1 ܚܸܙܘܵܐ ܕܐܹܫܲܥܝܵܐ ܒܲܪ ܐܵܡܘܿܨ: ܕܲܚ̣ܙܵܐ ܥܲܠ ܝܼܗܘܼܕ݂ܵܐ ܘܥܲܠ ܐܘܿܪܸܫܠܸܡ: ܒܝܵܘ̈ܡܲܝ ܥܘܿܙܝܼܵܐ: ܘܝܘܿܬ̣ܵܡ: ܘܐܵܚܵܙ: ܘܚܹܙܲܩܝܵܐ: ܡܲܠ̈ܟܹ̇ܐ ܕܲܝܗܘܼܕ݂ܵܐ.
2 ܫܡܲܥܘ ܫܡܲܝܵܐ: ܘܨܘܼܬ̣ܝ ܐܲܪܥܵܐ: ܡܸܛܠ ܕܡܵܪܝܵܐ ܡܲܠܸܠ̣: ܒܢܲـ̈ـܝܵܐ ܪܲܒ̇ܝܼܬ̣ ܘܪܲܡ̱ܪܡܹ̇ܬ̣: ܘܗܸܢ̣ܘܿܢ ܐܲܥܠܝܼܘ ܒܝܼ.
3 ܝܼܕܲܥ̣ ܬܵܘܪܵܐ ܩܵܢܹ̇ܝܗ̇: ܘܲܚܡܵܪܵܐ ܐܘܿܪܝܵܐ ܕܡܵܪܹܗ. ܘܝܼܣܪܵܝܹܠ ܠܵܐ ܝܼܕܲܥ̣: ܘܥܲܡܝ ܠܵܐ ܐܸܣܬܲܟܲܠ.
4 ܘܵܝ ܠܥܲܡܵܐ ܚܲܛܵܝܵܐ: ܥܲܡܵܐ ܥܲܫܝܼܢ ܥܵܘܼܠܵܐ: ܙܲܪܥܵܐ ܡܲܒ̣ܐ̱ܫܵܢܵܐ. ܒܢܲـ̈ـܝܵܐ ܡܚܲܒ̇ܠܹ̈ܐ: ܫܒܲܩ̣ܬ̇ܘܿܢ ܠܡܵܪܝܵܐ: ܘܐܲܪܓܸ̇ܙܬ̇ܘܿܢ ܠܩܲܕ̇ܝܼܫܵܐ ܕܝܼܣܪܵܝܹܠ: ܘܲܗܦܲܟ݂ܬ̇ܘܿܢ ܠܒܸܣܬܲܪܟ݂ܘܿܢ.
5 ܠܡܵܢܵܐ ܬܘܼܒ̣ ܬܸܒ̣ܠ̱ܥܘܼܢ: ܘܬ̣ܵܘܣ̄ܦܘܼܢ ܠܡܸܬ̣ܪ̱ܕ݂ܵܝܘܼ ܟܠ ܪܹܫ ܠܟܹܐܒ̣ܵܐ: ܘܟ݂ܠ ܠܸܒܵܐ ܠܟܲܪܝܘܼܬ̣ܵܐ.
6 ܡ̣ܢ ܦܲܣܬ̣ܵܐ ܕܪܸܓ̣ܠܵܐ ܘܲܥܕܲܡܵܐ ܠܡܘܼܚܵܐ: ܠܲܝܬ̇ ܒܹܗ ܕܘܼܟ̇ܬ̣ܵܐ ܕܫܲܪܝܼܪܵܐ. ܨܘܼ̈ܠܦܵܬ̣ܵܐ: ܘܫܘܼ̈ܡܵܬ̣ܵܐ: ܘܡܲܚ̈ܘܵܬ̣ܵܐ: ܕܲܥܒ̣ܵܝܹ̈ܐ. ܠܵܐ ܠܡܸܨܡܲܕ݂: ܘܠܵܐ ܠܡܸܥܨܲܒ̣: ܘܐܵܦ ܠܵܐ ܠܲܡܪܲܟܵܟ݂ܘܼ ܒܡܸܫܚܵܐ.
7 ܐܲܪ̱ܥܟ݂ܘܿܢ ܚܲܪܒܵܐ: ܘܩܘܼܪ̈ܝܼܟ݂ܘܿܢ ܝܵܩ̈ܕܵܢ ܒܢܘܼܪܵܐ. ܐܲܪܥ̱ܟ݂ܘܿܢ ܠܘܼܩܒܲܠܟ݂ܘܿܢ ܐܲܟ݂ܠܝܼܢ ܠܵܗ̇ ܢܘܼܟ݂ܪ̈ܵܝܹܐ. ܘܨܵܕ݂ܝܵܐ ܐܲܝܟ݂ ܗܦܝܼܟ݂ܬܵܐ ܕܢܘܼܟ݂ܪ̈ܵܝܹܐ.
8 ܘܐܸܫܬܲܚܪܲܬ̤ ܒܲܪܬ̣ ܨܸܗܝܘܿܢ: ܐܲܝܟ݂ ܡܛܲܠܬ̣ܵܐ ܒܟܲܪܡܵܐ: ܘܐܲܝܟ݂ ܥܲܪܙܵܠܵܐ ܒܡܲܩܛܝܵܐ: ܘܐܲܝܟ݂ ܡܕ݂ܝܼܢ̄ܬܵܐ ܚܒ̣ܝܼܫܬܵܐ.
9 ܘܐܸܠܘܼܠܵܐ ܡܵܪܝܵܐ ܨܒ̣ܵܐܘܼܬ̣ ܐܵܘܬܲܪ ܠܲܢ ܣܪܝܼܕ݂ܵܐ: ܐܲܝܟ݂ ܣܕ݂ܘܿܡ ܗܵܘܹ̇ܝܢ ܗ̄ܘܲܝܢ: ܘܲܠܥܵܡܘܿܪܵܐ ܡܸܬ̇ܕܲܡܹܝܢ ܗ̄ܘܲܝܢ.
10 ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ: ܫܲܠܝܼ̈ܛܹܐ ܕܲܣܕ݂ܘܿܡ. ܘܨܘܼܬ̣ܘ ܢܵܡܘܿܣܹܗ ܕܐܲܠܵܗܲܢ ܥܲܡܵܐ ܕܥܵܡܘܿܪܵܐ.
11 ܠܡܵܢܵܐ ܗܵܘܹ̇ܝܢ ܠܝܼ ܣܘܼܓ̣ܵܐܐ ܕܕܸܒ̣ܚܲܝ̈ܟܘܿܢ: ܐܵܡܲܪ ܡܵܪܝܵܐ. ܣܸܒ̣ܥܹ̇ܬ̣ ܥܠܵـ̈ـܘܵܬ̣ܵܐ ܕܕܸܟ݂ܪܹ̈ܐ: ܘܬܲܪܒܵܐ ܕܲܡܦܲܛܡܹ̈ܐ. ܘܲܕܡܵܐ ܕܬ̣ܵܘܪܹ̈ܐ: ܘܕܸܐܡܪܹ̈ܐ: ܘܕܲܓ̣̈ܕܲܝܵܐ: ܠܵܐ ܨܒܹ̇ܝܬ̣.
12 ܟܲܕ݂ ܬܹܐܬ̣ܘܼܢ ܠܡܸܚܙܵܐ ܐܲܦܲܝ̈: ܡܲܢ̣ܘܼ ܒܥ̣ܵܐ ܗܵܠܹܝܢ ܡ̣ܢ ܐܝܼܕܲܝ̈ܟ̇ܘܿܢ ܠܲܡܕ݂ܵܫ ܕܵܪ̈ܲܝ.
13 ܠܵܐ ܬܵܘܣܦܘܼܢ ܠܡܲܝܬܵܝܘܼ ܠܝܼ ܩܘܼܪ̈ܒܵܢܹܐ ܣܪ̈ܝܼܩܹܐ: ܣܘܵܬ̣ܵܐ ܕܡܲܣ̱ܠܝܵܐ ܗ̄ܝܼ ܠܝܼ: ܒܪܹܫ ܝܲܪ̈ܚܹܐ ܘܲܒ̣ܫܲܒ̇ܬ̣ܵܐ: ܟܵܢܫܝܼܢ ܐ̄ܢܬ̇ܘܿܢ ܟܢܘܼܫܝܵܐ. ܠܵܐ ܐܵܟܹ̇ܠ ܐ̄ܢܵܐ ܕܥܸܬܵܐ ܘܕܲܚܘܼܫܝܵܐ.
14 ܪܹܫ ܝܲܪ̈ܚܲܝܟ̇ܘܿܢ ܘܥܲܕ݂ܥܹܕܲܝ̈ܟ̇ܘܿܢ: ܣܢܵܬ̤ ܢܲܦ̮ܫܝ. ܗܘ̤ܵܘ ܥܠܲܝ ܠܝܼܩܲܪܬܵܐ. ܠܐ̇ܝܼܬ̣ ܠܡܸܫܩܲܠ.
15 ܟܲܕ݂ ܬܸܦ̱ܪܣܘܿܢ ܐܝܼܕܲܝ̈ܟ̇ܘܿܢ: ܐܲܗܡܸܐ ܥܲܝܢܲܝ̈ ܡܸܢܟ݂ܘܿܢ. ܘܐܵܦܸܢ ܬܲܣܓ̇ܘܿܢ ܨܠܘܿܬ̣ܵܐ: ܠܵܐ ܫܵܡܲܥ ܐ̄ܢܵܐ. ܐܝܼܕܲܝ̈ܟ̇ܘܿܢ ܡܲܠ̈ܝܵܢ ܕܡܵܐ.
16 ܣܚܵܘ ܘܐܸܬ̇ܕܲܟܵܘ. ܘܐܲܥܒܲܪܘ ܒܝܼ̈ܫܵܬ̣ܵܐ ܕܲܥܒ̣̱ܵܕܲܝ̈ܟ̇ܘܿܢ ܡ̣ܢ ܩܕ݂ܵܡ ܥܲܝܢܲܝ̈.
17 ܫܠܵܘ ܡ̣ܢ ܒܝܼ̈ܫܵܬ̣ܵܐ: ܘܝܼܠܲܦܘ ܠܡܲܛܐܵܒ̣ܘܼ ܥܲܩܸܒ̣ܘ ܕܝܼܢܵܐ: ܘܐܲܛܐܸܒ̣ܘ ܠܲܛܠܝܼܡܹ̈ܐ. ܕܘܼܢܘ ܝܲܬ̣ܡܹ̈ܐ: ܘܕ݂ܘܼܢܘܼ ܐܲܪ̈ܡܠܵܬ̣ܵܐ.
18 ܘܬ̣ܵܘ ܢܡܲܠܸܠ ܥܲܡ ܚ̈ܕ݂ܵܕܹܐ: ܐܵܡܲܪ ܡܵܪܝܵܐ. ܘܐܸܢ ܢܸܗܘܘܿܢ ܚܛܵܗܲܝ̈ܟ̇ܘܿܢ ܐܲܝܟ݂ ܙܚܘܿܪܝܼܬ̣ܵܐ: ܐܲܝܟ݂ ܬܲܠܓܵܐ ܢܸܬ̣ܚܵܘܪܘܼܢ. ܘܐܸܢ ܢܸܣ̱ܡܩܘܼܢ ܐܲܝܟ݂ ܬܵܘܠܵܥܬ̣ܵܐ: ܐܲܝܟ݂ ܥܲܡܪܵܐ ܢܸܗܘܘܿܢ.
19 ܘܐܸܢ ܬܸܬ̇ܛܦܝܼܣܘܼܢ ܘܬܸܫܡܥܘܼܢܵܢܝ: ܛܘܼܒ̣ܵܗ̇ ܕܐܲܪܥܵܐ ܬܹܐܟ݂ܠܘܼܢ.
20 ܘܐܸܢ ܠܵܐ ܬܸܬ̇ܛܦܝܼܣܘܼܢ ܘܬܸܬ̣ܚ̄ܪܘܿܢ: ܒܚܲܪܒܵܐ ܬܸܬ̣ܐܲܟ݂ܠܘܼܢ. ܦܘܼܡܹܗ ܕܡܵܪܝܵܐ ܡܲܠܸܠ̣.
21 ܐܲܝܟܲܢܵܐ ܗܘ̤ܵܬ̣ ܙܵܢܝܼܬ̣ܵܐ ܡܕ݂ܝܼܢ̄ܬܵܐ ܡܗܲܝܡܲܢܬܵܐ: ܕܡܲܠܝܵܐ ܗ̄ܘܼܵܬ̣ ܕܝܼܢܵܐ. ܘܙܲܕ̇ܝܼܩܘܼܬ̣ܵܐ ܒܵܬܲܬ̤ ܒܵܗ̇: ܘܗܵܫܵܐ ܩܵܛܘܿܠܹ̈ܐ.
22 ܟܸܣܦܹܟ݂ܝ ܐܸܣܬ̇ܠܝܼ. ܚܵܢܘܿܝܲܝ̈ܟ̇ܝ ܚܵܠ̇ܛܝܼܢ ܡܲـ̈ـܝܵܐ.
23 ܪܵܘ̱ܪ̈ܒ̣ܵܢܲܝܟ̇ܝ ܡܵܪܘܿܕ݂ܝܼܢ. ܘܫܵܘ̈ܬܵܦܹܐ ܐܸܢܘܿܢ ܕܓܲܢܵܒܹ̈ܐ. ܟܠܗܘܿܢ ܪܵܚ̇ܡܝܼܢ ܫܘܼܚܕ݂ܵܐ. ܘܡܸܣܬܲܪܗܒ̣ܝܼܢ ܠܡܸܦܪܲܥ ܚܘܼ̈ܒ̣ܠܹܐ. ܠܝܲܬ̣ܡܹ̈ܐ ܠܵܐ ܕܵܝܢ̇ܝܼܢ: ܘܕ݂ܝܼܢܵܐ ܕܐܲܪ̈ܡܠܵܬ̣ܵܐ ܠܵܐ ܥܵܐܹ̇ܠ ܠܘܵܬ̣ܗܘܿܢ.
24 ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܚܲܝܠܬ̣ܵܢܵܐ: ܥܲܫܝܼܢܵܐ ܕܝܼܣܪܵܝܹܠ: ܘܵܝ ܡܸܬ̣ܦܪܲܥ ܐ̄ܢܵܐ ܡ̣ܢ ܣܵܢ̈ܐܲܝ: ܘܡܸܬ̣ܢܲܩܲܡ ܐ̄ܢܵܐ ܡ̣ܢ ܒܥܸܠܕ̇ܒ̣ܵܒܲܝ̈.
25 ܘܐܲܦܢܹܐ ܐܝܼܕ݂ܝ ܥܠܲܝܟ̇ܝ ܘܐܸܨܪܘܿܦ ܡܵܪ̈ܘܿܕܲܝܟ̇ܝ ܠܕܲܟ݂ܝܘܼ ܘܐܲܥܒܲܪ ܥܵܘܿܠܲܝܟ̇ܝ ܟܠܗܘܿܢ.
26 ܘܐܲܩܝܼܡ ܕܲܝܢܲܝ̈ܟܝ ܐܲܝܟ݂ ܕܡ̣ܢ ܩܕ݂ܝܼܡ: ܘܡܵܠ̇ܘܿܟܲܝ̈ܟ̇ܝ ܐܲܝܟ݂ ܕܡ̣ܢ ܠܩܘܼܕ݂ܡܝܼܢ. ܘܵܒ̣ܵܬܲܪܟܸ̇ܢ ܬܸܬ̣ܩܪܹܝܢ ܡܕ݂ܝܼܢ̄ܬܵܐ ܕܙܲܕ̇ܝܼܩܘܼܬ̣ܵܐ: ܘܲܡܕ݂ܝܼܢ̄ܬܵܐ ܕܗܲܝܡܵܢܘܼܬ̣ܵܐ.
27 ܨܸܗܝܘܿܢ ܒܕ݂ܝܼܢܵܐ ܬܸܬ̣ܦܪܸܩ: ܘܲܫܒ̣ܝܼܬ̣ܵܗ̇ ܒܙܲܕ̇ܝܼܩܘܼܬ̣ܵܐ.
28 ܘܲܬ̣ܒ̣ܵܪܵܐ ܕܥܵܘܿܠܹ̈ܐ ܘܲܕ݂ܚܲܛܵܝܹ̈ܐ ܐܲܟ݂ܚ̄ܕ݂ܵܐ. ܘܐܲܝܠܝܢ ܕܲܫ̣ܒܲܩܘ ܠܡܵܪܝܵܐ ܢܣܘܼܦܘܼܢ.
29 ܡܸܛܠ ܕܢܸܒ̣ܗ̱ܬ̣ܘܼܢ ܡ̣ܢ ܦܬܲܟ݂ܪܹ̈ܐ ܕܪܲܓ̣ܘ ܘܢܲܚ̄ܦܪܘܿܢ ܡ̣ܢ ܓܸܢ̈ܝܵܬ̣ܵܐ ܕܲܓ̣ܒ̣ܵܘ.
30 ܡܸܛܠ ܕܢܸܗܘܘܿܢ ܐܲܝܟ݂ ܒܸܛܡ̱ܬ̣ܵܐ ܕܲܢܬܲܪܘ ܛܲܪ̈ܦܹܝܗ̇. ܘܐܲܝܟ݂ ܓܲܢܬ̣ܵܐ ܕܡܲـ̈ـܝܵܐ ܠܲܝܬ̇ ܠܵܗ̇.
31 ܘܢܸܗܘܹܐ ܥܘܼܫ̱ܢܗܘܿܢ ܠܲܣܪܵܩܬ̣ܵܐ: ܘܲܥܒ̣ܵܕܲܝ̈ܗܘܿܢ ܠܲܒ̣ܠܹܨܘܿܨ̈ܝܵܬ̣ܵܐ ܘܢܹܐܩܕ̇ܘܼܢ ܬܪ̈ܲܝܗܘܿܢ ܐܲܟ݂ܚ̄ܕ݂ܵܐ. ܘܠܲܝܬ̇ ܕܲܡܕܲܥܸܟ݂.
1 ܦܸܬ̣ܓ̣ܵܡܵܐ ܕܲܚܙܵܐ ܐܹܫܲܥܝܵܐ ܒܲܪ ܐܵܡܘܿܨ: ܥܲܠ ܝܼܗܘܼܕ݂ܵܐ: ܘܥܲܠ ܐܘܿܪܸܫܠܸܡ.
2 ܢܸܗܘܸܐ ܒܝܵܘ̈ܡܵܬ̣ܵܐ ܐ̄ܚܪ̈ܵܝܹܐ: ܛܘܼܪܒܲܝܬܹ̇ܗ ܕܡܵܪܝܵܐ. ܡܲܬ̣ܩܲܢ ܒܪܹܫ ܛܘܼܪܹ̈ܐ: ܘܪܵܡ ܡ̣ܢ ܪ̈ܵܡܵܬ̣ܵܐ. ܘܲܢܣܲܟ̇ܘܿܢ ܠܹܗ ܟܠܗܘܿܢ ܥܲܡܡܹ̈ܐ.
3 ܘܢܹܐܙܠ̄ܘܿܢ ܥܲܡܡܹ̈ܐ ܣܲܓ̇ܝܹ̈ܐܐ: ܘܢܹܐܡܪܘܼܢ: ܬܵܘ ܢܸܣܲܩ ܠܛܘܼܪܹܗ ܕܡܵܪܝܵܐ: ܘܲܠܒܹܝܬ̣ ܐܲܠܵܗܹܗ ܕܝܲܥܩܘܿܒ̣. ܘܢܲܠܦܲܢ ܡ̣ܢ ܐܘܼܪ̈ܚܵܬܹܗ. ܘܲܢܗܲܠܸܟ݂ ܒܲܫܒ̣ܝܼܠܵܘ̈ܗܝ. ܡܸܛܠ ܕܡ̣ܢ ܨܸܗܝܘܿܢ ܢܵܦܹ̇ܩ ܢܵܡܘܿܣܵܐ: ܘܦܸܬ̣ܓ̣ܵܡܹܗ ܕܡܵܪܝܵܐ ܡ̣ܢ ܐܘܿܪܸܫܠܸܡ.
4 ܘܲܢܕ݂ܘܿܢ ܒܹܝܬ̣ ܥܲܡܡܹ̈ܐ. ܘܢܲܟܸ̇ܣ ܠܥܲܡܡܹ̈ܐ ܣܲܓ̇ܝܹ̈ܐܐ ܕܲܒ̣ܪܘܼܚܩܵܐ. ܘܢܸܪܥܘܿܢ ܣܲܦ̮ܣܹܪ̈ܲܝܗܘܿܢ ܠܣܸܟܲܝ̈ ܦܲܕܵܢܹ̈ܐ: ܘܪ̈ܘܼܡܚܲܝܗܘܿܢ ܠܡܲܓ̇ܠܹ̈ܐ. ܘܠܵܐ ܢܸܫܩܘܿܠ ܥܵܡܵܐ ܥܲܠ ܥܲܡܵܐ ܣܲܝܦܵܐ. ܘܬ̣ܘܼܒ̣ ܠܵܐ ܢܹܐܠܦܘܼܢ ܩܪܵܒ̣ܵܐ.
5 ܕܒܹܝܬ̣ ܝܲܥܩܘܿܒ̣: ܬܵܘ ܢܹܐܙܲܠ ܒܢܘܼܗܪܹܗ ܕܡܵܪܝܵܐ.
6 ܡܸܛܠ ܕܲܫܒ̣ܩܬܵܝܗܝ ܠܥܲܡܵܟ݂ ܕܒܹܝܬ̣ ܝܲܥܩܘܿܒ̣. ܡܸܛܠ ܕܐܸܬ̣ܡ̱ܠܝܼܘ ܐܲܝܟ݂ ܕܡ̣ܢ ܩܕ݂ܝܼܡ. ܘܲܡܢܲܚܫܝܼܢ ܐܲܝܟ݂ ܦܠܸܫܬܵܝܹ̈ܐ. ܘܣܘܿܓ̣ܵܐܐ ܕܲܒ̣ܢܲـ̈ـܝܵܐ ܢܘܼܟ݂ܪ̈ܵܝܹܐ ܪܲܒ̇ܝܘܼ.
7 ܘܐܸܬ̣ܡܲܠܝܲܬ̇ ܐܲܪ̱ܥܗܘܿܢ ܣܹܐܡܵܐ ܘܕܲܗܒ̣ܵܐ ܘܠܲܝܬ̇ ܣܵܟ݂ܵܐ ܠܓܲܙܲܝ̈ܗܘܿܢ ܘܐܸܬ̣ܡܲܠܝܲܬ̤ ܐܲܪ̱ܥܗܘܿܢ ܪ̈ܲܟ݂ܫܵܐ: ܘܠܲܝܬ̇ ܣܵܟ݂ܵܐ ܠܡܲܪ̈ܟ̇ܒ̣ܵܬ̣ܗܘܿܢ.
8 ܘܐܸܬ̣ܡܲܠܝܲܬ̤ ܐܲܪ̱ܥܗܘܿܢ ܦܬܲܟ݂ܪܹ̈ܐ. ܠܲܥܒ̣ܵܕ݂ ܐܝܼܕܲܝ̈ܗܘܿܢ ܣܵܓ̇ܕ̇ܝܼܢ: ܠܕܲܥ̣ܒܲܕ݂ ܨܸܒ̣̈ܥܵܬ̣ܗܘܿܢ.
9 ܘܐܸܬ̣ܡܲܟܸ̇ܟ݂ ܐ̄ܢܵܫܵܐ: ܘܐܸܫܬܲܦܲܠ ܓܲܒ̣ܪܵܐ ܘܠܵܐ ܬܸܫܒ̇ܘܿܩ ܠܗܘܿܢ.
10 ܥܘܿܠܘ ܒܛܲܪ̈ܵܢܹܐ: ܘܐܸܬ̇ܛܲܡ̄ܪܘ ܒܥܲܦܪܵܐ: ܡ̣ܢ ܩܕ݂ܵܡ ܕܸܚ̱ܠܬܹܗ ܕܡܵܪܝܵܐ: ܘܡ̣ܢ ܗܸܕ݂ܪܵܐ ܕܥܘܼܫܢܹܗ.
11 ܥܲܝܢܹ̈ܐ ܪ̈ܵܡܵܬ̣ܵܐ ܕܐ̄ܢܵܫܵܐ ܢܡܲܟܸ̇ܟ݂. ܘܢܸܬ̣ܡܲܟܸ̇ܟ݂ ܪܵܘܡܵܐ ܕܓܲܒ̣ܪܵܐ. ܘܢܸܥܫܲܢ ܡܵܪܝܵܐ ܒܲܠܚܘܿܕ݂ܵܘܗܝ ܒܝܵܘܡܵܐ ܗܵܘܿ.
12 ܡܸܛܠ ܕܝܵܘܡܹܗ ܕܡܵܪܝܵܐ: ܥܲܠ ܟܠ ܕܡܸܬ̣ܓܲܐܹܐ ܘܡܸܬ̇ܬ̇ܪܝܼܡ: ܘܥܲܠ ܟܠ ܕܡܸܫܬܲܩܲܠ ܕܢܸܬ̣ܡܲܟܲܟ݂.
13 ܘܥܲܠ ܟܠܗܘܿܢ ܐܲܪ̈ܙܹܐ ܕܢܸܒ̣ܢܵܢ ܕܪܵܡܝܼܢ ܘܲܡܫܲܩܠܝܼܢ: ܘܥܲܠ ܟܠܗܘܿܢ ܒܲܠܘܼܛܹ̈ܐ ܕܒܲܝܫܵܢ.
14 ܘܥܲܠ ܟܠܗܘܿܢ ܛܘܼܪܹ̈ܐ ܕܪܵܡܝܼܢ: ܘܥܲܠ ܟܠ ܪ̈ܵܡܵܬ̣ܵܐ ܕܪ̈ܵܡܵܢ.
15 ܘܥܲܠ ܟܠ ܡܲܓܕ̇ܠܹ̈ܐ ܕܪܵܡܝܼܢ: ܘܥܲܠ ܟܠ ܫܘܼܪܹ̈ܐ ܕܥܲܫܝܼܢܝܼܢ.
16 ܘܥܲܠ ܟܠܗܹܝܢ ܐܸܠܦܹ̈ܐ ܕܬܲܪܫܝܼܫ: ܘܥܲܠ ܟܠܗܘܿܢ ܕܵܘܩܹ̈ܐ ܕܪܸܓ̇ܬ̣ܵܐ.
17 ܘܢܸܬ̣ܡܲܟܲܟ݂ ܪܵܘܡܵܐ ܕܐ̄ܢܵܫܵܐ: ܘܢܸܫܬܲܦܲܠ ܪܵܘܡܵܐ ܕܓܲܒ̣ܪܵܐ ܘܢܸܥܫܲܢ ܡܵܪܝܵܐ ܒܲܠܚܘܿܕ݂ܵܘܗܝ ܒܝܵܘܡܵܐ ܗܵܘܿ.
18 ܘܲܦܬܲܟ݂ܪܹ̈ܐ ܓܡܝܼܪܵܐܝܼܬ̣ ܢܸܥܒ̇ܪܘܼܢ.
19 ܘܢܸܥܠܘܿܢ ܒܲܡܥܲܪܹ̈ܐ ܕܟܹܐܦܵܐ: ܘܲܒ̣ܚܘܼܠܵܢܹ̈ܐ ܕܥܲܦܪܵܐ ܡ̣ܢ ܩܕ݂ܵܡ ܕܸܚ̱ܠܬܹܗ ܕܡܵܪܝܵܐ: ܘܡ̣ܢ ܗܸܕ݂ܪܵܐ ܕܥܘܼܫܢܹܗ: ܡܵܐ ܕܩܵܐܹ̇ܡ ܠܲܡܟܲܒܵܫܘܼ ܠܐܲܪܥܵܐ.
20 ܒܹܗ ܒܝܵܘܡܵܐ ܗܵܘܿ: ܢܸܫܕ̇ܘܿܢ ܐ̄ܢܵܫܵܐ ܦܬܲܟ݂ܪܹ̈ܐ ܕܕܲܗܒ̣ܵܐ ܘܲܕ݂ܣܹܐܡܵܐ: ܕܲܥ̣ܒܲܕ݂ܘ ܠܗܘܿܢ ܠܡܸܣܓܲܕ݂ ܠܲܣܪܝܼܩܘܼܬ̣ܵܐ: ܘܠܲܦܪ̈ܲܚܕ̇ܘܼܕܹܐ.
21 ܠܡܸܥܲܠ ܒܲܡܥܲܪܹ̈ܐ ܕܛܲܪܵܢܵܐ: ܘܒܲܫܩܝܼܦܹ̈ܐ ܕܟܹܐܦܵܐ ܡ̣ܢ ܩܕ݂ܵܡ ܕܸܚ̱ܠܬܹܗ ܕܡܵܪܝܵܐ: ܘܡ̣ܢ ܗܸܕ݂ܪܵܐ ܕܥܘܼܫܢܹܗ: ܡܵܐ ܕܩܵܐܹ̇ܡ ܠܲܡܟܲܒܵܫܘܼ ܠܐܲܪܥܵܐ.
22 ܫܠܵܘ ܠܟ݂ܘܿܢ ܡ̣ܢ ܐ̄ܢܵܫܵܐ ܕܲܢܫܲܡܬ̣ܵܐ ܒܲܢܚܝܼܪ̈ܵܘܗܝ: ܡܸܛܠ ܕܐܲܝܟ݂ ܡܵܢܵܐ ܚܫܝܼܒ̣.
1 ܡܸܛܠ ܕܗܵܐ ܡܵܪܹܐ ܡܵܪ̈ܵܘܵܬ̣ܵܐ: ܡܲܥܒܲܪ ܡܢ ܐܘܿܪܸܫܠܸܡ: ܘܡ̣ܢ ܝܼܗܘܼܕ݂ܵܐ: ܣܵܡ̇ܘܿܟ݂ܵܐ ܘܣܵܡ̇ܘܿܟ݂ܬܵܐ: ܟܠ ܕܣܵܡܹ̇ܟ݂ ܒܠܲܚܡܵܐ: ܘܟ݂ܠ ܕܣܵܡܹ̇ܟ݂ ܒܡܲـ̈ـܝܵܐ.
2 ܘܓܲܢ̄ܒܵܪܵܐ ܘܓܲܒ̣ܪܵܐ ܩܪܲܒ̣ܬ̣ܵܢܵܐ: ܘܕܲܝܵܢܵܐ ܘܲܢܒ̣ܝܼܵܐ ܘܩܵܨܘܿܡܵܐ ܘܩܲܫܝܼܫܵܐ.
3 ܘܪܹܫ ܚܲܡܫܝܼܢ: ܘܲܗܕ݂ܝܼܪ ܐܲܦܹ̈ܐ: ܘܡܵܠܘܿܟ݂ܵܐ ܘܚܲܟ̇ܝܼܡ ܢܲܓܵܪܹ̈ܐ: ܘܲܕ݂ܡܸܬ̣ܒܲܝܲܢ ܒܡܸܠܟܵܐ.
4 ܘܐܲܩܝܼܡ ܥܠܲܝܡܹ̈ܐ ܪܵܘ̱ܪ̈ܒ̣ܵܢܲܝܗܘܿܢ: ܘܲܡܒܲܙܚܵܢܹ̈ܐ ܢܸܫܬܲܠܛܘܼܢ ܒܗܘܿܢ.
5 ܘܢܸܦܸܠ ܥܲܡܵܐ ܓܒܲܪ ܒܲܓ̣ܒܲܪ: ܓܲܒ̣ܪܵܐ ܒܚܲܒ̣ܪܹܗ. ܘܢܸܬ̣ܓܲܪܘܿܢ ܥܠܲܝܡܹ̈ܐ ܥܲܠ ܣܵܒܹ̈ܐ: ܘܲܡܨܲܥܪܹ̈ܐ ܥܲܠ ܡܝܲܩܪܹ̈ܐ.
6 ܡܸܛܠ ܕܢܹܐܚܘܿܕ݂ ܓܲܒ̣ܪܵܐ ܓܒܲܪ ܠܐܲܚܘܼܗܝ ܡ̣ܢ ܒܹܝܬ̣ ܐܲܒ̣ܘܼܗܝ: ܘܢܹܐܡܲܪ ܠܹܗ: ܢܲܚ̈ܬܹ̇ܐ ܐܝܼܬ̣ ܠܵܟ݂. ܗ̤ܘܝܼ ܠܲܢ ܫܲܠܝܼܛܵܐ. ܘܬ̣ܘܼܩ̱ܠܬ̣ܵܐ ܗܵܕܹܐ ܬܚܹܝܬ̣ ܐܝܼܕ݂ܵܟ݂.
7 ܘܢܸܥܢܹܐ ܒܝܵܘܡܵܐ ܗܵܘܿ: ܘܢܹܐܡܲܪ: ܠܵܐ ܗܵܘܹ̇ܐ ܐ̄ܢܵܐ ܪܹܫܵܐ. ܕܲܒ̣ܒܲܝܬ̇ܝܼ ܠܲܝܬ̇ ܠܲܚܡܵܐ: ܘܐܵܦܠܵܐ ܬܲܟ݂ܣܝܼܬ̣ܵܐ. ܠܵܐ ܬܸܥܒ̇ܕ݂ܘܼܢܢܝ ܫܲܠܝܼܛܵܐ ܥܲܠ ܥܲܡܵܐ.
8 ܡܸܛܠ ܕܐܸܬ̇ܬܲܩܠܲܬ̤ ܐܘܿܪܸܫܠܸܡ: ܘܲܝܗܘܼܕ݂ܵܐ ܢܦܲܠ̣. ܡܸܛܠ ܕܠܸܫܵܢܗܘܿܢ ܘܲܥܒ̣ܵܕ݂ ܐܝܼܕܲܝ̈ܗܘܿܢ ܡܲܪܡܲܪܘ ܩܕ݂ܵܡ ܡܵܪܝܵܐ: ܘܠܲܥܢܵܢܵܐ ܕܐܝܼܩܵܪܹܗ.
9 ܡܲܣܲܒ̣ ܒܐܲܦܲܝ̈ܗܘܿܢ ܣܵܗܹܕ݂ ܒܗܘܿܢ. ܘܲܚܛܵܗܲܝ̈ܗܘܿܢ ܐܲܝܟ݂ ܣܕ݂ܘܿܡ ܚܵܘܝܼܘ: ܘܠܵܐ ܐܸܬ̇ܬ̇ܟܸܣܘ ܘܵܝ ܠܢܲܦ̮ܫܗܘܿܢ: ܕܐܲܪܡܝܼܘ ܠܗܘܿܢ ܚܘܼܒ̣̈ܠܹܐ ܒܝܼܫܹ̈ܐ.
10 ܐܸܡܲܪܘ ܠܙܲܕ̇ܝܼܩܵܐ ܛܵܒ̣: ܡܸܛܠ ܗܵܢܵܐ ܦܹܐܪ̈ܲܝ ܥܒ̣ܵܕܲܝ̈ܗܘܿܢ ܢܹܐܟ݂ܠܘܿܢ.
11 ܘܵܝ̇ ܠܪܲܫܝܼܥܵܐ ܒܝܼܫܵܐ: ܡܸܛܠ ܕܲܥܒܲܕ݂ ܐܝܼܕ݂ܵܘ̈ܗܝ ܡܸܬ̣ܦܪܲܥ.
12 ܫܲܠܝܼ̈ܛܵܘܗܝ ܕܥܲܡܝ ܡܒܲܥܪܝܼܢ ܠܹܗ. ܘܢܸܫܹ̈ܐ ܐܸܫܬܲܠܲܛ ܒܹܗ ܥܲܡܝ ܡܲܛܐ̱ܒ̣ܵܢܲܝ̈ܟ ܐܲܛܥ̱ܝܘܼܟ݂. ܘܐܘܼܪܚܵܐ ܕܲܫܒ̣̈ܝܼܠܲܝܟ ܕܲܠܲܚ̣ܘ.
13 ܩܵܐܹ̇ܡ ܠܲܡܕ݂ܵܢ ܡܵܪܝܵܐ: ܘܩܵܐܹ̇ܡ ܠܲܡܕ݂ܵܢ ܠܥܲܡܹܗ.
14 ܡܵܪܝܵܐ ܒܕ݂ܝܼܢܵܐ ܢܸܥܘܿܠ: ܘܥܲܡ ܣܵܒܹ̈ܐ ܕܥܲܡܹܗ: ܘܥܲܡ ܪܵܘ̱ܪ̈ܒ̣ܵܢܵܘܗܝ. ܐܲܢ̄ܬ̇ܘܿܢ ܐܵܘܩܸܕ̇ܬ̇ܘܿܢ ܟܲܪܡܵܐ. ܘܲܚܛܘܼܦܝܵܐ ܕܡܸܣܟܹ̇ܢܹ̈ܐ ܒܒ̣ܵܬܲܝ̈ܟ̇ܘܿܢ.
15 ܠܡܵܢܵܐ ܢܟܲܝܬ̇ܘܿܢ ܠܥܲܡܝ: ܘܐܲܦܹ̈ܐ ܕܡܸܣܟܹ̇ܢܹ̈ܐ ܐܲܒ̣ܗܸܬ̇ܬ̇ܘܿܢ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.
16 ܥܲܠ ܕܐܸܬ̇ܬ̇ܪܝܼܡ ܒ̈ܢܵܬ̣ ܨܸܗܝܘܿܢ: ܘܗܲܠܸܟ݂ ܒܨܵܘܪܵܐ ܪܵܡܵܐ. ܘܲܒ̣ܪܸܡܙܵܐ ܕܥܲܝܢܹ̈ܐ ܡܗܲܠ̈ܟ݂ܵܢ ܗ̄ܘܲܝ̈. ܘܲܡܛܲܪ̈ܦܵܢ ܒܪܸ̈ܓ̣ܠܲܝܗܹܝܢ: ܘܡܲܪ̈ܓ̇ܙܵܐ.
17 ܢܡܲܟܸ̇ܟ݂ ܡܵܪܝܵܐ ܪܹ̈ܫܵܝܵܬ̣ܵܐ ܕܲܒ̣̈ܢܵܬ̣ ܨܸܗܝܘܿܢ. ܘܡܵܪܝܵܐ ܐܸܣܟܹ̇ܡܗܹܝܢ ܢܦܲܪܣܸܐ.
18 ܒܝܵܘܡܵܐ ܗܵܘܿ: ܢܲܥܒܲܪ ܡܵܪܝܵܐ ܫܘܼܒ̣ܚܵܐ ܕܢܲܚܬܲܝ̈ܗܹܝܢ. ܘܲܕ݂ܨܸܒ̣ܬ̇ܗܹܝܢ: ܘܕܲܓ̣ܕ݂ܘܿܠܲܝ̈ܗܹܝܢ.
19 ܘܐܸܣܦܹܝܪܹ̈ܐ ܕܣܲܥܪ̈ܲܝܗܹܝܢ: ܘܒܸܠܘܿܪ̈ܲܝܗܹܝܢ: ܘܨܸܕ݂ܥܲܝ̈ܗܹܝܢ.
20 ܘܨܸܒ̣ܬܵܐ ܕܐܲܦܲܝ̈ܗܹܝܢ: ܘܲܩܕ݂ܵܫܲܝ̈ܗܹܝܢ: ܘܥܸܩܲܝ̈ܗܹܝܢ.
21 ܘܐܲܩ̈ܠܵܢܲܝܗܹܝܢ: ܘܩܘܿܠܒܲܝ̈ܗܹܝܢ: ܘܫܹܐܪ̈ܲܝܗܹܝܢ.
22 ܘܟ݂ܘܼܬ̇ܝܼܢ̈ܝܵܬ̣ܗܹܝܢ: ܘܲܡܫܲܠܡܵܢ̈ܝܵܬ̣ܗܹܝܢ: ܘܒ̣ܘܼܨܗܹܝܢ: ܘܐܲܪ̈ܓ̇ܘܵܢܲܝܗܹܝܢ.
23 ܘܢܲܚܬܲܝ̈ܗܹܝܢ: ܘܬܸܟ݂̈ܠ̱ܝܵܬ̣ܗܹܝܢ: ܘܲܙܚܘܿܪ̈ܝܵܬ̣ܗܹܝܢ: ܘܨܸܡܕܵܐ ܟܠܹܗ ܕܨܸܒ̣ܬ̇ܗܹܝܢ.
24 ܘܢܸܗܘܸܐ ܚܸܠܵܐ ܚܠܵܦ ܪܹܝܚܗܹܝܢ ܒܲܣܝܼܡܵܐ. ܘܲܚܠܵܦ ܐܲܣܵܪ ܚܲܨܲܝ̈ܗܹܝܢ ܡܝܼܙܪ̈ܵܢܹܐ ܢܹܐܣܪ̈ܵܢ. ܘܲܚܠܵܦ ܒܸܠܘܿܪܹ̈ܐ: ܩܘܼܕ݂ܚܵـ̈ـܬ̣ܵܐ. ܘܲܚܠܵܦ ܬܸܟ݂ܠ̈ܝܵܬ̣ܗܹܝܢ: ܣܲܩܹ̈ܐ ܢܸܬ̣ܟܲܣ̈ܝܵܢ. ܡܸܛܠ ܕܢܸܬ̣ܚܲܒܲܠ ܫܘܼܦ̱ܪܗܹܝܢ.
25 ܘܥܲܫܝܼܢܲܝ̈ܟ̇ܝ ܒܚܲܪܒܵܐ ܢܸܦܠܘܼܢ: ܘܓܲܢ̄ܒܵܪ̈ܲܝܟ̇ܝ ܒܲܩܪܵܒ̣ܵܐ.
26 ܘܢܹܐܠܘܿܢ: ܘܢܸܬ̇ܒ̣ܘܼܢ ܒܐܸܒ̣ܠܵܐ ܬܲܪ̈ܥܹܝܗ̇. ܘܙܵܟ݂ܘܼܬ̣ܵܗ̇ ܒܐܲܪܥܵܐ ܬܸܦܸܠ.
1 ܘܢܹܐܚ̈ܕܵܢ ܫܒܲܥ ܢܸܫ̈ܝܼܢ ܠܓܲܒ̣ܪܵܐ ܚܲܕ݂ ܒܝܵܘܡܵܐ ܗܵܘܿ. ܘܢܹܐܡܪ̈ܵܢ ܠܹܗ: ܠܲܚܡܲܢ ܢܹܐܟ݂ܘܿܠ: ܘܢܲܚ̈ܬܲܝܢ ܢܸܬ̣ܟܲܣܸܐ. ܒܲܠܚܘܿܕ݂ ܫܡܵܟ݂ ܢܸܬ̣ܩܪܸܐ ܥܠܲܝܢ: ܘܐܲܥܒܲܪ ܚܸܣܕܲܢ.
2 ܒܹܗ ܒܝܵܘܡܵܐ ܗܵܘܿ: ܢܸܗܘܹܐ ܕܸܢܚܹܗ ܕܡܵܪܝܵܐ ܠܫܘܼܒ̣ܚܵܐ: ܘܠܐܝܼܩܵܪܵܐ. ܘܦܹܐܪܹ̈ܐ ܕܐܲܪܥܵܐ ܠܓܲܐܝܘܼܬ̣ܵܐ: ܘܲܠܫܘܼܒ̣ܚܵܐ: ܠܡܸܕܸ̇ܡ ܕܐܸܫܬ̇ܚܲܪ ܡ̣ܢ ܝܼܣܪܵܝܹܠ.
3 ܘܢܸܗܘܹܐ ܡܲܢ ܕܡܸܫܬܲܚܲܪ ܒܨܸܗܝܘܿܢ: ܘܡܲܢ ܕܡܸܫܬܲܚܪ ܒܐܘܿܪܸܫܠܸܡ: ܩܲܕ̇ܝܼܫܵܐ ܢܸܬ̣ܩܪܸܐ: ܟܠ ܕܲܟ݂ܬ̣ܝܼܒ̣ ܒܐܘܿܪܸܫܠܸܡ ܠܚܲܝܹ̈ܐ.
4 ܘܲܢܫܝܼܓ̣ ܡܵܪܝܵܐ ܨܵܐܬ̣ܵܐ ܕܲܒ̣̈ܢܵܬ̣ ܨܸܗܝܘܿܢ. ܘܲܕ݂ܡܵܐ ܢܲܪܚܸܩ ܡ̣ܢ ܓܵܘܵܗ̇ ܕܐܘܿܪܸܫܠܸܡ: ܒܪܘܼܚܵܐ ܕܕ݂ܝܼܢܵܐ: ܘܲܒ̣ܪܘܼܚܵܐ ܝܲܩܝܼܕ̇ܬܵܐ.
5 ܘܢܸܒ̣ܪܸܐ ܡܵܪܝܵܐ ܥܲܠ ܟܠܹܗ ܡܲܬ̣ܩܢܵܐ: ܠܛܘܼܪܵܐ ܕܨܸܗܝܘܿܢ ܥܲܠ ܚܕ݂ܵܪܹ̈ܝܗ̇: ܥܢܵܢܵܐ ܒܐܝܼܡܵܡܵܐ: ܘܬܸܢܵܢܵܐ ܘܙܲܗܪܵܐ ܕܫܲܠܗܹܒ̣ܝܼܬ̣ܵܐ ܕܢܘܼܪܵܐ ܒܠܸܠܝܵܐ. ܡܸܛܠ ܕܥܲܠ ܟܠ ܐܝܼܩܵܪ ܬܲܛܸܥ.
6 ܘܣܸܬܵܪܵܐ ܢܸܗܘܹܐ ܠܛܸܠܵܠܵܐ ܕܝܵܘܡܵܐ ܡ̣ܢ ܫܵܘܒܵܐ: ܠܲܡܟܲܣܵܝܘܼ ܘܠܲܡܣܲܬܵܪܘܼ ܡ̣ܢ ܙܵܪܝܼܒ̣ܬܵܐ ܘܡ̣ܢ ܡܸܛܪܵܐ.
1 ܐܹܫܲܒܲܚ ܠܚܲܒ̇ܝܼܒ̣ܝ: ܬܸܫܒ̇ܘܿܚܬܵܐ ܕܚܲܒ̇ܝܼܒ̣ܝ ܠܟܲܪܡܹܗ. ܟܲܪܡܵܐ ܗ̄ܘܼܵܐ ܠܚܲܒ̇ܝܼܒ̣ܝ: ܒܩܲܪܢܵܐ ܕܐܲܬ̣ܪܵܐ ܫܲܡܝܼܢܵܐ.
2 ܘܦܲܠܚܹܗ: ܘܐܲܚܕ̇ܪܹܗ ܣܝܵܓ̣ܵܐ. ܘܲܢܨܲܒ̣ ܒܹܗ ܫܲܒ̇ܘܼܩܹ̈ܐ: ܘܲܒ̣ܢܵܐ ܡܲܓܕ̇ܠܵܐ ܒܓܵܘܹܗ. ܘܐܵܦ ܡܲܥܨܲܪܬܵܐ ܥܒܲܕ݂ ܒܹܗ. ܘܣܲܟ̇ܝܼ ܕܢܸܥܒܸ̇ܕ݂ ܥܸܢܒܹ̈ܐ. ܘܲܥ̣ܒܲܕ݂ ܚܲܪ̈ܘܼܒܹܐ.
3 ܗܵܫܵܐ ܓܲܒ̣ܪܹ̈ܐ ܕܲܝܗܘܼܕ݂ܵܐ: ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܕܘܼܢܘ ܒܲܝܢܲܝ ܠܟܲܪܡܝ.
4 ܡܵܢܵܐ ܬܘܼܒ̣ ܘܵܠܹܐ ܗ̄ܘܼܵܐ ܠܡܸܥܒܲܕ݂ ܠܟܲܪܡܝ: ܘܠܵܐ ܥܸܒ̣ܕܹ̇ܬ̣ ܠܹܗ. ܕܣܲܟ̇ܝܼܬ̇ ܕܢܸܥܒܸ̇ܕ݂ ܥܸܢܒܹ̈ܐ: ܘܲܥ̣ܒܲܕ݂ ܚܲܪ̈ܘܼܒܹܐ.
5 ܗܵܫܵܐ ܐܹܚܵܘܹܝܟ݂ܘܿܢ ܡܸܕܸ̇ܡ ܕܥܵܒܹ̇ܕ݂ ܐ̄ܢܵܐ ܠܹܗ ܠܟܲܪܡܝ: ܥܵܩܲܪ ܐ̄ܢܵܐ ܡܲܓܕ̇ܠܹܗ: ܘܢܸܗܘܹܐ ܠܒܸܙܬ̣ܵܐ. ܘܬ̣ܵܪܲܥ ܐ̄ܢܵܐ ܣܝܵܓܹܗ: ܘܢܸܗܘܹܐ ܠܲܕ݂ܫܵܐ.
6 ܘܐܸܥܒ̇ܕ݂ܝܼܘܗܝ ܕܢܸܚܪܲܒ̣ ܘܠܵܐ ܢܸܬ̣ܟ̇ܣܲܚ. ܘܠܵܐ ܢܸܬ̣ܦܠܲܚ ܘܢܹܐܥܘܿܢ ܒܹܗ ܟܘܼ̈ܒܹ̇ܐ ܘܝܲܥܪܵܐ. ܘܐܸܦܩܘܿܕ݂ ܠܲܥܢܵܢܹ̈ܐ ܕܠܵܐ ܢܲܚ̈ܬ̣ܵܢ ܥܠܵܘܗܝ ܡܸܛܪܵܐ.
7 ܡܸܛܠ ܕܟܲܪܡܹܗ ܕܡܵܪܝܵܐ ܚܲܝܠܬ̣ܵܢܵܐ: ܒܲܝܬܵܐ ܗ̄ܘܼ ܕܒܹܝܬ̣ ܝܼܣܪܵܝܹܠ: ܘܓܲܒ̣ܪܹ̈ܐ ܕܡ̣ܢ ܝܼܗܘܼܕ݂ܵܐ: ܢܸܨܒ̇ܬ̣ܵܐ ܚܕܲܬܵܐ ܘܚܲܒ̇ܝܼܒ̣ܬܵܐ ܣܲܟ̇ܝܼܬ̇ ܠܕ݂ܝܼܢܵܐ: ܘܲܗܘ̤ܵܐ ܚܛܘܼܦܝܵܐ. ܘܲܠܙܲܕ̇ܝܼܩܘܼܬ̣ܵܐ: ܘܗܵܐ ܝܑܼܠܲܠܬܵܐ.
8 ܘܵܝ ܠܕܲܡܩܲܪܒ̣ܝܼܢ ܒܲܝܬܵܐ ܠܒܲܝܬܵܐ: ܘܚܲܩܠܐ ܒܚܲܩܠܵܐ ܚܵܠܛܝܼܢ. ܕܬܹܐܚܕ̇ܘܼܢ ܐܲܬ̣ܪܵܐ: ܘܬܸܬ̇ܒ̣ܘܼܢ ܒܲܠܚܘܿܕܲܝܟ̇ܘܿܢ ܒܓ̣ܵܘܵܗ̇ ܕܐܲܪܥܵܐ.
9 ܒܐܸܕ݂ܢܲܝ̈ ܡܵܪܝܵܐ ܚܲܝܠܬ̣ܵܢܵܐ ܐܸܫܬ̇ܡܲܥ. ܒܵـ̈ـܬܹܐ ܣܲܓ̇ܝܹ̈ܐܐ ܠܚܘܼܪܒܵܐ ܢܸܗܘܘܿܢ: ܡ̣ܢ ܒܠܲܝ ܕܝܵܬܹܒ̣.
10 ܡܸܛܠ ܕܲܥܣܲܪ ܐܸܫܟܵܪܹ̈ܐ ܕܟܲܪܡܵܐ ܢܸܥ̈ܒ̇ܕܵܢ ܚܕ݂ܵܐ ܚܵܒ̣ܝܼܬ̣ܵܐ: ܘܙܲܪܥܵܐ ܕܟ݂ܘܿܪ ܢܸܥܒܸ̇ܕ݂ ܣܐܵܐ.
11 ܘܵܝ ܠܕܲܡܩܲܕ̇ܡܝܼܢ ܒܨܲܦܪܵܐ: ܘܪܵܗ̇ܛܝܼܢ ܠܫܲܟ݂ܪܵܐ. ܘܡܵܘܚ̄ܪܝܼܢ ܒܪܲܡܫܵܐ: ܘܚܲܡܪܵܐ ܡܵܘܩܸܕ݂ ܠܗܘܿܢ.
12 ܒܟܸܢܵܪܹ̈ܐ: ܘܲܒ̣ܩܝܼܬ̣ܵܪܹ̈ܐ: ܘܒܲܦ̈ܠܲܓܹ̇ܐ: ܘܒܲܪ̈ܒ̣ܝܼܥܹܐ: ܚܲܡܪܵܐ ܫܵܬܹܝܢ. ܘܒܲܥܒ̣ܵܕ݂ܵܘ̈ܗܝ ܕܐܲܠܵܗܵܐ ܠܵܐ ܡܸܣܬܲܟ̇ܠܝܼܢ. ܘܒܲܥܒ̣ܵܕ݂ ܐܝܼܕ݂ܵܘ̈ܗܝ ܠܵܐ ܚܵܝ̇ܪܝܼܢ.
13 ܡܸܛܠ ܗܵܢܵܐ ܐܸܫܬ̇ܒ̣ܝܼ ܥܲܡܝ ܡ̣ܢ ܒܠܲܝ ܝܼܕܲܥܬ̣ܵܐ. ܡܝܼܬܲܝ̈ܗܘܿܢ ܡ̣ܢ ܟܲܦܢܵܐ. ܘܲܥ̣ܫܸܢܘ ܡ̣ܢ ܨܲܗܝܵܐ.
14 ܡܸܛܠ ܗܵܢܵܐ ܐܲܦ̮ܬ̇ܝܲܬ̤ ܫܝܘܿܠ ܢܲܦ̮ܫܵܗ̇. ܘܦܸܥܪܲܬ̤ ܦܘܼܡܵܗ̇ ܕܠܵܐ ܣܵܟ݂: ܘܢܸܚܬ̣ܘܼܢ ܠܵܗ̇ ܡܫܲܒ̇ܚܹ̈ܐ ܘܲܡܝܲܩܪܹ̈ܐ ܘܥܲܫܝܼܢܹ̈ܐ.
15 ܘܢܸܬ̣ܡܲܟܲܟ݂ ܐ̄ܢܵܫܵܐ: ܘܢܸܫܬܲܦܲܠ ܓܲܒ̣ܪܵܐ ܘܥܲܝܢܹ̈ܐ ܪ̈ܵܡܵܬ̣ܵܐ ܢܸܬ̣ܡܲـ̈ـܟ̇ܟ݂ܵܢ.
16 ܘܢܸܬ̇ܬ̇ܪܝܼܡ ܡܵܪܝܵܐ ܚܲܝܠܬ̣ܵܢܵܐ ܒܕ݂ܝܼܢܵܐ ܘܐܲܠܵܗܵܐ ܩܲܕ̇ܝܼܫܵܐ ܢܸܬ̣ܩܲܕܲܫ ܒܙܲܕ̇ܝܼܩܘܼܬ̣ܵܐ.
17 ܘܢܸܪܥܘܿܢ ܐܸܡܪܹ̈ܐ ܒܙܸܕ݂ܩ̄ܗܘܿܢ. ܘܚܲܪ̈ܒ̣ܵܬ̣ܵܐ ܕܐܸܬ̣ܒ̇ܢܝܼ: ܥܵܡܘܿܪܹ̈ܐ ܢܹܐܟ݂ܠܘܼܢ ܐܸܢܹܝܢ.
18 ܘܵܝ ܠܲܕ݂ܡܵܘܪܟ݂ܝܼܢ ܚܛܵܗܲܝ̈ܗܘܿܢ ܐܲܝܟ݂ ܚܲܒ̣ܠܵܐ ܐܲܪܝܼܟ݂ܵܐ. ܘܐܲܝܟ݂ ܥܪܲܩܬ̣ܵܐ ܕܥܵܓܸܠܬܵܐ ܚܛܝܼܬ̣ܗܘܿܢ.
19 ܘܐܵܡ̇ܪܝܼܢ: ܒܲܥܓܲܠ ܢܣܲܪܗܸܒ̣ ܡܵܪܝܵܐ ܥܒ̣ܵܕ݂ܵܘ̈ܗܝ ܕܢܸܚܙܹܐ ܐܸܢܘܿܢ. ܘܬܸܩܪܘܿܒ̣ ܘܬܹܐܬܹܐ ܬܲܪܥܝܼܬܹܗ ܕܩܲܕ̇ܝܼܫܵܐ ܕܝܼܣܪܵܝܹܠ ܘܢܸܕ̇ܥܹܝܗ̇.
20 ܘܵܝ ܠܲܕ݂ܩܵܪܹܝܢ ܠܒ̣ܝܼܫܵܐ ܛܵܒ̣ܵܐ: ܘܲܠܛܵܒ̣ܵܐ ܒܝܼܫܵܐ. ܘܣܵܝܡ̇ܝܢ ܢܲܗܝܼܪܵܐ ܠܚܸܫܘܿܟ݂ܵܐ: ܘܚܸܫܘܿܟ݂ܵܐ ܠܢܲܗܝܼܪܵܐ. ܘܣܵܝ̇ܡܝܼܢ ܡܲܪܝܼܪܵܐ ܚܲܠܝܵܐ: ܘܚܲܠܝܵܐ ܡܲܪܝܼܪܵܐ.
21 ܘܵܝ ܠܲܕ݂ܚܲܟ̇ܝܼܡܝܼܢ ܒܥܲܝܢܲܝ̈ ܢܲܦ̮ܫܗܘܿܢ: ܘܠܘܼܩܒܲܠ ܐܲܦܲܝ̈ܗܘܿܢ ܣܲܟ̇ܘܼܠܬ̣ܵܢܝܼܢ.
22 ܘܵܝ ܠܲܕ݂ܓܲܢ̄ܒܵܪܝܼܢ ܠܡܸܫܬܵܐ ܚܲܡܪܵܐ: ܘܲܠܓܲܒ̣ܪܹ̈ܐ ܚܲܝܠܬ̣ܵܢܹ̈ܐ ܕܡܵܙ̇ܓ̇ܝܼܢ ܫܲܟ݂ܪܵܐ.
23 ܘܲܡܙܲܟܹ̇ܝܢ ܠܚܲܝܵܒ̣ܵܐ ܡܸܛܠ ܫܘܼܚܕܹ̇ܗ ܘܙܵܟ݂ܘܼܬܹܗ ܕܙܲܟܵܝܵܐ ܡܲܥܒ̇ܪܝܼܢ ܡܸܢܗܘܿܢ.
24 ܡܸܛܠ ܗܵܢܵܐ ܐܲܝܟ݂ ܕܡܸܬ̣ܐܲܟ݂ܠܵܐ ܚܲܒ̇ܬ̣ܵܐ. ܒܠܸܫܵܢܵܐ ܕܢܘܼܪܵܐ ܕܐܵܚ̇ܕܵܐ: ܡ̣ܢ ܫܲܠܗܹܒ̣ܝܼܬ̣ܵܐ ܕܡܸܫܬܲܒ̣ܩܵܐ ܢܸܬ̣ܐܲܟ݂ܠܘܼܢ. ܘܥܸܩܵܪܗܘܿܢ ܐܲܝܟ݂ ܚܸܠܵܐ ܢܸܗܘܹܐ. ܘܦܸܪ̱ܥܗܘܿܢ ܐܲܝܟ݂ ܥܘܼܪܵܐ ܢܸܣܲܩ. ܥܲܠ ܕܐܲܣܠܝܼܘ ܢܵܡܘܿܣܹܗ ܕܡܵܪܝܵܐ ܚܲܝܠܬ̣ܵܢܵܐ: ܘܲܠܡܹܐܡܪܹܗ ܕܩܲܕ̇ܝܼܫܵܐ ܕܝܼܣܪܵܝܹܠ ܐܲܪܓܸ̇ܙܘ.
25 ܡܸܛܠ ܗܵܢܵܐ ܐܸܬ̣ܚܲܡܲܬ̣ ܪܘܼܓ̣ܙܹܗ ܕܡܵܪܝܵܐ ܥܲܠ ܥܲܡܹܗ. ܘܐܲܪܝܼܡ ܐܝܼܕܹܗ ܥܠܲܝܗܘܿܢ: ܘܲܡܚܵܐ ܐܸܢܘܿܢ. ܘܙܵܥܘܼ ܛܘܼܪܹ̈ܐ ܘܲܗ̤ܘܲܝ̈ ܫܠܲܕܲܝ̈ܗܘܿܢ ܐܲܝܟ݂ ܣܝܵܢܵܐ ܒܓ̣ܵܘ ܫܘܼܩܹ̈ܐ ܘܲܒ̣ܗܵܠܹܝܢ ܟܠܗܹܝܢ ܠܵܐ ܗ̣ܦܲܟ݂ ܪܘܼܓ̣ܙܹܗ: ܘܬ̣ܘܼܒ̣ ܐܝܼܕܹܗ ܪܵܡܵܐ.
26 ܘܲܢܪܝܼܡ ܐܵܬ̤ܵܐ ܠܥܲܡܡܹ̈ܐ ܡ̣ܢ ܪܘܼܚܩܵܐ: ܘܢܲܫܪܸܩ ܠܗܘܿܢ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ. ܘܒܲܥܓܲܠ ܘܩܲܠܝܼܠܵܐܝܼܬ̣ ܢܹܐܬ̣ܘܿܢ.
27 ܠܵܐ ܢܸܬ̇ܛܲܪܦܘܼܢ: ܘܠܵܐ ܢܸܬ̇ܬܲܩܠܘܼܢ. ܘܠܵܐ ܢܢܘܼܡܘܼܢ ܘܠܵܐ ܢܸܕ݂ܡ̱ܟ݂ܘܼܢ. ܘܠܵܐ ܢܸܫܪܘܿܢ ܐܵܣܲܪ ܚܲܨܲܝ̈ܗܘܿܢ: ܘܠܵܐ ܢܸܬ̣ܦܲܣ̈ܩܵܢ ܥܲܪ̈ܩܹܐ ܕܲܡܣܵܢܲܝ̈ܗܘܿܢ.
28 ܓܹܐܪ̈ܲܝܗܘܿܢ ܫܢܝܼܢܝܼܢ: ܘܩܸܫ̈ܬܵܬ̣ܗܘܿܢ ܡܲܠ̈ܝܵܢ. ܘܦܲܪ̈ܣܵܬ̣ܵܐ ܕܪ̈ܲܟ݂ܫܗܘܿܢ ܐܲܝܟ݂ ܛܲܪ̈ܵܢܹܐ ܢܸܬ̣ܚܲܫ̈ܒܵܢ: ܘܓ̣ܝܼܓ̣ܠܲܝ̈ܗܘܿܢ ܐܲܝܟ݂ ܥܲܠܥܵܠܵܐ.
29 ܘܢܸܗܡܲܬ̣ܗܘܿܢ ܐܲܝܟ݂ ܐܲܪܝܵܐ ܕܢܵܗܹ̇ܡ: ܘܐܲܝܟ݂ ܓܘܼܪܝܵܐ ܕܐܲܪܝܵܐ ܕܢܵܗܹ̇ܡ ܘܐܵܚܹ̇ܕ݂ ܬܒ̣ܵܪܵܐ. ܘܡܲܥܕܹ̇ܐ ܘܠܲܝܬ̇ ܕܲܡܦܲܨܹܐ.
30 ܘܢܸܢܗܲܡ ܥܠܲܝܗܘܿܢ ܒܝܵܘܡܵܐ ܗܵܘܿ: ܐܲܝܟ݂ ܢܸܗ̱ܡܬܹܗ ܕܝܲܡܵܐ. ܘܲܢܚܘܼܪܘܼܢ ܒܐܲܪܥܵܐ: ܘܢܸܗܘܹܐ ܚܸܫܘܿܟ݂ܵܐ ܘܐܘܼܠܨܵܢܵܐ. ܘܢܘܼܗܪܵܐ ܢܸܚܫܲܟ݂ ܒܥܲܡܛܵܢܗܘܿܢ.
1 ܒܫܲܢ̄ܬܵܐ ܕܡܝܼܬ̣ ܥܘܿܙܝܼܵܐ ܡܲܠܟܵܐ: ܚܙܹ̇ܝܬ̣ ܠܡܵܪܝܵܐ ܝܵܬܹ̇ܒ̣ ܥܲܠ ܟܘܼܪܣܝܵܐ ܪܵܡܵܐ. ܘܫܸܩܠܵܐ ܕܲܫܦܘܿܠܵܘ̈ܗܝ ܡܠܸܐ ܗܲܝܟ̇ܠܹܗ.
2 ܘܲܣܪ̈ܵܦܝܼܢ ܩܵܝ̇ܡܝܼܢ ܠܥܸܠ ܡܸܢܹܗ: ܫܬܵܐ ܫܬܵܐ ܓܸܦܝܼ̈ܢ ܠܚܲܕ݂ ܡܸܢܗܘܿܢ. ܒܲܬ̣ܪܹܝܢ ܡܟܲܣܹܝܢ ܦܲܪܨܘܿܦܹܗ: ܘܒܲܬ̣ܪܹܝܢ ܡܟܲܣܹܝܢ ܪܸ̈ܓ̣ܠܵܘܗܝ: ܘܒܲܬ̣ܪܹܝܢ ܦܵܪܚܝܼܢ.
3 ܘܩܵܪܝܼܢ ܗܵܢܵܐ ܠܗܵܢܵܐ: ܘܐܵܡ̇ܪܝܼܢ: ܩܲܕ̇ܝܼܫ: ܩܲܕ̇ܝܼܫ: ܩܲܕ̇ܝܼܫ: ܡܵܪܝܵܐ ܚܲܝܠܬ̣ܵܢܵܐ: ܕܡܲܠܝܵܐ ܟܠܵܗ̇ ܐܲܪܥܵܐ ܬܸܫ̈ܒ̇ܚܵܬܹܗ.
4 ܘܙܵܥ ܐܸܣܟ̇ܦܵـ̈ـܬ̣ܵܐ ܕܬܲܪ̈ܥܹܐ ܡ̣ܢ ܩܵܠܵܐ ܕܩܵܪܹܐ: ܘܒܲܝܬܵܐ ܐܸܬ̣ܡ̱ܠܝܼ ܬܸܢܵܢܵܐ.
5 ܘܐܸܡ̇ܪܹܬ̣ ܘܵܝ ܠܝܼ ܕܬ̣ܵܘܝܼܪ ܐ̄ܢܵܐ: ܡܸܛܠ ܕܓܲܒ̣ܪܵܐ ܐ̄ܢܵܐ ܛܡܲܐ ܣܸܦ̈ܘܵܬ̣ܵܐ: ܘܒܲܝܢܵܬ̣ ܥܲܡܵܐ ܕܛܲܡܵܐ̈ܢ ܣܸܦ̈ܘܵܬܹܗ ܥܵܡܲܪ ܐ̄ܢܵܐ. ܘܲܠܡܲܠܟܵܐ ܡܵܪܝܵܐ ܚܲܝܠܬ̣ܵܢܵܐ ܚܙܲܝ̈ ܥܲܝ̈ܢܲܝ.
6 ܘܲܦܪܲܚ̣ ܠܘܵܬ̣ܝ ܚܲܕ݂ ܡ̣ܢ ܣܪ̈ܵܦܝܼܢ: ܘܒ̣ܐܝܼܕܹܗ ܓܡܘܼܪܬܵܐ ܫ̣ܩܲܠ ܡ̣ܢ ܡܲܕ݂ܒ̇ܚܵܐ: ܒܟܲܠܒ̇ܬ̣ܵܐ.
7 ܘܩܲܪܸܒ̣ ܠܦܘܼܡܝ: ܘܐܸܡܲܪ ܠܝܼ: ܗܵܐ ܩܸܪܒܲܬ̤ ܗܵܕܹܐ ܠܣܸܦ̈ܘܵܬ̣ܵܟ݂: ܕܢܸܥܒܲܪ ܥܵܘܼܠܵܟ݂: ܘܲܚܛܵܗܲܝ̈ܟ ܢܸܫܬܲܒ̣ܩܘܼܢ.
8 ܘܫܸܡܥܹ̇ܬ̣ ܩܵܠܹܗ ܕܡܵܪܝܵܐ ܕܐܵܡܲܪ: ܠܡܲܢ ܐܹܫܲܕܲܪ: ܘܡܲܢ ܢܹܐܙܲܠ. ܘܐܸܡ̇ܪܹܬ̣ ܗܵܐ ܐܸܢܵܐ ܫܲܕܲܪܲܝܢܝ.
9 ܘܐܸܡܲܪ ܠܝܼ: ܙܸܠ ܐܸܡܲܪ ܠܥܲܡܵܐ ܗܵܢܵܐ: ܫܡܲܥܘ ܡܸܫܡܲܥ: ܘܠܵܐ ܬܸܣܬܲܟ̇ܠܘܼܢ ܘܲܚܙܸܵܘ ܡܸܚܙܵܐ: ܘܠܵܐ ܬܸܕ̇ܥܘܼܢ.
10 ܐܸܬ̣ܥܲܒ̇ܝܼ ܠܹܗ ܓܹܝܪ ܠܸܒܹ̇ܗ ܕܥܲܡܵܐ ܗܵܢܵܐ: ܘܐܸܕ݂ܢܵܘ̈ܗܝ ܐܵܘܩܲܪ: ܘܥܲܝܢܵܘ̈ܗܝ ܫܵܥ. ܕܠܵܐ ܢܸܚܙܹܐ ܒܥܲܝܢܵܘ̈ܗܝ: ܘܢܸܫܡܲܥ ܒܐܸܕ݂ܢܵܘ̈ܗܝ: ܘܢܸܣܬܲܟܲܠ ܒܠܸܒܹ̇ܗ: ܘܲܢܬ̣ܘܼܒ̣ ܘܢܸܫܬܲܒܸܩ ܠܹܗ.
11 ܘܐܸܡ̇ܪܹܬ̣ ܥܕܲܡܵܐ ܠܐܸܡܲܬ̣ܝ ܡܵܪܝܵܐ: ܘܐܸܡܲܪ ܥܕܲܡܵܐ ܕܢܸܚ̱ܪ̈ܒ̣ܵܢ ܩܘܼܪ̈ܝܵܐ ܡ̣ܢ ܒܠܲܝ ܕܝܵܬܹ̇ܒ̣: ܘܒ̣ܵـ̈ـܬܹ̇ܐ ܡ̣ܢ ܒܠܲܝ ܐ̄ܢܵܫܵܐ: ܘܐܲܪܥܵܐ ܬܸܚܪܲܒ̣ ܘܬܸܨܕܹ̇ܐ.
12 ܘܢܸܕ݂ܚܘܿܩ ܡܵܪܝܵܐ ܠܐ̄ܢܵܫܐ: ܘܬܸܣܓܹ̇ܐ ܫܒ̣ܝܼܩܘܼܬ̣ܵܐ ܒܓ̣ܵܘܵܗ̇ ܕܐܲܪܥܵܐ.
13 ܘܲܕ݂ܦܵܝܫܝܼܢ ܒܵܗ̇ ܚܲܕ݂ ܡ̣ܢ ܥܸܣܪܵܐ: ܘܲܬ̇ܬ̣ܘܼܒ̣: ܘܬܸܗܘܹܐ ܠܝܲܩܕܵܢܵܐ: ܐܲܝܟ݂ ܒܸܛܡ̱ܬ̣ܵܐ ܘܐܲܝܟ݂ ܒܲܠܘܼܛܵܐ ܕܲܢܦܲܠ ܡ̣ܢ ܩܥܵܪܬܹ̇ܗ. ܘܙܲܪܥܵܐ ܗ̄ܘܼ ܩܲܕ̇ܝܼܫܵܐ ܢܸܨܒ̇ܬܹܗ.
1 ܘܲܗܘ̤ܵܐ ܒܝܵܘ̈ܡܵܬܹܗ ܕܐܵܚܵܙ: ܒܲܪ ܝܘܿܬ̣ܵܡ: ܒܲܪ ܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܣܠܸܩ ܪܵܨܵܢ ܡܲܠܟܵܐ ܕܐܵܪܵܡ: ܘܲܦܩܲܚ ܒܲܪ ܪܘܿܡܲܠܝܵܐ ܡܲܠܟܵܐ ܕܝܼܣܪܵܝܹܠ ܠܐܘܿܪܸܫܠܸܡ: ܠܡܸܬ̣ܟܲܬܵܫܘܼ ܥܲܡܵܗ̇: ܘܠܵܐ ܐܸܫܟܲܚܘ ܕܢܸܬ̣ܟܲܬ̇ܫܘܼܢ ܥܠܹܝܗ̇.
2 ܘܐܸܬ̣ܐ̱ܡܲܪ ܠܲܕ݂ܒܹܝܬ̣ ܕܵܘܝܼܕ݂: ܕܐܸܫܬ̇ܘܝܼ ܐܵܪܵܡ ܥܲܡ ܐܲܦܪܹܝܡ. ܘܙܵܥ̣ ܠܸܒܹ̇ܗ ܘܠܸܒܵܐ ܕܥܲܡܹܗ: ܐܲܝܟ݂ ܕܙܵܝ̇ܥܝܼܢ ܐܝܼܠܵܢܹ̈ܐ ܕܥܵܒ̣ܵܐ ܡ̣ܢ ܩܕ݂ܵܡ ܪܘܼܚܵܐ.
3 ܘܐܸܡܲܪ ܡܵܪܝܵܐ ܠܐܹܫܲܥܝܵܐ: ܦܘܿܩ ܠܐܘܼܪܥܹܗ ܕܐܵܚܵܙ: ܐܲܢ̄ܬ̇ ܘܫܲܪܢܵܫܘܿܒ̣ ܒܪܵܟ݂: ܥܲܠ ܓܸܢ̄ܒ̣ ܝܲܡܬ̣ܵܐ ܥܸܠܵܝܬܵܐ ܕܒ̣ܐܘܼܪܚܵܐ ܕܚܲܩܠܹܗ ܕܩܵܨܪܵܐ.
4 ܘܐܸܡܲܪ ܠܹܗ: ܐܸܙܕܲܗ̄ܪ ܘܲܫܠܝܼ: ܘܠܵܐ ܬܸܕ݂ܚܲܠ. ܘܠܸܒܵܟ݂ ܠܵܐ ܢܬ̣ܘܲܪ ܡ̣ܢ ܗܵܠܹܝܢ ܬܪܹܝܢ ܕܘܼܢ̈ܒܵܬ̣ܵܐ: ܐܘܼ̈ܕܹܐ ܡܚܲܪ̈ܟܹܐ: ܡ̣ܢ ܚܸܡܬ̣ܵܐ ܕܪܘܼܓ̣ܙܹܗ ܕܪܵܨܵܢ ܘܲܕ݂ܒܲܪ ܪܘܿܡܲܠܝܵܐ.
5 ܚܠܵܦ ܕܐܸܬ̣ܡܲܠܟ݂ܘܼ ܥܠܲܝܟ ܒܝܼܫܬܵܐ: ܐܵܪܵܡ: ܘܐܲܦܪܹܝܡ: ܘܒܲܪ ܪܘܿܡܲܠܝܵܐ.
6 ܘܐܸܡܲܪܘ ܢܸܣܲܩ ܠܲܝܗܘܼܕ݂ܵܐ ܘܢܸܥܩ̄ܪܝܼܗ̇: ܘܢܸܬ̣ܪ̱ܥܝܼܗ̇ ܘܢܲܡܠܸܟ݂ ܒܵܗ̇ ܡܲܠܟܵܐ ܠܒܲܪ ܛܒ̣ܵܐܹܝܠ.
7 ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ: ܠܵܐ ܬܩܘܼܡ ܘܠܵܐ ܬܸܗܘܹܐ.
8 ܡܸܛܠ ܕܪܹܫܵܐ ܕܐܵܪܵܡ ܕܲܪܡܣܘܿܩ: ܘܪܹܫܵܐ ܕܕܲܪܡܣܘܿܩ ܪܵܨܵܢ: ܘܒ̣ܵܬܲܪ ܫܬ̇ܝܼܢ ܘܚܲܡܸܫ ܫܢ̈ܝܼܢ: ܢܸܬܲܪ ܐܲܦܪܹܝܡ ܡ̣ܢ ܥܲܡܵܐ.
9 ܘܪܹܫܵܐ ܕܐܲܦܪܹܝܡ ܫܵܡ̇ܪܹܝܢ: ܘܪܹܫܵܐ ܕܫܵܡܪܹܝܢ ܒܲܪ ܪܘܿܡܲܠܝܵܐ. ܘܐܸܢ ܠܵܐ ܬܗܲܝܡܢܘܼܢ: ܐܵܦ ܠܵܐ ܬܸܣܬܲܟ̇ܠܘܼܢ.
10 ܘܐܵܘܣܸܦ ܬܘܼܒ̣ ܡܵܪܝܵܐ ܠܡܹܐܡܲܪ ܠܐܵܚܵܙ.
11 ܫܐܲܠ ܠܵܟ݂ ܐܵܬ̤ܵܐ ܡ̣ܢ ܡܵܪܝܵܐ ܐܲܠܵܗܵܟ݂: ܥܲܡܸܩ: ܫܐܲܠ: ܐܵܘ ܐܲܪܝܼܡ ܠܥܸܠ.
12 ܘܐܸܡܲܪ ܐܵܚܵܙ ܠܵܐ ܐܸܫܐܲܠ: ܘܠܵܐ ܐܹܢܲܣܸܐ ܠܡܵܪܝܵܐ ܐܲܠܵܗܝ.
13 ܘܐܸܡܲܪ ܫܡܲܥܘ ܒܲܝܬܹ̇ܗ ܕܕ݂ܵܘܝܼܕ݂: ܙܥܘܿܪܝܵܐ ܗ̄ܝܼ ܠܟ݂ܘܿܢ ܕܡܲܠܐܹܝܢ ܐ̄ܢܬ̇ܘܿܢ ܠܓܲܒ̣ܪܵܐ: ܐܸܠܵܐ ܕܬܲܠܐܘܿܢ ܐܵܦ ܠܐܲܠܵܗܝ.
14 ܡܸܛܠ ܗܵܢܵܐ ܢܸܬܸ̇ܠ ܠܟ݂ܘܿܢ ܡܵܪܝܵܐ ܐܲܠܵܗܵܐ ܐܵܬ̤ܵܐ: ܗܵܐ ܒܬ̣ܘܼܠܬܵܐ ܒܵܛܢܵܐ ܘܝܵܠܕܵܐ ܒܪܵܐ: ܘܢܸܬ̣ܩܪܸܐ: ܫܡܹܗ ܥܲܡܲܢܘܼܐܹܝܠ.
15 ܚܹܐܘܬ̣ܵܐ ܘܕܸܒ̣ܫܵܐ ܢܹܐܟ݂ܘܿܠ: ܕܢܸܕܲܥ ܠܡܲܣܠܵܝܘܼ ܒܝܼܫܬܵܐ: ܘܲܠܡܸܓ̣ܒ̣ܵܐ ܛܵܒ̣ܬ̣ܵܐ.
16 ܡܸܛܠ ܕܥܲܕ݂ܠܵܐ ܢܸܕܲܥ ܛܲܠܝܵܐ ܠܡܲܣܠܵܝܘܼ ܒܝܼܫܬܵܐ: ܘܲܠܡܸܓܒ̣ܵܐ ܛܲܒ̣ܬ̣ܵܐ: ܬܸܫܬ̇ܒܸܩ ܐܲܪܥܵܐ ܕܲܡܥܵܩ ܐܲܢ̄ܬ̇ ܒܵܗ̇ ܡ̣ܢ ܩܕ݂ܵܡ ܬܪܹܝܢ ܡܲܠܟܹ̇ܝ̈ܗ̇.
17 ܡܵܪܝܵܐ ܢܲܝܬܹ̇ܐ ܥܠܲܝܟ: ܘܥܲܠ ܥܲܡܵܟ݂: ܘܥܠ ܒܹܝܬ̣ ܐܲܒ̣ܘܼܟ݂: ܝܵܘ̈ܡܵܬ̣ܵܐ ܕܠܵܐ ܐܸܬ̣ܵܘ ܡ̣ܢ ܝܵܘܡܵܐ ܕܐܲܥܒܲܪ ܠܐܲܦܪܹܝܡ ܡ̣ܢ ܝܼܗܘܼܕ݂ܵܐ ܡܲܠܟܵܐ ܕܐܵܬ̣ܘܿܪ.
18 ܘܢܸܗܘܹܐ ܒܝܵܘܡܵܐ ܗܵܘܿ: ܢܲܫܪܸܩ ܡܲܪܝܵܐ ܠܕܲܒܵܒܹ̈ܐ: ܕܒܲܫܦܘܿܠܲܝ̈ ܢܲܗܪ̈ܵܘܵܬ̣ܵܐ ܕܡܸܨܪܹܝܢ: ܘܲܠܕܸܒ̇ܘܿܪ̈ܝܵܬ̣ܵܐ ܕܒܲܐܪܥܵܐ ܕܐܵܬ̣ܘܿܪ.
19 ܘܢܹܐܬ̣ܘܿܢ ܘܢܸܬ̇ܬ̇ܢܝܼܚܘܼܢ ܟܠܗܘܿܢ ܒܢܲܚܠܵܐ ܕܝܵܬ̣ܘܿܬ̣: ܘܲܒ̣ܦܲܥܪܹ̈ܐ ܕܟܹܐܦܵܐ: ܘܲܒ̣ܟ݂ܠܗܘܿܢ ܚܠܹܠܹ̈ܐ.
20 ܒܝܵܘܡܵܐ ܗܵܘܿ: ܢܸܓ̣ܪܘܿܥ ܡܵܪܝܵܐ ܒܲܡܕܲܟ̇ܝܵܐ ܪܵܘܝܵܐ: ܒܥܸܒ̣ܪ̈ܵܘܗܝ ܕܢܲܗܪܵܐ ܠܡܲܠܟܵܐ ܕܐܵܬ̣ܘܿܪ: ܡ̣ܢ ܪܹܫܹܗ ܘܲܠܣܲܥܪܵܐ ܕܪܸ̈ܓ̣ܠܵܘܗܝ. ܐܵܦ ܕܲܩܢܹܗ ܢܸܫܩܘܿܠ.
21 ܘܢܸܗܘܹܐ ܒܝܵܘܡܵܐ ܗܵܘܿ: ܢܲܚܹܐ ܓܲܒ̣ܪܵܐ ܥܓܸܠܬܵܐ ܕܬ̣ܵܘܪܹ̈ܐ: ܘܬܲܪܬܹ̇ܝܢ ܥܵـ̈ـܢܵܐ.
22 ܘܢܸܗܘܹܐ ܡ̣ܢ ܣܘܿܓ̣ܵܐܐ ܕܥܵܒ̣̈ـ̈ـܕܵܢ ܚܲܠܒ̣ܵܐ: ܢܹܐܟ݂ܘܿܠ ܚܹܐܘܬ̣ܵܐ: ܡܸܛܠ ܕܕܸܒ̣ܫܵܐ ܘܚܹܐܘܬ̣ܵܐ ܢܹܐܟ݂ܘܿܠ ܡܲܢ ܕܡܸܫܬܲܚܲܪ ܒܓ̣ܵܘܵܗ̇ ܕܐܲܪܥܵܐ.
23 ܘܢܸܗܘܹܐ ܒܝܵܘܡܵܐ ܗܵܘܿ ܟܠ ܐܲܬܲܪ ܕܐܝܼܬ̣ ܒܹܗ ܐܵܠܹܦ ܓܘܼܦܢ̈ܝܼܢ ܒܐܵܠܹܦ ܕܲܟ݂ܣܸܦ: ܠܝܲܥܪܵܐ ܘܲܠܟ݂ܘܼ̈ܒܹ̇ܐ ܢܸܗܘܹܐ.
24 ܘܲܒ̣ܓܹܐܪܹ̈ܐ ܘܲܒ̣ܩܸܫ̈ܬܵܬ̣ܵܐ ܢܸܥܠܘܼܢ ܠܬܲܡܵܢ. ܡܸܛܠ ܕܝܲܥܪܵܐ ܘܟ݂ܘܼ̈ܒܹ̇ܐ ܬܸܬ̣ܡ̱ܠܸܐ ܟܠܵܗ̇ ܐܲܪܥܵܐ.
25 ܘܟ݂ܠܗܘܿܢ ܛܘܼܪܹ̈ܐ ܕܕ݂ܵܒ̣ܪܵܐ ܗ̄ܘܼܵܬ̣ ܒܗܘܿܢ ܦܲܕܵܢܵܐ. ܢܸܬ̇ܕܲܒ̣ܪܘܼܢ: ܘܠܵܐ ܬܸܥܘܿܠ ܠܬܲܡܵܢ ܕܸܚܠ̱ܬ̣ܵܐ ܕܝܲܥܪܵܐ ܘܲܕ݂ܟ݂ܘܼ̈ܒܹ̇ܐ. ܘܢܸܗܘܹܐ ܒܹܝܬ̣ ܪܸܥܝܵܐ ܠܬ̣ܵܘܪܹ̈ܐ: ܘܒܹܝܬ̣ ܕܝܵܫܵܐ ܠܥܵـ̈ـܢܵܐ.
1 ܘܐܸܡܲܪ ܠܝܼ ܡܵܪܝܵܐ ܣܲܒ̣ ܠܵܟ݂ ܓܸܠܵܝܘܼܢܵܐ ܪܲܒܵܐ: ܘܲܟ݂ܬ̣ܘܼܒ̣ ܥܠܵܘܗܝ ܒܲܟ݂ܬ̣ܵܒ̣ܵܐ ܕܐ̄ܢܵܫܵܐ: ܠܲܡܣܲܪܗܵܒ̣ܘܼ ܫܸܒ̣ܝܵܐ: ܘܲܠܡܸܬ̣ܟܲܒ̣ ܒܸܙܬ̣ܵܐ.
2 ܘܣܲܗܸܕ݂ ܠܝܼ ܣܵܗ̈ܕܹ̇ܐ ܕܲܡܗܲܝܡܢܝܼܢ: ܠܐܘܿܪܝܼܵܐ ܟܵܗܢܵܐ: ܘܠܲܙܟܲܪܝܵܐ ܒܲܪ ܒܪܲܟ݂ܝܵܐ.
3 ܘܩܸܪܒܹ̇ܬ̣ ܠܲܢܒ̣ܝܼܬ̣ܵܐ: ܘܒܸܛܢܲܬ̤ ܘܝܸܠܕܲܬ̤ ܒܪܵܐ. ܘܐܸܡܲܪ ܠܝܼ ܡܵܪܝܵܐ: ܩܪܝܼ ܫܡܹܗ ܡܣܲܪܗܸܒ̣ ܫܵܒܹ̇ܐ: ܘܬ̣ܵܘܟܹ̇ܒ̣ ܒܵܐܹ̇ܙ.
4 ܡܸܛܠ ܕܥܲܕ݂ܠܵܐ ܢܸܕܲܥ ܛܲܠܝܵܐ ܠܡܸܩܪܵܐ ܐܲܒ̣ܵܐ ܘܐܸܡܵܐ: ܢܸܫܩܘܿܠ ܩܸܢܝܵܢܵܐ ܕܕܲܪܡܣܘܿܩ: ܘܒܸܙܬ̣ܵܐ ܕܫܵܡ̇ܪܹܝܢ: ܩܕ݂ܵܡ ܡܲܠܟܵܐ ܕܐܵܬ̣ܘܿܪ.
5 ܘܐܵܘܣܸܦ ܬܘܼܒ̣ ܡܵܪܝܵܐ ܠܡܹܐܡܲܪ ܠܝܼ.
6 ܥܲܠ ܕܐܲܣܠܝܼܘ ܥܲܡܵܐ ܗܵܢܵܐ ܡܲـ̈ـܝܵܐ ܕܫܝܼܠܘܿܚܵܐ ܕܪܵܕܹܝܢ ܒܫܸܠܝܵܐ: ܘܲܚܕ݂ܝܼܘ ܒܪܵܨܵܢ ܘܲܒ̣ܒܲܪ ܪܘܿܡܲܠܝܵܐ.
7 ܡܸܛܠ ܗܵܢܵܐ ܢܲܣܸܩ ܥܠܲܝܗܘܿܢ ܡܵܪܝܵܐ: ܡܲـ̈ـܝܵܐ ܕܢܲܗܪܵܐ ܣܲܓ̇ܝܹ̈ܐܐ ܘܥܲܫܝܼܢܹ̈ܐ: ܠܡܲܠܟܵܐ ܕܐܵܬ̣ܘܿܪ: ܘܲܠܟ݂ܠܹܗ ܐܝܼܩܵܪܹܗ. ܘܢܸܣܲܩ ܥܲܠ ܟܠܗܘܿܢ ܦܨܝܼܕܲܝ̈ܗܘܿܢ: ܘܲܢܗܲܠܸܟ݂ ܥܲܠ ܟܠܗܘܿܢ ܫܘܼܪ̈ܲܝܗܘܿܢ.
8 ܘܢܸܥܒܲܪ ܒܲܝܗܘܼܕ݂ܵܐ: ܘܢܸܓ̣ܪܘܿܦ ܘܢܸܥܒܲܪ: ܘܲܥܕܲܡܵܐ ܠܨܵܘܪܵܐ ܢܸܡܛܹܐ. ܘܢܸܗܘܹܐ ܪܵܘܡܵܐ ܕܟܸܢܦܵܘ̈ܗܝ: ܡܠܸܐ ܦܬ̣ܵܝܵܗ̇ ܕܐܲܪܥܵܟ݂ ܥܲܡܲܢܘܼܐܹܝܠ.
9 ܙܘܼܥܘ ܥܲܡܡܹ̈ܐ: ܘܐܸܬ̇ܬܲܒ̣̄ܪܘ. ܘܨܘܼܬ̣ܘ ܟܠܗܘܿܢ ܪ̈ܲܚܝܼܩܹܝܗ̇ ܕܐܲܪܥܵܐ. ܐܸܬ̣ܥܲܫܲܢܘ ܘܐܸܬ̇ܬܲܒ̣̄ܪܘ.
10 ܐܸܬ̣ܪܲܥܵܘ ܬܲܪܥܝܼܬ̣ܵܐ: ܘܬܸܬ̣ܒܲܛܲܠ ܡܲܠܸܠܘ ܡܸܠܬ̣ܵܐ: ܘܠܵܐ ܬܸܬ̣ܩܲܝܲܡ ܡܸܛܠ ܥܲܡܲܢܘܼܐܹܝܠ.
11 ܗܵܟܲܢܵܐ ܐܸܡܲܪ ܠܝܼ ܡܵܪܝܵܐ: ܐܲܝܟ݂ ܡܹܐܚܲܕ݂ ܐܝܼܕ݂ܵܐ: ܘܢܲܣܛܹܝܢܝ: ܠܵܐ ܐܹܗܲܠܸܟ݂ ܒܐܘܼܪܚܹܗ ܕܥܲܡܵܐ ܗܵܢܵܐ.
12 ܘܐܸܡܲܪ: ܠܵܐ ܬܹܐܡܪܘܿܢ ܡܸܪܕܵܐ: ܐܲܝܟ݂ ܕܐܸܡܲܪ ܥܲܡܵܐ ܗܵܢܵܐ ܡܸܪܕܵܐ: ܘܲܒ̣ܪܸܚܠܲܬ̣ܗܘܿܢ ܠܵܐ ܬܸܕ݂ܚ̄ܠܘܼܢ: ܘܠܵܐ ܬܙܘܼܥܘܼܢ.
13 ܠܡܵܪܝܵܐ ܚܲܝܠܬ̣ܵܢܵܐ ܩܲܕܸ̇ܫܘ: ܘܗ̤ܘܝܘܼ ܕܸܚܠܲܬ̣ܟ݂ܘܿܢ: ܘܗ̤ܘܝܘܼ ܡܣܲܝܥܵܢܟ݂ܘܿܢ.
14 ܘܢܸܗܘܹܐ ܠܡܲܩܕ̇ܫܵܐ: ܘܲܠܟܹܐܦܵܐ ܕܲܡܚܘܿܬ̣ܵܐ: ܘܲܠܛܲܪܵܢܵܐ ܕܬ̣ܘܼܩ̱ܠܬ̣ܵܐ: ܠܲܬ̣ܪ̈ܲܝܗܘܿܢ ܒܵـ̈ـܬܹ̇ܐ ܕܝܼܣܪܵܝܹܠ: ܠܦܲܚܹ̈ܐ ܘܠܲܡܨܝܼ̈ܕ݂ܵܬ̣ܵܐ ܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ.
15 ܘܢܸܬ̇ܬܲܩܠܘܼܢ ܒܗܘܿܢ ܣܲܓ̇ܝܹ̈ܐܐ: ܘܢܸܦܠܘܿܢ: ܘܢܸܬ̇ܬܲܒ̣ܪܘܿܢ: ܘܢܸܬ̇ܬ̇ܨܝܼܕ݂ܘܼܢ: ܘܢܸܬ̇ܬܲܚܕ̇ܘܼܢ.
16 ܨܘܿܪܘ ܣܵܗܕ̇ܘܼܬ̣ܵܐ: ܘܲܚܬ̣ܘܿܡܘ ܢܵܡܘܿܣܵܐ.
17 ܒܝܘܼܠܦܵܢܝ ܐܹܟܲܬܲܪ ܠܡܵܪܝܵܐ ܕܐܲܦܢܝܼ ܐܲܦܵܘ̈ܗܝ ܡ̣ܢ ܕܒܹܝܬ̣ ܝܲܥܩܘܿܒ̣: ܘܐܹܣܲܟܹ̇ܐ ܠܹܗ.
18 ܗܵܐ ܐܸܢܵܐ ܘܲܒ̣ܢܲـ̈ـܝܵܐ ܕܝܲܗ̄ܒ̣ ܠܝܼ ܡܵܪܝܵܐ: ܠܐܵܬ̤ܵܐ ܘܲܠܬܸܕ݂ܡܘܼܪܬܵܐ ܒܝܼܣܪܵܝܹܠ: ܡ̣ܢ ܩܕ݂ܵܡ ܡܵܪܝܵܐ ܚܲܝܠܬ̣ܵܢܵܐ ܕܲܫܪܸܐ ܒܛܘܼܪܵܐ ܕܨܸܗܝܘܿܢ.
19 ܝܛܘܟܲܕ݂ ܢܹܐܡܪܘܿܢ ܠܟ݂ܘܿܢ: ܕܲܫܐܲܠܘ ܡ̣ܢ ܙܲܟ̇ܘܼܪܹ̈ܐ ܘܡ̣ܢ ܝܲܕ̇ܘܼܥܹ̈ܐ: ܕܢܵܨ̇ܪܝܼܢ: ܘܢܵܗ̇ܡܝܼܢ: ܠܵܐ ܗܘ̤ܵܘ ܥܲܡܹܗ ܕܐܲܠܵܗܵܐ ܐܲܝܠܹܝܢ ܕܫܵܐ̇ܠܝܼܢ ܠܡܝܼ̈ܬܹܐ ܥܲܠ ܚܲܝܹ̈ܐ.
