1

¹ "Nen kumatlon taon na panaari nen Joakim ed Juda, dinogpaan nen Ari Nabucodonosor na Babilonia so Jerusalem tan nilakob to.

² "Inyabuloy na Katawan a nadakep nen Ari Nabucodonosor si Ari Joakim tan impasamsam toy pigaran kayamanan na Timplo. Inawit tod Babilonia iray pigaran totoon adakep to, tan inyan tod timplo na saray diriyos to iray kayamanan ya asamsam tod saray panagsinupan a kuarto na Timplo.

³ "Ingganggan na ari si Aspenaz, say manonan opisyal to, a mamilid saray adakep ya Israelita na pigaran lalakin tobun-balon kabyangan na pamilyay ari tan saray pamilyan gagalangen ed baley.

⁴ "Nepeg a guapo ra, maung iran impanolo, maung so inkapasal da, masiglat iran manaral, tan anggapoy antokaman a deral na laman da, pian manepeg iran manlingkur ed palasio. Si Aspenaz so nambangat ed sikara a mambasa tan mansulat na salita da ray taga Babilonia.

⁵ "Ingganggan met na ari a nepeg ya itdan iran inagew-agew na kakanen tan alak a singa saray niiiter ed ari tan saray kabyangan na opisyal to. Kayariy taloy taon a pangibangat ed sikara, nepeg ya omparontal irad ari.

⁶ "Akabilang ira dia di Daniel, Ananias, Misael, tan Azarias; kabyangan iran apat na tribu nen Juda.

⁷ "Samay manonan opisyal et initdan to ra na balon ngaran: si Daniel atawag na Beltsasar, si Ananias atawag na Sadrac, si Misael atawag na Mesac, tan si Azarias atawag na Abednego.

⁸ "Tinibokel nen Daniel ed kanunotan to ya ag to abuloyan a magmaliw a marotak onung ed ganggan diad pangan to na kakanen tan diad iyinom to na alak a manlalapud palasio. Lapud saya kinerew tod kinen Aspenaz ya abuloyan ton ag narotakan onung ed ganggan,

⁹ "et say Dios impagmaliw ton mapangasi tan manunot si Aspenaz ed kinen Daniel.

¹⁰ Balet antakot ed ari si Aspenaz, kanyan kuantod kinen Daniel, Say ari so nampili na nepeg yon kanen tan inomen, et no nanengneng ton makapoy so laman yo, aliwan singa saray arum a lalakin tobun-balo, nayarin pateyen to ak.

¹¹ Kanyan inasinggeran nen Daniel so guardian impasen nen Aspenaz a makaoley ed kinen Daniel tan saramay taloran kakaaro to.

¹² Inkuanto, Subok mo kami karin samploy agew. Itdan mo kami na pising a kanen mi tan say danum ya inomen mi.

¹³ Insan mo kami ipara ed saray lalakin tobun-balon mangakan na kakanen a manlalapud palasio, et no antoy nanengneng mod sikami sikatoy pangiletnegan moy ebat mo.

¹⁴ Inmabuloy imay guardia a suboken to ra na samploran agew.

¹⁵ Kalabas na samploran agew, maung niy impanlaman da tan mabiskeg ni ra nen saray arum a mangakan na taganon manlalapud palasio.

¹⁶ Kanyan nanlapud saman samay guardia inyabuloy ton mangan ira na pising, aliwa lan samay kakanen a manlalapud palasio.

¹⁷ Initdan na Dios ira yan apatiran lalakin tobun-balo na dunong tan kakabatan ed litiratura tan pilosopiya. Say Dios initdan to niy Daniel na karunongan a mangipatalus na saray pasingayew tan saray kogip.

¹⁸ Kalabas na taloy taon ya inggetar na ari, inyakar nen Aspenaz ed kinen Nabucodonosor ira may amin a lalakin tobun-balo.

