1

¹ ܘܲܡܪܲܕ݂ ܡܘܼܐܵܒ̣ ܥܲܠ ܝܼܣܪܵܝܹܠ ܡ̣ܢ ܒܵܬܲܪ ܕܡܝܼܬ̣ ܐܵܚܵܒ̣.

² ܘܲܢܦܲܠ̣ ܐܹܚܲܙܝܵܐ ܡ̣ܢ ܟܣܘܼܣܛܵܪܘܿܢ ܕܥܸܠܝܼܬܹܗ ܕܲܒ̣ܫܵܡܪܹܝܢ: ܘܐܸܬ̣ܟ̇ܪܲܗ ܘܫܲܕܲܪ ܐܝܼܙ̈ܓܲܕܹ̇ܐ ܘܐܸܡܲܪ ܠܗܘܿܢ: ܙܸܠܘ ܫܲܐܸܠܘ ܡ̣ܢ ܒܥܸܠܙܒ̣ܘܿܒ̣ ܐܲܠܵܗܵܐ ܕܥܸܩܪܘܿܢ: ܐܸܢ ܡܸܬ̣ܚܠܸܡ ܐ̄ܢܵܐ ܡ̣ܢ ܟܘܼܪܗܵܢܝ ܗܵܢܵܐ.

³ ܘܡܲܠܲܐܟܹܗ ܕܡܵܪܝܵܐ ܐܸܡܲܪ ܠܐܹܠܝܼܵܐ ܕܡ̣ܢ ܬܲܫܒ̇ܝܼ: ܩܘܼܡ ܣܲܩ ܠܐܘܼܪܥܵܐ ܕܐܝܼܙܓܲܕܵܘ̈ܗܝ ܕܡܲܠܟܵܐ ܕܫܵܡܪܹܝܢ: ܘܐܸܡܲܪ ܠܗܘܿܢ: ܡ̣ܢ ܒܠܲܝ ܕܠܲܝܬ̇ ܐܲܠܵܗܵܐ ܒܝܼܣܪܵܝܹܠ: ܐܵܙ̇ܠ̄ܝܼܢ ܐܢ̄ܬ̇ܘܿܢ ܠܡܸܫܐܲܠ ܡ̣ܢ ܒܥܸܠܙܒ̣ܘܿܒ̣ ܐܲܠܵܗܵܐ ܕܥܸܩܪܘܿܢ.

⁴ ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ: ܥܲܪܣܵܐ ܕܲܣܠܸܩܬ̇ ܠܵܗ̇: ܠܵܐ ܬܸܚܘܿܬ̣ ܡܸܢܵܗ̇: ܐܸܠܵܐ ܡܡܵܬ̣ ܬܡܘܼܬ̣. ܘܐܸܙܲܠ̣ ܐܹܠܝܼܵܐ.

⁵ ܘܲܗܦܲܟ݂ܘ ܐܝܼܙ̈ܓܲܕܹ̇ܐ ܠܘܵܬ̣ ܐܹܚܲܙܝܵܐ. ܘܐܸܡܲܪ ܠܗܘܿܢ ܐܹܚܲܙܝܵܐ ܡܵܢܵܐ ܗܦܲܟ݂ܬ̇ܘܿܢ.

⁶ ܘܐܵܡ̇ܪܝܼܢ ܠܹܗ: ܓܲܒ̣ܪܵܐ ܚܲܕܸ ܣܠܸܩ ܠܐܘܼܪܥܲܢ: ܘܐܸܡܲܪ ܠܲܢ: ܗܦܘܿܟ݂ܘ ܙܸܠܘ ܠܘܵܬ̣ ܓܲܒ̣ܪܵܐ ܕܫܲܕܲܪܟ݂ܘܿܢ: ܘܐܸܡܲܪܘ ܠܹܗ: ܡ̣ܢ ܒܠܲܝ ܕܠܲܝܬ̇ ܐܲܠܵܗܵܐ ܒܝܼܣܪܵܝܹܠ: ܫܲܕܲܪܬ̇ ܠܡܸܫܐܲܠ ܡ̣ܢ ܒܥܸܠܙܒ̣ܘܿܒ̣ ܐܲܠܵܗܵܐ ܕܥܸܩܪܘܿܢ. ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܥܲܪܣܵܐ ܕܲܣܠܸܩܬ̇ ܠܵܗ̇: ܠܵܐ ܬܸܚܘܿܬ̣ ܡܸܢܵܗ̇: ܐܸܠܵܐ ܡܡܵܬ̣ ܬܡܘܼܬ̣.

⁷ ܐܵܡܲܪ ܠܗܘܿܢ: ܡܵܢܵܘ ܚܹܙܘܹܗ ܕܓܲܒ̣ܪܵܐ ܕܲܣܠܸܩ ܠܐܘܼܪ̱ܥܟ݂ܘܿܢ ܘܐܸܡܲܪ ܠܟ݂ܘܿܢ ܡܸܠܹ̈ܐ ܗܵܠܹܝܢ.

⁸ ܐܵܡ̇ܪܝܼܢ ܠܹܗ. ܓܒܲܪ ܣܥܲܪ: ܘܩܲܡܪܵܐ ܕܡܸܫܟܵܐ ܐܲܣܝܼܪ ܒܚܲܨܵܘ̈ܗܝ. ܐܵܡܲܪ ܠܗܘܿܢ: ܐܹܠܝܼܵܐ ܗ̄ܘ̣ ܕܡ̣ܢ ܬܫܒ̇ܝܼ.

⁹ ܘܫܲܕܲܪ ܥܠܵܘܗܝ ܪܲܒܵܐ ܕܚܲܡܫܝܼܢ ܘܚܲܡܫܝܼܢ ܕܥܲܡܹܗ. ܘܲܣܠܸܩ ܠܘܵܬܹܗ: ܘܗ̤ܘ ܝܵܬܹܒ̣ ܥܲܠ ܪܹܫ ܛܘܼܪܵܐ: ܘܐܸܡܲܪ ܠܹܗ: ܢܒ̣ܝܹܗ ܕܐܲܠܵܗܵܐ: ܡܲܠܟܵܐ ܐܵܡܲܪ ܚܘܿܬ̣.

¹⁰ ܘܲܥܢ̣ܵܐ ܐܹܠܝܼܵܐ ܘܐܸܡܲܪ ܠܪܲܒܵܐ ܕܚܲܡܫܝܼܢ: ܐܸܢ ܢܒ̣ܝܹܗ ܐ̄ܢܵܐ ܕܐܲܠܵܗܵܐ: ܬܸܚܘܿܬ̣ ܢܘܼܪܵܐ ܡ̣ܢ ܫܡܲܝܵܐ: ܘܬܹܐܟ݂ܠܵܟ݂ ܠܵܟ݂ ܘܲܠܚܲܡܫܝܼܢ ܕܥܲܡܵܟ݂. ܘܢܸܚܬܲܬ̤ ܢܘܼܪܵܐ ܡ̣ܢ ܫܡܲܝܵܐ: ܘܐܸܟܲܠܬܹܗ ܠܹܗ ܘܲܠܚܲܡܫܝܼܢ ܕܥܲܡܹܗ.

¹¹ ܘܲܗܦܸܟ݂ ܘܫܲܕܲܪ ܥܠܵܘܗܝ ܪܲܒܵܐ ܕܚܲܡܫܝܼܢ ܐ̄ܚܪ̈ܵܢܝܼܢ ܘܚܲܡܫܝܼܢ ܕܥܲܡܹܗ. ܘܲܥܢܵܐ ܘܐܸܡܲܪܠܹܗ: ܢܒ̣ܝܹܗ ܕܐܲܠܵܗܵܐ: ܗܵܟܲܢܵܐ ܐܵܡܲܪ ܡܲܠܟܵܐ: ܒܲܥܓܲܠ ܚܘܿܬ̣.

¹² ܘܲܥܢ̣ܵܐ ܐܹܠܝܼܵܐ ܘܐܸܡܲܪ ܠܹܗ: ܐܸܢ ܢܒ̣ܝܹܗ ܐ̄ܢܵܐ ܕܐܲܠܵܗܵܐ: ܬܸܚܘܿܬ̣ ܢܘܼܪܵܐ ܡ̣ܢ ܫܡܲܝܵܐ: ܘܬܹܐܟ݂ܠܵܟ݂ ܠܵܟ݂ ܘܲܠܚܲܡܫܝܼܢ ܕܥܲܡܵܟ݂. ܘܢܸܚܬܲܬ̤ ܢܘܼܪܹܗ ܕܐܲܠܵܗܵܐ ܡ̣ܢ ܫܡܲܝܵܐ: ܘܐܸܟܲܠܬܹܗ ܠܹܗ ܘܲܠܚܲܡܫܝܼܢ ܕܥܲܡܹܗ.

¹³ ܘܫܲܕܲܪ ܥܠܵܘܗܝ ܪܲܒܵܐ ܕܚܲܡܫܝܼܢ ܕܲܬ̣ܠܵܬ̣ ܙܲܒ̣ܢ̈ܝܼܢ ܘܚܲܡܫܝܼܢ ܕܥܲܡܹܗ. ܘܲܣܠܸܩ ܪܲܒܵܐ ܕܚܲܡܫܝܼܢ: ܘܲܒ̣ܪܲܟ݂ ܥܲܠ ܒܘܼܪ̈ܟܵܘܗܝ ܩܕ݂ܵܡ ܐܹܠܝܼܵܐ: ܘܡܸܬ̣ܟܲܫܲܦ ܠܹܗ ܘܐܵܡܲܪ ܠܹܗ: ܢܒ̣ܝܹܗ ܕܐܲܠܵܗܵܐ: ܬܸܬ̣ܝܲܩܲܪ ܢܲܦ̮ܫܝ ܘܢܲܦ̮ܫܵܐ ܕܥܲܒ̣ܕܲܝ̈ܟ ܗܵܠܹܝܢ ܚܲܡܫܝܼܢ ܕܩܵܝ̇ܡܝܼܢ ܩܕ݂ܵܡܲܝܟ.

¹⁴ ܕܗܵܐ ܢܸܚܬܲܬ̤ ܢܘܼܪܵܐ ܡ̣ܢ ܫܡܲܝܵܐ: ܘܐܸܟ݂ܠܲܬ̤ ܠܐܲܬ̣ܪܹܝܢ ܪܵܘ̱ܪ̈ܒ̣ܵܢܝܼܢ ܕܚܲܡܫܝܼܢ: ܘܲܠܚܲܡܫܝܼܢ ܚܲܡܫܝܼܢ ܕܥܲܡܗܘܿܢ. ܘܗܵܫܵܐ ܬܸܬ̣ܝܲܩܲܪ ܢܲܦ̮ܫܝ ܒܥܲܝܢܲܝ̈ܟ.

¹⁵ ܘܐܸܡܲܪ ܡܲܠܲܐܟܹܗ ܕܡܵܪܝܵܐ ܠܐܹܠܝܼܵܐ: ܚܘܿܬ̣ ܥܲܡܹܗ: ܘܠܵܐ ܬܸܕ݂ܚܲܠ ܡܸܢܹܗ. ܘܩܵܡ̣ ܘܲܢܚܲܬ̣ ܥܲܡܹܗ ܠܘܵܬ̣ ܡܲܠܟܵܐ.

¹⁶ ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܚܠܵܦ ܕܫܲܕܲܪܬ̇ ܐܝܼܙ̈ܓܲܕܹ̇ܐ ܠܡܸܫܐܲܠ ܡ̣ܢ ܒܥܸܠܙܒ̣ܘܿܒ̣ ܐܲܠܵܗܵܐ ܕܥܸܩܪܘܿܢ: ܡ̣ܢ ܒܠܲܝ ܕܠܲܝܬ̇ ܐܲܠܵܗܵܐ ܒܝܼܣܪܵܝܹܠ: ܠܡܸܫܐܲܠ ܦܸܬ̣ܓ̣ܵܡܹܗ. ܡܸܛܠ ܗܵܢܵܐ ܥܲܪܣܵܐ ܕܲܣܠܸܩܬ̇ ܠܵܗ̇: ܬܸܚܘܿܬ̣ ܡܸܢܵܗ̇: ܐܸܠܵܐ ܡܡܵܬ̣ ܬܡܘܼܬ̣.

¹⁷ ܘܡܝܼܬ݂ ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܐܸܡܲܪ ܐܹܠܝܼܵܐ. ܘܐܲܡ̣ܠܸܟ݂ ܝܘܿܪܵܡ ܐܲܚܘܼܗܝ ܒܵܬ̣ܪܹܗ: ܒܲܫܢܲܬ̣ ܬܲܪܬܹ̇ܝܢ ܕܝܘܿܪܵܡ ܒܲܪ ܝܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ: ܡܸܛܠ ܕܠܵܐ ܗܘ̤ܵܐ ܠܹܗ ܒܪܵܐ.

¹⁸ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܐܹܚܲܙܝܵܐ ܘܟ݂ܠܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ.

2

¹ ܘܲܗܘ̤ܵܐ ܕܟܲܕ݂ ܡܲܣܸܩ ܡܵܪܝܵܐ ܠܐܹܠܝܼܵܐ ܒܥܲܠܥܵܠܵܐ ܠܲܫܡܲܝܵܐ: ܐܸܙܲܠܘ ܐܹܠܝܼܵܐ ܘܐܹܠܝܼܫܲܥ ܡ̣ܢ ܓܲܠܥܵܠܵܐ.

² ܘܐܸܡܲܪ ܐܹܠܝܼܵܐ ܠܐܹܠܝܼܫܲܥ: ܟܲܬܲܪ ܠܝܼ ܗܵܪܟܵܐ: ܡܸܛܠ ܕܡܵܪܝܵܐ ܫܲܕ̇ܪܲܢܝ ܠܒܹܝܬ̣ ܐܹܝܠ. ܘܐܸܡܲܪ ܐܹܠܝܼܫܲܥ: ܚܲܝ ܗ̄ܘ̣ ܡܵܪܝܵܐ: ܘܚܲܝܵܐ ܗ̄ܝ̣ ܢܲܦ̮ܫܵܟ݂: ܕܠܵܐ ܐܸܫܒ̇ܩܵܟ݂. ܘܲܢܚܸܬ̣ܘ ܠܒܹܝܬ̣ ܐܹܝܠ.

³ ܘܢܦܲܩܘ ܒܢܲܝ̈ ܢܒ̣ܝܹ̈ܐ ܕܒܹܝܬ̣ ܐܹܝܠ ܠܘܵܬ̣ ܐܹܠܝܼܫܲܥ: ܘܐܵܡ̇ܪܝܼܢ ܠܹܗ: ܠܵܐ ܝܵܕܲܥ ܐܲܢ̄ܬ̇ ܕܝܵܘܡܵܢܵܐ ܢܵܣܹܒ̣ ܡܵܪܝܵܐ ܠܡܵܪܵܟ݂ ܡ̣ܢ ܪܹܫܵܟ݂. ܘܐܸܡܲܪ ܐܵܦ ܐܸܢܵܐ ܝܵܕܲܥ ܐ̄ܢܵܐ: ܫܬ̣ܘܿܩܘ.

⁴ ܘܐܸܡܲܪ ܐܹܠܝܼܵܐ ܠܐܹܠܝܼܫܲܥ: ܟܲܬܲܪ ܠܝܼ ܗܵܪܟܵܐ: ܡܸܛܠ ܕܡܵܪܝܵܐ ܫܲܕ̇ܪܲܢܝ ܠܐܝܼܪܝܼܚܘܿ ܘܐܸܡܲܪ: ܚܲܝ ܗ̄ܘ̣ ܡܵܪܝܵܐ: ܘܚܲܝܵܐ ܗ̄ܝ̣ ܢܲܦ̮ܫܵܟ݂: ܕܠܵܐ ܐܸܫܒ̇ܩܵܟ݂. ܘܐܸܙܲܠ̣ܘ ܠܐܝܼܪܝܼܚܘܿ.

⁵ ܘܲܩܪܸܒ̣ܘ ܒܢܲܝ̈ ܢܒ̣ܝܹ̈ܐ ܕܒ̣ܐܝܼܪܝܼܚܘܿ ܠܘܵܬ̣ ܐܹܠܝܼܫܲܥ: ܘܐܵܡ̇ܪܝܼܢ ܠܹܗ: ܝܵܕܲܥ ܐܲܢ̄ܬ̇ ܕܝܵܘܡܵܢܵܐ ܢܵܣܹ̇ܒ̣ ܡܵܪܝܵܐ ܠܡܵܪܵܟ݂ ܡ̣ܢ ܪܹܫܵܟ݂. ܘܐܸܡܲܪ ܐܵܦ ܐܸܢܵܐ ܝܵܕܲܥ ܐ̄ܢܵܐ: ܫܬ̣ܘܿܩܘ.

⁶ ܘܐܸܡܲܪ ܐܹܠܝܼܵܐ ܠܐܹܠܝܼܫܲܥ: ܟܲܬܲܪ ܠܝܼ ܗܵܪܟܵܐ: ܡܸܛܠ ܕܡܵܪܝܵܐ ܫܲܕ̇ܪܲܢܝ ܠܝܘܿܪܕ̇ܢܵܢ. ܘܐܸܡܲܪ ܚܲܝ ܗ̄ܘ̣ ܡܵܪܝܵܐ: ܘܚܲܝܵܐ ܗ̄ܝ̣ ܢܲܦ̮ܫܵܟ݂: ܕܠܵܐ ܐܸܫܒ̇ܩܵܟ݂. ܘܐܸܙܲܠܘܪ̈ܲܝܗܘܿܢ.

⁷ ܘܚܲܡܫܝܼܢ ܓܲܒ̣ܪܹ̈ܐ ܡ̣ܢ ܒܢܲܝ̈ ܢܒ̣ܝܹ̈ܐ: ܐܸܙܲܠ̣ܘ ܘܩܵܡ̣ܘ ܡ̣ܢ ܩܒ̣ܘܿܠ ܡ̣ܢ ܪܘܼܚܩܵܐ: ܘܲܬ̣ܪ̈ܲܝܗܘܿܢ ܩܵܡ̣ܘ ܥܲܠ ܣܸܦܬܹܗ ܕܝܘܿܪܕ̇ܢܵܢ.

⁸ ܘܲܢܣܲܒ̣ ܐܹܠܝܼܵܐ ܡܲܥܦܪܹܗ: ܘܟ݂ܪܟܹܗ ܘܲܡܚ̣ܵܐ ܐܸܢܘܿܢ ܠܡܲـ̈ـܝܵܐ ܕܝܘܿܪܕ̇ܢܵܢ: ܘܐܸܬ̣ܦܠܸܓ̣ܘ ܦܸܠܓܵܐ ܠܟ݂ܵܐ ܘܦܸܠܓܵܐ ܠܟ݂ܵܐ: ܘܲܥܒܲܪܘ ܬܪ̈ܲܝܗܘܿܢ ܒܝܲܒ̣ܫܵܐ.

⁹ ܘܟܲܕ݂ ܥܒܲܪܘ: ܐܸܡܲܪ ܐܹܠܝܼܵܐ ܠܐܹܠܝܼܫܲܥ: ܫܐܲܠ ܡܵܢܵܐ ܐܸܥܒܸ̇ܕ݂ ܠܵܟ݂ ܥܲܕ݂ܠܵܐ ܐܸܬ̇ܕ̇ܒܲܪ ܡܸܢܵܟ݂: ܘܐܸܡܲܪ ܐܹܠܝܼܫܲܥ: ܢܸܗܘܹܐ ܚܲܕ݂ ܬܪܹܝܢ ܒܪܘܼܚܵܟ݂ ܥܠܲܝ.

¹⁰ ܘܐܸܡܲܪ ܐܲܣܓ̇ܝܼܬ̇ ܫܐܸܠܬ̇: ܐܸܢ ܬܸܚܙܹܝܢܝ ܟܲܕ݂ ܡܸܬ̇ܕ̇ܒܲܪ ܐ̄ܢܵܐ ܡܸܢܵܟ݂: ܢܸܗܘܹܐ ܠܵܟ݂ ܗܵܟܲܢܵܐ: ܘܐܸܢ ܠܵܐ: ܠܵܐ ܢܸܗܘܹܐ.

¹¹ ܘܲܗܘ̤ܵܐ ܕܟܲܕ݂ ܗܸܢܘܿܢ ܡܡܲܠܠܝܼܢ ܘܲܡܗܲܠܟ݂ܝܼܢ: ܘܗܵܐ ܡܲܪܟܲܒ̣ܬܵܐ ܕܢܘܼܪܵܐ ܘܪ̈ܲܟ݂ܫܵܐ ܕܢܘܼܪܵܐ: ܘܲܦܪܲܫ̣ܘ ܒܹܝܬ̣ ܬܪ̈ܲܝܗܘܿܢ: ܘܲܣܠܸܩ ܐܹܠܝܼܵܐ ܒܥܲܠܥܵܠܵܐ ܠܲܫܡܲܝܵܐ.

¹² ܘܐܹܠܝܼܫܲܥ ܚ̣ܙܵܐ: ܘܗܵܐ ܡܲܝܠܸܠ ܘܐܵܡܲܪ: ܐܲܒ̣ܝ ܐܵܒ̣ܝ: ܪܲܟ̇ܒܹ̇ܗ ܕܝܼܣܪܵܝܹܠ: ܘܦܲܪ̈ܵܫܵܘܗܝ ܘܬ̣ܘܼܒ̣ ܠܵܐ ܚ̣ܙܵܝܗܝ: ܘܐܸܚܲܕ݂ ܒܲܠܒ̣ܘܼܫܵܘ̈ܗܝ ܘܨܲܪܝܼ ܐܸܢܘܿܢ ܠܲܬ̣ܪܹܝܢ ܨܪܵܘܵܢ.

¹³ ܘܐܲܪܝܼܡ ܡܲܥܦܪܹܗ ܕܐܹܠܝܼܵܐ ܕܲܢܦܲܠ̣ ܡܸܢܹܗ: ܘܲܗ̣ܦܲܟ݂ ܘܩܵܡ̣ ܠܹܗ ܥܲܠ ܣܸܦܬܹܗ ܕܝܘܿܪܕ̇ܢܵܢ.

¹⁴ ܘܢܲܣܒܹ̇ܗ ܠܡܲܥܦܪܹܗ ܕܐܹܠܝܼܵܐ ܕܲܢܦܲܠ̣ ܡܸܢܹܗ: ܘܲܡܚ̣ܵܐ ܠܡܲـ̈ـܝܵܐ ܘܐܸܡܲܪ: ܐܘܿܢ ܡܵܪܝܵܐ ܐܲܠܵܗܹܗ ܕܡܵܪܝ ܐܹܠܝܼܵܐ: ܘܐܵܦ ܗ̤ܘ ܡܚ̣ܵܐ ܠܡܲـ̈ـܝܵܐ ܕܝܘܿܪܕ̇ܢܵܢ: ܘܐܸܬ̣ܦܠܸܓ̣ܘ ܦܸܠܓܵܐ ܠܟ݂ܵܐ ܘܦܸܠܓܵܐ ܠܟ݂ܵܐ: ܘܲܥܒܲܕ݂ ܐܹܠܝܼܫܲܥ.

¹⁵ ܘܲܚܙ̣ܵܘ ܒܢܲܝ̈ ܢܒ̣ܝܹ̈ܐ ܕܒ̣ܐܝܼܪܝܼܚܘܿ ܡ̣ܢ ܩܒ̣ܘܿܠ: ܘܐܸܡܲܪܘ: ܫܪܵܬ̤ ܪܘܼܚܹܗ ܕܐܹܠܝܼܵܐ ܥܲܠ ܐܹܠܝܼܫܲܥ: ܘܐܸܬ̣ܵܘ ܠܐܘܼܪܥܹܗ ܘܲܣܓܸܕ݂ܘ ܠܹܗ ܥܲܠ ܐܲܪܥܵܐ.

¹⁶ ܘܐܸܡܲܪܘ ܠܹܗ: ܗܵܐ ܐܝܼܬ̣ ܗܵܪܟܵܐ ܥܲܡ ܥܲܒ̣ܕܲܝ̈ܟ: ܚܲܡܫܝܼܢ ܓܲܒ̣ܪ̈ܝܼܢ ܓܲܢ̄ܒܵܪ̈ܲܝ ܚܲܝܠܵܐ: ܢܹܐܙܠ̄ܘܿܢ ܢܸܒ̣ܥܘܿܢܹܗ ܠܡܵܪܵܟ݂: ܕܲܠܡܵܐ ܫܩܲܠܬܹܗ ܪܘܼܚܹܗ ܕܡܵܪܝܵܐ: ܘܐܲܪܡܝܵܬܹܗ ܒܚܲܕ݂ ܡ̣ܢ ܛܘܼܪܹ̈ܐ: ܐܵܘ ܒܚܲܕ݂ ܡ̣ܢ ܢܲܚ̈ܠܹܐ. ܘܐܸܡܲܪ ܠܵܐ ܬܫܲܕܪܘܼܢ.

¹⁷ ܘܐܸܬ̣ܟܲܬܫܘ ܥܲܡܹܗ ܥܕܲܡܵܐ ܕܲܒ̣ܗܸܬ̣ ܡܸܢܗܘܿܢ. ܘܐܸܡܲܪ ܫܲܕܲܪܘ. ܘܫܲܕܲܪܘ ܚܲܡܫܝܼܢ ܓܲܒ̣ܪ̈ܝܼܢ: ܘܲܒ̣ܥܵܐܘܼܗܝ ܬܠܵܬ̣ܵܐ ܝܵܘ̈ܡܝܼܢ: ܘܠܵܐ ܐܸܫܟ̇ܚܝܼܘܗܝ.

¹⁸ ܘܐܸܬ̣ܵܘ ܠܘܵܬܹܗ: ܘܗ̤ܘ ܝܵܬܹܒ̣ ܒܐܝܼܪܝܼܚܘܿ. ܘܐܸܡܲܪ ܠܗܘܿܢ: ܠܵܐ ܐܸܡ̇ܪܹܬ̣ ܠܟ݂ܘܿܢ ܕܠܵܐ ܬܹܐܙܠ̄ܘܼܢ.

¹⁹ ܘܐܸܡܲܪܘ ܐ̄ܢܵܫܲܝ̈ ܩܪܝܼܬ̣ܵܐ ܠܐܹܠܝܼܫܲܥ: ܗܵܐ ܡܵܘܬ̇ܒ̣ܵܗ̇ ܕܲܩܪܝܼܬ̣ܵܐ ܫܲܦܝܼܪ: ܐܲܝܟ݂ ܕܡܵܪܲܢ ܚܵܙܹ̇ܐ: ܘܡܲـ̈ـܝܵܐ ܒܝܼܫܝܼܢ: ܘܐܲܪܥܵܐ ܡܓܲܙܝܵܐ.

²⁰ ܘܐܸܡܲܪ ܐܲܝܬܵܘ ܠܝܼ ܩܘܼܩܬ̣ܵܐ ܚܕ݂ܵܐ ܚܕܲܬܵܐ: ܘܐܲܪܡܵܘ ܒܵܗ̇ ܡܸܠܚܵܐ. ܘܐܲܝܬ̇ܝܼܘ ܠܹܗ.

²¹ ܘܲܢܦܲܩ̣ ܠܹܗ ܠܡܲܒ̇ܘܼܥܵܐ ܕܡܲـ̈ـܝܵܐ: ܘܐܲܪܡܝܼ ܬܲܡܵܢ ܡܸܠܚܵܐ: ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܝܵܐ: ܐܲܣܝܼܬ̣ ܠܡܲـ̈ـܝܵܐ ܗܵܠܹܝܢ: ܘܬ̣ܘܼܒ̣ ܠܵܐ ܢܸܗܘܹܐ ܬܲܡܵܢ ܕܡܵܐܹ̇ܬ̣ ܘܕܲܡܓܲܙܹܐ.

²² ܘܐܸܬ̣ܐܲܣܝܼܘ ܡܲـ̈ـܝܵܐ ܗܵܠܹܝܢ ܥܕܲܡܵܐ ܠܝܵܘܡܵܢܵܐ: ܐܲܝܟ݂ ܦܸܬ̣ܓ̣ܵܡܹܗ ܕܐܹܠܝܼܫܲܥ ܕܐܸܡܲܪ.

²³ ܘܲܣܠܸܩ ܡ̣ܢ ܬܲܡܵܢ ܠܒܹܝܬ̣ ܐܹܝܠ: ܘܗ̤ܘ ܣܵܠܹܩ ܒܐܘܼܪܚܵܐ: ܘܲܛܠܵܝܹ̈ܐ ܕܲܩܕ̇ܩܹ̈ܐ ܢܦܲܩ̣ܘ ܡ̣ܢ ܒܪܝܼܬ̣ܵܐ: ܘܲܡܒܲܙܚܝܼܢ ܒܹܗ ܘܐܵܡ̇ܪܝܼܢ: ܣܲܩ ܩܲܪܚܵܐ: ܣܲܩ ܩܲܪܚܵܐ.

²⁴ ܘܐܸܬ̣ܦܢܝܼ ܠܒܸܣܬ̇ܪܹܗ: ܘܲܚܙܵܐ ܐܸܢܘܿܢ: ܘܠܵܛ ܐܸܢܘܿܢ ܒܲܫܡܹܗ ܕܡܵܪܝܵܐ. ܘܲܢܦܲܩ ܬܲܪܬܹ̇ܝܢ ܕܸܒ̇ܝܼ̈ܢ ܡ̣ܢ ܥܵܒ̣ܵܐ: ܘܦܲܪܬ̣ ܡܸܢܗܘܿܢ ܐܲܪܒ̇ܥܝܼܢ ܘܲܬ̣ܪܹܝܢ ܛܠܵܝܝܼ̈ܢ.

²⁵ ܘܐܸܙܲܠ ܡ̣ܢ ܬܲܡܵܢ ܠܛܘܼܪܵܐ ܕܟܲܪܡ̄ܠܵܐ: ܘܡ̣ܢ ܬܲܡܵܢ ܬܘܼܒ̣ ܠܫܵܡܪܹܝܢ.

3

¹ ܘܝܘܿܪܵܡ ܒܲܪ ܐܵܚܵܒ̣ ܐܲܡ̣ܠܸܟ݂ ܥܲܠ ܝܼܣܪܵܝܹܠ ܒܫܵܡܪܹܝܢ: ܒܲܫܢܲܬ̣ ܬܡܵܢܲܥܸܣܪܹ̈ܐ ܠܝܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ. ܘܐܲܡ̣ܠܸܟ݂ ܬܲܪܬܲܥܸܣܪܹ̈ܐ ܫܢ̈ܝܼܢ.

² ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܒܪܲܡ ܠܵܐ ܐܲܝܟ݂ ܐܲܒ̣ܘܼܗܝ ܘܐܲܝܟ݂ ܐܸܡܹܗ. ܘܐܲܥܒܲܪ ܩܵܝܑܹܡܬ̣ܵܐ ܕܒܲܥܠܵܐ ܕܲܥܒܲܕ݂ ܐܲܒ̣ܘܼܗܝ.

³ ܒܲܠܚܘܿܕ݂ ܒܲܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ ܐܸܬ̇ܕܲܒܲܩ: ܘܠܵܐ ܣܛܵܐ ܡܸܢܗܘܿܢ.

⁴ ܘܡܹܝܫܵܥ ܡܲܠܟܵܐ ܕܡܘܼܐܵܒ̣ ܢܵܩܕܵܐ ܗ̄ܘ̣ܵܐ. ܘܡܲܣܸܩ ܗ̄ܘ̣ܵܐ ܠܡܲܠܟܵܐ ܕܝܼܣܪܵܝܹܠ ܡܵܐܐ ܐܲܠܦ̈ܝܼܢ ܫܲܡܝܼܢܹ̈ܐ ܕܥܵܢܵـ̈ـܐ: ܘܲܡܵܐܐ ܐܲܠܦ̈ܝܼܢ ܕܸܟ݂ܪܹ̈ܐ ܕܥܲܡܪܵܐ.

⁵ ܘܡ̣ܢ ܒܵܬܲܪ ܕܡ̣ܝܼܬ̣ ܐܵܚܵܒ̣: ܡܪܲܕ݂ ܡܲܠܟܵܐ ܕܡܘܼܐܵܒ̣ ܥܲܠ ܡܲܠܟܵܐ ܕܝܼܣܪܵܝܹܠ.

⁶ ܘܲܢܦܲܩ ܡܲܠܟܵܐ ܝܘܿܪܵܡ ܒܝܵܘܡܵܐ ܗܵܘ̇ ܡ̣ܢ ܫܵܡܪܹܝܢ: ܘܲܡܢܵܐ ܠܟ݂ܠܹܗ ܝܼܣܪܵܝܹܠ.

⁷ ܘܐܸܙܲܠ̣ ܘܫܲܕܲܪ ܠܘܵܬ̣ ܝܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ: ܘܐܸܡܲܪ: ܡܲܠܟܵܐ ܕܡܘܼܐܵܒ̣ ܡܪܲܕ݂ ܥܠܲܝ: ܬܵܐ ܥܲܡܝ ܢܹܐܙܲܠ ܠܲܩܪܵܒ̣ܵܐ ܥܲܠ ܡܘܼܐܵܒ̣.

⁸ ܘܐܸܡܲܪ ܠܹܗ ܝܘܿܫܵܦܵܛ: ܣܵܠܹܩ ܐ̄ܢܵܐ ܐܲܟ݂ܘܵܬ̣ܵܟ݂: ܘܥܲܡܝ ܐܲܝܟ݂ ܥܲܡܵܟ݂: ܘܪ̈ܲܟ݂ܫ̄ܝ ܐܲܝܟ݂ ܪ̈ܲܟ݂ܫܵܟ݂. ܘܐܸܡܲܪ ܠܹܗ: ܒܐܲܝܕܵܐ ܐܘܼܪܚܵܐ ܢܸܣܲܩ ܘܐܸܡܲܪ ܒܐܘܼܪܚܵܐ ܕܡܲܕ݂ܒ̇ܪܵܐ ܕܐܲܕ݂ܘܿܡ.

⁹ ܘܐܸܙܲܠܘ ܡܲܠܟܵܐ ܕܝܼܣܪܵܝܹܠ: ܘܡܲܠܟܵܐ ܕܲܝܗܘܼܕ݂ܵܐ: ܘܡܲܠܟܵܐ ܕܐܲܕ݂ܘܿܡ. ܘܐܸܬ̣ܟ̇ܕܟ݂ܘ ܡܲܪܕܹ̇ܐ ܫܲܒ̣ܥܵܐ ܝܵܘܡ̈ܝܼܢ ܘܠܲܝܬ̇ ܗ̄ܘ̣ܵܐ ܡܲـ̈ـܝܵܐ ܠܡܲܫܪܝܼܬ̣ܵܐ: ܘܲܠܥܲܡܵܐ ܕܥܲܡܗܘܿܢ.

¹⁰ ܘܐܸܡܲܪ ܡܲܠܟܵܐ ܕܝܼܣܪܵܝܹܠ: ܐܘܿܗ ܥܲܠ ܗܵܕܹܐ ܟܲܝ ܩ̣ܪܵܐ ܡܵܪܝܵܐ ܠܲܬ̣ܠܵܬ̣ܵܐ ܡܲܠܟ̇ܝܼ̈ܢ ܗܵܠܹܝܢ: ܕܢܲܫܠܸܡ ܐܸܢܘܿܢ ܒܐܝܼܕ݂ܵܐ ܕܡܘܼܐܵܒ̣.

¹¹ ܘܐܸܡܲܪ ܝܘܿܫܵܦܵܛ: ܠܲܝܬ̇ ܗܵܪܟܵܐ ܢܒ̣ܝܼܵܐ ܕܡܵܪܝܵܐ ܕܢܸܫܐܲܠ ܦܸܬ̣ܓ̣ܵܡܹܗ ܕܡܵܪܝܵܐ ܡܸܢܹܗ. ܘܲܥܢ̣ܵܐ ܚܲܕ݂ ܡ̣ܢ ܥܲܒ̣ܕܵܘ̈ܗܝ ܕܡܲܠܟܵܐ ܕܝܼܣܪܵܝܹܠ: ܘܐܸܡܲܪ: ܐܝܼܬ̣ ܗܵܪܟܵܐ ܐܹܠܝܼܫܲܥ ܒܲܪ ܫܵܦܵܛ: ܕܢܵܣܹܟ݂ ܗ̄ܘ̣ܵܐ ܡܲـ̈ـܝܵܐ ܥܲܠ ܐܝܼܕ݂ܵܘ̈ܗܝ ܕܐܹܠܝܼܵܐ.

¹² ܘܐܸܡܲܪ ܝܘܿܫܵܦܵܛ: ܐܝܼܬ̣ ܗ̄ܘ̣ ܥܲܡܹܗ ܦܸܬ̣ܓ̣ܵܡܹܗ ܕܡܵܪܝܵܐ. ܘܲܢܚܸܬ̣ܘ ܠܘܵܬܹܗ ܡܲܠܟܵܐ ܕܝܼܣܪܵܝܹܠ ܘܝܘܿܫܵܦܵܛ: ܘܡܲܠܟܵܐ ܕܐܲܕ݂ܘܿܡ.

¹³ ܘܐܸܡܲܪ ܐܹܠܝܼܫܲܥ ܠܡܲܠܟܵܐ ܕܝܼܣܪܵܝܹܠ: ܡܵܐ ܠܝܼ ܘܠܵܟ݂: ܙܸܠ ܠܘܵܬ̣ ܢܒ̣ܝܼܵܘ̈ܗܝ ܕܐܲܒ̣ܘܼܟ݂: ܘܲܠܘܵܬ̣ ܢܒ̣ܝܹ̈ܝܗ̇ ܕܐܸܡܵܟ݂. ܘܐܸܡܲܪ ܠܹܗ ܡܲܠܟܵܐ ܕܝܼܣܪܵܝܹܠ: ܥܲܠ ܗܵܕܹܐ ܟܲܝ ܩ̣ܪܵܐ ܡܵܪܝܵܐ ܠܲܬ̣ܠܵܬ̣ܵܐ ܡܲܠܟ̇ܝܼ̈ܢ ܗܵܠܹܝܢ: ܕܢܲܫܠܸܡ ܐܸܢܘܿܢ ܒܐܝܼܕ݂ܵܐ ܕܡܘܼܐܵܒ̣.

¹⁴ ܘܐܸܡܲܪ ܐܹܠܝܼܫܲܥ: ܚܲܝܝ ܗ̄ܘ̣ ܡܵܪܝܵܐ ܚܲܝܠܬ̣ܵܢܵܐ ܕܩܵܡܹ̇ܬ̣ ܩܕ݂ܵܡܵܘܗܝ. ܐܸܠܘܼܠܵܐ ܡ̣ܢ ܐܲܦܵܘ̈ܗܝ ܕܝܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ ܡܸܬ̣ܚܲܡܲܨ ܐ̄ܢܵܐ: ܐܸܢ ܐܲܕ݂ܝܼܩܹ̇ܬ̣ ܠܘܵܬ̣ܵܟ݂ ܘܐܸܢ ܚܙܹ̇ܝܬ̣ܵܟ݂.

¹⁵ ܘܗܵܫܵܐ ܐܲܝܬܵܘ ܠܝܼ ܢܵܩܘܿܫܵܐ. ܘܲܗܘ̤ܵܐ ܕܟܲܕ݂ ܢܵܩܹܫ ܢܵܩܘܿܫܵܐ: ܗܘ̤ܵܬ̣ ܥܠܵܘܗܝ ܐܝܼܕܹܗ. ܕܡܵܪܝܵܐ.

¹⁶ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܝܵܐ: ܢܸܬ̣ܥ̱ܒܸܕ݂ ܢܲܚܠܵܐ ܗܵܢܵܐ ܓܘܼ̈ܒ̇ܝܼܢ ܓܘܼ̈ܒ̇ܝܼܢ.

¹⁷ ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ: ܠܵܐ ܬܸܚܙܘܼܢ ܪܘܼܚܵܐ: ܘܠܵܐ ܬܸܚܙܘܼܢ ܡܸܛܪܵܐ. ܘܢܲܚܠܵܐ ܗܵܢܵܐ ܢܸܬ̣ܡ̱ܠܸܐ ܡܲـ̈ـܝܵܐ. ܘܐܸܫܬܵܘ ܐܲܢ̄ܬ̇ܘܿܢ ܘܩܸܢܝܵܢܟ݂ܘܿܢ ܘܲܒ̣ܥܝܼܪܟ݂ܘܿܢ.

¹⁸ ܘܲܒ̣ܨܝܼܪܵܐ ܗ̄ܝ̣ ܗܵܕܹܐ ܒܥܲܝܢܲܝ̈ ܡܵܪܝܵܐ. ܘܢܲܫܠܸܡ ܠܡܘܼܐܒ̣ܵܝܹ̈ܐ ܒܐܝܼܕܲܝ̈ܗܘܿܢ.

¹⁹ ܘܬܸܚ̱ܪܒ̣ܘܼܢ ܟܠ ܩܘܼܪ̈ܝܵܐ ܥܲܫܝܼ̈ܢܵܬ̣ܵܐ: ܘܟ݂ܠ ܩܘܼܪ̈ܝܵܐ ܕܓܲܒ̣̈ܝܵܢ. ܘܟ݂ܠ ܐܲܝܠܵܢܹ̈ܐ ܕܫܲܦܝܼܪܝܼܢ ܬܲܪܡܘܿܢ. ܘܟ݂ܠ ܡܲܒ̇ܘܼܥܹ̈ܐ ܕܡܲـ̈ـܝܵܐ ܬܛܲܡܡܘܼܢ. ܘܟ݂ܠ ܝܵܪܬ̇ܘܼܬ̣ܵܐ ܕܫܲܦܝܼܪܵܐ ܬܸܡܠܘܿܢܵܗ̇ ܟܹܐܦܹ̈ܐ.

²⁰ ܘܲܗܘ̤ܵܐ ܒܨܲܦܪܵܐ ܟܲܕ݂ ܣܠܸܩ ܩܘܼܪܒܵܢܵܐ: ܘܗܵܐ ܡܲـ̈ـܝܵܐ ܐܵܬܹܝܢ ܡ̣ܢ ܐܘܼܪܚܵܐ ܕܐܲܕ݂ܘܿܡ: ܘܐܸܬ̣ܡܲܠܝܲܬ̤ ܐܲܪܥܵܐ ܡܲـ̈ـܝܵܐ.

²¹ ܘܟ݂ܠܗܘܿܢ ܡܘܼܐܒ̣ܵܝܹ̈ܐ ܫ̣ܡܲܥܘ ܕܲܣܠܸܩܘ ܡܲܠ̈ܟܹ̇ܐ ܠܡܸܬ̣ܟܲܬܵܫܘܼ ܥܲܡܗܘܿܢ: ܘܐܲܟ݂ܪܸܙܘ ܡ̣ܢ ܟܠ ܐܵܣܲܪ ܣܲܝܦܵܐ ܘܲܠܥܸܠ: ܘܩܵܡܘ ܥܲܠ ܬܚܘܼܡܵܐ.

²² ܘܩܲܕܸ̇ܡܘ ܒܨܲܦܪܵܐ: ܘܫܸܡܫܵܐ ܕܢܲܚ ܥܲܠ ܡܲـ̈ـܝܵܐ. ܘܲܚܙܵܘ ܡܘܼܐܒ̣ܵܝܹ̈ܐ ܡ̣ܢ ܩܒ̣ܘܿܠ ܠܡܲـ̈ـܝܵܐ ܕܣܘܼܡܵܩܝܼܢ ܐܲܝܟ݂ ܕܡܵܐ.

²³ ܘܐܸܡܲܪܘ: ܕܡܵܐ ܗ̄ܘ̣ ܗܵܢܵܐ: ܡܸܬ̣ܚܪܵܒ̣ܘܼ ܐܸܬ̣ܚܪܸܒ̣ܘ ܡܲܠ̈ܟܹ̇ܐ: ܘܩܲܛܸܠܘ ܓܒܲܪ ܚܲܒ̣ܪܹܗ: ܡܸܟܹ̇ܝܠ ܠܒܸܙܬ̣ܵܐ ܡܘܼܐܵܒ̣.

²⁴ ܘܐܸܬ̣ܵܘ ܠܡܲܫܪܝܼܬ̣ܵܐ ܕܝܼܣܪܵܝܹܠ. ܘܩܵܡ̣ܘ ܒܢܲܝ̈ ܝܼܣܪܵܝܹܠ: ܘܲܚܪܸܒ̣ܘ ܠܡܘܼܐܒ̣ܵܝܹ̈ܐ: ܘܲܥܪܲܩ̣ܘ ܡ̣ܢ ܩܕ݂ܵܡܲܝܗܘܿܢ ܘܥܲܠܘ ܒܗܘܿܢ: ܘܚܲܪܒ̇ܘܼܗܝ ܠܡܘܼܐܵܒ̣.

²⁵ ܘܩܘܼܪ̈ܝܵܐ ܣܲܚܸܦܘ ܘܟ݂ܠ ܝܵܪܬ̇ܘܼܬ̣ܵܐ ܕܫܲܦܝܼܪܵܐ: ܫܕ݂ܵܘ ܓܒܲܪ ܟܹܐܦܹܗ ܘܲܡܠܵܐܘܼܗ̇. ܘܟ݂ܠ ܡܥܝܼ̈ܢܹܐ ܕܡܲـ̈ـܝܵܐ ܛܲܡܸܡܘ. ܘܟ݂ܠ ܐܝܼܠܵܢܹ̈ܐ ܕܫܲܦܝܼܪܝܼܢ ܐܲܪܡܝܼܘ: ܥܕܲܡܵܐ ܕܐܸܫܬ̇ܒܸܩܘ ܟܹܐܦܹ̈ܐ ܒܐܸܣܬ̣ܵܐ ܟܲܕ݂ ܡܣܲܚ̈ܦܵܢ. ܘܐܸܬ̣ܟܲܪܟ̇ܘܼܗܝ ܕܫܵܕܹܝܢ ܒܩܸܠܥܹ̈ܐ: ܘܚܲܪܒ̇ܘܼܗܝ.

²⁶ ܘܲܚܙܵܐ ܡܲܠܟܵܐ ܕܡܘܼܐܵܒ̣: ܕܲܥܫܸܢ ܠܹܗ ܡܸܢܹܗ ܩܪܵܒ̣ܵܐ. ܘܲܕ݂ܒܲܪ ܥܲܡܹܗ ܫܒܲܥܡܵܐܐ ܓܲܒ̣ܪ̈ܝܼܢ ܫܵܡܛܲܝ̈ ܣܲܝܦܵܐ: ܕܢܸܬ̣ܦܲܠܲܛ ܠܘܵܬ̣ ܡܲܠܟܵܐ ܕܐܲܕ݂ܘܿܡ: ܘܠܵܐ ܐܸܫܟܲܚ.

²⁷ ܘܲܢܣܲܒ̣ ܠܲܒ̣ܪܹܗ ܒܘܼܟ݂ܪܹܗ: ܕܗ̤ܘ ܡܲܡܠܸܟ݂ ܒܵܬ̣ܪܹܗ: ܘܐܲܣܩܹܗ ܥܠܵܬ̣ܵܐ ܥܲܠ ܫܘܼܪܵܐ. ܘܲܗܘ̤ܵܐ ܪܘܼܓ̣ܙܵܐ ܪܲܒܵܐ ܥܲܠ ܝܼܣܪܵܝܹܠ: ܘܲܫܩܲܠܘ ܡܸܢܹܗ ܘܲܗܦܲܟ݂ܘ ܠܐܲܬ̣ܪ̱ܗܘܿܢ.

4

¹ ܘܐܲܢ̄ܬ̇ܬ̣ܵܐ ܚܕ݂ܵܐ ܡ̣ܢ ܢܸܫܲܝ̈ ܒܢܲܝ̈ ܢܒ̣ܝܹ̈ܐ: ܡܲܙܥܩܵܐ ܩܕ݂ܵܡ ܐܹܠܝܼܫܲܥ: ܘܐܵܡܪܵܐ: ܥܲܒ̣ܕܵܟ݂ ܒܲܥܠܲܝ ܡܝܼܬ̣. ܘܐܲܢ̄ܬ̇ ܝܵܕܲܥ ܐܲܢ̄ܬ̇ ܕܥܲܒ̣ܕܵܟ݂ ܕܵܚܹ̇ܠ ܗ̄ܘ̣ܵܐ ܡ̣ܢ ܡܵܪܝܵܐ: ܘܡܵܪܹܐ ܚܵܘܒܵܐ ܐܸܬ̣ܵܐ ܠܡܸܕ݂ܒܲܪ ܬܪܹܝܢ ܒܢܲܝ̈ ܠܹܗ ܥܲܒ̣̈ܕܹ̇ܐ.

² ܘܐܸܡܲܪ ܠܵܗ̇ ܐܹܠܝܼܫܲܥ: ܡܵܢܵܐ ܐܸܥܒܸ̇ܕ݂ ܠܹܟ݂ܝ: ܚܵܘܵܐܝܼܢܘ: ܡܵܢܵܐ ܐܝܼܬ̣ ܠܹܟ݂ܝ ܒܒܲܝܬܵܐ ܘܐܸܡܪܲܬ̤. ܠܲܝܬ̇ ܠܐܲܡܬ̣ܵܟ݂ ܡܸܕܸ̇ܡ ܒܒܲܝܬܵܐ: ܐܸܠܵܐ ܐܸܢ ܡܲܣܪܘܿܚܝܼܬ̣ܵܐ ܕܡܸܫܚܵܐ.

³ ܘܐܸܡܲܪ ܠܵܗ̇: ܙܸܠܝ ܫܐܲܠܝ ܠܹܟ݂ܝ ܡܵܐܢܹ̈ܐ ܡ̣ܢ ܫܘܼܩܵܐ: ܡ̣ܢ ܟܠܗܘܿܢ ܫܒ̣ܵܒܲܝ̈ܟ̇ܝ: ܡܵܐܢܹ̈ܐ ܣܦܝܼܩܹ̈ܐ. ܠܵܐ ܬܲܙܥ̱ܪܝܼܢ.

⁴ ܘܥܘܿܠܝ ܘܐܲܚܘܿܕ݂ܝ ܬܲܪܥܵܐ ܒܐܲܦܲܝ̈ܟ̇ܝ ܘܒܲܐܦܲܝ̈ ܒܢܲܝ̈ܟ̇ܝ: ܘܣܘܿܟ݂ܝ ܒܗܵܠܹܝܢ ܟܠܗܘܿܢ ܡܵܐܢܹ̈ܐ. ܘܡܵܐܢܵܐ ܕܲܡܠܹܐ ܐܲܣܸܩܝ ܠܝܼ.

⁵ ܘܐܸܙܲܠ̄ܬ̤ ܡ̣ܢ ܠܘܵܬܹܗ: ܘܥܸܠܲܬ̤ ܘܐܸܚܕܲܬ̤ ܬܲܪܥܵܐ ܒܐܲܦܹܝ̈ܗ̇: ܘܒܲܐܦܲܝ̈ ܒܢܹܝ̈ܗ̇. ܗܸܢܘܿܢ ܡܩܲܪܒ̣ܝܼܢ ܠܵܗ̇: ܘܗ̤ܝ ܢܵܣܟ݂ܵܐ.

⁶ ܘܟܲܕ݂ ܫܠܸܡ̣ܘ ܡܵܐܢܹ̈ܐ: ܐܵܡܪܵܐ ܠܲܒ̣ܪܵܗ̇: ܩܲܪܸܒ̣ ܠܝܼ ܬܘܼܒ̣ ܡܵܐܢܹ̈ܐ ܐܵܡܲܪ ܠܵܗ̇ ܒܪܵܗ̇ ܠܲܝܬ̇ ܬܘܼܒ̣ ܡܵܐܢܹ̈ܐ. ܘܩܵܡ ܠܹܗ ܡܸܫܚܵܐ.

⁷ ܘܐܸܬܲܬ̤ ܚܵܘܝܲܬ̤ ܠܲܢܒ̣ܝܹܗ ܕܐܲܠܵܗܵܐ ܘܐܸܡܲܪ ܠܵܗ̇: ܙܸܠܝ ܙܲܒܸ̇ܢܝ ܡܸܫܚܵܐ: ܘܲܦܪܘܿܥܝ ܚܵܘܒ̇ܬܹܟ݂ܝ. ܘܐܲܢ̄ܬ̇ܝ ܘܲܒ̣ܢܲܝ̈ܟ̇ܝ ܚܵܝܝ ܡ̣ܢ ܡܸܕܸ̇ܡ ܕܝܵܬܲܪ.

⁸ ܘܲܗܘ̤ܵܐ ܡ̣ܢ ܒܵܬܲܪ ܝܵܘܡܵܐ: ܘܐܸܬ̣ܵܐ ܐܹܠܝܼܫܲܥ: ܘܲܥܒܲܪ ܠܫܝܼܠܘܿ ܘܬܲܡܵܢ ܐܝܼܬ̣ ܗ̄ܘ̣ܵܬ̣ ܐܲܢ̄ܬ̇ܬ̣ܵܐ ܪܲܒ̇ܬ̣ܵܐ: ܘܐܸܚܲܕ݂ܬܹܗ ܕܢܹܐܟ݂ܘܿܠ ܠܲܚܡܵܐ. ܘܡܵܐ ܕܥܵܒܲܪ: ܣܵܛܹ̇ܐ ܠܬܲܡܵܢ ܠܡܹܐܟܲܠ ܠܲܚܡܵܐ.

⁹ ܘܐܸܡܪܲܬ̤ ܠܒܲܥܠܵܗ̇: ܗܵܐ ܝܵܕ݂ܥܵܐ ܐ̄ܢܵܐ ܕܲܢܒ̣ܝܹܗ ܕܐܲܠܵܗܵܐ ܩܲܕܝܼܫ ܗ̄ܘ̣: ܘܥܵܒܲܪ ܥܠܲܝܢ ܐܲܡܝܼܢܵܐܝܼܬ̣.

¹⁰ ܢܲܬ̣ܩܸܢ ܥܸܠܝܼܬ̣ܵܐ ܙܥܘܿܪܬܵܐ. ܘܢܲܪܡܸܐ ܠܹܗ ܬܲܡܵܢ ܥܲܪܣܵܐ: ܘܦܵܬ̣ܘܿܪܵܐ: ܘܟ݂ܘܼܪܣܝܵܐ: ܘܲܡܢܵܪܬܵܐ. ܘܡܵܐ ܕܐܵܬܹ̇ܐ ܠܘܵܬܲܢ: ܢܸܣܛܸܐ ܠܬܲܡܵܢ.

¹¹ ܘܲܗܘ̤ܵܐ ܝܵܘܡܵܐ ܘܐܸܬ̣ܵܐ ܠܬܲܡܵܢ: ܘܲܣܛܵܐ ܠܥܸܠܝܼܬ̣ܵܐ ܘܲܕ݂ܡܸܟ݂ ܬܲܡܵܢ.

¹² ܘܐܸܡܲܪ ܠܓܲܚܙܝܼ ܬܲܠܡܝܼܕܹܗ: ܩܪܝܼܗ̇ ܠܫܝܼܠܘܿܡܵܝܬܵܐ ܗܵܕܹܐ: ܘܲܩܪܵܗ̇ ܘܩܵܡܲܬ̤ ܩܕ݂ܵܡܵܘܗܝ.

¹³ ܘܐܸܡܲܪ ܠܵܗ̇: ܗܵܐ ܐܲܢ̄ܬܝ ܕܚܸܠܬ̇ܝ ܡܸܢܲܢ ܗܵܕܹܐ ܟܠܵܗ̇ ܕܸܚ̱ܠܬܵܐ. ܡܵܢܵܐ ܘܵܠܹ̇ܐ ܠܡܸܥܒܲܕ݂ ܠܹܟ݂ܝ. ܡܸܕܸ̇ܡ ܐܝܼܬ̣ ܠܡܹܐܡܲܪ ܥܠܲܝܟ̇ܝ ܠܡܲܠܟܵܐ: ܐܵܘ ܠܪܲܒ̇ ܚܲܝܠܵܐ. ܘܐܸܡܪܲܬ̤: ܫܲܦܝܼܪ ܒܓ̣ܵܘ ܥܲܡܝ ܝܵܬ̣ܒܵܐ ܐ̄ܢܵܐ.

¹⁴ ܘܐܸܡܲܪ: ܡܵܢܵܐ ܐܸܥܒܸ̇ܕ݂ ܠܵܗ̇. ܐܵܡܲܪ ܠܹܗ ܓܚܙܝܼ: ܫܲܪܝܼܪܵܐܝܼܬ̣ ܒܪܵܐ ܠܲܝܬ̇ ܠܵܗ̇: ܘܒܲܥܠܵܗ̇ ܣܐܸܒ̣.

¹⁵ ܘܐܸܡܲܪ ܩܪܝܼܗ̇: ܘܲܩ̣ܪܵܗ̇ ܘܩܵܡܲܬ̤ ܒܬܲܪܥܵܐ.

¹⁶ ܘܐܸܡܲܪ ܠܵܗ̇: ܠܙܲܒ̣ܢܵܐ ܗܵܢܵܐ ܟܲܕ݂ ܐܲܢ̄ܬ̇ܝ ܚܲܝܵܐ: ܥܵܦ̇ܩܵܐ ܐܲܢ̄ܬ̇ܝ ܒܪܵܐ. ܘܐܸܡܪܲܬ̤: ܠܵܐ ܡܵܪܝ ܢܒ̣ܝܹܗ ܕܐܲܠܵܗܵܐ: ܠܵܐ ܬܟܲܕܸ̇ܒ̣ ܒܐܲܡܬ̣ܵܟ݂.

¹⁷ ܘܒܸܛܢܲܬ̣ ܐܲܢ̄ܬ̇ܬ̣ܵܐ: ܘܝܸܠܕܲܬ̣ ܒܪܵܐ ܠܙܲܒ̣ܢܵܐ ܗܵܢܵܐ: ܟܲܕ݂ ܗ̤ܝ ܚܲܝܵܐ: ܐܲܝܟ݂ ܕܐܸܡܲܪ ܠܵܗ̇ ܐܹܠܝܼܫܲܥ.

¹⁸ ܘܲܪܒ̣ܵܐ ܛܵܠܝܵܐ: ܘܲܗܘ̤ܵܐ ܝܵܘܡܵܐ: ܘܲܢܦܲܩ̣ ܠܘܵܬ̣ ܐܲܒ̣ܘܼܗܝ ܠܘܵܬ̣ ܚܵܨܘܿܕܹ̈ܐ.

¹⁹ ܘܐܸܡܲܪ ܠܐܲܒ̣ܘܼܗܝ: ܪܹܫܝ ܪܹܫܝ: ܘܐܸܡܲܪ ܠܛܲܠܝܵܐ: ܫܩܘܿܠ ܐܵܘܒܸ̇ܠܲܝܗܝ ܠܐܸܡܹܗ.

