1

¹ "Sayan sulat nanlapud kinen Pablo, ya atawag a magmaliw ya apostol nen Cristo Jesus onung ed linaway Dios, tan nanlapud agi tayon si Sostenes.

² "Diad iglisia na Dios a walad Corinto, diad amin da ray tinawag na Dios a magmaliw a masanton totoo to, diad panamegley na pikakasakey ed Cristo Jesus, ontan met a diad saray amin a totood inerman a pasen, saray ontatawag ed ngaran na Katawan dan Jesu-Cristo a Katawan tayo met:

³ "Itdan kayo komun na Dios ya Ama tayo tan say Katawan tayon Jesu-Cristo na bindision tan kareenan.

⁴ "Misasalamat ak lawas ed Dios para sikayo, lapud baleg a panangaron inter tod sikayo diad panamegley nen Cristo Jesus.

⁵ "Ta diad pikakasakey yod Cristo nagmaliw kayon mayaman ed amin a bengatla, anggan diad amin a panagsalita tan amin a karunongan.

⁶ "Saray bangat a nipaakar ed Cristo et kinmetket la rad sikayo,

⁷ "kanyan amin a bindision aawaten yo, legan ya aalagden yon ompanengneng so Katawan tin Jesu-Cristo.

⁸ "Antabayen kayoy Dios anggad kaonuran, pian anggapoy pakadusaan yo no Agew na Katawan tin Jesu-Cristo.

⁹ "Matoor so Dios, say Dios ya anawag ed impikasakey yod Anak ton Jesu-Cristo a Katawan tayo.

¹⁰ Agagi, sisimbawaen ta kayo diad panamegley na ngaran na Katawan tin Jesu-Cristo: mankakasakey kayod amin a salitaen yo, pian ag kayo naapag-apag. Ayadyari komuy pankakasakey yo diad kanunotan tan getma.

¹¹ Ta, agagik, imbalitad siak na saray totoo nen Cloe a wala rad sikayoy mankokolkol.

¹² Say labay kon ibaga, say pandoromaay ibabaga yo. Kuay sakey, Si Pablo so kaibak; kuay sananey, Si Apolos so kaibak; kuay sakey, Si Cefas so kaibak; kuay sananey, Si Cristo so kaibak.

¹³ Naapag-apag sirin si Cristo? Si Pablo siriy nipasak ed krus para sikayo? Abinyagan kayo sirin ed ngaran nen Pablo?

¹⁴ Misalamat ak ed Dios, ta si Crispo tan si Gayo labat so bininyagan kod sikayo.

¹⁵ Kanyan anggapoy makapangibagad sikayo a bininyagan kayod ngaran ko.

¹⁶ (Anunotan ko, bininyagan ko met manayay Estefanas tan say pamilya to. Likud ed sikara, anggapo lay arum a nanunotan kon bininyagan ko.)

¹⁷ Ta si Cristo ag to ak imbaki a maminyag, no ag ingen mangipulong, na Maung a Balita. Mampupulong ak, aliwan diad panamegley na panagsalitan manlapud kakabatan na sankamundoan, pian ag naekalay pakayari so impatey nen Cristo ed krus.

¹⁸ Ta diad saray nababalang, anggapoy kabaliksan na balitan nipaakar ed impatey nen Cristo ed krus; balet diad sikatayon nilalaban, sikatoy pakayari na Dios.

¹⁹ Ta ibabagay Masanton Sulat, Deralen koy kakabatan da ray makabat, pagmaliwen kon andi-kakanaan so pakatalus da ray marunong.

²⁰ No ontan sirin, antoy kana da ray makabat? Odino saray iskriba? Odino saray maung a dibatista ed sayan mundo? Ag ta impagmaliw na Dios ya anggapoy kabaliksan so kakabatan na sankamundoan?

²¹ Ta lapud kakabatay Dios, ag to inyabuloy a sikatoy nakabatay too diad panamegley na kakabatan na sankamundoan. Ingen nilabay ton ilaban iray totoon manisia diad panamegley na ipupulong min Maung a Balita ya ipapasen ya andi-kakanaan na sankamundoan.

²² Saray Judio pilalek da ray milagro a pamaneknek, tan saray Grigo aanapen da so kakabatan.

²³ Balet no nipaakar ed sikami, ipupulong miy Cristo a nipasak ed krus, sakey a bangat a diad saray Judio et pakatumbaan tan diad saray Hintil et anggapoy kabaliksan.

²⁴ Balet diad saray tinawag na Dios, Judio o Grigo man ira, si Cristo so pakayari tan kakabatan na Dios.

²⁵ Ta say singa kakulang-kulangan na Dios et makabat nen say kakabatay too, tan say singa kakapoyay Dios et mabiskeg nen say biskeg na too.

²⁶ Agagi, nunot yo pay kipapasen yo nen tawagen kayoy Dios. Pigpigarad sikayoy makabat, o makapanyari, o bibirbiren ed baley, onung ed panangipasey too.

²⁷ Balet pinili na Dios so ipapasen ya andi-kakanaan na sankamundoan, pian napabaingan to ray makabat a totoo, tan pinili to so ipapasen a makapoy na sankamundoan, pian napabaingan to ray mabiskeg.

²⁸ Pinili na Dios so pabpaabebaen, balbalawen, tan ibanbantak na sankamundoan, pian naderal to ray pinabpabli na sankamundoan.

²⁹ Kanyan anggapoy toon makapampasirayew ed arap na Dios.

³⁰ Balet say Dios impikasakey to itayod Cristo Jesus tan ginawa to a kakabatan tayo. Diad panamegley nen Cristo, apirdona ray kasalanan tayo ed arap na Dios, nagmaliw itayon masanton totooy Dios, tan arondon itayo la.

³¹ Kanyan sirin, onung na ibabagay Masanton Sulat, Siopamay mampasirayew, saray ginagaway Katawan so nepeg ton ipasirayew.

2

¹ "Agagi, nen linma ak ditan a mangipulong ed sikayo na niamut a katwaan na Dios, ag ko inkanay araralem iran salita odino atatagey a kakabatan.

² "Ta nen wadtan ak, tinibokel kod kanunotan ko ya anggapoy arum a kabaten ko no ag si Jesu-Cristo labat, tan say inkipasak tod krus.

³ "Kanyan makapoy, natatakot, tan manggiwgiw ak ya akiarapad sikayo.

⁴ "Aliwan diad panamegley na makaayayat iran balikas a nanlapud kakabatay too so inkanak ed impansalitak tan impanpulong ko, no ag ingen diad panamegley na paneknek na Ispiritu tan say pakayari na Dios.

⁵ "Say pananisia yo sirin et ag niletneg ed kakabatay too, no ag ingen diad pakayariy Dios.

⁶ "Ibabangat miy kakabatan ed saray mamatakken lad maispiritun bilay, balet aliwan say kakabatan na sankamundoan odino say kakabatan na saray manoley ed sayan mundo, saray manoley a nababalang da lay pakayari ra.

⁷ "Say labay kon ibaga et say niamut a kakabatan na Dios, ya inggana ton pakagalangan tayo nanlapu lad inkapalsay mundo.

⁸ "Anggapoy anggan sakey a manoley ed sayan panaon so makaamta ed sayan kakabatan. Ta no amta ra komun, ag da impasak ed krus so Katawan na kagalangan.

⁹ "Balet onung na ibabagay Masanton Sulat, Ag ni anengneng odino nadngel na too, ag met ni anggan sinmibang ed nunot to, so imparaan na Dios ed saray mangarod sikato.

¹⁰ Balet say Dios impaamta to yad sikatayo diad panamegley na Ispiritu. Ta sokimaten na Ispiritu iray amin a bengatla, anggan saray sankaaraleman a getmay Dios.

¹¹ Anggapoy makaamtad nununotey too, no ag say dilin ispiritu to labat. Ontan met, anggapoy makaamtad nununotey Dios, no ag ingen Ispiritu na Dios labat.

¹² Aliwan ispirituy sankamundoan no ag say Ispiritu na Dios so inawat tayo, pian naamtaan tayo ray amin a panangaroy Dios ed sikatayo.

¹³ Kanyan diad pampapaliwawa miy maispiritun katwaan ed saray totoon walad sikaray Ispiritu, ag mi ikakana ray salitan ibabangat na kakabatay too, no ag ingen saray salitan ibabangat na Ispiritu.

¹⁴ Ta say toon anggapod sikatoy Ispiritu ag to awaten iray bengatlan iter na Ispiritu na Dios. Diad tuay tua, ag to ra natalusan; anggapoy kabaliksan da ra yad sikato, ta saray maispiritun bengatla natalusan ira labat diad panamegley na maispiritun panagnunot.

¹⁵ Say toon walad sikatoy Ispiritu natalusan to so kabaliksan na amin a bengatla, balet anggapoy toon makatalus ed sikato.

¹⁶ Ta onung na ibabagay Masanton Sulat, Siopay makaamtad kanunotay Katawan? Siopay makasimbawad sikato? Balet, walad sikatayoy panagnunot nen Cristo.

3

¹ "Agagi, ag ak makapitongtong ed sikayo a singa pitotongtong kod saray totoon walad sikaray Ispiritu. Kinaukolan a mitongtong ak ed sikayo a singa pitotongtong ed saray totoon minumundoy panagbilay da, singa ogogaw ed pananisiad Cristo.

² "Pinainom ta kayoy gatas, ta ag yo nayariay mangan na anawet. Diad tuay tua, anggad natan ag yo ni nayarian,

³ "ta minumundo niy panagbilay yo. Maniimonan tan mankokolkol kayo ni. Ag ta ra ya mangipatnag a minumundo kayo ni, tan say panagbilay yo et onung na panagbilay na karaklan?

