1

¹ "Sikato yay Maung a Balitan nipaakar ed Jesu-Cristo, say Anak na Dios.

² "Ginmapo onung na insulat nen propita Isaias: Inkuay Dios, Niay managpulong ko. Sikatoy ibakik ya onona nen sika a mangiparaay dalanen mo.

³ "Walay toon mambabandod kalawakan, Iparaan yoy dalan na Katawan tan apiger yoy panakaran to!

⁴ "Kanyan si Juan linmad kalawakan a nambibinyag tan nampupulong. Inkuanto, Magbabawi kayod saray kasalanan yo tan mampabinyag kayo, et say Dios pirdonaen to kayo.

⁵ "Dinmadagon ondengel ed kinen Juan iray amin a taga Judea tan siudad na Jerusalem. Impapatwa ray kasalanan da, tan binibinyagan to ra ed Ilog na Jordan.

⁶ "Bagoy kamilyo so kawes nen Juan, tan katat so balkes to. Dorun tan dilo so impambibilay to.

⁷ "Inkuantod saray totoo, Walay manomtombuk ya onsoblay ed siak a lalon makapanyari nen siak, tan ag ak manepeg a mangokbar na sandalya to.

⁸ "Siak bibinyagan ta kayo ed danum, balet sikato binyagan to kayo ed Ispiritu Santo.

⁹ "Ag abayag, sinmabi si Jesus a nanlapud Nazaret, sakey a baley ed Galilea, tan bininyagan nen Juan ed Ilog na Jordan.

¹⁰ Kasakbit nen Jesus, anengneng ton tampol ya alokasay tawen tan say Ispritun singa malapati ya ondadapod sikato.

¹¹ Insan walay bosis a nanlapud tawen ya inkuanto, Sika so dilin Anak ko ya inararok; pakaliliketan ta ka.

¹² Kasumpal na sayan agawa, say Ispiritu pinaonla tod kalawakan si Jesus.

¹³ Nanayam diman ya apataploy agew tan legan tod man, tinutukso nen Satanas. Wala met irad may ayayep ya atap, balet nanlilingkur iray anghil ed sikato.

¹⁴ Nen apriso lay Juan, linmay Jesus ed Galilea tan nampupulong na Maung a Balitan nanlapud Dios.

¹⁵ Inkuanto, Sinmabi la so nigetar a panaon tan asingger lay Panarian na Dios! pansibkelan yo la ray kasalanan yo, tan manisia kayo lad Maung a Balita!

¹⁶ Nen aminsan a manaakar si Jesus ed gilig na Dayat na Galilea, anengneng to ray sanagin Simon tan Andres. Peles dan mansasabokul ed dayat, ta sumisigay ira.

¹⁷ Inkuanen Jesus ed sikara, Tombuk kayod siak, ta gawaen ta kayon sumisigay na too.

¹⁸ Tinaynan dan tampol iray iket da, tan akila rad sikato.

¹⁹ Kaakar toy daiset, anengneng to met iray sanagin Santiago tan Juan ya anak nen Zebedeo. Wala rad baloto ra tan ipaparaan da ray iket da.

²⁰ Tinawag nen Jesus iran tampol, kanyan tinaynan dad baloto so ama ra tan saray inopaan dan totoo, tan akila rad kinen Jesus.

²¹ Linma rad baley na Capernaum, et nen ontombuk ya Agew na Panagpainawa, ginapoan nen Jesus so nambangat ed sinagoga.

²² Mankelaw iray totoo a dinmengel ed sikato ta walay pakaoley ton nambangat ed sikara, tan aliwan singa saray iskriba.

²³ Kabebekta linmoob ed sinagoga so sakey a lakin inaponay maoges ya ispiritu,

²⁴ tan ineyaeyag to, Antoy pibabalian mod sikami, Jesus a taga Nazaret? Linma ka dian maneral ed sikami: Kabat ko no siopa ka: sika so Masanto na Dios!

²⁵ Ingganggan nen Jesus imay maoges ya ispiritu, Ag ka maingal! Ekal kad sikato!

²⁶ Samay maoges ya ispiritu pinatayegteg ton maung imay laki, inmingal na maksil, insan inmekal ed sikato.

²⁷ Agaylay pankelaw dan amin, kanyan nantetepetan ira, Anto ya kasi? Balo ya kasin bangat? Walay pakaoley to yan too a mangganggan ed saray maoges ya ispiritu, et oonuren da!

²⁸ Maples a kinmayat diad amin a pasen na Galilea so balitan nipaakar ed kinen Jesus.

²⁹ Kasiput dad sinagoga, tinmuloy iran tampol ed abung di Simon tan Andres. Kaiba ra met si Santiago tan si Juan.

³⁰ Akarokul so biin katolangan nen Simon, ta napepetang. Kanyan kasabi nen Jesus, imbaga ra yan tampol ed sikato.

³¹ Dinago nen Jesus ed dinokulan to, binembenan tod lima, insan inibaan ton binmangon. Nakal so petang to, tan nansirbid sikara.

³² Kaselek na agew, inyakar na saray totoo ed kinen Jesus iray amin a mansasakit tan saray inaaponan na saray dimonyo.

³³ Dinmagop iray amin ya ombaley ed arap na saman ya abung.

³⁴ Amayamay iray pinapaabig ton manliliknay nambabangil a sakit tan pinapaekal to ray dakerakel a dimonyo. Ag to pinapaesel iray dimonyo, lapud kabat da no siopay Jesus.

³⁵ Diad ontombuk ya agew, ambilonget ni nen binmangon si Jesus. Linmad sakey a mareen a pasen tan nampikasid man.

³⁶ Balet inanap nen Simon tan saray kakaiba to si Jesus.

³⁷ Nen nalmo ra inkuandad sikato, Anapen kay amin a totoo.

³⁸ Balet inmebat si Jesus, Onla ti met a mampulong ed saray kaliber-liber a pasen, ta sikato yay makasengeg na inakaran ko dia.

³⁹ Niliber toy intiron Galilea a nampupulong ed saray sinagoga tan nampapapaway na saray dimonyo.

⁴⁰ Walay sakey a lakin akating a linmad kinen Jesus, tinmalimukor ed arap to tan akikasi. Inkuanto, No labay mo, nayarian mo ak a paabigen.

⁴¹ Akasian nen Jesus kanyan inyonat toy lima to, diniwit to, tan inkuanto, Labay ko. Abig ka la!

⁴² Diad saman a bekta nakal so kating to tan inmabig.

⁴³ Pinaonlan tampol nen Jesus kayari ton

⁴⁴ binilin a maung, Ag mo yan balut ibabalitad anggan siopa. Lakad pari tan panengneng ka, insan ka mangibagat onung ed Ganggan nen Moises, pian napaneknekan ed balang sakey ya inmabig ka la.

⁴⁵ Linma la may laki, balet imbabalita tod amin a pasen so agawad sikato. Diad karakel na angibalitaan to, si Jesus ag la makaonlan maparontal ed anggan anton baley. Nanaayam la sirin ed saray pasen ya ag natotoowan, tan diman la dinadagoy totoon nanlapud amin a lugar.

2

¹ "Kalabas na pigaran agew, pinmawil si Jesus ed Capernaum. Kinmayat so balita a sinmempet ed abung.

² "Ontan lay karakel na dinmadago, kanyan napnoy totoo so anggad pati arapay abung. Nen mampupulong si Jesus ed sikara na nipaakar ed Maung a Balita,

³ "wala ray sinmabin totoo. Kaiba ray sakey a paralitikon nilibit na apatiran totoo.

⁴ "Balet lapud karakel na totoo, ag da niasingger ed kinen Jesus imay mansasakit. Kanyan binongawan day atep ya apetekan nen Jesus, insan da inyabeba may paralitikon walad dokulan.

⁵ "Anengneng nen Jesus so pananisia ra, kanyan inkuantod samay paralitiko, Anak ko, apirdona la ray kasalanan mo.

⁶ "Wala met diman iray akayorung a pigaran iskriba tan inkuandad kanunotan da,

⁷ "Akin et ontan so panagsalita to yan too? Sumpad Dios tay ibabaga to! Siopay makapirdona na kasalanan no ag say Dios labat?

⁸ "Amtan tampol nen Jesus so walad kanunotan da, kanyan inkuantod sikara, Akin et ontay walad kanunotan yo?

⁹ "Dinay lalon mainomay ya ibagad sayan paralitiko: say pangibagay, Apirdona ray kasalan mo, o say pangibagay Alagey ka, alam so dokulan mo tan manakar ka?

¹⁰ Paneknekan kod sikayo sirin a say Anak na Too et walay pakayari tod tapew na dalin a mamirdonay kasalanan. Inkuantod satan ed samay paralitiko,

¹¹ Kuankod sika, alagey ka, alam tay dokulan mo, tan sempet ka la!

¹² Naimatonan dan amin ya inmalagey, inala toy dokulan to, insan la linman tampol. Agaylay pankelaw na amin a totood man tan indayew day Dios. Ag kami ni akanengneng na onya! kuanda.

¹³ Pinmawil si Jesus ed gilig na Dayat na Galilea. Tinombuk na amayamay a totoo, tan binangatan to ra.

¹⁴ Nen manaakar si Jesus anengneng toy Levi ya akayorung ed opisina to. Sumisingil na buis si Levi ya anak nen Alfeo. Inkuanen Jesus ed sikato, Tombuk kad siak. Inmalagey si Levi tan akilad sikato.

¹⁵ Dakerakel met iray akilan sumisingil na buis tan saray makasalanan. Amayamay ed sikaray akirongo ed kinen Jesus tan saray disipulo to nen mangakan irad abung nen Levi.

¹⁶ Anengneng ya na pigaran iskriba a kabyangan na saray Pariseo, kanyan tinepet dad saray disipulo nen Jesus, Akin et mirorongod saray sumisingil na buis tan saray makasalanan?

¹⁷ Nadngel ira nen Jesus kanyan sikatoy inmebat, Aliwan saray maksil so laman da so mankaukolan na doktor, no ag ingen saray mansasakit. Ag ak dia linman manawag ed saray matonung, no ag ingen linma ak dian manawag ed saray makasalanan.

¹⁸ Aminsan, manaayuno ray Pariseo tan saray disipulo nen Juan a Managbinyag. Wala ray totoon linmad kinen Jesus tan tinepet da, Manaayuno ray disipulo nen Juan a Managbinyag; ontan met na saray disipulo da ray Pariseo. Balet akin et ag manaayuno ray disipulom?

¹⁹ Inmebat si Jesus, Napanayuno yo kasi ray mibabansal leleg a kaiba ra niy nubio? Ambegyan kaiba ra niy nubio, ag ira makapanayuno.

²⁰ Balet onsabiy agew ya ontaynan lay nubio; sikato lad satay panayuno ra.

²¹ Anggapoy mangisakab na balon abel ed daan a kawes. Ta no onyay gawaen to, samay balon abel ya insakab et lalon pabalegen to ni may botaw na daan a kawes.

²² Anggapo met so toon mangikargay balon alak ed pananginan a katat a dagdaan la. Ta no onyay gawaen to, say balon alak pilaten toy pananginan a katat, et nadarak so alak tan say pananginan. Kanyan say balon alak nepeg ya ikargad balon pananginan!

²³ Aminsan ya Agew na Panagpainawa, ondaralan ed katrigowan si Jesus tan saray disipulo to. Nen manaakar ira, nanaala ra may disipulo to na bungay trigo.

²⁴ Kanyan saray Pariseo inkuandad kinen Jesus, Nengneng moy gagawaen da ra tay disipulom. Sebel itan no Agew na Panagpainawa!

²⁵ Inmebat si Jesus, Ag yo ta nin balut abasa so ginawa nen David nen si Abiatar so Pangulon Pari? Nen si David tan saray kakaiba to et narasan ira tan anggapoy naakan da, linmoob irad abung na Dios tan kinan day tinapay ya imbagat ed Dios. Onung ed Ganggan, say pari labat so nayarin mangan na sayan tinapay, balet kinan nen David tan initdan to ni ra may kakaiba to.

²⁶

²⁷ Insan kuanen Jesus, Say Agew na Panagpainawa so niletneg a pankaabigay too; say too ag pinalsa a para Agew na Panagpainawa.

²⁸ Ontan sirin, say Anak na Too so Katawan na anggan Agew na Panagpainawa.

3

¹ "Nen pinmawil si Jesus ed sinagoga, walad may lakin aparalisis so sakey a lima to.

² "Wala ra met dimay totoon labay dan akusaen si Jesus, kanyan siniiim da no mantambal kasi ed Agew na Panagpainawa.

³ "Inkuanen Jesus ed samay lakin aparalisis so lima to, Gala diad arap.

⁴ "Insan to tinepet ed saray totoon wadman, Antoy nayarin gawaen no Agew na Panagpainawa, onung ed Ganggan? Say panggaway maung, o say panggaway maoges? Say panambut na bilay, o say pamatey ed sakey a too? Balet anggapoy eseesel da.

⁵ "Legan a nenengnengen nen Jesus iray totood kaliber-liber to, akapasnuk; balet nantaruk na ermen so pasnuk to, lapud kinaawet na puso ra. Inkuantod samay laki, Iyonat moy limam. Inyonat ton tuay lima to, tan inmabig ed saman a bekta.

⁶ "Pinmaway ira may Pariseo tan akitongtong iran tampol ed saray disipulo nen Herodes, tan nampapaknaan da a pateyen si Jesus.

⁷ "Linmad gilig na Dayat na Galilea si Jesus tan saray disipulo to. Amayamay iray tinmombuk ed sikara a taga Galilea; ontan met na saray taga Judea,

⁸ "Jerusalem, Idumea, pati saray taga nibaliw na Jordan tan kaliber-liber na Tiro tan Sidon. Dinmadago ra yan amin nen nadngelan da a dakerakel so gagawaen nen Jesus.

⁹ "Imbaga nen Jesus ed saray disipulo to a mangiparaan iray baloton loganan to, ta ompan narisgo lapud karakel na totoon onderesdes ed sikato.

¹⁰ Amayamay la ray pinapaabig to, kanyan amin da ray mansasakit nanseseksekan iran onasingger ed kinen Jesus, pian nadiwit da.

¹¹ Tan kapag si Jesus et nanengneng na saramay totoon inaaponan na maoges iran ispiritu, ondapa rad saliyan to tan iyingaingal da, Sika so Anak na Dios!

