1

¹ "Sayan sulat nanlapud kinen Pablo, sakey ya aripen nen Jesu-Cristo, atawag a magmaliw ya apostol tan pinilin mampulong na Maung a Balita na Dios.

² "Sayan Maung a Balita ya abayag lan insipay Dios diad panamegley da ray propita to tan nikorit ed Masanton Sulat,

³ "et nipaakar ed Anak na Dios a si Jesu-Cristo a Katawan tayo. No nipaakar ed inkatoo to, sikatoy nianak a kabyangay boleg nen David;

⁴ "no nipaakar ed masanton inka-Dios to, nipaamta a sikatoy Anak na Dios diad panamegley na makapanyarin gawa, a salanti say inkioli tod bilay.

⁵ "Diad panamegley to, inawat mid Dios so baleg a panangaro to tan say inkaapostol, pian natanggoyur min manisia tan mangonur ed Cristo iray amin a katoowan.

⁶ "Kabyangan kayo met ed saray katoowan a tinawag na Dios, pian magmaliw iran mananombuk nen Jesu-Cristo.

⁷ "Kanyan susulaten ta kayo, amin yon wadtad Roma ya inararoy Dios tan tinawag ton magmaliw a totoo to: Itdan kayo komun na Dios ya Ama tayo tan say Katawan tayo a Jesu-Cristo na bindision tan kareenan.

⁸ "Onona, misalamat ak ed Dios diad panamegley nen Jesu-Cristo, lapud sikayon amin; ta nibabawag ed intiron mundo so pananisia yo.

⁹ "Say Dios, a panlilingkuran kod intiron pusok diad pangipupulong koy Maung a Balitan nipaakar ed Anak to, so tasik ya ipipikasi ta kayo lawas.

¹⁰ Ipipikasik ed Dios ya iyabuloy to komun natan a makakar ak lad tan.

¹¹ Ta ontan lay pampipilalek kon onlad tan, pian niiter kod sikayoy maispiritun bindision a mamabiskeg ed sikayo.

¹² Say labay kon ibaga, say pantutulongan tin amin ed pamabiskeg na pananisiay sakey tan sakey.

¹³ Agagi, nepeg yon amtaen a ginetmak lan amimpiga so onlad tan, balet anggad natan walan naynay so manesebel ed siak. Labay ko met so mananggoyur ditan na saray totoo pian manisia rad Cristo, a singa impananggoyur kod saray arum a Hintil.

¹⁴ Ta nakaukolan a gawaen ko ya ed saray Grigo tan saray barbaro, diad saray walay-aral tan saray anggapoy-aral.

¹⁵ Kanyan pampirawatan koy mangipulong na Maung a Balita ed sikayo met iran wadtad Roma.

¹⁶ Ag ko ibaing so Maung a Balita, ta sikatoy pakayariy Dios a mangilaban ed amin a manisia, onona ray Judio, insan saray Grigo.

¹⁷ Ipapaamta na Maung a Balita a say pamirdonay Dios ed saray kasalanay katoowan et onggapo tan mansamput ed panamegley na pananisia. Onung na ibabagay Masanton Sulat, Mambilay diad panamegley na pananisia so toon apirdona ray kasalanan to.

¹⁸ Ta nipaamta a manlapud tawen so sanuk na Dios ed amin a kasalanan tan kaogsan da ray totoon mamapaer na pangipakabat na katwaan, lapud kaogsan da.

¹⁹ Malinew ed sikara so nayarin amtaen na too nipaakar ed Dios. Say Dios a dili so angipalinew ed sikara.

²⁰ Ta nanlapu lad impamalsay Dios ed mundo say ag nanengneng a kipapasen to, a salanti say andi-anggaan a pakayari tan inka-Dios to, et nanengneng a malinew la tan natalusan na saray totoo diad panamegley da ray pinalsa. Kanyan anggapo lay nibaraay totoo!

²¹ Anggaman a kabat da lay Dios, ag da inggalang a Dios odino akisalamatan. Ingen, andikakanaan so kanunotan da tan abilongetan so ag makatalus ya otek da.

²² Mankabatkabatan ira balet diad tuay tua, makulang-kulang ira.

²³ Anta igalang da komun so ag ompatey a Dios, igagalang da ray talintaoy toon ompatey, saray talintao da ray manok, o ayayep ya apatiray sali, o onkokorung ya ayayep.

²⁴ Lapud onyay kaogsay katoowan, say Dios pinaolyan to la ran manggawa na saray marorotak a bengatla onung ed labay na puso ra. Manggagawa ni ray mabanday ed laman na sakey tan sakey.

²⁵ Ibebeneg day katwaan a nipaakar ed Dios tan sasalatan da na tila. Igagalang tan panlilingkuran day pinalsa, aliwan say Manamalsa a nepeg a galangen ed ando lan ando! Amen.

²⁶ Lapud saya, say Dios pinaolyan to ran manggawa na saray makapabaing a liket na laman. Anggan saray bibii ikakaindan day impamalsaan ed sikara, ta saray kapara ran bibii so piaakdulan da.

²⁷ Ontan met a saray lalaki ikakaindan day impamalsaan ed sikaran miakdul irad bibii, tan ompepetang so marorotak a liknaan dad kapara ran lalaki. Mabambanday so gagawaen da ray lalaki ed kapara ran lalaki, kanyan nadudusa ra onung ed kanepegay maoges a gagawaen da.

²⁸ Lapud saray totoo et ag da labay a kabaten so Dios, pinaolyan to ra ed maoges iran kanunotan da, kanyan gagawaen day ag manepeg iran gawa.

²⁹ Napno ra na amin a kaogsan, kaambagelan, kinaagom tan maibobosul a kaisipan; napno ray imon tan maoges iran getma; maliket irad panagpatey, panakolkol, tan panagsaol. Managtalabotob ira,

³⁰ managderal na kagalangay kapara ran too, managbosul ed Dios, managpabaing, mapaatagey, mapasirayew, managanap na balon kaogsan a gawaen da, benger irad atateng da.

³¹ Makulang-kulang ira, ag da amtay misipan, anggapoy panangaro tan panangasi rad kapara ran too.

³² Amta ra, ya onung ed ganggay Dios, kanepegan ya ompatey iray manggawa na saray onya, balet siansian gagawaen da. Aliwan saya labat, aabubunan da ni ingen iray manggawa ed saraya.

2

¹ "Kanyan siopa ka man a too a manintinsiad arum, anggapoy nibaraan mo. Ta diad panintinsiam ed arum a too, sintinsiaan moy laman mon dili, lapud sikan manintinsia et gagawaen mo met so gagawaen da.

² "Amta tayo a say Dios maptek so panagsintinsia to ed saray totoon manggagawa ed saraya.

³ "Abaloan mo kasi, o kaparan too, a nibatikan moy panintinsiay Dios no gawaen moy gagawaen da ray sintinsiaan mon nadusa?

⁴ "Babalawen mo kasiy baleg a panangasi, anos, tan tepel na Dios? Ag mo ta amtan say kaabigan na Dios et dagdagen to kan magbabawi?

⁵ "Balet lapud benger ka tan anawet so pusom, pabebelaten moy dusan niiter ed sika no Agew ya ompatnag lay sanuk na Dios tan say maptek a panagsintinsia to.

⁶ "Ta iter na Dios ed balang too so kanepegan to, onung ed saray ginagawa to.

⁷ "Saray ag ontondan manggaway kamaungan, mananap na galang, dayew, tan ag ipatey, naitdan iray bilay ya andi-anggaan.

⁸ "Balet baleg a sanuk tan pasnuk so ondapod saray masiblet tan managibeneg na katwaan, ta totombuken day dalan na kaogsan.

⁹ "Manliknay kairapan tan nagunigon ya amin iray totoon manggaway kaogsan, onona, saray Judio tan ontan met na saray Hintil.

¹⁰ Balet saray totoon manggaway kamaungan itdan iray Dios na kagalangan, dayew, tan kareenan, onona, saray Judio tan ontan met na saray Hintil.

¹¹ Ta anggapoy nilabi ed pangipapasen na Dios ed amin a katoowan.

¹² Saray Hintil ya ag nasasakopay Ganggan nen Moises nadusa ran anggapoy pibibiang na Ganggan. Saray Judio a nasasakopay Ganggan nasintinsiaan ira na Ganggan.

¹³ Ta aliwan saray ondengel na Ganggan so matonung ed arap na Dios, no ag ingen saray mangonur na Ganggan.

¹⁴ Ag nasasakopay Ganggan iray Hintil, balet no onuren day Ganggan lapud natural ya inkasikara, magmaliw a para sikara yan ganggan.

¹⁵ Ipanengneng na gagawaen da a nisulat so ibabagay Ganggan ed puso ra. Say konsinsia ra met so mantasi a katwaan ya, ta no maminsan akusaen iray kanunotan da, tan no arum iyagel to ra.

¹⁶ Onung ed Maung a Balitan ipupulong ko, onyay nagawa no onsabiy Agew sano: say Dios, diad panamegley nen Jesu-Cristo, sintinsiaan toy amin a maamut a kanunotan da ray katoowan.

¹⁷ Sika balet ey? Judio so tawag mod sikan dili; manmamatalek kad Ganggan tan ipapantam so kipapasen mod arap na Dios.

¹⁸ Amtam so pagagaway Dios ed sika; naaralan mod Ganggan no antoy maung;

¹⁹ anggapoy panduaruwam a sakey kan manangitabid saray bulag tan sakey kan silew ed saray walad kabilongetan;

²⁰ sakey kan managbangat ed saray makulang-kulang tan saray mamalangwer. Anggapoy panduaruwam a diad Ganggan walad sikay amin a kakabatan tan katwaan.

²¹ Ibabangat mo ray arum, balet akin et ag mo ibabangat so sikan dili? Ipupulong mo, Ag kayo mantatakew, balet akin et mantatakew ka?

²² Kuanmo, Ag kayo mikakaloguran, balet akin et mikakaloguran ka? Kabkabosul moy talintao, balet akin et tatakewan mo ray Timplo?