²⁰ ܘܲܫ̣ܩܲܠ ܛܲܠܝܵܐ ܐܵܘܒ̇ܠܹܗ ܠܐܸܡܹܗ. ܘܝܼܬܸܒ̣ ܥܲܠ ܒܘܼܪ̈ܟܹ̇ܝܗ̇ ܥܕܲܡܵܐ ܠܛܲܗܪܵܐ: ܘܡܝܼܬ̣.

²¹ ܘܐܲܣܩܲܬ̤ ܐܲܪ̱ܡܝܵܬܹܗ ܒܥܲܪܣܵܐ ܕܲܢܒ̣ܝܹܗ ܕܐܲܠܵܗܵܐ. ܘܐܸܚܕܲܬ̣ ܒܐܲܦܵܘ̈ܗܝ: ܘܢܸܦܩܲܬ̤.

²² ܘܲܩܪܵܬ̤ ܠܒܲܥܠܵܗ̇: ܘܐܸܡܪܲܬ̤: ܫܲܕܲܪ ܠܝܼ ܚܲܕ݂ ܡ̣ܢ ܛܠܵܝܹ̈ܐ ܘܲܚܕ݂ܵܐ ܐܲܬܵܢܵܐ: ܐܸܡܛܵܐ ܥܕܲܡܵܐ ܠܲܢܒ̣ܝܹܗ ܕܐܲܠܵܗܵܐ.

²³ ܐܵܡܲܪ ܠܵܗ̇: ܡܵܢܵܐ ܐܵܙܵܠ̄ܐ ܐܲܢ̄ܬ̇ܝ ܠܘܵܬܹܗ ܝܵܘܡܵܢܵܐ: ܕܠܵܐ ܪܹܫ ܝܲܪܚܵܐ ܘܠܵܐ ܫܲܒ̇ܬ̣ܵܐ. ܘܐܸܡܪܲܬ̤ ܫܝܼܠܘܿܡܵܝܬܵܐ: ܘܐܲܪܡ̣ܝܼܘ ܠܵܗ̇ ܥܲܠ ܐܲܬܵܢܵܐ.

²⁴ ܘܐܸܡܪܲܬ̤ ܠܛܲܠܝܵܐ: ܕܒܲܪ ܘܙܸܠ: ܘܠܵܐ ܬܸܟ݂ܠܸܐ ܠܝܼ ܠܡܸܬܲܒ̣: ܐܸܠܵܐ ܐܸܢ ܐܸܡ̇ܪܹܬ̣ ܠܵܟ݂.

²⁵ ܘܐܸܙܲܠ̄ܬ̇ ܠܘܵܬ̣ ܢܒ̣ܝܹܗ ܕܐܲܠܵܗܵܐ ܠܛܘܼܪܵܐ ܕܟܲܪܡܠܵܐ. ܘܟܲܕ݂ ܚ̣ܙܵܗ̇ ܢܒ̣ܝܹܗ ܕܐܲܠܵܗܵܐ ܡ̣ܢ ܩܒ̣ܘܿܠ: ܐܸܡܲܪ ܠܓܲܚܙܝܼ ܬܲܠܡܝܼܕܹܗ: ܗܵܐ ܫܝܼܠܘܿܡܵܝܬܵܐ ܗܵܕܹܐ.

²⁶ ܗܵܫܵܐ ܗܲܪܛ ܠܐܘܼܪܥܵܗ̇: ܘܐܸܡܲܪ ܠܵܗ̇: ܫܠܵܡ ܠܹܟ݂ܝ: ܘܲܫܠܵܡ ܠܒܲܥܠܹܟ݂ܝ: ܘܲܫܠܵܡ ܠܛܲܠܝܵܐ ܘܐܸܡܪܲܬ̤ ܫܠܵܡ.

²⁷ ܘܐܸܬܲܬ̤ ܠܘܵܬ̣ ܢܒ̣ܝܹܗ ܕܐܲܠܵܗܵܐ ܠܛܘܼܪܵܐ: ܘܐܸܚܕܲܬ̤ ܒܪܸ̈ܓ̣ܠܵܘܗܝ. ܘܲܩܪܲܒ̣ ܓܲܚܙܝܼ ܠܡܲܦܪܵܩܘܼܬ̣ܵܗ̇. ܘܐܸܡܲܪ ܠܹܗ ܢܒ̣ܝܹܗ ܕܐܲܠܵܗܵܐ: ܫܒ̣ܘܿܩ ܠܵܗ̇: ܡܸܛܠ ܕܢܲܦ̮ܫܵܗ̇ ܡܲܪܝܼܪܵܐ ܠܵܗ̇: ܘܡܵܪܝܵܐ ܟܲܣܝܼ ܡܹܢܝ ܘܠܵܐ ܚܵܘܝܲܢܝ.

²⁸ ܘܐܸܡܪܲܬ̤: ܫܸܐ̇ܠܹܬ̣ ܒܪܵܐ ܡ̣ܢ ܡܵܪܝ: ܠܵܐ ܐܸܡ̇ܪܹܬ̣ ܠܵܟ݂ ܕܠܵܐ ܬܸܫܐܲܠ ܠܝܼ.

²⁹ ܘܐܸܡܲܪ ܠܓܲܚܙܝܼ: ܐܲܣܘܿܪ ܚܲܨܲܝ̈ܟ: ܘܣܲܒ̣ ܚܘܼܛܪܝ ܒܐܝܼܕ݂ܵܟ݂: ܘܙܸܠ ܐܸܢ ܬܸܫܟܲܚ ܓܲܒ̣ܪܵܐ: ܠܵܐ ܬܒܲܪܟ݂ܝܼܘܗܝ ܘܐܸܢ ܢܒܲܪܟ݂ܵܟ݂ ܓܲܒ̣ܪܵܐ: ܠܵܐ ܬܸܥܢܹܝܘܗܝ. ܘܣܝܼܡ ܚܘܼܛܪܝ ܥܲܠ ܐܲܦܵܘ̈ܗܝ ܕܛܲܠܝܵܐ.

³⁰ ܘܐܸܡܪܲܬ̤ ܐܸܡܹܗ ܕܛܲܠܝܵܐ: ܚܲܝ ܗ̄ܘ̣ ܡܵܪܝܵܐ ܘܚܲܝܵܐ ܗ̄ܘ̣ ܢܲܦ̮ܫܵܟ݂: ܕܠܵܐ ܐܸܫܒ̇ܩܵܟ݂. ܘܩܵܡ̣ ܘܐܸܙܲܠ̣ ܒܵܬ̣ܪܵܗ̇.

³¹ ܘܓܲܚܙܝܼ ܥ̣ܒܲܪ ܩܕ݂ܵܡܲܝܗܘܿܢ: ܘܣܵܡ̣ ܚܘܼܛܪܵܐ ܥܲܠ ܐܲܦܵܘ̈ܗܝ ܕܛܲܠܝܵܐ: ܘܠܲܝܬ̇ ܩܵܠ ܐܵܦܠܵܐ ܕܨܵܐܹ̇ܬ̣. ܘܲܗܦܲܟ݂ ܠܐܘܼܪܥܹܗ ܘܚܵܘܝܼܗ: ܘܐܸܡܲܪ ܠܹܗ: ܠܵܐ ܐܸܬ̇ܬ̇ܥܝܼܪ ܛܲܠܝܵܐ.

³² ܘܐܸܬ̣ܵܐ ܐܹܠܝܼܫܲܥ ܠܒܲܝܬܵܐ: ܘܲܚܙܵܐ: ܘܗܵܐ ܛܲܠܝܵܐ ܡܝܼܬ̣: ܘܲܪܡܸܐ ܒܥܲܪܣܹܗ.

³³ ܘܥܲܠ: ܘܐܸܚܲܕ݂ ܬܲܪܥܵܐ ܒܐܲܦܲܝ̈ ܬܪ̈ܲܝܗܘܿܢ. ܘܨܲܠܝܼ ܩܕ݂ܵܡ ܡܵܪܝܵܐ.

³⁴ ܘܲܣܠܸܩ: ܘܲܢܦܲܠ̣ ܠܥܸܠ ܡܸܢܹܗ ܕܛܲܠܝܵܐ. ܘܣܵܡ ܦܘܼܡܹܗ ܥܲܠ ܦܘܼܡܹܗ: ܘܥܲܝܢܵܘ̈ܗܝ ܥܲܠ ܥܲܝܢܵܘ̈ܗܝ: ܘܐܝܼܕ݂ܵܘ̈ܗܝ ܥܲܠ ܐܝܼܕ݂ܵܘܗܝ ܘܐܸܬ̣ܓ̇ܗܸܢ ܥܠܵܘܗܝ. ܘܚܲܡ̣ ܒܸܣܪܹܗ ܕܛܲܠܝܵܐ.

³⁵ ܘܲܗ̣ܦܲܟ݂: ܘܗܲܠܸܟ݂ ܒܒܲܝܬܵܐ: ܚܕ݂ܵܐ ܠܟ݂ܵܐ ܘܲܚܕ݂ܵܐ ܠܟ݂ܵܐ. ܘܲܣܠܸܩ ܘܐܸܬ̣ܓ̇ܗܸܢ ܥܠܵܘܗܝ. ܘܐܸܬ̣ܦܵܘܲܩ ܛܲܠܝܵܐ ܫܒܲܥ ܙܲܒ̣ܢ̈ܝܼܢ: ܘܲܦܬܲܚ̣ ܛܲܠܝܵܐ ܥܲܝܢܵܘ̈ܗܝ.

³⁶ ܘܲܩ̣ܪܵܐ ܠܓܲܚܙܝܼ ܘܐܸܡܲܪ ܠܹܗ: ܩܪܝܼܗ̇ ܠܫܝܼܠܘܿܡܵܝܬܵܐ ܗܵܕܹܐ. ܘܲܩܪܵܗ̇. ܘܥܸܠܲܬ̤ ܠܘܵܬܹܗ. ܘܐܸܡܲܪ ܠܵܗ̇: ܫܩܘܿܠܝ ܒܪܹܟ݂ܝ.

³⁷ ܘܢܸܦܠܲܬ̤ ܥܲܠ ܪܸ̈ܓ̣ܠܵܘܗܝ: ܘܣܸܓ̣ܕܲܬ̤ ܠܹܗ ܥܲܠ ܐܲܪܥܵܐ. ܘܫܸܩܠܲܬ̤ ܒܪܵܗ̇: ܘܢܸܦܩܲܬ̤.

³⁸ ܘܐܹܠܝܼܫܲܥ ܗ̣ܦܲܟ݂ ܠܓܲܠܓܵܠܵܐ. ܘܟܲܦܢܵܐ ܐܝܼܬ̣ ܒܐܲܪܥܵܐ. ܘܲܒ̣ܢܲܝ̈ ܢܒ̣ܝܹ̈ܐ ܝܵܬ̣ܒ̇ܝܼܢ ܩܕ݂ܵܡܵܘܗܝ. ܘܐܸܡܲܪ ܠܬܲܠܡܝܼܕܹܗ: ܬܦܝܼ ܩܲܕ݂ܣܵܐ ܪܲܒܵܐ: ܘܒܲܫܸܠ ܒܘܼܫܵܠܵܐ ܠܲܒ̣ܢܲܝ̈ ܢܒ̣ܝܹ̈ܐ.

³⁹ ܘܲܢܦܲܩ̣ ܚܲܕ݂ ܠܚܲܩܠܵܐ ܠܡܸܠܩܲܛ ܪ̈ܘܼܥܢܹܐ. ܘܐܸܫܟܲܚ ܓܦܸܬܵܐ ܒܚܲܩܠܵܐ: ܘܲܠܩܲܛ ܡܸܢܵܗ̇ ܦܲܩܘܼܥܹ̈ܐ ܕܕܲܒ̣ܪܵܐ ܡܠܸܐ ܠܒ̣ܵܫܹܗ. ܘܐܸܬ̣ܵܐ ܐܲܪܡܝܼ ܒܩܲܕ݂ܣܵܐ ܕܒ̣ܘܼܫܵܠܵܐ: ܡܸܛܠ ܕܠܵܐ ܝܼܕܲܥ̣.

⁴⁰ ܘܲܢܣܲܟ݂ ܠܗܘܿܢ ܠܓܲܒ̣ܪܹ̈ܐ ܠܡܹܐܟܲܠ. ܘܟܲܕ݂ ܐܸܟܲܠܘ ܡ̣ܢ ܒܘܼܫܵܠܵܐ: ܐܵܡ̇ܪܝܼܢ: ܡܵܘܬܵܐ ܐܝܼܬ̣ ܒܩܲܕ݂ܣܵܐ: ܢܒ̣ܝܹܗ ܕܐܲܠܵܗܵܐ. ܘܠܵܐ ܐܸܫܟܲܚܘ ܕܢܹܐܟ݂ܠܘܼܢ.

⁴¹ ܘܐܸܡܲܪ: ܣܲܒ̣ܘ ܩܲܡܚܵܐ ܐܲܪܡܵܘ ܒܩܲܕ݂ܣܵܐ. ܘܐܸܡܲܪ: ܣܘܿܟ݂ܘ ܠܥܲܡܵܐ ܘܢܹܐܟ݂ܠܘܼܢ ܘܠܵܐ ܗܘ̤ܵܐ ܡܸܕܸ̇ܡ ܕܒ̣ܝܼܫ ܒܩܲܕ݂ܣܵܐ.

⁴² ܘܓܲܒ̣ܪܵܐ ܐܸܬ̣ܵܐ ܡ̣ܢ ܡܕ݂ܝܼܢܲܬ̣ ܓܲܢ̄ܒܵܪܹ̈ܐ: ܘܐܲܝܬ̇ܝܼ ܠܲܢܒ̣ܝܹܗ ܕܐܲܠܵܗܵܐ ܠܲܚܡܵܐ ܕܒܲܟܵܪܹ̈ܐ: ܥܸܣܪܝܼܢ ܕܠܲܚܡܵܐ ܕܲܣܥܵܪܹ̈ܐ: ܘܲܦܪ̈ܝܼܟ݂ܵܬ̣ܵܐ ܒܣܸܕܘܿܢܵܐ ܘܐܸܡܲܪ ܗܲܒ̣ ܠܥܲܡܵܐ ܘܢܹܐܟ݂ܠܘܼܢ.

⁴³ ܘܐܸܡܲܪ ܠܹܗ ܡܫܲܡܫܵܢܹܗ: ܡܵܢܵܐ ܐܸܬܸ̇ܠ ܗܵܢܵܐ ܩܕ݂ܵܡ ܡܵܐܐ ܓܲܒ̣ܪ̈ܝܼܢ ܘܐܸܡܲܪ ܠܹܗ ܐܹܠܝܼܫܲܥ: ܗܲܒ̣ ܠܥܲܡܵܐ ܘܢܹܐܟ݂ܠܘܼܢ: ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ: ܢܹܐܟ݂ܠܘܼܢ: ܘܢܵܘܬ̇ܪܘܼܢ.

⁴⁴ ܘܣܵܡ̣ ܩܕ݂ܵܡܲܝܗܘܿܢ ܘܐܸܟܲܠܘ: ܘܐܵܘܬܲܪܘ ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ.

5

¹ ܘܢܲܥܡܵܢ ܪܲܒ̇ ܚܲܝܠܵܐ ܕܡܲܠܟܵܐ ܕܐܲܕ݂ܘܿܡ: ܓܒܲܪ ܗ̄ܘ̣ܵܐ ܪܲܒ̇ ܩܕ݂ܵܡ ܡܵܪܹܗ: ܘܲܫܒ̣ܝܼܚ ܒܐܲܦܹ̈ܐ. ܡܸܛܠ ܕܒܹܗ ܥ̣ܒܲܕ݂ ܡܵܪܝܵܐ ܦܘܼܪܩܵܢܵܐ ܠܐܲܕ݂ܘܿܡ. ܘܓܲܒ̣ܪܵܐ ܢܲܥܡܵܢ ܓܲܢ̄ܒܵܪ ܚܲܝܠܵܐ ܗ̄ܘ̣ܵܐ: ܘܲܓ̣ܪܸܒ̣.

² ܘܐܲܕ݂ܘܿܡܵܝܹ̈ܐ ܢܦܲܩܘ ܒܓܲܝܣܹ̈ܐ: ܘܲܫܒ̣ܵܘ ܡ̣ܢ ܐܲܪܥܵܐ ܕܝܼܣܪܵܝܹܠ ܥܠܲܝܡܬ̣ܵܐ ܙܥܘܿܪܬܵܐ: ܘܲܗܘ̤ܵܬ̣ ܩܕ݂ܵܡ ܐܲܢ̄ܬ̇ܬܹܗ ܕܢܲܥܡܵܢ.

³ ܘܐܸܡܪܲܬ̤ ܠܡܵܪܬܵܗ̇: ܛܘܼܒ̣ܵܘܗܝ ܠܡܵܪܝ ܐܸܢ ܢܹܐܙܲܠ ܠܘܵܬ̣ ܢܒ̣ܝܼܵܐ ܕܲܒ̣ܫܵܡܪܹܝܢ: ܡܸܚܕ݂ܵܐ ܡܲܐܣܸܐ ܠܹܗ ܡ̣ܢ ܓܲܪܒܹܗ.

⁴ ܘܥܲܠܘ ܘܚܵܘܝܼܘ ܠܡܵܪܵܗ̇: ܘܐܸܡܲܪܘ ܠܹܗ: ܗܵܟܲܢܵܐ ܘܗܵܟܲܢܵܐ ܐܸܡܪܲܬ̤ ܥܠܲܝܡܬ̣ܵܐ ܕܡ̣ܢ ܐܲܪܥܵܐ ܕܝܼܣܪܵܝܹܠ.

⁵ ܘܐܸܡܲܪ ܠܹܗ: ܡܲܠܟܵܐ ܕܐܲܕ݂ܘܿܡ ܬܵܐ ܙܸܠ: ܐܸܢܵܐ ܐܹܫܲܕܲܪ ܐܸܓܲܪܬܵܐ ܠܡܲܠܟܵܐ ܕܝܼܣܪܵܝܹܠ. ܘܐܸܙܲܠ̣ ܘܲܢܣܲܒ̣ ܒܐܝܼܕܹܗ ܥܣܲܪ ܟܲܟ̇ܪ̈ܝܼܢ ܕܟܸܣܦܵܐ: ܘܸܫܬܵܐ ܐܲܠܦ̈ܝܼܢ ܕܕܲܗܒ̣ܵܐ: ܘܥܸܣܪܵܐ ܙܵܘ̈ܓ̇ܝܼܢ ܕܢܲܚ̈ܬܹ̇ܐ.

⁶ ܘܐܲܝܬ̇ܝܼ ܐܸܓܲܪܬܵܐ ܠܡܲܠܟܵܐ ܕܝܼܣܪܵܝܹܠ. ܘܗܵܟܲܢܵܐ ܟܬ̣ܝܼܒ̣ ܒܵܗ̇: ܒܫܵܥܬ̣ܵܐ ܕܡܵܛ̇ܝܵܐ ܐܸܓܲܪܬܵܐ ܗܵܕܹܐ ܠܘܵܬ̣ܵܟ݂: ܗܵܐ ܫܲܕܲܪܬ̇ ܠܘܵܬ̣ܵܟ݂ ܠܢܲܥܡܵܢ ܥܲܒ̣ܕܲܝ: ܐܲܣܵܝܗܝ ܡ̣ܢ ܓܲܪܒܹܗ.

⁷ ܘܟܲܕ݂ ܩܪܵܐ ܡܲܠܟܵܐ ܕܝܼܣܪܵܝܹܠ ܐܸܓܲܪܬܵܐ: ܨܲܪܝܼ ܠܒ̣ܘܼܫܵܘܗܝ: ܘܐܸܡܲܪ: ܐܸܢܵܐ ܐܲܠܵܗܵܐ ܐ̄ܢܵܐ ܕܲܡܡܝܼܬ̣ ܘܡܲܚܸܐ: ܕܲܫܠܲܚ ܠܝܼ ܗܵܢܵܐ ܕܐܲܣܸܐ ܓܲܒ̣ܪܵܐ ܡ̣ܢ ܓܲܪܒܹܗ. ܡܸܟܹ̇ܝܠ ܕܲܥܘ ܘܲܚܙܵܘ ܕܡܸܬ̣ܓܲܪܵܝܘܼ ܡܸܬ̣ܓܲܪܸܐ ܥܲܡܝ.

⁸ ܘܟܲܕ݂ ܫ̣ܡܲܥ ܐܹܠܝܼܫܲܥ ܢܒ̣ܝܹܗ ܕܐܲܠܵܗܵܐ: ܕܨܲܪܝܼ ܡܲܠܟܵܐ ܠܒ̣ܘܫܵܘ̈ܗܝ: ܫܠܲܚ ܠܡܲܠܟܵܐ: ܘܐܸܡܲܪ ܠܹܗ: ܠܡܵܢܵܐ ܨܲܪܝܼܬ̇ ܠܒ̣ܘܼܫܲܝ̈ܟ ܢܹܐܬܹܐ ܠܘܵܬ̣ܝ: ܘܢܸܕܲܥ ܕܐܝܼܬ̣ ܢܒ̣ܝܼܵܐ ܒܝܼܣܪܵܝܹܠ.

⁹ ܘܐܸܬ̣ܵܐ ܢܲܥܡܵܢ ܒܪ̈ܲܟ݂ܫܹܗ ܘܲܒ̣ܡܲܪ̈ܟ̇ܒ̣ܵܬܹܗ. ܘܩܵܡ̣ ܒܲܬ̣ܪܲܥ ܒܲܝܬܹ̇ܗ ܕܐܹܠܝܼܫܲܥ.

¹⁰ ܘܲܫܠܲܚ ܠܹܗ ܐܹܠܝܼܫܲܥ ܒܝܲܕ݂ ܡܲܠܲܐܟ݂ܵܐ: ܙܸܠ ܘܲܣܚܝܼ ܫܒܲܥ ܙܲܒ̣ܢ̈ܝܼܢ ܒܝܘܿܪܕ̇ܢܵܢ: ܘܲܢܬ̣ܘܼܒ̣ ܒܸܣܪܵܟ݂ ܥܠܲܝܟ: ܘܢܸܬ̇ܕܲܟܸ̇ܐ.

¹¹ ܘܲܪܓܸ̇ܙ ܢܲܥܡܵܢ ܘܐܸܙܲܠ̣: ܘܐܸܡܲܪ: ܐܸܢܵܐ ܐܸܡ̇ܪܹܬ̣ ܕܡܸܦܘܿܩ ܠܘܵܬ̣ܝ: ܘܲܢܩܘܼܡ ܘܢܸܩܪܸܐ ܒܲܫܡܹܗ ܕܡܵܪܝܵܐ ܐܲܠܵܗܹܗ: ܘܲܢܢܝܼܦ ܐܝܼܕܹܗ ܥܲܠ ܕܘܼܟ̇ܬ̣ܵܐ: ܘܐܸܬ̣ܐܲܣܸܐ ܡ̣ܢ ܓܲܪܒ̣ܵܐ.

¹² ܠܵܐ ܗ̄ܘ̣ܵܐ ܛܵܒ̣ ܐܲܡܢܵܢ ܘܦܲܪܦܵܪ ܢܲܗܪ̈ܵܘܵܬ̣ܵܐ ܕܕܲܪܡܣܘܿܩ: ܡ̣ܢ ܟܠܗܘܿܢ ܡܲـ̈ـܝܵܐ ܕܝܼܣܪܵܝܹܠ. ܐܸܙܲܠ ܐܸܣܚܸܐ ܒܗܘܿܢ: ܡܲܬ̇ܕܲܟܸ̇ܐ ܐ̄ܢܵܐ. ܘܐܸܬ̣ܦܢܝܼ: ܘܐܸܙܲܠ̣ ܒܚܸܡܬ̣ܵܐ.

¹³ ܘܲܩܪܸܒ̣ܘ ܥܲܒ̣ܕܵܘ̈ܗܝ ܘܐܵܡ̇ܪܝܼܢ ܠܹܗ: ܡܵܪܲܢ: ܐܸܠܘܼ ܦܸܬ̣ܓ̣ܵܡܵܐ ܪܲܒܵܐ ܐܸܡܲܪ ܗ̄ܘ̣ܵܐ ܠܵܟ݂ ܢܒ̣ܝܼܵܐ: ܘܵܠܹ̇ܐ ܗ̄ܘ̣ܵܐ ܠܵܟ݂ ܠܡܸܥܒܲܕ݂. ܐܸܠܵܐ ܗܵܐ ܦܸܬ̣ܓ̣ܵܡܵܐ ܗ̄ܘ̣ ܙܥܘܿܪܵܐ ܐܸܡܲܪ ܠܵܟ݂: ܙܸܠ ܣܚܝܼ ܘܲܕ݂ܟ݂ܝ.

¹⁴ ܘܐܸܙܲܠ ܣܚ̣ܵܐ ܒܝܘܿܪܕ̇ܢܵܢ ܫܒܲܥ ܙܲܒ̣ܢ̈ܝܼܢ: ܐܲܝܟ݂ ܦܸܬ̣ܓ̣ܵܡܹܗ ܕܲܢܒ̣ܝܼܵܐ ܕܐܲܠܵܗܵܐ. ܘܲܗܦܲܟ݂ ܒܸܣܪܹܗ ܐܲܝܟ݂ ܒܸܣܪܵܐ ܕܛܲܠܝܵܐ ܙܥܘܿܪܵܐ: ܘܐܸܬ̇ܕܲܟ̇ܝܼ.

¹⁵ ܘܲܗܦܲܟ݂ ܠܘܵܬ̣ ܢܒ̣ܝܹܗ ܕܐܲܠܵܗܵܐ: ܗ̤ܘ ܘܟ݂ܠܵܗ̇ ܡܲܫܪܝܼܬܹܗ: ܘܐܸܬ̣ܵܐ ܘܩܵܡ ܩܕ݂ܵܡܵܘܗܝ: ܘܐܸܡܲܪ ܠܹܗ ܗܵܫܵܐ ܗ̄ܘ̣ ܝܸܕܥܹܬ̣ ܕܠܲܝܬ̇ ܐܲܠܵܗܵܐ ܒܟ݂ܠܵܗ̇ ܐܲܪܥܵܐ: ܐܸܠܵܐ ܐܸܢ ܒܝܼܣܪܵܝܹܠ ܘܗܵܫܵܐ ܣܲܒ̣ ܒܘܼܪܟ̇ܬ̣ܵܐ ܗܵܕܹܐ ܡ̣ܢ ܥܲܒ̣ܕܵܟ݂.

¹⁶ ܘܐܸܡܲܪ ܐܹܠܝܼܫܲܥ: ܚܲܝ ܗ̄ܘ̣ ܡܵܪܝܵܐ ܕܩܵܡܹ̇ܬ̣ ܩܕ݂ܵܡܵܘܗܝ: ܕܠܵܐ ܐܸܣܲܒ̣ ܘܲܒ̣ܥܵܐ ܡܸܢܹܗ ܕܢܸܣܲܒ̣: ܘܠܵܐ ܨܒ̣ܵܐ.

¹⁷ ܘܐܸܡܲܪ ܢܲܥܡܵܢ: ܘܡܵܐ ܕܠܵܐ: ܢܸܬ̣̱ܝܼܗܸܒ̣ ܠܥܲܒ̣ܕܵܟ݂ ܛܲܥܢܵܐ ܕܲܬ̣ܪܹܝܢ ܟܘܼܕܲܢ̈ܘܵܢ ܐܲܕ݂ܡ̱ܬ̣ܵܐ ܡܸܛܠ ܕܬ̣ܘܼܒ̣ ܠܵܐ ܥܵܒܹ̇ܕ݂ ܥܲܒ̣ܕܵܟ݂ ܥܠܵـ̈ـܘܵܬ̣ܵܐ ܕܕܸܒ̣ܚܹ̈ܐ ܠܐܲܠܵܗ ܐ̄ܚܪܹܝܢ: ܐܸܠܵܐ ܐܸܢ ܠܡܵܪܝܵܐ ܒܲܠܚܘܿܕ݂ܵܘܗܝ.

¹⁸ ܘܥܲܠ ܨܒ̣ܘܼܬ̣ܵܐ ܗܵܕܹܐ ܢܸܫܒ̇ܘܿܩ ܡܵܪܝܵܐ ܠܥܲܒ̣ܕܵܟ݂: ܡܵܐ ܕܥܵܐܹ̇ܠ ܡܵܪܝ ܠܒܹܝܬ̣ ܪܲܡܘܿܢ ܠܡܸܣܓܲܕ݂ ܬܲܡܵܢ: ܘܗ̤ܘ ܡܸܣܬܲܡܲܟ݂ ܥܲܠ ܐܝܼ̈ܕܲܝ: ܘܐܸܣܓܘܿܕ݂ ܒܹܝܬ̣ ܪܲܡܘܿܢ. ܘܡܵܐ ܕܣܲܓܕܹ̇ܬ̣ ܒܹܝܬ̣ ܪܡܘܿܢ: ܢܸܫܒ̇ܘܿܩ ܡܵܪܝܵܐ ܠܥܲܒ̣ܕܵܟ݂ ܥܲܠ ܨܒ̣ܘܼܬ̣ܵܐ ܗܵܕܹܐ.

¹⁹ ܘܐܸܡܲܪ ܠܹܗ: ܙܸܠ ܒܲܫܠܵܡܵܐ. ܘܐܸܙܲܠ̣ ܡ̣ܢ ܠܘܵܬܹܗ ܐܲܝܟ݂ ܦܲܪܣܚܵܐ ܕܐܲܪܥܵܐ.

²⁰ ܘܐܸܡܲܪ ܓܲܚܙܝܼ ܬܲܠܡܝܼܕܹܗ ܕܐܹܠܝܼܫܲܥ ܢܒ̣ܝܹܗ ܕܐܲܠܵܗܵܐ: ܗܵܐ ܚܣܲܟ݂ ܡܵܪܝ ܠܢܲܥܡܵܢ ܐܲܕ݂ܘܿܡܵܝܵܐ: ܘܠܵܐ ܢܣܲܒ̣ ܡܸܢܹܗ ܡܸܕܸ̇ܡ ܕܐܲܝܬ̇ܝ. ܚܲܝ ܗ̄ܘ̣ ܡܵܪܝܵܐ: ܐܸܠܵܐ ܐܸܪܗܲܛ ܒܵܬ̣ܪܹܗ: ܘܐܸܣܲܒ̣ ܡܸܢܹܗ ܡܸܕܸ̇ܡ.

²¹ ܘܲܪܗܸܛ ܓܲܚܙܝܼ ܒܵܬܲܪ: ܢܲܥܡܵܢ ܘܲܚܙܵܐ ܢܲܥܡܵܢ ܕܪܵܗܹ̇ܛ ܒܵܬ̣ܪܹܗ: ܘܲܢܚܸܬ̣ ܡ̣ܢ ܡܲܪܟܲܒ̣ܬܹܗ ܠܐܘܼܪܥܹܗ: ܘܐܸܡܲܪ ܠܹܗ: ܫܠܵܡ ܐܸܬܲܝܬ̇.

²² ܘܐܸܡܲܪ ܫܠܵܡ: ܡܵܪܝ ܫܲܕܲܪܲܢܝ: ܘܐܵܡܲܪ: ܗܵܫܵܐ ܐܸܬ̣ܵܘ ܠܘܵܬ̣ܝ ܬܪܹܝܢ ܓܲܒ̣ܪܝܼܢ ܡܢ ܛܘܼܪܵܐ ܕܐܲܦܪܹܝܡ ܡ̣ܢ ܒܢܲܝ̈ ܢܒ̣ܝܹ̈ܐ. ܗܲܒ̣ ܠܗܘܿܢ ܟܲܟ̇ܪܵܐ ܕܟܸܣܦܵܐ: ܘܲܬ̣ܪܹܝܢ ܙܵܘ̈ܓ̇ܝܼܢ ܕܢܲܚ̈ܬܹ̇ܐ.

²³ ܘܐܸܡܲܪ ܢܲܥܡܵܢ: ܒܵܥܹ̇ܐ ܐ̄ܢܵܐ: ܣܲܒ̣ ܬܲܪܬܹ̇ܝܢ ܟܲܟ̇ܪ̈ܝܼܢ. ܘܐܲܠܨܹܗ ܘܨܲܪ ܬܲܪܬܹ̇ܝܢ ܟܲܟ̇ܪ̈ܝܼܢ ܕܟܸܣܦܵܐ ܒܲܬ̣ܪܹܝܢ ܣܸܕܘܿܢ̈ܝܼܢ: ܘܲܬ̣ܪܹܝܢ ܙܵܘ̈ܓ̇ܝܼܢ ܕܢܲܚ̈ܬܹ̇ܐ. ܘܝܲܗ̄ܒ̣ ܠܲܬ̣ܪܹܝܢ ܥܠܲܝܡܵܘ̈ܗܝ. ܘܲܫܩܲܠܘ ܩܕ݂ܵܡܵܘܗܝ.

²⁴ ܘܐܸܬ̣ܵܐ ܠܓܸܢܝܵܐ: ܘܲܢܣܲܒ̣ ܡܸܢܗܘܿܢ: ܘܐܲܛܲܪ ܒܒܲܝܬܵܐ. ܘܫܲܕܲܪܘ ܐܸܢܘܿܢ ܠܓܲܒ̣ܪܹ̈ܐ: ܘܐܸܙܲܠ̣ܘ.

²⁵ ܘܗ̤ܘ ܐܸܬ̣ܵܐ ܘܩܵܡ̣ ܩܕ݂ܵܡ ܡܵܪܹܗ. ܘܐܸܡܲܪ ܠܹܗ ܐܹܠܝܼܫܲܥ: ܐܲܝܡܸܟܵܐ ܓܲܚܙܝܼ ܘܐܸܡܲܪ: ܠܵܐ ܐܸܙܲܠ ܥܲܒ̣ܕܵܟ݂ ܠܵܐ ܠܟ݂ܵܐ ܘܠܵܐ ܠܟ݂ܵܐ.

²⁶ ܘܐܸܡܲܪ ܠܹܗ: ܠܹܒ̇ܝ ܚܵܘܝܲܢܝ ܟܲܕ݂ ܢܚܸܬ̣ ܓܲܒ̣ܪܵܐ ܡ̣ܢ ܡܵܪܟܲܒ̣ܬܹܗ ܠܐܘܼܪܥܵܟ݂. ܗܵܢܵܘ ܙܲܒ̣ܢܵܐ ܕܬܸܩܢܸܐ ܠܵܟ݂ ܟܸܣܦܵܐ: ܘܬܸܩܢܹܐ ܠܒ̣ܘܼܫܹ̈ܐ ܘܙܲܝ̈ܬܹܐ ܘܟܲܪ̈ܡܹܐ: ܘܥܵـ̈ـܢܵܐ ܘܬ̣ܵܘܪܹ̈ܐ ܘܥܲܒ̣̈ܕܹ̇ܐ ܘܐܲܡ̈ܗܵܬ̣ܵܐ.

²⁷ ܓܲܪܒܹܗ ܕܢܲܥܡܵܢ ܢܸܕ݂ܒܲܩ ܒܵܟ݂: ܘܲܒ̣ܙܲܪܥܵܟ݂ ܠܥܵܠܲܡ. ܘܲܢܦܲܩ ܡ̣ܢ ܩܕ݂ܵܡܵܘܗܝ ܟܲܕ݂ ܓܪܸܒ̣ ܐܲܝܟ݂ ܬܲܠܓܵܐ.

6

¹ ܘܐܸܡܲܪܘ ܒܢܲܝ̈ ܢܒ̣ܝܹ̈ܐ ܠܐܹܠܝܼܫܲܥ: ܗܵܢܵܐ ܐܲܬ̣ܪܵܐ ܕܝܵܬ̣ܒ̇ܝܼܢ ܚ̄ܢܲܢ ܒܹܗ ܗܵܪܟܵܐ ܩܕ݂ܵܡܲܝܟ: ܐܲܠܝܼܨ ܗ̄ܘ̣ ܠܲܢ.

² ܢܹܐܙܲܠ ܠܝܘܿܪܕܢܵܢ: ܘܢܸܦܣܘܿܩ ܡ̣ܢ ܬܲܡܵܢ ܓܒܲܪ ܚܕ݂ܵܐ ܚܕ݂ܵܐ ܩܵܪܝܼ: ܘܢܸܥܒܸ̇ܕ݂ ܠܲܢ ܐܲܬ̣ܪܵܐ ܠܡܸܬܲܒ̣ ܬܲܡܵܢ. ܘܐܸܡܲܪ: ܙܸܠܘ.

³ ܘܲܥܢܵܐ ܚܲܕ݂ ܡܢܗܘܿܢ ܘܐܸܡܲܪ: ܐܸܢ ܨܵܒܹ̇ܐ ܐܲܢ̄ܬ̇: ܙܸܠ ܥܲܡ ܥܲܒ̣ܕܲܝ̈ܟ. ܘܐܸܡܲܪ: ܐܸܢܵܐ ܐܸܙܲܠ.

⁴ ܘܐܸܙܲܠ ܥܲܡܗܘܿܢ: ܘܐܸܬ̣ܵܘ ܠܝܘܿܪܕ̇ܢܵܢ: ܘܲܦܣܲܩܘ ܩܲܝܣܹ̈ܐ.

⁵ ܚܲܕ݂ ܡܸܢܗܘܿܢ ܟܲܕ݂ ܪܵܡܹ̇ܐ ܩܵܪܝܼܬ̣ܵܐ: ܢܦܲܠ ܦܲܪܙܠܹܗ ܒܓ̣ܵܘ ܡܲـ̈ـܝܵܐ. ܘܐܲܝܠܸܠ̣ ܘܐܸܡܲܪ: ܒܵܥܹ̇ܐ ܐ̄ܢܵܐ ܡܸܢܵܟ݂ ܡܵܪܝ: ܡܸܫܐܲܠ ܫܐܝܼܠ ܠܥܲܒ̣ܕܵܟ݂.

⁶ ܘܐܸܡܲܪ ܠܹܗ ܢܒ̣ܝܹܗ ܕܐܲܠܵܗܵܐ ܐܲܝܟܵܐ ܢܦܲܠ̣ ܘܚܵܘܝܹܗ ܐܲܬ̣ܪܵܐ. ܘܲܦܣܲܩ ܩܲܝܣܵܐ: ܘܐܲܪܡܝܼ ܬܲܡܵܢ: ܘܛܵܦ ܦܲܪܙܠܵܐ.

⁷ ܘܐܸܡܲܪ: ܐܲܪܝܼܡ ܕܝܼܠܵܟ݂. ܘܐܵܘܫܸܛ ܐܝܼܕܹܗ: ܘܢܲܣܒܹ̇ܗ.

⁸ ܘܡܲܠܟܵܐ ܕܐܲܕ݂ܘܿܡ ܡܸܬ̣ܟܲܬܲܫ ܗ̄ܘ̣ܵܐ ܥܲܡ ܝܼܣܪܵܝܹܠ. ܘܐܸܬ̣ܡܲܠܲܟ݂ ܗ̤ܘ ܘܥܲܒ̣ܕܵܘ̈ܗܝ: ܘܐܸܡܲܪ: ܒܐܲܬܲܪ ܦܠܵܢ ܟܡܲܢܘ ܘܐܸܬ̇ܛܲܫܵܘ.

⁹ ܘܲܫܠܲܚ ܢܒ̣ܝܼܵܐ ܕܐܲܠܵܗܵܐ ܠܡܲܠܟܵܐ ܕܝܼܣܪܵܝܹܠ: ܘܐܸܡܲܪ ܠܹܗ: ܐܸܙܕܲܗ̄ܪ: ܠܵܐ ܬܸܥܒܲܪ ܐܬ̣ܪܵܐ ܗܵܢܵܐ: ܡܸܛܠ ܕܬܲܡܵܢ ܐܲܕ݂ܘܿܡܵܝܹ̈ܐ ܟܡܝܼܢܝܼܢ.

¹⁰ ܘܫܲܕܲܪ ܡܲܠܟܵܐ ܕܝܼܣܪܵܝܹܠ ܠܐܲܬ̣ܪܑܵ ܕܐܸܡܲܪ ܠܹܗ ܢܒ̣ܝܹܗ ܕܐܲܠܵܗܵܐ. ܘܙܲܗܪܹܗ ܕܢܸܙܕ̇ܗܲܪ ܡ̣ܢ ܬܲܡܵܢ: ܠܵܐ ܚܕ݂ܵܐ ܘܠܵܐ ܬܲܪܬܹ̇ܝܢ.

¹¹ ܘܐܸܬ̇ܕܲܠܲܚ ܠܸܒܹ̇ܗ ܕܡܲܠܟܵܐ ܕܐܲܕ݂ܘܿܡ: ܥܲܠ ܦܸܬ̣ܓ̣ܵܡܵܐ ܗܵܢܵܐ. ܘܲܩܪܵܐ ܠܥܲܒ̣ܕܵܘ̈ܗܝ ܘܐܸܡܲܪ ܠܗܘܿܢ: ܠܵܐ ܬܚܵܘܘܿܢܵܢܝ ܡ̇ܢ ܡ̣ܢ ܕܝܼܠܲܢ ܠܘܵܬ̣ ܡܲܠܟܵܐ ܕܝܼܣܪܵܝܹܠ.

¹² ܘܲܥ̣ܢܵܐ ܚܲܕ݂ ܡ̣ܢ ܥܲܒ̣ܕܵܘ̈ܗܝ ܘܐܸܡܲܪ: ܠܵܐ ܗ̄ܘ̣ܵܐ ܡ̣ܢ ܕܝܼܠܲܢ ܡܵܪܝ ܡܲܠܟܵܐ ܬܲܡܵܢ: ܐܸܠܵܐ ܐܹܠܝܼܫܲܥ ܗ̄ܘ̣ ܢܒ̣ܝܼܵܐ ܕܒ̣ܝܼܣܪܵܝܹܠ: ܡܚܵܘܸܐ ܠܡܲܠܟܵܐ ܕܝܼܣܪܵܝܹܠ ܡܸܕܸ̇ܡ ܕܥܵܒܹ̇ܕ݂ ܐܲܢ̄ܬ̇ ܒܩܲܝܛܘܿܢܵܐ ܕܡܲܫܟ̇ܒ̣ܵܟ݂.

¹³ ܘܐܸܡܲܪ: ܙܸܠܘ ܚܙܵܘ ܐܲܝܟܵܘ ܐܹܫܲܕܲܪ ܐܸܕ݂ܒ̇ܪܝܼܘܗܝ ܘܚܵܘܝܼܘܗܝ ܘܐܸܡܲܪܘ ܠܹܗ: ܗܵܐ ܒܕ݂ܘܿܬ̣ܵܢ.

¹⁴ ܘܫܲܕܲܪ ܠܬܲܡܵܢ ܪ̈ܲܟ݂ܫܵܐ ܘܪ̈ܲܟܵܒܹܐ ܘܚܲܝܠܵܐ ܥܲܫܝܼܢܵܐ. ܘܐܸܬ̣ܵܘ ܒܠܸܠܝܵܐ: ܘܐܸܬ̣ܟܲܪܟ̇ܘܼܗ̇ ܠܲܩܪܝܼܬ̣ܵܐ.

¹⁵ ܘܩܲܕܸ̇ܡ ܡܫܲܡܫܵܢܵܐ ܕܲܢܒ̣ܝܹܗ ܕܐܲܠܵܗܵܐ ܠܡܸܦܲܩ. ܘܲܢܦܲܩ̣ ܘܲܚܙܵܐ ܚܲܝܠܵܐ ܕܲܟ݂ܪܝܼܟ݂ ܠܲܩܪܝܼܬ̣ܵܐ: ܘܪ̈ܲܟ݂ܫܵܐ ܘܪ̈ܲܟܵܒܹܐ. ܘܐܸܡܲܪ ܠܹܗ ܥܠܲܝܡܹܗ: ܐܘܿܗ ܡܵܪܝ ܐܲܝܟܲܢܵܐ ܢܸܥܒܸ̇ܕ݂.

¹⁶ ܘܐܸܡܲܪ ܠܹܗ: ܠܵܐ ܬܸܕ݂ܚܲܠ: ܡܸܛܠ ܕܣܲܓ̇ܝܼܐܝܼܢ ܐܸܢܘܿܢ ܕܥܲܡܲܢ ܡ̣ܢ ܕܥܲܡܗܘܿܢ.

¹⁷ ܘܨܲܠܝܼ ܐܹܠܝܼܫܲܥ ܩܕ݂ܵܡ ܡܵܪܝܵܐ: ܘܐܸܡܲܪ: ܡܵܪܝܵܐ ܦܬܲܚ ܥܲܝܢܵܘ̈ܗܝ: ܘܢܸܚܙܹܐ ܘܲܦܬܲܚ̣ ܡܵܪܝܵܐ ܥܲܝܢܵܘ̈ܗܝ ܕܛܲܠܝܵܐ ܘܲܚ̣ܙܸܵܐ: ܘܗܵܐ ܛܘܼܪܵܐ ܡܠܸܐ ܪ̈ܲܟ݂ܫܵܐ: ܘܪ̈ܲܟܵܒܹܐ ܕܢܘܼܪܵܐ ܚܕ݂ܵܪ̈ܵܘܗܝ ܕܐܹܠܝܼܫܲܥ.

¹⁸ ܘܲܢܚܸܬ̣ ܠܘܵܬ̣ܗܘܿܢ. ܘܨܲܠܝܼ ܐܹܠܝܼܫܲܥ ܩܕ݂ܵܡ ܡܵܪܝܵܐ: ܘܐܸܡܲܪ: ܡܚܝܼ ܠܥܲܡܵܐ ܗܵܢܵܐ ܒܲܫܪܲܓ̣ܪ̈ܵܓ̣ܝܵܬ̣ܵܐ. ܘܲܡܚܵܐ ܐܸܢܘܿܢ ܒܲܫܪܲܓ̣ܪ̈ܵܓ̣ܝܵܬ̣ܵܐ ܐܲܝܟ݂ ܦܸܬ̣ܓ̣ܵܡܹܗ ܕܐܹܠܝܼܫܲܥ.

¹⁹ ܘܐܸܡܲܪ ܠܗܘܿܢ ܐܹܠܝܼܫܲܥ: ܠܵܐ ܗܘ̤ܵܬ̣ ܗܵܕܹܐ ܐܘܼܪܚܵܐ: ܘܠܵܐ ܗܘ̤ܵܬ̣ ܗܵܕܹܐ ܩܪܝܼܬ̣ܵܐ. ܬܵܘ ܒܵܬܲܪܝ: ܘܐܵܘܒܸ̇ܠܟ݂ܘܿܢ ܠܘܵܬ̣ ܓܲܒ̣ܪܵܐ ܕܒ̣ܵܥܹ̇ܝܢ ܐܢܬܘܿܢ ܘܐܵܘܒܸ̇ܠ ܐܸܢܘܿܢ ܠܫܵܡܪܹܝܢ.

²⁰ ܘܟܲܕ݂ ܥܲܠܘ ܠܫܵܡܪܝܼܢ: ܐܸܡܲܪ ܐܹܠܝܼܫܲܥ: ܡܵܪܝܵܐ ܦܵܬܲܚ̣ ܥܲܝܢܲܝ̈ܗܘܿܢ ܕܗܵܠܹܝܢ: ܘܢܸܚܙܘܿܢ. ܘܲܦܬܲܚ̣ ܡܵܪܝܵܐ ܥܲܝܢܲܝ̈ܗܘܿܢ: ܘܲܚܙܵܘ: ܘܗܵܐ ܒܓ̣ܵܘ ܫܵܡܪܹܝܢ ܐܸܢܘܿܢ.

²¹ ܘܐܸܡܲܪ ܡܲܠܟܵܐ ܕܝܼܣܪܵܝܹܠ ܠܐܹܠܝܼܫܲܥ ܟܲܕ݂ ܚ̣ܙܵܐ ܐܸܢܘܿܢ: ܡܸܡܚܵܐ ܐܸܡܚܸܐ ܐܸܢܘܿܢ: ܐܵܒ̣ܝ.

²² ܘܐܸܡܲܪ ܠܹܗ: ܠܵܐ ܬܸܡܚܸܐ ܐܸܢܘܿܢ: ܕܲܫܒܲܝܬ̇ ܒܚܲܪܒܵܟ݂: ܘܲܒ̣ܩܸܫܬܵܟ݂ ܡܵܚܹ̇ܐ ܐܲܢ̄ܬ̇. ܣܝܼܡ ܠܲܚܡܵܐ ܘܡܲـ̈ـܝܵܐ ܩܕ݂ܵܡܲܝܗܘܿܢ. ܢܹܐܟ݂ܠܘܼܢ ܘܢܸܫܬ̇ܘܿܢ: ܘܢܹܐܙܠ̄ܘܿܢ ܠܘܵܬ̣ ܡܵܪܗܘܿܢ.

²³ ܘܬܲܩܸܢ ܠܗܘܿܢ ܫܵܪܘܼܬ̣ܵܐ ܪܲܒ̇ܬ̣ܵܐ. ܘܐܸܟܲܠܘ ܘܐܸܫܬ̇ܝܼܘ: ܘܫܲܕܲܪܘ ܐܸܢܘܿܢ ܘܐܸܙܲܠܘ ܠܘܵܬ̣ ܡܵܪܗܘܿܢ. ܘܬ̣ܘܼܒ̣ ܠܵܐ ܐܵܘܣܸܦܘ ܓܲܝܵܣܹ̈ܐ ܕܐܲܕ݂ܘܿܡ ܠܡܹܐܬ̣ܵܐ ܠܲܬ̣ܚܘܼܡܵܐ ܕܝܼܣܪܵܝܹܠ.

²⁴ ܘܡ̣ܢ ܒܵܬܲܪ ܗܵܝܕܹ̇ܝܢ: ܟܲܢܸܫ ܒܲܪ ܗܕ݂ܵܕ݂ ܡܲܠܟܵܐ ܕܐܲܕ݂ܘܿܡ ܟܠܵܗ̇ ܡܲܫܪܝܼܬܹܗ: ܘܲܣܠܸܩ ܘܲܫܪܵܐ ܥܲܠ ܫܵܡܪܹܝܢ: ܘܐܸܬ̣ܟܲܬܲܫ ܥܲܡܵܗ̇.

²⁵ ܘܲܗܘ̤ܵܐ ܟܲܦܢܵܐ ܪܲܒܵܐ ܒܫܵܡܪܹܝܢ ܟܲܕ݂ ܗܸܢܘܿܢ ܫܪܹܝܢ ܥܠܹܝܗ̇: ܥܕܲܡܵܐ ܕܐܸܙܕܲܒܲܢ ܪܹܫܵܐ ܕܲܚܡܵܪܵܐ ܒܲܬ̣ܡܵܢܐܝܼܢ ܕܟܸܣܦܵܐ: ܘܪܘܼܒ̣ܥܵܐ ܕܩܲܒܵܐ ܕܲܚܪܲܝ ܝܵܘܢܵܐ ܒܚܲܡܫܵܐ ܕܟܸܣܦܵܐ.

²⁶ ܘܡܲܠܟܵܐ ܕܝܼܣܪܵܝܹܠ ܥܵܒܲܪ ܗ̄ܘ̣ܵܐ ܥܲܠ ܫܘܼܪܵܐ: ܘܐܲܢ̄ܬ̇ܬ̣ܵܐ ܚܕ݂ܵܐ ܡܒܲܓ̇ܢܵܐ ܩܕ݂ܵܡܵܘܗܝ ܘܐܵܡ̇ܪܵܐ: ܦܪܘܿܩܲܝܢܝ ܡܵܪܝ ܡܲܠܟܵܐ.

²⁷ ܘܐܸܡܲܪ ܠܵܗ̇: ܢܸܦ̱ܪܩܹܟ݂ܝ ܡܵܪܝܵܐ: ܡ̣ܢ ܐܲܝܡܸܟܵܐ ܐܸܦ̣ܪܩܹܟ݂ܝ: ܡ̣̤ ܐܸܕܪܵܐ ܐܵܘ ܡ̣ܢ ܡܲܥܨܲܪܬܵܐ.

²⁸ ܐܵܡܲܪ ܠܵܗ̇ ܡܲܠܟܵܐ ܡܵܠ ܠܹܟ݂ܝ: ܐܵܡܪܵܐ ܠܹܗ: ܐܲܢ̄ܬ̇ܬ̣ܵܐ ܗܵܕܹܐ ܐܸܡܪܲܬ̤ ܠܝܼ: ܗܲܒ̣ܝ ܒܪܹܟ݂ܝ ܢܹܐܟ݂ܠܝܼܘܗܝ ܝܵܘܡܵܢܵܐ: ܘܒܹܪܝ ܢܹܐܟ݂ܘܿܠ ܡܚܵܪ.

²⁹ ܘܒܲܫܠ̄ܢ ܒܹܪܝ ܘܐܸܟܲܠܢܵܝܗܝ: ܘܐܸܡ̇ܪܹܬ̣ ܠܵܗ̇ ܠܝܵܘܡܵܐ ܐ̄ܚܪܹܢܵܐ: ܗܲܒ̣ܝ ܒܪܹܟ݂ܝ: ܢܹܐܟ݂ܠܝܼܘܗܝ ܘܐܲܛܫܝܵܬܹܗ ܠܲܒ̣ܪܵܗ̇.

³⁰ ܘܟܲܕ݂ ܫܡܲܥ̣ ܡܲܠܟܵܐ ܡܸܠܹܝܗ̇ ܕܐܲܢ̄ܬ̇ܬ̣ܵܐ ܟܲܕ݂ ܡܗܲܠܸܟ݂ ܥܲܠ ܫܘܼܪܵܐ: ܨܲܪܝܼ ܠܒ̣ܘܼܫܵܘ̈ܗܝ ܘܲܚ̣ܙܵܐ ܥܲܡܵܐ ܕܣܲܩܵܐ ܠܒ̣ܝܼܫ ܥܲܠ ܒܸܣܪܹܗ ܡ̣ܢ ܠܓ̣ܵܘ.

³¹ ܘܐܸܡܲܪ: ܗܵܟܲܢܵܐ ܢܸܥܒܸ̇ܕ݂ ܠܝܼ ܐܲܠܵܗܵܐ: ܘܗܵܟܲܢܵܐ ܢܵܘܣܸܦ ܠܝܼ: ܐܸܢ ܢܦܘܼܫ ܪܹܫܹܗ ܕܐܹܠܝܼܫܲܥ ܒܲܪ ܫܵܦܵܛ ܥܠܵܘܗܝ ܝܵܘܡܵܢܵܐ.

³² ܘܐܹܠܝܼܫܲܥ ܝܵܬܹܒ̣ ܒܒܲܝܬܹ̇ܗ: ܘܣܵܒܹ̈ܐ ܝܵܬ̣ܒ̇ܝܼܢ ܗ̄ܘ̣ܵܘ ܩܕ݂ܵܡܵܘܗܝ. ܘܫܲܕܲܪ ܓܲܒ̣ܪܵܐ ܡ̣ܢ ܩܕ݂ܵܡܵܘܗܝ: ܘܥܲܕ݂ܠܵܐ ܢܹܐܬܹܐ ܐܝܼܙܓܲܕܵܐ ܥܠܵܘܗܝ: ܐܸܡܲܪ ܗ̤ܘ ܠܣܵܒܹ̈ܐ: ܚܙܲܝܬ̇ܘܿܢ ܕܫܲܕܲܪ ܒܲܪ ܩܵܛܘܿܠܵܐ ܗܵܢܵܐ ܠܡܸܣܲܒ̣ ܪܹܫܝ. ܚܙܵܘ ܡܵܐ ܕܐܸܬ̣ܵܐ ܐܝܼܙܓܲܕܵܐ: ܐܲܚܘܿܕ݂ܘ ܬܲܪܥܵܐ: ܘܚܘܼܒ̣ܨܘܼܗܝ ܠܒܲܪ. ܡܸܛܠ ܕܩܵܠܵܐ ܕܪܸ̈ܓ̣ܠܲܝ ܡܵܪܹܗ ܒܵܬ̣ܪܹܗ.

³³ ܘܥܲܕ݂ ܗ̤ܘ ܡܡܲܠܸܠ ܥܲܡܗܘܿܢ: ܐܸܬ̣ܵܐ ܐܝܼܙܓܲܕܵܐ ܥܠܵܘܗܝ. ܘܐܸܡܲܪ: ܗܵܐ ܗܵܕܲܐ ܗ̄ܝ̣ ܒܝܼܫܬܵܐ ܡ̣ܢ ܩܕ݂ܵܡ ܡܵܪܝܵܐ. ܡܵܢܵܐ ܐܹܨܲܠܹܐ ܬܘܼܒ̣ ܠܡܵܪܝܵܐ.

7

¹ ܘܐܸܡܲܪ ܐܹܠܝܼܫܲܥ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ: ܗܵܟܲܢܵܐ ܐܵܡܲܪ ܡܵܪܝܵܐ: ܡܚܵܪ ܠܗܵܢܵܐ ܥܸܕܵܢܵܐ: ܣܲܐܬ̣ܵܐ ܕܲܢܫܝܼܦܵܐ ܒܣܲܠܥܵܐ: ܘܣܲܐܬ̣̈ܝܼܢ ܣܥܵܪ̈ܝܼܢ ܒܣܲܠܥܵܐ: ܒܬܲܪܥܵܐ ܕܫܵܡܪܹܝܢ.

² ܘܲܥܢܵܐ ܓܲܢ̄ܒܵܪܵܐ: ܕܡܲܠܟܵܐ ܡܸܣܬܲܡܲܟ݂ ܥܲܠ ܐܝܼܕ݂ܵܘ̈ܗܝ: ܘܐܸܡܲܪ: ܐܸܢ ܡܵܪܝܵܐ ܢܸܥܒܸ̇ܕ݂ ܟܵܘܹ̈ܐ ܒܲܫܡܲܝܵܐ: ܢܸܗܘܹܐ ܦܸܬ̣ܓ̣ܵܡܵܐ ܗܵܢܵܐ. ܘܐܸܡܲܪ ܠܹܗ ܐܹܠܝܼܫܲܥ: ܗܵܐ ܚܵܙܹ̇ܐ ܐܲܢ̄ܬ̇ ܒܥܲܝܢܲܝ̈ܟ: ܘܡܸܢܹܗ ܠܵܐ ܬܹܐܟ݂ܘܿܠ.

³ ܘܐܲܪܒ̇ܥܵܐ ܓܲܒ̣ܪ̈ܝܼܢ ܓܲܪ̈ܒ̇ܝܼܢ ܝܵܬ̣ܒ̇ܝܼܢ ܗ̄ܘ̣ܵܘ ܠܒܲܪ ܡ̣ܢ ܫܘܼܪܵܐ. ܘܐܸܡܲܪ ܓܒܲܪ ܠܚܲܒ̣ܪܹܗ: ܡܵܢܵܐ ܝܵܬ̣ܒ̇ܝܼܢ ܚ̄ܢܲܢ ܗܵܪܟܵܐ ܥܕܲܡܵܐ ܕܲܢܡܘܼܬ̣.