20 ܠܢܵܡܘܿܣܵܐ ܘܲܠܣܵܗܕ̇ܘܼܬ̣ܵܐ: ܕܠܵܐ ܢܹܐܡܪܘܿܢ ܐܲܝܟ݂ ܡܸܠܬ̣ܵܐ ܗܵܕܹܐ: ܕܠܲܝܬ̇ ܠܡܸܬܲܠ ܥܠܹܝܗ̇ ܫܘܼܚܕܵܐ.
21 ܘܢܸܥܒܲܪ ܒܵܗ̇: ܘܲܢܩܲܫܹܝܗ̇: ܘܢܸܟ݂ܦܲܢ. ܘܡܵܐ ܕܲܟ݂ܦܸܢ ܢܸܪܓܲܙ: ܘܲܢܨܲܚܸܐ ܠܡܲܠܟܹ̇ܗ ܘܠܲܐܠܵܗܹܗ.
22 ܘܢܸܬ̣ܦ̄ܢܹܐ ܠܥܸܠ: ܘܒܲܐܪܥܵܐ ܢܚܘܼܪ: ܘܐܘܼܠܨܵܢܵܐ ܘܚܸܫܘܿܟ݂ܵܐ: ܘܥܵܩܵܬ̣ܵܐ ܘܥܲܡܛܵܢܵܐ ܢܸܕ݂ܚ̄ܩܝܼܘܗܝ ܡܸܛܠ ܕܠܵܐ ܢܛܲܪܸܦ ܠܐܲܝܢܵܐ ܕܲܡܥܵܩ: ܐܲܝܟ݂ ܕܲܒ̣ܙܲܒ̣ܢܵܐ ܩܲܕ݂ܡܵܝܵܐ.
1 ܣܲܪܗܒܲܬ̤ ܐܲܪܥܵܐ ܕܲܙܒ̣ܘܿܠܘܿܢ: ܘܐܲܪܥܵܐ ܕܢܲܦ̮ܬܵܠܝܼ. ܘܐܘܼܚܕܵܢܵܐ ܥ̣ܫܸܢ: ܐܘܼܪܚܵܐ ܕܝܲܡܵܐ: ܥܸܒ̣ܪ̈ܵܘܗܝ ܕܝܘܿܪܕ̇ܢܵܢ ܢܲܗܪܵܐ: ܓܠܝܼܠܵܐ ܕܥܲܡܡܹ̈ܐ.
2 ܥܲܡܵܐ ܕܲܡܗܲܠܟ݂ܝܼܢ ܒܚܸܫܘܿܟ݂ܵܐ: ܚ̣ܙܵܘ ܢܘܼܗܪܵܐ ܪܲܒܵܐ. ܘܲܕ݂ܝܵܬ̣ܒ̇ܝܼܢ ܒܐܲܪܥܵܐ ܕܛܸܠܵܠܲܝ̈ ܡܵܘܬܵܐ: ܢܘܼܗܪܵܐ ܕܢܲܚ̣ ܥܠܲܝܗܘܿܢ.
3 ܐܲܣܓ̇ܝܼܬ̇ ܥܲܡܵܐ: ܘܠܹܗ ܐܵܘܪܸܒ̣ܬ̇ ܚܲܕ݂ܘܼܬ̣ܵܐ. ܚܕ݂ܝܼܘ ܩܕ݂ܵܡܲܝܟ ܐܲܝܟ݂ ܗܵܢ̇ܘܿܢ ܕܚܵܕܹܝܢ ܒܲܚܨܵܕ݂ܵܐ: ܘܐܲܝܟ݂ ܗܵܢ̇ܘܿܢ ܕܕ݂ܵܝܨܝܼܢ ܡܵܐ ܕܲܡܦܲܠܓ̣ܝܼܢ ܒܸܙܬ̣ܵܐ.
4 ܡܸܛܠ ܕܢܝܼܪܵܐ ܕܫܘܼܥܒܵܕ݂ܗܘܿܢ: ܘܚܘܼܛܪܵܐ ܕܟܲܬ̣ܦ̄ܗܘܿܢ: ܘܫܲܒ̣ܛܵܐ ܕܲܡܫܲܥܒܸ̇ܕ݂ ܗ̄ܘܼܵܐ ܠܗܘܿܢ: ܬܒܲܪܬ̇ ܐܲܝܟ݂ ܝܵܘܡܵܐ ܕܡܸܕ݂ܝܲܢ.
5 ܡܸܛܠ ܕܟ݂ܠ ܩܵܠ ܐܸܫܬ̇ܡܲܥ ܒܙܵܘܥܬ̣ܵܐ. ܘܢܲܚܬܵܐ ܡܦܲܠܦܲܠ ܒܲܕ݂ܡܵܐ. ܘܲܗܘ̤ܵܐ ܠܝܲܩܕܵܢܵܐ ܘܲܠܡܹܐܟ݂ܘܼܠܬܵܐ ܕܢܘܼܪܵܐ.
6 ܡܸܛܠ ܕܝܲܠܕܵܐ ܐܸܬ̣̱ܝܼܠܸܕ݂ ܠܲܢ: ܘܲܒ̣ܪܵܐ ܐܸܬ̣̱ܝܼܗܸܒ̣ ܠܲܢ. ܘܲܗܘ̤ܵܐ ܫܘܼܠܛܵܢܹܗ ܥܲܠ ܟܲܬ̣ܦܹܗ. ܘܐܸܬ̣ܩ̄ܪܝܼ ܫܡܹܗ ܕܘܼܡܵܪܵܐ ܘܡܵܠܘܿܟ݂ܵܐ: ܐܲܠܵܗܵܐ ܓܲܢ̄ܒܵܪܵܐ ܕܥܵܠܡܹ̈ܐ: ܫܲܠܝܼܛܵܐ ܕܲܫܠܵܡܵܐ.
7 ܠܡܲܣܓܵܝܘܼ ܫܘܼܠܛܵܢܹܗ. ܘܠܲܫܠܵܡܹܗ ܠܲܝܬ̇ ܣܵܟ݂ܵܐ: ܥܲܠ ܟܘܼܪܣܝܹܗ ܕܕ݂ܵܘܝܼܕ݂: ܘܥܲܠ ܡܲܠܟ̇ܘܼܬܹܗ. ܕܢܲܬ̣ܩ̄ܢܝܼܗ̇ ܘܲܢܣܲܡܟ݂ܝܼܗ̇ ܒܕ݂ܝܼܢܵܐ ܘܲܒ̣ܙܲܕ̇ܝܼܩܘܼܬ̣ܵܐ: ܡܸܟܹ̇ܝܠ ܘܲܥܕܲܡܵܐ ܠܥܵܠܲܡ. ܛܢܵܢܹܗ ܕܡܵܪܝܵܐ ܚܲܝܠܬ̣ܵܢܵܐ ܥܵܒܹ̇ܕ݂ ܗܵܕܹܐ.
8 ܦܸܬ̣ܓ̣ܵܡܵܐ ܫܲܕܲܪ ܡܵܪܝܵܐ ܒܝܲܥܩܘܿܒ̣: ܘܲܢ̣ܦܲܠ ܒܝܼܣܪܵܝܹܠ.
9 ܘܢܸܕ̇ܥܘܼܢ ܥܲܡܡܹ̈ܐ ܟܠܗܘܿܢ: ܐܲܦܪܹܝܡ ܘܥܵܡ̇ܘܿܪܹ̈ܝܗ̇ ܕܫܵܡܪܹܝܢ: ܒܓܲܐܝܘܼܬ̣ܵܐ ܘܲܒ̣ܪܲܒ̇ܘܼܬ̣ ܠܸܒܵܐ: ܘܐܵܡ̇ܪܝܼܢ.
10 ܠܸܒ̣ܢܹ̈ܐ ܢܲܪܡܸܐ: ܘܢܸܓ̣ܙܘܿܪ ܓܙܝܼܪ̈ܵܬ̣ܵܐ. ܘܢܸܦܣܘܿܩ ܫܲܩܡܹ̈ܐ: ܘܐܲܪ̈ܙܹܐ ܢܸܚܠܘܿܦ.
11 ܘܢܲܥܫܸܢ ܡܵܪܝܵܐ ܠܐܵܠܘܼܨܵܘ̈ܗܝ ܕܪܵܨܵܢ ܥܠܵܘܗܝ. ܘܠܲܒ̣ܥܸܠܕ̇ܒ̣ܵܒ̣ܵܘ̈ܗܝ ܢܓܲܪܸܓ̣.
12 ܠܐܲܕ݂ܘܿܡ ܡ̣ܢ ܡܲܕ݂ܢ̱ܚܵܐ: ܘܠܲܦܠܸܫܬܵܝܹ̈ܐ ܡ̣ܢ ܡܲܥ̱ܪܒ̣ܵܐ. ܘܢܹܐܟ݂ܠܘܼܢܹܗ ܠܝܼܣܪܵܝܹܠ ܒܟ݂ܠܹܗ ܦܘܼܡܗܘܿܢ ܘܲܒ̣ܗܵܠܹܝܢ ܟܠܗܹܝܢ ܠܵܐ ܗ̣ܦܲܟ݂ ܪܘܼܓ̣ܙܹܗ. ܘܬ̣ܘܼܒ̣ ܐܝܼܕܹܗ ܪܵܡܵܐ.
13 ܘܥܲܡܵܐ ܠܵܐ ܐܸܬ̣ܦ̄ܢܝܼܘ: ܥܕܲܡܵܐ ܕܲܒ̣ܠܲܥ̣ܘ. ܘܲܠܡܵܪܝܵܐ ܚܲܝܠܬ̣ܵܢܵܐ ܠܵܐ ܒܥ̣ܵܘ.
14 ܘܐܵܘܒܸ̇ܕ݂ ܡܵܪܝܵܐ ܡ̣ܢ ܝܼܣܪܵܝܹܠ: ܪܹܫܵܐ ܘܕ݂ܘܼܢܒ̇ܬ̣ܵܐ: ܘܕ݂ܘܼܢܒ̇ܬ̣ܵܐ ܘܪܹܫܵܐ: ܒܝܵܘܡܵܐ ܚܲܕ݂.
15 ܣܵܒ̣ܵܐ ܘܲܗܕ݂ܝܼܪ ܐܲܦܹ̈ܐ ܗ̤ܘܝܘܼ ܪܹܫܵܐ. ܘܲܢܒ̣ܝܼܵܐ ܕܡܲܠܸܦ ܫܘܼܩܪܵܐ ܗܘ̤ܝܘܼ ܕܘܼܢܒ̇ܬ̣ܵܐ.
16 ܘܢܸܗܘܘܿܢ ܡܲܛܐ̱ܒ̣ܵܢܵܘ̈ܗܝ ܕܥܲܡܵܐ ܗܵܢܵܐ: ܡܲܛܥܹܝܢ ܘܲܡܛܲܒ̇ܥܝܼܢ ܠܹܗ.
17 ܡܸܛܠ ܗܵܢܵܐ ܠܵܐ ܢܚܲܕܸ̇ܐ ܡܵܪܝܵܐ ܥܲܠ ܥܠܲܝܡܲܝ̈ܗܘܿܢ. ܘܥܲܠ ܝܲܬ̣ܡܲܝ̈ܗܘܿܢ ܘܥܲܠ ܐܲܪ̈ܡܠܵܬ̣ܗܘܿܢ ܠܵܐ ܢܪܲܚܸܦ. ܡܸܛܠ ܕܟ݂ܠܗܘܿܢ ܚܲܠܦܝܼܢ ܘܒ̣ܝܼܫܝܼܢ. ܘܟ݂ܠ ܦܘܼܡ ܡܡܲܠܸܠ ܫܵܛ̇ܝܘܼܬ̣ܵܐ. ܘܲܒ̣ܗܵܠܹܝܢ ܟܠܗܹܝܢ ܠܵܐ ܗ̣ܦܲܟ݂ ܪܘܼܓ̣ܙܹܗ. ܘܬ̣ܘܼܒ̣ ܐܝܼܕܹܗ ܪܵܡܵܐ.
18 ܡܸܛܠ ܕܣܸܦܲܬ̤ ܚܛܝܼܬ̣ܵܐ ܐܲܝܟ݂ ܢܘܼܪܵܐ: ܘܬܹܐܟ݂ܘܿܠ ܝܲܥܪܵܐ ܘܟ݂ܘܼ̈ܒܹ̇ܐ. ܘܬܸܣܲܦ ܒܣܵܘ̈ܟܹ̇ܐ ܕܥܵܒ̣ܵܐ. ܘܢܸܬ̣ܥܲܪܩ̄ܠܘܼܢ ܓܒܲـ̈ـܝܵܐ ܒܬܸܢܵܢܵܐ.
19 ܒܲܟ݂ܐܵܬܹܗ ܕܡܵܪܝܵܐ ܚܲܝܠܬ̣ܵܢܵܐ ܙܵܥܲܬ̤ ܐܲܪܥܵܐ. ܘܲܗܘ̤ܵܐ ܥܲܡܵܐ ܐܲܝܟ݂ ܗܵܘܿ ܕܐܸܟܲܠܬܹܗ ܢܘܼܪܵܐ. ܘܲܓ̣ܒܲܪ ܥܲܠ ܐܲܚܘܼܗܝ ܠܵܐ ܢܚܘܼܣ.
20 ܘܢܸܓ̣ܙܘܿܪ ܥܲܠ ܝܲܡܝܼܢܹܗ ܘܢܸܟ݂ܦܲܢ. ܘܢܹܐܟ݂ܘܿܠ ܥܲܠ ܣܸܡܵܠܹܗ. ܘܠܵܐ ܢܸܣܒ̇ܥܘܼܢ ܓܒܲܪ ܒܸܣܪܵܐ ܕܲܕ݂ܪܵܥܹܗ ܢܹܐܟ݂ܘܿܠ.
21 ܡܢܲܫܹܐ ܠܐܲܦܪܹܝܡ: ܘܐܲܦܪܹܝܡ ܠܲܡܢܲܫܸܐ: ܘܐܲܟ݂ܚܕ݂ܵܐ ܥܲܠ ܝܼܗܘܼܕ݂ܵܐ. ܘܲܒ̣ܗܵܠܹܝܢ ܟܠܗܹܝܢ ܠܵܐ ܗ̣ܦܲܟ݂ ܪܘܼܓ̣ܙܹܗ. ܘܬ̣ܘܼܒ̣ ܐܝܼܕܹܗ ܪܵܡܵܐ.
1 ܘܵܝ ܠܲܕ݂ܒ̣ܵܕ݂ܩܝܼܢ ܒܕ݂ܵܩܹ̈ܐ ܕܥܸܬܵܐ: ܘܟ݂ܵܬ̣ܒ̇ܝܼܢ ܥܵܘܼܠܵܐ.
2 ܠܡܸܨܠܵܐ ܕܝܼܢܵܐ ܕܡܸܣܟܹ̇ܢܹ̈ܐ: ܘܲܠܡܸܒܲܙ ܕܝܼܢܵܐ ܕܒ̣ܵܝܫܹ̈ܐ ܕܥܲܡܝ. ܕܢܸܫܒ̇ܘܿܢ ܠܐܲܪ̈ܡܠܵܬ̣ܵܐ: ܘܢܸܒ̇ܙܘܼܢ ܠܝܲܬ̣ܡܹ̈ܐ.
3 ܡܵܢܵܐ ܬܸܥܒ̇ܕ݂ܘܼܢ ܠܝܵܘܡܵܐ ܕܦܘܼܪܥܵܢܵܐ: ܘܠܲܕ݂ܠܘܼܚܝܵܐ ܕܡ̣ܢ ܪܘܼܚܩܵܐ ܐܵܬܹ̇ܐ. ܠܘܵܬ̣ ܡ̣ܢ ܬܸܥ̱ܪܩܘܼܢ ܕܬܸܬ̣ܥܲܕ̇ܪܘܿܢ ܘܲܠܘܵܬ̣ ܡܲܢ ܬܸܫܒ̇ܩܘܼܢ ܐܝܼܩܵܪܟ݂ܘܿܢ.
4 ܕܠܵܐ ܬܸܒ̣ܪ̱ܟ݂ܘܼܢ ܬܚܹܝܬ̣ ܐܲܣܝܼܪܹ̈ܐ: ܬܚܹܝܬ̣ ܩܛܝܼ̈ܠܹܐ ܬܸܦܠܘܿܢ ܘܲܒ̣ܗܵܠܹܝܢ ܟܠܗܹܝܢ ܠܵܐ ܗ̣ܦܲܟ݂ ܪܘܼܓ̣ܙܹܗ. ܘܬ̣ܘܼܒ̣ ܐܝܼܕܹܗ ܪܵܡܵܐ.
5 ܘܵܝ ܠܐܵܬ̣ܘܿܪܵܝܵܐ: ܫܲܒ̣ܛܵܐ ܗ̄ܘܼ ܕܪܘܼܓ̣ܙܝ: ܘܚܘܼܛܪܵܐ ܗ̄ܘܼ ܒܐܝܼܕ݂ܗܘܿܢ ܕܲܡܚܘܿܬ̣ܝ: ܥܲܠ ܥܲܡܵܐ ܚܲܠܦܵܐ ܐܹܫܲܕ̇ܪܝܼܘܗܝ.
6 ܘܥܲܠ ܥܲܡܵܐ ܐܲܟ̇ܬ̣ܵܢܵܐ ܐܹܦܲܩܕ݂ܝܼܘܗܝ ܕܢܸܫܒܹ̇ܐ ܫܸܒ̣ܝܵܐ: ܘܢܸܒ̇ܘܿܙ ܒܸܙܬ̣ܵܐ: ܘܢܸܥܒ̇ܕ݂ܝܼܘܗܝ ܕܝܵܫܵܐ ܐܲܝܟ݂ ܣܝܵܢܵܐ ܕܫܘܼܩܹ̈ܐ.
7 ܘܗ̤ܘ ܠܵܐ ܗ̄ܘܼܵܐ ܗܵܟܲܢܵܐ ܕܲܡܝܼ. ܘܲܒ̣ܠܸܒܹ̇ܗ ܠܵܐ ܗ̄ܘܼܵܐ ܗܵܟܲܢܵܐ ܐܸܬ̣ܚܲܫܲܒ̣. ܐܸܠܵܐ ܕܢܵܘܒܸ̇ܕ݂ ܒܠܸܒܹ̇ܗ: ܘܲܢܣܝܼܦ ܥܲܡܡܹ̈ܐ ܣܲܓ̇ܝܹ̈ܐܐ.
8 ܡܸܛܠ ܕܐܸܡܪ: ܕܗܵܐ ܪܵܘ̱ܪ̈ܒ̣ܵܢܹܐ ܐܲܟ݂ܚ̄ܕ݂ܵܐ. ܡܲܠ̈ܟܹ̇ܐ ܐܸܢܘܿܢ.
9 ܗܵܐ ܐܲܝܟ݂ ܟܲܪܟ̇ܡܘܿܫ ܒܲܠܝܘܿ: ܘܐܲܝܟ݂ ܪܵܦܵܕ݂ ܚܡܵܬ̣: ܘܐܲܝܟ݂ ܕܲܪܡܣܘܿܩ ܫܵܡܪܹܝܢ.
10 ܘܐܲܝܟ݂ ܕܐܸܫܟ̇ܚܲܬ̤ ܐܝܼܕ݂ܝܼ ܠܡܲܠܟ̇ـ̈ـܘܵܬ̣ܵܐ ܕܲܦܬܲܟ݂ܪܹ̈ܐ ܘܕܲܓ̣ܠܝܼܦܹ̈ܐ: ܡ̣ܢ ܐܘܿܪܸܫܠܸܡ ܘܡ̣ܢ ܫܵܡܪܹܝܢ.
11 ܘܐܲܝܟ݂ ܕܥܸܒ̣ܕܹ̇ܬ̣ ܠܫܵܡ̇ܪܹܝܢ ܘܠܲܦܬܲܟ݂ܪܹ̈ܝܗ̇: ܗܵܟ݂ܢܵܐ ܐܸܥܒܸ̇ܕ݂ ܠܐܘܿܪܸܫܠܸܡ ܘܠܲܦܬܲܟ݂ܪܹ̈ܝܗ̇.
12 ܘܢܸܗܘܹܐ ܡܵܐ ܕܫܲܡܠܝܼ ܡܵܪܝܵܐ ܟܠܗܘܿܢ ܥܒ̣ܵܕ݂ܵܘ̈ܗܝ ܒܛܘܼܪܵܐ ܕܨܸܗܝܘܿܢ: ܘܒ̣ܐܘܿܪܸܫܠܸܡ: ܐܸܦܩܘܿܕ݂ ܥܲܠ ܦܹܐܪ̈ܵܘܗܝ ܕܠܸܒܵܐ ܪܲܒܵܐ ܕܡܲܠܟܵܐ ܕܐܵܬ̣ܘܿܪ: ܘܥܲܠ ܬܸܫܒ̇ܘܿܚܬܵܐ ܕܪܵܘܡܵܐ ܕܥܲܝܢܵܘ̈ܗܝ.
13 ܡܸܛܠ ܕܐܸܡܲܪ ܕܲܒ̣ܚܲܝܠܵܐ ܕܐܝܼܕ݂ܝ ܥܸܒ̣ܕܹ̇ܬ̣: ܘܲܒ̣ܚܸܟ݂ܡܲܬ̣ܝ ܡܸܛܠ ܕܣܲܟ̇ܘܼܠܬ̣ܵܢ ܐ̄ܢܵܐ. ܐܲܥܒ̇ܪܹܬ̣ ܬܚܘܼܡܲܝ̈ܗܘܿܢ ܕܥܲܡܡܹ̈ܐ. ܘܢܸܟ݂ܣܲܝ̈ܗܘܿܢ ܒܸܙܹܬ̣. ܘܟܲܒ̇ܫܹ̇ܬ̣ ܡܕ݂ܝܼ̈ܢܵܬ̣ܵܐ ܕܝܲܬ̣̈ܒܵܢ.
14 ܘܐܸܫܟ̇ܚܲܬ̣ ܐܝܼܕ݂ܝ ܐܲܝܟ݂ ܩܸܢܵܐ ܠܚܲܝܠܵܐ ܕܥܲܡܡܹ̈ܐ: ܘܐܲܝܟ݂ ܕܟ݂ܵܢܫܝܼܢ ܒ̈ܢܵܬ̣ܵܐ ܕܲܫܒ̣ܝܼ̈ܩܵܢ: ܟܢܲܫ̇ܬܵܗ̇ ܠܟ݂ܠܵܗ̇ ܐܲܪܥܵܐ. ܘܠܵܐ ܗܘ̤ܵܐ ܕܲܡܪܝܼܡ ܓܸܦܵܐ: ܘܦܵܬܲܚ ܦܘܼܡܹܗ ܘܢܵܨܲܪ.
15 ܕܲܠܡܵܐ ܡܸܫܬܲܒܲܚ ܢܵܪܓܵܐ ܥܲܠ ܡܲܢ ܕܦܵܣܹ̇ܩ ܒܹܗ. ܐܵܘ ܡܸܬ̇ܬ̇ܪܝܼܡ ܡܲܣܵܪܵܐ ܥܲܠ ܡܲܢ ܕܢܵܣܲܪ ܒܹܗ. ܐܵܘ ܡܸܫܬܲܩܲܠ ܫܲܒ̣ܛܵܐ ܥܲܠ ܡܲܢ ܕܲܡܪܝܼܡ ܠܹܗ.
16 ܡܸܛܠ ܗܵܢܵܐ ܢܫܲܕܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܐܲܒ̣ܕܵܢܵܐ ܥܲܠ ܫܲܡܝܼܢܵܘ̈ܗܝ ܚܠܵܦ ܐܝܼܩܵܪܹܗ ܢܹܐܩܲܕ݂ ܝܲܩܕܵܢܹܗ ܐܲܝܟ݂ ܝܲܩܕܵܢܵܐ ܕܢܘܼܪܵܐ.
17 ܘܢܸܗܘܹܐ ܢܘܼܗܪܹܗ ܕܝܼܣܪܵܝܹܠ ܠܢܘܼܪܵܐ: ܘܩܲܕ̇ܝܼܫܵܘ̈ܗܝ ܠܫܲܠܗܹܒ̣ܝܼܬ̣ܵܐ. ܘܬ̣ܵܘܩܸܕ݂ ܘܬܹܐܟ݂ܘܿܠ ܝܲܥܪܹܗ ܘܟ݂ܘܼܒܵܘ̈ܗܝ ܒܝܵܘܡܵܐ ܚܲܕ݂.
18 ܘܫܘܼܒ̣ܚܵܐ ܕܥܵܒܹܗ ܘܲܕ݂ܟܲܪܡܠܹܗ: ܡ̣ܢ ܢܲܦ̮ܫܵܐ ܘܲܥܕܲܡܵܐ ܠܒܸܣܪܵܐ ܢܓܲܡܲܪ. ܘܢܸܗܘܹܐ ܐܲܝܟ݂ ܕܠܵܐ ܗܘ̤ܵܐ.
19 ܘܫܲܪܟܵܐ ܕܩܲܝܣܹ̈ܐ ܕܥܵܒܹܗ: ܠܡܸܢܝܵܢܵܐ ܢܸܗܘܘܿܢ. ܘܛܲܠܝܵܐ ܢܸܟ݂ܬ̇ܘܿܒ̣ ܐܸܢܘܿܢ.
20 ܘܢܸܗܘܹܐ ܒܝܵܘܡܵܐ ܗܵܘܿ: ܠܵܐ ܢܵܘܣܸܦ ܬܘܼܒ̣ ܫܲܪܟܹ̇ܗ ܕܝܼܣܪܵܝܹܠ: ܘܐܲܝܠܹܝܢ ܕܡܸܬ̣ܦܲܨܹܝܢ ܡ̣ܢ ܕܒܹܝܬ̣ ܝܲܥܩܘܿܒ̣ ܠܡܸܬ̇ܬ̇ܟ݂ܠܵܘܼ ܥܲܠ ܡܲܢ ܕܲܢܟ݂ܵܐ ܐܸܢܘܿܢ. ܐܸܠܵܐ ܢܸܬ̇ܬܲܟ݂ܠܘܼܢ ܒܩܘܼܫܬܵܐ ܥܲܠ ܡܵܪܝܵܐ ܩܲܕ̇ܝܼܫܵܐ ܕܝܼܣܪܵܝܹܠ.
21 ܘܫܲܪܟܵܐ ܢܸܬ̣ܦ̄ܢܘܿܢ: ܫܲܪܟܹ̇ܗ ܕܝܲܥܩܘܿܒ̣ ܠܘܵܬ̣ ܐܹܝܠ ܓܲܢ̄ܒܵܪܵܐ.
22 ܘܐܸܢ ܢܸܗܘܹܐ ܥܲܡܵܟ݂ ܝܼܣܪܵܝܹܠ: ܐܲܝܟ݂ ܚܵܠܵܐ ܕܲܒ̣ܝܲܡܵܐ: ܫܲܪܟܵܐ ܢܸܬ̣ܦ̄ܢܘܿܢ ܡܸܢܗܘܿܢ ܟܪܲܡ̣ ܘܲܦܣܲܩ̣: ܘܲܓ̣ܪܲܦ̣ ܒܙܲܕ̇ܝܼܩܘܼܬ̣ܵܐ.
23 ܡܸܛܠ ܕܲܓ̣ܡܘܼܪܝܵܐ ܘܦܵܣܝܼ̈ܩܵܬ̣ܵܐ ܥܵܒܹ̇ܕ݂ ܡܵܪܝܵܐ ܚܲܝܠܬ̣ܵܢܵܐ ܒܟ݂ܠܵܗ̇ ܐܲܪܥܵܐ.
24 ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܠܵܐ ܬܸܕ݂ܚܲܠ ܕܥܵܡܲܪ ܒܨܸܗܝܘܿܢ: ܡ̣ܢ ܐܵܬ̣ܘܿܪܵܝܵܐ ܕܡܵܚܹ̇ܐ ܠܵܟ݂ ܒܫܲܒ̣ܛܹܗ: ܘܚܘܼܛܪܹܗ ܡܪܝܼܡ ܥܠܲܝܟ ܒܐܘܼܪܚܵܐ ܕܡܸܨܪܹܝܢ.
25 ܡܸܛܠ ܕܥܲܕ݂ ܩܲܠܝܼܠ ܙܥܘܿܪ: ܘܢܸܫܬܲܡܠܸܐ ܪܘܼܓ̣ܙܝܼ ܘܚܸܡܬ̣ܝ ܥܲܠ ܚܒ̣ܵܠܗܘܿܢ.
26 ܘܲܢܥܝܼܪ ܥܠܵܘܗܝ ܡܵܪܝܵܐ ܚܲܝܠܬ̣ܵܢܵܐ ܫܵܘܛܵܐ: ܐܲܝܟ݂ ܡܚܘܿܬ̣ܵܐ ܕܡܸܕ݂ܝܲܢ ܕܲܒ̣ܛܘܼܪܵܐ ܕܚܘܿܪܝܼܒ̣: ܘܚܘܼܛܪܹܗ ܥܲܠ ܝܲܡܵܐ: ܘܲܫܩܵܠܹܗ ܒܐܘܼܪܚܵܐ ܕܡܸܨܪܹܝܢ.
27 ܘܢܸܗܘܹܐ ܒܝܵܘܡܵܐ ܗܵܘܿ: ܢܸܥܒܲܪ ܫܘܼܥܒܵܕܹܗ ܡ̣ܢ ܟܲܬ̣ܦܵܟ݂: ܘܢܝܼܪܹܗ ܡ̣ܢ ܨܵܘܪܵܟ݂ ܘܢܸܬ̣ܚܲܒܲܠ ܢܝܼܪܵܐ ܡ̣ܢ ܩܕ݂ܵܡ ܡܘܼܫܚܵܐ.
28 ܐܸܬ̣ܵܐ ܠܲܥܢܵܬ̣: ܘܲܥܒܲܪ ܒܡܲܓܕ̇ܘܿ. ܘܲܒ̣ܡܲܟ݂ܡܲܣ ܣܵܡ̣ ܡܵܐܢܵܘ̈ܗܝ.
29 ܥ̣ܒܲܪ ܠܡܲܥܒ̇ܪܵܐ ܕܲܓ̣ܒܲܥ ܠܒܹܝܬ̣ ܒܝܵܬܲܢ: ܕܸܚܠܲܬ̤ ܪܵܡܬ̣ܵܐ: ܘܓܸܒ̣ܥܲܬ̣ ܫܵܐܘܿܠ ܥܸܪܩܲܬ̤.
30 ܨܗܲܠܝ ܒܩܵܠܹܟ݂ܝ ܒܲܪܬ̣ ܓܸܠܝܲܡ. ܨܘܼܬ̣ܝ ܠܝܼܫ ܘܲܥܢܵܝ ܥܢܵܬ̣ܘܿܬ̣.
31 ܐܸܬ̣ܪܲܚܩܲܬ̤ ܡܲܪܡܢܵܐ. ܘܝܵܬ̣̈ܒܲܝ ܓܘܼ̈ܒ̇ܝܼܢ ܥܫܸܢ̣ܘ.
32 ܥܕܲܟܹ̇ܝܠ ܝܵܘܡܵܐ ܒܢܵܒ̣ ܩܵܐܹ̇ܡ. ܐܲܢܝܼܦ ܐܝܼܕܹܗ ܥܲܠ ܛܘܼܪܵܐ ܕܒܲܪܬ̣ ܨܸܗܝܘܿܢ: ܘܥܲܠ ܪ̈ܵܡܵܬ̣ܵܐ ܕܐܘܿܪܸܫܠܸܡ.
33 ܗܵܐ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܡܣܲܚܸܦ ܠܲܡܫܲܒ̇ܚܹ̈ܐ ܒܥܘܼܫܢܵܐ. ܘܲܕ݂ܪܵܡܝܼܢ ܒܩܵܘ̈ܡܵܬ̣ܵܐ ܢܸܬ̣ܡܲܟ̇ܝܼܟ݂ܘܿܢ: ܘܲܕ݂ܪܵܡܝܼܢ ܢܸܫܬܲܦܠܘܼܢ.
34 ܘܲܢܦܲܫܲܚ ܣܵܘ̈ܟܹ̇ܐ ܕܥܵܒ̣ܵܐ ܒܦܲܪܙܠܵܐ. ܘܠܸܒ̣ܢܵܢ ܒܫܘܼܒ̣ܚܹܗ ܢܸܦܸܠ.
1 ܘܢܸܦܘܿܩ ܚܘܼܛܪܵܐ ܡ̣ܢ ܓܘܼܙܥܹܗ ܕܐܝܼܫܲܝ. ܘܢܲܦܪܲܥ ܢܘܼܪܒܵܐ ܡ̣ܢ ܥܸܩܵܪܹܗ.
2 ܘܬܸܬ̇ܢܝܼܚ ܘܬܸܫܪܹܐ ܥܠܵܘܗܝ ܪܘܼܚܵܐ ܕܐܲܠܵܗܵܐ: ܪܘܼܚܵܐ ܕܚܸܟ݂ܡ̱ܬ̣ܵܐ ܘܲܕ݂ܣܘܼܟܵܠܵܐ: ܪܘܼܚܵܐ ܕܬܲܪܥܝܼܬ̣ܵܐ ܘܲܕ݂ܓܲܢ̄ܒܲܪܘܼܬ̣ܵܐ: ܪܘܼܚܵܐ ܕܝܼܕܲܥܬ̣ܵܐ ܘܲܕ̇ܕܸܚ̱ܠܬܹܗ ܕܡܵܪܝܵܐ.
3 ܘܢܸܕ݂ܢܲܚ ܒܕܸܚ̱ܠܬܹܗ ܕܡܵܪܝܵܐ. ܘܠܵܐ ܐܲܝܟ݂ ܕܚܵܙ̈ܝܵܢ ܥܲܝܢܵܘ̈ܗܝ ܢܕ݂ܘܼܢ: ܘܠܵܐ ܐܲܝܟ݂ ܕܫܵܡ̈ܥܵܢ ܐܸܕ݂ܢܵܘ̈ܗܝ ܢܲܟܸ̇ܣ.
4 ܢܕ݂ܘܼܢ ܒܩܘܼܫܬܵܐ ܠܡܸܣܟܹ̇ܢܹ̈ܐ: ܘܢܲܟܸ̇ܣ ܒܲܬ̣ܪܝܼܨܘܼܬ̣ܵܐ ܠܒ̣ܝܼܫܹ̈ܝܗ̇ ܕܐܲܪܥܵܐ. ܢܸܡܚܸܐ ܠܐܲܪܥܵܐ ܒܫܲܒ̣ܛܵܐ ܕܦܘܼܡܹܗ. ܘܲܒ̣ܪܘܼܚܵܐ ܕܣܸܦ̈ܘܵܬܹܗ ܢܡܝܼܬ̣ ܠܪ̈ܲܫܝܼܥܹܐ.
5 ܬܸܗܘܹܐ ܙܲܕ̇ܝܼܩܘܼܬ̣ܵܐ ܐܲܣܵܪ ܚܲܨܵܘ̈ܗܝ: ܘܗܲܝܡܵܢܘܼܬ̣ܵܐ ܚܙܵܩܵܐ ܕܕܲܦܢܵܬܹ̈ܗ.
6 ܢܸܥܡܲܪ ܕܐܹܒ̣ܵܐ ܥܲܡ ܐܸܡܪܵܐ. ܘܢܸܡܪܵܐ ܥܲܡ ܓܲܕ݂ܝܵܐ ܢܸܘܒܲܥ. ܘܥܸܓ̣ܠܵܐ ܘܓ̣ܘܼܪܝܵܐ ܕܐܲܪܝܵܐ ܘܬ̣ܵܘܪܵܐ: ܐܲܟ݂ܚܕ݂ܵܐ ܢܸܪܥܘܿܢ. ܘܛܲܠܝܵܐ ܙܥܘܿܪܵܐ ܢܕܲܒܲܪ ܐܸܢܘܿܢ.
7 ܬܘܿܪܬܵܐ ܘܕܸܒܵܐ ܐܲܟ݂ܚܕ݂ܵܐ ܢܸܪ̈ܥ̱ܝܵܢ ܘܲܒ̣ܢܲܝ̈ܗܹܝܢ ܐܲܟ݂ܚ̄ܕ݂ܵܐ ܢܸܪܒ̇ܥܘܼܢ ܐܲܪܝܵܐ ܐܲܝܟ݂ ܬܵܘܪܵܐ ܢܹܐܟ݂ܘܿܠ ܬܸܒ̣ܢܵܐ.
8 ܘܢܸܫܬ̇ܥܹܐ ܝܲܠܘܼܕ݂ܵܐ ܒܚܲܪܡܵܢܵܐ. ܘܲܒ̣ܚܘܼܪܵܐ ܕܐܸܣܦܸܣ ܢܵܘܫܸܛ ܐܝܼܕܹܗ ܚܣܝܼܠܵܐ.
9 ܘܠܵܐ ܢܲܒ̣ܐ̱ܫܘܼܢ: ܘܠܵܐ ܢܚܲܒ̇ܠܘܼܢ ܒܟ݂ܠܹܗ ܛܘܼܪܵܐ ܕܩܘܼܕ݂ܫܝ. ܡܸܛܠ ܕܬܸܬ̣̱ܡܠܸܐ ܐܲܪܥܵܐ ܝܼܕܲܥܬܹܗ ܕܡܵܪܝܵܐ: ܐܲܝܟ݂ ܡܲـ̈ـܝܵܐ ܕܲܡܟܲܣܹܝܢ ܠܝܲܡܵܐ.
10 ܘܢܸܗܘܹܐ ܒܝܵܘܡܵܐ ܗܵܘܿ: ܥܸܩܵܪܹܗ ܕܐܝܼܫܲܝ ܕܩܵܐܹ̇ܡ: ܐܵܬ̤ܵܐ ܠܥܲܡܡܹ̈ܐ ܘܲܥܠܵܘܗܝ ܥܲܡܡܹ̈ܐ ܢܥܲܩܒ̣ܘܼܢ ܘܬܸܗܘܹܐ ܢܝܵܚܬܹ̇ܗ ܐܝܼܩܵܪܵܐ.
11 ܘܢܸܗܘܹܐ ܒܝܵܘܡܵܐ ܗܵܘܿ: ܢܵܘܣܸܦ ܡܵܪܝܵܐ ܬܸܢܝܵܐ ܕܐܝܼܕܹܗ: ܕܢܸܩܢܹܐ ܫܲܪܟܵܐ ܕܥܲܡܹܗ ܕܐܸܫܬ̇ܚܲܪܘ: ܡ̣ܢ ܐܵܬ̣ܘܿܪ: ܘܡ̣ܢ ܡܸܨܪܹܝܢ: ܘܡ̣ܢ ܦܲܬ̣ܪܘܿܣ: ܘܡ̣ܢ ܟܘܼܫ: ܘܡ̣ܢ ܥܝܼܠܵܡ: ܘܡ̣ܢ ܣܵܥܝܼܪ: ܘܡ̣ܢ ܚܡܵܬ̣: ܘܡܢ ܓܵܙܪ̈ܵܬ̣ܵܐ ܕܝܲܡܵܐ.
12 ܘܢܸܫܩܘܿܠ ܐܵܬ̤ܵܐ ܠܥܲܡܡܹ̈ܐ: ܘܲܢܟܲܢܸܫ ܠܛܵܥܲـ̈ـܝܵܐ ܕܝܼܣܪܵܝܹܠ: ܘܠܲܡܒܲܕ̇ܪܹ̈ܐ ܕܲܝܗܘܼܕ݂ܵܐ ܢܟܲܢܸܫ ܡ̣ܢ ܐܲܪܒ̇ܥܲܬ̣ ܟܸܢܦܹܝܗ̇ ܕܐܲܪܥܵܐ.
13 ܘܢܸܥܒܲܪ ܛܢܵܢܵܐ ܡ̣ܢ ܐܲܦܪܹܝܡ: ܘܐܵܠܘܿܨܵܘ̈ܗܝ ܕܲܝܗܘܼܕ݂ܵܐ ܢܹܐܒ̣ܕ̇ܘܿܢ. ܐܲܦܪܹܝܡ ܠܵܐ ܢܸܛܲܢ ܒܲܝܗܘܼܕ݂ܵܐ: ܘܲܝܗܘܼܕ݂ܵܐ ܠܵܐ ܢܹܐܠܘܿܨ ܠܐܲܦܪܹܝܡ.
14 ܘܢܸܦ̱ܠܚܘܿܢ ܒܟܲܬ̣ܦܵܐ ܕܲܦܠܸܫܬܵܝܹ̈ܐ ܥܲܠ ܝܲܡܵܐ. ܘܐܲܟ݂ܚ̄ܕ݂ܵܐ ܢܸܒ̇ܙܘܿܢ ܠܲܒ̣ܢܲܝ̈ ܡܲܕ݂ܢ̱ܚܵܐ ܒܐܲܕ݂ܘܡ ܘܲܒ̣ܡܘܼܐܵܒ̣ ܢܵܘܫܛܘܼܢ ܐܝܼܕܲܝ̈ܗܘܿܢ ܘܲܒ̣ܢܲܝ̈ ܥܲܡܘܿܢ ܢܸܫܬܲܡܠܘܼܢ ܠܗܘܿܢ.
15 ܘܢܲܚܪܸܒ̣ ܡܵܪܝܵܐ ܠܸܫܵܢ ܝܲܡܵܐ ܕܲܒ̣ܡܸܨܪܹܝܢ: ܘܲܢܪܝܼܡ ܐܝܼܕܹܗ ܥܲܠ ܢܲܗܪܵܐ ܒܐܘܼܚܕܵܢܵܐ ܕܪܘܼܚܹܗ: ܘܢܸܡܚܹܝܘܗܝ ܠܫܲܒ̣ܥܵܐ ܢܲܚ̈ܠܝܼܢ: ܕܢܸܬ̣ܥ̱ܒܲܪ ܒܲܡܣܵܢܹ̈ܐ.
16 ܘܢܸܗܘܹܐ ܫܒ̣ܝܼܠܵܐ ܠܫܲܪܟܵܐ ܕܥܲܡܹܗ: ܕܐܸܫܬ̇ܚܲܪܘ ܡ̣ܢ ܐܵܬ̣ܘܿܪ: ܐܲܝܟ݂ ܕܲܗܘ̤ܵܬ̣ ܠܝܼܣܪܵܝܹܠ: ܒܝܵܘܡܵܐ ܕܲܣܠܸܩ̣ܘ ܡ̣ܢ ܐܲܪܥܵܐ ܕܡܸܨܪܹܝܢ.
1 ܘܬܹܐܡܲܪ ܒܝܵܘܡܵܐ ܗܵܘܿ: ܐܵܘܕܸ̇ܐ ܠܵܟ݂ ܡܵܪܝܵܐ ܕܲܪܓܸܙܬ̇ ܥܠܲܝ: ܘܐܲܗܦܸܟ݂ܬ̇ ܪܘܼܓ̣ܙܵܟ݂ ܘܒܲܝܲܐܬܵܢܝ.
2 ܗܵܐ ܥܲܠ ܐܲܠܵܗܵܐ ܦܵܪܘܿܩܝ ܬܟ݂ܝܼܠ ܐ̄ܢܵܐ: ܘܠܵܐ ܐܹܙܘܿܥ. ܡܸܛܠ ܕܬ̣ܘܼܩܦ̄ܝ ܘܫܘܼܒ̣ܚ̄ܝ ܡܵܪܝܵܐ ܗ̄ܘܼ: ܘܢܸܗܘܹܐ ܠܝܼ ܠܦܘܼܪܩܵܢܵܐ.
3 ܘܬܸܡܠܘܿܢ ܡܲـ̈ـܝܵܐ ܒܚܲܕ݂ܘܼܬ̣ܵܐ ܡ̣ܢ ܡܲܒ̇ܘܼܥܵܐ ܕܦܘܼܪܩܵܢܵܐ.
4 ܘܬܹܐܡܪܘܿܢ ܒܝܵܘܡܵܐ ܗܵܘܿ: ܐܵܘܕܵܘ ܠܡܵܪܝܵܐ ܘܲܩܪܵܘ ܫܡܹܗ: ܘܚܵܘܵܘ ܒܥܲܡܡܹ̈ܐ ܨܸܢ̈ܥܵܬܹܗ. ܐܸܬ̇ܕܲܟ݂ܪܘ ܕܥܲܫܝܼܢ ܗ̄ܘܼ ܫܡܹܗ.
5 ܙܡܲܪܘ ܠܡܵܪܝܵܐ ܡܸܛܠ ܕܓܲܐܝܘܼܬ̣ܵܐ ܥ̣ܒܲܕ݂. ܝܼܕ݂ܝܼܥܵܐ ܗ̄ܝܼ ܗܵܕܹܐ ܒܟ݂ܠܵܗ̇ ܐܲܪܥܵܐ.
6 ܕܘܼܨܝ ܘܫܲܒܲܚܝ ܥܵܡ̇ܘܿܪܬܵܐ ܕܨܸܗܝܘܿܢ. ܡܸܛܠ ܕܪܲܒ̇ ܗ̄ܘܼ ܕܲܒ̣ܓ̣ܵܘܹܟ݂ܝ: ܩܲܕ̇ܝܼܫܵܐ ܕܝܼܣܪܵܝܹܠ.
1 ܡܲܫܩ̄ܠܵܐ ܕܒ̣ܵܒܹܠ ܕܲܚܙܵܐ ܐܹܫܲܥܝܵܐ ܒܲܪ ܐܲܡܘܿܨ.
2 ܥܲܠ ܛܘܼܪܹ̈ܐ ܫܦܲـ̈ـܝܵܐ ܫܩܘܼܠܘ ܐܵܬ̤ܵܐ. ܐܲܪܝܼܡܘ ܠܗܘܿܢ ܩܵܠܵܐ. ܐܲܢܝܼܦܘ ܒܐܝܼܕܹܗ ܢܸܥܠܘܿܢ ܒܬܲܪ̈ܥܲܝ ܫܲܠܝܼܛܵܢܹ̈ܐ.
3 ܐܸܢܵܐ ܦܸܩ̇ܕܹ̇ܬ̣ ܠܡܲܩܕܲܫܝ. ܘܲܩܪܹܝܬ̣ ܠܓܲܢ̄ܒܵܪܹ̈ܐ ܒܪܘܼܓ̣ܙܝ. ܘܡܸܬ̣ܥܲܫܢܝܼܢ ܒܓܲܐܝܘܼܬ̣ܝ.
4 ܩܵܠܵܐ ܕܲܪܓ̣ܘܼܫܝܵܐ ܒܛܘܼܪܵܐ: ܕܘܼܡܝܵܐ ܕܥܲܡܡܹ̈ܐ ܣܲܓ̇ܝܹ̈ܐܐ ܩܵܠܵܐ ܕܲܪܓ̣ܘܼܫܝܵܐ ܕܡܲܠܟ̇ـ̈ـܘܵܬ̣ܵܐ ܕܥܲܡܡܹ̈ܐ ܕܡܸܬ̣ܟܲܢܫܝܼܢ. ܡܵܪܝܵܐ ܚܲܝܠܬ̣ܵܢܵܐ ܣܵܥܲܪ ܚܲܝ̈ܠܹܐ.
5 ܩܪ̈ܲܒ̣ܬ̣ܵܢܹܐ ܐܵܬܹ̇ܝܢ ܡ̣ܢ ܪܘܼܚܩܵܐ: ܘܡ̣ܢ ܣܵܘ̈ܦܲܝ ܫܡܲܝܵܐ ܡܵܪܝܵܐ: ܘܡܵܐܢܹ̈ܐ ܕܪܘܼܓ̣ܙܹܗ: ܠܲܡܚܲܒܵܠܘܼ ܠܟ݂ܠܵܗ̇ ܐܲܪܥܵܐ.
6 ܐܲܝܠܸܠܘ ܡܸܛܠ ܕܩܲܪܝܼܒ̣ ܗ̄ܘܼ ܝܵܘܡܹܗ ܕܡܵܪܝܵܐ: ܘܐܲܝܟ݂ ܒܸܙܬ̣ܵܐ ܡ̣ܢ ܫܸܠܝܵܐ ܢܹܐܬܹܐ.
7 ܡܸܛܠ ܗܵܢܵܐ ܟܠܗܹܝܢ ܐܝܼ̈ܕܲܝܵܐ ܢܸܬ̣ܪ̈ܲܦܝܵܢ. ܘܟ݂ܠܹܗ ܠܸܒܵܐ ܕܐ̄ܢܵܫܵܐ ܢܸܬ̣ܡ̱ܣܹܐ ܘܢܸܬ̇ܕܲܠܚܘܼܢ.
8 ܘܨܵܘܪ̈ܵܢܹܐ ܘܚܸܒ̣̈ܠܹܐ ܐܲܝܟ݂ ܕܝܵܠܹܕ̇ܬܵܐ ܢܹܐܚܕ̇ܘܿܢ ܐܸܢܘܿܢ. ܘܢܸܬ̣ܡ̱ܗܘܿܢ ܓܒܲܪ ܒܚܲܒ̣ܪܹܗ. ܘܐܲܦܹ̈ܐ ܕܫܲܠܗܹܒ̣ܝܼܬ̣ܵܐ ܐܲܦܲܝ̈ܗܘܿܢ.
9 ܗܵܐ ܝܵܘܡܹܗ ܕܡܵܪܝܵܐ ܐܵܬܹ̇ܐ: ܕܐܵܣܝܘܼ ܠܲܝܬ̇ ܠܹܗ ܐܲܟ̇ܬ̣ܵܢ ܘܚܲܡܝܼܡ ܪܘܼܓ̣ܙܹܗ ܕܢܸܥܒ̇ܕ݂ܝܼܗ̇ ܠܐܲܪܥܵܐ ܠܚܘܼܪܒܵܐ: ܘܚܲܛܵܝܹ̈ܝܗ̇ ܢܵܘܒܸ̇ܕ݂ ܡܸܢܵܗ̇.
10 ܡܸܛܠ ܕܟ݂ܵܘܟ̇ܒܹ̈ܐ ܕܲܫܡܲܝܵܐ ܘܚܲܝ̈ܠܵܘܵܬ̣ܗܘܿܢ ܠܵܐ ܢܲܢ̱ܗܪܘܿܢ ܢܸܚܫܲܟ݂ ܫܸܡܫܵܐ ܒܡܲܦܩܹܗ. ܘܢܘܼܗܪܹܗ ܕܣܲܗܪܵܐ ܠܵܐ ܢܲܢܗܲܪ.
11 ܐܸܦܩܘܿܕ݂ ܒܝܼܫܬܵܐ ܥܲܠ ܬܹܒܹܝܠ: ܘܥܲܠ ܪ̈ܲܫܝܼܥܹܐ ܥܵܘܼܠܗܘܿܢ. ܐܹܒܲܛܸܠ ܪܵܡܘܼܬ̣ܵܐ ܕܫܲܒ̣ܗ̱ܪ̈ܵܢܹܐ. ܘܓܲܐܝܘܼܬ̣ܵܐ ܕܥܲܫܝܼܢܹ̈ܐ ܐܹܡܲܟܸ̇ܟ݂.
12 ܐܵܘܩܲܪ ܓܲܒ̣ܪܵܐ ܡ̣ܢ ܕܲܗܒ̣ܵܐ: ܘܐ̄ܢܵܫܵܐ ܡ̣ܢ ܕܲܗܒ̣ܵܐ ܕܐܵܘܦܹܝܪ.
13 ܡܸܛܠ ܗܵܢܵܐ ܠܲܫܡܲܝܵܐ ܐܲܪܓܸ̇ܙ. ܘܲܬ̣ܙܘܼܥ ܐܲܪܥܵܐ ܡ̣ܢ ܕܘܼܟ̇ܬ̣ܵܗ̇: ܒܲܟ݂ܐܵܬܹܗ ܕܡܵܪܝܵܐ ܚܲܝܠܬ̣ܵܢܵܐ: ܒܝܵܘܡܵܐ ܕܚܸܡܬ̣ܵܐ ܕܪܘܼܓ̣ܙܹܗ.
14 ܢܸܗܘܘܿܢ ܐܲܝܟ݂ ܛܒܲܝܵـ̈ـܐ ܕܥܵܪܩܝܼܢ: ܘܐܲܝܟ݂ ܥܵـ̈ـܢܵܐ ܕܠܲܝܬ̇ ܠܵܗ̇ ܡܟܲܢܫܵܢܵܐ ܐ̄ܢܵܫ ܠܥܲܡܹܗ ܢܸܬ̣ܦ̄ܢܘܿܢ: ܘܲܓ̣ܒܲܪ ܠܐܲܪܥܹܗ ܢܸܥܪ̱ܩܘܼܢ.
15 ܟܠ ܕܢܸܫܬܲܟܲܚ: ܢܸܬ̇ܕ̇ܩܲܪ. ܘܟ݂ܠ ܕܢܸܬ̇ܬܵܘܣܸܦ: ܢܸܦܸܠ ܒܚܲܪܒܵܐ.
16 ܘܝܲܠܘܼܕܲܝ̈ܗܘܿܢ ܢܸܫܬܲܩܦܘܼܢ ܠܥܹܢܲܝܗܘܿܢ ܘܢܸܬ̣ܒܲܙܙܘܼܢ ܒܵܬܲܝ̈ܗܘܿܢ. ܘܢܸܫܲܝ̈ܗܘܿܢ ܢܸܨܛܲܥܪ̈ܵܢ.
17 ܗܵܐ ܡܥܝܼܪ ܐ̄ܢܵܐ ܥܠܲܝܟ̇ܘܿܢ ܠܡܵܕ݂ܵܝܹ̈ܐ: ܕܟܸܣܦܵܐ ܠܵܐ ܚܫܝܼܒ̣ ܠܗܘܿܢ: ܘܲܒ̣ܕܲܗܒ̣ܵܐ ܠܵܐ ܡܸܨܛ̄ܒܹܝܢ.
18 ܩܸܫ̈ܬܵܬ̣ܵܐ ܕܲܥܠܲܝܡܹ̈ܐ ܢܸܬ̣ܬܲܒ̇ܪ̈ܵܢ. ܘܥܲܠ ܦܹܐܪܹ̈ܐ ܕܟܲܪܣܵܐ ܠܵܐ ܢܪܲܚܡܘܼܢ. ܘܥܲܠ ܒܢܲܝ̈ܟ̇ܘܿܢ ܠܵܐ ܢܚ̈ܘܼܣܵܢ ܥܲܝܢܲܝ̈ܗܘܿܢ.
19 ܘܬܸܗܘܹܐ ܒܵܒܹܠ ܚܲܝܠܵܐ ܕܡܲܠ̈ܟ̇ܘܵܬ̣ܵܐ: ܘܫܘܼܒ̣ܚܵܐ ܕܓܲܐܝܘܼܬ̣ܵܐ ܕܟܲܠܕ݂ܵܝܹ̈ܐ: ܐܲܝܟ݂ ܕܲܗܦܲܟ݂ ܐܲܠܵܗܵܐ ܠܲܣܕ݂ܘܿܡ ܘܲܠܥܵܡܘܿܪܵܐ.
20 ܠܵܐ ܬܸܬܲܒ̣ ܠܥܵܠܲܡ: ܘܠܵܐ ܬܸܫܪܹܐ ܠܕ݂ܵܪܕܵܪ̈ܝܼܢ ܘܠܵܐ ܢܸܫܪܘܿܢ ܬܲܡܵܢ ܥܲܪ̈ܒ̣ܵܝܹܐ: ܘܪ̈ܵܥܵܘܵܬ̣ܵܐ ܠܵܐ ܢܸܪܥܘܿܢ ܬܲܡܵܢ.
21 ܐܸܠܵܐ ܢܸܪ̈ܒ̇ܥܵܢ ܬܲܡܵܢ ܚܲܝ̈ܘܵܬ̣ܵܐ. ܘܢܸܬ̣ܡ̱ܠܘܼܢ ܒܵܬܲܝ̈ܗܘܿܢ ܒ̈ܢܵܬ̣ ܩܵܠܹ̈ܐ. ܘܢܸܫ̱ܪ̈ܝܵܢ ܬܲܡܵܢ ܒ̈ܢܵܬ̣ ܢܲܥܵܡܹ̈ܐ: ܘܫܹܐܕܹ̈ܐ ܢܪܲܩܕ݂ܘܼܢ ܬܲܡܵܢ.
22 ܘܢܸܥ̱ܢ̈ܝܵܢ ܣܝܼܪܹ̈ܢܵܣ ܒܣܵܚܪ̈ܵܬ̣ܗܘܿܢ: ܘܝܵܪܘܿܪܹ̈ܐ ܒܗܲܝ̈ܟ̇ܠܹܐ ܕܦܘܼܢܵܩܲܝ̈ܗܘܿܢ ܩܲܪܝܼܒ̣ ܗ̄ܘܼ ܙܲܒ̣ܢܵܗ̇ ܠܡܹܐܬ̣ܵܐ: ܘܝܵܘ̈ܡܵܬ̣ܵܗ̇ ܬܘܼܒ̣ ܠܵܐ ܢܸܬ̣ܡܲܬ̣ܚܘܼܢ.
1 ܡܸܛܠ ܕܲܡܪܲܚܸܡ ܡܵܪܝܵܐ ܥܲܠ ܝܲܥܩܘܿܒ̣: ܘܡܸܨܛܒܸܐ ܬܘܼܒ̣ ܒܝܼܣܪܵܝܹܠ ܘܢܸܫܒ̇ܘܿܩ ܐܸܢܘܿܢ ܒܐܲܪܥ̱ܗܘܿܢ. ܘܢܸܬ̣ܠܵܘܘܿܢ ܥܠܲܝܗܘܿܢ ܥܵܡܘܿܪܹ̈ܐ. ܘܢܸܬ̇ܬܵܘܣܦܘܼܢ ܥܲܠ ܕܒܹܝܬ̣ ܝܲܥܩܘܿܒ̣.
2 ܘܢܸܕ݂ܒ̇ܪܘܼܢ ܐܸܢܘܿܢ ܥܲܡܡܹ̈ܐ. ܘܢܲܝܬ̇ܘܿܢ ܐܸܢܘܿܢ ܠܐܲܪܥ̱ܗܘܿܢ ܘܢܹܐܪܬ̇ܘܿܢ ܐܸܢܘܿܢ ܕܒܹܝܬ̣ ܝܼܣܪܵܝܹܠ: ܒܐܲܪܥܹܗ ܕܡܵܪܝܵܐ: ܠܥܲܒ̣̈ܕܹ̇ܐ ܘܠܲܐܡ̈ܗܵܬ̣ܵܐ. ܘܢܸܗܘܘܿܢ ܫܵܒܹ̇ܝܢ ܠܫܵܒܲܝ̈ܗܘܿܢ: ܘܢܸܫܬܲܠܛܘܼܢ ܒܲܡܫܲܥܒ̇ܕ݂ܵܢܲܝ̈ܗܘܿܢ.
3 ܘܢܸܗܘܹܐ ܒܝܵܘܡܵܐ ܕܲܢܢܝܼܚܵܟ݂ ܡܵܪܝܵܐ ܡ̣ܢ ܟܲܪܝܘܼܬ̣ܵܟ݂: ܘܡ̣ܢ ܪܘܼܓ̣ܙܵܟ݂: ܘܡ̣ܢ ܫܘܼܥܒܵܕ݂ܵܐ ܩܲܫܝܵܐ ܕܐܸܫܬܲܥܒܲܕ̇ܬ̇.
4 ܬܸܫܩܘܿܠ ܡܲܬ̣ܠܵܐ ܗܵܢܵܐ ܥܲܠ ܡܲܠܟܵܐ ܕܒ̣ܵܒܹܠ: ܘܬܹܐܡܲܪ. ܐܲܝܟܲܢܵܐ ܒܛܸܠ̣ ܫܲܠܝܼܛܵܐ: ܘܲܒ̣ܛܸܠ ܡܚܲܦܛܵܢܵܐ.
5 ܬܒܲܪ ܡܵܪܝܵܐ ܚܘܼܛܪܵܐ ܕܪܲܫܝܼܥܵܐ: ܘܫܲܒ̣ܛܵܐ ܕܫܲܠܝܼܛܵܐ.
6 ܕܡܵܚܹ̇ܐ ܗ̄ܘܼܵܐ ܥܲܡܡܹ̈ܐ ܒܐܲܟ̇ܬ̣ܵܐ: ܡܚܘܿܬ̣ܵܐ ܕܠܵܐ ܡܲܪܕ̇ܘܼ. ܘܪܵܕܹܐ ܗ̄ܘܼܵܐ ܒܪܘܼܓ̣ܙܵܐ ܥܲܡܡܹ̈ܐ. ܘܪܵܕܸܦ ܠܗܘܿܢ ܕܠܵܐ ܚܵܘܣܵܢ.
7 ܐܸܬ̇ܬ̇ܢܝܼܚܲܬ̤ ܘܫܸܠܝܲܬ̤ ܟܠܵܗ̇ ܐܲܪܥܵܐ: ܘܕ݂ܵܨܲܬ̤ ܒܬܸܫܒ̇ܘܿܚܬܵܐ.
8 ܐܵܦ ܒܪܘܿܬ̣ܵܐ ܘܐܲܪ̈ܙܹܐ ܕܠܸܒ̣ܢܵܢ ܚܕ݂ܝܼܘ ܠܵܟ݂. ܡ̣ܢ ܙܲܒ̣ܢܵܐ ܕܲܫܟ݂ܒ̣ܬ̇: ܠܵܐ ܣܠܸܩ̣ܘ ܥܠܲܝܢ ܠܡܸܦܣܲܩ.
9 ܫܝܘܿܠ ܡ̣ܢ ܠܬܲܚܬ̇ ܐܸܬ̣ܡܲܪܡܪܲܬ̤ ܠܘܼܩܒܲܠ ܡܲܥܠܵܟ݂. ܐܲܥܝܼܪܲܬ̤ ܥܠܲܝܟ ܓܲܢ̄ܒܵܪܹ̈ܐ: ܘܟ݂ܠܗܘܿܢ ܫܲܠܝܼܛܵܢܹ̈ܐ ܕܐܲܪܥܵܐ ܕܐܲܩܝܼܡܬ̇ ܡ̣ܢ ܟܘܼܪ̈ܣܵܘܵܬ̣ܗܘܿܢ.
10 ܟܠܗܘܿܢ ܡܲܠ̈ܟܹ̇ܐ ܕܥܲܡܡܹ̈ܐ ܢܸܥܢܘܿܢ ܘܢܹܐܡܪܘܼܢ ܠܵܟ݂: ܐܵܦ ܐܲܢ̄ܬ̇ ܐܸܬ̣ܟ̇ܪܲܗܬ̇ ܐܲܟ݂ܘܵܬܲܢ: ܘܲܠܘܵܬܲܢ ܐܸܫܬܲܠܸܡܬ̇.
11 ܘܐܝܼܩܵܪܵܟ݂ ܢ̣ܚܸܬ̣ ܠܲܫܝܘܿܠ: ܘܡ̣ܝܼܬ̣ ܟܸܢܵܪܵܟ݂ ܬܚܘܿܬܲܝܟ ܬܸܬ̣ܡ̱ܟܸܟ݂ ܪܸܡܬ̣ܵܐ: ܘܲܬ̣ܟܲܣܹܝܟ݂ ܬܵܘܠܥܵܐ.
12 ܐܲܝܟܲܢܵܐ ܢܦܲܠ̣ܬ̇ ܡ̣ܢ ܫܡܲܝܵܐ. ܐܲܝܠܸܠ ܒܨܲܦܪܵܐ ܢܦܲܠܬ̇ ܒܐܲܪܥܵܐ ܡܨܲܥܪܵܝܵܐ ܕܥܲܡܡܹ̈ܐ.
13 ܐܲܢ̄ܬ̇ ܐܸܡܲܪܬ̇ ܒܠܵܒܵܟ݂. ܕܐܸܣܲܩ ܠܲܫܡܲܝܵܐ: ܘܲܠܥܸܠ ܡ̣ܢ ܟܵܘܟ̇ܒ̣ܵܘ̈ܗܝ ܕܐܹܝܠ ܐܲܪܝܼܡ ܟܘܼܪܣܲܝ: ܘܐܸܬܸ̇ܒ̣ ܒܛܘܼܪܹ̈ܐ ܪ̈ܵܡܹܐ ܕܒܲܫܦܘܿܠܲܝ̈ ܓܲܪܒ̇ܝܵܐ.
14 ܘܐܸܣܲܩ ܥܲܠ ܪܵܘܡܵܐ ܕܲܥܢܵܢܹ̈ܐ: ܘܐܸܬ̇ܕܲܡܸܐ ܠܥܸܠܝܵܐ.
15 ܡܸܟܹ̇ܝܠ ܠܲܫܝܘܿܠ ܬܸܚܘܿܬ̣: ܘܠܐܸܫܬܹ̇ܗ ܕܓ̣ܘܼܒܵܐ.
16 ܟܠ ܚܵܙ̈ܝܲܝܟ ܥܠܲܝܟ ܢܕ݂ܝܼܩܘܼܢ ܘܒܵܟ݂ ܢܸܣܬܲܟ̇ܠܘܼܢ: ܘܢܹܐܡܪܘܼܢ: ܗܵܢܵܘ ܓܲܒ̣ܪܵܐ ܕܡܲܪܡܲܪ ܗ̄ܘܼܵܐ ܐܲܪܥܵܐ: ܘܐܲܙܝܼܥ ܡܲܠܟ̇ـ̈ـܘܵܬ̣ܵܐ.
17 ܘܐܲܚܪܸܒ̣ ܬܹܒܹܝܠ ܐܲܝܟ݂ ܡܲܕ݂ܒ̇ܪܵܐ. ܘܩܘܼܪ̈ܝܵܐ ܣܲܚܸܦ̣: ܘܐܲܣܝܪ̈ܵܘܗܝ ܠܵܐ ܫ̣ܪܵܐ.
18 ܟܠܗܘܿܢ ܡܲܠ̈ܟܹ̇ܐ ܕܥܲܡܡܹ̈ܐ: ܫܟܸܒ̣ܘ ܒܐܝܼܩܵܪܵܐ: ܐ̄ܢܵܫ ܒܒܲܝܬܹ̇ܗ.
19 ܘܐܲܢ̄ܬ̇ ܐܸܫܬܲܕ݂ܝܼܬ̇ ܡ̣ܢ ܩܲܒ̣ܪܵܟ݂: ܐܲܝܟ݂ ܢܘܼܪܒܵܐ ܡܲܣ̱ܠܝܵܐ: ܠܒ̣ܘܼܫܵܐ ܕܲܩܛܝܼ̈ܠܹܐ ܕܲܩܛܝܼܠܝܼܢ ܒܣܲܝܦܵܐ: ܕܢܵܚ̇ܬܝܼܢ ܒܟܹܐܦܹ̈ܐ ܕܓ̣ܘܼܒܵܐ ܐܲܝܟ݂ ܫܠܲܕܹ̇ܐ ܕܝܼܫܵـ̈ـܬ̣ܵܐ.
20 ܘܠܵܐ ܬܸܚܕܹ̇ܐ ܥܲܡܗܘܿܢ ܒܩܲܒ̣ܪܵܐ: ܡܸܛܠ ܕܐܲܪܥܵܟ݂ ܚܲܒܸ̇ܠܬ̇: ܘܥܲܡܵܟ݂ ܩܛܲܠ̣ܬ̇. ܠܵܐ ܢܩܘܼܡ ܠܥܵܠܲܡ ܙܲܪܥܵܐ ܒܝܼܫܵܐ.
21 ܛܲܝܸܒ̣ ܠܲܒ̣ܢܵܘ̈ܗܝ ܩܸܛܠܵܐ ܒܥܵܘܼܠܵܐ ܕܐܲܒ̣ܘܼܗܘܿܢ. ܕܠܵܐ ܢܩܘܼܡܘܼܢ ܘܢܹܐܪܬ̇ܘܿܢ ܐܲܪܥܵܐ: ܘܢܸܡܠܘܿܢ ܐܲܦܲܝ̈ ܬܹܒܹܝܠ ܩܪܵܒ̣ܵܐ.
22 ܐܹܩܘܼܡ ܥܠܲܝܗܘܿܢ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ. ܘܐܵܘܒܸ̇ܕ݂ ܫܡܵܗ̇ ܕܒ̣ܵܒܹܠ: ܘܙܲܪܥܵܗ̇ ܘܛܘܼܗܡܵܗ̇ ܘܫܲܪܒ̇ܬ̣ܵܗ̇: ܐܵܡܲܪ ܡܵܪܝܵܐ.
23 ܘܐܸܥܒ̇ܕ݂ܝܼܗ̇ ܝܵܪܬ̇ܘܼܬ̣ܵܐ ܠܩܘܹ̈ܦܕܹ̇ܐ: ܘܐܵܓ̣ܡܹ̈ܐ ܕܡܲـ̈ـܝܵܐ ܘܐܸܟ݂ܢ̱ܫܝܼܗ̇ ܒܡܲܟ݂ܢܲܫܬܵܐ ܕܐܲܒ̣ܕܵܢܵܐ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.
24 ܝܑܼܡܵܐ ܡܵܪܝܵܐ ܚܲܝܠܬ̣ܵܢܵܐ ܘܐܸܡܲܪ: ܕܐܲܝܟ݂ ܕܐܸܬ̣ܚܲܫܒܹ̇ܬ̣: ܗܵܟܲܢܵܐ ܢܸܗܘܹܐ. ܘܐܲܝܟ݂ ܕܐܸܬ̣ܪܲܥܝܼܬ̇: ܢܸܬ̣ܩܲܝܲܡ.
25 ܕܐܸܬ̣ܒܲܪ ܠܐܵܬ̣ܘܿܪܵܝܵܐ ܒܐܲܪܥܝ: ܘܥܲܠ ܛܘܼܪ̈ܲܝ ܐܹܕ̇ܘܼܫܝܼܘܗܝ. ܘܢܸܥܒܲܪ ܢܝܼܪܹܗ ܡܸܢܗܘܿܢ: ܘܫܘܼܥܒܵܕܹܗ ܡ̣ܢ ܟܲܬ̣ܦܗܘܿܢ ܢܸܥܒܲܪ.
26 ܗܵܕܲܐ ܗ̄ܝܼ ܬܲܪܥܝܼܬ̣ܵܐ ܕܐܸܬ̣ܪܲܥܝܼܬ̣ ܥܲܠ ܐܲܪܥܵܐ ܟܠܵܗ̇. ܘܗܵܕܲܐ ܗ̄ܝܼ ܐܝܼܕ݂ܵܐ ܕܐܸܬ̇ܬ̇ܪܝܼܡܲܬ̤ ܥܲܠ ܟܠܗܘܿܢ ܥܲܡܡܹ̈ܐ.
27 ܡܵܪܝܵܐ ܚܲܝܠܬ̣ܵܢܵܐ ܐܸܬ̣ܪܲܥܝܼ: ܡܲܢ̣ܘܼ ܢܒܲܛܸܠ ܘܠܐܝܼܕܹܗ ܪܵܡܬ̣ܵܐ ܡܲܢ̣ܘܼ ܢܲܗܦܸܟ݂.
28 ܡܲܫܩ̄ܠܵܐ ܕܲܦܠܸܫܬ̇: ܒܫܲܢ̄ܬܵܐ ܕܡܝܼܬ̣ ܐܵܚܵܙ ܡܲܠܟܵܐ ܗܘ̤ܵܐ ܡܲܫܩ̄ܠܵܐ ܗܵܢܵܐ.
29 ܠܵܐ ܬܸܚܕܹ̇ܝܢ ܟܠܹܟ݂ܝ ܦܠܸܫܬ̇: ܡܸܛܠ ܕܐܸܬ̇ܬ̇ܒܲܪ ܫܲܒ̣ܛܵܐ ܕܲܡܫܲܥܒ̇ܕ݂ܵܢܹܟ݂ܝ. ܡܸܛܠ ܕܡ̣ܢ ܥܸܩܵܪܹܗ ܕܚܸܘܝܵܐ ܢܵܦܹ̇ܩ ܓܵܪܣܵܐ: ܘܦܹܐܪ̈ܵܘܗܝ ܚܲܪܡܵܢܵܐ ܕܦܵܪܲܚ.
30 ܘܢܸܪܥܘܿܢ ܒܘܼܟ݂ܪ̈ܲܝ ܡܸܣܟܹ̇ܢܹ̈ܐ. ܘܒ̣ܵܝܫܹ̈ܐ ܒܫܸܠܝܵܐ ܢܸܪܒ̇ܥܘܿܢ ܘܐܲܡܝܼܬ̣ ܥܸܩܵܪܹܟ݂ܝ ܒܟܲܦܢܵܐ. ܘܲܕ݂ܡܸܫܬ̇ܚܲܪ ܡܸܢܹܟ݂ܝ ܢܸܬ̣ܩܛܸܠ.
31 ܐܲܝܠܸܠܝ ܩܪܝܼܬ̣ܵܐ: ܒܲܓܸ̇ܢܝ ܩܪܝܼܬ̣ܵܐ ܐܸܬ̇ܕܲܠܚܲܬ̤ ܦܠܸܫܬ̇ ܟܠܵܗ̇. ܡܸܛܠ ܕܡ̣ܢ ܓܲܪܒ̇ܝܵܐ ܐܵܬܹ̇ܐ ܬܸܢܵܢܵܐ: ܘܠܲܝܬ̇ ܕܝܼܚܝܼܕ݂ܵܝ ܒܥܲܕ݂ܥܹܕ݂ܵܘ̈ܗܝ.
32 ܘܡܵܢܵܐ ܢܸܥܢܹܐ ܠܡܲܠܲܐܟ݂ܵܐ ܕܥܲܡܡܹ̈ܐ: ܕܡܵܪܝܵܐ ܡܲܬ̣ܩܸܢ ܫܲܬ̣ܐ̱ܣܹ̈ܝܗ̇ ܕܨܸܗܝܘܿܢ ܘܒ̣ܵܗ̇ ܢܸܣܬܲܬ̇ܪܘܿܢ ܒܵܝܫܹ̈ܐ ܕܥܲܡܹܗ.
1 ܡܲܫܩ̄ܠܵܐ ܕܡܘܼܐܵܒ̣ ܒܠܸܠܝܵܐ ܐܸܬ̣ܒܲܙܙܲܬ̤ ܩܪܝܼܬ̣ܵܐ ܕܡܘܼܐܵܒ̣ ܘܲܬ̣ܡܲܗ̣ܘ ܒܠܸܠܝܵܐ ܐܸܬ̣ܒ̇ܙܸܙܘ ܫܘܼܪܹ̈ܝܗ̇ ܕܡܘܼܐܵܒ̣: ܘܲܬ̣ܘܲܪܘ.
2 ܣܠܸܩ̣ܘ ܠܒܲܝܬܵܐ ܕܪܝܼܒ̣ܘܿܢ: ܥܲܠ ܥܠܵـ̈ـܘܵܬ̣ܵܐ ܠܡܸܒ̣ܟܵܐ: ܥܲܠ ܢܒ̣ܘܿ ܘܥܲܠ ܡܹܐܕ݂ܒ̣ܵܐ. ܡܘܼܐܵܒ̣ ܡܲܝܠܸܠ: ܘܲܒ̣ܟ݂ܠ ܪܹ̈ܫܵܘܗܝ ܩܘܼܕܹ̈ܚܵܬ̣ܵܐ: ܘܟ݂ܠ ܕܩܲܢ ܓܙܝܼܙ.
3 ܒܫܘܼܩܵܘ̈ܗܝ ܐܸܬ̣ܟ̇ܢܸܫܘ ܣܲܩܹ̈ܐ. ܘܥܲܠ ܐܸܓܵܪܹ̈ܐ ܘܲܒ̣ܫܘܼܩܹ̈ܐ: ܟܠ ܐ̄ܢܵܫ ܡܲܝܠܸܠ: ܘܢܵܚܹ̇ـܬ̣ ܒܲܒ̣ܟ݂ܵܬ̣ܵܐ.
4 ܬܲܝܠܸܠ ܚܸܫܒ̇ܘܿܢ ܘܐܲܠܥܵܠܵܐ: ܘܲܥܕܲܡܵܐ ܠܝܵܨܘܿܬ̣ ܢܸܫܬ̇ܡܲܥ ܩܵܠܗܹܝܢ ܡܸܛܠ ܗܵܢܵܐ ܡܲܚ̄ܣܢܵܘ̈ܗܝ ܕܡܘܼܐܵܒ̣ ܢܸܩܥܘܿܢ: ܘܢܲܦ̮ܫܹܗ ܬܸܩܥܹܐ ܠܹܗ.
5 ܘܠܹܒ̇ܝ ܥܲܠ ܡܘܼܐܵܒ̣: ܢܸܝܠܸܠ ܒܪܘܼܚܹܗ ܥܕܲܡܵܐ ܠܨܵܥܵܪ ܥܓܸܠܬܵܐ ܬܘܼܠܬܵܐ. ܡܸܛܠ ܕܲܒ̣ܡܲܣܲܩܬܵܐ ܕܠܘܼܚܝܲܬ̣ ܟܲܕ݂ ܒܵܟܹ̇ܝܢ: ܢܸܣܩܘܿܢ ܒܵܗ̇. ܘܒ̣ܐܘܼܪܚܵܐ ܕܚܘܿܪܢܝܡ ܓܥܵܬ̣ܵܐ ܕܲܬ̣ܒ̣ܵܪܵܐ ܢܸܥܒ̇ܕ݂ܘܼܢ.
6 ܡܸܛܠ ܕܡܲـ̈ـܝܵܐ ܕܢܲܡܪܝܼܡ ܢܓ̣ܘܼܙܘܼܢ. ܡܸܛܠ ܕܝܼܒܸܫ̣ ܥܡܝܼܪܵܐ: ܘܲܚ̣ܡܵܐ ܬܸܕ݂ܐܵܐ: ܘܝܘܼܪܵܩܵܐ ܠܵܐ ܗܘ̤ܵܐ.
7 ܡܸܛܠ ܗܵܢܵܐ ܡܸܕܸ̇ܡ ܕܐܸܫܬ̇ܚܲܪ ܥ̣ܒܲܪ. ܘܣܘܼܥܪܵܢܗܘܿܢ ܥܲܠ ܢܲܚܠܵܐ ܕܥܲܪ̈ܒ̣ܝܼܢ ܢܸܫܩ̄ܠܘܼܢ.
8 ܡܸܛܠ ܕܚܸܕ݂ܪܲܬ̤ ܝܑܼܠܲܠܬܵܐ ܠܲܬ̣ܚܘܼܡܵܐ ܕܡܘܼܐܵܒ̣: ܘܲܥܕܲܡܵܐ ܠܓܸܠܥܵܡ ܝܑܼܠܲܠܬܹ̇ܗ: ܘܲܠܒܹܪܵܐ ܕܐܵܠܝܼܡ ܝܑܼܠܲܠܬܹ̇ܗ.
9 ܡܸܛܠ ܕܡܲـ̈ـܝܵܐ ܕܪܝܼܒ̣ܘܿܢ ܐܸܬ̣ܡ̱ܠܝܼܘ ܕܡܵܐ: ܡܸܛܠ ܕܐܹܣܝܼܡ ܥܲܠ ܪܝܼܒ̣ܘܿܢ ܬܵܘܣܲܦܬܵܐ. ܘܐܸܪܢܹܐ ܥܲܠ ܐܲܝܠܹܝܢ ܕܡܸܬ̣ܦܲܨܹܝܢ ܡ̣ܢ ܡܘܼܐܵܒ̣.
1 ܘܥܲܠ ܫܲܪܟܵܐ ܕܐܲܪܥܵܐ: ܐܹܫܲܕܲܪ ܠܒܲܪ ܫܲܠܝܼܛܵܐ ܕܐܲܪܥܵܐ: ܡ̣ܢ ܟܹܐܦܵܐ ܕܡܲܕ݂ܒ̇ܪܵܐ ܠܛܘܼܪܵܐ ܕܒܲܪܬ̣ ܨܸܗܝܘܿܢ.
2 ܘܢܸܗܘܹܐ ܐܲܝܟ݂ ܦܵܪܲܚܬ̣ܵܐ ܕܲܡܫܲܢܝܵܐ ܩܸܢܵܗ̇. ܘܲܒ̣̈ܢܵܬ̣ ܡܘܼܐܵܒ̣: ܫܒ̣ܝܼ̈ܩܵܬ̣ܵܐ ܢܸܗ̱ܘ̈ܝܵܢ ܒܡܲܥܒܲܪܬܵܐ ܕܐܲܪܢܘܿܢ.
3 ܐܲܝܬܵܝ ܬܲܪܥܝܼܬ̣ܵܐ: ܘܲܥܒܸܕ݂ܝ ܬܵܘܓܵܢܵܐ. ܣܝܼܡܝ ܐܲܝܟ݂ ܠܸܠܝܵܐ ܛܸܠܵܠܹܟ݂ܝ ܡܸܨܥܲܬ̣ ܛܲܗܪܵܐ. ܛܲܫܵܝ ܠܲܕ̇ܛܵܥܹ̇ܝܢ ܘܲܠܕܲܡܒܲܕ̇ܪܝܼܢ ܠܵܐ ܬܸܓ̣ܠܹܝܢ.
4 ܢܸܥܡ̄ܪܘܿܢ ܒܹܟ݂ܝ ܡܒܲܕ̇ܪܹ̈ܐ ܕܡܘܼܐܵܒ̣ ܗܘ̤ܵܝ ܠܗܘܿܢ ܣܸܬܵܪܵܐ ܡ̣ܢ ܩܕ݂ܵܡ ܒܵܙܘܿܙܵܐ. ܡܸܛܠ ܕܲܓ̣ܡܲܪ ܕܲܚܝܼܚܵܐ: ܘܣܵܦ̣ ܒܵܙ̇ܘܿܙܵܐ: ܘܲܓ̣ܡܲܪ ܕܵܝܘܿܫܵܐ ܡ̣ܢ ܐܲܪܥܵܐ.
5 ܘܢܸܬ̣ܩܲܢ ܟܘܼܪܣܝܵܐ ܒܛܲܝܒ̇ܘܼܬ̣ܵܐ. ܘܢܸܬܸ̇ܒ̣ ܥܠܵܘܗܝ ܒܩܘܼܫܬܵܐ ܒܡܲܫܟ̇ܢܹܗ ܕܕ݂ܵܘܝܼܕ݂: ܕܲܝܵܢܵܐ ܘܲܡܥܲܩܸܒ̣ ܕܝܼܢܵܐ: ܘܲܡܣܲܪܗܸܒ̣ ܙܲܕ̇ܝܼܩܘܼܬ̣ܵܐ.
6 ܫ̣ܡܲܥ̄ܢ ܓܲܐܝܘܼܬܹܗ ܕܡܘܼܐܵܒ̣: ܕܛܵܒ̣ ܐܸܬ̣ܓܲܐܝܼ ܓܲܐܝܘܼܬܹܗ ܘܪܵܡܘܼܬܹܗ ܘܐܸܠܡܹܗ. ܠܵܐ ܗ̄ܘܼܵܐ ܗܵܟܲܢܵܐ ܒܲܕܸ̇ܩ̣ܘ ܥܠܵܘܗܝ ܩܵܨܘܿܡܵܘ̈ܗܝ.
7 ܡܸܛܠ ܗܵܢܵܐ ܢܲܝܠܸܠ ܡܘܼܐܵܒ̣ ܘܥܲܠ ܡܘܼܐܵܒ̣ ܟܠܹܗ ܢܲܝܠܸܠ: ܥܲܠ ܐܵܫ̈ܝܵܬ̣ܵܐ ܕܫܘܼܪܹ̈ܐ ܕܡܸܬ̣ܗܲܓ̣̈ܡܵܢ. ܬܢܲܗܡܘܼܢ ܐܲܝܟ݂ ܟܪ̈ܝܼܗܹܐ.
8 ܡܸܛܠ ܕܚܲܩ̈ܠܵܬ̣ܵܐ ܕܚܸܫܒ̇ܘܿܢ ܚܪܸܒ̣ ܓܦܸܬܵܐ ܕܣܲܒ̣ܡܵܐ: ܓܲܢ̄ܒܵܪܹ̈ܐ ܕܥܲܡܡܹ̈ܐ ܓܲܡ̣ܘ ܫܲܒ̇ܘܼܩܹ̈ܝܗ̇: ܘܲܥܕܲܡܵܐ ܠܝܲܥܙܝܼܪ ܡ̣ܛܵܘ ܘܲܛܥܵܘ ܒܡܲܕ݂ܒ̇ܪܵܐ ܥܢܵܩܹ̈ܝܗ̇ ܢܓܲܕ݂ܘ ܘܲܥ̣ܒܲܪܘ ܝܲܡܵܐ.
9 ܡܸܛܠ ܗܵܢܵܐ ܐܹܒܲܟܹ̇ܝܟ݂ܝ ܒܲܒ̣ܟ݂ܵܬ̣ܵܐ ܕܝܲܥܙܝܼܪ ܓܦܸܬܵܐ ܕܣܲܒ̣ܡܵܐ. ܐܲܪܘܹܝܟ݂ܝ ܡ̣ܢ ܕܸܡܥ̱ܬܹܟ݂ܝ ܚܸܫܒ̇ܘܿܢ: ܘܐܲܠܥܵܠܵܐ: ܡܸܛܠ ܕܥܲܠ ܚܨܵܕܹܟ݂ܝ ܘܥܲܠ ܩܛܵܦܹܟ݂ܝ ܕܵܝܘܿܫܵܐ ܢ̣ܦܲܠ.
10 ܘܬܸܥܒܲܪ ܚܲܕ݂ܘܼܬ̣ܵܐ ܘܲܕ݂ܝܵܨܵܐ ܡ̣ܢ ܟܲܪܡ̄ܠܵܐ. ܘܲܒ̣ܟܪܡ̄ܠܵܐ ܠܵܐ ܢܸܚܕ̇ܘܿܢ. ܘܠܵܐ ܢܸܥܨܪܘܼܢ ܚܲܡܪܵܐ ܒܡܲܥܨܲܪܬܵܐ. ܘܠܵܐ ܢܕ݂ܘܼܫ ܕܵܝܘܿܫܵܐ: ܡܸܛܠ ܕܲܠܕ݂ܵܝܘܿܫܵܐ ܐܹܒܲܛܸܠ.
11 ܡܸܛܠ ܗܵܢܵܐ ܟܲܪܣܝ ܥܲܠ ܡܘܼܐܵܒ̣: ܐܲܝܟ݂ ܟܸܢܵܪܵܐ ܬܡܲܠܸܠ. ܘܓ̣ܵܘܝ ܥܲܠ ܫܘܼܪܵܐ ܕܡܸܬ̣ܗ̱ܓܸܡ.
12 ܘܡܵܐ ܕܲܚܙ̣ܵܐ ܕܲܠܐܝܼ ܡܘܼܐܵܒ̣ ܥܲܠ ܥܠܵـ̈ـܘܵܬ̣ܵܐ: ܢܹܐܬܹܐ ܠܡܲܩ̄ܕ̇ܫܵܐ ܠܲܡܨܲܠܵܝܘܼ: ܘܠܵܐ ܢܸܫܟܲܚ.
13 ܗܵܢܵܐ ܦܸܬ̣ܓ̣ܵܡܵܐ ܡܲܠܸܠ̣ ܡܵܪܝܵܐ ܥܵܠ ܡܘܼܐܵܒ̣ ܡ̣ܢ ܗܵܝܕܹ̇ܝܢ.
14 ܘܗܵܫܵܐ ܡܲܠܸܠ̣ ܡܵܪܝܵܐ ܘܐܸܡܲܪ: ܒܲܬ̣ܠܵܬ̣ ܫܢ̈ܝܼܢ ܐܲܝܟ݂ ܫܢܲـ̈ـܝܵܐ ܕܐܲܓ̣ܝܼܪܵܐ: ܢܸܨܛܲܥܲܪ ܐܝܼܩܵܪܹܗ ܕܡܘܼܐܵܒ̣: ܥܲܠ ܣܘܿܓ̣ܵܐܐ ܕܥܲܡܹܗ. ܘܢܸܫܬܲܚܲܪ ܩܲܠܝܼܠ ܙܥܘܿܪ: ܘܠܵܐ ܣܲܓ̇ܝܼ.
1 ܡܲܫܩ̄ܠܵܐ ܕܕܲܪܡܣܘܿܩ ܗܵܐ ܕܲܪܡܣܘܿܩ ܡܲܥܒ̇ܪܵܐ ܡ̣ܢ ܩܪܝܼܬ̣ܵܐ ܘܬܸܗܘܹܐ ܠܚܘܼܪܒܵܐ ܘܲܠܡܲܦܘܼܠܬܵܐ.
2 ܘܢܸܗ̱ܘ̈ܝܵܢ ܫܒ̣ܝܼ̈ܩܵܬ̣ܵܐ ܩܘܼܪܝܵܐ ܕܥܲܕ݂ܘܵܥܝܼܪ ܘܢܸܗ̱ܘ̈ܝܵܢ ܠܲܓ̣ܙܵܪܹ̈ܐ ܕܢܸܪܒ̇ܥܘܼܢ ܒܗܹܝܢ. ܘܠܵܐ ܢܸܗܘܹܐ ܠܗܘܿܢ ܡܲܗܪܵܢܵܐ.
3 ܘܢܸܬ̣ܒܲܛܲܠ ܥܘܼܫܢܵܐ ܡ̣ܢ ܐܲܦܪܹܝܡ: ܘܡܲܠܟ̇ܘܼܬ̣ܵܐ ܡ̣ܢ ܕܲܪܡܣܘܿܩ ܘܫܲܪܟܵܐ ܕܐܲܦܪܹܝܡ ܐܲܝܟ݂ ܐܝܼܩܵܪܵܐ ܕܲܒ̣ܢܲܝ̈ ܝܼܣܪܵܝܹܠ ܢܸܗܘܘܿܢ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.
4 ܢܸܗܘܹܐ ܒܝܵܘܡܵܐ ܗܵܘܿ: ܢܸܬ̣ܡܲܣܟܲܢ ܐܝܼܩܵܪܹܗ ܕܝܲܥܩܘܿܒ̣ ܘܫܘܼܡܢܵܐ ܕܒܸܣܪܹܗ ܢܸܬ̣ܪ̱ܙܹܐ.
5 ܘܢܸܗܘܹܐ ܐܲܝܟ݂ ܗܵܘܿ ܕܟ݂ܵܢܹ̇ܫ ܚܨܵܕܵܐ ܕܩܵܝܑܹܡܬ̣ܵܐ: ܘܲܕ݂ܪܵܥܹܗ ܫܸܒ̇ܠܹ̈ܐ ܚܵܨܹ̇ܕ݂. ܘܢܸܗܘܹܐ ܐܲܝܟ݂ ܗܵܘܿ ܕܲܡܠܲܩܸܛ ܫܸܒ̇ܠܹ̈ܐ ܒܥܘܼܡܩܵܐ ܕܲܪܦܵܐܝܼܡ.
6 ܘܢܸܫܬ̇ܚܲܪ ܒܹܗ ܒܘܼܥܵܪܵܐ ܐܲܝܟ݂ ܙܲܝܬܵܐ ܕܲܚܒ̣ܝܼܛ: ܘܲܬ̣ܪܹܝܢ ܬܠܵܬ̣ܵܐ ܙܲܝ̈ܬ̇ܝܼܢ ܒܪܹܫ ܟܲܢܵܐ ܒܣܵܘܟܵܘ̈ܗܝ: ܘܐܲܪܒ̇ܥܵܐ ܘܚܲܡܫܵܐ: ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.
7 ܒܹܗ ܒܝܵܘܡܵܐ ܗܵܘܿ: ܢܸܬ̇ܬ̇ܟܸܠ ܐ̄ܢܵܫ ܥܲܠ ܥܵܒ̣ܘܿܕܹܗ. ܘܥܲܝܢܵܘ̈ܗܝ ܢܚܘܼܪ̈ܵܢ ܠܩܲܕ̇ܝܼܫܵܐ ܕܝܼܣܪܵܝܹܠ.
8 ܘܠܵܐ ܢܸܬ̇ܬ̇ܟܸܠ ܥܲܠ ܡܲܕ݂ܒ̇ܚܹ̈ܐ ܕܲܥܒܲܕ݂ ܐܝܼܕ݂ܵܘ̈ܗܝ ܘܲܥ̣ܒܲܪ ܨܸܒ̣̈ܥܵܬܹܗ. ܘܠܵܐ ܢܚܘܿܪ ܒܦܬܲܟ݂ܪܹ̈ܐ ܘܲܒ̣ܪܸܚ̈ܠܵܬ̣ܵܐ.
9 ܒܝܵܘܡܵܐ ܗܵܘܿ: ܢܸܗ̱ܘ̈ܝܵܢ ܩܘܼܪ̈ܝܵܐ ܕܥܘܼܫܢܹܗ ܐܲܝܟ݂ ܓܘܼܒܵܐ ܕܲܚܪܸܫ: ܘܕܲܐܡܝܼܪ ܕܐܸܫܬ̇ܒܸܩ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ ܘܲܗ̤ܘܲܝܬ̇ܝ ܠܲܚܒ̣ܵܠܵܐ.
10 ܕܲܛܥܲܝܬ̇ܝ ܠܐܲܠܵܗܵܐ ܦܵܪܘܿܩܹܟ݂ܝ ܘܲܠܬܲܩܝܼܦܵܐ ܡܥܲܫܢܵܢܹܟ݂ܝ ܠܵܐ ܐܸܬ̇ܕܲܟ݂ܪܬ̇ܝ ܡܸܛܠ ܗܵܢܵܐ ܬܸܨܒ̣ܝܼܢ ܢܸܨܒ̇ܬ̣ܵܐ ܝܵܐܝܼܬ̣ܵܐ. ܒܫܲܒ̇ܘܼܩܹ̈ܐ ܢܘܼܟ݂ܪ̈ܵܝܹܐ ܬܸܙ̱ܪܥܝܼܢܵܗ̇.
11 ܒܝܵܘܡܵܐ ܕܬܸܨܒ̣ܝܼܢܵܗ̇: ܢܸܦܘܿܩ ܣܡܵܕ݂ܪܵܐ. ܘܲܒ̣ܨܲܦܪܵܐ ܙܲܪܥܹܟ݂ܝ ܬܲܦ̱ܪܥܝܼܢ: ܐܲܝܟ݂ ܢܝܼܪܵܐ ܕܲܩܛܵܦܵܐ ܒܝܵܘܡܵܐ ܟܲܪܝܵܐ: ܘܐܲܝܟ݂ ܟܹܐܒ̣ܵܐ ܕܐ̄ܢܵܫܵܐ.
12 ܘܵܝ ܠܚܲܝܠܵܐ ܕܥܲܡܡܹ̈ܐ ܣܲܓ̇ܝܹ̈ܐܐ: ܕܐܵܙܹ̇ܠ ܩܵܠܗܘܿܢ ܐܲܝܟ݂ ܩܵܠܵܐ ܕܝܲܡܡܹ̈ܐ: ܘܲܪܓܘܼܫܝܵܐ ܕܐܹܡ̈ܘܵܬ̣ܵܐ.
