1 ܘܡ̣ܢ ܒܵܬܲܪ ܕܡܝܼܬ̣ ܝܼܫܘܿܥ ܒܲܪܢܘܿܢ ܥܲܒ̣ܕܹ̇ܗ ܕܡܵܪܝܵܐ: ܫܲܐܠܸܘ ܒ̈ܢܲܝ ܝܼܣܪܵܝܹܠ ܒܡܵܪܝܵܐ ܘܐܵܡ̇ܪܝܼܢ: ܡܲܢܘܼ ܠܲܢ ܥܲܠ ܟܢܲܥ̈ܢܵܝܹܐ ܒܪܹܫܵܐ: ܠܡܸܬ̣ܟܲܬܵܫܘܼ ܥܲܡܗܘܿܢ ܒܲܩܪܵܒ̣ܵܐ.
2 ܘܐܸܡܲܪ ܡܵܪܝܵܐ ܝܼܗܘܼܕܼܵܐ ܢܸܣܲܩ: ܗܵܐ ܐܲܫܠܸܡ̇ܬܵܗ̇ ܠܐܲܪܥܵܐ ܒܐܝܼܕܼܵܘ̈ܗܝ.
3 ܘܐܸܡܲܪ ܝܼܗܘܼܕܼܵܐ ܠܫܸܡܥܘܿܢ ܐܲܚܘܼܗܝ: ܣܲܩ ܥܲܡܝ ܒܦܸܨܲܬ̣ܝ: ܘܢܸܬ̣ܟܲܬܲܫ ܥܲܡ ܟܢܲܥ̈ܢܵܝܹܐ: ܘܐܸܙܲܠ ܐܵܦ ܐܸܢܵܐ ܥܲܡܵܟ̣ ܒܦܸܨܬ̣ܵܟ. ܘܐܸܙܲܠ ܥܲܡܹܗ ܫܸܡܥܘܿܢ.
4 ܘܐܸܙܲܠ ܝܼܗܘܼܕܼܵܐ: ܘܐܫܠܸܡ ܐܸܢܘܿܢ ܡܵܪܝܵܐ ܠܲܟ̣ܢܲܥ̈ܢܵܝܹܐ: ܘܲܠܦܲܪ̈ܙܵܝܹܐ ܒܐܝܼܕܲܝ̈ܗܘܿܢ: ܘܲܚܪܲܒ̣ܘ ܡܸܢܗܘܿܢ ܒܒ̣ܵܙܵܩ: ܥܸܣܪܵܐ ܐܲܠܦ̈ܝܼܢ ܓܲܒ̣ܪ̈ܝܼܢ.
5 ܘܐܸܫܟ̇ܚܘܼܗܝ ܠܡܵܪܵܗ̇ ܕܒ̣ܵܙܵܩ ܒܒ̣ܵܙܵܩ: ܘܐܸܬ̣ܟܲܬܲܫ̣ܘ ܥܲܡܹܗ: ܘܲܚܪܲܒ̣ܘ ܠܲܟ̣ܢܲܥܢܵܝܹܐ ܘܲܠܦܲܪ̈ܙܵܝܹܐ.
6 ܘܲܥܪܲܩ̣ ܡܵܪܵܗ̇ ܕܒ̣ܵܙܵܩ: ܘܲܪܕܲܦ̣ܘ ܒܵܬ̣ܪܹܗ ܘܐܲܚܕ̇ܘܼܗܝ: ܘܦܲܣܸܩ̣ܘ ܟܪ̈ܵܘܵܬ̣ܵܐ ܕܐܝܼܕܼܵܘ̈ܗܝ ܘܲܕܼܪܸ̈ܓ̣ܠܵܘܗܝ.
7 ܘܐܸܡܲܪ ܡܵܪܵܗ̇ ܕܒ̣ܵܙܵܩ: ܫܲܒ̣ܥܝܼܢ ܡܲܠܟ̇ܝܼ̈ܢ ܕܲܡܦܲܣ̈ܩܵܢ ܗ̄ܘܲܝ̈ ܟܪ̈ܵܘܵܬ̣ܵܐ ܕܐܝܼܕܲܝ̈ܗܘܿܢ ܘܲܕܼܪܸ̈ܓ̣ܠܲܝܗܘܿܢ: ܡܠܲܩܛܝܼܢ ܗ̄ܘ̣ܵܘ ܠܲܚܡܵܐ ܡ̣ܢ ܬܚܹܝܬ̣ ܦܵܬ̣ܘܿܪܝ: ܐܲܝܟ̣ ܡܵܐ ܕܥܸܒ̣ܕܹ̇ܬ̣ ܗܵܟܲܢܵܐ ܦܲܪܥܲܢܝ ܐܲܠܵܗܵܐ. ܘܐܲܥܠܘܼܗܝ ܠܐܘܿܪܸܫܠܸܡ: ܘܡܝܼܬ̣ ܬܲܡܵܢ.
8 ܘܐܸܬ̣ܟܲܬܲܫ̣ܘ ܒ̈ܢܲܝ ܝܼܗܘܼܕܼܵܐ ܒܐܘܿܪܸܫܠܸܡ ܘܟܲܒ̣ܫܘܼܗ̇: ܘܲܡ̣ܚܵܐܘܼܗ̇ ܒܦܘܼܡܵܐ ܕܚܲܪܒܵܐ: ܘܲܠܩܘܼܪ̈ܝܵܗ̇ ܐܵܘܩܸܕܼܘ ܒܢܘܼܪܵܐ.
9 ܘܒ̣ܵܬܲܪ ܗܵܝܕܹ̇ܝܢ: ܢܚܸܬ̣ܘ ܒ̈ܢܲܝ ܝܼܗܘܼܕܼܵܐ ܠܡܸܬ̣ܟܲܬܵܫܘܼ ܥܲܡ ܟܢܲܥ̈ܢܵܝܹܐ: ܝܵܬ̣ܒܲܝ̈ ܛܘܼܪܵܐ ܘܬܲܝ̱ܡܢܵܐ ܘܲܦܩܲܥܬ̣ܵܐ.
10 ܘܐܸܙܲܠ ܝܼܗܘܼܕܼܵܐ ܥܲܠ ܟܢܲܥ̈ܢܵܝܹܐ ܕܝܵܬ̣ܒ̇ܝܼܢ ܒܚܸܒ̣ܪܘܿܢ: ܘܲܫܡܵܗ̇ ܕܚܸܒ̣ܪܘܿܢ ܡ̣ܢ ܩܕܼܝܼܡ ܩܘܼܪܝܲܬ̣ ܐܲܪܒܲܥ: ܘܩܲܛܸܠ̣ܘ ܠܫܝܼܫܲܝ: ܘܠܲܐܚܝܼܡܵܢ: ܘܲܠܬ̣ܘܼܠܡܲܝ ܒ̈ܢܲܝ ܓܲܢ̄ܒܵܪܹ̈ܐ.
11 ܘܐܸܙܲܠܘ ܡ̣ܢ ܬܲܡܵܢ ܥܲܠ ܝܵܬ̣ܒܲܝ̈ ܕܵܒ̣ܝܼܪ: ܘܲܫܡܵܗ̇ ܕܕܼܵܒ̣ܝܼܪ ܡ̣ܢ ܩܕܼܝܼܡ ܩܘܼܪܝܲܬ̣ ܣܸܦܪܵܐ.
12 ܘܐܸܡܲܪ ܟܵܠܵܒ̣: ܡ̇ܢ ܕܢܸܟ̣ܒ̇ܫܝܼܗ̇ ܠܩܘܼܪܝܲܬ̣ ܣܸܦܪܵܐ ܘܢܸܚ̱ܪܒ̣ܝܼܗ̇: ܐܸܬܸ̇ܠ ܠܹܗ ܠܥܲܟ̣ܣܵܐ ܒܪܲܬ̣ܝ ܐܲܢ̄ܬ̇ܬ̣ܵܐ.
13 ܘܟܲܒ̣ܫܵܗ̇ ܥܲܬ̣ܢܵܐܹܝܠ ܒܲܪ ܩܲܢܲܙ ܐܲܚܘܼܗܝ ܕܟ̣ܵܠܵܒ̣ ܕܲܙܥܘܿܪ ܡܸܢܹܗ. ܘܝܲܗ̄ܒ̣ ܠܹܗ ܠܥܲܟ̣ܣܵܐ ܒܲܪܬܹܗ ܐܲܢ̄ܬ̇ܬ̣ܵܐ.
14 ܘܟܲܕܼ ܥܵܐܠܵܐ: ܐܸܬ̣ܓܲܪܓܲܬ̤ ܠܡܸܫܐܸܠ ܡ̣ܢ ܐܲܒ̣ܘܼܗܝ ܚܲܩܠܵܐ: ܘܐܸܬ̣ܪܲܟ̣ܢܲܬ̤ ܡ̣ܢ ܚܡܵܪܵܐ. ܐܵܡܲܪ ܠܵܗ̇ ܟܵܠܵܒ̣: ܡܵܐ ܠܹܟ̣ܝ ܒܪܲܬ̣ܝ.
15 ܐܵܡ̇ܪܵܐ ܠܹܗ. ܗܲܒ̣ ܠܝܼ ܒܘܼܪܟ̇ܬ̣ܵܐ: ܡܸܛܠ ܕܒܲܐܪܥܵܐ ܕܬܲܝ̱ܡܢܵܐ ܝܲܗ̄ܒܬܵܢܝ: ܗܲܒ̣ܠܝܼ ܒܹܝܬ̣ ܫܸܩܝܵܐ ܕܡܲـ̈ـܝܵܐ. ܘܝܲܗ̄ܒ̣ ܠܵܗ̇ ܟܵܠܵܒ̣ ܒܹܝܬ̣ ܫܸܩܝܵܐ ܥܸܠܵܝܬܵܐ ܘܒܹܝܬ̣ ܫܸܩܝܵܐ ܬܲܚܬܵܝܬܵܐ.
16 ܘܲܒ̣̈ܢܲܝ ܩܝܼܢܲܝ ܚܡܘܼܗܝ ܕܡܘܼܫܹܐ: ܡܠܸܩ̣ܘ ܡ̣ܢ ܩܪܹܝܼܬ̣ܵܐ ܕܕܸܩ̈ܠܹܐ ܥܲܡ ܒ̈ܢܲܝ ܝܼܗܘܼܕܼܵܐ: ܠܡܲܕܼܒ̇ܪܵܐ ܕܲܝܗܘܼܕܼܵܐ ܕܲܒ̣ܬܲܝ̱ܡܢܵܐ ܕܥܵܕܲܪ: ܘܐܸܙܲܠ̣ܘ ܘܐܵܘܬܸ̇ܒ̣ܘ ܠܥܲܡܵܐ.
17 ܘܐܸܙܲܠ ܫܸܡܥܘܿܢ ܥܲܡ ܝܼܗܘܼܕܼܵܐ ܐܲܚܘܼܗܝ: ܘܲܡܚ̣ܵܘ ܠܲܟ̣ܢܲܥܢܵܝܹ̈ܐ ܕܝܵܬ̣ܒ̇ܝܼܢ ܒܨܘܼܦܵܬ̣ ܘܐܲܚ̱ܪܡܘܼܗ̇: ܘܲܩܪܵܘ ܫܡܵܗ̇ ܕܲܩܪܝܼܬ̣ܵܐ ܚܸܪܡܵܐ.
18 ܘܟ̣ܒܲܫ ܝܼܗܘܼܕܼܵܐ ܠܥܵܐܙܵܐ ܘܠܲܬ̣ܚܘܼܡܹ̈ܝܗ: ܘܠܲܐܫܩܵܠܘܿܢ ܘܠܲܬ̣ܚܘܼܡܹ̈ܝܗ̇: ܘܲܠܥܸܩܪܘܿܢ ܘܠܲܬ̣ܚܘܼܡܹ̈ܝܗ̇.
19 ܘܲܗܘ̤ܵܐ ܡܵܪܝܵܐ ܥܲܡ ܝܼܗܘܼܕܼܵܐ ܘܝܼܪܸܬ̣ܘ ܛܘܼܪܵܐ: ܡܸܛܠ ܕܠܵܐ ܚܪܲܒ̣ܘ ܠܝܵܬ̣ܒܲܝ̈ ܥܘܼܡܩܵܐ: ܕܡܲܪ̈ܟ̇ܒ̣ܵܬ̣ܵܐ ܕܦܲܪܙܠܵܐ ܐܝܼܬ̣ ܠܗܘܿܢ.
20 ܘܝܲܗ̄ܒ̣ܘ ܠܟ̣ܵܠܵܒ̣ ܚܸܒ̣ܪܘܿܢ ܐܲܝܟ̣ ܕܐܸܡܲܪ ܡܘܼܫܹܐ: ܘܩܲܛܸܠܘ ܘܐܵܘܒܸ̇ܕܼܘ ܡ̣ܢ ܬܲܡܵܢ ܬܠܵܬ̣ܵܐ ܒ̈ܢܲܝ ܓܲܢ̄ܒܵܪܹ̈ܐ.
21 ܘܲܠܝܵܒ̣ܘܿܣܵܝܹ̈ܐ ܕܝܵܬ̣ܒ̇ܝܼܢ ܒܐܘܿܪܸܫܠܸܡ: ܠܵܐ ܐܵܘܒܸ̇ܕܼܘ ܒ̈ܢܲܝ ܒܸܢܝܵܡܹܝܢ: ܘܝܼܬܸܒ̣ܘ ܝܵܒ̣̈ܘܿܣܵܝܹܐ ܥܲܡ ܒ̈ܢܲܝ ܒܸܢܝܵܡܹܝܢ ܒܐܘܿܪܸܫܠܸܡ ܥܕܲܡܵܐ ܠܝܵܘܡܵܢܵܐ.
22 ܘܲܣܠܸܩ̣ܘ ܕܒܹܝܬ̣ ܝܵܘܣܸܦ ܘܐܵܦ ܗܸܢܘܿܢ ܠܒܹܝܬ̣ ܐܹܝܠ ܘܡܵܪܝܵܐ ܥܲܡܗܘܿܢ.
23 ܘܦܵܫܘ ܕܒܹܝܬ̣ ܝܵܘܣܸܦ ܒܒܹܝܬ̣ ܐܹܝܠ: ܘܲܫܡܵܗ̇ ܕܲܩܪܝܼܬ̣ܵܐ ܡ̣ܢ ܩܕܼܝܼܡ ܠܘܵܙ.
24 ܘܲܚܙܵܘ ܢܵܛܘܼܪܹ̈ܐ ܓܲܒ̣ܪܵܐ ܕܢܵܦܹ̇ܩ ܡ̣ܢ ܩܪܝܼܬ̣ܵܐ ܘܐܵܡ̇ܪܝܼܢ ܠܹܗ: ܚܵܘܵܢ ܐܲܝܢܵܘ ܡܲܥܠܵܢܵܐ ܕܲܩܪܝܼܬ̣ܵܐ: ܘܢܸܥܒܸ̇ܕܼ ܥܲܡܵܟ̣ ܫܠܵܡܵܐ.
25 ܘܚܵܘܝܼ ܐܸܢܘܿܢ ܡܲܥܠܵܢܵܐ ܕܲܩܪܝܼܬ̣ܵܐ: ܘܲܡ̣ܚܵܘ ܠܲܩܪܝܼܬ̣ܵܐ ܒܦܘܼܡܵܐ ܕܚܲܪܒܵܐ: ܘܲܠܓܲܒ̣ܪܵܐ ܗܵܘ̇ ܘܲܠܟ̣ܠܵܗ̇ ܫܲܪܒ̇ܬܹܗ ܫܲܒ̣ܩܘܼܗܝ.
26 ܘܐܸܙܲܠ ܓܲܒ̣ܪܵܐ ܗܵܘ̇ ܠܐܲܪܥܵܐ ܕܚܹܬ̣ܵܝܹ̈ܐ ܘܲܒ̣ܢܵܐ ܩܪܝܼܬ̣ܵܐ: ܘܲܩܪܵܐ ܫܡܵܗ̇ ܠܘܿܙ: ܘܗ̤ܘܝܘܼ ܫܡܵܗ̇ ܥܕܲܡܵܐ ܠܝܵܘܡܵܢܵܐ.
27 ܘܠܵܐ ܚܪܲܒ̣ ܡܢܲܫܹܐ ܠܒܹܝܬ̣ ܫܵܐܲܢ ܘܲܠܟܲܦܪ̈ܘܿܢܹܝܗ̇: ܘܲܠܬܲܥܢܵܟ ܘܲܠܟܲܦܪ̈ܘܿܢܹܝܗ̇: ܘܲܠܝܵܬ̣ܒܲܝ̈ ܕܘܿܪ ܘܲܠܟܲܦܪ̈ܘܿܢܹܝܗ̇: ܘܲܠܝܵܬ̣ܒܲܝ̈ ܐܲܒ̣ܝܼܢܥܵܡ ܘܲܠܟܲܦܪ̈ܘܿܢܹܝܗ̇: ܘܲܠܝܵܬ̣ܒܲܝ̈ ܡܲܓܕ̇ܘܼ ܘܲܠܟܲܦܪ̈ܘܿܢܹܝܗ̇: ܐܸܫܬܲܥܒܲܕܼ ܟܝܼܥܢܵܝܵܐ ܕܝܵܬܹܒ̣ ܒܐܲܪܥܵܐ ܗܵܝ̇.
28 ܘܟܲܕܼ ܐܸܬ̣ܚܲܝܲܠ ܝܼܣܪܵܝܹܠ: ܟܲܒ̣ܫܹܗ ܠܲܟ̣ܢܲܥܢܵܝܵܐ ܒܡܲܕܲܐܬ̣ܵܐ: ܘܡܵܘܒܵܕܼܘ ܠܵܐ ܐܵܘܒ̇ܕܹܗ.
29 ܘܐܲܦܪܹܝܡ ܠܵܐ ܐܵܘܒܸ̇ܕ ܠܲܟ̣ܢܲܥܢܵܝܵܐ ܕܝܵܬܹܒ̣ ܒܓ̣ܵܙܵܪ: ܘܝܼܬܸܒ̣ܘ ܟܢܲܥܢܵܝܹ̈ܐ ܒܲܝܢܵܬ̣ܗܘܿܢ ܒܓ̣ܵܙܵܪ.
30 ܘܲܙܒ̣ܘܿܠܘܿܢ ܠܵܐ ܐܵܘܒܸ̇ܕܼ ܠܝܵܬ̣ܒܲܝ̈ ܩܸܛܪܘܿܢ ܘܲܠܝܵܬ̣ܒܲܝ̈ ܝܲܗܠܝܼܠ. ܘܝܼܬܸܒ̣ܘ ܟܢܲܥܢܵܝܹ̈ܐ ܥܲܡܹܗ: ܘܐܸܬ̣ܟ̇ܒܸܫܘ ܒܡܲܕܲܐܬ̣ܵܐ.
31 ܘܐܵܫܹܝܪ ܠܵܐ ܐܵܘܒܸ̇ܕܼ ܠܝܵܬ̣ܒܲܝ̈ ܥܲܟ̇ܘܿ: ܘܲܠܝܵܬ̣ܒܲܝ̈ ܨܲܝܕ̇ܘܿܢ: ܘܠܲܚܒܸܠ: ܘܠܐܝܼܙܒܸ̇ܠ: ܘܲܠܚܲܠܒ̣ܵܐ: ܘܠܵܐܦܵܩ: ܘܲܠܪܵܚܘܿܒ̣.
32 ܘܝܼܬܸܒ̣ ܐܵܫܹܝܪ ܒܲܝܢܵܬ̣ ܟܢܲܥܢܵܝܹ̈ܐ ܝܵܬ̣ܒܲܝ̈ ܐܲܪܥܵܐ: ܡܸܛܠ ܕܠܵܐ ܐܵܘܒܸ̇ܕܼ ܐܸܢܘܿܢ.
33 ܘܢܲܦ̮ܬܵܠܝܼ ܠܵܐ ܐܵܘܒܸ̇ܕ ܠܝܵܬ̣ܒܲܝ̈ ܒܹܝܬ̣ ܫܡܸܫ: ܘܲܠܝܵܬ̣ܒܲܝ̈ ܒܹܝܬ̣ ܥܢܵܬ̣: ܘܝܼܬܸܒ̣ܘ ܒܹܝܬ̣ ܟܢܲܥܢܵܝܹܐ ܝܵܬ̣ܒܲܝ̈ ܐܲܪܥܵܐ: ܘܝܵܬ̣ܒܲܝ̈ ܒܹܝܬ̣ ܫܡܸܫ: ܘܝܵܬ̣ܒܲܝ̈ ܒܹܝܬ̣ ܥܢܵܬ̣: ܘܐܸܬ̣ܟ̇ܒܸܫܘ ܠܗܘܿܢ ܒܡܲܕܲܐܬ̣ܵܐ.
34 ܘܐܲܪܚܸܩ̣ܘ ܐܸܢܘܿܢ ܠܐܵܡܘܿܪ̈ܵܝܹܐ ܒ̈ܢܲܝ ܕܵܢ ܠܛܘܼܪܵܐ: ܡܸܛܠ ܕܠܵܐ ܫܒܲܩ̣ܘ ܐܸܢܘܿܢ ܠܡܸܚܲܬ̣ ܠܥܘܼܡܩܵܐ.
35 ܘܐܸܬ̇ܛܦܝܼܣܘ ܐܵܡܘܿܪ̈ܵܝܹܐ ܠܡܸܬܲܒ̣ ܒܐܲܪܥܵܐ ܕܲܚܕܸܣ ܒܛܘܼܪܵܐ: ܒܐܲܠܘܿܢ ܘܲܒ̣ܫܲܥ̱ܠܒ̣ܝܼܢ: ܘܥܸܫܢܲܬ̤ ܐܝܼܕܼܵܐ ܕܒܹܝܬ̣ ܝܵܘܣܸܦ: ܘܐܸܬ̣ܟ̇ܒܸܫܘ ܒܡܲܕܲܐܬ̣ܵܐ.
36 ܘܲܬ̣ܚܘܼܡܵܐ ܕܐܵܡܘܿܪ̈ܵܝܹܐ: ܡ̣ܢ ܡܲܣܩܵܢܵܐ ܕܥܸܩܪܘܿܢ ܡ̣ܢ ܫܩܝܼܦܵܐ ܘܲܠܥܸܠ.
1 ܘܲܣܠܸܩ ܡܲܠܲܐܟܹܗ ܕܡܵܪܝܵܐ ܡ̣ܢ ܓܲܠܓܵܠܵܐ ܠܒܸܟ̣ܝܵܢ: ܘܐܸܡܲܪ ܠܲܒ̣̈ܢܲܝ ܝܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܝܵܐ: ܐܸܢܵܐ ܐܲܣܩ̇ܬܟܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܘܐܲܝܬ̇ܝܼܬ̇ܟ̇ܘܿܢ ܠܐܲܪܥܵܐ ܕܝܼܡ̇ܝܼܬ̣ ܠܐܲܒ̣ܵܗܲܝ̈ܟ̇ܘܿܢ: ܘܐܸܡܪܹܬ̣ ܕܠܵܐ ܐܹܒܲܛܸܠ ܩܝܵܡܝ ܕܥܲܡܟ̣ܘܿܢ ܠܥܵܠܲܡ.
2 ܘܐܲܢ̄ܬ̇ܘܿܢ ܠܵܐ ܬܩܝܼܡܘܼܢ ܩܝܵܡܵܐ ܠܝܵܬ̣ܒܲܝ̈ ܐܲܪܥܵܐ ܗܵܕܹܐ: ܡܲܕܼܒ̇ܚܲܝ̈ܗܘܿܢ ܥܲܩܲܪܘ. ܘܠܵܐ ܫܡܲܥܬ̇ܘܿܢ ܠܩܵܠܝܼ: ܠܡܵܢܵܐ ܗܵܟܲܢܵܐ ܥܒܲܕ̇ܬ̇ܘܿܢ.
3 ܐܵܦ ܐܸܢܵܐ ܗܵܟܲܢܵܐ ܐܸܡ̇ܪܹܬ̣: ܕܠܵܐ ܐܵܘܒܸ̇ܕܼ ܐܸܢܘܿܢ ܡ̣ܢ ܩܕܼܵܡܲܝܟ̇ܘܿܢ: ܘܢܸܗܘܘܿܢ ܠܟ̣ܘܿܢ ܠܲܣܪܝܼܩܘܼܬ̣ܵܐ: ܘܐܲܠܵܗܲܝ̈ܗܘܿܢ ܢܸܗܘܘܿܢ ܠܟ̣ܘܿܢ ܠܬ̣ܘܼܩ̱ܠܬ̣ܵܐ.
4 ܘܟܲܕܼ ܐܸܡܲܪ ܡܲܠܲܐܟܹ̇ܗ ܕܡܵܪܝܵܐ ܡܸܠܹ̈ܐ ܗܵܠܹܝܢ ܠܝܼܣܪܵܝܹܠ: ܐܲܪܝܼܡܘ ܥܲܡܵܐ ܟܠܹܗ ܩܵܠܗܘܿܢ ܘܲܒ̣ܟ̣ܵܘ.
5 ܘܲܩ̣ܪܵܐ ܥܲܡܵܐ ܫܡܹܗ ܕܐܲܬ̣ܪܵܐ ܗܵܘ̇ ܒܸܟ̣ܝܵܢ: ܘܕܲܒܲܚܘ ܬܲܡܵܢ ܠܡܵܪܝܵܐ.
6 ܘܫܲܕܲܪ ܝܼܫܘܿܥ ܠܥܲܡܵܐ: ܘܐܸܙܲܠܘ ܒ̈ܢܲܝ ܝܼܣܪܵܝܹܠ ܓܒܲܪ ܠܝܵܪܬ̇ܘܼܬܹܗ ܠܡܹܐܪܲܬ̤ ܐܲܪܥܵܐ.
7 ܘܲܦܠܲܚ̣ܘ ܥܲܡܵܐ ܠܡܵܪܝܵܐ ܟܠܗܘܿܢ ܝܵܘ̈ܡܵܬܹܗ ܕܝܼܫܘܿܥ: ܘܟ̣ܠܗܘܿܢ ܝܵܘ̈ܡܵܬ̣ܵܐ ܕܩܲܫ̈ܝܼܫܹܐ ܕܐܲܓܲܪܘ ܒܵܬܲܪ ܝܼܫܘܿܥ: ܘܲܚܙ̣ܵܘ ܟܠܗܘܿܢ ܥܒ̣ܵܕܼܵܘ̈ܗܝ ܕܡܵܪܝܵܐ: ܘܪܵܘ̱ܪ̈ܒ̣ܵܬ̣ܵܐ ܕܲܥܒܲܕܼ ܠܝܼܣܪܵܝܹܠ.
8 ܘܡܝܼܬ̣ ܝܼܫܘܿܥ ܒܲܪܢܘܿܢ ܥܲܒ̣ܕܹ̇ܗ ܕܡܵܪܝܵܐ: ܒܲܪܡܵܐܐ ܘܲܥܣܲܪ ܫܢ̈ܝܼܢ.
9 ܘܩܲܒ̣ܪܘܼܗܝ ܒܲܬ̣ܚܘܼܡܵܐ ܕܝܵܪܬ̇ܘܼܬܹܗ ܒܬܲܡܢܲܬ̣ܣܪܲܚ ܕܲܒ̣ܛܘܼܪܵܐ ܕܐܲܦܪܹܝܡ: ܡ̣ܢ ܓܲܪܒ̇ܝܵܐ ܠܛܘܼܪܵܐ ܕܓ̣ܵܥܵܫ.
10 ܘܐܵܦ ܟܠܹܗ ܕܵܪܵܐ ܗ̄ܘ̣ ܐܸܬ̣ܟ̇ܢܸܫܘ ܠܘܵܬ̣ ܐܲܒ̣ܵܗܲܝ̈ܗܘܿܢ: ܘܩܵܡ̣ ܕܵܪܵܐ ܐ̄ܚܪܹܢܵܐ ܒܵܬܲܪܗܘܿܢ ܕܠܵܐ ܝܼܕܲܥ̣ܘ ܠܡܵܪܝܵܐ: ܘܐܵܦܠܵܐ ܠܲܥܒ̣ܵܕܼܵܘ̈ܗܝ ܕܲܥܒܲܕܼ ܠܝܼܣܪܵܝܹܠ.
11 ܘܲܥ̣ܒܲܕܼܘ ܒ̈ܢܲܝ ܝܼܣܪܵܝܹܠ ܕܒ̣ܝܼܫ ܩܕܼܵܡ ܡܵܪܝܵܐ: ܘܲܦܠܲܚܘ ܠܒܲܥܠܵܐ.
12 ܘܲܫܒܲܩܘ ܠܡܵܪܝܵܐ ܐܲܠܵܗܵܐ ܕܐܲܒ̣ܵܗܲܝ̈ܗܘܿܢ: ܕܐܲܦܸܩ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܘܐܸܙܲܠܘ ܒܵܬܲܪ ܐܲܠܵܗܹ̈ܐ ܐ̄ܚܪ̈ܵܢܹܐ ܕܥܲܡܡܹ̈ܐ ܕܲܚܕܼܵܪ̈ܲܝܗܘܿܢ: ܘܲܣܓܸܕܼܘ ܠܗܘܿܢ: ܘܐܲܪܓܸ̇ܙܘ ܠܡܵܪܝܵܐ.
13 ܘܲܫܒܲܩܘ ܠܡܵܪܝܵܐ: ܘܲܦܠܲܚܘ ܠܒܲܥܠܵܐ: ܘܠܐܸܣܬ̇ܪ̈ܵܬ̣ܵܐ.
14 ܘܐܸܬ̣ܚܲܡܲܬ̣ ܡܵܪܝܵܐ ܥܲܠ ܝܼܣܪܵܝܹܠ: ܘܐܲܫܠܸܡ ܐܸܢܘܿܢ ܒܐܝܼܕܼܵܐ ܕܒ̣ܵܙܘܿܙܹ̈ܐ ܘܒܲܙܘ ܐܸܢܘܿܢ: ܘܐܲܫܠܸܡ ܐܸܢܘܿܢ ܒܐܝܼܕܼܵܐ ܕܲܒ̣ܥܸܠܕ̇ܒ̣ܵܒܲܝ̈ܗܘܿܢ ܕܒܲܚܕܼܵܪ̈ܲܝܗܘܿܢ: ܘܠܵܐ ܐܸܫܟܲܚܘ ܬܘܼܒ̣ ܠܲܡܩܵܡ ܩܕܼܵܡ ܒܥܸܠܕܒ̣ܵܒܲܝ̈ܗܘܿܢ.
15 ܘܲܠܟܲܪ ܕܢܵܦܩܝܼܢ ܗ̄ܘ̣ܵܘ: ܐܝܼܕܹܗ ܕܡܵܪܝܵܐ ܗܵܘܝܵܐ ܗ̄ܘ̣ܵܬ̣ ܥܠܲܝܗܘܿܢ ܠܒ̣ܝܼܫܬܵܐ: ܐܲܝܟ̣ ܕܐܸܡܲܪ ܡܵܪܝܵܐ: ܘܐܲܝܟ̣ ܕܝܼܡܵܐ ܠܗܘܿܢ ܡܵܪܝܵܐ: ܘܥܲܩܲܬ̤ ܠܗܘܿܢ ܛܵܒ̣.
16 ܘܐܲܩܝܼܡ ܡܵܪܝܵܐ ܕܲܝܵܢܹ̈ܐ ܒܹܝܬ̣ ܝܼܣܪܵܝܹܠ: ܘܲܦܪܲܩ̣ܘ ܐܸܢܘܿܢ ܡ̣ܢ ܐܝܼܕܼܵܐ ܕܒ̣ܵܙܘܿܙܲܝ̈ܗܘܿܢ.
17 ܘܐܵܦ ܠܕܲܝܵܢܲܝ̈ܗܘܿܢ ܠܵܐ ܫ̣ܡܲܥܘ: ܡܸܛܠ ܕܲܛܥܵܘ ܒܵܬܲܪ ܐܲܠܵܗܹ̈ܐ ܐ̄ܚܪ̈ܵܢܹܐ: ܘܲܣܓܸܕܼܘ ܠܗܘܿܢ: ܘܲܣܛܵܘ ܒܲܥܓܲܠ ܡ̣ܢ ܐܘܼܪܚܵܐ ܕܐܸܙܲܠ̣ܘ ܒܵܗ̇ ܐܲܒ̣ܵܗܲܝ̈ܗܘܿܢ: ܠܡܸܫܡܲܥ ܦܘܼܩܕܵܢܵܘ̈ܗܝ ܕܡܵܪܝܵܐ: ܘܠܵܐ ܥܒܲܕܼܘ ܗܵܟܲܢܵܐ.
18 ܘܟܲܕܼ ܐܲܩܝܼܡ ܠܗܘܿܢ ܡܵܪܝܵܐ ܕܲܝܵܢܹ̈ܐ: ܗܘ̤ܵܐ ܡܵܪܝܵܐ ܥܲܡ ܕܲܝܵܢܹ̈ܐ: ܘܲܦܪܲܩ̣ ܐܸܢܘܿܢ ܡ̣ܢ ܐܝܼܕܼܵܐ ܕܲܒ̣ܥܸܠܕ̇ܒ̣ܵܒܲܝ̈ܗܘܿܢ ܟܠ ܝܵܘ̈ܡܲܝ ܕܲܝܵܢܹ̈ܐ: ܫܵܡܲܥ ܗ̄ܘ̣ܵܐ ܡܵܪܝܵܐ ܐܸܢܲܩܬ̣ܗܘܿܢ: ܡ̣ܢ ܩܕܼܵܡ ܐܵܠܘܿܨܲܝ̈ܗܘܿܢ: ܘܕܵܚܘܿܩܲܝ̈ܗܘܿܢ.
19 ܘܟܲܕܼ ܡܝܼܬ̣ܘ ܕܲܝܵܢܹ̈ܐ: ܗܦܲܟ̣ܘ ܘܚܲܒܸ̇ܠܘ ܡ̣ܢ ܐܲܒ̣ܵܗܲܝ̈ܗܘܿܢ: ܠܡܹܐܙܲܠ ܒܵܬܲܪ ܐܲܠܵܗܹ̈ܐ ܐ̄ܚܪ̈ܵܢܹܐ: ܠܡܸܦܠܲܚ ܐܸܢܘܿܢ: ܘܲܠܡܸܣܓܕܼ ܠܗܘܿܢ: ܘܠܵܐ ܒܲܨܲܪܘ ܡ̣ܢ ܥܒ̣ܵܕܲܝ̈ܗܘܿܢ: ܘܡ̣ܢ ܐܘܼܪ̈ܚܵܬ̣ܗܘܿܢ ܒܝܼ̈ܫܵܬ̣ܵܐ.
20 ܘܐܸܬ̣ܚܲܡܲܬ̣ ܡܵܪܝܵܐ ܥܲܠ ܝܼܣܪܵܝܹܠ: ܘܐܸܡܲܪ ܥܲܠ ܕܲܥܒܲܪܘ ܥܲܡܵܐ ܗܵܢܵܐ ܥܲܠ ܩܝܵܡܝ ܕܦܲܩܕܹܬ̣ ܠܐܲܒ̣ܵܗܲܝ̈ܗܘܿܢ: ܘܠܵܐ ܫ̣ܡܲܥܘ ܒܩܵܠܝ.
21 ܘܐܵܦ ܐܸܢܵܐ ܠܵܐ ܐܵܘܣܸܦ ܠܡܵܘܒܵܕܼܘܼ ܠܐ̄ܢܵܫ ܡ̣ܢ ܩܕܼܵܡܲܝܗܘܿܢ: ܡ̣ܢ ܥܲܡܡܹ̈ܐ ܕܲܫܒܲܩ ܝܼܫܘܿܥ ܘܡܝܼܬ̣.
22 ܡܸܛܠ ܕܲܢܢܲܣܸܐ ܒܗܘܿܢ ܡܵܪܝܵܐ ܠܝܼܣܪܵܝܹܠ: ܐܸܢ ܢܵܛܪܝܼܢ ܐܘܼܪܚܹܗ ܕܡܵܪܝܵܐ: ܘܐܸܢ ܡܗܲܠܟ̣ܝܼܢ ܒܵܗ̇: ܐܲܝܟ̣ ܕܲܢܛܲܪܘ ܐܲܒ̣ܵܗܲܝ̈ܗܘܿܢ ܐܵܘ ܠܵܐ.
23 ܘܲܫܒܲܩ ܐܸܢܘܿܢ ܡܵܪܝܵܐ ܠܥܲܡܡܹ̈ܐ ܗܵܠܹܝܢ: ܘܠܵܐ ܐܵܘܒܸ̇ܕܼ ܐܸܢܘܿܢ ܒܲܥܓܲܠ: ܘܠܵܐ ܐܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕܼܵܐ ܕܝܼܫܘܿܥ.
1 ܘܗܵܠܹܝܢ ܥܲܡܡܹ̈ܐ ܕܲܫܒܲܩ ܡܵܪܝܵܐ ܠܲܡܢܲܣܵܝܘܼ ܒܗܘܿܢ ܠܝܼܣܪܵܝܹܠ: ܟܠ ܕܠܵܐ ܝܼܕܲܥܘ ܠܟ̣ܠܗܘܿܢ ܩܪ̈ܵܒ̣ܵܐ ܕܲܟ̣ܢܲܥ̈ܢܵܝܹܐ.
2 ܒܲܠܚܘܿܕܼ ܡܸܛܠ ܕܢܸܕ̇ܥܘܼܢ ܕܵܪܹ̈ܐ ܕܲܒ̣̈ܢܲܝ ܝܼܣܪܵܝܹܠ ܕܢܹܐܠܦܘܼܢ ܩܪܵܒ̣ܵܐ: ܒܲܠܚܘܿܕܼ ܩܲܕܼܡܵܝܹ̈ܐ ܠܵܐ ܝܼܕܲܥ̣ܘ.
3 ܚܲܡܫܵܐ ܛܪ̈ܘܼܢܹܐ ܕܲܦܠܸܫ̈ܬܵܝܹܐ: ܘܟ̣ܠܗܘܿܢ ܟܢܲܥ̈ܢܵܝܹܐ ܘܨܲܝ̈ܕ̇ܢܵܝܹܐ: ܘܚܵܘܝܹ̈ܐ ܝܵܬ̣ܒܲܝ̈ ܛܘܼܪܵܐ ܕܠܸܒ̣ܢܵܢ: ܘܡ̣ܢ ܛܘܼܪܵܐ ܕܲܒ̣̈ܢܲܝ ܚܸܪܡܘܿܢ: ܘܲܥܕܲܡܵܐ ܠܡܲܥܠܵܢܵܐ ܕܲܚܡܵܬ̣.
4 ܗܘ̤ܵܘ ܠܲܡܢܲܣܵܝܘܼ ܒܗܘܿܢ ܠܝܼܣܪܵܝܹܠ: ܕܢܸܕܲܥ ܐܸܢ ܫܵܡ̇ܥܝܼܢ ܦܘܼܩܕܵܢܵܘ̈ܗܝ ܕܡܵܪܝܵܐ: ܕܦܲܩܸܕܼ ܠܐܲܒ̣ܵܗܲܝ̈ܗܘܿܢ ܒܐܝܼܕܼܵܐ ܕܡܘܼܫܹܐ.
5 ܘܲܒ̣̈ܢܲܝ ܝܼܣܪܵܝܹܠ ܝܼܬܸܒ̣ܘ ܒܲܝܢܵܬ̣ ܟܢܲܥ̈ܢܵܝܹܐ: ܘܚܵܘܵܝܹ̈ܐ: ܘܐܵܡܘܿܪ̈ܵܝܹܐ: ܘܦܲܪ̈ܙܵܝܹܐ: ܘܚܹܝ̈ܬ̣ܵܝܹܐ: ܘܝܵܒ̣ܘܿܣܵܝܹ̈ܐ.
6 ܘܲܢܣܲܒ̣ܘ ܡ̣ܢ ܒ̈ܢܵܬ̣ܗܘܿܢ ܠܗܘܿܢ ܢܸܫܹ̈ܐ: ܘܲܒ̈ܢܵܬ̣ܗܘܿܢ ܝܲܗ̄ܒ̣ܘ ܠܲܒ̣ܢܲܝ̈ܗܘܿܢ: ܘܲܦܠܲܚܘ ܠܐܲܠܵܗܲܝ̈ܗܘܿܢ.
7 ܘܲܥ̣ܒܲܕܘ ܒ̈ܢܲܝ ܝܼܣܪܵܝܹܠ ܕܒ̣ܝܼܫ ܩܕܼܵܡ ܡܵܪܝܵܐ: ܘܲܛܥܵܘ ܠܡܵܪܝܵܐ ܐܲܠܵܗܗܘܿܢ: ܘܲܦܠܲܚܘ ܠܒܲܥܠܵܐ ܘܠܐܸܣܬ̇ܪ̈ܵܬ̣ܵܐ.
8 ܘܐܸܬ̣ܚܲܡܲܬ̣ ܡܵܪܝܵܐ ܥܲܠ ܝܼܣܪܵܝܹܠ: ܘܐܲܫܠܸܡ ܐܸܢܘܿܢ ܝܐܝܼܕܼܵܐ ܕܟ̣ܘܼܫܵܢ ܥܵܘܿܠܵܐ ܡܲܠܟܵܐ ܕܐܵܪܵܡ ܢܲܗܪ̈ܝܼܢ: ܘܲܦܠܲܚܘ ܒ̈ܢܲܝ ܝܼܣܪܵܝܹܠ ܠܟ̣ܘܼܫܵܢ ܥܵܘܿܠܵܐ ܬܡܵܢܹܐ ܫܢ̈ܝܼܢ.
9 ܘܲܩܪܵܘ ܒ̈ܢܲܝ ܝܼܣܪܵܝܹܠ ܠܡܵܪܝܵܐ: ܘܐܲܩܝܼܡ ܡܵܪܝܵܐ ܦܵܪܘܿܩܵܐ ܠܲܒ̣̈ܢܲܝ ܝܼܣܪܵܝܹܠ: ܘܲܦܪܲܩ ܐܸܢܘܿܢ ܥܲܬ̣ܢܵܐܹܝܠ ܒܲܪ ܩܲܢܲܙ ܐܲܚܘܼܗܝ ܕܟ̣ܵܠܵܒ̣ ܕܲܙܥܘܿܪ ܡܸܢܹܗ.
10 ܘܲܗܘ̤ܵܬ̣ ܥܠܵܘܗܝ ܐܝܼܕܹܗ ܕܡܵܪܝܵܐ: ܘܕܼܵܢ ܠܝܼܣܪܵܝܹܠ: ܘܲܢܦܲܩ ܠܲܩܪܵܒ̣ܵܐ: ܘܐܲܫܠܸܡ ܡܵܪܝܵܐ ܒܐܝܼܕܼܵܘ̈ܗܝ ܠܟ̣ܘܼܫܲܢ ܥܵܘܿܠܵܐ ܡܲܠܟܵܐ ܕܐܵܪܵܡ ܢܲܗܪ̈ܝܼܢ: ܘܥܸܫܢܲܬ̤ ܐܝܼܕܹܗ ܥܲܠ ܟܘܼܫܲܢ ܥܵܘܿܠܵܐ.
11 ܘܐܸܬ̇ܬ̇ܢܝܼܚܲܬ̤ ܐܲܪܥܵܐ ܐܲܪܒ̇ܥܝܼܢ ܫܢ̈ܝܼܢ: ܘܡܝܼܬ̣ ܥܲܬ̣ܢܵܐܹܝܠ ܒܲܪ ܩܲܢܲܙ.
12 ܘܐܵܘܣܸܦ ܒ̈ܢܲܝ ܝܼܣܪܵܝܹܠ ܠܡܸܥܒܲܕܼ ܕܒ̣ܝܼܫ ܩܕܼܵܡ ܡܵܪܝܵܐ: ܘܚܲܝܸܠ ܡܵܪܝܵܐ ܠܥܸܓܠܘܿܢ ܡܲܠܟܵܐ ܕܡܘܼܐܵܒ̣ ܥܲܠ ܝܼܣܪܵܝܹܠ: ܥܲܠ ܕܲܥܒܲܕܼܘ ܕܒ̣ܝܼܫ ܩܕܼܵܡ ܡܵܪܝܵܐ.
13 ܘܟܲܢܸܫ ܥܠܲܝܗܘܿܢ ܠܲܒ̣̈ܢܲܝ ܥܲܡܘܿܢ ܘܠܲܥܡܵܠܹܝܩ: ܘܐܸܙܲܠ̣ܘ ܘܲܡܚܵܘ ܠܝܼܣܪܵܝܹܠ: ܘܝܼܪܸܬ̣ܘ ܩܪܝܼܬ̣ܵܐ ܕܕܸܩ̈ܠܹܐ.
14 ܘܲܦܠܲܚ̣ܘ ܒ̈ܢܲܝ ܝܼܣܪܵܝܹܠ ܠܥܸܓܠܘܿܢ ܡܲܠܟܵܐ ܕܡܘܼܐܵܒ̣ ܬܡܵܢܲܥܸܣܪܹ̈ܐ ܫܢ̈ܝܼܢ.
15 ܘܲܩܪܵܘ ܒ̈ܢܲܝ ܝܼܣܪܵܝܹܠ ܠܡܵܪܝܵܐ: ܘܐܲܩܝܼܡ ܠܗܘܿܢ ܡܵܪܝܵܐ ܦܵܪܘܿܩܵܐ: ܠܐܵܗܘܿܪ ܒܲܪ ܓܹܐܪܵܐ ܡ̣ܢ ܫܲܒ̣ܛܵܐ ܕܒܸܢܝܵܡܹܝܢ: ܓܲܒ̣ܪܵܐ ܕܲܦܫܝܼܓ̣ܵܐ ܗܘ̣ܵܬ̣ ܐܝܼܕܹܗ ܕܝܲܡܝܼܢܵܐ: ܘܫܲܕܲܪܘ ܒ̈ܢܲܝ ܝܼܣܪܵܝܹܠ ܩܘܼܪܒܵܢܵܐ ܒܐܝܼܕܹܗ ܠܥܸܓ̣ܠܘܿܢ ܡܲܠܟܵܐ ܕܡܘܼܐܵܒ̣.
16 ܘܲܥܒܲܕܼ ܠܹܗ ܐܵܗܘܿܪ ܣܲܝܦܵܐ ܕܲܬ̣ܪܹܝܢ ܦܘܼܡܵܘ̈ܗܝ: ܩܦܸܣ ܐܘܼܪܟܹ̇ܗ: ܘܐܲܣܪܹܗ ܠܓ̣ܵܘ ܡ̣ܢ ܠܒ̣ܘܼܫܹܗ ܥܲܠ ܥܲܛܡܹܗ ܕܝܲܡܝܼܢܵܐ.
17 ܘܩܲܪܸܒ̣ ܩܘܼܪܒܵܢܵܐ ܠܥܸܓ̣ܠܘܿܢ ܡܲܠܟܵܐ ܕܡܘܼܐܵܒ̣: ܘܥܸܓ̣ܠܘܿܢ ܡܲܠܟܵܐ ܓܲܒ̣ܪܵܐ ܗ̄ܘ̣ܵܐ ܕܲܒ̣ܪܝܼܪ ܛܵܒ̣.
18 ܘܟܲܕܼ ܓܲܡܲܪ ܠܲܡܩܲܪܵܒ̣ܘܼ ܩܘܼܪܒܵܢܵܐ: ܫܪܵܐ ܠܥܲܡܵܐ ܫܩ̈ܝܼܠܲܝ ܩܘܼܪܒܵܢܵܐ.
19 ܘܗ̤ܘ ܗ̣ܦܲܟ̣ ܡ̣ܢ ܦܣܝܼܠܝܼܢ ܕܥܲܠ ܓܹܢ̄ܒ̣ ܓܲܠܓܵܠܵܐ: ܘܐܸܡܲܪ ܠܹܗ: ܡܸܠܬ̣ܵܐ ܕܣܸܬ̣ܪܵܐ ܐܝܼܬ̣ ܠܝܼ ܕܐܹܡܲܪ ܠܵܟ̣ ܡܲܠܟܵܐ ܒܲܝܢܲܝ ܘܠܵܟ̣: ܘܐܸܡܲܪ ܡܲܠܟܵܐ ܥܒܲܪܘ ܡ̣ܢ ܬܲܡܵܢ: ܘܲܦܪܲܩ̣ܘ ܠܗܘܿܢ ܟܠܗܘܿܢ ܐܲܝܠܝܢ ܕܩܵܝ̇ܡܝܼܢ ܗ̄ܘ̣ܵܘ ܠܘܵܬܹܗ.
20 ܘܐܵܗܘܿܪ ܥܲܠ ܠܘܵܬܹܗ: ܘܗ̤ܘ ܝܵܬܹ̇ܒ̣ ܗ̄ܘ̣ܵܐ ܒܥܸܠܝܼܬ̣ܵܐ ܒܲܠܚܘܿܕܼܵܘܗܝ ܕܡܲܬ̣ܩܢܵܐ ܗ̄ܘ̣ܵܬ̣ ܠܹܗ. ܘܐܸܡܲܪ ܐܵܗܘܿܪ: ܡܸܠܬ̣ܵܐ ܕܐܲܠܵܗܵܐ ܐܝܼܬ̣ ܠܝܼ ܕܐܹܡܲܪ ܠܵܟ̣: ܘܩܵܡ̣ ܥܸܓ̣ܠܘܿܢ ܡ̣ܢ ܟܘܼܪܣܝܹܗ.
21 ܘܐܵܘܫܸܛ ܐܵܗܘܿܪ ܐܝܼܕܹܗ ܕܣܸܡܵܠܵܐ: ܘܲܢܣܲܒ̣ ܣܲܝܦܵܐ ܡ̣ܢ ܥܲܛܡܹܗ ܕܝܲܡܝܼܢܵܐ: ܘܲܡܚܵܝܗܝ ܒܟܲܪܣܹܗ.
22 ܘܐܸܬ̣ܵܐ ܡܲܪܩܩܹܗ ܒܵܬܲܪ ܡܚܘܿܬܹܗ: ܘܣܲܟ̣ܪܵܗ̇ ܚܸܠܒܵܐ ܠܲܡܚܘܿܬ̣ܵܐ: ܡܸܛܠ ܕܠܵܐ ܫܲܡܛܹܗ ܣܲܝܦܵܐ ܡ̣ܢ ܟܲܪܣܹܗ: ܘܲܢܦܲܩ ܡܣܲܪܗ̱ܒ̣ܵܐܝܼܬ̣.