⁴ "No ikuay sakey ed sikayo, Si Pablo so kaibak, tan say sananey ikuanto, Si Apolos so kaibak--ag kasi ya tanda na pambibilay yon onung ed panagbilay na karaklan?

⁵ "Siopay Apolos a? O siopay Pablo a? Aripen kami labat na Dios, ya inkana ton ananggoyur ed sikayo a manisia. Gagawaen na balang sakey ed sikami so kimey ya inawat tod Katawan.

⁶ "Siak so angisokit na bokel, si Apolos so nansalug, balet say Dios so amatubo tan amabaleg.

⁷ "Say manona aliwan say mantatanem odino say mansasalug, no ag say Dios mamapabaleg.

⁸ "Anggapoy pandomaan na toon mantanem tan toon mansalug. Tumangan iray Dios onung ed saray kimey ya agawaan da.

⁹ "Nampapara kamin kumikimey na Dios, tan sikayoy alog to. Sikayo met so paalagey na Dios.

¹⁰ Onung ed langkap ya inter na Dios ed siak, inletneg koy pundasion a singa gagawaey marunong a karpintiro. Insan sananey lay mangisumpal ed pangipaalgey. Balet nepeg a manalwar so siopaman a mangipaalagey,

¹¹ ta anggapo lay arum a pundasion a nayarin iletneg, likud ed samay niletneg la, a si Jesu-Cristo.

¹² Wala ray mangikanay balituk, pilak, odino mabmablin bato ed pangituloy day pangipaalagey; wala ray mangikanay kiew, dika, odino dayami.

¹³ Naamtaan so klasiy kimey na balang too no ipatnag la na Agew nen Cristo. Ta say apoy na satan ya Agew so manubok tan mangipatnag na klasiy kimey na balang too.

¹⁴ No ag napoolan so impaalagey na siopaman ed tapew na pundasion, satan a too makaawat na tumang to.

¹⁵ Balet no napoolan, nadarak imay impaalagey to. Anggaman ontan, sikato et nilaban, balet singa dinmalan ed apoy.

¹⁶ Ag yo ta amtan sikayoy timplo na Dios tan manaayam ed sikayo so Ispiritu na Dios?

¹⁷ No deralen na sakey a too so timplo na Dios, sikatoy deralen na Dios. Ta masanto so timplo na Dios, tan sikayo so timplo to.

¹⁸ Nepeg ya anggapoy toon tilaan toy sikaton dili. No abaloan na sakey ed sikayo a sikatoy makabat onung ed kakabatan na sankamundoan, nepeg a magmaliw a makulang-kulang, pian magmaliw a petepeteg a makabat.

¹⁹ Ta say kakabatan na sankamundoan, kakulang-kulangan ed arap na Dios. Onung na ibabagay Masanton Sulat, Erelen na Dios iray makabat diad panamegley na dilin silib da.

²⁰ Ibabaga to ni, Amtay Katawan a saray nununoten da ray makabat et andi-kakanaan.

²¹ Nepeg sirin ya anggapoy mangipasirayew ed nagawaay too. Ta kayaryan yoy amin a bengatla:

²² Si Pablo, si Apolos, tan si Pedro; say intiron mundo, say bilay, say patey, say natan tan say arapen; kayaryan yo ra yan amin.

²³ Kayaryan kayo nen Cristo, tan kayaryan na Dios si Cristo.

4

¹ "Nepeg ya ipasen yo kamin aripen nen Cristo tan managasikaso na saray niamut a katwaan na Dios.

² "Nakaukolan a matoor ed amo to so toon managasikaso.

³ "Anggapoy walad siak no sintinsiaan yo ak, odino sintinsiaan ak na panagsintisiay too; ni anggan siak ag ko sintinsiaay laman kon dili.

⁴ "Malinis so konsinsiak, balet ag to labay ya ibaga ya anggapoy kasalanan ko. Say Katawan so manintinsiad siak.

⁵ "Kanyan ag kayo manisintinsia no aliwa nin panaon to. Manalagar kayo ya anggad isabiy Katawan. Ipalinew tod satan iray bengatlan niamut ed kabilongetan tan ipaamta to ray niamut a getma na katoowan. Diad satan ya oras, naawat na balang sakey so kanepegan ton dayew a manlapud Dios.

⁶ "Agagi, lapud sikayo, impasen kon alimbawa si Apolos tan siak, pian naaralan yoy kabaliksan na sayan balikas, Ag yo pasosolukay nisulat. Ag yo nepeg ya ipasirayew so sakey tan balawen so sananey.

⁷ "Siopay angipasen a maung kayo ni nen saray arum? Antoy walad sikayo ya ag inter na Dios? No ontan sirin, panoy pampasirayew yon singa aliwan rigaloy Dios iray walad sikayo?

⁸ "Wala la ray amin a nakaukolan yo! Mayaman kayo la! Arari kayo la, anggaman a sikami et andi! Maung no petepeteg kayo lan arari, pian kaiba yo kami met a makapanoley.

⁹ "Ta angangko, sikami ran apostol ginaway Dios a sankaabebaan kamid amin da ray totoo. Singa kami totoon asintinsiaay patey, nenengnengen na sankamundoan, saray anghil tan saray katoowan.

¹⁰ Makulang-kulang kami nisengeg ed Cristo, balet makabat kayo diad pikakasakey ed Cristo! Makapkapoy kami, balet mabisbiskeg kayo! Nababalaw kami, balet napapagalangan kayo!

¹¹ Anggad sayan bekta nanaerasan tan nanaapgaan kami; apilat-pilat iray kawes mi; papairapen da kami tan anggapoy napanayaman mi.

¹² Mapalaloy kababnalan mid panagkimey mi. No nisasamba kami, mamibindision kami; no napapairap kami, itetepel mi;

¹³ no napapabaingan kami, anlemek so kakaebat mi. Anggad natan, aliling miy dotak tan andi-kakanaan a bengatla diad tapew na dalin.

¹⁴ Isusulat ko ra ya, aliwan lapud labay ta kayon pabaingan, no ag ingen lapud labay ta kayon simabawaan, a singa ta kayo inararon anak.

¹⁵ Ta anggan samplon liboy managbangat yon nipaakar ed pambibilay yon Cristiano, saksakey labat so ama yo. Ta diad pikakasakey yod Cristo Jesus anak ta kayo, diad panamegley na Maung a Balitan impupulong kod sikayo.

¹⁶ Karewen ko sirin ya alig yo ak.

¹⁷ Lapud saya, ibakik ditay Timoteo a matoor tan inararok ya anak ed Katawan. Sikatoy mangipanunot ed sikayo na panagbilay a totombuken ko, diad pikakasakey kod Cristo Jesus. Ibabangat ko met yan panagbilay ed amin ya iglisiad inerman a pasen.

¹⁸ Wala rad sikayoy mapaatagey, ta abaloan dan ag ak la onlad tan.

¹⁹ Balet no iyabuloy na Katawan, magano lay iyakar kod tan. Nengnengen ko pad satan no antoy nagawaan, ya aliwan say panagsalita labat, na saratay mapaatagey!

²⁰ Ta say Panarian na Dios aliwan diad salita, no ag diad pakayari.

²¹ Antoy labay yo: onla ak ditan ya awit koy pekpek, odino onla ak ditan ya maararo tan maoyoyamo?

5

¹ "Nibabalitan walay inmoralidad a nagagawa ed sikayo, gawan sankabandayan a tuloy tan ag gagawaen na anggan saray Hintil. Nibabalitad siak ya iyaamung na sakey ed sikayo so asawan pidwa na ama to!

² "Insan, mapasirayew kayo ni! Ingen manermen kayo komun tan paekal yo lad moyungan yo itay toon manggagaway inmoralidad.

³ "No nipaakar ed siak, anggaman ya andi ak ditan ed laman, singa wadtan ak lamlamang ed ispiritu. Diad ngaran na Katawan tayon Jesus, sinintinsiaan ko la tan a toon manggagaway sankabandayan a kasalanan, a singa wadtan ak a kaiba yo.

⁴ "Diad pantitipon yo, kaiba yo ak ed ispiritu. Tan lapud pakapanyariy Katawan a Jesus ed sikatayo,

⁵ "ipalima yo tan a too ed Satanas pian naderal so laman to, et nayarin nilaban so ispiritu to no Agew na Katawan.

⁶ "Maoges itan so panagpasirayew yo! Ag yo ta amtay kabaliksan na sayan balikas, Say daiset a libadura a napaalsa toy masa?

⁷ "Nepeg yon ekaley daan a libadura, say kasalanan, pian magmaliw kayon petepeteg a malinis. Diad ontan mipara kayod balon masa ya anggapoy libadura, ta talagan ontan kayo. Ta nibagat lay Cristo a Kordiro tayon onkanad Paskua.

⁸ "Kanyan pistaan tayoy Paskua, aliwan diad panamegley na tinapay a walay lauk ton daan a libaduray kasalanan tan kaogsan, no ag diad panamegley na tinapay ya anggapoy libadura, say tinapay na katooran tan katwaan.

⁹ "Imbagak ed samay sulat ko ya ag kayo mimiolup ed saray totoon manggagaway inmoralidad.

¹⁰ Aliwan saray totoon pagano a manggagaway inmoralidad so labay kon ibaga, odino sray maagom, saray matakew odino saray manangigalang ed saray talintaoy diriyos. Ta napaliisan yo ra ya labat no andi ki lad sayan mundo.

¹¹ Say labay kon ibaga, ag yo pipiolupan so toon ipapasen toy sikaton dili a Cristiano, balet manggagaway inmoralidad, maagom, manangigalang ed saray talintaoy diriyos, managpabaing, buanges, odino matakew. Ag kayo anggan mirorongod satan a klasiy too.

