1 "Sikato yay salitan impaamta na Katawan ed kinen propita Habacuc.
2 "O Katawan, anggad kapigay nepeg kon ikerew na tulong kasakbayay idengel mo, kasakbayay pangilaban mod sikamid panagduksa?
3 "Akin et inabuloyan mon nanengneng koy ontan a gunigon? Panon mon nitepel so onnengneng ed satan a maoges a nagagawa? Panagderal tan inkaruksa so nagagawa ed kaliber-liber ko, tan walay kolkolan tan panlalaban ed anggan iner a pasen.
4 "Maletey tan anggapoy kana so ganggan, tan ag balut natotombuk so katonungan. Lalamesen na saray totoon maoges iray matonung, kanyan napipikewet so inkatonung.
5 "Insan say Katawan kuantod saray totoo to, Imano yo lawas iray bansad kaliber-liber yo, et onkelaw kayod nanengneng yo. Manggawa ak na sakey a bengatlan ag yo sisiaen no narengelan yo.
6 "Pagmaliwen kon manoley iray taga Babilonia, saraman a mapalaloy sebeg tan ag mandeen a totoo. Sulong la ran sulong ed anggan iner, pian nadakep da ray arum a dalin.
7 "Ikakayat day takot tan kapagaan tan diad gaway panagpaatagey da, say dilin labay da so nasumpal.
8 "Maples nen saray liopardo iray kabayo ra, tan masebeg ira nen saray narasan ya asod katakelan. Onsasabin nanlapud arawin pasen iray kumakabayo ra; saray kabayo ra idepak-depak day dalin. Onsabi ran mapmaples ya ondogpan singa agilan manisibar na labay ton kanen.
9 "Onsusulong iray sondalo ra a manduksa tan mandakep ira; natatakot so balang too no onsasabi la ra. Singa karakel na buer so karakel na adakep da.
10 Luludlureyen da ray arari tan elek-elekan da ray atatagey ya opisyal. Anggapoy tirinsiran makapatondad sikaramambubunton ira na dalin ed abay na tirinsira et nadadakep da.
11 Insan onlalabas iran singa dagem tan nanaandi la ra, sarayan totoo a dios da so pakayari ra.
12 Katawan, manlapud gapoy gapo Dios ka la. Sika so Dios ko, masanto tan andi-anggaan. Katawan a Dios ko tan manangyagel ko, pinilim iray taga Babilonia tan pinabiskeg mo ra, pian nadusa da kami.
13 Balet panon mon nitepel ira yan traidor tan maoges? Masanton tuloy iray matam ya onnengneng ed kaogsan, tan ag mo nitepel so onnengneng ed saray totoon manggagaway kakapoyan. Akin sirin et ag ka oneseesel, anggan papairapen na sarayan totoo iray matonung nen say sikara?
14 Panoy pakapangipasen mon saray totoo et singa ra saray sira odino singa sakey ya olup na saray bigis ya anggapoy manoley dan mangiwanwan ed sikara?
15 Tatagaan na taga Babilonia iray totoon singa ra sira. Igagayugoy da ran akakolung ed iket tan maneeyag ed liket iray akarel ed sikara.
16 Igagalang da ni ingen iray iket da tan mangibabagat irad sikara, lapud saray iket da so panlalapwan na saray sankaabigan a nakaukolan dad bilay.
17 Ikana ra kasin andi-angga iray ispada ra tan ituloy dan deralen ya andi-panangasi iray bansa?
1 "Onkalab ak ed tagey na panagbantayan ko tan alagden kon nengnengen no antoy ibaga na Katawan ed siak tan no antoy iyebat tod riklamok.
2 "Saya so inebat tod siak: Isulat mon malinew ed sakey a tapyak a bato so ipapaamtak ed sika, pian nabasa ya anggan napasimaran labat.
3 "Isulat mo yan ipasingayew kod sika, ta aliwa nin natan a panaon so pakagawa to. Balet masiglat ya onsasabiy panaon tan ontua so ipaamtak ed sika. Nayarin singa matantan so isabi to, balet alagar mon onsabi; andi-saew a nagawa, tan ag la naabala so isabi to.
4 "Et sikato ya so kuanko: Saray maoges a totoo et ag ira makapaliis ed patey, balet saray matonung mambilay ira lapud matooor ira ed Dios.
5 "Makapalikdo so kayamanan. Mapaatagey tan iray ag mampapainawa iray totoon maagomag iran balut napepenek a singa say patey. Kanyan ag ira ontotondan manakep na saray bansa tan saray totoo, pian nagamuran day labalabay da.
6 "Saray adakep a totoo elekan da ray anakep ed sikara tan ipanengneng day pambosul dad sikara. Ikuanda, Aalaen yoy ag yo kayaryan, balet pakaskasiy kipapasen yo! Kapigay pangangga na pampapayaman yo diad pamapasoot yon mambayar iray akautang ed sikayo?
7 "Biglan onsabiy panaon a sikayon anakep ed saray arum a totoo et magmaliw a sikayoy akautang tan napasoot kayon mambayar na abang. Onsabi ray kalaban tan pagiwgiwen da kayo. Samsaman da kayo!
8 "Sinasamsaman yo ray totood amayamay a bansa, balet natan saray akapaliis ed patey et samsaman da kayo, lapud saray impanpapatey yo na totoo tan lapud inkaruksa yod saray totood mundo tan diad saray siudad to.
9 "Pakaskasi kayo la! Pinapayaman yo ray pamilya yo lapud saray impansasamsam yod saray ag yo kayaryan, tan impagmaliw yon arawid sulit tan kaatapan iray kaabungan yo.
