1 ܘܡ̣ܢ ܒܵܬܲܪ ܕܡܝܼܬ̣ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ: ܐܸܡܲܪ ܡܵܪܝܵܐ ܠܝܼܫܘܿܥ ܒܲܪܢܘܿܢ ܡܫܲܡܫܵܢܹܗ ܕܡܘܼܫܹܐ.
2 ܡܘܼܫܹܐ ܥܲܒ̣ܕ̇ܝ ܡܝܼܬ̣: ܡܸܟܹ̇ܝܠ ܩܘܼܡ ܥܒܲܪ ܝܘܿܪܕ̇ܢܵܢ ܗܵܢܵܐ: ܐܲܢ̄ܬ̇ ܘܟ݂ܠܹܗ ܥܲܡܵܐ ܗܵܢܵܐ: ܠܐܲܪܥܵܐ ܕܝܵܗܹ̇ܒ̣ ܐ̄ܢܵܐ ܠܗܘܿܢ ܠܲܒ̣̈ܢܲܝ ܝܼܣܪܵܝܹܠ.
3 ܟܠ ܐܲܬ̣ܪܵܐ ܕܬܸܕ݂ܪܘܿܟ݂ ܒܹܗ ܦܸܣܬ̣ܵܐ ܕܪܸܓ̣ܠ̱ܟ݂ܘܿܢ: ܠܟܘܿܢ ܢܸܗܘܹܐ: ܐܲܝܟ݂ ܕܐܸܡ̇ܪܹܬ̣ ܠܡܘܼܫܹܐ.
4 ܡ̣ܢ ܡܲܕ݂ܒ̇ܪܵܐ ܘܛܘܼܪܵܐ ܕܠܸܒ̣ܢܵܢ ܗܵܢܵܐ ܘܲܥܕܲܡܵܐ ܠܲܦܪܵܬ̣ ܢܲܗܪܵܐ ܪܲܒܵܐ: ܘܟ݂ܠܵܗ̇ ܐܲܪܥܵܐ ܕܚܹܬܵܝܹ̈ܐ: ܘܲܥܕܲܡܵܐ ܠܝܲܡܵܐ ܪܲܒܵܐ: ܒܹܝܬ̣ ܡܲܥܪܵܒܲܝ ܫܸܡܫܵܐ ܢܸܗܘܹܐ ܬܚܘܼܡܟ݂ܘܿܢ.
5 ܘܠܵܐ ܢܩܘܼܡ ܐ̄ܢܵܫ ܩܕ݂ܵܡܲܝܟ̇ܘܿܢ ܟܠܗܘܿܢ ܝܵܘ̈ܡܵܬ̣ܵܐ ܕܚܲܝܲܝ̈ܟ̇ܘܿܢ. ܘܐܲܝܟܲܢܵܐ ܕܲܗܘܹ̇ܝܬ̣ ܥܲܡ ܡܘܼܫܹܐ: ܐܸܗܘܹܐ ܐܵܦ ܥܲܡܵܟ݂: ܠܵܐ ܐܲܪܦܹܝܟ݂: ܘܠܵܐ ܐܸܫܒ̇ܩܵܟ݂.
6 ܐܸܬ̣ܚܲܝܲܠ ܘܐܸܬ̣ܥܲܫܲܢ ܛܵܒ̣: ܡܸܛܠ ܕܐܲܢ̄ܬ̇ ܬܵܘܪ̱ܬ̣ܝܼܘܗܝ ܠܥܲܡܵܐ ܗܵܢܵܐ: ܐܲܪܥܵܐ ܕܝܼܡ̇ܝܼܬ̣ ܠܐܲܒ̣ܵܗܲܝܗܘܿܢ ܠܡܸܬܲܠ ܠܗܘܿܢ.
7 ܒܲܠܚܘܿܕ݂ ܐܸܬ̣ܚܲܝܲܠ ܘܐܸܬ̣ܥܲܫܲܢ ܛܵܒ̣: ܠܡܸܛܲܪ ܘܲܠܡܸܥܒܲܕ݂ ܟܠ ܢܵܡܘܿܣܹ̈ܐ ܕܦܲܩܕ݂ܵܟ݂ ܡܘܼܫܹܐ ܥܲܒ̣ܕ̇ܝ: ܠܵܐ ܬܸܥܒܲܪ ܡܸܢܗܘܿܢ ܠܵܐ ܠܝܲܡܝܼܢܵܐ ܘܠܵܐ ܠܣܸܡܵܠܵܐ: ܡܸܛܠ ܕܬܲܨܠܲܚ ܒܟ݂ܠ ܕܲܬ̣ܗܲܠܸܟ݂.
8 ܘܠܵܐ ܢܸܥܢܲܕ݂ ܗܵܢܵܐ ܣܸܦܪܵܐ ܕܢܵܡܘܿܣܵܐ ܡ̣ܢ ܦܘܼܡܵܟ݂: ܐܸܠܵܐ ܗ̤ܘܲܝܬ̇ ܪܵܢܹ̇ܐ ܒܹܗ ܒܠܸܠܝܵܐ ܘܒ̣ܐܝܼܡܵܡܵܐ: ܕܬܸܛܲܪ ܘܬܸܥܒܸ̇ܕ݂ ܟܠ ܕܲܟ݂ܬ̣ܝܼܒ̣ ܒܹܗ. ܕܬܲܨܠܲܚ ܘܬܲܟ݂ܫܲܪ.
9 ܗܵܐ ܦܲܩܸܕ̇ܬܵܟ݂: ܐܸܬ̣ܚܲܝܲܠ ܘܐܸܬ̣ܥܲܫܲܢ: ܠܵܐ ܬܸܕ݂ܚܲܠ: ܘܠܵܐ ܬܙܘܼܥ: ܡܸܛܠ ܕܥܲܡܵܟ݂ ܗ̄ܘ̣ ܡܵܪܝܵܐ ܐܲܠܵܗܵܟ݂ ܐܲܬܲܪ ܘܐܵܙܹ̇ܠ ܐܲܢ̄ܬ̇.
10 ܘܦܲܩܸܕ݂ ܝܼܫܘܿܥ ܠܫܲܠܝܼܛܵܢܵܘ̈ܗܝ ܕܥܲܡܵܐ: ܘܲܠܣܵܦܪ̈ܵܘܗܝ: ܘܐܸܡܲܪ ܠܗܘܿܢ.
11 ܥܒܲܪܘ ܒܓ̣ܵܘ ܡܲܫܪܝܼܬ̣ܵܐ: ܘܦܲܩܸܕ݂ܘ ܠܥܲܡܵܐ: ܘܐܸܡܲܪܘ ܠܗܘܿܢ: ܛܲܝܸܒ̣ܘ ܠܟ݂ܘܿܢ ܙܘܵܕܹ̈ܐ: ܡܸܛܠ ܕܡܸܟܵܐ ܠܲܬ̣ܠܵܬ̣ܵܐ ܝܵܘ̈ܡܝܼܢ ܥܵܒ̣ܪܝܼܢ ܐ̄ܢܬ̇ܘܿܢ ܝܘܿܪܕܢܵܢ ܗܵܢܵܐ: ܠܡܸܥܲܠ ܠܡܹܐܪܲܬ̣ ܐܲܪܥܵܐ ܕܡܵܪܝܵܐ ܐܲܠܵܗܟ݂ܘܿܢ ܝܵܗܹ̇ܒ̣ ܠܟ݂ܘܿܢ ܠܡܹܐܪܬܵܗ̇.
12 ܘܲܠܪܘܼܒܹܝܠ: ܘܲܠܓܵܕ݂: ܘܲܠܦܸܠܓܹܗ ܕܫܲܒ̣ܛܵܐ ܕܲܡܢܲܫܹܐ ܐܸܡܲܪ ܝܼܫܘܿܥ.
13 ܐܸܬ̇ܕܲܟ݂ܪܘ ܦܸܬ̣ܓ̣ܵܡܵܐ ܕܦܲܩܸܕ݂ܟ݂ܘܿܢ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ: ܘܐܸܡܲܪ ܠܟ݂ܘܿܢ ܡܵܪܝܵܐ ܐܲܠܵܗܟ݂ܘܿܢ ܡܢܝܼܚ ܠܟ݂ܘܿܢ: ܘܝܵܗܹ̇ܒ̣ ܠܟ݂ܘܿܢ ܐܲܪܥܵܐ ܗܵܕܹܐ.
14 ܢܸܫܲܝ̈ܟ̇ܘܿܢ ܘܝܼܩܲܪܬ̇ܟ݂ܘܿܢ: ܘܩܸܢܝܵܢܟ݂ܘܿܢ: ܢܸܬ̇ܒ̣ܘܼܢ ܒܐܲܪܥܵܐ ܕܝܲܗ̄ܒ̣ ܠܟ݂ܘܿܢ ܡܘܼܫܹܐ: ܒܥܸܒ̣ܪܵܐ ܕܝܘܿܪܕ̇ܢܵܢ. ܘܐܲܢ̄ܬ̇ܘܿܢ ܥܒܲܪܘ ܟܲܕ݂ ܡܙܲܝܢܝܼܢ ܐ̄ܢܬ̇ܘܿܢ ܩܕ݂ܵܡ ܐܲܚܲܝ̈ܟ̇ܘܿܢ: ܟܠܟ݂ܘܿܢ ܓܲܢ̄ܒܵܪ̈ܲܝ ܚܲܝܠܵܐ: ܘܥܲܕܲܪܘ ܐܸܢܘܿܢ.
15 ܥܕܲܡܵܐ ܕܲܢܢܝܼܚ ܡܵܪܝܵܐ ܠܐܲܚܲܝ̈ܟ̇ܘܿܢ ܐܲܟ݂ܘܵܬ̣ܟ݂ܘܿܢ: ܘܢܹܐܪܬ̇ܘܿܢ ܐܵܦ ܗܸܢܘܿܢ ܐܲܪܥܵܐ ܕܡܵܪܝܵܐ ܐܲܠܵܗܟ݂ܘܿܢ ܝܵܗܹ̇ܒ̣: ܘܬܸܗܦܟ݂ܘܿܢ ܠܐܲܪܥܵܐ ܕܝܵܪܬ̇ܘܼܬ̣ܟ݂ܘܿܢ: ܘܬܹܐܪܬ̇ܘܼܢܵܗ̇: ܕܝܲܗ̄ܒ̣ ܠܟ݂ܘܿܢ ܡܘܼܫܹܗ ܥܲܒ̣ܕܹ̇ܗ ܕܡܵܪܝܵܐ ܒܥܸܒ̣ܪܵܐ ܕܝܘܿܪܕ̇ܢܵܢ: ܡ̣ܢ ܡܲܕ݂ܢܚܲܝ̈ ܫܸܡܫܵܐ.
16 ܘܲܥܢ̣ܵܘ ܒ̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܲܒ̣̈ܢܲܝ ܡܢܲܫܹܐ: ܘܐܸܡܲܪܘ ܠܝܼܫܘܿܥ: ܟܠܡܸܕܸ̇ܡ ܕܦܵܩܹ̇ܕ݂ ܐܲܢ̄ܬ̇ ܠܲܢ ܢܸܥܒܸ̇ܕ݂: ܘܠܲܐܝܟܵܐ ܕܲܬ̣ܫܲܕ̇ܪܲܢ ܢܹܐܙܲܠ.
17 ܘܐܲܝܟܲܢܵܐ ܕܫܵܡ̇ܥܝܼܢ ܗ̄ܘܲܝܢ ܠܡܘܼܫܹܐ: ܗܵܟܲܢܵܐ ܢܸܫ̱ܡܥܵܟ݂. ܒܲܠܚܘܿܕ݂ ܡܵܪܝܵܐ ܐܲܠܵܗܵܟ݂ ܢܸܗܘܹܐ ܥܲܡܵܟ݂: ܐܲܝܟܲܢܵܐ ܕܲܗܘ̤ܵܐ ܥܲܡ ܡܘܼܫܹܐ.
18 ܘܟ݂ܠ ܐ̄ܢܵܫ ܕܢܸܬ̣ܚܪܸܐ ܥܲܡܵܟ݂: ܘܠܵܐ ܢܸܫܡܲܥ ܡܸܠܬ̣ܵܟ݂ ܠܟ݂ܠܡܸܕܸ̇ܡ ܕܦܵܩܹ̇ܕ݂ ܐܲܢ̄ܬ̇ ܠܹܗ: ܢܸܬ̣ܩܛܸܠ. ܒܲܠܚܘܼܕ݂ ܐܸܬ̣ܚܲܝܲܠ ܘܐܸܬ̣ܥܲܫܲܢ.
1 ܘܫܲܕܲܪ ܝܼܫܘܿܥ ܒܲܪܢܘܿܢ ܡ̣ܢ ܣܵܛܝܼܡ ܬܪܹܝܢ ܓܲܒ̣ܪ̈ܝܼܢ ܕܝܵܕ݂ܥܝܼܢ ܒܐܲܪܥܵܐ: ܘܐܸܡܲܪ ܠܗܘܿܢ: ܙܸܠܘ ܚܙܵܘ ܠܐܲܪܥܵܐ ܕܐܝܼܪܝܼܚܘܿ ܘܐܸܙܲܠܘ ܘܥܲܠܘ ܠܘܵܬ̣ ܐܲܢ̄ܬ̇ܬ̣ܵܐ ܙܵܢܝܼܬ̣ܵܐ ܕܲܫܡܵܗ̇ ܪܵܚܵܒ̣: ܘܒ̣ܵܬ̣ܘ ܬܲܡܵܢ.
2 ܘܐܸܬ̣ܐ̱ܡܲܪ ܠܡܲܠܟܵܐ ܕܐܝܼܪܝܼܚܘܿ: ܕܗܵܐ ܓܲܒ̣ܪܹ̈ܐ ܐܸܬ̣ܵܘ ܠܗܵܪܟܵܐ ܒܠܸܠܝܵܐ ܡ̣ܢ ܒ̈ܢܲܝ ܝܼܣܪܵܝܹܠ ܠܡܸܓܲܫ ܐܲܪܥܵܐ.
3 ܘܫܲܕܲܪ ܡܲܠܟܵܐ ܕܐܝܼܪܝܼܚܘܿ ܠܘܵܬ̣ ܪܵܚܵܒ̣: ܘܐܸܡܲܪ ܠܵܗ̇: ܐܲܦܸܩ ܠܓܲܒ̣ܪܹ̈ܐ ܕܥܲܠ̣ܘ ܠܘܵܬܹܟ݂ܝ ܒܠܸܠܝܵܐ: ܡܸܛܠ ܕܲܠܡܸܓܲܫ ܐܲܪܥܲܢ ܐܸܬ̣ܵܘ.
4 ܘܕܸܒ̣ܪܲܬ̤ ܐܲܢ̄ܬ̇ܬ̣ܵܐ ܠܲܬ̣ܪ̈ܲܝܗܘܿܢ ܓܲܒ̣ܪܹ̈ܐ ܘܛܲܫܝܲܬ̤ ܐܸܢܘܿܢ: ܘܐܸܡܪܲܬ̤ ܫܲܪܝܼܪܵܐܝܼܬ̣ ܐܸܬ̣ܵܘ ܠܘܵܬ̣ܝ ܓܲܒ̣ܪܹ̈ܐ: ܘܠܵܐ ܝܼܕ݂ܥܹ̇ܬ̣ ܡ̣ܢ ܐܲܝܡܸܟܵܐ ܐܸܢܘܿܢ.
5 ܘܟܲܕ݂ ܗܘ̤ܵܐ ܙܲܒ̣ܢܵܐ ܕܡܸܬ̇ܬ̇ܚܸܕ݂ ܬܲܪܥܵܐ ܒܪܲܡܫܵܐ ܢܦܲܩ̣ܘ ܠܗܘܿܢ: ܘܠܵܐ ܝܸܕ݂ܥܹܬ̣ ܠܐܲܝܟܵܐ ܐܸܙܲܠ̣ܘ. ܦܘܿܩܘ ܥܓܲܠ ܒܵܬܲܪܗܘܿܢ: ܡܸܛܠ ܕܡܲܕ݂ܪ̱ܟ݂ܝܼܢ ܐ̄ܢܬ̇ܘܿܢ ܠܗܘܿܢ.
6 ܘܗ̤ܝ ܐܲܣܩܲܬ̤ ܐܸܢܘܿܢ ܠܐܸܓܵܪܵܐ: ܘܛܲܫܝܲܬ̤ ܐܸܢܘܿܢ ܒܹܝܬ̣ ܟܲܪ̈ܣܒ̣ܵܢܹܐ ܕܟܸܬܵܢܵܐ ܕܣܝܼܡܝܼܢ ܗ̄ܘ̣ܵܘ ܠܵܗ̇ ܥܲܠ ܐܸܓܵܪܵܐ.
7 ܘܓܲܒ̣ܪܹ̈ܐ ܢܦܲܩ̣ܘ ܒܵܬܲܪܗܘܿܢ ܒܐܘܼܪܚܵܐ ܕܝܘܿܪܕ̇ܢܵܢ ܕܥܲܠ ܡܲܥܒܲܪܬܵܐ: ܘܬܲܪܥܵܐ ܐܸܚܲܕ݂ܘ ܒܵܬܲܪ ܕܲܢܦܲܩ̣ܘ ܪܵܕܘܿܦܹܐ ܒܵܬܲܪ ܓܵܫܘܿܫܹ̈ܐ.
8 ܘܗܸܢܘܿܢ ܥܕܲܡܵܐ ܠܗܵܫܵܐ ܠܵܐ ܫܟܸܒ̣ܘ ܗ̄ܘ̣ܵܘ: ܘܗ̤ܝ ܣܸܠܩܲܬ̤ ܠܘܵܬ̣ܗܘܿܢ ܠܐܸܓܵܪܵܐ.
9 ܘܐܸܡܪܲܬ̤ ܠܓܲܒ̣ܪܹ̈ܐ: ܕܐܲܫ̱ܠܡܵܗ̇ ܠܟ݂ܘܿܢ ܡܵܪܝܵܐ ܠܐܲܪܥܵܐ: ܘܢܸܦܠܲܬ̤ ܕܸܚܠܲܬ̣ܟ݂ܘܿܢ ܥܠܲܝܢ: ܐܵܦ ܕܚܸܠ̣ܘ ܟܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ ܡ̣ܢ ܩܕ݂ܵܡܲܝܟ̇ܘܿܢ.
10 ܡܸܛܠ ܕܫ̣ܡܲܥ̄ܢ ܕܐܵܘܒܸ̇ܫ ܡܵܪܝܵܐ ܡܲـ̈ـܝܵܐ ܕܝܲܡܵܐ ܕܣܘܿܦ ܡ̣ܢ ܩܕ݂ܵܡܲܝܟ̇ܘܿܢ: ܟܲܕ݂ ܢܦܲܩܬ̇ܘܿܢ ܡ̣ܢ ܡܸܨܪܹܝܢ ܘܡܸܕܸ̇ܡ ܕܲܥܒܲܕ̇ܬ̇ܘܿܢ ܠܲܬ̣ܪܹܝܢ ܡܲܠܟܹ̈ܐ ܕܐܵܡܘܿܪ̈ܵܝܹܐ: ܠܣܝܼܚܘܿܢ ܘܲܠܥܘܿܓ̣ ܕܲܚܪܲܒ̣ܬ̇ܘܿܢ ܐܸܢܘܿܢ.
11 ܘܟܲܕ݂ ܫܡܲܥ̄ܢ ܙܵܥ̣ ܠܸܒܲܢ: ܘܠܵܐ ܐܸܫܬܲܚܪܲܬ̤ ܪܘܼܚܵܐ ܒܐ̄ܢܵܫ ܡܸܢܲܢ ܡ̣ܢ ܩܕ݂ܵܡܲܝܟ̇ܘܿܢ. ܡܸܛܠ ܕܡܵܪܝܵܐ ܐܲܠܵܗܟ݂ܘܿܢ: ܗܘ̤ܝܼܘ ܐܲܠܵܗܵܐ ܒܲܫܡܲܝܵܐ ܡ̣ܢ ܠܥܸܠ: ܘܒܲܐܪܥܵܐ ܡ̣ܢ ܠܬܲܚܬ̇.
12 ܡܸܟܹ̇ܝܠ ܝܼܡܵܘ ܠܝܼ ܒܡܵܪܝܵܐ: ܡܸܛܠ ܕܥܸܒ̣ܕܹ̇ܬ̣ ܒܟ݂ܘܿܢ ܛܲܝܒ̇ܘܼܬ̣ܵܐ. ܘܲܥܒܸܕ݂ܘ ܘܐܵܦ ܐܲܢ̄ܬ̇ܘܿܢ ܒܝܼ: ܘܲܒ̣ܒܹܝܬ̣ ܐܵܒ̣ܝ ܛܲܝܒ̇ܘܼܬ̣ܵܐ: ܘܗܲܒ̣ܘ ܠܝܼ ܐܵܬ̤ܵܐ ܕܩܘܼܫܬܵܐ.
13 ܘܐܲܚܵܘ ܠܝܼ: ܘܠܵܐܒ̣ܝ: ܘܠܹܐܡܝ: ܘܠܲܐܚܲܝ̈: ܘܠܲܐܚ̈ܘܵܬ̣ܝ: ܘܲܠܟ݂ܠ ܕܐܝܼܬ̣ ܠܲܢ: ܘܦܲܨܵܘ ܢܲܦ̮̈ܫܵܬܲܢ ܡ̣ܢ ܡܵܘܬܵܐ.
14 ܘܐܸܡܲܪܘ ܠܵܗ̇ ܓܲܒ̣ܪܹ̈ܐ: ܢܲܦ̮̈ܫܵܬܲܢ ܕܝܼܠܲܢ ܝܵܗ̄ܒ̇ܝܼܢ ܚ̄ܢܲܢ ܚܠܵܦܲܝܟ̇ܘܿܢ ܠܡܵܘܬܵܐ: ܐܸܢ ܠܵܐ ܕܹܝܢ ܡܚܵܘܹܝܢ ܐ̄ܢܬ̇ܘܿܢ ܡܸܠܬ̣ܵܐ ܗܵܕܹܐ. ܘܡܵܐ ܕܝܲܗ̄ܒܵܗ̇ ܠܲܢ ܡܵܪܝܵܐ ܠܐܲܪܥܵܐ ܗܵܕܹܐ: ܥܲܒ̣ܕ̇ܝܼܢ ܚ̄ܢܲܢ ܥܲܡܹܟ݂ܝ ܛܲܝܒ̇ܘܼܬ̣ܵܐ ܘܩܘܼܫܬܵܐ.
15 ܘܐܲܚܬܲܬ̤ ܐܸܢܘܿܢ ܒܚܲܒ̣ܠܵܐ ܡ̣ܢ ܟܵܘܬ̣ܵܐ: ܡܸܛܠ ܕܒܲܝܬܵܗ̇ ܒܐܸܣܬ̣ܵܐ ܗ̄ܘ̣ܵܐ ܕܫܘܼܪܵܐ: ܘܥܲܠ ܫܘܼܪܵܐ ܝܵܬ̣ܒܵܐ ܗ̄ܘ̣ܵܬ̣.
16 ܘܐܸܡܪܲܬ̤ ܠܗܘܿܢ: ܒܛܘܼܪܵܐ ܛܘܼܪܵܐ ܙܸܠܘ: ܕܲܠܡܵܐ ܢܦ̮ܓܘܼܢ ܒܟ݂ܘܿܢ ܗܵܢܘܿܢ ܕܲܢܦܲܩ̣ܘ ܒܵܬܲܪܟ݂ܘܿܢ: ܘܐܸܬ̇ܛܲܫܵܘ ܬܲܡܵܢ ܬܠܵܬ̣ܵܐ ܝܵܘ̈ܡܝܼܢ ܥܕܲܡܵܐ ܕܗܵܦܟ̇ܝܼܢ: ܘܗܵܝܕܹ̇ܝܢ ܬܹܐܙܠ̄ܘܿܢ ܒܐܘܼܪܚܟ݂ܘܿܢ.
17 ܘܐܸܡܲܪܘ ܠܵܗ̇ ܓܲܒ̣ܪܹ̈ܐ. ܡܚܲܣܹܝܢ ܚ̄ܢܲܢ ܡ̣ܢ ܡܵܘܡܵܬ̣ܵܐ ܗܵܕܹܐ ܕܐܵܘܡܝܼܬ̇ܝܼܢ.
18 ܗܵܐ ܚܢܲܢ ܥܵܐܠܝܼܢ ܚ̄ܢܲܢ ܠܐܲܪܥܵܐ: ܚܘܼܛܵܐ ܕܹܝܢ ܕܲܙܚܘܿܪܝܼܬ̣ܵܐ ܩܛܘܿܪܝ ܒܟ݂ܵܘܬ̣ܵܐ ܕܐܲܚܸܬ̇ܬ̇ܝܼܢ ܡܸܢܵܗ̇. ܘܠܲܐܒ̣ܘܼܟ݂ܝ: ܘܠܐܸܡܹܟ݂ܝ: ܘܠܲܐܚܲܝ̈ܟ̇ܝ: ܘܲܠܟ݂ܠܹܗ ܒܹܝܬ̣ ܐܲܒ̣ܘܼܟ݂ܝ: ܐܲܥܸܠܝ ܠܘܵܬܹܟ݂ܝ ܠܓ̣ܵܘ ܒܲܝܬܵܐ.
19 ܘܟ݂ܠܡ̇ܢ ܕܢܵܦܹ̇ܩ ܡ̣ܢ ܬܲܪܥܵܐ ܕܒܲܝܬܹ̇ܟ݂ܝ ܠܒܲܪ: ܕܡܹܗ ܒܪܹܫܹܗ: ܘܲܚܢܲܢ ܡܦܲܨܹܝܢ ܚ̄ܢܲܢ ܡ̣ܢ ܥܝܵܪܬܹ̇ܗ. ܘܟ݂ܠ ܡ̇ܢ ܕܢܸܗܘܹܐ ܥܲܡܹܟ݂ܝ ܒܓ̣ܵܘ ܒܲܝܬܵܐ: ܕܡܹܗ ܒܪܹܫܲܢ: ܘܲܚܢܲܢ ܚܲܝܵܒ̣ܝܼܢ ܚ̄ܢܲܢ ܥܝܵܪܬܹ̇ܗ: ܐܸܢ ܐ̄ܢܵܫ ܢܲܗܪܝܼܘܗܝ.
20 ܘܐܸܢ ܬܚܵܘܹܝܢ ܡܸܠܬ̣ܵܐ ܗܵܕܹܐ: ܗ̤ܘܲܝܢ ܡܚܲܣܹܝܢ ܡ̣ܢ ܡܵܘܡܵܬ̣ܵܐ ܗܵܕܹܐ ܕܐܵܘܡܝܼܬ̇ܝܼܢ.
21 ܘܐܸܡܪܲܬ̤ ܠܗܘܿܢ: ܐܲܝܟ݂ ܡܸܠܲܬ̣ܟ݂ܘܿܢ ܗܵܟܲܢܵܐ ܢܸܗܘܹܐ. ܘܫܲܕ̇ܪܲܬ̤ ܐܸܢܘܿܢ ܘܐܸܙܲܠܘ: ܘܩܸܛܪܲܬ̤ ܚܘܼܛܵܐ ܕܲܙܚܘܿܪܝܼܬ̣ܵܐ ܒܟ݂ܵܘܬܵܐ.
22 ܘܐܸܙܲܠܘ ܠܛܘܼܪܵܐ: ܘܝܸܬ̣ܒ̣ܘ ܬܲܡܵܢ ܬܠܵܬ̣ܵܐ ܝܵܘ̈ܡܝܼܢ: ܥܕܲܡܵܐ ܕܲܗܦܲܟ݂ܘ ܗܵܢܘܿܢ ܕܐܸܙܲܠܘ ܒܵܬܲܪܗܘܿܢ ܠܡܹܐܬ̣ܵܐ. ܘܲܒ̣ܥܵܘ ܐܸܢܘܿܢ ܗܵܢܘܿܢ ܕܲܢܦܲܩܘ ܒܵܬܲܪܗܘܿܢ ܒܟ݂ܠܵܗ̇ ܐܘܼܪܚܵܐ: ܘܟܲܕ݂ ܠܵܐ ܐܸܫܟܲܚܘ ܐܸܢܘܿܢ ܗܦܲܟ݂ܘ ܠܗܘܿܢ.
23 ܘܗܵܢܘܿܢ ܬܪܹܝܢ ܓܵܫܘܿܫ̈ܝܼܢ ܢܚܸܬ̣ܘ ܡ̣ܢ ܛܘܼܪܵܐ: ܘܲܥܒܲܪܘ ܘܐܸܙܲܠܘ ܠܘܵܬ̣ ܝܼܫܘܿܥ ܒܲܪܢܘܿܢ: ܘܐܸܫܬܲܥܝܼܘ ܠܹܗ ܟܠ ܡܸܕܸ̇ܡ ܕܲܓ̣ܕܲܫ ܠܗܘܿܢ.
24 ܘܐܸܡܲܪܘ ܠܹܗ ܠܝܼܫܘܿܥ: ܐܲܫܠ̱ܡܵܗ̇ ܡܵܪܝܵܐ ܒܐܝܼܕܲܝ̈ܢ ܠܟ݂ܠܵܗ̇ ܐܲܪܥܵܐ: ܐܵܦ ܕܚܸܠ̣ܘ ܟܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ ܡ̣ܢ ܩܕ݂ܵܡܲܝܢ.
1 ܘܩܲܕܸ̇ܡ ܝܼܫܘܿܥ ܒܨܲܦܪܵܐ ܘܲܫܩܲܠܘ ܡ̣ܢ ܣܵܛܝܼܡ: ܘܐܸܬ̣ܵܘ ܥܕܲܡܵܐ ܠܝܘܿܪܕ̇ܢܵܢ ܟܠܗܘܿܢ ܕܒܹܝܬ̣ ܝܼܣܪܵܝܹܠ: ܘܒ̣ܵܬ̣ܘ ܬܲܡܵܢ ܘܠܵܐ ܥ̣ܒܲܪܘ.
2 ܘܡ̣ܢ ܒܵܬܲܪ ܬܠܵܬ̣ܵܐ ܝܵܘ̈ܡܝܼܢ ܥ̣ܒܲܪܘ ܫܲܠܝܼܛܵܢܹ̈ܐ ܒܓ̣ܵܘ ܡܲܫܪܝܼܬ̣ܵܐ.
3 ܘܦܲܩܸܕ݂ܘ ܠܥܲܡܵܐ: ܘܐܸܡܲܪܘ ܠܗܘܿܢ: ܡܵܐ ܕܲܚܙܲܝܬ̇ܘܿܢ ܠܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ ܐܲܠܵܗܟ݂ܘܿܢ: ܘܟ݂ܵܗܢܹ̈ܐ ܘܠܹܘܵܝܹ̈ܐ ܕܲܫܩܝܼܠܝܼܢ ܠܵܗ̇: ܗܵܝܕܹ̇ܝܢ ܫܩܘܿܠܘ ܡ̣̤ ܐܲܬ̣ܪ̱ܟ݂ܘܿܢ: ܘܙܸܠܘ ܒܵܬ̣ܪܵܗ̇.
4 ܘܢܸܗܘܹܐ ܪܲܚܝܼܩ ܒܲܝܢܲܝܟ̇ܘܿܢ ܘܲܠܩܹܒ̣ܘܿܬ̣ܵܐ ܐܲܝܟ݂ ܬܪܹܝܢ ܐܲܠܦ̈ܝܼܢ ܐܲܡ̈ܝܼܢ. ܒܲܠܚܘܿܕ݂ ܒܲܡܫܘܼܚܬ̣ܵܐ: ܠܵܐ ܬܸܬ̣ܩܲܪܒ̣ܘܿܢ ܠܘܵܬ̣ܵܗ̇: ܡܸܛܠ ܕܬܸܕ̇ܥܘܼܢ ܐܘܼܪܚܵܐ ܕܬܹܐܙܠ̄ܘܿܢ ܒܵܗ̇: ܡܸܛܠ ܕܠܵܐ ܥ̣ܒܲܪܬ̇ܘܿܢ ܒܐܘܼܪܚܵܐ ܡ̣ܢ ܐܸܬ̣ܡܵܠܝ ܘܡ̣ܢ ܡܢܵܬ̣ܡܵܠܝ.
5 ܘܐܸܡܲܪ ܝܼܫܘܿܥ ܠܥܲܡܵܐ ܐܸܬ̣ܩܲܕܲܫܘ: ܡܸܛܠ ܕܲܡܚܵܪ ܥܵܒܹܕ݂ ܡܵܪܝܵܐ ܬܸܕ݂ܡܘܼܪܬܵܐ ܒܲܝܢܵܬ̣ܟ݂ܘܿܢ.
6 ܘܐܸܡܲܪ ܝܼܫܘܿܥ ܠܟ݂ܵܗܢܹ̈ܐ: ܫܩܘܿܠܘ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ: ܘܲܥܒܲܪܘ ܩܕ݂ܵܡ ܥܲܡܵܐ. ܘܲܫܩܲܠܘ ܩܹܒ̣ܘܼܬ̣ܵܐ ܕܲܕ݂ܝܵܬܹܩܹܐ ܘܲܥܒܲܪܘ ܩܕ݂ܵܡ ܥܲܡܵܐ.
7 ܘܐܸܡܲܪ ܡܵܪܝܵܐ ܠܝܼܫܘܿܥ: ܡ̣ܢ ܝܵܘܡܵܢܵܐ ܐܹܫܲܪܸܐ ܠܡܵܘܪܵܒ̣ܘܼܬ̣ܵܟ݂ ܒܥܲܝ̈ܢܲܝ ܟܠܹܗ ܝܼܣܪܵܝܹܠ. ܕܢܸܕ̇ܥܘܼܢ ܕܐܲܝܟܲܢܵܐ ܕܲܗܘܹ̇ܝܬ̣ ܥܲܡ ܡܘܼܫܹܐ: ܐܸܗܘܹܐ ܐܵܦ ܥܲܡܵܟ݂.
8 ܘܐܲܢ̄ܬ̇ ܦܲܩܸܕ݂ ܠܟ݂ܵܗܢܹ̈ܐ ܕܲܫܩܝܼܠܝܼܢ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ: ܘܐܸܡܲܪ ܠܗܘܿܢ: ܡܵܐ ܕܡܲܛܝܼܬ̇ܘܿܢ ܠܪܹܫ ܡܲـ̈ـܝܵܐ ܕܝܘܿܪܕ̇ܢܵܢ: ܒܹܗ ܒܝܘܿܪܕ̇ܢܵܢ: ܩܘܼܡܝ.
9 ܘܐܸܡܲܪ ܝܼܫܘܿܥ ܠܲܒ̣̈ܢܲܝ ܝܼܣܪܵܝܹܠ: ܩܪܘܿܒ̣ܘ ܠܗܵܪܟܵܐ: ܘܲܫܡܲܥܘ ܡܸܠܵܘ̈ܗܝ ܕܡܵܪܝܵܐ ܐܲܠܵܗܟ݂ܘܿܢ.
10 ܘܐܸܡܲܪ ܝܼܫܘܿܥ ܒܗܵܕܹܐ ܗ̤ܘܲܝܬ̇ܘܿܢ ܝܵܕ݂ܥܝܼܢ ܕܐܲܠܵܗܵܐ ܚܲܝܵܐ ܒܟ݂ܘܿܢ: ܘܚܵܪܹܒ̣ ܡ̣ܢ ܩܕ݂ܵܡܲܝܟ̇ܘܿܢ ܠܚܹܬ̣ܵܝܹ̈ܐ: ܘܠܲܟ݂ܢܲܥ̈ܢܵܝܹܐ: ܘܲܠܚܵܘܵܝܹ̈ܐ: ܘܲܠܦܲܪ̈ܙܵܝܹܐ: ܘܲܠܓܲܪ̈ܓ̇ܘ̇ܣܵܝܹܐ: ܘܠܵܐܡܘܿܪܵܝܹܐ: ܘܲܠܝܵܒ̣ܘܿܣܵܝܹ̈ܐ.
11 ܕܗܵܐ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ ܡܵܪܵܗ̇ ܕܟ݂ܠܵܗ̇ ܐܲܪܥܵܐ ܥܵܒ̣ܪܵܐ ܩܕ݂ܵܡܲܝܟ̇ܘܿܢ ܒܝܘܿܪܕ̇ܢܵܢ.
12 ܡܸܟܹ̇ܝܠ ܕܒܲܪܘ ܠܟ݂ܘܿܢ ܬܪܸܥܣܲܪ ܓܲܒ̣ܪ̈ܝܼܢ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܚܲܕ݂ ܚܲܕ݂ ܓܲܒ̣ܪܵܐ ܡ̣ܢ ܫܲܒ̣ܛܵܐ.
13 ܘܡܵܐ ܕܐܸܬ̇ܬ̇ܢܝܼܚ ܦܲܣܵـ̈ـܬ̣ܵܐ ܕܪܸ̈ܓ̣ܠܲܝܗܘܿܢ ܕܟ݂ܵܗܢܹ̈ܐ ܕܲܫܩܝܼܠܝܼܢ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ ܕܟ݂ܠܵܗ̇ ܐܲܪܥܵܐ ܒܡܲـ̈ـܝܵܐ ܕܝܘܿܪܕ̇ܢܵܢ: ܡܲـ̈ـܝܵܐ ܕܝܘܿܪܕ̇ܢܲܢ ܢܸܬ̣ܦܲܠܓܘܼܢ: ܡܲـ̈ـܝܵܐ ܕܢܵܚܬ̇ܝܼܢ ܡ̣ܢ ܠܥܸܠ ܢܩܘܼܡܘܼܢ ܐܲܝܟ݂ ܕܲܒ̣ܙܸܩܵܐ ܚܕ݂ܵܐ: ܠܣܸܛܪܵܐ ܚܲܕ݂.
14 ܘܟܲܕ݂ ܫ̣ܩܲܠܘ ܥܲܡܵܐ ܡ̣ܢ ܡܲܫܟ̇ܢܲܝ̈ܗܘܿܢ ܠܡܸܥܒܲܪ ܝܘܿܪܕ̇ܢܵܢ: ܟܵܗܢܹ̈ܐ ܕܲܫܩܝܼܠܝܼܢ ܗ̄ܘ̣ܵܘ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ: ܐܵܙܠ̄ܝܼܢ ܗ̄ܘ̣ܵܘ ܩܕ݂ܵܡ ܥܲܡܵܐ.
15 ܘܟܲܕ݂ ܡܲܛܝܼܘ ܫܩ̈ܝܼܠܲܝ ܩܹ݂ܒ̣ܘܿܬ̣ܵܐ ܥܕܲܡܵܐ ܠܝܘܿܪܕ̇ܢܵܢ: ܪܸ̈ܓ̣ܠܲܝܗܘܿܢ ܕܟ݂ܵܗܢܹ̈ܐ ܕܲܫܩܝܼܠܝܼܢ ܗ̄ܘ̣ܵܘ ܩܹܒ̣ܘܿܬ̣ܵܐ ܐܸܨܛܲܒܲܥ ܒܲܣܦܵܪ̈ܲܝ ܡܲـ̈ـܝܵܐ: ܘܝܘܿܪܕ̇ܢܵܢ ܡܠܸܐ ܗ̄ܘ̣ܵܐ ܣܦܵܐ ܒܲܣܦܵܐ ܟܠܗܘܿܢ ܝܵܘ̈ܡܵܬ̣ܵܐ ܕܲܚܨܵܕ݂ܵܐ.
16 ܘܩܵܡ̣ܘ ܡܲـ̈ـܝܵܐ ܕܢܵܚܬ̇ܝܼܢ ܗ̄ܘ̣ܵܘ ܡ̣ܢ ܠܥܸܠ ܩܵܡ̣ܘ ܐܲܝܟ݂ ܕܲܒ̣ܙܸܩܵܐ ܚܕ݂ܵܐ ܠܣܸܛܪܵܐ ܚܲܕ݂: ܐܲܪܚܸܩܘ ܛܵܒ̣ ܡ̣ܢ ܐܵܪܵܡ ܩܪܝܼܬ̣ܵܐ ܕܐܝܼܬ̣ ܥܲܠ ܓܹܢ̄ܒ̣ ܨܲܪܬܲܡ. ܘܲܕ݂ܢܵܚܬ̇ܝܼܢ ܠܝܲܡܵܐ ܕܡܲܥܪ̱ܒ̣ܵܐ ܝܲܡܵܐ ܕܡܸܠܚܵܐ: ܓܡܲܪܘ ܘܐܸܬ̣ܦܠܸܓ̣ܘ ܥܲܡܵܐ ܕܹܝܢ ܥܒܲܪܘ ܠܘܼܩܒܲܠ ܐܝܼܪܝܼܚܘܿ.
17 ܘܩܵܡ̣ܘ ܟܵܗܢܹ̈ܐ ܕܲܫܩܝܼܠܝܼܢ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ ܒܝܲܒ̣ܫܵܐ ܒܓ̣ܵܘ ܝܘܿܪܕ̇ܢܵܢ: ܘܐܸܬ̇ܛܲܝܲܒ̣ܘ ܟܠܗܘܿܢ ܕܒܹܝܬ̣ ܝܼܣܪܵܝܹܠ ܥܵܒܪܝܼܢ ܒܝܲܒ̣ܫܵܐ: ܥܕܲܡܵܐ ܕܲܫܠܸܡ̣ܘ ܟܠܹܗ ܥܲܡܵܐ ܠܡܸܥܒܲܪ ܝܘܿܪܕ̇ܢܵܢ.
1 ܘܟܲܕ݂ ܫܠܸܡ̣ܘ ܟܠܹܗ ܥܲܡܵܐ ܠܡܸܥܒܲܪ ܝܘܿܪܕ̇ܢܵܢ: ܐܸܡܲܪ ܡܵܪܝܵܐ ܠܝܼܫܘܿܥ.
2 ܕܒܲܪ ܠܟ݂ܘܿܢ ܡ̣ܢ ܥܲܡܵܐ ܬܪܲܥܣܲܪ ܓܲܒ̣ܪ̈ܝܼܢ: ܚܲܕ݂ ܚܲܕ݂ ܓܲܒ̣ܪܵܐ ܡ̣ܢ ܫܲܒ̣ܛܵܐ.
3 ܘܦܲܩܸܕ݂ ܐܸܢܘܿܢ: ܘܐܸܡܲܪ ܠܗܘܿܢ: ܣܲܒ̣ܘ ܠܟ݂ܘܿܢ ܡܸܟܵܐ ܡ̣ܢ ܓܵܘ ܝܘܿܪܕ̇ܢܵܢ ܡ̣ܢ ܬܚܹܝܬ̣ ܪܸ̈ܓ̣ܠܲܝܗܘܿܢ ܕܟ݂ܵܗܢܹ̈ܐ: ܛܲܝܸܒ̣ܘ ܬܲܪܬܲܥܸܣܪܹ̈ܐ ܟܹܐܦ̈ܝܼܢ: ܘܐܲܥܒܲܪܘ ܐܸܢܹܝܢ ܥܲܡܟ݂ܘܿܢ: ܘܣܝܼܡܘ ܐܸܢܹܝܢ ܒܹܝܬ̣ ܒܵܘܬܵܐ ܕܒ̣ܵܝܬ̇ܝܼܢ ܐ̄ܢܬ̇ܘܿܢ ܒܹܗ ܒܠܸܠܝܵܐ.
4 ܘܲܩܪܵܐ ܝܼܫܘܿܥ ܠܲܬ̣ܪܲܥܣܲܪ ܓܲܒ̣ܪ̈ܝܼܢ ܗܵܢܘܿܢ ܕܛܲܝܸܒ̣ܘ ܡ̣ܢ ܒ̈ܢܲܝ ܝܼܣܪܵܝܹܠ: ܚܲܕ݂ ܚܲܕ݂ ܓܲܒ̣ܪܵܐ ܡ̣ܢ ܫܲܒ̣ܛܵܐ.
5 ܘܐܸܡܲܪ ܠܗܘܿܢ ܝܼܫܘܿܥ: ܥܒܲܪܘ ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ ܐܲܠܵܗܟ݂ܘܿܢ ܒܓ̣ܵܘ ܝܘܿܪܕ̇ܢܵܢ: ܘܣܝܼܡܘ ܓܒܲܪ ܟܹܐܦܹܗ ܥܲܠ ܟܲܬ̣ܦܹܗ: ܒܡܸܢܝܵܢܵܐ ܕܫܲܒ̣̈ܛܹܐ ܕܲܒ̣̈ܢܲܝ ܝܼܣܪܵܝܹܠ.
6 ܡܸܛܠ ܕܬܸܗܘܹܐ ܐܵܬ̤ܵܐ ܗܵܕܹܐ ܒܲܝܢܵܬ̣ܟ݂ܘܿܢ: ܕܟܲܕ݂ ܢܫܲܐܠܘܼܢܵܟ݂ܘܿܢ ܒܢܲܝ̈ܟ̇ܘܿܢ ܡ̣ܢ ܡܚܵܪ: ܘܢܹܐܡܪܘܼܢ ܠܟ݂ܘܿܢ: ܡܵܢܵܐ ܐܸܢܹܝܢ ܟܹܐܦܹܐ ܗܵܠܹܝܢ.
7 ܐܸܡܲܪܘ ܠܗܘܿܢ: ܕܐܸܬ̣ܦܠܸܓ̣ܘ ܡܲـ̈ـܝܵܐ ܕܝܘܿܪܕ̇ܢܵܢ ܡ̣ܢ ܩܕ݂ܵܡ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ: ܟܲܕ݂ ܥܒܲܪ̄ܢ ܒܝܘܿܪܕ̇ܢܵܢ: ܐܸܬ̣ܦܠܸܓ̣ܘ ܡܲـ̈ـܝܵܐ ܕܝܘܿܪܕ̇ܢܵܢ. ܘܲܗ̤ܘܲܝ̈ ܗܵܠܹܝܢ ܟܹܐܦܹ̈ܐ ܕܘܼܟ݂ܪܵܢܵܐ ܠܲܒ̣̈ܢܲܝ ܝܼܣܪܵܝܹܠ ܠܥܵܠܲܡ.
8 ܘܲܥ̣ܒܲܕ݂ܘ ܗܵܟܲܢܵܐ ܒ̈ܢܲܝ ܝܼܣܪܵܝܹܠ ܐܲܝܟ݂ ܕܦܲܩܸܕ݂ ܐܸܢܘܿܢ ܝܼܫܘܿܥ: ܘܲܫ̣ܩܲܠܘ ܬܲܪܬܲܥܸܣܪܹ̈ܐ ܟܹܐܦ̈ܝܼܢ ܡ̣ܢ ܓܵܘ ܝܘܿܪܕ̇ܢܵܢ: ܐܲܝܟ݂ ܕܐܸܡܲܪ ܡܵܪܝܵܐ ܠܝܼܫܘܿܥ: ܒܡܲܢܝܵܢܵܐ ܕܫܲܒ̣̈ܛܹܐ ܕܲܒ̣̈ܢܲܝ ܝܼܣܪܵܝܹܠ: ܘܐܲܥܒܲܪܘ ܐܸܢܹܝܢ ܥܲܡܗܘܿܢ ܠܒܹܝܬ̣ ܒܵܘܬܵܐ: ܘܲܫܒܲܩܘ ܐܸܢܹܝܢ ܬܲܡܵܢ.
9 ܘܬܲܪܬܲܥܸܣܪܹ̈ܐ ܟܹܐܦ̈ܝܼܢ ܐܲܩܝܼܡܘ: ܕܲܢܣܲܒ̣ܘ ܡ̣ܢ ܓܵܘ ܝܘܿܪܕ̇ܢܵܢ: ܡ̣ܢ ܬܚܹܝܬ̣ ܪܸ̈ܓ̣ܠܲܝܗܘܿܢ ܕܟ݂ܵܗܢܹ̈ܐ ܕܲܫܩܝܼܾܠܝܼܢ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ ܘܲܗ̤ܘܲܝ ܬܲܡܵܢ ܥܕܲܡܵܐ ܠܝܵܘܡܵܢܵܐ.
10 ܘܟ݂ܵܗܢܹ̈ܐ ܕܲܫܩܝܼܠܝܼܢ ܗ̄ܘ̣ܵܘ ܩܹܒ̣ܘܿܬ̣ܵܐ ܩܵܝܡܝܼܢ ܗ̄ܘ̣ܵܘ ܒܓ̣ܵܘ ܝܘܿܪܕ̇ܢܵܢ: ܥܕܲܡܵܐ ܕܲܫܠܸܡ̣ܘ ܟܠܗܘܿܢ ܦܸܬ̣ܓ̣ܵܡܹ̈ܐ ܕܦܲܩܸܕ݂ ܡܵܪܝܵܐ ܠܝܼܫܘܿܥ: ܠܡܹܐܡܲܪ ܦܸܬ̣ܓ̣ܵܡܹ̈ܐ ܕܦܲܩܸܕ݂ ܡܵܪܝܵܐ ܠܝܼܫܘܿܥ: ܠܡܹܐܡܲܪ ܠܥܲܡܵܐ: ܐܲܝܟܲܢܵܐ ܕܦܲܩܕܹܗ ܡܘܼܫܹܐ ܠܝܼܫܘܿܥ. ܘܐܸܣܬܲܪܗܲܒ̣ܘ ܥܲܡܵܐ ܘܥ̣ܒܲܪܘ.
11 ܘܟܲܕ݂ ܥ̣ܒܲܪܘ ܟܠܹܗ ܥܲܡܵܐ ܡܫܲܡܠ̱ܝܵܐܝܼܬ̣: ܘܥܸܒ̣ܪܲܬ̤ ܩܹܒ̣ܘܿܬ̣ܵܐ ܕܡܵܪܝܵܐ: ܘܟ݂ܵܗܢܹ̈ܐ ܩܕ݂ܵܡ ܥܲܡܵܐ.
12 ܘܲܥ̣ܒܲܪܘ ܒ̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܦܸܠܓܹܗ ܕܫܲܒ̣ܛܵܐ ܕܲܡܢܲܫܹܐ: ܟܲܕ݂ ܡܙܲܝܢܝܼܢ ܩܕ݂ܵܡ ܒ̈ܢܲܝ ܝܼܣܪܵܝܹܠ: ܐܲܝܟܲܢܵܐ ܕܐܸܡܲܪ ܠܗܘܿܢ ܡܘܼܫܹܐ.
13 ܐܲܪܒ̇ܥܝܼܢ ܐܲܠܦ̈ܝܼܢ ܟܲܕ݂ ܡܙܲܝܢܝܼܢ ܒܚܲܝܠܵܐ: ܥ̣ܒܲܪܘ ܩܕ݂ܵܡ ܡܵܪܝܵܐ ܠܲܩܪܵܒ̣ܵܐ ܒܲܦܩܲܥܬ̣ܵܐ ܕܐܝܼܪܝܼܚܘܿ.
14 ܒܹܗ ܒܝܵܘܡܵܐ ܗܵܘ̇: ܐܵܘܪܸܒ̣ ܡܵܪܝܵܐ ܠܝܼܫܘܿܥ ܒܥܲܝ̈ܢܲܝ ܟܠܹܗ ܝܼܣܪܵܝܹܠ: ܘܲܕ݂ܚܸܠܘ ܡܸܢܹܗ ܐܲܝܟܲܢܵܐ ܕܕ݂ܵܚܠܝܼܢ ܗ̄ܘ̣ܵܘ ܡ̣̤ ܡܘܼܫܹܐ: ܟܠܗܘܿܢ ܝܵܘ̈ܡܵܬ̣ܵܐ ܕܚܲܝܵܘ̈ܗܝ.
15 ܘܐܸܡܲܪ ܡܵܪܝܵܐ ܠܝܼܫܘܿܥ.
16 ܦܲܩܸܕ݂ ܠܟ݂ܵܗܢܹ̈ܐ ܕܲܫܩܝܼܠܝܼܢ ܩܹܒ̣ܘܿܬ̣ܵܐ ܕܣܵܗܕ̇ܘܼܬ̣ܵܐ: ܘܢܸܣܩܘܼܢ ܡ̣ܢ ܓܵܘ ܝܘܿܪܕ̇ܢܵܢ.
17 ܘܦܲܩܸܕ݂ ܝܼܫܘܿܥ ܠܟ݂ܵܗܢܹ̈ܐ: ܘܐܸܡܲܪ ܠܗܘܿܢ: ܣܲܩܘ ܡ̣ܢ ܓܵܘ ܝܘܿܪܕ̇ܢܵܢ.
18 ܘܟܲܕ݂ ܣܠܸܩ̣ܘ ܗ̄ܘ̣ܵܘ ܟܵܗܢܹ̈ܐ ܕܲܫܩܝܼܠܝܼܢ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ ܡ̣ܢ ܓܵܘ ܝܘܿܪܕ̇ܢܵܢ: ܣ̣ܡܲܟ݂ ܦܲܣܵـ̈ـܬ̣ܵܐ ܕܪܸ̈ܓ̣ܠܲܝܗܘܿܢ ܕܟ݂ܵܗܢܹ̈ܐ ܒܝܒ̣ܫܵܐ. ܘܲܗ̣ܦܲܟ݂ܘ ܡܲـ̈ـܝܵܐ ܕܝܘܿܪܕ̇ܢܵܢ ܠܕ݂ܘܼܟܲܬ̣ܗܘܿܢ: ܘܗܲܠܸܟ݂ܘ ܐܲܝܟ݂ ܕܡ̣ܢ ܩܕ݂ܝܼܡ ܥܲܠ ܟܠܗܘܿܢ ܣܦܵܪ̈ܵܘܗܝ ܕܝܘܿܪܕ̇ܢܵܢ.