¹² Ta anggapoy kanepegan kon sintinsiaan iray aliwan Cristiano. Say Dios so manintinsiad sikara. Ag ta sikayoy manintinsia ed saray walad loob na iglisia? Onyay ibabagay Masanton Sulat, Paekal yoy maoges a too ed olupan yo.

6

¹ "No say sakey ed sikayo et walay riklamo ton sumlang ed sakey ya agi, mangisigep kasiy kaso ed saray huis a pagano, ya ag to paarigload saray totoon pinili na Dios?

² "Ag yo ta amtan saray totoon pinili na Dios so manintinsiad sankamundoan, ag yo ta nayarian ya arigloan iray ankekelag a pamaakaran?

³ "Ag yo ta amtan sikatayoy manintinsiad saray anghil? Nagkalalo la sirin ed saray bengatlad sayan bilay!

⁴ "No wala ray onyan kaso yo, paarigloan yo kasid saray totoon ag bibirbirey iglisia?

⁵ "Kababaing kayo! Anggapo la sirin ed sikayoy makabat a sarag toy mangariglod siblangay sanaagi?

⁶ "Akin et say sakey ya agi irimanda toy sakey ya agi, anta saray huis yo ni met et aliwa ran mananisia?

⁷ "Say katwaan to, diad satay pandidimandaan yo, ipapanengneng yoy kakapoyan yo. Ag kasi lalon maung no itepel yo la so pansasaol tan panlalames dad sikayo?

⁸ "Balet sikayo ingen so mansasaol tan manlalames--tan saray agagi yo ni met so panggagawaan yo!

⁹ "Ag yo ta amtan saray makasalanan et ag da natawir so Panariay Dios? Ag kayo patitilaan! Saray managgaway inmoralidad, saray manangigalang ed saray talintaoy diriyos, saray managkaloguran, saray managliket ed laman na kapara ran laki o kapara ran bii,

¹⁰ saray matakew, saray managlames, saray buanges, saray managpabaing, tan saray maagomanggapod sarayan totoo so makatawir ed Panarian na Dios.

¹¹ Ontan met iray arum ed sikayo nen saman. Balet naorasan ki lad kasalanan yo; apasanto ki lad Dios; nibilang ki lan anggapoy kasalanan ed arap na Dios diad panamegley na ngaran na Katawan tayon Jesu-Cristo tan lapud Ispiritu na Dios tayo.

¹² Walay mangibaga, Nayarian kon gawaen so anggan anto. On, nayari, balet aliwan amin et pankaabigan yo. Nayarian ko met ya ibaga, Nayarian kon gawaen so anggan anto; balet ag ak paoleyan ed anggan anto.

¹³ Ibaga na arum, Say kanen para eges, tan say eges para kanen. Tua tan, balet say Dios deralen to ran dua. Say lamay too aliwan para panggaway inmoralidad, no ag ta para Katawan, tan say Katawan para laman.

¹⁴ Say Dios pinaoli tod bilay so Katawan, ontan met a paolien to itayo diad panamegley na pakayari to.

¹⁵ Ag yo ta amta a saray laman yo et kabyangan nen Cristo? Alaen ko tay kabyangan nen Cristo, insan ko gawaen a kabyangan na biin marotak? Ag nayarin balut!

¹⁶ Ag yo ta amtan say lakin miakdul ed marotak a bii et mankasakey irad laman? Ta ibabagay Masanton Sulat, Magmaliw a saksakey a laman iran dua.

¹⁷ Balet say toon mitipon ed Katawan mikasakey a maispiritu ed sikato.

¹⁸ Ag kayo manggagaway inmoralidad. Say toon manggaway inmoralidad mankasalanan ed laman ton dili. Say toon manggaway arum nin kasalanan, anggapoy nagawad laman to.

¹⁹ Ag yo ta amtan say laman yo et timplo na Ispiritu Santo a manaayam ed sikayo tan inter na Dios ed sikayo? Ag yo kayaryay laman yo; say Dios so makankayaryan, ta

²⁰ mabliy impanaliw tod sikayo. Kanyan ikana yoy laman yo a pamagalang ed Dios.

7

¹ "Nipaakar ed saramay bengatlan insulat yo, onyay nayarian kon ibaga: maung ed sakey a laki no ag mangasawa.

² "Balet lapud ontan lan karakel a nagagawan inmoralidad, nepeg a walay asawa so balang laki tan balang bii.

³ "Nepeg a gawaen na laki so kanepegan tod asawa to; ontan met ed bii.

⁴ "Ta aliwa lan say bii so kawalaay pakayari ed laman ton dil, no ag say asawa to; ontan met, aliwa lan say laki so kawalaay pakayari ed laman ton dili, no ag say asawa to.

⁵ "Ag kayo mansisibletay liket na laman, likud labat no mampaknaan kayon ag manakdul a magano, pian niiter yoy panaon yo ed pampikasi. Balet pawil kayon manakdul lamet, pian nipaliis kayod pananukso nen Satanas, lapud ag yo pakatepel.

⁶ "Sakey a panangyabuloy yay ibabagak, aliwan sakey a ganggan.

⁷ "Labay kon aligen yo ak komun ya amin. Balet balang sakey walay langkap ton manlapud Dios, tan ag nampaparay walad sinansakey.

⁸ "Sayay ibabagak met ed saray tubonbalo tan saray balo: lalon maung ni no mansiansia kayon anggapoy asawa, a singa siak.

⁹ "Balet no ag yo natepelan, mangasawa kayo; ta lalon maung niy mangasawa nen say napoolan na pilalek na laman.

¹⁰ Walay ganggan kod saray walay asawa, ya ag nanlapud siak no ag diad Katawan: ag nepeg a misiyan so bii ed asawa to.

¹¹ No bilang ta gawaen to ya, nepeg ya ag miasawad sananey, odino andi mipulangad asawa to. Say laki ag to nepeg met ya isian so asawa to.

¹² Diad saray arum, nia met so ibabagak, aliwan say Katawan: no say sakey a lakin mananisia et walay asawa ton aliwan mananisia ya ag to labay so misiyan, nepeg ya ag to isian.

¹³ No say sakey a biin Cristiano et walay asawa ton aliwan mananisia ya ag to labay so misiyan, ag to nepeg yan bii so misiyan.

¹⁴ Ta say aliwan mananisian laki et magmaliw a makapaliket ed Dios makasengeg ed mananisian asawa to, tan say aliwan mananisian bii et magmaliw a makapaliket ed Dios, makasengeg ed asawa ton mananisia. Ta no aliwan ontan, ag magmaliw a makapaliket ed Dios iray anak da, balet say katwaan to, makapaliket ira.

¹⁵ Balet no labay na asawan aliwan mananisia so misiyan ed asawa ton Cristiano, paolyan yo labat. Diad satan a nagawa, bolus lay Cristiano ya asawa, bii man o laki, ta tinawag itayoy Dios ed mareen a panagbilay.

¹⁶ Antoy amtam, no sikan bii a Cristiano so ikanay Dios ed kilalaban na asawam? Antoy amtan, no sikan laki a Cristiano so ikanay Dios ed kilalaban na asawam?

¹⁷ Nepeg a mambilay so balang sakey ed sikayo onung ed langkap na Katawan ed sikato tan onung ed kipapasen to nen tawagen na Dios. Onyay ibabangat kod amin ya iglisia.

¹⁸ No asegat lay sakey a too nen tawagen na Dios, ag to la nepeg ya ekalen iray pakanengnengay inkasegat to. No ag ni asegat so sakey a too nen tawagey Dios, ag to la nepeg so pasegat.

¹⁹ Anggapoy kakanaay inkasegat odino ag inkasegat. Say manona, say pangonur ed saray ganggan na Dios.

²⁰ Nepeg a mansiansiay balang sakey ed gendat a kipapasen to nen awaten toy tawag na Dios.

²¹ Aripen ka nen tawagen kay Dios? Anggapoy walad satan, balet no walay pankanawnawam a nabolus, ag mo papalabasen.

²² Ta say too ya aripen nen tawagey Katawan et bolus la a tooy Katawan. Ontan met a say toon bolus nen tawagen nen Cristo et aripen la nen Cristo.

²³ Mabliy impanaliw na Dios ed sikayo; ag kayo sirin papaaripen ed too.

²⁴ Agagi, no antoy kipapasen yo nen tawagen kayoy Dios, mansiansia kayod satan a kipapasen a kaolup yoy Dios.

²⁵ Nipaakar ed saray totoon anggapoy asawa, anggapoy niiter kon ganggan a manlapud Katawan. Balet siak a napanmatalkan lapud panangasiy Katawan, ibabagak iray walad kanunotan ko.

²⁶ Lapud sayay peles a kairapan, iisipen ko a lalon maung no mansiansiad kipapasen to so sakey a laki.

²⁷ Wala lay asawam? Ag ka misisian. Anggapo niy asawam? Ag mo pampipilalekay mangasawa.

²⁸ Balet no mangasawa ka, ag ka mankasalanan, tan no miasaway sakey a marikit ag met mankasalanan. Balet nagunigon irad sayan bilay, et sikato yay labay kon napaliisan yo.

²⁹ Niay labay kon ibaga, agagi: manasingger lay niganan panaon, kanyan manlapud natan, saray walay asawa nepeg day mambilay, a singa ra anggapoy asawa;

³⁰ saray manaakis, a singa ra aliwan maermen; saray manliliket, a singa ra aliwan maliket; saray mansasaliw, a singa anggapoy kayaryan da;

³¹ saray manliliket ed saray minumundon bengatla, a singa anggapoy walawala ra yad sikara. Ta naandipat ya amin iray wala natan ed sayan mundo.