¹² Binilibilin to ra may maoges ya ispiritu ya ag dan balut ibabaga no siopa si Jesus.

¹³ Tinmakdang si Jesus ed nipokdul a pasen. Tinawag to ray labay ton kaiba, tan dinmago rad sikato.

¹⁴ Pinili tod sikaray labindua tan inngaran to ra na apostol. Pinili ta kayon kaibibak, kuanen Jesus. Ibaki ta kayon mampulong,

¹⁵ tan naitdan kayoy pakayarin mamaekal ed saray dimonyo.

¹⁶ Nia ray labinduan pinili to: si Simon ya inngaran nen Jesus na Pedro;

¹⁷ si Santiago tan si Juan ya anak ira nen Zebedeo (sikaray inngaran nen Jesus na BoanergesAnak na Karul so labay to yan ibaga);

¹⁸ di Andres, Felipe, Bartolome, Mateo, Tomas, Santiago ya anak nen Alfeo; si Tadeo, si Simon a Patriota,

¹⁹ tan si Judas Iscariote a nantraidor ed sikato.

²⁰ Nen sinmempet si Jesus ed abung, amayamay lamet iray atiptipon a totoo. Diad karakel da, ag naarap nen Jesus tan saray disipulo to so mangan.

²¹ Nen nadngelan ya na saray kakanayon to, labay da lan iyarawi lapud saray totoo et ibabaga ran nanaambagel.

²² Wala ray iskriban nanlapud Jerusalem a nankuan, Inaponan nen Beelzebul a prinsipi da ray dimonyo. Sikatoy mangiiter ed sayan too na pakayarin mamaekal ed saray dimonyo.

²³ Pinaasingger nen Jesus sirin iray totoo tan sinalita tod sikaray pigaran alimbawa. Inkuanto, Nayari kasin si Satanas et paekalen toy sikaton dili?

²⁴ No manlalaban iray totood sakey a nanarian, ag mambayag itan a nanarian.

²⁵ No manlalaban iray kabyangan na sakey a pamilya, naderal itan a pamilya.

²⁶ Ontan met sirin a no si Satanas et labanan toy sikaton dili, tan saray ooleyan to et manlalaban ira, asingger lan mangangga so nanarian to.

²⁷ Anggapoy makaloob a mantakew ed abung na toon mabiskeg, likud no baluren to ni kasakbayan to a takewan. No abalur to la, sikato labat so pakaloob tod abung a mantakew.

²⁸ Tandaan yo ya! Napirdonay amin a kasalanan na too tan amin a maoges a lalabiren to.

²⁹ Balet ag balut napirdona so toon manlabir na bengatlan sumpad Ispiritu Santo, ta nanggaway andianggaan a kasalanan.

³⁰ Imbaga ya nen Jesus lapud kuanda ray arum, Si Jesus inaponay maoges ya ispiritu.

³¹ Sinmabiy ina tan saray lalakin agagi nen Jesus. Wala rad paway na abung, kanyan impatawag da.

³² Si Jesus et walad pegley na amayamay a totoon manyodyorung ed loob na abung. Inkuandad sikato, Wadmay inam tan saray agagim a lalaki a manaalagar ed sika diad paway. Patatawag da ka.

³³ Inmebat si Jesus, Siopay inak? Siopa ray agagik a lalaki?

³⁴ Insan to ninengneng ira may akayorung ed kaliber-liber to tan inkuanto, Sikara ya so inak tan saray agagik a lalaki!

³⁵ Ta siopamay manumpal na linaway Dios, sikatoy agik, sikatoy inak.

4

¹ "Nambangat lamet si Jesus ed gilig na Dayat na Galilea. Diad karakel na totoon dinmadagod sikato, linmogan ed sakey a baloton walad tapew na danum. Saray totoo balet, nandengel irad sakbit, diad gilig na danum.

² "Amayamay iray imbangat tod sikara ya imparalan ed alimbawa. Diad pambabangat to inkuantod sikara:

³ "Dengel kayo! Walay sakey a dumaralus a linman nampasek.

⁴ "Nen mansisibwag, wala ray ilik a dinmapod gilig na dalan. Sinmabi ray manok ya atap tan tinotoktok da ra.

⁵ "Saray arum ya ilik dinmapod dalin a batoy dalem to. Lapud kinaraiset tan kinaimpis na dalin, tinmubo ran tampol.

⁶ "Balet nen atagey lay agew, nalnes tan amagaan ira, lapud ataptapew iray lamut da.

⁷ "Saray arum ya ilik dinmapod dalin a tutuboay dikarikan masabit. Nen baleg la ra may dikarikan masabit, pinatey da ra may tinmubon ilik; kanyan ag ira akapambunga.

⁸ "Wala met iray ilik a dinmapod mataban dalin. Tinmubo, binmaleg, tan nambunga ra. Wala ray nambungay santatalomplon bokel so balang dawa, wala ray sananemaplo, tan wala ni ra ingey sanlasus.

⁹ "Insan kuanen Jesus, Dengel kayo sirin, sikayo ran walay layag!

¹⁰ Nen bukbukor la nen Jesus sininggeran na saray labinduan disipulo tan saray pigarad saramay nandengel, tan kinerew dan ipaliwawa to ray alimbawa.

¹¹ Inkuanen Jesus, Niiter ed sikayoy pakaamta ed saray maamut a bengatlan nipaakar ed Panariay Dios, balet saray arum narerengel da labat ed panamegley na alimbawa.

¹² Kanyan, Nengneng la ra man a nengneng, ag da met lamlamang nanengneng; dengel la ra man a dengel, ag da met lamlamang natalusan; ta ompan lagi ompawil irad Dios, et pirdonaen to ra.

¹³ Inkuanen Jesus ed sikara: Ag yo ta natalusan yan alimbawa? Panon sirin so pakatalus yod saray arum ni ran alimbawa ey?

¹⁴ Say isisibwag to may dumaralus say salitay Dios.

¹⁵ Saramay ilik a dinmapod gilig na dalan aliling da ray totoon kadngel dad salitay Dios, laen iran tampol nen Satanas ya ekalen imay salitan nadngel da.

¹⁶ Saray arum a totoo aliling da ray may ilik a dinmapod dalin a batoy dalem to. Kadngel dad salita, awaten dan sililiket.

¹⁷ Balet ag onlamut; kanyan ag mansiansiad puso ra. Kanyan no onsabi lay kairapan o sikara lay napasegsegang makasengeg ed salitay Dios, bigla la ran ombetel.

¹⁸ Saray arum a totoo aliling da ra may ilik a dinmapod tutuboay dikarikan masabit. Dengelen dan tuay salita,

¹⁹ balet deralen ira na saray kapagaan na panagbilay, say inkaagom ed kayamanan, tan say alablabas a pampirawat ed arum ni ran bengatla; kanyan ag ira mambunga.

²⁰ Balet saray arum a totoo aliling da ra may ilik a dinmapod mataban dalin. Dengelen day salitay Dios, awaten da tan mambunga ra. Wala ray mambungay santatalomplo, wala ray sananemaplo, tan wala ni ra ingey sanlalasus.

²¹ Intuloy nen Jesus so nansalita. Inkuanto, No say lamparaan et selselan, sakuban kasi na timba o iyan kasid silong na katri? Ag kasi itapew ed panangipatoonan?

²² Anggapoy akaamut ya ag ompaway, tan anggapoy asakuban ya ag ombawag.

²³ Dengel kayo sirin, sikayo ran walay layag!

²⁴ Insan inkuantod sikara, Talusan yon maung so narerengel yo. No panoy panukat yod arum a totoo, ontan met so panukat na Dios ed sikayolalon mapeget ni ingen.

²⁵ Say toon wala lay bengatlad sikato, naitdan ni; balet say anggapoy bengatlad sikato, naala so anggan say dagdaiset a walan bengatlad sikato.

²⁶ Intuloy nen Jesus so nampaliwawa: Say Panariay Dios aliling toy sakey a toon mansisibwag na ilik ed dalin to.

²⁷ Kasumpal to, naogip no labi tan ombangon no agew. Saray ilik balet, ontutubo tan ombabaleg ira, ya ag to amta no panon so itutubo tan ibabaleg da.

²⁸ Say dalin so mamapabaleg tan mamapabunga: ontubon onaan, mambolung, tan diad kaonuran, mambunga.

²⁹ No tinmakken la ray bunga, samay nantanem anien to la ra, ta asabi lay panagani.

³⁰ Tinepet nen Jesus, Antoy pangiparaan tayod Panariay Dios? Anton alimbawa so mangipalinew?

³¹ Say Panariay Dios aliling toy bokel na mustasa, a sankamelagan a bokel diad tapew na dalin.

³² Balet no nitanem la, ombaleg tan magmaliw a sankabalegan ed saray tantanaman. Mansanga na masalsalompapak, tan nayarin panobungan na saray manok ed tagey.

³³ Onyay impanpupulong nen Jesus ed salitay Dios, diad panamegley na amayamay ya alimbawa. No kaonungay nayarian dan talusan, ontan met so imbabangat tod sikara.

³⁴ Ag to nampulong no ag imparalan ed alimbawa. Balet no bukbukor to la tan saray disipulo to, ipaliwawa ton amin ed sikara.

³⁵ Nen onlalabi la, diad saman lamlamang ya agew, inkuanen Jesus ed saray disipulo to, Ombaliw itayo.

³⁶ Tinaynan da sirin ira may totoo tan linmogan irad baloton kawalaan la nen Jesus, insan ira binmaliw. Wala met iray baloton kabansag da.

³⁷ Kabebekta, sinmabi so maksil a bagyo. Lapud saray daluyon ya onsisipwak ed baloto, ngalngali la napanoy danum.

³⁸ Akadanganan a naogip si Jesus, diad bandad samput na baloto. Niliing na saray disipulo tan inkuanda, Maistro, anggapo labat so pagpagam? Onlelereg itayo la!

³⁹ Binmangon si Jesus tan ingganggan to may maksil a bagyo, Tonda ka! Insan kuantod saray daluyon, Deen kayo! Tinmondan tuay bagyo tan dinmeen a maung so dayat.

⁴⁰ Kayari to man, kuanen Jesus ed sikara, Akin et agaylay takot yo? Anggapo ta niy pananisia yo?

⁴¹ Asabian iray balbaleg a takot tan inkuandad sakey tan sakey, Siopa kasi yan too, a pati say dagem tan saray daluyon et ontotoluk irad sikato?

5

¹ "Nen sinmabi rad biek na dayat, sinmamar irad dalin da ray Geraseno.

² "Kaepas nen Jesus ed baloto, inabet a tampol na sakey a lakin nanlapud saray inongib a lobuk. Inaponay ispiritun maoges yan laki,

³ "tan manaayam ed saray inongib a lobuk. Anggapoy makarel ed sikato,

⁴ "ta amimpiga-piga da lan binalur iray lima tan saray sali to, balet kapag baluren da sarasarag ton pulpultoten so golung-golung tan pangpangen iray balatyang ed saray sali to. Diad kinabiskeg to anggapoy toon makapangipuger ed sikato.

⁵ "Labi tan agew so panaakar-akar ton maneeyageyag ed saray lobuk tan diad nipokpokdul iran pasen. Susugat-sugaten to ni na bato so laman ton dili.

⁶ "Arawi niy kawalaan to, anengneng to lay Jesus. Mambabtik a dinmago tan nantalimukor ed arap nen Jesus,

⁷ "insan to iningaingal, Jesus, Anak na Sankatageyan a Dios, antoy pibabalim ed siak? Diad ngaray Dios, ipangasim ta ag mo ak papairapen!

⁸ "(Imbaga to ya lapud inkuanen Jesus ed sikato, Maoges ya ispiritu, ekal kad sayan too!)

⁹ "Tinepet nen Jesus, Antoy ngaran mo? Say ngaran ko Amayamay, ta dakel kami, inkuanto.

¹⁰ Insan akikasid kinen Jesus ya ag to komun paalisen ed saman a pasen ira may ispiritun maoges.

¹¹ Diad asingger diman, wala ray amayamay a baboy a manaalibok ed gilig na palandey.

¹² Saramay ispiritu akikasi rad kinen Jesus. Inkuanda, Ibaki mo kamin onloob ed saramay baboy.

¹³ Inabuloyan to ra, kanyan pinmaway ira may ispiritun maoges ed samay laki tan linmoob irad saramay baboy. Amin da ra may baboysakey a duan liboy bilang dabinmatik irad pandel, naplag irad dayat tan nalner ira.

¹⁴ Binmabatik ira may mankokomponi na saray baboy tan imbabalita rad baley tan diad saray bario so agawa. Kanyan dinmadago ray totoo, ta nengnengen da no antoy agawa.

¹⁵ Kaasingger dad kinen Jesus, anengneng da may lakin inaponan nen saman na saray dimonyo. Wadman a manyodyorung, akakawes la, tan duga lay kalakal to. Diad impakanengneng da, ataktakot ira.

¹⁶ Saramay akaimaton tinongtong dad saray dinmadagon totoo no antoy agawad samay lakin inaponan na saray dimonyo, tan no antoy agawad saramay baboy.

¹⁷ Kanyan kinerew dad kinen Jesus ya ontaynan lad lugar da.

¹⁸ Nen onlologan lay Jesus ed baloto, samay toon inaponan na saray dimonyo kinerew ton mila,

¹⁹ balet ag inabuloyan nen Jesus. Inkuanto ingen, Sempet ka lad abung, tan ibagam ed pamilyam tan saray kakanayon mo ray amin a ginaway Katawan ed sika lapud panangasi to.

²⁰ Sinmempet la may too tan imababaga tod Decapolis ya amin iray ginawa nen Jesus ed sikato; tan mankelaw iray amin ya akadngel.

²¹ Binmaliw lamet si Jesus ed biek na dayat, tan amayamay iray totoon dinmadagod sikato.

²² Wala met so dinmagon sakey a toon manngaray Jairo, sakey ya opisyal na sinagogad man. Kasabi to, dinmakmomod arap nen Jesus

²³ tan akikasi, Ompapatey so anak kon manmarmarikit. Mila ka kari, ta itapew mo labat so limam ed sikato, et onabig tao mambilay!

