1 "Sikato yay salitan nipaakar ed Ninive, say nipasingayew ed kinen Nahum a taga Elkos.
2 "Say Katawan a Dios ag to aabuloyan a walay ontalona nen say sikato; dudusaen to ray onsusumlang ed sikato. Diad gaway pasnuk to ombabawid sikara.
3 "Aliwan maipapasnuk so Katawan; balet makapanyari tan ag to aabuloyan ya ag nadusa iray nankasalanan. Ombabagyo so pasen a panaakaran na Katawan; dabuk na saray sali to so kaloreman!
4 "Igaganggan toy dayat et oneekat! Paeekaten to ray ilog! Namamagaan iray kaalogan na Basan, namamagaan so Palandey na Carmelo, tan nalalaylay iray rosas na Libano.
5 "Diad arap na Katawan nayeyegyeg iray kapalandeyan; natotonaw iray kapokdulan. Nayeyegyeg so dalin no ompapatnag so Katawan; manggiwgiw so mundo tan amin da ray katoowan.
6 "No mamapasnuk so Katawan, siopay makapaliis ed patey? Siopay makatepel na ontan lan sanuk to? Iibung toy manliub a pasnuk to; diad arap to nakukusbo tan ondadabuk iray baton-dampay.
7 "Say Katawan et maung; iyaagel tod panaon na gunigon iray totoo to; aasikasoen to ray onsisingger ed sikato.
8 "Say Katawan et singa baleg tan maples a delap a sigput ton dederalen iray kalaban to; ibabaki tod patey da iray onsusumlang ed sikato.
9 "Antoy pankokomplutan yo sumpad Katawan? Deralen to ka yo. Anggapoy makapidwan onsumlang ed sikato.
10 Napoolan kayo sa singa kapoolan na saray alokut-lokut a sabitan tan amagaan a dayami!
11 Nanlapud sika, Ninive, so sakey a toon walay maoges iran plano, a sikatoy angigolo na komplut a sumpad Katawan.
12 Sikato yay kuan na Katawan ed saray totoo ton Israel: Anggaman a mabiskeg tan amayamay iray taga Asiria, naderal tan naandipat ira. Totook, pinairap ta kayo, balet ag ko la oliten a gawaen.
13 Panganggaen ko la natan so panooley ed sikayo na Asiria tan paksoten ko lay golunggolung a nisinger ed sikayo.
14 Sikato yay ingganggan na Katawan nipaakar ed saray taga Asiria: Naoput iray kabyangay boleg da a mangikayat na ngaran da. Deralen ko ray talintaon walad saray timplo da ray diriyos da. Mangipaparaan ak na lobuk a para saray taga Asiriaag da kanepegay mambilay!
15 Bantag yo, onsasabid kapalandeyan so sakey ya ibabakin sankaawit toy maung a balita! Wala lad dalan a mangibawag na pananalo! Totood Juda, silibraan yo ray pista yo tan iter yoy sinambaan yon iter ed Dios, ta ag lan balut nalooban na saray totoon maoges so dalin yo. Sigput la ran aderal!
1 "Ninive, nadodogpaan da ka la! Sinmabi lay pakayarin manemek ed sika. Paguardiaan mo ray tirinsira tan saray daladalan! Mamparaan kan mibakal! (
2 "Ngalngali la ipawil na Katawan so kagalangan na Israel, a singa samay kagalangan to kasakbayan a sinasamsaman na saray kalaban to.)
3 "Sankaawit na saray kalaban ton sondalo iray ambalangan samper, tan akasolung iran amin na ambalanga. Mampaparaan iran ondogpa! Mankidyam a singa apoy iray karwahi ra! Mankitapbo iray kabayo ra!
4 "Mambanesbes ed saray dalan iray karwahi, ompawil onsulong irad saray plasa na siudad. Mankidyam iran singa apoy ya impotan tan mankidyam iran singa kirmat.
5 "Atawag iray opisyal; mamkitakba ra diad idadago ra. Mapmaples ya onsisingger ed padir iray ondogpa tan ililira da so samper na panagbongbong na padir.
6 "Biglan alokasan iray puirtad gilig na ilog; sinmabiy baleg a takot ed palasio.
7 "Nalan adakep so riyna; maermen iray aripen to, singa ra managlem a malapati, tapok-tapoken dad ermen so kapagewan da.
8 "Singa ompapaway a danum ed abwang a dipositoway danum iray totoon ontataynan ed Ninive! Tonda kayo! Tonda kayo! kuay eyagbalet anggapoy ompawil.
9 "Samsam yo ray pilak! Samsam yo ray balituk! Napno na kayamanan so siudad!