³² Labay ta kayon iyarawi ed saray kapagaay bilay. Say lakin anggapoy asawa et mapaga ed saray kimey a nipaakar ed Katawan, no panoy pamaliket tod Katawan.

³³ Balet say lakin walay asawa mapaga ed saray antokaman ed sayan mundo, no panoy pamaliket tod asawa to.

³⁴ Kanyan nankadwa so kawalaay kapagaan to. Ontan met, say biin anggapoy asawa o say marikit et mapaga ed saray kimey a nipaakar ed Katawan, no panoy pagmaliw ton masanto diad laman tan ispiritu; balet say biin walay asawa et mapaga ed saray antokaman ed sayan mundo, no panoy pamaliket tod asawa to.

³⁵ Ibabagak ya, ta labay ta kayon tulongan. Ag ta kayo sesebelan; labay ko labat a maptek tan maoksuy so pambilay yo, pian diad panlingur yod Katawan et anggapoy makaskasbel.

³⁶ Nipaakar ed saray nasipanan a mankasal ya ag da labay lan ituloy so pankasal da, onyay ibagak: no isipen na laki a mabanday yan nagawad kasipan to, no ag to la napokpokay pilalek na laman to, tan nalikna ton nakaukolan iran mankasal, nepeg a mankasal ira, onung ed labay to. Anggapoy kaogsan to ya.

³⁷ Balet no say laki et pinaletan tod kanunotan to ya ag la mangasawa, ya anggapoy mamasoot ed sikato, no saray ton pokpokan a maung so inkasikato, tan talagan ag to la omaney kanunotan to, maabig so ag to la pangasawa ed kasipan to.

³⁸ No ontan sirin, maabig ed laki no asawaen toy kasipan to, balet lalon maabig no ag to la asawaen.

³⁹ Aliwan bolus so bii no mabilay ni so asawa to. Balet no inatey lay asawa to, nayarian to lay miasawa ed anggan siopan laki a labay to, balet nakaukolan a Cristiano yan laki.

⁴⁰ Balet lalon maliket no ag la miasawan pidwa. Saya so walad kanunotan ko, et isipen kon walad siak met so Ispiritu na Dios.

8

¹ "Onya met so nibagak, nipaakar ed kakanen ya imbagat ed saray talintaoy diriyos. Amta tayon walay pakaamta tayon amin. Say pakaamta pagmaliwen ton mapaatagey so too; balet say aro mamabiskeg.

² "Say toon abaloan ton walay amta to, ag to ni amtay nepeg ton amtaen.

³ "Balet kabat na Dios so toon mangaarod sikato.

⁴ "Kanyan nipaakar ed pangay kakanen a nibagat ed saray talintaoy diriyos: amta tayon anggapoy kabaliksan na talintaoy dios; kabat tayon sasakey labat so Dios.

⁵ "Anggaman a dakerakel ira yan tatawagey diriyos diad tawen o diad dalin, tan talagan amayamay iray diriyos tan saray kakatawan,

⁶ "para sikatayo saksakey so Dios, say Ama ya amalsad amin a bengatla tan mambibilay itayon para sikato. Saksakey met so Katawan, si Jesu-Cristo, a diad panamegley to apalsay amin a bengatla, tan diad panamegley to met mambibilay itayo.

⁷ "Balet sayan katwaan ag amta na amin a katoowan. Wala ray niilwam lad saray talintaoy diriyos kanyan, anggad natan, no mangan iray imbagat ed talintaoy diriyos, abaloan dan kayaryan na talintaoy diriyos yan kakanen. Lapud makapoy so konsinsia ra, mapaga ra ta abaloan dan mankasalanan ira.

⁸ "Say kakanen ag to paabigey pikakasakey tayod Dios. Anggapoy nabawas ed sikatayo no ag itayo mangan, tan anggapo met so kaabigan a naala tayo no mangan itayo.

⁹ "Balet manalwar kayo, ta ompan lapud nayarian yoy mangan na antokaman et saya so makasengeg na pankasalanan da ray makapoy ed pananisia.

¹⁰ No bilang ta sikayon walay pakaamta et anengneng kayoy sakey a toon makapoy so konsinsia to, a mangakan kayod dalem na timploy dios, ag met kasi nadagdag a mangan na kakanen ya imbagat ed saray talintaoy diriyos?

¹¹ Kanyan sayan too a makapoy ed pananisia, say agi yon makasengeg na inateyan nen Cristo, nabalang lapud pakaamta yo!

¹² Lapud saya, mankasalanan kayod Cristo, diad pankakasalanan yod agagi yo, tan diad pandederal yoy konsinsia ran makapoy.

¹³ Kanyan no kakanen so makasengeg na pankasalanan na agik, ag ak lan balut mangan na karni, pian ag ko la nalagyat a mankasalanan so agik.

9

¹ "Aliwa ak ta a toon bolus? Aliwa ak ta ya apostol? Ag ko ta anengneng si Jesus a Katawan tayo? Aliwa kasin sikayo ray bungay panlilingkur kod Katawan?

² "No ag birbiren na saray arum ya apostol ak, andi-duaruwan birbiren yo ak! Ta sikayon dili so pakapatnagan ya apostol ak na Katawan.

³ "Onyay ebat kod saray mamabalaw ed siak:

⁴ "Anggapo tay kanepegan min naitday kanen tan inomen?

⁵ "Anggapo tay kanepegan min mangawit na asawan Cristiano, a singa gagawaen nen Pedro, saray arum ya apostol, tan saray agagi na Katawan?

⁶ "Sikami ta labat nen Bernabe so nakaukolan ya ag ontondad anapay-bilay?

⁷ "Siopa ta a sondalo so igastosan toy sikaton dili diad panlingkur to? Siopa ta a dumaralus so ag to pambilay so intanem to? Siopa ta a managkomponiy karniro so ag to ikanay gatas na karniro to?

⁸ "Ag ira ya labat paneknekay inagewagew a nagagawad bilay na too; sikato met so sasalitaen na Ganggan.

⁹ "Nisulat ed Ganggan nen Moises, Ag mo babalungosay bakan maniilik. Akin baka so aasikasoen na Dios?

¹⁰ Aliwa kasin sikatayoy labay ton ibaga nen inkuan to ya? On, sikatayoy makasengeg no akin et nisulat ya, ta say toon mambaka tan say toon manani walay ilalo ran makapiapag ed naani.

¹¹ Angipasek kamid sikayo na saray maispiritu ran bokel. Makapabelat la kasin tuloy so panani mid sikayo na matiryal iran bengatla?

¹² No saray arum et walay onyan kanepegan dad sikayo, ag kasi nagkalalod sikami? Balet ag mi ya inkanan kanepegan. Intepel mi ingen iray amin a bengatla, pian ag kami makapangyay makasbel ed ikayat na Maung a Balitan nipaakar ed Cristo.

¹³ Ag yo ta kabat a saray manlilingkur ed Timplo et diad Timplo met so pangaalaan day kakanen da, tan saray mangibabagat ed altar et minanabang irad saray ibabagat?

¹⁴ Ontan met ya ingganggan na Katawan a saray mampulong na Maung a Balita et nepeg a diad Maung a Balita so pangalaan day pambilay da.

¹⁵ Balet anggapoy inkanak ed sarayan kanepegan ko, tan aliwan say pikekerew koy pambilay ko so makasengeg na pansusulat kod saraya. Lablabayen ko niy ompatey nen say pagmaliwen dan andi-kakanaan so makanepegan a pampasirayew ko!

¹⁶ Anggapoy kanepegan kon mampasirayew makasengeg labat ed pampupulong koy Maung a Balita! Ta ingganggan ak a manggawad saya, et pakaskasi ak no ag ko ipulong so maung a Balita!

¹⁷ No pinilik yan kimey, walay ilaloan kon tumang. Balet gagawaen ko yan pangonur kod sakey a ganggan, ta nipia yan kimey ed siak.

¹⁸ Anto siriy tumang ko? Say tumang ko say pankanawnawak a mangipulong ya anggapoy bayar na Maung a Balita, say ag ko pangaalay intiron kanepegan a para siak diad pampupulong koy Maung a Balita.

¹⁹ Bolus ak tan anggapon balut so manggariped siak, balet papaaripen ak ed amin a too, pian dakel so natanggoyur kod pananisia.

²⁰ No kaibak iray Judio singa ak Judio, pian natanggoyur ko ra. Anggaman ya ag ak nasasakopay Ganggan nen Moises, pasasakop ak no kaibak iray nasasakopay Ganggan, pian natanggoyur ko ra.

²¹ Ontan met, no kaibak iray Hintil mambibilay ak a singa Hintil ya ag nasasakopay Ganggan, pian natanggoyur ko ra. Ag to kabaliksan yan ag ko oonurey ganggan na Dios, ta tuan nasaskopan ak na ganggan nen Cristo.

²² No kaibak iray makapoy, mampapakapoy ak met a singa sikara, pian natanggoyur ko ra. Mipapara ak ed amin a totoo diad amin a kipapasen da, pian nilaban ko ray arum ed sikara diad anggan anton pamaakaran.

²³ Gagawaen ko yan amin makasengeg ed Maung a Balita, pian makapinabang ak met ed saray bindision to.

²⁴ Amta yon saray milulumba ombabatik iran amin, balet sakey labat ed sikara so makalay tumang. Batik kayo sirin a singa milulumba, pian makala kayoy tumang!

²⁵ Saray mampapasal a milumba nakaukolan a mandangka rad amin a ganagana. Gagawaen da ya, pian nagamuran day korona a naderal lamlamang, balet koronan ag naderal so nagamuran tayo.

²⁶ Kanyan singa ak milulumba a pilalek koy manalo, tan singa ak buksingiron ag mamoponitid dagem.