¹⁹ Akitongtong ed sikaran amin imay ari, et nalmoan ton matalona nen saray arum ira di Daniel, Ananias, Misael, tan Azarias. Kanyan nagmaliw ira a kabyangan na saray opisyal ed palasio.

²⁰ Anggan antoy itepet ed sikara na ari odino anton problima so ipanon to, maminsamplon maung niyebat da ra may apatira nen say ebat na siopaman a managparles odino salamangkiro diad intiron nanarian.

²¹ Nansiansian kabyangan na opisyal na ari si Daniel ya anggad impakadakep ed Babilonia nen Ari Ciro, say impirador na Persia.

2

¹ "Nankogip si Ari Nabucodonosor nen kumadwan taon na panooley to. Mapalaloy inkagunigon to lapud saya, kanyan ag makaogip.

² "Impaawit to sirin iray managpalar, saray salamangkiro, saray managparles, tan saray managanito, ta ipaliwawa rad sikato imay kogip to. Kasabi ra nanalagey irad arap na ari,

³ "insan inkuantod sikara, Nagugunigon ak lapud samay kinogip ko. Labay kon naamtaan no antoy kabaliksan to.

⁴ "Inmebat irad ari diad salitan Aramaica, Mansiansia komun a mambilay so Kagalang ya Ari! Ibagam ed sikami so kogip mo, et ipaliwawa mid sika.

⁵ "Inkuan na ari ed sikara, Tinibokel ko lad kanunotan ko a nepeg ya ibaga yod siak so kogip, insan yo ibagay kabaliksan to. No ag yo nibaga, tartaren ta kayo tan deral-deralen koy kaabungan yo.

⁶ "Balet no nibaga yod siak so kogip tan say kabaliksan to, tumangan ta kayo na saray rigalo tan baleg a kagalangan. Natan sirin, ibaga yo lad siak so kogip tan say kabaliksan to.

⁷ "Inmebat ira lamet ed ari, No ibaga labat komun na Kagalang ya Ari so akogip to, ipatalus miy kabaliksan to.

⁸ "Diad saya inmeyag so ari, Duga la may walad kanunotan ko! Paparokeyen yoy panaon, lapud tinibokel ko lad inkasiak

⁹ "a nampaparay iter kod sikayon dusa no ag yo nibagad siak so kogip ko. Nampapakna kayo ya ituloy yoy pantitila yod siak, lapud iilaloan yo a diad panakar na panaon naoman iray bengatlan nagawa. Ibaga yod siak so kogip ko, et naamtaan kod satan a nayarian yo met ya ibagad siak so kabaliksan to.

¹⁰ Inmebat ira may sumisimbawa, Anggapod tapew na dalin, Kagalang ya Ari, so siopaman a makapangibagad sika na labay mon amtaen. Anggapoy ari, ya anggan say sankatalonggaringan tan sankamakapanyarian ed sikara, a mangiganggan na singa igaganggan mod saray managpalar, saray salamangkiro, tan saray managanitom.

¹¹ Satay kekerewen mo, Kagalang ya Ari, et petepeteg a mairap tan anggapoy makagawa likud labat ed saray diriyos, balet ag ira mililimug ed saray katoowan.

¹² Lapud sayan imbaga ra, mapalaloy impakapasnuk na ari tan ingganggan ton pateyen ya amin iray sumisimbaway ari a walad Babilonia.

¹³ Kanyan nipaakseb so ganggan a pateyen ya amin iray sumisimbaway ari; inanap da met a pateyen sirin si Daniel tan saramay kakaaro to.

¹⁴ Insan linmay Daniel ed kinen Arioc, say pangulo da ray dilin umaantabay na ari, tan sikatoy niganggan a mamatey ed saray sumisimbawa na ari. Inapi-apiger toy impitongtong to,

¹⁵ tan tinepet tod kinen Arioc no akin et impaakseb na ari imay maruksan ganggan. Kanyan imbaga nen Arioc ed kinen Daniel so agawa.