13 ܐܲܝܟ݂ ܩܵܠܵܐ ܕܡܲـ̈ـܝܵܐ ܣܲܓ̇ܝܹ̈ܐܐ: ܢܸܓ̣ܥܘܿܪ ܒܹܗ: ܘܢܸܥܪܘܿܩ ܠܪܘܼܚܩܵܐ. ܘܢܸܪܗܲܛ ܐܲܝܟ݂ ܕܲܚܝܼܚܵܐ ܕܛܘܼܪܹ̈ܐ ܩܕ݂ܵܡ ܪܘܼܚܵܐ: ܘܐܲܝܟ݂ ܓܸܠܵܐ ܩܕ݂ܵܡ ܥܲܠܥܵܠܵܐ.
14 ܒܙܲܒ̣ܢܵܐ ܕܪܲܡܫܵܐ ܘܗܵܐ ܚܘܼܛܵܦܵܐ ܥܲܕ݂ܠܵܐ ܗܘ̤ܵܐ ܨܲܦܪܵܐ: ܘܠܵܐ ܢܸܫܬܲܚܲܪ. ܗܵܕܲܐ ܗ̄ܝܼ ܦܵܠܓ̇ܘܼܬ̣ܵܐ ܕܕ݂ܵܝܘܿܫܲܢ: ܘܲܡܢܵܬ̣ܵܐ ܕܒ̣ܵܙܘܿܙܲܢ.
1 ܘܵܝ ܠܐܲܪܥܵܐ ܕܛܸܠܵܠܵܐ ܕܟܸܢ̈ܦܹܐ: ܕܒܲܥܒ̣ܵܪ ܢܲܗܪ̈ܵܘܵܬ̣ܵܐ ܕܟ݂ܘܼܫ.
2 ܕܲܡܫܲܕܲܪ ܗܡܲܝܪܹ̈ܐ ܒܝܲܡܵܐ: ܘܲܒ̣ܡܵܐ̈ܢܹܐ ܕܦܵܦܝܼܪܘܿܢ ܥܲܠ ܐܲܦܲܝ̈ ܡܲـ̈ـܝܵܐ. ܐܸܙܲܠ̣ܘ ܐܝܼܙܓܲـ̈ـܕܹ̇ܐ ܩܲܠ̈ܝܼܠܹܐ: ܠܘܵܬ̣ ܥܲܡܵܐ ܕܲܡܠܝܼܓ̣ ܘܲܥܩܝܼܪ: ܠܘܵܬ̣ ܥܲܡܵܐ ܕܚܲܝܠܵܐ ܡܸܢܹܗ ܘܲܠܗܲܠ: ܥܲܡܵܐ ܕܲܡܫܲܕܲܪ ܘܕ݂ܝܼܫ. ܕܒܲܙ̣ܘ ܢܲܗܪ̈ܵܘܵܬ̣ܵܐ ܐܲܪܥܹܗ.
3 ܟܠܗܘܿܢ ܥܵܡܘܿܪ̈ܝܗ̇ ܕܬܹܒܹܝܠ ܕܲܫܪܹܝܢ ܒܐܲܪܥܵܐ. ܡܵܐ ܕܲܫܩܲܠ̣ܘ ܐܵܬ̤ܵܐ ܛܘܼܪܹ̈ܐ: ܬܸܚܙܘܿܢ. ܘܡܵܐ ܕܲܩ̣ܪܵܐ ܫܝܼܦܘܿܪܵܐ: ܬܸܫ̱ܡܥܘܼܢ.
4 ܡܸܛܠ ܕܗܵܟܲܢܵܐ ܐܸܡܲܪ ܠܝܼ ܡܵܪܝܵܐ: ܐܲܫܠܵܐ ܘܚܘܼܪ ܒܛܘܼܝܵܒ̣ܝ: ܐܲܝܟ݂ ܚܘܼܡܵܐ ܨܲܚܝܼܚܵܐ ܕܥܲܠ ܢܲܗܪܵܐ: ܘܐܲܝܟ݂ ܥܢܵܢܵܐ ܕܛܲܠܵܐ ܒܝܵܘܡܵܐ ܕܲܚܨܵܕ݂ܵܐ.
5 ܡܸܛܠ ܕܡ̣ܢ ܩܕ݂ܵܡ ܚܨܵܕ݂ܵܐ ܓ̣ܡܲܪ ܦܪܸܥܵܐ: ܘܗܲܒܵܒ̣ܵܐ ܚ̣ܣܲܠ. ܘܢܸܗܘܹܐ ܥܘܼܦܝܵܐ. ܘܢܸܦܣܘܿܩ ܙܲܠܝܼܠܵܐ ܒܡܲܓ̇ܠܵܐ. ܘܫܲܒ̇ܘܼܩܵܐ ܢܸܥܒܲܪ ܘܢܸܦܸܨ.
6 ܘܢܸܫܬܲܒ̣ܩܘܼܢ ܐܲܟ݂ܚ̄ܕ݂ܵܐ ܠܛܲܝܪܵܐ ܕܛܘܼܪܹ̈ܐ: ܘܲܠܚܲܝ̄ܘܼܬ̣ܵܐ ܕܐܲܪܥܵܐ. ܘܬܸܟ݂ܢܲܫ ܥܠܵܘܗܝ ܛܲܝܪܵܐ. ܘܟ݂ܠܵܗ̇ ܚܲܝ̄ܘܼܬ̣ܵܐ ܕܐܲܪܥܵܐ ܥܠܵܘܗܝ ܬܸܪܓܲܙ.
7 ܒܹܗ ܒܝܵܘܡܵܐ ܗܵܘܿ: ܢܵܘܒܸ̇ܠ ܩܘܼܪ̈ܒܵܢܹܐ ܠܡܵܪܝܵܐ ܚܲܝܠܬ̣ܵܢܵܐ: ܥܲܡܵܐ ܡܠܝܼܓ̣ܵܐ ܘܲܥܩܝܼܪܵܐ: ܥܲܡܵܐ ܕܚܲܝܠܵܐ ܡܸܢܹܗ ܘܲܠܗܲܠ: ܥܲܡܵܐ ܕܲܡܫܲܟܲܪ ܘܕ݂ܝܼܫ. ܕܒܲܙܘ ܢܲܗܪ̈ܵܘܵܬ̣ܵܐ ܐܲܪܥܹܗ: ܠܐܲܬ̣ܪܵܐ ܕܲܫܡܹܗ ܕܡܵܪܝܵܐ ܚܲܝܠܬ̣ܵܢܵܐ: ܠܛܘܼܪܵܐ ܕܨܸܗܝܘܿܢ.
1 ܡܲܫܩ̄ܠܵܐ ܕܡܸܨܪܹܝܢ. ܗܵܐ ܡܵܪܝܵܐ ܪܟ݂ܝܼܒ̣ ܥܲܠ ܥܢܵܢܹ̈ܐ ܩܲܠܝܼ̈ܠܵܬ̣ܵܐ: ܘܥܵܐܹ̇ܠ ܠܡܸܨܪܹܝܢ. ܘܲܢܙܘܼܥܘܼܢ ܦܬܲܟ݂ܪܹ̈ܐ ܕܡܸܨܪܹܝܢ ܡ̣ܢ ܩܕ݂ܵܡܵܘܗܝ. ܘܠܸܒܹ̇ܗ ܕܡܸܨܪܵܝܵܐ ܢܸܬ̣ܡ̱ܣܸܐ ܒܓ̣ܵܘܹܗ.
2 ܘܐܲܓܲܪܸܐ ܡܸܨܪܵܝܵܐ ܒܡܸܨܪܵܝܵܐ. ܘܢܸܬ̣ܟܲܬܲܫ ܓܲܒ̣ܪܵܐ ܥܲܡ ܐܲܚܘܼܗܝ: ܘܓܲܒ̣ܪܵܐ ܥܲܡ ܚܲܒ̣ܪܹܗ: ܡܕ݂ܝܼܢ̄ܬܵܐ ܥܲܡ ܡܕ݂ܝܼܢ̄ܬܵܐ: ܘܡܲܠܟ̇ܘܼܬ̣ܵܐ ܥܲܡ ܡܲܠܟ̇ܘܼܬ̣ܵܐ.
3 ܘܬܸܬ̣ܦܣܸܩ ܪܘܼܚܹܗ ܕܡܸܨܪܵܝܵܐ ܒܓܵܘܹܗ: ܘܬܲܪܥܝܼܬܹܗ ܐܸܛܲܒܲܥ. ܘܢܸܫ̱ܐܠܘܼܢ ܡ̣ܢ ܦܬܲܟ݂ܪܹ̈ܐ ܘܡ̣ܢ ܡܓ̣ܘܼܫܹ̈ܐ: ܘܡ̣ܢ ܙܲܟ̇ܘܼܪܹ̈ܐ ܘܡ̣ܢ ܝܲܕ̇ܘܼ̈ܥܹܐ.
4 ܘܐܲܫܠܸܡ ܠܡܸܨܪ̈ܵܝܹܐ ܒܐܝܼܕ݂ܵܐ ܕܡܵܪ̈ܲܝܵܐ ܩܫܲܝܵـ̈ـܐ. ܘܡܲܠܟܵܐ ܥܲܫܝܼܢܵܐ ܢܸܫܬܲܠܲܛ ܒܗܘܿܢ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.
5 ܘܲܢܓܘܼܙܘܼܢ ܡܲـ̈ـܝܵܐ ܡ̣ܢ ܝܲܡܵܐ. ܘܢܲܗܪܵܐ ܢܸܚܪܲܒ̣ ܘܢܹܐܒܲܫ.
6 ܘܲܢܓܘܼܙܘܼܢ ܢܲܗܪ̈ܵܘܵܬ̣ܵܐ: ܘܢܸܬ̣ܡܲܣܟ̇ܢܘܼܢ. ܘܢܸܚܪ̱ܒ̣ܘܼܢ ܢܲܗܪ̈ܵܘܵܬ̣ܵܐ ܥܲܫܝܼܢܹ̈ܐ. ܩܲܢܝܵܐ ܘܐܲܪܒܵܢܵܐ ܘܦܵܦܹܪܘܿܢ ܢܹܐܒ̣ܫܘܼܢ.
7 ܘܠܘܿܥܵܐ ܕܥܲܠ ܢܲܗܪܵܐ: ܘܥܲܠ ܦܘܼܡܹܗ ܕܢܲܗܪܵܐ: ܘܟ݂ܠ ܕܡܸܙܕܲܪܲܥ ܥܲܠ ܓܲܒܹ̇ܗ ܕܢܲܗܪܵܐ ܢܹܐܒܲܫ. ܘܢܸܫܬ̇ܩܸܦ ܘܠܵܐ ܢܸܫܬ̇ܟܲܚ.
8 ܘܢܹܐܠܘܿܢ ܨܲܝܵܕܹ̈ܐ. ܘܢܸܬ̇ܒ̣ܘܼܢ ܒܐܸܒ̣ܠܵܐ ܕܪܵܡܹ̇ܝܢ ܨܸܢܵܪ̈ܝܵܬ̣ܵܐ ܒܢܲܗܪܵܐ. ܘܲܕ݂ܦܲܪܣܝܼܢ ܡܨܝܼ̈ܕ݂ܵܬ̣ܵܐ ܥܲܠ ܐܲܦܲܝ̈ ܡܲـ̈ـܝܵܐ ܐܸܬ̣ܟ̇ܪܲܗܘ.
9 ܘܢܸܒ̣ܗ̱ܬ̣ܘܼܢ ܥܵܒ̣̈ܕܲܝ ܟܸܬܵܢܵܐ: ܕܣܵܪܩܝܼܢ ܘܙܵܩܪܝܼܢ ܠܚܲܕ݂ܘܼܬ̣ܵܐ.
10 ܘܢܸܬ̣ܡܲܟ̇ܟ݂ܘܼܢ ܟܠ ܕܥܵܒ̣ܕ̇ܝܼܢ ܫܲܟ݂ܪܵܐ: ܠܡܲܫܬ̇ܝܵܐ ܕܢܲܦ̮ܫܵܐ.
11 ܫܛܵܘ ܪܵܘ̱ܪ̈ܒ̣ܵܢܹܐ ܕܨܵܥܵܢ: ܘܚܲܟ̇ܝܼܡܹ̈ܐ ܕܡܵܠܟ̇ܝܼܢ ܠܦܸܪܥܘܼܢ ܡܲܠܟܵܐ ܡܸܠ̈ܟܹ̇ܐ ܫܵܛܲـ̈ـܝܵܐ. ܐܲܝܟܲܢܵܐ ܬܹܐܡܪܘܼܢ ܠܦܸܪܥܘܿܢ ܕܚܲܟ̇ܝܼܡܹ̈ܐ ܚܢܲܢ: ܘܲܒ̣ܢܲܝ̈ ܡܲܠ̈ܟܹ̇ܐ ܩܲܕ݂ܡܵܝܹ̈ܐ.
12 ܐܲܝܟܵܐ ܐܸܢܘܿܢ ܚܲܟ̇ܝܼܡܲܝ̈ܟ: ܢܚܵܘܘܿܢܵܟ݂: ܘܢܸܕ̇ܥܘܼܢ ܡܵܢܵܐ ܐܸܬ̣ܪܲܥܝܼ ܡܵܪܝܵܐ ܚܲܝܠܬ̣ܵܢܵܐ ܥܲܠ ܡܸܨܪܹܝܢ.
13 ܫܛ̣ܵܘ ܪܵܘ̱ܪ̈ܒ̣ܵܢܹܐ ܕܨܵܥܵܢ. ܐܸܬ̇ܬ̇ܪܝܼܡܘ ܪܵܘ̱ܪ̈ܒ̣ܵܢܹܐ ܕܡܲܦܵܣ: ܘܐܲܛܥܝܼܘ ܠܡܸܨܪܹܝܢ ܒܙܵܘ̈ܝܵܬ̣ܵܐ ܕܫܲܪ̈ܒ̣ܵܬ̣ܵܗ̇.
14 ܡܵܪܝܵܐ ܡ̣ܙܲܓ̣ ܒܓ̣ܵܘܵܗ̇ ܪܘܼܚܵܐ ܛܵܥܝܼܬ̣ܵܐ: ܘܐܲܛܥ̱ܝܹܗ ܠܡܸܨܪܵܝܵܐ ܒܟ݂ܠܗܘܿܢ ܥܒ̣ܵܕ݂ܵܘ̈ܗܝ: ܐܲܝܟ݂ ܕܛܵܥܹ̇ܐ ܪܵܘܝܵܐ ܒܲܬ̣ܝܵܒ̣ܬܹ̇ܗ.
15 ܘܠܵܐ ܢܸܗܘܹܐ ܠܡܸܨܪܵܝܵܐ ܓܲܒ̣ܪܵܐ ܕܢܸܥܒܸ̇ܕ݂ ܪܹܫܵܐ ܘܕ݂ܘܼܢܒ̇ܬ̣ܵܐ: ܘܕ݂ܘܼܢܒܬ̣ܵܐ ܘܪܹܫܵܐ.
16 ܒܝܵܘܡܵܐ ܗܵܘܿ: ܢܸܗܘܹܐ ܡܸܨܪܵܝܵܐ ܐܲܝܟ݂ ܢܸܫܹ̈ܐ. ܘܢܸܕ݂ܚܲܠ ܘܲܢܙܘܼܥ ܡ̣ܢ ܩܕ݂ܵܡ ܪܵܘܡܵܐ ܕܐܝܼܕܹܗ ܕܡܵܪܝܵܐ ܚܲܝܠܬ̣ܵܢܵܐ ܕܲܡܪܝܼܡ ܥܠܵܘܗܝ.
17 ܘܬܸܗܘܹܐ ܐܲܪܥܵܐ ܕܲܝܗܘܼܕ݂ܵܐ ܠܡܸܨܪܵܝܵܐ ܠܣܘܼܪܵܕ݂ܵܐ. ܘܟ݂ܠ ܕܢܲܕ݂ܟ̇ܪܝܼܗ̇ ܠܹܗ: ܢܸܬ̣ܪ̱ܗܸܒ̣: ܡ̣ܢ ܩܕ݂ܵܡ ܬܲܪܥܝܼܬܹܗ ܕܡܵܪܝܵܐ ܚܲܝܠܬ̣ܵܢܵܐ ܕܐܸܬ̣ܪܲܥܝܼ ܥܠܵܘܗܝ.
18 ܒܝܵܘܡܵܐ ܗܵܘܿ: ܢܸܗ̱ܘ̈ܝܵܢ ܚܲܡܸܫ ܩܘܼܪ̈ܝܵܐ ܒܐܲܪܥܵܐ ܕܡܸܨܪܹܝܢ: ܕܲܡܡܲܠ̈ܠܵܢ ܒܠܸܫܵܢܵܐ ܟܢܲܥܢܵܝܵܐ. ܘܝܵܡ̈ܝܵܢ ܒܡܵܪܝܵܐ ܚܲܝܠܬ̣ܵܢܵܐ. ܘܲܚܕ݂ܵܐ ܡܸܢܗܹܝܢ ܗܲܪܸܣ ܬܸܬ̣ܩ̄ܪܸܐ.
19 ܒܝܵܘܡܵܐ ܗܵܘܿ: ܢܸܗܘܹܐ ܡܲܕ݂ܒ̇ܚܵܐ ܠܡܵܪܝܵܐ ܚܲܝܠܬ̣ܵܢܵܐ ܒܓ̣ܵܘܵܗ̇ ܕܐܲܪܥܵܐ ܕܡܸܨܪܹܝܢ: ܘܩܵܝܑܹܡܬ̣ܵܐ ܠܡܵܪܝܵܐ ܥܲܠ ܓܸܢ̄ܒ̣ ܬܚܘܼܡܹ̈ܝܗ̇.
20 ܘܬܸܗܘܹܐ ܠܐܵܬ̤ܵܐ ܘܲܠܣܵܗܕ̇ܘܼܬ̣ܵܐ ܠܡܵܪܝܵܐ ܚܲܝܠܬ̣ܵܢܵܐ ܒܐܲܪܥܵܐ ܕܡܸܨܪܹܝܢ: ܡܸܛܠ ܕܢܸܓ̣ܥܘܿܢ ܩܕ݂ܵܡ ܡܵܪܝܵܐ ܡ̣ܢ ܩܕ݂ܵܡ ܐܵܠܘܿܨܵܐ. ܘܲܢܫܲܕܲܪ ܠܗܘܿܢ ܦܵܪܘܿܩܵܐ: ܘܕܲܝܵܢܵܐ: ܘܲܢܦܲܨܹܐ ܐܸܢܘܿܢ.
21 ܘܢܸܬ̣̱ܝܼܕܲܥ ܡܵܪܝܵܐ ܠܡܸܨܪ̈ܵܝܹܐ: ܘܢܸܕ̇ܥܘܼܢܹܗ ܡܸܨܪ̈ܵܝܹܐ ܠܡܵܪܝܵܐ ܒܝܵܘܡܵܐ ܗܵܘܿ. ܘܲܢܩܲܪܒ̣ܘܼܢ ܕܸܒ̣ܚܹ̈ܐ ܘܲܣܡܝܼܕ݂ܵܐ. ܘܢܸܕ̇ܪܘܼܢ ܢܸܕ݂ܪܹ̈ܐ ܠܡܵܪܝܵܐ: ܘܲܢܫܲܠܡܘܼܢ.
22 ܘܢܸܡܚܸܐ ܡܵܪܝܵܐ ܠܡܸܨܪ̈ܵܝܹܐ ܡܚܘܿܬ̣ܵܐ: ܘܢܲܐܣܸܐ ܐܸܢܘܿܢ. ܘܢܸܬ̣ܦ̄ܢܘܿܢ ܠܘܵܬ̣ ܡܵܪܝܵܐ: ܘܢܸܥܢܸܐ ܐܸܢܘܿܢ: ܘܢܲܐܣܹܐ ܐܸܢܘܿܢ.
23 ܒܝܵܘܡܵܐ ܗܵܘܿ: ܢܸܗܘܹܐ ܫܒ̣ܝܼܥܵܐ ܡ̣ܢ ܡܸܨܪܹܝܢ ܐܵܬ̣ܘܿܪ: ܘܡ̣ܢ ܐܵܬ̣ܘܿܪ ܠܡܸܨܪܹܝܢ. ܘܢܸܥܘܿܠ ܐܵܬ̣ܘܿܪܵܝܵܐ ܠܡܸܨܪܹܝܢ: ܘܡܸܨܪܵܝܵܐ ܠܐܵܬ̣ܘܿܪ. ܘܢܸܦ̱ܠܚܘܼܢ ܡܸܨܪ̈ܵܝܹܐ ܠܐܵܬ̣ܘܿܪ̈ܵܝܹܐ.
24 ܒܝܵܘܡܵܐ ܗܵܘܿ ܢܸܗܘܹܐ ܝܼܣܪܵܝܹܠ ܚܲܕ݂ ܡ̣ܢ ܬܠܵܬ̣ܵܐ: ܠܡܸܨܪ̈ܵܝܹܐ ܘܠܵܐܬ̣ܘܿܪ̈ܵܝܹܐ ܒܘܼܪܟ̇ܬ̣ܵܐ ܒܓ̣ܵܘ ܐܲܪܥܵܐ.
25 ܕܠܹܗ ܒܲܪܸܟ݂ ܡܵܪܝܵܐ ܚܲܝܠܬ̣ܵܢܵܐ: ܘܐܸܡܲܪ ܒܪܝܼܟ݂ ܥܲܡܝ ܕܲܒ̣ܡܸܨܪܹܝܢ: ܘܲܥܒ̣ܵܕ݂ ܐܝܼ̈ܕܲܝ ܕܒ̣ܵܐܬ̣ܘܿܪ. ܘܝܘܼܪܬܵܢܝ ܝܼܣܪܵܝܹܠ.
1 ܐ: ܒܫܲܢ̄ܬܵܐ ܕܐܸܬ̣ܵܐ ܬܹܐܪܬܵܢ ܠܐܲܫܕ̇ܘܿܕ݂: ܟܲܕ݂ ܫܲܕ̇ܪܹܗ ܣܲܪܓ̣ܘܿܢ ܡܲܠܟܵܐ ܕܐܵܬ̣ܘܿܪ: ܘܐܸܬ̣ܟܲܬܲܫ ܥܲܡ ܐܲܫܕ̇ܘܿܕ݂ ܘܟܲܒ̣ܫܵܗ̇.
2 ܒܹܗ ܒܙܲܒ̣ܢܵܐ ܗܵܘܿ: ܡܲܠܸܠ̣ ܡܵܪܝܵܐ ܒܝܲܕ݂ ܐܹܫܲܥܝܵܐ ܢܒ̣ܝܼܵܐ ܒܲܪ ܐܵܡܘܿܨ: ܘܐܸܡܲܪ ܠܹܗ: ܙܸܠ ܫܪܝܼ ܣܲܩܵܐ ܡ̣ܢ ܚܲܨܲܝ̈ܟ: ܘܲܡܣܵܢܲܝ̈ܟ ܡ̣ܢ ܪܸ̈ܓ̣ܠܲܝܟ. ܘܲܥܒܲܕ݂ ܗܵܟܲܢܵܐ: ܘܗܲܠܸܟ݂ ܥܲܪܛܸܠ ܘܚܸܦܝܵܝ.
3 ܘܐܸܡܲܪ ܡܵܪܝܵܐ: ܐܲܝܟܲܢܵܐ ܕܗܲܠܸܟ݂ ܥܲܒ̣ܕܲܝ ܐܹܫܲܥܝܵܐ ܥܲܪܛܸܠ ܘܚܸܦܝܵܝ: ܗܵܟܲܢܵܐ ܢܸܗܘ̈ܝܵܢ ܐܵܬ̣̈ܘܵܬ̣ܵܐ ܘܬܸܕ݂ܡܪ̈ܵܬ̣ܵܐ ܬܠܵܬ̣ ܫܢ̈ܝܼܢ ܥܲܠ ܡܨܪܹܝܢ ܘܥܲܠ ܟܘܼܫ.
4 ܗܵܟܲܢܵܐ ܢܸܕ݂ܒܲܪ ܡܲܠܟܵܐ ܕܐܵܬ̣ܘܿܪ ܫܟ݂ܝܼܬ̣ܵܐ ܕܡܸܨܪܹܝܢ: ܘܲܫܒ̣ܝܼܬ̣ܵܐ ܕܟ݂ܘܼܫ: ܥܠܲܝܡܹ̈ܐ ܘܣܵܒܹ̈ܐ ܥܲܪܛܸܠ ܘܚܸܦܝܵܝ ܘܢܸܬ̣ܓ̇ܠܹܐ ܦܘܼܪܣܵܝܵܗ̇ ܕܡܸܨܪܹܝܢ.
5 ܘܢܸܬ̇ܬܲܒ̣ܪܘܿܢ ܘܢܸܒ̣ܗ̱ܬ̣ܘܼܢ: ܡ̣ܢ ܟܘܼܫ ܬܘܼܟ݂ܠܵܢܗܘܿܢ: ܘܡ̣ܢ ܡܸܨܪܹܝܢ ܬܸܫܒ̇ܘܿܚܬ̇ܗܘܿܢ.
6 ܘܢܹܐܡܲܪ ܥܵܡ̇ܘܿܪܵܐ ܕܓ̣ܵܙܲܪܬܵܐ ܗܵܕܹܐ ܒܝܵܘܡܵܐ ܗܵܘܿ: ܗܵܪܟܵܐ ܗ̄ܘܼ ܬܘܼܟ݂ܠܵܢܲܢ: ܕܲܥܪܲܩܢ ܠܡܸܬ̣ܥܲܕܵܪܘܼ ܘܲܠܡܸܬ̣ܦܲܨܵܝܘܼ ܡ̣ܢ ܡܲܠܟܵܐ ܕܐܵܬ̣ܘܿܪ. ܘܲܚܢܲܢ ܐܲܝܟܲܢܵܐ ܢܸܬ̣ܦܲܨܹܐ.
1 ܡܲܫܩ̄ܠܵܐ ܕܡܲܕ݂ܒ̇ܪܵܐ ܕܝܲܡܵܐ. ܐܲܝܟ݂ ܥܲܠܥܵܠܵܐ ܡ̣ܢ ܬܝܡ̄ܢܵܐ ܬܸܪܗܲܛ ܡ̣ܢ ܡܲܕ݂ܒ̇ܪܵܐ: ܘܬܹܐܬܹܐ ܡ̣ܢ ܐܲܪܥܵܐ ܪܲܚܝܼܩܬܵܐ.
2 ܚܸܙܘܵܐ ܩܲܫܝܵܐ ܐܸܬ̣ܚ̄ܙܝܼ ܠܲܢ. ܛܵܠܘܿܡܵܐ ܛܵܠܹ̇ܡ: ܘܒ̣ܵܙܘܿܙܵܐ ܒܐܹ̈ܙ ܣܲܩܝ ܥܝܼܠܵܡ ܘܛܘܼܪ̈ܲܝ ܡܵܕܲܝ: ܘܟ݂ܠܗܹܝܢ ܬܸܢ̈ܚܵܬ̣ܵܗ̇ ܒܲܛܠܹ̇ܬ̣.
3 ܡܸܛܠ ܗܵܢܵܐ ܐܸܬ̣ܡ̱ܠܝܼ ܚܲܨܝ ܙܵܘܥܬ̣ܵܐ ܘܐܲܚܕ̇ܘܢܝ ܨܵܘܪ̈ܵܢܹܐ ܐܲܝܟ݂ ܨܵܘܪ̈ܵܢܹܐ ܕܝܵܠܹܕ̇ܬܵܐ. ܙܵܥܹ̇ܬ̣ ܕܠܵܐ ܐܸܫܡܲܥ. ܘܐܸܬ̇ܕܲܠܚܹ̇ܬ̣ ܕܠܵܐ ܐܸܚܙܹܐ.
4 ܛܥ̣ܵܐ ܠܹܒ̇ܝ: ܘܨܵܘܪ̈ܵܢܹܐ ܐܲܙܝܼܥܘܼܢܝ ܘܫܘܼܦܪܹ̈ܐ ܕܨܸܒ̣ܝܵܢܝ ܣܵܡ̣ܘ ܠܝܼ ܠܣܘܼܪܵܕ݂ܵܐ.
5 ܛܲܝܸܒ̣ܘ ܦܵܬ̣ܘܿܪܹ̈ܐ: ܕܘܼܩܘ ܕܵܘܩܹ̈ܐ. ܐܲܟ݂ܘܿܠܘ ܘܐܸܫܬܵܘ. ܩܘܼܡܘ ܪܵܘ̱ܪ̈ܒ̣ܵܢܹܐ: ܡܫܘܿܚܘ ܣܲܟ̇ܪܹ̈ܐ.
6 ܡܸܛܠ ܕܗܵܟܲܢܵܐ ܐܸܡܲܪ ܠܝܼ ܡܵܪܝܵܐ: ܙܸܠ ܐܲܩܝܼܡ ܕܵܘܩܵܐ: ܕܡܸܕܸ̇ܡ ܕܚܵܙܹ̇ܐ: ܢܚܵܘܹܐ.
7 ܘܲܚܙ̣ܵܐ ܪܟ݂ܘܿܒ̣ܵܐ ܕܲܬ̣ܪܹܝܢ ܦܲܪ̈ܵܫܝܼܢ: ܕܲܪܟ݂ܝܼܒ̣ ܚܡܵܪܵܐ: ܘܕܲܪܟ݂ܝܼܒ̣ ܓܲܡܠܵܐ: ܘܨܵܬ̣ ܫܸܡܥܵܐ ܣܲܓ̇ܝܼܵܐܐ.
8 ܘܲܩܪܵܐ ܕܵܘܩܵܐ ܒܐܸܕ݂ܢܲܝ̈: ܘܐܸܡܲܪ: ܐܸܢܵܐ ܡܵܪܝܵܐ ܩܵܐܹ̇ܡ ܐ̄ܢܵܐ ܐܲܡܝܼܢܵܐܝܼܬ̣ ܒܐܝܼܡܵܡܵܐ: ܘܥܲܠ ܡܲܛ̇ܪܬ̇ܝ ܩܵܐܹ̇ܡ ܐ̄ܢܵܐ ܟܠܗܘܿܢ ܠܲܝܠܵـ̈ـܘܵܬ̣ܵܐ.
9 ܘܗܐ ܐܸܬ̣ܵܐ ܓܲܒ̣ܪܵܐ ܡ̣ܢ ܪ̈ܵܟ݂ܒܹ̇ܐ ܕܦܲܪ̈ܵܫܹܐ: ܘܲܥ̣ܢܵܐ ܘܐܸܡܲܪ: ܢܸܦܠܲܬ̤: ܢܸܦܠܲܬ̤: ܒܵܒܹܠ. ܘܟ݂ܠܗܘܿܢ ܐܲܠܵܗܹ̈ܝܗ̇ ܓܠܝܼܦܹ̈ܐ ܐܸܬ̇ܬܲܒܲܪܘ ܒܐܲܪܥܵܐ: ܡ̣ܢ ܚܨܵܕ݂ ܘܡ̣ܢ ܒܠܲܝ ܐܸܕܲܪ.
10 ܡܸܕܸ̇ܡ ܕܫܸܡ̇ܥܹܬ̣ ܡ̣ܢ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܚܵܘܝܼܬ̇ܟ݂ܘܿܢ.
11 ܡܲܫܩ̄ܠܵܐ ܕܕ݂ܘܿܡܵܐ. ܠܝܼ ܩܪܵܐ ܡ̣ܢ ܣܵܥܝܼܪ ܢܵܛ̇ܘܿܪܵܐ ܕܲܒ̣ܠܸܠܝܵܐ.
12 ܐܸܡܲܪ ܢܵܛ̇ܘܿܪܵܐ: ܐܸܬ̣ܵܐ ܨܲܦܪܵܐ ܐܵܦ ܠܸܠܝܵܐ. ܐܸܢ ܒܵܥܹ̇ܝܢ ܐܲܢ̄ܬ̇ܘܿܢ ܒܥܵܘ: ܬܘܼܒ̣ ܐܵܬܹ̇ܝܢ ܐܲܢ̄ܬ̇ܘܿܢ.
13 ܡܲܫܩ̄ܠܵܐ ܕܥܵܪܵܒ̣ܵܐ ܒܪܲܡܫܵܐ ܒܥܵܒܵܐ ܬܒ̣ܘܼܬ̣ܘܼܢ: ܒܲܫܒ̣ܝܼܠܵܐ ܕܕ݂ܘܼܪܢܝܼܡ.
14 ܠܐܘܼܪܲܥ ܨܗܲܝܵܐ ܐܲܝܬܵܘ ܡܲـ̈ـܝܵܐ: ܥܵܡ̇ܘܿܪܹ̈ܐ ܕܐܲܪܥܵܐ ܕܬܲܝܡ̄ܢܵܐ. ܒܠܲܚܡܟ݂ܘܿܢ ܐܲܪܘܿܥܘ ܠܲܡܒܲܕܵܪܹ̈ܐ.
15 ܡܸܛܠ ܕܡ̣ܢ ܩܕ݂ܵܡ ܣܲܦ̮ܣܹܪܵܐ ܐܸܬ̣ܒܲܕܲܪܘ: ܘܡ̣ܢ ܩܕ݂ܵܡ ܚܲܪܒܵܐ ܕܲܠܛܝܼܫܵܐ: ܘܡ̣ܢ ܩܕ݂ܵܡ ܩܸܫܬܵܐ ܕܡܲܠܝܵܐ: ܘܡ̣ܢ ܩܕ݂ܵܡ ܥܘܼܫܢܵܐ ܕܲܩܪܵܒ̣ܵܐ.
16 ܡܸܛܠ ܕܗܵܟܲܢܵܐ ܐܸܡܲܪ ܠܝܼ ܡܵܪܝܵܐ: ܒܡܫܠܲܡ ܫܲܢ̄ܬܵܐ ܐܲܝܟ݂ ܫܢܲـ̈ـܝܵܐ ܕܐܲܓ̣ܝܼܪܵܐ: ܢܣܘܼܦ ܟܠܹܗ ܐܝܼܩܵܪܵܐ ܕܩܸܕ݂ܵܪ.
17 ܘܫܲܪܟܵܐ ܕܡܸܢܝܵܢܵܐ ܕܩܲـ̈ـܫܵܬܹܐ: ܓܲܒ̣ܪܹ̈ܐ ܕܲܒ̣ܢܲܝ̈ ܩܹܕܵܪ ܢܸܙܥ̱ܪܘܼܢ: ܡܸܛܠ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܡܲܠܸܠ.
1 ܡܲܫܩ̄ܠܵܐ ܕܢܲܚܠܵܐ ܕܚܙܝܼܘܿܢ ܡܵܢܵܐ ܐܝܼܬ̣ ܠܹܟ݂ܝ ܗܵܪܟܵܐ: ܪܣܠܩܬ̇ܝ ܒܠܹܟ݂ܝ ܠܐܸܓܵܪܵܐ.
2 ܕܠܘܼܚܝܵܐ ܐܸܡ̱ܠܝܼܬ̇ܝ ܩܪܝܼܬ̣ܵܐ ܩܵܠܵܐ ܐܸܡ̱ܠܝܼܬ̇ܝ ܩܪܝܼܬ̣ܵܐ ܥܫܝܼܢܬܵܐ ܩܛܝܼܠܲܝ̈ܟ̇ܝ ܠܵܐ ܗܘ̤ܵܘ ܩܛܝܼ̈ܠܹܐ ܕܣܲܝܦܵܐ: ܐܵܦܠܵܐ ܡܝܼ̈ܬܹܐ ܕܲܩܪܵܒ̣ܵܐ.
3 ܟܠܗܘܿܢ ܫܲܠܝܼܛܵܢܲܝ̈ܟ̇ܝ ܢܵܘܘ ܐܲܟ݂ܚ̄ܕ݂ܵܐ ܡ̣ܢ ܩܸܫܬܵܐ ܐܸܬ̣ܐ̱ܣܲܪܘ. ܕܐܸܫܬܚܪܘܼ ܒܹܟ݂ܝ: ܐܲܟ݂ܚܕ݂ܵܐ ܐܸܬ̣ܐ̱ܣܲܪܘ: ܘܲܠܪܘܼܚܩܵܐ ܥܪܲܩ̣ܘ.
4 ܡܸܛܠ ܗܵܢܵܐ ܐܸܡ̇ܪܹܬ̣: ܫܘܼܒ̣ܩܘܢܝ ܐܸܬ̣ܡܲܪܡܲܪ ܒܲܒ̣ܟ݂ܵܬ̣ܵܐ ܘܠܵܐ ܬܹܐܠܨܘܼܢ ܠܲܡܒܲܝܵܐܘܼܬܲܢܝ ܥܲܠ ܬܒ̣ܵܪܵܗ̇ ܕܒܲܪܬ̣ ܥܲܡܝ.
5 ܡܸܛܠ ܕܝܵܘܡܵܐ ܕܲܕ݂ܠܘܼܚܝܵܐ ܘܕܲܕ݂ܝܵܫܵܐ ܘܕܲܒ̣ܟ݂ܵܬ̣ܵܐ: ܠܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܒܢܲܚܠܵܐ ܕܚܸܙܝܘܿܢ. ܒܨܵܐ ܫܘܼܪܹ̈ܐ: ܘܲܓ̣ܥ̣ܵܐ ܥܲܠ ܛܘܼܪܹ̈ܐ.
6 ܘܥܝܼܠܵܡ ܫ̣ܩܲܠ ܩܛܸܪܩܵܐ: ܒܪ̈ܵܟ݂ܒܹ̇ܐ ܕܐ̄ܢܵܫܵܐ ܦܲܪ̈ܵܫܹܐ. ܘܫܘܼܪܵܐ ܓܠܵܐ ܣܲܟ̇ܪܹ̈ܐ.
7 ܘܢܸܗܘܘܿܢ ܓܒܲـ̈ـܝܵܐ ܕܥܘܼܡܩܲܝ̈ܟ̇ܝ ܡܠܹܝܢ ܡܲܪ̈ܟ̇ܒ̣ܵܬ̣ܵܐ. ܘܦܲܪ̈ܵܫܹܐ ܢܸܣܬ̣ܕ݂ܪܘܼܢ ܥܲܠ ܬܲܪ̈ܥܹܐ.
8 ܘܲܝܗܘܼܕ݂ܵܐ ܢܸܓ̣ܠܹܐ ܣܸܕ݂ܪܹ̈ܐ. ܘܬܸܚܙܹܐ ܒܝܵܘܡܵܐ ܗܵܘܿ ܙܲܝܢܵܐ ܕܒܹܝܬ̣ ܥܵܒ̣ܵܐ.
9 ܘܬ̣ܘܼܪ̈ܥܵܬ̣ܵܐ ܕܲܩܪܝܼܬܹܗ ܕܕ݂ܵܘܝܼܕ݂ ܚܙܲܝܬ̇ܘܿܢ ܕܲܣܓܝܼ̈ ܘܲܟ݂ܢܲܫ̣ܬ̇ܘܿܢ ܡܲـ̈ـܝܵܐ ܕܝܲܡܬ̣ܵܐ ܬܲܚܬܵܝܬܵܐ.
10 ܘܲܡ̣ܠܝܬ̇ܘܿܢ ܒܵـ̈ـܬܹ̇ܐ ܕܐܘܿܪܸܫܠܸܡ. ܘܲܥ̣ܩܲܪܬ̇ܘܿܢ ܒܵـ̈ـܬܹ̇ܐ: ܕܬܲܥܫ̄ܢܘܿܢ ܫܘܼܪܵܐ.
11 ܘܩܵܒ̣̈ܝܵܬ̣ܵܐ ܥ̣ܒܲܕ̇ܬ̇ܘܿܢ ܒܹܝܬ̣ ܫܘܼܪܵܐ ܠܡܲـ̈ـܝܵܐ ܕܝܲܡܬ̣ܵܐ ܥܲܬ̇ܝܼܩܬܵܐ. ܘܠܵܐ ܚܵܪܬ̇ܘܿܢ ܠܥܵܒ̣ܘܿܕ݂ܵܗ̇ ܘܲܠܓܵܒ̣ܘܿܠܵܗ̇ ܡ̣ܢ ܪܘܼܚܩܵܐ ܠܵܐ ܚ̣ܙܲܝܬ̇ܘܿܢ.
12 ܘܲܩ̣ܪܵܐ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܒܝܵܘܡܵܐ ܗܵܘܿ: ܠܲܒ̣ܟ݂ܵܬ̣ܵܐ ܘܲܠܡܲܪ̈ܩܕ݂ܵܬ̣ܵܐ ܘܲܠܩܘܼ̈ܕ݂ܝܵܬ̣ܵܐ: ܘܠܲܟ݂ܒ̣ܵܢܵܐ ܕܣܲܩܹ̈ܐ.
13 ܘܗܵܐ ܒܘܼܣܵܡܵܐ ܘܚܲܕ݂ܘܼܬ̣ܵܐ: ܢܸܟ݂ܣܬ̣ܵܐ ܕܬ̣ܵܘܪܹ̈ܐ: ܘܢܸܟ݂ܣܬ̣ܵܐ ܕܥܵـ̈ـܢܵܐ: ܘܡܹܐܟ݂ܘܼܠܬܵܐ ܕܒܣܪܵܐ: ܘܡܲܫܬܝܵܐ ܕܚܲܡܪܵܐ. ܢܹܐܟ݂ܘܿܠ ܘܢܸܫܬܹ̇ܐ: ܡܸܛܠ ܕܲܡܚܵܪ ܢܡܘܼܬ̣.
14 ܓܲܠܝܵܐ ܗ̄ܝܼ ܒܐܸܕ݂ܢܲܝ̈ ܡܵܪܝܵܐ ܚܲܝܠܬ̣ܵܢܵܐ: ܘܐܸܡܲܪ: ܠܵܐ ܬܸܣܒ̣ܘܼܢ ܠܟ݂ܘܿܢ ܚܛܝܼܬ̣ܵܐ ܗܵܕܹܐ ܥܕܲܡܵܐ ܕܲܬ̣ܡܘܼܬ̣ܘܼܢ: ܐܵܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ.
15 ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܙܸܠ ܠܘܵܬ̣ ܣܵܘܟܵܢ ܗܵܢܵܐ: ܠܘܵܬ̣ ܫܲܒ̣ܢܵܐ ܪܲܒ̇ܒܲܝܬܵܐ: ܘܐܸܡܲܪ ܠܹܗ.
16 ܡܵܢܵܐ ܥܵܒܹ̇ܕ݂ ܐܲܢ̄ܬ̇ ܗܵܪܟܵܐ: ܘܡܵܢܵܐ ܐܝܼܬ̣ ܠܵܟ݂ ܗܵܪܟܵܐ. ܕܲܢܩܲܪܬ̇ ܠܵܟ݂ ܗܵܪܟܵܐ ܩܲܒܪܵܐ. ܢܵܩܲܪ ܒܪܘܡܵܐ ܩܲܒ̣ܪܹܗ: ܘܪܵܫܸܡ ܒܟܹܐܦܵܐ ܡܲܫ̱ܪܝܹܗ.
17 ܗܵܐ ܡܵܪܝܵܐ ܡܸܫܕܹ̇ܐ ܠܵܟ݂ ܓܒ̣ܪܵܐ: ܘܡܸܛܥܵܐ ܛܵܥܹ̇ܐ ܠܵܟ݂.
18 ܢܹܐܠܨܵܟ݂ ܒܐܘܼܠܨܵܢܵܐ ܐܲܝܟ݂ ܐܘܼܠܨܵܢܵܐ ܕܐܸܣܦܹܝܪܵܐ: ܒܐܲܪܥܵܐ: ܪܘܲܚܬ̣ܵܐ ܕܐܝܼܕܲܝܵܐ ܬܲܡܵܢ ܬܡܘܼܬ̣: ܘܬܲܡܵܢ ܡܲܪܟܲܒ̣ܬ̣ܵܐ ܕܐܝܼܩܵܪܵܟ݂: ܨܲܥܪܵܐ ܕܒܹܝܬ̣ ܡܵܪܵܟ݂.
19 ܘܐܹܗܲܓ̇ܡܵܟ݂ ܡ̣ܢ ܐܝܼܩܵܪܵܟ݂: ܘܐܸܣܲܚܦܵܟ݂ ܡ̣ܢ ܩܝܵܡܵܟ݂.
20 ܘܢܸܗܘܹܐ ܒܝܵܘܡܵܐ ܗܵܘܿ: ܐܵܡܲܪ ܡܵܪܝܵܐ: ܐܸܩܪܸܐ ܠܥܲܒ̣ܕ̇ܝ ܐܹܠܝܵܩܝܼܡ ܒܲܪ ܚܹܠܲܩܝܵܐ.
21 ܘܐܲܠܒ̇ܫܝܼܘܗܝ ܟܘܿܬ̇ܝܼܢܵܟ݂. ܘܲܒ̣ܗܸܡܝܵܢܵܟ݂ ܐܸܚܙ̄ܩܝܼܘܗܝ. ܘܫܘܼܠܛܵܢܵܟ݂ ܐܸܬܸ̇ܠ ܒܐܝܼܕ݂ܵܘ̈ܗܝ ܘܢܸܗܘܹܐ ܐܲܒ̣ܵܐ ܠܥܵܡܘܿܪܹ̈ܐ ܕܐܘܿܪܸܫܠܸܡ: ܘܲܠܓܲܒ̣ܪܹ̈ܐ ܕܒܹܝܬ̣ ܝܼܗܘܼܕ݂ܵܐ.
22 ܘܲܢܣܝܼܡ ܩܠܝܼ̈ܕܹܐ ܕܒܹܝܬ̣ ܕܵܘܝܼܕ݂ ܥܲܠ ܟܲܬ̣ܦܹܗ. ܘܢܸܦ̮ܬܲܚ: ܘܠܲܝܬ̇ ܕܢܹܐܚܘܿܕ݂. ܘܢܹܐܚܘܿܕ݂ ܘܠܲܝܬ̇ ܕܢܸܦ̮ܬܲܚ.
23 ܘܐܸܩܫܝܼܘܗܝ ܣܸܟ̇ܬ̣ܵܐ ܒܐܲܬ̣ܪܵܐ ܡܗܲܝܡܢܵܐ. ܘܢܸܗܘܹܐ ܟܘܼܪܣܝܵܐ ܕܐܝܼܩܵܪܵܐ ܠܒܹܝܬ̣ ܐܲܒ̣ܘܼܗܝ.
25
26 ܒܝܵܘܡܵܐ ܗܵܘܿ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܬܸܬ̣ܥ̱ܩܲܪ ܣܸܟ̇ܬ̣ܵܐ ܕܲܢܩܝܼܫܵܐ ܒܐܲܬ̣ܪܵܐ ܡܗܲܝܡܢܵܐ. ܘܬܸܣܬ̇ܚܸܦ ܘܬܸܦܸܠ. ܘܢܹܐܒܲܕ݂ ܫܩܵܠܵܐ ܕܣܝܼܡ ܥܠܹܝܗ̇: ܡܸܛܠ ܕܡܵܪܝܵܐ ܡܲܠܸܠ̣.
1 ܡܲܫܩ̄ܠܵܐ ܕܨܘܿܪ: ܐܲܝ̈ܠܸܠܹܝܢ ܐܸܠܦܹ̈ܐ ܕܬܲܪܫܝܼܫ ܡܸܛܠ ܕܐܸܬ̣ܒ̇ܙܸܙ ܡ̣ܢ ܒܲܝܬܵܐ: ܡܲܝܬ̇ܝܵܢܵܐ. ܘܡ̣ܢ ܐܲܪܥܵܐ ܕܟ݂ܵܬ̣ܝܼܡ ܐܸܬ̣ܓ̇ܠܝܼ ܠܲܢ.
2 ܫܬ̣ܘܿܩܘ ܥܵܡܘܿܪܹ̈ܐ ܕܓ̣ܵܙܲܪܬܵܐ: ܬܲܓܵܪܵܐ ܕܨܲܝܕܵܢ ܕܥܵܒܲܪ ܒܝܲܡܵܐ.
3 ܡܠܘܿܐܵܟ݂ ܒܡܲـ̈ـܝܵܐ ܣܲܓ̇ܝܹ̈ܐܐ: ܙܲܪܥܵܐ ܕܬܲܓܵܪܵܐ ܚܨܵܕ݂ܵܐ ܕܢܲܗܪܵܐ. ܥܠܲܠܬܹܗ ܗܘ̤ܵܬ̣ ܬܹܐܓ̣ܘܼܪܬܵܐ ܠܥܲܡܡܹ̈ܐ.
4 ܒܗܲܬ̣ܝ ܨܵܝܕܵܢ: ܡܸܛܠ ܕܐܸܡܲܪ ܝܲܡܵܐ ܘܥܘܼܫܢܹܗ ܕܝܲܡܵܐ: ܠܵܐ ܚܲܒ̇ܠܹ̇ܬ̣: ܘܠܵܐ ܝܸܠܕܹ̇ܬ̣. ܘܠܵܐ ܪܲܒ̇ܝܼܬ̣ ܓܲܕ̇ܘܼ̈ܕܹܐ: ܘܐܵܦܠܵܐ ܪܲܡ̱ܪܡܹ̇ܬ̣ ܒܬ̣ܘܼ̈ܠܵܬ̣ܵܐ.
5 ܡܵܐ ܕܐܸܫܬ̇ܡܲܥ ܠܡܸܨܪܹܝܢ: ܚܸܒ̣̈ܠܹܐ ܢܹܐܚܕ̇ܘܼܢ ܐܸܢܘܿܢ: ܐܲܝܟ݂ ܫܸܡܥܵܐ ܕܨܘܿܪ.
6 ܥܒܲܪܘ ܠܬܲܪܫܝܼܫ: ܐܲܝܠܸܠܘ ܥܵܡܘܿܪܹ̈ܐ ܕܓ̣ܵܙܲܪܬܵܐ.
7 ܗܵܕܲܐ ܗ̄ܝܼ ܠܟ݂ܘܿܢ ܥܲܫܝܼܢܬܵܐ ܕܡ̣ܢ ܝܵܘ̈ܡܵܬ̣ܵܐ ܩܲܕ݂ܡܵـ̈ـܝܹܐ ܩܕ݂ܵܡܹܝܗ̇ ܢܹܐ̈ܙܵܠ̄ܢ ܪܸ̈ܓ̣ܠܹܝܗ̇ ܕܬܸܥܡܲܪ ܒܪܘܼܚܩܵܐ.
8 ܡܲܢܘܼ ܐܸܬ̣ܡܲܠܲܟ݂ ܗܵܟܲܢܵܐ ܥܲܠ ܨܘܿܪ ܡܟܲܠܲܠܬܵܐ. ܕܬܲܓܵܪܹ̈ܝܗ̇ ܪܵܘ̱ܪ̈ܒ̣ܵܢܹܐ: ܘܲܟ݂ܢܲܥܢܵܝܹ̈ܝܗ̇ ܝܲܩܝܼܪܹ̈ܝܗ̇ ܕܐܲܪܥܵܐ.
9 ܡܵܪܝܵܐ ܚܲܝܠܬ̣ܵܢܵܐ ܐܸܬ̣ܪܲܥܝܼ: ܠܲܡܒܲܛܵܠܘܼ ܐܝܼܩܵܪܵܐ ܕܟ݂ܠ ܚܹܝܠ: ܘܠܲܡܨܲܥܵܪܘܼ ܠܟ݂ܠܗܘܿܢ ܝܲܩܝܼܪܹ̈ܝܗ̇ ܕܐܲܪܥܵܐ.
10 ܥܒ̇ܪܝ ܠܐܲܪܥܹܟ݂ܝ ܐܲܝܟ݂ ܢܲܗܪܵܐ ܒܲܪܬ̣ ܬܲܪܫܝܼܫ ܠܲܝܬ̇ ܬܘܼܒ̣ ܕܕ݂ܵܚܹ̇ܩ ܠܹܟ݂ܝ.
11 ܐܝܼܕܹܗ ܐܲܪܝܼܡ ܥܲܠ ܝܲܡܵܐ: ܘܐܲܪܓܸ̇ܙ ܡܲܠܟ̇ـ̈ـܘܵܬ̣ܵܐ. ܡܵܪܝܵܐ ܦ̣ܩܲܕ݂ ܥܲܠ ܟܢܲܥ̄ܢ ܕܢܵܘܒܸ̇ܕ݂ ܥܲܫܝܼܢܹ̈ܝܗ̇.
12 ܘܐܸܡܲܪ: ܠܵܐ ܬܵܘܣܦܝܼܢ ܬܘܼܒ̣ ܠܡܸܬ̣ܥܲܫܵܢܘܼ: ܛܠܝܼܡܬܵܐ ܒܬ̣ܘܼܠܬܵܐ ܒܲܪܬ̣ ܨܲܝܵܕܵܢ. ܩܘܼܡܝ ܥܒܲܪܝ ܠܟ݂ܵܬ̣ܝܼܡ ܐܵܦ ܬܲܡܵܢ ܠܵܐ ܢܢܝܼܚ ܠܹܟ݂ܝ.
13 ܗܵܐ ܐܲܪܥܵܐ ܕܟܲܠ̈ܕܵܝܹܐ: ܗܵܢܵܐ ܗ̄ܘܼ ܥܲܡܵܐ ܕܠܵܐ ܗ̄ܘܼܵܐ ܐܵܬ̣ܘܿܪܵܝܵܐ ܥܲܒ̣ܕܹ̇ܗ ܠܪܘܼܚܵܐ. ܘܐܲܩܝܼܡܘ ܒܵܨܘܿܝܹ̈ܐ. ܒܨ̣ܵܘ ܣܵܚܪ̈ܵܬ̣ܵܗ̇: ܘܥܲܒ̣ܕ̇ܘܼܗ̇ ܠܡܲܦܘܼܠܬܵܐ.
14 ܐܲܝ̈ܠܠܹܝܢ ܐܲܠ̈ܦܹܐ ܕܬܲܪܫܝܼܫ: ܡܸܛܠ ܕܐܸܬ̣ܒ̇ܙܸܙ ܥܘܼܫ̱ܢܟܹܝܢ.
15 ܢܸܗܘܹܐ ܕܹܝܢ ܒܝܵܘܡܵܐ ܗܵܘܿ: ܬܸܬ̇ܛܥܹܐ ܨܘܿܪ ܫܲܒ̣ܥܝܼܢ ܫܢ̈ܝܼܢ: ܐܲܝܟ݂ ܝܵܘܡܲܝ̈ ܡܲܠܟܵܐ ܚܲܕ݂. ܘܡ̣ܢ ܒܵܬܲܪ ܫܲܒ̣ܥܝܼܢ ܫܢ̈ܝܢ: ܢܸܙܡ̱ܪܘܿܢ ܠܨܘܿܪ ܙܡܝܼܪܬܵܐ ܕܙܵܢܝܼܬ̣ܵܐ.
16 ܣܲܒ̣ܝ ܟܸܢܵܪܵܐ: ܘܐܸܬ̣ܟܲܪܟ̇ܝ ܩܪܝܼܬ̣ܵܐ: ܙܵܢܝܼܬ̣ܵܐ ܕܐܹܬ̇ܛܲܥܝܲܬ̤. ܩܘܿܫܝ ܫܲܦܝܼܪ: ܐܲܣܓܵܝ ܙܡܵܪܵܐ: ܕܬܸܬ̇ܕܲܟ݂ܪܝܼܢ.
17 ܘܢܸܗܘܹܐ ܡ̣ܢ ܒܵܬܲܪ ܫܲܒ̣ܥܝܼܢ ܫܢ̈ܝܼܢ: ܢܸܦܩܘܿܕ݂ ܡܵܪܝܵܐ ܠܨܘܿܪ: ܘܢܲܗܦܟ݂ܝܼܗ̇ ܠܐܲܓ̣ܝܼܪ̈ܵܬ̣ܵܗ̇. ܘܲܬ̣ܙܲܢܹܐ ܒܟ݂ܠܗܹܝܢ ܡܲܠ̈ܟ̇ܘܵܬ̣ܵܐ ܕܥܲܠ ܐܲܦܲܝ̈ ܐܲܪܥܵܐ.
18 ܘܬܸܗܘܹܐ ܬܹܐܓ̣ܘܿܪܬܵܗ̇ ܘܐܲܓ̣ܪ̈ܵܬ̣ܵܗ̇ ܩܘܼܕ݂ܫܵܐ ܠܡܵܪܝܵܐ. ܠܵܐ ܢܸܬ̇ܬ̇ܣܝܼ̈ܡܵܢ ܒܹܝܬ̣ ܓܲܙܵܐ: ܘܠܵܐ ܢܸܬ̣ܢܲܛܪ̈ܢ. ܐܸܠܵܐ ܠܲܕ݂ܥܵܡ̇ܪܝܼܢ ܩܕ݂ܵܡ ܡܵܪܝܵܐ ܬܸܗܘܹܐ ܬܹܐܓ̣ܘܿܪܬܵܗ̇: ܠܡܹܐܟܲܠ: ܘܲܠܡܸܣܒܲܥ: ܘܠܲܡܟܲܣܵܝܘܼ ܥܲܬ̇ܝܼܩܹ̈ܝܗ̇.
1 ܗܵܐ ܡܵܪܝܵܐ ܡܚܲܒܸ̇ܠ ܐܲܪܥܵܐ: ܘܲܡܬܲܪܲܥ ܠܵܗ̇. ܘܣܵܚܹ̇ܦ ܐܲܦܹܝ̈ܗ̇: ܘܲܡܒܲܕܲܪ ܥܵܡܘܿܪܹ̈ܝܗ̇.
2 ܘܢܸܗܘܹܐ ܥܲܡܵܐ ܐܲܝܟ݂ ܟܵܗܢܵܐ: ܘܥܲܒ̣ܕܵܐ ܐܲܝܟ݂ ܡܵܪܹܗ: ܘܐܲܡܬ̣ܵܐ ܐܲܝܟ݂ ܡܵܪܬܵܗ̇: ܩܲܢܵܝܵܐ ܐܲܝܟ݂ ܡܙܲܒ̇ܢܵܢܵܐ: ܘܝܵܙܘܿܦܵܐ ܐܲܝܟ݂ ܡܵܘܙܦܵܢܵܐ: ܐܲܝܟ݂ ܡܵܪܹܐ ܚܵܘܒ̇ܬܹܗ ܕܚܲܝܵܒ̣ ܠܹܗ.
3 ܡܸܬ̣ܚܲܒܵܠܘܼ ܬܸܬ̣ܚܲܒܲܠ ܐܲܪܥܵܐ: ܘܡܸܬ̣ܒ̇ܙܵܙܘܼ ܬܸܬ̣ܒ̇ܙܸܙ. ܡܸܛܠ ܕܡܵܪܝܵܐ ܡܲܠܸܠ̣ ܦܸܬ̣ܓ̣ܵܡܵܐ ܗܵܢܵܐ.
4 ܐܲܠܲܬ̤ ܘܝܸܬ̣ܒܲܬ̤ ܒܐܸܒ̣ܠܵܐ ܐܲܪܥܵܐ. ܐܲܠܲܬ̤ ܘܝܸܬ̣ܒܲܬ̤: ܘܐܸܬ̣ܐܲܒ̣ܠܲܬ̤ ܬܹܒܹܝܠ. ܐܲܠܵܐ ܪܵܘܡܵܗ̇ ܕܐܲܪܥܵܐ.
5 ܘܐܲܪܥܵܐ ܐܸܬ̇ܕܲܡܝܲܬ̤ ܠܥܵܡܘܿܪܹ̈ܝܗ̇. ܡܸܛܠ ܕܲܥܒܲܪܘ ܢܵܡܘܿܣܵܐ: ܘܚܲܠܸܦܘ ܦܘܼܩܕܵܢܵܐ: ܘܒܲܛܸܠ̣ܘ ܩܝܵܡܵܐ ܕܥܵܠܲܡ.
6 ܡܸܛܠ ܗܵܠܹܝܢ ܬܸܬܸ̇ܒ̣ ܒܐܸܒ̣ܠܵܐ ܐܲܪܥܵܐ. ܘܢܸܬ̣ܚܲܝܒ̣ܘܼܢ ܟܠܗܘܿܢ ܥܵܡܘܿܪܹ̈ܝܗ̇ ܡܸܛܠ ܗܵܢܵܐ ܢܸܬ̣ܚܲܪܒ̇ܘܿܢ ܟܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ: ܘܢܸܫܬܲܚܪܘܼܢ ܐ̄ܢܵܫܵܐ ܩܲܠܝܼܠ.
7 ܝܼܬܸܒ̣ ܒܐܸܒ̣ܠܵܐ ܥܒ̣ܘܼܪܵܐ. ܘܐܲܠܲܝ̈ ܓܘܼܦܢܹ̈ܐ ܘܐܸܬ̇ܬܲܢܲܚܘ ܟܠ ܚܵܕ݂ܝܲܝ̈ ܠܸܒܵܐ.
8 ܒܸܛܠܲܬ̤ ܚܲܕ݂ܘܼܬ̣ܵܐ ܘܲܦܠܲـ̈ـܓܹ̇ܐ. ܘܲܫܠܝܼ ܩܵܠܵܐ ܕܲܕ݂ܝܵܨܵܐ. ܒܸܛܠܲܬ̤ ܚܲܕ݂ܘܼܬ̣ܵܐ ܘܟܸܢܵܪܹ̈ܐ.
9 ܒܲܙܡܵܪܵܐ ܠܵܐ ܢܸܫܬ̇ܘܿܢ ܚܲܡܪܵܐ. ܢܸܡܲܪ ܫܲܟ݂ܪܵܐ ܠܫܵܬ̣ܝܵܘ̈ܗܝ.
10 ܐܸܬ̣ܒܲܙܙܲܬ̤ ܩܪܝܼܬ̣ܵܐ: ܘܐܸܬ̇ܬ̇ܚܸܕ݂ܘ ܟܠ ܒܹܝܬ̣ ܡܲܕܵܢܹ̈ܐ.
11 ܝܑܼܠܲܠܬܵܐ ܥܲܠ ܚܲܡܪܵܐ ܒܫܘܼ̈ܩܹܐ. ܒܸܛܠܲܬ̤ ܟܠܵܗ̇ ܚܲܕ݂ܘܼܬ̣ܵܐ. ܘܲܥܒܲܪ ܕܝܵܨܵܗ̇ ܕܐܲܪܥܵܐ.
12 ܘܐܸܫܬ̇ܚܲܪ ܒܲܩܪܝܼܬ̣ܵܐ ܚܒ̣ܵܠܵܐ ܘܕ݂ܵܘܘܿܢܵܐ ܢܦܲܣܸܩ ܬܲܪ̈ܥܹܝܗ̇.
13 ܗܵܟܲܢܵܐ ܢܸܗܘܹܐ ܒܓ̣ܵܘܵܗ̇ ܕܐܲܪܥܵܐ ܒܲܝܢܵܬ̣ ܥܲܡܡܹ̈ܐ: ܐܲܝܟ݂ ܚܒ̣ܵܛܵܐ ܕܙܲܝܬܵܐ: ܘܐܲܝܟ݂ ܒܘܼܥܵܪܵܐ ܡܵܐ ܕܲܓ̣ܡܲܪ ܩܛܵܦܵܐ.
14 ܗܸܢ̣ܘܿܢ ܢܪܝܼܡܘܿܢ ܩܵܠܗܘܿܢ ܘܲܢܫܲܒ̇ܚܘܼܢ ܒܓܲܐܝܘܼܬܹܗ ܕܡܵܪܝܵܐ. ܘܢܸܨܗ̱ܠܘܼܢ ܡ̣ܢ ܝܲܡܵܐ.
15 ܡܸܛܠ ܗܵܢܵܐ ܒܬܸܫܒ̇ܘܿܚܬܵܐ ܫܲܒܲܚܘ ܠܡܵܪܝܵܐ: ܘܲܒ̣ܓܲܙܪ̈ܵܬ̣ܵܐ ܕܝܲܡܵܐ ܫܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.
16 ܡ̣ܢ ܟܸܢܦܹ̈ܝܗ̇ ܕܐܲܪܥܵܐ ܙܡܝܼܪ̈ܵܬ̣ܵܐ ܫ̣ܡܲܥܢ: ܚܲܝܠܵܐ ܕܙܲܕ̇ܝܼܩܵܐ ܕܐܵܡܲܪ: ܐ̄ܪܵܙ ܠܝܼ: ܐ̄ܪܵܙ ܠܝܼ: ܐܘܿܝ ܠܝܼ: ܥܵܘܿܠܹܐ ܐܲܥܠܝܼܘ: ܥܵܘܿܠܹܐ ܥܵܘܼܠܵܐ ܐܲܥ̣ܠܝܼܘ.
17 ܕܸܚ̱ܠܬܵܐ ܘܓܘܼܡܵܨܵܐ: ܘܦܲܚܵܐ ܥܠܲܝܟ: ܥܲܡܘܿܪܵܐ ܕܐܲܪܥܵܐ.
18 ܘܡܲܢ ܕܢܸܥܪܘܿܩ ܡ̣ܢ ܩܵܠܵܐ ܕܕܸܚ̱ܠܬ̣ܵܐ: ܢܸܦܸܠ ܒܓ̣ܘܼܡܵܨܵܐ. ܘܡܲܢ ܕܢܸܣܲܩ ܡ̣ܢ ܓܵܘ ܓܘܼܡܵܨܵܐ: ܢܸܬ̇ܬ̇ܚܸܕ݂ ܒܦܲܚܵܐ. ܡܸܛܠ ܕܡܲܣܘܼܟܹ̈ܐ ܡ̣ܢ ܡܪܵܘܡܵܐ ܐܸܬ̣ܦܬܲܚܘ: ܘܙܵܥ̣ ܫܲܬ̣ܐ̱ܣܹ̈ܝܗ̇ ܕܐܲܪܥܵܐ.
19 ܡܙܵܥ ܬܙܘܼܥ ܐܲܪܥܵܐ: ܘܲܡܕ݂ܵܠ ܬܕ݂ܘܼܠ ܐܲܪܥܵܐ: ܘܲܡܡܵܛ ܬܡܘܼܛ ܐܲܪܥܵܐ.
20 ܘܲܡܙܵܥ ܬܙܘܼܥ ܐܲܪܥܵܐ ܐܲܝܟ݂ ܪܵܘܝܵܐ ܘܲܬ̣ܢܘܼܕ݂ ܐܲܝܟ݂ ܥܲܪܙܵܠܵܐ. ܘܢܸܥܫܲܢ ܥܠܹܝܗ̇ ܥܵܘܼܠܵܗ̇: ܘܬܸܦܸܠ ܘܠܵܐ ܬܵܘܣܸܦ ܠܲܡܩܵܡ.
21 ܒܹܗ ܒܝܵܘܡܵܐ ܗܵܘܿ: ܢܸܦܩܘܼܕ݂ ܡܵܪܝܵܐ ܥܲܠ ܚܲܝ̈ܠܹܐ ܕܪܵܘܡܵܐ ܒܪܵܘܡܵܐ: ܘܥܲܠ ܡܲܠ̈ܟܹ̇ܐ ܕܐܲܪܥܵܐ ܒܐܲܪܥܵܐ.
22 ܘܢܸܟ݂ܢ̱ܫܘܼܢ ܟܢܘܼܫܝܵܐ ܥܲܠ ܐܲܣܝܼܪ ܓܘܼܒܵܐ. ܘܢܸܬ̣ܚܲܫܒ̣ܘܼܢ ܥܲܠ ܚܒ̣ܝܼܫܵܐ. ܘܲܠܣܘܿܓ̣ܵܐܐ ܕܝܵܘ̈ܡܵܬ̣ܵܐ ܢܸܬ̣ܦܲܪܩܘܼܢ.
23 ܘܢܸܚܦܘܿܪ ܣܲܗܪܵܐ: ܘܢܸܒ̣ܗܲܬ̣ ܫܸܡܫܵܐ. ܡܸܛܠ ܕܐܲܡܠܸܟ݂ ܡܵܪܝܵܐ ܚܲܝܠܬ̣ܵܢܵܐ: ܒܛܘܼܪܵܐ ܕܨܸܗܝܘܿܢ: ܘܒ̣ܐܘܿܪܸܫܠܸܡ ܘܲܩܕ݂ܵܡ ܩܲܕ̇ܝܼܫܵܘ̈ܗܝ ܢܸܫܬܲܒܲܚ.
1 ܡܵܪܝܵܐ ܐܲܠܵܗܝ ܐܲܢ̄ܬ̇: ܐܹܪܲܡ̱ܪܡܵܟ݂: ܘܐܵܘܕܹ̇ܐ ܠܲܫܡܵܟ݂. ܕܲܥ̣ܒܲܕ̇ܬ̇ ܕܘܼܡܵܪܵܐ ܘܬܲܪܥܝܼܬ̣ܵܐ ܡܗܲܝܡܲܢܬܵܐ. ܡ̣ܢ ܪܘܼܚܩܵܐ ܐܵܡܹܝܢ.
2 ܡܸܛܠ ܕܲܥܒܲܕ̇ܬ̇ ܩܪܝܼܬ̣ܵܐ ܠܝܲܓܪܵܐ: ܘܲܩܪܝܼܬ̣ܵܐ ܥܲܫܝܼܢܬܵܐ ܠܡܲܦܘܼܠܬܵܐ ܢܵܘܣܵܐ ܕܢܘܼܟ݂ܪ̈ܵܝܹܐ ܠܥܵܠܲܡ ܡ̣ܢ ܩܪܝܼܬ̣ܵܐ ܠܵܐ ܢܸܬ̣ܒ̇ܢܹܐ.
3 ܡܸܛܠ ܗܵܢܵܐ ܢܫܲܒ̇ܚܘܼܢܵܟ݂ ܥܲܡܡܹ̈ܐ ܣܲܓ̇ܝܼ̈ܐܹܐ. ܘܲܩܪܝܼܬ̣ܵܐ ܕܥܲܡܡܹ̈ܐ ܥܲܫܝܼܢܹ̈ܐ ܢܸܕ݂ܚ̄ܠܘܼܢ ܠܵܟ݂.
4 ܡܸܛܠ ܕܲܗ̤ܘܲܝܬ̇ ܡܣܲܝܥܵܢܵܐ ܠܡܸܣܟܹ̇ܢܵܐ: ܘܥܵܕ݂ܘܿܪܵܐ ܠܒ̣ܵܝܫܵܐ ܒܐܘܼܠܨܵܢܹܗ: ܣܸܬܵܪܵܐ ܡ̣ܢ ܙܵܪܝܼܦ̮ܬܵܐ: ܘܛܸܠܵܠܵܐ ܡ̣ܢ ܫܘܒܵܐ.
5 ܡܸܛܠ ܕܪܘܼܚܵܐ ܕܥܲܫܝܼܢܵܐ ܐܲܝܟ݂ ܙܵܪܝܼܦ̮ܬܵܐ ܒܐܸܣܬ̣ܵܐ: ܘܐܲܝܟ݂ ܛܸܠܵܠܵܐ ܒܫܵܘܒܵܐ. ܪܵܡܘܼܬ̣ܵܐ ܕܢܘܼܟ݂ܪ̈ܵܝܹܐ ܬܸܬ̣ܡܲܟܲܟ݂: ܘܫܵܘܒܵܐ ܒܛܸܠܵܠܵܐ ܕܲܥܢܵܢܹ̈ܐ. ܫܲܒ̇ܘܼܩܵܐ ܕܥܲܫܝܼܢܹ̈ܐ ܢܸܬ̣ܡܲܟܲܟ݂.
6 ܘܢܸܥܒܸ̇ܕ݂ ܡܵܪܝܵܐ ܚܲܝܠܬ̣ܵܢܵܐ ܒܟ݂ܠܗܘܿܢ ܥܲܡܡܹ̈ܐ ܒܛܘܼܪܵܐ ܗܵܢܵܐ: ܡܲܫܬ̇ܝܵܐ ܫܲܡܝܼܢܵܐ: ܘܡܲܫܬ̇ܝܵܐ ܢܛܝܼܪܵܐ ܘܫܲܡܝܼܢܵܐ: ܕܡܲܚܝܵܢܲܢ ܫܡܲܝܵܐ ܘܥܲܫܝܼܢܵܐ.
7 ܘܢܸܬ̣ܒ̇ܠܲܥ ܒܛܘܼܪܵܐ ܗܵܢܵܐ: ܐܲܦܲܝ̈ ܫܲܠܝܼܛܵܐ ܕܫܲܠܝܼܛ ܗ̄ܘܼܵܐ ܥܲܠ ܟܠܗܘܿܢ ܥܲܡܡܹ̈ܐ. ܘܢܸܟ݂ܣܬ̣ܵܐ ܕܐܸܬ̣ܢܲܟ݂ܣܲܬ̤ ܥܲܠ ܐܲܦܲܝ̈ ܟܠܗܘܿܢ ܥܲܡܡܹ̈ܐ.
8 ܘܢܸܬ̣ܒܲܠܥ ܡܵܘܬܵܐ ܠܙܵܟ݂ܘܼ ܠܥܵܠܡܝܼܢ. ܘܢܲܥܒܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܕܸܡ̱ܥܬ̣ܵܐ ܡ̣ܢ ܟܠ ܐܲܦܝܼ̈ܢ. ܘܚܸܣܕܵܐ ܕܥܲܡܹܗ ܢܲܥܒܲܪ ܡ̣ܢ ܟܠܵܗ̇ ܐܲܪܥܵܐ: ܡܸܛܠ ܕܡܵܪܝܵܐ ܡܲܠܸܠ̣.
9 ܘܬܹܐܡܲܪ ܒܝܵܘܡܵܐ ܗܵܘܿ: ܗܵܢܵܘ ܡܵܪܝܵܐ ܐܲܠܵܗܲܢ: ܕܣܲܟ̇ܝܼܢ ܠܹܗ ܘܢܸܦ̱ܪܩܲܢ ܗܵܢܵܘ ܡܵܪܝܵܐ ܐܲܠܵܗܲܢ ܕܣܲܟ̇ܝܼܢ ܠܹܗ: ܢܕ݂ܘܼܨ ܢܸܚܕܹ̇ܐ ܒܦܘܼܪܩܵܢܹܗ.
10 ܡܸܛܠ ܕܬܸܬ̇ܢܝܼܚ ܐܝܼܕܹܗ ܕܡܵܪܝܵܐ ܒܛܘܼܪܵܐ ܗܵܢܵܐ: ܘܢܸܬ̇ܬ̇ܕܝܼܫ ܡܘܼܐܵܒ̣ ܬܚܘܿܬ̣ܵܘܗܝ: ܐܲܝܟ݂ ܕܡܸܬ̇ܬ̇ܕ̇ܝܼܫ ܬܸܒ̣ܢܵܐ ܒܓܲܪܓ̇ܪܵܐ.
11 ܘܲܢܦܲܪܸܣ ܐܝܼܕ݂ܵܘ̈ܗܝ ܒܓ̣ܵܘܹܗ: ܐܲܝܟ݂ ܕܲܡܦܲܪܸܣ ܣܲܚܵܝܵܐ ܠܡܸܣܚܵܐ ܘܢܸܡܲܟ ܥܘܼܫܢܹܗ ܥܲܡ ܫܘܼܘܵܛܵܐ ܕܐܝܼܕ݂ܵܘ̈ܗܝ.
12 ܘܒܹܝܬ̣ ܡܸܪܕܵܐ ܕܥܘܼܫܢܵܐ ܕܫܘܼܪ̈ܲܝܟ̇ܝ ܢܡܲܟܸ̇ܟ݂: ܘܲܢܫܲܦܸܠ: ܘܲܢܡܲܛܹܐ ܠܐܲܪܥܵܐ ܥܕܲܡܵܐ ܠܥܲܦܪܵܐ.
1 ܒܹܗ ܒܝܵܘܡܵܐ ܗܵܘܿ: ܬܸܙܕܲܡܲܪ ܙܡܝܼܪܬܵܐ ܗܵܕܹܐ ܒܐܲܪܥܵܐ ܕܲܝܗܘܼܕ݂: ܩܪܝܼܬ̣ܵܐ ܕܲܥܫܸܢ ܦܘܼܪܩܵܢܵܗ̇: ܣܵܡ̣ܘ ܫܘܼܪܵܐ ܘܒܲܪ ܫܘܼܪܵܐ.
2 ܦܬܲܚܘ ܬܲܪ̈ܥܹܐ: ܢܸܥܘܿܠ ܥܲܡܵܐ ܙܲܕ̇ܝܼܩܵܐ: ܕܢܵܛܲܪ ܗܲܝܡܵܢܘܼܬ̣ܵܐ: ܕܢܵܛܲܪ ܒܲܫܪܵܪܵܐ.
3 ܬܸܛܲܪ ܠܲܢ ܫܠܵܡܵܐ: ܡܸܛܠ ܕܒ̣ܵܟ݂ ܣܲܒܲܪܢ ܡܵܪܝܵܐ: ܠܥܵܠܲܡ ܥܲܠܡܝܼܢ.
4 ܡܸܛܠ ܕܡܵܪܝܵܐ ܐܲܠܵܗܵܐ ܬܲܩܝܼܦܵܐ ܠܥܵܠܡܝܼܢ.
5 ܡܸܛܠ ܕܢܲܡܸܟ ܠܲܕ݂ܥܵܡ̇ܪܝܼܢ ܒܪܵܘܡܵܐ. ܘܲܩܪܝܼܬ̣ܵܐ ܥܲܫܝܼܢܬܵܐ ܢܡܲܟ̇ܟ݂ܝܼܗ̇ ܥܕܲܡܵܐ ܠܐܲܪܥܵܐ. ܘܲܢܡܲܛܝܹܗ ܥܕܲܡܵܐ ܠܥܲܦܪܵܐ.
6 ܬܕ݂ܘܼܫܝܼܗ̇ ܪܸܓ̣ܠܵܐ ܕܒ̣ܵܝܫܹ̈ܐ: ܘܲܗܠܲܟ݂ܬ̣ܵܐ ܕܡܸܣܟܹ̇ܢܹ̈ܐ.
7 ܫܒ̣ܝܼܠܵܐ ܬܪܝܼܨ ܠܡܸܣܟܹ̇ܢܹ̈ܐ. ܘܲܬ̣ܪܝܼܨܵܐ ܘܫܲܦܝܵܐ ܐܘܼܪܚܵܐ ܕܙܲܕ̇ܝܼܩܹ̈ܐ.
8 ܘܐܵܦ ܠܐܘܼܪܚܵܐ ܕܕ݂ܝܼܢܲܝ̈ܟ ܡܵܪܝܵܐ ܣܲܟܝܼܢ ܠܲܫܡܵܟ݂ ܘܲܠܕ݂ܘܼܟ݂ܪܵܢܵܟ݂ ܪܸܓܲܬ̤ ܢܲܦ̮ܫܵܟ݂.
9 ܢܲܦ̮ܫܝ ܐܸܬ̣ܐܵܘܒܲܬ̤ ܠܵܟ݂ ܒܠܸܠܝܵܐ: ܐܵܦ ܪܘܼܚܝ ܒܓ̣ܵܘܝ ܡܩܲܕ̇ܡܵܐ ܠܘܵܬ̣ܵܟ݂. ܡܸܛܠ ܕܐܲܝܟ݂ ܕܝܼܢܲܝ̈ܟ ܥܲܠ ܐܲܪܥܵܐ ܙܲܕ̇ܝܼܩܘܼܬ̣ܵܐ ܝܑܼܠܸܦ̣ܘ ܥܵܡܘܿܪܹ̈ܝܗ̇ ܕܬܹܒܹܝܠ.
10 ܐܸܬ̣ܪܲܚܲܩ ܥܵܘܿܠܵܐ ܕܠܵܐ ܢܹܐܠܲܦ ܙܲܕ̇ܝܼܩܘܼܬ̣ܵܐ. ܡܲܟ̇ܣܵܢܘܼܬ̣ܵܐ ܒܐܲܪܥܵܐ ܡܟ݂ܵܘܢܵܐ. ܘܠܵܐ ܢܸܚܙܘܿܢ ܒܓܲܐܝܘܼܬܹܗ ܕܡܵܪܝܵܐ.
11 ܡܵܪܝܵܐ ܒܪܵܡܘܼܬ̣ܵܐ ܕܐܝܼܕܲܝ̈ܟ ܠܵܐ ܢܸܚܙܘܿܢ. ܢܸܚܙܘܿܢ ܘܢܸܒ̣ܗ̱ܬ̣ܘܼܢ ܛܢܵܢܹܗ ܕܥܲܡܵܐ. ܘܐܲܝܟ݂ ܬܲܢܘܼܪܵܐ ܬܹܐܟ݂ܘܿܠ ܐܸܢܘܿܢ ܠܲܒ̣ܥܸܠܕ̇ܒ̣ܵܒܲܝ̈ܟ.
12 ܡܵܪܝܵܐ ܬܸܛܲܪ ܠܲܢ ܫܠܵܡܵܐ: ܡܸܛܠ ܕܐܲܝܟ݂ ܟܠܗܘܿܢ ܥܒ̣ܵܕܲܝܢ ܥܲܬܸ̇ܕ̇ܬ̇ ܠܲܢ.
13 ܡܵܪܝܵܐ ܐܲܠܵܗܲܢ: ܗܘ̤ܵܘ ܥܠܲܝܢ ܡܵܪ̈ܲܝܵܐ ܠܒܲܪ ܡܸܢܵܟ݂. ܒܲܠܚܘܿܕ݂ ܫܡܵܟ݂ ܕܝܼܠܵܟ݂ ܢܸܬ̇ܕܲܟܲܪ.
14 ܡܝܼܬܹ̈ܐ ܠܵܐ ܡܲܚܹܝܢ: ܘܓܲܢ̄ܒܵܪܹ̈ܐ ܠܵܐ ܡܩܝܼܡܝܼܢ ܡܸܛܠ ܗܵܢܵܐ ܦ̣ܩܲܕ̇ܬ̇ ܘܕܲܢܒ̣ܬ̇ ܐܸܢܘܿܢ. ܘܐܵܘܒܸ̇ܕ̇ܬ̇ ܟܠܹܗ ܕܘܼܟ݂ܪܵܢܗܘܿܢ.
15 ܐܵܘܣܸܦܬ̇ ܡܵܪܝܵܐ ܥܲܠ ܥܲܡܵܐ: ܐܵܘܣܸܦܬ̇ ܥܲܠ ܥܲܡܵܐ. ܐܸܬ̣ܪܲܚܲܩ̣ܬ̇ ܘܲܕ݂ܚܲܩ̣ܬ̇ ܟܠܗܘܿܢ ܣܵܘ̈ܦܹܝܗ̇ ܕܐܲܪܥܵܐ.
16 ܡܵܪܝܵܐ ܒܐܘܼܠܨܵܢܵܐ ܦܲܩ̣ܕ̇ܘܿܟ݂: ܘܒܲܚܒ̣ܘܼܫܝܵܐ ܠܲܚܸܫܘ ܡܲܪܕ̇ܘܼܬ̣ܵܟ݂.
17 ܐܲܝܟ݂ ܒܲܛܢ̱ܬ̣ܵܐ ܕܩܲܪܝܼܒ̣ܵܐ ܠܡܹܐܠܲܕ݂: ܘܲܡܚܲܒ̇ܠܵܐ ܘܡܲܝܠܠܵܐ ܒܚܸܒ̣̈ܠܹܝܗ̇: ܗܵܟܲܢܵܐ ܗܘܲܝܢ ܡ̣ܢ ܩܕ݂ܵܡܲܝܟ ܡܵܪܝܵܐ.
18 ܒܛܸܢܢ ܘܚܲܒܸ̇ܠܢ ܐܲܝܟ݂ ܗܵܢܹ̇ܝܢ ܕܝܵܠ̈ܕܵܢ ܪ̈ܘܼܚܹܐ. ܦܪܘܿܩܲܝܢ ܕܠܵܐ ܢܹܐܒܲܕ݂ ܒܐܲܪܥܵܐ: ܘܠܵܐ ܢܸܦܠܘܿܢ ܥܵܡܘܿܪܹ̈ܝܗ̇ ܕܬܹܒܹܝܠ.
19 ܢܸܚܘܿܢ ܡܝܼܬܲܝ̈ܟ: ܘܲܫܠܲܕܲܝ̈ܗܘܿܢ ܢܩ̈ܘܼܡܵܢ. ܘܢܸܬ̇ܬ̇ܥܝܼܪܘܼܢ ܘܲܢܫܲܒ̇ܚܘܼܢ ܫܵܟ݂ܒܲܝ̈ ܥܲܦܪܵܐ. ܡܸܛܠ ܕܛܵܠܵܟ݂ ܛܲܠܵܐ ܗ̄ܘܼ ܕܢܘܗܪܵܐ: ܘܐܲܪܥܵܐ ܕܓܲܢ̄ܒܵܪܹ̈ܐ ܬܣܲܚܸܦ.
20 ܙܸܠ ܥܲܡܝ: ܥܘܿܠ ܠܬ̣ܵܘܢܲܝ̈ܟ. ܘܐܲܚܘܿܕ݂ ܬܲܪ̈ܥܲܝܟ ܒܐܲܦܲܝ̈ܟ ܘܐܸܬ̇ܛܲܫܵܐ ܩܲܠܝܼܠ ܙܥܘܿܪ: ܥܲܕ݂ ܥܵܒܲܪ ܪܘܼܓ̣ܙܝ.
21 ܡܸܛܠ ܕܗܵܐ ܡܵܪܝܵܐ ܢܵܦܹ̇ܩ ܡ̣ܢ ܐܲܬ̣ܪܹܗ: ܘܦܵܩܹܕ݂ ܥܵܘܼܠܹܗ ܕܥܵܡܘܿܪܵܐ ܕܐܲܪܥܵܐ ܥܠܵܘܗܝ. ܘܬܸܓ̣ܠܹܐ ܐܲܪܥܵܐ ܕܡܵܗ̇: ܘܠܵܐ ܬܟܲܣܸܐ ܬܘܼܒ̣ ܥܲܠ ܩܛܝܼ̈ܠܹܝܗ̇.
1 ܒܝܵܘܡܵܐ ܗܵܘܿ: ܢܸܦܩܘܿܕ݂ ܡܵܪܝܵܐ ܒܚܲܪܒܹ̇ܗ ܩܫܝܼܬ̣ܵܐ ܘܪܲܒ̇ܬ̣ܵܐ ܘܥܲܫܝܼܢܬܵܐ: ܥܲܠ ܠܹܘܝܵܬ̣ܵܢ ܚܸܘܝܵܐ ܚܲܪܡܵܢܵܐ: ܘܥܲܠ ܠܹܘܝܵܬ̣ܵܢ ܚܸܘܝܵܐ ܥܩܲܠܩ̄ܠܵܐ. ܘܢܸܩܛܘܿܠ ܠܬܲܢܝܼܢܵܐ ܕܲܒ̣ܝܲܡܵܐ.
2 ܒܝܵܘܡܵܐ ܗܵܘ: ܟܲܪܡܵܐ ܕܚܲܡܪܵܐ ܥܲܢܵܘ ܠܹܗ.
3 ܐܸܢܵܐ ܡܵܪܝܵܐ ܢܵܛܲܪ ܐ̄ܢܵܐ ܠܹܗ: ܐܲܡܝܼܢܵܐܝܼܬ̣ ܐܲܫܩܹܝܘܗܝ: ܘܐܸܦܩܘܿܕ݂ ܥܠܵܘܗܝ ܒܠܸܠܝܵܐ ܘܒ̣ܐܝܼܡܵܡܵܐ ܐܸܛܪܝܼܘܗܝ.
4 ܫܘܼܪܵܐ ܠܲܝܬ̇ ܠܹܟ݂ܝ: ܡܲܢ ܕܹܝܢ ܝܲܗ̄ܒ̣ ܒܹܟ݂ܝ ܝܲܥܪܵܐ ܘܟ݂ܘܼ̈ܒܹ̇ܐ. ܒܩܘܼܪܒܵܐ ܐܸܦܘܿܚ ܒܹܗ: ܘܐܵܘܩ̄ܕ݂ܝܼܘܗܝ ܐܲܟ݂ܚ̄ܕ݂ܵܐ.
5 ܐܵܘ ܢܹܐܚܘܿܕ݂ ܒܥܘܼܫܢܝ: ܘܐܸܥܒܸ̇ܕ݂ ܠܹܗ ܫܠܵܡܵܐ. ܫܠܵܡܵܐ ܐܸܥܒܸ̇ܕ݂ ܠܹܗ.
6 ܐܲܝܠܹܝܢ ܕܡ̣ܢ ܥܸܩܵܪܹܗ ܕܝܲܥܩܘܿܒ̣. ܢܸܓ̣ܦܸܐ ܘܢܲܦܪܲܥ ܝܼܣܪܵܝܹܠ ܘܢܸܡܠܘܿܢ ܐܲܦܲܝ̈ ܬܹܒܹܝܠ ܦܹܐܪܹ̈ܐ.
7 ܐܲܝܟ݂ ܡܚܘܿܬ̣ܵܐ ܕܲܡܚܵܝܗܝ: ܡܚܵܝܗܝ. ܘܐܲܝܟ݂ ܩܸܛܠܵܐ ܕܩܲܛܸܠܹܗ: ܩܲܛܠܹܗ.
8 ܒܣܲܐܬ̣ܵܐ ܕܐܲܟ̇ܝܼܠ: ܬܕ݂ܘܼܢܝܼܘܗܝ: ܒܕܲܪܢܵܐ ܒܪܘܼܚܹܗ ܫܩܝܼܬ̣ܵܐ ܒܝܵܘܡܵܐ ܚܲܡܝܼܡܵܐ.
9 ܡܸܛܠ ܗܵܢܵܐ: ܒܗܵܕܹܐ ܢܸܫܬ̇ܒܸܩ ܥܵܘܼܠܹܗ ܕܝܲܥܩܘܿܒ̣ ܘܲܒ̣ܗܵܠܹܝܢ ܟܠܗܘܿܢ ܦܹܐܪܹ̈ܐ ܬܸܥܒܲܪ ܚܛܝܼܬܹܗ: ܡܵܐ ܕܣܵܐܹ̇ܡ ܟܠܗܹܝܢ ܟܹܐܦܹ̈ܐ ܕܡܲܕ݂ܒ̇ܚܵܐ: ܐܲܝܟ݂ ܟܹܐܦܹ̈ܐ ܕܟܸܠܫܵܐ ܕܡܸܬ̣ܦܲܟ̇ـ̈ـܟ݂ܵܢ: ܗܵܟܲܢܵܐ ܠܵܐ ܢܸܬ̣ܩܲܝܡܘܿܢ ܦܬܲܟ݂ܪܹ̈ܐ ܘܕܸܚ̈ܠܵܬ̣ܵܐ.
10 ܡܸܛܠ ܕܲܩܪܝܼܬ̣ܵܐ ܥܲܫܝܼܢܬܵܐ: ܒܲܠܚܘܿܕܹܝܗ̇ ܚܵܪܒܵܐ ܘܡܸܫܬܲܒ̣ܩܵܐ: ܘܚܵܪܒܵܐ ܐܲܝܟ݂ ܡܲܕ݂ܒ̇ܪܵܐ. ܬܲܡܵܢ ܢܸܪܥܸܐ ܥܸܓ̣ܠܵܐ: ܘܬܲܡܵܢ ܢܸܪܥܹܐ ܘܲܢܓܲܡܲܪ ܬܸܕ݂ܐܹ̈ܝܗ̇.
11 ܒܝܲܒ̣ܫܵܐ ܕܲܚܨܵܕ݂ܵܐ: ܢܸܬ̇ܬܲܒ̣ܪ̈ܵܢ ܢܸܫܹ̈ܐ ܕܐܵܬ̣̈ܝܵܢ ܡܲܢܗ̱ܪ̈ܵܢ ܠܵܗ̇: ܡܸܛܠ ܕܠܵܐ ܗ̄ܘܼܵܐ ܥܲܡܵܐ ܣܲܟ̇ܘܼܠܬ̣ܵܢܵܐ. ܡܸܛܠ ܗܵܢܵܐ ܠܵܐ ܢܪܲܚܸܡ ܥܠܵܘܗܝ ܥܵܒ̣ܘܿܕܹܗ ܘܓ̣ܵܒ̣ܘܿܠܹܗ ܠܵܐ ܢܪܲܚܸܦ ܥܠܵܘܗܝ.
12 ܘܢܸܗܘܹܐ ܒܝܵܘܡܵܐ ܗܵܘܿ: ܢܸܚܒ̇ܘܿܛ ܡܵܪܝܵܐ ܡ̣ܢ ܫܸܒ̣ܠ̱ܬ̣ܵܐ ܕܢܲܗܪܵܐ: ܥܕܲܡܵܐ ܠܢܲܚܠܵܐ ܕܡܸܨܪܹܝܢ. ܘܐܲܢ̄ܬ̇ܘܿܢ ܬܸܬ̣ܠܲܩܛܘܼܢ ܚܲܕ݂ ܠܘܵܬ̣ ܚܲܕ݂: ܒܢܲܝ̈ ܝܼܣܪܵܝܹܠ.
13 ܘܢܸܗܘܹܐ ܒܝܵܘܡܵܐ ܗܵܘܿ: ܢܸܬ̣ܩܪܸܐ ܫܝܼܦܘܿܪܵܐ ܪܲܒܵܐ: ܘܢܹܐܬ̣ܘܿܢ ܕܐܸܒܲܕ݂ܘ ܒܐܲܪܥܵܐ ܕܡܸܨܪܹܝܢ: ܘܕܸܐܬ̣ܒܲܕܲܪܘ ܒܐܲܪܥܵܐ ܕܐܵܬ̣ܘܿܪ. ܘܢܸܣܓ̇ܕ݂ܘܼܢ ܒܐܲܪܥܹܗ ܕܡܵܪܝܵܐ ܠܡܵܪܝܵܐ: ܒܛܘܼܪܹܗ ܩܲܕ̇ܝܼܫܵܐ ܒܐܘܿܪܸܫܠܸܡ.
1 ܘܵܝ ܠܲܟ݂ܠܝܼܠܵܐ ܓܲܐܝܵܐ ܕܪܵܘܝܵܐ ܐܲܦܪܹܝܡ: ܘܠܲܓ̣ܕ݂ܵܠܵܐ ܡܨܲܥܪܵܐ ܚܲܝܠܵܐ ܕܫܘܼܒ̣ܚܹܗ ܕܲܒ̣ܪܹܫ ܢܲܚܠܵܐ ܕܫܲܡܝܼܢܹ̈ܐ: ܕܬ̣ܵܘܝܼܪܝܼܢ ܒܚܲܡܪܵܐ.
2 ܗܵܐ ܚܲܝܠܵܐ ܘܥܘܼܫܢܵܐ ܕܡܵܪܝܵܐ: ܐܲܝܟ݂ ܙܵܪܝܼܦ̮ܬܵܐ ܕܒܲܪܕ݂ܵܐ: ܘܐܲܝܟ݂ ܥܲܠܥܵܠܵܐ ܕܬ̣ܵܒ̣ܪܵܐ: ܘܐܲܝܟ݂ ܙܵܪܝܼܦ̮ܬܵܐ ܕܡܲـ̈ـܝܵܐ ܣܲܓ̇ܝܹ̈ܐܐ ܕܓ̣ܵܪܦܝܼܢ.
