1 "Kagalgalang kon Teofilo: Amayamay la ray nanoksuy tan nansulat na nipaakar ed saray bengatlan agawgawad pegley mi.
2 "Insulat da ray imbabalitad sikami na saray akakkaimatun nanlapud gapo ed sarayan agawgawa tan nampupulong na salitay Dios.
3 "Kasumpal kon inaral a maung yan agawgawa nanlapud inggapo ra, ninunot kon maabig ya isulat ko ran maoksuy para sika.
4 "Gawaen ko ya sirin, pian naamtaan moy katwaan da ray imbabangat dad sika.
5 "Nen si Herodes so ari na Judea, walay sakey a parin manngaray Zacarias, a kabyangay olup na paparin ipapangulo nen Abias. Say asawa nen Zacarias et si Elizabet, a kabyangay kailalakan nen Aaron.
6 "Matonung so pambibilay dan dua ed arap na Dios, tan diad panusumpal dan amiy ganggan tan bilin to, anggapoy pakabalawan ed sikara.
7 "Anggapoy anak da, ta lepes si Elizabet; insan sakey ni, mataktakken la ran dua.
8 "Aminsan ya agew, si Zacarias manlilingkur a sakey a pari ed arap na Dios, ta asabi lay liber na kawalaan ton olup na papari.
9 "Onung ed kaogaliyan a totombuken na saray papari, nambibinagut ira. Si Zacarias so apalaran a mampool na insinso altar, kanyan linmoob ed Timploy Katawan.
10 Saray totoo balet, wala rad paway na Timplo tan mampipikasi ra nen oras na panagpool na insinso.
11 Pinmayawar ed sikatoy sakey ya anghil na Katawan a manalalagey ed nikawanan na altar a panagpoolay insinso.
12 Nikelawan si Zacarias tan ataktakot nen anengneng to may anghil.
13 Inkuanto may anghil, Ag ka natatakot, Zacarias, ta dinengel na Dios so pikakasim! Si Elizabet ya asawam et mananak na sakey a laki. Juan so pangingaran mod sikato.
14 Agaylay panliket tan panggayagam, tan agaylay panliket na amayamay a totoo ed kianak to!
15 Ta magmaliw a matalonggaring yan too ed arap na Dios. Ag oninom na alak o antokaman a makabuek. Napano la na Ispiritu Santo ya anggan wala nid eges nen ina to.
16 Dakel iray totoon taga Israel a papawilen tod Katawan a Dios da.
17 Onlan onona nen say Katawan, tan nawalan na singa pakayari tan ispiritu nen propita Elias. Papawilen toy panaarowan da ray ama tan anak. Papawilen to met ed dalan da ray matonung iray totoon bangar. Diad ontan, iparaan to ray totoo a mangawat ed Katawan.
18 Inkuanen Zacarias ed samay anghil, Panon ko a naamtaan a nagawa yan tua, anta masikesiken ak la tan akolakolaw met lay asawak?
19 Inmebat may anghil, Siak si Gabriel a manalalagey ed arap na Dios. Imbaki to ak a mangibagad sika yan maung a salita.
20 Manlapud natan naemel ka tan ag ka makasalita, anggad pakagawa na sayan imbagak, lapud ag mo panisiaan ya ontua ray imbagak ed sika no nasabiy niganan agew.
21 Leleg to ya, aalagaren na totoo si Zacarias. Mankelaw ira no akin et agaylay bayag tod dalem na Timplo.
22 Nen ompaway ag to la makasalita, kanyan naamtaan dan walay pinmayawar ed sikato diad dalem na Timplo. Ag makasalitan balut, kanyan sinisinyasan to labat iray totoo.
23 Nen asumpal lay liber nen Zacarias a manlingkur ed Timplo, sinmempet la.
24 Ag abayag, nanlokun a tua si asawa ton Elizabet tan limay bulan ya ag inmalis ed abung.
25 Inkuanto, Tinulongan ak natan na Katawan. Inekal toy kababaingan kod saray totoo!
26 Diad kumanem a bulan na lokun nen Elizabet, imbakiy Dios si anghil Gabriel ed Nazaret, sakey a baley ed Galilea,
27 ta walay paibaga tod sakey a marikit a manngaray Maria. Akisipanan la yan marikit a miasawad kinen Jose a kabyangay boleg nen Ari David.
28 Kasabi to may anghil ed kinen Maria inkuanto, Manggayaga ka, ta pinalaboan kay Dios! Say Katawan walad sika!
29 Agoloy kanunotan nen Maria ed sayan imbalikas to may anghil tan inisisip to no antoy labay ton ibaga.
30 Inkuan na anghil, Ag ka natatakot, Maria, ta pinalaboan kay Dios.
31 Manlokun tan mananak kay sakey a laki, tan Jesus so pangingaran mod sikato.
32 Magmaliw a matalonggaring yan laki tan natawag ya Anak na Sankatageyan a Dios. Say Dios a Katawan pagmaliwen ton sakey ya ari, a singa si David a laki ton.
33 Manarin andi-anggaan ed saray kabyangay boleg nen Jacob, tan anggapoy anggaan so panarian to!
34 Inkuanen Maria ed samay anghil, Panon yan nagawa, anta sakey ak a birhin?
35 Onlad sikay Ispiritu Santo, ebat na anghil, tan tarungan kay pakapanyariy Sankatageyan a Dios. Kanyan natawag ya Anak na Dios so masanton ogaw ya iyanak mo.
36 Nanunotan moy kanayon mon Elizabet? Lepes tan akolaw la, balet kumanem bulan to lan malokun natan.
37 Anggapoy ag nagawaan na Dios.
38 Inmebat si Maria, Aripen ak na Katawan. Nagawad siak komun itay ibabagam. Insan linma la may anghil.
39 Ag abayag, maganat a linmay Maria ed sakey a nipokdul a baley na Judea.
40 Kasabi tod abung nen Zacarias, inggalang toy Elizabet.
41 Nen nadngel nen Elizabet imay impangigalang nen Maria, ginmalaw so ogaw ed eges to. Napnoy Ispiritu Santo si Elizabet
42 tan inkuantod maksil a bosis, Sikay sankaliketan ed amin da ray bibii! Maliket met so ogaw ya iyanak mo!
43 Siopa ak a bisitaey ina na Katawan ko?
44 Ta kadngel koy impangigalang mod siak, ginmalaw yay ogaw ed eges ko diad liket to.
45 Agaylay liket mo, ta manisia kan nasumpal so impaibagad sikay Katawan!
46 Inkuanen Maria: Itanduroy pusok so Katawan,
47 tan manliket so ispirituk lapud Dios a Manangilaban ko,
48 ta anunotan to ak a magter ya aripen to! Manlapud natan, tawagen ak a maliket na amin da ray katoowan,
49 lapud saray makapakelaw a bengatlan ginaway Makapanyarin Dios ed siak. Masanto so ngaran to:
50 ipanengneng toy panangasi to ed amin da ray mangigagalang ed sikato, manlapud sakey a kailalakan ya anggad ontombuk iran kailalakan.
51 Impakana toy biskeg da ray taklay to, binuybuyak to ray mapaatagey tan saray getma ra.
52 Tinumba to ray makapanyarin ari ed trono ra, tan intanduro to ray mapaabeba.
53 Pinesel to na maung a bengabengatla iray narasan, tan pinataynan ton kalima-lima iray mamayaman.
54 Sinumpal toy insipan tod saray lalaki tayo, diad impanulong tod aripen ton Israel;
55 anunotan ton kinasian ya anggad angga si Abraham tan saray anak to!
56 Akiayam a taloy bulan si Maria ed kinen Elizabet, insan la sinmempet ed abung.
57 Sinmabi lay oras na pananak nen Elizabet, tan inyanak toy sakey a laki.
58 Abalitaan da ray kakaabay tan kakanayon to so baleg a panangasi na Katawan ed sikato, kanyan akiliket irad sikato.
59 Nen waloy agew to la may ogaw, dinmago ray totoon manegat ed sikato. Zacarias komuy pangingaran dad sikato pian iboloy dad kinen ama to,
60 balet inkuanen ina to, Andi! Juan so pangingaran ed sikato.
61 Balet anggapoy anggan sakey a kanayon mo a manngaray onya! inkuanda.
62 Sininyasan dad satay Zacarias, ta tinepet da no antoy labay ton ngaran na anak to.
63 Kinmerew si Zacarias na pansulatan to, tan insulat to: Juan so ngaran to! Mankelaw iran amin!
64 Diad saman a bekta ginmapon nansalita lamet si Zacarias, tan inggalang toy Dios.
65 Ataktakot iray kakaabay da tan kinmayat yan balita ed intiron nipokdul a pasen na Judea.
66 Ninunnunot ya na amin da ray akabalita tan tinetepet da, Anto kasiy pagmaliwan to yan ogaw? Ta walad sikatoy pakayari na Katawan.
67 Napnoy Ispiritu Santo si Zacarias ya ama na ogaw tan onyay propisiya to:
68 Nagalang komuy Katawan a Dios na Israel! Ta nila ton tinulongan tan inyagel so bansa to.
69 Angibakid sikatayo na makapanyarin Manangilaban, a kabyangan boleg nen David ya aripen to.
70 Sikato yay insipan to lan abayag diad panamegley da ray masanton propita to.
71 Insipan ton iyagel to itayod saray kalaban tayo, tan ipaliis to itayod saray mamobosul ed sikatayo.
72 Imbaga to met a kasian to ray lalaki tayo, tan nunoten toy masanton impisipanan to.
73 Sinambaan to ed ama tayon Abraham ya iyagel to itayod saray kalaban tayo, pian anggapoy takot tayon manlingkur ed sikato.
74
75 Magmaliw itayon masanto tan matonung ed pakanengneng to, legan tayon mambilay.
76 Sika balet, anak, natawag ka a propitay Sankatageyan a Dios. Ta onla kan onona nen say Katawan ya iparaan moy dalanen to;
77 tan ibagam ed saray totoo to a nilaban ira, diad pakapirdonay kasalanan da.
78 Maaro tan mapangasiy Dios tayo. Iwandag toy maliwliwawan agew na kilalaban ed sikatayo,
79 pian nasilewan ton manlapud tawen iray walad bilonget tan anino na patey, tan iwanwan to itayod dalan na kareenan.
80 Binmaleg imay ogaw tan binmiskeg so ispiritu to. Nanayam ed kalawakan ya anggad insabiy agew a pangiparontal toy sikaton dili ed saray totood Israel.
1 "Diad saraman ya agew, ingganggan nen Impirador Augusto a mampalista ray amin a totoon nasasakopay Impirio na Roma.
2 "Agawa yan onaan a palista nen si Cirenio so gobirnador na Siria.
3 "Linma sirin a mampalista so balang sakey a too ed dilin baley to.
4 "Diad Nazaret, Galilea, so panaayaman nen Jose, kanyan linmad Judea ed baley na Betlehem a nianakan nen Ari David. Dimay nila nen Jose, ta kabyangay boleg nen David.
5 "Kaiba ton mampalista si Maria ya asawaen to. Malokun si Maria,
6 "tan nen wadman irad Betlehem, asabian lad may pananak.
7 "Nananak na sakey a laki, a sikato so pangulowan ya anak to. Binalkut toy lamping imay ogaw, insan to imparokul ed sakey ya atotung, ta anggapoy pasen da ed abung a pundowan.
8 "Walad saman a pasen iray pumapastol a mampupuyat, ta babantayan dad alog iray karniro ra.
9 "Pinmayawar so sakey ya anghil ed sikara, tan say karlangay Katawan sinmindag ed kaliberliber da. Ontan lay inkataktakot da,
10 balet inkuanto may anghil, Ag kayo natatakot! Ta awit kod sikayoy maung a balitan mangiter na baleg a liket ed amin a katoowan.
11 Ta diad sayan agew, nianak ed baley nen David so Manangilaban, say Criston Katawan!
12 Say pakabirbiran yo onya: naalmo yoy sakey ya ogaw a binalkut ed lamping tan akarokul ed atotung.
13 Kabebekta, pinmayawar met a kaiba to may anghil so amayamay iran mangatatawen ya anghil a mangigagalang ed Dios:
14 Galang ed Dios ed tawen a sankatageyan, tan diad dalin kareenan ed saray totoon pakaliliketan to!
15 Kaalis da ra may anghil ya ompawil lad tawen, inkuanda ra may pumapastol ed sakey tan sakey, Itilad Betlehem, ta nengnengen tayo yan agawa ya imbalitay Katawan ed sikatayo.
16 Magangganat iran linma sirin, tan nalmo ray Maria tan si Jose, tan say ogaw ya akarokul ed atotung.
17 Nen anengneng da may ogaw, tinongtong da so imbagay anghil ed sikara nipaakar ed samay ogaw,
18 tan mankelaw iray amin ya akadngel ed sayan tinongtong da.
19 Ninunnunot ira yan amin nen Maria tan inyatol to rad puso to.
20 Sinmempet ira may pumapastol ya idaydayew tan igalgalang day Dios lapud samay anengneng tan naimatunan da, ya agawa ran amin onung na imbalitay anghil ed sikara.
21 Kasabiy kumawalon agew, sinegat da may ogaw tan Jesus so impangingaran dad sikato. Saya may ngaran ya inter na anghil kasakbayan a ninginew imay ogaw.
22 Nen asabiy agew a pampalinis di Jose tan Maria, onung ed Ganggan nen Moises, linma rad Jerusalem. Inawit dan isaklang ed Katawan imay ogaw.
23 Ta nisulat ed ganggan na Katawan: Amin a pangulowan ya anak a laki et nakaukolan ya isaklang ed Katawan.
24 Wala met so imbagat da, onung ed ganggay Katawan: Sankaparis a palekpek o duaran sibong na malapati.
25 Walay lakin manaayam ed Jerusalem a say ngaran to et Simeon. Matonung tan maasingger ed Dios yan too, tan aalagaren to a nilaban so Israel. Walad sikatoy Ispiritu Santo
26 ya angipaamtad sikato ya ag ompatey anggad ag to nanengneng so Cristo ya insipay Katawan.
27 Diad puyan na Ispiritu, linmad Timplo si Simeon. Nen inloob na saray atateng so ogaw a Jesus ta sumpalen day ibabagay Ganggan,
28 inampopo nen Simeon imay ogaw tan inggalang toy Dios. Inkuanto:
29 Natan, Katawan, nayarian mo ak lan alaen, siak ya aripen mo, onung na sipan mo.
30 Ta anengneng na dilin matak so panangilaban mo,
31 ya imparaan mod arap na amin a katoowan:
32 Say silew a mamaliwawad saray Hintil, tan mangiter na dayew ed bansam ya Israel.
33 Mankelaw ira may ama tan ina na ogaw ed imbaga nen Simeon nipaakar ed sikato.
34 Binindisionan nen Simeon, tan inkuantod Maria ya ina nen Jesus, Pinili na Dios yan ogaw a kaderalan o kilabanan na dakel a totood Israel. Sikatoy sakey a tandan manlapud Dios, balet sumpaen na amayamay a totoo,
35 et diad ontan, ombawag iray maamut a nununoten da. Nipaakar met ed sika, singa natoruk na ispada so pusom.
36 Wala met so sakey a biin propita ya akolakolaw la. Manngaray Anna tan anak nen Fanuel a kabyangay tribu nen Aser. Pitoy taon labat ya akiamung ed asawa to,
37 insan abalo, tan natan walomplo tan apat taon to lan abalo. Ag la onaalis ed Timplo, tan agew-labin igagalang toy Dios diad panamegley na panaayuno tan pampipikasi to.
38 Diad saman ya oras, linmad Timplo tan akisalamat ed Dios, insan nansalitay nipaakar ed kinen Jesus diad amin da ray manaalagar ed panondon na Dios ed Jerusalem.
39 Nen asumpal da lan ginaway amin a walad ganggay Katawan, pinmawil la rad Galilea, diad baley dan Nazaret.
40 Binmaleg imay ogaw tan nagmaliw a mabiskeg, napnoy kakabatan, tan inararoy Dios.
41 Tinaon-taon, kapag Pistay Paskua, oonlad Jerusalem iray atateng nen Jesus.
42 Nen mantaon na labindua si Jesus, linma rad pista onung na kaogaliyan na saray totoo.
43 Kasumpal na pista, linma la ran onsempet. Balet si Jesus tinmilak ed Jerusalem ya ag amtay atateng to.
44 Abaloan dan kaiba to ray arum a totoon onsesempet met la, kanyan sanagew la ran manaakar, insan da inanap ed saray kakanayon tan kabkabat da.
45 Nen ag da naalmo, pinmawil irad Jerusalem a mananap ed sikato.
46 Kayariy taloy agew, nalmo rad dalem na Timplo. Akayorung ed pegley da ray mamaistro, onderengel ed sikara tan tetepetan to ra.
47 Mankelaw iray amin ya akadngel ed sikato, lapud kakabatan tan saray ebat to.
48 Mankelaw met iray atateng to nen anengneng da. Inkuanen ina to, Anak, akin et onyay ginawam ed sikami? Mapalaloy pagpaga mi nen amam diad panaanap mid sika.
49 Inmebat ed sikara, Akin et inanap yo ak sirin a? Ag yo ta amtan nakaukolan a wala ak ed abung na Amak?
50 Balet ag da atalusan yan imbaga tod sikara.
51 Kaiba ran pinmawil si Jesus ed Nazaret, tan matoluk ed saray atateng to. Inyatol nen ina to ra yan amin ed puso to.
52 Binmaleg si Jesus, binmaleg met so kakabatan to, tan say panangaroy Dios tan saray totoo ed sikato.
1 "Kumalabinliman taon la na panooley nen Impirador Tiberio. Si Poncio Pilato so gobirnador na Judea, si Herodes so manoley ed Galilea, tan si agi ton Felipe so manoley ed Iturea tan Traconite. Si Lisanias so manoley ed Abilinia.
2 "Di Anas tan Caifas iray pangulon papari. Diad sayan panaon, sinmabid kalawakan so salitay Dios ed kinen Juan ya anak nen Zacarias.
3 "Niliber to sirin so intiron lugar na Jordan. Impupulong to, Magbabawi kayod saray kasalanan yo tan mampabinyag kayo, et say Dios pirdonaen to kayo.
4 "Agawa ya onung na insulat nen propita Isaias ed libro to: Walay mambabandod kalawakan, Iparaan yoy dalan na Katawan tan apiger yoy panakaran to!
5 "Nakaukolan a natabunan iray abeban pasen tan napalanas iray nipokdul tan nipalandey a pasen. Nakaukolan a napetek iray malikon daladalan, tan napatar iray matibagkul a daladalan,
6 "Tan nanengneng na amin a katoowan so panangilaban na Dios!
7 "Dakerakel iray totoo a linman pabinyagan ed kinen Juan. Inkuantod sikara, Sikayon anak na ooleg! Siopay angibagad sikayon ibatikan yoy onsabin sanuk na Dios?
8 "Ipanengneng yod panagbilay yo sirin a binenegan yo la ray kasalanan yo. Tan ag yo ibagbagad sikayon dili, Anak kami nen Abraham. Kuankod sikayo a nayarian na Dios a pagmaliwen ya anak nen Abraham ira yan bato.
9 "Akaparaan lay wasay a pamatang ed saray kiew ya anggad lamut. Amin a kiew ya ag mambungay maung nabatang tan nibantak ed apoy.
10 Tinepet na saray totood sikato, Antoy nepeg min gawaen sirin?
11 Inmebat, Say duaray kawes to nepeg ton iter so sakey ed anggapoy kawes to. Ontan met a say walay kanen to nepeg toy mangiter.
12 Wala ray sumisingil na buis a linman pabinyagan ed sikato. Tinepet da, Maistro, antoy nepeg min gawaen?
13 Ag kayo manisingil na masoluk nen say nepeg yon singilen, ebat to.
14 Wala met iray sondalon nantepet, Sikami met ey? Antoy nepeg min gawaen? Inmebat ed sikara, Ag kayo mimialay kuartad siopaman diad pamasoot o pangakusad sikato. Pasarag yoy suildo yo.
15 Binmiskeg so ilalo ray amin a totoo tan tinetepet dad sikaran dili no si Juan et sikato la kasiy Cristo ya aalagden da.
16 Kanyan inkuanen Juan ed sikaran amin, Siak bibinyagan ta kayo ed danum, balet walay manomtombuk ed siak. Sikatoy makapanyari nen siak tan ag ak manepeg ya anggan mangokbar na sandalya to. Sikato binyagan to kayo ed Ispiritu Santo tan apoy.
17 Sankabembenan toy bigaon pantaep to na trigo. Tiponen toy ilik ed kamalir to, balet poolan toy taep ed apoy ya ag balut naerep.
18 Amayamay niy imbabangat nen Juan diad pampupulong toy Maung a Balita.
19 Balet nansalitaan toy Herodes a gobirnador, lapud inasawa nen Herodes si Herodias ya asaway mabilay nin agi to, tan lapud amin da ray arum a ginagawa ton maoges.
20 Insan pinabelat ni nen Herodes so kasalanan to, ta impaipriso toy Juan.
21 Kasumpal ya abinyagan ya amin iray totoon dinmadago, abinyagan met si Jesus. Nen mampipikasi si Jesus, alokasay tawen
22 tan dinmapod sikatoy Ispiritu Santo ed nengneng na laman a singa malapati. Insan walay bosis a nanlapud tawen a nankuan, Sika so dilin Anak ko ya inararok; pakaliliketan ta ka.
23 Mantalomploy taon si Jesus nen ginapoan toy mampulong. Abaloan na saray totoo a si Jesus et anak nen Jose, ya anak nen Eli,
24 ya anak nen Matat. Si Matat anak nen Levi, ya anak nen Melki. Si Melki anak nen Janai, ya anak nen Jose.
25 Si Jose anak nen Matatias, ya anak nen Amos. Si Amos anak nen Nahum, ya anak nen Esli. Si Esli anak nen Nage,
26 ya anak nen Maat, ya anak nen Matatias. Si Matatias anak nen Semei, ya anak nen Josek. Si Josek anak nen Joda,
27 ya anak nen Joanan. Si Joanan anak nen Resa, ya anak nen Zorobabel, ya anak nen Sealtiel, ya anak nen Neri.
28 Si Neri anak nen Melki, ya anak nen Adi. Si Adi anak nen Cosam, ya anak nen Elmadam, ya anak nen Er.
29 Si Er anak nen Josue, ya anak nen Eliezer, ya anak nen Jorim, ya anak nen Matat. Si Matat anak nen Levi,
30 ya anak nen Simeon, ya anak nen Juda. Si Juda anak nen Jose, ya anak nen Jonan, ya anak nen Eliakim,
31 ya anak nen Melea. Si Melea anak nen Mena, ya anak nen Matata, ya anak nen Natan, ya anak nen David.