23 ܘܲܢܦܲܩ ܐܵܗܘܿܪ ܠܲܟ̣ܣܘܼܣܛܪܘܿܢ ܘܐܸܚܲܕܼ ܬܲܪ̈ܥܹܐ ܕܥܸܠܝܼܬ̣ܵܐ ܒܐܲܦܵܘ̈ܗܝ ܘܲܢܦܲܩ.
24 ܗ̤ܘ ܢܦܲܩ ܘܥܲܒ̣ܕܵܘ̈ܗܝ ܥܲܠܘ: ܘܚܵܙܹ̇ܝܢ ܬܲܪ̈ܥܹܐ ܕܥܸܠܝܼܬ̣ܵܐ ܛܦܹܝܢ: ܘܐܵܡ̇ܪܝܼܢ: ܟܒܲܪ ܠܲܦܪܘܼܬ̇ܕ̇ܩܵܐ ܢܦܲܩ ܒܬ̣ܵܘܵܢܵܐ ܕܥܸܠܝܼܬ̣ܵܐ.
25 ܘܟܲܬܲܪܘ ܣܲܓ̇ܝܼ: ܘܚܵܙܹ̇ܝܢ ܠܵܐ ܦܵܬܲܚ ܬܲܪ̈ܥܹܐ ܕܥܸܠܝܼܬ̣ܵܐ: ܘܲܢܣܲܒ̣ܘ ܩܠܝܼ̈ܕܹܐ ܘܲܦܬܲܚܘ: ܘܚܵܙܹ̇ܝܢ ܡܵܪܗܘܿܢ ܪܡܸܐ ܥܲܠ ܐܲܪܥܵܐ ܘܡܝܼܬ̣.
26 ܘܥܲܕܼ ܗܸܢܘܿܢ ܡܸܬ̇ܬܵܘܗܝܼܢ ܗ̄ܘ̣ܵܘ: ܐܲܗܘܿܪ ܥܒܲܪ ܠܲܦܣܝܼܠܝܼܢ ܘܐܸܬ̣ܦܲܠܲܛ: ܘܲܪܗܸܛ ܠܫܝܼܥܪܲܬ̣.
27 ܘܟܲܕܼ ܐܸܬ̣ܵܐ: ܩܪܵܐ ܒܫܝܼܦܘܿܪܵܐ ܒܛܘܼܪܵܐ ܕܐܲܦܪܹܝܡ: ܘܲܢܚܸܬ̣ܘ ܥܲܡܹܗ ܒ̈ܢܲܝ ܝܼܣܪܵܝܹܠ ܡ̣ܢ ܛܘܼܪܵܐ: ܘܗ̤ܘ ܩܕܼܵܡܲܝܗܘܿܢ.
28 ܘܐܸܡܲܪ ܠܗܘܿܢ: ܬܵܘ ܒܵܬܲܪܝ: ܡܸܛܠ ܕܐܲܫܠܸܡ ܡܵܪܝܵܐ ܠܲܒ̣ܥܸܠܕ̇ܒ̣ܵܒܲܝ̈ܟ̇ܘܿܢ ܡܘܼܐܵܒ̣ܵܝܹ̈ܐ ܒܐܝܼܕܲܝ̈ܟ̇ܘܿܢ. ܘܲܢܚܸܬ̣ܘ ܒܵܬ̣ܪܹܗ: ܘܐܸܚܲܕܼܘ ܡܲܥܒܲܪܬ̣ܵܐ ܕܝܘܿܪܕ̇ܢܵܢ ܕܡܘܼܐܵܒ̣: ܘܠܵܐ ܫܒܲܩ̣ܘ ܠܐ̄ܢܵܫ ܕܢܸܥܒܲܪ.
29 ܘܩܲܛܸܠܘ ܡ̣ܢ ܡܘܼܐܵܒ̣ܵܝܹ̈ܐ ܒܗܵܘ̇ ܙܲܒ̣ܢܵܐ: ܐܲܝܟ̣ ܥܸܣܪܵܐ ܐܲܠܦ̈ܝܼܢ ܓܲܒ̣ܪ̈ܝܼܢ: ܟܠ ܕܥܲܬ̇ܝܼܪ ܘܟ̣ܠ ܓܒܲܪ ܚܲܝܠܬ̣ܵܢ: ܘܠܵܐ ܐܸܬ̣ܦܲܠܲܛ ܐ̄ܢܵܫ.
30 ܘܐܸܬ̇ܬܲܒܲܪܘ ܡܘܼܐܵܒ̣ܵܝܹ̈ܐ ܒܗܵܘ̇ ܙܲܒ̣ܢܵܐ ܬܚܹܝܬ̣ ܐܝܼܕܼܵܐ ܕܝܼܣܪܵܝܹܠ: ܘܫܲܠܝܲܬ̤ ܐܲܪܥܵܐ ܬܡܵܢܐܝܼܢ ܫܢ̈ܝܼܢ.
31 ܘܒ̣ܵܬ̣ܪܹܗ ܗܘ̤ܵܐ ܫܲܡܓܲܪ ܒܲܪ ܥܢܵܬ̣: ܘܲܚܪܲܒ̣ ܡ̣ܢ ܦܠܸܫܬܵܝܹ̈ܐ: ܫܸܬ̣ܡܵܐܐ ܓܲܒ̣ܪ̈ܝܼܢ ܒܡܲܣܵܣܵܐ ܕܬ̣ܵܘܪܹ̈ܐ: ܘܲܦܪܲܩ ܐܵܦ ܗ̤ܘ ܠܝܼܣܪܵܝܹܠ.
1 ܘܐܵܘܣܸܦ̣ܘ ܬܘܼܒ̣ ܒ̈ܢܲܝ ܝܼܣܪܵܝܹܠ ܠܡܸܥܒܲܕܼ ܕܒ̣ܝܼܫ ܩܕܼܵܡ ܡܵܪܝܵܐ: ܘܐܵܗܘܿܪ ܡܝܼܬ̣.
2 ܘܐܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕܼܵܐ ܕܢܵܒ̣ܝܼܢ ܡܲܠܟܵܐ ܕܲܟ̣ܢܲܥܢ ܕܐܲܡܠܸܟ̣ ܒܚܵܨܘܿܪ: ܘܪܲܒ̇ ܚܲܝܠܹܗ ܣܝܼܣܪܵܐ: ܘܗ̤ܘ ܝܵܬܹܒ̣ ܗ̄ܘ̣ܵܐ ܒܚܲܪܫܲܬ̣ ܕܥܲܡܡܹ̈ܐ.
3 ܘܐܲܙܥܸܩܘ ܒ̈ܢܲܝ ܝܼܣܪܵܝܹܠ ܠܡܵܪܝܵܐ: ܡܸܛܠ ܕܲܬ̣ܫܲܥܡܵܐܐ ܡܲܪ̈ܟ̇ܒ̣ܵܬ̣ܵܐ ܕܦܲܪܙܠܵܐ ܐܝܼܬ̣ ܗ̄ܘܲܝ̈ ܠܹܗ: ܘܗ̤ܘ ܡܫܲܥܒܸ̇ܕܼ ܗ̄ܘ̣ܵܐ ܠܲܒ̣̈ܢܲܝ ܝܼܣܪܵܝܹܠ ܒܲܩܛܝܼܪܵܐ ܥܸܣܪܝܼܢ ܫܢ̈ܝܼܢ.
4 ܘܲܕܼܒ̣ܘܿܪܵܐ ܐܲܢ̄ܬ̇ܬ̣ܵܐ ܢܒ̣ܝܼܬ̣ܵܐ: ܐܲܢ̄ܬܲܬ̤ ܠܦܝܼܬ̣ܘܪ: ܗ̤ܝ ܗܘ̤ܵܬ̣ ܕܵܝܢܵܐ ܠܝܼܣܪܵܝܹܠ ܒܗܵܘ̇ ܙܲܒ̣ܢܵܐ.
5 ܘܗ̤ܝ ܕܒ̣ܘܼܪܵܐ ܝܵܬ̣ܒܵܐ ܗ̄ܘ̣ܵܬ̣ ܬܚܹܝܬ̣ ܕܸܩܠܵܐ: ܒܹܝܬ̣ ܪܵܡܬ̣ܵܐ ܘܒܹܝܬ̣ ܐܹܝܠ ܕܲܒ̣ܛܘܼܪܵܐ ܕܐܲܦܪܹܝܡ: ܘܲܣܠܸܩܘ ܠܘܵܬ̣ܵܗ̇ ܒ̈ܢܲܝ ܝܼܣܪܵܝܹܠ ܠܕܼܝܼܢܵܐ.
6 ܘܫܲܕ̇ܪܲܬ̤ ܩܪܬ̤ ܠܒ̣ܵܪܵܩ ܒܲܪ ܐܲܒ̣ܝܼܢܥܵܡ ܡ̣ܢ ܪܩܸܡ ܕܢܲܦ̮ܬܵܠܝܼ: ܘܐܵܡܪܵܐ ܠܹܗ: ܠܵܐ ܦܲܩܕܼܵܟ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܬܹܐܙܲܠ ܘܬܸܬܸ̇ܒ̣ ܒܛܘܼܪܵܐ ܕܬ̣ܵܒ̣ܘܿܪ: ܘܬܸܕܼܒܲܪ ܥܲܡܵܟ̣ ܥܸܣܪܵܐ ܐܲܠܦ̈ܝܼܢ ܓܲܒ̣ܪ̈ܝܼܢ: ܡ̣ܢ ܒ̈ܢܲܝ ܢܲܦ̮ܬܵܠܝܼ: ܘܡ̣ܢ ܒ̈ܢܲܝ ܙܒ̣ܘܿܠܘܿܢ.
7 ܘܢܹܐܬ̣ܘܿܢ ܥܲܡܵܟ̣ ܠܢܲܚܠܵܐ ܕܩܝܼܫܘܿܢ: ܥܲܠ ܣܝܼܣܪܵܐ ܪܲܒ̇ ܚܲܝܠܵܐ ܕܢܵܒ̣ܝܼܢ: ܘܥܲܠ ܡܲܪ̈ܟ̇ܒ̣ܵܬܹܗ: ܘܥܲܠ ܚܲܝܠܹܗ: ܘܐܲܫܠ̱ܡܝܼܘܗܝ ܒܐܝܼܕܲܝ̈ܟ.
8 ܐܵܡܲܪ ܠܵܗ̇ ܒܵܪܵܩ: ܐܸܢ ܐܵܙ̇ܠ̄ܐ ܐܲܢ̄ܬ̇ܝ ܥܲܡܝ: ܐܵܙܹ̇ܠ ܐ̄ܢܵܐ. ܘܐܸܢ ܠܵܐ ܐܵܙ̇ܠ̄ܐ ܐܲܢ̄ܬ̇ܝ ܥܲܡܝ: ܠܵܐ ܐܵܙܹ̇ܠ ܐ̄ܢܵܐ.
9 ܐܵܡܪܵܐ ܠܹܗ. ܡܹܐܙܲܠ ܐܵܙܵܠ̄ܐ ܐ̄ܢܵܐ ܥܲܡܵܟ̣: ܒܪܲܡ ܒܵܪܵܩ ܠܵܐ ܬܸܫܬܲܒ̣ܗܲܪ ܥܲܠ ܐܘܼܪܚܵܐ ܕܐܵܙܹܠ ܐܲܢ̄ܬ̇: ܡܸܛܠ ܕܒ̣ܐܝܼܕܼܵܐ ܕܐܲܢ̄ܬ̇ܬ̣ܵܐ ܢܲܫ̱ܠܡܝܼܘܗܝ ܡܵܪܝܵܐ ܠܣܝܼܣܪܵܐ. ܘܩܵܡܲܬ̤ ܕܒ̣ܘܿܪܵܐ ܘܐܸܙܲܠ̄ܬ̤ ܥܲܡ ܒܵܪܵܩ ܠܲܪܩܸܡ.
10 ܘܟܲܢܸܫ ܒܵܪܵܩ ܠܲܙܒ̣ܘܿܠܘܿܢ: ܘܲܠܢܲܦ̮ܬܵܠܝܼ ܠܲܪܩܸܡ. ܘܲܣܠܸܩ̣ܘ ܥܲܡܹܗ ܥܸܣܪܵܐ ܐܲܠܦ̈ܝܼܢ ܓܲܒ̣ܪ̈ܝܼܢ: ܘܣܸܠܩܲܬ̤ ܥܲܡܹܗ ܐܵܦ ܕܒ̣ܘܿܪܵܐ.
11 ܘܚܘܿܒ̣ܵܪ ܩܝܼܢܵܢ: ܢܦܲܩ ܡ̣ܢ ܩܝܼܢ ܡ̣ܢ ܒ̈ܢܲܝ ܚܘܿܒ̣ܵܒ̣ ܚܡܘܼܗܝ ܕܡܘܼܫܹܐ: ܘܲܢܩܲܫ ܡܲܫܟ̇ܢܹܗ ܥܕܲܡܵܐ ܠܒܸܛ̱ܡܬ̣ܵܐ ܕܒܲܨܥܝܼܢܝܼܢ ܕܥܲܠ ܓܹܢ̄ܒ̣ ܪܩܸܡ.
12 ܘܚܵܘܝܼܘ ܠܣܝܼܣܪܵܐ ܕܲܣܠܸܩ ܒܵܪܵܩ ܒܲܪ ܐܲܒ̣ܝܼܢܥܵܡ ܠܛܘܼܪܵܐ ܕܬ̣ܵܒ̣ܘܿܪ.
13 ܘܟܲܢܸܫ ܣܝܼܣܪܵܐ ܟܠܗܹܝܢ ܡܲܪ̈ܟ̇ܒ̣ܵܬܹܗ: ܬܫܲܥܡܵܐܐ ܡܲܪ̈ܟ̇ܒ̣ܵܬ̣ܵܐ ܕܦܲܪܙܠܵܐ: ܘܟ̣ܠܹܗ ܥܲܡܵܐ ܕܥܲܡܹܗ: ܡ̣ܢ ܚܲܪܫܲܬ̣ ܕܥܲܡܡܹ̈ܐ: ܘܲܥܕܲܡܵܐ ܠܢܲܚܠܵܐ ܕܩܝܼܫܘܿܢ.
14 ܘܐܸܡܪܲܬ̤ ܕܒ̣ܘܿܪܵܐ ܠܒ̣ܵܪܵܩ: ܩܘܼܡ: ܡܸܛܠ ܕܗܵܢܘܿ ܝܵܘܡܵܐ ܕܐܲܫܠܸܡ ܡܵܪܝܵܐ ܠܣܝܼܣܪܵܐ ܒܐܝܼܕܲܝ̈ܟ. ܗܵܐ ܡܵܪܝܵܐ ܢܵܦܹ̇ܩ ܩܕܼܵܡܲܝܟ ܘܲܢܚܸܬ̣ ܒܵܪܵܩ ܡ̣ܢ ܛܘܼܪܵܐ ܕܬ̣ܵܒ̣ܘܿܪ: ܘܥܸܣܪܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܥܲܡܹܗ.
15 ܘܲܬ̣ܒܲܪ ܡܵܪܝܵܐ ܠܣܝܼܣܪܵܐ ܘܲܠܟ̣ܠܗܹܝܢ ܡܲܪ̈ܟ̇ܒ̣ܵܬܹܗ: ܘܲܠܟ̣ܠܵܗ̇ ܡܲܫܪܝܼܬܹܗ ܒܦܘܼܡܵܐ ܕܚܲܪܒܵܐ ܩܕܼܵܡ ܒܵܪܵܩ: ܘܲܢܚܸܬ̣ ܣܝܼܣܪܵܐ ܡ̣ܢ ܡܲܪܟܲܒ̣ܬܹܗ: ܘܲܥ̣ܪܲܩ ܒܪܸ̈ܓ̣ܠܵܘܗܝ.
16 ܘܒ̣ܵܪܵܩ ܪܕܲܦ ܒܵܬܲܪ ܡܲܪ̈ܟ̇ܒ̣ܵܬܹܗ ܘܒ̣ܵܬܲܪ ܡܲܫܪܝܼܬܹܗ: ܥܕܲܡܵܐ ܠܚܲܪܫܹ̇ܬ̣ ܕܥܲܡܡܹ̈ܐ: ܘܢܸܦܠܲܬ̤ ܟܠܵܗ̇ ܡܲܫܪܝܼܬܹܗ ܕܣܝܼܣܪܵܐ ܒܦܘܼܡܵܐ ܕܚܲܪܒܵܐ: ܘܐ̄ܢܵܫ ܠܵܐ ܐܸܬ̣ܦܲܠܲܛ ܟܲܕܼ ܚܲܝ.
17 ܘܣܝܼܣܪܵܐ ܥܪܲܩ̣ ܒܲܪܓܸܠ: ܘܥܲܠ̣ ܠܡܲܫܟ̇ܢܵܐ ܕܲܥܢܵܐܹܝܠ ܐ̄ܢܬܲܬ̣ ܚܘܿܒ̣ܵܪ ܩܸܢܝܵܢܵܐ: ܡܸܛܠ ܕܲܫܠܵܡܵܐ ܐܝܼܬ̣ ܗ̄ܘ̣ܵܐ ܒܹܝܬ̣ ܢܵܒ̣ܝܼܢ ܡܲܠܟܵܐ ܕܚܵܨܘܿܪ ܘܒܹܝܬ̣ ܚܘܿܒ̣ܵܪ ܩܝܼܢܵܝܵܐ.
18 ܘܢܸܦܩܲܬ̤ ܥܢܵܐܹܝܠ ܠܐܘܼܪܥܹܗ ܕܣܝܼܣܪܵܐ ܘܐܵܡܪܵܐ ܠܹܗ: ܣܛܝܼ ܡܵܪܝ ܠܘܵܬ̣ܝ ܘܠܵܐ ܬܸܕܼܚܲܠ. ܘܲܣܛ̣ܵܐ ܠܘܵܬ̣ܵܗ̇ ܠܡܲܫܟ̇ܢܵܐ: ܘܟܲܣܝܵܬܹܗ ܒܲܚܡܝܼܠܬܵܐ.
19 ܘܐܸܡܲܪ ܠܵܗ̇: ܐܲܫܩܵܐܝܼܢܝ ܩܲܠܝܼܠ ܡܲـ̈ـܝܵܐ ܡܸܛܠ ܕܲܨܗܹܝܬ̣ ܘܲܫܪܵܬ̤ ܚܠܝܼܨܵܐ ܕܚܲܠܒ̣ܵܐ ܘܐܲܫܩܝܵܬܹܗ ܘܟܲܣܝܵܬܹܗ.
20 ܘܐܸܡܲܪ ܠܵܗ̇ ܩܘܼܡܝ ܒܬܲܪܥܵܐ ܕܡܲܫܟ̇ܢܵܐ: ܘܐܸܢܗ̤ܘ ܕܐܵܬܹܐ ܐ̄ܢܵܫ ܫܵܐܹ̇ܠ ܠܹܟ̣ܝ ܘܐܵܡܲܪ ܕܐܝܼܬ̣ ܬܢܵܢ ܐ̄ܢܵܫ: ܐܸܡܲܪܝ ܠܹܗ ܠܲܝܬ̇.
21 ܘܢܸܣܒܲܬ̤ ܥܢܵܐܹܝܠ ܐܲܢ̄ܬ̇ܬܹܗ ܕܚܘܿܒ̣ܵܪ ܣܸܟ̇ܬ̣ܵܐ ܕܡܲܫܟ̇ܢܵܐ: ܘܐܸܚܕܲܬ̤ ܐܲܪܙܲܦܬ̣ܵܐ ܒܐܝܼܕܼܵܗ̇: ܘܥܸܠܲܬ̤ ܥܠܵܘܗܝ ܟܲܕܼ ܗ̤ܘ ܕܡܝܼܟ̣: ܘܢܸܩܫܲܬ̤ ܣܸܟ̇ܬ̣ܵܐ ܒܨܸܕܼܥܹܗ: ܘܛܸܒ̣ܥܲܬ̤ ܒܐܲܪܥܵܐ ܟܲܕܼ ܗ̤ܘ ܕܡܝܼܟ̣: ܘܐܸܬ̇ܛܲܪܲܦ ܘܡܝܼܬ̣.
22 ܘܗܵܐ ܒܵܪܵܩ ܪܵܕܹܦ ܒܵܬܲܪ ܣܝܼܣܪܵܐ: ܘܢܸܦܩܲܬ̤ ܥܢܵܐܹܝܠ ܠܐܘܼܪܥܹܗ: ܘܐܵܡ̇ܪܵܐ ܠܹܗ: ܬܵܐ ܐܹܚܵܘܹܝܟ ܠܓܲܒ̣ܪܵܐ ܕܒܵܥܹ̇ܐ ܐܲܢ̄ܬ̇. ܘܥܲܠ ܠܘܵܬ̣ܵܗ̇ ܘܲܚܙܵܐ: ܘܗܵܐ ܪܡܸܐ ܘܡܝܼܬ̣: ܘܣܸܟ̇ܬ̣ܵܐ ܒܨܸܕܼܥܹܗ.
23 ܘܲܬ̣ܒܲܪ ܡܵܪܝܵܐ ܒܝܵܘܡܵܐ ܗܵܘ̇ ܠܢܵܒ̣ܝܼܢ ܡܲܠܟܵܐ ܕܲܟ̣ܢܲܥܢ ܩܕܼܵܡ ܒ̈ܢܲܝ ܝܼܣܪܵܝܹܠ.
24 ܘܐܝܼܕܼܵܐ ܕܲܒ̣̈ܢܲܝ ܝܼܣܪܵܝܹܠ ܐܵܙܵܠ̄ܐ ܗ̄ܘ̣ܵܬ̣ ܘܥܵܫܢܵܐ ܥܲܠ ܢܵܒ̣ܝܼܢ ܡܲܠܟܵܐ ܕܲܟ̣ܢܲܥܢ: ܥܕܲܡܵܐ ܕܩܲܛܠܘܼܗܝ ܠܢܵܒ̣ܝܼܢ ܡܲܠܟܵܐ ܕܲܟ̣ܢܲܥܢ.
1 ܘܫܲܒ̇ܚܲܬ̤ ܕܒ̣ܘܼܪܵܐ ܘܒ̣ܵܪܵܩ ܒܲܪ ܐܲܒ̣ܝܼܢܥܵܡ ܒܝܵܘܡܵܐ ܗܵܘ̇: ܠܡܹܐܡܲܪ.
2 ܒܦܘܼܪܥܵܢܘܼܬ̣ܵܐ ܕܐܸܬ̣ܦܪܲܥ ܝܼܣܪܵܝܹܠ: ܒܬܸܫܒ̇ܘܿܚܬܵܐ ܕܥܲܡܵܐ ܫܲܒܲܚܘ ܠܡܵܪܝܵܐ.
3 ܫܡܲܥܘ ܡܲܠܟܹ̈ܐ: ܘܨܘܼܬ̣ܘ ܫܲܠܝܼܛܵܢܹ̈ܐ: ܐܸܢܵܐ ܠܡܵܪܝܵܐ ܐܹܫܲܒܲܚ̣: ܘܐܹܙܲܡܲܪ ܠܹܗ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.
4 ܡܵܪܝܵܐ ܒܡܲܦܩܵܟ ܕܡ̣ܢ ܣܵܥܝܼܪ: ܟܲܕܼ ܗܲܠܸܟ̣ܬ̇ ܒܲܝܢܵܬ̣ ܚܲܩ̈ܠܵܬ̣ܵܐ ܕܐܲܕܼܘܿܡ ܐܲܪܥܵܐ ܙܵܥܲܬ̤: ܘܐܵܦ ܫܡܲܝܵܐ ܢܲܛܸܦܘ: ܘܲܥܢܵܢܹ̈ܐ ܪܲܣ̣ ܡܲـ̈ـܝܵܐ.
5 ܘܛܘܼܪܹ̈ܐ ܕܵܠܘܼ ܩܕܼܵܡ ܡܵܪܝܵܐ: ܘܗܵܢܵܐ ܣܝܼܢܲܝ ܡ̣ܢ ܩܕܼܵܡ ܡܵܪܝܵܐ ܩܲܕ̇ܝܼܫܵܐ ܕܝܼܣܪܵܝܹܠ.
6 ܒܝܵܘܡܵܘ̈ܗܝ ܕܫܲܡܓܲܪ ܒܲܪ ܥܢܵܬ̣: ܘܲܒ̣ܝܵܘ̈ܡܲܝ ܥܢܵܐܹܝܠ ܦܣܲܩ̣ܘ ܐܘܼܪ̈ܚܵܬ̣ܵܐ. ܘܕܲܡܗܲܠܟ̣ܝܼܢ ܗ̄ܘ̣ܵܘ ܒܲܫܒ̣ܝܼܠܹܐ ܬܪ̈ܝܼܨܹܐ: ܗܲܠܸܟ̣ܘ ܒܐܘܼܪ̈ܚܵܬ̣ܵܐ ܡܥܲܩ̈ܡܵܬ̣ܵܐ.
7 ܦܣܲܩܘ ܫܸܛܚܹ̈ܐ ܕܝܼܣܪܵܝܹܠ: ܒܣܲܩܘ ܥܕܲܡܵܐ ܕܩܵܡܹ̇ܬ̣ ܐܸܢܵܐ ܕܒ̣ܘܿܪܵܐ: ܩܵܡܹ̇ܬ̣ ܐܸܡܵܐ ܒܝܼܣܪܵܝܹܠ.
8 ܢܸܓ̣ܒܸ̇ܐ ܐܲܠܵܗܵܐ ܚܕܲܬܵܐ: ܘܗܵܝܕܹ̇ܝܢ ܠܲܚܡܵܐ ܕܲܣܥܵܪܹ̈ܐ: ܘܣܲܝܦܵܐ ܘܪܘܼܡܚܵܐ ܠܵܐ ܢܸܬ̣ܚܙܹܐ ܒܲܝܢܵܬ̣ ܐܲܪܒ̇ܥܝܼܢ ܐܲܠܦܹ̈ܐ ܕܝܼܣܪܵܝܹܠ.
9 ܠܹܒ̇ܝ ܐܸܡܲܪ ܠܲܡܒܲܕ̇ܩܵܢܵܐ ܕܝܼܣܪܵܝܹܠ: ܐܲܝܠܹܝܢ ܕܲܦܪܝܼܫܝܼܢ ܒܥܲܡܵܐ ܒܲܪܸܟ̣ܘ ܠܡܵܪܝܵܐ.
10 ܘܪ̈ܵܟ̣ܒܲܝ ܐܲܬܵܢܹ̈ܐ ܚܘܵܪܵܬ̣ܵܐ: ܘܝܵܬ̣ܒܲܝ̈ ܒܒ̣ܵـ̈ـܬܹ̇ܐ: ܘܲܡܗܲܠܟܲܝ̈ ܒܐܘܼܪ̈ܚܵܬ̣ܵܐ.
11 ܪܢܵܘ ܡ̣ܢ ܡܸܠܹ̈ܐ ܕܒ̣ܵܨ̈ܘܿܝܹܐ ܕܒܲܝܢܵܬ̣ ܡܲܠܦܵܢܹ̈ܐ: ܬܲܡܵܢ ܢܸܬ̇ܠܘܼܢ ܙܲܕ̇ܝܼܩܘܼܬܹܗ ܕܡܵܪܝܵܐ: ܙܲܕ̇ܝܼܩܘܼܬܹܗ ܕܐܲܣܓ̇ܝܼ ܒܝܼܣܪܵܝܹܠ. ܗܵܝܕܹ̇ܝܢ ܢܚܸܬ̣ܘ ܠܬܲܪܥܵܐ ܥܲܡܹܗ ܕܡܵܪܝܵܐ.
12 ܐܸܬ̇ܬ̇ܥܝܼܪܝ: ܐܸܬ̇ܬ̇ܥܝܼܪܝ: ܕܒ̣ܘܿܪܵܐ: ܐܸܬ̇ܬ̇ܥܝܼܪܝ: ܘܐܸܬ̣ܝܲܕܵܝ: ܘܡܲܠܠܝ ܬܸܫܒ̇ܘܿܚܬܵܐ. ܩܘܼܡ ܒܵܪܵܩ: ܘܲܫܒ̣ܝ ܫܵܒܲܝ̈ܟ: ܒܪܹܗ ܕܐܲܒ̣ܝܼܢܥܵܡ.
13 ܗܵܝܕܹ̇ܝܢ ܢܚܸܬ̣ ܡܦܲܨܝܵܢܵܐ ܠܲܡܫܲܒܵܚܘܼ ܩܕܼܵܡ ܡܵܪܝܵܐ: ܢܚܸܬ̣ ܠܝܼ ܒܓܲܢ̄ܒܵܪܹ̈ܐ ܡ̣ܢ ܐܲܦܪܹܝܡ.
14 ܘܲܥܒ̣ܵܕܼܵܘ̈ܗܝ ܒܲܥܡܵܠܹܝܩ: ܒܵܬ̣ܪܵܟ̣ ܒܸܢܝܵܡܹܝܢ ܒܚܘܼܒܵܟ: ܡ̣ܢ ܡܵܟ̣ܝܼܪ ܢܦܲܩ ܡܒܲܕ̇ܩܵܢܵܐ: ܘܡ̣ܢ ܙܒ̣ܘܿܠܘܿܢ ܕܟ̣ܵܬ̣ܒ̇ܝܼܢ ܒܩܲܢܝܵܐ ܕܣܵܦܪܵܐ.
15 ܪܵܘ̱ܪ̈ܒ̣ܵܢܹܐ ܕܐܝܼܣܵܟ̣ܵܪ ܥܲܡ ܕܒ̣ܘܿܪܵܐ: ܘܐܝܼܣܵܟ̣ܵܪ ܐܲܝܟ̣ ܒܵܪܵܩ ܒܥܲܡܡܹ̈ܐ: ܐܸܫܬܲܕܲܪ ܒܪܸ̈ܓ̣ܠܵܘܗܝ ܠܦܵܠܓܘܼܬ̣ܵܐ ܕܪܘܼܒܹܝܠ: ܪܵܘ̱ܪܒ̣ܝܼܢ ܒܵܕܼܩܲܝ̈ ܠܸܒܵܐ.
16 ܠܡܵܢܵܐ ܝܵܬܹܒ̣ ܐܲܢ̄ܬ̇ ܒܲܝܢܵܬ̣ ܫܒ̣̈ܝܼܠܹܐ: ܠܡܸܫܡܲܥ ܣܵܘܩܵܐ ܕܲܥܪ̈ܵܕܹܐ: ܠܦܵܠܓ̇ܘܼܬ̣ܵܐ ܕܪܘܼܒܹܝܠ: ܪܵܘ̱ܪ̈ܒ̣ܝܼܢ ܒܵܕܼܩܲܝ̈ ܠܸܒܵܐ.
17 ܓܵܕܼ ܒܥܸܒ̣ܪܵܐ ܕܝܘܿܪܕ̇ܢܵܢ ܫܪܸܐ: ܘܕܼܵܢ ܠܲܠܡܹܐܢܵܐ ܓܵܐܲܪ ܣܦܝܼܢܹ̈ܐ. ܐܵܫܹܝܪ ܝܵܬܹܒ̣ ܥܲܠ ܣܦܵܪܵܐ ܕܝܲܡܵܐ: ܘܥܲܠ ܬܘܼܪ̱ܥܬܹܗ ܢܸܫܪܸܐ.
18 ܙܒ̣ܘܿܠܘܿܢ ܥܲܡܵܐ ܕܚܲܣܸܕܼ ܢܲܦ̮ܫܹܗ ܠܡܵܘܬܵܐ. ܢܲܦ̮ܬܵܠܝܼ ܥܲܠ ܪܵܘܡܵܐ ܕܚܲܩܠܹܗ.
19 ܐܸܬ̣ܵܘ ܡܲܠ̈ܟܹ̇ܐ ܘܐܸܬ̣ܟܲܬܲܫ̣ܘ: ܘܗܵܝܕܹ̇ܝܢ ܐܸܬ̣ܟܲܬܲܫ̣ܘ ܡܲܠ̈ܟܹ̇ܐ ܕܲܟ̣ܢܲܥܢ. ܒܬܲܥܢܵܟ ܐܸܬ̣ܟܲܬܲܫ̣ܘ ܥܲܠ ܡܲـ̈ـܝܵܐ ܕܡܲܓܲܕ̇ܘܿ: ܩܸܢܝܵܢܵܐ ܘܟܸܣܦܵܐ ܠܵܐ ܢܣܲܒ̣ܘ.
20 ܥ̣ܒܲܕܼܘ ܩܪܵܒ̣ܵܐ ܟܵܘܟ̇ܒܹ̈ܐ ܡ̣ܢ ܕܘܼ̈ܟ̇ܝܵܬ̣ܗܘܿܢ: ܩܪܵܒ̣ܵܐ ܡ̣ܢ ܫܡܲܝܵܐ ܥܲܡ ܣܝܼܣܪܵܐ ܒܢܲܚܠܵܐ ܕܩܝܼܫܘܿܢ.
21 ܓܪܲܦ ܐܸܢܘܿܢ ܢܲܚܠܵܐ ܕܩܝܼܫܘܿܢ: ܘܢܲܚܠܵܐ ܕܩܲܪܡܝܼܢ. ܬܲܕܼܪܸܟ̣ ܢܲܦ̮ܫܝ ܚܲܝܠܵܐ.
22 ܗܵܝܕܹ̇ܝܢ ܢܦܲܠ ܥܸܩܒܹ̈ܐ ܕܪ̈ܲܟ̣ܫܹܗ: ܡ̣ܢ ܢܸܗ̱ܡܬ̣ܵܐ ܕܚܲܝܠܵܐ ܕܬܲܩܝܼܦܵܘ̈ܗܝ.
23 ܠܘܼܛܘ ܠܲܡܪܘܿܕܼ: ܐܵܡܲܪ ܡܲܠܲܐܟܹܗ ܕܡܵܪܝܵܐ: ܠܘܼܛܘܼܗ̇ ܘܠܘܼܛܘ ܠܝܵܬ̣ܒܹ̇ܝ̈ܗ̇: ܡܸܛܠ ܕܠܵܐ ܐܸܬ̣ܵܘ ܠܥܘܼܕܼܪܵܢܹܗ ܕܡܵܪܝܵܐ ܒܓܒ̣ܪܹ̈ܐ.
24 ܬܸܬ̣ܒܲܪܲܟ̣ ܡ̣ܢ ܢܸܫܹ̈ܐ ܥܢܵܐܹܝܠ ܐܲܢ̄ܬ̇ܬܹܗ ܕܚܘܿܒ̣ܵܪ ܩܝܼܢܵܝܵܐ: ܡ̣ܢ ܢܸܫܹ̈ܐ ܕܲܒ̣ܡܲܫܟ̇ܢܵܐ ܬܸܬ̣ܒܲܪܲܟ̣.
25 ܡܲـ̈ـܝܵܐ ܫܐܸܠ ܘܚܲܠܒ̣ܵܐ ܝܸܗ̄ܒܲܬ̤: ܒܟ̣ܵܣܵܐ ܕܓܲܢ̄ܒܵܪܹ̈ܐ ܩܲܪܒܲܬ̤ ܚܹܐ̄ܘܬ̣ܵܐ.
26 ܐܝܼܕܼܵܗ̇ ܥܲܠ ܣܸܟ̇ܬ̣ܵܐ ܐܵܘܫܛܲܬ̤: ܘܝܲܡܝܼܢܵܗ̇ ܠܐܲܪܙܲܦܬ̣ܵܐ ܕܢܲܓܵܪܵܐ: ܘܲܡܚܵܬܹܗ ܠܣܝܼܣܪܵܐ: ܘܦܲܟ̣ܬܹܗ ܠܪܹܫܹܗ: ܘܲܡܚܵܬ̤ ܘܐܲܥܒ̇ܪܲܬ̤ ܒܨܕܼܥܹܗ.
27 ܘܒܲܝܢܵܬ̣̱ ܪܸ̈ܓ̣ܠܹܝܗ̇ ܒܪܲܟ̣ ܘܲܢܦܲܠ̣: ܘܲܫܟܸܒ̣: ܒܕܼܘܼܟ̇ܬ̣ܵܐ ܕܲܒ̣ܪܲܟ̣ ܬܲܡܵܢ ܢܦܲܠ̣ ܒܵܙܘܿܙܵܐ.
28 ܘܡ̣ܢ ܟܵܘܬ̣ܵܐ ܐܲܕܼܝܼܩܲܬ̤ ܘܝܲܒ̇ܒܲܬ̤ ܐܸܡܹܗ ܕܣܝܼܣܪܵܐ ܡ̣ܢ ܟܣܘܿܣܛܵܪܘܿܢ ܘܐܸܡܪܲܬ̤: ܡܵܢܵܘ ܐܸܫܬܵܘܚܲܪ ܡܲܪ̈ܟ̇ܒ̣ܵܬܹܗ ܕܒܹܪܝ ܠܡܹܐܬ̣ܵܐ: ܘܡܵܢܵܘ ܐܵܘܚܲܪ ܙܢܵܓ̣ܵܐ ܕܡܲܪ̈ܟ̇ܒ̣ܵܬܹܗ.
29 ܚܲܟ̇ܝܼܡܲܬ̣ ܥܠܲܝ̈ܡܵܬ̣ܵܗ̇ ܐܵܦ ܗ̤ܝ ܥܢܵܬ̤: ܘܐܵܡ̇ܪܵܐ ܠܵܗ̇.
30 ܟܒܲܪ ܐܸܙܲܠ̣ ܘܐܸܫܟܲܚ ܒܸܙܬ̣ܵܐ ܣܲܓ̇ܝܼܐܬ̣ܵܐ: ܘܦܲܠܸܓ̣ ܟܘܿܕܲܢܝܵܐ ܠܪܹܫ ܓܲܒ̣ܪܵܐ: ܘܒܸܙܬ̣ܵܐ ܣܲܓ̇ܝܼܐܬ̣ܵܐ: ܘܨܘܼܒ̣ܥܵܢܹ̈ܐ: ܘܨܘܼܪ̈ܵܬ̣ܵܐ: ܠܣܝܼܣܪܵܐ: ܘܨܘܼܒ̣ܥܵܢܹ̈ܐ: ܘܨܘܼܪ̈ܵܬ̣ܵܐ: ܥܲܠ ܨܵܘܪܹ̈ܐ ܕܒ̣ܵܙܘܿܙܹ̈ܐ.
31 ܗܵܟܲܢܵܐ ܢܹܐܒ̣ܕ̇ܘܿܢ ܟܠܗܘܿܢ ܒܥܸܠܕ̇ܒ̣ܵܒܲܝ̈ܟ ܡܵܪܝܵܐ: ܘܪ̈ܵܚܡܲܝܟ ܐܲܝܟ̣ ܡܲܦܲܩ ܫܸܡܫܵܐ ܒܓܲܢ̄ܒܵܪܘܼܬܹܗ. ܘܫܸܠܝܲܬ̤ ܐܲܪܥܵܐ ܐܲܪܒ̇ܥܝܼܢ ܫܢ̈ܝܼܢ.
1 ܘܲܥ̣ܒܲܕܼܘ ܒ̈ܢܲܝ ܝܼܣܪܵܝܹܠ ܕܒ̣ܝܼܫ ܩܕܼܵܡ ܡܵܪܝܵܐ: ܘܐܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕܼܵܐ ܕܡܸܕܼܝܵܢܵܝܹ̈ܐ ܫܒܲܥ ܫܢ̈ܝܼܢ.
2 ܘܥܸܫܢܲܬ̤ ܐܝܼܕܼܵܐ ܕܡܸܕܝܵܢܵܝܹ̈ܐ ܥܲܠ ܝܼܣܪܵܝܹܠ: ܘܲܥܪܲܩ̣ܘ ܡ̣ܢ ܩܕܼܵܡ ܡܸܕܝܵܢܵܝܹ̈ܐ: ܘܲܥ̣ܒܲܕܼܘ ܠܗܘܿܢ ܒ̈ܢܲܝ ܝܼܣܪܵܝܹܠ ܒܵܬܹ̈ܐ ܒܛܘܼܪܹ̈ܐ: ܘܲܡܥܲܪܹ̈ܐ ܘܲܛܝܵܪܹ̈ܐ.
3 ܘܡܵܐ ܕܙܵܪܲܥ ܗ̄ܘ̣ܵܐ ܝܼܣܪܵܝܹܠ: ܣܵܠܩܝܼܢ ܗ̄ܘ̣ܵܘ ܡܸܕܝܵܢܵܝܹ̈ܐ: ܘܲܥܡܵܠܩܵܝܹ̈ܐ: ܘܲܒ̣̈ܢܲܝ ܪܩܸܡ: ܘܫܵܪܹܝܢ ܗ̄ܘ̣ܵܘ ܥܠܲܝܗܘܿܢ.
4 ܘܲܡܚܲܒ̇ܠܝܼܢ ܗ̄ܘ̣ܵܘ ܟܠܵܗ̇ ܐܲܪܥܵܐ: ܥܕܲܡܵܐ ܠܡܲܥܠܵܢܵܐ ܕܥܵܐܙܵܐ: ܘܠܵܐ ܫܵܒ̣ܩܝܼܢ ܗ̄ܘ̣ܵܘ ܠܝܼܣܪܵܝܹܠ ܕܢܲܚܘܿܢ ܬܵܘܪܹ̈ܐ: ܘܐܸܡܪܹ̈ܐ: ܘܚܸܡܪ̈ܵܐ.
5 ܡܸܛܠ ܕܗܸܢܘܿܢ: ܘܲܒ̣ܥܝܼܪܗܘܿܢ: ܘܡܲܫܟ̇ܢܲܝ̈ܗܘܿܢ: ܐܵܬܹ̇ܝܢ ܗ̄ܘ̣ܵܘ: ܐܲܝܟ̣ ܩܲܡܨܵܐ ܣܲܓ̇ܝܼܵܐܐ: ܘܲܠܗܘܿܢ ܘܲܠܓܲܡܠܲܝܗ̈ܘܿܢ ܠܲܝܬ̇ ܗ̄ܘ̣ܵܐ ܡܸܢܝܵܢ: ܘܥܲܠ̣ܘ ܠܐܲܪܥܵܐ ܠܲܡܚܲܒܵܠܘܼܬ̣ܵܗ̇.
6 ܘܐܸܬ̇ܬ̇ܙܝܼܥ ܝܼܣܪܵܝܹܠ ܛܵܒ̣. ܡ̣ܢ ܩܕܼܵܡ ܡܸܕܼܝܵܢܵܝܹ̈ܐ.
7 ܘܐܲܙܥܸܩܘ ܒ̈ܢܲܝ ܝܼܣܪܵܝܹܠ ܠܡܵܪܝܵܐ ܥܲܠ ܨܒ̣ܘܼܬ̣ܵܐ ܕܡܸܕܼܝܲܢ.
8 ܘܫܲܕܲܪ ܡܵܪܝܵܐ ܠܓܲܒ̣ܪܵܐ ܢܒ̣ܝܼܵܐ ܠܘܵܬ̣ ܒ̈ܢܲܝ ܝܼܣܪܵܝܹܠ: ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܸܢܵܐ ܐܲܣܸܩܬ̇ܟ̣ܘܿܢ ܡ̣ܢ ܐܲܪܥܵܐ ܕܡܸܨܪܹܝܢ. ܘܐܲܦܸܩܬ̇ܟ̣ܘܿܢ ܡ̣ܢ ܒܹܝܬ̣ ܥܲܒ̣ܕ̇ܘܼܬ̣ܵܐ.
9 ܘܦܲܨܝܼܬ̇ܟ̣ܘܿܢ ܡ̣ܢ ܐܝܼܕܼܵܐ ܕܡܸܨܪ̈ܵܝܹܐ: ܘܡ̣ܢ ܐܝܼܕܼܵܐ ܕܟ̣ܠܗܘܿܢ ܐܲܠܘܿܨܲܝ̈ܟ̇ܘܿܢ: ܘܐܵܘܒ̇ܕܹܬ̣ ܐܸܢܘܿܢ ܡ̣ܢ ܩܕܼܵܡܲܝܟ̇ܘܿܢ: ܘܝܸܗ̄ܒܹ̇ܬ̣ ܠܟ̣ܘܿܢ ܐܲܪܥ̱ܗܘܿܢ.
10 ܘܐܸܡ̇ܪܹܬ̣ ܠܟ̣ܘܿܢ ܕܐܸܢܵܐ ܐܢܵܐ ܡܵܪܝܵܐ ܐܲܠܵܗܟ̣ܘܿܢ: ܠܵܐ ܬܸܕܼܚ̄ܠܘܼܢ ܠܐܲܠܵܗܹ̈ܐ ܕܐܵܡܘܿܪ̈ܵܝܹܐ ܕܝܵܬ̣ܒܝܼܢ ܐ̄ܢܬ̇ܘܿܢ ܒܐܲܪܥ̱ܗܘܿܢ. ܘܠܵܐ ܫ̣ܡܲܥܬ̇ܘܿܢ ܒܩܵܠܝ.
11 ܘܐܸܬ̣ܵܐ ܡܲܠܲܐܟܹܗ ܕܡܵܪܝܵܐ ܘܝܸܬܸܒ̣ ܬܚܹܝܬ̣ ܒܸܛ̱ܡܬ̣ܵܐ ܕܐܝܼܬ̣ ܒܥܘܼܦܪܵܐ: ܩܪܝܼܬ̣ܵܐ ܕܝܘܿܐܵܫ ܐܲܒ̣ܘܼܗܝ ܕܥܲܙܪܝܼ: ܘܓܸܕܼܥܘܿܢ ܒܪܹܗ ܚܵܒܹܛ ܗ̄ܘ̣ܵܐ ܚܸܛܹ̈ܐ ܒܓ̣ܵܬ̣: ܕܢܸܥܪܘܿܩ ܡ̣ܢ ܩܕܼܵܡ ܡܸܕܼܝܵܢܵܝܹ̈ܐ.
12 ܘܐܸܬ̣ܚܙܝܼ ܠܹܗ ܡܲܠܲܐܟܹܗ ܕܡܵܪܝܵܐ: ܘܐܸܡܲܪ ܠܹܗ: ܡܵܪܝܵܐ ܓܲܢ̄ܒܵܪ ܚܲܝܠܵܐ ܥܲܡܵܟ̣.
13 ܘܐܸܡܲܪ ܠܹܗ ܓܸܕܼܥܘܿܢ: ܒܵܥܹ̇ܐ ܐ̄ܢܵܐ ܡܸܢܵܟ̣ ܡܵܪܝ: ܐܸܢ ܐܝܼܬ̣ ܡܵܪܝܵܐ ܥܲܡܵܢ: ܠܡܵܢܵܐ ܓܕܲܫ̣ ܠܲܢ ܗܵܠܹܝܢ ܟܠܗܹܝܢ: ܘܐܲܝܟܲܢܵܐ ܐܸܢܹܝܢ ܟܠܗܹܝܢ ܬܸܕܼܡܪ̈ܵܬܹܗ ܕܐܸܫܬܲܥܝܼܘ ܠܲܢ ܐܲܒ̣ܵܗܲܝ̈ܢ: ܘܐܸܡܲܪܘ ܠܲܢ ܕܡ̣ܢ ܡܸܨܪܹܝܢ ܐܲܦܩܲܢ ܡܵܪܝܵܐ: ܘܗܵܫܵܐ ܫܲܒ̣ܩܲܢ ܡܵܪܝܵܐ: ܘܐܲܫ̱ܠܡܲܢ ܒܐܝܼܕܼܵܐ ܕܡܸܕܼܝܵܢܝܹ̈ܐ.
14 ܘܐܸܬ̣ܦܢܝܼ ܥܠܵܘܗܝ ܡܵܪܝܵܐ: ܘܐܸܡܲܪ ܠܹܗ: ܒܚܲܝܠܵܟ̣ ܗܵܢܵܐ: ܡܸܛܠ ܕܐܲܢ̄ܬ̇ ܬܸܦܪܘܿܩ ܠܝܼܣܪܵܝܹܠ ܡ̣ܢ ܐܝܼܕܼܵܐ ܕܡܸܕܼܝܵܢܵܝܹ̈ܐ: ܗܵܐ ܫܲܕܲܪܬܵܟ̣.
15 ܐܵܡܲܪ ܠܹܗ: ܒܵܥܹ̇ܐ ܐ̄ܢܵܐ ܡܸܢܵܟ̣ ܡܵܪܝ: ܒܡܵܢܵܐ ܐܸܦ̱ܪܩܝܼܘܗܝ ܠܝܼܣܪܵܝܹܠ: ܕܗܵܐ ܫܲܪܒܲܬ̣ܝ ܒܨܝܼܪܵܐ ܗ̄ܝ̣ ܒܲܡܢܲܫܹܐ: ܘܐܸܢܵܐ ܐ̄ܢܵܐ ܕܒܹܝܬ̣ ܐܲܒ̣ܝ.
16 ܘܐܸܡܲܪ ܠܹܗ ܡܵܪܝܵܐ: ܐܸܢܵܐ ܐܸܗܘܹܐ ܥܲܡܵܟ̣: ܘܬܸܚܪܘܿܒ̣ ܠܡܸܕܼܝܵܢܵܝܹ̈ܐ ܐܲܝܟ̣ ܓܲܒ̣ܪܵܐ ܚܲܕܼ.
17 ܘܐܸܡܲܪ ܠܹܗ: ܐܸܢ ܐܸܫܟ̇ܚܹ̇ܬ̣ ܪ̈ܲܚܡܹܐ ܒܥܲܝܢܲܝ̈ܟ: ܥܒܸܕܼ ܠܝܼ ܐܵܬ̤ܵܐ: ܘܐܸܕܲܥ ܕܐܲܢ̄ܬ̇ ܡܡܲܠܸܠ ܥܲܡܝ.
18 ܠܵܐ ܬܸܦܪܘܿܩ ܡܸܟܵܐ: ܥܕܲܡܵܐ ܕܐܹܬܹܐ ܠܘܵܬ̣ܵܟ̣: ܘܐܲܦܲܩ̣ ܫܵܪܘܼܬ̣ܝ ܘܐܹܣܝܼܡ ܩܕܼܵܡܲܝܟ. ܘܐܸܡܲܪ ܠܹܗ: ܐܸܢܵܐ ܐܸܬܸ̇ܒ̣ ܥܕܲܡܵܐ ܕܬܹܐܬܹܐ.