19 ܘܥܲܡܵܐ ܣܠܸܩ ܡ̣ܢ ܓܵܘ ܝܘܿܪܕ̇ܢܵܢ: ܒܲܥܣܲܪܬܵܐ ܒܝܲܪܚܵܐ ܩܲܕ݂ܡܵܝܵܐ: ܘܲܫ̣ܪܵܘ ܒܓܲܠܓܵܠܵܐ ܒܣܵܘ̈ܦܲܝ ܡܲܕ݂ܢ̱ܚܵܝܵܗ̇ ܕܐܝܼܪܝܼܚܘܿ.
20 ܘܬܲܪܬܲܥܸܣܪܹ̈ܐ ܟܹܐܦ̈ܝܼܢ ܗܵܠܹܝܢ ܕܲܢܣܲܒ̣ܘ ܡ̣ܢ ܓܵܘ ܝܘܿܪܕ̇ܢܵܢ: ܐܲܩܝܼܡ ܐܸܢܹܝܢ ܝܼܫܘܿܥ ܒܓܲܠܓܵܠܵܐ.
21 ܘܐܸܡܲܪ ܝܼܫܘܿܥ ܠܲܒ̣̈ܢܲܝ ܝܼܣܪܵܝܹܠ: ܟܲܕ݂ ܢܫܲܐܠܘܼܢܵܟ݂ܘܿܢ ܒܢܲܝ̈ܟ̇ܘܿܢ ܡ̣ܢ ܡܚܵܪ: ܘܢܹܐܡܪܘܿܢ ܠܟ݂ܘܿܢ: ܡܵܢܵܐ ܟܹܐܦܹ̈ܐ ܗܵܠܹܝܢ.
22 ܚܵܘܵܘ ܐܸܢܹܝܢ ܠܲܒ̣ܢܝ̈ܟ̇ܘܿܢ: ܘܐܸܡܲܪܘ ܠܗܘܿܢ: ܕܲܒ̣ܝܲܒ̣ܫܵܐ ܥ̣ܒܲܪܘ ܒ̈ܢܲܝ ܝܼܣܪܵܝܹܠ ܝܘܿܪܕ̇ܢܵܢ ܗܵܢܵܐ.
23 ܘܐܵܘܒܸ̇ܫ ܡܵܪܝܵܐ ܐܲܠܵܗܟ݂ܘܿܢ ܡܲـ̈ـܝܵܐ ܕܝܘܿܪܕ̇ܢܵܢ ܡ̣ܢ ܩܕ݂ܵܡܲܝܗܘܿܢ ܥܕܲܡܵܐ ܕܲܥܒܲܪܘ: ܐܲܝܟ݂ ܕܲܥ̣ܒܲܕ݂ ܡܵܪܝܵܐ ܐܲܠܵܗܟ݂ܘܿܢ ܠܝܲܡܵܐ ܕܣܘܿܦ: ܘܐܵܘܒ̇ܫܹܗ ܡ̣ܢ ܩܕ݂ܵܡܲܝܢ ܥܕܲܡܵܐ ܕܲܥܒܲܪ̄ܢ.
24 ܕܢܸܕ̇ܥܘܼܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ: ܐܝܼܕܹܗ ܕܡܵܪܝܵܐ ܕܚܲܝܠܬ̣ܵܢܝܵܐ ܗ̄ܝ̣: ܘܬܸܕ݂ܚ̄ܠܘܼܢ ܠܡܵܪܝܵܐ ܐܲܠܵܗܟ݂ܘܿܢ ܟܠܗܘܿܢ ܝܵܘ̈ܡܵܬ̣ܵܐ.
1 ܘܟܲܕ݂ ܫ̣ܡܲܥܘ ܟܠܗܘܿܢ ܡܲܠܟܹ̈ܐ ܕܐܵܡܘܿܪ̈ܵܝܹܐ ܕܲܒ̣ܥܸܒ̣ܪܵܐ ܕܝܘܿܪܕ̇ܢܵܢ ܕܲܒ̣ܡܲܥ̱ܪܒ̣ܵܐ: ܘܟܠܗܘܿܢ ܡܲܠ̈ܟܹ̇ܐ ܕܲܟ݂ܢܲܥܢ ܕܥܲܠ ܝܲܕ݂ ܝܲܡܵܐ: ܕܐܵܘܒܸ̇ܫ ܡܵܪܝܵܐ ܡܲܝܵܐ ܕܝܘܿܪܕ̇ܢܵܢ ܡ̣ܢ ܩܕ݂ܵܡ ܒ̈ܢܲܝ ܝܼܣܪܵܝܹܠ ܥܕܲܡܵܐ ܕܲܥ̣ܒܲܪܘ: ܙܵܥ̣ ܠܸܒ̇ܗܘܿܢ: ܘܠܵܐ ܐܸܫܬܲܚܪܲܬ̤ ܒܗܘܿܢ ܢܲܦ̮ܫܵܐ ܡ̣ܢ ܩܕ݂ܵܡ ܒ̈ܢܲܝ ܝܼܣܪܵܝܹܠ.
2 ܒܹܗ ܒܙܲܒ̣ܢܵܐ ܗܵܘ̇: ܐܸܡܲܪ ܡܵܪܝܵܐ ܠܝܼܫܘܿܥ: ܥܒܸܕ݂ ܠܵܟ݂ ܣܲܦ̮ܣܹܪܵܐ ܕܛܲܪܵܢܵܐ: ܘܲܗܦܘܿܟ݂ ܓܙܘܿܪ ܐܸܢܘܿܢ ܠܲܒ̣̈ܢܲܝ ܝܼܣܪܵܝܹܠ ܬܸܢܝܵܢܘܼܬ̣.
3 ܘܲܥ̣ܒܲܕ݂ ܠܹܗ ܝܼܫܘܿܥ ܣܲܦ̮ܣܹܪܵܐ ܕܛܲܪܵܢܵܐ: ܘܲܓ̣ܙܲܪ ܐܸܢܘܿܢ ܠܲܒ̣̈ܢܲܝ ܝܼܣܪܵܝܹܠ ܬܸܢܝܵܢܘܼܬ̣ ܒܪܵܡܬ̣ܵܐ ܕܥܘܼܪ̈ܠܹܐ.
4 ܘܗܵܠܹܝܢ ܐܸܢܘܿܢ ܕܲܓ̣ܙܲܪ ܝܼܫܘܿܥ: ܠܟ݂ܠ ܝܲܠܕܵܐ ܕܥܲܡܵܐ ܕܲܢܦܲܩ̣ܘ ܡ̣ܢ ܡܸܨܪܹܝܢ ܕܸܟ݂ܪܹ̈ܐ: ܡܸܛܠ ܕܟ݂ܠܗܘܿܢ ܓܲܒ̣ܪܹ̈ܐ ܥܵܒ̣ܕܲܝ̈ ܩܪܵܒ̣ܵܐ: ܡܝܼܬ̣ܘ ܒܡܲܕ݂ܒ̇ܪܵܐ ܒܐܘܼܪܚܵܐ ܟܲܕ݂ ܢܦܲܩ̣ܘ ܡ̣ܢ ܡܸܨܪܹܝܢ.
5 ܡܸܛܠ ܕܲܓ̣ܙܝܼܪܝܼܢ ܗ̄ܘ̣ܵܘ ܟܠ ܥܲܡܵܐ ܕܲܢܦܲܩ̣ܘ: ܘܟ݂ܠ ܥܲܡܵܐ ܕܐܸܬ̣̱ܝܼܠܸܕ݂ ܒܡܲܕ݂ܒ̇ܪܵܐ. ܒܐܘܼܪܚܵܐ ܟܲܕ݂ ܢܦܲܩ̣ܘ ܡ̣ܢ ܡܸܨܪܹܝܢ ܠܵܐ ܐܸܬ̣ܓ̇ܙܲܪܘ.
6 ܡܸܛܠ ܕܐܲܪܒ̇ܥܝܼܢ ܫܢ̈ܝܼܢ ܗܲܠܸܟ݂ܘ ܒ̈ܢܲܝ ܝܼܣܪܵܝܹܠ ܒܡܲܕ݂ܒ̇ܪܵܐ: ܥܕܲܡܵܐ ܕܣܵܦ̣ܘ ܟܠܹܗ ܥܲܡܵܐ ܕܓܲܒ̣ܪܹ̈ܐ ܥܵܒ̣ܕܲܝ̈ ܩܪܵܒ̣ܵܐ ܕܲܢܦܲܩ̣ܘ ܡ̣ܢ ܡܸܨܪܹܝܢ: ܥܲܠ ܕܠܵܐ ܫ̣ܡܲܥܘ ܒܩܵܠܹܗ ܕܡܵܪܝܵܐ ܐܲܠܵܗܗܘܿܢ. ܘܝܼܡܵܐ ܠܗܘܿܢ ܡܵܪܝܵܐ: ܕܠܵܐ ܢܚܵܘܹܐ ܐܸܢܘܿܢ ܐܲܪܥܵܐ ܕܝܼܡ̣ܵܐ ܠܐܲܒ̣ܵܗܲܝ̈ܗܘܿܢ ܠܡܸܬܲܠ ܠܗܘܿܢ: ܐܲܪܥܵܐ ܕܡܲܪܕ̇ܝܵܐ ܚܲܠܒ̣ܵܐ ܘܕܸܒ̣ܫܵܐ.
7 ܘܠܲܒ̣ܢܲܝ̈ܗܘܿܢ ܕܲܗܘ̤ܵܘ ܡ̣ܢ ܒܵܬܲܪܗܘܿܢ: ܠܗܘܿܢ ܓܙܲܪ ܝܼܫܘܿܥ: ܡܸܛܠ ܕܥܘܼܪ̈ܠܝܼܢ ܗ̄ܘ̣ܵܘ ܠܵܐ ܓܙܝܼܪܝܼܢ ܗ̄ܘ̣ܵܘ.
8 ܘܟܲܕ݂ ܓܡܲܪܘ ܟܠܹܗ ܥܲܡܵܐ ܠܡܸܬ̣ܓܵܙܵܪܘܼ: ܘܝܼܬܸܒ̣ܘ ܒܕ݂ܘܼ̈ܟ̇ܝܵܬ̣ܗܘܿܢ ܒܡܲܫܪܝܼܬ̣ܵܐ ܥܕܲܡܵܐ ܕܐܸܬ̣ܐܲܣܝܼܘ.
9 ܘܐܸܡܲܪ ܡܵܪܝܵܐ ܠܝܼܫܘܿܥ: ܝܵܘܡܵܢܵܐ ܐܲܥ̇ܒ̇ܪܹܬ̣ ܚܸܣܕܵܐ ܕܡܸܨܪ̈ܵܝܹܐ ܡܸܢܟ݂ܘܿܢ ܘܲܩܪܵܐ ܫܡܹܗ ܕܐܲܬ̣ܪܵܐ ܗܵܘ̇ ܓܲܠܓܵܠܵܐ ܥܕܲܡܵܐ ܠܝܵܘܡܵܢܵܐ.
10 ܘܲܫܪܵܘ ܒ̈ܢܲܝ ܝܼܣܪܵܝܹܠ ܒܓܲܠܓܵܠܵܐ: ܘܲܥ̣ܒܲܕ݂ܘ ܦܸܨܚܵܐ ܒܐܲܪܒܲܥܸܣܪܵܐ ܒܝܲܪܚܵܐ ܩܲܕ݂ܡܵܝܵܐ: ܒܪܲܡܫܵܐ ܒܲܦܩܲܥܬ̣ܵܐ ܕܐܝܼܪܝܼܚܘܿ.
11 ܘܐܸܟܲܠܘ ܡ̣ܢ ܥܒ̣ܘܼܪܵܐ ܕܐܲܪܥܵܐ ܡ̣ܢ ܒܵܬܲܪ ܦܸܨܚܵܐ. ܦܲܛܝܼܪܹ̈ܐ: ܘܩܲܠ̈ܝܵܬ̣ܵܐ ܐܸܟܸ̇ܠܘ ܒܹܗ ܒܝܵܘܡܵܐ ܗܵܢܵܐ.
12 ܘܐܸܫܬ̇ܩܸܠ ܡܲܢܢܵܐ ܡ̣ܢ ܒܵܬܲܪ ܝܵܘܡܵܐ: ܟܲܕ݂ ܐܸܟܲܠ̣ܘ ܡ̣ܢ ܥܒ̣ܘܼܪܵܐ ܕܐܲܪܥܵܐ: ܘܠܵܐ ܗ̄ܘ̣ܵܐ ܬܘܼܒ̣ ܡܲܢܢܵܐ ܠܲܒ̣̈ܢܲܝ ܝܼܣܪܵܝܹܠ. ܘܐܸܟܲܠܘ ܡ̣ܢ ܥܠܲܠܬ̣ܵܗ̇ ܕܐܲܪܥܵܐ ܕܲܟ݂ܢܲܥܢ ܒܵܗ̇ ܒܫܲܢ̄ܬܵܐ ܗܵܝ̇.
13 ܘܟܲܕ݂ ܗܘ̤ܵܐ ܝܼܫܘܿܥ ܒܲܦܩܲܥܬ̣ܵܐ ܕܐܝܼܪܝܼܚܘܿ: ܐܲܪܝܼܡ ܥܲܝܢܵܘ̈ܗܝ ܘܲܚܙ̣ܵܐ ܓܲܒ̣ܪܵܐ ܚܲܕ݂ ܩܵܐܹ̇ܡ ܠܩܘܼܒ̣ܠܹܗ: ܘܣܲܝܦܹܗ ܫܡܝܼܛ ܘܐܲܚܝܼܕ݂ ܒܐܝܼܕܹܗ. ܘܐܸܙܲܠ̣ ܝܼܫܘܿܥ ܠܘܵܬܹܗ ܘܐܸܡܲܪ ܠܹܗ: ܡܸܢܲܢ ܐܲܢ̄ܬ̇ ܐܵܘ ܡ̣ܢ ܒܥܸܠܕ̇ܒ̣ܵܒܲܝ̈ܢ.
14 ܐܵܡܲܪ ܠܹܗ: ܐܸܢܵܐ ܪܲܒ̇ ܚܲܝ̈ܠܵܘܵܬܹܗ ܐ̄ܢܵܐ ܕܡܵܪܝܵܐ: ܘܗܵܫܵܐ ܐܸܬܹܝܬ̣. ܘܲܢܦܲܠ̣ ܝܼܫܘܿܥ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ ܘܲܣܓܸܕ݂: ܘܐܸܡܲܪ: ܡܵܢܵܐ ܐܵܡܲܪ ܡܵܪܝ ܠܥܲܒ̣ܕܹ̇ܗ.
15 ܘܐܸܡܲܪ ܪܲܒ̇ ܚܲܝ̈ܠܵܘܵܬܹܗ. ܕܡܵܪܝܵܐ ܠܝܼܫܘܿܥ: ܫܪܝܼ ܡܣܵܢܲܝ̈ܟ ܡ̣ܢ ܪܸ̈ܓ̣ܠܲܝܟ: ܡܸܛܠ ܕܕ݂ܘܼܟ̇ܬ̣ܵܐ ܕܩܵܐܹ̇ܡ ܐܲܢ̄ܬ̇ ܒܵܗ̇ ܩܲܕܝܼܫܵܐ ܗ̄ܝ̣: ܘܲܥܒܲܕ݂ ܝܼܫܘܿܥ ܗܵܟܲܢܵܐ.
1 ܘܐܝܼܪܝܼܚܘܿ ܐܲܚܝܼܕ݂ܵܐ ܗ̄ܘ̣ܵܬ̣ ܡ̣ܢ ܩܕ݂ܵܡ ܒ̈ܢܲܝ ܝܼܣܪܵܝܹܠ: ܘܠܲܝܬ̇ ܗ̄ܘ̣ܵܐ ܕܢܵܦܹ̇ܩ ܘܠܵܐ ܕܥܵܐܹ̇ܠ.
2 ܘܐܸܡܲܪ ܡܵܪܝܵܐ ܠܝܼܫܘܿܥ: ܚܙܝܼ ܕܐܲܫܠ̱ܡܹ̇ܬ̣ ܒܐܝܼܕܲܝ̈ܟ ܠܐܝܼܪܝܼܚܘܿ: ܘܲܠܡܲܠܟܵܗ̇: ܘܲܠܟ݂ܠܵܗ̇ ܚܲܝܠܵܗ̇. ܚܘܼܕ݂ܪܘܼܗ̇ ܠܲܡܕ݂ܝܼܢ̄ܬܵܐ ܟܠܟ݂ܘܿܢ ܓܲܒ̣ܪܹ̈ܐ ܥܵܒ̣ܕܲܝ̈ ܩܪܵܒ̣ܵܐ.
3 ܘܐܸܬ̣ܟ̇ܘܼܪܟ̇ܘܼܗ̇ ܠܲܡܕ݂ܝܼܢ̄ܬܵܐ ܙܒܲܢ̄ܬܵܐ ܚܕ݂ܵܐ ܒܝܵܘܡܵܐ ܚܲܕ݂: ܗܵܟܲܢܵܐ ܥܒܸܕ݂ܘ ܫܬܵܐ ܝܵܘ̈ܡܝܼܢ.
4 ܘܫܲܒ̣ܥܵܐ ܟܵܗܢܹ̈ܐ ܢܸܫܩܠܘܼܢ ܩܲܪ̈ܢܵܬ̣ܵܐ: ܘܲܢܝܲܒ̇ܒ̣ܘܼܢ ܩܕ݂ܵܡ ܩܹܒ̣ܘܿܬ̣ܵܐ. ܘܲܠܝܵܘܡܵܐ ܕܫܲܒ̣ܥܵܐ: ܐܸܬ̣ܟ̇ܘܼܪܟ̇ܘܼܗ̇ ܠܲܡܕ݂ܝܼܢ̄ܬܵܐ ܫܒܲܥ ܙܲܒ̣ܢ̈ܝܼܢ ܘܟ݂ܵܗܢܹ̈ܐ ܢܸܩܪܘܿܢ ܒܩܲܪ̈ܢܵܬ̣ܵܐ.
5 ܘܡܵܐ ܕܝܲܒܸ̇ܒ̣ܘ ܒܩܲܪ̈ܢܵܬ̣ܵܐ ܘܲܫ̣ܡܲܥܬ̇ܘܿܢ ܩܵܠܵܐ ܕܩܲܪܢܵܐ: ܢܸܩܥܘܿܢ ܟܠܹܗ ܥܲܡܵܐ ܩܥܵܬ̣ܵܐ ܪܲܒ̇ܬ̣ܵܐ: ܘܢܸܦܸܠ ܫܘܼܪܵܐ ܕܲܡܕ݂ܝܼܢ̄ܬܵܐ ܥܲܠ ܕܘܼܟ̇ܬܹܗ: ܘܢܸܣܩܘܼܢ ܥܲܡܵܐ ܐ̄ܢܵܫ ܠܩܘܼܒ̣ܠܹܗ.
6 ܘܲܩ̣ܪܵܐ ܝܼܫܘܿܥ ܒܲܪܢܘܿܢ ܠܟ݂ܵܗ̈ܢܹܐ ܘܐܸܡܲܪ ܠܗܘܿܢ: ܫܩܘܿܠܘ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ. ܘܫܲܒ̣ܥܵܐ ܟܵܗܢ̈ܝܼܢ ܢܸܫܩܠܘܼܢ ܫܒܲܥ ܩܲܪ̈ܢܵܢ: ܘܲܢܝܲܒ̇ܒ̣ܘܼܢ ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ.
7 ܘܐܸܡܲܪ ܠܥܲܡܵܐ: ܥܒܲܪܘ ܘܐܸܬ̣ܟܲܪܟ̇ܘ ܠܲܡܕ݂ܝܼܢ̄ܬܵܐ. ܘܐܲܝܠܹܝܢ ܕܲܡܙܲܝܢܝܼܢ ܢܸܥܒ̇ܪܘܼܢ ܩܕ݂ܵܡ ܩܹܒ̣ܘܿܬ̣ܵܐ ܕܡܵܪܝܵܐ.
8 ܘܐܲܝܟ݂ ܕܐܸܡܲܪ ܝܼܫܘܿܥ ܠܥܲܡܵܐ: ܫܲܒ̣ܥܵܐ ܟܲܗ̈ܢܹܐ ܫܩܝܼܠܝܼܢ ܗ̄ܘ̣ܵܘ ܫܒܲܥ ܩܲܪ̈ܢܵܢ: ܘܲܡܝܲܒ̇ܒ̣ܝܼܢ ܗ̄ܘ̣ܵܘ ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ: ܘܩܵܪܹܝܢ ܗ̄ܘ̣ܵܘ ܒܩܲܪ̈ܢܵܬ̣ܵܐ: ܘܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ ܐܲܬ̣ܝܵܐ ܗ̄ܘ̣ܵܬ̣ ܒܵܬܲܪܗܘܿܢ.
9 ܘܕܲܡܙܲܝܢܝܼܢ ܗ̄ܘ̣ܵܘ ܐܵܙ̇ܠ̄ܝܼܢ ܗ̄ܘ̣ܵܘ ܩܕ݂ܵܡ ܟܵܗ̈ܢܹܐ ܕܩܵܪܹܝܢ ܗ̄ܘ̣ܵܘ ܒܩܲܪ̈ܢܵܬ̣ܵܐ: ܘܕܲܡܟܲܢܫܝܼܢ ܐܵܙܠ̄ܝܼܢ ܗ̄ܘ̣ܵܘ ܒܵܬܲܪ ܩܹܒ̣ܘܿܬ̣ܵܐ: ܘܲܡܗܲܠܟ݂ܝܼܢ ܗ̄ܘ̣ܵܘ ܘܩܵܪܹܝܢ ܒܩܲܪ̈ܢܵܬ̣ܵܐ.
10 ܘܲܠܥܲܡܵܐ ܦܲܩܸܕ݂ ܝܼܫܘܿܥ: ܘܐܸܡܲܪ: ܠܵܐ ܬܸܩܥܘܿܢ ܘܠܵܐ ܬܲܫܡ̱ܥܘܼܢ ܩܵܠܟ݂ܘܿܢ: ܘܡܸܠܵܐ ܠܵܐ ܬܸܦܘܿܩ ܡ̣ܢ ܦܘܼܡܟ݂ܘܿܢ: ܥܕܲܡܵܐ ܠܝܵܘܡܵܐ ܕܐܹܡܲܪ ܠܟ݂ܘܿܢ ܕܲܩܥܵܘ: ܘܗܵܝܕܹ̇ܝܢ ܬܸܩܥܘܿܢ.
11 ܘܐܸܬ̣ܟܲܪܟܲܬ̤ ܩܹܒ̣ܘܿܬܹܗ ܕܡܵܪܝܵܐ ܠܲܡܕ݂ܝܼܢ̄ܬܵܐ ܙܒܲܢ̄ܬܵܐ ܚܕ݂ܵܐ: ܘܐܸܬ̣ܵܘ ܠܡܲܫܪܝܼܬ̣ܵܐ: ܘܒ̣ܵܬ̣ܘ ܒܡܲܫܪܝܼܬ̣ܵܐ.
12 ܘܩܲܕܸ̇ܡ ܝܼܫܘܿܥ ܒܨܲܦܪܵܐ: ܘܲܫ̣ܩܲܠܘ ܟܵܗ̈ܢܹܐ ܩܹܒ̣ܘܿܬܹܗ ܕܡܵܪܝܵܐ.
13 ܘܫܲܒ̣ܥܵܐ ܟܵܗ̈ܢܹܐ ܫܩܝܼܠܝܼܢ ܗ̄ܘ̣ܵܘ ܫܒܲܥ ܩܲܪ̈ܢܵܢ: ܘܐܵܙ̇ܠ̄ܝܼܢ ܗ̄ܘ̣ܵܘ ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ: ܘܲܡܗܲܠܟ݂ܝܼܢ ܗ̄ܘ̣ܵܘ ܘܩܵܪܝܼܢ ܒܩܲܪ̈ܢܵܬ̣ܵܐ. ܘܐܲܝܠܹܝܢ ܕܲܡܙܲܝܢܝܼܢ ܗ̄ܘ̣ܵܘ ܐܵܙ̇ܠ̄ܝܼܢ ܩܕ݂ܵܡܲܝܗܘܿܢ. ܘܕܲܡܟܲܢܫܝܼܢ ܗ̄ܘ̣ܵܘ ܐܵܙ̇ܠ̄ܝܼܢ ܗ̄ܘ̣ܵܘ ܒܵܬܲܪ ܩܹܒ̣ܘܿܬܹܗ ܕܡܵܪܝܵܐ: ܘܩܵܪܹܝܢ ܗ̄ܘ̣ܵܘ ܒܩܲܪ̈ܢܵܬ̣ܵܐ.
14 ܘܐܸܬ̣ܟܲܪܟ̇ܘܼܗ̇ ܠܲܡܕ݂ܝܼܢ̄ܬܵܐ ܗܵܝ̇ ܒܝܵܘܡܵܐ ܕܲܬ̣ܪܹܝܢ ܙܒܲܢ̄ܬܵܐ ܚܕ݂ܵܐ: ܘܲܗܦܲܟ݂ܘ ܠܗܘܿܢ ܠܡܲܫܪܝܼܬ̣ܵܐ: ܗܵܟܲܢܵܐ ܥܵܒ̣ܕ̇ܝܼܢ ܗ̄ܘ̣ܵܘ ܫܬܵܬܲܝ̈ܗܘܿܢ ܝܵܘ̈ܡܵܬ̣ܵܐ.
15 ܘܲܒ̣ܝܵܘܡܵܐ ܕܫܲܒ̣ܥܵܐ: ܩܲܕܸ̇ܡܘ ܒܨܲܦܪܵܐ ܘܐܸܬ̣ܟܲܪܟ̇ܘܼܗ̇ ܠܲܡܕ݂ܝܼܢ̄ܬܵܐ ܐܲܝܟ݂ ܢܵܡܘܿܣܵܐ ܗܵܢܵܐ ܫܒܲܥ ܙܲܒ̣ܢ̈ܝܼܢ. ܒܲܠܚܘܿܕ݂ ܕܹܝܢ ܒܹܗ ܒܗܵܘ̇ ܝܵܘܡܵܐ ܐܸܬ̣ܟܲܪܟ̇ܘܼܗ̇ ܙܲܒ̣ܢ̈ܝܼܢ.
16 ܘܒܲܙܒܲܢ̄ܬܵܐ ܗܵܝ̇ ܕܲܫܒܲܥ: ܩ̣ܪܵܘ ܟܵܗ̈ܢܹܐ ܒܩܲܪ̈ܢܵܬ̣ܵܐ. ܘܐܸܡܲܪ ܝܼܫܘܿܥ ܠܥܲܡܵܐ ܩܥܵܘ: ܡܸܛܠ ܕܐܲܫܠܡܵܗ̇ ܠܟ݂ܘܿܢ ܡܵܪܝܵܐ ܠܲܡܕ݂ܝܼܢ̄ܬܵܐ.
17 ܘܬܸܗܘܹܐ ܡܕ݂ܝܼܢ̄ܬܵܐ ܗܵܕܹܐ ܘܟ݂ܠ ܕܐܝܼܬ̣ ܒܵܗ̇ ܚܸܪܡܵܐ ܠܡܵܪܝܵܐ. ܒܲܠܚܘܿܕ݂ ܠܪܵܚܵܒ̣ ܙܵܢܝܼܬ̣ܵܐ ܐܵܚܵܘ ܠܵܗ̇ ܘܲܠܟ݂ܠ ܕܐܝܼܬ̣ ܥܲܡܵܗ̇ ܒܒܲܝܬܵܐ. ܡܸܛܠ ܕܛܲܫܝܲܬ̤ ܠܗܵܢܘܿܢ ܓܵܫܘܿܫܹ̈ܐ ܕܫܲܕܲܪ̄ܢ.
18 ܐܲܢ̄ܬ̇ܘܿܢ ܕܹܝܢ ܗ̤ܘܲܝܬ̇ܘܿܢ ܙܗܝܼܪܝܼܢ ܡ̣ܢ ܚܸܪܡܵܐ: ܕܠܵܐ ܬܛܵܘܫܘܼܢ ܘܬܸܣܒ̣ܘܼܢ ܡ̣ܢ ܚܸܪܡܵܐ. ܘܬܸܥܒ̇ܕ݂ܘܼܢܵܗ̇ ܠܡܲܫܪܝܼܬ݂ܵܐ ܕܝܼܣܪܵܝܹܠ ܚܸܪܡܵܐ: ܘܲܬ̇ܕܲܠܚܘܼܢܵܗ̇.
19 ܟܠ ܣܹܐܡܵܐ: ܘܕܲܗܒ̣ܵܐ: ܘܡܵܐܢܹ̈ܐ ܕܲܢܚܵܫܵܐ: ܘܲܕ݂ܦܲܪܙܠܵܐ: ܩܲܕ̇ܝܼܫܝܼܢ ܐܸܢܘܿܢ ܠܡܵܪܝܵܐ. ܠܒܹܝܬ̣ ܓܲܙܹܗ ܕܡܵܪܝܵܐ ܢܸܥܠܘܼܢ.
20 ܘܲܩܥܵܘ ܥܲܡܵܐ: ܘܲܩ̣ܪܵܘ ܒܩܲܪ̈ܢܵܬ̣ܵܐ. ܘܟܲܕ݂ ܫ̣ܡܲܥܘ ܥܲܡܵܐ ܩܵܠܵܐ ܕܩܲܪ̈ܢܵܬ̣ܵܐ: ܩܥ̣ܵܐ ܥܲܡܵܐ ܩܥܬ̣ܵܐ ܪܲܒ̇ܬ̣ܵܐ ܕܛܵܒ̣: ܘܲܢܦܲܠ̣ ܫܘܼܪܵܐ ܥܲܠ ܕܘܼܟ̇ܬܹܗ: ܘܲܣܠܸܩܘ ܥܲܡܵܐ ܠܲܡܕ݂ܝܼܢ̄ܬܵܐ ܐ̄ܢܵܫ ܠܩܘܼܒ̣ܠܹܗ: ܘܟܲܒ̣ܫܘܼܗ̇ ܠܲܡܕ݂ܝܼܢ̄ܬܵܐ.
21 ܘܲܚܪܲܒ̣ܘ ܠܟ݂ܠ ܕܐܝܼܬ̣ ܒܵܗ̇: ܡ̣ܢ ܓܲܒ̣ܪܹ̈ܐ ܘܲܥܕܲܡܵܐ ܠܢܸܫܹ̈ܐ: ܘܡ̣ܢ ܛܠܵܝܹ̈ܐ ܘܲܥܕܲܡܵܐ ܠܩܲܫܝܼܫܹ̈ܐ: ܘܲܥܕܲܡܵܐ ܠܬ̣ܵܘܪܹ̈ܐ: ܘܲܥܕܲܡܵܐ ܠܥܵܢܵܐ ܘܲܠܚܸܡܪ̈ܵܐ: ܚܪܲܒ̣ܘ ܒܦܘܼܡܵܐ ܕܣܲܝܦܵܐ.
22 ܘܠܲܬ̣ܪܹܝܢ ܓܲܒ̣ܪ̈ܝܼܢ ܗܵܢܘܿܢ ܕܓܲܫܘܼܗ̇ ܠܐܲܪܥܵܐ ܐܸܡܲܪ ܝܼܫܘܿܥ: ܥܘܿܠܘ ܠܒܹܝܬ̣ ܐܲܢ̄ܬ̇ܬ̣ܵܐ ܗܵܝ̇ ܙܵܢܝܼܬ̣ܵܐ: ܘܐܲܦܩܘܼܗ̇ ܡ̣ܢ ܬܲܡܵܢ ܠܵܗ̇ ܠܐܲܢ̄ܬ̇ܬ̣ܵܐ ܘܲܠܟ݂ܠ ܕܐܝܼܬ̣ ܠܵܗ̇: ܐܲܝܟܲܢܵܐ ܕܝܼܡܲܝܬ̇ܘܿܢ ܠܵܗ̇.
23 ܘܐܸܙܲܠ̣ܘ ܓܵܫ̈ܘܿܫܹܐ ܘܐܲܦܩܘܼܗ̇ ܠܪܵܚܵܒ̣: ܘܠܲܐܒ̣ܘܼܗ̇: ܘܠܐܸܡܵܗ̇: ܘܠܲܐܚܹ̈ܝܗ̇: ܘܲܠܟ݂ܠ ܕܐܝܼܬ̣ ܠܵܗ̇: ܘܲܠܟ݂ܠܵܗ̇ ܫܲܪܒ̇ܬ̣ܵܗ̇ ܐܲܦܸܩ̣ܘ: ܘܐܲܫܪܝܼܘ ܐܸܢܘܿܢ ܠܒܲܪ ܡ̣ܢ ܡܲܫܪܝܼܬ̣ܵܐ ܕܝܼܣܪܵܝܹܠ.
24 ܘܠܲܡܕ݂ܝܼܢ̄ܬܵܐ ܐܵܘܩܕ݂ܘܼܗ̇ ܒܢܘܼܪܵܐ ܘܲܠܟ݂ܠ ܕܐܝܼܬ̣ ܒܵܗ̇: ܒܲܠܚܘܿܕ݂ ܠܕܲܗܒ̣ܵܐ: ܘܲܠܣܹܐܡܵܐ: ܘܲܠܡܵܐܢܹ̈ܐ ܕܲܢܚܵܫܵܐ: ܘܲܕܦܲܪܙܠܵܐ: ܐܲܝܬ̇ܝܼܘ ܐܸܢܘܿܢ ܠܒܹܝܬ̣ ܓܲܙܹܗ ܕܡܵܪܝܵܐ.
25 ܘܲܠܪܵܚܵܒ̣ ܙܵܢܝܼܬ̣ܵܐ: ܘܲܠܒܹܝܬ̣ ܐܲܒ̣ܘܼܗ̇ ܘܲܠܟ݂ܠ ܕܐܝܼܬ̣ ܠܵܗ̇ ܐܲܚܝܼ ܝܫܘܿܥ: ܘܝܸܬ̣ܒܲܬ̤ ܒܓ̣ܵܘ ܒ̈ܢܲܝ ܝܼܣܪܵܝܹܠ ܥܕܲܡܵܐ ܠܝܵܘܡܵܢܵܐ: ܡܸܛܠ ܕܛܲܫܝܲܬ̤ ܓܵܫ̈ܘܿܫܹܐ ܕܫܲܕܲܪ ܝܼܫܘܿܥ ܠܡܸܓܲܫ ܠܐܝܼܪܝܼܚܘܿ.
26 ܘܝܼܡܵܐ ܝܼܫܘܿܥ ܒܙܲܒ̣ܢܵܐ ܗܵܘ̇: ܘܐܸܡܲܪ: ܠܝܼܛ ܗ̄ܘ̣ ܓܲܒ̣ܪܵܐ ܩܕ݂ܵܡ ܡܵܪܝܵܐ: ܕܲܢܩܘܼܡ ܘܢܸܒ̣ܢܹܝܗ̇ ܠܲܡܕ݂ܝܼܢ̄ܬܵܐ ܗܵܕܹܐ ܐܝܼܪܝܼܚܘܿ ܒܒ̣ܘܼܟ݂ܪܹܗ ܢܸܒ̣ܢܹܝܗ̇: ܘܒܲܙܥܘܿܪܹܗ ܢܩܝܼܡ ܬܲܪ̈ܥܹܝܗ̇.
27 ܘܲܗܘ̤ܵܐ ܡܵܪܝܵܐ ܥܲܡ ܝܼܫܘܿܥ ܘܫܸܡܥܹܗ ܐܵܙܹ̇ܠ ܗ̄ܘ̣ܵܐ ܒܟ݂ܠܵܗ̇ ܐܲܪܥܵܐ.
1 ܘܐܲܥܠܝܼܘ ܒ̈ܢܲܝ ܝܼܣܪܵܝܹܠ ܥܵܘܼܠܵܐ ܒܚܸܪܡܵܐ: ܘܲܢܣܲܒ̣ ܥܵܟ݂ܵܪ ܒܲܪ ܟܲܪܡܝ: ܒܲܪ ܙܲܒ̣ܕ̇ܝܼ: ܒܲܪ ܙܲܪܚ: ܡ̣ܢ ܫܲܒ̣ܛܵܐ ܕܲܝܗܘܼܕ݂ܵܐ: ܡ̣ܢ ܚܲܪܡܵܐ ܘܛܲܫܝܼ ܘܐܸܬ̣ܚܲܡܲܬ̣ ܪܘܼܓ̣ܙܹܗ ܕܡܵܪܝܵܐ ܥܲܠ ܒ̈ܢܲܝ ܝܼܣܪܵܝܹܠ:
2 ܘܫܲܕܲܪ ܝܼܫܘܿܥ ܓܲܒ̣ܪܹ̈ܐ ܡ̣ܢ ܐܝܼܪܝܼܚܘܿ ܠܥܵܝ: ܕܥܲܠ ܓܹܢ̄ܒ̣ ܒܹܝܬ̣ ܐܵܘܵܢ: ܡ̣ܢ ܡܲܕ݂ܢ̱ܚܵܐ ܕܒܹܝܬ̣ ܐܹܝܠ: ܘܐܸܡܲܪ ܠܗܘܿܢ ܣܲܩܘ ܓܘܿܫܘ ܐܲܪܥܵܐ. ܘܲܣܠܸܩ̣ܘ ܓܲܒ̣ܪܹ̈ܐ ܘܓܲܫܘܼܗ̇ ܠܥܵܝ.
3 ܘܲܗܦܲܟ݂ܘ ܠܘܵܬ̣ ܝܼܫܘܿܥ: ܘܐܵܡ̇ܪܝܼܢ ܠܹܗ: ܠܵܐ ܢܸܣܲܩ ܟܠܹܗ ܥܲܡܵܐ: ܐܸܠܵܐ ܐܲܝܟ݂ ܬܪܹܝܢ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܢܸܣܩܘܼܢ ܢܸܚܪ̱ܒ̣ܘܼܢܵܗ̇ ܠܥܵܝ. ܠܵܐ ܬܫܲܕܲܪ ܠܟ݂ܠܹܗ ܥܲܡܵܐ: ܡܸܛܠ ܕܲܙܥܘܿܪܝܼܢ ܐܸܢܘܿܢ.
4 ܘܲܣܠܸܩ̣ܘ ܡ̣ܢ ܥܲܡܵܐ ܠܬܲܡܵܢ: ܐܲܝܟ݂ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪ̈ܝܼܢ: ܘܲܥܪܲܩ̣ܘ ܠܗܘܿܢ ܡ̣ܢ ܩܕ݂ܵܡ ܐ̄ܢܵܫܹܝ̈ܗ̇ ܕܥܵܝ.
5 ܘܲܚܪܲܒ̣ܘ ܐ̄ܢܵܫܹܝ̈ܗ̇ ܕܥܵܝ ܡ̣ܢ ܝܼܣܪܵܝܹܠ: ܬܠܵܬ̣ܝܼܢ ܘܸܫܬܵܐ ܓܲܒ̣ܪ̈ܝܼܢ: ܘܲܪܕܲܦ̣ܘ ܐܸܢܘܿܢ ܩܕ݂ܵܡ ܬܲܪܥܵܐ ܥܕܲܡܵܐ ܕܐܸܬ̇ܬ̇ܒܲܪܘ: ܘܲܡܚܵܘ ܒܗܘܿܢ ܡܚܘܿܬ̣ܵܐ. ܘܙܵܥ̣ ܠܸܒܹ̇ܗ ܕܥܲܡܵܐ: ܘܲܗܘ̣ܵܐ ܐܲܝܟ݂ ܡܲـ̈ـܝܵܐ.
6 ܘܨܲܪܝܼ ܝܼܫܘܿܥ ܠܒ̣ܘܼܫܵܘ̈ܗܝ: ܘܲܢܦܲܠ̣ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ: ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ ܥܕܲܡܵܐ ܠܪܲܡܫܵܐ: ܗ̤ܘ ܘܩܲܫ̈ܝܼܫܹܐ ܕܝܼܣܪܵܝܹܠ: ܘܐܲܪܡܝܼܘ ܥܲܦܪܵܐ ܥܲܠ ܪܹ̈ܫܲܝܗܘܿܢ.
7 ܘܐܸܡܲܪ ܝܼܫܘܿܥ: ܐܘܿܢ ܡܵܪܝܵܐ ܐܲܠܵܗܵܐ: ܠܡܵܢܵܐ ܐܲܥ̣ܒܲܪܬܵܝܗܝ ܠܥܲܡܵܐ ܗܵܢܵܐ ܝܘܿܪܕ̇ܢܵܢ: ܕܬܲܫܠ̱ܡܲܢ ܒܐܝܼܕ݂ܵܐ ܕܐܵܡܘܿܪ̈ܵܝܹܐ. ܐܸܠܘܼ ܝܼܬܸܒ̣̄ܢ ܗ̄ܘܲܝܢ ܠܲܢ ܟܲܝ ܒܥܸܒ̣ܪܵܐ ܕܝܘܿܪܕ̇ܢܵܐ.
8 ܡܵܢܵܐ ܡܸܟܹ̇ܝܠ ܐܹܡܲܪ: ܕܐܲܦܢܝܼ ܝܼܣܪܵܝܹܠ ܩܕ݂ܵܠܹܗ ܩܕ݂ܵܡ ܒܥܸܠܕ̇ܒ̣ܵܒ̣ܵܘ̈ܗܝ.
9 ܘܢܸܫܡ̱ܥܘܿܢ ܟܢܲܥ̈ܢܵܝܹܐ ܘܟ݂ܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ: ܘܢܸܬ̣ܟܲܢܫܘܼܢ ܥܠܲܝܢ: ܘܢܵܘܒ̇ܕ݂ܘܼܢ ܫܡܲܢ ܡ̣ܢ ܐܲܦܲܝ̈ ܐܲܪܥܵܐ. ܘܡܵܢܵܐ ܕܹܝܢ ܥܵܒܹܕ݂ ܐܲܢ̄ܬ̇ ܠܲܫܡܵܟ݂ ܪܲܒܵܐ.
10 ܘܐܸܡܲܪ ܡܵܪܝܵܐ ܠܝܼܫܘܿܥ: ܩܘܼܡ ܠܵܟ݂: ܠܡܵܢܵܐ ܪܡܸܐ ܐܲܢ̄ܬ̇ ܥܲܠ ܐܲܦܲܝ̈ܟ ܥܲܠ ܐܲܪܥܵܐ.
11 ܚ̣ܛܵܐ ܝܼܣܪܵܝܹܠ: ܘܲܥܒܲܪܘ ܥܲܠ ܦܘܼܩܕܵܢܵܐ ܕܦܲܩܕܹܬ̣ ܐܸܢܘܿܢ: ܘܲܢܣܲܒ̣ܘ ܡ̣ܢ ܚܸܪܡܵܐ: ܐܵܦ ܓܢܲܒ̣ܘ: ܐܵܦ ܟܲܕܸ̇ܒ̣ܘ: ܘܛܲܫܝܼܘ ܒܡܵܐܢܲܝ̈ܗܘܿܢ.
12 ܘܠܵܐ ܢܸܫܟ̇ܚܘܼܢ ܬܘܼܒ̣ ܒ̈ܢܲܝ ܝܼܣܪܵܝܹܠ ܠܲܡܩܵܡ ܩܕ݂ܵܡ ܒܥܸܠܕ̇ܒ̣ܵܒܲܝ̈ܗܘܿܢ: ܐܸܠܵܐ ܩܕ݂ܵܠܗܘܿܢ ܢܲܦܢܘܿܢ ܩܕ݂ܵܡ ܒܥܸܠܕ̇ܒ̣ܵܒܲܝ̈ܗܘܿܢ: ܡܸܛܠ ܕܲܗܘ̤ܵܘ ܠܚܸܪܡܵܐ. ܘܬ̣ܘܼܒ̣ ܠܵܐ ܐܸܗܘܹܐ ܥܲܡܟ݂ܘܿܢ: ܐܸܠܵܐ ܐܸܢ ܐܲܦܪܸܩܬ̇ܘܿܢ ܚܸܪܡܵܐ ܡܟܢ ܒܲܝܢܵܬ̣ܟ݂ܘܿܢ.
13 ܩܘܼܡ ܙܲܡܸܢܲܝܗܝ ܠܥܲܡܵܐ ܗܵܢܵܐ: ܘܐܸܡܲܪ: ܐܸܙܕܲܡܲܢܘ ܡܚܵܪ: ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܚܸܪܡܵܐ ܒܓ̣ܵܘܵܟ݂ ܝܼܣܪܵܝܹܠ: ܬܘܼܒ̣ ܠܵܐ ܡܸܫܟܲܚ ܐܲܢ̄ܬ̇ ܠܲܡܩܵܡ ܩܕ݂ܵܡ ܒܥܸܠܕ̇ܒ̣ܵܒܲܝ̈ܟ: ܥܕܲܡܵܐ ܕܬܲܦ̱ܪܩܘܼܢ ܚܹܪܡܵܐ ܡ̣ܢ ܒܲܝܢܵܬ̣ܟ݂ܘܿܢ.
14 ܘܲܒ̣ܨܲܦܪܵܐ ܩܲܪܸܒ̣ܘ ܫܲܒ̣ܛܲܝ̈ܟ̇ܘܿܢ ܘܫܲܒ̣ܛܵܐ ܕܢܹܐܚܕ̇ܝܼܘܗܝ ܡܵܪܝܵܐ: ܢܸܬ̣ܩܲܪܲܒ̣ ܠܫܲܪ̈ܒ̣ܵܬ̣ܵܐ. ܘܫܲܪܒ̇ܬ̣ܵܐ ܕܢܹܐܚܕ̇ܝܼܗ̇ ܡܵܪܝܵܐ: ܬܸܬ̣ܩܲܪܲܒ̣ ܠܒ̣ܵـ̈ـܬ̇ܝܼܢ. ܘܒܲܝܬܵܐ ܕܢܹܐܚܕ̇ܝܼܘܗܝ ܡܵܪܝܵܐ: ܢܸܬ̣ܩܲܪܲܒ̣ ܠܓܲܒ̣ܪ̈ܝܼܢ.
15 ܘܡ̇ܢ ܕܡܸܬ̇ܬ̇ܚܸܕ݂ ܒܹܗ ܒܚܸܪܡܵܐ: ܢܹܐܩܲܕ݂ ܒܢܘܼܪܵܐ ܗ̤ܘ ܘܟ݂ܠ ܡܸܕܸ̇ܡ ܕܐܝܼܬ̣ ܠܹܗ: ܥܲܠ ܕܲܥܒܲܪ ܥܲܠ ܦܘܼܩܕܵܢܹܗ ܕܡܵܪܝܵܐ: ܘܥܲܠ ܕܲܥܒܲܪ ܥܵܘܼܠܵܐ ܒܝܼܣܪܵܝܹܠ.
16 ܘܩܲܕܸ̇ܡ ܝܼܫܘܿܥ ܒܨܸܦܪܵܐ: ܘܩܲܪܒܹܗ ܠܝܼܣܪܵܝܹܠ ܠܫܲܒ̣̈ܛܝܼܢ: ܘܐܸܬ̇ܬ̇ܚܸܕ݂ ܫܲܒ̣ܛܵܐ ܕܲܝܗܘܼܕ݂ܵܐ.
17 ܘܩܲܪܸܒ̣ ܫܲܒ̣ܛܵܐ ܕܲܝܗܘܼܕ݂ܵܐ ܠܫܲܪ̈ܒ̣ܵܬ̣ܵܐ: ܘܐܸܬ̇ܬܲܚܕܲܬ̤ ܫܲܪܒ̇ܬ̣ܵܐ ܕܙܲܪܚ. ܘܩܲܪܸܒ̣ ܫܲܪܒ̇ܬ̣ܵܐ ܕܙܲܪܚ ܠܒ̣ܵܬ̇ܝܼ̈ܢ. ܘܐܸܬ̇ܬ̇ܚܸܕ݂ ܙܲܒ̣ܕ̇ܝܼ.
18 ܘܩܲܪܸܒ̣ ܒܲܝܬܹ̇ܗ ܠܓܲܒ̣ܪ̈ܝܼܢ: ܘܐܸܬ̇ܬ̇ܚܸܕ݂ ܥܵܟ݂ܵܪ: ܒܲܪ ܟܲܪܡܝܼ: ܒܲܪ ܙܲܒ̣ܕ̇ܝܼ: ܒܲܪ ܙܲܪܚ: ܡ̣ܢ ܫܲܒ̣ܛܵܐ ܕܲܝܗܘܼܕ݂ܵܐ.
19 ܘܐܸܡܲܪ ܝܼܫܘܿܥ ܠܥܵܟ݂ܵܪ: ܗܲܒ̣ ܪܲܒ̇ܘܼܬ̣ܵܐ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܗܲܒ̣ ܠܹܗ ܬܵܘܕ̇ܝܼܬ̣ܵܐ: ܘܚܵܘܵܐ ܡܸܕܸ̇ܡ ܕܲܥܒܲܕ̇ܬ̇ ܘܠܵܐ ܬܛܲܫܸܐ ܡܹܢܝ.
20 ܥܢ̣ܵܐ ܥܵܟ݂ܵܪ ܘܐܸܡܲܪ ܠܝܼܫܘܿܥ: ܫܲܪܝܼܪܵܐܝܼܬ̣ ܐܸܢܵܐ ܚܛܹܝܬ̣ ܠܡܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܗܵܟܲܢܵܐ ܥܸܒ̣ܕܹܬ̣.
21 ܚܙܹܝܬ̣ ܒܒܸܙܬ̣ܵܐ: ܐܲܡ̣ܠܵܐ ܚܕ݂ܵܐ ܒܵܒ̣ܠܵܝܬܵܐ: ܘܫܲܦܝܼܪܵܐ ܗ̄ܘ̣ܵܬ̣: ܘܡܲܐܬܹ̇ܝܢ ܡܲܬ̣ܩܵܠ̈ܝܼܢ ܕܣܹܐܡܵܐ: ܘܠܸܫܵܢܵܐ ܚܲܕ݂ ܕܕܲܗܒ̣ܵܐ: ܕܬ̣ܵܩܹܠ ܚܲܡܫܝܼܢ ܡܲܬ̣ܩܵܠ̈ܝܼܢ ܘܪܸܓܲܬ̣ ܐܸܢܘܿܢ: ܘܢܸܣܒܹ̇ܬ̣ ܐܸܢܘܿܢ: ܘܗܵܐ ܛܡܝܼܪܝܼܢ ܠܝܼ ܒܐܲܪܥܵܐ ܒܡܲܫܟܲܢܝ: ܘܣܹܐܡܵܐ ܡ̣ܢ ܠܬܲܚܬ̇.
22 ܘܫܲܕܲܪ ܝܼܫܘܿܥ ܓܲܒ̣ܪܹ̈ܐ: ܘܲܪܗܸܛܘ ܠܡܲܫܟ̇ܢܹܗ: ܘܲܚܙܵܘ ܕܲܛܡܝܼܪܝܼܢ ܒܡܲܫܟ̇ܢܹܗ: ܘܣܹܐܡܵܐ ܡ̣ܢ ܠܬܲܚܬ̇.
23 ܘܲܢܣܲܒ̣ܘ ܐܸܢܘܿܢ ܡ̣ܢ ܡܲܫܟ̇ܢܹܗ ܘܐܲܝܬ̇ܝܼܘ ܐܸܢܘܿܢ ܠܘܵܬ̣ ܝܼܫܘܿܥ: ܘܲܠܘܵܬ̣ ܟܠܹܗ ܝܼܣܪܵܝܹܠ ܘܣܵܡ̣ ܐܸܢܘܿܢ ܩܕ݂ܵܡ ܡܵܪܝܵܐ.
24 ܘܕܲܒ̣ܪܹܗ ܝܼܫܘܿܥ ܠܥܵܟ݂ܵܪ ܒܲܪ ܙܲܪܚ. ܘܲܢܣܲܒ̣ ܠܣܹܐܡܵܐ: ܘܠܵܐܡ̣ܠܵܐ: ܘܲܠܸܠܫܵܢܵܐ ܕܕܲܗܒ̣ܵܐ ܘܲܕ݂ܒܲܪ ܠܲܒ̣ܢܵܘ̈ܗܝ: ܘܠܲܒ̣̈ܢܵܬܹܗ: ܘܲܠܬ̣ܵܘܪ̈ܵܘܗܝ: ܘܲܠܚܸܡܪܹ̈ܗ: ܘܲܠܥܵܢܹ̈ܗ: ܘܲܠܡܲܫܟ̇ܢܹܗ: ܘܲܠܟ݂ܠܡܸܕܸ̇ܡ ܕܐܝܼܬ̣ ܠܹܗ: ܘܲܠܟ݂ܠܹܗ ܝܼܣܪܵܝܹܠ ܥܲܡܹܗ: ܘܐܲܣܸܩ ܐܸܢܘܿܢ ܠܥܘܼܡܩܵܐ ܕܥܵܟ݂ܵܪ.
25 ܘܐܸܡܲܪ ܠܹܗ ܝܼܫܘܿܥ: ܠܡܵܢܵܐ ܕܲܠܲܚܬܵܢܝ: ܢܕܲܠܚܵܟ݂ ܡܵܪܝܵܐ ܒܝܵܘܡܵܐ ܗܵܢܵܐ. ܘܪܲܓ̣ܡܘܼܗܝ ܒܟܹܐܦܹ̈ܐ ܟܠܹܗ ܝܼܣܪܵܝܹܠ: ܠܹܗ ܘܲܠܟ݂ܠ ܕܐܝܼܬ̣ ܠܹܗ: ܘܐܵܘܩܸܕ݂ܘ ܐܸܢܘܿܢ ܒܢܘܼܪܵܐ.
