1 "Sikato yay salita na Katawan ed saray totood Israel diad panamegley nen Malakias.
2 "Say Katawan kuantod saray totoo to, Inaro ta kayo lawas. Balet ebat da, Panoy impangarom ed sikami? Ebat na Katawan, Sanagi ra di Jacob tan Esau, balet inarok si Jacob tan saray kabyangay boleg to,
3 "tan binosul koy Esau tan saray kabyangay boleg to. Dinederal koy kapokdulan a baley nen Esau tan pinaolyan kod saray ayayep ed katakelan so dalin to.
4 "No ibaga na saray kabyangay boleg nen Esau salanti saray Edomita, Aderalderal iray baley mi, balet pasimbaloen mi ran ipaalagey, say Katawan onebat ed satan, Pasimbaloen da ra labat ya ipaalageyigebak ira lamet. Tawagen ira na saray totoo, Say maoges a bansa tan Say bansan pamapasnukan na Katawan.
5 "Nanengneng ya na saray totood Israel ed dilin mata ra, tan ikuanda, Makapanyari so Katawan anggan diad paway na dalin na Israel!
6 "Say Katawan a Makapanyarin-amin kuantod saray papari, Say anak papagalangan toy ama to, tan say aripen papagalangan toy amo to. Siak so ama yoakin et ag yo ak pagalangan? Siak so amo yo, akin et ag yo ak itday galang? Babalawen yo ak balet tetepeten yo, Panoy pamabalaw mid sika?
7 "Onyay pamabalaw yod siakmangibabagat kayoy andi-kakanaan a kakanen ed altar ko. Insan tetepeten yo, panoy ag mi impamagalang ed sika? Ibagak ed sikayodiad ag yo pangingalngalep ed altar ko.
8 "Abaloan yo ya anggapoy kaogsan so pangibabagat yod siak na bulag odino mansasakit, odino piley ya ayep? Sali yo pay mangiter ed gobirnador na onman a klasiy ayep? Manliket kasid sikayo odino mangiter kasi na panangasi ed sikayo?
9 "Natan sikayo ran papari, kerew yo pad Dios a kasian to itayo. Ag to ebatan so pikakasi yo, et sikayo lamlamang so natetel.
10 Say Katawan a Makapanyarin-amin kuanto, Oy la komun, ta sakey ed sikayo so mangisarad saray kaput na Timplo, pian anggapod sikayoy manelsel na andi-kakanaan ya apoy ed altar ko. Ag ak makaliliket ed sikayo; ag ko awaten iray bagat ya iyaakar yod siak.
11 Igagalang ak na amin a totoo ed amin a sukong na mundo. Inerman a pasen saray totoo mamopool ira na insinso a para siak tan mangisasaklang ira na makapaliket a bagat. Igagalang da ak ya amin!
12 Balet ag yo ak papagalangan nen kuanyo ya andi-kakanaan so altar ko tan isasaklang yod altar ko so ag yo labalabay a kakanen.
13 Ibabaga yo, Onsasawa kami lad sarayan amin! Insan yo ak kokobibitan. Mangibabagat kayod siak na tinakew ya ayep odino piley odino mansasakit. Abaloan yo awaten ko tan ed sikayo?
14 Sakey a samba lalaingen so niiter ed masaol a mangibabagat ed siak na andi-kakanaan ya ayep, anta walay marakep ya ayep ed saray kokomponien to ya insipan ton iter ed siak! Lapud sakey ak a matalonggaring ya ari, tan tatakotan ak na saray totood amin a bansa.
1 "Say Katawan a Makapanyarin-amin kuantod saray papari, Para sikayo yan ganggan!
2 "Nepeg yo ak a pagalangan diad panamegley na gagawaen yo. No ag yo dengelen so ibabagak ed sikayo, isamba ta kayo. Isambak iray bengatlan panlalapwan na pambilay yo. Diad tuay tua insambak la ra, lapud leleglemewen yoy ganggan ko.
3 "Dusaen ko ray anak yo tan ingorangur ko ray lupa yo ed saray taiy ayep ya ibabagat yoinsan kayo nibantak ed bunton na taiy ayayep.
4 "Insan nakabatan yo ya inter kod sikayo yan ganggan, pian ag naderal so impisipanan kod saray paparin kabyangan iray boleg nen Levi.