3 ܐܲܢܝܼܚ ܠܐܲܪܥܵܐ ܒܐܝܼܕ݂ܵܟ݂. ܘܲܒ̣ܪܸܓ̣ܠܵܐ ܢܸܬ̇ܬ̇ܕ̇ܝܼܫ ܟܠܝܼܠܵܐ ܓܲܐܝܵܐ ܕܪܵܘܝܵܐ ܐܲܦܪܹܝܡ.
4 ܢܸܗܘܹܐ ܓܕ݂ܵܠܵܐ ܡܨܲܥܪܵܐ: ܚܲܝܠܵܐ ܕܫܘܼܒ̣ܚܹܗ ܕܲܒ̣ܪܹܫ ܢܲܚܠܵܐ ܕܫܲܡܝܼܢܹ̈ܐ: ܐܲܝܟ݂ ܒܲܟܵܪܬܵܐ ܕܲܩܕ݂ܵܡ ܩܲܝܛܵܐ: ܕܡܵܐ ܕܲܚ̣ܙܵܘ ܡܲܢ ܕܚܵܙܹ̇ܐ ܠܵܗ̇: ܥܲܕ݂ ܗ̤ܝ ܒܐܝܼܕܹܗ: ܒܵܠܲܥ ܠܵܗ̇.
5 ܒܝܵܘܡܵܐ ܗܵܘܿ: ܢܸܗܘܹܐ ܡܵܪܝܵܐ ܚܲܝܠܬ̣ܵܢܵܐ ܠܲܟ݂ܠܝܼܠܵܐ ܕܚܲܝܠܵܐ: ܘܠܲܓ̣ܕ݂ܵܠܵܐ ܡܫܲܒ̇ܚܵܐ ܠܫܲܪܟܵܐ ܕܥܲܡܹܗ.
6 ܠܪܘܼܚܵܐ ܕܕ݂ܝܼܢܵܐ: ܠܡܲܢ ܕܝܵܬܹܒ̣ ܥܲܠ ܕܝܼܢܵܐ ܘܓܲܢ̄ܒܵܪܘܼܬ̣ܵܐ: ܕܡܲܗܦܟ݂ܝܼܢ ܩܪܵܒ̣ܵܐ ܡ̣ܢ ܬܲܪܥܵܐ.
7 ܐܵܦ ܗܵܠܹܝܢ ܒܚܲܡܪܵܐ ܛܥ̣ܵܘ: ܘܲܒ̣ܫܲܟ݂ܪܵܐ ܛܥ̣ܵܘ. ܟܵܗ̈ܢܹܐ ܘܲܢܒ̣ܝܹ̈ܐ ܛܥ̣ܵܘ ܒܫܲܟ݂ܪܵܐ. ܐܸܬ̣ܒ̇ܠܲܥܘ ܡ̣ܢ ܚܲܡܪܵܐ. ܙܵܥ̣ܘ ܡ̣ܢ ܫܲܟ݂ܪܵܐ. ܛܥ̣ܵܘ ܒܪܵܘܵܝܘܼܬ̣ܵܐ ܐܸܟܲܠܘ ܐܵܣܘܿܛܵܐܝܼܬ̣.
8 ܡܸܛܠ ܕܟ݂ܠܗܘܿܢ ܦܵܬ̣ܘܿܪܹ̈ܐ ܐܸܬ̣ܡ̱ܠܝܼܘ ܬܝܘܿܒ̣ܵܐ ܘܬܸܒ̣ܬܵܐ ܡ̣ܢ ܒܠܲܝ ܐܲܬ̣ܪܵܐ.
9 ܠܡܲܢ ܢܲܠܸܦ ܝܼܕܲܥܬ̣ܵܐ ܘܲܠܡܲܢ ܢܣܲܟܸ̇ܠ ܫܸܡܥܵܐ: ܠܕܲܚܣܝܼܠܝܼܢ ܡ̣ܢ ܚܲܠܒ̣ܵܐ: ܘܲܢܓ̣ܝܼܕ݂ܝܼܢ ܡ̣ܢ ܬܕܲܝܵـ̈ـܐ.
10 ܡܸܛܠ ܬܸܒ̣ܬܵܐ ܥܲܠ ܬܸܒ̣ܬܵܐ: ܘܬܸܒ̣ܬܵܐ ܥܲܠ ܬܸܒ̣ܬܵܐ. ܘܲܬ̣ܝܘܿܒ̣ܵܐ ܥܲܠ ܬܝܘܿܒ̣ܵܐ: ܘܲܬ̣ܝܘܿܒ̣ܵܐ ܥܲܠ ܬܝܘܿܒ̣ܵܐ. ܩܲܠܝܼܠ ܠܬܲܡܵܢ: ܘܩܲܠܝܠ ܠܬܲܡܵܢ.
11 ܡܸܛܠ ܕܲܒ̣ܡܲܡܠܠܵܐ ܥܲܛܠܵܐ ܘܲܒ̣ܠܸܫܵܢܵܐ ܐ̄ܚܪܹܢܵܐ ܐܹܡܲܠܸܠ ܥܲܡܹܗ ܥܲܡ ܥܲܡܵܐ ܗܵܢܵܐ.
12 ܕܐܸܡ̇ܪܹܬ̣ ܠܗܘܿܢ: ܗܵܕܲܐ ܗ̄ܝܼ ܢܝܵܚܬ̇ܝ: ܐܲܢܝܼܚܘ ܠܲܡܛܲܪ̈ܦܵܐ ܘܗܵܢܵܘ ܫܸܠܝܵܐ ܘܠܵܐ ܨܒ̣ܵܘ ܠܡܸܫܡܲܥ.
13 ܘܲܗܘ̤ܵܬ̣ ܠܗܘܿܢ ܡܸܠܬܹܗ ܕܡܵܪܝܵܐ: ܬܸܒ̣ܬܵܐ ܥܲܠ ܬܸܒ̣ܬܵܐ: ܘܬܸܒ̣ܬܵܐ ܥܲܠ ܬܸܒ̣ܬܵܐ: ܘܲܬ̣ܝܘܿܒ̣ܵܐ ܥܲܠ ܬܝܘܿܒ̣ܵܐ: ܘܲܬ̣ܝܘܿܒ̣ܵܐ ܥܲܠ ܬܝܘܿܒ̣ܵܐ: ܩܲܠܝܼܠ ܠܬܲܡܵܢ: ܘܩܲܠܝܼܠ ܠܬܲܡܵܢ ܕܢܸܗ̄ܦܟ݂ܘܿܢ ܘܢܸܣܬܲܚܦܘܼܢ ܠܒܸܣܬܲܪܗܘܿܢ: ܘܢܸܬ̇ܬܲܒ̣ܪܘܼܢ ܘܢܸܬ̇ܬ̇ܨܝܼܕ݂ܘܼܢ ܘܢܸܬ̇ܬܲܚܕ̇ܘܼܢ.
14 ܡܸܛܠ ܗܵܢܵܐ ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ ܓܲܒ̣ܪܹ̈ܐ ܡܡܲܝܩܵܢܹ̈ܐ: ܫܲܠܝܼܛܵܘ̈ܗܝ ܕܥܲܡܵܐ ܗܵܢܵܐ ܕܒ̣ܐܘܿܪܸܫܠܸܡ.
15 ܡܸܛܠ ܕܐܸܡܲܪܬ̇ܘܿܢ ܕܐܲܩܝܼܡ̄ܢ ܩܝܵܡܵܐ ܥܲܡ ܡܵܘܬܵܐ: ܘܥܲܡ ܫܝܘܿܠ ܥܒܲܕ݂ܢ ܚܸܙܘܵܐ. ܫܵܘܛܵܐ ܕܲܓ̣ܪܘܼܦܝܵܐ ܟܲܕ݂ ܢܸܥܒܲܪ: ܠܵܐ ܢܹܐܬܹܐ ܥܠܲܝܢ. ܡܸܛܠ ܕܣܵܡܢ ܒܕܲܓܵܠܘܼܬ̣ܵܐ ܬܘܼܟ݂ܠܵܢܲܢ: ܘܲܒ̣ܫܘܼܩܪܵܐ ܐܸܣܬܲܬܲܪܢ.
16 ܡܸܛܠ ܗܵܢܵܐ ܐܵܡܲܪ ܡܵܪܝܵܐ ܐܲܠܵܗܵܐ: ܗܵܐ ܐܸܢܵܐ ܡܲܬ̣ܩܸܢ ܐ̄ܢܵܐ ܒܨܸܗܝܘܿܢ ܟܹܐܦܵܐ: ܟܹܐܦܵܐ ܒܚܝܼܪܬܵܐ ܒܙܵܘܝܼܬ̣ܵܐ ܝܲܩܝܼܪܬܵܐ: ܪܹܫ ܐܸܣܬ̣ܵܐ ܕܫܲܬ̣ܐ̱ܣܬ̣ܵܐ. ܕܲܡܗܲܝܡܸܢ ܠܵܐ ܢܸܕ݂ܚܲܠ.
17 ܘܐܹܣܝܼܡ ܕܝܼܢܵܐ ܠܲܡܫܘܼܚܬ̣ܵܐ: ܘܙܲܕ̇ܝܼܩܘܼܬ̣ܵܐ ܠܡܲܬ̣ܩܵܠܵܐ. ܘܢܸܚܒ̇ܘܿܛ ܒܲܪܕ݂ܵܐ ܠܣܲܒ̣ܪܵܐ ܕܲܓܵܠܵܐ: ܘܲܠܣܸܬܵܪܵܐ ܡܲـ̈ـܝܵܐ ܢܸܓܪ̱ܦܘܼܢ.
18 ܘܢܸܬ̣ܟܲܦܲܪ ܩܝܵܡܟ݂ܘܿܢ ܕܥܲܡ ܡܵܘܬܵܐ. ܘܚܸܙ̱ܘܟ݂ܘܿܢ ܕܥܲܡ ܫܝܘܿܠ ܠܵܐ ܢܩܘܼܡ. ܫܵܘܛܵܐ ܓܵܪܘܿܦܵܐ ܟܲܕ݂ ܢܸܥܒܲܪ: ܬܸܗܘܘܿܢ ܠܹܗ ܠܲܕ݂ܝܵܫܵܐ.
19 ܘܲܒ̣ܙܲܒ̣ܢܵܐ ܕܥܵܒܲܪ ܢܸܕ݂ܒܲܪܟ݂ܘܿܢ. ܡܸܛܠ ܕܲܒ̣ܨܲܦܪܵܐ ܒܨܲܦܪܵܐ ܢܸܥܒܲܪ ܒܐܝܼܡܵܡܵܐ ܘܲܒ̣ܠܸܠܝܵܐ ܗܵܘܝܵܐ ܙܵܘܥܬ̣ܵܐ. ܒܲܠܚܘܿܕ݂ ܐܸܣܬܲܟܲܠ ܫܵܡܘܿܥܵܐ.
20 ܡܸܛܠ ܕܟܲܪܝܼ ܡܵܐܢܵܐ ܠܡܸܣܬ̇ܪܹܗ. ܘܡܸܫܬ̇ܝܼܬ̣ܵܐ ܩܸܛܢܲܬ̤: ܘܠܵܐ ܡܡܲܠܝܵܐ.
21 ܡܸܛܠ ܕܲܒ̣ܛܘܼܪܵܐ ܒܬ̣ܘܼܪ̱ܥܬ̣ܵܐ ܢܩܘܼܡ ܡܵܪܝܵܐ: ܐܲܝܟ݂ ܥܘܼܡܩܵܐ ܕܓܸܒ̣ܥܘܿܢ ܢܸܪܓܲܙ ܠܡܸܥܒܲܕ݂ ܥܒ̣ܵܕ݂ܵܘ̈ܗܝ: ܢܘܿܟ݂ܪ̈ܵܝܑܼܝܢ ܥܒ̣ܵܕ݂ܵܘ̈ܗܝ. ܘܲܠܡܸܥܒܲܕ݂ ܥܒ̣ܝܼ̈ܕ݂ܵܬܹܗ: ܢܘܼܟ݂ܪ̈ܵܝܵܢ ܥܒ̣ܝܼ̈ܕܵܬܹܗ.
22 ܘܗܵܫܵܐ ܠܵܐ ܬܡܲܝܩܘܼܢ: ܕܠܵܐ ܢܸܥܫ̈ܢܵܢ ܡܲܪ̈ܕ̇ܘܵܬ̣ܟ݂ܘܿܢ ܡܸܛܠ ܕܲܓ̣ܡܘܼܪܝܵܐ ܘܦܵܣܝܼ̈ܩܵܬ̣ܵܐ ܫܸܡ̇ܥܹܬ̣ ܡ̣ܢ ܡܵܪܝܵܐ ܚܲܝܠܬ̣ܵܢܵܐ: ܥܲܠ ܟܠܵܗ̇ ܐܲܪܥܵܐ.
23 ܨܘܼܬ̣ܘ ܘܲܫܡܲܥܘ ܩܵܠܝ: ܨܘܼܬܘ ܘܲܫܡܲܥܘ ܡܹܐܡܲܪܝ.
24 ܕܲܠܡܵܐ ܝܵܘܡܵܐ ܟܠܹܗ ܕܵܒܲܪ ܐܲܟܵܪܵܐ ܠܡܸܙܪܲܥ: ܘܙܵܩܹ̇ܦ ܘܫܵܦܹ̇ܢ ܐܲܪܥܹܗ.
25 ܠܵܐ ܗ̄ܘܼܵܐ ܡܵܐ ܕܐܲܫܘܼܝܼ ܐܲܦܹܝ̈ܗ̇: ܒܵܕܲܪ ܫܒ̣ܘܼܒ̣ܵܢܵܐ: ܘܟܲܡܘܼܢܵܐ ܙܵܪܲܥ. ܘܪܵܡܹ̇ܐ ܚܸܛܹ̈ܐ ܘܲܣܥܵܪܹܐ ܘܟ݂ܘܼ̈ܢܵܬܹܐ ܒܲܬ̣ܚܘܼ̈ܡܝܗ̇.
26 ܢܸܪܕܸ̇ܝܘܗܝ ܒܕ݂ܝܼܢܵܐ ܕܐܲܠܵܗܵܐ ܘܲܢܫܲܒ̇ܚܝܼܘܗܝ.
27 ܡܸܛܠ ܕܠܵܐ ܗ̄ܘܼܵܐ ܒܕܸܪܫܵܐ ܡܸܬ̇ܕܲܪܸܟ݂ ܫܒ̣ܘܼܒ̣ܵܢܵܐ. ܘܐܵܦܠܵܐ ܡܸܬ̣ܟ̇ܪܸܟ݂ ܓܲܪܓ̇ܪܵܐ ܥܲܠ ܟܲܡܘܼܢܵܐ. ܡܸܛܠ ܕܲܒ̣ܚܘܼܛܪܵܐ ܡܸܬ̣ܚܲܒܲܛ ܫܒ̣ܘܼܒ̣ܵܢܵܐ: ܘܟܲܡܘܼܢܵܐ ܒܙܸܩܬܵܐ.
28 ܥܒ̣ܘܼܪܵܐ ܡܸܬ̇ܕ̇ܪܸܟ݂ ܡܸܛܠܵܬܲܢ. ܡܸܛܠ ܕܠܵܐ ܗ̄ܘܼܵܐ ܠܙܵܟ݂ܘܼ ܡܲܕ݂ܪܵܟ݂ܘܼ ܐܲܕ݂ܪܸܟ݂ܢܵܝܗܝ ܘܲܒ̣ܣܘܿܓ̣ܵܐܐ ܕܓ̣ܝܼ̈ܓ̣ܠܹܐ ܕܓܲܪܓ̇ܪ̈ܵܘܗܝ: ܘܲܒ̣ܦܲܪ̈ܣܵܘܗܝ ܢܲܕ̇ܩܘܼܢܹܗ.
29 ܘܐܵܦ ܗܵܕܹܐ ܩܕ݂ܵܡ ܡܵܪܝܵܐ ܚܲܝܠܬ̣ܵܢܵܐ ܢܸܦܩܲܬ̤ ܕܘܼܡܵܪܵܐ ܕܬܲܪܥܝܼܬ̣ܵܐ ܐܵܘܪܸܒ̣ ܬܲܪܒ̇ܝܼܬ̣ܵܐ.
1 ܘܵܝ ܐܲܪܝܼܠ ܐܲܪܝܼܠ ܩܪܝܼܬ̣ܵܐ ܕܲܫ̣ܪܵܐ ܕܵܘܝܼܕ݂. ܐܵܘܣܸܦܘ ܫܲܢ̄ܬܵܐ ܥܲܠ ܫܲܢ̄ܬܵܐ: ܥܲܕ݂ܥܹ̈ܕܹܐ ܢܸܬ̣ܥܲܒ̣ܕ̇ܘܼܢ.
2 ܘܐܲܥܝܼܩ ܠܐܵܪܝܼܠ: ܘܬܸܗܘܹܐ ܢܘܼܗܵܡܵܐ ܘܐܘܿܠܝܼܬ̣ܵܐ: ܘܬܸܗܘܹܐ ܐܲܝܟ݂ ܐܵܪܝܼܠ.
3 ܘܐܸܫܪܹܐ ܐܲܝܟ݂ ܐܹܣܦܹܪܵܐ ܥܠܲܝܟ̇ܝ ܘܐܲܠܨܹܟ݂ܝ ܒܡܲܩܲܒ̣ܬܵܐ ܘܐܲܩܝܼܡ ܥܠܲܝܟܝ ܡܲܛܲܪܬܵܐ.
4 ܘܬܸܬ̣ܡܲܟ̇ܟ݂ܝܼܢ ܘܡ̣ܢ ܥܲܦܪܵܐ ܬܡܲܠܠܝܼܢ. ܘܡ̣ܢ ܥܲܦܪܵܐ ܢܢܲܨܪ̈ܵܢ ܡܸܠܲܝ̈ܟ̇ܝ ܘܢܸܫܬ̇ܡܲܥ ܩܵܠܹܟ݂ܝ ܡ̣ܢ ܐܲܪܥܵܐ ܐܲܝܟ݂ ܙܲܟ̇ܘܼܪܵܐ. ܘܡ̣ܢ ܥܲܦܪܵܐ ܢܢܲܨܪ̈ܵܢ ܡܸܠܲܝ̈ܟ̇ܝ.
5 ܘܢܸܗܘܹܐ ܐܲܝܟ݂ ܚܸܠܵܐ ܕܲܩܝܼܩܵܐ ܣܘܿܓ̣ܵܐܐ ܕܕ݂ܵܝܘܿܫܲܝ̈ܟ̇ܝ ܘܐܲܝܟ݂ ܥܘܼܪܵܐ ܕܥܵܒܲܪ ܣܘܿܓ̣ܵܐܐ ܕܥܲܫܝܼܢܲܝ̈ܟ̇ܝ. ܘܢܸܗܘܹܐ ܡ̣ܢ ܫܸܠܝܵܐ ܒܲܥܓܲܠ.
6 ܡ̣ܢ ܩܕ݂ܵܡ ܡܵܪܝܵܐ ܚܲܝܠܬ̣ܵܢܵܐ: ܬܸܬ̣ܦܩܸܕ݂ ܒܙܵܘܥܹ̈ܐ: ܘܲܒ̣ܪ̈ܲܥܡܹܐ ܘܲܒ̣ܩܵܠܵܐ ܪܲܒܵܐ: ܘܲܒ̣ܩܘܼ̈ܕ݂ܚܵܬ̣ܵܐ: ܘܲܒ̣ܥܲܠܥܵܠܵܐ: ܘܲܒ̣ܫܲܠܗܹܒ̣ܝܼܬ̣ܵܐ ܕܢܘܼܪܵܐ ܕܡܵܘܩܕ݂ܵܐ.
7 ܘܢܸܗܘܹܐ ܐܲܝܟ݂ ܚܸܠܡܵܐ ܒܚܸܙܘܵܐ ܕܠܸܠܝܵܐ: ܣܘܿܓ̣ܵܐܐ ܕܟ݂ܠܗܘܿܢ ܥܲܡܡܹ̈ܐ ܕܡܸܬ̣ܚܲܝܠܝܼܢ ܥܲܠ ܨܸܗܝܘܿܢ: ܘܟ݂ܠ ܚܲܝ̈ܠܹܐ ܘܟܸܢܫܹ̈ܐ ܕܲܡܥܝܼܩܝܼܢ ܠܵܗ̇.
8 ܘܢܸܗܘܹܐ ܐܲܝܟ݂ ܟܲܦܢܵܐ ܕܚܵܙܹ̇ܐ ܒܚܸܠܡܹܗ ܕܐܵܟܹ̇ܠ ܘܡܵܐ ܕܐܸܬ̇ܬ̇ܥܝܼܪ: ܡܛܲܪܲܦ: ܘܲܣܪܝܼܩܵܐ ܢܲܦ̮ܫܹܗ. ܘܐܲܝܟ݂ ܨܲܗܝܵܐ ܕܚܵܙܹ̇ܐ ܒܚܸܠܡܹܗ ܕܫܵܬܹܐ. ܘܡܵܐ ܕܐܸܬ̇ܬ̇ܥܝܼܪ: ܡܛܲܪܲܦ ܘܲܣܪܝܼܩܵܐ ܢܲܦ̮ܫܹܗ. ܗܵܟܲܢܵܐ ܢܸܗܘܹܐ ܣܘܿܓ̣ܵܐܐ ܕܟ݂ܠܗܘܿܢ ܥܲܡܡܹ̈ܐ ܕܡܸܬ̣ܚܲܝܠܝܼܢ ܥܲܠ ܛܘܼܪܵܐ ܕܨܸܗܝܘܿܢ.
9 ܬܡܲܗܘ ܘܐܸܬ̇ܕܲܡܲܪܘ: ܘܐܸܬ̇ܛܲܪܲܦܘ ܘܲܬ̣ܘܲܪܘ: ܕܲܪܘܹܝܢ ܠܵܐ ܡ̣ܢ ܚܲܡܪܵܐ: ܘܲܕ̇ܛܵܥܹ̇ܝܢ ܠܵܐ ܡ̣ܢ ܫܲܟ݂ܪܵܐ.
10 ܡܸܛܠ ܕܲܢ̣ܣܲܟ݂ ܥܠܲܝܗܘܿܢ ܡܵܪܝܵܐ ܪܘܼܚܵܐ ܛܲܒ̇ܝܼܥܬܵܐ ܘܥܸܫܢܲܬ̤ ܥܲܠ ܥܲܝܢܲܝ̈ܗܘܿܢ ܘܥܲܠ ܢܒ̣ܝܹ̈ܐ: ܘܥܲܠ ܪܹ̈ܫܲܝܗܘܿܢ ܕܚܵܙܹ̇ܝܢ ܟܲܣ̈ܝܵܬ̣ܵܐ.
11 ܘܢܸܗܘܹܐ ܒܗܘܿܢ ܚܸܙܘܵܐ ܕܟ݂ܠܗܘܿܢ ܐܲܝܟ݂ ܡܸܠܹ̈ܐ ܕܲܟ݂ܬ̣ܵܒ̣ܵܐ ܕܲܚܬ̣ܝܼܡ ܕܡܵܐ ܕܝܲܗ̄ܒ̇ܘܼܗܝ ܠܡܲܢ ܕܝܵܕܲܥ̇ ܣܸܦܪܵܐ: ܢܹܐܡܪܘܼܢ ܠܹܗ ܩܪܝܼ ܗܵܢܵܐ: ܘܢܹܐܡܲܪ ܠܵܐ ܡܸܫܟܲܚ ܐ̄ܢܵܐ: ܡܸܛܠ ܕܲܚܬ̣ܝܼܡ ܗ̄ܘܼ.
12 ܘܢܸܬ̇ܠܘܼܢܹܗ ܠܲܟ݂ܬ̣ܵܒ̣ܵܐ ܠܡܲܢ ܕܠܵܐ ܝܵܕܲܥ ܣܸܦܪܵܐ. ܘܢܹܐܡܪܘܼܢ ܠܹܗ ܩܪܝܼ ܗܵܢܵܐ. ܘܢܹܐܡܲܪ ܠܵܐ ܝܵܕܲܥ ܐ̄ܢܵܐ ܣܸܦܪܵܐ.
13 ܘܐܸܡܲܪ ܡܵܪܝܵܐ: ܥܲܠ ܕܲܩ̣ܪܸܒ̣ ܥܲܡܵܐ ܗܵܢܵܐ ܒܦܘܼܡܹܗ: ܘܲܒ̣ܣܸܦ̈ܘܵܬܹܗ ܝܲܩ̣ܪܲܢܝ: ܘܠܸܒܹ̇ܗ ܪܲܚܝܼܩ ܡܹܢܝ: ܘܲܗܘ̤ܵܬ̣ ܕܸܚܠܲܬ̣ܗܘܿܢ ܡܹܢܝ ܒܦܘܼܩܕܵܢܵܐ ܘܲܒ̣ܝܘܼܠܦܵܢܵܐ ܕܐ̄ܢܵܫܵܐ.
14 ܡܸܛܠ ܗܵܢܵܐ: ܗܵܐ ܡܵܘܣܸܦ ܐ̄ܢܵܐ ܠܡܸܦ̱ܪܫܹܗ ܠܥܲܡܵܐ ܗܵܢܵܐ: ܒܬܸܕ݂ܡܘܼܪܬܵܐ ܘܲܒ̣ܕ݂ܘܼܡܵܪܵܐ. ܘܬܹܐܒܲܕ݂ ܚܸܟ݂ܡ̱ܬ̣ܵܐ ܕܚܲܟ̇ܝܼܡܵܘ̈ܗܝ. ܘܣܘܼܟܵܠܵܐ ܕ݂ܣܲܟ̇ܘܼܠܬ̣ܵܢܵܘ̈ܗܝ ܢܸܬ̣ܓ̇ܠܸܙ.
15 ܘܵܝ ܠܲܕ݂ܡܸܬ̣ܥܲܩܡܝܼܢ ܡ̣ܢ ܡܵܪܝܵܐ: ܠܲܡܛܲܫܵܝܘܼ ܬܲܪܥܝܼܬ̣ܵܐ. ܘܗܵܘܹ̇ܝܢ ܒܚܸܫܘܿܟ݂ܵܐ ܥܒ̣ܵܕܲܝ̈ܗܘܿܢ ܘܐܵܡ̇ܪܝܼܢ ܡܲܢܘܼ ܚܵܙܹ̇ܐ ܠܲܢ: ܐܵܘ ܡܲܢܘܼ ܝܵܕܲܥ ܡܵܢܵܐ ܡܸܬ̣ܗܲܦܟ݂ܝܼܢܲܢ.
16 ܐܲܝܟ݂ ܛܝܼܢܵܐ ܕܦܲܚܵܪܵܐ ܚܫܝܼܒ̣ܝܼܢ ܐ̄ܢܬ̇ܘܿܢ. ܕܲܠܡܵܐ ܐܵܡܲܪ ܥܒ̣ܵܕ݂ܵܐ ܠܥܵܒ̣ܘܿܕܹܗ ܠܵܐ ܥܒܲܕ̇ܬܵܢܝ. ܘܲܓ̣ܒ̣ܝܼܠܬܵܐ ܐܵܡ̇ܪܵܐ ܠܓ̣ܵܒ̣ܘܿܠܵܗ̇: ܕܚܲܟ̇ܝܼܡܵܐܝܼܬ̣ ܠܵܐ ܓܒܲܠܬܵܢܝ.
17 ܗܵܐ ܥܲܕ݂ ܩܲܠܝܼܠ ܙܥܘܿܪ: ܘܢܸܗܦܘܿܟ݂ ܠܸܒ̣ܢܵܢ ܠܟܲܪܡ̄ܠܵܐ: ܘܟܲܪܡ̄ܠܵܐ ܠܥܵܒ̣ܵܐ ܢܸܬ̣ܚܫܸܒ̣.
18 ܘܢܸܫ̱ܡܥܘܼܢ ܒܝܵܘܡܵܐ ܗܵܘܿ ܚܲܪ̈ܫܹܐ ܡܸܠܹ̈ܐ ܕܲܟ݂ܬ̣ܵܒ̣ܵܐ. ܘܡ̣ܢ ܚܸܫܘܿܟ݂ܵܐ ܘܥܲܡܛܵܢܵܐ: ܥܲܝܢܹ̈ܐ ܕܲܥܘܝܼܪܹ̈ܐ ܢܸܚ̈ܙܝܵܢ.
19 ܘܢܵܘܣܦܘܼܢ ܡܲܟ̇ܝܼܟܹ̈ܐ ܒܡܵܪܝܵܐ ܒܚܲܕ݂ܘܼܬ̣ܵܐ. ܘܐ̄ܢܵܫܵܐ ܒܵܝܫܹ̈ܐ ܒܩܲܕ̇ܝܼܫܵܐ ܕܝܼܣܪܵܝܹܠ ܢܕ݂ܘܼܨܘܼܢ.
20 ܡܸܛܠ ܕܲܥܒܲܪ ܕܵܝܘܿܫܵܐ: ܘܲܓ̣ܡܲܪ ܡܡܲܝܩܵܢܵܐ. ܘܐܸܒܲܕ݂ܘ ܟܠ ܕܲܡܓܲܪܓ̣ܝܼܢ ܥܵܘܼܠܵܐ.
21 ܘܡܲܚܛܹܝܢ ܠܐ̄ܢܵܫܵܐ ܒܡܸܠܬ̣ܵܐ. ܘܠܲܕ݂ܡܲܟܸ̇ܣ ܣܵܝ̇ܡܝܼܢ ܠܹܗ ܬܘܼܩ̱ܠܬ̣ܵܐ: ܘܨܵܠܹ̇ܝܢ ܒܚܸܫܘܿܟ݂ܵܐ ܠܙܲܕ̇ܝܼܩܵܐ.
22 ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܒܲܝܬܹ̇ܗ ܕܝܲܥܩܘܿܒ̣: ܕܲܦܪܲܩ̣ ܠܐܲܒ̣ܪܵܗܵܡ: ܠܵܐ ܡܸܟܹ̇ܝܠ ܢܸܒ̣ܗܲܬ̣ ܝܲܥܩܘܼܒ̣: ܘܠܵܐ ܡܸܟܹ̇ܝܠ ܢܸܚܦܪ̈ܵܢ ܐܲܦܵܘ̈ܗܝ.
23 ܡܵܐ ܕܲܚܙ̣ܵܘ ܒܢܵܘ̈ܗܝ ܥܒ̣ܵܕ݂ ܐܝܼܕܲܝ̈: ܒܓ̣ܵܘܹܗ ܢܩܲܕ̇ܫܘܼܢ ܫܹܡܝ. ܘܲܢܩܲܕ̇ܫܘܼܢ ܠܩܲܕ̇ܝܼܫܵܐ ܕܝܲܥܩܘܿܒ̣. ܘܠܲܐܠܵܗܵܐ ܕܝܼܣܪܵܝܹܠ ܢܥܲܫܢܘܼܢ.
24 ܘܢܸܕ̇ܥܘܼܢ ܣܲܟ݂̈ܠܹܐ ܐܲܝܠܹܝܢ ܕܛܵܥ̇ܝܵܐ ܗ̄ܘܼܵܬ̣ ܪܘܼܚܗܘܿܢ. ܘܫܵܛܲـ̈ـܝܵܐ ܢܹܐܠܦܘܼܢ ܠܡܸܫܬܲܡܵܥܘܼ.
1 ܘܵܝ ܠܲܒ̣̈ܢܲܝܵܐ ܡܵܪ̈ܘܿܕܹܐ: ܐܵܡܲܪ ܡܵܪܝܵܐ: ܕܲܥ̣ܒܲܕ݂ܘ ܬܲܪܥܝܼܬ̣ܵܐ ܘܠܵܐ ܡܹܢܝ. ܘܢܲܩܝܼܘ ܢܘܼܩܵܝܹ̈ܐ: ܕܠܵܐ ܡ̣ܢ ܪܘܼܚܝ. ܕܢܵܘܣܦܘܼܢ ܚܛܵܗܹ̈ܐ ܥܲܠ ܚܛܵܗܹ̈ܐ.
2 ܕܐܸܙܲܠ̣ܘ ܠܡܸܚܲܬ̣ ܠܡܸܨܪܹܝܢ: ܘܡ̣ܢ ܦܘܼܡܝ ܠܵܐ ܫܐܸܠܘ ܕܢܸܬ̣ܥܲܫܢܘܼܢ ܒܥܘܼܫܢܹܗ ܕܦܸܪܥܘܿܢ. ܘܢܸܣܬܲܬ̇ܪܘܼܢ ܒܛܸܠܵܠܵܗ̇ ܕܡܸܨܪܹܝܢ.
3 ܢܸܗܘܸܐ ܠܟ݂ܘܿܢ ܥܘܼܫܢܹܗ ܕܦܸܪܥܘܿܢ ܠܒܸܗܬ̇ܬ̣ܵܐ: ܘܣܸܬܵܪܵܐ ܕܛܸܠܵܠܵܗ̇ ܕܡܸܨܪܹܝܢ ܠܬܲܚܦܝܼܬ̣ܵܐ.
4 ܡܸܛܠ ܕܗ̤ܘ ܒܨܵܥܵܢ: ܘܪܵܘ̱ܪ̈ܒ̣ܵܢܵܘܗܝ ܘܡܲܠܲܐܟ݂ܵܘ̈ܗܝ ܚܲܠܦܹ̈ܐ ܢܹܠܐܘܿܢ.
5 ܠܘܵܬ̣ ܥܲܡܵܐ ܕܠܵܐ ܡܵܘܬܪ ܠܗܘܿܢ: ܠܵܐ ܠܥܘܼܕ݂ܪܵܢܵܐ ܘܠܵܐ ܠܗܸܢܝܵܢܵܐ: ܐܸܠܵܐ ܠܒܸܗܬ̇ܬ̣ܵܐ ܘܲܠܚܸܣܕܵܐ.
6 ܡܲܫܩ̄ܠܵܐ ܕܲܒ̣ܥܝܼܪܵܐ ܕܬܲܝܡ̄ܢܵܐ ܒܐܲܪܥܵܐ ܐܲܠܝܼܨܬܵܐ ܘܲܡܥܵܩܬܵܐ. ܐܲܪܝܵܐ ܘܓ̣ܘܼܪܝܵܐ ܕܐܲܪܝܵܐ: ܘܡܸܢܗܘܿܢ ܐܸܣܦܸܣ ܘܚܲܪܡܵܢܵܐ ܕܦܵܪܲܚ. ܢܫܩ̄ܠܘܼܢ ܥܲܠ ܚܲܨܵܐ ܕܥܝܼ̈ܠܹܐ ܥܘܼܬ̣ܪ̱ܗܘܿܢ: ܘܥܲܠ ܓܲܒܵܐ ܕܓܲܡ̈ܠܹܐ ܓܲܙܲܝ̈ܗܘܿܢ: ܠܘܵܬ̣ ܥܲܡܵܐ ܕܠܵܐ ܡܲܗܢܹܐ ܠܗܘܿܢ.
7 ܘܡܸܨܪ̈ܵܝܹܐ ܒܲܣܪܝܼܩܘܼܬ̣ܵܐ ܘܲܒ̣ܕܲܓܵܠܘܼܬ̣ܵܐ ܡܥܲܕ̇ܪܝܼܢ ܡܸܛܠ ܗܵܢܵܐ ܩܪܹܝܬ̣ ܠܗܘܿܢ: ܕܲܣܪܝܼܩ ܗ̄ܘܼ ܬܘܼܟ݂ܠܵܢܗܘܿܢ ܗܵܢܵܐ.
8 ܡܸܟܹ̇ܝܠ ܬܵܐ ܟܬ̣ܘܿܒ̣ ܥܲܠ ܠܘܼܚܹ̈ܐ ܗܵܠܹܝܢ: ܘܥܲܠ ܟܬ̣ܵܒ̣ܵܐ ܕܲܩܝܵܡܗܘܿܢ: ܕܢܸܗܘܹܐ ܠܝܵܘܡܵܐ ܐ̄ܚܪܵܝܵܐ ܠܣܵܗܕ̇ܘܼܬ̣ܵܐ ܠܥܵܠܲܡ ܥܵܠܡܝܼܢ.
9 ܡܸܛܠ ܕܥܲܡܵܐ ܗ̄ܘܼ ܡܡܲܪܡܪܵܢܵܐ: ܒ̈ܢܲܝܵܐ ܐܸܢܘܿܢ ܕܲܓܵܠܹ̈ܐ: ܒ̈ܢܲܝܵܐ ܕܠܵܐ ܨܒ̣ܵܘ ܠܡܸܫܡܲܥ ܢܵܡܘܿܣܹܗ ܕܡܵܪܝܵܐ.
10 ܕܐܸܡܲܪܘ ܠܚܲܙܵܝܹ̈ܐ ܕܠܵܐ ܬܸܚܙܘܿܢ: ܘܠܲܢܒ̣ܝܹ̈ܐ ܕܠܵܐ ܬܸܬ̣ܢܲܒ̇ܘܿܢ ܠܲܢ ܡܲܟ̇ܣܵܢܘܼܬ̣ܵܐ ܡܲܠܸܠܘ ܠܲܢ ܦܵܠܓ̇ܘܼܬ̣ܵܐ: ܘܲܚܙܵܘ ܠܲܢ ܟܲܕܵܒ̣ܘܼܬ̣ܵܐ.
11 ܘܐܲܣܛܵܐܘܼܢ ܡ̣ܢ ܐܘܼܪܚܵܐ. ܘܐܲܗܦܟ݂ܘܿܢ ܡ̣ܢ ܫܒ̣ܝܼ̈ܠܹܐ. ܘܒܲܛܸܠܘ ܡܸܢܲܢ ܠܩܲܕ̇ܝܼܫܵܐ ܕܝܼܣܪܵܝܹܠ.
12 ܡܸܛܠ ܗܵܢܵܐ: ܗܵܟܲܢܵܐ ܐܵܡܲܪ ܡܵܪܝܵܐ ܩܲܕ̇ܝܼܫܵܐ ܕܝܼܣܪܵܝܹܠ: ܥܲܠ ܕܐܲܣܠܝܬ̇ܘܿܢ ܡܸܠܬ̣ܵܐ ܗܵܕܹܐ: ܘܐܸܬ̇ܬ̇ܟܸܠܬ̇ܘܿܢ ܒܲܛܠܘܼܡܝܵܐ: ܘܲܪܛܲܢܬ̇ܘܿܢ ܘܐܬ̇ܬ̇ܟܸܠܬ̇ܘܿܢ ܥܠܵܘܗܝ.
13 ܡܸܛܠ ܗܵܢܵܐ ܬܸܗܘܹܐ ܠܟ݂ܘܿܢ ܚܛܝܼܬ̣ܵܐ ܗܵܕܹܐ ܐܲܝܟ݂ ܬܘܼܪ̱ܥܬ̣ܵܐ ܕܢܸܦܠܲܬ̤: ܘܐܲܝܟ݂ ܫܘܼܪܵܐ ܪܵܡܵܐ ܕܡ̣ܢ ܫܸܠܝܵܐ ܗܘ̤ܵܐ ܬܒ̣ܵܪܹܗ.
14 ܘܲܬ̣ܒ̣ܵܪܹܗ ܐܲܝܟ݂ ܬܒ̣ܵܪܵܐ ܕܡܵܐܢܵܐ ܕܦܲܚܵܪܵܐ ܕܲܬ̣ܒ̣ܝܼܪ ܕܠܵܐ ܚܵܘܣܵܢ. ܕܠܵܐ ܡܸܫܬܲܟܲܚ ܒܬܸܒ̣ܪ̈ܵܘܗܝ ܚܸܨܦܵܐ ܠܡܸܣܲܒ̣ ܒܹܗ ܢܘܼܪܵܐ ܡ̣ܢ ܝܲܩܕܵܢܵܐ: ܘܐܵܦܠܵܐ ܠܡܸܓ̣ܪܲܦ ܒܹܗ ܡܲـ̈ـܝܵܐ ܡ̣ܢ ܓܘܼܒܵܐ.
15 ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܩܲܕ̇ܝܼܫܵܐ ܕܝܼܣܪܵܝܹܠ: ܡܵܐ ܕܬ̣ܵܒ̣ܬ̇ܘܿܢ ܘܐܸܬ̇ܬܲܢܲܚܬ̇ܘܿܢ: ܬܸܬ̣ܦܲܪܩܘܼܢ. ܘܲܒ̣ܫܸܠܝܵܐ ܘܲܒ̣ܣܲܒ̣ܪܵܐ ܬܸܗܘܹܐ ܓܲܢ̄ܒܵܪܘܼܬ̣ܟ݂ܘܿܢ ܘܠܵܐ ܐܸܬ̇ܛ̣ܦܝܼܣܬ̇ܘܿܢ.
16 ܘܐܸܡܲܪܬ̇ܘܿܢ ܠܵܐ ܗܵܟܲܢܵܐ: ܥܲܠ ܪ̈ܲܟ݂ܫܵܐ ܢܸܪܟܲܒ̣. ܘܥܲܠ ܩܲܠܝܼ̈ܠܹܐ ܢܸܥܪܘܿܩ. ܡܸܛܠ ܗܵܢܵܐ ܬܸܥ̱ܪܩܘܼܢ: ܘܢܸܗܘܘܿܢ ܩܲܠܝܼܠܝܼܢ ܪ̈ܵܕ݂ܘܼܦܲܝܟ̇ܘܿܢ.
17 ܐܵܠܹܦ ܡ̣ܢ ܟܐܵܬ̣ܵܐ ܕܚܲܕ݂: ܘܡ̣ܢ ܟܐܵܬ̣ܵܐ ܕܚܲܡܫܵܐ ܬܸܥ̱ܪܩܘܼܢ: ܥܕܲܡܵܐ ܕܬܸܫܬܲܚܪܘܼܢ ܐܲܝܟ݂ ܥܪܵܪܵܐ ܥܲܠ ܪܹܫ ܛܘܼܪܵܐ: ܘܐܲܝܟ݂ ܐܵܬ̤ܵܐ ܥܲܠ ܪܵܡܬ̣ܵܐ.
18 ܡܸܛܠ ܕܲܢܫܲܪܸܐ ܡܵܪܝܵܐ ܠܲܡܪܲܚܵܡܘܼ ܥܠܲܝܟ̇ܘܿܢ. ܘܢܸܬ̇ܬ̇ܪܝܼܡ ܠܲܡܪܲܚܵܦܘܼ ܥܠܲܝܟ̇ܘܿܢ ܡܸܛܠ ܕܐܲܠܵܗܵܐ ܗ̄ܘܼ ܕܲܝܵܢܵܐ ܡܵܪܝܵܐ. ܘܛܘܼܒܲܝܗܘܿܢ ܠܟ݂ܠ ܕܲܡܣܲܟܹ̇ܝܢ ܠܹܗ.
19 ܡܸܛܠ ܕܥܲܡܵܐ ܒܨܸܗܝܘܿܢ ܝܵܬܹܒ̣: ܘܒ̣ܐܘܿܪܸܫܠܸܡ ܡܸܒ̣ܟܵܐ ܠܵܐ ܬܸܒ̣ܟ̇ܘܿܢ ܡܪܲܚܵܡܘܼ ܢܪܲܚܸܡ ܥܲܠ ܩܵܠܵܐ ܕܲܓ̣ܥܵܬ̣ܟ݂ܘܿܢ: ܘܡܵܐ ܕܲܫ̣ܡܲܥ ܢܸܥܢܹܝܟ݂ܘܿܢ.
20 ܘܢܸܬܸ̇ܠ ܠܟ݂ܘܿܢ ܡܵܪܝܵܐ ܠܲܚܡܵܐ ܒܐܘܼܠܨܵܢܵܐ: ܘܡܲـ̈ـܝܵܐ ܒܐܘܼܠܨܵܢܵܐ. ܘܠܵܐ ܢܟܲܢܸܫ ܬܘܼܒ̣ ܠܡܲܛܥ̱ܝܵܢܲܝ̈ܟ̇ܘܿܢ ܘܢܸܚܙ̈ܝܵܢ ܥܲܝܢܲܝ̈ܟ̇ܘܿܢ ܒܡܲܛܥ̱ܝܵܢܲܝ̈ܟ̇ܘܿܢ.
21 ܘܐܸܕ݂ܢܲܝ̈ܟ̇ܘܿܢ ܢܸܫ̱ܡ̈ܥܵܢ ܡܸܠܬ̣ܵܐ ܡ̣ܢ ܒܸܣܬܲܪܟ݂ܘܿܢ. ܕܐܵܡܪܵܐ: ܗܵܕܲܐ ܗ̄ܝܼ ܐܘܼܪܚܵܐ: ܙܸܠܘ ܒܵܗ̇. ܘܠܐ ܬܸܣܛܘܿܢ ܠܝܲܡܝܼܢܵܐ ܘܲܠܣܸܡܵܠܵܐ.
22 ܘܲܬ̇ܛܵܘܫܘܼܢ ܣܹܐܡܵܐ ܕܲܩܪܝܼܡ ܠܲܦܬܲܟ݂ܪ̈ܲܝܟ̇ܘܿܢ: ܘܦܸܕ̇ܬܵܐ ܕܢܸܣܟ̇ܬ̣ܵܐ ܕܕܲܗܒ̣ܗܘܿܢ. ܘܬܸܕ݂ܪܘܿܢ ܐܸܢܘܿܢ ܐܲܝܟ݂ ܡܲـ̈ـܝܵܐ ܕܟܸܦ̮ܣܵܢܝܼܬ̣ܵܐ. ܘܐܲܝܟ݂ ܢܦܵܬ̣ܵܐ ܬܲܦܩܘܼܢ ܐܸܢܘܿܢ.
23 ܘܢܸܬ̣ܝܼܗܸܒ̣ ܡܸܛܪܵܐ ܠܙܲܪ̱ܥܟ݂ܘܿܢ: ܕܬܸܙ̱ܪܥܘܼܢ ܒܐܲܪܥܵܐ: ܘܲܥܒ̣ܘܼܪܵܐ ܕܙܲܪܥܵܐ ܕܐܲܪܥܵܐ. ܢܸܗܘܹܐ ܕܲܗܝܼܢ ܘܫܲܡܝܼܢ: ܪܸܥܝܵܐ ܕܲܒ̣ܥܝܼܪܟ݂ܘܿܢ ܒܝܵܘܡܵܐ ܗܵܘܿ ܒܐܲܬ̣ܪܵܐ ܫܲܡܝܼܢܵܐ.
24 ܘܒܲܩܪܹ̈ܐ ܘܐܲܪ̈ܘܵܢܹܐ ܕܦܵܠܚܝܼܢ ܒܐܲܪܥܵܐ: ܒܠܝܼܠܵܐ ܚܲܡܝܼܡܵܐ ܢܹܐܟ݂ܠܘܼܢ: ܕܲܡܣܲܠܲܩ ܒܪܲܦ̮ܫܵܐ ܘܲܒ̣ܡܲܕ݂ܪ̱ܝܵܐ.
25 ܘܢܸܗܘܹܐ ܥܲܠ ܟܠ ܛܘܼܪ ܕܪܵܡ: ܘܥܲܠ ܟܠ ܪܵܡܬ̣ܵܐ ܕܪܵܡܵܐ: ܢܸܪܕܘܿܢ ܬܲܦܹ̈ܐ ܕܡܲـ̈ـܝܵܐ ܒܝܵܘܡܵܐ ܕܩܸܛܠܵܐ ܪܲܒܵܐ: ܘܲܒ̣ܣܘܼܚܵܦܵܐ ܕܡܲܓ̣̈ܕ̇ܠܹܐ.
26 ܘܢܸܗܘܹܐ ܢܘܼܗܪܹܗ ܕܣܲܗܪܵܐ ܐܲܝܟ݂ ܢܘܼܗܪܹܗ ܕܫܸܡܫܵܐ. ܘܢܘܼܗܪܹܗ ܕܫܸܡܫܵܐ ܢܸܗܘܹܐ ܚܲܕ݂ ܒܫܲܒ̣ܥܵܐ: ܐܲܝܟ݂ ܢܘܼܗܪܵܐ ܕܫܲܒ̣ܥܵܐ ܝܵܘ̈ܡܝܼܢ: ܒܝܵܘܡܵܐ ܕܢܸܥܨܘܿܒ̣ ܡܵܪܝܵܐ ܬܒ̣ܵܪܵܐ ܕܥܲܡܹܗ: ܘܟܹܐܒ̣ܵܐ ܕܲܡܚܘܿܬܹܗ ܢܲܐܣܹܐ.
27 ܗܵܐ ܫܡܹܗ ܕܡܵܪܝܵܐ ܐܵܬܹ̇ܐ ܡ̣ܢ ܪܘܼܚܩܵܐ ܝܵܩܹ̇ܕ݂ ܪܘܼܓ̣ܙܹܗ: ܘܲܫܒ̣ܝܼܚ ܡܲܫܩ̄ܠܹܗ. ܘܣܸܦ̈ܘܵܬܹܗ ܡܲܠ̈ܝܵܢ ܪܘܼܓ̣ܙܵܐ ܘܠܸܫܵܢܹܗ ܐܲܝܟ݂ ܢܘܼܪܵܐ ܕܝܵܩ̇ܕܵܐ.
28 ܘܪܘܼܚܹܗ ܐܲܝܟ݂ ܢܲܚܠܵܐ ܕܓܵܪܹܦ. ܥܕܲܡܵܐ ܠܨܵܘܪܵܐ ܢܸܦܣܘܿܩ: ܠܡܸܕ݂ܠܲܚ ܥܲܡܡܹ̈ܐ ܡܸܛܠ ܛܵܠܝܘܼܬ̣ܗܘܿܢ ܣܪܝܼܩܬܵܐ: ܘܠܲܦܓ̣ܘܼܕ̇ܬܵܐ ܡܲܛܥ̱ܝܵܢܝܼܬ̣ܵܐ ܕܥܲܠ ܦܲܟܲܝ̈ܗܘܿܢ ܕܥܲܡܡܹ̈ܐ.
29 ܬܸܫܒ̇ܘܿܚܬܵܐ ܢܸܗܘܹܐ ܠܟ݂ܘܿܢ ܟܠܝܼܠܵܐ ܕܐܹܬ̣ܩܲܕܲܫ ܒܚܲܓܵܐ. ܘܚܲܕ݂ܘܼܬܹܗ ܕܠܸܒܵܐ ܐܲܝܟ݂ ܗܵܘ ܕܲܡܗܲܠܸܟ݂ ܒܚܲܕ݂ܘܼܬ̣ܵܐ: ܠܡܹܐܬ̣ܵܐ ܠܛܘܼܪܹܗ ܕܡܵܪܝܵܐ: ܠܘܵܬ̣ ܬܲܩܝܼܦܵܐ ܕܝܲܥܩܘܿܒ̣.
30 ܘܢܲܫܡܲܥ ܡܵܪܝܵܐ ܫܘܼܒ̣ܚܵܐ ܕܩܵܠܹܗ. ܘܲܡܚܘܿܬ̣ܵܐ ܕܲܕ݂ܪܵܥܹܗ ܢܚܵܘܹܐ ܒܚܸܡܬ̣ܵܐ ܕܪܘܼܓ̣ܙܵܐ: ܘܲܒ̣ܫܲܠܗܹܒ̣ܝܼܬ̣ܵܐ ܕܢܘܼܪܵܐ ܕܐܵܟ݂ܠܵܐ: ܒܙܵܪܝܼܦ̮ܬܵܐ ܕܚܵܒ̣ܛܵܐ ܘܟܹܐܦܹ̈ܐ ܕܒܲܪܕ݂ܵܐ.
31 ܡܸܛܠ ܕܡ̣ܢ ܩܕ݂ܵܡ ܪܲܒ̇ܘܼܬܹܗ ܕܡܵܪܝܵܐ ܢܸܬ̇ܬ̇ܒܲܪ ܐܵܬ̣ܘܿܪܵܝܵܐ: ܘܲܒ̣ܫܲܒ̣ܛܵܐ ܢܸܒ̣ܠܲܥ.
32 ܘܢܸܗܘܹܐ ܒܟ݂ܠܗܘܿܢ ܥܒ̣ܵܕ݂ܵܘ̈ܗܝ: ܚܘܼܛܪܵܐ ܕܫܘܼܥܒܵܕ݂ܵܐ ܕܲܢܢܝܼܚ ܡܵܪܝܵܐ ܥܠܵܘܗܝ: ܒܲܦܠܲܓܹ̈ܐ: ܘܲܒ̣ܟܸܢܵܪܹ̈ܐ ܘܒܲܩܪܵܒ̣ܵܐ ܥܲܫܝܼܢܵܐ ܢܸܬ̣ܟܲܬܲܫ ܒܹܗ.
33 ܡܸܛܠ ܕܲܡܛܲܝܸܒ̣ ܡ̣ܢ ܩܕ݂ܵܡ ܝܵܘ̈ܡܵܬ̣ܵܐ ܡܹܐܟ݂ܘܼܠܬܹ̇ܗ ܐܵܦ ܗ̤ܝ ܐܸܬ̇ܛܲܝܒܲܬ̤ ܕܬܲܡܠܸܟ݂: ܘܥܲܡܩܲܬ̣ ܘܪܵܘܚܲܬ̤ ܒܹܝܬ̣ ܡܲܥܡܪܵܗ̇ ܣܲܓ̇ܝܼܐܝܼܢ ܩܲܝܣܹ̈ܐ ܘܢܘܼܪܵܐ. ܘܲܢܫܲܡܬܹܗ ܕܡܵܪܝܵܐ ܐܲܝܟ݂ ܢܲܚܠܵܐ ܕܟܸܒ̣ܪܝܼܬ̣ܵܐ ܕܝܵܩܕܵܐ ܒܹܗ.
1 ܘܵܝ ܠܲܕ݂ܢܵܚܬ̇ܝܼܢ ܠܡܸܨܪܹܝܢ ܠܡܸܬ̣ܥܲܕܵܪܘ: ܘܥܲܠ ܪ̈ܲܟ݂ܫܵܐ ܡܸܬ̇ܬܲܟ݂ܠܝܼܢ: ܘܡܸܬ̇ܬܲܟ݂ܠܝܼܢ ܥܲܠ ܡܲܪ̈ܟ̇ܒ̣ܵܬ̣ܵܐ ܣܲܓ̇ܝܼܵܐ̈ܬ̣ܵܐ: ܘܥܲܠ ܦܲܪ̈ܵܫܹܐ ܕܛܵܒ̣ ܥܲܫܝܼܢܝܼܢ. ܘܠܵܐ ܐܸܬ̇ܬ̇ܟܸܠܘ ܥܲܠ ܩܲܕ̇ܝܼܫܵܐ ܕܝܼܣܪܵܝܹܠ: ܘܲܠܡܵܪܝܵܐ ܠܵܐ ܒܥ̣ܵܘ.
2 ܘܲܒ̣ܚܸܟ݂ܡ̱ܬܹܗ ܐܲܝܬ̇ܝ ܒܝܼܫܬܵܐ: ܘܡܸܠܵܘ̈ܗܝ ܠܵܐ ܐܲܥܒܲܪ. ܘܩܵܡ ܥܲܠ ܒ̣ܵܝܬܵܐ ܕܒ̣ܝܼܫܹ̈ܐ: ܘܥܲܠ ܥܘܼܕ݂ܪܵܢܵܐ ܕܥܵܒ̣ܕܲܝ̈ ܥܵܘܼܠܵܐ.
3 ܘܡܸܨܪ̈ܵܝܹܐ ܐ̄ܢܵܫܵܐ ܐܸܢܘܿܢ: ܘܠܵܐ ܗܘ̤ܵܘ ܐܲܠܵܗܹ̈ܐ ܘܪ̈ܲܟ݂ܫܗܘܿܢ ܕܒܸܣܪܵܐ ܐܸܢܘܿܢ: ܘܠܵܐ ܗܘ̤ܵܘ ܕܪܘܼܚܵܐ. ܘܡܵܪܝܵܐ ܢܲܪܟܸ̇ܢ ܐܝܼܕܹܗ: ܘܢܸܣܬ̇ܚܸܦ ܡܥܲܕ̇ܪܵܢܵܐ. ܘܢܸܦܸܠ ܐܵܦ ܗܵܘܿ ܕܡܸܬ̣ܥܲܘܲܪ ܘܟ݂ܠܗܘܿܢ ܐܲܟ݂ܚ̄ܕ݂ܵܐ ܢܣܘܼܦܘܼܢ.
4 ܡܸܛܠ ܕܗܵܟܲܢܵܐ ܐܸܡܲܪ ܠܝܼ ܡܵܪܝܵܐ: ܐܲܝܟ݂ ܕܢܵܗܹ̇ܡ ܐܲܪܝܵܐ ܘܓ̣ܘܼܪܝܵܐ ܕܐܲܪܝܵܐ ܥܲܠ ܡܸܕܸ̇ܡ ܕܬ̣ܵܒܲܪ: ܘܩܵܥܹ̇ܝܢ ܒܹܗ ܣܘܿܓ̣ܵܐܐ ܕܪ̈ܵܥܵܘܵܬ̣ܵܐ ܘܡ̣ܢ ܩܵܠܗܘܿܢ ܠܵܐ ܕܵܚܹ̇ܠ: ܘܡ̣ܢ ܣܘܿܓ̣ܵܐܗܘܿܢ ܠܵܐ ܡܸܬ̇ܬ̇ܙܝܼܥ. ܗܵܟܲܢܵܐ ܢܸܚܘܿܬ̣ ܡܵܪܝܵܐ ܚܲܝܠܬ̣ܵܢܵܐ ܠܡܸܬ̣ܚܲܝܵܠܘܼ ܥܲܠ ܛܘܼܪܵܐ ܕܨܸܗܝܘܿܢ: ܘܥܲܠ ܪ̈ܵܡܵܬ̣ܵܗ̇.
5 ܐܲܝܟ݂ ܨܸܦܪܹ̈ܐ ܕܦܵܪ̈ܚܵܢ: ܗܵܟܲܢܵܐ ܢܲܓܸ̇ܢ ܡܵܪܝܵܐ ܚܲܝܠܬ̣ܵܢܵܐ ܥܲܠ ܐܘܿܪܸܫܠܸܡ: ܢܲܓܸ̇ܢ ܘܲܢܦܲܨܸܐ: ܘܲܢܣܲܝܲܥ ܘܲܢܥܲܕܲܪ.
6 ܬܘܼܒ̣ܘ ܒܢܲܝ̈ ܝܼܣܪܵܝܹܠ: ܕܐܲܥ̣ܫܸܢܬ̇ܘܿܢ ܡܲܪܕ̇ܘܼܬ̣ܵܐ.
7 ܡܸܛܠ ܕܲܒ̣ܝܵܘܡܵܐ ܗܵܘܿ: ܢܲܣܠܘܿܢ ܐ̄ܢܵܫܵܐ ܦܬܲܟ݂ܪܹ̈ܐ ܕܕܲܗܒ̣ܵܐ ܘܲܕ݂ܣܹܐܡܵܐ: ܕܲܥ̣ܒܲܕ݂ ܠܟ݂ܘܿܢ ܐܝܼܕܲܝ̈ܟ̇ܘܿܢ ܚܛܝܼܬ̣ܵܐ.
8 ܘܢܸܦܸܠ ܐܵܬ̱̣ܘܿܪܵܝܵܐ ܒܚܲܪܒܵܐ: ܚܲܪܒܵܐ ܠܵܐ ܕܓܲܒ̣ܪܹ̈ܐ: ܘܚܲܪܒܵܐ ܠܵܐ ܕܓܲܢ̄ܒܵܪܹ̈ܐ ܬܹܐܟ݂ܠܝܼܘܗܝ ܘܢܸܥܪܘܿܩ ܠܹܗ ܡ̣ܢ ܩܕ݂ܵܡ ܚܲܪܒܵܐ: ܘܲܥܠܲܝܡܵܘ̈ܗܝ ܠܐܵܬ̤ܵܐ ܢܸܗܘܘܿܢ.
9 ܘܒܲܫܩܝܼܦܵܐ ܕܡܲܥܡܪܹܗ ܢܸܥܡܲܪ. ܘܢܸܬ̇ܬܲܒ̣ܪܘܼܢ ܡ̣ܢ ܐܵܬ̤ܵܐ ܪܵܘ̱ܪ̈ܒ̣ܵܢܵܘܗܝ. ܐܵܡܲܪ ܡܵܪܝܵܐ ܕܢܘܼܗܪܹܗ ܒܨܸܗܝܘܿܢ: ܘܬܲܢܘܼܪܹܗ ܒܐܘܿܪܸܫܠܸܡ.
1 ܗܵܐ ܒܙܲܕ̇ܝܼܩܘܼܬ̣ܵܐ ܡܲܠܟܵܐ. ܘܪܵܘ̱ܪ̈ܒ̣ܵܢܹܐ ܒܕ݂ܝܼܢܵܐ ܢܸܫܬܲܠܛܘܼܢ.
2 ܘܢܸܗܘܹܐ ܓܲܒ̣ܪܵܐ ܐܲܝܟ݂ ܓܸܢܝܵܐ ܠܪܘܼܚܵܐ. ܘܐܲܝܟ݂ ܣܸܬܵܪܵܐ ܠܙܵܪܝܼܦ̮ܬܵܐ: ܘܐܲܝܟ݂ ܬܲܦܵܐ ܕܡܲـ̈ـܝܵܐ ܒܨܲܗܝܵܐ: ܘܐܲܝܟ݂ ܛܸܠܵܠܵܐ ܕܟܹܐܦܵܐ ܥܲܫܝܼܢܬܵܐ ܒܐܲܪܥܵܐ ܡܛܲܪܦܬܵܐ.
3 ܘܠܵܐ ܢܸܬ̇ܬ̇ܫ̈ܝܼܥܵܢ ܥܲܝܢܲܝ̈ܗܘܿܢ ܕܐܲܝܠܹܝܢ ܕܚܵܙܹ̇ܝܢ. ܘܐܸܕ݂ܢܲܝ̈ܗܘܿܢ ܕܐܲܝܠܹܝܢ ܕܫܵܡ̇ܥܝܼܢ: ܢܨܘܼ̈ܬ̣ܵܢ.
4 ܘܠܸܒܵܐ ܕܲܣܟܲܠ ܢܸܣܬܲܟܲܠ ܝܑܼܕܲܥܬ̣ܵܐ: ܘܠܸܫܵܢܵܐ ܕܠܲܥܓܵܐ ܢܸܣܬܲܪܗܲܒ̣ ܠܲܡܡܲܠܵܠܘܼ ܫܠܵܡܵܐ.
5 ܘܠܵܐ ܢܸܩܪܘܼܢ ܬܘܼܒ̣ ܠܫܵܛܝܵܐ ܫܲܠܝܼܛܵܐ. ܐܵܦܠܵܐ ܠܲܣܪܝܼܩܵܐ ܢܸܩܪܘܿܢ ܦܵܪܘܿܩܵܐ.
6 ܡܸܛܠ ܕܫܵܛ̇ܝܵܐ ܫܵܛܝܘܼܬ̣ܵܐ ܡܡܲܠܸܠ ܘܠܸܒܹ̇ܗ ܚܵܫܹ̇ܠ ܥܵܘܼܠܵܐ. ܕܢܸܥܒܸ̇ܕ݂ ܚܲܠܦܘܼܬ̣ܵܐ: ܘܲܢܡܲܠܸܠ ܥܲܠ ܛܵܥ̇ܝܘܼܬ̣ܵܐ: ܘܲܢܣܲܪܸܩ ܢܲܦ̮ܫܵܐ ܕܟܲܦܢܵܐ: ܘܡܲܫܬ̇ܝܵܐ ܕܨܲܗܝܵܐ ܢܓܲܝܸܙ.
7 ܒܝܼܫܝܼܢ ܐܸܢܘܿܢ ܡܵܐܢܵܘ̈ܗܝ ܕܲܣܪܝܼܩܵܐ. ܘܗ̤ܘ ܬܲܪܥܝܼܬ̣ܵܐ ܡܸܬ̣ܚܲܫܲܒ̣: ܠܲܡܚܲܒܵܠܘܼ ܡܸܣܟܹ̇ܢܹ̈ܐ ܒܡܹܐܡܪܵܐ ܕܫܘܼܩܪܵܐ: ܘܡܸܠܬܹܗ ܕܒ̣ܵܝܫܵܐ ܒܕ݂ܝܼܢܵܐ.
8 ܘܪܲܒܵܐ ܪܲܒ̇ܘܼܬ̣ܵܐ ܡܸܬ̣ܪܲܥܹܐ ܘܗ̤ܘ ܥܲܠ ܪܲܒ̇ܘܼܬ̣ܵܐ ܢܩܘܼܡ.
9 ܢܸܫܹ̈ܐ ܥܲܬ̇ܝܼܪ̈ܵܬ̣ܵܐ: ܩܘܼܡܹ̈ܝܢ ܫܡܲܥܹ̈ܝܢ ܩܵܠܝ. ܒܢܵـ̈ـܬ̣ܵܐ ܕܲܡܣܲܒ̇ܪ̈ܵܢ: ܨܘܼ̈ܬܹܝܢ ܡܸܠܲܝ.
10 ܝܵܘ̈ܡܵܬ̣ܵܐ ܕܫܲܢ̄ܬܵܐ ܢܸܪ̈ܓ̇ܙܵܢ ܐܲܝܠܹܝܢ ܕܲܡܣܲܒ̇ܪ̈ܵܢ. ܡܸܛܠ ܕܲܓ̣ܡܲܪ ܩܛܵܦܵܐ: ܘܐܸܬ̣ܚ̄ܡܸܠ: ܘܠܵܐ ܐܸܬ̣ܵܐ.
11 ܙܘܼܥܹ̈ܝܢ ܥܲܬ̇ܝܼܪ̈ܵܬ̣ܵܐ: ܘܲܪܓܲܙܹܝܢ ܐܲܝܠܹܝܢ ܕܲܡܣܲܒ̇ܪ̈ܵܢ ܫܠܲܚܹ̈ܝܢ ܥܲܪܛܸܠ: ܡܚܵܝܑܹܝ̈ܢ ܣܲܩܹ̈ܐ ܒܚܲܨܲܝܟܹ̇ܝ̈ܢ.
12 ܘܥܲܠ ܬܕܲܝ̈ܟܹ̇ܝܢ ܐܲܪ̈ܩܸܕܹܝܢ: ܥܲܠ ܬܸܕ݂ܐܵܐ ܕܚܲܩܠܵܐ: ܘܥܲܠ ܓܦܸܬܵܐ ܕܦܹܐܪܹ̈ܝܗ̇.
13 ܘܥܲܠ ܐܲܪܥܹܗ ܕܥܲܡܝ ܟܘܼ̈ܒܹ̇ܐ ܘܝܲܥܪܵܐ ܢܹܐܥܘܿܢ: ܘܲܒ̣ܟ݂ܠܗܘܿܢ ܒܵـ̈ـܬܹ̇ܐ ܕܚܲܕ݂ܘܼܬ̣ܵܐ: ܘܒܲܩܪܝܼܬ̣ܵܐ ܥܲܫܝܼܢܬܵܐ.
14 ܡܸܛܠ ܕܢܵܘܣܵܐ ܐܸܬ̇ܛܥܝܼ. ܘܚܲܝܠܵܐ ܕܲܩܪܝܼܬ̣ܵܐ ܐܸܫܬ̇ܒܸܩ. ܘܫܘܼܦ̱ܪܗܘܿܢ ܕܒ̣ܵـ̈ـܬܹ̇ܐ ܗܘ̤ܵܐ ܠܲܡܥܲܪܹ̈ܐ ܥܕܲܡܵܐ ܠܥܵܠܲܡ. ܟܘܼ̈ܒܹ̇ܐ ܘܚܲܕ݂ܘܼܬ̣ܵܐ ܠܲܥܪ̈ܵܕܹܐ: ܘܒܹܝܬ̣ ܪܸܥܝܵܐ ܠܲܓ̣ܙܵܪܹ̈ܐ ܕܥܵـ̈ـܢܵܐ.
15 ܥܕܲܡܵܐ ܕܬܸܬ̇ܥܝܼܪ ܥܠܲܝܢ ܪܘܼܚܵܐ ܡ̣ܢ ܡܪܵܘܡܵܐ: ܘܢܸܗܘܐ ܡܲܘܒ̇ܪܵܐ ܐܲܝܟ݂ ܟܲܪܡ̄ܠܵܐ: ܘܟܲܪܡ̄ܠܵܐ ܐܲܝܟ݂ ܥܒ̣ܵܐ ܢܸܬ̣ܚܫܸܒ̣.
16 ܘܢܸܫܪܹܐ ܕܝܼܢܵܐ ܒܡܲܕ݂ܒ̇ܪܵܐ: ܘܙܲܕ̇ܝܼܩܘܼܬ̣ܵܐ ܒܟܲܪܡ̄ܠܵܐ ܬܸܬ̣̱ܝܼܗܸܒ̣.
17 ܘܢܸܗܘܹܐ ܥܒ̣ܵܕ݂ܵܗ̇ ܕܙܲܕ̇ܝܼܩܘܼܬ̣ܵܐ ܫܠܵܡܵܐ: ܘܦܘܼܠܚܵܢܵܗ̇ ܕܙܲܕ̇ܝܼܩܘܼܬ̣ܵܐ ܫܸܠܝܵܐ: ܘܣܲܒ̣ܪܵܐ ܠܥܵܠܲܡ ܥܵܠܡܝܼܢ.
18 ܘܢܸܬܸ̇ܒ̣ ܥܲܡܝ ܒܕܲܝܪܵܐ ܕܲܫܠܵܡܵܐ: ܘܲܒ̣ܡܲܫܟ̇ܢܵܐ ܕܣܲܒ̣ܪܵܐ: ܘܒܹܝܬ̣ ܡܲܫ̱ܪܝܵܐ ܕܣܲܒ̣ܪܵܐ.
19 ܘܲܒ̣ܪܕ݂ܵܐ ܢܸܚܘܿܬ̣ ܥܲܠ ܥܵܒ̣ܵܐ: ܘܐܲܝܟ݂ ܦܩܲܥܬ̣ܵܐ ܬܸܬ̣ܡ̱ܟܸܟ݂ ܡܕ݂ܝܼܢ̄ܬܵܐ.
20 ܛܘܼܒܲܝܟ̇ܘܿܢ ܕܙܵܪܥܝܼܢ ܥܲܠ ܟܠ ܡܝܼ̈ܢ: ܟܲܪ ܕܕ݂ܵܪܹܟ݂ ܬܵܘܪܵܐ ܘܲܚܡܵܪܵܐ.
1 ܘܵܝ ܠܲܕ݂ܒ̣ܵܐܹ̇ܙ ܐܲܢ̄ܬ̇ܘܿܢ ܠܵܐ ܬܸܒ̇ܙܘܼܢ. ܘܕܲܓܵܠܵܐ ܠܵܐ ܢܕ̇ܓܸ̇ܠ ܒܟ݂ܘܿܢ. ܡܵܐ ܕܲܨܒ̇ܝܼܬ̇ܘܿܢ ܠܡܸܒܲܙ: ܬܸܬ̣ܒܲܙܘܼܢ. ܘܡܵܐ ܕܲܨܒܲܝܬ̇ܘܿܢ ܠܲܡܕܲܓܵܠܘܼ: ܢܸܬ̇ܕܲܠܲܓ ܒܟ݂ܘܿܢ.
2 ܡܵܪܝܵܐ: ܪܲܚܸܡ ܥܠܲܝܢ: ܡܸܛܠ ܕܲܥܠܲܝܟ̇ܘܼ ܣܲܒ̣ܪܲܢ. ܗܘ̤ܝܼ ܥܵܕ݂ܘܿܪܲܢ ܒܨܲܦܪܵܐ: ܘܦܵܪܘܿܩܲܢ ܒܙܲܒ̣ܢܵܐ ܕܐܘܼܠܨܵܢܵܐ.
3 ܡ̣ܢ ܩܵܠ ܕܸܚ̱ܠܬ̣ܵܟ݂ ܢܵܕ݂ܘ ܥܲܡܡܹ̈ܐ ܘܡ̣ܢ ܪܵܡܘܼܬ̣ܵܟ݂ ܐܸܬ̣ܒܲܕܲܪܘ ܥܲܡܡܹ̈ܐ.
4 ܡܸܟܹ̇ܝܠ ܬܸܬ̣ܟ̇ܢܸܫ ܒܸܙܲܬ̣ܟ݂ܘܿܢ ܐܲܝܟ݂ ܟܢܘܼܫܝܵܐ ܕܙܵܚܠܵܐ: ܘܐܲܝܟ݂ ܟܢܘܼܫܝܵܐ ܕܩܲܡܨܵܐ ܕܲܟ݂ܢܝܼܫ.
5 ܐܸܬ̇ܬ̇ܪܝܼܡ ܡܵܪܝܵܐ ܕܥܵܡܲܪ ܒܡܪ̈ܵܘܡܹܐ. ܘܲܡܠܵܗ̇ ܠܨܸܗܝܘܿܢ ܕܝܼܢܵܐ ܘܙܲܕ̇ܝܼܩܘܼܬ̣ܵܐ.
6 ܘܢܸܗܘܹܐ ܙܲܒ̣ܢܵܟ݂ ܗܲܝܡܵܢܘܼܬ̣ܵܐ: ܘܦܘܼܪܩܵܢܵܟ݂ ܒܣܸܬܵܪܵܐ. ܚܸܟ݂ܡ̱ܬ̣ܵܐ ܘܝܼܕܲܥܬ̣ܵܐ: ܕܸܚ̱ܠܬ̣ܵܐ ܕܡܵܪܝܵܐ ܗ̤ܝ ܗ̄ܝܼ ܓ̇ܙܹܗ.
7 ܐܸܢ ܢܸܬ̣ܚ̄ܙܹܐ ܠܗܘܿܢ: ܢܲܝܠܠܘܼܢ ܩܲܫܝܵܐܝܼܬ̣. ܘܡܲܠܲܐܟܹ̈ܐ ܕܲܫܠܵܡܵܐ ܢܸܒ̣ܟ̇ܘܿܢ ܡܲܪܝܼܪܵܐܝܼܬ̣.
8 ܨܕ݂ܵܘ ܫܒ̣ܝܼ̈ܠܹܐ: ܘܲܒ̣ܛܸܠ̣ܘ ܥܵܒ̣ܪ̈ܲܝ ܐܘܼܪܚܵܐ. ܘܲܒ̣ܛܸܠ ܩܝܵܡܵܐ. ܘܩܘܼܪ̈ܝܵܐ ܐܸܣܬ̇ܠܝܼ ܘܐ̄ܢܵܫܵܐ ܠܵܐ ܐܸܬ̣ܚ̄ܫܸܒ̣ܘ.
9 ܐܲܠܲܬ̤ ܘܝܸܬ̣ܒܲܬ̤ ܒܐܸܒ̣ܠܵܐ ܐܲܪܥܵܐ. ܘܐܲܚܦܲܪ ܠܸܒ̣ܢܵܢ ܘܲܒ̣ܗܸܬ̣. ܘܲܗܘ̤ܵܐ ܫܵܪܘܿܢܵܐ ܐܲܝܟ݂ ܦܩܲܥܬ̣ܵܐ. ܚܸܪܒܲܬ̤ ܒܲܝܫܵܢ ܘܟܲܪܡ̄ܠܵܐ.
10 ܡܸܟܹ̇ܝܠ ܐܹܩܘܼܡ ܐܵܡܲܪ ܡܵܪܝܵܐ: ܡܸܟܹ̇ܝܠ ܐܸܬ̇ܬ̇ܪܝܼܡ: ܘܡܸܟܹ̇ܝܠ ܐܸܫܬܲܩܲܠ.
11 ܘܬܸܒ̣ܛܢܘܼܢ ܟܘܼ̈ܒܹ̇ܐ: ܘܬܹܐܠܕ̇ܘܼܢ ܩܸܫܬ̣ܵܐ ܒܪܘܼܚܟ݂ܘܿܢ. ܢܘܼܪܵܐ ܬܹܐܟ݂ܘܿܠܟ݂ܘܿܢ.
12 ܘܢܸܗܘܘܿܢ ܥܲܡܡܹ̈ܐ ܡܵܘܩ̄ܕ݂ܝܼܢ ܐܲܝܟ݂ ܟܸܠܫܵܐ. ܘܐܲܝܟ݂ ܟܘܼ̈ܒܹ̇ܐ ܕܲܟ݂ܢܝܼܫܝܼܢ ܒܢܘܼܪܵܐ ܢܹܐܩܕ̇ܘܼܢ.
13 ܫܡܲܥܘ ܪ̈ܲܚܝܼܩܹܐ ܡܸܕܸ̇ܡ ܕܥܸܒ̣ܕܹ̇ܬ̣ ܘܕܲܥܘ ܩܲܪ̈ܝܼܒܹܐ ܓܲܢ̄ܒܵܪܘܼܬ̣ܝ.
14 ܐܸܬ̣ܪ̱ܗܸܒ̣ܘ ܚܲܛܵܝܹ̈ܐ ܒܨܸܗܝܘܿܢ. ܘܲܪܬܹܝܬ̣ܵܐ ܢܦܲܠ̣ ܒܚܲܢ̈ܦܹܐ. ܡܲܢܘܼ ܢܸܥܡܲܪ ܠܲܢ ܥܲܡ ܢܘܼܪܵܐ ܐܵܟܹ̇ܠܬ̣ܵܐ. ܘܡܲܢܘܼ ܢܸܥܡܲܪ ܠܲܢ ܥܲܡ ܡܵܘܩܕܲܬ̣ ܥܵܠܡܹ̈ܐ.
15 ܕܲܡܗܲܠܸܟ݂ ܒܙܲܕ̇ܝܼܩܘܼܬ̣ܵܐ: ܘܲܡܡܲܠܸܠ ܬܪܝܼܨܘܼܬ̣ܵܐ: ܘܣܵܢܹ̇ܐ ܢܸܟ݂ܠܵܐ ܘܲܛܠܘܼܡܝܵܐ: ܘܢܵܦܹ̇ܨ ܐܝܼܕܹܗ ܡ̣ܢ ܕܲܠܡܸܣܲܒ̣ ܫܘܼܚܕܵܐ: ܘܲܡܣܲܟܲܪ ܐܸܕ݂ܢܵܘ̈ܗܝ ܕܠܵܐ ܢܸܫܡܲܥ: ܘܲܡܥܲܡܸܨ ܥܲܝܢܵܘ̈ܗܝ ܕܠܵܐ ܢܸܚܙܹܐ ܒܝܼܫܬܵܐ.
16 ܗܵܢܵܐ ܒܲܡܪܵܘܡܵܐ ܢܸܥܡܲܪ. ܘܲܒ̣ܥܘܼܫܢܵܐ ܕܲܫܩܝܼܦܵܐ ܡܲܫ̱ܪܝܹܗ. ܠܲܚܡܹܗ ܝܑܼܗܝ̣ܒ̣: ܘܡܵܘ̈ܗܝ ܡܗܲܝܡܢܝܼܢ.
17 ܠܡܲܠܟܵܐ ܒܫܘܼܦܪܹܗ ܢܸܚ̈ܙܝܵܢ ܥܲܝܢܲܝ̈ܟ: ܒܐܲܪ̈ܥܵܬ̣ܵܐ ܪ̈ܲܚܝܼܩܵܬ̣ܵܐ. ܘܠܸܒܵܟ݂ ܢܸܬ̣ܝܲܠܲܦ ܕܸܚ̱ܠܬ̣ܵܐ.
18 ܐܲܝܟܵܐ ܗ̄ܘܼ ܣܵܦܪܵܐ ܐܲܝܟܵܐ ܗ̄ܘܼ ܬܵܩܘܿܠܵܐ ܐܲܝܟܵܘ ܕܡܵܢܵܐ ܡܲܓܕ̇ܠܹ̈ܐ ܠܥܲܡܵܐ ܥܲܫܝܼܢܵܐ.
19 ܠܵܐ ܢܚܘܼܪ ܠܥܲܡܵܐ ܕܲܥܛܸܠ ܫܸܡܥܹܗ: ܘܲܠܥܸܓ̣ ܠܸܫܵܢܹܗ: ܘܠܵܐ ܡܸܣܬܲܟܲܠ.
20 ܚܙܝܼ ܠܨܸܗܝܘܿܢ ܩܪܝܼܬ̣ܵܐ ܕܥܲܕ݂ܥܹ̈ܕܲܝܢ. ܘܥܲܝܢܲܝ̈ܟ ܢܚܘܼܪ̈ܵܢ ܒܐܘܿܪܸܫܠܸܡ ܕܲܝܪܵܐ ܥܲܬ̇ܝܼܪܬܵܐ. ܡܲܫܟ̇ܢܵܐ ܕܠܵܐ ܙܵܐܲܥ: ܘܠܵܐ ܡܸܬ̣ܥܲܩܪ̈ܵܢ ܣܸܟܵܘ̈ܗܝ ܠܥܵܠܡܝܼܢ: ܘܟ݂ܠܗܘܿܢ ܛܘܼܢܒܵܘ̈ܗܝ ܠܵܐ ܡܸܬ̣ܦܲܣܩܝܼܢ.
21 ܡܸܛܠ ܕܡܵܪܝܵܐ ܫܡܵܐ ܗ̄ܘܼ ܠܲܢ ܡܫܲܒ̇ܚܵܐ ܘܗ̤ܘ ܢܸܗܘܹܐ ܠܲܢ ܐܲܬ̣ܪܵܐ ܢܲܗܝܼܪܵܐ: ܘܢܲܗܝܼܪܘܼܬ̣ܵܐ ܘܲܪܘܲܚܬ̣ܵܐ ܕܐܝܼ̈ܕܲܝܵܐ. ܕܠܵܐ ܬܲܡܠܸܟ݂ ܡܵܪܘܼܬ̣ܵܐ ܕܫܲܠܝܼܛܵܐ ܘܥܲܫܝܼܢܵܐ ܕܢܸܫܬ̇ܟܲܚ: ܠܵܐ ܢܸܥܒܲܪ ܒܵܗ̇.
22 ܡܸܛܠ ܕܡܵܪܝܵܐ ܗ̄ܘܼ ܕܲܝܵܢܵܐ ܘܡܵܪܝܵܐ ܗ̄ܘܼ ܡܒܲܕ̇ܩܵܢܵܐ. ܘܡܵܪܝܵܐ ܗ̄ܘܼ ܡܲܠܟܲܢ: ܘܗܘ̤ܝܘܼ ܦܵܪܘܿܩܲܢ.
23 ܐܸܫܬ̇ܪܝܼܘ ܚܲܒ̣̈ܠܲܝܟ̇ܝ ܕܠܵܐ ܐܸܫܬܲܕܪܘ ܘܐܸܬ̣ܪ̱ܟܸܢܘ ܥܲܡܘܼܕܲܝ̈ܟ̇ܝ ܕܠܵܐ ܦܫܲܛܘ ܐܵܬ̤ܵܐ: ܥܕܲܡܵܐ ܕܦܲܠܸܓ̣ܘ ܒܸܙܬ̣ܵܐ: ܘܣܘܿܓ̣ܵܐܐ ܕܲܚܓܝܼܪܹ̈ܐ ܫܒܵܘ ܫܒ̣ܝܼܬ̣ܵܐ.
24 ܘܠܵܐ ܢܹܐܡܲܪ ܥܵܡܘܿܪܵܐ ܕܲܟ݂ܪܝܼܗ ܐ̄ܢܵܐ ܥܲܡܵܐ ܕܝܵܬܹܒ̣ ܒܵܗ̇: ܩܲܒܸ̇ܠ ܚܛܵܗܵܐ.
1 ܐܲܬ̣ܪܵܐ ܕܕ݂ܝܼܢܵܐ. ܩܪܘܿܒ̣ܘ ܥܲܡܡܹ̈ܐ ܠܡܸܫܡܲܥ: ܘܨܘܼ̈ܬܹܝܢ ܐܸܡ̈ܘܵܬ̣ܵܐ. ܬܸܫܡܲܥ ܐܲܪܥܵܐ ܒܲܡܠܹܐܵܗ̇: ܘܟ݂ܠܗܘܿܢ ܥܵܡܘܿܪܹ̈ܝܗ̇.
2 ܡܸܛܠ ܕܪܘܼܓ̣ܙܹܗ ܕܡܵܪܝܵܐ ܥܲܠ ܟܠܗܘܿܢ ܥܲܡܡܹ̈ܐ. ܘܚܸܡܬܹܗ ܥܲܠ ܟܠܹܗ ܚܲܝܠܗܘܿܢ ܕܢܸܚܪܘܿܒ̣ ܐܸܢܘܿܢ: ܘܢܲܫܠܸܡ ܐܸܢܘܿܢ ܠܩܸܛܠܵܐ.
3 ܘܢܸܫܬ̇ܕ݂ܘܿܢ ܩܛܝܼܠܲܝ̈ܗܘܿܢ. ܘܢܸܡܚܸܐ ܪܹܝܚܵܐ ܕܲܫܠܲܕܲܝ̈ܗܘܿܢ. ܘܢܸܬ̣ܡ̱ܣܘܿܢ ܛܘܼܪܹ̈ܐ ܡ̣ܢ ܕܸܡܗܘܿܢ.
4 ܘܢܸܬ̣ܡ̱ܣܘܿܢ ܟܠ ܚܲܝܠܵـ̈ـܘܵܬ̣ܵܐ ܕܲܫܡܲܝܵܐ. ܘܢܸܬ̣ܟܲܪܟ̇ܘܼܢ ܫܡܲܝܵܐ ܐܲܝܟ݂ ܡܓܲܠܬ̣ܵܐ. ܘܟ݂ܠܹܗ ܚܲܝܠܗܘܿܢ ܢܸܬܲܪ: ܐܲܝܟ݂ ܛܲܪܦܵܐ ܕܢܵܬܲܪ ܡ̣ܢ ܓܦܸܬܵܐ: ܘܐܲܝܟ݂ ܦܲܩܘܼܥܵܐ ܡ̣ܢ ܬܹܬܵܐ.
5 ܡܸܛܠ ܕܬܸܬ̣ܪ̱ܘܸܐ ܚܲܪܒ̇ܝ ܒܲܫܡܲܝܵܐ. ܗܵܐ ܥܲܠ ܐܲܕ݂ܘܿܡܵܝܹ̈ܐ ܬܸܚܘܿܬ̣: ܥܲܠ ܥܲܡܵܐ ܕܐܸܬ̣ܚܲܝܲܒ̣ ܒܕ݂ܝܼܢܵܐ.
6 ܚܲܪܒܹ̇ܗ ܕܡܵܪܝܵܐ ܡܲܠܝܵܐ ܕܡܵܐ. ܐܸܬ̇ܕܲܗܢܲܬ̤ ܡ̣ܢ ܕܡܵܐ ܘܡ̣ܢ ܬܲܪܒܵܐ ܕܲܡܦܲܛܡܹ̈ܐ: ܘܕܲܓ̣ܕܲܝܵܐ: ܘܬܲܪܒܵܐ ܕܟ݂ܘܿܠ̈ܝܵܬ̣ܵܐ ܕܕܸܟ݂ܪܹ̈ܐ. ܡܸܛܠ ܕܕܸܒ̣ܚ̱ܬ̣ܵܐ ܠܡܵܪܝܵܐ ܒܒ̣ܘܼܨܵܪ: ܘܩܸܛܠܵܐ ܪܲܒܵܐ ܒܐܲܪܥܵܐ ܕܐܲܕ݂ܘܿܡ.
7 ܘܢܸܦܠܘܼܢ ܪ̈ܲܝܡܹܐ ܥܲܡܗܘܿܢ: ܘܬ̣ܵܘܪܹ̈ܐ ܥܲܡ ܐܲܪ̈ܘܵܢܹܐ. ܘܬܸܬ̣ܪ̱ܘܐ ܐܲܪܥܵܐ ܡ̣ܢ ܕܸܡܗܘܿܢ. ܘܥܲܦܪܵܐ ܡ̣ܢ ܬܲܪܒ̇ܗܘܿܢ ܢܸܕ݂ܗܲܢ.
8 ܡܸܛܠ ܕܝܵܘܡܵܐ ܕܲܬ̣ܒܲܥܬ̣ܵܐ ܠܡܵܪܝܵܐ: ܘܫܲܢ̄ܬܵܐ ܕܦܘܼܪܥܵܢܵܐ ܠܕܲܝܵܢܵܐ ܕܨܸܗܝܘܿܢ.
9 ܘܢܸܬ̣ܦܟ̇ܘܿܢ ܢܲܚ̈ܠܹܝܗ̇ ܠܙܸܦ̮ܬܵܐ: ܘܥܲܦܪܵܗ̇ ܠܟܸܒ̣ܪܝܼܬ̣ܵܐ ܘܬܸܗܘܹܐ ܐܲܪܥܵܗ̇ ܙܸܦܬܵܐ ܕܝܵܩܕܵܐ.
10 ܘܠܵܐ ܬܸܕ݂ܥܲܟ݂ ܠܸܠܝܵܐ ܘܐܝܼܡܵܡܵܐ ܘܲܠܥܵܠܲܡ ܢܸܣܲܩ ܬܸܢܵܢܵܗ̇ ܘܬܸܚܪܲܒ̣ ܠܕ݂ܵܪܕܵܪ̈ܝܼܢ. ܘܲܠܥܵܠܲܡ ܥܲܠܡܝܼܢ ܐ̄ܢܵܫ ܠܵܐ ܢܸܥܒܲܪ ܒܵܗ̇.
11 ܕܢܹܐܪܬ̇ܘܼܢܵܗ̇ ܩܵܩܹ̈ܐ ܘܩܘܼ̈ܦܕܹܐ. ܘܩܲܦܘܼ̈ܦܹܐ ܘܢܲܥܒܹ̈ܐ ܢܸܫܪܘܿܢ ܒܵܗ̇.
12 ܘܢܸܬ̣ܡ̱ܬܲܚ ܥܠܹܝܗ̇ ܚܘܼܛܵܐ ܕܚܲܪܒܵܐ ܘܠܵܐ ܬܸܗܘܹܐ ܬܲܡܵܢ ܚܲܕ݂ܘܼܬ̣ܵܐ. ܐܵܦܠܵܐ ܢܸܩܪܘܿܢ ܬܲܡܵܢ ܡܲܠܟ̇ܘܼܬ̣ܵܐ. ܘܟ݂ܠܗܘܿܢ ܪܵܘ̱ܪ̈ܒ̣ܵܢܹܝܗ̇ ܢܸܗܘܘܿܢ ܠܐܲܒ̣ܕܵܢܵܐ.
13 ܘܢܹܐܥܘܿܢ ܟܘܼ̈ܒܹ̇ܐ ܒܣܵܚܪ̈ܵܬ̣ܵܗ̇: ܘܩܘܼܪ̈ܛܒܹܐ ܘܕܲܕ̇ܪܹ̈ܐ ܒܥܘܼܫܢܵܗ̇. ܘܬܸܗܘܹܐ ܕܲܝܪܵܐ ܕܝܵܪܘܿܪܹ̈ܐ: ܘܒܹܝܬ̣ ܪܸܥܝܵܐ ܠܲܒ̣̈ܢܵܬ̣ ܢܲܥܵܡܹ̈ܐ.
14 ܘܢܹܐܪܥܘܼܢ ܒܵܗ̇ ܪ̈ܘܼܚܹܐ ܒܦܸܓܥܹ̈ܐ. ܘܫܹܐܕ݂ܵܐ ܠܚܲܒ̣ܪܹܗ ܢܸܩܪܸܐ. ܬܲܡܵܢ ܐܸܬ̇ܬ̇ܢܝܼܚܲܬ̣ ܠܸܠܝܼܬ̣ܵܐ. ܘܐܸܫܟ̇ܚܲܬ̤ ܠܵܗ̇ ܢܝܵܚܵܐ.
15 ܘܬܲܡܵܢ ܐܲܩܢܲܬ̤ ܩܘܼܦܕܵܐ: ܘܐܸܬ̣ܢܲܦܨܲܬ̤ ܘܚܸܠܕܲܬ̣ ܘܒܸܙܥܲܬ̣ ܒܛܸܠܵܠܵܗ̇. ܘܬܲܡܵܢ ܐܸܬ̣ܟܲܢܲܫ ܕܲܝܵـ̈ـܬ̣ܵܐ ܚܕ݂ܵܐ ܠܘܵܬ̣ ܚܕ݂ܵܐ.
16 ܒܥܵܘ ܒܲܟ݂ܬ̣ܵܒܹܗ ܕܡܵܪܝܵܐ ܘܲܩܪܵܘ. ܕܲܚܕ݂ܵܐ ܡܸܢܗܹܝܢ ܠܵܐ ܛܥܵܬ̤. ܘܲܚܕ݂ܵܐ ܠܲܚܕ݂ܵܐ ܠܵܐ ܒܥܲܝ̈. ܐܸܠܵܐ ܗ̤ܘ ܦܩܲܕ݂ ܒܦܘܼܡܹܗ. ܘܪܘܼܚܹܗ ܟܲܢܫܲܬ̤ ܐܸܢܹܝܢ.
17 ܘܗ̤ܘ ܐܲܪܡܝܼ ܠܗܹܝܢ ܦܸܨܹ̈ܐ. ܘܐܝܼܕܹܗ ܦܲܠܓܲܬ̤ ܠܗܹܝܢ ܡܘܼܫ̈ܚܵܬ̣ܵܐ: ܕܲܥܕܲܡܵܐ ܠܥܵܠܲܡ ܢܹܐܪ̈ܬܵܢܵܗ̇: ܘܲܠܕ݂ܵܪܕܵܪ̈ܝܼܢ ܢܸܫ̱ܪ̈ܝܵܢ ܒܵܗ̇.
1 ܢܸܚܕܸ̇ܐ ܡܲܕ݂ܒ̇ܪܵܐ ܨܲܗܝܵܐ. ܘܲܬ̇ܕ݂ܘܼܨ ܦܩܲܥܬ̣ܵܐ: ܘܬܲܦܪܲܥ ܐܲܝܟ݂ ܚܲܡܨܲܠܵܝܬܵܐ.
2 ܘܲܬ̇ܕ݂ܘܼܨ ܐܲܝܟ݂ ܕܲܝܨܵܐ. ܘܲܒ̣ܫܘܼܒ̣ܚܵܐ ܐܝܼܩܵܪܵܐ ܕܠܸܒ̣ܢܵܢ ܢܸܬ̣̱ܝܼܗܸܒ̣ ܠܵܗ̇. ܘܗܸܕ݂ܪܹܗ ܕܟܲܪܡ̄ܠܵܐ ܘܲܕ݂ܫܵܪܘܿܢܵܐ. ܗܸܢ̣ܘܿܢ ܢܸܚܙܘܿܢ ܐܝܼܩܵܪܹܗ ܕܡܵܪܝܵܐ: ܘܗܸܕ݂ܪܹܗ ܕܐܲܠܵܗܲܢ.