32 Si David anak nen Jesse, ya anak nen Obed, ya anak nen Booz. Si Booz anak nen Salmon, ya anak nen Naason,
33 ya anak nen Aminadab, ya anak nen Admin. Si Admin anak nen Arni, ya anak nen Esrom, ya anak nen Fares. Si Fares anak nen Juda,
34 ya anak nen Jacob. Si Jacob anak nen Isaac, ya anak nen Abraham. Si Abraham anak nen Tare, ya anak nen Nacor.
35 Si Nacor anak nen Serug, ya anak nen Reu, ya anak nen Peleg, ya anak nen Eber, ya anak nen Sela.
36 Si Sela anak nen Cainan, ya anak nen Arfajad, ya anak nen Sem. Si Sem anak nen Noe, ya anak nen Lamec,
37 ya anak nen Matusalem, ya anak nen Enoc. Si Enoc anak nen Jared, ya anak nen Mahalaleel, ya anak nen Cainan.
38 Si Cainan anak nen Enos, ya anak nen Set. Si Set anak nen Adan, tan si Adan anak na Dios.
1 "Sinmiput si Jesus ed Jordan a napnoy Ispiritu Santo, tan inyakar ed kalawakan na Ispiritu.
2 "Tinutuksod man na Diablo ed loob na apataploy agew. Ag angan a balut legan to yan panaon kanyan kasumpal to, narasan a maung.
3 "Inkuay Diablo ed sikato, No sikan talagay Anak na Dios, iganggan mod sayan bato a magmaliw a tinapay.
4 "Inmebat si Jesus, Ibabagay Masanton Sulat, Aliwa labat a tinapay so pambilay na too!
5 "Insan inyakar na Diablo ed atagtagey a pasen tan diad sakey a bekta, impanengneng tod sikatoy amin a nanarian ed intiron mundo.
6 "Iter kod sikay amin a pakayari tan kayamanan na sarayan nanarian, inkuay Diablo. Ta nipalima yan amin ed siak, tan nayarian kon iter ed siopaman a labay ko.
7 "Kanyan no ondakmomo ka tan mangigalang kad siak, kien mo la ra yan amin.
8 "Inmebat si Jesus, Ibabagay Masanton Sulat, Igalang moy Katawan a Dios mo, tan sikato labat so panlingkuran mo!
9 "Inyakar na Diablo si Jesus ed toktok na Timplod Jerusalem tan inkuanto, No sikan tuay Anak na Dios, tabuy ka!
10 Ta ibabagay Masanton Sulat, Iganggan na Dios iray anghil ton mangasikasod sika;
11 tan Ampayaen da kad saray lima ra, pian diad bato anggan saray salim ag mo nitopa.
12 Balet inkuanen Jesus, Ibabaga met na Masanton Sulat, Ag mo tutuksoen so Katawan a Dios mo!
13 Kasumpal na Diablo a ginaway anggaay nayarian to a manuksod kinen Jesus, linma la tan nanalagar na pankanawnawan panukso to lamet.
14 Pinmawil ed Galilea si Jesus, tan walad sikatoy pakayari na Ispiritu Santo. Kinmayat ed amin a kaliber-liber a pasen so balitan nipaakar ed sikato.
15 Nambabangat ed sinagoga ra, tan indadayew na amin a totoo.
16 Sinmempet si Jesus ed Nazaret, say baley a binalegan to. Onung na kaogaliyan to, linmoob ed sinagoga nen Agew na Panagpainawa. Inmalagey a mambasay Masanton Sulat,
17 tan say libro nen propita Isaias so inter dan basaen to. Binoskag tod pasen ya onyay akasulat:
18 Walad siak so Ispiritu na Katawan, ta pinili to ak a mampulong na Maung a Balita ed saray mairapbilay. Imbaki to ak a mangibalitad saray apriso a nabolus la ra, tan saray bulag a makanengneng la ra. Imbaki to ak met a mangibalitad saray napapairap a nainawaan la ra,
19 tan mangipakabat na manepeg a taon a pangilabay Katawan.
20 Nilokut nen Jesus imay nambasaan to, insan to inderew ed samay manlilingkur ed sinagoga. Inmirung, tan sankanengneng na amin a totoo.
21 Inkuantod sikara, Asumpal ed sayan agew so ibabaga to yan parti na Masanton Sulat a nadngel yo.
22 Indayew na amin a totoo, tan mankelaw irad saray mararakep a salita to. Aliwa tan sikato ya may anak nen Jose? tepet da.
23 Kanyan inkuantod sikara, Andisaew ya ibaga yod siak imay oliran: Doktor, tambal moy laman mon dili! Ikuanyo met ni, Gawam met ed dilin baley mo ray abalitaan min ginagawam ed Capernaum!
24 Insan intuloy to, Kuankod sikayo: anggapoy propitan naawat ed dilin baley to.
25 Balet kuankod sikayo ya amayamay so balon bibii ed Israel nen panaon nen Elias. Diad saman, taloy taon tan kapaldua ya ag inmoran a balut, kanyan walay balbaleg ya eras ed lapag na saman a dalin.
26 Balet ag nibakiy Elias ed anggan siopad sikara. Nibaki inged sakey a balon bii ed Sarepta, sakey a baley ed Sidon.
27 Ontan met amayamay iray akating ed Israel nen panaon nen propita Eliseo, balet anggapoy inmabig ed sikara. Si Naaman labat a taga Siria so inmabig.
28 Mapalaloy pasnuk na amin da ra may totoon wadmad sinagoga nen nadngel da ya.
29 Inmalagey ira, insan da impaway ed siudad. Inyakar dad toktok na nipalandey a pasen ya angipaalageyan na siudad da, insan da ipepelag.
30 Balet linmabas ed pegley da, tan linma la.
31 Linmay Jesus ed Capernaum, diad Galilea, ta nambangat diman nen Agew na Panagpainawa.
32 Mankelaw irad panagbangat to, ta walay pakaoley so salita to.
33 Walad man ed sinagoga so sakey a lakin inaponay ispiritu na maoges a dimonyo. Ineyaeyag to,
34 Antoy pibabalian mod sikami, Jesus a taga Nazaret? Linma ka dian maneral ed sikami? Kabat ko no siopa ka: sika so Masanto na Dios!
35 Ingganggan nen Jesus imay maoges ya ispiritu, Ag ka maingal! Ekal kad sikato! Tinumba na dimonyo may laki ed arap na amin a totoo, insan inmekal ya ag to pinasakitan.
36 Mankelaw ira ya amin tan nantetepetan ira, Anto ra ya kasin salita? Walay pakaoley tan pakayari to yan too a mangganggan ed saray maoges ya ispiritu, et oonuren da!
37 Kinmayat ed saman a pasen so balitan nipaakar ed kinen Jesus.
38 Tinmaynan si Jesus ed sinagoga tan linmad abung nen Simon. Atagey so petang na biin katolangan nen Simon, kanyan imbaga rad kinen Jesus.
39 Dinago nen Jesus tan nanalagey ed abay na dinokulan to, insan to ginanggan ya onekal imay petang. Nakal so petang to may bii, binmangon a tampol, tan nansirbid sikara.
40 Kaselek na agew, amin iray manliliknay anggan anton sakit inyaakar na saray kakaaro ra ed kinen Jesus. Intatapew toy lima tod balang sakey ed sikara, tan pinapaabig to ran amin.
41 Pinmapaway iray dimonyo ed amayamay a totoo. Nen ompapaway ira, iniingal da, Sikay Anak na Dios! Balet binano ra nen Jesus, tan ag to ra abuloyan a mansalita, lapud amta ran sikato so Cristo.
42 Nen asabiy kabwasan, inmalis si Jesus tan linmad nisolinek a pasen. Inanap na totoo, et nen nalmo ra, popokpokan dan ag ni komun ontaynan.
43 Balet inkuantod sikara, Nakaukolan kon ipulong met ed arum iran baley so Maung a Balitan nipaakar ed Panariay Dios, ta sikato yay makasengeg na angibakiay Dios ed siak.
44 Kanyan nampupulong si Jesus diad saray sinagoga ed Judea.
1 "Aminsan ya agew, manalalagey si Jesus ed gilig na Dayat na Genesaret. Manleletletan ya onsingger ed sikato ray totoon ondengel ed salitay Dios.
2 "Anengneng nen Jesus so duaran baloto a tinaynan ed gilig na dayat na saray sumisigay, ta oorasan da ray iket da.
3 "Linmogan ed sakey ed saray baloto tan kinerew tod kinen Simeon ya akankien ed saya ya itolak toy daiset ed danum. Inmirung ed samay baloto, insan nampulong ed saray totoo.
4 "Kasumpal ton nansalita, inkuantod kinen Simon, Laka yo ed bandad aralem tan ipelag yo ray iket yo, pian makala kayoy sira.
5 "Maistro, ebat nen Simon, sanlabi kami lan nansagput, et anggapoy nala mi. Balet lapud ibabagam, ipelag ko ray iket.
6 "Onyay ginawa ran tua, tan lapud karakel na nala ran sira, ngalngali la napilat ira may iket.
7 "Kinaweyan dan ondago tan ontulong iray kakaiba rad samay sakey a baloto. Dinmago ra tan diad inkapanoy duaran baloto na siran inkarga ra, ngalngali ra onlereg.
8 "Nen naimatunan nen Simon Pedro yan agawa, dinmakmomo ed saliyan nen Jesus tan inkuanto, Arawi kad siak, Katawan, ta makasalanan ak a too!
9 "Nikelawan si Simon tan saray amin a wadman, lapud karakel na siran nala ra.
10 Ontan met a nikelawan ira may kakaiba to, a di Santiago tan Juan ya anak nen Zebedeo. Inkuanen Jesus ed kinen Simon, Ag ka natatakot. Manlapud natan, magmaliw kan sumisigay na too.
11 Insarsar da ra may baloto ra, tinaynan day amin a kayaryan da, tan akila rad kinen Jesus.
12 Aminsan, nen si Jesus et walad sakey a baley, dinmagod sikatoy sakey a laki ya akating so intiron laman to. Kanengneng tod kinen Jesus, dinmakmomo tan akikasi. Inkuanto, Katawan, no labay mo, napagmaliw mo ak a paabigen!
13 Inyonat nen Jesus so lima to, diniwit to tan inmebat, Labay ko. Magmaliw ka lan malinis! Nakal a tampol so kating to may laki.
14 Binilin nen Jesus, Ag mo yan balut ibabalitad anggan siopa. Lakad pari tan panengneng ka, insan ka mangibagat onung ed Ganggan nen Moises, pian napaneknekan ed balang sakey ya inmabig ka la.
15 Balet lalon kinmayat so balitan nipaakar ed kinen Jesus, kanyan dinmago ray amayamay a totoo ya ondengel ed sikato tan mampatambal ed saray sakisakit da.
16 Balet si Jesus naynay ya onlad nisolinek iran pasen a mampikasi.
17 Aminsan ya agew nen mambabangat si Jesus, wadman met iray Pariseo tan saray bumabangat na Ganggan a nanlapud Jerusalem tan amin a baley diad Galilea na Judea. Walad si Jesus so pakayariy Katawan, kanyan nayarian toy mamaabig ed saray mansasakit.
18 Sinmabi ray totoo a sankalibit day sakey a paralitikon walad dokulan. Ipapasoot day onloob ed abung pian niasingger dad kinen Jesus imay paralitiko.
19 Balet anggapoy nadalan da, lapud karakel na totoo. Kanyan kinmalab irad atep na abung tan binongaw da, insan da inyabebad arap nen Jesus, diad pegley na totoo imay paralitikon walad dokulan.
20 Nen anengneng nen Jesus so pananisia ra, inkuanto, Kaaro, apirdona la ray kasalanan mo.
21 Saramay Pariseo tan saramay iskriba inkuandad kanunotan da, Siopa yan too et sumpad Dios so sasalitaen to? Siopay makapirdona na kasalanan no ag say Dios labat?
22 Amta nen Jesus so walad kanunotan da, kanyan inkuantod sikara, Akin et ontay walad kanunotan yo?
23 Dinay lalon mainomay ya ibaga: say pangibagay, Apirdona ray kasalanan mo, o say pangibagay, Alagey ka, insan ka manakar?
24 Paneknekan kod sikayo sirin a say Anak na Too et walay pakayari tod tapew na dalin a mamirdonay kasalanan. Inkuantod satan ed samay paralito, Kuantod sika, alagey ka, alam tay dokulan mo, tan sempet ka la!
25 Inmalagey a tampol ed arap na amin a totoo may laki, inala to may dokulan to, insan la sinmempet a mandaydayew ed Dios.
26 Agaylay pankelaw na amin a totood man, tan natatakot met ira. Indayew day Dios tan inkuanda, Makapakelaw iray naimatonan mid sayan agew!
27 Kasumpal to ya, pinmaway si Jesus. Anengneng toy sakey a sumisingil na buis a manngaray Levi, ya akayorung ed opisina to. Inkuanen Jesus ed sikato, Tompuk kad siak.
28 Inmalagey si Levi, tinaynan ton amin iray kayaryan to, tan akilad sikato.
29 Diad abung nen Levi, intaryaan toy Jesus na baleg a ponsia. Karongod man nen Jesus iray amayamay a sumisingil na buis tan arum ni ran totoo.
30 Ngoro-ngoro ray Pariseo tan saray iskriban kabyangan da. Tinepet dad saray disipulo nen Jesus, Akin et mangakan tan oniinom kayo a kaiba yo ray sumisingil na buis tan saray makasalanan?
31 Si Jesus so inmebat ed sikara, Aliwan saray maksil so laman so mankaukolan na doktor, no ag saray mansasakit.
32 Ag ak dia linman manawag ed saray matonung, no ag ingen linma ak dian manawag ed saray makasalanan, pian mampatauli ra.
33 Wala ray angibagad kinen Jesus, Saray disipulo nen Juan manbetbet iran manayuno tan mampikasi; ontan da met iray disipulo na saray Pariseo. Balet andi-tonda so paniinom tan pangakan da ray disipulom.
34 Inmebat si Jesus, Napanayuno yo kasi ray mibabansal leleg a kaiba ra niy nubio?
35 Balet onsabiy agew ya ontaynan lay nubio; sikato lad satay panayuno ra.
36 Sinalita nen Jesus met yan alimbawa ed sikara, Anggapoy mamilat na balon abel, insan to isakab ed daan a kawes. Ta no onyay gawaen to, naderal to may balon kawes, tan sakey ni, mabambanday.
37 Anggapo met so mangikargay balon alak ed pananginan a katat a dagdaan la. Ta no onyay gawaen to, ompatdok imay pananginan, naibung so alak, tan naderal ni may katat.
38 Nepeg a say balon alak ikargad balo met a pananginan!
39 Tan anggapoy malabay ya oninom na balon alak no atawayan to lay daan, ta ikuanto, Magmaung niy daan ya alak!
1 "Aminsan ya Agew na Panagpainawa, ondaralan ed katrigowan si Jesus tan saray disipulo to. Lapud narasan ira nanaala ray disipulo to na bungay trigo, nililirlir dad lima ra, tan kinakakan da.
2 "Tinepet na pigaran Pariseo, Akin et gagawaen yoy sebel no Agew na Panagpainawa?
3 "Inmebat si Jesus ed sikara, Ag yo ta nin balut abasa so ginawa nen David nen sikato tan saray kakaiba to et narasan ira?
4 "Linmoob ed abung na Dios, inala toy tinapay ya imbagat ed Dios, insan to kinan. Initdan to met iray kakaiba to anggaman ya, onung ed Ganggan, saray papari labat so nayarin mangan ed saman.
5 "Inkuanto nid sikara, Say Anak na Too so Katawan na Agew na Panagpainawa.
6 "Aminsan met ya Agew na Panagpainawa, linmay Jesus a mambangat ed sinagoga. Walad may lakin aparalisis so sakey a lima to.
7 "Wala rad may iskriba tan Pariseo a manaanap na ipakasalanan dad kinen Jesus, kanyan siniim da no manambal kasi no Agew na Panagpainawa.
8 "Balet amta nen Jesus so walad kanunotan da, kanyan inkuantod samay lakin aparalisis so lima to, Gala tan alagey ka diad arap. Dinmago may laki tan nanalagey diman.
9 "Insan inkuanen Jesus ed sikara, Tepeten ta kayo pa: Antoy nayarin gawaen no Agew na Panagpainawa, onung ed Ganggan? Say panggaway maung, o say panggaway maoges? Say panambot na bilay o say pamatey ed sakey a too?
10 Ninengneng ton amin iray walad kaliber-liber to, tan inkuantod samay laki, Iyonat moy limam! Inyonat ton tuay lima to, tan inmabig ed saman a bekta.
11 Mapalaloy pasnuk da ra may iskriba tan Pariseo. Nantotongtongan da no antoy gawaen dad kinen Jesus.
12 Diad saman a panaon, linmay Jesus ed nipalandey a pasen tan sanlabin nampikasid man ed Dios.
13 Kasabiy kabwasan, tinawag to ray disipulo to, tan pinili tod sikaray labindua, tan inngaran to ray apostol.
14 Sikara yay pinili to: si Simon ya nginaranan toy Pedro, tan si Andres ya agi to; si Santiago tan si Juan, si Felipe tan si Bartolome,
15 si Mateo tan si Tomas, si Santiago ya anak nen Alfeo tan si Simon a Patriota,
16 si Judas ya anak nen Santiago, tan si Judas Iscariote a pinmaway a traidor.
17 Kaleksab da, inmalagey si Jesus ed nipatar a pasen. Dakerakel met iray wadman a disipulo to, tan amayamay a totoon nanlapud intiron Judea tan Jerusalem, tan saray pasen ed gilig na dayat a nasasakopay Tiro tan Sidon.
18 Dinmago ran mandengel ed kinen Jesus tan mampatambal na sakisakit da. Dinmago met iray papairapen na saray ispiritun maoges, tan pinapaabig to ra.
19 Labay na amin a totoo a diwiten si Jesus, ta walay pakayarin manlalapud sikato a mamapaabig ed sikaran amin.
20 Ninengneng nen Jesus iray disipulo to tan inkuanto: Maliket kayon mairap-bilay, ta kayaryan yoy Panarian na Dios!
21 Maliket kayon narasan natan, ta napesel kayo! Maliket kayon mannangis natan, ta napaliket kayo!
22 Maliket kayo no bosul-bosulen, ipolpolisay, pabpabaingan, tan pagpaogesen da kayo, lapud Anak na Too!
23 Manggayaga kayo tan lukso kayod liket no nagawa ya, ta balbaleg so tumang yod tawen. Onya met so ginagawa na saray lalaki ra ed saray propita.
24 Pakaskasi ki la, sikayon mamayaman, ta naawat yo lay ligliwa yo!
25 Pakaskasi ki la, sikayon napepesel natan, ta naerasan kayo! Pakaskasi ki la, sikayon maneelek natan, ta onermen tan onakis kayo!
26 Pakaskasi ki la no daydayewen kayoy amin a totoo, ta onyay ginagawa na saray lalaki ra ed saray tila-tilan propita.
27 Balet kuankod sikayon onderengel ed siak: Aro yo ray kalaban yo, manggawa kayoy kamaungan ed saray mamobosul ed sikayo,
28 kerew yod Dios a bindisionan to ray mangisasambad sikayo, tan pikasi yo ray mamapairap ed sikayo.
29 No walay manampal na sakey ya aping mo, patampal mo niy pagpag. No walay mamasoot a mangalay kawes mo, iter mo ni ingey kamisitam.
30 No walay siopaman a mikerew ed sika, iter moy kerewen to. No walay mangalay antokaman a kayaryan mo, ag mo la bababawien.
31 Gawa yod kapara yon totoo so labay yon gawaen da met ed sikayo.
32 No saray mangaarod sikayo labat so aaroen yo, anto niy tumang ya alagaren yo? Anggan saray makasalanan aaroen da met iray mangaarod sikara!
33 No saray manggaway kamaungan ed sikayo labat so panggawaan yoy kamaungan, anto niy tumang ya alagaren yo? Gagawaen ya met na anggan saray makasalanan!
34 No saray ilaloan yon makabayar labat so papautangen yo, anto niy tumang ya alagaren yo? Anggan saray makasalanan pautangen da met iray makasalanan ya amta ran makabayar!
35 Aliwan ontan! Aro yo ray kalaban yo, tan manggawa kayoy kamaungan ed sikara. Mamabayes kayo ya ag yo ilaloan lan ompawil. No sikato yay tombuken yo, balbaleg so naawat yon tumang tan nibilang kayon anak na Sankatageyan a Dios. Ta maung so Dios ed saray maoges tan saray ag da amtay mamirbir na utang na linawa.
36 Nepeg yoy mapangasi, a singa say mapangasin Ama yo.
37 Ag yo sisintinsiaay kapara yon too, pian ag kayo met sintinsiaay Dios. Ag yo dudusaey kapara yon too, pian ag kayo met dusaey Dios. Pirdona yoy kapara yon too, pian pirdonaen kayo met na Dios.
38 Mangiter kayod kapara yon too, pian mangiter met so Dios ed sikayo. Say iter na Dios ed sikayo et singa salup a pinatuk, pinerper tan mantampuwag. Ta no panoy panukat yod arum a too, ontan met so panukat na Dios ed sikayo.
39 Sinalita met nen Jesus yan alimbawa, Ag nayarin itabin na bulag so kapara ton bulag, ta no andi napelag iran duad banawang.
40 Anggapoy babangatan a palabsanan toy bumabangat to. Balet balang babangatan ya asumpal to lay aral to, mipara lad bumabangat to.
41 Akin et imanoen moy mokat ed matay agim, balet et ag mo naimanoy troson wadtad dilin matam?
42 Panoy pangibagam ed agim, Agi, gala pa ta ekalen koy mokat ed matam, no ag mo nanengneng so troson wadtad dilin matam? Mansimpisimpitan! Ekal mo nin onona so troson wadtad matam, insan ka makanengneng a maung tan naekal moy mokat ed matay agim.
43 Anggapoy maung a kiew a mambungay makapoy, tan anggapoy makapoy a kiew a mambungay maung.
44 Diad bunga so pakabirbiran no maung o makapoy so sakey a kiew. Ta say igos ag naborbor ed kasabitan, tan say ubas ag naborbor ed sengeg ya aliwan ubas.
45 Maung so manlalapud maung a too, lapud napnoy puso to na kamaungan. Maoges so manlalapud maoges a too, lapud napnoy puso to na kaogsan. Ta manlalapud puso so ibabalikas na sangi.