19 ܘܓܸܕܼܥܘܿܢ ܥܲܠ ܥ̣ܒܲܪ ܓܲܕܼܝܵܐ ܕܥܸܙܹ̈ܐ: ܘܣܲܐܬ̣ܵܐ ܕܩܲܡܚܵܐ ܦܲܛܝܼܪܵܐ: ܘܒܸܣܪܵܐ ܣܵܡ̣ ܒܣܲܠܵܐ: ܘܲܡܨܲܠܠܵܐ ܐܲܪܡܝܼ ܒܩܸܣܛܵܐ: ܘܐܲܦܸܩ ܠܹܗ ܬܚܹܝܬ̣ ܒܸܛ̱ܡܬ̣ܵܐ: ܘܩܲܪܸܒ̣ ܠܹܗ.
20 ܘܐܸܡܲܪ ܠܹܗ ܡܲܠܲܐܟܹ̇ܗ ܕܡܵܪܝܵܐ: ܣܲܒ̣ ܒܸܣܪܵܐ ܘܦܲܛܝܼܪܵܐ ܘܣܝܼܡ ܥܲܠ ܟܹܐܦܵܐ: ܘܲܡܨܲܠܠܵܐ ܐܲܫܘܿܕܼ ܥܠܹܝܗ̇. ܘܲܥܒܲܕܼ ܗܵܟܲܢܵܐ.
21 ܘܐܵܘܫܸܛ ܡܲܠܲܐܟܹ̇ܗ ܕܡܵܪܝܵܐ ܒܪܹܫ ܚܘܼܛܪܵܐ ܕܒ̣ܐܝܼܕܹܗ: ܘܲܩ̣ܪܸܒ̣ ܠܒܸܣܪܵܐ ܘܲܠܦܛܝܼܪܵܐ: ܘܣܸܠܩܲܬ̤ ܢܘܼܪܵܐ ܡ̣ܢ ܟܹܐܦܵܐ ܘܐܸܟ̣ܠܲܬ̤ ܒܸܣܪܵܐ ܘܦܲܛܝܼܪܵܐ: ܘܡܲܠܲܐܟܹܗ ܕܡܵܪܝܵܐ ܐܸܬ̣ܓܸ̇ܠܙ ܡ̣ܢ ܨܹܐܕܼܵܘܗܝ.
22 ܘܲܚܙ̣ܵܐ ܓܸܕܼܥܘܿܢ ܕܡܲܠܲܐܟܹܗ ܗ̄ܘ̣ ܕܡܵܪܝܵܐ: ܘܐܸܡܲܪ ܓܸܕܼܥܘܿܢ: ܐܘܿܢ ܡܵܪܝܵܐ ܐܲܠܵܗܵܐ: ܕܲܚܙܹܝܬ̣ ܡܲܠܲܐܟܹ̇ܗ ܕܡܵܪܝܵܐ ܐܲܦ̈ܝܼܢ ܒܐܲܦ̈ܝܼܢ.
23 ܘܐܸܡܲܪ ܠܹܗ ܡܵܪܝܵܐ: ܫܠܵܡ ܠܵܟ̣: ܠܵܐ ܬܸܕܼܚܲܠ: ܠܵܐ ܡܵܐܹ̇ܬ̣ ܐܲܢ̄ܬ̇.
24 ܘܲܒ̣ܢܵܐ ܬܲܡܵܢ ܓܸܕܼܥܘܿܢ ܡܲܕܼܒ̇ܚܵܐ ܠܡܵܪܝܵܐ: ܘܲܩܪܵܝܗܝ ܡܵܪܝܵܐ ܫܠܵܡܵܐ ܥܕܲܡܵܐ ܠܝܵܘܡܵܢܵܐ: ܘܲܥܕܼܵܟܹ̇ܝܠ ܒܥܘܼܦܪܵܐ ܗ̄ܘ̣ ܩܪܝܼܬ̣ܵܐ ܕܐܲܒ̣ܘܼܗܝ ܕܥܲܙܪܝܼ.
25 ܘܲܗܘ̤ܵܐ ܒܝܵܘܡܵܐ ܗܵܘ̇: ܘܐܸܡܲܪ ܠܹܗ ܡܵܪܝܵܐ: ܣܲܒ̣ ܬܵܘܪܵܐ ܕܐܲܒ̣ܘܼܟ̣: ܘܬ̣ܵܘܪܵܐ ܐ̄ܚܪܹܢܵܐ ܒܲܪ ܫܒܲܥ ܫܢ̈ܝܼܢ: ܘܲܣܚܘܿܦ ܡܲܕܼܒ̇ܚܹܗ ܕܒܲܥܠܵܐ ܦܬܲܟ̣ܪܹܗ ܕܐܲܒ̣ܘܼܟ̣: ܘܐܸܣܬ̇ܪܵܐ ܕܩܵܝ̇ܡܵܐ ܥܠܵܘܗܝ ܦܲܣܸܩ.
26 ܘܲܒ̣ܢܝܼ ܡܲܕܼܒ̇ܚܵܐ ܠܡܵܪܝܵܐ ܐܲܠܵܗܵܟ̣ ܥܲܠ ܪܹܫ ܬܘܼܩܦܵܐ ܗܵܢܵܐ: ܒܣܸܕܼܪܵܐ. ܘܣܲܒ̣ ܬܵܘܪܵܐ ܐ̄ܚܪܹܢܵܐ: ܘܐܲܣܸܩ ܥܠܵܘܗܝ ܥܠܵܬ̣ܵܐ: ܘܩܲܝܣܹ̈ܐ ܒܩܲܝܣܹ̈ܐ ܕܐܸܣܬ̇ܪܵܐ ܕܲܡܦܲܣܸܩ ܐܲܢ̄ܬ̇.
27 ܘܲܕܼܒܲܪ ܓܸܕܼܥܘܿܢ ܥܸܣܪܵܐ ܓܲܒ̣ܪ̈ܝܼܢ ܡ̣ܢ ܥܲܒ̣ܕܵܘ̈ܗܝ: ܘܲܥ̣ܒܲܕܼ ܐܲܝܟ̣ ܕܐܸܡܲܪ ܠܹܗ ܡܵܪܝܵܐ ܘܡܸܛܠ ܕܕܼܵܚܹ̇ܠ ܗ̄ܘ̣ܵܐ ܡ̣ܢ ܒܹܝܬ̣ ܐܲܒ̣ܘܼܗܝ ܘܡ̣ܢ ܐ̄ܢܵܫܲܝ̈ ܩܪܝܼܬ̣ܵܐ ܕܢܸܥܒܸ̇ܕܼ ܒܐܝܼܡܵܡܵܐ: ܥܒܲܕܼ ܒܠܸܠܝܵܐ.
28 ܘܩܲܕܸ̇ܡ̣ܘ ܐ̄ܢܵܫܲܝ̈ ܩܪܝܼܬ̣ܵܐ ܒܨܲܦܪܵܐ: ܘܲܚ̣ܙܵܘ ܕܲܥܩܝܼܪ ܡܲܕܼܒ̇ܚܵܐ ܕܒܲܥܠܵܐ: ܘܐܸܣܬ̇ܪܵܐ ܕܲܥܠܵܘܗܝ ܡܦܲܣܩܵܐ: ܘܬ̣ܵܘܪܵܐ ܐ̄ܚܪܹܢܵܐ ܡܲܣܲܩ ܥܲܠ ܡܲܕܼܒ̇ܚܵܐ ܐ̄ܚܪܹܢܵܐ ܕܲܒ̣ܢܸܐ.
29 ܘܐܵܡ̇ܪܝܼܢ ܓܒܲܪ ܠܚܲܒ̣ܪܹܗ: ܡܲܢܘܼ ܥܒܲܕܼ ܥܒ̣ܝܼܕ̇ܬܵܐ ܗܵܕܹܐ. ܘܫܲܐܸܠ̣ܘ ܘܥܲܩܸܒ̣ܘ: ܘܐܵܡ̇ܪܝܼܢ ܓܸܕܼܥܘܿܢ ܒܲܪ ܝܘܿܐܵܫ ܥܒܲܕܼ ܥܒ̣ܝܼܕܼܵܬ̣ܵܐ ܗܵܕܹܐ.
30 ܘܐܸܡܲܪܘ ܐ̄ܢܵܫܲܝ̈ ܩܪܝܼܬ̣ܵܐ ܠܝܘܿܐܵܫ: ܐܲܦܸܩ ܒܪܵܟ̣ ܢܡܘܼܬ̣: ܕܲܥܩܲܪ ܡܲܕܼܒ̇ܚܹܗ ܕܒܲܥܠܵܐ: ܘܦܲܣܸܩ ܐܸܣܬ̇ܪܵܐ ܕܲܥܠܵܘܗܝ.
31 ܘܐܸܡܲܪ ܝܘܿܐܵܫ ܠܟ̣ܠ ܕܩܵܡ̣ܘ ܥܠܵܘܗܝ: ܐܲܢ̄ܬ̇ܘܿܢ ܕܵܝܢܝܼܢ ܐ̄ܢܬ̇ܘܿܢ ܥܲܠ ܐܲܦܲܝ̈ ܒܲܥܠܵܐ: ܐܵܘ ܐܲܢ̄ܬ̇ܘܿܢ ܡܦܲܨܹܝܢ ܐ̄ܢܬ̇ܘܿܢ ܠܹܗ. ܡܲܢܘܼ ܕܕܼܵܐܹ̇ܢ ܥܲܠ ܐܲܦܵܘ̈ܗܝ ܥܕܲܡܵܐ ܠܨܲܦܪܵܐ ܢܡܘܼܬ̣: ܐܸܢ ܐܲܠܵܗܵܐ ܗ̄ܘ̣ ܢܕܼܘܼܢ ܥܲܠ ܐܲܦܲܝ̈ ܢܲܦ̮ܫܹܗ ܥܲܠ ܕܲܥܒܲܪ ܡܲܕܼܒ̇ܚܹܗ.
32 ܘܲܩܪܵܝܗܝ ܒܝܵܘܡܵܐ ܗܵܘ̇ ܢܕܼܘܼܒ̣ܥܹܝܠ: ܘܐܸܡܲܪ ܢܕܼܘܼܢܝܼܘܗܝ ܒܲܥܠܵܐ ܥܲܠ ܕܲܥܩܲܪ ܡܲܕܼܒ̇ܚܹܗ.
33 ܘܟ̣ܠܗܘܿܢ ܡܸܕܼܝܵܢܵܝܹ̈ܐ: ܘܲܥܡܵܠܩܵܝܹ̈ܐ: ܘܲܒ̣̈ܢܲܝ ܪܩܸܡ: ܐܸܬ̣ܟܲܢܲܫ̣ܘ ܐܲܟ̣ܚ̄ܕܼܵܐ: ܘܲܥܒܲܪܘ ܘܲܫܪܵܘ ܒܥܘܼܡܩܵܐ ܕܐܝܼܙܲܪܥܹܝܠ.
34 ܘܪܘܼܚܹܗ ܕܡܵܪܝܵܐ ܠܸܒ̣ܫܲܬ̣ ܠܓܸܕܼܥܘܿܢ: ܘܲܩ̣ܪܵܐ ܒܫܝܼܦܘܿܪܵܐ: ܘܲܩܥܵܐ ܐܝܼܙܲܪܥܹܝܠ ܒܵܬ̣ܪܹܗ. ܘܐܝܼܙܓܲܕܵܘ̈ܗܝ ܫܲܕܲܪ ܒܟ̣ܠܹܗ ܡܢܲܫܹܐ: ܘܲܩܥܵܘ ܐܵܦ ܗܸܢܘܿܢ ܒܵܬ̣ܪܹܗ.
35 ܘܐܝܼܙܓܲܕܵܘ̈ܗܝ ܫܲܕܲܪ ܐܵܦ ܥܲܠ ܐܵܫܹܝܪ: ܘܥܲܠ ܙܒ̣ܘܿܠܘܿܢ: ܘܥܲܠ ܢܲܦ̮ܬܵܠܝܼ: ܘܲܣܠܸܩ̣ܘ ܠܐܘܼܪ̱ܥܗܘܿܢ.
36 ܘܐܸܡܲܪ ܓܸܕܼܥܘܿܢ ܠܡܵܪܝܵܐ: ܐܸܢܗ̤ܘ ܕܦܵܪܹܩ ܐܲܢ̄ܬ̇ ܒܐܝܼܕܲܝ̈ ܠܝܼܣܪܵܝܹܠ ܐܲܝܟܲܢܵܐ ܕܐܸܡܲܪܬ̇.
37 ܗܵܐ ܣܵܐܹ̇ܡ ܐ̄ܢܵܐ ܓܸܙܬ̣ܵܐ ܕܥܲܡܪܵܐ ܒܐܸܕ̇ܪܵܐ. ܐܸܢ ܢܸܗܘܹܐ ܛܲܠܵܐ ܥܲܠ ܓܸܙܬ̣ܵܐ ܒܲܠܚܘܿܕܹܝܗ̇: ܘܥܲܠ ܟܠܵܗ̇ ܐܲܪܥܵܐ ܝܲܒ̣ܫܵܐ: ܝܵܕܲܥ ܐ̄ܢܵܐ ܕܦܵܪܹܩ ܐܲܢ̄ܬ̇ ܒܐܝܼܕܲܝ̈ ܠܝܼܣܪܵܝܹܠ ܐܲܝܟܲܢܵܐ ܕܐܸܡܲܪܬ̇.
38 ܘܲܗܘ̤ܵܐ ܗܵܟܲܢܵܐ: ܘܩܲܕܸ̇ܡ ܒܵܬܲܪ ܝܵܘܡܵܐ ܘܥܲܨܪܵܗ̇ ܠܓܸܙܬ̣ܵܐ: ܘܐܲܡܨܝܼ ܛܲܠܵܐ ܡ̣ܢ ܓܸܙܬ̣ܵܐ ܡܠܸܐ ܠܲܩܢܵܐ ܡܲـ̈ـܝܵܐ.
39 ܘܐܸܡܲܪ ܓܸܕܼܥܘܿܢ ܠܐܲܠܵܗܵܐ: ܠܵܐ ܢܸܬ̣ܚܲܡܲܬ̣ ܪܘܼܓ̣ܙܵܟ̣ ܥܠܲܝ: ܘܐܹܡܲܠܸܠ ܗܵܕܹܐ ܙܒܲܢ̄ܬܵܐ ܒܲܠܚܘܿܕܼ: ܐܹܢܲܣܹܐ ܬܘܼܒ̣ ܙܒܲܢ̄ܬܵܐ ܗܵܕܹܐ ܒܓܸܙܬ̣ܵܐ: ܢܸܗܘܹܐ ܝܲܒ̣ܫܵܐ ܥܲܠ ܓܸܙܬ̣ܵܐ ܒܲܠܚܘܿܕܹܝܗ̇: ܘܥܲܠ ܟܠܵܗ̇ ܐܲܪܥܵܐ ܢܸܗܘܹܐ ܛܲܠܵܐ.
40 ܘܲܥܒܲܕܼ ܐܲܠܵܗܵܐ ܒܠܸܠܝܵܐ ܗܵܘ̇ ܗܵܟܲܢܵܐ: ܘܲܗܘ̤ܵܐ ܝܲܒ̣ܫܵܐ ܥܲܠ ܓܸܙܬ̣ܵܐ ܒܲܠܚܘܿܕܹܝܗ̇: ܘܥܲܠ ܟܠܵܗ̇ ܐܲܪܥܵܐ ܗܘ̤ܵܐ ܛܲܠܵܐ.
1 ܘܩܲܕܸ̇ܡ ܢܕܼܘܼܒ̣ܥܹܝܠ ܕܗ̤ܘ ܓܸܕܼܥܘܿܢ ܘܟ̣ܠܹܗ ܥܲܡܵܐ ܕܥܲܡܹܗ: ܘܫܪܵܘ ܥܲܠ ܥܹܝܢ ܚܵܕܼܵܪ. ܘܡܲܫܪܝܼܬ̣ܵܐ ܕܡܸܕܼܝܲܢ ܗܘ̤ܵܬ̣ ܠܵܗ̇ ܡ̣ܢ ܓܲܪܒ̇ܝܵܐ ܕܓܸܒ̣ܥܲܬ̣ ܪܵܡܬ̣ܵܐ ܒܥܘܼܡܩܵܐ.
2 ܘܐܸܡܲܪ ܡܵܪܝܵܐ ܠܓܸܕܼܥܘܿܢ ܣܲܓ̇ܝܼ ܗ̄ܘ̣ ܗܵܢܵܐ ܥܲܡܵܐ ܕܥܲܡܵܟ̣: ܕܐܲܫܠܸܡ ܐܸܢܘܿܢ ܠܡܸܕܼܝܵܢܵܝܹ̈ܐ ܒܐܝܼܕܲܝ̈ܟ̇ܘܿܢ: ܕܠܵܐ ܢܸܫܬܲܒ̣ܗܲܪ ܝܼܣܪܵܝܹܠ ܘܢܹܐܡܲܪ ܐܝܼܕܼܝ ܗ̄ܘ̣ ܙܲܟ̇ܝܵܬܲܢܝ.
3 ܗܵܫܵܐ ܩܪܝܼ ܒܐܸܕܼܢܲܝ̈ ܥܲܡܵܐ ܘܐܸܡܲܪ: ܡܢ ܕܕܲܚܝܼܠ ܘܪܲܬܝܼܬ̣ ܢܦܘܼܫ ܠܹܗ: ܘܢܸܗܦܘܿܟ̣ ܡܢ ܛܘܼܪܵܐ ܕܓܸܠܥܵܕܼ. ܘܲܗܦܲܟ̣ܘ ܡ̣ܢ ܥܲܡܵܐ ܥܸܣܪܝܼܢ ܘܲܬ̣ܪܹܝܢ ܐܲܠܦ̈ܝܼܢ: ܘܥܸܣܪܵܐ ܐܲܠܦ̈ܝܼܢ ܐܸܫܬ̇ܚܲܪܘ.
4 ܘܐܸܡܲܪ ܡܵܪܝܵܐ ܠܓܸܕܼܥܘܿܢ: ܬܘܼܒ̣ ܣܲܓ̇ܝܼ ܗ̄ܘ̣ ܥܲܡܵܐ ܗܵܢܵܐ. ܐܲܚܸܬ̣ ܐܸܢܘܿܢ ܠܡܲـ̈ـܝܵܐ: ܘܐܸܒ̣ܩܸܐ ܐܸܢܘܿܢ ܠܵܟ̣ ܬܲܡܵܢ ܘܲܠܡ̇ܢ ܕܐܹܡܲܪ ܠܵܟ̣ ܕܗܵܘ̇ ܢܹܐܙܲܠ ܥܲܡܵܟ̣: ܗܵܘ̇ ܢܹܐܙܲܠ ܥܲܡܵܟ̣. ܘܲܠܡ̇ܢ ܕܐܹܡܲܪ ܠܵܟ ܕܗܵܘ̇ ܠܵܐ ܢܹܐܙܲܠ ܥܲܡܵܟ̣: ܗܵܘ̇ ܠܵܐ ܢܹܐܙܲܠ ܥܲܡܵܟ̣.
5 ܘܐܲܚܬܹܗ ܠܥܲܡܵܐ ܠܡܲـ̈ـܝܵܐ ܘܐܸܡܲܪ ܡܵܪܝܵܐ ܠܓܸܕܼܥܘܿܢ: ܟܠ ܕܠܵܐܲܥ ܡܲـ̈ـܝܵܐ ܒܠܸܫܵܢܹܗ ܐܲܝܟ̣ ܕܠܵܐܲܠ ܟܲܠܒܵܐ: ܐܲܩܝܼܡܲܝܗܝ ܐܲܟ̣ܚ̄ܕܼܵܐ. ܘܟ̣ܠ ܕܒ̣ܵܪܹܟ̣ ܥܲܠ ܒܘܼܪ̈ܟܵܘܗܝ ܠܡܸܫܬܵܐ: ܐܲܩܝܼܡܲܝܗܝ ܐܲܟ̣ܚ̄ܕܼܵܐ.
6 ܘܲܗܘ̤ܵܐ ܡܸܢܝܵܢܵܐ ܕܐܲܝܠܹܝܢ ܕܠܵܥܝܼܢ ܒܐܝܼܕܲܝ̈ܗܘܿܢ ܠܦܘܼܡܗܘܿܢ ܬܠܵܬ̣ܡܵܐܐ ܓܲܒ̣ܪ̈ܝܼܢ. ܘܟ̣ܠܹܗ ܫܲܪܟܹ̇ܗ ܕܥܲܡܵܐ ܒܪܲܟ̣ܘ ܥܲܠ ܒܘܼܪ̈ܟܲܝܗܘܿܢ ܠܡܸܫܬܵܐ ܡܲـ̈ـܝܵܐ.
7 ܘܐܸܡܲܪ ܡܵܪܝܵܐ ܠܓܸܕܼܥܘܿܢ: ܒܗܵܠܹܝܢ ܬܠܵܬ̣ܡܵܐܐ ܓܲܒ̣ܪ̈ܝܼܢ ܕܠܵܥܝܼܢ ܡܲـ̈ـܝܵܐ ܒܐܝܼܕܲܝ̈ܗܘܿܢ ܠܦܘܼܡܗܘܿܢ ܐܸܦܪܘܿܩܟ̣ܘܿܢ: ܘܐܲܫܠܸܡ ܠܡܸܕܼܝܵܢܵܝܹ̈ܐ ܒܐܝܼܕܲܝ̈ܟ̇ܘܿܢ: ܘܟ̣ܠܹܗ ܥܲܡܵܐ ܢܹܐܙܠ̄ܘܿܢ ܐ̄ܢܵܫ ܠܐܲܬ̣ܪܹܗ.
8 ܘܲܢܣܲܒ̣ܘ ܙܘܵܕܲܝ̈ܗܘܿܢ ܟܠܹܗ ܥܲܡܵܐ ܒܐܝܼܕܲܝ̈ܗܘܿܢ: ܘܩܲܪ̈ܢܵܬ̣ܗܘܿܢ: ܘܲܠܟ̣ܠܗܘܿܢ ܒ̈ܢܲܝ ܝܼܣܪܵܝܹܠ ܫܪܵܐ ܐܸܢܘܿܢ ܐ̄ܢܵܫ ܠܝܼܵܬ̇ܘܼܬܹܗ: ܘܲܠܡܲܫܟ̇ܢܹܗ: ܘܒܲܬ̣ܠܵܬ̣ܡܵܐܐ ܓܲܒ̣ܪ̈ܝܼܢ ܐܸܬ̣ܚܲܝܲܠ: ܘܡܲܫܪܝܼܬ̣ܵܐ ܕܡܸܕܼܝܲܢ ܗܘ̤ܵܬ̣ ܠܵܗ̇ ܠܬܲܚܬ̇ ܒܥܘܼܡܩܵܐ.
9 ܘܲܗܘ̤ܵܐ ܒܠܸܠܝܵܐ ܗܵܘ̇: ܘܐܸܡܲܪ ܠܹܗ ܡܵܪܝܵܐ: ܩܘܼܡ ܚܘܿܬ̣ ܠܡܲܫܪܝܼܬ̣ܵܐ: ܡܸܛܠ ܕܐܲܫܠܸܡ̇ܬܵܗ̇ ܒܐܝܼܕܲܝ̈ܟ.
10 ܘܐܸܢ ܕܵܚܹ̇ܠ ܐܲܢ̄ܬ̇ ܠܡܸܚܲܬ̣: ܚܘܿܬ̣ ܐܲܢ̄ܬ̇ ܘܦܹܐܪܵܐ ܥܠܲܝܡܵܟ̣ ܠܡܲܫܪܝܼܬ̣ܵܐ.
11 ܘܬܸܫܡܲܥ ܡܸܕܸ̇ܡ ܕܲܡܡܲܠܠܝܼܢ: ܘܗܵܝܕܹ̇ܝܢ ܢܸܬ̣ܚܲܝ̈ܠܵܢ ܐܝܼܕܲܝ̈ܟ. ܘܲܢܚܸܬ̣ ܠܡܲܫܪܝܼܬ̣ܵܐ ܗ̤ܘ ܘܦܹܐܪܵܐ ܥܠܲܝܡܹܝܗ̇: ܥܲܠ ܪܹܫ ܚܲܡܫܝܼܢ ܕܲܒ̣ܡܲܫܪܝܼܬ̣ܵܐ.
12 ܘܡܸܕܼܝܲܢ ܘܲܥܡܵܠܹܝܩ ܘܟ̣ܠܗܘܿܢ ܒ̈ܢܲܝ ܪܩܸܡ: ܢܦܲܠܘ ܒܥܘܼܡܩܵܐ ܐܲܝܟ̣ ܩܲܡܨܵܐ ܣܲܓ̇ܝܼܵܐܐ: ܘܲܠܗܘܿܢ ܘܲܠܓܲܡܠܲܝ̈ܗܘܿܢ ܠܲܝܬ̇ ܡܸܢܝܵܢ: ܐܲܝܟ̣ ܚܵܠܵܐ ܕܥܲܠ ܣܸܦܬܹܗ ܕܝܲܡܵܐ ܣܘܿܓ̣ܵܐܐ.
13 ܘܐܸܬ̣ܵܐ ܓܸܕܼܥܘܿܢ: ܘܲܚܙܵܐ ܓܲܒ̣ܪܵܐ ܕܡܸܫܬܲܥܹܐ ܠܚܲܒ̣ܪܹܗ ܚܸܠܡܵܐ: ܘܐܸܡܲܪ ܠܹܗ: ܚܙܹܝܬ̇ ܒܚܸܠܡ̄ܝ: ܟܘܼܟܵܐ ܕܠܲܚܡܵܐ ܕܲܣܥܵܪܹ̈ܐ ܡܸܬ̣ܗܲܦܲܟ̣ ܒܡܲܫܪܝܼܬ̣ܵܐ ܕܡܸܕܼܝܲܢ: ܘܡܲܛܝܼ ܥܕܲܡܵܐ ܠܡܲܫܟ̇ܢܵܐ: ܘܗܲܦܟܹ̇ܗ ܠܥܸܠ ܘܲܢ̣ܦܲܠ ܡܲܫܟ̇ܢܵܐ.
14 ܥ̣ܢܵܐ ܚܲܒ̣ܪܹܗ ܘܐܸܡܲܪ ܠܹܗ: ܠܵܐ ܐܝܼܬܹܝܗ̇ ܗܵܕܹܐ: ܐܸܠܵܐ ܐܸܢ ܚܲܪܒܹ̇ܗ ܕܓܸܕܼܥܘܿܢ ܒܲܪ ܝܘܿܐܵܫ ܓܲܢ̄ܒܵܪܵܐ ܕܝܼܣܪܵܝܹܠ: ܕܐܲܫܠܸܡ ܐܲܠܵܗܵܐ ܒܐܝܼܕܹܗ ܠܡܲܫܪܝܼܬ̣ܵܐ ܕܡܸܕܼܝܲܢ.
15 ܘܟܲܕܼ ܫ̣ܡܲܥ ܓܸܕܼܥܘܿܢ ܬܲܫܥܝܼܬܹܗ ܕܚܸܠܡܵܐ ܘܲܦܫܵܪܹܗ: ܣܓܸܕܼ ܘܲܗܦܲܟ̣ ܠܡܲܫܪܝܼܬ̣ܵܐ ܕܝܼܣܪܵܝܹܠ: ܘܐܸܡܲܪ ܩܘܼܡܘ: ܡܸܛܠ ܕܐܲܫܠܸܡ ܡܵܪܝܵܐ ܒܐܝܼܕܲܝ̈ܟ̇ܘܿܢ ܠܡܲܫܪܝܼܬ̣ܵܐ ܕܡܸܕܼܝܲܢ.
16 ܘܦܲܠܸܓ̣ ܬܠܵܬ̣ܡܵܐܐ ܓܲܒ̣ܪ̈ܝܼܢ: ܠܲܬ̣ܠܵܬ̣ܵܐ ܪܹ̈ܫܝܼܢ: ܘܐܵܘܚܸܕܼ ܩܲܪ̈ܢܵܬ̣ܵܐ ܒܐܝܼܕܲܝ̈ܗܘܿܢ ܕܟ̣ܠܗܘܿܢ: ܘܩܘܼ̈ܠܹܐ ܣܪ̈ܝܼܩܵܬ̣ܵܐ ܘܠܲܡܦܹ̈ܝܕܹܐ ܒܓ̣ܵܘ ܩܘܼ̈ܠܹܐ.
17 ܘܐܸܡܲܪ ܠܗܘܿܢ: ܠܝܼ ܚܙܵܘ ܘܗܵܟܲܢܵܐ ܥܒܸܕܼܘ: ܗܵܐ ܥܵܐܹ̇ܠ ܐ̄ܢܵܐ ܒܓ̣ܵܘ ܡܲܫܪܝܼܬ̣ܵܐ ܐܲܝܟܲܢܵܐ ܕܥܵܒܹܕܼ ܐ̄ܢܵܐ ܗܵܟܲܢܵܐ ܥܒܸܕܼܘ.
18 ܘܩܵܪܹܐ ܐ̄ܢܵܐ ܒܫܝܼܦܘܿܪܵܐ: ܐܸܢܵܐ ܘܟ̣ܠܹܗ ܥܲܡܵܐ ܕܥܲܡܝ: ܘܲܩܪܵܘ ܐܵܦ ܐܲܢ̄ܬ̇ܘܿܢ ܒܫܝܼܦܘܿܪܹ̈ܐ ܒܲܚܕܼܵܪ̈ܲܝ ܟܠܵܗ̇ ܡܲܫܪܝܼܬ̣ܵܐ: ܘܐܸܡܲܪܘ: ܚܲܪܒܵܐ ܠܡܵܪܝܵܐ ܘܲܠܓܸܕܼܥܘܿܢ.
19 ܘܥܲܠ ܓܸܕܼܥܘܿܢ: ܘܲܡܵܐܐ ܓܲܒ̣ܪ̈ܝܼܢ ܕܥܲܡܹܗ: ܒܪܹܫ ܡܲܫܪܝܼܬ̣ܵܐ ܒܡܲܛܲܪܬܵܐ ܡܸܨܥܵܝܬܵܐ: ܘܲܡܩܵܡܘܼ ܐܲܩܝܼܡ ܠܢܵܛܘܿܪܹ̈ܐ.
20 ܘܲܩܪܵܘ ܬܠܵܬ̣ܡܵܐܐ ܪܹ̈ܫܝܼܢ ܒܩܲܪ̈ܢܵܬ̣ܵܐ: ܘܬܲܒܲܪܘ ܩܘܼ̈ܠܹܐ: ܘܐܸܚܲܕܼܘ ܒܣܸܡܵܠܲܝ̈ܗܘܿܢ ܠܲܡܦܹܝ̈ܕܹܐ ܘܲܒ̣ܝܲܡܝܼܢܲܝ̈ܗܘܿܢ ܩܲܪ̈ܢܵܬ̣ܵܐ ܕܢܸܩܪܘܿܢ: ܘܲܩ̣ܪܵܘ ܚܲܪܒܵܐ ܠܡܵܪܝܵܐ ܘܲܠܓܸܕܼܥܘܿܢ.
21 ܘܩܵܡ̣ܘ ܐ̄ܢܵܫ ܒܕܼܘܼܟ̇ܬܹܗ ܚܕܼܵܪ̈ܲܝ ܡܲܫܪܝܼܬ̣ܵܐ: ܘܪܸܗܛܲܬ̤ ܟܠܵܗ̇ ܡܲܫܪܝܼܬ̣ܵܐ ܘܝܲܒܸ̇ܒ̣ܘ ܘܲܥܪܲܩ̣ܘ.
22 ܘܲܩܪ̈ܲܝ ܬܠܵܬ̣ܡܵܐܐ ܩܲܪ̈ܢܵܢ: ܘܣܵܡ̣ ܡܵܪܝܵܐ ܚܲܪܒܹ̇ܗ ܕܓܲܒ̣ܪܵܐ ܒܚܲܒ̣ܪܹܗ ܒܟ̣ܠܵܗ̇ ܡܲܫܪܝܼܬ̣ܵܐ: ܘܥܸܪܩܲܬ̣ܟܠܵܗ̇ ܡܲܫܪܝܼܬ̣ܵܐ: ܥܕܲܡܵܐ ܠܒܹܝܬ̣ ܫܲܒ̣̈ܛܹܐ ܘܲܠܨܸܕܼܪܲܬ̤: ܘܲܥܕܲܡܵܐ ܠܣܸܦܬ̣ܵܐ ܕܐܵܒܸܠ ܡܚܘܿܠܵܐ ܕܥܲܠ ܝܲܛܒܲܬ̣.
23 ܘܲܩܥܵܘ ܒ̈ܢܲܝ ܝܼܣܪܵܝܹܠ ܡ̣ܢ ܢܲܦ̮ܬܵܠܝܼ: ܘܡ̣ܢ ܐܵܫܹܝܪ: ܘܡ̣ܢ ܟܠܹܗ ܡܢܲܫܹܐ: ܘܲܪܕܲܦܘ ܒܵܬܲܪ ܡܸܕܼܝܲܢ.
24 ܘܐܝܼܙ̈ܓܲܕܹܐ ܫܲܕܲܪ ܓܸܕܼܥܘܿܢ ܒܟ̣ܠܹܗ ܛܘܼܪܵܐ ܕܐܲܦܪܹܝܡ: ܘܐܸܡܲܪܘ ܚܘܿܬ̣ܘ ܠܐܘܼܪܥܵܐ ܕܡܸܕܼܝܲܢ: ܘܐܲܚܘܿܕܼܘ ܡܲـ̈ـܝܵܐ: ܥܕܲܡܵܐ ܠܒܹܝܬ̣ ܒܹܪܵܐ ܕܥܲܠ ܓܹܢ̄ܒ̣ ܝܘܿܪܕ̇ܢܵܢ: ܘܲܩܥܵܘ ܟܠܗܘܿܢ ܕܒܹܝܬ̣ ܐܲܦܪܹܝܡ: ܘܐܸܚܲܕܼܘ ܡܲـ̈ـܝܵܐ ܥܕܲܡܵܐ ܠܒܹܝܬ̣ ܒܹܪܵܐ ܕܝܘܿܪܕ̇ܢܵܢ.
25 ܘܐܸܚܲܕܼܘ ܠܲܬ̣ܪܹܝܢ ܪܵܘ̱ܪ̈ܒ̣ܵܢܹܐ ܕܡܸܕܼܝܲܢ ܠܥܘܿܪܝܼܒ̣: ܘܲܠܙܝܼܒ̣ ܘܩܲܛܠܘܼܗܝ ܠܥܘܿܪܝܼܒ̣ ܒܨܘܿܪ: ܘܲܠܙܝܼܒ̣ ܩܛܲܠ̣ܘ ܒܒܹܝܬ̣ ܩܲܒ̣ܪܲܒ̣. ܘܲܪܕܲܦܘ ܠܡܸܕܼܝܲܢ: ܘܲܠܪܹ̈ܫܲܝܗܘܿܢ ܕܥܘܿܪܝܼܒ̣: ܘܲܕܼܙܝܼܒ̣: ܐܲܝܬ̇ܝܼܘ ܠܓܸܕܼܥܘܿܢ ܠܥܸܒ̣ܪܵܐ ܕܝܘܿܪܕ̇ܢܵܢ.
1 ܘܐܵܡ̇ܪܝܼܢ ܠܹܗ ܕܒܹܝܬ̣ ܐܲܦܪܹܝܡ: ܠܡܵܢܵܐ ܥܒܲܕ̇ܬ̇ ܗܵܟܲܢܵܐ: ܠܵܐ ܩܪܲܝܬܵܢ ܟܲܕܼ ܐܵܙܹ̇ܠ ܐܲܢ̄ܬ̇ ܠܡܸܬ̣ܟܲܬܵܫܘܼ ܥܲܡ ܡܸܕܝܲܢ: ܘܢܵܨܹܝܢ ܗ̄ܘ̣ܵܘ ܥܲܡܹܗ ܩܲܫܝܵܐܝܼܬ̣.
2 ܐܵܡܲܪ ܠܗܘܿܢ: ܡܵܢܵܐ ܥܸܒ̣ܕܹܬ̣ ܗܵܫܵܐ ܐܲܟ̣ܘܵܬ̣ܟ̣ܘܿܢ: ܠܵܐ ܗ̄ܘ̣ܵܐ ܛܵܒ̣ ܒܘܼܥܵܪܹܗ ܕܐܲܦܪܹܝܡ ܡ̣ܢ ܩܛܵܦܹ݂ܗ ܕܐܝܼܙܲܪܥܹܝܠ.
3 ܘܒ̣ܐܝܼܙܲܪܥܹܝܠ ܒܐܝܼܕܲܝ̈ܟ̇ܘܿܢ ܐܲܫܠܸܡ ܐܲܠܵܗܵܐ ܠܲܬ̣ܪܹܝܢ ܪܵܘ̱ܪ̈ܒ̣ܵܢܹܐ ܕܡܸܕܼܝܲܢ: ܠܥܘܿܪܝܼܒ̣: ܘܲܠܙܝܼܒ̣ ܘܡܵܢܵܐ ܐܸܫܟ̇ܚܹܬ̣ ܕܐܸܥܒܸ̇ܕܼ ܐܲܟ̣ܘܵܬ̣ܟ̣ܘܿܢ ܗܵܝܕܹ̇ܝܢ ܦܸܪܩܲܬ̤ ܚܸܡܬ̣ܗܘܿܢ ܡܸܢܹܗ: ܟܲܕܼ ܐܸܡܲܪ ܦܸܬ̣ܓ̣ܵܡܵܐ ܗܵܢܵܐ.
4 ܘܐܸܬ̣ܵܐ ܓܸܕܼܥܘܿܢ ܠܝܘܿܪܕ̇ܢܵܢ: ܘܲܥܒܲܪ ܗ̤ܘ ܘܲܬ̣ܠܵܬ̣ܡܵܐܐ ܓܲܒ̣ܪ̈ܝܼܢ ܕܥܲܡܹܗ: ܪܵܗ̇ܛܝܼܢ ܘܥܲܝܝܼܦܝܼܢ.
5 ܘܐܸܡܲܪ ܠ̄ܢܵܫܲܝ̈ ܣܵܟ̣ܘܼܬ̣: ܗܲܒ̣ܘ ܓܪܝܼܨܬܵܐ ܓܪܝܼܨܬܵܐ ܕܠܲܚܡܵܐ ܠܥܲܡܵܐ ܕܥܲܡܝ: ܡܸܛܠ ܕܥܲܝܝܼܦܝܼܢ ܐܸܢܘܿܢ: ܘܐܸܢܵܐ ܗܵܐ ܪܵܕܹܦ ܐ̄ܢܵܐ ܒܵܬܲܪ ܙܵܒ̣ܝܝ ܘܨܲܠܡܢܲܥ ܡܲܠ̈ܟܹ̇ܐ ܕܡܸܕܝܲܢ.
6 ܐܵܡ̇ܪܝܼܢ ܠܹܗ ܪܵܘ̱ܪ̈ܒ̣ܵܢܹܐ ܕܣܵܟ̣ܘܼܬ̣: ܗܵܐ ܐܝܼܕܹܗ ܕܙܵܒ̣ܵܚ ܘܲܕܼܨܲܠܡܢܲܥ ܗܵܫܵܐ ܒܐܝܼܕܲܝ̈ܟ: ܕܢܸܬܸ̇ܠ ܠܚܲܝܠܵܟ̣ ܠܲܚܡܵܐ.
7 ܘܐܸܡܲܪ ܠܗܘܿܢ ܓܸܕܼܥܘܿܢ: ܡܸܛܠ ܗܵܢܵܐ ܡܵܐ ܕܐܲܫܠܸܡ ܡܵܪܝܵܐ ܠܙܵܒ̣ܵܝܝ ܘܲܠܨܲܠܡܢܲܥ ܒܐܝܼܕܲܝ̈: ܐܹܕ̇ܘܼܫ ܒܸܣ̱ܪܟ̣ܘܿܢ ܥܲܠ ܟܘܼ̈ܒܹ̇ܐ ܕܲܒ̣ܡܲܕܼܒ̇ܪܵܐ ܘܥܲܠ ܩܘܼܪ̈ܛܒܹܐ.
8 ܘܲܣܠܸܩ ܡ̣ܢ ܬܲܡܵܢ ܠܲܦܢܘܼܐܹܝܠ: ܘܐܲܝܟ̣ ܕܲܥܢܵܐܘܼܗܝ ܐ̄ܢܵܫܲܝ̈ ܣܵܟ̣ܘܼܬ̣: ܗܵܟܲܢܵܐ ܥܢܵܐܘܼܗܝ ܐܵܦ ܐ̄ܢܵܫܲܝ̈ ܦܢܘܼܐܹܝܠ.
9 ܘܐܸܡܲܪ ܐܵܦ ܠܐ̄ܢܵܫܲܝ̈ ܦܢܘܼܐܹܝܠ: ܡܵܐ ܕܐܸܬܹܝܬ̣ ܒܲܫܠܵܡܵܐ: ܐܸܥܩ̄ܪܝܼܘܗܝ ܠܡܲܓܕܠܵܐ ܗܵܢܵܐ.
10 ܘܙܵܒ̣ܵܝܝ ܘܨܲܠܡܢܲܥ ܫܪܹܝܢ ܒܩܲܪܩܒ̣: ܗܸܢܘܿܢ ܘܡܲܫ̱ܪ̈ܝܵܬ̣ܗܘܿܢ ܥܲܡܗܘܿܢ ܐܲܝܟ̣ ܚܲܡܸܫܬܲܥܣܲܪ ܐܲܠܦ̈ܝܼܢ: ܟܠ ܕܐܸܫܬ̇ܚܲܪܘ ܘܡ̣ܢ ܟܠܗܹܝܢ ܡܲܫ̱ܪ̈ܝܵܬ̣ܵܐ ܕܲܒ̣̈ܢܲܝ ܡܲܕܼܢ̱ܚܵܐ: ܘܕܲܢܦܲܠ̣ܘ ܡܵܐܐ ܘܥܸܣܪܝܼܢ ܐܲܠܦ̈ܝܼܢ ܓܲܒ̣ܪ̈ܝܼܢ ܫܵܡܛܲܝ̈ ܣܲܝܦܵܐ.
11 ܘܲܣܠܸܩ ܓܹܕܼܥܘܿܢ ܒܐܘܼܪܚܵܐ ܕܫܵܪ̈ܝܲܝ ܡܲܫܟ̇ܢܵܐ: ܡ̣ܢ ܡܲܕܼܢ̱ܚܵܐ ܕܢܵܟ̣ܵܝܝ ܘܲܕܼܝܲܒ̣ܓ̇ܗܵܐ: ܘܲܡ̣ܚܵܐ ܠܡܲܫܪܝܼܬ̣ܵܐ: ܘܡܲܫܪܝܼܬ̣ܵܐ ܗܘ̤ܵܬ̣ ܒܫܸܠܝܵܐ.
12 ܘܲܥܪܲܩ̣ܘ ܙܵܒ̣ܵܝܝ ܘܨܲܠܡܢܲܥ: ܘܲܪܕܲܦ̣ ܒܵܬܲܪܗܘܿܢ: ܘܐܸܚܲܕܼ ܠܲܬ̣ܪܹܝܢ ܡܲܠ̈ܟܹ̇ܐ ܕܡܸܕܼܝܲܢ: ܘܲܠܟ̣ܠܵܗ̇ ܡܲܫܪܝܼܬ̣ܵܐ ܐܲܙܝܼܥ.
13 ܘܲܗܦܲܟ̣ ܓܸܕܼܥܘܿܢ ܒܲܪ ܝܘܿܐܵܫ ܡ̣ܢ ܩܪܵܒ̣ܵܐ: ܡ̣ܢ ܡܲܣܩܵܢܵܐ ܕܲܚܕܸܣ.
14 ܘܐܸܚܲܕܼ ܥܠܲܝܡܵܐ ܚܲܕܼ ܡ̣ܢ ܐ̄ܢܵܫܹ̈ܝܗ̇ ܕܣܵܟ̣ܘܼܬ̣ ܘܫܲܐܠܹܗ: ܘܐܲܟ̣ܬܸ̇ܒ̣ ܠܹܗ ܪܵܘ̱ܪ̈ܒ̣ܵܢܹ̇ܝܗ̇ ܕܣܵܟ̣ܘܼܬ̣ ܘܩܲܫܝܼܫܹ̈ܝܗ̇: ܫܲܒ̣ܥܝܼܢ ܓܲܒ̣ܪ̈ܝܼܢ.
15 ܘܐܸܬ̣ܵܐ ܠܘܵܬ̣ ܐ̄ܢܵܫܲܝ̈ ܣܵܟ̣ܘܼܬ̣ ܘܐܸܡܲܪ ܠܗܘܿܢ: ܗܵܐ ܙܵܒ̣ܵܝܝ ܘܨܲܠܡܢܲܥ ܕܚܲܣܸܕ̇ܬ̇ܘܿܢܵܢܝ ܘܐܸܡܲܪܬ̇ܘܿܢ ܠܝܼ ܕܙܵܒ̣ܵܝܝ ܘܨܲܠܡܢܲܥ ܦܟ̣ܝܼܪܝܼܢ ܒܐܝܼܕܲܝ̈ܟ: ܕܢܸܬܸ̇ܠ ܠܥܲܒ̣ܕܲܝ̈ܟ ܠܲܚܡܵܐ ܕܥܲܝܝܼܦܝܼܢ.
16 ܘܓܲܪ ܠܣܵܒܹ̈ܐ ܕܲܩܪܝܼܬ̣ܵܐ ܥܲܠ ܟܘܼ̈ܒܹ̇ܐ ܕܲܒ̣ܡܲܕܼܒ̇ܪܵܐ: ܘܥܲܠ ܩܘܼܪ̈ܛܵܒܹܐ: ܘܐܸܫܬܲܢܲܕܼ ܒܗܘܿܢ ܒܐ̄ܢܵܫܲܝ̈ ܣܵܟ̣ܘܼܬ̣.
17 ܘܡܲܓܕ̇ܠܵܐ ܕܲܦܢܘܼܐܹܝܠ ܥܩܲܪ: ܘܩܲܛܸܠ ܠܐ̄ܢܵܫܲܝ̈ ܩܪܝܼܬ̣ܵܐ.
18 ܘܐܸܡܲܪ ܠܙܵܒ̣ܵܚ ܘܲܠܨܲܠܡܢܲܥ: ܐܲܝܟܲܢܵܐ ܐܸܢܘܿܢ ܐ̄ܢܵܫܵܐ ܕܩܲܛܠܬ̇ܘܿܢ ܒܬ̣ܵܒ̣ܘܿܪ ܐܵܡܪܝܼܢ ܠܹܗ: ܐܲܟ̣ܘܵܬ̣ܵܟ̣ ܐܝܼܬܲܝܗܘܿܢ ܗ̄ܘ̣ܵܘ ܐܲܝܟ̣ ܚܸܙܘܵܐ ܕܲܒ̣̈ܢܲܝ ܡܲܠ̈ܟܹ̇ܐ.
19 ܘܐܸܡܲܪ: ܐܲܚܲܝ̈ ܐܸܢܘܿܢ ܒ̈ܢܲܝ ܐܹܡܝ. ܚܲܝ ܗ̄ܘ̣ ܡܵܪܝܵܐ ܐܲܠܵܗܵܐ: ܕܐܸܠܘܼ ܐܲܚܝܼܬ̇ܘܿܢ ܐܸܢܘܿܢ: ܠܵܐ ܩܲܛܸܠܬ̇ܟ̣ܘܿܢ.
20 ܘܐܸܡܲܪ ܠܝܵܬ̣ܵܪ ܒܘܼܟ̣ܪܹܗ: ܩܘܼܡ ܩܛܘܿܠ ܐܸܢܘܿܢ. ܘܠܵܐ ܫ̣ܡܲܥ ܛܲܠܝܵܐ ܣܲܝܦܹܗ ܡܸܛܠ ܕܲܕܼܚܸܠ ܕܲܥܕܲܟܹ̇ܝܠ ܛܲܠܝܵܐ ܗ̄ܘ̣ܵܐ.
21 ܘܐܸܡܲܪܘ ܙܵܒ̣ܵܝܝ ܘܨܲܠܡܢܲܥ: ܩܘܼܡ ܐܲܢ̄ܬ̇ ܘܲܦܠܲܥ ܒܲܢ: ܘܐܲܝܟ̣ ܓܲܒ̣ܪܵܐ ܓܲܢ̄ܒܵܪܘܼܬܹܗ. ܘܩܵܡ ܓܸܕܼܥܘܿܢ ܘܩܲܛܸܠ ܠܙܵܒ̣ܵܚ ܘܲܠܨܲܠܡܢܲܥ: ܘܲܢܣܲܒ̣ ܣܲܗܪ̈ܵܢܹܐ ܕܐܝܼܬ̣ ܗ̄ܘ̣ܵܘ ܒܨܵܘܪܹ̈ܐ ܕܓܲܡܠܲܝ̈ܗܘܿܢ.
22 ܘܐܵܡ̇ܪܝܼܢ ܒ̈ܢܲܝ ܝܼܣܪܵܝܹܠ ܠܓܸܕܼܥܘܿܢ. ܐܸܫܬܲܠܲܛ ܒܲܢ ܐܵܦ ܐܲܢ̄ܬ̇ ܐܵܦ ܒܪܵܟ̣: ܐܵܦ ܒܲܪ ܒܪܵܟ̣: ܕܲܦܪܲܩܬܵܢ ܡ̣ܢ ܐܝܼܕܼܵܐ ܕܡܸܕܼܝܼܢ.
23 ܐܵܡܲܪ ܠܗܘܿܢ ܓܸܕܼܥܘܿܢ: ܠܵܐ ܐܸܢܵܐ ܡܸܫܬܲܠܲܛ ܐ̄ܢܵܐ ܒܟ̣ܘܿܢ: ܘܠܵܐ ܒܹܪܝ ܡܸܫܬ̇ܠܲܛ ܒܟ̣ܘܿܢ: ܡܵܪܝܵܐ ܢܸܫܬܲܠܲܛ ܒܟ̣ܘܿܢ.
24 ܘܐܸܡܲܪ ܠܗܘܿܢ ܓܸܕܼܥܘܿܢ: ܐܸܢܵܐ ܫܸܐܠ̱ܬ̣ܵܐ ܚܕܼܵܐ ܫܵܐܹ̇ܠ ܐ̄ܢܵܐ ܡܸܢܟ̣ܘܿܢ: ܗܲܒ̣ܘ ܠܝܼ ܐ̄ܢܵܫ ܚܲܕܼ ܚܲܕܼ ܩܕܼܵܫܵܐ ܡ̣ܢ ܒܸܙܬܹܗ: ܡܸܛܠ ܕܲܩܕܼܵܫܹ̈ܐ ܕܕܲܗܒ̣ܵܐ ܐܝܼܬ̣ ܗ̄ܘ̣ܵܘ ܠܗܘܿܢ: ܡܸܛܠ ܕܥܲܪ̈ܒ̣ܵܝܹܐ ܗ̄ܘ̣ܵܘ.