⁴ ܐܸܢ ܐܵܡ̇ܪܝܼܢ ܚ̄ܢܲܢ ܕܢܸܥܘܿܠ ܠܓ̣ܵܘ ܩܪܝܼܬ̣ܵܐ: ܟܲܦܢܵܐ ܥܲܫܝܼܢ ܒܓ̣ܵܘ ܩܪܝܼܬ̣ܵܐ: ܡܵܝܬ̇ܝܼܢ ܚ̄ܢܲܢ ܬܲܡܵܢ. ܐܸܢ ܘܝܵܬ̣ܒ̇ܝܼܢ ܚ̄ܢܲܢ ܗܵܪܟܵܐ: ܡܵܝܬ̇ܝܼܢ ܚ̄ܢܲܢ. ܐܸܠܵܐ ܬܵܘ ܢܹܐܙܲܠ ܠܡܲܫܪܝܼܬ̣ܵܐ: ܕܐܹܕ݂ܘܿܡ ܐܸܢ ܢܲܚܘܿܢܵܢ: ܢܸܚܹܐ. ܘܐܸܢ ܢܡܝܼܬ̣ܘܼܢܵܢ: ܢܡܘܼܬ̣.

⁵ ܘܩܵܡ̣ܘ ܒܫܲܦܪܵܐ ܠܡܹܐܙܲܠ ܠܡܲܫܪܝܼܬ̣ܵܐ ܕܐܲܕ݂ܘܿܡ: ܘܡܲܛܝܼܘ ܥܕܲܡܵܐ ܠܣܵܘܦܵܐ ܕܡܲܫܪܝܼܬ̣ܵܐ: ܘܠܲܝܬ̇ ܬܲܡܵܢ ܐ̄ܢܵܫ.

⁶ ܘܡܵܪܝܵܐ ܐܲܫܡܲܥ ܠܡܲܫܪܝܼܬ̣ܵܐ ܕܐܲܕ݂ܘܿܡ ܩܵܠ ܪ̈ܲܟ݂ܫܵܐ ܘܩܵܠ ܪ̈ܲܟܵܒܹܐ ܘܩܵܠ ܚܲܝܠܵܐ ܥܲܫܝܼܢܵܐ ܘܐܸܡܲܪ ܓܒܲܪ ܠܚܲܒ̣ܪܹܗ: ܗܵܐ ܐܸܓܲܪ ܥܠܲܝܢ ܡܲܠܟܵܐ ܕܝܼܣܪܵܝܹܠ: ܠܡܲܠܟܵܐ ܕܚܹܬ̣ܵܝܹ̈ܐ: ܘܲܠܡܲܠܟܵܐ ܕܡܸܨܪ̈ܵܝܹܐ ܕܢܹܐܬ̣ܘܿܢ ܥܠܲܝܢ.

⁷ ܘܩܵܡܘ ܥܪܲܩ̣ܘ ܠܗܘܿܢ ܒܨܲܦܪܵܐ: ܘܲܫܒܲܩܘ ܡܲܫܟ̇ܢܲܝ̈ܗܘܿܢ: ܘܪ̈ܲܟ݂ܫܗܘܿܢ: ܘܚܸܡ̱ܪܗܘܿܢ: ܘܡܲܫܪܝܼܬ̣ܗܘܿܢ ܐܲܝܟ݂ ܕܲܥܒ̣ܝܼܕ݂ܵܐ. ܘܲܥܪܲܩ̣ܘ ܒܢܲܦ̮ܫܗܘܿܢ.

⁸ ܘܐܸܬ̣ܵܘ ܓܲܪ̈ܒܹ̇ܐ ܗܵܢܘܿܢ ܥܕܲܡܵܐ ܠܣܵܘܦܵܗ̇ ܕܡܲܫܪܝܼܬ̣ܵܐ: ܘܥܲܠܘ ܠܡܲܫܟ̇ܢܵܐ ܚܲܕ݂: ܘܐܸܟܲܠܘ ܘܐܸܫܬ̇ܝܼܘ ܘܲܢܣܲܒ̣ܘ ܡ̣ܢ ܬܲܡܵܢ ܟܸܣܦܵܐ ܘܕܲܗܒ̣ܵܐ ܘܲܠܒ̣ܘܼܫܹ̈ܐ: ܘܐܸܙܲܠ ܘܲܛܡܲܪܘ. ܘܲܗܦܲܟ݂ܘ ܘܥܲܠ̣ܘ ܠܡܲܫܟ̇ܢܵܐ ܐ̄ܚܪܹܢܵܐ: ܘܲܫܩܲܠܘ ܡ̣ܢ ܬܲܡܵܢ: ܘܐܸܙܲܠܘ ܘܲܛܡܲܪܘ.

⁹ ܘܐܸܡܲܪܘ ܓܒܲܪ ܠܚܲܒ̣ܪܹܗ: ܠܵܐ ܟܹܐܢܵܐܝܼܬ̣ ܥܵܒ̣ܕ̇ܝܼܢ ܚܢܲܢ: ܝܵܘܡܵܢܵܐ ܝܵܘܡܵܐ ܗ̄ܘ̣ ܕܲܣܒܲܪܬ̣ܵܐ ܘܲܥܕܲܡܵܐ ܠܐܸܡܲܬ̣ܝ ܫܲܬ̇ܝܼܩܝܼܢ ܚ̄ܢܲܢ: ܘܲܡܟܲܬ̇ܪܝܼܢ ܚ̄ܢܲܢ ܥܕܲܡܵܐ ܕܢܸܢܗܲܪ ܨܲܦܪܵܐ: ܘܢܸܡܛܹܝܢ ܚܛܵܗܵܐ. ܗܵܫܵܐ ܬܵܘ ܢܹܐܙܲܠ ܘܲܢܚܵܘܹܐ ܒܒܹܝܬ̣ ܡܲܠܟܵܐ.

¹⁰ ܘܐܸܬ̣ܵܘ ܘܲܩܪܵܘ ܠܬܲܪ̈ܥܹܐ ܕܲܩܪܝܼܬ̣ܵܐ: ܘܚܵܘܝܘܿ ܐܸܢܘܿܢ: ܘܐܸܡܲܪܘ: ܐܸܙܲܠ̄ܢ ܠܡܲܫܪܝܼܬ̣ܵܐ ܕܐܲܕ݂ܘܿܡ. ܘܠܲܝܬ̇ ܬܲܡܵܢ ܓܒܲܪ ܘܩܵܠ ܐ̄ܢܵܫ: ܐܸܠܵܐ ܪ̈ܲܟ݂ܫܵܐ ܟܲܕ݂ ܐܲܣܝܼܪܝܼܢ: ܘܚܸܡܪܹ̈ܐ ܟܲܕ݂ ܐܲܣܝܼܪܝܼܢ: ܘܡܲܫܟܢܹ̈ܐ ܐܲܝܟ݂ ܕܗܸܢܘܿܢ.

¹¹ ܘܲܩܪܵܘ ܬܲܪ̈ܥܹܐ ܘܚܵܘܝܼܘ ܠܓ̣ܵܘ ܒܹܝܬ̣ ܡܲܠܟܵܐ.

¹² ܘܩܵܡ ܡܲܠܟܵܐ ܒܠܸܠܝܵܐ ܘܐܸܡܲܪ ܠܥܲܒ̣ܕܵܘ̈ܗܝ. ܐܹܚܵܘܹܝܟ݂ܘܿܢ ܡܸܕܸ̇ܡ ܕܲܥܒ̣ܕ݂ܘ ܠܲܢ ܐܲܕ݂ܘܿܡܵܝܹ̈ܐ: ܝܼܕܲܥܝ ܕܟܲܦܢܝܼܢ ܚ̄ܢܲܢ: ܘܲܢܦܲܩ̣ܘ ܡ̣ܢ ܡܲܫܪܝܼܬ̣ܵܐ ܠܡܸܬܛܲܫܵܝܘܼ ܒܕܲܒ̣ܪܵܐ. ܘܐܵܡ̇ܪܝܼܢ: ܡܵܐ ܕܲܢܦܲܩ̣ܘ ܡ̣ܢ ܩܪܝܼܬ̣ܵܐ: ܢܹܐܚܘܿܕ݂ ܐܸܢܘܿܢ ܟܲܕ݂ ܚܲܝܝܼܢ: ܘܠܲܩܪܝܼܬ̣ܵܐ ܢܸܥܘܿܠ.

¹³ ܘܲܥܢܵܐ ܚܲܕ݂ ܡ̣ܢ ܥܲܒ̣ܕܵܘ̈ܗܝ: ܘܐܸܡܲܪ: ܢܸܕ݂ܒܪܘܿܢ ܚܲܡܫܵܐ ܡ̣ܢ ܪ̈ܲܟܵܒܹܐ ܕܐܸܫܬ̇ܚܲܪܘ ܐܸܢ ܐܸܬ̇ܬ̇ܚܸܕ݂ܘ: ܚܫܝܼܒ̣ܝܼܢ ܐܲܝܟ݂ ܚܲܝܠܵܐ ܟܠܹܗ ܕܝܼܣܪܵܝܹܠ ܕܣܵܦ: ܘܲܢܫܲܕܲܪ ܘܢܸܚܙܹܐ.

¹⁴ ܘܲܪܟܸܒ̣ܘ ܬܪܹܝܢ ܙܵܘ̈ܓ̇ܝܼܢ ܕܪ̈ܲܟܵܒܹܐ ܕܪ̈ܲܟ݂ܫܵܐ. ܘܫܲܕܲܪ ܡܲܠܟܵܐ ܒܵܬܲܪ ܡܲܫܪܝܼܬ̣ܵܐ ܕܐܲܕ݂ܘܿܡ: ܘܐܸܡܲܪ ܙܸܠܘ ܚܙܵܘ.

¹⁵ ܘܐܸܙܲܠܘ ܒܵܬܲܪܗܘܿܢ ܥܕܲܡܵܐ ܠܝܘܿܪܕܢܵܢ: ܘܚܵܙܹܝ݁ܢ ܟܠܵܗ̇ ܐܘܼܪܚܵܐ ܡܲܠܝܵܐ ܢܲܚ̈ܬܹ̇ܐ ܘܡܵܐܢܹ̈ܐ: ܕܲܫܒܲܩܘ ܐܲܕ݂ܘܿܡܵܝܹ̈ܐ ܒܣܘܼܪܗܵܒ̣ܗܘܿܢ. ܘܲܗܦܲܟ݂ܘ ܐܝܼܙ̈ܓܲܕܹ̇ܐ: ܘܚܵܘܝܼܘ ܠܡܲܠܟܵܐ.

¹⁶ ܘܲܢܦܲܩܘ ܥܲܡܵܐ: ܘܒܲܙܘ ܠܡܲܫܪܝܼܬ̣ܵܐ ܕܐܲܕ݂ܘܿܡ ܘܲܗܘ̤ܵܬ̣ ܣܲܐܬ̣ܵܐ ܕܲܢܫܝܼܦܵܐ ܒܣܲܠܥܵܐ: ܘܣܲܐܬ̣̈ܝܼܢ ܣܥܵܪ̈ܝܼܢ ܒܣܲܠܥܵܐ: ܐܲܝܟ݂ ܕܐܸܡܲܪ ܡܵܪܝܵܐ.

¹⁷ ܘܡܲܠܟܵܐ ܐܲܩܝܼܡ ܠܓܲܢ̄ܒܵܪܵܐ ܕܡܲܠܟܵܐ ܡܸܣܬܲܡܲܟ݂ ܗ̄ܘ̣ܵܐ ܥܲܠ ܐܝܼܕ݂ܵܘܗܝ ܥܲܠ ܬܲܪܥܵܐ. ܘܕ݂ܵܫܘܼܗܝ ܥܲܡܵܐ ܒܬܲܪܥܵܐ ܘܡܝܼܬ̣: ܐܲܝܟ݂ ܕܐܸܡܲܪ ܢܒ̣ܝܹܗ ܕܐܲܠܵܗܵܐ: ܟܲܕ݂ ܢܚܸܬ̣ ܐܝܼܙܓܲܕܵܐ ܥܠܵܘܗܝ.

¹⁸ ܘܲܗܘ̤ܵܐ ܦܸܬ̣ܓ̣ܵܡܹܗ ܕܲܢܒ̣ܝܹܗ ܕܐܲܠܵܗܵܐ ܕܐܸܡܲܪ ܠܡܲܠܟܵܐ: ܕܣܲܐܬ̣ܵܐ ܕܲܢܫܝܼܦܵܐ ܒܣܲܠܥܵܐ: ܘܣܲܐܬ̣̈ܝܼܢ ܣܥܵܪ̈ܝܼܢ ܒܣܲܠܥܵܐ: ܢܸܙܕܲܒ̇ܢ̈ܝܼܢ ܡܚܵܪ ܒܗܵܢܵܐ ܥܸܕܵܢܵܐ ܒܬܲܪܥܵܐ ܕܫܵܡܪܹܝܢ.

¹⁹ ܘܲܥܢܵܐ ܗ̄ܘ̣ܵܐ ܓܲܢ̄ܒܵܪܵܐ ܗܵܘ̇ ܘܐܸܡܲܪ ܠܲܢܒ̣ܝܹܗ ܕܐܲܠܵܗܵܐ. ܐܸܢ ܡܵܪܝܵܐ ܥܵܒܹ̇ܕ݂ ܟܵܘܹ̈ܐ ܒܲܫܡܲܝܵܐ: ܗܵܘܹ̇ܐ ܦܸܬ̣ܓ̣ܵܡܵܐ ܗܵܢܵܐ. ܘܐܸܡܲܪ ܗ̄ܘ̣ܵܐ ܠܹܗ: ܗܵܐ ܚܵܙܹ̇ܐ ܐܲܢ̄ܬ̇ ܒܥܲܝܢܲܝ̈ܟ: ܘܡܸܢܹܗ ܠܵܐ ܬܹܐܟ݂ܘܿܠ.

²⁰ ܘܲܗܘ̤ܵܐ ܠܹܗ ܗܵܟܲܢܵܐ: ܘܕ݂ܵܫܘܼܗܝ ܥܲܡܵܐ ܒܬܲܪܥܵܐ: ܘܡܝܼܬ̣.

8

¹ ܘܐܹܠܝܼܫܲܥ ܐܸܡܲܪ ܠܐܲܢ̄ܬܬ̣ܵܐ ܕܐܲܚܝܼ ܒܪܵܗ̇: ܩܘܼܡܝ ܙܸܠܝ ܐܲܢ̄ܬ̇ܝ ܘܒܲܝܬܹ̇ܟ݂ܝ: ܘܲܥܡܲܪܝ ܐܲܝܟܵܐ ܕܥܵܡܪܵܐ ܐܲܢ̄ܬ̇ܝ. ܡܸܛܠ ܕܲܩܪܵܐ ܡܵܪܝܵܐ ܠܟܲܦܢܵܐ: ܘܐܵܦ ܐܵܬܹ̇ܐ ܥܲܠ ܐܲܪܥܵܐ ܫܒܲܥ ܫܢ̈ܝܼܢ.

² ܘܩܵܡܲܬ̤ ܐܲܢ̄ܬ̇ܬ̣ܵܐ ܘܥܸܒ̣ܕܲܬ̤ ܐܲܝܟ݂ ܦܸܬ̣ܓ̣ܵܡܹܗ ܕܲܢܒ̣ܝܹܗ ܕܐܲܠܵܗܵܐ. ܘܐܸܙܲܠ̄ܬ̇ ܗ̤ܝ ܘܲܒ̣̈ܢܲܝ ܒܲܝܬܵܗ̇. ܘܥܸܡܪܲܬ̣ ܒܐܲܪܥܵܐ ܕܲܦܠܸܫܬܵܝܹ̈ܐ ܫܒܲܥ ܫܢ̈ܝܼܢ.

³ ܘܡ̣ܢ ܒܵܬܲܪ ܫܒܲܥ ܫܢ̈ܝܼܢ: ܗܸܦܟܲܬ̤ ܘܐܸܬܲܬ̤ ܡ̣ܢ ܐܲܪܥܵܐ ܕܲܦܠܸܫܬܵܝܹ̈ܐ ܘܐܸܙܲܠ̄ܬ̤ ܠܡܲܒܲܓܵܢܘܼ ܩܕ݂ܵܡ ܡܲܠܟܵܐ: ܥܲܠ ܒܲܝܬܹ̇ܗ ܘܥܲܠ ܚܲܩܠܵܗ̇.

⁴ ܘܡܲܠܟܵܐ ܐܸܡܲܪ ܠܓܲܚܙܝܼ ܥܠܲܝܡܵܐ ܕܲܢܒ̣ܝܹܗ ܕܐܲܠܵܗܵܐ: ܐܸܫܬܲܥܵܐ ܠܝܼ ܟܠܗܹܝܢ ܪܵܘ̱ܪ̈ܒ̣ܵܬ̣ܵܐ ܕܲܥܒܲܕ݂ ܐܹܠܝܼܫܲܥ.

⁵ ܘܟܲܕ݂ ܡܸܫܬܲܥܹܐ ܠܡܲܠܟܵܐ ܕܐܲܚܝܼ ܡܝܼܬ̣ܵܐ: ܚ̣ܙܵܐ ܐܲܢ̄ܬ̇ܬ̣ܵܐ ܕܐܲܚܝܼ ܒܪܵܗ̇: ܡܒܲܓܢܵܐ ܩܕ݂ܵܡ ܡܲܠܟܵܐ ܥܲܠ ܒܲܝܬܵܗ̇ ܘܥܲܠ ܚܲܩܠܵܗ̇ ܘܐܸܡܲܪ ܓܲܚܙܝܼ: ܡܵܪܝ ܡܲܠܟܵܐ: ܗܵܕܲܐ ܗ̄ܝ̣ ܐܲܢ̄ܬ̇ܬ̣ܵܐ: ܘܗܵܢܵܐ ܗ̄ܘ̣ ܒܪܵܗ̇ ܕܐܲܚܝܼ ܐܹܠܝܼܫܲܥ.

⁶ ܘܫܲܐܠܵܗ̇ ܡܲܠܟܵܐ ܠܐܲܢ̄ܬ̇ܬ̣ܵܐ ܘܐܸܫܬܲܥܝܲܬ̤ ܠܹܗ. ܘܲܩܪܵܐ ܠܵܗ̇ ܡܲܠܟܵܐ: ܠܲܡܗܲܝܡܢܵܐ ܚܲܕ݂. ܘܐܸܡܲܪ ܠܹܗ: ܦܢܵܐ ܠܵܗ̇ ܟܠܡܸܕܸ̇ܡ ܕܐܝܼܬ̣ ܠܵܗ̇: ܘܟ݂ܠܵܗ̇ ܥܠܲܠܬ̣ܵܐ ܕܚܲܩܠܵܗ̇: ܡ̣ܢ ܝܵܘܡܵܐ ܕܫܒܲܩܬ̣ܵܗ̇ ܠܐܲܪܥܵܐ ܘܲܥܕܲܡܵܐ ܠܗܵܫܵܐ.

⁷ ܘܐܸܬ̣ܵܐ ܐܹܠܝܼܫܲܥ ܠܕܲܪܡܣܘܿܩ ܘܒܲܪ ܗܕ݂ܵܕ݂ ܡܲܠܟܵܐ ܕܐܲܕ݂ܘܿܡ ܐܸܬ̣ܟ̇ܪܲܗ̇. ܘܚܵܘܝܼܘܗܝ ܘܐܸܡܲܪܘ ܠܹܗ: ܐܸܬ̣ܵܐ ܢܒ̣ܝܹܗ ܕܐܲܠܵܗܵܐ ܠܗܵܪܟܵܐ.

⁸ ܘܐܸܡܲܪ ܡܲܠܟܵܐ ܠܲܚܙܵܐܹܝܠ: ܣܲܒ̣ ܒܐܝܼܕ݂ܵܟ݂ ܩܘܼܪܒܵܢܵܐ: ܘܙܸܠ ܠܐܘܼܪܥܵܐ ܕܲܢܒ̣ܝܹܗ ܕܐܲܠܵܗܵܐ. ܘܲܫܐܲܠ ܡܸܠܬܹܗ ܕܡܵܪܝܵܐ ܡܸܢܹܗ. ܘܐܸܡܲܪ ܠܹܗ: ܐܸܢ ܡܸܬ̣ܚܠܸܡ ܐ̄ܢܵܐ ܡ̣ܢ ܟܘܼܪܗܵܢܝ ܗܵܢܵܐ.

⁹ ܘܐܸܙܲܠ ܚܙܵܐܹܝܠ ܠܐܘܼܪܥܹܗ. ܘܲܫܩܲܠ̣ ܩܘܼܪܒܵܢܵܐ ܒܐܝܼܕܹܗ: ܡ̣ܢ ܟܠ ܛܘܼܒ̣ܵܐ ܕܕܲܪܡܣܘܼܩ: ܛܥܹܝܢ ܐܲܪܒ̇ܥܝܼܢ ܓܲܡ̈ܠܝܼܢ. ܘܐܸܬ̣ܵܐ ܘܩܵܡ ܩܕ݂ܵܡܵܘܗܝ: ܘܐܸܡܲܪ ܠܹܗ: ܒܪܵܟ݂ ܒܲܪ ܗܕ݂ܵܕ݂ ܡܲܠܟܵܐ ܕܐܲܕ݂ܘܿܡ ܫܲܕ̇ܪܲܢܝ ܠܘܵܬ̣ܵܟ݂ ܘܐܵܡܲܪ: ܐܸܢ ܚܵܝܹ̇ܐ ܐ̄ܢܵܐ ܡ̣ܢ ܟܘܼܪܗܵܢܝ ܗܵܢܵܐ.

¹⁰ ܘܐܸܡܲܪ ܠܹܗ ܐܸܠܝܼܫܲܥ: ܙܸܠ ܘܐܸܡܲܪ ܠܹܗ: ܡܸܚܵܐ ܬܸܚܹܐ: ܚܵܘܝܲܢܝ ܡܵܪܝܵܐ ܕܲܡܡܵܬ̣ ܬܡܘܼܬ̣.

¹¹ ܘܲܒ̣ܟ݂ܵܐ ܢܒ̣ܝܹܗ ܕܐܲܠܵܗܵܐ.

¹² ܘܐܸܡܲܪ ܚܙܵܐܹܝܠ ܡܸܛܠ ܡܵܢܵܐ ܒܵܟܹ̇ܐ ܡܵܪܝ: ܘܐܸܡܲܪ ܠܹܗ ܐܹܠܝܼܫܲܥ: ܝܵܕܲܥ ܐ̄ܢܵܐ ܒܝܼܫܬܵܐ ܕܥܵܒܹܕ݂ ܐܲܢ̄ܬ̇ ܠܲܒ̣ܢܲܝ̈ ܝܼܣܪܵܝܹܠ: ܟܲܪ̈ܟܲܝܗܘܿܢ ܡܵܘܩܸܕ݂ ܐܲܢ̄ܬ̇ ܒܢܘܼܪܵܐ: ܘܓܲܕ̇ܘܼܕܲܝ̈ܗܘܿܢ ܒܚܲܪܒܵܐ ܡܩܲܛܸܠ ܐܲܢ̄ܬ̇: ܘܝܲܠܘܼܕܲܝ̈ܗܘܿܢ ܡܫܲܩܸܦ ܐܲܢ̄ܬ̇: ܘܒܲܛܢܵܬ̣̈ܗܘܿܢ ܡܦܲܪܸܬ̣ ܐܲܢ̄ܬ̇.

¹³ ܘܐܸܡܲܪ ܚܙܵܐܹܝܠ: ܡܵܢܵܐ ܚܫܝܼܒ̣ ܥܲܒ̣ܕܵܟ݂ ܟܲܠܒܵܐ: ܕܢܸܥܒܸ̇ܕ݂ ܦܸܬ̣ܓ̣ܵܡܵܐ ܗܵܢܵܐ ܪܲܒܵܐ: ܘܐܸܡܲܪ ܠܹܗ ܐܹܠܝܼܫܲܥ: ܚܵܘܝܲܢܝ ܡܵܪܝܵܐ ܕܐܲܢ̄ܬ̇ ܡܲܠܟܵܐ ܥܲܠ ܐܲܕ݂ܘܿܡ.

¹⁴ ܘܐܸܬ̣ܵܐ ܚܙܵܐܹܝܠ ܡ̣ܢ ܠܘܵܬ̣ ܐܹܠܝܼܫܲܥ: ܘܐܸܙܲܠ ܠܘܵܬ̣ ܡܵܪܹܗ: ܘܐܸܡܲܪ ܠܹܗ ܡܵܪܹܗ: ܡܵܢܵܐ ܐܸܡܲܪ ܠܵܟ݂ ܐܹܠܝܼܫܲܥ: ܐܵܡܲܪ ܠܹܗ: ܗܵܟܲܢܵܐ: ܐܸܡܲܪ ܠܝܼ ܕܡܸܚܵܐ ܬܸܚܹܐ.

¹⁵ ܘܡ̣ܢ ܒܵܬܲܪ ܝܵܘܡܵܐ ܢܣܲܒ̣ ܚܙܵܐܹܝܠ ܚܡܝܼܠܬܵܐ ܘܨܲܒ̇ܥܵܗ̇ ܒܡܲـ̈ـܝܵܐ: ܘܲܦܪܲܣ̣ ܥܲܠ ܐܲܦܵܘ̈ܗܝ ܘܡܝܼܬ̣. ܘܐܲܡ̣ܠܸܟ݂ ܚܙܵܐܹܝܠ ܒܵܬ̣ܪܹܗ.

¹⁶ ܘܒܲܫܢܲܬ̣ ܚܲܡܸܫ ܕܝܘܿܪܵܡ ܒܲܪ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܐܲܡ̣ܠܸܟ݂ ܝܘܿܪܵܡ ܒܲܪ ܝܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ.

¹⁷ ܒܲܪ ܬܠܵܬ̣ܝܼܢ ܗ̄ܘ̣ܵܐ ܘܬܲܪܬܹ̇ܝܢ ܫܢ̈ܝܼܢ ܟܲܕ݂ ܐܲܡ̣ܠܸܟ݂: ܘܲܬ̣ܡܵܢܹܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ.

¹⁸ ܘܗܲܠܸܟ݂ ܒܐܘܼܪܚܵܐ ܕܡܲܠ̈ܟܹ̇ܐ ܕܝܼܣܪܵܝܹܠ: ܐܲܝܟ݂ ܕܲܥܒܲܕ݂ܘ ܕܒܹܝܬ̣ ܐܵܚܵܒ̣: ܡܸܛܠ ܕܚܵܬܹܗ ܕܐܵܚܵܒ̣ ܗܘ̤ܵܬ̣ ܠܹܗ ܐܲܢ̄ܬ̇ܬ̣ܵܐ: ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ.

¹⁹ ܘܠܵܐ ܨܒ̣ܵܐ ܡܵܪܝܵܐ ܠܲܡܚܲܒܵܠܘܼ ܠܲܝܗܘܼܕ݂ܵܐ: ܡܸܛܠ ܕܵܘܝܼܕ݂ ܥܲܒ̣ܕܹ̇ܗ ܐܲܝܟ݂ ܕܐܸܡܲܪ ܠܹܗ: ܕܢܸܬܸ̇ܠ ܠܹܗ ܫܪܵܓ̣ܵܐ ܠܲܒ̣ܢܵܘ̈ܗܝ ܟܠܗܘܿܢ ܝܵܘ̈ܡܵܬ̣ܵܐ.

²⁰ ܒܝܵܘܡܵܘ̈ܗܝ ܡܪܲܕ݂ ܐܲܕ݂ܘܿܡ ܡ̣ܢ ܬܚܹܝܬ̣ ܐܝܼܕ݂ܵܐ ܕܲܝܗܘܼܕ݂ܵܐ: ܘܐܲܡܠܸܟ݂ܘ ܥܠܲܝܗܘܿܢ ܡܲܠܟܵܐ.

²¹ ܘܲܥܒܲܪ ܝܘܿܪܵܡ ܠܲܨܥܝܼܪܵܐ: ܘܟ݂ܠܗܘܿܢ ܪ̈ܲܟܵܒܹܐ ܥܲܡܹܗ. ܘܩܵܡ ܒܠܸܠܝܵܐ ܕܢܸܚܪܘܿܒ̣ ܠܐܲܕ݂ܘܿܡܵܝܹ̈ܐ ܕܲܟ݂ܪܝܼܟ݂ܝܼܢ ܠܹܗ: ܘܲܠܪܵܘ̱ܪ̈ܒ̣ܵܢܵܘܗܝ ܒܡܲܪ̈ܟ̇ܒ̣ܵܬ̣ܵܐ: ܘܲܥܪܲܩ̣ܘ ܥܲܡܵܐ ܠܡܲܫܟ̇ܢܲܝ̈ܗܘܿܢ.

²² ܘܲܡܪܲܕ݂ ܐܲܕ݂ܘܿܡ ܡ̣ܢ ܬܚܹܝܬ̣ ܐܝܼܕ݂ܵܐ ܕܲܝܗܘܼܕ݂ܵܐ: ܥܕܲܡܵܐ ܠܝܵܘܡܵܢܵܐ. ܗܵܝܕܹ̇ܝܢ ܡܸܪܕܲܬ̤ ܠܸܒ̣ܢܵܐ ܒܙܲܒ̣ܢܵܐ ܗܵܘ̇.

²³ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܪܵܡ ܘܟ݂ܠ ܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ.

²⁴ ܘܲܫܟܸܒ̣ ܝܘܿܪܵܡ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂ ܘܐܲܡ̣ܠܸܟ݂ ܐܹܚܲܙܝܵܐ ܒܪܹܗ ܒܵܬ̣ܪܹܗ.

²⁵ ܒܲܫܢܲܬ̣ ܚܕܲܥܸܣܪܹ̈ܐ ܠܝܘܿܪܵܡ ܒܲܪ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܐܲܡܠܸܟ݂ ܐܹܚܲܙܝܵܐ ܒܲܪ ܝܘܿܪܵܡ ܡܲܠܟܵܐ ܕܲܝܗܘܼܕ݂ܵܐ.

²⁶ ܒܲܪ ܥܸܣܪܝܼܢ ܗ̄ܘ̣ܵܐ ܘܬܲܪܬܹ̇ܝܢ ܫܢ̈ܝܼܢ ܐܹܚܲܙܝܵܐ ܟܲܕ݂ ܐܲܡܠܸܟ݂ ܘܫܲܢ̄ܬܵܐ ܚܕ݂ܵܐ ܐܲܡ̣ܠܸܟ݂ ܒܐܘܿܪܸܫܠܸܡ: ܘܲܫܡܵܗ̇ ܕܐܸܡܹܗ ܥܬܲܠܝܵܐ ܒܲܪܬ̣ ܥܲܡܪܝܼ ܡܲܠܟܵܐ ܕܝܼܣܪܵܝܹܠ.

²⁷ ܘܗܲܠܸܟ݂ ܒܐܘܼܪܚܵܐ ܕܒܹܝܬ̣ ܐܵܚܵܒ̣: ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ܘ ܕܒܹܝܬ̣ ܐܵܚܵܒ̣: ܡܸܛܠ ܕܚܲܬ̣ܢܵܐ ܗ̄ܘ̣ܵܐ ܕܒܹܝܬ̣ ܐܵܚܵܒ̣.

²⁸ ܘܐܸܙܲܠ̣ ܥܲܡ ܝܘܿܪܵܡ ܒܲܪ ܐܵܚܵܒ̣ ܠܲܩܪܵܒ̣ܵܐ. ܥܲܠ ܚܙܵܐܹܝܠ ܡܲܠܟܵܐ ܕܐܲܕ݂ܘܿܡ ܠܪܵܡܲܬ̣ ܓܸܠܥܵܕ݂. ܘܲܡܚܵܐܘܼܗܝ ܐܲܕ݂ܘܿܡܵܝܹ̈ܐ ܠܝܘܿܪܵܡ.

²⁹ ܘܲܗܦܲܟ݂ ܝܘܿܪܵܡ ܒܲܪ ܐܵܚܵܒ̣ ܠܡܸܬ̣ܐܲܣܵܝܘܼ ܒܐܝܼܙܲܪܥܹܝܠ: ܡ̣ܢ ܡܚܘܿܬ̣ܵܐ ܕܲܡܚܵܐܘܼܗܝ ܐܲܕ݂ܘܿܡܵܝܹ̈ܐ ܒܪܵܡܬ̣ܵܐ: ܟܲܕ݂ ܡܸܬ̣ܟܲܬܲܫ ܥܲܡ ܚܙܵܐܹܝܠ ܡܲܠܟܵܐ ܕܐܲܕ݂ܘܿܡ. ܘܐܹܚܲܙܝܵܐ ܒܲܪ ܝܘܿܪܵܡ ܡܲܠܟܵܐ ܕܲܝܗܘܼܕ݂ܵܐ: ܢܚܸܬ̣ ܠܡܸܚܙܵܐ ܠܝܘܿܪܵܡ ܒܲܪ ܐܵܚܵܒ̣ ܕܲܟ݂ܪܝܼܗ ܗ̄ܘ̣ܵܐ ܒܐܝܼܙܲܪܥܹܝܠ.

9

¹ ܘܐܹܠܝܼܫܲܥ ܢܒ̣ܝܼܵܐ ܩ̣ܪܵܐ ܠܚܲܕ݂ ܡ̣ܢ ܒܢܲܝ̈ ܢܒ̣ܝܹ̈ܐ: ܘܐܸܡܲܪ ܠܹܗ: ܐܲܣܘܿܪ ܚܲܨܲܝ̈ܟ: ܘܣܲܒ̣ ܩܲܪܢܵܐ ܕܡܸܫܚܵܐ ܒܐܝܼܕ݂ܵܟ݂: ܘܙܸܠ ܠܪܵܡܲܬ̣ ܓܸܠܥܵܕ݂.

² ܘܥܘܿܠ ܠܬܲܡܵܢ: ܘܲܚܙܝܼ ܬܲܡܵܢ ܠܝܵܗܘܿ ܒܲܪܝܲܡܫܝܼ. ܥܘܿܠ ܘܐܲܩܝܼܡܲܝܗܝ ܡ̣ܢ ܒܲܝܢܵܬ̣ ܐܲܚܵܘ̈ܗܝ. ܘܐܲܥܠܲܝܗܝ ܬܵܘܵܢ ܒܓ̣ܵܘ ܬܵܘܵܢ.

³ ܘܣܲܒ̣ ܩܲܪܢܵܐ ܕܡܸܫܚܵܐ: ܘܣܘܿܟ݂ ܒܪܹܫܹܗ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܡܫܲܚܬܵܟ݂ ܕܬܸܗܘܹܐ ܡܲܠܟܵܐ ܥܲܠ ܥܲܡܝ ܝܼܣܪܵܝܹܠ ܘܲܦܬܲܚ̣ ܬܲܪܥܵܐ ܘܲܥܪܘܿܩ: ܘܠܵܐ ܬܟܲܬܲܪ.

⁴ ܘܐܸܙܲܠ̣ ܥܠܲܝܡܵܐ ܢܒ̣ܝܼܵܐ ܠܪܵܡܲܬ̣ ܓܸܠܥܵܕ݂.

⁵ ܘܥܲܠ ܘܲܚܙܵܐ ܪ̈ܲܒܲܝ ܚܲܝ̈ܠܹܐ ܟܲܕ݂ ܝܵܬ̣ܒ̇ܝܼܢ. ܘܐܸܡܲܪ: ܦܸܬ̣ܓ̣ܵܡܵܐ ܐܝܼܬ̣ ܠܝܼ ܕܐܸܡܲܪ ܠܵܟ݂ ܪܲܒܵܐ. ܘܐܸܡܲܪ ܝܵܗܘܿ ܠܡ̇ܢ ܟܠܲܢ: ܘܐܸܡܲܪ ܠܹܗ ܠܵܟ݂ ܪܲܒܵܐ.

⁶ ܘܩܵܡ ܘܥܲܠ ܠܬ̣ܵܘܵܢܵܐ: ܘܲܢܣܲܟ݂ ܡܸܫܚܵܐ ܒܪܹܫܹܗ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡܫܲܚܬܵܟ݂ ܕܬܲܡܠܸܟ݂ ܥܲܠ ܥܲܡܹܗ ܕܡܵܪܝܵܐ ܥܲܠ ܝܼܣܪܵܝܹܠ.

⁷ ܘܬܸܡܚܸܐ ܠܲܕ݂ܒܹܝܬ̣ ܐܵܚܵܒ̣ ܡܵܪܵܟ݂ ܘܐܸܬ̣ܢܲܩܲܡ ܕܡܵܐ ܕܥܲܒ̣̈ܕܲܝ ܢܒ̣ܝܹ̈ܐ: ܘܲܕ݂ܡܵܐ ܕܟ݂ܠܗܘܿܢ ܥܲܒ̣ܕܵܘ̈ܗܝ ܕܡܵܪܝܵܐ ܡܢ ܐܝܼܕ݂ܵܐ ܕܐܝܼܙܒܸܠ.

⁸ ܘܐܵܘܒܸ̇ܕ݂ ܟܠܹܗ ܒܲܝܬܹ̇ܗ ܕܐܵܚܵܒ̣. ܘܐܵܘܒܸ̇ܕ݂ ܠܐܵܚܵܒ̣ ܕܬ̣ܵܐܹ̇ܢ ܒܐܸܣܬ̣ܵܐ: ܘܕ݂ܵܐܣܲܪ ܘܫܵܪܹܐ ܒܝܣܪܵܝܹܠ.

⁹ ܘܐܸܥܒ̇ܕ݂ܝܼܘܗܝ ܠܒܲܝܬܹ̇ܗ ܕܐܵܚܵܒ̣: ܐܲܝܟ݂ ܒܹܝܬ̣ ܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܘܐܲܝܟ݂ ܒܹܝܬ̣ ܒܲܥܫܵܐ ܒܲܪ ܐܲܚܝܼܵܐ.

¹⁰ ܘܠܐܝܼܙܒܸܠ ܢܹܐܟ݂ܠܘܼܢ ܟܲܠ̈ܒܹ̇ܐ ܒܝܵܪܬ̇ܘܼܬ̣ܵܐ ܕܐܝܼܙܲܪܥܹܝܠ: ܘܠܲܝܬ̇ ܕܩܵܒܲܪ ܘܲܦܬܲܚ ܬܲܪܥܵܐ: ܘܲܥ̣ܪܩ.

¹¹ ܘܝܵܗܘ̇ ܢܦܲܩ̣ ܠܘܵܬ̣ ܥܲܒ̣̈ܕܹ̇ܐ ܕܡܵܪܹܗ: ܘܐܵܡ̇ܪܝܼܢ ܠܹܗ ܫܠܵܡ. ܡܵܢܵܐ ܐܸܬ̣ܵܐ ܫܵܛܝܵܐ ܗܵܢܵܐ ܠܘܵܬ̣ܵܟ݂. ܐܵܡܲܪ ܠܗܘܿܢ: ܐܲܢ̄ܬ̇ܘܿܢ ܝܵܕ݂ܥܝܼܢ ܠܓܲܒ̣ܪܵܐ ܘܲܠܫܵܛܝܼܘܼܬܹܗ.

¹² ܘܐܵܡ̇ܪܝܼܢ ܠܹܗ ܡܕܲܓܸ̇ܠ ܐܲܢ̄ܬ̇: ܚܵܘܵܢ. ܐܵܡܲܪ ܠܗܘܿܢ: ܗܵܟܲܢܵܐ ܐܸܡܲܪ ܠܝܼ: ܗܵܟܲܢܵܐ ܐܵܡܲܪ ܡܵܪܝܵܐ: ܡܫܲܚܬܵܟ݂ ܕܬܲܡܠܸܟ݂ ܥܲܠ ܝܼܣܪܵܝܹܠ.

¹³ ܘܐܸܣܬܲܪܗܲܒ̣ܘ ܘܲܢܣܲܒ̣ܘ ܓܒܲܪ ܠܒ̣ܵܫܹܗ: ܘܣܵܡܘ ܬܚܘܿܬ̣ܵܘܗܝ ܥܲܠ ܡܵܘܬ̇ܒ̣ܵܐ ܕܕܲܪ̈ܓܹܐ: ܘܲܩ̣ܪܵܘ ܒܫܝܼܦܘܿܪܵܐ: ܘܐܸܡܲܪܘ ܐܲܡܠܸܟ݂ ܝܵܗܘܿ.

¹⁴ ܘܲܡܪܲܕ݂ ܝܵܗܘ̇ ܒܲܪ ܝܲܡܫܝܼ ܥܲܡ ܝܘܿܪܵܡ. ܘܝܘܿܪܵܡ ܢܵܛܲܪ ܗ̄ܘ̣ܵܐ ܒܪܵܡܲܬ̣ ܓܸܠܥܵܕ݂: ܗ̤ܘ ܘܟ݂ܠܹܗ ܝܼܣܪܵܝܹܠ ܥܲܡܹܗ: ܡ̣ܢ ܩܕ݂ܵܡ ܚܙܵܐܹܝܠ ܡܲܠܟܵܐ ܕܐܲܕ݂ܘܿܡ.

¹⁵ ܘܲܗܦܲܟ݂ ܝܘܿܪܵܡ ܡܲܠܟܵܐ ܠܡܸܬ̣ܐܲܣܵܝܘܼ ܒܐܝܼܙܲܪܥܹܝܠ ܡ̣ܢ ܡܚܘܿܬ̣ܵܐ ܕܲܡܚܵܐܘܼܗܝ ܐܲܕ݂ܘܿܡܵܝܹ̈ܐ: ܟܲܕ݂ ܡܸܬ̣ܟܲܬܲܫ ܡܲܠܟܵܐ ܕܐܲܕ݂ܘܿܡ. ܘܐܸܡܲܪ ܝܵܗܘ̇: ܐܸܢ ܨܵܒ̣̈ܝܵܢ ܢܲܦ̮̈ܫܵܬ̣ܟ݂ܘܿܢ: ܠܵܐ ܢܸܦܘܿܩ ܕܡܸܬ̣ܦܲܠܲܛ ܡ̣ܢ ܩܪܝܼܬ̣ܵܐ: ܕܢܹܐܙܲܠ ܘܲܢܚܵܘܹܐ ܒܐܝܼܙܲܪܥܹܝܠ.

¹⁶ ܘܲܪܟܸܒ̣ ܝܵܗܘܿ ܘܐܸܙܲܠ̣ ܠܬܲܡܵܢ: ܡܸܛܠ ܕܝܘܿܪܵܡ ܪܡܸܐ ܗ̄ܘ̣ܵܐ ܬܲܡܵܢ. ܘܐܹܚܲܙܝܵܐ ܡܲܠܟܵܐ ܕܲܝܗܘܼܕ݂ܵܐ ܢܚܸܬ̣ ܠܡܸܚܙܵܐ ܠܝܘܿܪܵܡ.

¹⁷ ܘܕ݂ܵܘܩܵܐ ܩܵܐܹ̇ܡ ܥܲܠ ܡܲܓ̣ܕ̇ܠܵܐ ܕܐܝܼܙܲܪܥܹܝܠ. ܘܲܚܙܵܐ ܪܟ݂ܘܿܒ̣ܵܐ ܕܝܵܗܘ̇ ܟܲܕ݂ ܐܵܬܹܐ. ܘܐܸܡܲܪ ܕܵܘܩܵܐ ܪ̈ܲܟܵܒܹܐ ܚܵܙܹ̇ܐ ܐ̄ܢܵܐ. ܘܐܸܡܲܪ ܝܘܿܪܵܡ: ܕܒܲܪ ܡܲܪܟܲܒ̣ܬ̣ܵܐ: ܘܫܲܕܲܪ ܠܐܘܼܪܥ̱ܗܘܿܢ ܘܢܹܐܡܲܪ ܫܠܵܡ.

¹⁸ ܘܐܸܙܲܠ ܪܵܟܹܒ̣ ܣܘܼܣܝܵܐ ܠܐܘܼܪܥܹܗ ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܲܠܟܵܐ ܫܠܵܡ. ܘܐܸܡܲܪ ܝܵܗܘ̇: ܡܵܐ ܠܵܟ݂ ܘܠܲܫܠܵܡܵܐ. ܗܦܘܿܟ݂ ܒܵܬܲܪܝ ܘܚܵܘܝܼ ܕܵܘܩܵܐ: ܘܐܸܡܲܪ: ܡ̣ܛܵܐ ܐܝܼܙܓܲܕܵܐ ܥܕܲܡܵܐ ܠܘܵܬ̣ܗܘܿܢ: ܘܠܵܐ ܗܦܲܟ݂.

¹⁹ ܘܫܲܕܲܪ ܦܲܪܵܫܵܐ ܐ̄ܚܪܹܢܵܐ ܠܘܵܬ̣ܗܘܿܢ: ܘܐܸܡܲܪ: ܗܵܟܲܢܵܐ ܐܵܡܲܪ ܡܲܠܟܵܐ ܫܠܵܡ. ܘܐܸܡܲܪ ܝܵܗܘ̇: ܡܵܐ ܠܵܟ݂ ܘܠܲܫܠܵܡܵܐ: ܗܦܘܿܟ݂ ܒܵܬܲܪܝ.

²⁰ ܘܚܵܘܝܼ ܕܵܘܩܵܐ ܘܐܸܡܲܪ: ܡܛ̣ܵܐ ܐܝܼܙܓܲܕܵܐ ܥܕܲܡܵܐ ܠܘܵܬ̣ܗܘܿܢ: ܘܠܵܐ ܗ̣ܦܲܟ݂ ܘܲܕ݂ܒ̣ܵܪܵܐ ܐܲܝܟ݂ ܕܒ̣ܵܪܵܐ ܕܝܵܗܘ̇ ܒܲܪ ܝܲܡܫܝܼ: ܡܸܛܠ ܕܲܡܣܲܪ̱ܗܒ̣ܵܐܝܼܬ̣ ܕܵܒܲܪ ܗ̄ܘ̣ܵܐ.

²¹ ܘܐܸܡܲܪ ܝܘܿܪܵܡ ܦܲܓܸ̇ܕ݂ܘ ܘܦܲܓܸ̇ܕ݂ܘ ܡܲܪ̈ܟ̇ܒ̣ܵܬ̣ܵܐ. ܘܲܢܦܲܩ ܝܘܿܪܵܡ ܡܲܠܟܵܐ ܕܝܼܣܪܵܝܹܠ. ܘܐܹܚܲܙܝܵܐ ܡܲܠܟܵܐ ܕܲܝܗܘܼܕ݂ܵܐ: ܓܒܲܪ ܒܡܲܪܟܲܒ̣ܬܹܗ. ܘܲܢܦܲܩܘ ܠܐܘܼܪܥܹܗ ܕܝܵܗܘ̇: ܘܐܸܫܟ̇ܚܘܼܗܝ ܒܝܵܪܬ̇ܘܼܬ̣ܵܐ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ.

²² ܘܟܲܕ݂ ܚܙܵܝܗܝ ܝܘܿܪܵܡ ܠܝܵܗܘ̇: ܐܸܡܲܪ ܠܹܗ ܫܠܵܡ ܝܵܗܘ̇. ܐܵܡܲܪ ܠܹܗ ܝܵܗܘ̇: ܡܵܢܵܘ ܫܠܵܡܵܐ: ܕܙܵܢܝܘܼܬ̣ܵܐ ܕܐܝܼܙܒܸܠ ܐܸܡܵܟ݂: ܐܵܘ ܕܚܲܪ̈ܵܫܹܝܗ̇ ܣܲܓ̇ܝܼ̈ܐܹܐ.

²³ ܘܲܗ̣ܦܲܟ݂ ܝܘܿܪܵܡ ܘܲܥܪܲܩ̣. ܘܐܸܡܲܪ ܠܐܹܚܲܙܝܵܐ ܢܸܟ݂ܠܵܐ ܐܹܚܲܙܝܵܐ.

²⁴ ܘܝܵܗܘ̇ ܡܠܵܐ ܐܝܼܕܹܗ ܒܩܸܫܬܵܐ: ܘܲܡܚܵܝܗܝ ܠܝܘܿܪܵܡ ܒܹܝܬ̣ ܕܪ̈ܵܥܵܘܗܝ ܘܲܢܦܲܩ̣ ܓܹܐܪܵܐ ܡ̣ܢ ܠܸܒܹ̇ܗ: ܘܲܒ̣ܪܲܟ݂ ܒܡܲܪܟܲܒ̣ܬܹܗ.

²⁵ ܘܐܸܡܲܪ ܝܵܗܘ̇ ܠܒܲܪ ܕܩܲܪ ܓܲܢ̄ܒܵܪܹܗ: ܫܩܘܿܠ ܐܲܪܡܵܝܗܝ ܒܝܵܪܬ̇ܘܼܬܹܗ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ. ܡܸܛܠ ܕܲܕ݂ܟ݂ܝܼܪ ܐ̄ܢܵܐ ܟܲܕ݂ ܪܟ݂ܝܼܒ̣ܝܼܢ ܗ̄ܘܲܝܢ ܐܸܢܵܐ ܘܐܲܢ̄ܬ̇: ܘܕ݂ܵܒ̣ܪܝܼܢ ܒܵܬܲܪ ܐܵܚܵܒ̣ ܐܲܒ̣ܘܼܗܝ: ܘܡܵܪܝܵܐ ܐܸܡܲܪ ܥܠܵܘܗܝ ܦܸܬ̣ܓ̣ܵܡܵܐ ܗܵܢܵܐ.

²⁶ ܐܸܠܵܐ ܕܡܹܗ ܕܢܵܒ̣ܘܿܬ̣ ܘܲܕ݂ܡܵܐ ܕܲܒ̣ܢܵܘ̈ܗܝ. ܚܙܹ̇ܝܬ̣ ܒܪܲܡܫܵܐ: ܐܵܡܲܪ ܡܵܪܝܵܐ: ܘܐܸܦ̱ܪܥܵܟ݂ ܒܝܵܪܬ̇ܘܼܬ̣ܵܐ ܗܵܕܹܐ ܐܵܡܲܪ ܡܵܪܝܵܐ. ܘܗܵܫܵܐ ܣܲܒ̣ ܫܕ݂ܝܼܘܗܝ ܒܝܵܪܬ̇ܘܼܬ̣ܵܐ ܗܵܕܹܐ ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ. ܘܲܫܕ݂ܵܐܘܼܗܝ ܒܝܵܪܬ̇ܘܼܬܹܗ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ.

²⁷ ܘܐܹܚܲܙܝܵܐ ܡܲܠܟܵܐ ܕܲܝܗܘܼܕ݂ܵܐ: ܚܙܵܐ ܘܲܥܪܲܩ̣ ܒܐܘܼܪܚܵܐ ܕܒܹܝܬ̣ ܓܲܢܹ̈ܐ. ܘܲܪܕܲܦ ܒܵܬ̣ܪܹܗ ܝܵܗܘ̇: ܘܐܸܡܲܪ: ܐܵܦ ܠܹܗ ܩܘܼܛܠܘܼܗܝ ܘܩܲܛܠܘܼܗܝ ܒܡܲܪܟܲܒ̣ܬܹܗ: ܒܡܲܣܩܵܢܵܐ ܕܓ̣ܘܿܕ݂ ܕܥܲܠ ܓܹܢ̄ܒ̣ ܢܒܸܠܥܲܡ: ܘܲܥܪܲܩ ܠܡܲܓܕܘܿ: ܘܡܝܼܬ̣ ܬܲܡܵܢ.

²⁸ ܘܫܲܩܠܘܼܗܝ ܥܲܒ̣ܕܵܘ̈ܗܝ: ܘܐܵܘܒ̇ܠܘܼܗܝ ܠܐܘܿܪܸܫܠܸܡ: ܘܩܲܒ̣ܪܘܼܗܝ ܒܩܲܒ̣ܪܹܗ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂.

²⁹ ܘܒܲܫܢܲܬ̣ ܚܕܲܥܸܣܪܹ̈ܐ ܠܝܘܿܪܵܡ ܒܲܪ ܐܵܚܵܒ̣: ܐܲܡܠܸܟ݂ ܐܹܚܲܙܝܵܐ ܥܲܠ ܝܼܗܘܼܕ݂ܵܐ.

³⁰ ܘܐܸܬ̣ܵܐ ܝܵܗܘ̇ ܠܐܝܼܙܲܪܥܹܝܠ. ܘܐܝܼܙܒܸܠ ܫܸܡܥܲܬ̤: ܘܟܸܚܠܲܬ̤ ܒܲܨܕ݂ܝܼܕ݂ܵܐ ܥܲܝܢܹ̈ܝܗ̇: ܘܐܸܣܪܲܬ̤ ܪܹܫܵܗ̇: ܘܐܲܕ݂ܝܼܩܲܬ̣ ܡ̣ܢ ܟܵܘܬܵܐ.

³¹ ܘܝܵܗܘ̇ ܥܵܐܹ̇ܠ ܒܬܲܪܥܵܐ. ܘܐܸܡܪܲܬ̤ ܫܠܵܡ ܙܲܡܪܝܼ ܩܵܛܹ̇ܠ ܡܵܪܹܗ.

³² ܘܐܲܪܝܼܡ ܐܲܦܵܘ̈ܗܝ ܠܟ݂ܵܘܬ̣ܵܐ: ܘܐܸܡܲܪ ܡ̇ܢ ܥܡܝ ܘܐܸܬ̣ܚ̄ܙܝܼܘ ܠܹܗ ܬܪܹܝܢ ܬܠܵܬ̣ܵܐ ܡܗܲܝܡܢ̈ܝܼܢ.

³³ ܘܐܸܡܲܪ ܦܘܼܫܚܘܼܗ̇ ܘܦܲܫܚܘܼܗ̇ ܘܪܲܣܘ ܡ̣ܢ ܕܡܵܗ̇ ܥܲܠ ܐܸܣܬ̣ܵܐ. ܘܥܲܠܘ ܪ̈ܲܟ݂ܫܵܐ ܘܕ݂ܵܫܘܼܗ̇.

³⁴ ܘܥܲܠ ܠܡܸܠܥܲܣ ܘܲܠܡܸܫܬܵܐ ܘܐܸܡܲܪ ܦܘܼܩܕܘܼܗ̇ ܠܠܝܼܛܬܵܐ ܗܵܝ̇: ܘܩܘܼܒ̣ܪܘܼܗ̇: ܡܸܛܠ ܕܒܲܪܬ̣ ܡܲܠܟܵܐ ܗ̄ܝ̣.

³⁵ ܘܐܸܙܲܠ̣ܘ ܠܡܸܩܒ̇ܪܵܗ̇: ܘܠܵܐ ܐܸܫܟܲܚܘ ܒܵܗ̇: ܐܸܠܵܐ ܐܸܢ ܪܹܫܵܗ̇ ܘܪܸ̈ܓ̣ܠܹܝܗ̇ ܘܦܲܣܹ̈ܐ ܕܐܝܼܕܹܝ̈ܗ̇.

³⁶ ܘܲܗܦܲܟ݂ܘ ܘܚܵܘܝܼܘܗܝ ܘܐܸܡܲܪ: ܦܸܬ̣ܓ̣ܵܡܵܐ ܗ̄ܘ̣ ܕܡܵܪܝܵܐ ܕܡܲܠܸܠ̣ ܒܐܝܼܕ݂ܵܐ ܕܥܲܒ̣ܕܹ̇ܗ ܐܹܠܝܼܵܐ ܕܡ̣ܢ ܬܲܫܒ̇ܝܼ: ܕܲܒ̣ܝܵܪܬܵܘܼܬ̣ܵܐ ܕܐܝܼܙܲܪܥܹܝܠ ܢܹܐܟ݂ܠܘܼܢ ܟܲܠ̈ܒܹ̇ܐ ܒܸܣܪܵܗ̇ ܕܐܝܼܙܒܸܠ.

³⁷ ܘܬܸܗܘܹܐ ܫܠܲܕܵܗ̇ ܕܐܝܼܙܒܸܠ: ܐܲܝܟ݂ ܙܸܒ̣ܠܵܐ ܥܲܠ ܐܲܦܲܝ̈ ܐܲܪܥܵܐ: ܒܝܵܪܬ̇ܘܼܬ̣ܵܐ ܕܐܝܼܙܲܪܥܹܝܠ: ܘܠܲܝܬ̇ ܕܩܵܒܲܪ: ܕܠܵܐ ܢܹܐܡܪܘܼܢ ܗܵܕܲܐ ܗ̄ܝ̣ ܐܝܼܙܒܸܠ.

10

¹ ܘܠܐܵܚܵܒ̣ ܫܲܒ̣ܥܝܼܢ ܒܢ̈ܝܼܢ ܐܝܼܬ̣ ܗ̄ܘ̣ܵܐ ܒܫܵܡܪܹܝܢ. ܘܪܵܘ̱ܪ̈ܒ̣ܵܢܹܐ ܕܲܩܪܝܼܬ̣ܵܐ ܡܪܲܒܹ̇ܝܢ ܗ̄ܘ̣ܵܘ ܠܗܘܿܢ ܘܲܟ݂ܬܲܒ̣ ܝܵܗܘ̇ ܐܸܓܲܪܬܵܐ: ܘܫܲܕܲܪ ܠܫܵܡܪܹܝܢ: ܠܘܵܬ̣ ܪܵܘ̱ܪ̈ܒ̣ܵܢܹܐ ܕܐܝܼܙܲܪܥܹܝܠ: ܘܲܠܘܵܬ̣ ܣܵܒܹ̈ܐ: ܘܲܠܘܵܬ̣ ܬܵܪ̈ܐܹܐ ܕܐܵܚܵܒ̣: ܠܡܹܐܡܲܪ.

² ܒܫܵܥܬ̣ܵܐ ܕܡܵܛܝܵܐ ܐܸܓܲܪܬܵܐ ܗܵܕܹܐ ܠܘܵܬ̣ܟ݂ܘܿܢ: ܘܥܲܡܟ݂ܘܿܢ ܒܢܲܝ̈ ܡܵܪ̈ܲܝܟ̇ܘܿܢ: ܘܥܲܡܟ݂ܘܿܢ ܡܲܪ̈ܟ̇ܒ̣ܵܬ̣ܵܐ ܘܪ̈ܲܟ݂ܫܵܐ: ܘܩܘܼܪ̈ܝܵܐ ܥܲܫ̈ܝܼܢܵܬ̣ܵܐ: ܘܙܲܝܢܵܐ.

