1 "Nen kumawalon bulan na kumadwan taon na panaari nen Dario ed Persia, say Katawan akisalitad kinen propita Zacarias a lakin anak nen Berekias tan apo nen Iddo.
2 "Say Katawan a Makapanyarin-amin impaibaga tod kinen Zacarias iray salita to ed saray totoo, Siak a Katawan et mapalaloy pasnuk ko ed saray lalaki yo,
3 "balet natan kuankod sikayo, Pawil kayod siak, et ompawil ak ed sikayo.
4 "Ag yo aaligen iray lalaki yo. Nen saman saray propita sinalita ra so impaikuankod saray totoo a magbabawi rad saray kaogsan da. Balet ag ira dinmengel odino inmonur ed siak.
5 "Inaatey la ra may lalaki yo tan saramay propita.
6 "Diad panamegley na saray aripen kon propita inter kod sikara iray ganggan ko tan pinasakbayan ko ra, balet ag da ra inngalngalep kanyan adusa ra. Insan nagbabawi ra tan binirbir da a siak a Katawan a Makapanyarin-amin et dinusak ira onung na kanepegan da tan onung na ginetmak la.
7 "Nen kumaduamplo tan apat agew na kumalabinsakey a bulan (say bulan a Sebat) na kumadwan taon na panaari nen Dario, say Katawan akisalitad siak diad panamegley na sakey a pasingayew ed labi.
8 "Anengneng koy sakey ya anghil na Katawan ya akakabayod ambalangan kabayo. Tinmondad kawalaan da ray kiew a mirto diad sakey a patar, tan diad nibeneg to wala ray arum a kabayo; wala ray ambalanga, batekan, tan ampoti.
9 "Tinepet kod samay too, Antoy kabaliksan da ra yan kabayo? Inmebat may anghil, Ipanengneng koy kabaliksan da.
10 Imbaki ra na Katawan, ta nengnengen da so mundo.
11 Saray akakabayod saramay arum a kabayo kuandad samay anghil, Nanlapu kamid intiron mundo, et anengneng min pangaskasiyan tan atalo so sankamundoan.
12 Insan samay anghil kuanto, Katawan a Makapanyarin-amin, pitomploy taon lan mamapasnuk kad Jerusalem tan saray siudad na Juda. Kapigan kasiy pansamput na ag mo pangasi ed sikara?
13 Makaligliwa tan makapaliket so inebat na Katawan ed samay anghil.
14 Insan samay anghil imbaga tod siak ya ibawag ko may imbaga na Katawan a Makapanyarin-amin: Mapalaloy panangarok ed Jerusalem a masanton siudad ko.
15 Balet baleg so pasnuk kod saray bansa a manliliket ed kareenan, ta diad pamopokpok koy pasnuk kod saray totook, iloloor dan pairapen iray totook.
16 Kanyan pinmawil ak ed Jerusalem ta kasian koy siudad. Napasimbalon nipaalagey so Timplok tan nipaalagey lamet so siudad.
17 Samay anghil imbaga to met ed siak ya ibawag ko: Ibabaga na Makapanyarin-amin a Katawan ya onaligwas lamet iray siudad to tan tulongan to lamet so Jerusalem, tan pilien to lamet a kayaryan ton dili so siudad to.
18 Diad sananey a pasingayew anengneng koy apatiran saklur na baka.
19 Tinepet kod samay katongtong ko lan anghil, Antoy kabaliksan da ra yan saklur? Inmebet imay anghil, Sikaray mangiriritrato na saramay matalonggaring a nanarian ed mundo ya angikaykayat na saray totoon taga Juda, Israel, tan Jerusalem.
20 Insan impanengneng na Katawan ed siak so apatiran kumikimey a sankaawit da ray mantilyo.
21 Tinepet ko, Antoy gawaen da ra yan totoo? Inmebat imay anghil, Sinmabi ran manaktakot tan mamasuko ed saray bansan sigput ya aneral ed dalin na Juda tan angikaykayat ed saray totoo to.
1 "Diad sananey a pasingayew anengneng koy sakey a lakin sankabembenan toy panagsukat.
2 "Tinepet kod sikato, Iner so laen mo? Onla ak a manukat ed Jerusalem, ebat to, pian naamtaan ko no panoy karokey tan kaawang to.
3 "Insan anengneng kon kinmurang ed bandad arap imay anghil a katongtong ko la, insan inabet na sakey ya anghil.
4 "Kuantod samay inmabet, Batik ka, ta ibagam ed samay lakin tobunbalo a sankaawit toy panagsukat, a nawalaan na amayamay a totoo tan baka so Jerusalem, kanyan diad gaway kaawang to ag nayarin paliberay padir.
5 "Insipan na Katawan a sikaton dili so magmaliw a padir na apoy ed liber-liber na siudad a mangyagel tan manayam diman a napnoy kagalangan.
6 "Say Katawan kuantod saray totoo to, Inkaykayat ta kayo ed amin a pasen. Balet natan, sikayon nibantak ed arum a bansa et ibatikan yoy Babilonia tan pawil kayo lad Jerusalem.