3 ܙܘܼܗܵܪܵܐ ܘܠܘܼܒܵܒ̣ܵܐ ܕܲܡܚܝܼ̈ܠܹܐ ܕܐܵܬܹܐ ܦܵܪܘܿܩܵܐ ܘܦܵܪܹܩ ܠܗܘܿܢ. ܐܸܬ̣ܚܲܝܲܠܹܝ̈ܢ ܐܝܼ̈ܕܲܝܵܐ ܕܲܡܪ̈ܲܦܝܵܢ. ܘܒ̣ܘܼܪ̈ܟܹ̇ܐ ܕܪ̈ܵܥܠܵܢ ܐܸܫܬܲܪܲܪܹ̈ܝܢ.
4 ܐܸܡܲܪܘ ܠܲܙܥܘܿܪ̈ܲܝ ܠܸܒܵܐ: ܐܸܬ̣ܚܲܝܲܠܘ ܘܠܵܐ ܬܸܕ݂ܚ̄ܠܘܼܢ ܗܵܐ ܐܲܠܵܗܟ݂ܘܿܢ ܬܵܒ̣ܘܿܥܵܐ ܐܵܬܹ̇ܐ. ܐܲܠܵܗܵܐ ܦܵܪܘܿܩܵܐ ܐܵܬܹ̇ܐ: ܘܦܵܪܹܩ ܠܟ݂ܘܿܢ.
5 ܗܵܝܕܹ̇ܝܢ ܢܸܬ̣ܦܲـ̈ـܬ̇ܚܵܢ ܥܲܝܢܲܝ̈ܗܘܿܢ ܕܲܥܘܝܼܪܹ̈ܐ. ܘܐܸܕ݂ܢܲܝ̈ܗܘܿܢ ܕܚܲܪ̈ܫܹܐ ܢܸܬ̣ܦܲـ̈ـܬ̇ܚܵܢ.
6 ܗܵܝܕܹ̇ܝܢ ܢܩܲܝܸܙ ܚܓ̣ܝܼܪܵܐ ܐܲܝܟ݂ ܐܲܝܠܵܐ. ܘܢܸܬ̣ܦܫܸܛ ܠܸܫܵܢܹܗ ܕܦܹܐܩܵܐ. ܡܸܛܠ ܕܐܸܬ̇ܬ̇ܪܲܥܘ ܡܲـ̈ـܝܵܐ ܒܡܲܕ݂ܒ̇ܪܵܐ: ܘܢܲܚ̈ܠܹܐ ܒܲܦܩܲܥܬ̣ܵܐ.
7 ܢܸܗܘܘܿܢ ܐܲܓ̣ܡܹ̈ܐ ܒܐܲܬ̣ܪܵܐ ܚܘܼܪܒܵܐ: ܘܡܲܒ̇ܘܼ̈ܥܹܐ ܕܡܲـ̈ـܝܵܐ ܒܹܝܬ̣ ܨܲܗ̈ܘܵܢܹܐ. ܢܹܐܥܹܐ ܥܡܝܼܪܵܐ ܘܩܲܢܝܵܐ ܘܐܲܪܒ̣ܵܢܵܐ ܒܕܲܝܪܵܐ ܕܝܵܪܘܿܪܹ̈ܐ.
8 ܘܢܸܗܘܸܐ ܬܲܡܵܢ ܫܒ̣ܝܼܠܵܐ: ܘܐܘܼܪܚܵܐ ܩܲܕ̇ܝܼܫܬܵܐ ܢܸܬ̣ܩ̄ܪܸܐ: ܘܠܵܐ ܬܸܥܒܲܪ ܒܹܗ ܛܲܢܦܘܼܬ̣ܵܐ. ܘܠܵܐ ܬܸܗܘܹܐ ܒܹܗ ܐܘܼܪܚܵܐ. ܘܣܲܟ݂̈ܠܹܐ ܠܵܐ ܢܸܛܥܘܿܢ ܬܲܡܵܢ.
9 ܘܠܵܐ ܢܸܗܘܹܐ ܬܲܡܵܢ ܐܲܪܝܵܐ. ܘܚܲܝ̈ܘܵܬ̣ܵܐ ܒܝܼ̈ܫܵܬ̣ܵܐ ܠܵܐ ܢܸܣ̈ܩܵܢ: ܘܠܵܐ ܢܸܫܬܲܟ݂̈ܚܵܢ ܬܲܡܵܢ.
10 ܘܢܹܐܙܠ̄ܘܼܢ ܦܪ̈ܝܼܩܹܐ: ܦܪ̈ܝܼܩܵܘܗܝ ܕܡܵܪܝܵܐ. ܘܢܸܬ̣ܦ̄ܢܘܿܢ ܘܢܸܥܠܘܼܢ ܠܨܸܗܝܘܿܢ ܒܫܘܼܒ̣ܚܵܐ. ܘܲܠܥܵܠܡܝܼܢ ܬܸܗܘܹܐ ܚܲܕ݂ܘܼܬ̣ܵܐ ܥܲܠ ܪܹ̈ܫܲܝܗܘܿܢ. ܒܘܼܣܵܡܵܐ ܘܚܲܕ݂ܘܼܬ̣ܵܐ ܢܲܕ݂ܪ̱ܟ݂ܘܼܢ. ܘܢܸܥܪ̱ܩܘܼܢ ܕܵܘ̈ܘܿܢܹܐ ܘܬܸܢ̈ܚܵܬ̣ܵܐ.
1 ܘܲܗܘ̤ܵܬ̣ ܒܲܫܢܲܬ̣ ܐܲܪܒܲܥܸܣܪܹ̈ܐ ܕܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܣܠܸܩ̣ ܣܲܢܚܸܪܝܼܒ̣ ܡܲܠܟܵܐ ܕܐܵܬ̣ܘܿܪ: ܥܲܠ ܟܠܗܹܝܢ ܡܕ݂ܝܼ̈ܢܵܬ̣ܵܐ ܥܲܫܝܼ̈ܢܵܬ̣ܵܐ ܕܲܝܗܘܼܕ݂ܵܐ. ܘܐܸܚܲܕ݂ ܐܸܢܹܝܢ.
2 ܘܫܲܕܲܪ ܡܲܠܟܵܐ ܕܐܵܬ̣ܘܿܪ ܡ̣ܢ ܠܟ݂ܝܼܫ ܠܪܲܒ̇ ܫܵܩܹ̈ܐ: ܠܘܵܬ̣ ܚܹܙܲܩܝܵܐ ܡܲܠܟܵܐ ܠܐܘܿܪܸܫܠܸܡ: ܒܚܲܝܠܵܐ ܣܲܓ̇ܝܼܵܐܐ. ܘܩܵܡ̣ ܒܡܲܣܲܩܬ̣ܵܐ ܕܝܲܡܬ̣ܵܐ ܥܸܠܵܝܬܵܐ ܕܒ̣ܐܘܼܪܚܵܐ ܕܚܲܩܠܹܗ ܕܩܵܨܪܵܐ.
3 ܘܲܢܦܲܩ̣ ܠܘܵܬܹܗ ܐܹܠܝܵܩܝܼܡ ܒܲܪ ܚܹܠܲܩܝܵܐ ܪܲܒ̇ܒܲܝܬܵܐ: ܘܫܲܒ̣ܢܵܐ ܣܵܦܪܵܐ: ܘܝܘܿܐܵܚ ܒܲܪ ܐܵܣܵܦ ܡܓܲܗܕ݂ܵܢܵܐ.
4 ܘܐܸܡܲܪ ܠܗܘܿܢ ܪܲܒ̇ ܫܵܩܹ̈ܐ: ܐܸܡܲܪܘ ܠܚܹܙܲܩܝܵܐ: ܗܵܟܲܢܵܐ ܐܵܡܲܪ ܡܲܠܟܵܐ ܪܲܒܵܐ ܡܲܠܟܵܐ ܕܐܵܬ̣ܘܿܪ: ܡܵܢܵܐ ܗ̄ܘܼ ܬܘܼܟ݂ܠܵܢܵܐ ܗܵܢܵܐ ܕܐܸܬ̇ܬ̇ܟܸܠܬ̇.
5 ܘܐܸܡܲܪܬ̇ ܕܐܝܼܬ̣ ܒܵܟ݂ ܡܲܡܠܠܵܐ ܕܣܸܦ̈ܘܵܬ̣ܵܐ: ܘܬܲܪܥܝܼܬ̣ܵܐ ܘܓܲܢ̄ܒܵܪܘܼܬ̣ܵܐ ܠܲܩܪܵܒ̣ܵܐ. ܗܵܫܵܐ ܥܲܠ ܡܲܢ̣ܘܼ ܐܸܬ̇ܬ̇ܟܸܠܬ̇: ܕܲܡ̣ܪܲܕ̇ܬ̇ ܥܠܲܝ.
6 ܗܵܐ ܐܸܬ̇ܬ̇ܟܸܠܬ̇ ܥܲܠ ܣܵܡ̇ܟܵܐ ܕܩܲܢܝܵܐ ܪܥܝܼܥܵܐ: ܥܲܠ ܡܸܨܪܵܝܵܐ. ܕܡܵܐ ܕܐܸܣܬ̇ܡܸܟ݂ ܓܲܒ̣ܪܵܐ ܥܠܵܘܗܝ: ܥܵܐܹ̇ܠ ܒܐܝܼܕܹܗ ܘܒ̣ܵܙܲܥ ܠܵܗ̇. ܗܵܟܲܢܵܐ ܗ̄ܘܼ ܦܸܪܥܘܿܢ ܡܲܠܟܵܐ ܕܡܸܨܪܹܝܢ ܠܟ݂ܠ ܕܡܸܬ̇ܬܲܟ݂ܠܝܼܢ ܥܠܵܘܗܝ.
7 ܘܐܸܢ ܬܹܐܡܲܪ ܠܝܼ ܕܥܲܠ ܡܵܪܝܵܐ ܐܲܠܵܗܲܢ ܐܸܬ̇ܬ̇ܟܸܠܢ: ܡܵܢܵܐ ܐܵܘܬܲܪ ܚܹܙܲܩܝܵܐ ܕܐܲܥܒܲܪ ܥܠܵـ̈ـܘܵܬ̣ܵܐ ܘܡܲܕ݂ܒ̇ܚܹ̈ܐ ܘܐܸܡܲܪ ܠܲܝܗܘܼܕ݂ܵܐ ܘܠܐܘܿܪܸܫܠܸܡ: ܕܲܩܕ݂ܵܡ ܡܲܕ݂ܒ̇ܚܵܐ ܚܲܕ݂ ܬܸܣܓ̇ܕ݂ܘܼܢ.
8 ܘܗܵܫܵܐ ܐܸܬ̣ܚܲܠܲܛ ܥܲܡ ܡܵܪܝ ܡܲܠܟܵܐ ܐܵܬ̣ܘܿܪܵܝܵܐ. ܘܐܸܬܸ̇ܠ ܠܵܟ݂ ܬܪܹܝܢ ܐܲܠܦ̈ܝܼܢ ܪ̈ܲܟ݂ܫܵܐ: ܐܸܢ ܐܝܼܬ̣ ܠܵܟ݂ ܦܲܪ̈ܵܫܹܐ ܕܬܲܪܟܸ̇ܒ̣ ܥܠܲܝܗܘܿܢ.
9 ܘܐܲܝܟܲܢܵܐ ܡܲܗܦܸܟ݂ ܐܲܢ̄ܬ̇ ܐܲܦܹ̈ܐ ܕܚܲܕ݂ ܡ̣ܢ ܥܲܒ̣ܕܵܘ̈ܗܝ ܙܥܘܿܪܹ̈ܐ ܕܡܵܪܝ. ܘܐܸܬ̇ܬ̇ܟܸܠܬ̇ ܠܵܟ݂ ܥܲܠ ܡܸܨܪܵܝܵܐ: ܕܢܸܬܸ̇ܠ ܠܵܟ݂ ܡܲܪ̈ܟ̇ܒ̣ܵܬ̣ܵܐ ܘܦܲܪ̈ܵܫܹܐ.
10 ܗܵܫܵܐ ܓܹܝܪ ܒܠܥܵܕ݂ ܡ̣ܢ ܡܵܪܝܵܐ ܣܸܠܩܹ̇ܬ̣ ܠܐܲܪܥܵܐ ܗܵܕܹܐ ܠܡܲܚܪܵܒ̣ܘܼܬ̣ܵܗ̇. ܡܵܪܝܵܐ ܗ̄ܘܼ ܐܸܡܲܪ ܠܝܼ ܕܐܸܣܲܩ ܥܲܠ ܐܲܪܥܵܐ ܗܵܕܹܐ ܘܐܸܚ̱ܪܒ̣ܝܼܗ̇.
11 ܘܐܸܡܲܪ ܐܸܠܝܵܩܝܼܡ ܘܫܲܒ̣ܢܵܐ ܘܝܘܿܐܵܚ ܠܪܲܒ̇ ܫܵܩܹ̈ܐ: ܡܲܠܸܠ ܥܲܡ ܥܲܒ̣ܕܲܝ̈ܟ ܐܲܪܡܵܐܝܼܬ̣ ܡܸܛܠ ܕܫܵܡ̇ܥܝܼܢ ܚ̄ܢܲܢ. ܘܠܵܐ ܬܡܲܠܸܠ ܥܲܡܲܢ ܝܗ̄ܘܼܕ݂ܵܐܝܼܬ̣ ܩܕ݂ܵܡ ܥܲܡܵܐ ܕܩܵܝ̇ܡܝܼܢ ܥܲܠ ܫܘܼܪܵܐ.
12 ܘܐܸܡܲܪ ܠܗܘܿܢ ܪܲܒ̇ ܫܵܩܹ̈ܐ: ܠܵܐ ܗ̄ܘܼܵܐ ܠܘܵܬ̣ܟ݂ܘܿܢ ܘܲܠܘܵܬ̣ ܡܵܪܟ݂ܘܿܢ: ܫܲܕ̇ܪܲܢܝ ܡܵܪܝ ܠܡܹܐܡܲܪ ܡܸܠܹ̈ܐ ܗܵܠܹܝܢ: ܐܸܠܵܐ ܠܓܲܒ̣ܪܹ̈ܐ ܕܝܵܬ̣ܒ̇ܝܼܢ. ܥܲܠ ܫܘܼܪܵܐ: ܕܠܵܐ ܢܹܐܟ݂ܠܘܼܢ ܬܸܒ̣ܬ̇ܗܘܿܢ: ܘܢܸܫܬ̇ܘܿܢ ܬܝܼܢܲܝ̈ܗܘܿܢ ܥܲܡܟ݂ܘܿܢ.
13 ܘܩܵܡ̣ ܪܲܒ̇ ܫܵܩܹ̈ܐ. ܘܲܩܪܵܐ ܒܩܵܠܵܐ ܪܵܡܵܐ ܝܗ̄ܘܼܕ݂ܵܐܝܼܬ̣: ܘܐܸܡܲܪ ܫܡܲܥܘ ܡܸܠܵܘ̈ܗܝ ܕܡܲܠܟܵܐ ܪܲܒܵܐ ܡܲܠܟܵܐ ܕܐܵܬ̣ܘܿܪ.
14 ܗܵܟܲܢܵܐ ܐܵܡܲܪ ܡܲܠܟܵܐ ܕܐܵܬ̣ܘܿܪ: ܠܵܐ ܢܲܛܥܹܝܟ݂ܘܿܢ ܚܹܙܲܩܝܵܐ: ܡܸܛܠ ܕܠܵܐ ܡܸܫܟܲܚ ܠܲܡܦܲܨܵܝܘܼܬ̣ܟ݂ܘܿܢ.
15 ܘܠܵܐ ܢܲܬ̣ܟܸ̇ܠܟ݂ܘܿܢ ܚܹܙܲܩܝܵܐ ܥܲܠ ܡܵܪܝܵܐ. ܘܢܹܐܡܲܪ ܕܲܡܦܲܨܵܝܘܼ ܡܦܲܨܹܐ ܠܲܢ ܡܵܪܝܵܐ: ܘܠܵܐ ܡܸܫܬܲܠܡܵܐ ܩܪܝܼܬ̣ܵܐ ܗܵܕܹܐ ܒܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ.
16 ܠܵܐ ܬܸܫ̱ܡܥܘܼܢ ܠܚܹܙܲܩܝܵܐ. ܡܸܛܠ ܕܗܵܟܲܢܵܐ ܐܵܡܲܪ ܡܲܠܟܵܐ ܕܐܵܬ̣ܘܿܪ: ܥܒܸܕ݂ܘ ܥܲܡܝ ܒܘܼܪܟ̇ܬ̣ܵܐ: ܘܦܘܿܩܘ ܠܘܵܬ̣ܝ ܘܐܲܟ݂ܘܿܠܘ ܐ̄ܢܵܫ ܓܘܼܦܢܵܘ̈ܗܝ: ܘܐ̄ܢܵܫ ܬܹܐܢܵܘ̈ܗܝ ܘܐܸܫܬܵܘ ܐ̄ܢܵܫ ܡܲـ̈ـܝܵܐ ܕܓ̣ܘܼܒܹ̇ܗ.
17 ܥܲܕ݂ ܐܹܬܹܐ ܘܐܸܕ݂ܒܲܪܟ݂ܘܿܢ ܠܐܲܪܥܵܐ ܕܐܲܝܟ݂ ܐܲܪܥ̱ܟ݂ܘܿܢ: ܐܲܪܥܵܐ ܕܲܥܒ̣ܘܼܪܵܐ ܘܲܕ݂ܡܸܫܚܵܐ: ܐܲܪܥܵܐ ܕܙܲܝ̈ܬܹ̇ܐ ܘܲܕ݂ܟܲܪ̈ܡܹܐ.
18 ܠܵܐ ܢܲܛܥܹܝܟ݂ܘܿܢ ܚܹܙܲܩܝܵܐ ܘܢܹܐܡܲܪ ܕܡܵܪܝܵܐ ܡܦܲܨܹܐ ܠܲܢ. ܕܲܠܡܵܐ ܦܲܨܝܼܘ ܐܲܠܵܗܲܝ̈ܗܘܿܢ ܕܥܲܡܡܹ̈ܐ: ܐ̄ܢܵܫ ܐܲܪܥܹܗ ܡ̣ܢ ܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ.
19 ܐܲܝܟܵܐ ܐܸܢܘܿܢ ܐܲܠܵܗܹ̈ܐ ܕܲܚܡܵܬ̣ ܘܕܲܪܦܵܕ݂ ܘܐܲܝܟܵܐ ܐܸܢܘܿܢ ܐܲܠܵܗܹ̈ܐ ܕܲܣܦܲܪܘܹܝܡ ܕܲܠܡܵܐ ܦܲܨܝܼܘ ܠܫܵܡܪܹܝܢ ܡ̣ܢ ܐܝܼܕܲܝ̈.
20 ܡܲܢ ܡ̣ܢ ܟܠܗܘܿܢ ܐܲܠܵܗܹ̈ܐ ܕܐܲܪ̈ܥܵܬ̣ܵܐ ܗܵܠܹܝܢ ܦܲܨܝܼ ܐܲܪܥܹܗ ܡ̣ܢ ܐܝܼܕܲܝ̈: ܕܲܡܦܲܨܹܐ ܡܵܪܝܵܐ ܠܐܘܿܪܸܫܠܸܡ ܡ̣ܢ ܐܝܼ̈ܕܲܝ.
21 ܘܲܫܬܸܒ̣ܩ ܠܗܘܿܢ: ܘܐ̄ܢܵܫ ܠܵܐ ܝܲܗ̄ܒ̣ ܠܹܗ ܦܸܬ̣ܓ̣ܵܡ. ܡܸܛܠ ܕܲܦ̣ܩܲܕ݂ ܡܲܠܟܵܐ ܘܐܸܡܲܪ: ܠܵܐ ܬܸܬ̇ܠܘܼܢ ܒܹܗ ܦܸܬ̣ܓ̣ܵܡܵܐ.
22 ܘܐܸܬ̣ܵܐ ܐܹܠܝܵܩܝܼܡ ܒܲܪ ܚܹܠܲܩܝܵܐ ܪܲܒ̇ܒܲܝܬܵܐ: ܘܫܲܒ̣ܢܵܐ ܣܵܦܪܵܐ: ܘܝܘܿܐܵܚ ܒܲܪ ܐܵܣܵܦ ܡܥܲܗܕ݂ܵܢܵܐ: ܠܘܵܬ̣ ܚܹܙܲܩܝܵܐ ܟܲܕ݂ ܡܨܲܪܹܝܢ ܢܲܚܬܲܝ̈ܗܘܿܢ ܘܚܵܘܝܘܼܗܝ ܡܸܠܵܘ̈ܗܝ ܕܪܲܒ̇ ܫܵܩܹ̈ܐ.
1 ܘܲܗܘ̤ܵܐ ܕܟܲܕ݂ ܫ̣ܡܲܥ ܚܹܙܲܩܝܵܐ ܡܲܠܟܵܐ: ܨܲܪܝܼ ܢܲܚܬܵܘ̈ܗܝ: ܘܐܸܬ̣ܟܲܣܝܼ ܣܲܩܵܐ. ܘܥܲܠ ܠܒܲܝܬܹ̇ܗ ܕܡܵܪܝܵܐ.
2 ܘܫܲܕܲܪ ܠܐܹܠܝܵܩܝܼܡ ܪܲܒ̇ܒܲܝܬܵܐ: ܘܲܠܫܲܒ̣ܢܵܐ ܣܵܦ̇ܪܵܐ: ܘܲܠܣܵܒܹ̈ܐ ܕܟ݂ܵܗܢܹ̈ܐ ܟܲܕ݂ ܡܟܲܣܹܝܢ ܣܲܩܹ̈ܐ: ܠܘܵܬ̣ ܐܹܫܲܥܝܵܐ ܢܒ̣ܝܼܵܐ ܒܲܪ ܐܵܡܘܿܨ.
3 ܘܐܸܡܲܪܘ ܠܹܗ: ܗܵܟܲܢܵܐ ܐܵܡܲܪ ܚܹܙܲܩܝܵܐ: ܝܵܘܡܵܐ ܗ̄ܘܼ ܕܐܘܼܠܨܵܢܵܐ: ܘܲܕ݂ܡܲܟ̇ܣܵܢܘܼܬ̣ܵܐ: ܘܲܕ݂ܪܘܼܓ̣ܙܵܐ: ܝܵܘܡܵܢܵܐ. ܡܸܛܠ ܕܡܲܛܝܼܘ ܚܸܒ̣̈ܠܹܐ ܕܲܒ̣ܢܲـ̈ـܝܵܐ. ܘܠܲܝܬ̇ ܚܲܝܠܵܐ ܒܝܵܠܕ̇ܬܵܐ.
4 ܟܒܲܪ ܢܸܫܡܲܥ ܡܵܪܝܵܐ ܐܲܠܵܗܵܟ݂ ܡܸܠܵܘ̈ܗܝ ܕܪܲܒ̇ ܫܵܩܹ̈ܐ. ܘܫܲܕ̇ܪܹܗ ܡܵܪܹܗ ܡܲܠܟܵܐ ܐܵܬ̣ܘܿܪܵܝܵܐ: ܕܲܢܚܲܣܸܕ݂ ܠܐܲܠܵܗܵܐ ܚܲܝܵܐ. ܘܢܲܟ̇ܣܝܼܘܗܝ ܒܡܸܠܹ̈ܐ ܕܲܫ̣ܡܲܥ ܡܵܪܝܵܐ ܐܲܠܵܗܵܟ݂. ܘܬܸܒ̣ܥܹܐ ܘܲܬ̣ܨܲܠܸܐ ܥܲܠ ܫܲܪܟܵܐ ܕܐܸܫܬ̇ܚܲܪܘ.
5 ܘܐܸܬ̣ܵܘ ܥܲܒ̣ܕܵܘ̈ܗܝ ܕܚܹܙܲܩܝܵܐ ܡܲܠܟܵܐ ܠܘܵܬ̣ ܐܹܫܲܥܝܵܐ.
6 ܘܐܸܡܲܪ ܠܗܘܿܢ ܐܹܫܲܥܝܵܐ: ܗܵܟܲܢܵܐ ܐܸܡܲܪܘ ܠܡܵܪܟ݂ܘܿܢ: ܗܵܟܲܢܵܐ ܐܵܡܲܪ ܡܵܪܝܵܐ: ܠܵܐ ܬܸܕ݂ܚܲܠ ܡ̣ܢ ܡܸܠܹ̈ܐ ܕܲܫܡܲܥܬ̇: ܕܓܲܕܸ̇ܦ̣ܘ ܩܕ݂ܵܡܲܝ ܐܝܼܙܓܲܕܵܘ̈ܗܝ ܕܡܲܠܟܵܐ ܕܐܵܬ̣ܘܿܪ.
7 ܗܵܐ ܝܵܗܹ̇ܒ̣ ܐ̄ܢܵܐ ܥܠܵܘܗܝ ܪܘܼܚܵܐ ܘܢܸܫܡܲܥ ܛܸܒܵܐ: ܘܢܸܗܦܘܿܟ݂ ܠܐܲܪܥܹܗ. ܘܐܲܪܡܹܝܘܗܝ ܒܚܲܪܒܵܐ ܒܐܲܪܥܹܗ.
8 ܘܲܗ̣ܦܲܟ݂ ܪܲܒ̇ ܫܵܩܹ̈ܐ. ܘܐܸܫ̣ܟܲܚ ܠܡܲܠܟܵܐ ܕܐܵܬ̣ܘܿܪ ܟܲܕ݂ ܡܸܬ̣ܟܲܬܲܫ ܥܲܠ ܠܸܒ̣ܢܵܐ: ܟܲܕ݂ ܫ̣ܡܲܥ ܕܲܫܩܲܠ̣ ܡ̣ܢ ܠܟ݂ܝܼܫ.
9 ܘܲܫ̣ܡܲܥ ܥܲܠ ܬܲܪܗܲܦ ܡܲܠܟܵܐ ܕܟ݂ܘܼܫ: ܕܲܢܦܲܩ ܠܡܸܬ̣ܟܲܬܵܫܘܼ ܥܲܡܹܗ. ܘܲܫܡܲܥ ܘܫܲܕܲܪ ܐܝܼܙ̈ܓܲܕܹ̇ܐ ܠܘܵܬ̣ ܚܹܙܲܩܝܵܐ.
10 ܗܵܟܲܢܵܐ ܐܸܡܲܪܘ ܠܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ ܠܡܹܐܡܲܪ: ܠܵܐ ܢܲܛܥܹܝܟ݂ ܐܲܠܵܗܵܟ݂: ܕܲܬ̣ܟ݂ܝܼܠ ܐܲܢ̄ܬ̇ ܥܠܵܘܗܝ. ܘܐܵܡܲܪ ܐܲܢ̄ܬ̇ ܕܠܵܐ ܡܸܫܬܲܠܡܵܐ ܐܘܿܪܸܫܠܸܡ ܒܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ.
11 ܗܵܐ ܐܲܢ̄ܬ̇ ܫܡܲܥ̣ܬ̇ ܠܟ݂ܠ ܕܲܥܒܲܕ݂ܘ ܡܲܠ̈ܟܹ̇ܐ ܕܐܵܬ̣ܘܿܪ ܠܟ݂ܠܗܹܝܢ ܐܲܪ̈ܥܵܬ̣ܵܐ ܠܡܲܚܪܵܒ̣ܘܼ ܐܸܢܹܝܢ. ܘܐܲܢ̄ܬ̇ ܡܸܬ̣ܦܲܨܹܐ ܐܲܢ̄ܬ̇.
12 ܕܲܠܡܵܐ ܦܲܨܝܼܘ ܐܲܠܵܗܲܝ̈ܗܘܿܢ ܕܥܲܡܡܹ̈ܐ ܕܲܚܪܲܒ̣ܘ ܐܲܒ̣ܵܗܲܝ̈: ܠܓ̣ܵܘܙܵܢ ܘܲܠܚܵܪܵܢ ܘܲܠܪܵܨܵܦ: ܘܠܲܒ̣ܢܲܝ̈ ܥܲܕܵܢ ܘܕܲܒ̣ܕ݂ܵܠܵܣܵܪ.
13 ܐܲܝܟܵܘ ܡܲܠܟܵܐ ܕܲܚܡܵܬ̣: ܘܡܲܠܟܵܐ ܕܲܪܦܵܕ݂: ܘܡܲܠܟܵܐ ܕܲܩܪܝܼܬ̣ܵܐ ܣܦܲܪܘܹܝܡ: ܘܲܕ݂ܢܵܥ: ܘܲܕ݂ܥܵܩܵܐ.
14 ܘܩܲܒܸ̇ܠ ܚܹܙܲܩܝܵܐ ܐܸܓ̇ܪ̈ܵܬ̣ܵܐ ܡ̣ܢ ܐܝܼܕ݂ܵܐ ܕܐܝܼܙ̈ܓܲܕܹ̇ܐ ܘܲܩ̣ܪܵܐ ܐܸܢܹܝܢ ܘܲܣܠܸܩ ܠܒܲܝܬܹ̇ܗ ܕܡܵܪܝܵܐ. ܘܲܦܪܲܣ ܐܸܢܹܝܢ. ܚܹܙܲܩܝܵܐ ܩܕ݂ܵܡ ܡܵܪܝܵܐ.
15 ܨܲܠܝܼ ܚܹܙܲܩܝܵܐ ܩܕ݂ܵܡ ܡܵܪܝܵܐ: ܘܐܸܡܲܪ.
16 ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ ܝܵܬܹܒ̣ ܥܲܠ ܟܪ̈ܘܿܒܹܐ. ܐܲܢ̄ܬ̇ ܗ̄ܘܼ ܐܲܠܵܗܵܐ ܒܲܠܚܘܿܕܲܝܟ ܥܲܠ ܟܠܗܹܝܢ ܡܲܠܟ̇ـ̈ـܘܵܬ̣ܵܐ ܕܐܲܪܥܵܐ. ܐܲܢ̄ܬ̇ ܥܒܲܕ̇ܬ̇ ܫܡܲܝܵܐ ܘܐܲܪܥܵܐ.
17 ܨܠܝܼ ܡܵܪܝܵܐ ܐܸܕ݂ܢܵܟ݂ ܘܲܫܡܲܥ ܦܬܲܚ ܡܵܪܝܵܐ ܥܲܝܢܲܝ̈ܟ ܘܲܚܙܝܼ ܘܲܫܡܲܥ ܡܸܠܵܘ̈ܗܝ ܕܣܲܢܚܹܪܝܼܒ̣: ܕܲܫ̣ܠܲܚ ܠܲܡܚܲܣܵܕ݂ܘܼ ܠܐܲܠܵܗܵܐ ܚܲܝܵܐ.
18 ܫܲܪܝܼܪܵܐܝܼܬ̣ ܡܵܪܝܵܐ: ܚܪܲܒ̣ܘ ܡܲܠ̈ܟܹ̇ܐ ܕܐܵܬ̣ܘܿܪ ܠܟ݂ܠܗܹܝܢ ܐܲܪ̈ܥܵܬ̣ܵܐ.
19 ܘܐܲܪܥ̱ܗܘܿܢ ܘܐܲܠܵܗܲܝ̈ܗܘܿܢ ܐܵܘܩܸܕ݂ܘ ܒܢܘܼܪܵܐ ܡܸܛܠ ܕܠܵܐ ܗܘ̤ܵܘ ܐܲܠܗܹ̈ܐ. ܐܹܠܵܐ ܥܒ̣ܵܕ݂ ܐܝܼ̈ܕܲܝܵܐ ܕܐ̄ܢܵܫܵܐ: ܕܩܲܝܣܵܐ: ܘܲܕ݂ܟܸܣܦܵܐ: ܘܲܕ݂ܟܹܐܦܵܐ. ܘܐܵܘܒܸ̇ܕ݂ܘ ܐܸܢܘܿܢ.
20 ܘܗܵܫܵܐ ܡܵܪܝܵܐ ܐܲܠܵܗܲܢ: ܦܪܘܿܩܲܝܢ ܡ̣ܢ ܐܝܼܕ݂ܵܘ̈ܗܝ: ܕܢܸ̈ܕ̇ܥܵܢ ܟܠܗܹܝܢ ܡܲܠܟ̇ـ̈ـܘܵܬ̣ܵܐ ܕܐܲܪܥܵܐ: ܕܐܲܢ̄ܬ̇ܘܼ ܐܲܠܵܗܵܐ ܒܲܠܚܘܿܕܲܝܟ.
21 ܘܐܸܫܬ̇ܠܲܚ ܐܹܫܲܥܝܵܐ ܒܲܪ ܐܵܡܘܿܨ ܠܘܵܬ̣ ܚܹܙܲܩܝܵܐ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܟܠ ܕܨܲܠܝܼܬ̇ ܩܕ݂ܵܡܲܝ ܥܲܠ ܣܲܢܚܹܪܝܼܒ̣ ܡܲܠܟܵܐ ܕܐܵܬ̣ܘܿܪ: ܫܸܡ̇ܥܹܬ̣.
22 ܗܵܢܵܐ ܦܸܬ̣ܓ̣ܵܡܵܐ ܕܐܸܡܲܪ ܥܠܵܘܗܝ ܡܵܪܝܵܐ. ܫܵܝܛܵܐ ܠܵܟ݂: ܘܲܡܡܲܝܩܵܐ ܒܵܟ݂ ܒܬ̣ܘܼܠܬܵܐ ܒܲܪܬ̣ ܨܸܗܝܘܿܢ ܘܲܡܢܝܼܕ݂ܵܐ ܪܹܫܵܗ̇ ܒܵܬ̣ܪܵܟ݂ ܒܲܪܬ̣ ܐܘܿܪܸܫܠܸܡ.
23 ܠܡܲܢ ܚܲܣܕ̇ܬ̇ ܘܓܲܕܸ̇ܦܬ̇. ܘܥܲܠ ܡܲܢ ܐܲܪܝܼܡ̣ܬ̇ ܩܵܠܵܟ݂ ܐܲܪܝܼܡ̣ܬ̇ ܥܲܝܢܲܝ̈ܟ ܠܲܡܪܵܘܡܵܐ ܥܲܠ ܩܲܕ̇ܝܼܫܵܐ ܕܝܼܣܪܵܝܹܠ.
24 ܘܒ̣ܐܝܼܕ݂ܵܐ ܕܐܝܼܙܓܲܕܲܝ̈ܟ ܚܲܣܕ̇ܬ̇ ܠܡܵܪܝܵܐ: ܘܐܸܡ̣ܪܬ̇: ܕܲܒ̣ܣܘܿܓ̣ܵܐܐ ܕܡܲܪ̈ܟ̇ܒ̣ܵܬ̣ܝ: ܐܸܢܵܐ ܐܸܣܲܩ ܠܪܵܘܡܵܐ ܕܛܘܼܪܹ̈ܐ: ܘܠܲܫܦܘܿܠܵܘ̈ܗܝ ܕܠܸܒ̣ܢܵܢ. ܘܐܸܦܣܘܿܩ ܩܵܘ̈ܡܵܬ̣ܵܐ ܕܐܲܪ̈ܙܵܘܗܝ: ܘܲܓ̣ܒܲـ̈ـܝܵܐ ܕܫܲܪ̈ܘܲܝܢܵܘܗܝ ܘܐܸܥܘܿܠ ܠܪܵܘܡܵܐ ܕܣܵܟܹ̇ܗ ܕܥܵܒ̣ܵܐ ܕܟܲܪܡ̄ܠܵܐ.
25 ܐܸܢܵܐ ܐܸܚܦܘܿܪ ܘܐܸܫܬܹ̇ܐ ܡܲـ̈ـܝܵܐ: ܘܐܵܘܒܸ̇ܫ ܒܦܲܪ̈ܣܵܬ̣ܵܐ ܕܪ̈ܲܟ݂ܫܝ: ܟܠܗܘܿܢ ܢܲܗܪ̈ܵܘܵܬ̣ܵܐ ܥܲܫܝܼܢܹ̈ܐ.
26 ܠܵܐ ܫ̣ܡܲܥܬ̇ ܕܡ̣ܢ ܪܘܼܚܩܵܐ ܠܵܗ̇ ܥܸܒ̣ܕܹ̇ܬ̣ ܘܡ̣ܢ ܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ ܠܵܗ̇ ܥܲܬ̇ܕܸܬ̣. ܘܗܵܫܵܐ ܐܲܝܬ̇ܝܼܬܵܗ̇ ܕܬܸܗܘܹܐ ܠܚܘܼܪܒܵܐ: ܘܲܠܨܸܕ݂ܝܵܐ: ܐܲܝܟ݂ ܡܕ݂ܝܼ̈ܢܵܬ̣ܵܐ ܥܲܫܝܼ̈ܢܵܬ̣ܵܐ.
27 ܕܥܵܡܘܿܪ̈ܲܝܗܹܝܢ ܐܲܪܦܝܼܘ ܒܗܹܝܢ ܐܝܼ̈ܕܲܝܵܐ. ܘܐܸܬ̇ܬ̇ܒܲܪܘ ܘܲܒ̣ܗܬ̣ܘ ܘܲܗܘ̤ܵܘ ܐܲܝܟ݂ ܥܸܣܒܵܐ ܕܚܲܩܠܵܐ: ܘܐܲܝܟ݂ ܝܘܼܪܵܩܵܐ ܕܬܸܕ݂ܐܵܐ: ܘܐܲܝܟ݂ ܫܸܒ̇ܠܵܐ ܕܐܸܓܵܪܵܐ: ܘܐܲܝܟ݂ ܒܘܼܚܫܝܼܢܵܐ ܩܕ݂ܵܡ ܩܵܝܑܹܡܬ̣ܵܐ.
28 ܡܵܘܬ̇ܒ̣ܵܟ݂ ܘܡܲܥܠܵܟ݂ ܘܡܲܦܩܵܟ݂ ܝܵܕܲܥ ܐ̄ܢܵܐ: ܘܕܲܐܡ̣ܪܲܝܬ̇ ܩܕ݂ܵܡܲܝ.
29 ܥܲܠ ܕܐܲܡܪܲܚܬ̇ ܩܕ݂ܵܡܲܝ: ܘܓ̣ܘܼܕܵܦܵܟ݂ ܣ̣ܠܸܩ ܒܐܸܕ݂ܢܲܝ̈: ܐܲܪܡܸܐ ܩܠܵܕ݂ܵܐ ܒܲܢܚܝܼܪܵܟ݂: ܘܲܒ̣ܥܵܡܵܐ ܒܣܸܦ̈ܘܵܬ̣ܵܟ݂ ܘܐܲܗܦ̄ܟ݂ܵܟ݂ ܒܐܘܼܪܚܵܐ ܕܐܸܬܲܝ̣ܬ̇ ܒܵܗ̇.
30 ܘܗܵܕܹܐ ܠܵܟ݂ ܐܵܬ̤ܵܐ: ܐܵܟܸ̇ܠ ܐܲܢ̄ܬ̇ ܫܲܢ̄ܬܵܐ ܗܵܕܹܐ ܟܵܬ̣ܵܐ. ܘܫܲܢ̄ܬܵܐ ܕܬܲܪܬܹ̇ܝܢ ܟܵܬ̣ ܟܵܬ̣ܵܐ. ܘܫܲܢ̄ܬܵܐ ܬܠܝܼܬ̣ܵܝܬܵܐ ܙܵܪܥܝܼܢ ܐܢ̄ܬ̇ܘܿܢ ܘܚܵܨܕܝܼܢ ܐܢ̄ܬ̇ܘܿܢ: ܘܢܵܨ̇ܒ̇ܝܼܢ ܐܢ̄ܬ̇ܘܿܢ ܟܲܪ̈ܡܹܐ: ܘܐܵܟ݂ܠܝܼܢ ܐܢ̄ܬ̇ܘܿܢ ܦܹܐܪ̈ܲܝܗܘܿܢ.
31 ܘܢܸܬ̣ܗܲܦܟ̇ܘܼܢ ܫܲܪܟܵܐ ܕܒܹܝܬ̣ ܝܼܗܘܼܕ݂ܵܐ ܕܐܸܫܬܲܚܲܪܘ: ܐܲܝܟ݂ ܥܸܩܵܪܵܐ ܕܲܪܡܸܐ ܠܬܲܚܬ̇: ܘܥܵܒܹ̇ܕ݂ ܦܹܐܪܹ̈ܐ ܠܥܸܠ.
32 ܡܸܛܠ ܕܡ̣ܢ ܐܘܿܪܸܫܠܸܡ ܢܵܦܹ̇ܩ ܫܲܪܟܵܢܵܐ. ܘܢܸܫܬܵܘܙܲܒ̣ ܡ̣ܢ ܛܘܼܪܵܐ ܕܨܸܗܝܘܿܢ. ܛܢܵܢܹܗ ܕܡܵܪܝܵܐ ܚܲܝܠܬ̣ܵܢܵܐ ܥܵܒܹ̇ܕ݂ ܗܵܕܹܐ.
33 ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܥܲܠ ܡܲܠܟܵܐ ܕܐܵܬ̣ܘܿܪ: ܠܵܐ ܢܸܥܘܿܠ ܠܲܩܪܝܼܬ̣ܵܐ ܗܵܕܹܐ. ܘܠܵܐ ܢܸܫܕܹ̇ܐ ܬܲܡܵܢ ܓܹܐܪܵܐ. ܘܠܵܐ ܢܹܐܪܥܝܗ̇ ܒܣܲܟ̇ܪܹ̈ܐ. ܘܠܵܐ ܢܲܟ݂ܡܸܢ ܥܠܹܝܗ̇ ܟܡܹܐܢܹ̈ܐ.
34 ܐܸܠܵܐ ܒܐܘܼܪܚܵܐ ܕܐܸܬ̣ܵܐ ܒܵܗ̇: ܢܸܗܦܘܿܟ݂ ܘܠܲܩܪܝܼܬ̣ܵܐ ܗܵܕܹܐ ܠܵܐ ܢܸܥܘܿܠ: ܐܵܡܲܪ ܡܵܪܝܵܐ.
35 ܘܐܲܓܸ̇ܢ ܥܲܠ ܩܪܝܼܬ̣ܵܐ ܗܵܕܹܐ ܘܐܸܦ̱ܪܩܝܼܗ̇: ܡܸܛܠܵܬ̣ܝ ܘܡܸܛܠ ܕܵܘܝܼܕ݂ ܥܲܒ̣ܕ̇ܝ.
36 ܘܲܢܦܲܩ̣ ܡܲܠܲܐܟܹܗ ܕܡܵܪܝܵܐ. ܘܲܩܛܲܠ ܒܡܲܫܪܝܼܬܹܗ ܕܐܵܬ̣ܘܿܪܵܝܵܐ. ܡܵܐܐ ܘܲܬ̣ܡܵܢܐܝܼܢ ܘܚܲܡܫܵܐ ܐܲܠܦܝܼ̈ܢ. ܘܩܲܕܸ̇ܡ̣ܘ ܒܨܲܦܪܵܐ: ܘܗܵܐ ܟܠܗܘܿܢ ܫ̈ܠܲܕܹ̇ܐ ܡܝܼ̈ܬ̣ܵܬ̣ܵܐ.
37 ܘܲܫܩܲܠ ܣܲܢܚܹܪܝ̣ܒ̣: ܘܲܗ̣ܦܲܟ݂ ܐܸܙܲܠ ܝܑܼܬܸܒ̣ ܒܢܝܼܢܘܹܐ.
38 ܘܟܲܕ݂ ܣܵܓܹ̇ܕ݂ ܗ̄ܘܼܵܐ ܒܹܝܬ̣ ܢܵܣܪܵܟ݂ ܐܵܠܵܗܹܗ: ܐܵܕ݂ܪܡܠܸܟ݂ ܘܫܵܪܵܐܨܵܐܪ ܒܢܵܘ̈ܗܝ ܩܲܛܠܘܼܗܝ ܒܚܲܪܒܵܐ. ܘܗܸܢܘܿܢ ܥܪܲܩ̣ܘ ܠܐܲܪܥܵܐ ܕܩܲܪ̈ܕ̇ܘܵܝܹܐ. ܘܐܲܡܠܸܟ݂ ܣܪܚܲܕ̇ܘܡ ܒܪܹܗ ܒܵܬ̣ܪܹܗ.
1 ܒܗܘܿܢ ܒܝܵܘ̈ܡܵܬ̣ܵܐ ܗܵܢ̇ܘܿܢ: ܐܸܬ̣ܟ̇ܪܲܗ ܚܹܙܲܩܝܵܐ ܠܲܡܡܵܬ̣. ܘܐܸܬ̣ܵܐ ܠܘܵܬܹܗ ܐܹܫܲܥܝܵܐ ܢܒ̣ܝܼܵܐ ܒܲܪ ܐܵܡܘܿܨ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ. ܦܲܩܸܕ݂ ܥܲܠ ܒܲܝܬܵܟ݂: ܡܸܛܠ ܕܡܵܐܹ̇ܬ̣ ܐܲܢ̄ܬ̇: ܘܠܵܐ ܚܵܝܹ̇ܐ ܐܲܢ̄ܬ̇.
2 ܘܐܲܦܢܝܼ ܚܹܙܲܩܝܵܐ ܐܲܦܵܘ̈ܗܝ ܠܐܸܣܬ̣ܵܐ. ܘܨܲܠܝܼ ܩܕ݂ܵܡ ܡܵܪܝܵܐ ܘܐܸܡܲܪ.
3 ܐܘܿܢ ܡܵܪܝܵܐ: ܐܸܬ̇ܕܲܟ݂ܪ ܕܗܲܠܟܹ̇ܬ̣ ܩܕ݂ܵܡܲܝܟ ܒܩܘܼܫܬܵܐ: ܘܲܒ̣ܠܸܒܵܐ ܫܲܠܡܵܐ: ܘܲܕ݂ܫܲܦܝܼܪ ܩܕ݂ܵܡܲܝܟ ܥܸܒ̣ܕܹ̇ܬ̣ ܘܲܒ̣ܟ݂ܵܐ ܚܹܙܲܩܝܵܐ ܒܟ݂ܵܬ̣ܵܐ ܪܲܒ̇ܬ̣ܵܐ.
4 ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܫܲܥܝܵܐ ܢܒ̣ܝܼܵܐ: ܠܡܹܐܡܲܪ.
5 ܙܸܠ ܐܸܡܲܪ ܠܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܹܗ ܕܕ݂ܵܘܝܼܕ݂ ܐܲܒ̣ܘܼܟ݂: ܫܸܡܥܹ̇ܬ̣ ܨܠܘܿܬ̣ܵܟ݂: ܘܲܚܙܹ̇ܝܬ̣ ܕܸܡܥܲܝ̈ܟ ܗܵܐ ܡܵܘܣܸܦ ܐ̄ܢܵܐ ܥܲܠ ܝܵܘ̈ܡܵܬ̣ܵܟ݂ ܚܲܡܫܲܥܸܣܪܹ̈ܐ ܫܢܝܼ̈ܢ.
6 ܘܡ̣ܢ ܐܝܼܕ݂ܵܘܗܝ ܕܡܲܠܟܵܐ ܕܐܵܬ̣ܘܿܪ ܐܹܦܲܨܹܝܟ݂: ܘܠܲܡܕ݂ܝܼܢ̄ܬܵܐ ܗܵܕܹܐ. ܘܐܲܓܸ̇ܢ ܥܲܠ ܡܕ݂ܝܼܢ̄ܬܵܐ ܗܵܕܹܐ: ܘܐܸܦ̱ܪܩܝܼܗ̇.
7 ܘܗܵܕܹܐ ܠܵܟ݂ ܐܵܬ̤ܵܐ ܡ̣ܢ ܩܕ݂ܵܡ ܡܵܪܝܵܐ ܕܥܵܒܹ̇ܕ݂ ܡܵܪܝܵܐ ܦܸܬ̣ܓ̣ܵܡܵܐ ܗܵܢܵܐ ܕܐܸܡܲܪ.
8 ܗܵܐ ܡܲܗܦܸܟ݂ ܐ̄ܢܵܐ ܛܸܠܵܠܵܐ ܕܕܲܪ̈ܓܹܐ ܕܢܵܚܹ̇ܬ̣ ܒܕܲܪ̈ܓܹܐ ܕܐܵܚܵܙ ܐܲܒ̣ܘܼܟ݂: ܫܸܡܫܵܐ ܠܒܸܣܬ̇ܪܹܗ ܥܸܣܪܵܐ ܕܲܪ̈ܓ̣ܝܼܢ ܘܲܗܦܲܟ݂ ܫܸܡܫܵܐ ܠܒܸܣܬ̇ܪܹܗ ܥܸܣܪܵܐ ܕܲܪ̈ܓ̣ܝܼܢ: ܒܕܲܪ̈ܓܹܐ ܕܲܢܚܸܬ̣.
9 ܟܬ̣ܵܒܹܗ ܕܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܟܲܕ݂ ܐܸܬ̣ܟ̇ܪܲܗ: ܘܲܚܝܵܐ ܡ̣ܢ ܟܘܼܪܗܵܢܹܗ.
10 ܐܸܢܵܐ ܐܸܡ̇ܪܹܬ̣ ܕܲܒ̣ܦܸܠܓ̇ܘܼܬ̣ ܝܵܘ̈ܡܲܝ ܐܹܙܲܠ: ܒܬܲܪܥܵܐ ܕܲܫܝܘܿܠ ܫܸܒ̣̇ܩܹܬ̣ ܫܲܪܟܵܐ ܕܲܫܢܲܝ̈.
11 ܐܸܡ̇ܪܹܬ̣ ܕܠܵܐ ܐܸܚܙܹܐ ܠܡܵܪܝܵܐ ܒܐܲܪܥܵܐ ܕܚܲܝܹ̈ܐ ܘܬ̣ܘܼܒ̣ ܠܵܐ ܐܸܚܙܹܐ ܐ̄ܢܵܫܵܐ ܥܲܡ ܥܵܡ̇ܪ̈ܲܝ ܚܸܦܪܵܐ.
13
14 ܐܲܝܟ݂ ܣܢܘܿܢܝܼܬ̣ܵܐ ܕܲܡܢܲܨܪܵܐ ܢܲܨ̇ܪܹܬ̣ ܘܐܲܝܟ݂ ܝܵܘܢܵܐ ܢܲܗܡܹ̇ܬ̣ ܐܲܪܝܼܡܹ̇ܬ̣ ܥܲܝܢܲܝ̈ ܠܲܡܪܵܘܡܵܐ. ܡܵܪܝܵܐ ܦܲܨܵܢܝ: ܘܒܲܣܸܡܲܝܢܝ.
15 ܘܡܵܢܵܐ ܐܹܡܲܠܸܠ: ܐܸܡܲܪ ܠܝܼ ܘܗ̤ܘ ܥ̣ܒܲܪ ܘܐܲܢܸܕ݂ ܟܠܵܗ̇ ܫܸܢܲܬ̣ܝ: ܥܲܠ ܡܪܵܪܹ̈ܐ ܕܢܲܦ̮ܫܝ. ܡܵܪܝܵܐ ܥܠܲܝܗܘܿܢ ܢܸܚܘܼܢ.
16 ܡܸܛܠ ܗܵܠܹܝܢ ܚܲܝܹ̈ܐ ܕܪܘܼܚܝ ܐܲܚܠܸܡܲܝܢܝ ܘܐܲܚܵܢܝ.
17 ܗܵܐ ܠܲܫܠܵܡܵܐ ܡܲܪܘ ܠܝܼ ܡܪܵܪܹ̈ܐ. ܘܐܲܢ̄ܬ̇ ܨܒܲܝܬ̇ ܒܢܲܦ̮ܫܝ ܕܠܵܐ ܬܸܒ̣ܠܸܐ ܒܲܚܒ̣ܵܠܵܐ ܡܸܛܠ ܕܲܫܕܲܝܬ̇ ܒܸܣܬܲܪ ܓܘܼܫܡܵܟ݂ ܟܠܗܘܿܢ ܚܛܵܗܲܝ̈.
18 ܡܸܛܠ ܕܠܵܐ ܫܝܘܿܠ ܬܵܪܕܹ̇ܐ ܠܵܟ݂. ܘܐܵܦܠܵܐ ܡܵܘܬܵܐ ܢܫܒ̇ܚܵܟ݂ ܘܠܵܐ ܢܣܲܒ̇ܪܘܼܢ ܠܩܘܼܫܬܵܟ݂ ܐܲܝܠܹܝܢ ܕܢܵܚܬ̇ܝܼܢ ܠܓ̣ܘܼܒܵܐ.
19 ܐܸܠܵܐ ܢܵܘܕ̇ܘܿܢ ܠܵܟ݂ ܚܲܝܹ̈ܐ ܕܐܲܟ݂ܘܵܬ̣ܝ ܝܵܘܡܵܢܵܐ ܘܐܲܒ̣ܵܐ ܠܲܒ̣̈ܢܲܝܵܐ ܢܚܵܘܸܐ ܗܲܝܡܵܢܘܼܬ̣ܵܟ݂.
20 ܡܵܪܝܵܐ ܢܸܦ̱ܪܩܲܢ: ܘܬܸܫ̈ܒ̇ܚܵܬܹܗ ܢܫܲܒܲܚ: ܟܠܗܘܿܢ ܝܵܘ̈ܡܵܬ̣ܵܐ ܕܚܲܝܲܝ̈ܢ: ܒܒܲܝܬܹ̇: ܕܡܵܪܝܵܐ.
21 ܘܐܸܡܲܪ ܚܹܙܲܩܝܵܐ: ܡܵܢܲܐܗ̄ܝܼ ܐܵܬ̤ܵܐ ܕܣܵܠܹ̇ܩ ܐ̄ܢܵܐ ܠܒܲܝܬܹ̇ܗ ܕܡܵܪܝܵܐ.
22 ܘܐܸܡܲܪ ܐܹܫܲܥܝܵܐ: ܢܸܣܒ̣ܘܼܢ ܕܒܲܠܬ̣ܵܐ ܕܬܹܐܢܹ̈ܐ. ܘܲܢܣܝܼܡܘܼܢ ܥܲܠ ܫܘܼܚܢܵܐ: ܘܡܸܬ̣ܚ̄ܠܸܡ.
1 ܒܙܲܒ̣ܢܵܐ ܗܵܘܿ: ܫܲܕܲܪ ܡܪܘܿܕ݂ܵܟ݂ ܒܸܠܕܵܢ ܒܲܪ ܒܸܠܕܵܢ ܡܲܠܟܵܐ ܕܒ̣ܵܒܹܠ: ܐܸܓ̇ܪ̈ܵܬ̣ܵܐ ܘܩܘܼܪ̈ܒܵܢܹܐ ܠܚܹܙܲܩܝܵܐ: ܡܸܛܠ ܕܲܫܡܲܥ ܕܐܹܬ̣ܟ̇ܪܲܗ: ܘܲܚܣܲܢ: ܘܐܸܬ̣ܚ̄ܠܸܡ.
2 ܘܲܚܕ݂ܝܼ ܒܗܘܿܢ ܚܹܙܲܩܝܵܐ ܘܚܵܘܝܼ ܐܸܢܘܿܢ ܒܹܝܬ̣ ܓܲܙܹܗ: ܟܸܣܦܵܐ: ܘܕܲܗܒ̣ܵܐ: ܘܒܸܣܡܹ̈ܐ: ܘܡܸܫܚܵܐ ܛܵܒ̣ܵܐ: ܘܟ݂ܠܗܘܿܢ ܒܹܝܬ̣ ܡܵܐܢܵܘ̈ܗܝ: ܘܟ݂ܠ ܕܐܸܫܬ̇ܟܲܚ ܒܓܲܙܵܘ̈ܗܝ ܘܠܵܐ ܫܒܲܩ ܡܸܕܸ̇ܡ ܚܹܙܲܩܝܵܐ ܕܠܵܐ ܚܵܘܝܼ ܐܸܢܘܿܢ: ܒܒܲܝܬܹ̇ܗ ܘܲܒ̣ܟ݂ܠܹܗ ܒܹܝܬ̣ ܫܘܼܠܛܵܢܹܗ.
3 ܘܐܸܬ̣ܵܐ ܐܹܫܲܥܝܵܐ ܢܒ̣ܝܼܵܐ ܠܘܵܬ̣ ܚܹܙܲܩܝܵܐ ܡܲܠܟܵܐ: ܘܐܸܡܲܪ ܠܹܗ: ܡܵܢܵܐ ܐܸܡܲܪܘ ܠܵܟ݂ ܗܵܠܹܝܢ ܓܲܒ̣ܪܹ̈ܐ. ܘܡ̣ܢ ܐܲܝܡܸܟܵܐ ܐܸܬ̣ܵܘ ܠܘܵܬ̣ܵܟ݂ ܘܐܸܡܲܪ ܚܹܙܲܩܝܵܐ: ܡ̣ܢ ܐܲܪܥܵܐ ܪܲܚܝܼܩܬܵܐ ܕܒ̣ܵܒܹܠ ܐܸܬ̣ܵܘ ܠܘܵܬ̣ܝ.
4 ܘܐܸܡܲܪ ܡܵܢܵܐ ܚܙܵܘ ܒܒܲܝܬܵܟ݂ ܘܐܸܡܲܪ ܚܹܙܲܩܝܵܐ ܟܠ ܕܐܝܼܬ̣ ܒܒܲܝܬ̇ܝ ܚܙܵܘ: ܘܠܵܐ ܫܸܒ̣ܩܹ̇ܬ̣ ܡܸܕܸ̇ܡ ܒܒܲܝܬ̇ܝ ܕܠܵܐ ܚܵܘܝܼܬ̣ ܐܸܢܘܿܢ.
5 ܘܐܸܡܲܪ ܐܹܫܲܥܝܵܐ ܠܚܹܙܲܩܝܵܐ: ܫܡܲܥ ܦܸܬ̣ܓ̣ܵܡܹܗ ܕܡܵܪܝܵܐ ܚܲܝܠܬ̣ܵܢܵܐ.
6 ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ: ܘܢܸܫܬ̇ܩܸܠ ܟܠ ܕܐܝܼܬ̣ ܒܒܲܝܬܵܟ݂ ܘܓܲܙܵܐ ܕܐܲܒ̣ܗܲܝ̈ܟ ܕܲܥܕܲܡܵܐ ܠܝܵܘܡܵܢܵܐ ܠܒ̣ܵܒܹܠ ܢܹܐܙܲܠ. ܘܡܸܕܸ̇ܡ ܠܵܐ ܢܸܫܬ̇ܚܲܪ ܠܵܟ݂: ܐܵܡܲܪ ܡܵܪܝܵܐ.
7 ܘܡ̣ܢ ܒܢܲܝ̈ܟ ܕܢܵܦܩܝܼܢ ܡܸܢܵܟ݂: ܕܡܵܘܠܸܕ݂ ܐܲܢ̄ܬ̇: ܢܸܬ̇ܕܲܒ̣ܪܘܼܢ: ܘܢܸܗܘܘܿܢ ܡܗܲܝܡܢܹ̈ܐ ܒܗܲܝܟ̇ܠܹܗ ܕܡܲܠܟܵܐ ܕܒ̣ܵܒܹܠ.
8 ܘܐܸܡܲܪ ܚܿܙܲܩܝܵܐ ܠܐܹܫܲܥܝܵܐ: ܫܲܦܝܼܪ ܦܸܬ̣ܓ̣ܵܡܹܗ ܕܡܵܪܝܵܐ ܕܐܸܡܲܪܬ̇: ܢܸܗܘܹܐ ܫܠܵܡܵܐ ܘܩܘܼܫܬܵܐ ܒܝܵܘ̈ܡܲܝ.
1 ܒܲܝܐܘܼܗܝ ܒܲܝܐܘܼܗܝ ܠܥܲܡܝ: ܐܵܡܲܪ ܐܲܠܵܗܟ݂ܘܿܢ.
2 ܡܠܵܘ ܒܠܸܒܵܗ̇ ܕܐܘܿܪܸܫܠܸܡ: ܘܲܩܪܵܘ ܠܵܗ̇. ܡܸܛܠ ܕܐܸܬ̣ܡܲܠܝܲܬ̤ ܚܲܝܠܵܐ: ܘܲܨܒ̣ܵܬ̤ ܒܲܚܛܝܼܬ̣ܵܐ. ܘܩܲܒ̇ܠܲܬ̣ ܡ̣ܢ ܐܝܼܕܹܗ ܕܡܵܪܝܵܐ ܐܲܥܦܐ ܕܟ݂ܠܗܘܿܢ ܚܛܵܗܹ̈ܝܗ̇.
3 ܩܵܠܵܐ ܕܩܵܪܹܐ ܒܡܲܕ݂ܒ̇ܪܵܐ: ܦܲܢܵܘ ܐܘܼܪܚܵܐ ܠܡܵܪܝܵܐ: ܘܲܬ̣ܪܘܿܨܘ ܒܲܦܩܲܥܬ̣ܵܐ ܫܒ̣ܝܼ̈ܠܹܐ ܠܐܲܠܵܗܲܢ.
4 ܟܠܗܘܿܢ ܢܲܚ̈ܠܹܐ ܢܸܬ̣ܡܲܠܘܿܢ ܘܟ݂ܠܗܘܿܢ ܛܘܼܪܹ̈ܐ ܘܪ̈ܵܡܵܬ̣ܵܐ ܢܸܬ̣ܡܲܟ̇ܟ݂ܘܼܢ. ܘܢܸܗܘܹܐ ܥܲܪܡܵܐ ܠܫܲܦܝܵܐ: ܘܐܲܬ̣ܪܵܐ ܥܲܣܩܵܐ ܠܲܦܩܲܥܬ̣ܵܐ.
5 ܘܢܸܬ̣ܓ̇ܠܹܐ ܐܝܼܩܵܪܹܗ ܕܡܵܪܝܵܐ. ܘܢܸܚܙܘܿܢܹܗ ܐܲܟ݂ܚ̄ܕ݂ܵܐ ܟܠ ܒܣܲܪ. ܡܸܛܠ ܕܦܘܼܡܹܗ ܕܡܵܪܝܵܐ ܡܲܠܸܠ.
6 ܩܵܠܵܐ ܕܐܵܡܲܪ ܩܪܝܼ ܘܐܸܡܲܪ ܡܵܢܵܐ ܐܸܩܪܸܐ. ܟܠ ܒܣܲܪ ܥܡܝܼܪܵܐ: ܘܟ݂ܠܵܗ̇ ܝܵܐܝܘܼܬܹܗ ܐܲܝܟ݂ ܥܘܼܦܝܵܐ ܕܚܲܩܠܵܐ.
7 ܝܑܼܒܸܫ̣ ܥܡܝܼܪܵܐ: ܘܲܚ̣ܡܵܐ ܥܘܼܦܝܵܐ ܡܸܛܠ ܕܪܘܼܚܹܗ ܕܡܵܪܝܵܐ ܢܸܫܒܲܬ̤ ܒܹܗ. ܗܵܟܲܢܵܐ ܗ̄ܘܼ ܥܡܝܼܪܹܗ ܕܥܲܡܵܐ ܗܵܢܵܐ.
8 ܝܵܒܹ̇ܫ ܥܡܝܼܪܵܐ: ܘܚܵܡܹ̇ܐ ܥܘܼܦܝܵܐ ܘܡܸܠܬܹܗ ܕܐܲܠܵܗܲܢ ܩܲܝܵܡܵܐ ܠܥܵܠܡܝܼܢ.
9 ܥܲܠ ܛܘܼܪܹ̈ܐ ܪ̈ܵܡܹܐ ܣܲܩܝ ܠܹܟ݂ܝ ܨܸܗܝܘܿܢ ܡܣܲܒܲܪܬܵܐ ܐܲܪܝܼܡܝ ܩܵܠܹܟ݂ܝ ܒܚܲܝܠܵܐ: ܐܘܿܪܸܫܠܸܡ ܡܣܲܒܲܪܬܵܐ ܐܲܪܝܼܡܝ: ܘܠܵܐ ܬܸܕ݂ܚ̄ܠܝܼܢ ܐܹܡܲܪܝ ܠܩܘܼܪ̈ܝܵܐ ܕܲܝܗܘܼܕ݂ܵܐ: ܗܵܐ ܐܲܠܵܗܟܹܝܢ.
10 ܗܵܐ ܡܵܪܝܵܐ ܐܲܠܵܗܵܐ ܐܵܬܹ̇ܐ ܒܥܘܼܫܢܵܐ: ܘܲܕ݂ܪܵܥܹܗ ܒܚܲܝܠܵܐ. ܗܵܐ ܐܲܓ̣̱ܪܹܗ ܥܲܡܹܗ: ܘܲܥܒ̣ܵܕܹ̇ܗ ܩܕ݂ܵܡܵܘܗܝ.
11 ܐܲܝܟ݂ ܪܵܥܝܵܐ ܕܪܵܥܹ̇ܐ ܠܲܓ̣ܙܵܪܹܗ: ܘܒܲܕ݂ܪܵܥܹܗ ܡܟܲܢܸܫ ܐܸܡܪܹ̈ܐ. ܘܲܒ̣ܚܲܢܹܗ ܫܵܩܹܠ ܠܗܘܿܢ. ܘܠܲܕ݂ܡܲܝ̈ܢܩܵܢ ܡܬܲܪܣܸܐ.
12 ܡܲܢ̣ܘܼ ܐܲܟ̇ܝܼܠ ܡܲـ̈ـܝܵܐ ܒܫܘܼܥܠܹܗ: ܘܲܫܡܲܝܵܐ ܡܫܲܚ ܒܙܲܪܬܹ̇ܗ. ܘܐܲܟ̇ܝܼܠ ܒܲܙܘܵܪܹܗ ܥܲܦܪܵܗ̇ ܕܐܲܪܥܵܐ. ܘܲܬ̣ܩܲܠ ܛܘܼܪܹ̈ܐ ܒܡܲܬ̣ܩܵܠܵܐ: ܘܪ̈ܵܡܵܬ̣ܵܐ ܒܡܲܣܲܐܬ̣ܵܐ.
13 ܡܲܢܘܼ ܬܲܩܸܢ ܪܘܼܚܹܗ ܕܡܵܪܝܵܐ ܐܵܘ ܡܲܢܘܼ ܗܘ̤ܵܐ ܠܹܗ ܡܵܠܹ̇ܟ݂ ܡܸܠܟܵܐ.
14 ܒܡܲܢܘܼ ܐܸܬ̣ܡ̱ܠܸܟ݂: ܘܐܲܠܦܹܗ ܘܣܲܟ̇ܠܹܗ ܐܘܼܪܚܵܐ ܕܕ݂ܝܼܢܵܐ ܘܐܲܠܦܹܗ ܝܑܼܕܲܥܬ̣ܵܐ. ܘܐܘܼܪܚܵܐ ܕܣܘܼܟܵܠܵܐ ܚܵܘܝܹܗ.
15 ܗܵܐ ܥܲܡܡܹ̈ܐ ܐܲܝܟ݂ ܢܘܼܛܦܬܵܐ ܡ̣ܢ ܩܲܕ݂ܣܵܐ: ܘܐܲܝܟ݂ ܢܸܙܠܵܐ ܕܡܲܣܲܐܬ̣ܵܐ. ܘܓ̣ܵܙܪ̈ܵܬ̣ܵܐ ܐܲܝܟ݂ ܕܲܚܝܼܚܵܐ ܢܸܫ̈ܕ݂ܝܵܢ.
16 ܘܠܸܒ̣ܢܵܢ ܠܵܐ ܚܫܝܼܒ̣ ܠܹܗ ܠܝܲܩܕܵܢܵܐ. ܘܚܲܝ̄ܘܬܹܗ ܠܵܐ ܚܫܝܼܒ̣ܵܐ ܠܹܗ ܠܵܥܠܵܬ̣ܵܐ.
17 ܘܟ݂ܠܗܘܿܢ ܥܲܡܡܹ̈ܐ ܐܲܝܟ݂ ܠܵܐ ܡܸܕܸ̇ܡ ܚܫܝܼܒ̣ܝܼܢ ܠܹܗ. ܠܐܲܒ̣ܕܵܢܵܐ ܘܲܠܚܲܪܒܵܐ ܚܫܝܼܒ̣ܝܼܢ ܠܹܗ.
18 ܠܡܲܢ ܕܲܡܝܼܬ̇ܘܿܢܵܝܗܝ ܠܐܲܠܵܗܵܐ. ܘܠܲܐܝܕܵܐ ܕܡܘܼܬ̣ ܕܲܡܝܼܬ̇ܘܼܢܵܝܗܝ.
19 ܨܲܠܡܵܐ ܗ̄ܘܼ ܕܲܥܒܲܕ݂ ܢܲܓܵܪܵܐ ܘܩܲܝܢܵܝܵܐ ܒܕܲܗܒ̣ܵܐ ܩܲܪܡܹܗ. ܘܣܹܐܡܵܐ ܨܪܝܼܦܵܐ ܩ̣ܒܲܥ ܒܹܗ.
20 ܦܪܲܫ̣ ܗ̤ܘ ܩܲܝܣܵܐ ܕܠܵܐ ܡܲܒ̣ܠܲܛ ܘܲܓ̣ܒ̣ܵܐ ܢܲܓܵܪܵܐ. ܘܲܒ̣ܚܸܡ̱ܬܹܗ ܓܲܠܦܹܗ ܘܡܲܬ̣ܩܸܢ ܨܲܠܡܵܐ ܕܠܵܐ ܙܵܐܲܥ.
21 ܠܵܐ ܫ̣ܡܲܥܬ̇ܘܿܢ: ܘܠܵܐ ܝܼܕܲܥ̣ܬ̇ܘܿܢ ܘܠܵܐ ܐܸܬ̣ܐ̱ܡܲܪܠܟ݂ܘܿܢ ܡ̣ܢ ܪܹܫܝܼܬ̣ܵܐ. ܘܠܵܐ ܐܸܣܬܲܟܲܠܬ̇ܘܿܢ: ܫܲܬ̣ܐ̱ܣܹ̈ܝܗ̇ ܕܐܲܪܥܵܐ.
22 ܘܲܠܡܲܢ ܕܝܵܬܹܒ̣ ܥܲܠ ܚܘܼܓ̣ܬ̣ܵܗ̇ ܕܐܲܪܥܵܐ: ܘܥܵܡܘܿܪܹ̈ܝܗ̇ ܐܲܝܟ݂ ܩܲܡܨܵܐ ܕܲܡ̣ܬܲܚ ܫܡܲܝܵܐ ܐܲܝܟ݂ ܟܸܦܬ̣ܵܐ. ܘܲܡܬܲܚ ܐܸܢܘܿܢ ܐܲܝܟ݂ ܡܲܫܟ̇ܢܵܐ ܠܝܲܬ̣ܒܵܐ.
23 ܕܲܥ̣ܒܲܕ݂ ܫܲܠܝܼܛܵܢܹ̈ܐ ܠܵܐ ܡܸܕܸ̇ܡ: ܘܕܲܝܵܢܹ̈ܐ ܕܐܲܪܥܵܐ ܐܲܝܟ݂ ܕܠܲܝܬ̇ ܐܸܢܘܿܢ.
24 ܠܵܐ ܢܸܨܒ̣ܘܼܢ: ܘܠܵܐ ܢܸܙܪ̱ܥܘܼܢ. ܘܠܵܐ ܢܲܪܡܘܿܢ ܥܸܩܵܪܵܐ ܒܐܲܪܥܵܐ. ܢܸܦܘܿܚ ܒܗܘܿܢ ܘܢܹܐܒ̣ܫܘܼܢ. ܘܥܲܠܥܵܠܵܐ ܬܸܫܩܘܿܠ ܐܸܢܘܿܢ ܐܲܝܟ݂ ܕܲܠܚܲܒ̇ܬ̣ܵܐ.
25 ܠܡܲܢ ܕܲܡܝܼܬ̇ܘܿܢܵܢܝ ܕܦܵܚܹ̇ܡ ܐ̄ܢܵܐ ܠܹܗ: ܐܵܡܲܪ ܩܲܕ̇ܝܼܫܵܐ.
26 ܐܲܪܝܼܡܘ ܥܲܝܢܲܝ̈ܟ̇ܘܿܢ ܠܲܡܪܵܘܡܵܐ. ܘܲܚܙܵܘ ܡܲܢ̣ܘܼ ܒܪܵܐ ܗܵܠܹܝܢ. ܕܡܲܦܸܩ ܒܡܸܢܝܵܢܵܐ ܚܲܝ̈ܠܵܘܵܬ̣ܗܘܿܢ: ܘܲܠܟ݂ܠܗܘܿܢ ܩ̣ܪܵܐ ܫܡܵܗܹ̈ܐ ܒܣܘܿܓ̣ܵܐܐ ܕܐܝܼܩܵܪܹܗ: ܘܲܒ̣ܥܘܼܫܢܵܐ ܕܚܲܝܠܹܗ ܐ̄ܢܵܫ ܠܵܐ ܛܵܥܹ̇ܐ.
27 ܠܡܵܢܵܐ ܡܡܲܠܸܠ ܐܲܢ̄ܬ̇ ܝܲܥܩܘܿܒ̣: ܘܐܵܡܲܪ ܐܲܢ̄ܬ̇ ܝܼܣܪܵܝܹܠ. ܕܲܡܛܲܫ̈ܝܵܢ ܐܘܼܪ̈ܚܵܬ̣ܝ ܡ̣ܢ ܡܵܪܝܵܐ: ܘܡܲܥܒܲܪ ܕܝܼܢܝ ܡ̣ܢ ܐܲܠܵܗܝ.
28 ܠܵܐ ܝܼܕܲܥܬ̇: ܘܠܵܐ ܫ̣ܡܲܥܬ̇: ܕܐܲܠܵܗܵܐ ܠܥܵܠܲܡ ܡܵܪܝܵܐ ܗ̄ܘܼ ܕܲܒ̣ܪܵܐ ܣܵܘ̈ܦܹܝܗ̇ ܕܐܲܪܥܵܐ. ܠܵܐ ܡܸܬ̇ܛܲܪܲܦ: ܘܠܵܐ ܠܵܐܹ̇ܐ: ܘܠܲܝܬ̇ ܒܘܼܕܵܩܵܐ ܠܣܘܼܟܵܠܹܗ.
29 ܝܵܗܹ̇ܒ̣ ܚܝܠܵܐ ܠܲܡܛܲܪ̈ܦܹܐ ܘܲܠܡܲܟ݂ܐܒ̇ܝ̈ ܟܹܐܒ̣ܵܐ ܡܲܣܓܸ̇ܐ ܥܘܼܫܢܵܐ.
30 ܢܸܬ̇ܛܲܪܦܘܼܢ ܥܠܲܝܡܹ̈ܐ ܘܢܹܠܐܘܿܢ ܘܓܲܕ̇ܘܼ̈ܕܹܐ ܡܸܬ̇ܬܲܩܵܠܘܼ ܢܸܬܲܩܠܘܼܢ.
31 ܘܐܲܝܠܹܝܢ ܕܲܡܣܲܒ̇ܪܝܼܢ ܒܡܵܪܝܵܐ: ܢܚܲܠܦܘܼܢ ܚܲܝܠܗܘܿܢ. ܘܢܵܘܥܘܿܢ ܓܸܦܹ̈ܐ ܐܲܝܟ݂ ܕܝܵܘܢܵܐ. ܘܢܸܪ̱ܗܛܘܼܢ: ܘܠܵܐ ܢܸܠܐܘܿܢ ܘܲܢܗܲܠܟ݂ܘܿܢ: ܘܠܵܐ ܢܸܬ̇ܛܲܪܦܘܼܢ.
1 ܫܬ̣ܘܿܩܹ̈ܝܢ ܓܵܙܪ̈ܵܬ̣ܵܐ. ܘܐܸܡ̈ܘܵܬ̣ܵܐ ܢܚܲܠ̈ܦܵܢ ܚܲܝܠܵܐ. ܢܸܩ̱ܪ̈ܒ̣ܵܢ: ܘܗܵܝܕܹ̇ܝܢ ܢܡܲܠ̈ܠܵܢ ܘܐܲܟ݂ܚ̄ܕ݂ܵܐ ܠܕ݂ܝܼܢܵܐ ܢܸܩ̱ܪ̈ܒ̣ܵܢ.
2 ܡܲܢܘܼ ܐܲܥܝܼܪ ܙܲܕ̇ܝܼܩܘܼܬ̣ܵܐ ܡ̣ܢ ܡܲܕ݂ܢ̱ܚܵܐ: ܘܲܩ̣ܪܵܗ̇ ܠܪܸܓ̣ܠܹܗ. ܢܸܫܬܲܠܡܘܼܢ ܩܕ݂ܵܡܵܘܗܝ ܥܲܡܡܹ̈ܐ ܘܡܲܠ̈ܟܹ̇ܐ ܢܸܬ̣ܘ̱ܪܘܼܢ ܢܸܬܸ̇ܠ ܐܲܝܟ݂ ܥܲܦܪܵܐ ܚܲܪܒܹ̇ܗ: ܘܐܲܝܟ݂ ܕܢܵܬ̣ܪܵܐ ܩܸܫܬܹ̇ܗ.
3 ܢܸܪܕ̇ܘܿܦ ܐܸܢܘܿܢ: ܘܢܸܥܒܸ̇ܕ݂ ܫܠܵܡܵܐ. ܘܐܘܼܪܚܵܐ ܒܪܸ̈ܓ̣ܠܵܘܗܝ ܠܵܐ ܢܲܥܸܠ.
4 ܡܲܢܘܼ ܥܲܬܸ̇ܕ݂ ܘܲܥܒܲܕ݂ ܡܲܢ ܕܲܩ̣ܪܵܐ ܠܕ݂ܵܪܹ̈ܐ ܡ̣ܢ ܪܹܫܝܼܬ̣ܵܐ. ܐܸܢܵܐ ܐ̄ܢܵܐ ܡܵܪܝܵܐ ܩܲܕ݂ܡܵܝܵܐ ܘܲܐ̄ܚܪܵܝܵܐ: ܐܸܢܵܐ ܐ̄ܢܵܐ.
5 ܚܙܲܝܵܢ̈ܝ ܓܵܙܪ̈ܵܬ̣ܵܐ. ܘܲܕ݂ܚܸܠ̣ܘ ܣܵܘ̈ܦܹܝܗ̇ ܕܐܲܪܥܵܐ. ܕܚܸܠ̣ܘ ܘܲܩ̣ܪܸܒ̣ܘ ܘܐܸܬ̣ܵܘ.
6 ܘܲܓ̣ܒܲܪ ܠܚܲܒ̣ܪܹܗ ܡܥܲܕ̇ܪܝܼܢ ܘܠܲܐܚܘܼܗܝ ܐܵܡܲܪ ܐܸܬ̣ܚܲܝܲܠ.
7 ܘܠܲܒܸ̇ܒ̣ ܢܲܓܵܪܵܐ ܠܩܲܝܢܵܝܵܐ ܕܐܵܪܹܫ ܒܩܘܼܪܢܵܣܵܐ: ܘܦܵܠܲܚ. ܘܐܵܡܲܪ ܥܲܠ ܕܸܒ̣ܩܵܐ ܕܫܲܦܝܼܪ ܗ̄ܘܼ. ܘܩܵܒ̣ܥܝܼܢ ܠܹܗ ܒܨܸܨܹ̈ܐ: ܕܠܵܐ ܢܸܬ̇ܬ̇ܙܝܼܥ.
8 ܗܵܫܵܐ ܝܼܣܪܵܝܹܠ ܥܲܒ̣ܕ̇ܝܼ: ܝܲܥܩܘܿܒ̣ ܕܲܓ̣ܒܹ̇ܝܬ̣ܵܟ݂: ܙܲܪܥܹܗ ܕܐܲܒ̣ܪܵܗܵܡ ܪܵܚܹܡܝ ܕܚܲܝܸܠܬܵܟ݂.
9 ܡ̣ܢ ܣܵܘ̈ܦܹܝܗ̇ ܕܐܲܪܥܵܐ: ܘܡ̣ܢ ܕܵܘܩܹ̈ܝܗ̇ ܩܪܝܼܬ̣ܵܟ݂ ܘܐܸܡ̇ܪܹܬ̣ ܠܵܟ݂ ܥܲܒ̣ܕ̇ܝ ܠܵܟ݂ ܥܲܒ̣ܕܝܼ ܐܲܢ̄ܬ̇ ܓܒܹܝܬ̣ܵܟ݂ ܘܠܵܐ ܐܲܣܠܝܼܬܵܟ݂.
10 ܠܵܐ ܬܸܕ݂ܚܲܠ ܡܸܛܠ ܕܥܲܡܵܟ݂ ܐ̄ܢܵܐ. ܘܠܵܐ ܬܸܬ̣ܪ̱ܗܸܒ̣ ܡܸܛܠ ܕܐܸܢܵܐ ܐ̄ܢܵܐ ܐܲܠܵܗܵܟ݂. ܚܲܝܸܠܬܵܟ݂: ܐܵܦ ܥܲܕܲܪܬܵܟ݂ ܐܵܦ ܣܲܡܸܟ݂ܬܵܟ݂ ܒܝܲܡܝܼܢܝ ܙܲܕ̇ܝܼܩܬܵܐ.
11 ܢܸܒ̣ܗ̱ܬ̣ܘܼܢ ܘܢܸܚܦܪܘܿܢ ܐܲܝܠܹܝܢ ܕܣܵܩ̇ܪܝܼܢ ܠܵܟ݂: ܢܸܗܘܘܿܢ ܐܲܝܟ݂ ܠܵܐ ܡܸܕܸ̇ܡ. ܘܢܹܐܒ̣ܕ̇ܘܿܢ ܓܲܒ̣ܪܹ̈ܐ ܕܢܵܨܹ̇ܝܢ ܥܲܡܵܟ݂.
12 ܬܸܒ̣ܥܸܐ ܐܸܢܘܿܢ: ܘܠܵܐ ܬܸܫܟܲܚ ܐܸܢܘܿܢ ܠܓܲܒ̣ܪܹ̈ܐ ܕܢܵܨܹ̇ܝܢ ܥܲܡܵܟ݂. ܢܸܗܘܘܿܢ ܐܲܝܟ݂ ܕܠܵܐ ܐܝܼܬܲܝܗܘܿܢ: ܓܲܒ̣ܪܹ̈ܐ ܕܡܸܬ̣ܟܲܬ̇ܫܝܼܢ ܥܲܡܵܟ݂.
13 ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܵܟ݂: ܡܚܲܝܠܵܢܵܐ ܕܝܲܡܝܼܢܵܟ݂: ܐܸܡ̇ܪܹܬ̣ ܠܵܟ݂ ܠܵܐ ܬܸܕ݂ܚܲܠ. ܐܸܢܵܐ ܐ̄ܢܐ ܥܵܕ݂ܘܿܪܵܟ݂.
14 ܠܵܐ ܬܸܕ݂ܚ̄ܠܝܼܢ ܬܵܘܠܥܹܗ ܕܝܲܥܩܘܿܒ̣: ܘܲܡܢܝܼܢܹܗ ܕܝܼܣܪܵܝܹܠ ܐܸܢܵܐ ܐ̄ܢܵܐ ܥܵܕ݂ܘܿܪܹܟ݂ܝ: ܐܵܡܲܪ ܡܵܪܝܵܐ. ܘܦܵܪܘܿܩܹܟ݂ܝ ܩܲܕ̇ܝܼܫܵܐ ܕܝܣܪܵܝܹܠ.
15 ܗܵܐ ܥܒܲܕ̇ܬܵܟ݂ ܐܲܝܟ݂ ܓܲܪܓܲܪܵܟ݂ ܚܲܕ݂ܬ̣ܵܐ: ܕܫܵܚܹ̇ܩ ܘܡܲܕܸ̇ܩ ܬܕ݂ܘܼܫ ܛܘܼܪܹ̈ܐ: ܘܬܲܕܸ̇ܩ ܘܪ̈ܵܡܵܬ̣ܵܐ ܬܸܥܒܸ̇ܕ݂ ܐܲܝܟ݂ ܥܘܼܪܵܐ.
16 ܬܸܕ݂ܕܹܐ ܐܸܢܘܿܢ. ܘܪܘܼܚܵܐ ܬܸܫܩܘܿܠ ܐܸܢܘܿܢ ܘܥܲܠܥܵܠܵܐ ܬܒܲܕܲܪ ܐܸܢܘܿܢ. ܘܐܲܢ̄ܬ̇ ܬܕ݂ܘܼܨ ܒܡܵܪܝܵܐ. ܘܲܒ̣ܩܲܕ̇ܝܼܫܵܐ ܕܝܼܣܪܵܝܹܠ ܬܸܫܬܲܒܲܚ.
17 ܡܸܣܟܹ̇ܢܹ̈ܐ ܘܒ̣ܵܝܫܹ̈ܐ ܒܵܥܹ̇ܝܢ ܡܲـ̈ـܝܵܐ ܘܠܲܝܬ̇ ܘܠܸܫܵܢܗܘܿܢ ܒܨܲܗܝܵܐ ܝܑܼܒܸܫ ܐܸܢܵܐ ܡܵܪܝܵܐ ܐܸܥܢܸܐ ܐܸܢܘܿܢ ܐܲܠܵܗܹܗ ܕܝܼܣܪܵܝܹܠ: ܘܠܵܐ ܐܸܫܒ̇ܘܿܩ ܐܸܢܘܿܢ.
18 ܐܸܦ̮ܬܲܚ ܢܲܗܪ̈ܵܘܵܬ̣ܵܐ ܒܛܘܼܪܹ̈ܐ: ܘܲܒ̣ܓ̣ܵܘ ܦܲܩ̈ܥܵܬ̣ܵܐ ܡܲܒ̇ܘܼܥܹ̈ܐ: ܐܸܥܒܸ̇ܕ݂ ܡܲܕ݂ܒ̇ܪܵܐ ܠܐܵܓ̣ܡܹ̈ܐ ܕܡܲـ̈ـܝܵܐ: ܘܐܲܪܥܵܐ ܨܗܝܼܬ̣ܵܐ ܠܡܲܒ̇ܘܼܥܹ̈ܐ ܕܡܲـ̈ـܝܵܐ.
19 ܐܸܬܸ̇ܠ ܒܡܲܕ݂ܒ̇ܪܵܐ ܐܲܪ̈ܙܹܐ ܘܐܸܫܟܵܪ̈ܥܹܐ: ܘܐܵܣܵܐ ܘܩܲܝܣܵܐ ܕܡܸܫܚܵܐ. ܐܹܣܝܼܡ ܒܲܦܩܲܬ̣ܵܐ ܫܲܪ̈ܘܲܝܢܹܐ ܗܕ݂ܝܼܪܹ̈ܐ ܐܲܟ݂ܚ̄ܕ݂ܵܐ.
20 ܕܢܸܚܙܘܿܢ ܘܢܸܕ̇ܥܘܼܢ ܘܢܸܬ̣ܒܲܝܢܘܼܢ. ܘܢܸܣܬܲܟ̇ܠܘܼܢ ܐܲܟ݂ܚ̄ܕ݂ܵܐ: ܕܐܝܼܕܹܗ ܕܡܵܪܝܵܐ ܥܸܒ̣ܕܲܬ̤ ܗܵܕܹܐ: ܘܩܲܕ̇ܝܼܫܵܐ ܕܝܼܣܪܵܝܹܠ ܒ̣ܪܵܗ̇.
21 ܩܲܪܸܒ̣ܘ ܕܝܼܢܲܝ̈ܟ̇ܘܿܢ: ܐܵܡܲܪ ܡܵܪܝܵܐ. ܩܲܪܸܒ̣ܘ ܬܲܪ̈ܥܝܵܬ̣ܟ݂ܘܿܢ ܐܵܡܲܪ ܡܲܠܟܹ̇ܗ ܕܝܲܥܩܘܿܒ̣.
22 ܢܸܩ̱ܪܒ̣ܘܼܢ: ܘܲܢܚܵܘܘܿܢ ܐܲܝܠܹܝܢ ܕܲܥܬ̣ܝܼ̈ܕ݂ܵܢ ܩܲܕ݂ܡܵܝܵـ̈ـܬ̣ܵܐ ܡܵܢܵܐ ܐܸܢܹܝܢ: ܚܵܘܵܐܘܼܢܝ. ܘܲܢܣܝܼܡ ܒܠܸܒܲܢ: ܘܢܸܕܲܥ ܐ̄ܚܪܵܝܬ̇ܗܹܝܢ. ܐܵܘ ܕܐܵܬ̣̈ܝܵܢ ܐܲܫ̱ܡܥܘܼܢ.
23 ܚܵܘܵܐܘܼܢܝ ܐܵܬ̣̈ܘܵܬ̣ܵܐ ܕܲܥܬ̣ܝܼܕ݂ܵܢ ܘܢܸܕܲܥ ܕܐܲܠܵܗܹ̈ܐ ܐܲܢ̄ܬ̇ܘܿܢ ܐܵܦ ܡܲܛܐ̱ܒ̣ܝܼܢ ܐ̄ܢܬ̇ܘܿܢ ܐܵܦ ܡܲܒ̣ܐ̱ܫܝܼܢ ܐ̄ܢܬ̇ܘܿܢ ܘܢܸܫܬܲܥܹܐ: ܘܢܸܚܙܹܐ ܐܲܟ݂ܚ̄ܕ݂ܵܐ.
24 ܗܵܐ ܐܲܢ̄ܬ̇ܘܿܢ ܠܵܐ ܡܸܕܸ̇ܡ ܐܲܢ̄ܬ̇ܘܿܢ. ܘܲܥܒ̣ܵܕܲܝ̈ܟ̇ܘܿܢ ܡ̣ܢ ܚܲܪܒܵܐ. ܘܛܲܢܦܘܼܬ̣ܵܐ ܗ̄ܝܼ ܓܒ̣ܝܼܬ̣ܟ݂ܘܿܢ.
25 ܐܲܥܝܼܪܹܬ̣ ܡ̣ܢ ܓܲܪܒ̇ܝܵܐ: ܕܢܹܐܬܹܐ ܡ̣ܢ ܡܲܕ݂ܢܵܚܲܝ̈ ܫܸܡܫܵܐ: ܘܢܸܩܪܹܐ ܒܫܹܡܝ. ܘܢܹܐܬ̣ܘܿܢ ܫܲܠܝܼܛܵܢܹ̈ܐ ܘܢܸܬ̇ܬ̇ܕ̇ܝܼܫܘܼܢ: ܐܲܝܟ݂ ܛܝܼܢܵܐ ܕܕ݂ܵܐܹ̇ܫ ܦܲܚܵܪܵܐ.
26 ܡܲܢܘܼ ܕܲܢܚܵܘܹܐ ܡ̣ܢ ܪܹܫܝܼܬ̣ܵܐ: ܘܢܸܕܲܥ ܘܢܹܐܡܲܪ ܕܙܲܕ̇ܝܼܩ. ܠܲܝܬ̇ ܕܲܡܚܵܘܸܐ ܐܵܦܠܵܐ ܕܡܲܫܡܲܥ: ܐܵܦܠܵܐ ܕܫܵܡܲܥ ܡܸܠܲܝ̈ܟ̇ܘܿܢ.
27 ܪܹ̈ܫܵܝܵܬ̣ܵܐ ܕܨܸܗܝܘܿܢ ܗܵܠܹܝܢ ܐܸܢܹܝܢ. ܘܠܐܘܿܪܸܫܠܸܡ ܡܣܲܒ̇ܪܵܢܵܐ ܐܸܬܸ̇ܠ.
28 ܚܵܪܹܬ̣ ܘܠܲܝܬ̇ ܐ̄ܢܵܫ ܕܡܸܬ̣ܪܲܥܹܐ ܥܲܠ ܗܵܠܹܝܢ: ܕܐܹܫܲܐܸܠ ܐܸܢܘܿܢ: ܘܢܸܬ̇ܠܘܼܢ ܠܝܼ ܦܸܬ̣ܓ̣ܵܡܵܐ.
29 ܗܵܐ ܟܠܗܘܿܢ ܠܵܐ ܡܸܕܸ̇ܡ ܐܸܢܘܿܢ: ܘܲܥܒ̣ܵܕܲܝ̈ܗܘܿܢ ܣܪܝܼܩܝܼܢ ܘܪܘܼܚܵܐ ܪܲܝܩܵܢܝܼܬ̣ܵܐ ܥܒ̣ܵܕܲܝ̈ܗܘܿܢ.
1 ܗܵܐ ܠܥܲܒ̣ܕ̇ܝ ܣܲܡ̇ܟܹ̇ܬ̣. ܘܲܒ̣ܓܲܒ̣ܚ̄ ܨܒ̣ܵܬ̤ ܢܲܦ̮ܫܝ. ܘܝܸܗ̄ܒܹ̇ܬ̣ ܪܘܼܚܝ ܥܠܵܘܗܝ: ܕܢܲܦܸܩ ܕܝܼܢܵܐ ܠܥܲܡܡܹ̈ܐ.
2 ܠܵܐ ܢܸܩܥܸܐ: ܘܠܵܐ ܢܪܝܼܒ̣ ܘܠܵܐ ܢܲܫܡܲܥ ܩܵܠܹܗ ܒܫܘܼܩܵܐ.
3 ܩܲܢܝܵܐ ܪܥܝܼܥܵܐ ܠܵܐ ܢܸܬ̣ܒܲܪ. ܘܲܫܪܵܓ̣ܵܐ ܕܲܡܛܲܦܛܸܦ ܠܵܐ ܢܲܕ݂ܥܸܟ݂. ܒܩܘܼܫܬܵܐ ܢܲܦܸܩ ܕܝܼܢܵܐ.
4 ܠܵܐ ܢܸܕ݂ܥܲܟ݂ ܘܠܵܐ ܢܛܲܦܛܸܦ: ܥܕܲܡܵܐ ܕܲܢܣܝܼܡ ܕܝܼܢܵܐ ܒܐܲܪܥܵܐ. ܘܲܠܢܵܡܘܿܣܹܗ ܓܵܙܪ̈ܵܬ̣ܵܐ ܢܣܲܟ̇ـ̈ـܝܵܢ.
5 ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ: ܕܲܒ̣ܪܵܐ ܫܡܲܝܵܐ ܘܲܡ̣ܬܚ ܐܸܢܘܿܢ. ܘܲܪܩܲܥ̣ ܐܲܪܥܵܐ ܘܟ݂ܠ ܕܒ̣ܵܗ̇. ܘܝܲܗ̄ܒ̣ ܢܫܲܡܬ̣ܵܐ ܠܥܲܡܵܐ ܕܲܥܠܹܝܗ̇: ܘܪܘܼܚܵܐ ܠܕܲܡܗܲܠܟ݂ܝܼܢ ܒܵܗ̇.
6 ܐܸܢܵܐ ܡܵܪܝܵܐ ܩܪܹܝܬ̣ܵܟ݂ ܒܙܲܕ̇ܝܩܘܼܬ̣ܵܐ: ܘܐܸܚ̇ܕܹ̇ܬ̣ ܒܐܝܼܕ݂ܵܟ݂ ܘܚܲܝܸܠܬܵܟ݂. ܘܝܲܗ̄ܒ̣ܬܵܟ݂ ܩܝܵܡܵܐ ܠܥܲܡܵܐ: ܘܢܘܼܗܪܵܐ ܠܥܲܡܡܹ̈ܐ.