10 Balet saray ginagawa yo so angipelag ed pamilya yo ed kababaingan; lapud impanderal yod amayamay a bansa impelag yod kadederal so sikayon dili.
11 Anggan saray bato ed padir et oneyag ira sumpad sikayo, tan ompoktal ed saray pagsen so eyag da.
12 Pakaskasi kayo la sikayon angiletneg na siudad lapud panagpatey na totoo tan arum nin kaogsan.
13 Andi-kakanaan so nansasagputan na saray bansan dinadakep yo, tan natetemek ed apoy iray impapaalagey da. Say Katawan a Makapanyarin-amin so nanggawad saya.
14 Say mundo et napano na pikakabat ed kagalangan na Katawan a singa inkapano na dayat na danum.
15 Pakaskasi kayo la! Diad gaway pasnuk yo pinaabeba tan impelag yod kababaingan iray kaabay yo; impandongildongil yo ran singa abuek.
16 Nakawesan kayo kumun na kagalangan, ingen napelag kayod kababaingan. Maninom kayo tan mandongildongil kayo. Ipainom na Katawan ed sikayo so kupay dusa tan magmaliw a kababaingan so kagalangan yo.
17 Binabatang yoy kakiewan ed takel na Libano; sikayo natan so nabatang. Pinapatey yo ray ayayep to; taktakoten kayo natan na ayayep. Onyay nagawad sikayo lapud saray impanpapatey yod saray totoo tan lapud impanduduksa yod saray totood mundo tan saray siudad to.
18 Antoy kana na sakey a talintaoy dios? Sakey labat a ginawa na sakey a too, et anggapoy nibaga tod sikayo no ag katilaan labat. Antoy kaabigan a niiter na talintao diad panmatalek ed sikato na nanggawad sikato? Say talintao et sakey labat a dios ya ag anggan makasalita.
19 Pakaskasi kayo la! Ikuan yod sakey a poter na kiew, Bangon ka! odino diad sakey a tabas na bato, Alagey ka! Wala tay nipuyan ed sikayo na sakey a talintao? Nayarin naokupan na pilak tan balituk yan talintao, balet anggapoy bilay to.
20 Say Katawan et walad dalem na masanton Timplo to; mandeen komun ed arap to so balang sakey a too diad tapew na dalin.
1 "Sikato yay pikakasi nen propita Ha- bacuc:
2 "O Katawan, nadngelan ko so ginagawam, et mapalaloy pankelaw ko. Diad sayan panaon mi gawam pa natan ira may makapakelaw a ginagawam nen saman. Mangasi ka pa, anggan mamapasnuk ka.
3 "Onsasabi lamet a manlapud Edom so Dios; onsasabin manlapud kapokdulan na Paran so masanton Dios. Akobutan na kagalangan to so katawenan, tan napno na dayew to so sankamundoan.
4 "Onsasabin maliwliwawa a singa kirmat; mankikidyam ed lima to so silew, a diay akaiyamutan na pakayari to.
5 "Papaonaen tod arap to so salot tan gangganen ton ontombuk ed sikato so patey.
6 "No sikatoy ontonda, nayegyeg so mundo; diad ilinggis to onggiwgiw iray bansa. Abuybuyak iray andi-anggaan a kapalandeyan; linmereg iray ag manganggan kapokdulan, saray kapokdulan a nanaakaran to ra nen saman.
7 "Anengneng kon antakot iray totood Cusan tan manggiwgiw iray totood Madian.
8 "Saray ilog so amapasnuk ed sika, Katawan? Say dayat so amapetang na olom? Linmogan kad tapew na kaloreman; karwahim so lorem ya ipapalir na bagyo, nen inyakar moy pananalo ed saray totoom.
9 "Imparaan mon ikana so panam; akaparaan kan mangibolus na balay panam. Papalduaen na kirmat mo so mundo.
10 Nen anengneng ka na kapalandeyan ginmiwgiw ira; naibung so danum manlapud saray tawen. Inmungol iray danum ed dalem na dalin, tan binmabaleg iray daluyon da.
11 Lapud kidyam na maples iran panam tan say siayap na makasileng a pikam, nantanyareg so agew tan say bulan.
12 Sipapasnuk kan binmeltang ed mundo; diad gaway sanuk mo ginagatinan mo ray bansa.
13 Pinmaway kan mangilaban ed saray totoom, tan mangiliktar ed pinilim ya ari. Kinabil moy pangulo da ray totoon maoges tan sigput mon dineral iray totoo to.
14 Tinoruk na saray panam so pangulo da ray sondalo to, nen sinmabi ran singa bagyo ya angikayat ed sikami, malikeliket iran singa saray totoon maamut a mamapairap ed saray mairap-bilay.
15 Impagatin-gatinan mod saray kabayom so dayat, et binmora-bora so mabiskeg a danum.
16 Narerengel ko ra yan amin, et manggiwgiw ak; manggigiwgiw ed takot iray bibil ko. Paligpalig so laman ko, mankitakit iray salik. Mandeen ak a manalagar ed isabiy panaon a dusaen na Dios iray ondodogpad sikami.
17 Anggan anggapoy bungay igos tan saray kaubasan, anggan anggapoy naborbor et kaolibaan tan anggapoy naanid kaalogan, anggan ompatey ya amin iray karniro tan naandian na baka iray koral,
18 manliket tan manggayaga ak nin siansia, lapud say Katawan a Dios so manangilaban ko.
19 Pinabiskeg ak na Katawan Dios. Patalabiten to ray salik a singa sali na ulsa tan iyarawi to ak ed kaatapan diad kapalandeyan.