³ ܘܡ̇ܢ ܕܚܵܙܹ̇ܝܢ ܐܢ̄ܬ̇ܘܿܢ ܕܛܵܒ̣ ܘܫܲܦܝܼܪ ܡ̣ܢ ܒܢܲܝ̈ ܡܵܪ̈ܲܝܟ̇ܘܿܢ: ܐܵܘܬܸ̇ܒ̣ܘ ܥܲܠ ܟܘܼܪܣܝܵܐ ܕܐܲܒ̣ܘܼܗܝ ܘܐܸܬ̣ܟܲܬܲܫܘ ܥܲܠ ܒܹܝܬ̣ ܡܵܪ̈ܲܝܟ̇ܘܿܢ.

⁴ ܘܲܕ݂ܚܸܠܘ ܛܵܒ̣ ܛܵܒ̣ ܟܲܕ݂ ܫ̣ܡܲܥܘ ܘܐܸܡܲܪܘ. ܗܵܐ ܬܪܹܝܢ ܡܲܠܟ̇ܝܼ̈ܢ ܠܐ ܩܵܡ̣ܘ ܩܕ݂ܵܡܵܘܗܝ: ܐܲܝܟܲܢܵܐ ܢܩܘܼܡ ܚܢܲܢ ܩܕ݂ܵܡܵܘܗܝ.

⁵ ܘܲܫܠܲܚܘ ܪܲܒ̇ܒܲܝܬܵܐ: ܘܫܲܠܝܼܛܵܐ ܕܲܩܪܝܼܬ̣ܵܐ: ܘܣܵܒܹ̈ܐ ܘܬ̣ܵܪ̈ܐܹܐ ܠܝܵܗܘ̇: ܘܐܸܡܲܪܘ ܥܲܒ̣ܕܲܝ̈ܟ ܚܢܲܢ ܘܟ݂ܠ ܕܐܵܡܲܪ ܐܲܢ̄ܬ̇ ܠܲܢ: ܢܸܥܒܸ̇ܕ݂ ܘܲܠܐ̄ܢܵܫ ܠܵܐ ܡܲܡܠ̱ܟ݂ܝܼܢ ܚ̄ܢܲܢ ܟܠ ܕܫܲܦܝܼܪ ܒܥܲܝܢܲܝ̈ܟ ܥܒܸܕ݂.

⁶ ܘܲܟ݂ܬܲܒ̣ ܠܗܘܿܢ ܐܸܓܲܪܬܵܐ ܕܬܲܪܬܹ̇ܝܢ ܙܲܒ̣ܢ̈ܝܼܢ ܘܐܸܡܲܪ: ܐܸܢ ܕܝܼܠܝ ܐܲܢ̄ܬ̇ܘܿܢ: ܘܲܠܩܵܠܝ ܫܵܡ̇ܥܝܼܢ ܐܲܢ̄ܬ̇ܘܿܢ: ܣܲܒ̣ܘ ܪܹ̈ܫܹܐ ܡܵܪ̈ܲܝܟ̇ܘܿܢ: ܘܐܲܝܬܵܘ ܠܝܼ ܡܚܵܪ ܠܗܵܢܵܐ ܥܸܕܵܢܵܐ ܠܐܝܼܙܲܪܥܹܝܠ ܘܲܒ̣ܢܲܝ̈ ܡܲܠܟܵܐ ܗܵܘܹ̇ܝܢ ܗ̄ܘ̣ܵܘ ܫܲܒ̣ܥܝܼܢ ܓܲܒ̣ܪ̈ܝܼܢ. ܘܪܵܘ̱ܪ̈ܒ̣ܵܢܹܐ ܕܲܩܪܝܼܬ̣ܵܐ ܡܪܲܒܹ̇ܝܢ ܗ̄ܘ̣ܵܘ ܠܗܘܿܢ.

⁷ ܘܟܲܕ݂ ܡܛܵܬ̤ ܐܸܓܲܪܬܵܐ: ܕܒܲܪܘ ܠܲܒ̣ܢܵܘ̈ܗܝ ܕܡܲܠܟܵܐ: ܘܢܲܟܸ̇ܣܘ ܐܸܢܘܿܢ ܫܲܒ̣ܥܝܼܢ ܓܲܒ̣ܪ̈ܝܼܢ. ܘܣܵܡ̣ܘ ܪܹ̈ܫܲܝܗܘܿܢ ܒܲܡܣܲܢܹ̈ܐ: ܘܫܲܕܲܪܘ ܠܐܝܼܙܲܪܥܹܝܠ.

⁸ ܘܐܸܬ̣ܵܐ ܐܝܼܙܓܲܕܵܐ: ܘܚܵܘܝܹܗ ܘܐܸܡܲܪ: ܐܲܝܬܝܼܘ ܪܹ̈ܫܹܐ ܕܲܒ̣ܢܲܝ̈ ܡܲܠܟܵܐ ܘܐܸܡܲܪ: ܟܫܵܘ ܐܸܢܘܿܢ ܬܲܪܬܹ̇ܝܢ ܟܵܫ̈ܝܵܢ: ܒܡܲܥܠܵܢܵܐ ܕܬܲܪܥܵܐ ܥܕܲܡܵܐ ܠܨܲܦܪܵܐ.

⁹ ܘܲܢܦܲܩ ܒܨܲܦܪܵܐ: ܘܐܸܡܲܪ ܠܟ݂ܠܹܗ ܥܲܡܵܐ: ܙܲܕ̇ܝܼܩܝܼܢ ܐܢ̄ܬ̇ܘܿܢ ܐܸܢ ܐܸܢܵܐ ܡܸܪܕܹܬ̣ ܥܲܠ ܡܵܪܝ ܘܲܩܛܲܠܬܹ̇ܗ: ܡ̇ܢ ܩܲܛܸܠ ܠܗܵܠܹܝܢ ܟܠܗܘܿܢ.

¹⁰ ܕܲܥܘ ܡܸܟܹ̇ܝܠ ܕܠܵܐ ܢܦܲܠ̣ ܡ̣ܢ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܲܪܥܵܐ: ܡ̣ܢ ܟܠ ܡܸܕܸ̇ܡ ܕܐܸܡܲܪ ܡܵܪܝܵܐ ܥܲܠ ܒܲܝܬܹ̇ܗ ܕܐܵܚܵܒ̣. ܘܡܵܪܝܵܐ ܥ̣ܒܲܕ݂ ܡܸܕܸ̇ܡ ܕܡܲܠܸܠ ܒܐܝܼܕ݂ܵܐ ܕܥܲܒ̣ܕܹ̇ܗ ܐܹܠܝܼܵܐ.

¹¹ ܘܲܚܪܲܒ̣ ܝܵܗܘ̇ ܠܟ݂ܠ ܕܐܸܫܬ̇ܟܲܚ ܠܒܹܝܬ̣ ܐܵܚܵܒ̣ ܒܐܝܼܙܲܪܥܹܝܠ: ܘܟ݂ܠ ܪܵܘ̱ܪ̈ܒ̣ܵܢܵܘܗܝ ܘܩܲܪ̈ܝܼܒ̣ܘܗܝ ܘܟ݂ܘܼܡܪ̈ܵܘܗܝ. ܘܠܵܐ ܫܒܲܩ ܠܹܗ ܣܪܝܼܕ݂ܵܐ.

¹² ܘܩܵܡ ܘܐܸܙܲܠ ܘܥܲܠ ܠܫܵܡܪܹܝܢ ܘܗ̤ܘ ܥܵܩܲܪ ܗ̄ܘ̣ܵܐ ܥܠܵܘܵـ̈ـܬ̣ܵܐ ܕܒ̣ܐܘܿܪܚܵܐ.

¹³ ܘܝܵܗܘ̇ ܐܸܫܟܲܚ ܠܐܲܚܵܘ̈ܗܝ ܕܐܹܚܲܙܝܵܐ ܡܲܠܟܵܐ ܕܲܝܗܘܼܕ݂ܵܐ ܘܐܸܡܲܪ ܠܗܘܿܢ ܡ̣ܢ ܐܲܢ̄ܬ̇ܘܿܢ ܐܵܡܪܝܼܢ ܠܹܗ: ܐܲܚܵܘ̈ܗܝ ܚܢܲܢ ܕܐܹܚܲܙܝܵܐ: ܘܲܢܚܸܬ̣̄ܢ ܠܲܫܠܵܡܵܐ ܕܲܒ̣̈ܢܲܝ ܡܲܠܟܵܐ ܘܕܲܒ̣̈ܢܲܝ ܡܲܠܟ̇ܬ̣ܵܐ.

¹⁴ ܘܐܸܡܲܪ: ܐܲܚܘܿܕ݂ܘ ܐܸܢܘܿܢ ܟܲܕ݂ ܚܲܝܝܼܢ ܘܐܸܚܲܕ݂ܘ ܐܸܢܘܿܢ: ܘܢܲܟܸ̇ܣܘ ܐܸܢܘܿܢ: ܘܲܫܕ݂ܵܘ ܐܸܢܘܿܢ ܒܓ̣ܘܼܒܵܐ: ܕܒܹܝܬ̣ ܥܵܩܵܪ ܐܲܪܒ̇ܥܝܼܢ ܘܲܬ̣ܪܹܝܢ ܓܲܒ̣ܪ̈ܝܼܢ ܘܠܵܐ ܫܒܲܩ̣ ܡܸܢܗܘܿܢ ܐ̄ܢܵܫ.

¹⁵ ܘܐܸܙܲܠ ܡ̣ܢ ܬܲܡܵܢ: ܘܐܸܫܟܲܚ ܠܝܘܿܢܵܕ݂ܵܒ̣ ܒܲܪ ܪܵܟ݂ܵܒ̣ ܟܲܕ݂ ܐܵܬܹ̇ܐ ܠܐܘܼܪܥܹܗ. ܘܒܲܪܟܹܗ ܘܐܸܡܲܪ ܠܹܗ: ܐܝܼܬ̣ ܒܠܸܒܵܟ݂ ܬܪܝܼܨܘܼܬ̣ܵܐ ܐܲܝܟ݂ ܕܲܒ̣ܠܹܒ̇ܝ ܥܲܡ ܠܸܒܵܟ݂. ܘܐܸܡܲܪ ܝܘܿܢܵܕ݂ܵܒ̣. ܐܝܼܬ̣ ܘܐܝܼܬ̣: ܘܐܸܡܲܪ ܠܹܗ ܗܲܒ̣ ܐܝܼܕ݂ܵܟ݂ ܘܝܲܗ̄ܒ̣ ܐܝܼܕܹܗ. ܘܐܲܣܩܹܗ ܠܘܵܬܹܗ ܠܡܲܪܟܲܒ̣ܬ̣ܵܐ.

¹⁶ ܘܐܸܡܲܪ ܠܹܗ: ܬܵܐ ܥܵܡܝ: ܘܲܚܙܝܼ ܟܲܕ݂ ܛܵܐܹ̇ܢ ܐ̄ܢܵܐ ܠܡܵܪܝܵܐ. ܘܐܵܘܬ̇ܒܹܗ ܥܲܡܹܗ ܒܡܲܪܟܲܒ̣ܬ̣ܵܐ.

¹⁷ ܘܥܲܠ ܠܫܵܡܪܹܝܢ: ܘܲܚܪܲܒ̣ ܠܟ݂ܠ ܕܐܸܫܬ̇ܟܲܚ ܒܒܲܝܬܹ̇ܗ ܕܐܵܚܵܒ̣ ܒܫܵܡܪܹܝܢ: ܥܕܲܡܵܐ ܕܐܵܘܒܸ̇ܕ݂ ܐܸܢܘܿܢ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܐܸܡܲܪ ܠܐܹܠܝܼܵܐ.

¹⁸ ܘܟܲܢܸܫ ܝܵܗܘ̇ ܠܟ݂ܠܹܗ ܥܲܡܵܐ: ܘܐܸܡܲܪ ܠܗܘܿܢ: ܐܵܚܵܒ̣ ܦܠܲܚ ܠܒܲܥܠܐ ܩܲܠܝܼܠ. ܝܵܗܘ̇ ܢܸܦ̱ܠܚܝܼܘܗܝ ܣܲܓ̇ܝ.

¹⁹ ܘܗܵܫܵܐ ܟܠܗܘܿܢ ܢܒ̣ܝܹ̈ܐ ܕܒܲܥܠܵܐ: ܘܟ݂ܠܗܘܿܢ ܦܵܠܚܵܘ̈ܗܝ ܘܟ݂ܠܗܘܿܢ ܟܘܼܡܪ̈ܵܘܗܝ ܙܲܡܸܢܘ ܠܝܼ. ܘܐ̄ܢܵܫ ܠܵܐ ܢܸܛܥܹܐ: ܡܸܛܠ ܕܕܸܒ̣ܚܬ̣ܵܐ ܪܲܒ̇ܬ̣ܵܐ ܥܵܒܹܕ݂ ܐ̄ܢܵܐ ܠܒܲܥܠܵܐ. ܘܟ݂ܠ ܡ̇ܢ ܕܢܸܛܥܹܐ: ܢܸܚܹܐ ܘܝܵܗܘ̇ ܥܲܒ̣ܕܵܗ̇ ܒܢܸܟ݂ܠܵܐ ܕܢܵܘܒܸ̇ܕ݂ ܠܦܵܠܚܵܘ̈ܗܝ ܕܒܲܥܠܵܐ.

²⁰ ܘܐܸܡܲܪ ܝܵܗܘ̇: ܙܲܡܸܢܘ ܠܟ݂ܠܹܗ ܟܸܢܫܵܐ ܠܒܲܥܠܵܐ. ܘܙܲܡܸܢܘ.

²¹ ܘܫܲܕܲܪ ܝܵܗܘ̇ ܥܲܠ ܟܠܹܗ ܝܼܣܪܵܝܹܠ ܘܐܸܬ̣ܵܘ ܟܠܗܘܿܢ ܦܵܠܚܵܘ̈ܗܝ ܕܒܲܥܠܵܐ ܘܠܵܐ ܐܸܫܬ̇ܚܲܪ ܐ̄ܢܵܫ ܕܠܵܐ ܐܸܬ̣ܵܐ. ܘܥܲܠ ܠܒܹܝܬ̣ ܒܲܥܠܵܐ ܘܐܸܬ̣ܡ̱ܠܝܼ ܒܹܝܬ̣ ܒܲܥܠܵܐ ܣܦܵܐ ܒܲܣܦܵܐ.

²² ܘܐܸܡܲܪ ܠܓܹܙܲܒ̣ܪܵܐ: ܐܲܦܸܩ ܠܒ̣ܘܼܫܹ̈ܐ ܠܟ݂ܠܗܘܿܢ ܦܵܠܚܲܝ̈ ܒܲܥܠܵܐ. ܘܐܲܦܸܩ ܠܗܘܿܢ ܠܒ̣ܘܼܫܹ̈ܐ.

²³ ܘܥܲܠ ܝܵܗܘ̇ ܘܝܘܿܢܵܕ݂ܵܒ̣ ܒܲܪ ܪܵܟ݂ܵܒ̣ ܠܒܹܝܬ̣ ܒܲܥܠܵܐ: ܘܐܸܡܲܪ ܝܵܗܘ̇ ܠܦܵܠܚܵܘ̈ܗܝ ܕܒܲܥܠܵܐ: ܒܨܵܘ ܘܲܚܙܵܘ: ܕܲܠܡܵܐ ܐܝܼܬ̣ ܥܲܡܟ݂ܘܿܢ ܗܵܪܟܵܐ ܡ̣ܢ ܥܲܒ̣ܕܵܘ̈ܗܝ ܕܡܵܪܝܵܐ: ܐܸܠܵܐ ܐܸܢ ܦܵܠܚܵܘ̈ܗܝ ܕܒܲܥܠܵܐ ܒܲܠܚܘܿܕܲܝܗܘܿܢ.

²⁴ ܘܥܲܠܘ ܠܡܸܥܒܲܕ݂ ܕܸܒ̣ܚܹ̈ܐ ܘܲܥ̈ܠܵܘܵܬ̣ܵܐ. ܘܝܵܗܘ̇ ܐܲܩܝܼܡ ܡ̣ܢ ܠܒܲܪ: ܬܠܵܬ̣ܡܵܐܐ ܘܲܬ̣ܡܵܢܐܝܼܢ ܓܲܒ̣ܪ̈ܝܼܢ ܘܐܸܡܲܪ ܓܲܒ̣ܪܵܐ ܕܡܸܬ̣ܦܲܠܲܛ ܡ̣ܢ ܐ̄ܢܵܫܵܐ ܕܡܲܫܠܸܡ ܐ̄ܢܵܐ ܠܟ݂ܘܿܢ: ܢܲܦ̮ܫܹܗ ܚܠܵܦ ܢܲܦ̮ܫܹܗ.

²⁵ ܘܟܲܕ݂ ܓܲܡܲܪ ܠܡܸܥܒܲܕ݂ ܥ̈ܠܵܘܵܬ̣ܵܐ: ܐܸܡܲܪ ܝܵܗܘ̇ ܠܪ̈ܲܗܵܛܹܐ ܘܲܠܓܲܢ̄ܒܵܪܹ̈ܐ: ܥܘܿܠܘ ܚܪܘܿܒ̣ܘ ܐܸܢܘܿܢ: ܘܐ̄ܢܵܫ ܠܵܐ ܢܸܦܘܿܩ ܘܲܚܪܲܒ̣ܘ ܐܸܢܘܿܢ ܒܦܘܼܡܵܐ ܕܚܲܪܒܵܐ: ܘܐܲܪܡ̣ܝܼܘ ܐܸܢܘܿܢ ܪ̈ܲܗܵܛܹܐ ܘܓܲܢ̄ܒܵܪܹ̈ܐ. ܘܐܸܙܲܠܘ ܥܕܲܡܵܐ ܠܲܩܪܝܼܬ̣ܵܐ ܕܒܹܝܬ̣ ܒܲܥܠܵܐ.

²⁶ ܘܐܲܦܸܩܘ ܩܵܝܑܹܡܬ̣ܵܐ ܕܒܹܝܬ̣ ܒܲܥܠܵܐ: ܘܐܵܘܩܕ݂ܘܼܗ̇ ܒܢܘܼܪܵܐ.

²⁷ ܘܲܥܩܲܪܘ ܩܵܝܑܹܡܬ̣ܵܐ ܕܒܲܥܠܵܐ. ܘܥܲܩܪܘܼܗܝ ܠܒܹܝܬ̣ ܒܲܥܠܵܐ: ܘܥܲܒ̣ܕܘܼܗܝ ܒܹܝܬ̣ ܡܲܚ̱ܪܝܵܐ ܥܕܲܡܵܐ ܠܝܵܘܡܵܢܵܐ.

²⁸ ܘܐܵܘܒܸ̇ܕ݂ ܝܵܗܘ̇ ܠܒܲܥܠܵܐ ܡ̣ܢ ܝܼܣܪܵܝܹܠ:

²⁹ ܒܲܠܚܘܿܕ݂ ܒܲܚܛܵܗܵܘ̈ܗܝ ܕܝܼܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ: ܠܵܐ ܣܛܵܐ ܝܵܗܘ̇ ܡ̣ܢ ܒܵܬܲܪܗܘܿܢ ܕܥܸܓ̣̈ܠܹܐ ܕܕܲܗܒ̣ܵܐ ܕܲܒ̣ܒܹܝܬ̣ ܐܹܝܠ ܘܕܲܒ̣ܕ݂ܵܢ.

³⁰ ܘܐܸܡܲܪ ܡܵܪܝܵܐ ܠܝܵܗܘ̇: ܚܠܵܦ ܕܲܥܒܲܕ̇ܬ̇ ܕܫܲܦܝܼܪ ܩܕ݂ܵܡܝ: ܘܟ݂ܠ ܕܲܒ̣ܠܹܒ̇ܝ ܥܒܲܕ̇ܬ̇ ܠܲܕ݂ܒܹܝܬ̣ ܐܵܚܵܒ̣: ܒ̈ܢܲܝܵܐ ܪ̈ܒ̣ܝܼܥܵܝܹܐ ܢܸܬ̇ܒ̣ܘܼܢ ܠܵܟ݂ ܥܲܠ ܟܘܼܪܣܝܵܐ ܕܝܼܣܪܵܝܹܠ.

³¹ ܘܝܵܗܘ̇ ܠܵܐ ܢܛܲܪ ܠܲܡܗܲܠܵܟ݂ܘܼ ܒܢܵܡܘܿܣܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܡ̣ܢ ܟܠܹܗ ܠܸܒܹ̇ܗ. ܘܠܵܐ ܣܛܵܐ ܡ̣ܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܕܐܲܚܛܝܼ ܠܝܼܣܪܵܝܹܠ.

³² ܘܲܒ̣ܝܵܘ̈ܡܵܬ̣ܵܐ ܗܵܢܘܿܢ: ܫܲܪܝܼ ܡܵܪܝܵܐ ܠܲܡܥܵܩܘܼ ܒܝܼܣܪܵܝܹܠ. ܘܲܡ̣ܚܵܐ ܐܸܢܘܿܢ ܚܙܵܐܹܝܠ ܒܟ݂ܠܹܗ ܬܚܘܼܡܵܐ ܕܝܼܣܪܵܝܹܠ.

³³ ܡ̣ܢ ܝܘܿܪܕ̇ܢܵܢ ܒܡܲܕ݂ܢܵܚܲܝ̈ ܫܸܡܫܵܐ: ܘܟ݂ܠܵܗ̇ ܐܪܥܵܐ ܕܓܸܠܥܵܕ݂ ܘܲܕ݂ܓܵܕ݂: ܘܲܕ݂ܪܘܼܒܹܝܠ ܘܕܲܡܢܲܫܹܐ: ܡ̣ܢ ܥܲܕܘܵܥܝܼܪ ܕܥܲܠ ܣܸܦܬ̣ܵܐ ܕܢܲܚܠܵܐ ܕܐܲܪܢܘܿܢ: ܘܓܸܠܥܵܕ݂ ܘܡܲܬ̣ܢܝܼܢ.

³⁴ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܵܗܘ̇: ܘܟ݂ܠ ܡܸܕܸ̇ܡ ܕܲܥܒܲܕ݂. ܘܟ݂ܠܵܗ̇ ܓܲܢ̄ܒܵܪܘܼܬܹܗ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ.

³⁵ ܘܲܫܟܸܒ̣ ܝܵܗܘ̇ ܥܲܡ ܐܲܒ̣ܵܗܵܘ̈ܗܝ: ܘܩܲܒ̣ܪܘܼܗܝ ܒܫܵܡܪܹܝܢ. ܘܐܲܡ̣ܠܸܟ݂ ܝܵܗܘ̇ ܐܵܚܵܙ ܒܪܹܗ ܒܵܬ̣ܪܹܗ.

³⁶ ܘܝܵܘ̈ܡܵܬ̣ܵܐ ܕܐܲܡ̣ܠܸܟ݂ ܝܵܗܘ̇ ܥܲܠ ܝܼܣܪܵܝܹܠ ܥܸܣܪܝܼܢ ܘܲܬ̣ܡܵܢܹܐ ܫܢ̈ܝܼܢ ܒܫܵܡܪܹܝܢ.

11

¹ ܘܲܥܬܲܠܝܵܐ ܐܸܡܹܗ ܕܐܹܚܲܙܝܵܐ: ܚܙܵܬ̤ ܕܡ̣ܝܼܬ̣ ܒܪܵܗ̇. ܘܩܵܡܲܬ̤ ܘܐܵܘܒ̇ܕܲܬ̤ ܠܟ݂ܠܹܗ ܙܲܪܥܵܐ ܕܡܲܠܟ̇ܘܼܬ̣ܵܐ.

² ܘܕܸܒ̣ܪܲܬ̤ ܝܘܿܫܒܲܥ ܒܲܪܬ̣ ܡܲܠܟܵܐ ܝܘܿܪܵܡ: ܚܵܬܹܗ ܕܐܹܚܲܙܝܵܐ: ܠܝܘܿܐܵܫ ܒܲܪ ܐܹܚܲܙܝܵܐ: ܘܲܓ̣ܢܲܒ̣ܬܹܗ ܡ̣ܢ ܒܲܝܢܵܬ̣ ܒܢܲܝ̈ ܡܲܠܟܵܐ ܕܡܸܬ̣ܩܲܛܠܝܼܢ: ܘܛܲܫܝܵܬܹܗ ܠܹܗ ܘܲܠܡܲܝܢܲܩܬܹܗ ܒܩܲܝܛܘܿܢܵܐ ܕܡܲܫܟ̇ܒ̣ܵܗ̇. ܘܛܵܫܝܵܬܹܗ ܡ̣ܢ ܩܕ݂ܵܡ ܥܬܲܠܝܵܐ: ܘܠܵܐ ܡܝܼܬ̣.

³ ܘܲܗܘ̤ܵܐ ܥܲܡܵܗ̇ ܒܒܲܝܬܹ̇ܗ ܕܡܵܪܝܵܐ ܡܸܬ̇ܛܲܫܹܐ ܫܸܬ̣ ܫܢ̈ܝܼܢ. ܘܲܥܬܲܠܝܵܐ ܐܲܡ̱ܠܟܲܬ̤ ܥܲܠ ܐܲܪܥܵܐ.

⁴ ܘܲܒ̣ܫܲܢ̄ܬܵܐ ܫܒ̣ܝܼܥܷܵܬܵܐ: ܫܲܕܲܪ ܝܘܿܝܵܕ݂ܵܥ: ܘܲܕ݂ܒܲܪ ܠܪ̈ܲܒܲܝ ܡܵܐ̈ܘܵܬ̣ܵܐ ܘܲܠܪ̈ܲܗܵܛܹܐ: ܘܠܲܛܒܸܠܵܘܹ̈ܐ. ܘܐܲܥܸܠ ܐܸܢܘܿܢ ܠܘܵܬܹܗ ܠܒܲܝܬܹ̇ܗ ܕܡܵܪܝܵܐ: ܘܐܲܩܝܼܡ ܠܗܘܿܢ ܩܝܵܡܵܐ ܘܝܼܡܵܐ ܥܲܡܗܘܿܢ ܡܵܘ̈ܡܵܬ̣ܵܐ ܒܒܲܝܬܹ̇ܗ ܕܡܵܪܝܵܐ: ܘܚܵܘܝܼ ܐܸܢܘܿܢ ܠܲܒ̣ܪܹܗ ܕܡܲܠܟܵܐ.

⁵ ܘܦܲܩܸܕ݂ ܐܸܢܘܿܢ ܘܐܸܡܲܪ ܠܗܘܿܢ: ܗܵܢܵܐ ܦܸܬ̣ܓ̣ܵܡܵܐ ܕܬܸܥܒ̇ܕ݂ܘܼܢ: ܬܘܼܠܬ̣ܵܐ ܡܸܢܟܘܿܢ ܢܸܗܘܘܿܢ ܢܵܛܪܝܼܢ ܒܡܲـ̈ـܥܵܠܲܝ ܫܲܒ̇ܬ̣ܵܐ ܒܡܲܛܲܪܬܵܐ ܕܒܹܝܬ̣ ܡܲܠܟܵܐ.

⁶ ܘܬ̣ܘܼܠܬ̣ܵܐ ܒܬܲܪܥܵܐ ܕܩܹܐܪܣܵܐ. ܘܬ̣ܘܼܠܬ̣ܵܐ ܒܬܲܪܥܵܐ ܕܒܹܝܬ̣ ܪ̈ܲܗܵܛܹܐ. ܘܛܲܪܘ ܡܲܛܲܪܬܵܐ ܕܒܲܝܬܵܐ ܡ̣ܢ ܣܘܼܪܚܵܢܵܐ.

⁷ ܘܬܲܪܬܹ̇ܝܢ ܡܢܵـ̈ـܘܵܢ ܡܸܢܟ݂ܘܿܢ ܒܟ݂ܠ ܡܲܦܵܩܲܝ̈ ܫܲܒ̇ܬ̣ܵܐ. ܘܛܲܪܘ ܡܲܛܲܪܬܵܐ ܕܒܹܝܬ̣ ܡܵܪܝܵܐ ܥܲܡ ܕܒܹܝܬ̣ ܡܲܠܟܵܐ.

⁸ ܘܐܸܬ̣ܟ̇ܘܼܪܟ̇ܘܼܗܝ ܠܡܲܠܟܵܐ ܓܲܒ̣ܪܵܐ ܘܙܲܝܢܹܗ ܒܐܝܼܕܹܗ. ܘܡ̣ܢ ܕܥܵܐܹ̇ܠ ܠܣܸܕ݂ܪܹ̈ܐ: ܢܡܘܼܬ̣. ܘܲܗܘ̤ܵܘ ܥܲܡ ܡܲܠܟܵܐ ܒܡܲܦܩܹܗ ܘܲܒ̣ܡܲܥܠܹܗ.

⁹ ܘܲܥܒܲܕ݂ܘ ܪ̈ܲܒܲܝ ܡܵܐ̈ܘܵܬ̣ܵܐ ܐܲܝܟ݂ ܕܦܲܩܸܕ݂ ܐܸܢܘܿܢ ܝܘܿܝܵܕ݂ܵܥ ܟܵܗܢܵܐ. ܘܲܕ݂ܒܲܪ ܓܲܒ̣ܪܵܐ ܐ̄ܢܵܫܵܘ̈ܗܝ ܒܡܲܥ̈ܠܲܝ ܫܲܒ̇ܬ̣ܵܐ ܥܲܡ ܡܲܦܵܩܲܝ̈ ܫܲܒ̇ܬ̣ܵܐ. ܘܐܸܬ̣ܵܐ ܠܘܵܬ̣ ܝܘܿܝܵܕ݂ܵܥ ܟܵܗܢܵܐ.

¹⁰ ܘܝܲܗ̄ܒ̣ ܟܵܗܢܵܐ ܠܪ̈ܲܒܲܝ ܡܵܐ̈ܘܵܬ̣ܵܐ ܡܘܿܪ̈ܵܢܝܵܬ̣ܵܐ ܘܫܵܠ̈ܛܹܐ ܕܡܲܠܟܵܐ ܕܵܘܝܼܕ݂ ܕܲܒ̣ܒܲܝܬܹ̇ܗ ܕܡܵܪܝܵܐ.

¹¹ ܘܩܵܡ̣ܘ ܪ̈ܲܗܵܛܹܐ ܓܲܒ̣ܪܵܐ ܘܙܲܝܢܹܗ ܒܐܝܼܕܹܗ: ܡ̣ܢ ܣܸܛܪܹܗ ܕܒܲܝܬܵܐ: ܡ̣ܢ ܝܲܡܝܼܢܵܐ: ܘܲܥܕܲܡܵܐ ܠܣܸܛܪܹܗ ܕܒܲܝܬܵܐ ܡ̣ܢ ܣܸܡܵܠܵܐ. ܘܐܸܬ̣ܟ̇ܪܸܟ݂ܘ ܥܲܠ ܡܲܕ݂ܒ̇ܚܵܐ ܘܥܲܠ ܒܹܝܬ̣ ܡܲܠܟܵܐ.

¹² ܘܐܲܦܸܩܘ ܠܲܒ̣ܪܹܗ ܕܡܲܠܟܵܐ: ܘܣܵܡܘ ܒܪܹܫܹܗ ܟܠܝܼܠܵܐ ܕܣܵܗܕ̇ܘܼܬ̣ܵܐ. ܘܐܲܡ̱ܠܝܼܟ݂ܘܼܗܝ ܘܡܲܫܚܘܼܗܝ: ܘܲܢܩܲܫܘ ܟܲܦܵܐ ܘܐܸܡܲܪܘ: ܢܸܚܹܐ ܡܲܠܟܵܐ.

¹³ ܘܫܸܡܥܲܬ̤ ܥܬܲܠܝܵܐ ܩܵܠ ܪܵܘܒܵܐ ܕܥܲܡܵܐ: ܘܥܲܡܵܐ ܟܲܕ݂ ܚܵܕܹܝܢ. ܘܐܸܬܲܬ̤ ܠܘܵܬ̣ ܥܲܡܵܐ ܠܒܲܝܬܹ̇ܗ ܕܡܵܪܝܵܐ.

¹⁴ ܘܲܚܙܵܬ̤ ܡܲܠܟܵܐ ܟܲܕ݂ ܩܵܐܹ̇ܡ ܥܲܠ ܥܲܡܘܼܕ݂ܵܐ ܐܲܝܟ݂ ܢܵܡܘܿܣܵܐ ܕܡܲܠ̈ܟܹ̇ܐ. ܘܪܵܘ̱ܪ̈ܒ̣ܵܢܹܐ ܘܩܵܪ̈ܝܲܝ ܒܩܲܪ̈ܢܵܬ̣ܵܐ ܩܵܝܡܝܼܢ ܩܕ݂ܵܡ ܡܲܠܟܵܐ: ܘܟ݂ܠܹܗ ܥܲܡܵܐ ܕܐܲܪܥܵܐ ܚܵܕܹܝܢ ܘܩܵܪܹܝܢ ܒܩܲܪ̈ܢܵܬ̣ܵܐ. ܘܨܲܪܝܲܬ̤ ܥܬܲܠܝܵܐ ܠܒ̣ܘܼܫܹ̈ܝܗ̇: ܘܲܩܪܵܬ̤ ܡܸܪܕܵܐ: ܡܸܪܕܵܐ.

¹⁵ ܘܲܦܩܲܕ݂ ܝܘܿܝܵܕ݂ܵܥ ܟܵܗܢܵܐ ܠܪ̈ܲܒܲܝ ܡܵܐ̈ܘܵܬ̣ܵܐ ܫܲܠܝܼܛܲܝ̈ ܚܲܝܠܵܐ: ܘܐܸܡܲܪ ܠܗܘܿܢ: ܐܲܦܩܘܼܗ̇ ܠܒܲܪ ܡ̣ܢ ܣܸܕ݂ܪܹ̈ܐ. ܘܟ݂ܠ ܡ̇ܢ ܕܥܵܐܹ̇ܠ ܒܵܬ̣ܪܵܗ̇: ܢܸܬ̣ܩܛܸܠ ܒܚܲܪܒܵܐ ܡܸܛܠ ܕܐܸܡܲܪ ܟܵܗܢܵܐ: ܠܵܐ ܬܸܬ̣ܩܛܸܠ ܒܒܲܝܬܹ̇ܗ ܕܡܵܪܝܵܐ.

¹⁶ ܘܬܲܩܸܢ ܠܵܗ̇ ܕܘܼܟ̇ܬ̣ܵܐ. ܘܥܸܠܲܬ̤ ܒܐܘܼܪܚܵܐ ܕܡܲܥܠܵܢܵܐ ܕܪ̈ܲܟ݂ܫܵܐ ܕܡܲܠܟܵܐ: ܘܡܝܼܬܲܬ̤ ܬܲܡܵܢ.

¹⁷ ܘܐܲܩܝܼܡ ܝܘܿܝܵܕ݂ܵܥ ܩܝܵܡܵܐ ܒܹܝܬ̣ ܡܵܪܝܵܐ ܠܡܲܠܟܵܐ ܘܲܠܥܲܡܵܐ: ܕܢܸܗܘܘܿܢ ܥܲܡܵܐ ܠܡܵܪܝܵܐ: ܘܒܹܝܬ̣ ܡܲܠܟܵܐ ܠܥܲܡܵܐ.

¹⁸ ܘܥܲܠܘ ܟܠܹܗ ܥܲܡܵܐ ܕܐܲܪܥܵܐ: ܠܒܹܝܬ̣ ܒܲܥܠܵܐ. ܘܲܥܩܲܪܘ ܡܲܕ݂ܒ̇ܚܵܘ̈ܗܝ ܘܨܲܠܡܵܘ̈ܗܝ ܬܲܒܲܪܘ. ܘܲܠܡܵܬܲܢ ܟܘܼܡܪܵܐ ܕܒܲܥܠܵܐ ܩܛܲܠܘ ܩܕ݂ܵܡ ܡܲܕ݂ܒ̇ܚܵܐ. ܘܐܲܩܝܼܡ ܟܵܗܢܵܐ ܦܵܩܘܿܕܹ̈ܐ ܥܲܠ ܒܲܝܬܹ̇ܗ ܕܡܵܪܝܵܐ.

¹⁹ ܘܲܕ݂ܒܲܪ ܠܪ̈ܲܒܲܝ ܡܵܐ̈ܘܵܬ̣ܵܐ ܘܲܠܪ̈ܲܗܵܛܹܐ ܘܠܲܛܒܸܠܵܘܹ̈ܐ: ܘܲܠܟ݂ܠܹܗ ܥܲܡܵܐ ܕܐܲܪܥܵܐ. ܘܐܲܚܬ̣ܘܼܗܝ ܠܡܲܠܟܵܐ ܡ̣ܢ ܒܲܝܬܹ̇ܗ ܕܡܵܪܝܵܐ. ܘܥܲܠ ܒܐܘܼܪܚܵܐ ܕܬܲܪܥܵܐ ܕܪ̈ܲܗܵܛܹܐ ܕܒܹܝܬ̣ ܡܲܠܟܵܐ. ܘܝܼܬܸܒ̣ ܥܲܠ ܟܘܼܪܣܝܵܐ ܕܡܲܠ̈ܟܹ̇ܐ.

²⁰ ܘܲܚܕ݂ܝܼ ܟܠܹܗ ܥܲܡܵܐ ܕܐܲܪܥܵܐ: ܘܲܩܪܝܼܬ̣ܵܐ ܫܸܠܝܲܬ̤. ܘܠܲܥܬܲܠܝܵܐ ܩܛܲܠ̣ܘ ܒܚܲܪܒܵܐ ܒܒܹܝܬ̣ ܡܲܠܟܵܐ.

²¹ ܒܲܪ ܫܒܲܥ ܫܢ̈ܝܼܢ ܗ̄ܘ̣ܵܐ ܝܘܿܐܵܫ ܟܲܕ݂ ܐܲܡ̣ܠܸܟ݂.

12

¹ ܒܲܫܢܲܬ̣ ܫܒܲܥ ܠܝܵܗܘ̇ ܐܲܡ̣ܠܸܟ݂ ܝܘܼܐܵܫ: ܘܐܲܪܒ̇ܥܝܼܢ ܫܢ̈ܝܼܢ ܐܲܡܠܸܟ݂ ܒܐܘܿܪܸܫܠܸܡ ܘܲܫܡܵܐ ܕܐܸܡܹܗ ܨܘܼܒ̣ܵܐ ܡ̣ܢ ܒܹܪ ܫܒܲܥ.

² ܘܲܥܒܲܕ݂ ܝܘܼܐܵܫ ܕܫܲܦܝܼܪ ܩܕ݂ܵܡ ܡܵܪܝܵܐ ܟܠ ܝܵܘܡܵܘ̈ܗܝ: ܕܡܲܠܸܦ ܗ̄ܘ̣ܵܐ ܠܹܗ ܝܘܿܝܵܕ݂ܵܥ ܟܵܗܢܵܐ.

³ ܒܪܲܡ ܥܠܵـ̈ـܘܵܬ̣ܵܐ ܠܵܐ ܐܲܥܒܲܪ: ܘܲܥܕܲܟܹ̇ܝܠ ܥܲܡܵܐ ܡܕܲܒ̇ܚܝܼܢ ܗ̄ܘ̣ܵܘ ܘܡܲܥܛܪܝܼܢ ܥܲܠ ܥܠܵـ̈ـܘܵܬ̣ܵܐ.

⁴ ܘܐܸܡܲܪ ܝܘܼܐܵܫ ܠܟ݂ܵܗ̈ܢܹܐ: ܟܠ ܟܸܣܦܵܐ ܕܩܘܼܕ݂ܫܵܐ ܕܥܵܐܹ̇ܠ ܠܒܲܝܬܹ̇ܗ ܕܡܵܪܝܵܐ: ܟܸܣܦܵܐ ܕܝܵܗܹ̇ܒ̣ ܓܲܒ̣ܪܵܐ ܠܦܘܼܪܩܵܢܵܐ ܕܢܲܦ̮ܫܹܗ: ܟܠ ܟܸܣܦܵܐ ܕܡܸܬ̣ܪܲܥܸܐ ܓܲܒ̣ܪܵܐ ܒܠܸܒܹ̇ܗ ܕܢܲܥܸܠ ܠܒܲܝܬܹ̇ܗ ܕܡܵܪܝܵܐ.

⁵ ܢܸܣܒ̣ܘܼܢ ܠܗܘܿܢ ܟܵܗ̈ܢܹܐ ܓܲܒ̣ܪܵܐ ܡ̣ܢ ܡ̇ܢ ܕܡܸܬ̣ܪܲܥܸܐ. ܘܗܸܢܘܿܢ ܢܸܗܘܘܿܢ ܡܲܦܩܝܼܢ ܥܲܠ ܒܕ݂ܵܩܵܐ ܕܒܲܝܬܵܐ: ܕܡܸܫܬ̇ܟܲܚ ܒܹܗ ܒܕ݂ܵܩܵܐ.

⁶ ܘܒܲܫܢܲܬ̣ ܥܸܣܪܝܼܢ ܘܲܬ̣ܠܵܬ̣ ܫܢ̈ܝܼܢ ܠܡܲܠܟܵܐ ܝܘܼܐܵܫ: ܠܵܐ ܒܕܲܩ̣ܘ ܟܵܗ̈ܢܹܐ ܒܕ݂ܵܩܵܐ ܕܒܲܝܬܵܐ.

⁷ ܘܲܩܪܵܐ ܡܲܠܟܵܐ ܝܘܿܐܵܫ ܠܝܘܿܝܵܕ݂ܵܥ ܟܵܗܢܵܐ: ܘܲܠܟ݂ܵܗ̈ܢܹܐ: ܘܐܸܡܲܪ ܠܗܘܿܢ: ܡܸܛܠ ܡܵܢܵܐ ܠܵܐ ܒܵܕ݂ܩܝܼܢ ܐܢ̄ܬ̇ܘܿܢ ܒܕ݂ܵܩܵܐ ܕܒܲܝܬܵܐ. ܗܵܫܵܐ ܠܵܐ ܬܸܣܒ̣ܘܼܢ ܟܸܣܦܵܐ ܡ̣ܢ ܐܲܝܠܹܝܢ ܕܝܵܗ̄ܒ̇ܝܼܢ ܠܟܘܿܢ ܠܲܒ̣ܕ݂ܵܩܵܐ ܕܒܲܝܬܵܐ ܗܲܒ̣ܘܼܗܝ.

⁸ ܘܐܸܬ̇ܛܦܝܼܣܘ ܟܵܗܢܹܐ ܕܠܵܐ ܢܸܣܒ̣ܘܼܢ ܟܸܣܦܵܐ ܡ̣ܢ ܥܲܡܵܐ: ܘܠܵܐ ܢܸܒ̣ܕ̇ܩܘܼܢ ܒܕ݂ܵܩܵܐ ܕܒܲܝܬܵܐ.

⁹ ܘܲܢܣܲܒ̣ ܝܘܿܝܵܕ݂ܵܥ ܟܵܗܢܵܐ ܐܵܪܘܿܢܵܐ ܚܲܕ݂: ܘܲܢܩܲܒ̣ ܢܸܩܒܵܐ ܒܬܲܪܥܹܗ. ܘܣܵܡܹܗ ܥܲܠ ܓܹܢ̄ܒ̣ ܡܲܕ݂ܒ̇ܚܵܐ ܡ̣ܢ ܝܲܡܝܼܢܵܐ: ܐܲܝܟܵܐ ܕܥܵܐܹ̇ܠ ܓܲܒ̣ܪܵܐ ܠܒܲܝܬܹ̇ܗ ܕܡܵܪܝܵܐ. ܘܪܵܡܹ̇ܝܢ ܬܲܡܵܢ ܟܵܗ̈ܢܹܐ ܢܵܛܪ̈ܲܝ ܬܲܪ̈ܥܹܐ: ܟܠܹܗ ܟܸܣܦܵܐ ܕܥܵܐܹ̇ܠ ܠܒܲܝܬܹ̇ܗ ܕܡܵܪܝܵܐ.

¹⁰ ܘܟܲܕ݂ ܚܙܵܘ ܕܲܣܓ̣ܝܼ ܠܹܗ ܟܸܣܦܵܐ ܒܐܵܪܘܿܢܵܐ: ܣܠܸܩ̣ ܣܵܦܪܵܐ ܕܡܲܠܟܵܐ ܘܟ݂ܵܗܢܵܐ ܪܲܒܵܐ: ܘܲܣܠܸܩܘ: ܘܲܡܢܵܘ: ܘܨܲܪܘ ܟܸܣܦܵܐ ܕܐܸܫܬ̇ܟܲܚ ܒܒܲܝܬܹ̇ܗ ܕܡܵܪܝܵܐ.

¹¹ ܘܝܲܗ̄ܒ̇ܘܼܗܝ ܠܟܸܣܦܵܐ ܟܲܕ݂ ܨܪܝܼܪ ܠܥܵܒ̣ܕܲܝ̈ ܥܒ̣ܵܕ݂ܵܐ ܕܲܡܫܲܠܛܝܼܢ ܒܒܲܝܬܹ̇ܗ ܕܡܵܪܝܵܐ. ܘܝܲܗ̄ܒ̇ܘܼܗܝ ܠܢܲܓܵܪܹ̈ܐ ܘܠܲܐܪ̈ܓܘܼܒ̣ܠܹܐ: ܕܥܵܒ̣ܕ̇ܝܼܢ ܒܒܲܝܬܹ̇ܗ ܕܡܵܪܝܵܐ.

¹² ܘܠܲܐܪ̈ܕܸ̇ܟ݂ܠܹܐ ܘܲܠܦܣܠܲܝ̈ ܟܹܐ̈ܦܹܐ: ܘܲܠܡܸܙܒܲܢ ܩܲܝ̈ܣܹܐ. ܘܟܹܐ̈ܦܹܐ ܦܣ̈ܝܼܠܵܬ̣ܵܐ: ܠܡܸܒ̣ܕܲܩ ܒܕ݂ܵܩܵܐ ܕܒܲܝܬܹ̇ܗ ܕܡܵܪܝܵܐ: ܘܲܠܟ݂ܠ ܡܸܕܸ̇ܡ ܕܢܵܦܹܩ ܥܲܠ ܒܲܝܬܵܐ ܠܲܡܫܲܪܵܪܘܼܬܹܗ.

¹³ ܘܠܵܐ ܐܸܬ̣ܥ̱ܒܸܕ݂ ܒܒܲܝܬܹ̇ܗ ܕܡܵܪܝܵܐ: ܠܵܐ ܠܲܩܢܹ̈ܐ ܕܟܸܣܦܵܐ: ܘܠܵܐ ܫܵܚ̈ܠܹܐ: ܘܠܵܐ ܩܲܛܪ̈ܘܿܩܹܐ: ܘܠܵܐ ܩܲܪ̈ܢܵܬ̣ܵܐ: ܘܠܵܐ ܟܠ ܡܵܐܢ ܕܕܲܗܒ̣ܵܐ ܘܡܵܐܢܹ̈ܐ ܕܟܸܣܦܵܐ: ܡ̣ܢ ܟܸܣܦܵܐ ܕܥܵܐܹ̇ܠ ܠܒܲܝܬܹ̇ܗ ܕܡܵܪܝܵܐ.

¹⁴ ܐܸܠܵܐ ܠܥܵܒ̣ܕܲܝ̈ ܥܒ̣ܵܕ݂ܵܐ ܝܲܗ̄ܒ̇ܘܼܗܝ ܘܒ̣ܵܕ݂ܩܝܼܢ ܒܹܗ ܒܕ݂ܵܩܵܐ ܕܒܲܝܬܹ̇ܗ ܕܡܵܪܝܵܐ.

¹⁵ ܘܠܵܐ ܚܵܫܒ̇ܝܼܢ ܥܲܡ ܓܲܒ̣ܪܹ̈ܐ ܕܝܵܗ̄ܒ̇ܝܼܢ ܠܗܘܿܢ ܟܸܣܦܵܐ ܕܢܸܬ̇ܠܘܼܢ ܠܥܵܒ̣ܕܲܝ̈ ܥܒ̣ܵܕ݂ܵܐ: ܡܸܛܠ ܕܲܒ̣ܗܲܝܡܵܢܘܼܬ̣ܵܐ ܝܵܗ̄ܒ̇ܝܼܢ ܟܸܣܦܵܐ ܕܲܒ̣ܕ݂ܵܩܵܐ.

¹⁶ ܘܟܸܣܦܵܐ ܕܩܘܼܪܒܵܢܵܐ ܘܟܸܣܦܵܐ ܕܲܚܠܵܦ ܚܛܵܗܹ̈ܐ: ܠܵܐ ܥܵܐܹ̇ܠ ܠܒܲܝܬܹ̇ܗ ܕܡܵܪܝܵܐ: ܐܸܠܵܐ ܠܟ݂ܵܗ̈ܢܹܐ ܗܵܘܹ̇ܐ.

¹⁷ ܗܵܝܕܹ̇ܝܢ ܣܠܸܩ ܚܙܵܐܹܝܠ ܡܲܠܟܵܐ ܕܐܲܕ݂ܘܿܡ: ܘܐܸܬ̣ܟܲܬܲܫ ܥܲܡ ܓܵܬ̣ ܘܟܲܒ̣ܫܵܗ̇. ܘܣܵܡ̣ ܚܙܵܐܹܝܠ ܐܲܦܵܘ̈ܗܝ ܠܡܸܣܲܒ̣ ܥܲܠ ܐܘܿܪܸܫܠܸܡ.

¹⁸ ܘܲܢܣܲܒ̣ ܝܘܿܐܵܫ ܡܲܠܟܵܐ ܕܲܝܗܘܼܕ݂ܵܐ: ܟܠܗܘܿܢ ܩܘܼ̈ܕ݂ܫܹܐ ܕܩܲܕܸ̇ܫ̣ ܝܘܿܫܵܦܵܛ: ܘܝܘܿܪܵܡ: ܘܐܹܚܲܙܝܵܐ: ܐܲܒ̣ܵܗܵܘ̈ܗܝ ܡܲܠ̈ܟܹ̇ܐ ܕܲܝܗܘܼܕ݂ܵܐ: ܘܩܘܼܕ݂ܫܵܘ̈ܗܝ: ܘܟ݂ܠܹܗ ܕܲܗܒ̣ܵܐ ܕܐܸܫܬ̇ܟܲܚ ܒܒܹܝܬ̣ ܓܲܙܵܐ ܕܒܲܝܬܹ̇ܗ ܕܡܵܪܝܵܐ: ܘܲܒ̣ܒܹܝܬ̣ ܡܲܠܟܵܐ. ܘܫܲܕܲܪ ܠܲܚܙܵܐܹܝܠ ܡܲܠܟܵܐ ܕܐܲܕ݂ܘܿܡ. ܘܐܸܬ̣ܥܲܠܝܼ ܡ̣ܢ ܐܘܿܪܸܫܠܸܡ.

¹⁹ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܐܵܫ ܘܟܸܠܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ.

²⁰ ܘܩܵܡܘ ܥܲܒ̣ܕܵܘܗܝ ܕܝܘܿܐܵܫ: ܘܲܡܪܲܕ݂ܘ ܡܸܪܕܵܐ. ܘܩܲܛܠܘܼܗܝ ܠܝܘܿܐܵܫ ܒܹܝܬ̣ ܡܲܠܘܿ ܟܲܕ݂ ܢܵܚܹ̇ܬ̣ ܠܲܣܠܲܥ.

²¹ ܝܘܿܙܵܟ݂ܵܪ ܒܲܪ ܫܸܡܥܲܬ̣: ܘܝܘܼܙܒ̣ܵܪ ܒܲܪ ܫܵܡܝܼܪ ܥܲܒ̣ܕܵܘ̈ܗܝ ܡܚܵܐܘܼܗܝ ܘܡܝܼܬ̣. ܘܩܲܒ̣ܪܘܼܗܝ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂ ܘܐܲܡ̣ܠܸܟ݂ ܐܵܡܘܿܨܝܼܵܐ ܒܪܹܗ ܒܵܬ̣ܪܹܗ.

13

¹ ܒܲܫܢܲܬ̣ ܥܸܣܪܝܼܢ ܘܲܬ̣ܠܵܬ̣ ܫܢ̈ܝܼܢ ܠܝܘܿܐܵܫ ܒܲܪ ܐܹܚܲܙܝܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ ܝܵܗܘܿܐܵܚܵܙ ܒܲܪ ܝܵܗܘ̇ ܥܲܠ ܝܼܣܪܵܝܹܠ ܒܫܵܡܪܹܝܢ ܫܒܲܥܸܣܪܹ̈ܐ ܫܢ̈ܝܼܢ.

² ܘܲܥܒܲܕ݂ ܕܒܹܝܫ ܩܕ݂ܵܡ ܡܵܪܝܵܐ: ܘܗܲܠܸܟ݂ ܒܵܬܲܪ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ: ܘܠܵܐ ܣܛ̣ܵܐ ܡܸܢܗܘܿܢ.

³ ܘܐܸܬ̣ܚܲܡܲܬ̣ ܪܘܼܓ̣ܙܹܗ ܕܡܵܪܝܵܐ ܥܲܠ ܝܼܣܪܵܝܹܠ: ܘܐܲܫܠܸܡ ܐܸܢܘܿܢ ܒܐܝܼܕ݂ܵܐ ܕܲܚܙܵܐܹܝܠ ܡܲܠܟܵܐ ܕܐܲܕ݂ܘܿܡ: ܘܒ̣ܐܝܼܕ݂ܵܐ ܕܒܲܪ ܗܕ݂ܵܕ݂ ܒܲܪ ܚܙܵܐܹܝܠ ܟܠܗܘܿܢ ܝܵܘ̈ܡܵܬ̣ܵܐ.

⁴ ܘܨܲܠܝܼ ܝܵܗܘ̇ܐܵܚܵܙ ܩܕ݂ܵܡ ܡܵܪܝܵܐ: ܘܫܲܡ̣ܥܹܗ ܡܵܪܝܵܐ. ܡܸܛܠ ܕܲܚܙܵܐ ܐܘܼܠܨܵܢܹܗ ܕܝܼܣܪܵܝܹܠ: ܕܐܲܠܲܨ ܐܸܢܘܿܢ ܡܲܠܟܵܐ ܕܐܲܕ݂ܘܿܡ.

⁵ ܘܝܲܗ̄ܒ̣ ܡܵܪܝܵܐ ܠܝܼܣܪܵܝܹܠ ܦܵܪܘܿܩܵܐ: ܘܲܢܦܲܩ̣ܘ ܡ̣ܢ ܬܚܹܝܬ̣ ܐܝܼܕ݂ܵܐ ܕܐܲܕ݂ܘܿܡ. ܘܝܸܬ̣ܒ̣ܘ ܒ̈ܢܲܝ ܝܼܣܪܵܝܹܠ ܒܫܸܠܝܵܐ ܒܡܲܫܟ̇ܢܲܝ̈ܗܘܿܢ: ܐܲܝܟ݂ ܕܐܸܬ̣ܡܵܠܝ ܘܐܲܝܟ݂ ܕܲܡܢܵܬ̣ܡܵܠܝ.

⁶ ܒܪܲܡ ܕܹܝܢ ܠܵܐ ܥ̣ܒܲܪܘ ܡ̣ܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ: ܘܲܒ̣ܗܘܿܢ ܗܲܠܸܟ݂ܘ ܘܐܵܦ ܕܸܚܠ̱ܬ̣ܵܐ ܩܵܝ̇ܡܵܐ ܗ̄ܘ̣ܵܬ̣ ܒܫܵܡܪܹܝܢ.

⁷ ܘܠܵܐ ܐܸܫܬ̇ܒܸܩ ܗ̄ܘ̣ܵܐ ܠܹܗ ܠܝܵܗܘ̇ܐܵܚܵܙ ܥܲܡܵܐ: ܐܸܠܵܐ ܐܸܢ ܚܲܡܫܝܼܢ ܦܲܪ̈ܵܫܝܼܢ: ܘܲܥܣܲܪ ܡܲܪ̈ܟ̇ܒ̣ܵܢ: ܘܥܸܣܪܵܐ ܐܲܠܦ̈ܝܼܢ ܪܸ̈ܓ̣ܠܵܝܝܼܢ. ܡܸܛܠ ܕܐܵܘܒܸ̇ܕ݂ ܐܸܢܘܿܢ ܡܲܠܟܵܐ ܕܐܲܕ݂ܘܿܡ: ܘܲܥ̣ܒܲܕ݂ ܐܸܢܘܿܢ ܐܲܝܟ݂ ܥܲܦܪܵܐ ܠܲܡܕ݂ܵܫ.

⁸ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܵܗܘܿܐܵܚܵܙ: ܘܟ݂ܠܡܸܕܸ̇ܡ ܕܲܥ̣ܒܲܕ݂: ܘܓܲܢ̄ܒܵܪܘܼܬܹܗ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ.

⁹ ܘܲܫܟܸܒ̣ ܝܵܗܘܿܐܵܚܵܙ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܒܫܵܡܪܹܝܢ ܘܐܲܡ̣ܠܸܟ݂ ܝܵܗܘܿܐܵܫ ܒܪܹܗ ܒܵܬ̣ܪܹܗ.

¹⁰ ܒܲܫܢܲܬ̣ ܬܠܵܬ̣ܝܼܢ ܘܲܫܒܲܥ ܫܢ̈ܝܼܢ ܠܝܘܿܐܵܫ ܡܲܠܟܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ ܝܵܗܘܿܐܵܫ ܒܲܪ ܝܵܗܘܿܐܵܚܵܙ ܒܲܪ ܝܵܗܘܿ ܥܲܠ ܝܼܣܪܵܝܹܠ: ܒܫܵܡܪܹܝܢ ܬܠܵܬܲܥܸܣܪܹ̈ܐ ܫܢ̈ܝܼܢ.

¹¹ ܘܲܥ̣ܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܠܵܐ ܣܛ̣ܵܐ ܡ̣ܢ ܟܠܗܘܿܢ ܚܛܵܗܵܘ̈ܗܝ. ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ: ܐܸܠܵܐ ܒܗܘܿܢ ܗܲܠܸܟ݂.

¹² ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܵܗܘܿܐܵܫ ܘܟ݂ܠܡܸܕܸ̇ܡ ܕܲܥܒܲܕ݂: ܘܓܲܢ̄ܒܵܪܘܼܬܹܗ: ܘܕܸܐܬ̣ܟܲܬܲܫ ܥܲܡ ܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ.

¹³ ܘܲܫܟܸܒ̣ ܝܵܗܘܿܐܵܫ ܥܲܡ ܐܲܒ̣ܵܗܵܘ̈ܗܝ. ܘܝܘܿܪܲܒ̣ܥܲܡ ܒܪܹܗ ܝܼܬܸܒ̣ ܥܲܠ ܟܘܼܪܣܝܹܗ ܘܐܸܬ̣ܩܒܲܪ ܝܵܗܘܿܐܵܫ ܒܫܵܡܪܹܝܢ ܥܲܡ ܡܲܠ̈ܟܹ̇ܐ ܝܼܣܪܵܝܹܠ.