25 ܐܵܡ̇ܪܝܼܢ ܠܹܗ ܝܲܗ̄ܒ̇ܝܼܢ ܚ̄ܢܲܢ ܠܵܟ̣. ܘܲܦܪܲܣܘ ܡܲܪܛܘܼܛܵܐ: ܘܐܲܪܡܝܼܘ ܬܲܡܵܢ ܐ̄ܢܵܫ ܚܲܕܼ ܚܲܕܼ ܩܕܼܵܫܵܐ ܡ̣ܢ ܒܸܙܬܹܗ.
26 ܘܲܗܘ̤ܵܐ ܡܲܬ̣ܩܵܠܵܐ ܕܲܩܕܼܵܫܹ̈ܐ ܕܕܲܗܒ̣ܵܐ ܕܲܫܐܸܠ ܐܵܠܹܦ ܘܲܫܒܲܥܡܵܐܐ ܕܕܲܗܒ̣ܵܐ: ܣܛܲܪ ܡ̣ܢ ܣܵܗܪ̈ܵܢܹܐ: ܘܥܸܩܹ̈ܐ: ܘܲܠܒ̣ܘܼܫܹ̈ܐ ܕܐܲܪܓ̇ܘܵܢܵܐ: ܕܐܝܼܬ̣ ܗ̄ܘ̣ܵܘ ܥܲܠ ܡܲܠ̈ܟܹ̇ܐ ܕܡܸܕܼܝܲܢ: ܘܲܣܛܲܪ ܡ̣ܢ ܥܸܩܹ̈ܐ ܕܐܝܼܬ̣ ܗ̄ܘ̣ܵܘ ܒܨܵܘܪܹ̈ܐ ܕܓܲܡܠܲܝ̈ܗܘܿܢ.
27 ܘܲܢܣܲܒ̣ ܡܸܢܗܘܿܢ ܓܸܕܼܥܘܿܢ ܘܲܥܒܲܕܼ ܥܘܼܦܪܵܐ: ܘܐܲܩܝܼܡܹܗ ܒܲܩܪܝܼܬܹܗ ܒܥܘܼܦܪܵܐ: ܘܲܛܥܵܘ ܠܗܘܿܢ ܒ̈ܢܲܝ ܝܼܣܪܵܝܹܠ ܒܵܬ̣ܪܹܗ ܬܲܡܵܢ: ܘܲܗܘ̤ܵܐ ܠܓܸܕܼܥܘܿܢ ܘܲܠܒܲܝܬܹ̇ܗ ܠܬ̣ܘܼܩ̱ܠܬ̣ܵܐ.
28 ܘܐܸܬ̇ܬܲܒܲܪܘ ܡܸܕܼܝܵܢܵܝܹ̈ܐ ܩܕܼܵܡ ܒ̈ܢܲܝ ܝܼܣܪܵܝܹܠ: ܘܬ̣ܘܼܒ̣ ܠܵܐ ܐܵܘܣܸܦܘ ܕܲܢܪܝܼܡܘܿܢ ܪܹܫܗܘܿܢ ܘܫܸܠܝܲܬ̤ ܐܲܪܥܵܐ ܐܲܪܒ̇ܥܝܼܢ ܫܢ̈ܝܼܢ ܒܝܵܘܡܵܘ̈ܗܝ ܕܓܸܕܼܥܘܿܢ.
29 ܘܐܸܙܲܠ ܢܕܼܘܼܒ̣ܥܹܝܠ ܒܲܪ ܝܘܿܐܵܫ ܘܝܸܬܸܒ̣ ܒܒܲܝܬܹ̇ܗ.
30 ܘܠܹܗ ܠܓܕܼܥܘܿܢ ܐܝܼܬ̣ ܗ̄ܘ̣ܵܘ ܫܲܒ̣ܥܝܼܢ ܒܢ̈ܝܼܢ ܕܲܢܦܲܩ̣ܘ ܡ̣ܢ ܚܨܗ: ܡܸܛܠ ܕܢܸܫܹ̈ܐ ܣܲܓ̇ܝܼܵܐ̈ܬ̣ܵܐ ܐܝܼܬ̣ ܗ̄ܘܲܝ̈ ܠܹܗ.
31 ܘܲܕܼܪܘܼܟ̣ܬܹ̇ܗ ܕܒܲܫܟܹܝܡ ܝܸܠܕܲܬ̤ ܠܹܗ ܒܪܵܐ: ܘܫܲܡܝܼ ܫܡܹܗ ܐܲܒ̣ܝܼܡܲܠܟ.
32 ܘܡܝܼܬ̣ ܓܸܕܼܥܘܿܢ ܒܲܪ ܝܘܿܐܵܫ ܒܣܲܝܒ̇ܘܼܬ̣ܵܐ ܛܵܒ̣ܬ̣ܵܐ: ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܝܘܿܐܵܫ ܐܲܒ̣ܘܼܗܝ: ܒܥܘܼܦܪܵܐ ܕܐܲܒ̣ܘܼܗܝ ܕܥܲܙܪܝܼ.
33 ܘܟܲܕܼ ܡܝܼܬ̣ ܓܸܕܼܥܘܿܢ: ܗ̣ܦܲܟ̣ܘ ܒ̈ܢܲܝ ܝܼܣܪܵܝܹܠ: ܘܲܛܥܵܘ ܒܵܬܲܪ ܒܲܥܠܵܐ: ܘܲܥܒܲܕܼܘ ܠܗܘܿܢ ܒܥܸܠ ܩܝܵܡܵܐ ܐܲܠܵܗܵܐ.
34 ܘܠܵܐ ܐܸܬ̇ܕܲܟܲܪܘ ܒ̈ܢܲܝ ܝܼܣܪܵܝܹܠ ܠܡܵܪܝܵܐ ܐܵܠܵܗܗܘܿܢ: ܕܲܡܦܲܨܹܐ ܠܗܘܿܢ ܡ̣ܢ ܟܠܗܘܿܢ ܒܥܸܠܕ̇ܒ̣ܵܝܲܝ̈ܗܘܿܢ ܕܒܲܚܕܼܵܪ̈ܲܝܗܘܿܢ.
35 ܘܠܵܐ ܥܒܲܪܘ ܛܲܝܒ̇ܘܼܬ̣ܵܐ ܥܲܡ ܒܲܝܬܹ̇ܗ ܕܲܢܕܼܘܼܒ̣ܥܹܝܠ: ܕܗ̤ܘܝܘܼ ܓܸܕܼܥܘܿܢ: ܐܲܝܟ̣ ܟܠܵܗ̇ ܛܲܝܒ̇ܘܼܬ̣ܵܐ ܕܲܥܒܲܕܼ ܥܲܡ ܝܼܣܪܵܝܹܠ.
1 ܘܐܸܙܲܠ ܐܲܒ̣ܝܼܡܲܠܟ ܒܲܪ ܢܕܼܘܼܒ̣ܥܹܝܠ ܠܲܫܟܹܝܡ ܠܘܵܬ̣ ܐܲܚܹ̈ܐ ܕܐܸܡܹܗ: ܘܐܸܡܲܪ ܠܗܘܿܢ: ܘܲܠܟ̣ܠܵܗ̇ ܫܲܪܒ̇ܬ̣ܵܐ ܕܒܹܝܬ̣ ܐܲܒ̣ܘܼܗ̇ ܕܐܸܡܹܗ.
2 ܐܸܡܲܪܘ ܩܕܼܵܡ ܟܠܗܘܿܢ ܡܵܪ̈ܝܗ̇ ܕܲܫܟܹܝܡ: ܡܵܢܵܐ ܦܲܩܵܚ ܠܟ̣ܘܿܢ: ܕܢܸܫܬܲܠܛܘܿܢ ܒܟ̣ܘܿܢ ܫܲܒ̣ܥܝܼܢ ܓܲܒ̣ܪ̈ܝܼܢ ܒܢܵܘ̈ܗܝ ܕܲܢܕܼܘܼܒ̣ܥܹܝܠ: ܐܵܘ ܕܢܸܫܬܲܠܲܛ ܒܟ̣ܘܿܢ ܚܲܕܼ ܓܒܲܪ: ܘܐܸܬ̇ܕܲܟ̣̄ܪܘ ܕܓܲܪܡ̱ܟ̣ܘܿܢ ܐ̄ܢܵܐ ܘܒܸܣ̱ܪܟ̣ܘܿܢ.
3 ܘܐܸܡܲܪܘ ܐܲܚܹ̈ܐ ܕܐܸܡܹܗ ܩܕܼܵܡ ܟܠܗܘܿܢ ܡܵܪܹ̈ܝܗ̇ ܕܲܫܟܹܝܡ ܥܠܵܘܗܝ ܟܠܗܹܝܢ ܡܸܠܹ̈ܐ ܗܵܠܹܝܢ: ܘܐܸܨܛܒ̣ܝܼ ܠܸܒ̇ܗܘܿܢ ܒܵܬܲܪ ܐܲܒ̣ܝܼܡܲܠܟ: ܘܐܵܡܪܝܼܢ ܐܲܚܘܼܢ ܗ̄ܘ̣.
4 ܘܝܲܗ̄ܒ̣ܘ ܠܹܗ ܫܲܒ̣ܥܝܼܢ ܕܟܸܣܦܵܐ ܡ̣ܢ ܒܹܝܬ̣ ܒܥܸܠ ܩܝܵܡܵܐ: ܘܐܸܓܲܪ ܒܗܘܿܢ ܐܲܒ̣ܝܼܡܲܠܟ ܐ̄ܢܵܫܵܐ ܣܪ̈ܝܼܩܹܐ: ܘܦܲܚ̈ܙܹܐ: ܘܐܸܙܲܠ̣ܘ ܒܵܬ̣ܪܹܗ.
5 ܘܥܲܠ ܠܒܹܝܬ̣ ܐܲܒ̣ܘܼܗܝ ܠܥܘܼܦܪܵܐ: ܘܩܲܛܸܠ ܠܐܲܚܵܘ̈ܗܝ ܒܢܵܘ̈ܗܝ ܕܲܢܕܼܘܼܒ̣ܥܹܝܠ ܫܲܒ̣ܥܝܼܢ ܓܲܒ̣ܪ̈ܝܼܢ ܥܲܠ ܟܹܐܦܵܐ ܚܕܼܵܐ: ܘܐܸܫܬܲܚܲܪܘ ܝܘܿܬ̣ܵܡ ܒܲܪ ܢܕܼܘܼܒ̣ܥܹܝܠ ܙܥܘܿܪܵܐ ܡܸܛܠ ܕܐܸܬ̇ܛܲܫܝܼ.
6 ܘܐܸܬ̣ܟܲܢܲܫܘ ܟܠܗܘܿܢ ܡܵܪܹ̈ܝܗ̇ ܕܲܫܟܹܝܡ ܘܟ̣ܠܹܗ ܥܲܡܵܐ ܕܒܹܝܬ̣ ܡܵܠܘܿ: ܘܐܸܙܲܠ ܘܐܲܩܝܼܡܘ ܠܐܲܒ̣ܝܼܡܲܠܟ ܕܢܸܗܘܹܐ ܥܠܲܝܗܘܿܢ ܡܲܠܟܵܐ: ܥܲܠ ܓܹܢ̄ܒ̣ ܒܲܠܘܼܛܵܐ ܕܡܲܨܦܝܵܐ ܕܐܝܼܬ̣ ܒܲܫܟܹܝܡ.
7 ܘܚܵܘܝܼܘ ܠܝܘܿܬ̣ܵܡ: ܘܲܣܠܸܩ ܘܩܵܡ̣ ܒܪܹܫ ܛܘܼܪܵܐ ܕܓܲܪܙܝܼܡ: ܘܐܲܪܝܼܡ ܩܵܠܹܗ: ܘܐܸܡܲܪ: ܫܘܼܡܥܘܼܢܝ ܡܵܪܹ̈ܝܗ̇ ܕܲܫܟܹܝܡ: ܕܢܸܫܡܲܥܟ̣ܘܿܢ ܐܲܠܵܗܵܐ.
8 ܡܑܹܙܲܠ ܐܝܼܠܵܢܹ̈ܐ ܕܢܸܡܫ̄ܚܘܼܢ ܥܠܲܝܗܘܿܢ ܡܲܠܟܵܐ: ܐܵܡ̇ܪܝܼܢ ܠܙܲܝܬܵܐ ܐܲܡܠܸܟ̣ ܥܠܲܝܢ.
9 ܐܵܡܲܪ ܠܗܘܿܢ ܙܲܝܬܵܐ: ܠܵܐ ܫܵܒܹܩ ܐ̄ܢܵܐ ܕܘܼܗܵܢܝ: ܕܒ̣ܝ ܡܸܬ̣ܝܲܩܪܝܼܢ ܐܲܠܵܗܹ̈ܐ ܘܐ̄ܢܵܫܵܐ: ܘܐܵܙܹ̇ܠ ܐ̄ܢܵܐ ܠܲܡܢܵܕܼ ܐܝܼܠܵܢܹ̈ܐ.
10 ܐܵܡ̇ܪܝܼܢ ܐܝܼܠܵܢܹ̈ܐ ܠܬܹܬܵܐ: ܬܵܝ ܐܲܢ̄ܬܝ ܐܲܡܠܸܟ̣ܝ ܥܠܲܝܢ.
11 ܐܵܡܪܵܐ ܠܗܘܿܢ ܬܹܬܵܐ: ܠܵܐ ܫܵܒ̣ܩܵܐ ܐ̄ܢܵܐ ܚܲܠܝܘܼܬ̣ܝ: ܘܐܸܒ̇ܝ ܛܵܒ̣ܵܐ: ܘܐܵܙܵܠ̄ܐ ܐ̄ܢܵܐ ܠܲܡܢܵܕܼ ܥܲܠ ܐܝܼܠܵܢܹ̈ܐ.
12 ܐܵܡ̇ܪܝܼܢ ܐܝܼܠܵܢܹ̈ܐ ܠܲܓܦܸܬܵܐ: ܬܵܝ ܐܲܢ̄ܬܝ ܐܲܡܠܸܟ̣ܝ ܥܠܲܝܢ.
13 ܐܵܡܪܵܐ ܠܗܘܿܢ ܓܦܸܬܵܐ: ܠܵܐ ܫܵܒ̣ܩܵܐ ܐ̄ܢܵܐ ܐܲܕܼܫܝ ܕܲܡܚܲܕܼܵܐ ܠܸܒܵܐ ܕܐܲܠܵܗܹ̈ܐ ܘܲܕܼܐ̄ܢܵܫܵܐ: ܘܐܵܙܠ̄ܐ ܐ̄ܢܵܐ ܠܲܡܢܵܕܼ ܥܲܠ ܐܝܼܠܵܢܹ̈ܐ.
14 ܐܵܡܪܝܼܢ ܐܝܼܠܵܢܹ̈ܐ ܟܠܗܘܿܢ ܠܗܲܛܛܵܐ: ܐܲܢ̄ܬ̇ ܐܲܡܠܸܟ̣ ܥܠܲܝܢ.
15 ܐܵܡܲܪ ܗܲܛܛܵܐ ܠܐܝܼܠܵܢܹ̈ܐ: ܐܸܢ ܒܲܫܪܵܪܵܐ ܡܵܫܚܝܼܢ ܐ̄ܢܬ̇ܘܿܢ ܠܝܼ ܕܐܲܡܠܸܟ̣ ܥܠܲܝܟ̇ܘܿܢ: ܬܵܘ ܐܸܣܬܲܬܲܪܘ ܒܛܸܠܵܠܝ. ܘܐܸܢ ܠܵܐ: ܬܸܦܘܿܩ ܢܘܼܪܵܐ ܡ̣ܢ ܗܲܛܛܵܐ: ܘܬܹܐܟ̣ܘܿܠ ܠܐܲܪ̈ܙܹܐ ܕܲܒ̣ܠܸܒ̣ܢܵܢ.
16 ܘܗܵܫܵܐ ܐܸܢ ܒܩܘܼܫܬܵܐ ܘܒܲܫܪܵܪܵܐ ܥܒܲܕ̇ܬ̇ܘܿܢ: ܕܐܲܡܠܟ̣ܬ̇ܘܿܢ ܠܐܲܒ̣ܝܼܡܲܠܟ: ܘܐܸܢ ܛܵܒ̣ܬ̣ܵܐ ܥܒܸ̇ܕ̇ܬ̇ܘܿܢ ܥܲܡ ܢܕܼܘܼܒ̣ܥܹܝܠ ܘܥܲܡ ܒܲܝܬܹ̇ܗ: ܐܵܘ ܐܲܝܟ̣ ܥܲܡܠܵܐ ܕܐܝܼܕܼܵܘ̈ܗܝ ܦܪܲܥܬ̇ܘܿܢܵܝܗܝ.
17 ܕܐܸܬ̣ܟܲܬܲܫ ܐܵܒ̣ܝ ܥܲܠ ܐܲܦܲܝ̈ܟ̇ܘܿܢ: ܘܲܫܕܼܵܐ ܢܲܦ̮ܫܹܗ ܡ̣ܢ ܩܒ̣ܘܿܠ: ܘܦܲܨܝܼܟ̣ܘܿܢ ܡ̣ܢ ܐܝܼܕܼܵܐ ܕܡܸܕܝܲܢ.
18 ܘܐܲܢ̄ܬ̇ܘܿܢ ܩܵܡܬ̇ܘܿܢ ܥܲܠ ܒܹܝܬ̣ ܐܵܒ̣ܝ ܝܵܘܡܵܢܵܐ: ܘܩܲܛܠܬ̇ܘܿܢ ܠܲܒ̣ܢܵܘ̈ܗܝ ܫܲܒ̣ܥܝܼܢ ܓܲܒ̣ܪ̈ܝܼܢ ܥܲܠ ܟܹܐܦܵܐ ܚܕܼܵܐ: ܘܐܲܡܠܸܟ̣ܬ̇ܘܿܢ ܠܐܒ̣ܝܼܡܲܠܟ ܒܲܪ ܐܲܡܬܹܗ ܥܲܠ ܡܪܹ̈ܝܗ̇ ܕܲܫܟ̣ܝܼܡ: ܡܸܛܠ ܕܐܲܚܘܼܟ̣ܘܿܢ ܗ̄ܘ̣.
19 ܘܐܸܢ ܒܩܘܼܫܬܵܐ ܘܒܲܫܪܵܪܵܐ ܥܒܲܕ̇ܬ̇ܘܿܢ ܥܲܡ ܢܕܼܘܼܒ̣ܥܹܝܠ ܘܥܲܡ ܒܲܝܬܹ̇ܗ ܝܵܘܡܵܢܵܐ: ܚܕܼܵܘ ܒܐܲܒ̣ܝܼܡܲܠܟ: ܘܐܵܦ ܗ̤ܘ ܢܸܚܕܸ̇ܐ ܒܟ̣ܘܿܢ.
20 ܘܐܸܢ ܠܵܐ: ܬܸܦܘܿܩ ܢܘܼܪܵܐ ܡ̣ܢ ܐܲܒ̣ܝܼܡܲܠܟ: ܘܬܹܐܟ̣ܘܿܠ ܠܡܵܪܹ̈ܝܗ̇ ܕܲܫܟܹܝܡ ܘܲܠܡܵܪܹ̈ܝܗ̇ ܕܡܲܠܘܿ. ܘܬܸܦܘܿܩ ܢܘܼܪܵܐ ܡ̣ܢ ܡܵܪܹ̈ܝܗ̇ ܕܲܫܟܹܝܡ: ܘܡܵܪܹ̈ܝܗ̇ ܕܡܲܠܘܿ: ܘܬܹܐܟ̣ܠܝܼܘܗܝ ܠܐܲܒ̣ܝܼܡܲܠܟ.
21 ܘܲܥܪܲܩ ܝܘܿܬ̣ܵܡ ܘܐܸܬ̣ܦܲܠܲܛ: ܘܐܸܙܲܠ ܠܕܼܵܒ̣ܝܼܪ ܘܝܼܬܸܒ̣ ܬܲܡܵܢ: ܐܲܝܟܵܐ ܕܝܵܬܹܒ̣ ܗ̄ܘ̣ܵܐ ܐܲܒ̣ܝܼܡܲܠܟ ܡ̣ܢ ܩܕܼܝܼܡ.
22 ܘܐܸܫܬܲܠܲܛ ܐܲܒ̣ܝܼܡܲܠܟ ܥܲܠ ܝܼܣܪܵܝܹܠ ܬܠܵܬ̣ ܫܢ̈ܝܼܢ.
23 ܘܫܲܕܲܪ ܐܲܠܵܗܵܐ ܪܘܼܚܵܐ ܒܝܼܫܬܵܐ ܥܲܠ ܐܲܒ̣ܝܼܡܲܠܟ: ܘܥܲܠ ܡܵܪܹ̈ܝܗ̇ ܕܲܫܟܹܝܡ: ܘܕܲܓܸ̇ܠܘ ܡܵܪܹ̈ܝܗ̇ ܕܲܫܟܹܝܡ ܒܐܲܒ̣ܝܼܡܲܠܟ.
24 ܡܸܛܠ ܕܢܹܐܬܹܐ ܥܵܘܼܠܵܐ ܕܫܲܒ̣ܥܝܼܢ ܒܢܵܘ̈ܗܝ ܕܲܢܕܼܘܼܒ̣ܥܹܝܠ: ܘܕܸܡܗܘܿܢ ܠܲܡܣܵܡ ܥܲܠ ܐܲܒ̣ܝܼܡܲܠܟ ܐܲܚܘܼܗܘܿܢ ܕܩܲܛܸܠ ܐܸܢܘܿܢ: ܘܥܲܠ ܡܵܪܹ̈ܝܗ̇ ܕܲܫܟܹܝܡ ܕܚܲܝܸܠܘ ܐܝܼܕܼܵܘ̈ܗܝ ܕܲܢܩܲܛܸܠ ܠܐܲܚܵܘ̈ܗܝ.
25 ܘܐܲܟ̣ܡܸܢܘ ܠܹܗ ܟܡܹܐܢܹ̈ܐ ܥܲܠ ܪܹܫ ܛܘܼܪܵܐ: ܘܲܚܛܲܦܘ ܟܠ ܕܥܵܒܲܪ ܥܠܲܝܗܘܿܢ ܒܐܘܼܪܚܵܐ: ܘܐܸܬ̣ܚܵܘܝܼ ܠܐܲܒ̣ܝܼܡܲܠܟ.
26 ܘܐܸܬ̣ܵܐ ܓܵܥܵܠ ܒܲܪ ܥܵܦܵܪ: ܗ̤ܘ ܘܐܲܚܵܘ̈ܗܝ: ܘܲܥܒܲܪܘ ܒܲܫܟܹܝܡ: ܘܐܸܬ̇ܬ̇ܟܸܠܘ ܥܠܵܘܗܝ ܡܵܪܹ̈ܝܗ̇ ܕܲܫܟܹܝܡ.
27 ܘܲܢܦܲܩܘ ܠܕܲܒ̣ܪܵܐ: ܘܲܩܛܲܦܘ ܟܲܪ̈ܡܲܝܗܘܿܢ ܘܲܥܨܲܪܘ: ܘܲܥܒܲܕܼܘ ܚܠܘܿܠܵܐ: ܘܥܲܠ̣ܘ ܠܒܹܝܬ̣ ܐܲܠܵܗܲܝ̈ܗܘܿܢ: ܘܲܠܥܣܘ: ܘܐܸܣܬ̇ܝܼܘ: ܘܨܲܚܝܼܘ ܠܐܲܒ̣ܝܼܡܲܠܟ.
28 ܘܐܵܡܲܪ ܓܵܥܵܠ ܒܲܪ ܥܵܦܵܪ: ܡܲܢܘܼ ܐܲܒ̣ܝܼܡܲܠܟ ܘܡܲܢܘܼ ܫܟܹܝܡ ܕܢܸܦ̱ܠܚܝܼܘܗܝ: ܠܵܐ ܗ̄ܘ̣ܵܐ ܒܲܪ ܢܕܼܘܼܒ̣ܥܹܝܠ. ܘܙܵܒ̣ܵܠ ܕܫܲܢܝܼ ܦܘܼܩܕܵܢܹܗ: ܦܠܲܚ̣ ܠܐ̄ܢܵܫܲܝ̈ ܚܡܘܿܪ ܐܲܒ̣ܘܼܗܝ ܕܲܫܟܹܝܡ: ܡܸܛܠ ܡܵܢܵܐ ܢܸܦ̱ܠܚܝܼܘܗܝ ܚܢܲܢ.
29 ܡ̇ܢ ܕܹܝܢ ܐܲܫ̱ܠܡܹܗ ܠܥܲܡܵܐ ܗܵܢܵܐ ܒܐܝܼܕܲܝ̈: ܘܐܲܥܒܲܪܬܹ̇ܗ ܠܐܲܒ̣ܝܼܡܲܠܟ. ܘܐܸܡܲܪ ܠܐܲܒ̣ܝܼܡܲܠܟ: ܐܲܣܓܵܐ ܚܲܝܠܵܟ̣: ܘܦܘܿܩ.
30 ܘܲܫܡܲܥ ܙܵܒ̣ܵܠ ܫܲܠܝܼܛܵܐ ܕܲܩܪܝܼܬ̣ܵܐ ܡܸܠܵܘ̈ܗܝ ܕܓ̣ܵܥܵܠ ܒܲܪ ܥܵܦܵܪ: ܘܐܸܬ̣ܚܲܡܲܬ̣ ܪܘܼܓ̣ܙܹܗ.
31 ܘܫܲܕܲܪ ܐܝܼܙ̈ܓܲܕܹܐ ܠܘܵܬ̣ ܐܲܒ̣ܝܼܡܲܠܟ ܒܢܸܟ̣ܠܵܐ: ܘܐܸܡܲܪ: ܗܵܐ ܓܵܥܵܠ ܒܲܪ ܥܵܦܪ ܗ̤ܘ ܘܐܲܚܵܘ̈ܗܝ ܐܸܬ̣ܵܘ ܠܲܫܟܹܝܡ: ܘܗܵܐ ܚܕܼܝܼܪܝܼܢ ܠܲܩܪܝܼܬ̣ܵܐ ܥܠܲܝܟ.
32 ܗܵܫܵܐ ܩܘܼܡ ܒܠܸܠܝܵܐ ܐܲܢ̄ܬ̇ ܘܥܲܡܵܐ ܕܥܲܡܵܟ̣: ܘܐܸܬ̣ܟܲܡ̄ܢ ܒܕܲܒ̣ܪܵܐ.
33 ܘܲܒ̣ܨܲܦܪܵܐ ܡܵܐ ܕܕܸܢܚܲܬ̤ ܫܸܡܫܵܐ: ܩܘܼܡ ܘܗܲܠܸܟ̣ ܥܲܠ ܩܪܝܼܬ̣ܵܐ: ܘܗܵܐ ܗ̤ܘ ܘܥܲܡܵܐ ܕܥܲܡܹܗ ܢܵܦܩܝܼܢ ܠܘܵܬ̣ܵܟ̣: ܥܒܸܕܼ ܠܗܘܿܢ ܐܲܟ̣ܡܵܐ ܕܣܵܦܩܵܐ ܒܐܝܼܕܲܝ̈ܟ.
34 ܘܩܵܡ ܐܲܒ̣ܝܼܡܲܠܟ ܘܥܲܡܵܐ ܟܠܹܗ ܕܥܲܡܹܗ ܒܠܸܠܝܵܐ: ܘܐܸܬ̣ܟ̇ܡܸܢܘ ܥܲܠ ܫܟܹܝܡ ܐܲܪܒ̇ܥܵܐ ܪܹ̈ܫܝܼܢ.
35 ܘܲܢܦܲܩ ܓܵܥܵܠ ܒܲܪ ܥܵܦܵܪ: ܘܩܵܡ ܒܡܲܥܠܵܢܵܐ ܕܬܲܪܥܵܐ ܕܲܩܪܝܼܬ̣ܵܐ: ܘܩܵܡ̣ ܐܲܒ̣ܝܼܡܲܠܟ ܘܥܲܡܵܐ ܕܥܲܡܹܗ ܡ̣ܢ ܟܡܹܐܢܵܐ.
36 ܘܲܚܙܵܐ ܓܵܥܵܠ ܠܥܲܡܵܐ ܘܐܸܡܲܪ ܠܙܵܒ̣ܵܠ: ܗܵܐ ܥܲܡܵܐ ܢܵܚܬ̇ܝܼܢ ܡ̣ܢ ܪܹ̈ܫܲܝ ܛܘܼܪܹ̈ܐ. ܘܐܸܡܲܪ ܠܹܗ ܙܵܒ̣ܵܠ: ܛܸܠܵܠܵܐ ܗ̄ܘ̣ ܕܛܘܼܪܹ̈ܐ ܚܵܙܹ̇ܐ ܐܲܢ̄ܬ̇ ܐܲܝܟ̣ ܐ̄ܢܵܫܵܐ.
37 ܘܐܵܘܣܸܦ ܓܵܥܵܠ ܘܐܸܡܲܪ ܠܙܵܒ̣ܵܠ: ܗܵܐ ܥܲܡܵܐ ܢܵܚܬ̇ܝܼܢ ܡ̣ܢ ܬܘܼܩ̄ܢܵܗ̇ ܕܐܲܪܥܵܐ: ܘܪܹܫܵܐ ܚܲܕܼ ܐܵܬܹܐ ܡ̣ܢ ܐܘܼܪܚܵܐ ܕܒܹܝܬ̣ ܒܲܠܘܼܛܵܐ ܕܲܡܥܘܿܢܝܼܢ.
38 ܐܵܡܲܪ ܠܹܗ ܙܵܒ̣ܵܠ: ܐܲܝܟܵܘ ܦܘܼܡܵܟ̣ ܗܵܘ̇ ܕܐܵܡܲܪ ܗ̄ܘ̣ܵܐ: ܕܡܲܢܘܼ ܐܲܒ̣ܝܼܡܲܠܟ ܕܢܸܦ̱ܠܚܝܼܘܗܝ: ܠܵܐ ܗ̄ܘ̣ܵܐ ܗܵܢܵܐ ܥܲܡܵܐ ܕܐܲܣܠܝܼܬ̇: ܦܘܿܩ ܗܵܫܵܐ ܘܐܸܬ̣ܟܲܬܲܫ ܥܲܡܹܗ.
39 ܘܲܢܦܲܩ ܓܵܥܵܠ ܩܕܼܵܡ ܡܵܪܹ̈ܝܗ̇ ܕܲܫܟܹܝܡ: ܘܐܸܬ̣ܟܲܬܲܫ ܥܲܡ ܐܲܒ̣ܝܼܡܲܠܟ.
40 ܘܪܲܕܼܦܹܗ ܐܲܒ̣ܝܼܡܲܠܟ ܘܲܥܪܲܩ ܡ̣ܢ ܩܕܼܵܡܵܘܗܝ: ܘܲܢܦܲܠ̣ܘ ܩܛܝܼ̈ܠܹܐ ܣܲܓ̇ܝܼ̈ܐܹܐ: ܥܕܲܡܵܐ ܠܡܲܥܠܵܢܵܐ ܕܬܲܪܥܵܐ.
41 ܘܝܼܬܸܒ̣ ܐܲܒ̣ܝܼܡܲܠܟ ܒܐܲܕܼܘܿܡܵܐ: ܘܲܛܪܲܕܼ ܙܵܒ̣ܵܠ ܠܓܵܥܵܠ ܘܠܲܐܚܵܘ̈ܗܝ ܕܠܵܐ ܢܸܬ̇ܒ̣ܘܼܢ ܒܲܫܟܹܝܡ.
42 ܘܲܗܘ̤ܵܐ ܡ̣ܢ ܒܵܬܲܪ ܝܵܘܡܵܐ: ܘܲܢܦܲܩ̣ܘ ܥܲܡܵܐ ܠܕܲܒ̣ܪܵܐ: ܘܚܵܘܝܼܘ ܠܐܲܒ̣ܝܼܡܲܠܟ.
43 ܘܲܕܼܒܲܪ ܠܥܲܡܵܐ: ܘܦܲܠܸܓ̣ ܐܸܢܘܿܢ ܠܲܬ̣ܠܵܬ̣ܵܐ ܪܹ̈ܫܝܼܢ: ܘܐܸܬ̣ܟ̇ܡܸܢ ܒܕܲܒ̣ܪܵܐ: ܘܲܚܙܵܐ ܘܗܵܐ ܥܲܡܵܐ ܢܵܦܹ̇ܩ ܡ̣ܢ ܩܪܝܼܬ̣ܵܐ: ܘܩܵܡ ܥܠܲܝܗܘܿܢ: ܘܩܲܛܸܠ ܐܸܢܘܿܢ.
44 ܘܐܲܒ̣ܝܼܡܲܠܟ ܘܪܹ̈ܫܹܐ ܕܥܲܡܹܗ: ܗܲܠܸܟ̣ܘ ܘܩܵܡ̣ܘ ܒܡܲܥܠܵܢܵܐ ܕܬܲܪܥܵܐ ܕܲܩܪܝܼܬ̣ܵܐ: ܘܲܬ̣ܪܹܝܢ ܪܹ̈ܫܝܼܢ ܗܲܠܸܟ̣ܘ ܥܲܠ ܟܠ ܕܲܒ̣ܡܲܕܼܒ̇ܪܵܐ ܘܩܲܛܸܠܘ ܐܸܢܘܿܢ.
45 ܘܐܲܒ̣ܝܼܡܲܠܟ ܐܸܬ̣ܟܲܬܲܫ ܒܲܩܪܝܼܬ̣ܵܐ ܟܠܹܗ ܝܵܘܡܵܐ ܗܵܘ̇: ܘܟܲܒ̣ܫܵܗ̇ ܠܲܩܪܝܼܬ̣ܵܐ ܘܲܠܟ̣ܠܹܗ ܥܲܡܵܐ ܕܐܝܼܬ̣ ܒܵܗ̇ ܩܲܛܸܠ: ܘܥܲܩܪܵܗ̇ ܠܲܩܪܝܼܬ̣ܵܐ ܘܙܲܪܥܵܗ̇ ܡܲܠܘܼܚܵܐ.
46 ܘܲܫܡܲܥܘ ܟܠܗܘܿܢ ܡܵܪܹ̈ܝܗ̇ ܕܡܲܓܕܲܠ ܫܟܹܝܡ: ܘܐܸܬ̣ܵܘ ܠܡܸܦܣܲܩ ܒܒܹܝܬ̣ ܐܹܝܠ ܩܝܵܡܵܐ.
47 ܘܚܵܘܝܼܘ ܠܐܲܒ̣ܝܼܡܲܠܟ ܕܐܸܬ̣ܟܲܢܲܫܘ ܟܠܗܘܿܢ ܡܵܪܹ̈ܝܗ̇ ܕܡܲܓܕܲܠ ܫܟܹܝܡ.
48 ܘܲܣܠܸܩ ܐܲܒ̣ܝܼܡܲܠܟ ܠܛܘܼܪܵܐ ܕܨܲܠܡܘܿܢ: ܘܟ̣ܠܹܗ ܥܲܡܵܐ ܕܥܲܡܹܗ: ܘܲܢܣܲܒ̣ ܐܲܒ̣ܝܼܡܲܠܟ ܢܵܪܓܵܐ ܒܐܝܼܕܹܗ: ܘܲܦܣܲܩ ܣܵܘܟ̇ܬ̣ܵܐ ܕܩܲܝܣܹ̈ܐ: ܘܫܲܩܠܵܗ̇ ܘܣܵܡܵܗ̇ ܥܲܠ ܟܲܬ̣ܦܹܗ: ܘܐܸܡܲܪ ܠܥܲܡܵܐ ܕܥܲܡܹܗ: ܡܵܐ ܕܲܚܙܲܝܬ̇ܘܿܢ ܕܥܸܒ̣ܕܹܬ̣: ܥܒܸܕܼܘ ܐܵܦ ܐܲܢ̄ܬ̇ܘܿܢ ܒܲܥܓܲܠ ܐܲܟ̣ܘܵܬ̣ܝ.
49 ܘܲܦܣܲܩܘ ܓܒܲܪ ܣܵܘܟ̇ܬܹܗ: ܘܐܸܙܲܠ ܒܵܬܲܪ ܐܲܒ̣ܝܼܡܲܠܟ: ܘܣܵܡ ܟܵܫܝܼܬ̣ܵܐ ܘܐܵܘܩܕܼܵܗ̇ ܠܲܩܪܝܼܬ̣ܵܐ ܒܢܘܼܪܵܐ: ܘܡܝܼܬ̣ܘ ܟܠܗܘܿܢ ܐ̄ܢܵܫܵܐ ܕܐܝܼܬ̣ ܒܡܲܓܕܲܠ ܫܟܹܝܡ ܒܢܘܼܪܵܐ: ܐܲܝܟ ܐܵܠܹܦ: ܒܹܝܬ̣ ܓܲܒ̣ܪܹ̈ܐ ܠܢܸܫܹ̈ܐ.
50 ܘܐܸܙܲܠ ܐܲܒ̣ܝܼܡܲܠܟ ܠܬ̣ܵܒ̣ܵܨ: ܘܲܫܪܵܐ ܒܬ̣ܵܒ̣ܵܨ ܘܐܲܚܕܵܗ̇.
51 ܘܡܲܓܕ̇ܠܵܐ ܥܲܫܝܼܢܵܐ ܗܘ̤ܵܐ ܒܓ̣ܵܘܵܗ̇ ܕܲܩܪܝܼܬ̣ܵܐ: ܘܲܥܪܲܩ̣ܘ ܠܬܲܡܵܢ ܟܠܗܘܿܢ ܓܲܒ̣ܪܹ̈ܐ ܘܢܸܫܹ̈ܐ: ܘܟ̣ܠܗܘܿܢ ܡܵܪܹ̈ܝܗ̇ ܕܲܩܪܝܼܬ̣ܵܐ: ܘܐܸܚܲܕܼܘ ܒܐܲܦܲܝ̈ܗܘܿܢ: ܘܲܣܠܲܩܘ ܠܐܸܓܵܪܵܐ ܕܡܲܓ̣ܕ̇ܠܵܐ.
52 ܘܡܲܛܝܼ ܐܲܒ̣ܝܼܡܲܠܟ ܥܕܲܡܵܐ ܠܡܲܓܕ̇ܠܵܐ ܘܡܸܬ̣ܟܲܬܲܫ ܒܹܗ: ܘܲܩܪܲܒ̣ ܥܕܲܡܵܐ ܠܬܲܪܥܵܐ ܕܡܲܓܕ̇ܠܵܐ ܕܢܵܘܩܕܼܝܼܘܗܝ ܒܢܘܼܪܵܐ.
53 ܘܲܫܕܼܵܬ̤ ܐܲܢ̄ܬ̇ܬ̣ܵܐ ܚܕܼܵܐ ܬܸܒ̣ܪܵܐ ܕܪܲܟ̣ܫܵܐ ܕܪܲܚܝܵܐ ܥܲܠ ܪܹܫܹܗ ܕܐܲܒ̣ܝܼܡܲܠܟ: ܘܲܬ̣ܒܲܪܬܹܗ ܠܪܹܫܹܗ.
54 ܘܲܩܪܵܐ ܡܣܲܪܗ̱ܒ̣ܵܐܝܼܬ̣ ܠܛܵܠܝܵܐ ܫܵܩܹܠ ܡܵܐܢܵܘ̈ܗܝ: ܘܐܸܡܲܪ ܠܹܗ: ܫܡܘܿܛ ܣܲܝܦܵܟ ܘܲܩܛܘܿܠܲܝܢܝ ܒܹܗ: ܕܠܵܐ ܢܹܐܡܪܘܿܢ ܥܠܲܝ ܕܐܲܢ̄ܬ̇ܬ̣ܵܐ ܩܛܲܠܬܹܗ. ܘܕܲܩܪܹܗ ܥܠܲܝܡܵܐ ܘܡܝܼܬ̣.
55 ܘܲܚܙܵܘ ܒ̈ܢܲܝ ܝܼܣܪܵܝܹܠ ܕܡܝܼܬ̣ ܠܹܗ ܐܲܒ̣ܝܼܡܲܠܟ: ܘܐܸܙܲܠܘ ܐ̄ܢܵܫ ܠܐܲܬ̣ܪܹܗ.
56 ܘܦܲܪܥܹܗ ܐܲܠܵܗܵܐ ܒܝܼܫܬܵܐ ܠܐܲܒ̣ܡܲܠܟ ܕܲܥܒܲܕܼ ܠܐܲܒ̣ܘܼܗܝ: ܘܩܲܛܸܠ ܠܫܲܒ̣ܥܝܼܢ ܐܲܚܵܘ̈ܗܝ.
57 ܘܟ̣ܠܵܗ̇ ܒܝܼܫܬܵܐ ܕܲܥܒܲܕܼܘ ܐ̄ܢܵܫܲܝ̈ ܫܟܹܝܡ: ܐܲܗܦܸܟ ܐܲܠܵܗܵܐ ܒܪܹܫܗܘܿܢ: ܘܐܸܬ̣ܵܬ̤ ܥܠܲܝܗܘܿܢ ܟܠܵܗ̇ ܠܵܘܛܬܹܗ ܕܝܘܿܬ̣ܵܡ ܒܲܪ ܢܕܼܘܼܒ̣ܥܹܝܠ.
1 ܘܩܵܡ̣ ܡ̣ܢ ܒܵܬܲܪ ܐܲܒ̣ܝܼܡܲܠܟ ܠܡܸܦܪܲܩ ܠܝܼܣܪܵܝܹܠ: ܬܘܿܠܵܥ ܒܲܪ ܦܘܿܐܵܐ ܒܲܪ ܕܵܕܹܗ: ܓܲܒ̣ܪܵܐ ܡ̣ܢ ܐܝܼܣܵܟ̣ܵܪ: ܘܗ̤ܘ ܝܵܬܹܒ̣ ܗ̄ܘ̣ܵܐ ܒܫܵܡܝܼܪ ܛܘܼܪܵܐ ܕܐܲܦܪܹܝܡ.
2 ܘܕܼܵܢ ܠܝܼܣܪܵܝܹܠ ܘܲܬ̣ܠܵܬ̣ ܫܢ̈ܝܼܢ: ܘܡܝܼܬ̣ ܘܐܸܬ̣ܩܒܲܪ ܒܫܵܡܝܼܪ.
3 ܘܩܵܡ̣ ܡ̣ܢ ܒܵܬ̣ܪܹܗ ܝܵܐܝܼܪ ܓܸܠܥܵܕܼܵܝܵܐ: ܘܕܼܵܢ ܠܝܼܣܪܵܝܹܠ ܥܸܣܪܝܼܢ ܘܬܲܪܬܹ̇ܝܢ ܫܢ̈ܝܼܢ.
4 ܘܲܗܘ̤ܵܘ ܠܹܗ ܬܠܵܬ̣ܝܼܢ ܒܢ̈ܝܼܢ: ܘܲܪܟ̣ܝܼܒ̣ܝܼܢ ܗ̄ܘ̣ܵܘ ܥܲܠ ܬܠܵܬ̣ܝܼܢ ܥܝܼ̈ܠܝܼܢ: ܘܲܬ̣ܠܵܬ̣ܝܼܢ ܩܘܼܪ̈ܝܵܐ ܐܝܼܬ̣ ܗ̄ܘܲܝ̈ ܠܗܘܿܢ: ܘܩܵܪܹܝܢ ܗ̄ܘ̣ܵܘ ܠܗܹܝܢ: ܟܲܦܪ̈ܘܿܢܹܐ ܕܝܵܐܝܼܪ ܥܕܲܡܵܐ ܠܝܵܘܡܵܢܵܐ: ܕܒܲܐܪܥܵܐ ܕܓܸܠܥܵܕܼ.
5 ܘܡܝܼܬ̣ ܝܵܐܝܼܪ ܘܐܸܬ̣ܩܒܲܪ ܒܩܲܡܘܿܢ.
6 ܘܐܵܘܣܸܦ̣ܘ ܒ̈ܢܲܝ ܝܼܣܪܵܝܹܠ ܠܡܸܥܒܲܕܼ ܕܒ̣ܝܼܫ ܩܕܼܵܡ ܡܵܪܝܵܐ: ܘܲܦܠܲܚ̣ܘ ܠܒܲܥܠܵܐ: ܘܠܐܸܣܬ̇ܪ̈ܵܬ̣ܵܐ: ܘܠܲܐܠܵܗܹ̈ܐ ܕܐܲܕܼܘܿܡ: ܘܠܲܐܠܵܗܹ̈ܐ ܕܨܲܝܕܵܢ: ܘܠܲܐܠܵܗܹ̈ܐ ܕܡܘܼܐܵܒ̣: ܘܠܲܐܠܵܗܹ̈ܐ ܕܲܒ̣̈ܢܲܝ ܥܲܡܘܿܢ: ܘܠܲܐܠܵܗܹ̈ܐ ܕܲܦܠܸܫܬܵܝܹ̈ܐ: ܘܠܲܐܠܵܗܹ̈ܐ ܕܫܲܪܟܵܐ ܕܥܲܡܡܹ̈ܐ: ܘܲܫܒܲܩ̣ܘ ܠܡܵܪܝܵܐ ܘܠܵܐ ܦܲܠܚܘܼܗܝ.
7 ܘܐܸܬ̣ܚܲܡܲܬ̣ ܪܘܼܓ̣ܙܹܐ ܕܡܵܪܝܵܐ ܥܲܠ ܝܼܣܪܵܝܹܠ: ܘܐܲܫܠܸܡ ܐܸܢܘܿܢ ܒܐܝܼܕܼܵܐ ܕܲܦܠܸܫܬܵܝܹ̈ܐ: ܘܒ̣ܐܝܼܕܼܵܐ ܕܲܒ̣̈ܢܲܝ ܥܲܡܘܿܢ.
8 ܘܲܥܨܵܘ ܘܐܲܠܲܨܘ ܠܲܒ̣̈ܢܲܝ ܝܼܣܪܵܝܹܠ: ܡ̣ܢ ܗܝ̇ ܫܲܢ̄ܬܵܐ ܬܡܵܢܲܥܸܣܪܹ̈ܐ ܫܢ̈ܝܼܢ: ܠܟ̣ܠܗܘܿܢ ܒ̈ܢܲܝ ܝܼܣܪܵܝܹܠ ܕܲܒ̣ܥܸܒ̣ܪܵܐ ܕܝܘܿܪܕ̇ܢܵܢ: ܒܐܲܪܥܵܐ ܕܐܵܡܘܿܪ̈ܵܝܹܐ ܕܲܒ̣ܓܸܠܥܵܕܼ.
9 ܘܲܥ̣ܒܲܪܘ ܒ̈ܢܲܝ ܥܲܡܘܿܢ ܝܘܿܪܕ̇ܢܵܢ ܠܡܸܬ̣ܟܲܬܵܫܘܼ ܥܲܡ ܝܼܗܘܼܕܼܵܐ: ܘܐܵܦ ܥܲܡ ܒ̈ܢܲܝ ܐܲܦܪܹܝܡ: ܘܒܸܢܝܵܡܹܝܢ ܘܥܵܩܲܬ̤ ܠܝܼܣܪܵܝܹܠ ܛܵܒ̣.
10 ܘܐܲܙܥܸܩܘ ܒ̈ܢܲܝ ܝܼܣܪܵܝܹܠ ܠܘܵܬ̣ ܡܵܪܝܵܐ: ܘܐܵܡ̇ܪܝܼܢ: ܚ̣ܛܲܝܢ ܠܵܟ̣ ܕܲܫܒܲܩ̄ܢ ܠܐܲܠܵܗܲܢ: ܘܲܦ̣ܠܲܚ̄ܢ ܠܒܲܥܠܵܐ.
11 ܘܐܸܡܲܪ ܡܵܪܝܵܐ ܠܲܒ̣̈ܢܲܝ ܝܼܣܪܵܝܹܠ: ܠܵܐ ܡܸܨܪ̈ܵܝܹܐ: ܘܡܘܼܐܵܒ̣ܵܝܹ̈ܐ ܘܲܒ̣̈ܢܲܝ ܥܲܡܘܿܢ: ܘܲܦܠܸܫܬܵܝܹ̈ܐ.
12 ܘܨܲܝ̈ܕ̇ܢܵܝܹܐ: ܘܲܥܡܵܠܹܝܩ: ܘܥܲܡܘܿܢ ܐܲܠܲܨܟ̣ܘܿܢ: ܘܲܓ̣ܥܲܝܬ̇ܘܿܢ ܠܘܵܬ̣ܝ ܘܲܦܪܲܩܬ̇ܟ̣ܘܿܢ ܡ̣ܢ ܐܝܼܕܲܝ̈ܗܘܿܢ.
13 ܘܐܲܢ̄ܬ̇ܘܿܢ ܫܒܲܩ̣ܬ̇ܘܿܢܵܢܝ ܘܲܦܠܲܚܬ̇ܘܿܢ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܡܸܛܠ ܗܵܢܵܐ ܠܵܐ ܐܵܘܣܸܦ ܬܘܼܒ̣ ܕܐܸܦܪܘܿܩܟ̣ܘܿܢ.
14 ܙܸܠܘ ܨܲܠܵܘ ܠܘܵܬ̣ ܐܲܠܵܗܹ̈ܐ ܕܲܨܒ̇ܝܼܬ̇ܘܿܢ ܒܗܘܿܢ: ܗܸܢܘܿܢ ܢܸܗܘܘܿܢ ܠܟ̣ܘܿܢ ܦܵܪ̈ܘܿܩܹܐ ܒܙܲܒ̣ܢܵܐ ܕܥܵܒ̣ܬ̣ܟ̣ܘܿܢ.
15 ܘܐܸܡܲܪܘ ܒ̈ܢܲܝ ܝܼܣܪܵܝܹܠ ܠܡܵܪܝܵܐ: ܚܛܲܝܢ ܠܵܟ̣: ܐܲܢ̄ܬ̇ ܥܒܸܕܼ ܠܲܢ ܡܸܕܸ̇ܡ ܕܫܲܦܝܼܪ ܒܥܲܝ̈ܢܲܝܟ: ܒܲܠܚܘܿܕܼ ܦܲܨܵܢ ܝܵܘܡܵܢܵܐ.