²³ Mapampanta ka, ta walad sikay Ganggay Dios, balet akin et kababaingay iiter mod Dios lapud ag mo oonurey ganggan to?

²⁴ Ta ibabagay Masanton Sulat, Lapud sikayo ran Judio, aayewen na saray Hintil so ngaray Dios.

²⁵ No onuren moy Ganggan, makanay inkatandaan moy segat. Balet no ag mo onurey Ganggan, singa ka met ni lamlamang ag atandaay segat.

²⁶ Ag ta ipasen na Dios a singa atandaay segat so Hintil ya onuren toy Ganggan, anggaman ya ag asegat?

²⁷ Saray Hintil ya ag ira atandaay segat balet et oonuren day Ganggan sintinsiaan da kayo a nadusa, ta ag yo onurey Ganggan, anggaman a walad sikayoy nisulat a Ganggan tan atandaan kayoy segat.

²⁸ Ta aliwan petepeteg a Judio so sakey a toon asegat tan Judio ray atateng to.

²⁹ Ingen, say petepeteg a Judio ag nabirbir ed indengan to, ta say inkatandaan toy segat et diad puso to. Say Ispiritu na Dios so manggagawad saya, aliwan say Ganggan ya akasulat. Say Dios so mangidayew ed sayan too, aliwan say kapara ton too.

3

¹ "Anto sirin so panmaungay Judio ed saray Hintil? O antoy kaabigan a naalam no atandaan kay segat?

² "Talagan dakel! Onona, saray Judio so angipiaan na salitay Dios.

³ "No aliwan matoor iray arum ed sikara, pagmaliwen to kasin aliwan matoor met so Dios?

⁴ "Andi! Nepeg a matoor ed katwaan so Dios anggaman a matilan amin iray katoowan, ta onung na ibabagay Masanton Sulat, Saray salitam so mangipatnag a maptek ka; tan manalo ka no sikay naakusa.

⁵ "Balet antoy kuan tayo, no say panggawa tayoy kaogsan so lalon mangipatnag a matonung so gagawaey Dios? Ibaga ti kasin makapoy so gagawaey Dios no dusaen to itayo? (Mansasalita ak dia a singa panangibagay too.)

⁶ "Andin balut! No aliwan matonung so Dios, panon ton sintinsiaay sankamundoan?

⁷ "Balet, anto no say pantitilak et sikatoy pakagalangay Dios lapud napalinew so katwaan to? Akin et nasintinsiaan ak nin sakey a makasalanan?

⁸ "Akin et ag tayo ikuan sirin, Manggawa itayoy kaogsan, pian mambungay kamaungan? Diad pamaoges na saray arum ed sikami, inkuanda ya imbaga mi ya kono! Say dusan kanepegan da so niiter ed sikara.

⁹ "Sikatayo ran Judio, maung ni kasiy kipapasen tayo nen saray Hintil? Andin balut! Ta pinaneknekan mi la ya ooleyan na kasalanan iray amin a Judio tan amin a Hintil.

¹⁰ Onung na ibabagay Masanton Sulat: Anggapoy toon matonung, anggapo, anggan sakey;

¹¹ anggapoy makatalus o manaanap ed Dios.

¹² Amin a katoowan say Dios so imbeneg da; amin da nagmaliw iran andi-kana; anggapoy manggagaway kamaungan, anggapo, anggan sakey ed sikara.

¹³ Saray kolokolung da singa ra lobuk ya akalokas; pantitila da ray dila ra, singa ditay oleg iray salitan maoges ya ibabalikas na saray bibil da;

¹⁴ napno na saray ampaipait a panagayew so sangi ra.

¹⁵ Mainomay day mangekal na bilay;

¹⁶ inerman a laen da deral tan ermen so itilak da.

¹⁷ Ag da akabatay dalan na mareen a bilay;

¹⁸ say takot ed Dios anggapo ed sikara.

¹⁹ Natan amta tayo ya amin iray walad Ganggan et para saray walad silong na Ganggan, pian napatonda toy pambabaraan na amin a katoowan tan napasilong tod panagsintinsia na Dios so sankamundoan.

²⁰ Ta anggapoy toon nibilang a matonung ed arap na Dios diad panamegley na panangonur toy ibabagay Ganggan. Say gagawaey Ganggan et say pangipapaamta to a nankasalanan so too.

²¹ Balet natan nipaamta ya aliwan diad panamegley na ganggan so panamaandi na Dios ed kasalanay too. Pinaneknekan ya na Ganggan tan saray propita.

²² Papaandien na Dios so kasalanan na amin da ray mananisiad Jesu-Cristo, diad panamegley na pananisia rad Jesu-Cristo. Ta anggapoy pandoromaan na anggan siopa:

²³ nankasalanan ya amin iray katoowan tan ag ira manepeg ed pakanengneng na Dios.

²⁴ Balet lapud panangasi na Dios, pinaandi to ray kasalanan dan amin diad panamegley nen Cristo Jesus ya anondon ed sikara.

²⁵ Imbagat na Dios si Cristo pian, diad panamegley na tinmerter a dala to, napirdona so kasalanay totoo lapud pananisia rad sikato. Ginawa ya na Dios, pian nipanengneng a sikatoy matonung, ta nananos nen saman tan pinalabas toy kasalanay katoowan.

²⁶ Balet, diad sayan panaon, papanengneng ton sikatoy matonung, ta papaandien toy kasalanan na amin a manisiad kinen Jesus.

²⁷ Anto sirin natay nipasirayew tayo? Anggapo! Akin ey? Lapu oonuren tayoy Ganggan? Andi, no ag ingen lapud mananisia tid Cristo.

²⁸ Ta malinew lad kanunotan tayo a naandiay kasalanan so too diad panamegley na pananisia tod Cristo, aliwan lapud panagonur tod ibabagay Ganggan.

²⁹ Ag kasi say Dios et Dios met na saray Hintil, aliwan saray Judio labat? On, sikatoy Dios na amin,

³⁰ ta saksakey so Dios. Judio o Hintil man ira, paandien na Dios iray kasalanan da diad panamegley na pananisia rad Cristo.

³¹ Lapud sayan pananisia, ekalan mi kasiy kakanaan so Ganggan? Andin balut! Itatalindeg mi ingen so Ganggan.

4

¹ "Anto siran so nibaga tayon nipaakar ed kinen Abraham a sengeg na boleg tayo? Antoy agamuran to?

² "No apaandiay kasalanan lapud saray dilin ginagawa to, wala komuy nipasirayew to. Balet anggapoy nipasirayew tod arap na Dios,

³ "ta ibabagay Masanton Sulat, Anisiay Abraham ed Dios tan lapud pananisia to, pinaandi na Dios so kasalanan to.

⁴ "Say sipan ya iter ed toon mankimey et ag ipasen a panangaro no ag ta bayar na utang.

⁵ "Balet say toon ag makimey, no ag ta manisiad Dios a manamaandiy kasalanan da ray makasalanan, paandien na Dios iray kasalanan to lapud pananisia to.

⁶ "Onya so labay ya ibaga nen David sanen sinalita ton maliket so toon pinaandi na Dios iray kasalanan to, aliwan lapud saray ginagawa to:

⁷ "Maliket so toon pinirdona lay Dios so kaogsan to, tan sinakbungan lay Dios iray kasalanan to!

⁸ "Maliket so toon nilingwanan lay Katawan iray kasalanan to!

⁹ "Saya kasin liket et para labat ed saray atandaay segat? Andi, no ag ingen para met ed saray ag atandaay segat. Ta onung ed Masanton Sulat, ibabaga tayon pinaandi na Dios iray kasalanan nen Abraham lapud pananisia to.

¹⁰ Kapigay inkagawa to ya? Kasakbayan o kasumpal na inkasegat to? Kasakbayan, aliwan kasumpal, na inkasegat to.

¹¹ Sikatoy sinegat a tanday impamaandi na Dios ed kasalanan to lapud pananisia to nen ag ni asegat. Kanyan si Abraham et nagmaliw a maispiritun ama na amin da ray mananisian pinaandi na Dios iray kasalanan da, anggaman ya ag ira asegat.

¹² Ontan met a sikatoy ama da ray asegat, aliwan lapu labat ta asegat ira, no ag lapud anisia ran singa si Abraham kasakbayan ya asegat.

¹³ Insipay Dios ed kinen Abraham tan saray kabyangay boleg to a tawiren day sankamundoan, aliwan lapud impangonur toy Ganggan, no ag lapud apaandi ray kasalanan to diad impanisia tod Dios.

¹⁴ Ta no saray mangonur na Ganggan labat so makaawat na sipay Dios, anggapo siriy kabaliksay pananisia tan andi-kakanaan so sipay Dios.

¹⁵ Say Ganggan so panlapwan na pasnuk na Dios; ta no anggapoy ganggan, anggapo met so sumlangen a ganggan.

¹⁶ No ontan sirin, say sipan niletneg ed pananisia, pian magmaliw a panangaroy Dios yan sipan tan andi-saew a nagamuran na amin a kabyangan na saray boleg nen Abraham aliwa labat a saray manangonur na Ganggan, no ag pati amin da ray mananisian singa si Abraham. Ta si Abraham so maispiritun ama tayon amin.

¹⁷ Onyay ibabagay Masanton Sulat: Ginawa ta kan ama na amayamay a bansa. Makana yan sipan ed arap na Dios a sinisia nen Abraham, say Dios a mamapabilay ed saray inaatey, tan mamapalesa ed saray anggapo diad panamegley na salita to.

¹⁸ Anggaman ya anggapo lay ilalo nen Abraham a makailalak, anisia tan nanilalo ni a sikatoy magmaliw ya ama na amayamay a bansa. Onung na inkuay Dios ed sikato tan walad Masanton Sulat, Singa karakel na bitewen iray kabyangay boleg mo naani.

