܨܲܗܝܵܐ: ܘܟ݂ܠ ܢܲܦ̮ܫܵܐ ܕܟܲܦܢܵܐ ܣܲܒ̇ــ̇ܥܹܬ̣.

²⁶ ܡܸܛܠ ܗܵܢܵܐ ܐܸܬ̇ܬ̇ܥـ̇ܝܼܪܹܬ̣ ܘܲܚـ̇ܙܹܝܬ̣: ܘܫܸܢܲܬ̣ܝ ܒܸܣܡܲܬ̤ ܠܝܼ.

²⁷ ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܐܵܡܲ݁ܪ ܡܵܪܝܵܐ: ܘܐܸܙܪܘܿܥ ܠܲܕ݂ܒܹܝܬ̣ ܝܑܼܣܪܵܝܹܠ: ܘܠܲܕ݂ܒܹܝܬ̣ ܝܑܼܗܘܼܕ݂ܵܐ: ܙܲܪܥܵܐ ܕܲܒ̣ܢܲܝ̈ ܐ̄ܢܵܫܵܐ: ܘܙܲܪܥܵܐ ܕܲܒ̣ܥܝܼܪܵܐ.

²⁸ ܘܐܲܝܟ݂ ܕܐܸܬ̣ܪܲܥـ̇ܝܼܬ̣ ܥܠܲܝܗܘܿܢ ܠܡܸܥܩܲܪ ܐܸܢܘܿܢ: ܘܲܠܡܸܣܬܲܪ: ܘܠܲܡܣܲܚܵܦܘܼ: ܘܲܠܡܵܘܒܵܕ݂ܘ: ܘܲܠܡܲܒ̣ܐܵܫܘܼ: ܗܵܟܲܢܵܐ ܐܸܥܗܲܕ݂ ܥܠܲܝܗܘܿܢ ܠܡܸܒ̣ܢܵܐ ܘܲܠܡܸܨܲܒ̣ ܐܵܡܲ݁ܪ ܡܵܪܝܵܐ.

²⁹ ܒܝܵܘ̈ܡܵܬ̣ܵܐ ܗܵܢܘܿܢ: ܠܵܐ ܢܹܐܡܪܘܼܢ ܬܘܼܒ̣ ܐܲܒ̣ܵܗܹ̈ܐ ܐܸܟܲܠ̣ܘ ܒܸܣܖܹ̈ܐ: ܘܫܸܢܹ̈ܐ ܕܲܒ̣ܢܲܝ̈ܵܐ ܩܵܗ̈ܝܵܢ.

³⁰ ܐܸܠܵܐ ܐ̄ܢܵܫ ܒܲܚܛܵܗܵܘ̈ܗܝ ܢܡܘܼܬ̣: ܟܠ ܒܲܪܢܵܫܵܐ ܕܐܵܟܹܠ ܒܸܣܖܹ̈ܐ: ܫܸܢܵܘ̈ܗܝ ܕܝܼܠܹܗ ܢܸܩܗ̈ܝܵܢ.

³¹ ܗܵܐ ܝܵܘ̈ܡܵܬܵܐ ܐܵܬ݁܀ ܝܢ ܐܵܡܲܪܥ ܡܵܪܝܵܐ: ܘܐܲܩܝܼܡ ܠܲܕ݂ܒܹܝܬ̣ ܝܑܼܣܪܵܝܹܠ: ܘܠܲܕ݂ܒܹܝܬ̣ ܝܑܼܗܘܼܕ݂ܵܐ ܕܝܵܬܹܩܹܐ ܚܕܲܬܵܐ.

³² ܠܵܐ ܐܲܝܟ݂ ܗܵܝ̇ ܕܝܵܬܹܩ܀ ܐ ܕܐܲܩـ̇ܝܪܡܹܬ̣ ܥܲܡ ܐܲܒ̣ܵܗܲܝ̈ܗܘܿܢ: ܒܝܵܘܡܵܐ ܕܸܚ̇ܕܹܬ̣ ܒܐܝܼܕܗܘܿܢ ܘܐܲܦ̇ܩܹܬ̣ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܡܸܛܠ ܕܗܸܢܘܿܢ ܒܲܛܸܠ̣ܘ ܕܝܵܬܹܩܹܐ ܕܝܼܠܝ: ܘܐܵܦ ܐܸܢܵܐ ܒܣܹܝܬ̣ ܒܗܘܿܢ ܐܵܡܲ݁ܪ ܡܵܪܝܵܐ.

³³ ܐܸܠܵܐ ܗܵܕܹܐ ܕܝܵܬܹܩܹܐ ܕܐܹܣܝܼܡ ܠܲܕ݂ܒܹܝܬ̣ ܝܼܣܪܵܝܹܠ: ܒܵܬܲܪ ܝܵܘ̈ܡܵܬ̣ܵܐ ܗܵܢ̇ܘܿܢ ܐܵܡܲ݁ܪ ܡܵܪܝܵܐ: ܐܲܬ̇ܠܝܼܘܗܝ ܠܢܵܡܘܼܣܝ ܒܓ̣ܵܘܗܘܿܢ: ܘܥܲܠ ܠܸܒܵـ̈ܘܵܬ̣ܗܘܿܢ ܐܸܟ݂ܬ̇ܒ̣ܝܼܘܗܝ: ܘܐܸܗܘܸܐ ܠܗܘܿܢ ܐܲܠܵܗܵܐ: ܘܗܸܢܘܘܿܢ ܢܸܗܘܿܢ ܠܝܼ ܥܲܡܵܐ.

³⁴ ܘܠܵܐ ܢܲܠܦܘܼܢ ܬܘܼܒ̣ ܓܒܲܪ ܠܐܲܚܘܼܗܝ: ܘܲܓ̣ܒܲܪ ܠܚܲܒ̣ܪܹܗ: ܘܢܹܐܡܪܘܿܢ ܕܕܲܥܘ ܠܡܵܪܝܵܐ: ܡܸܛܠ ܕܟ݂ܠܗܘܿܢ ܢܸܕܥܘܼܢܵܢܝ: ܡ̣ܢ ܙܥܘܿܪܗܘܿܢ ܘܲܥܕܲܡܵܐ ܠܩܲܫܝܼܫܗܘܿܢ ܐܵܡܲ݁ܪ ܡܵܪܝܵܐ: ܡܸܛܠ ܕܐܸܫܒ̇ܘܿܩ ܠܚܵܘܒܲܝ̈ܗܘܿܢ: ܘܲܚܛܵܗܲܝ̈ܗܘܿܢ ܬܘܼܒ̣ ܠܵܐ ܐܸܬ̇ܕܟܲܪ.

³⁵ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܕܝܵܗ̣̄ܒ̣ ܫܸܡܫܵܐ ܠܢܘܼܗܪܵܐ ܕܐܝܼܡܵܡܵܐ: ܘܕ݂ܘܼܒܵܪܵܐ ܕܣܵܗܪܵܐ ܘܲܕ݂ܟ݂ܵܘܟ̇ܒܹ̈ܐ ܠܢܘܼܗܪܵܐ ܕܠܸܠܝܵܐ: ܕܟ݂ܵܐܹܐ ܒܝܲܡܵܐ ܘܫܵܠܹ̇ܝܢ ܓܲܠܠܵܘ̈ܗܝ: ܡܵܪܝܵܐ ܚܲܝܠܬ̣ܵܢܵܐ ܫܡܹܗ.

³⁶ ܐܸܢ ܢܸܥܒ̇ܕ݂ܘܼܢ ܕܘܼܒܵܖܹ̈ܐ ܗܵܠܹܝܢ ܡ̣ܢ ܩܕ݂ܵܡܲܝ ܐܵܡܲ݁ܪ ܡܵܪܝܵܐ: ܘܐܵܦ ܙܲܪܥܵܐ ܕܝܼܣܪܵܝܹܠ ܢܸܒ̣̄ܛܠܘܼܢ: ܕܠܵܐ ܢܸܗܘܘܿܢ ܥܲܡܵܐ ܩܕ݂ܵܡܲܝ ܟܠܗܘܿܢ ܝܵـܘ̈ܡܵܬ̣ܵܐ.

³⁷ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܐܸܢ ܢܸܬ̣ܡܲܫܚܘܼܢ ܫܡܲܝܵܐ ܡ̣ܢ ܠܥܸܠ: ܘܢܸܬ̣ܒܲـ̈ܕܩܵܢ ܫܲܬ̣ܐ̱ܣܹ̈ܝܗ̇ ܕܐܲܪܥܵܐ ܡ̣ܢ ܠܬܲܚܬ̇: ܐܵܦ ܐܸܢܵܐ ܐܲܣܠܸܐ ܠܟ݂ܠܹܗ ܙܲܪܥܹܗ ܕܝܼܣܪܵܝܹܠ: ܥܲܠ ܟܠ ܡܸܕܸܡ ܕܲܥـ̣ܒܲܕ݂ܘ ܐܵܡܲ݁ܪ ܡܵܪܝܵܐ.

³⁸ ܗܵܐ ܝܵܘ̈ܡܵܬ̣ܵܐ ܐܵܬܹ݁ܝܢ ܐܵܡܲ݁ܪ ܡܵܪܝܵܐ: ܘܬܸܬ̣ܒ̇ܢܹܐ ܩܪܝܼܬ̣ܵܐ ܠܡܵܪܝܵܐ܆ܡ̣ܢ ܓܲܓ̣ܕܠܵܐ ܕܲܚܢܵܢܵܐܹܝܠ: ܥܕܲܡܵܐ ܠܬܲܪܥܵܐ ܕܙܵܘܝܼܬ̣ܵܐ.

³⁹ ܘܢܸܦܘܿܩ ܬܘܼܒ̣ ܚܘܼܛܵܐ ܕܲܡܫܘܼܚܬ̣ܵܐ ܠܩܘܼܒ̣ܠܹܗ: ܥܲܠ ܪܵܡܬ̣ܵܐ ܕܲܓ̣ܪܵܒ̣: ܘܢܸܬ̣ܟ̇ܪܸܟ݂ ܠܪܵܡܬ̣ܵܐ.

⁴⁰ ܘܟ݂ܠܹܗ ܥܘܼܡܩܵܕ ܕܫܵܕܹܝܢܒܹܗ ܦܸܪܬ̣ܵܐ ܘܩܸܛܡܵܐ: ܥܕܲܡܵܐ ܠܢܲܚܠܵܐ ܕܩܸܕ݂ܪܘܿܢ: ܘܲܥܕܲܡܵܐ ܠܙܵܘܝܼܬ̣ܵܐ ܕܬܲܪܥܵܐ ܕܖ̈ܲܟ݂ܫܵܐ ܡܲܕ݂ܢܚܵܝܵܐ ܩܘܼܕ݂ܫܵܐ ܠܡܵܪܝܵܐ: ܠܵܐ ܢܸܬ̣ܥ̱ܩܲܪ ܘܠܵܐ ܢܸܣܬ̇ܚܸܦ ܬܘܼܒ̣ ܠܥܵܠܲܡ.

32

¹ ܦܸܬ̣ܓ̣ܵܡܵܐ ܕܲܗ̤ܘܵܐ ܥܲܠ ܐܹܪܲܡܝܵܐ: ܡ̣ܢ ܩܕ݂ܵܡ ܡܵܪܝܵܐ: ܗ̤ܝ ܗ̄ܝ̣ ܫܢܲܬ̣ ܬܡܵܢܲܥܸܣܖܹ̈ܐ ܠܲܢܘܼܒ̣ܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ.

² ܘܗܵܝܕܹܝܢ ܚܲܝ̈ܠܹܐ ܕܡܲܠܟܵܐ ܕܒ̣ܵܒܹܠ ܟܪܝܼܟ݂ܝܼܢ ܠܐܘܿܪܸܫܠܸܡ: ܘܐܹܪܲܡܝܵܐ ܢܒ̣ܝܼܵܐ ܟܠܸܐ ܗ̄ܘ̣ܵܐ ܒܕ݂ܵܪܲܬ̣ ܡܲܛܲܪܬܵܐ ܕܒܹܝܬ̣ ܟܲܠܟܵܐ ܕܲܝܗܘܼܕ݂ܵܐ.

³ ܕܲܟ݂ܠܵـ̣ܝܗܝ ܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܘܐܸܡ݂ܲܪ: ܡܸܛܠ ܡܵܢܵܐ ܡܸܬ̣ܢܲܒܸ̇ܐ ܐܲܢ̄ܬ̇ ܘܐܵܡܲ݁ܪ ܐܲܢ̄ܬ̇: ܗܵܟܲܢܵܐ ܐܵܡܲ݁ܪ ܡܵܪܝܵܐ ܗܵܐ ܡܫܲܠܸܡ ܐ̄ܢܵܐ ܠܵܗ̇ ܠܲܩܪܝܼܬ̣ܵܐ ܗܵܕܹܐ ܒܐܝܼܕ݂ܵܘ̈ܗܝ ܕܡܲܠܟܵܐ ܕܒ̣ܵܒܹܠ: ܘܢܸܟ݂ܒ̇ܫܝܼܗ̇.

⁴ ܘܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܠܵܐ ܢܸܬ̣ܦܲܠܲܛ ܡ̣ܢ ܐܝܼܕ݂ܵܐ ܕܟܲܠܕܵܝܹ̈ܐ: ܡܸܛܠ ܕܡܸܫܬ̇ܠܵܡܘܼ ܢܸܫܬ̇ܠܸܡ ܒܐܝܼܕ݂ܵܘ̈ܗܝ ܕܡܲܠܟܵܐ ܕܒ̣ܵܒܹܠ: ܘܲܢܡܲܠܸܠ ܦܘܪܡܹܗ ܥܲܡ ܦܘܼܡܹܗ: ܘܥܲܝ̈ܢܵܘܗܝ ܠܥܲܝ̈ܢܵܘܗܝ ܢܸܚ̈ܙܝܵܢ.

⁵ ܘܲܠܒ̣ܵܒܹܠ ܢܲܘܒ̇ܠܝܼܘܗܝ ܠܨܹܕܲܩܝܵܐ: ܘܬܲܡܵܢ ܢܸܗܘܸܐ ܥܕܲܡܵܐ ܠܝܵܘܡܵܐ ܕܦܵـ̇ܩܹܕ݂ ܐ̄ܢܵܐ ܠܹܗ ܐܵܡܲ݁ܪ ܡܵܪܝܵܐ: ܡܸܛܠ ܕܬܸܬ̣ܟܲܬ̇ܫܘܼܢ ܥܲܡ ܟܲܠܕ݂ܵܝܹ̈ܐ ܘܠܵܐ ܬܸܙܟ̇ܘܿܢ.

⁶ ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܠܡܹܐܡܲܪ.

⁷ ܗܵܐ ܢܲܚܡܵܐܹܝܠ ܒܲܪ ܫܵܠܘܿܡ ܕܵܕ݂ܵܟ݂ ܐܵܬܹ̇ܐ ܠܘܵܬ̣ܵܟ݂: ܘܐܵܡܲ݁ܪ: ܙܒܸܢ ܠܵܟ݂ ܚܲܩܠܝ ܕܒܲܥܢܵܬ̣ܘܿܬ̣ ܕܒܲܐܪܥܵܐ ܕܒܸܢܝܵܡܸܢ: ܡܸܛܠ ܕܠܵܟ݂ ܙܵܕ݂ܩܵܐ ܝܵܪܬ̇ܘܼܬ̣ܵܐ ܠܡܸܙܒܲܢ.

⁸ ܘܐܸܬ݂̣ܵܐ ܠܘܵܬ̣ܝ ܢܲܚܡܵܐܹܝܠ ܒܲܪ ܕܵܕ݂ܝ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܠܕ݂ܵܪܲܬ̣ ܡܲܛܲܪܬܵܐ: ܘܐܸܡ݂ܲܪ ܠܝܼ: ܙܒܸܢ ܠܵܟ݂ ܚܲܩܠܝ ܕܒܲܥܢܵܬ̣ܘܿܬ̣ ܕܒܲܐܪܥܵܐ ܕܒܸܢܝܵܡܸܢ: ܡܸܛܠ ܕܠܵܟ݂ ܙܵܕ݂ܩܵܐ ܝܵܪܬܘܼܬ̣ܵܐ: ܘܠܵܟ݂ ܘܵܠ̇ܝܵܐ. ܙܒܸܢܹܝܗ̇ ܠܵܟ݂.

⁹ ܘܝܸܕ݂ܥܹ̇ܬ̣ ܕܦܸܬ̣ܓ̣ܵܡܹܗ ܗ̄ܘ̣ ܕܡܵܪܝܵܐ: ܘܙܸܒ̣ܢܹ̇ܬ̣ ܚܲܩܠܵܐ ܡ̣ܢ ܢܲܚܡܵܐܹܝܠ ܒܲܪ ܕܵܕ݂ܝ ܕܒܲܥܢܵܬ̣ܘܿܬ̣: ܘܬܸܩܠܹ̇ܬ̣ ܠܹܗ ܟܸܣܦܵܐ: ܫܲܒ̣ܥܵܐ ܡܲܬ̣ܩܵܠ̈ܝܼܢ ܘܥܸܣܪܵܐ ܕܟܸܣܦܵܐ.

¹⁰ ܘܟܸܬ̣ܒܹ̇ــ̇ܬ̣ ܫܛܵܖܹ̈ܐ ܘܚܲܬ̇ܡܹ̇ܬ̣ ܘܣܲܗ̇ܕܹܬ̣ ܣܵܗ̈ܕܹܐ: ܘܬܸܩܒܹ̇ܬ̣ ܟܸܣܦܵܐ ܒܡܲܣܲܐܬ̣ܵܐ.

¹¹ ܘܢܸܣ̇ܒܹܬ̣ ܫܛܵܪܵܐ ܕܲܙܒ̣ܝܼܢܬܵܐ: ܕܲܚܬ̣ܝܼܡ ܒܦܘܼܩܕܵܢܵܐ ܘܲܒ̣ܢܵܡܘܿܣܵܐ ܘܲܕ݂ܠܵܐ ܡܚܲܬܲܡ.

¹² ܘܝܸܗ̄ܒܹ̇݁ܬ̣ ܫܛܵܖܹ̈ܐ ܕܲܙܒ̣ܝܼܢܬܵܐ ܠܒ̣ܵܪܘܿܟ݂ ܒܲܪ ܢܹܪܝܼܵܐ: ܒܲܪ ܡܥܲܣܝܵܐ: ܠܥܹܝܢ ܢܲܚܡܵܐܹܝܠ ܒܲܪ ܕܵܕ݂ܝ: ܘܲܠܥܹܝܢ ܣܵܗ̈ܕܹܐ ܕܲܟ݂ܬ̣ܝܼܒ̣ܝܼܢ ܒܲܫܛܵܖܹ̈ܐ ܕܲܙܒ̣ܝܼܢܬܵܐ: ܘܲܠܥܹܝܢ ܟܠܗܘܿܢ ܝܗ̄ܘܼܕܵܝܹ̈ܐ ܕܝܵـ̇ܬ̣ܒ̇ܝܼܢ ܒܕ݂ܵܪܲܬ̣ ܡܲܛܲܪܬܵܐ.

¹³ ܘܦܲܩ̇ܕܹܬ̣ ܠܒ̣ܵܪܘܿܟ݂ ܠܥܹܢܲܝܗܘܿܢ ܘܐܸܡ̇ܪܹܬ̣.

¹⁴ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܣܲܒ̣ ܫܛܵܖܹ̈ܐ ܗܵܠܹܝܢ: ܐ̄ܫܛܵܪܵܐ ܗܵܢܵܐ ܕܲܙܒ̣ܝܼܢܬܵܐ ܕܲܚܬ̣ܝܼܡ: ܘܲܫܛܵܪܵܐ ܗܵܢܵܐ ܕܠܵܐ ܡܚܲܬܲܡ: ܘܐܲܪܡܵܐ ܐܸܢܘܿܢ ܒܡܵܐܢܵܐ ܕܦܲܚܵܪܵܐ: ܕܢܸܬ̣ܢܲܛܪܘܼܢ ܝܵܘ̈ܡܵܬܵܐ ܣܲܓ̇ܝܼ̈ܐܹܐ.

¹⁵ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ ܨܒ̣ܐܘܼܬ̣ ܐܲܠܵܗܵܐ ܕܝܼܣܪܵܝܹܠ: ܡܸܟܹ̇ܝܠ ܢܸܙܕܲܒ̣ܢܘܼܢ ܒܵـ̈ܬܹܐ ܘܚܲܩ̈ܠܵܬ̣ܵܐ: ܘܟܲܖ̈ܡܹܐ ܒܐܲܪܥܵܐ ܗܵܕܹܐ.

¹⁶ ܘܨܲܠ̇ܝܼܬ̣ ܩܕ݂ܵܡ ܡܵܪܝܵܐ: ܡ̣̇ܢ ܒܲܬܲܪ ܕܝܸܗ̄ܒܹܬ̣ ܫܛܵܖܹ̈ܐ ܕܲܙܒ̣ܝܼܢܬܵܐ ܠܒ̣ܵܪܘܿܟ݂ ܒܲܪ ܢܹܪܝܼܵܐ.

¹⁷ ܘܨܲܠ̇ܝܼܬ̣ ܩܕ݂ܵܡ ܡܵܪܝܵܐ ܘܐܸܡ̇ܪܹܬ̣: ܒܒ̣ܵܥܘ ܡܵܪܝܵܐ ܐܲܠܵܗܵܐ: ܗܵܐ ܐܲܢ̄ܬ̇ ܥ̣ـܒܲܕܬ̇ ܫܡܲܝܵܐ ܘܐܲܪܥܵܐ: ܒܚܲܝܠܵܟ݂ ܪܲܒܵܐ ܘܒܲܕܪܵܥܵܟ݂ ܪܵܡܵܐ: ܘܠܵܐ ܛܵܫܹ̇ܐ ܡ̣ܢ ܩܕ݂ܵܡܲܝܟ ܟܠ ܦܸܬ̣ܓ̣ܵܡ.

¹⁸ ܥܵܒܸ݁ܕ݂ ܛܲܝܒ̇ܘܼܬ̣ܵܐ ܠܐܲܠܦܹ̈ܐ ܕܕ݂ܵܖܹ̈ܐ: ܦܵܪܲܥ ܚܛܵܗܹ̈ܐ ܕܐܲܒ̣ܵܗܹ̈ܐ ܠܥܘܼܒܵܐ ܕܲܒ̣ܢܲܝ̈ܗܘܿܢ ܒܵܬܲܪܗܘܿܢ: ܐܲܠܵܗܵܐ ܪܲܒܵܐ: ܘܓܲܢ̄ܒܵܪܵܐ: ܘܲܕ݂ܚܝܼܠܵܐ: ܡܵܪܝܵܐ ܚܲܝܠܬ̣ܵܢܵܐ ܫܡܹܗ.

¹⁹ ܕܪܲܒܵܐ ܬܲܪܥܝܼܬܹܗ ܘܣܲܓ̇ܝܼܐܝܼܢ ܥܒ̣ܵܕ݂ܵܘ̈ܗܝ: ܘܥܲܝ̈ܢܵܘܗܝ ܦܬ̣ܝܼ̈ܚܵܢ ܥܲܠ ܟܠܗܹܝܢ ܐܘܼܖ̈ܚܵܬ̣ܗܘܿܢ ܕܲܒ̣ܢܲܝ̈ܢܵܫܵܐ: ܕܬܸܬܸ̇ܠ ܠܓܲܒ̣ܪܵܐ ܐܲܝܟ݂ ܐܘܼܖ̈ܚܵܬܹܗ: ܘܐܲܝܟ݂ ܦܹܐܖ̈ܲܝ ܥܒ̣ܵܕ݂ܵܘ̈ܗܝ.

²⁰ ܕܲܥـ̣ܒܲܕܬ̇ ܐܵܬ̣̈ܘܵܬܵܐ ܪܵܘܖ̈ܒ̣ܵܬ̣ܵܐ: ܘܬܸܕ݂ܡܪܵܬ̣ܵܐ ܒܐܲܪܥܵܐ ܕܡܸܨܪܹܝܢ ܥܕܲܡܵܐ ܠܝܵܘܡܵܢܵܐ: ܠܝܼܣܪܵܝܹܠ ܒܹܝܬ̣ ܒܢܲܝ̈ ܐ̄ܢܵܫܵܐ: ܘܲܥ̣ܒܲܕܬ̇ ܠܵܟ݂ ܫܡܵܐ ܐܲܝܟ݂ ܕܝܵܘܡܵܢܵܐ.

²¹ ܘܐܲܦܩܸܬ̇ ܠܥܲܡܵܟ݂ ܝܼܣܪܵܝܠ ܡ̣ܢ ܐܲܪܥܵܐ ܕܡܸܨܪܹܝܢ: ܒܐܵܬ̣̈ܘܵܬܵܐ ܘܲܒ̣ܕ݂ܡܖ̈ܵܬ̣ܵܐ: ܘܒ̣ܐܝܼܕ݂ܵܐ ܬܲܩܝܼܦܬܵܐ: ܘܒܲܕ݂ܪܵܥܵܐ ܪܵܡܵܐ: ܘܲܒ̣ܚܸܙܘܵܐ ܪܲܒܵܐ.

²² ܘܝܲܗ̣̄ܒ̣ܬ̇ ܠܗܘܿܢ ܐܲܪܥܵܐ ܗܵܕܹܐ ܕܝܼܡܲܝܬ̇ ܠܐܲܒ̣ܵܗܲܝ̈ܗܘܿܢ ܠܡܸܬܲܠ ܠܗܘܿܢ: ܐܲܪܥܵܐ ܕܡܲܪܕܝܵܐ ܚܲܠܒ̣ܵܐ ܘܕܸܒ̣ܫܵܐ.

²³ ܘܐܸܬ̣݂ܵܘ ܘܝܲܪܬ̇ܘܼܗ̇: ܘܠܵܐ ܫ̣ܡܲܥܘ ܒܩܵܠܵܟ݂: ܘܒ̣ܢܵܡܘܿܣܵܟ݂ ܠܵܐ ܗܲܠܸܟ݂ܘ: ܘܟ݂ܠ ܕܦܲܩܸܕܬ̇ ܐܸܢܘܿܢ ܠܡܸܥܒܲܕ݂ ܠܵܐ ܥ̣ܒܲܕ݂ܘ: ܘܡܲܛܝܲܬ̤ ܐܸܢܘܿܢ ܟܠܵܗ̇ ܗܵܕܹܐ ܒܝܼܫܬܵܐ.

²⁴ ܗܵܐ ܟܹܐܡܢܹ̈ܐ ܐܸܬ̣ܵܘ ܐܲܥ ܩܪܝܼܬ̣ܵܐ ܗܵܕܹܐ ܠܡܹܐܚܕܵܗ̇: ܘܲܩܪܝܼܬ̣ܵܐ ܐܸܫܬܲܠܡܲܬ̤ ܠܵܗ̇ ܒܐܝܼܕ݂ܵܐ ܕܟܲܠܕܵܝܹ̈ܐ ܕܡܸܬ̣ܟܲܬ̇ܫܝܼܢ ܥܠܹܝܗ̇܆ܡ̣ܢ ܩܕ݂ܵܡ ܚܲܪܒܵܐ: ܘܟܲܦܢܵܐ ܘܡܵܘܬܵܢܵܐ: ܘܡܸܕܸܡ ܕܐܸܡ݂ܲܪܬ̇ ܗܘ̤ܵܐ ܘܗܵܐ ܚـ̇ܙܹܝܬ̣.

²⁵ ܘܐܲܢ̄ܬ̇ ܐܸܡ݂ܲܪܬ̇ ܠܝܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܙܒܸܢ ܠܵܟ݂ ܚܲܩܠܵܐ ܒܟܸܣܦܵܐ: ܘܣܲܗܸܕ݂ ܣܵܗ̈ܕܹܐ: ܘܗܵܐ ܩܪܝܼܬ̣ܵܐ ܐܸܫܬܲܠܡܲܬ̤ ܠܵܗ̇ ܒܐܝܼܕ݂ܵܐ ܕܟܲܕܠܕ݂ܵܝܹ̈ܐ.

²⁶ ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܠܡܹܐܡܲܪ.

²⁷ ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܵܐ ܕܟ݂ܠ ܒܣܲܪ ܕܲܠܡܵܐ ܡ̣ܢ ܩܕ݂ܵܡܲܝ ܛܵܫܹ̇ܐ ܡܸܕܸܡ.

²⁸ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ: ܗܵܐ ܡܲܫܠܸܡ ܐ̄ܢܵܐ ܠܵܗ̇ ܠܲܩܪܝܼܬ̣ܵܐ ܗܵܕܹܐ ܒܐܝܼܕ݂ܵܐ ܕܟܲܠܕ݂ܵܝܹ̈ܐ: ܘܒ̣ܐܝܼܕܹܗ ܕܲܢܒܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܘܢܸܟ݂ܒ̇ܫܝܼܗ̇.

²⁹ ܘܢܹܐܬ̣ܘܿܢ ܟܲܠܕܵܝܹ̈ܐ ܘܢܸܥܒ̇ܕ݂ܘܼܢ ܩܪܵܒ̣ܵܐ ܥܲܠ ܩܪܝܼܬ̣ܵܐ ܗܵܕܹܐ: ܘܢܸܥܩ̄ܪܘܼܢܵܗ̇ ܠܲܩܪܝܼܬܵܐ ܗܵܕܹܐ: ܘܢܵܘܩܕ݂ܘܼܢܵܗ̇ ܒܢܘܼܪܵܐ: ܘܒ̣ܵـ̈ܬܹܐ ܕܣܵܡ̣ܘ ܒܸܣܡܹ̈ܐ ܥܲܠ ܐܸܓܵܖ̈ܲܝܗܘܿܢ ܠܒܲܥܠܵܐ: ܘܢܲܩ̣ܝܼܘ ܢܘܼܩܵܝܹ̈ܐ ܠܐܲܠܵܗܹ̈ܐ ܐ̄ܚܖ̈ܵܢܹܐ ܕܢܲܪܓ̇ܙܘܼܢܵܢܝ.

³⁰ ܡܸܛܠ ܕܲܗܘ̤ܵܘ ܒܢܲܝ̈ ܝܼܣܪܵܝܹܠ: ܘܲܒ̣ܢܲܝ̈ ܝܼܗܘܼܕ݂ܵܐ: ܥܵܒ̣ܕܝܼܢ ܕܒ̣ܝܼܫ ܩܕ݂ܵܡܲܝ ܡ̣ܢ ܛܲܠܝܘܼܬ̣ܗܘܿܢ: ܡܸܛܠ ܕܲܒ̣ܢܲܝ̈ ܝܼܣܪܵܝܹܠ ܡܲܪܓ̇ܙܝܼܢ ܠܝܼ ܒܲܥܒ̣ܵـ̇ܕ݂ ܐܝܼܕܲܝ̈ܗܘܿܢ ܐܵܡܲ݁ܪ ܡܵܪܝܵܐ.

³¹ ܘܡܸܛܠܵܬ̣ܗܘܿܢ ܗܘ̤ܵܐ ܪܘܼܓ̣ܙܝ ܘܚܸܡܬ̣ܝ ܥܲܠ ܩܪܝܼܬ̣ܵܐ ܗܵܕܹܐ: ܡ̣ܢ ܝܵܘܡܵܐ ܕܲܒ̣ــ̣ܢܵܐܘܼܗ̇ ܘܲܥܕܲܡܵܐ ܠܝܵܘܡܵܢܵܐ: ܠܡܲܥܒܵܪܘܼܬ̣ܵܗ̇ ܡ̣ܢ ܩܕ݂ܵܡ ܐܲܦܲܝ̈.

³² ܥܲܠ ܟܠܗܹܝܢ ܒܝܼ̈ܫܵܬ̣ܵܐ ܕܲܒ̣ܢܲܝ̈ ܝܼܣܪܵܝܹܠ: ܘܕܲܒ̣ܢܲܝ̈ ܝܼܗܘܼܕ݂ܵܐ ܕܲܥܒܲܕ݂ܘ ܠܡܲܪܓܵܙܘܼܬ̣ܝ: ܗܸܢܘܿܢ ܘܡܲܠܟܲܝ̈ܗܘܿܢ: ܘܪܵܘܖ̈ܒ̣ܸܵܢܲܝܗܘܿܢ: ܘܟ݂ܗܢܲܝ̈ܗܘܿܢ: ܘܲܢܒ̣ܝܲܝ̈ܗܘܿܢ: ܘܓܲܒ̣ܖܹ̈ܐ ܕܲܝܗܘܼܕ݂ܵܐ: ܘܥܵܡܘܿܖܹ̈ܝܗ̇ ܕܐܘܿܪܸܫܠܸܡ.

³³ ܘܐܲܦܢܝܼܘ ܠܝܼ ܩܕ݂ܵܠܗܘܿܢ ܘܠܵܐ ܐܲܦܝ̈ܗܘܿܢ: ܘܐܲܠـ̇ܦܹܬ̣ ܐܸܢܘܿܢ: ܩܲܕܡܹܬ̣ ܘܐܲܠـ̇ܦܹܬ̣: ܘܠܵܐ ܫܵܡ̇ܥܝܼܢ ܠܲܡܩܲܒܵܠܘܼ ܡܲܪܕܘܼܬ̣ܵܐ.

³⁴ ܘܣܵܡ̣ܘ ܛܲܢܦܘܼܬ̣ܗܘܿܢ ܒܒܲܝܬܵܐ ܕܐܸܬ̣ܩܪܝܼ ܫܹܡܝ ܥܠܵܘܗܝ: ܘܛܲܡ̣ܐܘܼܗܝ.

³⁵ ܘܲܒ̣ܢ̣ܵܘ ܥܠܵـ̈ܘܵܬ̣ܵܐ ܠܒܲܥܠܵܐ ܒܬܲܦܲܬ̣ ܕܲܒ̣ܢܲܚܠܵܐ ܕܒܲܪ ܗܵܢܘܿܡ: ܠܡܵܘܩܵܕ݂ܘܼ ܒܢܲܝ̈ܗܘܿܢ ܘܲܒ̣̈ܢܵܬ̣ܗܘܿܢ ܠܐܲܡܠܸܟ݂: ܕܠܵܐ ܦܲܩ̇ܕܹܬ̣ ܘܠܵܐ ܣܸܠܩܲܬ̤ ܥܲܠ ܠܹܒ̇ܝ: ܕܢܸܥܒ̇ܕ݂ܘܼܢ ܛܲܢܦܘܼܬ̣ܵܐ ܗܵܕܹܐ ܘܢܲܚܛܘܿܢ ܠܲܝܗܘܼܕ݂ܵܐ.

³⁶ ܗܵܫܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. ܥܲܠ ܩܪܝܼܬ̣ܵܐ ܗܵܕܹܐ ܕܐܵܡ̇ܪܝܼܢ ܐ̄ܢܬ̇ܘܿܢ ܐܸܫܬܲܠܡܲܬ̤ ܒܐܝܼܕܹܗ ܕܡܲܠܟܵܐ ܕܒ̣ܵܒܹܠ: ܒܚܲܪܒܵܐ ܘܒ̣ܟܲܦܢܵܐ ܘܒ̣ܡܵܘܬܵܢܵܐ.

³⁷ ܗܵܐ ܡܟܲܢܸܫ ܐ̄ܢܵܐ ܠܗܘܿܢ ܡ̣ܢ ܟܠܗܹܝܢ ܐܲܖ̈ܥܵܬ̣ܵܐ ܕܒܲܕܪܹܬ̣ ܐܸܢܘܿܢ ܠܬܲܡܵܢ: ܒܪܘܼܓ̣ܙܝ ܘܲܒ̣ܚܸܡܬ̣ܝ ܒܪܘܼܓ̣ܙܵܐ ܪܲܒܵܐ: ܘܐܲܗܦܸـܟ݂ ܐܸܢܘܿܢ ܠܐܲܬ̣ܪܵܐ ܗܵܢܵܐ: ܘܐܵܘܬܸ̇ܒ̣ ܐܸܢܘܿܢ ܒܫܸܠܝܵܐ.

³⁸ ܘܢܸܗܘܘܿܢ ܠܝܼ ܥܲܡܵܐ: ܘܐܸܢܵܐ ܐܸܗܘܸܐ ܠܗܘܿܢ ܐܲܠܵܗܵܐ.

³⁹ ܘܐܸܬܸܠ ܠܗܘܿܢ ܠܸܒܵܐ ܚܲܕ݂ܬܵܐ܆ܘܪܘܼܚܵܐ ܚܕܲܬܵܐ: ܠܡܸܕ݂ܚܲܠ ܩܕ݂ܵܡܲܝ ܟܠܗܘܿܢ ܝܵܘ̈ܡܵܬ̣ܵܐ: ܘܢܸܛܐܲܒ̣ ܠܗܘܿܢ ܠܗܘܿܢ ܘܠܲܒ̣ܢܲܝ̈ܗܘܿܢ ܒܵܬܲܪܗܘܿܢ.

⁴⁰ ܘܐܲܩܝܼܡ ܠܗܘܿܢ ܩܝܵܡܵܐ ܠܥܵܠܲܡ: ܕܠܵܐ ܐܸܗܦܘܿܟ݂ ܡܸܢܗܘܿܢ ܠܡܲܛܐܵܒ̣ܘܼ ܠܗܘܿܢ: ܘܕܸܚܠܲܬ̣ܝ ܐܸܬܸܠ ܒܠܸܒ̇ܗܘܿܢ ܕܠܵܐ ܢܸܣܛܘܿܢ ܡܹܢܝ.

⁴¹ ܙܐܹܚܲܕܸܐ ܐܸܢܘܿܢ ܘܢܸܛܐܲܒ̣ ܠܗܘܿܢ: ܘܐܸܨܘܿܒ̣ ܒܐܲܪܥܵܐ ܗܵܕܹܐ ܒܩܘܼܫܬܵܐ: ܒܟ݂ܠܹܗ ܠܹܒܝ ܘܲܒ̣ܟ݂ܠܵܗ̇ ܢܲܦ̮ܫܝ.

⁴² ܗܵܟܲܢܵܐ ܐܵܡܲ݁ܪ ܡܵܪܝܵܐ: ܐܲܝܟ݂ ܕܐܲܝܬ̇ܝܼـ̇ܬ̣ ܥܲܠ ܥܲܡܵܐ ܗܵܢܵܐ ܟܠܵܗ̇ ܒܝ̣ܫܬܵܐ ܗܵܕܹܐ ܪܲܒ̇ܬ̣ܵܐ: ܗܵܟܲܢܵܐ ܡܲܝܬܹ̇ܐ ܐ̄ܢܵܐ ܥܠܲܝܗܘܿܢ. ܟܠܵܗ̇ ܛܵܒ̣ܬ̣ܵܐ ܕܐܵܡܲ݁ܪ ܐ̄ܢܵܐ ܥܠܲܝܗܘܿܢ.

⁴³ ܘܢܸܙܕܲܒ̣̈ܢܵܢ ܚܲܩ̈ܠܵܬ̣ܵܐ ܒܐܵܪܥܵܐ ܗܵܕܹܐ: ܕܐܵܡ̇ܪܝܼܬ̇ܘܿܢ ܚܲܪܒܵܐ ܗ̄ܝ̣ ܡ̣ܢ ܒܢܲܝ̈ܢܵܫܵܐ ܘܒ̣ܥܝܼܪܵܐ: ܘܐܸܫܬܲܠܡܲܬ̤ ܒܐܝܼܕ݂ܵܐ ܕܟܲܠܕ݂ܵܝܹ̈ܐ.

⁴⁴ ܚܲܩ̈ܠܵܬ̣ܵܐ ܒܟܸܣܦܵܐ ܢܸܙܒ̇ܢܘܼܢ: ܘܢܸܟ݂ܬ̇ܒ̣ܘܼܢ ܐܸܫܛܵܖܹ̈ܐ ܘܲܢܚܲܬ̇ܡܘܼܢ: ܘܲܢܣܲܗܕܘܼܢ ܣܵܗ̈ܕܹܐ: ܒܐܲܪܥܵܐ ܕܒܸܢܝܵܡܸܝܢ: ܙܒܲܚܕ݂ܵܖܹ̈ܝܗ̇ ܕܐܘܿܪܸܫܠܸܡ: ܘܲܒ̣ܩܘܼܖ̈ܝܵܐ ܕܲܝܗܘܼܕ݂ܵܐ ܘܒ̣ܩܘܼܖ̈ܝܵܐ ܕܛܘܼܖܹ̈ܐ: ܘܲܒ̣ܩܘܼܖ̈ܝܵܐ ܕܦܲܩ̈ܥܵܬ̣ܵܐ: ܘܒ̣ܩܘܼܖ̈ܝܵܐ ܕܬܲܝܡ̄ܢܵܐ: ܘܐܲܗܦܸـܟ݂ ܫܒ̣ܝܼܬ̣ܗܘܿܢ ܐܵܡܲ݁ܪ ܡܵܪܝܵܐ.

33

¹ ܘܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܢܒ̣ܝܼܵܐ ܕܬܲܪܬܹ̇ܝܢ ܙܲܒ̣ܢܝܼ̈ܢ: ܟܲܕ݂ ܟܠܸܐ ܗ̄ܘ̣ܵܐ ܥܕܲܟܹ̇ܝܠ ܒܕ݂ܵܪܲܬ̣ ܡܲܛܲܪܬܵܐ: ܘܐܸܡ݂ܲܪ.

² ܗܵܟܲܢܵܐ ܐܵܡܲ݁ܪ ܡܵܪܝܵܐ: ܕܥܲـ̣ܒ̣ܕܵܟ݂ ܘܓܲܒ̣ܠܵܟ݂ ܘܐܲܬ̣ܩ̣ܢܵܟ݂ ܡܵܪܝܵܐ ܫܡܹܗ.

³ ܩܪܝܼܢܝ ܘܐܹܥܢܹܝܟ݂: ܘܐܹܚܵܘܹܝܟ݂ ܪܵܘܖ̈ܒ̣ܵܬ̣ܵܐ ܘܥܲܫܝܼ̈ܢܵܬ̣ܵܐ ܕܠܵܐ ܝܼܕܲܥ̣ܬ̇ܘܿܢ.

⁴ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܥܲܠ ܒܵـ̈ܬܹ̇ܐ ܕܲܩܪܝܼܬ̣ܵܐ ܗܵܕܹܐ: ܘܥܲܠ ܒܵـ̈ܬܹ̇ܐ ܕܡܲܠ̈ܟܹܐ ܕܲܝܗܘܼܕ݂ܵܐ: ܕܲܥ̣ܩܲܪܘ ܐܸܢܘܿܢ ܓܲܝܵܣܹ̈ܐ ܒܚܲܪܒܵܐ.

⁵ ܕܐܸܬ݂ܵܘ ܠܡܸܬ̣ܟܲܬܵܫܘܼ ܥܲܡ ܟܲܠܕ݂ܵܝܹ̈ܐ: ܘܲܠܡܸܡܠܵܐ ܐܸܢܘܿܢ ܦܲܓ̣ܖܹ̈ܐ ܕܲܒ̣ܢܲܝ̈ܢܵܫܵܐ: ܕܩܲܛـ̇ܠܹܬ̣ ܒܪܘܼܓ̣ܙ ܘܲܒ̣ܚܸܡܬ̣: ܘܐܲܗܦܟܹـ̇ܬ̣ ܐܲܦܲܝ̈ ܡ̣ܢ ܩܪܝܼܬܵܐ ܗܵܕܹܐ: ܥܲܠ ܟܠܵܗ̇ ܒܝܼܫܬܵܐ ܕܲܥ̣ܒܲܕ݂ܘ ܩܕ݂ܵܡܲܝ.

⁶ ܗܵܐ ܡܲܣܸܩ ܐ̄ܢܵܐ ܠܵܗ̇ ܠܢܘܼܓ̣ܪܵܐ ܐܵܣܝܵܐ ܘܐܲܣܸܐ ܐܸܢܘܿܢ: ܘܐܸܓ̣ܠܸܐ ܠܗܘܿܢ ܫܒ̣̈ܝܼܠܹܐ ܕܲܫܠܵܡܵܐ ܘܕ݂ܗܲܝܡܵܢܘܼܬ̣ܵܐ.

⁷ ܘܐܲܗܦܸـܟ݂ ܫܒ̣ܝܼܬ̣ܵܐ ܕܲܝܗܘܼܕ݂ܵܐ: ܘܲܫܒ̣ܝܼܬ̣ܵܐ ܕܝܼܣܪܵܝܹܠ: ܘܐܸܒ̣ܢܸܐ ܐܸܢܘܿܢ ܐܲܝܟ݂ ܕܡ̣ܢ ܩܕ݂ܝܼܡ: ܘܐܲܛܐܸܒ̣ ܠܗܘܿܢ ܐܲܝܟ݂ ܕܡ̣ܢ ܪܹܫܝܼܬ̣ܵܐ.

⁸ ܘܐܹܕܲܟܹ̇ܐ ܐܸܢܘܿܢ ܡ̣ܢ ܟܠܹܗ ܥܵܘ̣ܠܗܘܿܢ ܕܲܚ̣ܛܵܘ ܠܝܼ: ܘܐܸܫܒܘܿܩ ܠܟ݂ܠܗܘܿܢ ܚܵܘ̈ܒܲܝܗܘܿܢ ܕܲܚ̣ܛܵܘ ܠܝܼ ܘܕܲܐܥܠܝܼܘ ܒܝܼ.

⁹ ܘܬܸܗܘܸܐ ܠܝܪ ܠܲܫܡܵܐ ܘܲܠܒܘܼܣܵܡܵܐ: ܘܲܠܚܲܕܘܼܬ̣ܵܐ ܘܲܠܫܘܼܒ̣ܗܵܪܵܐ ܒܟ݂ܠܗܘܿܢ ܥܲܡܡܹ̈ܐ ܕܐܲܪܥܵܐ: ܘܢܸܫ̱ܡܥܘܼܢ ܟܠܵܗ̇ ܛܵܒ̣ܵܬ̣ܵܐ ܕܥܵـ̇ܒܹܕ݂ ܐ̄ܢܵܐ ܥܲܡܗܘܿܢ: ܘܢܸܕ݂ܚ̄ܠܘܼܢ ܘܢܸܪܓ̇ܙܘܼܢ ܥܲܠ ܟܠܵܗ̇ ܛܵܒ̣ܬ̣ܵܐ: ܘܥܲܠ ܟܠܹܗ ܫܠܵܡܵܐ ܕܥܵـ̇ܒܹܕ݂ ܐ̄ܢܵܐ ܠܗܘܿܢ.