46 Akin et tatawagen yo ak na Katawan, Katawan! et ag yo lamlamang totombukey ibabagak?
47 Ipanengneng kod sikayo no antoy aliling na toon onsisingger ed siak, ondedengel, tan ontotombuk ed saray salitak.
48 Aliling toy sakey a toon angotkot na aralem, tan inletneg tod baton-dampay so pundasion na abung ya impaalagey to. Dinmelap, tan say maksil a danum binmasig ed saman ya abung, balet ag agalaw, lapud malet so inkagawa to.
49 Say toon ondengel ed saray salitak, balet et ag to ra lamlamang tombuken, aliling toy sakey a toon angipaalagey na abung ed dalin tan anggapoy pundasion. Nen sinmabiy delap, nagban tampol iman ya abung, tan makapataktakot so inkaderal to!
1 "Kasumpal nen Jesus ya imbaga ra ya amin ed saray totoo, linmad Capernaum.
2 "Walad may sakey a kapitan na sanlasus a sondalo a say inararo ton katulong et mansasakit tan ngalngali la ompatey.
3 "Nen abalitaan toy nipaakar ed kinen Jesus, angibaki na pigaran mamatakken a Judio, ta kerewen dad kinen Jesus a paabigen to may katulong na kapitan.
4 "Linma ra sirin ed kinen Jesus tan akikasi ra, Manepeg a tulongan mo yan too,
5 "ta inaro toy a bansa tayo. Impaalageyan to itayo niy sakey a sinagoga.
6 "Akila sirin si Jesus ed sikara. Nen asingger lad abung, angibaki may kapitan na kakaaro to ed kinen Jesus tan impaibaga to, Katawan, ag mo la aabalaey sikan dili. Ag ak manepeg a laen mo nid abung ko.
7 "Ontan met ya ag ak manepeg ya onlad sika. Ibagam labat lay salita, et onabig lay katulong ko.
8 "Ta sakey ak met a walad silong na pakaoley na arum a totoo, tan wala met iray sondalo ed silong na pakaoley ko. Kanyan no kuankod sakey, Laka! onla; no kuankod sananey, Gala! ondago. No iganggan kod aripen ko, Gawam ya! gawaen to.
9 "Mankelaw si Jesus nen nadngel to ya. Inarap to ray totoon ontotombuk ed sikato tan inkuanto, Kuankod sikayo: ag ko ni akarumog na ontan lan pananisiay too, ya anggan diad Israel!
10 Kapawil dad abung na kapitan ira may totoon imbaki, asabian dan inmabig la may katulong.
11 Ag abayag, linmay Jesus ed sakey a baley a manngaray Nain. Akilad sikato ray disipulo to tan saray dakerakel a totoo.
12 Nen asingger lad puirtay baley, nabet toy tolur na bogbogtung a lakin anak na sakey a biin balo. Amayamay iray mitotolur.
13 Nen anengneng na Katawan imay ina na inatey akasian to, kanyan inkuanto, Ag ka onaakis.
14 Inmasingger, insan to diniwit so longun, kanyan tinmonda ra may mangaawit. Inkuanto natan, Balolaki, kuankod sika, bangon ka!
15 Inmalagey imay inatey tan ginapoan toy mansalita, tan inter nen Jesus ed samay ina to.
16 Asabiay takot iray amin a wadman, tan indaydayew day Dios. Inkuanda, Sinmabid pegley tayo so matalonggaring a propita! Ag nilingwanay Dios ya ilaban iray totoo to!
17 Binmawag yan balitan nipaakar ed kinen Jesus ed intiron Judea tan diad amin a kaliber-liber a pasen.
18 Saray disipulo nen Juan imbalita rad sikato ra yan amin. Tinawag nen Juan so duarad sikara,
19 tan imbaki to rad Katawan a manepet, Sika may aalagden min onsabi, o manalagar kami niy sananey?
20 Kasabi rad kinen Jesus inkuanda, Imbaki kami dia nen Juan a Managbinyag tan patetepet to no sika may aalagden min onsabi o manalagar kami niy sananey.
21 Diad saman ya oras, pinapaabig nen Jesus iray amayamay a mansasakit, saray nanairapan, tan saray inaaponay dimonyo. Iniitdan toy pakanengneng met iray amayamay a bulag.
22 Inmebat ed saramay imbaki nen Juan, Pawil kayod kinen Juan tan ibaga yoy anengneng tan nadngel yo: saray bulag makakanengneng ira, saray lopuy makakaakar ira, saray akating onaabig ira, saray telek makakadngel ira, saray inaatey nabibilay ira, tan saray mairap-bilay nipupulong ed sikara so Maung a Balita.
23 Maliket so toon ag naekalay pananisia ed siak!
24 Nen kasiput da ra may imbaki nen Juan, nansalitay Jesus nipaakar ed kinen Juan, Nen linma kayod kalawakan, antoy getma yon nengnengen? Sakey kasin bolo ya ipapalig-palig na dagem?
25 Anton talaga so labay yon nengnengen? Sakey a toon akakawes na marakep? Walad saray palasio ray mankakawes na mararakep tan mambibilay ed inawa!
26 Anton talaga so labay yon nengnengen diman? Sakey a propita? On, kuankod sikayo, matalona nen say propita so anengneng yo.
27 Ta nipaakar ed kinen Juan so ibabagay Masanton Sulat: Inkuay Dios, Niay managpulong ko. Sikatoy ibakik ya onona nen sika a mangiparaay dalanen mo!
28 Kuankod sikayo a si Juan so sankatalonaan ed amin da ray totoon nianak, balet matalona ni nen sikato so toon sankaabebaay pasen ed Panariay Dios.
29 Dinengel na amin ya ombaley si Jesus, pati saray sumisingil na buis. Sikaray amirbir a matonung so Dios nen nampabinyag irad kinen Juan.
30 Balet ag sinumpal na saray Pariseo tan saray iskriba so linaway Dios para sikara, ta ag ira nampabinyag ed kinen Juan.
31 Intuloy nen Jesus, Antoy pangiparaan kod saray totood sayan panaon? Antoy kaparpara ra?
32 Singa ra ogogaw a manyodyorung ed tindaan ya eeyagan da ray kagalaw da, Tinogtogan mi kayoy sasayawan, ag ki met sinmayaw; angansion kamiy makapaermen, ag ki met inmakis!
33 Sinmabiy Juan a Managbinyag, manaayuno tan ag oniinom na alak, balet kuanyo, Walay dimonyo ed sikato!
34 Sinmabiy Anak a Too, mangakan tan oniinom, balet kuanyo, Nengneng yo yan too. Masiba tan mainom na alak, tan kakaaro to ray sumisingil na buwis tan saray makasalanan!
35 Anggaman ontan, diad saray gawgawa so pakapatnagan a tua so kakabatay Dios.
36 Inimbitaan na sakey a Pariseo si Jesus a mangan ed abung to. Linma sirin si Jesus ed abung to may Pariseo tan dinmongo a mangan.
37 Diad saman a baley, walay biin bantug a makasalanan. Nadngelan ton mangakay Jesus ed abung to may Pariseo, kanyan linman sankaawit toy botilyan alabastro a napnoy pabalingit.
38 Inmasingger ed nibeneg nen Jesus, diad saliyan to. Mannangnangis diman tan manterter so lua to ed sali nen Jesus. Pinonasan to ray sali nen Jesus na buek to, inanguban to ra tan pinoyukan to ray pabalingit.
39 Nen anengneng ya na samay Pariseon angimbita, inkuantod sikaton dili, No tuan propita yan too, kabat to komun no siopa yan bii so mandiriwit ed sikatosakey a makasalanan!
40 Simon, inkuanen Jesus, wala pay labay kon ibagad sika. Anto man, Maistro? ebat to.
41 Inkuanen Jesus, Walay duaran too ya akautang ed sakey a managpabayes na kuarta. Say sakey akautang na sanliboy pisos tan samay sakey akautang met na sanlasus pisos.
42 Anggapod sikaran duay makabayar, kanyan pinirdona to la ray utang da. Siopa natan ed sikaran duay lalon baleg so pangaro tod samay managpabayes?
43 Samay lalon dakel so utang ton apirdona, ebat nen Simon. Dugay ebat mo, kuanen Jesus.
44 Insan to nilingaw imay bii tan inkuantod kinen Simon, Nanenengneng mo yan bii, anto? Linmoob ak ed abung mo, et ag mo ak labat initdan na danum a panoras ko ray salik. Balet sayan bii inorasan to ray salik na lua to, tan pinonasan to ra na buek to.
45 Ag mo ak inanguban, balet ag to tinondaan ya inangub-anguban iray salik nanlapud insabik dia.
46 Ag mo anggan nilarakay olok, balet sayan bii pinoyukan to ray salik na pabalingit.
47 Kanyan kuankod sika ya apirdona ray amayamay a kasalanan to; papaneknekan ya na impanengneng ton balbaleg a panangaro to. Balet say toon dagdaiset so kasalanan ton apirdona, dagdaiset met so panangaron ipanengneng to.
48 Insan kuanen Jesus ed samay bii, Apirdona la ray kasalanan mo.
49 Saray karongo tod lamisaan inkuandad sikaran dili, Siopa ya kasin too et mamipirdonay pati anggan saray kasalanan?
50 Balet inkuanen Jesus ed samay bii, Say pananisiam so angilaban ed sika. Laka la, tan pakpel moy linawam.
1 "Ag abayag, nanliliber si Jesus ed saray baley tan bario a nampupulong tan nampapakabat na Maung a Balitan nipaakar ed Panariay Dios. Kaiba to ray labinduan disipulo to
2 "tan pigaran bibii a pinapaabig tod saray maoges ya ispiritu tan saray sakisakit. Sikara ya di Maria a tatawagey Magdalena ya angekalan toy pitoran dimonyo,
3 "Juana ya asawa nen Cusa ya opisyal nen Herodes, Susana, tan arum ni ran amayamay a bibii. Sarayan bibii inkakana ray kayamanan da ed intulong dad kinen Jesus tan saray disipulo to.
4 "Ag nanaoput iray totoon manlalapud binaleybaley ya ondaragod kinen Jesus. Nen atiptipon la ray amayamay a totoo, sinalita to yan alimbawa:
5 "Walay sakey a dumaralus a linman mampasek na ilik to. Nen mansisibwag, wala ray dinmapod gilig na dalan, kanyan agatin-gatinay totoo tan tinotoktok na saray manok ya atap.
6 "Saray arum ya ilik, dinmapod dalin a batoy dalem to. Katubo ra, nalnes iran tampol ta amagay dalin a tinuboan da.
7 "Saray arum ya ilik dinmapod dalin a tutuboay dikarikan masabit. Nen baleg la ra may dikarikan masabit, pinatey da ra may tinmubon ilik.
8 "Wala met iray ilik a dinmapod mabonan dalin, tinmobo ra, tan nambunga na sanlalasus ya ilik so balang dawa. Insan inkuanto na maksil, Dengel kayo sirin, sikayo ran walay layag!
9 "Tinepet na saray disipulo nen Jesus no antoy talus to yan alimbawa.
10 Inmebat si Jesus, Niiter ed sikayoy pakaamta ed saray maamut a bengatlan nipaakar ed Panariay Dios. Nipaamtad saray arum, balet diad panamegley na saray alimbawa, pian nengneng la ra man a nengneng, ag da nanengneng met lamlamang; tan dengel la ra man a dengel, ag da natalusan met lamlamang.
11 Sikato ya so kabaliksan na sayan alimbawa: say ilik so salitay Dios.
12 Saramay ilik a dinmapod gilig na dalan aliling day totoon onderengel ed salitay Dios, balet lalaen ira na Diablo tan eekalen toy salita ed puso ra, pian ag da sisiaen et ag ira nilaban.
13 Saramay ilik a dinmapod dalin a batoy dalem to aliling day totoon ondedengel ed salitay Dios tan aawaten dan sililiket, balet ag onlalamut. Sisiaen da magano, balet no natukso ra, bigla met la ran ombetel.
14 Saramay ilik a dinmapod kasabitan aliling day totoon ondedengel, balet dederalen ira na saray gunigon, kayamanan, tan minumundon likeliket na panagbilay, kanyan ag ontatakken iray bunga ra.
15 Saramay ilik a dinmapod mabonan dalin aliling day totoon ondedengel ed salitay Dios, insan da aasikasoen ed matoor tan maung a puso ra, tan pansiasiansiaen dan anggad mambunga ra.
16 Anggapoy toon manelsel na lamparaan insan to sakubay timba, o iyan tod silong na katri. Iyan to inged panangipatoonan, pian nanengneng na saray onloob so liwawa to.
17 Anggapoy akaamut ya ag ompaway, tan anggapoy asakuban ya ag naamtaan tan ombawag.
18 Kanyan asikaso yoy karerengel yo. Ta say toon wala lay bengatlad sikato, naaruman niy walan bengatlad sikato; balet say toon anggapoy bengatlad sikato, naala so anggan say dagdaiset a bengatlan ipapasen to a walad sikato.
19 Sinmabiy ina tan saray lalakin agagi nen Jesus. Balet lapud karakel na totoo, ag da napinengnengan.
20 Inkuan na sakey ed saray totoon wadman, Wadmay inam tan saray agagim a lalaki a manalalagey ed paway, ta labay da ka konon nanengneng.
21 Inkuanen Jesus ed sikara, Say inak tan saray agagik et saray totoon onderengel ed salitay Dios tan susumpalen da.
22 Aminsan ya agew, linmogad baloto si Jesus tan saray disipulo to. Inkuantod sikara, Ombaliw itayo. Kanyan sinmiput ira.
23 Nen ombabaliw ira, akaogip si Jesus. Binmagyo ed kawalaan dan dayat, tan say baloto ngalngali la napanoy danum, kanyan piligro la ra.
24 Sininggeran na saray disipulo si Jesus tan binangon da. Maistro, Maistro, onlelereg itayo la! kuanda. Binmangon si Jesus tan ingganggan to ya ontonday bagyo tan saray ankakabaleg a daluyon. Tinmonda ran tua, tan dinmeen a maung so dayat.
25 Insan kuantod saray disipulo, Iner so kawalaay pananisia yo? Balet mankelaw tan natatakot ira, tan inkuandad sakey tan sakey. Siopa kasi yan too et igganggan toy anggan say bagyo tan saray daluyon, et ontotoluk irad sikato?
26 Sinmarsar irad lugar da ray Gadareno, a walad basil na Galilea.
27 Kasakbit nen Jesus, inabet na sakey a lakin taga diman. Inaponan na saray dimonyo yan laki, tan abayag lan ag mankakawes. Ag manaayam ed abung; diad saray inongib a lobuk so panaayaman to.
28 Nen anengneng toy Jesus, inmingal, dinmakmomod arap to, tan inkuanton makmaksil, Jesus, Anak na Sankatageyan a Dios! Antoy pibabalim ed siak? Pikasik ed sikan ag mo ak papairapen!
29 Imbaga to ya, lapud ingganggan nen Jesus so ispiritun maoges ya onekal ed saman a too. Naynay ton looban imay laki, tan anggan antoy pambantay ed sikato, anggan antoy pamalur ed saray sali tan lima to na golunggolung, sarasarag ton ekalen, insan paonlaen ed kalawakan na dimonyo.
30 Tinepet nen Jesus ed sikato, Antoy ngaran mo? Amayamay, ebat to, ta dakerakel a dimonyoy inmapon ed sikato.
31 Saramay dimonyo kinerew dad kinen Jesus ya ag to ra paonlaen ed araldalem a pasen.
32 Diad asingger diman, wala ray amayamay a baboy a manaalibok ed giligilig na palandey. Akikasi ra may dimonyo a paonlaen to rad saramay baboy, et inabuloyan to ra.
33 Kanyan pinmaway ira may dimonyo ed samay laki tan linmoob irad saramay baboy. Insan binmatik ed pandel ira may baboy, naplag irad dayat tan nalner ira.
34 Nen anengneng na saray mankokomponi na saray baboy so agawa, binmatik ira tan imbabalita rad baley tan diad saray bario.
35 Kanyan dinmadago ray totoo a nengnengen da no antoy agawa. Kaasingger dad kinen Jesus, anengneng da may lakin angekalan to na saray dimonyo. Manyodyorung ed saliyan nen Jesus, akakawes la, tan duga lay kalakal to. Diad satan, ataktakot ira.
36 Tinongtong met na saramay akanengneng no panoy inabig to.
37 Amin da ray Gadareno kinerew dad kinen Jesus ya ontaynan la, ta ontan lay takot da. Kanyan linmogan lay Jesus ed baloto tan linma la.
38 Kasakbayan ya onsiput, akikasin milad kinen Jesus imay lakin angekelan na saray dimonyo. Balet pinasempet to la tan inkuanto,
39 Pawil ka lad abung, tan ibalitam so ginaway Dios ed sika. Linma la sirin tan imbalita tod intiron baley so ginawa nen Jesus ed sikato.
40 Kapawil nen Jesus ed biek na dayat maliket ya inawat na saray totoo, ta talagan aalagaren da.
41 Sinmabi met si Jairo, sakey ya opisyal na sinagogad man. Dinmakmomod saliyan nen Jesus tan akikasin onla ed abung to,
42 ta ompapatey so saksakey ya anak ton bii a mantaoy labindua. Nen oonla lay Jesus, deresdesen na amayamay a totoo.
43 Walad may biin labinduay taon la maniirap lapud alablabas a pandadala to. Agastos to lad saray doktor iray amin a kuarta to, balet anggapoy makapaabig ed sikato.
44 Inmasingger ed nibeneg nen Jesus, insan to diniwit so saloy na kawes nen Jesus. Tinmondan tampol so pandadala to.
45 Tinepet nen Jesus, Siopay aniwit ed siak? Nen anggapoy mamirbir, inkuanen Pedro, Maistro, deresdesen tan leletleten kay amayamay a totoo!
46 Balet inkuanton impasoot, Walay aniwit ed siak, ta alikas kon walay pakayarin pinmaway ed siak.
47 Nen alikas to may bii ya ag to niamut so ginawa to, dinmagon manggiwgiw tan dinmakmomod saliyan nen Jesus. Imbaga tod arap na amin a totoo no akin et diniwit toy Jesus, tan no panoy inyabig ton tampol.
48 Inkuanen Jesus ed sikato, Anak ko, say pananisiam so amaabig ed sika. Onla kan mareen lay kalakal mo!
49 Nen peles nen Jesus a mansasalita, sinmabiy sakey a lakin nanlapud abung to may inkargadoy sinagoga. Inatey lay anak mo, kuantod kinen Jairo, akin et aabalaen mo niy Maistro?
50 Nen nadngel ya nen Jesus, inkuantod kinen Jairo, Ag ka natatakot. Manisia ka labat et onabig la.
51 Kasabi nen Jesus ed abung, anggapoy inabuloyan ton onloob no ag di Pedro, Juan, Santiago, tan say ama tan say ina to may ogaw.
52 Amin a wadman paneermenan tan panaakisan da may inatey ya ogaw. Inkuanen Jesus, Ag kayo onaakis. Ag inatey so ogaw; nanaogip labat!
53 Inelek-elekan da labat si Jesus, ta amta ran inatey la may ogaw.
54 Binembenan nen Jesus so limay ogaw tan inkuanto, Anak, bangon ka!
55 Binmilay tan inmalagey a tampol. Insan ingganggan nen Jesus a pakanen da.
56 Mankelaw iray atateng to, balet impurek nen Jesus ya anggapon balut so pangibagaan dad sayan agawa.
1 "Tinawag nen Jesus iray labinduan disipulo tan initdan to ray pakayari tan pakaoley a mamaekal ed saray dimonyo tan mamaabig ed saray sakisakit.
2 "Insan to ra imbakin mangipulong na Panariay Dios tan mamaabig ed saray mansasakit.
3 "Inkuantod sikara, Ag kayo manaawit na antokaman diad pampulong yo. Ag kayo manaawit na anggan bastun, bayung, kakanen, kuarta, tan duga lay sakey a kawes yo.
4 "Manayam kayod abung a pamatuloyan dad sikayo, tan diman kayo manayam anggad isiput yod saman a baley.
5 "No ag kayo awatey totoo ed sakey a baley, taynan kid man tan pokpok yoy dabuk ed saray sali yo, a tanda na maoges a ginawa ra.
6 "Sinmiput la sirin ira may disipulo, tan nililiber da ray bario a nampupulong na Maung a Balita tan nampapaabig ed saray mansasakit ed amin a pasen.
7 "Si Herodes a manooley ed Galilea nadngelan to ra yan amin ya agawgawa. Agoloy isip to, ta wala ray mangibabagan abilay si Juan a Managbinyag.
8 "Wala met iray mangibabagan pinmanengneng si Elias. Wala ni ray arum a mangibabagan abilay so sakey ed saray propita nen saman.
9 "Inkuanen Herodes, Impapotul koy olo nen Juan. Balet siopa yan toon amayamay so nababalitaan kon nipaakar ed sikato? Kanyan nampilalekan ton nanengneng si Jesus.
10 Kapawil da ra may apostol, imbaga rad kinen Jesus iray amin a ginagawa ra. Intagar ira nen Jesus tan linma ran kabukbukoran da ed sakey a baley a manngaray Betsaida.
11 Nen nadngelan ya na totoo, tinombuk day Jesus tan maliket ya angawat ed sikara. Nansalitay Jesus ed sikara na nipaakar ed Panariay Dios, tan pinapaabig to ray mansasakit.
12 Nen onngangarem la, dinmagod kinen Jesus iray labinduan disipulo. Inkuandad sikato, Ibakim la ray totoo, pian makakar irad kaabungan ed saray kaliber-liber a bario, et makalmo ray kanen tan ogipan da, ta arawid kaabungan yan pasen.
13 Balet inkuanen Jesus ed sikara, Sikayo ingey mangiter na kanen da. Inmebat ira, Anggapoy kanen tayo no ag labat limaran tinapay tan duaran sira. Say labay mon ibaga, onla kamin manaliw na kanen da ra yan amin a totoo?
14 (Sakey a liman libon lalaki so wadman.) Inkuanen Jesus ed saray disipulo, Payorung yo ray totoo a sanlilimamplod sakey a grupo.
15 Onyay ginawa ran tua, tan pinayorung da ran amin.
16 Inala nen Jesus ira may limaran tinapay tan duaran sira, tinmangay ed tawen, tan akisalamat ed Dios. Pinipisag to ra tan inter tod saray disipulo to ya ibunog dad saray totoo.
17 Angan ira ya amin tan napsel ira. Nen tinipon na saray disipulo so kera-keran tinapay tan sira, napnoy labinduan tiklis.
