1

¹ "Diad ononan agew na kumanem a bulan na kumadwan taon na panaari nen Dario ed Persia, say Katawan nansalita diad panamegley nen propita Aggeo. Say sinalita na Katawan et para si Zorobabel a gobirnandor na Juda tan lakin anak nen Sealtiel, tan para si Josue a Pangulon Pari tan lakin anak nen Josadac.

² "Say Katawan a Makapanyarin-amin inkuantod kinen Aggeo, Ibabaga na sarayan totoo ya aliwan sikato ya niy manepeg a panaon a pamaalagey lamet ed Timplo.

³ "Insan inkuan na Katawan ed saray totoo diad panamegley nen propita Aggeo,

⁴ "Totook, akin et manaayam kayod mararakep ya abung, balet palpaolyan yon aderal-deral so Timplok?

⁵ "Ag yo ta nanaimanoy nagagawad sikayo?

⁶ "Nantanem kayoy dakerakel, balet dagdaiset so naani yo. Walay nanaakan yo, balet ag kayo napepesel. Walay nanainom yon alak, balet ag kayo napepenek! Walay ikakawes yo, balet ag napepetangan so laman yo. Ag makagenap a pambilay so nanaanap da ray kumikimey a miuupa.

⁷ "Ag yo amtay makasengeg no akin onyay nagagawa?

⁸ "Laka yo lad kapokdulan ta mangala kayoy kiew, tan ipaalagey yo lamet so Timplo; diad satan siak so napaliket tan nagalang ak onung na manepeg a kigalang ko.

⁹ "Nanilalo kayon makaani na dakerakel, balet dagdaiset so naani yo. Et nen insempet yo ray naani yo intitikyab ko ra. Akin et onmay ginawak? Lapud apaolyan ya aderal-deral so Timplok; inarap yon kikimeyan so dilin kaabungan yo.

¹⁰ Sikato yay makasengeg ya anggapoy onterter ya oran tan anggapoy ontubon tanaman.

¹¹ Anggapoy pateterteren kon oran ed dalindiad kapokdulan, diad kaalogan, diad kaubasan, tan diad kaolibaandiad amin a tanaman ed dalin, diad saray totoo tan saray ayayep, tan diad amin a bengatlan labay yon pabalegen.

¹² Insan si Zorobabel, tan si Josue, tan amin da ray totoon sinmempet a nanlapud inkibantak ed Babilonia inonur day imbagad sikara na Katawan a Dios da. Tinmakot ira tan inonur day propita Aggeo ya ibabaki na Katawan.

¹³ Insan sinalita nen Aggeo ed saray totoo so impaibagad sikato na Katawan: Siak so nakaiba yosatan so sipan ko.

¹⁴ Pinabiskeg na Katawan so linawa na balang sakey ed sikara a mangipaalagey lamet ed Timplo: si Zorobabel a gobirnador na Juda; si Josue a Pangulon Pari, tan amin a totoon sinmempet a nanlapud inkibantak dad arum a bansa. Inggapo ray impankimey da ed Timplo na Katawan a Makapanyarin-amin a Dios da,

¹⁵ nen kumaduamplo tan apat na kumanem a bulan na kumadwan taon na panaari nen Dario.

2

¹ "Nen kumaduamplo tan sakey ya agew na kumapiton bulan na saman lamlamang a taon, say Katawan nansalita lamet diad pan amegley nen propita Aggeo.

² "Say Katawan impaibaga tod kinen Aggeo so salita tod kinen Zorobabel a gobirnador na Juda, si Josue a Pangulon Pari, tan saray totoo:

³ "Siopad sikayo so makanunot na karakpan na samay gendat a Timplo? Antoy pakanengneng yo natan? Arawdawi yan tuloy ed karakpan, anto?

⁴ "Balet mampabiskeg kayoy linawa, sikayon amin. Ituloy yoy kimey yo, ta siak so kaiba yo.

⁵ "Nen pinmaway kayod Egipto insipan kon siak so kaiba yo lawas. Siak ni so kaiba yo, kanyan ag kayo natatakot.

⁶ "Ag mabayag yegyegen koy tawen tan say mundo, say dalin tan say dayat.

⁷ "Taloen kon amin iray bansa, tan niyakar dia iray kayamanan da, tan napano na kayamanan so Timplo.

⁸ "Kayaryan kon amin iray pilak tan balituk ed intiron mundo.

⁹ "Magmaliw a marakep ni so balon Timplo nen say samay daan, tan itdan ko na aligwas tan kareenan iray totoo. Say Katawan a Makapanyarin-amin so nansalita.

¹⁰ Nen kumaduamplo tan apat ya agew na kumasyam a bulan na kumadwan taon na panaari nen Dario, say Katawan a Makapanyarin-amin akisalita lamet ed propita Aggeo.

¹¹ Inkuanto, Tepet mod saray papari no antoy kuandad totontonen a nipaakar ed saya:

¹² No bilang ta walay toon sankaawit tod saloy na kawes to so sankategteg a pinasanton karni, insan nisapigar to may kawes to ed tinpay, odino antokaman a niloton kakanen, odino alak, odino larak na oliba, odino antokaman a tagano, magmaliw met man kasin masanton kakanen? Nen Nitepet ya, saray papari inmebat ira, Andi.

¹³ Insan tinepet nen Aggeo, No bilang ta walay sakey a toon arotakan lapud adiwit toy bangkay, insan to diwiten so sakey ed sarayan kakanen, nadotakan met la ra kasi? Inmebat ira may papari, On.

¹⁴ Insan inkuanen Aggeo, Say Katawan ibabaga to ya onya met so nagawad saray totood sayan bansa tan amin a bungay kimey da tan saray ayayep da; kanyan marotak ya amin iray isasaklang dad altar.

¹⁵ Say Katawan kuanto, Ag yo nanaimano so agawad sikayo! Kasakbayan yon inggapoy pamaalagey lamet ed Timplo,

¹⁶ linma kayod bunton na trigo ya inilaloan yon makala kayoy duamplon sako, balet samsamploray wala. Linma kayon mangaur ed pananginan na limamplon galon na alak, balet duamduamploy nala yo.

¹⁷ Angibaki ak na makasinit a dagem tan ontan met na kristal ya angoran ed antokaman ya intanem yo, balet siansian ag kayo nagbabawi.

¹⁸ Natan et kumaduamplo tan apat ya agew na kumasyam a bulan, say agew na impakasumpal na pundasion na Timplo. Imano yo no antoy nagawa manlapud natan.

¹⁹ Anggaman ya anggapoy atilak ya ilik na trigo, tan ag ni nambunga iray ubas, igos, granada, tan oliba, balet bindisionan ta kayo.

²⁰ Diad saman lamlamang ya agew, say kumaduamplo tan apat agew na bulan, say Katawan kuanton pidwa ed kinen Aggeo,

²¹ Laka ta ibagam ed kinen Zorobabel a gobirnador na Juda, ya onyay kuankod sikato, Ngalngalik la yegyegen so tawen tan dalin;

²² taloen ko ray bansa tan panganggaen koy pakayari ra. Ipabalintuag ko ray karwahi ra tan saray kutsiro ra; ompatey iray kabayo tan mampapateyan iray kumakabayo.

²³ Diad satan ya agew alaen ta ka, Zorobabel, ya aripen ko tan toroen ta kan manoley ed ngaran ko. Sika so pinilik. Say Katawan a Makapanyarin-amin so nansalita.