¹⁹ Anggaman a ngalngali lan sanlasus so taon to, dokung-dokung la, tan lepes si Sara ya asawa to, ag kinmapoy so pananisia to diad impannunot tod saraya.

²⁰ Ag to nanduaruwaan so sipay Dios, no ag ingen binmiskeg so pananisia to tan inggalang toy Dios.

²¹ Ag ton balut nanduaruwaan a say Dios et nagawaan to so insipan to.

²² Kanyan pinaandi na Dios iray kasalanan to lapud pananisia to.

²³ Balet say salitan pinaandi na Dios iray kasalanan to, nisulat ya aliwan para si Abraham labat.

²⁴ Nisulat met para sikatayon napaandiay kasalanan lapud pananisia tayod Dios ya amaolid bilay ed kinen Jesus a Katawan tayo.

²⁵ Pinatey si Jesus lapud saray kasalanan tayo, tan pinaolid bilay pian napaandi ray kasalanan tayod arap na Dios.

5

¹ "Natan ta apaandi la ray kasalanan tayod arap na Dios lapud pananisia, wala lay kareenan tid Dios diad panamegley nen Jesu-Cristo.

² "Dia nid panamegley to, agamuran tid Dios so baleg a panangaro to, a diad silong toy pambibilayan tayo natan. Panliliketan ti siriy ilalo tayon makapibiang ed kagalangan na Dios!

³ "Aliwan saya labat, no ag ingen panliliketan tayo met ni ray segsegang tayo, ta amta tayon mambunga ra na panagtepel.

⁴ "Tan say panagtepel mambunga na ogalin makapaliket ed Dios, tan sayan ogali mambunga na ilalo.

⁵ "Sayan ilalo ag to pabeteley linawa tayo, ta inkalbo lay Dios so aro tod puso tayo diad panamegley na Ispiritu Santo ya inter tod sikatayo.

⁶ "Ta sanen anggapoy nagawaan tayo ni, si Cristo inatey nen panaon a manepeg para saray makasalanan.

⁷ "Mairap ya isaklang na anggan siopa so bilay to para sakey a toon maptek so panagbilay to. Anggaman ontan, nayarin walay makakpel ya ompatey para sakey a maung a too.

⁸ "Balet impanengneng na Dios so ontan lan panangaro tod sikatayo, ta nen makasalanan itayo ni, si Cristo inatey para sikatayo.

⁹ "Tan natan ta apaandi la ray kasalanan tayo diad panamegley na dala nen Cristo, lalo sirin ya ilaban to itayod pasnuk na Dios.

¹⁰ Kabosul itayoy Dios nen saman, balet natan kakaaro to ti la diad panamegley na impatey na Anak to. Natan ta kakaaro itayo lay Dios, lalon andi-saew a nilaban itayo diad panamegley na bilay nen Cristo!

¹¹ Aliwan saya labat, makaliliket itayo nid Dios diad panamegley nen Jesu-Cristo a Katawan tayo, ta lapud sikato nagmaliw ti lan kakaaroy Dios.

¹² Linmoob so kasalanan ed sankamundoan diad panamegley na sakey a too, tan linmoob so patey diad panamegley na kasalanan to. Lapud saya kinmayat so patey ed amin a katoowan, ta nankasalanan iran amin.

¹³ Wala lay kasalanan kasakbayan a niiter so Ganggan, balet anggapoy nayarin ibilang a kasalanan no anggapoy ganggan.

¹⁴ Anggaman ontan, nanoley so patey manlapud kinen Adan ya anggad kinen Moises, tan anggan diad saray totoon say impankasalanan da et aliwan singa say insumlang nen Adan ed ganggay Dios. Si Adan so sakey ya anino na samay onsabi.

¹⁵ Balet nandomaan ira yan dua, ta ag namparay panangaroy Dios tan say kasalanan nen Adan. Tua a dakel so totoon inaatey lapud kasalanay sakey a too. Balet lalon baleg so panangaroy Dios tan say rigalon inter tod amayamay a totoo diad panamegley na baleg a panangaro na sakey a toosi Jesu-Cristo.

¹⁶ Walay pandomaan na rigalo na Dios tan say bungay kasalanan na sakey a too. Say sakey a kasalanan nambungay sintinsian dusa, balet anggaman a dakerakel so agawan kasalanan, niiter so rigalon nambungay pakapaandi na kasalanan.

¹⁷ No lapud kasalanay sakey a too et nanoley so patey, lalon baleg so nagamuran ed ginawa na sakey a too a si Jesu-Cristo! Amin a mangawat na ag nasabsabaan a panangaro tan rigaloy Dios nipaakar ed pakapaandi na kasalanan, manoley irad bilay diad panamegley nen Cristo.

¹⁸ Kanyan no say sakey a kasalanan et nambungay pakadusa na amin a katoowan, ontan met a samay sakey a gawan matonung paandien toy kasalanay amin a katoowan tan itdan to ray bilay.

¹⁹ Tan no saray makasalanan et dinmakel ira lapud impankasalanay sakey a too, ontan met a saray totoon napaandiay kasalanan et ondakel ira lapud intoluk na sakey a too.

²⁰ Nen niiter so Ganggan, lalon dinmakel so panaggaway kaogsan. Balet nen dinmakel so kasalanan, lalon binmaleg so panangaroy Dios.

²¹ Kanyan no say kasalanan et nanoley diad panamegley na patey, ontan met a manoley so baleg a panangaroy Dios diad panamegley na pakapaandi na kasalanan, pian nagamuran tayoy bilay ya andi-anggaan diad panamegley nen Jesu-Cristo a Katawan tayo.

6

¹ "Antoy nibaga ti natan? Ituloy tayo kasiy mankasalanan pian ombaleg so panangaroy Dios ed sikatayo?

² "Andi! Inatey ti lad kasalanan, panon niy pambilay tid kasalanan?

³ "Ag yo ta amtan amin tayo ya abinyagan ya akikasakey ed Cristo Jesus et akikasakey tayod impatey to diad panamegley na sayan binyag?

⁴ "Ontan sirin, inatey tan nipompon itayo a kaiba tiy Cristo diad panamegley na binyag, pian no panoy inkioli tod bilay diad panamegley na mapagalang a pakayariy Ama, mambilay ti met ed balon panagbilay.

⁵ "Ta no akikasakey itayod Cristo diad impatey to, mikasakey ti met diad inkioli tod bilay.

⁶ "Amta tayon kaiba nen Cristo a nipasak ed krus so daan ya inkatoo tayo, pian naderal so makasalanan ya inkanatural tayo, et diad ontan ag ti la paaripen ed kasalanan.

⁷ "Ta no inatey lay too, ag la naaripen na kasalanan.

⁸ "Panisiaan tayo a mambilay tin mikasakey ed Cristo no akikasakey tid impatey to.

⁹ "Amta tayon inmolid bilay si Cristo tan ag lan balut ompatey, kanyan anggapo lay pakaoley na patey ed sikato.

¹⁰ Nen sikatoy inatey, aminpinsan ya inatey para kasalanan, tan sikato natay mambibilay para Dios.

¹¹ Ontan met, nepeg yon ipasen ya inatey ed kasalanan so sikayon dili, balet mabilay para Dios diad pikakasakey yod Cristo Jesus.

¹² Kanyan ag yo la nepeg a panoleyey kasalanan ed laman yon ompatey, pian ag yo la naonur so maoges iran pilalek yo.

¹³ Ag yo met papaoleyad kasalanan iray kabyangay laman yo, pian ag ira nikanad panggaway kaogsan. Isaklang yo ingey bilay yod Dios, a singa totoon inatey a pinaolid bilay, tan iyabuloy yon ikanay Dios iray kabyangay laman yo ed panggaway kamaungan.

¹⁴ Ta ag nepeg a manoley so kasalanan ed sikayo, ta aliwa ki lan walad silong na ganggan, no ag ta wala ki lad silong na baleg a panangaroy Dios.

¹⁵ Anto sirin ey, mankasalanan itayo kasi lapud aliwa tin walad silong na ganggan no ag ta walad silong na baleg a panangaroy Dios? Andi!

¹⁶ Ag yo ta amta, a no onabuloy kayon paaripen ed siopaman, aripen kayon talaga na amon onuren yo? No aripen kayoy kasalanan, mansumpal kayod patey; no aripen kayoy katotoluk, mansumpal kayod pakapaandi na kasalanan ed arap na Dios.

¹⁷ Balet, salamat ed Dios, ta sikayon gendat ya aripey kasalanan et nagmaliw ki lan maonur ed bangat ya inawat yo.

¹⁸ Nibolus ki lad kasalanan tan natan, aripen ki lay katonungan.

¹⁹ Mainomay iray salitan ikakanak, ta mairap kin makatalus. No inyabuloy yo ray kabyangay laman yo a nikana ra ed karotakan tan ompapalalon kaogsan, ontan met natan, isaklang yoy intiron laman yo ya aripey katonungan tan nikana ed matonung a kipaakaran.

²⁰ Ta nen aripen kayo niy kasalanan, ag kayo nasasakopay inkatonung.

²¹ Antoy agunggona yo ed impanggagawa yod saray ibabaing yo la natan? Patey so pansumpalan na saraman a bengatla.

²² Balet natan ta nablus ki lad kasalanan tan aripen ki lay Dios, say agunggona yo say masanton bilay a mansumpal ed bilay ya andi-anggaan.

²³ Ta patey so upa na kasalanan, balet bilay ya andi-anggaan so rigaloy Dios diad panamegley na pikakasakey ed Cristo Jesus a Katawan tayo.

7

¹ "Agagi, natatalusan yoy ganggan, kanyan kabat yon say too et nasasakopan labat na ganggan legan ton mambibilay.

² "Alimbawa: onung ed ganggan, say asawan bii et nasasakopay asawa to legan a mabilay. Balet no inatey lay asawa to, bolus la ed ibabagay ganggan nipaakar ed saray walay asawa.

³ "Kanyan mikaloguran no miamung ed sananey a laki, anta mabilay ni so asawa to. Balet no ompatey so asawa to, bolus lad ibabagay ganggan. Anggan miasawa nid satan, ag mankasalanan na pikakaloguran.