¹⁰ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܬܘܼܒ̣ ܢܸܫܬ̇ܡܲܥ ܒܐܲܬ̣ܪܵܐ ܗܵܢܵܐ: ܕܐܵܡ̇ܪܝܼܢ ܐ̄ܢܬ̇ܘܿܢ ܚܪܸܒ̣ ܗ̄ܘ̣ ܡ̣ܢ ܒܠܲܝ ܐ̄ܢܵܫܵܐ ܘܡ̣ܢ ܒܠܲܝ ܒܥܝܼܪܵܐ: ܒܩܘܖ̈ܝܵܐ ܕܲܝܗܘܼܕ݂ܵܐ: ܘܲܒ̣ܫܘܼܩܝܹ̈ܐ ܕܐܘܿܪܸܫܠܸܡ: ܕܚܵܪܒ̇ܝܼܢ ܡ̣ܢ ܒܠܲܝ ܐ̄ܢܵܫܵܐ: ܘܡ̣ܢ ܒܠܲܝ ܕܝܵـ̇ܬܹܒ̣ ܘܡ̣ܢ ܒܠܲܝ ܒܥܝܼܪܵܐ.

¹¹ ܩܵܠܵܐ ܕܲܕ݂ܝܵܨܵܐ ܘܩܵܠܵܐ ܕܚܲܕ݂ܘܼܬ̣ܵܐ: ܩܵܠܵܐ ܕܚܲܬ̣ܢܵܐ: ܘܩܵܠܵܐ ܕܟܲܠܬ̣ܵܐ: ܩܵܠܵܐ ܕܐܵܡ̇ܪܝܼܢ ܐܵܘܕܵܘ ܠܡܵܪܝܵܐ ܚܲܝܠܬ̣ܵܢܵܐ: ܕܛܵܒ̣ ܗ̄ܘ̣ ܡܵܪܝܵܐ ܘܒܲܣܝܼܡ ܗ̄ܘ̣: ܘܠܥܵܠܲܡ ܛܲܝܒ̇ܘܼܬܹܗ: ܘܡܲܝܬܹ̇ܝܢ ܬܵܘܕܝܼܬ̣ܵܐ ܠܒܲܝܬܹ̇ܗ ܕܡܵܪܝܵܐ: ܡܸܛܠ ܕܐܲܗܦܸـܟ݂ ܫܒ̣ܝܼܬ̣ܵܗ ܕܐܲܪܥܵܐ ܐܲܝܟ݂ ܕܲܒ̣ܩܲܕ݂ܡܵܝܬܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ.

¹² ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܡܸܟܹ̇ܝܠ ܢܸܗܘܸܐ ܒܐܲܬ̣ܪܵܐ ܗܵܢܵܐ: ܕܲܚܪܸܒ̣ ܡ̣ܢ ܒܢܲܝ̈ܢܵܫܵܐ ܘܲܥܕܲܡܵܐ ܠܲܒ̣ܥܝܼܪܵܐ ܘܒ̣ܟ݂ܠܗܹܝܢ ܩܘܼܖ̈ܝܹܗ: ܕܲܝܖܹ̈ܐ ܕܖ̈ܵܥܵܘܵܬ̣ܵܐ ܘܡܲܪܒ̇ܥܵܐ ܕܥܵـ̈ܢܵܐ.

¹³ ܒܩܘܼܖ̈ܝܵܐ ܕܛܘܼܖܹ̈ܐ: ܘܒ̣ܩܘܼܖ̈ܝܵܐ ܕܦܲܩ̈ܥܵܬܵܐ: ܘܲܒ̣ܩܘܼܖ̈ܝܵܐ ܕܬܲܝܡ̄ܢܵܐ: ܘܒܲܐܪܥܵܐ ܕܒܸܢܝܵܡܹܝܢ: ܘܒܲܚܕ݂ܵܖܹ̈ܝܗ̇ ܕܐܘܿܪܸܫܠܸܡ: ܘܲܒ̣ܩܘܼܖ̈ܝܵܐ ܕܲܝܗܘܼܕ݂ܵܐ: ܡܸܟܹ̇ܝܠ ܬܸܥܒܲܪ ܥܵـ̈ܢܵܐ ܥܲܠ ܐܝܼܕܲܝ̈ ܡܲܢܵܝܵܐ ܐܵܡܲ݁ܪ ܡܵܪܝܵܐ.

¹⁴ ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܐܵܡܲ݁ܪ ܡܵܪܝܵܐ: ܘܐܲܩܝܼܡ ܦܸܬ̣ܓ̣ܵܡܹ̈ܐ ܛܵܒܹ̈ܐ ܕܐܸܡ̇ܪܹܬ̣ ܥܲܠ ܕܒܹܝܬ̣ ܝܑܼܣܪܵܝܹܠ ܘܥܲܠ ܕܒܹܝܬ̣ ܝܑܼܗܘܼܕ݂ܵܐ ܐܵܡܲ݁ܪ ܡܵܪܝܵܐ.

¹⁵ ܒܝܵܘ̈ܡܵܬ̣ܵܐ ܗܵܢܘܿܢ ܘܲܒ̣ܙܲܒ̣ܢܵܐ ܗܵܘ̇: ܐܲܨܡܲܚ ܠܕ݂ܵܘܝܼܕ݂ ܨܸܡܚܵܐ ܕܙܲܕܝܼܩܘܼܬ̣ܵܐ: ܘܢܲܡܠܸܟ݂ ܒܡܲܠܟܘܼܬ̣ܵܐ: ܘܢܸܣܬܲܟܲܠ: ܘܢܸܥܒܲܕ݂ ܕܝܼܢܵܐ ܘܙܲܕܝܼܩܘܼܬ̣ܵܐ ܒܐܲܪܥܵܐ.

¹⁶ ܒܝܵܘ̈ܡܵܬ̣ܵܐ ܗܵܢܘܿܢ ܢܸܬ̣ܦܪܸܩ ܝܑܼܗܘܼܕ݂ܵܐ: ܘܐܘܿܪܸܫܠܸܡ ܬܸܫܪܸܐ ܒܫܸܠܝܵܐ: ܘܗܵܢܵܘ ܫܡܹܗ ܕܢܸܩܪܘܿܢܹܗ: ܡܵܪܝܵܐ ܙܸܕ݂ܩܲܢ.

¹⁷ ܡܸܛܠ ܕܗܵܟܲܢܵܐ ܐܵܡܲ݁ܪ ܡܵܪܝܵܐ: ܠܵܐ ܢܸܥܢܲܕܪ ܠܕ݂ܵܘܝܼܕ݂ ܒܪܵܐ ܕܝܵܬܹ̇ܒ̣ ܥܲܠ ܟܘܼܪܣܝܵܐ ܕܒܹܝܬ̣ ܝܑܹܣܪܵܝܹܠ.

¹⁸ ܘܲܠܟܵܗ̈ܢܹܐ ܘܲܠܠܹܘܵܝܹ̈ܐ: ܠܵܐ ܢܸܥܢܲܕ݂ ܓܲܒ̣ܪܵܐ ܡ̣ܢ ܩܕ݂ܵܡܲܝ: ܕܡܲܣܸܩ ܥܠܵܬ̣ܵܐ ܘܥܵܒܹ݁ܕ݂ ܕܸܒ̣ܚܬ̣ܵܐ: ܘܣܵܐܹ̇ܡ ܒܸܣܡܹ̈ܐ ܟܠܗܘܿܢ ܝܵܘ̈ܡܵܬ̣ܵܐ.

¹⁹ ܘܲܗܘ̤ܵܐ ܦܸܬ̣ܓܲܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܠܡܹܐܡܲܪ.

²⁰ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܐܸܢ ܡܸܫܟ̇ܚܝܼܢ ܐ̄ܢܬ̇ܘܿܢ ܠܲܡܒܲܛܵܠܘܼ ܕܘܼܒܵܖ̈ܲܝ ܕܐܝܼܡܵܡܵܐ: ܘܕ݂ܘܼܒܵܖ̈ܲܝ ܕܠܸܠܝܵܐ: ܕܠܵܐ ܢܸܗܘܸܐ ܐܝܼܡܵܡܵܐ ܘܠܸܠܝܵܐ ܒܙܲܒ̣ܢ̱ܗܘܿܢ.

²¹ ܐܵܦ ܩܝܵܡܝ ܕܡܸـ̇ܠܟܹ̇ܬ̣ ܠܕ݂ܵܘܝܼܕ݂ ܥܲܒ̣ܕܝ ܢܸܬ̣ܒܲܛܲܠ: ܕܠܵܐ ܢܸܗܘܸܐ ܠܹܗ ܒܪܵܐ ܕܢܲܡܠܸܟ݂ ܥܲܠ ܟܘܼܪܣܹܝܗ: ܘܲܠܟ݂ܵܗ̈ܢܹܐ ܘܲܠܠܹܘܵܝܹ̈ܐ ܡܫܲܡܫܵܢܲܝ̈.

²² ܐܲܝܟ݂ ܕܠܵܐ ܡܸܬ̣ܡ̱ܢܸܐ ܚܲܝܠܵܐ ܕܲܫܡܲܝܵܐ: ܘܠܵܐ ܡܸܬ̇ܬ̇ܟ݂ܝܼܠ ܚܵܠܵܐ ܕܝܲܡܵܐ: ܗܵܟܲܢܵܐ ܐܲܣܓܸ̇ܐ ܙܲܪܥܹܗ ܕܕ݂ܵܘܝܼܕ݂ ܥܲܒ̣ܕܝ: ܘܲܕ݂ܠܹܘܵܝܹ̈ܐ ܕܲܡܫܲܡܫܝܼܢ ܠܝܼ.

²³ ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܠܡܹܐܡܲܪ.

²⁴ ܠܵܐ ܚܵܙ̇ܐ ܐܲܢ̄ܬ̇ ܡܸܕܸܡ ܕܐܵܡ̇ܪܝܼܢ ܥܲܡܵܐ: ܕܬܲܪܬܹ̇ܝܢ ܫܲܖ̈ܒ̣ܵܢ ܕܲܓ̣ܒ̣ܵܐ ܡܵܪܝܵܐ ܐܲܣܠܝܼ ܐܸܢܹܝܢ: ܘܲܠܥܲܡܝ ܡܲܪܓ̇ܙܝܼܢ ܕܠܵܐ ܢܸܗܘܸܐ ܥܲܡܵܐ ܩܕ݂ܵܡܲܝ.

²⁵ ܗܵܟܲܢܵܐ ܐܵܡܲ݁ܪ ܡܵܪܝܵܐ: ܐܸܢ ܠܵܐ ܗܘ̤ܵܐ ܩܝܵܡܝ ܕܐܝܼܡܵܡܵܐ ܘܲܕ݂ܠܸܠܝܵܐ: ܘܢܵܡܘܿܣܹ̈ܐ ܕܲܫܡܲܝܵܐ ܘܐܲܪܥܵܐ ܠܵܐ ܣܵـ̇ܡܹܬ̣.

²⁶ ܐܵܦ ܙܲܪܥܹܗ ܕܝܲܥܩܘܿܒ̣ ܘܲܕ݂ܕ݂ܵܘܝܼܕ ܥܲܒ̣ܕܝ ܐܲܣܠܸܐ: ܕܐܸܣܲܒ̣ ܡ̣ܢ ܙܲܪܥܹܗ ܫܲܠܝܼܛܵܐ: ܥܲܠ ܒܲܝܬܹ̇ܗ ܕܐܒ̣ܪܵܗܵܡ ܘܲܕ݂ܐܝܼܣܚܵܩ ܘܲܕ݂ܝܲܥܩܘܿܒ: ܟܲܕ݂ ܐܲܗܦܸـܟ݂ ܫܒ̣ܝܼܬ̣ܗܘܿܢ ܘܐܹܪܲܚܸܡ ܥܠܲܝܗܘܿܢ.

34

¹ ܦܸܬ̣ܓ̣ܵܡܵܐ ܕܲܗܘ̤ܵܐ ܥܲܠ ܐܹܪܲܡܝܵܐ ܡ̣ܢ ܩܕ݂ܵܡ ܡܵܪܝܵܐ: ܘܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܘܟ݂ܠܹܗ ܚܲܝܠܹܗ: ܘܟ݂ܠܗܹܝܢ ܡܲܠܟ̇ــ̈ܘܵܬ̣ܵܐ ܕܐܲܪܲܥ ܫܘܼܠܛܵܢ ܐܝܼܕܹܗ܆ܘܟ݂ܠܗܘܿܢ ܥܲܡܡܹ̈ܐ ܡܸܬ̣ܟܲܬ̇ܫܝܼܢ ܥܲܠ ܐܘܿܪܸܫܠܸܡ: ܘܥܲܠ ܟܠܗܹܝܢ ܩܘܼܖ̈ܝܵܗ̇.

² ܗܵܟܲܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܙܸܠ ܐܸܡܲܪ ܠܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܗܵܟܲܢܵܐܐܵܡܲ݁ܪ ܡܵܪܝܵܐ: ܗܵܐ ܡܲܫܠܸܡ ܐ̄ܢܵܐ ܠܵܗ̇ ܠܲܩܪܝܼܬ̣ܵܐ ܗܵܕ܀ ܐ: ܒܐܝܼܕܹܗ ܕܡܲܠܟܵܐ ܕܒ̣ܵܒܹܠ: ܘܢܵܘܩ̄ܕ݂ܝܼܗ̇ ܒܢܘܼܪܵܐ.

³ ܘܐܲܢ̄ܬ̇ ܠܵܐ ܬܸܬ̣ܦܲܠܲܛ ܡ̣ܢ ܐܝܼܕ݂ܵܘ̈ܗܝ: ܐܸܠܵܐ ܡܸܬ̇ܬ̇ܚܵܕ݂ܘܼ ܬܸܬ̇ܚܸܕ݂: ܘܒ̣ܐܝܼܕ݂ܵܘ̈ܗܝ ܬܸܫܬ̇ܠܸܡ. ܘܥܲܝܢܲܝ̈ܟ ܠܥܲܝܢܵܘ̈ܗܝ ܕܡܲܠܟܵܐ ܕܒ̣ܵܒܹܠ ܢܸܚܙ̈ܝܵܢ: ܘܦܘܼܡܵܟ݂ ܥܲܡ ܦܘܼܡܹܗ ܢܡܲܠܸܠ: ܘܲܠܒ̣ܵܒܹܠ ܬܹܐܙܲܠ.

⁴ ܒܪܲܡ ܫܡܲܥ ܦܸܬ̣ܓ̣ܵܡܹܗ ܕܡܵܪܝܵܐ ܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܗܵܟܲܢܵܐ ܐܵܡܲܪ ܡܵܪܝܵܐ ܥܠܲܝܟ: ܠܵܐ ܬܡܘܼܬ̣ ܒܚܲܪܒܵܐ: ܐܸܠܵܐ ܒܲܫܠܵܡܵܐ ܬܡܘܼܬ̣.

⁵ ܘܐܲܝܟ݂ ܕܐܲܪܩܸܕ݂ܘ ܥܲܠ ܐܲܒ̣ܵܗܲܝ̈ܟ ܡܲܠ̈ܟܹܐ ܩܲܕ݂ܡܵܝܹ̈ܐ ܕܲܗܘ̤ܵܘ ܩܕ݂ܵܡܲܝܟ܆ܗܵܟܲܢܵܐ ܢܲܪܩ̄ܕ݂ܘܼܢ ܥܠܲܝܟ: ܘܵܝ ܡܵܪܵܐ ܢܲܪܩ̄ܕ݂ܘܼܢ ܥܠܲܝܟ: ܡܸܛܠ ܕܦܸܬ̣ܓ̣ܵܡܵܐ ܗܵܢܵܐ ܡܲܠـ̇ܠܹܬ̣ ܐܵܡܲ݁ܪ ܡܵܪܝܵܐ.

⁶ ܘܐܸܡ݂ܲܪ ܐܹܪܲܡܝܵܐ ܠܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܟܠܗܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ ܒܐܘܿܪܸܫܠܸܡ.

⁷ ܘܚܲܝܠܵܐ ܕܡܲܠܟܵܐ ܕܒ̣ܵܒܹܠ ܡܸܬ̣ܟܲܬ̇ܫܝܪܢ ܥܲܠ ܐܘܿܪܸܫܠܸܡ: ܘܥܲܠ ܟܠܗܹܝܢ ܩܘܼܖ̈ܝܵܐ ܕܲܝܗܘܼܕ݂ܵܐ ܕܐܸܫܬ̇ܚܲܪ: ܥܲܠ ܠܟ݂ܝܼܫ: ܘܥܲܠ ܥܲܙܩܵܐ. ܡܸܛܠ ܕܗܸܢܹܝܢ ܐܸܫܬ̇ܚܲܪ ܒܩܘܼܖ̈ܝܵܐ ܕܲܝܗܘܼܕ݂ܵܐ ܩܘܼܖ̈ܝܵܐ ܥܲܫܝܼ̈ܢܵܬ̣ܵܐ.

⁸ ܦܸܬ̣ܓ̣ܵܡܵܐ ܕܲܗܘ̤ܵܐ ܥܲܠ ܐܹܪܲܡܝܵܐ ܡ̣ܢ ܩܕ݂ܵܡ ܡܵܪܝܵܐ ܠܡܹܐܡܲܪ: ܡ̣ܢ ܒܵܬܲܪ ܕܐܲܩܝܼܡ ܡܲܠܟܵܐ ܨܹܕܲܩܝܵܐ ܩܝܵܡܵܐ ܥܲܡ ܟܠܹܗ ܥܲܡܵܐ ܕܒ̣ܐܘܿܪܸܫܠܸܡ: ܕܢܸܬ̣ܩܪܘܿܢ ܡܚܲܪܖܹ̈ܐ.

⁹ ܕܢܸܫܒ̇ܘܿܩ ܓܒܲܪ ܥܲܒ̣ܕܹܗ: ܘܲܓ̣ܒܲܪ ܐܲܡܬܹܗ ܥܸܒ̣ܪܵܝܵܐ ܘܥܸܒ̣ܪܵܝܬܵܐ ܒܢܲܝ̈ ܚܹܐܖܹ̈ܐ: ܕܠܵܐ ܢܫܲܥܒ̇ܕ݂ܘܼܢ ܓܒܲܪ ܠܐܲܚܘܼܗܝ ܝܗ̄ܘܕ݂ܵܝܵܐ.

¹⁰ ܘܲܫ̣ܡܲܥܘ ܟܠܗܘܿܢ ܪܵܘܖ̈ܒ̣ܵܢܹܐ ܘܟ݂ܠܹܗ ܥܲܡܵܐ: ܘܩܲܒܸ̇ܠ̣ܘ ܥܠܲܝܗܘܿܢ ܕܢܸܫܒ̇ܘܿܩ ܓܒܲܪ ܥܲܒ̣ܕܹܗ: ܘܲܓ̣ܒܲܪ ܐܲܡܬܹܗ ܒܢܲܝ̈ ܚܹܐܖܹ̈ܐ: ܕܠܵܐ ܢܸܦ̱ܠܚܘܼܢ ܐܸܢܘܿܢ ܬܘܼܒ̣. ܘܚܲܪܲܪܘ ܐܸܢܘܿܢ.

¹¹ ܘܲܗܦܲܟ݂ܘ ܡ̣ܢ ܒܵܬܲܪܟܸ̇ܢ: ܘܫܲܥܒܸ̇ܕ݂ܘ ܐܸܢܘܿܢ ܠܲܡܚܲܪܖܹ̈ܐ ܘܲܥ̣ܒܲܕ݂ܘ ܐܸܢܘܿܢ ܥܲܒ̣̈ܕܹܐ.

¹² ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܠܡܹܐܡܲܪ.

¹³ ܗܵܟܲܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܸܢܵܐ ܐܲܩܝܼܡܹ̇ܬ̣ ܩܝܵܡܵܐ ܥܲܡ ܐܲܒ̣ܵܗܲܝ̈ܟ̇ܘܿܢ: ܒܝܵܘܡܵܐ ܕܐܲܦـ̇ܩܹܬ̣ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ ܡ̣ܢ ܒܹܝܬ̣ ܥܲܒ̣ܕܘܼܬ̣ܵܐ ܠܡܹܐܡܲܪ.

¹⁴ ܡ̣ܢ ܒܵܬܲܪ ܫܒܲܥ ܫܢܝܼ̈ܢ: ܬܸܫܒ̇ܩܘܼܢ ܓܒܲܪ ܠܐܲܚܘܼܗܝ ܥܸܒ̣ܪܵܝܵܐ ܕܢܸܙܕܲܒܲܢ ܠܵܟ݂: ܘܢܸܦ̱ܠܚܵܟ݂ ܫܸܬ̣ ܫܢܝܼ̈ܢ: ܘܬܸܫܒ̇ܩܝܼܘܗܝ ܒܲܪ ܚܹܐܖܹ̈ܐ ܡ̣ܢ ܠܘܵܬ̣ܵܟ݂: ܘܠܵܐ ܫܲܡ̣ܥܘܼܢܝ ܐܲܒ̣ܵܗܲܝ̈ܟ̇ܘܿܢ: ܘܠܵܐ ܨܠܵܘ ܐܸܕ݂ܢܗܘܿܢ ܠܘܵܬ̣ܝ.

¹⁵ ܘܲܗܦܲܟ݂ܬ̇ܘܿܢ ܐܲܢ̄ܬ̇ܘܿܢ ܝܵܘܡܵܢܵܐ: ܘܲܥ̣ܒܲܕ̇ܬ̇ܘܿܢ ܡܸܕܸܡ ܕܫܲܦܝܼܪ ܒܥܲܝ̈ܢܲܝ: ܠܡܸܩܪܵܐ ܚܹܐܪܘܼܬ̣ܵܐ ܓܒܲܪ ܠܚܲܒ̣ܪܹܗ: ܘܐܲܩܝܼܡܬ̇ܘܿܢ ܩܝܵܡܵܐ ܩܕ݂ܵܡܲܝ ܒܒܲܝܬܵܐ ܕܐܸܬ̣ܩܪܝܼ ܫܹܡܝ ܥܠܵܘܗܝ.

¹⁶ ܘܲܗܦܲܟ݂ܬ̇ܘܿܢ ܘܛܵܘܸܫܬ̇ܘܿܢ ܫܹܡܝ: ܘܐܲܗܦܸܟ݂ܬ̇ܘܿܢ ܓܒܲܪ ܥܲܒ̣ܕܹܗ ܘܲܓ̣ܒܲܪ ܐܲܡܬܹܗ ܕܲܫـ̣ܒܲܩܬ̇ܘܿܢ ܒܢܲܝ̈ ܚܹܐܖܹ̈ܐ ܠܢܲܦ̮ܫܗܘܿܢ: ܘܟܲܒܸ̇ܫܬ̇ܘܿܢ ܐܸܢܘܿܢ ܕܢܸܗܘܘܿܢ ܠܟ݂ܘܿܢ ܥܲܒ̈ܕܹܐ ܘܐܲܡ̈ܗܵܬ̣ܵܐ.

¹⁷ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܲܢ̄ܬ̇ܘܿܢ ܠܵܐ ܫܡܲܥܬ̇ܘܿܢܵܢܝ ܠܡܸܩܪܵܐ ܚܹܐܪܘܼܬ̣ܵܐ ܓܒܲܪ ܠܚܲܒ̣ܪܹܗ܆ܗܵܐ ܩܵـ̇ܪܹܐ ܐ̄ܢܵܐ ܠܟ݂ܘܿܢ ܚܹܐܪܘܼܬ̣ܵܐ ܠܚܲܪܒܵܐ: ܘܲܠܟܲܦܢܵܐ: ܘܲܠܡܵܘܬܵܢܵܐ: ܐܵܡܲ݁ܪ ܡܵܪܝܵܐ: ܘܐܸܬܸ̇ܠܟ݂ܘܿܢ ܠܙܵܘܸܥܬ̣ܵܐ ܠܟ݂ܠܗܹܝܢ ܡܲܠܟ̇ــ̈ܘܵܬ̣ܵܐ ܕܐܲܪܥܵܐ.

¹⁸ ܘܐܸܬܸ̇ܠ ܠܓܲܒ̣ܖܹ̈ܐ ܕܲܥ̣ܒܲܪܘ ܥܲܠ ܩܝܵܡܝ: ܕܠܵܐ ܐܲܫܲܪܘ ܦܸܬ̣ܓ̣ܵܡܲܝ̈ ܩܝܵܡܵܐ ܕܐܲܩܝܼܡܘ ܩܕ݂ܵܡܲܝ: ܥܸܓ̣ܠܵܐ ܕܲܦ̣ܣܲܩܘ ܠܲܬ̣ܪܹܝܢ ܘܲܥ̣ܒܲܪܘ ܒܹܝܬ̣ ܦܸܠܓܵܘ̈ܗܝ.

¹⁹ ܪܵܘܖ̈ܒ̣ܵܢܹܐ ܕܲܝܗܘܼܕ݂ܵܐ ܘܲܕܐܘܿܪܸܫܠܸܡ: ܘܲܡܗܲܝܡܢܹ̈ܐ ܘܟ݂ܵܗܢܹ̈ܐ: ܘܟ݂ܠܹܗ ܥܲܡܵܐ ܕܐܲܪܥܵܐ: ܕܲܥ̣ܒܲܪܘ ܒܹܝܬ̣ ܦܸܠܓܵܘ̈ܗܝ ܕܥܸܓ̣ܠܵܐ.

²⁰ ܘܐܲܫܠܸܡ ܐܸܢܘܿܢ ܒܐܝܼܕ݂ܵܐ ܕܲܒ̣ܥܸܠܕܒ̣ܵܒܲܝ̈ܗܘܿܢ: ܘܒ̣ܐܝܼܕ݂ܵܐ ܕܐܲܝܠܹܝܢ ܕܒ̣ܵܥܹ̇ܝܢ ܢܲܦ̮ܫܗܘܿܢ: ܘܢܸܗܘ̈ܝܵܢ ܫܠܲܕܲܝ̈ܗܘܿܢ ܡܹܐܟ݂ܘܼܠܬܵܐ ܠܦܵܪܲܚܬ̣ܵܐ ܕܲܫܡܲܝܵܐ: ܘܲܠܚܲܝ̄ܘܬ̣ܵܐ ܕܐܲܪܥܵܐ.

²¹ ܘܲܠܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ ܘܲܠܪܵܘܖ̈ܒ̣ܵܢܵܘܗܝ: ܐܲܫܠܸܡ ܐܸܢܘܿܢ ܒܐܝܼܕ݂ܵܐ ܕܲܒ̣ܥܸܠܕܒ̣ܵܒܲܝ̈ܗܘܿܢ: ܘܒ̣ܐܝܼܕ݂ܵܐ ܕܐܲܝܠܹܝܢ ܕܒ̣ܵܥܹ̇ܝܢ ܢܲܦ̮ܫܗܘܿܢ: ܘܲܒ̣ܝܲܕ݂ ܚܲܝ̈ܠܹܐ ܕܡܲܠܟܵܐ ܕܒܵܒܹܠ ܕܣܵܠ̇ܩܝܼܢ ܥܠܲܝܗܘܿܢ.

²² ܗܵܐ ܐܸܢܵܐ ܦܵܩܹ̇ܕ݂ ܐ̄ܢܵܐ ܐܵܡܲ݁ܪ ܡܵܪܝܵܐ: ܘܐܲܥܦܸـܟ݂ ܐܸܢܘܿܢ ܠܲܩܪܝܼܬ̣ܵܐ ܗܵܕܹܐ: ܘܢܸܬ̣ܟܲܬ̇ܫܘܼܢ ܥܠܹܝܗ̇ ܘܢܸܟ݂ܒ̇ܫܘܼܢܵܗ̇ ܘܢܵܘܩ̄ܕ݂ܘܼܢܵܗ̇ ܒܢܘܼܪܵܐ: ܘܲܠܩܘܼܖ̈ܝܵܐ ܕܲܝܗܘܼܕ݂ܵܐ: ܐܸܬܸ̇ܠ ܠܚܘܼܪܒܵܐ ܡ̣ܢ ܒܠܲܝ ܕܝܵـ̇ܬܹܒ̣.

35

¹ ܦܸܬ̣ܓ̣ܵܡܵܐ ܕܲܗܘ̤ܵܐ ܥܲܠ ܐܹܪܲܡܝܵܐ ܡ̣ܢ ܩܕ݂ܵܡ ܡܵܪܝܵܐ: ܒܝܵܘ̈ܡܵܘܗܝ ܕܝܘܿܝܵܩܝܼܡ ܒ݂ ܝܘܿܫܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܠܡܹܐܡܲܪ.

² ܘܸܠ ܠܹܝܬ̣ ܒܢܲܝ̈ ܪܟܸܒ̣ܝܲܡ: ܘܡܲܠܸܠ ܥܲܡܗܘܿܢ: ܘܐܲܥܸܠ ܐܸܢܘܿܢ ܠܒܲܝܬܹ̇ܗ ܕܡܵܪܝܵܐ ܠܲܚܕ݂ܵܐ ܡ̣ܢ ܚܵܢ̈ܘܵܬ̣ܵܐ: ܘܐܲܫܩܵܐ ܐܸܢܘܿܢ ܚܲܡܪܵܐ.

³ ܘܕܸܒ̣ܪܹܬ̣ ܠܝܲܙܲܢܝܵܐ: ܒܲܪ ܐܲܡܲܪܝܵܐ: ܒܲܪ ܚܲܒ̣ܨܲܢܝܵܐ: ܘܠܲܐܚܵܘ̈ܗܝ: ܘܲܠܟ݂ܠܗܘܿܢ ܒܢܵܘ̈ܗܝ܆ܘܲܠܟ݂ܠܹܗ ܒܹܝܬ̣ ܪܟܸܒ̣ܝܲܡ.

⁴ ܘܐܲܥܠܹ̇ܬ̣ ܐܸܢܘܿܢ ܠܒܲܝܬܹ̇ܗ ܕܡܵܪܝܵܐ: ܠܒܲܝܬܵܐ ܕܒ̣ܢܲܝ̈ ܚܲܢܵܢ ܒܲܪ ܓܕܲܠܝܵܐ ܢܒ̣ܝܹܗ ܕܐܲܠܵܗܵܐ: ܕܩܲܪܝܼܒ̣ ܒܲܝܬܹ̇ܗ ܠܪܵܘܖ̈ܒ̣ܵܢܹܐ: ܕܝܵـ̇ܬ̣ܒ̇ܝܼܢ ܠܥܸܠ ܡ̣ܢ ܒܲܝܬܹ̇ܗ ܕܲܡܥܲܣܝܵܐ ܒܲܪ ܫܵܠܘܿܡ ܢܵـ̇ܛܲܪ ܬܲܪܥܵܐ.

⁵ ܘܣܵܡܹ̇ܬ̣ ܩܕ݂ܵܡ ܒܢܲܝ̈ ܒܹܝܬ̣ ܪܟܸܒ̣ܝܲܡ: ܐܲܓܵܢܹ̈ܐ ܕܡܲــ̈ܠܝܵܢ ܚܲܡܪܵܐ: ܘܟ݂ܵܣܹ̈ܐ: ܘܐܸܡ̇ܪܹܬ̣ ܠܗܘܿܢ ܐܹܫܬܵܘ ܚܲܡܪܵܐ.

⁶ ܘܐܸܡ݂ܲܪ ܠܵܐ ܫܵـ̇ܬܹܝܢܲܢ ܚܲܡܪܵܐ: ܡܸܛܠ ܕܝܘܿܢܵܕ݂ܵܒ̣ ܒܲܪ ܪܵܟܵܒ̣ ܐܲܒ̣ܘܼܢ ܦܲܩ̣ܕܲܢ ܘܐܸܡ݂ܲܪ ܠܲܢ: ܠܵܐ ܬܸܫܬ̇ܘܿܢ ܚܲܡܪܵܐ ܐܲܢ̄ܬ̇ܘܿܢ ܘܲܒ̣ܢܲܝ̈ܟ̇ܘܿܢ ܥܕܲܡܵܐ ܠܥܵܠܲܡ.

⁷ ܘܒ̣ܵـ̈ـܬܹ̇ܐ ܠܵܐ ܬܸܒ̣ܢܘܿܢ ܠܟ݂ܘܿܢ܆ܘܙܲܪܥܵܐ ܠܵܐ ܬܸܙ̱ܪܥܘܼܢ: ܘܟܲܖ̈ܡܹܐ ܠܵܐ ܬܸܨܒ̣ܘܼܢ : ܘܠܵܐ ܢܸܗܘܸܐ ܠܟ݂ܘܿܢ: ܐܸܠܵܐ ܒܡܲܫܟ̇ܢܹ̈ܐ ܬܸܬ̇ܒ̣ܘܼܢ ܟܠܗܘܿܢ ܝܵܘ̈ܡܵܬ̣ܵܐ: ܡܸܛܠ ܕܬܸܚܘܿܢ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ: ܥܲܠ ܐܲܦܲܝ̈ ܐܲܪܥܵܐ ܕܥܵܡܪܝܼܢ ܐ̄ܢܬ̇ܘܿܢ ܒܵܗ̇.

⁸ ܘܲܫ̣ܡܲܥܢ ܒܦܘܼܩܕܵܢܹܗ ܕܝܘܿܢܵܕ݂ܵܒ̣ ܒܲܪ ܪܵܟ݂ܵܒ̣ ܐܲܒ̣ܘܼܢ ܟܠ ܕܦܲܩܕܲܢ: ܕܠܵܐ ܢܸܫܬܸ̇ܐ ܚܲܡܪܵܐ ܟܠܗܘܿܢ ܝܵܘ̈ܡܵܬ̣ܵܐ: ܠܵܐ ܚܢܲܢ ܘܠܵܐ ܢܸܫܲܝ̈ܢ: ܘܠܵܐ ܒܢܲܝ̈ܢ ܘܠܵܐ ܒ̈ܢܵܬ̣ܵܢ.

⁹ ܘܠܵܐ ܢܸܒ̣ܢܸܐ ܒܵـ̈ـܬܹ̇ܐ ܠܡܵܘܬ̇ܒܲܢ: ܘܟܲܖ̈ܡܹܐ ܘܚܲܩ̈ܠܵܬ̣ܵܐ ܘܙܲܪܥܵܐ ܠܵܐ ܢܸܗܘܸܐ ܠܲܢ.

¹⁰ ܘܝܼܬܸܒ̣ܢ ܒܡܲܫܟ̇ܢܹ̈ܐ: ܘܲܫ̣ܡܲܥܢ ܘܲܥ̣ܒܲܕ݂ܢ ܟܠ ܕܦܲܩ̣ܕܲܢ ܝܘܿܢܵܕ݂ܵܒ̣ ܐܲܒ̣ܘܼܢ.

¹¹ ܘܟܲܕ݂ ܣܠܸܩ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܥܲܠ ܐܲܪܥܵܐ: ܐܸܡ݂ܲܪܢ ܕܢܸܥܘܿܠ ܠܐܘܿܪܸܫܠܸܡ: ܡ̣ܢ ܩܕ݂ܵܡ ܚܲܝܠܵܐ ܕܟܲܠܕ݂ܵܝܹ̈ܐ ܘܡ̣ܢ ܩܕ݂ܵܡ ܚܲܝܠܵܐ ܕܐܲܕ݂ܘܿܡ: ܘܝܼܬܸܒ̣ܢ ܒܐܘܿܪܸܫܠܸܡ.

¹² ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܢܒ̣ܝܵܐ ܠܡܹܐܡܲܪ.

¹³ ܗܵܟܲܢܵܐ ܐܵܡܲ݁ܪ ܡܵܪܝܵܐ ܨܒ̣ܵܐܘܼܬ̣ ܐܲܠܵܗܵܐ ܕܝܼܣܪܵܝܹܠ: ܙܸܠ ܠܓܲܒ̣ܖܹ̈ܐ ܕܲܝܗܘܼܕ݂ܵܐ: ܘܲܠܥܵܡܘܿܖܹ̈ܝܗ̇ ܕܐܘܿܪܸܫܠܸܡ: ܠܵܐ ܡܩܲܒ̇ܠܝܼܢ ܐ̄ܢܬ̇ܘܿܢ ܡܲܪܕܘܼܬ̣ܵܐ ܠܡܸܫܡܲܥ ܦܸܬ̣ܓ̣ܵܡܲܝ̈ ܐܵܡܲ݁ܪ ܡܵܪܝܵܐ.

¹⁴ ܫܲܪܘ ܦܸܬ̣ܓ̣ܵܡܵܘ̈ܗܝ ܕܝܘܿܢܵܕ݂ܵܒ̣ ܒܲܪ ܪܵܟ݂ܵܒ̣: ܕܦܲـ̣ܩܸܕ݂ ܠܲܒ̣ܢܵܘ̈ܗܝ ܕܠܵܐ ܢܸܫܬ̇ܘܿܢ ܚܲܡܪܵܐ: ܘܠܵܐ ܐܸܫܬ̇ܝܼܘ ܥܕܲܡܵܐ ܠܝܵܘܡܵܢܵܐ: ܡܸܛܠ ܕܲܫ̣ܡܲܥܘ ܦܘܼܩܕܵܢܵܐ ܕܐܲܒ̣ܘܼܗܘܿܢ܆ܘܐܸܢܵܐ ܐܸܡ̇ܪܹܬ̣ ܠܟ݂ܘܿܢ: ܩܲܕܡܹܬ̣ ܘܐܸܡ̇ܪܹܬ̣ ܘܠܵܐ ܫ̣ܡܲܥܬ̇ܘܿܢ.

¹⁵ ܘܫܲܕܪܹܬ̣ ܠܘܵܬ̣ܟ݂ܘܿܢ ܠܟ݂ܠܗܘܿܢ ܥܲܒ̣̈ܕܲܝ ܢܒ̣ܝܹ̈ܐ: ܩܲܕܡܹ̇ܬ̣ ܘܫܲܕܪܹܬ̣ ܘܐܸܡ̇ܪܹܬ̣: ܬܘܼܒ̣ܘ ܓܒܲܪ ܡ̣ܢ ܐܘܼܪܚܹܗ ܒܝܼܫܬܵܐ: ܘܐܲܛܐܸܒ̣ܘ ܥܒ̣ܵܕܲܝ̈ܟ̇ܘܿܢ: ܘܠܵܐ ܬܹܐܙ̄ܠܘܼܢ ܒܵܬܲܪ ܐܲܠܵܗܹ̈ܐ ܐ̄ܚܖ̈ܵܢܹܐ ܠܡܸܦܠܲܚ ܐܸܢܘܿܢ: ܘܬܸܒ̣ܘ ܒܐܲܪܥܵܐ ܕܝܸܗ̄ܒܹ̇ܬ̇ ܠܟ݂ܘܿܢ ܘܠܲܐܒ̣ܵܗܲܝ̈ܟ̇ܘܿܢ: ܘܠܵܐ ܨܠܲܝܬ̇ܘܿܢ ܐܸܕ݂ܢܟ݂ܘܿܢ ܘܠܵܐ ܫ̣ܡܲܥܬ̇ܘܿܢܵܢܝ.

¹⁶ ܗܵܐ ܐܲܫܲܪܘ ܒܢܵܘ̈ܗܝ ܕܝܘܿܢܵܕ݂ܵܒ̣ ܒܲܪ ܪܵܟ݂ܵܒ̣ ܦܘܼܩܕܵܢܵܐ ܕܐܲܒ̣ܘܼܗܘܿܢ ܕܦܲܩܸܕ݂ ܐܸܢܘܿܢ: ܘܥܲܡܵܐ ܗܵܢܵܐ ܠܵܐ ܫܲܡ̣ܥܘܼܢܝ.

¹⁷ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܡܲܝܬܹ̇ܐ ܐ̄ܢܵܐ ܥܲܠ ܝܑܼܗܘܼܕ݂ܵܐ ܘܥܲܠ ܟܠܗܘܿܢ ܥܵܡܘܿܖܹ̈ܝܗ̇ ܕܐܘܿܪܸܫܠܸܡ: ܟܠܵܗ̇ ܒܝܼܫܬܵܐ ܕܐܸܡ̇ܪܹܬ̣ ܥܠܲܝܗܘܿܢ: ܥܲܠ ܕܐܸܡ̇ܪܹܬ̣ ܠܗܘܿܢ ܘܠܵܐ ܫ̣ܡܲܥܘ: ܘܲܩܪܹܝ̇ܬ̣ ܠܗܘܿܢ ܘܠܵܐ ܥܢܵܐ̣ܘܼܢܝ.

¹⁸ ܘܲܠܒܹܝܬ̣ ܪܟ݂ܒ̣ܝܲܡ ܐܸܡ݂ܲܪ ܐܹܪܲܡܝܵܐ: ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܚܠܵܦ ܕܲܫ̣ܡܲܥܬܘܿܢ ܦܘܼܩܕܵܢܵܐ ܕܝܘܿܢܵܕ݂ܵܒ̣ ܐܒ̣ܘܼܟ݂ܘܿܢ ܘܲܢ̣ܛܲܪܬ̇ܘܿܢ ܟܠܗܘܿܢ ܦܘܼܩܕܵܢܵܘ̈ܗܝ: ܘܲܥ̣ܒܲܕܬ̇ܘܿܢ ܟܠܡܸܕܸܡ ܕܦܲܩܸܕ݂ܟ݂ܘܿܢ.

¹⁹ ܡܸܛܠ ܗܵܢܵܐ ܗܵܟܲܢܵܐ ܐܵܡܲ݁ܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܠܵܐ ܢܸܥܢܲܕ݂ ܓܲܒ̣ܪܵܐ ܠܝܘܿܢܵܕ݂ܵܒ̣ ܒܲܪ ܪܵܟ݂ܵܒ̣: ܕܩܵـ̇ܐܹܡ ܩܕ݂ܵܡܲܝ ܟܠܗܘܿܢ ܝܵܘ̈ܡܵܬ̣ܵܐ.

36

¹ ܘܲܗܘ݀ܵܐ ܒܫܲܢ̄ܬܵܐ ܪܒ݂ܝܼܥܵܝܬܵܐ ܕܝܘܿܝܵܩܝܼܡ ܒܲܪ ܝܘܿܫܝܼܵܐ ܡܲܠܟܵܐ ܕܲܝܗ̄ܘܼܕܵܐ: ܗ݀ܘܵܐ ܦܸܬ݂ܓ݂ܵܡܵܐ ܗܵܢܵܐ ܥܲܠ ܐܹܪܲܡܝܵܐ ܡ̣ܢ ܩܕ݂ܵܡ ܡܵܪܝܵܐ ܠܡܹܐܡܲܪ.

² ܣܒ݂ ܠܟ݂ ܡܓܠܬܐ ܕܣܦܪܐ: ܘܟܬܘܒ ܥܠܝܗ ܟܠܗܘܢ ܦܬܓܡܐ ܕܐܡܪܬ ܠܟ݂: ܥܠ ܝܣܪܝܠ: ܘܗܠ ܝܗܘܕܐ: ܘܥܠ ܟܠܗܘܢ ܥܡܡܐ: ܡܢ ܝܘܡܐ ܕܐܡܪܬ ܠܟ݂: ܡܢ ܝܘܡܘܗܝ ܕܝܘܫܝܐ ܘܥܕܡܐ ܠܝܘܡܢܐ.

³ ܛܟ݂ ܢܫܡܥܘܢ ܕܒܝܬ ܝܗܘܕܐ: ܟܠܗ ܒܝܫܬܐ ܕܡܬܚܫܒ ܐ̄ܢܐ ܠܡܥܒܕ ܠܗܘܢ: ܘܢܗܦܟܘܢ ܓܒܪ ܡܢ ܐܘܪܚܗ ܒܝܫܬܐ: ܘܐܫܒܘܩ ܠܚܘܒܝܗܘܢ ܘܠܚܛܗܝܗܘܢ.

⁴ ܘܩܪܐ ܐܪܡܝܐ ܠܒܪܘܟ݂ ܒܪ ܢܪܝܐ: ܘܟܬܒ ܒܪܘܟ݂ ܡܢ ܦܘܡܗ ܕܐܪܡܝܐ: ܟܠܗܘܢ ܦܬܓܡܘܗܝ ܕܡܪܝܐ ܕܐܡܪ ܠܗ ܥܠ ܡܓܠܬܐ ܕܣܦܪܐ.

⁵ ܘܦܩܕ ܐܪܡܝܐ ܠܒܪܘܟ݂ ܒܪ ܢܪܝܐ ܘܐܡܪ ܠܗ: ܐܢܐ ܟܠܐ ܐ̄ܢܐ: ܘܠܐ ܡܫܟܚ ܐ̄ܢܐ ܕܐܥܘܠ ܠܒܝܬܗ ܕܡܪܝܐ.

⁶ ܥܘܠ ܐܢ̄ܬ ܘܩܪܝ ܒܡܓܠܬܐ ܕܟܬܒܬ ܡܢ ܦܘܡܝ: ܦܬܓܡܘܗܝ ܕܡܪܝܐ ܩܕܡ ܥܡܐ ܒܒܝܬܗ ܕܡܪܝܐ: ܒܝܘܡܐ ܕܨܘܡܐ: ܘܐܦ ܩܕܡ ܟܠܗ ܥܡܐ ܕܝܗܘܕܐ ܕܐܬܝܢ ܡܢ ܩܘܪܝܗܘܢ ܬܩܪܐ ܐܢܘܢ.

⁷ ܛܟ݂ ܬܦܠ ܒܥܘܬܗܘܢ ܩܕܡ ܡܪܝܐ: ܘܢܗܦܟܘܢ ܓܒܪ ܡܢ ܐܘܪܚܗ ܒܝܫܬܐ: ܘܢܫܠܐ ܡܪܝܐ ܡܢ ܒܝܫܬܐ ܕܐܡܪ ܥܠܝܗܘܢ: ܡܛܠ ܕܪܒܘ ܪܘܓܙܐ ܘܚܡܬܐ ܕܡܠܠ ܡܪܝܐ ܥܠ ܥܡܐ ܗܢܐ.

⁸ ܘܥܒܕ ܒܪܘܟ݂ ܒܪ ܢܪܝܐ ܟܠ ܕܦܩܕܗ ܐܪܡܝܐ ܢܒܝܐ: ܠܡܩܪܐ ܒܣܦܪܐ ܦܬܓܡܘܗܝ ܕܡܪܝܐ ܒܒܝܬܗ ܕܡܪܝܐ.