²⁴ Akilan tuay Jesus ed sikato. Dakerakel met iray totoon tinmombuk tan nantotolakan iran onsingger ed kinen Jesus.

²⁵ Walay sakey a biin labinduay taon lan maniirap lapud alablabas a pandadala to.

²⁶ Amayamay lay nampapatambalan ton doktor tan agastos to lan amin so kuarta to, balet ag onaabig no ag ingen lalon onloloor so sakit to.

²⁷ Nadngelan toy ibabaga ray totoo nipaakar ed kinen Jesus, kanyan akiletletan ya anggad impakaasingger to. Diniwit toy kawes nen Jesus,

²⁸ ta kuantod sikaton dili, No nadiwit ko labat so kawes nen Jesus, onabig ak la.

²⁹ Tinmondan tampol so pandadala to, tan alikas tod laman to ya inmabig la.

³⁰ Diad saman met a bekta, alikna nen Jesus a walay pakayarin pinmaway ed sikato, kanyan inarap to ray walad nibeneg to tan inkuanto, Siopay aniwit ed siak?

³¹ Inmebat iray disipulo to, Anta sankanengneng mon deresdesen kay dakerakel a totoo, tepeten mo no siopay aniwit ed sika?

³² Intuloy nen Jesus so pannenengneng tod kaliber-liber to, diad panaanap to no siopay nanggawa.

³³ Samay bii amta toy agawa, kanyan manggiwgiw ed takot to. Dinmagon nantalimukor ed arap nen Jesus, tan impatwa ton amin so agawa ed sikato.

³⁴ Inkuanen Jesus, Anak ko, say pananisiam so amaabig ed sika. Onla kan mareen lay kalakal mo, tan ag la ompawil so sakit mo.

³⁵ Mansasalita niy Jesus nen pigaran totooy sinmabi a nanlapud abung nen Jairo. Inatey lay anak mo, kuanda, akin et aabalaen mo niy Maistro?

³⁶ Balet ag inimano nen Jesus so imbaga ra. Inkuan to ingen ed kinen Jairo, Ag ka natatakot; pabiskeg moy linawam.

³⁷ Anggapoy inabuloyan nen Jesus a milad sikato no ag si Pedro tan saray sanagin Santiago tan Juan labat.

³⁸ Nen sinmabi rad abung nen Jairo, anengneng nen Jesus a magolo-golo ray totoo. Wala ray mannangnangis tan manogogaog.

³⁹ Linmoob ed abung tan inkuantod saray totoo, Akin et magologolo kayo? Akin et mannangnangis kayo? Ag inatey so ogaw; nanaogip labat!

⁴⁰ Inelek-elekan da labat si Jesus. Pinapaway to ran amin, likud ed saray ateng na ogaw tan saramay taloran disipulo, insan linma rad kuarton kawalaay ogaw.

⁴¹ Binembenan tod lima tan inkuanto, Talitha, koum, a say labay ton ibaga, Ining, ibabagak ed sika, bangon ka!

⁴² Binmangon a tampol imay ogaw, a mantaoy labindua, tan nanakar. Ontan lay pankelaw dan amin.

⁴³ Impurpurek nen Jesus ya anggapoy pangibagaan dan balut na sayan agawa. Insan kuanto, Itdan yoy kanen to.

6

¹ "Tinaynan nen Jesus iman a pasen, tan pinmawil ed baley to a kaolup to ray disipulo to.

² "Kasabiy Agew na Panagpainawa, ginapoan toy nambangat ed sinagoga. Amayamay ed saray totoon wadman so mankelaw nen sikatoy nadngel da. Inkuanda, Iner kasiy angalaan to yan too na saraya? Nanasulan to kasi na onya lan kakabatan? Panoy pakagawa toy onya la ran milagro?

³ "Aliwa kasin sikato ya may karpintiro, ya anak nen Maria, tan sikatoy agi di Santiago, Jose, Judas, tan Simon? Ag ta manaayam ira diay agagi ton bibii? Sikatoy ag da sirin sinisia.

⁴ "Inkuanen Jesus ed sikara, Gagalangen na karaklan so sakey a propita, balet ag gagalangen na saray kabaleyan to kakanayon to tan anggan say dilin pamilya to.

⁵ "Kanyan ag to akagawad man na milagro. Anggaman ontan, intatapew toy lima tod pigaran mansasakit tan pinapaabig to ra.

⁶ "Mankelaw a maung lapud ag da panisiad sikato. Linman nambabangat si Jesus ed kaliber-liber iran bariod man.

⁷ "Tinawag to ray labinduan disipulo tan imbaki to ran sanderwa. Kasakbayan to ran imbaki, initdan to ray pakayarin mamaekal na saray maoges ya ispiritu

⁸ "tan binilin to ra, Ag kayo manaawit na antokaman diad pampulong yo, likud labat ed baston. Ag kayo anggan manaawit na tinapay, bayung, o kuarta.

⁹ "Nayarin mansandalya kayo, tan duga lay sakey a kawes yo.

¹⁰ Imbaga to nid sikara, Manayam kid abung a pamatuloyan dad sikayo, anggad ag yo isiput ed saman a baley.

¹¹ No onsabi kayod pasen ya anggapoy toon mangawat o ondengel ed sikayo, taynan kid man tan pokpok yoy dabuk ed saray sali yo, a tanda na maoges a ginawa ra.

¹² Linma sirin iray labindua a nampulong na pampatauli da ray totoo ed saray kasalanan da.

¹³ Dakel iray pinapaekal dan dimonyo ed saray totoon inaaponan. Dakel met iray mansasakit a pinopoyukan day larak, tan pinapaabig da ra.

¹⁴ Nadngelan nen Ari Herodes ira yan amin ya agawgawa, lapud bantug lay Jesus. Wala ray totoon inkuanda, Inmolin binmilay si Juan a Managbinyag! Sikaton makapanggagawa na ontan la ran milagro.

¹⁵ Inkuan met na saray arum, Si Elias ya. Wala ni ra ingey mangibabaga, Sakey yan propita, a singa saray propita nen saman.

¹⁶ Nen nadngel ya nen Herodes, inkuanto, Si Juan yan impapotulan koy olo. Inmolid bilay!

¹⁷ Si Herodes so amaerel ed kinen Juan, insan to impaipriso. Ginawa to ya lapud kinen Herodias ya inamung to, anggaman ya asaway agi ton si Felipe.

¹⁸ Ta amimpiga-pigan imbaga nen Juan ed kinen Herodes, Sumpad ganggan so pangyaamung mod asaway agim!

¹⁹ Kanyan ansakit so linawa nen Herodias ed kinen Juan. Labay to ni ingen a papatey, balet ag to ya nagawaan lapud kinen Herodes.

²⁰ Antakot nen Herodes si Juan, ta amta to a maung tan masanton too, kanyan iyaagel to. Labalabay ton dengelen si Juan, anggaman a saray ibabaga to et ag makapareen na isip to.

²¹ Sinmabin siansiay pankanawnawa nen Herodias nen nantaryay Herodes ed inkianak to. Inimbitaan nen Herodes iray mambebembey ambelat iran betang ed gobirno, saray opisyal da ray sondalo, tan saray manonan totood Galilea.

²² Namparontal so marikit ya anak nen Herodias tan sinmayaw. Alay liket nen Herodes tan saray sangkaili to diad impambantay da. Kanyan inkuan na arid samay marikit, Kerew kad siak na antokaman a labay mo et iter kod sika.

²³ Sinambaan to nin inkuan, Iter kon iter ed sikay kerewen mo, anggan say kapaldua na nanarian ko!

²⁴ Pinmaway natan imay marikit tan intepet tod ina to, Antoy kerewen ko? Say olo nen Juan a Managbinyag, ebat nen ina to.

²⁵ Amawil a tampol imay marikit ed ari, insan inkuanto, Labay ko komun a diad sayan bekta, iter yod siak a walad bandihado so olo nen Juan a Managbinyag!

²⁶ Naermenan a maung so ari, balet ag to nayarian a pabaingan imay marikit lapud walay samban ag to nabenegan ed arap na saray sangkaili to.

²⁷ Kanyan angigganggan na sakey a guardian mangalay olo nen Juan. Linmad prisowan imay guardia tan pinutolan toy olo si Juan.

²⁸ Pinmawil ya awit toy olon akaiyan ed bandihado, insan to inyawat ed samay marikit. Say marikit ed satan inter tod kinen ina to.

²⁹ Nen akabatan ya na saray disipulo nen Juan, nila ran inala so bangkay to tan impompon da.

³⁰ Pinmawil iray apostol ed kinen Jesus tan insalaysay dad sikatoy amin a ginagawa tan imbabangat da.

³¹ Diad gaway karakel na totoon onsasabi tan onsisiput, ag naarap nen Jesus tan saray disipulo to so mangan. Kanyan kuantod sikara, Onla tayod sakey a pasen a pakapambukbukoran tayo, ta pian makapampainawa kayoy daiset.

³² Nambaloto ran linmad sakey a pasen ya ag natotoowan.

³³ Anggaman ontan, dakel iray akaimanod intaynan da tan abirbir da ra. Kanyan saray totoon nanlapud amin a baley mambabtik iran linmad lugar ya arapen nen Jesus tan saray disipulo to, tan akaona ni ran sinmabid man.

³⁴ Kasakbit nen Jesus, anengneng toy dakerakel a totoo. Kaskasian to ra, ta singa ra karniron anggapoy pastol. Binangatan to ra sirin na nambabangil a bengatla.

³⁵ Nen onngangarem la, inasinggeray disipulo to tan inkuanda, Ag natotoowan yan pasen, insan onseselek lay agew ni met.

³⁶ Ibakim la ray totoo a manaliw na kanen da diad kaliber-liber iran bario tan baley.

³⁷ Inmebat si Jesus, Sikayo ingey mangiter na kanen da. Say labay mon ibaga, kuanda, onla kamin manaliw na tinapay a mambili na duan lasus a dinario ya iter min kanen da?

³⁸ Pigaray awit yon tinapay? Lakayo pa ta nengneng yo, inkuantod sikara. Nen anengneng da inkuanda, Walay limaran tinapay tan duaran sira.

³⁹ Ingganggan nen Jesus iray disipulo to a pantitiponen ya agrupo-grupo tan payorungen dad karikaan iray amin a totoo.

⁴⁰ Kanyan amongkumongkug ya inmiirung iray totoo. Wala ray grupon sanlalasus, wala met iray sanlilimamplo.

⁴¹ Insan inala nen Jesus ira may limaran tinapay tan duaran sira, tinmangay ed tawen, tan akisalamat ed Dios. Pinipisag to ra may tinapay tan inter to rad saray disipulo to, ta ibunog dad saray totoo. Ontan met, inaapag tod sikaran amin ira may duaran sira.

⁴² Angan iran amin tan napsel ira.

⁴³ Nen tinipon da ray disipulo so kera-keran tinapay tan sira, napnoy labinduan tiklis.

⁴⁴ Diad saray angan, liman libo la ray lalaki.

⁴⁵ Pinalogan a tampol nen Jesus ed baloto iray disipulo to tan pinaona to ran binmaliw ed Betsaida, legan ton pasisiputen iray totoo.

⁴⁶ Nen apasiput to la ray disipulo to, linmad nipokdul a pasen tan nampikasi.

⁴⁷ Nen labi la, wala nid pegley na dayat so baloton niloganan da ra may disipulo, balet bukbukor nen Jesus ed sakbit.

⁴⁸ Anengneng ton naiirapan a mansasakay iray disipulo to, ta susubaen day dagem. Nen palbangon la, tinombuk ira nen Jesus a nanakar ed tapew na danum. Labsanan to ra lawari,

⁴⁹ balet anengneng dan manaakar ed tapew na danum. Abaloan dan anyani, kanyan inmeyag irad takot da.

⁵⁰ Ataktakot iran amin diad impakanengneng dad sikato. Balet tampol ya inkuantod sikara, Pakpel yoy loob yo, ta siak ya. Ag kayo natatakok!

⁵¹ Akilogan ed kawalaan dan baloto. Kabebekta, tinmonda may maksil a dagem. Nikelawan a maung iray disipulo,

⁵² ta ag da atalusay kabaliksan na impamarakel nen Jesus na tinapay; ag natokur na kakabatan da.

⁵³ Binmaliw irad dayat tan kasakbti dad Genesaret, diman da insarsar so baloto.

⁵⁴ Abirbir na totoon tampol si Jesus.

⁵⁵ Kanyan binmatik iran linma ed saray kaliber-liber a pasen, tan intombuk dad kinen Jesus iray ag makayarin walad dokulan diad inerman a narengelan dan kawalaan to.

⁵⁶ Diad inerman a nila ton bario, baley, o kaalogan, saray totoo inawit dad plasa ray mansasakit da, tan akikasi rad sikaton pariwit toy anggan saloy na kawes to. Inmabig iray amin ya akariwit.

7

¹ "Nantitipon ed kawalaan nen Jesus iray Pariseo tan pigaran iskriba a nanlapud Jerusalem.

² "Naimano ra a pigarad saray disipulo to so mangakan a marotak so lima ra, lapud ag ira nanoras onung ed kaogaliyan na saray Judio.

³ "Ta amin da ray Judio, lautlad saray Pariseo, et ag ira mangan no ag ni ra nanoras na lima, ra onung ed kaogaliyan ya impabangon na saray lalaki ra.

⁴ "No manlapu ra tindaan, ag ira mangan na antokaman no ag da ni naorasan. Dakdakel ni so abangonan dan bangat na lalaki ra, a singa say panagoras na saray losur, boyung, gansan yaung, tan dokulan.

⁵ "Kanyan tinepet na saray Pariseo tan saray iskriba ed kinen Jesus, Akin et ag oonuren na saray disipulom so bangat ya impabangon da ray lalaki tayo, ta mangakan iran ag ni nanoras na lima ra?

⁶ "Inmebat si Jesus ed sikara, Duga so imbaga nen Isaias nipaakar ed sikayo. Mansimpisimpitan kayo, onung na insulat to: Inkuay Dios Gagalangen ak na sarayan totoo diad panamegley na bibil da; balet diad tuay tua, arawrawid siak so puso ra.

⁷ "Kanyan say pangidadayew dad siak anggapoy kana, ta anggan saray ganggay too gagawaen dan ganggay Dios ira!