⁴ "Ontan met, agagi, no say Ganggan so pantotongtongan inatey kayo la, ta kabyangan ki lay laman nen Cristo; tan mikakasakey ki lad sikato a pinaolid bilay, pian dakel iray nagawaan tayon maung a bengatlan nipaakar ed Dios.

⁵ "Ta nen mambibilay itayo ni onung ed natural ya inkatoo tayo, saray makasalanan a pilalek a pinabiskeg na Ganggan so anagdag ed saray kabyangay laman tayo a manggaway bengatlan mambungay patey.

⁶ "Natan balet, anggapo ti lad silong na Ganggan, ta inatey ti lad samay angariped sikatayo. Kanyan ag itayo manlilingkur onung ed daan ya ibabagay nisulat a ganggan, no ag ingen onung ed impamasimbaloy Ispiritu.

⁷ "Nayarian ti kasin ibaga a makapakasalanan so Ganggan? Ag nayari! Anggaman ontan, say Ganggan so angipaamtad siak no antoy kasalanan. No ag imbagay Ganggan, Ag ka maagom, ag ko komun amta no anto tay panagagom.

⁸ "Balet lapud Ganggan, say kasalanan pinabiskeg to ak a manggaway amin a klasiy panagagom. Ta no anggapoy ganggan, inatey so kasalanan.

⁹ "Nen saman nambilay ak ya ag nasasakopay ganggan; balet nen akabatan koy ganggan, abilay so kasalanan

¹⁰ tan siak so inatey. Say ganggan sirin a nepeg a mangiter na bilay, patey la laingey inter tod siak.

¹¹ Ta inkana na kasalanan so ganggan a pamalingo tan pamatey ed siak.

¹² Masanto sirin so Ganggan, tan amin ya ibabagay ganggan et masanto, matonung, tan maung.

¹³ Say labay to yan ibaga kasi et say kamaungan so makasengeg na impatey ko? Andi! Say kasalanan so amatey ed siak; diad panamegley na kamaungan so impamatey na kasalanan ed siak, pian nipanengneng so tuan kipapasey kasalanan. Kanyan diad panamegley na ganggan, apatnagay ontan lan kaogsay kasalanan.

¹⁴ Amta tayon maispiritu so Ganggan, balet aliwa ak a maispiritun too, tan naaripen ak na kasalanan.

¹⁵ Ag ko natalusay gagawaen ko; ta ag ko gagawaey labay kon gawaen, no ag say kabosul ko so gagawaen ko.

¹⁶ No gawaen koy ag ko labay, mapatnag sirin ya onaabubon ak a say Ganggan et maung.

¹⁷ Kanyan aliwan siak a talagay manggagawad saya, no ag say kasalanan a walad siak.

¹⁸ Amtak ya anggapoy kamaungan a walad siak, a salanti diad inkatook. Ta anggan walay pilalek kon manggaway kamaungan, ag ko balet nagawaan.

¹⁹ Ag ko gagawaey kamaungan a labay kon gawaen, no ag ingen say kaogsan ya ag ko labay a gawaen.

²⁰ No gawaen koy ag ko labay a gawaen, aliwan siak so manggagawad saya no ag say kasalanan a walad siak.

²¹ Kanyan apalinew ko ya onyay nagagawa: no labay koy manggaway kamaungan, say kaogsan so manonaan a nagawaan ko.

²² Diad otel na pusok, malikeliket ak ed ganggay Dios.

²³ Balet nalilikas kon mankikimey so sananey a ganggan ed saray kabyangay laman ko, ganggan a misusumlangan ed ganggan na kanunotan tan angaripen ed siak ya ontoluk ed ganggan na kasalanan a walad saray kabyangan na laman ko.

²⁴ Pangaskasiyay kipapasen ko! Siopay mangilabad siak ed sayan laman a mangipepelag ed siak ed patey?

²⁵ Say Dios diad panamegley nen Jesu-Cristo a Katawan tayo! Salamat ed sikato. Sikato ya siriy kipapasen ko: diad panamegley na kanunotan ko, lilingkuran koy ganggay Dios; balet diad panamegley na inkatook, lilingkuran koy ganggan na kasalanan.

8

¹ "Kanyan ag la natan nadusa iray totoon mikakasakey ed Cristo Jesus.

² "Ta say ganggay Ispiritu, a mangiiter ed sikatayoy bilay diad panamegley na pikakasakey tid Cristo Jesus, so angibolus ed siak. Kanyan andi ak la ed silong na ganggay kasalanan tan patey.

³ "Say ag nagawaay Ganggan lapud kakapoyay inkatoo, ginawa lay Dios. Dinusa toy kasalanan ed inkatoo diad panamegley na impangibaki toy dilin Anak to a linma dian too a makapankasalanan, tan nagmaliw a bagat para kasalanan.

⁴ "Ginaway ya na Dios, pian say matonung a kakaukolay Ganggan et nasumpal ed sikatayon mambibilay onung ed Ispiritu, aliwan onung ed inkatoo tayo.

⁵ "Ta saray totoon mambibilay onung ed inkanatural na too nanaoleyan so kanunotan da na saray bengatlan onung ed inkanatural na too. Balet saray mambibilay onung ed panangiwanwan na Ispiritu, nanaoleyan so kanunotan da na saray bengatlan onung ed Ispiritu.

⁶ "Say panoley na kanunotan na inkanatural na too et mansumpal ed patey, balet say pangonur ed panangiwanwan na Ispiritu et mansumpal ed bilay tan kareenan.

⁷ "Kanyan kalaban toy Dios so toon nanaoleyan so kanunotan to na inkanatural na too, ta ag to oonuren so ganggay Dios tan diad tuay tua, ag to nayarian ya onuren.

⁸ "Ag da napaliket so Dios iray mambibilay onung ed inkanatural na too.

⁹ "Balet ag ki la mambibilay onung ed inkanatural na too, no ag ingen onung ed linaway Ispiritu, no tuan manaayam so Ispiritu na Dios ed sikayo. Say toon andid sikatoy Ispiritu nen Cristo, ag kayaryan nen Cristo.

¹⁰ No walay Cristo ed sikayo, anggaman ya inatey so laman yo lapud kasalanan, mambibilay so ispiritu yo, ta pinaandi lay Dios iray kasalanan yo.

¹¹ No manayam ed sikayo so Ispiritu na Dios ya amaolid bilay ed kinen Jesus, say Dios ya amaolid Cristo so mangiter met na bilay ed saray ompatey a laman yo, diad panamegley na Ispiritu a manaayam ed sikayo.

¹² Kanyan, agagi, ag ti la nepeg so mambilay onung ed inkanatural na too.

¹³ Ta ompatey kayo no mambilay kayo onung ed inkanatural na too, balet mambilay kayo no diad tulong na Ispiritu et pateyen yoy maoges iran gaway laman.

¹⁴ Anak na Dios iray amin ya itotonton na Ispiritu na Dios.

¹⁵ Ta say Ispiritu ya inter na Dios ed sikayo et ag to kayo gawaen ya aripen tan pagmaliwen a matakot, no ag ingen pagmaliwen to kayon anak na Dios tan tulongan to itayon ontawag ed Dios na Ama! Ama mi!

¹⁶ Say dilin Ispiritu, a kaiba toy ispiritu tayo, so mamaneknek a sikatayo ray anak na Dios.

¹⁷ Et natan ta anak itayo lay Dios, mananawir tila na Dios tan kaiba tin mananawir si Cristo. Ta no minabang itayod kairapan to, minabang itayo met ed kagalangan to.

¹⁸ Ipapasen ko a saray kairapan ed sayan panaon et ag ira nayarin ipara ed kagalangan a nipatnag naani ed sikatayo.

¹⁹ Pampilpilalekay amin a pinalsa so pangipatnag na Dios ed saray anak to.

²⁰ Nagmaliw ya andi-kakanaay amin a pinalsa, aliwan lapud linawa ran dili, no ag lapud linaway Dios. Anggaman ontan, wala ni yan ilalo,

²¹ ya amin a pinalsa et nibolus ed inkaaripen dad kaboboluk, tan minabang irad maliket tan bolus a kipapasen da ray anak na Dios.

²² Amta tayo ya anggad natan, amin a pinalsa et manngesnges irad kairapan a singa pampapasakit na manaanak.

²³ Aliwan sikara labat so onya; sikatayo met ya angawat na Ispiritu, say onaan ed saray rigaloy Dios, et manngesnges itayod inkasikatayo, legan tin aalagdey Dios a managibi ed sikatayo tan manondon na laman tayo.

²⁴ Lapud ilalo nilaban iti la. No nanenengneng tiy iilaloan tayo, aliwan petepeteg ya ilalo. Siopay manilalo nid nanenengneng to la?

²⁵ Balet no manilalo tayod ag tayo nanenengneng, anosan tayo ya alagden.

²⁶ Ontan met, say Ispiritu so ontutulong ed kakapoyan tayo. Ta ag tayo amta no panoy nepeg tayon pampikasi, balet say Ispiritu lan dili so mangipikasid sikatayo ed Dios, diad ey-ey ya ag nayarin ibalikas.

²⁷ Say kanunotay Ispiritu et kabat na Dios a makaamtay walad pusoy too; ta say Ispiritu so mangipikasid saray totooy Dios tan onung ed linaway Dios so pangipikasi to.

²⁸ Amta tayo a diad amin a bengatla gagawaen na Dios so pankaabigan na amin da ray mangaarod sikato, a salanti saray tinawag na Dios onung ed linawa to.

²⁹ Saray pinili na Dios a kayaryan ton nanlapud gapo et inggana to ran miolibay ed Anak to, pian say Anak so magmaliw a pangulowad saray amayamay a sanaagi.

³⁰ Kanyan tinawag to ray inggana to la nen saman. Pinaandi toy kasalanan da ray tinawag to, tan initdan toy kagalangan iray pinaandian toy kasalanan.