7
8 "Siopamay mangabil ed sikayo kabilen toy sankablian ed siak. Kanyan say Katawan a Makapanyarin-amin imbaki to ak a mangikuan ed saray bansan sinasamsaman da ray totoo to,
9 "Say Katawan a dili so onlaban ed sikayo, tan samsaman kayo na saray totoon aripen yo nen saman. No nagawa la ya, naamtaan na balang too a siak so imbaki na Katawan a Makapanyarin-amin.
10 Say Katawan kuanto, Mankanta kayod liket, sikayon totood Jerusalem, ta onsabi ak a manayam ed pegley yo!
11 Diad satan a panaon dakerakel iray bansan onsingger ed Katawan tan magmaliw iran totoo to. Manayam ed kawalaan yo, et nabirbir yo ya imbaki to ak ed sikayo.
12 Maminsan ni lamet say Juda et magmaliw a nidoma-doman kayaryan na Katawan diad dalin ton masanto, tan say Jerusalem, et magmaliw a sankainaroan tod saray kayaryan to.
13 Mandeen kayo, amin yon totoo ed arap na Katawan, ta sikatoy onsasabin nanlapud masanton ayaman ton pasen.
1 "Diad sananey a pasingayew say Katawan impanengneng tod siak a manalalagey ed arap na anghil na Katawan si Josue a Pangulon Pari. Manalalagey met diman ed abay to si Satanas ya akaparaan lan mangakusa ed kinen Josue.
2 "Samay anghil na Katawan kuantod kinen Satanas, Dusaen ka komun na Katawan, sika Satanas! Dusaen ka komun na Katawan ya inaro to so Jerusalem. Sayan too et aliling toy sakey a pegpeg na kiew ya inalad kawalaay pool.
3 "Manalalagey diman si Josue a maringot so kawes to.
4 "Samay anghil kuantod mangatatawen iran igaganggan, Lakseb yod sayan laki so maringot ya akasolung ed sikato. Insan to inkuan ed kinen Josue, Inekal ko ray kasalanan mo tan itdan ta kay balon kawes ya isolung mo.
5 "Ingganggan na samay anghil ira may igaganggan ya itapew dad olo nen Josue so balon turban. Legan a manalalagey diman imay anghil saramay igaganggan intapew dad olo nen Josue imay turban tan insolung dad sikato so balon kawes.
6 "Insan imbaga na samay anghil ed kinen Josue a
7 "say Katawan a Makapanyarin-amin kuanto: No onuren mo ray ganggan ko tan sumpalen mo ray kimey a nipabetang ed sika mansiansia kan makaoley ed Timplok tan diad saray patio to, tan dengelen ko ray pikakasim a singa pandedengel kod pikakasi da ray anghil a manaayam ed kawalaan ko.
8 "Dengel ka sirin, Josue, sika a Pangulon Pari; tan dengel kayon kapara ton papari, sikayo a tanda na maung a nagawa ed arapen a panaon; ipaamtak so aripen ko a tatawagey Say Sanga!
9 "Ipasen kod arap nen Josue so sakey a baton pitoray lupa to. Itatak kod sayan bato so sakey a balikas, et diad sanagew ekalen koy kasalanan na sayan dalin.
10 No onsabiy tan ya agew, balang sakey ed sikayo imbitaan to ray kakaaro to ya ondago tan manliket a walay kareenan tan arawid kaatapan diad pasen ya apaliberan na saray kaubasan tan saray kakiewan yon igos.
1 "Dinmago lamet imay katongtong kon anghil tan binangon to ak a singa amangon na toon naogip.
2 "Tinepet ko, Antoy nanenengneng mo? Inmebat ak, Balituk a panangipatoonan na lamparaan. Diad tapew to walay sakey a yaung a pananginay larak. Walay pitoran lamparaan ed samay panangipatoonan, tan balang sakey et walay pitoran pananginay pabilo.
3 "Walay sakey a kiew ya oliba ed kapag diking to may patoonan na lamparaan.
4 "Insan ko tinepet ed samay anghil, Antoy kabaliksan da ra ya?
5 "Inmebat imay anghil, Ag mo amta? On, ag ko amta, ebat ko.
6 "Samay anghil imbaga tod kinen Zorobabel ira yan salita na Katawan: Mampalabo ka, aliwan lapud pakapanyari na saray sondalo odino lapud dilin biskeg mo, no ag ingen lapud ispirituk.
7 "Naandipat ed arap mo iray bangen a singa ra palandey. Napasimbalom a nipaalagey so Timplo, tan diad pangiliram na sankasamputan a bato, saray totoo iyeyag da, Marakep, marakep!
8 "Wala niy sananey iran salita a sinmabid siak a nanlapu rad Katawan.
9 "Inkuanto, Inlira nen Zorobabel so pundasion na Timplo, et sumpalen ton ipaalagey. No nagawa ya, naamtaan na saray totook a siak so angibakid sika ed sikara.
10 Binmetel so pananisia ra lapud melmelag niy agawaan ed kimey. Balet nanengneng day Zorobabel a mangituloy na kimey a pamaalagey na Timplo, et manliket ira.
1 "Ninmengneng ak lamet, et anengneng koy sakey a nilokut a babasaen ya ontitikyab ed tagey.
2 "Tinepet na samay anghil no antoy anengneng ko. Inmebat ak, Sakey a nilokut a babasaen ya ontitikyab ed tagey; siamiran mitroy karokey to tan apatira tan kapalduan mitroy kaawang to.