⁹ ܘܗܘܐ ܒܫܢ̄ܬܐ ܚܡܝܫܝܬܐ ܕܝܘܝܩܝܡ ܒܪ ܝܘܫܝܐ ܡܠܟܐ ܕܝܗܘܕܐ: ܒܝܪܚܐ ܕܬܫܥܐ: ܓܙܪܘ ܨܘܡܐ ܩܕܡ ܡܪܝܐ ܟܠܗ ܥܡܐ ܕܒܐܘܪܫܠܡ: ܘܩܪܐ ܒܪܘܟ݂ ܩܕܡ ܟܠܗ ܥܡܐ ܕܐܬܝܢ ܡܢ ܩܘܪܝܐ ܕܝܗܘܕܐ ܠܐܘܪܫܠܡ.

¹⁰ ܘܩܪܐ ܒܪܘܟ݂ ܣܦܪܐ: ܦܬܓܡܘܗܝ ܕܡܪܝܐ ܕܐܡܪ ܐܪܡܝܐ ܢܒܝܐ ܒܒܝܬܗ ܕܡܪܝܐ: ܒܚܢܘܬܗ ܕܓܡܪܝܐ ܒܪ ܫܦܢ ܣܦܪܐ ܒܕܪܬܐ ܥܠܝܬܐ: ܒܡܥܠܢܐ ܕܬܪܥܐ ܚܕܬܐ ܕܒܝܬܗ ܕܡܪܝܐ: ܩܕܡ ܟܠܗ ܥܡܐ.

¹¹ ܘܫܡܥ ܡܝܟܐ ܒܪ ܓܡܪܝܐ: ܒܪ ܫܦܢ: ܟܠܘܢ ܦܬܓܡܘܗܝ ܕܡܪܝܐ ܡܢ ܣܦܪܐ.

¹² ܘܢܚܬ ܡܢ ܒܝܬ ܡܠܟܐ ܠܚܢܘܬܗ ܕܣܦܪܐ: ܘܚܙܐ ܬܡܢ ܟܠܗܘܢ ܪܘܪܒܢܐ ܝܬܒܝܢ: ܐܠܝܫܡܥ ܣܦܪܐ: ܘܕܠܝܐ ܒܪ ܫܡܥܝܐ: ܘܐܠܝܬܢ ܒܪ ܥܒܟܘܪ: ܘܓܡܪܝܐ ܒܪ ܫܦܢ: ܘܨܕܩܝܐ ܒܪ ܚܢܢܝܐ: ܘܟܠܗܘܢ ܪܘܪܒܢܐ.

¹³ ܘܚܘܝ ܐܢܘܢ ܡܝܟܐ ܟܠܗܘܢ ܦܬܓܡܐ ܕܫܡܥ: ܟܕ ܩܪܐ ܒܪܘܟ݂ ܣܦܪܐ ܒܐܕܢܘܗܝ ܕܥܡܐ.

¹⁴ ܘܫܕܪܘ ܟܠܗܘܢ ܪܘܪܒܢܐ ܠܘܬ ܒܪܘܟ݂: ܠܝܗܘܕܝ ܒܪ ܢܬܢܝܐ: ܒܪ ܫܠܡܝܐ: ܒܪ ܟܘܫܝ: ܘܐܡܪܘ ܠܗ: ܡܓܠܬܐ ܕܩܪܝܬ ܒܗ ܩܕܡ ܥܡܐ: ܣܒܝܗ ܒܐܝܕܟ݂ ܘܬܐ: ܘܢܣܒ ܒܪܘܟ݂ ܒܪ ܢܪܝܐ ܡܓܠܬܐ ܒܐܝܕܗ: ܘܐܬܐ ܠܘܬܗܘܢ.

¹⁵ ܘܐܡܪܘ ܠܗ ܪܘܪܒܢܐ: ܬܒ ܘܩܪܝܗ ܩܕܡܝܢ: ܘܩܪܗ ܒܪܘܟ݂ ܩܕܡܝܗܘܢ.

¹⁶ ܘܟܕ ܫܡܥܘ ܦܬܓܡܘܗܝ ܬܘܗܘ ܓܒܪ ܥܠ ܚܒܪܗ: ܘܐܡܪܘ ܠܒܪܘܟ݂: ܡܚܘܝܢ ܚ̄ܢܢ ܠܡܠܟܐ ܟܠܗܘܢ ܦܬܓܡܐ ܗܠܝܢ.

¹⁷ ܘܠܒܪܘܟ݂ ܫܐܠܘܗܝ ܘܐܡܪܘ ܠܗ: ܚܘܢ ܐܝܟܢܐ ܟܬܒܬ ܟܠܗܘܢ ܦܬܓܡܐ ܗܠܝܢ ܡܢ ܦܘܡܗ.

¹⁸ ܘܐܡܪ ܠܗܘܢ ܒܪܘܟ݂: ܡܢ ܦܘܡܗ ܐܡܪ ܗ̄ܘܐ ܠܝ ܐܪܡܝܐ ܟܠܗܘܢ ܦܬܓܡܐ ܗܠܝܢ: ܘܐܢܐ ܟܬܒ ܗܘܝܬ ܥܠ ܣܦܪܐ ܒܕܝܘܬܐ.

¹⁹ ܘܐܡܪܘ ܪܘܪܒܢܐ ܠܒܪܘܟ݂: ܙܠ ܘܐܬܛܫܐ ܐܢ̄ܬ ܘܐܪܡܝܐ: ܘܐ̄ܢܫ ܠܐ ܢܕܥ ܐܝܟܐ ܐܢ̄ܬܘܢ.

²⁰ ܘܐܬܘ ܠܘܬ ܡܠܟܐ ܠܕܪܬܐ: ܘܡܓܠܬܐ ܣܡܘܗ ܒܚܢܘܬܗ ܕܐܠܝܫܡܥ ܣܦܪܐ: ܘܚܘܝܘ ܩܕܡ ܡܠܟܐ ܟܠܗܘܢ ܦܬܓܡܐ ܗܠܝܢ.

²¹ ܘܫܕܪ ܡܠܟܐ ܠܝܗܘܕܝ ܕܢܝܬܝܗ ܠܡܓܠܬܐ: ܘܢܣܒܗ ܡܢ ܚܢܘܬܗ ܕܐܠܝܫܡܥ ܣܦܪܐ: ܘܩܪܗ ܝܗܘܕܝ ܩܕܡ ܡܠܟܐ: ܘܩܕܡ ܟܠܗܘܢ ܪܘܪܒܢܐ ܕܩܝܡܝܢ ܩܕܡ ܡܠܟܐ.

²² ܘܡܠܟܐ ܝܬܒ ܗ̄ܘܐ ܒܝܬ ܣܬܘܐ ܒܝܪܚܐ ܕܬܫܥܐ: ܘܢܘܪܐ ܣܝܡܝܢ ܗ̄ܘܘ ܩܕܡܘܗܝ.

²³ ܘܟܕ ܩܪܐ ܝܗܘܕܝ ܬܠܬ ܦܨܝܢ ܘܐܪܒܥ: ܨܪܗ ܒܙܡܠܝܐ ܕܣܦܪܐ: ܘܫܕܗ ܒܓܘܡܪܐ ܕܢܘܪܐ: ܘܝܩܕܬ ܟܠܗ ܡܓܠܬܐ ܒܢܘܪܐ ܕܥܠ ܩܡܝܢܐ.

²⁴ ܘܠܐ ܕܚܠܘ ܘܠܐ ܨܪܝܘ ܠܒܘܫܝܗܘܢ ܡܠܟܐ ܘܟܠܗܘܢ ܥܒܕܘܗܝ: ܟܕ ܫܡܥܘ ܟܠܗܘܢ ܦܬܓܡܐ ܗܠܝܢ.

²⁵ ܘܐܦ ܐܠܝܬܢ: ܘܓܡܪܝܐ: ܘܕܠܝܐ: ܒܥܘ ܡܢ ܡܠܟܐ ܕܠܐ ܢܘܩܕܝܗ ܠܡܓܠܬܐ ܒܢܘܪܐ ܘܠܐ ܫܡܥ ܐܢܘܢ.

²⁶ ܘܦܩܕ ܡܠܟܐ ܠܝܪܚܡܐܝܠ ܒܪ ܡܠܟܐ: ܘܠܫܪܝܐ ܒܪ ܥܙܪܐܝܠ: ܘܠܫܠܡܝܐ ܒܪ ܥܒܕܐܝܠ: ܠܡܐܚܕ ܠܐܪܡܝܐ ܢܒܝܐ ܘܠܒܪܘܟ݂ ܣܦܪܐ: ܘܛܫܝ ܐܢܘܢ ܡܪܝܐ.

²⁷ ܘܗܘܐ ܦܬܓܡܗ ܕܡܪܝܐ ܥܠ ܐܪܡܝܐ ܢܒܝܐ: ܡܢ ܒܬܪ ܕܐܘܩܕ ܡܠܟܐ ܡܓܠܬܐ: ܘܦܬܓܡܐ ܕܟܬܝ ܒܪܘܟ݂ ܡܢ ܦܘܡܗ ܕܐܪܡܝܐ ܠܡܐܡܪ.

²⁸ ܗܦܘܟ݂ ܣܒ ܠܟ݂ ܡܓܠܬܐ ܐ̄ܚܪܬܐ: ܘܟܬܘܒ ܥܠܝܗ ܟܠܗܘܢ ܦܬܓܡܐ ܩܕܡܝܐ: ܕܐܝܬ ܗ̄ܘܘ ܥܠ ܡܓܠܬܐ ܕܐܘܩܕ ܝܘܝܩܝܡ ܡܠܟܐ ܕܝܗܘܕܐ ܒܢܘܪܐ.

²⁹ ܘܠܝܘܝܩܝܡ ܡܠܟܐ ܕܝܗܘܕܐ ܬܐܡܪ: ܗܟܢܐ ܐܡܪ ܡܪܝܐ: ܐܢ̄ܬ ܐܘܩܕܬ ܡܓܠܬܐ ܗܕܐ: ܘܐܡܪܬ: ܡܛܠ ܡܢܐ ܟܬܒܬ ܥܠܝܗ: ܕܢܐܬܐ ܡܠܟܐ ܕܒܒܠ ܘܢܚܪܒܝܗ ܠܐܪܥܐ ܗܕܐ: ܘܢܒܛܠ ܡܢܗ ܒܢܝܢܫܐ ܘܒܥܝܪܐ.

³⁰ ܡܛܠ ܗܢܐ ܗܟܢܐ ܐܡܪ ܡܪܝܐ ܥܠ ܝܘܝܩܝܡ ܡܠܟܐ ܕܝܗܘܕܐ: ܠܐ ܢܗܘܐ ܠܗ ܓܒܪܐ ܕܝܬܒ ܥܠ ܟܘܪܣܝܗ ܕܕܘܝܕ: ܘܫܠܕܗ ܬܗܘܐ ܪܡܝܐ ܒܫܘܒܐ ܒܐܝܡܡܐ: ܘܒܓܠܝܕܐ ܒܠܠܝܐ.

³¹ ܘܐܦܩܘܕ ܥܠܘܗܝ: ܘܥܠ ܙܪܥܗ: ܘܥܠ ܥܒܕܘܗܝ ܥܘܠܗܘܢ: ܘܐܝܬܐ ܥܠܝܗܘܢ ܘܥܠ ܟܠܗܘܢ ܥܡܘܪܝܗ ܕܐܘܪܫܠܡ: ܘܥܠ ܐ̄ܢܫܐ ܕܝܗܘܕܐ: ܟܠܗ ܒܝܫܬܐ ܕܐܡܪܬ ܥܠܝܗܘܢ: ܥܠ ܕܠܐ ܫܡܥܘ ܒܩܠܝ.

³² ܘܐܪܡܝܐ ܢܣܒ ܡܓܠܬܐ ܐ̄ܚܪܬܐ: ܘܝܗ̄ܒܗ ܠܒܪܘܟ݂ ܒܪ ܢܪܝܐ ܣܦܪܐ: ܘܟܬܒ ܥܠܝܗ ܡܢ ܦܘܡܗ ܕܐܪܡܝܐ: ܟܠܗܘܢ ܦܬܓܡܐ ܕܟܬܝܒܝܢ ܗ̄ܘܘ ܒܣܦܪܐ: ܕܐܘܩܕ ܝܘܝܩܝܡ ܡܠܟܐ ܕܝܗܘܕܐ ܒܢܘܪܐ: ܘܬܘܒ ܐܘܣܦ ܥܠܝܗܘܢ ܦܬܓܡܐ ܕܣܓܝܐܝܢ ܐܟܘܬܗܘܢ.

37

¹ ܘܐܡܠܟ݂ ܡܠܟܐ ܨܕܩܝܐ ܒܪ ܝܘܫܝܐ: ܚܠܦ ܝܘܟܢܝܐ ܒܪ ܝܘܝܩܝܡ: ܕܐܡܠܟ݂ ܢܒܘܟܕܢܨܪ ܡܠܟܐ ܕܒܒܠ ܒܐܪܥܐ ܕܝܗܘܕܐ.

² ܘܠܐ ܫܡܥ ܗܘ ܘܥܒܕܘܗܝ ܘܥܡܐ ܕܐܪܥܐ: ܦܬܓܡܘܗܝ ܕܡܪܝܐ ܕܐܡܪ ܒܝܕ ܐܪܡܝܐ ܢܒܝܐ.

³ ܘܫܕܪ ܡܠܟܐ ܨܕܩܝܐ ܠܝܘܟܠ ܒܪ ܫܠܡܝܐ: ܘܠܨܦܢܝܐ ܒܪ ܡܥܣܝܐ ܟܗܢܐ: ܠܘܬ ܐܪܡܝܐ ܢܒܝܐ ܠܡܐܡܪ: ܨܠܐ ܥܠܝܢ ܩܕܡ ܡܪܝܐ ܐܠܗܟ݂.

⁴ ܘܐܪܡܝܐ ܢܦܩ ܗ̄ܘܐ ܘܥܐܠ ܒܓܘ ܥܡܐ: ܘܠܐ ܐܪܡܝܘܗܝ ܒܝܬ ܐܣܝܪܐ.

⁵ ܘܚܝܠܗ ܕܦܪܥܘܢ ܢܦܩ ܡܢ ܡܨܪܝܢ: ܘܫܡܥܘ ܟܠܕܝܐ ܕܟܪܝܟܝܢ ܠܐܘܪܫܠܡ ܫܡܥܗܘܢ: ܘܫܢܝܘ ܠܗܘܢ ܡܢ ܐܘܪܫܠܡ.

⁶ ܘܗܘܐ ܦܬܓܡܗ ܕܡܪܝܐ ܥܠ ܐܪܡܝܐ ܢܒܝܐ ܠܡܐܡܪ.

⁷ ܗܟܢܐ ܐܡܪ ܡܪܝܐ ܐܠܗܐ ܕܝܣܪܝܠ: ܗܟܢܐ ܬܐܡܪܘܢ ܠܡܠܟܐ ܕܝܗܘܕܐ ܕܫܕܪܟܘܢ ܠܘܬܝ ܕܬܒܥܘܢ ܡܢܝ: ܗܐ ܚܝܠܗ ܕܦܪܥܘܢ ܕܢܦܩ ܠܡܥܕܪܘܬܟܘܢ: ܗܦܟ݂ ܠܐܪܥܗ ܠܡܨܪܝܢ.

⁸ ܘܢܗܦܟܘܢ ܟܠܕܝܐ ܘܢܬܟܬܫܘܢ ܥܠ ܩܪܝܬܐ ܗܕܐ: ܘܢܟܒܫܘܢܗ ܘܢܘܩܕܘܢܗ ܒܢܘܪܐ.

⁹ ܗܟܢܐ ܐܡܪ ܡܪܝܐ: ܠܐ ܬܣܒܪܘܢ ܒܢܦ̮ܫܟܘܢ ܘܬܐܡܪܘܢ ܕܐܙܠ̄ܝܢ ܡܢܢ ܟܠܕܝܐ: ܡܛܠ ܕܠܐ ܐܙܠ̄ܝܢ.

¹⁰ ܡܛܠ ܕܐܢ ܬܚܪܒܘܢ ܟܠܗ ܚܝܠܐ ܕܟܠܕܝܐ ܕܡܬܟܬܫܝܢ ܥܡܟܘܢ: ܘܢܫܬܚܪܘܢ ܒܗܘܢ ܐ̄ܢܫܐ ܕܡܡܚܝܢ: ܓܒܪ ܡܢ ܡܫܟܢܗ ܢܩܘܡܘܢ: ܘܢܘܩܕܘܢܗ ܠܩܪܝܬܐ ܗܕܐ ܒܢܘܪܐ.

¹¹ ܘܫܢܝ ܠܗ ܚܝܠܐ ܕܟܠܕܝܐ ܡܢ ܐܘܪܫܠܡ ܡܢ ܩܕܡ ܚܝܠܗ ܕܦܪܥܘܢ.

¹² ܘܢܦܩ ܐܪܡܝܐ ܡܢ ܐܘܪܫܠܡ ܠܡܐܙܠ ܠܐܪܥܐ ܕܒܢܝܡܝܢ: ܠܡܦܠܓܘ ܬܡܢ ܡܢܬܐ ܥܡ ܥܡܐ.

¹³ ܘܟܕ ܩܐܡ ܗ̄ܘܐ ܒܬܪܥܐ ܕܒܢܝܡܝܢ: ܐܝܬ ܗ̄ܘܐ ܬܡܢ ܓܒܪܐ ܦܩܘܕܐ: ܘܫܡܗ ܢܪܝܐ ܒܪ ܫܠܡܝܐ: ܒܪ ܚܢܢܝܐ: ܘܐܚܕܗ ܠܐܪܡܝܐ ܢܒܝܐ: ܘܐܡܪ ܠܗ: ܠܘܬ ܟܠܕܝܐ ܥܪܩ ܐܢ̄ܬ.

¹⁴ ܘܐܡܪ ܠܗ ܐܪܡܝܐ ܡܕܓܠ ܐܢ̄ܬ: ܠܐ ܥܪܩ ܐ̄ܢܐ ܠܘܬ ܟܠܕܝܐ: ܘܠܐ ܫܡܥܗ: ܘܐܚܕܗ ܢܪܝܐ ܠܐܪܡܝܐ ܘܐܝܬܝܗ ܠܘܬ ܪܘܪܒܢܐ.

¹⁵ ܘܪܓܙܘ ܪܘܪܒܢܐ ܥܠ ܐܪܡܝܐ ܘܢܓܕܘܗܝ: ܘܐܪܡܝܘܗܝ ܒܝܬ ܐܣܝܪܐ ܒܝܬ ܝܘܢܬܢ ܣܦܪܐ: ܡܛܠ ܕܠܗ ܥܒܕܘ ܪܒ ܐܣܝܪܐ.

¹⁶ ܘܐܪܡܝܘܗܝ ܠܐܪܡܝܐ ܡܢ ܟܘܬ ܓܘܒܐ ܠܓܘܒܐ: ܘܗܘܐ ܬܡܢ ܐܪܡܝܐ ܝܘܡܬܐ ܣܓܝܐܐ.

¹⁷ ܘܫܕܪ ܡܠܟܐ ܨܕܩܝܐ ܘܐܣܩܗ: ܘܫܐܠܗ ܡܠܟܐ ܒܒܝܬܐ ܡܛܫܝܐܝܬ: ܘܐܡܪ ܠܗ: ܢܦܩ ܦܬܓܡܐ ܡܢ ܩܕܡ ܡܪܝܐ: ܘܐܡܪ ܐܪܡܝܐ ܢܦܩ: ܘܐܡܪ ܡܠܟܐ ܐܝܟܢܐ ܢܦܩ: ܘܐܡܪ ܕܒܐܝܕܘܗܝ ܕܡܠܟܐ ܕܒܒܠ ܬܫܬܠܡ.

¹⁸ ܘܐܡܪ ܐܪܡܝܐ ܠܡܠܟܐ ܨܕܩܝܐ: ܡܢܐ ܚܛܝܬ ܠܟ݂ ܘܠܥܒܕܝܟ ܘܠܥܡܐ ܗܢܐ: ܕܐܪܡܝܬܘܢܢܝ ܒܝܬ ܐܣܝܪܐ.

¹⁹ ܘܐܝܟܐ ܐܢܘܢ ܢܒܝܝܟܘܢ ܕܡܬܢܒܝܢ ܗ̄ܘܘ ܠܟܘܢ ܘܐܡܪܝܢ: ܕܠܐ ܐܬܐ ܡܠܟܐ ܕܒܒܠ ܥܠܝܟܘܢ ܘܥܠ ܐܪܥܐ ܗܕܐ.

²⁰ ܗܫܐ ܫܡܥܝܢܝ ܡܪܝ ܡܠܟܐ: ܘܬܦܠ ܒܥܘܬܝ ܩܕܡܝܟ: ܘܠܐ ܬܗܦܟܢܝ ܠܒܝܬ ܝܘܢܬܢ ܣܦܪܐ ܕܠܐ ܐܡܘܬ ܬܡܢ.

²¹ ܘܦܩܕ ܡܠܟܐ ܨܕܩܝܐ: ܘܫܒܩܘܗܝ ܠܐܪܡܝܐ ܢܒܝܐ ܒܕܪܬܐ ܕܒܝܬ ܐܣܝܪܐ: ܘܝܗ̄ܒܝܢ ܗ̄ܘܘ ܠܗ ܓܪܝܨܬܐ ܕܠܚܡܐ ܒܝܘܡܐ ܡܢ ܫܘܩܐ ܕܢܚܬܘܡܐ: ܥܕܡܐ ܕܓܡܪ ܟܠܗ ܠܚܡܐ ܡܢ ܩܪܝܬܐ: ܘܝܬܒ ܐܪܡܝܐ ܒܕܪܬܐ ܕܒܝܬ ܐܣܝܪܐ.

38

¹ ܘܫܡܥ ܫܦܛܝܐ ܒܪ ܡܬܢ: ܘܓܕܠܝܐ ܒܪ ܦܫܚܘܪ: ܘܝܘܟܠ ܒܪ ܫܠܡܝܐ: ܘܦܫܚܘܪ ܒܪ ܡܠܟܝܐ: ܦܬܓܡܐ ܕܐܡܪ ܐܪܡܝܐ ܠܟܠܗ ܥܡܐ.

² ܗܟܢܐ ܐܡܪ ܡܪܝܐ: ܡܢ ܕܝܬܒ ܒܩܪܝܬܐ ܗܕܐ: ܢܡܘܬ ܒܚܪܒܐ: ܘܒܟܦܢܐ: ܘܒܡܘܬܢܐ: ܘܡܢ ܕܢܦܩ ܠܘܬ ܟܠܕܝܐ: ܚܝܐ ܘܡܫܘܙܒ ܢܦ̮ܫܗ.

³ ܗܟܢܐ ܐܡܪ ܡܪܝܐ: ܬܫܬܠܡ ܩܪܝܬܐ ܗܕܐ ܒܐܝܕܐ ܕܚܝܠܗ ܕܡܠܟܐ ܕܒܒܠ: ܘܢܟܒܫܝܗ.

⁴ ܘܐܡܪܘ ܪܘܪܒܢܐ ܠܡܠܟܐ: ܢܬܩܛܠ ܓܒܪܐ ܗܢܐ: ܡܛܠ ܕܗܘܝܘ ܡܪܦܐ ܐܝܕܝܐ ܕܓܒܪܐ ܥܒܕܝ ܩܪܒܐ ܕܐܫܬܚܪܘ ܒܩܪܝܬܐ ܗܕܐ: ܘܐܝܕܝܐ ܕܟܠܗ ܥܡܐ ܕܐܡܪ ܠܗܘܢ ܦܬܓܡܐ ܗܢܐ: ܡܛܠ ܕܓܒܪܐ ܗܢܐ: ܠܐ ܨܒܐ ܫܠܡܐ ܠܥܡܐ ܗܢܐ: ܐܠܐ ܐܢ ܒܝܫܬܐ.

⁵ ܘܐܡܪ ܡܠܟܐ ܨܕܩܝܐ: ܗܐ ܡܫܠܡ ܒܐܝܕܝܟܘܢ: ܡܛܠ ܕܡܠܟܐ ܠܐ ܡܫܟܚ ܠܡܐܡܪ ܠܟܘܢ ܡܕܡ.

⁶ ܘܕܒܪܘܗܝ ܠܐܪܡܝܐ: ܘܐܪܡܝܘܗܝ ܒܓܘܒܐ ܕܡܠܟܝܐ ܒܪ ܡܠܟܐ ܒܕܪܬܐ ܕܒܝܬ ܐܣܝܪܐ: ܘܫܒܘܗܝ ܠܐܪܡܝܐ ܒܚܒܠܐ ܠܓܘܒܐ: ܘܒܓܘܒܐ ܠܝܬ ܡܝܐ ܠܐ ܐܢ ܣܝܢܐ: ܘܛܒܥ ܐܪܡܝܐ ܒܣܝܢܐ.

⁷ ܘܫܡܥ ܥܒܕܡܠܟ ܟܘܫܝܐ ܓܒܪܐ ܡܗܝܡܢܐ: ܘܗܘ ܒܒܝܬ ܡܠܟܐ ܗ̄ܘܐ: ܕܐܪܡܝܘܗܝ ܠܐܪܡܝܐ ܒܓܘܒܐ: ܘܡܠܟܐ ܝܬܒ ܗ̄ܘܐ ܒܬܪܥܐ ܕܒܢܝܡܝܢ.

⁸ ܘܢܦܩ ܥܒܕܡܠܟ ܡܢ ܒܝܬ ܡܠܟܐ: ܘܐܡܪ ܠܡܠܟܐ.

⁹ ܡܪܝ ܒܝܫ ܥܒܕܘ ܓܒܪܐ ܗܠܝܢ: ܡܕܡ ܕܥܒܕܘ ܠܐܪܡܝܐ ܢܒܝܐ: ܕܐܪܡܝܘܗܝ ܒܓܘܒܐ: ܘܐ ܡܐܬ ܠܟܦܢܐ: ܡܛܠ ܕܠܝܬ ܠܚܡܐ ܒܩܪܝܬܐ.

¹⁰ ܘܦܩܕ ܡܠܟܐ ܠܥܒܕܡܠܟ ܟܘܫܝܐ: ܘܐܡܪ ܠܗ: ܕܒܪ ܥܡܟ݂ ܡܟܐ ܬܠܬܝܢ ܓܒܪܝܢ: ܘܙܠ ܐܣܩܝܗܝ ܠܐܪܡܝܐ ܡܢ ܓܘܒܐ ܥܕܠܐ ܢܡܘܬ.

¹¹ ܘܕܒܪ ܥܒܕܡܠܟ ܟܘܫܝܐ ܓܒܪܐ ܡܢ ܒܝܬ ܡܠܟܐ ܥܡܗ: ܘܥܠ ܠܒܝܬ ܓܙܐ ܕܠܬܚܬ ܡܢ ܒܝܬ ܡܠܟܐ: ܘܢܣܒ ܡܢ ܬܡܢ ܒܠܝܐ ܕܣܚܘܬܐ: ܘܒܠܝܐ ܕܪܘܩܥܐ: ܘܫܒ ܐܢܘܢ ܠܐܪܡܝܐ ܒܚܒܠܐ ܠܓܘܒܐ.

¹² ܘܐܡܪ ܥܒܕܡܠܟ ܟܘܫܝܐ ܠܐܪܡܝܐ: ܒܠܝܐ ܕܣܚܘܬܐ ܘܕܪܘܩܥܐ: ܣܝܡ ܬܚܝܬ ܫܚܘܬܟ݂ ܠܬܚܬ ܡܢ ܚܒܠܐ: ܘܥܒܕ ܐܪܡܝܐ ܗܟܢܐ.

¹³ ܘܢܓܕܘܗܝ ܠܐܪܡܝܐ ܒܚܒܠܐ: ܘܐܣܩܘܗܝ ܡܢ ܓܘܒܐ: ܘܝܬܒ ܐܪܡܝܐ ܒܕܪܬܐ ܕܒܝܬ ܐܣܝܪܐ.

¹⁴ ܘܫܕܪ ܡܠܟܐ ܨܕܩܝܐ: ܘܕܒܪܗ ܠܐܪܡܝܐ ܢܒܝܐ ܠܘܬܗ: ܠܓܘ ܡܢ ܬܠܬܐ ܡܥܠܢܝܢ ܕܒܝܬܗ ܕܡܪܝܐ: ܘܐܡܪ ܡܠܟܐ ܠܐܪܡܝܐ: ܫܐܠ ܐ̄ܢܐ ܠܟ݂ ܡܠܬܐ: ܠܐ ܬܟܣܐ ܡܢܝ ܡܠܬܐ.

¹⁵ ܘܐܡܪ ܐܪܡܝܐ ܠܨܕܩܝܐ: ܐܢ ܡܚܘܐ ܐ̄ܢܐ ܠܟ݂ ܗܐ ܩܛܠ ܐܢ̄ܬ ܠܝ: ܘܐܢ ܡܠܟ݂ ܐ̄ܢܐ ܠܟ݂ ܠܐ ܫܡܥ ܐܢ̄ܬ ܠܝ.

¹⁶ ܘܝܡܐ ܡܠܟܐ ܨܕܩܝܐ ܠܐܪܡܝܐ ܡܛܫܝܐܝܬ ܒܒܝܬܐ: ܘܐܡܪ: ܚܝ ܗ̄ܘ ܡܪܝܐ ܕܥܒܕ ܒܢ ܢܦ̮ܫܐ ܕܠܐ ܐܩܛܠܟ݂: ܘܠܐ ܐܫܠܡܟ݂ ܒܝܕ ܐ̄ܢܫܐ ܐܝܠܝܢ ܕܒܥܝܢ ܢܦ̮ܫܟ݂.

¹⁷ ܘܐܡܪ ܐܪܡܝܐ ܠܨܕܩܝܐ: ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܝܣܪܝܠ: ܐܢ ܬܦܘܩ ܠܘܬ ܪܘܪܒܢܐ ܕܡܠܟܐ ܕܒܒܠ: ܡܚܐ ܐܢ̄ܬ ܢܦ̮ܫܟ݂: ܘܩܪܝܬܐ ܗܕܐ ܠܐ ܝܩܕܐ ܒܢܘܪܐ: ܘܚܝܐ ܐܢ̄ܬ ܘܒܝܬܟ݂.

¹⁸ ܘܐܢ ܠܐ ܢܦܩ ܐܢ̄ܬ ܠܘܬ ܪܘܪܒܢܐ ܕܡܠܟܐ ܕܒܒܠ: ܡܫܬܠܡܐ ܩܪܝܬܐ ܗܕܐ ܒܐܝܕܐ ܕܟܠܕܝܐ: ܘܡܘܩܕܝܢ ܠܗ ܒܢܘܪܐ: ܘܐܢ̄ܬ ܠܐ ܬܬܦܠܛ ܡܢ ܐܝܕܝܗܘܢ.

¹⁹ ܘܐܡܪ ܡܠܟܐ ܨܕܩܝܐ ܠܐܪܡܝܐ: ܕܚܠ ܐ̄ܢܐ ܡܢ ܝܗܘܕܝܐ ܕܐܦܘܩ ܠܘܬ ܟܠܕܝܐ: ܕܠܡܐ ܢܫܠܡܘܢܢܝ ܒܐܝܕܝܗܘܢ ܘܢܒܙܚܘܢ ܒܝ.

²⁰ ܘܐܡܪ ܐܪܡܝܐ ܠܐ ܡܫܠܡܝܢ ܠܟ݂: ܫܡܥ ܕܝܢ ܡܠܬܗ ܕܡܪܝܐ ܕܐܡܪ ܐ̄ܢܐ ܠܟ݂: ܕܢܛܐܒ ܠܟ݂: ܘܬܚܐ ܢܦ̮ܫܟ݂.

²¹ ܘܐܢ ܠܐ ܨܒܐ ܐܢ̄ܬ ܠܡܦܩ: ܗܢܘ ܦܬܓܡܐ ܕܚܘܝܢܝ ܡܪܝܐ.

²² ܕܟܠܗܝܢ ܢܫܐ ܕܐܫܬܚܪ ܒܒܝܬܗ ܕܡܠܟܐ ܕܝܗܘܕܐ: ܢܦܩܢ ܠܘܬ ܪܘܪܒܢܐ ܕܡܠܟܐ ܕܒܒܠ: ܘܗܢܝܢ ܐܡܪܢ: ܐܛܥܝܘܟ݂ ܘܙܟܐܘܟ݂ ܐ̄ܢܫܐ ܕܫܐܠܝܢ ܗ̄ܘܘ ܒܫܠܡܟ݂: ܘܛܒܥܘ ܒܣܝܢܐ ܪܓܠܝܟ ܘܗܦܟܘ ܠܒܣܬܪܗܘܢ.

²³ ܘܟܠܗܝܢ ܢܫܝܟ ܘܒܢܝܟ ܡܦܩܝܢ ܠܘܬ ܟܠܕܝܐ: ܘܐܢ̄ܬ ܠܐ ܬܬܦܠܛ ܡܢ ܐܝܕܝܗܘܢ: ܐܠܐ ܒܐܝܕܘܗܝ ܕܡܠܟܐ ܕܒܒܠ ܬܫܬܠܡ: ܘܩܪܝܬܐ ܗܕܐ ܬܐܩܕ ܒܢܘܪܐ.

²⁴ ܘܐܡܪ ܨܕܩܝܐ ܠܐܪܡܝܐ: ܐ̄ܢܫ ܠܐ ܢܕܥ ܒܗܠܝܢ ܡܠܐ ܕܠܐ ܬܡܘܬ.

²⁵ ܘܟܕ ܢܫܡܥܘܢ ܪܘܪܒܢܐ ܕܡܠܠܬ ܥܡܟ݂: ܘܢܐܬܘܢ ܠܘܬܟ݂ ܘܢܐܡܪܘܢ ܠܟ݂: ܚܘܢ ܡܢܐ ܡܠܠܬ ܥܡ ܡܠܟܐ: ܘܡܢܐ ܐܡܪ ܠܟ݂ ܡܠܟܐ: ܠܐ ܬܟܣܐ ܡܢܢ ܕܠܐ ܢܩܛܠܟ݂.

²⁶ ܘܐܡܪ ܠܗܘܢ: ܡܒܥܐ ܒܥܝܬ ܡܢ ܡܠܟܐ: ܕܠܐ ܢܗܦܟܢܝ ܠܒܝܬ ܝܘܢܬܢ ܣܦܪܐ ܕܠܐ ܐܡܘܬ ܬܡܢ.

²⁷ ܘܐܬܘ ܟܠܗܘܢ ܪܘܪܒܢܐ ܠܘܬ ܐܪܡܝܐ ܘܫܐܠܘܗܝܙ ܘܚܘܝ ܐܢܘܢ ܟܠܗܝܢ ܡܠܐ ܕܦܩܕܗ ܡܠܟܐܙ ܘܫܬܩܘ ܠܗܘܢ ܡܢܗ: ܡܛܠ ܕܠܐ ܐܫܬܡܥܬ ܡܠܬܐ.

²⁸ ܘܝܬܒ ܐܪܡܝܐ ܒܕܪܬܐ ܕܒܝܬ ܐܣܝܪܐ: ܥܕܡܐ ܠܝܘܡܐ ܕܐܬܟܒܫܬ ܐܘܪܫܠܡ.

39

¹ ܒܫܢ̄ܬܐ ܕܬܫܥ ܕܨܕܩܝܐ ܡܠܟܐ ܕܝܗܘܕܐ ܒܝܪܚܐ ܕܥܣܪܐ: ܐܬܐ ܢܒܘܟܕܢܨܪ ܡܠܟܐ ܕܒܒܠ: ܗܘ ܘܟܠܗ ܚܝܠܗ ܥܠ ܐܘܪܫܠܡ: ܘܫܪܘ ܥܠܝܗ.

² ܘܒܫܢܬ ܚܕܥܣܪܐ ܕܡܠܟܐ ܨܕܩܝܐ: ܒܝܪܚܐ ܚܡܝܫܝܐ ܒܬܫܥܬܐ ܒܗ ܒܝܪܚܐ: ܐܬܬܪܥܬ ܩܪܝܬܐ.

³ ܘܐܬܘ ܟܠܗܘܢ ܪܘܪܒܢܐ ܕܡܠܟܐ ܕܒܒܠ: ܘܝܬܒܘ ܒܬܪܥܐ ܡܨܥܝܐ: ܢܪܓܠ: ܫܪܐܨܪ: ܘܣܡܓܕܢܒܘ: ܘܣܪܣܟܝܡ: ܪܒ ܡܗܝܡܢܐ: ܢܪܓܠ: ܫܪܐܨܪ: ܪܒܡܓ: ܘܟܠܗܘܢ ܪܘܪܒܢܐ ܕܡܠܟܐ ܕܒܒܠ.

⁴ ܘܟܕ ܚܙܐ ܐܢܘܢ ܨܕܩܝܐ ܡܠܟܐ ܕܝܗܘܕܐ: ܘܟܠܗܘܢ ܓܒܪܐ ܩܪܒܬܢܐ: ܥܪܩܘ ܘܢܦܩܘ ܡܢ ܩܪܝܬܐ ܒܠܠܝܐ: ܒܐܘܪܚܐ ܕܓܢܬܐ ܕܡܠܟܐ ܒܬܪܥܐ ܕܒܝܬ ܫܘܪܐܙ ܘܢܦܩܘ ܒܐܘܪܚܐ ܕܦܩܥܬܐ.

⁵ ܘܪܕܦܩܘ ܚܝܠܐ ܕܟܠܕܝܐ ܒܬܪܗܘܢ: ܘܐܕܪܟܘܝ ܠܨܕܩܝܐ ܒܦܩܥܬܐ ܕܐܝܪܝܚܘ: ܘܟܠܗ ܚܝܠܗ ܐܬܒܕܪ ܡܢܗ: ܘܕܒܪܘܗܝܘܐܣܩܘܗܝ ܠܘܬ ܢܒܘܟܕܢܨܪ ܡܠܟܐ ܕܒܒܠ ܠܕܒܠܬ ܒܐܪܥܐ ܕܚܡܬ: ܘܡܠܠ ܥܡܗ ܕܝܢܐ.

⁶ ܘܢܟܣ ܡܠܟܐ ܕܒܒܠܠ ܠܒܢܘܗܝ ܕܨܕܩܝܐ ܒܕܒܠܬ ܠܥܢܘܗܝ: ܘܠܟܠܗܘܢ ܪܘܪܒܢܐ ܕܝܗܘܕܐ: ܢܟܣ ܡܠܟܐ ܕܒܒܠ ܒܕܒܠܬ.

⁷ ܘܥܝܢܘܗܝ ܕܨܕܩܝܐ ܥܘܪ: ܘܐܣܪܗ ܒܫܫܠܬܐ ܠܡܘܒܠܘܬܗ ܠܒܒܠ.

⁸ ܘܠܒܝܬ ܡܠܟܐ ܘܠܒܬܐ ܕܥܡܐ: ܐܘܩܕܘ ܟܠܕܝܐ ܒܢܘܪܐ: ܘܠܫܘܪܐ ܕܐܘܪܫܠܡ ܟܕ ܚܕܪܐ ܥܩܪܘ.

⁹ ܘܫܪܟܗ ܕܥܡܐ ܕܐܫܬܚܪܘ ܒܩܪܝܬܐ: ܘܐ̄ܢܫܐ ܕܥܪܩܘ ܠܘܬܗ: ܘܫܪܟܗ ܕܥܡܐ ܕܐܫܬܚܪܘ: ܫܒܐ ܢܒܘܙܪܕܢ ܪܒ ܕܚܫܐ: ܘܐܘܒܠ ܐܢܘܢ ܠܒܒܠ.

¹⁰ ܘܡܢ ܡܣܟܢܐ ܕܥܡܐ ܕܠܝܬ ܠܗܘܢ ܡܕܡ: ܫܒܩ ܢܒܘܙܪܕܢ ܪܒ ܕܚܫܐ ܒܐܪܥܐ ܕܝܗܘܕܐ: ܘܝܗ̄ܒ ܠܗܘܢ ܟܪܡܐ ܘܦܘܠܚܢܐ ܒܝܘܡܐ ܗܘ.

¹¹ ܘܦܩܕ ܢܒܘܟܕܢܨܪ ܡܠܟܐ ܕܒܒܠ ܥܠ ܐܪܡܝܐ: ܠܢܒܘܙܪܕܢ ܪܒ ܕܚܫܐ: ܘܐܡܪ ܠܗ.

¹² ܕܒܪܝܗܝ ܠܐܪܡܝܐ: ܘܥܝܢܝܟ ܢܗܘܝܢ ܥܠܘܗܝ: ܘܠܐ ܬܥܒܕ ܠܗ ܡܕܡ ܕܒܝܫ: ܘܟܠ ܡܕܡ ܕܐܡܪ ܠܟ݂ ܥܒܕ ܠܗ.

¹³ ܘܫܕܪ ܢܒܘܙܪܕܢ ܪܒ ܕܚܫܐ: ܘܢܒܘܫܙܒܢ ܪܒ ܡܗܝܡܢܐ: ܘܢܪܓܠ: ܫܪܐܨܪ: ܪܒܡܓ: ܘܟܠܗܘܢ ܪܘܪܒܢܐ ܕܡܠܟܐ ܕܒܒܠ.

¹⁴ ܫܕܪܘ ܕܒܪܘܗܝ ܠܐܪܡܝܐ ܡܢ ܕܪܬܐ ܕܒܝܬ ܐܣܝܪܐ: ܘܐܫܠܡܘܗܝ ܠܓܕܠܝܐ ܒܪ ܐܚܝܩܡ: ܒܪ ܫܦܢ: ܠܡܗܦܟܘܬܗ ܠܒܝܬܗ: ܘܝܬܒ ܒܓܘ ܥܡܐ.

¹⁵ ܘܥܠ ܐܪܡܝܐ ܗܘܐ ܦܬܓܡܗ ܕܡܪܝܐ: ܟܕ ܗܘ ܟܠܐ ܗ̄ܘܐ ܒܕܪܬ ܡܛܪܬܐ.

¹⁶ ܙܠ ܘܐܡܪ ܠܥܒܕܡܠܟ ܟܘܫܝܐ: ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܝܣܪܝܠ: ܗܐ ܡܝܬܐ ܐ̄ܢܐ ܦܬܓܡܐ ܥܠ ܩܪܝܬܐ ܗܕܐ: ܠܒܝܫܬܐ ܘܠܐ ܠܛܒܬܐ: ܘܢܗܘܘܢ ܩܕܡܝܟ ܒܝܘܡܐ ܗܘ.

¹⁷ ܘܐܦܨܝܟ݂ ܒܝܘܡܐ ܗܘ ܐܡܪ ܡܪܝܐܙ ܘܠܐ ܬܫܬܠܡ ܒܐܝܕܐ ܕܓܒܪܐ ܕܕܚܠ ܐܢ̄ܬ ܡܢܗܘܢ.

¹⁸ ܘܐܦܨܝܟ݂ ܘܒܚܪܒܐ ܠܐ ܬܦܠ: ܘܬܫܘܙܒ ܢܦ̮ܫܟ݂: ܥܠ ܕܐܬܬܟܠܬ ܥܠܝ ܐܡܪ ܡܪܝܐ.

40

¹ ܦܬܓܡܐ ܕܗܘܐ ܥܠ ܐܪܡܝܐ ܡܢ ܩܕܡ ܡܪܝܐ: ܡܢ ܒܬܪ ܕܫܕܪܗ ܢܒܘܙܪܕܢ ܪܒ ܕܚܫܐ ܡܢ ܪܡܬܐ: ܟܕ ܕܒܪܗ ܟܕ ܐܣܝܪ ܒܫܫܠܬܐ: ܒܓܘ ܟܠܗ ܫܒܝܬܐ ܕܐܘܪܫܠܡ ܘܕܝܗܘܕܐ ܕܐܫܬܒܝܘ ܠܒܒܠ.

² ܘܕܒܪܗ ܪܒ ܕܚܫܐ ܠܐܪܡܝܐ: ܘܐܡܪ ܠܗ: ܡܪܝܐ ܐܠܗܟ݂ ܐܡܪ: ܒܝܫܬܐ ܗܕܐ ܥܠ ܐܬܪܐ ܗܢܐ.

³ ܘܐܝܬܝ ܘܥܒܕ ܡܪܝܐ ܐܝܟ݂ ܕܐܡܪ: ܥܠ ܕܚܛܝܬܘܢ ܠܡܪܝܐ: ܘܠܐ ܫܡܥܬܘܢ ܒܩܠܗ: ܗܘܐ ܠܟܘܢ ܦܬܓܡܐ ܗܢܐ.

⁴ ܠܟ݂ ܕܝܢ ܗܐ ܫܪܝܬܟ݂ ܝܘܡܢܐ ܡܢ ܫܫܠܬܐ ܕܒܐܝܕܝܟ: ܐܢ ܨܒܐ ܐܢ̄ܬ ܠܡܐܬܐ ܥܡܝ ܠܒܒܠ: ܬܐ: ܘܬܗܘܐ ܥܝܢܝ ܥܠܝܟ: ܘܐܢ ܠܐ ܨܒܐ ܐܢ̄ܬ ܠܡܐܬܐ ܥܡܝ ܠܒܒܠ: ܦܘܫ: ܗܐ ܟܠܗ ܐܪܥܐ ܩܕܡܝܟ: ܟܪ ܕܛܒ ܘܟܪ ܕܫܦܝܪ ܒܥܝܢܝܟ ܠܡܐܙܠ: ܠܬܡܢ ܙܠ.

⁵ ܘܐܡܪ ܠܗ: ܐܢ ܦܐܫ ܐܢ̄ܬ ܬܒ ܠܘܬ ܓܕܠܝܐ ܒܪ ܐܚܝܩܡ: ܒܪ ܫܦܢ: ܒܓܘ ܥܡܐ: ܗܘ ܕܐܫܠܛܗ ܡܠܟܐ ܕܒܒܠ ܒܩܘܪܝܐ ܕܝܗܘܕܐ: ܐܘ ܟܪ ܕܫܦܝܪ ܒܥܝܢܝܟ ܠܡܐܙܠ: ܙܠ: ܘܝܗ̄ܒ ܠܗ ܢܒܘܙܪܕܢ ܡܘܗܒܬܐ ܒܐܘܪܚܐ: ܘܫܪܝܗܝ.