¹⁴ ܘܐܹܠܝܼܫܲܥ ܐܸܬ̣ܟ̇ܪܲܗ ܟܘܼܪܗܵܢܵܐ ܕܡܵܐܹ̇ܬ̣ ܒܹܗ. ܘܲܢܚܸܬ̣ ܠܘܵܬܹܗ ܝܵܗܘܿܐܵܫ ܡܲܠܟܵܐ ܕܝܼܣܪܵܝܹܠ: ܘܲܒ̣ܟ݂ܵܐ ܥܲܠ ܐܲܦܵܘ̈ܗܝ ܘܐܸܡܲܪ: ܐܵܒ̣ܝ: ܐܵܒ̣ܝ: ܡܲܪ̈ܟ̇ܒ̣ܵܬܹܗ ܕܝܼܣܪܵܝܹܠ ܘܦܲܪ̈ܵܫܵܘܗܝ.

¹⁵ ܘܐܸܡܲܪ ܠܹܗ ܐܹܠܝܼܫܲܥ: ܣܲܒ̣ ܩܸܫܬܵܐ ܘܓܹܐܪܹ̈ܐ. ܘܲܢܣܲܒ̣ ܩܸܫܬܵܐ ܘܓܹܐܪܹ̈ܐ.

¹⁶ ܘܐܸܡܲܪ ܠܡܲܠܟܵܐ ܕܝܼܣܪܵܝܹܠ: ܐܲܪܟܸ̇ܒ̣ ܐܝܼܕ݂ܵܟ݂ ܥܲܠ ܩܸܫܬܵܐ. ܘܐܲܪܟܸ̇ܒ̣ ܐܝܼܕܹܗ. ܘܣܵܡ̣ ܐܹܠܝܼܫܲܥ ܐܝܼܕ݂ܵܘ̈ܗܝ ܥܲܠ ܐܝܼܕ݂ܵܘ̈ܗܝ ܕܡܲܠܟܵܐ.

¹⁷ ܘܐܸܡܲܪ: ܦܬܲܚ ܟܵܘܬ̣ܵܐ ܠܡܲܕ݂ܢ̱ܚܵܐ ܘܲܦܬܲܚ. ܘܐܸܡܲܪ ܠܹܗ ܐܹܠܝܼܫܲܥ: ܫܕ݂ܝܼ. ܘܲܫܕ݂ܵܐ ܓܹܐܪܵܐ ܘܐܸܡܲܪ: ܓܹܐܪܵܐ ܕܦܘܼܪܩܵܢܵܐ ܠܡܵܪܝܵܐ: ܘܓܹܐܪܵܐ ܕܦܘܼܪܩܵܢܵܐ ܒܐܲܕ݂ܘܿܡ: ܘܬܸܡܚܸܐ ܠܐܲܕ݂ܘܿܡܵـ̈ـܝܹܐ ܒܐܵܦܵܩ ܥܕܲܡܵܐ ܕܲܬ̣ܓܲܡܲܪ ܐܸܢܘܿܢ.

¹⁸ ܘܐܸܡܲܪ ܠܹܗ: ܣܲܒ̣ ܓܹܐܪܵܐ. ܘܲܢܣܲܒ̣. ܘܐܸܡܲܪ: ܡܚܝܼ ܒܐܲܪܥܵܐ. ܘܲܡܚ̣ܵܐ ܬܠܵܬ̣ ܙܲܒ̣ܢ̈ܝܼܢ: ܘܩܵܡ̣.

¹⁹ ܘܲܪܓܸܙ ܥܠܵܘܗܝ ܢܒ̣ܝܹܗ ܕܐܲܠܵܗܵܐ: ܘܐܸܡܲܪ: ܠܡܸܡܚܵܐ ܚܲܡܸܫ ܐܵܘ ܫܸܬ̣ ܙܲܒ̣ܢ̈ܝܼܢ: ܘܗܵܝܕܹ̇ܝܢ ܬܸܡܚܸܐ ܠܐܲܕ݂ܘܿܡܵܝܹ̈ܐ ܥܕܲܡܵܐ ܕܲܬ̣ܓܲܡܲܪ ܐܸܢܘܿܢ. ܡܟܢ ܗܵܫܵܐ ܬܠܵܬ̣ ܙܲܒ̣ܢ̈ܝܼܢ ܬܸܡܚܹܐ ܠܐܲܕ݂ܘܿܡ.

²⁰ ܘܡܝܼܬ̣ ܐܹܠܝܼܫܲܥ ܘܩܲܒ̣ܪܘܼܗܝ: ܘܓܲܝܵܣܹܐ ܕܡܘܼܐܵܒ̣ ܐܸܬ̣ܵܘ ܥܲܠ ܐܲܪܥܵܐ ܒܵܗ̇ ܒܫܲܢ̄ܬܵܐ ܗܵܝ̇.

²¹ ܘܟܲܕ݂ ܗܸܢܘܿܢ ܩܵܒ̣ܪܝܼܢ ܓܲܒ̣ܪܵܐ: ܚܙܵܘ ܓܲܝܵܣܹ̈ܐ: ܘܐܲܪܡܝܼܘܼܗܝ ܠܓܲܒ̣ܪܵܐ ܒܩܲܒ̣ܪܹܗ ܕܐܹܠܝܼܫܲܥ. ܘܐܸܙܲܠ ܓܲܒ̣ܪܵܐ ܘܲܩܪܸܒ̣ ܠܓܲܪ̈ܡܵܘܗܝ ܕܐܹܠܝܼܫܲܥ: ܘܲܚܝܵܐ ܘܩܵܡ ܥܲܠ ܪܸ̈ܓ̣ܠܵܘܗܝ.

²² ܘܲܚܙܵܐܹܝܠ ܡܲܠܟܵܐ ܕܐܲܕ݂ܘܿܡ ܐܲܠܲܨ ܠܝܼܣܪܵܝܹܠ: ܟܠܗܘܿܢ ܝܵܘܡܵܘ̈ܗܝ ܕܝܵܗܘܿܐܵܚܵܙ.

²³ ܘܚܲܢ ܐܸܢܘܿܢ ܡܵܪܝܵܐ: ܘܪܲܚܸܡ ܥܠܲܝܗܘܿܢ: ܘܐܸܬ̣ܦܢܝܼ ܥܠܲܝܗܘܿܢ. ܡܸܛܠ ܩܝܵܡܹܗ ܕܥܲܡ ܐܲܒ̣ܪܵܗܵܡ: ܘܥܲܡ ܐܝܼܣܚܵܩ: ܘܥܲܡ ܝܲܥܩܘܿܒ̣. ܘܠܵܐ ܨܒ̣ܵܐ ܡܵܪܝܵܐ ܕܲܢܚܲܒܸ̇ܠ ܐܸܢܘܿܢ: ܘܠܵܐ ܫ̣ܕ݂ܵܐ ܐܸܢܘܿܢ ܡ̣ܢ ܩܕ݂ܵܡܵܘܗܝ ܥܕܲܡܵܐ ܠܗܵܝܕܹ̇ܝܢ.

²⁴ ܘܡ̣ܝܼܬ̣ ܚܙܵܐܹܝܠ ܡܲܠܟܵܐ ܕܐܲܕ݂ܘܿܡ. ܘܐܲܡ̣ܠܸܟ݂ ܒܲܪ ܗܕ݂ܵܕ݂ ܒܪܹܗ ܒܵܬ̣ܪܹܗ.

²⁵ ܘܲܗܦܲܟ݂ ܝܵܗܘܿܐܵܫ ܒܲܪ ܝܵܗܘܿܐܵܚܵܙ: ܘܲܢܣܲܒ̣ ܩܘܼܪ̈ܝܵܐ ܡ̣ܢ ܒܲܪ ܗܕ݂ܵܕ݂ ܒܲܪ ܚܙܵܐܹܝܠ: ܕܲܢܣܲܒ̣ ܡ̣ܢ ܝܵܗܘܿܐܵܚܵܙ ܐܲܒ̣ܘܼܗܝ ܒܲܩܪܵܒ̣ܵܐ. ܬܠܵܬ̣ ܫܢ̈ܝܼܢ ܡܚܵܝܗܝ ܝܵܗܘܿܐܵܫ: ܘܐܲܗܦܲܟ݂ ܐܸܢܹܝܢ ܩܘܼܪ̈ܝܵܐ ܠܝܼܣܪܵܝܹܠ.

14

¹ ܒܲܫܢܲܬ̣ ܬܲܪܬܹ̇ܝܢ ܠܝܵܗܘܿܐܵܫ ܒܲܪ ܝܵܗܘܿܐܵܚܵܙ ܡܲܠܟܵܐ ܕܝܼܣܪܵܝܹܠ: ܐܲܡ̣ܠܸܟ݂ ܐܵܡܘܿܨܝܼܵܐ ܒܲܪ ܝܘܿܐܵܫ ܡܲܠܟܵܐ ܕܲܝܗܘܼܕ݂ܵܐ.

² ܒܲܪ ܥܸܣܪܝܼܢ ܗ̄ܘ̣ܵܐ ܘܚܲܡܸܫ ܫܢ̈ܝܼܢ ܟܲܕ݂ ܐܲܡ̣ܠܸܟ݂. ܘܥܸܣܪܝܼܢ ܘܲܬ̣ܫܲܥ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ. ܘܲܫܡܵܗ̇ ܕܐܸܡܹܗ: ܝܵܗܘܿܥܲܕܵܢ ܡ̣ܢ ܐܘܿܪܸܫܠܸܡ.

³ ܘܲܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܒܘܼܡ ܠܵܐ ܐܲܝܟ݂ ܕܵܘܝܼܕ݂ ܐܲܒ̣ܘܼܗܝ. ܐܲܝܟ݂ ܕܲܥܒܲܕ݂ ܝܘܿܐܵܫ ܐܲܒ̣ܘܼܗܝ ܥ̣ܒܲܕ݂.

⁴ ܒܪܲܡ ܥ̈ܠܵܘܵܬ̣ܵܐ ܠܵܐ ܐܲܥ̣ܒܲܪ: ܘܲܥܕܲܟܹ̇ܝܠ ܥܲܡܵܐ ܡܕܲܒ̇ܚܝܼܢ ܗ̄ܘ̣ܵܘ ܘܡܲܥܛܪܝܼܢ ܥܲܠ ܥ̈ܠܵܘܵܬ̣ܵܐ.

⁵ ܘܟܲܕ݂ ܐܸܬ̣ܚܲܝܠܲܬ̤ ܡܲܠܟ̇ܘܼܬ̣ܵܐ ܒܐܝܼܕܹܗ: ܩܲܛܸܠ̣ ܠܥܲܒ̣ܕܵܘ̈ܗܝ ܕܲܩܛܲܠܘ ܠܝܘܿܐܵܫ ܡܲܠܟܵܐ ܐܲܒ̣ܘܼܗܝ.

⁶ ܘܠܲܒ̣ܢܲܝ̈ ܩܵܛܘܿܠܹ̈ܐ ܠܵܐ ܩܲܛܸܠ: ܐܲܝܟ݂ ܕܲܟ݂ܬ̣ܝܼܒ̣ ܒܣܸܦܪܵܐ ܕܢܵܡܘܿܣܹܗ ܕܡܘܼܫܹܐ: ܕܦܲܩܸܕ݂ ܡܵܪܝܵܐ ܘܐܸܡܲܪ: ܠܵܐ ܢܡܘܼܬ̣ܘܼܢ ܐܲܒ̣ܵܗܹ̈ܐ ܥܲܠ ܐܲܦܲܝ̈ ܒܢܲـ̈ـܝܵܐ: ܘܲܒ̣ܢܲـ̈ـܝܵܐ ܠܵܐ ܢܡܘܼܬ̣ܘܼܢ ܥܲܠ ܐܲܦܲܝ̈ ܐܲܒ̣ܵܗܲܝ̈ܗܘܿܢ: ܐܸܠܵܐ ܐ̄ܢܵܫ ܒܲܚܛܵܗܵܘ̈ܗܝ ܢܡܘܼܬ̣.

⁷ ܘܗ̤ܘ ܚ̣ܪܲܒ̣ ܠܐܲܕ݂ܘܿܡ ܒܓܲܡܠܲܚ ܥܸܣܪܝܼܢ ܐܲܠܦ̈ܝܼܢ. ܘܲܚܪܲܒ̣ ܠܲܣܠܲܥ ܒܲܩܪܵܒ̣ܵܐ: ܘܲܩ̣ܪܵܐ ܫܡܵܗ̇ ܢܲܩܬ̣ܵܐܹܝܠ ܥܕܲܡܵܐ ܠܝܵܘܡܵܢܵܐ.

⁸ ܗܵܝܕܹ̇ܝܢ ܫܲܕܲܪ ܐܵܡܘܿܨܝܼܵܐ ܕܲܝܗܘܼܕ݂ܵܐ ܐܝܼܙ̈ܓܲܕܹ̇ܐ: ܠܘܵܬ̣ ܝܵܗܘܿܐܵܫ ܒܲܪ ܝܵܗܘܿܐܵܚܵܙ ܒܲܪ ܝܵܗܘܿ ܡܲܠܟܵܐ ܕܝܼܣܪܵܝܹܠ: ܘܐܸܡܲܪ: ܬܵܐ ܢܲܩܒܸ̇ܠ ܐܲܦܹ̈ܐ ܚܲܕ݂ ܕܚܲܕ݂.

⁹ ܘܲܫܠܲܚ ܝܵܗܘܿܐܵܫ ܡܲܠܟܵܐ ܕܝܼܣܪܵܝܹܠ ܠܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܘܐܸܡܲܪ: ܚܘܿܚܵܐ ܕܲܒ̣ܠܸܒ̣ܢܵܢ ܫ̣ܠܲܚ ܠܐܲܪܙܵܐ ܕܲܒ̣ܠܸܒ̣ܢܵܢ: ܗܲܒ̣ ܒܲܪܬ̣ܵܟ݂ ܠܒܹܪܝ ܐܲܢ̄ܬ̇ܬ̣ܵܐ. ܘܥܸܒ̣ܪܲܬ̤ ܚܲܝ̄ܘܬ̣ܵܐ ܕܲܒ̣ܠܸܒ̣ܢܵܢ: ܘܕܵܫܬܹܗ ܠܚܘܿܚܵܐ.

¹⁰ ܡܸܚܪܲܒ̣ ܚܪܲܒ̣ܬ̇ ܠܐܲܕ݂ܘܿܡ: ܘܐܲܪܝܼܡܵܟ݂ ܠܸܒܵܟ݂. ܐܸܬ̣ܝܲܩܲܪ ܘܬܸܒ̣ ܒܒܲܝܬܵܟ݂: ܘܠܵܐ ܬܸܬ̣ܓܲܪܸܐ ܠܒ̣ܝܼܫܬܵܐ: ܘܬܸܦܸܠ ܐܲܢ̄ܬ̇ ܘܲܝܗܘܼܕ݂ܵܐ ܥܲܡܵܟ݂.

¹¹ ܘܠܵܐ ܫܲܡ̣ܥܹܗ ܐܵܡܘܿܨܝܼܵܐ. ܘܲܣܠܸܩ ܝܵܗܘܿܐܵܫ ܡܲܠܟܵܐ ܕܝܼܣܪܵܝܹܠ ܘܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܘܐܲܩܒܸ̇ܠܘ ܐܲܦܹ̈ܐ ܕܲܚܕ݂ܵܕܹ̈ܐ ܒܒܹܝܬ̣ ܫܡܸܫ ܕܲܝܗܘܼܕ݂ܵܐ: ܗ̤ܘ ܘܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ.

¹² ܘܐܸܬ̇ܬ̇ܒܲܪ ܝܼܗܘܼܕ݂ܵܐ ܡ̣ܢ ܩܕ݂ܵܡ ܝܼܣܪܵܝܹܠ: ܘܲܥܪܲܩ̣ܘ ܐ̄ܢܵܫ ܠܡܲܫܟ̇ܢܹܗ.

¹³ ܘܠܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܚܕܹ̇ܗ ܝܵܗܘܿܐܵܫ ܡܲܠܟܵܐ ܕܝܼܣܪܵܝܹܠ ܒܒܹܝܬ̣ ܫܡܸܫ: ܘܥܲܠ̣ ܠܐܘܿܪܸܫܠܸܡ ܘܲܬ̣ܪܲܥ̣ ܒܫܘܼܪܵܐ ܕܐܘܿܪܸܫܠܸܡ ܡ̣ܢ ܬܲܪܥܵܐ ܕܐܲܦܪܹܝܡ ܘܲܥܕܲܡܵܐ ܠܬܲܪܥܵܐ ܕܙܵܘܝܼܬ̣ܵܐ: ܐܲܪܒܲܥܡܵܐܐ ܐܲܡ̈ܝܼܢ.

¹⁴ ܘܲܢܣܲܒ̣ ܟܠܹܗ ܕܲܗܒ̣ܵܐ ܘܟܸܣܦܵܐ: ܘܟ݂ܠܗܘܿܢ ܡܵܐܢܹ̈ܐ ܕܐܸܫܬ̇ܟܲܚܘ ܒܒܲܝܬܹ̇ܗ ܕܡܵܪܝܵܐ ܘܲܒ̣ܒܹܝܬ̣ ܓܲܙܵܐ ܕܡܲܠܟܵܐ: ܘܲܒ̣ܢܲܝ̈ ܥܪܘܿܒ̣ܵܐ. ܘܲܗܦܲܟ݂ ܠܫܵܡܪܹܝܢ.

¹⁵ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܵܗܘܿܐܵܫ ܘܟ݂ܠܡܸܕܸ̇ܡ ܕܲܥܒܲܕ݂ ܘܓܲܢ̄ܒܵܪܘܼܬܹܗ: ܘܕܸܐܬ̣ܟܲܬܲܫ ܥܲܡ ܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ.

¹⁶ ܘܲܫܟܸܒ̣ ܝܵܗܘܿܐܵܫ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܒܫܵܡܪܹܝܢ ܥܲܡ ܡܲܠ̈ܟܹ̇ܐ ܕܝܼܣܪܵܝܹܠ. ܘܐܲܡ̣ܠܸܟ݂ ܝܘܿܪܲܒ̣ܥܲܡ ܒܪܹܗ ܒܵܬ̣ܪܹܗ.

¹⁷ ܘܲܚܝܵܐ ܐܵܡܘܿܨܝܼܵܐ ܒܲܪ ܝܘܿܐܵܫ ܡܲܠܟܵܐ ܕܲܝܗܘܼܕ݂ܵܐ: ܡ̣ܢ ܒܵܬܲܪ ܕܡܝܼܬ̣ ܝܵܗܘܿܐܵܫ ܒܲܪ ܝܵܗܘܿܐܵܚܵܙ ܡܲܠܟܵܐ ܕܝܼܣܪܵܝܹܠ: ܚܲܡܫܲܥܸܣܪܹ̈ܐ ܫܢ̈ܝܼܢ.

¹⁸ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܐܵܡܘܿܨܝܼܵܐ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ.

¹⁹ ܘܲܡܪܲܕ݂ ܥܠܵܘܗܝ ܡܸܪܕܵܐ ܒܐܘܿܪܸܫܠܸܡ: ܘܲܥܪܲܩ ܠܹܗ ܠܲܠܟ݂ܝܼܫ ܘܫܲܕܲܪܘ ܒܵܬ̣ܪܹܗ ܠܲܠܟ݂ܝܼܫ: ܘܩܲܛܠܘܼܗܝ ܬܲܡܵܢ.

²⁰ ܘܫܲܩܠܘܼܗܝ ܘܐܸܬ̣ܵܘ ܥܲܠ ܪ̈ܲܟ݂ܫܵܐ. ܘܐܸܬ̣ܩܒܲܪ ܒܐܘܿܪܸܫܠܸܡ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂.

²¹ ܘܲܕ݂ܒܲܪܘ ܟܠܹܗ ܥܲܡܵܐ ܕܲܝܗܘܼܕ݂ܵܐ ܠܥܘܿܙܝܼܵܐ: ܘܗ̤ܘ ܒܲܪ ܫܸܬ̇ܬܲܥܸܣܪܹ̈ܐ ܗ̄ܘ̣ܵܐ ܫܢ̈ܝܼܢ. ܘܐܲܡ̣ܠ̱ܟ݂ܘܼܗܝ ܚܠܵܦ ܐܵܡܘܿܨܝܼܵܐ ܐܲܒ̣ܘܼܗܝ.

²² ܘܗ̤ܘ ܒܢ̣ܵܐ ܠܐܲܝܠܲܬ̣: ܘܐܵܘܬ̇ܒ̣ܵܗ̇ ܠܲܝܗܘܼܕ݂ܵܐ: ܡ̣ܢ ܒܵܬܲܪ ܕܲܫܟܸܒ̣ ܡܲܠܟܵܐ ܥܲܡ ܐܲܒ̣ܵܗܵܘ̈ܗܝ.

²³ ܒܲܫܢܲܬ̣ ܚܲܡܫܲܥܸܣܪܹ̈ܐ ܠܐܵܡܘܿܨܝܼܵܐ ܒܲܪ ܝܘܿܐܵܫ ܡܲܠܟܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ ܝܘܿܪܲܒ̣ܥܲܡ ܒܲܪ ܝܵܗܘܿܐܵܫ ܒܲܪ ܝܵܗܘܿܐܵܚܵܙ ܡܲܠܟܵܐ ܕܝܼܣܪܵܝܹܠ: ܒܫܵܡܪܹܝܢ ܐܲܪܒ̇ܥܝܼܢ ܘܲܚܕ݂ܵܐ ܫܢ̈ܝܼܢ.

²⁴ ܘܲܥ̣ܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܠܵܐ ܣܛ̣ܵܐ ܡ̣ܢ ܟܠܗܘܿܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ: ܘܲܒ̣ܗܘܿܢ ܗܲܠܸܟ݂.

²⁵ ܘܗ̤ܘ ܐܲܗ̣ܦܲܟ݂ ܬܚܘܼܡܵܐ ܠܝܼܣܪܵܝܹܠ: ܡ̣ܢ ܡܲܥܠܵܢܵܐ ܕܲܚܡܵܬ̣: ܘܲܥܕܲܡܵܐ ܠܝܲܡܵܐ ܕܥܲܪܵܒ̣ܵܐ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܡܲܠܸܠ ܒܐܝܼܕ݂ܵܐ ܕܥܲܒ̣ܕܹ̇ܗ ܝܵܘܢܵܢ ܒܲܪ ܡܲܬܲܝ ܢܒ̣ܝܼܵܐ ܕܡ̣ܢ ܓܲܕ݂ ܚܦܲܪ.

²⁶ ܡܸܛܠ ܕܲܚܙܵܐ ܡܵܪܝܵܐ ܫܘܼܥܒܵܕܹܗ ܕܝܼܣܪܵܝܹܠ ܕܡܲܪܝܼܪ ܛܵܒ̣. ܘܠܲܝܬ̇ ܕܐܵܣܲܪ: ܘܠܵܐ ܕܫܵܪܹܐ: ܘܐܵܦܠܵܐ ܕܲܡܥܲܕܲܪ ܠܝܼܣܪܵܝܹܠ.

²⁷ ܘܠܵܐ ܐܸܡܲܪ ܡܵܪܝܵܐ ܠܡܸܥܛܵܐ ܫܡܹܗ ܕܝܼܣܪܵܝܹܠ ܡ̣ܢ ܬܚܹܝܬ̣ ܫܡܲܝܵܐ. ܘܲܦܪܲܩ̣ ܐܸܢܘܿܢ ܒܐܝܼܕܹܗ ܕܝܘܿܪܲܒ̣ܥܲܡ ܒܲܪ ܝܵܗܘܿܐܵܫ ܒܲܪ ܝܵܗܘܿܐܵܚܵܙ.

²⁸ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܪܲܒ̣ܥܲܡ ܘܟ݂ܠܡܸܕܸ̇ܡ ܕܲܥܒܲܕ݂: ܘܓܲܢ̄ܒܵܪܘܼܬܹܗ: ܘܕܸܐܬ̣ܟܲܬܲܫ ܘܐܲܗ̣ܦܸܟ݂ ܕܲܪܡܣܘܿܩ ܘܲܚܡܵܬ̣ ܠܝܼܣܪܵܝܹܠ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ.

²⁹ ܘܲܫܟܸܒ̣ ܝܘܿܪܲܒ̣ܥܲܡ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܥܲܡ ܐܲܒ̣ܵܗܲܘ̈ܗܝ ܥܲܡ ܡܲܠ̈ܟܹ̇ܐ ܕܝܼܣܪܵܝܹܠ ܘܐܲܡ̣ܠܸܟ݂ ܙܟܲܪܝܵܐ ܒܪܹܗ ܒܵܬ̣ܪܹܗ.

15

¹ ܒܲܫܢܲܬ̣ ܥܸܣܪܝܼܢ ܘܲܫܒܲܥ ܫܢ̈ܝܼܢ ܠܝܘܿܪܲܒ̣ܥܲܡ ܡܲܠܟܵܐ ܕܝܼܣܪܵܝܹܠ: ܐܲܡ̣ܠܸܟ݂ ܥܘܿܙܝܼܵܐ ܒܲܪ ܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ.

² ܒܲܪ ܫܸܬ̇ܬܲܥܸܣܪܹ̈ܐ ܗ̄ܘ̣ܵܐ ܫܢ̈ܝܼܢ ܟܲܕ݂ ܐܲܡ̣ܠܸܟ݂: ܘܚܲܡܫܝܼܢ ܘܬܲܪܬܹ̇ܝܢ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ. ܘܲܫܡܵܐ ܕܐܸܡܹܗ ܝܑܼܟܲܢܝܵܐ ܡ̣ܢ ܐܘܿܪܸܫܠܸܡ.

³ ܘܲܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܐܲܝܟ݂ ܐܵܡܘܿܨܝܼܵܐ ܐܲܒ̣ܘܼܗܝ.

⁴ ܒܪܲܡ ܕܹܝܢ ܥ̈ܠܵܘܵܬ̣ܵܐ ܠܵܐ ܐܲܥ̣ܒܲܪ ܘܲܥܕܲܟܹ̇ܝܠ ܥܲܡܵܐ ܡܕܲܒ̇ܚܝܼܢ ܗ̄ܘ̣ܵܘ: ܘܣܵܝ̇ܡܝܼܢ ܒܸܣܡܹ̈ܐ ܥܲܠ ܥܠܵـ̈ـܘܵܬ̣ܵܐ.

⁵ ܘܲܡܚܵܝܗܝ ܡܵܪܝܵܐ ܠܡܲܠܟܵܐ: ܘܲܗܘ̤ܵܐ ܓܲܪܒܵܐ ܥܕܲܡܵܐ ܠܝܵܘܡܵܐ ܕܡܝܼܬ̣. ܘܝܼܬܸܒ̣ ܒܒܲܝܬܵܐ ܡܲܛܫܝܵܐܝܼܬ̣. ܘܝܘܿܬ̣ܵܡ ܒܲܪ ܡܲܠܟܵܐ ܪܲܒ̇ܒܲܝܬܵܐ ܕܵܐܹ̇ܢ ܗ̄ܘ̣ܵܐ ܠܥܲܡܵܐ ܕܐܲܪܥܵܐ.

⁶ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܥܘܿܙܝܼܵܐ: ܘܟ݂ܠܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ.

⁷ ܘܲܫܟܸܒ̣ ܥܘܿܙܝܼܵܐ ܐܲܒ̣ܵܗܵܘ̈ܗܝ: ܘܩܲܒ̣ܪܘܼܗܝ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂. ܘܐܲܡ̣ܠܸܟ݂ ܝܘܿܬ̣ܵܡ ܒܪܹܗ ܒܵܬ̣ܪܹܗ.

⁸ ܒܲܫܢܲܬ̣ ܬܠܵܬ̣ܝܼܢ ܘܲܬ̣ܡܵܢܹܐ ܫܢ̈ܝܼܢ ܠܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ ܙܟܲܪܝܵܐ ܒܲܪ ܝܘܿܪܲܒ̣ܥܲܡ ܥܲܠ ܝܼܣܪܵܝܹܠ: ܒܫܵܡܪܹܝܢ ܫܬܵܐ ܝܲܪ̈ܚܝܼܢ.

⁹ ܘܲܥ̣ܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ ܐܲܒ̣ܘܼܗܝ. ܘܠܵܐ ܣܛ̣ܵܐ ܡ̣ܢ ܟܠܗܘܿܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܕܐܲܚܛܝܼ ܠܝܼܣܪܵܝܹܠ.

¹⁰ ܘܲܡܪܲܕ ܥܠܵܘܗܝ ܫܵܠܘܿܡ ܒܲܪ ܝܵܒ̣ܝܼܫ. ܘܲܡܚܵܝܗܝ ܠܘܼܩܒܲܠ ܥܲܡܵܐ: ܘܩܲܛܠܹܗ. ܘܐܲܡ̣ܠܸܟ݂ ܒܵܬ̣ܪܹܗ.

¹¹ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܲܙܟܲܪܝܵܐ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ.

¹² ܘܫܸܠܡܲܬ̤ ܡܸܠܬܹܗ ܕܡܵܪܝܵܐ ܕܐܸܡܲܪ ܠܝܵܗܘܿ: ܕܲܒ̣ـ̈ـܢܲܝܵܐ ܪ̈ܒ̣ܝܼܥܵܝܹܐ ܢܸܬ̇ܒ̣ܘܼܢ ܠܵܟ݂ ܥܲܠ ܟܘܼܪܣܝܵܐ ܕܝܼܣܪܵܝܹܠ. ܘܲܗܘ̤ܵܐ ܗܵܟܲܢܵܐ.

¹³ ܘܫܵܠܘܿܡ ܒܲܪ ܝܵܒ̣ܝܼܫ ܐܲܡ̣ܠܸܟ݂: ܒܲܫܢܲܬ̣ ܬܠܵܬ̣ܝܼܢ ܘܲܬ̣ܫܲܥ ܫܢ̈ܝܼܢ ܠܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ. ܘܐܲܡ̣ܠܸܟ݂ ܝܼܪܲܚ ܝܵܘ̈ܡܝܼܢ ܒܫܵܡܪܹܝܢ.

¹⁴ ܘܲܣܠܸܩ ܡܲܚܢܝܼܡ ܒܲܪ ܓܲܕ̇ܝܼ ܡ̣ܢ ܬܲܪܨܵܐ ܘܥܲܠ̣ ܠܫܵܡܪܹܝܢ: ܘܲܡܚܵܝܗܝ ܠܫܵܠܘܿܡ ܒܲܪ ܝܵܒ̣ܝܼܫ ܒܫܵܡܪܹܝܢ. ܘܩܲܛܠܹܗ: ܘܐܲܡܠܸܟ݂ ܒܵܬ̣ܪܹܗ.

¹⁵ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܫܵܠܘܿܡ. ܘܡܸܪܕܵܐ ܕܲܡܪܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ.

¹⁶ ܗܵܝܕܹ̇ܝܢ ܡ̣ܚܵܐ ܡܲܚܢܝܼܡ ܠܬܲܦ̮ܣܲܚ ܘܲܠܟ݂ܠ ܕܐܝܼܬ̣ ܒܵܗ̇: ܘܠܲܬ̣ܚܘܼܡܹ̈ܝܗ̇ ܡ̣ܢ ܬܲܪܨܵܐ: ܥܲܠ ܕܠܵܐ ܦܬܲܚܘ ܠܹܗ ܬܲܪܥܵܐ. ܘܚܲܪܒܵܗ̇. ܘܲܠܟ݂ܠܗܹܝܢ ܒܲܛ̈ܢܵܬ̣ܵܗ̇ ܦܲܪܸܬ̣.

¹⁷ ܒܲܫܢܲܬ̣ ܬܠܵܬ̣ܝܼܢ ܘܲܬ̣ܫܲܥ ܫܢ̈ܝܼܢ ܠܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܐܸܡܠܸܟ݂ ܡܚܲܢܝܼܡ ܒܲܪ ܓܲܕ̇ܝܼ ܥܲܠ ܝܼܣܪܵܝܹܠ: ܒܫܵܡܪܹܝܢ: ܥܣܲܪ ܫܢ̈ܝܼܢ.

¹⁸ ܘܲܥ̣ܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܠܵܐ ܣ̣ܛܵܐ ܡ̣ܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ: ܟܠܗܘܿܢ ܝܵܘܡܵܘ̈ܗܝ.

¹⁹ ܘܐܸܬ̣ܵܐ ܦܘܿܠ ܡܲܠܟܵܐ ܕܐܵܬ̣ܘܿܪ ܥܲܠ ܐܲܪܥܵܐ. ܘܝܲܗ̄ܒ̣ ܡܲܚܢܝܼܡ ܠܦܘܿܠ: ܐܵܠܹܦ ܟܲܟ̇ܪ̈ܝܼܢ ܕܟܸܣܦܵܐ. ܕܬܸܗܘܹܐ ܐܝܼܕܹܗ ܥܲܡܹܗ: ܘܢܹܐܚܘܿܕ݂ ܡܲܠܟ̇ܘܼܬ̣ܵܐ ܒܐܝܼܕܹܗ.

²⁰ ܘܐܲܪܡܝܼ ܡܲܚܢܝܼܡ ܥܲܠ ܝܼܣܪܵܝܹܠ: ܟܸܣܦܵܐ ܥܲܠ ܟܠܗܘܿܢ ܥܲܬ̇ܝܼܪܹ̈ܐ ܕܐܲܪܥܵܐ: ܕܢܸܬܸ̇ܠ ܠܡܲܠܟܵܐ ܕܐܵܬ̣ܘܿܪ: ܚܲܡܫܝܼܢ ܡܲܬ̣ܩܵـ̈ـܠܝܼܢ ܕܟܸܣܦܵܐ ܥܲܠ ܓܲܒ̣ܪܵܐ ܚܲܕ݂. ܘܲܗܦܲܟ݂ ܡܲܠܟܵܐ ܕܐܵܬ̣ܘܿܪ: ܘܠܵܐ ܩܵܡ̣ ܬܲܡܵܢ ܒܐܲܪܥܵܐ.

²¹ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܡܲܚܢܝܼܡ: ܘܟܸܠܡܸܕܸ̇ܡ ܕܲܥܒܲܕ݂: ܗܵܐ ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ.

²² ܘܲܫܟܸܒ̣ ܡܲܚܢܝܼܡ ܥܲܡ ܐܲܒ̣ܵܗܵܘ̈ܗܝ ܘܐܲܡ̣ܠܸܟ݂ ܦܩܲܚܝܵܐ ܒܪܹܗ ܒܵܬ̣ܪܹܗ.

²³ ܒܲܫܢܲܬ̣ ܚܲܡܫܝܼܢ ܠܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ ܦܩܲܚܝܵܐ ܒܲܪ ܡܲܚܢܝܼܡ ܥܲܠ ܝܼܣܪܵܝܹܠ: ܒܫܵܡܪܹܝܢ ܬܲܪܬܹ̇ܝܢ ܫܢ̈ܝܼܢ.

²⁴ ܘܲܥ̣ܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ. ܘܠܵܐ ܣܛܵܐ ܡ̣ܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ.

²⁵ ܘܲܡܪܲܕ݂ ܥܠܵܘܗܝ ܦܩܲܚ ܒܲܪ ܪܘܿܡܲܠܝܵܐ ܓܲܢ̄ܒܵܪܹܗ: ܘܩܲܛܠܹܗ ܒܫܵܡܪܹܝܢ ܒܣܵܚܲܪܬܵܐ ܕܒܹܝܬ̣ ܡܲܠܟܵܐ. ܘܲܕ݂ܒܲܪ ܠܐܲܪܓ̣ܵܐܘܼܒ̣ ܘܠܲܐܢܝܼ: ܘܥܲܡܹܗ ܚܲܡܫܝܼܢ ܓܲܒ̣ܪ̈ܝܼܢ ܡ̣ܢ ܒܢܲܝ̈ ܓܸܠܥܵܕ݂. ܘܩܲܛܠܹܗ: ܘܐܲܡ̣ܠܸܟ݂ ܒܵܬ̣ܪܹܗ.

²⁶ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܲܦܩܲܚܝܵܐ: ܘܟ݂ܠܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ.

²⁷ ܒܲܫܢܲܬ̣ ܚܲܡܫܝܼܢ ܘܬܲܪܬܹ̇ܝܢ ܫܢ̈ܝܼܢ ܠܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ ܦܩܲܚ ܒܲܪ ܪܘܿܡܲܠܝܵܐ ܥܲܠ ܝܼܣܪܵܝܹܠ: ܒܫܵܡܪܹܝܢ ܥܸܣܪܝܼܢ ܫܢ̈ܝܼܢ.

²⁸ ܘܲܥ̣ܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܠܵܐ ܣܛ̣ܵܐ ܡ̣ܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ.

²⁹ ܘܲܒ̣ܝܵܘܡܵܘ̈ܗܝ ܕܲܦܩܲܚ ܡܲܠܟܵܐ ܕܝܼܣܪܵܝܹܠ: ܐܸܬ̣ܵܐ ܬܲܓ̣ܠܲܬ̣ ܦܲܠܣܲܪ ܡܲܠܟܵܐ ܕܐܵܬ̣ܘܿܪ. ܘܲܕ݂ܒܲܪ ܠܥܝܼܘܿܢ ܘܠܲܐܒܸܠ ܡܚܘܿܠܵܐ: ܘܲܠܟ݂ܠ ܒܹܝܬ̣ ܡܲܥܟܵܐ: ܘܠܲܢܝܵܚ ܘܠܲܩܕܸܫ: ܘܠܚܵܨܘܿܪ: ܘܲܠܓܸܠܥܵܕ݂: ܘܠܲܓܠܝܼܠܵܐ: ܘܲܠܟ݂ܠܵܗ̇ ܐܲܪܥܵܐ ܕܢܲܦ̮ܬܵܠܝܼ. ܘܓܲܠܝܼ ܐܸܢܘܿܢ ܠܐܵܬ̣ܘܿܪ.

³⁰ ܘܲܡܪܲܕ݂ ܡܸܪܕܵܐ ܗܘܿܫܵܥ ܒܲܪ ܐܲܠܵܐ ܥܲܠ ܦܩܲܚ ܒܲܪ ܪܘܿܡܲܠܝܵܐ. ܘܲܡܚܵܝܗܝ: ܘܩܲܛܠܹܗ: ܘܐܲܡ̣ܠܸܟ݂ ܒܵܬ̣ܪܹܗ: ܒܲܫܢܲܬ̣ ܬܲܪܬܹ̇ܝܢ ܠܝܘܿܬ̣ܵܡ ܒܲܪ ܥܘܿܙܝܼܵܐ.

³¹ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܲܦܩܲܚ: ܘܟ݂ܠ ܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ.

³² ܒܲܫܢܲܬ̣ ܬܲܪܬܹ̇ܝܢ ܕܲܦܩܲܚ ܒܲܪ ܪܘܿܡܲܠܝܵܐ ܡܲܠܟܵܐ ܕܝܼܣܪܵܝܹܠ: ܐܲܡ̣ܠܸܟ݂ ܝܘܿܬ̣ܵܡ ܒܲܪ ܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ.

³³ ܒܲܪ ܥܸܣܪܝܼܢ ܗ̄ܘ̣ܵܐ ܘܚܲܡܸܫ ܫܢ̈ܝܼܢ ܟܲܕ݂ ܐܲܡ̣ܠܸܟ݂. ܘܫܸܬ̇ܬܲܥܸܣܪܹ̈ܐ ܫܢ̈ܝܼܢ ܐܲܡܠܸܟ݂ ܒܐܘܿܪܸܫܠܸܡ ܘܲܫܡܵܗ̇ ܕܐܸܡܹܗ ܝܑܼܪܘܿܫܵܐ ܒܲܪܬ̣ ܨܵܕ݂ܘܿܩ.

³⁴ ܘܲܥ̣ܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥ̣ܒܲܕ݂ ܥܘܿܙܝܼܵܐ ܐܲܒ̣ܘܼܗܝ.

³⁵ ܒܪܲܡ ܥܠܵـ̈ـܘܵܬ̣ܵܐ ܠܵܐ ܐܲܥܒܲܪ ܘܲܥܕܲܟܹ̇ܝܠ ܥܲܡܵܐ ܡܕܲܒ̇ܚܝܼܢ ܗ̄ܘ̣ܵܘ: ܘܣܵܝܡܝܼܢ ܗ̄ܘ̣ܵܘ ܒܸܣܡܹ̈ܐ ܥܲܠ ܥܠܵـ̈ـܘܵܬ̣ܵܐ: ܘܗ̤ܘ ܒܢ̣ܵܐ ܬܲܪܥܵܐ ܥܸܠܵܝܵܐ ܕܒܲܝܬܹ̇ܗ ܕܡܵܪܝܵܐ.

³⁶ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܬ̣ܵܡ ܘܟ݂ܠ ܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ.

³⁷ ܒܝܵܘ̈ܡܵܬ̣ܵܐ ܗܵܢܘܿܢ: ܫܲܪܝܼ ܡܵܪܝܵܐ ܠܲܡܓܲܪܵܝܘܼ ܒܲܝܗܘܼܕ݂ܵܐ: ܠܪܵܨܵܢ ܡܲܠܟܵܐ ܕܐܵܪܵܡ: ܘܠܲܦܩܲܚ ܒܲܪ ܪܘܿܡܲܠܝܵܐ ܡܲܠܟܵܐ ܕܝܼܣܪܵܝܹܠ.

³⁸ ܘܲܫܟܸܒ̣ ܝܘܿܬ̣ܵܡ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂: ܘܐܲܡ̣ܠܸܟ݂ ܐܵܚܵܙ ܒܪܹܗ ܒܵܬ̣ܪܹܗ.

16

¹ ܒܲܫܢܲܬ̣ ܬܡܲܢܲܥܸܣܪܹ̈ܐ ܫܢ̈ܝܼܢ ܠܲܦܩܲܚ ܒܲܪ ܪܘܿܡܲܠܝܵܐ ܡܲܠܟܵܐ ܕܝܼܣܪܵܝܹܠ: ܐܲܡ̣ܠܸܟ݂ ܐܵܚܵܙ ܒܲܪ ܝܘܿܬ̣ܵܡ ܡܲܠܟܵܐ ܕܲܝܗܘܼܕ݂ܵܐ.

² ܒܲܪ ܥܸܣܪܝܼܢ ܗ̄ܘ̣ܵܐ ܫܢ̈ܝܼܢ ܐܵܚܵܙ ܟܲܕ݂ ܐܲܡܠܸܟ݂: ܘܫܸܬ̇ܬܲܥܸܣܪܹ̈ܐ ܫܢ̈ܝܼܢ ܐܲܡܠܸܟ݂ ܒܐܘܿܪܸܫܠܸܡ. ܘܠܵܐ ܥ̣ܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ ܐܲܠܵܗܹܗ ܐܲܝܟ݂ ܕܵܘܝܼܕ݂ ܐܲܒ̣ܘܼܗܝ.

³ ܘܗܲܠܸܟ݂ ܒܐܘܼܪܚܵܐ ܕܡܲܠ̈ܟܹ̇ܐ ܕܝܼܣܪܵܝܹܠ. ܐܵܦ ܒܪܹܗ ܐܲܥܒܲܪ ܒܢܘܼܪܵܐ: ܐܲܝܟ݂ ܢܵܡܘܿܣܵܐ ܕܥܲܡܡܹ̈ܐ ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ.

⁴ ܘܕܲܒܲܚ ܘܐܲܥܛܲܪ ܥܲܠ ܥ̈ܠܵܘܵܬ̣ܵܐ ܘܥܲܠ ܪ̈ܵܡܵܬ̣ܵܐ: ܘܲܬ̣ܚܹܝܬ̣ ܟܠ ܐܝܼܠܵܢ ܕܥܲܒ̇ܝܼܛ.

⁵ ܗܵܝܕܹ̇ܝܢ ܣܠܸܩ ܪܵܨܵܢ ܡܲܠܟܵܐ ܕܐܵܪܵܡ: ܘܲܦܩܲܚ ܒܲܪ ܪܘܿܡܲܠܝܵܐ ܡܲܠܟܵܐ ܕܝܼܣܪܵܝܹܠ: ܠܐܘܿܪܸܫܠܸܡ ܠܡܸܬ̣ܟܲܬܵܫܘܼ ܥܲܡܵܗ̇. ܘܠܵܐ ܐܸܫܟܲܚܘ ܕܢܸܬ̣ܟܲܬ̇ܫܘܼܢ ܥܠܹܝܗ.

⁶ ܒܙܲܒ̣ܢܵܐ ܗܵܘ̇: ܐܲܗܦܲܟ݂ ܪܵܨܵܢ ܡܲܠܟܵܐ ܕܐܵܪܵܡ ܠܐܲܝܠܲܬ̣ ܠܐܵܪܵܡ: ܘܐܲܦܸܩ ܠܲܝܗܘܼܕ݂ܵܐ ܡ̣ܢ ܐܲܝܠܲܬ̣. ܘܐܲܪ̈ܡܵܝܹܐ ܐܸܬ̣ܵܘ ܠܐܲܝܠܲܬ̣: ܘܝܼܬܸܒ̣ܘ ܬܲܡܵܢ ܥܕܲܡܵܐ ܠܝܵܘܡܵܢܵܐ.

⁷ ܘܫܲܕܲܪ ܐܵܚܵܙ ܐܝܼܙ̈ܓܲܕܹ̇ܐ ܠܘܵܬ̣ ܬܲܓ̣ܠܲܬ̣ ܦܲܠܣܲܪ ܡܲܠܟܵܐ ܕܐܵܬ̣ܘܿܪ: ܘܐܸܡܲܪ: ܥܲܒ̣ܕܵܟ݂ ܐ̄ܢܵܐ ܘܲܒ̣ܪܵܟ݂: ܣܲܩ ܘܲܦܪܘܿܩܲܝܢܝ ܡ̣ܢ ܐܝܼܕ݂ܵܘ̈ܗܝ ܕܡܲܠܟܵܐ ܕܐܵܪܵܡ: ܘܡ̣ܢ ܐܝܼܕ݂ܵܘܗܝ ܕܡܲܠܟܵܐ ܕܝܼܣܪܵܝܹܠ ܕܩܵܝ̇ܡܝܼܢ ܥܠܲܝ.

⁸ ܘܲܢܣܲܒ̣ ܐܵܚܵܙ ܟܸܣܦܵܐ ܘܕܲܗܒ̣ܵܐ ܕܐܸܫܬ̇ܟܲܚ ܒܒܲܝܬܹ̇ܗ ܕܡܵܪܝܵܐ: ܘܲܒ̣ܒܹܝܬ̣ ܓܲܙܵܐ ܕܡܲܠܟܵܐ. ܘܫܲܕܲܪ ܠܡܲܠܟܵܐ ܕܐܵܬ̣ܘܿܪ ܩܘܼܪܒܵܢܵܐ.

⁹ ܘܫܲܡܥܹܗ ܡܲܠܟܵܐ ܕܐܵܬ̣ܘܿܪ ܘܲܣܠܸܩ ܡܲܠܟܵܐ ܕܐܵܬ̣ܘܿܪ ܥܲܠ ܕܲܪܡܣܘܿܩ ܘܐܲܚܕܵܗ̇ ܘܓܲܠܝܵܗ̇ ܠܩܝܼܪ ܘܲܠܪܵܨܵܢ ܩܛܲܠ.

¹⁰ ܘܐܸܙܲܠ ܡܲܠܟܵܐ ܐܵܚܵܙ ܠܐܘܼܪܥܹܗ ܕܬܲܓ̣ܠܲܬ̣ ܦܲܠܣܲܪ ܡܲܠܟܵܐ ܕܐܵܬ̣ܘܿܪ: ܠܕܲܪܡܣܘܿܩ ܘܲܚܙܵܐ ܡܲܕ݂ܒ̇ܚܵܐ ܕܲܒ̣ܕܲܪܡܣܘܿܩ ܘܫܲܕܲܪ ܡܲܠܟܵܐ ܐܵܚܵܙ ܠܐܘܿܪܝܼܵܐ ܟܵܗܢܵܐ ܕܡܘܼܬܹܗ ܕܡܲܕ݂ܒ̇ܚܵܐ: ܘܒܸܢܝܵܢܹܗ: ܘܟܠܹܗ ܥܒ̣ܵܕܹܗ.

¹¹ ܘܲܥܒܲܕ݂ ܐܘܿܪܝܼܵܐ ܟܵܗܢܵܐ ܡܲܕ݂ܒ̇ܚܵܐ: ܐܲܝܟ݂ ܕܫܲܕܲܪ ܡܲܠܟܵܐ ܐܵܚܵܙ ܡ̣ܢ ܕܲܪܡܘܣܘܿܩ: ܗܵܟܲܢܵܐ ܥ̣ܒܲܕ݂ ܐܘܿܪܝܼܵܐ ܟܵܗܢܵܐ: ܥܲܕ݂ܠܵܐ ܢܹܐܬܹܐ ܐܵܚܵܙ ܡܲܠܟܵܐ ܡ̣ܢ ܕܲܪܡܣܘܿܩ.

¹² ܘܐܸܬ̣ܵܐ ܡܲܠܟܵܐ ܡ̣ܢ ܕܲܪܡܣܘܿܩ. ܘܲܚܙܵܐ ܐܵܚܵܙ ܡܲܠܟܵܐ ܡܲܕ݂ܒ̇ܚܵܐ: ܘܲܩܪܸܒ̣ ܡܲܠܟܵܐ ܠܘܵܬ̣ ܡܲܕ݂ܒ̇ܚܵܐ: ܘܲܣܠܸܩ ܠܥܸܠ ܡܸܢܹܗ.

¹³ ܘܐܲܣܸܩ ܥܠܵܘܗܝ ܥ̈ܠܵܘܵܬ̣ܵܐ ܘܩܘܼܪ̈ܒܵܢܹܐ ܘܢܲܩܝܼ ܢܘܼܩܵܝܹ̈ܐ: ܘܪܲܣ̣ ܕܡܵܐ ܕܫܲܠܡܹ̈ܐ ܕܝܼܠܹܗ ܥܲܠ ܡܲܕ݂ܒ̇ܚܵܐ.

¹⁴ ܘܡܲܕ݂ܒ̇ܚܵܐ ܕܲܢܚܵܫܵܐ ܕܲܩܕ݂ܵܡ ܡܵܪܝܵܐ: ܩܲܪܒܹܗ ܡ̣ܢ ܩܕ݂ܵܡ ܐܲܦܲܝ̈ ܒܲܝܬܵܐ: ܡ̣ܢ ܒܹܝܬ̣ ܡܲܕ݂ܒ̇ܚܵܐ ܘܡ̣ܢ ܒܹܝܬ̣ ܡܵܪܝܵܐ. ܘܣܵܡܹܗ ܥܲܠ ܓܹܢ̄ܒ̣ ܡܲܕ݂ܒ̇ܚܵܐ ܡ̣ܢ ܓܲܪܒ̇ܝܵܐ.

¹⁵ ܘܦܲܩܸܕ݂ ܡܲܠܟܵܐ ܐܵܚܵܙ ܠܐܘܿܪܝܼܵܐ ܟܵܗܢܵܐ: ܘܐܸܡܲܪ ܠܹܗ: ܥܲܠ ܡܲܕ݂ܒ̇ܚܵܐ ܪܲܒܵܐ ܐܲܣܸܩ ܥܠܵܬ̣ܵܐ ܕܨܲܦܪܵܐ ܘܩܘܼܪܒܵܢܵܐ ܕܪܲܡܫܵܐ: ܘܲܥܠܵܬ̣ܵܐ ܕܡܲܠܟܵܐ ܘܩܘܼܪܒܵܢܹܗ: ܘܲܥܠܵܬ̣ܵܐ ܕܟ݂ܠܹܗ ܥܲܡܵܐ ܕܐܲܪܥܵܐ: ܘܩܘܼܪܒܵܢܗܘܿܢ ܘܢܘܼܩܵܝܗܘܿܢ: ܘܟ݂ܠܹܗ ܕܡܵܐ ܕܲܥܠܵܬ̣ܵܐ. ܘܟ݂ܠ ܕܡܵܐ ܕܕܸܒ̣ܚܹ̈ܐ ܥܠܵܘܗܝ ܪܘܿܣ. ܘܡܲܕ݂ܒ̇ܚܵܐ ܕܲܢܚܵܫܵܐ ܢܸܗܘܹܐ ܠܝܼ ܠܫܘܼܐܵܠܵܐ.

¹⁶ ܘܲܥܒܲܕ݂ ܐܘܿܪܝܼܵܐ ܟܵܗܢܵܐ ܐܲܝܟ݂ ܕܦܲܩܕܹܗ ܡܲܠܟܵܐ ܐܵܚܵܙ.

¹⁷ ܘܲܦܣܲܩ ܡܲܠܟܵܐ ܐܵܚܵܙ ܓܕ݂ܵܢ̈ܦܹܐ ܕܡܲܬ̣ܩܢܵܐ. ܘܐܲܦܪܸܩ ܡܸܢܗܘܿܢ ܠܲܩܢܹ̈ܐ. ܘܝܲܡܵܐ ܐܲܚܸܬ̣ ܡ̣̱ܢ ܬܵܘܪܹ̈ܐ ܕܲܢܚܵܫܵܐ: ܘܣܵܡܹܗ ܥܲܠ ܪܨܵܦܵܐ ܕܟܹܐ̈ܦܹܐ.

¹⁸ ܘܒܹܝܬ̣ ܫܲܒ̇ܬ̣ܵܐ ܕܲܒ̣ܢܵܐ ܒܒܲܝܬܹ̇ܗ ܕܡܵܪܝܵܐ: ܘܡܲܥܠܵܢܵܐ ܕܬܲܪܥܵܐ ܒܲܪܵܝܵܐ: ܐܲܟ݂ܪܸܟ݂ ܠܒܲܝܬܹ̇ܗ ܕܡܵܪܝܵܐ: ܡ̣ܢ ܩܕ݂ܵܡ ܡܲܠܟܵܐ ܕܐܵܬ̣ܘܿܪ.

¹⁹ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܐܵܚܵܙ: ܘܟ݂ܠ ܡܸܕܸ̇ܢ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ.

²⁰ ܘܲܫܟܸܒ̣ ܐܵܚܵܙ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂ ܘܐܲܡ̣ܠܸܟ݂ ܚܹܙܲܩܝܵܐ ܒܪܹܗ ܒܵܬ̣ܪܹܗ.

17

¹ ܒܲܫܢܲܬ̣ ܬܲܪܬܲܥܸܣܪܹ̈ܐ ܫܢ̈ܝܼܢ ܠܐܵܚܵܙ ܡܲܠܟܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ ܗܘܿܫܲܥ ܒܲܪ ܐܲܠܵܐ ܥܲܠ ܝܼܣܪܵܝܹܠ: ܒܫܵܡܪܹܝܢ ܬܫܲܥ ܫܢ̈ܝܼܢ.

² ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ. ܒܪܲܡ ܠܵܐ ܐܲܝܟ݂ ܡܲܠ̈ܟܹ̇ܐ ܕܝܼܣܪܵܝܹܠ ܕܲܗܘ̤ܵܘ ܩܕ݂ܵܡܵܘܗܝ.

³ ܥܠܵܘܗܝ ܣܠܸܩ ܫܲܠܡܵܢܸܥܣܲܪ ܡܲܠܟܵܐ ܕܐܵܬ̣ܘܿܪ ܘܲܗܘ̤ܵܐ ܠܹܗ ܗܘܿܫܲܥ ܥܲܒ̣ܕܵܐ: ܘܐܲܝܬ̇ܝܼ ܠܹܗ ܩܘܼܪ̈ܒܵܢܹܐ.

⁴ ܘܐܸܫܟܲܚ ܡܲܠܟܵܐ ܕܐܵܬ̣ܘܿܪ ܒܗܘܿܫܲܥ ܡܸܪܕܵܐ. ܘܫܲܕܲܪ ܐܝܼܙ̈ܓܲܕܹ̇ܐ ܠܘܵܬ̣ ܣܹܐܘܿ ܡܲܠܟܵܐ ܕܡܸܨܪܹܝܢ. ܘܠܵܐ ܐܲܣܸܩ ܩܘܼܪ̈ܒܵܢܹܐ: ܠܡܲܠܟܵܐ ܕܐܵܬ̣ܘܿܪ ܐܲܝܟ݂ ܕܲܒ̣ܟ݂ܠ ܫܢ̣ܵܐ. ܘܲܟ݂ܠܵܝܗܝ ܡܲܠܟܵܐ ܕܐܵܬ̣ܘܿܪ: ܘܐܲܣܪܹܗ ܒܒܹܝܬ̣ ܐܲܣܝܼܪܹ̈ܐ.

⁵ ܘܲܣܠܸܩ ܡܲܠܟܵܐ ܕܐܵܬ̣ܘܿܪ ܥܲܠ ܟܠܵܗ̇ ܐܲܪܥܵܐ. ܘܲܣܠܸܩ ܥܲܠ ܫܵܡܪܹܝܢ: ܘܲܫܪܵܐ ܥܠܹܝܗ̇ ܬܠܵܬ̣ ܫܢ̈ܝܼܢ.

⁶ ܘܲܒ̣ܫܲܢ̄ܬܵܐ ܬܫܝܼܥܵܝܬܵܐ ܠܗܘܿܫܲܥ: ܟܒܲܫ ܡܲܠܟܵܐ ܕܐܵܬ̣ܘܿܪ ܠܫܵܡܪܹܝܢ: ܘܓܲܠܝܼ ܠܲܒ̣ܢܲܝ̈ ܝܼܣܪܵܝܹܠ ܠܐܵܬ̣ܘܿܪ. ܘܐܵܘܬܸ̇ܒ̣ ܐܸܢܘܿܢ ܒܲܚܠܲܝܝ ܘܲܒ̣ܚܵܒ̣ܵܪ ܢܗܲܪܓܵܘܙܵܢ ܩܘܼܪ̈ܝܵܐ ܕܡܵܕܲܝ.

⁷ ܘܲܗܘ̤ܵܐ ܕܟܲܕ݂ ܚܛܵܘ ܒܢܲܝ̈ ܝܼܣܪܵܝܹܠ ܠܡܵܪܝܵܐ ܐܲܠܵܗܗܘܿܢ: ܕܐܲܦܸܩ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܡ̣ܢ ܬܚܹܝܬ̣ ܐܝܼܕ݂ܵܐ ܕܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܘܲܕ݂ܚܸܠܘ ܠܐܲܠܵܗܹ̈ܐ ܐ̄ܚܪ̈ܵܢܹܐ.

⁸ ܘܗܲܠܸܟ݂ܘ ܒܢܵܡܘܿܣܹ̈ܐ ܕܥܲܡܡܹ̈ܐ: ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ.