⁸ "Insan kuanen Jesus, Palpaolyan yoy ganggan na Dios, oonuren yo balet so tinawir yo ran bangat na too.

⁹ "Intuloy nen Jesus, Masilib kayon mangipaliis na ganggay Dios, pian naonur yoy bangat yon dili.

¹⁰ Singa satan, imbaga nen Moises, Igalang moy amam tan inam, tan, Nakaukolan ya ompatey so siopaman a mampaoges ed ama o ina to.

¹¹ Balet ibabangat yo a no ikuay sakey a too ed ama to odino ina to, Antokaman a nayarian kon itulong ed sikayo so Korban (kabaliksan to yay innunot ed Dios),

¹² ag to la nakaukolan so ontulong ed ama odino ina to.

¹³ Ditan la nanengneng a gagawaen yon andikabaliksan so salitay Dios lapud bangat ya ipapatawir yod amin. Tan amayamay ni ray onyan gagawaen yo.

¹⁴ Pinaasingger lamet nen Jesus iray totoo tan inkuantod sikara, Dengel kayon amin tan talusan yoy ibagak.

¹⁵ Aliwan say onloob no ag ingen say ompaway ed too so mandotak ed sikato.

¹⁶

¹⁷ Tinaynan nen Jesus iray totoo tan nen akaloob lad abung, tinepet da ray disipulo to so nipaakar ed sayan alimbawa.

¹⁸ Inkuanen Jesus ed sikara, Anggapo ta niy pakatalus yo met? Ag yo ta amta ya ag mandotak ed too so kakanen to,

¹⁹ ta ag onlad puso to, no ag ingen diad eges to, insan ompaway met lamlamang? (Diad impangibaga nen Jesus na onya, impakabat to a nayarin kanen so antokaman a nakan.)

²⁰ Impatombuk to ni, Say mandotak ed too say ompaway a manlapud sikato.

²¹ Ta manlapud otel na pusoy too iray maoges a kanunotan, pilalawanan, panagtakew, panagpatey,

²² pikakaloguran, panagagom, tan amin iray kaogsan a singa panagsaol, panaggaway karumsisan, panagimon, panagpaoges ed kaparan too, panagpaatagey na linawa, kaambagelan.

²³ Diad pusoy too so panlalapwan da ra yan amin, tan sikaray mandotak ed sikato.

²⁴ Tinmaynan diman si Jesus tan linmad pasen ya asingger ed saray siudad na Tiro tan Sidon. Akipundod man ed sakey ya abung. Anggaman a labay ton anggapo komuy makaamtan wadman, siansian akabatay totoo.

²⁵ Ta say insabi to so abalitaan na sakey ya ina a walay anak ton ogaw a biin inaponay maoges ya ispiritu. Dinago ton tampol si Jesus tan dinmakmomod arap to.

²⁶ Griega yan bii tan nianak ed Fenicia, sakey baley ed Siria. Akikasid kinen Jesus a paekalen to la komun so dimonyon walad anak to.

²⁷ Imbaga nen Jesus ed sikato, Paolyan mo pa nin napesel iray ogogaw, ta ag nepeg ya alaen so kakanen da insan ibontuk ed saray aso.

²⁸ Inmebat may bii, Tua tan Katawan, balet saray ason walad silong na lamisaan mangakan ira na ibung da ray ogogaw.

²⁹ Kanyan inkuanen Jesus ed sikato, Lapud sayan imbalikas mo, nayarian mo lay onsempet. Pinmaway lay dimonyo ed anak mo.

³⁰ Sinmempet imay bii tan asabian toy anak ton mareereen ya akarokul, ta tinaynanan lay dimonyo.

³¹ Diad impawil nen Jesus ed Dayat na Galilea a nanlapud lugar na Tiro, dinmalan ed Sidon tan Decapolis.

³² Inyasingger na pigaran totoo ed kinen Jesus so sakey a toon telek tan ataata, tan akikasi rad sikato ya itapew toy lima tod saman a laki.

³³ Inyarawi nen Jesus ed karaklan imay laki. Nen siksikara la dua, inseksek to ray tamoro tod saray layag to may telek. Insan linmukda tan diniwit toy dila na laki.

³⁴ Tinmangay si Jesus ed tawen, inmingas na araldalem, tan inkuanto, Ephphatha, a kabaliksan toy, Lokas ka!

³⁵ Akadngel a tampol nakal so panaataata to, tan akapansalitay maptek.

³⁶ Binilin nen Jesus iray totoon ag da ya totongtongen ed siopaman, balet no panoy impangisebel to ed sikara, diman linmoor so impangibawag da.

³⁷ Ontan lay pankelaw da ray akadngel ed sayan balita tan inkuanda, Agaylay abig na amin a gagawaen to! Iitdan toy pakadngel iray telek, tan pakasalita iray emel!

8

¹ "Kalabas na pigaran agew, nantitipon lamet iray dakerakel a totoo. Lapud anggapoy naakan da, tinawag nen Jesus iray disipulo to tan inkuantod sikara,

² "Nakakasian ko ra yan totoo, ta taloy agew lan kaibak ira et anggapoy naakan da.

³ "No pasempeten ko ran narasan, naelew irad dalan. Wala pa ni met iray nanlapud arawi.

⁴ "Inkuanda ray disipulo, Iner ed sayan kalawakan so napangalaan na ondugan ipakan ed ontan lan karakel na totoo?

⁵ "Pigaray tinapay yo? tinepet nen Jesus ed sikara. Pitora, ebat da.

⁶ "Si Jesus pinayorung tod dalin iray totoo. Inala to may pitoran tinapay, akisalamat ed Dios, pinipisag to ra, insan to ra inter ed saray disipulo to, ta ibunog da. Imbunog da ra sirin ed saray totoo.

⁷ "Wala met so pigaran ankelag a sira ra. Akisalamat lamet ed Dios si Jesus, insan to met impaibunog ed saray totoo ira may sira.

⁸ "Angan iran amin tan napsel ira. Nen tinipon day kera-keran tinapay, napnoy pitoran tiklis.

⁹ "Sakey ya apat a libon totoo ray angan. Pinasempet to la ra nen Jesus.

¹⁰ Sikato balet linmogan ed baloto a kaiba to ray disipulo to, tan linma rad lugar a tatawagey Dalmanuta.

¹¹ Wala ray Pariseo a sinmingger ed kinen Jesus tan akisangsangan irad sikato. Labay dan suboken, kanyan kinerew dan manggaway sakey a milagron manlapud tawen.

¹² Inmingas na araldalem si Jesus, insan inkuanto, Akin et mananap na milagro ray totood sayan panaon? Ibagak ed sikayo, ag ira naitdan na antokaman a milagro!

¹³ Tinaynan to ray totoo, linmogan ed baloto, insan binmaliw.

¹⁴ Alingwanan na saray disipulo so nambalon na tinapay. Saksakey so tinapay a walad baloto.

¹⁵ Binilin nen Jesus iray disipulo to, Manasikaso kayo! Alwaran yoy libadura na saray Pariseo tan say libadura nen Herodes.

¹⁶ Nantotongtongan ya na saray disipulo. Inkuanda, Imbaga to ya, ta ag itayo nambalon na tinapay.

¹⁷ Amta nen Jesus so pantotongtongan da, kanyan tinepet to, Akin et pantotongtongan yoy ag yo impanbalon na tinapay? Ag yo ni natebek o natalusan? Inmawet ta so puso yo?

¹⁸ Walay mata yo, ag kayo makanengneng? Walay layag yo, ag kayo makadngel? Alingwanan yo ta la

¹⁹ may impampipisag koy limaran tinapay a kinan na liman libon totoo? Pigaran tiklis so kera-keran atipon yod saman? Labindua, inkuanda.

²⁰ Nen pinipisag ko may pitoran tinapay a kinan na apat a libon totoo, pigaran tiklis so atipon yod saman? tinepet tod sikara. Pitora, kuanda.

²¹ Et ag yo ni natalusan? tinepet nen Jesus ed sikara.

²² Sinmabid Betsaida si Jesus tan saray disipulo to. Inyasingger na pigaran totoo ed kinen Jesus so sakey a lakin bulag, tan kinerew dad sikato a diwiten to.

²³ Intabin nen Jesus imay bulag tan impaway tod baley. Nilukdaan nen Jesus iray mata to may laki tan intapew tod sikato ray lima to, insan tinepet to, Walay nanenengneng mo?

²⁴ Kinmonineng imay bulag tan inkuanto, Makanenengneng ak na totoo, balet singa ra kakiewan a manaakar.

²⁵ Intapew lamet nen Jesus iray lima to ed saray mata to may laki. Innengneng ton maung natan iray mata to. Pinmawil so pakanengneng to, tan linminew lan amin ed saray mata to.

²⁶ Pinasempet la nen Jesus tan binilin to, Ag ka la onsasamar ed baley.

²⁷ Linmay Jesus a kaolup to ray disipulo to ed saray bario na Cesarea na Filipos. Nen wala rad dalan tinepet tod sikara, Siopa ak, onung na ibabagay totoo?

²⁸ Inmebat irad sikato, Wala ray mangibabagan sika si Juan a Managbinyag. Ibabagay arum a sika si Elias; wala met iray mangibabagan sakey ka ed saray propita.

²⁹ Sikayo balet, antoy kuanyo? Siopa ak? tepet tod sikara. Sika so Cristo, ebat nen Pedro.

³⁰ Insan to ra binilin, Ag yo ibabagad siopaman no siopa ak.

³¹ Nanlapud saman, impakabat nen Jesus ed saray disipulo to a say Anak na Too et nepeg a manirap a maung; ag awaten na saray mamatakken na baley, saray manonan papari, tan saray iskriba; papatey da ni, balet onolid bilay kasumpal na taloy agew.

³² Malinlinew so impangibaga to ya ed sikara, kanyan si Pedro inyarawi toy daiset si Jesus tan nansalitaan to.

³³ Balet imbeneg nen Jesus tan inarap to ray disipulo, insan to nampasnukay Pedro. Inkuanto, Arawi kad siak, Satanas! Say labay na too so nununoten mo, aliwan say labay na Dios.

³⁴ Pinaasingger natan nen Jesus iray totoo tan saray disipulo to. Inkuanto, Siopamay malabay ya ontombuk ed siak, nakaukolan a lingwanan toy sikaton dili, sakbaten toy krus to, insan ontombuk ed siak.

³⁵ Ta naandiay bilay so toon mangilaban na bilay to; balet nilaban so toon mangiter na bilay to makasengeg ed siak tan say Maung a Balita.

³⁶ Antoy nagonggona na sakey a toon nakayaryan toy intiron mundo, no naandi lamlamang so bilay to?

³⁷ Anggapoy nibayar na too a pamapawil toy bilay to!

³⁸ Kanyan siopamay mangibaing ed siak tan saray salitak ed sayan panaon a makasalanan tan ag mamirbir ed Dios, sikato met so ibaing na Anak na Too, no onla dian ompawil a kataruk toy kagalangay Ama tan kaiba to ray masanton anghil.

9

¹ "Inkuan ni nen Jesus ed sikara, Tandaan yo ya! Walad sikayo ray ag ompatey anggad ag da nanengneng so Panariay Dios a napnoy pakayari.

² "Kasumpal na anem agew, intagar nen Jesus iran talo labat di Pedro, Santiago, tan Juan, insan tinmakdang ira ed atagey a palandey. Nen wadman ira, naimatunan da a naoman so nengneng nen Jesus.

³ "Sinmilesileng tan pinmotipoti so kawes to; anggapoy pumepesak a makapapotiy kawes a singa poti to.

⁴ "Insan anengneng na sarayan taloran disipulo si Elias tan si Moises a mitotongtong irad kinen Jesus.

⁵ "Inkuanen Pedro ed kinen Jesus, Maistro, maung a wadya itayo. Manggawa tayoy taloran ayaman: sakey so para sika, sakey so para si Moises, tan sakey so para si Elias.

⁶ "Lapud baleg a takot da ra may taloran disipulo, ag amta nen Pedro so ibabaga to.

⁷ "Walay lorem a linmesa tan tinarungan to ra. Insan walay bosis a nanlapud lorem a kuanto, Sikato yay inararok ya Anakdengel kayod sikato!

⁸ "Kabebekta linmingaw ira may disipulo ed kaliber-liber, et anggapo lay anengneng da no ag si Jesus labat.

⁹ "Nen onlalasur iran nanlapud palandey, binilin ira nen Jesus ya ag dan balut ibabalita so anengneng da, anggad ag ni inmolid bilay so Anak na Too.

¹⁰ Inonur day bilin to, balet nantetepetan ira no antoy kabaliksan na kiolid bilay.

¹¹ Tinepet dad sikato, Akin et ibabaga da ray iskriba a nakaukolan ya ononan onsabi ni diay Elias?

¹² Inmebat ed sikara, Tua ya ononan onsabiy Elias tan pasimbaloen ton amin iray bengatla. Balet akin et ibabagay Masanton Sulat a mapalaloy kairapan na Anak na Too tan nabalaw-balaw?

¹³ Kuankod sikayo balet a wadya lay Elias, tan ginawa na totood sikatoy labalabay da onung na ibabagay Masanton Sulat nipaakar ed sikato.

¹⁴ Kasempet da, anengneng day amayamay a totoon akamokut ed saray disipulon atilak. Misasangsangan iray iskriba ed sarayan disipulo.

¹⁵ Kanengneng na saray totoo ed kinen Jesus, nikelawan ira. Inabet da, insan da imbano.

¹⁶ Tinepet nen Jesus ed sikara, Antoy pisasangsangan yod sikara?

¹⁷ Inmebat so sakey ed saramay akamokut, Maistro, inyakar kod sikara yay anak kon laki lapud inaponay maoges ya ispiritu tan ag makasalita.

¹⁸ Kapag pasigien na ispiritu ya inmapon ed sikato, natumba tan mamboraboray songut to. Manngalngalatenget iray ngipen to, insan mampatalker so intiron laman to. Kinerew kod saray disipulom a paekalen da so maoges ya ispiritu balet ag da nayarian.

¹⁹ Inkuanen Jesus ed sikara, Agaylay ag yo panisiad Dios, sikayon totood sayan panaon! Anggad kapigan kasiy piolup-olup kod sikayo? Anggad kapigan kasiy pananos kod sikayo? Iyakar yo pa dia tay ogaw.