5 "Diad saman ya impisipanan ko imbagak ya itdan ko ray bilay tan kareenan, et inter kod sikara ya pian pagalangan da ak. Diad saraman a panaon pinagalangan da ak tan tinakotan da ak.
6 "Imbabangat day onung ed katonungan, ya aliwan say kapikewetan. Nambilay iran makapaliket ed siak; ag da labat ginawa so katonungan, no ag ta tinutulongan da ni ingen iray arum a totoo ed itonda rad panggaway kaogsan.
7 "Nepeg ya ibangat na saray papari so tuan pakapikabat ed Dios. Nepeg ya onlad sikaran mangamta na linawak iray totoo, lapud sikaray ibabaki na Katawan a Makapanyarin-amin.
8 "Balet natan, inmarawi kayo ed tuan dalan, sikayo ran papari. Inggolo na bangat yo a nanggagaway kaogsan iray amayamay a totoo.
9 "Kanyan abuloyan kon balawen kayo na saray totood Israel lapud ag yo oonuren so linawak, tan no bangatan yo ray totook wala ray lalabien yo.
10 Ag ta saksakey so ama tayo? Ag ta saksakey a Dios so amalsad sikatayon amin? Akin sirin et ag tayo susumpalen so sipan tayod sakey tan sakey, tan akin et babalawen tayoy impisipanan na Dios ed saray lalaki tayo?
11 Ag tinoor na saray totood Juda so sipan dad Dios tan nanggagawa rad Jerusalem tan diad intiron bansa na mabambanday a bengatla. Dinotakan da so Timplo ya inaro na Katawan. Saray lalaki et angaasawa ra na saray bibiin mangigagalang ed saray diriyos na arum a bansa.
12 Ekalen komun na Katawan ed olupan na saray Israelita so siopaman a nanggawad saya, tan ag to la ran balut pibiangen ed saray bagat ya isasaklang na bansa tayo ed Katawan a Makapanyarin-amin.
13 Niay sakey nin gagawaen yo. Aamesen yo na lua yo so altar na Katawan, manaakis tan managogul kayo lapud ag to la aawaten iray bagat ya iyaakar yod sikato.
14 Tetepeten yo no akin et ag to la ra aawaten iray bagat yo. Say makasengeg et lapud amta ton dineral yoy sipan yod bii ya inasawa yo nen malangwer kayo ni. Sikatoy katambayan yo, balet dineral yoy sipan yod sikato, anggaman ya insipan yod arap na Dios a matoor kayod sikato.
15 Ag ta say Dios impankasakey to kayod laman tan ispiritu? Antoy getma tod saya? Say getma to et say pananak yo na saray petepeteg a totooy Dios. Kanyan apiapiger yon imanoen ya anggapoy anggan sakey ed sikayo so maneral na sipan to ed asawa to.
16 Kabosul koy pansiyan na sanasawa, kuay Katawan a Dios na Israel. Ag ko labay a balut a sakey ed sikayo et gawaen tod asawa to itan a maruksan bengatla. Alwaran yo sirin ya ag yo dederalen so sipan yon matoor kayod asawa yo.
17 Pinasawa yoy Katawan lapud panagsalita yo. Balet tetepeten yo, Panoy impamasawa mid sikato? Pinasawa yo diad impangikuanyo, Ipapasen na Katawan a Makapanyarin-amin a maung iray manggagawa kaogsan; diad tuay tua labalabay to ra. Odino diad panamegley na panetepet yo, Kawalaay Dios a nepeg a matonung?
1 "Say Katawan a Makapanyarin-amin onebat, Paonlaen koy ibabakik a mangiparaan na dalanen ko. Insan say Katawan ya anapen yo et biglan onsabi ed Timplo to. Onsabi so ibabaki a pampilpilalekan yon nanengneng tan ibawag toy sipanan ko.
2 "Balet siopay makapangitepel na agew na isabi to? Siopay nabilay no sikatoy ompanengneng? Sikatoy singa mabayanin sabon, singa apoy a manlinis ed mital.
3 "Sikatoy onsabi a manintinsia a singa toon mamasileng tan malinis ed pilak. No panoy pamapasileng na platiro ed pilak tan balituk, ontan met so panlilinis na Katawan ed saray papari, pian mangyakar irad Katawan na manepeg iran bagat.
4 "Diad ontan magmaliw a makapaliket ed Katawan iray bagat ya iyakar ed sikato na saray totood Juda tan Jerusalem, a singa gendat a ginagawa da la nen saman.