²⁷ Papairapen koy laman ko tan aaripenen ko, ta ompan kasumpal kon mampulong ed arum et siak so nipolisay.

10

¹ "Labay kon nunoten yo, agagi, no antoy agawa ed saray lalaki tayo a tinmombuk ed kinen Moises. Tinarungan iran amin na lorem tan binaliw dan amin so Dayat ya Ambalanga.

² "Kanyan diad lorem tan dayat, amin da abinyagan a mananombuk nen Moises.

³ "Angan iran amin na namparan maispirtun kakanen,

⁴ "inminom ira na namparan maispiritu ya iinomen. Inminom ira ed maispiritun bato ya angolup ed sikara, tan sayan baton-dampay et si Cristo.

⁵ "Anggaman ontan, karaklan ed sikaray ag akapaliket ed Dios, kanyan akaykayat ed kalawakan iray bangkay da.

⁶ "Sarayan agawa et pamasakbay ed sikatayo, pian ag tayo pampilalekan iray bengatlan maoges, a singa impanpipilalek da,

⁷ "tan ag itayo mangigalang ed saray talintaoy diriyos, a singa ginagaway arum ed sikara. Onung na ibabagay Masanton Sulat, Saray totoo nandorongo ran nampista, tan say pista et agawan inoman tan liketay laman.

⁸ "Ag itayo met komun manggagaway inmoralidad, a singa ginagaway arum ed sikara, kanyan duamplo tan talon libo ed sikara so inatey ed loob na sanagew.

⁹ "Ag tayo nepeg subokey Katawan, a singa ginagaway arum ed sikara, kanyan pinapatey ira na saray oleg.

¹⁰ Ag itayo nepeg a manriklamo, a singa ginagaway arum ed sikara, kanyan pinapatey iray Anghil na Patey.

¹¹ Agawgawa ra ya ed sikara pian napasakbayan iray arum, tan nisulat ira pian nabangatan itayo, ta mambibilay ti lad kaonuran a panaon.

¹² Kanyan manalwar so siopaman ya abaloan ton akaalagey, ta ompan natumba.

¹³ Anggapo niy sinmabin tukso ed sikayo ya ag ni asaliy karaklan. Matoor so Dios, kanyan ag to iyabuloy ya onsabid sikayoy tukson ag yo nayarian a taloen. Itdan to kayo ingey biskeg no natukso kayo, pian napaliisan yo, et manalo kayo.

¹⁴ Kanyan sirin, inararo, ag kayo mangigagalang ed saray talintaoy diriyos.

¹⁵ Makakabat kayon totoo a susulaten ko, kanyan akaoley ki la no antoy pangipasen yod ibabagak.

¹⁶ Aliwa kasin say iyiinom tayod kupa na bindision a pisasalamatan tayod Dios et pinanabang ed dala nen Cristo? Tan say papangan tayoy tinapay a pipisagen tayo et pinabang ed laman nen Cristo?

¹⁷ Lapud saksakey so tinapay saksakey itayon laman, anggaman ya amayamay itayo, ta saksakey a tinapay so pannanabangan tayo.

¹⁸ Imano yo pa ray Israelita: ag ta minanabang ed panlilingkur ed Dios diad altar iray mangakay imbagat?

¹⁹ Antoy labay kon ibaga? Labay ko kasin ibaga a makabaliksan so dios odino say kakanen ya imbagat ed talintaoy dios?

²⁰ Andi! Say labay kon ibaga: saray Hintil mangibabagat iray kakanen diad saray dimonyo, aliwan diad Dios, et ag ko labay a mikasakey kayod saray dimonyo.

²¹ Ag yo nayariay oninom ed kupay Katawan tan diad kupa da ray dimonyo. Ag yo nayariay ondongod lamisaay Katawan tan diad lamisaan da ray dimonyo.

²² Labay tayo kasin pangimoney Katawan? Mabiskeg itayo ta nen say sikato?

²³ Walay mangikuan, Nayarian kon gawaey antokaman. On, balet aliwan amin et maung. Nayarian kon gawaey antokaman. On, balet aliwan amin et makatulong.

²⁴ Nepeg ya anggapoy mananap na pankaabigan ton dili, no ag say pankaabigan na arum.

²⁵ Nayarian yon kaney antokaman a nasaliw ed lakoway karni ya ag kayo la tepet-tepet, lapud konsinsia.

²⁶ Ta ibabagay Masanton Sulat, Kayaryan na Katawan so mundo tan amin a logan to.

²⁷ No bagaan kayoy sakey ed saray aliwan mananisia, et labay yoy onla, akan yoy antokaman ya iparongo tod sikayo, ya ag kayo la tepet-tepet, lapud konsinsia.

²⁸ Balet no walay mangikuan ed sikayo, Imbagat yad saray talintaoy diriyos, ag yo kakanen, makasengeg ed samay angipaamtad sikayo tan say konsinsia;

²⁹ aliwan say konsinsia yo no ag say konsinsia to, so labay kon ibaga. Ta akin et dangkaan na konsinsiay arum so kanepegan kon manggaway labay kon gawaen?

³⁰ Akin et balawen ak na arum lapud papangan koy kakanen a pisasalamatan kod Dios?

³¹ Kanyan sirin, mangan kayo man odino oninom, o anggan antoy gawaen yo, gawa yon amin a pakagalangan na Dios.

³² Mambilay kayo ya aliwan sikayoy panlapwan na pankasalanay siopaman--saray Judio, saray Grigo, o saray kabyangay iglisia na Dios.

³³ Gawa yoy gagawaen ko; papaliketen koy amin a katoowan tan ag ko nununotey pankaabigan ko, no ag say pankaabigan na amin pian nilaban ira.

11

¹ "Alig yo ak sirin, a singa pangaalig kod Cristo.

² "Idadayew ta kayo, ta nununoten yo ak lawas tan oonuren yo ray bangabangat kod sikayo.

³ "Balet labay kon talusan yo a si Cristo so manoley ed amin a lalaki, say laki so manoley ed asawa to, tan say Dios so manoley ed Cristo.

⁴ "Kanyan say lakin akapandung no mampikasi o mampulong na salitay Dios, pabaingan toy Cristo.

⁵ "Say biin ag akapandung a mampikasi o mampulong na salitay Dios, pabaingan toy asawa to; singa biin kiskis so olo to.

⁶ "No ag labay na sakey a bii so mampandung, mampakiskis la laingen na olo to. Balet lapud makapabaing ed sakey a bii so mampakatli o mampakiskis na olo to, nepeg a mampandung.

⁷ "Ag nepeg a mampandung so laki, ta sikatoy kaolibay tan kagalangay Dios. Balet say bii kagalangay laki,

⁸ "ta ag nanlapuy laki ed bii, no ag say bii so nanlapud laki.

⁹ "Ag met pinalsa so laki para bii, no ag say bii pinalsan laki.

¹⁰ Lapud saray anghil, nepeg a mampandung so bii, pian napatnagan a sikatoy walad silong na pakaoley na asawa to.

¹¹ Anggaman ontan, onung ed pikakasakey tayod Katawan nakaukolan na bii so laki, tan nakaukolan na laki so bii.

¹² No nanlapuy bii ed laki, say laki met et inyanak na bii; tan nanlapud Dios so amin a bengatla.

¹³ Sikayo lay makaoley no antoy pangipasen yo ed saya: maabig kasin nengnengen so sakey a biin ag akapandung no mampikasi ed Dios?

¹⁴ Ag kasi natural a mabanday ed laki so mamparokey na buek?

¹⁵ Balet pakadayewan na bii so mamparokey na buek, ta onkanan panakbung.

¹⁶ Balet no walay labay toy misangsangan nipaakar ed saya, anggapoy nibagak no ag saya: anggapoy arum ya ogali mi tan saray iglisia na Dios.

¹⁷ Diad saray onggendan iran bitlaen ko natan, ag ta kayo nayarin idayew ta aliwan say kamaungan so iiter na pantitipon yo, no ag ingen say kaogsan.

¹⁸ Onona, abalitaan kon naapag-apag so pantitipon yo, tan manisia ak a walay katwaan to ya.

¹⁹ (Nakaukolan a naapag-apag kayo, pian naamtan no siopad sikayoy walad kaptekan.)

²⁰ Diad pantitipon yo, aliwan say pangan yoy Pandem na Katawan so iyaakaran yo.

²¹ Ta manlulumbaay balang sakey a mangay balun to, kanyan nanaerasan iray arum tan nabuebuek ni ra ingey arum.

²² Anggapo tay kaabungan yon panganan tan inoman yo? Odino lalon labay yon lemlemewey iglisiay Dios tan pabpabaingan iray mairap-bilay? Antoy ibagak ed sikayo natan? Idayew ta kayo kasi? Andi! Ag ta kayo nepeg ya idayew ed sayan gagawaen yo!

²³ Ta inawat kod Katawan so bangat ya inter kod sikayo: say Katawan a Jesus, diad samay labin impangyawat dad sikato, angalay tinapay,

²⁴ akisalamat ed Dios, insan to pinipisag tan kuanto, Sikato yay laman ko a para sikayo; gawa yo ya a pakanudnunotan ed siak.

²⁵ Ontan met kasumpal dan nandem, angalay kupa tan kuanto, Sayan kupa sikatoy balon impisipanay Dios a paneknekay dalak. Kapag oninom kayod saya, gawa yo a pakanudnunotan ed siak.

²⁶ Ta kapag kanen yo yan tinapay tan oninom kayod sayan kupa, ipaamta yoy impatey na Katawan anggad ipawil to dia.

²⁷ Ontan sirin, siopamay aliwan manepeg a mangan na tinapay tan oninom ed kupa na Katawan, mankasalanan ed laman tan dala na Katawan.