⁶ ܘܐܬܐ ܐܪܡܝܐ ܠܘܬ ܓܕܠܝܐ ܒܪ ܐܚܝܩܡ: ܒܪ ܫܦܢ: ܠܡܨܦܝܐ: ܘܝܬܒ ܠܘܬܗ ܒܓܘ ܥܡܐ ܕܐܫܬܚܪܘ ܒܐܪܥܐ.

⁷ ܘܫܡܥܘ ܟܠܗܘܢ ܪܒܝ ܚܝܠܐ ܕܒܩܘܪܝܐ: ܗܢܘܢ ܘܓܒܪܐ ܕܥܡܗܘܢ: ܕܐܫܠܛ ܡܠܟܐ ܕܒܒܠ ܠܓܕܠܝܐ ܒܪ ܐܚܝܩܡ ܒܐܪܥܐ: ܘܕܐܫܠܡ ܠܗ ܓܒܪܐ ܘܢܫܐ ܘܛܠܝܐ: ܘܡܢ ܡܣܟܢܐ ܕܐܪܥܐ ܐܝܠܝܢ ܕܠܐ ܐܫܬܒܝܘ ܠܒܒܠ.

⁸ ܘܐܬܘ ܠܘܬ ܓܕܠܝܐ ܠܡܨܦܝܐ: ܐܝܫܡܥܝܠ ܒܪ ܢܬܢܝܐ: ܘܝܘܚܢܢ: ܘܝܘܢܬܢ: ܒܢܝ ܩܘܪܚ: ܘܫܪܝܐ ܒܪ ܬܢܚܡܬ: ܘܒܢܝ ܥܝܦܝ ܕܡܢ ܢܛܘܦܬ: ܘܝܙܢܝܐ ܒܪ ܡܥܟܬ: ܗܢܘܢ ܘܓܒܪܝܗܘܢ.

⁹ ܘܝܡܐ ܠܗܘܢ ܓܕܠܝܐ ܒܪ ܐܚܝܩܡ: ܒܪ ܫܦܢ: ܘܠܓܒܪܐ ܕܥܡܗܘܢ: ܘܐܡܪ: ܠܐ ܬܕܚܠܘܢ ܠܡܦܠܚ ܠܟܠܕܝܐ: ܬܒܘ ܒܐܪܥܐ: ܘܦܠܘܚܘ ܠܡܠܟܐ ܕܒܒܠ ܘܢܛܐܒ ܠܟܘܢ.

¹⁰ ܘܐܢܐ ܗܐ ܝܬܒ ܐ̄ܢܐ ܒܡܨܦܝܐ: ܠܡܩܡ ܩܕܡ ܟܠܕܝܐ ܕܐܬܝܢ ܥܠܝܢ: ܘܐܢ̄ܬܘܢ ܚܡܘܠܘ ܥܒܘܪܐ: ܘܚܡܪܐ ܘܡܫܚܐ: ܘܐܒܐ ܕܩܝܛܐ: ܘܐܪܡܘ ܒܡܐܢܝܟܘܢ: ܘܬܒ ܒܩܘܪܝܟܘܢ ܕܐܚܕܬܘܢ.

¹¹ ܘܐܦ ܟܠܗܘܢ ܝܗܘܕܝܐ ܕܐܝܬ ܒܐܕܘܡ: ܘܒܡܘܐܒ: ܘܒܢܝ ܥܡܘܢ: ܘܒܟܠܗܝܢ ܐܪܥܬܐ: ܫܡܥܘ ܕܫܒܩ ܡܠܟܐ ܕܒܒܠ ܫܪܟܢܐ ܠܝܗܘܕܝܐ: ܘܕܐܫܠܛ ܥܠܝܗܘܢ ܠܓܕܠܝܐ ܒܪ ܐܚܝܩܡ: ܒܪ ܫܦܢ.

¹² ܘܗܦܟܘ ܟܠܗܘܢ ܝܗܘܕܝܐ: ܡܢ ܟܠܗܘܢ ܐܬܪܘܬܐ ܕܐܬܒܕܪܘ ܬܡܢ: ܘܐܬܘ ܠܐܪܥܐ ܕܝܗܘܕܐ ܠܘܬ ܓܕܠܝܐ ܠܡܨܦܝܐ: ܘܚܡܠܘ ܚܡܪܐ ܘܥܠܠܬܐ ܕܩܝܛܐ ܣܘܓܐܐ ܕܛܒ.

¹³ ܘܝܘܚܢܢ ܒܪ ܩܘܪܚ ܘܟܠܗܘܢ ܪܒܝ ܚܝܠܐ ܕܒܩܘܪܝܐ: ܐܬܘ ܠܘܬ ܓܕܠܝܐ ܠܡܨܦܝܐ.

¹⁴ ܘܐܡܪܘ ܠܗ: ܠܐ ܝܕܥ ܐܢ̄ܬ ܕܒܠܥܝܣ ܡܠܟܐ ܕܒܢܝ ܥܡܘܢ: ܫܕܪ ܠܐܝܫܡܥܝܠ ܒܪ ܢܬܢܝܐ ܠܡܩܛܠܟ݂: ܘܠܐ ܗܝܡܢ ܐܢܘܢ ܓܕܠܝܐ ܒܪ ܐܚܝܩܡ.

¹⁵ ܘܝܘܚܢܢ ܒܪ ܩܘܪܚ ܐܡܪ ܠܓܕܠܝܐ ܡܛܫܝܐܝܬ ܒܡܨܦܝܐ: ܐܙܠ ܐܩܛܠܝܘܗܝ ܠܐܝܫܡܥܝܠ ܒܪ ܢܬܢܝܐ: ܘܐ̄ܢܫ ܠܐ ܢܕܥ: ܕܠܡܐ ܢܩܛܠܟ݂: ܘܢܬܒܕܪܘܢ ܟܠܗܘܢ ܕܒܝܬ ܝܗܘܕܐ ܕܡܬܟܢܫܝܢ ܠܘܬܟ݂: ܘܢܐܒܕ ܫܪܟܢܐ ܕܝܗܘܕܐ.

¹⁶ ܘܐܡܪ ܓܕܠܝܐ ܒܪ ܐܚܝܩܡ ܠܝܘܚܢܢ ܒܪ ܩܘܪܚ: ܠܐ ܬܥܒܕ ܦܬܓܡܐ ܗܢܐ: ܡܛܠ ܕܕܓܠܘܬܐ ܡܠܠܬ ܥܠ ܐܝܫܡܥܝܠ.

41

¹ ܘܒܝܪܚܐ ܕܫܒܥܐ ܐܬܐ ܐܝܫܡܥܝܠ: ܒܪ ܢܬܢܝܐ: ܒܪ ܐܝܫܡܥܝܠ: ܡܢ ܙܪܥܐ ܕܡܠܟܘܬܐ: ܘܪܘܪܒܢܝ ܡܠܟܐ: ܘܥܣܪܝܢ ܓܒܪܝܢ ܥܡܗ: ܠܘܬ ܓܕܠܝܐ ܒܪ ܐܚܝܩܡ ܠܡܨܦܝܐ: ܘܐܟܠܘ ܬܡܢ ܠܚܡܐ ܐܟܚܕܐ ܒܡܨܦܝܐ.

² ܘܩܵܡ ܐܝܼܫܡܵܥܹܝܠ ܒܲܪ ܢܬܲܢܝܵܐ ܗ̤ܘ ܘܥܸܣܪܝܼܢ ܓܲܒ̣ܪ̈ܝܼܢ ܕܐܸܬ̣ܵܘ ܥܲܡܹܗ: ܘܲܡܚܵܐܘܼܗܝ ܠܲܓ̣ܕܲܠܝܵܐ ܒܲܪ ܐܲܚܝܼܩܲܡ: ܒܲܪ ܫܵܦܵܢ: ܒܚܲܪܒܵܐ ܘܩܲܛܠܘܼܗܝ: ܗܵܘ̇ ܕܐܲܫ̱ܠܛܹܗ ܡܲܠܟܵܐ ܕܒ̣ܵܒܹܠ ܒܐܲܪܥܵܐ ܕܲܝܗܘܼܕ݂ܵܐ.

³ ܘܲܠܟ݂ܠܗܘܿܢ ܝܗ̄ܘܼܕ݂ܵܝܹ̈ܐ ܕܐܝܼܬ̣ ܗ̄ܘ̣ܵܘ ܥܲܡܹܗ ܥܲܡ ܓܕܲܠܝܵܐ ܒܡܲܨܦܝܵܐ: ܘܲܠܟܲܠܕ݂ܵܝܹ̈ܐ ܕܐܸܫܬܲܟܲܚܘ ܬܲܡܵܢ: ܘܐܵܦ ܠܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ ܩܲܛܸܠ ܐܝܼܫܡܵܥܹܝܠ: ܘܐ̄ܢܵܫ ܠܵܐ ܫܡܲܥ.

⁴ ܘܲܒ̣ܝܵܘܡܵܐ ܕܲܬ̣ܪܹܝܢ ܒܵܬܲܪ ܕܐܸܬ̣ܩܛܸܠ ܓܕܲܠܝܵܐ.

⁵ ܐܸܬ̣ܵܘ ܓܲܒ̣ܪܹ̈ܐ ܡ̣ܢ ܫܟܹܝܡ: ܘܡ̣ܢ ܫܝܼܠܘܿ: ܘܡ̣ܢ ܫܵܡܪܹܝܢ: ܬܡܵܢܵܐܝܼܢ ܓܲܒ̣ܪ̈ܝܼܢ: ܓܪܝܼܥܝܼܢ ܕܲܩܢܲܝ̈ܗܘܿܢ: ܘܲܡܨܲܪܹܝܢ ܠܒ̣ܘܼܫܲܝ̈ܗܘܿܢ: ܘܡܸܬ̣ܟܲܬ̇ܫܝܼܢ: ܘܩܘܼܪ̈ܒܵܢܹܐ ܘܲܠܒ̣ܘܼܢ̄ܬܵܐ ܒܐܝܼܕܲܝ̈ܗܘܿܢ: ܠܡܲܥܵܠܘܼ ܠܒܲܝܬܹ̇ܗ ܕܡܵܪܝܵܐ.

⁶ ܘܲܢܦܲܩ ܐܝܼܫܡܵܥܹܝܠ ܒܲܪ ܢܬܲܢܝܵܐ ܠܐܘܼܪ̣ܥܗܘܿܢ ܡ̣ܢ ܡܲܨܦܝܵܐ: ܡܗܲܠܸܟ݂ ܘܐܵܙܹ̇ܠ ܘܒ̣ܵܟܹ̇ܐ: ܘܟܲܕ݂ ܦܓܲܥ ܒܗܘܿܢ: ܐܸܡܲܪ ܠܗܘܿܢ ܬܵܘ ܠܘܵܬ̣ ܓܕܲܠܝܵܐ ܒܲܪ ܐܲܚܝܼܩܲܡ.

⁷ ܘܟܲܕ݂ ܥܲܠܘ ܠܲܩܪܝܼܬ̣ܵܐ: ܢܲܟܸ̇ܣ ܐܸܢܘܿܢ ܐܝܼܫܡܵܥܹܝܠ ܒܲܪ ܢܬܲܢܝܵܐ: ܘܐܲܪܡܝܼ ܐܸܢܘܿܢ ܒܓ̣ܘܼܒܵܐ ܗ̤ܘ ܘܓܲܒ̣ܪܹ̈ܐ ܕܥܲܡܹܗ.

⁸ ܘܥܸܣܪܵܐ ܓܲܒ̣ܪ̈ܝܼܢ ܐܸܫܬ̇ܟܲܚܘ ܒܗܘܿܢ: ܘܐܵܡ̇ܪܝܼܢ ܠܐܝܼܫܡܵܥܹܝܠ ܠܵܐ ܬܸܩܛܠܲܢ: ܡܸܛܠ ܕܐܝܼܬ̣ ܠܲܢ ܚܲܕ݂̈ܘܵܬ̣ܵܐ ܒܚܲܩܠܵܐ ܕܚܸܛܹ̈ܐ ܘܕܲܣܥܵܪܹ̈ܐ: ܘܡܸܫܚܵܐ ܘܕܸܒ̣ܫܵܐ. ܘܲܫܒܲܩ̣ ܐܸܢܘܿܢ ܘܠܵܐ ܩܲܛܸܠ ܐܸܢܘܿܢ ܥܲܡ ܐܲܚܲܝ̈ܗܘܿܢ.

⁹ ܘܓ̣ܘܼܒܵܐ ܕܲܫܕ݂ܵܐ ܒܹܗ ܐܝܼܫܡܵܥܹܝܠ ܟܠܗܹܝܢ ܫ̈ܠܲܕܹ̇ܐ ܕܓܲܒ̣ܪܹ̈ܐ ܕܩܲܛܸܠ ܥܲܡ ܓܕܲܠܝܵܐ: ܗܵܘ̇ ܗ̄ܘ̣ ܕܲܥܒܲܕ݂ ܐܵܣܵܐ ܡܲܠܟܵܐ ܕܲܝܗܘܼܕ݂ܵܐ: ܡ̣ܢ ܩܕ݂ܵܡ ܒܲܥܫܵܐ ܡܲܠܟܵܐ ܕܝܼܣܪܵܝܹܠ: ܠܹܗ ܠܓ̣ܘܼܒܵܐ ܗܵܘ̇ ܡ̣ܠܵܝܗܝ ܐܝܼܫܡܵܥܹܝܠ ܒܲܪ ܢܬܲܢܝܵܐ ܩܛܝܼ̈ܠܹܐ.

¹⁰ ܘܲܫܒ̣ܵܐ ܐܝܼܫܡܵܥܹܝܠ ܟܠܹܗ ܫܲܪܟܹ̇ܗ ܕܥܲܡܵܐ ܕܲܒ̣ܡܲܨܦܝܵܐ ܕܐܲܫܠܸܡ ܢܒ̣ܘܼܙܲܪܕܵܢ ܪܲܒ̇ ܕܲܚܫܹ̈ܐ ܠܲܓܕܲܠܝܵܐ ܒܲܪ ܐܲܚܝܼܩܵܡ: ܘܲܫܒ̣ܵܐ ܐܸܢܘܿܢ ܐܝܼܫܡܵܥܹܝܠ ܒܲܪ ܢܬܲܢܝܵܐ: ܘܐܸܙܲܠ ܠܥܸܒ̣ܪܵܐ ܕܲܒ̣ܢܲܝ̈ ܥܲܡܘܿܢ.

¹¹ ܘܲܫܩܲܠ ܝܘܿܚܲܢܵܢ ܒܲܪ ܩܘܿܪܚ: ܘܟ݂ܠܗܘܿܢ ܪ̈ܲܒܲܝ ܚܲܝ̈ܠܹܐ ܕܥܲܡܹܗ: ܥܲܠ ܟܠܵܗ̇ ܫܒ̣ܝܼܬ̣ܵܐ ܕܲܕ݂ܒܲܪ ܐܝܼܫܡܵܥܹܝܠ ܒܲܪ ܢܬܲܢܝܵܐ.

¹² ܘܲܕ݂ܒܲܪ ܟܠܗܘܿܢ ܓܲܒ̣ܪܹ̈ܐ: ܘܐܸܙܲܠ ܠܡܸܬ̣ܟܲܬܵܫܘܼ ܥܲܡ ܐܝܼܫܡܵܥܹܝܠ ܒܲܪ ܢܬܲܢܝܵܐ: ܘܐܸܫܟ̇ܚܘܼܗܝ ܥܲܠ ܡܲـ̈ـܝܵܐ ܣܲܓ̇ܝܼ̈ܐܹܐ ܕܐܝܼܬ̣ ܒܓܸܒ̣ܥܘܿܢ.

¹³ ܘܟܲܕ݂ ܚ̣ܙܵܐ ܟܠܹܗ ܥܲܡܵܐ ܕܥܲܡ ܐܝܼܫܡܵܥܹܝܠ ܠܝܘܿܚܲܢܵܢ ܒܲܪ ܩܘܿܪܚܝ: ܘܲܠܟ݂ܠܗܘܿܢ ܪ̈ܲܒܲܝ ܚܲܝ̈ܠܹܐ ܕܥܲܡܹܗ ܚܕ݂ܝܼܘ.

¹⁴ ܘܲܗܦܲܟ݂ܘ ܟܠܹܗ ܥܲܡܵܐ ܕܲܫܒ̣ܵܐ ܐܝܼܫܡܵܥܹܝܠ ܡ̣ܢ ܡܲܨܦܝܵܐ: ܘܐܸܬ̣ܵܘ ܠܘܵܬ̣ ܝܘܿܚܲܢܵܢ ܒܲܪ ܩܘܼܪܚ.

¹⁵ ܘܐܝܼܫܡܵܥܹܝܠ ܒܲܪ ܢܬܲܢܝܵܐ ܐܸܫܬܵܘܙܲܒ̣: ܒܲܬ̣ܡܵܢܝܵܐ ܐ̄ܢܵܫ̈ܝܼܢ ܡ̣ܢ ܩܕ݂ܵܡ ܝܘܿܚܲܢܵܢ: ܘܐܸܙܲܠ ܠܘܵܬ̣ ܒܢܲܝ̈ ܥܲܡܘܿܢ.

¹⁶ ܘܲܕ݂ܒܲܪ ܝܘܿܚܲܢܵܢ ܒܲܪ ܩܘܿܪܚ: ܘܟ݂ܠܗܘܿܢ ܪ̈ܲܒܲܝ ܚܲܝ̈ܠܹܐ ܕܥܲܡܹܗ: ܟܠ ܫܲܪܟܵܐ ܕܥܲܡܵܐ ܕܐܲܗܦܸܟ݂ ܡ̣ܢ ܠܘܵܬ̣ ܐܝܼܫܡܵܥܹܝܠ ܒܲܪ ܢܬܲܢܝܵܐ ܡ̣ܢ ܡܲܨܦܝܵܐ: ܡ̣ܢ ܒܵܬܲܪ ܕܲܩܛܲܠ ܐܝܼܫܡܵܥܹܝܠ ܠܲܓ̣ܕܲܠܝܵܐ ܒܲܪ ܐܲܚܝܼܩܲܡ: ܘܲܕ݂ܒܲܪ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ ܘܢܸܫܹ̈ܐ ܘܲܛܠܵܝܹ̈ܐ ܘܲܡܗܲܝܡܢܹ̈ܐ ܕܐܲܗܦܸܟ݂ ܡ̣ܢ ܓܸܒ̣ܥܘܿܢ.

¹⁷ ܘܐܸܙܲܠܘ ܘܝܼܬܸܒ̣ܘ ܒܐܸܕ̇ܪܹ̈ܐ ܕܒܸܡܗܲܡ ܕܥܲܠ ܓܸܢ̄ܒ̣ ܒܹܝܬ̣ ܠܚܸܡ: ܠܡܹܐܙܲܠ ܠܡܸܥܲܠ ܠܡܸܨܪܹܝܢ.

¹⁸ ܡ̣ܢ ܩܕ݂ܵܡ ܟܲܠܕ݂ܵܝܹ̈ܐ ܕܲܕ݂ܚܸܠ̣ܘ ܡܸܢܗܘܿܢ: ܥܲܠ ܕܲܩ̣ܛܲܠ ܐܝܼܫܡܵܥܹܝܠ ܒܲܪ ܢܬܲܢܝܵܐ ܠܲܓܕܲܠܝܵܐ ܒܲܪ ܐܲܚܝܼܩܵܡ: ܗܵܘ̇ ܕܐܲܫ̱ܠܛܹܗ ܡܲܠܟܵܐ ܕܒ̣ܵܒܹܠ ܒܐܲܪܥܵܐ ܕܲܝܗܘܼܕ݂ܵܐ.

42

¹ ܘܲܩ̣ܪܸܒ̣ܘ ܟܠܗܘܿܢ ܪ̈ܲܒܲܝ ܚܲܝ̈ܠܹܐ: ܘܝܘܿܚܲܢܵܢ ܒܲܪ ܩܘܿܪܚ: ܘܝܲܙܲܢܝܵܐ ܒܲܪ ܗܘܿܫܲܥܝܵܐ: ܘܟ݂ܠܹܗ ܥܲܡܵܐ ܡ̣ܢ ܙܥܘܿܪܵܐ ܘܲܥܕܲܡܵܐ ܠܩܲܫܝܼܫܵܐ.

² ܘܐܸܡܲܪܘ ܠܐܹܪܲܡܝܵܐ ܒܵܥܹ̇ܝܢܲܢ ܡܸܢܵܟ݂ ܨܲܠܵܐ ܥܠܲܝܢ ܩܕ݂ܵܡ ܡܵܪܝܵܐ ܐܲܠܵܗܵܟ݂: ܡܸܛܠ ܕܐܸܫܬ̇ܚܲܪܢ ܩܲܠܝܼܠ ܡ̣ܢ ܣܘܿܓ̣ܐܵܐ: ܐܲܝܟ݂ ܕܥܲܝܢܲܝ̈ܟ ܚܵܙ̈ܝܵܢ ܠܲܢ.

³ ܘܲܢܚܵܘܹܝܢ ܡܵܪܝܵܐ ܐܲܠܵܗܲܢ ܐܘܼܪܚܵܐ ܕܢܹܐܙܲܠ ܒܵܗ̇: ܘܦܸܬ̣ܓ̣ܵܡܹ̈ܐ ܕܢܸܥܒܸ̇ܕ݂.

⁴ ܘܐܸܡܲܪ ܠܗܘܿܢ ܐܹܪܲܡܝܵܐ ܢܒ̣ܝܼܵܐ ܫܸܡ̇ܥܹܬ̣: ܗܵܐ ܡܨܲܠܹܐ ܐ̄ܢܵܐ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ: ܐܲܝܟ݂ ܦܸܬ̣ܓ̣ܵܡܟ݂ܘܿܢ: ܘܟ݂ܠ ܦܸܬ̣ܓ̣ܵܡܵܐ ܕܢܸܥܢܹܝܟ݂ܘܿܢ ܡܵܪܝܵܐ ܐܲܠܵܗܟ݂ܘܿܢ ܐܹܚܵܘܹܝܟ݂ܘܿܢ: ܘܠܵܐ ܐܹܛܲܫܹܐ ܡܸܢܟ݂ܘܿܢ ܡܸܠܵܐ.

⁵ ܘܗܸܢܘܿܢ ܐܸܡܲܪܘ ܠܐܹܪܲܡܝܵܐ: ܢܸܗܘܹܐ ܒܲܢ ܡܵܪܝܵܐ ܣܵܗܕܵܐ ܫܲܪܝܼܪܵܐ ܘܲܡܗܲܝܡܢܵܐ: ܐܸܠܵܐ ܐܲܝܟ݂ ܦܸܬ̣ܓ̣ܵܡܵܐ ܕܲܢܫܲܕ̇ܪܵܟ݂ ܡܵܪܝܵܐ ܐܲܠܵܗܵܟ݂ ܠܘܵܬܲܢ ܗܵܟܲܢܵܐ ܢܸܥܒܸ̇ܕ݂.

⁶ ܐܸܢ ܕܛܵܒ̣ ܘܐܸܢ ܕܒ̣ܝܼܫ: ܒܩܵܠܹܗ ܕܡܵܪܝܵܐ ܐܲܠܵܗܲܢ ܢܸܫܡܲܥ: ܕܲܡܫܲܕ̇ܪܝܼܢܲܢ ܠܵܟ݂ ܠܘܵܬܹܗ: ܘܢܸܛܐܲܒ̣ ܠܲܢ ܟܲܕ݂ ܢܸܫܡܲܥ ܒܩܵܠܹܗ ܕܡܵܪܝܵܐ ܐܲܠܵܗܲܢ.

⁷ ܘܡ̣ܢ ܒܵܬܲܪ ܥܸܣܪܵܐ ܝܵܘ̈ܡܝܼܢ: ܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܛ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܫܲܕܲܪܬ̇ܘܿܢܵܢܝ ܠܘܵܬܹܗ ܠܡܲܪܡܵܝܘܼ ܒܵܥܘܼܬ̣ܟ݂ܘܿܢ ܩܕ݂ܵܡܵܘܗܝ.

⁹

¹⁰ ܐܸܢ ܬܸܬ̇ܒ̣ܘܼܢ ܒܐܲܪܥܵܐ ܗܵܕܹܐ: ܐܸܒ̣ܢܹܝܟ݂ܘܿܢ ܘܠܵܐ ܐܸܣܚܘܿܦܟ݂ܘܿܢ: ܘܐܸܨܘܿܒ̣ܟ݂ܘܿܢ ܘܠܵܐ ܐܸܥܩܘܿܪܟ݂ܘܿܢ: ܘܐܸܫܠܸܐ ܡ̣ܢ ܒܝܼܫܬܵܐ ܕܥܸܒ̣ܕܹ̇ܬ̣ ܠܟ݂ܘܿܢ.

¹¹ ܘܠܵܐ ܬܸܕ݂ܚ̄ܠܘܼܢ ܡ̣ܢ ܩܕ݂ܵܡ ܡܲܠܟܵܐ ܕܒ̣ܵܒܹܠ ܕܐܲܢ̄ܬ̇ܘܿܢ ܕܵܚܠܝܼܢ ܡܸܢܹܗ: ܠܵܐ ܬܸܕ݂ܚ̄ܠܘܼܢ ܡܸܢܹܗ ܐܵܡܲܪ ܡܵܪܝܵܐ: ܡܸܛܠ ܕܥܲܡܟ݂ܘܿܢ ܐ̄ܢܵܐ ܐܵܡܲܪ ܡܵܪܝܵܐ: ܠܡܸܦܪܲܩܟ݂ܘܿܢ ܘܠܲܡܦܲܨܵܝܘܼܬ̣ܟ݂ܘܿܢ ܡ̣ܢ ܐܝܼܕ݂ܵܘ̈ܗܝ.

¹² ܘܐܸܬܸ̇ܠ ܥܠܲܝܟ̇ܘܿܢ ܪ̈ܲܚܡܹܐ ܘܐܸܪܚܲܡܟ݂ܘܿܢ: ܘܐܵܘܬܸ̇ܒ̣ܟ݂ܘܿܢ ܒܐܲܪܥ̱ܟ݂ܘܿܢ.

¹³ ܘܐܸܢ ܐܵܡ̇ܪܝܼܬ̇ܘܿܢ ܠܵܐ ܝܵܬ̣ܒ̇ܝܼܢܲܢ ܒܐܲܪܥܵܐ ܗܵܕܹܐ: ܡܸܛܠ ܕܠܵܐ ܬܸܫ̱ܡܥܘܼܢ ܒܩܵܠܹܗ ܕܡܵܪܝܵܐ ܐܲܠܵܗܟ݂ܘܿܢ.

¹⁴ ܘܐܸܡܲܪܬ̇ܘܿܢ ܠܵܐ ܗܵܟܲܢܵܐ: ܠܐܲܪܥܵܐ ܕܡܸܨܪܹܝܢ ܢܸܥܘܿܠ: ܕܠܵܐ ܢܸܚܙܹܐ ܩܪܵܒ̣ܵܐ: ܘܩܵܠܵܐ ܕܫܝܼܦܘܿܪܵܐ ܠܵܐ ܢܸܫܡܲܥ: ܘܲܠܠܲܚܡܵܐ ܠܵܐ ܢܸܟ݂ܦܲܢ: ܘܬܲܡܵܢ ܢܸܬܸ̇ܒ̣.

¹⁵ ܗܵܫܵܐ ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ ܫܲܪܟܵܐ ܕܲܝܗܘܼܕ݂ܵܐ: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܐܸܢ ܐܲܢ̄ܬ̇ܘܿܢ ܬܣܝܼܡܘܼܢ ܐܲܦܲܝ̈ܟܘܿܢ ܠܡܸܥܲܠ ܠܡܸܨܪܹܝܢ: ܘܬܸܥܠܘܼܢ ܠܡܸܥܡܲܪ ܬܲܡܵܢ.

¹⁶ ܗܵܝ̇ ܚܲܪܒܵܐ ܕܕ݂ܵܚܠܝܼܢ ܐ̄ܢܬ̇ܘܿܢ ܡܸܢܵܗ̇: ܬܲܡܵܢ ܬܲܕ݂ܪܸܟ݂ܟ݂ܘܿܢ ܒܐܲܪܥܵܐ ܕܡܸܨܪܹܝܢ: ܘܟܲܦܢܵܐ ܕܐܲܢ̄ܬ̇ܘܿܢ ܕܵܚܠܝܼܢ ܡܸܢܹܗ: ܬܲܡܵܢ ܢܸܪܕ̇ܘܿܦ ܒܵܬܲܪܟ݂ܘܿܢ ܠܡܸܨܪܹܝܢ: ܘܬܲܡܵܢ ܬܡܘܼܬ̣ܘܼܢ.

¹⁷ ܘܢܸܗܘܘܿܢ ܟܠܗܘܿܢ ܓܲܒ̣ܪܹ̈ܐ ܕܣܵܡܘ ܐܲܦܲܝ̈ܗܘܿܢ ܠܡܸܥܲܠ ܠܡܸܨܪܹܝܢ ܠܡܸܥܡܲܪ ܬܲܡܵܢ: ܢܡܘܼܬ̣ܘܼܢ ܒܚܲܪܒܵܐ: ܘܲܒ̣ܟܲܦܢܵܐ: ܘܲܒ̣ܡܵܘܬܵܢܵܐ: ܘܠܵܐ ܢܸܗܘܹܐ ܠܗܘܿܢ ܣܪܝܼܕ݂ܵܐ ܕܡܸܫܬܵܘܙܲܒ̣: ܡ̣ܢ ܩܕ݂ܵܡ ܒܝܼܫܬܵܐ ܕܡܲܝܬܸ̇ܐ ܐ̄ܢܵܐ ܥܠܲܝܗܘܿܢ.

¹⁸ ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܐܲܝܟ݂ ܕܐܸܬ̇ܬ̇ܢܝܼܚ ܪܘܼܓ̣ܙܝܼ ܘܚܸܡܬ̣ܝ ܥܲܠ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܗܵܟܲܢܵܐ ܬܸܬ̇ܢܝܼܚ ܚܸܡܬ̣ܝ ܥܠܲܝܟ̇ܘܿܢ ܡܵܐ ܕܥܲܠܬ̇ܘܿܢ ܠܡܸܨܪܹܝܢ: ܘܬܸܗܘܘܿܢ ܠܡܵܘ̈ܡܵܬ̣ܵܐ: ܘܲܠܬܸܡܗܵܐ ܘܲܠܠܵܘܛܝܼܬ̣ܵܐ: ܘܲܠܚܸܣܕܵܐ: ܘܠܵܐ ܬܸܚܙܘܿܢ ܬܘܼܒ̣ ܐܲܬ̣ܪܵܐ ܗܵܢܵܐ: ܐܵܡܲܪ ܡܵܪܝܵܐ ܥܠܲܝܟ̇ܘܿܢ ܫܲܪܟܵܐ ܕܲܝܗܘܼܕ݂ܵܐ.

¹⁹ ܠܵܐ ܬܸܥܠܘܼܢ ܠܡܸܨܪܹܝܢ: ܘܕܲܥܘ ܕܣܲܗܕܹ̇ܬ̣ ܒܟ݂ܘܿܢ ܝܵܘܡܵܢܵܐ.

²⁰ ܕܐܲܢ̄ܬ̇ܘܿܢ ܐܲܛܥܝܼܬ̇ܘܿܢ ܒܢܲܦ̮ܫܟ݂ܘܿܢ: ܘܫܲܕܲܪܬ̇ܘܿܢܵܢܝ ܠܘܵܬ̣ ܡܵܪܝܵܐ ܐܲܠܵܗܟ݂ܘܿܢ: ܘܐܸܡܲܪܬ̇ܘܿܢ ܨܲܠܵܐ ܥܠܲܝܢ ܩܕ݂ܵܡ ܡܵܪܝܵܐ ܐܲܠܵܗܲܢ: ܘܟ݂ܠܡܸܕܸ̇ܡ ܕܐܵܡܲܪ ܠܵܟ݂ ܡܵܪܝܵܐ ܐܲܠܵܗܲܢ ܚܵܘܵܢ: ܘܢܸܥܒܸ̇ܕ݂.

²¹ ܘܚܵܘܝܼܬ̇ܟ݂ܘܿܢ ܝܵܘܡܵܢܵܐ: ܘܠܵܐ ܫܡܲܥܬ̇ܘܿܢ ܒܩܵܠܹܗ ܕܡܵܪܝܵܐ ܐܲܠܵܗܟ݂ܘܿܢ: ܘܥܲܠ ܟܠ ܕܫܲܕ̇ܪܲܢܝ ܠܘܵܬ̣ܟܘܿܢ ܠܵܐ ܥ̣ܒܲܕ̇ܬ̇ܘܿܢ.

²² ܗܵܫܵܐ ܕܲܥܘ: ܕܲܒ̣ܚܲܪܒܵܐ: ܘܲܒ̣ܟܲܦܢܵܐ: ܘܲܒ̣ܡܵܘܬܵܢܵܐ: ܬܡܘܼܬ̣ܘܿܢ: ܒܐܲܬ̣ܪܵܐ ܕܲܨܒܝܼܬ̇ܘܿܢ ܠܡܸܥܲܠ ܠܹܗ ܠܡܸܥܡܲܪ ܬܲܡܵܢ.

43

¹ ܘܟܲܕ݂ ܫܲܠܸܡ ܐܹܪܲܡܝܵܐ ܠܡܹܐܡܲܪ ܠܟ݂ܠܹܗ ܥܲܡܵܐ: ܟܠܗܘܿܢ ܦܸܬ̣ܓ̣ܵܡܵܘ̈ܗܝ ܕܡܵܪܝܵܐ ܐܲܠܵܗܗܘܿܢ: ܕܫܲܕ̇ܪܹܗ ܡܵܪܝܵܐ ܐܲܠܵܗܟ݂ܘܿܢ ܠܘܵܬ̣ܗܘܿܢ: ܠܡܹܐܡܲܪ ܠܗܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ.

² ܐܸܡܲܪ ܝܲܙܲܢܝܵܐ ܒܲܪ ܗܘܿܫܲܥܝܵܐ: ܘܝܘܿܚܲܢܵܢ ܒܲܪ ܩܘܿܪܚ: ܘܟ݂ܠܗܘܿܢ ܓܲܒ̣ܪܹ̈ܐ ܪ̈ܲܫܝܼܥܹܐ ܐܸܡܲܪܘ ܠܐܹܪܲܡܝܵܐ: ܕܲܓܵܠܵܐܝܼܬ̣ ܐܸܡܪܬ̇: ܠܵܐ ܫܲܕ̇ܪܵܟ݂ ܡܵܪܝܵܐ ܐܲܠܵܗܲܢ ܕܬܹܐܡܲܪ ܠܲܢ: ܕܠܵܐ ܬܸܥܠܘܼܢ ܠܡܸܨܪܹܝܢ ܠܡܸܥܡܲܪ ܬܲܡܵܢ.

³ ܡܸܛܠ ܕܒ̣ܵܪܘܿܟ݂ ܒܲܪ ܢܹܪܝܼܵܐ ܡܓܲܪܸܐ ܠܵܟ݂ ܒܲܢ: ܕܢܲܫ̱ܠܡܲܢ ܒܐܝܼܕ݂ܵܐ ܕܟܲܠܕܵܝܹ̈ܐ: ܕܢܸܩܛܠܘܼܢܵܢ ܘܢܸܫܒ̇ܘܿܢܵܢ ܠܒ̣ܵܒܹܠ.

⁴ ܘܠܵܐ ܫ̣ܡܲܥ ܝܘܿܚܲܢܵܢ ܒܲܪ ܩܘܼܪܚ ܘܟ݂ܠܗܘܿܢ ܪ̈ܲܒܲܝ ܚܲܝ̈ܠܹܐ: ܘܟ݂ܠܹܗ ܥܲܡܵܐ ܒܩܵܠܹܗ ܕܡܵܪܝܵܐ ܐܲܠܵܗܗܘܿܢ: ܕܢܸܬ̇ܒ̣ܘܼܢ ܒܐܲܪܥܵܐ ܕܲܝܗܘܼܕ݂ܵܐ.

⁵ ܘܲܕ݂ܒܲܪ ܝܘܿܚܲܢܵܢ ܒܲܪ ܩܘܿܪܚ ܠܟ݂ܠܗܘܿܢ ܪ̈ܲܒܲܝ ܚܲܝ̈ܠܹܐ: ܘܲܠܟ݂ܠܹܗ ܫܲܪܟܵܐ ܕܐܸܫܬ̇ܚܲܪܘ ܡ̣ܢ ܕܒܹܝܬ̣ ܝܑܼܗ̈ܘܼܕ݂ܵܐ.

⁶ ܠܓܲܒ̣ܪܹ̈ܐ: ܘܲܠܢܸܫܹ̈ܐ: ܘܠܲܛܠܵܝܹ̈ܐ: ܘܲܠܒܹܝܬ̣ ܡܲܠܟܵܐ: ܟܠܗܹܝܢ ܢܲܦ̮ـ̈ـܫܵܬ̣ܵܐ ܕܲܫܒܲܩ ܢܒ̣ܘܼܙܲܪܕܵܢ ܪܲܒ̇ ܕܲܚܫܹ̈ܐ: ܠܘܵܬ̣ ܓܕܲܠܝܵܐ ܒܲܪ ܐܲܚܝܼܩܵܡ: ܒܲܪ ܫܵܦܵܢ: ܠܐܹܪܲܡܝܵܐ ܢܒ̣ܝܼܵܐ: ܘܲܠܒ̣ܵܪܘܿܟ݂ ܒܲܪ ܢܹܪܝܼܵܐ.

⁷ ܘܐܸܬ̣ܵܘ ܠܐܲܪܥܵܐ ܕܡܸܨܪܹܝܢ: ܡܸܛܠ ܕܠܵܐ ܫܡܲܥܘ ܒܩܵܠܹܗ ܕܡܵܪܝܵܐ: ܘܐܸܬ̣ܵܘ ܥܕܲܡܵܐ ܠܬܲܚܦܝܼܣ.

⁸ ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܒܬܲܚܦܝܼܣ ܠܡܹܐܡܲܪ.

⁹ ܣܲܒ̣ ܒܐܝܼܕ݂ܵܟ݂ ܟܹܐܦܹ̈ܐ ܪܵܘܪ̈ܒ̣ܵܬ̣ܵܐ: ܘܲܛܡܘܿܪ ܐܸܢܹܝܢ ܒܲܡܠܵܛܵܐ ܒܡܲܠܒܵܢܵܐ: ܒܬܲܪܥܵܐ ܕܒܹܝܬ̣ ܦܸܪܥܘܿܢ ܒܬܲܚܦܝܼܣ: ܠܥܹܝܢ ܓܲܒ̣ܪܹ̈ܐ ܕܲܝܗܘܼܕ݂ܵܐ.

¹⁰ ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܡܫܲܕܲܪ ܐ̄ܢܵܐ ܘܕ݂ܵܒܲܪ ܐ̄ܢܵܐ ܠܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܥܲܒ̣ܕܲܝ: ܘܢܲܪܡܹܐ ܟܘܼܪܣܝܹܗ ܠܥܸܠ ܡ̣ܢ ܟܹܐܦܹ̈ܐ ܗܵܠܹܝܢ ܕܲܛܡܲܪܬ̇: ܘܢܸܫܩܘܿܠ ܙܲܝܢܹܗ ܥܠܲܝܗܹܝܢ.

¹¹ ܘܢܹܐܬܹܐ ܘܢܸܡܚܹܗ ܠܐܲܪܥܵܐ ܕܡܸܨܪܹܝܢ: ܕܲܠܡܵܘܬܵܐ ܠܡܵܘܬܵܐ: ܘܕܲܠܫܸܒ̣ܝܵܐ ܠܫܸܒ̣ܝܵܐ: ܘܕܲܠܚܲܪܒܵܐ ܠܚܲܪܒܵܐ.

¹² ܘܢܸܫܒ̇ܘܿܩ ܢܘܼܪܵܐ ܒܒ̣ܵـ̈ـܬܹܐ ܕܐܲܠܵܗܹ̈ܐ ܕܡܸܨܪ̈ܵܝܹܐ ܘܢܵܘܩܸܕ݂ ܐܸܢܘܿܢ ܘܢܸܫܒܹ̇ܐ ܐܸܢܘܿܢ: ܘܢܸܬ̣ܥܲܛܦܝܼܗ̇ ܠܐܲܪܥܵܐ: ܐܲܝܟ݂ ܕܡܸܬ̣ܥܲܛܲܦ ܪܵܥܝܵܐ ܠܓ̣ܘܼܠܬܹܗ ܘܢܸܦܘܿܩ ܡ̣ܢ ܬܲܡܵܢ ܒܲܫܠܵܡܵܐ.

¹³ ܘܢܸܬ̣ܒܲܪ ܩܵܝܹܡܬܵܐ ܕܒܹܝܬ̣ ܫܡܸܫ ܕܒܲܐܲܪܥܵܐ ܕܡܸܨܪܹܝܢ: ܘܒ̣ܵـ̈ـܬܹ̇ܐ ܕܐܲܠܵܗܹ̈ܐ ܕܡܸܨܪܵܝܹܐ ܢܵܘܩܸܕ݂ ܒܢܘܼܪܵܐ.

44

¹ ܦܸܬ̣ܓ̣ܵܡܵܐ ܕܲܗܘ̤ܵܐ ܥܲܠ ܐܹܪܲܡܝܵܐ ܡ̣ܢ ܩܕ݂ܵܡ ܡܵܪܝܵܐ: ܕܢܸܬ̣ܢܲܒܸ̇ܐ ܥܲܠ ܟܠܗܘܿܢ ܝܗ̄ܘܼܕ݂ܵܝܹ̈ܐ ܕܝܵܬ̣ܒ̇ܝܼܢ ܒܐܲܪܥܵܐ ܕܡܸܨܪܹܝܢ: ܘܲܕ݂ܝܵܬ̣ܒ̇ܝܼܢ ܒܡܲܓ̣ܕ̇ܘܿܠ ܘܲܒ̣ܬܲܚܦܝܼܣ: ܘܲܒ̣ܡܲܦܲܣ: ܘܒܲܐܪܥܵܐ ܕܦܲܬ̣ܪܘܿܣ.

² ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܐܲܢ̄ܬ̇ܘܿܢ ܚܙܲܝܬ̇ܘܿܢ ܟܠܵܗ̇ ܒܝܼܫܬܵܐ ܕܐܲܝܬܝܼܬ̇ ܥܲܠ ܐܘܿܪܸܫܠܸܡ: ܘܥܲܠ ܟܠܗܹܝܢ ܩܘܼܪ̈ܝܵܐ ܕܲܝܗܘܼܕ݂ܵܐ: ܘܗܸܢܹܝܢ ܚܲܪ̈ܒܵܢ ܝܵܘܡܵܢܵܐ: ܘܠܲܝܬ̇ ܒܗܹܝܢ ܐ̄ܢܵܫ ܕܝܵܬܹܒ̣.

³ ܡܸܛܠ ܟܠܵܗ̇ ܒܝܼܫܬܵܐ ܕܲܥܒܲܕ݂ܘ ܘܐܲܪܓ̇ܙܘܼܢܝ: ܘܐܸܙܲܠ̣ܘ ܣܵܡ̣ܘ ܒܸܣܡܹ̈ܐ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܐܲܝܠܹܝܢ ܕܠܵܐ ܝܼܕܲܥ̣ܘ ܐܸܢܘܿܢ ܗܸܢܘܿܢ ܘܐܲܒ̣ܵܗܲܝ̈ܗܘܿܢ.

⁴ ܘܫܲܕ̇ܪܹܬ̣ ܠܘܵܬ̣ܟ݂ܘܿܢ ܠܟ݂ܠܗܘܿܢ ܥܲܒ̣ܕܲܝ̈ ܢܒ̣ܝܹ̈ܐ: ܩܲܕܡܹܬ̣ ܘܫܲܕ̇ܪܹܬ̣ ܘܐܸܡ̇ܪܹܬ̣: ܠܵܐ ܬܸܥܒ̇ܕ݂ܘܼܢ ܛܲܢܦܘܼܬ̣ܵܐ ܗܵܕܹܐ ܕܲܣܢܹ̇ܝܬ̣.

⁵ ܘܠܵܐ ܫ̣ܡܲܥܘ ܘܠܵܐ ܨܠܵܘ ܐܸܕ݂ܢ̱ܗܘܿܢ ܕܢܸܗ̄ܦܟ݂ܘܿܢ ܡ̣ܢ ܒܝܼ̈ܫܵܬ̣ܗܘܿܢ: ܕܠܵܐ ܢܣܝܼܡܘܼܢ ܒܸܣܡܹ̈ܐ ܠܐܲܠܵܗܹ̈ܐ ܐ̄ܚܪ̈ܵܢܹܐ.

⁶ ܘܐܸܬ̇ܬ̇ܢܝܼܚܘ ܪܘܼܓ̣ܙܝܼ ܘܚܸܡܬ̣ܝ: ܘܐܸܚܕܲܬ̤ ܢܘܼܪܵܐ ܒܩܘܼܪ̈ܝܵܐ ܕܲܝܗܘܼܕ݂ܵܐ: ܘܲܒ̣ܫܘܼܩܹ̈ܝܗ̇ ܕܐܘܿܪܸܫܠܸܡ: ܘܲܗ̤ܘܲܝ̈ ܠܚܘܼܪܒܵܐ ܘܲܠܬܸܡܗܵܐ ܐܲܝܟ݂ ܕܝܵܘܡܵܢܵܐ.

⁷ ܘܗܵܫܵܐ ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܬ ܐܲܠܵܗܵܐ ܕܝܼܣܪܵܝܹܠ: ܠܡܵܢܵܐ ܥܵܒ̣ܕ̇ܝܼܬ̇ܘܿܢ ܒܝܼܫܬܵܐ ܪܲܒ̇ܬ̣ܵܐ ܥܲܠ ܢܲܦ̮̈ܫܵܬ̣ܟ݂ܘܿܢ: ܕܬ̣ܵܘܒ̇ܕ݂ܘܼܢ ܡܸܢܟ݂ܘܿܢ ܓܲܒ̣ܪܹ̈ܐ ܘܢܸܫ̈ܐ: ܘܲܥܠܲܝܡܹ̈ܐ ܘܝܲܠܘܼ̈ܕܹܐ ܡ̣ܢ ܓܵܘ ܝܑܼܗܘܼܕ݂ܵܐ: ܕܠܵܐ ܬܸܫܒ̇ܩܘܼܢ ܠܟ݂ܘܿܢ ܚܲܪܬ̣ܵܐ.