7 ܕܲܬ̣ܦܲܬܲܚ ܥܲܝܢܹ̈ܐ ܕܲܥܘܼܝܼܪܹ̈ܐ: ܘܬܲܦܸܩ ܠܐܲܣܝܼܪܹ̈ܐ ܡ̣ܢ ܒܹܝܬ̣ ܚܒ̣ܘܼܫܝܵܐ: ܘܡ̣ܢ ܒܹܝܬ̣ ܐܲܣܝܼܪܹ̈ܐ ܠܲܕ݂ܝܵܬ̣ܒ̇ܝܼܢ ܒܚܸܫܘܿܟ݂ܵܐ.
8 ܐܸܢܵܐ ܐ̄ܢܵܐ ܡܵܪܝܵܐ: ܘܗܵܢܵܘ ܫܹܡܝ. ܘܐܝܼܩܵܪܝ ܠܐܲܚܪܹܝܢ ܠܵܐ ܐܸܬܸ̇ܠ: ܘܐܵܦܠܵܐ ܬܸܫܒ̇ܘܿܚܬ̇ܝ ܠܲܓ̣ܠܝܼܦܹ̈ܐ.
9 ܚܲܕ݂̈ܬ̣ܵܬ̣ܵܐ ܐܸܢܵܐ ܡܚܵܘܸܐ. ܘܩܲܕ݂ܡܵـ̈ـܝܵܬ̣ܵܐ ܗܵܐ ܐܸܬܲܝ̈. ܘܥܲܕ݂ܠܵܐ ܢܸܨܡ̱̈ܚܵܢ: ܐܲܫ̱ܡ̇ܥܹܬ̣ ܐܸܢܹܝܢ ܠܟ݂ܘܿܢ. ܬܸܫܒ̇ܘܼܚܬܵܐ ܕܐܹܫܲܥܝܵܐ.
10 ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ. ܬܸܫܒ̇ܘܿܚܬܹܗ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ. ܢܵܚܬܲܝ̈ ܝܲܡܵܐ ܒܲܡܠܹܐܹܗ: ܘܓ̣ܵܙܪ̈ܵܬ̣ܵܐ ܘܲܕ݂ܥܵܡ̇ܪܝܼܢ ܒܗܹܝܢ.
11 ܢܸܚܕܹ̇ܐ ܡܲܕ݂ܒ̇ܪܵܐ ܘܩܘܼܪ̈ܝܹܗ: ܘܡܲܪ̈ܓܹܐ ܬܸܗܘܹܐ ܩܕ݂ܵܪ. ܢܫܲܒ̇ܚܘܼܢ ܝܵܬ̣ܒܲܝ̈ ܫܩܝܼ̈ܦܹܐ: ܘܡ̣ܢ ܪܹܫܵܐ ܕܛܘܼܪܹ̈ܐ ܢܸܩܥܘܿܢ.
12 ܘܢܸܬ̇ܠܘܼܢ ܬܸܫܒ̇ܘܿܚܬܵܐ ܠܡܵܪܝܵܐ: ܘܬܸܫ̈ܒ̇ܚܵܬܹܗ ܢܚܵܘܘܿܢ ܒܓ̣ܵܙܪ̈ܵܬ̣ܵܐ.
13 ܡܵܪܝܵܐ ܐܲܝܟ݂ ܓܲܢ̄ܒܵܪܵܐ ܢܸܦܘܿܩ. ܘܐܲܝܟ݂ ܓܲܒ̣ܪܵܐ ܩܪܲܒ̣ܬ̣ܵܢܵܐ ܢܓܲܪܸܓ̣ ܛܢܵܢܵܐ. ܢܸܩܥܸܐ ܘܢܸܬ̣ܓܲܢ̄ܒܲܪ: ܘܢܸܩܛܘܿܠ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ.
14 ܫܸܬ̣ܩܹ̇ܬ̣: ܡ̣ܢ ܥܵܠܲܡ ܐܹܫܬ̇ܘܿܩ ܣܲܝܒ̇ܪܹܬ̣ ܐܲܝܟ݂ ܝܵܠܹܕ̇ܬܵܐ. ܐܲܬ̣ܡܲܗ ܘܐܲܬ̣ܘܲܪ ܐܲܟ݂ܚ̄ܕ݂ܵܐ.
15 ܐܲܚܪܸܒ̣ ܛܘܼܪܹ̈ܐ ܘܪ̈ܵܡܵܬ̣ܵܐ: ܘܟ݂ܠܹܗ ܥܘܼܫܢ̱ܗܘܿܢ ܐܵܘܒܸ̇ܫ. ܐܸܥܒܸ̇ܕ݂ ܢܲܗܪ̈ܵܘܵܬ̣ܵܐ ܠܓ̣ܵܙܪ̈ܵܬ̣ܵܐ: ܘܐܵܓ̣ܡܹ̈ܐ ܐܵܘܒܸ̇ܫ.
16 ܐܸܕ݂ܒܲܪ ܥܘܝܼܪܹ̈ܐ ܒܐܘܼܪܚܵܐ ܕܠܵܐ ܝܵܕ݂ܥܝܼܢ. ܘܒܲܫܒ̣ܝܼ̈ܠܹܐ ܕܠܵܐ ܝܵܕ݂ܥܝܼܢ ܗ̄ܘܼܵܘ: ܐܹܗܲܠܸܟ݂ ܐܸܢܘܿܢ. ܐܸܥܒܸ̇ܕ݂ ܚܸܫܘܿܟ݂ܵܐ ܩܕ݂ܵܡܲܝܗܘܿܢ ܢܘܼܗܪܵܐ. ܘܥܲܪܡܵܐ ܐܹܫܲܦܹܐ. ܗܵܠܹܝܢ ܦܸܬ̣ܓ̣ܵܡܹ̈ܐ ܥܸܒ̣ܕܹ̇ܬ̣ ܠܗܘܿܢ. ܘܠܵܐ ܫܸܒ̣ܩܹ̇ܬ̣ ܐܸܢܘܿܢ.
17 ܢܸܗܦ̄ܟ݂ܘܿܢ ܠܒܸܣܬܲܪܗܘܿܢ: ܘܢܸܒ̣ܗ̱ܬ̣ܘܼܢ ܒܒܸܗܬ̇ܬ̣ܵܐ: ܐܲܝܠܹܝܢ ܕܲܬ̣ܟ݂ܝܼܠܝܼܢ ܥܲܠ ܓܠܝܼܦܹ̈ܐ: ܘܐܵܡ̇ܪܝܼܢ ܠܲܢܣܝܟܹ̈ܐ: ܕܐܲܢ̄ܬ̇ܘܿܢ ܐܸܢܘܿܢ ܐܲܠܵܗܲܝ̈ܢ.
18 ܚܲܪ̈ܫܹܐ ܫܡܲܥܘ. ܘܲܥܘܝܼܪܹ̈ܐ ܐܸܣܬܲܟܲܠܘ: ܘܲܚܙܵܘ.
19 ܡܲܢ̣ܘܼ ܥܘܝܼܪܵܐ ܐܸܠܵܐ ܥܲܒ̣ܕ̇ܝ: ܘܚܲܪܫܵܐ ܐܲܝܟ݂ ܡܲܠܲܐܟ݂ܝ ܕܐܹܫܲܕܲܪ ܡܲܢܘܼ ܥܘܝܼܪܵܐ ܐܲܝܟ݂ ܫܲܠܝܼܛܵܐ: ܘܲܥܘܝܼܪܵܐ ܐܲܝܟ݂ ܥܲܒ̣ܕܹ̇ܗ ܕܡܵܪܝܵܐ.
20 ܚܵܪܹ̇ܬ̣ ܣܲܓ̇ܝܼ ܘܠܵܐ ܢܵܛ̇ܪܝܼܢ ܐ̄ܢܬ̇ܘܿܢ ܘܦܸܬ̣ܚܹ̇ܬ̣ ܐܸܕ݂ܢܹ̈ܐ: ܘܠܵܐ ܫܵܡ̇ܥܝܼܢ ܐ̄ܢܬ̇ܘܿܢ.
21 ܡܵܪܝܵܐ ܨܒ̣ܵܐ ܡܸܛܠ ܙܲܕ̇ܝܼܩܘܼܬܹܗ: ܕܢܵܘܪܸܒ̣ ܢܵܡܘܿܣܵܐ ܘܲܢܫܲܒ̇ܚܝܼܘܗܝ.
22 ܘܗ̤ܘ ܥܲܡܵܐ ܒܙܝܼܙܵܐ ܘܕ݂ܝܼܫܵܐ ܦܲܚܹ̈ܐ ܐܸܢܘܿܢ ܟܠܗܘܿܢ ܓܲܕ݂ܘܼ̈ܕܹܐ ܘܲܒ̣̈ܒ̣ܵܬܹ̇ܐ ܐܲܣܝܼܪܹ̈ܐ ܛܲܫܝܼܘ. ܗܘ̤ܵܘ ܠܒܸܙܬ̣ܵܐ: ܘܠܲܝܬ̇ ܕܲܡܦܲܨܸܐ ܘܠܲܕ݂ܝܵܫܵܐ: ܘܠܲܝܬ̇ ܕܡܲܦܢܸܐ.
23 ܡܲܢܘܼ ܐܝܼܬ̣ ܒܟ݂ܘܿܢ ܕܢܲܫܡܲܥ ܗܵܕܹܐ. ܘܲܢܨܘܼܬ̣ ܘܢܸܫܡܲܥ ܠܐܲܚܪܬ̣ܵܐ.
24 ܡܲܢܘܼ ܝܲܗ̄ܒ̣ ܠܝܲܥܩܘܿܒ̣ ܠܲܕ݂ܝܵܫܵܐ: ܘܠܝܼܣܪܵܝܹܠ ܠܲܒ̣ܙܵܙܵܐ. ܠܵܐ ܗ̄ܘܼܵܐ ܡܵܪܝܵܐ ܥܲܠ ܕܲܚܛܲܝܢ ܠܹܗ: ܘܠܵܐ ܨܒܲܝܢ ܠܲܡܗܲܠܵܟ݂ܘܼ ܒܐܘܼܪ̈ܚܵܬܹܗ: ܘܠܵܐ ܫ̣ܡܲܥܢ ܢܵܡܘܿܣܹܗ.
25 ܐܹܫܲܕ݂ ܥܠܲܝܗܘܿܢ ܚܸܡܬ̣ܵܐ ܕܪܘܼܓ̣ܙܹܗ. ܘܥܘܼܫܢܵܐ ܕܲܩܪܵܒ̣ܵܐ ܐܵܘܩܸܕ݂ ܐܸܢܘܿܢ ܡ̣ܢ ܚܕ݂ܵܪ̈ܲܝܗܘܿܢ ܘܠܵܐ ܝܼܕܲܥܘ ܘܚܸܒܲܬ ܒܗܘܿܢ ܢܘܼܪܵܐ: ܘܠܵܐ ܐܲܝܬܝܼܘ ܥܲܠ ܒܵܠܗܘܿܢ.
1 ܗܵܫܵܐ ܗܵܟܲܢܵܐ ܐܵܡܲܪ ܡܵܪܝܵܐ: ܕܲܒ̣ܪܵܟ݂ ܝܲܥܩܘܿܒ̣ ܘܓܲܒ̣ܠܵܟ݂ ܝܼܣܪܵܝܹܠ ܠܵܐ ܬܸܕ݂ܚܲܠ ܕܲܦܪܲܩ̇ܬ̣ܵܟ݂: ܘܲܩܪܹܝܬ̣ܵܟ݂ ܒܲܫܡܵܟ݂: ܕܕ݂ܝܼܠܝ ܐܲܢ̄ܬ̇.
2 ܐܸܢ ܬܸܥܒܲܪ ܒܝܲܡܵܐ: ܥܲܡܵܟ݂ ܐ̄ܢܵܐ ܘܢܗܪ̈ܵܘܵܬ̣ܵܐ ܠܵܐ ܢܸܓ̣ܪܦܘܼܢܵܟ݂. ܐܸܢ ܬܗܲܠܸܟ݂ ܥܲܠ ܢܘܼܪܵܐ ܠܵܐ ܬܸܬ̣ܟܵܘܸܐ: ܘܫܲܠܗܹܒ̣ܝܼܬ̣ܵܐ ܠܵܐ ܬܵܘܩܕܵܟ݂.
3 ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܵܟ݂: ܩܲܕ̇ܝܼܫܵܐ ܕܝܼܣܪܵܝܹܠ ܦܵܪܘܿܩܵܟ݂ ܝܸܗ̄ܒܹ̇ܬ̣ ܠܡܸܨܪܹܝܢ ܚܠܵܦܲܝܟ: ܘܲܠܟ݂ܘܼܫ ܘܠܲܫܒ̣ܵܐ ܥܲܠ ܐܲܦܲܝ̈ܟ.
4 ܡ̣ܢ ܕܝܲܩܝܼܪ ܐܲܢ̄ܬ̇ ܒܥܲܝ̈ܢܲܝ ܐܸܫܬܲܒܲܚܬ̇: ܘܐܸܢܵܐ ܪܚܸܡܬ̣ܵܟ݂ ܝܸܗ̄ܒܹ̇ܬ̣ ܐ̄ܢܵܫܵܐ ܚܠܵܦܲܝܟ: ܘܐܸܡ̈ܘܵܬ̣ܵܐ ܚܠܵܦ ܢܲܦ̮ܫܵܟ݂.
5 ܠܵܐ ܬܸܕ݂ܚܲܠ ܡܸܛܠ ܕܥܲܡܵܟ݂ ܐ̄ܢܵܐ ܡ̣ܢ ܡܲܕ݂ܢ̱ܚܵܐ ܐܲܝܬܸ̇ܐ ܙܲܪܥܵܟ݂. ܘܡ̣ܢ ܡܲܥ̱ܪܒ̣ܵܐ ܐܹܟܲܢܫܵܟ݂.
6 ܐܹܡܲܪ ܠܓܲܪܒ̇ܝܵܐ ܕܗܲܒ̣ܝ. ܘܲܠܬܲܝܡܢܵܐ ܕܠܵܐ ܬܸܟ݂ܠܝܼܢ ܐܲܝܬܹ̇ܐ ܒܢܲܝ̈ ܡ̣ܢ ܪܘܼܚܩܵܐ: ܘܲܒ̣̈ܢܵܬ̣ܝ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ.
7 ܟܠ ܕܩܵܪܹܐ ܒܫܹܡܝ: ܠܐܝܼܩܵܪܝ ܒܪܹܝܬܹܗ ܘܲܓ̣ܒܲܠܬܹ̇ܗ ܘܲܥܒܲܕ̇ܬܹ̇ܗ.
8 ܐܲܦܸܩ ܥܲܡܵܐ ܥܘܝܼܪܵܐ: ܕܥܲܝܢܹ̈ܐ ܐܝܼܬ̣ ܠܗܘܿܢ: ܘܐܸܕ݂ܢܹ̈ܐ ܐܝܼܬ̣ ܠܗܘܿܢ ܘܚܲܪܫܝܼܢ.
9 ܟܠܗܘܿܢ ܥܲܡܡܹ̈ܐ ܢܸܬ̣ܟܲܢܫܘܼܢ ܐܲܟ݂ܚ̄ܕ݂ܵܐ. ܘܢܸܬ̣ܟܲܢ̈ܫܵܢ ܐܸܡـ̈ـܘܵܬ̣ܵܐ ܡܲܢ̣ܘܼ ܐܝܼܬ̣ ܒܟ݂ܘܿܢ ܕܲܢܚܵܘܸܐ ܗܵܕܹܐ: ܘܩܲܕ݂ܡܵܝܵܬ̣ܵܐ ܢܲܫܡܲܥ ܢܲܝܬ̇ܘܿܢ ܣܵܗܕܲܝ̈ܗܘܿܢ ܘܢܸܙܕܲܕ̇ܩܘܼܢ: ܘܢܸܫ̱ܡܥܘܼܢ ܘܢܹܐܡܪܘܼܢ.
10 ܒܩܘܼܫܬܵܐ ܐܲܢ̄ܬ̇ܘܿܢ ܣܵܗ̈ܕܲܝ: ܐܵܡܲܪ ܡܵܪܝܵܐ: ܘܥܲܒ̣̈ܕܲܝ ܕܲܓ̣ܒܹ̇ܝܬ̣ ܘܬܸܕ̇ܥܘܼܢ ܘܲܬ̣ܗܲܝܡܢܘܿܢ ܒܝܼ ܘܬܸܣܬܲܟ̇ܠܘܼܢ ܕܐܸܢܵܐ ܗ̄ܘܼ. ܘܲܩܕ݂ܵܡܲܝ ܠܵܐ ܐܸܬ̣ܒ̇ܪܝܼ ܐܲܠܵܗ ܘܒ̣ܵܬܲܪܝ ܠܵܐ ܢܸܗܘܹܐ.
11 ܐܸܢܵܐ ܐ̄ܢܵܐ ܡܵܪܝܵܐ: ܘܠܲܝܬ̇ ܬܘܼܒ̣ ܠܒܲܪ ܡܹܢܝ.
12 ܐܸܢܵܐ ܚܵܘܝܼܬ̣ ܘܦܸܪܩܹ̇ܬ̣ ܘܐܲܫ̱ܡ̇ܥܹܬ̣: ܘܠܲܝܬ̇ ܒܟ݂ܘܿܢ ܢܘܼܟ݂ܪܵܝܵܐ: ܘܐܲܢ̄ܬ̇ܘܿܢ ܣܵܗ̈ܕܲܝ: ܐܵܡܲܪ ܡܵܪܝܵܐ. ܘܐܸܢܵܐ ܐܲܠܵܗܵܐ.
13 ܘܐܵܦ ܡ̣ܢ ܝܵܘܡܵܐ ܩܲܕ݂ܡܵܝܵܐ ܐܸܢܵܐ ܐ̄ܢܵܐ: ܘܠܲܝܬ̇ ܕܡܸܬ̣ܦܲܨܹܐ ܡ̣ܢ ܐܝܼܕܲܝ̈. ܘܡܸܕܸ̇ܡ ܕܥܵܒܹ̇ܕ݂ ܐ̄ܢܵܐ: ܡܲܢܘܼ ܡܲܗܦܸܟ݂.
14 ܗܵܟܲܢܵܐ ܐܵܡܲܪ ܡܵܪܝܵܐ ܦܵܪܘܿܩܟ݂ܘܿܢ ܩܲܕ̇ܝܼܫܵܐ ܕܝܼܣܪܵܝܹܠ. ܡܸܛܠܵܬ̣ܟ݂ܘܿܢ ܫܲܕ̇ܪܹܬ̣ ܠܒ̣ܵܒܹܠ. ܘܐܲܝܬ̇ܝܼܬ̣ ܠܟ݂ܠܗܘܿܢ ܥܵܪ̈ܘܿܩܹܐ: ܘܲܠܟܲܠܕ݂ܵܝܹ̈ܐ ܕܒܲܣܦܝܼܢܹ̈ܐ ܡܸܫܬܲܒ̇ܚܝܼܢ.
15 ܐܸܢܵܐ ܐ̄ܢܵܐ ܡܵܪܝܵܐ ܩܲܕ̇ܝܼܫܟ݂ܘܿܢ: ܕܲܒ̣ܪܹܝܬ̇ ܠܝܼܣܪܵܝܹܠ ܡܲܓܟ̇ܟ݂ܘܿܢ.
16 ܗܵܟܲܢܵܐ ܐܵܡܲܪ ܡܵܪܝܵܐ: ܕܝܲܗ̄ܒ̣ ܐܘܼܪܚܵܐ ܒܝܲܡܵܐ: ܘܲܫܒ̣ܝܼܠܵܐ ܒܡܲـ̈ـܝܵܐ ܣܲܓ̇ܝܼ̈ܐܹܐ.
17 ܕܡܲܦܸܩ ܡܲܪ̈ܟ̇ܒ̣ܵܬ̣ܵܐ ܙܪ̈ܲܟ݂ܫܵܐ ܘܚܲܝܠܵܐ ܥܲܫܝܼܢܵܐ. ܘܐܲܟ݂ܚ̄ܕ݂ܵܐ ܢܸܫܟ̇ܒ̣ܘܼܢ ܘܠܵܐ ܢܩܘܼܡܘܼܢ. ܘܢܸܕ݂ܥ̱ܟ݂ܘܼܢ ܐܲܝܟ݂ ܫܪܵܓ̣ܵܐ ܕܲܡܛܲܦܛܸܦ.
18 ܠܵܐ ܬܸܬ̇ܕܲܟ݂ܪܘܼܢ ܩܲܕ݂ܡܵـ̈ـܝܵܬ̣ܵܐ: ܘܲܕ݂ܡ̣ܢ ܪܹܫܝܼܬ̣ܵܐ ܠܵܐ ܬ̣ܣܬܲܟ̇ܠܘܼܢ.
19 ܗܵܐ ܥܵܒܹ̇ܕ݂ ܐ̄ܢܵܐ ܚܕܲܬܵܐ ܘܗܵܫܵܐ ܬܹܐܥܹܐ ܘܬܸܕ̇ܥܘܼܢܵܗ̇. ܘܐܸܥܒܸ̇ܕ݂ ܐܘܼܪܚܵܐ ܒܡܲܕ݂ܒ̇ܪܵܐ: ܘܢܲܗܪ̈ܵܘܵܬ̣ܵܐ ܒܐܲܫܝܼܡܘܿܢ.
20 ܬܫܲܒ̇ܚܲܢܝ ܚܲܝ̄ܘܬ̣ܵܐ ܕܕܲܒ̣ܪܵܐ: ܝܵܪܘܿܪܹ̈ܐ ܘܲܒ̣̈ܢܵܬ̣ ܢܲܥܵܡܹ̈ܐ: ܡܸܛܠ ܕܝܸܗ̄ܒܹ̇ܬ̣ ܡܲـ̈ـܝܵܐ ܒܡܲܕ݂ܒ̇ܪܵܐ: ܘܢܲܗܪ̈ܵܘܵܬ̣ܵܐ ܒܐܲܫܝܼܡܘܿܢ: ܕܢܸܫܬܹ̇ܐ ܥܲܡܝ ܓܲܒ̣ܝܵܐ.
21 ܥܲܡܵܐ ܗܵܢܵܐ ܕܲܓ̣ܒܹ̇ܝܬ̣ ܠܝܼ: ܢܸܫܬ̇ܘܿܢ.
22 ܠܵܐ ܗ̄ܘܼܵܐ ܠܝܼ ܩ̣ܪܲܝܬ̇ ܝܲܥܩܘܿܒ̣: ܕܲܩܪܹܝܼܬ̣ܵܟ݂ ܝܼܣܪܵܝܹܠ.
23 ܠܵܐ ܐܲܝܬ̇ܝܼܬ̇ ܠܝܼ ܐܸܡܪܹ̈ܐ ܕܝܲܩܕ̇ܝ̈ܟ. ܘܲܒ̣ܕܸܒ̣ܚܲܝ̈ܟ ܠܵܐ ܝܲܩܲܪܬܵܢܝ ܠܵܐ ܫܲܥܒܸܕ̇ܬܵܟ݂ ܒܩܘܼܪ̈ܒܵܢܹܐ: ܘܠܵܐ ܐܲܠܐܝܼܬܵܟ݂ ܒܲܠܒ̣ܘܼܢ̄ܬܵܐ.
24 ܠܵܐ ܙܒܲܢܬ̇ ܠܝܼ ܒܟܸܣܦܵܐ ܩܲܢܝܵܐ ܕܒܸܣܡܵܐ. ܘܲܒ̣ܬܲܪܒܵܐ ܕܕܸܒ̣ܚܲܝ̈ܟ ܠܵܐ ܐܲܪܘܝܼܬܵܢܝ ܐܸܠܵܐ ܫܲܥ̣ܒܸ̇ܕ̇ܬܵܢܝ ܒܲܚܛܵܗܲܝ̈ܟ: ܘܲܒ̣ܥܘܼܠܵܟ݂ ܐܲܠܐ̄ܝܼܬܵܢܝ.
25 ܐܸܢܵܐ ܐ̄ܢܵܐ ܕܥܵܛܹ̇ܐ ܐ̄ܢܵܐ ܥܵܘܼܠܵܟ݂ ܡܸܛܠܵܬ̣ܝ. ܘܲܚܛܵܗܲܝ̈ܟ ܠܵܐ ܐܸܬ̇ܕ̇ܟܲܪ.
26 ܐܸܬ̇ܕܲܟ݂ܪܲܝܢܝ: ܢܸܬ̇ܬ̇ܕܝܼܢ ܐܲܟ݂ܚ̄ܕ݂ܵܐ. ܐܸܡ̇ܪܹܬ̣ ܕܬܸܙܕܲܕܲܩ.
27 ܐܲܒ̣ܘܼܟ݂ ܩܲܕ݂ܡܵܝܵܐ ܚܛܵܐ ܫܲܠܝܼܛܵܢܲܝ̈ܟ ܐܲܥܠܝܼܘ ܒܝܼ.
28 ܛܵܘܸܫܘ ܪܵܘ̱ܪ̈ܒ̣ܵܢܲܝܟ ܩܘܼܕ݂ܫܵܐ. ܝܸܗ̄ܒܹ̇ܬ̣ ܠܝܲܥܩܘܿܒ̣ ܠܚܪܡܵܐ: ܘܠܝܼܣܪܵܝܹܠ ܠܚܸܣܕܵܐ.
1 ܡܸܟܹ̇ܝܠ ܫܡܲܥܲܝܢܝ ܝܲܥܩܘܿܒ̣ ܥܲܒ̣ܕ̇ܝ: ܘܝܼܣܪܵܝܹܠ ܕܲܓ̣ܒܹ̇ܝܬ̣
2 ܗܵܟܲܢܵܐ ܐܵܡܲܪ ܡܵܪܝܵܐ: ܕܥܲܒ̣ܕܵܟ݂ ܘܓܲܒ̣ܠܵܟ݂ ܒܡܲܪܒ̇ܥܵܐ ܘܥܲܕ݂ܪܵܟ݂ ܠܵܐ ܬܸܕ݂ܚܸܠ ܥܲܒ̣ܕ̇ܝ ܝܲܥܩܘܿܒ̣: ܘܝܼܣܪܵܝܹܠ ܕܲܩܪܹܝܬ̣.
3 ܡܸܛܠ ܕܐܸܬܸ̇ܠ ܡܲـ̈ـܝܵܐ ܒܐܲܬ̣ܪܵܐ ܨܲܗܝܵܐ: ܘܪ̈ܵܕܲܝܵܐ ܒܝܲܒ̣ܫܵܐ ܐܹܫܘܿܕ݂ ܪܘܼܚܝ ܥܲܠ ܙܲܪܥܵܟ݂: ܘܒ̣ܘܼܪ̈ܟܵܬ̣ܝ ܥܲܠ ܒܢܲܝ̈ܟ.
4 ܘܢܹܐܥܘܿܢ ܡ̣ܢ ܒܲܝܢܵܬ̣ ܥܡܝܼܪܵܐ: ܐܲܝܟ݂ ܥܲܪ̈ܒܹܐ ܕܥܲܠ ܬܲܦܹ̈ܐ ܕܡܲـ̈ـܝܵܐ.
5 ܗܵܢܵܐ ܢܹܐܡܲܪ ܕܡܵܪܝܵܐ ܐ̄ܢܵܐ: ܘܗܵܢܵܐ ܢܸܩܪܸܐ ܒܲܫܡܹܗ ܕܝܲܥܩܘܿܒ̣ ܘܗܵܢܵܐ ܢܲܟ݂ܬܸ̇ܒ̣ ܐܝܼܕܹܗ ܠܡܵܪܝܵܐ. ܘܲܒ̣ܫܸܡ ܝܼܣܪܵܝܹܠ ܢܸܬ̣ܟܲܢܸܐ.
6 ܗܵܟܲܢܵܐ ܐܵܡܲܪ ܡܵܪܝܵܐ ܡܲܠܟܹ̇ܗ ܕܝܼܣܪܵܝܹܠ ܘܦܵܪܘܿܩܹܗ: ܡܵܪܝܵܐ ܚܲܝܠܬ̣ܵܢܵܐ ܫܡܹܗ. ܐܸܢܵܐ ܐ̄ܢܵܐ ܩܲܕ݂ܡܵܝܵܐ: ܘܐܸܢܵܐ ܐ̄ܢܵܐ ܐ̄ܚܪܵܝܵܐ. ܘܠܲܝܬ̇ ܐܲܠܵܗ ܠܒܲܪ ܡܹܢܝ.
7 ܘܡܲܢ̣ܘܼ ܐܲܟ݂ܘܵܬ̣ܝ ܢܸܩܪܸܐ: ܘܢܸܬ̇ܛܲܝܲܒ̣ ܘܲܢܚܵܘܸܐ: ܡ̣ܢ ܕܣܵܡܹ̇ܬ̣ ܥܲܡܵܐ ܠܥܵܠܲܡ: ܘܐܵܬ̣̈ܘܵܬ̣ܵܐ ܕܐܵܬ̣̈ܝܵܢ ܢܚܵܘܘܿܢ.
8 ܠܵܐ ܬܸܕ݂ܚ̄ܠܘܼܢ ܘܠܵܐ ܬܸܬ̣ܪܲܗܒ̣ܘܼܢ: ܠܵܐ ܐܲܫܡܲܥ̇ܬ̇ܟ݂ܘܿܢ ܡ̣ܢ ܩܕ݂ܝܼܡ ܘܚܵܘܝܼܬ̇ܟ݂ܘܿܢ ܘܐܲܢ̄ܬ̇ܘܿܢ ܣܵܗ̈ܕܲܝ. ܕܠܲܝܬ̇ ܐܲܠܵܗ ܠܒܲܪ ܡܹܢܝ: ܘܠܲܝܬ̇ ܕܬܲܩܝܼܦ ܕܠܵܐ ܝܵܕܲܥ ܐ̄ܢܵܐ.
9 ܣܪܝܼܩܝܼܢ ܐܸܢܘܿܢ ܟܠܗܘܿܢ ܐܘܼܡܵܢܹ̈ܐ ܕܥܵܒ̣ܕ̇ܝܼܢ ܨܲܠܡܹ̈ܐ. ܘܠܲܝܬ̇ ܝܘܼܬ̣ܪܵܢ ܒܲܥܒ̣ܵܕܲܝܗܘܿܢ ܕܪܲܓ̣ܘ ܠܡܸܥܒܲܕ݂ ܘܣܵܗܕ̇ܝܼܢ ܐܘܼܡܵܢܹ̈ܐ ܕܲܥ̣ܒܲܕ݂ܘ ܐܸܢܘܿܢ: ܕܠܵܐ ܚܵܙܹ̇ܝܢ: ܘܠܵܐ ܫܵܡ̇ܥܝܼܢ: ܘܠܵܐ ܝܵܕ݂ܥ̇ܝܼܢ.
10 ܡܸܛܠ ܗܵܢܵܐ ܢܸܒ̣ܗ̱ܬ̣ܘܼܢ ܐܲܝܠܹܝܢ ܕܥܵܒ̣ܕ̇ܝܼܢ ܐܲܠܵܗܹ̈ܐ: ܘܓ̣ܵܠܦܝܼܢ ܢܣܝܼܟܹ̈ܐ ܕܝܘܼܬ̣ܪܵܢ ܠܲܝܬ̇ ܒܗܘܿܢ.
11 ܗܵܐ ܟܠܗܘܿܢ ܐܘܼܡܵܢܲܝ̈ܗܘܿܢ: ܚܲܪܫܝܼܢ ܐܸܢܘܿܢ ܡ̣ܢ ܒܢܲܝ̈ܢܵܫܵܐ. ܢܸܬ̣ܟܲܢܫܘܼܢ ܟܠܗܘܿܢ ܘܲܢܩܘܼܡܘܼܢ ܘܢܸܒ̣ܗ̱ܬ̣ܘܼܢ ܘܢܸܚܦܪܘܿܢ ܐܲܟ݂ܚ̄ܕ݂ܵܐ.
12 ܕܲܠܛܲܫ̣ ܦܲܪܙܠܵܐ ܢܲܓܵܪܵܐ: ܘܲܒ̣ܥܸܫܦܵܐ ܫܲܦܝܹܗ. ܘܲܒ̣ܡܲܩܵܪܵܐ ܓܲܠ̣ܦܹܗ ܘܥܲܒ̣ܕܹ̇ܗ ܒܚܲܝܠܵܐ ܕܲܕ݂ܪܵܥܹܗ. ܐܵܦ ܟܦܸܢ ܐܵܦ ܨܗ̣ܝܼ. ܘܠܵܐ ܐܸܫܬ̇ܝܼ ܡܲـ̈ـܝܵܐ ܘܐܸܬ̇ܛܲܪܲܦ.
13 ܓܒ̣ܵܐ ܢܲܓܵܪܵܐ ܩܲܝܣܵܐ: ܘܡܲܫ̣ܚܹܗ ܘܲܒ̣ܬܸ̇ܬܵܐ ܕܲܒ̇ܩܹܗ. ܘܓܲܠܦܹܗ ܘܥܲܒ̣ܕܹ̇ܗ ܒܲܕ݂ܡܘܼܬ̣ܵܐ ܕܓܲܒ̣ܪܵܐ: ܐܲܝܟ݂ ܝܵܐܝܘܼܬ̣ܵܐ ܕܒܲܪܢܵܫܵܐ.
14 ܘܐܲܩܝܼܡܹܗ ܒܒܲܝܬܵܐ ܠܩܲܝܣܵܐ ܕܲܦܣܝܼܩ ܡ̣ܢ ܥܵܒ̣ܵܐ: ܕܲܒ̣ܡܸܛܪܵܐ ܐܸܬ̣ܪܲܒ̇ܝܼ. ܕܢܸܗܘܹܐ ܠܐ̄ܢܵܫܵܐ ܠܝܲܩܕܵܢܵܐ.
15 ܘܲܢܣܲܒ̣ܘ ܡܸܢܹܗ: ܘܐܲܚܸܡ̣ܘ: ܘܐܲܦܵܘ ܠܲܚܡܵܐ. ܘܐܵܦ ܥ̣ܒܲܕ݂ܘ ܐܲܠܵܗܵܐ: ܘܣܵܓ̣ܕܲܝܼܢ ܠܹܗ. ܥ̣ܒܲܕ݂ܘ ܓܠܝܼܦܵܐ ܘܲܣܓܸܕ݂ܘ ܠܹܗ.
16 ܦܸܠܓܹ̇ܗ ܐܵܘܩܸܕ݂ܘ ܒܢܘܼܪܵܐ. ܘܛܵܘܝܼܘ ܒܸܣܪܵܐ ܥܲܠ ܓܘܼܡܪ̈ܵܘܗܝ. ܘܐܸܟܲܠܘ ܘܲܣܒܲܥܘ ܘܐܵܦ ܫܚܸܢܘ ܘܐܸܡܲܪܘ ܐܲܚܵܢ: ܫܸܚܢܹ̇ܬ̣: ܘܲܚܙܹܝܬ̣ ܢܘܼܪܵܐ.
17 ܘܫܲܪܟܵܐ ܥܒܲܕ݂ܘ ܐܲܠܵܗܵܐ ܓܠܝܼܦܵܐ: ܘܲܣܓܸܕ݂ܘ ܠܹܗ: ܘܨܲܠܝܼܘ ܠܹܗ: ܘܐܸܡܲܪܘ ܦܲܨܵܢ: ܡܸܛܠ ܕܐܲܢ̄ܬ̇ܘܼ ܐܲܠܵܗܲܢ.
18 ܘܠܵܐ ܝܼܕܲܥ̣ܘ ܘܠܵܐ ܐܸܣܬܲܟܲܠܘ: ܕܫܝܼܥ ܗ̄ܘܼ ܚܸܙܘܵܐ ܕܥܲܝܢܲܝ̈ܗܘܿܢ. ܘܣܘܼܟܵܠܵܐ ܕܠܸܒ̇ܗܘܿܢ.
19 ܘܠܵܐ ܐܲܝܬ̇ܝܘ ܥܲܠ ܒܵܠܗܘܿܢ: ܘܠܵܐ ܝܼܕܲܥ̣ܘ ܘܠܵܐ ܐܸܬ̣ܪܲܥܝܼܘ ܘܐܸܡܲܪܘ: ܕܦܸܠܓܹ̇ܗ ܐܵܘܩܸܕ݂ܘ ܒܢܘܼܪܵܐ. ܘܥܲܠ ܓܘܼܡܪ̈ܵܘܗܝ ܐܲܦܵܘ ܠܲܚܡܵܐ. ܘܛܵܘܝܼܘ ܒܸܣܪܵܐ ܘܐܸܟܲܠܘ ܘܫܲܪܟܵܐ ܥܒܲܕ݂ܘ ܠܗܘܿܢ ܦܬܲܟ݂ܪܵܐ ܕܩܲܝܣܵܐ: ܘܲܣܓܸܕ݂ܘ ܠܹܗ.
20 ܪܵܥܹ̇ܐ ܗ̄ܘܼ ܒܩܸܛܡܵܐ ܠܸܒ̇ܗܘܿܢ. ܘܡܸܛܥܵܐ ܗ̄ܘܼ ܛܵܥܹ̇ܝܢ: ܘܠܵܐ ܡܦܲܨܹܝܢ ܢܲܦ̮ܫܗܘܿܢ. ܘܠܵܐ ܐܵܡ̇ܪܝܼܢ ܕܕ̇ܓܵܠܘܼܬ̣ܵܐ ܥܸܒ̣ܕܲܬ̤ ܝܲܡܝܼܢܲܢ.
21 ܐܸܬ̇ܕܲܟ݂ܪ ܗܵܠܹܝܢ ܝܲܥܩܘܿܒ̣: ܘܝܼܣܪܵܝܹܠ ܕܥܲܒ̣ܕ̇ܝ ܐܲܢ̄ܬ̇. ܓܒܲܠܬܵܟ݂ ܠܝܼ ܥܲܒ̣ܕ݂ܵܐ: ܡܸܟܹ̇ܝܠ ܝܼܣܪܵܝܹܠ ܠܵܐ ܬܸܛܥܹܝܢܝ.
22 ܐܲܥ̇ܒܪܹܬ̣ ܥܵܘܼܠܵܟ݂ ܐܲܝܟ݂ ܥܲܪܦܸܠܵܐ: ܘܲܚܛܵܗܲܝ̈ܟ ܐܲܝܟ݂ ܥܢܵܢܵܐ. ܐܸܬ̣ܦܲܢܝ ܠܘܵܬ̣ܝ ܕܲܦܪܲܩܬܵܟ݂.
23 ܫܲܒܲܚܘ ܫܡܲܝܵܐ ܡܸܛܠ ܕܲܥ̣ܒܲܕ݂ ܡܵܪܝܵܐ: ܝܲܒܸ̇ܒܹܝ̈ܢ ܫܲܬ̣ܐ̱ܣܹ̈ܝܗ̇ ܕܐܲܪܥܵܐ. ܐܸܬ̣ܦܲܨ̄ܚܘ ܛܘܼܪܹ̈ܐ ܒܬܸܫܒ̇ܘܿܚܬܵܐ: ܘܥܵܒ̣ܵܐ ܘܟ݂ܠ ܐܝܼܠܵܢܹ̈ܐ ܕܒܹܗ. ܕܲܦܪܲܩ̣ ܡܵܪܝܵܐ ܠܝܲܥܩܘܿܒ̣: ܘܒ̣ܝܼܣܪܵܝܹܠ ܐܸܫܬܲܒܲܚ.
24 ܗܵܟܲܢܵܐ ܐܵܡܲܪ ܡܵܪܝܵܐ: ܕܦܲܪܩܵܟ݂ ܘܓܲܒ̣ܠܵܟ݂ ܒܡܲܪܒ̇ܥܵܐ ܘܥܲܕ̇ܪܵܟ݂. ܐܸܢܵܐ ܐ̄ܢܵܐ ܡܵܪܝܵܐ ܕܥܸܒ̣ܕܸ̇ܬ̣ ܟܠ. ܡܸܬܚܹ̇ܬ̣ ܫܡܲܝܵܐ ܒܲܠܚܘܿܕܲܝ. ܘܪܸܩܥܹ̇ܬ̣ ܐܲܪܥܵܐ ܡܹܢܝ ܘܠܝܼ.
25 ܡܒܲܛܸܠ ܐܵܬ̣̈ܘܵܬ̣ܵܐ ܕܙܲܟ̇ܘܼܪܹ̈ܐ ܘܩܸܨܡܲܝ̈ܗܘܿܢ ܡܲܫܛܸܐ ܐ̄ܢܵܐ. ܡܲܗܦܸܟ݂ ܚܲܟ̇ܝܼܡܹ̈ܐ ܠܒܸܣܬܲܪܗܘܿܢ ܘܝܼܕܲܥܬ̣ܗܘܿܢ ܡܣܲܟܸ̇ܠ ܐ̄ܢܵܐ.
26 ܘܲܡܩܝܼܡ ܡܸܠܬ̣ܵܐ ܕܥܲܒ̣ܕܹ̇ܗ: ܘܬܲܪܥܝܼܬ̣ܵܐ ܕܡܲܠܲܐܟ݂ܵܘ̈ܗܝ ܡܫܲܠܸܡ. ܕܐܸܡܲܪ ܠܐܘܿܪܸܫܠܸܡ: ܕܬܸܬ̣ܝܲܬܲܒ̣. ܘܲܠܩܘܼܪ̈ܝܵܐ ܕܲܝܗܘܼܕ݂ܵܐ: ܕܢܸܬ̣ܒܲܢ̈ܝܵܢ. ܘܲܠܚܲܪ̈ܒ̣ܵܬ̣ܵܗ̇ ܐܲܩܝܼܡ.
27 ܕܐܸܡܲܪ ܠܥܘܼܡܩܵܐ ܚܪܲܒ̣. ܘܢܲܗܪ̈ܵܘܵܬ̣ܵܟ݂ ܐܵܘܒܸ̇ܫ.
28 ܕܐܸܡܲܪ ܠܟ݂ܘܼܪܸܫ ܪܵܥܚ: ܕܟ݂ܠܹܗ ܨܸܒ̣ܝܵܢܝ ܢܫܲܠܸܡ: ܠܡܹܐܡܲܪ ܠܐܘܿܪܸܫܠܸܡ ܕܬܸܬ̣ܒ̇ܢܸܐ ܘܗܲܝܟ̇ܠܵܐ ܢܸܫܬܲܟ݂ܠܲܠ.
1 ܗܵܟܲܢܵܐ ܐܵܡܲܪ ܡܵܪܝܵܐ ܠܲܡܫܝܼܚܹܗ: ܠܟ݂ܘܼܪܸܫ ܕܐܸܚܕܹ̇ܬ̣ ܒܝܲܡܝܼܢܹܗ. ܢܸܫܬܲܥܒ̇ܕ݂ܘܼܢ ܩܕ݂ܵܡܵܘܗܝ ܥܲܡܡܹ̈ܐ. ܘܚܲܨܵܐ ܕܡܲܠ̈ܟܹ̇ܐ ܐܹܫܲܪܸܐ ܠܡܸܦ̮ܬܲܚ ܩܕ݂ܵܡܵܘܗܝ ܬܲܪ̈ܥܹܐ: ܘܬܲܪ̈ܥܹܐ ܠܵܐ ܢܸܬ̇ܬܲܚܕ̇ܘܼܢ.
2 ܐܸܢܵܐ ܩܕ݂ܵܡܲܝܟ ܐܹܙܲܠ. ܘܥܲܪܡܵܐ ܐܹܫܲܦܸܐ. ܬܲܪ̈ܥܹܐ ܕܲܢܚܵܫܵܐ ܐܹܬܲܒܲܪ. ܘܡܘܼܟ݂̈ܠܹܐ ܕܦܲܪܙܠܵܐ ܐܹܓܲܕܸ̇ܡ.
3 ܘܐܸܬܸ̇ܠ ܠܵܟ݂ ܣܝܼ̈ܡܵܬ̣ܵܐ ܕܲܒ̣ܚܸܫܘܿܟ݂ܵܐ: ܘܲܛܡܝܼܪ̈ܵܬ̣ܵܐ ܡܣܲܬ̇ܪ̈ܵܬ̣ܵܐ. ܕܬܸܕܲܥ ܕܐܸܢܵܐ ܐ̄ܢܵܐ ܡܵܪܝܵܐ ܕܲܩܪܹܝܬ̣ܵܟ݂ ܒܲܫܡܵܟ݂: ܐܲܠܵܗܹܗ ܕܝܼܣܪܵܝܹܠ.
4 ܡܸܛܠ ܥܲܒ̣ܕ̇ܝ ܝܲܥܩܘܿܒ̣: ܘܝܼܣܪܵܝܹܠ ܓܲܒ̣ܚ: ܩܪܹܝܬ̣ܵܟ݂ ܒܲܫܡܵܘ ܘܟ̇ܢܝܼܬ̣ܵܟ݂: ܘܠܵܐ ܝܼܕܲܥܬܵܢܝ.
5 ܐܸܢܵܐ ܐ̄ܢܵܐ ܡܵܪܝܵܐ: ܘܠܲܝܬ̇ ܬܘܼܒ̣ ܠܒܲܪ ܡܹܢܝ: ܘܠܲܝܬ̇ ܐܲܠܵܗ. ܐܲܥܫܸܢ̇ܬܵܟ݂: ܘܠܵܐ ܝܼܕܲܥܬܵܢܝ.
6 ܕܢܸܕ̇ܥܘܼܢ ܡ̣ܢ ܡܲܕ݂ܢܵܚܲܝ̈ ܫܸܡܫܵܐ. ܘܡ̣ܢ ܡܲܥܪ̈ܵܒ̣ܵܘܗܝ: ܕܠܲܝܬ̇ ܠܒܲܪ ܡܹܢܝ. ܐܸܢܵܐ ܐ̄ܢܵܐ ܡܵܪܝܵܐ ܘܠܲܝܬ̇ ܬܘܼܒ̣.
7 ܕܲܓܒܲܠ ܢܘܼܗܪܵܐ: ܘܲܒ̣ܪܵܐ ܚܸܫܘܿܟ݂ܵܐ. ܥܒܲܕ݂ ܫܠܵܡܵܐ: ܘܲܒ̣ܪܵܐ ܒܝܼܫܬܵܐ ܐܸܢܵܐ ܐ̄ܢܵܐ ܡܵܪܝܵܐ ܕܥܸܒ̣ܕܹ̇ܬ̣ ܗܵܠܹܝܢ ܟܠܗܹܝܢ.
8 ܐܸܬ̣ܒܲܣܲܡܘ ܫܡܲܝܵܐ ܡ̣ܢ ܠܥܸܠ ܘܲܥܢܵܢܹ̈ܐ ܢܸܪ̈ܣܵܢ ܙܲܕ̇ܝܼܩܘܼܬ̣ܵܐ. ܬܸܬ̣ܦܬܲܚ ܐܲܪܥܵܐ: ܘܢܸܣܓܹ̇ܐ ܦܘܼܪܩܵܢܵܐ. ܘܙܲܕ̇ܝܼܩܘܼܬ̣ܵܐ ܬܸܫܘܲܝ ܐܲܟ݂ܚ̄ܕ݂ܵܐ. ܐܸܢܵܐ ܐ̄ܢܵܐ ܡܵܪܝܵܐ ܕܲܒ̣ܪܹܝܬ̣ ܗܵܠܹܝܢ.
9 ܘܵܝ ܠܲܕ݂ܕ݂ܵܐܹ̇ܢ ܥܲܡ ܓܵܒ̣ܘܿܠܹܗ: ܚܸܨܦܵܐ ܡ̣ܢ ܚܸܨܦܹ̈ܝܗ̇ ܕܐܲܪܥܵܐ ܕܲܠܡܵܐ ܐܵܡܲܪ ܛܝܼܢܵܐ ܠܦܲܚܵܪܵܐ ܡܵܢܵܐ ܥܵܒܹ̇ܕ݂ ܐܲܢ̄ܬ̇. ܘܠܵܐ ܗ̄ܘܹܝܬ̣ ܥܒ̣ܵܕ݂ܵܐ ܕܐܝܼܕܲܝ̈ܟ.
10 ܘܵܝ ܠܲܕ݂ܵܐܡܲܪ ܠܐܲܒ̣ܵܐ: ܡܵܢܵܐ ܡܵܘܠܸܕ݂ ܐܲܢ̄ܬ̇ ܘܠܲܐܢ̄ܬ̇ܬ̣ܵܐ: ܕܡܵܢܵܐ ܒܵܛ̇ܢܲܬ̇ܝ.
11 ܗܵܟܲܢܵܐ ܐܵܡܲܪ ܡܵܪܝܵܐ ܩܲܕ̇ܝܼܫܵܐ ܕܝܼܣܪܵܝܠ ܘܓ̣ܵܒ̣ܘܿܠܹܗ. ܡܵܪܝܵܐ ܚܲܝܠܬ̣ܵܢܐ ܫܡܹܗ. ܫܲܐܠܘܼܢܝ ܐܵܬ̣ܘܵܬ̣ܵܐ ܥܲܠ ܒܢܲܝ̈. ܘܥܲܠ ܥܒ̣ܵܕ݂ ܐܝܼܕܲܝ̈ ܦܘܼܩܕ̇ܘܼܢܝ.
12 ܐܸܢܵܐ ܥܸܒ̣ܕܹ̇ܬ̣ ܐܲܪܥܵܐ: ܘܒܲܪܢܵܫܵܐ ܥܠܹܝܗ̇ ܐܸܢܵܐ ܒܐܝܼܕܲܝ̈ ܡܸܬ̣ܚܹ̇ܬ̣ ܫܡܲܝܵܐ. ܘܦܸܩܕܹ̇ܬ̣ ܠܟ݂ܠܹܗ ܚܲܝܠܗܘܿܢ.
13 ܐܸܢܵܐ ܐܲܥܝܼܪܬܹ̇ܗ ܒܙܲܕ̇ܝܼܩܘܼܬ̣ܵܐ ܘܟ݂ܠܗܹܝܢ ܐܘܼܪ̈ܚܵܬܹܗ ܐܹܫܲܦܸܐ. ܗ̤ܘ ܢܸܒ̣ܢܸܐ ܩܪܝܼܬ̣ܝ ܘܲܫܒ̣ܝܼܬܝ ܢܫܲܕܲܪ ܠܵܐ ܒܲܕ݂ܡܲـ̈ـܝܵܐ: ܘܠܵܐ ܒܫܘܼܚܕܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.
14 ܗܵܟܲܢܵܐ ܐܵܡܲܪ ܡܵܪܝܵܐ: ܠܐܹܘܬ̣ܵܗ̇ ܕܡܸܨܪܹܝܢ: ܬܲܓܵܪܹ̈ܐ ܕܟ݂ܘܼܫ ܘܕܲܫܒ̣ܵܐ. ܓܲܒ̣ܪܹ̈ܐ ܕܲܡܫܘܼܚܬ̣ܵܐ ܥܠܲܝܟ̇ܝ ܢܸܥܒ̇ܪܘܼܢ. ܘܕ݂ܝܼܠܹܟ݂ܝ ܢܸܗܘܘܿܢ: ܘܒ̣ܵܬ̣ܪܹܟ݂ܝ ܢܹܐܙܠ̄ܘܼܢ. ܘܲܒ̣ܫܸܫ̈ܠܵܬ̣ܵܐ ܢܸܥܒ̇ܪܘܼܢ. ܘܠܹܟ݂ܝ ܢܸܣܓ̇ܕ݂ܘܼܢ. ܘܒܹܟ݂ܝ ܢܨܲܠܘܿܢ ܕܒܹܟ݂ܝ ܗ̄ܘܼ ܐܲܠܵܗܵܐ: ܘܠܲܝܬ̇ ܬܘܼܒ̣ ܐܲܠܵܗ ܐ̄ܚܪܹܝܢ.
15 ܫܲܪܝܼܪܵܐܝܼܬ̣ ܐܲܢ̄ܬ̇ ܗ̄ܘܼ ܡܣܲܬ̇ܪܵܐ: ܐܲܠܵܗܹܗ ܕܝܼܣܪܵܝܹܠ ܘܦܵܪܘܿܩܹܗ.
16 ܒ̣ܗܸܬ̣ܘ ܘܐܲܚܦܲܪܘ ܟܠܗܘܿܢ ܐܲܟ݂ܚ̄ܕ݂ܵܐ. ܕܲܡܗܲܠܟ݂ܝܼܢ ܒܚܸܦܪܵܐ: ܘܓ̣ܵܠܦܝܼܢ ܦܬܲܟ݂ܪܹ̈ܐ.
17 ܦܘܼܪܩܵܢܹܗ ܕܝܼܣܪܵܝܹܠ ܒܡܵܪܝܵܐ ܗ̄ܘܼ ܦܵܪܘܿܩܵܐ ܕܥܵܠܡܹ̈ܐ ܠܵܐ ܬܸܒ̣ܗ̄ܬ̣ܘܼܢ: ܘܠܵܐ ܬܸܚ̄ܦܪܘܼܢ ܠܥܵܠܲܡ ܥܵܠܡܝܼܢ.
18 ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܕܲܒ̣ܪܵܐ ܫܡܲܝܵܐ: ܘܗ̤ܘܝܘܼ ܐܲܠܵܗܵܐ ܕܲܓ̣ܒܲܠ ܐܲܪܥܵܐ: ܘܥܲܒ̣ܕܵܗ̇ ܘܗ̤ܘܝܘܼ ܬܲܩ̣ܢܵܗ̇. ܠܵܐ ܗ̄ܘܼܵܐ ܣܪܝܼܩܵܐܝܼܬ̣ ܒܪܵܗ̇ ܐܸܠܵܐ ܕܬܸܬܸ̇ܒ̣ ܒܵܗ̇ ܒܪܝܼܬܹܗ. ܐܸܢܵܐ ܐ̄ܢܵܐ ܡܵܪܝܵܐ ܘܠܲܝܬ̇ ܬܘܼܒ̣.
19 ܠܵܐ ܗ̄ܘܼܵܐ ܒܛܘܼܫܝܵܐ ܡܲܠܠܹܬ̣ ܒܐܲܬ̣ܪܵܐ ܕܐܲܪܥܵܐ ܚܸܫܘܿܟ݂ܬܵܐ: ܘܠܵܐ ܐܸܡ̇ܪܹܬ̣ ܠܙܲܪܥܵܐ ܕܝܲܥܩܘܿܒ̣ ܕܲܣܪܝܼܩܵܐܝܼܬ̣ ܒܥܵܐܘܼܢܝ ܕܐܸܢܵܐ ܐ̄ܢܵܐ ܡܵܪܝܵܐ ܕܲܡܡܲܠܸܠ ܐ̄ܢܵܐ ܙܲܕ̇ܝܼܩܘܼܬ̣ܵܐ: ܘܲܡܚܵܘܸܐ ܐ̄ܢܵܐ ܬܪܝܼܨܘܼܬ̣ܵܐ.
20 ܐܸܬ̣ܟܲܢܲܫܘ: ܘܬ̣ܵܘ: ܘܐܸܬ̣ܩܲܪܲܒ̣ܘ ܐܲܟ݂ܚ̄ܕ݂ܵܐ: ܐܲܝܠܹܝܢ ܕܡܸܬ̣ܦܲܨܹܝܢ ܡ̣ܢ ܥܲܡܡܹ̈ܐ. ܘܠܵܐ ܝܸܕ݂ܥ̣ܘ ܕܲܫܩܲܠܘ ܩܲܝܣܵܐ ܓܠܝܼܦܵܐ ܘܨܲܠܝܼܘ ܠܐܲܠܵܗܵܐ ܕܠܵܐ ܦܵܪܹܩ.
21 ܚܵܘܵܘ ܘܲܩܪܘܿܒ̣ܘ: ܘܐܸܬ̣ܡܲܠܲܟ݂ܘ ܐܲܟ݂ܚ̄ܕ݂ܵܐ. ܡܲܢܘܼ ܐܲܫܡܲܥ ܗܵܕܹܐ ܡ̣ܢ ܩܕ݂ܝܼܡ. ܘܡ̣ܢ ܪܹܫܝܼܬ̣ܵܐ ܐܸܢܵܐ ܐ̄ܢܵܐ ܡܵܪܝܵܐ. ܘܠܲܝܬ̇ ܬܘܼܒ̣ ܐܲܠܵܗ ܠܒܲܪ ܡܹܢܝ. ܐܲܠܵܗܵܐ ܙܲܕ̇ܝܼܩܵܐ ܘܦܵܪܘܿܩܵܐ: ܘܠܲܝܬ̇ ܠܒܲܪ ܡܹܢܝ.
22 ܐܸܬ̣ܩܲܪܲܒ̣ܘ ܠܘܵܬ̣ܝ ܟܠܟ݂ܘܿܢ ܥܸܒ̣ܪܹ̈ܝܗ̇ ܕܐܲܪܥܵܐ: ܕܬܸܬ̣ܦܲܪܩܘܼܢ ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ: ܘܠܲܝܬ̇ ܬܘܼܒ̣.
23 ܒܝܼ ܝܼܡ̇ܝܼܬ̣: ܘܢܸܦܩܲܬ̤ ܡ̣ܢ ܦܘܼܡܝ ܡܸܠܬ̣ܵܐ ܕܙܲܕ̇ܝܼܩܘܼܬ̣ܵܐ: ܘܠܵܐ ܬܸܗܦܘܿܟ݂ ܕܠܝܼ ܬܸܟ̇ܘܿܦ ܟܠ ܒܪܘܿܟ ܘܒ̣ܝܼ ܢܹܐܡܸܐ ܟܠ ܠܸܫܵܢ.
24 ܘܢܹܐܡܪܘܿܢ ܒܡܵܪܝܵܐ ܗ̄ܝܼ ܙܲܕ̇ܝܼܩܘܼܬ̣ܵܐ. ܘܥܲܫܝܼܢܹ̈ܐ ܠܘܵܬܹܗ ܢܹܐܙ̄ܠܘܼܢ. ܘܢܸܒ̣ܗ̱ܬ̣ܘܼܢ ܟܠ ܕܣܵܩܪܝܼܢ ܠܵܟ݂.
25 ܒܝܼ ܢܸܫܬܲܒܲܚ ܘܢܸܙܕܲܕܲܩ ܟܠܹܗ ܙܲܪܥܹܗ ܕܝܼܣܪܵܝܹܠ.
1 ܢܦܲܠ̣ ܒܹܝܠ: ܘܐܸܣܬ̇ܚܸܦ ܢܒ̣ܘܿ ܘܲܗܘ̤ܵܘ ܦܬܲܟ݂ܪ̈ܲܝܗܘܿܢ ܓܠܝܼܦܹ̈ܐ ܛܲܥܢܹ̈ܐ ܥܕ݂ܝܼ̈ܕܹܐ: ܠܚܲܝ̄ܘܼܬ̣ܵܐ ܘܠܲܒ̣ܥܝܼܪܵܐ ܟܦܲܢܬܵܐ.
2 ܐܸܣܬ̇ܚܸܦܘ ܘܲܢܦܲܠܘ ܐܲܟ݂ܚ̄ܕ݂ܵܐ. ܘܠܵܐ ܐܸܫܟܲܚܘ ܠܲܡܫܵܘܙܒ̣ܵܘܼ ܛܵܥܘܿܢܲܝ̈ܗܘܿܢ ܘܐܸܙܲܠ ܒܫܸܒ̣ܝܵܐ ܢܲܦ̮̈ܫܵܬ̣ܗܘܿܢ.
3 ܫܘܼܡܥܘܼܢܝ ܝܒܹܝܬ̣ ܝܲܥܩܘܿܒ̣: ܘܟ݂ܠܹܗ ܫܲܪܟܹ̇ܗ ܕܝܼܣܪܵܝܹܠ ܕܡܸܫܬܲܩܠܝܼܢ ܒܟܲܪܣܵܐ: ܘܡܸܫܬܲܩܠܝܼܢ ܒܡܲܪܒ̇ܥܵܐ.
4 ܥܕܲܡܵܐ ܠܣܲܝܒ̇ܘܼܬ̣ܵܐ ܐܸܢܵܐ ܗ̄ܘܼ ܘܲܥܕܲܡܵܐ ܠܩܲܫܝܼܫܘܼܬ̣ܵܐ ܐܸܢܵܐ ܐܸܣܒ̇ܘܿܠ ܐܸܢܵܐ ܥܸܒ̣ܕܹ̇ܬ̣: ܘܐܸܢܵܐ ܐܸܫܩܘܿܠ ܘܐܸܢܵܐ ܐܸܣܒ̇ܘܿܠ ܘܐܹܦܲܨܹܐ.
5 ܠܡܲܢ ܕܲܡܝܼܬ̇ܘܿܢܵܢܝ ܘܦܲܚܸܡ̣ܬ̇ܘܿܢܵܢܝ.
6 ܠܲܕ݂ܛܵܥܹ̇ܝܢ ܘܡܲܦܩܝܼܢ ܕܲܗܒ̣ܵܐ ܡ̣ܢ ܟܝܼܣܲܝ̈ܗܘܿܢ ܘܣܹܐܡܵܐ ܒܡܲܣܲܐܬ̣ܵܐ ܬܵܩ̇ܠܝܼܢ. ܘܐܵܓ̣ܪܝܼܢ ܩܲܢܝܵܢܵܐ. ܘܥܵܒ̣ܕ̇ܝܼܢ ܐܲܠܵܗܵܐ ܘܣܵܓ̣ܕܝܼܢ ܠܹܗ: ܘܐܵܦ ܡܨܲܠܹܝܢ ܠܹܗ.
7 ܘܫܵܩܠܝܼܢ ܠܹܗ ܥܲܠ ܟܲܬ̣ܦܬ̣̈ܗܘܿܢ: ܘܲܡܗܲܠܟ݂ܝܼܢ ܠܹܗ. ܘܣܵܝܡܝܼܢ ܠܹܗ ܥܲܠ ܕܘܼܟ̇ܬܹܗ. ܘܠܵܐ ܡܸܫܟܲܚ ܠܲܡܩܵܡ ܡ̣ܢ ܕܘܼܟ̇ܬܹܗ ܘܐܵܦ ܡܨܲܠܹܝܢ ܠܹܗ: ܘܠܵܐ ܥܵܢܹ̇ܐ ܠܗܘܿܢ. ܘܠܵܐ ܦܵܪܹܩ ܠܗܘܿܢ ܡ̣ܢ ܐܘܼܠܨܵܢܲܝ̈ܗܘܿܢ.
8 ܐܸܬ̇ܕܲܟ݂ܪܘ ܗܵܠܹܝܢ ܘܐܸܬ̣ܒܲܝܲܢܘ ܘܐܲܝܬܵܘ ܥܵܘܿܠܹ̈ܐ ܥܲܠ ܠܸܒ̇ܟ݂ܘܿܢ.
9 ܐܸܬܲܕܲܟ݂ܪܘ ܩܲܕ݂ܡܵـ̈ـܝܵܬ̣ܵܐ ܕܡ̣ܢ ܥܵܠܲܡ. ܕܐܸܢܵܐ ܐ̄ܢܵܐ ܐܲܠܵܗܵܐ: ܘܠܲܝܬ̇ ܬܘܼܒ̣ ܐܲܠܵܗ: ܘܠܲܝܬ̇ ܐܲܟ݂ܘܵܬ̣ܝ.
10 ܘܲܡܚܵܘܸܐ ܐ̄ܢܵܐ ܡ̣ܢ ܪܹܫܝܼܬ̣ܵܐ ܐ̄ܚܪ̈ܵܝܬܵܐ: ܘܡ̣ܢ ܩܕ݂ܝܼܡ ܐܲܝܠܹܝܢ ܕܠܵܐ ܐܸܬ̣ܥ̱ܒܸܕ݂ ܐܵܡܲܪ ܐ̄ܢܵܐ. ܬܲܪܥܝܼܬܝ ܡܩܝܼܡ ܐ̄ܢܵܐ. ܘܟ݂ܠܹܗ ܨܸܒ̣ܝܵܢܝ ܥܵܒܹ̇ܕ݂ ܐ̄ܢܵܐ.
11 ܩܵܪܹܐ ܐ̄ܢܵܐ ܡ̣ܢ ܡܲܕ݂ܢ̄ܚܵܐ ܛܲܝܪܵܐ: ܘܡ̣ܢ ܐܲܪܥܵܐ ܪܲܚܝܼܩܬܵܐ ܓܲܒ̣ܪܵܐ ܕܬܲܪܥܝܼܬ̣ܝ. ܐܸܢܵܐ ܡܡܲܠܸܠ ܐ̄ܢܵܐ: ܐܵܦ ܡܲܝܬܹܐ ܐ̄ܢܵܐ. ܓܸܒ̣ܠܹ̇ܬ̣: ܐܵܦ ܥܵܒܸܕ݂ ܐ̄ܢܵܐ.
12 ܫܘܼܡܥܘܼܢܝ ܥܲܫܝܼ̈ܢܲܝ ܠܸܒܵܐ: ܪ̈ܲܚܝܼܩܲܝ ܡ̣ܢ ܙܲܕ̇ܝܼܩܘܼܬ̣ܵܐ.
13 ܩܸܪܒܲܬ̤ ܙܲܕ̇ܝܼܩܘܼܬ̣ܝ ܠܡܹܐܬ̣ܵܐ: ܘܦܘܼܪܩܵܢܝ ܠܵܐ ܢܵܘܚܲܪ ܘܐܸܬܸ̇ܠ ܒܨܸܗܝܘܿܢ ܦܘܼܪܩܵܢܵܐ: ܘܠܝܼܣܪܵܝܹܠ ܬܸܫܒ̇ܘܿܚܬ̇ܝ.
1 ܐ: ܚܘܿܬ̣ܝ ܘܬܸܒ̣ܝ ܥܲܠ ܥܲܦܪܵܐ ܒܬ̣ܘܼܠܬܵܐ ܒܲܪܬ̣ ܒܵܒܹܠ. ܬܸܒ̣ܝ ܥܲܠ ܐܲܪܥܵܐ ܒܲܪܬ̣ ܟܲܠܕ݂ܵܝܹ̈ܐ. ܠܲܝܬ̇ ܟܘܼܪܣܝܵܐ. ܡܸܛܠ ܕܠܵܐ ܢܵܘܣܦܘܼܢ ܬܘܼܒ̣ ܠܡܸܩ̱ܪܝܹܟ݂ܝ ܡܥܲܕܲܢܬܵܐ ܘܲܡܦܲܢܲܩܬܵܐ.
2 ܣܲܒ̣ܝ ܪܲܚܝܵܐ: ܛܚܲܢܝ ܩܲܡܚܵܐ ܓܠܵܝ ܬܲܚܦܝܼܬܹܟ݂ܝ ܓܘܿܙܝ ܚܸܘܵܪ̈ܵܬܹܟ݂ܝ ܓܠܵܝ ܫܵܩܲܝ̈ܟ̇ܝ ܥܒܲܪܝ ܢܲܗܪ̈ܵܘܵܬ̣ܵܐ.
3 ܢܸܬ̣ܓ̇ܠܹܐ ܦܘܼܪܣܵܝܹܟ݂ܝ: ܘܢܸܬ̣ܚܙܹܐ ܚܸܣܕܲܟ݂ܝ ܐܸܣܲܒ̣ ܡܸܢܹܟ݂ܝ ܬܒܲܥܬ̣ܵܐ. ܘܠܵܐ ܐܲܦ̮ܓܲܥ ܒܹܟ݂ܝ ܐ̄ܢܵܫ.
4 ܦܵܪܘܿܩܲܢ ܡܵܪܝܵܐ ܚܲܝܠܬ̣ܵܢܵܐ ܫܡܹܗ: ܩܲܕ̇ܝܼܫܵܐ ܕܝܼܣܪܵܝܹܠ.
5 ܬܸܒ̣ܝ ܒܲܬ̣ܘܵܪܵܐ. ܥܘܿܠܝ ܒܚܸܫܘܿܟ݂ܵܐ ܒܲܪܬ̣ ܟܲܠܕ݂ܵܝܹ̈ܐ. ܡܸܛܠ ܕܠܵܐ ܢܵܘܣܦܘܼܢ ܬܘܼܒ̣ ܠܡܸܩ̱ܪܝܹܟ݂ܝ ܓܲܢ̄ܒܵܪܲܬ̣ ܡܲܠ̈ܟ̇ܘܵܬ̣ܵܐ.
6 ܪܸܓ̣ܙܹ̇ܬ̣ ܥܲܠ ܥܲܡܝ: ܕܛܵܘܸܫܘ ܝܵܪܬ̇ܘܼܬ̣ܝ ܘܐܲܫ̱ܠܡܹ̇ܬ̣ ܐܸܢܘܿܢ ܒܐܝܼܕܲܝ̈ܟ̇ܝ ܘܠܵܐ ܥ̣ܒܲܕ̇ܬܝ ܥܠܲܝܗܘܿܢ ܪ̈ܲܚܡܹܐ. ܘܥܲܠ ܣܵܒܹ̈ܐ ܐܲܥܫܸܢܬ̇ܝ ܢܝܼܪܹܟ݂ܝ ܛܵܒ̣.
7 ܘܐܸܡܲܪܬ̇ܝ ܕܲܠܥܵܠܲܡ ܐܸܗܘܹܐ ܓܲܢ̄ܒܵܪܬܵܐ. ܘܠܵܐ ܣܵܡ̣ܬ̇ܝ ܒܠܸܒܹ̇ܟ݂ܝ ܗܵܠܹܝܢ. ܘܠܵܐ ܐܸܬ̇ܕ̇ܟܲܪܬ̇ܝ ܚܲܪܬ̣ܵܐ.
8 ܗܵܫܵܐ ܫܡܲܥܝ ܗܵܠܹܝܢ ܡܥܲܕ̇ܢܬܵܐ: ܕܝܵܬ̣ܒܵܐ ܒܫܸܠܝܵܐ: ܘܐܵܡܪܵܐ ܒܠܸܒܵܗ̇: ܐܸܢܵܐ ܐ̄ܢܵܐ ܘܠܲܝܬ̇ ܬܘܼܒ̣. ܠܵܐ ܐܸܬܸ̇ܒ̣ ܐܲܪܡܲܠܬܵܐ: ܘܠܵܐ ܐܸܕܲܥ ܬܟ݂ܵܠܵܐ.
9 ܢܹܐ̈ܬ̣ܝܵܢ ܥܠܲܝܟ̇ܝ ܗܵܠܹܝܢ ܬܲܪ̈ܬܲܝܗܹܝܢ ܡܲܚ̈ܘܵܬ̣ܵܐ ܒܝܵܘܡܵܐ ܚܲܕ݂. ܬܟ݂ܵܠܵܐ ܘܐܲܪܡܠܘܼܬ̣ܵܐ ܡ̣ܢ ܫܸܠܝܵܐ ܢܹܐ̈ܬ̣ܝܵܢ ܥܠܲܝܟ̇ܝ: ܒܣܘܼܓ̣ܵܐܐ ܕܚܲܪ̈ܵܫܲܝܟ̇ܝ: ܘܲܒ̣ܣܘܿܓ̣ܵܐܐ ܕܲܡܓ̣ܘܫܲܝ̈ܟ̇ܝ.
10 ܕܐܸܬ̇ܬ̇ܟܸܠܬ̇ܝ ܥܲܠ ܒܝܼܫܘܼܬܹܟ݂ܝ ܘܐܸܡܲܪܬ̇ܝ ܕܠܲܝܬ̇ ܕܚܵܙܹ̇ܐ ܠܝܼ. ܚܸܟ݂ܡ̱ܬܹܟ݂ܝ ܘܝܼܕܲܥܬܹܟ݂ܝ. ܗ̤ܝ ܐܲܛܥ̱ܝܵܬܹܟ݂ܝ ܘܐܸܡܪܬ̇ܝ ܒܠܸܒܹ̇ܟ݂ܝ ܕܐܸܢܵܐ ܐ̄ܢܵܐ ܘܠܲܝܬ̇ ܬܘܼܒ̣.
11 ܬܹܐܬܹܐ ܥܠܲܝܟܝ ܒܝܼܫܬܵܐ ܒܫܲܦܪܵܐ: ܘܠܵܐ ܬܸܕ̇ܥܝܼܢ ܘܬܸܦܸܠ ܥܠܲܝܟ̇ܝ ܬܵܘܸܗܬ̣ܵܐ: ܘܠܵܐ ܬܹܫܟ̇ܚܝܼܢ ܠܡܲܥܒܵܪܘܼܬ̣ܵܗ̇ ܘܢܹܐܬܹܐ ܥܠܲܝܟܝ ܡ̣ܢ ܫܸܠܝܵܐ ܕܠܘܼܚܝܵܐ ܘܠܵܐ ܬܸܕ̇ܥܝܼܢ.
12 ܩܘܼܡܝ ܢܹܐ ܒܲܡܓ̣ܘܼܫܲܝ̈ܟ̇ܝ: ܘܲܒ̣ܚܲܪ̈ܵܫܲܝܟ̇ܝ ܣܲܓ̇ܝܼ̈ܐܹܐ ܕܲܠܐܝܼܬ̇ܝ ܒܗܘܿܢ ܡ̣ܢ ܛܲܠܝܘܼܬܹܟ݂ܝ. ܛܵܟ݂ ܬܸܫܟ̇ܚܝܼܢ ܬܵܘܬ̇ܪܝܼܢ: ܛܵܟ݂ ܬܸܬ̣ܥܲܫܢܝܼܢ.
13 ܠܐܝܼܬ̇ܝ ܒܣܘܿܓ̣ܵܐܐ ܕܡܲܚܫ̈ܒ̣ܵܬܹܟ݂ܝ. ܢܩܘܼܡܘܼܢ ܢܸܦ̱ܪܩܘܼܢܹܟ݂ܝ ܟܲܠܕ݂ܵܝܹ̈ܐ ܕܚܵܝܪܝܼܢ ܒܲܫܡܲܝܵܐ ܘܲܒ̣ܟ݂ܵܘܟ̇ܒܹ̈ܐ: ܘܡܵܘܕ̇ܥܝܼܢ ܠܹܟ݂ܝ ܒܝܲܪܚܵܐ ܡܸܕܸ̇ܡ ܕܐܵܬܹܐ ܥܠܲܝܟ̇ܝ.
14 ܗܵܐ ܗܘ̤ܵܘ ܐܲܝܟ݂ ܓܸܠܹ̈ܐ ܕܐܵܘܩܕܲܬ̤ ܐܸܢܘܿܢ ܢܘܼܪܵܐ. ܘܠܵܐ ܢܦܲܨܘܿܢ ܢܲܦ̮ܫܗܘܿܢ ܡ̣ܢ ܐܝܼܕܵܐ ܕܫܲܠܗܹܒ̣ܝܼܬ̣ܵܐ. ܠܲܝܬ̇ ܓܘܼܡܪܹ̈ܐ ܠܢܘܼܪܗܘܿܢ: ܐܵܦܠܵܐ ܙܲܗܪܵܐ ܠܡܸܬܲܒ̣ ܠܩܘܼܒ̣ܠܹܗ.
15 ܗܵܟܲܢܵܐ ܗܘ̤ܵܘ ܠܹܟ݂ܝ ܬܲܓܵܪ̈ܲܝܟ̇ܝ ܕܲܠܐܝܼܬ̇ܝ ܒܗܘܿܢ ܡ̣ܢ ܛܲܠܝܘܼܬܹܟ݂ܝ ܘܐ̄ܢܵܫ ܠܣܸܛܪܹܗ ܛܥ̣ܵܘ: ܘܠܲܝܬ̇ ܕܦܵܪܹܩ ܠܹܟ݂ܝ.
1 ܫܡܲܥܘ ܗܵܠܹܝܢ ܕܒܹܝܬ̣ ܝܲܥܩܘܿܒ̣: ܕܡܸܬ̣ܩܪܝܼܢ ܒܲܫܡܹܗ ܕܝܼܣܪܵܝܹܠ: ܘܡ̣ܢ ܡܲـ̈ـܝܵܐ ܕܲܝܗܘܼܕ݂ܵܐ ܢܦܲܩ̣ܘ: ܕܝܵܡܹ̇ܝܢ ܒܲܫܡܹܗ ܕܡܵܪܝܵܐ: ܘܒܲܐܠܵܗܵܐ ܕܝܼܣܪܵܝܹܠ ܡܲܕ݂ܟ̇ܪܝܼܢ: ܠܵܐ ܒܩܘܼܫܬܵܐ ܘܠܵܐ ܒܙܲܕ̇ܝܼܩܘܼܬ̣ܵܐ.
2 ܡܸܛܠ ܕܡ̣ܢ ܩܪܝܼܬ̣ܵܐ ܕܩܘܼܕ݂ܫܵܐ ܐܸܬ̣ܩܪܝܼܘ: ܘܥܲܠ ܐܲܠܵܗܵܐ ܕܝܼܣܪܵܝܹܠ ܐܸܣܬ̇ܡܸܟ݂ܘ: ܡܵܪܝܵܐ ܚܲܝܠܬ̣ܵܢܵܐ ܫܡܹܗ.
3 ܩܲܕ݂ܡܵܝܵـ̈ـܬ̣ܵܐ ܕܡ̣ܢ ܪܹܫܝܼܬ̣ܵܐ ܚܵܘܝܼܬ̣. ܘܡ̣ܢ ܦܘܼܡܝ ܢܦܲܩ̣: ܘܐܲܫ̱ܡ̇ܥܹܬ̣ ܐܸܢܹܝܢ ܠܟ݂ܘܿܢ. ܘܡ̣ܢ ܫܸܠܝܵܐ ܥܵܒܹ̇ܕ݂ ܐ̄ܢܵܐ ܘܐܵܬ̣̈ܝܵܢ.
4 ܝܵܕܲܥ ܕܲܩܫܸܐ ܐܲܢ̄ܬ̇ ܘܲܩܕ݂ܵܠܵܟ݂ ܓܝܵܕܵܐ ܗ̄ܘܼ ܕܦܲܪܙܠܵܐ. ܘܒܹܝܬ̣ ܥܲܝܢܲܝ̈ܟ ܢܚܵܫܵܐ.
5 ܘܚܵܘܝܼܬ̣ܵܟ݂ ܡ̣ܢ ܩܕ݂ܝܼܡ. ܘܥܲܕ݂ܠܵܐ ܬܹܐܬܹܐ ܐܲܫܡܲܥܬܵܟ݂ ܕܠܵܐ ܬܹܐܡܲܪ ܦܬ̣ܟ݂ܪ̈ܲܝ ܥ̣ܒܲܕ݂ܘ: ܘܲܓ̣ܠܝܼܦܲܝ̈ ܘܲܢܣܝܼܟܲܝ̈ ܦܲܪܩܘܼܢܝ.
6 ܫܸܡ̇ܥܹܬ̣ ܘܲܚܙܹ̇ܝܬ̣ ܟܠܗܹܝܢ ܘܐܲܢ̄ܬ̇ܘܿܢ ܠܵܐ ܬܚܵܘܘܿܢ. ܐܲܫܡܲܥܬܵܟ݂ ܚܲܕ݂̈ܬ̣ܵܬ̣ܵܐ ܕܡ̣ܢ ܗܵܫܵܐ ܢܛܝܼܪ̈ܵܢ: ܘܠܵܐ ܝܼܕܲܥܬ̇.
7 ܘܡܸܟܹ̇ܝܠ ܡܸܬ̣ܒܲܪ̈ܝܵܢ ܘܠܵܐ ܡ̣ܢ ܩܕ݂ܝܼܡ. ܘܡ̣ܢ ܩܕ݂ܵܡ ܝܵܘܡܵܐ ܠܵܐ ܫܡܲܥܬ̇ ܐܸܢܹܝܢ: ܕܠܵܐ ܬܹܐܡܲܪ ܕܝܵܕܲܥ ܐ̄ܢܵܐ ܠܗܹܝܢ.
8 ܠܵܐ ܫܡܲܥ̣ܬ̇ ܐܵܦܠܵܐ ܝܵܕܲܥ ܐܲܢ̄ܬ̇ ܠܗܹܝܢ. ܘܡ̣ܢ ܩܕ݂ܝܼܡ ܠܵܐ ܐܸܬ̣ܦܬܲܚ ܐܸܕ݂ܢܲܝ̈ܟ ܝܵܕܲܥ̣ ܐ̄ܢܵܐ ܕܲܡܕܲܓܵܠܘܼ ܡܕܲܓܸ̇ܠ ܐ̄ܢܬ̇. ܘܥܵܘܿܠܵܐ ܡ̣ܢ ܟܲܪܣܵܐ ܐܸܬ̣ܩܪܝܼܬ̇.
9 ܡܸܛܠ ܫܹܡܝ ܐܵܘܪܸܟ݂ ܪܙܼܓ̣ܙܝܼ ܘܬܸܫܒ̇ܘܿܚܬ̇ܝ ܐܸܛܲܪ ܠܵܟ݂: ܘܠܵܐ ܐܵܘܒ̇ܕ݂ܵܟ݂.
10 ܗܵܐ ܨܪܲܦܬܵܟ݂ ܘܠܵܐ ܒܟܸܣܦܵܐ. ܘܲܒ̣ܚܲܪܬܵܟ݂ ܒܟ݂ܘܼܪܵܐ ܕܡܸܣܟܹ̇ܢܘܼܬ̣ܵܐ.
11 ܡܸܛܠܵܬ̣ܝ ܐܸܥܒܸ̇ܕ݂ ܕܠܵܐ ܐܸܬ̇ܛܵܘܲܫ ܘܐܝܼܩܵܪܝ ܠܐܲܚܪܹܝܢ ܠܵܐ ܐܸܬܸ̇ܠ.
12 ܫܡܲܥܲܝܢܝ ܝܲܥܩܘܿܒ̣ ܘܝܼܣܪܵܝܹܠ ܕܲܩܪܝܼܬ̣. ܐܸܢܵܐ ܐ̄ܢܵܐ ܩܲܕ݂ܡܵܝܵܐ: ܘܐܸܢܵܐ ܐ̄ܢܵܐ ܐ̄ܚܪܵܝܵܐ.
13 ܘܐܝܼܕ݂ܝ ܐܲܬ̣ܩܢܲܬ̤ ܫܲܬ̣ܐ̱ܣܹ̈ܝܗ̇ ܕܐܲܪܥܵܐ. ܘܝܲܡܝܼܢܝ ܛܸܦܚܲܬ̤ ܫܡܲܝܵܐ. ܩܵܪܹܐ ܐ̄ܢܵܐ ܠܗܘܿܢ: ܘܩܵܝ̇ܡܝܼܢ ܐܲܟ݂ܚ̄ܕ݂ܵܐ.
14 ܐܸܬ̣ܟܲܢܲܫܘ ܟܠܟ݂ܘܿܢ ܘܲܫܡܲܥܘ ܡܲܢܘܼ ܐܝܼܬ̣ ܒܟ݂ܘܿܢ ܕܲܡܚܵܘܹܐ ܗܵܠܹܝܢ. ܡܵܪܝܵܐ ܪܚܸܡ̣ ܕܢܸܥܒܸ̇ܕ݂ ܨܸܒ̣ܝܵܢܹܗ ܒܒ̣ܵܒܹܠ: ܘܲܒ̣ܙܲܪܥܵܐ ܕܟܲܠܕ݂ܵܝܹ̈ܐ.
15 ܐܸܢܵܐ ܡܲܠܠܹ̇ܬ̣ ܘܐܵܦ ܩܪܹܝܬ̣ ܘܐܲܝܬ̇ܝܼܬܵܗ̇ ܘܐܲܨܠܚܹ̇ܬ̣ ܐܘܼܪܚܹܗ.
16 ܩܪܘܿܒ̣ܘ ܠܘܵܬ̣ܝ ܘܲܫܡܲܥܘ ܗܵܕܹܐ. ܕܡ̣ܢ ܪܹܫܝܼܬ̣ܵܐ ܒܛܘܼܫܝܵܐ ܠܵܐ ܡܲܠܠܹܬ̣ ܘܡ̣ܢ ܙܲܒ̣ܢܵܐ ܕܲܗܘ̤ܵܬ̣ ܬܲܡܵܢ ܐ̄ܢܵܐ. ܘܗܵܫܵܐ ܡܵܪܝܵܐ ܐܲܠܵܗܵܐ ܫܲܕ̇ܪܲܢܝ ܘܪܘܼܚܹܗ.
17 ܗܵܟܲܢܵܐ ܐܵܡܲܪ ܡܵܪܝܵܐ ܦܵܪܘܿܩܵܟ݂ ܩܲܕ̇ܝܼܫܵܐ ܕܝܼܣܪܵܝܹܠ ܐܸܢܵܐ ܡܵܪܝܵܐ ܐܲܠܵܗܵܟ݂ ܡܲܠܸܦ ܐ̄ܢܵܐ ܠܵܟ݂ ܕܠܵܐ ܬܲܥܠܹܐ ܘܲܡܚܵܘܹܐ ܐ̄ܢܵܐ ܠܵܟ݂ ܐܘܼܪܚܵܐ ܕܬܹܐܙܲܠ ܒܵܗ̇.
18 ܠܘܲܝ ܕܹܝܢ ܨܵܐܹ̇ܬ̣ ܐܲܢ̄ܬ̇ ܦܘܼܩܕܵܢܲܝ̈. ܘܗܵܘܹ̇ܐ ܫܠܵܡܵܟ݂ ܐܲܝܟ݂ ܢܲܗܪܵܐ: ܘܙܲܕ̇ܝܼܩܘܼܬ̣ܵܟ݂ ܐܲܝܟ݂ ܓܲܠܠܹ̈ܐ ܕܝܲܡܵܐ.
19 ܘܗܵܘܹ̇ܐ ܙܲܪܥܵܟ݂ ܐܲܝܟ݂ ܚܵܠܵܐ: ܘܝܲܠܕܵܐ ܕܲܡܥܲܝ̈ܟ ܐܲܝܟ݂ ܚܨܵܨܵܘ̈ܗܝ ܘܠܵܐ ܢܣܘܼܦ ܘܠܵܐ ܢܹܐܒܲܕ݂ ܫܡܹܗ ܡ̣ܢ ܩܕ݂ܵܡܲܝ.
20 ܦܘܿܩܘ ܡ̣ܢ ܒܵܒܹܠ: ܥܪܘܿܩܘ ܡ̣ܢ ܟܲܠܕ݂ܵܝܹ̈ܐ ܒܩܵܠܵܐ ܕܬܸܫܒ̇ܘܿܚܬܵܐ ܚܵܘܵܘ ܗܵܕܹܐ. ܘܐܲܫܡ̱ܥܘܼܗ̇ ܘܐܲܦܩܘܼܗ̇ ܥܕܲܡܵܐ ܠܣܵܘ̈ܦܹܝܗ̇ ܕܐܲܪܥܵܐ. ܘܐܸܡܲܪܘ: ܦܪܲܩ̣ ܡܪܝܵܐ ܠܝܲܥܩܘܿܒ̣ ܥܲܒ̣ܕܹ̇ܗ.
21 ܒܚܲܪ̈ܒ̣ܵܬ̣ܵܐ ܗܲܠܸܟ݂ ܐܸܢܘܿܢ. ܘܡܲـ̈ـܝܵܐ ܡ̣ܢ ܛܲܪܵܢܵܐ ܐܲܪܕ̇ܝܼ ܠܗܘܿܢ ܒܲܙܲܥ̣ ܟܹܐܦܵܐ ܘܲܪܕ݂ܵܘ ܡܲـ̈ـܝܵܐ.
22 ܠܲܝܬ̇ ܫܠܵܡܵܐ ܠܪ̈ܲܫܝܼܥܹܐ: ܐܵܡܲܪ ܡܵܪܝܵܐ.
1 ܫܡܲܥܹ̈ܝܢ ܓܵܙܪ̈ܵܬ̣ܵܐ: ܘܨܘܼ̈ܬܹܝܢ ܐܸܡ̈ܘܵܬ̣ܵܐ. ܡ̣ܢ ܪܘܼܚܩܵܐ ܡܵܪܝܵܐ ܩ̣ܪܵܢܝ. ܘܡ̣ܢ ܡܲܪܒ̇ܥܵܐ ܘܡ̣ܢ ܟܲܪܣܵܗ̇ ܕܐܹܡܝ ܕܟܲܪ ܫܹܡܝ.
2 ܥ̣ܒܲܕ݂ ܦܘܼܡܝ ܐܲܝܟ݂ ܣܲܝܦܵܐ ܚܲܪܝܼܦܵܐ ܘܲܒ̣ܛܸܠܵܠܵܐ ܕܐܝܼܕܹܗ ܛܲܫܝܲܢܝ ܥܲܒ̣ܕܲܢܝ ܐܲܝܟ݂ ܓܹܐܪܵܐ ܓܲܒ̣ܝܵܐ: ܘܒܲܩܛܸܪܩܹܗ ܣܲܬ̇ܪܲܢܝ.
3 ܘܐܸܡܲܪ ܠܝܼ܆ ܥܲܒ̣ܕ̇ܝ ܐܲܢ̄ܬ̇: ܝܼܣܪܵܝܹܠ ܕܒ̣ܵܟ݂ ܡܸܫܬܲܒܲܚ ܐ̄ܢܵܐ.
4 ܘܠܵܐ ܐܸܡ̇ܪܹܬ̣ ܠܙܲܪܥܹܗ ܕܝܲܥܩܘܿܒ̣ ܕܲܣܪܝܼܩܵܐܝܼܬ̣ ܠܐܝܼܬ̇ ܘܝܸܗ̄ܒܹ̇ܬ̣ ܚܠܝ ܠܲܣܪܝܼܩܘܼܬ̣ܵܐ. ܫܲܪܝܼܪܵܐܝܼܬ̣ ܕܝܼܢܝ ܩܕ݂ܵܡ ܡܵܪܝܵܐ: ܘܲܥܒܵܕ݂ܝ ܩܕ݂ܵܡ ܐܲܠܵܗܝ.
5 ܗܵܫܵܐ ܗܵܟܲܢܵܐ ܐܵܡܲܪ ܡܵܪܝܵܐ: ܕܓܲܒ̣ܠܢܝ ܒܡܲܪܒ̇ܥܵܐ ܕܐܸܗܘܹܐ ܠܹܗ ܥܲܒ̣ܕܵܐ: ܘܐܲܦܢܸܐ ܠܝܲܥܩܘܿܒ̣ ܠܘܵܬܹܗ: ܘܠܝܼܣܪܵܝܹܠ ܐܹܟܲܢܸܫ ܐܸܫܬܲܒ̇ܚܹ̇ܬ̣ ܩܕ݂ܵܡ ܡܵܪܝܵܐ. ܘܐܲܠܵܗܝ ܗܘ̤ܵܐ ܥܘܼܫܢܝ.
6 ܘܐܸܡܲܪ ܙܥܘܿܪܵܐ ܗ̄ܝܼ ܕܬܸܗܘܹܐ ܠܝܼ ܥܲܒ̣ܕܵܐ: ܘܲܬ̣ܩܝܼܡ ܫܲܒ̣ܛܵܐ ܕܝܲܥܩܘܿܒ̣: ܘܬܲܦܢܸܐ ܢܘܼܪܒܹ̇ܗ ܕܝܼܣܪܵܝܹܠ. ܝܲܗ̄ܒ̣ܬܵܟ݂ ܢܘܼܗܪܵܐ ܠܥܲܡܡܹ̈ܐ: ܕܬܸܗܘܹܐ ܦܘܼܪܩܵܢܝ ܥܕܲܡܵܐ ܠܣܵܘ̈ܦܹܝܗ̇ ܕܐܲܪܥܵܐ.
7 ܗܵܟܲܢܵܐ ܐܵܡܲܪ ܡܵܪܝܵܐ ܩܲܕ̇ܝܼܫܵܐ ܕܝܼܣܪܵܝܹܠ: ܘܦܵܪܘܿܩܹܗ: ܠܲܕ݂ܡܸܣܬܲܠܝܵܐ ܢܲܦ̮ܫܹܗ: ܠܲܕ݂ܡܲܣܠܲܝ ܡ̣ܢ ܥܲܡܵܐ ܘܡ̣ܢ ܥܲܒ̣ـ̈ـܕܹ̇ܐ ܕܫܲܠܝܼܛܵܢܹ̈ܐ: ܡܲܠ̈ܟܹ̇ܐ ܢܸܚܙܘܿܢ ܘܲܢܩܘܼܡܘܼܢ: ܘܫܲܠܝܼܛܵܢܹ̈ܐ ܢܸܣܓ̇ܕ݂ܘܼܢ ܠܹܗ. ܡܸܛܠ ܡܵܪܝܵܐ ܕܲܡܗܲܝܡܲܢ: ܩܲܕ̇ܝܼܫܵܐ ܕܝܼܣܪܵܝܹܠ ܕܲܓ̣ܒ̣ܵܟ݂.
8 ܗܵܟܲܢܵܐ ܐܵܡܲܪ ܡܵܪܝܵܐ: ܒܙܲܒ̣ܢܵܐ ܕܨܸܒ̣ܝܵܢܵܐ ܥܢܹܝܬ̣ܵܟ݂ ܘܲܒ̣ܝܵܘܡܵܐ ܕܦܘܼܪܩܵܢܵܐ ܥܲܕܲܪܬܵܟ݂. ܘܲܓ̣ܒܲܠܬܵܟ݂: ܘܝܲܗ̄ܒ̣ܬܵܟ݂ ܩܝܵܡܵܐ ܠܥܲܡܵܐ: ܘܢܘܼܗܪܵܐ ܠܥܲܡܡܹ̈ܐ. ܕܲܬ̣ܩܝܼܡ ܐܲܪܥܵܐ: ܘܬܹܐܪܲܬ̣ ܝܵܪܬ̇ܘܼܬ̣ܵܐ ܕܚܲܪ̈ܒ̣ܵܬ̣ܵܐ.
9 ܘܬܹܐܡܲܪ ܠܐܲܣܝܼܪܹ̈ܐ ܕܦܘܿܩܘ: ܘܠܲܚܒ̣ܝܼ̈ܫܹܐ ܕܐܸܬ̣ܓ̇ܠܵܘ. ܥܲܠ ܐܘܼܪ̈ܚܵܬ̣ܵܐ ܢܸܪܥܘܿܢ: ܘܲܒ̣ܟ݂ܠܗܘܿܢ ܫܒ̣ܝܼ̈ܠܹܐ ܡܲܪ̈ܥܝܵܬ̣ܗܘܿܢ.
10 ܠܵܐ ܢܸܟ݂ܦ̄ܢܘܿܢ: ܘܠܵܐ ܢܸܨܗܘܿܢ. ܘܠܵܐ ܢܲܟܸ̇ܐ ܐܸܢܘܿܢ ܫܵܘܒܵܐ ܘܫܸܡܫܵܐ. ܡܸܛܠ ܕܲܡܪܲܚܡܵܢܗܘܿܢ ܢܕܲܒܲܪ ܐܸܢܘܿܢ. ܘܲܠܡܲܒ̇ܘܼܥܹ̈ܐ ܕܡܲـ̈ـܝܵܐ ܢܲܝܬܹ̇ܐ ܐܸܢܘܿܢ.