²⁰ Inyasingger da sirin imay ogaw ed sikato. Kanengneng na maoges ya ispiritud kinen Jesus, pinatayegteg to may ogaw. Niparugsod dalin, insan nantolin-tolin tan namboraboray songut to.

²¹ Panoy kabayag lan inaponay ispiritun maoges? tinepet nen Jesus ed ama na ogaw. Nanlapu lad ogaw ni, ebat to may ama.

²² Naynay ya ibontuk na ispiritun maoges ed apoy tan danum, ta labay ton pateyen. No walay nayarian mon gawaen, kasian tan tulongan mo kami!

²³ Inkuanen Jesus, On, no sikan dili et nayarian mo! Siopamay manisia, nayarian ton gawaey amin a bengatla.

²⁴ Inmebat a tampol na makmaksil imay ama na ogaw, Manisia ak, balet kulang ni. Aruman mo pa!

²⁵ Nen anengneng nen Jesus a pinasia lay totoon ondarago, ingganggan tod ispiritun maoges, Ispiritun managpaemel, iganggan kod sikan ekal kad satay ogaw, tan ag ka lan balut ompapawil ed sikato!

²⁶ Inmakis na ampaipait imay maoges ya ispiritu, tan pinatayegteg to may ogaw, insan inmekal. Nagmaliw a singa bangkay imay ogaw, kanyan inkuan da ray karaklan, Inatey la!

²⁷ Balet inala nen Jesus imay ogaw ed lima tan inibaan ton binmangon, et inmalagey.

²⁸ Nen linmoob si Jesus ed abung, maamut a tinepet na saray disipulo to, Akin kasi et ag mi napaekal imay maoges ya ispiritu?

²⁹ Inmebat si Jesus ed sikara, Saman a klasi na ispiritu, ag napapaway no ag dia labat ed panamegley na pikakasi.

³⁰ Tinaynan da man a pasen tan dinmalan irad Galilea. Ag labay nen Jesus a nakabatan na totoo no iner so kawalaan to,

³¹ lapud ibabangat tod saray disipulo to, Niawat so Anak na Too ed lima da ray totoon mamatey ed sikato, balet onolid bilay kayariy taloy agew.

³² Ag atalusan ya na saray disipulo to, balet antakot dan osisaen ed sikato.

³³ Linma rad Capernaum. Nen wala rad loob na abung tinepet nen Jesus ed saray disipulo to, Anto may pansasangsangan yod dalan?

³⁴ Ag ira inmesel, lapud say pansasangsangan da et no siopay manona ed sikara.

³⁵ Inmirung si Jesus tan tinawag to ray labinduan disipulo, insan kuantod sikara, Siopamay labay to so walad onaan, mampaonur tan manlingkur ed amin.

³⁶ Tinawag toy sakey ya ogaw tan pinaalagey tod pegley da. Inampupo to tan kuantod saray labinduan disipulo,

³⁷ Siopamay mangawat ed sakey a singa sayan ogaw lapud siak awaten to ak; tan siopamay mangawat ed siak, aliwan siak labat lay awaten to, no ag ingen pati say angibakid siak.

³⁸ Inkuanen Juan ed kinen Jesus, Maistro, akanengneng kamiy sakey a toon mamapaekal na saray dimonyo ed ngaran mo. Binano mi, lapud ag kabyangan na olupan tayo.

³⁹ Balet kuanen Jesus, Ag yo babanoen, ta anggapoy toon manggaway milagrod ngaran ko, insan pansalitaan to ak a tampol na maoges.

⁴⁰ Ta say ag onsumpad sikatayo, kaiba tayo.

⁴¹ Tandaan yo ya! Siopamay mamainom na danum ed sikayo lapud mananombuk kayo nen Cristo, walay awaten ton awaten a tumang to.

⁴² Magmaung nin bitinay baleg a gilingan so beklew na sakey a too insan ibontuk ed dayat, nen say sikato so pansengegay pankasalanan na sakey ed sarayan ogogaw a manisiad siak.

⁴³ Potut moy limam no sikatoy pansengegay pankasalanan mo. Magmaung nin onloob kad bilay a pokul so sakey a limam nen say duaray limam ya onlad impirno a kawalaay apoy ya ag balut naerep.

⁴⁴

⁴⁵ Potut moy salim no sikatoy pansengegay pankasalanan mo. Magmaung nin onla kad tawen a saksakey so salim, nen say nibantak kad impirnon nantopag so salim.

⁴⁶

⁴⁷ Sokit moy matam no sikatoy pansengegay pankasalanan mo, ta magmaung nin onloob kad Panariay Dios a bulag so sakey a matam nen say nibantak kad impirnon nantopag so matam.

⁴⁸ Diman, ag ompatey iray bigis a mankibkib ed sikara, tan ag naerep a balut so apoy.

⁴⁹ Ta say apoy linisan tan pasilengen toy balang sakey.

⁵⁰ Maung so asin, balet no tinmabang la, panoy pakapangipawil na gendat a taway to? Magmaliw kayo komun a singa kipapasen na asin et, diad ontan, mareen so panoolup yo.

10

¹ "Inmalis si Jesus nanlapud saman a pasen. Linmad lugar na Judea tan binmaliw ed Ilog na Jordan. Dinago lamet na dakerakel a totoo, tan binangatan to ra a singa gagawaen ton gendat.

² "Wala ray Pariseon sinmingger met ed kinen Jesus, ta labay da ya erelen ed salita to. Ibagam ed sikami, tinepet da, iyabuloy kasi na Ganggan ya isian na sakey a laki so asawa to?

³ "Antoy ingganggan nen Moises ed sikayo? tinepet nen Jesus ed sikara.

⁴ "Inmebat ira, Inyabuloy nen Moises a say laki nayarian ton isian so asawa to, kasumpal ton itday kasulatan na pansiyan.

⁵ "Inkuanen Jesus ed sikara, Anawet so puso yo, kanyan ingganggan nen Moises so ontan.

⁶ "Balet nanlapud impamalsay Dios ed mundo nibaga, Pinalsay Dios so laki tan bii.

⁷ "Sikato yay makasengeg a taynan na laki so ama tan ina to tan iyamung toy asawa to,

⁸ "et mankasakey iran dua. Kanyan aliwa la ran duara, no ag ta saksakey la ran laman.

⁹ "Ag nepeg sirin a siyanen na too so impankasakey na Dios.

¹⁰ Nen wala rad abung tinepet na saray disipulo ed kinen Jesus so nipaakar ed saya.

¹¹ Inkuantod sikara, Say lakin mangisian ed asawa to tan mangasaway sananey mankasalanan ed asawa to, ta mikakaloguran.

¹² Mikaloguran met so biin mangisian na asawa to tan miasawad sananey.

¹³ Wala ray totoon angawit na ogogaw ed kinen Jesus, ta labay dan diwiten to ra yan ogogaw. Balet nampasnuk iray disipulo ed sarayan totoo.

¹⁴ Asanukay Jesus nen anengneng to yan ginawa da ray disipulo to tan kuantod sikara, Paolyan yo ray ogogaw ya ondagod siak. Ag yo ra sesebelan, ta saray totoon singa sarayan ogogaw so makankien na Panariay Dios.

¹⁵ Tandaan yo ya! Siopamay ag onabuloy a pasakop ed Panariay Dios a singa sakey ya ogaw, ag balut makaloob ed Panariay Dios.

¹⁶ Insan to inaampupo ra may ogogaw, intatapew to ray lima tod sikara, tan binibindisionan to ra.

¹⁷ Nen onaalis lay Jesus, walay sakey a lakin mambabtik a linmad sikato. Tinmalimukor ed arap nen Jesus, insan tinepet to, Maung a Maistro, antoy nepeg kon gawaen pian nagamuran koy bilay ya andi-anggaan?

¹⁸ Inmebat si Jesus ed sikato, Akin et tatawagen mo ak na maung? Anggapoy arum a maung no ag say Dios labat.

¹⁹ Amtam iray ganggan: Ag ka mamapatey; ag ka mikakaloguran; ag ka mantatakew; ag ka mantitila ed pantasim; ag ka mansasaol; igalang moy amam tan inam.

²⁰ Maistro, kuanto may laki, nanlapud ogaw ak ni, oonuren ko la ra yan amin.

²¹ Maararon ninengneng nen Jesus, tan kuantod sikato, Wala niy sakey a kakulangan mo. Laka, ta ilakom ya amin so kayaryan mo, insan mo iter ed saray mairap-bilay so panlakoan mo. Nawalaan kad satan na kayamanan ed tawen. Insan ka dia ompawil ya ontombuk ed siak.

²² Nen nadngel na samay laki yan balikas nen Jesus, abaliw so lupa to tan tinmaynan a maermen lapud agaylay inkayaman to.

²³ Ninengneng nen Jesus iray walad kaliber-liber to tan kuantod saray disipulo to, Mairap a tuloy ya onloob ed Panariay Dios iray mamayaman!

²⁴ Nikelawan iray disipulo ed sarayan balikas to. Inkuanen Jesus lamet, Anak, talagan mairap so onloob ed Panariay Dios.

²⁵ Mainomay niy kamilyon onloob ed abut na dagom nen say toon mayaman ya onloob ed Panariay Dios.

²⁶ Nikelawan la ran maung ed saya, kanyan nantetepetan ira, Siopay nayari a nilaban sirin ey?

²⁷ Ninengneng ira nen Jesus tan inmebat, Ag ya nagawaan na too, balet nagawaan na Dios, ta say Dios nayaryan to a gawaen ya amin iray bengatla.

²⁸ Nansalitay Pedro, Ag mo lilingwanan a tinaynan miy amin a bengatla tan tinmombuk kamid sika.

²⁹ On, kuanen Jesus ed sikara, tan tandaan yo ya: siopamay taynan toy abung, agagi, ina, ama, anak, dalin, lapud siak tan say Maung a Balita,

³⁰ makaawat na maminlasus ed sayan bilaysaray abung, agagi, ina, anak, dalinbalet katekep day pamairap ed sikato. Tan diad biek a bilay makagamur na bilay ya andi-anggaan.

³¹ Balet amayamay iray makakaona natan a naonur, tan amayamay met iray nanaonur natan a makaona.

³² Mamapaarap la ra natan ed Jerusalem tan walad onaay Jesus. Mankelaw iray disipulo tan natatakot iray arum a totoon manontombuk. Binukoran lamet nen Jesus ira may labinduan disipulo, insan to tinongtong iray nagawad sikato.

³³ Inkuantod sikara, Oonla itayod Jerusaelm a diman niawat so Anak na Too ed lima da ray manonan papari tan saray iskriba. Sintinsiaan da a pateyen, insan da ipalima ed saray Hintil.

³⁴ Ludlureyen, luklukdaan, lewetleweten, tan pateyen da. Balet onolid bilay kasumpal na taloy agew.

³⁵ Inmasingger ed kinen Jesus ira di Santiago tan Juan ya anak nen Zebedeo. Inkuanda, Maistro, pikasi mi pan iter moy kerewen mi.

³⁶ Antoy labay yon gawaen ko para sikayo? tinepet nen Jesus ed sikara.

³⁷ Inmebat ira, Iyabuloy mo pa komun ya onyorung kami ed nikawanan tan nikawigim, no onyorung ka lad trono na Panarian mo.

³⁸ Inkuanen Jesus ed sikara, Ag yo amtay kekerewen yo. Nayarian yo kasiy oninom ed kupan nepeg kon inoman? Nayarian yo kasiy mampabinyag ed pampabinyagan ko?

³⁹ Nayarian mi, ebat da. Inkuanen Jesus ed sikara, Nayarian yoy oninom ed kupan inoman ko tan mampabinyag ed pampabinyagan ko,

⁴⁰ balet andid limak so pampili no siopay onyorung ed nikawanan tan nikawigik. Onyorung iray angiganaan ed saratan a pasen.

⁴¹ Nen nadngel ya na saray samploran disipulo, asanukan ira ed kinen Santiago tan si Juan.

⁴² Tinawag nen Jesus iran amin tan inkuanto, Kabat yo a saray nipasen a manoley ed saray Hintil walay pakayari rad saray totoon ooleyan da, tan nagawa so labay da ray walay betang.

⁴³ Aliwan onya balet so nepeg a nagawad sikayo. Siopaman ed sikayo so labay toy mangipangulo, nepeg toy manlingkur ed sikayon amin.

⁴⁴ Tan siopaman ed sikayo so labay toy manona, nepeg a paaripen ed sikayo.

⁴⁵ Ta anggan say Anak na Too ag linma dian palingkuran, no ag ingen manlingkur tan mangisaklang na bilay to, a panondon ed saray amayamay a totoo.

⁴⁶ Sinmabiy Jesus ed Jerico a kaiba to ray disipulo to tan saray amayamay a totoo. Nen ontataynan la rad man, walay sakey a toon bulag a manngaray Bartimeo ya anak nen Timeo. Manyodyorung ed gilig na dalan a mipapayabol.

⁴⁷ Nen nadngel ton si Jesus a taga Nazaret so onlalabas, tinmawag na maksil, Jesus, Anak nen David! Kasian mo ak!

⁴⁸ Dakel iray amasnuk ed sikato tan imbaga ran mandeen, balet lalon tinmawag na maksil, Anak nen David, kasian mo ak!

⁴⁹ Tinmonday Jesus tan impatawag to. Kanyan tinawag da may bulag tan kuanda, Pabiskeg moy linawam. Alagey ka, ta patatawag to ka.

⁵⁰ Inekal toy kolibemben to, biglan inmalagey, tan sinmingger ed kinen Jesus.

⁵¹ Tinepet nen Jesus ed sikato, Antoy labay mon gawaen kon para sika? Inmebat imay bulag, Maistro, labay koy makanengneng.

⁵² Inkuanen Jesus, Inmabig ka la, lapud pananisiam. Nayarian mo lay onla. Inmabig ed saman a bekta tan tinmombuk ed kinen Jesus.

11

¹ "Asingger la rad Jerusalem nen sinmabi rad alusadsar na Palandey na Kaolibaan, diad saray baley na Betfage tan Betania. Pinaona nen Jesus iray duaran disipulo to,

² "tan binilin to ra, Laka yod ontombuk a bario. Kasabi yod man narumog yon tampol so asnon akasinger tan ag nin balut kinabayoan. Okbar yo tan awit yo dia.

