1 "Sikato yay salita na Katawan a sinmabid kinen Joel a lakin anak nen Petuel.
2 "Dengel kayo, sikayon mamatakken a totoo; dengel kayo, sikayon amin a totood Juda. Walay bengatlan singa onyan agawa diad panaon yo odino diad panaon da ray lalaki yo?
3 "Ibaga yod saray anak yo so nipaakar ed sayan agawa; ibaga da met ed satan ed saray anak da, insan saratan ya anak da ibaga da met ed ontombuk a kailalakan.
4 "Nantotombukan a dinmadapod saray tanaman ed kaalogan iray pigaran grupoy dorun; inooput na arum a grupo iray tanaman a kera-keray sakey a grupo.
5 "Bangon tan mannangis kayo, sikayon buanges; akis kayo, sikayon mainom na alak; aderal-deral la ray ubas a panggawaay balon alak.
6 "Dinogpaan na amayamay a dorun so dalin tayo; makapanyari ra tan ag ira nabilang; matdem a singa tarem na ngipey lion so ngipen da.
7 "Dinederal da ray sengeg na ubas tayo tan nginingitngit da ray kiew tayon igos. Ineekal dan impepelag iray obak ya anggad ampoti-poti ray sanga.
8 "Akis kayon singa sakey a marikit a nanangisan toy impatey na nubio to.
9 "Anggapo lay trigo odino alak ya ibagat ed Timplo; maermen iray papari lapud anggapoy nibagat da ed Katawan.
10 Anggapoy tanaman ed kaalogan; maermen so dalin lapud aderal-deral iray trigo, amagaan iray sengeg na ubas, tan nalnes iray kiew na oliba.
11 Manermen kayo, sikayon dumaralos; akis kayo, sikayon managasikasoy kaubasan, lapud aderal la ray trigo, sibada, on, aderal lan amiy tanaman ed kaalogan.
12 Nalnes iray sengeg na ubas tan saray kiew ya igos; nalnes ya amin iray kiew a mambunga, insan ira inaatey. Naandi lay liket da ray totoo.
13 Mankawes kayoy sako tan mannangis kayo, sikayo ran paparin manlilingkur ed altar! Laka yod Timplo tan manermen kayon sanlabi! Anggapoy trigo odino alak a nibagat ed Dios yo.
14 Iganggan yon nagawa so sakey a panayuno; pantitipon yo ray totoo. Pantitipon yo ray pangulo tan amin da ray totood Juda. Pantitipon yo ra ed Timplo na Katawan a Dios yo tan tawag kayod sikato!
15 Asingger lay agew na KATAWAN, say agew ya iyakar na Makapanyarin-amin so deral. Makapataktakot yan agew!
16 Legan a nadederal iray tanaman mid kaalogan mambanbantay kami labat ya anggapoy nagawaan. Anggapo lay liket ed Timplo na Dios tayo.
17 Inaatey ed kinmelang a dalin iray bokel na tanaman. Anggapoy trigon isempen, kanyan aderal-deral la ray kamalir.
18 Manngakngak a tangaw-tangaw iray baka, lapud anggapoy pampastolan ed sikara; maniiirap met iray amayamay a karniro.
19 Ontatawag ak ed sika, O Katawan, lapud amagaan iray pastolan tan saray kakiewan, singa ra apoolan.
20 Oneeyey ed sika iray ayayep ed katakelan, lapud nakatan iray kolus.
1 "Paknul yoy trumpita; paknul yod Sion a masanton palandey na Dios so pamasakbay. Giwgiw kayo, sikayon totood Juda! Magano lan onsabiy agew na Katawan.
2 "Sakey ya agew ya ambilonget tan maermen, sakey ya mayemyem tan malorem ya agew. Ondodogpa ray amayamay a dorun a singa ra bilonget ya onkokobut ed kapalandeyan. Ag ni agaway singa onya nen saman, tan ag yan balut nagawa ed arapen a panaon.
3 "Singa panagtemek na apoy so pangan dad saray tanaman. Singa Tanamanan na Eden so dalin a walad arap da, balet sakey a begtebegtew a kabueran so dalin ed beneg da. Anggapon balut so nalabsanan dan tanaman.
4 "Singa kabayo so nengneng da; ombabatik iran singa saray kabayod bakal.
5 "Diad panlulukso rad kapalandeyan, mapanaspas iran singa saray karwahi; masalanosut iran singa dikan napopoolan. Mandarasig iran singa amayamay a sondalon akaparaan a mibakal.
6 "Diad isasabi ra, natatakot ya amin so katoowan; ampoti-potiy bosaleg dan amin.