18 Aminsan nen mampipikasi a bukor si Jesus, sinmingger iray disipulod sikato. Tinepet tod sikara, Siopa ak, onung na ibabagay totoo?
19 Wala ray mangibabagan sika si Juan a Managbinyag, ebat da. Ibabagay arum a si Elias ka; wala met iray mangibabagan sakey ka ed saray propita nen saman ya inmolid bilay.
20 Sikayo balet, antoy kuanyo? Siopa ak? tepet tod sikara. Inmebat si Pedro, Sikay Cristo na Dios!
21 Binilin ira nen Jesus ya ag da yan balut ibabaga ed anggan siopa.
22 Inkuanto nid sikara, Nepeg a manirap a maung so Anak na Too. Ag awaten na saray mamatakken na baley, saray manonan papari, tan saray iskriba. Papatey da, balet onolid bilay diad kumatlon agew.
23 Insan inkuantod sikaran amin, Siopamay malabay ya ontombuk ed siak, nakaukolan a lingwanan toy sikaton dili, sakbaten ton inagew-agew so krus to, insan ontombuk ed siak.
24 Ta naandiay bilay so toon mangilaban na bilay to; balet nilaban so toon mangiter na bilay to a nisesengeg ed siak.
25 Antoy nagonggona na sakey a toon nakayaryan toy intiron mundo, no naderal o naandi lamlamang so bilay to?
26 Siopamay mangibaing ed siak tan saray salitak, sikato met so ibaing na Anak na Too, no onla dian ompawil a kataruk toy kagalangay Ama, tan kaiba to ray masanton anghil.
27 Tandaan yo ya! Walad sikayo ray ag ompatey, anggad ag da nanengneng so Panariay Dios.
28 Kalabas na waloy agew kasumpal ton imbaga ra ya, tinmakdang si Jesus ed palandey ta mampikasi. Intagar to ra di Pedro, Juan tan Santiago.
29 Nen mampipikasi, naoman so nengneng na lupa to. Pinmotipotin mankidyam so kawes to.
30 Kabebekta, wala ray duaran lalakin mitotongtong ed sikato: si Moises tan si Elias.
31 Pinmanengneng iran walay mangatatawen a liwawa, tan mitotongtong irad kinen Jesus na nipaakar ed magano lan panumpal toy linaway Dios, salanti say ipatey tod Jerusalem.
32 Nanaogip si Pedro tan saramay kaiba to, balet bigla ran abangon tan anengneng day mangatatawen a liwawa nen Jesus tan saramay duaran lalakin akaalagey a kaiba to.
33 Nen ontataynan la ra may lalaki, inkuanen Pedro ed kinen Jesus, Maistro, maung ta wadya itayo. Manggawa kamiy taloran ayaman: sakey so para sika, sakey so para si Moises, tan sakey so para si Elias. (Diad tuay tua ag to amtay ibabaga to.)
34 Mansasalita niy Pedro nen walay lorem a linmesa tan tinarungan to ra. Ataktakot ira nen tinarungan iray lorem.
35 Insan walay bosis a nanlapud samay lorem ya inkuanto, Sikato yay Anak ko a pinilik. Dengel kayod sikato!
36 Katonda to may bosis, anengneng dan bukbukor la nen Jesus. Saramay taloran disipulo ag da nin balut imbagbaga ed anggan siopa so anengneng da.
37 Diad ontombuk ya agew, linmeksab la ra. Amayamay so totoon inmabet ed kinen Jesus.
38 Walay sakey a tood man ya inmeyag, Maistro! Kerewen kod sika a nengneng mo pay anak konlaki. Bukbukor to ni met yan anak ko!
39 Inaponay dimonyo tan no onsigi, bigla-biglan makaingal, insan mantayetayegteg tan mambora-boray songut to. Ontan lay pamapairap na dimonyo ed sikato tan ag to taynan!
40 Akikasi ak ed saray disipulom a paekalen da, balet ag da nayarian.
41 Inmebat si Jesus, Agaylay kinaoges tan ag yo panisiad Dios, sikayon totood sayan panaon! Anggan kapigan kasiy piolup-olup kod sikayo? Anggad kapigay pananos kod sikayo? Insan inkuantod samay too, Iyakar mo pa dia tay anak mo.
42 Nen ondarago may ogaw, tinumbay dimonyo tan pinatayegteg to. Nampasnukan nen Jesus imay dimonyo, pinaabig to may ogaw, insan to impawil ed ama to.
43 Mankelaw ya amin iray totoo ed pakapanyariy Dios. Pankelkelawan niy totoo so amin a gagawaen nen Jesus nen inkuantod saray disipulo to,
44 Ag yo lilingwanay ibagak ed sikayo natan! Say Anak na Too nipalima ed pakayariy totoo.
45 Balet ag da amtay kabaliksan to ya. Niamut yad sikara, pian ag da natalusan. Antakot da met a tepeten ed kinen Jesus no antoy labay to yan ibaga.
46 Nansasangsanganan na saray disipulo no siopay manona ed sikara.
47 Amta nen Jesus no antoy nununoten da, kanyan anawag na sakey ya ogaw tan pinaalagey tod abay to.
48 Insan kuantod sikara, Siopamay mangawat ed sayan ogaw lapud ngaran ko, awaten to ak; tan siopamay mangawat ed siak, awaten toy angibakid siak. Ta say sankaabebaan ed sikayon amin, sikatoy manona.
49 Inkuanen Juan, Maistro, akanengneng kamiy sakey a toon mamapaekal na saray dimonyo ed ngaran mo. Binano mi, lapud aliwan kabyangan na olupan tayo.
50 Inkuanen Jesus ed sikato tan saray arum a disipulo, Ag yo babanoen, ta say ag onsumpad sikayo, kaiba yo lamlamang.
51 Nen asingger lay panaon a kiatagey nen Jesus ed tawen, ginetma toy onlan onla ed Jerusalem.
52 Imbaki toy pigaran totoo ya onona ran onlad sakey a bario ed Samaria a mangiparaan na tuloyan to.
53 Balet ag inawat na saray totood man, lapud kabat dan getma to lay onlad Jerusalem.
54 Nen naamtaan ya na saray disipulon si Santiago tan si Juan, inkuanda, Katawan, onabuloy kan manawag kamiy apoy a manlapud tawen a maneral ed sikara?
55 Linmingaw si Jesus tan nampasnukan to ra;
56 insan la ra linmad sakey a bario.
57 Nen wala rad dalan, inkuay sakey a too ed kinen Jesus, Ontombuk ak ed sika, anggan iner so laen mo.
58 Inkuanen Jesus ed sikato, Wala ray ongib a panaayaman da ray asod katakelan, tan wala met iray obung da ray manok ed tagey, balet say Anak na Too anggapoy anggan narokulan to.
59 Inkuantod sananey a laki, Tombuk kad siak. Katawan, ebat to may laki, abuloyan mo ak pa nin onsempet a mangipompon ed kinen amak.
60 Inkuanen Jesus, Paolyan mo la ray inaatey a mangipompon na inaatey da. Lakan mampulong na nipaakar ed Panariay Dios.
61 Inkuan met na sakey, Ontombuk ak ed sika, Katawan, balet abuloyan mo ak nin mampatanir ed pamilyak.
62 Inkuanen Jesus ed sikato, Siopamay mambabakan lingaw-lingaw nid beneg, anggapoy kana tod Panariay Dios.
1 "Kasumpal to ya, nampili si Jesus na pitomplo tan duan totoo. Pinaona to ra ed saray baley tan lugar a laen to, tan impanoolup ta ran sandederwa.
2 "Inkuantod sikara, Amayamay so aaniyen, balet dagdaiset iray manani. Kerew yod akankiey aaniyen a mangibaki niy arum a manani.
3 "Laka yo la! Ibaki ta kayon singa saray karniro ed pegley da ray asod katakelan.
4 "Ag kayo manaawit na pitaka, bayung, o sapatos. Ag kayo tonda-tondad dalan a mangigalang ed anggan siopa.
5 "Kaloob yod anggan dinan ya abung ikuanyo nin onaan, Manari komuy kareenan ed sayan abung!
6 "No walay manaayam diman a manangarod kareenan, natilak ed sikatoy kareenan a pilalek yon manari. No anggapo, ompawil ed sikayoy kareenan a pilalek yon manari.
7 "Manayam kayod saman ya abung; akan tan inom yoy iparongo rad sikayo, ta nepeg a bayaran so kumikimey. Ag kayo salat a salat na panayaman yon abung.
8 "No awaten da kayon malikeliket ed sakey a baley, akan yoy iparongo rad sikayo,
9 "paabig yo ray mansasakit, tan ikuanyod saray totood man, Inmasingger lad sikayo so Panariay Dios.
10 Balet no ag da kayo awaten ed sakey a baley, paway kayod saray daladalan tan ikuanyo,
11 Anggan say dabuk na baley yo a pinmepeket ed saray sali mi, ipagpag mi a tanday maoges a ginawa yo. Balet, tandaan yo ya, inmasingger lay Panariay Dios!
12 Kuankod sikayo a no Agew na Okum, lalon anlemew so dusa na baley na Sodoma nen sayan baley!
13 Pakaskasi ka, Corazin! Pakaskasi ka met, Betsaida! Ta no dimad Tiro tan Sidon so akagawaan na sarayan milagro, abayag la ra komuy taga diman a nankawes na sako tan nampulapol na dapul ed laman da, a pakanengnengay impangibeneg dad saray kasalanan da!
14 Diad Agew na Okum, lalon anlemew so dusa da ray taga Tiro tan Sidon nen say sikayo.
15 Tan sika, Capernaum, labay moy niatagey ya anggad tawen? Nibantak ka ni inged impirno!
16 Inkuantod saray disipulo to, Siopamay ondengel ed sikayo, siak so dengelen to. Siopamay mangipolisay ed sikayo, siak so ipolisay to; tan say mangipolisay ed siak, say angibakid siak so ipolisay to.
17 Makakaliket a pinmawil ira may pitomplo tan duan disipulo. Katawan, inkuanda, pati saray dimonyo onuren da kami no iganggan mi ran onekal diad ngaran mo.
18 Inmebat si Jesus, Anengneng koy Satanas a naplag a singa kirmat a nanlapud tawen!
19 Dengel kayo! Initdan ta kayoy pakaoley ya onggatin ed saray oleg tan alakdan, tan maneral na amin a pakayari nen Satanas. Anggapoy makarigsod sikayo.
20 Balet ag kayo manliliket lapud oonuren kayo ray maoges ya ispiritu. Manliket kayo ingen lapud nisulat ed tawen iray kangaranan yo.
21 Diad saman ya oras, si Jesus pinagayagay Ispiritu Santo. Inkuanen Jesus, Misalamat ak ed sika, Ama, Katawan na tawen tan dalin, ta inyamut mo ra yan bengatla ed saray makabat tan makatalus, tan impaamtam ed saray totoon mapaabeban singa saray ogogaw. On, Ama, agawa ya ta sikatoy nilabay mo.
22 Inter na Amak ed siak iray amin a bengatla. Anggapoy mikabat ed Anak likud ed Ama; anggapoy mikabat ed Ama likud ed Anak tan saray labay a pangipakabatan na Anak.
23 Insan inarap nen Jesus iray disipulo tan inkuantod sikaran anggapoy arum a makadngel, Maliket kayo ta nanenengneng yo ray nanenengneng yo natan!
24 Ta amayamay iray ari tan propita, kuankod sikayo, a nampiwarat a makanengneng na nanenengneng yo natan, balet ag da anengneng. Nampirawat met iran makadngel na narerengel yo natan, balet ag da nadngel.
25 Walay sakey a makabat ed Ganggan ya inmalagey ta labay ton suboken si Jesus. Maistro, tepet to, antoy nepeg a gawaen ko pian nagamuran koy bilay ya andi-anggaan?
26 Inmebat si Jesus ed sikato, Antoy nisulat ed Ganggan? Panoy pangipapatalus mo?
27 Inkuanto may too, Arom so Katawan a Dios mo ed intiron pusom, intiron kamererwam, intiron biskeg mo, tan intiron kanunotan mo; tan, Arom so kaabay mo a singa panangarom ed sikan dili.
28 Dugay ebat mo, kuanen Jesus. Onur mo itan et nagamuran moy bilay ya andi-anggaan.
29 Balet labay to may makabat ed Ganggan a bawiey kagalangan to, kanyan tinepet tod kinen Jesus, Siopay kaabay ko?
30 Inmebat si Jesus, Walay sakey a toon mampapaleksab a nanlapud Jerusalem tan oonlad Jerico. Diad dalan, sinabat na tutulisan, inala ray pati kawes ya akasolung ed sikato, pinepekpek da, insan da tinaynan a patey-pateyan.
31 Nibanan walay sakey a parin dinmalan diman. Nen anengneng to may too, pinaliisan to tan intuloy toy panaakar to.
32 Dinmalan met diman so sakey a Levita. Nen akasabid saman a pasen tan anengneng to may too, pinaliisan to tan intuloy toy panaakar to.
33 Wala met so sakey a Samaritano a dinmalan diman. Nen akasabid saman a pasen tan anengneng to may too, akasian to.
34 Inasinggeran to, kinalboan toy larak tan alak iray sugat to, tan binerber to ra. Insan pinakabayo tod dilin ayep to; inawit tod abung a pundowan, tan diman to inasikaso.
35 Nen ontombuk ya agew, angaut na kuartad bulsa to, insan to inter ed samay inkargadoy abung a pundowan. Inkuanto, Asikasom, ta kapawil ko dia, bayaran koy amin a nagastos mo nid panasikasom ed sikato.
36 Insan tinepet nen Jesus ed samay makabat ed Ganggan, Onung ed sikan dili, siopad saramay talora so nanggaway kanepegan na kaabay ed samay toon sinabat na saray tulisan?
37 Samay angasid sikato, ebat to may makabat ed Ganggan. Inkuanen Jesus, Laka la, sirin, tan ontan met so gawaen mo.
38 Nen intuloy nen Jesus tan saray disipulo to so panaakar da, sinmabid sakey a bario. Walad may sakey a biin anangkailid sikato ed abung to. Marta so ngaran to,
39 tan walay agi ton manngaray Maria. Si Maria inyorung tod saliyan na Katawan tan dinmengel ed saray bangat to.
40 Si Marta, balet, nakekesawad pansisirbi to, kanyan naingungotan. Dinmagod kinen Jesus tan inkuanto, Katawan, anggapo tay walad sika, a satay agik et palpaolyan to ak a mankikimey a bukor? Ibagam karid sikaton tulongan to ak!
41 Inmebat so Katawan, Sika, Marta, amayamay a bengatla so pampapagaan tan pansasakitan moy olo.
42 Saksakey so talagan nakaukolan! Pinili nen Maria so lalon maung a gawaen, tan ag ya naekal ed sikato.
1 "Aminsan, mampipikasi si Jesus ed sakey a pasen. Nen asumpal, inkuan na sakey ed saray disipulo to, Katawan, ibangat mo kami pan mampikasi, a singa impangibangat nen Juan ed saray disipulo to.
2 "No mampikasi kayo, kuanen Jesus, onyay ibaga yo: Ama: Nagalang komuy ngaran mo; onsabi la komuy Panarian mo.
3 "Itdan mo kami pay kanen min inagew-agew.
4 "Pirdona mo kami pad saray kasalanan mi, ta pirdonaen mi ray amin a nankakasalanan ed sikami. Tan ag mo kami iyaakar ed pakatuksoan.
5 "Insan inkuanton intuloy nen Jesus ed saray disipulo to, No bilbilang ta walay sakey ed sikayo ya onlad abung na kaaro to diad pegley-labi tan ikuanto, Kaaro, pabayes mo ak pay taloran tinapay,
6 "ta sinmabiy sakey a kaarok a mambiabiahi et anggapoy niparongok ed sikato!
7 "Et onebat so kaaro ton walad loob na abung, Ag mo ak gugunigonen! Akatalak lay puirta tan akarokul ak la tan saray anak ko. Ag ko la nayariay ombangon a mangiter ed sikay nakaukolan mo.
8 "Kuankod sikayo, anggan ag to bangonan ya itdan lapud impankaaro ra, bangonan to lamlamang ya itday nakaukolan to lapud panamasoot to.
9 "Kanyan kuankod sikayo: Kerew kayo, et naitdan kayo. Mananap kayo, et makalmo kayo. Toktok kayo, et nalokasan para sikayo so puirta.
10 Ta naitday siopaman a mikerew; makalmoy siopaman a mananap; tan nalokasay siopaman ya ontoktok.
11 Sikayo ran ama, iter yo kasiy oleg ed anak yo no onkerew na sira?
12 O itdan yo kasiy alakdan no onkerew na iknul?
13 No sikayo, anta maoges kayo, et amta yoy mangiter na pankaabigay anak yo, lalo la sirin a say Aman walad tawen et iter toy Ispiritu Santo ed saray onkerew ed sikato.
14 Aminsan, mamapaekal si Jesus na sakey a dimonyon mamapaemel ed sakey a laki. Kaekal na dimonyo, nansalita may laki. Mankelaw iray totoo,
15 balet inkuanda ray arum, Si Beelzebul a prinsipi da ray dimonyo so mangiiter na pakayarid sikato a mamaekal ed sikara.
16 Wala ni ray arum a totoon labay dan suboken si Jesus, kanyan kinerew dad sikaton manggaway milagro a pakanengnengan a walad sikatoy Dios.
17 Balet amta nen Jesus so walad isip da, kanyan inkuantod sikara, No manlalaban iray totood sakey a nanarian, ag mambayag itan a nanarian. No manlalaban iray kabyangan na sakey a pamilya, naderal itan a pamilya.
18 No ontan sirin, no naapag-apag tan manlalaban iray ooleyan nen Satanas, panon a mansiansiay nanarian to ey? Ibabaga yo a si Beelzebul so mangiiter ed siak na pakayarin mamaekal ed saray dimonyo.
19 No mamapaekal ak na saray dimonyo diad pakayari nen Beelzebul, siopay mangiiter ed saray disipulo yo na pakayarin mamaekal ed sikara? Saray dilin disipulo yoy mamapaneknek a nalilingo kayo!
20 Andi, no ag ingen say Dios so mangiiter ed siak na pakayarin mamaekal ed saray dimonyo. Sikato yay mamapaneknek a sinmabi lad sikayoy Panariay Dios.
21 No say toon mamabantay ed abung to et mabiskeg tan akaparaan iray armas to, arawid takew iray kayaryan to.
22 Balet no labanan tan taloen na lalon mabiskeg nen sikato, naala ni ra may armas a nanmatalkan to, tan apagen na sayan matakew iray tinatakew to.
23 Siopamay ag ontombuk ed siak, onlaban lamlamang ed siak. Siopamay ag mangibad siak a mansinup, mambuyak lamlamang.
24 No ompaway ed sakey a too so maoges ya ispiritu, mananap na amagan pasen a pampainawaan to. No anggapoy naalmo to, ikuantod sikaton dili, Ompawil ak ed abung kon tinaynan ko.
25 Ompawil sirin tan naalmoan to ya anggapoy manaayam, malinis, tan masinup.
26 Onlad satan a mangawit na pitoran ispiritu a lalon maoges nen say sikato, tan kaiba to ran manayam diman. Lalon maoges so kipapasen to yan too nen say gendat.
27 Nen ibabaga ya nen Jesus, walay sakey a biid saramay totoon wadman a nansalita. Inkuantod kinen Jesus, Agaylay liket na biin angyanak tan nampasusod sika!
28 Balet inmebat si Jesus, Lalo ni ingen a maliket iray ondedengel ed salitay Dios tan oonuren da!
29 Nen ondarakel iray totoon onmomokut ed kinen Jesus inkuanto, Agaylay kaogsan na totood sayan panaon! Onkekerew iray milagro, balet anggapoy milagron naimatunan da no ag say milagro nen propita Jonas.
30 No panoy impagmaliw nen Jonas a tanda ed saray taga Ninive, ontan met so pagmaliw na Anak na Too a tanda ed saray totood sayan panaon.
31 Diad Agew na Okum, onalagey so Riyna na Saba tan akusaen to ray totood sayan panaon, ta nanlapud arawdawin pasen ya ondengel labat ed kakabatan nen Solomon. Balet kuankod sikayo a wadyay lalon makapanyari nen si Solomon.
32 Diad Agew na Okum, onalagey iray taga Ninive tan akusaen da kayo, ta nansibkelan da ray kasalanan da nen nadngel dan nampulong si Jonas. Balet kuankod sikayo a wadyay lalon makapanyari nen si Jonas!
33 Anggapoy manelsel na lamparaan, insan to lamlamang iyamut o sakubay timba. Iyan to ingen ed panangipatoonan, pian nanengneng na totoon onloob ed abung so liwawa to.
34 Say matam so pinagkasilew na laman mo. Kanyan no anggapoy sakit na matam, naliwawaan met so intiron laman mo. Balet no walay sakit na matam, nabilongetan met so intiron laman mo.
35 Kanyan asikasom a maung, ta ompan say liwawan walad sika et bilonget manaya.
36 No walay liwawa so intiron laman mo tan anggapon balut so kabyangan ton walad ambilonget, naliwawaay nagnap, tan singa nawawandagan kay maliwliwawan silew.
37 Kasumpal nen Jesus a nansalita, inimbitaan na sakey a Pariseo ed abung to. Linma sirin, tan inmirung a mangan.
38 Mankelaw imay Pariseo nen naimatunan ton ag nanoras si Jesus kasakbayan ton mangan.
39 Kanyan inkuanen Jesus ed sikato, Sikayon Pariseo, lilinisan yoy paway na tasa tan plato, balet diad puso yo napno kayoy inkaagum tan inkasiblet.
40 Anggapoy kalakal yo! Say Dios ya amalsay paway et sikato met so amalsay loob, andi ta?
41 Iter yod saray mairap-bilay so walad saray tasa tan plato yo, et nalinisan onung ed ganggan para sikayo ray amin a bengatla.
42 Pakaskasi ki la, sikayon Pariseo! Iiter yoy kakaplo na anggan saray rikato, a singa say paminta, bawang, tan amin a pising, balet sasaolen yoy kapara yon totoo tan ag yo aaroey Dios. Nepeg a gawaen yo ra ya, balet ag yo papaolyan iray arum a ganggan.
43 Pakaskasi ki la, sikayon Pariseo! Labalabay yoy onyorung ed manonan yorungan ed sinagoga. Labalabay yo met so paigalang ed publiko.
44 Pakaskasi kayo! Kaparpara yo ray lobuk ya anggapoy pakapatnagan, kanyan gatingatinan iray totoo, ta ag da amtan lobuk ira.