³ "No walay mantepet no akin et ookbaran yo ikuanyod sikato, Say Katawan nakaukolan to. Andi bali, ta paipawil to met la dian tampol.

⁴ "Kanyan linma ra tan arumog day sakey ya asno ed dalan, ya akasinger ed puirta na sakey ya abung. Et nen ookbaran da may asno,

⁵ "tinepet na saray totoon manalalagey diman, Akin et ookabaran yo tan?

⁶ "Inmebat ira may disipulo, onung ed imbilin nen Jesus ed sikara, kanyan inabuloyan da ra.

⁷ "Inyakar da may asno ed kinen Jesus, insapin da ray kolibemben da, insan kinmabayoy Jesus.

⁸ "Saray dakel a totoo inyaaplag dad dalan iray kolibemben da. Saray arum nampopoter iray sangasangay kiew tan indadatak dad dalan.

⁹ "Ineeyag da ray totoon walad onaan tan walad onur nen Jesus, Hosanna! Bindisionan komuy Dios so onla dia ed ngaray Katawan!

¹⁰ Bindisionan komuy Dios so onsabin panarian nen David ya ama tayo! Nagalang komuy Dios a Sankatageyan!

¹¹ Linmay Jesus ed Jerusalem tan linmoob ed Timplo. Ninengneng ton amin iray bengatlan wadman. Lapud onlalabi la, pinmaway tan linma ed Betania a kaiba to ray labinduan disipulo to.

¹² Kaimbwasan, nen manaakar iran nanlapud Betania, narasan si Jesus.

¹³ Diad ag arawi anengneng toy mabolubolunga kiew ya igos. Inmasingger a mananap na bunga, balet kabolubolung lapud aliwa nin panagbungay igos.

¹⁴ Inkuanen Jesus ed samay kiew ya igos, Anggapo lan balut so mangay bungam! Nadngel ya na saray disipulo to.

¹⁵ Kasabi rad Jerusalem linmoob si Jesus ed Timplo tan pinataynan to ray manlalako tan mansasaliw diman. Imbabalintuag to ray lamisaan da ray managsalat na kuarta tan saray yorungan da ray managlakoy malapati,

¹⁶ tan ag to inabuloyan ya ondalan ed loob na Timplo so siopaman a walay awit.

¹⁷ Insan imbangat tod saray totoo, Nabasad Masanton Sulat a say Dios inkuanto, Say abung ko natawag ya abung a panagpikasiyan na amin a katoowan. Balet ginawa yon ayaman da ray matatakew!

¹⁸ Sayan inkagawa nadngelan na saray manonan papari tan saray iskriba, kanyan ginapoan day mananap na pakapatey dad kinen Jesus. Antakot irad sikato lapud mankelaw iray totoo ed saray bangat to.

¹⁹ Nen labi la, pinmaway lamet a nanlapud siudad si Jesus tan saray disipulo to.

²⁰ Nen manaakar irad kabkabwasan na ontombuk ya agew, anengneng dan amagaan ya anggad lamut imay kiew ya igos.

²¹ Anunotan nen Pedro may agawa tan inkuanto, Katawan, nengneng mo, inatey imay igos ya insambam!

²² Inmebat si Jesus ed sikara, Tandaan yo ya! No manisia kayo ed Dios,

²³ nayarian yon ibagd sayan palandey, Alis kad tan, tabuy kad dayat, et gawaen na Dios so ontan, no ag manduaruway puso yo tan manisia kayon nagawa.

²⁴ Kanyan kuankod sikayo ya antokaman a kerewen yod pikakasi yo, manisia kayo ya andi-saew a naawat yo et niiter ya amin ed sikayo.

²⁵ No onalagey kayon mampikasi, pirdona yo ray nankasalanan ed sikayo, pian pirdonaen met na Ama yon walad tawen iray kasalanan yo.

²⁶

²⁷ Pinmawil ira lamet ed Jerusalem. Nen manaakar si Jesus ed loob na Timplo, inmasingger iray manonan papari, saray iskriba, tan saray mamatakken na baley.

²⁸ Tinepet dad sikato, Antoy pankatonungan mon manggawad saraya? Siopay angiter ed sika na pankatonungan a manggawad saraya?

²⁹ Inmebat si Jesus ed sikara, Wala pa labat so tepeten kod sikayo. No ebatan yo ak, ibagak ed sikayo no antoy pankatonungan kon manggawad saraya.

³⁰ Nanlapway pankatonungan nen Juan a maminyag: nanlapud Dios o nanlapud too?

³¹ Nantetepetan ira, Antoy iyebat tayo? No ibaga tayon nanlapud Dios, ikuantod sikatayo, Akin et ag yo sinisiay Juan?

³² Balet no ibaga tayon nanlapud too... (Antakot irad saray totoo, tan manisia ran amin a si Juan et propita.)

³³ Kanyan inmebat irad kinen Jesus, Ag mi amta. Inkuanen Jesus ed sikara, Ag ko met sirin ibagad sikayo no antoy pankatonungan kon manggawad saraya.

12

¹ "Insan nansalitay Jesus ed sikara diad panamegley na saray alimbawa. Inkuanto, Walay sakey a toon nantanem na saray ubas. Inalar to tan nanggaway panagpespesan na saray ubas. Amalagey met na atagey a panagbantayan. Impaasikaso tod saray kasamak, insan linma ed sananey a bansa.

² "Nen asabiy panaon a panagborbor na ubas, imbaki ton miapag ed saray kasamak so sakey ya aripen to.

³ "Balet siningkat na saray kasamak imay aripen, pinepekpek da, insan da pinapawil a kalima-lima.

⁴ "Angibaki may akanubas na sananey ya aripen to. Saray kasamak pinepekpek da ed olo, insan da pinapabaingan.

⁵ "Angibaki ni lamet imay akanubas na sananey ya aripen to, tan natan pinatey la ya na saray kasamak to. Onya met so ginagawa na sarayan kasamak ed saray arum nin imbaki to. Pinepekpek da ray pigara tan pinapatey da ray arum.

⁶ "Wala niy sakey labat ya akeraan a nayarin ibaki to, salanti say inararo ton anak. Diad kaonuran sirin imbaki toy anak to tan inkuanto, Andi-saew a galangen day anak ko.

⁷ "Balet saramay kasamak nantotongtong ira tan kuanda, Nitan lay mananawir na kaubasan. Pateyen tayo, pian kayaryan ti lay kaubasan!

⁸ "Kanyan siningkat da may anak, pinatey da, insan da imbantak ed paway na kaubasan.

⁹ "Anto natay gawaen na akankiey kaubasan? tinepet nen Jesus. Onlan papatey to ra man a totoo, insan to ipaasikasoy kaubasan ed saray arum.

¹⁰ Ag yo ta ni abasa ed Masanton Sulat? Say baton impasen ya andi-kakanaan na saray karpintiro nagmaliw lamlamang a sankakanaan a bato.

¹¹ Ginawa ya na Katawan; makapakelkelaw a nengnengen!

¹² Sinali na saray manonan Judio ya erelen si Jesus lapud atebek dan nipaakar ed sikaray sasalitaen to ed sayan alimbawa. Balet antakot irad saray karaklan, kanyan pinaolyan da la tan tinmaynan la ra.

¹³ Wala ray pigaran Pariseo tan pigaran totoo nen Herodes ya imbaki da ran mangerel ed kinen Jesus diad panamegley na pantepet da.

¹⁴ Inmasingger irad kinen Jesus tan kuanda, Maistro, kabat min tua ya amin so ibabagam. Aliwan kan manangibiig, ta nampaparay pangipapasen mod amin a totoo. Ibabangat mo ray totoo no antoy linawa na Dios nipaakar ed sikara. Ibagam pad sikami, sumpad Ganggan kasi so pambayar na buis ed Impirador na Roma? Mambayar kamiy buis odino andi?

¹⁵ Balet atebek nen Jesus so maoges a getma ra, kanyan kuantod sikara, Akin et labay yo ak ya erelen? Itdan yo ak pa na sakey a kuarta ta nengnengen ko.

¹⁶ Initdan day sakey a kuarta, tan tinepet tod sikara, Siopay akanlupa tan akanngaran na nitatak ed kuarta? Say Impirador, ebat da.

¹⁷ Kanyan si Jesus kuanto, Iter yod Impirador so nabebetangay Impirador, tan iter yo met ed Dios so nabebetangay Dios. Kanyan mankelaw irad sikato.

¹⁸ Wala ray Saduseo a linmad kinen Jesus. (Sikara yay mangibabagan ag onolid bilay iray inaatey.) Inkuandad kinen Jesus.

¹⁹ Maistro, insulat nen Moises yan ganggan para sikami: No inatey so sakey a lakin anggapoy ilalak, nakaukolan ya asawaen na agi to may balo pian mananak ira para samay inatey.

²⁰ Wala nen saman iray pitoran sanaagi. Angasawa may pangulowan, balet inatey ya anggapoy ilalak.

²¹ Say kumadwad pangulowan inasawa to may balo na kuya to, balet inatey met ya anggapoy ilalak.

²² Ontan to met so agawad kumatlon agi tan pati saray arum ya agagi to. Inaatey iran amin ya anggapoy ilalak. Diad kaonuran, inatey met imay bii.

²³ Natan, diad iyolid bilay na saray inaatey, siopay makanasawa ed samay bii, anta amin da ra may pitoran sanaagi et nambabalesan dan inasawa?

²⁴ Inmebat si Jesus ed sikara, Nalilingo kayo! Amta yo no akin? Lapud ag yo amta so Masanton Sulat odino say pakayari na Dios.

²⁵ Ta no onolid bilay iray inaatey, ag la ra mangasawa tan miasawa, tan magmaliw iran singa saray anghil ed tawen.

²⁶ Natan, nipaakar ed kiolid bilay: ag yo ta ni abasa ed libro nen Moises so nipaakar ed abeban kiew a napopoolan? Nisulat diman a say Dios kauntod kinen Moises, Siak so Dios nen Abraham, Dios nen Isaac, tan Dios nen Jacob.

²⁷ Say labay to yan ibaga et sikatoy Dios na saray mabilay, aliwan Dios na saray inaatey. Alingo kayon talaga!

²⁸ Nadngel na sakey ya iskriba so sangsangan da. Naimano to a si Jesus et maung so ebat to ed saray Saduseo, kanyan inmasingger tan tinepet to, Dinan so sankamanonan ganggan?

²⁹ Inmebat si Jesus, Saya so sankamanona: Dengel mo, Israel! Say Katawan a Dios tayo et bukbukor to so Katawan.

³⁰ Arom so Katawan a Dios mo ed intiron pusom, diad intiron kamarerwam, diad intiron kanunotan mo, tan diad intiron biskeg mo.

³¹ Say kumadwa saya: Arom so kaparam a too a singa panangarom ed sikan dili. Anggapo lay arum a ganggan a manona nen sarayan dua.

³² Samay iskriba kuantod kinen Jesus, Duga tan, Maistro! Tua tay imbagam a saksakey so Dios, tan anggapo lay arum no ag sikato labat.

³³ Kanyan say too nepeg ton aroen so Dios ed intiron puso to, tan diad intiron nunot to, tan diad intiron biskeg to. Nepeg to met ya aroen so kapara ton too a singa panangaro tod sikaton dili. Lalon maung ni ya, nen say pangibagat na ayayep a poolan ed altar tan say pangisaklang na arum ni ran bagat ed Dios.

³⁴ Naimano nen Jesus so kakabatay ebat to, kanyan kuantod sikato, Ag ka arawi ed Panarian na Dios. Kasumpal to ya, anggapo lay arum a makakpel a mantepet ed sikato.

³⁵ Diad pambabangat nen Jesus ed Timplo, inkuanto, Panoy pangibaga na saray iskriba a kabyangay boleg nen David so Cristo?

³⁶ Pinuyanan na Ispiritu Santo si David a nankuan: Say Katawan inkuantod Katawan ko: Yorung ka ed nikawanan ko, anggad napasukok ed sika iray kalaban mo.

³⁷ Si David a dili tinawag to na Katawan so Cristo; panon sirin a sikatoy kabyangay boleg nen David? Makaliliket iray karaklan a dinmengel ed kinen Jesus.

³⁸ Diad pambabangat to, inkuantod sikara, Manalwar kayod saray iskriba a labalabay day akar-akar ya andokey so saloy na kawes da, tan igalgalang irad publiko.

³⁹ Labalabay dan pilien iray manonan yorungan ed saray sinagoga tan saray sankaabigan a pasen ed saray ponsia.

⁴⁰ Kakatkatan da ray balon bibii, insan andorokey so pampikasi ra a pandisimula rad gagawaen da. Lalon ambelat so dusa ra!

⁴¹ Sanen inmirung si Jesus ed abay na panagpelagan ed Timplo, inimano to ray totoo a mangipepelag na kuarta. Dakel iray totoon mamayaman ya angipelag na ankakabaleg a kantidad.

⁴² Nen inmasingger so sakey a balon bii, angipelag na duaran sinsilyo a mankantidad na dagdaiset.

⁴³ Tinawag to ray disipulo, tan kuantod sikara, Kuankod sikayo a sayan mairap-bilay a balo et angipelag na dakel ni nen say impelag na siopaman ed sikaran amin.

⁴⁴ Ta amin da ray arum angipelag ira labat na nasosolukan da balet sayan bii, anggan mairap so bilay to, inter to lan amin so walan pambilay to.

13

¹ "Nen ompapaway lad Timplo si Jesus, inkuan na sakey ed saray disipulo to, Maistro, nengneng mo! Agaylay dakep na saray paalagey tan saray baton inkakana ra!

² "Inkuanen Jesus ed sikato, Nanenengneng mo ra yan ankakabaleg a paalagey? Anggapoy anggan sakey a baton natilak ed pasen to, ta nageba ran amin.

³ "Manyodyorung si Jesus ed Palandey na Kaolibaan a kapetekay Timplo nen inmasingger irad sikato di Pedro, Santiago, Juan, tan Andres. Maamut dan tinepet,

⁴ "Kapigan so pakagawa da ra ya, tan antoy pakapatnagan ya asingger lan nagawa ra yan amin?

⁵ "Inkuanen Jesus ed sikara, Manalwar kayo tan ag kayo palilingo ed siopaman.