11 ܐܸܥܒܸ̇ܕ݂ ܟܠܗܘܿܢ ܛܘܼܪܹ̈ܐ ܐܘܼܪ̈ܚܵܬ̣ܵܐ: ܘܲܫܒ̣ܝܼ̈ܠܹܐ ܢܸܬ̇ܬ̇ܪܝܼܡܘܿܢ.
12 ܗܵܠܹܝܢ ܢܹܐܬ̣ܘܿܢ ܡ̣ܢ ܪܘܼܚܩܵܐ: ܘܗܵܠܹܝܢ ܡ̣ܢ ܓܲܪܒ̇ܝܵܐ ܘܗܵܠܹܝܢ ܡ̣ܢ ܝܲܡܵܐ: ܘܗܵܠܹܝܢ ܡ̣ܢ ܝܲܡܵܐ ܕܣܲܢܝܲܡ.
13 ܫܲܒܲܚܘ ܫܡܲܝܵܐ: ܘܕ݂ܘܼܨܝ ܐܲܪܥܵܐ. ܐܸܬ̣ܦܲܨ̄ܚܘ ܛܘܼܪܹ̈ܐ ܒܬܸܫܒ̇ܘܿܚܬܵܐ. ܡܸܛܠ ܕܒܲܝܲܐ ܡܵܪܝܵܐ ܠܥܲܡܹܗ: ܘܪܲܚܸܡ ܥܲܠ ܒܵܝܫܘܵܗܝ.
14 ܘܐܸܡܪܲܬ̤ ܨܸܗܝܘܿܢ ܕܫܲܒ̣ܩܲܢܝ ܡܵܪܝܵܐ: ܘܡܵܪܝܵܐ ܛܥܵܢܝ.
15 ܐܸܢ ܛܵܥ̇ܝܵܐ ܐܲܢ̄ܬ̇ܬ̣ܵܐ ܥܘܼܠܵܗ̇: ܘܠܵܐ ܡܪܲܚܡܵܐ ܥܲܠ ܒܲܪ ܡܥܹ̈ܝܗ̇: ܐܵܦܸܢ ܗܵܠܹܝܢ ܢܸܛ̈ܥ̱ܝܵܢ: ܐܸܢܵܐ ܠܵܐ ܐܸܛܥܹܝܟ݂ܝ.
16 ܗܵܐ ܥܲܠ ܦܲܣܹ̈ܐ ܕܐܝܼܕܝ̈ ܪܫܲܡ̇ܬܹ̇ܟ݂ܝ ܘܫܘܼܪ̈ܲܝܟ̇ܝ ܠܘܼܩܒܲܠܝ ܐܸܢܘܿܢ ܐܲܡܝܼܢܵܐܝܼܬ̣.
17 ܒܲܥܓܲܠ ܒܢܲـ̈ـܟ̇ܝ ܡܣܲܚܦܵܢܲܝ̈ܟ̇ܝ ܘܡܲܚ̱ܪ̈ܒ̣ܵܢܲܝܟ̇ܝ ܡܸܢܹܟ݂ܝ ܢܸܦܩܘܼܢ.
18 ܐܲܪܝܼܡܝ ܥܲܝܢܲܝ̈ܟ̇ܝ ܠܲܚܕ݂ܵܪ̈ܲܝܟ̇ܝ. ܘܲܚܙܵܝ ܕܟ݂ܠܗܘܿܢ ܡܸܬ̣ܟܲܢܫܝܼܢ ܘܐܵܬܹ̇ܝܢ ܠܹܟ݂ܝ: ܚܲܝ ܐ̄ܢܵܐ ܐܵܡܲܪ ܡܵܪܝܵܐ: ܕܟ݂ܠܗܘܿܢ ܐܲܝܟ݂ ܨܸܒ̣ܬܵܐ ܬܸܠܒ̇ܫܝܼܢ: ܘܬܸܬ̣ܟܲܠܠܝܼܢ ܐܲܝܟ݂ ܟܲܠܬ̣ܵܐ.
19 ܡܸܛܠ ܕܚܲܪ̈ܒ̣ܵܬܹܟ݂ܝ: ܘܨܵܕ݂̈ܝܵܬܹܟ݂ܝ: ܘܐܲܪܥܵܐ ܕܲܣܚܝܼܦܘܼܬܹܟ݂ܝ ܡܸܟܹ̇ܝܠ ܬܸܬ̣ܐ̱ܠܨ ܡ̣ܢ ܝܲܬ̣ܒܵܐ: ܘܢܸܥܪ̱ܩܘܼܢ ܒܵܠܘܿܥܲܝ̈ܟ̇ܝ.
20 ܘܬ̣ܘܼܒ̣ ܢܹܐܡܪܘܿܢ ܒܐܸܕ݂ܢܲܝ̈ܟ̇ܝ ܒܢܲܝ̈ ܡܓܲܙܝܘܼܬܹܟ݂ܝ: ܐܲܠܝܼܨ ܗ̄ܘܼ ܠܲܢ ܐܲܬ̣ܪܵܐ ܐܸܬ̣ܩܲܪܲܒ̣ ܠܲܢ: ܢܸܬܸ̇ܒ̣.
21 ܘܬܹܐ ܡܪܝܼܢ ܒܠܸܒܹ̇ܟ݂ܝ ܡܲܢܘܼ ܝܲܠܸܕ݂ ܠܝܼ ܗܵܠܹܝܢ. ܕܗܵܐ ܐܸܢܵܐ ܡܓܲܙܲܝܬܵܐ ܐܢܵܐ ܘܲܡܫܵܘܚܲܕ̇ܬܵܐ: ܓܵܠܝܼܬ̣ܵܐ ܘܲܡܕ݂ܵܘܲܕ̇ܬܵܐ. ܗܵܠܹܝܢ ܡܲܢ ܪܲܒ̇ܝ ܐܸܢ ܐܸܢܵܐ ܗܵܐ ܐܹܫܬܲܚܪܹܬ̣ ܒܲܠܚܘܼܕ݂ܝ: ܗܵܠܹܝܢ ܐܲܝܟܵܐ ܗܘ̤ܵܘ.
22 ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ: ܗܵܐ ܡܪܝܼܡ ܐ̄ܢܵܐ ܐܝܼܕ݂ܝ ܥܲܠ ܥܲܡܡܹ̈ܐ. ܘܲܠܥܲܡܡܹ̈ܐ ܐܲܪܝܼܡ ܐܵܬ̤ܵܐ. ܘܢܲܝܬ̇ܘܿܢ ܠܲܒ̣ܢܲܝ̈ܟ̇ܝ ܥܲܠ ܐܝܼܕܲܝܗܘܿܢ. ܘܠܲܒ̣̈ܢܵܬܹܟ݂ܝ ܥܲܠ ܟܲܬ̣ܦܵܬ̣̈ܗܘܿܢ ܢܸܫܩ̄ܠܘܼܢ.
23 ܘܢܸܗܘܘܿܢ ܡܲܠ̈ܟܹ̇ܐ ܡܪ̈ܲܒ̇ܝܵܢܲܝܟ̇ܝ: ܘܪܵܘ̱ܪ̈ܒ̣ܵܢܝܵܬ̣ܗܘܿܢ ܡܲܝܢܩܵܢ̈ܝܵܬܹܟܝ ܘܥܲܠ ܐܲܦܲܝ̈ܗܘܿܢ ܥܲܠ ܐܲܪܥܵܐ ܢܸܣܛܕ݂ܘܼܢ ܠܹܟ݂ܝ. ܘܥܲܦܪܵܐ ܕܪܸ̈ܓ̣ܠܲܝܟ̇ܝ ܢܸܠܚ̄ܟ݂ܘܼܢ ܘܬܸܕܲܥܝܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܕܠܵܐ ܒܵܗ̇ܬܝܼܢ ܐܲܝܠܹܝܢ ܕܲܡܣܲܟܹ̇ܝܢ ܠܝܼ.
24 ܠܡܵܐ ܡܸܬ̇ܕܲܒ̣ܪܵܐ ܕܒ̣ܵܪܬܹ̇ܗ ܕܓܲܢ̄ܒܵܪܵܐ. ܐܵܘ ܫܒ̣ܝܼܬܹܗ ܕܥܲܫܝܼܢܵܐ ܡܸܬ̣ܦܲܨܝܵܐ.
25 ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ: ܕܲܕ݂ܒ̣ܵܪܬܹ̇ܗ ܕܓܲܢܒܵܪܵܐ ܬܸܬ̇ܕ̇ܒܲܪ ܘܲܫܒ̣ܝܼܬܹܗ ܕܥܲܫܝܼܢܵܐ ܬܸܬ̣ܦܲܨܹܐ. ܘܕ݂ܝܼܢܲܝ̈ܟ̇ܝ ܐܸܢܵܐ ܐܹܕ̇ܘܼܢ. ܘܠܲܒ̣ܢܲܝ̈ܟ̇ܝ ܐܸܢܵܐ ܐܸܦܪܘܿܩ.
26 ܘܐܵܘܟܸ̇ܠ ܠܐܵܠܘܿܨܲܝ̈ܟ̇ܝ ܒܸܣ̱ܪܗܘܿܢ. ܘܐܲܝܟ݂ ܡܹܐܪܝܼܬ̣ܵܐ ܢܸܪܘܘܿܢ ܡ̣ܢ ܕܸܡܗܘܿܢ. ܘܢܸܕ̇ܥܘܼܢ ܟܠ ܒܣܲܪ ܕܐܸܢܵܐ ܐ̄ܢܵܐ ܡܵܪܝܵܐ ܦܵܪܘܿܩܹܟ݂ܝ: ܘܲܡܣܲܝܥܵܢܹܟ݂ܝ ܬܲܩܝܼܦܹܗ ܕܝܲܥܩܘܿܒ̣.
1 ܗܵܟܲܢܵܐ ܐܵܡܲܪ ܡܵܪܝܵܐ: ܐܲܝܢܵܘ ܟܬ̣ܵܒ̣ܵܐ ܕܫܘܼܒ̣ܩܵܢܵܐ ܕܫܸܒ̣ܩܹ̇ܬ̣ ܠܐܸܡܟ݂ܘܿܢ. ܐܵܘ ܡܲܢܘܼ ܡܵܪܹܐ ܚܵܘܒܲܬ̣ܝ ܕܙܲܒܸ̇ܢܬ̇ܟ݂ܘܿܢ ܠܹܗ. ܗܵܐ ܒܲܚܛܵܗܲܝ̈ܟ̇ܘܿܢ ܐܸܙܕܲܒܲܢ̣ܬ̇ܘܿܢ. ܘܲܒ̣ܥܵܘܼܠܟ݂ܘܿܢ ܐܸܫܬܲܒ̣ܩܲܬ̤ ܐܸܡܟ݂ܘܿܢ.
2 ܠܡܵܢܵܐ ܐܹܬܹܝ̇ܬ̣: ܘܠܲܝܬ̇ ܐ̄ܢܵܫ ܘܲܩܪܹܝܬ̣ ܘܠܲܝܬ̇ ܕܥܵܢܹ̇ܐ ܚܨܵܕ݂ܵܐ ܚܸܨܕܲܬ̤ ܐܝܼܕ݂ܝ ܘܦܸܕܲܬ̤ ܐܵܘ ܠܲܝܬ̇ ܒܝܼ ܚܲܝܠܵܐ ܠܲܡܦܲܨܵܝܘܼ ܗܵܐ ܒܲܟ݂ܐܵܬ̣ܝ ܡܲܚܪܸܒ̣ ܐ̄ܢܵܐ ܝܲܡܵܐ. ܘܥܵܒܹ̇ܕ݂ ܐ̄ܢܵܐ ܢܲܗܪ̈ܵܘܵܬ̣ܵܐ ܐܲܝܟ݂ ܡܲܕ݂ܒ̇ܪܵܐ: ܘܣܵܪܹܝܢ ܢܘܼܢܲܝ̈ܗܘܿܢ ܡ̣ܢ ܒܠܲܝ ܡܲـ̈ـܝܵܐ: ܘܡܵܝܬ̇ܝܼܢ.
3 ܘܡܲܠܒܸ̇ܫ ܐ̄ܢܵܐ ܠܲܫܡܲܝܵܐ ܚܸܫܘܿܟ݂ܵܐ. ܘܣܲܩܵܐ ܥܵܒܹ̇ܕ݂ ܐ̄ܢܵܐ ܬܲܟ݂ܣܝܼܬܗܘܿܢ.
4 ܡܵܪܝܵܐ ܐܲܠܵܗܵܐ ܝܲܗ̄ܒ̣ ܠܝܼ ܠܸܫܵܢܵܐ ܕܝܘܼܠܦܵܢܵܐ. ܕܐܵܘܕܲܥ ܘܐܹܚܵܘܸܐ ܠܲܡܛܲܪ̈ܦܹܐ ܡܸܠܬ̣ܵܐ. ܐܲܥܝܪ ܒܨܲܦܪܵܐ. ܒܨܲܦܪܵܐ ܢܸܥܒܸ̇ܕ݂ ܠܝܼ ܐܸܕ݂ܢܹ̈ܐ ܠܡܸܫܡܲܥ ܝܘܼܠܦܵܢܵܐ.
5 ܡܵܪܝܵܐ ܐܲܠܵܗܵܐ ܦ̣ܬܲܚ ܠܝܼ ܐܸܕ݂ܢܹ̈ܐ. ܘܐܸܢܵܐ ܠܵܐ ܗܸܦ̣ܟܹ̇ܬ̣ ܠܒܸܣܬܲܪܝ: ܐܵܦܠܵܐ ܩܵܡܹ̇ܬ̣ ܒܚܸܪܝܵܢܵܐ.
6 ܓܘܼܫܡܝ ܝܸܗ̄ܒܹ̇ܬ̣ ܠܡܲܚ̈ܘܵܬ̣ܵܐ: ܘܦܲܟܲܝ̈ ܠܫܘܼ̈ܩܵܦܹܐ. ܘܐܲܦܲܝ̈ ܠܵܐ ܐܲܦܢܝܼܬ̣ ܡ̣ܢ ܒܸܗܬ̇ܬ̣ܵܐ ܘܡ̣ܢ ܪܘܼܩܵܐ.
7 ܘܡܵܪܝܵܐ ܐܲܠܵܗܵܐ ܥܲܕ̇ܪܲܢܝ. ܡܸܛܠ ܗܵܢܵܐ ܠܵܐ ܒܸܗ̇ܬܹ̇ܬ̣: ܡܸܛܠ ܗܵܢܵܐ ܥܸܒ̣ܕܹ̇ܬ̣ ܐܲܦܲܝ̈ ܐܲܝܟ݂ ܟܹܐܦܵܐ: ܘܝܸܕ݂ܥܹ̇ܬ̣ ܕܠܵܐ ܒܵܗܹ̇ܬ̣ ܐ̄ܢܵܐ.
8 ܕܩܲܪܝܼܒ̣ ܗ̄ܘܼ ܡܙܲܕ̇ܩܵܢܝ. ܡܲܢܘܼ ܕܕ݂ܵܐܹ̇ܢ ܥܲܡܝ: ܢܩܘܼܡ ܐܲܟ݂ܚ̄ܕ݂ܵܐ. ܐܵܘ ܡܲܢܘܼ ܒܥܸܠ ܕܝܼܢܝ: ܢܸܬ̣ܩܲܪܲܒ̣ ܠܘܵܬ̣ܝ.
9 ܗܵܐ ܡܵܪܝܵܐ ܐܲܠܵܗܵܐ ܡܥܲܕܲܪ ܠܝܼ: ܡܲܢܘܼ ܡܚܲܝܸܒ̣ ܠܝܼ. ܗܵܐ ܟܠܗܘܿܢ ܐܲܝܟ݂ ܠܒ̣ܘܼܫܵܐ ܒܵܠܹ̇ܝܢ: ܘܣܵܣܵܐ ܢܹܐܟ݂ܘܼܠ ܐܸܢܘܿܢ.
10 ܡܲܢܘܼ ܒܟ݂ܘܿܢ ܕܕ݂ܵܚܹ̇ܠ ܡ̣ܢ ܡܵܪܝܵܐ: ܢܸܫܡܲܥ ܒܩܵܠܵܐ ܕܥܲܒ̣ܕܹ̇ܗ ܕܲܡܗܲܠܸܟ݂ ܒܚܸܫܘܿܟ݂ܵܐ: ܘܠܲܝܬ̇ ܠܹܗ ܢܘܼܗܪܵܐ. ܢܣܲܒܲܪ ܒܲܫܡܹܗ ܕܡܵܪܝܵܐ: ܘܢܸܬ̣ܦܪܸܩ ܒܐܲܠܵܗܹܗ.
11 ܗܵܐ ܟܠܟ݂ܘܿܢ ܫܵܒ̣ܩܲܝ̈ ܢܘܼܪܵܐ ܐܲܢ̄ܬ̇ܘܿܢ: ܘܲܡܓ̣ܵܘ̈ܙܠܲܝ ܫܲܠܗܹܒ̣ܝܼܬ̣ܵܐ. ܙܸܠܘ ܒܙܲܗܪܵܐ ܕܢܘܼܪܟ݂ܘܿܢ: ܘܲܒ̣ܫܲܠܗܹܒ̣ܝܼܬ̣ܵܐ ܕܓ̣ܵܘܙܲܠܬ̇ܟ݂ܘܿܢ. ܡ̣ܢ ܐܝܼܕܲܝ̈ ܗ̤ܘܵܬ̣ܟ݂ܘܿܢ ܗܵܕܹܐ: ܕܲܒ̣ܟܲܪܝܘܼܬ̣ܵܐ ܬܸܕ݂ܡ̱ܟ݂ܘܼܢ.
1 ܫܘܼܡܥܘܼܢܝ ܕܪܵܗ̇ܛܝܼܢ ܒܙܲܕ̇ܝܼܩܘܼܬ̣ܵܐ: ܘܒ̣ܵܥܹ̇ܝܢ ܠܡܵܪܝܵܐ. ܚܘܼܪܘ ܠܛܘܼܪܵܐ ܕܐܸܬ̣ܓ̇ܙܲܪܬ̇ܘܿܢ ܡܸܢܹܗ: ܘܲܠܓ̣ܘܼܒܵܐ ܕܐܸܬ̣ܢܲܩܲܪܬ̇ܘܿܢ ܡܸܢܹܗ.
2 ܚܘܼܪܘ ܠܐܲܒ̣ܪܵܗܵܡ ܐܲܒ̣ܘܼܟ݂ܘܿܢ: ܘܲܠܣܲܪܵܐ ܕܲܒ̣ܛܹܢܬ̣ܟ݂ܘܿܢ ܕܚܲܕ݂ ܗ̄ܘܼܵܐ: ܘܲܩܪܹܝ̇ܬܹܗ: ܘܒܲܕܸܟ݂ܬܹ̇ܗ: ܘܐܲܣܓܝܼܬܹ̇ܗ.
3 ܡܸܛܠ ܕܒ̣ܵܢܹ̇ܐ ܡܵܪܝܵܐ ܠܨܸܗܝܘܿܢ: ܘܲܡܒܲܢܸܐ ܠܟ݂ܠܗܹܝܢ ܚܲܪ̈ܒ̣ܵܬ̣ܵܗ̇. ܘܥܵܒܹ̇ܕ݂ ܡܲܕ݂ܒ̇ܪܵܗ̇ ܐܲܝܟ݂ ܥܕܸܢ: ܘܲܦܩܲܥܬ̣ܵܗ̇ ܐܲܝܟ݂ ܦܲܪܕܲܝܣܹܗ ܕܡܵܪܝܵܐ. ܕܝܵܨܵܐ ܘܚܲܕ݂ܘܼܬ̣ܵܐ ܢܸܫܬ̇ܡܲܥ ܒܓ̣ܵܘܵܗ̇: ܬܵܘܕ̇ܝܼܬ̣ܵܐ ܘܩܵܠܵܐ ܕܲܙܡܵܪܵܐ.
4 ܫܘܼܡܥܘܼܢܝ ܥܲܡܡܹ̈ܐ: ܘܨܘܼܬܹܝܢܵܢ̈ܝ ܐܸܡ̈ܘܵܬ̣ܵܐ. ܡܸܛܠ ܕܢܵܡܘܿܣܵܐ ܡ̣ܢ ܩܕ݂ܵܡܲܝ ܢܵܦܹ̇ܩ ܘܕ݂ܝܼܢܝ ܢܘܼܗܪܵܐ ܗ̄ܘܼ ܠܥܲܡܡܹ̈ܐ.
5 ܩܸܪܒܲܬ̤ ܙܲܕ̇ܝܼܩܘܼܬ̣ܝ: ܘܲܢܦܲܩ̣ ܦܘܼܪܩܵܢܝ. ܘܒܲܕ݂ܪܵܥܝ ܥܲܡܡܹ̈ܐ ܢܸܬ̇ܬ̇ܕ̇ܝܼܢܘܼܢ. ܠܝܼ ܢܣܲܟ̇ـ̈ـܝܵܢ ܓܵܙܪ̈ܵܬ̣ܵܐ. ܘܠܲܕ݂ܪܵܥܝ ܢܣܲܒ̇ܪ̈ܵܢ.
6 ܐܲܪܝܼܡܘ ܥܲܝܢܲܝ̈ܟ̇ܘܿܢ ܠܲܫܡܲܝܵܐ: ܘܚܘܼܪܘ ܐܵܦ ܠܬܲܚܬ̇ ܒܐܲܪܥܵܐ. ܡܸܛܠ ܕܲܫܡܲܝܵܐ ܐܲܝܟ݂ ܬܸܢܵܢܵܐ ܢܸܥܒ̇ܪܘܼܢ: ܘܐܲܪܥܵܐ ܐܲܝܟ݂ ܠܒ̣ܘܼܫܵܐ ܬܸܒ̣ܠܸܐ. ܘܥܵܡܘܿܪܹ̈ܝܗ̇ ܐܲܟ݂ܘܵܬ̣ܵܗ̇ ܢܸܗܘܘܿܢ. ܘܦܘܼܪܩܵܢܝ ܠܥܵܠܲܡ ܢܸܗܘܹܐ: ܘܙܲܕ̇ܝܼܩܘܼܬ̣ܝ ܠܵܐ ܬܸܥܒܲܪ.
7 ܫܘܼܡܥܘܼܢܝ ܝܵܕ݂ܥܲܝ̈ ܙܲܕ̇ܝܼܩܘܼܬ̣ܵܐ: ܥܲܡܵܐ ܕܢܵܡܘܿܣܝ ܒܠܸܒ̇ܗܘܿܢ. ܠܵܐ ܬܸܕ݂ܚ̄ܠܘܼܢ ܡ̣ܢ ܚܸܣܕܵܐ ܕܐ̄ܢܵܫܵܐ. ܘܡ̣ܢ ܓܘܼܕܵܦܗܘܿܢ ܠܵܐ ܬܙܘܼܥܘܼܢ.
8 ܡܸܛܠ ܕܐܲܝܟ݂ ܕܲܠܥܲܡܪܵܐ ܘܐܲܝܟ݂ ܕܠܲܠܒ̣ܘܼܫܵܐ ܢܹܐܟ݂ܘܿܠ ܐܸܢܘܿܢ ܣܵܣܵܐ. ܘܙܲܕ̇ܝܼܩܘܼܬ̣ܝ ܠܥܵܠܲܡ ܬܸܗܘܹܐ. ܘܦܘܼܪܩܵܢܝ ܠܕ݂ܵܪܕܵܪ̈ܝܼܢ.
9 ܐܸܬ̇ܬ̇ܥܝܼܪܝ: ܐܸܬ̇ܬ̇ܥܝܼܪܝ: ܘܲܠܒܲܫܝ ܥܘܼܫܢܵܐ ܕܲܕ݂ܪܵܥܹܗ ܕܡܵܪܝܵܐ. ܐܸܬ̇ܬ̇ܥܝܼܪܝ ܐܲܝܟ݂ ܕܲܒ̣ܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ: ܘܐܲܝܟ݂ ܕܵܪܹ̈ܐ ܕܡ̣ܢ ܥܵܠܡܝܼܢ. ܐܲܢ̄ܬ̇ܝ ܐܲܢ̄ܬ̇ܝ ܕܲܦܣܲܩ̣ܬ̇ܝ ܦܣܵܩܵܐ ܪܲܒܵܐ: ܘܲܩ̣ܛܲܠܬ̇ܝ ܠܬܲܢܝܼܢܵܐ.
10 ܐܲܢ̄ܬ̇ܝ ܗ̄ܝܼ ܕܐܲܚܪܸܒ̣ܬ̇ܝ ܝܲܡܵܐ: ܘܡܲـ̈ـܝܵܐ ܕܲܬ̣ܗܘܿܡܵܐ ܪܲܒܵܐ. ܘܲܒ̣ܥܘܼܡܩܵܐ ܕܡܲـ̈ـܝܵܐ ܥ̣ܒܲܕ̇ܬ̇ܝ ܐܘܼܪܚܵܐ. ܕܢܸܥܒ̇ܪܘܼܢ ܦܪ̈ܝܼܩܹܐ ܦܪ̈ܝܼܩܵܘܗܝ ܕܡܵܪܝܵܐ.
11 ܘܢܸܗ̄ܦܟ݂ܘܿܢ ܘܢܸܥܠܘܼܢ ܠܨܸܗܝܘܿܢ ܒܫܘܼܒ̣ܚܵܐ. ܘܲܠܥܵܠܡܝܼܢ ܬܸܗܘܹܐ ܚܲܕ݂ܘܼܬ̣ܵܐ ܥܲܠ ܪܹ̈ܫܲܝܗܘܿܢ. ܒܘܼܣܵܡܵܐ ܘܚܲܕ݂ܘܼܬ̣ܵܐ ܢܲܕ݂ܪ̱ܟ݂ܘܼܢ. ܘܢܸܥܪ̱ܩܘܼܢ ܕܵܘܘܿܢܹ̈ܐ ܘܬܸܢ̈ܚܵܬ̣ܵܐ.
12 ܐܸܢܵܐ ܐ̄ܢܵܐ ܒܡܲܝܐܵܢܟ݂ܘܿܢ ܐܵܡܲܪ ܡܵܪܝܵܐ. ܡܲܢ ܐܲܢ̄ܬ̇ܝ ܕܲܕ݂ܚܸܠܬ̇ܝ ܡ̣ܢ ܐ̄ܢܵܫܵܐ ܕܡܵܐܹ̇ܬ̣: ܘܡ̣ܢ ܒܲܪܢܵܫܵܐ ܕܐܲܝܟ݂ ܥܵܡܝܼܪܵܐ ܝܵܒܹ̇ܫ.
13 ܘܲܛܥܲܝܬ̇ܝ ܠܡܵܪܝܵܐ ܕܥܲܒ̣ܕܲܟ݂ܝ. ܕܲܡܬܲܚ̣ ܫܡܲܝܵܐ: ܘܐܲܬ̣ܩܸܢ ܫܲܬ̣ܐ̱ܣܹ̈ܝܗ̇ ܕܐܲܪܥܵܐ. ܘܲܕ݂ܚܸܠܬ̇ܝ ܐܲܡܝܼܢܵܐܝܼܬ̣ ܟܠܝܘܿܡ ܡ̣ܢ ܩܕ݂ܵܐ ܚܸܡܬܹܗ ܕܐܵܠܘܿܨܵܐ: ܕܲܡܛܲܝܲܒ̣ ܗ̄ܘܼܵܐ ܠܲܡܚܲܒܵܠܘܼ ܐܲܝܟܵܐ ܗ̄ܝܼ ܚܸܡܬܹܗ ܕܐܵܠܘܿܨܵܐ.
14 ܕܲܡܣܲܪܗܸܒ̣ ܗ̄ܘܼܵܐ ܥܲܫܝܼܢܹ̈ܐ ܠܲܡܚܲܒܵܠܘܼ ܠܵܐ ܢܡܘܼܬ̣ܘܼܢ ܠܲܚܒ̣ܵܠܵܐ. ܘܠܵܐ ܢܸܚܣܲܪ ܠܲܚܡܹܗ.
15 ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܹܟ݂ܝ ܕܟ݂ܵܐܹ̇ܐ ܒܝܲܡܵܐ ܘܫܵܠܹ̇ܝܢ ܓܲܠܠܵܘ̈ܗܝ ܡܵܪܝܵܐ ܚܲܝܠܬ̣ܵܢܵܐ ܫܡܹܗ.
16 ܕܣܵܡܹ̇ܬ̣ ܡܸـ̈ـܠܲܝ ܒܦܘܼܡܹܟ݂ܝ. ܘܲܒ̣ܛܸܠܵܠܵܐ ܕܐܝܼܕ݂ܝ ܟܲܣܝܼܬܹ̇ܟ݂ܝ ܒܗܵܝ̇ ܕܡܸܬ̣ܚܹ̇ܬ̣ ܫܡܲܝܵܐ: ܘܐܲܬ̣ܩܢܹ̇ܬ̣ ܫܲܬ̣ܐ̱ܣܹ̈ܝܗ̇ ܕܐܲܪܥܵܐ: ܘܐܸܡ̇ܪܹܬ̣ ܠܨܸܗܝܘܿܢ ܕܥܲܡܝ ܐܲܢ̄ܬ̇ܝ.
17 ܐܸܬ̇ܬ̇ܥܝܼܪܝ: ܐܸܬ̇ܬ̇ܥܝܼܪܝ: ܘܩܘܼܡܝ ܐܘܿܪܸܫܠܸܡ ܕܐܸܫܬܲܝܼܬܝ ܡ̣ܢ ܐܝܼܕܹܗ ܕܡܵܪܝܵܐ ܟܵܣܵܐ ܕܪܘܼܓ̣ܙܹܗ ܘܐܸܫܬ̇ܝܼܬ̇ܝ ܘܐܲܡ̣ܨܝܼܬ̇ܝ ܟܵܣܵܐ ܕܲܪܥܵܠܵܐ.
18 ܘܠܲܝܬ̇ ܕܲܡܒܲܝܲܐ ܠܵܗ̇ ܡ̣ܢ ܟܠܗܘܿܢ ܒܢܲـ̈ـܝܵܐ ܕܝܸܠܕܲܬ̤. ܘܠܲܝܬ̇ ܕܐܵܚܹ̇ܕ݂ ܒܐܝܼܕ݂ܵܗ̇ ܘܲܡܩܝܼܡ ܠܵܗ̇: ܡ̣ܢ ܟܠܗܘܿܢ ܒܢܲـ̈ـܝܵܐ ܕܪܲܒܝܲܬ̤.
19 ܬܲܪܬܹ̇ܝܢ ܐܸܢܹܝܢ ܡܲܛ̈ܝܹܟ݂ܝ ܠܡܲܢ ܬܸܟ݂ܪܸܐ ܥܠܲܟ̇ܝ ܒܸܙܬ̣ܵܐ ܘܲܬ̣ܒ̣ܵܪܐ: ܙܟܲܦܢܵܐ ܘܚܲܪܒܵܐ ܡܲܢ ܢܒܲܝܐܹܟ݂ܝ.
20 ܒܢܲܝ̈ܟ̇ܝ ܬܵܘܝܼܪܝܼܢ: ܘܕ݂ܵܡܟ̇ܝܼܢ ܒܪܹܫ ܟܠܗܘܿܢ ܫܘܼܩܹ̈ܐ: ܐܲܝܟ݂ ܣܸܠܩܵܐ ܕܲܟ݂ܡܝܼܕ݂. ܘܲܡܠܹܝܢ ܪܘܼܓ̣ܙܹܗ ܕܡܵܪܝܵܐ: ܘܲܟ݂ܐܵܬܹܗ ܕܐܲܠܵܗܹܟ݂ܝ.
21 ܡܸܛܠ ܗܵܢܵܐ ܫܡܲܥܝ ܗܵܠܹܝܢ ܡܡܲܟܲܟ݂ܬܵܐ: ܕܪܲܘܝܵܐ ܠܵܐ ܡ̣ܢ ܚܲܡܪܵܐ.
22 ܗܵܟܲܢܵܐ ܐܵܡܲܪ ܡܵܪܹܟ݂ܝ ܡܵܪܝܵܐ: ܘܐܲܠܵܗܹܟ݂ܝ ܢܕ݂ܘܼܢ ܠܥܲܡܹܗ. ܗܵܐ ܢܸܣܒܹ̇ܬ̣ ܡ̣ܢ ܐܝܼܕܲܝ̈ܟ̇ܝ ܟܵܣܵܐ ܕܲܪܥܵܠܵܐ. ܘܟ݂ܵܣܵܐ ܕܪܘܼܓ̣ܙܝ ܠܵܐ ܬܵܘܣܦܝܼܢ ܬܘܼܒ̣ ܠܡܸܫܬ̇ܝܹܗ.
23 ܘܐܹܣܝܼܡܝܼܘܗܝ ܒܝܲܕ݂ ܡܡܲܟ̇ܟ݂ܵܢܲܝ̈ܟ̇ܝ ܕܐܸܡܲܪܘ ܠܢܲܦ̮ܫܹܟ݂ܝ ܐܸܬ̣ܡܲܟܲܟ݂ܝ: ܘܢܸܥܒܲܪ. ܘܲܥ̣ܒܲܕ̇ܬ̇ܝ ܠܥܲܡܹܟ݂ܝ ܐܲܝܟ݂ ܐܲܪܥܵܐ: ܘܐܲܝܟ݂ ܫܘܼܩܵܐ ܠܲܕ݂ܥܵܒ̣ܪܝܼܢ.
1 ܐܸܬ̇ܬ̇ܥܝܼܪܝ: ܐܸܬ̇ܬ̇ܥܝܼܪܝ: ܨܸܗܝܘܿܢ ܘܲܠܒܲܫܝ ܠܒ̣ܘܼܫܵܐ ܕܬܸܫܒ̇ܘܿܚܬܵܐ: ܐܘܿܪܸܫܠܸܡ ܩܪܝܼܬ̣ܵܐ ܩܲܕ̇ܝܼܫܬܵܐ. ܡܸܛܠ ܕܠܵܐ ܢܵܘܣܸܦ ܬܘܼܒ̣ ܠܡܸܥܲܠ ܠܹܟ݂ܝ ܥܘܼܪܠܵܐ ܘܛܲܡܵܐܐ.
2 ܐܸܬ̣ܢܲܦ̄ܨܝ ܡ̣ܢ ܥܲܦܪܵܐ ܘܩܘܼܡܝ ܬܹܒ̣ܝ ܐܘܿܪܸܫܠܸܡ ܫܪܵܝ ܢܝܼܪܵܐ ܡ̣ܢ ܨܵܘܪܹܟ݂ܝ ܫܒ̣ܝܼܬ̣ܵܐ: ܒܲܪܬ̣ ܨܸܗܝܘܿܢ.
3 ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ: ܡܲܓܵܢ ܐܸܙܕܲܒܲܢ̣ܬ̇ܘܿܢ: ܘܠܵܐ ܒܟܸܣܦܵܐ ܬܸܬ̣ܦܲܪܩܘܼܢ.
4 ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ: ܠܡܸܨܪܹܝܢ ܢ̣ܚܸܬ̣ ܥܲܡܝ ܒܩܲܕ݂ܡܵܝܬܵܐ ܠܡܸܥܡܲܪ ܬܲܡܵܢ. ܘܐܵܬ̣ܘܿܪܵܝܵܐ ܒܲܩܛܝܼܪܵܐ ܕܲܒ̣ܪܹܗ.
5 ܘܗܵܫܵܐ ܡܵܐ ܠܝܼ ܗܵܪܟܵܐ ܐܵܡܲܪ ܡܵܪܝܵܐ: ܕܐܸܬ̇ܕ̇ܒܲܪ ܥܲܡܝ ܡܲܓܵܢ. ܫܲܠܝܼܛܵܢܲܝ̈ܗܘܿܢ ܡܲܝܠܠܝܼܢ: ܐܵܡܲܪ ܡܵܪܝܵܐ. ܘܐܲܡܝܼܢܵܐܝܼܬ̣ ܟܠܝܘܿܡ ܥܲܠ ܫܹܡܝ ܡܓܲܕ̇ܦܝܼܢ.
6 ܡܸܛܠ ܗܵܢܵܐ ܢܸܕܲܥ ܥܲܡܝ ܫܹܡܝ ܒܝܵܘܡܵܐ ܗܵܘܿ. ܡܸܛܠ ܕܐܸܢܵܐ ܗ̄ܘܼ ܡܡܲܠܸܠ: ܘܐܝܼܬ̇ܝ.
7 ܡܵܐ ܝܵܐ̈ܝܵܢ ܥܲܠ ܛܘܼܪܹ̈ܐ ܪܸ̈ܓ̣ܠܵܘܗܝ ܕܲܡܣܲܒܲܪ ܫܠܵܡܵܐ: ܘܕܲܡܣܲܒܲܪ ܛܵܒ̣ܵـ̈ـܬ̣ܵܐ: ܘܲܕ݂ܡܲܫܡܲܥ ܦܘܼܪܩܵܢܵܐ. ܕܐܵܡܲܪ ܠܨܸܗܝܘܿܢ: ܐܲܡ̣ܠܸܟ݂ ܐܲܠܵܗܹܟ݂ܝ.
8 ܩܵܠܵܐ ܕܕ݂ܵܘܩܲܝ̈ܟ̇ܝ ܐܲܪܝܼܡܘ ܩܵܠܵܐ. ܘܐܲܟ݂ܚ̄ܕ݂ܵܐ ܡܫܲܒ̇ܚܝܼܢ ܡܸܛܠ ܕܥܹܝܢ ܒܥܹܝܢ ܢܸܚܙܘܿܢ ܟܲܕ݂ ܡܲܦܢܸܐ ܡܵܪܝܵܐ ܠܨܸܗܝܘܿܢ.
9 ܕܘܼܨܹܝ̈ܢ ܘܫܲܒܲܚܹ̈ܝܢ ܐܲܟ݂ܚ̄ܕ݂ܵܐ ܚܲܪ̈ܒ̣ܵܬ̣ܵܐ ܕܐܘܿܪܸܫܠܸܡ ܡܸܛܠ ܕܒܲܝܲܐ ܡܵܪܝܵܐ ܠܥܲܡܹܗ: ܘܲܦܪܲܩ̣ ܠܐܘܿܪܸܫܠܸܡ.
10 ܓ̣ܠܵܐ ܡܵܪܝܵܐ ܕܪܵܥܹܗ ܩܲܕ̇ܝܼܫܵܐ ܠܥܹܝܢ ܟܠܗܘܿܢ ܥܲܡܡܹ̈ܐ. ܘܢܸܚܙܘܿܢ ܟܠܗܘܿܢ ܥܸܒ̣ܪܹ̈ܝܗ̇ ܕܐܲܪܥܵܐ ܦܘܼܪܩܵܢܹܗ ܕܐܲܠܵܗܲܢ.
11 ܥܒܲܪܘ: ܥܒܲܪܘ ܦܘܿܩܘ ܡ̣ܢ ܬܲܡܵܢ: ܘܲܠܛܲܡܹ̈ܐܐ ܠܵܐ ܬܸܬ̣ܩܲܪܒ̣ܘܼܢ. ܦܘܿܩܘ ܡ̣ܢ ܓܵܘܵܗ̇: ܘܐܸܬ̣ܓܲܒܵܘ: ܫܩܝܼ̈ܠܲܝ ܡܵܐܢܵܘ̈ܗܝ ܕܡܵܪܝܵܐ.
12 ܡܸܛܠ ܕܠܵܐ ܒܣܘܼܪܗܵܒ̣ܵܐ ܬܸܦܩܘܼܢ. ܘܒܲܥܪܘܼܩܝܵܐ ܠܵܐ ܬܹܐܙܠ̄ܘܼܢ ܡܸܛܠ ܕܡܵܪܝܵܐ ܐܵܙܹ̇ܠ ܩܕ݂ܵܡܲܝܟ̇ܘܿܢ: ܘܲܡܟܲܢܫܵܢܟ݂ܘܿܢ ܐܲܠܵܗܹܗ ܕܝܣܪܵܝܹܠ.
13 ܗܵܐ ܡܸܣܬܲܟܲܠ ܥܲܒ̣ܕ̇ܝ. ܘܡܸܬ̇ܬ̇ܪܝܼܡ: ܘܡܸܫܬܲܩܲܠ: ܘܡܸܬ̣ܥܲܠܸܐ ܛܵܒ̣.
14 ܐܲܝܟ݂ ܕܢܸܬ̣ܡ̱ܗܘܿܢ ܥܠܵܘܗܝ ܣܲܓܝܼ̈ܐܹܐ ܗܵܟܲܢܵܐ ܡܚܲܒܲܠ ܚܸܙܘܹܗ ܡ̣ܢ ܕܓܲܒ̣ܪܵܐ: ܘܩܘܼܒ̣ܠ̱ܠܹܗ ܡ̣ܢ ܕܲܒ̣ܢܲܝ̈ܢܵܫܵܐ.
15 ܗܵܢܵܐ ܡܕܲܟܹ̇ܐ ܥܲܡܡܹ̈ܐ ܣܲܓ̇ܝܼ̈ܐܹܐ: ܘܲܥܠܘܗܝ ܢܹܐܚܕ̇ܘܼܢ ܡܲܠ̈ܟܹ̇ܐ ܦܘܼܡܗܘܿܢ ܡܸܛܠ ܕܲܕ݂ܠܵܐ ܐܸܬ̣ܐ̱ܡܲܪ ܠܗܘܿܢ ܚ̣ܙܵܘ: ܘܲܕ݂ܠܵܐ ܫܡܲܥܘ ܐܸܣܬܲܟܲܠܘ.
1 ܡܲܢ ܗܲܝܡܸܢ ܠܫܸܡܥܲܢ. ܘܲܕ݂ܪܵܥܹܗ ܕܡܵܪܝܵܐ ܠܡܲܢ ܐܸܬ̣ܓ̇ܠܝܼ.
2 ܣܠܸܩ̣ ܐܲܝܟ݂ ܝܲܠܘܼܕ݂ܵܐ ܩܕ݂ܵܡܵܘܗܝ: ܘܐܲܝܟ݂ ܥܸܩܵܪܵܐ ܡ̣ܢ ܐܲܪܥܵܐ ܨܗܝܼܬ̣ܵܐ ܠܲܝܬ̇ ܗ̄ܘܼܵܐ ܠܹܗ ܚܸܙܘܵܐ: ܘܠܵܐ ܙܝܼܘܵܐ ܘܲܚܙܲܝܢܵܝܗܝ ܕܠܲܝܬ̇ ܗ̄ܘܼܵܐ ܠܹܗ ܚܸܙܘܵܐ ܘܕܲܓܸܠܢܵܝܗܝ.
3 ܫܝܼܛܵܐ ܘܡܲܟ̇ܝܼܟ݂ܵܐ ܕܐ̄ܢܵܫܵܐ: ܓܲܒ̣ܪܵܐ ܗ̄ܘܼ ܕܟܹܐܒܹ̈ܐ: ܘܝܵܕܲܥ ܚܲܫܹ̈ܐ. ܐܲܦܢܝܼܢ ܐܲܦܝܼ̈ܢ ܡܸܢܹܗ. ܘܫܵܛܢܵܝܗܝ ܘܠܵܐ ܚ̣ܫܲܒ̣ܢܵܝܗܝ.
4 ܫܲܪܝܼܪܵܐܝܼܬ̣ ܚܲܫܲܝ̈ܢ ܗ̤ܘ ܣܲܝܒܲܪ ܘܟܹܐܒܲܝ̈ܢ ܗ̤ܘ ܣ̣ܒܲܠ. ܘܲܚܢܲܢ ܚܫܲܒ̣ܢܵܝܗܝ ܟܬ̣ܝܼܫܵܐ: ܘܲܡܡܲܚܝܵܐ ܕܐܲܠܵܗܵܐ: ܘܲܡܡܲܟ̇ܟ݂ܵܐ.
5 ܗ̤ܘ ܡ̣ܬ̣ܩܛܸܠ ܡܸܛܠ ܚܛܵܗܲܝ̈ܢ. ܘܡܸܬ̣ܡܲܟܲܟ݂ ܡܸܛܠ ܥܵܘܼܠܲܢ ܡܲܪܕ̇ܘܼܬ̣ܵܐ ܕܲܫܠܵܡܲܢ ܥܠܵܘܗܝ. ܘܲܒ̣ܫܘܼ̈ܡܵܬܹܗ ܢܸܬ̣ܐܲܣܹܐ.
6 ܟܠܲܢ ܐܲܝܟ݂ ܥܵـ̈ـܢܵܐ ܛܥܲܝܢ. ܘܐ̄ܢܵܫ ܠܣܸܛܪܹܗ ܦܢܲܝܢ ܘܡܵܪܝܵܐ ܐܲܦ̮ܓܲܥ ܒܹܗ ܚܛܵܗܹ̈ܐ ܕܟ݂ܠܲܢ.
7 ܩ̣ܪܸܒ̣ ܘܐܸܬ̣ܡܲܟܲܟ݂: ܘܠܵܐ ܦ̣ܬܲܚ ܦܘܼܡܹܗ. ܐܲܝܟ݂ ܐܸܡܪܵܐ ܠܢܸܟ݂ܣܬ̣ܵܐ ܐܸܬ̇ܕܲܒܲܪ. ܘܐܲܝܟ݂ ܢܸܩܝܵܐ ܩܕ݂ܵܡ ܓܵܙܘܿܙܵܐ ܫܲܬ̣ܝܼܩ ܗ̄ܘܼܵܐ: ܘܠܵܐ ܦ̣ܬܲܚ ܦܘܼܡܹܗ.
8 ܘܡ̣ܢ ܚܒ̣ܘܼܫܝܵܐ ܘܡ̣ܢ ܕܝܼܢܵܐ ܐܸܬ̇ܕ̇ܒܲܪ ܘܕ݂ܵܪܹܗ ܡܲܢܘܼ ܢܸܫܬܲܥܸܐ. ܡܸܛܠ ܕܐܸܬ̣ܓܲܙܲܪ ܡ̣ܢ ܐܲܪܥܵܐ ܕܚܲܝܹ̈ܐ: ܘܡ̣ܢ ܥܵܘܿܠܹ̈ܐ ܕܥܲܡܝ ܩ̣ܪܸܒ̣ܘ ܠܹܗ.
9 ܝܲܗ̄ܒ̣ ܪܲܫܝܼܥܵܐ ܩܲܒ̣ܪܹܗ: ܘܥܲܬ̇ܝܼܪܵܐ ܒܡܵܘܬܹ̇ܗ ܥܲܠ ܕܠܵܐ ܥ̣ܒܲܕ݂ ܥܵܘܼܠܵܐ: ܘܠܲܝܬ̇ ܢܸܟ݂ܠܵܐ ܒܦܘܼܡܹܗ.
10 ܘܡܵܪܝܵܐ ܨܒ̣ܵܐ ܕܲܢܡܲܟ̇ܟ݂ܝܼܘܗܝ ܘܢܲܚܫܝܼܘܗܝ ܐܸܬ̇ܬ̇ܣܝܼܡ ܚܛܵܗܵܐ ܒܢܲܦ̮ܫܹܗ. ܕܢܸܚܙܹܐ ܙܲܪܥܵܐ: ܘܢܲܓܲܪ ܝܵܘ̈ܡܵܬ̣ܵܐ. ܘܨܸܒ̣ܝܵܢܹܗ ܕܡܵܪܝܵܐ ܒܐܝܼܕܹܗ ܢܲܨܠܲܚ.
11 ܘܡ̣ܢ ܥܲܡܠܵܐ ܕܢܲܦ̮ܫܹܗ ܢܸܚܙܹܐ: ܘܲܢܣܲܒܲܥ ܒܝܼܕܲܥܬ̣ܵܐ: ܘܲܢܙܲܟܸ̇ܐ ܠܙܲܕ̇ܝܼܩܹ̈ܐ. ܥܲܒ̣ܕܵܐ ܗ̄ܘܼ ܕܣܲܓ̇ܝܼ̈ܐܹܐ. ܘܲܚܛܵܗܲܝ̈ܗܘܢ ܗ̤ܘ ܢܸܣܒ̇ܘܿܠ.
12 ܡܸܛܠ ܗܵܢܵܐ ܐܹܦܲܠܓ̣ܝܼܘܗܝ ܒܣܲܓ̇ܝܼ̈ܐܹܐ. ܘܲܠܥܲܫܝܼܢܹ̈ܐ ܢܦܲܠܸܓ̣ ܒܸܙܬ̣ܵܐ. ܚܠܵܦ ܕܲܫܕ݂ܵܐ ܢܲܦ̮ܫܹܗ ܠܡܵܘܬܵܐ: ܘܥܲܡ ܥܵܘܿܠܹ̈ܐ ܐܸܬ̣ܡ̱ܢܝ ܘܗ̤ܘ ܚܛܵܗܹ̈ܐ ܕܣܲܓ̇ܝܼ̈ܐܹܐ ܫ̣ܩܲܠ: ܘܲܒ̣ܥܵܘܿܠܹ̈ܐ ܦܓܲܥ.
1 ܫܲܒܲܚܝ ܥܩܲܪܬ̣ܵܐ ܕܠܵܐ ܝܸܠܕܲܬ̤ ܘܐܸܬ̣ܦܲܨ̄ܚܝ ܒܬܸܫܒ̇ܘܿܚܬܵܐ: ܘܕ݂ܘܼܨܝ ܠܵܐ ܚܲܒ̇ܠܲܬ̤. ܡܸܛܠ ܕܲܣܓ̣ܝܼܘ ܒܢܹ̈ܝܗ̇ ܕܨܵܕ݂ܝܼܬ̣ܵܐ: ܝܲܬ̇ܝܼܪ ܡ̣ܢ ܒܢܹ̈ܝܗ̇ ܕܲܒ̣ܠܝܼܠܬܵܐ: ܐܵܡܲܪ ܡܵܪܝܵܐ.
2 ܐܲܦ̮ܬܵܝ ܐܲܬ̣ܪܵܐ ܕܡܲܫܟ̇ܢܲܝ̈ܟ̇ܝ. ܘܝܵܪ̈ܝܼܥܵܬ̣ܵܐ ܕܡܲܫܟ̇ܢܲܝ̈ܟܝ ܡܬ̣ܘܿܚܝ: ܘܠܵܐ ܬܚܘܼܣܝܼܢ. ܐܵܘܪܸܟ݂ܝ ܛܘܼܢܒܲܝ̈ܟ̇ܝ ܘܣܸܟܲܝ̈ܟ̇ܝ ܫܲܪܲܪܝ.
3 ܡܸܛܠ ܕܲܠܝܲܡܝܼܢܵܐ ܘܲܠܣܸܡܵܠܵܐ ܬܸܣܓܹ̇ܝܢ. ܘܙܲܪܥܹܟ݂ܝ ܢܹܐܪܲܬ̣ ܥܲܡܡܹ̈ܐ. ܘܩܘܼܪ̈ܝܵܐ ܕܨܵܕ݂̈ܝܵܢ ܢܵܘܬ̇ܒ̣ܘܿܢ.
4 ܠܵܐ ܬܸܕ݂ܚ̄ܠܝܼܢ ܡܸܛܠ ܕܠܵܐ ܒܵܗ̇ܬܲܬ̇ܝ. ܘܠܵܐ ܬܸܬܲܟ݂ܣܝܼܢ: ܡܸܛܠ ܕܠܵܐ ܡܲܚܦܪܲܬ̇ܝ. ܡܸܛܠ ܕܒܸܗܬ̇ܬ̣ܵܐ ܕܛܲܠܝܘܼܬܹܟ݂ܝ ܬܸܛܥܹܝܢ: ܘܚܸܣܕܵܐ ܕܐܲܪܡܠܘܼܬܹܟ݂ܝ ܬܘܼܒ̣ ܠܵܐ ܬܸܬ̇ܕܲܟ݂ܪܝܼܢ.
5 ܡܸܛܠ ܕܡܵܪܹܟ݂ܝ ܥܵܒܹ̇ܕ݂ ܠܹܟ݂ܝ ܗܵܟܲܢܵܐ: ܡܵܪܝܵܐ ܚܲܝܠܬ̣ܵܢܵܐ ܫܡܹܗ. ܘܦܵܪܘܿܩܹܟ݂ܝ ܩܲܕ̇ܝܼܫܵܐ ܕܝܼܣܪܵܝܹܠ. ܐܲܠܵܗܵܐ ܕܟ݂ܠܵܗ̇ ܐܲܪܥܵܐ ܢܸܬ̣ܩܪܸܐ.
6 ܡܸܛܠ ܕܐܲܝܟ݂ ܕܠܲܐ̄ܢܬ̇ܬ̣ܵܐ ܫܒ̣ܝܼܩܬܵܐ ܘܥܲܝܝܼܩܲܬ̣ ܪܘܼܚܵܐ ܩܪܵܟ݂ܝ ܡܵܪܝܵܐ ܘܐܲܝܟ݂ ܐܲܢ̄ܬ̇ܬ̣ ܛܲܠܝܘܼܬ̣ܵܐ ܕܡܸܫܬܲܒ̣ܩܵܐ: ܐܵܡܲܪ ܐܲܠܵܗܹܟ݂ܝ.
7 ܒܪܘܼܓ̣ܙܵܐ ܙܥܘܿܪܵܐ ܫܒܲܩ̇ܬܹ̇ܟ݂ܝ: ܘܲܒ̣ܪ̈ܲܚܡܲܝ ܣܲܓ̇ܝܼ̈ܐܹܐ ܐܹܟܲܢܫܹܟ݂ܝ.
8 ܒܪܘܼܓ̣ܙܵܐ ܪܲܒܵܐ ܐܲܦܢܹ̇ܝܬ̣ ܐܲܦܲܝ̈ ܡܸܢܹܟ݂ܝ. ܘܲܒ̣ܪ̈ܲܚܡܲܝ ܕܲܠܥܵܠܲܡ ܪܲܚܡܹ̇ܬ̣ ܥܠܲܝܟ̇ܝ: ܐܵܡܲܪ ܡܵܪܝܵܐ ܦܵܪܘܿܩܹܟ݂ܝ.
9 ܗܵܕܹܐ ܐܲܝܟ݂ ܝܵܘ̈ܡܵܬ̣ܵܐ ܗ̄ܝܼ ܠܝܼ ܕܢܘܿܚ: ܕܝܼܡ̇ܝܼܬ̣ ܕܠܵܐ ܢܸܥܒ̇ܪܘܼܢ ܬܘܼܒ̣ ܡܲـ̈ـܝܵܐ ܕܢܘܿܚ ܥܲܠ ܐܲܪܥܵܐ. ܗܵܟܲܢܵܐ ܝܼܡ̇ܝܼܬ̣ ܕܠܵܐ ܐܸܪܓܲܙ ܥܠܲܝܟ̇ܝ: ܘܠܵܐ ܐܸܟ݂ܐܹܐ ܒܟ݂ܝ.
10 ܡܸܛܠ ܕܛܘܼܪܹ̈ܐ ܢܸܬ̣ܡܲܟ̇ܟ݂ܘܼܢ: ܘܪ̈ܵܡܵܬ̣ܵܐ ܢܸܬ̣ܪ̈ܲܟ݂ܢܵܢ. ܘܛܲܝܒ̇ܘܼܬ̣ܝ ܡܸܢܹܟ݂ܝ ܠܵܐ ܬܸܥܒܲܪ. ܘܲܩܝܵܡܵܐ ܕܲܫܠܵܡܹܟ݂ܝ ܠܵܐ ܢܸܥܒܲܪ: ܐܵܡܲܪ ܡܵܪܝܵܐ ܡܪܲܚܡܵܢܵܐ.
11 ܡܡܲܟܲܟ݂ܬܵܐ ܘܲܡܥܲܠܥܲܠܬܵܐ ܕܠܵܐ ܐܸܬ̣ܒܲܝܐܲܬ̤. ܗܵܐ ܐܸܢܵܐ ܥܵܒܹ̇ܕ݂ ܐ̄ܢܵܐ: ܟܹܐܦܲܝ̈ܟ̇ܝ ܒܹܪ̈ܘܿܠܹܐ. ܘܐܲܬ̣ܩܸܢ ܫܲܬ̣ܐ̱ܣܲܝ̈ܟ̇ܝ ܒܟܹܐܦܹ̈ܐ ܕܣܲܦܝܼܠܵܐ.
12 ܘܐܸܒ̣ܢܸܐ ܐܸܣܲܝ̈ܟ̇ܝ ܒܟܹܐܦܹ̈ܐ ܕܐܝܼܵܣܦܘܿܢ: ܘܬܲܪ̈ܥܲܝܟܝ ܒܟܹܐܦܹ̈ܐ ܕܲܩܪܘܿܣܛܸܠܘܿܣ: ܘܲܬ̣ܚܘܼܡܲܝ̈ܟ̇ܝ ܒܟܹܐܦܹ̈ܐ ܓܲܒ̣̈ܝܵܬ̣ܵܐ.
13 ܘܟ݂ܠܗܘܿܢ ܒܢܲܝ̈ܟ̇ܝ ܢܸܠܦܘܼܢܵܢܝ. ܘܢܸܣܓܸ̇ܐ ܫܠܵܡܵܐ ܕܲܒ̣ܢܲܝ̈ܟ̇ܝ.
14 ܘܲܒ̣ܙܲܕ̇ܝܼܩܘܼܬ̣ܵܐ ܬܸܬ̣ܩܢܝܼܢ. ܐܸܬ̣ܪܲܚܲܩܝ ܡ̣ܢ ܥܫܘܼܩܝܵܐ: ܡܸܛܠ ܕܠܵܐ ܬܸܕ݂ܚ̄ܠܝܼܢ. ܘܡ̣ܢ ܬܒ̣ܵܪܵܐ: ܡܸܛܠ ܕܠܵܐ ܩܵܪܹܒ̣ ܠܹܟ݂ܝ.
15 ܘܟ݂ܠ ܕܡܸܬ̣ܦܢܹܝܢ ܡ̣ܢ ܐܝܼܕܲܝ̈: ܢܸܥܠܘܼܢ ܠܹܟ݂ܝ. ܘܬܸܗܘܹܝܢ ܒܹܝܬ̣ ܓܵܘܣܵܐ ܠܥܵܡܘܿܪ̈ܲܝܟ̇ܝ.
17
18 ܟܠ ܡܵܐܢ ܕܡܸܬ̇ܬܲܩܲܢ ܥܠܲܝܟ̇ܝ: ܠܵܐ ܢܸܣܲܩ ܠܪܹܫ. ܘܟ݂ܠ ܠܫܵܢ ܕܲܢܩܘܼܡ ܥܲܡܹܟ݂ܝ ܒܕ݂ܝܼܢܵܐ: ܬܚܲܝܒ̣ܝܼܢܹܗ ܗܵܕܲܐ ܗ̄ܝܼ ܝܵܪܬ̇ܘܼܬ̣ܵܐ ܕܥܲܒ̣ܕܵܘ̈ܗܝ ܕܡܵܪܝܵܐ. ܘܙܲܕ̇ܝܼܩܘܼܬ̣ܗܘܿܢ ܡ̣ܢ ܩܕ݂ܲܡܲܝ: ܐܵܡܲܪ ܡܵܪܝܵܐ.
1 ܐܘܿܝ ܟܠ ܕܲܨܗܹܝܢ: ܙܸܠܘ ܠܡܲـ̈ـܝܵܐ: ܕܠܲܝܬ̇ ܠܹܗ ܟܸܣܦܵܐ. ܙܸܠܘ ܡܘܼܪܘ: ܘܐܲܟ݂ܘܿܠܘ ܕܠܵܐ ܟܸܣܦܵܐ: ܘܲܕ݂ܠܵܐ ܕܡܝܼ̈ܢ: ܚܲܡܪܵܐ ܘܚܲܠܒ̣ܵܐ.
2 ܠܡܵܐ ܬܵܩ̇ܠܝܼܢ ܐ̄ܢܬ̇ܘܿܢ ܟܸܣܦܵܐ ܕܠܵܐ ܠܠܲܚܡܵܐ: ܘܠܹܐܘܲܬ̣ܟ݂ܘܿܢ ܕܠܵܐ ܠܡܸܣܒܲܥ ܫܘܼܡܥܘܼܢܝ ܡܸܫܡܲܥ: ܘܬܹܐܟ݂ܠܘܼܢ ܛܵܒ̣ܵـ̈ـܬ̣ܵܐ. ܘܬܸܬ̣ܦܲܢܲܩ ܢܲܦ̮ܫܟ݂ܘܿܢ ܒܕ݂ܘܼܗܵܢܵܐ.
3 ܨܠܵܘ ܐܸܕ݂ܢܲܝ̈ܟ̇ܘܿܢ: ܘܬ̣ܵܘ ܠܘܵܬ̣ܝ ܫܘܼܡܥܘܼܢܝ ܘܬܸܚܹܐ ܢܲܦ̮ܫܟ݂ܘܿܢ. ܘܐܲܩܝܼܡ ܠܟ݂ܘܿܢ ܩܝܵܡܵܐ ܕܥܵܠܲܡ: ܛܲܝܒ̇ܘܼܬܹܗ ܕܕ݂ܵܘܝܼܕ݂ ܡܗܲܝܡܲܢܬܵܐ.
4 ܗܵܐ ܣܵܗܕܵܐ ܠܥܲܡܡܹ̈ܐ ܝܲܗ̄ܒ̣ܬܵܟ݂: ܫܲܠܝܼܛܵܐ ܘܲܡܕܲܒ̇ܪܵܢܵܐ ܠܐܸܡ̈ܘܵܬ̣ܵܐ.
5 ܕܬܸܩܪܹܐ ܥܲܡܡܹ̈ܐ ܕܠܵܐ ܝܼܕܲܥ̣ܬ̇. ܘܥܲܡܡܹ̈ܐ ܕܠܵܐ ܝܵܕ݂ܥܝܼܢ ܠܵܟ݂ ܠܘܵܬ̣ܵܟ݂ ܢܸܪܗ̱ܛܘܼܢ. ܡܸܛܠ ܡܵܪܝܵܐ ܐܲܠܵܗܵܟ݂: ܘܩܲܕ̇ܝܼܫܵܐ ܕܝܼܣܪܵܝܹܠ ܕܫܲܒ̇ܚܵܟ݂.
6 ܒܥܵܘ ܠܡܵܪܝܵܐ. ܘܡܵܐ ܕܐܸܫ̣ܟܲܚܬ̇ܘܿܢܵܝܗܝ: ܩܪܵܐܘܼܗܝ.
7 ܘܡܵܐ ܕܲܩ̣ܪܸܒ̣: ܢܸܫܒ̇ܘܿܩ ܚܲܛܵܝܵܐ ܐܘܼܪܚܹܗ: ܘܓܲܒ̣ܪܵܐ ܥܵܘܿܠܵܐ ܬܲܪܥܝܼܬܹܗ. ܘܢܸܬ̣ܦܢܸܐ ܠܘܵܬ̣ܝ: ܘܐܹܪܲܚܸܡ ܥܠܵܘܗܝ: ܘܲܠܘܵܬ̣ ܐܲܠܵܗܲܢ ܕܡܲܣܓܸ̇ܐ ܠܡܸܫܒܲܩ.
8 ܡܸܛܠ ܕܬܲܪ̈ܥܝܵܬ̣ܝ ܠܵܐ ܗ̤ܘܲܝ̈ ܐܲܝܟ݂ ܬܲܪ̈ܥܝܵܬ̣ܟ݂ܘܿܢ. ܘܐܘܼܪ̈ܚܵܬ̣ܝ ܠܵܐ ܗ̤ܘܲܝ̈ ܐܲܝܟ݂ ܐܘܼܪ̈ܚܵܬ̣ܟ݂ܘܿܢ: ܐܵܡܲܪ ܡܵܪܝܵܐ.
9 ܡܸܛܠ ܕܐܲܝܟ݂ ܕܪܵܡܝܼܢ ܫܡܲܝܵܐ ܡ̣ܢ ܐܲܪܥܵܐ: ܗܵܟܲܢܵܐ ܪ̈ܵܡܵܢ ܐܘܼܪ̈ܚܵܬ̣ܝ ܡ̣ܢ ܐܘܼܪ̈ܚܵܬ̣ܟ݂ܘܿܢ. ܘܬܲܪ̈ܥܝܵܬ̣ܝ ܡ̣ܢ ܬܲܪ̈ܥܝܵܬ̣ܟ݂ܘܿܢ.
10 ܡܸܛܠ ܕܐܲܝܟܲܢܵܐ ܕܵܢܵܚܹ̇ܬ̣ ܡܸܛܪܵܐ ܘܬܲܠܓܵܐ ܡ̣ܢ ܫܡܲܝܵܐ: ܘܲܠܬܲܡܵܢ ܠܵܐ ܗܵܦܹ̇ܟ݂: ܐܸܠܵܐ ܡܲܪܘܸܐ ܠܐܲܪܥܵܐ: ܘܡܵܘܠܸܕ݂ ܠܵܗ̇: ܘܡܵܘܥܹܐ ܠܵܗ̇: ܘܝܵܗܹ̇ܒ̣ ܙܲܪܥܵܐ ܠܙܵܪܘܿܥܵܐ: ܘܠܲܚܡܵܐ ܠܡܹܐܟ݂ܘܼܠܬܵܐ.
11 ܗܵܟܲܢܵܐ ܢܸܗܘܹܐ ܦܸܬ̣ܓ̣ܵܡܝ ܕܲܢܦܲܩ̣ ܡ̣ܢ ܦܘܼܡܝ: ܘܠܵܐ ܢܸܗܦܘܿܟ݂ ܠܘܵܬ̣ܝ ܣܪܝܼܩܵܐܝܼܬ̣: ܐܸܠܵܐ ܐܸܢ ܥ̣ܒܲܕ݂ ܡܸܕܸ̇ܡ ܕܨܵܒܹ̇ܐ ܐ̄ܢܵܐ: ܘܫܲܠܸܡ̣ ܕܫܲܕܲܪܬܹ̇ܗ.
12 ܡܸܛܠ ܕܲܒ̣ܚܲܕ݂ܘܼܬ̣ܵܐ ܬܸܦܩܘܼܢ: ܘܒܲܫܠܵܡܵܐ ܬܹܐܙܠ̄ܘܼܢ ܘܛܘܼܪܹ̈ܐ ܘܪ̈ܵܡܵܬ̣ܵܐ ܢܸܬ̣ܦܲܨܚܘܼܢ ܩܕ݂ܵܡܲܝܟ̇ܘܿܢ. ܘܬܸܫܒ̇ܘܿܚܬܵܐ ܕܟ݂ܠܗܘܿܢ ܐܝܼܠܵܢܹ̈ܐ ܕܚܲܩܠܵܐ ܢܸܩܫܘܼܢ ܟܲܦܵܐ.
13 ܚܠܵܦ ܚܵܓ̣ܬ̣ܵܐ ܬܹܐܥܹܐ ܒܪܘܿܬ̣̱ܵܐ ܘܲܚܠܵܦ ܨܵܬ̣ܪܵܐ ܢܹܐܥܹܐ ܐܵܣܵܐ. ܘܢܸܗܘܹܐ ܠܡܵܪܝܵܐ ܠܲܫܡܵܐ: ܘܠܵܐܬ̤ܵܐ ܕܲܠܥܵܠܲܡ ܕܠܵܐ ܓܵܡ̇ܪܵܐ.
1 ܗܵܟܲܢܵܐ ܐܵܡܲܪ ܡܵܪܝܵܐ. ܛܵܪܘ ܕܝܼܢܵܐ ܘܲܥܒܸܕ݂ܘ ܙܲܕ̇ܝܼܩܘܼܬ̣ܵܐ. ܡܸܛܠ ܕܩܲܪܝܼܒ̣ ܗ̄ܘܼ ܦܘܼܪܩܵܢܝ ܠܡܹܐܬ̣ܵܐ: ܘܙܲܕ̇ܝܼܩܘܼܬ̣ܝ ܠܡܸܬ̣ܓ̇ܠܵܝܘܼ.
2 ܛܘܼܒ̣ܵܘܗܝ ܠܓܲܒ̣ܪܵܐ ܕܢܸܥܒܸ̇ܕ݂ ܗܵܕܹܐ: ܘܒܲܪܢܵܫܵܐ ܕܢܸܬ̣ܚܲܝܲܠ ܒܵܗ̇. ܘܢܸܛܲܪ ܐܵܦ ܫܲܒ̇ܬ̣ܵܐ ܕܠܵܐ ܢܲܚܠܝܼܗ̇ ܘܢܸܛܲܪ ܐܝܼܕ݂ܵܘ̈ܗܝ ܕܠܵܐ ܢܸܥܒܸ̇ܕ݂ ܕܒ̣ܝܼܫ.
3 ܘܠܵܐ ܢܹܐܡܲܪ ܒܲܪ ܢܘܼܟ݂ܪ̈ܵܝܹܐ ܕܡܸܬ̣ܠܵܘܸܐ ܠܡܵܪܝܵܐ: ܕܡܸܦܪܲܫ ܦܵܪܹܫ ܠܝܼ ܡܵܪܝܵܐ ܡ̣ܢ ܥܲܡܹܗ. ܘܠܵܐ ܢܹܐܡܲܪ ܡܗܲܝܡܢܵܐ: ܕܩܲܝܣܵܐ ܐ̄ܢܵܐ ܝܲܒ̇ܝܼܫܵܐ.
4 ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ: ܠܲܡܗܲܝܡ̈ܢܹܐ ܕܢܵܛܪܝܼܢ ܫܲܒܲܝ̈: ܘܓ̣ܵܒܹ̇ܝܢ ܡܸܕܸ̇ܡ ܕܨܵܒܹ̇ܐ ܐ̄ܢܵܐ: ܘܡܸܬ̣ܚܲܝܠܝܼܢ ܒܲܩܝܵܡܝ.
5 ܐܸܬܸ̇ܠ ܠܗܘܿܢ ܒܒܲܝܬ̇ܝ ܘܲܒ̣ܫܘܼܪ̈ܲܝ ܐܲܬ̣ܪܵܐ. ܘܲܫܡܵܐ ܕܛܵܒ̣ ܡ̣ܢ ܒܢܲـ̈ـܝܵܐ ܘܡ̣ܢ ܒܢܵـ̈ـܬ̣ܵܐ: ܫܡܵܐ ܕܲܠܥܵܠܲܡ ܐܸܬܸ̇ܠ ܠܗܘܿܢ ܕܠܵܐ ܓܵܡܲܪ.
6 ܘܠܲܒ̣ܢܲܝ̈ ܢܘܼܟ݂ܪ̈ܵܝܹܐ ܕܡܸܬ̣ܠܵܘܹܝܢ ܠܡܵܪܝܵܐ ܠܲܡܫܲܡܵܫܘܼܬܹܗ: ܘܲܠܡܸܪܚܲܡ ܫܡܹܗ ܕܡܵܪܝܵܐ: ܘܲܕ݂ܢܸܗܘܘܿܢ ܠܹܗ ܥܲܒ̣̈ܕܹ̇ܐ. ܟܠ ܕܢܵܛܲܪ ܫܲܒ̇ܬ̣ܵܐ ܕܠܵܐ ܢܲܚܠܝܼܗ̇: ܘܡܸܬ̣ܚܲܠܝܼܢ ܒܲܩܝܵܡܝ.
7 ܐܲܝܬܹ̇ܐ ܐܸܢܘܿܢ ܠܛܘܼܪܝ ܩܲܕ̇ܝܼܫܵܐ ܘܐܹܚܲܕܸ̇ܐ ܐܸܢܘܿܢ ܒܒܲܝܬܵܐ ܕܲܨܠܘܿܬ̣ܝ ܥܠܵـ̈ـܘܵܬ̣ܗܘܿܢ ܘܕܸܒ̣ܚܲܝ̈ܗܘܿܢ ܠܨܸܒ̣ܝܵܢܵܐ ܠܡܲܕ݂ܒܲܚܝ. ܡܸܛܠ ܕܒܲܝܬ̇ܝ: ܒܹܝܬ̣ ܨܠܘܿܬ̣ܵܐ ܢܸܬ̣ܩ̄ܪܸܐ: ܠܟ݂ܠܗܘܿܢ ܥܲܡܡܹ̈ܐ.
8 ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ: ܕܲܡܟܲܢܸܫ ܠܲܡܒܲܕ̇ܪܹ̈ܐ ܕܝܼܣܪܵܝܹܠ: ܬܘܼܒ̣ ܐܹܟܲܢܸܫ ܥܠܵܘܗܝ ܠܲܡܟܲܢܵܫܹ̈ܐ.
9 ܟܠ ܚܲܝ̄ܘܼܬ̣ܵܐ ܕܕܲܒ̣ܪܵܐ: ܬܵܝ ܐܲܟ݂ܘܿܠܝ ܠܟ݂ܠܵܗ̇ ܚܲܝ̄ܘܼܬ̣ܵܐ ܕܥܵܒ̣ܵܐ.
10 ܚܵܙܹ̇ܝܢ ܟܠܗܘܿܢ ܥܘܝܼܪܹ̈ܐ ܘܠܵܐ ܝܵܕ݂ܥܝܼܢ. ܟܠܗܘܿܢ ܟܲܠ̈ܒܹ̇ܐ ܐܸܢܘܿܢ ܦܹܐܩܹ̈ܐ: ܘܠܵܐ ܡܸܫܟ̇ܚܝܼܢ ܠܡܸܒܲܚ. ܚܵܙܹ̇ܝܢ ܘܕ݂ܵܡ̇ܟܝܼܢ: ܘܪܵܚܡܝܼܢ ܠܲܡܢܵܡ.
11 ܘܟܲܠ̈ܒܹ̇ܐ ܐܸܢܘܿܢ ܕܝܲܥܢܵܐ ܢܲܦ̮ܫܗܘܿܢ: ܘܠܵܐ ܝܵܕ݂ܥܝܼܢ ܠܡܸܣܒܲܥ. ܢܸܗܘܘܿܢ ܒܝܼܫܝܼܢ ܘܠܵܐ ܝܵܕ݂ܥܝܼܢ ܣܘܼܟܵܠܵܐ ܟܠܗܘܿܢ ܠܐܘܼܪܚܗܘܿܢ ܦܢܵܘ: ܘܐ̄ܢܵܫ ܠܣܸܛܪܹܗ ܘܲܠܓܲܒܹ̇ܗ.
12 ܬܵܘ ܢܸܣܲܒ̣ ܚܲܡܪܵܐ: ܘܢܸܣܲܒ̣ ܫܲܟ݂ܪܵܐ ܘܢܸܗܘܹܐ ܐܲܝܟ݂ ܕܝܵܘܡܵܢܵܐ: ܘܢܵܘܬܲܪ ܠܲܢ ܣܘܿܓ̣ܵܐܐ ܕܛܵܒ̣.
1 ܐ: ܗܵܐ ܙܲܕ̇ܝܼܝܼܩܵܐ ܐܸܒܲܕ݂. ܘܠܲܝܬ̇ ܐ̄ܢܵܫ ܕܡܲܝܬܹ̇ܐ ܥܲܠ ܒܵܠܹܗ. ܘܓܲܒ̣ܪܹ̈ܐ ܚܣܲـ̈ـܝܵܐ ܡܸܬ̣ܟܲܢܫܝܼܢ ܕܠܵܐ ܣܘܼܟܵܠܵܐ: ܡܸܛܠ ܕܡ̣ܢ ܩܕ݂ܵܡ ܒܝܼܫܬܵܐ ܡܸܬ̣ܟ̇ܢܸܫ ܙܲܕ̇ܝܼܩܵܐ.
2 ܘܢܹܐܬ̣ܵܐ ܫܠܵܡܵܐ: ܘܢܸܬ̇ܬ̇ܢܝܼܚܘܼܢ ܥܲܠ ܡܲܫܟܲܒ̣ܗܘܿܢ: ܘܢܹܐܙܠ̄ܘܿܢ ܠܘܼܩܒܲܠܗܘܿܢ.
3 ܘܐܲܢ̄ܬ̇ܘܿܢ ܩܪܘܿܒ̣ܘ ܠܟ݂ܵܐ: ܒܢܲܝ̈ ܡܡܲܟܲܟ݂ܬܵܐ: ܙܲܪܥܵܐ ܓܲܝܵܪܵܐ ܘܙܲܢܵܝܵܐ.
4 ܥܲܠ ܡ̣ܢ ܐܸܬ̣ܠܲܥܲܒ̣ܬ̇ܘܿܢ ܘܥܲܠ ܡܲܢ ܦܬܲܚܬ̇ܘܿܢ ܦܘܼܡܟ݂ܘܿܢ: ܘܐܵܘ ܪܸܟ݂ܬ̇ܘܿܢ ܠܸܫܵܢܟ݂ܘܿܢ. ܕܗܵܐ ܐܲܢ̄ܬ̇ܘܿܢ ܝܲܠܕܵܐ ܕܥܵܘܼܠܵܐ: ܘܙܲܪܥܵܐ ܕܲܓܵܠܵܐ.
5 ܕܡܸܬ̣ܒܲܝܲܐܝܼܢ ܒܲܦܬܲܟ݂ܪܹ̈ܐ ܬܚܹܝܬ̣ ܟܠ ܐܝܼܠܵܢ ܕܥܵܒ̣ܵܐ. ܘܲܢܟܲܣ̣ܬ̇ܘܿܢ ܛܠܵܝܹ̈ܐ ܒܢܲܚ̈ܠܹܐ ܬܚܹܝܬ̣ ܫܩܝܼ̈ܦܹܐ ܕܟܹܐܦܵܐ.
6 ܡܢܵܬ̣ܟ݂ܝ ܘܝܵܪܬ̇ܘܼܬܹܟ݂ܝ ܥܲܡ ܡܢܵܬ̣ܵܐ ܗ̄ܝܼ ܕܢܲܚ̈ܠܹܐ. ܐܵܦ ܥܠܲܝܗܘܿܢ ܢܲܩܝܼܬ̇ܝ ܢܘܼܩܵܝܹ̈ܐ: ܘܐܲܣ̣ܩܬ̇ܝ ܩܘܼܪ̈ܒܵܢܹܐ. ܥܲܠ ܗܵܠܹܝܢ ܐܸܬ̣ܒܲܝܲܐ.
7 ܥܲܠ ܛܘܼܪܹ̈ܐ ܪ̈ܵܡܹܐ ܘܲܡܫܲܩ̈ܠܹܐ ܥܒܲܕ̇ܬ̇ܝ ܡܲܫܟ̇ܒܹܟ݂ܝ. ܐܵܦ ܠܬܲܡܵܢ ܣܠܸܩܬ̇ ܠܡܸܕ݂ܒܲܚ ܕܸܒ̣ܚܹ̈ܐ.
8 ܘܒܸܣܬܲܪ ܬܲܪ̈ܥܹܐ ܥܲܠ ܦܪ̈ܘܼܣܬ̇ܕܹܐ ܪܫܲܡ̣ܬܝ ܕܘܼܟ݂ܪܵܢܹܟ݂ܝ ܡܸܛܠ ܕܡ̣ܢ ܠܘܵܬ̣ܝ ܓܲܠܝܼܬ̇ܝ ܘܲܣܠܸܩܬ̇ܝ ܘܐܲܪܘܲܚܬ̇ܝ ܡܲܫܟ̇ܒ̣ܟ݂ܝ. ܘܲܗ̤ܘܲܝܬ̇ܝ ܠܹܟ݂ܝ ܡܸܢܗܘܿܢ. ܘܲܪܚܸܡܬ̇ܝ ܡܲܫܟܲܒ̣ܗܘܿܢ: ܘܐܲܬ̣ܪܵܐ ܚ̣ܙܲܝܬ̇ܝ.
9 ܘܐܸܫܬܲܒܲܚܬ̇ܝ ܠܡܲܠ̈ܟܹ̇ܐ ܒܡܸܫܚܵܐ. ܘܐܲܣܓ̇ܝܼܬܝ ܒܸܣܡܲܝ̈ܟ̇ܝ ܘܫܲܕܲܪܬ̇ܝ ܐܝܼܙܓܲܕܲܝ̈ܟ̇ܝ ܠܪܘܼܚܩܵܐ. ܘܐܸܬ̣ܡܲܟ̇ܟ݂ܬ̇ܝ ܥܕܲܡܵܐ ܠܲܫܝܘܿܠ.
10 ܒܣܘܿܓ̣ܐܲܬ̣ ܐܘܼܪ̈ܚܵܬܹܟ݂ܝ ܠܐܝܼܬ̇ܝ ܘܠܵܐ ܐܸܡܲܪܬ̇ܝ ܕܐܸܫܠܸܐ. ܒܚܵܘܒ̇ܬ̣ܵܐ ܕܐܝܼܕܲܝ̈ܟ̇ܝ ܐܲܫܚܝܬ̇ܝ ܡܸܛܠ ܗܵܢܵܐ ܠܵܐ ܐܸܬ̣ܟܲܫܲܦܬ̇ܝ.
11 ܡ̣ܢ ܡܲܢ ܐܸܬ̣ܪ̱ܗܸܒ̣ܬ̇ܝ ܘܲܕ݂ܚܸܠܬ̇ܝ. ܕܟܲܕܸ̇ܒ̣ܬ̇ܝ ܒܝܼ. ܘܠܵܐ ܐܸܬ̇ܕ̇ܟܲܪܬ̇ܝܼܢܝ: ܘܠܵܐ ܚܫܲܒ̣ܬ̇ܝܼܢܝ ܒܠܸܒܹ̇ܟ݂ܝ ܗܵܐ ܐܸܢܵܐ ܗ̄ܘܼ ܚܲܣܝܵܐ ܕܡ̣ܢ ܥܵܠܲܡ. ܘܡܹܢܝ ܠܵܐ ܕܚܸܠܬ̇ܝ.
12 ܐܸܢܵܐ ܐܹܚܵܘܹܐ ܙܲܕ̇ܝܼܩܘܼܬ̣ܝ ܘܲܥܒ̣ܵܕܲܝ̈ܟܝ ܠܵܐ ܢܵܘܬ̇ܪܘܼܢܹܟ݂ܝ.
13 ܒܲܓ̣ܥܵܬܹܟ݂ܝ ܢܦܲܨܘܿܢܹܟ݂ܝ ܐܲܝܠܹܝܢ ܕܡܸܬ̣ܟܲܢܫܝܼܢ ܠܹܟ݂ܝ. ܠܟ݂ܠܗܘܿܢ ܬܸܫܩܘܿܠ ܐܸܢܘܿܢ ܪܘܼܚܵܐ. ܘܬܸܣܲܒ̣ ܐܸܢܘܿܢ ܥܲܠܥܵܠܵܐ ܘܐܲܝܠܹܝܢ ܕܲܡܣܲܒ̇ܪܝܼܢ ܒܝܼ: ܢܹܐܪܬ̇ܘܼܢ ܐܲܪܥܵܐ: ܘܢܹܐܪܬ̇ܘܿܢ ܛܘܼܪܝ ܩܲܕ̇ܝܼܫܵܐ.
14 ܘܢܹܐܡܪܘܿܢ ܫܲܦܵܘ ܫܲܦܵܘ: ܦܲܢܵܘ ܐܘܼܪܚܵܐ ܘܐܲܪܝܼܡܘ ܬܘܼܩ̈ܠܵܬ̣ܵܐ ܡ̣ܢ ܐܘܼܪܚܹܗ ܕܥܲܡܝ.
15 ܡܸܛܠ ܕܗܵܟܲܢܵܐ ܐܵܡܲܪ ܡܪܲܝܡܵܐ ܘܲܡܫܲܩܠܵܐ: ܕܲܫܪܸܐ ܠܥܵܠܡܝܼܢ: ܘܩܲܕ̇ܝܼܫ ܫܡܹܗ: ܟܪܲܝܡܵܐ: ܘܩܲܕ̇ܝܼܫ ܡܲܫ̱ܪܝܹܗ: ܠܡܲܟ̇ܝܼܟܹ̈ܐ ܘܲܠܥܲܝܝܼ̈ܩܲܝ ܪܘܼܚܵܐ: ܠܡܲܚܵܝܘܼ ܪܘܼܚܵܐ ܕܡܲܟ̇ܝܼܟܹ̈ܐ: ܘܲܠܡܲܚܵܝܘܼ ܠܸܒܵܐ ܕܡܲܟ݂ܐ̱ܒܹ̈ܐ.
16 ܡܸܛܠ ܕܠܵܐ ܠܥܵܠܲܡ ܐܵܠܹ̇ܡ ܐ̄ܢܵܐ. ܘܠܵܐ ܠܥܵܠܲܡ ܪܵܓܹ̇ܙ ܐ̄ܢܵܐ. ܡܸܛܠ ܕܪܘܼܚܵܐ ܡ̣ܢ ܩܕ݂ܵܡܲܝ ܢܵܦ̇ܩܵܐ ܘܲܢܫܲܡܬ̣ܵܐ ܐܸܢܵܐ ܥܸܒ̣ܕܲܬ̣.
17 ܒܥܵܘܼܠܵܐ ܕܢܸܟ݂ܠܵܗ̇ ܪܸܓ̣ܙܹ̇ܬ̣ ܘܲܡܚܹ̇ܝܬ̣ܵܗ̇. ܘܐܸܬ̣ܦܲܢܝܲܬ̣ ܘܪܸܓ̣ܙܲܬ̣: ܘܐܸܙܲܠ̄ܬ̤ ܚܢܲܓ̣ܬ̣ܵܗ̇ ܒܐܘܼܪܚܵܐ ܕܠܸܒܵܗ̇.
18 ܐܘܼܪ̈ܚܵܬ̣ܵܗ̇ ܚܙܹܝܬ̣: ܘܐܲܣܝܼܬܵܗ̇ ܘܒܲܝܲܐܬܵܗ̇ ܘܦܸܪܥܹܬ̣ ܒܘܼܝܵܐܐ ܠܵܗ̇ ܘܠܲܐܒ̣ܝܼ̈ܠܹܝܗ̇.
19 ܒܪܸܐ ܡܲܡܠܠܵܐ ܕܣܸܦ̈ܘܵܬ̣ܵܐ ܫܠܵܡܵܐ: ܫܠܵܡܵܐ: ܠܪ̈ܲܚܝܼܩܹܐ ܘܲܠܩܲܪ̈ܝܼܒܹܐ: ܐܵܡܲܪ ܡܵܪܝܵܐ ܘܐܲܣܸܐ ܐܸܢܘܿܢ.
20 ܘܪ̈ܲܫܝܼܥܹܐ ܐܲܝܟ݂ ܝܲܡܵܐ ܡܸܬ̇ܕܲܠܚܝܼܢ. ܡܸܛܠ ܕܫܸܠܝܵܐ ܠܵܐ ܡܸܫܟ̇ܚܝܼܢ ܘܗܵܦܟ݂ܝܼܢ ܡܵܘ̈ܗܝ ܪ̈ܲܚܫܵܐ ܘܲܣܝܵܢܵܐ. ܠܲܝܬ̇ ܫܠܵܡܵܐ ܠܪ̈ܲܫܝܼܥܹܐ: ܐܵܡܲܪ ܐܲܠܵܗܝ.
1 ܩܪܝܼ ܒܓܲܓܲܪܬܵܟ݂ ܘܠܵܐ ܬܚܘܼܣ ܘܐܲܪܝܼܡ ܩܵܠܵܟ݂ ܐܲܝܟ݂ ܫܝܼܦܘܿܪܵܐ ܘܚܵܘܵܐ ܠܥܲܡܝ ܥܵܘܼܠܗܘܿܢ: ܘܠܲܕ݂ܒܹܝܬ̣ ܝܲܥܩܘܿܒ̣ ܚܛܵܗܲܝ̈ܗܘܿܢ.
2 ܘܠܝܼ ܒܵܥܹ̇ܝܢ ܒܟ݂ܠܝܘܿܡ ܘܨܵܒܹ̇ܝܢ ܠܡܸܕܲܥ ܐܘܼܪ̈ܚܵܬ̣ܝ: ܐܲܝܟ݂ ܥܲܡܵܐ ܕܲܥܒܲܕ݂ ܙܲܕ̇ܝܼܩܘܼܬ̣ܵܐ: ܘܠܵܐ ܫܒܲܩ ܕܝܼܢܵܐ ܕܐܲܠܵܗܹܗ. ܫܵܐܠܝܼܢ ܠܝܼ ܕܝܼܢܵܐ ܘܙܲܕܝܼܩܘܼܬ̣ܵܐ: ܙܨܵܒܹ̇ܝܢ ܠܡܸܬ̣ܩܲܪܵܒ̣ܘܼ ܠܐܲܠܵܗܵܐ.
3 ܠܡܵܢܵܐ ܨܵܡ̣ܢ: ܘܠܵܐ ܚ̣ܙܲܝܬ̇ ܘܡܲܟܸ̇ܟ݂ܢ ܢܲܦ̮ܫܲܢ: ܘܠܵܐ ܝܼܕܲܥܬ̇ ܗܵܐ ܒܝܵܘܡܵܐ ܕܨܵܘܡܟ݂ܘܿܢ ܥܵܒ̣ܕ̇ܝܼܬ̇ܘܿܢ ܨܸܒ̣ܝܵܢܲܝ̈ܟ̇ܘܿܢ: ܘܲܡܩܲܪܒ̣ܝܼܢ ܐ̄ܢ̇ܬ̇ܘܿܢ ܦܬܲܟ݂ܪ̈ܲܝܟ̇ܘܿܢ ܟܠܗܘܿܢ.
4 ܗܵܐ ܠܚܸܪܝܵܢܵܐ ܘܲܠܡܲܨܘܼܬ̣ܵܐ ܨܵܝ̇ܡܝܼܬ̇ܘܿܢ: ܘܲܠܡܸܡܚܵܐ ܒܲܩܛܝܼܪܵܐ ܕܥܵܘܼܠܵܐ. ܠܵܐ ܬܨܘܼܡܘܼܢ ܐܲܝܟ݂: ܕܝܵܘܡܵܢܵܐ: ܘܬܲܫܡ̱ܥܘܼܢ ܩܵܠܟ݂ܘܿܢ ܒܲܡܪܵܘܡܵܐ.
5 ܗܵܢܵܘ ܨܵܘܡܵܐ ܕܲܓ̣ܒܹܝܬ̣: ܕܢܲܡܸܟ ܐ̄ܢܵܫ ܢܲܦ̮ܫܹܗ. ܘܢܸܟ̇ܘܿܦ ܨܵܘܪܹܗ ܐܲܝܟ݂ ܟܪܘܿܠܵܐ ܘܣܲܩܵܐ ܘܩܸܛܡܵܐ ܡܵܐܹ̇ܟ ܠܹܗ. ܠܗܵܢܵܐ ܬܸܩܪܘܿܢ ܨܵܘܡܵܐ: ܘܝܵܘܡܵܐ ܕܨܸܒ̣ܝܵܢܹܗ ܕܡܵܪܝܵܐ.
6 ܗܵܢܵܘ ܨܵܘܡܵܐ ܕܲܓ̣ܒܹܝܬ̣: ܕܬܸܫܪܸܐ ܩܸܛܪܹ̈ܐ ܕܥܵܘܼܠܵܐ: ܘܲܬ̣ܦܲܣܸܩ ܡܹܐܣܲܪ̈ܝܵܬ̣ܵܐ ܕܢܸܟ݂ܠܵܐ. ܘܬܸܫܪܸܐ ܟܒ̣ܝܼ̈ܫܹܐ ܠܚܹܐܪܘܼܬ̣ܵܐ ܘܟ݂ܠܗܹܝܢ ܡܹܐܣܲܪ̈ܝܵܬ̣ܵܐ ܬܸܦܣܩܘܼܢ.
7 ܘܬܸܩܨܹܐ ܠܲܚܡܵܟ݂ ܠܟܲܦܢܵܐ. ܘܠܲܐܟ݂ܣܢܵܝܵܐ ܬܲܥܸܠ ܠܒܲܝܬܵܟ݂ ܟܲܕ݂ ܬܸܚܙܹܐ ܥܲܪܛܸܠܵܝܵܐ: ܘܲܬ̣ܟܲܣܹܝܘܗܝ ܘܠܵܐ ܬܲܗܡܹܐ ܡ̣ܢ ܒܲܪ ܒܸܣܪܵܟ݂.
8 ܗܵܝܕܹ̇ܝܢ ܢܸܬ̣ܦܬܲܚ ܢܘܼܗܪܵܟ݂ ܐܲܝܟ݂ ܨܲܦܪܵܐ. ܘܙܲܕ̇ܝܼܩܘܼܬ̣ܵܟ݂ ܒܲܥܓܲܠ ܬܸܕ݂ܢܲܚ. ܘܬܹܐܙܲܠ ܩܕ݂ܵܡܲܝܟ ܙܲܕ̇ܝܼܩܘܼܬ̣ܵܟ݂. ܘܐܝܼܩܵܪܹܗ ܕܡܵܪܝܵܐ ܢܟܲܫܵܟ݂.
9 ܗܵܝܕܹ̇ܝܢ ܬܸܩܪܸܐ: ܘܢܸܥܢܹܝܟ݂ ܡܵܪܝܵܐ. ܘܬܸܓ̣ܥܹܐ: ܘܢܹܐܡܲܪ ܗܵܐ ܐܸܢܵܐ ܐܸܢ ܬܲܥܒܲܪ ܡ̣ܢ ܓܵܘܵܟ݂ ܢܸܟ݂ܠܵܐ: ܘܬܸܫܪܹܐ ܠܲܟ݂ܒ̣ܝܼ̈ܫܹܐ ܘܡ̣ܢ ܡܲܡܠܠܵܐ ܕܲܓܵܠܵܐ ܬܲܪܚܸܩ.
10 ܘܬܸܬܸ̇ܠ ܠܲܚܡܵܟ݂ ܠܟܲܦܢܵܐ. ܘܲܬ̣ܣܲܒܲܥ ܢܲܦ̮ܫܵܟ݂ ܕܟܲܦܢܵܐ: ܢܸܕ݂ܢܲܚ ܢܘܼܗܪܵܟ݂ ܒܚܸܫܘܿܟ݂ܵܐ: ܘܚܸܫܘܿܟ݂ܵܐ ܐܲܝܟ݂ ܛܲܗܪܵܐ.
11 ܘܲܢܕܲܒ̇ܪܵܟ݂ ܡܵܪܝܵܐ ܐܲܡܝܼܢܵܐܝܼܬ̣ ܘܲܢܣܲܒܲܥ ܢܲܦ̮ܫܵܟ݂ ܒܕ݂ܘܼܗܵܢܵܐ. ܘܢܲܫܲܪ ܓܲܪ̈ܡܲܝܟ ܘܬܸܗܘܹܐ ܐܲܝܟ݂ ܦܲܪܕܲܝܣܵܐ ܕܲܪܘܸܐ: ܘܐܲܝܟ݂ ܡܲܒ̇ܘܼܥܵܐ ܕܡܲܝܵܐ ܕܠܵܐ ܓܵܝ̇ܙܝܼܢ ܡܵܘ̈ܗܝ.