³¹ Anto niy nibaga tayo nipaakar ed saya? No say Dios et kaiba tayo, siopay makasumlang ed sikatayo?

³² Ag to kinawanan so dilin Anak to, no ag ingen inter ton imbagat para sikatayon amin! No inter tod sikatayoy Anak to, ag to met kasi iter ed sikatayoy amin a bengatla?

³³ Siopay mangakusad saray totoon pinili na Dios, anta say Dios so amaandiy kasalanan da?

³⁴ Siopay manintinsiay dusa ed sikara? Si Cristo Jesus kasi, ya inatey tan pinaolid bilay? Sikatoy walad nikawanay Dios tan ipipikasi to tayo ingen ed Dios!

³⁵ Siopa sirin so makapangisian ed sikatayod panangaro nen Cristo? Say segsegang, o say ermen, o say kairapan, o say eras, o say kaandiay ikawes, o say kaatapay bilay, o say patey?

³⁶ Onung na ibabagay Masanton Sulat, Lapud sika, ngalngali kami ompatey ed loob na sanagew; nipapasen kamin singa karniron papatayen.

³⁷ Andi! Sarasarag ti ra yan amin a taloen diad panamegley na Dios ya angarod sikatayo!

³⁸ Anggapoy duaruwak ya anggan say patey, o say bilay, o saray anghil, o saray walad pakaoley, o saray bengatlad kaplesan o arapen a panaon, o saray pakayari,

³⁹ o anggan say katageyan, o say anggan anton pinalsaamin da ra ya et ag ira makapangisian ed sikatayo ed panangaroy Dios ya inter tod sikatayo diad panamegley nen Cristo Jesus a Katawan tayo.

9

¹ "Kayaryan ak nen Cristo, kanyan tuay ibabagak tan ag ak mantitila. Ooleyan met na Ispiritu Santo so konsinsiak, kanyan andi-duaruwa ya ag ak mantitila.

² "Agaylay ermen ko, tan agaylay ag itonday sakit na pagew ko, lapud saray agagik, saray kadalaan tan kabaleyan ko.

³ "Lapud sikara, labalabay ko lay anggan nisamba na Dios tan nisian ed Cristo.

⁴ "Israelita ra tan pinili na Dios iran totoo to. Ginawa to ran anak to tan impinabang to rad kagalangan to. Akisipanan ya amimpiga so Dios ed sikara tan inter tod sikaray Ganggan. Walad sikaray matwan panagdayew ed Dios, tan inawat da ray sipan na Dios.

⁵ "Diad saray bantug a lalaki da ray Hebreo so sengeg na boleg da, et diad boleg da so nanlapwan nen Cristo sanen nagmaliw a too. Sikato a Dios a Sankatageyan et nagalang komun ed ando lan ando! Amen.

⁶ "Ag ko ibabagan anggapoy kabaliksay sipan na Dios; ta aliwan amin a totood baley na Israel et sikaray totoon pinili na Dios.

⁷ "Aliwan amin met a kabyangay boleg nen Abraham et sikaray anak na Dios. Ta inkuay Dios ed kinen Abraham, Diad panamegley nen Isaac nawalaan ka na saray kabyangay boleg ya insipan kod sika.

⁸ "Say labay to yan ibaga, aliwan saray inyanak na too so anak na Dios; ingen amin da ray inyanak onung ed sipay Dios sikaray tuan nipapasen a kabyangay boleg.

⁹ "Ta onya so sipan, Diad duga-rugan oras a singa onya, ompawil ak et mananak na sakey a laki si Sara.

¹⁰ Balet aliwan saya labat. Lalo yan linminew diad inkagawad saramay siping ya anak nen Rebeca tan si laki tayon Isaac.

¹¹ Ta say impamili na Dios ed sakey ya anak et onung ed labay ton dili, aliwan onung ed gaway too, kanyan kasakbayan a nianak ira may siping tan kasakbayan iran makapanggaway maung o maoges,

¹² imbaga lay Dios ed kinen Rebeca, Manlingkur so pangulowan ed yogtan.

¹³ Ontan met ibabaga ni na Masanton Sulat, Si Jacob so inarok, tan si Esau so binosul ko.

¹⁴ Lapud saya, nayarian tayo kasin ibaga ya aliwan matonung so Dios? Andi!

¹⁵ Ta onyay imbagay Dios ed kinen Moises, Kasian koy labay kon kasian tan abageyen koy labay kon abageyen.

¹⁶ Kanyan aliwa ya onung ed labay o gaway too, no ag ingen onung ed panangasi na Dios.

¹⁷ Ta onung ed Masanton Sulat say Dios kuantod ari na Egipto, Ginawa ta kan ari, pian diad panamegley mo, nipanengneng koy pakayarik tan nibawag so ngaran ko ed intiron mundo.

¹⁸ Kanyan kasian na Dios so labay ton kasian, tan paaweten toy puso na labay ton paaweten.

¹⁹ Ikuan mod siak pa lagi, No ontan sirin, akin et tetelen ni na Dios so too? Siopay makasumlang ed labay na Dios?

²⁰ Balet, kaaro, siopa kan too ya onebat ed Dios? Ibaga kasi na banga ed toon nanggawad sikato, Akin et onyay impanggawam ed siak?

²¹ Akin, anggapo tay kanepegay toon managgaway banga a manggaway mabmabli tan mamurmuran banga ed sakey a minolin dalin?

²² Ontan met, anggaman a labay na Dios ya ipanengneng so pasnuk to tan ipaamtay pakayari to, inanosan ton maung ya intepel iray totoon pamapasnukan to tan nepeg la ran dusaen.

²³ Ginawa to ya met a pangipanengneng toy ag miparan kagalangan to diad saray totoon kinasian to, saray imparaan to la ra nen saman a mangawat na kagalangan.

²⁴ Kabyangan itayo na sarayan totoon tinawag na Dios, aliwan nanlapud saray Judio labat, no ag pati nanlapud saray Hintil.

²⁵ Onung ed libro nen Oseas, say Dios kuanto, Saray totoon ag ko totoo nen saman, tawagen ko ra na Saray totook. Say bansan ag ko inaro nen saman, tawagen ko na Say inararok.

²⁶ Tan diad pasen ya akapangibagan ed sikara, Ag ta kayo ra totoo, dimay pakatawagen ed sikaran anak ira na mabilay a Dios.

²⁷ Onya met so imbawag nen Isaias nipaakar ed Israel: Anggan magmaliw a singa karakel na buer ed dayat so bilang da ray totood Israel, daiset ed sikara so nilaban.

²⁸ Ta malet tan masiglat a sumpalen na Katawan so panintinsia tod intiron mundo.

²⁹ Si Isaias met so angikuan, No say Makapanyarin-amin a Katawan et ag labat angitilak na saray anak, nagmaliw ti la komun a singa baley na Sodoma, tan aparaan tayo lay baley na Gomorra.

³⁰ Antoy ibaga tayo sirin ey? Saya: saray Hintil, anta ag da aanapey pakapaandi na kasalanan dad arap na Dios, apaandian iray kasalanan diad panamegley na pananisia.

³¹ Balet saray Israelitan apili, anta nanseseet iran nanaanap na ganggan a makapaandi na kasalanan dad arap na Dios, ag da nalmo man a ganggan.

³² Akin ey? On a, ta inanap day pakapaandi na kasalanan dad arap na Dios diad panamegley na saray gawa, aliwan diad panamegley a pananisia. Apater irad baton pakapateran,

³³ onung a ibabagay Masanton Sulat, Nengneng yo, mangyan ak ed Sion na baton pakapateran, sakey a baleg a baton pakapatakbaan. Balet siopamay manisiad sikato ag nabaingan.

10

¹ "Agagi, ontan lay pampipilalek tan pampipikasik ed Dios a nilaban ira komuy kadalaan tan kabaleyan ko.

² "Napaneknekan kon ontan lay seet dan mamapaliket ed Dios, balet aliwan tuan kakabatan so sasaralay seet da.

³ "Lapud ag da amta so panamaandi na Dios ed kasalanay too, sineetan day angiletneg na dili ran polaing, tan ag ira tinmoluk ed panamaandi na Dios ed kasalanay too.

⁴ "Si Cristo so pansumpalay Ganggan, kanyan siopamay manisiad sikato, napaandi so kasalanan tod arap na Dios.

⁵ "Onya so insulat nen Moises, nipaakar ed pakapaandi na kasalanay too ed arap na Dios lapud panangonur ed Ganggan: Mambilay so toon mangoonur ed ibabagay Ganggan.

⁶ "Balet onya met so nasasalitan nipaakar ed pakapaandi na kasalanay too ed arap na Dios diad panamegley na pananisia: Ag mo ibabagad sikan dili, Siopay onkalab ed tawen? (salanti, pian niakseb si Cristo).

⁷ "Ag mo met anggan ibabaga, Siopay onlad dalem na dalin? (salanti, pian naaon si Cristo manlapud saray inaatey).

⁸ "Balet saya so ibabaga to, Asingger ed sikay salita, walad saray bibil mo tan dalem na pusomsalanti, say salitan ipupulong min nipaakar ed pananisia.

⁹ "No ibawag mo diad panamegley na sangim a si Jesus et Katawan tan manisia kad pusom a sikatoy pinaoli na Dios ed bilay, nilaban ka.

¹⁰ Ta diad panisiay too ed panamegley na puso to, napaandi so kasalanan tod arap na Dios tan diad pangibawag na too ed panamegley na sangi to, nilaban.

¹¹ Ta ibabagay Masanton Sulat, Siopamay manisiad sikato, ag nabaingan.

¹² Anggapoy pandomaay Judio tan Grigo, ta say Katawan et Katawan na amin, tan mangiiter na dakel a bindision ed amin da ray ontatawag ed sikato.

¹³ Onung na ibabagay Masanton Sulat, Siopamay ontawag ed ngaray Katawan, nilaban.