⁸ ܡܸܛܠ ܕܐܲܪܓܸ̇ܙܬ̇ܘܿܢܵܢܝ ܒܲܥܒ̣ܵܕ݂ ܐܝܼܕܲܝ̈ܟ̇ܘܿܢ: ܘܣܵܡ̣ܬ̇ܘܿܢ ܒܸܣܡܹ̈ܐ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܒܐܲܪܥܵܐ ܕܡܸܨܪܹܝܢ ܕܥܲܠܬ̇ܘܿܢ ܠܡܸܥܡܲܪ ܬܲܡܵܢ: ܕܐܵܘܒܸ̇ܕ݂ ܟ݂ܘܿܢ ܘܬܸܗܘܘܿܢ ܠܠܵܘܛܬ̣ܵܐ ܘܲܠܚܸܣܕܵܐ: ܒܟ݂ܠܗܘܿܢ ܥܲܡܡܹ̈ܐ ܕܐܲܪܥܵܐ.

⁹ ܠܡܵܐܛܥܲܝܬ̇ܘܿܢ ܒܝܼܫܬܵܐ ܕܐܲܒ̣ܵܗ̇ܝ̈ܟ̇ܘܿܢ: ܘܒ̣ܝܼܫܬܵܐ ܕܡܲܠ̈ܟܹ̇ܐ ܕܲܝܗܘܼܕ݂ܵܐ: ܘܒ̣ܝܼܫܬܵܐ ܕܢܸܫܲܝ̈ܗܘܿܢ: ܕܲܥܒܲܕ݂ܘ ܒܐܲܪܥܵܐ ܕܲܝܗܘܼܕ݂ܵܐ: ܘܲܒ̣ܫܘܼܩܹ̈ܝܗ̇ ܕܐܘܿܪܸܫܠܸܡ.

¹⁰ ܘܠܵܐ ܐܸܬ̇ܕܲܟ̇ܝܼܘ ܥܕܲܡܵܐ ܠܝܵܘܡܵܢܵܐ: ܘܠܵܐ ܕܚܸܠܘ: ܘܠܵܐ ܦܲܠܚܘܼܢܝ: ܘܠܵܐ ܗܲܠܸܟ݂ܘ ܒܢܵܡܘܿܣܝ ܘܒܲܩܝܵܡܝ ܕܝܸܗ̄ܒܹ̇ܬ̣ ܠܗܘܿܢ ܘܠܲܐܒ̣ܵܗܲܝ̈ܗܘܿܢ.

¹¹ ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܣܵܐܹ̇ܡ ܐ̄ܢܵܐ ܐܲܦܲܝ̈ ܒܟ݂ܘܿܢ ܠܒ̣ܝܼܫܬܵܐ: ܘܲܠܡܵܘܒܵܕ݂ܘ ܠܟ݂ܠܗܘܿܢ ܕܒܹܝܬ̣ ܝܑܼܗܘܼܕ݂ܵܐ.

¹² ܘܐܸܬ̣ܒܲܪ ܫܲܪܟܵܐ ܕܲܝܗܘܼܕ݂ܵܐ: ܕܣܵܡ̣ܘ ܐܲܦܲܝ̈ܗܘܿܢ ܠܡܸܥܲܠ ܠܡܸܨܪܹܝܢ ܠܡܸܥܡܲܪ ܬܲܡܵܢ: ܘܲܢܣܘܼܦܘܼܢ ܟܠܗܘܿܢ ܒܐܲܪܥܵܐ ܕܡܸܨܪܹܝܢ. ܘܲܢܡܘܼܬ̣ܘܼܢ ܒܚܲܪܒܵܐ: ܘܲܒ̣ܟܲܦܢܵܐ: ܘܲܒ̣ܡܵܘܬܵܢܵܐ: ܘܢܸܗܘܘܿܢ ܠܡܵܘ̈ܡܵܬ̣ܵܐ: ܘܲܠܬܸܡܗܵܐ: ܘܲܠܠܵܘܛܬ̣ܵܐ ܘܲܠܚܸܣܕܵܐ.

¹³ ܘܐܸܦܩܘܿܕ݂ ܥܲܠ ܕܝܵܬ̣ܒ̇ܝܼܢ ܒܐܲܪܥܵܐ ܕܡܸܨܪܹܝܢ: ܐܲܝܟ݂ ܕܦܸܩܕܹ̇ܬ̣ ܥܲܠ ܐܘܿܪܸܫܠܸܡ: ܒܚܲܪܒܵܐ: ܘܲܒ̣ܟܲܦܢܵܐ: ܘܲܒ̣ܡܵܘܬܵܢܵܐ.

¹⁴ ܘܠܵܐ ܢܸܗܘܹܐ ܠܗܘܿܢ ܦܲܠܝܼܛܵܐ ܘܲܣܪܝܼܕ݂ܵܐ: ܠܫܲܪܟܵܐ ܕܲܝܗܘܼܕ݂ܵܐ ܕܥܵܐܠܝܼܢ ܠܡܸܥܡܲܪ ܬܲܡܵܢ ܒܐܲܪܥܵܐ ܕܡܸܨܪܹܝܢ: ܘܲܠܡܸܗܦܲܟ݂ ܠܐܲܪܥܵܐ ܕܲܝܗܘܼܕ݂ܵܐ: ܕܗܸܢܘܿܢ ܣܲܒ̣ܪܝܼܢ ܒܢܲܦ̮ܫܗܘܿܢ ܠܡܸܗܦܲܟ݂ ܠܬܲܡܵܢ: ܠܵܐ ܢܸܗܞܦܟ݂ܘܿܢ ܐܸܠܵܐ ܐܸܢ ܙܥܘܿܪܹ̈ܐ.

¹⁵ ܘܲܥܢܵܘ ܘܐܸܡܲܪܘ ܠܐܹܪܲܡܝܵܐ: ܟܠ ܓܲܒ̣ܪܹ̈ܐ ܕܝܵܕ݂ܥܝܼܢ ܗ̄ܘ̣ܵܘ ܕܣܵܝ̈ܡܵܢ ܗ̄ܘܲܝ̈ ܢܸܫܲܝ̈ܗܘܿܢ ܒܸܣܡܹ̈ܐ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܘܟ݂ܠܗܹܝܢ ܢܸܫܹ̈ܐ ܕܩܵܝ̈ܡܵܢ ܟܸܢܫܵܐ ܪܲܒܵܐ: ܘܟ݂ܠܹܗ ܥܲܡܵܐ ܕܝܵܬ̣ܒܝܼܢ ܒܐܲܪܥܵܐ ܕܡܸܨܪܹܝܢ ܘܲܒ̣ܦܲܬ̣ܪܘܿܣ.

¹⁶ ܘܐܸܡܲܪܘ ܠܹܗ: ܦܸܬ̣ܓ̣ܵܡܵܐ ܕܐܸܡܪܹܬ̣ ܠܲܢ ܒܫܸܡ ܡܵܪܝܵܐ: ܠܵܐ ܫܵܡ̇ܥܝܼܢܲܢ ܠܵܟ݂.

¹⁷ ܐܸܠܵܐ ܥܵܒ̣ܕ̇ܝܼܢܲܢ ܟܠ ܦܸܬ̣ܓ̣ܵܡܵܐ ܕܲܢܦܲܩ̣ ܡ̣ܢ ܦܘܼܡܲܢ: ܠܲܡܣܵܡ ܒܸܣܡܹ̈ܐ ܠܦܘܼܠܚܵܢ ܫܡܲܝܵܐ: ܘܠܲܡܢܲܩܵܝܘܼ ܠܵܗ̇ ܢܘܼܩܵܝܹ̈ܐ: ܐܲܝܟ݂ ܕܲܥܒܲܕ݂ܢ ܚܢܲܢ: ܘܐܲܒ̣ܵܗܲܝ̈ܢ: ܘܡܲܠܟ̇ܝܼ̈ܢ: ܘܪܵܘܪ̈ܒ̣ܵܢܲܝܢ: ܒܩܘܼܪ̈ܝܵܐ ܕܲܝܗܘܼܕ݂ܵܐ ܘܲܒ̣ܫܘܼܩܹ̈ܝܗ̇ ܕܐܘܿܪܸܫܠܸܡ ܘܣܵܒ̣ܥܝܼܢ ܗ̄ܘܲܝܢ ܠܲܚܡܵܐ: ܘܛܵܒ̣ ܗ̄ܘ̣ܵܐ ܠܲܢ: ܘܒ̣ܝܼܫܬܵܐ ܠܵܐ ܚܙܲܝܢ.

¹⁸ ܘܗܵܐ ܡ̣ܢ ܕܦܵܫܢ ܡ̣ܢ ܕܠܲܡܣܵܡ ܒܸܣܡܹ̈ܐ ܠܦܘܼܠܚܵܢ ܫܡܲܝܵܐ: ܘܠܲܡܢܲܩܵܝܘܼ ܠܵܗ̇ ܢܘܼܩܵܝܹ̈ܐ: ܚܣܲܪ ܠܲܢ ܟܠ ܡܸܕܸ̇ܡ: ܘܲܒ̣ܚܲܪܒܵܐ ܘܲܒ̣ܟܲܦܢܵܐ ܣܵܦܢ.

¹⁹ ܘܲܥܢܲܝ̈ ܟܠܗܹܝܢ ܢܸܫܹ̈ܐ ܘܐܵܡܪ̈ܵܢ: ܟܲܕ݂ ܚܢܲܢ ܣܵܝ̈ܡܵܢ ܗ̄ܘܲܝܢ ܒܸܣܡܹ̈ܐ ܠܡܲܠܟܲܬ̣ ܫܡܲܝܵܐ: ܘܲܡܢܲܩ̈ܝܵܢ ܗ̄ܘܲܝܢ ܠܵܗ̇ ܢܘܼܩܵܝܹ̈ܐ: ܠܵܐ ܗ̄ܘ̣ܵܐ ܒܸܠܥܵܕ݂ ܡ̣ܢ ܓܲܒ̣ܪ̈ܲܝܢ ܥ̣ܒܲܕ݂ܢ ܠܵܗ̇ ܙܵܘܬ̇ܪܹ̈ܐ: ܘܢܲܩܝܼܢ ܠܵܗ̇ ܢܘܼܩܵܝܹ̈ܐ.

²⁰ ܘܐܸܡܲܪ ܐܹܪܲܡܝܵܐ ܠܟ݂ܠܹܗ ܥܲܡܵܐ ܠܓܲܒ̣ܪܹ̈ܐ ܘܲܠܢܸܫܹ̈ܐ: ܘܲܠܟ݂ܠܹܗ ܥܲܡܵܐ ܕܐܸܡܲܪܘ ܠܹܗ ܡܸܠܹ̈ܐ ܗܵܠܹܝܢ.

²¹ ܗܵܘ̇ ܥܸܛܪܵܐ ܕܒܸܣܡܹ̈ܐ ܕܣܵܡܬ̇ܘܿܢ ܒܩܘܼܪ̈ܝܵܐ ܕܲܝܗܘܼܕ݂ܵܐ ܘܲܒ̣ܫܘܼܩܹ̈ܝܗ̇ ܕܐܘܿܪܸܫܠܸܡ: ܐܲܢ̄ܬ̇ܘܿܢ ܘܐܲܒ̣ܵܗܲܝ̈ܟ̇ܘܿܢ: ܘܡܲܠܟܲܝ̈ܟ̇ܘܿܢ: ܘܪܵܘܪ̈ܒ̣ܵܢܲܝܟ̇ܘܿܢ: ܘܥܲܡܵܐ ܕܐܲܪܥܵܐ: ܠܹܗ̤ܘ ܐܸܬ̇ܕ̇ܟܲܪ ܡܵܪܝܵܐ ܘܲܣܠܸܩ ܥܲܠ ܠܸܒܹ̇ܗ.

²² ܘܠܵܐ ܡܸܫܟܲܚ ܬܘܼܒ̣ ܡܵܪܝܵܐ ܠܡܸܫܒܲܩ ܠܟ݂ܘܿܢ: ܡܸܛܠ ܒܝܼܫܘܼܬ̣ܵܐ ܕܲܥܒ̣ܵܕܲܝ̈ܟ̇ܘܿܢ ܘܡܸܛܠ ܛܲܢܦܘܼܬ̣ܵܐ ܕܲܥܒܲܕ̇ܬ̇ܘܿܢ: ܘܲܗܘ̤ܵܬ̣ ܐܲܪ̱ܥܟ݂ܘܿܢ ܠܬܸܡܗܵܐ: ܘܲܠܠܵܘܛܬ̣ܵܐ: ܘܲܠܚܘܼܪܒܵܐ ܡ̣ܢ ܒܠܲܝ ܕܝܵܬܹ̇ܒ̣ ܐܲܝܟ݂ ܕܝܵܘܡܵܢܵܐ.

²³ ܥܲܠ ܕܣܵܡܬ̇ܘܿܢ ܒܸܣܡܹ̈ܐ ܘܲܚܛܲܝܬ̇ܘܿܢ ܠܡܵܪܝܵܐ: ܘܠܵܐ ܫܡܲܥܬ̇ܘܿܢ ܒܩܵܠܹܗ ܕܡܵܪܝܵܐ: ܘܲܒ̣ܢܵܡܘܿܣܹܗ ܘܒܲܩܝܵܡܹܗ ܘܲܒ̣ܣܵܗ̈ܕ̇ܘܵܬܹܗ ܠܵܐ ܗܲܠܸܟ݂ܬ̇ܘܿܢ: ܡܸܛܠ ܗܵܢܵܐ ܐܲܕܪ̱ܟܲܬ̣ܟ݂ܘܿܢ ܒܝܼܫܬܵܐ ܗܵܕܹܐ ܐܲܝܟ݂ ܕܝܵܘܡܵܢܵܐ.

²⁴ ܘܐܸܡܲܪ ܐܹܪܲܡܝܵܐ ܠܟ݂ܠܹܗ ܥܲܡܵܐ ܠܓܲܒ̣ܪܹ̈ܐ ܘܲܠܢܸܫܹ̈ܐ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ ܟܠܹܗ ܝܑܼܗܘܼܕ݂ܵܐ ܕܒܲܐܪܥܵܐ ܕܡܸܨܪܹܝܢ.

²⁵ ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܐܲܢ̄ܬ̇ܘܿܢ ܘܢܸܫܲܝ̈ܟ̇ܘܿܢ ܐܸܡܲܪܬ̇ܘܿܢ ܒܦܘܼܡܟ݂ܘܿܢ ܘܒ̣ܐܝܼ̈ܕܲܝܟ̇ܘܿܢ: ܫܲܡܠܝܼܬ̇ܘܿܢ: ܘܐܸܡܲܪܬ̇ܘܿܢ ܢܲܫܲܪ ܢܸܕ݂ܪ̈ܲܝܢ ܕܲܢܕܲܪܢ ܠܲܡܣܵܡ ܒܸܣܡܹ̈ܐ ܠܦܘܼܠܚܵܢ ܫܡܲܝܵܐ: ܘܠܲܩܢܲܩܵܝܘܼ ܠܵܗ̇ ܢܘܼܩܵܝܹ̈ܐ: ܐܲܫܲܪܬ̇ܘܿܢ ܡܵܘ̈ܡܵܬ̣ܟ݂ܘܿܢ: ܘܲܥܒܲܕ̇ܬ̇ܘܿܢ ܢܸܕܪ̈ܲܝܟ̇ܘܿܢ.

²⁶ ܡܸܛܠ ܗܵܢܵܐ ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ: ܟܠܹܗ ܝܑܼܗܘܼܕ݂ܵܐ ܕܝܵܬ̣ܒ̇ܝܼܢ ܒܐܲܪܥܵܐ ܕܡܸܨܪܹܝܢ: ܗܵܐ ܐܸܢܵܐ ܝܼܡܝܼܬ̣ ܒܫܹܡܝ ܪܲܒܵܐ ܐܵܡܲܪ ܡܵܪܝܵܐ: ܕܠܵܐ ܢܸܗܘܹܐ ܬܘܼܒ̣ ܫܹܡܝ ܒܦܘܼܡܗܘܿܢ ܕܒܹܝܬ̣ ܝܑܼܗܘܼܕ݂ܵܐ ܕܲܒ̣ܟ݂ܠܵܗ̇ ܐܲܪܥܵܐ ܕܡܸܨܪܹܝܢ: ܘܠܵܐ ܢܹܐܡܪܘܿܢ ܚܲܝ ܗ̄ܘ̣ ܡܵܪܝܵܐ ܐܲܠܵܗܵܐ.

²⁷ ܐܸܢܵܐ ܓܹܝܪ ܡܣܲܪܗܸܒ̣ ܐ̄ܢܵܐ ܥܠܲܝܗܘܿܢ ܒܝܼܫܬܵܐ ܐܵܡܲܪ ܡܵܪܝܵܐ: ܘܲܢܣܘܼܦܘܼܢ ܟܠܗܘܿܢ ܓܲܒ̣ܪܹ̈ܐ ܕܲܝܗܘܼܕ݂ܵܐ ܕܒܲܐܪܥܵܐ ܕܡܸܨܪܹܝܢ: ܒܚܲܪܒܵܐ: ܘܲܒ̣ܟܲܦܢܵܐ: ܘܲܒ̣ܡܵܘܬܵܢܵܐ: ܥܕܲܡܵܐ ܕܐܓܲܡܲܪ ܐܸܢܘܿܢ.

²⁸ ܘܦܲܠܝܼܛܲܝ̈ ܚܲܪܒܵܐ ܢܸܗ̄ܦܟ݂ܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܠܐܲܪܥܵܐ ܕܲܝܗܘܼܕ݂ܵܐ ܩܲܠܝܼܠ ܒܡܸܢܝܵܢܵܐ: ܘܢܸܕ̇ܥܘܼܢ ܟܠܹܗ ܫܲܪܟܵܐ ܕܲܝܗܘܼܕ݂ܵܐ ܕܐܸܙܲܠ̣ܘ ܠܡܸܥܡܲܪ ܒܐܲܪܥܵܐ ܕܡܸܨܪܹܝܢ: ܦܸܬ̣ܓ̣ܵܡܵܐ ܕܡܲܢ ܢܸܫܲܪ: ܕܝܼܠܝ ܐܵܘ ܕܝܼܠܗܘܿܢ.

²⁹ ܘܗܵܕܹܐ ܠܟ݂ܘܿܢ ܐܵܬ̤ܵܐ ܐܵܡܲܪ ܡܵܪܝܵܐ: ܕܦܵܩܹ̇ܕ݂ ܐ̄ܢܵܐ ܥܠܲܝܟ̇ܘܿܢ ܒܐܲܬ̣ܪܵܐ ܗܵܢܵܐ: ܕܬܸܕ̇ܥܘܼܢ ܕܫܵܪ̈ܵܢ ܡܸܠܲܝ̈ ܥܠܲܝܟ̇ܘܿܢ ܠܒ̣ܝܼܫܬܵܐ.

³⁰ ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܡܲܫܠܸܡ ܐ̄ܢܵܐ ܠܹܗ ܠܦܸܪܥܘܿܢ ܚܓ̣ܝܼܪܵܐ ܡܲܠܟܵܐ ܕܡܸܨܪܹܝܢ: ܒܐܝܼܕ݂ܵܐ ܕܲܒ̣ܥܸܠܕ̇ܒ̣ܵܒ̣ܵܘ̈ܗܝ: ܘܒ̣ܐܝܼܕ݂ܵܐ ܕܐܲܝܠܹܝܢ ܕܒ̣ܵܥܹ̇ܝܢ ܢܲܦ̮ܫܹܗ: ܐܲܝܟ݂ ܕܐܲܫ̱ܠܡܹ̇ܬ̣ ܠܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܒܐܝܼܕ݂ܵܐ ܕܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܒܥܸܠܕ̇ܒ̣ܵܒܹܗ ܘܒ̣ܵܥܹ̇ܐ ܢܲܦ̮ܫܹܗ.

45

¹ ܦܸܬ̣ܓ̣ܵܡܵܐ ܕܐܸܡܲܪ ܐܹܪܲܡܝܵܐ ܠܒ̣ܵܪܘܿܟ݂ ܒܲܪ ܢܹܪܝܼܵܐ: ܟܲܕ݂ ܟܬܲܒ̣ ܦܸܬ̣ܓ̣ܵܡܹ̈ܐ ܗܵܠܹܝܢ ܥܲܠ ܣܸܦܪܵܐ ܡ̣ܢ ܦܘܼܡܹܗ ܕܐܹܪܲܡܝܵܐ: ܒܫܲܢ̄ܬܵܐ ܪܒ̣ܝܼܥܵܝܬܵܐ ܕܝܘܿܝܵܩܝܼܡ ܒܲܪ ܝܘܿܫܝܼܵܐ ܡܲܠܟܵܐ ܕܲܝܗܘܼܕ݂ܵܐ ܠܡܹܐܡܲܪ.

² ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܥܠܲܝܟ ܒܵܪܘܿܟ݂.

³ ܐܸܡܲܪܬ̇ ܘܵܝ ܕܐܵܘܣܸܦ ܡܵܪܝܵܐ ܕܵܘܘܿܢܵܐ ܥܲܠ ܟܹܐܒ̣ܝ: ܠܐܝܼܬ̣ ܒܬܸܢ̈ܚܵܬ̣ܝ ܘܲܢܝܵܚܵܐ ܠܵܐ ܐܸܫܟܹ̇ܝܬ̣.

⁴ ܗܵܟܲܢܵܐ ܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܡܸܕܸ̇ܡ ܕܲܒ̣ܢܲܝܬܚ: ܐܸܢܵܐ ܣܵܚܹ̇ܦ ܘܡܸܕܸ̇ܡ ܕܲܢܨܲܒ̣ܬ̇: ܐܸܢܵܐ ܥܵܩܲܪ. ܘܲܠܟ݂ܠܵܗ̇ ܐܲܪܥܵܐ ܡܲܚܪܸܒ̣ ܐ̄ܢܵܐ.

⁵ ܘܐܲܢ̄ܬ̇ ܕܹܝܢ ܕܲܒ̣ܥܲܝܬ̇ ܠܵܟ݂ ܪܵܘܪ̈ܒ̣ܵܬ̣ܵܐ: ܠܵܐ ܬܸܒ̣ܥܸܐ ܕܲܡܝܲܬ̇ܪ̈ܵܢ ܡܸܢܵܟ݂: ܡܸܛܠ ܕܗܵܐ ܡܲܝܬܹ̇ܐ ܐ̄ܢܵܐ ܒܝܼܫܬܵܐ ܥܲܠ ܟܠ ܒܣܲܪ ܐܵܡܲܪ ܡܵܪܝܵܐ: ܘܐܸܬܸ̇ܠ ܠܵܟ݂ ܕܲܬ̣ܫܵܘܙܒ̣ ܢܲܦ̮ܫܵܟ݂: ܒܟ݂ܠܗܘܿܢ ܐܲܬ̣ܪ̈ܵܘܵܬ̣ܵܐ ܕܬܹܐܙܲܠ ܠܬܲܡܵܢ.

46

¹ ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܢܒ̣ܝܼܵܐ: ܕܢܸܬ̣ܢܲܒܸ̇ܐ ܥܲܠ ܥܲܡܡܹ̈ܐ.

² ܘܥܲܠ ܡܸܨܪ̈ܵܝܹܐ: ܘܥܲܠ ܚܲܝܠܹܗ ܕܦܸܪܥܘܿܢ ܚܓ̣ܝܼܪܵܐ ܡܲܠܟܵܐ ܕܡܸܨܪܹܝܢ: ܕܫܪܸܐ ܗ̄ܘ̣ܵܐ ܥܲܠ ܢܲܗܪܵܐ ܦܪܵܬ̣ ܒܟܲܪܟ̇ܡܘܼܫ: ܕܲܩܛܲܥ̣ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܒܫܲܢ̄ܬܵܐ ܪܒ̣ܝܼܥܵܝܬܵܐ ܕܝܘܿܝܵܩܝܼܡ ܒܲܪ ܝܘܿܫܝܼܵܐ ܡܲܠܟܵܐ ܕܲܝܗܘܼܕ݂ܵܐ ܠܡܹܐܡܲܪ.

³ ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܫܩܘܿܠܘ ܙܲܝܢܵܐ ܘܣܲܟ̇ܪܹ̈ܐ: ܘܲܩܪܘܿܒ̣ܘ ܠܲܩܪܵܒ̣ܵܐ.

⁴ ܦܲܓ̣ܕ݂ܘ ܪ̈ܲܟ݂ܫܵܐ: ܐܲܪܟܸ̇ܒ̣ܘ ܦܲܪ̈ܵܫܹܐ: ܣܝܼܡܘ ܣܲܢ̱ܘܪ̈ܵܬ̣ܵܐ: ܡܪܘܿܩܘ ܪ̈ܘܼܡܚܹܐ: ܠܒܲܫܘ ܫܸܪ̈ܝܵܢܹܐ.

⁵ ܡܸܛܠ ܕܲܚܙܹ̇ܝܬ̇ ܕܗܸܢܘܿܢ ܡܸܬ̇ܬܲܒ̣ܪܝܼܢ ܘܗܵܦܟ̇ܝܼܢ ܠܒܸܣܬܲܪܗܘܿܢ: ܘܓܲܢ̄ܒܵܪ̈ܲܝܗܘܿܢ ܐܸܬ̣ܡܲܚܝܼܘ ܘܲܥܪܲܩ̣ܘ: ܘܠܵܐ ܐܸܬ̣ܦ̄ܢܝܼܘ: ܡܸܛܠ ܕܲܟ݂ܪܝܼܟ݂ܝܼܢ ܗ̄ܘ̣ܵܘ ܠܗܘܿܢ ܡ̣ܢ ܚܕ݂ܵܪܲܝܗܘܿܢ: ܐܵܡܲܪ ܡܵܪܝܵܐ.

⁶ ܠܵܐ ܢܸܥܪܘܿܩ ܐܲܝܢܵܐ ܕܩܲܠܝܼܠ: ܘܠܵܐ ܢܸܬ̣ܦܲܠܲܛ ܐܲܝܢܵܐ ܕܓܲܢ̄ܒܵܪ ܒܓܲܢ̄ܒܵܪܹ̈ܐ: ܥܲܠ ܝܲܕ݂ ܢܲܗܪܵܐ ܦܪܵܬ̣ ܐܸܬ̇ܬ̇ܩܸܠܘ ܘܲܢܦܲܠܘ ܟܠܗܘܿܢ.

⁷ ܡܲܢܘܼ ܗܵܢܵܐ ܕܐܲܝܟ݂ ܢܲܗܪܵܐ ܣܵܠܹ̇ܩ: ܘܐܲܝܟ݂ ܢܲܗܪ̈ܵܘܵܬ̣ܵܐ ܡܸܬ̣ܪܲܓ̣ܫܝܼܢ ܡܵܘ̈ܗܝ.

⁸ ܡܲܠܟܵܐ ܕܡܸܨܪܹܝܢ ܐܲܝܟ݂ ܢܲܗܪܵܐ ܣܵܠܹ̇ܩ: ܘܐܲܝܟ݂ ܢܲܗܪ̈ܵܘܵܬ̣ܵܐ ܡܸܬ̣ܪܲܓ̣ܫܝܼܢ ܡܵܘ̈ܗܝ: ܘܐܵܡܲܪ ܐܹܣܲܩ ܘܐܹܟܲܣܸܐ ܠܐܲܪܥܵܐ: ܘܐܵܘܒܸ̇ܕ݂ ܩܪܝܼܬ̣ܵܐ ܘܥܵܡܘܿܪܹ̈ܝܗ̇.

⁹ ܪܟܲܒ̣ܘ ܪ̈ܲܟ݂ܫܵܐ: ܐܸܫܬܲܒܲܚܘ ܒܡܲܪ̈ܟ̇ܒ̣ܵܬ̣ܵܐ: ܢܸܦܩܘܼܢ ܓܲܒ̣ܪܹ̈ܐ ܟܘܼ̈ܫܵܝܹܐ ܘܦܘܼܛܝܹ̈ܐ ܐܲܚܝܼܕܲܝ̈ ܣܲܟ̇ܪܹ̈ܐ: ܘܠܘܼ̈ܕܵܝܹܐ ܕܝܵܕ݂ܥܝܼܢ ܠܡܸܫܕܵܐ ܒܩܸܫܬܵܐ.

¹⁰ ܘܢܸܗܘܹܐ ܝܵܘܡܵܐ ܗܵܘ̇ ܠܡܵܪܝܵܐ ܚܲܝܠܬ̣ܵܢܵܐ: ܝܵܘܡܵܐ ܕܦܘܼܪܥܵܢܵܐ ܕܦܵܪܲܥ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ: ܘܬܹܐܟ݂ܘܿܠ ܚܲܪܒܵܐ ܘܬܸܣܒܲܥ: ܘܬܸܪܘܸܐ ܡ̣ܢ ܕܸܡܗܘܿܢ: ܡܸܛܠ ܕܚܲܪܒܵܐ ܢܸܥܒܸ̇ܕ݂ ܡܵܪܝܵܐ ܚܲܝܠܬ̣ܵܢܵܐ ܒܐܲܪܥܵܐ ܕܓܲܪܒܝܵܐ ܥܲܠ ܢܲܗܪܵܐ ܦܪܵܬ̣.

¹¹ ܣܲܩܝ ܠܓܸܠܥܵܕ݂ ܘܣܲܒ̣ܝ ܪ̈ܗܸܛܢܹܐ ܒܬ̣ܘܼܠܬܵܐ ܒܲܪܬ̣ ܡܸܨܪܹܝܢ: ܐܝܼܩܹܐ ܐܲܣܓ̇ܝܼܬ̇ܝ ܐܵܣܝܘܼܬ̣ܵܐ: ܘܥܘܼܕ݂ܪܵܢܵܐ ܠܵܐ ܗܘ̤ܵܐ ܠܹܟ݂ܝ.

¹² ܫܡܲܥܘ ܥܲܡܡܹ̈ܐ ܨܲܥܪܹܟ݂ܝ: ܘܝܼܠܠܬܹ̇ܟ݂ܝ ܐܸܬ̣ܡܲܠܝܲܬ̣ ܐܲܪܥܵܐ: ܡܸܛܠ ܕܓܲܒ̣ܪܵܐ ܒܓܲܒ̣ܪܵܐ ܐܸܬ̇ܛܪܝܼܘ: ܘܲܬ̣ܪ̈ܲܝܗܘܿܢ ܒܚܲܪܒܵܐ ܢܦܲܠܘ.

¹³ ܦܸܬ̣ܓ̣ܵܡܵܐ ܕܐܸܡܲܪ ܡܵܪܝܵܐ ܠܐܹܪܲܡܝܵܐ ܢܒ̣ܝܼܵܐ: ܕܢܹܐܬܹܐ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܘܢܲܚ̱ܪܒ̣ܝܼܗ̇ ܠܐܲܪܥܵܐ ܕܡܸܨܪܹܝܢ.

¹⁴ ܚܵܘܵܘ ܒܡܸܨܪܹܝܢ ܘܐܲܫܡܲܥܘ ܒܡܲܓ̣ܕ̇ܘܿܠ: ܘܐܲܫܡܲܥܘ ܒܡܲܦܲܣ: ܘܲܒ̣ܬܲܚܦܝܼܣ ܐܸܡܲܪܘ: ܐܸܬ̇ܛܲܝܲܒ̣ܘ ܘܐܸܬ̇ܬܲܩܲܢܘ: ܡܸܛܠ ܕܐܸܟ݂ܠܲܬ̤ ܚܲܪܒܵܐ ܚܕ݂ܵܪ̈ܲܝܟ̇ܝ.

¹⁵ ܡܸܛܠ ܡܵܢܵܐ ܐܸܣܬ̇ܚܸܦܘ ܥܲܫ̈ܝܼܢܲܝܟ̇ܝ ܘܲܢܦܲܠܘ ܘܠܵܐ ܩܵܡܘ: ܡܸܛܠ ܕܡܵܪܝܵܐ ܣܚܲܦ ܐܸܢܘܿܢ.

¹⁶ ܣܘܿܓ̣ܐܗܘܿܢ ܐܸܣܬ̇ܚܸܦܘ: ܐܵܦ ܢܦܲܠܘ ܓܲܒ̣ܪܵܐ ܥܲܠ ܚܲܒ̣ܪܹܗ ܘܐܸܡܲܪܘ: ܩܘܼܡܘ ܢܸܗܦܘܿܟ݂ ܠܥܲܡܲܢ ܘܠܲܐܪܥܵܐ ܕܐܸܬ̣̱ܝܼܠܸܕ݂ܢ ܒܵܗ̇: ܡ̣ܢ ܩܕ݂ܵܡ ܚܲܪܒܵܐ ܕܡܲܕ݂ܘ̱ܝܵܐ.

¹⁷ ܘܲܩܪܵܘ ܬܲܡܵܢ ܫܡܹܗ ܕܦܸܪܥܘܿܢ ܚܓ̣ܝܼܪܵܐ ܡܲܠܟܵܐ ܕܡܸܨܪܹܝܢ: ܕܵܠܘܿܚܵܐ ܘܡܲܥܒܲܪ ܙܲܒ̣ܢܹ̈ܐ.

¹⁸ ܚܲܝ ܐ̄ܢܵܐ ܐܵܡܲܪ ܡܵܪܝܵܐ ܡܲܠܟܵܐ ܨܒ̣ܐܘܼܬ̣ ܫܡܹܗ: ܐܸܠܵܐ ܢܸܦܸܠ ܦܸܪܥܘܿܢ ܐܲܝܟ݂ ܬܒ̣ܵܪܵܐ ܕܛܘܼܪܵܐ: ܘܐܲܝܟ݂ ܟܲܪܡ̄ܠܵܐ ܒܓ̣ܵܘ ܝܲܡܵܐ.

¹⁹ ܡܵܐܢܹ̈ܐ ܕܲܫܒ̣ܝܼܬ̣ܵܐ ܥܒܸܕ݂ܝ ܠܹܟ݂ܝ ܒܬ̣ܘܼܠܬܵܐ ܒܲܪܬ̣ ܡܸܨܪܹܝܢ: ܡܸܛܠ ܕܡܲܦܲܣ ܬܸܗܘܹܐ ܠܚܘܼܪܒܵܐ: ܘܬܸܨܕܹ̇ܐ ܡ̣ܢ ܒܠܲܝ ܕܝܵܬܹ̇ܒ̣.

²⁰ ܡܸܨܪܹܝܢ ܥܓܸܠܬܵܐ ܫܲܦܝܼܪܬܵܐ ܡܨܲܝܲܪܬܵܐ: ܚܲܝܠܵܐ ܡ̣ܢ ܓܲܪܒ̇ܝܵܐ ܐܸܬ̣ܵܐ ܥܠܹܝܗ̇.

²¹ ܐܲܓ̣ܝܼܪܹ̈ܝܗ̇ ܒܓ̣ܵܘܵܗ̇ ܐܲܝܟ݂ ܥܸܓ̣̈ܠܹܐ ܕܦܸܛܡܵܐ: ܘܐܵܦ ܗܸܢܘܿܢ ܐܸܬ̣ܦ̄ܢܝܼܘ: ܘܲܥܪܲܩ̣ܘ ܐܲܟ݂ܚ̄ܕ݂ܵܐ ܘܠܵܐ ܩܵܡ̣ܘ: ܡܸܛܠ ܕܝܵܘܡܵܐ ܕܲܬ̣ܒ̣ܵܪܗܘܿܢ ܐܸܬ̣ܵܐ ܥܠܲܝܗܘܿܢ ܙܲܒ̣ܢܵܐ ܕܦܘܼܩܕܵܢܗܘܿܢ.

²² ܩܵܠܹܗ ܕܚܲܝܠܵܐ ܕܐܲܝܟ݂ ܚܸܘܝܵܐ ܕܪܵܫܹ̇ܦ: ܡܸܛܠ ܕܥܲܠ ܚܲܝܠܵܐ ܢܹܐܙܠ̄ܘܼܢ: ܘܲܒ̣ܟ݂ܘܼܠ̈ܒܹܐ ܢܹܐܬ̣ܘܿܢ ܥܠܹܝܗ̇ ܐܲܝܟ݂ ܦܵܣܩܲܝ̈ ܩܲܝ̈ܣܹܐ.

²³ ܦܣܘܿܩܘ ܥܵܒܹܝ̈ܗ̇ ܐܵܡܲܪ ܡܵܪܝܵܐ: ܡܸܛܠ ܕܣܵܟ݂ܵܐ ܠܲܝܬ̇ ܠܗܘܿܢ: ܡܸܛܠ ܕܣܲܓ̇ܝܼܐܝܼܢ ܡ̣ܢ ܩܲܡܨܵܐ ܘܠܲܝܬ̇ ܠܗܘܿܢ ܡܸܢܝܵܢ.

²⁴ ܒܸܗܬܲܬ̤ ܒܲܪܬ̣ ܡܸܨܪܹܝܢ: ܘܐܸܫܬܲܠܡܲܬ̤ ܒܝܲܕ݂ ܥܲܡܵܐ ܕܓܲܪܒ̇ܝܵܐ.

²⁵ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܐܸܢܵܐ ܦܵܩܹ̇ܕ݂ ܐ̄ܢܵܐ ܥܲܠ ܐܲܡܘܿܢ ܕܡܲـ̈ـܝܵܐ: ܘܥܲܠ ܦܸܪܥܘܿܢ: ܘܥܲܠ ܡܸܨܪܹܝܢ: ܘܥܲܠ ܐܲܠܵܗܹܝ̈ܗ̇: ܘܥܲܠ ܚܲܝܠܵܗ̇: ܘܥܲܠ ܡܲܠܟ̇ܝ̈ܗ̇: ܘܥܲܠ ܦܸܪܥܘܿܢ ܘܥܲܠ ܟܠ ܕܲܬ̣ܟ݂ܝܼܠܝܼܢ ܥܠܵܘܗܝ.

²⁶ ܘܐܲܫܠܸܡ ܐܸܢܘܿܢ ܒܐܝܼܕ݂ܵܐ ܕܲܒ̣ܥܸܠܕ̇ܒ̣ܵܒܲܝ̈ܗܘܿܢ: ܘܒ̣ܐܝܼܕ݂ܵܐ ܕܐܲܝܠܹܝܢ ܕܒ̣ܵܥܹܝܢ ܢܲܦ̮ܫܗܘܿܢ: ܘܒ̣ܐܝܼܕ݂ܵܐ ܕܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܘܒ̣ܐܝܼܕ݂ܵܐ ܕܥܵܒ̣ܕܵܘ̈ܗܝ: ܘܒ̣ܵܬܲܪܟܸ̇ܢ ܬܸܫܪܸܐ ܐܲܝܟ݂ ܝܵܘ̈ܡܵܬ̣ܵܐ ܕܡ̣ܢ ܩܕ݂ܝܼܡ: ܐܵܡܲܪ ܡܵܪܝܵܐ.

²⁷ ܘܐܲܢ̄ܬ̇ ܠܵܐ ܬܸܕ݂ܚܲܠ ܥܲܒ̣ܕܲܝ ܝܲܥܩܘܿܒ̣ ܐܵܡܲܪ ܡܵܪܝܵܐ: ܘܠܵܐ ܬܸܬ̇ܒܲܪ ܝܼܣܪܵܝܹܠ: ܕܗܵܐ ܦܵܪܹܩ ܐ̄ܢܵܐ ܠܵܟ݂ ܡ̣ܢ ܪܘܼܚܩܵܐ: ܘܲܠܙܲܪܥܵܟ݂ ܡ̣ܢ ܐܲܪܥܵܐ ܕܲܫܒ̣ܝܼܬ̣ܗܘܿܢ: ܘܢܸܬܸ̇ܒ̣ ܝܲܥܩܘܿܒ̣ ܘܢܸܫܠܸܐ: ܘܢܸܫܟܲܬ̣ ܘܢܸܬ̇ܬ̇ܢܝܼܚ ܡܲܢ ܕܡܲܗܲܪ ܠܹܗ.

²⁸ ܘܐܲܢ̄ܬ̇ ܠܵܐ ܬܸܕ݂ܚܲܠ ܥܲܒ̣ܕܲܝ ܝܲܥܩܘܿܒ̣ ܐܵܡܲܪ ܡܵܪܝܵܐ: ܡܸܛܠ ܕܥܲܡܵܟ݂ ܐ̄ܢܵܐ: ܡܸܛܠ ܕܐܸܥܒܸ̇ܕ݂ ܣܵܘܦܵܢܵܐ ܒܟ݂ܠܗܘܿܢ ܥܲܡܡܹ̈ܐ ܕܒܲܕܲܪܬܵܟ݂ ܬܲܡܵܢ: ܘܠܵܟ݂ ܠܵܐ ܐܲܣܝܼܦ: ܘܐܸܪܕܸ̇ܝܟ݂ ܒܕ݂ܝܼܢܵܐ: ܘܲܡܙܲܟܵܝܘܼ ܠܵܐ ܐܹܙܲܟܹ̇ܝܟ݂.

47

¹ ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܪܲܡܝܵܐ ܢܒ̣ܝܼܵܐ: ܕܢܸܬ̣ܢܲܒܸ̇ܐ ܥܲܠ ܦܠܸܫ̈ܬܵܝܹܐ: ܥܲܕ݂ܠܵܐ ܢܸܡܚܹܐ ܦܸܪܥܘܿܢ ܠܥܵܐܙܵܐ.

² ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܡܲܝܬܸ̇ܐ ܐ̄ܢܵܐ ܥܠܲܝܡܹ̈ܐ ܡ̣ܢ ܓܲܪܒ̇ܝܵܐ: ܘܢܸܗܘܘܿܢ ܐܲܝܟ݂ ܢܲܚܠܵܐ ܕܓ̣ܵܪܹܦ: ܘܢܸܓ̣ܪ̱ܦܘܼܢ ܐܲܪܥܵܐ ܘܲܡܠܹܐܵܗ̇: ܩܪܝܼܬ̣ܵܐ ܘܥܵܡܘܿܪܹ̈ܝܗ̇: ܘܲܢܒܲܓܢܘܿܢ ܒܢܲܝ̈ܢܵܫܵܐ: ܘܢܲܝܠܠܘܼܢ ܟܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ.

³ ܡ̣ܢ ܩܵܠܵܐ ܕܲܗܠܲܟ݂ܬܵܐ ܕܦܲܪ̈ܣܵܬ̣ܵܐ ܕܓܲܢ̄ܒܵܪ̈ܵܘܗܝ: ܘܡ̣ܢ ܙܵܘܥܵܐ ܕܡܲܪ̈ܟ̇ܒ̣ܵܬܹܗ: ܘܡ̣ܢ ܩܵܠܵܐ ܕܓ̣ܝܼܓ̣ܠܵܘ̈ܗܝ: ܠܵܐ ܐܸܬ̣ܦ̄ܢܝܼܘ ܐܲܒ̣ܵܗܹ̈ܐ ܥܲܠ ܒ̈ܢܲܝܵܐ: ܡܸܛܠ ܕܐܹܬ̣ܪܲܦܝܼ ܐܝܼܕܲܝ̈ܗܘܿܢ.

⁴ ܗܵܐ ܝܵܘܡܵܐ ܐܸܬ̣ܵܐ ܠܡܸܒܲܙ ܠܟ݂ܠܗܘܿܢ ܦܠܸܫܬܵܝܹ̈ܐ: ܘܲܠܡܵܘܒܵܕܘ ܠܨܘܿܪ ܘܲܠܨܲܝܕܵܢ: ܘܲܠܟ݂ܠ ܕܐܸܫܬ̇ܚܲܪ ܠܲܡܥܲܕܵܪܘܼ: ܡܸܛܠ ܕܚܵܪܹܒ̣ ܡܵܪܝܵܐ ܠܲܦܠܸܫܬܵܝܹ̈ܐ: ܠܫܲܪܟܵܐ ܕܓܲܙܪ̈ܵܬ̣ܵܐ ܕܩܵܦܘܿܕ̇ܩܵܝܹ̈ܐ.

⁵ ܡܛܵܬ̤ ܡܚܘܿܬ̣ܵܐ ܠܥܵܐܙܵܐ: ܐܸܬ̇ܬܲܒ̣ܪܲܬ̤ ܐܲܫܩܵܠܘܿܢ: ܘܟ݂ܠ ܕܐܸܫܬ̇ܚܲܪ ܒܝܲܬ̣ܒ̇ܗܘܿܢ.

⁶ ܐܘܿ ܣܲܦ̮ܣܹܪܹܗ ܕܡܵܪܝܵܐ ܥܕܲܡܵܐ ܠܐܸܡܲܬ̣ܝ ܠܵܐ ܬܸܫܠܹܝܢ: ܘܠܵܐ ܬܸܬ̇ܢܝܼܚܝܼܢ ܡ̣ܢ ܕܲܠܡܸܚܪܲܒ̣ ܐܸܬ̣ܚܲܡ̄ܠܝ ܒܚܸܠܬܹܟ݂ܝ: ܐܸܬ̣ܚܲܡ̄ܠܝ ܘܲܫܠܵܝ.

⁷ ܐܲܝܟܲܢܵܐ ܬܸܫܠܹܐ ܕܡܵܪܝܵܐ ܦܲܩܕܵܗ̇ ܥܲܠ ܐܲܫܩܵܠܘܿܢ: ܘܥܲܠ ܣܦܵܪܲܗ ܝܲܡܵܐ: ܬܲܡܵܢ ܐܲܫ̱ܠܛܵܗ̇.

48

¹ ܥܲܠ ܡܘܼܐܵܒ̣. ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܘܵܝ ܠܢܵܒ̣ܘܿ ܕܐܸܬ̣ܒܲܙܙܲܬ̤: ܒܸܗܬܲܬ̤ ܘܐܲܚܦܪܲܬ̤ ܩܘܿܪ ܝܲܬܝܼܡ: ܒܗܸܬ̣ ܥܘܼܫܢܵܗ̇ ܘܐܸܬ̣ܒܲܕܲܪ.