3 "Insan inkuantod siak, Nisulat ed saman a babasaen so samba ya onsabi ed intiron dalin. Diad sakey a dapag na samay babasaen, ibabaga to a napagit ed dalin iray amin a matakew; tan diad sakey a dapag ibabaga to a napagit ya amin iray totoo a mansasambad pantitila ra.
4 "Ibabaga na Katawan a Makapanyarin-amin ya ibaki to yan samba tan onloob ed abung na balang matakew tan diad abung na balang toon mansasamba ed pantitila to. Mansiansia ed kaabungan da tan taynan to ran aderalderal.
5 "Pinmanengneng lamet imay anghil tan kuanto, Nengneng mo! Sananey lamet so onsasabi!
6 "Anto tan? tepet ko. Inmebat, Sakey a baskit ya iriritrato toy kasalanan na intiron dalin.
7 "Walay sakub ton gansa imay baskit. Nen babantayan ko niatagey may sakub, tan walay biin akayorung ed samay baskit!
8 "Samay anghil kuanto, Sayan bii iriritrato to so kaogsan. Insan to intelmer ed baskit imay bii tan sinakuban to.
9 "Tinmangay ak et anengneng koy duaran bii ya ontitikyab a mamapaarap ed siak; mabisbiskeg iray payak dan singa ra payak na dulakak. Inala da may baskit tan intikyab da.
10 Tinepet kod samay anghil, Iner so pangyakaran dad samay baskit?
11 Inmebat, Diad Babilonia a diman da igawaan na timplo. No ayari lay timplon ipaalagey da, iyakar dad dalem imay baskit ta galangen na saray totoo.
1 "Wala niy sananey a nipasingayew ed siak. Akanengneng ak natan na apatiran karwahi ya ompapaway ed nanleetan na duaran gansan palandey.
2 "Gogoyuren na saray ambalangan kabayo so ononan karwahi, tan gogoyuren na saray andeket a kabayo so kumadwa,
3 "saray ampotin kabayo so kumatlo, tan saray batekan a kabayo so kumapat.
4 "Insan ko tinepet ed samay anghil, Antoy kabaliksan da ra yan karwahi?
5 "Inmebat, Sikara yay apatiran dagem; kapkapanlapu rad arap na Katawan na intiron dalin.
6 "Samay karwahin igogoyur na saray andeket a kabayo et mamapaarap irad baybay diad Babilonia, saramay ampotin kabayo et diad bokig so lalaen da, tan saramay batekan et oonla rad bansa diad abalaten.
7 "Nen ompapaway ira may batekan a kabayo, magangganat ira ya onlan mangimano ed intiron mundo. Samay anghil kuantod sikara Laka yon mannengneng ed intiron mundo! Linma ra sirin a nannengneng ed intiron mundo.
8 "Insan inmeyag ed siak imay anghil, Pinakepa na saramay kabayon linmad baybay ed Babilonia so pasnuk na Katawan.
9 "Say Katawan inter tod siak ira yan salita.
10 Inkuanto, Alam iray rigalon inter na saray totoon nibantak ed arum a bansa a di Heldai, Tobias, tan Jedaya, tan lakan tampol ed abung nen Josias a lakin anak nen Sofonias. Amin da ra yan lalaki et pinmawil iran nanlapud Babilonia ya inkibantakan da.
11 Gawam a korona iray balituk tan pilak ya iniiter da, insan mo ipatoon ed olo na Pangulon Pari a si Josue a lakin anak nen Jehosadak.
12 Ibagam ed sikato a say Katawan a Makapanyarin-amin kuanto, Say toon tatawagen na Say Sanga et onaligwas ed kawalaan to tan pasimbaloen ton ipaalagey so Timplo na Katawan.
13 Sikato so mangipaalagey ed Timplo tan awaten to so kagalangan na sakey ya ari tan oleyan to ray totoo to. Manalagey ed abay na trono to so sakey a pari tan mankimey iran dua a mareen tan maliket,
14 Manayam ed dalem na Timplo na Katawan imay korona a sakey a pakanudnunotan ed kindi Heldai, Tobias, Jadaya, tan Josias.
15 Ondagon ontulong ed pangipaalagey lamet ed Timplo iray totoon manaayam ed arawin dalin. Et no asumpal lan nipaalagey lamet, naamtaan yod satan ya imbaki ak ed sikayo na Katawan a Makapanyarin-amin. Nagawa ra yan amin no sigput yon onuren iray ganggan na Katawan a Dios yo.
1 "Nen kumapat ya agew na kumasiam a bulan (say bulan a Kislev) na kumapat a taon na panooley nen Dario, sinmabid siak so salita na Katawan.
2 "Saray taga Betel imbaki da ra di Sarezer tan Regemmelek tan saray totoo ran lalaki ya onla rad Timplo na Katawan a Makapanyarin-amin, ta onkerew ira na bindision na Katawan,
3 "tan itepet da ed saray papari tan saray propita yan tepet: Ituloy tayo niy manermen lapud inkaderal na Timplo, diad panamegley na panayuno tayod kumaliman bulan a singa ginagawa tayo lad amayamay ya imbeneg a taon?