7 "Ondodogpa ran singa saray sondalon mibabakal; singa ra sondalon onkakalab ed padir. Itutuloy day onsusulong tan ag ira onaarawid dalan
8 "odino mansasamsamay dalan. Seselaken day antokaman a tirinsira, et anggapoy makabaat ed sikara,
9 "Maples iran ondodogpad siudad; luluksoen da ray padir; kakalaben da ray kaabungan tan ondadalan irad saray bintana a singa ra matakew.
10 Diad idadalan da nayeyegyeg so dalin; nayayakayak so tawen. Ombibilonget so agew tan say bulan, tan ag la onsisinag ira bitewen.
11 Say Katawan iyeeyag ton singa karul so ganggan tod saray sondalo to. Amayamay iray sondalo ton onoonur ed sikato tan makapanyari ra. Makapataktakot a tuloy so agew na Katawan! Siopay makapaliis ed patey no onsabi yan agew?
12 Balet anggan natan, kuay KATAWAN! masimoon kayon magbabawi tan pawil kayod siak a manaayuno, mannangnangis, tan maneermen kayo.
13 Ipapuso yoy panermen yo; aliwan masarag so pampilat yod kawes yo. Pawil kayod Katawan a Dios yo, ta maabagey tan mapangasi; sikatoy maanos tan totooren toy sipan to; sipaparaan a mamirdona, aliwan manusa.
14 Angangko mangoman a kanunotan so Katawan a Dios yo tan bindisionan to kayo na daakan iran bungay tanaman. Diad satan nayarian yoy mangibagat ed sikato na trigo tan alak.
15 Paknul yod Palandey na Sion so trumpita; iganggan yoy sakey a panagayuno tan tawag kayo na sakey a miting!
16 Pantitipon yo ray totoo; iparaan yo ran ondagup ed masanton miting; pankakasakey yo ray mamatakken; pantitipon yo ray ogogaw tan ontan met na saray mansususo. Anggan saray kapankasal nepeg a taynan day kaabungan da tan ondagup ira.
17 Nepeg ya onakis tan mampikasi iray paparin manlilingkur ed nanleetan na altar tan say lolooban ed Timplo: Katawan, kasian mo pa ray totoom. Ag mo pa iyaabuloy a balawen tan ludlureyen kami na arum a bansa diad pangikuan da, Kawalaan na Dios yo?
18 Insan say Katawan impanengneng toy panagnunot tod dalin to; walay panangasi tod saray totoo to.
19 Say Katawan inmebat ed sikara: Itdan ta kayo la na trigo, alak, tan larak na oliba, et napenek kayo. Ag kayo la balawen na arum a bansa.
20 Ekalen ko ray amayamay a dorun a nanlapud baybay tan paonlaen ko rad kabueran. Saray walad onaan ya olup et naablug irad Inatey a Dayat, tan saray walad bandad onur, diad Dayat na Mediteraneo. Ombanget iray inaatey a laman da. Deralen ko ra, lapud saray ginagawa rad sikayo.
21 Kaalogan, ag kayo natatakot; ingen, manliket tan manggayaga kayo, lapud saray amin a ginagawa na Katawan ed sikayo.
22 Ayayep, ag kayo natatakot. Malamlambut iray dikad pastolan; mambubunga iray kakiewan, tan walay daakan a bungay igos tan ubas.
23 Manliket kayo, sikayon totood Sion, manliket kayod saray ginagawad sikayo na Katawan a Dios yo. Initdan to kayo na nagnap ya oran ed tiagew, impelag toy oran a para sikayo no panaoy ambetel tan pinaoran ton singa gendat no nepnep.
24 Napano na trigo so panagilikan; onlepwad alak tan larak na oliba iray abut ya abay na saray panagpespesan.
25 Ipawil kod sikayo ira may naandid sikayo diad saramay taon ya inaakan na amayamay a dorun iray tanaman yo. Siak so angibakid sikayo ra man ya amayamay a dorun.
26 Amayamay natan so naakan yo, tan napenek kayo. Idayew yo so Katawan a Dios yo, a nanggagawad sikayo na saray makapakelaw a bengatla. Ag lan balut napabaingan iray totook.
27 Kanyan sikayo ran taga Israel, naamtaan yo a wala ak ed sikayo tan siak a Katawan so bukbukor a Dios yo. Ag lan balut napabaingan iray totook.
28 Kayari to yan nagawa ibung kod balang sakey a too so ispirituk: ibawag na saray anak yon lalaki tan bibii so balitak; nawalaan na saray kogip iray mamatakken yon lalaki, tan makanengneng na pasingayew iray tobun-balo yo.