12 ܘܢܸܒ̣ܢܘܿܢ ܡܸܢܵܟ݂ ܚܲܪ̈ܒ̣ܵܬ̣ܵܐ ܕܡ̣ܢ ܥܵܠܲܡ. ܘܫܲܬ̣ܐ̱ܣܹ̈ܐ ܕܕ݂ܵܪܕܵܪ̈ܝܼܢ ܬܩܝܼܡ ܘܢܸܩܪܘܿܢܵܟ݂ ܣܵܐܹ̇ܓ̣ ܬܘܼܪ̈ܥܵܬ̣ܵܐ: ܘܡܲܗܦܸܟ݂ ܫܒ̣ܝܼ̈ܠܹܐ ܠܝܲܬ̣ܒܵܐ.
13 ܐܸܢ ܬܲܗܦܸܟ݂ ܪܸܓ̣ܠܵܟ݂ ܡ̣ܢ ܫܲܒ̇ܬ̣ܵܐ: ܕܠܵܐ ܬܸܥܒܸ̇ܕ݂ ܨܸܒ̣ܝܵܢܵܟ݂ ܒܝܵܘܡܵܐ ܕܩܘܼܕ݂ܫܝ. ܘܬܸܩܪܹܐ ܠܫܲܒ̇ܬ̣ܵܐ ܡܦܲܢܲܩܬ̣ܵܐ: ܘܩܘܼܕܫܹܗ ܕܡܵܪܝܵܐ ܡܝܲܩܪܵܐ. ܘܲܬ̣ܝܲܩܪܝܼܗ̇ ܕܠܵܐ ܬܸܥܒܸ̇ܕ݂ ܒܵܗ̇ ܐܘܼܪܚܵܟ݂: ܘܠܵܐ ܬܸܥܒܸ̇ܕ݂ ܒܵܗ̇ ܨܸܒ̣ܝܵܢܵܟ݂: ܘܠܵܐ ܬܡܲܠܸܠ ܡܸܠܬ̣ܵܐ.
14 ܗܵܝܕܹ̇ܝܢ ܬܸܬ̇ܟܸܠ ܥܲܠ ܡܵܪܝܵܐ. ܕܐܲܪܟ̇ܒ̣ܵܟ݂ ܥܲܠ ܥܘܼܫܢܵܗ̇ ܕܐܲܪܥܵܐ. ܘܐܵܘܟ̇ܠܵܟ݂ ܝܵܪܬ̇ܘܼܬܹܗ ܕܝܲܥܩܘܿܒ̣ ܐܲܒ̣ܘܼܟ݂ ܡܸܛܠ ܕܦܘܼܡܹܗ ܕܡܵܪܝܵܐ ܡܲܠܸܠ̣.
1 ܗܵܐ ܠܵܐ ܙܥܘܿܪܝܵܐ ܐܝܼܕܹܗ ܕܡܵܪܝܵܐ ܠܡܸܦܪܲܩ ܘܠܵܐ ܝܲܩܝܼܪܵܐ ܐܸܕ݂ܢܹܗ ܠܡܸܫܡܲܥ.
2 ܐܸܠܵܐ ܚܵܘ̈ܒܲܝܟ̇ܘܿܢ ܗ̄ܘܼ ܦܪܲܫ̣ܘ ܒܲܝܢܲܝܟ̇ܘܿܢ ܠܐܲܠܵܗܟ݂ܘܿܢ ܘܲܚܛܵܗܲܝ̈ܟ̇ܘܿܢ ܐܲܗܦܸܟ݂ܘ ܐܲܦܵܘ̈ܗܝ ܡܸܢܟ݂ܘܿܢ ܕܠܵܐ ܢܸܫܡܲܥ.
3 ܡܸܛܠ ܕܐܝܼܕܲܝ̈ܟ̇ܘܿܢ ܡܛܲܢ̈ܦܵܢ ܒܲܕ݂ܡܵܐ: ܘܨܸܒ̣̈ܥܵܬ̣ܟ݂ܘܿܢ ܒܥܵܘܼܠܵܐ ܘܣܸܦ̈ܘܵܬ̣ܟ݂ܘܿܢ ܡܡܲܠ̈ܠܵܢ ܫܘܼܩܪܵܐ. ܘܠܸܫܵܢܟ݂ܘܿܢ ܪܵܢܹ̇ܐ ܒܥܵܘܼܠܵܐ.
4 ܘܠܲܝܬ̇ ܕܩܵܪܹܐ ܒܙܲܕ̇ܝܼܩܘܼܬ̣ܵܐ ܘܠܲܝܬ̇ ܕܕ݂ܵܐܹ̇ܢ ܒܗܲܝܡܢܘܼܬ̣ܵܐ ܐܸܬ̇ܬ̇ܟܸܠܘ ܥܲܠ ܣܪܝܼܩܘܼܬ̣ܵܐ: ܘܡܲܠܸܠ̣ܘ ܪܲܝܩܵܢܘܼܬ̣ܵܐ ܒܛܸܢܘ ܥܸܬܵܐ: ܘܝܼܠܸܕ݂ ܟܹܐܒܹ̈ܐ.
5 ܒ̈ܢܵܬ̣ܵܐ ܕܚܲܪܡܵܢܵܐ ܐܲܦܲܥܘ ܘܢܵܘܠܵܐ ܕܲܓ̣ܘܵܓܲܝ ܙܩܲܪܘ. ܕܐܵܟܸ̇ܠ ܡ̣ܢ ܒ̈ܢܵܬ̣ܗܘܿܢ: ܢܡܘܼܬ̣ ܘܲܕ̇ܬܲܒ̣ܪܵܗ̇: ܡܸܫܟܲܚ ܫܲܥܛܵܐ.
6 ܢܵܘܠܗܘܿܢ ܠܵܐ ܢܸܗܘܹܐ ܠܲܠܒ̣ܘܼܫܵܐ. ܘܠܵܐ ܢܸܬ̣ܟܲܣܘܿܢ ܒܲܥܒ̣ܵܕܲܝ̈ܗܘܿܢ ܥܒ̣ܵܕܲܝ̈ܗܘܿܢ ܥܒ̣ܵܕܹ̈ܐ ܐܸܢܘܿܢ ܕܥܸܬܵܐ. ܘܲܥܒ̣ܵܕܹ̈ܐ ܕܥܵܘܼܠܵܐ ܒܐܝܼܕܲܝ̈ܗܘܿܢ.
7 ܪܸ̈ܓ̣ܠܲܝܗܘܿܢ ܪ̈ܵܗܛܢ ܠܒ̣ܝܼܫܬܵܐ. ܘܡܸܣܬܲܪܗܒ̣ܝܼܢ ܠܡܹܐܫܲܕ݂ ܕܡܵܐ ܙܟܵܝܵܐ. ܬܲܪ̈ܥܝܵܬ̣ܗܘܿܢ ܬܲܪ̈ܥܝܵܬ̣ܵܐ ܐܸܢܹܝܢ ܕܥܸܬܵܐ. ܘܒܸܙܬ̣ܵܐ ܘܲܬ̣ܒ̣ܵܪܵܐ ܒܲܫܒ̣ܝܼ̈ܠܲܝܗܘܿܢ.
8 ܐܘܼܪܚܵܐ ܕܲܫܠܵܡܵܐ ܠܵܐ ܝܼܕܲܥܘ ܘܠܲܝܬ̇ ܕܝܼܢܵܐ ܒܗܲܠ̈ܟ݂ܵܬ̣ܗܘܿܢ ܫܒ̣ܝܼ̈ܠܲܝܗܘܿܢ ܡܥܲܩܡܝܼܢ. ܘܟ݂ܠ ܕܲܡܗܲܠܸܟ݂ ܒܗܘܿܢ: ܠܵܐ ܝܵܕܲܥ ܫܠܵܡܵܐ.
9 ܡܸܛܠ ܗܵܢܵܐ ܐܸܬ̣ܪܲܚܲܩ ܡܸܢܲܢ ܕܝܼܢܵܐ. ܘܙܲܕ̇ܝܼܩܘܼܬ̣ܵܐ ܠܵܐ ܬܸܕ݂ܪ̱ܟܲܢ ܣܲܟ̇ܝܼܢ ܠܢܘܼܗܪܵܐ: ܘܲܗܘ̤ܵܐ ܚܸܫܘܿܟ݂ܵܐ ܘܲܠܙܲܗܪܵܐ ܘܲܒ̣ܥܲܡܛܵܢܵܐ ܗܲܠܸܟ݂ܢ.
10 ܡܵܫܢ ܐܸܣܬ̣ܵܐ ܐܲܝܟ݂ ܥܘܝܼܪܹ̈ܐ. ܘܡܵܫ̄ܢ ܐܲܝܟ݂ ܗܵܢ̇ܘܿܢ ܕܠܲܝܬ̇ ܠܗܘܿܢ ܥܲܝܢܹ̈ܐ ܐܸܬ̇ܬܲܩܲܠܢ ܒܛܲܗܪܵܐ ܐܲܝܟ݂ ܕܲܒ̣ܪܲܡܫܵܐ. ܘܐܸܬ̇ܬܲܢܲܚ̄ܢ ܐܲܝܟ݂ ܗܵܢ̇ܘܿܢ ܕܩܲܪܝܼܒ̣ܝܼܢ ܠܵܡܡܵܬ̣.
11 ܢܲܗܸܡ̄ܢ ܟܠܲܢ ܐܲܝܟ݂ ܕܸܒܹ̇ܐ ܘܐܲܝܟ݂ ܝܵܘܢܹ̈ܐ ܢܲܗܸܡ̄ܢ ܣܲܟ̇ܝܼܢ ܠܕ݂ܝܼܢܵܐ: ܘܠܲܝܬ̇ ܘܲܠܦܘܼܪܩܵܢܵܐ: ܘܐܸܬ̣ܪܲܚܲܩ ܡܸܢܲܢ.
12 ܡܸܛܠ ܕܲܣܓܝܼ ܥܵܘܼܠܲܢ ܩܕ݂ܵܡܲܝܟ: ܘܲܚܛܵܗܲܝ̈ܢ ܣܲܗܕ̇ܘܼܢ ܡܸܛܠ ܕܥܵܘܼܠܲܢ ܥܲܡܲܢ ܗ̄ܘܼ. ܘܲܚܛܵܗܲܝ̈ܢ ܝܼܕ݂ܝܼܥܝܼܢ ܐܸܢܘܿܢ.
13 ܐܲܥܠܝܼܢ ܘܕܲܓܸ̇ܠܢ ܒܡܵܪܝܵܐ ܘܲܗܦܲܟ݂ܢ ܡ̣ܢ ܒܵܬ̣ܪܹܗ ܕܐܲܠܵܗܲܢ. ܡܲܠܸܠ̣ܢ ܛܠܘܼܡܝܵܐ ܘܲܡ̣ܪܲܕ݂ܢ. ܒܛܸܢ̄ܢ: ܘܲܪܢܲܝܢ ܡ̣ܢ ܠܸܒܲܢ ܡܸܠܹ̈ܐ ܕܫܘܼܩܪܵܐ.
14 ܐܲܗ̣ܦܸܟ݂ܢ ܕܝܼܢܵܐ ܠܒܸܣܬܪܹܗ: ܘܙܲܕ̇ܝܼܩܘܼܬ̣ܵܐ ܐܲܩܝܼܡ̄ܢ ܒܪܘܼܚܩܵܐ ܡܸܛܠ ܕܐܸܬ̇ܬ̇ܩܸܠ ܩܘܼܫܬܵܐ ܒܲܪܘܲܚܬ̣ܵܐ. ܘܡܲܟ̇ܣܵܢܘܼܬ̣ܵܐ ܠܵܐ ܡܸܫܟ̇ܚܵܐ ܠܡܹܐܬ̣ܵܐ.
15 ܘܲܗܘ̤ܵܐ ܩܘܼܫܬܵܐ ܒܟܸܣܝܵܐ. ܘܲܥܒܲܪ ܣܘܼܟܵܠܵܐ ܡ̣ܢ ܪܸܥܝܵܢܲܢ. ܘܲܚܙ̣ܵܐ ܡܵܪܝܵܐ ܕܠܲܝܬ̇ ܕܝܼܢܵܐ: ܘܐܸܬ̣ܒ̇ܐܸܫ ܒܥܲܝܢܵܘ̈ܗܝ.
16 ܘܲܚܙ̣ܵܐ ܕܠܲܝܬ̇ ܐ̄ܢܵܫ. ܘܐܸܬ̇ܕܲܡܲܪ ܕܠܲܝܬ̇ ܕܲܡܥܲܕܲܪ. ܘܦܲܪܩܹܗ ܕܪܵܥܹܗ ܘܙܲܕ̇ܝܼܩܘܼܬܹܗ ܗ̤ܝ ܣܡܲܟ݂ܬܹܗ.
17 ܠܒܸܫ ܙܲܕ̇ܝܼܩܘܼܬ̣ܵܐ ܐܲܝܟ݂ ܫܸܪܝܵܢܵܐ: ܘܣܲܢܘܲܪܬ̣ܵܐ ܕܦܘܼܪܩܵܢܵܐ ܒܪܹܫܹܗ. ܘܲܠܒܸܫ ܠܒ̣ܘܼܫܵܐ ܕܦܘܼܪܥܵܢܵܐ.
18 ܕܢܸܬ̇ܬܲܒܲܥ ܡ̣ܢ ܣܵܢܐܵܘ̈ܗܝ: ܘܢܸܦܪܘܿܥ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ ܘܲܠܓ̣ܵܙܪ̈ܵܬ̣ܵܐ ܢܸܦܪܘܿܥ ܦܘܼܪܥܵܢܵܐ.
19 ܢܸܕ݂ܚ̄ܠܘܼܢ ܡ̣ܢ ܡܲܥ̱ܪܒ̣ܵܐ ܠܲܫܡܹܗ ܕܡܵܪܝܵܐ. ܘܡ̣ܢ ܡܲܕ݂ܢܵܚܲܝ̈ ܫܸܡܫܵܐ ܠܐܝܼܩܵܪܹܗ. ܡܸܛܠ ܕܢܹܐܬܹܐ ܐܵܠܘܿܨܵܐ ܢܲܗܪܵܐ ܘܪܘܼܚܹܗ ܕܡܵܪܝܵܐ ܬܡܲܟ̇ܟ݂ܝܼܘܗܝ.
20 ܘܢܹܐܬܹܐ ܠܨܸܗܝܘܿܢ ܦܵܪܘܿܩܵܐ: ܘܐܲܝܠܹܝܢ ܕܡܲܦܢܹܝܢ ܥܵܘܼܠܵܐ ܡ̣ܢ ܝܲܥܩܘܿܒ̣: ܐܵܡܲܪ ܡܵܪܝܵܐ.
21 ܘܐܸܢܵܐ ܗܵܢܵܘ ܩܝܵܡܝ ܕܥܲܡܟ݂ܘܿܢ: ܐܵܡܲܪ ܡܵܪܝܵܐ: ܪܘܼܚܝ ܕܲܥܠܲܝܟ ܘܡܸܠܲܝ̈ ܕܣܵܡܹ̇ܬ̣ ܒܦܘܼܡܵܟ݂: ܠܵܐ ܢܸܥܢ̈ܕ݂ܵܢ ܡ̣ܢ ܦܘܼܡܵܟ݂ ܘܡ̣ܢ ܦܘܼܡܹܗ ܕܙܲܪܥܵܟ݂: ܘܡ̣ܢ ܦܘܼܡܵܐ ܕܙܲܪܥܵܐ ܕܙܲܪܥܵܟ݂: ܐܵܡܲܪ ܡܵܪܝܵܐ: ܡ̣ܢ ܗܵܫܵܐ ܘܲܥܕܲܡܵܐ ܠܥܵܠܲܡ.
1 ܩܘܼܡܝ ܐܲܢܗܲܪܝ ܡܸܛܠ ܕܲܡܛ̣ܵܐ ܢܘܼܗܪܹܟ݂ܝ. ܘܐܝܼܩܵܪܹܗ ܕܡܵܪܝܵܐ ܥܠܝܟ̇ܝ ܢܸܕ݂ܢܲܚ.
2 ܡܸܛܠ ܕܗܵܐ ܚܸܫܘܿܟ݂ܵܐ ܡܟܲܣܸܐ ܠܐܲܪܥܵܐ: ܘܥܲܪܦܸܠܵܐ ܠܐܸܡܘ̈ܬ̣ܵܐ. ܘܲܥܠܲܝܟ̇ܝ ܢܸܕ݂ܢܲܚ ܡܵܪܝܵܐ. ܘܐܝܼܩܵܪܹܗ ܥܠܲܝܟ̇ܝ ܢܸܬ̣ܚ̄ܙܹܐ.
3 ܘܢܹܐܬ̣ܘܿܢ ܥܲܡܡܹ̈ܐ ܠܢܘܼܗܪܹܟ݂ܝ: ܘܡܲܠ̈ܟܹ̇ܐ ܠܢܘܼܗܪܵܐ ܕܕܸܢܚܹܟ݂ܝ.
4 ܐܲܪܝܼܡܝ ܥܲܝܢܲܝ̈ܟ̇ܝ ܠܲܚܕ݂ܵܪ̈ܲܝܟ̇ܝ ܘܲܚܙܵܝ ܕܟ݂ܠܗܘܿܢ ܡܸܬ̣ܟܲܢܫܝܼܢ ܘܐܵܬܹ̇ܝܢ ܠܹܟ݂ܝ. ܒܢܲܝ̈ܟ̇ܝ ܡ̣ܢ ܪܘܼܚܩܵܐ ܢܹܐܬ̣ܘܿܢ ܘܲܒ̣̈ܢܵܬܹܟ݂ܝ ܥܲܠ ܦܸܪ̈ܝܵܘܵܬ̣ܵܐ ܢܸܬ̣ܪ̈ܲܒ̇ܝܵܢ.
5 ܗܵܝܕܹ̇ܝܢ ܬܸܚܙܹܝܢ: ܘܬܸܢܗ̱ܪܝܼܢ ܘܬܸܚܕܹ̇ܝܢ: ܘܲܢܪܘܼܚ ܠܸܒܸ̇ܟ݂ܝ. ܡܸܛܠ ܕܗܵܦܹ̇ܟ݂ ܠܹܟ݂ܝ ܥܘܼܬ̣ܪܹܗ ܕܝܲܡܵܐ. ܘܚܲܝ̈ܠܹܐ ܕܥܲܡܡܹ̈ܐ ܢܹܐܬ̣ܘܿܢ ܠܹܟ݂ܝ.
6 ܐܲܒܲܠܬܵܐ ܕܓܲܡ̈ܠܹܐ ܬܟܲܣܹܝܟ݂ܝ ܒܘܼܟ݂ܪܹ̈ܐ ܕܡܸܕ݂ܝܲܢ ܘܕܲܐܥܦܵܐ: ܟܠܗܘܿܢ ܡ̣ܢ ܫܒ̣ܵܐ ܢܹܐܬ̣ܘܿܢ. ܕܲܗܒ̣ܵܐ ܘܲܠܒ̣ܘܿܢ̄ܬܵܐ ܢܸܫܩ̄ܠܘܼܢ ܘܬܸܫ̈ܒ̇ܚܵܬܹܗ ܕܡܵܪܝܵܐ ܢܣܲܒ̇ܪܘܼܢ.
7 ܟܠܵܗ̇ ܥܵـ̈ـܢܵܐ ܕܩܹܕ݂ܵܪ ܢܟܲܢܫܘܼܢ ܠܹܟ݂ܝ ܘܕܸܟ݂ܪܹ̈ܐ ܕܲܢܒ̣ܵܐܘܼܬ̣ ܢܫܲܡܫܘܼܢܹܟ݂ܝ. ܘܢܸܣܩܘܼܢ ܠܨܸܒ̣ܝܵܢܵܐ ܥܲܠ ܡܲܕ݂ܒܲܚܝ ܘܒܲܝܬܵܐ ܕܬܸܫܒ̇ܘܿܚܬ̇ܝ ܐܹܫܲܒܲܚ.
8 ܡܲܢ ܐܸܢܘܿܢ ܗܵܠܹܝܢ ܕܐܲܝܟ݂ ܥܢܵܢܹ̈ܐ ܦܵܪܚܝܼܢ: ܘܐܲܝܟ݂ ܝܵܘܢܹ̈ܐ ܠܟ݂ܵܘܲܝ̈ܗܹܝܢ.
9 ܡܸܛܠ ܕܠܝܼ ܢܣܲܟ̇ܝܵܢ ܓܵܙܪ̈ܵܬ̣ܵܐ: ܘܐܸܠܦܹ̈ܐ ܕܬܲܪܫܝܼܫ ܐܲܝܟ݂ ܕܲܒ̣ܩܲܕ݂ܡܵܝܬܵܐ. ܠܡܲܝܬܵܝܘܼ ܒܢܲܝ̈ܟ̇ܝ ܡ̣ܢ ܪܘܼܚܩܵܐ: ܘܣܹܐܡܗܘܿܢ ܘܕܲܗ̱ܒ̣ܗܘܿܢ ܥܲܡܗܘܿܢ: ܠܲܫܡܹܗ ܕܡܵܪܝܵܐ ܐܲܠܵܗܹܟ݂ܝ: ܘܩܲܕ̇ܝܼܫܵܐ ܕܝܼܣܪܵܝܹܠ ܕܫܲܒ̇ܚܹܟ݂ܝ.
10 ܘܢܸܒ̣ܢܘܿܢ ܒܢܲܝ̈ ܢܘܼܟ݂ܪ̈ܵܝܹܐ ܫܘܼܪ̈ܲܝܟ̇ܝ. ܘܡܲܠܟܲܝ̈ܗܘܿܢ ܢܫܲܡܫܘܼܢܹܟ݂ܝ ܡܸܛܠ ܕܲܒ̣ܪܘܼܓ̣ܙܝ ܡܚܹܝ̇ܬ̣ܟ݂ܝ. ܘܲܒ̣ܨܸܒ̣ܝܵܢܝ ܪܲܚܡܹ̇ܬ̣ ܥܠܲܝܟ̇ܝ.
11 ܢܸܬ̣ܦܲܬ̣ܚܘܿܢ ܬܲܪ̈ܥܲܝܟ̇ܝ ܐܲܡܝܼܢܵܐܝܼܬ̣: ܒܐܝܼܡܵܡܵܐ ܘܲܒ̣ܠܸܠܝܵܐ: ܘܠܵܐ ܢܸܬ̇ܬܲܚܕ̇ܘܼܢ. ܘܢܸܥܠܘܼܢ ܠܹܟ݂ܝ ܚܲܝ̈ܠܹܐ ܕܥܲܡܡܹ̈ܐ: ܘܡܲܠܟܲܝ̈ܗܘܿܢ ܟܲܕ݂ ܕܒ̣ܝܼܪܝܼܢ.
12 ܡܸܛܠ ܕܥܲܡܵܐ ܘܡܲܠܟ̇ܘܼܬ̣ܵܐ ܕܠܵܐ ܢܸܦ̱ܠܚܘܼܢܹܟ݂ܝ: ܢܹܐܒ̣ܕ̇ܘܼܢ ܘܥܲܡܡܹ̈ܐ ܒܚܲܪܒܵܐ ܢܸܬ̣ܚܲܪܒ̇ܘܼܢ.
13 ܐܝܼܩܵܪܵܐ ܕܠܸܒ̣ܢܵܢ ܢܹܐܬܹܐ ܠܹܟ݂ܝ: ܒܪܘܿܬ̣ܵܐ ܗܕ݂ܝܼܪܬܵܐ ܘܫܲܪ̈ܘܲܝܢܹܐ ܐܲܟ݂ܚ̄ܕ݂ܵܐ: ܠܲܡܫܲܒܵܚܘܼܢ ܐܲܬ̣ܪܵܐ ܕܡܲܩܕܲܫܝ: ܘܠܲܐܬ̣ܪܵܐ ܕܪܸ̈ܓ̣ܠܲܝ ܐܝܼܩܵܪܝ.
14 ܘܢܹܐܬ̣ܘܿܢ ܠܹܟ݂ܝ ܟܲܕ݂ ܡܡܲܟ̇ܟ݂ܝܼܢ ܒܢܲܝ̈ ܡܡܲܟ̇ܟ݂ܵܢܲܝ̈ܟ̇ܝ ܘܢܸܣܓ̇ܕ݂ܘܼܢ ܠܦܲܣܹ̈ܐ ܕܪܸ̈ܓ̣ܠܲܝܟ̇ܝ ܟܠܗܘܿܢ ܡܲܪ̈ܓ̇ܙܵܢܲܝܟ̇ܝ ܘܢܸܩܪܘܿܢܹܟ݂ܝ ܨܸܗܝܘܿܢ ܩܪܝܼܬܹܗ ܕܡܵܪܝܵܐ ܩܲܕ̇ܝܼܫܵܐ ܕܝܼܣܪܵܝܹܠ.
15 ܚܠܵܦ ܕܲܗ̤ܘܲܝܬ̇ܝ ܫܒ̣ܝܼܩܬ̣ܵܐ ܘܲܣܢܝܼܐܬ̣ܵܐ ܡ̣ܢ ܒܠܲܝ ܕܥܵܒܲܪ: ܐܸܥܒ̇ܕܹܟ݂ܝ ܐܝܼܩܵܪܵܐ ܠܥܵܠܲܡ: ܘܚܲܕ݂ܘܼܬ̣ܵܐ ܠܕ݂ܵܪܕܵܪ̈ܝܼܢ.
16 ܘܬܹܐܢܩܝܼܢ ܚܲܠܒ̣ܵܐ ܕܥܲܡܡܹ̈ܐ ܘܒܸܙܬ̣ܵܐ ܕܡܲܠ̈ܟܹ̇ܐ ܬܹܐܢܩܝܼܢ. ܘܬܸܕ̇ܥܝܼܢ ܕܐܸܢܵܐ ܐ̄ܢܵܐ ܡܵܪܝܵܐ ܦܵܪܘܿܩܹܟ݂ܝ: ܘܲܡܦܲܨܝܵܢܹܟ݂ܝ ܬܲܩܝܼܦܹܗ ܕܝܲܥܩܘܿܒ̣.
17 ܚܠܵܦ ܢܚܵܫܵܐ ܐܲܝܬܹ̇ܐ ܕܲܗܒ̣ܵܐ. ܘܲܚܠܵܦ ܦܲܪܙܠܵܐ ܐܲܝܬܹ̇ܐ ܣܹܐܡܵܐ. ܘܲܚܠܵܦ ܩܲܝܣܹ̈ܐ ܢܚܵܫܵܐ. ܘܚܠܵܦ ܟܹܐܦܹ̈ܐ ܦܲܪܙܠܵܐ. ܘܐܸܥܒܸ̇ܕ݂ ܫܠܵܡܵܐ ܦܵܩܘܿܕܹܟ݂ܝ: ܘܫܲܠܝܼܛܹܟ݂ܝ ܙܲܕ̇ܝܼܩܘܼܬ̣ܵܐ. ܘܠܵܐ ܢܸܫܬ̇ܡܲܥ ܬܘܼܒ̣ ܥܵܘܼܠܵܐ ܒܐܲܪܥܹܟ݂ܝ
18 ܘܒܸܙܬ̣ܵܐ ܘܲܬ̣ܒ̣ܵܪܵܐ ܒܲܬ̣ܚܘܼܡܲܝ̈ܟ̇ܝ ܘܢܸܩܪܘܿܢ ܫܘܼܪ̈ܲܝܟ̇ܝ ܦܘܼܪܩܵܢܵܐ: ܘܬܲܪ̈ܥܲܝܟ̇ܝ ܬܸܫܒ̇ܘܿܚܬܵܐ.
19 ܘܠܵܐ ܢܸܗܘܹܐ ܠܹܟ݂ܝ ܬܘܼܒ̣ ܫܸܡܫܵܐ ܠܢܘܼܗܪܵܐ ܕܐܝܼܡܵܡܵܐ. ܘܢܘܼܗܪܹܗ ܕܣܲܗܪܵܐ ܠܵܐ ܢܸܢܗܲܪ ܠܹܟ݂ܝ. ܡܸܛܠ ܕܢܸܗܘܹܐ ܠܹܟ݂ܝ ܡܵܪܝܵܐ ܢܘܼܗܪܵܐ ܠܥܵܠܲܡ.
20 ܘܢܸܫܠ̱ܡܘܼܢ ܝܵܘ̈ܡܵܬ̣ܵܐ ܕܐܸܒ̣ܠܹܟ݂ܝ.
21 ܘܟ݂ܠܹܗ ܥܲܡܹܟ݂ܝ ܙܲܕ̇ܝܼܩܵܐ ܠܥܵܠܲܡ ܢܹܐܪܬ̇ܘܼܢ ܐܲܪܥܵܐ. ܢܘܼܪܒܵܐ ܕܢܸܨܒܹ̇ܬ̣: ܥܒ̣ܵܕ݂ ܐܝܼ̈ܕܲܝ ܢܸܫܬܲܒܲܚ.
22 ܙܥܘܿܪܵܐ ܢܸܗܘܹܐ ܒܐܲܠܦܹ̈ܐ: ܘܲܒ̣ܨܝܼܪܵܐ ܒܥܲܡܵܐ ܥܲܫܝܼܢܵܐ ܐܸܢܵܐ ܡܵܪܝܵܐ ܠܙܲܒ̣ܢܹܗ ܐܸܛܪܝܼܘܗܝ.
1 ܪܘܼܚܹܗ ܕܡܵܪܝܵܐ ܐܲܠܵܗܵܐ ܥܠܲܝ. ܚܠܵܦ ܕܡܲܫܚܲܢܝ ܡܵܪܝܵܐ ܘܫܲܕܲܪܲܢܝ ܕܐܹܣܲܒܲܪ ܠܡܲܟ̇ܝܼ̈ܟܹܐ: ܘܐܸܥܨܘܿܒ̣ ܠܲܬ̣ܒ̣ܝܼܪ̈ܲܝ ܠܸܒܵܐ: ܘܐܸܩܪܹܐ ܚܹܐܪܘܼܬ̣ܵܐ ܠܲܫ̈ܒܲܝܵܐ: ܘܲܫܪܵܝܵܐ ܠܐܲܣܝܼܪܹ̈ܐ.
2 ܘܐܸܩܪܹܐ ܫܲܢ̄ܬܵܐ ܕܨܸܒ̣ܝܵܢܵܐ ܠܡܵܪܝܵܐ: ܘܝܵܘܡܵܐ ܕܦܘܼܪܩܵܢܵܐ ܠܐܲܠܵܗܲܢ: ܠܲܡܒܲܝܵܐܘܼ ܠܟ݂ܠܗܘܿܢ ܐܲܒ̣ܝܼ̈ܠܹܐ.
3 ܠܡܸܬܲܠ ܠܐܲܒ̣ܝܼ̈ܠܹܐ ܕܨܸܗܝܘܿܢ ܫܘܼܒ̣ܚܵܐ: ܚܠܵܦ ܩܸܛܡܵܐ ܡܸܫܚܵܐ ܒܲܣܝܼܡܵܐ: ܘܲܚܠܵܦ ܐܸܒ̣ܠܵܐ ܥܛܵܦܵܐ ܕܬܸܫܒ̇ܘܿܚܬܵܐ. ܘܲܚܠܵܦ ܪܘܼܚܵܐ ܡܲܟ݂ܐܲܒ̣ܬܵܐ: ܢܸܬ̣ܩܪܘܿܢ ܕܸܟ݂ܪܹ̈ܐ ܕܙܲܕ̇ܝܼܩܘܼܬ̣ܵܐ: ܢܸܨܒ̇ܬܹܗ ܕܡܵܪܝܵܐ ܡܫܲܒܲܚܬܵܐ.
4 ܘܢܸܒ̣ܢܘܿܢ ܚܲܪ̈ܒܵܬ̣ܵܐ ܕܡ̣ܢ ܥܵܠܲܡ: ܘܨܵܕ݂̈ܝܵܬ̣ܵܐ ܕܡ̣ܢ ܪܹܫܝܼܬ̣ܵܐ ܢܩܝܼܡܘܼܢ ܘܲܢܚܲܕ̇ܬ̣ܘܼܢ ܩܘܼܪ̈ܝܵܐ ܚܲܪ̈ܒܵܬ̣ܵܐ: ܘܨܵܕ݂̈ܝܵܬ̣ܵܐ ܕܕ݂ܵܪܕܵܪ̈ܝܼܢ.
5 ܘܲܢܩܘܼܡܘܼܢ ܢܘܼܟ݂ܪ̈ܵܝܹܐ: ܘܢܸܪܥܘܿܢ ܥܵܢ̈ܗܘܿܢ. ܘܲܒ̣ܢܲܝ̈ ܢܘܼܟ݂ܪ̈ܵܝܹܐ ܢܸܗܘܘܿܢ ܠܗܘܿܢ ܐܲܟܵܪܹ̈ܐ ܘܟ݂ܵܪ̈ܡܹܐ.
6 ܘܐܲܢ̄ܬ̇ܘܿܢ ܟܘܼܡܪ̈ܵܘܗܝ ܕܡܵܪܝܵܐ ܬܸܬ̣ܩܪܘܼܢ. ܘܲܡܫܲܡܫܵܢܵܘ̈ܗܝ ܕܐܲܠܵܗܲܢ ܢܸܬ̣ܐ̱ܡܲܪ ܠܟ݂ܘܿܢ. ܢܸܟ݂ܣܲܝ̈ܗܘܿܢ ܕܥܲܡܡܹ̈ܐ ܬܹܐܟ݂ܠܘܼܢ ܘܒ̣ܐܝܼܩܵܪܗܘܿܢ ܬܸܫܬܲܒ̇ܚܘܼܢ.
7 ܚܠܵܦ ܒܸܗܬ̇ܬ̣ܟ݂ܘܿܢ: ܘܲܚܠܵܦ ܚܸܦ̱ܪܟ݂ܘܿܢ: ܝܘܼܪܬܵܢܵܐ ܬܸܢܝܵܢܵܐ ܬܹܐܪܬ̇ܘܼܢ ܒܐܲܪ̱ܥܗܘܿܢ. ܘܬܸܫܬܲܒ̇ܚܘܼܢ ܒܦܵܠܓ̇ܘܼܬ̣ܗܘܿܢ. ܚܲܕ݂ܘܼܬ̣ܵܐ ܠܥܵܠܲܡ ܬܸܗܘܹܐ ܠܟ݂ܘܿܢ.
8 ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ ܕܪܵܚܹ̇ܡ ܐ̄ܢܵܐ ܕܝܼܢܵܐ. ܘܣܵܢܹ̈ܐ ܐ̄ܢܵܐ ܚܛܘܼܦܝܵܐ ܘܥܵܘܼܠܵܐ ܘܐܸܬܸ̇ܠ ܥܲܡ̱ܠܟ݂ܘܿܢ ܒܩܘܼܫܬܵܐ. ܘܲܩܝܵܡܵܐ ܕܥܵܠܲܡ ܐܲܩܝܼܡ ܠܟ݂ܘܿܢ.
9 ܘܢܸܬ̣̱ܝܼܕܲܥ ܙܲܪܥ̱ܟ݂ܘܿܢ ܒܥܲܡܡܹ̈ܐ: ܘܙܲܪܥܵܐ ܕܙܲܪܥ̱ܟ݂ܘܿܢ ܒܐܸܡ̈ܘܵܬ̣ܵܐ. ܟܠ ܚܵܙ̈ܝܵܝܟ̇ܘܿܢ ܢܸܫܬܵܘܕ̇ܥܘܼܢܵܟ݂ܘܿܢ: ܕܙܲܪܥܵܐ ܐܲܢ̄ܬ̇ܘܿܢ ܕܒܲܪܸܟ݂ ܡܵܪܝܵܐ.
10 ܡܸܬ̣ܒܲܣܵܡܘܼ ܐܸܬ̣ܒܲܣܲܡ ܒܡܵܪܝܵܐ. ܘܲܬ̇ܕ݂ܘܼܨ ܢܲܦ̮ܫܝ ܒܐܲܠܵܗܝ. ܡܸܛܠ ܕܐܲܠܒ̇ܫܲܢܝ ܠܒ̣ܘܼܫܵܐ ܕܦܘܼܪܩܵܢܵܐ: ܘܐܲܥ̣ܛܦܲܢܝ ܦܪܝܼܣܵܐ ܕܙܲܕ̇ܝܼܩܘܼܬ̣ܵܐ: ܐܲܝܟ݂ ܚܲܬ̣ܢܵܐ ܫܒ̣ܝܼܚܵܐ ܘܐܲܝܟ݂ ܟܲܠܬ̣ܵܐ ܡܨܲܒ̇ܬ̇ܬܵܐ.
11 ܘܐܲܝܟ݂ ܐܲܪܥܵܐ ܕܡܲܦܩܵܐ ܥܘܼܢܝܵܐ: ܘܐܲܝܟ݂ ܓܲܢܬ̣ܵܐ ܕܡܵܘܥܝܵܐ ܙܲܪܥܵܐ: ܗܵܟܲܢܵܐ ܢܵܘܥܸܐ ܡܵܪܝܵܐ ܐܲܠܵܗܵܐ ܙܲܕ̇ܝܼܩܘܼܬ̣ܵܐ: ܘܬܸܫܒ̇ܘܿܚܬܵܐ ܩܕ݂ܵܡ ܟܠܗܘܿܢ ܥܲܡܡܹ̈ܐ.
1 ܡܸܛܠ ܨܸܗܝܘܿܢ ܠܵܐ ܐܸܫܬ̇ܘܿܩ ܘܡܸܛܠ ܐܘܿܪܸܫܠܸܡ ܠܵܐ ܐܸܫܠܸܐ ܥܕܲܡܵܐ ܕܬܸܦܘܿܩ ܙܲܕ̇ܝܼܩܘܼܬ̣ܵܗ̇ ܐܲܝܟ݂ ܢܘܼܗܪܵܐ: ܘܦܘܼܪܩܵܢܵܗ̇ ܐܲܝܟ݂ ܠܲܡܦܹܝܕ݂ܵܐ ܢܸܕ݂ܠܲܩ.
2 ܘܢܸܚܙܘܿܢ ܥܲܡܡܹ̈ܐ ܙܲܕ̇ܝܼܩܘܼܬܹܟ݂ܝ: ܘܟ݂ܠܗܘܿܢ ܡܲܠ̈ܟܹ̇ܐ ܐܝܼܩܵܪܹܟ݂ܝ. ܘܢܸܬ̣ܩܪܸܐ ܠܹܟܝ ܫܡܵܐ ܚܲܕ݂ܬ̣ܵܐ: ܕܦܘܼܡܹܗ ܕܡܵܪܝܵܐ ܢܣܝܼܡܝܼܘܗܝ.
3 ܘܬܸܗܘܹܝܢ ܟܠܝܼܠܵܐ ܕܬܸܫܒ̇ܘܿܚܬܵܐ ܒܐܝܼܕܹܗ ܕܡܵܪܝܵܐ: ܘܬ̣ܵܓ̣ܵܐ ܕܡܲܠܟ̇ܘܼܬ̣ܵܐ ܒܐܝܼܕܹܗ ܕܐܲܠܵܗܹܟ݂ܝ.
4 ܘܬ̣ܘܼܒ̣ ܠܵܐ ܬܸܬ̣ܩܪܹܝܢ ܫܒ̣ܝܼܬܵܐ. ܘܐܲܪܥܹܟ݂ܝ ܬܘܼܒ̣ ܠܵܐ ܬܸܬ̣ܩܪܸܐ ܨܵܕ݂ܝܬ̣ܵܐ. ܐܸܠܵܐ ܬܸܬ̣ܩܪܹܝܢ ܨܸܒ̣ܝܵܢܝ: ܘܐܲܪܥܹܟ݂ܝ ܒܥܝܼܠܬܵܐ. ܡܸܛܠ ܕܲܨܒ̣ܵܐ ܒܹܟ݂ܝ ܡܵܪܝܵܐ. ܘܐܲܪܥܹܟ݂ܝ ܬܸܬ̣ܒܲܥܸܠ.
5 ܡܸܛܠ ܕܐܲܝܟ݂ ܕܒ̣ܵܥܹ̇ܠ ܓܲܕ̇ܘܼܕ݂ܵܐ ܠܲܒ̣ܬ̣ܘܼܠܬܵܐ: ܗܵܟܲܢܵܐ ܢܸܒ̣ܥ̱ܠܘܼܢܹܟ݂ܝ ܒܢܲܝ̈ܟ̇ܝ. ܘܐܲܝܟ݂ ܕܚܵܕܹ̇ܐ ܚܲܬ̣ܢܵܐ ܒܟܲܠܬ̣ܵܐ: ܢܸܚܕܸ̇ܐ ܒܹܟ݂ܝ ܐܵܠܵܗܹܟ݂ܝ.
6 ܥܲܠ ܫܘܼܪ̈ܲܝܟ̇ܝ ܐܘܿܪܸܫܠܸܡ ܐܲܩܝܼܡܹ̇ܬ̣ ܢܵܛܘܿܪܹ̈ܐ ܟܠܝܘܿܡ: ܒܐܝܼܡܵܡܵܐ ܘܲܒ̣ܠܸܠܝܵܐ ܐܲܡܝܼܢܵܐܝܼܬ̣. ܕܠܵܐ ܢܸܫܬ̇ܩܘܼܢ: ܘܠܵܐ ܢܸܫܠܘܿܢ ܡܲܕ݂ܟ̇ܪ̈ܵܢܹܝܗ̇ ܩܕ݂ܵܡ ܡܵܪܝܵܐ.
7 ܘܠܵܐ ܬܸܬ̇ܠܝܼܢ ܠܗܘܿܢ ܫܸܠܝܵܐ ܥܕܲܡܵܐ ܕܢܲܬ̣ܩܢܹܟ݂ܝ: ܘܲܥܕܲܡܵܐ ܕܢܲܥܒ̇ܕܹܟ݂ܝ ܐܘܿܪܸܫܠܸܡ ܬܸܫܒ̇ܘܼܚܬܵܐ ܒܐܲܪܥܵܐ.
8 ܝܑܼܡܵܐ ܡܵܪܝܵܐ ܒܝܲܡܝܼܢܹܗ ܘܒܲܕ݂ܪܵܥܹܗ ܥܲܫܝܼܢܵܐ: ܕܠܵܐ ܐܸܬܸ̇ܠ ܬܘܼܒ̣ ܥܒ̣ܘܼܪܹܟ݂ܝ ܡܹܐܟ݂ܘܼܠܬܵܐ ܠܲܒ̣ܥܸܠܕ̇ܒ̣ܵܒܲܝ̈ܟ̇ܝ ܘܠܵܐ ܢܸܫܬ̇ܘܿܢ ܒܢܲܝ̈ ܢܘܼܟ݂ܪ̈ܵܝܹܐ ܚܲܡܪܹܟ݂ܝ ܕܲܠܐܝܼܬ̇ܝ ܒܹܗ.
9 ܐܸܠܵܐ ܡܟܲܢܫܵܢܵܘ̈ܗܝ ܢܹܐܟ݂ܠܘܼܢܹܗ. ܘܲܢܫܲܒ̇ܚܘܼܢ ܠܡܵܪܝܵܐ. ܘܲܡܟܲܢܫܵܢܵܘ̈ܗܝ ܢܸܫܬ̇ܘܿܢܹܗ ܒܕ݂ܵܪ̈ܲܝ ܩܲܕ̇ܝܼ̈ܫܵܬ̣ܵܐ.
10 ܥܒܲܪܘ ܥܒܲܪܘ ܒܬܲܪܥܵܐ ܦܲܢܵܘ ܐܘܼܪܚܵܐ ܠܥܲܡܵܐ. ܕܪܘܿܫܘ ܫܒ̣ܝܼܠܵܐ. ܘܩܘܿܠܘ ܟܹܐܦܵܘ̈ܗܝ ܐܲܪܝܼܡܘ ܐܵܬ̤ܵܐ ܠܥܲܡܡܹ̈ܐ.
11 ܗܵܐ ܡܵܪܝܵܐ ܐܲܫ̣ܡܲܥ ܠܣܵܘ̈ܦܹܝܗ̇ ܕܐܲܪܥܵܐ. ܐܸܡܲܪܘ ܠܒܲܪܬ̣ ܨܸܗܝܘܿܢ ܕܗܵܐ ܐܵܬܹ̇ܐ ܦܵܪܘܿܩܹܟ݂ܝ. ܗܵܐ ܐܲܓ̣ܪܹܗ ܥܲܡܹܗ: ܘܲܥܒ̣ܵܕܹ̇ܗ ܩܕ݂ܵܡܵܘܗܝ.
12 ܘܢܸܩܪܘܿܢ ܐܸܢܘܿܢ ܥܲܡܵܐ ܩܲܕ̇ܝܼܫܵܐ: ܦܪ̈ܝܼܩܵܘܗܝ ܕܡܵܪܝܵܐ. ܘܐܲܢ̄ܬ̇ܝ ܬܸܬ̣ܩܪܹܝܢ ܬܒ̣ܝܼܥܬܵܐ: ܩܪܝܼܬ̣ܵܐ ܕܠܵܐ ܐܸܫܬܲܒ̣ܩܲܬ̤.
1 ܡܲܢܘܼ ܗܵܢܵܐ ܕܐܵܬܹ̇ܐ ܡ̣ܢ ܐܲܕ݂ܘܿܡ. ܘܣܘܼ̈ܡܵܩܝܼܢ ܢܲܚܬܵܘ̈ܗܝ ܡ̣ܢ ܒܘܼܨܵܪ ܘܲܗܕ݂ܝܼܪ ܒܲܠܒ̣ܘܼܫܵܘ̈ܗܝ ܘܥܲܫܝܼܢ ܒܣܘܿܓ̣ܵܐܐ ܕܚܲܝܠܹܗ. ܐܸܢܵܐ ܡܡܲܠܸܠ ܒܙܲܕ̇ܝܼܩܘܼܬ̣ܵܐ: ܘܡܲܣܓܹ̇ܐ ܠܡܸܦܪܲܩ.
2 ܠܡܵܢܵܐ ܣܘܼ̈ܡܵܩܝܼܢ ܢܲܚ̈ܬܲܝܟ ܘܲܠܒ̣ܘܼܫܲܝ̈ܟ: ܐܲܝܟ݂ ܗܵܘܿ ܕܲܥܨܲܪ ܒܡܲܥܨܲܪܬܵܐ.
3 ܡܲܥܨܲܪܬܵܐ ܕܵܫܹ̇ܬ̣ ܒܲܠܚܘܿܕܲܝ ܘܐ̄ܢܵܫ ܡ̣ܢ ܥܲܡܡܹ̈ܐ ܠܲܝܬ̇ ܗ̄ܘܼܵܐ ܥܲܡܝ. ܥܸܨܪܹܬ̣ ܐܸܢܘܿܢ ܒܪܘܼܓ̣ܙܝ ܘܕ݂ܵܫܹ̇ܬ̣ ܐܸܢܘܿܢ ܒܚܸܡܬ̣ܝ. ܘܲܢܕ݂ܵܐ ܕܸܡܗܘܿܢ ܥܲܠ ܠܒ̣ܘܼ̈ܫܲܝ ܘܟ݂ܠܗܘܿܢ ܢܲܚ̈ܬܲܝ ܦܲܠܦܠܹ̇ܬ̣.
4 ܡܸܛܠ ܕܝܵܘܡܵܐ ܕܲܬ̣ܒܲܥܬ̣ܵܐ ܒܠܒ̇ܝ. ܘܫܲܢ̄ܬܵܐ ܕܦܘܼܪܩܵܢܝ ܡܛܵܬ̤.
5 ܚܵܪܹܬ̣ ܘܠܲܝܬ̇ ܕܲܡܥܲܕܲܪ ܘܐܸܬ̇ܕܲܡ̇ܪܹܬ̣ ܘܠܲܝܬ̇ ܕܣܵܡܹ̇ܟ݂ ܘܦܲܪܩܲܢܝ ܕܪܵܥܝ ܘܚܸܡܬ̣ܵܐ ܗ̤ܝ ܣܡܲܟ݂ܬܲܢܝ.
6 ܕܵܫܹ̇ܬ̣ ܥܲܡܡܹ̈ܐ ܒܪܘܼܓ̣ܙܝ ܘܕ݂ܵܘܝܼܬ̣ ܐܸܢܘܿܢ ܒܚܸܡܬ̣ܝ ܘܐܲܚܬܹ̇ܬ̣ ܠܐܲܪܥܵܐ ܥܘܼܫ̱ܢܗܘܿܢ.
7 ܛܲܝܒ̇ܘܼܬܹܗ ܕܡܵܪܝܵܐ ܐܸܬ̇ܕ̇ܟܲܪ. ܘܬܸܫܒ̇ܘܿܚܬܹ̇ܗ ܕܡܵܪܝܵܐ ܥܲܠ ܕܟ݂ܠ ܕܦܲܪܥܲܝܢܝ ܡܵܪܝܵܐ. ܘܐܲܣܓܝܼ ܛܲܝܒ̇ܘܼܬܹܗ ܥܲܠ ܕܒܹܝܬ̣ ܝܼܣܪܵܝܹܠ ܕܦܲܪܥܲܝܢܝ ܐܲܝܟ݂ ܪ̈ܲܚܡܵܘܗܝ: ܘܐܲܝܟ݂ ܣܘܿܓ̣ܵܐܐ ܕܛܲܝܒ̇ܘܼܬܹܗ.
8 ܘܐܸܡܲܪ ܕܥܲܡܝ ܐܸܢܘܿܢ ܒ̈ܢܲܝܵܐ ܕܠܵܐ ܡܕܲܓ̇ܠܝܼܢ ܘܲܗܘ̤ܵܐ ܠܗܘܿܢ ܦܵܪܘܿܩܵܐ.
9 ܒܟ݂ܠ ܐܘܼܠܨܵܢܲܝ̈ܗܘܿܢ ܠܵܐ ܐܲܠܸܨ ܐܸܢܘܿܢ. ܘܡܲܠܲܐܟ݂ܵܐ ܕܐܲܦܵܘ̈ܗܝ ܦܪܲܩ ܐܸܢܘܿܢ. ܒܲܡܪܲܚܡܵܢܘܼܬܹܗ ܘܲܒ̣ܪܘܼܚܵܦܹܗ ܦܪܲܩ̣ ܐܸܢܘܿܢ. ܘܐܲܪܝܼܡ ܐܸܢܘܿܢ ܘܫܲܩܸܠ ܐܸܢܘܿܢ: ܟܠܗܘܿܢ ܝܵܘ̈ܡܵܬܹܗ ܕܥܵܠܡܵܐ.
10 ܘܗܸܢܘܿܢ ܡܲܪܡܲܪܘ: ܘܐܲܟ݂ܐܸܒ̣ܘ ܠܪܘܼܚܵܐ ܕܩܘܼܕ݂ܫܹܗ. ܘܲܗܦܲܟ݂ ܗܘ̤ܵܐ ܠܗܘܿܢ ܒܥܸܠܕ̇ܒ̣ܵܒ̣ܵܐ. ܘܗܘ̤ ܐܸܬ̣ܟܲܬܲܫ ܥܲܡܗܘܿܢ.
11 ܘܐܸܬ̇ܕ̇ܟܲܪ ܝܵܘ̈ܡܵܬ̣ܵܐ ܕܥܵܠܲܡ ܕܡܘܼܫܹܐ ܥܲܒ̣ܕܹ̇ܗ: ܐܲܝܟ݂ ܕܐܲܣܸܩ̣ ܡ̣ܢ ܝܲܡܵܐ ܠܪܵܥܝܵܐ ܕܥܵܢܹ̈ܗ: ܘܐܲܝܟ݂ ܕܣܵܡ̣ ܒܓ̣ܵܘܹܗ ܪܘܼܚܵܐ ܕܩܘܼܕ݂ܫܹܗ.
12 ܡܕܲܒܲܪ ܠܝܲܡܝܼܢܹܗ ܕܡܘܼܫܹܐ ܕܪܵܥܵܐ ܕܬܸܫܒ̇ܘܿܚܬܹ̇ܗ. ܬܪܲܥ̣ ܝܲܡܵܐ ܡ̣ܢ ܩܕ݂ܵܡܲܝܗܘܿܢ. ܘܲܥ̣ܒܲܕ݂ ܠܗܘܿܢ ܫܡܵܐ ܠܥܵܠܲܡ.
13 ܕܲܒܲܪ ܐܸܢܘܿܢ ܒܲܬ̣ܗܘܿܡܵܐ ܐܲܝܟ݂ ܣܘܼܣܝܵܐ ܒܡܲܕ݂ܒ̇ܪܵܐ. ܘܠܵܐ ܐܸܬ̇ܬ̇ܩܸܠܘ.
14 ܐܲܝܟ݂ ܒܥܝܼܪܵܐ ܕܢܵܚܬܵܐ ܒܲܦܩܲܥܬ̣ܵܐ: ܪܘܼܚܹܗ ܕܡܵܪܝܵܐ ܕܲܒ̇ܪܲܬ̤ ܐܸܢܘܿܢ. ܗܵܟܲܢܵܐ ܕܲܒܲܪܬ̇ ܐܸܢܘܿܢ ܠܥܲܡܵܟ݂: ܘܲܥܒܲܕ̇ܬ̇ ܠܵܟ݂ ܫܡܵܐ ܡܫܲܒ̇ܚܵܐ.
15 ܚܘܼܪ ܡ̣ܢ ܫܡܲܝܵܐ. ܘܲܚܙܝܼ ܡ̣ܢ ܡܸܕ݂ܝܵܪܵܟ݂ ܩܲܕ̇ܝܼܫܵܐ ܘܲܡܫܲܒ̇ܚܵܐ ܐܲܝܟܵܘ ܛܢܵܢܵܟ݂ ܘܓܲܢ̄ܒܵܪܘܼܬ̣ܵܟ݂: ܘܗܘܼܦܵܟ݂ܵܐ ܕܲܡܥܲܝ̈ܟ ܘܲܕ݂ܪ̈ܵܚܡܲܝܟ ܕܐܸܬ̣ܗ̱ܦܸܟ݂ܘ ܥܠܲܝܢ.
16 ܡܸܛܠ ܕܐܲܢ̄ܬ̇ܘܼ ܐܲܒ̣ܘܼܢ. ܐܲܒ̣ܪܵܗܵܡ ܠܵܐ ܝܼܕܲܥ̄ܢ ܘܝܼܣܪܵܝܹܠ ܠܵܐ ܐܸܫܬܵܘܕ̇ܥ̄ܢ ܘܐܲܢ̄ܬ̇ܘܼ ܡܵܪܝܵܐ ܐܲܒ̣ܘܼܢ ܦܵܪܘܿܩܲܢ ܘܡ̣ܢ ܥܵܠܲܡ ܫܡܵܟ݂.
17 ܠܡܵܢܵܐ ܐܲܛܥ̣ܝܼܬܵܢ ܡܵܪܝܵܐ ܡ̣ܢ ܐܘܼܪܚܵܟ݂. ܘܩܲܫܝܼܬ̇ ܠܸܒܲܢ ܡ̣ܢ ܕܸܚܠܬ̣ܵܟ݂. ܐܸܬ̣ܦܲܢܝ ܡܸܛܠ ܥܲܒ̣ܕܲܝ̈ܟ ܫܲܒ̣ܛܵܐ ܕܝܵܪܬ̇ܘܼܬ̣ܵܟ݂.
18 ܩܲܠܝܼܠ ܢܹܐܪܲܬ̣ ܥܲܡܵܐ ܕܩܘܼܕ݂ܫܵܟ݂. ܐܵܠܘܿܨܲܝ̈ܢ ܕܵܫܘ ܡܲܩܕ̇ܫܵܟ݂.
19 ܗ̤ܘܲܝܢ ܡ̣ܢ ܥܵܠܲܡ: ܥܲܕ݂ܠܵܐ ܐܸܫܬܲܠܲܛܬ̇ ܥܠܲܝܗܘܿܢ. ܘܠܵܐ ܐܸܬ̣ܩܪܝܼ ܫܡܵܟ݂ ܥܠܲܝܗܘܿܢ.
1 ܠܵܐ ܦ̣ܬܲܚܬ̇ ܫܡܲܝܵܐ ܘܲܢܚܸܬ̇ܬ̇ ܘܡܢ ܩܕ݂ܵܡܲܝܟ ܕܵܠܘܼ ܛܘܼܪܹ̈ܐ. ܘܐܸܬ̣ܦܲܫܲܪܘ ܐܲܝܟ݂ ܕܡܸܬ̣ܦܲܫܪܵܐ ܫܥܘܿܬ̣ܵܐ ܡ̣ܢ ܩܕ݂ܵܡ ܢܘܼܪܵܐ.
2 ܘܬ̣ܵܘܩܸܕ݂ ܢܘܼܪܵܐ ܠܲܒ̣ܥܸܠܕ̇ܒ̣ܵܒܲܝ̈ܟ. ܘܢܸܬ̣̱ܝܼܕܲܥ ܫܡܵܟ݂ ܠܲܒ̣ܥܸܠܕ̇ܒ̣ܵܒܲܝ̈ܟ. ܘܢܸܬ̇ܕܲܠܚܘܼܢ ܥܲܡܡܹ̈ܐ ܡ̣ܢ ܩܕ݂ܵܡܲܝܟ.
3 ܟܲܕ݂ ܥ̣ܒܲܕ̇ܬ̇ ܕܚܝܼ̈ܠܵܬ̣ܵܐ ܕܠܵܐ ܣܲܟ̇ܝܼܢ ܠܵܟ݂: ܢܚܸܬ̇ܬ̇: ܘܡ̣ܢ ܩܕ݂ܵܡܲܝܟ ܕܵܠܘܼ ܛܘܼܪܹ̈ܐ.
4 ܡ̣ܢ ܥܵܠܲܡ ܠܵܐ ܨܵܬ̣ܘ ܘܠܵܐ ܫܡܲܥܘ ܘܥܹܝܢ ܠܵܐ ܚܙܵܬ̤ ܐܲܠܵܗ ܠܒܲܪ ܡܸܢܵܟ݂. ܕܥܵܒܹ̇ܕ݂ ܐܲܢ̄ܬ̇ ܠܐܲܝܠܹܝܢ ܕܲܡܣܲܟܹ̇ܝܢ ܠܵܟ݂.
5 ܘܦܵܓܲܥ ܐܲܢ̄ܬ̇ ܒܒ̣ܘܼܣܵܡܵܐ ܒܐܲܝܠܹܝܢ ܕܥܵܒ̣ܕ̇ܝܼܢ ܙܲܕ̇ܝܼܩܘܼܬ̣ܵܐ ܒܐܘܼܪ̈ܚܵܬ̣ܵܟ݂ ܢܸܬ̇ܕܲܟ݂ܪܘܼܢܵܟ݂. ܗܵܐ ܐܲܢ̄ܬ̇ ܪܓܸܙܬ̇ ܘܲܚܛܲܝܢ ܒܗܹܝܢ. ܒܥܵܠܲܡ ܢܸܬ̣ܦܪܸܩ.
6 ܕܲܗ̤ܘܲܝܢ ܐܲܝܟ݂ ܛܲܡܹ̈ܐܐ ܟܠܲܢ. ܘܐܲܝܟ݂ ܐܘܼܪܩܲܥܬ̣ܵܐ ܕܟܸܦ̮ܣܵܢܝܼܬ̣ܵܐ ܟܠܵܗ̇ ܙܲܕ̇ܝܼܩܘܼܬܲܢ. ܢܬܲܪܢ ܐܲܝܟ݂ ܛܲܪ̈ܦܹܐ ܟܠܲܢ. ܘܐܲܝܟ݂ ܥܲܠܥܵܠܵܐ ܫܲܩ̣ܠܘܿܢ ܚܛܵܗܲܝ̈ܢ.
7 ܘܠܲܝܬ̇ ܕܩܵܪܹܐ ܒܲܫܡܵܟ݂: ܘܲܕ݂ܥܵܗܹ̇ܕ݂ ܠܲܡܚܲܡܣܵܢܘܼ ܒܵܟ݂. ܡܸܛܠ ܕܐܲܗ̣ܦܸܟ݂ܬ̇ ܐܲܦܲܝ̈ܟ ܡܸܢܲܢ: ܘܐܲܫܠܸܡ̣ܬܵܢ ܒܝܲܕ݂ ܚܛܵܗܲܝ̈ܢ.
8 ܗܵܫܵܐ ܡܵܪܝܵܐ ܐܲܒ̣ܘܼܢ ܐܲܢ̄ܬ̇ ܚܢܲܢ ܛܝܼܢܵܐ: ܘܐܲܢ̄ܬ̇ ܓܵܒ̣ܘܿܠܲܢ ܘܲܥܒ̣ܵܕ݂ ܐܝܼܕܲܝ̈ܟ ܚܢܲܢ ܟܠܲܢ.
9 ܠܵܐ ܬܸܪܓܲܙ ܡܵܪܝܵܐ ܛܵܒ̣ ܠܥܵܠܲܡ. ܘܠܵܐ ܬܸܬ̇ܕ̇ܟܲܪ ܠܥܵܠܲܡ ܚܛܵܗܲܝ̈ܢ ܚܙܝܼ ܕܥܲܡܵܟ݂ ܚܢܲܢ ܟܠܲܢ.
10 ܩܘܼܪ̈ܝܵܐ ܕܩܘܼܕ݂ܫܵܟ݂ ܗ̤ܘܲܝ̈ ܡܲܕ݂ܒ̇ܪܵܐ. ܘܨܸܗܝܘܿܢ ܗܘ̤ܵܬ̣ ܡܲܕ݂ܒ̇ܪܵܐ: ܘܐܘܿܪܸܫܠܸܡ ܚܲܪܒ̇ܬ̣ܵܐ.
11 ܒܹܝܬ̣ ܩܘܼܕ݂ܫܲܢ ܘܬܸܫܒ̇ܘܿܚܬܲܢ: ܕܫܲܒ̇ܚܘܼܟ݂ ܐܲܒ̣ܵܗܲܝ̈ܢ: ܗܘ̤ܵܐ ܠܝܲܩܕܵܢܵܐ ܕܢܘܼܪܵܐ. ܘܟ݂ܠܵܗ̇ ܪܸܓ̇ܬܲܢ ܗܘ̤ܵܬ̣ ܠܚܘܼܪܒܵܐ.
12 ܥܲܠ ܗܵܠܹܝܢ ܚܲܡ̣ܣܸܢܬ̇ ܡܵܪܝܵܐ. ܘܲܫܬܸܩܬ̇ ܘܡܲܟܸ̇ܟ݂ܬܵܢ ܛܵܒ̣.
1 ܐܸܬ̣ܒ̇ܥܝܼܬ̣ ܠܐܲܝܠܹܝܢ ܕܠܵܐ ܫܲܐܠܘܼܢܝ ܘܐܸܫܬܲܟ݂ܚܹ̇ܬ̣ ܠܐܲܝܠܹܝܢ ܕܠܵܐ ܒܥܵܐܘܼܢܝ. ܐܸܡ̇ܪܹܬ̣ ܗܵܐ ܐܸܢܵܐ: ܠܥܲܡܵܐ ܕܠܵܐ ܩܪܵܐ ܫܹܡܝ.
2 ܦܸܫܛܹ̇ܬ̣ ܐܝܼ̈ܕܲܝ ܝܵܘܡܵܐ ܟܠܹܗ: ܥܲܠ ܥܲܡܵܐ ܕܠܵܐ ܡܸܬ̇ܛܦܝܼܣ: ܕܲܡܗܲܠܟ݂ܝܼܢ ܒܵܬܲܪ ܬܲܪ̈ܥܝܼܬ̣ܗܘܿܢ: ܒܐܘܼܪܚܵܐ ܕܠܵܐ ܫܲܦܝܼܪܵܐ.
3 ܥܲܡܵܐ ܕܡܲܪܓ̇ܙܝܼܢ ܠܝܼ ܐܲܡܝܼܢܵܐܝܼܬ̣: ܕܕ݂ܵܒ̣ܚܝܼܢ ܒܓܲܢܹ̈ܐ: ܘܣܵܝܡܝܼܢ ܒܸܣܡܹ̈ܐ ܥܲܠ ܐܲܒ̣ܢܹ̈ܐ.
4 ܘܝܵܬ̣ܒ̇ܝܼܢ ܒܩܲܒ̣ܪܹ̈ܐ: ܘܒ̣ܵܝܬ̇ܝܼܢ ܒܲܡܥܲܪܹ̈ܐ. ܘܐܵܟ݂ܠܝܼܢ ܒܸܣܪܵܐ ܕܲܚܙܝܼܪܵܐ. ܘܲܡܛܵܘܫܝܼܢ ܒܲܫ̈ܠܲܕܹ̇ܐ ܡܵܐܢܲܝ̈ܗܘܿܢ.
5 ܘܐܵܡ̇ܪܝܼܢ ܦܪܘܿܩ ܠܗܲܠ: ܠܵܐ ܬܸܬ̣ܩܲܪܲܒ̣ ܠܝܼ ܡܸܛܠ ܕܲܡܩܲܕܲܫ ܐ̄ܢܵܐ ܗܵܠܹܝܢ ܗ̤ܘܲܝ̈ ܬܸܢܵܢܵܐ ܒܪܘܼܓ̣ܙܝ: ܘܢܘܼܪܵܐ ܕܝܵܩܕܵܐ ܒܟ݂ܠܝܘܿܡ.
6 ܗܵܐ ܟܬ̣ܝܼܒ̣ܵܐ ܩܕ݂ܵܡܲܝ. ܠܵܐ ܐܸܫܬ̇ܘܿܩ: ܥܕܲܡܵܐ ܕܐܸܦܪܘܿܩ ܐܸܢܘܿܢ ܐܲܥܦܵܐ ܒܥܘܼܒ̇ܗܘܿܢ.
7 ܚܛܵܗܲܝ̈ܗܘܿܢ ܘܲܚܛܵܗܹ̈ܐ ܕܐܲܒ̣ܵܗܲܝ̈ܗܘܿܢ: ܚܲܫ ܩܒ̣ܘܿܠ ܐܸܢܘܿܢ: ܐܵܡܲܪ ܡܵܪܝܵܐ. ܕܣܵܡ̣ܘ ܒܸܣܡܹ̈ܐ ܥܲܠ ܛܘܼܪܹ̈ܐ. ܘܥܲܠ ܪ̈ܵܡܵܬ̣ܵܐ ܚܲܣܕ݂ܘܢܝ ܐܸܡܫܘܿܚ ܥܒ̣ܵܕܲܝ̈ܗܘܿܢ ܠܘܼܩܕܲܡ ܒܥܘܼܒ̇ܗܘܿܢ.
8 ܗܵܟܲܢܵܐ ܐܵܡܲܪ ܡܵܪܝܵܐ: ܐܲܝܟ݂ ܕܡܸܫܬܲܟ݂ܚܵܐ ܛܘܿܛܝܼܬ̣ܵܐ ܒܲܣܓ̣ܘܼܠܵܐ: ܘܐܵܡܲܪ ܐ̄ܢܵܫ ܠܚܲܒ̣ܪܹܗ: ܠܵܐ ܬܚܲܒ̇ܠܝܼܘܗܝ: ܡܸܛܠ ܕܒ̣ܘܼܪܟ̇ܬ̣ܵܐ ܐܝܼܬ̣ ܒܹܗ. ܗܵܟܲܢܵܐ ܐܸܥܒܸ̇ܕ݂ ܡܸܛܠ ܥܲܒ̣ܕܲܝ̈: ܘܠܵܐ ܐܹܚܲܒܲܠ ܠܟ݂ܠܗܘܿܢ.
9 ܘܐܲܦܸܩ ܙܲܪܥܵܐ ܡ̣ܢ ܝܲܥܩܘܿܒ̣: ܘܡ̣ܢ ܝܼܗܘܼܕ݂ܵܐ ܝܵܪܬܵܐ ܕܛܘܼܪܝ ܘܢܹܐܪܬ̇ܘܼܢܹܗ ܓܒܲܝ̈. ܘܥܲܒ̣ܕܲܝ̈ ܢܸܥܡܪܘܼܢ ܬܲܡܵܢ.
10 ܘܢܸܗܘܹܐ ܫܵܪܘܿܢܵܐ ܕܲܝܪܵܐ ܠܥܵـ̈ـܢܵܐ. ܘܥܘܼܡܩܵܐ ܕܥܵܟ݂ܵܪ ܠܡܲܪܒܵܥܵܐ ܕܒܲܩܪܹ̈ܐ ܠܥܲܡܝ ܕܲܒ̣ܥܵܐܘܼܢܝ.
11 ܘܐܲܢ̄ܬ̇ܘܼ ܕܲܫܒܲܩܬ̇ܘܼܢ ܠܡܵܪܝܵܐ: ܘܲܛ̣ܥܲܝܬ̇ܘܿܢ ܠܛܘܼܪܹܗ ܩܲܕ̇ܝܼܫܵܐ. ܘܲܡ̣ܠܲܝܬ̇ܘܿܢ ܦܵܬ̣ܘܿܪܹ̈ܐ ܠܓܲـ̈ـܕܹ̇ܐ: ܘܲܡ̣ܙܲܓ̣ܬ̇ܘܿܢ ܠܗܘܿܢ ܐܲܓܵܢܹ̈ܐ.
12 ܐܸܡܚܹܟ݂ܘܿܢ ܒܚܲܪܒܵܐ. ܘܟ݂ܠܟ݂ܘܿܢ ܒܩܸܛܠܵܐ ܐܸܬ̣ܒܲܪܟ݂ܘܿܢ. ܥܲܠ ܕܲܩܪܹܝܬ̣ܟ݂ܘܿܢ ܘܠܵܐ ܥ̣ܢܲܝܬ̇ܘܿܢ. ܘܡܲܠܠܹܬ̣ ܘܠܵܐ ܫ̣ܡܲܥܬ̇ܘܿܢ. ܘܲܥܒܲܕܬ̇ܘܿܢ ܕܒ̣ܝܼܫ ܩܕ݂ܵܡܲܝ ܘܲܓܒܲܝܬ̇ܘܿܢ ܡܸܕܸ̇ܡ ܕܠܵܐ ܨܵܒܹ̇ܐ ܐ̄ܢܵܐ.
13 ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ. ܗܵܐ ܥܲܒ̣ܕܲܝ̈ ܢܹܐܟ݂ܠܘܼܢ: ܘܐܲܢ̄ܬ̇ܘܿܢ ܬܸܟ݂ܦܢܘܼܢ ܗܵܐ ܥܲܒ̣ܕܲܝ̈ ܢܸܫܬ̇ܘܿܢ: ܘܐܲܢ̄ܬ̇ܘܿܢ ܬܸܨܗܘܿܢ ܗܵܐ ܥܲܒ̣ܕܲܝ̈ ܢܸܚܕ̇ܘܿܢ: ܘܐܲܢ̄ܬ̇ܘܿܢ ܬܸܒ̣ܟ̇ܘܿܢ.
14 ܗܵܐ ܥܲܒ̣ܕܲܝ̈ ܢܫܲܒ̇ܚܘܼܢ ܡ̣ܢ ܛܵܒ̣ܵـ̈ـܬ̣ܵܐ ܕܠܸܒ̇ܗܘܿܢ: ܘܐܲܢ̄ܬ̇ܘܿܢ ܬܒܲܓ̇ܢܘܿܢ ܡ̣ܢ ܟܹܐܒܹܗ ܕܠܸܒ̇ܟ݂ܘܿܢ: ܘܡ̣ܢ ܬܒ̣ܵܪܵܗ̇ ܕܪܘܼܚܟ݂ܘܿܢ.
15 ܘܬܸܫܒ̇ܩܘܼܢ ܫܸܡܟ݂ܘܿܢ ܡܵܘ̈ܡܵܬ̣ܵܐ ܠܲܓ̣ܒܲܝ̈ ܘܲܢܡܝܼܬ̣ܵܟ݂ ܡܵܪܝܵܐ ܐܲܠܵܗܵܐ ܘܲܠܥܲܒ̣ܕܵܘ̈ܗܝ ܢܸܩܪܸܐ ܫܡܵܐ ܐ̄ܚܪܹܢܵܐ.
16 ܕܡܸܬ̣ܒܲܪܲܟ݂ ܒܐܲܪܥܵܐ: ܡܸܬ̣ܒܲܪܲܟ݂ ܒܐܲܠܵܗܵܐ ܐܵܡܹܝܢ. ܘܲܕ݂ܝܵܡܹ̇ܐ ܒܐܲܪܥܵܐ: ܝܵܡܹ̇ܐ ܒܐܲܠܵܗܵܐ ܐܵܡܹܝܢ. ܡܸܛܠ ܕܢܸܬ̇ܛܲܥ̈ܝܵܢ ܥܵܩܵـ̈ـܬ̣ܵܐ ܩܲܕ݂ܡܵـ̈ـܝܵܬ̣ܵܐ: ܘܢܸܬ̣ܟܲܣ̈ܝܵܢ ܡ̣ܢ ܩܕ݂ܵܡܲܝ.
17 ܡܸܛܠ ܕܗܵܐ ܐܸܢܵܐ ܒܵܪܹܐ ܐ̄ܢܵܐ ܫܡܲܝܵܐ ܚܲܕ݂ܬܹ̈ܐ ܘܐܲܪܥܵܐ ܚܕܲܬܵܐ. ܘܠܵܐ ܢܸܬ̇ܕܲܟ݂ܪܘܼܢ ܩܲܕ݂ܡܵـ̈ـܝܵܬ̣ܵܐ. ܘܠܵܐ ܢܸܣ̈ܩܵܢ ܥܲܠ ܠܸܒܵܐ.
18 ܐܸܠܵܐ ܢܸܚܕ̇ܘܿܢ ܘܲܢܕ݂ܘܼܨܘܼܢ ܠܥܵܠܲܡ ܥܵܠܡܝܼܢ ܕܒ̣ܵܪܹܐ ܐ̄ܢܵܐ. ܡܸܛܠ ܕܗܵܐ ܒܵܪܹܐ ܐ̄ܢܵܐ ܠܐܘܿܪܸܫܠܸܡ ܕܝܵܨܵܐ: ܘܒ̣ܵܗ̇ ܐܸܚܕܹ̇ܐ.
19 ܘܐܸܚܕܹ̇ܐ ܒܐܘܿܪܸܫܠܸܡ: ܘܐܹܕ̇ܘܼܨ ܒܥܲܡܝ. ܘܬ̣ܘܼܒ̣ ܠܵܐ ܢܸܫܬ̇ܡܲܥ ܒܵܗ̇ ܩܵܠܵܐ ܕܲܒ̣ܟ݂ܵܬ̣ܵܐ: ܘܩܵܠܵܐ ܕܝܼܠܲܠܬܵܐ.
20 ܘܬ̣ܘܼܒ̣ ܠܵܐ ܢܸܗܘܹܐ ܬܲܡܵܢ ܛܠܸܐ ܝܵܘ̈ܡܵܬ̣ܵܐ: ܘܣܵܒ̣ܵܐ ܕܠܵܐ ܢܡܲܠܸܐ ܝܵܘ̈ܡܵܬܹܗ. ܡܸܛܠ ܕܛܲܠܝܵܐ ܒܲܪ ܡܵܐܐ ܫܢ̈ܝܼܢ ܢܡܘܼܬ̣. ܘܐܲܝܢܵܐ ܕܚܵܛܹ̇ܐ ܒܲܪ ܡܵܐܐ ܫܢ̈ܝܼܢ: ܢܸܬ̇ܬ̇ܠܝܼܛ.
21 ܘܢܸܒ̣ܢܘܿܢ ܒܵـ̈ـܬܹ̇ܐ: ܘܢܸܬ̇ܒ̣ܘܼܢ ܘܢܸܨܒ̣ܘܼܢ ܟܲܪ̈ܡܹܐ ܘܢܹܐܟ݂ܠܘܼܢ ܦܹܐܪ̈ܲܝܗܘܿܢ.
22 ܠܵܐ ܢܸܒ̣ܢܘܿܢ: ܘܲܐ̄ܚܪ̈ܵܢܹܐ ܢܸܬ̇ܒ̣ܘܼܢ ܘܠܵܐ ܢܸܨܒ̣ܘܼܢ: ܘܲܐ̄ܚܪ̈ܵܢܹܐ ܢܹܐܟ݂ܠܘܼܢ. ܡܸܛܠ ܕܝܵܘ̈ܡܵܬܹܗ ܕܥܲܡܝ ܐܲܝܟ݂ ܝܵܘ̈ܡܵܬ̣ܵܐ ܐܸܢܘܿܢ ܕܐܝܼܠܵܢܹ̈ܐ. ܘܲܥܒ̣ܵܕ݂ ܐܝܼܕܲܝ̈ܗܘܿܢ ܢܹܐܟ݂ܠܘܼܢ ܓܒܲܝ̈.
23 ܠܵܐ ܢܸܠܐܘܿܢ ܠܲܣܪܝܼܩܘܼܬ̣ܵܐ: ܘܠܵܐ ܢܵܘܠܕ݂ܘܼܢ ܠܠܵܘܛܬ̣ܵܐ: ܡܸܛܠ ܕܙܲܪܥܵܐ ܐܸܢܘܿܢ ܒܪܝܼܟܹܗ ܕܡܵܪܝܵܐ: ܗܸܢܘܿܢ ܘܲܒ̣ܢܲܝ̈ܗܘܿܢ ܥܲܡܗܘܿܢ.
24 ܘܥܲܕ݂ܠܵܐ ܢܸܩܪܘܿܢ: ܐܸܥܢܸܐ ܐܸܢܘܿܢ ܘܥܲܕ݂ܠܵܐ ܢܡܲܠܠܘܼܢ: ܐܸܫܡܲܥ ܐܸܢܘܿܢ.
25 ܕܸܐܒ̣ܵܐ ܘܐܸܡܪܵܐ ܐܲܟ݂ܚ̄ܕ݂ܵܐ ܢܸܪܥܘܿܢ. ܘܐܲܪܝܵܐ ܐܲܝܟ݂ ܬܵܘܪܵܐ ܢܹܐܟ݂ܘܿܠ ܬܸܒ̣ܢܵܐ. ܘܚܸܘܝܵܐ ܥܲܦܪܵܐ ܠܲܚܡܹܗ: ܘܠܵܐ ܢܲܒ̣ܐ̱ܫܘܼܢ ܘܠܵܐ ܢܚܲܒ̇ܠܘܼܢ ܒܟ݂ܠܹܗ ܛܘܼܪܵܐ ܕܩܘܼܕ݂ܫܝ ܐܵܡܲܪ ܡܵܪܝܵܐ.
1 ܗܵܟܲܢܵܐ ܐܵܡܲܪ ܡܵܪܝܵܐ: ܫܡܲܝܵܐ ܟܘܼܪܣܲܝ: ܘܐܲܪܥܵܐ ܟܘܼܒ̣ܫܵܐ ܕܪܸ̈ܓ̣ܠܲܝ: ܐܲܝܢܵܘ ܒܵܝܬܵܐ ܕܒ̣ܵܢܹ̇ܝܢ ܐ̄ܢܬ̇ܘܿܢ ܠܝܼ: ܐܵܘ ܐܲܝܢܵܘ ܐܲܬ̣ܪܐ ܕܲܢܝܵܚܬ̇ܝ.
2 ܗܵܠܹܝܢ ܟܠܗܹܝܢ ܐܝܼܕ݂ܝ ܥܸܒ̣ܕܲܬ̤: ܘܕ݂ܝܼܠܝ ܐܸܢܹܝܢ ܗܵܠܹܝܢ ܟܠܗܹܝܢ ܐܵܡܲܪ ܡܵܪܝܵܐ. ܘܲܒ̣ܡܲܢ ܐܹܚܘܼܪ ܘܐܸܥܡܲܪ: ܐܸܠܵܐ ܒܢܝܼܚܵܐ ܘܲܒ̣ܡܲܟ̇ܝܼܟ݂ ܪܘܼܚܵܐ ܕܐܵܙܲܥ ܡ̣ܢ ܡܸܠܲܬ̣ܝ.
3 ܕܢܵܟܹ̇ܣ ܬܵܘܪܵܐ ܐܲܝܟ݂ ܗܵܘܿ ܕܩܵܛܹ̇ܠ ܓܲܒ̣ܪܵܐ: ܕܕ݂ܵܒܲܚ̇ ܐܸܡܪܵܐ ܐܲܝܟ݂ ܗܵܘܿ ܕܩܵܛܹ̇ܠ ܟܲܠܒܵܐ: ܕܲܡܩܲܪܸܒ̣ ܣܡܝܼܕ݂ܵܐ ܐܲܝܟ݂ ܕܡܵܐ ܕܲܚܙܝܼܪܵܐ: ܕܲܡܩܲܪܸܒ̣ ܠܒ̣ܘܿܢ̄ܬܵܐ ܐܲܝܟ݂ ܗܵܘܿ ܕܲܡܒܲܪܸܟ݂ ܠܲܦܬܲܟ݂ܪܹ̈ܐ: ܐܵܦ ܗܸܢܘܿܢ ܐܸܬ̣ܪܲܥܝܼܘ ܒܐܘܼܪ̈ܚܵܬ̣ܗܘܿܢ: ܘܲܨܒ̣ܵܬ̤ ܢܲܦ̮ܫܗܘܿܢ ܒܲܦܬܲܟ݂ܪ̈ܲܝܗܘܿܢ.
4 ܐܵܦ ܐܸܢܵܐ ܐܸܨܒܹ̇ܐ ܒܒ̣ܘܼܙܵܚܗܘܿܢ: ܘܐܸܦܪܘܿܥ ܐܸܢܘܿܢ ܥܒ̣ܵܕܲܝ̈ܗܘܿܢ: ܥܲܠ ܕܲܩܪܹܝܬ̣ ܘܠܲܝܬ̇ ܕܥܵܢܹ̇ܐ: ܘܡܲܠܠܹܬ̣ ܘܠܵܐ ܫܡܲܥ̣ܘ: ܘܲܥܒܲܕ݂ܘ ܕܒ̣ܝܼܫ ܩܕ݂ܵܡܲܝ: ܘܲܓ̣ܒ̣ܵܘ ܡܸܕܸ̇ܡ ܕܠܵܐ ܨܒܹ̇ܝܬ̣.
5 ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ ܐܲܝܠܹܝܢ ܕܙܵܝܥܝܼܢ ܡ̣ܢ ܡܸܠܬܹܗ. ܐܸܡܲܪܘ ܠܐܲܚܲܝ̈ܟ̇ܘܿܢ ܣܵܢܐܲܝ̈ܟ̇ܘܿܢ ܡܲܣ̱ܠܝܵܢܲܝ̈ܟ̇ܘܿܢ ܡܸܛܠ ܫܹܡܝ. ܢܸܫܬܲܒܲܚ ܡܵܪܝܵܐ ܘܢܸܚܕܹ̇ܐ ܒܚܲܕ݂ܘܼܬ̣ܟ݂ܘܿܢ: ܘܗܸܢ̣ܘܿܢ ܢܸܒ̣ܗ̱ܬ̣ܘܼܢ.
6 ܩܵܠܵܐ ܕܲܕ݂ܠܘܼܚܝܵܐ ܡ̣ܢ ܩܪܝܼܬ̣ܵܐ: ܘܩܵܠܵܐ ܡ̣ܢ ܗܲܝܟ̇ܠܵܐ: ܩܵܠܹܗ ܕܡܵܪܝܵܐ ܕܦܵܪܲܥ ܦܘܼܪܥܵܢܵܐ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ.
7 ܥܲܕ݂ܠܵܐ ܬܚܲܒܸ̇ܠ ܕܝܵܠܕܵܐ: ܘܥܲܕ݂ܠܵܐ ܢܸܡܛܘܿܢ ܚܸܒ̣̈ܠܹܝܗ̇ ܘܬܸܦܠܲܛ ܕܸܟ݂ܪܵܐ.
8 ܡܲܢ ܫ̣ܡܲܥ ܐܲܝܟ݂ ܗܵܕܹܐ: ܘܡܲܢ ܚ̣ܙܵܐ ܐܲܝܟ݂ ܗܵܠܹܝܢ: ܕܲܡܚܲܒ̇ܠܵܐ ܐܲܪܥܵܐ ܒܝܵܘܡܵܐ ܚܕ݂: ܘܡܸܬ̣̱ܝܼܠܸܕ݂ ܥܲܡܵܐ ܒܫܵܥܬ̣ܵܐ ܚܕ݂ܵܐ: ܡܸܛܠ ܕܚܲܒ̇ܠܲܬ̤ ܘܝܸܠܕܲܬ̣ ܨܸܗܝܘܿܢ ܠܲܒ̣ܢܹ̈ܝܗ̇.
9 ܐܸܢܵܐ ܝܸܗ̄ܒܹ̇ܬ̣ ܣܘܼܟܵܝܵܐ ܗܵܢܵܐ: ܘܠܵܐ ܡܵܘܠܸܕ݂ ܐ̄ܢܵܐ ܐܵܡܲܪ ܡܵܪܝܵܐ ܕܲܠܡܵܐ ܠܵܐ ܗ̄ܘܼܵܐ ܐܸܢܵܐ ܡܵܘܠܸܕ݂ ܐ̄ܢܵܐ ܘܟ݂ܵܠܹ̇ܐ ܐ̄ܢܵܐ ܐܵܡܲܪ ܐܲܠܵܗܹܟ݂ܝ.
10 ܚܕ݂ܵܘ ܒܐܘܿܪܸܫܠܸܡ ܘܕ݂ܘܼܨܘ ܒܵܗ̇ ܟܠ ܪ̈ܵܚܡܹܝܗ̇. ܐܸܬ̣ܒܲܣܲܡܘ ܥܲܡܵܗ̇ ܒܒ̣ܘܼܣܵܡܵܐ ܟܠ ܕܲܗܘ̤ܵܘ ܒܐܸܒ̣ܠܵܐ ܥܠܹܝܗ̇.
11 ܘܬܹܐܢܩܘܼܢ ܘܬܸܣܒ̇ܠܘܼܢ ܡ̣ܢ ܬܕ݂ܵܐ ܕܒ̣ܘܼܝܵܐܵܗ̇: ܘܬܹܐܢܩܘܼܢ ܘܬܸܬ̣ܦܲܢܩܘܼܢ ܡ̣ܢ ܥܘܼܫܢܵܐ ܕܐܝܼܩܵܪܵܗ̇.
12 ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ: ܕܗܵܐ ܪܵܡܹ̇ܐ ܐ̄ܢܵܐ ܥܠܹܝܗ̇ ܫܠܵܡܵܐ ܐܲܝܟ݂ ܢܲܗܪܵܐ: ܘܐܲܝܟ݂ ܢܲܚܠܵܐ ܕܓ̣ܵܪܹܦ. ܘܐܝܼܩܵܪܵܐ ܕܥܲܡܡܹ̈ܐ ܬܹܐܢܩܘܼܢ: ܘܥܲܠ ܦܸܪ̈ܝܵܘܵܬ̣ܵܐ ܬܸܫܬܲܩܠܘܼܢ: ܘܥܲܠ ܒܘܼܪ̈ܟܹ̇ܐ ܬܸܬ̣ܪܲܒ̇ܘܿܢ.
13 ܐܲܝܟ݂ ܓܲܒ̣ܪܵܐ ܕܲܡܒܲܝܐܵܐ ܠܹܗ ܐܸܡܹܗ: ܗܵܟܲܢܵܐ ܐܸܢܵܐ ܐܹܒܲܝܲܐܟ݂ܘܿܢ: ܘܒ̣ܐܘܿܪܸܫܠܸܡ ܬܸܬ̣ܒܲܝܐܘܼܢ.
14 ܘܬܸܚܙܘܿܢ ܘܢܸܚܕܹ̇ܐ ܠܸܒ̇ܟ݂ܘܿܢ: ܘܓܲܪ̈ܡܲܝܟ̇ܘܿܢ ܐܲܝܟ݂ ܬܸܕ݂ܐܵܐ ܢܸܪܘ̱ܙܘܼܢ. ܘܬܸܬ̣̱ܝܼܕܲܥ ܐܝܼܕܹܗ ܕܡܵܪܝܵܐ ܥܲܠ ܥܲܒ̣ܕܵܘ̈ܗܝ: ܘܬ̣ܵܘܒܸ̇ܕ݂ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ.
15 ܡܸܛܠ ܕܗܵܐ ܡܵܪܝܵܐ ܒܢܘܼܪܵܐ ܐܵܬܹ̇ܐ: ܘܐܲܝܟ݂ ܥܲܠܥܵܠܵܐ ܡܲܪܟܲܒ̣ܬܹܗ. ܕܢܸܗܦܘܿܟ݂ ܒܚܸܡܬ̣ܵܐ ܕܪܘܼܓ̣ܙܹܗ. ܘܲܟ݂ܐܵܬܹܗ ܫܲܠܗܹܒ̣ܝܼܬ̣ܵܐ ܕܢܘܼܪܵܐ.
16 ܡܸܛܠ ܕܲܒ̣ܢܘܼܪܵܐ ܕܵܐܹ̇ܢ ܡܵܪܝܵܐ: ܘܒ̣ܵܚܲܪ ܒܵܗ̇ ܠܟ݂ܠ ܒܣܲܪ: ܘܢܸܣܓ̇ܘܿܢ ܩܛܝܼܠܵܘ̈ܗܝ ܕܡܵܪܝܵܐ.
17 ܕܡܸܬ̣ܩܲܕ̇ܫܝܼܢ ܘܡܸܬ̇ܕܲܟܹ̇ܝܢ ܒܓܲܢܹ̈ܐ: ܚܲܕ݂ ܒܵܬܲܪ ܚܲܕ݂ ܒܲܡܨܲܥܬ̣ܵܐ: ܘܐܵܟ݂ܠܝܼܢ ܒܸܣܪܵܐ ܕܲܚܙܝܼܪܵܐ: ܘܫܸܪܨܵܐ ܘܥܘܼܩܒ̇ܪܹ̈ܐ. ܐܲܟ݂ܚ̄ܕ݂ܵܐ ܢܣܘܼܦܘܼܢ ܐܵܡܲܪ ܡܵܪܝܵܐ.
18 ܘܐܸܢܵܐ ܝܵܕܲܥ ܐ̄ܢܵܐ ܥܒ̣ܵܕܲܝ̈ܗܘܿܢ ܘܬܲܪ̈ܥܝܵܬ̣ܗܘܿܢ: ܡܵܐ ܕܐܸܬܹ̇ܝܬ̣ ܠܲܡܟܲܢܵܫܘܼ ܠܟ݂ܠܗܘܿܢ ܥܲܡܡܹ̈ܐ ܘܲܠܸܠܫܵܢܹ̈ܐ: ܘܢܹܐܬ̣ܘܿܢ ܘܢܸܚܙܘܿܢ ܐܝܼܩܵܪܝ.
19 ܘܐܹܣܝܼܡ ܒܗܘܿܢ ܐܵܬ̤ܵܐ: ܘܐܹܫܲܕܲܪ ܡܸܢܗܘܿܢ ܡܫܵܘܙ̈ܒܹܐ ܠܥܲܡܡܹ̈ܐ: ܠܬܲܪܫܝܼܫ: ܘܲܠܦܘܿܠ: ܘܲܠܠܘܿܕ݂: ܕܢܵܓܕ̇ܝܼܢ ܒܩܸܫܬܵܐ: ܘܲܠܬ̣ܘܼܒܹܝܠ: ܘܲܠܝܵܘܵܢ: ܘܲܠܓ̣ܵܙܪ̈ܵܬ̣ܵܐ ܪ̈ܲܚܝܼܩܵܬ̣ܵܐ: ܕܠܵܐ ܫ̣ܡܲܥܘ ܫܹܡܝ ܘܠܵܐ ܚܙܵܘ ܐܝܼܩܵܪܝ: ܘܲܢܚܵܘܘܿܢ ܐܝܼܩܵܪܝ ܒܥܲܡܡܹ̈ܐ.
20 ܘܢܲܝܬ̇ܘܿܢ ܠܟ݂ܠܗܘܿܢ ܐܲܚܲܝ̈ܟ̇ܘܿܢ ܡ̣ܢ ܟܠܗܘܿܢ ܥܲܡܡܹ̈ܐ ܩܘܼܪܒܵܢܵܐ ܠܡܵܪܝܵܐ: ܒܪ̈ܲܟ݂ܫܵܐ: ܘܲܒ̣ܡܲܪ̈ܟ̇ܒ̣ܬ̣ܵܐ: ܘܲܒ̣ܩܵܪ̈ܘܿܟܹܐ: ܠܛܘܼܪܵܐ ܕܩܘܼܕ݂ܫܝ: ܠܐܘܿܪܸܫܠܸܡ ܐܵܡܲܪ ܡܵܪܝܵܐ: ܐܲܝܟ݂ ܕܡܲܝܬܹ̇ܝܢ ܒܢܲܝ̈ ܝܑܼܣܪܵܝܹܠ ܣܡܝܼܕ݂ܵܐ ܒܡܵܐܢܹ̈ܐ ܕܟܲـ̈ـܝܵܐ ܠܒܲܝܬܹ̇ܗ ܕܡܵܪܝܵܐ.
21 ܐܵܦ ܡܸܢܗܘܿܢ ܐܸܣܲܒ̣ ܠܟ݂ܵܗܢܹ̈ܐ: ܘܲܠܠܹܘܵܝܹ̈ܐ: ܐܵܡܲܪ ܡܵܪܝܵܐ.
22 ܐܲܝܟ݂ ܫܡܲܝܵܐ ܚܲܕ݂ܬܹ̈ܐ ܘܐܲܪܥܵܐ ܚܕܲܬܵܐ ܕܥܵܒܹ̇ܕ݂ ܐ̄ܢܵܐ: ܕܩܵܝ̇ܡܝܼܢ ܩܕ݂ܵܡܲܝ ܐܵܡܲܪ ܡܵܪܝܵܐ: ܗܵܟܲܢܵܐ ܢܸܬ̣ܩܲܝܲܡ ܙܲܪܥ̱ܟ݂ܘܿܢ ܘܫܸܡܟ݂ܘܿܢ.
23 ܘܢܸܗܘܸܐ ܡ̣ܢ ܙܒܲܢ ܝܼܪܲܚ ܒܝܼܪܲܚ: ܘܡ̣ܢ ܙܒܲܢ ܫܲܒܵܐ ܠܫܲܒܵܐ: ܢܹܐܬ̣ܘܿܢ ܟܠ ܒܣܲܪ ܠܡܸܣܓܲܕ݂ ܩܕ݂ܵܡܲܝ ܐܵܡܲܪ ܡܵܪܝܵܐ.
24 ܘܢܸܦܩܘܼܢ ܘܢܸܚܙܘܿܢ ܫܠܲܕܲܝ̈ܗܘܿܢ ܕܓܲܒ̣ܪܹ̈ܐ ܕܐܲܥܠܝܼܘ ܒܝܼ: ܡܵܝ̇ܬܵܐ ܬܵܘܠܲܥܗܘܿܢ: ܘܢܘܼܪܗܘܿܢ ܠܵܐ ܕܵܥܟܵܐ: ܘܢܸܗܘܘܿܢ ܕܘܼܡܵܪܵܐ ܠܟ݂ܠ ܒܣܲܪ.