²⁸ Kanyan nakaukolan a sokayan na balang sakey so sikaton dili, kasakbayan a mangan na tinapay tan oninom ed kupa.

²⁹ Ta siopamay ag mamirbir ed kabaliksan na lamay Katawan, sintinsiaan toy sikaton dili diad pangan toy tinapay tan iyinom tod kupa.

³⁰ Sikato yay makasengeg no akin et dakel ed sikayo ray makapoy tan mansasakit, tan amayamay lay inatey.

³¹ No sokayan tayon maung ya onona so sikatayon dili, ag itayo dusaey Dios.

³² Balet no dusaen itayoy Katawan, labay to itayon peteken, pian ag itayo nasintinsiaay dusa a kaiba tayoy sankamundoan.

³³ Kanyan, agagi, manaalagaran kayo no mantitipon kayon mangay Masanton Pandem.

³⁴ No walay narasan, nepeg a mangad abung, pian ag mansumpal ed panusay Katawan so pantitipon yo. Nipaakar ed saray arum a bengatla, arigloan ko la no onsabi ak ditan.

12

¹ "Natan, ipaliwawak ed sikayo ray nipaakar ed saray langkap na Ispiritu Santo. Agagi, labay kon malinew ed sikayon amin ira ya.

² "Amta yo a nen aliwa ki nin mananisia, tinmotombuk kayod saray ag makasalitan talintaoy diriyos a lawas angibabalang ed sikayo.

³ "Kanyan labay kon naamtaan yo ya anggapoy toon iwawanwan na Ispiritu na Dios a makapangikuan, Naayew si Jesus! Ag met nikuan na siopaman a toon ag iwawanwan na Ispiritu Santo, Katawan si Jesus.

⁴ "Nandoromay langkap a maispiritu, balet saksakey ya Ispritu so mangiiter ed saraya.

⁵ "Nandoromay panaglingkur, balet saksakey a Katawan so panlilingkuran.

⁶ "Nandoromay pakayari ed panagkimey, balet saksakey so Dios a mangiiter ed balang sakey na pakayarin man kimey.

⁷ "Say kiwawalay Ispiritu nipapatnag ed balang sakey diad nandoroman nengneng, a para kaabigan na amin.

⁸ "Iiter na Ispiritu ed sakey a too so pakayarin mangipulong na salitay Dios, tan diad sananey a too say pakayarin mantalus na salitay Dios.

⁹ "Say Ispriritu met so mangiiter ed sakey a too na pananisia, tan diad sananey a too say pakayarin mamaabig ed saray mansasakit.

¹⁰ Say Ispiritu met so mangiiter ed sakey a too na pakayarin manggaway milagro; diad sananey a too, say langkap a mampulong na salitay Dios; tan diad sananey nin too, say pakayarin napambiigan to ray langkap a manlalapud ispritu tan saray manlalapud maoges ya ispiritu. Diad sakey a too iiter toy pakapansalitay nandoroman salita, tan diad sananey a too say pakapangipatalus ed sarayan nandoroman salita.

¹¹ Balet saksakey labat ya Ispiritu so manggagawa ed amin da ra ya, tan nandoroman langkap so iiter tod balang sakey, onung ed linawa to.

¹² Si Cristo et singa sakey a laman ya amayamay so kabyangan to; anggaman a titibokeley nandoroman kabyangan, saksakey ni lamlamang yan laman.

¹³ Ontan met ya amin tayo, Judio man o Hintil, aripen man o andi, bininyagan itayo na saksakey ya Ispiritu, tan nagmaliw itayon sakey a laman. Pinainom itayo met ya amin ed saksakey ya Ispiritu.

¹⁴ Ta say dilin laman et titibokeley amayamay a kabyangan, aliwan saksakey labat.

¹⁵ No ibagay sali, Aliwa ak a lima, kanyan aliwa ak a kabyangay laman, ag to kabaliksan ya aliwa lan kabyangay laman.

¹⁶ No ibagay layag, Aliwa ak a mata, kanyan aliwa ak a kabyangay laman, ag to kabaliksan ya aliwa lan kabyangay laman.

¹⁷ No say intiron laman et mata labat, panoy pakadngel to? Tan no layag labat, panoy pakaangub to?

¹⁸ Balet, onung ed labay na Dios, impasen tod laman iray nandoroman kabyangan.

¹⁹ Anggapoy laman no saksakey so kabyangan to!

²⁰ Say katwaan to, amayamay so kabyangan balet saksakey so laman.

²¹ Kanyan sirin, ag nibaga na mata ed lima, Ag ta ka nakaukolan! Ag met nibaga na olo ed saray sali, Ag ta kayo nakaukolan.

²² Say katwaan to, saray singa anggapoy kanan kabyangay laman et sikara la laingey nakaukolan.

²³ Papagalangan tin maung iray kabyangay laman a nababaloan tayon andiay kagalangan. Paparakepen ti ray kabyangan ya aliwliway nengneng da.

²⁴ Ag nakaukolan a gawaen tayo ya ed saray marakep a kabyangay laman. Nen inoksuy na Dios so laman tayo, pinagalangan to ray kabyangan a kulang so kagalangan da,

²⁵ pian anggapoy pansisian da ray kabyangay laman, no ag ingen manmamasakitan ira.

²⁶ No apasakitay sakey a kabyangan, nalikna iran amin. No apagalangay sakey a kabyangan, naliketan iran amin.

²⁷ Amin yo sirin et saksakey a laman nen Cristo, tan balang sakey et kabyangan to.

²⁸ Impasen na Dios ed iglisia, onona, saray apostol; onkumadwa, saray propita; onkumatlo, saray bumabangat. Insan impasen to ray managgawa na milagro, saray walay pakayarin mamaabig na mansasakit, saray mananulong, saray inkargado na kimey, tan saray managsalitay nandoroman salita.

²⁹ Aliwan amin da et apostol, o propita, o bumabangat. Ag ira naitdan ya amin na pakayarin manggaway milagro,

³⁰ o mamaabig na mansasakit, o mansalitay nandoroman salita, odino mangipatalus ed sarayan salita.

³¹ Pampilalekan yo sirin iray lalon manonan langkap. Balet iparontal kod sikayo niy sankaabigan ed amin.

13

¹ "Anggaman a nayarian koy mansalita na nandoroman salita da ray totoo tan saray anghil, no anggapo balet so arok, singa ak labat matalangatang a kampana tan makmaknul a piangpiang.

² "Anggaman a naitdan ak na pakayarin mampulong na salitay Dios; anggaman a walad siak so kakabatan tan pakatalus ed amin da ray niamut a katwaan; anggaman a walay mabiskeg a pananisiak pian nayarian kon paekalen iray palandey ed kawalaan da, no anggapo balet so arok, anggapoy kakanaan kon too.

³ "Anggaman ya iter kod saray mairapbilay iray amin a kayaryan ko, o ibagat koy laman kon papoolan, no anggapo balet so arok, anggapoy kaabigan a niiter to yad siak.

⁴ "Say aro maanos tan mapangasi; aliwan maimon, o mapasirayew, o mapaatagey;

⁵ "say aro aliwan mabanday so kagagawa to, aliwan masiblet, o maipapasnuk; ag mamopokuk na sakit na linawa.

⁶ "Say aro ag manliliket ed kaogsan, no ag ingen manliliket ed katwaan.

⁷ "Say aro et ag balut onsuko, tan ag balut naandian na pananisia, ilalo, tan anos.

⁸ "Walay pakayarin mampulong na salitay Dios, et ag mansiansia. Walar ray langkap na panagsalitay nandoroman salita, et ag ira mansiansia. Wala met so kakabatan, et ag mansiansia. Balet say aro mansiansiad anggad angga.

⁹ "Aliwa nin nagnap so kakabatan tayo tan say pakayari tayon mampulong na salitay Dios.

¹⁰ Balet no onsabi lay ayadyari, naekal lay aliwan ayadyari.

¹¹ Nen ogaw ak ni inoogaw so panagsalitak, panagliknak, tan panag-isip ko. Balet natan ta matakken ak la, nilingwanan ko la ray inoogaw a kagagawa.

¹² Say nanenengneng tayo natan et singa burarog a lupa ed salming; balet onsabiy agew a nanengneng tayo ed lupa-lupaan. Daiset niy amtak natan, balet onsabiy agew a magmaliw ya ayadyari so pakaamtak, a singa ayadyarin pakapikabat na Dios ed siak.

¹³ Mansiansia ra yan talo: say pananisia, ilalo, tan aro; balet say aro so sankabalgan ed saraya.

14

¹ "Pampirawatan yo sirin so aro. Pampelengan yo ray maispirtun langkup, nagkalalo lad pampulong na salitay Dios.

² "Say toon mansasalitay nandoroman salita et say Dios so pitotongtongan to, aliwan say totoo, ta anggapoy makatalus ed sikato. Mansasalita na niamut iran katwaan lapud pakayari na Ispiritu.

³ "Balet say toon mampupulong na salitay Dios et mitotongtong ed saray totoo tan pabibiskegen toy pananisia ra, sisimbawaen, tan liligliwaen to ra.

⁴ "Say toon mansalitay nandoroman salita et pabiskegen to labat so maispiritun bilay to, balet say toon mampulong na salitay Dios pabiskegen toy iglisia.

⁵ "Labay ko komun a makapansalita kayon amin na nandoroman salita, balet nagkalalon pilalek ko a makapampulong kayon amin na salitay Dios. Makana niy toon mampulong na salitay Dios nen say toon mansalitay nandoroman salita, likud labat no walay mangipatalus ed salitaen to, pian makatulong ed ibiskeg na iglisia.