29 Diad satan a panaon ibung kod anggan saray aripen kon bibii tan lalaki so ispirituk.
30 Diad satan ya agew mangiter ak na saray tanda a nanengneng ed tawen tan diad tapew na dalin; wala so onagos a dala, apoy, tan makapakapal ya asewek.
31 Ombilonget so agew, tan ombalangan singa dala so bulan kasakbayan ya onsabi so baleg tan makapataktakot ya agew na Katawan.
32 Balet nilaban ya amin iray onkerew na tulong ed Katawan. Onung na inkuay Katawan, Saray pigaran totood Jerusalem et makabatik ira; makapaliis ed patey iray pilien ko.
1 "Say Katawan kuanto, Diad satan a panaon ipawil koy aligwas na Juda tan Jerusalem.
2 "Tiponen kon amin iray bansa tan iyakar ko rad Patar na Sintinsia. Sintinsiaan ko rad man, lapud amin a ginagawa rad saray totook. Inkakayat dad saray arum a bansa iray Israelita tan inaapag day dalin kon Israel.
3 "Nampapalaranan ira no siopay mangalad saray adakep. Inlalako ran aripen iray ogogaw a lalaki tan bibii, pian walay nibayar dad saray marotak a bibii tan walay nisaliw day alak.
4 "Antoy gagawaen yod siak, sikayo ran taga Tiro, Sidon, tan amin a dalin a sakop na Filistia? Babayaran yo ak, lapud sakey a bengatla? No ontan so gagawaen yo, bayaran ta kayon tampol!
5 "Inaala yo ray pilak ko tan saray balituk ko tan inyaakar yod saray timplo yo iray kayamanan ko.
6 "Inyaarawi yod dilin dalin da iray totood Juda tan Jerusalem tan inlalako yo rad saray Grigo.
7 "Ipaway ko ra natan ed saray pasen ya angilakuan yod sikara. Gawaen kod sikayo so ginagawa yod sikara.
8 "Abuloyan kon nilakod saray totood Juda iray anak yon lalaki tan bibii; ilako da ra ed saray totood Saba, ya arawdawin pasen. Siak, say Katawan, so nansalita.
9 "Ibawag yo ya ed saray bansa: Mamparaan kayon mibakal; tawag yo ray bumabakal yo; pantitipon yo ray amin a sondalo yo tan mankurang kayo.
10 Pitpit yon gawaen ya ispada iray tarem na lukoy yo tan gawa yon pika iray panaggapas yo. Nepeg a milaban iray anggan makapoy so laman da.
11 Ganatan yoy ondago, amin yon walad kaliber-liber a bansa, tan mantitipon kayo ed patar. O Katawan, paakseb mo pa la ray sondalom ya ondogpad sikara!
12 Saray bansa et nepeg a mamparaan ira, ta ondago ra ed Patar na Sintinsia. Siak, a Katawan, et onirung ak diman a manintinsia ed amin a kaliber-liber a bansa.
13 Mapalaloy kaogsan da; gapas mo pa ran singa trigo no panaoy panagani; terak mo ran singa katerak na ubas diad panagpespesan ya anggad onlepwan onagos so alak.
14 Nilibon totoo iray walad Patar na Sintinsia. Diman so sabian naani na Agew na Katawan.
15 Ombibilonget so agew tan say bulan, tan ag la onsisinag iray bitewen.
16 Unungol a manlapud Palandey na Sion so Katawan; say bosis to onkarul a manlapud Jerusalem; nayakayak iray katawenan tan nayegyeg so dalin. Balet iyagel to ray totoo to.
17 Diad satan, Israelita, naamtaan yo a siak so Katawan a Dios yo. Manaayam ak ed Sion a masanton palandey ko. Magmaliw a masanton siudad so Jerusalem; ag lan balut nadakep na saray taga arum a bansa.
18 Diad satan a panaon napano na kaubasan iray kapalandeyan, tan nawalaan na baka so balang pokdul; nawalaan na daakan a danum so intiron Juda. Manlapud Timplo na Katawan onagos so kolus a manalog ed Patar na Acacia.
19 Magmaliw a disirto so Egipto, tan magmaliw a dalin ya aderal-deral so Edom, lapud dinogpaan day dalin na Juda tan pinapatey da ray totoo ton anggapoy kasalanan.
20 Ibawian ko ra may apatey; dusaen kon dusaen iray walay kasalanan. Balet natoowan ed ando lan ando so Juda tan Jerusalem, tan siak a Katawan et manayam ak ed Palandey na Sion.