4 "Sikato yay sinmabid siak a salita na Katawan,
5 "Ibagam ed saray totood bansa tan saray papari ya ag da ak pinagalangan nen nanayuno tan nanermen ira nen kumalima tan kumapiton bulan legan na saraman a pitomplon taon.
6 "Pinepenek day sikaran dili labat nen naniinom tan nanaakan ira.
7 "Sikato yay imbaga na saray inmonan propita sanen maaligwas so Jerusalem tan sikatoy napno na saray totoo tan sanen amayamay iray totoo a manaayam ed saray baley a kaliber-liber na siudad tan diad bandad abalaten tan diad alusadsar na kapokdulan ed bandad sagur.
8 "Say Katawan kuantod kinen Zacarias,
9 "Nen saman saya so salitak ed saray totook: Nepeg yon gawaen so inkatonung, tan mankakasiyan tan manaarowan so sakey tan sakey ed sikayo.
10 Ag yo papairapen iray balo, saray olila, saray sangkailin manaayam ed dalin yo, odino siopaman a walad pankaukolan. Tan ag kayo mannununot a manggaway maoges ed siopaman.
11 Balet anawet so olo da ray totook; ag ira dinmengel. Kinaputan day isip da.
12 Pinaawet dan singa bato so kapusoan da. Mapalaloy impakapasnuk ko lapud ag ira dinmengel ed saray ganggan kon impaibangat kod saray propitan nambibilay nen saman a panaon.
13 Lapud ag ira dinmengel nen nansalita ak, ag ko ra inebatan nen nampikasi ra.
14 Singa ak bagyon angibantak ed sikara ed saray arum a bansa a diman ira nanayam. Nagmaliw ya ataynan yan marakep a dalin, anggapoy anggan sakey ya atilak a toon manaayam.
1 "Say Katawan a Makapanyarin-amin inter to yan salita ed siak:
2 "Pampilpilalekan kon tulongan so Jerusalem lapud inararok iray totoo to; lapud panangarok ed sikara siak so akapasnuk ed saray kalaban da.
3 "Ompawil ak ed Jerusalem a masanton siudad ko, tan manayam ak diman. Natawag iman a pasen a matoor a siudad tan say palandey na Katawan a Makapanyarin-amin et natawag na masanton palandey.
4 "Ompawil lamet imay gendat lan agawa a saray mamasiken tan saray akokolaw, a lapud kinatakken da mambastun la ra, et manyurong irad saray plasa na siudad.
5 "Saray dalan et napano lamet ed satan na saray ogogaw a lalaki tan bibiin manggagalaw.
6 "Nayarin ipasen na saray totoon atilak ed bansa ya ag yan balut nagawa, balet no para siak nagawa.
7 "Ilaban ko ray totook ed saray dalin ya akadakepan da,
8 "tan manlapud bokig tan sagur ipawil ko ran manayam ed Jerusalem. Magmaliw iran totook tan siak so Dios da a manoley ed sikara onung ed inkatoor tan inkatonung.
9 "Mampabiskeg kayoy linawa! Narerengel yo natan ira may salitan imbabaga na saray propita diad samay panaon a nililira so pundasion diad pamapasimbaloy kipaalagey na Timplo.
10 Kasakbayan to man a panaon anggapoy toon nayarian toy mangupa na totoo odino ayayep, tan anggapoy toon ag igagaem na kalaban to. Impanbubusolan kod saman ya amin iray totoo.
11 Balet natan doma so gagawaen kod saray totoon akapaliis ed patey ed sayan bansa.
12 Anggapoy manigensigen ed sikara ed pantanem da. Mambunga ray sengeg na ubas da, mangiter na bungay tanaman so dalin da, tan daakan so ompelag ya oran. Iter ko ra yan amin a bindision ed saray totook ya akapaliis ed patey.
13 Sikayo ran totood Juda tan Israel! Nen saman saray sangkaili mansasambaan ira ya ikuandad sakey tan sakey, Ondapo met komun ed sika so deral a singa samay deral a dinmapo ed Juda tan Israel! Balet ilaban ta kayo, insan saraman a sangkaili ikuandad sakey tan sakey, Nagamuran mo met komun so bindision a singa samay bindision ya agamuran na Juda tan Israel! Kanyan pabiskeg yoy linawa yo, ag kayo ontatakot.
14 Say Katawan a Makapanyarin-amin kuanto, Nen impanpasnuk ak na saray lalaki yo, ninunot ko ya ipadalan so deral ed sikara tan ag ko inoman so kanunotan ko, no ag ingen intuloy kon sinumpal iray planok.
15 Balet natan nununoten ko a bindisionan iray totood Jerusalem tan Juda. Kanyan ag kayo natatakot.
16 Sarayay bengatlan gawaen yo: Salita yod balang sakey so katwaan. Diad saray korti ipakurang yo so petepeteg a katunongansay katunongan a mangiter na kareenan.
17 Ag kayo mannununot na antokaman a makapasakit ed arum. Ag kayo mantatasi na tila a katekep toy samba. Kabosul koy panagtila, panagpikewet na katunongan, tan panagduksa.
18 Say Katawan a Makapanyarin-amin inter to yan salita ed kinen Zacarias:
19 Say ayunon nagagawa kapag kumapat, kumalima, kumapito tan kumaplon bulan et magmaliw a pista na liket tan gayagan para saray totood Juda. Nepeg yon aroen so katwaan tan kareenan.