26 ܘܐܲܩܝܼܡܘ ܥܠܵܘܗܝ ܝܲܓܪܵܐ ܕܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ ܥܕܲܡܵܐ ܠܝܵܘܡܵܢܵܐ. ܘܐܸܬ̇ܬ̇ܢܝܼܚ ܡܵܪܝܵܐ ܡ̣ܢ ܚܡܬ̣ܵܐ ܕܪܘܼܓ̣ܙܹܗ ܡܸܛܠ ܗܵܢܵܐ ܐܸܬ̣ܩܪܝܼ ܫܡܹܗ ܕܐܲܬ̣ܪܵܐ ܗܵܘ̇: ܥܘܼܡܩܵܐ ܕܥܵܟ݂ܵܪ ܥܕܲܡܵܐ ܠܝܵܘܡܵܢܵܐ.
1 ܘܐܸܡܲܪ ܡܵܪܝܵܐ ܠܝܼܫܘܿܥ: ܠܵܐ ܬܸܕ݂ܚܲܠ: ܘܠܵܐ ܬܙܘܼܥ: ܕܒܲܪ ܥܲܡܵܟ݂ ܠܟ݂ܠܹܗ ܥܲܡܵܐ ܘܲܥܒܸܕ݂ ܩܪܵܒ̣ܵܐ: ܘܲܩܘܼܡ ܣܲܩ ܠܥܵܝ ܡܸܛܠ ܕܐܲܫܠܸܡܬܹ̇ܗ ܒܐܝܼܕܲܝ̈ܟ ܠܡܲܠܟܵܐ ܕܥܵܝ: ܘܲܠܥܲܡܹܗ: ܘܠܲܡܕ݂ܝܼܢ̄ܬܹܗ: ܘܠܲܐܪܥܹܗ.
2 ܘܲܥܒܸܕ݂ ܠܥܵܝ ܘܲܠܡܲܠܟܵܗ̇: ܐܲܝܟܲܢܵܐ ܕܲܥܒܲܕ̇ܬ̇ ܠܐܝܼܪܝܼܚܘܿ: ܘܲܠܡܲܠܟܵܗ̇ ܒܲܠܚܘܿܕ݂ ܕܹܝܢ ܒܹܝܬ̣ ܘܲܒ̣ܥܝܼܪܵܐ ܒܘܿܙܘ ܠܟ݂ܘܿܢ: ܘܐܲܟ݂ܡܸܢܘ ܠܟ݂ܘܿܢ ܟܡܹܐܢܵܐ ܡ̣ܢ ܒܸܣܬ̇ܪܵܗ̇ ܕܲܡܕ݂ܝܼܢ̄ܬܵܐ.
3 ܘܩܵܡ ܝܼܫܘܿܥ ܘܟ݂ܠܹܗ ܥܲܡܵܐ ܥܵܒ̣ܕܲܝ̈ ܩܪܵܒ̣ܵܐ ܠܡܸܣܲܩ ܠܥܵܝ. ܘܲܓ̣ܒ̣ܵܐ ܝܼܫܘܿܥ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܕܓܲܢ̄ܒܵܪ̈ܝܼܢ ܒܚܲܝ̱ܠܗܘܿܢ: ܘܫܲܕܲܪ ܐܸܢܘܿܢ ܒܠܸܠܝܵܐ.
4 ܘܦܲܩܸܕ݂ ܐܸܢܘܿܢ: ܘܐܸܡܲܪ ܠܗܘܿܢ: ܚܙܵܘ ܡܵܐ ܕܟ݂ܵܡܢܝܼܢ ܐ̄ܢܬ̇ܘܿܢ ܥܲܠ ܡܕ݂ܝܼܢ̄ܬܵܐ: ܡ̣ܢ ܒܸܣܬ̇ܪܵܗ̇ ܕܲܡܕ݂ܝܼܢ̄ܬܵܐ: ܠܵܐ ܬܲܪܚ̄ܩܘܼܢ ܛܵܒ̣ ܡܸܢܵܗ̇ ܡ̣ܢ ܡܕ݂ܝܼܢ̄ܬܵܐ: ܘܲܗ̤ܘܲܝܬ̇ܘܿܢ ܡܛܲܝܒ̣ܝܼܢ ܟܠܟ݂ܘܿܢ.
5 ܘܐܸܢܵܐ ܘܥܲܡܵܐ ܕܐܝܼܬ̣ ܥܲܡܝ ܢܸܬ̣ܩܲܪܲܒ̣ ܠܲܡܕ݂ܝܼܢ̄ܬܵܐ: ܘܡܵܐ ܕܲܢܦܲܩ̣ܘ ܠܐܘܼܪܥܲܢ ܐܲܝܟ݂ ܕܲܒ̣ܩܲܕ݂ܡܵܝܬܵܐ: ܗܵܐ ܥܵܪܩܝܼܢ ܚ̄ܢܲܢ ܡ̣ܢ ܩܕ݂ܵܡܲܝܗܘܿܢ.
6 ܘܢܵܦܩܝܼܢ ܒܵܬ̣ܪܲܢ ܘܪܵܕ݂ܦܝܼܢ ܠܲܢ ܡ̣ܢ ܡܕ݂ܝܼܢ̄ܬܵܐ: ܡܸܛܠ ܕܐܵܡ̇ܪܝܼܢ: ܕܥܵܪܩܝܼܢ ܐܸܢܘܿܢ ܡ̣ܢ ܩܕ݂ܵܡܲܝܢ ܐܲܝܟ݂ ܕܲܒ̣ܩܲܕ݂ܡܵܝܬܵܐ: ܘܲܚܢܲܢ ܗܵܐ ܥܵܪܩܝܼܢ ܚ̄ܢܲܢ ܡ̣ܢ ܩܕ݂ܵܡܲܝܗܘܿܢ.
7 ܘܐܲܢ̄ܬ̇ܘܿܢ ܩܘܼܡܘ ܡ̣ܢ ܟܡܹܐܢܟ݂ܘܿܢ: ܘܚܘܼܪܒ̇ܘܼܗ̇ ܠܲܡܕ݂ܝܼܢ̄ܬܵܐ: ܘܢܲܫܠ̱ܡܝܼܗ̇ ܡܵܪܝܵܐ ܐܲܠܵܗܟ݂ܘܿܢ ܒܐܝܼܕܲܝ̈ܟ̇ܘܿܢ.
8 ܘܡܵܐ ܕܐܸܚܲܕ̇ܬ̇ܘܿܢܵܗ̇ ܠܲܡܕ݂ܝܼܢ̄ܬܵܐ: ܐܵܘܩܕ݂ܘܼܗ̇ ܒܢܘܼܪܵܐ: ܐܲܝܟ݂ ܡܸܠܬܹܗ ܕܡܵܪܝܵܐ ܥܒܸܕ݂ܘ: ܘܲܚܙܵܘ ܕܹܝܢ ܕܦܲܩܸܕ̇ܬ̇ܟ݂ܘܿܢ.
9 ܘܫܲܕܲܪ ܐܸܢܘܿܢ ܝܼܫܘܿܥ: ܘܐܸܙܸܠ̣ܘ ܠܒܹܝܬ̣ ܟܡܹܐܢܵܐ: ܘܝܼܬܸܒ̣ܘ ܒܲܝܢܵܬ̣ ܒܹܝܬ̣ ܐܹܝܠ ܠܥܵܝ: ܡ̣ܢ ܡܲܥ̱ܪܒ̣ܵܝܵܗ̇ ܕܲܡܕ݂ܝܼܢ̄ܬܵܐ: ܘܒ̣ܵܬ̣ ܝܼܫܘܿܥ ܒܠܸܠܝܵܐ ܗܵܘ̇ ܒܓ̣ܵܘ ܥܲܡܵܐ.
10 ܘܩܲܕܸܡ ܝܼܫܘܿܥ ܒܨܲܦܪܵܐ ܘܲܡܢܵܝܗܝ ܠܥܲܡܵܐ: ܘܲܣܠܸܩ̣ܘ ܗ̤ܘ ܘܣܵܒܹ̈ܐ ܕܝܼܣܪܵܝܹܠ ܠܥܵܝ ܩܕ݂ܵܡ ܥܲܡܵܐ.
11 ܘܟ݂ܠܗܘܿܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ ܕܥܲܡܹܗ: ܣܠܸܩ̣ܘ: ܘܲܩ̣ܪܸܒ̣ܘ ܠܩܘܼܒ̣ܠܵܗ̇ ܕܲܡܕ݂ܝܼܢ̄ܬܵܐ: ܘܲܫܪܵܘ ܡ̣ܢ ܓܲܪܒܝܵܝܵܗ̇ ܕܥܵܝ: ܘܢܲܚܠܵܐ ܐܝܬ̣ ܗ̄ܘ̣ܵܐ ܒܲܝܢܵܬ̣ܗܘܿܢ ܠܥܵܝ.
12 ܘܲܕ݂ܒܲܪ ܝܼܫܘܿܥ ܚܲܡܫܵܐ ܐܲܠܦ̈ܝܼܢ ܓܲܒ̣ܪ̈ܝܼܢ: ܘܐܵܘܬܸ̇ܒ̣ ܐܸܢܘܿܢ ܒܲܟ݂ܡܹܐܢܵܐ ܒܲܝܢܵܬ̣ ܒܹܝܬ̣ ܐܹܝܠ ܠܥܵܝ: ܡ̣ܢ ܡܲܥܪ̱ܒ̣ܵܝܵܗ̇ ܕܲܡܕ݂ܝܼܢ̄ܬܵܐ.
13 ܘܥܲܒ̣ܕܹ̇ܗ ܠܥܲܡܹܗ ܘܲܠܟ݂ܠܵܗ̇ ܡܲܫܪܝܼܬܹܗ ܡ̣ܢ ܓܲܪܒ̇ܝܵܝܵܗ̇ ܕܲܡܕ݂ܝܼܢ̄ܬܵܐ: ܘܢܵܛܪ̈ܲܝ ܥܸܩܒ̣ܵܐ ܡ̣ܢ ܡܲܥܪ̱ܒ̣ܵܝܵܗ̇ ܕܲܡܕ݂ܝܼܢ̄ܬܵܐ. ܘܐܸܙܲܠ̣ ܝܼܫܘܿܥ ܒܠܸܠܝܵܐ ܗܵܘ̇ ܒܓ̣ܵܘ ܥܲܡܵܐ.
14 ܘܟܲܕ݂ ܚܙ̣ܵܐ ܡܲܠܟܵܐ ܕܥܵܝ ܐܸܣܬܲܪܗܲܒ̣ ܘܩܵܡ̣ܘ ܢܦܲܩ̣ܘ ܐ̄ܢܵܫܹܝ̈ܗ̇ ܕܲܡܕ݂ܝܼܢ̄ܬܵܐ ܠܐܘܼܪܥܹܗ ܕܝܼܣܪܵܝܹܠ: ܘܲܗܘ̤ܵܘ ܟܠܹܗ ܥܲܡܵܐ ܕܥܵܝ ܒܲܦܩܲܥܬ̣ܵܐ: ܘܥܲܡܵܐ ܠܵܐ ܝܵܕܲܥ ܗ̄ܘ̣ܵܐ ܕܲܟ݂ܡܹܐܢܵܐ ܐܝܼܬ̣ ܗ̄ܘ̣ܵܐ ܠܗܘܿܢ ܡ̣ܢ ܒܸܣܬ̇ܪܵܗ̇ ܕܲܡܕ݂ܝܼܢ̄ܬܵܐ.
15 ܘܐܸܬ̣ܒܲܕܲܪ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܡ̣ܢ ܩܕ݂ܵܡܲܝܗܘܿܢ ܠܡܸܥܪܲܩ ܒܐܘܼܪܚܵܐ ܕܡܲܕ݂ܒ̇ܪܵܐ.
16 ܘܲܩ̣ܥܵܐ ܟܠܹܗ ܥܲܡܵܐ ܕܥܵܝ ܠܡܸܪܕܲܦ ܒܵܬܲܪܗܘܿܢ: ܘܲܪܕܲܦܲܘ ܒܵܬܲܪ ܝܼܫܘܿܥ: ܘܐܸܣܬܲܪܲܩܘ ܠܗܘܿܢ ܡ̣ܢ ܡܕ݂ܝܼܢ̄ܬܵܐ.
17 ܘܠܵܐ ܐܸܫܬ̇ܚܲܪ ܐ̄ܢܵܫ ܒܥܵܝ: ܘܲܒ̣ܒܹܬ̣ ܐܹܝܠ: ܕܠܵܐ ܢܦܲܩ̣ܘ ܒܵܬܲܪ ܝܼܣܪܵܝܹܠ. ܘܫܲܒ̣ܩܘܼܗ̇ ܠܲܡܕ݂ܝܼܢ̄ܬܵܐ ܟܲܕ݂ ܦܬ̣ܝܼܚܵܐ: ܘܲܪܕܲܦ̣ܘ ܒܵܬܲܪ ܝܼܣܪܵܝܹܠ.
18 ܘܐܸܡܲܪ ܡܵܪܝܵܐ ܠܝܼܫܘܿܥ: ܐܲܪܝܼܡ ܒܢܲܝܙܟ݂ܵܐ ܕܒ̣ܐܝܼܕ݂ܵܟ݂ ܥܲܠ ܥܵܝ: ܡܸܛܠ ܕܒ̣ܐܝܼܕܲܝ̈ܟ ܐܲܫܠܸܡ̇ܬܵܗ̇. ܘܐܲܪܝܼܡ ܝܼܫܘܿܥ ܒܢܲܝܙܟ݂ܵܐ ܕܐܲܚܝܼܕ݂ ܗ̄ܘ̣ܵܐ ܒܐܝܼܕܹܗ ܥܲܠ ܡܕ݂ܝܼܢ̄ܬܵܐ.
19 ܘܲܟ݂ܡܹܐܢܵܐ ܩܵܡ̣ ܡܣܵܪ̱ܗܒ̣ܵܐܝܼܬ̣ ܡ̣ܢ ܕܘܼܟ̇ܬܹܗ: ܘܲܪܗܸܛܘ ܚܦܝܼܛܵܐܝܼܬ̣ ܐܲܝܟ݂ ܡܲܦܢܸܐ ܐܝܼܕ݂ܵܐ. ܘܥܲܠ̣ܘ ܠܲܡܕ݂ܝܼܢ̄ܬܵܐ ܘܐܲܚܕ̇ܘܼܗ̇: ܘܐܸܣܬܲܪܗܲܒ̣ܘ ܘܐܵܘܩܕ݂ܘܼܗ̇ ܠܲܡܕ݂ܝܼܢ̄ܬܵܐ ܒܢܘܼܪܵܐ.
20 ܘܐܸܬ̣ܦܢܝܼܘ ܐ̄ܢܵܫܵܐ ܕܥܵܝ ܠܒܸܣܬܲܪܗܘܿܢ: ܘܲܚܙܵܘ ܕܣܵܠܹܩ ܬܸܢܵܢܵܐ ܕܲܡܕ݂ܝܼܢ̄ܬ̇ܗܘܿܢ ܥܕܲܡܵܐ ܠܲܫܡܲܝܵܐ: ܘܠܵܐ ܐܵܘܦܝܼܘ ܠܡܸܥܪܲܩ ܠܟ݂ܵܐ ܘܲܠܟ݂ܵܐ. ܘܥܲܡܵܐ ܕܝܼܣܪܵܝܹܠ ܕܥܵܪܹܩ ܗ̄ܘ̣ܵܐ ܒܡܲܕ݂ܒ̇ܪܵܐ: ܐܸܬ̣ܗ̱ܦܲܟ݂ ܥܲܠ ܪ̈ܵܕ݂ܘܿܦܵܘܗܝ.
21 ܘܝܼܫܘܿܥ ܘܟ݂ܠܹܗ ܝܼܣܪܵܝܹܠ: ܚܙ̣ܵܘ ܕܟܲܒ̣ܫܵܗ̇ ܟܡܹܐܢܵܐ ܠܲܡܕ݂ܝܼܢ̄ܬܵܐ: ܘܲܣܠܸܩ ܬܸܢܵܢܵܗ̇ ܕܲܡܕ݂ܝܼܢ̄ܬܵܐ: ܘܲܗܦܲܟ݂ܘ ܘܲܚܪܲܒ̣ܘ ܐܸܢܘܿܢ ܠܐ̄ܢܵܫܹ̈ܝܗ̇ ܕܥܵܝ.
22 ܘܗܵܠܹܝܢ ܢܦܲܩ̣ܘ ܡ̣ܢ ܡܕ݂ܝܼܢ̄ܬܵܐ ܠܐܘܼܪ̱ܥܗܘܿܢ: ܘܲܗܘ̣ܵܘ ܠܗܘܿܢ ܐ̄ܢܵܫܹ̈ܝܗ̇ ܕܥܵܝ ܒܲܡܨܲܥܬܹܗ ܕܝܼܣܪܵܝܹܠ: ܘܗܵܠܹܝܢ ܡܸܟܵܐ ܘܗܵܠܹܝܢ ܡܸܟܵܐ. ܘܲܚܪܲܒ̣ܘ ܐܸܢܘܿܢ: ܘܲܣܪܝܼܕ݂ܵܐ ܠܵܐ ܫܒܲܩ̣ܘ ܠܗܘܿܢ.
23 ܘܲܠܡܲܠܟܵܐ ܕܥܵܝ ܐܲܚܕ̇ܘܼܗܝ ܟܲܕ݂ ܚܲܝ: ܘܩܲܪܒ̣ܘܼܗܝ ܠܘܵܬ̣ ܝܼܫܘܿܥ.
24 ܘܟܲܕ݂ ܓܲܡܲܪ ܝܼܣܪܵܝܹܠ ܠܡܸܚܪܲܒ̣ ܠܟ݂ܠܗܘܿܢ ܥܵܡ̇ܘܿܪܹ̈ܝܗ̇ ܕܥܵܝ: ܒܚܲܩ̈ܠܵܬ̣ܵܐ ܘܲܒ̣ܡܲܕ݂ܒ̇ܪܵܐ ܪܵܕ݂ܦܝܼܢ ܗ̄ܘ̣ܵܘ ܠܗܘܿܢ ܘܲܢܦܲܠ̣ܘ ܟܠܗܘܿܢ ܒܦܘܼܡܵܐ ܕܚܲܪܒܵܐ ܥܕܲܡܵܐ ܕܲܓ̣ܡܲܪܘ. ܘܲܗܦܲܟ݂ܘ ܟܠܹܗ ܝܼܣܪܵܝܹܠ ܠܥܵܝ: ܘܚܲܪܒ̣ܵܘܼܗ̇ ܒܦܘܼܡܵܐ ܕܚܲܪܒܵܐ.
25 ܘܟ݂ܠܗܘܿܢ ܕܲܢܦܲܠ̣ܘ ܒܝܵܘܡܵܐ ܗܵܘ̇: ܡ̣ܢ ܓܲܒ̣ܪܹ̈ܐ ܘܲܥܕܲܡܵܐ ܠܢܸܫܹ̈ܐ ܬܪܸܥܣܲܪ ܐܲܠܦ̈ܝܼܢ: ܟܠܗܘܿܢ ܐ̄ܢܵܫܵܐ ܕܥܵܝ.
26 ܘܝܼܫܘܿܥ ܠܵܐ ܐܲܗܦܲܟ݂ ܐܝܼܕܹܗ ܕܐܲܪܝܼܡ ܗ̄ܘ̣ܵܐ ܒܢܲܝܙܟ݂ܵܐ: ܥܕܲܡܵܐ ܕܲܚܪܲܒ̣ ܐܸܢܘܿܢ ܠܟ݂ܠܗܘܿܢ ܥܵܡܘܿܪܹ̈ܝܗ̇ ܕܥܵܝ.
27 ܒܲܠܚܘܿܕ݂ ܒܥܝܼܪܵܐ ܘܒܸܙܬ̣ܵܐ ܕܲܡܕ݂ܝܼܢ̄ܬܵܐ ܗܵܝ̇: ܒܲܙܘ ܠܗܘܿܢ ܒ̈ܢܲܝ ܝܼܣܪܵܝܹܠ: ܐܲܝܟ݂ ܡܸܠܬܹܗ ܕܡܵܪܝܵܐ ܕܦܲܩܸܕ݂ ܠܝܼܫܘܿܥ.
28 ܘܐܵܘܩܕ݂ܵܗ̇ ܝܼܫܘܿܥ ܠܥܵܝ: ܘܥܲܒ̣ܕܵܗ̇ ܬܸܠܵܐ ܚܲܪܒܵܐ ܠܥܵܠܲܡ: ܥܕܲܡܵܐ ܠܝܵܘܡܵܢܵܐ.
29 ܘܲܠܡܲܠܟܵܐ ܕܥܵܝ ܙܲܩ̣ܦܹܗ ܥܲܠ ܩܲܝܣܵܐ: ܥܕܲܡܵܐ ܠܙܲܒ̣ܢܵܐ ܕܪܲܡܫܵܐ. ܘܟܲܕ݂ ܥܸܪܒܲܬ̤ ܫܸܡܫܵܐ: ܦ̣ܩܲܕ݂ ܝܼܫܘܿܥ ܘܐܲܚܬ̣ܘܼܗ̇ ܠܲܫܠܲܕܵܐ ܡ̣ܢ ܩܲܝܣܵܐ: ܘܐܲܪܡ̱ܝܘܼܗ̇ ܒܡܲܥܠܵܢܵܐ ܕܬܲܪܥܵܐ ܕܲܡܕ݂ܝܼܢ̄ܬܵܐ: ܘܐܲܩܝܼܡܘ ܥܠܵܘܗܝ ܝܲܓܪܵܐ ܕܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ ܥܕܲܡܵܐ ܠܝܵܘܡܵܢܵܐ.
30 ܗܵܝܕܹ̇ܝܢ ܒܢ̣ܵܐ ܝܼܫܘܿܥ ܡܲܕ݂ܒ̇ܚܵܐ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܒܛܘܼܪܵܐ ܕܲܓ̣ܒܸܠ.
31 ܐܲܝܟ݂ ܕܦܲܩܸܕ݂ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ ܠܲܒ̣̈ܢܲܝ ܝܼܣܪܵܝܹܠ: ܐܲܝܟ݂ ܕܲܟ݂ܬ̣ܝܼܒ̣ ܒܣܸܦܪܵܐ ܕܢܵܡܘܿܣܵܐ ܕܡܘܼܫܹܐ: ܡܲܕ݂ܒ̇ܚܵܐ ܕܟܹܐܦܹ̈ܐ ܫܠܲܡ̱ܠ̈ܡܵܬ̣ܵܐ: ܕܠܵܐ ܢܸܦܲܠ ܥܠܲܝܗܹܝܢ ܦܲܪܙܠܵܐ: ܘܩܲܪܸܒ̣ܘ ܥܠܵܘܗܝ ܝܲܩ̈ܕܹ̇ܐ ܫܲܠܡܹ̈ܐ ܠܡܵܪܝܵܐ: ܘܕܲܒܲܚܘ ܕܸܒ̣̈ܚܵܬ̣ܵܐ.
32 ܘܲܟ݂ܬܲܒ̣ ܬܲܡܵܢ ܥܲܠ ܟܹܐܦܹ̈ܐ ܗܵܠܹܝܢ ܕܡܲܕ݂ܒ̇ܚܵܐ: ܦܲܪܫܲܓ̣ܢܵܐ ܕܢܵܡܘܿܣܹܗ ܕܡܘܼܫܹܐ: ܕܲܟ݂ܬܲܒ̣ ܩܕ݂ܵܡ ܒ̈ܢܲܝ ܝܼܣܪܵܝܹܠ.
33 ܘܟ݂ܠܹܗ ܝܼܣܪܵܝܹܠ: ܘܩܲܫܝܼܫܵܘ̈ܗܝ: ܘܣܵܦܪ̈ܵܘܗܝ: ܘܕܲܝܵܢܵܘ̈ܗܝ: ܩܵܝ̇ܡܝܼܢ ܡܸܟܵܐ ܘܡܸܟܵܐ: ܡ̣ܢ ܬܪ̈ܲܝܗܘܿܢ ܣܸܛܪܹ̈ܝܗ̇ ܕܩܹܒ̣ܘܿܬ̣ܵܐ: ܠܘܼܩܒܲܠ ܟܵܗܢܹ̈ܐ ܘܠܹܘܵܝܹ̈ܐ ܕܲܫܩܝܼܠܝܼܢ ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ ܐܲܝܟ݂ ܒܘܼܟ݂ܢܹ̈ܐ. ܘܗܵܟ݂ܘܵܬ̣ ܥܵܡܘܿܪܹ̈ܐ ܦܸܠܓ̇ܗܘܿܢ ܠܘܼܩܒܲܠ ܛܘܼܪܵܐ ܕܓܲܪܙܝܼܡ: ܘܦܸܠܓܗܘܿܢ ܠܘܼܩܒܲܠ ܛܘܼܪܵܐ ܕܲܓ̣ܒܸܠ: ܐܲܝܟܲܢܵܐ ܕܦܲܩܸܕ݂ ܡܘܼܫܹܐ ܥܲܒ̣ܕܹܗ ܕܡܵܪܝܵܐ: ܠܲܡܒܲܪܵܟ݂ܘܼ ܠܝܼܣܪܵܝܹܠ ܐܲܝܟ݂ ܕܡ̣ܢ ܩܕ݂ܝܼܡ.
34 ܘܡ̣ܢ ܒܵܬܲܪܟܸ̇ܢ ܩ̣ܪܵܐ ܝܼܫܘܿܥ ܟܠܗܘܿܢ ܦܸܬ̣ܓ̣ܵܡܵܘ̈ܗܝ ܕܢܵܡܘܿܣܵܐ: ܒܘܼܪ̈ܟܵܬ̣ܵܐ ܘܠܵܘ̈ܛܵܬ̣ܵܐ ܟܠܗܹܝܢ ܕܲܟ݂ܬ̣ܝܼܒ̣ܵܢ ܒܣܸܦܪܵܐ ܕܢܵܡܘܿܣܵܐ.
35 ܠܵܐ ܫܒܲܩ ܚܕ݂ܵܐ ܡܸܠܬܵܐ ܡ̣ܢ ܟܠ ܕܦܲܩܸܕ݂ ܡܘܼܫܹܐ ܕܠܵܐ ܩ̣ܪܵܐ ܝܼܫܘܿܥ ܩܕ݂ܵܡ ܟܠܵܗ̇ ܟܢܘܼܫܬܵܐ ܕܝܼܣܪܵܝܹܠ: ܘܲܩܕ݂ܵܡ ܢܸܫܹ̈ܐ: ܘܲܩܕ݂ܵܡ ܛܠܵܝܹ̈ܐ: ܘܲܩܕ݂ܵܡ ܬܵܘܬܵܒ̣̈ܐ ܕܒܲܝܢܵܬ̣ܗܘܿܢ.
1 ܘܟܲܕ݂ ܫ̣ܡܲܥܘ ܟܠܗܘܿܢ ܡܲܠ̈ܟܹ̇ܐ ܕܐܝܼܬ̣ ܒܥܸܒ̣ܪܵܐ ܕܝܘܿܪܕ̇ܢܵܢ: ܒܛܘܼܪܹ̈ܐ ܘܲܒ̣ܦܲܩ̈ܥܵܬ̣ܵܐ: ܘܲܒ̣ܟ݂ܠܗܘܿܢ ܣܦܵܪ̈ܵܘܗܝ ܕܝܲܡܵܐ ܪܲܒܵܐ ܕܠܘܼܩܒܲܠ ܠܸܒ̣ܢܵܢ: ܚܹܝܬ̣ܵܝܹ̈ܐ: ܘܐܵܡܘܿܪ̈ܵܝܹܐ: ܘܲܟ݂ܢܲܥ̈ܢܵܝܹܐ: ܘܦܲܪ̈ܙܵܝܹܐ: ܘܚܵܘܵܝܹ̈ܐ: ܘܝܵܒ̣̈ܘܿܣܵܝܹܐ.
2 ܐܸܬ̣ܟܲܢܲܫܘ ܐܲܟ݂ܚ̄ܕ݂ܵܐ ܠܡܸܥܒܲܕ݂ ܩܪܵܒ̣ܵܐ ܥܲܡ ܝܼܫܘܿܥ ܘܥܲܡ ܝܼܣܪܵܝܹܠ: ܡ̣ܢ ܚܲܕ݂ ܦܘܼܡ.
3 ܘܥܵܡܘܿܪܹ̈ܐ ܕܓܒ̣ܥܘܿܢ ܫ̣ܡܲܥܘ ܡܸܕܸ̇ܡ ܕܲܥ̣ܒܲܕ݂ ܝܼܫܘܿܥ ܠܥܵܝ ܘܠܐܝܼܪܝܼܚܘܿ.
4 ܘܲܥ̣ܒܲܕ݂ܘ ܐܵܦ ܗܸܢܘܿܢ ܒܲܥܪܝܼܡܘܼܬ̣ܵܐ: ܘܐܸܙܲܠ̣ܘ ܐܸܙܕܵܘܲܕ݂ܘ. ܘܐܲܪܡܝܼܘ ܣܲܩܹ̈ܐ ܒܠܵܝܹ̈ܐ ܥܲܠ ܚܸܡ̱ܪ̈ܗܘܿܢ: ܘܙܸܩܹ̈ܐ ܕܚܲܡܪܵܐ ܕܲܒ̣̈ܠܵܝܵܢ: ܘܲܡܒܲܙ̈ܥܵܢ ܘܲܡܨܲܪ̈ܪܵܢ.
5 ܘܲܡܣܵܢܹ̈ܐ ܕܲܒ̣̈ܠܵܝܑܝܼܢ ܘܛܲܪ̈ܡܵܣܝܵܬ̣ܵܐ ܣܐܝܼܢܝܼܢ ܗ̄ܘ̣ܵܘ ܒܪܸ̈ܓ̣ܠܲܝܗܘܿܢ: ܘܢܲܚ̈ܬܹ̇ܐ ܒ̈ܠܵܝܹܐ ܠܒ̣ܝܼܫܝܼܢ ܗ̄ܘ̣ܵܘ. ܘܠܲܚܡܵܐ ܕܲܙܘܵܕܲܝ̈ܗܘܿܢ ܝܲܒܸ̇ܫܘ: ܘܲܗܘ̣ܵܐ ܠܹܗ ܦܲܓܘܼܪܵܐ.
6 ܘܐܸܬ̣ܵܘ ܠܘܵܬ̣ ܝܼܫܘܿܥ ܠܡܲܫܪܝܼܬ̣ܵܐ ܠܓܲܠܓܵܠܵܐ: ܘܐܸܡܲܪܘ ܠܹܗ ܘܠܲܕ݂ܒܹܝܬ̣ ܝܼܣܪܵܝܹܠ: ܡ̣ܢ ܐܲܬ̣ܪܵܐ ܪܲܚܝܼܩܵܐ ܐܸܬܲܝܢ: ܗܵܫܵܐ ܗܲܒ̣ܘ ܠܲܢ ܝܲܡܝܼܢܵܐ.
7 ܐܵܡ̇ܪܝܼܢ ܕܒܹܝܬ̣ ܝܼܣܪܵܝܹܠ ܠܚܵܘܵܝܹ̈ܐ. ܐܸܢ ܠܘܵܬ̣ܵܢ ܥܵܡܪܝܼܢ ܐ̄ܢܬܘܿܢ: ܠܡܵܢܵܐ ܗܵܘ̇ܝܵܐ ܠܟ݂ܘܿܢ ܝܲܡܝܼܢܵܐ.
8 ܘܐܸܡܲܪܘ ܠܝܼܫܘܿܥ ܥܲܒ̣ܕܲܝ̈ܟ ܚܢܲܢ: ܐܵܡܲܪ ܠܗܘܿܢ ܝܼܫܘܿܥ ܐܲܝܡܸܟܵܐ ܐܲܢ̄ܬ̇ܘܿܢ: ܘܡ̣ܢ ܐܲܝܡܸܟܵܐ ܐܸܬܲܝܬ̇ܘܿܢ.
9 ܘܐܸܡܲܪܘ ܠܹܗ: ܡ̣ܢ ܐܲܬ̣ܪܵܐ ܕܪܲܚܝܼܩ ܛܵܒ̣ ܐܸܬ̣ܵܘ ܥܲܒ̣ܕܲܝ̈ܟ: ܠܲܫܡܹܗ ܕܡܵܪܝܵܐ ܐܲܠܵܗܵܟ݂. ܡܸܛܠ ܕܲܫ̣ܡܲܥܢ ܫܡܹܗ ܘܟ݂ܠܡܸܕܸ̇ܡ ܕܲܥܒܲܕ݂ ܒܡܸܨܪܹܝܢ.
10 ܘܟ݂ܠ ܕܲܥܒܲܕ݂ ܠܲܬ̣ܪ̈ܲܝܗܘܿܢ ܡܲܠ̈ܟܹ̇ܐ ܕܐܵܡܘܿܪ̈ܵܝܹܐ ܕܲܒ̣ܥܸܒ̣ܪܵܐ ܕܝܘܿܪܕ̇ܢܵܢ: ܠܣܝܼܚܘܿܢ ܡܲܠܟܵܐ ܕܚܸܫܒ̇ܘܿܢ: ܘܲܠܥܘܿܓ̣ ܡܲܠܟܵܐ ܕܡܲܬ̣ܢܝܢ: ܕܝܵܬܹܒ̣ ܗ̄ܘ̣ܵܐ ܒܥܸܣܬ̇ܪܘܼܬ̣.
11 ܘܐܸܡܲܪܘ ܠܲܢ ܩܲܫ̈ܝܼܫܲܢ: ܘܟ݂ܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܲܢ: ܣܲܒ̣ܘ ܥܲܡܟ݂ܘܿܢ ܙܘܵܕܹ̈ܐ ܠܐܘܼܪܚܵܐ ܘܙܸܠܘ ܠܐܘܼܪܥ̱ܗܘܿܢ: ܘܐܸܡܲܪܘ ܠܗܘܿܢ ܕܥܲܒ̣ܕܲܝ̈ܟ̇ܘܿܢ ܚܢܲܢ: ܡܸܟܹ̇ܝܠ ܗܲܒ̣ܘ ܠܲܢ ܝܲܡܝܼܢܵܐ.
12 ܘܐܸܡܲܪܘ ܠܝܼܫܘܿܥ: ܗܵܢܵܐ ܠܲܚܡܲܢ ܟܲܕ݂ ܚܲܡܝܼܡ ܐܸܙܕܵܘܲܕ݂ܢܵܝܗܝ ܡ̣ܢ ܒܵـ̈ـܬܹ̇ܝܢ: ܒܝܵܘܡܵܐ ܕܲܢܦܲܩ̄ܢ ܠܡܹܐܬ̣ܵܐ ܠܘܵܬ̣ܟ݂ܘܿܢ: ܘܗܵܫܵܐ ܗܵܐ ܝܼܒܸܫ ܘܲܗܘ̤ܵܐ ܦܲܓܘܼܪܵܐ.
13 ܘܗܵܠܹܝܢ ܙܸܩܹ̈ܐ ܕܚܲܡܪܵܐ: ܡܠܲܝܢ ܐܸܢܹܝܢ ܟܲܕ݂ ܚܲܕ݂ܬ̣ܵܢ: ܘܗܵܐ ܐܸܬ̣ܒ̇ܙܲܥ. ܘܗܵܠܹܝܢ ܢܲܚ̈ܬܲܝܢ ܘܲܡܣܵـ̈ـܢܲܝ̈ܢ: ܟܲܕ݂ ܚܲܕ݂ܬ̣̈ܝܼܢ ܢܣܲܒ̣̄ܢ ܐܸܢܘܿܢ ܠܲܢ: ܘܗܵܐ ܒܠܝܼܘ: ܡܸܛܠ ܕܛܵܒ̣ ܣܲܓܝܼܐܵܐ ܗ̄ܘ̣ܵܬ̣ ܐܘܼܪܚܵܐ.
14 ܘܲܢܣܲܒ̣ܘ ܓܲܒ̣ܪܹ̈ܐ ܗܵܠܹܝܢ ܡ̣ܢ ܙܘܵܕܲܝ̈ܗܘܿܢ ܘܐܸܙܲܠ̣ܘ: ܘܡ̣ܢ ܦܘܼܡܹܗ ܕܡܵܪܝܵܐ ܠܵܐ ܫܐܸܠܘ.
15 ܘܲܥܒܲܕ݂ ܠܗܘܿܢ ܝܼܫܘܿܥ ܫܠܵܡܵܐ: ܘܝܲܗ̄ܒ̣ ܠܗܘܢ ܝܲܡܝܼܢܵܐ ܠܚܲܝܲܝ̈ܗܘܿܢ: ܘܝܼܡܵܘ ܠܗܘܿܢ ܪܵܘ̱ܪ̈ܒ̣ܵܢܹܐ ܕܲܟ݂ܢܘܼܫܬܵܐ.
16 ܘܡ̣ܢ ܒܵܬܲܪ ܬܠܵܬ̣ܵܐ ܝܵܘ̈ܡܝܼܢ: ܡ̣ܢ ܒܵܬܲܪ ܕܝܲܗ̄ܒ̣ܘ ܠܗܘܿܢ ܝܲܡܝܼܢܵܐ: ܫ̣ܡܲܥܘ ܕܩܲܪܝ̣ܒ̣ܝܼܢ ܐܸܢܘܿܢ ܠܗܘܿܢ: ܘܒܲܝܢܵܬ̣ܗܘܿܢ ܫܪܹܝܢ.
17 ܘܲܫܩܲܠܘ ܒ̈ܢܲܝ ܝܼܣܪܵܝܹܠ: ܘܐܸܬ̣ܵܘ ܠܩܘܼܪ̈ܝܼܗܘܿܢ ܒܝܵܘܡܵܐ ܕܲܬ̣ܠܵܬ̣ܵܐ: ܘܲܫܡܵܗܹ̈ܐ ܕܩܘܼܪ̈ܝܼܗܘܿܢ: ܓܸܒ̣ܥܘܿܢ: ܘܲܟ݂ܦܝܼܪܵܐ: ܘܥܝܼܪܘܼܬ̣: ܘܩܘܼܪܝܲܬ̣ ܢܲܥܪܝܼܢ.
18 ܘܠܵܐ ܩܲܛܸܠܘ ܐܸܢܘܿܢ ܒ̈ܢܲܝ ܝܼܣܪܵܝܹܠ: ܡܸܛܠ ܕܝܼܡܵܘ ܠܗܘܿܢ ܪܵܘ̱ܪ̈ܒ̣ܵܢܹܐ ܕܲܟ݂ܢܘܼܫܬܵܐ ܒܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܪܵܛܢܝܼܢ ܗ̄ܘ̣ܵܘ ܘܪܵܝܒ̇ܝܼܢ ܟܠܵܗ̇ ܟܢܘܼܫܬܵܐ ܥܲܠ ܪܵܘ̱ܪ̈ܒ̣ܵܢܹܐ.
19 ܘܐܵܡ̇ܪܝܼܢ ܪܵܘ̱ܪ̈ܒ̣ܵܢܹܐ ܕܲܟ݂ܢܘܼܫܬܵܐ: ܚܢܲܢ ܝܼܡܲܝܢ ܠܗܘܿܢ ܒܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡܸܟܹ̇ܝܠ ܠܵܐ ܡܸܫܟ̇ܚܝܼܢܲܢ ܠܡܲܗܵܪܘܼ ܐܸܢܘܿܢ.
20 ܗܵܟܲܢܵܐ ܕܹܝܢ ܥܵܒ̣ܕ̇ܝܼܢ ܚ̄ܢܲܢ ܘܡܲܚܹ̇ܝܢ ܚ̄ܢܲܢ ܠܗܘܿܢ: ܕܠܵܐ ܢܸܗܘܹܐ ܥܠܲܝܢ ܪܘܼܓ̣ܙܵܐ: ܡܸܛܠ ܡܵܘܡܵܬ̣ܵܐ ܕܝܼܡܲܢ ܠܗܘܿܢ.
21 ܘܐܵܡ̇ܪܝܼܢ ܪܵܘ̱ܪ̈ܒ̣ܵܢܹܐ ܠܲܒ̣̈ܢܲܝ ܝܼܣܪܵܝܹܠ: ܢܸܚܘܿܢ: ܘܢܸܗܘܘܿܢ ܠܵܩܛܝܼܢ ܩܲܝܣܹ̈ܐ: ܘܡܵܠܹ̇ܝܢ ܡܲـ̈ـܝܵܐ ܠܟ݂ܠܵܗ̇ ܟܢܘܼܫܬܵܐ. ܘܲܗܘ̤ܵܘ ܠܵܩܛܲܝ̈ ܩܲܝܣܹ̈ܐ ܘܡܵܠܲܝ̈ ܡܲـ̈ـܝܵܐ ܠܲܟ݂ܢܘܼܫܬܹ̇ܗ ܕܡܵܪܝܵܐ ܥܕܲܡܵܐ ܠܝܵܘܡܵܢܵܐ: ܐܲܝܟܲܢܵܐ ܕܐܸܡܲܪܘ ܠܗܘܿܢ ܪܵܘ̱ܪ̈ܒ̣ܵܢܹܐ.
22 ܘܲܩ̣ܪܵܐ ܐܸܢܘܿܢ ܝܼܫܘܿܥ ܘܐܸܡܲܪ ܠܗܘܿܢ: ܠܡܵܢܵܐ ܢܟ݂ܠܬ̇ܘܿܢܵܢ ܘܐܸܡܲܪܬ̇ܘܿܢ ܠܲܢ ܕܛܵܒ̣ ܪܲܚܝܼܩܝܼܢ ܚ̄ܢܲܢ ܡܸܢܟ݂ܘܿܢ: ܘܗܵܐ ܠܘܵܬܲܢ ܥܵܡ̇ܪܝܼܢ ܐ̄ܢܬ̇ܘܿܢ.
23 ܡܸܟܹ̇ܝܠ ܬܸܗܘܘܿܢ ܠܝܼܛܝܼܢ: ܘܠܵܐ ܢܸܥܢܲܕ݂ ܡܸܢܟ݂ܘܿܢ ܓܲܒ̣ܪܵܐ ܠܵܩܹ̇ܛ ܩܲܝܣܹ̈ܐ ܘܡܵܠܹ̇ܐ ܡܲـ̈ـܝܵܐ ܠܒܲܝܬܹ̇ܗ ܕܐܲܠܵܗܵܐ.
24 ܘܲܥܢ̣ܵܘ ܘܐܸܡܲܪܘ ܠܝܼܫܘܿܥ: ܡܸܫܬ̇ܡܵܥܘܼ ܐܸܫܬ̇ܡܲܥ ܠܥܲܒ̣ܕܲܝ̈ܟ ܡܸܕܸ̇ܡ ܕܦܲܩܸܕ݂ ܡܵܪܝܵܐ ܐܲܠܵܗܵܟ݂ ܠܡܘܼܫܹܐ ܥܲܒ̣ܕܹ̇ܗ: ܠܡܸܬܲܠ ܠܟ݂ܘܿܢ ܟܠܵܗ̇ ܐܲܪܥܵܐ: ܘܲܠܡܵܘܒܵܕ݂ܘ ܠܟ݂ܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ ܡ̣ܢ ܩܕ݂ܵܡܲܝܟ̇ܘܿܢ. ܘܲܕ݂ܚܸܠ̄ܢ ܛܵܒ̣ ܡ̣ܢ ܢܲܦ̮ܫܲܢ ܘܲܥܒܲܕ̄ܢ ܗܵܟܲܢܵܐ.
25 ܗܵܫܵܐ ܗܵܐ ܒܐܝܼܕܲܝ̈ܟ ܚ̄ܢܲܢ. ܐܲܝܟܲܢܵܐ ܕܫܲܦܝܼܪ ܒܥܲܝܢܲܝ̈ܟ ܠܡܸܥܒܲܕ݂ ܠܲܢ: ܥܒܸܕ݂ ܠܲܢ.
26 ܘܲܥܒܲܕ݂ ܠܗܘܿܢ ܝܼܫܘܿܥ ܗܵܟܲܢܵܐ: ܘܦܲܨܝܼ ܐܸܢܘܿܢ ܡ̣ܢ ܐܝܼܕ݂ܵܐ ܕܝܼܣܪܵܝܹܠ: ܘܠܵܐ ܩܲܛܠܘ ܐܸܢܘܿܢ.
27 ܘܲܥܒܲܕ݂ ܐܸܢܘܿܢ ܝܼܫܘܿܥ ܒܹܗ ܒܝܵܘܡܵܐ ܗܵܘ̇: ܠܵܩܛܲܝ̈ ܩܲܝܣܹ̈ܐ: ܘܡܵܠܲܝ̈ ܡܲـ̈ـܝܵܐ ܠܲܟ݂ܢܘܼܫܬܵܐ ܘܲܠܡܲܕ݂ܒ̇ܚܹܗ ܕܡܵܪܝܵܐ ܥܕܲܡܵܐ ܠܝܵܘܡܵܢܵܐ: ܒܐܲܬ̣ܪܵܐ ܕܨܵܒܹ̇ܐ ܡܵܪܝܵܐ.
1 ܘܟܲܕ݂ ܫ̣ܡܲܥ ܐܲܕ݂ܘܿܢܝܼܨܕܸܩ ܡܲܠܟܵܐ ܕܐܘܿܪܸܫܠܸܡ: ܕܟܲܒ̣ܫܵܗ̇ ܝܼܫܘܿܥ ܠܥܵܝ ܘܚܲܪܒܵܗ̇: ܐܲܝܟܲܢܵܐ ܕܲܥ̣ܒܲܕ݂ ܠܐܝܼܪܝܼܚܘܿ ܘܲܠܡܲܠܟܵܗ̇: ܗܵܟܲܢܵܐ ܥ̣ܒܲܕ݂ ܠܥܵܝ ܘܲܠܡܲܠܟܵܗ̇: ܘܕܲܫܠܸܡܘ ܥܵܡܘܿܪܹ̈ܝܗ̇ ܕܓܸܒ̣ܥܘܿܢ ܥܲܡ ܝܼܣܪܵܝܹܠ ܘܲܗܘ̤ܵܘ ܒܲܝܢܵܬ̣ܗܘܿܢ.
2 ܕܚܸܠ ܛܵܒ̣: ܡܸܛܠ ܕܲܡܕ݂ܝܼܢ̄ܬܵܐ ܗ̄ܝ̣ ܪܲܒ̇ܬ̣ܵܐ ܓܸܒ̣ܥܘܿܢ: ܐܲܝܟ݂ ܚܕ݂ܵܐ ܡ̣ܢ ܡܕ݂ܝܼ̈ܢܵܬ̣ܵܐ ܕܡܲܠܟ̇ܘܼܬ̣ܵܐ. ܘܪܲܒܵܐ ܗ̄ܘ̣ܵܬ̣ ܡ̣ܢ ܥܵܝ: ܘܟ݂ܠܗܘܿܢ ܓܲܒ̣ܪܹ̈ܝܗ̇ ܓܲܢ̄ܒܵܪ̈ܝܼܢ ܗ̄ܘ̣ܵܘ.
3 ܘܫܲܕܲܪ ܐܲܕ݂ܘܿܢܝܼܨܕܸܩ ܡܲܠܟܵܐ ܕܐܘܿܪܸܫܠܸܡ ܠܘܵܬ̣ ܗܘܿܗܵܡ ܡܲܠܟܵܐ ܕܚܸܒ̣ܪܘܿܢ: ܘܲܠܘܵܬ̣ ܒܲܪܐܵܢ ܡܲܠܟܵܐ ܕܝܲܪܡܘܼܬ̣: ܘܲܠܘܵܬ̣ ܢܵܦܝܼܥ ܡܲܠܟܵܐ ܕܲܠܟ݂ܝܼܫ: ܘܲܠܘܵܬ̣ ܕܵܒ̣ܝܼܪ ܡܲܠܟܵܐ ܕܥܸܓ̣ܠܘܿܢ.
4 ܘܲܫܠܲܚ ܠܗܘܿܢ: ܕܣܲܩܘ ܠܘܵܬ̣ܝ ܘܲܗܘ̤ܵܘ ܠܝܼ ܥܸܕ݂ܪܵܐ: ܘܢܸܬ̣ܟܲܬܲܫ ܥܲܡ ܓܸܒ̣ܥܘܿܢ: ܡܸܛܠ ܕܐܲܫܠ̱ܡܲܬ̤ ܠܵܗ̇ ܥܲܡ ܝܼܫܘܿܥ: ܘܥܲܡ ܝܼܣܪܵܝܹܠ.
5 ܘܐܸܬ̣ܟܲܢܲܫܘ ܘܲܣܠܸܩܘ ܚܲܡܫܵܐ ܡܲܠܟܲܝ̈ܗܘܿܢ ܕܐܵܡܘܿܪ̈ܵܝܹܐ: ܡܲܠܟܵܐ ܕܐܘܿܪܸܫܠܸܡ: ܘܡܲܠܟܵܐ ܕܚܸܒ̣ܪܘܿܢ: ܘܡܲܠܟܵܐ ܕܝܲܪܡܘܼܬ̣: ܘܡܲܠܟܵܐ ܕܲܠܟ݂ܝܼܫ: ܘܡܲܠܟܵܐ ܕܥܸܓ̣ܠܘܿܢ: ܗܸܢܘܿܢ ܘܟ݂ܠܗܹܝܢ ܡܲܫ̱ܪ̈ܝܵܬ̣ܗܘܿܢ. ܘܲܫܪܵܘ ܥܲܠ ܓܸܒ̣ܥܘܿܢ: ܘܲܥܒܲܕ݂ܘ ܥܲܡܵܗ̇ ܩܪܵܒ̣ܵܐ.
6 ܘܫܲܕܲܪܘ ܐ̄ܢܵܫܵܐ ܕܓܸܒ̣ܥܘܿܢ ܠܘܵܬ̣ ܝܼܫܘܿܥ ܠܡܲܫܪܝܼܬ̣ܵܐ ܠܓܲܠܓܵܠܵܐ ܘܐܸܡܲܪܘ ܠܹܗ: ܠܵܐ ܬܲܪܫܸܠ ܐܝܼܕܲܝ̈ܟ ܡ̣ܢ ܥܲܒ̣ܕܲܝ̈ܟ: ܡܸܛܠ ܕܐܸܬ̣ܟܲܢܲܫܘ ܥܠܲܝܢ ܟܠܗܘܿܢ ܡܲܠܟܲܝ̈ܗܘܿܢ ܕܐܵܡܘܿܪ̈ܵܝܹܐ ܕܥܵܡ̇ܪܝܼܢ ܒܛܘܼܪܵܐ.
7 ܘܲܣܠܸܩ ܝܼܫܘܿܥ ܡ̣ܢ ܓܲܠܓܵܠܵܐ: ܗ̤ܘ ܘܟ݂ܠܹܗ ܥܲܡܵܐ ܩܪܲܒ̣ܬ̣ܵܢܵܐ ܕܥܲܡܹܗ: ܘܟ݂ܠܗܘܿܢ ܓܲܢ̄ܒܵܪ̈ܲܝ ܚܲܝܠܵܐ.
8 ܘܐܸܡܲܪ ܡܵܪܝܵܐ ܠܝܼܫܘܿܥ: ܠܵܐ ܬܸܕ݂ܚܲܠ ܡܸܢܗܘܿܢ: ܡܸܛܠ ܕܒ̣ܐܝܼܕܲܝ̈ܟ ܐܲܫ̱ܠܡܹ̇ܬ̣ ܐܸܢܘܿܢ: ܘܚܲܕ݂ ܡܸܢܗܘܿܢ ܡܸܫܟܲܚ ܠܲܡܩܵܡ ܩܕ݂ܵܡܲܝܟ.
9 ܘܐܸܬ̣ܵܐ ܠܘܵܬ̣ܗܘܿܢ ܝܼܫܘܿܥ ܡ̣ܢ ܫܸܠܝܵܐ: ܟܠܹܗ ܠܸܠܝܵܐ ܣܠܸܩ̣ ܗ̄ܘ̣ܵܐ ܡ̣ܢ ܓܲܠܓܵܠܵܐ.
10 ܘܕܲܠܲܚ ܐܸܢܘܿܢ ܡܵܪܝܵܐ ܩܕ݂ܵܡ ܝܼܣܪܵܝܹܠ: ܘܲܡ̣ܚܵܘ ܐܸܢܘܿܢ ܡܚܘܿܬ̣ܵܐ ܪܲܒ̇ܬ̣ܵܐ ܒܓܸܒ̣ܥܘܿܢ ܕܒܹܝܬ̣ ܚܵܘܪܵܢ: ܘܲܪܕܲܦܘ ܐܸܢܘܿܢ ܒܐܘܼܪܚܵܐ ܕܡܲܣܩܵܢܵܐ ܕܒܹܝܬ̣ ܚܵܘܪܵܢ: ܘܲܚܪܲܒ̣ܘ ܐܸܢܘܿܢ ܥܕܲܡܵܐ ܠܥܵܩܵܪ: ܘܲܥܕܲܡܵܐ ܠܡܵܩܵܪ.
11 ܘܟܲܕ݂ ܥܪܲܩ̣ܘ ܡ̣ܢ ܩܕ݂ܵܡ ܝܼܣܪܵܝܹܠ: ܘܢܵܚܬ̇ܝܼܢ ܗ̄ܘ̣ܵܘ ܒܡܲܚܲܬ̇ܬ̣ܵܐ ܕܒܹܝܬ̣ ܚܵܘܪܵܢ: ܘܡܵܪܝܵܐ ܫܕ݂ܵܐ ܥܲܠܝܗܘܿܢ ܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ ܡ̣ܢ ܫܡܲܝܵܐ: ܥܕܲܡܵܐ ܠܥܵܩܵܪ ܘܡܝܼܬ̣ܘ. ܘܣܲܓ̇ܝܼܐܝܼܢ ܗ̄ܘ̣ܵܘ ܕܡܝܼܬ̣ܘ ܒܟܹܐܦܹ̈ܐ ܕܒܲܪܕ݂ܵܐ: ܡ̣ܢ ܗܵܢܘܿܢ ܕܲܚܪܲܒ̣ܘ ܒ̈ܢܲܝ ܝܼܣܪܵܝܹܠ ܒܚܲܪܒܵܐ.