² ܘܠܲܝܬ̇ ܬܘܼܒ̣ ܬܸܫܒ̇ܘܿܚܬܵܐ ܠܡܘܼܐܵܒ̣: ܒܚܸܫܒ̇ܘܿܢ ܐܸܬ̣ܚܲܫܲܒ̣ܘ ܥܠܹܝܗ ܒܝܼܫܬܵܐ: ܘܐܸܡܲܪܘ ܬܵܘ ܢܵܘܒ̇ܕ݂ܝܼܗ̇ ܡ̣ܢ ܥܲܡܵܐ: ܐܵܦܸܢ ܡܸܫܬܲܩ ܐܸܢ ܬܸܫܬ̇ܩܝܼܢ: ܒܵܬ̣ܪܹܟ݂ܝ ܬܹܐܙܲܠ ܚܲܪܒܵܐ.

³ ܩܵܠ ܝܑܼܠܲܠܬܵܐ ܡ̣ܢ ܚܘܿܪܢܝܼܡ. ܒܸܙܬ̣ܵܐ ܘܲܬ̣ܒ̣ܵܪܵܐ ܪܲܒܵܐ.

⁴ ܐܸܬ̇ܬܲܒ̣ܪܲܬ̤ ܡܘܼܐܵܒ̣: ܐܲܫܡܲܥܘ ܝܑܼܠܠܬܵܐ ܡܸܣܟܹ̇ܢܹܝ̈ܗ̇.

⁵ ܒܡܲܣܩܵܢܵܐ ܕܠܘܼܚܝܲܬ̣ ܟܲܕ݂ ܒܵܟܹ̇ܝܢ ܢܸܣܩܘܼܢ: ܘܲܒ̣ܡܲܚܲܬ̇ܬܵܐ ܕܚܘܿܪܢܝܼܡ: ܐܘܼܠܨܵܢܵܐ ܘܲܓ̣ܥܵܬ̣ܵܐ ܕܲܬ̣ܒ̣ܵܪܵܐ ܢܸܥܒ̇ܕ݂ܘܼܢ.

⁶ ܫܡܲܥܘ ܘܲܥܪܘܿܩܘ ܘܦܲܨܵܘ ܢܲܦ̮ܫܟ݂ܘܿܢ: ܘܲܗܘ̤ܵܘ ܐܲܝܟ݂ ܥܸܩܵܪܵܐ ܒܡܲܕ݂ܒ̇ܪܵܐ.

⁷ ܥܲܠ ܕܐܸܬ̇ܬ̇ܟܸܠܬ̇ܝ ܥܲܠ ܚܸܣܢܲܝ̈ܟ̇ܝ ܘܥܲܠ ܓܲܙܲܝ̈ܟ̇ܝ: ܐܵܦ ܐܲܢ̄ܬ̇ܝ ܬܸܬܲܚܕ̇ܝܼܢ: ܘܢܸܦܘܿܩ ܟܵܡܘܿܫ ܒܲܫܒ̣ܝܼܬ̣ܵܐ: ܘܟ݂ܘܼܡܪ̈ܵܘܗܝ ܘܪܵܘܪ̈ܒ̣ܵܢܵܘܗܝ ܐܲܟ݂ܚ̄ܕ݂ܵܐ.

⁸ ܘܢܹܐܬܹܐ ܒܵܙܘܿܙܵܐ ܥܲܠ ܟܠܗܹܝܢ ܩܘܼܪ̈ܝܲܝܟ ܘܠܵܐ ܢܸܬ̣ܦܲܨ̈ܝܵܢ: ܘܢܹܐܒܲܕ݂ ܥܘܼܡܩܵܐ ܘܬܸܚܪܲܒ̣ ܦܩܲܥܬ̣ܵܐ: ܐܲܝܟܲܢܵܐ ܕܐܸܡܲܪ ܡܵܪܝܵܐ.

⁹ ܗܲܒ̣ܘ ܟܠܝܼܠܵܐ ܠܡܘܼܐܵܒ̣ ܡܸܛܠ ܕܡܸܚܪܲܒ̣ ܚܵܪܒܵܐ: ܘܟ݂ܠܗܹܝܢ ܩܘܼܪ̈ܝܵܗ̇ ܢܸܗܘ̈ܝܵܢ ܠܚܘܼܪܒܵܐ ܡܢ ܒܠܲܝ ܕܝܵܬܹܒ̣.

¹⁰ ܠܝܼܛ ܗ̄ܘ̣ ܡܲܢ ܕܢܸܥܒܸ̇ܕ݂ ܥܒ̣ܵܕܹܗ ܕܡܵܪܝܵܐ ܒܢܸܟ݂ܠܵܐ: ܘܠܝܼܛ ܗ̄ܘ̣ ܡ̣ܢ ܕܢܸܟ݂ܠܵܐ ܚܲܪܒܹ̇ܗ ܡ̣ܢ ܕܡܵܐ.

¹¹ ܫܠܹܝܢ ܡܘܼܐܵܒ̣ܵܝܹ̈ܐ ܡ̣ܢ ܛܲܠܝܘܼܬ̣ܗܘܿܢ: ܘܫܲܟ̇ܘܼܬ̣ܝܼܢ ܥܲܠ ܬܸܛܪ̈ܲܝܗܘܿܢ: ܘܠܵܐ ܣܲܪܸܩ̣ܘ ܡ̣ܢ ܡܵܐܢܵܐ ܠܡܵܐܢܵܐ: ܘܒܲܫܒ̣ܝܼܫܬܵܐ ܠܵܐ ܐܸܙܲܠܘ: ܡܸܛܠ ܗܵܢܵܐ ܩܲܝܵܡ ܛܲܥ̱ܡܗܘܿܢ ܒܗܘܿܢ: ܘܪܹܝܚܗܘܿܢ ܠܵܐ ܦܵܓ̣.

¹² ܡܸܛܠ ܗܵܢܵܐ ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܐܵܡܲܪ ܡܵܪܝܵܐ: ܘܐܹܫܲܕܲܪ ܥܠܲܝܗܘܿܢ ܒܵܙܘܿܙܹ̈ܐ ܘܢܸܒ̇ܙܘܼܢ ܐܸܢܘܿܢ: ܘܡܵܐܢܲܝ̈ܗܘܿܢ ܢܣܲܪܩܘܼܢ: ܘܲܓ̣ܪ̈ܲܒܲܝܗܘܿܢ ܢܫܲܚܩܘܼܢ.

¹³ ܘܢܸܒ̣ܗܲܬ̣ ܡܘܼܐܵܒ̣ ܡ̣ܢ ܟܵܡܘܿܫ: ܐܲܝܟ݂ ܕܒ̣ܗܸܬ̣ܘ ܒܢܲܝ̈ ܝܼܣܪܵܝܹܠ ܡ̣ܢ ܒܹܝܬ̣ ܐܹܝܠ ܬܘܼܟ݂ܠܵܢܗܘܿܢ.

¹⁴ ܐܲܝܟܲܢܵܐ ܐܵܡ̇ܪܝܼܬ̇ܘܿܢ ܕܓܲܢ̄ܒܵܪܹ̈ܐ ܚܢܲܢ: ܘܓܲܒ̣ܪܹ̈ܐ ܚܲܝܠܬ̣ܵܢܹ̈ܐ ܠܲܩܪܵܒ̣ܵܐ.

¹⁵ ܐܸܬ̣ܒ̇ܙܸܙ ܡܘܼܐܵܒ̣ ܘܩܘܼܪ̈ܝܹܗ̇ ܣܠܸܩ: ܘܲܓ̣ܒܲـ̈ـܝܵܐ ܕܓܲܢ̄ܒܵܪ̈ܵܘܗܝ ܐܸܫܬܲܠܸܡܘ ܠܩܸܛܠܵܐ: ܐܵܡܲܪ ܡܲܠܟܵܐ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܫܡܹܗ.

¹⁶ ܩܲܪܝܼܒ̣ ܗ̄ܘ̣ ܬܒ̣ܵܪܹܗ ܕܡܘܼܐܵܒ̣ ܠܡܹܐܬ̣ܵܐ: ܘܒ̣ܝܼܫܬܹ̇ܗ ܡܣܲܪܗܒ̣ܵܐ ܛܵܒ̣.

¹⁷ ܐܸܬ̇ܕܲܠܲܚܘ ܘܙܵܥܘ ܟܠ ܕܲܚܕ݂ܵܪ̈ܵܘܗܝ: ܘܟ݂ܠ ܕܝܵܕ݂ܥܝܼܢ ܫܡܹܗ ܐܸܡܲܪܘ: ܐܲܝܟܲܢܵܐ ܐܸܬ̇ܬ̇ܒܲܪ ܚܘܼܛܪܵܐ ܥܲܫܝܼܢܵܐ ܘܓ̣ܘܼܙܥܵܐ ܕܬܸܫܒ̇ܘܿܚܬܵܐ.

¹⁸ ܚܘܿܬ̣ܝ ܡ̣ܢ ܐܝܼܩܵܪܵܐ ܘܬܸܒ̣ܝ ܒܨܲܥܪܵܐ: ܥܵܡܘܿܪܬܵܐ ܕܒܲܪܬ̣ ܪܝܼܒ̣ܘܼܢ: ܡܸܛܠ ܕܒ̣ܵܙܘܿܙܵܐ ܕܡܘܼܐܵܒ̣ ܣܠܸܩ ܥܠܲܝܟ̇ܝ ܘܐܲܚܪܸܒ̣ ܟܲܪ̈ܟܲܝܟ̇ܝ.

¹⁹ ܥܲܠ ܐܘܼܪ̈ܚܵܬ̣ܵܐ ܩܘܼܡܝ ܘܚܘܼܪܝ ܥܵܡܘܿܪܬܵܐ ܕܥܲܕ݂ܘܵܥܝܼܪ: ܫܲܐܸܠܝ ܠܲܕ݂ܥܵܪܹܩ: ܘܠܲܕ݂ܡܸܬ̣ܦܲܠܲܛ ܐܸܡܲܪܝ ܡܵܢܵܐ ܗܘ̤ܵܐ.

²⁰ ܒܗܸܬ̣ ܡܘܼܐܵܒ̣ ܡܸܛܠ ܕܐܸܬ̇ܬ̇ܒܲܪ: ܘܐܲܝܠܸܠܘ ܘܐܲܙܥܸܩܘ ܒܐܲܪܢܘܿܢ: ܡܸܛܠ ܕܐܸܬ̇ܬ̇ܒܲܪ ܡܘܼܐܵܒ̣.

²¹ ܘܕ݂ܝܼܢܵܐ ܐܸܬ̣ܵܐ ܥܲܠ ܐܲܪܥܵܐ ܕܡܫܘܿܪ: ܘܥܲܠ ܚܲܠܘܼܢ: ܘܥܲܠ ܝܵܗܵܨ: ܘܥܲܠ ܡܦܝܼܥܲܬ̣.

²² ܘܥܲܠ ܪܝܼܒ̣ܘܿܢ ܘܥܲܠ ܢܵܒ̣ܘܿ: ܘܥܲܠ ܒܹܝܬ̣ ܕܲܒ̣ܠܲܬܝܼܡ.

²³ ܘܥܲܠ ܩܘܼܪܝܲܬ̇ܝܼܡ ܘܥܲܠ ܒܹܝܬ̣ ܓܵܡܘܿܠ: ܘܥܲܠ ܒܹܝܬ̣ ܡܥܘܿܢ.

²⁴ ܘܥܲܠ ܩܸܪܝܘܿܬ̣: ܘܥܲܠ ܒܘܼܨܵܪ: ܘܥܲܠ ܟܠܗܹܝܢ ܩܘܼܪ̈ܝܵܢ ܕܐܲܪܥܵܐ ܕܡܘܼܐܵܒ̣ ܕܪ̈ܲܚܝܼܩܵܢ ܘܲܕ݂ܩܲܪ̈ܝܼܒ̣ܵܢ.

²⁵ ܐܸܬ̣ܓܲܕ݂ܡܲܬ̣ ܩܲܪܢܹܗ ܕܡܘܼܐܵܒ̣: ܘܲܕ݂ܪܵܥܹܗ ܐܸܬ̇ܬ̇ܒܲܪ ܐܵܡܲܪ ܡܵܪܝܵܐ.

²⁶ ܕܵܘܵܐܘܼܗܝ ܡܸܛܠ ܕܥܲܠ ܡܵܪܝܵܐ ܐܸܬ̇ܬ̇ܪܝܼܡ: ܘܢܸܬ̇ܛܲܪܲܦ ܡܘܼܐܵܒ̣ ܒܲܬ̣ܝܵܒ̣ܬܹ̇ܗ: ܘܢܸܗܘܹܐ ܠܓ̣ܘܼܚܟܵܐ ܐܵܦ ܗ̤ܘ.

²⁷ ܘܐܸܢ ܠܵܐ ܗ̄ܘ̣ܵܐ ܠܓ̣ܘܼܚܟܵܐ ܗܘ̤ܵܐ ܠܵܟ݂ ܝܼܣܪܵܝܹܠ: ܘܲܒ̣ܓܲܢܵܒܹ̈ܐ ܐܸܫܬ̇ܟܲܚ ܟܲܕ݂ ܥܵܒܹ̇ܕ݂ ܗ̄ܘܲܝܬ̇ ܥܲܡܹܗ ܩܪܵܒ̣ܵܐ.

²⁸ ܫܒ̣ܘܿܩܘ ܩܘܼܪ̈ܝܵܐ: ܘܲܫܪܵܘ ܒܲܫܩܝܼܦܹ̈ܐ ܝܵܬ̣ܒܲܝ̈ ܡܘܼܐܵܒ̣: ܘܲܗܘ̤ܵܘ ܐܲܝܟ݂ ܝܵܘܢܵܐ ܕܡܲܩܢܵܐ ܒܲܓ̣ܕ݂ܵܢܦܵܐ.

²⁹ ܫܡܲܥܢ ܪܵܘܪ̈ܒ̣ܵܢܹܐ ܕܡܘܼܐܵܒ̣ ܕܡܸܬ̣ܓܲܐܹܝܢ ܛܵܒ̣: ܓܲܐܝܘܼܬ̣ܗܘܿܢ ܘܪܵܡܘܼܬ̣ܗܘܿܢ ܘܪܵܡܘܼܬ̣ ܠܸܒ̇ܗܘܿܢ: ܐܸܢܵܐ ܝܵܕܲܥ ܐ̄ܢܵܐ ܐܵܡܲܪ ܡܵܪܝܵܐ.

³⁰ ܥܒ̣ܵܕܲܝ̈ܗܘܿܢ ܕܠܵܐ ܗܘ̤ܵܘ ܟܹܐܢ̈ܝܼܢ܆ ܘܩܵܨܘܿܡܵܘ̈ܗܝ ܠܵܐ ܗ̄ܘ̣ܵܐ ܗܵܟܲܢܵܐ ܒܲܕܸ̇ܩ̣ܘ ܥܠܵܘܗܝ.

³¹ ܡܸܛܠ ܗܵܢܵܐ ܥܲܠ ܡܘܼܐܵܒ̣ ܐܲܝܠܸܠܘ: ܘܥܲܠ ܡܘܼܐܵܒ̣ ܟܠܹܗ ܡ̣ܢ ܟܠ ܐܲܬܲܪ ܩܥܵܘ: ܘܥܲܠ ܐ̄ܢܵܫܵܐ ܕܥܵܡ̇ܪܝܼܢ ܒܒܲܝܬܹ̇ܗ: ܒܝܼܫܬܵܐ ܢܸܗܘܘܿܢ ܪܵܢܹܝܢ.

³² ܡ̣ܢ ܒܟ݂ܵܬ̣ܵܐ ܕܝܲܥܙܝܼܪ ܐܹܒܲܟܹ̇ܝܟ݂ܝ ܓܦܸܬܵܐ ܕܣܲܒ̣ܡܵܐ: ܫܲܒ̇ܘܼܩܲܝ̈ܟ̇ܝ ܥ̣ܒܲܪܘ ܝܲܡܵܐ: ܘܲܥܕܲܡܵܐ ܠܝܲܡܵܐ ܕܝܲܥܙܝܼܪ ܡ̣ܛܵܘ: ܡܸܛܠ ܕܥܲܠ ܚܨܵܕܹܟ݂ܝ ܘܥܲܠ ܩܛܵܦܹܟ݂ܝ ܒܵܙܘܿܙܵܐ ܢܦܲܠ̣.

³³ ܘܬܸܥܒܲܪ ܚܲܕ݂ܘܼܬ̣ܵܐ ܘܲܕ݂ܝܵܨܵܐ ܡ̣ܢ ܐܲܪܥܵܐ ܕܟܲܪܡ̄ܠܵܐ: ܘܡ̣ܢ ܐܲܪܥܵܐ ܕܡܘܼܐܵܒ̣: ܘܚܲܡܪܵܐ ܡ̣ܢ ܡܲܥܨܲܪܬܵܐ ܢܸܒ̣ܛܲܠ: ܘܠܵܐ ܢܸܥܨ̄ܪܘܼܢ ܥܵܨܘܿܪܹ̈ܐ: ܘܠܵܐ ܢܸܥܢܘܿܢ ܘܠܵܐ ܢܹܐܡܪܘܼܢ ܝܵܗܵܝ ܝܵܗܵܝ.

³⁴ ܡ̣ܢ ܝܑܼܠܲܠܬܵܐ ܕܚܸܫܒ̇ܘܿܢ ܘܲܥܕܲܡܵܐ ܠܐܲܠܥܵܠܵܐ: ܘܲܥܕܲܡܵܐ ܠܝܵܗܵܨ ܐܲܪܝܼܡܘ ܩܵܠܗܘܿܢ: ܡ̣ܢ ܨܲܥܵܪ ܘܲܥܕܲܡܵܐ ܠܚܘܿܪܢܝܼܡ: ܘܲܥܕܲܡܵܐ ܠܟܲܪܟ݂ܵܐ ܕܐܲܠܸܣ ܥܓܸܠܬܵܐ ܬܘܼܠܬܵܐ: ܡܸܛܠ ܕܡܲـ̈ـܝܵܐ ܕܢܲܡܪܝܼܡ ܢܓ̣ܘܼܙܘܼܢ.

³⁵ ܘܐܹܒܲܛܸܠ ܡ̣ܢ ܡܘܼܐܵܒ̣ ܐܵܡܲܪ ܡܵܪܝܵܐ: ܕܡܲܣܸܩ ܥܠܵܬ̣ܵܐ ܘܣܵܐܹ̇ܡ ܒܸܣܡܹ̈ܐ ܠܐܲܠܵܗܹܗ.

³⁶ ܡܸܛܠ ܗܵܢܵܐ ܠܹܒ̇ܝ ܥܲܠ ܡܘܼܐܵܒ̣ ܐܲܝܟ݂ ܟܸܢܵܪܵܐ ܢܡܲܠܸܠ: ܡܸܛܠ ܕܒ̣ܝܼܫܬܵܐ ܥܒܲܕ݂ܘ ܘܐܸܒܲܕ݂ܘ.

³⁷ ܪܹ̈ܫܲܝܗܘܿܢ ܓܹܝܪ ܡܣܲܦܪܝܼܢ: ܘܕܲܩܢܲܝ̈ܗܘܿܢ ܓܪܝܼܥܝܼܢ: ܘܥܲܠ ܟܠܗܹܝܢ ܐܝܼܕܲܝ̈ܗܘܿܢ ܡܲܪ̈ܩܕ݂ܵܬ̣ܵܐ: ܘܥܲܠ ܚܲܨܹ̈ܐ ܣܲܩܹ̈ܐ.

³⁸ ܘܥܲܠ ܟܠ ܐܸܓܵܪܹ̈ܐ ܕܡܘܼܐܵܒ̣ ܘܲܒ̣ܫܘܼܩܹ̈ܐ ܟܠܗܘܿܢ ܡܲܪ̈ܩܕ݂ܵܬ̣ܵܐ: ܡܸܛܠ ܕܬܸܒ̣ܪܹܬ̣ ܠܡܘܼܐܵܒ̣: ܐܲܝܟ݂ ܡܵܐܢܵܐ ܕܠܲܝܬ̇ ܒܹܗ ܚܲܫܚܘܼ ܐܵܡܲܪ ܡܵܪܝܵܐ.

³⁹ ܐܲܝܟܲܢܵܐ ܐܸܬ̇ܬ̇ܒܲܪܘ ܘܐܲܝܠܸܠܘ ܐܲܝܟܲܢܵܐ ܐܲܦܢܝܼ ܩܕ݂ܵܠܹ݂ܗ ܡܘܼܐܵܒ̣ ܘܲܒ̣ܗܸܬ̣. ܘܢܸܗܘܹܐ ܡܘܼܐܵܒ̣ ܠܓ̣ܘܼܚܟܵܐ ܘܠܲܬ̣ܒ̣ܵܪܵܐ ܠܟ݂ܠܗܘܿܢ ܕܲܚܕ݂ܵܪ̈ܵܘܗܝ.

⁴⁰ ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܐܲܝܟ݂ ܢܸܫܪܵܐ ܢܸܣܲܩ ܘܲܢܛܘܼܣ: ܘܢܸܦܪܘܿܣ ܓܸܦܵܘ̈ܗܝ ܥܲܠ ܡܘܼܐܵܒ̣.

⁴¹ ܐܸܬ̇ܬܲܚܕܲܬ̣ ܩܸܪܝܘܿܬ̣ ܘܡܸܨܪܘܼܬ̣ ܐܸܬ̣ܟܲܒ̣ܫܲܬ̤: ܘܢܸܗܘܹܐ ܠܸܒ̇ܗܘܿܢ ܕܓܲܢ̄ܒܵܪ̈ܲܝ ܡܘܼܐܵܒ̣ ܒܝܵܘܡܵܐ ܗܵܘܚ: ܐܲܝܟ݂ ܠܸܒܵܐ ܕܐܲܢ̄ܬ̇ܬ̣ܵܐ ܕܲܡܚܲܒ̇ܠܵܐ ܠܡܹܐܠܲܕ݂.

⁴² ܘܢܹܐܒܲܕ݂ ܡܘܼܐܵܒ̣ ܡ̣ܢ ܥܲܡܵܐ: ܡܸܛܠ ܕܥܲܠ ܡܵܪܝܵܐ ܐܸܬ̇ܬ̇ܪܝܼܡ.

⁴³ ܕܸܚ̱ܠܬ̣ܵܐ ܘܓ̣ܘܼܡܵܨܵܐ ܘܦܲܚܵܐ ܥܠܲܝܟ ܥܵܡܘܿܪܵܐ ܕܡܘܼܐܵܒ̣ ܐܵܡܲܪ ܡܵܪܝܵܐ.

⁴⁴ ܘܡܲܢ ܕܢܸܥܪܘܿܩ ܡ̣ܢ ܩܵܠܵܐ ܕܕܸܚ̱ܠܬܵܐ ܢܸܦܸܠ ܒܓ̣ܘܼܡܵܨܵܐ: ܘܡܲܢ ܕܢܸܣܲܩ ܡ̣ܢ ܓܵܘ ܓܘܼܡܵܨܵܐ ܢܸܬ̇ܬ̇ܚܸܕ݂ ܒܦܲܚܵܐ: ܡܸܛܠ ܕܡܲܝܬܸ̇ܐ ܐ̄ܢܵܐ ܗܵܠܹܝܢ ܥܲܠ ܡܘܼܐܵܒ̣: ܫܲܢ̄ܬܵܐ ܕܦܘܼܩܕܵܢܗܘܿܢ ܐܵܡܲܪ ܡܵܪܝܵܐ.

⁴⁵ ܡܸܛܠ ܕܢܘܼܪܵܐ ܢܸܦܩܲܬ̣ ܡ̣ܢ ܚܸܫܒ̇ܘܿܢ: ܘܫܲܠܗܹܒ̣ܝܼܬ̣ܵܐ ܡ̣ܢ ܟܲܪܟ݂ܵܐ ܕܣܝܼܚܘܿܢ: ܘܬܹܐܟ݂ܘܿܠ ܦܵܐܬܹܗ ܕܡܘܼܐܵܒ̣: ܘܪܹ̈ܫܵܢܹܐ ܕܲܒ̣ܢܲܝ̈ ܫܵܐܘܿܢ.

⁴⁶ ܘܵܝ ܠܵܟ݂ ܡܘܼܐܵܒ̣: ܐܸܒܲܕ̇ܬ̇ ܥܲܡܵܐ ܕܟ݂ܵܡܘܿܫ: ܕܐܸܬ̣ܒܲܕܲܪܘ ܒܢܲܝ̈ܟ ܘܲܒ̣̈ܢܵܬ̣ܵܟ݂ ܒܫܸܒ̣ܝܵܐ.

⁴⁷ ܘܐܲܗܦܸܟ݂ ܫܒ̣ܝܼܬܹܗ ܕܡܘܼܐܵܒ̣ ܒܲܐ̄ܚܪܵܝܑܬ̇ ܝܵܘ̈ܡܵܬ̣ܵܐ ܐܵܡܲܪ ܡܵܪܝܵܐ. ܥܕܲܡܵܐ ܠܗܵܪܟܵܐ ܕܝܼܢܹܗ ܕܡܘܼܐܵܒ̣.

49

¹ ܥܲܠ ܒܢ̈ܝ ܥܡܘܼܢ. ܗܵܟܲܢܵܬ ܐܵܡܲܪ ܡܵܪܝܵܐ: ܒܢܲـ̈ـܝܵܐ ܠܲܝܬ̇ ܠܝܼܣܪܵܝܹܠ: ܐܵܘ ܝܵܪܘܿܬ̣ܵܐ ܠܲܝܬ̇ ܠܹܗ: ܡܸܛܠ ܡܵܢܵܐ ܝܑܼܪܸܬ̣ ܡܲܠܟ̇ܘܼܡ ܠܓ̣ܵܕ݂: ܘܥܲܡܹܗ ܒܩܘܼܪ̈ܝܹܗ ܝܼܬܸܒ̣.

² ܡܸܛܠ ܗܵܢܵܐ ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܐܵܡܲܪ ܡܵܪܝܵܐ: ܘܐܲܫܡܲܥ ܥܲܠ ܪܲܒܲܬ̣ ܕܲܒ̣ܢܲܝ̈ ܥܲܡܘܿܢ ܩܵܠܵܐ ܕܲܩܪܵܒ̣ܵܐ: ܘܬܸܗܘܹܐ ܠܬܸܠܵܐ ܚܲܪܒܵܐ: ܘܟܲܦܪ̈ܘܿܢܹܝܗ̇ ܒܢܘܼܪܵܐ ܢܹܐܩܕ̇ܘܼܢ: ܘܢܹܐܪܲܬ̣ ܝܼܣܪܵܝܹܠ ܠܝܵܪ̈ܘܿܬ̣ܵܘܗܝ ܐܵܡܲܪ ܡܵܪܝܵܐ.

³ ܬܲܝܠܸܠ ܚܸܫܒ̇ܘܿܢ ܡܸܛܠ ܕܐܸܬ̇ܬܲܒ̣ܪܲܬ̤ ܥܵܝ: ܒܲܓܸ̇ܢܘ ܟܲܦܪ̈ܘܿܢܹܝܗ̇ ܕܪܲܒܲܬ̣: ܐܸܬ̣ܟܲܒ̣̄ܢܘ ܣܲܩܹ̈ܐ: ܐܲܪܩܸܕ݂ܘ ܘܐܸܬ̣ܟܲܬܫܘ ܒܲܚ̈ܕ݂ܵܕܹܐ: ܡܸܛܠ ܕܡܲܠܟ̇ܘܼܡ ܢܹܐܙܲܠ ܒܲܫܒ̣ܝܼܬ̣ܵܐ: ܘܟ݂ܘܼܡܪ̈ܵܘܗܝ ܘܪܵܘܪ̈ܒ̣ܵܢܵܘܗܝ ܐܲܟ݂ܚ̄ܕ݂ܵܐ ܐܵܡܲܪ ܡܵܪܝܵܐ.

⁴ ܡܵܢܵܐ ܡܸܫܬܲܒ̇ܚܲܬ̇ܝ ܒܥܘܼܡܩܲܝ̈ܟ̇ܝ: ܘܲܬ̣ܟ݂ܝܼܠܲܬ̇ܝ ܥܲܠ ܐܵܘܠܘܿܢܲܝ̈ܟܝ ܒܲܪܬ̣ܵܐ ܚܲܒ̇ܝܼܒ̣ܬܵܐ: ܕܲܬ̣ܟ݂ܝܼܠܵܐ ܥܲܠ ܓܲܙܹܝ̈ܗ̇ ܘܐܵܡܪܵܐ ܡܲܢܘܼ ܢܹܐܬܹܐ ܥܠܲܝ.

⁵ ܗܵܐ ܡܲܝܬܹ̇ܐ ܐ̄ܢܵܐ ܥܠܲܝܟ̇ܝ ܕܸܚ̱ܠܬ̣ܵܐ: ܡ̣ܢ ܟܠܗܘܿܢ ܚܕ݂ܵܪ̈ܲܝܟ̇ܝ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܘܐܹܒܲܕܲܪ ܐܸܢܘܿܢ ܓܒܲܪ ܠܓܲܒܹ̇ܗ: ܘܠܲܝܬ̇ ܕܲܡܟܲܢܸܫ ܠܲܡܒܲܕ̇ܪܹ̈ܐ.

⁶ ܘܒ̣ܵܬܲܪܟܸ̇ܢ ܐܲܗܦܸܟ݂ ܫܒ̣ܝܼܬ̣ܵܐ ܕܲܒ̣ܢܲܝ̈ ܥܲܡܘܿܢ: ܐܵܡܲܪ ܡܵܪܝܵܐ.

⁷ ܥܲܠ ܐܕܘܡ ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܠܲܝܬ̇ ܬܘܼܒ̣ ܚܸܟ݂ܡ̱ܬ̣ܵܐ ܒܬܲܝܡܲܢ: ܐܸܒܲܕ݂ ܡܸܠܟܵܐ ܡ̣ܢ ܣܲܟ̇ܘܼܠܬ̣ܵܢܹ̈ܐ: ܐܸܫܬܲܩܠܲܬ̤ ܚܸܟ݂ܡܲܬ̣ܗܘܿܢ.

⁸ ܥܪܲܩ̣ܘ ܘܐܸܬ̣ܗ̱ܦܸܟ݂ܘ: ܘܥܲܡܸܩ̣ܘ ܠܡܸܬܲܒ̣ ܥܵܡܘܿܪܹ̈ܐ ܕܕ݂ܵܪܵܢ: ܡܸܛܠ ܕܲܬ̣ܒ̣ܵܪܹܗ ܕܥܹܣܘܿ ܐܲܝܬ̇ܝܼܬ̣ ܥܠܵܘܗܝ: ܙܲܒ̣ܢܵܐ ܕܦܘܼܩܕܵܢܹܗ ܐܵܡܲܪ ܡܵܪܝܵܐ.

⁹ ܐܸܢ ܩܵܛܘܿܦܹ̈ܐ ܐܸܬ̣ܵܘ ܥܠܲܝܟ: ܠܵܐ ܫܵܒ̣ܩܝܼܢ ܗ̄ܘ̣ܵܘ ܒܘܼܥܵܪܵܐ: ܘܐܸܢ ܓܲܢܵܒܹ̈ܐ: ܒܠܸܠܝܵܐ ܚܲܒܸ̇ܠܘ ܐܲܝܟ݂ ܕܲܨܒ̣ܵܘ.

¹⁰ ܐܸܢܵܐ ܓܹܝܪ ܒܨܹܝܬ̣ ܠܥܹܣܘܿ: ܘܲܓ̣ܠܹܝܬ̣ ܡܣܲܬ̇ܪ̈ܵܬܹܗ: ܘܐܸܬ̇ܛܲܫܝܼ ܘܠܵܐ ܐܸܫܬ̇ܟܲܚ: ܘܐܸܬ̣ܒܲܕܲܪ ܙܲܪܥܹܗ: ܘܐܲܚܵܘ̈ܗܝ ܘܲܫܒ̣ܵܒ̣ܵܘ̈ܗܝ ܘܠܲܝܬ̇ ܐܸܢܘܿܢ.

¹¹ ܫܒ̣ܘܿܩ ܝܲܬ̣ܡܲܝ̈ܟ ܐܸܢܵܐ ܐܲܚܹܐ: ܘܐܲܪ̈ܡܠܵܬ̣ܵܟ݂ ܥܠܲܝ ܢܸܬ̇ܬܲܟ݂̈ܠܵܢ.

¹² ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܕܠܵܐ ܙܵܕܹ̇ܩ ܗ̄ܘ̣ܵܐ ܠܗܘܿܢ ܠܡܸܫܬܵܐ ܟܵܣܵܐ ܐܸܫܬ̇ܝܼܘ: ܘܐܲܢ̄ܬ̇ ܣܒܲܪܬ̇ ܕܬܸܙܟܸ̇ܐ ܠܵܐ ܬܸܙܟܸ̇ܐ: ܐܸܠܵܐ ܐܵܦ ܬܸܫܬܸ̇ܐ ܟܵܣܵܐ.

¹³ ܡܸܛܠ ܕܒ̣ܝܼ ܝܼܡ̇ܝܼܬ̣ ܐܵܡܲܪ ܡܵܪܝܵܐ: ܕܲܠܬܸܡܗܵܐ: ܘܲܠܚܘܼܪܒܵܐ: ܘܲܠܚܸܣܕܵܐ: ܘܲܠܠܵܘܛܬ̣ܵܐ: ܬܸܗܘܹܐ ܒܘܼܨܪ. ܘܟ݂ܠܗܹܝܢ ܩܘܼܪ̈ܝܵܗ̇ ܠܚܘܼܪܒܵܐ ܢܸܗܘ̈ܝܵܢ ܠܥܵܠܲܡ.

¹⁴ ܛܸܒܵܐ ܫܸܡ̇ܥܹܬ̣ ܡ̣ܢ ܩܕ݂ܵܡ ܡܵܪܝܵܐ: ܘܐܝܼܙܓܲܕܵܐ ܠܥܲܡܡܹ̈ܐ ܐܸܫܬ̇ܠܲܚ: ܩܘܼܡܘ ܢܸܣܲܩ ܥܠܹܝܗ̇ ܠܲܩܪܵܒ̣ܵܐ.

¹⁵ ܡܸܛܠ ܕܗܵܐ ܙܥܘܿܪܵܐ ܝܲܗܒ̣ܬܵܟ݂ ܒܥܲܡܡܹ̈ܐ: ܘܫܝܼܛܵܐ ܒܹܝܬ̣ ܒܢܲܝ̈ܢܵܫܵܐ.

¹⁶ ܥܵܘܼܠܵܟ݂ ܐܲܛܥ̱ܝܵܟ݂ ܘܫܘܼܒ̣ܗܵܪܹܗ ܕܠܸܒܵܟ݂: ܕܲܫܪܸܐ ܒܲܫܩܝܼܦܵܐ ܕܟܹܐܦܵܐ: ܘܐܲܚܝܼܕ݂ ܒܪܵܘܡܵܐ ܕܪܵܡܬ̣ܵܐ: ܘܐܵܡܲܪ ܒܠܸܒܹ̇ܗ ܡܲܢܘܼ ܢܲܚܬܲܢܝ ܠܐܲܪܥܵܐ. ܐܸܢ ܒܹܝܬ̣ ܟܵܘ̈ܟ̇ܒܹܐ ܬܣܝܼܡ ܩܸܢܵܟ݂: ܘܐܸܢ ܬܪܝܼܡ ܐܲܝܟ݂ ܢܸܫܪܵܐ ܩܸܢܵܟ݂: ܡ̣ܢ ܬܲܡܵܢ ܐܲܚܬ̣ܵܟ݂ ܐܵܡܲܪ ܡܵܪܝܵܐ.

¹⁷ ܘܬܸܗܘܹܐ ܐܲܕ݂ܘܿܡ ܠܚܘܼܪܒܵܐ: ܘܟ݂ܠ ܕܢܸܥܒܲܪ ܥܠܹܝܗ̇: ܢܸܬ̣ܡܲܗ ܘܢܲܫܪܸܩ ܥܲܠ ܟܠܗܹܝܢ ܡܲܚ̈ܘܵܬ̣ܵܗ̇.

¹⁸ ܘܬܸܬ̣ܗܦܸܟ݂ ܐܲܝܟ݂ ܕܲܗܦܲܟ݂ ܐܲܠܵܗܵܐ ܠܲܣܕ݂ܘܿܡ ܘܲܠܥܵܡܘܿܪܵܐ ܐܵܡܲܪ ܡܵܪܝܵܐ: ܠܵܐ ܢܸܬܸ̇ܒ̣ ܬܲܡܵܢ ܓܒܲܪ: ܘܠܵܐ ܢܸܥܡܲܪ ܬܲܡܵܢ ܒܲܪܢܵܫ.

¹⁹ ܗܵܐ ܐܲܝܟ݂ ܐܲܪܝܵܐ ܢܸܣܲܩ ܡ̣ܢ ܥܘܼܫܢܵܐ ܕܝܘܿܪܕ̇ܢܵܢ ܠܕܲܝܪܵܐ ܕܐܵܬ̣ܵܢ: ܘܒܲܥܓܲܠ ܐܸܪܕ̇ܘܿܦ ܐܸܢܘܿܢ ܡܸܢܵܗ̇: ܘܓܲܕ̇ܘܼ̈ܕܹܐ ܥܠܹܝܗ̇ ܐܸܦܩܘܿܕ݂: ܡܲܢܘܼ ܓܹܝܪ ܐܲܟ݂ܘܵܬ̣ܝ: ܐܵܘ ܡܲܢܘܼ ܢܣܲܗܕܲܢܝ: ܐܵܘ ܐܲܝܢܵܐ ܪܵܥܝܵܐ ܕܲܢܩܘܼܡ ܩܕ݂ܵܡܲܝ.

²⁰ ܡܸܛܠ ܗܵܢܵܐ ܫܡܲܥܘ ܬܲܪܥܝܼܬܹܗ ܕܡܵܪܝܵܐ ܕܐܸܬ̣ܪܲܥܝܼ ܥܲܠ ܐܲܕ݂ܘܿܡ: ܘܡܲܚܫܲܒ̣ܬܹܗ ܕܐܸܬ̣ܚܲܫܲܒ̣ ܥܲܠ ܝܵܬ̣ܒܲܝ̈ ܬܲܝܡܲܢ: ܕܢܸܓ̇ܪܘܼܢ ܐܸܢܘܿܢ ܒܨܝܼܪܹ̈ܐ ܕܥܵـ̈ـܢܵܐ: ܘܢܲܨܕ̇ܘܼܢ ܥܠܝܗܘܿܢ ܕܲܝܪܗܘܢ.

²¹ ܡ̣ܢ ܩܵܠܵܐ ܕܡܲܦܘܼܠܬ̇ܗܘܿܢ ܙܵܥܲܬ̤ ܐܲܪܥܵܐ: ܝܑܼܠܠܬܵܗ̇ ܡ̣ܢ ܝܲܡܵܐ ܕܣܘܿܦ ܐܸܫܬ̇ܡܲܥ ܩܵܠܵܗ̇.

²² ܗܵܐ ܐܲܝܟ݂ ܢܸܫܪܵܐ ܘܲܢܛܘܼܣ: ܘܢܸܦܪܘܿܣ ܓܸܦܵܘ̈ܗܝ ܥܲܠ ܒܘܼܨܵܪ: ܘܢܸܗܘܹܐ ܠܸܒ̇ܗܘܿܢ ܕܓܲܢ̄ܒܵܪ̈ܲܝ ܐܲܕ݂ܘܿܡ ܒܝܵܘܡܵܐ ܗܵܘ̇: ܐܲܝܟ݂ ܠܸܒܵܐ ܕܐܲܢ̄ܬ̇ܬ̣ܵܐ ܕܲܡܚܲܒ̇ܠܵܐ ܠܡܹܐܠܲܕ݂.

²³ ܥܲܠ ܕܲܪܡܣܘܿܩ ܒܸܗܬܲܬ̤ ܚܡܵܬ̣ ܘܲܪܦܵܕ݂: ܡܸܛܠ ܕܲܫܡܘܼܥܬܵܐ ܒܝܼܫܬܵܐ ܫ̣ܡܲܥܘ ܘܐܸܬ̇ܬܲܒܲܪܘ: ܒܝܲܡܵܐ ܕܸܚ̱ܠܬ̣ܵܗ̇: ܘܲܢܝܵܚܵܐ ܠܵܐ ܐܸܫܟ̇ܚܲܬ̤.

²⁴ ܐܸܬ̣ܪܲܦܝܲܬ̤ ܕܲܪܡܣܘܿܩ ܘܐܸܬ̣ܦܲܢܝܲܬ̣ ܠܡܸܥܪܲܩ: ܘܲܪܬܹܝܬ̣ܵܐ ܐܲܚܕܵܗ̇: ܘܥܵܩܬ̣ܵܐ ܘܚܸܒ̣ܠܹ̈ܐ ܐܲܚܕ̇ܘܼܗ̇ ܐܲܝܟ݂ ܕܝܵܠܹܕ̇ܬܵܐ.

²⁵ ܐܲܝܟܲܢܵܐ ܠܵܐ ܐܸܫܬܲܒ̣ܩܲܬ̤ ܩܪܝܼܬ̣ܵܐ ܕܬܸܫܒ̇ܘܿܚܬܵܐ ܩܪܝܼܬ̣ܵܐ ܕܚܲܕ݂ܘܼܬ̣ܵܐ.

²⁶ ܡܸܛܠ ܗܵܢܵܐ ܢܸܦܠܘܿܢ ܓܲܕ̇ܘܼ̈ܕܹܐ ܒܫܘܼܩܹܝ̈ܗ̇: ܘܟ݂ܠܗܘܿܢ ܓܲܒ̣ܪܹ̈ܝܗ̇ ܩܪ̈ܲܒ̣ܬ̣ܵܢܹܐ ܢܸܫܬܲܬ̇ܩܘܼܢ.

²⁷ ܒܝܵܘܡܵܐ ܗܵܘ̇ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܐܹܫܒ̇ܘܿܩ ܢܘܼܪܵܐ ܒܫܘܼܩܹܝ̈ܗ̇ ܕܕܲܪܡܣܘܿܩ: ܘܬܹܐܟ݂ܘܿܠ ܣܵܚܪ̈ܵܬܹܗ ܕܒܲܪ ܗܕ݂ܵܕ݂.

²⁸ ܕܥܲܠ ܩܹܕ݂ܵܪ ܘܥܲܠ ܡܲܠ̈ܟ̇ܘܵܬ̣ܵܐ ܕܚܵܨܘܿܪ ܕܩܲܛܸܠ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ. ܗܵܟܲܢܵܐ ܐܵܡܲܪ ܡܵܪܝܵܐ: ܩܘܼܡܘ ܣܲܩܘ ܥܲܠ ܩܹܕ݂ܵܪ: ܘܒ̣ܘܿܙܘ ܠܲܒ̣ܢܲܝ̈ ܡܲܕ݂ܢ̱ܚܵܐ.

²⁹ ܡܲܫ̈ܟ̇ܢܲܝܗܘܿܢ ܘܥܵـܢ̈ܗܘܿܢ ܢܸܣܒ̣ܘܿܢ: ܘܝܵܪ̈ܝܼܥܵܬ̣ܗܘܿܢ ܘܟ݂ܠܗܘܿܢ ܡܵܐܢܲܝ̈ܗܘܿܢ ܘܓܲܡܠܲܝ̈ܗܘܿܢ ܢܸܕ݂ܒ̇ܪܘܿܢ ܠܗܘܿܢ: ܘܢܸܩܪܘܿܢ ܥܠܲܝܗܘܿܢ ܡܓܲܪ̈ܝܵܢܹܐ ܡ̣ܢ ܚܕ݂ܵܪ̈ܲܝܗܘܿܢ.

³⁰ ܥܪܲܩ̣ܘ ܘܢܵܕ݂ܘ: ܘܥܲܡܸܩ̣ܘ ܠܡܸܬܲܒ̣ ܝܵܬ̣ܒܲܝ̈ ܚܵܨܘܿܪ ܐܵܡܲܪ ܡܵܪܝܵܐ: ܡܸܛܠ ܕܐܸܬ̣ܡܲܠܲܟ݂ ܥܠܲܝܗܘܿܢ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܘܐܸܬ̣ܚܲܫܲܒ̣ ܥܠܲܝܗܘܿܢ ܡܲܚܫܲܒ̣ܬܵܐ: ܘܐܸܡܲܪ.

³¹ ܩܘܼܡܘ ܣܲܩܘ ܥܲܠ ܥܲܡܵܐ ܟܲܗܝܼܢܵܐ ܕܝܵܬܹܒ̣ ܒܫܸܠܝܵܐ ܐܵܡܲܪ ܡܵܪܝܵܐ: ܕܠܵܐ ܬܲܪ̈ܥܹܐ ܘܠܵܐ ܣܘܼܟ̇ܪܹ̈ܐ ܠܹܗ: ܘܒܲܠܚܘܿܕ݂ܵܘܗܝ ܝܵܬܹܒ̣.

³² ܘܢܸܗܘ̈ܝܵܢ ܓܲܡ̈ܠܲܝܗܘܿܢ ܠܒܸܙܬ̣ܵܐ: ܘܣܘܿܓܲܐܬ̣ ܩܸܢܝܵܢܗܘܿܢ ܠܲܕ݂ܒ̣ܵܪܬܵܐ: ܘܐܸܕ݂ܪܸܐ ܐܸܢܘܿܢ ܒܟ݂ܠ ܪܘܼܚ ܒܹܝܬ̣ ܩܨܝܼܨܲܝ̈ ܦܲܐܬ̣ܵܐ: ܘܡ̣ܢ ܟܠܗܘܿܢ ܥܸܒ̣ܪ̈ܲܝܗܘܿܢ ܐܲܝܬܹ̇ܐ ܬܒ̣ܵܪܗܘܿܢ ܐܵܡܲܪ ܡܵܪܝܵܐ.

³³ ܘܬܸܗܘܹܐ ܚܵܨܘܿܪ ܡܲܥܡ̄ܪܵܐ ܠܝܵܪ̈ܘܿܪܹܐ: ܘܚܘܼܪܒܵܐ ܥܕܲܡܵܐ ܠܥܵܠܲܡ: ܠܵܐ ܢܸܬܸ̇ܒ̣ ܬܲܡܵܢ ܓܒܲܪ: ܘܠܵܐ ܢܸܥܡܲܪ ܬܲܡܵܢ ܒܲܪܢܵܫ.