¹⁴ Balet panoy itawag dad sikato, no ag da panisiaan? Panoy panisia rad sikato, no ag da ni narerengel so paliwawan nipaakar ed sikato? Panon met a makarengel ira, no anggapoy managpulong?

¹⁵ Tan panon a makapampulong iray Maung a Balita, no ag ira imbaki? Onung na ibabagay Masanton Sulat, Agaylay abig a nengnengen so isabi da ray managpulong na Maung a Balita!

¹⁶ Balet ag inawat na amin a katoowan so Maung a Balita. Si Isaias kuanto, Katawan, siopay anisiad impulong mi?

¹⁷ Kanyan say pananisia manlalapud pandengel na balita, tan say balita onsasabi diad panamegley na pampulong na nipaakar ed Cristo.

¹⁸ Balet tepeten ko pa: Ag da kasi nadngel so Maung a Balita? Nadngel da, ta ibabagay Masanton Sulat: Nadngel anggad iner a sokung na mundo so bosis da ray managpulong, tan kinmayat iray salita ya angad saray samput na mundo.

¹⁹ Tepeten ko pa ni: Ag ta atalusan na bansay Israel? Si Moises lay akaonan inmebat: Pangimonen ta kayo ed saray totoon aliwa ni met a talagan bansa; Pasanuken ta kayo ed saray totoo na ag makatalus a bansa.

²⁰ Lalon nakpel si Isaias ta inkuanto, Arumog da ak iray ag manaanap ed siak. Pinmanengneng ak ed saray ag manetepet no iner so kawalaan ko.

²¹ Balet nipaakar ed Israel, inkuanto, Sanagew ya inyonat ko ray limak diad pantawag kod saray totoon ag mangoonur tan onsusumlang ed siak.

11

¹ "Onyay tepet ko natan sirin: Impolisay na Dios kasi ray totoo ton dili? Andi! Sakey ak met ya Israelita, kabyangan ak na boleg nen Abraham tan say tribu nen Benjamin.

² "Ag impolisay na Dios iray totoon pinili to lan inmona nen saman. Ag yo ta amtay ibabagay Masanton Sulat ed sakey a pasen? Akikasiy Elias ed Dios sumlang ed Israel:

³ "Katawan, pinatey da ray propitam tan gineba da ray altar mo. Bukbukor ko la, igagaem da ak nin pateyen.

⁴ "Balet antoy inebat na Dios ed sikato? Angikera ak na piton libo a totoon lalaki para siak, a sikaray ag angigalang ed kinen Baal a dios.

⁵ "Ontan met a diad sayan panaon, wala ni ray daiset ya atilak a pinili na Dios lapud panangasi to.

⁶ "Pinili to ra lapud panangasi to, aliwan lapud saray ginagawa ra; ta no say impampili na Dios et lapud saray ginagawa ra, say panangasi tod satan et aliwa lan petepeteg a panangasi.

⁷ "Anto natan ey? Ag agamuran na saray totood Israel so anapen da. Saray pinili na Dios labat so akagamur; inmawet so puso da ray arum.

⁸ "Onung na ibabagay Masanton Sulat, Initday Dios ira yan totoo na anawet a puso tan olo; saray mata ya ag makanengneng tan saray layag ya ag makadngel, anggad sayan panaon.

⁹ "Inkuan met nen David, Magmaliw komun a patit tan kalut iray pista ra; natumba tan nadusa komun ira!

¹⁰ Nabilongetan komuy mata ra, pian ag ira makanengneng, tan anggad angga komun a bokuten iray kairapan.

¹¹ Tepeten ko pa sirin: Atumba ra kasiy Israelita, pian ag la ra makabangon? Andi! No ag ta diad impankasalanan da, sinmabiy kilalaban ed saray Hintil, pian pangimonan iray Israelita.

¹² Natan, no say impankasalanan da et inkabindisionay sankamundoan, tan say kinulangan dad maispiritun panagbilay et inkabindisionan da ray Hintil, lalo komun a dakdakel so bindision no amin ya Israelita et nibilang iran amin a totooy Dios.

¹³ Saya met so ibagak ed sikayo ran Hintil: dapot apostol ak na saray Hintil, ikikinon koy panaglingkur ko,

¹⁴ ta ag la pigan napaibeg ko ray kadalaan ko, et nilaban so pigarad sikara.

¹⁵ No say sankamundoan et akapipulangan ed Dios lapud impakapolisay ed saray Judio, ag kasi say pakaawat ed sikara lamet et singa pangiter na bilay ed saray inaatey?

¹⁶ No say ononan tinapay a nanlapud masa et imbagat ed Dios, imbagat met lay intiron masa. No imbagat ed Dios so lamut na kiew, imbagat met la ray sanga to.

¹⁷ Saray pigaran sangay oliban intanem so apoter, tan sinoldungan na sangay oliban balang. Sikan Hintil, aliling moy oliban balang, tan natan minanabang kad biskeg tan maung a bilay da ray Judio.

¹⁸ Kanyan ag mo nepeg a balbalawen ira may apoter a sangasanga; ta nepeg mon nunoten a sanga ka labat tan ag mo tataganoey lamut, no ag ingen say lamut so manataganod sika.

¹⁹ Ikuanmod satan, Apoter iray sanga, pian nisoldung ak.

²⁰ On, tua tay kuanmo. Apoter ira, ta ag ira anisia; nisoldung ka, ta manisia ka. Kanyan ag ka mampapaatagey; ontakot ka ingen.

²¹ Ta no ag pinalabas na Dios iray Judio ya aliling day peteg iran sanga, ag to ka met palabasen.

²² Nanengneng mo diay panangasi tan kinasebeg na Dios. Masebeg ed saray ag manisiad sikato, balet mapangasid sika no mansiansia kad panangasi to. Balet no andi, napoter ka met.

²³ Nisoldung iray Judio no ikaindan day ag da panisia, ta nayariay Dios ya isoldung ira.

²⁴ No sikan Hintil ya aliling moy apoter ya oliban balang et nayarin isoldung ed oliban intanem, anggaman a sumlang ed inkanatural na kiew, mainomay sirin ya isoldung ed sengeg dan dili iray apoter a sangay oliban intanem.

²⁵ Agagi, walay sakey a niamut a katwaan a labay kon ipaamtad sikayo, pian ag yo ipasen a makabkabat kayo. Say inkaawet na puso da ray Israelita et mansamput la no inmasingger lad Dios so nagnap a bilang da ray Hintil.

²⁶ Onyay kilaban na intiron Israel. Onung na ibabagay Masanton Sulat, Manlapud Sion so Manangilaban, Saray kabyangay boleg nen Jacob, ekalan to ray kaogsan.

²⁷ Sikato yay isipan kod sikara, no ekalen ko la ray kasalanan da.

²⁸ Lapud ag inawat na saray Judio so Maung a Balita, nagmaliw iran kalaban na Dios. Balet sikayo ran Hintil, pankaabigan yo ya. Balet lapud pinili ra na Dios, inararo to ni ra makasengeg ed saray inmonan atateng da.

²⁹ Ta say Dios ag mangomay kanunotan diad panagtawag tod saray totoo, tan panangiter toy bindision.

³⁰ Sikayo ran Hintil, aliwa kayon maonur ed Dios nen saman, balet agamuran yoy panangasi na Dios lapud ag intoluk na saray Judio ed sikato.

³¹ Ontan met, ag ontotoluk natan iray Judio ed Dios, pian diad impakaawat yoy panangasi to, makagamur met iray panangasi.

³² Ta say Dios inabuloyan toy amin a katoowan a magmaliw iran aripey kasalanan, pian nipanengneng toy panangasi tod sikaran amin.

³³ Agaylay karakel so kayamanay Dios! Ag natokur so kakabatan tan pakatalus to! Ag natalusan iray panagsintinsia tan kagagawa to!

³⁴ Onung na ibabagay Masanton Sulat, Siopay makaamta na kanunotay Katawan? Siopay makasimbawad sikato?

³⁵ Siopay akapangiter ed sikatoy bengatla, a nepeg ton bayaran?

³⁶ Ta pinalsa toy amin a bengatla, mambibilay ira diad panamegley to, tan mansusumpal iran amin ed sikato. Nagalang komun ed ando lan ando so Dios! Amen.

12

¹ "Kanyan, agagi, lapud ontan lan panangasi na Dios, kerewen kon isaklang yon mabilay a bagat ed Dios so bilay yo, bagat a masanto tan makapaliket ed sikato. Sikato yay panangigalang yod Dios.

² "Ag yo aaligey panagbilay na sankamundoan. Ingen paoman yo lad Dios so panagbilay yo, pian naamtaan yoy linawa na Diosno anto so maung, makapaliket ed Dios, tan ayadyari.

³ "Lapud baleg a panangaroy Dios ed siak ibabagak ed balang sakey ed sikayo: Ag yo itatanduroy laman yon dili ya alabas nen say kanepegan to. Ingen mampaabeba kayo tan balang sakey ed sikayo sintinsiaan toy sikaton dili, onung ed sukat na pananisian inter na Dios ed sikato.

⁴ "Amayamay so kabyangay laman, balet ag nampaparay kimey dan amin.

⁵ "Ontan met, anggaman ya amayamay tayo, saksakey tin laman diad pikakasakey tid Cristo. Nandoroma itayon kabyangan, balet nantetekep itayod sakey a laman.

⁶ "Kanyan ikana tayo ray langkap ya inter na Dios ed sikatayo, onung ed baleg a panangaro to. No say langkap na Dios ed sikatayo et say panagpulong na salita to, mampulong itayo, onung ed pananisian inter tod sikatayo;

⁷ "no panaglingkur, manlingkur itayo; no panagbangat, mambangat itayo;

⁸ "no panagsimbawa, manimbawa tayo. Say mangyapag na kayamanan to, nepeg a mangiter a mabonbonluk; say walad oley, mankoli; say mangasid kapara ton too, gawaen ton sililiket.

⁹ "Nepeg ya anggapoy pankonkonwari so panangaro yo. Bosul yoy kaogsan, pabli yoy kamaungan.