45 Walay sakey ed saray makabat ed Ganggan a nankuan, Maistro, diad satay panagsalitam, papabaingan mo kami met!
46 Inmebat si Jesus, Pakaskasi ki met, sikayo ran makabat ed Ganggan! Ipapasakbat yod arum a totoo ray ambelat a sasakbaten, balet ag yo gagalawey anggan tamoro yo ed pangiba yod sikara.
47 Pakaskasi kayo! Igagawaan yoy pantion iray propitan pinapatey da ray lalaki yo.
48 Aakoen yo sirin ya aabubonan yoy ginawa ray lalaki yo, ta pinapatey da ray propita, et ipapaalageyan yo ray pantion da.
49 Sikato yay makasengeg ya inkuay Kakabatan na Dios, Mangibaki ak ed sikara na saray propita tan apostol. Pateyen na totooy pigarad sikara, tan pairapen da ray arum.
50 Kanyan napelag ed saray totood sayan panaon so dusa na impamatey ed saray propita, nanlapu lad impamalsay mundo.
51 Ginmapod impamatey dad kinen Abel ya anggad impamatey dad kinen Zacarias diad nanleetay altar tan say Masanton Pasen. On, kuankod sikayo, napelag ed saray totood sayan panaon so dusa na agawad saraman a propita!
52 Pakaskasi ki la, sikayon makabat ed Ganggan! Inyamut yoy tombuk a panaglokas na puirtay abung na kakabatan. Anta ag yo la labay so onloob, sesebelan yo ni ray malabay ya onloob!
53 Nen sinmiput lay Jesus ed saman ya abung, ginapoan na saramay iskriba a binalaw-balaw a maung tan tinepettepetay amayamay a bengatla,
54 ta labay dan naeral ed panagsalita to.
1 "Nen libo-libon totooy nantitipon, a diad karakel da et makapanggagatinan la ra, inkuanen Jesus ya onona ed saray disipulo to, Manalwar kayod libadura na saray Pariseo, salanti say pansimpisimpitan da.
2 "Anggapoy asakuban ya ag ompaway, tan anggapoy akaamut ya ag nakabatan.
3 "Antokamay imbaga yod ambilonget, narengel ed maliwawa; tan antokamay inyesaes yod saray totoon walad akakaput a kuarto, nibando manlapud toktok na kaabungan.
4 "Kuankod sikayo, kakaarok, ya ag yo tatakotan iray mamatey na laman, balet kasumpal to et anggapo lay nagawaan da a lalon maoges.
5 "Ibagak ed sikayo no siopay nepeg yon takotan: takotan yoy Dios ta kasumpal ton mamatey, wala niy pakayari ton mangibantak ed impirno. On, kuankod sikayo, sikatoy nepeg yon takotan!
6 "Ag ta nasaliw na mamurmura so limaran anuyaw? Anggan mamurmura ra, anggapoy anggan sakey ed sikara so nalingwanay Dios.
7 "Anggan say buek na olo yo et abilang ira. Kanyan ag kayo natatakot, ta mabli kayo ni nen saray amayamay ya anuyaw!
8 "Kuankod sikayo a siopamay mamirbir ed siak ed arap na totoo, birbiren met na Anak na Too diad arap da ray anghil na Dios!
9 "Balet siopamay mangiborid siak ed arap na totoo, ibori met na Anak na Too diad arap da ray anghil na Dios.
10 Napirdona so siopaman a manlabir na bengatlan sumpad Anak na Too; balet ag napirdona so siopaman a mamaoges ed Ispiritu Santo.
11 No awiten da kayon akusaen ed saray sinagoga o diad arap da ray gobirnador o arum iran manoley, ag yo pampapagaan no panoy pangyagel yod sikayon dili o no antoy ibaga yo.
12 Ta diad satan a bekta, ibangat kayoy Ispirutu Santo no antoy ibaga yo.
13 Inkuan na sakey ed saramay totoo, Maistro, ibagam pad agik ya iter toy apag kod impatawir na ama mi.
14 Inmebat si Jesus, Siopa tay anorod siak a huis o manangapag yo?
15 Insan inkuantod sikaran amin, Manalwar kayo tan paliisan yoy amin a klasiy inkaagum; ta say kayamanan, anggan antoy karakel, anggapoy pibabalian tod tuan inkatoo na anggan siopa.
16 Sinalita nen Jesus ed satan so sakey ya alimbawa: Walay sakey a mayaman a too. Dakel so naani tod dalin to.
17 Nannunot tan inkuantod sikaton dili, Anto kasiy gawaen ko, et anggapo lay napanginan koy naanik?
18 A, amtak lay gawaen ko! Gebaen kon amin iray kamalir ko, insan ak mamaalagey na lalon ankabaleg a panginan koy amin ya ilik ko tan saray arum a kayaryan ko.
19 Insan ikuankod siak a dili, Mapalpalar ka, ta ag ka la onkulang ed amin a nakaukolan mod pigapigan taon. Natan, nayarian mo lay manliket, mangan, tan oninom ya anggapoy pagpagam!
20 Balet inkuay Dios ed sikato, Kulang so kalakal mo! Diad sayan labi, ompatey ka. Siopa natay manawir ed saratay imparaan mon para sika?
21 Inkuanen Jesus a pangisumpal to, Onyay pansumpalan da ray mampayaman ya onkanad sikaran dili, balet et aliwa ran mayaman ed arap na Dios.
22 Inkuanen Jesus ed saray disipulo to, Sikato yay makasengeg na pangibabagaan kod sikayo ya ag kayo mapagpagad pambilay yo, no antoy kanen yo, o antoy ikawes yo.
23 Mamabli niy bilay nen say kakanen; mamabli niy laman nen say kawes.
24 Imano yo pa ray wawak! Ag ira mantatanem odino manaani, anggapoy kamalir o arum nin pantiponan da. Anggaman ontan, papakanen iray Dios! Mamabli kayo ni nen saray manok ed tagey!
25 Siopad sikayo so makaparokey na bilay to na anggan sakey a bekta, lapud pampaga to?
26 No ag yo nagawaan so anggan pati sayan melmelag a bengatla, akin et pampagaan yo ray arum a bengatla?
27 Imano yo pa no panoy ibabaleg da ray rosas a balang. Ag ira mankikimey; ag ira manggagaway ikawes da. Anggaman ontan, kuankod sikayo, anggan si Solomon a mayaman ag akapankawes na onyan kinarakep na sakey ed sarayan rosas.
28 No say Dios so mangakawes ed saray karikaad kaalogan, a mabilay ira natan tan napoolan la ra nabwas, ag lalo kasin kawesan to kayo? Agaylay kapoy na pananisia yo!
29 Kanyan ag kayo mapagpaga lawas no antoy kanen tan inomen yo.
30 Sikara yay anapen na saray Hintil. Amtay Ama yod tawen a nakaukolan yo ra yan amin.
31 Sikayo, balet, anap yon onona so Panarian na Dios, et iter tod sikayoy amin a nakaukolan yo.
32 Ag kayo natatakot, sikayon pigaran papastolan ko, ta maliket so Ama yon mangiter ed sikayo na Panarian.
33 Ilako yo ray kayaryan yo, tan mangiter kayod saray mairap-bilay na nanlakoan yo. Manggawa kayo ray pitakan ag ondaan, tan mantipon kayo na kayamanan yo ed tawen yo, ta ag nabawasan diman, ag natakew, tan ag naderal na bokbok.
34 Ta no iner so kawalaay kayamanan mo, diman met so kawalaay pusom.
35 Nakaukolan a sipaparaan kayo, ya akalislis iray kawes yo tan mandardarlang iray lamparaan yo,
36 a singa saray aripen a manaalagar ed isabiy amo ra a manlapud bansal. No onsabi tan ontoktok, lokasan dan tampol so puirta.
37 Alay liket da ray aripen a sipaparaan a nasabiay amo ra. Kuankod sikayo, ilislis toy kawes to, payorungen to ra, insan to ra serbian.
38 Alay liket da no anggan pegley-labi o palbangon so isabi to et sipaparaan ira!
39 Tandaan yo ya! No amta labat na akanabung no anton oras so isabi na matakew, ag to palooben ed abung to.
40 Sikayo met sirin, nakaukolan a sipaparaan kayo, ta onsabiy Anak na Too ed oras ya ag yo ilaloan.
41 Tinepet nen Pedro, Katawan, sikami labat o amin a totoo so pangibabagaan mod sayan alimbawa?
42 Inmebat so Katawan, Siopa sirin so napanmatalkan tan marunong ya aripen? Say aripen ya ipasen na amo to a mangasikasoy abung to, tan mangiter na kanen da ray kapara ton aripen diad manepeg ya oras.
43 Maliket yan aripen no nasabian na amo to a gagawaen toy kimey to!
44 Samay amo, kuankod sikayo, pagmaliwen to may aripen a manasikasoy amin a kayamanan to.
45 Balet no ikuanto yan aripen ed sikaton dili, Mabayag nin onsabiy amok. Gapoan tod satan a kabilen iray arum ya aripen, laki man o bii, tan mangan, oninom tan mambuwek.
46 Insan onsempet so amo to ed agew ya ag to ilaloan tan diad oras ya ag to amta. Dusaen na amo to tan ipila tod kawalaan da ray aliwan mananisia.
47 Say aripen ya amta toy labay a pagaway amo to et ag to paraanan a gawaen, nasiplatay dakel.
48 Balet say aripen ya ag to amtay labay a pagaway amo to et akagaway nepeg a panusaan ed sikato, nasiplatay daiset. Say toon naitday dakel, dakel met so ebatan to. Say toon angipiaay dakel, dakel met so paebatan dad sikato.
49 Linma ak dian mangigapoy pool ed dalin. Agaylay pampirawat kon naselselan la komun!
50 Wala niy binyag a nepeg kon awaten, et nagunigon ak a maung ya anggad pakaawat ko!
51 Abaloan yo sirin, linma ak dian mangiter na kareenan ed dalin? Aliwan say kareenan, no ag say pansisian.
52 Manlapud natan, say limaran sankapamilyaan mansisian ira; saray talora sumlangen da ray duara, tan saray duara sumlangen da ray talora.
53 Saray ama sumlangen da ray anak dan lalaki; saray anak a lalaki sumlangen da ray kaamaan da. Saray ina sumlangen da ray anak dan bibii; saray anak a bibii sumlangen ray kainaan da. Saray katolangan a bibii sumlangen da ray manugang dan bibii, tan saray manugang a bibii sumlangen da ray katolangan dan bibii.
54 Inkuan met nen Jesus ed saray totoo, No nanengneng yo lay makapal a lorem ed sagur, ibaga yon onoran, et onoran met a tua.
55 No nalikna yo lay dagem a manlapud abalaten, ibaga yon ompetang so panaon, et ompetang met a tua.
56 Mansimpisimpitan kayo! Amta yon ipatalus iray nanengneng yod tawen tan dalin, akin balet et ag yo amtan ipatalus iray tanday panaon natan?
57 Akin et ag yo amtan pilien no antoy matonung a gawaen yo?
58 Singa bilbilang, no walay angisegep na kasod sika ed korti, gawam so anggaay nayarian mon miariglod sikato no wala ki nid dalan, ta ompan ituloy toy pangyakar tod sika ed huis, tan ipalima kay huis ed polis, tan ipriso kay polis.
59 Ag kad man makapaway a balut, kuankod sika, anggad ag mo nabayaray samput a sentimo na utang mo.
1 "Diad saman a panaon, wala ray totood man ya angibalitad kinen Jesus na nipaakar ed impamatey nen Pilato ed pigaran taga Galilea, leleg dan mangibabagat ed Dios.
2 "Inmebat si Jesus ed sikara, Abaloan yo sirin, lalon makasalanan ni ra yan taga Galilea nen saray amin nin arum a tagad man, lapud onyay asagmak da?
3 "Andi! Kuankod sikayo a no ag yo benegan iray kasalanan yo, ompatey kayo met ya amin, a singa sikara.
4 "Tan nipaakar met ed saramay labinwalon totoo ed Siloe ya inatey lapud atumbaan iray tori, abaloan yo sirin a lalon maoges ni ra nen saray amin nin arum a totoon manaayam ed Jerusalem?
5 "Andi! Kuankod sikayo a no ag yo benegan iray kasalanan yo, ompatey kayo met ya amin, a singa sikara.
6 "Sinalita nen Jesus yan alimbawa ed sikara, Walay sakey a toon walay kiew ya igos ed kaubasan to. Ninengneng to no walay bunga, balet anggapoy nalmo to.
7 "Kanyan inkuantod inkargado to, Taloy taon lan oonla ak dian mananap na bunga to yan kiew, balet anggapoy naalmok. Batang mo la, ta dadaraken to labat so tabay dalin!
8 "Inmebat imay inkargado, Paolyan tayo pa nin sakey taon. Kotkotan koy kaliber-liber na sengeg to, tan inan koy abuno.
9 "No mambunga ed ontombuk a taon, maung met; no andi, insan ti la batangen.
10 Aminsan ya Agew na Panagpainawa, mambabangat si Jesus ed sakey a sinagoga.
11 Walad may biin labinwaloy taon to lan mansasakit, ta inaponay maoges ya ispiritu. Lapud sayan sakit to mapalaloy inkabokut to, kanyag ag to naonat a balut so beneg to.
12 Nen anengneng nen Jesus, tinawag to tan inkuanto, Inmabig ka lad liliknaen mo!
13 Insan intapew nen Jesus iray lima tod samay bii, et tampol a nampetek so beneg to tan indayew toy Dios.
14 Balet nampasnuk so inkargadoy sinagoga, lapud amaabig si Jesus ed Agew na Panagpainawa. Inkuantod saray totoo, Walay anemiran agew a niganan pankimey. Laki diad sarayan agew a mampatambal, aliwan sano Agew na Panagpainawa!
15 Inmebat ed sikato so Katawan, Mansimpisimpitan kayon talaga! Ag yo ta ookbaren a painumen so baka o asno yo no Agew na Panagpainawa?
16 Natan, sayan bii ya anak nen Abraham, labinwaloy taon lan papairapen nen Satanas. Ag kasi manepeg a paabigen ko no Agew na Panagpainawa?
17 Abaingan ya amin iray kalaban to ed sayan ebat to, balet makaliliket ya amin iray totoo lapud sarayan makapakelkelaw a ginagawa to.
18 Inkuanen Jesus, Antoy aliling na Panariay Dios? Antoy pangiparaan ko?
19 Aliling toy bokel na mustasa ya intanem na sakey a too ed tanamanan to. Tinmubo tan binmaleg a sakey a kiew, tan saray manok ed tagey nanoobung irad saray sanga-sanga to.
20 Inkuan lamet nen Jesus, Anto ni so pangiparaan kod Panariay Dios?
21 Aliling toy libadura ya inkames na sakey a bii ed taloran sukat na arina, anggad inmalsa may intiron angikamesan to.
22 Intuloy nen Jesus so panliliberliber to. Nambabangat ed binaley-baley tan diad saray barion nadadalan to nen mamaarap ed Jerusalem.
23 Walay toon anepet ed sikato, Maistro, daiset kasiy totoon nilaban? Inmebat si Jesus ed sikara,
24 Gawa yoy anggaay nayarian yon onloob ed mainget a puirta, ta kuankod sikayo: amayamay iray totoon mampilalek ya onloob, balet ag da nayariay onloob.
25 No inmalagey lay panguloy pamilya tan inkaput to lay puirta, wala kayod paway tan ontoktok kayo. Katawan, inkuanyo, lokasan mo kami pa! Onebat ed satan, Ag ko amta no taga iner kayo!
26 Ikuan yo lamet, Amimpigan karongo mi ka ya angan, tan inminom, tan nambabangat ka nid baley mi!
27 Balet ikuanto lamet, Ag ko amta no iner so nanlapoan yo. Arawi kayod siak, sikayon managgaway kaogsan!
28 Agaylad satay pannangis tan panngalatenget na ngipen yo no nanengneng yo ra di Abraham, Isaac, Jacob tan amin da ray propita a wala rad Panariay Dios et nibantak kayo balet ed paway!
29 Onsabi ray totoon manlapud bokig tan sagur, abalaten tan baybay, tan ondongo rad lamisaan ed Panariay Dios.
30 Wala ray naonur a makaona, tan wala ray makaona a naonur.
31 Sinmabi met ed saman ya oras iray pigaran Pariseo tan inkuandad kinen Jesus, Taynan ka dia, ta labay to kan papatey nen Herodes.
32 Inmebat si Jesus ed sikara, Lakayo ta ibaga yod saman ya asod katakelan a mamapaekal ak na dimonyo tan mamapaabig ak ed sayan agew tan nabwas. Diad kumatlon agew, sumpalen koy kimey ko.
33 Balet nepeg kon ituloy so panaakar kod sayan agew, nabwas, tan diad ontombuk ya agew. Ta ag manepeg a napatey so sakey a propita no aliwan diad Jerusalem.
34 Jerusalem, O Jerusalem! Papateyen mo ray propita tan tutupaken mo ray imbakiy Dios ed sika! Amimpigapigan labay kon tiponen iray anak mo, a singa panitipon na nganak ed saray siwsiw to diad silong na payak to, balet ag mo labay!
35 Kanyan, natan, sigput a napaolyan so abung mo. Kuankod sikan ag mo ak la nanengneng a balut ya anggad pangibagam, Bindisionay Dios so onsabid ngaray Katawan!
1 "Aminsan ya Agew na Panagpainawa, linmay Jesus a mangan ed abung na sakey ed saray manonan Pariseo. Siniim a maung na saray totoo si Jesus.
2 "Sinmingger ed sikato natan so sakey a lakin linmalarag so laman to.
3 "Tinepet nen Jesus ed saray Pariseo tan saray makabat ed Ganggan, Sebel kasi so panambal no Agew na Panagpainawa o andi?
4 "Balet ag ira inmesel, kanyan binembenan nen Jesus imay mansasakit, pinaabig to, insan to la pinasempet.
5 "Inkuantod sikara, No walay lakin anak yo odino baka yon naplag ed bobun, ag yo kasi agwaten a tampol ya anggan Agew na Panagpainawa?
6 "Balet ag da naebatan ed sayan tepet to.
7 "Naimano nen Jesus so pampipili da ray sangkaili na saray manonan pasen, kanyan sinalita to yan alimbawa ed sikara,
8 "No inimbitaan da kad bansal, ag ka onyoyorung ed manonan pasen, ta nayarin wala niy naimbitaan a matalonggaring nen say sika.
9 "Onlad satay angimbitad sikayon dua tan ikuantod sika, Nayarin iter mo tay pasen mod sikato? Nabaingan kad satan tan napasootan kan onyorung ed sankaabebaan a pasen.
10 Say maung, no naimbitaan ka yorung kad sankaabebaan a pasen, pian asinggeran kay angimbitad sika tan ikuanto, Kaaro, yorung kad magmaung a pasen. Diad ontan, niiter ed sikay kagalangan ed arap na amin a karongom.
11 Ta siopamay mampaatagey ed sikaton dili, napaabeba; siopamay mampaabebad sikaton dili, napaatagey.
12 Insan kuanen Jesus ed samay angimbitad sikato, No mamponsia ka, ag mo ra iimbitaay kakaarom, agagim, kakanayon mo, o saray mamayaman a kakaabay mo, ta ag la pigan imbitaan da ka met. Diad ontan, nabalesay ginawam.
13 Ingen, no mamponsia ka, imbitaan mo ray mairap-bilay, saray lopuy, saray piley, tan saray bulag.
14 Nabindisionan ka, ta ag ira makabales ed sika. Say Dios so mangiter na tumang mo, no onolid bilay iray matonung a totoo.
15 Nadngel ya na sakey ed saramay akarongod lamisaan, kanyan inkuantod kinen Jesus, Maliket so toon makapirongod lamisaan ed Panariay Dios!
16 Inkuanen Jesus ed sikato, Walay sakey a toon angiparaay baleg a ponsia, tan amayamay a totooy inimbitaan to.
17 Kasakbayay panangan, imbaki toy sakey ya aripen to a mangibagad saray naimbitaan, Gali la, ta akaparaan lan amin!
18 Balet nambaraan iran amin. Inkuay sakey, Kapansaliw koy dalin a dadalusan, et nakaukolan a laen kon nengnengen. Akaoley ki lan mangitepel ed siak.
19 Say sakey inkuanto, Kapansaliw koy limaran paris a baka, tan laen ko ran salien ya isinta. Akaoley ki lan mangitepel ed siak.
20 Inkuay sakey met, Kapankasal ak, kanyan ag ko makakar.
21 Pinmawil imay aripen tan imbaga to ra yan amin ed kinen amo to. Agaylay pasnuk to, tan inkuantod samay aripen to, Lakad saray kalsada tan saray daladalan diad baley, tan itagar mo ra diay mairap-bilay, saray lopuy, saray bulag, tan saray piley!
22 Kapawil to may aripen inkuanto, Amo, sinumpal koy ganggan mo, balet dakel miy nayorungan.
23 Inkuan na amo, Lakad saray daladalan tan saray leeleet diad paway na baley, tan pasoot mo ray totoon ondago, pian napanoy abung ko.
24 Kuankod sikayo: anggapod saray onaan ya inimbitaan ko so makataway na ponsiak!
25 Dakerakel a totooy mimilad kinen Jesus. Inarap to ra tan inkuanto,
26 Ag nayarin magmaliw a disipulok so sakey a toon ondagod siak, no say panangaro tod ama tan say ina to, asawa tan saray anak to, agagi ton lalaki may bibii, tan say sikaton dili.
27 Siopamay ag to sakbatey dilin krus to tan ag ontombuk ed siak, ag nayarin magmaliw a disipulok.
28 Siopad sikayoy mannununot a mamaalagey na tori et ag onyorung nin onona a mankuinta? Ta nakaukolan a nengnengen to ni no dugay kuartan gastosen to.
29 No ag to ya gawaen, ompan kasumpal ton inyay pundasion et ag to lamlamang nituloy a sumpalen. Ludlureyen na amin a totoon makaimatun tan
30 ikuanda, Ginapoan toy mamaalagey, balet ag to lamlamang nasumpal!
31 O siopan ari so mibakal ed kapara ton ari, et ag to ni onyorung tan aralen a maung no say samplon libon sondalo to et nalabanan day duamplon libon sondalo to may kabakal to?
32 No bilang ta ag to nayarian, mangibakiy totoo ton miariglo ed samay arin kalaban to, ambegyan arawi ni.
33 Ontan met sirin, anggapoy nayarid sikayon magmaliw a disipulok no ag to ikaindan iray amin a kayaryan tod sayan bilay.