¹⁶ Linman tampol ed ari si Daniel tan akerew ton naitdan na andokdokey a panaon, pian nayarian ton ibagad ari so kabaliksan na kogip to.

¹⁷ Sinmempet sirin si Daniel tan imbaga tod saramay kakaaro to a di Ananias, Misael, tan Azarias so agawa.

¹⁸ Imbaga tod sikaran onkerew ira na panangasi na Dios na tawen tan ipikasi rad sikato ya ipaliwawa tod sikara so mistirio, pian ag ira napipatey ed saray arum a sumisimbawa a walad Babilonia.

¹⁹ Diad saman lamlamang a labi nipaamtad kinen Daniel so mistirio diad panamegley na pasingayew. Lapud saman indayew to so Dios na tawen:

²⁰ Say Dios makabat tan makapanyari! Sikatoy indayew yo ed ando lan ando.

²¹ Walad lima to so oras tan say panaon; sikatoy mangipapayorung tan mangeekal ed saray arari; sikatoy mangiiter na kakabatan ed saray makabat tan say pakatalus ed saray makatalus.

²² Ipapaamta to ray bengatlan aralem tan maamut; amta toy antokaman a niamut ed kabilongetan, ta manaayam ed sikaton dili so liwawa.

²³ Pisasalamatan tan idadayew ta ka, Dios da ray lalakik. Initdan mo ak na kakabatan tan biskeg; inebatan mo so pikakasik tan impaamtam ed sikami no antoy ibaga mid ari.

²⁴ Kanyan linmay Daniel ed kinen Arioc, say ingganggan na ari a mamatey ed saray sumisimbawa na ari. Inkuantod sikato, Ag mo ra papateyen. Iyakar mo ak ed ari, ta ibagak ed sikato so kabaliksan na kogip to.

²⁵ Inyakar nen Arioc a tampol si Daniel ed Ari Nabuconodosor tan inkuantod sikato, Walay arumog kon sakey a Judion adakep dia a nayarian ton ibagad sika, Kagalang ya ari, so kabaliksan na kogip mo.

²⁶ Inkuan na ari ed kinen Daniel (ya atawag met na Beltsasar), Nibagam ed siak so akogip ko tan no antoy kabaliksan to?

²⁷ Inmebat si Daniel, Kagalang ya Arim anggapoy siopaman a makabat, managparles, salamangkiro, odino astrologo a makapangibaga na kogip mo tan say kabaliksan to.

²⁸ Balet walay Dios ed tawen a sikatoy mangipapaamtad saray mistirio. Impaamta tod sika, Kagalang ya Ari, no antoy nagawa ed arapen. Natan ibagak ed sika so kogip mo, say nipasingayew ed sika nen naogip ka.

²⁹ Legan mon nanaogip, Kagalang ya Ari, akogip mo so nipaakar ed arapen; et say Dios, a mangipapaamtad saray mistirio, impanengneng tod sikano antoy nagawa ed arapen.

³⁰ Natan, nipaamtad siak yan mistirio, aliwan lapud makabat ak nen saray arum, no ag ingen pian nakabatan mo, Kagalang ya Ari, so kabaliksan na kogip mo tan natalusan mo ray kanunotan a sinmabid sika.

³¹ Kagalang ya Arim, diad samay nipasingayew ed sika, anengneng mon manalalagey ed arap mo so sakey a balbaleg a talintao, masilesileng tan mansiayap, tan makapataktakot a nengnengen.

³² Sankapuroan a balituk sa olo to; pilak so pagew tan saray taklay to; gansa so balangbang to tan saray tapi to,

³³ balatyang iray ulpo tan bikking to, tan balatyang tan dalin iray sali to.

³⁴ Legan mon nenengnengen, walay sakey a baleg a baton ginmeray a nanlapud palandey anggaman ya anggapoy aniwit, atolinan to ra may balatyang tan dalin a sali na samay talintao, tan tinemek to ra.