⁹ ܘܐܸܡܲܪܘ ܒܢܲܝ̈ ܝܼܣܪܵܝܹܠ ܡܸܠܹ̈ܐ ܕܠܵܐ ܫܲܦܝܼܪ̈ܵܢ ܥܲܠ ܡܵܪܝܵܐ ܐܲܠܵܗܗܘܿܢ: ܗܸܢܘܿܢ ܘܡܲܠܟܲܝ̈ܗܘܿܢ ܘܲܒ̣ܢܵܘ ܠܗܘܿܢ ܥ̈ܠܵܘܵܬ̣ܵܐ ܒܟ݂ܠ ܩܘܼܪ̈ܝܼܗܘܿܢ: ܡ̣ܢ ܡܲܓܕܲܠ ܢܵܛܘܿܪܹ̈ܐ ܘܲܥܕܲܡܵܐ ܠܲܩܪܝܼܬ̣ܵܐ ܥܲܫܝܼܢܬܵܐ.

¹⁰ ܘܐܲܩܝܼܡ̣ܘ ܠܗܘܿܢ ܩܵܝ̈ܡܵܬܵܐ ܘܕܸܚ̈ܠܵܬ̣ܵܐ: ܥܲܠ ܟܠ ܪܵܡܬ̣ܵܐ ܕܪܵܡܵܐ ܘܲܬ̣ܚܹܝܬ̣ ܟܠ ܐܝܼܠܵܢ ܕܥܲܒ̇ܝܼܛ.

¹¹ ܘܣܵܡܘ ܬܲܡܵܢ ܒܸܣܡܹ̈ܐ ܥܲܠ ܥ̈ܠܵܘܵܬ̣ܵܐ: ܐܲܝܟ݂ ܥܲܡܡܹ̈ܐ ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡܲܝܗܘܿܢ. ܘܲܥ̣ܒܲܕ݂ܘ ܦܸܬ̣ܓ̣ܵܡܹ̈ܐ ܕܒ̣ܝܼܫܝܼܢ ܠܡܲܪܓܵܙܘܼ ܩܕ݂ܵܡ ܡܵܪܝܵܐ.

¹² ܘܲܦܠܲܚܘ ܠܕܸܚ̈ܠܵܬ̣ܵܐ: ܕܐܸܡܲܪ ܠܗܘܿܢ ܡܵܪܝܵܐ ܠܵܐ ܬܸܥܒ̇ܕ݂ܘܼܢ ܦܸܬ̣ܓ̣ܵܡܵܐ ܗܵܢܵܐ.

¹³ ܘܐܲܣܗܸܕ݂ ܡܵܪܝܵܐ ܒܝܼܣܪܵܝܹܠ ܘܒܲܝܗܘܼܕ݂ܵܐ ܒܐܝܼܕ݂ܵܐ ܕܟ݂ܠܗܘܿܢ ܥܲܒ̣ܕܵܘ̈ܗܝ ܢܒ̣̈ܝܹܐ ܘܟ݂ܠ ܚܲܙܵܝܹ̈ܐ: ܘܐܸܡܲܪ ܬܘܼܒ̣ܘ ܡ̣ܢ ܐܘܼܪ̈ܚܵܬ̣ܟ݂ܘܿܢ ܒܝܼ̈ܫܵܬ̣ܵܐ: ܘܛܲܪܘ ܦܘܼܩ̈ܕܵܢܲܝ ܘܲܩܝܵܡܲܝ̈: ܐܲܝܟ݂ ܢܵܡܘܿܣܹ̈ܐ ܕܦܸܩܕܹ̇ܬ̣ ܠܐܲܒ̣ܵܗܲܝ̈ܟ̇ܘܿܢ: ܘܐܲܝܟ݂ ܕܫܸܠܚܹܬ̣ ܠܗܘܿܢ ܒܐܝܼܕ݂ܵܐ ܕܥܲܒ̣̈ܕܲܝ ܢܒ̣̈ܝܹܐ.

¹⁴ ܘܠܵܐ ܫܡܲܥܘ: ܘܩܲܫܝܼܘ ܩܕ݂ܵܠܗܘܿܢ ܡ̣ܢ ܩܕ݂ܵܠܵܐ ܕܐܲܒ̣ܵܗܲܝ̈ܗܘܿܢ: ܘܠܵܐ ܗܲܝܡܸܢܘ ܒܡܵܪܝܵܐ ܐܲܠܵܗܗܘܿܢ.

¹⁵ ܘܐܲܣܠܝܼܘ ܩܝܵـ̈ـܡܲܝ ܘܦܘܼܩ̈ܕܵܢܲܝ ܕܦܲܩܕܹܬ̣ ܠܐܲܒ̣ܵܗܲܝ̈ܗܘܿܢ: ܘܣܵܗ̈ܕ̇ܘܵܬ̣ܵܐ ܕܐܲܣ̱ܗ̇ܕܹܬ̣ ܒܗܘܿܢ. ܘܐܸܙܲܠ̣ܘ ܒܵܬܲܪ ܠܵܐ ܡܸܕܸ̇ܡ: ܘܡܸܕܸ̇ܡ ܠܵܐ ܝܑܼܬܲܪܘ. ܐܸܠܵܐ ܐܸܙܲܠܘ ܒܵܬܲܪ ܥܲܡܡܹ̈ܐ ܕܦܲܩܸܕ݂ ܐܸܢܘܿܢ ܡܵܪܝܵܐ ܕܠܵܐ ܬܸܥܒ̇ܕ݂ܘܼܢ ܐܲܟ݂ܘܵܬ̣ܗܘܿܢ.

¹⁶ ܘܲܫܒܲܩܘ ܟܠܗܘܿܢ ܦܘܼܩܕܵܢܵܘ̈ܗܝ ܕܡܵܪܝܵܐ ܐܲܠܵܗܗܘܿܢ. ܘܲܥܒܲܕ݂ܘ ܠܗܘܿܢ ܢܣܝܼ̈ܟܹܐ ܬܪܹܝܢ ܥܸܓ̣ܠܹ̈ܐ. ܘܲܥܒܲܕ݂ܘ ܕܸܒ̣ܚܹ̈ܐ ܠܕܸܚ̈ܠܵܬ̣ܵܐ: ܘܲܣܓܸܕ݂ܘ ܠܟ݂ܠ ܚܲܝ̈ܠܹܐ ܕܫܡܲܝܵܐ: ܘܲܦܠܲܚܘ ܠܒܲܥܠܵܐ.

¹⁷ ܘܐܲܥܒܲܪܘ ܒܢܲܝ̈ܗܘܿܢ ܘܲܒ̣̈ܢܵܬ̣ܗܘܿܢ ܒܢܘܼܪܵܐ. ܘܲܩܨܲܡ̣ܘ ܩܸܨܡܹ̈ܐ ܘܢܲܚܸܫܘ ܘܐܸܬ̣ܚܲܫܲܒ̣ܘ ܠܡܸܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ ܠܡܲܪܓܵܙܘܼܬܹܗ.

¹⁸ ܘܲܪܓܸ̇ܙ ܡܵܪܝܵܐ ܛܵܒ̣ ܥܲܠ ܝܼܣܪܵܝܹܠ: ܘܐܲܥܒܲܪ ܐܸܢܘܿܢ ܡ̣ܢ ܩܕ݂ܵܡܵܘܗܝ. ܘܠܵܐ ܐܸܫܬ̇ܚܲܪܘ: ܐܸܠܵܐ ܐܸܢ ܫܲܒ̣ܛܵܐ ܕܲܝܗܘܼܕ݂ܵܐ ܒܲܠܚܘܿܕ݂.

¹⁹ ܘܐܵܦ ܒ̈ܢܲܝ ܝܼܗܘܼܕ݂ܵܐ ܠܵܐ ܢܛܲܪܘ ܦܘܼܩܕܵܢܵܘ̈ܗܝ ܕܡܵܪܝܵܐ ܐܲܠܵܗܗܘܿܢ. ܘܗܲܠܸܟ݂ܘ ܒܢܵܡܘܿܣܹܗ ܕܝܼܣܪܵܝܹܠ: ܘܲܥܒܲܕ݂ܘ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܐܲܪܓ̇ܙܘܼܗܝ ܟܠܗܘܿܢ ܝܵܘ̈ܡܵܬ̣ܵܐ.

²⁰ ܘܐܲܣܠܝܼ ܡܵܪܝܵܐ ܠܟ݂ܠܹܗ ܙܲܪܥܹܗ ܕܝܼܣܪܵܝܹܠ. ܘܨܲܥܲܪ ܐܸܢܘܿܢ: ܘܐܲܫܠܸܡ ܐܸܢܘܿܢ ܒܐܝܼܕ݂ܵܐ ܕܒ̣ܵܙܘܿܙܹ̈ܐ: ܥܕܲܡܵܐ ܕܲܫܕ݂ܵܐ ܐܸܢܘܿܢ ܡ̣ܢ ܩܕ݂ܵܡܵܘܗܝ.

²¹ ܡܸܛܠ ܕܲܦܪܲܩܘ ܕܒܹܝܬ̣ ܝܼܣܪܵܝܹܠ ܡ̣ܢ ܒܵܬܲܪ ܕܵܘܝܼܕ݂: ܘܐܲܡܠܸܟ݂ܘ ܥܠܲܝܗܘܿܢ ܠܝܘܿܪܲܒ̣ܥܲܡ ܒܲܪ ܢܵܒ̣ܵܛ ܘܐܲܛܥܝܼ ܝܘܿܪܲܒ̣ܥܲܡ ܠܝܼܣܪܵܝܹܠ ܡ̣ܢ ܒܵܬܲܪ ܡܵܪܝܵܐ: ܘܐܲܚܛܝܼ ܐܸܢܘܿܢ ܚܛܵܗܹ̈ܐ ܪܵܘ̱ܪ̈ܒܹܐ.

²² ܘܗܲܠܸܟ݂ܘ ܒܢܲܝ̈ ܝܼܣܪܵܝܹܠ ܒܟ݂ܠܗܘܿܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܕܲܥܒܲܕ݂: ܘܠܵܐ ܣܛܵܘ ܡܸܢܗܘܿܢ.

²³ ܥܕܲܡܵܐ ܕܐܲܥܒܲܪ ܡܵܪܝܵܐ ܠܝܼܣܪܵܝܹܠ ܡ̣ܢ ܩܕ݂ܵܡܵܘܗܝ: ܐܲܝܟ݂ ܕܐܸܡܲܪ ܡܵܪܝܵܐ ܒܐܝܼܕ݂ܵܐ ܕܟ݂ܠܗܘܿܢ ܢܒ̣ܝܹ̈ܐ. ܘܓܲܠܝܼ ܐܸܢܘܿܢ ܠܲܒ̣̈ܢܲܝ ܝܼܣܪܵܝܹܠ ܡ̣ܢ ܐܲܪܥܗܘܿܢ ܠܐܵܬ̣ܘܿܪ: ܥܕܲܡܵܐ ܠܝܵܘܡܵܢܵܐ.

²⁴ ܘܐܲܝܬ̇ܝܼ ܡܲܠܟܵܐ ܕܐܵܬ̣ܘܿܪ ܡ̣ܢ ܒܵܒܹܠ: ܘܡ̣ܢ ܟܘܿܬ̣: ܘܡ̣ܢ ܥܵܘܵܐ: ܘܡ̣ܢ ܚܡܵܬ̣: ܘܡ̣ܢ ܣܦܲܪܘܹܝܡ. ܘܐܵܘܬܸ̇ܒ̣ ܐܸܢܘܿܢ ܒܩܘܼܪ̈ܝܵܐ ܕܫܵܡܪܹܝܢ: ܚܠܵܦ ܒܢܲܝ̈ ܝܼܣܪܵܝܹܠ. ܘܝܸܪܬ̣ܘ ܠܫܵܡܪܹܝܢ: ܘܝܸܬܸܒ̣ܘ ܒܩܘܼܪ̈ܝܵܗ̇.

²⁵ ܘܡ̣ܢ ܪܹܫܝܼܬ̣ܵܐ ܟܲܕ݂ ܝܼܬܸܒ̣ܘ ܬܲܡܵܢ ܠܵܐ ܕܚܸܠ̣ܘ ܠܡܵܪܝܵܐ. ܘܫܲܕܲܪ ܡܵܪܝܵܐ ܥܠܲܝܗܘܿܢ ܐܲܪ̈ܝܵܘܵܬ̣ܵܐ: ܘܲܗܘ̤ܵܘ ܡܩܲܛܠܝܼܢ ܒܗܘܿܢ.

²⁶ ܘܚܵܘܝܼܘ ܠܡܲܠܟܵܐ ܕܐܵܬ̣ܘܿܪ: ܘܐܸܡܲܪܘ ܠܹܗ: ܥܲܡܡܹ̈ܐ ܕܓܲܠܝܼܬ̇ ܘܐܵܘܬܸ̇ܒ̣ܬ̇ ܒܩܘܼܪ̈ܝܵܐ ܕܫܵܡܪܹܝܢ: ܠܵܐ ܝܵܕ݂ܥܝܼܢ ܕܝܼܢܵܐ ܕܐܲܠܵܗܵܗ̇ ܕܐܲܪܥܵܐ. ܘܫܲܕܲܪ ܥܠܲܝܗܘܿܢ ܐܲܪ̈ܝܵܘܵܬ̣ܵܐ: ܘܗܵܐ ܡܩܲܛܠܝܼܢ ܒܗܘܿܢ: ܡܸܛܠ ܕܠܵܐ ܝܵܕ݂ܥܝܼܢ ܕܝܼܢܵܐ ܕܐܲܠܵܗܵܗ̇ ܕܐܲܪܥܵܐ.

²⁷ ܘܲܦܩܲܕ݂ ܡܲܠܟܵܐ ܕܐܵܬܘܿܪ: ܘܐܸܡܲܪ: ܐܵܘܒܸ̇ܠܘ ܠܬܲܡܵܢ ܚܲܕ݂ ܡ̣ܢ ܟܵܗܢܹ̈ܐ ܕܓܲܠܝܼܬ̇ܘܿܢ ܡ̣ܢ ܬܲܡܵܢ. ܘܢܹܐܙܲܠ ܘܢܸܬܸ̇ܒ̣ ܬܲܡܵܢ: ܘܢܸܠܸܦ ܐܸܢܘܿܢ ܕܝܼܢܵܐ ܕܐܲܠܵܗܵܗ̇ ܕܐܲܪܥܵܐ.

²⁸ ܘܐܸܬ̣ܵܐ ܚܲܕ݂ ܡ̣ܢ ܟܵܗ̈ܢܹܐ ܕܓܲܠܝܼ ܡ̣ܢ ܫܵܡܪܹܝܢ. ܘܝܸܬܸܒ̣ܘ ܒܒܹܝܬ̣ ܐܹܝܠ ܘܲܗܘ̤ܵܐ ܡܲܠܸܦ ܠܗܘܿܢ: ܐܲܝܟܲܢܵܐ ܢܸܕ݂ܚ̄ܠܘܼܢ ܠܡܵܪܝܵܐ.

²⁹ ܘܲܗܘ̤ܵܘ ܦܵܠܚܝܼܢ ܥܲܡ ܥܲܡ ܐܵܠܵܗܹܗ. ܘܲܫܒܲܩܘ ܒܵـ̈ـܬܹ̇ܐ ܕܲܥܠܵـ̈ـܘܵܬ̣ܵܐ ܕܲܥܒܲܕ݂ܘ ܒܡܵܫܪܹܝܢ ܥܲܡ ܥܲܡ ܒܩܘܼܪ݁ܝܼܗܘܿܢ: ܟܲܪ ܕܗܸܢܘܿܢ ܝܵܬ̣ܒ̇ܝܼܢ.

³⁰ ܘܐ̄ܢܵܫܲܝ̈ ܒܵܒܹܠ ܦܵܠܚܝܼܢ ܠܣܵܟ݂ܘܼܬ̣ ܒܢܘܼܬ̣. ܘܐ̄ܢܵܫܲܝ̈ ܟܘܵܬ̣ ܦܵܠܚܝܼܢ ܠܢܸܪܓܲܠ. ܘܐ̄ܢܵܫܲܝ̈ ܚܡܵܬ̣ ܦܵܠܚܝܼܢ ܠܐܲܫܝܼܡܵܐ.

³¹ ܘܥܵܘܵܝܹ̈ܐ ܦܵܠܚܝܼܢ ܠܝܲܒ̣ܙܲܚ ܘܲܠܬܲܪܬܲܩ. ܘܲܣܦܲܪ̈ܘܵܝܹܐ ܡܵܘܩ̄ܕ݂ܝܼܢ ܒܢܲܝ̈ܗܘܿܢ ܒܢܘܼܪܵܐ: ܠܐܲܪܕܲܡܠܸܟ݂ ܘܠܲܥܡܵܠܹܝܩ ܐܲܠܵܗܹ̈ܐ ܕܲܣܦܲܪܘܹܝܡ.

³² ܘܲܗܘ̤ܵܘ ܕܵܚܠܝܼܢ ܠܡܵܪܝܵܐ. ܘܲܥܒܲܕ݂ܘ ܠܗܘܿܢ ܡܸܢܗܘܿܢ ܟܘܼܡܪܹ̈ܐ ܕܲܥܠܵـ̈ـܘܵܬ̣ܵܐ: ܘܲܗܘ̤ܵܘ ܦܵܠܚܝܼܢ ܠܗܘܿܢ: ܒܒܹܝܬ̣ ܥܠܵـ̈ـܘܵܬ̣ܵܐ.

³³ ܠܡܵܪܝܵܐ ܕܵܚܠܝܼܢ ܗ̄ܘ̣ܸܘ: ܘܠܲܐܠܵܗܲܝ̈ܗܘܿܢ ܦܵܠܚܝܼܢ ܗ̄ܘ̣ܵܘ: ܐܲܝܟ݂ ܢܵܡܘܿܣܵܐ ܕܥܲܡܡܹ̈ܐ: ܕܓܲܠܝܼܘ ܒܢܲܝ̈ ܝܼܣܪܵܝܹܠ ܡ̣ܢ ܐܲܪܥ̱ܗܘܿܢ.

³⁴ ܥܕܲܡܵܐ ܠܝܵܘܡܵܢܵܐ. ܥܲܠ ܕܲܫܒܲܩܘ ܠܡܵܪܝܵܐ: ܘܥܵܒ̣ܕ̇ܝܼܢ ܐܲܝܟ݂ ܢܵܡܘܿܣܹ̈ܐ ܕܥܲܡܡܹ̈ܐ: ܘܠܵܐ ܕܵܚ̇ܠܝܼܢ ܠܡܵܪܝܵܐ. ܘܠܵܐ ܥܵܒ̣ܕ̇ܝܼܢ ܐܲܝܟ݂ ܩܝܵܡܵܐ. ܘܐܲܝܟ݂ ܕܝܼܢܵܐ: ܘܐܲܝܟ݂ ܢܵܡܘܿܣܵܐ: ܘܐܲܝܟ݂ ܦܘܼܩܕܵܢܵܐ ܕܦܲܩܸܕ݂ ܡܵܪܝܵܐ ܠܲܒ̣ܢܲܝ̈ ܝܲܥܩܘܿܒ̣: ܕܫܲܡܝܼ ܫܡܹܗ ܝܼܣܪܵܝܹܠ.

³⁵ ܘܐܲܩܝܼܡ ܡܵܪܝܵܐ ܩܝܵܡܵܐ ܥܲܡܗܘܿܢ: ܘܦܲܩܸܕ݂ ܐܸܢܘܿܢ ܘܐܸܡܲܪ: ܠܵܐ ܬܸܕ݂ܚ̄ܠܘܼܢ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܘܠܵܐ ܬܸܣܓܕ݂ܘܼܢ ܠܗܘܿܢ: ܘܠܵܐ ܬܸܦ̱ܠܚܘܼܢ ܐܸܢܘܿܢ: ܘܠܵܐ ܬܕܲܒ̇ܚܘܼܢ ܠܗܘܿܢ.

³⁶ ܐܸܠܵܐ ܦܠܘܿܚܘ ܠܡܵܪܝܵܐ ܕܐܲܣܩܟ݂ܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܒܚܲܝܠܵܐ ܪܲܒܵܐ: ܘܒܲܕ݂ܪܵܥܵܐ ܪܵܡܵܐ. ܠܹܗ ܦܠܘܿܚܘ: ܘܠܹܗ ܣܓ̣ܘܿܕ݂ܘ: ܘܠܹܗ ܕܲܒܲܚܘ.

³⁷ ܘܲܩܝܵܡܹ̈ܐ: ܘܕ݂ܝܼܢܹ̈ܐ: ܘܢܵܡܘܿܣܹ̈ܐ: ܘܦܘܼܩ̈ܕܵܢܹܐ: ܕܲܟ݂ܬܲܒ̣ ܠܟ݂ܘܿܢ: ܛܲܪܘ ܘܲܥܒܸܕ݂ܘ ܟܠܗܘܿܢ ܝܵܘ̈ܡܵܬ̣ܵܐ.

³⁸ ܘܠܵܐ ܬܸܕ݂ܚ̄ܠܘܼܢ ܠܐܲܠܵܗܹ̈ܐ ܐ̄ܚܪ̈ܵܢܹܐ. ܘܲܩܝܵܡܹ̈ܐ ܕܐܲܩܝܼܡܹ̇ܬ̣ ܥܲܡܟ݂ܘܿܢ: ܠܵܐ ܬܸܛܥܘܿܢ. ܘܐܵܐ ܬܸܕ݂ܚ̄ܠܘܼܢ ܠܐܲܠܵܗܹ̈ܐ ܕܥܲܡܡܹ̈ܐ.

³⁹ ܐܸܠܵܐ ܠܡܵܪܝܵܐ ܐܲܠܵܗܟ݂ܘܿܢ ܕܚܲܠܘ. ܘܗ̤ܘ ܡܦܲܨܹܐܠܟ݂ܘܿܢ ܡ̣ܢ ܐܝܼܕ݂ܵܐ ܕܟ݂ܠܗܘܿܢ ܒܥܸܠܕ̇ܒ̣ܵܒܲܝ̈ܟ̇ܘܿܢ.

⁴⁰ ܘܠܵܐ ܫ̣ܡܲܥܘ: ܐܸܠܵܐ ܐܲܝܟ݂ ܢܵܡܘܿܣܗܘܿܢ ܩܲܕ݂ܡܵܝܵܐ ܥܲܒ̣ܕ̇ܝܼܢ ܗ̄ܘ̣ܵܘ.

⁴¹ ܘܲܗܘ̤ܵܘ ܐܵܦ ܥܲܡܡܹ̈ܐ ܗܵܠܹܝܢ: ܕܝܼܬܸܒ̣ܘ ܒܫܵܡܪܹܝܢ: ܕܵܚ̇ܠܝܼܢ ܠܡܵܪܝܵܐ: ܘܠܲܓܠܝܼܦܲܝ̈ܗܘܿܢ ܦܵܠܚܝܼܢ ܗ̄ܘ̣ܵܘ: ܐܵܦ ܒܢܲܝ̈ܗܘܿܢ ܐܵܦ ܒܢܲܝ̈ ܒܢܲܝ̈ܗܘܿܢ. ܐܲܝܟ݂ ܕܲܥܒܲܕ݂ܘ ܐܲܒ̣ܵܗܲܝ̈ܗܘܿܢ: ܥܵܒ̣ܕܝܼܢ ܗ̄ܘ̣ܵܘ ܐܵܦ ܗܸܢܘܿܢ ܥܕܲܡܵܐ ܠܝܵܘܡܵܢܵܐ.

18

¹ ܒܲܫܢܲܬ̣ ܬܠܵܬ̣ ܠܗܘܿܫܲܥ ܒܲܪ ܐܲܠܵܐ ܡܲܠܟܵܐ ܕܝܼܣܪܵܝܹܠ: ܐܲܡ̣ܠܸܟ݂ ܚܹܙܲܩܝܵܐ ܒܲܪ ܐܵܚܵܙ ܡܲܠܟܵܐ ܕܲܝܗܘܼܕ݂ܵܐ.

² ܒܲܪ ܥܸܣܪܝܼܢ ܗ̄ܘ̣ܵܐ ܘܚܲܡܸܫ ܫܢ̈ܝܼܢ ܟܲܕ݂ ܐܲܡ̣ܠܸܟ݂. ܘܥܸܣܪܝܼܢ ܘܲܬ̣ܫܲܥ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ. ܘܲܫܡܵܗ̇ ܕܐܸܡܹܗ ܐܲܟ݂ܝܼ ܒܲܪܬ̣ ܙܟܲܪܝܵܐ.

³ ܘܲܥ̣ܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ ܕܵܘܝܼܕ݂ ܐܲܒ̣ܘܼܗܝ.

⁴ ܘܗ̤ܘ ܐܲܥ̣ܒܲܕ݂ ܥ̈ܠܵܘܵܬ̣ܵܐ: ܘܬܲܒܲܪ ܩܵܝ̈ܡܵܬ̣ܵܐ: ܘܦܲܣܸܩ ܕܸܚ̈ܠܵܬ̣ܵܐ. ܘܲܦܣܵܩ ܚܸܘܝܵܐ ܕܲܢܚܵܫܵܐ ܕܲܥܒܲܕ݂ ܡܘܼܫܹܐ. ܡܸܛܠ ܕܲܛܥܵܘ ܒܢܲܝ̈ ܝܼܣܪܵܝܹܠ ܒܵܬ̣ܪܹܗ: ܘܣܵܝܡ̇ܝܼܢ ܗ̄ܘ̣ܵܘ ܠܹܗ ܒܸܣܡܹ̈ܐ ܥܕܲܡܵܐ ܠܝܵܘ̈ܡܵܬ̣ܵܐ ܗܵܢܘܿܢ: ܘܲܩܪܵܐܘܼܗܝ ܢܸܚ̄ܫܬ̣ܵܢ.

⁵ ܘܲܒ̣ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܣܲܒܲܪ: ܘܒ̣ܵܬ̣ܪܹܗ ܠܵܐ ܗܘ̤ܵܐ ܐܲܟ݂ܘܵܬܹܗ ܒܟ݂ܠܗܘܿܢ ܡܲܠ̈ܟܹ̇ܐ ܕܲܝܗܘܼܕ݂ܵܐ: ܘܐܵܦܠܵܐ ܒܕܲܗܘ̤ܵܘ ܩܕ݂ܵܡܵܘܗܝ.

⁶ ܘܐܸܬ̇ܕܲܒܲܩ ܒܡܵܪܝܵܐ: ܘܠܵܐ ܣܛ̣ܵܐ ܡ̣ܢ ܒܵܬ̣ܪܹܗ. ܘܲܢ̣ܛܲܪ ܦܘܼܩܕܵܢܵܘ̈ܗܝ ܐܲܝܟ݂ ܕܦܲܩܸܕ݂ ܡܵܪܝܵܐ ܠܡܘܼܫܹܐ.

⁷ ܘܲܗܘ̤ܵܐ ܡܵܪܝܵܐ ܥܲܡܹܗ. ܘܠܲܐܝܟܵܐ ܕܐܵܙܹ̇ܠ ܗ̄ܘ̣ܵܐ: ܙܵܟܹ̇ܐ ܗ̄ܘ̣ܵܐ. ܘܲܡܪܲܕ݂ ܥܲܠ ܡܲܠܟܵܐ ܕܐܵܬ̣ܘܿܪ ܘܠܵܐ ܦܲܠܚܹܗ.

⁸ ܘܗ̤ܘ ܡܚ̣ܵܐ ܠܲܦܠܸܫܬܵܝܹ̈ܐ ܥܕܲܡܵܐ ܠܥܵܐܙܵܐ: ܘܠܲܬ̣ܚܘܼܡܹ̈ܝܗ̇: ܡ̣ܢ ܡܲܓܕܲܠ ܢܵܛܘܿܪܹ̈ܐ ܘܲܥܕܲܡܵܐ ܠܲܩܪܝܼܬ̣ܵܐ ܥܲܫܝܼܢܬܵܐ.

⁹ ܘܲܒ̣ܫܲܢ̄ܬܵܐ ܪܒ̣ܝܼܥܵܝܬܵܐ ܠܡܲܠܟܵܐ ܚܹܙܲܩܝܵܐ: ܗ̤ܝ ܗ̄ܝ̣ ܫܲܢ̄ܬܵܐ ܫܒ̣ܝܼܥܵܝܬܵܐ ܠܗܘܿܫܲܥ ܒܲܪ ܐܲܠܵܐ ܡܲܠܟܵܐ ܕܝܼܣܪܵܝܹܠ: ܣܠܸܩ ܫܲܠܡܵܢܸܥܣܲܪ ܡܲܠܟܵܐ ܕܐܵܬ̣ܘܿܪ ܥܲܠ ܫܵܡܪܹܝܢ: ܘܲܫܪܵܐ ܥܠܹܝܗ̇.

¹⁰ ܘܟܲܒ̣ܫܵܗ̇ ܡ̣ܢ ܒܵܬܲܪ ܬܠܵܬ̣ ܫܢ̈ܝܼܢ: ܒܲܫܢܲܬ̣ ܫܸܬ̣ ܠܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܗ̤ܝ ܗ̄ܝ̣ ܫܢܲܬ̣ ܬܫܲܥ ܠܗܘܿܫܲܥ ܡܲܠܟܵܐ ܕܝܼܣܪܵܝܹܠ: ܐܸܬ̣ܟܲܒ̣ܫܲܬ̣ ܫܵܡܪܹܝܢ.

¹¹ ܘܓܲܠܝܼ ܡܲܠܟܵܐ ܕܐܵܬ̣ܘܿܪ ܠܝܼܣܪܵܝܹܠ ܠܐܵܬ̣ܘܿܪ: ܘܐܲܫܪܝܼ ܐܸܢܘܿܢ ܒܲܚܠܲܚ ܘܲܒ̣ܚܵܒ̣ܵܪ ܢܗܲܪ ܓܵܘܙܵܢ ܩܘܼܪ̈ܝܵܐ ܕܡܵܕܲܝ.

¹² ܥܲܠ ܕܠܵܐ ܫ̣ܡܲܥܘ ܒܩܵܠܹܗ ܕܡܵܪܝܵܐ ܐܲܠܵܗܗܘܿܢ: ܘܲܥ̣ܒܲܕ݂ܘ ܥܲܠ ܩܝܵܡܹܗ. ܘܟ݂ܠ ܕܦܲܩܸܕ݂ ܐܸܢܘܿܢ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ: ܠܵܐ ܫ̣ܡܲܥܘ ܘܠܵܐ ܥ̣ܒܲܕ݂ܘ.

¹³ ܘܒܲܫܢܲܬ̣ ܐܲܪܒܲܥܸܣܪܹ̈ܐ ܠܡܲܠܟܵܐ ܚܹܙܲܩܝܵܐ: ܣܠܸܩ ܣܲܢܚܹܝܪܝܼܒ̣ ܡܲܠܟܵܐ ܕܐܵܬ̣ܘܿܪ ܥܲܠ ܟܠܗܹܝܢ ܩܘܼܪ̈ܝܵܐ ܕܲܝܗܘܼܕ݂ܵܐ ܥܲܫܝܼ̈ܢܵܬ̣ܵܐ: ܘܐܸܚܲܕ݂ ܐܸܢܹܝܢ.

¹⁴ ܘܲܫܠܲܚ ܚܹܙܲܩܝܵܐ ܡܲܠܟܵܐ ܕܝܗܘܼܕ݂ܵܐ ܠܡܲܠܟܵܐ ܕܐܵܬ̣ܘܿܪ ܠܲܠܟ݂ܝܼܫ: ܘܐܸܡܲܪ ܠܹܗ: ܚܛܹ̇ܝܬ̣ ܗܦܘܿܟ݂ ܡܹܢܝ. ܘܡܸܕܸ̇ܡ ܕܪܵܡܹ̇ܐ ܐܲܢ̄ܬ̇ ܥܠܲܝ: ܫܵܩܹ̇ܠ ܐ̄ܢܵܐ. ܘܐܲܪܡܝܼ ܡܲܠܟܵܐ ܕܐܵܬ̣ܘܿܪ ܥܲܠ ܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܬܠܵܬ̣ܡܵܐܐ ܟܲܟ̇ܪ̈ܝܼܢ ܕܟܸܣܦܵܐ: ܘܲܬ̣ܠܵܬ̣ܝܼܢ ܟܲܟ̇ܪ̈ܝܼܢ ܕܕܲܗܒ̣ܵܐ.

¹⁵ ܘܝܲܗ̄ܒ̣ ܚܹܙܲܩܝܵܐ ܟܠܹܗ ܟܸܣܦܵܐ ܕܐܸܫܬ̇ܟܲܚ ܒܒܲܝܬܹ̇ܗ ܕܡܵܪܝܵܐ: ܘܲܒ̣ܒܹܝܬ̣ ܓܲܙܵܐ ܕܡܲܠܟܵܐ.

¹⁶ ܒܙܲܒ̣ܢܵܐ ܗܵܘ̇: ܩܠܲܦ ܚܹܙܲܩܝܵܐ ܬܲܪ̈ܥܹܐ ܕܗܲܝܟ̇ܠܹܗ ܕܡܵܪܝܵܐ: ܘܐܹܣ̈ܟ̇ܦܵܬ̣ܵܐ ܕܲܩܪܲܡ ܗ̄ܘ̣ܵܐ ܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ. ܘܝܲܗ̄ܒ̣ ܐܸܢܘܿܢ ܠܡܲܠܟܵܐ ܕܐܵܬ̣ܘܿܪ.

¹⁷ ܘܲܗܦܲܟ݂ ܫܲܕܲܪ ܡܲܠܟܵܐ ܕܐܵܬ̣ܘܿܪ: ܠܬܹܐܪܬܵܢ: ܘܲܠܪܲܒ̇ ܣܝܼܣܲܩ: ܘܲܠܪܲܒ̇ ܫܵܩܹ̈ܐ: ܡ̣ܢ ܠܟ݂ܝܼܫ ܠܘܵܬ̣ ܚܹܙܲܩܝܵܐ ܡܲܠܟܵܐ: ܥܲܡ ܚܲܝܠܵܐ ܥܲܫܝܼܢܵܐ ܠܐܘܿܪܸܫܠܸܡ. ܘܲܣܠܸܩܘܘ ܘܥܲܠܘ ܠܐܘܿܪܸܫܠܸܡ ܘܩܵܡ̣ܘ ܒܡܲܣܩܵܢܵܐ ܕܝܲܡܬ̣ܵܐ ܥܸܠܵܝܬܵܐ ܕܒܲܫܒ̣ܝܼܠ ܚܲܩܠܹܗ ܕܩܵܨܪܵܐ.

¹⁸ ܘܲܩܪܵܘ ܠܡܲܠܟܵܐ. ܘܲܢܦܲܩ̣ܘ ܠܘܵܬ̣ܗܘܿܢ: ܐܸܠܝܵܩܝܼܡ ܒܲܪ ܚܹܠܲܩܝܵܐ ܪܲܒ̇ܒܲܝܬܵܐ: ܘܫܲܒ̣ܢܵܐ ܣܵܦܪܵܐ: ܘܝܘܿܐܵܚ ܒܲܪ ܐܵܣܵܦ ܡܥܲܗܕ݂ܵܢܵܐ.

¹⁹ ܘܐܸܡܲܪ ܠܗܘܿܢ ܪܲܒ̇ ܫܵܩܹ̈ܐ: ܐܸܡܲܪܘ ܠܚܹܙܲܩܝܵܐ: ܗܵܟܲܢܵܐ ܡܲܠܟܵܐ ܪܲܒܵܐ ܡܲܠܟܵܐ ܕܐܵܬ̣ܘܿܪ: ܡܵܢܵܘ ܬܘܼܟ݂ܠܵܢܵܐ ܗܵܢܵܐ ܕܐܸܬ̇ܬܲܟ݂ܠܬ̇.

²⁰ ܘܐܸܡܲܪܬ̇: ܕܐܝܼܬ̣ ܒܵܟ݂ ܡܲܡܠܠܵܐ ܕܣܸܦ̈ܘܵܬ̣ܵܐ ܘܬܲܪܥܝܼܬ̣ܵܐ ܘܓܲܢ̄ܒܵܪܘܼܬ̣ܵܐ ܠܲܩܪܵܒ̣ܵܐ ܗܵܫܵܐ ܥܲܠ ܡܲܢܘܼ ܐܸܬ̇ܬܲܟ݂ܠܲܬ̇ ܕܲܡܪܲܕ̇ܬ̇ ܥܠܲܝ.

²¹ ܗܵܐ ܐܸܬ̇ܬܲܟ݂ܠܲܬ̇ ܥܲܠ ܣܵܡܟܵܐ ܕܩܲܢܝܵܐ ܪܥܝܼܥܵܐ: ܥܲܠ ܡܸܨܪܵܝܵܐ. ܕܡܵܐ ܕܐܸܣܬ̇ܡܵܟ݂ ܓܲܒ̣ܪܵܐ ܥܠܵܘܗܝ: ܥܵܐܹ̇ܠ ܒܐܝܼܕܹܗ: ܘܒ̣ܵܙܲܥ ܠܵܗ̇. ܗܵܟܲܢܵܐ ܗ̄ܘ̣ ܦܸܪܥܘܿܢ ܡܲܠܟܵܐ ܕܡܸܨܪܹܝܢ ܠܟ݂ܠ ܕܡܸܬ̇ܬܲܟ݂ܠܝܼܢ ܥܠܵܘܗܝ.

²² ܘܐܸܢ ܬܹܐܡܲܪ ܠܝܼ: ܕܥܲܠ ܡܵܪܝܵܐ ܐܲܠܵܗܲܢ ܐܸܬ̇ܬܲܟ݂ܠ̄ܢ: ܠܵܐ ܗ̄ܘ̣ܵܐ ܗܵܘ̇ ܕܐܲܥܒܲܪ ܚܹܙܲܩܝܵܐ ܥ̈ܠܵܘܵܬܹܗ ܘܡܲܕ݂ܒ̇ܚܵܘ̈ܗܝ ܘܐܸܡܲܪ ܠܲܝܗܘܼܕ݂ܵܐ: ܘܠܐܘܿܪܸܫܠܸܡ: ܕܲܩܕ݂ܵܡ ܡܲܕ݂ܒ̇ܚܵܐ ܚܲܕ݂ ܬܸܣܓ̇ܕ݂ܘܼܢ ܒܐܘܿܪܸܫܠܸܡ.

²³ ܘܗܵܫܵܐ ܐܸܬ̣ܚܲܠܲܛ ܥܲܡ ܡܵܪܝ ܡܲܠܟܵܐ ܐܵܬ̣ܘܿܪܵܝܵܐ. ܘܐܸܬܸ̇ܠ ܠܵܟ݂ ܬܪܹܝܢ ܐܲܠܦ̈ܝܼܢ ܪ̈ܲܟ݂ܫܵܐ: ܐܸܢ ܐܝܼܬ̣ ܠܵܟ݂ ܦܲܪ̈ܵܫܹܐ ܕܬܲܪܟܸ̇ܒ̣ ܥܠܲܝܗܘܿܢ.

²⁴ ܘܐܲܝܟܲܢܵܐ ܡܲܗܦܲܟ݂ ܐܲܢ̄ܬ̇ ܐܲܦܹ̈ܐ ܕܚܲܕ݂ ܡ̣ܢ ܚܹܐܪܹ̈ܐ ܕܥܲܒ̣ܕܵܘ̈ܗܝ ܕܡܵܪܝ ܙܥܘܿܪܹ̈ܐ: ܘܐܸܬ̇ܬ̇ܟܸܠܬ̇ ܠܵܟ݂ ܥܲܠ ܡܸܨܪܵܝܵܐ ܥܲܠ ܡܲܪ̈ܟ̇ܒ̣ܵܬ̣ܵܐ ܘܦܲܪ̈ܵܫܹܐ.

²⁵ ܘܗܵܫܵܐ ܠܡܵܐ ܒܸܠܥܵܕ݂ ܡ̣ܢ ܡܵܪܝܵܐ ܣܸܠܩܹ̇ܬ̣ ܥܲܠ ܐܲܪܥܵܐ ܗܵܕܹܐ ܠܡܲܚܪܒ̣ܘܼܬ̣ܵܗ̇. ܡܵܪܝܵܐ ܗ̄ܘ̣ ܐܸܡܲܪ ܠܝܼ ܣܲܩ ܥܲܠ ܐܲܪܥܵܐ ܗܵܕܹܐ: ܘܐܲܚ̱ܪܒ̣ܝܼܗ̇.

²⁶ ܘܐܸܡܲܪ ܐܹܠܝܵܩܝܼܡ ܒܲܪ ܚܹܠܲܩܝܵܐ: ܘܫܲܒ̣ܢܵܐ: ܘܝܘܿܐܵܚ ܠܪܲܒ̇ ܫܵܩܹ̈ܐ: ܡܲܠܸܠ ܥܲܡ ܥܲܒ̣ܕܲܝ̈ܟ ܐܲܪܡܵܐܝܼܬ̣. ܡܸܛܠ ܕܫܵܡ̇ܥܝܼܢ ܚ̄ܢܲܢ: ܘܠܵܐ ܬܡܲܠܸܠ ܥܲܡ̇ܢ ܝܗ̄ܘܼܕ݂ܵܐܝܼܬ̣ ܩܕ݂ܵܡ ܥܲܡܵܐ ܕܥܲܠ ܫܘܼܪܵܐ.

²⁷ ܘܐܸܡܲܪ ܠܗܘܿܢ ܪܲܒ̇ ܫܵܩܹ̈ܐ: ܠܵܐ ܗ̄ܘ̣ܵܐ ܠܘܵܬ̣ܟ݂ܘܿܢ ܘܲܠܘܵܬ̣ ܡܵܪܟ݂ܘܿܢ ܫܲܕܲܪܲܢܝ ܡܵܪܝ ܠܡܹܐܡܲܪ ܡܸܠܹ̈ܐ ܗܵܠܹܝܢ: ܐܸܠܵܐ ܠܓܲܒ̣ܪܹ̈ܐ ܕܝܵܬ̣ܒ̇ܝܼܢ ܥܲܠ ܫܘܼܪܵܐ. ܕܠܵܐ ܢܹܐܟ݂ܠܘܼܢ ܬܸܒ̣ܬ̇ܗܘܿܢ: ܘܢܸܫܬ̇ܘܿܢ ܬܝܵܢܲܝ̈ܗܘܿܢ ܥܲܡܟ݂ܘܿܢ.

²⁸ ܘܩܵܡ ܪܲܒ̇ ܫܵܩܹ̈ܐ: ܘܲܩܪܵܐ ܒܩܵܠܵܐ ܪܵܡܵܐ ܝܗ̄ܘܼܕ݂ܵܐܝܼܬ̣: ܘܡܲܠܸܠ ܘܐܸܡܲܪ: ܫܡܲܥܘ ܦܸܬ̣ܓ̣ܵܡܹܗ ܕܡܲܠܟܵܐ ܪܲܒܵܐ ܡܲܠܟܵܐ ܕܐܵܬ̣ܘܿܪ.

²⁹ ܗܵܟܲܢܵܐ ܐܵܡܲܪ ܡܲܠܟܵܐ: ܠܵܐ ܢܲܛܥܹܝܟ݂ܘܿܢ ܚܹܙܲܩܝܵܐ: ܡܸܛܠ ܕܠܵܐ ܡܸܫܟܲܚ ܠܲܡܦܲܨܵܝܘܼܬ̣ܟ݂ܘܿܢ ܡ̣ܢ ܐܝܼܕܲܝ̈.

³⁰ ܘܠܵܐ ܢܲܬ̣ܟܸ̇ܠܟ݂ܘܿܢ ܚܹܙܲܩܝܵܐ ܥܲܠ ܡܵܪܝܵܐ: ܘܢܹܐܡܲܪ ܕܲܡܦܲܨܵܝܘܼ ܡܦܲܨܹܐ ܠܲܢ ܡܵܪܝܵܐ: ܘܠܵܐ ܡܸܫܬܲܠܡܵܐ ܩܪܝܼܬ̣ܵܐ ܗܵܕܹܐ ܒܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ.

³¹ ܠܵܐ ܬܸܫ̱ܡܥܘܿܢ ܠܚܹܙܲܩܝܵܐ: ܡܸܛܠ ܕܗܵܟܲܢܵܐ ܐܵܡܲܪ ܡܲܠܟܵܐ ܕܐܵܬ̣ܘܿܪ. ܥܒܸܕ݂ܘ ܥܲܡܝ ܒܘܼܪܟ̇ܬ̣ܵܐ ܘܦܘܿܩܘ ܠܘܵܬ̣ܝ. ܘܐܲܟ݂ܘܿܠܘ ܐ̄ܢܵܫ ܓܘܼܦܢܵܘ̈ܗܝ. ܘܐ̄ܢܵܫ ܬܹܐܢܵܘ̈ܗܝ. ܘܐܸܫܬܵܘ ܐ̄ܢܵܫ ܡܲـ̈ـܝܵܐ ܕܓ̣ܘܼܒܹ̇ܗ.

³² ܥܕܲܡܵܐ ܕܐܹܬܹܐ ܘܐܸܕ݂ܒܲܪܟ݂ܘܿܢ ܠܐܲܪܥܵܐ ܕܐܲܝܟ݂ ܐܲܪ̱ܥܟ݂ܘܿܢ: ܐܲܪܥܵܐ ܕܐܵܕ݂ܫܹ̈ܐ ܘܕܸܐ̈ܒܹ̇ܐ: ܐܲܪܥܵܐ ܕܲܥܒ̣ܘܼܪܵܐ ܘܲܕ݂ܟܲܪ̈ܡܹܐ: ܐܲܪܥܵܐ ܕܙܲܝ̈ܬܹ̇ܐ ܘܲܕ݂ܫܘܼܡܵܢܵܐ ܘܲܕ̇ܕܸܒ̣ܫܵܐ. ܘܵܚܝܵܘ ܘܠܵܐ ܬܡܘܼܬ̣ܘܼܢ ܘܠܵܐ ܬܸܫ̱ܡܥܘܼܢ ܠܚܹܙܲܩܝܵܐ ܘܠܵܐ ܢܲܛܥܹܝܟ݂ܘܿܢ ܚܹܙܲܩܝܵܐ: ܘܢܹܐܡܲܪ ܕܡܵܪܝܵܐ ܡܦܲܨܹܐ ܠܲܢ.

³³ ܕܲܠܡܵܐ ܐܸܫܟܲܚ̣ܘ ܠܲܡܦܲܨܵܝܘܼ ܐܲܠܵܗܲܝ̈ܗܘܿܢ ܕܥܲܡܡܹ̈ܐ: ܐܲܠܵܗ ܐܲܪܥܹܗ: ܡ̣ܢ ܐܝܼܕ݂ܵܘܗܝ ܕܡܲܠܟܵܐ ܕܐܵܬ̣ܘܿܪ.

³⁴ ܐܲܝܟܵܐ ܐܸܢܘܿܢ ܐܲܠܵܗܹ̈ܐ ܕܲܚܡܵܬ̣ ܘܕܲܪܦܵܕ݂. ܐܲܝܟܵܐ ܐܸܢܘܿܢ ܐܲܠܵܗܹ̈ܐ ܕܲܣܦܲܪܘܹܝܡ: ܘܲܕ݂ܢܵܥ: ܘܲܕ݂ܥ̄ܘܵܐ. ܕܲܠܡܵܐ ܦܵܨܝܼܘ ܠܫܵܡܪܹܝܢ ܡ̣ܢ ܐܝܼ̈ܕܲܝ.

³⁵ ܡ̇ܢ ܡ̣ܢ ܟܠܗܘܿܢ ܐܲܠܵܗܹ̈ܐ ܕܐܲܪ̈ܥܵܬ̣ܵܐ ܗܵܠܹܝܢ ܦܲܨܝܼ ܐܲܪܥܹܗ ܡ̣ܢ ܐܝܼܕܲܝ̈: ܕܲܡܦܲܨܹܐ ܡܵܪܝܵܐ ܠܐܘܿܪܸܫܠܸܡ ܡ̣ܢ ܐܝܼܕܲܝ̈.

³⁶ ܘܲܫܬܸܩ̣ܘ ܥܲܡܵܐ: ܘܠܵܐ ܝܲܗ̄ܒ̣ܘ ܠܹܗ ܦܸܬ̣ܓ̣ܵܡܵܐ: ܡܸܛܠ ܕܡܲܠܟܵܐ ܦܲܩܸܕ݂: ܘܐܸܡܲܪ ܠܵܐ ܬܸܬ̇ܠܘܼܢ ܠܹܗ ܦܸܬ̣ܓ̣ܵܡܵܐ.

³⁷ ܘܐܸܬ̣ܵܐ ܐܹܠܝܵܩܝܼܡ ܒܲܪ ܚܹܠܲܩܝܵܐ ܪܲܒ̇ܒܲܝܬܵܐ: ܘܫܲܒ̣ܢܵܐ ܣܵܦܪܵܐ: ܘܝܘܿܐܵܚ ܒܲܪ ܐܵܣܵܦ ܡܥܲܗܕ݂ܵܢܵܐ: ܠܘܵܬ̣ ܚܹܙܲܩܝܵܐ ܟܲܕ݂ ܡܨܲܪܹܝܢ ܠܒ̣ܘܼܫܲܝ̈ܗܘܿܢ. ܘܚܵܘܝܼܘܗܝ ܡܸܠܵܘ̈ܗܝ ܕܪܲܒ̇ܫܵܩܹ̈ܐ.

19

¹ ܘܟܲܕ݂ ܫ̣ܡܲܥ ܡܲܠܟܵܐ ܚܹܙܲܩܝܵܐ: ܨܲܪܝ ܠܒ̣ܘܼܫܵܘ̈ܗܝ: ܘܐܸܬ̣ܟܲܣܝܼ ܣܲܩܵܐ: ܘܥܲܠ̣ ܠܒܲܝܬܹ̇ܗ ܕܡܵܪܝܵܐ.

² ܘܫܲܕܲܪ ܠܐܸܠܝܵܩܝܼܡ ܪܲܒ̇ܒܲܝܬܵܐ: ܘܲܠܫܲܒ̣ܢܵܐ ܣܵܦܪܵܐ: ܘܲܠܣܵܒܹ̈ܐ ܕܟ݂ܵܗ̈ܢܹܐ ܟܲܕ݂ ܡܟܲܣܹܝܢ ܣܲܩܹ̈ܐ: ܠܘܵܬ̣ ܐܹܫܲܥܝܵܐ ܢܒ̣ܝܼܵܐ ܒܲܪ ܐܵܡܘܿܨ.

³ ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܚܹܙܲܩܝܵܐ: ܝܵܘܡܵܐ ܗ̄ܘ̣ ܕܐܘܼܠܨܵܢܵܐ: ܘܲܕ݂ܡܲܟ̇ܣܵܢܘܼܬ̣ܵܐ ܘܲܕ݂ܪܘܼܓ̣ܙܵܐ ܝܵܘܡܵܢܵܐ. ܡܸܛܠ ܕܡܲܛܝܼܘ ܚܸܒ̣̈ܠܹܐ ܕܲܒ̣ܢܲܝܵܐ: ܘܠܲܝܬ̇ ܚܲܝܠܵܐ ܒܝܵܠܹܕܬܵܐ.

⁴ ܛܵܟ݂ ܢܸܫܡܲܥ ܡܵܪܝܵܐ ܐܲܠܵܗܵܟ݂ ܡܸܠܵܘ̈ܗܝ ܕܪܲܒ̇ܫܵܩܹ̈ܐ: ܕܫܲܕ̇ܪܹܗ ܡܲܠܟܵܐ ܐܵܬ̣ܘܿܪܵܝܵܐ ܡܵܪܹܗ: ܠܲܡܚܲܣܵܕ݂ܘܼ ܠܐܲܠܵܗܵܐ ܚܲܝܵܐ: ܘܢܲܟ̇ܣܝܼܘܗܝ ܒܡܸܠܹ̈ܐ ܕܲܫ̣ܡܲܥ ܡܵܪܝܵܐ ܐܲܠܵܗܵܟ݂. ܘܬܸܒ̣ܥܸܐ ܘܲܬ̣ܨܲܠܹܐ ܥܲܠ ܫܲܪܟܵܐ ܕܐܸܫܬ̇ܚܲܪܘ.

⁵ ܘܐܸܬ̣ܵܘ ܥܲܒ̣ܕܵܘ̈ܗܝ ܕܡܲܠܟܵܐ ܚܹܙܲܩܝܵܐ ܠܘܵܬ̣ ܐܹܫܲܥܝܵܐ.

⁶ ܘܐܸܡܲܪ ܠܗܘܿܢ ܐܹܫܲܥܝܵܐ: ܗܵܟܲܢܵܐ ܬܹܐܡܪܘܼܢ ܠܡܵܪܟ݂ܘܿܢ: ܗܵܟܲܢܵܐ ܐܵܡܲܪ ܡܵܪܝܵܐ: ܠܵܐ ܬܸܕ݂ܚܲܠ ܡ̣ܢ ܩܕ݂ܵܡ ܡܸܠܹ̈ܐ ܕܲܫܡܲܥܬ̇: ܕܓܲܕܸ̇ܦܘ ܩܕ݂ܵܡܲܝ ܐܝܼܙܓܲܕܵܘ̈ܗܝ ܕܡܲܠܟܵܐ ܕܐܵܬ̣ܘܿܪ.

⁷ ܗܵܐ ܝܵܗܹ̇ܒ̣ ܐ̄ܢܵܐ ܒܹܗ ܪܘܼܚܵܐ. ܘܢܸܫܡܲܥ ܛܸܒܵܐ: ܘܢܸܗܦܘܿܟ݂ ܠܐܲܪܥܹܗ. ܘܐܲܪܡܹܝܘܗܝ ܒܚܲܪܒܵܐ ܒܐܲܪܥܹܗ.

⁸ ܘܲܗܦܲܟ݂ ܪܲܒ̇ܫܵܩܹ̈ܐ: ܘܐܸܫܟܲܚ ܠܡܲܠܟܵܐ ܕܐܵܬ̣ܘܿܪ ܟܲܕ݂ ܡܸܬ̣ܟܲܬܲܫ ܥܲܠ ܠܸܒ̣ܢܵܐ: ܡܸܛܠ ܕܲܫ̣ܡܲܥ ܕܲܫܩܲܠ ܡ̣ܢ ܠܟ݂ܝܼܫ.

⁹ ܘܲܫܡܲܥ ܥܲܠ ܬܲܪܗܲܩ ܡܲܠܟܵܐ ܕܟܘܼܫ: ܕܲܢܦܲܩ ܠܡܸܬ̣ܟܲܬܵܫܘܼ ܥܲܡܹܗ. ܘܲܗܦܲܟ݂: ܘܫܲܕܲܪ ܐܝܼܙܓܲـ̈ـܕܹ̇ܐ ܠܘܵܬ̣ ܚܹܙܲܩܝܵܐ: ܘܐܸܡܲܪ.

¹⁰ ܗܵܟܲܢܵܐ ܬܹܐܡܪܘܼܢ ܠܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܠܵܐ ܢܲܛܥܹܝܟ݂ ܐܲܠܵܗܵܟ݂ ܕܲܬ̣ܟ݂ܝܼܠ ܐܲܢ̄ܬ̇ ܥܠܵܘܗܝ: ܘܐܵܡܲܪ ܐܲܢ̄ܬ̇ ܕܠܵܐ ܡܸܫܬܲܠܡܵܐ ܐܘܿܪܸܫܠܸܡ ܒܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ.

¹¹ ܐܲܢ̄ܬ̇ ܫܡܲܥܬ̇ ܡܸܕܸ̇ܡ ܕܲܥܒܲܕ݂ܘ ܡܲܠ̈ܟܹ̇ܐ ܕܐܵܬ̣ܘܿܪ ܠܟ݂ܠܗܹܝܢ ܐܲܪ̈ܥܵܬ̣ܵܐ: ܘܐܲܚܪܸܒ̣ܘ ܐܸܢܹܝܢ: ܘܐܲܢ̄ܬ̇ ܡܸܬ̣ܦܲܨܹܐ ܐܲܢ̄ܬ̇.

¹² ܕܲܠܡܵܐ ܦܲܨܝܼܘ ܐܲܠܵܗܲܝ̈ܗܘܿܢ ܕܥܲܡܡܹ̈ܐ: ܕܲܚܪܲܒ̣ܘ ܐܲܒ̣ܵܗܲܝ̈: ܠܓ̣ܵܘܙܵܢ ܘܲܠܚܵܪܵܢ ܘܲܠܪܵܨܵܦ ܘܠܲܒ̣ܢܲܝ̈ ܥܕ݂ܢ ܕܲܒ̣ܕ݂ܵܠܵܣܵܪ.

¹³ ܐܲܝܟܵܘ ܡܲܠܟܵܐ ܕܲܚܡܵܬ̣: ܘܡܲܠܟܵܐ ܕܲܪܦܵܕ݂: ܘܡܲܠܟܵܐ ܕܲܩܪܝܼܬ̣ܵܐ ܣܦܲܪܘܹܝܡ: ܘܲܕ݂ܢܵܥ: ܘܲܕ݂ܥܵܘܵܐ.

¹⁴ ܘܲܢܣܲܒ̣ ܚܹܙܲܩܝܵܐ ܐܸܓܪ̈ܵܬ̣ܵܐ ܡ̣ܢ ܐܝܼܕ݂ܵܐ ܕܐܝܼܙܓܲـ̈ـܕܹ̇ܐ: ܘܲܩܪܵܐ ܐܸܢܹܝܢ. ܘܲܣܠܸܩ ܠܒܲܝܬܹ̇ܗ ܕܡܵܪܝܵܐ ܘܲܦܪܲܣ ܐܸܢܹܝܢ ܚܹܙܲܩܝܵܐ ܩܕ݂ܵܡ ܡܵܪܝܵܐ.

¹⁵ ܘܨܲܠܝܼ ܚܹܙܲܩܝܵܐ ܩܕ݂ܵܡ ܡܵܪܝܵܐ ܘܐܸܡܲܪ: ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܕܝܵܬܹܒ̣ ܥܲܠ ܟܪ̈ܘܿܒܹܐ. ܐܲܢ̄ܬ̇ ܗ̄ܘ̣ ܐܲܠܵܗܵܐ ܒܲܠܚܘܿܕܲܝܟ ܥܲܠ ܟܠܗܹܝܢ ܡܲܠ̈ܟ̇ܘܵܬ̣ܵܐ ܕܐܲܪܥܵܐ. ܐܲܢ̄ܬ̇ ܥܒܲܕ̇ܬ̇ ܫܡܲܝܵܐ ܘܐܲܪܥܵܐ.