16 ܘܐܲܦܪܸܩ̣ܘ ܒ̈ܢܲܝ ܝܼܣܪܵܝܹܠ ܐܲܠܵܗܹ̈ܐ ܢܘܼܟ̣ܪ̈ܵܝܹܐ ܡ̣ܢ ܒܲܝܢܵܬ̣ܗܘܿܢ: ܘܲܦܠܲܚܘ ܠܡܵܪܝܵܐ: ܡܸܛܠ ܕܐܸܬ̇ܬ̇ܥܝܼܩܲܬ̤ ܢܲܦ̮ܫܹܗ ܕܝܼܣܪܵܝܹܠ.
17 ܘܐܸܬ̣ܟܲܢܲܫܘ ܒ̈ܢܲܝ ܥܲܡܘܿܢ ܘܲܫܪܵܘ ܒܓܸܠܥܵܕܼ: ܘܐܸܬ̣ܟܲܢܲܫ̣ܘ ܒ̈ܢܲܝ ܝܼܣܪܵܝܹܠ ܘܲܫܪܵܘ ܒܡܲܨܦܝܵܐ.
18 ܘܐܸܡܲܪܘ ܥܲܡܵܐ ܪܵܘ̱ܪ̈ܒ̣ܵܢܲܝ ܓܸܠܥܵܕܼ ܐ̄ܢܵܫ ܠܚܲܒ̣ܪܹܗ: ܐܲܝܢܵܐ ܓܲܒ̣ܪܵܐ ܕܲܢܫܲܪܸܐ ܠܡܸܬ̣ܟܲܬܵܫܘܼ ܥܲܡ ܒ̈ܢܲܝ ܥܲܡܘܿܢ: ܗ̤ܘ ܢܸܗܘܹܐ ܪܹܫܵܐ ܠܟ̣ܠ ܝܵܬ̣ܒܲܝ̈ ܓܸܠܥܵܕܼ.
1 ܘܢܲܦ̮ܬܲܚ ܓܸܠܥܵܕܼܵܝܵܐ ܓܲܢ̄ܒܵܪ ܗ̄ܘ̣ܵܐ ܚܲܝܠܹܗ: ܘܗ̤ܘ ܒܲܪ ܐܲܢ̄ܬ̇ܬ̣ܵܐ ܗ̄ܘ̣ܵܐ ܙܵܢܝܼܬ̣ܵܐ: ܘܐܵܘܠܸܕܼ ܓܸܠܥܵܕܼ ܠܢܲܦ̮ܬܲܚ.
2 ܘܝܸܠܕܲܬ̤ ܐܲܢ̄ܬ̇ܬܹܗ ܕܓܸܠܥܵܕܼ ܠܹܗ ܒ̈ܢܲܝܵܐ: ܘܲܪܒ̣ܵܘ ܒܢܹ̈ܝܗ̇ ܕܐܲܢ̄ܬ̇ܬ̣ܵܐ ܘܛܲܪܕ̇ܘܼܗܝ ܠܢܲܦ̮ܬܲܚ: ܘܐܵܡ̇ܪܝܼܢ ܠܵܐ ܢܹܐܪܲܬ̣ ܒܹܝܬ̣ ܐܲܒ̣ܘܼܢ: ܡܸܛܠ ܕܒܲܪ ܐܲܢ̄ܬ̇ܬ̣ܵܐ ܗ̄ܘ̣ ܐ̄ܚܪܹܬ̣ܵܐ.
3 ܘܲܥܪܲܩ ܢܲܦ̮ܬܲܚ ܡ̣ܢ ܩܕܼܵܡ ܐܲܚܵܘ̈ܗܝ: ܘܝܼܬܸܒ̣ ܒܐܲܪܥܵܐ ܛܵܒ̣ܬ̣ܵܐ: ܘܐܸܬ̣ܠܲܒܲܛܘ ܠܘܵܬ̣ ܢܲܦ̮ܬܲܚ ܐ̄ܢܵܫܵܐ ܣܪ̈ܝܼܩܹܐ: ܘܲܢܦܲܩ̣ܘ ܥܲܡܹܗ.
4 ܘܲܗܘ̤ܵܐ ܡ̣ܢ ܒܵܬܲܪ ܝܵܘ̈ܡܵܬ̣ܵܐ: ܐܸܬ̣ܟܲܬܲܫ̣ܘ ܒ̈ܢܲܝ ܥܲܡܘܿܢ ܥܲܡ ܝܼܣܪܵܝܹܠ.
5 ܘܟܲܕܼ ܐܹܬ̣ܟܲܬܲܫ̣ܘ ܒ̈ܢܲܝ ܥܲܡܘܿܢ ܥܲܡ ܒ̈ܢܲܝ ܝܼܣܪܵܝܹܠ: ܐܸܙܲܠ̣ܘ ܩܲܫܝܼܫܹ̈ܐ ܕܓܸܠܥܵܕܼ ܠܡܸܕܼܒ̇ܪܹܗ ܠܢܲܦ̮ܬܲܚ ܡ̣ܢ ܐܲܪܥܵܐ ܛܵܒ̣ܬ̣ܵܐ.
6 ܘܐܸܡܲܪܘ ܠܢܲܦ̮ܬܲܚ: ܬܵܐ ܗ̤ܘܝܼ ܠܲܢ ܪܹܫܵܐ: ܘܢܸܬ̣ܟܲܬܲܫ ܥܲܡ ܒ̈ܢܲܝ ܥܲܡܘܿܢ.
7 ܘܐܸܡܲܪ ܢܲܦ̮ܬܲܚ ܠܩܲܫܝܼܫܹ̈ܐ ܕܓܸܠܥܵܕܼ: ܠܵܐ ܐܲܢ̄ܬ̇ܘܿܢ ܣܢܲܝܬ̇ܘܿܢܵܢܝ ܘܲܛܪܲܕ̇ܬ̇ܘܿܢܵܢܝ ܡ̣ܢ ܒܹܝܬ̣ ܐܵܒ̣ܝ: ܘܗܵܫܵܐ ܡܵܢܵܐ ܐܸܬܲܝܬ̇ܘܿܢ ܠܘܵܬ̣ܝ ܟܲܕܼ ܥܵܩܲܬ̤ ܠܟ̣ܘܿܢ.
8 ܘܐܸܡܲܪܘ ܠܹܗ ܩܲܫܝܼܫܹ̈ܐ ܕܓܸܠܥܵܕܼ ܠܢܲܦ̮ܬܲܚ: ܡܸܛܠ ܗܵܢܵܐ ܗܵܫܵܐ ܗܵܐ ܐܸܬܲܝܢ ܠܘܵܬ̣ܵܟ̣: ܙܸܠ ܥܲܡܲܢ ܘܢܸܬ̣ܟܲܬܲܫ ܥܲܡ ܒ̈ܢܲܝ ܥܲܡܘܿܢ: ܘܗ̤ܘܝܼ ܪܹܫܵܐ ܠܟ̣ܠ ܝܵܬ̣ܒܲܝ̈ ܓܸܠܥܵܕܼ.
9 ܘܐܸܡܲܪ ܢܲܦ̮ܬܲܚ ܠܩܲܫܝܼܫܹ̈ܐ ܕܓܸܠܥܵܕܼ: ܐܸܢ ܡܵܗܦܟ̣ܝܼܢ ܐ̄ܢܬ̇ܘܿܢ ܠܝܼ ܕܐܸܬ̣ܟܲܬܲܫ ܥܲܡ ܒ̈ܢܲܝ ܥܲܡܘܿܢ: ܘܡܲܫܠܸܡ ܠܗܘܿܢ ܡܵܪܝܵܐ ܩܕܼܵܡܲܝ: ܐܸܢܵܐ ܐܸܗܘܹܐ ܠܟ̣ܘܿܢ ܪܹܫܵܐ.
10 ܘܐܸܡܲܪܘ ܠܹܗ ܩܲܫܝܼܫܹ̈ܐ ܕܓܸܠܥܵܕܼ: ܡܵܪܝܵܐ ܢܸܗܘܹܐ ܫܵܡܘܿܥܵܐ ܒܲܝܢܵܬܲܢ: ܐܸܠܵܐ ܐܲܝܟ ܡܸܠܬ̣ܵܟ̣ ܗܵܟܲܢܵܐ ܢܸܥܒܸ̇ܕܼ.
11 ܘܐܸܙܲܠ ܢܲܦ̮ܬܲܚ ܥܲܡ ܩܲܫܝܼܫܹ̈ܐ ܕܓܸܠܥܵܕܼ: ܘܐܲܩܝܼܡܘܼܗܝ ܥܠܲܝܗܘܿܢ ܪܹܫܵܐ ܘܫܲܠܝܼܛܵܐ: ܘܐܸܡܲܪ ܢܲܦ̮ܬܲܚ ܟܠܗܹܝܢ ܡܸܠܵܘ̈ܗܝ ܩܕܼܵܡ ܡܵܪܝܵܐ ܒܡܲܨܦܝܵܐ.
12 ܘܫܲܕܲܪ ܢܲܦ̮ܬܲܚ ܐܝܼܙ̈ܓܲܕܹ̇ܐ ܠܘܵܬ̣ ܡܲܠܟܵܐ ܕܲܒ̣̈ܢܲܝ ܥܲܡܘܿܢ ܠܡܹܐܡܲܪ ܠܹܗ: ܡܵܐ ܠܝܼ ܘܠܵܟ̣ ܕܐܸܬܲܝܬ̇ ܠܡܸܬ̣ܟܲܬܵܫܘܼ ܒܐܲܪܥܝ.
13 ܘܐܸܡܲܪ ܡܲܠܟܵܐ ܕܲܒ̣̈ܢܲܝ ܥܲܡܘܿܢ ܠܐܝܼܙܓܲܕܵܘ̈ܗܝ ܕܢܲܦ̮ܬܲܚ: ܡܸܛܠ ܕܲܢܣܲܒ̣ܘ ܗ̄ܘ̣ܵܘ ܒ̈ܢܲܝ ܝܼܣܪܵܝܹܠ ܐܲܪܥܝ: ܟܲܕܼ ܣܵܠܩܝܼܢ ܗ̄ܘ̣ܵܘ ܡ̣ܢ ܐܲܪܥܵܐ ܕܡܸܨܪܹܝܢ: ܡܟܢ ܐܲܪܢܘܿܢ ܘܲܥܕܲܡܵܐ ܠܐܵܒ̣ܵܩ: ܘܲܥܕܲܡܵܐ ܠܝܘܿܪܕ̇ܢܵܢ: ܗܵܫܵܐ ܦܲܢܵܐ ܐܸܢܹܝܢ ܠܝܼ ܒܲܫܠܵܡܵܐ.
14 ܘܲܗܦܲܟ̣ ܬܘܼܒ̣ ܢܲܦ̮ܬܲܚ: ܘܫܲܕܲܪ ܐܸܓܪ̈ܵܬ̣ܵܐ ܘܐܝܼܙ̈ܓܲܕܹ̇ܐ ܠܘܵܬ̣ ܡܲܠܟܵܐ ܕܲܒ̣̈ܢܲܝ ܥܲܡܘܿܢ.
15 ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܢܲܦ̮ܬܲܚ: ܠܵܐ ܢܣܲܒ̣ ܝܼܣܪܵܝܹܠ ܐܲܪܥܵܐ ܕܡܘܼܐܵܒ̣: ܘܐܲܪܥܵܐ ܕܲܒ̣̈ܢܲܝ ܥܲܡܘܿܢ.
16 ܡܸܛܠ ܟܲܕܼ ܣܵܠܩܝܼܢ ܗ̄ܘ̣ܵܘ ܡ̣ܢ ܡܸܨܪܹܝܢ: ܗܲܠܸܟ̣ܘ ܗ̄ܘ̣ܵܘ ܒ̈ܢܲܝ ܝܼܣܪܵܝܹܠ ܒܡܲܕܼܒ̇ܪܵܐ: ܥܕܲܡܵܐ ܠܝܲܡܵܐ ܕܣܘܿܦ: ܘܡܲܛܝܼܘ ܠܲܪܩܸܡ.
17 ܘܫܲܕܲܪ ܗ̄ܘ̣ܵܐ ܝܼܣܪܵܝܹܠ ܐܝܼܙ̈ܓܲܕܹ̇ܐ ܠܘܵܬ̣ ܡܲܠܟܵܐ ܕܐܲܕܼܘܿܡ: ܠܡܹܐܡܲܪ ܠܹܗ: ܢܸܥܒܲܪ ܒܐܲܪܥܵܟ̣. ܘܠܵܐ ܫ̣ܡܲܥ ܡܲܠܟܵܐ ܕܐܲܕܼܘܿܡ: ܘܐܵܦ ܠܡܲܠܟܵܐ ܕܡܘܼܐܵܒ̣ ܫܠܲܚ̣ ܘܠܵܐ ܐܸܬ̇ܛܦܝܼܣ ܠܹܗ. ܘܝܸܬܸܒ̣ ܝܼܣܪܵܝܹܠ ܒܲܪܩܸܡ.
18 ܘܗܲܠܸܟ̣ ܒܡܲܕܼܒ̇ܪܵܐ: ܘܐܸܬ̣ܟ̇ܪܸܟ̣ ܐܲܪܥܵܐ ܕܐܲܕܼܘܿܡ: ܘܐܲܪܥܵܐ ܕܡܘܼܐܵܒ̣: ܘܲܫܪܵܘ ܒܥܸܒ̣ܪܵܐ ܕܐܲܪܢܘܿܢ: ܘܠܵܐ ܥܲܠ̣ܘ ܒܲܬ̣ܚܘܼܡܵܐ ܕܡܘܼܐܵܒ̣: ܡܸܛܠ ܕܐܲܪܢܘܿܢ ܬܚܘܼܡܵܐ ܗ̄ܘ̣ܵܐ ܕܡܘܼܐܵܒ̣.
19 ܘܫܲܕܲܪ ܗ̄ܘ̣ܵܐ ܝܼܣܪܵܝܹܠ ܐܝܼܙ̈ܓܲܕܹܐ ܠܘܵܬ̣ ܣܝܼܚܘܿܢ ܡܲܠܟܵܐ ܕܐܵܡܘܿܪ̈ܵܝܹܐ: ܘܡܲܠܟܵܐ ܕܚܸܫܒ̇ܘܿܢ. ܘܐܸܡܲܪ ܠܹܗ ܝܼܣܪܵܝܹܠ: ܢܸܥܒܲܪ ܒܐܲܪܥܵܟ̣ ܥܕܲܡܵܐ ܠܐܲܪܥܝ.
20 ܘܠܵܐ ܗܲܝܡܸܢ ܣܝܼܚܘܿܢ ܠܝܼܣܪܵܝܹܠ ܕܢܸܥܒܲܪ ܒܲܬ̣ܚܘܼܡܹܗ: ܘܟܲܢܸܫ ܣܝܼܚܘܿܢ ܠܟ̣ܠܹܗ ܥܲܡܹܗ: ܘܲܫܪܵܘ ܒܝܵܗܵܨ: ܘܐܸܬ̣ܟܲܬܲܫ̣ ܥܲܡ ܝܼܣܪܵܝܹܠ.
21 ܘܐܲܫܠܸܡ ܡܵܪܝܵܐ ܐܲܠܵܗܲܢ ܠܣܝܼܚܘܿܢ ܘܲܠܟ̣ܠܹܗ ܥܲܡܹܗ ܒܐܝܼܕܼܵܐ ܕܝܼܣܪܵܝܹܠ: ܘܐܵܘܒܸ̇ܕܼ ܝܼܣܪܵܝܹܠ ܐܲܪܥܵܐ ܕܐܵܡܘܿܪ̈ܵܝܹܐ.
22 ܘܝܼܪܸܬ̣ܘ ܟܠܹܗ ܬܚܘܼܡܗܘܿܢ: ܡ̣ܢ ܐܲܪܢܘܿܢ ܘܲܥܕܲܡܵܐ ܠܐܵܒ̣ܵܩ: ܘܡ̣ܢ ܡܲܕܼܒ̇ܪܵܐ ܘܲܥܕܲܡܵܐ ܠܝܘܿܪܕ̇ܢܵܢ.
23 ܘܗܵܫܵܐ ܡܵܪܝܵܐ ܐܲܠܵܗܵܐ ܐܵܘܒܸ̇ܕܼ ܠܐܵܡܘܿܪ̈ܵܝܹܐ ܡ̣ܢ ܩܕܼܵܡ ܥܲܡܹܗ ܝܼܣܪܵܝܹܠ: ܘܐܲܢ̄ܬ̇ ܝܵܪܹܬ̣ ܐܲܢ̄ܬ̇ ܠܗܘܿܢ.
24 ܠܵܐ ܗ̄ܘ̣ܵܐ ܡܸܕܸ̇ܡ ܕܐܵܘ̱ܪܬ̣ܵܟ̣ ܟܵܡܘܿܫ ܐܲܠܵܗܵܟ̣ ܝܵܪܹܬ̣ ܐܲܢ̄ܬ̇. ܘܡܸܕܸ̇ܡ ܕܐܵܘܒܸ̇ܕܼ ܡܵܪܝܵܐ ܐܲܠܵܗܲܢ ܡ̣ܢ ܩܕܼܵܡܲܝܢ: ܠܹܗ ܗ̄ܘ̣ ܝܵܪܬ̇ܝܼܢܲܢ.
25 ܗܵܫܵܐ ܡܛܵܒ̣ ܐܲܢ̄ܬ̇ ܡ̣ܢ ܒܵܠܵܩ ܒܲܪ ܨܦܘܿܪ ܡܲܠܟܵܐ ܕܡܘܼܐܵܒ̣: ܕܲܠܡܵܐ ܡܸܬ̣ܚܪܵܝܘܼ ܐܸܬ̣ܚ̄ܪܝܼ ܗ̄ܘ̣ܵܐ ܥܲܡ ܝܼܣܪܵܝܹܠ: ܐܵܘ ܡܸܬ̣ܟܲܬܵܫܘ ܐܸܬ̣ܟܲܬܲܫ̣ ܗ̄ܘ̣ܵܐ ܥܲܡܗܘܿܢ.
26 ܟܲܕܼ ܝܼܬܸܒ̣ ܝܼܣܪܵܝܹܠ ܒܚܸܫܒ̇ܘܿܢ ܘܲܒ̣ܟܲܦܪ̈ܘܿܢܹܝܗ̇: ܘܲܒ̣ܥܲܕܘܵܥܝܼܪ ܘܲܒ̣ܟܲܦܪ̈ܘܿܢܹܝܗ̇: ܘܲܒ̣ܟ̣ܠܗܘܿܢ ܩܘܼܪ̈ܝܵܐ ܕܥܲܠ ܓܹܢ̄ܒ̣ ܐܲܪܢܘܿܢ ܬܠܵܬ̣ܡܵܐܐ ܫܢ̈ܝܼܢ: ܠܡܵܢܵܐ ܠܵܐ ܐܲܥܕ̇ܝܼܬ̇ܘܿܢ ܐܸܢܹܝܢ ܒܙܲܒ̣ܢܵܐ ܗܵܘ̇.
27 ܐܸܠܵܐ ܐܸܢܵܐ ܗܵܫܵܐ ܠܵܐ ܚܛܹ̇ܝܬ̣ ܠܵܟ̣: ܘܐܲܢ̄ܬ̇ ܥܵܒܹܕܼ ܐܲܢ̄ܬ̇ ܥܲܡܝ ܒܝܼܫܬܵܐ ܠܡܸܬ̣ܟܲܬܵܫܘܼ ܥܲܡܝ: ܢܕܼܘܼܢ ܡܵܪܝܵܐ ܝܵܘܡܵܢܵܐ ܒܲܝܢܲܝ ܒ̈ܢܲܝ ܝܼܣܪܵܝܹܠ: ܘܲܠܒܹܝܬ̣ ܒ̈ܢܲܝ ܥܲܡܘܿܢ.
28 ܘܠܵܐ ܫ̣ܡܲܥ ܡܲܠܟܵܐ ܕܲܒ̣̈ܢܲܝ ܥܲܡܘܿܢ ܠܡܸܠܵܘ̈ܗܝ ܕܢܲܦ̮ܬܲܚ ܕܲܫ̣ܠܲܚ ܠܹܗ.
29 ܘܲܗܘ̤ܵܬ̣ ܥܲܠ ܢܲܦ̮ܬܲܚ ܪܘܼܚܹܗ ܕܡܵܪܝܵܐ: ܘܲܥ̣ܒܲܪ ܠܓܸܠܥܵܕܼ ܘܠܲܡܢܲܫܹܐ: ܘܲܥ̣ܒܲܪ ܠܡܲܨܦܝܵܐ ܕܓܸܠܥܵܕܼ: ܘܡ̣ܢ ܡܲܨܦܝܵܐ ܕܓܸܠܥܵܕܼ ܥ̣ܒܲܪ ܠܲܒ̣̈ܢܲܝ ܥܲܡܘܿܢ.
30 ܘܲܢܕܲܪ ܢܲܦ̮ܬܲܚ ܢܸܕܼܪܵܐ ܠܡܵܪܝܵܐ: ܘܐܸܡܲܪ: ܐܸܢ ܡܲܫܠܵܡܘܼ ܬܲܫܠܸܡ ܠܲܒ̣̈ܢܲܝ ܥܲܡܘܿܢ ܒܐܝܼܕܲܝ̈.
31 ܡ̇ܢ ܕܢܵܦܹ̇ܩ ܡ̣ܢ ܬܲܪܥܵܐ ܕܒܲܝܬ̇ܝ ܠܐܘܼܪܥܝ: ܡܵܐ ܕܐܸܬܹܝܬ̣ ܒܲܫܠܵܡܵܐ ܡ̣ܢ ܒ̈ܢܲܝ ܥܲܡܘܿܢ: ܢܸܗܘܹܐ ܠܡܵܪܝܵܐ: ܘܐܲܣܩܝܼܘܗܝ ܠܲܥܠܵܬ̣ܵܐ.
32 ܘܲܥܒܲܪ ܢܲܦ̮ܬܲܚ ܥܲܠ ܒ̈ܢܲܝ ܥܲܡܘܿܢ: ܠܡܸܬ̣ܟܲܬܵܫܘܼ ܥܲܡܗܘܿܢ: ܘܐܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕܹܗ.
33 ܘܲܡ̣ܚܵܐ ܐܸܢܘܿܢ ܡ̣ܢ ܥܲܕܼܘܵܥܝܼܪ ܘܲܥܕܲܡܵܐ ܠܡܲܥܠܵܢܵܐ ܕܡܵܟ̣ܝܼܪ: ܥܸܣܪܝܼܢ ܩܘܼܪ̈ܝܵܐ: ܘܲܥܕܲܡܵܐ ܠܐܵܒ̣ܠ ܟܲܪ̈ܡܝܼܢ: ܡܚܘܿܬ̣ܵܐ ܪܲܒ̇ܬ̣ܵܐ ܕܛܵܒ̣. ܘܐܸܬ̇ܬ̇ܒܲܪܘ ܒ̈ܢܲܝ ܥܲܡܘܿܢ ܩܕܼܵܡ ܒ̈ܢܲܝ ܝܼܣܪܵܝܹܠ.
34 ܘܐܸܬ̣ܵܐ ܢܲܦ̮ܬܲܚ ܠܡܲܨܦܝܵܐ ܠܒܲܝܬܹ̇ܗ: ܘܗܵܐ ܒܲܪܬܹܗ ܢܸܦܩܲܬ̤ ܠܐܘܼܪܥܹܗ ܒܲܦ̈ܠܲܓܹ̇ܐ ܘܒܲܪ̈ܒ̣ܝܼܥܵܐ: ܘܗ̤ܝ ܝܼܚܝܼܕܼܵܝܬܵܐ ܗ̄ܘ̣ܵܬ̣ ܠܹܗ: ܘܠܲܝܬ̇ ܗ̄ܘ̣ܵܐ ܠܹܗ ܒܪܵܐ ܐܵܘ ܒܲܪܬ̣ܵܐ ܠܒܲܪ ܡܸܢܵܗ̇.
35 ܘܟܲܕܼ ܚ̣ܙܵܗ̇ ܨܲܪܝܼ ܠܒ̣ܘܼܫܵܘ̈ܗܝ: ܘܐܸܡܲܪ: ܐܘܿܗ̇ ܒܪܲܬ̣ܝ ܡܸܣܚܲܦ ܣܚܲܦܬ̇ܝܼܢܝ: ܘܐܲܢ̄ܬ̇ܝ ܗ̤ܘܲܝܬ̇ܝ ܝܵܘܡܵܢܵܐ ܡ̣ܢ ܣܵܚܘܿܦܲܝ̈: ܕܗܵܐ ܐܸܢܵܐ ܦܸܬ̣ܚܹܬ̣ ܦܘܼܡܝ ܠܘܵܬ̣ ܐܲܠܵܗܵܐ: ܘܠܵܐ ܡܸܫܟܲܚ ܐ̄ܢܵܐ ܕܐܸܗܦܘܿܟ̣.
36 ܘܐܸܡܪܲܬ̤ ܠܹܗ ܒܲܪܬܹܗ: ܐܵܒ̣ܝ ܦܬܲܚܬ̇ ܦܘܼܡܵܟ̣ ܠܘܵܬ̣ ܐܲܠܵܗܵܐ: ܥܒܸܕܼ ܠܝܼ ܐܲܝܟ̣ ܡܸܕܸ̇ܡ ܕܲܢ̣ܦܲܩ ܡ̣ܢ ܦܘܼܡܵܟ̣: ܡ̣ܢ ܒܵܬܲܪ ܕܲܥ̣ܒܲܕܼ ܠܵܟ̣ ܡܵܪܝܵܐ ܢܩܲܡܬ̣ܵܐ ܡ̣ܢ ܒܥܸܠܕ̇ܒ̣ܵܒܲܝ̈ܟ ܡ̣ܢ ܒ̈ܢܲܝ ܥܲܡܘܿܢ.
37 ܘܐܵܡ̇ܪܵܐ ܠܐܲܒ̣ܘܼܗܝ: ܒܲܠܚܘܿܕܼ ܥܒܸܕܼ ܠܝܼ ܗܵܕܹܐ: ܐܲܪܦܵܢܝ ܬܪܹܝܢ ܝܲܪ̈ܚܝܼܢ: ܘܐܸܙܲܠ ܐܹܗܲܠܸܟ̣ ܥܲܠ ܛܘܼܪܹ̈ܐ: ܘܐܸܒ̣ܟܹ̇ܐ ܥܲܠ ܒܬ̣ܘܼܠܘܼܬ̣ܝ ܐܸܢܵܐ ܘܚܲܒ̣ܪ̈ܵܬ̣ܝ.
38 ܘܐܸܡܲܪ ܠܵܗ̇ ܙܸܠܝ: ܘܫܲܕ̇ܪܵܗ̇ ܬܪܹܝܢ ܝܲܪ̈ܚܝܼܢ: ܘܐܸܙܲܠ̄ܬ̇ ܗ̤ܝ ܘܚܲܒ̣ܪ̈ܵܬ̣ܵܗ̇: ܘܲܒ̣ܟ̣ܵܬ̣ ܥܲܠ ܒܬ̣ܘܼܠܘܼܬ̣ܵܗ̇ ܥܲܠ ܛܘܼܪܹ̈ܐ.
39 ܘܡ̣ܢ ܒܵܬܲܪ ܬܪܹܝܢ ܝܲܪ̈ܚܝܼܢ: ܐܸܬ̣ܵܬ̤ ܠܘܵܬ̣ ܐܲܒ̣ܘܼܗ̇: ܘܲܥ̣ܒܲܕܼ ܠܵܗ̇ ܐܲܝܟ̣ ܢܸܕܼܪܵܐ ܕܲܢܕܲܪ: ܘܗ̤ܘ ܠܵܐ ܚܲܟ̣ܡܵܗ̇ ܓܒܲܪ: ܘܲܗܘ̤ܵܬ̣ ܠܵܗ̇ ܐܵܬ̤ܵܐ ܒܲܝܢܵܬ̣ ܒ̈ܢܲܝ ܝܼܣܪܵܝܹܠ.
40 ܘܡ̣ܢ ܥܸܕܵܢ ܠܥܸܕܵܢ: ܐܵܙܵܠ̄ܢ ܗ̄ܘܲܝ̈ ܒ̈ܢܵܬ̣ ܝܼܣܪܵܝܹܠ: ܘܒ̣ܵܟ̣̈ܝܵܢ ܘܐܵܠ̈ܝܵܢ ܥܲܠ ܒܲܪܬܹܗ ܕܢܲܦ̮ܬܲܚ ܓܸܠܥܵܕܼܵܝܵܐ: ܐܲܪܒ̇ܥܵܐ ܝܵܘ̈ܡܝܼܢ ܒܫܲܢ̄ܬܵܐ.
1 ܘܲܩܥܵܘ ܓܲܒ̣ܪܹ̈ܐ ܕܐܲܦܪܹܝܡ: ܘܲܥܒܲܪܘ ܠܓܲܪܒ̇ܝܵܐ: ܘܐܸܡܲܪܘ ܠܢܲܦ̮ܬܲܚ: ܠܡܵܢܵܐ ܥܒܲܪܬ̇ ܠܡܸܬ̣ܟܲܬܵܫܘܼ ܥܲܡ ܒ̈ܢܲܝ ܥܲܡܘܿܢ: ܘܠܲܢ ܠܵܐ ܩܪܲܝܬ̇ ܠܡܹܐܙܲܠ ܥܲܡܵܟ̣. ܒܲܝܬܵܟ̣ ܡܵܘܩܕܼܝܼܢ ܚ̄ܢܲܢ ܥܠܲܝܟ ܒܢܘܼܪܵܐ.
2 ܘܐܸܡܲܪ ܠܗܘܿܢ ܢܲܦ̮ܬܲܚ: ܓܲܒ̣ܪܹ̈ܐ: ܢܵܨܹܐ ܗ̄ܘܹ̇ܝܬ̣ ܐܸܢܵܐ ܘܥܲܡܝ ܥܲܡ ܒ̈ܢܲܝ ܥܲܡܘܿܢ: ܘܲܩܪܹܝܬ̣ܟ̣ܘܿܢ ܘܠܵܐ ܦܪܲܩܬ̇ܘܿܢܵܢܝ ܡ̣ܢ ܐܝܼܕܲܝ̈ܗܘܿܢ.
3 ܘܟܲܕܼ ܚܙܹܝܬ̣ ܕܠܲܝܬ̇ ܕܦܵܪܹܩ ܠܝܼ: ܣܵܡܹ̇ܬ̣ ܢܲܦ̮ܫܝ ܒܲܙܘܵܪ̈ܲܝ: ܘܥܸܒ̣ܪܹܬ̣ ܥܲܠ ܒ̈ܢܲܝ ܥܲܡܘܿܢ: ܘܐܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕܲܝ̈ ܘܗܵܫܵܐ ܠܡܵܢܵܐ ܣܠܸܩܬ̇ܘܿܢ ܥܠܲܝ ܝܵܘܡܵܢܵܐ ܕܬܸܬ̣ܟܲܬ̇ܫܘܿܢ ܥܲܡܝ.
4 ܘܟܲܢܸܫ̣ ܢܲܦ̮ܬܲܚ ܠܟ̣ܠܗܘܿܢ ܐ̄ܢܵܫܵܐ ܕܓܸܠܥܵܕܼ: ܘܐܸܬ̣ܟܲܬܲܫ ܥܲܡ ܐܲܦܪܹܝܡ: ܘܲܡܚ̣ܵܘ ܐ̄ܢܵܫܲܝ̈ ܓܸܠܥܵܕܼ ܠܐ̄ܢܵܫܲܝ̈ ܐܲܦܪܹܝܡ: ܡܸܛܠ ܕܐܵܡ̇ܪܝܼܢ: ܕܐܲܦܪܹ̈ܝܡܵܝܹܐ ܐܸܢܘܿܢ ܕܒܹܝܬ̣ ܐܲܦܪܹܝܡ ܘܲܡܢܲܫܹܐ.
5 ܘܐܸܚܲܕܼܘ ܓܸܠܥܵܕܼܵܝܹ̈ܐ ܠܡܲܥܒܲܪܬܵܐ ܕܝܘܿܪܕ̇ܢܵܢ ܕܐܲܦܪܹܝܡ. ܘܡܵܐ ܕܥܵܒ̣ܪܝܼܢ ܗ̄ܘ̣ܵܘ ܒܡܲܥܒܲܪܬܵܐ ܐܲܝܠܹܝܢ ܕܡܸܬ̣ܦܲܠܛܝܼܢ ܗ̄ܘ̣ܵܘ ܡ̣ܢ ܐܲܦܪܹܝܡ ܠܡܸܥܒܲܪ: ܡܫܲܐܠܝܼܢ ܗ̄ܘ̣ܵܘ ܠܹܗ ܐ̄ܢܵܫܲܝ̈ ܓܸܠܥܵܕܼ: ܐܲܦܪܹܝܡܵܝܵܐ ܐܲܢ̄ܬ̇: ܐܵܡܲܪ ܠܵܐ.
6 ܐܵܡ̇ܪܝܼܢ ܠܹܗ: ܐܸܡܲܪ ܫܸܒ̇ܠܹ̈ܐ. ܐܵܡܲܪ ܣܸܒ̇ܠܹ̈ܐ: ܡܸܛܠ ܕܠܵܐ ܓܹܝܪ ܡܸܫܟܲܚ ܗ̄ܘ̣ܵܐ ܠܲܡܡܲܠܵܠܘܼ ܗܵܟܲܢܵܐ: ܘܐܲܥܒ̇ܪܘܼܗܝ ܘܢܲܟ̣ܣܘܼܗܝ ܥܲܠ ܡܲܥܒܲܪܬܵܐ ܕܝܘܿܪܕ̇ܢܵܢ ܘܲܢܦܲܠ̣ܘ ܒܙܲܒ̣ܢܵܐ ܗܵܘ̇ ܡ̣ܢ ܐܲܦܪܹܝܡ: ܐܲܪܒ̇ܥܝܼܢ ܘܲܬ̣ܪܹܝܢ ܐܲܠܦ̈ܝܼܢ.
7 ܘܕܼܵܢ ܢܲܦ̮ܬܲܚ ܠܝܼܣܪܵܝܹܠ ܫܸܬ̣ ܫܢ̈ܝܼܢ: ܘܡܝܼܬ̣ ܢܲܦ̮ܬܲܚ ܓܸܠܥܵܕܼܵܝܵܐ: ܘܐܸܬ̣ܩܒܲܪ ܒܲܩܪܝܼ̣ܬ̣ܵܐ ܕܓܸܠܥܵܕܼ.
8 ܘܕܼܵܢ ܡ̣ܢ ܒܵܬ̣ܪܹܗ ܠܝܼܣܪܵܝܹܠ: ܐܲܒ̣ܝܼܨܵܢ ܕܡ̣ܢ ܒܹܝܬ̣ ܠܚܸܡ.
9 ܘܲܗܘ̤ܵܘ ܠܹܗ ܬܠܵܬ̣ܝܼܢ ܒܢ̈ܝܼܢ: ܘܲܬ̣ܠܵܬ̣ܝܼܢ ܒ̈ܢܵܢ. ܘܲܬ̣ܠܵܬ̣ܝܼܢ ܒ̈ܢܵܬܹܗ ܐܲܦܸܩ ܠܒܲܪ: ܘܲܬ̣ܠܵܬ̣ܝܼܢ ܟܲܠ̈ܠܵܢ ܐܲܥܸܠ̣ ܡ̣ܢ ܠܒܲܪ. ܘܕܼܵܢ ܠܝܼܣܪܵܝܹܠ ܫܒܲܥ ܫܢ̈ܝܼܢ.
10 ܘܡܝܼܬ̣ ܐܲܒ̣ܝܼܨܵܢ: ܘܐܸܬ̣ܩܒܲܪ ܒܒܹܝܬ̣ ܠܚܸܡ.
11 ܘܕܼܵܢ ܡ̣ܢ ܒܵܬ̣ܪܹܗ ܠܝܼܣܪܵܝܹܠ ܐܲܠܘܿܢ ܕܡ̣ܢ ܙܒ̣ܘܿܠܘܿܢ ܥܣܲܪ ܫܢ̈ܝܼܢ.
12 ܘܡܝܼܬ̣ ܐܲܠܘܿܢ ܕܡ̣̤ ܙܒ̣ܘܿܠܘܿܢ: ܘܐܸܬ̣ܩܒܲܪ ܒܐܲܝܠܘܿܢ ܒܐܲܪܥܵܐ ܕܲܙܒ̣ܘܿܠܘܿܢ.
13 ܘܕܼܵܢ ܡ̣ܢ ܒܵܬ̣ܪܹܗ ܠܝܼܣܪܵܝܹܠ: ܥܲܟ̣ܪܘܿܢ ܒܲܪ ܗܸܠܝܵܢ ܐܲܦܪܲܥܬ̇ܘܿܢܵܝܵܐ.
14 ܘܲܗܘ̤ܵܘ ܠܹܗ ܐܲܪܒ̇ܥܝܼܢ ܒܢ̈ܝܼܢ: ܘܲܬ̣ܠܵܬ̣ܝܼܢ ܒ̈ܢܲܝ ܒܢܵܘ̈ܗܝ: ܘܲܗܘ̤ܵܘ ܪܟ̣ܝܼܒ̣ܝܼܢ ܥܲܠ ܫܲܒ̣ܥܝܼܢ ܥܝܼ̈ܠܝܼܢ: ܘܕܼܵܢ ܠܝܼܣܪܵܝܹܠ ܬܡܵܢܹܐ ܫܢ̈ܝܼܢ.
15 ܘܡܝܼܬ̣ ܥܲܟ̣ܪܘܿܢ ܒܲܪ ܗܸܠܝܵܢ ܐܲܦܪܲܥܬ̇ܘܿܢܵܝܵܐ: ܘܐܸܬ̣ܩܒܲܪ ܒܐܲܦܪܲܥܬ̇ܘܿܢ: ܒܐܲܪܥܵܐ ܕܐܲܦܪܹܝܡ ܒܛܘܼܪܵܐ ܕܲܥܡܵܠܩܵܝܹ̈ܐ.
1 ܘܐܵܘܣܸܦܘ ܬܘܼܒ̣ ܒ̈ܢܲܝ ܝܼܣܪܵܝܹܠ ܠܡܸܥܒܲܕܼ ܕܒ̣ܝܼܫ ܩܕܼܵܡ ܡܵܪܝܵܐ: ܘܐܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕܼܵܐ ܕܲܦܠܸܫܬܵܝܹ̈ܐ ܐܲܪܒ̇ܥܝܼܢ ܫܢ̈ܝܼܢ.
2 ܘܲܗܘ̤ܵܐ ܓܲܒ̣ܪܵܐ ܚܲܕܼ ܡ̣ܢ ܨܸܕܼܥܵܐ: ܡ̣ܢ ܫܲܪܒ̇ܬ̣ܵܐ ܕܕܼܵܢ: ܘܲܫܡܹܗ ܡܢܘܿܚ: ܘܐܲܢ̄ܬ̇ܬܹܗ ܥܩܲܪܬ̣ܵܐ ܗ̄ܘ̣ܵܬ̣ ܘܠܵܐ ܝܵܠܕܵܐ.
3 ܘܐܸܬ̣ܚܙܝܼ ܡܲܠܲܐܟܹܗ ܕܡܵܪܝܵܐ ܠܐܲܢ̄ܬ̇ܬ̣ܵܐ ܗܵܝ̇: ܘܐܸܡܲܪ ܠܵܗ̇: ܗܵܐ ܐܲܢ̄ܬ̇ܝ ܥܲܩܪܵܐ ܘܠܵܐ ܝܵܠܕܵܐ: ܗܵܫܵܐ ܬܸܒ̣ܛܢܝܼܢ ܘܬܹܐܠܕ̇ܝܼܢ ܒܪܵܐ.
4 ܐܸܙܕܲܗ̄ܪܝ ܕܲܠܡܵܐ ܬܸܫܬܹ̇ܝܢ ܚܲܡܪܵܐ ܐܵܘ ܫܲܟ̣ܪܵܐ. ܘܠܵܐ ܬܹܐܟ̣ܠܝܼܢ ܟܠ ܡܸܕܸ̇ܡ ܕܲܛܡܲܐ.
5 ܡܸܛܠ ܕܗܵܐ ܒܵܛܢܵܐ ܐܲܢ̄ܬ̇ܝ ܘܝܵܠܕܵܐ ܐܲܢ̄ܬ̇ܝ ܒܪܵܐ: ܘܲܡܕܲܟܝܵܐ ܠܵܐ ܢܸܣܲܩ ܥܲܠ ܪܹܫܹܗ: ܡܸܛܠ ܕܲܢܙܝܼܪܹܗ ܕܐܲܠܵܗܵܐ ܢܸܗܘܹܐ ܛܲܠܝܵܐ ܡ̣ܢ ܡܲܪܒ̇ܥܵܐ: ܘܗ̤ܘ ܢܫܲܪܸܐ ܠܡܸܦܪܲܩ ܠܝܼܣܪܵܝܹܠ ܡ̣ܢ ܐܝܼܕܼܵܐ ܕܲܦܠܸܫܬܵܝܹ̈ܐ.
6 ܘܐܸܬ̣ܵܬ̣ ܐܲܢ̄ܬ̇ܬ̣ܵܐ ܘܐܸܡܪܲܬ̤ ܠܒ̣ܵܥܠܵܗ̇: ܓܲܒ̣ܪܵܐ ܕܐܲܠܵܗܵܐ ܐܸܬ̣ܵܐ ܠܘܵܬ̣ܝ: ܘܐܸܬ̣ܚ̄ܙܝܼ ܠܝܼ ܒܚܸܙܘܵܐ ܕܡܲܠܲܐܟ̣ܵܐ ܕܐܲܠܵܗܵܐ: ܘܙܵܥܹܬ̣ ܛܵܒ̣: ܘܠܵܐ ܫܲܐܠܬܹ̇ܗ ܡ̣ܢ ܐܲܝܡܸܟܵܐ ܗ̄ܘ̣: ܘܲܫܡܹܗ ܠܵܐ ܚܵܘܝܼ̈ܢܝ.
7 ܘܐܸܡܲܪ ܠܝܼ: ܕܗܵܐ ܒܵܛܢܵܐ ܐܲܢ̄ܬ̇ܝ ܘܝܵܠܕܵܐ ܐܲܢ̄ܬܲܝ ܒܪܵܐ: ܡܸܟܹ̇ܝܠ ܠܵܐ ܬܸܫܬܹ̇ܝܢ ܚܲܡܪܵܐ ܘܫܲܟ̣ܪܵܐ: ܘܠܵܐ ܬܹܐܟ̣ܠܝܼܢ ܟܠ ܡܸܕܸ̇ܡ ܕܲܛܡܲܐ: ܡܸܛܠ ܕܲܢܙܝܼܪܹܗ ܕܐܲܠܵܗܵܐ ܢܸܗܘܹܐ ܛܲܠܝܵܐ ܡ̣ܢ ܡܲܪܒ̇ܥܵܐ ܥܕܲܡܵܐ ܠܝܵܘܡܵܐ ܕܡܵܐܹ̇ܬ̣.
8 ܘܲܒ̣ܥܵܐ ܡܢܘܿܚ ܡ̣ܢ ܡܵܪܝܵܐ ܘܐܸܡܲܪ: ܒܒ̣ܵܥܘܼ ܡܵܪܝܵܐ: ܓܲܒ̣ܪܵܐ ܕܐܲܠܵܗܵܐ ܕܫܲܕܲܪܬ̇: ܢܹܐܬܹܐ ܬܘܼܒ̣ ܠܘܵܬܲܢ: ܘܢܲܠܦܲܢ ܡܵܢܵܐ ܢܸܥܒܸ̇ܕܼ ܠܹܗ ܠܛܲܠܝܵܐ ܕܡܸܬ̣̱ܝܼܠܸܕܼ.
9 ܘܲܫ̣ܡܲܥ ܡܵܪܝܵܐ ܒܩܵܠܹܗ ܕܲܡܢܘܿܚ: ܘܐܸܬ̣ܵܐ ܬܘܼܒ̣ ܡܲܠܲܐܟܹ̇ܗ ܕܡܵܪܝܵܐ ܠܘܵܬ̣ ܐܲܢ̄ܬ̇ܬ̣ܵܐ: ܘܗ̤ܝ ܝܵܬ̣ܒܵܐ ܗ̄ܘ̣ܵܬ̣ ܒܚܲܩܠܵܐ: ܘܲܡܢܘܿܚ ܒܲܥܠܵܗ̇ ܠܵܐ ܗ̄ܘ̣ܵܐ ܠܘܵܬ̣ܵܗ̇.
10 ܘܐܸܣܬܲܪ̱ܗܒܲܬ̤ ܐܲܢ̄ܬ̇ܬ̣ܵܐ: ܘܪܸܗܛܲܬ̤ ܘܚܵܘܝܲܬ̤ ܠܒܲܥܠܵܗ̇: ܘܐܵܡ̇ܪܵܐ ܠܹܗ: ܗܵܐ ܐܸܬ̣ܚ̄ܙܝܼ ܠܝܼ ܓܲܒ̣ܪܵܐ ܕܐܸܬ̣ܵܐ ܒܗܵܘ̇ ܝܵܘܡܵܐ ܠܘܵܬ̣ܝ.
11 ܘܩܵܡ ܡܢܘܿܚ ܘܐܸܙܲܠ ܥܲܡ ܐܲܢ̄ܬ̇ܬܹܗ: ܘܐܸܬ̣ܵܐ ܠܘܵܬ̣ ܓܲܒ̣ܪܵܐ: ܘܐܸܡܲܪ ܠܹܗ: ܐܲܢ̄ܬ̇ ܗ̄ܘ̣ ܓܲܒ̣ܪܵܐ ܕܡܲܠܠܸܬ̇ ܥܲܡ ܗܵܕܹܐ ܐܲܢ̄ܬ̇ܬ̣ܵܐ. ܘܐܸܡܲܪ ܐܸܢܵܐ ܗ̄ܘ̣.
12 ܘܐܸܡܲܪ ܡܢܘܿܚ: ܗܵܫܵܐ ܗܵܘܹ̇ܐ ܦܸܬ̣ܓ̣ܵܡܵܟ̣: ܐܸܡܲܪ ܠܝܼ ܡܵܢܵܘ ܕܝܼܢܹܗ ܕܛܲܠܝܵܐ ܘܥܲܒ̣ܕܼܵܘ̈ܗܝ.
13 ܘܐܸܡܲܪ ܡܲܠܲܐܟܹ̇ܗ ܕܡܵܪܝܵܐ ܠܲܡܢܘܿܚ: ܡ̣ܢ ܟܠ ܡܸܕܸ̇ܡ ܕܐܸܡ̇ܪܹܬ̣ ܠܐܲܢ̄ܬ̇ܬ̣ܵܐ ܬܸܙܕ̇ܗܲܪ.
14 ܘܡ̣ܢ ܟܠ ܕܢܵܦܹ̇ܩ ܡ̣ܢ ܓܦܸܬܵܐ ܠܵܐ ܬܹܐܟ̣ܘܿܠ: ܘܚܲܡܪܵܐ ܘܫܲܟ̣ܪܵܐ ܠܵܐ ܬܸܫܬܹ̇ܐ: ܘܟ̣ܠ ܕܲܛܡܲܐ ܠܵܐ ܬܹܐܟ̣ܘܿܠ: ܘܟ̣ܠ ܕܦܲܩܸܕ̇ܬܵܗ̇ ܬܸܛܲܪ.
15 ܘܐܸܡܲܪ ܡܢܘܿܚ ܠܡܲܠܲܟܹܗ ܕܡܵܪܝܵܐ: ܢܸܟ̣ܠܹܝܟ ܘܢܸܥܒܸ̇ܕܼ ܓܲܕܼܝܵܐ ܕܥܸܙܹ̈ܐ ܩܕܼܵܡܲܝܟ.
16 ܘܐܸܡܲܪ ܡܲܠܲܐܟܹ̇ܗ ܕܡܵܪܝܵܐ ܠܲܡܢܘܿܚ: ܐܸܢ ܬܸܟ̣ܠܹܝܢܝ ܠܵܐ ܐܹܟܘܿܠ ܡ̣ܢ ܠܲܚܡܵܟ̣. ܘܐܸܢ ܬܲܣܸܩ ܥܠܵܬ̣ܵܐ: ܠܡܵܪܝܵܐ ܬܲܣܩܝܼܗ̇ ܡܸܛܠ ܕܠܵܐ ܝܵܕܼܵܥ ܗ̄ܘ̣ܵܐ ܡܢܘܿܚ ܕܡܲܠܲܟܹ̇ܗ ܗ̄ܘ̣ ܕܡܵܪܝܵܐ.
17 ܘܐܸܡܲܪ ܡܢܘܿܚ ܠܡܲܠܲܐܟܹܗ ܕܡܵܪܝܵܐ: ܡܵܢܵܘ ܫܡܵܟ̣ ܕܡܵܐ ܕܲܗܘ̤ܵܐ ܦܸܬ̣ܓ̣ܵܡܵܟ̣ ܢܸܩܪܹܝܟ.
18 ܘܐܸܡܲܪ ܠܹܗ ܡܲܠܲܐܟܹܗ ܕܡܵܪܝܵܐ: ܠܡܵܢܵܐ ܫܵܐܹܠ ܐܲܢ̄ܬ̇ ܥܲܠ ܫܹܡܝ ܕܗ̤ܘ ܡܫܲܒܲܚ.
19 ܘܲܢܣܲܒ̣ ܡܢܘܿܚ ܓܲܕܼܝܵܐ ܕܥܸܙܹ̈ܐ: ܘܲܣܡܝܼܕܼܵܐ: ܘܐܲܣܸܩ ܥܲܠ ܟܹܐܦܵܐ ܠܡܵܪܝܵܐ ܘܲܡܫܲܒܲܚ ܗ̄ܘ̣ܵܐ ܠܡܵܪܝܵܐ.