³⁵ Insan biglan akusbo ira may balatyang, dalin, gansa, pilak, tan balituk, tan nagmaliw iran singa dabuk ed panagilikan no tiagew. Intikyab iran amin na dagem, et anggapoy nakdaan a pakatontonan ed kawalaan da. Balet binmaleg imay bato tan nagmaliw a palandey a sinakuban toy intiron mundo.

³⁶ Saya so kinogip mo. Natan ibagak ed sika, Kagalang ya Ari, so kabaliksan to.

³⁷ Kagalang ya Ari, sika so sankatalonggaringan ed amin da ray arari. Say Dios na tawen impagmaliw to kan ari tan initdan to ka na pakayari, biskeg, tan kagalangan.

³⁸ Impagmaliw to kan manoley ed amin a pasen a kawalaan na totoo tan manoley ed amin da ray ayayep tan amin da ray manok. Sika may olon balituk.

³⁹ No anggapo ka la onsalat so sananey ya impirio, balet aliwan singa kabaleg tan katalonggaring na impiriom. Kayari to ya, onsalat so kumatlon impirio na gansa a sikatoy manoley ed intiron mundo.

⁴⁰ Insan walay kumapat ya impirio a mabiskeg a singa balatyang; temeken tan misimisien toy amin a bengatla. No panoy panemek na balatyang ed amin a bengatla, ontan met so panemek tan pamagbag na sayan impirio ed amin ya akaonan impirio.

⁴¹ Anengneng mo met a walay balatyang tan dalin iray sali tan saray gamet na samay talintao. Apaldua ya impirio so kabaliksan to man. Nawalaan so impirio na biskeg a singa balatyang lapud wala man a balatyang ya alaukan na dalin.

⁴² Saramay gamet na saliwalay balatyang tan dalinkabaliksan day mabiskeg so arum a parti na impirio, balet makapoy so arum a parti.

⁴³ Anengneng mo met a nanlauk so balatyang tan say dalin. Kabaliksan to ya a saray manoley ed saman ya impirio et salien dan pankakasakeyen iray pamilya ra diad panaasawaan na saray totoo ra, balet ag da nayarian, a singa say balatyang et ag nayarin onlauk ed dalin.

⁴⁴ Diad panaon da raman a manoley say Dios na tawen mangiletneg na panarian ya ag balut mangangga. Ag balut nadakep yan panarian, no ag ingen sigput ton deralen ya amin ira man ya impirio, insan mansiansia ya anggad angga.

⁴⁵ Anengneng mo no panon a ginmoray imay baton baleg a nanlapud palandey tan tinmolin ed samay talintaon balatyang, gansa, dalin, pilak, tan balituk. Say matalonggaring a Dios impaamta to, Kagalang ya Ari, so nagawa ed arapen a panaon. Sikato ya so tuan kinogip mo tan say petepeteg a kabaliksan to.

⁴⁶ Insan dinmakmomo ya anggad dalin si Ari Nabucodonosor tan ingganggan ton nisaklang ed kinen Daniel iray bagat tan insinso.

⁴⁷ Inkuan na ari, Say Dios mo so sankatalonggaringan ed amin da ray diriyos, say Katawan da ray arari, tan sikato so mangipapaamta ed kabaliksan na saray mistirio. Amtak ya, lapud ayarian mon impaliwawa so kabaliksan na sayan mistirio.

⁴⁸ Insan initdan na ari si Daniel na atagey a kipapasen, initdan to na amayamay a mabmabli ran rigalo, impasen ton makaoley ed luyag na Babilonia, tan impagmaliw ton pangulo da ray amin a sumisimbawa na ari.

⁴⁹ Lapud kinerew nen Daniel, say ari impasen ton makaoley ed kimey diad luyag na Babilonia ira di Sadrac, Mesac, tan Abednego; si Daniel balet nansiansia ed korti na ari.