¹⁶ ܨܠܝܼ ܡܵܪܝܵܐ ܐܸܕ݂ܢܵܟ݂: ܘܲܫܡܲܥ ܦܬܲܚ ܡܵܪܝܵܐ ܥܲܝܢܲܝ̈ܟ: ܘܲܚܙܝܼ ܘܲܫܡܲܥ ܟܠܗܹܝܢ ܡܸܠܵܘ̈ܗܝ ܕܣܲܢܚܹܝܪܝܼܒ̣ ܕܲܫܠܲܚ̣ ܠܲܡܚܲܣܵܕ݂ܘܼ ܠܐܲܠܵܗܵܐ ܚܲܝܵܐ.

¹⁷ ܫܲܪܝܼܪܵܐܝܼܬ̣ ܡܵܪܝܵܐ ܚܪܲܒ̣ܘ ܡܲܠ̈ܟܹ̇ܐ ܕܐܵܬ̣ܘܿܪ ܥܲܡܡܹ̈ܐ ܘܐܲܪ̈ܥܵܬ̣ܗܘܿܢ.

¹⁸ ܘܐܲܠܵܗܲܝ̈ܗܘܿܢ ܐܵܘܩܸܕ݂ܘ ܒܢܘܼܪܵܐ. ܡܸܛܠ ܕܠܵܐ ܗܘ̤ܵܘ ܐܲܠܵܗܹ̈ܐ: ܐܸܠܵܐ ܥܒ̣ܵܕ݂ ܐܝܼ̈ܕܲܝܵܐ ܕܲܒ̣ܢܲܝ̈ܢܵܫܵܐ: ܕܩܲܝܣܵܐ ܘܲܕ݂ܟܹܐܦܵܐ. ܘܐܵܘܒܸ̇ܕ݂ܘ ܐܸܢܘܿܢ.

¹⁹ ܘܗܵܫܵܐ ܡܵܪܝܵܐ ܐܲܠܵܗܲܢ: ܦܪܘܿܩܲܝܢ ܡ̣ܢ ܐܝܼܕ݂ܵܘ̈ܗܝ. ܕܢܸ̈ܕܥܵܢ ܟܠܗܹܝܢ ܡܲܠ̈ܟ̇ܘܵܬ̣ܵܐ ܕܐܲܪܥܵܐ: ܕܐܲܢ̄ܬ̇ܘܼ ܡܵܪܝܵܐ ܐܲܠܵܗܵܐ ܒܲܠܚܘܿܕܲܝܟ.

²⁰ ܘܲܫܠܲܚ ܐܹܫܲܥܝܵܐ ܒܲܪ ܐܵܡܘܿܨ ܠܚܹܙܲܩܝܵܐ: ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡܸܕܸ̇ܡ ܕܨܲܠܝܼܬ̇ ܩܕ݂ܵܡܲܝ ܥܲܠ ܣܲܢܚܹܝܪܝܼܒ̣ ܡܲܠܟܵܐ ܕܐܵܬ̣ܘܿܪ: ܫܸܡ̇ܥܹܬ̣.

²¹ ܗܵܢܵܐ ܗ̄ܘ̣ ܦܸܬ̣ܓ̣ܵܡܵܐ ܕܐܸܡܲܪ ܥܠܵܘܗܝ ܡܵܪܝܵܐ: ܫܸܝ̇ܛܵܐ ܠܵܟ݂ ܘܲܡܡܲܝܩܵܐ ܒܵܟ݂ ܒܬ̣ܘܼܠܬܵܐ ܒܲܪܬ̣ ܨܸܗܝܘܿܢ: ܘܒ̣ܵܬ̣ܪܵܟ݂ ܡܢܝܼܕ݂ܵܐ ܪܹܫܵܗ̇ ܒܲܪܬ̣ ܐܘܿܪܸܫܠܸܡ.

²² ܠܡ̇ܢ ܚܲܣܕ̇ܬ̇: ܘܲܩܕ݂ܵܡ ܡ̇ܢ ܓ̇ܕܸ̇ܦܬ̇. ܘܥܲܠ ܡ̇ܢ ܐܲܪܝܼܡܬ̇ ܩܵܠܵܟ݂ ܐܲܪܝܼܡܬ̇ ܥܲܝܢܲܝ̈ܟ ܠܲܡܪܵܘܡܵܐ ܥܲܠ ܩܲܕ̇ܝܼܫܵܐ ܕܝܼܣܪܵܝܹܠ.

²³ ܘܒ̣ܐܝܼܕ݂ܵܐ ܕܐܝܼܙܓܲܕܲܝ̈ܟ ܚܲܣܕ̇ܬ̇ ܠܡܵܪܝܵܐ. ܘܐܸܡܪܬ̇ ܕܲܒ̣ܣܘܼܓ̣ܵܐܐ ܕܡܲܪ̈ܟ̇ܒ̣ܵܬ̣ܵܝ: ܐܸܢܵܐ ܐܸܣܲܩ ܠܪܵܘܡܵܐ ܕܛܘܼܪܹ̈ܐ: ܘܠܲܫܦܘܿܠܵܘ̈ܗܝ ܕܠܸܒ̣ܢܵܢ. ܘܐܸܦܣܘܿܩ ܩܵܘ̈ܡܵܬ̣ܵܐ ܕܐܲܪ̈ܙܘܗܝ: ܘܲܓܒܲـ̈ـܝܵܐ ܕܫܲܪ̈ܘܲܝܢܵܘܗܝ ܘܐܸܥܘܿܠ ܠܪܵܘܡܵܐ ܕܣܵܟܹܗ ܕܥܵܒ̣ܵܐ ܕܟܲܪܡ̄ܠܵܐ.

²⁴ ܐܸܢܵܐ ܐܸܚܦܘܿܪ: ܘܐܸܫܬܸ̇ܐ ܡܲـ̈ـܝܵܐ ܢܘܼܟ݂ܪ̈ܵܝܹܐ. ܘܐܵܘܒܸ̇ܫ ܒܦܲܪ̈ܣܵܬ̣ܵܐ ܕܪ̈ܲܟ݂ܫ̄ܝ: ܟܠܗܘܿܢ ܢܗܪ̈ܵܘܵܬ̣ܵܐ ܥܲܫܝܼܢܹ̈ܐ.

²⁵ ܠܵܐ ܫܡܲܥܬ̇ ܡ̣ܢ ܪܘܼܚܩܵܐ ܠܵܗ̇ ܥܸܒ̣ܕܹ̇ܬ̣: ܘܡ̣ܢ ܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ ܠܵܗ̇ ܥܲܬ̇ܕܹ̇ܬ̣ ܘܗܵܫܵܐ ܐܝܼܬ̇ܝܼܬܵܗ̇ ܕܬܸܗܘܹܐ ܠܚܘܼܪܒܵܐ ܘܲܠܨܕ݂ܝܵܐ: ܐܲܝܟ݂ ܡܕ݂ܝܼ̈ܢܵܬ̣ܵܐ ܥܲܫܝܼ̈ܢܵܬ̣ܵܐ.

²⁶ ܕܝܲܬܵܒܲܝ̈ܗܹܝܢ ܙܥܲܪ ܚܲܝ̱ܠܗܘܿܢ: ܘܐܸܬ̇ܬ̇ܒܲܪܘ ܘܲܒ̣ܗܸܬ̣ܘ ܘܲܗܘ̤ܵܘ ܐܲܝܟ݂ ܥܸܣܒܵܐ ܕܚܲܩܠܵܐ: ܘܐܲܝܟ݂ ܝܘܼܪܵܩܵܐ ܕܬܸܕܐܵܐ: ܘܐܲܝܟ݂ ܥܡܝܼܪܵܐ ܕܐܸܓܵܪܵܐ: ܘܐܲܝܟ݂ ܒܘܼܚܫܝܼܢܵܐ ܩܕ݂ܵܡ ܩܵܝܑܹܡܬ̣ܵܐ.

²⁷ ܡܵܘܬ̇ܒ̣ܵܟ݂ ܘܡܲܥܠܵܟ݂ ܘܡܲܦܩܵܟ݂ ܝܵܕܲܥ ܐ̄ܢܵܐ. ܘܕܸܐܬ̣ܪܵܘܪܲܒ̣ܬ̇ ܥܠܲܝ: ܥܲܠ ܕܐܲܡܪܲܚܬ̇ ܘܐܸܬ̣ܪܵܘܪܲܒ̣ܬ̇ ܥܠܲܝ.

²⁸ ܘܓ̣ܘܼܕܵܦܵܟ݂ ܣܠܸܩ ܒܐܸܕ݂ܢܲܝ̈ ܐܲܪܡܸܐ ܩܠܵܕ݂ܵܐ ܒܲܢܚܝܼܪܵܟ݂: ܘܲܒ̣ܠܵܡܵܐ ܒܣܸܦ̈ܘܵܬ̣ܵܟ݂ ܘܐܲܗܦܟ݂ܵܟ݂ ܒܐܘܼܪܚܵܐ ܕܐܸܬܲܝܬ̇ ܒܵܗ̇.

²⁹ ܘܗܵܕܹܐ ܐܵܬ̤ܵܐ ܬܸܗܘܹܐ ܠܵܟ݂: ܐܵܟܹ̇ܠ ܐܲܢ̄ܬ̇ ܫܲܢ̄ܬܵܐ ܗܵܕܹܐ ܟܵܬ̣ܵܐ. ܘܫܲܢ̄ܬܵܐ ܕܬܲܪܬܹ̇ܝܢ: ܟܵܬ̣ ܟܵܬ̣ܵܐ. ܘܫܲܢ̄ܬܵܐ ܬܠܝܼܬ̣ܵܝܬܵܐ: ܙܵܪܘܿܥܘ ܘܲܚܨܘܿܕ݂ܘ: ܘܨܘܿܒ̣ܘ ܟܲܪ̈ܡܹܐ: ܘܐܲܟ݂ܘܿܠܘ ܦܹܐܪ̈ܲܝܗܘܿܢ.

³⁰ ܘܢܵܘܣܦܘܼܢ ܫܲܪܟܵܐ ܕܒܹܝܬ̣ ܝܼܗܘܼܕ݂ܵܐ. ܕܐܸܫܬ̇ܚܲܪܘ: ܫܵܕܹܝܢ ܥܸܩܵܪܵܐ ܠܬܲܚܬ̇: ܘܥܵܒ̣ܕ̇ܝܼܢ ܦܹܐܪܹ̈ܐ ܠܥܸܠ.

³¹ ܡܸܛܠ ܕܡ̣ܢ ܐܘܿܪܸܫܠܸܡ ܢܸܦܘܿܩ ܫܲܪܟܵܢܵܐ: ܘܦܘܼܠܵܛܵܐ ܡ̣ܢ ܛܘܼܪܵܐ ܕܨܵܗܝܘܿܢ. ܩܸܢ̱ܐܬܹܗ ܕܡܵܪܝܵܐ ܚܲܝܠܬ̣ܵܢܵܐ ܬܸܥܒܸ̇ܕ݂ ܗܵܕܹܐ.

³² ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܥܲܠ ܡܲܠܟܵܐ ܕܐܵܬ̣ܘܿܪ: ܠܵܐ ܢܸܥܘܿܠ ܠܲܩܪܝܼܬ̣ܵܐ ܗܵܕܹܐ: ܘܠܵܐ ܢܸܫܕܹ̇ܐ ܬܲܡܵܢ ܓܹܐܪܵܐ: ܘܠܵܐ ܢܩܲܕ̇ܡܝܼܗ̇ ܒܣܲܟ̇ܪܵܐ: ܘܠܵܐ ܢܲܟ݂ܡܸܢ ܥܠܹܝܗ̇ ܟܡܹܐܢܵܐ.

³³ ܐܸܠܵܐ ܒܐܘܼܪܚܵܐ ܕܐܸܬ̣ܵܐ ܒܵܗ̇: ܢܸܗܦܘܿܟ݂ ܘܠܲܩܪܝܼܬ̣ܵܐ ܗܵܕܹܐ ܠܵܐ ܢܸܥܘܿܠ: ܐܵܡܲܪ ܡܵܪܝܵܐ.

³⁴ ܘܐܲܓܸ̇ܢ ܥܲܠ ܩܪܝܼܬ̣ܵܐ ܗܵܕܹܐ ܘܐܸܦ̱ܪܩܝܼܗ̇: ܡܸܛܠܵܬ̣ܝ ܘܡܸܛܠ ܕܵܘܝܼܕ݂ ܥܲܒ̣ܕܝ.

³⁵ ܘܲܗܘ̤ܵܐ ܒܠܸܠܝܵܐ ܗܵܘ̇: ܘܲܢܦܲܩ ܡܲܠܲܐܟܹܗ ܕܡܵܪܝܵܐ: ܘܩܲܛܸܠ ܒܡܲܫܪܝܼܬܹܗ ܕܐܵܬ̣ܘܿܪܵܝܵܐ: ܡܵܐܐ ܘܲܬ̣ܡܵܢܐܝܼܢ ܘܚܲܡܫܵܐ ܐܲܠܦ̈ܝܼܢ. ܘܩܲܕܸ̇ܡ̣ܘ ܒܨܲܦܪܵܐ ܘܚܵܙܹ̇ܝܢ: ܘܗܵܐ ܟܠܗܘܿܢ ܦܲܓ̣ܪܹ̈ܐ ܡܝܼ̈ܬܹܐ.

³⁶ ܘܲܫܩܲܠܘ ܘܐܸܙܲܠܘ ܘܲܗܦܲܟ݂ ܣܲܢܚܹܝܪܝܼܒ̣ ܡܲܠܟܵܐ ܕܐܵܬ̣ܘܿܪ: ܘܝܼܬܸܒ̣ ܒܢܝܼܢܘܹܐ.

³⁷ ܘܟܲܕ݂ ܣܵܓܹܕ݂ ܗ̄ܘ̣ܵܐ ܒܹܝܬ̣ ܢܲܣܪܵܟ݂ ܐܲܠܵܗܹܗ: ܐܲܕܲܪܡܲܠܟ ܘܫܵܪܵܐܨܵܪ ܒܢܵܘ̈ܗܝ ܩܲܛܠܘܼܗܝ ܒܚܲܪܒܵܐ. ܗܸܢܘܿܢ ܐܸܬ̣ܦܲܠܲܛܘ ܠܐܲܪܥܵܐ ܕܐܲܪܕ݂ܵܛ. ܘܐܲܡ̣ܠܸܟ݂ ܣܲܪܚܲܕ̇ܘܿܡ ܒܪܹܗ ܒܵܬ̣ܪܹܗ.

20

¹ ܒܝܵܘ̈ܡܵܬ̣ܵܐ ܗܵܢܘܿܢ ܐܸܬ̣ܟ̇ܪܲܗ̇ ܚܹܙܲܩܝܵܐ ܠܲܡܡܵܬ̣. ܘܐܸܬ̣ܵܐ ܠܘܵܬܹܗ ܐܹܫܲܥܝܵܐ ܢܒ̣ܝܼܵܐ ܒܲܪ ܐܵܡܘܿܨ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ. ܦܲܩܸܕ݂ ܥܲܠ ܒܲܝܬܵܟ݂: ܡܸܛܠ ܕܡܵܐܹ̇ܬ̣ ܐܲܢ̄ܬ̇: ܘܠܵܐ ܚܵܝܹܐ ܐܲܢ̄ܬ̇.

² ܘܐܲܦܢܝܼ ܚܹܙܲܩܝܵܐ ܐܲܦܵܘ̈ܗܝ ܠܐܸܣܬ̣ܵܐ: ܘܨܲܠܝܼ ܩܕ݂ܵܡ ܡܵܪܝܵܐ: ܘܐܸܡܲܪ.

³ ܐܘܿܢ ܡܵܪܝܵܐ ܐܸܬ̇ܕܲܟ݂ܪ ܕܗܲܠܟܹ̇ܬ̣ ܩܕ݂ܵܡܲܝܟ ܒܩܘܼܫܬܵܐ ܘܲܒ̣ܠܒܵܐ ܫܲܠܡܵܐ. ܘܲܕ݂ܫܲܦܝܼܪ ܩܕ݂ܵܡܲܝܟ ܥܸܒ̣ܕܹ̇ܬ̣. ܘܲܒ̣ܟܵܐ ܚܹܙܲܩܝܵܐ ܒܟ݂ܵܬ̣ܵܐ ܪܲܒ̇ܬ̣ܵܐ.

⁴ ܘܐܹܫܲܥܝܵܐ ܠܵܐ ܢܦܲܩ̣ ܗ̄ܘ̣ܵܐ ܠܕ݂ܵܪܬܵܐ ܡܸܨܥܵܝܬܵܐ. ܘܦܸܬ̣ܓ̣ܵܡܹܗ ܕܡܵܪܝܵܐ ܗܘ̤ܵܐ ܥܠܵܘܗܝ ܠܡܹܐܡܲܪ.

⁵ ܗܦܘܿܟ݂ ܘܐܸܡܲܪ ܠܚܹܙܲܩܝܵܐ ܡܕܲܒ̇ܪܵܢܹܗ ܕܥܲܡܝ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܹܗ ܕܕ݂ܵܘܝܼܕ݂ ܐܲܒ̣ܘܼܟ݂: ܫܸܡܥܲܬ̇ ܨܠܘܿܬ̣ܵܟ݂: ܘܲܚܙܹ̇ܝܬ̣ ܕܸܡܥܲܝ̈ܟ. ܗܵܐ ܡܲܐܣܸܐ ܐ̄ܢܵܐ ܠܵܟ݂. ܘܲܒ̣ܝܵܘܡܵܐ ܬܠܝܼܬ̣ܵܝܵܐ ܬܸܣܲܩ ܠܒܲܝܬܹ̇ܗ ܕܡܵܪܝܵܐ.

⁶ ܘܐܵܘܣܸܦ ܥܲܠ ܝܵܘ̈ܡܵܬ̣ܵܟ݂ ܚܲܡܫܲܥܸܣܪܹ̈ܐ ܫܢ̈ܝܼܢ. ܘܡ̣ܢ ܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ ܐܹܦܲܨܹܝܟ݂: ܘܠܲܩܪܝܼܬ̣ܵܐ ܗܵܕܹܐ. ܘܐܲܓܸ̇ܢ ܥܲܠ ܩܪܝܼܬ̣ܵܐ ܗܵܕܹܐ: ܘܐܲܦܪ̱ܩܝܼܗ̇: ܡܸܛܠܵܬ̣ܝ: ܘܡܸܛܠ ܕܵܘܝܼܕ݂ ܥܲܒ̣ܕ̇ܝ.

⁷ ܘܐܸܡܲܪ ܐܹܫܲܥܝܵܐ: ܢܸܣܒ̣ܘܼܢ ܕܒܲܠܬ̣ܵܐ ܕܬܹܐܢܹ̈ܐ: ܘܲܢܣܝܼܡܘܼܢ ܥܲܠ ܫܘܼܚܢܵܐ ܘܡܸܬ̣ܚ̱ܠܸܡ.

⁸ ܘܐܸܡܲܪ ܚܹܙܲܩܝܵܐ ܠܐܹܫܲܥܝܵܐ: ܡܵܢܲܐ ܗ̄ܝ̣ ܐܵܬ̤ܵܐ ܕܡܲܐܣܸܐ ܠܝܼ ܡܵܪܝܵܐ: ܘܣܵܠܹܩ ܐ̄ܢܵܐ ܒܝܵܘܡܵܐ ܬܠܝܼܬ̣ܵܝܵܐ ܠܒܲܝܬܹ̇ܗ ܕܡܵܪܝܵܐ.

⁹ ܘܐܸܡܲܪ ܐܹܫܲܥܝܵܐ: ܗܵܕܲܐ ܗ̄ܝ̣ ܠܵܟ݂ ܐܵܬ̤ܵܐ ܡ̣ܢ ܩܕ݂ܵܡ ܡܵܪܝܵܐ: ܕܢܸܥܒܸ̇ܕ݂ ܡܵܪܝܵܐ ܦܸܬ̣ܓ̣ܵܡܵܐ ܕܐܸܡܲܪ: ܢܗܲܠܸܟ݂ ܛܸܠܵܠܵܐ ܥܸܣܪܵܐ ܕܲܪ̈ܓ̣ܝܼܢ: ܐܵܘ ܢܸܗܦܘܿܟ݂ ܥܸܣܪܵܐ ܕܲܪ̈ܓ̣ܝܼܢ.

¹⁰ ܘܐܸܡܲܪ ܚܹܙܲܩܝܵܐ: ܒܨܝܼܪܵܐ ܗ̄ܝ̣ ܗܵܕܹܐ ܕܲܢܗܲܠܸܟ݂ ܛܸܠܵܠܵܐ ܥܸܣܪܵܐ ܕܲܪ̈ܓ̣ܝܼܢ. ܠܵܐ ܗܵܟܲܢܵܐ: ܐܸܠܵܐ ܢܸܗܦܘܿܟ݂ ܛܲܠܵܠܵܐ ܠܒܸܣܬ̇ܪܹܗ ܥܸܣܪܵܐ ܕܲܪ̈ܓ̣ܝܼܢ.

¹¹ ܘܲܩܪܵܐ ܐܹܫܲܥܝܵܐ ܢܒ̣ܝܼܵܐ ܠܡܵܪܝܵܐ: ܘܲܗܦܲܟ݂ ܛܸܠܵܠܵܐ ܒܕܲܪ̈ܓܹܐ: ܕܲܢܚܸܬ̣ ܒܕܲܪ̈ܓܹܐ ܕܐܵܚܵܙ: ܫܸܡܫܵܐ ܠܒܸܣܬ̇ܪܹܗ ܥܸܣܪܵܐ ܕܲܪܓ̣ܝܼܢ.

¹² ܒܙܲܒ̣ܢܵܐ ܗܵܘ̇: ܫܲܕܲܪ ܡܪܘܿܕ݂ܵܟ݂ ܒܠܕܵܢ ܒܲܪ ܒܸܠܕܵܢ ܡܲܠܟܵܐ ܕܒ̣ܵܒܹܠ: ܐܸܓܪ̈ܵܬ̣ܵܐ ܘܩܘܼܪ̈ܒܵܢܹܐ ܠܚܹܙܲܩܝܵܐ: ܟܲܕ݂ ܫ̣ܡܲܥ ܕܐܸܬ̣ܟ̇ܪܲܗ̇ ܚܹܙܲܩܝܵܐ ܘܲܚܝܵܐ.

¹³ ܘܲܚܕ݂ܝܼ ܒܗܘܿܢ ܚܹܙܲܩܝܵܐ ܘܚܵܘܝܼ ܐܸܢܘܿܢ ܒܹܝܬ̣ ܓܲܙܹܗ: ܟܸܣܦܵܐ ܘܕܲܗܒ̣ܵܐ: ܘܒܸܣܡܹ̈ܐ: ܘܡܸܫܚܵܢܹ̈ܐ ܛܵܒܹ̈ܐ: ܘܟ݂ܠܹܗ ܒܹܝܬ̣ ܡܵܐܢܵܘ̈ܗܝ: ܘܟ݂ܠ ܕܐܸܫܬ̇ܟܲܚ ܒܹܝܬ̣ ܓܲܙܵܘ̈ܗܝ ܘܠܵܐ ܫܒܲܩ ܡܸܕܸ̇ܡ ܚܹܙܲܩܝܵܐ ܕܠܵܐ ܚܵܘܝܼ ܐܸܢܘܿܢ: ܒܒܲܝܬܹ̇ܗ ܘܲܒ̣ܟ݂ܠܹܗ ܒܹܝܬ̣ ܫܘܼܠܛܵܢܹܗ.

¹⁴ ܘܐܸܬ̣ܵܐ ܐܹܫܲܥܝܵܐ ܢܒ̣ܝܼܵܐ ܠܘܵܬ̣ ܚܹܙܲܩܝܵܐ ܡܲܠܟܵܐ: ܘܐܸܡܲܪ ܠܹܗ: ܡܵܢܵܐ ܐܸܡܲܪܘ ܠܵܟ݂ ܗܵܠܹܝܢ ܓܲܒ̣ܪܹ̈ܐ: ܘܡ̣ܢ ܐܲܝܡܸܟܵܐ ܐܸܬ̣ܵܘ ܠܘܵܬ̣ܵܟ݂ ܘܐܸܡܲܪ ܚܹܙܲܩܝܵܐ: ܡ̣ܢ ܐܲܪܥܵܐ ܪܲܚܝܼܩܬܵܐ ܡ̣ܢ ܒܵܒܹܠ ܐܸܬ̣ܵܘ ܠܘܵܬ̣ܝ.

¹⁵ ܘܐܸܡܲܪ ܡܵܢܵܐ ܚܙܵܘ ܒܒܲܝܬܵܟ݂ ܘܐܸܡܲܪ ܚܹܙܲܩܝܵܐ: ܟܠ ܐܝܼܬ̣ ܒܒܲܝܬ̇ܝ ܚܙܵܘ. ܘܠܵܐ ܫܸܒ̣ܩܹ̇ܬ̣ ܡܸܕܸ̇ܡ ܒܒܲܝܬ̇ܝ: ܕܠܵܐ ܚܵܘܝܼܬ̣ ܐܸܢܘܿܢ ܒܓܲܙܝܼ.

¹⁶ ܘܐܸܡܲܪ ܐܹܫܲܥܝܵܐ ܠܚܹܙܲܩܝܵܐ: ܫܡܲܥ ܦܸܬ̣ܓ̣ܵܡܹܗ ܕܡܵܪܝܵܐ.

¹⁷ ܗܵܐ ܝܵܘ̈ܡܵܬ̣ܵܐ ܐܵܬܹܝܢ: ܘܢܸܫܬ̇ܩܸܠ ܟܠ ܕܐܝܼܬ̣ ܒܒܲܝܬܵܟ݂. ܘܓܲܙܵܐ ܕܲܢܛܲܪܘ ܐܲܒ̣ܵܗܲܝ̈ܟ ܥܕܲܡܵܐ ܠܝܵܘܡܵܢܵܐ ܠܒ̣ܵܒܹܠ ܢܹܐܙܲܠ. ܘܡܸܕܸ̇ܡ ܠܵܐ ܢܸܫܬ̇ܒܸܩ ܠܵܟ݂: ܐܵܡܲܪ ܡܵܪܝܵܐ.

¹⁸ ܘܡ̣ܢ ܒܢܲܝ̈ܟ ܕܢܵܦܩܝܼܢ ܡܸܢܵܟ݂: ܕܡܵܘܠܸܕ݂ ܐܲܢ̄ܬ̇: ܢܸܬ̇ܕܲܒ̣ܪܘܼܢ: ܘܢܸܗܘܘܿܢ ܡܗܲܝܡ̈ܢܹܐ ܒܗܲܝܟ̇ܠܵܐ ܕܡܲܠܟܵܐ ܕܒ̣ܵܒܹܠ.

¹⁹ ܘܐܸܡܲܪ ܚܹܙܲܩܝܵܐ ܠܐܹܫܲܥܝܵܐ: ܛܵܒ̣ ܦܸܬ̣ܓ̣ܵܡܹܗ ܕܡܵܪܝܵܐ ܕܐܸܡܲܪܬ̇. ܘܐܸܡܲܪ: ܐܸܫܬܘܿܦ ܕܹܝܢ ܢܸܗܘܹܐ ܫܠܵܡܵܐ ܘܩܘܼܫܬܵܐ ܒܝܵܘ̈ܡܲܝ.

²⁰ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܚܹܙܲܩܝܵܐ ܘܟ݂ܠܵܗ̇ ܓܲܢ̄ܒܵܪܘܼܬܹܗ: ܘܕܲܥܒܲܕ݂: ܝܼܡܬ̣ܵܐ ܘܚܹܐܪܝܼܬ̣ܵܐ: ܘܐܲܥܸܠ ܡܲـ̈ـܝܵܐ ܠܲܩܪܝܼܬ̣ܵܐ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ.

²¹ ܘܲܫܟܸܒ̣ ܚܹܙܲܩܝܵܐ ܥܲܡ ܐܲܒ̣ܵܗܵܘ̈ܗܝ: ܘܐܲܡܠܸܟ݂ ܡܢܲܫܹܐ ܒܪܹܗ ܒܵܬ̣ܪܹܗ.

21

¹ ܒܲܪ ܬܲܪܬܲܥܸܣܪܹ̈ܐ ܗ̄ܘ̣ܵܐ ܫܢ̈ܝܼܢ ܡܢܲܫܹܐ ܟܲܕ݂ ܐܲܡ̣ܠܸܟ݂. ܘܚܲܡܫܝܼܢ ܘܚܲܡܸܫ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ. ܘܲܫܡܵܗ̇ ܕܐܸܡܹܗ ܚܲܒ̣ܨܝܼܒ̣ܵܗ̇.

² ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܛܲܢܦ̈ܘܵܬ̣ܵܐ ܕܥܲܡܡܹ̈ܐ ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ.

³ ܘܲܗܦܲܟ݂ ܘܲܒ̣ܢܵܐ ܥ̈ܠܵܘܵܬ̣ܵܐ ܕܲܥܩܲܪ ܚܹܙܲܩܝܵܐ ܐܲܒ̣ܘܼܗܝ ܘܐܲܩܝܼܡ ܡܲܕ݂ܒ̇ܚܹ̈ܐ ܠܒܲܥܠܵܐ. ܘܲܥܒܲܕ݂ ܕܸܚ̈ܠܵܬ̣ܵܐ ܐܲܝܟ݂ ܕܲܥܒܲܕ݂ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ. ܘܲܣܓܸܕ݂ ܠܟ݂ܠ ܚܲܝ̈ܠܹܐ ܕܲܫܡܲܝܵܐ: ܘܲܦܠܲܚ ܐܸܢܘܿܢ.

⁴ ܘܲܒ̣ܢܵܐ ܡܲܕ݂ܒ̇ܚܹ̈ܐ ܒܒܲܝܬܹ̇ܗ ܕܡܵܪܝܵܐ ܕܐܸܡܲܪ ܥܠܵܘܥܝ ܡܵܪܝܵܐ: ܕܒ̣ܐܘܿܪܸܫܠܸܡ ܐܹܣܝܼܡ ܫܹܡܝ.

⁵ ܘܲܒ̣ܢܵܐ ܡܲܕ݂ܒ̇ܚܹ̈ܐ ܠܟ݂ܠ ܚܲܝ̈ܠܹܐ ܕܲܫܡܲܝܵܐ: ܒܬܲܪܬܹ̇ܝܢ ܕܵܪܹ̈ܐ ܕܒܲܝܬܹ̇ܗ ܕܡܵܪܝܵܐ.

⁶ ܘܐܲܥܒܲܪ ܒܪܹܗ ܒܢܘܼܪܵܐ: ܘܲܩܨܲܡ: ܘܢܲܚܸܫ: ܘܲܥܒܲܕ݂ ܙܲܟܘܼܪܹ̈ܐ ܘܝܲܕ̇ܘܼ̈ܥܹܐ. ܘܐܲܣܓܝܼ ܠܡܸܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ ܠܡܲܪܓܵܙܘܼܬܹܗ.

⁷ ܘܣܵܡ ܠܨܲܠܡܵܐ ܕܕܸܚ̱ܠܬ̣ܵܐ ܕܲܥܒܲܕ݂ ܒܒܲܝܬܵܐ ܕܐܸܡܲܪ ܡܵܪܝܵܐ ܠܕ݂ܵܘܝܼܕ݂ ܘܠܲܫܠܹܝܡܘܿܢ ܒܪܹܗ: ܒܒܲܝܬܵܐ ܗܵܢܵܐ ܘܒ̣ܐܘܿܪܸܫܠܸܡ ܕܲܓܒܹܝܬ̣ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܐܹܣܝܼܡ ܫܹܡܝ ܬܲܡܢ ܠܥܵܠܲܡ.

⁸ ܘܠܵܐ ܐܵܘܣܸܦ ܬܘܼܒ̣ ܠܲܡܢܵܕܲܘ ܪܸܓ̣ܠܹܗ ܕܝܼܣܪܵܝܹܠ: ܡ̣ܢ ܐܲܪܥܵܐ ܕܝܸܗ̄ܒܹܬ̣ ܠܐܲܒ̣ܵܗܲܝ̈ܗܘܿܢ. ܒܲܠܚܘܿܕ݂ ܐܸܢ ܢܸܛܪܘܿܢ ܘܢܸܥܒ̇ܕ݂ܘܼܢ ܟܠܡܸܕܸ̇ܡ ܕܦܲܩܕܹܬ̣ ܐܸܢܘܿܢ: ܘܟ݂ܠ ܢܵܡܘܿܣܵܐ ܕܦܲܩܸܕ݂ ܐܸܢܘܿܢ ܥܲܒ̣ܕ̇ܝ ܡܘܼܫܹܐ.

⁹ ܘܠܵܐ ܫ̣ܡܲܥܘ: ܘܐܲܛܥܝܼ ܐܸܢܘܿܢ ܡܢܲܫܹܐ. ܘܲܥܒܲܕ݂ܘ ܕܒ̣ܝܼܫ ܡ̣ܢ ܥܲܡܡܹ̈ܐ ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ.

¹⁰ ܘܐܸܡܲܪ ܡܵܪܝܵܐ ܒܐܝܼܕ݂ܵܐ ܕܥܲܒ̣ܕܵܘ̈ܗܝ ܢܒ̣ܝܹ̈ܐ.

¹¹ ܥܲܠ ܕܲܥܒܲܕ݂ ܡܢܲܫܹܐ ܒܲܪ ܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ ܥܒ̣ܵܕܹ̈ܐ ܗܵܠܹܝܢ: ܘܐܲܒ̣ܐܸܫ ܡ̣ܢ ܟܠ ܕܲܥܒܲܕ݂ܘ ܐܵܡܘܿܪ̈ܵܝܹܐ ܕܲܩܕ݂ܵܡܵܘܗܝ: ܘܐܲܚܛܝܼ ܠܲܝܗܘܼܕ݂ܵܐ ܒܲܦܬܲܟ݂ܪ̈ܵܘܗܝ.

¹² ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܡܲܝܬܹ̇ܐ ܐ̄ܢܵܐ ܒܝܼܫܬܵܐ ܥܲܠ ܝܼܗܘܼܕ݂ܵܐ ܘܥܲܠ ܐܘܿܪܸܫܠܸܡ. ܕܟ݂ܠ ܕܢܸܫ̱ܡܥܝܼܗ̇: ܢܸܨ̈ܠܵܢ ܬܲܪ̈ܬܲܝܗܹܝܢ ܐܸܕ݂ܢܵܘ̈ܗܝ.

¹³ ܘܐܲܪܡܸܐ ܥܲܠ ܐܘܿܪܸܫܠܸܡ ܚܘܼܛܵܐ ܕܫܵܡ̇ܪܹܝܢ: ܘܡܲܬ̣ܩܘܼܠܬܵܐ ܕܒܹܝܬ̣ ܐܵܚܵܒ̣. ܘܐܸܡܚܹܐ ܠܐܘܿܪܸܫܠܸܡ: ܘܐܵܘܒ̇ܕܹܝܼܗ̇: ܡܸܛܠ ܟܠܵܗ̇ ܛܲܢܦܘܼܬ̣ܵܐ ܕܲܥܒܲܕ݂ ܡܢܲܫܹܐ ܒܲܝܗܘܼܕ݂ܵܐ.

¹⁴ ܘܐܸܫܒ̇ܘܿܩ ܫܲܪܟܵܐ ܕܝܵܪܬ̇ܘܼܬ̣ܝ ܘܐܲܫܠܸܡ ܐܸܢܘܿܢ ܒܐܝܼܕ݂ܵܐ ܕܲܒ̣ܥܸܠܕ̇ܒ̣ܵܒܲܝ̈ܗܘܿܢ ܘܢܸܗܘܘܿܢ ܠܒܸܙܬ̣ܵܐ ܘܠܲܕ݂ܝܵܫܵܐ ܠܟ݂ܠܗܘܿܢ ܒܥܸܠܕ̇ܒ̣ܵܒܲܝ̈ܗܘܿܢ.

¹⁵ ܥܲܠ ܕܲܥܒܲܕ݂ܘ ܒܝܼܫܬܵܐ ܩܕ݂ܵܡܲܝ: ܘܲܗܘ̤ܵܘ ܡܲܪܓ̇ܙܝܼܢ ܠܝܼ: ܡ̣ܢ ܝܵܘܡܵܐ ܕܲܢܦܲܩ̣ܘ ܐܲܒ̣ܵܗܲܝ̈ܗܘܿܢ ܡ̣ܢ ܡܸܨܪܹܝܢ ܘܲܥܕܲܡܵܐ ܠܝܵܘܡܵܢܵܐ.

¹⁶ ܘܐܵܦ ܕܡܵܐ ܙܲܟܵܝܵܐ ܐܸܫܲܕ݂ ܡܢܲܫܹܐ ܣܘܿܓ̣ܵܐܐ ܕܛܵܒ̣: ܥܕܲܡܵܐ ܕܲܡܠܵܗ̇ ܠܐܘܿܪܸܫܠܸܡ ܣܦܵܐ ܒܲܣܦܵܐ: ܣܛܲܪ ܡ̣ܢ ܚܛܵܗܵܘ̈ܗܝ ܕܐܲܚܛܝܼ ܠܲܝܗܘܼܕ݂ܵܐ: ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ.

¹⁷ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܲܡܢܲܫܹܐ ܘܟ݂ܠܡܸܕܸ̇ܡ ܕܲܥܒܲܕ݂: ܘܲܚܛܵܗܵܘ̈ܗܝ ܕܲܚܛܵܐ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ.

¹⁸ ܘܲܫܟܸܒ̣ ܡܢܲܫܹܐ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܒܓܲܢܲܬ̣ ܒܲܝܬܹ̇ܗ ܒܓܲܢܲܬ̣ ܓܲܙܵܐ ܘܐܲܡܠܸܟ݂ ܐܲܡܘܿܢ ܒܪܹܗ ܒܵܬ̣ܪܹܗ.

¹⁹ ܒܲܪ ܥܸܣܪܝܼܢ ܗ̄ܘ̣ܵܐ ܘܬܲܪܬܹ̇ܝܢ ܫܢ̈ܝܼܢ ܐܲܡܘܿܢ ܟܲܕ݂ ܐܲܡܠܸܟ݂ ܘܬܲܪܬܹ̇ܝܢ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܗ̇ ܕܐܸܡܹܗ: ܡܲܫ̱ܠܡܲܬ̣ ܒܲܪܬ̣ ܚܲܕ݂ܘܿܨ ܕܡ̣ܢ ܝܲܛܒܲܬ̣.

²⁰ ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ ܡܢܲܫܹܐ ܐܲܒ̣ܘܼܗܝ.

²¹ ܘܗܲܠܸܟ݂ ܒܟ݂ܠܵܗ̇ ܐܘܼܪܚܵܐ ܕܗܲܠܸܟ݂ ܐܲܒ̣ܘܼܗܝ. ܘܲܦ̣ܠܲܚ ܠܲܦܬܲܟ݂ܪܹ̈ܐ ܕܲܦܠܲܚ ܐܲܒ̣ܘܼܗܝ: ܘܲܣܓܸܕ݂ ܠܗܘܿܢ.

²² ܘܲܫܒܲܩ ܠܡܵܪܝܵܐ ܐܲܠܵܗܵܐ ܕܐܲܒ̣ܵܗܵܘ̈ܗܝ: ܘܠܵܐ ܗܲܠܸܟ݂ ܒܐܘܼܪܚܹܗ ܕܡܵܪܝܵܐ.

²³ ܘܲܡܪܲܕ݂ܘ ܥܲܒ̣ܕܵܘ̈ܗܝ ܕܐܲܡܘܿܢ ܥܠܵܘܗܝ: ܘܩܲܛܠܘܼܗܝ ܒܒܲܝܬܹ̇ܗ.

²⁴ ܘܩܲܛܸܠܘ ܥܲܡܵܐ ܕܐܲܪܥܵܐ ܠܟ݂ܠ ܕܲܡܪܲܕ݂ܘ ܥܲܠ ܡܲܠܟܵܐ ܐܲܡܘܿܢ. ܘܐܲܡܠܸܟ݂ܘ ܥܲܡܵܐ ܕܐܲܪܥܵܐ ܠܝܘܿܫܝܼܵܐ ܒܪܹܗ ܒܵܬ̣ܪܹܗ.

²⁵ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܐܲܡܘܿܢ. ܘܟ݂ܠܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ.

²⁶ ܘܩܲܒ̣ܪܘܼܗܝ ܒܩܲܒ̣ܪܹܗ ܒܓܲܢܲܬ̣ ܓܲܙܵܐ. ܘܐܲܡ̣ܠܸܟ݂ ܝܘܿܫܝܼܵܐ ܒܪܹܗ ܒܵܬ̣ܪܹܗ.

22

¹ ܒܲܪ ܬܡܵܢܹܐ ܗ̄ܘ̣ܵܐ ܫܢ̈ܝܼܢ ܝܘܿܫܝܼܵܐ ܟܲܕ݂ ܐܲܡ̣ܠܸܟ݂. ܘܲܬ̣ܠܵܬ̣ܝܼܢ ܘܲܚܕ݂ܵܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ. ܘܲܫܡܵܐ ܕܐܸܡܹܗ ܝܲܕ̇ܝܼܕ݂ܵܐ ܒܲܪܬ̣ ܥܲܙܲܪܝܵܐ ܡ̣ܢ ܒܸܙܩܲܬ̣.

² ܘܲܥ̣ܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ. ܘܗܲܠܸܟ݂ ܒܟ݂ܠܵܗ̇ ܐܘܼܪܚܵܐ ܕܕ݂ܵܘܝܼܕ݂ ܐܲܒ̣ܘܼܗܝ: ܘܠܵܐ ܣ̣ܛܵܐ ܠܝܲܡܝܼܢܵܐ ܘܲܠܣܸܡܵܠܵܐ.

³ ܘܒܲܫܢܲܬ̣ ܬܡܵܢܲܥܸܣܪܹ̈ܐ ܠܡܲܠܟܵܐ ܝܘܿܫܝܼܵܐ: ܫܲܕܲܪ ܡܲܠܟܵܐ ܠܫܵܦܵܢ ܒܲܪ ܐܲܠܲܨܝܼܵܐ ܒܲܪ ܡܲܫܠܵܡ ܣܵܦܪܵܐ: ܠܒܲܝܬܹ̇ܗ ܕܡܵܪܝܵܐ: ܠܡܹܐܡܲܪ.

⁴ ܣܲܩ ܠܘܵܬ̣ ܚܹܠܲܩܝܵܐ ܟܵܗܢܵܐ ܪܲܒܵܐ. ܘܢܲܫܠܸܡ ܟܸܣܦܵܐ ܕܥܲܠ̣ ܠܒܲܝܬܹ̇ܗ ܕܡܵܪܝܵܐ: ܕܟܲܢܸܫ̣ܘ ܢܵܛܪ̈ܲܝ ܬܲܪܥܵܐ ܡ̣ܢ ܥܲܡܵܐ.

⁵ ܘܢܲܫ̱ܠܡܘܼܢܹܗ ܠܥܵܒ̣ܕܲܝ̈ ܥܒ̣ܵܕ݂ܵܐ ܕܲܦܩܝܼܕ݂ܝܼܢ ܒܒܲܝܬܹ̇ܗ ܕܡܵܪܝܵܐ: ܘܢܲܫ̱ܠܡܘܼܢܹܗ ܠܥܵܒ̣ܕܲܝ̈ ܥܒ̣ܵܕ݂ܵܐ ܕܲܒ̣ܒܲܝܬܹ̇ܗ ܕܡܵܪܝܵܐ: ܠܡܸܒ̣ܕܲܩ ܒܕ݂ܵܩܵܐ ܕܒܲܝܬܹ̇ܗ ܕܡܵܪܝܵܐ.

⁶ ܠܢܲܓܵܪܹ̈ܐ: ܘܠܲܐܪ̈ܓ̇ܘܼܒ̣ܠܹܐ: ܘܠܲܐܪ̈ܕܸ̇ܟ݂ܠܹܐ: ܘܲܠܡܸܙܒܲܢ ܩܲܝܣܹ̈ܐ: ܘܟܹܐܦܹ̈ܐ ܦܣܝܼ̈ܠܵܬ̣ܵܐ ܠܲܡܫܲܪܵܪܘܼܬܹܗ ܠܒܲܝܬܹ̇ܗ ܕܡܵܪܝܵܐ.

⁷ ܒܪܲܡ ܕܹܝܢ ܠܵܐ ܡܸܬ̣ܚܫܸܒ̣ ܗ̄ܘ̣ܵܐ ܥܲܡܗܘܿܢ ܟܸܣܦܵܐ ܕܡܸܬ̣̱ܝܼܗܸܒ̣ ܗ̄ܘ̣ܵܐ ܥܲܠ ܐܝܼܕܲܝ̈ܗܘܿܢ: ܡܸܛܠ ܕܲܒ̣ܗܲܝܡܵܢܘܼܬ̣ܵܐ ܗ̄ܘ̣ ܥܵܒ̣ܕ̇ܝܼܢ ܗ̄ܘ̣ܵܘ.

⁸ ܘܐܸܡܲܪ ܚܹܠܲܩܝܵܐ ܟܵܗܢܵܐ ܪܲܒܵܐ ܠܫܵܦܵܢ ܣܵܦܪܵܐ: ܣܸܦܪܵܐ ܕܢܵܡܘܿܣܵܐ ܐܸܫܟ̇ܚܹ̇ܬ̣ ܒܒܲܝܬܹ̇ܗ ܕܡܵܪܝܵܐ. ܘܝܲܗ̄ܒܹ̇ܗ ܚܹܠܲܩܝܵܐ ܟܵܗܢܵܐ ܠܣܸܦܪܵܐ ܕܢܵܡܘܿܣܵܐ ܠܫܵܦܵܢ ܣܵܦܪܵܐ: ܘܲܩ̣ܪܵܝܗܝ.

⁹ ܘܐܸܬ̣ܵܐ ܫܵܦܵܢ ܣܵܦܪܵܐ ܠܘܵܬ̣ ܡܲܠܟܵܐ: ܕܲܢܬ̣ܝܼܒ̣ ܠܡܲܠܟܵܐ ܦܸܬ̣ܓ̣ܵܡܵܐ: ܘܐܸܡܲܪ: ܐܲܫܠܸܡܘ ܥܲܒ̣ܕܲܝ̈ܟ ܟܸܣܦܵܐ ܕܐܸܫܬ̇ܟܲܚ ܒܒܲܝܬܵܐ: ܘܐܲܫ̱ܠܡܘܼܗܝ ܠܥܵܒ̣ܕܲܝ̈ ܥܒ̣ܵܕ݂ܵܐ ܕܦܩܝܼܕ݂ܝܼܢ ܒܒܲܝܬܹ̇ܗ ܕܡܵܪܝܵܐ.

¹⁰ ܘܚܵܘܝܼ ܫܵܦܵܢ ܣܵܦܪܵܐ ܠܡܲܠܟܵܐ: ܘܐܸܡܲܪ: ܣܸܦܪܵܐ ܝܲܗ̄ܒ̣ܠܝܼ ܚܹܠܲܩܝܵܐ ܟܵܗܢܵܐ. ܘܲܩܪܵܝܗܝ ܫܵܦܵܢ ܩܕ݂ܵܡ ܡܲܠܟܵܐ.

¹¹ ܘܟܲܕ݂ ܫ̣ܡܲܥ ܡܲܠܟܵܐ ܦܸܬ̣ܓ̣ܵܡܵܘ̈ܗܝ ܕܣܸܦܪܵܐ ܕܐܘܿܪܵܝܬܵܐ: ܨܲܪܝܼ ܠܒ̣ܘܼܫܵܘ̈ܗܝ.

¹² ܘܲܦܩܲܕ݂ ܡܲܠܟܵܐ ܠܚܹܠܲܩܝܵܐ ܟܵܗܢܵܐ: ܘܠܲܐܚܝܼܩܵܡ ܒܲܪ ܫܵܦܵܢ: ܘܠܲܥܒܲܟ̇ܘܿܪ ܒܲܪ ܡܝܼܟ݂ܵܐ: ܘܲܠܫܵܦܵܢ ܣܵܦܪܵܐ: ܘܠܲܥܫܵܝܵܐ ܥܲܒ̣ܕܵܐ ܕܡܲܠܟܵܐ: ܘܐܸܡܲܪ.

¹³ ܙܸܠܘ ܫܐܲܠܘ ܡ̣ܢ ܡܵܪܝܵܐ ܥܠܲܝ: ܘܥܲܠ ܥܲܡܵܐ: ܘܥܲܠ ܟܠܹܗ ܝܼܗܘܼܕ݂ܵܐ: ܥܲܠ ܦܸܬ̣ܓ̣ܵܡܹ̈ܐ ܕܣܸܦܪܵܐ ܗܵܢܵܐ ܕܐܸܫܬ̇ܟܲܚ. ܡܸܛܠ ܕܪܲܒ̇ ܗ̄ܘ̣ ܪܘܼܓ̣ܙܹܗ ܕܡܵܪܝܵܐ ܕܲܪܓܸܙ ܥܠܲܝܢ: ܥܲܠ ܕܠܵܐ ܫ̣ܡܲܥܘ ܐܲܒ̣ܵܗܲܝ̈ܢ ܡܸܠܵܘ̈ܗܝ ܕܣܸܦܪܵܐ ܗܵܢܵܐ: ܠܡܸܥܒܲܕ݂ ܐܲܝܟ݂ ܕܲܟ݂ܬ̣ܝܼܒ̣ ܥܠܲܝܢ.

¹⁴ ܘܐܸܙܲܠܘ ܚܹܠܲܩܝܵܐ ܟܵܗܢܵܐ: ܘܐܲܚܝܼܩܵܡ: ܘܲܥܒܲܟ̇ܘܿܪ: ܘܫܵܦܵܢ: ܘܲܥܫܵܝܵܐ: ܠܘܵܬ̣ ܚܘܼܠܕ̇ܝܼ ܢܒ̣ܝܼܬ̣ܵܐ ܐܲܢ̄ܬ̇ܬ̣ ܫܵܠܘܿܡ ܒܲܪ ܬܲܩܘܵܐ: ܒܲܪ ܚܲܕ݂ܚܲܣ ܢܵܛܲܪ ܡܵܐܢܹ̈ܐ. ܘܗ̤ܝ ܝܵܬ̣ܒܵܐ ܗ̄ܘ̣ܵܬ̣ ܒܐܘܿܪܸܫܠܸܡ ܒܬܸܢܝܵܢܘܼܬ̣ܵܐ ܘܡܲܠܸܠ̣ܘ ܥܲܡܵܗ̇.

¹⁵ ܘܐܸܡܪܲܬ̤ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܸܡܲܪܘ ܠܓܲܒ̣ܪܵܐ ܕܫܲܕܲܪܟ݂ܘܿܢ ܠܘܵܬ̣.

¹⁶ ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܡܲܝܬܸ̇ܐ ܐ̄ܢܵܐ ܒܝܼܫܬܵܐ ܥܲܠ ܐܲܬ̣ܪܵܐ ܗܵܢܵܐ ܘܥܲܠ ܥܵܡܘܿܪ̈ܵܘܗܝ: ܟܠܗܘܿܢ ܦܸܬ̣ܓ̣ܵܡܵܘ̈ܗܝ ܕܣܸܦܪܵܐ ܕܲܩܪܵܐ ܡܲܠܟܵܐ ܕܲܝܗܘܼܕ݂ܵܐ.

¹⁷ ܥܲܠ ܕܫܲܒ̣ܩܘܼܢܝ ܘܣܵܡ̣ܘ ܒܸܣܡܹ̈ܐ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܘܐܲܪܓ̇ܙܘܼܢܝ ܒܲܥܒ̣ܵܕ݂ ܐܝܼܕܲܝ̈ܗܘܿܢ: ܢܸܣܲܦ ܪܘܼܓ̣ܙܝܼ ܒܐܲܬ̣ܪܵܐ ܗܵܢܵܐ: ܘܐܵܘܒܸ̇ܕ݂ܟ݂ܘܿܢ.

¹⁸ ܘܲܠܡܲܠܟܵܐ ܕܲܝܗܘܼܕ݂ܵܐ ܕܫܲܕܲܪܟ݂ܘܿܢ: ܠܡܸܫܐܲܠ ܡ̣ܢ ܡܵܪܝܵܐ: ܗܵܟܲܢܵܐ ܐܸܡܲܪܘ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

¹⁹ ܦܸܬ̣ܓ̣ܵܡܹ̈ܐ ܕܲܫܡܲܥ̣ܬ̇: ܚܠܵܦ ܕܐܸܬ̣ܟ̇ܪܲܗ ܠܸܒܵܟ݂: ܘܐܸܬ̇ܬ̇ܙܝܼܥܲܬ̇ ܡ̣ܢ ܩܕ݂ܵܡ ܡܵܪܝܵܐ: ܟܲܕ݂ ܫܡܲܥ̣ܬ̇ ܡܸܕܸ̇ܡ ܕܐܸܡ̇ܪܹܬ̣ ܥܲܠ ܐܲܬ̣ܪܵܐ ܗܵܢܵܐ ܘܥܲܠ ܥܵܡܘܿܪ̈ܵܘܗܝ: ܕܢܸܗܘܹܐ ܠܬܸܡܗܵܐ ܘܲܠܠܵܘܛܬ̣ܵܐ: ܘܨܲܪܝܼܬ̇ ܠܒ̣ܘܼܫܲܝ̈ܟ: ܘܲܒ̣ܟܲܝܬ̇ ܩܕ݂ܵܡܲܝ. ܘܐܵܦ ܐܸܢܵܐ ܫܸܡ̇ܥܹܬ̣ ܐܵܡܲܪ ܡܵܪܝܵܐ.

²⁰ ܡܸܛܠ ܗܵܢܵܐ ܗܵܐ ܟܵܢܹ̇ܫ ܐ̄ܢܵܐ ܠܵܟ݂ ܠܘܵܬ̣ ܐܲܒ̣ܵܗܲܝ̈ܟ. ܘܬܸܬ̣ܟ̇ܢܸܫ ܠܩܲܒ̣ܪܵܟ݂ ܒܲܫܠܵܡܵܐ. ܘܠܵܐ ܢܸܚ̈ܙܝܵܢ ܒܟ݂ܠܵܗ̇ ܒܝܼܫܬܵܐ ܕܡܲܝܬܸ̇ܐ ܐ̄ܢܵܐ ܥܲܠ ܐܲܬ̣ܪܵܐ ܗܵܢܵܐ. ܘܐܲܬ̣ܝܼܒ̣ܘ ܠܡܲܠܟܵܐ ܦܸܬ̣ܓ̣ܸܵܡܵܐ.

23

¹ ܘܫܲܕܲܪ ܡܲܠܟܵܐ: ܘܐܸܬ̣ܟܲܢܲܫܘ ܠܘܵܬܹܗ ܟܠܗܘܿܢ ܣܵܒܹ̈ܐ ܕܲܝܗܘܼܕ݂ܵܐ ܘܕ݂ܐܘܿܪܸܫܠܸܡ.

² ܘܲܣܠܸܩ ܡܲܠܟܵܐ ܠܒܲܝܬܹ̇ܗ ܕܡܵܪܝܵܐ: ܘܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܘܟ݂ܠܗܘܿܢ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ ܥܲܡܹܗ: ܘܟ݂ܵܗ̈ܢܹܐ ܘܲܢܒ̣ܝܹ̈ܐ ܘܟ݂ܠܹܗ ܥܲܡܵܐ ܡ̣ܢ ܙܥܘܿܪܵܐ ܘܲܥܕܲܡܵܐ ܠܪܲܒܵܐ. ܘܲܩܪܵܐ ܩܕ݂ܵܡܲܝܗܘܿܢ ܟܠܗܘܿܢ ܦܸܬ̣ܓ̣ܵܡܹ̈ܐ ܕܣܸܦܪܵܐ ܕܲܩܝܵܡܵܐ ܕܐܸܫܬ̇ܟܲܚ ܒܒܲܝܬܹ̇ܗ ܕܡܵܪܝܵܐ.

³ ܘܩܵܡ ܡܲܠܟܵܐ ܥܲܠ ܥܲܡܘܼܕ݂ܵܐ: ܘܐܲܩܝܼܡ ܩܝܵܡܵܐ ܩܕ݂ܵܡ ܡܵܪܝܵܐ ܠܲܡܗܲܠܵܟ݂ܘܼ ܒܵܬܲܪ ܡܵܪܝܵܐ: ܘܲܠܡܸܛܲܪ ܦܘܼܩܕܵܢܵܘ̈ܗܝ ܘܣܵܗ̈ܕ̇ܘܵܬܹܗ ܘܲܩܝܵܡܵܘ̈ܗܝ: ܒܟ݂ܠܹܗ ܠܸܒ̇ܗܘܿܢ. ܘܲܒ̣ܟ݂ܠܵܗ̇ ܢܲܦ̮ܫܗܘܿܢ. ܕܲܢܩܝܼܡܘܼܢ ܦܸܬ̣ܓ̣ܵܡܹ̈ܐ ܕܲܩܝܵܡܵܐ ܗܵܢܵܐ: ܕܲܟ݂ܬ̣ܝܼܒ̣ܝܼܢ ܒܣܸܦܪܵܐ ܗܵܢܵܐ. ܘܩܵܡ̣ܘ ܟܠܹܗ ܥܲܡܵܐ ܒܲܩܝܵܡܵܐ.

⁴ ܘܲܦܩܲܕ݂ ܡܲܠܟܵܐ ܠܚܹܠܲܩܝܵܐ ܟܵܗܢܵܐ ܪܲܒܵܐ: ܘܲܠܟ݂ܵܗ̈ܢܹܐ ܕܒ̣ܵܬ̣ܪܹܗ ܘܲܠܢܵܛܪ̈ܲܝ ܬܲܪ̈ܥܹܐ: ܠܡܲܦܵܩܘܼ ܡ̣ܢ ܒܲܝܬܹ̇ܗ ܕܡܵܪܝܵܐ: ܡܵܐܢܹ̈ܐ ܟܠܗܘܿܢ ܕܲܥܒ̣ܝܼܕ݂ܝܼܢ ܠܒܲܥܠܵܐ ܘܲܠܕܸܚ̈ܠܵܬ̣ܵܐ: ܘܲܠܟ݂ܠܹܗ ܚܲܝܠܵܐ ܕܲܫܡܲܝܵܐ. ܘܐܵܘܩܸܕ݂ ܐܸܢܘܿܢ ܠܒܲܪ ܡ̣ܢ ܐܘܿܪܸܫܠܸܡ ܒܫܲܕ݂ܡܘܿܐܝܼܬ̣ ܩܸܕ݂ܪܘܿܢ. ܘܫܲܩܠܹܗ ܠܥܲܦܪ̱ܗܘܿܢ ܠܒܹܝܬ̣ ܐܹܝܠ.