20 Say Katawan a Makapanyarin-amin kuanto, Onsabiy panaon a saray totood amayamay a siudad et onla rad Jerusalem.
21 Saray totoon walad sakey a siudad inkuandad saray walad arum a siudad, Onla kamin mangigalang ed Katawan a Makapanyarin-amin tan onkerew kami na bindision to. Mila kayod sikami!
22 Amayamay a totoo tan makapanyarin bansa so onlad Jerusalem a mangigalang ed Katawan a Makapanyarin-amin tan onkerew ira na bindision to.
23 Diad saratan ya agew saray samploran sangkaili onla rad sakey a Judio tan ikuanda, Mikasakey kamid sika, lapud nadngelan min walad sika so Dios.
1 "Sikato yay salitan papaibaga na Katawan: Inggetar to lan nadusa so dalin na Hadrac tan say siudad na Damasco. Aliwa labat a saray tribu na Israel so kayaryan na Katawan, no ag ingen pati say manonan baley na Siria.
2 "Kayaryan met na Katawan so Hamat a miketeg ed Hadrac, saray siudad na Tiro tan Sidon pati saray karunongan da.
3 "Amaalagey so Tiro na tirinsira to tan nantitipon na amayamay a pilak tan balituk a singa ra karakel na dabuk!
4 "Balet alaen na Katawan iray amin a bengatlan kayaryan to. Ibantak tod dayat iray kayamanan na Tiro tan temeken tod apoy.
5 "Nanengneng ya na siudad na Ascalon, et nataktakot. Nanengneng met ya na siudad na Gaza, et manlikna na ontan lan sulit. Ontan met na Ekron, et nataktakot tan naandian na ilalo. Nabalang na Gaza so ari to tan nataynan so Ascalon.
6 "Panayaman na totoon nandoroma so kolor na baog da so Asdod. Say Katawan kuanto, Ipaabebak ira yan mapaatagey a Filistio.
7 "Ag la mangan na karnin kadadala, odino say kakanen a sebel onung ed ganggan. Amin da ray makapaliis ed patey et magmaliw iran kabyangan na totook tan singa ra sakey a boleg ed tribu na Juda. Magmaliw a kabyangan na saray totook iray taga Ekron a singa impagmaliw met na saray Jebuseo.
8 "Guardiaan koy dalin ko tan ag ko padalanen ed dalin ko iray sondalo. Ag ko la abuloyan a pairapen na saray maruksan totoo iray totook. Anengneng ko so ontan lan impanirap na saray totook.
9 "Manliket kayo na baleg, sikayon totood Sion! Eyag kayod liket, sikayon totood Jerusalem! Nengneng yo, onsasabid sikayo so ari yo! Onsasabin analo tan sipapalabo, balet mapaabeba tan akakabayod sakey a kilaw na asno
10 Say Katawan kuanto, Ekalen kod Israel iray karwahin para bakal; ekalen kod Jerusalem iray kabayon para bakal; naderal iray panan inkakanad bakal. Say ari yo et mikaaro ed saray arum a bansa; manoley a manlapud sakey a dayat ya anggad sananey a dayat, manlapud Ilog na Eufrates ya anggad saray samput na dalin.
11 Say Katawan kuanto, Lapud impisipanan kod sika samay sipanan a pinaletan na dala da ray bagat, ibolus ko ray totoom naagwat irad anggapoy danum a bobun na inkibantak ed arum a bansa.
12 Pawil kayo la, sikayon nibantak ed arum a bansa a natan wala lay ilalo yo; pawil kayod pasen yon arawid kaatapan. Ibabagak ed sikayo natan a say bindision ya iter kod sikayo et mamidwad karakel na saramay kairapan a nilikna yo.
13 Ikanak so Juda a singa bekang a panay sondalo tan say Israel a singa pana. Ikanak a singa ispada iray totoo ed Sion, diad pibakal ed saray totood Grecia.
14 Say Katawan ompanengneng ed tagey da ray totoo to; ibolus ton singa kirmat iray pana to. Say Katawan a Dios paknulen toy trumpita; manlapud abalaten manakar ed saray bagyo.
15 Say Katawan a Makapanyarin-amin et iyagel to ray totoo to, tan deralen da ray kalaban da. Diad bakal oneyag iran singa abuek a totoo, tan paterteren day dala ray kalaban da; onagos so dala a singa say dala na bagat a walad yaung ya inibung ed altar.
16 No onsabi tan ya agew, say Katawan iyagel to ray totoo to, a singa say pumapastul iyaagel tod kaatapan iray karniro to. Onkidyam irad dalin to a singa ikikidyam na saray alahas ed koronay ari.
17 Agay lay abig tan dakep so pagmaliwan na dalin! Pabiskegen na trigo tan alak ya iter to iray tobun-balo.
1 "Kerew kayod Katawan na oran no panaon na tiagew. Say Katawan so mangibabaki na lorem a mangipepelag na oran a mamapalambut ed saray tanaman ed kaalogan a para balang sakey a too.
