1 "Aminsan ya agew say Katawan akisalitad kinen Jonas a lakin anak nen Amitai.
2 "Inkuanto, Lakad Ninive, say baleg a siudad, ta mansalita ka sumpad saman a siudad; amtak so ontan lan kaogsan na saray totood man.
3 "Balet sananey a dalan so inarap to, ta labay ton ibatikan so Katawan. Linmad Jope a dimay akanengnengan to na sakey a bapor ya onla lad Espanya. Kayari ton binayaran so pasahi to, linmogan ed samay bapor a kaiba to ray tripulanti ya onlad Espanya a diman to naarawian so Katawan.
4 "Balet say Katawan angibakid dayat na mabiskeg a dagem, tan diad gaway peles na bagyo ngalngali la nabuyak imay bapor a niloganan da.
5 "Ataktakot iray marinirod samay bapor, kanyan tinmawag na tulong ed nagsinagsin dios to so balang sakey ed sikara. Pian nalemewan ira imbabantak dad dayat iray karga ra. Legan to ya, linmad bandad dalem na bapor si Jonas, dinmokul, tan naogip na malmalet.
6 "Arumog diman na kapitan kanyan kuantod sikato, Akin et wadtan kan naogip? Bangon ka, ta kerew kay tulong ed dios mo. Ag la pigan abageyen to itayo et ipaliis to itayod patey.
7 "Saray mariniro kuandad sakey tan sakey ed sikara, Mambibinagut itayo, ta nengnengen no siopay nepeg a natetel ed sayan asagmakan tayon kaatapan. Nambibinagut ira sirin, et say ngaran nen Jonas so abagut.
8 "Kanyan kuandad sikato, Natan sirin, ag ka mamboborid sikami! Siopay nepeg a natetel ed sayan asagmakan tayon kaatapan? Antoy gagawaen mo dia? Taga iner ka? Judio ka, o anto?
9 "Sakey ak a Hebreo, ebat nen Jonas. Mangigagalang ak ed Katawan a Dios na tawen, say nanggawad dalin tan say dayat.
10 Intuloy nen Jonas ya imbangad sikara ya ibabatikan toy Katawan. Mapalaloy inkataktakot da ra may mariniro, kanyan kuandad sikato, Akin et ontay ginawam?
11 Pinmalalo lan pinmalalo so imbiskeg na samay bagyo, kanyan saramay mariniro tinepet dad kinen Jonas, Antoy gawaen mid sika pian ontonday bagyo?
12 Inmebat si Jonas, Ibantak yo ak ed dayat, et ontonday bagyo. Amtak a siak so makasengeg na sayan impakabetan yo diay mabiskeg a bagyo.
13 Balet ginawa na saramay mariniro so anggaay nayarian dan mangigilig ed samay bapor. Insakasakay day pinasia, balet ag da nigilig lapud pinmalalo lan pinmalo so imbiskeg na bagyo.
14 Kanyan tinmawag irad Katawan, O Katawan, pikasi mid sika ya ag mo kami pa dudusaen na patey lapud pangoyus mid bilay na sayan too. Sika, O Katawan, so akaoley ed sayan inkagawa; sika so nanggawad sayan amin.
15 Insan da inalay Jonas tan imbantak dad dayat; et kinmalmadan tampol imay dayat.
16 Lapud saya mapalaloy inkataktakot dad Katawan ira may mariniro, kanyan angibagat irad sikato tan insipan dan manlingkur irad sikato.
17 Lapud ganggan na Katawan, inakmon na balbaleg a sira si Jonas; nanayam ed dalem na eges na sira si Jonas na taloy agew tan taloy labi.
1 "Dimad dalem na eges na sira si Jonas nampikasid Katawan a Dios to:
2 "Diad kaermenan ko, O Katawan, tinmawag ak ed sika, et inebatan mo ak. Manlapud dalem na pasen a panaayaman da ray inaatey tinmawag ak a kinmerew na tulong, et dinengel mo ak.
3 "Imbantak mo ak ed kaaralman na dayat, diad daledalem na dayat, ya aliber-liber ak na danum, tan atabun-tabunan ak na ankakabaleg a daluyon.
4 "Abaloan kon ya atawtaw ak la ed arap mo tan ag ko la nanengneng lamet so masanton Timplom.
5 "Tinabunan ak na danum, insan to ak inakmun ed kaaralman; tan sigput ak a tinabunan na dayat, tan akobutan na dikad dayat so olok.
6 "Linma ak ed kaoteotelan da ray kapalandeyan, diad dalin ya angga lad anggan akasara iray puirta to. Balet sika, Katawan a Dios, et inagwat mo ak a mabilay manlapud kaaralman.
7 "Nen aliknak a nanaoyus so linawak, anunotan ta ka, Katawan, tan nampikasi ak ed sika, et dinengel mo ak ditan ed dalem na masanton Timplom.