20 ܘܲܡܢܘܿܚ ܘܐܲܢ̄ܬ̇ܬܹܗ ܚܵܙܹܝܢ ܗ̄ܘ̣ܵܘ: ܟܲܕܼ ܣܸܠܩܲܬ̤ ܫܲܠܗܹܒ̣ܝܼܬ̣ܵܐ ܕܢܘܼܪܵܐ ܡ̣ܢ ܟܹܐܦܵܐ ܠܲܫܡܲܝܵܐ: ܘܲܣܠܸܩ ܡܲܠܲܐܟܹܗ ܕܡܵܪܝܵܐ ܒܫܵܠܗܹܒ̣ܝܼܬ̣ܵܐ ܕܡܲܕܼܒ̇ܚܵܐ: ܘܲܡܢܘܿܚ ܘܐܲܢ̄ܬ̇ܬܹܗ ܚ̣ܙܵܘ: ܘܲܢܦܲܠܘ ܥܲܠ ܐܲܦܲܝ̈ܗܘܿܢ ܥܲܠ ܐܲܪܥܵܐ: ܘܲܣܓܸܕܼܘ.
21 ܘܠܵܐ ܐܵܘܣܸܦ ܬܘܼܒ̣ ܡܲܠܲܐܟܹܗ ܕܡܵܪܝܵܐ ܠܡܸܬ̣ܚܙܵܝܘܼ ܠܲܡܢܘܿܚ ܘܠܲܐܢ̄ܬ̇ܬܹܗ: ܘܗܵܝܕܹ̇ܝܢ ܝܼܕܲܥ̣ܘ ܡܢܘܿܚ ܘܐܲܢ̄ܬ̇ܬܹܗ: ܕܡܲܠܲܐܟܹܗ ܗ̄ܘ̣ ܕܡܵܪܝܵܐ.
22 ܘܐܸܡܲܪ ܡܢܘܿܚ ܠܐܲܢ̄ܬ̇ܬܹܗ: ܡܡܵܬ̣ ܡܵܝܬܝܼܢ ܚ̄ܢܲܢ: ܡܸܛܠ ܕܠܲܐܠܵܗܵܐ ܚܙܲܝܢ.
23 ܘܐܸܡܪܲܬ̤ ܠܹܗ ܐܲܢ̄ܬ̇ܬܹܗ: ܐܸܠܘܼ ܨܵܒܹ̇ܐ ܗ̄ܘ̣ܵܐ ܐܲܠܵܗܵܐ ܕܲܢܡܝܼܬܲܢ: ܠܵܐ ܡܩܲܒܸ̇ܠ ܗ̄ܘ̣ܵܐ ܡܸܢܲܢ ܥܠܵܬ̣ܵܐ ܘܲܣܡܝܼܕܼܵܐ: ܘܠܵܐ ܡܚܵܘܸܐ ܗ̄ܘ̣ܵܐ ܠܲܢ ܗܵܠܹܝܢ ܟܠܗܹܝܢ ܒܗܵܢܵܐ ܙܲܒ̣ܢܵܐ: ܘܠܵܐ ܡܲܫܡܲܥ ܗ̄ܘ̣ܵܐ ܠܲܢ ܗܵܠܹܝܢ.
24 ܘܝܸܠܕܲܬ̤ ܐܲܢ̄ܬ̇ܬ̣̱ܵܐ ܒܪܵܐ: ܘܲܩܪܵܬ̤ ܫܡܹܗ ܫܸܡܫܘܿܢ: ܘܲܪܒ̣ܵܐ ܛܲܠܝܵܐ. ܘܒܲܪܟܹܗ ܡܵܪܝܵܐ.
25 ܘܫܲܪܝܲܬ̤ ܪܘܼܚܹܗ ܕܡܵܪܝܵܐ ܠܲܡܗܲܠܵܟ̣ܘܼܬܹܗ ܒܡܲܫܪܝܼܬ̣ܵܐ ܕܕܼܵܢ: ܒܹܝܬ̣ ܨܸܕܼܥܵܐ ܘܒܹܝܬ̣ ܐܸܫܬ̇ܘܼܐܹܝܠ.
1 ܘܲܢܚܸܬ̣ ܫܸܡܫܘܿܢ ܠܬܲܡܢܲܬ̣: ܘܲܚܙ̣ܵܐ ܐܲܢ̄ܬ̇ܬ̣ܵܐ ܒܬܲܡܢܲܬ̣: ܡ̣ܢ ܒ̈ܢܵܬ̣ ܦܠܸܫܬܵܝܹ̈ܐ.
2 ܘܲܣܠܸܩ ܘܚܵܘܝܼ ܠܐܲܒ̣ܘܼܗܝ ܘܠܐܸܡܹܗ: ܘܐܸܡܲܪ ܠܗܘܿܢ: ܐܲܢ̄ܬ̇ܬ̣ܵܐ ܚܙܹܝܬ̣ ܒܬܲܡܢܲܬ̣ ܡ̣ܢ ܒ̈ܢܵܬ̣ ܦܠܸܫܬܵܝܹ̈ܐ: ܗܵܫܵܐ ܣܲܒ̣ܘܼܗ̇ ܠܝܼ ܐܲܢ̄ܬ̇ܬ̣ܵܐ.
3 ܘܐܸܡܲܪܘ ܠܹܗ ܐܲܒ̣ܘܼܗܝ ܘܐܸܡܹܗ: ܠܲܝܬ̇ ܗܵܪܟܵܐ ܒܒܹܝܬ̣ ܐܲܒ̣ܘܼܟ̣ ܘܲܒ̣ܟ̣ܠܹܗ ܥܲܡܵܟ̣ ܐܲܢ̄ܬ̇ܬ̣ܵܐ ܕܐܵܙܹ̇ܠ ܐܲܢ̄ܬ̇ ܠܡܸܣܲܒ̣ ܐܲܢ̄ܬ̇ܬ̣ܵܐ ܡ̣ܢ ܦܠܸܫܬܵܝܹ̈ܐ ܥܘܼܪ̈ܠܹܐ. ܘܐܸܡܲܪ ܫܸܡܫܘܿܢ ܠܐܲܒ̣ܘܼܗܝ: ܠܗܵܝ̇ ܣܲܒ̣ܘ ܠܝܼ ܡܸܛܠ ܕܗ̤ܝ ܫܸܦܪܲܬ̤ ܒܥܲܝ̈ܢܲܝ.
4 ܘܐܲܒ̣ܘܼܗܝ ܘܐܸܡܹܗ ܠܵܐ ܝܵܕܼܥܝܼܢ ܗ̄ܘ̣ܵܘ ܕܡ̣ܢ ܡܵܪܝܵܐ ܗ̄ܝ̣: ܕܢܸܬ̣ܒܲܥ ܥܝܵܪܬܵܐ ܡ̣ܢ ܦܠܸܫܬܵܝܹ̈ܐ. ܘܲܒ̣ܙܲܒ̣ܢܵܐ ܗܵܘ̇ ܦܠܸܫܬܵܝܹ̈ܐ ܫܲܠܝܼܛܝܼܢ ܗ̄ܘ̣ܵܘ ܥܲܠ ܝܼܣܪܵܝܹܠ.
5 ܘܲܢܚܸܬ̣ ܫܸܡܫܘܿܢ ܘܐܲܒ̣ܘܼܗܝ ܘܐܸܡܹܗ ܠܬܲܡܢܲܬ̤: ܘܡܲܛܝܼܘ ܥܕܲܡܵܐ ܠܟܲܪ̈ܡܹܐ ܕܬܲܡܢܲܬ̣: ܘܗܵܐ ܓܘܼܪܝܵܐ ܕܐܲܪܝܵܐ ܢܵܗܹܡ ܠܩܘܼܒ̣ܠܹܗ.
6 ܘܐܲܨܠܚܲܬ̤ ܥܠܵܘܗܝ ܪܘܼܚܹܗ ܕܡܵܪܝܵܐ: ܘܦܲܫܚܹܗ ܐܲܝܟ̣ ܕܲܡܦܲܫܚܝܼܢ ܠܓܲܕܼܝܵܐ: ܘܠܵܐ ܐܝܼܬ̣ ܗ̄ܘ̣ܵܐ ܡܸܕܸ̇ܡ ܒܐܝܼܕܹܗ: ܘܠܵܐ ܚܵܘܝܼ ܗ̄ܘ̣ܵܐ ܠܐܲܒ̣ܘܼܗܝ ܘܠܐܸܡܹܗ ܡܸܕܸ̇ܡ ܕܲܥܒܲܕܼ.
7 ܘܲܢܚܸܬ̣ܘ ܘܡܲܠܸܠ̣ܘ ܥܲܡ ܐܲܢ̄ܬ̇ܬ̣ܵܐ: ܘܫܸܦܪܲܬ̤ ܒܥܲܝܢܵܘ̈ܗܝ ܕܫܸܡܥܘܿܢ.
8 ܘܲܗܦܲܟ̣ ܡ̣ܢ ܒܵܬܲܪ ܝܵܘ̈ܡܵܬ̣ܵܐ ܠܡܸܣܒ̣ܵܗ̇: ܘܲܣܛܵܐ ܠܡܸܚܙܵܐ ܬܲܓܪܘܼܡܬܵܐ ܕܐܲܪܝܵܐ: ܘܗܵܐ ܫܸܠܚܵܐ ܕܕܸܒ̇ܘܿܪ̈ܝܵܬ̣ܵܐ ܒܓ̣ܘܼܫܡܹܗ ܕܐܲܪܝܵܐ ܗܵܘ̇: ܘܪܵܕܹܐ ܗ̄ܘ̣ܵܐ ܕܸܒ̣ܫܵܐ ܥܲܠ ܐܝܼܕܼܵܘ̈ܗܝ ܘܲܡܗܲܠܸܟ.
9 ܘܐܸܙܲܠ ܠܘܵܬ̣ ܐܲܒ̣ܘܼܗܝ ܘܲܠܘܵܬ̣ ܐܸܡܹܗ: ܘܝܲܗ̄ܒ̣ ܠܗܘܿܢ ܘܐܸܟܲܠܘ: ܘܠܵܐ ܚܵܘܝܼ ܐܸܢܘܿܢ ܡܢ ܓܘܼܫܡܹܗ ܕܐܲܪܝܵܐ ܪܵܕܼܵܐ ܕܸܒ̣ܫܵܐ.
10 ܘܲܢܚܸܬ̣ ܐܲܒ̣ܘܼܗܝ ܠܘܵܬ̣ ܐܲܢ̄ܬ̇ܬ̣ܵܐ: ܘܲܥܒܲܕܼ ܬܲܡܵܢ ܫܸܡܫܘܿܢ ܡܸܫܬ̇ܘܼܬ̣ܵܐ ܫܲܒ̣ܥܵܐ ܝܵܘ̈ܡܝܼܢ: ܡܸܛܠ ܕܗܵܟܲܢܵܐ ܥܵܒ̣ܕ̇ܝܼܢ ܗ̄ܘ̣ܵܘ ܓܲܕܘܼ̈ܕܹܐ ܡܸܫܬ̇ܘܼܬ̣ܵܐ.
11 ܘܟܲܕܼ ܚܙܵܐܘܼܗܝ ܐܸܬ̣ܵܘ ܬܠܵܬ̣ܝܼܢ ܓܲܒ̣ܪ̈ܝܼܢ: ܘܲܗܘ̤ܵܘ ܠܹܗ ܫܵܘܫܒ̣ܝܼܢܹ̈ܐ.
12 ܘܐܸܡܲܪ ܠܗܘܿܢ ܫܸܡܫܘܿܢ: ܐܵܚܹ̇ܕܼ ܐ̄ܢܵܐ ܠܟܘܿܢ ܐܘܼܚ̄ܕ̇ܬ̣ܵܐ. ܐܸܢ ܬܸܦܫ̄ܪܘܼܢܵܗ̇ ܠܝܼ ܫܲܒ̣ܥܵܐ ܝܵܘ̈ܡܲܝ ܡܸܫܬ̇ܘܼܬ̣ܵܐ ܘܬܸܕ̇ܥܘܼܢܵܝܗ̇: ܐܸܬܸ̇ܠ ܠܟ̣ܘܿܢ ܬܠܵܬ̣ܝܼܢ ܐܲܦܩܲܪ̈ܣܝܼܢ: ܘܲܬ̣ܠܵܬ̣ܝܼܢ ܙܵܘ̈ܓ̇ܝܼܢ ܕܲܠܒ̣ܘܼܫܹ̈ܐ.
13 ܘܐܸܢ ܠܵܐ ܐܸܫܟܲܚܬ̇ܘܿܢ ܕܬܸܦܫ̄ܪܘܼܢܵܗ̇ ܠܝܼ: ܝܵܗ̇ܒ̇ܝܼ ܐ̄ܢܬ̇ܘܿܢ ܠܝܼ ܬܠܵܬ̣ܝܼܢ ܐܵܦܩܲܪ̈ܣܝܼܢ: ܘܲܬ̣ܠܵܬ̣ܝܼܢ ܙܵܘ̈ܓ̇ܝܼܢ ܕܲܠܒ̣ܘܼܫܹ̈ܐ. ܐܵܡ̇ܪܝܼܢ ܠܹܗ: ܐܵܚܘܿܕܼ ܐܘܼܚ̄ܕ̇ܬ̣ܵܟ̣: ܘܢܸܫ̱ܡܥܝܼܗ̇.
14 ܐܵܡܲܪ ܠܗܘܿܢ: ܡ̣ܢ ܐܵܟ̣ܠܵܐ ܢܦܲܩ ܐܘܼܟ̣ܠܵܐ: ܘܡ̣ܢ ܡܲܪܝܼܪܵܐ ܢܦܲܩ̣ ܚܲܠܝܵܐ. ܘܠܵܐ ܐܸܫܟܲܚܘ ܠܡܸܦܫܪܵܗ̇ ܐܘܼܚ̄ܕ̇ܬܵܐ ܬܠܵܬ̣ܵܐ ܝܵܘ̈ܡܝܼܢ.
15 ܘܲܒ̣ܝܵܘܡܵܐ ܪܒ̣ܝܼܥܵܝܵܐ ܐܵܡܪܝܼܢ ܠܐܲܢ̄ܬ̇ܬܹܗ ܕܫܸܡܫܘܿܢ: ܫܲܕ̇ܠܝܼܘܗܝ ܠܒܲܥܠܹܟ̣ܝ ܕܢܵܘܕ̇ܥܲܢ ܐܘܼܚ̄ܕ̇ܬܹܗ: ܕܠܵܐ ܢܵܘܩܕܹܟ̣ܝ ܠܹܟ̣ܝ ܘܲܠܒܹܝܬ̣ ܐܲܒ̣ܘܼܟ̣ܝ ܒܢܘܼܪܵܐ: ܘܢܹܐܪܲܬ̣ ܝܘܼܪܬܵܢܹܗ.
16 ܘܲܒ̣ܟ̣ܬ̣ ܐܲܢ̄ܬ̇ܬܹܗ ܕܫܸܡܫܘܿܢ ܘܐܵܡ̇ܪܵܐ ܠܹܗ: ܫܲܪܝܼܪܵܐܝܼܬ̣ ܣܢܲܝܬܵܢܝ ܘܠܵܐ ܪܚܸܡܬܵܢܝ. ܕܐܘܼܚ̄ܕ̇ܬܵܐ ܕܐܸܚܲܕ̇ܬ̇ ܠܲܒ̣̈ܢܲܝ ܥܲܡܝ: ܠܝܼ ܠܵܐ ܐܸܡܲܪܬܵܗ̇: ܘܐܸܡܲܪ ܠܵܗ̇: ܠܐܵܒ̣ܝ ܘܠܐܸܡܝ ܠܵܐ ܐܸܡ̇ܪܹܬ̣: ܠܹܟ̣ܝ ܐܹܡܲܪ.
17 ܘܲܗܘ̤ܵܬ̣ ܒܵܟ̣ܝܵܐ ܗܵܢܘܿܢ ܫܲܒ̣ܥܵܐ ܝܵܘ̈ܡܝܼܢ ܕܡܸܫܬ̇ܘܼܬ̣ܵܐ. ܘܲܠܝܵܘܡܵܐ ܕܫܲܒ̣ܥܵܐ: ܐܸܡܲܪ ܠܵܗ̇ ܡܸܛܠ ܕܐܲܥܝܼܩܲܬ̤ ܠܹܗ: ܘܲܓ̣ܠܵܬ̣ܵܗ̇ ܐܘܼܚ̄ܕ̇ܬܵܐ ܠܲܒ̣̈ܢܲܝ ܥܲܡܵܗ̇.
18 ܘܐܵܡ̇ܪܝܼܢ ܐ̄ܢܵܫܲܝ̈ ܩܪܝܼܬ̣ܵܐ ܒܝܵܘܡܵܐ ܕܫܲܒ̣ܥܵܐ: ܥܲܕܼܠܵܐ ܬܘܼܩܵܢܵܐ: ܡܵܢܵܘ ܕܲܚܠܸܐ ܡ̣ܢ ܕܸܒ̣ܫܵܐ: ܐܵܘ ܡܲܢܘܼ ܕܬܲܩܝܼܦ ܡ̣ܢ ܐܲܪܝܵܐ. ܐܵܡܲܪ ܠܗܘܿܢ ܫܸܡܫܘܿܢ: ܐܸܠܘܼ ܠܵܐ ܫܲܕܸ̇ܠܬ̇ܘܿܢ ܥܓܠܬ̇ܝ: ܠܵܐ ܦܫܲܪܬ̇ܘܿܢ ܐܘܼܚܕܲܬ̣ܝ.
19 ܘܐܲܨܠܚܲܬ̤ ܥܠܵܘܗܝ ܪܘܼܚܹܗ ܕܡܵܪܝܵܐ ܘܲܢܚܸܬ̣ ܠܐܲܫܩܵܠܘܿܢ: ܘܐܸܚܲܕܼ ܡܸܢܗܘܿܢ ܬܠܵܬ̣ܝܼܢ ܓܲܒ̣ܪ̈ܝܼܢ ܘܩܲܛܸܠ ܐܸܢܘܿܢ: ܘܲܢܣܲܒ̣ ܠܒ̣ܘܼܫܲܝ̈ܗܘܿܢ: ܘܝܲܗ̄ܒ̣ܘ ܠܗܵܢܘܿܢ ܕܲܦܫܲܪܘ ܐܘܼܚ̄ܕ̇ܬܹܗ. ܘܐܸܬ̣ܚܲܡܲܬ̣ ܪܘܼܓ̣ܙܹܗ ܘܲܣܠܸܩ ܠܒܹܝܬ̣ ܐܲܒ̣ܘܼܗܝ.
20 ܘܲܗܘ̤ܵܬ̣ ܐܲܢ̄ܬ̇ܬܹܗ ܕܫܸܡܫܘܿܢ ܕܪܵܚܹ̇ܡ ܗ̄ܘ̣ܵܐ ܠܵܗ̇: ܠܫܵܘܫܒ̣ܝܼܢܹܗ.
1 ܘܲܗܘ̤ܵܐ ܡ̣ܢ ܒܵܬܲܪ ܝܵܘ̈ܡܵܬ̣ܵܐ ܒܙܲܒ̣ܢܵܐ ܕܲܚܨܵܕܼܵܐ ܕܚܸܛܹ̈ܐ: ܘܐܸܬ̇ܕܲܟ̣ܪܵܗ̇ ܫܸܡܫܘܿܢ: ܠܐܲܢ̄ܬ̇ܬܹܗ ܒܓܲܕܝܵܐ ܕܥܸܙܹ̈ܐ: ܘܐܸܡܲܪ ܐܹܙܲܠ ܠܘܵܬ̣ ܐܲܢ̄ܬ̇ܬ̣ܝ ܠܩܲܝܛܘܿܢܵܐ ܘܠܵܐ ܫܲܒ̣ܩܹܗ ܐܲܒ̣ܘܼܗ̇ ܠܡܸܥܲܠ.
2 ܘܐܸܡܲܪ ܠܹܗ ܐܲܒ̣ܘܼܗܝ: ܣܵܒܲܪ ܗ̄ܘܹܝܬ̣ ܕܡܸܣܢܵܐ ܣܢܲܝܬܵܗ̇: ܘܝܲܗ̄ܒ̣ܬܵܗ̇ ܠܫܵܘܫܒ̣ܝܼܢܵܟ̣ ܗܵܐ ܚܵܬ̣ܵܗ̇ ܙܥܘܿܪܬܵܐ ܕܛܵܒ̣ܵܐ ܡܸܢܵܗ̇: ܬܸܗܘܹܐ ܠܵܟ̣ ܚܠܵܦܹܝܗ̇.
3 ܘܐܸܡܲܪ ܠܗܘܿܢ ܫܸܡܫܘܿܢ: ܙܲܟܵܝ ܐ̄ܢܵܐ ܡ̣ܢ ܦܠܸܫܬܵܝܹ̈ܐ: ܡܸܛܠ ܕܥܵܒܹܕܼ ܐ̄ܢܵܐ ܥܲܡܟ̣ܘܿܢ ܒܝܼܫܬܵܐ.
4 ܘܐܸܙܲܠ ܫܸܡܫܘܿܢ ܘܐܸܚܲܕܼ ܬܠܵܬ̣ ܡܵܐܐ ܬܲܥ̈ܠܝܼܢ: ܘܲܢܣܲܒ̣ ܠܲܡܦܹܝ̈ܕܹܐ: ܘܐܸܣܲܪ ܒܕܼܘܼܢ̈ܒ̇ܝܵܬ̣ܗܘܿܢ: ܬܪܹܝܢ ܬܪܹܝܢ ܬܲܥ̈ܠܝܼܢ ܐܲܟ̣ܚ̄ܕܼܵܐ: ܘܐܸܣܲܪ ܚܲܕܼ ܚܲܕܼ ܠܲܡܦܹܝܕܼܵܐ ܒܹܝܬ̣ ܬܪܹܝܢ ܬܲܥ̈ܠܝܼܢ: ܒܲܝܢܵܬ̣ ܬܲܪܬܹ̇ܝܢ ܕܘܼܢ̈ܒ̇ܝܵܬ̣ܗܘܿܢ.
5 ܘܐܵܘܚܸܕܼ ܢܘܼܪܵܐ ܒܠܲܡܦܹ̈ܝܕܹܐ: ܘܲܫܒܲܩ ܒܩܵܝ̈ܡܵܬ̣ܵܐ ܕܲܦܠܸܫܬܵܝܹ̈ܐ: ܘܐܵܘܩܸܕܼ ܡ̣ܢ ܓܕܼܝܼܫܹ̈ܐ: ܘܲܥܕܲܡܵܐ ܠܩܵܝ̈ܡܵܬ̣ܵܐ: ܘܥܕܲܡܵܐ ܠܟܲܪ̈ܡܹܐ: ܘܲܥܕܲܡܵܐ ܠܙܲܝ̈ܬܹ̇ܐ.
6 ܘܐܵܡ̇ܪܝܼܢ ܦܠܸܫܬܵܝܹ̈ܐ: ܡܲܢܘܼ ܥܒܲܕܼ ܗܵܟܲܢܵܐ: ܐܵܡ̇ܪܝܼܢ ܫܸܡܫܘܿܢ ܚܲܬ̣ܢܹܗ ܕܬܲܡܢܲܡ: ܥܲܠ ܕܲܢܣܲܒ̣ ܐܲܢ̄ܬ̇ܬܹܗ ܘܝܲܗ̄ܒ̣ܵܗ̇ ܠܫܵܘܫܒ̣ܝܼܢܹܗ. ܘܲܣܠܸܩܘ ܦܠܸܫܬܵܝܹ̈ܐ: ܘܐܵܘܩܕܼܘܼܗ̇ ܠܵܗ̇ ܘܲܠܒܹܝܬ̣ ܐܲܒ̣ܘܼܗ̇ ܒܢܘܼܪܵܐ.
7 ܘܐܸܡܲܪ ܠܗܘܿܢ ܫܸܡܫܘܿܢ: ܐܵܦܸܢ ܬܸܥܒ̇ܕܼܘܼܢ ܗܵܟܲܢܵܐ: ܡܸܬ̣ܢܲܩܲܡ ܐ̄ܢܵܐ ܡܸܢܟ̣ܘܿܢ: ܘܗܵܝܕܹ̇ܝܢ ܫܵܠܹܐ ܐ̄ܢܵܐ.
8 ܘܲܡ̣ܚܵܐ ܐܸܢܘܿܢ ܒܲܡܚܘܿܬ̣ܵܐ: ܡ̣ܢ ܫܵܩܲܝ̈ܗܘܿܢ ܘܲܥܕܲܡܵܐ ܠܚܲܨܲܝ̈ܗܘܿܢ: ܡܚܘܿܬ̣ܵܐ ܪܲܒ̇ܬ̣ܵܐ ܘܐܸܙܲܠ ܘܝܼܬܸܒ̣ ܒܣܵܚܵܦ ܕܒܲܫܩܝܼܦܵܐ ܕܥܲܛܡܝܼܢ.
9 ܘܲܣܠܸܩܘ ܦܠܸܫܬܵܝܹ̈ܐ ܘܲܫܪܵܘ ܒܲܝܗܘܼܕܼܵܐ.
10 ܘܐܵܡ̇ܪܝܼܢ ܓܲܒ̣ܪܹ̈ܐ ܕܲܝܗܘܼܕܼܵܐ ܠܡܵܢܵܐ ܣܠܸܩܬ̇ܘܿܢ: ܐܵܡ̇ܪܝܼܢ ܕܢܹܐܣܘܿܪ ܠܫܸܡܫܘܿܢ ܣܠܸܩ̄ܢ: ܕܢܸܥܒܸ̇ܕܼ ܠܹܗ ܐܲܝܟ̣ ܕܲܥܒܲܕܼ ܠܲܢ.
11 ܘܲܢܚܸܬ̣ܘ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܡ̣ܢ ܝܼܗܘܼܕܼܵܐ: ܠܣܵܚܵܦ ܕܒܲܫܩܝܼܦܵܐ ܕܥܲܛܡܝܼܢ: ܘܐܵܡ̇ܪܝܼܢ ܠܫܸܡܫܘܿܢ: ܠܵܐ ܝܵܕܲܥ ܐܲܢ̄ܬ̇ ܕܫܲܠܝܼܛܝܼܢ ܒܲܢ ܦܠܸܫܬܵܝܹ̈ܐ: ܡܸܛܠ ܡܵܢܵܐ ܥܒܲܕ̇ܬ̇ ܠܲܢ ܗܵܟܲܢܵܐ. ܐܵܡܲܪ ܠܗܘܿܢ: ܐܲܝܟ̣ ܡܵܐ ܕܲܥܒܲܕܼܘ: ܗܵܟܲܢܵܐ ܥܸܒ̣ܕܹܬ̣ ܠܗܘܿܢ.
12 ܐܵܡ̇ܪܝܼܢ ܠܗ: ܠܡܹܐܣܪܵܟ̣ ܢܚܸܬ̣̄ܢ ܘܲܠܡܲܫܠܵܡܘܼܬ̣ܵܟ̣ ܒܐܝܼܕܼܵܐ ܕܲܦܠܸܫܬܵܝܹ̈ܐ ܐܵܡܲܪ ܠܗܘܿܢ: ܝܼܡܵܘ ܠܝܼ ܕܠܵܐ ܬܲܗܪܘܼܢܵܢܝ ܐܲܢ̄ܬ̇ܘܿܢ.
13 ܐܵܡܪܹܝܢ ܠܹܗ ܠܵܐ: ܐܸܠܵܐ ܡܹܐܣܲܪ ܐܵܣܪܝܼܢ ܚ̄ܢܲܢ ܠܵܟ̣: ܘܡܲܫ̱ܠܡܝܼܢ ܚ̄ܢܲܢ ܠܵܟ̣ ܒܐܝܼܕܲܝ̈ܗܘܿܢ: ܘܡܸܩܛܲܠ ܠܵܐ ܩܵܛܠܝܼܢ ܚ̄ܢܲܢ ܠܵܟ̣. ܘܐܲܣܪܘܼܗ̇ ܒܬܲܪܬܹ̇ܝܢ ܫܸܫ̈ܠܵܬ̣ܵܐ ܚܲܕܼ̈ܬ̣ܵܬ̣ܵܐ: ܘܐܲܣܩܘܼܗܝ ܡ̣ܢ ܫܩܝܼܦܵܐ ܗܵܘ̇.
14 ܘܡܵܛܝܼ ܥܕܲܡܵܐ ܠܲܠܚܝܼ: ܘܲܦܠܸܫܬܵܝܹ̈ܐ ܩܵܡ̣ܘ ܠܡܸܩܛܠܹܗ: ܘܐܲܨܠܚܲܬ̤ ܥܠܵܘܗܝ ܪܘܼܚܹܗ ܕܡܵܪܝܵܐ: ܘܲܗ̤ܘܲܝ̈ ܫܸܫ̈ܠܵܬ̣ܵܐ ܕܥܲܠ ܐܝܼܕܼܵܘ̈ܗܝ: ܐܲܝܟ̣ ܟܸܬܵܢܵܐ ܕܣܸܦܲܬ̤ ܒܹܗ ܢܘܼܪܵܐ: ܘܐܸܫܬ̇ܪܝܼܘ ܐܲܣܘܼܪܹ̈ܐ ܡ̣ܢ ܐܝܼܕܼܵܘ̈ܗܝ.
15 ܘܐܸܫܟܲܚ ܦܲܟܵܐ ܕܲܚܡܵܪܵܐ ܛܲܪܘܼܢܵܐ: ܘܐܵܘܫܸܛ ܐܝܼܕܹܗ ܘܢܲܣܒܹ̇ܗ: ܘܩܲܛܸܠ ܒܹܗ ܐܵܠܹܦ ܓܲܒ̣ܪ̈ܝܼܢ.
16 ܘܐܸܡܲܪ ܫܸܡܫܘܿܢ: ܒܦܲܟܵܐ ܕܲܚܡܵܪܵܐ ܟܵܫ̈ܝܵܬ̣ܵܐ ܟܫܹܝܬ̣ ܡܸܢܗܘܿܢ: ܒܦܲܟܵܐ ܕܲܚܡܵܪܵܐ ܩܲܛܠܹܬ̣ ܐܵܠܹܦ ܓܲܒ̣ܪ̈ܝܼܢ.
17 ܘܟܲܕܼ ܫܲܠܸܡ ܠܲܡܡܲܠܵܠܘܼ: ܫܕܼܵܝܗܝ ܦܲܟܵܐ ܡ̣ܢ ܐܝܼܕܹܗ: ܘܲܩ̣ܪܵܐ ܫܡܹܗ ܕܐܲܬ̣ܪܵܐ ܗܵܘ̇ ܕܡܵܐ ܕܦܲܟܵܐ.
18 ܘܲܨܗܝܼ ܛܵܒ̣: ܘܲܩܪܵܐ ܠܡܵܪܝܵܐ ܘܐܸܡܲܪ: ܐܲܢ̄ܬ̇ ܝܲܗ̄ܒ̣ܬ̇ ܒܐܝܼܕܹܗ ܕܥܲܒ̣ܕܵܟ̣ ܢܸܨܚܵܢܵܐ ܗܵܢܵܐ ܪܲܒܵܐ: ܘܗܵܫܵܐ ܐܹܡܘܼܬ̣ ܠܨܲܗܝܵܐ: ܘܐܸܦܸܠ ܒܐܝܼܕܼܵܐ ܕܥܘܼܪ̈ܠܹܐ ܗܵܠܹܝܢ.
19 ܘܒܲܙܥ̣ ܡܵܪܝܵܐ ܐܲܠܵܗܵܐ ܠܘܼܓ̣ܡܵܐ ܕܦܲܟܵܐ ܕܲܚܡܵܪܵܐ: ܘܲܢܦܲܩܘ ܡܸܢܹܗ ܡܲـ̈ـܝܵܐ: ܘܐܸܫܬ̇ܝܼ ܘܐܸܬ̣ܦܲܢܝܲܬ̤ ܪܘܼܚܹܗ. ܡܸܛܠ ܗܵܢܵܐ ܩ̣ܪܵܐ ܫܡܹܗ ܕܐܲܬ̣ܪܵܐ ܗܵܘ̇: ܥܹܝܢ ܩܲܪܢܵܐ ܕܦܲܟܵܐ ܕܲܚܡܵܪܵܐ ܥܕܲܡܵܐ ܠܝܵܘܡܵܢܵܐ.
20 ܘܗ̤ܘ ܪܢ ܠܝܼܣܪܵܝܹܠ ܒܝܵܘ̈ܡܵܬ̣ܵܐ ܕܲܦܠܸܫܬܵܝܹ̈ܐ ܥܸܣܪܝܼܢ ܫܢ̈ܝܼܢ.
1 ܘܐܸܙܲܠ ܫܸܡܫܘܿܢ ܠܥܵܙܲܬ̣: ܘܲܚܙܵܐ ܬܲܡܵܢ ܐܲܢ̄ܬ̇ܬ̣ܵܐ ܙܵܢܝܼܬ̣ܵܐ: ܘܥܲܠ ܠܘܵܬ̣ܵܗ̇ ܠܥܵܙܲܬ̣.
2 ܘܐܸܬ̣ܐ̱ܡܲܪ ܕܐܸܬ̣ܵܐ ܫܸܡܫܘܿܢ ܠܗܵܪܟܵܐ: ܘܐܸܬ̣ܟ̇ܡܸܢܘ ܥܠܵܘܗܝ ܟܠܹܗ ܠܸܠܝܵܐ ܒܬܲܪܥܵܐ ܕܲܩܪܝܼܬ̣ܵܐ: ܘܲܗܘ̤ܵܘ ܡܠܲܚܫܝܼܢ ܟܠܹܗ ܠܸܠܝܵܐ: ܘܐܸܡܲܪܘ ܡܵܐ ܕܲܢܗܲܪ ܨܲܦܪܵܐ: ܢܸܩܛܠܝܼܘܗܝ.
3 ܘܲܕܼܡܸܟ̣ ܫܸܡܫܘܿܢ ܥܕܲܡܵܐ ܠܦܸܠܓܹ̇ܗ ܕܠܸܠܝܵܐ: ܘܩܵܡ ܒܦܸܠܓܹ̇ܗ ܕܠܸܠܝܵܐ: ܘܐܸܚܲܕܼ ܒܲܬ̣ܪܹܝܢ ܦܪ̈ܘܼܣܬ̇ܕܹܐ ܕܬܲܪܥܵܐ ܕܲܩܪܝܼܬ̣ܵܐ: ܘܫܲܩܠܹܗ ܥܕܲܡܵܐ ܠܡܘܼܟ̣ܠܵܘ̈ܗܝ: ܘܣܵܡ̣ ܥܲܠ ܟܲܬ̣ܦܹܗ: ܘܐܲܣܸܩ ܐܸܢܘܿܢ ܠܛܘܼܪܵܐ ܕܲܩܕܼܵܡ ܚܸܒ̣ܪܘܿܢ.
4 ܘܒ̣ܵܬܲܪܟܸ̇ܢ ܪܚܸܡ ܐܲܢ̄ܬ̇ܬ̣ܵܐ ܒܲܢܚܸܠ ܣܵܪܘܿܩ: ܘܲܫܡܵܗ̇ ܕܲܠܝܼܠܵܐ.
5 ܘܲܣܠܸܩܘ ܠܘܵܬ̣ܵܗ̇ ܛܪ̈ܘܿܢܹܐ ܕܲܦܠܸܫܬܵܝܹ̈ܐ: ܘܐܵܡ̇ܪܝܼܢ ܠܵܗ̇: ܫܲܕ̇ܠܝܼܘܗܝ ܘܲܚܙܵܝ ܒܡܵܢܵܐ ܪܲܒ̇ ܚܲܝܠܹܗ: ܘܲܒ̣ܡܵܢܵܐ ܢܸܬ̣̱ܡܨܹܐ ܚܲܝܠܵܐ ܕܢܹܐܣܪܝܼܘܗܝ ܠܲܡܨܲܥܵܪܘܼܬܹܗ: ܘܲܚܢܲܢ ܢܸܬܸ̇ܠ ܠܹܟ̣ܝ ܟܠ ܓܒܲܪ ܐܵܠܹܦ ܘܲܬ̣ܠܵܬ̣ܵܐ ܡܵܐܐ ܕܟܸܣܦܵܐ.
6 ܘܐܸܡܪܲܬ̤ ܕܲܠܝܼܠܵܐ ܠܫܸܡܫܘܿܢ: ܚܵܘܵܢܝ ܒܡܵܢܵܐ ܪܲܒ̇ ܚܲܝܠܵܟ̣: ܘܲܒ̣ܡܵܢܵܐ ܡܸܬ̣ܐ̱ܣܲܪ ܐܲܢ̄ܬ̇: ܘܐܸܢ ܡܸܬ̣ܒܲܨܲܪ ܐܲܢ̄ܬ̇.
7 ܐܵܡܲܪ ܠܹܗ ܫܸܡܫܘܿܢ: ܐܸܢ ܢܹܐܣܪܘܿܢܵܢܝ ܒܫܲܒ̣ܥܵܐ ܝܲܬ̣ܪܹ̈ܐ ܪ̈ܲܛܝܼܒܹܐ ܕܠܵܐ ܫܪܸܒ̣ܘ: ܡܸܫܬܲܦܲܠ ܐ̄ܢܵܐ ܘܗܵܘܹ̇ܐ ܐ̄ܢܵܐ ܐܲܝܟ̣ ܚܲܕܼ ܐ̄ܢܵܫ.
8 ܘܐܲܣܸܩܘ ܠܵܗ̇ ܛܪ̈ܘܼܢܹܐ ܕܲܦܠܸܫܬܵܝܹ̈ܐ ܫܲܒ̣ܥܵܐ ܝܲܬ̣ܪܹ̈ܐ ܪ̈ܲܛܝܼܒܹܐ ܕܠܵܐ ܫܪܲܒ̣ܘ: ܘܐܸܣܲܪܬܹܗ ܒܗܘܿܢ.
9 ܘܲܟ̣ܡܹܐܢܵܐ ܝܵܬܹܒ̣ ܠܵܗ̇ ܒܬ̣ܵܘܵܢܵܐ: ܘܐܵܡ̇ܪܵܐ ܠܹܗ: ܦܠܸܫܬܵܝܹ̈ܐ ܐܸܬ̣ܵܘ ܥܠܲܝܟ ܫܸܡܫܘܿܢ. ܘܦܲܣܸܩ ܐܸܢܘܿܢ ܠܝܲܬ̣ܪܹ̈ܐ: ܐܲܝܟ̣ ܕܡܸܬ̣ܦܲܣܲܩ ܚܘܼܛܵܐ ܕܟܸܬܵܢܵܐ ܡܵܐ ܕܲܡܪܝܼܚܵܐ ܒܹܗ ܢܘܼܪܵܐ: ܘܠܵܐ ܐܸܬ̇ܬ̇ܙܝܼܥ ܚܲܝܠܹܗ.
10 ܘܐܸܡܪܲܬ̤ ܕܲܠܝܼܠܵܐ ܠܫܸܡܫܘܿܢ: ܗܵܐ ܕܲܓܸ̇ܠܬ̇ ܒܝܼ ܘܐܸܡܲܪܬ̇ ܠܝܼ ܕܲܓ̈ܠܵܬ̣ܵܐ: ܚܵܘܵܢܝ ܒܡܵܢܵܐ ܬܸܬ̣ܐ̱ܣܲܪ.
11 ܘܐܸܡܲܪ ܠܵܗ̇: ܐܸܢ ܡܹܐܣܲܪ ܢܹܐܣܪܘܼܢܵܢܝ ܒܫܸܫ̈ܠܵܬ̣ܵܐ ܚܲܕܼ̈ܬ̣ܵܬ̣ܵܐ ܕܠܵܐ ܐܸܬ̣ܥ̱ܒܸܕܼ ܒܗܹܝܢ ܥܒ̣ܵܕܼܵܐ: ܐܸܫܬܲܦܲܠ ܘܐܸܗܘܹܐ ܐܲܝܟ̣ ܚܲܕܼ ܐ̄ܢܵܫ.
12 ܘܢܸܣܒܲܬ̤ ܕܲܠܝܼܠܵܐ ܫܸܫ̈ܠܵܬ̣ܵܐ ܚܲܕܼ̈ܬ̣ܵܬ̣ܵܐ: ܘܐܸܣܲܪܬܹܗ ܒܗܹܝܢ: ܘܐܵܡ̇ܪܵܐ ܠܹܗ: ܦܠܸܫܬܵܝܹ̈ܐ ܐܸܬ̣ܵܘ ܥܠܲܝܟ ܫܸܡܫܘܿܢ. ܘܲܟ̣ܡܹܐܢܵܐ ܝܵܬܹܒ̣ ܠܵܗ̇ ܒܬ̣ܵܘܵܢܵܐ: ܘܦܲܣܸܩ ܐܸܢܹܝܢ ܡ̣ܢ ܕܪ̈ܵܥܵܘܗܝ ܐܲܝܟ̣ ܚܘܼܛܵܐ.
13 ܘܐܸܡܪܲܬ̤ ܕܲܠܝܼܠܵܐ ܠܫܸܡܫܘܿܢ: ܗܵܐ ܕܲܓܸ̇ܠܬ̇ ܒܝܼ ܘܐܸܡܲܪܬ̇ ܠܝܼ ܟܲܕܵܒ̣ܵـ̈ـܬ̣ܵܐ: ܚܵܘܢܲܝ ܒܡܵܢܵܐ ܬܸܬ̣̱ܐܣܲܪ ܘܐܸܡܲܪ ܠܵܗ̇: ܐܸܢܗ̤ܘ ܕܡܲܫܬ̇ܝܲܬ̇ܝ ܫܒܲܥ ܥܸܕܼܩܵܘ̈ܗܝ ܕܪܹܫܝ ܒܡܸܫܬ̇ܝܼܬ̣ܵܐ.
14 ܘܐܲܫܬ̇ܝܲܬ̤ ܒܢܵܘܠܵܐ ܘܐܸܡܪܲܬ̤: ܦܠܸܫܬܵܝܹ̈ܐ ܐܸܬ̣ܵܘ ܥܠܲܝܟ ܫܸܡܫܘܿܢ ܘܐܸܬ̇ܬ̇ܥܝܼܪ ܡ̣ܢ ܫܸܢܬܹܗ: ܘܫܩܠܹܗ ܠܢܵܘܠܵܐ ܕܓܲܪ̈ܕ̇ܝܵܝܹܐ ܘܲܠܡܸܫܬ̇ܝܼܬ̣ܵܐ.
15 ܘܐܵܡ̇ܪܵܐ ܠܹܗ: ܐܲܝܟܲܢܵܐ ܐܸܡܲܪܬ̇ ܠܝܼ ܕܲܪܚܸܡ̇ܬܹܟ̣ܝ: ܘܠܸܒܵܟ̣ ܠܵܐ ܗ̄ܘ̣ܵܐ ܠܘܵܬ̣ܝ: ܕܗܵܐ ܬܠܵܬ̣ ܙܲܒ̣ܢ̈ܝܼܢ ܕܲܓܸܠܬ̇ ܒܝܼ: ܘܠܵܐ ܚܵܘܝܼܬܵܢܝ ܒܡܵܢܵܐ ܪܲܒ̇ ܚܲܝܠܵܟ̣.
16 ܘܟܲܕܼ ܐܲܥܝܼܩܲܬ̤ ܠܹܗ ܒܡܸܠܹ̈ܝܗ̇ ܟܠܗܘܿܢ ܝܵܘ̈ܡܵܬ̣ܵܐ ܘܐܲܠܸܨܬܹܗ: ܐܸܬ̇ܬ̇ܥܝܼܩܲܬ̤ ܢܲܦ̮ܫܹܗ ܥܕܲܡܵܐ ܠܡܵܘܬܵܐ.
17 ܘܲܓ̣ܠܵܐ ܠܵܗ̇ ܟܠܹܗ ܠܸܒܹ̇ܗ: ܘܐܸܡܲܪ ܠܵܗ̇: ܡܕܲܟ̇ܝܵܐ ܠܵܐ ܣܠܸܩ ܥܲܠ ܪܹܫܝ: ܡܸܛܠ ܕܲܢܙܝܼܪܵܐ ܐ̄ܢܵܐ ܕܐܲܠܵܗܵܐ ܡ̣ܢ ܟܲܪܣܵܗ̇ ܕܐܹܡܝ: ܐܸܢܗ̤ܘ ܕܓܸܪܥܹ̇ܬ̣. ܦܵܪܹܩ ܠܹܗ ܡܹܢܝ ܚܲܝܠܝ: ܘܡܸܫܬܲܦܲܠ ܐ̄ܢܵܐ ܘܗܵܘܹ̇ܐ ܐ̄ܢܵܐ ܐܲܝܟ̣ ܟܠ ܐ̄ܢܵܫ.
18 ܘܟܲܕܼ ܚܙܵܬ̤ ܕܲܠܝܼܠܵܐ ܕܲܓ̣ܠܵܐ ܠܵܗ̇ ܟܠܹܗ ܠܸܒܹ̇ܗ: ܫܲܕ̇ܪܲܬ̤ ܩܪܵܬ̤ ܠܲܛܪ̈ܘܼܢܹܐ ܕܲܦܠܸܫܬܵܝܹ̈ܐ: ܘܐܵܡ̇ܪܵܐ ܠܗܘܿܢ: ܣܲܩܘ ܡܸܟܹ̇ܝܠ: ܡܸܛܠ ܕܓ̣ܠܵܐ ܠܝܼ ܟܠܹܗ ܠܸܒܹ̇ܗ. ܘܲܣܠܸܩܘ ܠܘܵܬ̣ܵܗ̇ ܛܪ̈ܘܼܢܹܐ ܕܲܦܠܸܫܬܵܝܹ̈ܐ ܘܐܲܣܩܘ ܟܸܣܦܵܐ ܥܲܡܗܘܿܢ.
19 ܘܐܲܕܼܡܸܟ̣ܬܹܗ ܥܲܠ ܒܘܼܪ̈ܟܹ̇ܝܗ̇: ܘܲܩܪܵܬ̤ ܠܓܲܪܵܥܵܐ: ܘܓܸܪܥܲܬ̤ ܫܒܲܥ ܥܸܕܼܩܹ̈ܐ ܕܪܹܫܹܗ: ܘܫܲܪܝܲܬ̣ ܠܲܡܫܲܦܵܠܘܼܬܹܗ: ܘܲܦܪܲܩ ܠܹܗ ܚܲܝܠܹܗ ܡܸܢܹܗ.
20 ܘܐܵܡܪܵܐ ܠܹܗ: ܦܠܸܫܬܵܝܹ̈ܐ ܐܸܬ̣ܵܘ ܥܠܲܝܟ ܫܸܡܫܘܿܢ: ܘܐܸܬ̇ܬ̇ܥܝܼܪ ܡ̣ܢ ܫܸܢܬܹܗ ܘܐܸܡܲܪ: ܐܸܦܘܿܩ ܐܲܝܟ̣ ܕܲܒ̣ܟ̣ܠܙܒܲܢ ܘܐܸܫܬܲܢܲܕܼ ܒܗܘܿܢ: ܘܗ̤ܘ ܠܵܐ ܝܼܕܲܥ̣ ܕܡܵܪܝܵܐ ܦܪܲܩ ܠܹܗ ܡܸܢܹܗ.
21 ܘܐܲܚܕ̇ܘܼܗܝ ܦܠܸܫܬܵܝܹ̈ܐ ܘܥܵܘܲܪܘ ܥܲܝܢܵܘ̈ܗܝ: ܘܐܲܣܪܘܼܗܝ ܒܫܸܫ̈ܠܵܬ̣ܵܐ ܘܐܲܚܬ̣ܘܼܗܝ ܠܥܵܙܲܪ ܘܲܗܘ̤ܵܐ ܛܵܥܹ̇ܝܢ ܒܹܝܬ̣ ܐܲܣܝܼܪܹ̈ܐ.
22 ܘܫܲܪܝܼ ܣܲܥܪܵܐ ܕܪܹܫܹܗ ܠܡܹܐܥܵܐ ܟܲܕܼ ܐܸܬ̣ܓ̇ܪܲܥ.
23 ܘܲܛܪ̈ܘܼܢܹܐ ܕܲܦܠܸܫܬܵܝܹ̈ܐ ܐܸܬ̣ܟܲܢܲܫ̣ܘ ܠܡܸܕܼܒܲܚ ܕܸܒ̣ܚܵܐ ܪܲܒܵܐ ܠܕܵܓ̣ܘܿܢ ܐܲܠܵܗܗܘܿܢ ܒܚܸܕܼܘܼܬ̣ܵܐ: ܘܐܵܡ̇ܪܝܼܢ: ܐܲܫܠܸܡ ܐܲܠܵܗܲܢ ܒܐܝܼܕܲܢ ܠܫܸܡܫܘܿܢ ܒܥܸܠܕ̇ܒ̣ܵܒ̣ܵܢ.
24 ܘܟܲܕܼ ܚ̣ܙܵܐܘܼܗܝ ܥܲܡܵܐ ܫܲܒܲܚܘ ܠܐܲܠܵܗܗܘܿܢ: ܡܸܛܠ ܕܐܵܡ̇ܪܝܼܢ: ܕܐܲܫܠܸܡ ܐܲܠܵܗܲܢ ܒܐܝܼܕܲܢ ܠܲܒ̣ܥܸܠܕ̇ܒ̣ܵܒܲܢ: ܘܲܠܡܲܚܪܸܒ̣ ܐܲܪ̈ܥܵܬܲܢ: ܘܲܠܕܲܐܣܓ̇ܝ ܩܛܝܼܠܲܝ̈ܢ.
25 ܘܟܲܕܼ ܫ̣ܦܲܪ ܠܸܒ̇ܗܘܿܢ ܐܵܡܪܝܼܢ: ܩܪܵܘ ܠܫܸܡܫܘܿܢ ܡܪܲܩܸܕܼ ܩܕܼܵܡܲܝܢ ܘܲܩܪܵܘ ܠܫܸܡܫܘܿܢ ܡ̣ܢ ܒܹܝܬ̣ ܐܲܣܝܼܪܹ̈ܐ: ܘܲܡܪܲܩܸܕܼ ܗ̄ܘ̣ܵܐ ܩܕܼܵܡܲܝܗܘܿܢ: ܘܐܲܩܝܼܡܘܼܗܝ ܒܲܝܢܵܬ̣ ܥܲܡܘܼ̈ܕܹܐ.
26 ܘܐܸܡܲܪ ܫܸܡܫܘܿܢ ܠܛܲܠܝܵܐ ܕܐܲܚܝܼܕܼ ܒܐܝܼܕܹܗ: ܫܒ̣ܘܿܩܲܝܢܝ ܘܐܲܡܝܼܫܲܝܢܝ ܥܲܡܘܼ̈ܕܹܐ ܕܒܲܝܬܵܐ ܣܡܝܼܟ̣ ܥܠܲܝܗܘܿܢ: ܘܐܸܣܬ̇ܡܸܟ ܥܠܲܝܗܘܿܢ.