2 "Saray totoo et mangipapanon irad saray talintaoy diriyos tan diad saray pumaparles, balet tila tan andi-kakanaan iray nanaala ran ebat. Pigarad sikaray mangipapatalus na saray kogip, balet papalikdoen da kayo labat; andi-kakanaan iray iiter dan ligliwa. Kanyan mantawtawataw iray totoon singa ra abalang a karniro. Nagugunigon ira lapud anggapoy pangulo ra.
3 "Say Katawan kuanto, Mamapasnuk ak ed saraman a sangkailin manooley ed saray totook; dusaen ko ra. Kayaryan ko ray totood Juda, tan asikasoen ko ra, siak a Katawan a Makapanyan-amin. Magmaliw iran makapanyarin kabayok a para bakal.
4 "Manlapud sikara iray manoley, saray pangulo, tan saray kapitan na sondalo a manoley ed saray totook.
5 "Saray totood Juda et manalo ran singa saray sondalo a gatingatinan dad pitek na daladalan iray kalaban da. Mibakal ira lapud kaiba ra so Katawan, tan taloen da ray anggan kumakabayon kalaban da.
6 "Pabiskegen ko ray totood Juda; iyagel ko ray totood Israel. Ipawil ko rad dalin lapud inarok ira. Magmawil iran singa ra ag ko impolisay. Siak so Katawan a Dios; ebatan ko ray pikakasi ra.
7 "Magmaliw a mabiskeg a singa saray sondalo iray totood Israel, magmaliw iran maliket a singa totoon maniinom na alak. Nanunotan na saray kabyangay boleg da yan pananalo tan manliket ira lapud saray ginawa na Katawan.
8 "Tawagen ko ray totook tan pantitiponen ko ra. Ilaban ko ra tan pagmaliwen ko ran dakerakel a singa samay gendat a karakel da.
9 "Anggaman ya intaytayak ko ra ed saray bansa, nanunotan da ak diman ed arawin lugar. Sikara tan saray anak da et makapaliis irad patey tan mambabansag iran ompawil ed bansa ra.
10 Pasempeten ko ran manlapud Egipto tan Asiria tan manayam ira ed dilin bansa ra. Panayamen ko ra met ed Galaad tan diad Libano; napano na totoo so intiron dalin.
11 No ondalan irad dayat na ginigon da, siak a Katawan et pareenen ko ray daluyon, tan naekatan iray kaaralman na Ilog na Nilo. Napaabeba so mapaatagey ya Asiria, tan naekalay pakayari so makapanyarin Egipto.
12 Pabiskegen ko ray totook; igalang tan onuren da ak. Say Katawan so nansalita.
1 "Lokasan mo ray kaput mo, Libano, pian napoolan na apoy iray kiew mon sidro!
2 "Manakis tan managugol kayo, sikayon kiew a sipris atumba la ray kiew a sidro; aderal la ra man a mapagalang a kiew! Akis tan managugol kayo, sikayon robli na Basan abatang la ray makdel a takel!
3 "Manaakis ed ermen iray manoley; naandi la so kagalangan da! Dengel kayod pangwam na saray lion; aderal lay balaong dan takel ed gilig na Jordan.
4 "Sa Katawan a Dios ko kuantod siak, Magmaliw kan pumapastol ed pulok da ray papatasen.
5 "Papateyen ira na saray akankayaryan ed sikara, et ag ira ya nadudusa. Ilalako ray karni tan kuanda, Nagalang komun so Katawan! Mayaman kami la! Ag ira kakasian na anggan saray dilin pumapastol da. (
6 "Say Katawan kuanto, Ag ko la kasian so siopaman a too ed tapew na dalin. Paoleyan kod saray manoley da iray amin a totoo. Deralen na sarayan manoley so mundo, tan ag ko iyagel ed pakayari ra.)
7 "Saray sumasaliw tan lumalako na karniro et inupaan da ak, tan magmaliw ak a pumapastol na saray karniron papatasen. Angawit ak na duaran bastun; say sakey tinawag ko na Panangasi tan say sakey Pankakasakey. Inasikasok imay poluk na karniro.
8 "Ag ak akaanos ed saray taloran kaparak a pumapastol ya amosul ed siak, kanyan pinagit ko ra ed loob na sakey bulan.
9 "Insan inkuankod saray karniro, Aliwa lan siak so pumapastol yo. Ompatey la ray nepeg ya ompatey ed sikayo, tan naderal la ray nepeg a naderal ed sikayo. Mandederalan iray amin a makapaliis ed patey.
10 Insan ko inala may bastun a tatawagen na Panangasi tan pinoter ko a pamaandik ed impisipanan na Katawan ed amin da ray bansa.
11 Kanyan naandi lad saman ya agew so sipanan. Bambantayan ak ed saman na saramay sumasaliw tan lumalako ed saray karniro, et amta ra a misasalita so Katawan diad panamegley na ginawak.
12 Inkuankod sikara, No maabuloy kayo, iter yod siak so upak. Balet no ag kayo maabuloy, kayaryan yo la. Kanyan inter day upak a talomplon pilak a kuarta.
13 Say Katawan inkuantod siak, Yan mod panagsinupan na kayamanan ed Timplo ira tay kuarta. Kanyan inalak ira may kuartasay kuartan mapagalang ya abaloan dan manepeg ya upaktan inyan ko ra ed panagsinupan na kayamanan ed Timplo.