³⁴ ܦܸܬ̣ܓ̣ܵܡܹܗ ܕܡܵܪܝܵܐ ܕܲܗܘ̤ܵܐ ܥܲܠ ܐܹܪܲܡܝܵܐ ܢܒ̣ܝܼܵܐ ܕܢܸܬ̣ܢܲܒܸ̇ܐ ܥܲܠ ܥܝܼܠܲܡ: ܒܪܹܫ ܡܲܠܟ̇ܘܼܬܹܗ ܕܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ.

³⁵ ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܗܵܐ ܬܵܒܲܪ ܐ̄ܢܵܐ ܩܸܫܬܹ̇ܗ ܕܥܝܼܠܲܡ ܪܹܫ ܓܲܢ̄ܒܵܪܘܼܬ̣ܗܘܿܢ.

³⁶ ܘܐܲܝܬܸ̇ܐ ܥܲܠ ܥܝܼܠܲܡ ܐܲܪܒܲܥ ܪ̈ܘܼܚܹܐ. ܡ̣ܢ ܐܲܪܒܲܥ ܙܵܘ̈ܝܵܬ̣ ܫܡܲܝܵܐ: ܘܐܹܒܲܕܲܪ ܐܸܢܘܿܢ ܒܟ݂ܠܗܹܝܢ ܪ̈ܘܼܚܵܬ̣ܵܐ ܗܵܠܹܝܢ: ܘܠܵܐ ܢܸܗܘܹܐ ܥܲܡܵܐ ܕܠܵܐ ܢܸܗܘܘܿܢ ܬܲܡܵܢ ܡܒܲܕ̇ܪܹ̈ܐ ܕܥܝܼܠܲܡ.

³⁷ ܘܐܸܬ̣ܒܲܪ ܠܥܝܼܠܲܡ ܩܕ݂ܵܡ ܒܥܸܠܕ̇ܒ̣ܵܒܲܝ̈ܗܘܿܢ: ܘܲܩܕ݂ܵܡ ܐܲܝܠܹܝܢ ܕܒ̣ܵܥܹ̇ܝܢ ܢܲܦ̮ܫܗܘܿܢ: ܘܐܲܝܬܸ̇ܐ ܥܠܲܝܗܘܿܢ ܒܝܼܫܬܵܐ: ܚܸܡܬ̣ܵܐ ܕܪܘܼܓ̣ܙܝ ܐܵܡܲܪ ܡܵܪܝܵܐ: ܘܐܹܫܲܕܲܪ ܒܗܘܿܢ ܚܲܪܒܵܐ ܥܕܲܡܵܐ ܕܐܹܓܲܡܲܪ ܐܸܢܘܿܢ.

³⁸ ܘܐܲܪܡܸܐ ܟܘܼܪܣܲܝ ܒܥܝܼܠܲܡ: ܘܐܵܘܒܸ̇ܕ݂ ܡ̣ܢ ܬܲܡܵܢ ܡܲܠ̈ܟܹ̇ܐ ܘܫܲܠܝܼܛܵܢܹ̈ܐ ܐܵܡܲܪ ܡܵܪܝܵܐ.

³⁹ ܘܒܲܐ̄ܚܪܵܝܑܬ̣ ܝܵܘ̈ܡܵܬ̣ܵܐ ܐܲܗܦܸܟ݂ ܫܒ̣ܝܼܬ̣ܵܗ̇ ܕܥܝܼܠܲܡ ܐܵܡܲܪ ܡܵܪܝܵܐ.

50

¹ ܦܸܬ̣ܓ̣ܵܡܵܐ ܕܐܸܡܲܪ ܡܵܪܝܵܐ ܥܲܠ ܒܵܒܹܠ ܘܥܲܠ ܐܲܪܥܵܐ ܕܟܲܠܕ݂ܵܝܹ̈ܐ: ܒܐܝܼܕܹܗ ܕܐܹܪܲܡܝܵܐ ܢܒ̣ܝܼܵܐ.

² ܚܵܘܵܘ ܒܥܲܡܡܹ̈ܐ ܘܐܲܫܡܲܥܘ: ܘܲܫܩܘܿܠܘ ܐܵܬ̤ܵܐ: ܐܲܫܡܲܥܘ ܘܠܵܐ ܬܸܬܲܟ݂ܣܘܼܢ: ܐܸܡܲܪܘ ܐܸܬ̇ܬܲܚܕܲܬ̤ ܒܵܒܹܠ: ܢܦܲܠ ܒܹܝܠ: ܘܐܲܚܦܲܪ ܡܪܘܿܕܲܟ݂: ܒܗܸܬ̣ܘ ܦܬܲܟ݂ܪܹ̈ܝܗ̇: ܘܐܸܬ̇ܬܲܒܲܪܘ ܓܠܝܼܦܹ̈ܝܗ̇.

³ ܡܸܛܠ ܕܲܣܠܸܩ ܥܠܹܝܗ̇ ܥܲܡܵܐ ܡ̣ܢ ܓܲܪܒ̇ܝܵܐ: ܗ̤ܘ ܢܸܥܒܸ̇ܕ݂ ܐܲܪܥܵܗ̇ ܠܚܘܼܪܒܵܐ: ܘܠܵܐ ܢܸܗܘܹܐ ܒܵܗ̇ ܕܝܵܬܹܒ̣: ܡ̣ܢ ܒܢܲܝ̈ܢܵܫܵܐ ܘܲܥܕܲܡܵܐ ܠܲܒ̣ܥܝܼܪܵܐ ܢܵܕ݂ܘ ܘܐܸܙܲܠܘ.

⁴ ܒܝܵܘ̈ܡܵܬ̣ܵܐ ܗܵܢܘܿܢ ܘܲܒ̣ܙܲܒ̣ܢܵܐ ܗܵܘ̇ ܐܵܡܲܪ ܡܵܪܝܵܐ: ܢܹܐܬ̣ܘܿܢ ܒܢܲܝ̈ ܝܼܣܪܵܝܹܠ ܗܸܢܘܿܢ ܘܲܒ̣ܢܲܝ̈ ܝܑܼܗܘܼܕ݂ܵܐ ܐܲܟ݂ܚ̄ܕ݂ܵܐ: ܡܗܲܠܟ݂ܝܼܢ ܘܒ̣ܵܟܹܝܢ ܘܲܠܡܵܪܝܵܐ ܐܲܠܵܗܗܘܿܢ ܒܵܥܹ̇ܝܢ.

⁵ ܥܲܠ ܐܘܼܪ̈ܚܵܬ̣ܵܗ̇ ܕܨܸܗܝܘܿܢ ܢܫܲܐܠܘܼܢ ܒܐܲܦܲܝ̈ܗܘܿܢ: ܬܵܘ ܢܸܬ̣ܠܵܘܸܐ ܠܡܵܪܝܵܐ ܩܝܵܡܵܐ ܕܲܠܥܵܠܲܡ ܕܠܵܐ ܡܸܬ̇ܛܥܸܐ.

⁶ ܐܲܝܟ݂ ܥܵـ̈ـܢܵܐ ܐܲܒ̇ܝܕ̇ܬܵܐ ܗܘ̤ܵܐ ܥܲܡܝ: ܪ̈ܵܥܵܘܵܬ̣ܗܘܿܢ ܐܲܛܥܝܼܘ ܐܸܢܘܿܢ: ܘܥܲܠ ܛܘܼܪܹ̈ܐ ܒܲܕܲܪܘ ܐܸܢܘܿܢ: ܡ̣ܢ ܛܘܼܪܹ̈ܐ ܠܪ̈ܵܡܵܬ̣ܵܐ ܐܸܙܲܠܘ: ܘܲܛܥܵܘ ܒܡܲܪܒܲܥܗܘܿܢ.

⁷ ܟܠ ܡܲܢ ܕܐܸܫܟܲܚ ܐܸܢܘܿܢ ܐܸܟܲܠ ܐܸܢܘܿܢ: ܘܲܒ̣ܥܸܠܕ̇ܒ̣ܵܒܲܝ̈ܗܘܿܢ ܐܵܡ̇ܪܝܼܢ ܠܵܐ ܢܸܫܒ̇ܘܿܩ ܐܸܢܘܿܢ: ܥܲܠ ܕܲܚܛܵܘ ܠܡܵܪܝܵܐ ܘܲܠܕܲܝܪܹܗ ܙܲܕ̇ܝܼܩܬܵܐ: ܘܣܲܒ̣ܪܵܐ ܕܐܲܒ̣ܵܗܲܝ̈ܗܘܿܢ: ܡܵܪܝܵܐ ܗ̄ܘ̣.

⁸ ܥܪܘܿܩܘ ܡ̣ܢ ܓܵܘ ܒܵܒܹܠ: ܘܡ̣ܢ ܐܲܪܥܵܐ ܕܟܲܠܕ݂ܵܝܹ̈ܐ ܦܘܿܩܘ: ܘܲܗܘ̤ܵܘ ܐܲܝܟ݂ ܬܲܝܫܹ̈ܐ ܩܕ݂ܵܡ ܥܵـ̈ـܢܵܐ.

⁹ ܡܸܛܠ ܕܗܵܐ ܡܕ݂ܝܼܠ ܐ̄ܢܵܐ ܘܡܲܣܸܩ ܐ̄ܢܵܐ ܥܲܠ ܒܵܒܹܠ: ܟܸܢܫܵܐ ܕܥܲܡܡܹ̈ܐ ܣܲܓ̇ܝܼ̈ܐܹܐ ܡ̣ܢ ܐܲܪܥܵܐ ܕܓܲܪܒ̇ܝܵܐ: ܘܢܸܣܬܲܕ݂ܪܘܼܢ ܥܠܹܝܗ̇: ܘܡ̣ܢ ܬܲܡܵܢ ܬܸܬ̇ܚܸܕ݂: ܓܹܐܪ̈ܲܝܗܘܿܢ ܐܲܝܟ݂ ܓܲܒ̣ܪܵܐ ܕܡܲܨܠܲܚ ܘܠܵܐ ܗܵܦܹ̇ܟ݂ ܣܪܝܼܩܵܐܝܼܬ̣.

¹⁰ ܘܬܸܗܘܹܐ ܐܲܪܥܵܐ ܕܟܲܠܕ݂ܵܝܹ̈ܐ ܠܒܸܙܬ̣ܵܐ: ܘܟ݂ܠܗܘܿܢ ܒܵܙܘܿܙܹܝ̈ܗ̇ ܢܸܣܒ̇ܥܘܼܢ ܐܵܡܲܪ ܡܵܪܝܵܐ.

¹¹ ܡܸܛܠ ܕܬܸܚܕ̇ܘܿܢ ܘܡܸܛܠ ܕܲܬ̇ܕ݂ܘܼܨܘܼܢ: ܪܹܫ ܝܵܪܬ̇ܘܼܬ̣ܝ: ܘܲܬ̇ܕ݂ܨܘܼܢ ܐܲܝܟ݂ ܥܸܓ̣̈ܠܹܐ ܕܦܸܛܡܵܐ: ܘܲܬ̣ܪܲܩܕ݂ܘܼܢ ܐܲܝܟ݂ ܕܸܟ݂ܪܹ̈ܐ ܕܥܵـ̈ـܢܵܐ.

¹² ܒܸܗܬ̇ܬ̤ ܐܸܡܟ݂ܘܿܢ ܛܵܒ̣: ܘܐܲܚܦܪܲܬ̤ ܝܵܠܹܕ̇ܟ݂ܘܿܢ: ܗܵܐ ܚܲܪܬ̣ܵܐ ܕܥܲܡ̈ܡܹܐ ܐܲܝܟ݂ ܡܲܕ݂ܒ̇ܪܵܐ ܚܲܪܒܵܐ ܘܨܵܕ݂ܝܵܐ.

¹³ ܡ̣ܢ ܪܘܼܓ̣ܙܹܗ ܕܡܵܪܝܵܐ ܠܵܐ ܬܸܬܸ̇ܒ̣: ܘܬܸܗܘܹܐ ܨܹܕ݂ܝܵܐ ܟܠܵܗ̇. ܘܟ݂ܠ ܕܢܸܥܒܲܪ ܥܲܠ ܒܵܒܹܠ: ܢܸܬ̣ܡܲܗ ܘܢܲܫܪܸܩ ܥܲܠ ܟܠܗܹܝܢ ܡܲܚ̈ܘܿܬ̣ܵܗ̇.

¹⁴ ܐܸܣܬܲܕ݂ܪܘ ܥܲܠ ܒܵܒܹܠ: ܟܠ ܐܲܝܠܹܝܢ ܕܝܵܕ݂ܥܝܼܢ ܠܡܸܫܕܵܐ ܒܩܸܫܬܵܐ ܫܕ݂ܵܘ ܥܠܹܝܗ̇: ܠܵܐ ܬܚܘܼܣܘܼܢ ܥܲܠ ܓܹܐܪܹ̈ܐ: ܡܸܛܠ ܕܲܠܡܵܪܝܵܐ ܚܛܵܬ̤.

¹⁵ ܝܲܒܸ̇ܒ̣ܘ ܥܠܹܝܗ̇ ܡ̣ܢ ܚܕ݂ܵܪܹ̈ܝܗ̇: ܝܸܗ̄ܒܲܬ̤ ܐܝܼܕ݂ܵܐ: ܢܦܲܠ̣ ܫܲܬ̣ܐ̱ܣܹ̈ܝܗ̇: ܐܸܣܬ̇ܚܸܦܘ ܫܘܼܪܹ̈ܝܗ̇: ܡܸܛܠ ܕܦܘܼܪܥܵܢܹܗ ܕܡܵܪܝܵܐ ܐܸܬ̣ܢܲܩܲܡܘ ܒܵܗ̇. ܐܲܟ݂ܡܵܐ ܕܥܸܒ̣ܕܲܬ̤ ܥܒܸܕ݂ܘ ܠܵܗ̇.

¹⁶ ܘܐܵܘܒܸ̇ܕ݂ܘ ܙܵܪܘܿܥܵܐ ܡ̣ܢ ܒܵܒܹܠ: ܘܐܵܚܹܕ݂ ܡܲܓ̇ܠܵܐ ܒܙܲܒ̣ܢܵܐ ܕܲܚܨܵܕ݂ܵܐ: ܡܸܛܠ ܚܲܪܒܵܐ ܕܡܲܕ݂ܘ̱ܝܵܐ: ܐ̄ܢܵܫ ܠܥܲܡܹܗ ܢܸܬ̣ܦ̄ܢܘܿܢ: ܘܲܓ̣ܒܲܪ ܠܐܲܪܥܹܗ ܢܸܥ̱ܪܩܘܼܢ.

¹⁷ ܢܸܩܝܵܐ ܛܵܥܝܼܬ̣ܵܐ ܝܼܣܪܵܝܹܠ: ܐܵܪ̈ܝܵܘܵܬ̣ܵܐ ܐܲܛܥܝܼܘ ܐܸܢܘܿܢ: ܩܲܕ݂ܡܵܝܵܐ ܐܲܟ݂ܠܹܗ ܡܲܠܟܵܐ ܕܐܵܬ̣ܘܿܪ: ܘܗܵܢܵܐ ܐ̄ܚܪܵܝܵܐ ܥܫܸܢ ܡܸܢܹܗ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ.

¹⁸ ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܦܵܩܹ̇ܕ݂ ܐ̄ܢܵܐ ܥܲܠ ܡܲܠܟܵܐ ܕܒ̣ܵܒܹܠ: ܘܥܲܠ ܐܲܪܥܹܗ: ܐܲܝܟ݂ ܕܦܸܩܕܹ̇ܬ̣ ܥܲܠ ܡܲܠܟܵܐ ܕܐܵܬ̣ܘܿܪ.

¹⁹ ܘܐܲܗܦܸܟ݂ ܠܝܼܣܪܵܝܹܠ ܠܕܲܝܪܗܘܿܢ: ܘܢܸܪܥܘܿܢ ܒܟܲܪܡ̄ܠܵܐ ܘܲܒ̣ܡܲܬ̣ܢܝܼܢ: ܘܲܒ̣ܛܘܼܪܵܐ ܕܐܲܦܪܹܝܡ: ܘܲܒ̣ܓܸܠܥܵܕ݂: ܘܬܸܣܒܲܥ ܢܲܦ̮ܫܗܘܿܢ.

²⁰ ܒܝܵܘ̈ܡܵܬ̣ܵܐ ܗܵܢܘܿܢ ܘܲܒ̣ܙܲܒ̣ܢܵܐ ܗܵܘ̇ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܢܸܬ̣ܒ̇ܥܹܐ ܥܵܘܼܠܹܗ ܕܝܼܣܪܵܝܹܠ ܘܠܲܝܬܵܘܗܝ: ܘܲܚܛܝܼܬܹܗ ܕܲܝܗܘܼܕ݂ܵܐ: ܘܠܵܐ ܬܸܫܬ̇ܟܲܚ: ܡܸܛܠ ܕܐܸܫܒ̇ܘܿܩ ܠܫܲܪܟܵܐ ܕܐܸܫܬ̇ܚܲܪܘ ܡܸܢܗܘܿܢ.

²¹ ܣܲܩܘ ܥܲܠ ܐܲܪܥܵܐ ܡܡܲܪܡ̄ܪܢܝܼܬ̣ܵܐ: ܣܲܩܘ ܥܠܹܝܗ̇ ܘܥܲܠ ܥܵܡܘܿܪܹ̈ܝܗ̇: ܐܸܬ̇ܬ̇ܥܝܼܪ ܚܲܪܒܵܐ ܘܲܚܪܘܿܒ̣ܝ ܐܸܢܘܿܢ ܐܵܡܲܪ ܡܵܪܝܵܐ: ܘܲܥܒܸܕ݂ܝ ܐܲܝܟ݂ ܕܦܲܩܸܕ̇ܬܹ̇ܟ݂ܝ.

²² ̣: ܩܵܠܵܐ ܕܲܩܪܵܒ̣ܵܐ ܒܐܲܪܥܵܐ ܘܲܬ̣ܒ̣ܵܪܵܐ ܪܲܒܵܐ.

²³ ܐܲܝܟܲܢܵܐ ܐܸܬ̇ܬܲܒ̣ܪܲܬ̤ ܘܐܸܫܬܲܩܠܲܬ̤ ܬܲܩܝܼܦܬܵܐ ܕܟ݂ܠܵܗ̇ ܐܲܪܥܵܐ ܐܲܝܟܲܢܵܐ ܗܘ̤ܵܬ̣ ܠܬܸܡܗܵܐ ܒܵܒܹܠ ܒܥܲܡܡܹ̈ܐ.

²⁴ ܐܸܬ̇ܬܲܩܠܲܬ̤ ܒܵܒܹܠ ܘܐܵܦ ܐܸܬ̇ܬܲܚܕܲܬ̤: ܘܠܵܐ ܝܸܕܥܲܬ̣ ܕܠܘܼܩܒܲܠ ܡܵܪܝܵܐ ܩܵܡܲܬ̤.

²⁵ ܦܬܲܚ̣ ܡܵܪܝܵܐ ܐܵܘܨܪܹܗ: ܘܐܲܦܸܩ ܡܵܐܢܹ̈ܐ ܕܪܘܼܓ̣ܙܹܗ: ܡܸܛܠ ܕܲܥܒ̣ܵܕ݂ܵܐ ܗ̄ܘ̣ ܠܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܒܐܲܪܥܵܐ ܕܟܲܠܕ݂ܵܝܹ̈ܐ.

²⁶ ܬܵܘ ܥܠܹܝܗ̇ ܡ̣ܢ ܚܕ݂ܵܪܹ̈ܝܗ̇: ܦܬܲܚܘ ܬܲܪ̈ܥܹܝܗ̇: ܒܨܵܐܘܼܗ̇ ܐܲܝܟ݂ ܥܲܪܛܸܠܵܝܬܵܐ: ܘܚܘܼܪܒ̇ܘܼܗ̇ ܘܠܵܐ ܬܸܫܒ̇ܩܘܼܢ ܠܵܗ̇ ܚܲܪܬ̣ܵܐ.

²⁷ ܚܘܼܪܒ̇ܘܼܗ̇ ܘܟ݂ܠܗܘܿܢ ܦܹܐܪܹ̈ܝܗ̇ ܢܸܫܬܲܠܡܘܼܢ ܠܩܸܛܠܵܐ: ܘܵܝ ܥܠܲܝܗܘܿܢ ܕܡܲܛܝܼ ܝܵܘܡܗܘܿܢ: ܙܲܒ̣ܢܵܐ ܕܦܘܼܩܕܵܢܗܘܿܢ.

²⁸ ܩܵܠܵܐ ܕܥܵܪܩܝܼܢ ܘܲܕ݂ܡܸܬ̣ܦܲܠܛܝܼܢ ܡ̣ܢ ܐܲܪܥܵܐ ܕܒ̣ܵܒܹܠ: ܠܲܡܚܵܘܵܝܘܼ ܒܨܸܗܝܘܿܢ ܢܩܲܡܬܹܗ ܕܡܵܪܝܵܐ: ܐܲܠܵܗܲܢ: ܘܲܢܩܲܡܬ̣ܵܐ ܕܗܲܝܟ̇ܠܹܗ.

²⁹ ܐܲܫܡܲܥܘ ܥܲܠ ܒܵܒܹܠ. ܣܲܓܝܼ̈ܐܹܐ: ܟܠ ܕܝܵܕ݂ܥܝܼܢ ܠܡܸܫܕܵܐ ܒܩܸܫܬܵܐ ܫܕ݂ܵܘ ܥܠܹܝܗ̇ ܡ̣ܢ ܚܕ݂ܵܪܹ̈ܝܗ̇: ܠܵܐ ܬܸܫܒ̇ܩܘܼܢ ܠܵܗ̇ ܚܲܪܬ̣ܵܐ: ܦܘܼܪܥܘܼܗ̇ ܐܲܝܟ݂ ܐܲܓ̣ܪܵܗ̇: ܘܐܲܝܟ݂ ܕܥܸܒ̣ܕܲܬ̤ ܥܒܸܕ݂ܘ ܠܵܗ̇: ܡܸܛܠ ܕܥܲܠ ܡܵܪܝܵܐ ܐܲܡ̱ܪܚܲܬ̤ ܘܥܲܠ ܩܲܕ̇ܝܼܫܵܐ ܕܝܼܣܪܵܝܹܠ.

³⁰ ܡܸܛܠ ܗܵܢܵܐ ܢܸܦܠܘܼܢ ܓܲܕ̇ܘܼ݁ܕܹܝܗ̇: ܒܓ̣ܵܘܵܗ̇: ܘܟ݂ܠܗܘܿܢ ܓܲܒ̣ܪܹ̈ܝܗ̇ ܩܪ̈ܲܒ̣ܬ̣ܵܢܹܐ ܢܸܫܬܲܬ̇ܩܘܼܢ ܒܝܵܘܡܵܐ ܗܵܘ̇.

³¹ ܗܵܐ ܐܸܢܵܐ ܥܠܲܝܟ ܡܲܪܵܚܵܐ ܐܵܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܡܸܛܠ ܕܲܡܛܵܐ ܝܵܘܡܵܟ݂: ܙܲܒ̣ܢܵܐ ܕܦܘܼܩܕܵܢܵܟ݂.

³² ܘܢܸܣܬ̇ܚܸܦ ܡܲܪܵܚܵܐ ܘܢܸܦܸܠ: ܘܠܲܝܬ̇ ܡܲܢ ܕܲܡܩܝܼܡ ܠܹܗ: ܘܐܸܫܒ̇ܘܿܩ ܢܘܼܪܵܐ ܒܩܘܼܪ̈ܝܹܗ: ܘܬܹܐܟ݂ܘܿܠ ܟܠܗܘܿܢ ܚܕ݂ܵܪܵܘܗܝ.

³³ ܗܵܟܲܢܵܐ ܐܵܡܲܪ ܡܵܪܝܵܐ ܨܒ̣ܵܐܘܼܬ̣: ܛܠܝܼܡܝܼܢ ܒܢܲܝ̈ ܝܼܣܪܵܝܹܠ ܘܲܒ̣ܢܲܝ̈ ܝܑܼܗܘܼܕ݂ܵܐ ܐܲܟ݂ܚ̄ܕ݂ܵܐ: ܘܟ݂ܠ ܕܲܫܒ̣ܵܘ ܐܸܢܘܿܢ ܚܲܡܣܸܢܘ ܒܗܘܿܢ: ܘܠܵܐ ܨܵܒܹ̇ܝܢ ܠܡܫܲܕܵܪܘܼ ܐܸܢܘܿܢ.

³⁴ ܦܵܪܘܿܩܗܘܿܢ ܬܲܩܝܼܦ ܗ̄ܘ̣: ܡܵܪܝܵܐ ܚܲܝܠܬ̣ܵܢܵܐ ܫܡܹܗ: ܡܕ݂ܵܢ ܢܕ݂ܘܼܢ ܕܝܼܢܗܘܿܢ: ܘܲܢܫܲܠܸܐ ܠܐܲܪܥܵܐ: ܘܢܲܪܓܸ̇ܙ ܠܟ݂ܠܗܘܿܢ ܥܵܡܘܿܪܹ̈ܝܗ̇ ܕܬܹܒܹܝܠ.

³⁵ ܚܲܪܒܵܐ ܥܲܠ ܟܲܠܕܵܝܹ̈ܐ ܐܵܡܲܪ ܡܵܪܝܵܐ: ܘܥܲܠ ܟܠܗܘܿܢ ܥܵܡܘܿܪܹ̈ܝܗ̇ ܕܒ̣ܵܒܹܠ: ܘܥܲܠ ܪܵܘܪ̈ܒ̣ܵܢܹܝܗ̇ ܘܥܲܠ ܚܲܟ̇ܝܼܡܹ̈ܝܗ̇.

³⁶ ܚܲܪܒܵܐ ܥܲܠ ܩܵܨܘܿܡܹܝ̈ܗ̇ ܘܢܸܬ̇ܛܲܪܦܘܼܢ: ܚܲܪܒܵܐ ܥܲܠ ܓܲܢ̄ܒܵܪܹ̈ܝܗ̇ ܘܢܸܬ̇ܬܲܒ̣ܪܘܼܢ.

³⁷ ܚܲܪܒܵܐ ܥܲܠ ܪ̈ܲܟ݂ܫܵܗ̇ ܘܥܲܠ ܡܲܪ̈ܟ̇ܒ̣ܵܬ̣ܵܗ̇: ܘܥܲܠ ܟܠܗܘܿܢ ܬܵܘܬܵܒܹ̈ܐ ܕܲܒ̣ܓ̣ܵܘܵܗ̇: ܘܢܸܗܘܘܿܢ ܐܲܝܟ݂ ܢܸܫܹ̈ܐ: ܚܲܪܒܵܐ ܥܲܠ ܓܲܙܹܝ̈ܗ̇ ܘܢܸܬ̣ܒܲܙܙܘܼܢ.

³⁸ ܚܲܪܒܵܐ ܥܲܠ ܡܹܝ̈ܗ̇ ܘܢܹܐܒ̣ܫܘܼܢ: ܡܸܛܠ ܕܐܲܪܥܵܐ ܗ̄ܝ̣ ܕܓ̣ܵܠܦܲܝ̈ ܨܲܠܡܹ̈ܐ: ܘܒܲܦܬܲܟ݂ܪܹ̈ܐ ܡܸܫܬܲܒ̣ܗ̱ܪܝܼܢ.

³⁹ ܡܸܛܠ ܗܵܢܵܐ ܢܸܥ̄ܡܪ̈ܵܢ ܒܵܗ̇ ܣܝܼܪܹ̈ܢܵܣ. ܘܢܸـ̈ـܬ̇ܒ̣ܵܢ ܒܵܗ̇ ܒ̈ܢܵܬ̣ ܢܲܥܵܡܹ̈ܐ: ܠܵܐ ܬܸܬܸ̇ܒ̣ ܠܥܵܠܲܡ: ܘܠܵܐ ܬܸܫܪܸܐ ܠܕ݂ܵܪܕܵܪ̈ܝܼܢ.

⁴⁰ ܘܬܸܗܘܹܐ ܐܲܝܟ݂ ܣܕ݂ܘܿܡ ܘܐܲܝܟ݂ ܥܵܡܘܿܪܵܐ: ܕܲܗܦܲܟ݂ ܐܸܢܹܝܢ ܐܲܠܵܗܵܐ ܘܲܠܥܵܡܘܿܪ̈ܲܝܗܹܝܢ: ܠܵܐ ܢܸܬܸ̇ܒ̣ ܬܲܡܵܢ ܓܒܲܪ: ܘܠܵܐ ܢܸܥܡܲܪ ܬܲܡܵܢ ܒܲܪܢܵܫ.

⁴¹ ܗܵܐ ܥܲܡܵܐ ܐܵܬܹ̇ܐ ܡ̣ܢ ܓܲܪܒ̇ܝܵܐ: ܥܲܡܵܐ ܪܲܒܵܐ: ܘܡܲܠ̈ܟܹ̇ܐ ܣܲܓ̇ܝܼ̈ܐܹܐ ܢܕ݂ܘܼܠܘܼܢ ܡ̣ܢ ܣܵܘܦܹܝ̈ܗ̇ ܕܐܲܪܥܵܐ.

⁴² ܒܩܸܫ̈ܬܵܬ̣ܵܐ ܘܲܒ̣ܢܲܝܙܟܹ̈ܐ ܡܙܲܝܢܝܼܢ: ܒܝܼܫܝܼܢ ܐܸܢܘܿܢ ܘܠܵܐ ܡܪܲܚܡܵܢܝܼܢ: ܩܵܠܗܘܿܢ ܐܲܝܟ݂ ܝܲܡܵܐ ܕܡܸܬ̣ܟ̇ܬܸܫ: ܘܥܲܠ ܪ̈ܲܟ݂ܫܵܐ ܪܟ݂ܝܼܒ̣ܝܼܢ: ܘܲܡܛܲܝܒ̣ܝܼܢ ܐܲܝܟ݂ ܓܲܢ̄ܒܵܪܹ̈ܐ ܠܲܩܪܵܒ̣ܵܐ: ܥܠܲܝܟ̇ܝ ܒܲܪܬ̣ ܒܵܒܹܠ.

⁴³ ܫܡܲܥ ܡܲܠܟܵܐ ܕܒ̣ܵܒܹܠ ܫܸܡ̱ܥܗܘܿܢ ܘܐܸܬ̣ܪܲܫܲܠ ܐܝܼܕ݂ܵܘ̈ܗܝ: ܘܥܵܩܬ̣ܵܐ ܐܸܚܲܕܬܹܗ ܘܚܸܒ̣ܠܹ̈ܐ ܐܲܝܟ݂ ܕܝܵܠܹܕ̇ܬ݂ܵܐ: ܗܵܐ ܐܲܝܟ݂ ܐܲܪܝܵܐ ܢܸܣܲܩ ܡ̣ܢ ܥܘܼܫܢܵܐ ܕܝܘܿܪܕ̇ܢܵܢ ܠܕܲܝܪܵܐ ܕܐܵܬ̣ܵܢ: ܡܸܛܠ ܕܒܲܥܓܲܠ ܐܸܪܕ̇ܘܿܦ ܐܸܢܘܿܢ ܡܸܢܵܗ̇: ܘܓܲܕ̇ܘܼ̈ܕܹܐ ܐܸܦܩܘܿܕ݂ ܥܠܹܝܗ̇: ܡܲܢܘܼ ܓܹܝܪ ܐܲܟ݂ܘܵܬ̣ܝ: ܐܵܘ ܡܲܢܘܼ ܕܢܸܬ̇ܛܪܸܐ ܒܝܼ: ܐܵܘ ܐܲܝܢܵܘ ܪܵܥܝܵܐ ܕܲܢܩܘܼܡ ܠܘܼܩܒܲܠܝ.

⁴⁴ ܡܸܛܠ ܗܵܢܵܐ ܫܡܲܥܘ ܬܲܪܥܝܼܬܹܗ ܕܡܵܪܝܵܐ ܕܐܹܬ̣ܪܲܥܝܼ ܥܲܠ ܒܵܒܹܠ: ܘܡܲܚܫܲܒ̣ܬܹܗ ܕܐܸܬ̣ܚܲܫܲܒ̣ ܥܲܠ ܐܲܪܥܵܐ ܕܟܲܠܕ݂ܵܝܹ̈ܐ: ܕܢܸܓܪܘܼܢ ܐܸܢܘܿܢ ܒܨܝܼܪܹ̈ܐ ܕܥܵـ̈ـܢܵܐ: ܘܢܲܨܕ̇ܘܼܢ ܥܠܲܝܗܘܿܢ ܕܲܝܪܗܘܿܢ.

⁴⁵ ܡ̣ܢ ܩܵܠܵܐ ܕܐܸܬ̇ܬܲܚܕܲܬ̤ ܒܵܒܹܠ ܙܵܥܲܬ̣ ܐܲܪܥܵܐ: ܘܝܑܼܠܠܬܵܗ̇ ܒܥܲܡܡܹ̈ܐ ܐܸܫܬܲܡܥܲܬ݀.

51

¹ ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܗܵܐ ܡܕ݂ܝܼܠ ܐ̄ܢܵܐ ܥܲܠ ܒܵܒܹܠ ܘܥܲܠ ܥܵܡܘܿܪܹ̈ܝܗ̇: ܠܸܒܵܐ ܩܲܫܝܵܐ ܘܪܘܼܚܵܐ ܡܚܲܒ̇ܠܵܢܵܐ.

² ܘܐܹܫܲܕܲܪ ܥܲܠ ܒܵܒܹܠ ܒܵܙܘܿܙܹ̈ܐ: ܘܢܸܒ̇ܙܘܼܢܵܗ̇ ܘܲܢܕ݂ܘܼܫܘܼܢ ܐܲܪܥܵܗ̇: ܘܢܸܬ̣ܟܲܢܫܘܼܢ ܥܠܹܝܗ̇ ܡ̣ܢ ܚܕ݂ܵܪܹܝܗ̇ ܒܝܵܘܡܵܐ ܕܒ̣ܝܼܫܬܵܐ.

³ ܠܵܐ ܢܸܫܠܹܐ ܡܲܢ ܕܫܵܕܹܐ ܒܩܸܫܬܵܐ: ܘܠܵܐ ܢܸܫܠܲܚ ܫܸܪܝܵܢܹܗ ܩܪܲܒ̣ܬ̣ܵܢܵܐ: ܘܠܵܐ ܬܚܘܼܣܘܼܢ ܥܲܠ ܓܲܕ̇ܘܼ̈ܕܹܝܗ̇: ܚܪܘܿܒ̣ܘ ܟܠܹܗ ܚܲܝܠܵܗ̇.

⁴ ܘܢܸܦܠܘܿܢ ܩܛܝܼ̈ܠܹܐ ܒܐܲܪܥܵܐ ܕܟܲܠܕܵܝܹ̈ܐ: ܘܕܲܡܡܲܚܹܝܢ ܒܫܘܼܩܹ̈ܝܗ̇.

⁵ ܡܸܛܠ ܕܠܵܐ ܐܲܪܡܸܠܘ ܝܑܼܣܪܵܝܹܠ ܘܲܝܗܘܼܕ݂ܵܐ ܡ̣ܢ ܐܲܠܵܗܗܘܿܢ: ܡ̣ܢ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܗܘܿܢ: ܡܸܛܠ ܕܐܲܪ̱ܥܗܘܿܢ ܐܸܬ̣ܡܲܠܝܲܬ̤ ܥܵܘܼܠܵܐ ܩܕ݂ܵܡ ܩܲܕ̇ܝܼܫܵܐ ܕܝܼܣܪܵܝܹܠ.

⁶ ܥܪܘܿܩܘ ܡ̣ܢ ܓܵܘ ܒܵܒܹܠ: ܘܦܲܨܵܘ ܓܒܲܪ ܢܲܦ̮ܫܹܗ: ܠܵܐ ܬܸܒ̣ܠ̱ܥܘܼܢ ܒܲܚܛܵܗܹܝ̈ܗ̇: ܡܸܛܠ ܕܙܲܒ̣ܢܵܐ ܗ̄ܘ̣ ܕܦܘܼܪܥܵܢܵܗ̇ ܡ̣ܢ ܡܵܪܝܵܐ: ܐܲܝܟ݂ ܥܲܒ̣ܕܹܝܗ̇ ܗ̄ܘ̣ ܦܵܪܲܥ ܠܵܗ̇.

⁷ ܟܵܣܵܐ ܕܕܲܗܒ̣ܵܐ ܒܵܒܹܠ ܒܐܝܼܕܹܗ ܕܡܵܪܝܵܐ: ܕܡܲܪܘܸܐ ܠܟ݂ܠܵܗ̇ ܐܲܪܥܵܐ ܡ̣ܢ ܚܲܡܪܹܗ: ܐܸܫܬ̇ܝܼܘ ܟܠܗܘܿܢ ܥܲܡܡܹ̈ܐ ܘܐܸܬ̇ܛܲܪܲܦܘ.

⁸ ܡ̣ܢ ܫܸܠܝܵܐ ܢܸܦܠܲܬ̣ ܒܵܒܹܠ ܘܐܸܬ̣ܒܲܙܲܬ̤: ܐܲܝܠܸܠܘ ܥܠܹܝܗ̇: ܣܲܒ̣ܘ ܣܲܡܡܵܢܹ̈ܐ ܠܟܹܐܒܹܝ̈ܗ̇: ܛܵܟ݂ ܬܸܬ̣ܐܲܣܸܐ.

⁹ ܐܲܣܝܼܢܵܗ̇ ܠܒ̣ܵܒܹܠ ܘܠܵܐ ܐܸܬ̣ܐܲܣܝܲܬ̤: ܢܸܫܒ̇ܩܝܼܗ̇ ܘܢܹܐܙܲܠ ܓܒܲܪ ܠܐܲܪܥܹܗ: ܡܸܛܠ ܕܲܩ̣ܪܸܒ̣ ܥܕܲܡܵܐ ܠܲܫܡܲܝܵܐ ܕܝܼܢܵܗ̇: ܘܐܸܬ̇ܬܪܝܼܡ ܥܕܲܡܵܐ ܠܲܥܢܵܢܹ̈ܐ.

¹⁰ ܐܲܦܸܩ ܡܵܪܝܵܐ ܙܵܟ݂ܘܼܬܲܢ: ܬܵܘ ܢܸܫܬܲܥܸܐ ܒܨܸܗܝܘܿܢ ܥܒ̣ܵܕ݂ܵܘ̈ܗܝ ܕܡܵܪܝܵܐ ܐܲܠܵܗܲܢ.

¹¹ ܟܲܢܸܫܘ ܫܵܠ̈ܛܹܐ: ܡܠܵܘ ܓܹܐܪܹ̈ܐ: ܐܲܕ݂ܝܼܥ ܡܵܪܝܵܐ ܪܘܼܚܵܐ ܕܡܲܠܟܵܐ ܕܡܵܕܲܝ: ܡܸܛܠ ܕܥܲܠ ܒܵܒܹܠ ܬܲܪܥܝܼܬܹܗ ܠܲܡܚܲܒܵܠܘܼܬ̣ܵܗ̇: ܡܸܛܠ ܕܦܘܼܪܥܵܢܹܗ ܗ̄ܘ̣ ܕܡܵܪܝܵܐ: ܘܲܬ̣ܒܲܥܬ̣ܵܐ ܕܗܲܝܟ̇ܠܹܗ.

¹² ܥܲܠ ܫܘܼܪܹ̈ܝܗ̇ ܕܒܵܒܹܠ ܫܩܘܿܠܘ ܐܵܬ̤ܵܐ: ܐܲܩܝܼܡܘ ܡܲܛܲܪܬܵܐ ܘܛܲܒ̇ܥܘܼܗ̇ ܒܡܲـ̈ـܝܵܐ: ܡܸܛܠ ܕܲܥܒܲܕ݂ ܡܵܪܝܵܐ ܡܸܕܸ̇ܡ ܕܐܸܬ̣ܪܲܥܝܼ ܒܒ̣ܵܒܹܠ.

¹³ ܕܫܲܪܝܵܐ ܗ̄ܘ̣ܵܬ̣ ܒܡܲـ̈ـܝܵܐ ܣܲܓ̇ܝܼ̈ܐܹܐ: ܣܲܓ̇ܝܼܐܝܼܢ ܓܲܙܲܝ̈ܟ̇ܝ: ܡܸܛܵܐ ܩܸܨܹܟ݂ܝ ܘܥܸܫܢܲܬ̤ ܡܚܘܿܬܹܟ݂ܝ.

¹⁴ ܝܑܼܡܵܐ ܡܵܪܝܵܐ ܚܲܝܠܬ̣ܵܢܵܐ ܒܢܲܦ̮ܫܹܗ: ܕܐܸܡܠܹܝܟ݂ܝ ܐ̄ܢܵܫܵܐ ܐܲܝܟ݂ ܩܲܡܨܵܐ: ܘܢܸܥܢܘܿܢ ܥܠܲܝܟ̇ܝ ܘܢܹܐܡܪܘܼܢ: ܗܹܘܵܝ ܗܹܘܵܝ.

¹⁵ ܡܵܪܝܵܐ ܥܒܲܕ݂ ܐܲܪܥܵܐ ܒܚܲܝܠܹܗ: ܘܐܲܬ̣ܩܸܢ ܬܹܒܹܝܠ ܒܚܸܟ݂ܡ̱ܬܹܗ: ܘܲܒ̣ܣܘܼܟܵܠܹܗ ܡ̣ܬܲܚ ܫܡܲܝܵܐ.

¹⁶ ܝܵܗܹ̇ܒ̣ ܩܵܠܵܐ ܕܲܪܓ̣ܘܼܫܝܵܐ ܕܡܲـ̈ـܝܵܐ ܒܲܫܡܲܝܵܐ: ܡܲܣܸܩ ܥܢܵܢܹ̈ܐ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ: ܘܒܲܪ̈ܩܹܐ ܠܡܸܛܪܵܐ ܥܒܲܕ: ܡܲܦܸܩ ܪ̈ܘܼܚܹܐ ܡ̣ܢ ܐܵܘܨܪ̈ܵܘܗܝ.

¹⁷ ܫܛܵܐ ܟܠ ܒܲܪܢܵܫ ܡ̣ܢ ܝܑܼܕܲܥܬ̣ܵܐ: ܒܗܸܬ̣ܘ ܟܠ ܩܲܝܢܵܝܹ̈ܐ ܡ̣ܢ ܓܠܝܼܦܹ̈ܐ ܕܲܥ̣ܒܲܕ݂ܘ: ܡܸܛܠ ܕܕܲܓܵܠܘܼܬ̣ܵܐ ܢܣܲܟ݂ܘ ܘܠܲܝܬ̇ ܒܗܘܿܢ ܪܘܼܚܵܐ.

¹⁸ ܠܵܐ ܡܸܕܸ̇ܡ ܐܸܢܘܿܢ: ܘܲܥܒ̣ܵܕܹܐ ܐܸܢܘܿܢ ܫܵܛܲـ̈ـܝܵܐ: ܒܙܲܒ̣ܢܵܐ ܕܡܸܬ̣ܦܲܩܕ̇ܝܼܢ ܢܹܐܒ̣ܕ̇ܘܼܢ.

¹⁹ ܠܵܐ ܐܲܝܟ݂ ܕܗܵܠܹܝܢ ܡܢܵܬܹܗ ܕܝܲܥܩܘܿܒ̣: ܐܸܠܵܐ ܡܲܢ ܕܲܒ̣ܪܵܐ ܟܠ ܗ̤ܘܝܘܼ ܡܢܵܬ̣ܗܘܿܢ: ܘܫܲܒ̣ܛܵܐ ܕܝܵܪܬ̇ܘܼܬ̣ܗܘܿܢ ܡܵܪܝܵܐ ܚܲܝܠܬ̣ܵܢܵܐ ܫܡܹܗ.

²⁰ ܛܲܝܸܒ̣ܘ ܠܝܼ ܡܵܐܢܹ̈ܐ ܕܲܩܪܵܒ̣ܵܐ: ܐܹܒܲܕܲܪ ܒܹܟ݂ܝ ܥܲܡܡܹ̈ܐ: ܘܐܹܚܲܒܸ̇ܠ ܒܹܟ݂ܝ ܡܲܠ̈ܟ̇ܘܵܬ̣ܵܐ.

²¹ ܘܐܹܒܲܕܲܪ ܒܹܟ݂ܝ ܪ̈ܲܟ݂ܫܵܐ ܘܪ̈ܵܟ݂ܒܲܝܗܘܿܢ.

²² ܘܐܹܒܲܕܲܪ ܒܹܟ݂ܝ ܡܲܪ̈ܟ̇ܒ̣ܵܬ̣ܵܐ ܘܪ̈ܵܟ݂ܒܲܝܗܹܝܢ: ܘܐܹܒܲܕܲܪ ܒܹܟ݂ܝ ܓܲܒ̣ܪܹ̈ܐ ܘܢܸܫܹ̈ܐ: ܘܐܹܒܲܕܲܪ ܒܹܟ݂ܝ ܣܵܒܹ̈ܐ ܘܲܥܠܲܝܡܹ̈ܐ: ܘܐܹܒܲܕܲܪ ܒܹܟ݂ܝ ܓܲܕ̇ܘܼ̈ܕܹܐ ܘܲܒ̣ܬ̣ܘܼܠܵܬ̣ܵܐ.

²³ ܘܐܹܒܲܕܲܪ ܒܹܟ݂ܝ ܪܵܥܝܵܐ ܘܲܓ̣ܙܵܪܹܗ: ܘܐܹܒܲܕܲܪ ܒܹܟ݂ܝ ܐܲܟܵܪܵܐ ܘܦܲܕܵܢܹܗ: ܘܐܹܒܲܕܲܪ ܒܹܟ݂ܝ ܛܪ̈ܘܿܢܹܐ ܘܫܲܠܝܼܛܵܢܹ̈ܐ.

²⁴ ܘܐܸܦܪܘܿܥ ܠܒ̣ܵܒܹܠ ܘܲܠܟ݂ܠܗܘܿܢ ܥܵܡܘܿܪܹ̈ܐ ܕܟܲܠܕܵܝܹ̈ܐ: ܟܠܵܗ̇ ܒܝܼܫܬܵܐ ܕܲܥܒܲܕ݂ܘ ܒܨܸܗܝܘܿܢ ܠܥܹܢܲܝܟ̇ܘܿܢ ܐܵܡܲܪ ܡܵܪܝܵܐ.