27 ܘܒܲܝܬܵܐ ܡܠܸܐ ܗ̄ܘ̣ܵܐ ܓܲܒ̣ܪܹ̈ܐ ܘܢܸܫܹ̈ܐ: ܘܬܲܡܵܢ ܗ̄ܘ̣ܵܘ ܟܠܗܘܿܢ ܛܪ̈ܘܼܢܹܐ ܕܲܦܠܸܫܬܵܝܹ̈ܐ. ܘܥܲܠ ܐܸܓܵܪܵܐ ܐܝܼܬ̣ ܗ̄ܘ̣ܵܘ ܐܲܝܟ̣ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪܹ̈ܐ ܘܢܸܫܹ̈ܐ: ܘܚܵܙܹܝܢ ܗ̄ܘ̣ܵܘ ܟܲܕܼ ܡܪܲܩܸܕܼ ܫܸܡܫܘܿܢ.
28 ܘܲܩܪܵܐ ܫܸܡܫܘܿܢ ܠܡܵܪܝܵܐ: ܘܐܸܡܲܪ: ܒܒ̣ܵܥܘܼ ܡܵܪܝܵܐ ܐܲܠܵܗܵܐ: ܐܸܬ̇ܕܲܟ̣ܪܲܝܢܝ: ܘܚܲܠܲܝܢܝ ܒܲܠܚܘܿܕܼ ܗܵܕܹܐ ܙܒܲܢ̄ܬܵܐ: ܐܲܠܵܗܵܐ: ܕܐܸܬ̣ܢܲܩܲܡ ܢܩܲܡܬ̣ܵܐ ܕܬܲܪܬܹ̇ܝܢ ܥܲܝ̈ܢܲܝ ܡ̣ܢ ܦܠܸܫ̈ܬܵܝܹܐ.
29 ܘܐܸܚܲܕܼ ܫܸܡܫܘܿܢ ܬܪܹܝܢ ܥܲܡܘܼ̈ܕܹܐ ܡܸܨܥܵܝܹ̈ܐ ܕܒܲܝܬܵܐ ܣܡܝܼܟ̣ ܥܠܲܝܗܘܿܢ: ܘܐܸܣܬ̇ܡܸܟ ܥܠܲܝܗܘܿܢ: ܚܲܕܼ ܒܝܲܡܝܼܢܹܗ ܘܚܲܕܼ ܒܣܸܡܵܠܹܗ.
30 ܘܐܸܡܲܪ ܫܸܡܫܘܿܢ: ܬܡܘܼܬ̣ ܢܲܦ̮ܫܝ ܥܲܡ ܦܠܸܫܬܵܝܹ̈ܐ: ܘܲܢܓܲܕܼ ܒܚܲܝܠܹܗ: ܘܲܢܦܲܠ ܒܲܝܬܵܐ ܥܲܠ ܛܪ̈ܘܼܢܹܐ: ܘܥܲܠ ܟܠܹܗ ܥܲܡܵܐ ܕܒܹܗ. ܘܲܗܘ̤ܵܘ ܡܝܼܬܹ̈ܐ ܕܡܝܼܬ̣ܘ ܒܡܵܘܬܹ̇ܗ ܕܫܸܡܫܘܿܢ: ܣܲܓ̇ܝܼܐܝܼܢ ܡ̣ܢ ܕܡܝܼܬ̣ܘ ܒܚܲܝܵܘ̈ܗܝ.
31 ܘܲܢܚܸܬ̣ܘ ܟܠܗܘܿܢ ܐܲܚܵܘ̈ܗܝ: ܘܟ̣ܠܹܗ ܒܹܝܬ̣ ܐܲܒ̣ܘܼܗܝ: ܘܲܣܠܩܘ ܘܩܲܒ̣ܪܘܼܗܝ ܒܹܝܬ̣ ܨܸܕܼܥܵܐ: ܘܒܹܝܬ̣ ܐܸܫܬ̇ܘܼܐܹܝܠ ܒܩܲܒ̣ܪܹܗ ܕܲܡܢܘܿܚ ܐܲܒ̣ܘܼܗܝ ܘܗ̤ܘ ܕܵܢ ܠܝܼܣܪܵܝܹܠ ܥܸܣܪܝܼܢ ܫܢ̈ܝܼܢ.
1 ܘܲܗܘ̤ܵܐ ܓܲܒ̣ܪܵܐ ܚܲܕܼ ܡ̣ܢ ܛܘܼܪܵܐ ܕܐܲܦܪܹܝܡ: ܘܲܫܡܹܗ ܡܝܼܟ̣ܵܐ.
2 ܘܐܸܡܲܪ ܠܐܸܡܹܗ: ܐܵܠܹܦ ܘܲܡܵܐܐ ܕܟܸܣܦܵܐ ܕܐܸܬ̣̱ܢܣܸܒ̣ ܠܹܟ̣ܝ. ܘܐܲܢ̄ܬܝ ܝܲܡܝܼܬ̇ܝ ܘܐܵܦ ܐܸܡܲܪܬ̇ܝ ܒܐܸܕܼܢܲܝ̈: ܗܵܘ̇ ܟܸܣܦܵܐ ܐܸܢܵܐ ܢܣܲܒ̣ܬܹܗ ܘܐܸܡܪܲܬ̤ ܐܸܡܹܗ: ܒܪܝܼܟ̣ ܒܹܪܝ ܠܡܵܪܝܵܐ.
3 ܘܦܲܢܝܼ ܐܵܠܹܦ ܘܲܡܵܐܐ ܕܟܸܣܦܵܐ ܠܐܸܡܹܗ. ܘܐܸܡܪܲܬ̤ ܐܸܡܹܗ: ܡܩܲܕܵܫܘܼ ܩܲܕ̇ܫܹܬ̣ ܟܸܣܦܵܐ ܠܡܵܪܝܵܐ ܡ̣ܢ ܐܝܼܕܲܝ̈ ܒܹܪܝ: ܕܐܸܥܒܸ̇ܕܼ ܨܲܠܡܵܐ ܓܠܝܼܦܵܐ ܘܲܢܣܝܼܟ̣ܵܐ ܘܗܵܫܵܐ ܦܲܢܵܝܗܝ ܠܝܼ.
4 ܘܦܲܢܝܼ ܟܸܣܦܵܐ ܠܐܸܡܹܗ. ܘܢܸܣܒܲܬ̤ ܐܸܡܹܗ ܡܲܐܬܹ̇ܝܢ ܕܟܸܣܦܵܐ ܘܝܸܗ̄ܒܲܬ̤ ܠܩܲܢܝܵܢܵܐ. ܘܲܥܒܲܕܼ ܨܲܠܡܵܐ ܓܠܝܼܦܵܐ ܘܲܢܣܝܼܟ̣ܵܐ: ܘܲܗܘ̤ܵܐ ܒܒܹܝܬ̣ ܡܝܼܟ̣ܵܐ.
5 ܘܓܲܒ̣ܪܵܐ ܡܝܼܟ̣ܵܐ ܐܝܼܬ̣ ܗ̄ܘ̣ܵܐ ܠܹܗ ܒܹܝܬ̣ ܐܲܠܵܗܹ̈ܐ: ܘܲܥܒܲܕܼ ܦܕܲܬܵܐ ܘܲܦܪܝܼܣܵܐ: ܘܫܲܡܠܝܼ ܐܝܼܕܼܵܐ ܕܚܲܕܼ ܡ̣ܢ ܒܢܵܘ̈ܗܝ: ܘܲܗܘ̤ܵܐ ܠܹܗ ܟܘܼܡܪܵܐ.
6 ܒܝܵܘ̈ܡܵܬ̣ܵܐ ܗܵܢܘܿܢ: ܠܲܝܬ̇ ܗ̄ܘ̣ܵܐ ܡܲܠܟܵܐ ܒܹܝܬ̣ ܝܼܣܪܵܝܹܠ: ܘܟ̣ܠ ܐ̄ܢܵܫ ܡܸܕܸ̇ܡ ܕܫܲܦܝܼܪ ܒܥܲܝܢܵܘ̈ܗܝ ܥܵܒܹܕܼ ܗ̄ܘ̣ܵܐ.
7 ܘܲܗܘ̤ܵܐ ܥܠܲܝܡܵܐ ܚܲܕܼ ܡ̣ܢ ܒܹܝܬ̣ ܠܚܸܡ ܕܲܝܗܘܼܕܼܵܐ: ܘܲܫܡܹܗ ܠܹܘܝܼ: ܘܥܵܡܲܪ ܗ̄ܘ̣ܵܐ ܬܲܡܵܢ.
8 ܘܐܸܙܲܠ ܓܲܒ̣ܪܵܐ ܡ̣ܢ ܩܪܝܼܬ̣ܵܐ ܡ̣ܢ ܒܹܝܬ̣ ܠܚܸܡ ܕܲܝܗܘܼܕܼܵܐ: ܠܡܸܥܡܲܪ ܐܲܝܟܵܐ ܕܡܸܫܟܲܚ. ܘܲܡܛ̣ܵܐ ܠܛܘܼܪܵܐ ܕܐܲܦܪܹܝܡ ܥܕܲܡܵܐ ܠܒܹܝܬ̣ ܡܝܼܟ̣ܵܐ: ܠܡܸܣܥܲܪ ܐܘܼܪܚܹܗ.
9 ܘܐܸܡܲܪ ܠܹܗ ܡܝܼܟ̣ܵܐ ܐܲܝܡܸܟܵܐ ܐܵܬܹܐ ܐܲܢ̄ܬ̇ ܐܵܡܲܪ ܠܹܗ: ܠܹܘܵܝܵܐ ܐ̄ܢܵܐ ܡ̣ܢ ܒܹܝܬ̣ ܠܚܸܡ ܕܲܝܗܘܼܕܼܵܐ: ܘܐܵܙܹ̇ܠ ܐ̄ܢܵܐ ܠܡܸܥܡܲܪ ܐܲܝܟܵܐ ܕܡܸܫܟܲܚ ܐ̄ܢܵܐ.
10 ܐܵܡܲܪ ܠܹܗ ܡܝܼܟ̣ܵܐ: ܬܸܒ̣ ܠܘܵܬ̣ܝ: ܘܲܗ̤ܘܝܼ ܠܝܼ ܐܲܝܟ̣ ܐܲܒ̣ܵܐ ܘܟ̣ܘܼܡܪܵܐ. ܘܐܸܢܵܐ ܐܸܬܸ̇ܠ ܠܵܟ̣ ܥܸܣܪܵܐ ܕܟܸܣܦܵܐ ܠܝܵܘ̈ܡܵܬ̣ܵܐ: ܘܡܵܐܢܲܝ̈ܟ: ܘܬ̣ܘܼܪܣܵܝܵܟ̣.
11 ܘܐܸܙܲܠ ܠܹܘܝܼ ܘܐܸܬ̇ܛܦܝܼܣ ܠܡܸܬܲܒ̣ ܥܲܡ ܓܲܒ̣ܪܵܐ: ܘܲܗܘ̤ܵܐ ܠܹܗ ܥܠܲܝܡܵܐ ܐܲܝܟ̣ ܚܲܕܼ ܡ̣ܢ ܒܢܵܘ̈ܗܝ.
12 ܘܫܲܡܠܝܼ ܡܝܼܟ̣ܵܐ ܐܝܼܕܹܗ ܕܠܹܘܵܝܵܐ. ܘܲܗܘ̤ܵܐ ܠܹܗ ܟܘܼܡܪܵܐ: ܘܲܗܘ̤ܵܐ ܠܹܗ ܒܒܹܝܬ̣ ܡܝܼܟ̣ܵܐ.
13 ܘܐܸܡܲܪ ܡܝܼܟ̣ܵܐ: ܗܵܫܵܐ ܝܸܕܼܥܹ̇ܬ̣ ܕܡܲܛܐܸܒ̣ ܠܝܼ ܡܵܪܝܵܐ: ܕܲܗܘ̤ܵܐ ܠܝܼ ܠܹܘܵܝܵܐ ܟܘܼܡܪܵܐ.
1 ܒܝܵܘ̈ܡܵܬ̣ܵܐ ܗܵܢܘܿܢ: ܠܲܝܬ̇ ܗ̄ܘ̣ܵܐ ܡܲܠܟܵܐ ܒܹܝܬ̣ ܝܼܣܪܵܝܹܠ. ܘܲܒ̣ܝܵܘ̈ܡܵܬ̣ܵܐ ܗܵܢܘܿܢ: ܫܲܒ̣ܛܵܐ ܕܕܼܵܢ ܒܵܥܹ̇ܐ ܗ̄ܘ̣ܵܐ ܠܹܗ ܦܵܠܓ̇ܘܼܬ̣ܐ ܠܡܸܬܲܒ̣: ܡܸܛܠ ܕܠܵܐ ܐܸܬ̣ܦܲܠܓܲܬ̣ ܗ̄ܘ̣ܵܬ̣ ܥܕܲܡܵܐ ܠܝܵܘܡܵܐ ܗܵܘ̇ ܝܵܪܬ̇ܘܼܬ̣ܵܐ ܒܲܝܢܵܬ̣ ܫܲܒ̣̈ܛܹܐ ܕܝܼܣܪܵܝܹܠ.
2 ܘܫܲܕܲܪܘ ܒ̈ܢܲܝ ܕܵܢ ܡ̣ܢ ܫܲܪܒ̇ܬ̣ܗܘܿܢ ܚܲܡܫܵܐ ܓܲܒ̣ܪ̈ܝܼܢ: ܡ̣ܢ ܨܹܕܼܥܵܐ ܘܡ̣ܢ ܐܸܫܬ̇ܘܼܐܹܝܠ: ܠܡܸܓܲܫ ܐܲܪܥܵܐ ܘܲܠܡܸܒ̣ܕ̇ܩܵܗ̇. ܘܐܵܡ̇ܪܝܼܢ ܠܗܘܿܢ: ܙܸܠܘ ܒܘܼܕܼܩܘܼܗ̇ ܠܐܲܪܥܵܐ. ܘܐܸܬ̣ܵܘ ܠܛܘܼܪܵܐ ܕܐܲܦܪܹܝܡ ܥܕܲܡܵܐ ܠܒܹܝܬ̣ ܡܝܼܟ̣ܵܐ: ܘܒ̣ܵܬ̣ܘ ܬܲܡܵܢ.
3 ܗܸܢܘܿܢ ܥܲܡ ܒܹܝܬ̣ ܡܝܼܟ̣ܵܐ: ܘܐܸܫܬܵܘܕܲܥܘ ܠܩܵܠܹܗ ܕܲܥܠܲܝܡܵܐ ܠܹܘܝܼ: ܘܲܣܛܵܘ ܠܘܵܬܹܗ ܠܬܲܡܵܢ: ܘܐܸܡܲܪܘ ܠܹܗ: ܡܵܢܵܐ ܐܸܬܲܝܬ̇ ܠܗܵܪܟܵܐ: ܘܡܵܢܵܐ ܥܵܒܹܕܼ ܐܲܢ̄ܬ̇ ܗܵܪܟܵܐ.
4 ܐܵܡܲܪ ܠܗܘܿܢ: ܗܵܟܲܢܵܐ ܘܗܵܟܲܢܵܐ ܥܒܲܕܼ ܠܝܼ ܡܝܼܟ̣ܵܐ: ܘܐܲܓܪܲܢܝ: ܘܲܗܘܹ̇ܝܬ̣ ܠܹܗ ܟܘܼܡܪܵܐ.
5 ܐܵܡ̇ܪܝܼܢ ܠܹܗ ܫܐܲܠ ܠܲܢ ܒܐܲܠܵܗܵܐ: ܘܢܸܕܲܥ ܐܸܢ ܡܲܟ̣ܫܪܵܐ ܐܘܼܪܚܵܐ ܕܐܵܙ̇ܠ̄ܝܼܢ ܚ̄ܢܲܢ ܥܠܹܝܗ̇.
6 ܐܵܡܲܪ ܠܗܘܿܢ ܟܘܼܡܪܵܐ: ܙܸܠܘ ܒܲܫܠܵܡܵܐ: ܘܡܵܪܝܵܐ ܢܲܬ̣ܩܸܢ ܐܘܼܪܚܟ̣ܘܿܢ ܕܬܹܐܙܠ̄ܘܿܢ ܥܠܹܝܗ̇.
7 ܘܐܸܙܲܠ̣ܘ ܚܲܡܫܵܐ ܓܲܒ̣ܪ̈ܝܼܢ ܠܠܝܼܫ: ܘܲܚܙܵܘ ܠܥܲܡܵܐ ܕܝܵܬܹܒ̣ ܒܓ̣ܵܘܵܗ̇: ܕܝܵܬ̣ܒ̇ܝܼܢ ܒܫܸܠܝܵܐ ܐܲܝܟ̣ ܢܵܡܘܿܣܵܐ ܕܨܲܝ̈ܕ̇ܢܵܝܹܐ: ܫܠܹܝܢ ܘܲܒ̣ܗܝܼܠܝܼܢ: ܘܠܲܝܬ̇ ܕܡܲܗܲܪ ܒܐܲܪܥܵܐ: ܐܵܦܠܵܐ ܕܐܵܠܹܨ ܘܲܡܥܝܼܩ: ܘܪܲܚܝܼܩܝܼܢ ܐܸܢܘܿܢ ܡ̣ܢ ܨܲܝ̈ܕ̇ܢܵܝܹܐ: ܘܡܸܠܬ̣ܵܐ ܠܲܝܬ̇ ܠܗܘܿܢ ܥܲܡ ܒܲܪܢܵܫ.
8 ܘܐܸܬ̣ܵܘ ܠܘܵܬ̣ ܐܲܚܲܝ̈ܗܘܿܢ ܠܨܕܼܥܵܐ ܘܐܸܫܬ̇ܘܼܐܹܝܠ: ܘܐܵܡ̇ܪܝܼܢ ܠܗܘܿܢ ܐܲܚܲܝ̈ܗܘܿܢ: ܐܲܝܡܸܟܵܐ ܐܸܬܲܝܬ̇ܘܿܢ.
9 ܘܐܵܡܪܝܼܢ ܡ̣ܢ ܠܝܼܫ: ܩܘܼܡܘ ܗܵܫܵܐ ܢܸܣܲܩ ܥܠܲܝܗܘܿܢ: ܡܸܛܠ ܕܲܚܙܲܝܢܵܗ̇ ܠܐܲܪܥܵܐ: ܕܛܵܒ̣ܵܐ ܗ̄ܝ̣ ܛܵܒ̣ ܘܐܲܢ̄ܬ̇ܘܿܢ ܠܵܐ ܬܸܫܬ̇ܩܘܼܢ: ܐܵܦ ܠܵܐ ܬܸܬ̣ܚܲܒ̣ܢܘܿܢ ܠܡܹܐܙܲܠ ܘܲܠܡܸܥܲܠ ܠܡܸܐܪܲܬ̣ ܐܲܪܥܵܐ.
10 ܒܡܲܥܠܵܢܲܝ̈ܟ̇ܘܿܢ ܥܵܐܠܝܼܢ ܐ̄ܢܬ̇ܘܿܢ ܥܲܠ ܥܲܡܵܐ ܟܲܗܝܼܢܵܐ: ܘܐܲܪܥܵܐ ܪܘܵܚܬܵܐ ܕܐܝܼ̈ܕܲܝܵܐ ܡܸܛܠ ܕܐܲܫ̱ܠܡܵܗ̇ ܐܲܠܵܗܵܐ ܒܐܝܼܕܲܝ̈ܟ̇ܘܿܢ: ܕܠܵܐ ܬܸܚܣܪܘܿܢ ܡܸܕܸ̇ܡ ܒܐܲܪܥܵܐ.
11 ܘܲܫܩܲܠܘ ܡ̣ܢ ܬܲܡܵܢ ܡ̣ܢ ܫܲܪܒ̇ܬ̣ܵܐ ܕܕܼܵܢ: ܡ̣ܢ ܨܹܕܼܥܵܐ ܘܡ̣ܢ ܐܸܫܬ̇ܘܼܐܹܝܠ: ܫܸܬ̣ܡܵܐܐ ܓܲܒ̣ܪ̈ܝܼܢ ܕܲܡܙܲܝܢܝܼܢ ܒܡܵܐܢܲܝ̈ ܩܪܵܒ̣ܵܐ.
12 ܘܲܣܠܩܘ ܘܲܫܪܵܘ ܒܩܘܼܪܝܲܬ̣ ܢܲܥܪܝܼܢ ܕܲܝܗܘܼܕܼܵܐ: ܡܸܛܠ ܗܵܢܵܐ ܩ̣ܪܵܐܘܼܗܝ ܠܐܲܬ̣ܪܵܐ ܗܵܘ̇: ܡܲܫܪܝܼܬ̣ܵܐ ܕܕܼܵܢ ܥܕܲܡܵܐ ܠܝܵܘܡܵܢܵܐ: ܗܵܐ ܒܸܣܬܲܪ ܩܘܼܪܝܲܬ̣ ܢܲܥܪܝܼܢ.
13 ܘܲܥܒܲܪܘ ܡ̣ܢ ܬܲܡܵܢ ܠܛܘܼܪܵܐ ܕܐܲܦܪܹܝܡ: ܘܐܸܙܲܠ̣ܘ ܥܕܲܡܵܐ ܠܒܹܝܬ̣ ܡܝܼܟ̣ܵܐ.
14 ܘܲܥܢܵܘ ܚܲܡܫܵܐ ܓܲܒ̣ܪ̈ܝܼܢ ܕܐܸܙܲܠ̣ܘ ܠܡܸܓܫ ܐܲܪܥܵܐ ܕܠܝܼܫ: ܘܐܸܡܲܪܘ ܠܐܲܚܲܝ̈ܗܘܿܢ: ܝܵܕܼܥܝܼܢ ܐ̄ܢܬ̇ܘܿܢ ܕܐܝܼܬ̣ ܒܪ̈ܵܡܵܬ̣ܵܐ ܗܵܠܹܝܢ ܦܸܕ̇ܬ̣ܵܐ ܘܲܦܪܝܼܣܵܐ: ܘܨܲܠܡܵܐ ܓܠܝܼܦܵܐ ܘܲܢܣܝܼܟ̣ܵܐ ܘܗܵܫܵܐ ܕܲܥܘ ܡܵܢܵܐ ܥܵܒ̣ܕ̇ܝܼܢ ܐ̄ܢܬ̇ܘܿܢ.
15 ܘܲܣܛܵܘ: ܘܥܲܠܘ ܠܒܹܝܬ̣ ܥܠܲܝܡܵܐ ܠܹܘܝܼ: ܠܒܹܝܬ̣ ܡܝܼܟ̣ܵܐ: ܘܲܫܐܸܠ̣ܘ ܒܲܫܠܵܡܹܗ.
16 ܘܫܸܬ̣ܡܵܐܐ ܓܲܒ̣ܪ̈ܝܼܢ ܕܲܡܙܲܝܢܝܼܢ ܒܡܵܐܢܲܝ ܩܪܵܒ̣ܵܐ: ܩܵܝܡܝܼܢ ܒܡܲܥܠܵܢܵܐ ܕܬܲܪܥܵܐ ܡ̣ܢ ܒ̈ܢܲܝ ܕܵܢ.
17 ܘܲܣܠܸܩܘ ܚܲܡܫܵܐ ܓܲܒ̣ܪ̈ܝܼܢ ܕܐܸܙܲܠܘ ܠܡܸܓܲܫ ܐܲܪܥܵܐ: ܘܥܲܠܘ ܠܬܲܡܵܢ ܘܲܢܣܲܒ̣ܘ ܨܲܠܡܵܐ: ܘܦܸܕ̇ܬ̣ܵܐ: ܘܲܦܪܝܼܣܵܐ: ܘܲܚܫܲܠܬ̣ܵܐ: ܘܟ̣ܘܼܡܪܵܐ ܟܲܕܼ ܩܵܐܹ̇ܡ ܒܡܲܥܠܵܢܵܐ ܕܬܲܪܥܵܐ.
18 ܘܫܸܬ̣ܡܵܐܐ ܓܲܒ̣ܪ̈ܝܼܢ ܗܵܢܘܿܢ ܕܲܡܙܲܝܢܝܼܢ ܒܡܵܐܢܲܝ̈ ܩܪܵܒ̣ܵܐ: ܥܲܠܘ ܠܒܹܝܬ̣ ܡܝܼܟ̣ܵܐ ܘܲܢܣܲܒ̣ܘ ܨܲܠܡܵܐ: ܘܦܸܪܬܵܐ: ܘܲܦܪܝܼܣܵܐ: ܘܲܚܫܲܠܬ̣ܵܐ. ܐܵܡܲܪ ܠܗܘܿܢ ܟܘܼܡܪܵܐ ܡܵܢܵܐ ܥܵܒ̣ܕ̇ܝܼܢ ܐ̄ܢܬ̇ܘܿܢ.
19 ܐܵܡ̇ܪܝܼܢ ܠܹܗ ܫܬ̣ܘܿܩ: ܣܝܼܡ ܐܝܼܕܼܵܟ̣ ܥܲܠ ܦܘܼܡܵܟ̣: ܘܬ̣ܵܐ ܥܲܡܲܢ. ܘܲܗ̤ܘܝܼ ܠܲܢ ܐܲܒ̣ܵܐ ܘܟ̣ܘܼܡܪܵܐ. ܐܲܝܢܵܐ ܛܵܒ̣ ܠܵܟ̣: ܕܬܸܗܘܹܐ ܟܘܼܡܪܵܐ ܠܒܹܝܬ̣ ܓܲܒ̣ܪܵܐ ܚܲܕܼ: ܐܵܘ ܕܬܸܗܘܹܐ ܟܘܼܡܪܵܐ ܠܛܘܿܗܡܵܐ ܘܲܠܫܲܪܒ̇ܬ̣ܵܐ ܕܝܼܣܪܵܝܹܠ.
20 ܘܲܫܦܲܪ ܠܸܒܹ̇ܗ ܕܟ̣ܘܼܡܪܵܐ: ܘܲܢܣܲܒ̣ ܨܲܠܡܵܐ: ܘܦܸܕ̇ܬ̣ܵܐ: ܘܲܦܪܝܼܣܵܐ: ܘܐܸܙܲܠ ܥܲܡ ܥܲܡܵܐ.
21 ܘܐܸܬ̣ܦܢܝܼܘ ܘܲܥܒܲܪܘ ܘܐܸܙܲܠܘ: ܘܲܢܩܵـ̈ـܘܵܬ̣ܵܐ: ܘܩܸܢܝܵܢܵܐ: ܘܲܒ̣ܥܝܼܪܵܐ ܩܕܼܵܡܲܝܗܘܿܢ.
22 ܗܸܢܘܿܢ ܐܲܪܚܸܩܘ ܡ̣ܢ ܒܹܝܬ̣ ܡܝܼܟ̣ܵܐ: ܘܓܲܒ̣ܪܵܐ ܕܐܝܼܬ̣ ܒܒܲܝܬܵܐ ܥܲܠ ܓܹܢ̄ܒ̣ ܒܹܝܬ̣ ܡܝܼܟ̣ܵܐ: ܩ̣ܥܵܐ ܘܲܪܕܲܦ̣ ܒܵܬܲܪ ܒ̈ܢܲܝ ܕܵܢ.
23 ܘܲܩܪܵܐ ܠܲܒ̣̈ܢܲܝ ܕܵܢ: ܘܐܸܬ̣ܦܢܝܼܘ ܘܐܸܡܲܪܘ ܠܡܝܼܟ̣ܵܐ: ܡܵܐ ܠܵܟ̣ ܕܩܵܥܹ̇ܐ ܐܲܢ̄ܬ̇.
24 ܐܵܡܲܪ ܠܗܘܿܢ: ܐܲܠܵܗܹ̈ܐ ܕܥܸܒ̣ܕܹ̇ܬ̣ ܢܣܲܒ̣ܬ̇ܘܿܢ: ܘܐܵܦ ܠܟ̣ܘܼܡܪܵܐ ܕܒܲܪܬ̇ܘܿܢ ܘܐܸܙܲܠܬ̇ܘܿܢ ܘܡܵܢܵܐ ܐܝܼܬ̣ ܠܝܼ ܬܘܼܒ̣: ܕܐܵܡ̇ܪܝܼܢ ܐ̄ܢܬ̇ܘܿܢ ܠܝܼ ܡܵܐ ܠܵܟ̣.
25 ܘܐܸܡܲܪܘ ܠܹܗ ܒ̈ܢܲܝ ܕܵܢ: ܠܵܐ ܬܲܫܡܲܥ ܩܵܠܵܟ̣ ܠܘܬܲܢ: ܕܲܠܡܵܐ ܢܸܦ̮ܓܥܘܼܢ ܒܵܟ̣ ܐ̄ܢܵܫܵܐ ܡܲܪ̈ܝܼܪܲܝ ܢܲܦ̮ܫܵܐ: ܘܬ̣ܵܘܒܸ̇ܕܼ ܢܲܦ̮ܫܵܟ̣ ܘܢܲܦ̮ܫܵܐ ܕܲܒ̣ܢܲܝ̈ܟ.
26 ܘܐܸܙܲܠܘ ܒ̈ܢܲܝ ܕܵܢ ܠܐܘܼܪܚܗܘܿܢ ܘܟܲܕܼ ܚܙܵܐ ܡܝܼܟ̣ܵܐ ܕܥܲܫܝܼܢܝܼܢ ܐܸܢܘܿܢ ܡܸܢܹܗ: ܐܸܬ̣ܦܢܝܼ ܘܐܸܬ̣ܵܐ ܠܒܲܝܬܹ̇ܗ.
27 ܘܗܸܢܘܿܢ ܢܣܲܒ̣ܘ ܠܡܸܕܸ̇ܡ ܕܲܥܒܲܕܼ ܡܝܼܟ̣ܵܐ. ܘܲܕܼܒܲܪܘ ܠܟ̣ܘܼܡܪܵܐ ܕܐܝܼܬ̣ ܗ̄ܘ̣ܵܐ ܠܹܗ: ܘܥܲܠ̣ܘ ܠܠܝܼܫ ܥܲܠ ܥܲܡܵܐ ܟܲܗܝܼܢܵܐ ܘܫܲܠܝܵܐ: ܘܲܡ̣ܚܵܘ ܐܸܢܘܿܢ ܒܦܘܼܡܵܐ ܕܚܲܪܒܵܐ: ܘܠܲܩܪܝܼܬ̣ܵܐ ܐܵܘܩܸܕܼܘ ܒܢܘܼܪܵܐ.
28 ܘܠܲܝܬ̇ ܡ̇ܢ ܕܲܡܦܲܨܹܐ: ܡܸܛܠ ܕܪ̈ܲܚܝܼܩܵܐ ܗ̄ܘ̣ܵܬ̣ ܡ̣ܢ ܨܲܝܕܵܢ: ܘܡܸܠܬ̣ܵܐ ܠܲܝܬ̇ ܗ̄ܘ̣ܵܐ ܠܗܘܿܢ ܥܲܡ ܒܲܪܢܵܫ. ܘܗ̤ܝ ܒܥܘܼܡܩܵܐ ܗ̄ܘ̣ܵܬ̣ ܕܒܹܝܬ̣ ܪܚܘܿܒ̣: ܘܲܒ̣ܢܵܐܘܼܗ̇ ܠܲܩܪܝܼܬ̣ܵܐ: ܘܝܼܬܸܒ̣ܘ ܒܵܗ̇.
29 ܘܲܩܪܵܘ ܫܡܵܗ̇ ܕܲܩܪܝܼܬ̣ܵܐ ܕܵܢ: ܥܲܠ ܫܸܡ ܕܵܢ ܐܲܒ̣ܘܼܗܘܿܢ: ܕܐܸܬ̣̱ܝܼܠܸܕܼ ܠܝܼܣܪܵܝܹܠ. ܒܪܲܡ ܠܘܿܙ ܫܡܵܗ̇ ܗ̄ܘ̣ܵܐ ܠܲܩܪܝܼܬ̣ܵܐ ܡ̣ܢ ܩܕܼܝܼܡ.
30 ܘܐܲܩܝܼܡܘ ܠܗܘܿܢ ܒ̈ܢܲܝ ܕܵܢ ܨܲܠܡܵܐ ܝܘܿܢܵܬ̣ܵܢ ܒܲܪ ܓܸܪܫܘܿܢ: ܒܲܪ ܡܢܲܫܹܐ: ܗ̤ܘ ܘܲܒ̣ܢܵܘ̈ܗܝ ܗܘ̤ܵܘ ܟܘܼܡܪܹ̈ܐ ܠܫܲܒ̣ܛܵܐ ܕܕܼܵܢ: ܥܕܲܡܵܐ ܠܝܵܘܡܵܐ ܕܐܸܫܬܲܒ̣ܝܲܬ̤ ܐܲܪܥܵܐ.
31 ܘܣܵܡܘܼܗܝ ܠܗܘܿܢ ܨܲܠܡܵܐ ܕܡܝܼܟ̣ܵܐ ܕܲܥܒܲܕܼ: ܟܠܗܘܿܢ ܝܵܘ̈ܡܵܬ̣ܵܐ ܕܲܗܘ̤ܵܐ ܒܲܝܬܹ̇ܗ ܕܐܲܠܵܗܵܐ ܒܫܝܼܠܘܿ.
1 ܘܲܗܘ̤ܵܐ ܒܝܵܘ̈ܡܵܬ̣ܵܐ ܗܵܢܘܿܢ: ܘܡܲܠܟܵܐ ܠܲܝܬ̇ ܗ̄ܘ̣ܵܐ ܒܝܼܣܪܵܝܹܠ. ܘܲܗܘ̤ܵܐ ܓܲܒ̣ܪܵܐ ܠܹܘܝܼ ܥܵܡܲܪ ܗ̄ܘ̣ܵܐ ܒܲܫܦܘܿܠܵܐ ܕܛܘܼܪܵܐ: ܘܲܢܣܲܒ̣ ܠܹܗ ܐܲܢ̄ܬ̇ܬ̣ܵܐ ܕܪܘܼܟ̣ܬ̣ܵܐ ܡ̣ܢ ܒܹܝܬ̣ ܠܚܸܡ ܕܲܝܗܘܼܕܼܵܐ.
2 ܘܙܲܢܝܲܬ̣ ܥܠܵܘܗܝ ܕܪܘܼܟ̣ܬܹ̇ܗ: ܘܩܵܡܲܬ̤ ܘܐܸܙܲܠ̄ܬ̇ ܡ̣ܢ ܠܘܵܬܹܗ ܠܒܹܝܬ̣ ܐܲܒ̣ܘܼܗ̇ ܠܒܹܝܬ̣ ܠܚܸܡ ܕܲܝܗܘܼܕܼܵܐ: ܘܲܗܘ̤ܵܬ̣ ܬܲܡܵܢ ܝܵܘ̈ܡܵܬ̣ܵܐ ܝܲܪ̈ܚܹܐ ܐܲܪܒ̇ܥܵܐ.
3 ܘܩܵܡ ܒܲܥܠܵܗ̇ ܘܐܸܙܲܠ ܒܵܬ̣ܪܵܗ̇: ܕܢܸܡܠܹܐ ܒܠܸܒܵܗ̇ ܘܢܲܝܬܹ̇ܝܗ̇: ܘܲܥܠܲܝܡܹܗ ܘܲܬ̣ܪܹܝܢ ܚܡܵܪ̈ܝܼܢ ܥܲܡܹܗ. ܘܐܲܥܸܠܬܹܗ ܠܒܹܝܬ̣ ܐܲܒ̣ܘܼܗ̇: ܘܲܚܙܵܝܗܝ ܐܲܒ̣ܘܼܗܝ ܕܲܥܠܲܝܡܬ̣ܵܐ ܘܲܚܕܼܝܼ ܠܩܘܼܒ̣ܠܹܗ.
4 ܘܐܲܚܕܹ̇ܗ ܚܡܘܼܗܝ ܐܲܒ̣ܘܼܗ̇ ܕܲܥܠܲܝܡܬ̣ܵܐ: ܘܝܼܬܸܒ̣ ܠܘܵܬܹܗ ܬܠܵܬ̣ܵܐ ܝܵܘ̈ܡܝܼܢ: ܘܲܠܥܸܣܘ ܘܐܸܫܬ̇ܝܼܘ ܘܒ̣ܵܬ̣ܘ ܬܲܡܵܢ.
5 ܘܲܒ̣ܝܵܘܡܵܐ ܕܐܲܪܒ̇ܥܵܐ: ܩܲܕܸ̇ܡ ܒܨܲܦܪܵܐ ܠܡܹܐܙܲܠ: ܘܐܸܡܲܪ ܐܲܒ̣ܘܼܗ̇ ܕܲܥܠܲܝܡܬ̣ܵܐ ܠܚܲܬ̣ܢܹܗ. ܣܡܘܿܟ̣ ܠܸܒܵܟ̣ ܒܲܩܨܵܝܵܐ ܕܠܲܚܡܵܐ: ܘܗܵܝܕܹ̇ܝܢ ܬܩܘܼܡ ܘܬܹܐܙܲܠ.
6 ܘܝܼܬܸܒ̣ܘ ܘܲܠܥܸܣܘ ܬܪ̈ܲܝܗܘܿܢ ܐܲܟ̣ܚ̄ܕܼܵܐ ܘܐܸܫܬ̇ܝܼܘ. ܘܐܸܡܲܪ ܐܲܒ̣ܘܼܗܝ ܕܲܥܠܲܝܡܬ̣ܵܐ: ܠܚܲܬ̣ܢܹܗ: ܐܸܢ ܨܵܒܹ̇ܐ ܐܲܢ̄ܬ̇: ܒܘܼܬ̣ ܘܢܸܛܐܲܒ̣ ܠܵܟ̣.
7 ܘܩܵܡ ܓܲܒ̣ܪܵܐ ܠܡܹܐܙܲܠ: ܘܐܲܠܨܹܗ ܚܡܘܼܗܝ: ܘܒ̣ܵܬ̣ ܠܹܗ ܬܲܡܵܢ.
8 ܘܩܲܕܸ̇ܡ ܒܨܲܦܪܵܐ ܒܝܵܘܡܵܐ ܕܚܲܡܫܵܐ ܠܡܹܐܙܲܠ: ܘܐܸܡܲܪ ܠܹܗ ܐܲܒ̣ܘܼܗ̇ ܕܲܥܠܲܝܡܬ̣ܵܐ: ܣܡܘܿܟ̣ ܠܸܒܵܟ̣: ܘܐܸܬ̣ܟܲܪ̄ܟ̣ ܥܲܕܼ ܨܵܠܹ̇ܐ ܝܵܘܡܵܐ: ܘܲܠܥܸܣܘ ܬܪ̈ܲܝܗܘܿܢ ܘܐܸܫܬ̇ܝܼܘ.
9 ܘܩܵܡ̣ ܓܲܒ̣ܪܵܐ ܠܡܹܐܙܲܠ: ܗ̤ܘ ܘܲܕܼܪܘܼܟ̣ܬܹ̇ܗ ܘܲܥܠܲܝܡܹܗ: ܘܐܸܡܲܪ ܠܹܗ ܚܡܘܼܗܝ ܐܲܒ̣ܘܼܗ̇ ܕܲܥܠܲܝܡܬ̣ܵܐ: ܗܵܐ ܦ̣ܢܵܐ ܝܵܘܡܵܐ: ܒܘܼܬ̣ ܗܵܪܟܵܐ ܘܢܸܛܐܲܒ̣ ܠܵܟ̣: ܘܩܲܕܸ̇ܡܘ ܡܚܵܪ ܘܙܸܠܘ ܠܡܲܫܟܲܢܟ̣ܘܿܢ.
10 ܘܠܵܐ ܨܒ̣ܵܐ ܓܲܒ̣ܪܵܐ ܠܲܡܒ̣ܵܬ̣: ܘܩܵܡ ܘܐܸܙܲܠ ܘܡܲܛܝܼ ܠܘܼܩܒܲܠ ܝܵܒ̣ܘܿܣ ܕܗ̤ܝ ܗ̄ܝ̣ ܐܘܿܪܸܫܠܸܡ: ܘܥܲܡܹܗ ܬܪܹܝܢ ܚܡܵܪ̈ܝܼܢ ܟܲܕܼ ܛܥܝܼܢܝܼܢ: ܘܲܕܼܪܘܼܟ̣ܬܹ̇ܗ ܥܲܡܹܗ.
11 ܗܸܢܘܿܢ ܥܲܠ ܓܹܢ̄ܒ̣ ܝܵܒ̣ܘܿܣ: ܘܝܵܘܡܵܐ ܪܟ̣ܢ ܠܹܗ ܛܵܒ̣. ܘܐܸܡܲܪ ܥܠܲܝܡܵܐ ܠܡܵܪܹܗ: ܬܵܐ ܢܸܣܛܹܐ ܠܲܩܪܝܼܬ̣ܵܐ ܗܵܕܹܐ ܝܵܒ̣ܘܿܣ: ܘܲܢܒ̣ܘܼܬ̣ ܒܵܗ̇.
12 ܐܵܡܲܪ ܠܹܗ ܡܵܪܹܗ: ܠܵܐ ܢܸܣܛܹܐ ܠܲܩܪܝܼܬ̣ܵܐ ܢܘܼܟ̣ܪܵܝܬܵܐ ܕܠܵܐ ܗ̄ܘ̣ܵܬ̣ ܡ̣ܢ ܕܒܹܝܬ̣ ܝܼܣܪܵܝܹܠ: ܐܸܠܵܐ ܢܸܥܒܲܪ ܥܕܲܡܵܐ ܠܲܓܒܲܥ.
13 ܘܐܸܡܲܪ ܠܹܗ ܡܵܪܹܗ: ܬܵܐ ܢܸܬ̣ܩܲܪܲܒ̣ ܠܚܲܕܼ ܡ̣ܢ ܐܲܬ̣ܪ̈ܵܘܵܬ̣ܵܐ: ܘܲܢܒܘܼܬ̣ ܒܲܓܒܲܥ ܐܵܘ ܒܪܵܡܬ̣ܵܐ.
14 ܘܲܥ̣ܒܲܪܘ ܘܐܸܙܲܠ̣ܘ: ܘܥܸܪܒܲܬ̤ ܠܗܘܿܢ ܫܸܡܫܵܐ ܥܲܠ ܓܹܢ̄ܒ̣ ܓܒܲܥ ܕܒܸܢܝܵܡܹܝܢ.
15 ܘܲܣܛܵܘ ܠܬܲܡܵܢ ܠܲܡܒ̣ܵܬ̣. ܘܥܲܠ̣ܘ ܠܲܓܒܲܥ ܘܝܼܬܸܒ̣ܘ ܒܫܘܼܩܵܐ ܕܲܩܪܝܼܬ̣ܵܐ: ܘܠܲܝܬ̇ ܐ̄ܢܵܫ ܕܡܲܥܸܠ ܠܗܘܿܢ ܠܒܲܝܬܵܐ ܠܲܡܒ̣ܵܬ̣.
16 ܘܗܵܐ ܓܲܒ̣ܪܵܐ ܣܵܒ̣ܵܐ ܐܵܬܹ̇ܐ ܡ̣ܢ ܥܒ̣ܵܕܹܗ ܡ̣ܢ ܚܲܩܠܵܐ ܒܪܲܡܫܵܐ: ܘܓܲܒ̣ܪܵܐ ܡܢ ܛܘܼܪܵܐ ܗ̄ܘ̣ܵܐ ܕܐܲܦܪܹܝܡ: ܘܥܵܡܲܪ ܗ̄ܘ̣ܵܐ ܒܲܓ̣ܒܲܥ ܕܒܸܢܝܵܡܹܝܢ. ܘܐ̄ܢܵܫܵܘ̈ܗܝ ܕܐܲܬ̣ܪܵܐ ܒ̈ܢܲܝ ܒܸܢܝܵܡܹܝܢ: ܒܝܼܫܝܼܢ ܗ̄ܘ̣ܵܘ ܥܒ̣ܵܕܲܝ̈ܗܘܿܢ ܛܵܒ̣.
17 ܘܐܲܪܝܼܡ ܥܲܝܢܵܘ̈ܗܝ ܓܲܒ̣ܪܵܐ ܣܵܒ̣ܵܐ: ܘܲܚܙܵܐ ܐܲܪܚܵܐ ܒܫܘܼܩܵܐ ܕܲܩܪܝܼܬ̣ܵܐ: ܘܐܸܡܲܪ ܠܹܗ ܓܲܒ̣ܪܵܐ ܣܵܒ̣ܵܐ: ܠܐܲܝܟܵܐ ܐܵܙܹ̇ܠ ܐܲܢ̄ܬ̇: ܘܡ̣ܢ ܐܲܝܡܸܟܵܐ ܐܵܬܹ̇ܐ ܐܲܢ̄ܬ̇.
18 ܐܵܡܲܪ ܠܹܗ: ܡܸܥܒܲܪ ܥܵܒ̣ܪܝܼܢ ܚ̄ܢܲܢ ܡ̣ܢ ܒܹܝܬ̣ ܠܚܸܡ ܕܲܝܗܘܼܕܼܵܐ: ܥܕܲܡܵܐ ܠܲܫܦܘܿܠܲܝ̈ ܛܘܼܪܵܐ. ܘܡ̣ܢ ܬܲܡܵܢ ܐ̄ܢܵܐ. ܘܐܸܙܹܠ̄ܬ̇ ܥܕܲܡܵܐ ܠܒܹܝܬ̣ ܠܚܸܡ ܕܲܝܗܘܼܕܼܵܐ. ܘܲܠܒܲܝܬܹ̇ܗ ܕܡܵܪܝܵܐ ܐܵܙܹ̇ܠ ܐ̄ܢܵܐ: ܘܠܲܝܬ̇ ܐ̄ܢܵܫ ܕܡܲܥܸܠ ܠܲܢ ܠܒܲܝܬܵܐ.
19 ܐܵܦ ܬܸܒ̣ܢܵܐ ܐܵܦ ܟܸܣܬ̣ܵܐ ܐܝܼܬ̣ ܠܚܸܡܪ̈ܲܢ: ܘܐܵܦ ܠܲܚܡܵܐ ܘܚܲܡܪܵܐ ܐܝܼܬ̣ ܠܝܼ ܘܠܲܐܡܬ̣ܵܟ̣ ܘܠܲܥܠܲܝܡܵܐ ܥܲܒ̣ܕܵܟ̣: ܘܡܸܕܸ̇ܡ ܠܵܐ ܚܲܣܝܼܪ.
20 ܐܵܡܲܪ ܠܹܗ ܓܲܒ̣ܪܵܐ ܣܵܒ̣ܵܐ ܫܠܵܡ ܠܵܟ̣: ܟܠܡܸܕܸ̇ܡ ܕܚܲܣܝܼܪ ܠܵܟ̣ ܐܸܢܵܐ ܐܸܬܸ̇ܠ: ܒܲܠܚܘܿܕܼ ܒܫܘܼܩܵܐ ܠܵܐ ܬܒ̣ܘܼܬ̣.
21 ܘܐܲܥܠܹܗ ܠܒܲܝܬܹ̇ܗ ܘܐܲܪܡܝܼ ܠܚܸܡܪܹ̈ܗ: ܘܐܲܫܝܼܓܘ ܪܸ̈ܓ̣ܠܝܗܘܿܢ: ܘܲܠܥܸܣܘ ܘܐܸܫܬ̇ܝܼܘ.
22 ܘܗܸܢܘܿܢ ܫܦܲܪ ܠܸܒ̇ܗܘܿܢ: ܘܗܵܐ ܐ̄ܢܵܫܲܝ̈ ܩܪܝܼܬ̣ܵܐ ܓܲܒ̣ܪܹ̈ܐ ܥܵܘܵܠܹ̈ܐ ܐܸܬ̣ܟܲܪܟ̇ܘܼܗܝ ܠܒܲܝܬܵܐ: ܘܥܲܠ ܬܲܪܥܵܐ ܡܸܬ̣ܟܲܬ̇ܫܝܼܢ: ܘܐܵܡ̇ܪܝܼܢ ܠܓܲܒ̣ܪܵܐ ܣܵܒ̣ܵܐ ܡܵܪܹܗ ܕܒܲܝܬܵܐ: ܐܲܦܸܩ ܠܓܲܒ̣ܪܵܐ ܕܥܲܠ ܠܒܲܝܬܵܟ̣ ܕܢܸܕ̇ܥܝܼܘܗܝ.
23 ܘܲܢܦܲܩ ܠܘܵܬ̣ܗܘܿܢ ܓܲܒ̣ܪܵܐ ܣܵܒ̣ܵܐ ܡܵܪܹܗ ܕܒܲܝܬܵܐ: ܘܐܸܡܲܪ ܠܗܘܿܢ: ܠܵܐ ܐܲܚܲܝ̈ ܠܵܐ ܬܲܒ̣ܐ̱ܫܘܼܢ ܗܵܟܲܢܵܐ: ܡܸܛܠ ܕܥܲܠ̣ ܓܲܒ̣ܪܵܐ ܗܵܢܵܐ ܠܒܲܝܬ̇ܝ ܠܵܐ ܬܸܥܒ̇ܕܼܘܼܢ ܨܲܥܪܵܐ ܗܵܢܵܐ.
24 ܗܵܐ ܒܪܲܬܝ ܒܬ̣ܘܼܠܬܵܐ: ܘܲܕܼܪܘܼܟ̣ܬܹ̇ܗ: ܐܲܦܸܩ̣ ܐܸܢܹܝܢ ܠܟ̣ܘܿܢ: ܘܨܲܥܲܪܘ ܐܸܢܹܝܢ: ܘܲܥܒܸܕܼܘ ܠܗܹܝܢ ܡܸܕܸ̇ܡ ܕܫܲܦܝܼܪ ܒܥܲܝܢܲܝ̈ܟ̇ܘܿܢ: ܘܲܠܓܲܒ̣ܪܵܐ ܗܵܢܵܐ ܠܵܐ ܬܸܥܒ̇ܕܼܘܼܢ ܨܲܥܪܵܐ ܗܵܢܵܐ.
25 ܘܠܵܐ ܨܒ̣ܵܘ ܓܲܒ̣ܪܹ̈ܐ ܗܵܢܘܿܢ ܠܡܸܫ̱ܡܥܹܗ. ܘܐܸܚܲܕܼ ܓܲܒ̣ܪܵܐ ܕܪܘܼܟ̣ܬܹ̇ܗ. ܘܐܲܦܩܵܗ̇ ܠܗܘܿܢ ܠܒܲܪ: ܘܚܲܟ̣ܡܘܼܗ̇: ܘܐܸܫܬܲܢܲܕܼܘ ܒܵܗ̇ ܟܠܹܗ ܠܸܠܝܵܐ ܥܕܲܡܵܐ ܠܨܲܦܪܵܐ: ܘܫܲܒ̣ܩܘܼܗ̇ ܟܲܕܼ ܣܠܸܩ ܨܲܦܪܵܐ.