34 Maung so asin, balet no tinmabang la, ag lan balut nipawil so gendat a taway to.
35 Ag met la nikanad dalin o nilauk ed bontunay dotak ya onkanan abuno, no ag say ibantak la. Dengel kayo, sirin, sikayo ran walay layag!
1 "Aminsan, inmasingger ya ondengel ed kinen Jesus iray amin a sumisingil na buis tan saray makasalanan.
2 "Balet ngoro-ngoro ray Pariseo tan saray iskriba tan inkuanda, Sayan too aawaten to ray makasalanan tan mimikan nid sikara!
3 "Kanyan sinalita nen Jesus yan alimbawa,
4 "No bilbilang ta sakey ed sikayoy walay sanlasus a karniro et abalang so sakey, antoy gawaen to? Taynan tod alog ira may siamaplo tan siam a karniro, insan to anapen imay abalang a karniro, anggad ag to pakalmo.
5 "No nalmo to la, sakbaten to diad pakaliliket to.
6 "Kasabi tod abung, imbitaan to ray kaaro tan saray kakaabay to. Miliket kayod siak, ikuanto, ta nalmok so karniron abalang ko!
7 "Ontan met, kuankod sikayo, a babaleg so liket ed tawen lapud sakey a toon mampataulid saray kasalanan to, nen say siamaplo tan siam a totoon matonung ya ag da la nakaukolay mampatauli.
8 "No say sakey a biin walay samploran pilak a kuarta et abalang toy sakey, antoy gawaen to? Manelsel na lamparaan, panisan toy abung, tan anapen ton maung ya anggad ag to pakalmo.
9 "No nalmo to la, tawagen to ray kakaaro tan saray kakaabay to. Miliket kayod siak, ikuanto, ta nalmok so kuartan abalang ko!
10 Ontan met, kuankod sikayo, so panliket na saray anghil na Dios lapud sakey a toon mampataulid saray kasalanan to.
11 Intuloy nen Jesus, Walay sakey a lakin duaray ilalak ton lalaki.
12 Inkuay yogtan ed kinen ama to, Ama, iter yo pa lad siak natan so tawir ko. Inapag nen ama sirin iray kayaryan to ed saramay duaran ilalak to.
13 Kalabas na pigaran agew, inlako to may yogtan so apag to, insan linmad arawin pasen a diman to dinarak so kuarta to diad aliwaliwan panagbilay.
14 Nen agastos to lan amiy kuarta to, sinmabiy baleg ya eras ed saman a pasen, kanyan anggapo lay nagastos to.
15 Linman akikimey ed sakey a tood saman a pasen, tan samay too imbaki ton manasikasoy baboy.
16 Labay to komun a tempeyey eras to na anggan say kupag a kakaney baboy, balet anggapoy mangiter ed sikato.
17 Nen anunotan toy maung inkuantod sikaton dili, Amin da ray katulong na amak dugay kakanen da. Masoluk ni ingen! Siak, balet, wadyan ompapatey lad eras.
18 Say maung, ompawil ak ed amak tan akoen koy impankasalanan kod Dios tan diad sikara.
19 Ibagak nin ag ak la manepeg a tawagen day anak, tan kerewen ko ya anggan ibilang da ak lan sakey ed saray katulong da.
20 Inmalagey sirin, ta onla lan ompawil ed kinen ama to. Arawi nid abung nen anengneng nen ama to. Atenyeg so puso nen ama to, kanyan inabet ton mambabtik, nilakap toy anak to, tan inanguban to.
21 Ama, kuanen anak, nankasalanan ak ed Dios tan diad sikayo. Ag ak la manepeg a tawagen yon anak yo.
22 Balet tinawag nen ama ray katulong to tan inkuanto, Ganatan yo! Awit yo diay sankarakepan a kawes tan isolung yod sikato. Solungan yoy singsing tan itdan yoy sandalya.
23 Patey yo may pinataban kilaw a baka, ta mangan tan manliket itayo!
24 Ta inatey yan anak ko, balet mabilay la; abalang, balet nalmo la. Ginmapo sirin so panliliket da.
25 Samay pangulowan balet, walad alog. Nen onsesempet tan asingger lad abung, nadngel toy togtog tan anengneng toy sayawan.
26 Tinawag toy sakey ed saramay katulong tan tinepet to no antoy nagagawa.
27 Pinmawil a mabilay imay agim tan anggapoy sakit, ebat to may katulong, kanyan impapatey nen amam imay pinataban baka.
28 Diad pasnuk to may pangulowan, ag to onloob ed abung. Dinago nen ama to tan kinerew ton onloob la.
29 Balet inkuantod kinen ama to, Nanlingkur ak a singa aripen ed sikayon piga-pigay taon. Anggapo niy ganggan yon sinumlang ko. Antoy inter yod siak? Anggapoy anggan kanding a panliliketan mi ray kakaarok!
30 Balet satan ya anak yo, dinarak to ray amin a kayaryan yo ed marorotak a bibii. Natan ta pinmawil, pinatey yoy pinataban bakan kilaw para sikato!
31 Anak ko, kuay ama, wadya kan naynay ed abung tan kayaryan mo ray amin a kayaryan ko.
32 Balet nakaukolan a manliket tan mampista itayo, ta inatey yay agim, balet mabilay la; abalang, balet nalmo la!
1 "Inkuan met ni nen Jesus ed saray disipulo to, Walay sakey a toon mayaman a walay inkargado to. Nidalem ed sikato a say kuarta to et dadarakey inkargado to,
2 "kanyan impatawag to. Anto tay narerengelan kon nipaakar ed sika? inkuanto. Mikuintaan ka lad siak, tan iter mo lan amiy listaan na impiak ed sikan kayaryan ko, ta ekalen ta ka lan inkargadok.
3 "Anto kasiy gawaen ko? inkuantod kanunotan to may inkargado. Ekalen ak lay amok ed trabaho, et ag nayariay laman koy mankotkot na dalin tan ambaing ak a mipayabol.
4 "A, amtak lay gawaen ko, pian no anggapo lay trabahok et wala ray kakaarok a manangkailid siak ed abung da.
5 "Sinansakey ton tinawag sirin iray akautang ed amo to. Nen sinmabiy onaan, tinepet to no pigaray utang to.
6 "Sanlasus a pasig na larak, ebat to. Inkuanto may inkargado, Niay listaay utang mo. Yorung kan tampol tan isulat mo labat so limamplo.
7 "Sika ey, tinepet tod sakey, pigaray utang mo? Sanlasus a kaban na trigo, ebat to. Inkuanto may inkargado, Niay listaay utang mo. Isulat mo labat so walomplo.
8 "Samay amo indayew to yan masaol ya inkargado lapud kinasilib to. Ta lalon marunong ni ray minumundon totoo ed pipiolup dad saray kapara ran minumundo nen saray ontotombuk ed Dios.
9 "Intuloy nen Jesus so pansasalita to, Kanyan kuankod sikayo ya ikana yod pikakaaro so kayamanan na sayan mundo, ta pian anggan naoput la yan kayamanan et maliket kayon naawat ed anggan ya ayaman.
10 Siopamay napampiaan ed saray ankekelag a bengatla, napampiaan met ed saray ankakabaleg a bengatla. Siopamay ag napampiaan ed saray ankekelag a bengatla, ag napampiaan met ed saray nakakabaleg a bengatla.
11 No ag kayo napampiaan a mangegnay mangaraldalin a kayamanan, panon kayon mangegnay tuan kayamanan?
12 No ag kayo napampiaan a mangegnay kayamanan na arum a too, siopay mangiter ed sikayoy kayamanan a para sikayon talaga?
13 Anggapoy aripen a makapanlingkur ed duaran amo, ta bosulen toy sakey tan aroen toy sakey; panlingkuran toy sakey tan balawen toy sakey. Ag kayo makapanlingkur ed Dios tan say kayamanan.
14 Nadngelan na saray Pariseo ira yan amin, et nilemlemew day Jesus ta maagum irad kuarta.
15 Inkuanen Jesus ed sikara, Mansimpisimpitan kayod arap na totoo, balet amtay Dios so kipapasen da ray puso yo. Ta say ipapasen a makanakana na too, anggapoy kana tod Dios.
16 Anggad kinen Juan a Managbinyag labat so kanay Ganggan nen Moises tan saray sulsulat da ray propita. Nanlapu lad saman, nipupulong so Maung a Balitan nipaakar ed Panariay Dios, tan gagawaen na totoo so anggaay nayarian da ya onloob.
17 Balet mainomay nin naandiy tawen tan dalin nen say naandiay kana so sankamelagan a kabyangay Ganggan.
18 Say lakin mangisiad asawa to tan mangasaway sananey a bii, mikaloguran. Mikaloguran met so lakin mangasaway biin insian.
19 Walay sakey a mayaman a mabmabli ray kawes to tan agaylay abig so kakanen ton inagew-agew.
20 Wala met so sakey a mairap-bilay a manngaray Lazaro. Agiri-giriy intiron laman nen Lazaro, tan wadmad puirtay solar to may mayaman,
21 ta labay ton tempeyey eras to na anggan say ibung a napepelag manlapud lamisaan to may mayaman. Aliwan satan labat, pati saray aso dinadago ran dildilan iray giri-giri to.
22 Inatey si Lazaro, tan inawit ed tawen na saray anghil, diad diking nen Abraham. Inatey met imay mayaman, tan nipompon.
23 Leleg ton maniirap ed Hadis imay mayaman, anengneng tod arawi si Abraham tan si Lazaro a walad diking to.
24 Inkuanton iningal, Ama Abraham, kasian mo ak pa! Ibakim pay Lazaro ya idelnet toy ngoroy tamoro tod danum ta pabtelan toy dilak, ta agaylay paniirap kod sayan apoy!
25 Balet inkuanen Abraham, Anak ko, tandaan mo a nen mambibilay kad tapew na dalin, walad sikay maung iran bengatla, balet walad kinen Lazaro iray kairapan. Manliliket dia natan, balet maniirap kad tan.
26 Aliwan satan labat! Walay baleg a kelas ed nanleetan tayo. Saray wadyan malabay ya onlad tad sikayo, ag ira makakar; tan saray wadtan a malabay ya onla diad sikami, ag ira makakar.
27 Inkuanto may mayaman, No ontan sirin, ama, pikasik ed sikayo ya ibaki yoy Lazaro ed abung na amak,
28 ta walad may limaran agagik a lalaki. Paonla yo pad man ta pasakbayan to ra, pian ag ira makakar ed sayan pasen na kairapan.
29 Balet inkuanen Abraham ed sikato, Wala ra di Moises tan saray propita a mamasakbay ed sikara. Paolyan mo ray agagim ya ondengel ed sikara.
30 Inmebat may mayaman, Kulang itan, ama Abraham! Balet no walay onlad sikaran toon inmolid bilay, benegan da ray kasalanan da.
31 Balet kuanen Abraham, No ag da dengelen si Moises tan saray propita, ag da met panisiaan so anggan toon naolid bilay.
1 "Inkuanen Jesus ed saray disipulo to, Ag naandin balut iray bengatlan pankasalananan, balet makapataktakot so nasagmak na toon makasengeg na pankasalanay arum!
2 "Magmaung nin bitinay baleg a gilingan so beklew na sakey a too insan ibontuk ed dayat, nen say sikato so pansengegay pankasalanan na sakey ed sarayan ogogaw.
3 "Kanyan manalwar kayo! No mankasalanay agim, pampasnukan mo; no mampatauli, pirdonam.
4 "No mankasalanan ed sikan mamimpitod sanagew et onlad sikan mipirdonaan a mamimpito met, pirdonam.
5 "Inkuanda ray apostol ed Katawan, Pabiskeg moy pananisia mi.
6 "Inmebat so Katawan, No walay pananisia yon singa kabaleg no bokel na mustasa, nibaga yod sayan kiew a sikomoro, Nabagut ka komun tan nitanem kad dayat! et onuren to kayo.
7 "No bilbilang ta walay aripen yo a mambabaka o mampapastol na karniro, et onsabin nanlapud alog, tawagen yo kasin tampol a mangan?
8 "Andi! Ikuanyo inged sikato, Iparaan mo lay pangogtoan ko tan mampales ka, ta sirbian mo ak. Kasumpal ko, insan ka mangan!
9 "Nakaukolan kasi a pisalamatan yoy aripen ed panusumpal toy ganggan yo?
10 Ontan yo met. No asumpal yo lan amiy pagagawad sikayo, ikuanyo, Magter kami labat ya aripen a nanggaway kanepegan mi!
11 Diad panaakar nen Jesus a mamaarap ed Jerusalem, linmabas ed ketegay Samaria tan Galilea.
12 Nen onloloob ed sakey a bario, inabet na samploran totoo ya akating. Nanalagey irad arawdawi
13 tan iningal da, Jesus! Katawan! Kasian mo kami!
14 Nen anengneng nen Jesus ira inkuanto, Laka yon mampanengneng ed saray papari. Leleg dan oonla, inmabig ira.
15 Sakey ed sikara so pinmawil nen anengneng ton inmabig, tan indaydayew toy Dios.
16 Dinmakmomo ya anggad dalin, diad saliyan nen Jesus, tan akisalamat ed sikato. Samaritano yan too.
17 Aliwa tan samploray inmabig? tepet nen Jesus. Kawalaan da ray siamira?
18 Akin et sayan sangkaili labat so pinmawil a misalamat ed Dios?
19 Inkuanen Jesus ed sikato, Alagey ka, tan sempet ka la. Say pananisiam so amaabig ed sika.
20 Tinepet na saray Pariseo ed kinen Jesus no kapigay isabi na Panariay Dios. Onyay ebat to, Say isabi na Panariay Dios anggapoy kaiba ton tandan nanengneng na mata.
21 Anggapoy mangibagay Wadya la! o Wadman la!; ta walad sikayoy Panarian na Dios.
22 Insan inkuantod saray disipulo, Onsabiy panaon a pampilalekan yon nanengneng so anggan sakey labat ed saray agew na Anak na Too, balet ag yo nanengneng.
23 Wala ray mangibagad sikayo, Nengneng yod man! o Nengneng yo dia! Balet ag kayo oonla, ag kayo ontotombuk.
24 Ta say isabi na Anak na Too et singa kirmat ya onggulis tan manliwawad sakey a pasen na tawen ya anggad pagpag.
25 Balet kasakbayan to ya, nakaukolan nin onona a manirap so Anak na Too tan ipolisay ni na saray totood sayan panaon.
26 Say panaon ya isabiy Anak na Too et singa samay panaon nen Noe.
27 Nen saman, nanaakan tan naniinom so balang sakey ed sikara, angaasawa tan akiaasawa ra. Onyay ginagawa ra ya anggad inloob nen Noe ed biong. Insan sinmabiy delap tan inaatey iran amin.
28 Say panaon ya isabiy Anak na Too et singa saman met so panaon nen Lot; nanaakan tan naniinom so balang sakey ed sikara, nansasaliw tan nanlalako ra, nantatanem ira, tan nampapaalagey iray abung da.
29 Balet diad agew ya insiput nen Lot ed Sodoma, inmoray apoy tan asupri tan inaatey iray amin a totood man.
30 Onya met so nagawa no ompanengneng so Anak na Too.
31 No onsabi yan agew say toon walad toktok na abung ag la nakaukolan ya onlasur nin mangalay kayaryan tod loob na abung. Ontan met a say toon walad alog, ag la nakaukolan ya ompawil nid abung.
32 Nunot yoy agawad asawa nen Lot!
33 Naandiy bilay so toon mampilalek a mangilaban ed bilay to; balet nilaban so toon naandi bilay to.
34 Kuankod sikayo a diad satan a labi, walay duaran lalakin nanaogip ed sakey a katri: naalay sakey, tan natilak so sakey.
35 Walay duaran bibiin manggigiling: naalay sakey, tan natilak so sakey.
36
37 Iner, Katawan? tepet da ray disipulo. Inmebat si Jesus, No iner so kawalaay bangkay, diman so pandaragopan da ray buitri.
1 "Tinongtong nen Jesus so sakey ya alimbawan pangibangat tod sikara a nepeg day mampikasi lawas tan ag ira nanaekalay ilalo.
2 "Diad sakey a baley, inkuanto, walay sakey a huis ya ag to tatakotay Dios tan ag to gagalangey too.
3 "Wala met diman so sakey a biin balo ya onla lan onlad sikato ya onkerew na katonungan: Iyagel mo ak ed kalaban ko!
4 "Abayag ya ag asasikasoey huis, balet diad kaonuran inkuanto lamlamang ed sikaton dili, Anggaman ya ag ko tatakotay Dios odino gagalangen so too,
5 "balet lapud panggugunigon tod siak yan balon bii, iter ko pa lad sikatoy kekerewen to. Ta no andi, ag to ak tondaan a gunigonen et ag ak la makaanos!
6 "Intuloy na Katawan, Dengel yo may imbagay maoges a huis.
7 "Say Dios balet ey? Ag to kasi iter so kanepegan da ray dilin totoo to ya agewlabin mikasi? Ag to ra kasi tulongan a tampol?
8 "Kuankod sikayo: iter ton tampol so kanepegan da. Balet no onsabiy Anak na Too, wala kasiy nasabian ton pananisia diad mundo?
9 "Sinalita met nen Jesus yan alimbawa ed saray totoon ipapasen dan matonung so sikaran dili tan mumurmuraen da ray arum.
10 Walay duaran totoo a linmoob ed Timplo a mampikasi. Sakey so Pariseo, sakey so sumisingil na buis.
11 Samay Pariseo binmiig tan nanalagey a mampikasi, Misalamat ak ed sika, O Dios, ta aliwa ak a singa saray arum a totoon maagum, masaol, tan mikakaloguran. Misalamat ak, ta aliwa ak a singa saman a sumisingil na buis.
12 Mamidwa ak a manaayuno ed loob na sakey simba, tan iiter koy kakaplo na amin a nanaalmoan ko!
13 Samay sumisingil na buis balet, arawdawiy nanalageyan to, tan ngalngali ag to itangwad tawen so lupa to. Tinapuktapuk toy pagew to tan inkuanto, O Dios, kasian mo ak pa a makasalanan!
14 Kuankod sikayo a sayan too sinmempet ya apirdona ray kasalanan to; balet samay Pariseo, andi. Ta siopamay mampaatagey ed sikaton dili, napaabeba; siopamay mampaabebad sikaton dili, napaatagey.
15 Wala ray toton angawit na ogogaw ed kinen Jesus, ta labay dan itapew to ray lima tod sarayan ogogaw. Balet nen anengneng na saray disipulo ira yan totoo, nampasnukan da ra.
16 Balet tinawag nen Jesus ira may ogogaw tan inkuanto, Paolyan yo ray ogogaw ya ondagod siak. Ag yo ra sesebelan, ta saray totoon singa sarayan ogogaw so makankien na Panariay Dios.
17 Tandaan yo ya! Siopamay ag onabuloy a pasakop ed Panariay Dios a singa sakey ya ogaw, ag balut makaloob ed Panariay Dios.
18 Tinepet na sakey a manonan Judio ed kinen Jesus, Maung a Maistro, antoy nepeg kon gawaen pian nagamuran koy bilay ya andi-anggaan?
19 Akin et tatawagen mo ak na maung? ebat nen Jesus. Anggapoy arum a maung no ag say Dios labat.
20 Amtam iray ganggan: Ag ka mikakaloguran; ag ka mamapatey; ag ka mantatakew; ag ka mantitila ed pantasim; igalang moy amam tan inam!
21 Inmebat imay laki, Nanlapud ogaw ak ni, oonuren ko la ra yan amin.
22 Kadngel nen Jesus ed saya inkuanto, Wala niy sakey a kakulangan mo. Ilakom ya amin so kayaryan mo, insan mo iter ed saray mairap-bilay so panlakoan mo. Nawalaan kad satan na kayamanan ed tawen. Insan ka dia ompawil ya ontombuk ed siak.
23 Kadngel tod saya, naermenan a maung lapud agaylay inkayaman to.
24 Anengneng nen Jesus a maerermen imay too, kanyan inkuanto, Mairap a tuloy ya onloob ed Panariay Dios iray mamayaman!
25 Mainomay niy kamilyon onloob ed abut na dagom nen say toon mayaman ya onloob ed Panariay Dios.
26 Inkuan na saramay totoon akadngel ed sikato, Siopay nayarin nilaban sirin ey?
27 Inmebat si Jesus, Say ag nagawaay too, nagawaay Dios.
28 Inkuanen Pedro, Ag mo lilingwanan a tinaynan mi ray abung mi tan tinmombuk kamid sika.
29 On, kuanen Jesus ed sikara, tan kuankod sikayo: siopamay taynan toy abung, asawa, agagi, atateng, o anak lapud Panariay Dios,
30 lalon dakerakel so naawat tod sayan bilay tan, diad panaon ya onsabi, say bilay ya andi-anggaan.
31 Imbiig nen Jesus iray labinduan disipulo tan inkuantod sikara, Tandaan yo ya! Oonla tayod Jerusalem a diman nagaway amin ya insulat da ray propita nipaakar ed Anak na Too.
32 Niawat ed saray Hintil tan ludlureyen, pagpaogesen, tan luklukdaan da.
33 Lewet-leweten da, insan da pateyen, balet onolid bilay diad kumatlon agew.
34 Anggapoy atalusan na saray disipulo, ta niamut ed sikaray talus da ra yan imbaga nen Jesus, tan ag da amta ingey sasalitaen to.
35 Nen akaasingger lay Jesus ed Jerico, walay sakey a lakin bulag a manyodyorung a mipapayabol ed gilig na dalan.
36 Nen nadngel to ray amayamay a totoon ondaralan, tinepet to no antoy nagagawa.
37 Onlalabas si Jesus a taga Nazaret, inkuandad sikato.
38 Tinmawag na maksil, Jesus ya Anak nen David, kasian mo ak!
39 Saray totoon walad bandad onaan nampasnukan da tan imbaga ran mandeen, balet lalon tinmawag na maksil, Anak nen David! Kasian mo ak!
40 Tinmondan manaakar si Jesus tan ingganggan ton iyakar dad sikato. Kaasingger to, tinepet nen Jesus,
41 Antoy labay mon gawaen kon para sika? Katawan, ebat to, labay koy makanengneng.
42 Inkuanen Jesus ed sikato, Makanengneng ka! Say pananisiam so amaabig ed sika.
43 Tampol a makanengneng la. Tinombuk toy Jesus tan akisalamat ed Dios. Nen anengneng ya na totoo, indadayew dan amin so Dios.
1 "Tinmuloy si Jesus ed Jerico tan dinmalan ed baley.