14 Insan ko pinoter imay sakey nin bastun, samay tatawagen na Pankakasakey, et naandi so pankakasakey na Juda tan Israel.
15 Insan say Katawan kuantod siak, Maminsan ni a magmaliw kan pumapastol, balet natan andi-kakanaan kan pumapastol.
16 Angipasen ak na sakey a pumapastol a manasikasod saray karnirok, balet ag to tutulongan iray maatap so bilay da; ag to aanapen iray abalang, ag to tatambalen iray asugatan, odino papakanen iray akapaliis ed patey. Kakanen to ingen so karni da ray sankatabaan tan aakniten to ray koko ra.
17 Pakaskasiy kipapasen na satan ya andi-kakanaan a pumapastol! Inkaindan to ray karniro to. Sigput a deralen na bakal so pakayari to. Naparalisis so taklay to, tan nabulag so kawanan a mata to.
1 "Sikato yay salita na Katawan nipaakar ed Israel, say Katawan ya angipanat na katawenan, say amalsad mundo, tan sikatoy angiter na bilay ed too. Kuanto,
2 "Pagmaliwen kon singa kupa na alak so Jerusalem; oninom iray bansan walad kaliber-liber to et mandongilngil iran singa abuek. Et no lakoben day Jerusalem, lakoben da met iray arum a siudad na Juda.
3 "Balet no onsabiy tan a panaon, pagmaliwen kon singa sakey ya ambelat a bato so Jerusalemdinan man a bansan salien ton alsaen et nasakitan. Mankakasakey ya ondogpad saman a bato iray amin a bansa ed mundo.
4 "Diad satan a panaon taktakoten kon amin iray kabayo ra tan ambagelen ko ray amin a kumakabayo ra. Bantayan ko ray totoo ed Juda, balet bulagen ko ray kabayo na saray kalaban da.
5 "Insan saray kabyangan na saray boleg na Juda ikuandad sikaran dili, Pinabiskeg na Katawan a Dios a Makapanyarin-amin iray totoo to a manaayam ed Jerusalem.
6 "Diad satan a panaon pagmaliwen ko ray boleg na Juda a singa ra pool ed sakey a takel odino diad sakey ya alog ya aaniyen la ray bungay tanaman toderalen da ray amin a bansa ed kaliber-liber. Mansiansian arawid kaatapan ed dalem na siudad iray totood Jerusalem.
7 "Siak a Katawan panaloen kon onona iray sondalo na Juda, pian say kagalangan ya awaten da ray kabyangay boleg nen David tan saray totood Jerusalem et baleg ni nen say awaten na saray arum a parti na Juda.
8 "Diad satan a panaon iyagel na Katawan iray manaayam ed Jerusalem, et anggan say sankakapoyan ed sikara magmaliw a mabiskeg a singa samay kinabiskeg nen David. Saray kabyangay boleg nen David et mangipangulo ran singa anghil na Katawan, singa say Dios a dili.
9 "Diad satan a panaon deralen koy balang bansan manalin ondogpa ed Jerusalem.
10 Panoen ko na ispiritu na panangasi tan ispiritu na pikakasi iray kabyangay boleg nen David tan saray arum a totoo ed Jerusalem. Onnengeng irad sakey a dinoyuk da, tan ermenan da a singa ra saray maneermen ed saksakey ya anak. Mapalaloy panermen da a singa ra saray maneermen ed impatey na panguloan ya anak a laki.
11 Diad satan a panaon say panermen ed Jerusalem et singa kabaleg na panermen ed Hadadrimon diad patar na Megido.
12 Manermen a bukbukor to so kapag pamilya ed intiron dalin: say pamilyan say sengeg to et si David, say pamilyan say sengeg to et si Natan, say pamilyan say sengeg to et si Levi, say pamilyan say sengeg to et si Simei, tan amin da ray arum nin pamilya. Kapag pamilya et manermen a bukor to, tan saray lalaki na kapag pamilya et manermen ya akabiig irad saray bibii.
1 "No onsabiy tan a panaon, kuay Katawan a Makapanyarin-amin, nalokasan so subul a manlinis ed kasalanan tan panangigalang ed talintaoy diriyos iray kabyangay boleg nen David tan saray totood Jerusalem.
2 "Diad satan a panaon ekalen kod bansa so kangaranan da ray talintaoy diriyos, et anggapo lay siopaman a makanunot ed sikara. Paekalen kod dalin so siopaman a mangibagan sikato et propita tan ekalen koy pampilalek da ray totoo ed pangigalang ed saray talintaoy diriyos.
3 "No ipasoot na siopaman so mampropisiya, say dilin ama tan ina to so mangibagad sikaton sikatoy nepeg a pateyen, lapud ipapasen ton sasalitaen toy salitay Katawan, balet ta mantitila. No mampropisiya say dilin ama tan ina to so manaksak ed sikato ya anggad ag to ipatey.
4 "No onsabiy tan a panaon, anggapoy propitan makapangikinon ed saray pasingayew to odino ompasen a singa propita odino mansolung na magasal a kawes na propita, pian mamalikdod saray totoo.
5 "Ibaga to la laingen, Aliwa ak a propita. Sakey ak a dumaralus tan ondadalus ak nanlapu lad impanbalolakik.
6 "Et no walay manepet ed sikato, Akin ira tay sugat ed pagew mo? onebat, Nalak ira ed abung na kaarok.