⁶ "Kanyan, agagi, no onla ak ditan tan mansalita ak na nandoroman salita, antoy napinabangan yod siak? Anggapo! Wala labat so nagunggona yo, no awit kod sikayoy puyan na Dios, o say kakabatan, o saray nagawa, o arum iran bangat.

⁷ "Anggan saray anggapoy bilay ya ikakanad panagtogtog, a singa say plauta tan say arpa--panoy pakaamta na anggan siopa no antoy totogtogen da, no aliwan malinew so tanul da ray nota?

⁸ "Tan no aliwan malinew so panawag na trumpita, siopay mamparaan a mibakal?

⁹ "Ontan met, panoy pakatalus na siopaman ed labay yon ibaga no say pansalita yo na nandoroman salita et aliwan malinew? Saray salita yo et singa labat onlalabas a dagem!

¹⁰ Dakel iray nandoroman salitad mundo, tan natalusan iran amin.

¹¹ Balet no ag ko amtay salitan ikakanay katongtong ko, ag kami makapantalusan.

¹² Bangta pampilalekan yoy pakagamur yo ray maispiritun langkap, pampelengan yon maung iray langkap a makapabiskeg ed iglisia.

¹³ Lapud saya, say mansalitay nandoroman salita nakaukolan a mampikasi a naitdan met komun na langkap a mangipatalus ed salitaen to.

¹⁴ Ta no mampikasi ak diad panamegley na nandoroman salita, mampikasin tuay ispirituk, balet anggapoy pibiang na kanunotan ko.

¹⁵ Anto siriy nepeg kon gawaen? Mampikasi ak diad panamegley na ispirituk, balet ikanak met ed panagpikasik so kanunotan ko. Mankanta ak diad panamegley na ispirituk, balet ikanak met ed panagkantak so kanunotan ko.

¹⁶ No misalamat kad Dios diad panamegley na ispiritu labat, panoy pangikuay Amen na sakey a toon wadman ya anggapod sikatoy ontan a langkap, bangta ag to natalusay ibagam?

¹⁷ Maung a tua so pisasalamat mod Dios, balet ag to napabiskeg so maispiritun bilay na arum a too.

¹⁸ Misalamat ak ed Dios, ta lalon makapansalita ak na nandoroman salita nen say sikayon amin.

¹⁹ Balet diad pantitipon na iglisia, lablabayen ko niy mansalitay limlimaran balikas a natalusan pian nibangat ko ray arum, nen say nilibon balikas ya ag natalusan.

²⁰ Agagi, ag kayo singa ogogaw diad panagnunot yo. Mipara kayod saray ogogaw no nipaakar ed kaogsan, balet singa kayo komun matakken diad panagnunot yo.

²¹ Onyay walad Masanton Sulat, Inkuay Katawan: mansalita ak ed sayan bansa, diad panamegley na totoon nandoromay salita ra, diad panamegley na saray bibil na totoon nanlapud arum a bansa. Anggaman ontan, ag da ak dengelen.

²² Ontan sirin, say langkap na pakapansalitay nandoroman salita et sakey a tanda a para saray aliwan mananisia, aliwan para saray mananisia. Balet say langkap na pampulong na salitay Dios et sakey a tanda a para saray mananisia, aliwan para saray aliwan mananisia.

²³ No diad pantitipon na intiron iglisia et mansalitay balang sakey na nandoroman salita, insan onloob iray arum a totoo ya anggapoy ontan a langkap da odino ag ira manisia, ag da kasi ibagan ambagel kin amin?

²⁴ Balet no amin yo et mampulong na salitay Dios, insan onloob so sakey ya ag manisia odino anggapod sikatoy ontan a langkap, nabirbir ton sikatoy makasalanan, nasintinsiaan diad panamegley na amin a narengel to,

²⁵ tan naamtaan to ray iyaamut na puso to. Kanyan ondakmomo, igalang toy Dios, tan ikuanto, Tuan wadyay Dios ed pegley yo!

²⁶ Anto sirin so labay kon ibaga ed sarayan amin, agagi? Diad pantitipon yo a mangigalang, walay manganta, walay mambangat, walay mangipaamta na puyan na Dios, wala met so mansalitay nandoroman salita, tan walay mangipatalus ed sarayan salita. Gawa yo ray amin a bengatlan makapabiskeg ed iglisia.

²⁷ No walay mansalitay nandoroman salita, duga lay duara tan ag la nepeg ya onsoluk ed talora, mampapalabasan iran mansalita, tan nepeg a walay mangipatalus na ibaga ra.

²⁸ Balet no anggapoy mangipatalus, nepeg a mandeen ira, tan mitongtong ira labat a bukbukor ed Dios.

²⁹ Nepeg a duara o talora ya akaawat na langkap a mampulong na salitay Dios so mansalita, tan saray arum so manimbang ed ibaga ra.

³⁰ No walay toon akayorung diman ya akaawat na balitan nanlapud Dios, nepeg ya ontonda so siopaman a mansasalita.

³¹ Nayari ya amin yo et sansakey a mampulong na salitay Dios, pian makaaral tan napabiskeg so linawa yon amin.

³² Saray walay langkap a mampulong na salitay Dios nepeg a napatonda ray laman dan dili.

³³ Ta say Dios aliwan Dios na golo, no ag ingen Dios na kareenan. Onung na nepeg a nagawad amin da ray iglisia na totooy Dios,

³⁴ nepeg a mandeen iray bibii diad pantitipon na saray kabyangay iglisia. Ta ag nayarin mansalita ra diad ontan iran pantitipon; nepeg a sikaray paoleyan onung na ibabagay Ganggan.

³⁵ No walay labay dan amtaen, tepeten da lad kaasawaan da no kasabi rad abung, ta mabambanday so sakey a biin mansalita ed pantitipon da ray kabyangay iglisia.

³⁶ Ompan nababaloan yo a nanlapud sikayoy salitay Dios? O sikayo labat so akaawat?

³⁷ No nababaloan na siopaman a sikatoy managpulong na Dios o walay maispiritun langkap to, nepeg ton birbiren a saray isusulat kod sikayo et ganggay Katawan.

³⁸ Say toon ag mamirbir ed saya, ag yo nepeg a birbiren.

³⁹ Kanyan, agagi, pampilalekan yoy pakapampulong yoy salitay Dios, balet ag yo sesebelay pansalitay nandoroman salita.

⁴⁰ Nepeg a maabig tan maoksuy so panggawa yod antokaman.

15

¹ "Natan ipapanunot kod sikayo, agagi, so ibanghilyo ya impulong kod sikayo, say Maung a Balita ya inawat yo tan niletnegay pananisia yo.

² "Nilaban kayo diad panamegley na Maung a Balitan impulong ko no bembenan yon maletlikud labat no anggapoy kabaliksan na impanisia yo.

³ "Ta inter kod sikayo so manonan bangat ya inawat ko met, salanti, inatey si Cristo lapud saray kasalanan tayo, onung ed Masanton Sulat;

⁴ "imponpon tan inmolin binmilay ed kumatlon agew, onung met ed Masanton Sulat;

⁵ "pinmanengneng ed kinen Pedro, insan diad sikaran amin a labinduan apostol.

⁶ "Pinmanengneng met ed masoluk a liman lasus ya agagi a nantitipon. Karaklan ed sikaray mabilay ni ya anggad natan, balet inaatey la ray arum.

⁷ "Pinmanengneng met ed kinen Santiago, insan diad saray amin ya apostol.

⁸ "Diad kasamputan, pinmanengneng met ed siak, anggaman a kaparak so ogaw a nianak ed oras ya ag ilaloan,

⁹ "ta sankaabebaan ak ed saray apostol, ag ak ingen manepeg a tawagey apostol, ta pinapairap koy iglisia na Dios.

¹⁰ Balet lapud baleg a panangaroy Dios, nagmaliw ak ya apostol, tan ag met naandiay kakanaan so baleg a panangaro ya inter tod siak. Mairap niy impankimey ko nen say siopaman ed sikara, anggaman ya aliwan lapud biskeg kon dili, no ag lapud baleg a panangaro na Dios ed siak.

¹¹ Kanyan siak man o sikara, sikato yay ipupulong mi tan sikato ya met so panisiaan yo.

¹² Natan ta ipupulong min naolid bilay si Cristo, akin et saray arum ed sikayo ibabaga ran ag naolid bilay iray inaatey?

¹³ No ag naolid bilay iray inaatey, ag met sirin pinaolid bilay si Cristo.

¹⁴ Et no ag naolid bilay si Cristo, anggapoy kakanaay pampupulong mi tan say pananisia yo.

¹⁵ Sakey ni no ontan, ompaway ya aliwa kamin tuan tasi na Dios. Ta pinaneknekan min say Dios pinaoli tod bilay si Cristo, balet ompaway ya aliwa yan tua no talagan ag naolid bilay iray inaatey.

¹⁶ No ag naolid bilay iray inaatey, ag met sirin naolid bilay si Cristo.

¹⁷ No ag naolid bilay si Cristo, anggapoy kakanaay pananisia yo tan ag kayo ni naokpus ed saray kasalanan yo.

¹⁸ Aliwa nin satan labat, ompaway ya amin da ray inaatey a mananisiad Cristo et abalang ira.

¹⁹ No say ilalo tayod Cristo et diad sayan bilay labat, sikatayo lay pangaskasiyan ed amin a katoowan.

²⁰ Balet say katwaan et naolid bilay si Cristo a pamaneknek a naolid bilay iray inaatey.

²¹ No panoy insabiy patey diad panamegley na sakey a too, ontan met a sinmabiy kiolid bilay diad panamegley na sakey a too.

²² Ta no panoy ipatey na amin a katoowan lapud pikakasakey dad kinen Adan, ontan met a naolid bilay iray amin a katoowan lapud pikakasakey dad Cristo.