2 "Walad may sakey a mayaman a pangulo da ray sumisingil na buis; say ngaran to Zaqueo.
3 "Labay ton naamtaan no siopay Jesus, balet lapud melmelag a too ag to nanengneng, ta amayamay so totoo.
4 "Kanyan binmatik tan inonaan to ray totoo, insan kinmalab ed sakey a kiew a sikomoro pian nanengneng toy Jesus no ondalan diman.
5 "Nen asabi nen Jesus iman a pasen, tinmangay tan inkuantod kinen Zaqueo, Epas kan tampol, Zaqueo, ta nakaukolan ya ontuloy ak natan ed abung mo.
6 "Inmepas a tampol tan malikeliket ya anangkailid kinen Jesus.
7 "Amin ya akaimatun ed saya ngoro-ngoro ra tan inkuanda, Pasasangkaili ed sakey a toon makasalanan!
8 "Inmalagey si Zaqueo tan inkuantod Katawan, Iter koy kapalduay kayaryan ko ed saray mairap-bilay, Katawan; tan no wala bilang so sinaol ko, mamipat a karakel so ipawil ko.
9 "Inkuanen Jesus ed sikato, Say kilalaban sinmabi natan ed sayan abung, ta anak met nen Abraham yan too.
10 Ta say Anak na Too linma dian mananap tan mangilaban ed abalang.
11 Kadngel dad saraya, intuloy nen Jesus so pansasalita tod sikara. Sinalita toy sakey ya alimbawa, lapud sikatoy asingsingger lad Jerusalem tan say amta ray totoo et magano lan onsabiy Panariay Dios.
12 Inkuanto, Wala nen saman so sakey a toon matalonggaring a linmad sananey a bansa ta gawaen dan ari, insan lad satan ompawil.
13 Kasakbayan ton sinmiput, tinawag toy samploran katulong to, initdan to ray sansasakey a kuartan balituk tan inkuanto, Ipoonan yo ya, anggad isabik!
14 Balet kabosul na saray dilin kabaleyan to, kanyan kasiput to, angibaki ray mangibaga, Ag mi labay a manarid sikami yan too.
15 Ginawa ran ari met lamlamang, insan pinmawil. Kasabi to, impatawag to ra may katulong ya angiteran toy kuarta, ta labay ton naamtaan no pigaray tinubo na balang sakey ed sikara.
16 Sinmabiy sakey tan inkuanto, Katawan, anuboy samploran kuartan balituk imay sakey ya inter mod siak.
17 Inkuanto may amo, Maabig so ginawam, maung a katulong! Lapud napampiaan kad melag iran bengatla, panoleyen ta kad samploran baley.
18 Sinmabiy kumadwan katulong tan inkuanto, Katawan, anuboy limaran kuartan balituk imay sakey ya inter mod siak.
19 Inkuanto may amo, Panoleyen ta kad limaran baley.
20 Wala niy sakey a katulong a sinmabi tan inkuanto, Katawan, nia may inter mod siak a kuarta. Pinonggus kod panyo.
21 Antakot ak ed sika, ta mapeget kan maung lanti. Aalaen moy anggan ag mo kayaryan, tan aanien moy ag mo intanem.
22 Inkuanto may amo, Maoges kan katulong! Say salitam a dili so panintinsiaan kod sika! Amtam manaya a mapeget ak. Amtam manaya ya aalaen koy ag ko kayaryan, tan aanien koy ag ko intanem.
23 Akin sirin et ag mo labat indipositod bangko may kuartan inter kod sika, pian walay nasabian kon tubo to?
24 Insan inkuantod saray manalalagey diman, Ala yoy kuartan balituk ed sikato, insan yo iter ed samay katulong a kawalaay samplora.
25 Inkuandad sikato, Katawan, wala la so samploran balituk a kuarta to!
26 Kuankod sikayo, ebat to, say wala lay bengatlad sikato, naaruman niy walan bengatlad sikato; balet say toon anggapoy bengatlad sikato, naala so anggan say dagdaiset a bengatlan walad sikato.
27 Tan nipaakar ed saramay kalaban ko ya ag da ak labay a manarid sikara: iyakar yo ra dia tan patey yo rad arap ko!
28 Kapangibaga nen Jesus ed saya, inmonan linmad Jerusalem.
29 Nen asingger lad Betfage tan Betania, diad Palandey na Kaolibaan, pinaona toy duaran disipulo to,
30 tan binilin to ra, Laka yod ontombuk a bario. Kasabi yod man, narumog yoy kilaw ya asno ya akasinger tan ag nin balut kinabayoan. Okbaran yo tan awit yo dia.
31 No walay mantepet no akin et ookbaran yo, ikuanyod sikato, Say Katawan nakaukolan to.
32 Linma la ra sirin tan nalmo ran tua may asno, onung na imbaga nen Jesus.
33 Nen ookbaran da, inkuanda ray akankien, Akin et ookbaran yo tan?
34 Say Katawan nakaukolan to, ebat da.
35 Inyakar da may asno ed kinen Jesus. Insapin da ray kalibemben da, insan da pinakabayoy Jesus.
36 Leleg a mamapaarap si Jesus ed siudad, saray totoo inyaaplag dad dalan iray kolibemben da.
37 Diad dalan a mamaleksab a manlapud Palandey na Kaolibaan, tan asingger lad Jerusalem, amin da ra may disipulo inmeeyag irad liket da tan indadayew day Dios, lapud saray amin a makapanyarin gawgawan anengneng da:
38 Bindisionan komuy Dios so arin onsasabid ngaray Katawan! Kareenan ed tawen! Galang ed Dios!
39 Inkuan na pigaran Pariseo a walad pegley na totoo, Maistro, iganggan mon ontonda ran oneyag iray disipulom!
40 Inmebat si Jesus, Kuankod sikayo a no ontonda ra, saray bato so oneyag.
41 Asingsingger lay Jesus ed siudad na Jerusalem. Kanengneng tod siudad inakisan to
42 tan inkuanto, No natalusan mo labat ed sayan agew no antoy makapangiter ed sikay kareenan! Balet natan niamut ed saray matam!
43 Ta onsabid sika ray agew a liktuben da ka ray kalaban mo tan saraan da ka, pian ag ka makapaway.
44 Deralen da ka tan saray totoon walad loob na padir mo. Anggapoy anggan sakey a baton natilak ed pasen to, ta ag mo inasikasoy insabi na Dios a mangilaban ed sika!
45 Linmoob si Jesus ed Timplo tan pinataynan to ray manlalakod man.
46 Inkuantod sikara, Ibabagay Masanton Sulat a kuay Dios, Say abung ko natawag ya abung a panagpikasiyan! Balet ginawa yon ayaman da ray matatakew!
47 Nambabangat si Jesus ya inagew-agew ed Timplo. Saray manonan papari, saray iskriba, tan saray manonad baley et labay dan pateyen si Jesus.
48 Balet ag da amta no panoy pamatey da, ta agaylay karerengel ed sikato na amin da ray totoo.
1 "Aminsan ya agew, nen babangatan nen Jesus iray totoon walad Timplo tan ipupulong toy Maung a Balita, inmasingger iray manonan papari, saray iskriba, tan saray mamatakken na baley.
2 "Inkuandad sikato, Ibagam pad sikami: antoy pankatonungan mon manggawad saraya? Siopay angiter ed sikay pankatonungan a manggawad saraya?
3 "Inmebat si Jesus, Wala pa labat so tepeten kod sikayo. Ibaga yo pad siak:
4 "nanlapway pankatonungan nen Juan a mambinyag, nanlapud Dios o nanlapud too?
5 "Nantetepetan ira, Antoy iyebat tayo? No ibaga tayon nanlapud Dios, ikuantod sikatayo, Akin et ag yo sinisiay Juan ey?
6 "Balet no ibaga tayon nanlapud too, saray amin a totoo tupaken da tayoy bato, ta manisia ran propita si Juan.
7 "Kanyan inkuanda, Ag mi amta!
8 "Inkuan met nen Jesus ed sikara, Ag ko met sirin ibagad sikayo no antoy pankatonungan kon manggawad saraya.
9 "Insan sinalita nen Jesus yan alimbawa ed saray totoo, Walay sakey a toon nantanem na saray ubas. Impaasikaso tod saray kasamak, tan linmad sananey a bansa a diman manayam a mabayag.
10 Nen asabiy panaon a panagborbor na ubas, imbaki ton miapag ed saray kasamak so sakey ya aripen to. Balet pinepekpek da, insan da pinapawil a kalimalima.
11 Angibaki lamet na sananey ya aripen, balet saray kasamak pinepekpek tan pinapabaingan da met, insan da pinapawil a kalima-lima.
12 Angibaki niy kumatlon aripen, balet sinusugat da, insan da pinapaway ed kaubasan.
13 Anto kasiy gawaen ko? kuanto may akanubas. Ibakik pay dilin inararok ya anak, ta andi-saew a galangen da!
14 Balet nen anengneng na saramay kasamak, inkuandad sakey tan sakey, Nitan lay mananawir na kaubasan. Pateyen tayo, pian kayaryan ti lay kaubasan!
15 Kanyan impaway dad kaubasan, insan da pinatey. Anto natay gawaen na akankiey kaubasan ed sikara? tinepet nen Jesus.
16 Onlan papatey to ra man a totoo, insan to ipaasikasoy kaubasan ed saray arum. Nen nadngel ya na saray totoo inkuanda, Ag komun nagawa tan!
17 Ninengneng ira nen Jesus tan tinepet to, Anto sirin so labay ya ibagay Masanton Sulat? Say baton imbantak na saray karpintiro, nagmaliw lamlamang a sankakanaan a bato.
18 Siopamay napelag ed sayan bato, nabuybuyak. Tan siopamay napataan to yan bato, magmaliw a singa dabuk ed katemek to.
19 Saray iskriba tan saray manonan papari ginetma ran erelen si Jesus ed saman a bekta, lapud amta ran sikaray papasikian tod sayan alimbawa. Balet ag da ya nagawaan, ta antakot da ray totoo.
20 Kanyan inalagar day pankanawnawan mangerel ed sikato. Wala ray inopaan dan totoo a mankonkonwariyan a maung iran totoo. Imbaki da ran mangerel ed kinen Jesus, diad panamegley na pantepet da, pian nipalima rad pakayari tan pakaoley na Gobirnador.
21 Inkuanda ra yan ispia ed kinen Jesus, Maistro, kabat min tua ray amin ya ibabagam tan ibabangat mo. Kabat mi met ya aliwa kan manangibiig, no ag ta ibabangat mo ray totoo no antoy linawa na Dios nipaakar ed sikara.
22 Ibagam pa sirin ed sikami: sumpad Ganggan kasi so pambayar na buis ed Impirador na Roma, odino andi?
23 Balet atebek nen Jesus so maoges a getma ra, kanyan kuantod sikara,
24 Ipanengneng yo pad siak so sakey a kuartan pilak. Siopay akanlupa tan akanngaran na nitatak ed kuarta? Say Impirador, ebat da.
25 Inkuanen Jesus, No ontan sirin, iter yod Impirador so nabebetangay Impirador, tan iter yo met ed Dios so nabebetangay Dios.
26 Diad arap na totoo, ag dan balut naerel si Jesus ed panagsalita to. Mankelaw irad ebat to, kanyan ag la ra inmesel.
27 Wala ray pigaran Saduseo a linmad kinen Jesus. (Sikara yay mangibabagan ag onolid bilay iray inaatey.) Tinepet da,
28 Maistro, insulat nen Moises yan ganggan para sikami: No inatey so sakey a lakin anggapoy ilalak, nakaukolan ya asawaen na agi to may abalo, pian mananak ira para samay inatey.
29 Wala nen saman iray pitoran sanaagi. Angasaway pangulowan, balet inatey ya anggapoy ilalak.
30 Say kumadwad pangulowan inasawa to may balo na kuya to, balet inatey met ya anggapoy ilalak.
31 Ontan to met so agawad kumatlon agi, ya anggad kumapito. Inaatey iran amin ya anggapoy ilalak.
32 Diad kaonuran, inatey met imay bii.
33 Natan, diad iyolid bilay na saray inaatey, siopay makanasawa ed samay bii, anta amin da ra may pitoran sanaagi et nambabalesan dan inasawa?
34 Inmebat si Jesus ed sikara, Diad sayan bilay, mangasawa ray lalaki tan miasawa ray bibii.
35 Balet saray lalaki tan saray bibiin nibilang ed saray manepeg ya onolid bilay, tan makakar ed biek a bilay, ag la ra mangasawa o miasawa.
36 Ag la ra nayarin ompatey, ta singa ra saray anghil. Anak iray Dios, ta inmoli rad bilay.
37 Anggan si Moises a dili papaneknekan ton naolid bilay iray inaatey. Diad samay tongtong a nipaakar ed manliub ya abeban kiew, sinalita to a say Katawan et Dios nen Abraham, Dios nen Isaac, tan Dios nen Jacob.
38 Say labay to yan ibaga sikatoy Dios na saray mabilay, aliwan Dios na saray inaatey, ta diad sikato mabilay ya amin iray katoowan.
39 Inkuan na pigaran iskriba, Marakep itan ya ebat mo, Maistro!
40 Nanlapud saman, anggapo lay akakpel a mantepet ed kinen Jesus.
41 Inkuanen Jesus ed sikara, Panoy pangibaga ran say Cristo et kabyangay boleg nen David?
42 Ta si David a dili so angikuan, diad libro na saray Salmo: Say Katawan inkuantod Katawan ko: Yorung ka ed nikawanan ko,
43 anggad napasukok ed sika ray kalaban mo!
44 Tinawag sirin nen David na Katawan so Cristo. Panon sirin a sikatoy kabyangay boleg nen David?
45 Leleg ya onderengel ya amin iray totoo ed kinen Jesus, inkuantod saray disipulo to,
46 Manalwar kayod saray iskriba, a labalabay day akar-akar ya andokey so saloy na kawes da, tan igalgalang irad publiko. Labalabay dan pilien iray manonan yorungan ed saray sinagoga tan diad saray ponsia.
47 Kakatkatan da ray balon bibii, insan mampikasi ray andorokey a panisimula rad gagawaen da. Lalon ombelat so dusa ra!
1 "Nen tinmangway Jesus, anengneng to ray mamayaman a mangipepelag na donasion dan kuarta diad panagpelagan ed Timplo.
2 "Anengneng to met so mairap-bilay a biin balo a mangipepelag na duaran sinsilyo.
3 "Inkuanto, Kuankod sikayo a dakel ni so inter to man a mairap-bilay a balo nen saray amin da ray arum.
4 "Ta say inter na arum manlalapud soluk na kayamanan da, balet anggan mairap-bilay man a balo, inter toy amin a pambilay to.
5 "Pantotongtongan na pigarad sikara so nipaakar ed Timplo, saray mararakep a bato ya inkana tan saray bagat ed Dios. Balet inkuanen Jesus,
6 "Nipaakar ed amin da ra yan nanenengneng yo natan: onsabi ray agew ya anggapoy anggan sakey a baton natilak ed pasen to, ta nageba ran amin.
7 "Maistro, tinepet da, kapigan nagawa ya? Tan antoy pakapatnagan ya asingger lan nagawa?
8 "Inkuanen Jesus, Manalwar kayo tan ag kayo palilingo ed siopaman! Ta amayamay iray onsabi tan ikana ray ngaran ko ya ikuanda, Siak so Cristo! tan Sinmabi lay panaon! Balet ag yo ra totombuken.
9 "Ag kayo natatakot no nabalitaan yo ray bakabakal tan gologolo. Nakaukolan ya onona ra yan nagawa, balet aliwa nin asingger so anggaay mundo.
10 Inkuanto nid sikara, Manlalaban iray bansa; ontan da met iray nanarian.
11 Wala ray onsabin maksil a yegyeg, eras, tan sakisakit diad nandoroman pasen. Onletaw iray makapataktakot a bengatla tan makapakelkelaw iran tandan manlapud tawen.
12 Balet kasakbayan a nagawa ra yan amin, erelen da kayo, insan da kayo pairapen. Iyakar da kayod saray sinagoga tan saray prisowan. Iyarap da ki met ed saray arari tan saray gobirnador, lapud siak.
13 Sikato yay pankanawnawa yon mantasid siak.
14 Paligen yo, lad kanunotan yo ya ag yo panggugunigonan no panoy pangyagel yod sikayon dili,
15 ta itdan ta kayoy kakabatan tan panagsalitan ag nasarag a sumlangen o paandien na saray amin a kalaban yo.
16 Mantraidor ed sikayoy anggan saray dilin atateng, agagi, kakanayon, tan kakaaro yo. Papatey da ni ray arum ed sikayo.
17 Bosulen kayoy amin a katoowan lapud siak,
18 balet anggapoy anggan sakey a naandin buek ed olo yo.
19 Mananos kayo, pian nagamuran yoy tuan bilay.
20 No nanengneng yon aliber na sondalo so Jerusalem, amta yo lan asingger lay kaderal to.
21 Nakaukolan ed satan ya ombatik ed kapalandeyan iray taga Judea, ontaynan iray walad siudad, tan ag la onlad siudad iray walad kalawakan.
22 Ta saraya lay Agew na Dusa, pian ontuay amin ya ibabagay Masanton Sulat.
23 Agaylay panirap da ray malokun tan saray walay anak nin mansususo! Ta makapataktakot so onsabin kairapan ed sayan bansa, tan say onsabin pasnuk na Dios ed sarayan totoo.
24 Ompatey irad ispada, awiten da ran aripenen ed amin a bansa, tan deralen na saray Hintil so Jerusalem, anggad nasumpal so panaon da.
25 Onletaw iray tanda ed agew, bulan, tan saray bitewen. Diad dalin, saray bansa nagolo rad kataktakot dad saray daluyon tan say ungol na dayat.
26 Patey-pateyan iray totood takot da diad panalagar dad kairapan ya onsabid sankamundoan, ta ag natombuk na saray pakayarid liwang so gendat a kinaoksuy da.
27 Insan nanengneng day Anak na Too ya onsasabin walad lorem tan walaay pakayari tan baleg a kagalangan.
28 No ginmapo la ra yan nagawa, alagey kayo tan tangay kayo, ta asingger lay kilalaban yo.
29 Insan sinalita nen Jesus so sakey ya alimbawa, Nengneng yoy sengeg na igos tan arum iran kiew.
30 No ompapaway la ray bolubolung da, amta yon asingger lay tiagew.
31 Ontan met, no nanengneng yo la ra yan nagagawa, amta yon magano lan onsabiy Panariay Dios.
32 Tandaan yo ya! Nagawa ra yan amin kasakbayay ipatey da ray totood sayan panaon.
33 Naandipat so tawen tan dalin, balet ag balut naandipat iray salitak.
34 Manalwar kayo! Ag kayo mapalalon kapaakan tan kapabuek, tan ag kayo met kapagunigon ed panagbilay yo, ta ompan biglan onsabid sikayo yan Agew
35 tan ag kayo akaparaan. Ta diad sayan Agew onsabid amin a katoowad intiron mundo ya ag da naamamtaan.
36 Kanyan nakaukolan a sipaparaan kayo lawas tan ag yo totondaay mampikasi, pian nawalaan kayoy biskeg ya ompaliis ed amin da ra yan nagawa, tan makapiarap kayod Anak na Too.
37 Inagew-agew a nambabangat ed Timplo si Jesus. Kapag onsironget la, ontaynan diman tan mansanlabiyan ed Palandey na Kaolibaan.
38 Kabkabwasan ya onlad Timplo ray totoon ondengel ed sikato.
1 "Manasingger lay Pista na Tinapay ya Anggapoy Libadura, a tatawagey Paskua.
2 "Saray manonan papari tan saray iskriba et manaanap iray pankanawnawa ran mamatey ed kinen Jesus, ta antakot irad saray totoo.
3 "Linmoob si Satanas ed puso nen Judas a tatawagey Iscariote, sakey ed saray labinduan disipulo.
4 "Linman akitongtong si Judas ed saray manonan papari tan saray opisyal da ray guardia na Timplo. Nantotongtongan da no panoy pangyawat tod kinen Jesus ed sikara.
5 "Makaliliket ira tan insipan da ya itdan day kuarta.
6 "Linmabay si Judas ed saya, tan nanlapud saman ginapoan toy mananap na pankanawnawa ton mangyawat ed kinen Jesus diad sikara, ya ag amtay totoo.
7 "Sinmabiy Pista na Tinapay ya Anggapoy Libadura, a sikato met so panagpatey na saray kilaw a karniro ya onkanad Paskua.
8 "Imbaki nen Jesus ira di Pedro tan Juan tan binilin to ra, Laka yon mangiparaay Pandem na Paskua tayo.
9 "Iner so labay mon pangiparaanan mi? tepet da.
10 Inmebat, Dengel kayo! Laka yod siudad. Naabet kid may sakey a lakin sankasakbat toy samboyug a danum. Tombuk yod looban ton abung.
11 Insan ikuanyod akanabung a patetepet na Maistro: Iner so kawalaay kuarton panganan ko tan saray disipulok na Pandem na Paskua?
12 Itoro tod satan so sakey a maawang a kuarto ed tagey, a wala la ray ikanan kagawaan ya akaparaan. Iparaan yo ray amin diman.
13 Linma la ra sirin tan arumog da ra may amin ya imbaga nen Jesus ed sikara. Kanyan imparaan day Pandem na Paskua.
14 Nen sinmabi lay oras, dinmongoy Jesus ed lamisaan a kaiba to ray apostol.
15 Inkuantod sikara, Nampirpirawatan koy mirongod sikayo ed sayan Pandem na Paskua, kasakbayay panirap ko!
16 Kuankod sikayon ag ak lan balut mangan ed saya, anggad naitday nagnap a kabaliksan ed Panariay Dios.
17 Angalay kupa tan kasumpal ton akisalamat ed Dios inkuanto, Ala yo ya tan paniinoman yon amin.
18 Kuankod sikayo a manlapud natan, ag ak la oninom na sayan tabul na ubas, anggad isabi na Panariay Dios.
19 Insan angalay tinapay tan kasumpal ton akisalamat ed Dios, pinipisag to, inter tod sikara tan inkuanto, Sikato yay laman ko a niiter ed sikayo. Gawa yo ya a pakanudnunotan ed siak.
20 Ontan met a kayari ran nandem, inter tod sikaray kupa a kuanto, Sayan kupa sikatoy balon impisipanay Dios a paneknekay dalak ya onterter para sikayo.