8 "Inkaindan day inkatoor dad sika iray mangigagalang ed saray andikakanaan a talintaoy diriyos.
9 "Balet mankanta ak na panangidayew ed sika; mangisaklang ak ed sika na bagat tan sumpalen ko so insipan ko. Manlalapud Katawan so kilalaban!
10 Insan say Katawan ingganggan to may sira ya iboga tod gilig na dayat si Jonas, et imbugan tua na samay sira si Jonas.
1 "Akitongtong lamet so Katawan ed kinen Jonas.
2 "Inkuanto, Lakad Ninive, say baleg a siudad, ta ibagam ed saray totood man so sinalitak ed sika.
3 "Inmonur si Jonas ed Katawan kanyan linmad Ninive, say siudad a diad gaway kabaleg to et taloy agew ya akaren no beltangen.
4 "Ginapwan nen Jonas so nanakar ed siudad tan kalabas na sanagew ya impanakar to, imbawag to, Naderal so Ninive kalabas na apataplon agew manlapud natan!
5 "Sinisia na saray totood Ninive so impaibalita na Dios. Kanyan nampapaknaan da a manayuno so balang sakey ed sikara, tan amin a totoo, manlapud sankatageyan ya anggad sankaabebaay kipapasen, et nansolung ira na sako a pangipanengneng da a nagbabawi ra.
6 "Nen nadngelan na ari ed Ninive so nipaakar ed saya, inmepas a nanlapud trono to, nilakseb toy kawes to, nansolung na sako, tan nanirung ed dapul.
7 "Impaibawag tod saray totood Ninive: Sikato yay ganggan na ari tan saray opisyal to: Anggapoy siopaman a mangan; amin a totoo, amin a baka, tan amin a karniro et nisebel ed sikaran mangan odino oninom.
8 "Amin a too tan amin ya ayayep et nepeg a mansolung na sako. Balang too nepeg a benegan to la ray amin a maoges a kagagawa to tan amin a kaogsan a gagawaen to.
9 "Angangko mangoman na kanunotan so Dios; pakepaen to angangkoy pasnuk to, et ag itayo ompatey!
10 Anengneng na Dios so ginawa ra; anengneng ton imbebeneg da ray maoges a kagagawa ra. Kanyan angoman na kanunotan, et ag to la intuloy imay imbaga ton panusa tod sikara.
1 "Naermenan a tuloy si Jonas nipaakar ed sayan inkagawa tan mapalaloy pasnuk to.
2 "Kanyan nampikasi, Katawan, ag ko ta la imbaga a kasakbayan a tinaynan koy baley ko et onyay gawaen mo? Lapud saman ya imbagak ginawak so anggaay nayarian ko ya ombatik ed Espanya! Amtak a maaro tan mapangasi kan Dios, maanos ka lawas, tan akaparaan ka lawas a mangoman na kanunotan mo tan ag ka manusa.
3 "Ontan sirin, Katawan, alam pa lay bilay ko. Magmaung nin ompatey ak la nen say mambilay ak ni.
4 "Inmebat so Katawan, Antoy kanepegan mon mampasnuk?
5 "Pinmaway ed bokig na siudad si Jonas tan inmirung diman. Nanggawa na tarung to, nanirung ed silong to, tan inalagar toy nagawad Ninive.
6 "Insan pinatubo na Dios a Katawan so sakey a tanaman ya anarung ed kinen Jonas, pian ag nasalimootan. Mapalaloy liket nen Jonas lapud samay tanaman.
7 "Balet diad kaimbuas ingganggan na Dios so sakey a bigis a kibkiben to may tanaman, kanyan inatey imay tinmobun tanaman.
8 "Nen atagey lay agew, say Dios angipasibuk na ampetapetang a dagem a nanlapud bokig, et si Jonas ngalngali aponaw lapud petang na agew a kinmenad olo to. Kanyan kinaliktan ton sikato lay inatey komun. Inkuanto, Magmaung nin inatey ak la nen say mambilay ak ni.
9 "Balet inkuay Dios ed sikato, Antoy kanepegan mon mampasnuk nipaakar ed samay tanaman? Inmebat si Jonas, On, walay kanepegan kon mampasnukmampasnuk ya anggan makasengeg la na ipatey ko!
10 Inkuan na Katawan ed sikato, Sayan tanaman et sanlabi labat a binmaleg tan inatey ed ontombuk ya agew; ag mo nanlingetan tan ag mo pinabaleg. Balet naermenan ka nen inatey.
11 Siak ni kasiy ag mangasi ed Ninive amta balbaleg a siudad, tan walaan na sanlasus tan duamplon libo ya anggapoy amtan ogogaw, likud ed saray amayamay ya ayayep?