⁶ "Ta amayamay iray onsabi tan ikana ray ngaran ko ya ikuanda, Siak so Cristo! tan dakel iray napalingo ra.

⁷ "Makadngel kayo ray bakal diad asingger tan saray balitan nipaakar ed saray bakal diad arawi, balet ag kayo mapaga. Nakaukolan a nagawa ra ya, balet aliwa nin sikato yay anggaay mundo.

⁸ "Manlalaban iray bansa; ontan da met iray nanarian. Wala ray onsabin yegyeg ed nandoroman pasen, tan wala ray onsabin eras. Balet saraya et gapo ra labat na kairapan, a singa onaan a pasakit na malokun.

⁹ "Manalwar kayo! Ta erelen da kayo tan akusaen da kayo ed korti. Leweten da kayo ed saray sinagoga; iyarap da kayo ed saray manoley tan arari nisesengeg ed siak, pian napaneknekan yod sikara so Maung a Balita.

¹⁰ Nakaukolan a nipulong ya onona so Maung a Balita ed saray katoowan ed amin a bansa.

¹¹ No erelen da kayo tan akusaen da kayod korti, ag kayo mapaga no antoy ibaga yo. Diad satan ya oras, ibaga yoy antokaman a niiter ed sikayo. Ta saray ibaga yo et manlapud Ispiritu Santo, aliwan diad sikayon dili.

¹² Saray totoo papatey da naani ray agagi ra. Ontan met so gawaen da ray atateng ed saray anak da. Saray anak labanan da ray atateng da tan papatey da ni ra.

¹³ Bosulen kayoy amin a katoowan lapud siak. Balet nilaban so toon mansiansia ya anggad kasamputan.

¹⁴ Nanengneng yoy Makapataktakot a Managderal ya akaalagey ed ag to kanepegan a pasen. (Paimano ed saray mambabasa: talusan yoy labay to yan ibaga!) No onya lay nagawa, nakaukolan ya ombatik ed kapalandeyan iray taga Judea.

¹⁵ Say toon walad toktok na abung nakaukolan ya ag la manabalan onlasur tan mangalay bengatla ed dalem na abung to.

¹⁶ Say walad alog nakaukolan ya ag la onsempet a mangalay kawes to.

¹⁷ Diad saratan ya agew, agaylay panirap da ray malokun tan saray walay anak nin mansususo!

¹⁸ Mikasi kayod Dios ya ag nagawa ya komun ed panaoy ambetel!

¹⁹ Ta say baleg a kairapan ed saratan ya agew et ag balut mipara ed anggan anton kairapan, manlapud impamalsay Dios ed mundo ya anggad natan, tan ag met la naolit ya anggan kapigan.

²⁰ Balet pinaraiset na Dios ira tan ya agew, pian nilaban iray totoon pinili to; ta no andi, anggapo komuy nilaban.

²¹ Kanyan ag kayo manigsisia no walay mangikuan ed sikayo, Wadyay Cristo! odino, Wadmay Cristo!

²² Ta dakel iray tila-tilan Cristo tan tila-tilan propita ya onsabi. Manggawa ray tanda tan pakelaw pian napalingo ra, no nayari, iray totoon piniliy Dios.

²³ Manasikaso kayo! Imbagak lad sikayo ra yan amin kasakbayan iran nagawa.

²⁴ Kasumpal na satan a kairapan, ombilonget so agew tan ag la onsinag so bulan.

²⁵ Napelag iray bitewen a manlapud tawen, tan saray pakayarid liwang ag da natombuk so gendat a kinaoksuy da.

²⁶ Insan nanengneng day Anak na Too a walad saray lorem tan onsasabin walay baleg a pakayari tan kagalangan.

²⁷ Ibaki tod apatiran suyok na mundo ray anghil to tan, manlapud amin a pasey mundo, tiponen da iray totoon piniliy Dios.

²⁸ Aral yoy bangat a manlapud kiew ya igos. No onkolaney tan mambolung la ray sanga-sanga to, amta yon asingger lay tiagew.

²⁹ Ontan met a no nanengneng yo la ra yan nagagawa, naamtaan yon asingger lay panaon. Ngalngali lan onggapo ingen.

³⁰ Tandaan yo ya! Nagawa ra yan amin kasakbayan a naandi ray totood sayan panaon.

³¹ Naandipat so tawen tan dalin, balet ag balut naandipat iray salitak.

³² Balet anggapoy mikabat no kapigan so isabi na sayan agew o oras. Ag kabat na anggan saray anghil ed tawen, ni say Anak. Say Ama labat so mikabat.

³³ Manalwar tan manasikaso kayo, ta ag yo amta so isabi na sayan oras.

³⁴ Miolibay ya ed sakey a toon mambiahi ed arawin pasen. Ipaasikaso toy abung to ed saray aripen to. Itdan toy balang sakey na kimey tan bilinen toy bantay ed puirta a manalagar lawas ed isabi to.

³⁵ Sipaparaan kayo komun sirin, ta ag yo amtay isabi na akanabung. Nayarin onsabi no atapew ni so labi, o no pegley labi, o no palbangon, o no ngalngali lan ompaway so agew.

³⁶ No onsabin bigla, ag to kayo komun nasabian ya akaogip.

³⁷ No antoy ibabagak ed sikayo, ibabagak ed amin: Mamparaan kayo sirin lawas!

14

¹ "Duay agew labat la natan kasakbayan na Pista na Paskua tan pista na Tinapay ya Anggapoy Libadura. Saray manonan papari tan saray iskriba manaanap iray pankanawnawan mangerel a maamut ed kinen Jesus, insan da pateyen.

² "Balet inkuanda, Ag tayo pateyen legan na pista, ta ag la pigan manggolo ray totoo.

³ "Si Jesus walad abung nen Simon ya akating, diad Betania. Nen mangakan, inmasingger so sakey a biin sankaawit toy botilyan alabastro a napnoy mabmablin pabalingit a ginawad puron nardo. Binetag toy sangab na botilya, insan to inkalbod olo nen Jesus imay pabalingit.

⁴ "Asunukan iray arum a totoon wadman tan inkuandad sakey tan sakey, Akin et dinarak yan pabalingit?

⁵ "Inlako la komun na masoluk a talon lasus a dinario, insan inter ed saray mairap-bilay so nanlakoan! Ontan lay impambalaw dad samay bii.

⁶ "Balet inkuanen Jesus, Paolyan yon bukor! Akin et balbalawen yo? Maabig tan marakep yan ginawa tod siak.

⁷ "Ta kaiba yo lawas iray mairap-bilay tan nayarian yo ran tulongan ed anggan anton oras a labay yo. Balet ag yo ak lawas kaiba.

⁸ "Ginawa na sayan bii so anggaay nayarian to. Kinalboan toy laman ko na pabalingit a pangiparaan na pangipompon ed siak.

⁹ "Natan, tandaan yo ya! Inerman ed sankamundoan so pangipulongay Maung a Balita, nasalitay ginawa to yan bii a pakanudnunotan ed sikato.

¹⁰ Si Judas Iscariote, sakey ed saray labinduan disipulo, linmad saray manonan papari a mitongtong na nipaakar ed pangyawat tod kinen Jesus ed sikara.

¹¹ Makaliliket iran maung nen nadngel day imbaga nen Judas tan insipan dan itday kuarta. Kanyan ginapoan nen Judas so mananp na pankanawnawan mangyawat ed kinen Jesus.

¹² Diad ononan agew na Pistay Tinapay ya Anggapoy Libadura, a sikato met so panagpatey na saray kilaw a karniro ya onkanad Paskua, tinepet da ray disipulo ed kinen Jesus, Iner so labay mon pangiparaanan miy panganan moy Paskua?

¹³ Imbaki nen Jesus so duaran disipulo to tan binilin to ra, Laka yod siudad. Naabet kid may sakey a lakin sankasakbat toy samboyug a danum.

¹⁴ Tombuk yod looban ton abung. Insan ikuanyod akanabung a patetepet na Maistro: Iner so kawalaay kuarton panganan ko tan saray disipulok na Pandem na Paskua?

¹⁵ Itoro tod satan so sakey a maawang a kuarto ed tagey, a wala la ray ikanan kagawaan ya akaparaan. Iparaan yod may pandeman tayo.

¹⁶ Pinmikal ira may disipulo, linma rad siudad, tan amin ira may imbaga nen Jesus ed sikara arumog da. Kanyan imparaan day Pandem na Paskua.

¹⁷ Nen labi la, sinmabiy Jesus tan saray labinduan disipulo to.

¹⁸ Nen wala rad lamisaan a mangakan, inkuanen Jesus, Kuankod sikayo: sakey ed sikayo ran karongok natan so mantraidor ed siak.

¹⁹ Agoloy kalakal da ray may disipulo kanyan nansosoblay iran nantepet, Siak kasi, Katawan?

²⁰ Inmebat si Jesus, Sakey ed sikayon labindua, say kabansag kon mangisawsaw na tinapay ed aralem a plato.

²¹ Ompatey so Anak na Too, onung na ibabagay Masanton Sulat, balet kaskasian so toon mantraidor ed Anak na Too! Magmaung ni komun ya ag la nianak!

²² Nen peles dan mangakan, angalay tinapay si Jesus. Kasumpal ton akisalamat ed Dios, pinipisag to, insan to inter ed saray disipulo to tan kuanto, Ala yo ya; sikato yay laman ko.

²³ Insan inala toy kupa, tan kasumpal ton akisalamat ed Dios, inter tod sikara. Inminom ira ya amin.

²⁴ Inkuanen Jesus ed sikara, Sikato yay dalak a mamaneknek ed impisipanay Dios, say dalak ya onterter para saray amayamay a totoo.

²⁵ Kuankod sikayo ya ag ak la oninom na sayan tabul na ubas, anggad agew na iyinom ko na balon tabul na ubas ed Panariay Dios.

²⁶ Anganta ray sakey ya imno, insan ira linma ed Palandey na Kaolibaan.

²⁷ Inkuanen Jesus ed sikara, Ibatikan tan taynan yo ak ya amin, ta ibabagay Masanton Sulat, Pateyen na Dios so pumapastol et nataytayak iray karniro.

²⁸ Balet kayari na iyolik ed bilay, onaan ta kayon onlad Galilea.

²⁹ Inkuanen Pedro ed sikato, Anggan taynan da kan amin, ag ta kan balut taynan!

³⁰ Inmebat si Jesus, Tandaan mo ya! Kasakbayay pidwan ikukaok na lalung ed sayan labi, mamitlon ibagam ya ag mo ak kabat.

³¹ Lalon makmakpel ya inmebat si Pedro, Ag kon balut ibagan ag ta ka kabat, anggan kaiba ta kan pateyen da! Onya met so imbaga na amin da ray arum a disipulo.

³² Linma rad pasen a manngaray Getsemani. Inkuanen Jesus ed saray disipulo to, Yorung kayo dia, legan kon mampikasi.

³³ Intagar to ra balet di Pedro, Santiago, tan Juan. Insan agunigon a maung tan apagaan

³⁴ tan kuantod sikara, Agaylay ermen ko tan ngalngalik la ipatey. Dia kayo tan mampuyat kayo.

³⁵ Kaarawi toy daiset, dinmakmomod dalin tan nampikasi a no nayari ag la komun onsabid sikatoy oras na kairapan.

³⁶ Inkuanto, Ama, O Ama! Nayarian mon gawaey amin a bengatla. Ipaliis mo pad siak yan kupay kairapan. Balet aliwan say linawak, no ag ingen say linawam, so nasumpal.

³⁷ Pinawil to ra may taloran disipulo, tan asabian to ran akaogip. Inkuantod kinen Pedro, Akaogip ka, Simon? Ag mo ta nayariay mampuyat na saksakey oras?

³⁸ Mampuyat tan mampikasi kayo, pian ag kayo napelag ed tukso. Sipaparaan so ispiritu, balet makapoy so laman.

³⁹ Inmarawi lamet a nampikasi, tan inolit to may kerew to.

⁴⁰ Pinawil to lamet iray disipulo to tan asabian to ran akaogip, ta mapalaloy pakakaogip da. Ag da amtay iyebat dad sikato.

⁴¹ Diad pitlon impawil to inkuantod sikara, Akaogip tan mamapainawa kayo nin anggad natan? Duga la tan! Sinmabi lay oras a niawat so Anak na Too ed lima da ray makasalanan.

⁴² Bangon kayo, ta onla itayo la. Nengneng yo, wadya lay toon mantraidor ed siak!

⁴³ Mansasalita niy Jesus nen sinmabi si Judas a, sakey ed saray labinduan disipulo. Kaiba to ray totoon sankaawit da ray ispada tan saray pekpek. Sarayan totoo imbaki na saray manonan papari, saray iskriba, tan saray mamatakken na baley.

⁴⁴ Samay traidor initdan to ray kakaiba to na pakabirbiran da: Say anguban ko sikato man so aanapen yo. Erel yo tan no awiten yo, bantayan yon maung.

⁴⁵ Kasabi nen Judas, dinago ton tampol si Jesus tan inkuanto, Maistro! insan to inanguban.

⁴⁶ Kanyan inerel day Jesus tan binembenan day malet.

⁴⁷ Balet walay sakey ed saray manalalagey diman ya inoyus toy ispada to tan sinigbat toy aripen na Pangulon Pari, et apingolan.

⁴⁸ Inkuanen Jesus ed sikara, Akin et sankaawit yo ray ispada tan saray pekpek a mangerel ed siak? Tulisan ak sirin?

⁴⁹ Inagew-agew ak a nambabangat ed Timplo tan wadman kayo met, balet ag yo ak inerel Balet nakaukolan a nasumpal so ibabagay Masanton Sulat.

⁵⁰ Nagsibatik ya amin iray disipulo tan tinaynan day Jesus.

⁵¹ Sakey a balolakin akakolibemben labat na oles so tinmombuk ed kinen Jesus. Siningkat na saray totoo

⁵² balet akaokpus, insan binmatik a labus-lakseb ta atilak to la may kolibemben to.

⁵³ Inyakar day Jesus ed abung na Pangulon Pari, a nantitiponan da ray manonan papari, saray mamatakken na baley, tan saray iskriba.