¹⁰ Manaarowan kayo na malet, a singa dilin sanaagi; manoonaan kayo ed pangiter na dayew ed sakey tan sakey.

¹¹ Mankoli kayo tan ag kayo onngingiras. Ipapuso yoy panaglingkur yod Katawan.

¹² Manliket kid paniilalo yo, mananos kayod saray kairapan yo, tan mampikasi kayo lawas.

¹³ Tulongan yo ray agagi yon walad pankaukolan, patuloy yo ray sangkali.

¹⁴ Kerew yod Dios a bindisionan to ray mamapasegsegang ed sikayo; on, pikasi yon bindisionan, aliwan isamba to ra.

¹⁵ Miliket kayod saray manliliket, tan minangis kid saray mannanangis.

¹⁶ Pampapara yoy panangaro yod amin a too. Ag kayo mapaatagey, no ag ingen mikaaro kayod saray mapaabeba. Ag yo ipapasen a makabkabat kayo.

¹⁷ Ag kayo ombabales na maoges ed toon nanggaway maoges ed sikayo. Gawa yoy antokaman ya ipapasen a maung na amin a totoo.

¹⁸ No nayari, diad anggaay nayarian yo, piolupan yon amiy too.

¹⁹ Ag kayo ombabawi, inararon agagi; paolyan yo lan ombawi so Dios. Ta ibabagay Masanton Sulat, Siak so maningil, siak so ombawi, kuay Katawan.

²⁰ Ingen, onung na ibabagay Masanton Sulat, No narasay kalaban mo, pakan mo; no napgaan, painom mo; ta diad kababaingan to, singa ipapaagtom so ngalab ed olo to.

²¹ Ag ka padadaeg ed maoges; nepeg mo ingen a daegey maoges diad panamegley na maung.

13

¹ "Nepeg a toluken na balang sakey iray manoley ed gobirno; ta anggapoy pakaoley ya ag nanlapud Dios, tan saray manoley natan et pinayorung iray Dios.

² "Kanyan siopamay onsumlang ed gobirno, sumlangen toy pakaoley ya inletneg na Dios, tan nadusa so toon onsumlang.

³ "Saray manoley nepeg a takotan na saray managgaway kaogsan, aliwan saray managgaway kamaungan. Labay mon ag takotay toon manoley? Manggawa kay kamaungan, pian pagalangan to ka.

⁴ "Ta sikatoy kumikimey na Dios tan pankaabigan moy gagawaen to. Balet takot ka no maoges so gawaen mo, ta dusaen to kan dusaen. Sikatoy kumikimey na Dios a manusa ed saray manggaway kaogsan.

⁵ "Kanyan nepeg yoy ontoluk, aliwa labat a lapud labay yon paliisay pasnuk na Dios, no ag ingen lapu met ed konsinsia.

⁶ "Sikato ya met so makasengeg no akin et mambabayar kayoy buis. Ta saray manoley kumikimey iray Dios tan makoli ran manusumpal ed sayan kanepegan.

⁷ "Iter yo sirin ed sikaran amin so kanepegan da ya awaten; bayaran yoy lisinsia yo tan buis yo ed saray nepeg a pambayaran; takotan yo ray nepeg a takotan, tan igalang yo ray nepeg a galangen.

⁸ "Ag kayo miuutang ed siopaman, likud ed panarowan yo. Siopamay mangarod kapara ton too sinumpal toy Ganggan.

⁹ "Ta saray ganggan, Ag ka mikakaloguran; ag ka mamapatey; ag ka mantatakew; ag ka maagom tan arum ni ran ganggan a singa saraya et natitibokel ed sayan ganggan, Arom so kaparam a too, a singa panangarom ed sikan dili.

¹⁰ Say toon mangarod kapara ton too et ag manggaway antokaman a kaogsan ed siopaman. Kanyan say pangarod kaparan too panumpal ed Ganggan.

¹¹ Nepeg yo yan gawaen lapud amta yo no anto la yan panaon. Panaon lan nepeg kayon onliing, ta say kilalaban tayo et magano la natan nen samay inggapo tayon manisia.

¹² Ngalngali la mansamput so labi, tan ombubutay lay agew. Tondaan ti lay panggaway bengatlan kayaryay bilonget, tan egnaan ti la ray armas a kayaryar liwawa.

¹³ Simpitan ti lay kagagawa tayo, ta singa tayo totoon mambibilay ed liwawa; ikaindan ti lay alablabas a panagliket tan say pangbuanges, ekalen ti met la ray mabanday a likeliket na laman, pankokolkol, tan paniimonan.

¹⁴ Balet panoleyen yo lan sigput ed bilay yo so Katawan a Jesu-Cristo, tan ibeneg yo lay makasalanan ya inkatoo yo, pian ag yo la nagawaay labay to.

14

¹ "Awat yoy agi yon makapoy ed pananisia, balet ag kayo la misasangsangan ed sikato nipaakar ed dilin pakatalus to.

² "Walay toon manisian naakan toy amin a nakan, balet pising labat so kakaney toon makapoy ed pananisia.

³ "Say toon mamangay amin a nakan ag to nepeg a balawey toon mamangay pising labat, tan say toon mamangay pising labat ag to nepeg a sintinsiaay toon mamangay amin a nakan, ta sikatoy inawat na Dios.

⁴ "Siopa kan manintinsiad aripey arum a too? Say katawan to labat so makapangibaga no sikato kasiy makana o andi. Magmaliw a makana, ta nayarian na Katawan a gawaen ya.

⁵ "Walay toon mangipapasen a maabig so sakey ya agew nen say arum iran agew, balet say sananey a too ipapasen ton nampaparay amin ya agew. Nakaukolan ya ag manduaruway kanunotan na balang sakey a too.

⁶ "Say toon ngingilinan toy sakey ya agew, manngingilin a pamagalang tod Katawan; say toon kakanen toy amin a nakan, mamangan a pamagalang tod Katawan, ta pisasalamatan tod Dios so kakanen. Say too balet ya ag mamangay arum iran nakan, ag mamangan a pamagalang tod Katawan, tan pisalamatan to met so Dios.

⁷ "Ta anggapod sikatayoy mambibilay para sikaton dili labat, tan anggapo met so ompapatey para sikaton dili labat.

⁸ "No mambilay tayo mambilay itayon para Katawan, tan no ompatey tayo ompatey itayon para Katawan. Kanyan mambilay man o ompatey tayo, kayaryan itayoy Katawan.

⁹ "Ta inatey tan inmolid bilay si Cristo, pian magmaliw a Katawan da ray mabilay tan saray inatey.

¹⁰ Akin et sintinsiaan mo sirin so agim? Tan akin et balawen mo agim? Onarap tayon amin ed panagsintinsiaan na Dios.

¹¹ Ta ibabagay Masanton Sulat, Dapot mabilay ak, kuay Katawan, mantalimukor ed arap ko sa amin a pueg tan balang dila mandayew ed Dios.

¹² Ebatan sirin na balang sakey ed sikatayo so sikaton dili ed arap na Dios.

¹³ Ag tayo la mansisintinsiaan, no ag ingen saya lay talagan gawaen yo: ag kayo manggagaway pakatumbaan o pakapankasalanay agi yo.

¹⁴ Lapud pikakasakey kod Katawan a Jesus, amtak tan sisiaen ko ya anggapoy nakan a gendat lan marotak. Balet no ipasen na sakey a too a walay nakan a marotak tan ag nayarin kanen, ag nayari sirin a kanen to.

¹⁵ No napasakitan moy agim lapud bengatlan kanen mo, sumlang lad panangaro so gagawaen mo. Inatey para agim si Cristo, kanyan nepeg ya ag mo dederaley agim lapud bengatlan kanen mo!

¹⁶ Ag mo aaboluyan a say ipasen mon maung et nasalitan maoges.

¹⁷ Ta say Panarian na Dios aliwan nipaakar ed panangan tan panaginom, no ag ingen nipaakar ed katonungan, kareenan, tan liket ya iter na Ispiritu Santo.

¹⁸ Say manlingkur na onya ed Cristo et paliketen toy Dios tan abubonay totoo.

¹⁹ Kanyan nepeg tin panseetan a gawaen iray makapangiter na kareenan tan makapabiskeg na sakey tan sakey.

²⁰ Ag yo dederaley kimey na Dios lapu labat ed kakanen. Amin a nakan nayarin kanen, balet maoges so pangan mo na pansengegay pankasalanan na sakey a too.

²¹ Maung so ag pangay karni, say ag iyinom na alak, o say ag panggaway bengatlan pansengegan na pankasalanay agim.

²² Sika tan say Dios labat so nepeg a makaamtad pananisiam nipaakar ed saya. Maliket so toon ag nagoluy isip to diad panggawa toy bengatlan ipapasen ton maung!

²³ Balet say toon panduaduaruwaan to no maung a marotak so kanen to et siansian kanen to, say Dios sintinsiaan ton nadusa, ta sumlang ed pananisia so gagawaen to. Kasalanan so antokaman a gawan sumlang ed pananisia.

15

¹ "Sikatayo ran mabiskeg ed pananisia nepeg tin tulongan iray makapoy ed pananisia diad panakbat dad saray pakabebelatan da. Ag tayo nepeg a paliketen so sikatayon dili.

² "Paliketen ti ingey agi tayo no pankaabigan to, pian ombiskeg so pananisia to.

³ "Ta anggan si Cristo, ag to pinaliket so sikaton dili. Ingen onung ed Masanton Sulat, Siak so naplagan na saray pabpabaing da ray nanlemlemew ed sika.

⁴ "Amin a walad Masanton Sulat insualt ira a pakaaralan tayo, et diad ontan nawalaan itayoy ilalo diad panamegley na anos tan biskeg na linawa ya iter na Masanton Sulat ed sikatayo.