12 ܗܵܝܕܹ̇ܝܢ ܡܲܠܸܠ̣ ܝܼܫܘܿܥ ܩܕ݂ܵܡ ܡܵܪܝܵܐ: ܒܝܵܘܡܵܐ ܕܐܲܫܠܸܡ ܡܵܪܝܵܐ ܠܐܵܡܘܿܪ̈ܵܝܹܐ ܩܕ݂ܵܡ ܝܼܣܪܵܝܹܠ. ܘܐܸܡܲܪ ܝܼܫܘܿܥ ܩܕ݂ܵܡ ܒ̈ܢܲܝ ܝܼܣܪܵܝܹܠ: ܫܸܡܫܵܐ ܒܓܸܒ̣ܥܘܿܢ ܟܲܬܲܪ: ܘܐܲܢ̄ܬ̇ ܣܲܗܪܵܐ ܒܲܦܩܲܥܬ̣ܵܐ ܕܐܲܝܠܘܿܢ.
13 ܘܟܲܬܲܪ ܫܸܡܫܵܐ: ܘܣܲܗܪܵܐ ܩܵܡ: ܥܕܲܡܵܐ ܕܐܸܬ̣ܦܪܲܥ ܥܲܡܵܐ ܡ̣ܢ ܒܥܸܠܕ̇ܒ̣ܵܒ̣ܵܘ̈ܗܝ: ܘܗܵܐ ܟܬ̣ܝܼܒ̣ ܒܣܸܦܪܵܐ ܕܬܸܫ̈ܒ̇ܚܵܬ̣ܵܐ: ܘܩܵܡ̣ ܫܸܡܫܵܐ ܒܦܸܠܓ̇ܘܼܬ̣ ܫܡܲܝܵܐ: ܘܠܵܐ ܣܲܪܗܸܒ̣ ܠܡܸܥܪܲܒ̣: ܘܲܗܘ̤ܵܐ ܐܲܝܟ݂ ܝܵܘܡܵܐ ܫܲܠܡܵܐ.
14 ܘܠܵܐ ܗܘ̤ܵܐ ܐܲܝܟ݂ ܝܵܘܡܵܐ ܗܵܘ̇ ܩܕ݂ܵܡܵܘܗܝ ܐܵܘ ܒܵܬ̣ܪܹܗ: ܐܲܝܟܲܢܵܐ ܕܲܫ̣ܡܲܥ ܡܵܪܝܵܐ ܒܩܵܠܹܗ ܕܐ̄ܢܵܫ: ܡܸܛܠ ܕܡܵܪܝܵܐ ܥܵܒܹܕ݂ ܗ̄ܘ̣ܵܐ ܩܪܵܒ̣ܵܐ ܠܝܼܣܪܵܝܹܠ.
15 ܘܲܗ̣ܦܲܟ݂ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܥܲܡܹܗ ܠܡܲܫܪܝܼܬ̣ܵܐ ܠܓܲܠܓܵܠܵܐ.
16 ܘܲܥܪܲܩ̣ܘ ܚܲܡܫܵܐ ܡܲܠܟ̇ܝܼ̈ܢ ܗܵܠܹܝܢ: ܘܐܸܬ̇ܛܲܫܝܼܘ ܒܲܡܥܲܪܬ̣ܵܐ ܕܡܵܩܵܪ.
17 ܘܐܸܫܬ̇ܡܲܥ ܠܝܼܫܘܿܥ ܘܐܸܡܲܪܘ ܠܹܗ: ܕܐܸܫܬ̇ܟܲܚܘ ܚܲܡܫܵܐ ܡܲܠܟ̇ܝܼ̈ܢ ܗܵܠܹܝܢ: ܟܲܕ݂ ܛܫܹܝܢ ܒܲܡܥܲܪܬ̣ܵܐ ܕܡܵܩܵܪ.
18 ܘܐܸܡܲܪ ܝܼܫܘܿܥ: ܥܲܓܸ̇ܠܘ ܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ: ܘܐܲܪܡܵܘ ܥܲܠ ܬܲܪܥܵܗ̇ ܕܲܡܥܲܪܬ̣ܵܐ: ܘܲܫܒ̣ܘܿܩܘ ܬܲܡܵܢ ܓܲܒ̣ܪܹ̈ܐ ܕܢܸܛܪܘܿܢ ܐܸܢܘܿܢ.
19 ܐܲܢ̄ܬ̇ܘܿܢ ܕܹܝܢ ܠܵܐ ܬܩܘܼܡܘܼܢ: ܐܸܠܵܐ ܪܕ݂ܘܿܦܘ ܒܵܬܲܪ ܒܥܸܠܕ̇ܒ̣ܵܒܲܝ̈ܟ̇ܘܿܢ ܘܐܲܕ݂ܪܸܟ݂ܘ ܐܸܢܘܿܢ ܘܠܵܐ ܬܸܫܒ̇ܩܘܼܢ ܐܸܢܘܿܢ ܕܢܸܥܠܘܿܢ ܠܲܡܕ݂ܝܼܢ̄ܬܵܐ: ܡܸܛܠ ܕܐܲܫܠܸܡ ܐܸܢܘܿܢ ܡܵܪܝܵܐ ܐܲܠܵܗܟ݂ܘܿܢ ܒܐܝܼܕܲܝ̈ܟ̇ܘܿܢ.
20 ܘܟܲܕ݂ ܓܲܡܲܪ ܝܼܫܘܿܥ ܘܲܒ̣̈ܢܲܝ ܝܼܣܪܵܝܹܠ ܠܡܸܚܪܲܒ̣ ܐܸܢܘܿܢ ܚܲܪܒܵܐ ܪܲܒ̇ܬ̣ܵܐ: ܥܕܲܡܵܐ ܕܲܓ̣ܡܲܪܘ: ܘܲܣܪܝܼܕ݂ܵܐ ܠܵܐ ܐܸܫܬ̇ܚܲܪ ܡܸܢܗܘܿܢ: ܘܐܲܥܸܠܘ ܠܗܵܢܘܿܢ ܡܲܘ̈ܝܼܕܹܐ ܕܓܸܒ̣ܥܘܿܢ ܠܟܲܪܟ݂ܗܘܿܢ.
21 ܗܵܝܕܹ̇ܝܢ ܗܦܲܟ݂ ܟܠܹܗ ܥܲܡܵܐ ܠܡܲܫܪܝܼܬ̣ܵܐ ܠܘܵܬ̣ ܝܼܫܘܿܥ ܠܡܵܩܵܪ ܒܲܫܠܵܡܵܐ: ܘܠܵܐ ܐܲܗܲܪܘ ܡ̣ܢ ܕܒܹܝܬ̣ ܝܼܣܪܵܝܹܠ ܓܒܲܪ ܒܠܸܫܵܢܹܗ.
22 ܘܐܸܡܲܪ ܝܼܫܘܿܥ: ܦܬܲܚܘ ܦܘܼܡܵܗ̇ ܕܲܡܥܲܪܬ̣ܵܐ: ܘܐܲܦܸܩܘ ܠܝܼ ܚܲܡ̈ܫܵܬܲܝܗܘܿܢ ܡܲܠ̈ܟܹ̇ܐ ܗܵܠܹܝܢ ܡ̣ܢ ܡܥܲܪܬ̣ܵܐ.
23 ܘܲܥܒܲܕ݂ܘ ܐܲܝܟ݂ ܕܐܸܡܲܪ ܠܗܘܿܢ ܝܼܫܘܿܥ: ܘܐܲܦܸܩܘ ܠܘܵܬܹܗ ܠܚܲܡ̈ܫܵܬܲܝܗܘܿܢ ܡܲܠ̈ܟܹ̇ܐ ܗܵܠܹܝܢ ܡ̣ܢ ܡܥܲܪܬ̣ܵܐ: ܠܡܲܠܟܵܐ ܕܐܘܿܪܸܫܠܸܡ: ܘܲܠܡܲܠܟܵܐ ܕܚܸܒ̣ܪܘܿܢ: ܘܲܠܡܲܠܟܵܐ ܕܝܲܪܡܘܼܬ̣: ܘܲܠܡܲܠܟܵܐ ܕܲܠܟ݂ܝܼܫ: ܘܲܠܡܲܠܟܵܐ ܕܥܸܓ̣ܠܘܿܢ.
24 ܘܟܲܕ݂ ܐܲܦܸܩ̣ܘ ܐܸܢܘܿܢ ܠܡܲܠ̇ܟܹ̈ܐ ܗܵܠܹܝܢ ܠܘܵܬ̣ ܝܼܫܘܿܥ: ܩܪܵܐ ܝܼܫܘܿܥ ܠܟ݂ܠܗܘܿܢ ܫܲܠܝܼܛܵܢܹ̈ܐ ܥܵܒ̣ܕܲܝ̈ ܩܪܵܒ̣ܵܐ ܕܲܡܗܲܠܟ݂ܝܼܢ ܥܲܡܹܗ: ܘܐܸܡܲܪ ܠܗܘܿܢ: ܩܪܘܿܒ̣ܘ ܘܣܝܼܡܘ ܪܸ̈ܓ̣ܠܲܝܟ̇ܘܿܢ ܥܲܠ ܨܵܘܪ̈ܲܝܗܘܿܢ ܕܡܲܠܟܹ̈ܐ ܗܵܠܹܝܢ. ܘܲܩܪܸܒ̣ܘ ܘܣܵܡ̣ܘ ܪܸ̈ܓ̣ܠܲܝܗܘܿܢ ܥܲܠ ܨܵܘܪ̈ܲܝܗܘܿܢ ܕܡܲܠܟܹ̈ܐ ܗܵܠܹܝܢ.
25 ܘܐܸܡܲܪ ܠܗܘܿܢ ܝܼܫܘܿܥ: ܠܵܐ ܬܸܕ݂ܚ̄ܠܘܼܢ ܘܠܵܐ ܬܙܘܼܥܘܼܢ: ܐܸܬ̣ܚܲܠܘ ܘܐܸܬ̣ܥܲܫܲܢܘ: ܡܸܛܠ ܕܗܵܟܲܢܵܐ ܥܵܒܹ̇ܕ݂ ܡܵܪܝܵܐ ܠܟ݂ܠܗܘܿܢ ܒܥܸܠܕ̇ܒ̣ܵܒ̣ܵܝ̈ܟ̇ܘܿܢ ܕܡܸܬ̣ܟܲܬ̇ܫܝܼܢ ܐ̄ܢܬ̇ܘܿܢ ܥܲܡܗܘܿܢ.
26 ܘܒ̣̱ܵܬܲܪ ܗܵܝܕܹ̇ܝܢ ܩܲܛܸܠ ܐܸܢܘܿܢ ܝܼܫܘܿܥ: ܘܲܙܩܲܦ ܐܸܢܘܿܢ ܥܲܠ ܚܲܡܫܵܐ ܩܲܝ̈ܣܝܼܢ: ܘܲܗܘ̤ܵܘ ܙܩܝܼܦܝܼܢ ܥܲܠ ܩܲܝ̈ܣܹܐ ܠܪܲܡܫܵܐ.
27 ܘܲܒ̣ܙܲܒ̣ܢܵܐ ܕܡܲܥܪ̈ܵܒܲܪ ܫܸܡܫܵܐ: ܦܩܲܕ݂ ܝܼܫܘܿܥ ܘܐܲܚܬ̣ܘ ܐܸܢܘܿܢ ܡ̣ܢ ܩܲܝ̈ܣܹܐ ܠܲܙܩܝܼܦܹ̈ܐ: ܘܐܲܪܡܝܼܘ ܐܸܢܘܿܢ ܒܲܡܥܲܪܬ̣ܵܐ ܕܲܛܫܹܝܢ ܗ̄ܘ̣ܵܘ ܒܵܗ̇: ܘܣܵܡ̣ܘ ܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ ܥܲܠ ܦܘܼܡܵܗ̇ ܕܲܡܥܲܪܬܵܐ ܥܕܲܡܵܐ ܠܝܵܘܡܵܢܵܐ.
28 ܘܲܠܡܵܩܵܪ ܟܒܲܫ ܝܼܫܘܿܥ ܒܝܵܘܡܵܐ ܗܵܘ̇: ܘܚܲܪܒܵܗ̇ ܒܦܘܼܡܵܐ ܕܚܲܪܒܵܐ: ܘܲܠܡܲܠܟܵܗ̇ ܘܲܠܟ݂ܠ ܕܐܝܼܬ̣ܵ ܒܵܗ̇ ܩܲܛܸܠ: ܘܠܵܐ ܫܒܲܩ ܡܸܢܗܘܿܢ ܣܪܝܼܕ݂ܵܐ. ܘܲܥܒܲܕ݂ ܠܡܲܠܟܵܐ ܕܡܵܩܵܪ ܐܲܝܟܲܢܵܐ ܕܲܥܒܲܕ݂ ܠܡܲܠܟܵܐ ܕܐܝܼܪܝܼܚܘܿ.
29 ܘܲܥܒܲܪ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܥܲܡܹܗ ܡ̣ܢ ܡܵܩܵܪ ܠܠܸܒ̣ܢܵܐ: ܘܐܸܬ̣ܟܲܬܲܫ ܥܲܡ ܠܸܒ̣ܢܵܐ.
30 ܘܐܲܫܠ̱ܡܵܗ̇ ܡܵܪܝܵܐ ܐܵܦ ܠܵܗ̇ ܒܐܝܼܕ݂ܵܐ ܕܝܼܣܪܵܝܹܠ ܘܚܲܪܒ̇ܘܼܗ̇ ܘܲܠܡܲܠܟܵܗ̇ ܒܦܘܼܡܵܐ ܕܚܲܪܒܵܐ: ܘܲܠܟ݂ܠ ܢܲܦ̮̈ܫܵܬ̣ܵܐ ܕܐܝܼܬ̣ ܗ̄ܘܲܝ̈ ܒܵܗ̇: ܘܠܵܐ ܫܒܲܩ ܒܵܗ̇ ܣܪܝܼܕ݂ܵܐ. ܘܲܥܒܲܕ݂ ܝܼܫܘܿܥ ܠܡܲܠܟܵܗ̇ ܐܲܝܟ݂ ܕܲܥܒܲܕ݂ ܠܡܲܠܟܵܐ ܕܐܝܼܪܝܼܚܘܿ.
31 ܘܲܥܒܲܪ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܥܲܡܹܗ ܡ̣ܢ ܠܸܒ̣ܢܵܐ ܠܲܠܟ݂ܝܼܫ: ܘܲܫܪܵܐ ܥܠܹܝܗ̇: ܘܲܥܒܲܕ݂ ܥܲܡܵܗ̇ ܩܪܵܒ̣ܵܐ.
32 ܘܐܲܫ̱ܠܡܵܗ̇ ܡܵܪܝܵܐ ܠܲܠܟ݂ܝܼܫ ܒܐܝܼܕ݂ܵܐ ܕܝܼܣܪܵܝܹܠ: ܘܟܲܒ̣ܫܵܗ̇ ܒܝܵܘܡܵܐ ܕܲܬ̣ܪܹܝܢ: ܘܚܲܪܒܵܗ̇ ܒܦܘܼܡܵܐ ܕܣܲܝܦܵܐ: ܘܲܠܟ݂ܠܗܹܝܢ ܢܲܦ̮̈ܫܵܬ̣ܵܐ ܕܐܝܼܬ̣ ܗ̄ܘܲܝ̈ ܒܵܗ̇: ܐܲܝܟܲܢܵܐ ܕܲܥܒܲܕ݂ ܠܠܸܒ̣ܢܵܐ.
33 ܗܵܝܕ̇ܝܢ ܣܠܸܩ ܗܲܪܡܘܿܢ ܡܲܠܟܵܐ ܕܓܵܙܵܪ ܠܲܡܥܲܕܵܪܘܼܬ̣ܵܗ̇ ܠܲܠܟ݂ܝܼܫ. ܘܚܲܪܒܹ̇ܗ ܝܼܫܘܿܥ ܐܵܦ ܠܹܗ ܘܲܠܥܲܡܹܗ ܒܦܘܼܡܵܐ ܕܚܲܪܒܵܐ: ܘܠܵܐ ܫܒܲܩ ܠܹܗ ܣܪܝܼܕ݂ܵܐ.
34 ܘܲܥ̣ܒܲܪ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܥܲܡܹܗ ܡ̣ܢ ܠܟ݂ܝܼܫ ܠܥܸܓ̣ܠܘܿܢ: ܘܲܫܪܵܐ ܥܠܹܝܗ̇ ܘܲܥܒܲܕ݂ ܥܲܡܵܗ̇ ܩܪܵܒ̣ܵܐ.
35 ܘܟܲܒ̣ܫܵܗ̇ ܒܝܵܘܡܵܐ ܗܵܘ̇: ܘܚܲܪܒ̣ܵܗ̇ ܒܦܘܼܡܵܐ ܕܣܲܝܦܵܐ: ܘܲܠܟ݂ܠ ܢܲܦ̮̈ܫܵܬ̣ܵܐ ܕܐܝܼܬ̣ ܗ̄ܘܲܝ̈ ܒܵܗ̇: ܐܲܝܟܲܢܵܐ ܕܲܥܒܲܕ݂ ܠܲܠܟ݂ܝܼܫ.
36 ܘܲܣܠܸܩ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܥܲܡܹܗ ܡ̣ܢ ܥܸܓ̣ܠܘܿܢ ܠܚܸܒ̣ܪܘܿܢ. ܘܲܥܒܲܕ݂ ܥܲܡܵܗ̇ ܩܪܵܒ̣ܵܐ.
37 ܘܟܲܒ̣ܫܵܗ̇ ܘܚܲܪܒܵܗ̇ ܒܦܘܼܡܵܐ ܕܣܲܝܦܵܐ: ܘܲܠܡܲܠܟܵܗ̇ ܘܲܠܟ݂ܠܗܹܝܢ ܩܘܼܪ̈ܝܵܐ ܕܝܼܠܵܗ̇: ܘܲܠܟ݂ܠܗܹܝܢ ܢܲܦ̮̈ܫܵܬ̣ܵܐ ܕܐܝܼܬ̣ ܗ̄ܘܲܝ̈ ܒܵܗ̇. ܘܠܵܐ ܫܒܲܩ̣ ܡܸܢܗܹܝܢ ܣܪܝܼܕ݂ܵܐ ܐܲܝܟ݂ ܕܲܥܒܲܕ݂ ܠܥܸܓ̣ܠܘܿܢ: ܘܲܠܟ݂ܠ ܢܲܦ̮̈ܫܵܬ̣ܵܐ ܕܐܝܼܬ̣ ܗ̄ܘܲܝ̈ ܒܵܗ̇. ܕܲܚܪܲܒ̣ ܐܸܢܹܝܢ.
38 ܘܲܗ̣ܦܲܟ݂ ܝܼܫܘܿܥ ܘܟ݂ܠܹܗ ܝܼܣܪܵܝܹܠ ܥܲܡܹܗ ܠܕ݂ܵܒ̣ܝܼܪ: ܘܐܸܬ̣ܟܲܬܲܫ ܥܲܡܵܗ̇.
39 ܘܟܲܒ̣ܫܵܗ̇: ܘܲܠܡܲܠܟܵܗ̇: ܘܲܠܟ݂ܠܗܹܝܢ ܩܘܼܪ̈ܝܵܗ̇: ܘܲܚܪܲܒ̣ ܐܸܢܹܝܢ ܒܦܘܼܡܵܐ ܕܣܲܝܦܵܐ: ܘܲܚܪܲܒ̣ ܠܟ݂ܠ ܢܲܦ̮̈ܫܵܬ̣ܵܐ ܕܒ̣ܵܗ̇: ܘܠܵܐ ܫܒܲܩ ܡܸܢܗܹܝܢ ܣܪܝܼܕ݂ܵܐ. ܐܲܝܟ݂ ܕܲܥܒܲܕ݂ ܠܚܸܒ̣ܪܘܿܢ: ܗܵܟܲܢܵܐ ܥܒܲܕ݂ ܠܕ݂ܵܒ̣ܝܼܪ ܘܲܠܡܲܠܟܵܗ̇: ܘܐܲܝܟܲܢܵܐ ܕܲܥܒܲܕ݂ ܠܠܸܒ̣ܢܵܐ ܘܲܠܡܲܠܟܵܗ̇.
40 ܘܚܲܪܒ̣ܵܗ̇ ܝܼܫܘܿܥ ܠܟ݂ܠܵܗ̇ ܐܲܪܥܵܐ: ܠܛܘܼܪܵܐ: ܘܲܠܬܲܝ̱ܡܢܵܐ: ܘܠܲܦܩܲܥܬ̣ܵܐ: ܘܠܲܫܕ̇ܘܿܕ݂ ܘܲܠܟ݂ܠܗܘܿܢ ܡܲܠܟܲܝ̈ܗܘܿܢ. ܘܠܵܐ ܫܒܲܩ̣ ܡܸܢܗܘܿܢ ܣܪܝܼܕ݂ܵܐ: ܘܲܠܟ݂ܠܹܗ ܚܲܝ̱ܠܗܘܿܢ ܚܪܲܒ̣: ܐܲܝܟܲܢܵܐ ܕܦܲܩܕܹܗ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.
41 ܘܲܚܪܲܒ̣ ܐܸܢܘܿܢ ܝܼܫܘܿܥ: ܡ̣ܢ ܪܩܸܡ ܕܓܲܝܵܐ ܥܕܲܡܵܐ ܠܥܵܐܙܵܐ: ܘܲܠܟ݂ܠܵܗ̇ ܐܲܪܥܵܐ ܕܓ̣ܫܵܢ: ܘܲܥܕܲܡܵܐ ܠܓܸܒ̣ܥܘܿܢ.
42 ܘܲܠܟ݂ܠܗܘܿܢ ܡܲܠܟܹ̈ܐ ܗܵܠܹܝܢ ܘܠܲܐܬ̣ܪ̈ܵܘܵܬ̣ܗܘܿܢ ܟܒܲܫ ܝܼܫܘܿܥ ܒܙܲܒ̣ܢܵܐ ܚܲܕ݂: ܡܸܛܠ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܥܲܡܹܗ. ܘܗ̤ܘܝܼܘ ܥܵܒܹܕ݂ ܩܪܵܒ̣ܵܐ ܠܝܼܣܪܵܝܹܠ.
1 ܘܟܲܕ݂ ܫ̣ܡܲܥ ܡܲܠܟܵܐ ܕܚܵܨܘܿܪ: ܫܲܕܲܪ ܥܲܠ ܝܘܿܒܵܒ̣ ܡܲܠܟܵܐ ܕܡܵܕܘܿܢ: ܘܥܲܠ ܡܲܠܟܵܐ ܕܫܵܡܪܹܝܢ ܘܥܲܠ ܡܲܠܟܵܐ ܕܐܲܟ݂ܫܵܦ.
2 ܘܥܲܠ ܡܲܠܟܹ̈ܐ ܕܲܠܓܲܪܒ̇ܝܵܐ ܡܸܢܹܗ: ܕܲܒ̣ܛܘܼܪܵܐ: ܘܲܒ̣ܬܲܝ̱ܡܢܵܐ: ܘܒܲܦܩܲܥܬ̣ܵܐ ܕܟܸܢܪܲܬ̣: ܘܲܒ̣ܦܲܩ̈ܥܵܬ̣ܵܗ̇ ܘܒܲܢܦܸܬ̇ܕ̇ܘܿܪ ܕܡ̣ܢ ܡܲܥܪ̱ܒ̣ܵܐ.
3 ܘܠܲܟ݂ܢܲܥ̈ܢܵܝܹܐ ܕܡ̣ܢ ܡܲܕ݂ܢ̱ܚܵܐ ܘܡ̣ܢ ܡܲܥ̱ܪܒ̣ܵܐ: ܘܐܵܡܘܿܪ̈ܵܝܹܐ: ܘܚܹـ̈ـܬܵܝܹܐ: ܘܦܲܪ̈ܙܵܝܹܐ: ܘܝܵܒ̣ܘܿܣܵܝܹ̈ܐ: ܕܲܒ̣ܛܘܼܪܵܐ: ܘܲܠܚܵܘܵܝܹ̈ܐ ܕܲܬ̣ܚܹܬ̣ ܛܘܼܪܵܐ ܕܚܸܪܡܘܿܢ: ܕܒܲܐܪܥܵܐ ܕܕ݂ܵܘܩܹ̈ܐ.
4 ܘܲܢܦܲܩܘ ܗܸܢܘܿܢ ܘܟ݂ܠܗܹܝܢ ܡܲܫ̱ܪ̈ܝܵܬ̣ܗܘܿܢ ܥܲܡܗܘܿܢ ܣܲܓ̇ܝܼܐܝܼܢ ܐܲܝܟ݂ ܚܵܠܵܐ ܕܥܲܠ ܣܸܦܬܹܗ ܕܝܲܡܵܐ: ܘܪ̈ܲܟ݂ܫܵܐ ܘܩܵܪ̈ܘܿܟܹܐ ܣܘܿܓ̣ܵܐܐ ܕܛܵܒ̣.
5 ܘܐܸܬ̣ܘܲܥܲܕ݂ܘ ܟܠܗܘܿܢ ܡܲܠܟܹ̈ܐ ܗܵܠܹܝܢ: ܘܲܫܪܵܘ ܐܲܟ݂ܚ̄ܕ݂ܵܐ ܥܲܠ ܡܲـ̈ـܝܵܐ ܕܡܸܪܘܿܢ: ܘܐܸܬ̇ܛܲܝܲܒ̣ܘ ܠܡܸܥܒܲܕ݂ ܩܪܵܒ̣ܵܐ ܥܲܡ ܝܼܣܪܵܝܹܠ.
6 ܘܐܸܡܲܪ ܡܵܪܝܵܐ ܠܝܼܫܘܿܥ: ܠܵܐ ܬܸܕ݂ܚܲܠ ܡܸܢܗܘܿܢ: ܡܸܛܠ ܕܲܡܚܵܪ ܠܗܵܢܵܐ ܥܸܕܵܢܵܐ: ܥܵܒܹ̇ܕ݂ ܐ̄ܢܵܐ ܠܗܘܿܢ ܠܟ݂ܠܗܘܿܢ ܟܲܕ݂ ܚܪܝܼܒ̣ܝܼܢ ܩܕ݂ܵܡ ܒ̈ܢܲܝ ܝܼܣܪܵܝܹܠ. ܘܪ̈ܲܟ݂ܫܗܘܿܢ ܐܹܓܲܡܲܪ: ܘܩܵܪ̈ܘܿܟܲܝܗܘܿܢ ܐܵܘܩܸܕ݂ ܒܢܘܼܪܵܐ.
7 ܘܐܸܬ̣ܵܐ ܝܼܫܘܿܥ ܠܡܲـ̈ـܝܵܐ ܕܡܸܪܘܿܢ ܡ̣ܢ ܫܸܠܝܵܐ: ܗ̤ܘ ܘܟ݂ܠܹܗ ܥܲܡܵܐ ܥܵܒ̣ܕܲܝ̈ ܩܪܵܒ̣ܵܐ ܕܐܝܼܬ̣ ܗ̄ܘ̣ܵܐ ܥܲܡܹܗ: ܘܲܢܦܲܠܘ ܒܗܘܿܢ.
8 ܘܐܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕ݂ܵܐ ܕܝܼܣܪܵܝܹܠ: ܘܲܚܪܲܒ̣ܘ ܐܸܢܘܿܢ: ܘܲܪܕܲܦ̣ܘ ܐܸܢܘܿܢ ܥܕܲܡܵܐ ܠܨܲܝܕ̇ܘܿܢ ܪܲܒܵܐ: ܘܲܥܕܲܡܵܐ ܠܒܹܝܬ̣ ܟܸܢܫܵܐ ܕܡܲـ̈ـܝܵܐ: ܘܲܥܕܲܡܵܐ ܠܲܦܩܲܥܬ̣ܵܐ ܕܡܲܨܦܝܵܐ ܕܲܒ̣ܡܲܕ݂ܢ̱ܚܵܐ. ܘܲܚܪܲܒ̣ܘ ܐܸܢܘܿܢ: ܘܠܵܐ ܫܒܲܩ̣ܘ ܡܸܢܗܘܿܢ ܣܪܝܼܕ݂ܵܐ.
9 ܘܲܥܒܲܕ݂ ܠܗܘܿܢ ܝܼܫܘܿܥ ܐܲܝܟ݂ ܕܐܸܡܲܪ ܠܹܗ ܡܵܪܝܵܐ: ܪ̈ܲܟ݂ܫܗܘܿܢ ܓܲܡܲܪ: ܘܩܵܪ̈ܘܿܟܲܝܗܘܿܢ ܐܵܘܩܸܕ݂ ܒܢܘܼܪܵܐ.
10 ܘܲܗ̣ܦܲܟ݂ ܝܼܫܘܿܥ ܒܙܲܒ̣ܢܵܐ ܗܵܘ̇: ܘܲܟ݂ܒܲܫ ܠܚܵܨܘܿܪ: ܘܲܠܡܲܠܟܵܗ̇ ܩܛܲܠ ܒܚܲܪܒܵܐ: ܡܸܛܠ ܕܡ̣ܢ ܩܕ݂ܝܼܡ ܚܵܨܘܿܪ ܗ̄ܘ̣ܵܬ̣ ܪܹܫܗܹܝܢ ܕܡܲܠܟ̇ـ̈ـܘܵܬ̣ܵܐ ܗܵܠܹܝܢ.
11 ܘܲܚܪܲܒ ܠܟ݂ܠ ܢܲܦ̮̈ܫܵܬ̣ܵܐ ܕܒ̣ܵܗ̇ ܒܦܘܼܡܵܐ ܕܚܲܪܒܵܐ: ܘܠܵܐ ܫܒܲܩ ܡܸܢܗܹܝܢ ܢܫܲܡܬ̣ܵܐ: ܘܲܠܚܵܨܘܿܪ ܐܵܘܩܸܕ݂ ܒܢܘܼܪܵܐ.
12 ܘܲܠܟ݂ܠܗܹܝܢ ܡܕ݂ܝܼ̈ܢܵܬ̣ܵܐ ܕܡܲܠ̈ܟܹ̇ܐ ܗܵܠܹܝܢ: ܘܲܠܡܲܠܟܲܝ̈ܗܹܝܢ ܟܒܲܫ ܝܼܫܘܿܥ: ܘܲܚܪܲܒ̣ ܐܸܢܘܿܢ ܒܦܘܼܡܵܐ ܕܚܲܪܒܵܐ: ܐܲܝܟܲܢܵܐ ܕܦܲܩܕܹܗ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ.
13 ܘܲܠܟ݂ܠܗܹܝܢ ܩܘܼܪ̈ܝܵܐ ܕܩܵܝ̈ܡܵܢ ܥܲܠ ܬܸܠܹ̈ܐ ܐܵܘܩܸܕ݂ ܐܸܢܹܝܢ ܝܼܣܪܵܝܹܠ: ܘܲܠܚܵܨܘܿܪ ܐܵܘܩܸܕ݂ ܝܼܫܘܿܥ.
14 ܘܲܠܟ݂ܠܵܗ̇ ܒܸܙܬ̣ܵܐ ܕܲܡܕ݂ܝܼ̈ܢܵܬ̣ܵܐ ܗܵܠܹܝܢ: ܘܲܒ̣ܥܝܼܪܵܐ ܒܲܙܘ ܠܗܘܿܢ ܒ̈ܢܲܝ ܝܼܣܪܵܝܹܠ. ܘܲܠܟ݂ܠܗܘܿܢ ܒܢܲܝ̈ܢܵܫܵܐ ܚܪܲܒ̣ܘ ܒܦܘܼܡܵܐ ܕܣܲܝܦܵܐ ܥܕܲܡܵܐ ܕܓܲܡܲܪܘ ܐܸܢܘܿܢ: ܘܠܵܐ ܫ̣ܒܲܩܘ ܡܸܢܗܘܿܢ ܢܫܲܡܬ̣ܵܐ.
15 ܐܲܝܟܲܢܵܐ ܕܦܲܩܸܕ݂ ܡܵܪܝܵܐ ܠܡܘܼܫܹܐ ܥܲܒ̣ܕܹ̇ܗ: ܗܵܟܲܢܵܐ ܦܲܩܕܹܗ ܡܘܼܫܹܐ ܠܝܼܫܘܿܥ: ܘܗܵܟܲܢܵܐ ܥܒܲܕ݂ ܝܼܫܘܿܥ: ܘܠܵܐ ܒܲܛܸܠ ܡܸܠܬ̣ܵܐ ܡ̣ܢ ܟܠܡܸܕܸ̇ܡ ܕܦܲܩܸܕ݂ ܡܵܪܝܵܐ ܠܡܘܼܫܹܐ.
16 ܘܢܲܣܒܵܗ̇ ܝܼܫܘܿܥ ܠܟ݂ܠܵܗ̇ ܐܲܪܥܵܐ ܗܵܕܹܐ ܕܛܘܼܪܵܐ: ܘܲܠܟ݂ܠܵܗ̇ ܬܲܝ̱ܡܢܵܐ: ܘܲܠܟ݂ܠܵܗ̇ ܐܲܪܥܵܐ ܕܲܦܩܲܥܬ̣ܵܐ: ܘܲܠܛܘܼܪܹ̈ܐ ܟܠܗܘܿܢ: ܘܲܠܦܲܩ̈ܥܵܬ̣ܗܘܿܢ.
17 ܡ̣ܢ ܛܘܼܪܵܐ ܕܦܵܠܹܓ ܘܣܵܠܹܩ ܠܣܵܥܝܼܪ: ܘܲܥܕܲܡܵܐ ܠܓܲܕ݂ܓܵܕ݂ ܕܒܲܦܩܲܥܬ̣ܵܐ ܕܠܸܒ̣ܢܵܢ ܕܲܬ̣ܚܹܝܬ̣ ܛܘܼܪܵܐ ܕܚܸܪܡܘܿܢ: ܘܲܠܟ݂ܠܗܘܿܢ ܡܲܠܟܲܝ̈ܗܘܿܢ ܟܒܲܫ: ܘܩܲܛܸܠ ܐܸܢܘܿܢ ܝܼܫܘܿܥ.
18 ܘܝܵܘ̈ܡܵܬ̣ܸܐ ܣܲܓ̇ܝܼ̈ܐܹܐ ܥܒܲܕ݂ ܝܼܫܘܿܥ ܩܪܵܒ̣ܵܐ: ܥܲܡ ܟܠܗܘܿܢ ܗܵܠܹܝܢ.
19 ܘܠܵܐ ܐܸܫܬܲܚܪܲܬ̤ ܩܪܝܼܬ̣ܵܐ ܕܠܵܐ ܐܸܫܬܲܠܡܲܬ̤ ܠܲܒ̣̈ܢܲܝ ܝܼܣܪܵܝܹܠ ܘܚܲܪܒ̇ܘܼܗܝ ܐܸܠܵܐ ܐܸܢ ܚܵܘܵܝܹ̈ܐ ܕܝܵܬ̣ܒ̇ܝܼܢ ܒܓܒ̣ܥܘܿܢ: ܕܐܲܚܝܼ ܐܸܢܘܿܢ ܝܼܫܘܿܥ: ܘܲܫܒܲܩ ܐܸܢܘܿܢ ܝܼܫܘܿܥ ܕܢܸܦܠ̱ܚܘܼܢ ܠܝܼܣܪܵܝܹܠ. ܘܲܠܟ݂ܠܗܹܝܢ ܡܲܠ̈ܟ̇ܘܵܬ̣ܵܐ ܗܵܠܹܝܢ ܫܒ̣ܵܐ ܐܸܢܹܝܢ ܝܼܫܘܿܥ ܘܲܚܪܲܒ̣ ܐܸܢܹܝܢ.
20 ܡܸܛܠ ܕܡ̣ܢ ܩܕ݂ܵܡ ܡܵܪܝܵܐ ܗܘ̤ܵܬ̣ ܗܵܕܹܐ: ܕܢܸܬ̣ܚܲܝܲܠ ܠܸܒ̇ܗܘܿܢ ܕܢܸܦܩܘܿܢ ܠܲܩܪܵܒ̣ܵܐ ܥܲܠ ܝܼܣܪܵܝܹܠ: ܡܸܛܠ ܕܢܸܚ̱ܪܒ̣ܘܼܢ ܐܸܢܘܿܢ ܘܠܵܐ ܬܸܗܘܹܐ ܥܠܲܝܗܘܿܢ ܬܲܟ݂ܫܲܦ̮ܬܵܐ: ܡܸܛܠ ܕܐܵܘܒܸ̇ܕ݂ ܐܸܢܘܿܢ ܐܲܝܟܲܢܵܐ ܕܦܲܩܸܕ݂ ܡܵܪܝܵܐ ܠܡܘܼܫܹܐ.
21 ܘܐܸܬ̣ܵܐ ܝܼܫܘܿܥ ܒܙܲܒ̣ܢܵܐ ܗܵܘ̇: ܘܲܚܪܲܒ̣ ܠܓܲܢ̄ܒܵܪܹ̈ܐ ܕܲܒ̣ܛܘܼܪܵܐ: ܡ̣ܢ ܚܸܒ̣ܪܘܿܢ: ܘܡ̣ܢ ܕܵܒ̣ܝܼܪ: ܘܡ̣ܢ ܓܒܸܠ: ܘܡ̣ܢ ܟܠܹܗ ܛܘܼܪܵܐ ܕܲܝܗܘܼܕ݂ܵܐ: ܘܡ̣ܢ ܟܠܹܗ ܛܘܼܪܵܐ ܕܝܼܣܪܵܝܹܠ. ܥܲܡ ܡܕ݂ܝܼ̈ܢܵܬ̣ܗܘܿܢ ܚܪܲܒ̣ ܐܸܢܘܿܢ ܝܼܫܘܿܥ.
22 ܘܠܵܐ ܐܸܫܬܲܚܲܪܘ ܓܲܢ̄ܒܵܪܹ̈ܐ ܒܐܲܪܥܵܐ ܕܲܒ̣̈ܢܲܝ ܝܼܣܪܵܝܹܠ: ܐܸܠܵܐ ܐܸܢ ܒܥܵܐܙܵܐ: ܘܲܒ̣ܓܵܬ̣̱: ܘܒܲܐܫܕ̇ܘܿܕ݂ ܐܸܫܬ̇ܚܲܪܘ.
23 ܘܢܲܣܒܵܗ̇ ܝܼܫܘܿܥ ܠܟ݂ܠܵܗ̇ ܐܲܪܥܵܐ: ܐܲܝܟ݂ ܕܐܸܡܲܪ ܡܵܪܝܵܐ ܠܡܘܼܫܹܐ: ܘܝܲܗ̄ܒܵܗ̇ ܝܼܫܘܿܥ ܝܘܼܪܬܵܢܵܐ ܠܝܼܣܪܵܝܹܠ ܒܦܵܠܓ̈ܘܵܬ̣ܵܐ ܠܫܲܒ̣ܛܲܝ̈ܗܘܿܢ. ܘܐܲܪܥܵܐ ܐܸܬ̇ܬ̇ܢܝܼܚܲܬ̤ ܡ̣ܢ ܩܪܵܒ̣ܵܐ.
1 ܘܗܵܠܹܝܢ ܡܲܠܟܹ̈ܐ ܕܐܲܪܥܵܐ ܕܲܚܪܲܒ̣ܘ ܒ̈ܢܲܝ ܝܼܣܪܵܝܹܠ: ܘܝܼܪܸܬ̣ܘ ܐܲܬ̣ܪ̈ܵܘܵܬ̣ܗܘܿܢ: ܒܥܸܒ̣ܪܵܐ ܕܝܘܿܪܕܢܵܢ ܡ̣ܢ ܡܲܕ݂ܢܵܚܲܝ̈ ܫܸܡܫܵܐ: ܡ̣ܢ ܢܲܚܠܵܐ ܕܐܲܪܢܘܿܢ ܘܲܥܕܲܡܵܐ ܠܛܘܼܪܵܐ ܕܚܸܪܡܘܿܢ: ܘܟ݂ܠܵܗ̇ ܦܩܲܥܬ̣ܵܐ ܕܲܒ̣ܡܲܕ݂ܢ̱ܚܵܐ.
2 ܣܝܼܚܘܿܢ ܡܲܠܟܵܐ ܕܐܵܡܘܿܪ̈ܵܝܹܐ ܕܝܵܬܹܒ̣ ܗ̄ܘ̣ܵܐ ܒܚܸܫܒ̇ܘܿܢ: ܘܫܲܠܝܼܛ ܗ̄ܘ̣ܵܐ ܡ̣ܢ ܥܲܕ݂ܘܵܥܝܼܪ ܕܥܲܠ ܣܸܦܬ̣ܵܐ ܕܢܲܚܠܵܐ ܕܐܲܪܢܘܿܢ: ܘܓ̣ܵܘܹܗ ܕܢܲܚܠܵܐ: ܘܦܸܠܓܵܗ̇ ܕܓܸܠܥܵܕ݂: ܘܲܥܕܲܡܵܐ ܠܐܵܦܵܩ ܢܲܚܠܵܐ ܕܲܬ̣ܚܘܼܡܵܐ ܕܲܒ̣̈ܢܲܝ ܥܲܡܘܿܢ.
3 ܘܲܦܩܲܥܬ̣ܵܐ ܥܕܲܡܵܐ ܠܝܲܡܵܐ ܕܟܸܢܪܲܬ̣: ܡ̣ܢ ܡܲܕ݂ܢ̱ܚܵܐ: ܘܲܥܕܲܡܵܐ ܠܝܲܡܵܐ ܕܲܦܩܲܥܬ̣ܵܐ ܝܲܡܵܐ ܕܡܸܠܚܵܐ: ܕܲܒ̣ܡܲܕ݂ܢ̱ܚܵܐ ܕܐܘܼܪܚܵܐ ܕܒܹܝܬ̣ ܐܲܫܝܼܡܘܿܢ: ܘܡ̣ܢ ܬܲܝܡܲܢ ܕܲܬ̣ܚܹܝܬ̣ ܐܲܫܕ̇ܘܼܬ̣ ܪܵܡܬ̣ܵܐ.
4 ܘܲܬ̣ܚܘܼܡܵܐ ܕܥܘܿܠ ܡܲܠܟܵܐ ܕܒܲܝܫܵܢ ܡ̣ܢ ܫܲܪܒ̇ܬ̣ܵܐ ܕܓܲܢ̄ܒܵܪܹ̈ܐ ܕܝܵܬܹܒ̣ ܗ̄ܘ̣ܵܐ ܒܥܸܣܬ̇ܪܘܲܬ̣: ܘܒܲܐܪܕ̇ܥܝܼ.
5 ܘܫܲܠܝܼܛ ܗ̄ܘ̣ܵܐ ܒܛܘܼܪܵܐ ܕܐܲܫܝܼܡܘܿܢ: ܘܲܒܣܲܠܟܵܐ: ܘܲܒ̣ܟ݂ܠܵܗ̇ ܒܲܝܫܵܢ: ܥܕܲܡܵܐ ܠܲܬ̣ܚܘܼܡܵܐ ܕܥܝܼܢܕ̇ܘܿܪ ܘܲܕ݂ܡܲܥܟܲܬ̣: ܘܦܸܠܓܵܗ̇ ܕܓܸܠܥܵܕ݂: ܘܲܬ̣ܚܘܼܡܹܗ ܕܣܝܼܚܘܿܢ ܡܲܠܟܵܐ ܕܚܸܫܒ̇ܘܿܢ.
6 ܕܩܲܛܠܹܗ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ: ܘܝܲܗ̄ܒܹ̇ܗ ܝܘܼܪܬܵܢܵܐ ܠܪܘܼܒܹܝܠ: ܘܲܠܓܵܕ݂: ܘܲܠܦܸܠܓܹܗ ܕܫܲܒ̣ܛܵܐ ܕܲܡܢܲܫܹܐ.
7 ܘܗܵܠܹܝܢ ܡܲܠܟܹ̈ܐ ܕܐܲܪܥܵܐ ܕܲܚܪܲܒ̣ ܝܼܫܘܿܥ ܘܲܒ̣̈ܢܲܝ ܝܼܣܪܵܝܹܠ ܕܝܘܿܪܕ̇ܢܵܢ: ܡ̣ܢ ܥܵܪܵܒܵܐ: ܘܡ̣ܢ ܓܲܠܓܵܠܵܐ ܕܲܦܩܲܥܬ̣ܵܐ ܕܠܸܒܢܵܢ: ܘܲܥܕܲܡܵܐ ܠܛܘܼܪܵܐ ܕܦܵܠܹܓ̣ ܘܣܵܠܹܩ ܠܣܵܥܝܼܪ. ܘܝܲܗ̄ܒܹ̇ܗ ܝܼܫܘܿܥ ܠܫܲܒ̣̈ܛܹܐ ܕܝܼܣܪܵܝܹܠ ܠܝܘܼܪܬܵܢܵܐ ܒܦܵܠ̈ܓܘܵܬ̣ܗܘܿܢ.
8 ܒܛܘܼܪܹ̈ܐ ܘܲܒ̣ܦܲܩ̈ܥܵܬ̣ܵܐ: ܘܲܒ̣ܥܵܪܵܒ̣ܵܐ: ܘܒܲܐܫܕ̇ܘܼܕ݂: ܘܲܒ̣ܡܲܕ݂ܒ̇ܪܵܐ: ܘܲܒ̣ܬܲܝܡܢܵܐ: ܘܚܹܝ̈ܬ̣ܵܝܹܐ: ܘܐܵܡܘܿܪ̈ܵܝܹܐ: ܘܲܟ݂ܢܲܥܢܵܝܹ̈ܐ: ܘܦܲܪ̈ܵܙܵܝܹܐ: ܘܚܵܘܵܝܹ̈ܐ: ܘܝܵܒ̣ܘܿܣܵܝܹ̈ܐ.
9 ܘܗܵܠܹܝܢ ܡܲܠܟܹ̈ܐ ܕܐܲܪܥܵܐ ܕܲܚܪܲܒ̣ ܝܼܫܘܿܥ: ܡܲܠܟܵܐ ܚܲܕ݂ ܕܐܝܼܪܝܼܚܘܿ: ܡܲܠܟܵܐ ܚܲܕ݂ ܕܥܵܝ: ܕܥܲܠ ܓܹܢ̄ܒ̣ ܒܹܝܬ̣ ܐܹܝܠ.
10 ܡܲܠܟܵܐ ܚܲܕ݂ ܕܐܘܿܪܸܫܠܸܡ: ܡܲܠܟܵܐ ܚܲܕ݂ ܕܚܸܒ̣ܪܘܿܢ.
11 ܡܲܠܟܵܐ ܚܲܕ݂ ܕܝܲܪܡܘܼܬ̣: ܡܲܠܟܵܐ ܚܲܕ݂ ܕܲܠܟ݂ܝܼܫ.
12 ܡܲܠܟܵܐ ܚܲܕ݂ ܕܥܸܓ̣ܠܘܿܢ: ܡܲܠܟܵܐ ܚܲܕ݂ ܕܓ̣ܵܙܵܪ.
13 ܡܲܠܟܵܐ ܚܲܕ݂ ܕܕ݂ܵܒ̣ܝܼܪ: ܡܲܠܟܵܐ ܚܲܕ݂ ܕܓ̣ܵܕ݂ܵܪ.
14 ܡܲܠܟܵܐ ܚܲܕ݂ ܕܚܸܪܡܵܐ: ܡܲܠܟܵܐ ܚܲܕ݂ ܕܥܵܕ݂ܵܪ.
15 ܡܲܠܟܵܐ ܚܲܕ݂ ܕܠܸܒ̣ܢܵܐ: ܡܲܠܟܵܐ ܚܲܕ݂ ܕܥܲܪܠܵܡ.
16 ܡܲܠܟܵܐ ܚܲܕ݂ ܕܡܵܩܵܪ: ܡܲܠܟܵܐ ܚܲܕ݂ ܕܒܹܝܬ̣ ܐܹܝܠ.
17 ܡܲܠܟܵܐ ܚܲܕ݂ ܕܬܲܦܘܿܚ: ܡܲܠܟܵܐ ܚܲܕ݂ ܕܚܵܦܵܪ.
18 ܡܲܠܟܵܐ ܚܲܕ݂ ܕܐܵܦܵܩ: ܡܲܠܟܵܐ ܚܲܕ݂ ܕܢܸܫܪܘܿܢ.
19 ܡܲܠܟܵܐ ܚܲܕ݂ ܕܡܵܕ݂ܘܿܢ: ܡܲܠܟܵܐ ܚܲܕ݂ ܕܚܵܨܘܿܪ.
20 ܡܲܠܟܵܐ ܚܲܕ݂ ܕܫܵܡܪܹܝܢ ܘܲܕ݂ܡܸܪܘܿܢ: ܡܲܠܟܵܐ ܚܲܕ݂ ܕܐܲܟ݂ܫܵܦ.
21 ܡܲܠܟܵܐ ܚܲܕ݂ ܕܬܲܥܢܵܟ݂: ܡܲܠܟܵܐ ܚܲܕ݂ ܕܡܲܓܕ̇ܘܿ.
22 ܡܲܠܟܵܐ ܚܲܕ݂ ܕܲܪܩܸܡ: ܡܲܠܟܵܐ ܚܲܕ݂ ܕܲܢܩܸܡܥܲܡ ܘܲܕ݂ܟܲܪܡܠܵܐ.
23 ܡܲܠܟܵܐ ܚܲܕ݂ ܕܕ݂ܘܿܪ ܘܕܲܢܦܸܬ̇ܕ̇ܘܿܪ: ܡܲܠܟܵܐ ܚܲܕ݂ ܕܥܘܼܡܩܵܐ ܘܲܕ݂ܓܲܠܓܵܠܵܐ.
24 ܡܠܟܵܐ ܚܲܕ݂ ܕܬܲܪܨܵܐ. ܟܠܗܘܿܢ ܡܲܠܟܹ̈ܐ ܕܚܪܲܒ̣ ܝܼܫܘܿܥ ܬܠܵܬ̣ܝܼܢ ܘܚܲܕ݂.
1 ܘܝܼܫܘܿܥ ܩܲܫ ܘܥܲܠ ܒܲܫܢܲـ̈ـܝܵܐ: ܘܐܸܡܲܪ ܠܹܗ ܡܵܪܝܵܐ: ܗܵܐ ܐܲܢ̄ܬ̇ ܩܲܫܬ̇ ܘܥܲܠܬ̇ ܒܲܫܢܲـ̈ـܝܵܐ: ܘܐܲܪܥܵܐ ܕܐܸܫܬܲܚܪܲܬ̤ ܣܲܓ̇ܝܼܵܐܐ ܗ̄ܝ̣ ܛܵܒ̣ ܠܡܹܐܪܬܵܗ̇.
2 ܗܕܲܐ ܗ̄ܝ̣ ܐܲܪܥܵܐ ܕܐܸܫܬܲܚܪܲܬ̤ ܒܟ݂ܠܹܗ ܓܠܝܼܠܵܐ ܕܲܦܠܸܫܬܵܝܹ̈ܐ ܘܲܒ̣ܟ݂ܠܹܗ ܐܲܬ̣ܪܵܐ ܕܥܝܼܢܕ̇ܘܿܪ.
3 ܡ̣ܢ ܫܝܼܚܘܿܪ ܕܲܩܕ݂ܵܡ ܡܸܨܪܹܝܢ: ܘܲܥܕܲܡܵܐ ܠܲܬ̣ܚܘܼܡܵܐ ܕܥܸܩܪܘܿܢ ܕܲܒ̣ܓܲܪܒ̇ܝܵܐ: ܕܲܟ݂ܢܲܥܢܵܝܹ̈ܐ ܡܸܬ̣ܚܲܫܒܵܐ: ܘܚܲܡܫܵܐ ܛܪ̈ܘܿܢܲܝܗܘܿܢ ܕܲܦܠܸܫ̈ܬܵܝܹܐ: ܓܲܙܬ̣ܵܝܹ̈ܐ: ܘܐܲܫܕ̇ܘܿܕ݂ܵܝܹ̈ܐ: ܘܐܲܫܩܵܠܘܿܢܵܝܹ̈ܐ: ܘܓ̣ܵܬ̣ܵܝܹ̈ܐ: ܘܥܸܩܪ̈ܘܿܢܵܝܹܐ: ܘܥܵܘܵܝܹ̈ܐ ܕܡ̣ܢ ܬܲܝ̱ܡܢܵܐ.
4 ܘܟ݂ܠܵܗ̇ ܐܲܪܥܵܐ ܕܲܟ݂ܢܲܥܢܵܝܹ̈ܐ: ܘܲܡܥܲܪܬ̣ܵܐ ܕܨܲܝܕ̇ܢܵܝܹ̈ܐ: ܥܕܲܡܵܐ ܠܐܵܦܵܩ: ܘܲܥܕܲܡܵܐ ܠܲܬ̣ܚܘܼܡܵܐ ܕܐܵܡܘܿܪ̈ܵܝܹܐ.
5 ܘܐܲܪܥܵܐ ܕܲܓ̣ܒܸܠ ܘܟ݂ܠܹܗ ܠܸܒ̣ܢܵܢ: ܡ̣ܢ ܡܲܕ݂ܢܵܚܲܝ̈ ܫܸܡܫܵܐ ܕܲܒ̣ܓܸܠܥܵܕ݂: ܕܲܬ̣ܚܹܝܬ̣ ܛܘܼܪܵܐ ܕܚܸܪܡܘܿܢ: ܥܕܲܡܵܐ ܠܡܲܥܠܵܢܵܐ ܕܲܚܡܵܬ̣.