²³ Balet balang sakey onung ed niganan panaon to: si Cristo so onaan, insan onsoblay iray totoo nen Cristo, diad ipawil to dia.

²⁴ Insan onsabiy kasamputan, kasumpal a taloen nen Cristo iray amin a maispiritun manoley, saray walay betang tan pakayari; tan yawat tod Dios Ama so Panarian.

²⁵ Ta nakaukolan a manariy Cristo, anggad say Dios napasuko tod sikato ray amin a kalaban.

²⁶ Say patey so kaonuran a tatalowen.

²⁷ Ta ibabagay Masanton Sulat, Say Dios pinasuko tod sikato iray amin a bengatla. Malinew a diad samay salitan amin a bengatla, ag ipipila so Dios ya angyay amin a bengatla ed silong na pakayari nen Cristo.

²⁸ Et no wala lad silong na pakaoley nen Cristo iray amin a bengatla, sikaton dili, say Anak, onsilong met lad satan ed pakaoley na Dios ya angyan na amin a bengatla ed silong na pakayari to. Say Dios ed satan manari lan nagnap ed amiamin.

²⁹ No aliwan ontan, antoy kipapasen da ra may totoon abinyagan para saray inaatey? No tuan ag naolid bilay iray inaatey, akin sirin et mampabinyag ni ray totoo para saray inaatey?

³⁰ Tan sikamiakin et ipoposta miy bilay min inoras-oras?

³¹ Susubaen koy patey ya inagew-agew, agagi! Ibabagak ya, ta ikikinon ta kayo, lapud pikakasakey tayod Cristo Jesus a Katawan tayo!

³² No say getmay too labat so makasengeg na impilaban ko diad Efeso, a singa ak milalaban ed masebesebeg iran ayayep, antoy nagunggonak? No ag met lamlamang naolid bilay iray inaatey, lalon maung nin onuren tayo may kuanda, Mangan tan oninom itayo, ta nabwas ompatey itayo.

³³ Ag kayo patitilaan. Saray maoges a kaolup deralen day maung a kagagawa.

³⁴ Pawil kayod maptek a panagnunot yo tan ibeneg yo la ray kasalanan yo. Pigarad sikayo so ag makapikabat ed Dios; ibabagak ya, pian nabaingan kayo.

³⁵ Balet walay mantepet, Panon a naolid bilay iray inaatey? Antoy klasi na laman da?

³⁶ Ag ka makatalus! Ag ontuboy bokel ya isokit mod dalin, no ag ni ompatey.

³⁷ Tan say isokit mod dalin aliwan say baleg lan tanaman, no ag say bokel, a singa bilang say bokel na trigo o arum a bokel.

³⁸ Say Dios, onung ed labay to, so mangiter na laman ed satan a bokel. Itdan toy manepeg a laman so balang bokel.

³⁹ Ag nampaparay laman da ray pinalsan walay bilay; domay laman na too, domay laman na ayep, doma met so lamay manok, tan ontan met a domay laman na sira.

⁴⁰ Wala ray laman a mangatatawen, tan wala met iray mangaraldalin. Domay dakep da ray laman a mangatatawen, tan domay dakep da ray laman a mangaraldalin.

⁴¹ Walay dilin dakep na agew a nidomad dakep na bulan tan dakep da ray bitewen. Anggan saray bitewen, nandoromay dakep na balang sakey.

⁴² Ontan met so nagawa no naolid bilay iray inaatey. Naboluk so laman ya ipompon, balet ag naboluk so laman a naolid bilay.

⁴³ Aliwliwa tan makapkapoy so laman ya ipompon, balet marakerakep tan mabisbiskeg so laman a paolien ed bilay.

⁴⁴ Imponpon a natural a laman, balet naolid bilay ya ispiritual a laman. No walay natural a laman, wala met so ispiritual a laman.

⁴⁵ Onung met na ibabagay Masanton Sulat, Say onaan a too a si Adan et pinalsan initday bilay; balet say kaonuran ya Adan say Ispiritu a mangiiter na bilay.

⁴⁶ Ag inmonay ispiritual, no ag say natural, insan say ispiritual.

⁴⁷ Say inmonan too, nanlapud dalin, ta pinalsad dabuk; say kumadwan too nanlapud tawen.

⁴⁸ Saray mangaraldalin a laman et mipara rad samay nanlapud dalin; saray mangatatawen a laman, et mipara rad samay nanlapud tawen.

⁴⁹ No panoy pipara tayod samay toon nanlapud dalin, ontan met ya onsabiy agew a mipara tayod samay Toon nanlapud tawen.

⁵⁰ Sayay labay kon ibaga, agagi: say walay laman tan dala to, ag to natawir so Panariay Dios, tan say laman a naboluk, ag to natawir so ag naboluk.

⁵¹ Dengel kayod sayay niamut a katwaan ya ibagak: ag itayo ompatey ya amin, balet naoman itayon amin,

⁵² diad sakey a bekta, diad kakirem labat, no ontanul lay kaonuran a trumpita. Katanul na trumpita, saray inaatey paolien irad bilay tan ag la ra ompatey. Naoman itayon amin,

⁵³ ta sayan laman a naboluk; tan say laman ya ompatey, nakaukolan a nasalatan na ag ompatey.

⁵⁴ No asalatan lay ag naboluk so naboluk tan asalatan lay ag ompatey so ompatey, napatwa lad satay ibabagay Masanton Sulat: Aderal so Patey, nagnap lay pananalo!

⁵⁵ Iner, O Patey, so kawalaay pananalom? Iner, O Patey, so kawalaay pakayarim a mamasakit?

⁵⁶ Say pakayariy patey et manlapud kasalanan, tan say pakayariy kasalanan et manlapud Ganggan.

⁵⁷ Balet misalamat itayod Dios a mangiiter ed sikatayoy pananalo diad panamegley na Katawan tayon Jesu-Cristo!

⁵⁸ Kanyan, inararok iran agagi, mansiansia kayon malet tan ag nagiing. Mankoli kayod panagkimey a para Katawan, ta amta yon ag nadarak so pansasagput yod Katawan.

16

¹ "Natan, nipaakar met ed kuarta ya itulong ed saray totooy Dios ed Judea, gawa yoy singa imbagak ed saray iglisia ed Galacia.

² "Kapag Simba mangibiig lay kuarta so balang sakey ed sikayo onung ed nanaalmoan to, tan tipon yo pian ag la nakaukolay pankoliktay kuarta, no onsabi ak ditan.

³ "Kasabik ditan, ibakik tan itdan koy sulat iray totoon pilien yon mangyakar ed Jerusalem na tulong yo.

⁴ "Balet, no nakaukolan ya onla ak ed Jerusalem, mila la rad siak.

⁵ "Ontuloy ak lad tan a manlapud Macedonia, ta nununoten koy ondalan diman.

⁶ "Makapambayag ak ditan angangko tan nayarin manayam ak ditan ed legay panaoy ambetel, pian natulongan yo ak ed inerman nin laen ko manlapud tan.

⁷ "Ag ko labay so onsamar labat ditan, no ag ingen labay koy mambayag ditan na daiset, no iyabuloy na Katawan.

⁸ "Balet getmak so manayam diad Efeso, anggad agew na Pinticostis.

⁹ "Baleg dian tuay pankanawnawak a manggaway makana-kana ran kimey, anggaman a dakel iray onsusumlang.

¹⁰ No onsabid tay Timoteo, paliket tan pabiskeg yoy loob to diad pilimug tod sikayo, ta kaparak a manlilingkur ed Katawan.

¹¹ Anggapo komuy manlemlemew ed sikato, no ag ingen tulongan yo pian mareen so pangituloy toy pambiahi to, et makapawil diad siak, ta alagden ko dia tan saray arum ya agagi.

¹² Nipaakar met ed kinen agin Apolos: tatanggoyuren kon maung ya ompasyar ditan a kaiba to ray arum ya agagi, balet ag to nin talaga labay so onla natan ditan. Balet no wala lay pankanawnawa to, onlad tan.

¹³ Manalwar kayo, mampabiskeg kid pananisia, mampakpel kayoy linawa, tan mampabiskeg kid laman yo.

¹⁴ Amin a gawaen yo, gawa yo a katekep na aro.

¹⁵ Agagi, kabat yoy Estefanas tan say pamilya to; sikaray inmonan nagmaliw a Cristiano dimad Acaya, tan insaklang day bilay da a manlingkur ed saray totoon pinili na Dios. Kerewen ko, agagi,

¹⁶ ya ontoluk kid sikara, tan diad anggan siopan toon mansasagput tan manlilingkur a singa sikara.

¹⁷ Malikeliket ak ed insabi di Estefanas, Fortunato, tan Acaioco, ta sikara lay manggagaway nepeg yo ran gawaen lapud andi dia kayo.

¹⁸ Niligliwa da ak, a singa impanligliwa rad sikayo. Manepeg a birbiren yo ray ontan a totoo.

¹⁹ Ibabano da kayo ray iglisiad Asia. Diad ngaran na Katawan, ibabano da kayo met iray sanasawan Akila tan Priscila tan saray kabyangay iglisia a mantitipon ed abung da.

²⁰ Papaibanoan met iray amin ya agagi dia. Mambabanowan kayo ed panamegley na inaagin angub.

²¹ Siak, a si Pablo so dilin mangisusulat ya: Komusta kayo.

²² Naayew so siopaman ya ag mangaarod Katawan! Marana thaKatawan mi, onsabi ka la komun!

²³ Walad sikayo komuy bindision na Katawan a Jesus.

²⁴ Say arok wala komun ed sikayon amin, diad panamegley nen Cristo Jesus. Amen.