⁵ ܘܩܲܛܠܘ ܟܘܼܡܪܹ̈ܐ ܐܲܝܠܹܝܢ ܕܐܲܩܝܼܡܘ ܡܲܠ̈ܟܹ̇ܐ ܕܲܝܗܘܼܕ݂ܵܐ: ܠܲܡܣܵܡ ܒܸܣܡܹ̈ܐ ܥܲܠ ܥ̈ܠܵܘܵܬ̣ܵܐ: ܒܩܘܼܪ̈ܝܵܐ ܕܲܝܗܘܼܕ݂ܵܐ: ܘܒܲܚܕ݂ܵܪܹ̈ܝܗ̇ ܕܐܘܿܪܸܫܠܸܡ. ܘܲܕ݂ܣܵܝܡܝܼܢ ܗ̄ܘ̣ܵܘ ܒܸܣܡܹ̈ܐ ܠܒܲܥܠܵܐ: ܘܲܠܫܸܡܫܵܐ: ܘܲܠܣܲܗܪܵܐ: ܘܲܠܡܵܘ̈ܙܠܵܬ̣ܵܐ: ܘܲܠܟ݂ܠܹܗ ܚܲܝܠܵܐ ܕܲܫܡܲܝܵܐ.

⁶ ܘܐܲܦܩܵܗ̇ ܠܕܸܚ̱ܠܬ̣ܵܐ ܡ̣ܢ ܒܲܝܬܹ̇ܗ ܕܡܵܪܝܵܐ: ܠܒܲܪ ܡ̣ܢ ܐܘܿܪܸܫܠܸܡ ܠܢܲܚܠܵܐ ܕܩܸܕ݂ܪܘܿܢ. ܘܐܵܘܩܕ݂ܵܗ̇ ܒܢܲܚܠܵܐ ܕܩܸܕ݂ܪܘܿܢ: ܘܥܲܒ̣ܕܵܗ̇ ܐܲܝܟ݂ ܥܲܦܪܵܐ: ܘܲܫܕ݂ܵܐ ܥܲܦܪܵܗ̇ ܥܲܠ ܩܲܒ̣ܪܹ̈ܐ ܕܲܒ̣ܢܲܝ̈ ܥܲܡܵܐ.

⁷ ܘܲܥܩܲܪ ܒܵـ̈ـܬܹ̇ܐ ܕܙܲܢܵܝܹ̈ܐ ܕܲܒ̣ܒܲܝܬܹ̇ܗ ܕܡܵܪܝܵܐ: ܘܲܕ݂ܢܸܫܹ̈ܐ ܗ̄ܘܲܝ̈ ܡܵܐܢܹ̈ܐ ܠܕܸܚ̈ܠܵܬ̣ܵܐ ܬܲܡܵܢ.

⁸ ܘܐܲܝܬܝܼܘ ܟܠܗܘܿܢ ܟܵܗ̈ܢܹܐ ܡ̣ܢ ܩܘܼܪ̈ܝܵܐ ܕܲܝܗܘܼܕ݂ܵܐ. ܘܛܲܡܲܐܘ ܥ̈ܠܵܘܵܬ̣ܵܐ ܕܣܵܡ̣ܘ ܒܗܹܝܢ ܟܵܗ̈ܢܹܐ ܒܸܣܡܹ̈ܐ: ܡ̣ܢ ܕܵܢ ܘܲܥܕܲܡܵܐ ܠܒܲܪ ܫܒܲܥ. ܘܲܥܩܲܪ ܥ̈ܠܵܘܵܬ̣ܵܐ ܕܬܲܪ̈ܥܹܐ ܕܲܒ̣ܡܲܥܠܵܢܵܐ ܕܬܲܪܥܵܐ ܕܗܘܿܫܲܥ ܪܲܒ̇ ܩܪܝܼܬ̣ܵܐ ܕܥܲܠ ܣܸܡܵܠܹܗ ܕܓܲܒ̣ܪܵܐ ܒܬܲܪܥܵܐ ܕܲܩܪܝܼܬ̣ܵܐ.

⁹ ܒܪܲܡ ܠܵܐ ܣܵܠܩܝܼܢ ܗ̄ܘ̣ܵܘ ܟܵܗ̈ܢܹܐ ܕܲܥ̈ܠܵܘܵܬ̣ܵܐ ܠܡܲܕ݂ܒ̇ܚܹܗ ܕܡܵܪܝܵܐ ܒܐܘܿܪܸܫܠܸܡ: ܐܸܠܵܐ ܐܸܢ ܐܸܟܲܠܘ ܦܲܛܝܼܪܵܐ ܥܲܡ ܐܲܚܲܝ̈ܗܘܿܢ.

¹⁰ ܘܲܥܩܲܪܘ ܥ̈ܠܵܘܵܬ̣ܵܐ ܕܲܥܒܲܕ݂ܘ ܡܲܠ̈ܟܹ̇ܐ ܕܲܝܗܘܼܕ݂ܵܐ ܒܬܲܦܲܬ̇ ܕܲܒ̣ܢܲܚܠܵܐ ܕܒܲܪܗܵܢܘܿܡ: ܠܡܲܥܒܵܪܘܼ ܓܒܲܪ ܒܪܹܗ ܘܒܲܪܬܹܗ ܒܢܘܼܪܵܐ ܠܐܲܡ̣ܠܸܟ݂.

¹¹ ܘܩܲܛܸܠ ܪ̈ܲܟ݂ܫܵܐ ܕܝܲܗ̄ܒ̣ܘ ܡܲܠ̈ܟܹ̇ܐ ܕܲܝܗܘܼܕ݂ܵܐ ܠܫܸܡܫܵܐ: ܒܡܲܥܠܵܢܵܐ ܕܒܲܝܬܹ̇ܗ ܕܡܵܪܝܵܐ: ܒܚܵܢܘܼܬ̣ܵܐ ܕܢܵܬ̣ܵܢ ܡܗܲܝܡܢܵܐ ܕܡܲܠܟܵܐ ܕܒܲܦܪܘܿܕ݂ܵܐ. ܘܡܲܪ̈ܟ̇ܒ̣ܵܬ̣ܵܐ ܕܫܸܡܫܵܐ ܐܵܘܩܸܕ݂ ܒܢܘܼܪܵܐ.

¹² ܘܡܲܕ݂ܒ̇ܚܵܐ ܕܥܲܠ ܐܸܓܵܪܵܐ ܕܥܸܠܝܼܬܹܗ ܕܐܵܚܵܙ ܕܲܥܒܲܕ݂ܘ ܡܲܠ̈ܟܹ̇ܐ ܕܲܝܗܘܼܕ݂ܵܐ: ܘܡܲܕ݂ܒ̇ܚܹ̈ܐ ܕܲܥܒܲܕ݂ ܡܢܲܫܹܐ ܒܬܲܪܬܹ̇ܝܢ ܕܵܪܹ̈ܐ ܕܒܲܝܬܹ̇ܗ ܕܡܵܪܝܵܐ: ܥ̣ܩܲܪ ܡܲܠܟܵܐ. ܘܲܪܗܸܛ̣ ܡ̣ܢ ܬܲܡܵܢ: ܘܲܫܕ݂ܵܐ ܥܲܦ̱ܪܗܘܿܢ ܠܢܲܚܠܵܐ ܕܩܸܕ݂ܪܘܿܢ.

¹³ ܘܲܥ̈ܠܵܘܵܬ̣ܵܐ ܕܲܩܕ݂ܵܡ ܐܘܿܪܸܫܠܸܡ: ܕܡ̣ܢ ܝܲܡܝܼܢܵܐ ܕܛܘܼܪܵܐ ܡܚܲܒ̇ܠܵܢܵܐ: ܕܲܒ̣ܢܵܐ ܫܠܹܝܡܘܿܢ ܡܲܠܟܵܐ ܕܝܼܣܪܵܝܹܠ: ܠܥܸܣܬ̇ܪܘܼܬ̣ ܐܲܠܵܗܬܵܐ ܕܨܲܝ̈ܕ̇ܢܵܝܹܐ: ܘܲܠܟ݂ܵܡܘܿܫ ܕܸܚ̱ܠܬ̣ܵܐ ܕܡܘܼܐܵܒ̣: ܘܲܠܡܲܠܟ̇ܘܿܡ ܕܸܚ̱ܠܬ̣ܵܐ ܕܲܒ̣ܢܲܝ̈ ܥܲܡܘܿܢ: ܥ̣ܩܲܪ ܡܲܠܟܵܐ ܝܘܿܫܝܼܵܐ.

¹⁴ ܘܬܲܒܲܪ ܩܵܝ̈ܡܵܬ̣ܵܐ: ܘܦܲܣܸܩ̣ ܕܸܚ̈ܠܵܬ̣ܵܐ: ܘܲܡܠܵܐ ܐܲܬ̣ܪܗܘܿܢ ܓܲܪ̈ܡܹܐ ܕܲܒ̣ܢܲܝ̈ܢܵܫܵܐ.

¹⁵ ܘܐܵܦ ܠܡܲܕ݂ܒ̇ܚܵܐ ܕܲܒ̣ܒܹܝܬ̣ ܐܹܝܠ: ܘܲܥ̈ܠܵܘܵܬ̣ܵܐ ܕܲܥ̣ܒܲܕ݂ ܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ: ܘܐܵܦ ܠܹܗ ܠܡܲܕ݂ܒ̇ܚܵܐ ܗܵܘ̇ ܘܠܲܥܠܵܬ̣ܵܐ ܥ̣ܩܲܪ. ܘܐܵܘܩܕ݂ܵܗ̇ ܠܲܥܠܵܬ̣ܵܐ: ܘܕܲܩܩܵܗ̇ ܐܲܝܟ݂ ܥܲܦܪܵܐ: ܘܐܵܘܩܸܕ݂ ܕܸܚ̈ܠܵܬ̣ܵܐ.

¹⁶ ܘܐܸܬ̣ܦܢܝܼ ܝܘܿܫܝܼܵܐ: ܘܲܚܙܵܐ ܩܲܒ̣ܪܹ̈ܐ ܕܬܲܡܵܢ ܒܛܘܼܪܵܐ. ܘܫܲܕܲܪ ܘܲܢܣܲܒ̣ ܓܲܪ̈ܡܹܐ ܡ̣ܢ ܩܲܒ̣ܪܹ̈ܐ. ܘܐܵܘܩܸܕ݂ ܥܲܠ ܡܲܕܒ̇ܚܵܐ: ܘܛܲܡ̣ܐܹܗ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܲܩܪܵܐ ܢܒ̣ܝܹܗ ܕܐܲܠܵܗܵܐ: ܕܲܩܪܵܐ ܗ̄ܘ̣ܵܐ ܦܸܬ̣ܓ̣ܵܡܹ̈ܐ ܗܵܠܹܝܢ.

¹⁷ ܘܐܸܡܲܪ ܡܲܠܟܵܐ: ܡܵܢܵܘ ܢܝܼܫܵܐ ܗܵܢܵܐ ܕܚܵܙܹ̇ܐ ܐ̄ܢܵܐ. ܐܵܡ̇ܪܝܼܢ ܠܹܗ ܐ̄ܢܵܫܹܝ̈ܗ̇ ܕܲܩܪܝܼܬ̣ܵܐ: ܩܲܒ̣ܪܵܐ ܗ̄ܘ̣ ܕܲܢܒ̣ܝܹܗ ܕܐܲܠܵܗܵܐ: ܕܐܸܬ̣ܵܐ ܡ̣ܢ ܝܼܗܘܼܕ݂ܵܐ. ܘܲܩܪܵܐ ܦܸܬ̣ܓ̣ܵܡܹ̈ܐ ܗܵܠܹܝܢ ܕܲܥܒܕܬ̇ ܥܲܠ ܡܲܕ݂ܒ̇ܚܵܐ ܕܒܹܝܬ̣ ܐܹܝܠ.

¹⁸ ܘܐܸܡܲܪ: ܫܘܼܒ̣ܩܘܼܗܝ: ܠܵܐ ܐ̄ܢܵܫ ܢܙܝܼܥ ܓܲܪ̈ܡܵܘܗܝ. ܘܦܲܠܸܛܘ ܓܲܪ̈ܡܵܘܗܝ ܠܓܲܪ̈ܡܹܐ ܕܲܢܒ̣ܝܼܵܐ ܕܐܸܬ̣ܵܐ ܡ̣ܢ ܫܵܡܪܹܝܢ.

¹⁹ ܘܐܵܦ ܟܠܗܘܿܢ ܒܵـ̈ـܬܹ̇ܐ ܕܲܥ̈ܠܵܘܵܬ̣ܵܐ ܕܲܒ̣ܩܘܼܪ̈ܝܵܐ ܕܫܵܡܪܹܝܢ: ܕܲܥܒܲܕ݂ܘ ܡܲܠ̈ܟܹ̇ܐ ܕܝܼܣܪܵܝܹܠ ܠܡܲܪܓܵܙܘܼ ܠܡܵܪܝܵܐ ܐܲܥܒܲܪ ܝܘܿܫܝܼܵܐ ܘܲܥܒܲܕ݂ ܐܸܢܘܿܢ ܐܲܝܟ݂ ܥܒ̣ܵܕ݂ܵܐ ܕܲܥܒܲܕ݂ ܒܒܹܝܬ̣ ܐܹܝܠ.

²⁰ ܘܕܲܒܲܚ ܠܟ݂ܠܗܘܿܢ ܟܘܼܡܪܹ̈ܐ ܕܲܥ̈ܠܵܘܵܬ̣ܵܐ ܕܣܵܡ̣ܘ ܒܸܣܡܹ̈ܐ ܥܲܠ ܡܲܕ݂ܒ̇ܚܹ̈ܐ. ܘܐܵܘܩܸܕ݂ ܓܲܪ̈ܡܹܐ ܕܐ̄ܢܵܫܵܐ ܥܠܲܝܗܘܿܢ: ܘܲܗܦܲܟ݂ ܠܐܘܿܪܸܫܠܸܡ.

²¹ ܘܲܦܩܲܕ݂ ܡܲܠܟܵܐ ܠܟ݂ܠܹܗ ܥܲܡܵܐ: ܘܐܸܡܲܪ: ܥܒܸܕ݂ܘ ܦܸܨܚܵܐ ܠܡܵܪܝܵܐ ܐܲܠܵܗܟ݂ܘܿܢ: ܐܲܝܟ݂ ܕܲܟ݂ܬ̣ܝܼܒ̣ ܒܣܸܦܪܵܐ ܕܲܩܝܵܡܵܐ ܗܵܢܵܐ.

²² ܡܸܛܠ ܕܠܵܐ ܐܸܬ̣ܥ̱ܒܸܕ݂ ܐܲܝܟ݂ ܦܸܨܚܵܐ ܗܵܢܵܐ: ܡ̣ܢ ܝܵܘܡܵܐ ܕܕܲܝܵܢܹ̈ܐ ܕܕܵܢܘ ܠܝܼܣܪܵܝܹܠ: ܟܠܗܘܿܢ ܝܵܘ̈ܡܵܬ̣ܵܐ ܕܡܲܠ̈ܟܹ̇ܐ ܕܝܼܣܪܵܝܹܠ ܘܡܲܠ̈ܟܹ̇ܐ ܕܲܝܗܘܼܕ݂ܵܐ.

²³ ܐܸܠܵܐ ܐܸܢ ܒܲܫܢܲܬ̣ ܬܡܵܢܲܥܸܣܪܹ̈ܐ ܕܝܼܠܹܗ ܕܡܲܠܟܵܐ ܝܘܿܫܝܼܵܐ ܐܸܬ̣ܥ̱ܒܸܕ݂ ܦܸܨܚܵܐ ܗܵܢܵܐ ܠܡܵܪܝܵܐ ܒܐܘܿܪܸܫܠܸܡ.

²⁴ ܘܐܵܦ ܙܲܟܘܼܪܹ̈ܐ ܘܝܲܕ̇ܘܼ̈ܥܹܐ ܘܲܦܬܲܟ݂ܪܹ̈ܐ ܘܕܸܚ̈ܠܵܬ̣ܵܐ: ܘܟ݂ܠܵܗ̇ ܛܲܢܦܘܼܬ̣ܵܐ ܕܐܸܬ̣ܚܲܙܝܲܬ̤ ܒܐܲܪܥܵܐ ܕܲܝܗܘܼܕ݂ܵܐ ܘܲܒ̣ܫܘܼܩܹ̈ܝܗ̇ ܕܐܘܿܪܸܫܠܸܡ: ܒܲܥܲܪ ܝܘܿܫܝܼܵܐ: ܡܸܛܠ ܕܲܢܩܝܼܡ ܦܸܬ̣ܓ̣ܵܡܹ̈ܐ ܕܣܸܦܪܵܐ ܕܐܘܿܪܝܵܬܵܐ: ܕܲܟ݂ܬ̣ܝܼܒ̣ܝܼܢ ܒܣܸܦܪܵܐ ܕܐܸܫܟܲܚ ܚܹܠܲܩܝܵܐ ܟܵܗܢܵܐ ܒܒܲܝܬܹ̇ܗ ܕܡܵܪܝܵܐ.

²⁵ ܘܐܲܟ݂ܘܵܬܹܗ ܠܵܐ ܗܘ̤ܵܐ ܡܲܠܟܵܐ ܩܕ݂ܵܡܵܘ̈ܗܝ: ܕܐܸܬ̣ܦܢܝܼ ܠܘܵܬ̣ ܡܵܪܝܵܐ ܒܟ݂ܠܹܗ ܠܸܒܹ̇ܗ: ܘܲܒ̣ܟ݂ܠܵܗ̇ ܢܲܦ̮ܫܹܗ: ܘܲܒ̣ܟ݂ܠܹܗ ܚܲܝܠܹܗ: ܐܲܝܟ݂ ܕܲܟ݂ܬ̣ܝܼܒ̣ ܒܐܘܿܪܵܝܬܵܐ ܕܡܘܼܫܹܐ. ܘܒ̣ܵܬ̣ܪܹܗ ܠܵܐ ܩܵܡ̣ ܐܲܟ݂ܘܵܬܹܗ.

²⁶ ܒܪܲܡ ܠܵܐ ܐܸܬ̣ܦܢܝܼ ܪܘܼܓ̣ܙܹܗ ܕܡܵܪܝܵܐ ܪܲܒܵܐ ܕܲܪܓܸܙ ܥܲܠ ܝܼܗܘܼܕ݂ܵܐ: ܥܲܠ ܪܘܼܓ̣ܙܵܐ ܕܐܲܪܓ̇ܙܹܗ ܡܢܲܫܹܐ.

²⁷ ܘܐܸܡܲܪ ܡܵܪܝܵܐ: ܐܵܦ ܠܲܝܗܘܼܕ݂ܵܐ ܡܲܥܒܲܪ ܐ̄ܢܵܐ ܡ̣ܢ ܩܕ݂ܵܡܲܝ: ܐܲܝܟ݂ ܕܐܲܥܒ̇ܪܹܬ̣ ܠܝܼܣܪܵܝܹܠ. ܘܐܲܣܠܹܝܗ̇ ܠܲܩܪܝܼܬ̣ܵܐ ܗܵܕܹܐ ܕܲܓ̣ܒܹ̇ܝܬ̣ ܠܐܘܿܪܸܫܠܸܡ: ܘܲܠܒܲܝܬܵܐ ܕܐܸܡ̇ܪܹܬ̣ ܕܢܸܗܘܹܐ ܫܹܡܝ ܬܲܡܵܢ.

²⁸ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܫܝܼܵܐ ܘܟ݂ܠ ܡܸܕܸ̇ܡ ܕܲܥ̣ܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ.

²⁹ ܒܝܵܘܡܵܘ̈ܗܝ ܣܠܸܩ ܦܸܪܥܘܿܢ ܚܓܝܼܪܵܐ ܡܲܠܟܵܐ ܕܡܸܨܪܹܝܢ: ܥܲܠ ܡܲܒ̇ܘܼܓ̣ ܕܥܲܠ ܢܲܗܪܵܐ ܦܪܵܬ̣. ܘܐܸܙܲܠ̣ ܡܲܠܟܵܐ ܝܘܿܫܝܼܵܐ ܠܐܘܼܪܥܹܗ ܠܡܸܬ̣ܟܲܬܵܫܘܼ ܥܲܡܹܗ. ܘܐܸܡܲܪ ܠܹܗ ܦܸܪܥܘܿܢ: ܠܵܐ ܗ̄ܘ̣ܵܐ ܥܠܲܝܟ ܐܵܬܹ̇ܐ ܐ̄ܢܵܐ: ܣܛܝܼ ܡܹܢܝ. ܘܠܵܐ ܫܲܡܥܹܗ ܝܘܿܫܝܼܵܐ. ܘܲܡܚܵܝܗܝ ܦܸܪܥܘܿܢ ܘܩܲܛܠܹܗ ܒܡܲܓܕ̇ܘ ܟܲܕ݂ ܚ̣ܙܵܝܗܝ ܬܲܡܵܢ.

³⁰ ܘܫܲܩܠܘܼܗ̇ ܥܲܒ̣ܕܵܘ̈ܗܝ ܟܲܕ݂ ܡܝܼܬ̣ ܡ̣ܢ ܡܲܓܕ̇ܘܿ: ܘܐܵܘܒ̇ܠܘܼܗܝ ܠܐܘܿܪܸܫܠܸܡ ܘܩܲܒ̣ܪܘܼܗܝ ܬܲܡܵܢ ܒܩܲܒ̣ܪܹܗ. ܘܲܕ݂ܒܲܪܘ ܥܲܡܵܐ ܕܐܲܪܥܵܐ ܠܝܵܗܘܿܐܵܚܵܙ ܒܲܪ ܝܘܿܫܝܼܵܐ: ܘܡܲܫܚܘܼܗܝ ܘܐܲܡ̱ܠܟ݂ܘܼܗܝ ܚܠܵܦ ܐܲܒ̣ܘܼܗܝ.

³¹ ܒܲܪ ܥܸܣܪܝܼܢ ܗ̄ܘ̣ܵܐ ܘܲܬ̣ܠܵܬ̣ ܫܢ̈ܝܼܢ ܝܵܗܘܿܐܵܚܵܙ ܟܲܕ݂ ܐܲܡ̣ܠܸܟ݂ ܘܲܬ̣ܠܵܬ̣ܵܐ ܝܲܪ̈ܚܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ. ܘܲܫܡܵܗ̇ ܕܐܸܡܹܗ: ܚܲܡܛܘܿܠ ܒܲܪܬ̣ ܐܹܪܲܡܝܵܐ ܡ̣ܢ ܠܸܒ̣ܢܵܐ.

³² ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ܘ ܐܲܒ̣ܵܗܵܘ̈ܗܝ.

³³ ܘܐܲܣܪܹܗ ܦܸܪܥܘܿܢ ܚܓܝܼܪܵܐ ܫܲܠܟܵܐ ܕܡܸܨܪܹܝܢ ܒܕܸܒ̣ܠܲܬ̣ ܒܐܲܪܥܵܐ ܕܲܚܡܵܬ̣: ܟܲܕ݂ ܐܲܡ̣ܠܸܟ݂ ܒܐܘܿܪܸܫܠܸܡ ܘܐܲܪܡܝܼ ܡܲܕܲܐܬ̣ܵܐ ܥܲܠ ܐܲܪܥܵܐ: ܡܵܐܐ ܟܲܟ̇ܪ̈ܝܼܢ ܕܟܸܣܦܵܐ: ܘܲܥܣܲܪ ܟܲܟ̇ܪ̈ܝܼܢ ܕܕܲܗܒ̣ܵܐ.

³⁴ ܘܐܲܡ̣ܠܸܟ݂ ܦܸܪܥܘܿܢ ܚܓܝܼܪܵܐ ܠܐܸܠܝܵܩܝܼܡ ܒܲܪ ܝܘܿܫܝܼܵܐ ܚܠܵܦ ܝܘܿܫܝܼܵܐ ܐܲܒ̣ܘܼܗܝ ܘܫܲܡܝܼ ܫܡܹܗ ܝܘܿܝܵܩܝܼܡ. ܘܲܠܝܵܗܘܿܐܵܚܵܙ ܕܲܒ̣ܪܹܗ: ܘܥܲܠ̣ ܠܡܸܨܪܹܝܢ: ܘܡܝܼܬ̣ ܬܲܡܵܢ.

³⁵ ܘܟܸܣܦܵܐ ܘܕܲܗܒ̣ܵܐ ܝܲܗ̄ܒ̣ ܝܘܿܝܵܩܝܼܡ ܠܦܸܪܥܘܿܢ ܒܪܲܡ ܟܸܣܦܵܐ ܘܕܲܗܒ̣ܵܐ ܐܲܪܡܝܼ ܥܲܠ ܐܲܪܥܵܐ: ܥܲܠ ܡܸܠܲܬ̣ ܦܘܼܡܹܗ ܕܦܸܪܥܘܿܢ ܐ̄ܢܵܫ ܐܲܝܟ݂ ܙܸܕ݂ܩܹܗ ܡܩܲܪܸܒ̣ ܗ̄ܘ̣ܵܐ ܟܸܣܦܵܐ ܘܕܲܗܒ̣ܵܐ: ܡ̣ܢ ܥܲܡܵܐ ܕܐܲܥܪܵܐ: ܥܲܠ ܡܸܠܲܬ̣ ܦܘܼܡܹܗ ܕܦܸܪܥܘܿܢ ܚܓܝܼܪܵܐ.

³⁶ ܒܲܪ ܥܸܣܪܝܼܢ ܗ̄ܘ̣ܵܐ ܘܚܲܡܸܫ ܫܢ̈ܝܼܢ ܝܘܿܝܵܩܝܼܡ ܟܲܕ݂ ܐܲܡ̣ܠܸܟ݂ ܘܲܚܕܲܥܸܣܪܹ̈ܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܗ̇ ܕܐܸܡܹܗ: ܙܒ̣ܝܼܕ݂ܵܐ ܒܲܪܬ̣ ܦܪܵܝܵܐ ܡ̣ܢ ܪܵܡܬ̣ܵܐ.

³⁷ ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ܘ ܐܲܒ̣ܵܗܵܘ̈ܗܝ.

24

¹ ܒܝܵܘܡܵܘ̈ܗܝ ܣܠܸܩ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܥܲܠ ܐܘܿܪܸܫܠܸܡ ܘܲܗܘ̤ܵܐ ܠܹܗ ܝܘܿܝܵܩܝܼܡ ܥܲܒ̣ܕܵܐ ܬܠܵܬ̣ ܫܢ̈ܝܼܢ. ܘܲܗܦܲܟ݂ ܘܲܡܪܲܕ݂ ܥܠܵܘܗܝ.

² ܘܓܲܪܝܼ ܒܹܗ ܡܵܪܝܵܐ: ܓܲܝܵܣܹ̈ܐ ܕܟܲܠ̈ܕܵܝܹܐ: ܘܓܲܝܵܣܹ̈ܐ ܕܐܲܕ݂ܘܿܡ: ܘܓܲܝܵܣܹ̈ܐ ܕܡܘܼܐܵܒ̣: ܘܓܲܝܵܣܹ̈ܐ ܕܲܒ̣ܢܲܝ̈ ܥܲܡܘܿܢ ܘܓܲܪܝܼ ܐܸܢܘܿܢ ܒܲܝܗܘܼܕ݂ܵܐ: ܕܢܵܘܒ̇ܕ݂ܘܼܢ ܐܸܢܘܿܢ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܡܲܠܸܠ̣ ܒܐܝܼܕ݂ܵܐ ܕܥܲܒ̣ܕܵܘ̈ܗܝ ܢܒ̣ܝܹ̈ܐ ܦܘܼܡܹܗ ܕܡܵܪܝܵܐ.

³ ܘܲܗܘ̤ܵܐ ܪܘܼܓ̣ܙܵܐ ܥܲܠ ܝܼܗܘܼܕ݂ܵܐ: ܕܢܲܥܒܲܪ ܐܸܢܘܿܢ ܡܟܢ ܩܕ݂ܵܡܵܘܗܝ: ܡܸܛܠ ܚܛܵܗܵܘ̈ܗܝ ܕܲܡܢܲܫܹܐ ܘܟ݂ܠܡܸܕܸ̇ܡ ܕܲܥܒܲܕ݂.

⁴ ܐܵܦ ܕܡܵܐ ܙܲܟܵܝܵܐ ܕܐܸܫܲܕ݂: ܘܲܡܠܵܗ̇ ܠܐܘܿܪܸܫܠܸܡ ܕܡܵܐ ܙܲܟܵܝܵܐ. ܘܠܵܐ ܨܒ̣ܵܐ ܡܵܪܝܵܐ ܠܡܸܫܒܲܩ.

⁵ ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܝܵܩܝܼܡ ܘܟ݂ܠܡܸܕܸ̇ܡ ܕܲܥܒܲܕ݂ ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ.

⁶ ܘܲܫܟܸܒ̣ ܝܘܿܝܵܩܝܼܡ ܥܲܡ ܐܲܒ̣ܵܗܵܘ̈ܗܝ. ܘܐܲܡܠܸܟ݂ ܝܘܿܝܵܟ݂ܝܼܢ ܒܪܹܗ ܒܵܬ̣ܪܹܗ.

⁷ ܘܠܵܐ ܐܵܘܣܸܦ ܬܘܼܒ̣ ܡܲܠܟܵܐ ܕܡܸܨܪܹܝܢ ܠܡܸܦܲܩ ܡ̣ܢ ܐܲܪܥܹܗ. ܡܸܛܠ ܕܲܢܣܲܒ̣ ܡܲܠܟܵܐ ܕܒ̣ܵܒܹܠ: ܡ̣ܢ ܢܲܚܠܵܐ ܕܡܸܨܪܹܝܢ ܘܲܥܕܲܡܵܐ ܠܢܲܗܪܵܐ ܦܪܵܬ̣: ܟܠ ܐܝܼܬ̣ ܗ̄ܘ̣ܵܐ ܠܡܲܠܟܵܐ ܕܡܸܨܪܹܝܢ.

⁸ ܒܲܪ ܬܡܵܢܲܥܸܣܪܹ̈ܐ ܗ̄ܘ̣ܵܐ ܫܢ̈ܝܼܢ ܝܘܿܝܵܟ݂ܝܼܢ ܟܲܕ݂ ܐܲܡ̣ܠܸܟ݂ ܘܲܬ̣ܠܵܬ̣ܵܐ ܝܲܪ̈ܚܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܗ̇ ܕܐܸܡܹܗ: ܢܸܚ̄ܫܬ̣ܵܐ ܒܲܪܬ̣ ܐܸܠܝܵܬ̣ܵܢ ܡ̣ܢ ܐܘܿܪܸܫܠܸܡ.

⁹ ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ ܐܲܒ̣ܘܼܗܝ.

¹⁰ ܒܙܲܒ̣ܢܵܐ ܗܵܘ̇: ܣܠܸܩ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܥܲܠ ܐܘܿܪܸܫܠܸܡ ܘܐܸܬ̣ܚܲܒ̣ܫܲܬ̤ ܩܪܝܼܬ̣ܵܐ ܒܐܘܼܠܨܵܢܵܐ.

¹¹ ܘܐܸܬ̣ܵܐ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܥܲܠ ܩܪܝܼܬ̣ܵܐ: ܘܥܲܒ̣ܕܵܘ̈ܗܝ ܫܪܹܝܢ ܥܠܹܝܗ̇.

¹² ܘܲܢܦܲܩ ܝܘܿܝܵܟ݂ܝܼܢ ܡܲܠܟܵܐ ܕܲܝܗܘܼܕ݂ܵܐ ܠܘܵܬ̣ ܡܲܠܟܵܐ ܕܒ̣ܵܒܹܠ: ܗ̤ܘ ܘܐܸܡܹܗ: ܘܥܲܒ̣ܕܵܘ̈ܗܝ: ܘܪܵܘ̱ܪ̈ܒ̣ܵܢܵܘܗܝ: ܘܲܡܗܲܝܡܢܵܘ̈ܗܝ. ܘܕܲܒ̣ܪܹܗ ܥܲܡܹܗ ܡܲܠܟܵܐ ܕܒ̣ܵܒܹܠ: ܒܲܫܢܲܬ̣ ܬܡܵܢܹܐ ܕܡܲܠܟ̇ܘܼܬܹܗ.

¹³ ܘܐܲܦܸܩ ܡ̣ܢ ܬܲܡܵܢ ܟܠܹܗ ܓܲܙܵܐ ܕܒܲܝܬܹ̇ܗ ܕܡܵܪܝܵܐ: ܘܓܲܙܵܐ ܕܒܹܝܬ̣ ܡܲܠܟܵܐ. ܘܦܲܣܸܩ ܟܠܗܘܿܢ ܡܵܐܢܹ̈ܐ ܕܕܲܗܒ̣ܵܐ ܕܲܥܒܲܕ݂ ܫܠܹܝܡܘܿܢ ܡܲܠܟܵܐ ܕܝܼܣܪܵܝܹܠ ܠܗܲܝܟ̇ܠܹܗ ܕܡܵܪܝܵܐ: ܐܲܝܟ݂ ܕܐܸܡܲܪ ܡܵܪܝܵܐ.

¹⁴ ܘܓܲܠܝܼ ܠܟܠܵܗ̇ ܐܘܿܪܸܫܠܸܡ: ܘܲܠܟ݂ܠܗܘܿܢ ܪܵܘ̱ܪ̈ܒ̣ܵܢܹܐ ܘܲܠܟ݂ܠܗܘܿܢ ܓܲܢ̄ܒܵܪ̈ܲܝ ܚܲܝܠܵܐ: ܥܸܣܪܵܐ ܐܲܠܦ̈ܝܼܢ ܒܓ̣ܵܠܘܼܬ̣ܵܐ: ܘܟ݂ܠܗܘܿܢ ܕܲܚܫܹ̈ܐ: ܘܪ̈ܲܗܵܛܹܐ. ܘܠܵܐ ܫܒܲܩ ܐܸܠܵܐ ܐܸܢ ܡܸܣܟܹ̇ܢܹ̈ܐ ܕܥܲܡܵܐ ܕܐܲܪܥܵܐ.

¹⁵ ܘܓܲܠܝܼ ܠܝܘܿܝܵܟ݂ܝܼܢ ܠܒ̣ܵܒܹܠ: ܘܠܐܸܡܹܗ ܕܡܲܠܟܵܐ: ܘܲܠܢܸܫܵܘ̈ܗܝ ܕܡܲܠܟܵܐ: ܘܠܲܡܗܲܝܡܢܵܘܼ̈ܗܝ: ܘܲܠܪܵܘ̱ܪ̈ܒ̣ܵܢܹܐ ܕܐܲܪܥܵܐ. ܘܐܵܘܒܸ̇ܠ ܐܸܢܘܿܢ ܒܓ̣ܵܠܘܼܬ̣ܵܐ ܡ̣ܢ ܐܘܿܪܸܫܠܸܡ ܠܒ̣ܵܒܹܠ.

¹⁶ ܘܲܠܟ݂ܠܗܘܿܢ ܓܲܒ̣ܪܹ̈ܐ ܚܲܝܠܬ̣ܵܢܹ̈ܐ ܫܲܒ̣ܥܵܐ ܐܲܠܦ̈ܝܼܢ: ܘܕܲܚ̈ܫܹܐ ܘܪ̈ܲܗܵܛܹܐ ܐܵܠܹܦ: ܘܟ݂ܠܗܘܿܢ ܓܲܒ̣ܪܹ̈ܐ ܥܵܒ̣ܕܲܝ̈ ܩܪܵܒ̣ܵܐ: ܐܲܝܬ̇ܝܼ ܐܸܢܘܿܢ ܡܲܠܟܵܐ ܕܒ̣ܵܒܹܠ ܒܓ̣ܵܠܘܼܬ̣ܵܐ ܠܒ̣ܵܒܹܠ.

¹⁷ ܘܐܲܡ̣ܠܸܟ݂ ܡܲܠܟܵܐ ܕܒ̣ܵܒܹܠ ܠܲܡܬܲܢܝܵܐ ܕܵܕܹܗ ܚܠܵܦܵܘܗܝ. ܘܫܲܡܝܼ ܫܡܹܗ ܨܹܕܲܩܝܵܐ.

¹⁸ ܒܲܪ ܥܸܣܪܝܼܢ ܗ̄ܘ̣ܵܐ ܘܲܚܕ݂ܵܐ ܫܢ̈ܝܼܢ ܨܹܕܲܩܝܵܐ ܟܲܕ݂ ܐܲܡ̣ܠܸܟ݂ ܘܲܚܕܲܥܸܣܪܹ̈ܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܗ̇ ܕܐܸܡܹܗ: ܚܲܡܘܿܛ ܒܲܪܬ̣ ܐܹܪܲܡܝܵܐ ܡ̣ܢ ܠܸܒ̣ܢܵܐ.

¹⁹ ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ ܝܘܿܝܵܩܝܼܡ.

²⁰ ܘܲܗܘ̤ܵܐ ܪܘܼܓ̣ܙܹܗ ܕܡܵܪܝܵܐ ܥܲܠ ܝܼܗܘܼܕ݂ܵܐ ܘܥܲܠ ܐܘܿܪܸܫܠܸܡ: ܥܕܲܡܵܐ ܕܲܫܕ݂ܵܐ ܐܸܢܘܿܢ ܡ̣ܢ ܩܕ݂ܵܡܵܘܗܝ. ܘܲܡܪܲܕ݂ ܨܹܕܲܩܝܵܐ ܥܲܠ ܡܲܠܟܵܐ ܕܒ̣ܵܒܹܠ.

25

¹ ܘܲܒ̣ܫܲܢ̄ܬܵܐ ܬܫܝܼܥܵܝܬܵܐ ܠܡܲܠܟ̇ܘܼܬܹܗ: ܒܲܥܣܲܪܬܵܐ ܒܝܲܪܚܵܐ ܥܣܝܼܪܵܝܵܐ: ܐܸܬ̣ܵܐ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܗ̤ܘ ܘܟ݂ܠܹܗ ܚܲܝܠܹܗ ܥܲܠ ܐܘܿܪܸܫܠܸܡ: ܘܲܫ̣ܪܵܐ ܥܠܹܝܗ̇. ܘܲܒ̣ܢܵܐ ܥܠܹܝܗ̇ ܩܲܠܩ̈ܘܼܡܹܐ ܟܲܕ݂ ܚܵܕ݂ܪܵܐ.

² ܘܐܸܬ̣ܚܲܒ̣ܫܲܬ̤ ܩܪܝܼܬ̣ܵܐ ܒܐܘܼܠܨܵܢܵܐ: ܥܕܲܡܵܐ ܠܲܫܢܲܬ̣ ܚܕܲܥܸܣܪܹ̈ܐ ܕܡܲܠܟܵܐ ܨܹܕܲܩܝܵܐ.

³ ܘܒܲܫܢܲܬ̣ ܚܕܲܥܸܣܪܹ̈ܐ ܠܡܲܠܟܵܐ ܨܹܕܲܩܝܵܐ: ܒܝܲܪܚܵܐ ܚܡܝܼܫܵܝܵܐ ܒܲܬ̣ܫܲܥܬ̣ܵܐ ܒܹܗ ܒܝܲܪܚܵܐ: ܥܫܸܢ ܟܲܦܢܵܐ ܒܲܩܪܝܼܬ̣ܵܐ. ܘܠܵܐ ܐܝܼܬ̣ ܗ̄ܘ̣ܵܐ ܠܲܚܡܵܐ ܠܥܲܡܵܐ ܕܐܲܪܥܵܐ.

⁴ ܘܐܸܬ̇ܬܲܪܥܲܬ̤ ܩܪܝܼܬ̣ܵܐ. ܘܟ݂ܠܗܘܿܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ: ܥܪܲܩ̣ܘ ܘܲܢܦܲܩ̣ܘ ܡ̣ܢ ܩܪܝܼܬ̣ܵܐ ܒܠܸܠܝܵܐ: ܒܐܘܼܪܚܵܐ ܕܬܲܪܥܵܐ ܕܒܹܝܬ̣ ܫܘܼܪܹ̈ܐ ܕܥܲܠ ܓܹܢ̄ܒ̣ ܓܲܢܬ̣ܵܐ ܕܡܲܠܟܵܐ. ܘܟܲܠܕܵܝܹ̈ܐ ܟܪܝܼܟ݂ܝܼܢ ܠܲܩܪܝܼܬ̣ܵܐ: ܘܐܸܙܲܠ̣ܘ ܒܐܘܼܪܚܵܐ ܕܲܦܩܲܥܬ̣ܵܐ.

⁵ ܘܲܪܕܲܦ̣ܘ ܚܲܝܠܵܐ ܕܟܲܠܕܵܝܹ̈ܐ ܒܵܬܲܪ ܡܲܠܟܵܐ. ܘܐܲܕ݂ܪܟ݂ܘܼܗܝ ܠܡܲܠܟܵܐ ܒܲܦܩܲܥܬ̣ܵܐ ܕܐܝܼܪܝܼܚܘܿ. ܘܟ݂ܠܹܗ ܚܲܝܠܹܗ ܐܸܬ̣ܒܲܕܲܪ ܡܸܢܹܗ.

⁶ ܘܐܲܚܝܼܕ̇ܘܼܗܝ ܠܡܲܠܟܵܐ: ܘܐܲܣܩܘܼܗܝ ܠܘܵܬ̣ ܡܲܠܟܵܐ ܕܒ̣ܵܒܹܠ ܠܕܸܒ̣ܠܲܬ̣. ܘܡܲܠܸܠ ܥܲܡܹܗ ܕܝܼܢܵܐ.

⁷ ܘܠܲܒ̣ܢܵܘ̈ܗܝ ܕܨܹܕܲܩܝܵܐ ܡܲܠܟܵܐ ܢܲܟܸ̇ܣ ܡܲܠܟܵܐ ܕܒ̣ܵܒܹܠ: ܠܥܹܝܢܵܘ̈ܗܝ. ܘܥܲܝܢܵܘ̈ܗܝ ܕܨܹܕܲܩܝܵܐ ܥܘܲܪ. ܘܐܲܣܪܹܗ ܒܫܸܫ̈ܠܵܬ̣ܵܐ: ܘܐܵܘܒ̇ܠܹܗ ܠܒ̣ܵܒܹܠ.

⁸ ܒܝܲܪܚܵܐ ܚܡܝܼܫܵܝܵܐ ܒܲܬ̣ܫܲܥܬ̣ܵܐ ܒܹܗ ܒܝܲܪܚܵܐ ܗ̤ܝ ܗ̄ܝ̣ ܫܢܲܬ̣ ܬܫܲܥܸܣܪܹ̈ܐ ܠܲܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܐܸܬ̣ܵܐ ܢܒ̣ܘܼܙܲܪܕܵܢ ܪܲܒ̇ ܕܲܚܫܹ̈ܐ ܥܲܒ̣ܕܹ̈ܗ ܕܡܲܠܟܵܐ ܕܒ̣ܵܒܹܠ ܠܐܘܿܪܸܫܠܸܡ.

⁹ ܘܐܵܘܩܸܕ݂ ܠܒܲܝܬܹ̇ܗ ܕܡܵܪܝܵܐ: ܘܲܠܒܹܝܬ̣ ܡܲܠܟܵܐ. ܘܲܠܟ݂ܠܗܘܿܢ ܒܵـ̈ـܬܹܐ ܕܐܘܿܪܸܫܠܸܡ: ܘܲܠܟ݂ܠ ܒܵـ̈ـܬܹܐ ܕܪܵܘ̱ܪ̈ܒ̣ܵܢܹܐ ܐܵܘܩܸܕ݂ ܒܢܘܼܪܵܐ.

¹⁰ ܘܲܠܫܘܼܪܵܐ ܕܐܘܿܪܸܫܠܸܡ ܟܲܕ݂ ܚܵܕ݂ܪܵܐ: ܥܩܲܪܘ ܟܠܹܗ ܚܲܝܠܵܐ ܕܟܲܠ̈ܕܵܝܹܐ ܕܥܲܡ ܪܲܒ̇ ܕܲܚܫܹ̈ܐ.

¹¹ ܘܫܲܪܟܵܐ ܕܥܲܡܵܐ ܕܐܸܫܬ̇ܚܲܪܘ ܒܲܩܪܝܼܬ̣ܵܐ: ܘܢܵܦܠܹ̈ܐ ܕܲܢܦܲܠܘ ܥܲܡ ܡܲܠܟܵܐ ܕܒ̣ܵܒܹܠ: ܘܫܲܪܟܵܐ ܕܚܲܝܠܵܐ ܓܲܠܝܼ ܢܒ̣ܘܼܙܲܪܕܵܢ ܪܲܒ̇ ܕܲܚܫܹ̈ܐ. ܘܐܵܘܒܸ̇ܠ̣ ܐܸܢܘܿܢ ܠܒ̣ܵܒܹܠ.

¹² ܘܡ̣ܢ ܡܸܣܟܹ̇ܢܹ̈ܐ ܕܐܲܪܥܵܐ: ܫܒܲܩ ܢܒ̣ܘܼܙܲܪܕܵܢ ܪܲܒ̇ ܕܲܚܫܹ̈ܐ ܠܟ݂ܵܪ̈ܡܹܐ ܘܲܠܦܲܠܵܚܹ̈ܐ.

¹³ ܘܥܲܡܘܼܕܹ̈ܐ ܕܲܢܚܵܫܵܐ ܕܲܒ̣ܒܲܝܬܹ̇ܗ ܕܡܵܪܝܵܐ: ܘܠܲܩܢܹ̈ܐ: ܘܝܲܡܵܐ ܕܲܢܚܵܫܵܐ ܕܲܒ̣ܒܲܝܬܹܗ ܕܡܵܪܝܵܐ: ܬܲܒܲܪܘ ܟܲܠܕܵܝܹ̈ܐ. ܘܲܫܩܲܠܘ ܢܚܵܫܗܘܿܢ: ܘܐܵܘܒ̇ܠܘܼܗܝ ܠܒ̣ܵܒܹܠ.

¹⁴ ܘܩܲܕ݂ܣܹ̈ܐ: ܘܐܝܼܘܹ̈ܐ: ܘܩܲܪ̈ܕܵܠܹܐ: ܘܟܲܦܹ̈ܐ: ܘܟ݂ܠܗܘܿܢ ܡܵܐܢܹ̈ܐ ܕܲܢܚܵܫܵܐ ܕܲܡܫܲܡܫܝܼܢ ܒܗܘܿܢ: ܢܣܲܒ̣ܘ.

¹⁵ ܘܦܝܼܪ̈ܡܹܐ: ܘܩܲܛܪ̈ܘܼܩܹܐ ܕܕܲܗܒ̣ܵܐ ܘܲܕ݂ܣܹܐܡܵܐ: ܘܟ݂ܵܣܹ̈ܐ: ܢܣܲܒ̣ ܪܲܒ̇ ܕܲܚܫܹ̈ܐ.

¹⁶ ܘܥܲܡܘܼܕܹ̈ܐ ܬܪܹܝܢ: ܘܝܲܡܵܐ ܚܲܕ݂: ܘܠܲܩܢܹ̈ܐ ܕܲܥܒܲܕ݂ ܡܲܠܟܵܐ ܫܠܹܝܡܘܿܢ ܠܒܲܝܬܹ̇ܗ ܕܡܵܪܝܵܐ. ܘܠܵܐ ܗܘ̤ܵܐ ܡܲܬ̣ܩܵܠܵܐ ܠܲܢܚܵܫܗܘܿܢ ܕܟ݂ܠܗܘܿܢ ܡܵܐܢܹ̈ܐ ܗܵܠܹܝܢ. ܘܥܲܡܘܼܕܹ̈ܐ ܗܵܢܘܿܢ.

¹⁷ ܬܡܵܢܲܥܸܣܪܹ̈ܐ ܐܲܡ̈ܝܼܢ: ܪܵܘܡܹܗ ܕܥܲܡܘܼܕ݂ܵܐ ܚܲܕ݂ ܡܸܢܗܘܿܢ. ܘܐܲܓܵܢܵܐ ܥܠܵܘܗܝ ܕܲܢܚܵܫܵܐ. ܘܪܵܘܡܵܗ̇ ܕܐܲܓܵܢܵܐ ܬܠܵܬ̣ ܐܲܡ̈ܝܼܢ. ܘܗܸܠܩܹ̈ܐ ܘܪ̈ܘܼܡܵܢܹܐ ܥܲܠ ܐܲܓܵܢܵܐ ܟܲܕ݂ ܚܵܕ݂ܪܵܐ: ܘܟ݂ܠܵܗ̇ ܕܲܢܚܵܫܵܐ ܘܗܵܟܲܢܵܐ ܐܵܦ ܥܲܠ ܥܲܡܘܼܕ݂ܵܐ ܐ̄ܚܪܹܢܵܐ: ܘܟ݂ܠܵܗ̇ ܕܲܢܚܵܫܵܐ.

¹⁸ ܘܲܕ݂ܒܲܪ ܪܲܒ̇ ܕܲܚܫܹ̈ܐ ܠܫܹܪܝܼܵܐ ܪܲܒܵܐ ܕܟ݂ܵܗ̈ܢܹܐ: ܘܠܲܨܦܲܢܝܵܐ ܟܵܗܢܵܐ ܕܒ̣ܵܬ̣ܪܹܗ: ܘܠܲܬ̣ܠܵܬ̣ܵܐ ܢܵܛܪ̈ܲܝ ܬܲܪ̈ܥܹܐ.

¹⁹ ܘܡ̣ܢ ܩܪܝܼܬ̣ܵܐ ܕܒܲܪ ܡܗܲܝܡܢܵܐ ܚܲܕ݂: ܕܗ̤ܘ ܦܩܝܼܕ݂ ܗ̄ܘ̣ܵܐ ܥܲܠ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ: ܘܚܲܡܫܵܐ ܓܲܒ̣ܪ̈ܝܼܢ ܕܡܸܬ̣ܚ̄ܙܹܝܢ ܗ̄ܘ̣ܵܘ ܩܕ݂ܵܡ ܡܲܠܟܵܐ ܕܐܸܫܬ̇ܟܲܚܘ ܒܲܩܪܝܼܬ̣ܵܐ: ܘܲܠܣܵܦܪܵܐ ܘܲܠܪܲܒ̇ ܚܲܝܠܵܐ ܕܲܡܚܲܠܝܼܢ ܗ̄ܘ̣ܵܘ ܠܥܲܡܵܐ ܕܐܲܪܥܵܐ: ܘܸܫܬ̇ܝܼܢ ܓܲܒ̣ܪ̈ܝܼܢ ܡ̣ܢ ܥܲܡܵܐ ܕܐܲܪܥܵܐ ܕܐܸܫܬ̇ܚܲܪܘ ܒܲܩܪܝܼܬ̣ܵܐ.

²⁰ ܘܲܕ݂ܒܲܪ ܐܸܢܘܿܢ ܢܒ̣ܘܼܙܲܪܕܵܢ ܪܲܒ̇ ܕܲܚܫܹ̈ܐ. ܘܐܵܘܒܸ̇ܠ ܐܸܢܘܿܢ ܠܘܵܬ̣ ܡܲܠܟܵܐ ܕܒ̣ܵܒܹܠ ܠܕܸܒ̣ܠܲܬ̣.

²¹ ܘܲܡܚܵܐ ܐܸܢܘܿܢ ܡܲܠܟܵܐ ܕܒ̣ܵܒܹܠ: ܘܩܲܛܸܠ ܐܸܢܘܿܢ ܒܕܸܒ̣ܠܲܬ̣ ܒܐܲܪܥܵܐ ܕܲܚܡܵܬ̣. ܘܓܲܠܝܼ ܠܲܝܗܘܼܕ݂ܵܐ ܡ̣ܢ ܐܲܪܥܹܗ.

²² ܘܥܲܡܵܐ ܕܐܸܫܬ̇ܚܲܪܘ ܒܐܲܪܥܵܐ ܕܲܝܗܘܼܕ݂ܵܐ: ܐܲܝܠܹܝܢ ܕܲܫܒܲܩ ܗ̄ܘ̣ܵܐ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܐܲܩܝܼܡ ܥܠܲܝܗܘܿܢ ܠܲܓܕܲܠܝܵܐ ܒܲܪ ܐܲܚܝܼܩܲܡ ܒܲܪ ܫܵܦܵܢ.

²³ ܘܲܫܡܲܥܘ ܟܠܗܘܿܢ ܪ̈ܲܒܲܝ ܚܲܝ̈ܠܹܐ ܗܸܢܘܿܢ ܘܓܲܒ̣ܪ̈ܲܝܗܘܿܢ: ܕܐܲܫܠܸܛ ܡܲܠܟܵܐ ܕܒ̣ܵܒܹܠ ܠܲܓܕܲܠܝܵܐ. ܘܐܸܬ̣ܵܘ ܠܘܵܬ̣ ܓܕܲܠܝܵܐ ܠܡܲܨܦܝܵܐ: ܐܝܼܫܡܵܥܹܝܠ ܒܲܪ ܢܬ̣ܵܢܝܵܐ: ܘܝܘܿܚܲܢܢ ܒܲܪ ܩܘܿܪܚ: ܘܫܹܪܝܼܵܐ ܒܲܪ ܬܢܲܚܡܲܬ̣: ܘܛܘܼܒ̣ܝܼܵܐ: ܘܝܲܙܲܢܝܵܐ ܒܲܪ ܡܲܥܟܲܬ̣: ܗܸܢܘܿܢ ܘܓܲܒ̣ܪ̈ܲܝܗܘܿܢ.

²⁴ ܘܝܼܡܵܐ ܠܗܘܿܢ ܓܕܲܠܝܵܐ: ܘܲܠܐ̄ܢܵܫܲܝ̈ܗܘܿܢ: ܘܐܸܡܲܪ ܠܗܘܿܢ: ܠܵܐ ܬܸܕ݂ܚ̄ܠܘܼܢ ܡ̣ܢ ܟܲܠܕܵܝܹ̈ܐ: ܬܸܒ̣ܘ ܒܐܲܪܥܵܐ ܘܲܦܠܘܿܚܘ ܠܡܲܠܟܵܐ ܕܒ̣ܵܒܹܠ: ܘܢܸܛܐܲܒ̣ ܠܟ݂ܘܿܢ.

²⁵ ܘܲܒ̣ܝܲܪܚܵܐ ܫܒ̣ܝܼܥܵܝܵܐ: ܐܸܬ̣ܵܐ ܐܝܼܫܡܵܥܹܝܠ ܒܲܪ ܢܬܲܢܝܵܐ: ܒܲܪ ܐܝܼܫܡܵܥܹܝܠ: ܡ̣ܢ ܙܲܪܥܵܐ ܕܡܲܠܟ̇ܘܼܬ̣ܵܐ: ܘܥܸܣܪܵܐ ܓܲܒ̣ܪ̈ܝܼܢ ܥܲܡܹܗ. ܘܲܡ̣ܚܵܐܘܼܗܝ ܠܲܓܕܲܠܝܵܐ ܘܡܝܼܬ̣: ܘܐܵܦ ܠܲܝܗܘܼܕ݂ܵܝܹ̈ܐ ܘܲܠܟܲܠܕܵܝܹ̈ܐ ܕܲܗܘ̤ܵܘ ܥܲܡܹܗ ܒܡܲܨܦܝܵܐ.

²⁶ ܘܩܵܡ ܟܠܹܗ ܥܲܡܵܐ ܕܐܲܪܥܵܐ ܡ̣ܢ ܙܥܘܿܪܵܐ ܘܲܥܕܲܡܵܐ ܠܪܲܒܵܐ: ܘܟܠܗܘܿܢ ܪ̈ܲܒܲܝ ܚܲܝ̈ܠܹܐ: ܘܥܲܠ̣ܘ ܠܡܸܨܪܹܝܢ: ܡܸܛܠ ܕܲܕ݂ܚܸܠ̣ܘ ܡ̣ܢ ܟܲܠܕܵܝܹ̈ܐ.

²⁷ ܘܒܲܫܢܲܬ̣ ܬܠܵܬ̣ܝܼܢ ܘܲܫܒܲܥ ܫܢ̈ܝܼܢ ܠܓܵܠܘܼܬܹܗ ܕܝܘܿܝܵܟܝܼܢ ܡܲܠܟܵܐ ܕܲܝܗܘܼܕ݂ܵܐ: ܒܝܲܪܚܵܐ ܕܲܬ̣ܪܸܥܣܲܪ ܒܫܲܒ̣ܥܵܐ ܘܥܸܣܪܝܼܢ ܒܹܗ ܒܝܲܪܚܵܐ: ܐܲܪܝܼܡ ܐܹܘܲܠ ܡܪܘܿܕ݂ܵܟ݂ ܡܲܠܟܵܐ ܕܒ̣ܵܒܹܠ: ܒܫܲܢ̄ܬܵܐ ܩܲܕ݂ܡܵܝܬܵܐ ܕܐܲܡ̣ܠܸܟ݂: ܒܪܹܫܹܗ ܕܝܘܿܝܵܟ݂ܝܼܢ ܡܲܠܟܵܐ ܕܲܝܗܘܼܕ݂ܵܐ. ܘܐܲܦܩܹܗ ܡ̣ܢ ܒܹܝܬ̣ ܐܲܣܝܼܪܹ̈ܐ.

²⁸ ܘܡܲܠܸܠ̣ ܥܲܡܹܗ ܛܵܒ̣ܵـ̈ـܬ̣ܵܐ. ܘܐܲܪܡܝܼ ܟܘܼܪܣܝܹܗ ܠܥܸܠ ܡ̣ܢ ܟܘܼܪ̈ܣܵܘܵܬ̣ܵܐ ܕܡܲܠ̈ܟܹ̇ܐ ܕܐܝܼܬ̣ ܥܲܡܹܗ ܒܒ̣ܵܒܹܠ.

²⁹ ܘܫܲܚܠܸܦ ܠܒ̣ܘܼܫܲܝ̈ ܐܲܣܘܼܪܹܗ. ܘܐܸܟܲܠ ܠܲܚܡܵܐ ܩܕ݂ܵܡܵܘܗܝ ܐܲܡܝܼܢܵܐܝܼܬ̣ ܟܠ ܝܵܘܡܲܝ̈ ܚܲܝܵܘ̈ܗܝ.

³⁰ ܘܲܒ̣ܫܵܪܘܼܬܹܗ ܫܵܪܘܼܬ̣ܵܐ ܐܲܡܝܼܢܵܐܝܼܬ̣ ܡܸܬ̣ܝܲܗ̄ܒܵܐ ܗ̄ܘ̣ܵܬ̣ ܠܹܗ ܡ̣ܢ ܩܕ݂ܵܡ ܡܲܠܟܵܐ ܕܒ̣ܵܒܹܠ ܒܟ݂ܠܝܘܿܡ ܟܠ ܝܵܘ̈ܡܲܝ ܚܲܝܵܘ̈ܗܝ.