6 ܟܠܗܘܿܢ ܥܵܡܘܿܪܹ̈ܐ ܕܛܘܼܪܹ̈ܐ: ܡ̣ܢ ܠܸܒ̣ܢܵܢ ܘܲܥܕܲܡܵܐ ܠܐܲܬ̣ܪܵܐ ܕܡܲـ̈ـܝܵܐ ܚܲܡܝܼܡܹ̈ܐ: ܘܲܠܟ݂ܠܗܘܿܢ ܨܲܝܕ̇ܢܵܝܹ̈ܐ: ܐܸܢܵܐ ܡܵܪܝܵܐ ܐܵܘܒܸ̇ܕ݂ ܐܸܢܘܿܢ ܡ̣ܢ ܩܕ݂ܵܡ ܒ̈ܢܲܝ ܝܼܣܪܵܝܹܠ. ܒܲܠܚܘܿܕ݂ ܕܹܝܢ ܠܲܒ̣̈ܢܲܝ ܝܼܣܪܵܝܹܠ ܐܲܝܟܲܢܵܐ ܕܦܲܩܸܕܬܵܟ݂.
7 ܦܲܠܓܹܝܗ̇ ܠܐܲܪܥܵܐ ܗܵܕܹܐ ܒܝܵܪ̈ܬ̇ܘܵܬ̣ܵܐ ܠܬܸܫܥܵܐ ܫܲܒ̣̈ܛܹܐ: ܘܲܠܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ ܥܲܡܗܘܿܢ.
8 ܡܸܛܠ ܕܪܘܼܒܹܝܠ: ܘܓ̣ܵܕ݂: ܘܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܩܲܒܸ̇ܠܘ ܝܵܪܬ̇ܘܼܬ̣ܗܘܿܢ ܕܝܲܗ̄ܒ̣ ܠܗܘܿܢ ܡܘܼܫܹܐ ܒܥܸܒ̣ܪܵܐ ܕܝܘܿܪܕ̇ܢܵܢ ܡ̣ܢ ܡܲܕ݂ܢ̱ܚܵܐ: ܐܲܝܟܲܢܵܐ ܕܝܲܗ̄ܒ̣ ܠܗܘܿܢ ܥܲܒ̣ܕ̇ܝ ܡܘܼܫܹܐ.
9 ܡܢ ܥܲܕ݂ܘܵܥܝܼܪ ܕܥܲܠ ܣܸܦܬ̣ܵܐ ܕܢܲܚܠܵܐ ܕܐܲܪܢܘܿܢ: ܘܲܩܪܝܼܬ̣ܵܐ ܕܲܒ̣ܓܵܘܹܗ ܕܢܲܚܠܵܐ: ܘܟ݂ܠܵܗ̇ ܦܩܲܥܬ̣ܵܐ ܕܲܒ̣ܡܲܥ̱ܪܒ̣ܵܐ: ܘܲܥܕܲܡܵܐ ܠܪܝܼܒ̣ܘܼܢ.
10 ܘܟ݂ܠܗܹܝܢ ܩܘܼܪ̈ܝܵܐ ܕܣܝܼܚܘܿܢ ܡܲܠܟܵܐ ܕܐܵܡܘܿܪ̈ܵܝܹܐ ܕܐܲܡ̣ܠܸܟ݂ ܒܚܸܫܒ̇ܘܿܢ: ܥܕܲܡܵܐ ܠܲܬ̣ܚܘܼܡܵܐ ܕܲܒ̣̈ܢܲܝ ܥܲܡܘܿܢ.
11 ܘܓ̣ܠܥܵܕ݂: ܘܲܬ̣ܚܘܼܡܵܐ ܕܥܝܼܢܕ̇ܘܿܪ: ܘܲܕ݂ܩܘܼܪܘܿܣ: ܘܟ݂ܠܹܗ ܛܘܼܪܵܐ ܕܚܹܪܡܘܿܢ: ܘܟ݂ܠܵܗ̇ ܡܲܬ̣ܢܝܼܢ ܥܕܲܡܵܐ ܠܣܲܠܟܵܐ.
12 ܟܠܵܗ̇ ܡܲܠܟ̇ܘܼܬܹܗ ܕܥܘܿܓ̣ ܕܲܒ̣ܡܲܬ̣ܢܝܼܢ: ܕܐܲܡܠܸܟ݂ ܒܥܸܣܬ̇ܪܘܼܬ̣ ܘܒܲܐܪܕ̇ܥܝܼ. ܘܗ̤ܘ ܐܸܫܬ̇ܚܲܪ ܡ̣ܢ ܫܲܪܟܵܐ ܕܓܲܢ̄ܒܵܪܹ̈ܐ: ܕܩܲܛܸܠ ܐܸܢܘܿܢ ܡܘܼܫܹܐ ܘܝܼܪܹܬ̣ ܐܲܪ̱ܥܗܘܿܢ.
13 ܘܠܵܐ ܚܪܲܒ̣ܘ ܒ̈ܢܲܝ ܝܼܣܪܵܝܹܠ ܠܥܲܡܡܹ̈ܐ ܕܥܝܼܢܕ̇ܘܿܪ: ܘܲܕ݂ܩܘܼܪܘܿܣ ܘܝܼܬܸܒ̣ܘ ܥܝܼܢܕ̇ܘܿܪ̈ܵܝܹܐ ܘܩܘܼܪ̈ܘܿܣܵܝܹܐ ܒܓ̣ܵܘ ܒ̈ܢܲܝ ܝܼܣܪܵܝܹܠ ܥܕܲܡܵܐ ܠܝܵܘܡܵܢܵܐ.
14 ܒܲܠܚܘܿܕ݂ ܠܫܲܒ̣ܛܵܐ ܕܠܹܘܝܼ ܠܵܐ ܝܲܗ̄ܒ̣ ܦܵܠܓܘܼܬ̣ܵܐ: ܡܸܛܠ ܕܩܘܼܪ̈ܒܵܢܵܘܗܝ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܗܸܢܘܿܢ ܝܵܪܬ̇ܘܼܬ̣ܗܘܿܢ: ܐܲܝܟܲܢܵܐ ܕܐܸܡܲܪ ܠܗܘܿܢ ܡܘܼܫܹܐ.
15 ܘܝܲܗ̄ܒ̣ ܡܘܼܫܹܐ ܠܫܲܒ̣ܛܵܐ ܕܪܘܼܒܹܝܠ ܠܫܲܪ̈ܒ̣ܵܬ̣ܗܘܿܢ.
16 ܘܲܗܘ̤ܵܐ ܬܚܘܼܡܗܘܿܢ ܡ̣ܢ ܥܲܕ݂ܘܵܥܝܼܪ ܕܥܲܠ ܓܹܢ̄ܒ̣ ܣܸܦܬ̣ܵܐ ܕܢܲܚܠܵܐ ܕܐܲܪܢܘܿܢ: ܘܲܩܪܝܼܬ̣ܵܐ ܕܲܒ̣ܓ̣ܵܘ ܢܲܚܠܵܐ: ܘܟ݂ܠܵܗ̇ ܦܩܲܥܬ̣ܵܐ: ܥܕܲܡܵܐ ܠܪܝܼܒ̣ܵܐ.
17 ܘܚܸܫܒ̇ܘܿܢ: ܘܟ݂ܠܗܹܝܢ ܩܘܼܪ̈ܝܵܐ ܕܐܝܼܬ̣ ܒܲܦܩܲܥܬ̣ܵܐ: ܘܪܝܼܒ̣ܘܿܢ ܘܡܲܬ̣ܒ̇ܥܸܠ: ܘܒܹܝܬ̣ ܒ̈ܢܲܝ ܥܲܡܘܿܢ.
18 ܘܝܵܗܵܨ: ܘܩܸܪܡܘܼܬ̣: ܘܲܥܢܵܬ̣.
19 ܘܩܘܼܪܝܲܬ̇ܝܼܡ: ܘܫܲܡܡܵܐ: ܘܝܲܨܪܲܬ̣: ܘܣܵܥܝܼܪ ܕܲܒ̣ܛܘܼܪܵܐ ܕܲܒ̣ܥܘܼܡܩܵܐ.
20 ܘܒܹܝܬ̣ ܦܥܘܿܪ: ܘܥܸܣܬ̇ܪܘܼܬ̣: ܘܦܲܣܓܵܐ: ܘܒܹܝܬ̣ ܐܲܚܫܡܘܿܬ̣.
21 ܘܟ݂ܠܗܹܝܢ ܩܘܼܪ̈ܝܵܐ ܕܒܲܦܩܲܥܬ̣ܵܐ: ܘܟ݂ܠܵܗ̇ ܡܲܠܟ̇ܘܼܬܹܗ ܕܣܝܼܚܘܿܢ ܡܲܠܟܵܐ ܕܐܵܡܘܿܪ̈ܵܝܹܐ ܕܐܲܡܠܸܟ݂ ܒܚܸܫܒ̇ܘܿܢ: ܕܩܲܛܠܹܗ ܡܘܼܫܹܐ ܘܲܒ̣̈ܢܲܒ ܝܼܣܪܵܝܹܠ ܒܡܸܕܝܼܢ: ܠܹܗ ܘܲܠܪܵܘ̱ܪ̈ܒ̣ܵܢܵܘܗܝ: ܠܐܘܿܝ: ܘܠܲܪܩܸܡ: ܘܲܠܨܘܿܪ: ܘܲܠܚܘܿܪ: ܘܠܲܪܒ̣ܵܥ: ܚܲܡܫܵܐ ܗܵܠܹܝܢ ܫܲܠܝܼܛܵܢܵܘ̈ܗܝ ܕܣܝܼܚܘܿܢ ܕܥܵܡ̇ܪܝܼܢ ܒܐܲܪܥܵܐ.
22 ܘܲܠܒܸܠܥܵܡ ܒܲܪ ܒܥܘܿܠ ܩܵܨܘܿܡܵܐ: ܩܲܛܠܘܼܗܝ ܒ̈ܢܲܝ ܝܼܣܪܵܝܹܠ ܒܚܲܪܒܵܐ ܥܲܡ ܩܛܝܼܠܲܝ̈ܗܘܿܢ.
23 ܘܲܗܘ̤ܵܐ ܬܚܘܼܡܵܐ ܕܲܒ̣̈ܢܲܝ ܪܘܼܒܹܝܠ ܝܘܿܪܕ̇ܢܵܢ. ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܲܒ̣̈ܢܲܝ ܪܘܼܒܹܝܠ ܠܫܲܪ̈ܒ̣ܵܬ̣ܗܘܿܢ: ܩܘܼܪ̈ܝܵܐ ܘܐܵܓ̣ܘܼܪ̈ܣܲܝܗܹܝܢ.
24 ܘܝܲܗ̄ܒ̣ܘ ܡܘܼܫܹܐ ܠܫܲܒ̣ܛܵܐ ܕܓ̣ܵܕ݂ ܠܫܲܪ̈ܒ̣ܵܬ̣ܗܘܿܢ.
25 ܘܲܗܘ̤ܵܐ ܬܚܘܼܡܗܘܿܢ: ܝܲܥܙܝܼܪ ܘܟ݂ܠܗܹܝܢ ܩܘܼܪ̈ܝܵܐ ܕܓܸܠܥܵܕ݂: ܘܦܸܠܓܵܗ̇ ܕܐܲܪܥܵܐ ܕܲܒ̣̈ܢܲܝ ܥܲܡܘܿܢ: ܥܕܲܡܵܐ ܠܥܲܕ݂ܘܵܥܝܼܪ ܕܐܝܼܬ̣ ܩܕ݂ܵܡ ܪܲܒܲܬ̣.
26 ܘܡ̣ܢ ܚܸܫܒ̇ܘܿܢ ܘܲܥܕܲܡܵܐ ܠܪܵܡܲܬ̣ ܡܲܨܦܝܵܐ ܘܒܲܛܢܝܼܢ: ܘܡ̣ܢ ܡܲܚܢܝܼܡ ܘܲܥܕܲܡܵܐ ܠܲܬ̣ܚܘܼܡܵܐ ܕܕ݂ܵܒܝܼܪ.
27 ܘܲܒ̣ܥܘܼܡܩܵܐ: ܒܹܝܬ̣ ܐܲܬ̣ܝܼܡ: ܘܒܹܝܬ̣ ܢܲܡܪܵܐ: ܘܣܵܟ݂ܘܼܬ̣: ܘܓܲܪܒ̇ܝܵܐ: ܘܫܲܪܟܵܐ ܕܡܲܠܟ̇ܘܼܬܹܗ ܕܣܸܚܘܿܢ ܡܲܠܟܵܐ ܕܚܸܫܒ̇ܘܿܢ: ܘܲܬ̣ܚܘܼܡܗܘܿܢ ܥܕܲܡܵܐ ܠܝܘܿܪܕ̇ܢܵܢ: ܥܕܲܡܵܐ ܠܣܵܘܦܵܐ ܕܝܲܡܵܐ ܕܟܸܢܪܲܬ̣. ܠܥܸܒ̣ܪܵܐ ܕܝܘܿܪܕ̇ܢܵܢ ܕܲܒ̣ܡܲܕ݂ܢ̱ܚܵܐ.
28 ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܲܒ̣̈ܢܲܝ ܓܵܕ݂ ܠܫܲܪ̈ܒ̣ܵܬ̣ܗܘܿܢ: ܩܘܼܪ̈ܝܵܐ ܘܐܲܓ̣ܘܼܪ̈ܣܲܝܗܹܝܢ.
29 ܘܝܲܗ̄ܒ̣ ܡܘܼܫܹܐ ܠܦܸܠܓܘܼܬ̣ ܫܲܒ̣ܛܵܐ ܕܲܡܢܲܫܹܐ: ܘܲܗܘ̤ܵܬ̣ ܦܵܠܓ̇ܘܼܬ̣ܗܘܿܢ ܕܲܒ̣̈ܢܲܝ ܡܢܲܫܹܐ ܠܫܲܪ̈ܒ̣ܵܬ̣ܗܘܿܢ.
30 ܘܲܗܘ̤ܵܐ ܬܚܘܼܡܗܘܿܢ: ܡ̣ܢ ܡܲܚܢܝܼܡ ܘܟ݂ܠܵܗ̇ ܡܲܬ̣ܢܝܼܢ: ܘܟ݂ܠܵܗ̇ ܡܲܠܟ̇ܘܼܬܹܗ ܕܥܘܿܓ̣ ܡܲܠܟܵܐ ܕܡܲܬ̣ܢܝܼܢ: ܘܟ݂ܠܗܘܿܢ ܟܲܦܪ̈ܘܿܢܹܐ ܕܝܵܐܝܼܪ ܕܲܒ̣ܡܲܬ̣ܢܹܝܢ: ܫܬ̇ܝܼܢ ܩܘܼܪ̈ܝܵܐ.
31 ܘܦܸܠܓܵܗ̇ ܕܓܸܠܥܵܕ݂ ܘܲܕ݂ܥܸܣܬ̇ܪܘܼܬ̣: ܘܕܲܐܪܕ̇ܥܝܼ: ܩܘܼܪ̈ܝܵܐ ܕܡܲܠܟ̇ܘܼܬܹܗ ܕܥܘܿܓ ܕܲܒ̣ܡܲܬ̣ܢܝܼܢ ܗܵܠܹܝܢ ܩܘܼܪ̈ܝܵܐ ܘܟܲܦܪ̈ܘܿܢܲܝܗܹܝܢ: ܝܲܗ̄ܒ̣ ܡܘܼܫܹܐ ܠܲܒ̣ܢܵܘ̈ܗܝ ܕܡܵܟ݂ܝܼܪ ܒܲܪ ܡܢܲܫܹܐ: ܠܦܸܠܓܵܐ ܕܲܒ̣̈ܢܲܝ ܡܵܟ݂ܝܼܪ ܠܫܲܪ̈ܒ̣ܵܬ̣ܗܘܿܢ.
32 ܠܗܵܠܹܝܢ ܬܪܹܝܢ ܫܲܒ̣̈ܛܝܼܢ: ܘܲܠܦܸܠܓ̇ܘܼܬ̣ ܫܲܒ̣ܛܵܐ: ܐܵܘܪܸܬ̣ ܡܘܼܫܹܐ ܒܲܦܩܲܥܬ̣ܵܐ ܕܡܘܼܐܵܒ̣: ܡ̣ܢ ܥܸܒ̣ܪܵܐ ܕܝܘܿܪܕ̇ܢܵܢ ܡ̣ܢ ܡܲܕ݂ܢ̱ܚܵܐ.
33 ܘܲܠܫܲܒ̣ܛܵܐ ܕܠܹܘܝܼ ܠܵܐ ܝܲܗ̄ܒ̣ ܡܘܼܫܹܐ ܝܵܪܬ̇ܘܼܬ̣ܵܐ: ܡܸܛܠ ܕܡܵܪܝܵܐ ܗ̄ܘ̣ ܐܲܠܵܗܵܐ ܕܝܼܣܪܵܝܹܠ ܝܵܪܬ̇ܘܼܬ̣ܗܘܿܢ: ܐܲܝܟܲܢܵܐ ܕܐܸܡܲܪ ܠܗܘܿܢ.
1 ܘܗܵܠܹܝܢ ܕܝܼܪܬ̣ܘ ܒ̈ܢܲܝ ܝܼܣܪܵܝܹܠ ܒܐܲܪܥܵܐ ܕܲܟ݂ܢܲܥܢ: ܕܐܵܘܪܸܬ̣ ܐܸܢܘܿܢ ܐܹܠܝܼܥܵܙܲܪ ܟܵܗܢܵܐ ܘܝܼܫܘܿܥ ܒܲܪܢܘܿܢ: ܘܪܹ̈ܫܹܐ ܕܐܲܒ̣ܵـ̈ـܗܵܬ̣ܵܐ ܕܫܲܒ̣̈ܛܹܐ ܕܝܼܣܪܵܝܹܠ.
2 ܒܲܡܢܵܬ̣ܵܐ ܕܝܵܪܬ̇ܘܼܬ̣ܗܘܿܢ: ܐܲܝܟܲܢܵܐ ܕܦܲܩܸܕ݂ ܡܵܪܝܵܐ ܒܐܝܼܕ݂ܵܐ ܕܡܘܼܫܹܐ: ܠܡܸܬܲܠ ܠܬܸܫܥܵܐ ܫܲܒ̣̈ܛܝܼܢ ܘܲܠܦܸܠܓܘܼܬ̣ ܫܲܒ̣ܛܵܐ.
3 ܡܸܛܠ ܕܝܲܗ̄ܒ̣ ܡܘܼܫܹܐ ܝܵܪܬ̇ܘܼܬ̣ܵܐ ܠܲܬ̣ܪܹܝܢ ܫܲܒ̣ܛ̈ܝܼܢ: ܘܲܠܦܸܠܓ̇ܘܼܬ̣ ܫܲܒ̣ܛܵܐ ܒܥܸܒ̣ܪܵܐ ܕܝܘܿܪܕ̇ܢܵܢ. ܘܲܠܠܹܘܵܝܹ̈ܐ ܠܵܐ ܝܲܗ̄ܒ̣ ܝܲܪܬ̇ܘܼܬ̣ܵܐ ܒܲܝܢܵܬ̣ܗܘܿܢ.
4 ܡܸܛܠ ܕܲܗܘ̤ܵܘ ܒ̈ܢܲܝ ܝܵܘܣܸܦ ܬܪܹܝܢ ܫܲܒ̣̈ܛܝܼܢ: ܡܢܲܫܹܐ ܘܐܲܦܪܹܝܡ. ܘܠܵܐ ܝܲܗ̄ܒ̣ ܦܵܠܓ̇ܘܼܬ̣ܵܐ ܠܠܹܘܵܝܹ̈ܐ ܒܐܲܪܥܵܐ: ܐܸܠܵܐ ܐܸܢ ܩܘܼܪ̈ܝܵܐ ܠܡܸܥܡܲܪ ܒܗܹܝܢ: ܘܐܵܓ̣ܘܼܪ̈ܣܹܐ ܠܲܒ̣ܥܝܼܪܗܘܿܢ: ܘܲܠܩܸܢܝܵܢܗܘܿܢ.
5 ܐܲܝܟܲܢܵܐ ܕܦܲܩܸܕ݂ ܡܵܪܝܵܐ ܠܡܘܼܫܹܐ: ܗܵܟܲܢܵܐ ܥܒܲܕ݂ܘ ܒ̈ܢܲܝ ܝܼܣܪܵܝܹܠ: ܘܦܲܠܓܘܼܗ̇ ܠܐܲܪܥܵܐ.
6 ܘܲܩܪܸܒ̣ܘ ܒ̈ܢܲܝ ܝܼܗܘܼܕ݂ܵܐ ܠܘܵܬ̣ ܝܼܫܘܿܥ ܒܓܲܠܓܵܠܵܐ. ܘܐܸܡܲܪ ܟܵܠܵܒ̣ ܒܲܪܝܘܿܦܲܢܵܐ ܩܲܢܙܵܝܵܐ ܠܝܼܫܘܿܥ ܐܲܢ̄ܬ̇ ܝܵܕܲܥ ܐܲܢ̄ܬ̇ ܦܸܬ̣ܓ̣ܵܡܵܐ ܕܡܲܠܸܠ̣ ܡܵܪܝܵܐ ܥܲܡ ܡܘܼܫܹܐ ܥܲܒ̣ܕܹ̇ܗ: ܥܲܠ ܨܒ̣ܘܼܬ̣ܝ ܘܥܲܠ ܨܒ̣ܘܼܬ̣ܵܟ݂ ܒܲܪܩܸܡ ܕܓܲܝܵܐ.
7 ܟܲܕ݂ ܒܲܪ ܐܲܪܒ̇ܥܝܼܢ ܗܘܹܝܬ̣ ܫܢ̈ܝܼܢ ܗܵܝܕܹ̇ܝܢ: ܟܲܕ݂ ܫܲܕ̇ܪܲܢܝ ܡܘܼܫܹܐ ܥܲܒ̣ܕܹ̇ܗ ܕܐܲܠܵܗܵܐ: ܡ̣ܢ ܪܩܸܡ ܕܓܲܠܝܵܐ ܠܡܸܓܫܵܗ̇ ܠܐܲܪܥܵܐ: ܘܐܲܬ̣ܝܼܒ̣ܬܹ̇ܗ ܦܸܬ̣ܓ̣ܵܡܵܐ ܐܲܝܟ݂ ܕܐܝܼܬ̣ ܗ̄ܘ̣ܵܐ ܒܠܹܒ̇ܝ.
8 ܘܐܲܚܲܝ̈ܢ ܕܲܣܠܸܩܘ ܗ̄ܘ̣ܵܘ ܥܲܡܵܢ: ܐܲܙܝܼܥܘܼܗܝ ܠܸܒܹ̇ܗ ܕܥܲܡܵܐ. ܘܐܸܢܵܐ ܫܲܡܠܝܼܬ̣ ܒܵܬܲܪ ܡܵܪܝܵܐ ܐܲܠܵܗܝ.
9 ܘܝܼܡܵܐ ܡܘܼܫܹܐ ܒܹܗ ܒܙܲܒ̣ܢܵܐ: ܗܵܘ̇: ܘܐܸܡܲܪ: ܐܲܪܥܵܐ ܕܕܸܪܟܲܬ̤ ܒܵܗ̇ ܪܓ̣ܠܵܟ݂: ܠܵܟ݂ ܬܸܗܘܹܐ ܝܵܪܬ̇ܘܼܬ̣ܵܐ: ܘܠܲܒ̣ܢܲܝ̈ܟ ܠܥܵܠܲܡ: ܡܸܛܠ ܕܫܲܡ̣ܠܝܼܬ̇ ܒܵܬܲܪ ܡܵܪܝܵܐ ܐܲܠܵܗܵܐ.
10 ܘܗܵܫܵܐ ܗܵܐ ܐܲܢܝܼܚ ܠܲܢ ܡܵܪܝܵܐ ܐܲܝܟܲܢܵܐ ܕܐܸܡܲܪ: ܗܵܐ ܐܲܪܒ̇ܥܝܼܢ ܘܚܲܡܸܫ ܫܢ̈ܝܼܢ: ܗܵܐ ܡ̣ܢ ܕܐܸܡܲܪ ܡܵܪܝܵܐ ܡܸܠܬ̣ܵܐ ܗܵܕܹܐ ܠܡܘܼܫܹܐ: ܕܲܢܗܲܠܸܟ݂ ܠܝܼܣܪܵܝܹܠ ܒܡܲܕ݂ܒ̇ܪܵܐ. ܘܗܵܫܵܐ ܐܸܢܵܐ ܝܵܘܡܵܢܵܐ: ܒܲܪ ܬܡܵܢܐܝܼܢ ܐ̄ܢܵܐ ܘܚܲܡܸܫ ܫܢ̈ܝܼܢ.
11 ܘܲܥܕܲܡܵܐ ܠܗܵܫܵܐ ܚܲܝܠܵܐ ܐܝܼܬ̣ ܒܝܼ: ܐܲܝܟ݂ ܕܲܒ̣ܝܵܘܡܵܐ ܗܵܘ̇ ܕܫܲܕܲܪܲܢܝ ܡܘܼܫܹܐ ܚܲܝܠܝ ܕܗܵܝܕܹ̇ܝܢ ܘܲܕ݂ܗܵܫܵܐ ܫܘܸܐ ܗ̄ܘ̣ ܠܲܩܪܵܒ̣ܵܐ ܘܲܠܡܸܦܲܩ ܘܲܠܡܸܥܲܠ.
12 ܗܵܫܵܐ ܗܲܒ̣ ܠܝܼ ܛܘܼܪܵܐ ܗܵܢܵܐ ܕܐܸܡܲܪ ܡܵܪܝܵܐ ܒܹܗ ܒܝܵܘܡܵܐ ܗܵܘ̇. ܘܐܲܢ̄ܬ̇ ܫܡܲܥܬ̇ ܒܹܗ ܒܝܵܘܡܵܐ ܗܵܘ̇ ܕܓܲܢ̄ܒܵܪܹ̈ܐ ܐܝܼܬ̣ ܬܲܡܵܢ. ܘܲܡܕ݂ܝܼ̈ܢܵܬ̣ܵܐ ܪܵܘ̱ܪ̈ܒ̣ܵܢ ܐܸܢܹܝܢ ܘܚܲܣ̈ܝܼܢܵܢ: ܟܒܲܪ ܢܸܗܘܹܐ ܡܵܪܝܵܐ ܥܲܡܝ ܘܐܸܚܪܘܿܒ̣ ܐܸܢܘܿܢ: ܐܲܝܟ݂ ܕܐܸܡܲܪ ܡܵܪܝܵܐ.
13 ܘܒܲܪܟܹܗ ܝܼܫܘܿܥ ܠܟ݂ܵܠܵܒ̣ ܒܲܪ ܝܘܿܦܲܢܵܐ: ܘܝܲܗ̄ܒ̣ ܠܹܗ ܠܚܸܒ̣ܪܘܿܢ ܟܲܪܟ݂ܵܐ ܝܵܪܬ̇ܘܼܬ̣ܵܐ.
14 ܡܸܛܠ ܗܵܢܵܐ ܗܘ̤ܵܐ ܚܸܒ̣ܪܘܿܢ ܟܲܪܟ݂ܵܐ ܝܵܪܬ̇ܘܼܬ̣ܵܐ ܠܟ݂ܵܠܵܒ̣ ܒܲܪ ܝܘܿܦܲܢܵܐ ܩܲܢܙܵܝܵܐ ܥܕܲܡܵܐ ܠܝܵܘܡܵܢܵܐ: ܡܸܛܠ ܕܫܲܡܠܝܼ ܒܵܬܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.
15 ܘܲܫܡܵܗ̇ ܕܚܸܒ̣ܪܘܿܢ ܟܲܪܟ݂ܵܐ ܡ̣ܢ ܩܕ݂ܝܼܡ: ܩܘܼܪܝܲܬ̣ ܐܲܪܒܲܥ ܕܐ̄ܢܵܫܵܐ ܓܲܢ̄ܒܵܪܹ̈ܐ. ܘܐܲܪܥܵܐ ܐܲܬ̇ܬ̇ܢܝܼܚܲܬ̣ ܡ̣ܢ ܩܪܵܒ̣ܵܐ.
1 ܘܲܗܘ̤ܵܬ̣ ܡܢܵܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܝܼܗܘܼܕ݂ܵܐ ܠܫܲܪ̈ܒ̣ܵܬ̣ܗܘܿܢ: ܥܲܠ ܬܚܘܼܡܵܐ ܕܐܲܕ݂ܘܿܡ: ܘܲܥܕܲܡܵܐ ܠܡܲܕ݂ܒ̇ܪܵܐ ܕܨܝܼܢ: ܘܲܥܕܲܡܵܐ ܠܚܲܪܬܹܗ ܕܬܲܝ̱ܡܢܵܐ.
2 ܘܲܗܘ̤ܵܐ ܬܚܘܼܡܗܘܿܢ: ܡ̣ܢ ܬܲܝ̱ܡܢܵܐ ܕܣܵܘܦܵܐ ܕܝܲܡܵܐ ܕܡܸܠܚܵܐ: ܘܣܵܠܹܩ ܡ̣ܢ ܬܲܡܵܢ ܠܠܸܫܵܢܵܐ ܕܦܵܢܹ̇ܐ ܠܬܲܝ̱ܡܢܵܐ.
3 ܘܢܵܦܹ̇ܩ ܡ̣ܢ ܬܲܝ̱ܡܢܵܐ ܠܡܲܣܩܵܢܵܐ ܕܲܥܩܲܪܩܲܡ: ܘܥܵܒܲܪ ܠܨܝܼܢ: ܘܣܵܠܹܩ ܡ̣ܢ ܬܲܝ̱ܡܢܵܐ ܠܲܪܩܸܡ ܕܓܲܠܝܵܐ: ܘܥܵܒܲܪ ܠܚܸܨܪܘܼܬ̣: ܘܣܵܠܹ̇ܩ ܠܐܸܕܲܪ: ܘܚܵܕܲܪ ܠܩܲܪܩܲܥ.
4 ܘܥܵܒܲܪ ܠܥܸܨܡܘܿܢ: ܘܢܵܦܹ̇ܩ ܠܢܲܚܠܵܐ ܕܡܸܨܪܹܝܢ ܘܗܵܘܹ̇ܝܢ ܡܲܦܩܵܢܵܘ̈ܗܝ ܕܲܬ̣ܚܘܼܡܵܐ ܠܡܲܥܪ̱ܒ̣ܵܐ. ܗܵܢܵܐ ܢܸܗܘܹܐ ܠܟ݂ܘܿܢ ܬܚܘܼܡܵܐ ܕܬܲܝ̱ܡܢܵܐ.
5 ܘܲܬ̣ܚܘܼܡܵܐ ܕܡܲܕ݂ܢ̱ܚܵܐ ܣܵܘܦܵܐ ܕܝܲܡܵܐ ܕܡܸܠܚܵܐ: ܥܕܲܡܵܐ ܠܣܵܘܠܵܐ ܕܝܘܿܪܕ̇ܢܵܢ ܘܣܵܠܹܩ ܬܚܘܼܡܵܐ ܠܣܸܛܪܵܐ ܕܓܲܪܒ̇ܝܵܐ: ܡ̣ܢ ܠܸܫܵܢܵܐ ܕܝܲܡܵܐ: ܡ̣ܢ ܣܵܘܦܵܐ ܕܝܘܿܪܕ̇ܢܵܢ.
6 ܘܣܵܠܹܩ ܬܚܘܼܡܵܐ ܠܠܸܒ̣ܵܢ ܕܲܒ̣̈ܢܲܝ ܪܘܼܒܹܝܠ.
7 ܘܣܵܠܹܩ ܬܚܘܼܡܵܐ ܠܕ݂ܵܒ̣ܝܼܪ: ܡ̣ܢ ܥܘܼܡܩܵܐ ܕܥܵܟ݂ܵܪ ܘܲܠܓܲܪܒ̇ܝܵܐ: ܘܦܵܢܹ̇ܐ ܥܲܠ ܓܠܝܼܠܵܐ ܕܠܘܼܩܒܲܠ ܡܲܣܩܵܢܵܐ ܕܪܵܡܝܼܢ: ܡ̣ܢ ܬܲܝ̱ܡܢܵܐ ܠܢܲܚܠܵܐ ܘܥܵܒܲܪ ܬܚܘܼܡܵܐ ܥܲܠ ܡܲܒ̇ܘܼܥܵܐ ܕܲܫܡܸܫ: ܘܗܵܘܹ̇ܝܢ ܡܲܦܩܵܢܵܘ̈ܗܝ ܥܲܠ ܥܲܝܢܵܐ ܕܕ݂ܘܼܓܸ̇ܠ.
8 ܘܣܵܠܹܩ ܬܚܘܼܡܵܐ ܠܢܲܚܠܵܐ ܕܒܲܪܗܵܢܘܿܡ: ܠܣܸܛܪܵܐ ܕܝܵܒ̣ܘܿܣܵܝܹܐ ܕܡ̣ܢ ܬܲܝ̱ܡܢܵܐ ܕܗ̤ܝ ܗ̄ܝ̣ ܐܘܿܪܸܫܠܸܡ. ܘܣܵܠܹܩ ܬܚܘܼܡܵܐ ܥܲܠ ܪܹܫܵܐ ܕܛܘܼܪܵܐ ܕܲܩܕ݂ܵܡ ܢܲܚܠܵܐ ܕܒܲܪܗܵܢܘܿܡ: ܡ̣ܢ ܡܲܥܪ̱ܒ̣ܵܐ ܕܣܘܿܦ ܥܘܼܡܩܵܐ ܕܓܲܢ̄ܒܵܪܹ̈ܐ.
9 ܘܚܵܐܲܪ ܬܚܘܼܡܵܐ ܡ̣ܢ ܪܹܫܹܗ ܕܛܘܼܪܵܐ ܠܡܲܒ̇ܘܼܥܵܐ ܕܡܲـ̈ـܝܵܐ ܕܢܲܦܬܘܿܚ: ܘܢܵܦܹ̇ܩ ܥܲܠ ܩܲܪܢܵܐ ܕܛܘܼܪܵܐ ܕܥܸܒ̣ܪܘܿܢ: ܘܚܵܐܲܪ ܬܚܘܼܡܵܐ ܠܒ̣ܵܠܵܥ ܕܗ̤ܝ ܗ̄ܝ̣ ܩܘܼܪܝܲܬ̣ ܢܲܥܪܝܼܢ.
10 ܘܚܵܐܲܪ ܬܚܘܼܡܵܐ ܡܟܢ ܒܵܠܵܥ ܠܡܲܥܪ̱ܒ̣ܵܐ ܥܲܠ ܛܘܼܪܵܐ ܕܣܵܥܝܼܪ: ܘܥܵܒܲܪ ܥܲܠ ܣܸܛܪܵܐ ܕܛܘܼܪܵܐ ܕܢܲܥܪܝܼܡ ܡ̣ܢ ܓܲܪܒ̇ܝܵܐ: ܗ̤ܝ ܗ̄ܝ̣ ܟܸܣܠܘܿܢ: ܘܢܵܚܹ̇ܬ̣ ܠܒܹܝܬ̣ ܫܡܸܫ: ܘܥܵܒܲܪ ܠܬܲܝ̱ܡܢܵܐ.
11 ܘܢܵܦܹ̇ܩ ܬܚܘܼܡܵܐ ܠܣܸܛܪܵܐ ܕܥܸܩܪܘܿܢ ܡ̣ܢ ܓܲܪܒ̇ܝܵܐ: ܬܚܘܼܡܵܐ ܠܫܸܟ݂ܪܘܿܢ: ܘܥܵܒܲܪ ܥܲܠ ܛܘܼܪܵܐ ܕܒ̣ܵܠܵܥ: ܘܢܵܦܹ̇ܩ ܠܝܵܗܒ̣ܵܐܹܝܠ. ܘܗܵܘܹ̇ܝܢ ܡܲܦܩܵܢܵܘ̈ܗܝ ܕܲܬ̣ܚܘܼܡܵܐ ܠܡܲܥܪ̱ܒ̣ܵܐ.
12 ܘܲܬ̣ܚܘܼܡܹܗ ܡ̣ܢ ܡܲܥܪ̱ܒ̣ܵܐ ܠܲܡܪܝܼܒ̣ܵܐ ܒܲܬ̣ܚܘܼܡܹ̈ܝܗ̇ ܗܵܢܵܘ ܬܚܘܼܡܵܐ ܕܲܒ̣̈ܢܲܝ ܝܼܗܘܼܕ݂ܵܐ ܠܫܲܪ̈ܒ̣ܵܬ̣ܗܘܿܢ ܟܲܕ݂ ܚܵܕܲܪ.
13 ܘܲܠܟ݂ܠܵܒ̣ ܒܲܪ ܝܘܿܦܲܢܵܐ: ܝܲܗ̄ܒ̣ ܝܼܫܘܼܥ ܦܵܠܓܘܼܬ̣ܵܐ ܒܲܝܢܵܬ̣ ܒ̈ܢܲܝ ܝܼܗܘܼܕ݂ܵܐ: ܐܲܝܟ݂ ܡܸܠܲܬ̣ ܦܘܼܡܹܗ ܕܡܵܪܝܵܐ ܘܐܸܡܲܪ ܟܵܠܵܒ̣ ܠܝܼܫܘܿܥ: ܗܲܒ̣ ܠܝܼ ܗܵܕܹܐ ܒܘܼܪܝܲܬ̣ ܐܲܪܒܲܥ ܕܐܲܒ̣ܘܼܗܘܿܢ ܕܓܲܢ̄ܒܵܪܹ̈ܐ. ܘܝܲܗ̄ܒ̣ ܝܼܫܘܿܥ ܠܟ݂ܵܠܵܒ̣ ܒܘܼܪܝܲܬ̣ ܐܲܪܒܲܥ ܕܐܲܒ̣ܘܼܗܘܿܢ ܕܓܲܢ̄ܒܵܪܹ̈ܐ: ܕܗ̤ܝ ܗ̄ܝ̣ ܚܸܒ̣ܪܘܿܢ.
14 ܘܲܚܪܲܒ̣ ܡ̣ܢ ܬܲܡܵܢ ܟܵܠܵܒ̣ ܬܠܵܬ̣ܵܐ ܒ̈ܢܲܝ ܓܲܢ̄ܒܵܪܹ̈ܐ: ܠܫܝܼܫܲܝ ܘܠܲܐܚܝܼܡܵܢ: ܘܲܠܬ̣ܘܼܠܡܲܝ ܒ̈ܢܲܝ ܓܲܢ̄ܒܵܪܹ̈ܐ.
15 ܘܲܣܠܸܩ ܡ̣ܢ ܬܲܡܵܢ ܥܲܠ ܥܵܡ̇ܘܿܪܹ̈ܐ ܕܕ݂ܵܒܝܼܪ: ܘܲܫܡܵܗ̇ ܕܕ݂ܵܒ̣ܝܼܪ ܡ̣ܢ ܩܕ݂ܝܼܡ ܩܘܼܪܝܲܬ̣ ܣܸܦܪܵܐ.
16 ܘܐܸܡܲܪ ܟܵܠܵܒ̣: ܟܠܡ̇ܢ ܕܢܸܟ݂ܒ̇ܫܝܼܗ̇ ܠܩܘܼܪܝܲܬ̣ ܣܸܦܪܵܐ ܘܢܸܚܪ̱ܒ̣ܝܼܗ̇: ܐܸܬܸ̇ܠ ܠܹܗ ܠܥܲܟ݂ܣܵܐ ܒܪܲܬ̣ܝ ܐܲܢ̄ܬ̇ܬ̣ܵܐ.
17 ܘܟܲܒ̣ܫܵܗ̇ ܥܲܬ̣ܢܵܐܹܝܠ ܒܲܪ ܩܲܢܙ ܐܲܚܘܼܗܝ ܕܟ݂ܵܠܵܒ̣: ܘܝܲܗ̄ܒ̣ ܠܹܗ ܠܥܲܟ݂ܣܵܐ ܒܲܪܬܹܗ ܐܲܢ̄ܬ̇ܬ̣ܵܐ.
18 ܘܟܲܕ݂ ܗܘ̤ܵܬ̣ ܠܹܗ: ܐܸܬ̣ܓܲܪܓܲܬ̤ ܕܬܸܫܐܲܠ ܡ̣ܢ ܐܲܒ̣ܘܼܗ̇ ܝܵܪܬ̇ܘܼܬ̣ܵܐ ܕܚܲܩܠܵܐ: ܘܐܸܬ̣ܪܲܟ݂ܢܲܬ̣ ܡ̣ܢ ܚܡܵܪܵܐ. ܐܵܡܲܪ ܠܵܗ̇ ܟܠܵܒ̣: ܡܵܐ ܠܹܟ݂ܝ ܒܪܹܬ̣ܝ.
19 ܐܵܡܪܵܐ ܠܹܗ ܗܲܒ̣ܠܝܼ ܒܘܼܪܟ̇ܬ̣ܵܐ: ܡܸܛܠ ܕܒܲܐܪܥܵܐ ܕܬܲܝ̱ܡܢܵܐ ܝܲܗ̄ܒ̣ܬܵܢܝ: ܗܲܒ̣ܠܝ ܚܸܦܪܵܐ ܗܵܢܵܐ ܕܡܲـ̈ـܝܵܐ: ܘܝܲܗ̄ܒ̣ ܠܵܗ̇ ܟܵܠܵܒ̣ ܚܸܦܪܵܐ ܥܸܠܵܝܵܐ: ܘܚܸܦܪܵܐ ܬܲܚܬܵܝܵܐ.
20 ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܝܼܗܘܼܕ݂ܵܐ ܠܫܲܪ̈ܒ̣ܵܬ̣ܗܘܿܢ.
21 ܘܲܗ̤ܘܲܝ ܩܘܼܪ̈ܝܵܐ ܕܫܲܒ̣ܛܵܐ ܕܲܒ̣̈ܢܲܝ ܝܼܗܘܼܕ݂ܵܐ: ܥܲܠ ܬܚܘܼܡܵܐ ܕܐܲܕ݂ܘܿܡ ܡ̣ܢ ܬܲܝ̱ܡܢܵܐ. ܘܗܵܠܹܝܢ ܐܸܢܘܿܢ ܫܡܵܗܹ̈ܐ ܕܩܘܼܪ̈ܝܵܐ ܕܲܒ̣̈ܢܲܝ ܝܼܗܘܼܕ݂ܵܐ: ܩܲܒ̣ܨܝܼܐܹܝܠ: ܘܥܵܕ݂ܵܪ: ܘܝܵܓ̣ܘܿܪ.
22 ܘܩܝܼܢܵܐ: ܘܝܲܪܡܘܿܢܵܐ: ܘܓܲܕ݂ܓܵܕ݂ܵܐ.
23 ܘܲܩܕܸܫ: ܘܚܵܨܘܿܪ: ܘܢܲܬ̣ܢܝܼܢ.
24 ܘܙܝܼܒ̣: ܘܐܲܛܠܸܡ: ܘܒܲܥܠܘܼܬ̣.
25 ܘܚܵܨܘܿܪ: ܘܲܚܕܲܬܵܐ: ܘܩܘܼܪܝܼܬ̇ ܚܸܨܪܘܿܢ.
26 ܘܐܵܡܵܡ: ܘܐܲܫܡܵܥ: ܘܡܵܘܠܵܕ݂ܵܐ.
27 ܘܲܚܨܵܪ ܐܲܕܵܐ: ܘܚܸܫܡܘܿܢ: ܘܒܹܝܬ̣ ܦܵܠܵܛ.
28 ܘܲܕ݂ܵܪܲܬ̣ ܬܲܥ̈ܠܹܐ: ܘܒܹܪ ܫܒܲܥ: ܘܒܹܪܝܘܿܬ̣ܵܐ.
29 ܘܲܒ̣ܥܸܠ: ܘܥܸܠܝܼܢ: ܘܲܥܨܲܡ.
30 ܘܐܲܠܬܵܠܲܡ: ܘܐܲܟ݂ܣܝܼܢ: ܘܚܸܪܡܵܐ.
31 ܘܨܸܢܩܠܲܓ̣: ܘܡܲܪܡܵܢܵܐ: ܘܣܲܡܣܵܠܵܐ.
32 ܘܲܠܒ̣ܵܐܘܼܬ̣: ܘܫܲܠܘܿܚ: ܘܥܝܼܪܡܘܿܢ. ܟܠܗܹܝܢ ܩܘܼܪ̈ܝܵܐ ܬܠܵܬ̣ܝܼܢ ܘܫܸܬ̣: ܘܐܵܓ̣ܘܼܪ̈ܣܲܝܗܹܝܢ ܒܲܦܫܲܥܬ̣ܵܐ.
33 ܘܐܸܫܬ̇ܘܼܐܹܝܠ: ܘܨܹܕ݂ܥܵܐ: ܘܐܸܫܬ̇ܢܵܐ.
34 ܘܚܘܿܚ: ܘܥܹܝܢ ܓܲܚܘܿܡ: ܘܦܲܬܘܿܚ: ܘܥܹܝܠܲܡ.
35 ܘܝܲܪܡܘܼܬ̣: ܘܥܲܪܠܲܡ: ܘܣܵܘܟܵܐ: ܘܥܲܙܩܵܐ.
36 ܘܫܲܥܬ̣ܝܼܢ: ܘܥܲܙܝܼܬ̣ܝܼܡ: ܘܓ̣ܵܬ̣ܵܪ: ܘܓܸܬ̣ܪܘܿܢܝܼܢ: ܩܘܼܪ̈ܝܵܐ ܚܲܡܫܲܥܸܣܪܹ̈ܐ: ܘܐܵܓ̣ܘܿܪ̈ܣܲܝܗܹܝܢ.
37 ܘܨܲܠܵܢ: ܘܚܲܪܫܵܐ ܘܡܲܓܕܲܠܓܵܕ݂.
38 ܘܕܸܠܒܵܢ: ܘܩܲܨܦܵܐ: ܘܢܲܩܬ̣ܵܐܹܝܠ.
39 ܘܲܠܟ݂ܝܼܫ ܘܥܲܙܩܲܬ̣: ܘܥܸܓ̣ܠܘܿܢ.
40 ܘܟܲܒ̣ܫܘܿܢ: ܘܠܲܚܡܵܣ: ܘܟܲܬ̣ܠܝܼܫ.
41 ܘܥܸܕܪܘܼܬ̣: ܘܒܹܝܬ̣ ܕܓ̣ܘܿܢ: ܘܢܲܥܡܵܐ: ܘܢܲܩܪܵܐ ܩܘܼܪ̈ܝܵܐ ܫܸܬ̇ܬܲܥܸܣܪܹ̈ܐ: ܘܐܵܓ̣ܘܼܪ̈ܣܲܗܹܝܢ.
42 ܘܠܸܒܵܢ: ܘܥܵܬ̣ܵܪ: ܘܢܲܦ̮ܬܲܚ.
43 ܘܲܥܫܵܢ: ܘܐܲܫܝܵܐ: ܘܨܸܢܩܠܲܓ.
44 ܘܲܩܥܝܼܠܵܐ: ܘܐܲܟ݂ܙܝܼܒ̣: ܘܡܹܐܪܫܵܐ ܩܘܼܪ̈ܝܵܐ ܬܫܲܥ: ܘܐܲܓ̣ܘܿܪ̈ܣܲܝܗܹܝܢ.
45 ܘܥܸܩܪܘܿܢ: ܘܟܲܦܪ̈ܘܿܢܹܝܗ̇: ܘܐܵܓ̣ܘܼܪ̈ܣܹܝܗ̇ ܡ̣ܢ ܡܲܥܪ̱ܒ̣ܵܐ.
46 ܘܟ݂ܠܹܗ ܐܲܬ̣ܪܵܐ ܕܐܲܫܕ̇ܘܿܕ݂: ܘܐܵܓ̣ܘܿܪ̈ܣܲܝܗܹܝܢ.
47 ܘܐܲܫܕ̇ܘܼܕ݂ ܘܟܲܦܪ̈ܘܿܢܹܝܗ̇: ܘܐܲܓ̣ܘܼܪ̈ܣܹܝܗ̇: ܘܥܵܐܙܵܐ ܘܟܲܦܪ̈ܘܿܢܹܝܗ̇: ܘܐܵܓ̣ܘܼܪ̈ܣܹܝܗ̇: ܥܕܲܡܵܐ ܠܢܲܚܠܵܐ ܕܡܸܨܪܹܝܢ: ܘܝܲܡܵܐ ܪܲܒܵܐ ܬܚܘܼܡܵܐ.
48 ܘܗܵܠܹܝܢ ܒܛܘܼܪܵܐ: ܫܵܡܝܼܪ ܘܝܵܬ̣ܝܼܪ: ܘܣܵܘܟܵܐ.
49 ܘܪܲܢܵܐ: ܘܩܘܼܪܝܲܬ̣ ܣܸܦܪܵܐ ܕܗ̤ܝ ܗ̄ܝ̣ ܕܵܒ̣ܝܼܪ.
50 ܘܲܓ̣ܢܵܒ̣: ܘܐܸܫܬ̇ܡܘܿ: ܘܥܸܠܝܼܢ.
51 ܘܥܸܫܝܵܢ: ܘܚܲܠܵܢ: ܘܓܲܠܘܿ ܩܘܼܪ̈ܝܵܐ ܚܕܲܥܸܣܪܹ̈ܐ ܘܐܲܓ̣ܘܼܪ̈ܣܲܝܗܹܝܢ.
52 ܘܪܲܝܼܒ̣: ܘܪܘܼܡܵܐ: ܘܲܥܫܵܢ.
53 ܘܝܲܠܘܿܡ: ܘܒܹܝܬ̣ ܦܲܬ̇ܘܿܚ: ܘܐܵܦܵܩ.
54 ܘܚܸܡܛܵܐ: ܘܩܘܼܪܝܲܬ̣ ܐܲܪܒܲܥ: ܕܗ̤ܝ ܗ̄ܝ̣ ܚܸܒ̣ܪܘܿܢ: ܘܨܸܒ̣ܥܘܿܢ. ܩܘܼܪ̈ܝܵܐ ܬܫܲܥ: ܘܐܵܓ̣ܘܼܪ̈ܣܲܝܗܹܝܢ.
55 ܘܡܵܥܘܿܢ: ܘܟܲܪܡܸܠ: ܘܙܝܼܒ̣: ܘܐܲܛܢܵܐ.
56 ܘܐܝܼܙܲܪܥܹܝܠ: ܘܲܢܩܸܡܥܲܡ: ܘܙܲܠܘܼܚ.
57 ܘܩܝܼܡ: ܘܓ̣ܒ̣ܥܵܐ: ܘܬܲܩܢܵܐ ܩܘܼܪ̈ܝܵܐ ܥܣܲܪ: ܘܐܵܓ̣ܘܿܪ̈ܣܲܝܗܹܝܢ.
58 ܘܚܲܠܘܿܠ: ܘܒܹܝܬ̣ ܨܲܕܲܘܿ: ܘܓ̣ܵܬ̣ܵܪ.
59 ܘܲܡܥܲܪܲܬ̣: ܘܒܹܝܬ̣ ܥܢܵܬ̣: ܘܠܲܬ̣ܩܵܢ. ܩܘܼܪ̈ܝܵܐ ܫܸܬ̣ ܘܐܵܓ̣ܘܪ̈ܣܲܝܗܹܝܢ.
60 ܘܪܲܒܲܬ̣: ܘܩܘܼܪܝܲܬ̣ ܒܥܸܠ ܕܗ̤ܝ ܗ̄ܝ̣ ܩܘܼܪܝܲܬ̣ ܢܲܥܪܝܼܢ. ܩܘܼܪܝܵܐ ܬܲܪܬܹ̇ܝܢ: ܘܐܵܓ̣ܘܼܪ̈ܣܲܝܗܹܝܢ ܒܡܲܕ݂ܒ̇ܪܵܐ.
61 ܘܒܹܝܬ̣ ܥܵܪܵܒ̣ܵܐ: ܘܡܸܕ̇ܝܼܢ: ܘܣܵܟ݂ܣܵܐ.
62 ܘܝܲܥܫܵܢ: ܘܥܝܼܪܡ̱ܚܸܠ: ܘܥܹܝܢ ܓܵܕ݂. ܩܘܼܪ̈ܝܵܐ ܫܸܬ̣ ܘܐܵܓ̣ܘܼܪ̈ܣܲܝܗܹܝܢ.
63 ܘܲܠܝܵܒ̣ܘܿܣܵܝܹ̈ܐ ܕܥܵܡ̇ܪܝܼܢ ܒܐܘܿܪܸܫܠܸܡ: ܠܵܐ ܚܪܲܒ̣ܘ ܒ̈ܢܲܝ ܝܼܗܘܼܕ݂ܵܐ: ܘܝܼܬܸܒ̣ܘ ܝܵܒ̣ܘܿܣܵܝܹ̈ܐ ܥܲܡ ܒ̈ܢܲܝ ܝܼܗܘܼܕ݂ܵܐ ܒܐܘܿܪܸܫܠܸܡ ܥܕܲܡܵܐ ܠܝܵܘܡܵܢܵܐ.
1 ܘܢܸܦܩܲܬ̣ ܡܢܵܬ̣ܵܐ ܕܲܒ̣̈ܢܲܝ ܝܵܘܣܸܦ: ܡ̣ܢ ܝܘܿܪܕ̇ܢܵܢ ܕܐܝܼܪܝܼܚܘܿ: ܠܡܲـ̈ـܝܵܐ ܕܐܝܼܪܝܼܚܘܿ: ܡ̣ܢ ܡܲܕ݂ܢܵܚܲܝ̈ ܡܲܕ݂ܒ̇ܪܵܐ ܕܣܵܠܹܩ ܡ̣ܢ ܐܝܼܪܝܼܚܘܿ: ܘܲܥܕܲܡܵܐ ܠܛܘܼܪܵܐ ܕܣܵܠܹܩ ܠܒܹܝܬ̣ ܐܹܝܠ.