21 Balet karongok natan so mantraidor ed siak!
22 Ompatey so Anak na Too, onung ed linaway Dios. Balet makapataktakot so nasagmak na toon mantraidor ed sikato!
23 Nantetepetan irad satan no siopa kasid sikaray manggawa ya.
24 Nansasangsangan met iray disipulo no siopad sikaray nabirbir a manona.
25 Inkuanen Jesus ed sikara, Walay pakayari da ray arari ed sayan mundo a manoley ed saray totoon nasasakopan da; tan saray manoley labay day patawag na Kakaaroy Totoo.
26 Balet aliwa kayon ontan. Say manona ed sikayo nepeg to ingey magmaliw a singa sikatoy yogtan; tan say pangulo nepeg a magmaliw a singa sikatoy managlingkur.
27 Siopay lalon manona: say akarongon mangakan, o say mansisirbi? Say akarongon mangakan. Balet managsirbi ak ed sikayo ran kakaibak.
28 Sikayo ray nansiansiad siak diad amin da ray subsubok ed siak.
29 Initdan ak na Amak na pakayarin manoley,
30 pian mangan tan oninom kayo ed lamisaan ko diad Panarian ko, tan onyorung kayo met ed saray trono a manintinsia ed saray labinduan tribu na Israel.
31 Simon, Simon, dengel ka! Naabuloyan si Satanas a manubok ed sikayon amin, a singa say dumaralus a pambiigan toy ilik tan apa.
32 Balet Simon, impikasi ta kan ag naandiy pananisiam. No pinmawil lay pananisiam ed siak, pabiskeg moy linawa da ray agagim.
33 Katawan, ebat nen Pedro, sipaparaan ak a napriso tan ompatey a kaiba ta ka!
34 Inkuanen Jesus, Kuankod sika, Pedro, kasakbayay ikukaok na lalung ed sayan agew, mamitlon ibagam ya ag mo ak kabat.
35 Insan inkuanen Jesus ed sikara, Nen imbaki ta kayo ya anggapoy awit yon pitaka, bayung, o sapatos, wala tay anggan antokaman a kinulangan yo? Anggapo, ebat da.
36 Balet natan, kuanen Jesus, siopamay walay pitaka o bayung to, nakaukolan ya awiten to. Siopamay anggapoy ispada to nakaukolan ya ilako toy kawes to tan manaliw na ispada.
37 Ta kuankod sikayon nepeg a nasumpal so ibabaga na Masanton Sulat nipaakar ed siak, Sikatoy nibilang a sakey a kriminal. Ta nagagawa lay nisulat a nipaakar ed siak.
38 Inkuanda ray disipulo, Katawan, niay duaran ispada! Duga la tan! inkuanto.
39 Inmalis si Jesus tan linmad Palandey na Kaolibaan, onung ed kaogaliyan to; tan akila ray disipulo to.
40 Kasabi ra inkuantod sikara, Mampikasi kayo, pian ag kayo napelag ed tukso.
41 Insan inmarawiy daiset. Nantalimukor diman tan nampikasi.
42 Ama, inkuanto, no labay mo, ipaliis mo ak pad sayan kupay kairapan. Anggaman ontan, aliwan say linawak, no ag ingen say linawam, so nasumpal.
43 Pinmayawar so sakey ya anghil a nanlapud tawen, tan pinabiskeg toy linawa nen Jesus.
44 Ontan lay inkagunigon to, kanyan lalon masimoon so impampikasi to. Singa dala so linget ton tinmerter ed dalin.
45 Kasumpal ton nampikasi, pinmawil ed saray disipulo to. Asabian to ran nanaogip, ta mapalaloy ermen da.
46 Inkuantod sikara, Akin et nanaogip kayo? Bangon kayo tan mampikasi kayo, pian ag kayo napelag ed tukso.
47 Mansasalita niy Jesus nen sinmabi ray dakerakel a totoo. Si Judas a sakey ed saray labinduan disipulo so angipangulod sikara. Sinmingger ed kinen Jesus, ta anguban to.
48 Inkuanen Jesus, Judas, pantraidoran moy Anak na Too diad panamegley na angub, anto?
49 Nen alikas na saray disipulon kaiba nen Jesus no antoy nagawa inkuanda, Sigbaten mi la ra, Katawan?
50 Sinigbat na sakey ed sikara so aripen na Pangulon Pari, tan apingol so kawanan a layag to.
51 Balet inkuanen Jesus, Tonda ki la! Paolyan yo ra labat! Diniwit to may layag na aripen, tan pinaabig to.
52 Insan inkuanen Jesus ed saramay manonan papari, saramay opisyal da ray guardiad Timplo, tan saramay mamatakken na baley a linmad man a mangerel ed sikato, Akin et sankaawit yo ray ispada tan pekpek? Tulisan ak sirin?
53 Inagew-agew ak a walad Timplo tan wadman kayo met, balet ag yo ak inerel. Balet sikato yay oras yon onggalaw, no say pakayari na kabilongetan so manoley.
54 Inerel day Jesus, insan da inyakar ed abung na Pangulon Pari. Tinmombuk si Pedro ed kinen Jesus, balet walad bandad arawi.
55 Walay pinarlangan dan apoy ed pegley na solar to may abung. Akiirung met si Pedro ed saray wadman a mandarangdang.
56 Nen amataan na sakey ed saray katulong a bibii, ninengneng ton maung, insan inkuanto, Kaiba to met yan too!
57 Balet imbori nen Pedro. Inkuanto ni ingen, Andi pa, ag ko kabat itan a too!
58 Ag abayag, walay sakey a lakin akaasikasod sikato tan inkuanto, Kaiba ra ka met, anto? Balet inmebat si Pedro, Andi pa!
59 Kalabas na ngalngalin sakey oras, inkuan na sananey a laki, Talagan kaiba to yan too, ta sakey met a taga Galilea!
60 Balet inkuanen Pedro, Ag ko amta tay ibabagam! Kabebekta nen mansasalita ni, kinmukaok so sakey a lalung.
61 Linmingaw so Katawan, tan ninengneng tod mata si Pedro. Natan anunotan nen Pedro may imbagay Katawan, Kasakbayay ikukaok na lalung ed sayan agew, mamitlon ibagam ya ag mo ak kabat.
62 Pinmaway si Pedro tan inmakis na ampaipait.
63 Saray totoon mambabantay ed kinen Jesus niludlurey tan sinisiplatan da.
64 Pinerengan day abel insan da tinepet, Ibagam pa no siopay angabil ed sika!
65 Amayamay ni so imbabaga ran pamabaing ed sikato.
66 Kasabiy kabwasan, nantitipon iray kabyangay Sanidrin: saray mamatakken na baley, saray manonan papari, tan saray iskriba, tan inyarap day Jesus ed sikara.
67 Tinepet da, Ibagam ed sikami sikay Cristo? Inmebat, Anggan ibagak ed sikayo ag ki met lamlamang manisia.
68 No tepetan ta kayo, ag yo ak lamlamang ebatan.
69 Balet, manlapud natan, say Anak na Too onyorung ed nikawanay Dios a Makapanyarin-amin.
70 Inkuandan amin, Labay mon ibaga, sirin, sikay Anak na Dios? Inmebat, Sikayo lan dili so mangibabaga.
71 Inkuanda, Ag tayo la nakaukolan iray mantasi! Arengel ti lad dilin sangi to!
1 "Inmalagey iran amin, insan da inyakar si Jesus ed kinen Pilato.
2 "Ginapoan dan inakusa, Narel mi yan too, inkuanda, a sosogsogan to ray totoo mi a manggaway aliwa. Isesebel to met so pambayar na buis ed Impirador. Ibabaga to nid saray totoo a sikatoy Cristo, say sakey ya ari.
3 "Tinepet nen Pilato, Sikay ari da ray Judio? Sika lan dili so mangibabaga, ebat nen Jesus.
4 "Inkuanen Pilatod satan ed saray manonan papari tan saray totoo, Anggapoy naalmok a kasalanan to yan too.
5 "Balet lalon kuandan impasoot, Diad panamegley na pambabangat to, nasosogsogan iray totoo. Inggapo tod Galilea, insan diad intiron Judea, tan wadya la natan.
6 "Nen nadngel ya nen Pilato, tinepet to, Akin, taga Galiea yan too?
7 "Nen akabatan ton si Jesus et nanlapud pasen a nasasakopan nen Herodes, imbaki toy Jesus ed sikato ta wadman ed Jerusalem ed saraman ya agew.
8 "Makaliliket si Herodes nen anengneng toy Jesus, ta abayag lan mampipirawat a napilupaan to yan too, lapud amayamay lay abalitaan ton nipaakar ed sikato. Maniilalon nanengneng ton manggaway milagro si Jesus.
9 "Kanyan abayag a tinepetan to, balet ag balut inmebat si Jesus.
10 Inmasingger iray manonan papari tan saray iskriba tan ontan lay impangakusa rad kinen Jesus.
11 Si Herodes tan saray sondalo to niludlurey tan pinapabaingan day Jesus. Sinolungan day marakep a kawes, insan da impawil ed kinen Pilato.
12 Diad saman ya agew, akapankaaroy Herodes tan si Pilato, saray gendat a mambobosulan.
13 Impatawag nen Pilato ray manonan papari, saray opisyal na baley, tan saray totoo,
14 tan inkuantod sikara, Inyakar yo yan tood siak, ta kuanyon sosogsogan to ray totoo a manggaway aliwa. Natan, inosisak la tan naimatunan yo met, balet nalmoan ko ya anggapoy kasalanan to ed saray ipapakasalanan yod sikato.
15 Anggapo met so nalmoan nen Herodes a kasalanan to, kanyan pinapawil to diad sikatayo. Anggapoy ginawa to yan too a makasengeg na pamateyan ed sikato.
16 Kanyan pasipsiplatan ko, insan ko la ibolus.
17
18 Balet nankakasakey ya inmeyag iran amiy totoo, Pateyen itan a too! Si Barabbas so labay min ibolus mo!
19 (Aprisoy Barabbas lapud golon agawad siudad, tan lapud impamatey to.)
20 Si Jesus balet so labay nen Pilato ya ibolus, kanyan nansalita lamet ed saray totoo.
21 Balet lalon inmeyag ira, Ipasak mod krus! Ipasak mod krus!
22 Pinitlo nen Pilato ya inkuan ed sikara, Akin, antoy ginawa ton kasalanan? Anggapoy naalmoan kon ginawa ton makasengeg na pamatey ed sikato! Kanyan pasipsiplatan ko, insan ko la ibolus.
23 Balet lalon inkasikasil dan ineyag a nepeg ya ipasak ed krus si Jesus. Diad kaonuran, analoy impaneeyag da.
24 Kanyan insintinsia nen Pilato ed kinen Jesus imay kekerewen da.
25 Imbolus to may toon papaibolus da, samay apriso lapud impanggolo tan impamatey to. Insan impalima toy Jesus ed sikara, pian nagawaan dad sikato so labay da.
26 Nen iyaakar dan ipasak ed krus si Jesus, nabet day sakey a lakin nanlapud bario. Taga Cirene yan too, tan manngaray Simon. Sinabat da, tan impasakbat day krus ed sikato, insan da pinatombuk ed kinen Jesus.
27 Amayamay iray totoon tinmotombuk ed kinen Jesus, pati saray bibiin mannangnangis tan maneermen lapud sikato.
28 Nilingaw nen Jesus ira tan inkuanto, Bibiin taga Jerusalem! Ag yo ak nanangisan. Nangisan yo ingey sikayon dili tan saray anak yo.
29 Ta onsabi la ray agew ya ikuanda ray totoo, Mapalar iray bibiin lepes, saray ag mananak, tan saray ag nampasuso!
30 Diad sarayan agew, saray totoo ikuandad saray palandey, Tumbaan yo kami! tan diad saray pokdul. Tabunan yo kami!
31 No gawaen da yad siak a kaparay mabilay a kiew, anto la kasiy gawaen dad sikayo a kaparay amagaan a kiew?
32 Wala met iray duaran kriminal ya inyakar dan pateyen a kabansag nen Jesus.
33 Nen sinmabi rad pasen a tatawagey Lapis-lapis na Olo, diman da impasak ed krus si Jesus. Impasak da met ed sansakey a krus ira may duaran kriminal, say sakey diad nikawanan tan say sakey diad nikawigi nen Jesus.
34 Inkuanen Jesus, Ama, pirdonam ira, ta ag da amtay gagawaen da! Kayari ran nampapalaranan iray kawes to, inapag da.
35 Manalalagey iray totood man tan bambantayan day Jesus; balet saramay opisyal na baley niludlurey da. Inkuanda, Inlaban to ray arum. Ilaban to met komuy laman ton dili, no tuan sikatoy Cristo a piniliy Dios!
36 Niludlurey met na saray sondalo; inasinggeran da, initdan day alak
37 tan inkuanda, Ilaban moy sikan dili, no tuan sikay ari da ray Judio!
38 Onyay akasulat ed olowan to: Sikato yay Ari da ray Judio.
39 Pinapabaingan na sakey ed saramay mambitbitin a kriminal. Inkuanto, Aliwa tan sikay Cristo? Ilaban moy sikan dili tan pati sikami met!
40 Balet nampasnukan na samay kaiba to ya inkuanto, Ag mo tatakotay Dios, anta namparay dusam ed sikato?
41 Nepeg tan dua so nadusay onya lapud ginawa ta, balet sikato anggapoy kasalanan a ginawa to.
42 Insan inkuantod kinen Jesus, Nunot mo ak, Jesus, no kasabim ed Panarian mo!
43 Inkuanen Jesus ed sikato, Kuankod sika: diad sayan agew, kaiba mo ak ed Paraiso.
44 Sakey ya alas dosid kaagewan ya anggad alas tris ed ngarem nen binmilonget so intiron dalin,
45 naandiay liwawa so agew, tan apaldua so kurtina na Timplo.
46 Inmeyag na maksil si Jesus tan inkuanto, Ama, iyawat kod saray limam so ispirituk! Kapangibaga to ya, inatey.
47 Nen naimatunan yan agawa na kapitan da ray sondalo, indayew toy Dios. Inkuanto, Tua a matonung yan too!
48 Sayan agawa naimatunan na amin da ra may dinmagop a nambantay, tan sinmempet iran tapuk-tapuken day kapagewan da.
49 Manalalagey ed bandad arawi ray amin a kakaaro nen Jesus, pati saramay bibiin tinmombuk ed sikaton nanlapu lad Galilea, tan naimatunan da ra yan agawa.
50 Walay sakey a lakin manngaray Jose, taga Arimatea a sakey a baley na saray Judio. Maung tan matonung yan too, tan sakey met ed saray manaalagar ed Panariay Dios. Anggaman a kabyangan na Sanidrin, ag inmabuloy ed nankakasakeyan dan gawaen ed kinen Jesus.
51
52 Linmad kinen Pilato tan kinerew ton alaen so bangkay nen Jesus.
53 Inepas to sirin so bangkay nen Jesus, binalkut tod sidan abel, insan to insorub ed lobuk ya inongib ed bato tan ag nin balut angipomponan.
54 Agew na Panagparaan ed saman ya agew, tan ngalngali la onggapoy Agew na Panagpainawa.
55 Akilad kinen Jose ira may bibiin tinmombuk ed kinen Jesus a nanlapu lad Galilea. Anengneng da may lobuk tan say impangiyan diman ed bangkay nen Jesus.
56 Kasumpal to, sinmempet ira tan angiparaan iray pabalingit tan mira a para samay bangkay. Nen Agew na Panagpainawa, nampainawa ra, onung na ibabagay Ganggan.
1 "Kabkabwasay Simba, linma ra may bibii ed lobuk a sankaawit da ra may pabalingit ya imparaan da.
2 "Asabian dan nitolin lay baton akasarad sangab na lobuk.
3 "Nen linmoob ira, ag da la nalmoy bangkay na Katawan a Jesus.
4 "Nen nagogoloy kaisipan da lapud saya, pinmayawar ed abay da so duaran lalaki a mankidyam iray kawes da.
5 "Ataktakot ira may bibii, tan dinmakmomo ran anggad dalin. Tinepet na saramay lalaki, Akin et aanapen yoy mabilay ed pegley da ray inaatey?
6 "Andi dia, ta inmoli lad bilay. Natandaan yo ni no antoy imbaga tod sikayo nen walad Galilea?
7 "Imbaga ton nakaukolan a nipalimay Anak na Too ed saray makasalanan, nipasak ed krus, tan onolid bilay diad kumatlon agew!
8 "Saramay bibii anunotan da no anto ray imbaga to.
9 "Kasabi ran nanlapud lobuk, imbalita ray amin a bengatla ed saray labinsakey a disipulo tan amin ya arum a kakaiba ra.
10 Saraman a bibii sikara di Maria Magdalena, Juana, tan Maria ya ina nen Santiago. Sikara tan saray arum a kakaiba ran bibii so angibalita na sarayam amin ed saray apostol.
11 Balet, abaloan na saray apostol a lurey so imbaga ra, tan ag da ra panisiaan.
12 Anggaman ontan, inmalagey tan binmatik a linmad lobuk si Pedro. Tinmakiling tan anengneng ton anggapoy arum a wadman no ag saramay sidal abel. Kanyan pinmawil ed abung a mankelaw ed agawa.
13 Diad saman lamlamang ya agew, duarad saray disipulo so manaakar a mamaarap ed Emaus, sakey a barion labinsakey a kilomitroy kaarawi tod Jerusalem.
14 Pantotongtongan da ray nipaakar ed amin ya agawa.
15 Leleg dan mantotongtong tan mantetepetan, sinmabiy Jesus tan akiolup ed sikara.
16 Balet singa asaniban iray mata ra, kanyan ag da abirbir.
17 Tinepet nen Jesus ed sikara, Anto ray pantotongtongan yo, legan yon manaakar? Tinmonda ra a maermen.
18 Inkuanto may sakey ed sikara a manngaray Cleopas, Sika labat angangkoy sangkailid Jerusalem ya ag mikabat ed saray agawad man nen imbeneg iran agew!
19 Anto ra tan? tepet to. Inmebat ira, Saray agawan nipaakar ed kinen Jesus a taga Nazaret, sakey a propitan makapanyari ed salita tan gawa diad matay Dios tan diad amin a katoowan.
20 Inerel na saray manonan papari tan saray manoley tayo, tan impasintinsiaan da a pateyen, insan da impasak ed krus.
21 Sikato pa ni met so inilaloan mi a mangilaban ed Israel! Aliwan satan labat, kumatlon agew la natan nanlapud inkagawa to ya.
22 Insan nikelawan kamid imbalita na pigaran bibii a kaiba mi. Kabkabwasan kono nen linma rad lobuk,
23 balet anggapo lad may bangkay. Sinmempet ira, tan imbalita ran wala ray pinmayawar ed sikaran anghil. Imbaga da ra may anghil ed sikara a mabilay si Jesus.
24 Linmay pigarad sikami ed lobuk, tan apaneknekan da a tua so imbalita na saramay bibii, balet ag da anengneng si Jesus.
25 Inkuanen Jesus ed sikara, Agaylay kakulangay panagnunot yo! Akin sirin et mairap kayon manisia ed amin ya imbaga da ray propita?
26 Ag ta nakaukolan a panirapan na Cristo ira yan amin kasakbayan a nagamuran toy mapagalang a kipapasen to?
27 Insan impaliwawa nen Jesus ed sikara yan asalitan nipaakar ed sikato diad Masanton Sulat, manlapud saray libro nen Moises ya anggad saray sulat na amin da ray propita.
28 Asingger la rad samay barion laen da tan impalikas nen Jesus a singa arawi niy laen to.
29 Balet pinokpokan dan ag la ontutuloy a kuanda, Mipundo ka la diad sikami, ta onseselek lay agew, insan onlalabi la ni met. Kanyan akipundod sikara.
30 Nen karongo rad lamisaan angalay tinapay, akisalamat ed Dios, pinipisag to, insan to inter ed sikara.
31 Alokasay mata ra tan sikatoy abirbir da, balet biglan naandipat.
32 Inkuandad sakey tan sakey, Kampega lan walay singa apoy a manliub ed puso ta, nen mitotongtong ed sikatad dalan tan ipapaliwawa toy Masanton Sulat.
33 Inmalagey iran tampol a pinmawil ed Jerusalem. Nalmo rad man a nantitipon iray labinsakey a disipulo tan saray arum a kaiba ra
34 tan inkuanda, Talagan inmolid bilay so Katawan! Nampanengneng ed kinen Simon!
35 Imbalita met na saramay duara so agawad dalan, tan say impakabirbir dad Katawan nen pinipisag toy tinapay.
36 Nen pantotongtongan da ya, biglan manalalagey si Jesus ed pegley da. Inkuantod sikara, Say kareenan komun so walad sikayo.
37 Diad kelaw tan takot da, abaloan dan anyani so nanengneng da.
38 Balet inkuantod sikara, Akin et napapagaan kayo? Akin et manduaruwa kayo ni?
39 Nengneng yo pa ra yay limak tan saray salik, pian napamintuaan yo a siak a dili ya. Diwit yo ak, pian manisia kayo, ta say anyani anggapoy laman tan pokel to, balet nanenengneng yon walad siak ira ya.
40 Kapangibaga to ya, impanengneng tod sikara iray lima tan sali to.
41 Nen ag ni ran siansia anisia lapud liket tan kelaw da, tinepet tod sikara, Wala diay nakan?
42 Initdan day sakey a tegteg na siran inkalut.
43 Inala to, tan kinan to a sankanengneng da.
44 Insan inkuantod sikara, Sikara yay sinalitak ed sikayo nen kaibiba ta kayo ni. Imbagak ed sikayon nepeg a nasumpal ya amin iray nisulat nipaakar ed siak diad Ganggan nen Moises, diad saray sulat da ray propita, tan diad saray Salmo.
45 Insan nilokasan toy muling da, pian natalusan day Masanton Sulat.
46 Inkuantod sikara, Onyay nisulat: nakaukolan a manirap so Cristo tan onolid bilay ed kumatlon agew,
47 tan diad ngaran to, say pagbabawi tan say kapirdona na saray kasalanan et nepeg a nipulong ed amin a bansa, manlapud Jerusalem.
48 Sikayoy tasi ed sarayan bengatla.
49 Tandaan yo ya! Ibakik ed sikayo so insipay Amak, balet ag kayo ni ontataynan ed siudad na Jerusalem, anggad ag kayo naitday pakayarin manlapud tawen.
50 Inyakar to rad satan ed paway na siudad. Kasabi rad Betania, intagey to ray lima to tan binindisionan to ra.
51 Nen bibindisionan to ra, tinaynan to ra tan niatagey ed tawen.
52 Inggalang da tan pinmawil iran magaygayaga ed Jerusalem.
53 Wala ra lawas ed Timplo a misalsalamat ed Dios.