5 "Say Katawan a Makapanyarin-amin kuanto, Onsabi ak a manintinsia ed sikayo, tan mantasi ak a tampol sumpad saray managsalamangkiro, saray managlawan, saray mantatasi na tila-tila ed korti, saray manasaol na suildo da ray kumikimey, tan saray mamapasegsegang ed saray balon bibii, saray olila, tan saray sangkailiamin da ray mangigagalang ed siak.
6 "Siak so Katawan, ag ak mangoman. Kanyan sikayo ran kabyangay boleg nen Jacob et ag kayo ni sigput a naoput.
7 "Singa saray lalaki yo nen saman, impolisay yo ray ganggan ko tan ag yo ra inonur. Pawil kayod siak, et ompawil ak ed sikayo. Balet tetepeten yo, Antoy gawaen mi, pian makapawil kamid sika?
8 "Tetepetan ta kayo, maung kasin takewan na too so Dios? Andi-duaruwa ya aliwan maung, balet tatakewan yo ak. Panon mi kan tatakewan? tepet yo. Diad saray kakaplo tan diad saray bagat.
9 "Nisasamba kayon amin, lapud tatakewan ak na intiron bansa.
10 Iyakar yod Timplo iray amin a kakaplo yo, pian walay daakan a pantaganod man. Subok yo ak, et nanengneng yon lokasan koy puirtay tawen tan ikalbok ed sikayo so daakan a bindision.
11 Ag ko abuloyan a deralen na saray bigis iray tanaman yo, et diad ontan mambunga na amayamay iray sengeg na ubas yo.
12 Insan saray totoo ed amin a bansa tawagen da kayo a maliket, lapud magmaliw a marakep a panayaman so dalin yo.
13 Anagasang iray sinasalita yo a nipaakar ed siak, kuay Katawan. Balet tetepeten yo, Antoy imbaga mi nipaakar ed sika?
14 Inkuanyo, Andi-kakanaan so manlingkur ed Dios. Antoy kana na panumpal na saray salita to odino say pangipanengneng tayod Katawan a Makapanyarin-amin a sikatayoy maermen lapud saray ginagawa tayo?
15 Onung na nanenengneng tayo, saray mapaatagey a totoo so maliket. Ag labat onaaligwas iray totoon maoges, no ag ingen panusubok dad anos na Dios iray maoges a gagawaen da tan napapaliisan da.
16 Insan nantotongtong iray totoon walay takot dad Katawan. Dinmengel so Katawan ed sikara, et nadngel toy imbabaga ra. Diad arap to nisulat so sakey a libro a nipaakar ed saray tinmakot ed Katawan tan angigagalang ed sikato.
17 Sikaray magmaliw a totook, kuay Katawan a Makapanyarin-amin. Diad agew a siak so onggalaw, sikaray magmaliw a petepeteg kon kayaryan. Kasian ko ra a singa pangakasi na ama ed anak ton laki a manlilingkur ed sikato.
18 Maminsan ni nanengneng na saray totook so pandomaan na nagawad saray matonung tan saray maoges a totoo, say pandomaan na pansumpalan da ray totoon manlilingkur ed siak tan diad saray ag manlilingkur ed siak.
1 "Say Katawan kuanto, Onsabiy agew a napoolan a singa dayami iray mapaatagey tan maoges a totoo. Diad satan ya agew napoolan ira tan anggapoy nakeraan ed sikara.
2 "Balet sikayo ran mangoonur ed siak, singa agew ya ombutay ed sikayo so pakayarik a mangilaban tan mangyakar na panamaabig a singa saray rayos na agew. Magmaliw iran bolus tan maliket a singa saray kilaw na baka ya akapaway ed koral.
3 "Diad agew a siak so onggalaw, natalo yo ray maoges, tan magmaliw iran singa dabuk ed silong na saray sali yo.
4 "Nunot yo ray bangat na aripen kon Moises, saray ganggan tan saray bilin ya inter kod sikato diad Palandey na Sinai, a nepeg ya onuren na amin da ray totood Israel.
5 "Balet kasakbayan na isabi na baleg tan makapataktakot ya agew na Katawan, ibakik ed sikayo si propita Elias.
6 "Pankakasakeyen to lamet iray ama tan saray anak; ta no andi nepeg ya onsabi ak a maneral na bansa yo.