2 ܘܢܵܦܹܩ ܡ̣ܢ ܒܹܝܬ̣ ܐܹܝܠ ܠܠܘܿܙ: ܘܥܵܒܲܪ ܠܲܬ̣ܚܘܼܡܵܐ ܕܥܸܒ̣ܪܵܐ: ܘܲܕ݂ܥܸܛܪܘܼܬ̣.
3 ܘܢܵܚܹ̇ܬ̣ ܠܡܲܥ̱ܪܒ̣ܵܐ ܠܲܬ̣ܚܘܼܡܵܐ ܕܦܲܠܛܵܐ: ܥܕܲܡܵܐ ܠܲܬ̣ܚܘܼܡܵܐ ܕܒܹܝܬ̣ ܚܵܘܪܵܢ ܬܲܚܬܵܝܬܵܐ: ܘܲܥܕܲܡܵܐ ܠܓ̣ܵܕ݂ܵܪ: ܘܲܗܘ̤ܵܘ ܡܲܦܩܵܢܵܘ̈ܗܝ ܠܡܲܥ̱ܪܒ̣ܵܐ.
4 ܘܝܸܪܬ̣ܘܼ ܒ̈ܢܲܝ ܝܵܘܣܸܦ: ܡܢܲܫܹܐ: ܘܐܲܦܪܹܝܡ.
5 ܘܲܗܘ̤ܵܐ ܬܚܘܼܡܵܐ ܕܲܒ̣̈ܢܲܝ ܐܲܦܪܹܝܡ ܠܫܲܪ̈ܒ̣ܵܬܲܗܘܿܢ: ܬܚܘܼܡܵܐ ܕܝܵܪܬ̇ܘܼܬ̣ܗܘܿܢ ܥܸܛܪܘܼܬ̣: ܘܐܸܕܲܪ: ܥܕܲܡܵܐ ܠܒܹܝܬ̣ ܚܵܘܪܵܢ ܥܸܠܵܝܬܵܐ.
6 ܘܢܵܦܹ̇ܩ ܬܚܘܼܡܵܐ ܠܡܲܥܪ̱ܒ̣ܵܐ ܠܡܸܟܡܲܬ̣ ܡ̣ܢ ܓܲܪܒ̇ܝܵܐ. ܘܚܵܕܲܪ ܬܚܘܼܡܵܐ ܡ̣ܢ ܡܲܕ݂ܢ̱ܚܵܐ ܕܲܬ̣ܚܹܝܬ̣ ܫܝܼܠܘܿ: ܘܥܵܒܲܪ ܡ̣ܢ ܡܲܕ݂ܢ̱ܚܵܐ ܕܝܲܠܘܿܚ.
7 ܘܢܵܚܹܬ̣ ܡ̣ܢ ܝܲܠܘܿܚ ܠܥܸܛܪܘܼܬ̣: ܘܲܠܝܲܓ̣ܪܲܬ̣: ܘܲܠܦܵܓ̣ܵܪ: ܘܠܐܝܼܪܝܼܚܘ ܘܢܵܦܹܩ ܡ̣ܢ ܬܲܦܘܿܚ ܠܝܘܿܪܕ̇ܢܵܢ.
8 ܘܐܵܙܹ̇ܠ ܠܲܬ̣ܚܘܼܡܵܐ ܡܲܥܪ̱ܒ̣ܵܝܵܐ ܕܢܲܚܠܵܐ ܕܩܵܒ̣ܵܐ: ܘܗܵܘܹ̇ܝܢ ܡܲܦܩܵܢܵܘ̈ܗܝ ܠܡܲܥ̱ܪܒ̣ܵܐ. ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܐܲܦܪܹܝܡ: ܠܫܲܪ̈ܒ̣ܵܬ̣ܗܘܿܢ.
9 ܩܘܼܪ̈ܝܵܐ ܕܲܦܪ̈ܝܼܫܵܢ ܗ̄ܘܲܝ̈ ܠܲܒ̣̈ܢܲܝ ܐܲܦܪܹܝܡ: ܒܓ̣ܵܘ ܝܵܪܬ̇ܘܼܬ̣ܵܐ ܕܲܒ̣̈ܢܲܝ ܡܢܲܫܹܐ: ܟܠܗܹܝܢ ܩܘܼܪ̈ܝܵܐ ܘܐܲܓ̣ܘܼܪ̈ܣܲܝܗܹܝܢ.
10 ܘܠܵܐ ܚܪܲܒ̣ܘ ܠܲܟ݂ܢܲܥܢܵܝܹ̈ܐ ܕܝܵܬ̣ܒ̇ܝܼܢ ܒܓ̣ܵܕ݂ܵܪ. ܘܝܼܬܸܒ̣ܘ ܟܢܲܥܢܵܝܹ̈ܐ ܒܓ̣ܵܘ ܒܹܝܬ̣ ܐܲܦܪܹܝܡ ܥܕܲܡܵܐ ܠܝܵܘܡܵܢܵܐ. ܘܐܸܬ̣ܟ̇ܒܸܫܘ ܒܡܲܕܲܐܬ̣ܵܐ.
1 ܘܲܗܘ̤ܵܬ̣ ܓܸܠܥܵܕ݂ ܡܢܵܬܵܐ ܕܫܲܒ̣ܛܵܐ ܕܲܡܢܲܫܹܐ: ܡܸܛܠ ܕܗ̤ܘܝܘܼ ܗ̄ܘ̣ܵܐ ܒܘܼܟ݂ܪܹܗ ܕܝܵܘܣܸܦ: ܘܲܠܡܵܟ݂ܝܼܪ ܒܘܼܟ݂ܪܹܗ ܕܲܡܢܲܫܹܐ: ܐܲܒ̣ܘܼܗܝ ܕܓܸܠܥܵܕ݂: ܡܸܛܠ ܕܗ̤ܘ ܗܘ̤ܵܐ ܒܘܼܟ݂ܪܵܐ ܓܲܒ̣ܪܵܐ ܩܪܲܒ̣ܬ̣ܵܢܵܐ: ܘܲܗܘ̤ܵܬ̣ ܕܝܼܠܹܗ ܓܸܠܥܵܕ݂ ܘܡܲܬ̣ܢܝܼܢ.
2 ܘܲܗܘ̤ܵܬ̣ ܕܲܒ̣̈ܢܲܝ ܡܢܲܫܹܐ ܕܐܸܫܬ̇ܚܲܪܘ ܠܫܲܪ̈ܒ̣ܵܬ̣ܗܘܿܢ: ܘܠܲܒ̣̈ܢܲܝ ܐܲܒ̣ܝܼܥܵܙܲܪ: ܘܠܲܒ̣̈ܢܲܝ ܚܵܠܵܩ: ܘܠܲܒ̣̈ܢܲܝ ܢܸܫܪܵܐܹܝܠ: ܘܠܲܒ̣̈ܢܲܝ̈ ܫܘܿܦܵܡ: ܘܠܲܒ̣̈ܢܲܝ ܚܵܦܵܪ: ܘܠܲܒ̣̈ܢܲܝ ܫܡܕ݂ܵܥ ܗܵܠܹܝܢ ܒܢܵܘ̈ܗܝ ܕܲܡܢܲܫܹܐ ܒܲܪ ܝܵܘܣܸܦ ܕܸܟ݂ܪܹ̈ܐ ܠܫܲܪ̈ܒ݂ܵܬ̣ܗܘܿܢ.
3 ܘܠܲܨܠܸܦܚܲܕ݂ ܒܲܪ ܚܵܦܵܪ: ܒܲܪ ܓܸܠܥܵܕ݂: ܒܲܪ ܡܵܟ݂ܝܼܪ: ܒܲܪ ܡܢܲܫܹܐ: ܠܵܐ ܗܘ̤ܵܘ ܠܹܗ ܒ̈ܢܲܝܵܐ: ܐܸܠܵܐ ܒ̈ܢܵܬ̣ܵܐ ܘܗܵܠܹܝܢ ܫܡܵܗܹ̈ܐ ܕܲܒ̣̈ܢܵܬܹܗ: ܡܲܚܠܵܐ: ܘܝܲܥܵܐ: ܘܚܸܓ̣ܠܵܐ: ܘܡܸܟܵܐ: ܘܬܲܪܨܵܐ.
4 ܘܲܩܪܸܒ̣ ܩܕ݂ܵܡ ܐܹܠܝܼܥܵܙܲܪ ܟܵܗܢܵܐ: ܘܲܩܕ݂ܵܡ ܝܼܫܘܿܥ ܒܲܪܢܘܿܢ: ܘܲܩܕ݂ܵܡ ܪܵܘ̱ܪ̈ܒ̣ܵܢܹܐ ܕܝܼܣܪܵܝܹܠ: ܘܐܵܡܪ̈ܵܢ: ܡܵܪܝܵܐ ܦܲܩܸܕ݂ ܠܡܘܼܫܹܐ ܕܢܸܬܸ̇ܠ ܠܲܢ ܝܵܪܬ̇ܘܼܬ̣ܵܐ ܒܲܝܢܵܬ̣ ܐܲܚܲܝ̈ܢ: ܘܝܲܗ̄ܒ̣ ܠܲܢ ܥܲܠ ܡܸܠܲܬ̣ ܦܘܼܡܹܗ ܕܡܵܪܝܵܐ: ܒܲܝܢܵܬ̣ ܐܲܚܹ̈ܐ ܕܐܲܒ̣ܘܼܢ: ܘܝܲܗ̄ܒ̣ ܠܗܹܝܢ ܝܼܫܘܿܥ ܝܵܪܬ̇ܘܼܬ̣ܵܐ ܘܦܵܠܓܘܼܬ̣ܵܐ ܒܲܝܢܵܬ̣ ܐܲܚܹ̈ܐ ܕܐܲܒ̣ܘܼܗܹܝܢ.
5 ܘܲܢܦܲܠܘ ܚܲܒ̣ܠܵܘ̈ܗܝ ܕܲܡܢܲܫܹܐ ܥܸܣܪܵܐ: ܠܒܲܪ ܡ̣ܢ ܐܲܪܥܵܐ ܕܓܸܠܥܵܕ݂: ܘܲܕ݂ܡܲܬ̣ܢܹܝܢ ܕܐܝܼܬ̣ ܒܥܸܒ̣ܪܵܐ ܕܝܘܿܪܕ̇ܢܵܢ.
6 ܡܸܛܠ ܕܲܒ̣̈ܢܵܬܹܗ ܕܲܡܢܲܫܹܐ ܝܼܪܬ̣ ܝܵܪܬ̇ܘܼܬ̣ܵܐ ܥܲܡ ܐܲܚܲܝ̈ܗܹܝܢ: ܘܐܲܪܥܵܐ ܕܓܸܠܥܵܕ݂ ܗܘ̤ܵܬ̣ ܠܲܒ̣ܢܵܘ̈ܗܝ ܕܲܡܢܲܫܹܐ ܕܐܸܫܬ̇ܚܲܪܘ.
7 ܘܲܗܘ̤ܵܐ ܬܚܘܼܡܵܐ ܕܲܒ̣̈ܢܲܝ ܡܢܲܫܹܐ: ܡ̣ܢ ܬܚܘܼܡܵܐ ܕܡܲܟ݂ܡܲܬ̣ ܕܐܝܼܬ̣ ܥܲܠ ܝܲܡܝܼܢܵܐ ܕܝܵܬ̣ܒܲܝ̈ ܥܹܝܢ ܬܲܦܘܿܚ.
8 ܘܲܗܘ̤ܵܬ̣ ܐܲܪܥ̱ܗܘܿܢ ܒܬܲܦܘܿܚ ܘܲܦܬܲܚ. ܘܲܗܘ̤ܵܐ ܬܚܘܼܡܵܐ ܠܲܒ̣̈ܢܲܝ ܡܢܲܫܹܐ ܒܲܪ ܝܵܘܣܸܦ: ܘܲܠܒܹܝܬ̣ ܒ̈ܢܲܝ ܐܲܦܪܹܝܡ.
9 ܘܢܵܚܹ̇ܬ̣ ܬܚܘܼܡܗܘܿܢ ܠܢܲܚܠܵܐ ܕܝܲܡܵܐ ܡ̣ܢ ܬܲܝ̱ܡܢܵܐ ܕܢܲܚܠܵܐ ܕܩܘܼܪ̈ܝܵܐ ܗܵܠܹܝܢ ܕܐܲܦܪܹܝܡ ܠܒܹܝܬ̣ ܩܘܼܪ̈ܝܵܐ ܕܲܡܢܲܫܹܐ. ܘܲܬ̣ܚܘܼܡܵܐ ܕܲܡܢܲܫܹܐ ܡ̣ܢ ܓܲܪܒ̇ܝܵܐ ܕܢܲܚܠܵܐ. ܘܲܗܘ̤ܵܘ ܡܲܦܩܵܢܵܘ̈ܗܝ ܠܡܲܥ̱ܪܒ̣ܵܐ.
10 ܘܬܲܝ̱ܡܢܵܐ ܠܐܲܦܪܹܝܡ: ܘܓܲܪܒ̇ܝܵܐ ܠܲܡܢܲܫܹܐ: ܘܝܲܡܵܐ ܬܚܘܼܡܗܘܿܢ ܘܒ̣ܵܐܫܹܝܪ ܦܵܓ̣ܥܝܼܢ ܡ̣ܢ ܓܲܪܒ̇ܝܵܐ: ܘܒ̣ܐܝܼܣܵܟ݂ܵܪ ܡ̣ܢ ܡܲܕ݂ܢ̱ܚܵܐ.
11 ܘܲܗܘ̤ܵܬ̣ ܕܲܡܢܲܫܹܐ ܠܩܘܼܒ̣ܠܹܗ ܕܐܝܼܣܵܟ݂ܵܪ: ܒܹܝܬ̣ ܝܵܫܵܢ ܘܟܲܦܪ̈ܘܿܢܹܝܗ̇: ܘܲܢܒܸܠܥܵܡ ܘܟܲܦܪ̈ܘܿܢܹܝܗ̇: ܘܥܝܼܢܕ̇ܘܿܪ ܘܟܲܦܪ̈ܘܿܢܹܝܗ̇: ܘܬܲܥܢܵܟ݂ ܘܟܲܦܪ̈ܘܿܢܹܝܗ̇: ܘܡܲܓܕ̇ܘܿ ܘܟܲܦܪ̈ܘܿܢܹܝܗ̇: ܬܠܵܬ̣ ܙܵܘ̈ܝܵܢ.
12 ܘܠܵܐ ܚܪܲܒ̣ܘ ܒ̈ܢܲܝ ܝܼܣܪܵܝܹܠ ܠܩܘܼܪ̈ܝܵܐ ܗܵܠܹܝܢ: ܡܸܛܠ ܕܐܸܬ̇ܛܦܝܼܣܘ ܟܢܲܥܢܵܝܹ̈ܐ ܠܡܸܬܲܒ̣ ܒܩܘܼܪ̈ܝܵܐ ܗܵܠܹܝܢ.
13 ܘܟܲܕ݂ ܥܫܸܢܘ ܒ̈ܢܲܝ ܝܼܣܪܵܝܹܠ: ܟܒܲܫܘ ܐܸܢܘܿܢ ܠܲܟ݂ܢܲܥܢܵܝܹ̈ܐ ܒܡܲܕܲܐܬ̣ܵܐ: ܘܡܸܚܪܲܒ̣ ܠܵܐ ܚܪܲܒ̣ܘ ܐܸܢܘܿܢ.
14 ܘܐܸܡܲܪ ܒ̈ܢܲܝ ܝܵܘܣܸܦ ܠܝܼܫܘܿܥ: ܠܡܵܢܵܐ ܝܲܗ̄ܒ̣ܬ̇ ܠܲܢ ܝܵܪܬ̇ܘܼܬ̣ܵܐ ܡܢܵܬ̣ܵܐ ܚܕ݂ܵܐ: ܘܚܲܒ̣ܠܵܐ ܚܲܕ݂: ܘܲܚܢܲܢ ܥܲܡܵܐ ܣܲܓ̇ܝܼܵܐܐ ܥܕܲܡܵܐ ܗ̄ܘ̣ ܠܗܵܪܟܵܐ ܒܲܪܟܲܢ ܡܵܪܝܵܐ.
15 ܐܵܡܲܪ ܠܗܘܿܢ ܝܼܫܘܿܥ: ܐܸܢ ܥܲܡܵܐ ܐܲܢ̄ܬ̇ܘܿܢ ܣܲܓ̇ܝܼܵܐܐ: ܣܲܩܘ ܠܟ݂ܘܿܢ ܠܓܲܒܵܐ ܕܛܘܼܪܵܐ: ܘܲܓ̣ܒ̣ܵܘ ܠܟ݂ܘܿܢ ܬܲܡܵܢ ܒܐܲܪܥܵܐ ܕܦܲܪ̈ܙܵܝܹܐ ܘܲܕ݂ܓܲܢ̄ܒܵܪܹ̈ܐ: ܡܸܛܠ ܕܐܲܠܝܼܨ ܗ̄ܘ̣ ܠܟ݂ܘܿܢ ܛܘܼܪܵܐ ܕܐܲܦܪܹܝܡ.
16 ܘܐܸܡܲܪܘ ܒ̈ܢܲܝ ܝܵܘܣܸܦ: ܠܵܐ ܣܵܦܹ̇ܩ ܠܲܢ ܛܘܼܪܵܐ ܘܲܡܕ݂ܝܼ̈ܢܵܬ̣ܵܐ ܕܦܲܪ̈ܙܵܝܹܐ: ܡܸܛܠ ܕܲܟ݂ܢܲܥܢܵܝܹ̈ܐ ܝܵܬ̣ܒ̇ܝܼܢ ܒܐܲܪܥܵܐ ܕܥܘܼܡܩܵܐ: ܘܒܹܝܬ̣ ܝܵܫܵܢ ܘܲܒ̣ܟܲܦܪ̈ܘܿܢܹܝܗ̇: ܘܲܒ̣ܥܘܼܡܩܵܐ ܕܐܝܼܙܲܪܥܹܝܠ.
17 ܘܐܸܡܲܪ ܝܼܫܘܿܥ ܠܲܕ݂ܒܹܝܬ̣ ܝܵܘܣܸܦ ܠܲܒ̣̈ܢܲܝ ܐܲܦܪܹܝܡ ܘܲܡܢܲܫܹܐ: ܥܲܡܵܐ ܣܲܓ̇ܝܼܵܐܐ ܐܲܢ̄ܬ̇ܘܿܢ: ܘܚܲܝܠܵܐ ܪܲܒܵܐ ܠܟ݂ܘܿܢ. ܐܸܢ ܠܵܐ ܣܵܦܩܵܐ ܠܟ݂ܘܿܢ ܡܢܵܬ̣ܵܐ ܚܕ݂ܵܐ.
18 ܓܒ̣ܵܘ ܠܟ݂ܘܿܢ ܛܘܼܪܵܐ: ܘܣܵܦܹ̇ܩ ܠܟ݂ܘܿܢ. ܘܓܲܒܵܘ̈ܗܝ ܕܛܘܼܪܵܐ ܢܸܗܘܘܿܢ ܠܟ݂ܘܿܢ ܡܲܦܩܵܢܵܘ̈ܗܝ. ܘܲܚܪܘܿܒ̣ܘ ܠܲܟ݂ܢܲܥܢܵܝܹ̈ܐ ܘܲܠܦܲܪ̈ܙܵܝܹܐ: ܡܸܛܠ ܕܡܲܪ̈ܟ̇ܒ̣ܵܬ̣ܵܐ ܪܵܘ̱ܪ̈ܒ̣ܵܬ̣ܵܐ ܕܥܲܫܝܼ̈ܢܵܢ ܕܦܲܪܙܠܵܐ ܐܝܼܬ̣ ܠܗܘܿܢ ܘܥܲܫܝܼܢܝܼܢ ܐܸܢܘܿܢ.
1 ܘܐܸܬ̣ܟܲܢܲܫܘ ܟܠܵܗ̇ ܟܢܘܼܫܬܵܐ ܕܲܒ̣̈ܢܲܝ ܝܼܣܪܵܝܹܠ ܠܫܝܼܠܘܿ: ܘܐܲܫܪܝܼܘ ܬܲܡܵܢ ܡܲܫܟܲܢ ܙܲܒ̣ܢܵܐ. ܘܐܲܪܥܵܐ ܐܸܬ̣ܟܲܒ̣ܫܲܬ̤ ܩܕ݂ܵܡܲܝܗܘܿܢ.
2 ܘܐܸܫܬ̇ܚܲܪܘ ܡ̣ܢ ܒ̈ܢܲܝ ܝܼܣܪܵܝܹܠ ܕܠܐ ܦܲܠܓܘ ܝܵܪܬ̇ܘܼܬ̣ܵܐ ܫܲܒ̣ܛܹ̈ܐ ܫܲܒ̣ܥܵܐ.
3 ܘܐܸܡܲܪ ܝܼܫܘܿܥ ܠܲܒ̣̈ܢܲܝ ܝܼܣܪܵܝܹܠ: ܥܕܲܡܵܐ ܠܐܸܡܲܬ̣ܝ ܡܲܬ̣ܪܲܦܹܝܢ ܐ̄ܢܬ̇ܘܿܢ ܠܡܸܥܲܠ ܠܡܹܐܪܲܬ̣ ܐܲܪܥܵܐ: ܕܝܲܗ̄ܒ̣ ܠܟ݂ܘܿܢ ܡܵܪܝܵܐ ܐܲܠܵܗܵܐ ܕܐܲܒ̣ܵܗܲܝ̈ܟ̇ܘܿܢ.
4 ܓܒ̣ܵܘ ܠܟ݂ܘܿܢ ܬܠܵܬ̣ܵܐ ܬܠܵܬ̣ܵܐ ܓܲܒ̣ܪ̈ܝܼܢ ܡ̣ܢ ܫܲܒ̣ܛܵܐ: ܘܐܹܫܲܕܲܪ ܐܸܢܘܿܢ: ܘܲܢܩܘܼܡܘܼܢ ܘܲܢܗܲܠܟ݂ܘܼܢ ܒܐܲܪܥܵܐ: ܘܢܸܟ݂ܬ̇ܒ̣ܘܼܢܵܗ̇ ܠܦܘܼܬ̣ ܝܵܪܬ̇ܘܼܬ̣ܗܘܿܢ: ܘܢܹܐܬ̣ܘܼܢ ܠܘܵܬ̣ܝ.
5 ܘܲܢܦܲܠܓܘܼܢܵܗ̇ ܠܐܲܪܥܵܐ ܠܲܫܒܲܥ ܦܵܠ̈ܓܘܵܢ. ܘܲܝܗܘܼܕ݂ܵܐ ܢܩܘܼܡ ܥܲܠ ܬܚܘܼܡܹܗ ܡ̣ܢ ܬܲܝ̱ܡܢܵܐ: ܘܲܕ݂ܒܹܝܬ̣ ܝܵܘܣܸܦ ܢܩܘܼܡܘܼܢ ܥܲܠ ܬܚܘܼܡܗܘܿܢ ܡ̣ܢ ܓܲܪܒ̇ܝܵܐ.
6 ܘܐܲܢ̄ܬ̇ܘܿܢ ܟܘܼܬ̣ܒ̇ܘܼܗ̇ ܠܐܲܪܥܵܐ ܠܲܫܒܲܥ ܦܵܠ̈ܓܘܵܢ: ܘܐܲܝܬܵܐܘܼܗ̇ ܠܘܵܬ̣ ܠܗܵܪܟܵܐ: ܘܐܹܚܵܘܹܝܟ݂ܘܿܢ ܡܢܵܬ̣ܵܐ ܕܓܲܒ̣ܝܵܐ ܩܕ݂ܵܡ ܡܵܪܝܵܐ ܐܲܠܵܗܲܢ.
7 ܡܸܛܠ ܕܠܲܝܬ̇ ܦܵܠܓܘܼܬ̣ܵܐ ܠܠܹܘܵܝܹ̈ܐ ܒܲܝܢܵܬ̣ܟ݂ܘܿܢ: ܡܸܛܠ ܕܟ݂ܵܗܢܘܼܬܹܗ ܗ̄ܝ̣ ܕܡܵܪܝܵܐ ܝܵܪܬ̇ܘܼܬ̣ܗܘܿܢ. ܘܓ̣ܵܕ݂. ܘܪܘܼܒܹܝܠ: ܘܦܲܠܓܘܼܬ̣ ܫܲܒ̣ܛܵܐ ܕܲܡܢܲܫܹܐ ܩܲܒܸ̇ܠܘ ܝܵܪܬ̇ܘܼܬ̣ܗܘܿܢ ܒܥܸܒ̣ܪܵܐ ܕܝܘܿܪܕ̇ܢܵܢ ܡ̣ܢ ܡܲܕ݂ܢܚܵܐ: ܕܝܲܗ̄ܒ̣ ܠܗܘܿܢ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ.
8 ܘܩܵܡ̣ܘ ܓܲܒ̣ܪܹ̈ܐ ܘܐܸܙܲܠܘ. ܘܦܲܩܸܕ݂ ܝܼܫܘܿܥ ܠܗܵܢܘܿܢ ܕܐܸܙܲܠ̣ܘ ܠܡܸܟ݂ܬ̇ܒ̣ܵܗ̇ ܠܐܲܪܥܵܐ: ܘܐܸܡܲܪ ܠܗܘܿܢ: ܙܸܠܘ ܗܲܠܸܟ݂ܘ ܒܐܲܪܥܵܐ ܘܟ݂ܘܼܬ̣ܒ̇ܘܼܗ̇: ܘܬ̣ܵܘ ܠܘܵܬ̣ܝ ܠܗܵܪܟܵܐ: ܘܐܲܪܡܸܐ ܠܟ݂ܘܿܢ ܡ̈ܢܵܘܵܬ̣ܵܐ ܩܕ݂ܵܡ ܡܵܪܝܵܐ ܒܫܝܼܠܘܿ.
9 ܘܐܸܙܲܠܘ ܓܲܒ̣ܪܹ̈ܐ ܘܲܥܒܲܪܘ ܒܐܲܪܥܵܐ: ܘܲܟ݂ܬܲܒ̣ܘ ܐܸܢܹܝܢ ܠܩܘܼܪ̈ܝܵܐ ܫܒܲܥ ܦܵܠ̈ܓܘܵܢ ܥܲܠ ܡܓܲܠܬ̣ܵܐ: ܘܐܸܬ̣ܵܘ ܠܘܵܬ̣ ܝܼܫܘܿܥ ܠܫܝܼܠܘܿ ܡܕ݂ܝܼܢ̄ܬܵܐ.
10 ܘܐܲܪܡܝܼ ܠܗܘܿܢ ܦܲܨܹ̈ܐ ܒܫܝܼܠܘܿ ܩܕ݂ܵܡ ܡܵܪܝܵܐ: ܘܦܲܠܓܵܗ̇ ܬܲܡܵܢ ܝܼܫܘܿܥ ܠܐܲܪܥܵܐ ܠܲܒ̣̈ܢܲܝ ܝܼܣܪܵܝܹܠ ܒܦܵܠ̈ܓܘܵܬ̣ܵܐ.
11 ܘܣܸܠܩܲܬ̤ ܦܸܨܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܒܸܢܝܵܡܹܝܢ ܠܫܲܪ̈ܒ̣ܵܬ̣ܗܘܿܢ: ܘܲܢܦܲܩ ܬܚܘܼܡܵܐ ܕܝܵܪܬ̇ܘܼܬ̣ܗܘܿܢ: ܠܒܹܝܬ̣ ܒ̈ܢܲܝ ܝܼܗܘܼܕ݂ܵܐ: ܘܲܠܒܹܝܬ̣ ܒ̈ܢܲܝ ܝܵܘܣܸܦ.
12 ܘܲܗܘ̤ܵܐ ܬܚܘܼܡܗܘܿܢ ܠܣܸܛܪܵܐ ܕܓܲܪܒ̇ܝܵܐ ܡ̣ܢ ܝܘܿܪܕ̇ܢܵܢ: ܘܣܵܠܹܩ ܬܚܘܼܡܵܐ ܠܣܸܛܪܵܐ ܕܐܝܼܪܝܼܚܘܿ ܡ̣ܢ ܓܲܪܒ̇ܝܵܐ: ܘܣܵܠܹܩ ܒܛܘܼܪܵܐ ܠܡܲܥܪ̱ܒ̣ܵܐ ܘܗܵܘܹ̇ܝܢ ܡܲܦܩܵܢܵܘ̈ܗܝ ܠܡܲܕ݂ܒ̇ܪܵܐ ܕܒܹܝܬ̣ ܐܵܘܵܢ.
13 ܘܥܵܒܲܪ ܡ̣ܢ ܬܲܡܵܢ ܬܚܘܼܡܵܐ ܠܠܘܿܙ: ܥܲܠ ܣܸܛܪܵܐ ܕܠܘܙ ܡ̣ܢ ܬܲܝ̱ܡܢܵܐ: ܗ̤ܝ ܗ̄ܝ̣ ܒܹܝܬ̣ ܐܹܝܠ. ܘܢܵܚܹ̇ܬ̣ ܬܚܘܼܡܵܐ ܠܥܸܛܪܘܼܬ̣ ܐܸܕܲܪ: ܥܲܠ ܛܘܼܪܵܐ ܕܡ̣ܢ ܬܲܝ̱ܡܢܵܐ ܕܒܹܝܬ̣ ܚܵܘܪܵܢ ܬܲܚܬܵܝܬܵܐ.
14 ܘܚܵܐܲܪ ܬܚܘܼܡܵܐ ܠܣܸܛܪܵܐ ܕܝܲܡܵܐ ܡ̣ܢ ܬܲܝ̱ܡܢܵܐ: ܡ̣ܢ ܛܘܼܪܵܐ ܕܠܲܐܦܲܝ̈ ܒܹܝܬ̣ ܚܵܘܪܲܢ ܕܲܒ̣ܬܲܝ̱ܡܢܵܐ: ܘܗܵܘܹ̇ܝܢ ܡܲܦܩܵܢܵܘ̈ܗܝ ܥܲܠ ܩܘܼܪܝܲܬ̣ ܒܥܸܠ: ܕܗ̤ܝ ܗ̄ܝ̣ ܩܘܼܪܝܲܬ̣ ܢܲܥܪܝܼܢ ܡܕ݂ܝܼܢ̄ܬܵܐ ܕܲܒ̣̈ܢܲܝ ܝܼܗܘܼܕ݂ܵܐ. ܗܵܢܵܐ ܗ̄ܘ̣ ܣܸܛܪܵܐ ܕܝܲܡܵܐ.
15 ܘܣܸܛܪܵܐ ܕܬܲܝ̱ܡܢܵܐ ܡ̣ܢ ܣܵܘܦܵܐ ܕܩܘܼܪܝܲܬ̣ ܢܲܥܪܝܼܢ. ܘܢܵܦܹܩ ܬܚܘܼܡܵܐ ܠܝܲܡܵܐ: ܘܢܵܦܹ̇ܩ ܠܡܲܒ̇ܘܼܥܵܐ ܕܡܲـ̈ـܝܵܐ ܕܢܲܦ̮ܬܵܠܝܼ.
16 ܘܢܵܚܹ̇ܬ̣ ܬܚܘܼܡܵܐ ܥܲܠ ܣܵܘܦܹܗ ܕܛܘܼܪܵܐ ܠܐܲܦܲܝ̈ ܢܲܚܠܵܐ ܕܒܲܪ ܗܵܢܘܿܡ: ܕܐܝܼܬ̣ ܒܥܘܼܡܩܵܐ ܕܓܲܒܵܢ̄ܪܹ̈ܐ ܕܡ̣ܢ ܓܲܪܒ̇ܝܵܐ. ܘܢܵܚܹܬ̣ ܬܚܘܼܡܵܐ ܕܒܲܪ ܗܵܢܘܿܡ: ܥܲܠ ܣܸܛܪܵܐ ܕܝܵܒ̣̈ܘܿܣܵܝܹܐ ܡ̣ܢ ܬܲܝ̱ܡܢܵܐ: ܘܢܵܚܹ̇ܬ̣ ܠܥܹܝܢ ܕܘܼܓܹܠ.
17 ܘܚܵܐܲܪ ܡ̣ܢ ܓܲܪܒ̇ܝܵܐ: ܘܢܵܦܹܩ ܠܡܲܒ̇ܘܼܥܵܐ ܕܲܫܡܸܫ: ܘܢܵܦܹ̇ܩ ܥܲܠ ܓܠܝܼܠܵܐ ܕܠܘܼܩܒܲܠ ܡܲܣܩܵܢܵܐ ܕܪܲܡܝܼܢ: ܘܢܵܚܹ̇ܬ̣ ܠܠܵܒ̣ܵܢ: ܘܲܠܒ̣ܵܗܵܢ ܕܲܒ̣ܪܹܗ ܕܪܘܼܒܹܝܠ.
18 ܘܥܵܒܲܪ ܥܲܠ ܣܸܛܪܵܐ ܕܠܘܼܩܒܲܠ ܦܩܲܥܬ̣ܵܐ ܡ̣ܢ ܓܲܪܒ̇ܝܵܐ: ܘܢܵܚܹ̇ܬ̣ ܠܲܦܩܲܥܬ̣ܵܐ.
19 ܘܥܵܒܲܪ ܬܚܘܼܡܵܐ ܥܲܠ ܣܸܛܪܵܐ ܕܒܹܝܬ̣ ܚܲܓܠܵܐ ܡ̣ܢ ܓܲܪܒ̇ܝܵܐ. ܘܗܵܘܹ̇ܝܢ ܡܲܦܩܵܢܵܘ̈ܗܝ ܕܲܬ̣ܚܘܼܡܵܐ ܥܲܠ ܠܸܫܵܢܵܐ ܕܝܲܡܵܐ ܕܡܸܠܚܵܐ ܡ̣ܢ ܓܲܪܒ̇ܝܵܐ: ܘܥܲܠ ܣܦܵܪ̈ܵܘܗܝ ܕܝܘܿܪܕ̇ܢܵܢ ܡ̣ܢ ܬܲܝ̱ܡܢܵܐ. ܗܵܢܵܘ ܬܚܘܼܡܵܐ ܕܬܲܝ̱ܡܢܵܐ ܘܲܕ݂ܝܘܿܪܕ̇ܢܵܢ.
20 ܒܲܬ̣ܚܘܼܡܵܘ̈ܗܝ ܠܣܸܛܪܵܐ ܕܡܲܕ݂ܢ̱ܚܵܐ: ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܫܲܒ̣ܛܵܐ ܕܲܒ̣ܢܲܝ ܒܸܢܝܵܡܹܝܢ ܒܲܬ̣ܚܘܼܡܹ̈ܝܗ̇ ܟܲܕ݂ ܚܵܕ݂ܪܵܐ ܠܫܲܪ̈ܒ̣ܵܬ̣ܗܘܿܢ.
21 ܘܲܗ̤ܘܲܝ̈ ܩܘܼܪ̈ܝܵܐ ܕܫܲܒ̣ܛܵܐ ܕܲܒ̣̈ܢܲܝ ܒܸܢܝܵܡܹܝܢ ܠܫܲܪ̈ܒ̣ܵܬ̣ܗܘܿܢ: ܘܐܝܼܪܝܼܚܘܿ: ܘܒܹܝܬ̣ ܚܲܓܠܵܐ: ܘܲܥܡܵܩ: ܘܲܩܨܵܨ.
22 ܘܒܹܝܬ̣ ܥܵܪܵܒ̣ܵܐ: ܘܲܨܡܵܪܝܼܡ: ܘܒܹܝܬ̣ ܐܹܝܠ.
23 ܘܥܵܘܝܼܢ: ܘܦܲܪܵܐ: ܘܥܘܼܦܪܵܐ.
24 ܘܲܟ݂ܦܲܪ ܥܘܼܡܩܵܐ: ܘܥܲܦܠܝܼ: ܘܲܓ̣ܒ̣ܵܥ: ܩܘܼܪ̈ܝܵܐ ܐܲܪܒܲܥܸܣܪܹ̈ܐ ܘܐܵܓ̣ܘܼܪ̈ܣܲܝܗܹܝܢ.
25 ܘܓܸܒ̣ܥܘܿܢ: ܘܪܵܡܬ̣ܵܐ: ܘܒܹܪܘܿܬ̣.
26 ܘܡܲܨܦܝܵܐ: ܘܲܟ݂ܦܝܼܪܵܐ: ܘܡܲܨܵܐ.
27 ܘܲܪܩܸܡ: ܘܲܪܦܵܐܹܝܠ: ܘܬܲܪܐܲܠܵܐ.
28 ܘܲܨܠܲܥ: ܘܲܓܒ̣ܝܼܪܵܐ: ܘܢܵܒ̣ܘܿܣ ܕܗ̤̱ܝ ܗ̄ܝ̣ ܐܘܿܪܸܫܠܸܡ: ܘܓܸܒ̣ܥܲܬ̣: ܘܩܘܼܪܝܲܬ̇ܝܼܡ ܩܘܼܪ̈ܝܵܐ ܐܲܪܒܲܥܸܣܪܹ̈ܐ: ܘܐܵܓ̣ܘܼܪ̈ܣܲܝܗܹܝܢ ܗܵܕܲܐ ܗ̄ܝ̣ ܝܲܪܬ̇ܘܼܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܒܸܢܝܵܡܹܝܢ ܠܫܲܪ̈ܒ̣ܵܬ̣ܗܘܿܢ.
1 ܘܢܸܦܩܲܬ̤ ܦܸܨܬ̣ܵܐ ܕܬܲܪܬܹ̇ܝܢ ܠܫܲܒ̣ܛܵܐ ܕܲܒ̣̈ܢܲܝ ܫܸܡܥܘܿܢ ܠܫܲܪ̈ܒ̣ܵܬ̣ܗܘܿܢ: ܘܲܗܘ̤ܵܬ̣ ܝܵܪܬ̇ܘܼܬ̣ܗܘܿܢ ܒܓ̣ܵܘ ܝܵܪܬ̇ܘܼܬ̣ܵܐ ܕܲܒ̣̈ܢܲܝ ܝܼܗܘܼܕ݂ܵܐ.
2 ܘܲܗ̤ܘܲܝ ܠܗܘܿܢ ܒܝܵܪ̈ܬܘܵܬ̣ܗܘܿܢ ܒܹܪ ܫܒܲܥ: ܘܲܫܒܲܥ: ܘܡܵܘܠܵܕ݂ܵܐ.
3 ܘܕ݂ܵܪܲܬ̣ ܬܲܥ̈ܠܹܐ: ܘܒܲܠܵܐ ܘܲܥܨܵܡ.
4 ܘܐܹܠܘܿܬ̣ܠܲܕ݂: ܘܒܹܝܬ̣ ܐܹܝܠ: ܘܚܸܪܡܵܐ.
5 ܘܨܸܢܩܠܲܓ̣: ܘܒܹܝܬ̣ ܡܲܪܟ̇ܒ̣ܘܼܬ̣: ܘܲܚܨܵܪ ܣܘܼܣܵܐ.
6 ܘܒܹܝܬ̣ ܠܲܒ̇ܘܼܬ̣: ܘܫܲܪܘܲܝܢܵܢ. ܩܘܼܪ̈ܝܵܐ ܐܲܪܒܲܥܸܣܪܹ̈ܐ: ܘܐܵܓ̣ܘܼܪ̈ܣܲܝܗܹܝܢ.
7 ܘܥܹܝܢ: ܘܪܲܡܝܼܢ: ܘܓ̣ܵܬ̣ܵܪ: ܘܥܵܫܵܢ. ܩܘܼܪ̈ܝܵܐ ܐܲܪܒܲܥ: ܘܐܵܓ̣ܘܼܪ̈ܣܲܝܗܹܝܢ.
8 ܘܟ݂ܠܗܘܿܢ ܐܵܓ̣ܘܼܪ̈ܣܹܐ ܕܲܚܕ݂ܝܼܪܝܼܢ ܠܗܹܝܢ ܠܩܘܼܪ̈ܝܵܐ ܗܵܠܹܝܢ: ܥܕܲܡܵܐ ܠܲܒ̣ܥܵܬ̣ ܒܹܝܬ̣ ܪܵܡܬ̣ܵܐ ܕܲܒ̣ܬܲܝ̱ܡܢܵܐ ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܫܸܡܥܘܿܢ ܠܫܲܪ̈ܒ̣ܵܬ̣ܗܘܿܢ.
9 ܡ̣ܢ ܚܲܒ̣ܠܵܐ ܕܲܒ̣̈ܢܲܝ ܝܼܗܘܼܕ݂ܵܐ ܗܘ̤ܵܬ̣ ܝܵܪܬ̇ܘܼܬ̣ܵܐ ܕܲܒ̣ܢܲܝ̈ ܫܸܡܥܘܼܢ: ܡܸܛܠ ܕܣܲܓ̇ܝܼܵܐܐ ܗ̄ܘ̣ܵܬ̣ ܦܵܠܓ̇ܘܼܬ̣ܗܘܿܢ ܕܲܒ̣ܢܲܝ̈ ܝܼܗܘܼܕ݂ܵܐ. ܘܝܸܪܬ̣ܘ ܒ̈ܢܲܝ ܫܸܡܥܘܿܢ ܡ̣ܢ ܝܵܪܬ̇ܘܼܬ̣ܗܘܿܢ.
10 ܘܣܸܠܩܲܬ̣ ܦܸܨܬ̣ܵܐ ܕܲܬ̣ܠܵܬ̣ ܠܲܒ̣̈ܢܲܝ ܙܒ̣ܘܿܠܘܿܢ ܠܫܲܪ̈ܒ̣ܵܬ̣ܗܘܿܢ: ܘܲܗܘ̤ܵܐ ܬܚܘܼܡܵܐ ܕܝܵܪܬ̇ܘܼܬ̣ܗܘܿܢ: ܥܕܲܡܵܐ ܠܐܲܫܕ̇ܘܿܕ݂.
11 ܘܣܵܠܹܩ ܬܚܘܼܡܗܘܿܢ ܠܡܲܥ̱ܪܒ̣ܵܐ: ܘܲܠܪܵܡܲܬ̤ ܬܲܥ̈ܠܹܐ: ܘܦܵܓܠ ܒܕ݂ܒ̣ܫܲܬ̣: ܘܦܵܓܥ ܒܢܲܚܠܵܐ ܕܲܩܕ݂ܵܡ ܢܩܸܡܥܲܡ.
12 ܘܗܵܦܹܟ݂ ܡ̣ܢ ܐܲܫܕ̇ܘܿܕ݂ ܡ̣ܢ ܡܲܕ݂ܢܵܚܲܝ̈ ܫܸܡܫܵܐ. ܥܲܠ ܬܚܘܼܡܵܐ ܕܟܸܣܠܘܿܬ̣: ܘܲܕ݂ܒܸܬ̇ܘܿܪ. ܘܢܵܦܹ̇ܩ ܠܪܲܒܲܬ̣: ܘܣܵܠܹܩ ܠܢܵܦܝܼܥ.
13 ܘܡ̣ܢ ܬܲܡܵܢ ܥܵܒܲܪ ܩܲܕ݂ܡܵܝܑܬ̣ ܡ̣ܢ ܡܲܕ݂ܢ̱ܚܵܐ: ܠܓܸܬ̣ ܘܲܠܚܵܦܵܪ: ܘܲܠܥܲܬܵܐ: ܘܲܠܩܸܨܝܵܢ ܘܢܵܦܹ̇ܩ ܠܐܲܪܡܘܿܢ: ܘܲܠܡܲܬ̣ܘܵܐ: ܘܲܠܥܵܘܵܐ.
14 ܘܚܵܕܲܪ ܠܹܗ ܬܚܘܼܡܵܐ ܡ̣ܢ ܓܲܪܒ̇ܝܵܐ ܕܲܚܕ݂ܝܼܬ̇ܘܿܢ: ܘܗܵܘܹ̇ܝܢ ܡܲܦܩܵܢܵܘ̈ܗܝ ܠܢܲܚܠܵܐ ܕܟܲܦ̮ܬ̇ܢܵܐܹܝܠ.
15 ܘܲܠܩܲܛܲܬ̣: ܘܲܠܝܲܗܠܝܼܠ: ܘܲܠܫܵܡܪܹܝܢ: ܘܲܠܥܲܪܐܲܠܵܐ: ܘܲܠܒܹܝܬ̣ܠܚܸܡ ܩܘܼܪ̈ܝܵܐ ܬܲܪܬܲܥܸܣܪܹ̈ܐ: ܘܐܵܓ̣ܘܼܪ̈ܣܲܝܗܹܝܢ.
16 ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܲܒ̣̈ܢܲܝ ܙܲܒ̣ܘܿܠܘܿܢ ܠܫܲܪ̈ܒ̣ܵܬ̣ܗܘܿܢ.
17 ܘܢܸܦܩܲܬ̤ ܦܸܨܬ̣ܵܐ ܕܐܲܪܒܲܥ ܕܲܒ̣̈ܢܲܝ ܐܝܼܣܵܟ݂ܵܪ ܠܫܲܪ̈ܒ̣ܵܬ̣ܗܘܿܢ.
18 ܘܲܗܘ̤ܵܐ ܬܚܘܼܡܗܘܿܢ: ܐܝܼܙܲܪܥܹܝܠ: ܘܟܸܣܠܘܿܬ̣: ܘܫܘܿܝܵܡ.
19 ܘܲܚܦܝܼܪܵܡ: ܘܫܸܢܐܵܢ: ܘܐܲܚܬܲܪ.
20 ܘܕܸܒ̣ܠܲܬ̣: ܘܩܝܼܫܘܿܢ: ܘܐܵܦܵܨ.
21 ܘܪܵܡܲܬ̣ ܥܹܝܢ: ܘܥܸܢܝܵܢ: ܘܥܹܝܢ ܚܲܕܵܐ: ܘܒܹܝܬ̣ ܦܸܨܝܵܢ.
22 ܘܦܵܓܥ ܬܚܘܼܡܵܐ ܒܬܲܒ̣ܘܿܪ: ܘܲܒ̣ܫܲܚܨܝܼܡܵܐ: ܘܲܒ̣ܒܹܝܬ̣ ܫܡܸܫ. ܘܗܵܘܹ̇ܐ ܡܲܦܩܵܢܵܐ ܕܲܬ̣ܚܘܼܡܗܘܿܢ ܠܝܘܿܪܕ̇ܢܵܢ ܩܘܼܪ̈ܝܵܐ ܬܠܵܬܲܥܸܣܪܹ̈ܐ: ܘܐܵܓ̣ܘܼܪ̈ܣܲܝܗܹܝܢ.
23 ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܐܝܼܣܵܟ݂ܵܪ ܠܫܲܪܒ̣ܵܬ̣ܗܘܿܢ ܩܘܼܪ̈ܝܵܐ ܘܐܵܓ̣ܘܼܪ̈ܣܲܝܗܹܝܢ.
24 ܘܢܲܦܩܲܬ̣ ܦܸܨܬ̣ܵܐ ܕܚܲܡܸܫ ܕܫܲܒ̣ܛܵܐ ܕܲܒ̣̈ܢܲܝ ܐܲܫܹܝܪ ܠܫܲܪ̈ܒ̣ܵܬ̣ܗܘܿܢ.
25 ܘܲܗܘ̤ܵܐ ܬܚܘܼܡܗܘܿܢ: ܚܲܩܠܲܬ̣: ܘܚܲܠܝܼ: ܘܒ̣ܵܛܵܢ: ܘܐܲܟ݂ܫܵܦ.
26 ܘܐܲܡܠܸܟ݂: ܘܥܲܡܟܵܪ: ܘܐܲܡܫܵܐܹܝܠ ܘܦܵܓܠ ܒܟܲܪܡܠܵܐ ܡ̣ܢ ܡܲܥ̱ܪܒ̣ܵܐ: ܘܫܝܼܚܘܿܪ: ܘܠܲܒ̇ܝܬ̣.
27 ܘܗܵܦܹ̇ܟ݂ ܡ̣ܢ ܡܲܕ݂ܢܵܚܲܝ̈ ܫܸܡܫܵܐ ܠܒܹܝܬ̣ ܕܵܓ̣ܘܿܢ: ܘܦܵܓܠ ܒܲܙܒ̣ܘܿܠܘܿܢ: ܘܲܒ̣ܢܲܚܠܵܐ ܕܢܲܦ̮ܬ̇ܚܵܐܹ̇ܝܠ ܡ̣ܢ ܓܲܪܒ̇ܝܵܐ: ܘܕܲܒ̇ܝܼܬ̣: ܘܥܘܼܡܩܵܐ: ܘܕܲܢܥܵܐܹܝܠ. ܘܢܵܦܹ̇ܩ ܥܲܠ ܟܘܼܒܸ̇ܠ ܡ̣ܢ ܓܲܪܒ̇ܝܵܐ.
28 ܘܲܠܥܸܒ̣ܪܘܿܢ: ܘܠܲܪܚܵܐܒ̣: ܘܲܠܚܲܡܘܿܢ: ܘܲܠܩܲܥܵܐ: ܥܕܲܡܵܐ ܠܨܲܝܕ̇ܘܿܢ ܪܲܒܵܐ.
29 ܘܗܵܦܹ̇ܟ݂ ܬܚܘܼܡܵܐ ܠܪܵܡܬ̣ܵܐ: ܘܲܥܕܲܡܵܐ ܠܨܘܿܪ ܡܕ݂ܝܼܢ̄ܬܵܐ ܥܲܫܝܼܢܬܵܐ. ܘܗܵܦܹܟ݂ ܬܚܘܼܡܵܐ ܠܚܲܣ: ܘܗܵܘܹ̇ܝܢ ܡܲܦܩܵܢܵܘ̈ܗܝ ܠܡܲܥ̱ܪܒ̣ܵܐ ܡ̣ܢ ܢܲܚܠܵܐ ܕܐܲܟ݂ܙܝܼܒ̣.
30 ܘܥܘܼܡܩܵܐ: ܘܐܵܦܵܩ: ܘܪܵܚܘܿܒ̣. ܩܘܼܪ̈ܝܵܐ ܥܸܣܪܝܼܢ ܘܬܲܪܬܹ̇ܝܢ: ܘܐܵܓ̣ܘܼܪ̈ܣܲܝܗܹܝܢ.
31 ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܐܵܫܹܝܪ ܠܫܲܪ̈ܒ̣ܵܬ̣ܗܘܿܢ: ܩܘܼܪ̈ܝܵܐ ܗܵܠܹܝܢ ܘܐܵܓ̣ܘܼܪ̈ܣܲܝܗܹܝܢ.
32 ܘܢܸܦܩܲܬ̤ ܦܸܨܬ̣ܵܐ ܕܫܸܬ̣ ܕܲܒ̣̈ܢܲܝ ܢܲܦ̮ܬܵܠܝܼ ܠܫܲܪ̈ܒ̣ܵܬ̣ܗܘܿܢ.
33 ܘܲܗܘ̤ܵܐ ܬܚܘܼܡܗܘܿܢ: ܡ̣ܢ ܚܲܠܦܵܐ: ܘܡ̣ܢ ܐܲܠܘܿܢ: ܘܡ̣ܢ ܨܸܢܥܵܡ: ܘܐܲܕܵܡܵܐ: ܘܲܢܩܸܒ̣: ܘܲܢܒ̣ܵܐܹܝܠ: ܥܕܲܡܵܐ ܠܠܲܩܘܿܡ. ܘܗܵܘܹ̇ܐ ܡܲܦܩܵܢܗܹܝܢ ܠܝܘܿܪܕ̇ܢܵܢ.
34 ܘܗܵܦܲܟ݂ ܬܚܘܼܡܵܐ ܠܡܲܥ̱ܪܒ̣ܵܐ ܠܐܲܙܢܘܿܬ̣ܒܘܿܙ: ܘܢܵܦܹ̇ܩ ܡ̣ܢ ܬܲܡܵܢ ܠܲܚܩܝܼܩ: ܘܦܵܓܥ ܒܲܙܒ̣ܘܿܠܘܿܢ ܡ̣ܢ ܬܲܝ̱ܡܢܵܐ: ܘܒ̣ܵܐܫܹܝܪ ܦܵܓܥ ܡ̣ܢ ܡܲܥ̱ܪܒ̣ܵܐ: ܘܒܲܝܗܘܼܕ݂ܵܐ ܒܝܘܿܪܕ̇ܢܵܢ ܡ̣ܢ ܡܲܕ݂ܢܵܚܲܝ̈ ܫܸܡܫܵܐ.
35 ܘܒܲܡܕ݂ܝܼ̈ܢܵܬ̣ܵܐ ܪܵܘ̱ܪ̈ܒ̣ܵܬ̣ܵܐ: ܒܨܘܿܪ: ܘܲܒ̣ܨܲܝܕܵܢ: ܘܒܲܚܡܵܬ̣: ܘܩܲܪܲܬ̣: ܘܟܸܢܪܲܬ̣.
36 ܘܐܵܕ݂ܵܡܵܐ: ܘܕ݂ܵܡܵܐ: ܘܚܵܨܘܿܪ.
37 ܘܲܩܕܸܫ: ܘܐܲܪܕ̇ܥܝܼ: ܘܥܹܝܢ ܨܘܿܪ.
38 ܘܕܝܼܐܘܿܢ: ܘܡܲܓܕܲܠܐܹܝܠ: ܘܚܵܪܘܿܡ: ܘܒܹܝܬ̣ ܥܢܵܬ̣: ܘܒܹܝܬ̣ ܫܡܸܫ: ܡܕ݂ܝܼ̈ܢܵܬ̣ܵܐ ܬܫܲܥܸܣܪܹ̈ܐ: ܘܐܵܓ̣ܘܼܪ̈ܣܲܝܗܹܝܢ.