²⁵ ܗܵܐ ܐܸܢܵܐ ܥܠܲܝܟ ܛܘܼܪܵܐ ܡܚܲܒ̇ܠܵܢܵܐ ܐܵܡܲܪ ܡܵܪܝܵܐ: ܕܚܲܒܸ̇ܠ ܠܟ݂ܠܵܗ̇ ܐܲܪܥܵܐ: ܘܐܲܪܝܼܡ ܐܝܼܕ݂ܝ ܥܠܲܝܟ: ܘܐܸܩܠܵܟ݂ ܡ̣ܢ ܟܹܐܦܵܐ: ܘܐܸܥܒ̇ܕ݂ܵܟ݂ ܠܛܘܼܪܵܐ ܝܲܩܝܼܕ݂ܵܐ.

²⁶ ܘܠܵܐ ܢܸܣܒ̣ܘܼܢ ܡܸܢܵܟ݂ ܟܹܐܦܵܐ ܠܙܵܘܝܼܬ̣ܵܐ: ܘܟܹܐܦܵܐ ܠܫܲܬ̣ܐ̱ܣܬ̣ܵܐ: ܐܸܠܵܐ ܠܚܘܼܪܒܵܐ ܠܥܵܠܲܡ ܬܸܗܘܹܐ ܐܵܡܲܪ ܡܵܪܝܵܐ.

²⁷ ܫܩܘܿܠܘܿ ܐܵܬ̤ܵܐ ܒܐܲܪܥܵܐ: ܩܪܵܘ ܫܝܼܦܘܿܪܵܐ ܒܥܲܡܡܹ̈ܐ: ܛܲܝܸܒ̣ܘ ܥܠܹܝܗ̇ ܥܲܡܡܹ̈ܐ: ܐܲܫܡܲܥܘ ܥܠܹܝܗ̇ ܡܲܠ̈ܟ̇ܘܵܬ̣ܵܐ ܕܐܲܪܕܲܛ: ܘܕܲܐܪܡܸܢܝ: ܘܕܲܐܫܟ̇ܢܲܙ: ܦܩܘܿܕ݂ܘ ܥܠܹܝܗ̇ ܐܲܒ̣ܕܵܢܵܐ: ܐܲܣܸܩܘ ܪ̈ܲܟ݂ܫܵܐ ܐܲܝܟ݂ ܙܵܚܠܵܐ.

²⁸ ܛܲܝܸܒ̣ܘ ܥܠܹܝܗ̇ ܥܲܡܡܹ̈ܐ: ܠܡܲܠܟܵܐ ܕܡܵܕܲܝ ܘܲܠܚܹܐܪ̈ܵܘܗܝ: ܘܲܠܟ݂ܠܗܘܿܢ ܫܲܠܝܼܛܵܢܵܘ̈ܗܝ.

²⁹ ܘܲܬ̣ܙܘܼܥ ܐܲܪܥܵܐ ܘܬܸܬ̣ܘܲܪ: ܡܸܛܠ ܕܩܵܡܲܬ̤ ܥܲܠ ܒܵܒܹܠ ܡܲܚܫܲܒ̣ܬܹܗ: ܕܡܵܪܝܵܐ: ܠܡܲܚܪܵܒ̣ܘܼ ܐܲܪܥܵܐ ܕܒ̣ܵܒܹܠ ܡ̣ܢ ܒܠܲܝ ܕܝܵܬܹܒ̣.

³⁰ ܣܵܦܘ ܓܲܒ̣ܪܹ̈ܐ ܕܒܵܒܹܠ ܠܡܸܬ̣ܟܲܬܵܫܘܼ ܥܲܡ ܝܵܬ̣ܒܲܝ̈ ܡܸܨܪܘܿܬ̣: ܐܸܬ̇ܬܲܒ̣ܪܲܬ̤ ܓܲܢ̄ܒܵܪܘܼܬ̣ܗܘܿܢ ܘܲܗܘ̤ܵܘ ܐܲܝܟ݂ ܢܸܫܹ̈ܐ: ܥܩܘܿܪܘ ܡܲܫܟ̇ܢܹ̈ܝܗ̇: ܬܲܒܲܪܘ ܬܲܪ̈ܥܹܝܗ̇.

³¹ ܕܪܵܗܹ̇ܛ ܠܘܼܩܒܲܠ ܕܪܵܗܹ̇ܛ ܢܸܪܗܲܛ: ܘܕܲܡܚܵܘܹܐ ܠܘܼܩܒܲܠ ܕܲܡܚܵܘܹܐ: ܠܲܡܚܵܘܵܝܘܼ ܠܡܲܠܟܵܐ ܕܒ̣ܵܒܹܠ: ܕܐܸܬ̇ܬܲܚܕܲܬ̤ ܡܕ݂ܝܼܢ̄ܬܹܗ ܡ̣ܢ ܚܕ݂ܵܪܹ̈ܝܗ̇.

³² ܘܡܲܥܒ̇ܪ̈ܵܬ̣ܵܗ̇ ܐܸܬ̇ܬ̇ܚܸܕ݂: ܘܐܵܓ̣ܡܹ̈ܝܗ̇ ܝܑܼܩܸܕ݂ܘ ܒܢܘܼܪܵܐ. ܘܟ݂ܠܗܘܿܢ ܓܲܒ̣ܪܹ̈ܝܗ̇ ܩܪ̈ܲܒ̣ܬ̣ܵܢܹܐ ܐܸܬ̇ܕܲܠܲܚܘ.

³³ ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܒܲܪܬ̣ ܒܵܒܹܠ ܐܲܝܟ݂ ܐܸܕ̇ܪܵܐ ܕܲܡ̣ܛܵܐ ܙܒܲܢ ܕܪܵܟ݂ܬܹ̇ܗ: ܥܲܕ݂ ܩܲܠܝܼܠ ܘܲܡ̣ܛܵܐ ܩܛܵܦܵܗ̇.

³⁴ ܐܸܡܪܲܬ̤ ܐܘܿܪܸܫܠܸܡ: ܐܲܟ݂ܠܲܢܝ ܘܒܲܙܲܢܝ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܐܲܩܝܼܡܲܢܝ ܐܲܝܟ݂ ܡܵܐܢܵܐ ܣܪܝܼܩܵܐ: ܒܲܠܥܲܢܝ ܐܲܝܟ݂ ܬܲܢܝܼܢܵܐ: ܡ̣ܠܵܐ ܟܲܪܣܹܗ ܡ̣ܢ ܥܘܼܕܵܢܝ ܘܐܲܛܥ̱ܝܲܢܝ.

³⁵ ܒܸܙܲܬ̣ܝ ܘܩܸܢܝܵܢܝ ܠܒ̣ܵܒܹܠ ܐܸܫܬ̇ܒ̣ܝܼܘ: ܘܕܹܡܝ ܥܲܠ ܥܵܡܘܿܪܹ̈ܐ ܕܟܲܠܕܵܝܹ̈ܐ ܬܹܐܡܲܪ ܐܘܿܪܸܫܠܸܡ.

³⁶ ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܕܵܐܹ̇ܢ ܐ̄ܢܵܐ ܕܝܼܢܹܟ݂ܝ: ܘܡܸܬ̣ܢܲܩܲܡ ܐ̄ܢܵܐ ܢܩܲܡܬܹܟ݂ܝ: ܘܐܲܚܪܸܒ̣ ܝܲܡܵܐ ܕܒ̣ܵܒܹܠ: ܘܐܵܘܒܸ̇ܫ ܡܲܒ̇ܘܼܥܵܘ̈ܗܝ.

³⁷ ܘܬܸܗܘܹܐ ܒܵܒܹܠ ܚܲܪܒ̇ܬ̣ܐ: ܡܲܥܡ̄ܪܵܐ ܠܝܵܪܘܿܪܹ̈ܐ: ܘܲܠܬܸܡܗܵܐ ܘܲܠܡܲܫܪܘܿܩܝܼܬ̣ܵܐ ܡ̣ܢ ܒܠܲܝ ܕܝܵܬܹܒ̣ ܒܵܗ̇.

³⁸ ܐܲܝܟ݂ ܐܲܪ̈ܝܵܘܵܬ̣ܵܐ ܢܢܲܗܡܘܼܢ: ܘܢܸܥܪܘܿܢ ܐܲܝܟ݂ ܓܪ̈ܲܝܵܐ ܕܐܲܪ̈ܝܵܘܵܬ̣ܵܐ.

³⁹ ܒܚܸܡܬ̣ܵܐ ܐܸܥܒܸ̇ܕ݂ ܡܲܫܬܲܝܗܘܿܢ: ܘܐܲܪܘܸܐ ܐܸܢܘܿܢ ܘܢܸܬ̇ܬܲܒ̣ܪܘܿܢ: ܘܢܸܕ݂ܡ̱ܟ݂ܘܿܢ ܫܸܢܬ̣ܵܐ ܠܥܵܠܲܡ: ܘܠܵܐ ܢܸܬ̇ܬ̇ܥܝܼܪܘܿܢ ܐܵܡܲܪ ܡܵܪܝܵܐ.

⁴⁰ ܘܐܲܫܠܸܡ ܐܸܢܘܿܢ ܐܲܝܟ݂ ܡܦܲܛܡܹ̈ܐ ܠܩܸܛܠܵܐ: ܘܐܲܝܟ݂ ܕܸܟ݂ܪܹ̈ܐ ܘܲܓ̣̈ܕܲܝܵܐ ܠܢܸܟ݂ܣܬܵܐ.

⁴¹ ܐܲܝܟܲܢܵܐ ܐܸܬ̇ܬܲܚܕܲܬ̤ ܐܵܪܹܫܟ݂ܵܝܬܵܐ ܬܸܫܒ̇ܘܿܚܬܵܐ ܕܟ݂ܠܵܗ̇ ܐܲܪܥܵܐ: ܐܲܝܟܲܢܵܐ ܗܘ̤ܵܬ̣ ܠܬܹܡܗܵܐ ܒܵܒܹܠ ܒܥܲܡܡܹ̈ܐ.

⁴² ܣܠܸܩ ܥܲܠ ܒܵܒܹܠ ܝܲܡܵܐ ܘܲܒ̣ܣܘܿܓ̣ܵܐܐ ܕܓܲܠܠܵܘ̈ܗܝ ܐܸܬ̣ܟܲܣܝܲܬ̤.

⁴³ ܗ̤ܘܲܝ̈ ܩܘܼܪ̈ܝܵܗ̇ ܠܬܸܡܗܵܐ: ܐܲܝܟ݂ ܐܲܪܥܵܐ ܚܲܪܒ̇ܬ̣ܵܐ ܘܨܵܕ݂ܝܼܬ̣ܵܐ: ܠܵܐ ܢܸܬܸ̇ܒ̣ ܒܗܹܝܢ ܓܒܲܪ: ܘܠܵܐ ܢܸܥܡܲܪ ܒܗܹܝܢ ܒܲܪܢܵܫ.

⁴⁴ ܘܐܸܦܩܘܿܕ݂ ܥܲܠ ܒܹܝܠ ܒܒ̣ܵܒܹܠ: ܘܐܲܦܸܩ ܙܵܘܬ̇ܪ̈ܵܘܗܝ ܡ̣ܢ ܦܘܼܡܹܗ: ܘܠܵܐ ܢܸܕ݂ܚ̄ܠܘܼܢ ܠܹܗ ܬܘܼܒ̣ ܥܲܡܡܹ̈ܐ: ܘܐܵܦ ܫܘܼܪܹ̈ܝܗ̇ ܕܒ̣ܵܒܹܠ ܪ̈ܘܝܼܚܹܐ ܢܸܦܠܘܼܢ.

⁴⁵ ܦܘܿܩܘ ܡ̣ܢ ܓܵܘܵܗ̇ ܥܲܡܝ: ܘܦܲܠܸܛܘ ܓܒܲܪ ܢܲܦ̮ܫܹܗ: ܡ̣ܢ ܚܸܡܬ̣ܵܐ ܕܪܘܼܓ̣ܙܹܗ ܕܡܵܪܝܵܐ.

⁴⁶ ܕܲܠܡܵܐ ܢܸܬ̇ܬ̇ܒܲܪ ܠܸܒ̇ܟ݂ܘܿܢ: ܘܬܸܕ݂ܚ̄ܠܘܼܢ ܡ̣ܢ ܛܸܒܵܐ ܕܡܸܫܬ̇ܡܲܥ ܒܐܲܪܥܵܐ: ܘܢܹܐܬܹܐ ܒܵܗ̇ ܒܫܲܢ̄ܬܵܐ ܗܵܝ̇ ܛܸܒܵܐ: ܘܒ̣ܵܬ̣ܪܵܗ̇ ܕܫܲܢ̄ܬܵܐ ܛܸܒܵܐ ܐ̄ܚܪܹܢܵܐ: ܘܢܸܗܘܹܐ ܚܛܘܼܦܝܵܐ ܒܐܲܪܥܵܐ: ܘܲܢܩܘܼܡ ܫܲܠܝܼܛܵܐ ܥܲܠ ܫܲܠܝܼܛܵܐ.

⁴⁷ ܡܸܛܠ ܗܵܢܵܐ ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܐܵܡܲܪ ܡܵܪܝܵܐ: ܘܐܸܦܩܘܿܕ݂ ܥܲܠ ܓܠܝܼܦܹ̈ܝܗ̇ ܕܒ̣ܵܒܹܠ: ܘܟ݂ܠܵܗ̇ ܐܲܪܥܵܐ ܬܹܐܒܲܕ݂: ܘܟ݂ܠܗܘܿܢ ܩܛܝܼܠܹܝ̈ܗ̇ ܢܸܦܠܘܿܢ ܒܓ̣ܵܘܵܗ̇.

⁴⁸ ܘܢܸܚܕ̇ܘܿܢ ܥܲܠ ܒܵܒܹܠ ܫܡܲܝܵܐ ܘܐܲܪܥܵܐ ܘܟ݂ܠ ܕܲܒ̣ܗܘܿܢ: ܡܸܛܠ ܕܡ̣ܢ ܓܲܪܒ̇ܝܵܐ ܢܹܐܬ̣ܘܿܢ ܥܠܹܝܗ̇: ܒܵܙܘܿܙܹ̈ܐ ܐܵܡܲܪ ܡܵܪܝܵܐ.

⁴⁹ ܘܐܵܦ ܒܒ̣ܵܒܹܠ ܢܸܦܠܘܿܢ ܩܛܝܼ̈ܠܹܐ ܕܝܼܣܪܵܝܹܠ: ܘܐܵܦ ܡ̣ܢ ܒܵܒܹܠ ܢܸܦܠܘܿܢ ܩܛܝܼ̈ܠܹܐ ܒܟ݂ܠܵܗ̇ ܐܲܪܥܵܐ.

⁵⁰ ܐܲܝܠܹܝܢ ܕܐܸܬ̣ܦܲܠܲܛܘ ܡ̣ܢ ܚܲܪܒܵܐ: ܙܸܠܘ ܘܠܵܐ ܬܩܘܼܡܘܼܢ: ܐܸܬ̇ܕܲܟ݂ܪܘ ܡ̣ܢ ܪܘܼܚܩܵܐ ܠܡܵܪܝܵܐ: ܘܐܘܿܪܸܫܠܸܡ ܬܸܣܲܩ ܥܲܠ ܠܸܒ̇ܟ݂ܘܿܢ.

⁵¹ ܘܢܹܐܡܪܘܿܢ ܕܒܹܝܬ̣ ܝܑܼܣܪܵܝܹܠ ܒܗܸܬ̣ܢ ܛܵܒ̣: ܡܸܛܠ ܕܲܫܡܲܥܢ ܚܸܣܕܵܐ: ܘܟܲܣܝܲܬ̤ ܒܸܗܬ̇ܬ̣ܵܐ ܠܐܲܦܲܝ̈ܢ: ܡܸܛܠ ܕܥܲܠܘ ܢܘܼܟ݂ܪ̈ܵܝܹܐ ܠܡܲܩܕ̇ܫܹܗ ܕܡܵܪܝܵܐ.

⁵² ܡܸܛܠ ܗܵܢܵܐ ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܐܵܡܲܪ ܡܵܪܝܵܐ: ܘܐܸܦܩܘܿܕ݂ ܥܲܠ ܒܵܒܹܠ ܘܥܲܠ ܓܠܝܼܦܹ̈ܝܗ̇: ܘܲܒ̣ܟ݂ܠܵܗ̇ ܐܲܪܥܵܐ ܢܸܦܠܘܿܢ ܩܛܝܼ̈ܠܹܝܗ̇.

⁵³ ܐܸܢ ܬܸܣܲܩ ܒܵܒܹܠ ܠܲܫܡܲܝܵܐ: ܘܐܸܢ ܬܣܝܼܡ ܒܪܵܘܡܵܐ ܥܘܼܫܢܵܗ̇: ܡ̣ܢ ܩܕ݂ܵܡܲܝ ܢܹܐܬ̣ܘܿܢ ܥܠܹܝܗ̇ ܒܵܙܘܿܙܹ̈ܐ ܐܵܡܲܪ ܡܵܪܝܵܐ.

⁵⁴ ܩܵܠܵܐ ܕܝܼܠܲܠܬܵܐ ܡ̣ܢ ܒܵܒܹܠ: ܘܲܬ̣ܒ̣ܵܪܵܐ ܪܲܒܵܐ ܡ̣ܢ ܐܲܪܥܵܐ: ܕܟܲܠܕ݂ܵܝܹ̈ܐ.

⁵⁵ ܡܸܛܠ ܕܒܲܙ ܡܵܪܝܵܐ ܠܒ̣ܵܒܹܠ: ܘܐܵܘܒܸ̇ܕ݂ ܡܸܢܵܗ̇ ܒܢܲܝ̈ ܐ̄ܢܵܫܵܠ ܘܲܒ̣ܥܝܼܪܵܐ: ܩܵܠܵܐ ܪܲܒܵܐ ܐܲܝܟ݂ ܡܲـ̈ـܝܵܐ ܣܲܓ̇ܝܼ̈ܐܹܐ ܕܐܵܙܹ̇ܠ ܩܵܠܗܘܿܢ.

⁵⁶ ܡܸܛܠ ܕܐܸܬ̣ܵܘ ܥܲܠ ܒܵܒܹܠ ܒܵܙܘܿܙܹ̈ܐ: ܘܐܸܬ̇ܬ̇ܚܸܕ݂ܘ ܓܲܢ̄ܒܵܪܹ̈ܝܗ̇ ܘܐܸܬ̇ܬ̇ܒܲܪ ܩܸܫ̈ܬܵܬ̣ܗܘܿܢ: ܡܸܛܠ ܕܐܲܠܵܗܵܐ ܦܵܪܘܿܥܵܐ ܡܵܪܝܵܐ: ܡܸܦܪܲܥ ܢܸܦܪܘܿܥ ܐܸܢܘܿܢ.

⁵⁷ ܘܐܲܪܘܸܐ ܪܵܘܪ̈ܒ̣ܵܢܹ̈ܝܗ̇ ܘܚܲܟ̇ܝܼܡܹ̈ܝܗ̇: ܘܚܹܐܪܹ̈ܝܗ̇ ܘܫܲܠܝܼܛܵܢܹ̈ܝܗ̇ ܘܓܲܢ̄ܒܵܪܹ̈ܝܗ̇: ܘܢܸܕ݂ܡ̱ܟ݂ܘܿܢ ܫܸܢܬ̣ܵܐ ܠܥܵܠܲܡ ܘܠܵܐ ܢܸܬ̇ܬ̇ܥܝܼܪܘܼܢ: ܐܵܡܲܪ ܡܲܠܟܵܐ ܡܵܪܝܵܐ ܚܲܝܠܬ̣ܵܢܵܐ ܫܡܹܗ.

⁵⁸ ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܫܘܼܪܹ̈ܝܗ̇ ܕܒ̣ܵܒܹܠ ܪ̈ܘܝܼܚܹܐ ܡܸܬ̣ܥܲܩܵܪܘܼ ܢܸܬ̣ܥܲܩܪܘܼܢ: ܘܬܲܪ̈ܥܹܝܗ̇ ܪ̈ܵܡܹܐ ܒܢܘܼܪܵܐ ܢܹܐܩܕ̇ܘܼܢ: ܘܢܸܠܐܘܿܢ ܥܲܡܡܹ̈ܐ ܣܪܝܼܩܵܐܝܼܬ̣: ܘܐܸܡ̈ܘܵܬ̣ܵܐ ܒܢܘܼܪܵܐ ܢܸܬ̇ܛܲܪ̈ܦܵܢ.

⁵⁹ ܦܸܬ̣ܓ̣ܵܡܵܐ ܕܦܲܩܸܕ݂ ܐܹܪܲܡܝܵܐ ܢܒ̣ܝܼܵܐ: ܠܫܹܪܝܼܵܐ ܒܲܪ ܢܹܪܝܼܵܐ ܒܲܪ ܡܥܲܣܝܵܐ: ܟܲܕ݂ ܐܸܙܲܠ ܥܲܡ ܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ ܠܒ̣ܵܒܹܠ: ܒܲܫܢܲܬ̣ ܚܕܲܥܸܣܪܹ̈ܐ ܕܡܲܠܟ̇ܘܼܬܹܗ: ܘܫܹܪܝܼܵܐ ܪܲܒ̇ ܡܲܫܪܝܼܬ̣ܵܐ ܗ̄ܘ̣ܵܐ.

⁶⁰ ܘܲܟ݂ܬܲܒ̣ ܐܹܪܲܡܝܵܐ ܟܠܵܗ̇ ܒܝܼܫܬܵܐ ܕܐܵܬ̣ܝܵܐ ܥܲܠ ܒܵܒܹܠ ܒܣܸܦܪܵܐ ܚܲܕ݂: ܡܸܠܹ̈ܐ ܗܵܠܹܝܢ ܕܲܟ݂ܬ̣ܝܼ̈ܒ̣ܵܢ ܥܲܠ ܒܵܒܹܠ.

⁶¹ ܘܐܸܡܲܪ ܐܹܪܲܡܝܵܐ ܠܫܹܪܝܼܵܐ: ܡܵܐ ܕܥܲܠܬ̇ ܠܓ̣ܵܘ ܒܵܒܹܠ: ܩܪܝܼ ܘܲܚܙܝܼ ܟܠܗܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ.

⁶² ܘܐܸܡܲܪ ܡܵܪܝܵܐ: ܐܲܢ̄ܬ̇ ܐܸܡܲܪܬ̇ ܥܲܠ ܐܲܬ̣ܪܵܐ ܗܵܢܵܐ ܠܡܵܘܒܵܕ݂ܘܼܬܹܗ: ܕܠܵܐ ܢܸܗܘܹܐ ܒܹܗ ܕܝܵܬܹܒ̣ ܡ̣ܢ ܒܢܲܝ̈ܢܵܫܵܐ ܘܲܥܕܲܡܵܐ ܠܲܒ̣ܥܝܼܪܵܐ: ܡܸܛܠ ܕܲܠܚܘܼܪܒܵܐ ܠܥܵܠܲܡ ܢܸܗܘܹܐ.

⁶³ ܘܡܵܐ ܕܫܲܠܡܸܬ̇ ܠܡܸܩܪܵܐ ܒܣܸܦܪܵܐ ܗܵܢܵܐ: ܩܛܘܿܪ ܒܹܗ ܟܹܐܦܵܐ ܘܲܫܕ݂ܝܼܘܗܝ ܒܲܦܪܵܬ̣.

⁶⁴ ܘܐܸܡܲܪ ܗܵܟܲܢܵܐ ܬܸܦܸܠ ܒܵܒܹܠ ܘܠܵܐ ܬܩܘܼܡ: ܡ̣ܢ ܩܕ݂ܵܡ ܒܝܼܫܬܵܐ ܕܡܲܝܬܹ̇ܐ ܐ̄ܢܵܐ ܥܠܲܝܗܘܿܢ ܘܢܸܬ̇ܛܲܪܦܘܼܢ.

52

¹ ܒܲܪ ܥܸܣܪܝܼܢ ܘܲܚܕ݂ܵܐ ܫܢܝܼ̈ܢ ܗ̄ܘ̣ܵܐ ܨܹܕܲܩܝܵܐ ܟܲܕ݂ ܐܲܡ̣ܠܸܟ݂: ܘܲܚܕܲܥܸܣܪܹ̈ܐ ܫܢܝܼ̈ܢ ܐܲܡ̣ܠܸܟ݂ ܒܐܘܿܪܸܫܠܸܡ: ܘܲܫܡܵܐ ܕܐܸܡܹܗ: ܚܲܡܛܘܠ ܒܲܪܬ̣ ܐܹܪܲܡܝܵܐ ܡ̣ܢ ܠܸܒ̣ܢܵܐ.

² ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ ܝܘܿܝܵܩܝܼܡ.

³ ܡܸܛܠ ܗܵܠܹܝܢ ܗܘ̤ܵܐ ܪܘܼܓ̣ܙܹܐ ܕܡܵܪܝܵܐ ܥܲܠ ܐܘܿܪܸܫܠܸܡ: ܘܥܲܠ ܝܑܼܗܘܼܕ݂ܵܐ: ܥܕܲܡܵܐ ܕܲܫܕ݂ܵܐ ܐܸܢܘܿܢ ܡ̣ܢ ܩܕ݂ܵܡ ܐܲܦܵܘ̈ܗܝ: ܘܲܡܪܲܕ݂ ܨܹܕܲܩܝܵܐ ܡܲܠܟܵܐ ܥܲܠ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ.

⁴ ܘܲܒ̣ܫܲܢ̄ܬܵܐ ܕܲܬ̣ܫܲܥ ܠܡܲܠܟ̇ܘܼܬܹܗ ܒܝܲܪܚܵܐ ܕܥܸܣܪܵܐ: ܒܹܗ ܒܝܲܪܚܵܐ ܗܵܢܵܐ: ܐܸܬ̣ܵܐ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܗ̤ܘ ܘܟ݂ܠܹܗ ܚܲܝܠܹܗ ܥܲܠ ܐܘܿܪܸܫܠܸܡ: ܘܲܫܪܵܘ ܥܠܹܝܗ̇: ܘܲܒ̣ܢܵܘ ܥܠܹܝܗ̇ ܩܲܠܩܘܼܡܹ̈ܐ ܟܲܕ݂ ܚܵܕ݂ܪܵܐ.

⁵ ܘܥܸܠܲܬ̤ ܩܪܝܼܬ̣ܵܐ ܒܐܘܼܠܨܵܢܵܐ: ܥܕܲܡܵܐ ܠܲܫܢܲܬ̣ ܚܕܲܥܸܣܪܹ̈ܐ ܠܡܲܠܟܵܐ ܨܹܕܲܩܝܵܐ.

⁶ ܘܲܒ̣ܝܲܪܚܵܐ ܕܚܲܡܫܵܐ ܒܲܬ̣ܫܲܥܬ̣ܵܐ ܒܹܗ ܒܝܲܪܚܵܐ: ܥܫܸܢ ܟܲܦܢܵܐ ܒܲܩܪܝܼܬ̣ܵܐ: ܘܠܲܝܬ̇ ܗ̄ܘ̣ܵܐ ܠܲܚܡܵܐ ܠܥܲܡܵܐ ܕܐܲܪܥܵܐ.

⁷ ܘܐܸܬ̇ܬܲܪܥܲܬ̤ ܩܪܝܼܬ̣ܵܐ. ܘܟ݂ܠܗܘܿܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ: ܥܪܲܩ̣ܘ ܘܲܢܦܲܩ̣ܘ ܡ̣ܢ ܩܪܝܼܬ̣ܵܐ ܒܠܸܠܝܵܐ: ܒܐܘܼܪܚܵܐ ܕܬܲܪܥܵܐ ܕܒܹܝܬ̣ ܫܘܼܪܹ̈ܐ ܕܥܲܠ ܓܸܢ̄ܒ̣ ܓܲܢܬ̣ܵܐ ܕܡܲܠܟܵܐ: ܘܟܲܠܕ݂ܵܝܹ̈ܐ ܟܪܝܼܟ݂ܝܼܢ ܥܲܠ ܩܪܝܼܬ̣ܵܐ: ܘܐܸܙܲܠܘ ܒܐܘܼܪܚܵܐ ܕܲܦܩܲܥܬ̣ܵܐ.

⁸ ܘܲܪܕܲܦ̣ܘ ܚܲܝܠܵܐ ܕܟܲܠܕܵܝܹ̈ܐ ܒܵܬܲܪ ܡܲܠܟܵܐ: ܘܐܲܕ݂ܪ̱ܟ݂ܘܼܗܝ ܠܨܹܕܲܩܝܵܐ ܒܲܦܩܲܥܬ̣ܵܐ ܕܐܝܼܪܝܼܚܘܿ: ܘܟ݂ܠܹܗ ܚܲܝܠܹܗ ܐܸܬ̣ܒܲܕܲܪ ܡܸܢܹܗ.

⁹ ܘܐܲܚܕ̇ܘܼܗܝ ܠܡܲܠܟܵܐ: ܘܐܲܣܩܘܼܗܝ ܠܘܵܬ̣ ܡܲܠܟܵܐ ܕܒ̣ܵܒܹܠ ܠܕܸܒ̣ܠܬ̣ ܒܐܲܪܥܵܐ ܕܸܚܡܵܬ̣: ܘܡܲܠܸܠ ܥܲܡܹܗ ܕܝܼܢܵܐ.

¹⁰ ܘܢܲܟܸ̇ܣ ܡܲܠܟܵܐ ܕܒ̣ܵܒܹܠ ܠܲܒ̣ܢܵܘ̈ܗܝ ܕܨܹܕܲܩܝܵܐ ܠܥܹܢܵܘܗܝ: ܘܲܠܟ݂ܠܗܘܿܢ ܚܹܐܪܹ̈ܐ ܕܲܝܗܘܼܕ݂ܵܐ ܚ̣ܪܲܒ̣ ܒܕܸܒ̣ܠܲܬ̣.

¹¹ ܘܥܲܝܢܵܘ̈ܗܝ ܕܨܹܐܕܲܩܝܵܐ ܥܵܘܲܪ: ܘܐܲܣܪܹܗ ܒܫܸܫ̈ܠܵܬ̣ܵܐ: ܘܐܵܘܒ̇ܠܹܗ ܡܲܠܟܵܐ ܕܒ̣ܵܒܹܠ ܠܒ̣ܵܒܹܠ ܘܐܲܫ̱ܠܡܹܗ ܠܒܹܝܬ̣ ܢܛܘܼܪܬܵܐ ܥܕܲܡܵܐ ܠܝܵܘܡܵܐ ܕܡܝܼܬ̣.

¹² ܘܲܒ̣ܝܲܪܚܵܐ ܕܚܲܡܫܵܐ ܒܲܥܣܲܪܬܵܐ ܒܹܗ ܒܝܲܪܚܵܐ: ܗ̤ܝ ܗ̄ܝ̣ ܫܢܲܬ̣ ܬܫܲܥܸܣܪܹ̈ܐ ܕܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܐܸܬ̣ܵܐ ܢܒ̣ܘܼܙܲܪܕܵܢ ܪܲܒ̇ ܕܲܚܫܹ̈ܐ: ܘܩܵܡ̣ ܩܕ݂ܵܡ ܡܲܠܟܵܐ ܕܒ̣ܵܒܹܠ ܒܐܘܿܪܸܫܠܸܡ.

¹³ ܘܐܵܘܩܸܕ݂ ܠܒܲܝܬܹ̇ܗ ܕܡܵܪܝܵܐ ܘܲܠܒܹܝܬ̣ ܡܲܠܟܵܐ ܕܲܝܗܘܼܕ݂ܵܐ: ܘܲܠܟ݂ܠܗܘܿܢ ܒܵـ̈ـܬܹ̇ܐ ܕܐܘܿܪܸܫܠܸܡ: ܘܲܠܟ݂ܠܗܘܿܢ ܒܵـ̈ـܬܹܐ ܕܪܵܘܪ̈ܒ̣ܵܢܹܐ ܐܵܘܩܸܕ݂ ܒܢܘܼܪܵܐ.

¹⁴ ܘܲܠܟ݂ܠܗܘܿܢ ܫܘܼܪܹ̈ܝܗ̇ ܕܐܘܿܪܸܫܠܸܡ ܟܲܕ݂ ܚܵܕ݂ܪܵܐ: ܥܩܲܪܘ ܟܠܹܗ ܚܲܝܠܵܐ ܕܟܲܠܕ݂ܵܝܹ̈ܐ ܕܥܲܡ ܪܲܒ̇ ܕܲܚܫܹ̈ܐ.

¹⁵ ܘܡ̣ܢ ܡܸܣܟܹ̇ܢܹ̈ܐ ܕܥܲܡܵܐ: ܘܫܲܪܟܵܐ ܕܥܲܡܵܐ ܕܐܸܫܬ̇ܚܲܪܘ ܒܲܩܪܝܼܬ̣ܵܐ. ܘܗܵܢܘܿܢ ܕܲܥܪܲܩܘ ܠܘܵܬ̣ ܡܲܠܟܵܐ ܕܒ̣ܵܒܹܠ: ܘܫܲܪܟܵܐ ܕܥܲܡܵܐ ܫܒ̣ܵܐ ܢܒ̣ܘܼܙܲܪܕܵܢ.

¹⁶ ܘܡ̣ܢ ܡܸܣܟܹ̇ܢܹ̈ܐ ܕܐܲܪܥܵܐ: ܫܒܲܩ ܢܒ̣ܘܼܙܲܪܕܵܢ ܪܲܒ̇ ܕܸܫܚܹ̈ܐ ܠܟ݂ܵܪ̈ܡܹܐ ܘܲܠܦܘܼܠܚܵܢܵܐ.

¹⁷ ܘܥܲܡܘܼ̈ܕܹܐ ܕܲܢܚܵܫܵܐ ܘܐܲܓܵܢܹ̈ܐ: ܘܝܲܡܵܐ ܕܲܢܚܵܫܵܐ ܕܲܒ̣ܒܲܝܬܹ̇ܗ ܕܡܵܪܝܵܐ ܬܲܒܲܪܘ ܟܲܠܕܵܝܹ̈ܐ: ܘܲܫܩܲܠܘ ܟܠܹܗ ܢܚܵܫܗܘܿܢ ܘܐܵܘܒ̇ܠܘܼܗܝ ܠܒ̣ܵܒܹܠ.

¹⁸ ܘܩܲܕ݂ܣܹ̈ܐ: ܘܐܝܼܪܹ̈ܐ: ܘܩܲܪ̈ܕܵܠܹܐ: ܘܫܵܚ̈ܠܹܐ: ܘܟܲܦܹ̈ܐ: ܘܟ݂ܠܗܘܿܢ ܡܵܐܢܹ̈ܐ ܕܲܢܚܵܫܵܐ ܕܲܡܫܲܡܫܝܼܢ ܒܗܘܿܢ ܢܣܲܒ̣ܘ.

¹⁹ ܘܩܲܛܪ̈ܘܼܩܹܐ: ܘܦܝܼܪ̈ܡܹܐ: ܘܡܲܫ̈ܠܵܘܵܬ̣ܵܐ: ܘܩܲܕ݂ܣܹ̈ܐ: ܘܡܲܙ̱ܡܟܹ̈ܐ: ܘܲܡܢܵܪ̈ܵܬ̣ܵܐ: ܘܟܲܦܹ̈ܐ: ܘܲܡܢܹܩ̈ܝܵܬ̣ܵܐ: ܕܕܲܗܒ̣ܵܐ: ܘܲܕ݂ܣܹܐܡܵܐ. ܘܲܢܣܲܒ̣ ܪܲܒ̇ ܕܲܚܫܹ̈ܐ.

²⁰ ܥܲܡܘܼ̈ܕܹܐ ܬܪܹܝܢ ܕܲܢܚܵܫܵܐ: ܘܝܲܡܵܐ ܚܲܕ݂: ܘܬ̣ܵܘܪܹ̈ܐ ܬܪܸܥܣܲܪ ܕܲܢܚܵܫܵܐ ܕܲܬ̣ܚܹܝܬ̣ ܓܸܣܵܘ̈ܗܝ ܕܝܲܡܵܐ: ܕܲܥܒܲܕ݂ ܡܲܠܟܵܐ ܫܠܹܝܡܘܿܢ ܠܒܲܝܬܹ̇ܗ ܕܡܵܪܝܵܐ: ܘܠܲܝܬ̇ ܗ̄ܘ̣ܵܐ ܡܲܬ̣ܩܵܠܵܐ ܠܲܢܚܵܫܗܘܿܢ ܕܡܵܐܢܹ̈ܐ ܗܵܠܹܝܢ.

²¹ ܘܥܲܡܘܼ̈ܕܹܐ ܗܵܢܘܿܢ ܬܪܹܝܢ: ܬܡܵܢܲܥܸܣܪܹ̈ܐ ܐܲܡ̈ܝܼܢ ܪܵܘܡܹܗ ܕܥܲܡܘܼܕ݂ܵܐ ܚܲܕ݂ ܡܸܢܗܘܿܢ: ܘܚܘܼܛܵܐ ܕܬܲܪܬܲܥܸܣܪܹ̈ܐ ܐܲܡ̈ܝܼܢ ܟܵܪܹܟ݂ ܠܹܗ: ܟܲܕ݂ ܚܵܕܲܪ: ܘܲܥܒ̣ܵܝܹܗ ܐܲܪܒܲܥ ܨܸܒ̣ܥܝܼ̈ܢ ܘܲܚܠܝܼܠ ܓܵܘܹܗ.

²² ܘܐܲܓܢܵܐ ܥܠܵܘܗܝ ܕܲܢܚܵܫܵܐ: ܘܪܵܘܡܵܗ̇ ܕܐܲܓܵܢܵܐ ܚܕ݂ܵܐ ܚܲܡܸܫ ܐܲܡ̈ܝܼܢ: ܘܲܡܨܝܼܕ̇ܬܵܐ ܘܪ̈ܘܼܡܵܢܹܐ ܥܲܠ ܐܲܓܵܢܵܐ ܟܲܕ݂ ܚܵܕ݂ܪܵܐ: ܘܟ݂ܠܵܗ̇ ܕܲܢܚܵܫܵܐ: ܘܐܲܝܟ݂ ܗܵܠܹܝܢ ܠܥܲܡܘܼܕ݂ܵܐ ܐ̄ܚܪܹܢܵܐ ܘܪ̈ܘܼܡܵܢܹܐ.

²³ ܘܲܗܘ̤ܵܘ ܪ̈ܘܼܡܵܢܹܐ ܬܸܫܥܝܼܢ ܘܸܫܬܵܐ: ܘܟ݂ܠܗܘܿܢ ܪ̈ܘܼܡܵܢܹܐ ܡܵܐܐ ܥܲܠ ܡܨܝܼܕ̇ܬܵܐ ܟܲܕ݂ ܚܵܕ݂ܪܵܐ.

²⁴ ܘܲܕ݂ܒܲܪ ܪܲܒ̇ ܕܲܚܫܹ̈ܐ ܠܫܹܪܝܼܵܐ ܟܵܗܢܵܐ ܪܲܒܵܐ: ܘܠܲܨܦܲܢܝܵܐ ܟܵܗܢܵܐ ܕܒ̣ܵܬ̣ܪܹܗ: ܘܠܲܬ̣ܠܵܬ̣ܵܐ ܢܵܛܪ̈ܲܝ ܬܲܪ̈ܥܹܐ.

²⁵ ܘܡ̣ܢ ܩܪܝܼܬ̣ܵܐ ܕܒܲܪ ܡܗܲܝܡܢܵܐ ܚܲܕ݂: ܕܗ̤ܘ ܡܫܲܠܲܛ ܗ̄ܘ̣ܵܐ ܥܲܠ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ: ܘܫܲܒ̣ܥܵܐ ܓܲܒ̣ܪ̈ܝܼܢ ܝܼܕ݂ܝܼܥܹ̈ܐ ܕܡܸܬ̣ܚ̄ܙܹܝܢ ܗ̄ܘ̣ܵܘ ܩܕ݂ܵܡ ܡܲܠܟܵܐ ܕܐܸܫܬ̇ܚܲܪܘ ܒܲܩܪܝܼܬ̣ܵܐ: ܘܣܵܦܪܵܐ ܘܪܲܒ̇ ܚܲܝܠܵܐ ܕܥܲܡܵܐ ܕܐܲܪܥܵܐ. ܘܸܫܬ̇ܝܼܢ ܓܲܒ̣ܪ̈ܝܼܢ ܡ̣ܢ ܥܲܡܵܐ ܕܐܲܪܥܵܐ: ܕܐܸܫܬ̇ܟܲܚܘ ܒܓ̣ܵܘ ܩܪܝܼܬ̣ܵܐ.

²⁶ ܕܒܲܪ ܐܸܢܘܿܢ ܢܒ̣ܘܼܙܲܪܕܵܢ ܪܲܒ̇ ܕܲܚܫܹ̈ܐ: ܘܐܵܘܒܸ̇ܠ ܐܸܢܘܿܢ ܠܘܵܬ̣ ܡܲܠܟܵܐ ܕܒ̣ܵܒܹܠ ܠܕܸܒ̣ܠܲܬ̣ ܒܐܲܪܥܵܐ ܕܲܚܡܵܬ̣.

²⁷ ܘܲܡ̣ܚܵܐ ܐܸܢܘܿܢ ܡܲܠܟܵܐ ܕܒ̣ܵܒܹܠ: ܘܩܲܛܸܠ ܐܸܢܘܿܢ ܒܕܸܒ̣ܠܲܬ̣ ܒܐܲܪܥܵܐ ܕܲܚܡܵܬ̣: ܘܐܸܫܬ̇ܒ̣ܝܼ ܝܑܼܗܘܼܕ݂ܵܐ ܡ̣ܢ ܐܲܪܥܹܗ.

²⁸ ܗܵܢܵܘ ܥܲܡܵܐ ܕܲܫܒ̣ܵܐ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܒܲܫܢܲܬ̣ ܫܒܲܥ ܕܡܲܠܟ̇ܘܼܬܹܗ: ܝܗ̄ܘܼܕ݂ܵܝܹܐ ܬܠܵܬ̣ܵܐ ܐܲܠܦܝܼ̈ܢ ܘܥܸܣܪܝܼܢ ܘܲܬ̣ܠܵܬ̣ܵܐ.

²⁹ ܘܒܲܫܢܲܬ̣ ܬܡܵܢܲܥܸܣܪܹ̈ܐ ܕܡܲܠܟ̇ܘܼܬܹܗ ܕܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒܵܒܹܠ: ܫܒ̣ܵܐ ܡ̣ܢ ܐܘܿܪܸܫܠܸܡ ܢܲܦ̮̈ܫܵܬ̣ܵܐ ܬܡܵܢܹܡܵܐܐ: ܘܲܬ̣ܠܵܬ̣ܝܼܢ ܘܬܲܪܬܹ̇ܝܢ.

³⁰ ܘܒܲܫܢܲܬ̣ ܥܸܣܪܝܼܢ ܘܲܬ̣ܠܵܬ̣ ܫܢܝܼ̈ܢ ܕܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܫܒ̣ܵܐ ܢܒ̣ܘܼܙܲܪܕܵܢ ܪܲܒ̇ ܕܲܚܫܹ̈ܐ: ܝܗ̄ܘܼ̈ܕ݂ܵܝܹܐ ܢܲܦ̮̈ܫܵܬ̣ܵܐ ܫܒܲܥܡܵܐܐ ܘܐܲܪܒ̇ܥܝܼܢ ܘܚܲܡܸܫ: ܟܠܗܹܝܢ ܢܲܦ̮ܫܵܬ̣ܵܐ ܐܲܪܒ̇ܥܵܐ ܐܲܠܦ̈ܝܼܢ ܘܫܸܬ̣ܡܵܐܐ.

³¹ ܒܲܫܢܲܬ̣ ܬܠܵܬ̣ܝܼܢ ܘܲܫܒܲܥ ܕܲܫܒ̣ܝܼܬܹܗ ܕܝܘܿܝܵܟ݂ܝܼܢ ܡܲܠܟܵܐ ܕܲܝܗܘܼܕ݂ܵܐ: ܒܝܲܪܚܵܐ ܕܲܬ̣ܪܸܥܣܲܪ ܒܚܲܡܫܵܐ ܘܥܸܣܪܝܼܢ ܒܹܗ ܒܝܲܪܚܵܐ: ܐܲܪܝܼܡ ܐܘܿܠ ܡܪܘܿܕܵܟ݂ ܡܲܠܟܵܐ ܕܒ̣ܵܒܹܠ ܒܫܲܢ̄ܬܵܐ ܕܡܲܠܟ̇ܘܼܬܹܗ: ܒܪܹܫܹܗ ܕܝܘܿܝܵܟ݂ܝܼܢ ܡܲܠܟܵܐ ܕܲܝܗܘܼܕ݂ܵܐ: ܘܐܲܦܩܹܗ ܡ̣ܢ ܒܹܝܬ̣ ܐܲܣܝܼܪܹ̈ܐ.

³² ܘܡܲܠܸܠ ܥܲܡܹܗ ܫܲܦܝܼܪ̈ܵܬ̣ܵܐ ܘܐܲܪܡܝܼ ܟܘܼܪܣܝܹܗ ܠܥܸܠ ܡ̣ܢ ܟܘܼܪ̈ܣܵܘܵܬ̣ܵܐ ܕܡܲܠ̈ܟܹ̇ܐ ܕܐܝܼܬ̣ ܥܲܡܹܗ ܒܒ̣ܵܒܹܠ.

³³ ܘܚܲܠܸܦ ܠܒ̣ܘܼܫܹ̈ܐ ܕܐܲܣܘܼܪܹܗ: ܘܐܸܟܲܠ ܠܲܚܡܵܐ ܩܕ݂ܵܡܵܘܗܝ: ܐܲܡܝܼܢܵܐܝܼܬ̣ ܟܠ ܝܵܘ̈ܡܲܝ ܚܲܝܵܘ̈ܗܝ.

³⁴ ܘܲܫܩܵܠܹܗ ܢܵܦܹ̇ܩ ܗ̄ܘ̣ܵܐ ܡ̣ܢ ܩܕ݂ܵܡ ܡܲܠܟܵܐ ܕܒ̣ܵܒܹܠ ܟܠܝܘܿܡ ܐܲܡܝܼܢܵܐܝܼܬ̣: ܥܕܲܡܵܐ ܠܝܵܘܡܵܐ ܕܡܝܼܬ̣: ܟܠܗܘܿܢ ܝܵܘ̈ܡܲܝ ܚܲܝܵܘ̈ܗܝ.