10 Aderal la so Ninive, ataynan lan begtebegtew! Napoponaw ed takot iray kapusuan, mankalog iray pueg, naandi lay biskeg; mampotiy bosaleg iray kalupaan.
11 Iner so kawalaan natan na samay siudad a nen saman et singa balaung na saray lion, say pasen a pangakanan da ray anak na lion, a dimay lalaen na lion a kalakyan tan kabatyan ya arawid kaatapan iray anak dan angkelag.
12 Pinatey na lion so narel ton ayep tan biningbingkas ton kanen na asawa to tan saray anak ton ankelag; pinano to na abingbingkas a laman so balaung to.
13 Siak so kalaban! kuay Katawan a Makapanyarin-amin. Poolan ko ray karwahim. Napatey ed bakal iray sondalom, tan alaen kon amin iray bengatlan sinasamsam mod saray arum a bansa. Ag la narengel so antokaman ya ibaga na saray ibabakim.
1 "Pangaskasiyan so kipapasen na siudad a managpatey na too, say siudad a napno na kayamanan a samsamen.
2 "Dengel yo! Say sanotsut na lewet, say kalarakar na saray dalig, say banesbes da ray kabayo, say dalagorug na saray karwahin para bakal!
3 "Ondedepdep iray akakabayo, mankidyam iray ispada tan saray pika! Ag nabilang iray bangkay ya abunbunton nataktakbaan ira na saray totoo.
4 "Nadudusa la so Ninive ya aliling toy marotak a bii. Makaay-ayat tan makapatey so ganggana to, kanyan pinalikdo to ray bansa tan inaripen to ra.
5 "Say Katawan a Makapanyarin-amin kuanto, Dusaen ta ka, Ninive! Ekalan ta kay kawes tan ipanengneng ta kad saray bansa, et nanengneng day pakababaingan mo.
6 "Kabosulen ta ka tan kobutan ta ka na dotak, Sitatakot ya onnengneng ed sika iray totoo.
7 "Arawian ka na amin a makanengneng ed sika. Ikuanda, Aderal-deral so Ninive. Siopay mangakasi ed sikato? Siopay malabay a manligliwad sikato?
8 "Ninive, daeg mo ni so Tebes a manonan siudad na Egipto? Wala met so ilog ton mangyagel ed sikato nen saman a singa atagey a padirsay Ilog na Nilo so tirinsira to nen saman.
9 "Inoleyan toy Sudan tan say Egipto, anggapoy anggaan na pakayari to; kagampi to so Libia.
10 Balet saray totood Tebes et nibantak irad arum a bansa. Diad inerman a sokung na dalan, saray anak da et nipaspas ira ya anggad ag da impatey. Agolunggolungan a niakar ed arum a bansa iray manonan totoo ra tan nanaapagan ira na saray akadakep ed sikara.
11 Ninive, magmaliw ka met a singa abuek a mandongilngil! Ibatikan mo met iray kalaban mo.
12 Amin da ray tirinsiram et magmaliw iran singa saray kiew na igos ya aluluto la ray bunga ra: yugayog moy sengeg da et napelag lad sangim iray bunga ra!
13 Singa bibii iray sondalom, tan akaparontal ya anggapoy nagawaan ed arap na saray kalaban mo so bansam. Temeken na apoy iray balewet na saray puirtam.
14 Mantipon kay danum a pangiparaan mod panlakob dad sika, tan pabiskeg mo ray tirinsiram! Gatin-gatinan mo ray pitek, ta manggawa ka na saray laryo, tan iparaan mo ray pampeket ed sikara!
15 Anggan antoy gawaen mo, napoolan ka nin siansia ya anggad ipatey mo odino napatey ka ed bakal. Naandipat kan singa saray tanaman ya inoput na saray dorun. Dinmakerakel kan singa saray dorun!
16 Dakel ni nen saray bitewen ed tawen so impamarakel mod saray nigosiantim! Balet natan naadipat la ra, a singa saray dorun ya imbuskag da ray payak da tan tinmikyab la rad arawi.
17 Saray opisyal mo et singa sakey ya olup na amayamay a dorun a pinmepeket ed saray padir diad agew ya ambetebetel so panaon. Balet no ompaway lay agew, ontikyab la ra, tan anggapoy makaamta no iner so nakar da!
18 Ari na Asiria, inaatey la ray gobirnador mo, tan ag la nabangon a balut ed ogip da iray manonan totoom! Ataytayak ed kapalandeyan iray totoom, et anggapoy mamasempet ed sikara.
19 Anggapo lay panambal ed saray sugat mo, tan ag la ra naabigan. Mantipak ed liket iray amin a makarengel ed balitan nipaakar ed inkaderal mo. Wala tay akapaliis ed ag manganggan inkaruksam?