39 ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܢܲܦ̮ܬܵܠܝܼ ܠܫܲܪ̈ܒ̣ܵܬ̣ܗܘܿܢ: ܗܵܠܹܝܢ ܩܘܼܪ̈ܝܵܐ ܘܐܵܓ̣ܘܼܪ̈ܣܲܝܗܹܝܢ.
40 ܘܢܸܦܩܲܬ̤ ܦܸܨܬ̣ܵܐ ܕܲܫܒܲܥ ܕܲܒ̣̈ܢܲܝ ܕܵܢ ܠܫܲܪ̈ܒ̣ܵܬ̣ܗܘܿܢ.
41 ܘܲܗܘ̤ܵܐ ܬܚܘܼܡܵܐ ܕܝܵܪܬ̇ܘܼܬ̣ܗܘܿܢ: ܨܲܕ݂ܥܵܐ: ܘܐܸܫܬ̇ܘܼܐܹܝܠ: ܘܲܩܪܝܼܬ̣ܵܐ ܕܲܫܡܸܫ.
42 ܘܫܲܥܠܒ̣ܝܼܢ: ܘܐܲܝܠܘܿܢ: ܘܢܲܬ̣ܠܵܐ.
43 ܘܐܲܠܘܿܢ: ܘܬܸܡܢܵܐ: ܘܥܸܩܪܘܿܢ.
44 ܘܐܸܠܩܲܬ̣: ܘܓܸܒ̣ܬ̇ܘܿܢ: ܘܒܲܥܠܲܬ̣.
45 ܘܲܝܗܘܼܕ݂ܝܼܬ̣: ܘܲܒ̣ܥܸܠܕ̇ܒ̣ܵܟ݂: ܘܓܸܬ̣ܪܡܘܿܢ.
46 ܘܡܲܚ̱ܪܩܘܿܢ: ܘܟܲܪܩܘܿܢ: ܥܕܲܡܵܐ ܠܲܬ̣ܚܘܼܡܵܐ ܕܠܘܼܩܒܲܠ ܐܲܝܠܲܬ̣.
47 ܘܲܢܦܲܩ̣ ܬܚܘܼܡܵܐ ܕܲܒ̣ܢܵܘ̈ܗܝ ܕܕ݂ܵܢ ܡܸܢܗܘܿܢ. ܘܲܣܠܸܩܘ ܒ̈ܢܲܝ ܕܵܢ: ܘܲܥܒܲܕ݂ܘ ܩܪܵܒ̣ܵܐ ܥܲܡ ܐ̄ܢܵܫܵܐ ܕܐܝܼܢܘܿ: ܘܟܲܒ̣ܫܘܼܗ̇ ܘܚܲܪܒ̇ܘܼܗ̇ ܒܦܘܼܡܵܐ ܕܣܲܝܦܵܐ: ܘܝܲܪܬ̇ܘܼܗ̇ ܘܝܼܬܸܒ̣ܘ ܒܵܗ̇: ܘܲܩܪܵܐܘܼܗ̇ ܠܐܝܼܢܘܿ ܕܵܢ ܥܲܠ ܫܸܡ ܕܵܢ ܐܲܒ̣ܘܼܗܘܿܢ.
48 ܗܵܕܲܐ ܗ̄ܝ̣ ܝܵܪܬ̇ܘܼܬ̣ܵܐ ܕܫܲܒ̣ܛܵܐ ܕܲܒ̣̈ܢܲܝ ܕܵܢ ܠܫܲܪ̈ܒ̣ܵܬ̣ܗܘܿܢ: ܡܕ݂ܝܼ̈ܢܵܬ̣ܵܐ ܗܵܠܹܝܢ ܘܩܘܼܪ̈ܝܵܐ ܘܐܵܓ̣ܘܼܪ̈ܣܲܝܗܹܝܢ.
49 ܘܫܲܠܡ̣ܘ ܠܡܹܐܪܬܵܗ̇ ܠܐܲܪܥܵܐ ܒܸܬ̣ܚ̈ܘܼܡܹܝܗ̇: ܘܝܲܗ̄ܒ̣ܘ ܒ̈ܢܲܝ ܝܼܣܪܵܝܹܠ ܝܵܪܬ̇ܘܼܬ̣ܵܐ ܠܝܼܫܘܿܥ ܒܲܪܢܘܿܢ ܒܲܝܢܵܬ̣ܗܘܿܢ.
50 ܥܲܠ ܡܸܠܲܬ̤ ܦܘܼܡܹܗ ܕܡܵܪܝܵܐ: ܝܲܗ̄ܒ̣ܘ ܠܹܗ ܩܪܝܼܬ̣ܵܐ ܕܫܐܸܠ: ܠܬܲܡܢܲܬ̣ܣܪܲܚ ܕܲܒ̣ܛܘܼܪܵܐ ܕܐܲܦܪܹܝܡ: ܘܲܒ̣ܢܵܗ̇ ܠܲܩܪܝܼܬ̣ܵܐ ܘܝܼܬܸܒ̣ ܒܵܗ̇.
51 ܗܵܠܹܝܢ ܝܵܪ̈ܬ̇ܘܵܬ̣ܵܐ ܕܐܵܘܪܸܬ̣ܘ ܐܹܠܝܼܥܵܙܲܪ ܟܵܗܢܵܐ ܘܝܼܫܘܿܥ ܒܲܪܢܘܿܢ: ܘܪܹ̈ܫܹܐ ܕܐܲܒ̣ܵـ̈ـܗܵܬ̣ܵܐ ܕܫܲܒ̣̈ܛܹܐ ܕܝܼܣܪܵܝܹܠ: ܒܦܸܨܹ̈ܐ ܒܫܝܼܠܘܿ ܩܕ݂ܵܡ ܡܵܪܝܵܐ ܒܬܲܪܥܵܐ ܕܡܲܫܟܲܢܙܲܒ̣ܢܵܐ: ܘܫܲܠܸܡ̣ܘ ܠܲܡܦܲܠܵܓܘܼܬ̣ܵܗ̇ ܠܐܲܪܥܵܐ.
1 ܘܐܸܡܲܪ ܡܵܪܝܵܐ ܠܝܼܫܘܿܥ.
2 ܐܸܡܲܪ ܠܲܒ̣̈ܢܲܝ ܝܼܣܪܵܝܹܠ: ܫܒ̣ܘܿܩܘ ܠܟ݂ܘܿܢ ܩܘܼܪ̈ܝܵܐ ܠܲܡܫܵܘܙܒ̣ܘܼܬ̣ܵܐ: ܐܲܝܟܲܢܵܐ ܕܐܸܡ̇ܪܹܬ̣ ܠܟ݂ܘܿܢ ܒܐܝܼܕ݂ܵܐ ܕܥܲܒ̣ܕ̇ܝ ܡܘܼܫܹܐ.
3 ܕܢܸܥܪܘܿܩ ܠܬܲܡܵܢ ܩܵܛܘܿܠܵܐ: ܐܲܝܢܵܐ ܕܢܸܩܛܘܿܠ ܢܲܦ̮ܫܵܐ ܡ̣ܢ ܫܸܠܝܵܐ ܟܲܕ݂ ܠܵܐ ܝܵܕܲܥ. ܘܢܸܗ̱ܘ̈ܝܵܢ ܠܟ݂ܘܿܢ ܠܲܡܫܵܘܙܒ̣ܘܼܬ̣ܵܐ ܡ̣ܢ ܬܵܒܲܥ ܥܝܵܪܬܵܐ ܕܲܕ݂ܡܵܐ.
4 ܘܢܸܥܪܘܿܩ ܠܲܚܕ݂ܵܐ ܡ̣ܢ ܗܵܠܹܝܢ ܩܘܼܪܝܵܐ: ܘܲܢܩܘܼܡ ܒܡܲܥܠܵܢܵܐ ܕܬܲܪܥܵܐ ܕܲܩܪܝܼܬ̣ܵܐ. ܘܲܢܡܲܠܠ ܩܕ݂ܵܡ ܩܲܫܝܼܫܹ̈ܐ ܕܲܩܪܝܼܬ̣ܵܐ ܗܵܝ̇: ܘܢܹܐܡܲܪ ܡܸܠܵܘ̈ܗܝ: ܘܢܸܚ̱ܡܠܘܼܢܹܗ ܠܘܵܬ̣ܗܘܿܢ ܒܲܩܪܝܼܬ̣ܵܐ: ܘܢܸܬ̇ܠܘܼܢ ܠܹܗ ܕܘܼܟ̇ܬ̣ܵܐ ܠܡܸܥܡܲܪ ܥܲܡܗܘܿܢ.
5 ܟܲܕ݂ ܢܸܪܕ̇ܘܿܦ ܬܵܒܲܥ ܥܝܵܪܬܵܐ ܕܲܕ݂ܡܵܐ ܒܵܬ̣ܪܗ: ܘܠܵܐ ܢܲܫ̱ܠܡܘܼܢܹܗ ܒܐܝܼܕ݂ܵܘ̈ܗܝ ܠܩܵܛܘܿܠܵܐ: ܡܸܛܠ ܕܟܲܕ݂ ܠܵܐ ܝܵܕܲܥ ܗ̄ܘ̣ܵܐ ܡܚܵܝܗܝ ܠܚܲܒ̣ܪܹܗ: ܘܠܵܐ ܣܵܢܹ̇ܐ ܗ̄ܘ̣ܵܐ ܠܹܗ ܡ̣ܢ ܩܕ݂ܵܡ ܝܵܘ̈ܡܵܬ̣ܵܐ.
6 ܘܢܸܬܸ̇ܠ ܒܲܩܪܝܼܬ̣ܵܐ ܗܵܝ̇: ܥܕܲܡܵܐ ܕܩܵܐܹ̇ܡ ܩܕ݂ܵܡ ܟܢܘܼܫܬܵܐ ܒܕ݂ܝܼܢܵܐ: ܥܕܲܡܵܐ ܕܲܢܡܘܼܬ̣ ܟܵܗܢܵܐ ܪܲܒܵܐ ܕܢܸܗܘܹܐ ܒܝܵܘ̈ܡܵܬ̣ܵܐ ܗܵܢܘܿܢ: ܘܗܵܝܕܹ̇ܝܢ ܢܸܗܦܘܿܟ݂ ܩܵܛܘܿܠܵܐ ܘܢܹܐܬܹܐ ܠܒܲܝܬܹ̇ܗ: ܘܠܲܩܪܝܼܬܹܗ: ܘܠܲܡܕ݂ܝܼܢ̄ܬܵܐ ܕܲܥܪܲܩ̣ ܡܸܢܵܗ̇.
7 ܗܵܝܕܹ̇ܝܢ ܦܪܲܫ̣ܘ ܩܘܼܪ̈ܝܵܐ ܗܵܠܹܝܢ ܠܒܹܝܬ̣ ܓܵܘܣܵܐ: ܠܲܪܩܸܡ ܕܒܲܓ̣ܠܝܼܠܵܐ ܕܲܒ̣ܛܘܼܪܵܐ ܕܢܲܦ̮ܬܵܠܝܼ: ܘܠܲܫܟܹܝܡ ܕܲܒ̣ܛܘܼܪܵܐ ܕܐܲܦܪܹܝܡ: ܘܲܠܩܘܼܪܝܲܬ̣ ܐܲܪܒܲܥ ܕܗ̤ܝ ܗ̄ܝ̣ ܚܸܒ̣ܪܘܿܢ ܕܲܒ̣ܛܘܼܪܵܐ ܕܲܝܗܘܼܕ݂ܵܐ.
8 ܘܲܒ̣ܥܸܒ̣ܪܵܐ ܕܝܘܿܪܕ̇ܢܵܢ ܕܐܝܼܪܝܼܚܘܼ ܡ̣ܢ ܡܲܕ݂ܢ̱ܚܵܐ: ܝܲܗ̄ܒ̣ܘ ܒܘܿܨܵܪ ܕܒ̣ܡܲܕ݂ܒ̇ܪܵܐ ܕܝܵܬ̣ܒܵܐ ܒܲܦܩܲܥܬ̣ܵܐ ܡ̣ܢ ܫܲܒ̣ܛܵܐ ܕܪܘܼܒܹܝܠ: ܘܪܵܡܲܬ̣ ܓܸܠܥܵܕ݂ ܡ̣ܢ ܫܲܒ̣ܛܵܐ ܕܓ̣ܵܕ݂: ܘܓ̣ܵܘܠܵܢ ܕܲܒ̣ܡܲܬ̣ܢܝܼܢ ܡ̣ܢ ܫܲܒ̣ܛܵܐ ܕܲܡܢܲܫܹܐ.
9 ܗܵܠܹܝܢ ܐܸܢܹܝܢ ܩܘܼܪ̈ܝܵܐ ܕܫܘܼܘܙܵܒ̣ܵܐ ܘܲܕ݂ܒܹܝܬ̣ ܓܵܘܣܵܐ ܠܟ݂ܠܗܘܿܢ ܒ̈ܢܲܝ ܝܼܣܪܵܝܹܠ: ܘܲܠܥܵܡܘܿܪܹ̈ܐ ܕܥܵܡ̇ܪܝܼܢ ܒܲܝܢܵܬ̣ܗܘܿܢ: ܕܢܸܗܘܹܐ ܥܵܪܹܩ ܠܬܲܡܵܢ ܟܠ ܡ̇ܢ ܕܩܵܛܸܠ ܢܲܦ̮ܫܵܐ ܡ̣ܢ ܫܸܠܝܵܐ: ܘܠܵܐ ܢܸܫܬ̇ܠܸܡ ܒܐܝܼܕ݂ܵܐ ܕܬ̣ܵܒܲܥ ܥܝܵܪܬܵܐ ܕܲܕ݂ܡܵܐ: ܥܕ݂ܡܵܐ ܕܲܢܩܘܼܡ ܩܕ݂ܵܡ ܟܢܘܼܫܬܵܐ ܒܕ݂ܝܼܢܵܐ.
1 ܘܲܩܪܸܒ̣ܘ ܪܹ̈ܫܹܐ ܕܟ݂ܵܗܢܹ̈ܐ ܘܲܠܹܘܵܝܹ̈ܐ ܠܘܵܬ̣ ܐܹܠܝܼܥܵܙܲܪ ܟܵܗܢܵܐ ܘܲܠܘܵܬ̣ ܝܼܫܘܿܥ ܒܲܪܢܘܿܢ: ܘܲܠܘܵܬ̣ ܪܹ̈ܫܹܐ ܕܐܲܒ̣ܵـ̈ـܗܵܬ̣ܵܐ ܕܫܲܒ̣̈ܛܹܐ ܕܝܼܣܪܵܝܹܠ.
2 ܘܐܸܡܲܪܘ ܠܗܘܿܢ ܒܫܝܼܠܘܿ ܒܐܲܪܥܵܐ ܕܲܟ݂ܢܲܥܢ: ܡܵܪܝܵܐ ܦܲܩܸܕ݂ ܒܐܝܼܕ݂ܵܐ ܕܡܘܼܫܹܐ: ܕܢܸܬ̇ܠܘܼܢ ܠܲܢ ܩܘܼܪ̈ܝܵܐ ܠܡܸܥܡܲܪ ܒܗܹܝܢ: ܘܐܵܓ̣ܘܼܪ̈ܣܲܝܗܹܝܢ ܠܲܒ̣ܥܝܼܪܲܢ.
3 ܘܝܲܗ̄ܒ̣ܘ ܒ̈ܢܲܝ ܝܼܣܪܵܝܹܠ ܠܠܹܘܵܝܹ̈ܐ ܡ̣ܢ ܝܵܪܬ̇ܘܼܬ̣ܗܘܿܢ ܥܲܠ ܡܸܠܲܬ̣ ܦܘܼܡܹܗ ܕܡܵܪܝܵܐ: ܩܘܼܪ̈ܝܵܐ ܗܵܠܹܝܢ ܘܐܵܓ̣ܘܼܪ̈ܣܲܝܗܹܝܢ.
4 ܘܢܸܦܩܲܬ̣ ܦܸܨܬ̣ܵܐ ܕܫܲܪܒ̇ܬ̣ܵܐ ܕܩܵܗܵܬ̣: ܕܲܒ̣̈ܢܲܝ ܐܲܗܪܘܿܢ ܟܵܗܢܹܐ ܡ̣ܢ ܠܹܘܵܝܹ̈ܐ. ܘܝܲܗ̄ܒ̣ܘ ܠܗܘܿܢ ܡ̣ܢ ܫܲܒ݂ܛܵܐ ܕܲܝܗܘܼܕ݂ܵܐ: ܘܡ̣ܢ ܫܲܒ̣ܛܵܐ ܕܫܸܡܥ̱ܘܿܢ: ܘܡ̣ܢ ܫܲܒ̣ܛܵܐ ܕܒܸܢܝܵܡܹܝܢ: ܒܦܸܨܬ̣ܵܐ ܩܘܼܪ̈ܝܵܐ ܬܠܵܬܲܥܸܣܪܹ̈ܐ.
5 ܘܠܲܒ̣ܢܵܘ̈ܗܝ ܕܩܵܗܵܬ̣ ܕܐܸܫܬ̇ܚܲܪܘ: ܝܲܗ̄ܒ̣ܘ ܠܗܘܿܢ ܡ̣ܢ ܫܲܒ̣ܛܵܐ ܕܐܲܦܪܹܝܡ: ܘܡ̣ܢ ܫܲܒ̣ܛܵܐ ܕܕ݂ܵܢ: ܘܡ̣ܢ ܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܩܘܼܪ̈ܝܵܐ ܥܣܲܪ.
6 ܘܠܲܒ̣ܢܵܘ̈ܗܝ ܕܓܸܪܫܘܿܢ: ܝܲܗ̄ܒ̣ܘ ܠܗܘܿܢ ܡ̣ܢ ܫܲܒ̣ܛܵܐ ܕܐܝܼܣܵܟ݂ܵܪ: ܘܡ̣ܢ ܫܲܒ̣ܛܵܐ ܕܐܵܫܹܝܪ: ܘܡ̣ܢ ܫܲܒ̣ܛܵܐ ܕܢܲܦ̮ܬܵܠܝܼ: ܘܡ̣ܢ ܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ ܕܲܒ̣ܡܲܬ̣ܢܹܝܢ: ܒܦܸܨܬ̣ܵܐ: ܩܘܼܪ̈ܝܵܐ ܬܠܵܬܲܥܸܣܪܹ̈ܐ.
7 ܘܠܲܒ̣ܢܵܘ̈ܗܝ ܕܡܵܪܵܪܝܼ: ܠܫܲܪ̈ܒ̣ܵܬ̣ܗܘܿܢ ܝܲܗ̄ܒ̣ܘ ܠܗܘܿܢ ܡ̣ܢ ܫܲܒ̣ܛܵܐ ܕܪܘܼܒܹܝܠ: ܘܡ̣ܢ ܫܲܒ̣ܛܵܐ ܕܓ̣ܵܕ݂: ܘܡ̣ܢ ܫܲܒ̣ܛܵܐ ܕܲܙܒ̣ܘܿܠܘܿܢ: ܩܘܼܪ̈ܝܵܐ ܬܲܪܬܲܥܸܣܪܹ̈ܐ.
8 ܘܝܲܗ̄ܒ̣ܘ ܒ̈ܢܲܝ ܝܼܣܪܵܝܹܠ ܠܠܹܘܵܝܹ̈ܐ ܩܘܼܪ̈ܝܵܐ ܗܵܠܹܝܢ ܘܐܵܓ̣ܘܼܪ̈ܣܲܝܗܹܝܢ ܒܦܸܨܹ̈ܐ: ܐܲܝܟܲܢܵܐ ܕܦܲܩܸܕ݂ ܡܵܪܝܵܐ ܠܡܘܼܫܹܐ.
9 ܘܗܵܠܹܝܢ ܫܡܵܗܹ̈ܐ ܕܩܘܼܪ̈ܝܵܐ ܕܝܲܗ̄ܒ̣ܘ ܡ̣ܢ ܫܲܒ̣ܛܵܐ ܕܲܝܗܘܼܕ݂ܵܐ: ܘܡ̣ܢ ܫܲܒ̣ܛܵܐ ܕܫܸܡܥܘܿܢ: ܩܘܼܪ̈ܝܵܐ ܒܲܫܡܵܗܲܝ̈ܗܹܝܢ.
10 ܘܲܗ̤ܘܲܝ̈ ܠܲܒ̣ܢܵܘ̈ܗܝ ܕܐܲܗܪܘܿܢ ܡ̣ܢ ܫܲܪܒ̇ܬ̣ܵܐ ܕܩܵܗܵܬ̣: ܡ̣ܢ ܒܢܵܘ̈ܗܝ ܕܠܹܘܝܼ: ܡܸܛܠ ܕܕ݂ܝܼܠܗܘܿܢ ܗܘ̤ܵܬ̣ ܦܸܨܬ̣ܵܐ ܩܲܕ݂ܡܵܝܬܵܐ.
11 ܘܝܲܗ̄ܒ̣ܘ ܠܗܘܿܢ ܠܩܘܼܪܝܲܬ̣ ܐܲܪܒܲܥ ܕܐܲܒ̣ܘܼܗܘܿܢ ܕܓܲܢ̄ܒܵܪܹ̈ܐ: ܕܗ̤ܝ ܗ̄ܝ̣ ܚܸܒ̣ܪܘܿܢ ܕܲܒ̣ܛܘܼܪܵܐ ܕܲܝܗܘܼܕ݂ܵܐ: ܘܠܵܐ ܓ̣ܘܼܪ̈ܣܹܝܗ̇ ܟܲܕ݂ ܚܕ݂ܪܝܼܢ ܠܵܗ̇.
12 ܘܲܠܚܲܩ̈ܠܵܬ̣ܵܐ ܕܲܩܪܝܼܬ̣ܵܐ ܘܲܠܫܲܪܟܵܐ ܕܐܵܓ̣ܘܼܪ̈ܣܹܝܗ̇: ܝܲܗ̄ܒ̣ܘ ܠܟ݂ܵܠܵܒ̣ ܒܲܪ ܝܘܿܦܲܢܵܐ ܒܝܵܪܬܘܼܬܹܗ.
13 ܘܠܲܒ̣̈ܢܲܝ ܐܲܗܪܘܿܢ ܟܵܗܢܵܐ ܝܲܗ̄ܒ̣ܘ ܩܪܝܼܬ̣ܵܐ ܕܲܡܫܵܘܙܒ̣ܵܐ ܠܩܵܛܘܼܠܹ̈ܐ: ܠܚܸܒ̣ܪܘܿܢ ܘܠܵܐܓ̣ܘܼܪ̈ܣܹܝܗ̇: ܘܲܠܠܸܒ̣ܢܵܐ ܘܠܵܐܓ̣ܘܼܣܹܝܗ̇.
14 ܘܲܠܝܲܪܬ̣ ܘܠܵܐܓ̣ܘܼܪ̈ܣܹܝܗ̇: ܘܠܐܸܫܬ̇ܡܘܿܥ ܘܠܵܐܓ̣ܘܼܪ̈ܣܹܝܗ̇.
15 ܘܲܠܚܲܠܘܿܠ ܘܠܵܐܓ̣ܘܼܪ̈ܣܹܝܗ̇: ܘܲܠܕ݂ܵܒ̣ܝܼܪ ܘܠܵܐܓ̣ܘܼܪ̈ܣܹܝܗ̇.
16 ܘܲܠܥܲܝܢ ܘܠܵܐܓ̣ܘܿܪ̈ܣܝܹܗ: ܘܲܠܥܲܛܵܐ . ܠܵܐܓ̣ܘܼܪ̈ܣܹܝܗ̇: ܘܲܠܒܹܝܬ̣ ܫܡܸܫ ܘܠܵܐܓ̣ܘܿܪ̈ܣܹܝܗ̇. ܩܘܼܪ̈ܝܵܐ ܬܫܲܥ ܡ̣ܢ ܫܲܒ̣ܛܵܐ ܕܲܝܗܘܼܕ݂ܵܐ ܘܲܕ݂ܫܸܡܥܘܿܢ.
17 ܘܡ̣ܢ ܫܲܒ̣ܛܵܐ ܕܒܸܢܝܵܡܹܝܢ: ܓܸܒ̣ܥܘܿܢ ܘܐܵܓ̣ܘܼܪ̈ܣܹܝܗ̇: ܘܲܓܒܲܥ ܘܐܵܓ̣ܘܼܪ̈ܣܹܝܗ̇.
18 ܘܲܥܢܵܬ̣ܘܿܬ̣ ܘܐܵܓ̣ܘܼܪ̈ܣܹܝܗ̇: ܘܥܸܠܡܘܿܢ ܘܐܵܓ̣ܘܼܪ̈ܣܝܹܗ̇: ܡܕ݂ܝܼ̈ܢܵܬ̣ܵܐ ܐܲܪܒܲܥ.
19 ܟܠܗܹܝܢ ܩܘܼܪ̈ܝܵܐ ܕܲܒ̣̈ܢܲܝ ܐܲܗܪܘܿܢ ܟܵܗܢܵܐ: ܬܠܵܬܲܥܸܣܪܹ̈ܐ ܘܐܵܓ̣ܘܼܪ̈ܣܲܝܗܹܝܢ.
20 ܘܲܠܫܲܪܒ̇ܬ̣ܵܐ ܕܠܹܘܵܝܹ̈ܐ ܕܲܒ̣̈ܢܲܝ ܩܵܗܵܬ̣ ܕܐܸܫܬ̇ܚܲܪܘ ܡ̣ܢ ܒ̈ܢܲܝ ܩܵܗܵܬ̣: ܗ̤ܘܲܝ̈ ܩܘܼܪ̈ܝܵܐ ܕܦܸܨܲܝ̈ܗܘܿܢ ܡ̣ܢ ܫܲܒ̣ܛܵܐ ܕܐܲܦܪܹܝܡ.
21 ܘܝܲܗ̄ܒ̣ܘ ܠܗܘܿܢ ܩܪܝܼܬ̣ܵܐ ܕܒܹܝܬ̣ ܡܫܵܘܙܒ̣ܘܼܬ̣ܵܐ ܕܩܵܛܘܿܠܹ̈ܐ: ܠܲܫܟܹܝܡ ܕܲܒ̣ܛܘܼܪܵܐ ܕܐܲܦܪܹܝܡ ܘܠܵܐܓ̣ܘܿܪ̈ܣܹܝܗ̇: ܘܲܠܓܵܕ݂ܵܪ ܘܲܠܵܐܓ̣ܘܼܪ̈ܣܹܝܗ̇.
22 ܘܲܠܩܲܒ̣ܨܝܼܡ ܘܠܵܐܓ̣ܘܼܪ̈ܣܝܹܗ̇: ܘܲܠܒܹܝܬ̣ ܚܵܘܪܵܢ ܘܠܵܐܓ̣ܘܼܪ̈ܣܹܝܗ̇: ܩܘܼܪ̈ܝܵܐ ܐܲܪܒܲܥ ܘܐܵܓ̣ܘܼܪ̈ܣܲܝܗܹܝܢ.
23 ܘܡ̣ܢ ܫܲܒ̣ܛܵܐ ܕܕ݂ܵܢ: ܐܲܬ̣ܠܩܵܐ ܘܐܵܓ̣ܘܼܪ̈ܣܹܝܗ̇: ܘܓܸܒ̣ܬ̇ܘܿܢ ܘܐܵܓ̣ܘܼܪ̈ܣܝܹܗ̇.
24 ܘܐܲܠܘܿܢ ܘܐܵܓ̣ܘܿܪ̈ܣܹܝܗ̇: ܘܓܲܬ̣ܪܸܡܘܿܢ ܘܐܵܓ̣ܘܿܪ̈ܣܹܝܗ̇ ܩܘܼܪ̈ܝܵܐ ܐܲܪܒܲܥ ܘܐܵܓ̣ܘܼܪ̈ܣܲܝܗܹܝܢ.
25 ܘܡ̣ܢ ܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܬܲܥܢܵܟ݂ ܘܐܵܓ̣ܘܼܪ̈ܣܹܝܗ̇: ܘܓܲܬ̣ܪܸܡܘܿܢ ܘܐܵܓ̣ܘܼܪ̈ܣܹܝܗ̇ ܩܘܪ̈ܝܵܐ ܬܲܪܬܹ̇ܝܢ ܘܐܵܓ̣ܘܼܪ̈ܣܲܝܗܹܝܢ.
26 ܟܠܗܹܝܢ ܩܘܼܪ̈ܝܵܐ ܘܲܡܕ݂ܝܼ̈ܢܵܬ̣ܵܐ ܥܣܲܪ ܘܐܵܓ̣ܘܼܪ̈ܣܲܝܗܹܝܢ: ܗ̤ܘܲܝ̈ ܠܫܲܪܒ̇ܬ̣ܵܐ ܕܲܒ̣ܢܵܘ̈ܗܝ ܕܩܵܗܵܬ̣ ܕܐܸܫܬ̇ܚܲܪܘ.
27 ܘܠܲܒ̣ܢܵܘ̈ܝ ܕܓܸܪܫܘܿܢ ܡ̣ܢ ܫܲܪܒ̇ܬ̣ܵܐ ܕܠܹܘܵܝܹ̈ܐ. ܗܘ̤ܝ ܩܘܼܪ̈ܝܼܗܘܿܢ ܡ̣ܢ ܦܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܩܪܝܼܬ̣ܵܐ ܕܒܹܝܬ̣ ܫܘܼܘܙܒ̣ܵܐ ܕܩܵܛܘܿܠܹ̈ܐ: ܓܵܘܠܵܢ ܕܲܒ̣ܡܲܬ̣ܢܝܼܢ ܘܐܵܓ̣ܘܼܪ̈ܣܹܝܗ̇: ܘܥܸܣܬ̇ܪܘܼܬ̣ ܘܐܵܓ̣ܘܼܪ̈ܣܹܝܗ̇: ܩܘܼܪ̈ܝܵܐ ܬܲܪܬܹ̇ܝܢ ܘܐܵܓ̣ܘܼܪ̈ܣܲܝܗܹܝܢ.
28 ܘܡ̣ܢ ܫܲܒ̣ܛܵܐ ܕܐܝܼܣܵܟ݂ܵܪ: ܩܸܫܝܵܢ ܘܐܵܓ̣ܘܼܪ̈ܣܹܝܗ̇: ܘܪܲܒܲܬ̣ ܘܐܵܓ̣ܘܼܪ̈ܣܹܝܗ̇.
29 ܘܝܲܪܡܘܼܬ̣ ܘܐܵܓ̣ܘܼܪ̈ܣܹܝܗ̇: ܘܥܹܝܢ ܓܵܕ݂ ܘܐܵܓ̣ܘܼܪ̈ܣܹܝܗ̇: ܩܘܼܪ̈ܝܵܐ ܐܲܪܒܲܥ ܘܐܵܓ̣ܘܼܪ̈ܣܲܝܗܹܝܢ.
30 ܘܡ̣ܢ ܫܲܒ̣ܛܵܐ ܕܐܵܫܹܝܪ: ܡܫܵܐܹܝܠ ܘܐܵܓ̣ܘܼܪ̈ܣܹܝܗ̇: ܘܥܲܟ݂ܪܘܿܢ ܘܐܵܓ̣ܘܼܪ̈ܣܹܝܗ̇: ܘܚܸܠܩܘܼܬ̣ ܘܐܵܓ̣ܘܼܪ̈ܣܹܝܗ̇.
31 ܘܲܪܚܘܼܒ̣ ܘܐܵܓ̣ܘܼܪ̈ܣܹܝܗ̇: ܩܘܼܪ̈ܝܵܐ ܐܲܪܒܲܥ ܘܐܵܓ̣ܘܼܪ̈ܣܲܝܗܹܝܢ.
32 ܘܡ̣ܢ ܫܲܒ̣ܛܵܐ ܕܢܲܦ̮ܬܵܠܝܼ: ܩܪܝܼܬ̣ܵܐ ܕܒܹܝܬ̣ ܫܘܼܘܙܒ̣ܵܐ ܕܩܵܛܘܿܠܹ̈ܐ: ܩܕܸܫ ܕܒܲܓ̣ܠܝܼܠܵܐ ܘܐܵܓ̣ܘܼܪ̈ܣܹܝܗ̇: ܘܐܲܚܡܵܬ̣ ܕܘܿܪ ܘܐܵܓ̣ܘܿܪ̈ܣܹܝܗ̇ ܘܩܲܪܬ̣ܵܢ ܘܐܵܓ̣ܘܼܪ̈ܣܹܝܗ̇: ܩܘܼܪ̈ܝܵܐ ܬܠܵܬ̣ ܘܐܵܓ̣ܘܼܪ̈ܣܲܝܗܹܝܢ.
33 ܟܠܗܹܝܢ ܩܘܼܪ̈ܝܵܐ ܕܫܲܪܒ̇ܬ̣ܵܐ ܕܲܒ̣̈ܢܲܝ ܓܸܪܫܘܿܢ: ܩܘܼܪ̈ܝܵܐ ܬܠܵܬܲܥܸܣܪܹ̈ܐ ܘܐܵܓ̣ܘܼܪ̈ܣܲܝܗܹܝܢ.
34 ܘܲܠܫܲܪܒ̇ܬ̣ܵܐ ܕܲܒ̣̈ܢܲܝ ܡܪܵܪܝܼ ܠܠܹܘܵܝܹ̈ܐ ܕܐܸܫܬ̇ܚܲܪܘ ܗܘ̤̈ܝ ܩܘܼܪ̈ܝܼܗܘܿܢ ܡ̣ܢ ܫܲܒ̣ܛܵܐ ܕܪܘܿܒܹܝܠ: ܝܵܗܵܨ ܘܐܵܓ̣ܘܼܪ̈ܣܹܝܗ̇: ܘܩܸܪܡܘܼܬ̣ ܘܐܵܓ̣ܘܼܪ̈ܣܹܝܗ̇.
35 ܘܩܲܪܝܲܬ̇ܝܼܡ ܘܐܵܓ̣ܘܼܪ̈ܣܹܝܗ̇: ܘܐܲܚܫܡܘܼܬ̣ ܘܐܵܓ̣ܘܼܪ̈ܣܹܝܗ̇: ܩܘܼܪ̈ܝܵܐ ܐܲܪܒܲܥ ܘܐܵܓ̣ܘܼܪ̈ܣܲܝܗܹܝܢ.
36 ܘܡ̣ܢ ܫܲܒ̣ܛܵܐ ܕܲܙܒ̣ܘܿܠܘܿܢ: ܢܵܟ݂ܵܚ ܘܐܵܓ̣ܘܼܪ̈ܣܹܝܗ̇: ܘܩܲܪܬ̣ܵܢ ܘܐܵܓ̣ܘܼܪ̈ܣܹܝܗ̇.
37 ܘܲܪܡܝܼܢ ܘܐܵܓ̣ܘܼܪ̈ܣܹܝܗ̇: ܘܝܲܗܠܵܐ ܘܐܵܓ̣ܘܼܪ̈ܣܹܝܗ̇: ܩܘܼܪ̈ܝܵܐ ܐܲܪܒܲܥ ܘܐܵܓ̣ܘܼܪ̈ܣܲܝܗܹܝܢ.
38 ܘܡ̣ܢ ܫܲܒ̣ܛܵܐ ܕܓܵܕܪ: ܩܪܝܼܬ̣ܵܐ ܕܫܘܼܘܙܒ̣ܵܐ ܕܩܵܛܘܿܠܹ̈ܐ: ܪܵܡܲܬ̣ ܓܸܠܥܵܕ݂ ܘܐܵܓ̣ܘܿܪ̈ܣܹܝܗ̇: ܘܡܲܚܢܝܼܡ ܘܐܵܓ̣ܘܼܪ̈ܣܹܝܗ̇.
39 ܘܚܸܫܒ̇ܘܿܢ ܘܐܵܓ̣ܘܼܪ̈ܣܹܝܗ̇: ܘܝܲܥܙܝܼܪ ܘܐܵܓ̣ܘܼܪ̈ܣܹܝܗ̇: ܩܘܼܪ̈ܝܵܐ ܐܲܪܒܲܥ ܘܐܵܓ̣ܘܼܪ̈ܣܲܝܗܹܝܢ.
40 ܗܵܠܹܝܢ ܩܘܼܪ̈ܝܵܐ ܕܲܒ̣̈ܢܲܝ ܡܪܵܪܝܼ ܠܫܲܪ̈ܒ̣ܵܬ̣ܗܘܿܢ: ܕܐܸܫܬ̇ܚܲܪܘ ܡ̣ܢ ܫܲܪܒ̇ܬ̣ܵܐ ܕܠܹܘܵܝܹ̈ܐ. ܘܲܣܠܩ ܒܦܲܨܲܬ̣ܗܘܿܢ: ܩܘܼܪ̈ܝܵܐ ܬܲܪܬܲܥܸܣܪܹ̈ܐ: ܘܐܵܓ̣ܘܼܪ̈ܣܲܝܗܹܝܢ.
41 ܘܟ݂ܠܗܹܝܢ ܩܘܼܪ̈ܝܵܐ ܗܵܠܹܝܢ ܕܠܹܘܵܝܹ̈ܐ: ܒܓ̣ܵܘ ܝܵܪܬ̇ܘܼܬ̣ܵܐ ܐܸܢܹܝܢ ܕܲܒ̣̈ܢܲܝ ܝܼܣܪܵܝܹܠ. ܘܲܗܘܲܝ̈ ܩܘܼܪ̈ܝܵܐ ܕܠܹܘܵܝܹ̈ܐ: ܐܲܪܒ̇ܥܝܼܢ ܘܲܬ̣ܡܵܢܹ̈ܐ ܘܐܲܓ̣ܘܼܪ̈ܣܲܝܗܹܝܢ.
42 ܝܵܬ̣̈ܒܵܢ ܗ̤ܘܲܝ̈ ܕܹܝܢ ܩܘܼܪ̈ܝܵܐ ܘܲܡܕ݂ܝܼ̈ܢܵܬ̣ܵܐ ܗܵܠܹܝܢ ܩܪܝܼܬ̣ܵܐ ܩܪܝܼܬ̣ܵܐ: ܘܐܵܓ̣ܘܼܪ̈ܣܲܝܗܹܝܢ ܚܕ݂ܝܼܪܝܼܢ ܠܗܹܝܢ: ܘܟ݂ܠܗܹܝܢ ܩܘܼܪ̈ܝܵܐ ܗܵܠܹܝܢ ܘܲܡܕ݂ܝܼ̈ܢܵܬ̣ܵܐ ܗܵܟܲܢܵܐ.
43 ܘܝܲܗ̄ܒ̣ ܡܵܪܝܵܐ ܠܝܼܣܪܵܝܹܠ ܟܠܵܗ̇ ܐܲܪܥܵܐ ܕܝܼܡ̣ܵܐ ܠܡܸܬܲܠ ܠܐܲܒ̣ܵܗܲܝ̈ܗܘܿܢ: ܘܝܲܪܬ̇ܘܼܗ̇ ܘܝܼܬܸܒ̣ܘ ܒܵܗ̇.
44 ܘܐܲܢܝܼܚ ܠܗܘܿܢ ܡܵܪܝܵܐ ܡ̣ܢ ܟܠܗܘܿܢ ܚܕ݂ܵܪ̈ܲܝܗܘܿܢ: ܐܲܝܟ݂ ܕܝܼܡ̣ܵܐ ܠܐܲܒ̣ܵܗܲܝ̈ܗܘܿܢ. ܘܐ̄ܢܵܫ ܡ̣ܢ ܒܥܸܠܕ̇ܒ̣ܵܒܲܝ̈ܗܘܿܢ ܠܵܐ ܩܵܡ̣ ܩܕ݂ܵܡܲܝܗܘܿܢ: ܐܸܠܵܐ ܐܲܫܠܸܡ ܐܸܢܘܿܢ ܡܵܪܝܵܐ ܠܟ݂ܠܗܘܿܢ ܒܥܸܠܕ̇ܒ̣ܵܒܲܝ̈ܗܘܿܢ ܒܐܝܼܕܲܝ̈ܗܘܿܢ.
45 ܘܠܵܐ ܒܸܛܠܸܬ̤ ܚܕ݂ܵܐ ܡ̣ܢ ܟܠܗܹܝܢ ܡܸܠܹ̈ܐ ܛܵܒ̣ܵـ̈ـܬ̣ܵܐ ܕܐܸܡܲܪ ܡܵܪܝܵܐ ܠܲܕ݂ܒܹܝܬ̣ ܝܼܣܪܵܝܹܠ: ܐܸܠܵܐ ܟܠܗܹܝܢ ܗ̤ܘܲܝ̈.
1 ܗܵܝܕܹ̇ܝܢ ܩ̣ܪܵܐ ܝܼܫܘܿܥ ܠܲܒ̣̈ܢܲܝ ܪܘܼܒܹܝܠ: ܘܠܲܒ̣̈ܢܲܝ ܓܵܕ݂: ܘܲܠܦܸܠܓܹܗ ܕܫܲܒ̣ܛܵܐ ܕܲܡܢܲܫܹܐ.
2 ܘܐܸܡܲܪ ܠܗܘܿܢ: ܐܲܢ̄ܬ̇ܘܿܢ ܢܛܲܪܬ̇ܘܿܢ ܟܠܡܸܕܸ̇ܡ ܕܐܸܡܲܪ ܠܟ݂ܘܿܢ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ ܘܲܫܡܲܥܬ̇ܘܿܢ ܒܩܵܠܝ ܠܟ݂ܠ ܡܸܕܸ̇ܡ ܕܦܲܩܸܕ̇ܬ̇ܟ݂ܘܿܢ.
3 ܘܠܵܐ ܫܒܲܩܬ̇ܘܿܢ ܠܐܲܚܲܝ̈ܟ̇ܘܿܢ: ܗܵܐ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ ܥܕܲܡܵܐ ܠܝܵܘܡܵܢܵܐ: ܘܲܢܛܲܪܬ̇ܘܿܢ ܦܘܼܩ̈ܕܵܢܵܘܗܝ ܕܡܵܪܝܵܐ ܐܲܠܵܗܟ݂ܘܿܢ.
4 ܘܗܵܫܵܐ ܗܵܐ ܐܲܢܝܼܚ ܡܵܪܝܵܐ ܐܲܠܵܗܟ݂ܘܿܢ ܠܐܲܚܲܝ̈ܟ̇ܘܿܢ ܐܲܝܟܲܢܵܐ ܕܐܸܡܲܪ ܠܗܘܿܢ ܡܸܟܸ̇ܝܠ ܐܸܬ̣ܦܢܵܘ ܘܙܸܠܘ ܠܩܘܼܪ̈ܝܼܟ݂ܘܼܢ: ܘܠܲܐܪܥܵܐ ܕܝܵܪܬ̇ܘܼܬ̣ܟ݂ܘܿܢ: ܕܝܲܗ̄ܒ̣ ܠܟ݂ܘܿܢ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ: ܒܥܸܒ̣ܪܵܐ ܕܝܘܿܪܕ̇ܢܵܢ ܡ̣ܢ ܡܲܕ݂ܢ̱ܚܵܐ.
5 ܒܲܠܚܘܿܕ݂ ܕܹܝܢ ܐܸܙܕܲܗ̄ܪܘ ܛܵܒ̣: ܘܲܥܒܸܕ݂ܘ ܦܘܼܩܕܵܢܹ̈ܐ ܘܢܵܡܘܿܣܹ̈ܐ ܕܦܲܩܸܕ݂ܟܘܿܢ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ: ܠܡܸܪܚܲܡ ܠܡܵܪܝܵܐ ܐܲܠܵܗܟ݂ܘܿܢ: ܘܲܠܡܸܛܲܪ ܦܘܼܩ̈ܕܵܢܵܘܗܝ: ܘܲܠܡܸܬ̣ܢܲܩܵܦܘܼ ܠܹܗ: ܘܲܠܡܸܦܠ̱ܚܹܗ: ܒܟ݂ܠܹܗ ܠܸܒ̇ܟ݂ܘܿܢ: ܘܲܒ̣ܟ݂ܠܵܗ̇ ܢܲܦ̮ܫܟ݂ܘܿܢ.
6 ܘܒܲܪܸܟ݂ ܐܸܢܘܿܢ ܝܼܫܘܿܥ: ܘܫܲܕܲܪ ܐܸܢܘܿܢ ܘܐܸܙܲܠ̣ܘ ܠܩܘܼܪ̈ܝܼܗܘܿܢ.
7 ܘܲܠܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܝܲܗ̄ܒ̣ ܡܘܼܫܹܐ ܒܡܲܬ̣ܢܝܼܢ. ܘܲܠܦܲܠܓܹ̇ܗ ܝܲܗ̄ܒ̣ ܝܼܫܘܿܥ ܥܲܡ ܐܲܚܲܝ̈ܗܘܿܢ: ܒܥܸܒ̣ܪܵܐ ܕܝܘܿܪܕ̇ܢܵܢ: ܡ̣ܢ ܡܲܥܪ̱ܒ̣ܵܐ. ܘܫܲܕܲܪ ܐܸܢܘܿܢ ܝܼܫܘܿܥ ܘܐܸܙܲܠ̣ܘ ܠܩܘܼܪ̈ܝܼܗܘܿܢ: ܘܒܲܪܸܟ݂ ܐܸܢܘܿܢ.
8 ܘܐܸܡܲܪ ܠܗܘܿܢ: ܒܢܸܟ݂ܣܹ̈ܐ ܣܲܓ̇ܝܼ̈ܐܹܐ ܗܦܘܿܟ݂ܘ ܠܩܘܼܪ̈ܝܼܟ݂ܘܿܢ: ܘܠܲܐܪܥܵܐ ܕܝܵܪܬ̇ܘܼܬ̣ܟ݂ܘܿܢ: ܘܲܒ̣ܩܸܢܝܵܢܵܐ ܕܛܵܒ̣ ܣܲܓ̇ܝܼ: ܒܣܹܐܡܵܐ: ܘܲܒ̣ܕܲܗܒ̣ܵܐ: ܘܒܲܢܚܵܫܵܐ: ܘܲܒ̣ܦܲܪܙܠܵܐ: ܘܲܒ̣ܢܲܚ̈ܬܹ̇ܐ ܕܣܲܓ̇ܝܼܐܝܼܢ ܛܵܒ̣. ܘܦܲܠܸܓ̣ܘ ܒܸܙܬ̣ܵܐ ܕܲܒ̣ܥܸܠܕ̇ܒ̣ܵܒܲܝ̈ܟ̇ܘܿܢ: ܥܲܡ ܐܲܚܲܝ̈ܟ̇ܘܿܢ.
9 ܘܲܗ̣ܦܲܟ݂ܘ ܘܐܸܙܲܠܘ ܒ̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܡ̣ܢ ܠܘܵܬ̣ ܒ̈ܢܲܝ ܝܼܣܪܵܝܹܠ: ܡ̣ܢ ܫܝܼܠܘܿ ܕܒܲܐܪܥܵܐ ܕܲܟ݂ܢܲܥܢ: ܠܡܹܐܙܲܠ ܠܐܲܪܥܵܐ ܕܓܸܠܥܵܕ݂: ܠܐܲܪܥܵܐ ܕܝܵܪܬ̇ܘܼܬ̣ܗܘܿܢ ܕܝܼܪܸܬ̣ܘ ܒܵܗ̇: ܥܲܠ ܡܸܠܲܬ̣ ܦܘܼܡܹܗ ܕܡܵܪܝܵܐ ܒܐܝܼܕ݂ܵܐ ܕܡܘܼܫܹܐ.
10 ܘܐܸܬ̣ܵܘ ܠܓܲܠܓܵܠܵܐ ܕܥܲܠ ܓܹܢ̄ܒ̣ ܝܘܿܪܕ̇ܢܵܢ ܕܒܲܐܪܥܵܐ ܕܲܟ݂ܢܲܥܢ. ܘܲܒ̣ܢܵܘ ܬܲܡܵܢ ܒ̈ܢܲܝ ܪܘܼܒܹܝܠ ܘܲܒ̣̈ܢܲܝ ܓܵܕ݂ ܘܦܲܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܡܲܕ݂ܒ̇ܚܵܐ ܥܲܠ ܓܸܢ̄ܒ̣ ܝܘܿܪܕ̇ܢܵܢ: ܡܲܕ݂ܒ̇ܚܵܐ ܪܲܒܵܐ ܕܚܸܙܘܵܐ.
11 ܘܲܫ̣ܡܲܥܘ ܒ̈ܢܲܝ ܝܼܣܪܵܝܹܠ ܕܲܒ̣̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܒܢ̣ܵܘ ܡܲܕ݂ܒ̇ܚܵܐ ܠܘܼܩܒܲܠ ܐܲܪܥܵܐ ܕܲܟ݂ܢܲܥܢ: ܒܓܲܠܓܵܠܵܐ ܕܥܲܠ ܓܹܢ̄ܒ̣ ܝܘܿܪܕ̇ܢܵܢ ܒܐܲܪܥܵܐ ܕܲܒ̣̈ܢܲܝ ܝܼܣܪܵܝܹܠ.
12 ܘܐܸܬ̣ܟܲܢܲܫܘ ܟܠܵܗ̇ ܟܢܘܼܫܬܵܐ ܕܲܒ̣̈ܢܲܝ ܝܼܣܪܵܝܹܠ ܠܫܝܼܠܘܿ: ܠܡܸܣܲܩ ܥܠܲܝܗܘܿܢ ܠܲܩܪܵܒ̣ܵܐ.
13 ܘܫܲܕܲܪܘ ܒ̈ܢܲܝ ܝܼܣܪܵܝܹܠ ܠܘܵܬ̣ ܒ̈ܢܲܝ ܪܘܼܒܹܝܠ: ܘܲܠܘܵܬ̣ ܒ̈ܢܲܝ ܓܵܕ݂: ܘܲܠܘܵܬ̣ ܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ ܠܐܲܪܥܵܐ ܕܓܸܠܥܵܕ݂: ܠܦܝܼܢܚܸܣ ܒܲܪ ܐܹܠܝܼܥܵܙܲܪ ܟܵܗܢܵܐ.
14 ܘܥܸܣܪܵܐ ܪܵܘ̱ܪ̈ܒ̣ܵܢܝܼܢ ܥܲܡܹܗ: ܚܲܕ݂ ܚܲܕ݂ ܪܲܒܵܐ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ. ܘܗܸܢܘܿܢ ܓܲܒ̣ܪܹ̈ܐ ܗܵܠܹܝܢ: ܪܹ̈ܫܹܐ ܗ̄ܘ̣ܵܘ ܕܚܲܝ̈ܠܵܘܵܬ̣ܵܐ ܕܝܼܣܪܵܝܹܠ.
15 ܘܐܸܬ̣ܵܘ ܠܘܵܬ̣ ܒ̈ܢܲܝ ܪܘܼܒܹܝܠ: ܘܲܠܘܵܬ̣ ܒ̈ܢܲܝ ܓܵܕ݂: ܘܲܠܘܵܬ̣ ܦܸܠܓܹܗ ܕܫܲܒ̣ܛܵܐ ܕܲܡܢܲܫܹܐ ܠܐܲܪܥܵܐ ܕܓܸܠܥܵܕ݂: ܘܡܲܠܸܠ̣ܘ ܥܲܡܗܘܿܢ: ܘܐܸܡܲܪܘ ܠܗܘܿܢ.
16 ܗܵܟܲܢܵܐ ܐܵܡ̇ܪܝܼܢ ܟܠܵܗ̇ ܟܢܘܼܫܬܵܐ ܕܡܵܪܝܵܐ: ܡܵܢܲܐ ܗ̄ܝ ܟܲܕܵܒ̣ܘܼܬ̣ܵܐ ܗܵܕܹܐ ܕܟܲܕܸ̇ܒ̣ܬ̇ܘܿܢ ܒܐܲܠܵܗܵܐ ܕܝܼܣܪܵܝܹܠ: ܘܲܗܦܲܟ݂ܬ̇ܘܿܢ ܡ̣ܢ ܒܵܬ̣ܪܹܗ ܕܡܵܪܝܵܐ: ܘܲܒ̣ܢܲܝܬ̇ܘܿܢ ܠܟ݂ܘܿܢ ܡܲܕ݂ܒ̇ܚܵܐ ܕܬܸܦ̱ܪܩܘܼܢ ܡ̣ܢ ܕܸܚ̱ܠܬܹܗ ܕܡܵܪܝܵܐ.
17 ܠܵܐ ܟܲܕ̇ܘܼ ܠܲܢ ܚܛܝܼܬ̣ܵܐ ܕܲܦܥܘܿܪ: ܕܠܵܐ ܐܸܬ̇ܕܲܟ̇ܝܼܢ ܡܸܢܵܗ̇ ܥܕܲܡܵܐ ܠܝܵܘܡܵܢܵܐ: ܘܲܗܘ̤ܵܐ ܡܵܘܬܵܢܵܐ ܒܲܟ݂ܢܘܼܫܬܹ̇ܗ ܕܡܵܪܝܵܐ.
18 ܘܐܲܢ̄ܬ̇ܘܿܢ ܡܵܐ ܕܲܗ̣ܦܲܟ݂ܬ̇ܘܿܢ ܝܵܘܡܵܢܵܐ ܡ̣ܢ ܕܸܚ̱ܠܬܹܗ ܕܡܵܪܝܵܐ: ܡ̣ܢ ܡܚܵܪ ܥܲܠ ܟܠܵܗ̇ ܗ̄ܘ̣ ܟܢܘܼܫܬܵܐ ܕܝܼܣܪܵܝܹܠ ܗܵܘܹ̇ܐ ܪܘܼܓ̣ܙܵܐ.