⁵⁴ Tinmombuk si Pedro ed kinen Jesus, balet walad bandad arawi. Tinmuloy ya anggad solar na Pangulon Pari, inmirung diman a kaiba to ray guardia, tan akidangdang.

⁵⁵ Ginawa na saray manonan papari tan amin a kabyangay Sanidrin so anggaay nayarian da a mananap na ipakasalanan dad kinen Jesus, pian napapatey da. Balet anggapoy narumog da.

⁵⁶ Dakel iray tasin nantila sumpad kinen Jesus, balet ag nantutukoyay salita ra.

⁵⁷ Insan wala ray inmalagey a nantila sumpad kinen Jesus.

⁵⁸ Nadngel min inkuanto, Gebaen ko yan Timplo a ginaway too, insan kayariy taloy agew mangipaalagey ak na sananey ya aliwan ginaway too.

⁵⁹ Balet anggan sikara ag da napantutukoyay salita ra.

⁶⁰ Inmalagey so Pangulon Pari ed arap dan amin, tan tinepet tod kinen Jesus, Anggapoy iyebat mod sayan ipapakasalanan dad sika?

⁶¹ Balet mareereen si Jesus tan ag balut inmesel. Tinepet lamet na Pangulon Pari ed kinen Jesus, Sika so Cristo ya Anak na Galgalangen a Dios?

⁶² Inmebat si Jesus, On, siak, tan nanengneng yoy Anak na Too ya akayorung ed nikawanay Dios a Makapanyarin-amin. Nanengneng yo met naani ya onsasabin walad saray lorem na tawen!

⁶³ Pinilat na Pangulon Pari so kawes to tan inkuanto, Ag tayo la nakaukolay arum ni ran tasi!

⁶⁴ Nadngel yoy kaogsay salita ton sumpad Dios! Antoy kuanyo? Nankakasakeyan dan amin a si Jesus et nepeg a pateyen.

⁶⁵ Ginapoan na saray arum a nilulukdaan si Jesus tan pinerengan da. Kinakabil da ran kuanda, Ibagam pa no siopay angabil ed sika? Inala na saray guardia, insan da met tinatampal.

⁶⁶ Wadman niy Pedro ed solar nen sinmabi so bii a sakey ed saray katulong na Pangulon Pari.

⁶⁷ Nen anengneng toy Pedro a mandarangdang, kinonineng ton maung tan kuanto, Kaiba ka met nen Jesus a taga Nazaret.

⁶⁸ Balet imbori nen Pedro tan inkuanto, Ag ko amta...ag ko natatalusan itay ibabagam! Insan linmad puirtay solar. Diad saman a bekta kinmukaok so sakey a lalung.

⁶⁹ Anengneng lamet na samay biin igaganggan tan kuanto ed saray wadman, Sayan too sakey ed sikara!

⁷⁰ Balet imbori lamet nen Pedro. Ag abayag, inkuan lamet na saramay wadman ed kinen Pedro, Ag mo nibori a sakey kad sikara, lapud taga ka met Galilea.

⁷¹ Balet nansamba lay Pedro a kuanto, Nitay Dios, anggan duasen to ak no mantitila ak! Tua ya ag ko kabat itay toon ibabaga yod siak!

⁷² Diad saman a bekta, kinmukaok lamet so lalung. Insan anunotan nen Pedro may sinalita nen Jesus ed sikato, Kasakbayan a pidwan ikukaok na lalung, ibori mo ak a mamitlo! Inmakis na ampaipait si Pedro.

15

¹ "Kasabiy kabwasan, nantitipon a namplano ray manonan papari, saray mamatakken na baley, saray iskriba, tan saray arum ni ran kabyangay Sanidrin. Binalur day Jesus, insan da inyakar ed kinen Pilato.

² "Tinepet nen Pilato ed kinen Jesus, Sikay ari da ray Judio? Inmebat si Jesus, Sika lan dili so mangibabaga.

³ "Amayamay iray ipapakasalanan na saray manonan papari ed kinen Jesus,

⁴ "kanyan tinepet nen Pilato lamet, Akin et ag ka onebat? Nadngel moy ontan lan karakel na ipapakasalanan dad sika!

⁵ "Ag lan balut inmebat si Jesus, kanyan agaylay pankelaw nen Pilato.

⁶ "Kapag Pista na Paskua, mangibolus si Pilato na siopaman a prison kerewey karaklan.

⁷ "Diad saman a panaon walay sakey a lakin manngaray Barabbas a walad prisowan. Kaiba to ray totoon akapatey nen walay golon sumpad gobirno.

⁸ "Nen nantitipon sirin iray totoo tan kinerew dad kinen Pilato ya ibolus toy sakey a priso,

⁹ "tinepet tod sikara, Labay yon ibolus kod sikayoy ari da ray Judio?

¹⁰ Ta kabkabat nen Pilato ya inyawat na saray manonan papari si Jesus ed sikato, lapud pakakaibeg da.

¹¹ Balet saray manonan papari sinogsogan da ray totoo a kerewen dad kinen Pilato ya ibolus toy Barabbas, aliwan si Jesus.

¹² Tinepet lamet nen Pilato ed saray totoo, Anto sirin so gawaen kod sayay toon tatawagen yoy ari da ray Judio?

¹³ Ineyag dad sikato, Ipasak mod krus!

¹⁴ Akin, antoy ginawa ton maoges? tinepet nen Pilato. Lalon inkasikasil dan ineyag, Ipasak mod krus!

¹⁵ Labay nen Pilato a paliketen iray totoo, kanyan imbolus tod sikara si Barabbas. Impapasiplatan toy Jesus, tan inyawat ton ipasak ed krus.

¹⁶ Si Jesus inyakar na saray sondalo ed dalem na palasioy gobirnador, tan tinawag da ray arum a kakaiba rad batalyon.

¹⁷ Sinolungan day Jesus na granatin kawes, nanliken iray sangasangan masabit tan ginawa ran singa korona, insan da inyan ed olo to.

¹⁸ Inggagalang dad satan a kuanda, Andokey komun so bilay na Ari da ray Judio!

¹⁹ Pinapaspas day olo to tan nilulukdaan da, insan ira nantatalimukor a mangigalang ed sikato.

²⁰ Kasumpal dan niludlurey, nilakseb da may granatin inkawes dad sikato tan insolung da may dilin kawes to. Insan da impaway ya ipasak ed krus.

²¹ Nabet dad dalan so sakey a lakin manngaray Simon, a nanlapud bario ya oonlad siudad, tan pinasoot dan impasakbat ed sikatoy krus nen Jesus. Si Simon taga Cirene tan ama di Alejandro tan Rufo.

²² Inyakar day Jesus ed pasen a manngaray Golgota a kabaliksan toy Pasen na Lapis-lapis na Olo.

²³ Initdan dad may Jesus na alak a nilaukay mira, balet ag to ininom.

²⁴ Impasak dad krus, tan inapag da ray kawes to kayari ran nampapalaranan, pian naamtaan da no dinay betang na sakey tan sakey ed sikara.

²⁵ Alas nuibid kabwasan nen impasak dad krus.

²⁶ Nisulat so impakasalanan dad sikato: Say Ari da ray Judio.

²⁷ Insan da impasak a kaiba nen Jesus so duaran tulisan ed sansakey a krus, diad nikawanan tan nikawigi to.

²⁸

²⁹ Si Jesus pineyeng-peyengan tan pinapabaingan na saray totoon onlalabas: Aha, aliwa tan sika may maneral na Timplo, insan mo ipaalagey ed loob na taloy agew?

³⁰ Epas kad tan ed krus tan ilaban moy laman mon dili!

³¹ Onton met, niludlurey na saray manonan papari tan saray iskriba. Inkuandad sakey tan sakey, Inlaban to ray arum, balet ag to nilaban so laman ton dili!

³² Onepas pa natan ed krus so Cristo ya ari na Israel, pian nanengneng mi tan panisiaan mi la! Niludlurey met na saramay duaran nipasak ed krus, a singa sikato.

³³ Nanlapud alas dosi ed kaagewan, say intiron dalin binnilonget ed loob na taloy oras.

³⁴ Diad alas tris, inmeyag si Jesus na makmaksil, Eloi, Eloi, lema sabachthani? a labay ton ibaga, Dios ko, Dios ko, akin et inkaindan mo ak?

³⁵ Nadngel ya na saray arum a wadman tan inkuanda, Dengel yo, tatawagen toy Elias!

³⁶ Batik so sakey ed sikara tan angalay ispongha. Impasepsep tod anakseng ya alak, insan to inyan ed ngoroy tiken. Impasopsop tod kinen Jesus tan kuanto, Alagar kayo! Nengnengen tayo pa no onsabiy Elias a mangyepas ed sikato ed krus!

³⁷ Inmeyag na maksil si Jesus, insan inatey.

³⁸ Diad saman a bekta, apaldua so kurtina ed Timplo, manlapud tagey ya anggad saloy.

³⁹ Naimatunan na samay sondalon kapitan a manaalagey ed arap na krus no panon so ineyag tan impatey nen Jesus. Tuan Anak na Dios yan too! inkuanto.

⁴⁰ Wala ray pigaran bibii a walad bandad arawi ya onnennengneng ed nagagawa. Wadman met ira di Salome, Maria Magdalena, tan sakey nin Maria ya ina nen Jose tan si Santiago a yogtan to.

⁴¹ Nanlapu lad Galilea, ontotombuk la ra yan bibii ed kinen Jesus tan manlilingkur irad sikato. Wadman met iray dakel a bibii a kaiba nen Jesus a linmad Jerusalem.

⁴² Onlalabi la nen sinmabiy Jose a taga Arimatea. Sikatoy sakey ed saray gagalangen a kabyangay Sanidrin, tan mampipilalek ed isabi na Panariay Dios. Agew ed saman a Panagparaan (salanti say agew a kasakbayan na Agew na Panagpainawa), kanyan linman mataletalek si Jose ed kinen Pilato tan kinerew ton alaen so bangkay nen Jesus.

⁴³

⁴⁴ Nikelawan si Pilato nen nadngelan to ya inatey lay Jesus. Pinatawag to may kapitan da ray sondalo tan tinepet to no tuan inatey lay Jesus.

⁴⁵ Nen nadngel toy paneknek na kapitan a talagan inatey lay Jesus, inyabuloy to ya alaen nen Jose so bangkay.

⁴⁶ Analiw si Jose na abel a sida. Nen niepas to lay bangkay nen Jesus, binalkut tod samay abel, insan insorub tod lobuk ya inongib ed baton-dampay. Kasumpal to ya, angitolin na baton baleg ya insara tod puirtay lobuk.

⁴⁷ Ombabantay si Maria Magdalena tan si Maria ya ina nen Jose, kanyan anengneng day angipomponan ed kinen Jesus.

16

¹ "Asumpal lay Agew na Panagpainawa. Si Maria Magdalena, si Maria ya ina nen Santiago, tan si Salome, analiw iray pabalingit ya ipoyuk dad bangkay nen Jesus.

² "Diad kabkabwasay Simba, nen ompapaway lay agew, linma rad pantion.

³ "Nen wala rad dalan, inkuandad sakey tan sakey, Siopa kasi so napikasian tayon mangitolin na baton akasara ed sangab na pantion?

⁴ "(Agaylay kabaleg to may bato.) Balet nen ontangwa ra anengneng dan nitolin la.

⁵ "Nen linmoob irad pantion, nikelawan ira nen anengneng day sakey a balolakin akaampoti a manyodyorung ed nikawanan.

⁶ "Inkuanto, Ag kayo mankelaw. Aanapen yoy Jesus a taga Nazaret a nipasak ed krus, anto? Andi dia, ta inmoli lad bilay. Nengneng yoy angiparokulan dad sikato.

⁷ "Laka yod kinen Pedro tan saray arum a disipulo tan ikuanyo: Onona nen sikayo si Jesus ya onlad Galilea tan diman yo nanengneng, onung na imbaga tod sikayo!

⁸ "Kanyan pinmaway tan batik ira lapud mapalaloy takot tan pankelaw da. Anggapon balut so imbagbaga rad arum, ta natatakot ira.

⁹ "[Nen inmolid bilay si Jesus ed kabkabwasay Simba, si Maria Magdalena ya amapawayan toy pitoran dimonyo so onaan a nampanengnengan to.

¹⁰ Linmay Maria Magdalena tan imbaga tod saray maneermen tan mannanangis a kakaiba nen Jesus.

¹¹ Nen nadngel dan imbaga ton mabilay si Jesus tan anengneng to, ag da sinisia.

¹² Kasumpal to ya, pinmanengneng si Jesus diad nidoman nengneng ed saray duaran disipulo nen wala rad dalana mamaarap ed bario.

¹³ Pinmawil ira tan imbaga rad arum a kakaiba ra, balet ag da ra sinisia.

¹⁴ Kasumpal to ya, pinmanengneng si Jesus ed saray labinsakey a disipulo legan dan mangakan. Nampasnukan to ra, lapud anawet so puso ra tan ag ira anisia ed saramay akanengneng ed sikato ya inmoli lad bilay.

¹⁵ Inkuantod sikara, Laka kayod intiron mundo tan ipulong yoy Maung a Balita ed amin a pinalsa.

¹⁶ Siopamay manisia tan nabinyagan, nilaban; siopamay ag manisia, nadusa.

¹⁷ Saray mananisia naitdan ira na saray tanda na pakayari: papawayen da ray dimonyo ed ngaran ko; mansalita ray nandoroman salita;

¹⁸ no mamemben iray oleg tan no oninom iray samal anggapoy maoges a nagawad sikara; tan onabig iray mansasakit a pangitapewan da ray lima ra.

¹⁹ Kasumpal ya akisalitay Katawan a Jesus ed sikara, niatagey ed tawen tan inmirung ed nikawanan na Dios.

²⁰ Linma sirin a nampupulong ed amin a pasen iray disipulo. Tinulongan iray Katawan ed sayan kimey da. Initdan to ray pakayari a manggaway milagro a pamaneknek ton katwaan so salita ya impupulong da.]

²¹ "[Linma ra may bibii ed kinen Pedro tan saray kakaaro to. Diad antikey a panangibaga, imbalita ray amin a nibagad sikara.

²² Kasumpal to ya, inkayat nen Jesus a dili ed amin a sokung na mundo, diad panamegley da ray disipulo to, so masanto tan mabilay lawas a balita na andi-anggaan a kilalaban.]