7 "Say Katawan a Makapanyarin-amin kuanto, Bangon ka, ispada, ta dogpaan moy pumapastol a mankikimey na para siak! Patey mo, pian nikaykayat iray karniro! Dogpaan ko ray totook
8 "et ompatey ed intiron dalin so kakatlo na totoo.
9 "Suboken ko ray akeraan a kakatlo tan linisan ko ran singa kalinisan na pilak ed apoy. Suboken ko ran singa kasubok na balituk. Insan ira mampikasi ed siak, et ebatan ko ra. Ibagak ed sikara a sikaray totook, tan ibawag dan siak so Dios da.
1 "Asingger lan onsabi so agew a panintinsia na Katawan. Nasamsaman ed satan so Jerusalem tan naapag a sankanengneng yo iray asamsam.
2 "Pankakasakeyen na Katawan iray bansa a mibakal ed Jerusalem. Nadakep so siudad, nasamsaman iray kaabungan, tan napasoot iray bibii. Nibantak ed arum a bansa iray kapalduan totoo, balet ag nipaway ed siudad iray arum a totoo.
3 "Insan ompaway so Katawan a mibakal ed saraman a bansa, a singa impibakal to nen saman a panaon.
4 "Diad satan a panaon sikatoy manalagey ed Palandey na Kaolibaan, a mamaarap ed bokig na Jerusalem. Insan napaldua na maawang a patar imay Palandey na Kaolibaan manlapud bokig ya anggad sagur. Say kapaldua na palandey ondere ed bandad baybay tan say kapaldua ondere ed bandad abalaten.
5 "No ombatik kayo ondalan kayod satan patar ya onsabid palandey ya anggad biek a dapag. Ombatik kayo a singa ginawa na saray lalaki yo nen agawa so yegyeg diad samay panaon nen Ari Uzias na Juda. Onsabi so Katawan a Dios ko, kaiba to ray amin ya anghil.
6 "No onsabiy tan ya agew, anggapo lay onsabin ambetebetel a panaon ya onkigtel so danum,
7 "odino bilonget. Wala lawas so liwawa na agew anggan panaon na labi. Say Katawan labat so makapikabat no kapigay pakagawa to ya.
8 "No onsabi tan ya agew, onagos so masamit a danum a manlapud Jerusalem, say kapaldua onagos ed Inatey a Dayat tan say kapaldua diad dayat Mediteraneo. Ag ontonday panagos to, nepnep may tiagew.
9 "Insan say Katawan so magmaliw ya ari ed intiron mundo; balang sakey a too et igalang to a Dios tan nakabatan da ed saksakey a ngaran.
10 Napalanas so intiron dalin manlapud Geba diad baybay ya anggad Rimon diad abalaten. Say Jerusalem mansiansian ososdungan to ray dalin ed kaliber-liber to; say siudad sakopen toy pasen a manlapud Puirta nen Benjamin ya anggad Puirta na Suyok, a kawalaan nen saman na gendat a puirta, tan manlapud Tori nen Hananel ya anggad pespesan na ubas na ari.
11 Manayam ya arawid kaatapan iray totoo tan, ag la ra nataktakot na deral.
12 Say Katawan mangipadalan na salot ed saray totood amin a bansan mibabakal ed Jerusalem. Mabilay ni ra aboluk lay laman da, saray mata ra tan say dila ra.
13 Diad satan a panaon gewgewen ira na Katawan tan patakoten to ra na mapalalo, kanyan singkaten na balang sakey a too so kaabay to tan kabilen to.
14 Saray totoo ed Juda et mibakal ira a mangyagel ed Jerusalem. Samsamen da ray kayamanan na amin a bansasaray balituk, saray pilak, tan mapalaloy karakel a kawes.
15 Ondalan met so salot ed saray kabayo, diad saray mulo, diad saray kamilyo, tan diad saray asnodiad saray amin ya ayayep ed saray kampo da ray kalaban.
16 Insan amin da ray akapaliis ed patey a taga rad saray bansa a dinmodogpa ed Jerusalem, et onla rad man a tinaon a mangigalang ed Katawan a Makapanyarin-amin ya ari tan silibraan day Pista na Abung-abung.
17 No walay bansan ag onlan mangigalang ed Katawan a Makapanyarin-amin ya ari, ag ompelag ed dalin da so oran.
18 No saray Egipsio et ag da silibraan so Pista na Abung-abung, nadalan met iray salot ya ipadalan na Katawan ed balang bansa ya ag onlad Jerusalem.
19 Sikato ya so dusan niiter ed Egipto tan diad amin a bansa ya ag da silibraan so Pista na Abung-abung.
20 Diad satan a panaon nitatak ed anggan batingting ya arkos na kabayo ira yan salita, Nisaklang ed Katawan. Magmaliw a masanto iray bangan lotowan a singa saray yaung ed arap na altar.
21 Amin a bangan lotowan ed Jerusalem tan diad intiron Juda et nibiig ira ya ikana ed pangigalang ed Katawan a Makapanyarin-amin. Ikana na saray totoon mangibagat a panlambungan na karni na saray ibagat. No onsabiy tan a panaon anggapo la ray mannigosio ed dalem na Timplo na Katawan a Makapanyarin-amin.