19 ܒܪܲܡ ܕܹܝܢ ܐܸܢ ܡܛܵܘܫܵܐ ܗ̄ܝ̣ ܐܲܪܥܵܐ ܕܝܵܪܬ̇ܘܼܬ̣ܟ݂ܘܿܢ: ܥܒܲܪܘ ܠܟ݂ܘܿܢ ܠܐܲܪܥܵܐ ܕܝܵܪܬ̇ܘܼܬܹܗ ܕܡܵܪܝܵܐ: ܐܲܝܟܵܐ ܕܲܫܪܸܐ ܡܲܫܟ̇ܢܹܗ ܕܡܵܪܝܵܐ: ܘܝܼܪܲܬ̣ܘ ܥܲܡܲܢ: ܘܲܒ̣ܕܸܚ̱ܠܬܹܗ ܕܡܵܪܝܵܐ ܠܵܐ ܬܸܒ̣ܣܘܿܢ: ܘܲܥܠܲܝܢ ܠܵܐ ܬܸܡ̱ܪܕ݂ܘܼܢ: ܡܸܛܠ ܕܲܒ̣ܢܲܝܬ̇ܘܿܢ ܠܟ݂ܘܿܢ ܡܲܕ݂ܒ̇ܚܵܐ ܠܒܲܪ ܡ̣ܢ ܡܲܕ݂ܒ̇ܚܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.
20 ܠܵܐ ܚ̣ܙܲܝܬ̇ܘܿܢ ܕܥܵܟ݂ܵܪ ܒܲܪ ܟܲܪܡܝܼ ܪܕܲܓ̣ ܗ̄ܘ̣ܵܐ ܘܲܢܣܲܒ̣ ܡ̣ܢ ܚܸܪܡܵܐ: ܘܥܲܠ ܟܠܵܗ̇ ܗ̄ܘ̣ ܟܢܘܼܫܬܵܐ ܕܝܼܣܪܵܝܹܠ ܗܘ̤ܵܐ ܪܘܼܓ̣ܙܵܐ: ܘܗ̤ܘ ܚܕ݂ ܗ̄ܘ̣ܵܐ ܓܒܲܪ: ܘܟ݂ܠܲܢ ܒܠܲܥ̄ܢ ܒܲܚܛܝܼܬܹܗ.
21 ܘܲܥܢ̣ܵܘ ܒ̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ: ܘܡܲܠܸܠ̣ܘ ܥܲܡ ܦܝܼܢܚܸܣ ܒܲܪ ܐܹܠܝܼܥܵܙܲܪ ܟܵܗܢܵܐ: ܘܥܲܡ ܪܹ̈ܫܹܐ ܕܚܲܝ̈ܠܵܘܵܬ̣ܵܐ ܕܝܼܣܪܵܝܹܠ: ܘܐܸܡܲܪܘ ܠܗܘܿܢ.
22 ܡܵܪܝܵܐ ܗ̄ܘ̣ ܐܲܠܵܗܵܐ ܕܐܲܠܵܗܹ̈ܐ: ܐܲܠܵܗ̇ ܐܲܠܵܗܹ̈ܝܢ ܡܵܪܝܵܐ ܗ̄ܘ̣: ܘܗ̤ܘܝܘܼ ܐܲܠܵܗܲܢ: ܘܠܝܼܣܪܵܝܹܠ ܗ̤ܘ ܝܵܕܲܥ: ܘܠܲܢ ܗ̤ܘ ܝܵܕܲܥ. ܐܸܢ ܕܢܸܦܪܘܿܩ ܡܸܢܹܗ ܘܐܸܢ ܕܢܲܥܠܹܐ ܗ̄ܘ̣ ܒܕܸܚ̱ܠܬܹܗ ܕܡܵܪܝܵܐ ܥܒܲܕ̄ܢ ܗܵܟܲܢܵܐ: ܠܵܐ ܢܸܦ̱ܪܩܲܢ ܝܵܘܡܵܢܵܐ.
23 ܐܸܢ ܒܢܲܝܢ ܠܲܢ ܡܲܕ݂ܒ̇ܚܵܐ ܕܢܸܗܦܘܿܟ݂ ܡ̣ܢ ܕܸܚ̱ܠܬܹܗ ܕܡܵܪܝܵܐ: ܐܵܘ ܕܲܢܩܲܪܸܒ̣ ܥܠܵܘܗܝ ܕܸܒ̣̈ܚܵܬ̣ܵܐ: ܐܵܘ ܦܘܼܠܚܵܢ ܐ̄ܚܪܹܝܢ: ܡܵܪܝܵܐ ܢܸܬ̣ܒܲܥ ܒܐܝܼܕܲܢ.
24 ܐܸܢ ܠܵܐ ܗ̄ܘ̣ܵܐ ܡ̣ܢ ܕܸܚ̱ܠܬܹܗ ܥܒܲܕ݂ܢܵܗ̇ ܗܵܕܹܐ: ܘܲܕ݂ܠܵܐ ܢܹܐܡܪܘܿܢ ܡ̣ܢ ܡܚܵܪ ܒܢܲܝ̈ܟ̇ܘܿܢ ܠܲܒ̣̈ܢܲܝܢ: ܡܵܢܵܐ ܐܝܼܬ̣ ܠܟ݂ܘܿܢ ܠܘܵܬ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܒ̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂.
25 ܕܗܵܐ ܬܚܘܼܡܵܐ ܝܲܗ̄ܒ̣ ܡܵܪܝܵܐ ܒܲܝܢܲܝܢ ܘܲܠܟ݂ܘܿܢ ܝܘܿܪܕ̇ܢܵܢ ܗܵܢܵܐ. ܡܸܟܸ̇ܝܠ ܠܲܝܬ̇ ܠܟ݂ܘܿܢ ܡܢܵܬ̣ܵܐ ܒܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܘܲܢܒܲܛܠܘܼܢ ܒܢܲܝ̈ܟ̇ܘܿܢ ܡ̣ܢ ܡܚܵܪ ܠܲܒ̣̈ܢܲܝܢ ܕܠܵܐ ܢܸܕ݂ܚ̄ܠܘܼܢ ܠܡܵܪܝܵܐ.
26 ܡܸܛܠ ܗܵܢܵܐ ܗ̄ܘ̣ ܐܸܡܲܪ̄ܢ ܕܢܸܥܒܸ̇ܕ݂ ܠܲܢ ܡܲܕ݂ܒ̇ܚܵܐ: ܠܵܐ ܠܕܸܒ̣ܚܬ̣ܵܐ: ܘܠܵܐ ܠܩܘܼܪܒܵܢܵܐ.
27 ܐܸܠܵܐ ܠܣܵܗܕ̇ܘܼܬ̣ܵܐ ܒܲܝܢܲܝܢ ܘܲܠܟ݂ܘܿܢ: ܘܒܹܝܬ̣ ܕܪ̈ܲܝܢ ܡ̣ܢ ܒܵܬ̣ܪܲܢ. ܘܲܚܢܲܢ ܘܕܵܪ̈ܲܝܢ ܡ̣ܢ ܒܵܬ̣ܪܲܢ: ܦܘܼܠܚܵܢܹܗ ܗ̄ܘ̣ ܕܡܵܪܝܵܐ ܦܵܠܚܝܼܢܲܢ ܩܕ݂ܵܡܵܘܗܝ ܒܲܥ̈ܠܵܘܵܬܲܢ: ܘܲܒ̣ܕܸܒ̣ܚܲܝ̈ܢ: ܘܲܒ̣ܩܘܼܪ̈ܒܢܲܝܢ ܒܐܲܬ̣ܪܵܐ ܕܓ̣ܵܒܹܐ ܡܵܪܝܵܐ ܠܡܲܫܪܵܝܘܼ ܫܡܹܗ ܬܲܡܵܢ: ܘܲܕ݂ܠܵܐ ܢܹܐܡܪܘܿܢ ܒܢܲܝ̈ܟ̇ܘܿܢ ܡ̣ܢ ܡܚܵܪ ܠܲܒ̣̈ܢܲܝܢ: ܠܲܝܬ̇ ܠܟ݂ܘܿܢ ܡܢܵܬ̣ܵܐ ܒܡܵܪܝܵܐ.
28 ܘܐܸܡܲܪ̄ܢ: ܡܵܐ ܕܐܸܡܲܪܘ ܠܲܢ: ܘܲܠܕ݂ܵܪ̈ܲܝܢ ܡ̣ܢ ܡܚܵܪ: ܢܹܐܡܪܘܼܢ ܠܗܘܿܢ: ܚܙܵܘ ܕܡܘܼܬ̣ܵܐ ܕܡܲܕ݂ܒ̇ܚܹܗ ܕܡܵܪܝܵܐ ܕܲܥܒܲܕ݂ܘ ܐܲܒ̣ܵܗܲܝ̈ܢ: ܠܵܐ ܠܝܲܩܕܵܐ ܫܲܠܡܵܐ: ܘܠܵܐ ܠܕܸܒ̣ܚܬ̣ܵܐ: ܐܸܠܵܐ ܕܢܸܗܘܹܐ ܣܵܗܕܵܐ ܒܲܝܢܲܝܢ ܘܲܠܟ݂ܘܿܢ.
29 ܚܵܣ ܠܲܢ ܕܢܲܣܠܸܐ ܕܸܚ̱ܠܬܹܗ ܕܡܵܪܝܵܐ: ܘܢܸܗܦܘܿܟ݂ ܡ̣ܢ ܕܸܚ̱ܠܬܹܗ ܕܐܲܠܵܗܵܐ: ܘܢܸܒ̣ܢܸܐ ܠܲܢ ܡܲܕ݂ܒ̇ܚܵܐ ܠܝܲܩܕܵܐ ܫܲܠܡܵܐ: ܘܲܠܩܘܼܪܒܵܢܵܐ: ܘܲܠܕܸܒ̣ܚܬ̣ܵܐ: ܠܒܲܪ ܡ̣ܢ ܡܲܕ݂ܒ̇ܚܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܕܐܝܼܬ̣ ܩܕ݂ܵܡ ܡܲܫܟ̇ܢܹܗ.
30 ܘܲܫ̣ܡܲܥ ܦܝܼܢܚܸܣ ܒܲܪ ܐܸܠܝܼܥܵܙܲܪ ܟܵܗܢܵܐ: ܘܪܵܘ̱ܪ̈ܒ̣ܵܢܹܐ ܕܲܟ݂ܢܘܼܫܬܵܐ: ܪܹ̈ܫܹܐ ܕܚܲܝ̈ܠܵܘܵܬ̣ܵܐ ܕܝܼܣܪܵܝܹܠ ܕܥܲܡܹܗ: ܡܸܠܹ̈ܐ ܕܡܲܠܸܠ̣ܘ ܒ̈ܢܲܝ ܪܘܼܒܹܝܠ: ܕܲܒ̣ܢ̈ܝ ܓܵܕ݂: ܘܦܸܠܓܹ̇ܗ ܕܫܲܒ̣̈ܛܵܐ ܕܲܡܢܲܫܹܐ: ܘܲܫܦܲܪ ܒܥܲܝܢܲܝ̈ܗܘܿܢ.
31 ܘܐܸܡܲܪ ܦܝܼܢܚܸܣ ܒܲܪ ܐܸܠܝܼܥܵܙܲܪ ܟܵܗܢܵܐ: ܠܲܒ̣̈ܢܲܝ ܪܘܼܒܹܝܠ: ܘܠܲܒ̣̈ܢܲܝ ܓܵܕ݂: ܘܠܲܒ̣̈ܢܲܝ ܡܢܲܫܹܐ: ܝܵܘܡܵܢܵܐ ܝܼܕܲܥ̄ܢ ܕܒܲܝܢܵܬܲܢ ܗ̄ܘ̣ ܡܵܪܝܵܐ: ܕܠܵܐ ܕܲܓܸܠܬ̇ܘܿܢ ܒܡܵܪܝܵܐ ܕܲܓܵܠܘܼܬ̣ܵܐ ܗܵܕܹܐ: ܡܸܟܹ̇ܝܠ ܐܲܢ̄ܬ̇ܘܿܢ ܦܲܨܝܼܬ̇ܘܿܢ ܠܲܒ̣̈ܢܲܝ ܝܼܣܪܵܝܹܠ: ܕܠܵܐ ܬܸܗܘܹܐ ܒܗܘܿܢ ܐܝܼܕܹܗ ܕܡܵܪܝܵܐ ܠܪܘܼܓ̣ܙܵܐ.
32 ܘܲܗ̣ܦܲܟ݂ ܦܝܼܢܚܸܣ ܒܲܪ ܐܹܠܝܼܥܵܙܲܪ ܟܵܗܢܵܐ ܘܪܵܘ̱ܪ̈ܒ̣ܵܢܹܐ ܕܥܲܡܹܗ: ܡ̣ܢ ܠܘܵܬ̣ ܒ̈ܢܲܝ ܪܘܼܒܹܝܠ: ܘܡ̣ܢ ܠܘܵܬ̣ ܒ̈ܢܲܝ ܓܵܕ݂: ܘܲܡܢܲܫܹܐ ܡ̣ܢ ܐܲܪܥܵܐ ܕܓܸܠܥܵܕ݂: ܠܐܲܪܥܵܐ ܕܲܟ݂ܢܲܥܢ: ܠܘܵܬ̣ ܒ̈ܢܲܝ ܝܼܣܪܵܝܹܠ: ܘܐܲܬ̣ܝܼܒ̣ܘ ܐܸܢܘܿܢ ܦܸܬ̣ܓ̣ܵܡܵܐ.
33 ܘܲܫܦܲܪ ܦܸܬ̣ܓ̣ܵܡܵܐ ܒܥܲܝ̈ܢܲܝ ܒ̈ܢܲܝ ܝܼܣܪܵܝܹܠ: ܘܒܲܪܸܟ݂ܘ ܒ̈ܢܲܝ ܝܼܣܪܵܝܹܠ ܠܐܲܠܵܗܵܐ: ܘܠܵܐ ܐܸܡܲܪܘ ܕܢܸܣܩܘܼܢ ܥܠܲܝܗܘܿܢ ܠܲܩܪܵܒ̣ܵܐ ܠܡܲܚܪܵܒ̣ܘܼܬ̣ܵܗ̇ ܠܐܲܪܥܵܐ ܕܲܒ̣̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܲܒ̣̈ܢܲܝ ܡܢܲܫܹܐ ܝܵܬ̣ܒ̇ܝܼܢ ܒܵܗ̇.
34 ܘܲܩܪܵܘ ܒ̈ܢܲܝ ܪܘܼܒܹܝܠ: ܘܲܒ̣̈ܢܲܝ ܓܵܕ݂: ܘܲܒ̣̈ܢܲܝ ܡܢܲܫܹܐ ܠܡܲܕ݂ܒ̇ܚܵܐ ܕܲܥܒܲܕ݂ܘ: ܡܲܕ݂ܒ̇ܚܵܐ ܕܣܵܗܕ̇ܘܼܬ̣ܵܐ: ܡܸܛܠ ܕܣܵܗܕ̇ܘܼܬ̣ܵܐ ܗ̄ܘ̣ ܒܲܝܢܵܬ̣ܗܘܿܢ: ܘܡܵܪܝܵܐ ܗ̄ܘ̣ ܒܲܠܚܘܿܕ݂ ܐܲܠܵܗܵܐ.
1 ܘܡ̣ܢ ܒܵܬܲܪ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ: ܐܲܢܝܼܚ ܡܵܪܝܵܐ ܠܝܼܣܪܵܝܹܠ ܡ̣ܢ ܟܠܗܘܿܢ ܒܥܸܠܕ̇ܒ̣ܵܒܲܝ̈ܗܘܿܢ ܕܲܟ݂ܪܝܼܟ݂ܝܼܢ ܠܗܘܿܢ. ܘܝܼܫܘܿܥ ܩܲܫ ܘܥܲܠ ܒܲܫܢܲـ̈ـܝܵܐ.
2 ܘܲܩ̣ܪܵܐ ܝܼܫܘܿܥ ܠܟ݂ܠܹܗ ܝܼܣܪܵܝܹܠ: ܠܩܲܫܝܼܫܵܘ̈ܗܝ ܘܲܠܪܹ̈ܫܵܘ̈ܗܝ ܘܲܠܕܲܝܵܢܵܘ̈ܗܝ: ܘܲܠܣܵܦܪ̈ܵܘܗܝ: ܘܐܸܡܲܪ ܠܗܘܿܢ: ܐܸܢܵܐ ܣܸܐܒܹ̇ܬ̣ ܘܥܸܠܹ̇ܬ̣ ܒܲܫܢܲܝܵܐ.
3 ܘܐܲܢ̄ܬ̇ܘܿܢ ܚܙܲܝܬ̇ܘܿܢ ܟܠ ܕܲܥ̣ܒܲܕ݂ ܡܵܪܝܵܐ ܐܲܠܵܗܟ݂ܘܿܢ ܠܟ݂ܠܗܘܿܢ ܥܲܡܡܹ̈ܐ ܗܵܠܹܝܢ: ܘܐܵܘܒܸ̇ܕ݂ ܐܸܢܘܿܢ ܡ̣ܢ ܩܕ݂ܵܡܲܝܟ̇ܘܿܢ: ܘܡܵܪܝܵܐ ܐܲܠܵܗܟ݂ܘܿܢ ܗ̤ܘܝܘܼ ܥܵܒܹ̇ܕ݂ ܩܪܵܒ̣ܟ݂ܘܿܢ.
4 ܚܙܵܘ ܕܹܝܢ ܕܠܵܐ ܦܲܠܓܹ̇ܬ̣ ܠܟ݂ܘܿܢ ܥܲܡܡܹ̈ܐ ܗܵܠܹܝܢ ܕܐܸܫܬ̇ܚܲܪܘ ܒܝܵܪܬ̇ܘܼܬ̣ܵܐ ܕܫܲܒ̣̈ܛܲܝܟ̇ܘܿܢ: ܡ̣ܢ ܝܘܿܪܕ̇ܢܵܢ ܘܟ݂ܠܗܘܿܢ ܥܲܡܡܹ̈ܐ ܕܚܸܪܒܹ̇ܬ̣: ܘܝܲܡܵܐ ܪܲܒܵܐ ܒܡܲܥܪ̈ܵܒܲܝ ܫܸܡܫܵܐ ܦܲܠܓܹ̇ܬ̣ ܠܟ݂ܘܿܢ.
5 ܡܵܪܝܵܐ ܐܲܠܵܗܟ݂ܘܿܢ ܗ̤ܘ ܢܸܬ̣ܒܲܪ ܐܸܢܘܿܢ: ܘܢܸܚܪܘܿܒ̣ ܐܸܢܘܿܢ ܡ̣ܢ ܩܕ݂ܵܡܲܝܟ̇ܘܿܢ: ܘܬܹܐܪܬ̇ܘܿܢ ܐܲܪܥ̱ܗܘܿܢ: ܐܲܝܟ݂ ܕܐܸܡܲܪ ܠܟ݂ܘܿܢ ܡܵܪܝܵܐ ܐܲܠܵܗܟ݂ܘܿܢ.
6 ܒܲܠܚܘܿܕ݂ ܐܸܬ̣ܚܲܝܲܠܘ ܛܵܒ̣: ܘܛܲܪܘ ܘܲܥܒܸܕ݂ ܟܠ ܕܲܟ݂ܬ̣ܝܼܒ̣ ܒܣܸܦܪܵܐ ܕܢܵܡܘܿܣܵܐ ܕܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ: ܘܠܵܐ ܬܸܣܛܘܿܢ ܡܸܢܹܗ ܠܵܐ ܠܝܲܡܝܼܢܵܐ ܘܠܵܐ ܠܣܸܡܵܠܵܐ.
7 ܘܠܵܐ ܬܸܬ̣ܚܲܠܛܘܼܢ ܒܥܲܡܡܹ̈ܐ ܗܵܠܹܝܢ ܕܐܸܫܬ̇ܚܲܪܘ ܒܲܝܢܵܬ̣ܟ݂ܘܿܢ: ܘܲܫܡܵܐ ܕܐܲܠܵܗܲܝ̈ܗܘܿܢ ܠܵܐ ܬܸܬ̇ܕܲܟ݂ܪܘܿܢ: ܘܠܵܐ ܬܹܐܡܪܘܿܢ ܒܗܘܿܢ: ܘܠܵܐ ܬܸܦܠ̱ܚܘܼܢ ܐܸܢܘܿܢ: ܘܠܵܐ ܬܸܣܓ̇ܕ݂ܘܼܢ ܠܗܘܿܢ.
8 ܐܸܠܵܐ ܠܡܵܪܝܵܐ ܐܲܠܵܗܟ݂ܘܿܢ ܐܸܬ̣ܢܲܩܲܦܘ: ܐܲܝܟܲܢܵܐ ܕܲܥ̣ܒܲܕ̇ܬ̇ܘܿܢ ܥܕܲܡܵܐ ܠܝܵܘܡܵܢܵܐ.
9 ܘܲܚܪܲܒ̣ ܡܵܪܝܵܐ ܡ̣ܢ ܩܕ݂ܵܡܲܝܟ̇ܘܿܢ ܥܲܡܡܹ̈ܐ ܪܵܘ̱ܪ̈ܒܹܐ ܘܥܲܫܝܼܢܹ̈ܐ: ܘܐ̄ܢܵܫ ܠܵܐ ܩܵܡ̣ ܠܘܼܩܒܲܠܟ݂ܘܿܢ ܥܕܲܡܵܐ ܠܝܵܘܡܵܢܵܐ.
10 ܓܲܒ̣ܪܵܐ ܚܲܕ݂ ܡܸܢܟ݂ܘܿܢ: ܢܸܪܕ̇ܘܿܦ ܠܐܲܠܦܵܐ ܡܸܛܠ ܕܡܵܪܝܵܐ ܐܲܠܵܗܟ݂ܘܿܢ ܥܲܡܟ݂ܘܿܢ: ܘܗ̤ܘ ܥܵܒܹܕ݂ ܩܪܵܒ̣ܟ݂ܘܿܢ ܐܲܝܟܲܢܵܐ ܕܐܸܡܲܪ ܠܟ݂ܘܿܢ.
11 ܐܸܙܕܲܗ̄ܪܘ ܛܵܒ̣ ܒܢܲܦ̮ܫܟ݂ܘܿܢ ܠܡܸܕ݂ܚܲܠ ܠܡܵܪܝܵܐ ܐܲܠܵܗܟ݂ܘܿܢ.
12 ܐܸܢ ܕܹܝܢ ܬܸܗܦܟ݂ܘܿܢ ܘܬܸܬ̣ܢܲܩܦܘܼܢ ܒܫܲܪܟܵܐ ܕܗܵܠܹܝܢ ܥܲܡܡܹ̈ܐ ܕܐܸܫܬ̇ܚܲܪܘ ܒܲܝܢܵܬ̣ܟ݂ܘܿܢ: ܘܬܸܗܘܘܿܢ ܠܗܘܿܢ ܚܲܬ̣ܢܹ̈ܐ: ܘܬܸܬ̣ܚܲܠܛܘܼܢ ܒܗܘܿܢ ܘܗܸܢܘܿܢ ܒܟ݂ܘܿܢ.
13 ܗ̤ܘܲܝܬ̇ܘܿܢ ܝܵܕ݂ܥܝܼܢ: ܕܬ̣ܘܼܒ̣ ܠܵܐ ܡܵܘܣܸܦ ܡܵܪܝܵܐ ܐܲܠܵܗܟ݂ܘܿܢ ܠܡܸܚܪܲܒ̣ ܠܗܵܠܹܝܢ ܥܲܡܡܹ̈ܐ ܡ̣ܢ ܩܕ݂ܵܡܲܝܟ̇ܘܿܢ: ܘܢܸܗܘܘܿܢ ܠܟ݂ܘܿܢ ܠܦܲܚܹ̈ܐ ܘܲܠܬ̣ܘܼܩ̈ܠܵܬ̣ܵܐ: ܘܠܘܼܠ̈ܝܵܬ̣ܵܐ ܒܨܸܕ݂ܥܲܝ̈ܟ̇ܘܿܢ: ܘܨܸܢܵܪ̈ܝܵܬ̣ܵܐ ܒܥܲܝ̈ܢܲܝܟ̇ܘܿܢ: ܥܕܲܡܵܐ ܕܬܹܐܒ̣ܕ̇ܘܿܢ ܡ̣ܢ ܐܲܪܥܵܐ ܛܵܒ̣ܬ̣ܵܐ ܕܝܲܗ̄ܒ̣ ܠܟ݂ܘܿܢ ܡܵܪܝܵܐ ܐܲܠܵܗܟ݂ܘܿܢ.
14 ܐܸܢܵܐ ܕܹܝܢ ܗܵܐ ܐܵܙܹ̇ܠ ܐ̄ܢܵܐ ܒܐܘܼܪܚܵܐ ܕܟ݂ܠܵܗ̇ ܐܲܪܥܵܐ. ܐܲܢ̄ܬ̇ܘܿܢ ܕܹܝܢ ܝܵܕ݂ܥܝܼܢ ܐ̄ܢܬ̇ܘܿܢ ܒܟ݂ܠܹܗ ܠܸܒ̇ܟ݂ܘܿܢ ܘܲܒ̣ܟ݂ܠܵܗ̇ ܢܲܦ̮ܫܟ݂ܘܿܢ: ܕܠܵܐ ܒܸܛܠܲܬ̤ ܡܸܠܬ̣ܵܐ ܚܕ݂ܵܐ ܡ̣ܢ ܟܠܗܹܝܢ ܡܸܠܹ̈ܐ ܛܵܒ̣ܵـ̈ـܬ̣ܵܐ ܕܐܸܡܲܪ ܡܵܪܝܵܐ ܐܲܠܵܗܟ݂ܘܿܢ ܥܠܲܝܟ̇ܘܿܢ. ܐܸܠܵܐ ܟܠܗܹܝܢ ܐܸܬܲܝ̈ ܥܠܲܝܟ̇ܘܿܢ: ܘܠܵܐ ܒܸܛܠܲܬ̤ ܡܸܠܬ̣ܵܐ ܚܕ݂ܵܐ.
15 ܘܐܲܝܟܲܢܵܐ ܕܹܝܢ ܕܐܸܬܲܝ̈ ܥܠܲܝܟ̇ܘܿܢ ܟܠܗܹܝܢ ܡܸܠܹ̈ܐ ܛܵܒ̣ܵـ̈ـܬ̣ܵܐ ܕܐܸܡܲܪ ܠܟܘܿܢ ܡܵܪܝܵܐ ܐܲܠܵܗܟ݂ܘܿܢ: ܗܵܟܲܢܵܐ ܢܹܐܬ̣̈ܝܵܢ ܥܠܲܝܟ̇ܘܿܢ ܟܠܗܹܝܢ ܠܵܘ̈ܛܵܬ̣ܵܐ: ܥܕܲܡܵܐ ܕܢܵܘܒܸ̇ܕ݂ܟ݂ܘܿܢ ܡ̣ܢ ܐܲܪܥܵܐ ܗܵܕܹܐ ܛܵܒ̣ܬ̣ܵܐ ܕܝܲܗ̄ܒ̣ ܠܟ݂ܘܿܢ.
16 ܐܸܢ ܬܸܥܒ̇ܪܘܼܢ ܥܲܠ ܕܝܵܬܹܩܹܐ ܕܡܵܪܝܵܐ ܐܲܠܵܗܟ݂ܘܿܢ: ܘܥܲܠ ܦܘܼܩ̈ܕܵܢܹܐ ܕܐܸܬ̣ܦܲܩܲܕ̇ܬ̇ܘܿܢ: ܘܬܹܐܙܠ̄ܘܼܢ ܘܬܸܦ̱ܠܚܘܼܢ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܘܬܸܣܓ̇ܕ݂ܘܼܢ ܠܗܘܿܢ: ܢܸܬ̣ܚܲܡܲܬ̣ ܪܘܼܓ̣ܙܹܗ ܕܡܵܪܝܵܐ ܐܲܠܵܗܟ݂ܘܿܢ ܥܠܲܝܟ̇ܘܿܢ: ܘܬܹܐܒ̣ܕ̇ܘܿܢ ܒܲܥܓܲܠ ܡ̣ܢ ܐܲܪܥܵܐ ܛܵܒ̣ܬ̣ܵܐ ܕܝܲܗ̄ܒ̣ ܠܟ݂ܘܿܢ.
1 ܘܟܲܢܸܫ ܝܼܫܘܿܥ ܠܟ݂ܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ ܠܲܫܟܹܝܡ: ܘܲܩܪܵܐ ܠܩܲܫ̈ܝܼܫܹܐ ܕܝܼܣܪܵܝܹܠ: ܘܲܠܪܹ̈ܫܵܢܲܝܗܘܿܢ ܘܲܠܕܲܝܵܢܲܝ̈ܗܘܿܢ: ܘܲܠܣܵܦܪ̈ܲܝܗܘܿܢ: ܘܩܵܡ̣ܘ ܩܕ݂ܵܡ ܡܲܫܟܲܢ ܙܲܒ̣ܢܵܐ ܩܕ݂ܵܡ ܐܲܠܵܗܵܐ.
2 ܘܐܸܡܲܪ ܝܼܫܘܿܥ ܠܟ݂ܠܹܗ ܥܲܡܵܐ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܒܥܸܒ̣ܪܵܐ ܕܢܲܗܪܵܐ ܝܸܬ̣ܒ̣ܘ ܗ̄ܘ̣ܵܘ ܐܲܒ̣ܵܗܲܝ̈ܟ̇ܘܿܢ ܡ̣ܢ ܥܵܠܲܡ: ܬܲܪܚ ܐܲܒ̣ܘܼܗܝ ܕܐܲܒ̣ܪܵܗܵܡ: ܘܐܲܒ̣ܘܼܗܝ ܕܢܵܚܘܿܪ: ܘܦܵܠܚܝܼܢ ܗ̄ܘ̣ܵܘ ܬܲܡܵܢ ܠܐܲܠܵܗܹ̈ܐ ܐ̄ܚܪ̈ܵܢܹܐ.
3 ܘܕܸܒ̣ܪܹܬ̣ ܠܐܲܒ̣ܪܵܗܵܡ ܐܲܒ̣ܘܼܟ݂ܘܿܢ ܡ̣ܢ ܥܸܒ̣ܪܵܐ ܕܢܲܗܪܵܐ: ܘܗܲܠܸܟ݂ܬܹ̇ܗ ܒܟ݂ܠܵܗ̇ ܐܲܪܥܵܐ ܕܲܟ݂ܢܲܥܢ: ܘܐܲܣܓܝܼܬ̣ ܙܲܪܥܹܗ: ܘܝܸܗ̄ܒܹ̇ܬ̣ ܠܹܗ ܠܐܝܼܣܚܵܩ.
4 ܘܝܸܗ̄ܒܹ̇ܬ̣ ܠܐܝܼܣܚܵܩ ܠܝܲܥܩܘܿܒ̣ ܘܲܠܥܹܣܘܿ: ܘܝܸܗ̄ܒܹ̇ܬ̣ ܠܥܹܣܘܿ ܝܘܼܪܬܵܢܵܐ ܛܘܼܪܵܐ ܕܣܵܥܝܼܪ. ܘܝܲܥܩܘܿܒ̣ ܘܲܒ̣ܢܵܘ̈ܗܝ ܢܚܸܬ̣ܘ ܠܡܸܨܪܹܝܢ.
5 ܘܫܲܕ̇ܪܹܬ̣ ܠܡܘܼܫܹܐ ܘܠܲܐܗܪܘܿܢ: ܘܲܡܚܹ̇ܝܬ̣ ܠܡܸܨܪ̈ܵܝܹܐ: ܘܬܸܕ݂ܡ̱ܪ̈ܵܬ̣ܵܐ ܥܸܒ̣ܕܹ̇ܬ̣ ܒܲܝܢܵܬ̣ܗܘܿܢ: ܘܡ̣ܢ ܒܵܬܲܪ ܗܵܝܕܹ̇ܝܢ ܐܲܦܲܩܬ̇ܟ݂ܘܿܢ.
6 ܘܐܲܦܩܹ̇ܬ̣ ܠܐܲܒ̣ܵܗܲܝ̈ܟ̇ܘܿܢ ܡ̣ܢ ܡܸܨܪܹܝܢ: ܘܐܲܝܬܝܼܬ̣ ܐܸܢܘܿܢ ܠܝܲܡܵܐ: ܘܲܪܕܲܦ̣ܘ ܡܸܨܪ̈ܵܝܹܐ ܒܵܬܲܪ ܐܲܒ̣ܵܗܲܝ̈ܟ̇ܘܿܢ: ܒܩܵܪ̈ܘܿܟܹܐ ܘܲܒ̣ܦܲܪ̈ܵܫܹܐ ܠܝܲܡܵܐ ܕܣܘܿܦ.
7 ܘܲܓ̣ܥܵܘ ܐܲܒ̣ܵܗܲܝ̈ܟ̇ܘܿܢ ܠܘܵܬ̣ ܡܵܪܝܵܐ: ܘܲܥ̣ܒܲܕ݂ ܚܸܫܘܿܟ݂ܵܐ ܒܲܝܢܵܬ̣ܗܘܿܢ ܠܡܸܨܪ̈ܵܝܹܐ. ܘܦܲܠܲܓ̣ ܡܵܪܝܵܐ ܝܲܡܵܐ ܕܣܘܿܦ: ܘܐܲܥܒܲܪ ܠܐܲܒ̣ܵܗܲܝ̈ܟ̇ܘܿܢ ܒܓ̣ܵܘܹܗ: ܘܐܲܝܬ̇ܝܹܗ ܠܝܲܡܵܐ ܥܲܠ ܡܸܨܪܹ̈ܝܢ ܘܟܲܣܝܼ ܐܸܢܘܿܢ. ܘܲܚܙܲܝ̈ ܥܲܝܢܲܝ̈ܟ̇ܘܿܢ ܡܸܕܸ̇ܡ ܕܥܸܒ̣ܕܹܬ̣ ܠܡܸܨܪ̈ܵܝܹܐ. ܘܐܲܝܬ̇ܝܼܬ̇ܟ݂ܘܿܢ ܠܡܲܕ݂ܒ̇ܪܵܐ: ܘܝܸܬ̣ܒ̣ܬ̇ܘܿܢ ܒܡܲܕ݂ܒ̇ܪܵܐ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ.
8 ܘܐܲܝܬ̇ܝܼܬ̇ܟ݂ܘܿܢ ܠܐܲܪܥܵܐ ܕܐܵܡܘܿܪ̈ܵܝܹܐ ܕܝܵܬ̣ܒ̇ܝܼܢ ܒܥܸܒ̣ܪܵܐ ܕܝܘܿܪܕ̇ܢܵܢ: ܘܐܸܬ̣ܟܲܬܲܫ̣ܘ ܥܲܡܟ݂ܘܿܢ: ܘܐܲܫ̱ܠܡܹ̇ܬ̣ ܐܸܢܘܿܢ ܒܐܝܼܕܲܝ̈ܟ̇ܘܿܢ: ܘܐܵܘܒ̇ܕܹܬ̣ ܐܸܢܘܿܢ ܡ̣ܢ ܩܕ݂ܵܡܲܝܟ̇ܘܿܢ: ܘܝܼܪܸܬ̇ܬ̇ܘܿܢ ܐܲܪܥ̱ܗܘܿܢ.
9 ܘܩܵܡ ܒܵܠܵܩ ܒܲܪ ܨܸܦܘܿܪ ܡܲܠܟܵܐ: ܕܡܘܼܐܵܒ̣ܵܝܹ̈ܐ: ܘܐܸܬ̣ܟܲܬܲܫ̣ ܥܲܡ ܝܼܣܪܵܝܹܠ: ܘܫܲܕܲܪ ܩܪܵܐ ܠܒܸܠܥܵܡ ܒܲܪ ܒܥܘܿܪ ܠܲܡܠܵܛܘܼܬ̣ܟ݂ܘܿܢ.
10 ܘܠܵܐ ܨܒܹܝܬ̣ ܠܡܸܫ̱ܡܥܹܗ ܠܒܸܥܠܵܡ: ܘܲܡܒܲܪܵܟ݂ܘܼ ܒܲܪܸܟ݂ܬ̇ܟ݂ܘܿܢ ܘܦܲܨܵܝܬ̇ܟ݂ܘܿܢ ܡ̣ܢ ܐܝܼܕ݂ܵܘ̈ܗܝ.
11 ܘܲܥܒܲܪܬ̇ܘܿܢ ܝܘܿܪܕ̇ܢܵܢ: ܘܐܸܬܲܝܬ̇ܘܿܢ ܠܐܝܼܪܝܼܚܘܿ. ܘܐܸܬ̣ܟܲܬܲܫܘ ܥܲܡܟ݂ܘܿܢ ܓܲܒ̣ܪܹ̈ܐ ܕܐܝܼܪܝܼܚܘܿ: ܘܐܵܡܘܿܪ̈ܵܝܹܐ: ܘܲܟ݂ܢܲܥܢܵܝܹ̈ܐ: ܘܦܲܪ̈ܙܵܝܹܐ: ܘܚܹـ̈ـܬ̣ܵܝܹܐ: ܘܓܲܪ̈ܓ̇ܘܿܣܵܝܹܐ: ܘܚܵܘܵܝܹ̈ܐ: ܘܝܵܒ̣ܘܿܣܵܝܹ̈ܐ ܘܐܲܫ̱ܠܡܹ̇ܬ̣ ܐܸܢܘܿܢ ܒܐܝܼܕܲܝ̈ܟ̇ܘܿܢ.
12 ܘܫܲܕܪܹܬ̣ ܩܕ݂ܵܡܲܝܟ̇ܘܿܢ ܕܸܒ̇ܘܿܪ̈ܝܵܬ̣ܵܐ: ܘܐܵܘܒ̇ܕܹܬ̣ ܡ̣ܢ ܩܕ݂ܵܡܲܝܟ̇ܘܿܢ ܬܪܹܝܢ ܡܲܠܟܲܝ̈ܗܘܿܢ. ܕܐܵܡܘܿܪ̈ܵܝܹܐ: ܠܵܐ ܒܣܲܝܦܲܝ̈ܟ̇ܘܿܢ: ܐܵܦܠܵܐ ܒܩܸܫ̈ܬܵܬ̣ܟ݂ܘܿܢ.
13 ܘܝܸܗ̄ܒܹ̇ܬ̣ ܠܟ݂ܘܿܢ ܐܲܪܥܵܐ ܕܠܵܐ ܠܐܝܼܬ̇ܘܿܢ ܒܵܗ̇: ܘܩܘܼܪ̈ܝܵܐ ܕܠܵܐ ܒܢܲܝܬ̇ܘܿܢ: ܘܝܸܬ̣ܒ̣ܬ̇ܘܿܢ ܒܗܹܝܢ. ܘܟܲܪ̈ܡܹܐ ܘܙܲܝ̈ܬܹ̇ܐ ܕܠܵܐ ܢܨܲܒ̣ܬ̇ܘܿܢ: ܗܵܐ ܐܵܟ݂ܠܝܼܢ ܐ̄ܢܬ̇ܘܿܢ.
14 ܡܸܟܹ̇ܝܠ ܕܚܲܠܘ ܡ̣ܢ ܡܵܪܝܵܐ: ܘܦܘܼܠܚܘܼܗܝ. ܒܬܲܡܝܼܡܘܼܬ̣ܵܐ ܘܲܒ̣ܩܘܼܫܬܵܐ. ܘܐܲܥܒܲܪܘ ܡ̣ܢ ܠܸܒ̇ܟ݂ܘܿܢ ܐܲܠܵܗܹ̈ܐ ܢܘܼܟ݂ܪ̈ܵܝܹܐ: ܕܲܦܠܲܚ̣ܘ ܐܲܒ̣ܵܗܲܝ̈ܟ̇ܘܿܢ ܒܥܸܒ̣ܪܵܐ ܕܢܲܗܪܵܐ ܘܲܒ̣ܡܸܨܪܹܝܢ: ܘܐܲܢ̄ܬ̇ܘܿܢ ܦܠܘܿܚܘ ܠܡܵܪܝܵܐ.
15 ܘܐܸܢ ܒܝܼܫ ܗ̄ܘ̣ ܒܥܲܝܢܲܝ̈ܟ̇ܘܿܢ ܠܡܸܦܠܲܚ ܠܡܵܪܝܵܐ: ܓܒ̣ܵܘ ܠܟ݂ܘܿܢ ܝܵܘܡܵܢܵܐ ܠܡ̇ܢ ܦܵܠܚܝܼܢ ܐ̄ܢܬ̇ܘܿܢ: ܐܸܢ ܐܲܠܵܗܹ̈ܐ ܕܲܦܠܲܚܘ ܐܲܒ̣ܵܗܲܝ̈ܟ̇ܘܿܢ ܒܥܸܒ̣ܪܵܐ ܕܢܲܗܪܵܐ: ܘܐܸܢ ܠܐܲܠܵܗܹ̈ܐ ܕܐܵܡܘܿܪ̈ܵܝܹܐ ܕܥܵܡ̇ܪܝܼܢ ܐ̄ܢܬ̇ܘܿܢ ܒܐܲܪ̱ܥܗܘܿܢ. ܐܸܢܵܐ ܕܹܝܢ ܘܲܒ̣̈ܢܲܝ ܒܲܝܬ̇ܝ: ܠܡܵܪܝܵܐ ܗ̄ܘ̣ ܐܲܠܵܗܵܐ ܦܵܠܚܝܼܢ ܚ̄ܢܲܢ.
16 ܘܲܥܢ̣ܵܘ ܟܠܹܗ ܥܲܡܵܐ ܘܐܸܡܲܪ: ܚܵܣ ܠܲܢ ܕܢܸܫܒ̇ܘܿܩ ܠܡܵܪܝܵܐ: ܘܢܸܦܠܘܿܚ ܠܐܲܠܵܗܹ̈ܐ ܐ̄ܚܪ̈ܵܢܹܐ.
17 ܡܸܛܠ ܕܡܵܪܝܵܐ ܗ̄ܘ̣ ܐܲܠܵܗܲܢ: ܗܵܘ̇ ܕܐܲܣܩܲܢ ܡ̣ܢ ܐܲܪܥܵܐ ܕܡܸܨܪܹܝܢ ܡ̣ܢ ܒܹܝܬ̣ ܥܲܒ̣ܕ̇ܘܼܬ̣ܵܐ: ܘܲܥܒܲܕ݂ ܩܕ݂ܵܡܲܝܢ ܗܵܠܹܝܢ ܐܲܬ̣̈ܘܵܬ̣ܵܐ ܪܵܘ̱ܪ̈ܒ̣ܵܬ̣ܵܐ. ܘܢܲܛܪܲܢ ܒܟ݂ܠܵܗ̇ ܐܘܼܪܚܵܐ ܕܗܲܠܸܟ݂ܢ ܒܵܗ̇: ܘܲܒ̣ܟ݂ܠܗܘܿܢ ܥܲܡܡܹ̈ܐ ܕܲܥܒܲܪ̄ܢ ܒܲܝܢܵܬ̣ܗܘܿܢ.
18 ܘܐܵܘܒܸ̇ܕ݂ ܐܸܢܘܿܢ ܡܵܪܝܵܐ ܐܲܠܵܗܲܢ ܠܟ݂ܠܗܘܿܢ ܥܲܡܡܹ̈ܐ ܗܵܠܹܝܢ. ܘܠܵܐܡܘܿܪ̈ܵܝܹܐ ܕܥܵܡ̇ܪܝܼܢ ܚ̄ܢܲܢ ܒܐܲܪ̱ܥܗܘܿܢ: ܐܵܘܒܸ̇ܕ݂ ܐܸܢܘܿܢ ܡܵܪܝܵܐ ܡ̣ܢ ܩܕ݂ܵܡܲܝܢ: ܡܸܛܠ ܗܵܢܵܐ ܠܡܵܪܝܵܐ ܗ̄ܘ̣ ܦܵܠܚܝܼܢ ܚ̄ܢܲܢ: ܡܸܛܠ ܕܗ̤ܘܝܘܼ ܐܲܠܵܗܵܐ ܒܲܠܚܘܿܕ݂ܵܘܗܝ: ܘܗ̤ܘܝܘܼ ܐܲܠܵܗܲܢ.
19 ܘܐܸܡܲܪ ܝܼܫܘܿܥ ܠܥܲܡܵܐ: ܚܙܵܘ ܕܹܝܢ ܕܲܠܡܵܐ ܠܵܐ ܡܸܫܟ̇ܚܝܼܢ ܐ̄ܢܬ̇ܘܿܢ ܠܡܸܦܠܲܚ ܠܡܵܪܝܵܐ. ܡܸܛܠ ܕܐܲܠܵܗܵܐ ܗ̄ܘ̣ ܩܲܕ݂ܝܼܫܵܐ: ܘܐܲܠܵܗܵܐ ܗ̄ܘ̣ ܛܲܢܵܢܵܐ: ܘܠܵܐ ܕܹܝܢ ܫܵܒܹ̇ܩ ܠܚܵܘܒܲܝ̈ܟ̇ܘܿܢ ܘܠܲܚܛܵܗܲܝ̈ܟ̇ܘܿܢ.
20 ܕܲܠܡܵܐ ܬܸܫܒ̇ܩܘܼܢܹܗ ܠܡܵܪܝܵܐ: ܘܬܸܦ̱ܠܚܘܼܢ ܠܐܲܠܵܗܹ̈ܐ ܐ̄ܚܪܵܢܹܐ ܢܘܼܟ݂ܪ̈ܵܝܹܐ ܕܐܲܪܥܵܐ: ܘܢܸܗܦܘܿܟ݂ ܡܵܪܝܵܐ ܠܡܲܒ̣ܐܵܫܘܼ ܠܟ݂ܘܿܢ: ܘܲܢܓܲܡܪܟ݂ܘܿܢ ܡ̣ܢ ܒܵܬܲܪ ܕܐܲܛܐܸܒ̣ ܠܟ݂ܘܿܢ.
21 ܘܐܸܡܲܪܘ ܥܲܡܵܐ ܠܝܼܫܘܿܥ: ܠܵܐ ܗܵܘܹ̇ܐ ܠܲܢ ܦܘܼܠܚܵܢ ܐ̄ܚܪܹܝܢ: ܐܸܠܵܐ ܠܡܵܪܝܵܐ ܗ̄ܘ̣ ܐܲܠܵܗܵܐ ܦܵܠܚܝܼܢܲܢ.
22 ܘܐܸܡܲܪ ܝܼܫܘܿܥ ܠܥܲܡܵܐ: ܣܵܗܕ̇ܝܼܢ ܐ̄ܢܬ̇ܘܿܢ ܒܢܲܦ̮ܫܟ݂ܘܿܢ: ܕܐܲܢ̄ܬ̇ܘܿܢ ܓܒܲܝܬ̇ܘܿܢ ܠܟ݂ܘܿܢ ܠܡܸܦܠܲܚ ܠܡܵܪܝܵܐ. ܘܐܵܡ̇ܪܝܼܢ ܠܹܗ ܣܵܗܕ̇ܝܼܢ ܚ̄ܢܲܢ.
23 ܐܵܡܲܪ ܠܗܘܿܢ ܝܼܫܘܿܥ: ܡܸܟܹ̇ܝܠ ܐܲܥܒܲܪܘ ܐܲܠܵܗܹ̈ܐ ܢܘܼܟ݂ܪ̈ܵܝܹܐ ܕܒܲܝܢܵܬ̣ܟ݂ܘܿܢ: ܘܐܲܬ̣ܩܸܢܘ ܠܸܒ̇ܟ݂ܘܿܢ ܠܘܵܬ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.
24 ܘܐܸܡܲܪܘ ܥܲܡܵܐ ܠܝܼܫܘܿܥ: ܠܡܵܪܝܵܐ ܐܲܠܵܗܲܢ ܦܵܠܚܝܼܢ ܚ̄ܢܲܢ: ܘܲܒ̣ܩܵܠܹܗ ܫܵܡܥܝܼܢ ܚ̄ܢܲܢ.
25 ܘܐܲܩܝܼܡ ܝܼܫܘܿܥ ܕܝܵܬܹܩܹܐ ܠܥܲܡܵܐ ܒܹܐ ܒܝܵܘܡܵܐ ܗܵܘ̇: ܘܐܲܠܸܦ ܐܸܢܘܿܢ ܦܘܼܩ̈ܕܵܢܹܐ: ܘܕ݂ܝܼܢܹ̈ܐ: ܒܲܫܟܹܝܡ.
26 ܘܲܟܬܲܒ̣ ܝܼܫܘܿܥ ܡܸܠܹ̈ܐ ܗܵܠܹܝܢ ܒܣܸܦܪܵܐ ܕܢܵܡܘܿܣܹܗ ܕܡܘܼܫܹܐ. ܘܲܢܣܲܒ̣ ܟܹܐܦܵܐ ܪܲܒ̇ܬ̣ܵܐ: ܘܐܲܩܝܼܡܵܗ̇ ܬܚܹܝܬ̣ ܒܸܛܡ̱ܬ̣ܵܐ ܕܒܹܝܬ̣ ܡܲܩܕ̇ܫܹܗ ܕܡܵܪܝܵܐ.
27 ܘܐܸܡܲܪ ܝܼܫܘܿܥ ܠܟ݂ܠܹܗ ܥܲܡܵܐ: ܗܵܐ ܟܹܐܦܵܐ ܗܵܕܹܐ ܬܸܗܘܹܐ ܠܲܢ ܣܵܗܕ̇ܘܼܬ̣ܵܐ: ܡܸܛܠ ܕܗ̤ܝ ܫܸܡܥܲܬ̤ ܟܠܗܹܝܢ ܡܸܠܵܘ̈ܗܝ ܕܡܵܪܝܵܐ ܕܡܲܠܸܠ̣ ܥܲܡܲܢ: ܘܬܸܗܘܹܐ ܠܟ݂ܘܿܢ ܠܣܵܗܕ̇ܘܼܬ̣ܵܐ: ܕܠܵܐ ܬܟܲܕ̇ܒ̣ܘܼܢ ܒܡܵܪܝܵܐ ܐܲܠܵܗܟ݂ܘܿܢ.
28 ܘܡ̣ܢ ܒܵܬܲܪ ܕܦܲܩܸܕ݂ ܝܼܫܘܿܥ ܠܥܲܡܵܐ: ܫܲܕܲܪ ܐܸܢܘܿܢ ܐ̄ܢܵܫ ܠܝܵܪܬ̇ܘܼܬܹܗ.
29 ܘܡ̣ܢ ܒܵܬܲܪ ܡܸܠܹ̈ܐ ܗܵܠܹܝܢ: ܡܝܼܬ̣ ܝܼܫܘܿܥ ܒܲܪܢܘܿܢ ܥܲܒ̣ܕܹ̇ܗ ܕܡܵܪܝܵܐ: ܒܲܪܡܵܐܐ ܘܲܥܣܲܪ ܫܢ̈ܝܼܢ.
30 ܘܩܲܒ̣ܪܘܼܗܝ ܒܲܬ̣ܚܘܼܡܵܐ ܕܝܵܪܬ̇ܘܼܬܹܗ: ܒܬܲܝܡܢܲܬ̣ ܣܪܲܚ ܕܲܒ̣ܛܘܼܪܵܐ ܕܐܲܦܪܹܝܡ: ܡ̣ܢ ܓܪܒ̇ܝܵܐ ܠܛܘܼܪܵܐ ܕܓ݂ܵܥܵܫ.
31 ܘܲܦܠܲܚ ܝܼܣܪܵܝܹܠ ܠܡܵܪܝܵܐ ܟܠܗܘܿܢ ܝܵܘ̈ܡܵܬܹܗ ܕܝܼܫܘܿܥ: ܘܟ݂ܠܗܘܿܢ ܝܵܘ̈ܡܵܬ̣ܵܐ ܕܩܲܫ̈ܝܼܫܹܐ: ܕܲܚܝܵܘ ܢܘܼܓ̣ܪܵܐ ܒܵܬܲܪ ܝܼܫܘܿܥ: ܥܒ̣ܵܕ݂ܵܘ̈ܗܝ ܕܡܵܪܝܵܐ ܕܲܥܒܲܕ݂ ܠܝܼܣܪܵܝܹܠ.
32 ܘܲܠܓܲܪ̈ܡܵܘܗܝ ܕܝܵܘܣܸܦ ܕܐܲܣܸܩ̣ܘ ܒ̈ܢܲܝ ܝܼܣܪܵܝܹܠ ܡ̣ܢ ܡܸܨܪܹܝܢ: ܩܒܲܪܘ ܒܲܫܟܹܝܡ: ܒܦܵܠܓܘܼܬ̣ܵܐ ܕܚܲܩܠܵܐ ܕܲܙܒܲܢ ܝܲܥܩܘܿܒ̣ ܡ̣ܢ ܚܡܘܿܪ ܐܲܒ̣ܘܼܗܝ ܕܲܫܟܹܝܡ ܒܡܵܐܐ ܢܩܵـ̈ـܘܵܢ: ܘܲܗܘ̤ܵܬ̣ ܝܵܪܬ̇ܘܼܬ̣ܵܐ ܠܲܒ̣̈ܢܲܝ ܝܵܘܣܸܦ.
33 ܘܐܹܠܝܼܥܵܙܲܪ ܟܵܗܢܵܐ ܒܲܪ ܐܲܗܪܘܿܢ ܟܵܗܢܵܐ ܡܝܼܬ̣: ܘܩܲܒ̣ܪܘܼܗܝ ܒܲܓܒܲܥܬ̣ܵܐ ܕܦܝܼܢܚܸܣ ܒܪܹܗ: ܕܐܸܬ̣ܝܲܗܒܲܬ̤ ܠܹܗ ܒܛܘܼܪܵܐ ܕܐܲܦܪܹܝܡ.