⁵ "Iyabuloy komun na Dios a manangiter na anos tan biskeg na linawa, a mankakasakey kayo ed kanunotan, onung ed linawa nen Cristo Jesus,

⁶ "pian saksakey so bosis yo diad pankakasakey yon mangigalang ed Dios tan Ama na Katawan tin Jesu-Cristo.

⁷ "No panoy impangawat nen Cristo ed sikayo, ontan met komun so panaawatay sakey tan sakey ed sikayo, pian napagalangan yoy Dios.

⁸ "Ta ibabagak ed sikayo a nagmaliw a managlingkur si Cristo ed saray Judio, pian nipanengneng ton matoor so Dios, napatwa to ray sipay Dios ed saray lalaki ra,

⁹ "tan saray Hintil et igalang day Dios lapud panangasi to. Onung na ibabagay Masanton Sulat, Kanyan idayew ta kad saray Hintil, tan kantaan ko so ngaran mo.

¹⁰ Ibabaga to ni, Sikayo ran Hintil, manliket kayo, a kaiba yo ray pinilin totooy Dios!

¹¹ Ibabaga to met ni, Idayew yoy Katawan, amin yon Hintil, idayew yo, amin yon katoowan!

¹² Ibabaga met ni nen Isaias, Onsabi so kabyangay boleg nen Jesse, ontalindeg a manoley ed saray Hintil, tan manilalo rad sikato.

¹³ Say Dios a manangiter na ilalo panoen to kayo komuy liket tan kareenan lapud pananisia yod sikato, pian ombiskeg so ilalo yo diad panamegley na pakayariy Ispiritu Santo.

¹⁴ Agagi, anggapoy duaruwak met a napno kayoy kaabigan, amin a kakabatan, tan sarag yoy mansisimbawaan.

¹⁵ Balet nampakpel ak na linawa a nansulat ed sikayo na nipaakar ed pigaran bengatla, pian ag yo ra nalingwanan. Ginawak ya lapud pankanawnawan inter na Dios,

¹⁶ a magmaliw ak a kumikimey nen Cristo Jesus ed saray Hintil. Singa ak parin mangipupulong ed sikara na Maung a Balitan nanlapud Dios, pian magmaliw iran bagat a makapaliket ed Dios, bangta pinasanto ra na Ispiritu Santo.

¹⁷ Kanyan lapud pikakasakey kod Cristo Jesus, walay kanepegan kon mampasirayew ed kimey kon para Dios.

¹⁸ Balet say nayarian ko labat a bitlaen et say ginawa nen Cristo diad panamegley ko, a salanti say impangiwanwan kod saray Hintil a mangonur irad Dios diad panamegley na saray salitak tan gawak,

¹⁹ say pakayari da ray tanda tan milagro, tan say pakayari na Ispiritu Santo. Kanyan diad impambiahik nanlapud Jerusalem ya anggad Ilirico, nipulong ko lan sigput so Maung a Balitan nipaakar ed Cristo.

²⁰ Say pilalek ko lawas et say pakapampulong koy Maung a Balita ed saray totoon ag da ni kabat si Cristo; ag ak mampulong ed nampulongay sananey a too, pian ag ak mangipaalagey ed pundasion ya inletneg lay sananey a too.

²¹ Ta onung na ibabagay Masanton Sulat, Saray ag ni apulongan na nipaakar ed sikato makanengneng ira, tan saray ag ni akadngel na nipaakar ed sikato makatalus ira.

²² Sikato yay makasengeg ya amimpiga-piga ak ya asebelan ed iyakar kod tan.

²³ Balet natan ta asumpal ko lay kimey kod sarayan pasen, tan lapud pigay taon lan pilalek ta kin bisitaen,

²⁴ iilaloan kon makasamar ak ditan no onla ak ed Espanya. Iilaloan ko met a natulongan yo ak ed pangituloy koy pambiahik, kasumpal na pilimug kod sikayon magano.

²⁵ Balet natan, onla ak nid Jerusalem ta awiten koy tulong ed saray agagid man.

²⁶ Ta mamolbolus a nampapakna ray iglisiad Macedonia tan Acaya a mangiter iray tulong ed saray mairap-bilay a totooy Dios a wala rad Jerusalem.

²⁷ Maliket iran tinmulong, balet talagan kanepegan da ran tulongan. Say makasengeg, akapinabang iray Hintil ed saray maispiritun bindision na Dios ed saray Judio, kanyan kaukolan a saray Hintil pinabangen da met iray Judio na saray matirial a bindision na Dios ed sikara.

²⁸ Kanyan kasumpal kon niiter la yan tulong, onsamar ak ditan no onla ak ed Espanya.

²⁹ Amtak a no onla ak ditan awit koy ag nasabsabaan a bindision nen Cristo.

³⁰ Kerewen ko pad sikayo, agagi, lapud Katawan tin Jesu-Cristo tan say aron iiter na Ispiritu, ya ibaan yo ak a mangipikasi a masimoon ed Dios ed laman kon dili.

³¹ Ipikasi yo pan nipaliis ak ed saray aliwan mananisian walad Judea, tan maliket ya awaten na saray totooy Dios a wala rad Jerusalem so panlingkur kod sikara.

³² Diad ontan, no iyabuloy na Dios, onla ak ditan a maliket tan ilaloan kon makapampainawa ak a maung ed pilimug kod sikayo.

³³ Walad sikayon amin komuy Dios a panlalapway kareenan tayo. Amen.

16

¹ "Ipipiak ed sikayoy agi tin Febe, a manlilingkur ed iglisia ed Cencrea.

² "Lapud Katawan, awat yo onung na kanepegan a gawaen da ray totooy Dios, tan iter yo pay antokaman a nakaukolan tod sikayo, ta amayamay iray tinulongan to, tan siak so sakey ed sikara.

³ "Ibanoan yo ak pad kindi Priscila tan Aquila a kaparak iran manlilingkur ed Cristo Jesus.

⁴ "Imposta ray bilay da nisengeg ed siak, kanyan pisalsalamatan ko ra; aliwan siak labat so misasalamat ed sikara, no ag ingen pati amin ya iglisia da ray Hintil.

⁵ "Ibanoan yo ak met ed saray kabyangay iglisian mantitipon ed abung da ra yan sanasawa. Ibanoan yo ak pa met ed pinablik ya Epeneto, a sikatoy inmona-onan anisiad Cristo dimad luyag na Asia.

⁶ "Ontan met ya ibanoan yo ak ed kinen Maria a nanlingkur a maung ed sikayo,

⁷ "tan kindi Andronico tan Junia a kadalaan ko ra tan kaibak irad prisowan; bantug irad saray apostol tan akaona ran nagmaliw a Cristiano nen say siak.

⁸ "Ibanoan yo ak pa met ed kinen Ampliato a pinablik ed Katawan;

⁹ "ontan met ed kinen Urbano, say kapara tin managlingkur ed Cristo, tan si pinablik ya Estaquis.

¹⁰ Ibanoan yo ak met ed kinen Apeles ya apaneknekan a matoor ed Cristo. Ibanoan yo ak met ed pamilya nen Aristobulo,

¹¹ tan kinen Herodion a kadalaan ko tan saray agagid Katawan a kabyangan iray pamilya nen Narciso.

¹² Ibanoan yo ak pad kindi Trifena tan Trifosa, a manlilingkur irad Katawan, tan si pinablik a Persida, a pinasyay impankimey to para Katawan.

¹³ Ibanoan yo ak met ed kinen Rufo a bantug a managlingkur na Katawan, tan si ina to ya impasen to ak ya anak a dili.

¹⁴ Ibanoan yo ak met ed kindi Asincrito, Flegonte, Hermes, Patrobas, Hermas, tan saray arum ya agagin kaiba ra.

¹⁵ Ibanoan yo ak ed kindi Filologo, Julia, Nereo tan si agi ton bii, si Olimpas tan amin a kaiba ran totooy Dios.

¹⁶ Mambabanowan kayod panamegley na inaagin angub. Ibabano kayo na amin da ray iglisia nen Cristo.

¹⁷ Kerewen kod sikayo, agagi, alwaran yo ray manangigapoy pansisian da ray kabyangay iglisia, a dederalen day pananisiay totoo tan susumlangen day bangat ya inawat yo. Paliisan yo ra.

¹⁸ Saratan a klasiy totoo et ag da panlilingkuray Criston Katawan tayo, no ag say dilin pilalek da. Lapud malamlamuyot tan masamsamit a pananalita ra, ibabalang da so kanunotan da ray totoon mainomay a natanggoyur.

¹⁹ Kabkabat la na amin a matoor kayod Cristo, tan panliliketan ko yan maung. Labay kon makabat kayo no nipaakar ed kamaungan, balet anggapoy pibabali yo no nipaakar ed kaogsan.

²⁰ Say Dios a panlalapway kareenan tayo et magano lan pagatin-gatinan toy Satanas ed sikayo. Talimaen kayo komun nen Jesus a Katawan tayo.

²¹ Papaibanoad sikayo si Timoteo a kakimeyan ko. Ontan met a papaibanoan ira di Lucio, Jason, tan Sosipatro, a kadalaan ko ra.

²² Siak, a si Tercio, ya angikorit ed sayan sulat et ibabano ta kayo ed ngaray Katawan.

²³ Ibabano ki met nen Gayo a pipupundoan ko tan diad abung toy pantitiponay intiron iglisia. Ontan met, ibabano kinen Erasto a tisoriroy siudad tan si agi tayon Cuarto.

²⁴

²⁵ Idayew tayoy Dios a nayarian ton pabiskegey pananisia yo, onung ed Maung a Balitan nipaakar ed Jesu-Cristo ya ipupulong ko; onung ed inkibawag na abaybayag lan niamut a katwaan.

²⁶ Nibawag la ya natan a katwaan diad panamegley na saray insusulat da ray propita; tan lapud ganggan na andi-anggaan a Dios, nipakabat ed saray amin a bansa pian manisia tan mangonur iray amin a katoowan.

²⁷ Nagalang komun ed ando lan ando, diad panamegley nen Jesu-Cristo, so bukor toy makabat a Dios! Amen.