26 ܘܐܸܬ̣ܵܬ̤ ܐܲܢ̄ܬ̇ܬ̣ܵܐ ܠܥܸܕܵܢ ܨܲܦܪܵܐ: ܘܢܸܦܠܲܬ̤ ܒܬܲܪܥܵܐ ܕܓܲܒ̣ܪܵܐ ܐܲܝܟܵܐ ܕܡܵܪܵܗ̇ ܬܲܡܵܢ: ܥܕܲܡܵܐ ܕܢܸܓܗܲܬ̤.
27 ܘܩܵܡ̣ ܡܵܪܵܗ̇ ܒܨܲܦܪܵܐ: ܘܲܦܬܲܚ̣ ܬܲܪܥܵܐ ܕܒܲܝܬܵܐ. ܘܲܢܦܲܩ̣ ܕܢܑܹܙܲܠ ܠܐܘܼܪܚܹܗ: ܘܲܚܙܵܐ ܕܪܘܼܟ̣ܬܹ̇ܗ ܪܲܡܝܵܐ ܥܲܠ ܬܲܪܥܵܐ ܕܒܲܝܬܵܐ: ܘܐܝܼܕܼܵܗ̇ ܥܲܠ ܬܲܪܥܵܐ.
28 ܐܵܡܲܪ ܠܵܗ̇ ܩܘܼܡܝ ܢܹܐܙܲܠ: ܘܠܵܐ ܥܵܢ̇ܝܵܐ ܗ̄ܘ̣ܵܬ̣ ܠܹܗ. ܘܫܲܩܠܵܗ̇ ܥܲܠ ܚܡܵܪܹܗ: ܘܩܵܡ̣ ܓܲܒ̣ܪܵܐ ܘܐܸܙܲܠ̣ ܠܐܲܬ̣ܪܹܗ.
29 ܘܥܲܠ ܠܒܲܝܬܹ̇ܗ: ܘܲܢܣܲܒ̣ ܣܲܟ̇ܝܼܢܵܐ: ܘܦܲܫܚܵܗ̇ ܠܲܕܼܪܘܼܟ̣ܬܹ̇ܗ ܠܬܲܪܬܲܥܸܣܪܹ̈ܐ ܡ̈ܢܵܘܵܢ: ܘܲܫܕܼܵܗ̇ ܒܟ̣ܠܗܘܿܢ ܬܚ̈ܘܼܡܹܐ ܕܝܼܣܪܵܝܹܠ.
30 ܘܟ̣ܠܡ̇ܢ ܕܲܚܙܵܗ̇: ܐܸܡܲܪ: ܠܵܐ ܗܘ̤ܵܬ̣ ܘܠܵܐ ܐܸܬ̣ܚܲܙܝܲܬ̤ ܐܲܝܟ̣ ܗܵܕܹܐ: ܡ̣ܢ ܝܵܘܡܵܐ ܕܲܣܠܸܩ̣ܘ ܒ̈ܢܲܝ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ ܘܲܥܕܲܡܵܐ ܠܝܵܘܡܵܢܵܐ: ܘܐܸܬ̣ܪܲܥܝܼܘ ܥܠܹܝܗ̇: ܘܐܸܬ̣ܡܲܠܲܟ̣ܘ ܘܡܲܠܸܠ̣ܘ.
1 ܘܲܢܦܲܩ̣ܘ ܟܠܗܘܿܢ ܒ̈ܢܲܝ ܝܼܣܪܵܝܹܠ: ܘܐܸܬ̣ܟܲܢܲܫ̣ܘ ܟܢܘܼܫܬܵܐ ܐܲܝܟ̣ ܚܲܕܼ ܓܒܲܪ: ܡ̣ܢ ܕܵܢ ܘܲܥܕܲܡܵܐ ܠܒܲܪ ܫܒܲܥ: ܠܐܲܪܥܵܐ ܕܓܸܠܥܵܕܼ ܩܕܼܵܡ ܡܵܪܝܵܐ: ܒܡܲܨܦܝܵܐ.
2 ܘܩܵܡ̣ ܫܲܪ̈ܒ̣ܵܬ̣ܵܐ ܕܟ̣ܠܹܗ ܥܲܡܵܐ: ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܒܲܟ̣ܢܘܼܫܬܵܐ ܥܲܡܹܗ ܕܐܲܠܵܗܵܐ: ܐܲܪܒܲܥܡܵܐܐ ܐܲܠܦ̈ܝܼܢ ܪܸ̈ܓ̣ܠܵܝܝܼܢ ܫܵܡ̇ܛܲܝ̈ ܣܲܝܦܵܐ.
3 ܘܲܫ̣ܡܲܥܘ ܒ̈ܢܲܝ ܒܸܢܝܵܡܹܝܢ ܕܲܣܠܸܩ̣ܘ ܒ̈ܢܲܝ ܝܼܣܪܵܝܹܠ ܠܡܲܨܦܝܵܐ: ܘܐܸܡܲܪܘ ܒ̈ܢܲܝ ܝܼܣܪܵܝܹܠ: ܐܸܡܲܪܘ ܠܲܢ ܐܲܝܟܲܢܵܐ ܗܘ̤ܵܬ̣ ܒܝܼܫܬܵܐ ܗܵܕܹܐ.
4 ܥܢ̣ܵܐ ܠܹܘܝܼ ܒܲܥܠܵܗ̇ ܕܐܲܢ̄ܬ̇ܬ̣ܵܐ ܕܐܸܬ̣ܩܲܛܠܲܬ̤ ܘܐܸܡܲܪ ܠܗܘܿܢ: ܠܲܓܒܲܥ ܕܒܸܢܝܵܡܹܝܢ ܥܸܠܹ̇ܬ̣ ܐܸܢܵܐ ܘܲܕܼܪܘܼܟ̣ܬ̇ܝ ܠܲܡܒ̣ܵܬ̣.
5 ܘܩܵܡ̣ܘ ܥܠܲܝ ܡܵܪܹ̈ܝܗ̇ ܕܲܓ̣ܒܲܥ: ܘܐܸܬ̣ܟܲܪܟ̇ܘܼܗܝ ܥܠܲܝ ܒܲܝܬܵܐ ܒܠܸܠܝܵܐ. ܠܝܼ ܒܥܵܘ ܠܡܸܩܛܲܠ: ܘܠܲܕܼܪܘܼܟ̣ܬ̇ܝ ܨܲܥܲܪܘ ܘܡܝܼܬܲܬ̤.
6 ܘܐܸܚܲܕ̇ܬܵܗ̇ ܠܲܕܼܪܘܼܟ̣ܬ̇ܝ: ܘܲܦܫܲܚܬܵܗ̇: ܘܲܫܕܹܝܬ̣ܵܗ̇ ܒܟ̣ܠܗܹܝܢ ܚܲܩ̈ܠܵܬ̣ܵܐ ܕܝܵܪܬ̇ܘܼܬ̣ܵܐ ܕܝܼܣܪܵܝܹܠ: ܥܲܠ ܕܲܥ̣ܒܲܕܼܘ ܚܛܝܼܬ̣ܵܐ ܘܥܵܘܼܠܵܐ ܒܝܼܣܪܵܝܹܠ.
7 ܗܵܐ ܟܠܟ̣ܘܿܢ ܒ̈ܢܲܝ ܝܼܣܪܵܝܹܠ: ܗܲܒ̣ܘ ܦܸܬ̣ܓ̣ܵܡܵܐ ܘܡܸܠܟܵܐ ܥܲܠ ܗܵܕܹܐ.
8 ܘܩܵܡ̣ܘ ܟܠܹܗ ܥܲܡܵܐ ܐܲܝܟ̣ ܓܲܒ̣ܪܵܐ ܚܲܕܼ: ܘܐܵܡ̇ܪܝܼܢ: ܠܵܐ ܐ̄ܢܵܫ ܢܹܐܙܲܠ ܠܡܲܫܟ̇ܢܹܗ: ܘܠܵܐ ܢܸܣܛܹܐ ܐ̄ܢܵܫ ܠܒܲܝܬܹ̇ܗ.
9 ܗܵܫܵܐ ܗܵܟܲܢܵܐ ܢܸܥܒܸ̇ܕܼ ܠܵܗ̇ ܠܲܓܒܲܥ: ܢܲܪܡܸܐ ܥܠܹܝܗ̇ ܦܸـ̈ـܨܹܐ.
10 ܢܸܕܼܒܲܪ ܥܸܣܪܵܐ ܓܲܒ̣ܪ̈ܝܼܢ ܠܲܡܵܐܐ: ܠܟ̣ܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܘܲܡܵܐܐ ܠܐܵܠܹܦ: ܘܐܵܠܹܦ ܠܪܸܒ̇ܘܿ: ܕܢܸܣܒ̣ܘܿܢ ܙܘܵܕܹ̈ܐ ܠܥܲܡܵܐ ܕܥܵܒ̣ܪܝܼܢ: ܕܢܹܐܙܠ̄ܘܿܢ ܥܲܠ ܓܒܲܥ ܕܒܸܢܝܵܡܹܝܢ: ܐܲܝܟ̣ ܟܠܹܗ ܥܵܘܼܠܵܐ ܕܲܥܒܲܕܘ ܒܝܼܣܪܵܝܹܠ.
11 ܘܐܸܬ̣ܟܲܢܲܫ̣ܘ ܟܠܗܘܿܢ ܐ̄ܢܵܫܵܐ ܕܝܼܣܪܵܝܹܠ ܥܲܠ ܩܪܝܼܬ̣ܵܐ: ܐܲܝܟ̣ ܓܲܒ̣ܪܵܐ ܚܲܕܼ ܟܲܕܼ ܫܘܹܝܢ.
12 ܘܫܲܕܲܪܘ ܟܠܗܘܿܢ ܫܲܒ̣̈ܛܹܐ ܕܲܒ̣̈ܢܲܝ ܝܼܣܪܵܝܹܠ: ܓܲܒ̣ܪܹ̈ܐ ܠܘܵܬ̣ ܟܠܗܘܿܢ ܕܒܹܝܬ̣ ܒܸܢܝܵܡܹܝܢ: ܠܡܹܐܡܲܪ: ܡܲܢܵܐ ܗ̄ܝ̣ ܒܝܼܫܬܵܐ ܗܵܕܹܐ ܕܲܗܘ̤ܵܬ̣ ܠܟ̣ܘܿܢ.
13 ܗܵܫܵܐ ܗܲܒ̣ܘ ܓܲܒ̣ܪܹ̈ܐ ܒ̈ܢܲܝ ܥܵܘܼܠܵܐ ܕܐܝܼܬ̣ ܒܲܓܒܲܥ ܢܩܲܛܸܠ ܐܸܢܘܿܢ: ܘܢܲܦܪܸܩ ܒܝܼܫܬܵܐ ܡ̣ܢ ܝܼܣܪܵܝܹܠ. ܘܠܵܐ ܨܒ̣ܵܘ ܒ̈ܢܲܝ ܒܸܢܝܵܡܹܝܢ ܕܢܸܫ̱ܡܥܘܼܢ ܒܩܵܠܵܐ ܕܐܲܚܲܝ̈ܗܘܿܢ: ܒ̈ܢܲܝ ܝܼܣܪܵܝܹܠ.
14 ܘܐܸܬ̣ܟܲܢܲܫ̣ܘ ܟܠܗܘܿܢ ܒ̈ܢܲܝ ܒܸܢܝܵܡܹܝܢ ܡ̣ܢ ܩܘܼܪ̈ܝܼܗܘܿܢ ܠܲܓܒܲܥ: ܠܡܸܦܲܩ ܘܲܠܡܸܬ̣ܟܲܬܵܫܘܼ ܥܲܡ ܒ̈ܢܲܝ ܝܼܣܪܵܝܹܠ.
15 ܘܐܸܬ̣ܡ̱ܢܝܼܘ ܒ̈ܢܲܝ ܒܸܢܝܵܡܹܝܢ ܒܝܵܘܡܵܐ ܗܵܘ̇ ܡ̣ܢ ܩܘܼܪ̈ܝܵܐ: ܥܸܣܪܝܼܢ ܘܸܫܬܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܫܵܡ̇ܛܲܝ̈ ܣܲܝܦܵܐ: ܣܛܲܪ ܡ̣ܢ ܝܵܬ̣ܒܲܝ̈ ܓܒܲܥ ܕܐܸܬ̣ܡ̱ܢܝܼܘ ܫܒܲܥܡܵܐܐ ܓܲܒ̣ܪ̈ܝܼܢ.
16 ܕܲܦܫܝܼ̈ܠܵܢ ܐܝܼܕܲܝ̈ܗܘܿܢ ܕܝܲܡܝܼܢܵܐ: ܟܠ ܕܫܵܕܹܐ ܒܩܸܠܥܵܐ ܠܥܲܠܥܵܠܵܐ ܘܠܵܐ ܡܦܝܼܫ.
17 ܘܓܲܒ̣ܪܹ̈ܐ ܕܝܼܣܪܵܝܹܠ ܐܸܬ̣ܡ̱ܢܝܼܘ ܣܛܲܪ ܡ̣ܢ ܒ̈ܢܲܝ ܒܸܢܝܵܡܹܝܢ: ܐܲܪܒܲܥܡܵܐܐ ܐܲܠܦ̈ܝܼܢ ܓܲܒ̣ܪ̈ܝܼܢ ܫܵܡ̇ܛܲܝ̈ ܣܲܝܦܵܐ: ܟܠܗܘܿܢ ܓܲܒ̣ܪܹ̈ܐ ܥܵܒ̣ܕܲܝ̈ ܩܪܵܒ̣ܵܐ.
18 ܘܩܵܡ̣ܘ ܘܲܣܠܸܩܘ ܠܒܹܝܬ̣ ܐܹܝܠ: ܘܲܫܐܸܠ̣ܘ ܒܐܲܠܵܗܵܐ: ܘܐܵܡ̇ܪܝܼܢ ܒ̈ܢܲܝ ܝܼܣܪܵܝܹܠ: ܡܲܢܘܼ ܢܸܣܲܩ ܠܲܢ ܒܪܹܫܵܐ ܠܡܸܬ̣ܟܲܬܵܫܘܼ ܥܲܡ ܒ̈ܢܲܝ ܒܸܢܝܵܡܹܝܢ. ܘܐܸܡܲܪ ܡܵܪܝܵܐ: ܝܼܗܘܼܕܼܵܐ ܒܩܲܕܼܡܵܝܬܵܐ.
19 ܘܩܵܡ̣ܘ ܒ̈ܢܲܝ ܝܼܣܪܵܝܹܠ ܒܨܲܦܪܵܐ: ܘܲܫܪܵܘ ܥܲܠ ܓܒܲܥ.
20 ܘܲܢܦܲܩ̣ܘ ܒ̈ܢܲܝ ܝܼܣܪܵܝܹܠ ܠܡܸܬ̣ܟܲܬܵܫܘܼ ܥܲܡ ܒ̈ܢܲܝ ܒܸܢܝܵܡܹܝܢ: ܘܲܣܕܲܪܘ ܒ̈ܢܲܝ ܝܼܣܪܵܝܹܠ ܩܪܵܒ̣ܵܐ ܥܲܡܗܘܿܢ ܥܲܠ ܓܒܲܥ.
21 ܘܲܢܦܲܩ̣ܘ ܒ̈ܢܲܝ ܒܸܢܝܵܡܹܝܢ ܡ̣ܢ ܓܒܲܥ: ܘܐܸܣܬ̇ܕܲܪܘ ܠܘܼܩܒܲܠ ܝܼܣܪܵܝܹܠ. ܘܐܲܪܡܝܼܘ ܡ̣ܢ ܝܼܣܪܵܝܹܠ ܒܝܵܘܡܵܐ ܗܵܘ̇ ܕܐܲܩ̣ܪܸܒ̣ܘ: ܥܸܣܪܝܼܢ ܘܲܬ̣ܪܹܝܢ ܐܲܠܦ̈ܝܼܢ ܓܲܒ̣ܪ̈ܝܼܢ ܥܲܠ ܐܲܪܥܵܐ.
22 ܘܐܸܬ̣ܚܲܝܲܠܘ ܬܘܼܒ̣ ܒ̈ܢܲܝ ܝܼܣܪܵܝܹܠ: ܘܐܵܘܣܸܦ̣ܘ ܠܡܸܣܲܕܲܪ ܩܪܵܒ̣ܵܐ ܒܕܼܘܼܟ̇ܬ̣ܵܐ ܕܲܣܕܲܪܘ ܒܝܵܘܡܵܐ ܩܲܕܼܡܵܝܵܐ.
23 ܘܲܣܠܸܩܘ ܒ̈ܢܲܝ ܝܼܣܪܵܝܹܠ: ܘܲܒ̣ܟ̣ܵܘ ܩܕܼܵܡ ܡܵܪܝܵܐ ܥܕܲܡܵܐ ܠܪܲܡܫܵܐ: ܘܲܫܐܸܠ̣ܘ ܒܡܵܪܝܵܐ: ܘܐܵܡ̇ܪܝܼܢ: ܢܵܘܣܸܦ ܬܘܼܒ̣ ܠܡܲܩܪܵܒ̣ܘ ܩܪܵܒ̣ܵܐ ܥܲܡ ܒ̈ܢܲܝ ܒܸܢܝܵܡܹܝܢ ܐܲܚܘܼܢ. ܘܐܸܡܲܪ ܡܵܪܝܵܐ ܣܲܩܘ ܥܠܵܘܗܝ.
24 ܘܐܲܩܪܸܒ̣ܘ ܒ̈ܢܲܝ ܝܼܣܪܵܝܹܠ ܥܲܡ ܒ̈ܢܲܝ ܒܸܢܝܵܡܹܝܢ ܠܝܵܘܡܵܐ ܐ̄ܚܪܹܢܵܐ.
25 ܘܲܢܦܲܩ̣ܘ ܒ̈ܢܲܝ ܒܸܢܝܵܡܹܝܢ ܠܘܼܩܒܲܠܗܘܿܢ ܡ̣ܢ ܓܒܲܥ ܒܝܵܘܡܵܐ ܕܲܬ̣ܪܹܝܢ. ܘܐܲܪܡܝܼܘ ܬܘܼܒ̣ ܒ̈ܢܲܝ ܒܸܢܝܵܡܹܝܢ ܡ̣ܢ ܝܼܣܪܵܝܹܠ: ܬܡܵܢܬܲܥܣܲܪ ܐܲܠܦ̈ܝܼܢ ܓܲܒ̣ܪ̈ܝܼܢ ܥܲܠ ܐܲܪܥܵܐ: ܟܠܗܘܿܢ ܗܵܠܹܝܢ ܫܵܡ̇ܛܲܝ̈ ܣܲܝܦܵܐ.
26 ܘܲܣܠܸܩ̣ܘ ܟܠܗܘܿܢ ܒ̈ܢܲܝ ܝܼܣܪܵܝܹܠ: ܘܟ̣ܠܹܗ ܥܲܡܵܐ. ܘܐܸܬ̣ܵܘ ܠܒܹܝܬ̣ ܐܹܝܠ: ܘܲܒ̣ܟ̣ܵܘ: ܘܝܼܬܸܒ̣ܘ ܬܲܡܵܢ ܩܕܼܵܡ ܡܵܪܝܵܐ: ܘܨܵܡ̣ܘ ܒܝܵܘܡܵܐ ܗܵܘ̇ ܥܕܲܡܵܐ ܠܪܲܡܫܵܐ: ܘܐܲܣܸܩ̣ܘ ܥܠܵـ̈ـܘܵܬ̣ܵܐ ܘܫܲܠܡܹ̈ܐ ܩܕܼܵܡ ܡܵܪܝܵܐ.
27 ܘܲܫܐܸܠ̣ܘ ܒ̈ܢܲܝ ܝܼܣܪܵܝܹܠ ܒܡܵܪܝܵܐ: ܘܬܲܡܵܢ ܗܘ̤ܵܬ̣ ܩܹܒ̣ܘܿܬܹܗ ܕܡܵܪܝܵܐ ܒܝܵܘ̈ܡܵܬ̣ܵܐ ܗܵܢܘܿܢ.
28 ܘܦܝܼܢܚܸܣ ܒܲܪ ܐܹܠܝܼܥܵܙܲܪ ܒܲܪ ܐܲܗܪܘܿܢ ܟܵܗܢܵܐ: ܩܵܐܹ̇ܡ ܗ̄ܘ̣ܵܐ ܩܕܼܵܡܵܘܗܝ ܒܝܵܘ̈ܡܵܬ̣ܵܐ ܗܵܢܘܿܢ. ܘܐܵܡ̇ܪܝܼܢ ܢܵܘܣܸܦ ܬܘܼܒ̣ ܠܡܸܦܲܩ ܠܲܩܪܵܒ̣ܵܐ ܥܲܠ ܒ̈ܢܲܝ ܒܸܢܝܵܡܹܝܢ ܐܲܚܘܼܢ: ܐܵܘ ܢܸܫܠܸܐ. ܘܐܸܡܲܪ ܡܵܪܝܵܐ ܣܲܩܘ: ܡܸܛܠ ܕܲܡܚܵܪ ܡܲܫܠܸܡ ܐ̄ܢܵܐ ܠܹܗ ܒܐܝܼܕܲܝ̈ܟ̇ܘܿܢ.
29 ܘܐܲܟ̣ܡܸܢܘ ܒ̈ܢܲܝ ܝܼܣܪܵܝܹܠ ܟܡܹܐܢܵܐ ܥܲܠ ܓܒܲܥ: ܘܚܲܕܼܪܘܼܗ̇.
30 ܘܲܣܠܸܩܘ ܒ̈ܢܲܝ ܝܼܣܪܵܝܹܠ ܥܲܠ ܒ̈ܢܲܝ ܒܸܢܝܵܡܹܝܢ ܒܝܵܘܡܵܐ ܬܠܝܼܬ̣ܵܝܵܐ: ܘܐܸܣܬ̇ܕܲܪܘ ܥܲܠ ܓܒܲܥ ܐܲܝܟ̣ ܕܲܒ̣ܟ̣ܠܙܒܲܢ.
31 ܘܲܢܦܲܩ̣ܘ ܒ̈ܢܲܝ ܒܸܢܝܵܡܹܝܢ ܠܐܘܼܪܥܹܗ ܕܥܲܡܵܐ: ܘܐܸܬ̣ܢܲܦܲܨܘ ܡ̣ܢ ܩܪܝܼܬ̣ܵܐ. ܘܫܲܪܝܼܘ ܕܢܲܪܡܘܿܢ ܡ̣ܢ ܥܲܡܵܐ ܩܛ̈ܝܼܠܹܐ: ܐܲܝܟ̣ ܕܲܒ̣ܟ̣ܠܙܒܲܢ: ܒܲܫܒ̣ܝܼܠܵܐ: ܚܲܕܼ ܕܣܵܠܹܩ ܠܲܓܒܲܥ: ܘܚܲܕܼ ܠܒܹܝܬ̣ ܐܹܝܠ ܒܚܲܩܠܵܐ: ܐܲܝܟ̣ ܬܠܵܬ̣ܝܼܢ ܓܲܒ̣ܪ̈ܝܼܢ ܡ̣ܢ ܝܼܣܪܵܝܹܠ.
32 ܘܐܸܡܲܪܘ ܒ̈ܢܲܝ ܒܸܢܝܵܡܹܝܢ ܡܸܬ̇ܬܲܒ̣ܪܝܼܢ ܐܸܢܘܿܢ ܡ̣ܢ ܩܕܼܵܡܲܝܢ ܐܲܝܟ̣ ܕܲܒ̣ܩܲܕܼܡܵܝܬܵܐ. ܘܲܒ̣̈ܢܲܝ ܝܼܣܪܵܝܹܠ ܐܸܡܲܪܘ: ܢܸܥܪܘܿܩ ܘܢܲܦܩ ܐܸܢܘܿܢ ܡ̣ܢ ܩܪܝܼܬ̣ܵܐ ܠܲܫܒ̣ܝܼܠܵܐ.
33 ܘܟ̣ܠܗܘܿܢ ܒ̈ܢܲܝ ܝܼܣܪܵܝܹܠ ܩܵܡ̣ܘ ܡ̣ܢ ܕܘܼܟ̇ܝܵܬ̣̈ܗܘܿܢ: ܘܐܸܣܬ̇ܕܲܪܘ ܒܲܒ̣ܥܸܠ ܬܵܡܵܪ: ܘܲܟ̣ܡܹܐܢܵܐ ܕܝܼܣܪܵܝܹܠ ܡܕܼܝܼܩ ܗ̄ܘ̣ܵܐ ܡ̣ܢ ܕܘܼܟ̇ܬܹܗ ܡ̣ܢ ܡܥܲܪܬ̣ܵܐ ܕܒܲܓܒܲܥ.
34 ܘܐܸܬ̣ܵܘ ܡ̣ܢ ܠܘܼܩܒܲܠ ܓܒܲܥ: ܥܸܣܪܵܐ ܐܲܠܦ̈ܝܼܢ ܓܲܒ̣ܪܹ̈ܐ ܓܒܲـ̈ـܝܵܐ ܡ̣ܢ ܟܠܹܗ ܝܼܣܪܵܝܹܠ: ܘܲܩܪܵܒ̣ܵܐ ܥܫܝܼܢ: ܘܗܸܢܘܿܢ ܠܵܐ ܝܼܕܲܥ̣ܘ ܕܲܡܛܵܬ̤ ܥܠܲܝܗܘܿܢ ܒܝܼܫܬܵܐ.
35 ܘܬܲܒ̣ܪܹܗ ܡܵܪܝܵܐ ܠܒܸܢܝܵܡܹܝܢ ܩܕܼܵܡ ܝܼܣܪܵܝܹܠ. ܘܐܲܪܡܝܼܘ ܕܒܹܝܬ̣ ܝܼܣܪܵܝܹܠ ܡ̣ܢ ܕܒܹܝܬ̣ ܒܸܢܝܵܡܹܝܢ ܒܝܵܘܡܵܐ ܗܵܘ̇: ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܲܡܵܐܐ ܓܲܒ̣ܪ̈ܝܼܢ: ܟܠܗܘܿܢ ܗܵܠܹܝܢ ܫܵܡܛܲܝ̈ ܣܲܝܦܵܐ.
36 ܘܲܚܙܵܘ ܒ̈ܢܲܝ ܒܸܢܝܵܡܹܝܢ ܕܐܸܬ̇ܬܲܒܲܪܘ: ܘܝܲܗ̄ܒ̣ܘ ܒ̈ܢܲܝ ܝܼܣܪܵܝܹܠ ܐܲܬ̣ܪܵܐ ܠܓܲܒ̣ܪܹ̈ܐ ܕܒܸܢܝܵܡܹܝܢ: ܡܸܛܠ ܕܐܸܬ̇ܬ̇ܟ̣ܠܘ ܥܲܠ ܡܟܹܐܢܵܐ ܕܐܲܟ̣ܡܸܢ̣ܘ ܥܲܠ ܓܒܲܥ.
37 ܘܲܟ̣ܡܹܐܢܵܐ ܪܲܟ̇ܝܼܟ̣ܵܐܝܼܬ̣ ܢܦܲܠ̣ ܥܲܠ ܓܒܲܥ: ܘܗܲܠܸܟ̣ ܟܡܹܐܢܵܐ: ܘܲܡ̣ܚܵܐ ܠܟ̣ܠܵܗ̇ ܩܪܝܼܬ̣ܵܐ ܒܦܘܼܡܵܐ ܕܚܲܪܒܵܐ.
38 ܘܘܲܥܕܵܐ ܗܘ̤ܵܐ ܠܓܲܒ̣ܪܹ̈ܐ ܕܝܼܣܪܵܝܹܠ ܥܲܡ ܟܡܹܐܢܵܐ: ܠܡܲܣܵܩܘܼ ܐܸܢܘܿܢ ܐܲܝܟ̣ ܡܲܣܲܩ ܬܸܢܵܢܵܐ ܡ̣ܢ ܩܪܝܼܬ̣ܵܐ.
39 ܘܲܗܦܲܟ̣ܘ ܓܲܒ̣ܪܹ̈ܐ ܕܝܼܣܪܵܝܹܠ ܡ̣ܢ ܩܪܵܒ̣ܵܐ: ܘܒܸܢܝܵܡܹܝܢ ܫܲܪܝܼ ܕܢܲܪܡܸܐ ܩܛܝܼܠܹ̈ܐ ܡ̣ܢ ܝܼܣܪܵܝܹܠ ܬܠܵܬ̣ܝܼܢ ܓܲܒ̣ܪ̈ܝܼܢ: ܡܸܛܠ ܕܐܵܡ̇ܪܝܼܢ: ܡܸܬ̇ܬ̇ܒ̣ܵܪܘܿ ܡܸܬ̇ܬܲܒ̣ܪܝܼܢ ܡ̣ܢ ܩܕܼܵܡܲܝܢ ܐܲܝܟ̣ ܕܒܲܩܪܵܒܹܐ ܩܲܕܼܡܵܝܹ̈ܐ.
40 ܘܬܸܢܵܢܵܐ ܫܲܪܝܼ ܕܢܸܣܲܩ ܡ̣ܢ ܩܪܝܼܬ̣ܵܐ ܐܲܝܟ̣ ܥܲܡܘܼܕܼܵܐ. ܘܐܸܬ̣ܦܢܝܼܘ ܒ̈ܢܲܝ ܒܸܢܝܵܡܹܝܢ ܠܒܸܣܬܲܪܗܘܿܢ: ܘܗܵܐ ܣܵܠܹܩ ܚܲܝܒ̇ܘܼܪܵܗ̇ ܕܲܩܪܝܼܬ̣ܵܐ ܥܕܲܡܵܐ ܠܲܫܡܲܝܵܐ.
41 ܘܓܲܒ̣ܪܹ̈ܐ ܕܝܼܣܪܵܝܹܠ ܗ̣ܦܲܟ̣ܘ ܥܠܲܝܗܘܿܢ. ܘܲܕܼܚܸܠ̣ܘ ܓܲܒ̣ܪܹ̈ܐ ܕܒܸܢܝܵܡܹܝܢ: ܡܸܛܠ ܕܲܚܙ̣ܵܘ ܕܩܸܪܒܲܬ̤ ܥܠܲܝܗܘܿܢ ܒܝܼܫܬܵܐ.
42 ܘܲܥܪܲܩ̣ܘ ܡܢ ܩܕܼܵܡ ܒ̈ܢܲܝ ܝܼܣܪܵܝܹܠ ܠܐܘܼܪܚܵܐ ܕܡܲܕܼܒ̇ܪܵܐ: ܘܲܩܪܵܒ̣ܵܐ ܐܲܕܼܪܸܟ̣ ܐܸܢܘܿܢ: ܘܕܲܒ̣ܩܲܕܼܡܵܝܬܵܐ ܥܒܲܕܼܘ ܐܸܢܘܿܢ ܒܲܡܨܲܥܬ̣ܵܐ.
43 ܘܪܲܕܦܘܼܗܝ ܠܒܸܢܝܵܡܹܝܢ: ܘܛܲܪܕ̇ܘܼܗܝ: ܘܒܲܢܝܵܚܵܐ ܚܲܪܒ̇ܘܼܗܝ: ܥܕܲܡܵܐ ܠܘܼܩܒܲܠ ܓܒܲܥ ܡ̣ܢ ܡܲܕܼܢܵܚܲܝ̈ ܫܸܡܫܵܐ.
44 ܘܲܢܦܲܠ̣ܘ ܡ̣ܢ ܒܸܢܝܵܡܹܝܢ: ܬܡܵܢܬܲܥܣܲܪ ܐܲܠܦ̈ܝܼܢ ܓܲܒ̣ܪ̈ܝܼܢ: ܟܠܗܘܿܢ ܗܵܠܹܝܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ.
45 ܘܐܸܬ̣ܦܢܝܼܘ ܘܲܥܪܲܩ̣ܘ ܠܡܲܕܼܒ̇ܪܵܐ ܠܲܫܩܝܼܦܵܐ ܕܪܲܡܘܿܢ: ܘܲܢܦܲܠ̣ܘ ܒܲܫܒ̣̈ܝܼܠܹܐ ܚܲܡܫܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܫܵܡܛܲܝ̈ ܣܲܝܦܵܐ: ܘܲܪܕܲܦ̣ܘ ܒܵܬܲܪܗܘܿܢ ܥܕܲܡܵܐ ܠܓܸܒ̣ܥܘܿܢ: ܘܲܚܪܲܒ̣ܘ ܡܸܢܗܘܢ ܬܪܹܝܢ ܐܲܠܦ̈ܝܼܢ ܓܲܒ̣ܪ̈ܝܼܢ.
46 ܘܟ̣ܠ ܕܲܢܦܲܠ̣ܘ ܡ̣ܢ ܒܸܢܝܵܡܹܝܢ: ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܫܵܡܛܲܝ̈ ܣܲܝܦܵܐ ܒܝܵܘܡܵܐ ܗܵܘ̇: ܟܠܗܘܿܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ.
47 ܘܐܸܬ̣ܦܢܝܼܘ ܘܲܥܪܲܩ̣ܘ ܠܡܲܕܼܒ̇ܪܵܐ ܠܲܫܩܝܼܦܵܐ ܕܪܲܡܘܿܢ ܫܸܬ̣ܡܵܐܐ ܓܲܒ̣ܪ̈ܝܼܢ: ܘܝܼܬܸܒ̣ܘ ܒܲܫܩܝܼܦܵܐ ܕܪܲܡܘܿܢ ܐܲܪܒ̇ܥܵܐ ܝܲܪ̈ܚܝܼܢ.
48 ܘܲܒ̣̈ܢܲܝ ܝܼܣܪܵܝܹܠ ܗܲܦܲܟ̣ܘ ܥܲܠ ܒ̈ܢܲܝ ܒܸܢܝܵܡܹܝܢ: ܘܲܡ̣ܚܵܘ ܐܸܢܘܿܢ ܒܦܘܼܡܵܐ ܕܚܲܪܒܵܐ: ܘܓܲܡܲܪܘ ܐܸܢܘܿܢ ܡ̣ܢ ܩܘܼܪ̈ܝܵܐ: ܡ̣ܢ ܒܢܲܝ̈ܢܵܫܵܐ ܘܲܥܕܲܡܵܐ ܠܲܒ̣ܥܝܼܪܵܐ: ܘܲܥܕܲܡܵܐ ܠܟ̣ܠ ܕܐܸܫܬ̇ܟܲܚ ܘܐܵܦ ܟܠܗܹܝܢ ܩܘܼܪ̈ܝܵܐ ܕܐܸܫܬ̇ܟܲܚ: ܐܵܘܩܸܕܼܘ ܐܸܢܹܝܢ ܒܢܘܼܪܵܐ.
1 ܘܓܲܒ̣ܪܵܐ ܕܝܼܣܪܵܝܹܠ ܝܼܡܵܘ ܒܡܲܨܦܝܵܐ: ܘܐܸܡܲܪܘ: ܕܓܲܒ̣ܪܵܐ ܡܸܢܲܢ ܠܵܐ ܢܸܬܸ̇ܠ ܒܲܪܬܹܗ ܠܲܒ̣̈ܢܲܝ ܒܸܢܝܵܡܹܝܢ ܠܐܲܢ̄ܬ̇ܬ̣ܵܐ.
2 ܘܐܸܬ̣ܵܘ ܥܕܲܡܵܐ ܠܒܹܝܬ̣ ܐܹܝܠ: ܘܝܼܬܸܒ̣ܘ ܬܲܡܵܢ ܥܕܲܡܵܐ ܠܪܲܡܫܵܐ ܩܕܼܵܡ ܐܲܠܵܗܵܐ: ܘܐܲܪܝܼܡܘ ܩܵܠܗܘܿܢ ܘܲܒ̣ܟ̣ܵܘ ܒܟ̣ܵܬ̣ܵܐ ܪܲܒ̇ܬ̣ܵܐ.
3 ܘܐܸܡܲܪܘ: ܠܡܵܢܵܐ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܗܘ̤ܵܬ̣ ܗܵܕܹܐ ܒܹܝܬ̣ ܝܼܣܪܵܝܹܠ: ܕܢܸܛܥܹܐ ܝܵܘܡܵܢܵܐ ܡ̣ܢ ܝܼܣܪܵܝܹܠ ܚܲܕܼ ܫܲܒ̣ܛܵܐ.
4 ܘܡ̣ܢ ܒܵܬܲܪ ܝܵܘܡܵܐ: ܩܲܕܸ̇ܡ̣ܘ ܥܲܡܵܐ: ܘܲܒ̣ܢܵܘ ܬܲܡܵܢ ܡܲܕܼܒ̇ܚܵܐ: ܘܐܲܣܸܩ̣ܘ ܥܠܵـ̈ـܘܵܬ̣ܵܐ ܘܫܲܠܡܹ̈ܐ.
5 ܘܐܸܡܲܪܘ ܒ̈ܢܲܝ ܝܼܣܪܵܝܹܠ: ܡܲܢܘܼ ܕܠܵܐ ܣܠܸܩ ܒܟܸܢܫܵܐ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ ܩܕܼܵܡ ܡܵܪܝܵܐ: ܡܸܛܠ ܕܡܵܘܡܵܬ̣ܵܐ ܪܲܒ̇ܬ̣ܵܐ ܗܘ̤ܵܬ̣ ܕܡ̇ܢ ܕܠܵܐ ܣܵܠܹܩ ܩܕܼܵܡ ܡܵܪܝܵܐ ܠܡܲܨܦ̄ܝܵܐ ܡܡܵܬ̣ ܢܡܘܼܬ̣.
6 ܘܐܸܬ̇ܬ̇ܘܝܼܘ ܒ̈ܢܲܝ ܝܼܣܪܵܝܹܠ ܥܲܠ ܒ̈ܢܲܝ ܒܸܢܝܵܡܹܝܢ ܐܲܚܘܼܗܘܿܢ: ܘܐܵܡ̇ܪܝܼܢ: ܝܵܘܡܵܢܵܐ ܥܢܲܕܼ ܫܲܒ̣ܛܵܐ ܚܲܕܼ ܡ̣ܢ ܝܼܣܪܵܝܹܠ.
7 ܘܐܸܡܲܪ: ܡܵܢܵܐ ܢܸܥܒܸ̇ܕܼ ܠܗܵܢܘܿܢ ܕܐܸܫܬ̇ܒܸܩܘ ܕܠܵܐ ܢܸܫܹ̈ܐ: ܕܲܚܢܲܢ ܝܼܡܲܝܢ ܒܡܵܪܝܵܐ ܕܠܵܐ ܢܸܬܸ̇ܠ ܠܗܘܿܢ ܢܸܫܹ̈ܐ.
8 ܘܐܵܡ̇ܪܝܼܢ: ܡ̇ܢ ܚܲܕܼ ܡ̣ܢ ܫܲܒ̣̈ܛܹܐ ܕܝܼܣܪܵܝܹܠ ܕܠܵܐ ܣܠܸܩ ܩܕܼܵܡ ܡܵܪܝܵܐ ܠܡܲܨ̄ܦܝܵܐ ܘܠܵܐ ܐܸܬ̣ܵܘ ܓܲܒ̣ܪܹ̈ܐ ܠܡܲܫܪܝܼܬ̣ܵܐ: ܡ̣ܢ ܝܵܬ̣ܒܲܝ̈ ܝܵܒ̣ܝܼܫ ܕܓܸܠܥܵܕܼ.
9 ܘܐܸܬ̣ܡ̱ܢܝܼܘ ܬܲܡܵܢ ܥܲܡܵܐ: ܘܠܵܐ ܐܸܫܬ̇ܟܲܚ̣ ܐ̄ܢܵܫ ܬܲܡܵܢ ܡ̣ܢ ܝܵܬ̣ܒܲܝ̈ ܝܵܒ̣ܝܼܫ ܕܓܸܠܥܵܕܼ.
10 ܘܫܲܕܲܪܘ ܠܬܲܡܵܢ ܥܲܡܵܐ: ܬܪܸܥܣܲܪ ܐܲܠܦ̈ܝܼܢ ܓܲܒ̣ܪ̈ܝܼܢ ܡ̣ܢ ܒ̈ܢܲܝ ܚܲܝܠܵܐ. ܘܦܲܩܸܕܼܘ ܐܸܢܘܿܢ: ܘܐܸܡܲܪܘ ܠܗܘܿܢ: ܙܸܠܘ ܚܪܘܿܒ̣ܘ ܠܝܵܬ̣ܒܲܝ̈ ܝܵܒ̣ܝܼܫ ܕܓܸܠܥܵܕܼ ܒܦܘܼܡܵܐ ܕܚܲܪܒܵܐ: ܘܢܸܫܹ̈ܐ ܘܲܛܠܵܝܹ̈ܐ.
11 ܗܵܟܲܢܵܐ ܥܒܸܕܼܘ ܠܟ̣ܠ ܓܲܒ̣ܪܵܐ. ܘܲܠܟ̣ܠ ܐܲܢ̄ܬ̇ܬ̣ܵܐ ܕܚܲܟ̣ܡܵܗ̇ ܓܒܲܪ ܚܪܘܿܒ̣ܘ.
12 ܘܐܸܫܟܲܚܘ ܡ̣ܢ ܝܵܬ̣ܒܲܝ̈ ܝܵܒ̣ܝܼܫ ܕܓܸܠܥܵܕܼ: ܐܲܪܒܲܥܡܵܐܐ ܥܠܲܝ̈ܡܵܬ̣ܵܐ ܒܬ̣̈ܘܼܠܬܵܐ ܕܠܵܐ ܚܟܲܡܘ ܐܸܢܹܝܢ ܓܲܒ̣ܪܹ̈ܐ. ܘܐܲܝܬ̇ܝܼܘ ܐܸܢܹܝܢ ܠܡܲܫܪܝܼܬ̣ܵܐ ܠܫܝܼܠܘܿ ܕܒܲܐܪܥܵܐ ܕܲܟ̣ܢܲܥܢ.
13 ܘܫܲܕܲܪ ܟܠܹܗ ܥܲܡܵܐ: ܘܐܸܡܲܪܘ ܠܒܸܢܝܵܡܹܝܢ ܕܒܲܫܩܝܼܦܵܐ ܕܪܲܡܘܿܢ: ܘܲܩܪܵܘ ܠܹܗ ܫܠܵܡܵܐ.
14 ܘܐܸܬ̣ܵܐ ܒܸܢܝܵܡܹܝܢ ܒܙܲܒ̣ܢܵܐ ܗܵܘ̇: ܘܝܲܗ̄ܒ̣ܘ ܠܗܘܿܢ ܢܸܫܹ̈ܐ ܕܐܲܚܝܼܘ ܡܟܢ ܢܸܫܹ̈ܐ ܕܝܵܒ̣ܝܼܫ ܕܓܸܠܥܵܕܼ ܘܠܵܐ ܡ̈ܠܲܝ ܠܗܘܿܢ.
15 ܘܥܲܡܵܐ ܐܸܬ̇ܬ̇ܘܝܼ ܥܲܠ ܒܸܢܝܵܡܹܝܢ: ܡܸܛܠ ܕܲܥܒܲܕܼ ܡܵܪܝܵܐ ܬܘܼܪ̱ܥܬ̣ܵܐ ܒܫܲܒ̣̈ܛܹܐ ܕܝܼܣܪܵܝܹܠ.
16 ܘܐܸܡܲܪܘ ܣܵܒܹ̈ܐ ܕܥܲܡܵܐ: ܡܵܢܵܐ ܢܸܥܒܸ̇ܕܼ ܠܐܲܝܠܹܝܢ ܕܐܸܫܬ̇ܒܸܩ̣ܘ ܕܠܵܐ ܢܸܫܹ̈ܐ: ܗܵܠܹܝܢ ܕܐܸܫܬ̇ܚܲܪܘ: ܡܸܛܠ ܕܣܵܦ̣ ܠܗܹܝܢ ܢܸܫܹ̈ܐ ܕܒܸܢܝܵܡܹܝܢ.
17 ܘܐܸܡܲܪܘ ܕܢܸܫܬ̇ܒܸܩ ܫܲܪܟܵܢܵܐ ܕܒܸܢܝܵܡܹܝܢ: ܘܠܵܐ ܢܸܬ̇ܛܥܹܐ ܫܲܒ̣ܛܵܐ ܡ̣ܢ ܝܼܣܪܵܝܹܠ.
18 ܚܢܲܢ ܓܹܝܪ ܠܵܐ ܡܸܫܟ̇ܚܝܼܢ ܚ̄ܢܲܢ ܕܢܸܬܸ̇ܠ ܠܗܘܿܢ ܢܸܫܹ̈ܐ ܡ̣ܢ ܒ̈ܢܵܬܲܢ. ܡܸܛܠ ܕܝܼܡ̣ܵܘ ܒ̈ܢܲܝ ܝܼܣܪܵܝܹܠ: ܘܐܸܡܲܪܘ: ܠܝܼܛ ܗ̄ܘ̣ ܡ̇ܢ ܕܢܸܬܸ̇ܠ ܐܲܢ̄ܬ̇ܬ̣ܵܐ ܠܒܸܢܝܵܡܹܝܢ.
19 ܘܐܸܡܲܪܘ: ܗܵܐ ܚܲܓܵܐ ܕܡܵܪܝܵܐ ܗܵܘܹ̇ܐ ܒܫܝܼܠܘܿ ܡ̣ܢ ܥܸܕܵܢ ܠܥܸܕܵܢ: ܡ̣ܢ ܓܲܪܒ̇ܝܵܐ ܕܒܹܝܬ̣ ܐܹܝܠ: ܡ̣ܢ ܡܲܕܼܢܵܚܲܝ̈ ܫܸܡܫܵܐ ܡ̣ܢ ܫܒ̣ܝܼܠܵܐ ܕܣܵܠܹܩ ܡ̣ܢ ܒܹܝܬ̣ ܐܹܝܠ ܠܲܫܟܹܝܡ: ܡ̣ܢ ܬܲܝ̱ܡܢܵܐ ܕܲܠܒ̣ܘܿܢܵܐ.
20 ܘܦܲܩܸܕܼܘ ܠܲܒ̣̈ܢܲܝ ܒܸܢܝܵܡܹܝܢ: ܘܐܸܡܲܪܘ ܠܗܘܿܢ: ܙܸܠܘ ܟܡܲܢܘ ܒܟܲܪ̈ܡܹܐ.
21 ܘܡܵܐ ܕܲܚܙܲܝܬ̇ܘܿܢ ܕܲܢܦܲܩ̣ ܡ̣ܢ ܒ̈ܢܵܬ̣ ܫܝܼܠܘܿ ܠܡܸܩܲܫ ܒܲܦ̈ܠܲܓܹܐ: ܦܘܿܩܘ ܡ̣ܢ ܟܲܪ̈ܡܹܐ: ܘܲܚܛܘܿܦܘ ܠܟ̣ܘܿܢ ܓܒܲܪ ܐܲܢ̄ܬ̇ܬܹܗ ܡ̣ܢ ܒ̈ܢܵܬ̣ ܫܝܼܠܘܿ: ܘܙܸܠܘ ܠܐܲܪܥܵܐ ܕܒܸܢܝܵܡܹܝܢ.
22 ܘܐܸܢ ܐܸܬ̣ܵܘ ܐܲܒ̣ܵܗܲܝ̈ܗܹܝܢ ܐܵܘ ܐܲܚܲܝ̈ܗܹܝܢ ܠܲܡܕܼܵܢ ܩܕܼܵܡܲܝܢ: ܐܵܡ̇ܪܝܼܢ ܚ̄ܢܲܢ ܠܗܘܿܢ: ܪܲܚܸܡܘ ܥܠܲܝܗܘܿܢ: ܡܸܛܠ ܕܠܵܐ ܕܒܲܪܘ ܓܒܲܪ ܐܲܢ̄ܬ̇ܬܹܗ ܒܲܩܪܵܒ̣ܵܐ. ܠܵܐ ܗ̄ܘ̣ܵܐ ܐܲܢ̄ܬ̇ܘܿܢ ܝܲܗ̄ܒ̣ܬ̇ܘܿܢ ܐܸܢܹܝܢ ܠܗܘܿܢ ܕܬܸܚܛܘܿܢ.
23 ܘܲܥܒܲܕܼܘ ܗܵܟܲܢܵܐ ܒ̈ܢܲܝ ܒܸܢܝܵܡܹܝܢ: ܘܲܢܣܲܒ̣ܘ ܠܗܘܿܢ ܢܸܫܹ̈ܐ ܠܟ̣ܠܗܘܿܢ ܡ̣ܢ ܢܵܩ̈ܫܵܬ̣ ܦ̈ܠܲܓܹ̇ܐ ܕܲܚܛܲܦܘ ܘܲܗ̣ܦܲܟ̣ܘ ܘܐܸܬ̣ܵܘ ܠܝܵܪܬ̇ܘܼܬ̣ܗܘܿܢ: ܘܲܒ̣ܢܵܘ ( ) ܘܝܼܬܸܒ̣ܘ ܒܗܹܝܢ.
24 ܘܐܸܙܲܠܘ ܡ̣ܢ ܬܲܡܵܢ ܒ̈ܢܲܝ ܝܼܣܪܵܝܹܠ ܒܙܲܒ̣ܢܵܐ ܗܵܘ̇: ܐ̄ܢܵܫ ܠܫܲܒ̣ܛܹܗ ܘܲܠܫܲܪܒ̇ܬܹܗ: ܘܲܢܦܲܩ̣ܘ ܡ̣ܢ ܬܲܡܵܢ ܐ̄ܢܵܫ ܠܝܵܪܬ̇ܘܼܬܹܗ.
25 ܘܲܒ̣ܝܵܘ̈ܡܵܬ̣ܵܐ ܗܵܢܘܿܢ: ܠܲܝܬ̇ ܗ̄ܘ̣ܵܐ ܡܲܠܟܵܐ ܒܹܝܬ̣ ܝܼܣܪܵܝܹܠ ܘܟ̣ܠ ܐ̄ܢܵܫ ܐܲܝܟ̣ ܕܫܲܦܝܼܪ ܒܥܲܝܢܵܘ̈ܗܝ: ܗܵܘ̇ ܗ̄ܘ̣ ܥܵܒܹܕܼ ܗ̄ܘ̣ܵܐ.