3

¹ "Nampagawa si Ari Nabucodonosor na balituk a talintao, a duamplo tan walon mitro so kaatagey to tan ngalngali taloran mitro so kalapar to, insan to impaalagey ed patar na Dura diad luyag na Babilonia.

² "Insan say ari ingganggan tod amin ya opisyal to a mantitipon irasaray prinsipi, saray gobirnador, saray bokal, saray huis, saray tisoriro, saray piskal, tan amin da ray arum ya opisyal na saray luyag. Mantitipon ira, ta onimatun ira ed pangisaklang na samay talintaon impaalagey nen Ari Nabucodonosor.

³ "Nen akapantitipon la ra yan opisyal tan akaalagey iran amin ed arap to may talintaon isaklang,

⁴ "inkulyaot na sakey a managbando, Sikayo ran totoo ed amin a bansa, anggan antoy kolor na baog yo tan salita yo, dengel yo yan ganggan!

⁵ "Kadngel yod tanul na saray trumpita, a patombukay togtog na saray kornita, arpa, lira, plauta, tan saray arum nin kagawaan na musika, dakmomo kayon mangigalang ed balituk a talintaon impaalagey nen Ari Nabucodonosor.

⁶ "Siopamay toon ag ondakmomon mangigalang et ibontuk a tampol ed manliub ya apoy na palbaan.

⁷ "Katanul sirin na saray kagawaan na musika, saray totoo ed amin a bansa, anggan antoy kolor na baog da tan salita ra, et dinmakmomo ran angigalang ed samay balituk a talintaon impaalagey nen Ari Nabucodonosor.

⁸ "Lapud saya wala ray pigaran taga Babilonia ya anganamut na pankanawnawa ran mangidalem ed saray Judio.

⁹ "Inkuandad Ari Nabucodonosor, Mambilay komun ed anggad angga so Kagalang ya Ari!

¹⁰ Kagalang ya Ari, angipaakseb ka na ganggan a katogtog na musika, nepeg na balang sakey a too so ondakmomon mangigalang ed samay balituk a talintao,

¹¹ et ibantak ed manliub a palbaan so siopaman ya ag ondakmomon mangigalang.

¹² Wala ray pigaran Judio ya impasen mo ran makaoley ed luyag na Babilonia, a di Sadrac, Mesac, tan Abednego a susumlangen da ray ganggan mo, Kagalang ya Ari. Ag da igagalang so dios mo odino ondadakmomo ed samay talintaon impaalagey mo.

¹³ Lapud saman mapalaloy impetang na olo na ari, et ingganggan ton iyarap ed sikato ira may taloran lalaki.

¹⁴ Inkuantod sikara, Sadrac, Mesac, tan Abednego, tua ya ag yo labay so mangigalang ed dios ko tan ag yo labay so ondakmomon mangigalang ed samay talintaon impaalagey ko?

¹⁵ Natan sirin, karengel yod tanul na saray trumpita, kornita, arpa, lira, plauta, tan amin da ray arum a kagawaan na musika, dakmomo kayon mangigalang ed samay talintao. No ag yo labay nibantak kayon tampol ed manliub a palbaan. Dinan a dios so mangyagel ed sikayo?

¹⁶ Inmebat ira di Sadrac, Mesac, tan Abednego, Ag mi iyagel so sikamin dili, Kagalang ya Ari.

¹⁷ No say Dios a panlilingkuran mi et nayarian to kamin iyagel ed manliub a palbaan tan diad pakayarim, iyagel to kami.

¹⁸ Balet anggan ag to kami iyagel, andi-duaruwa, Kagalang ya Ari, ya ag kami mangigalang ed dios mo, tan ag kami ondakmomo ed samay balituk a talintaon impaalagey mo.

¹⁹ Insan mapalaloy impetang na olo nen Nabucodonosor tan binmilonget so lupa tod pasnuk tod kindi Sadrac, Mesac, tan Abednego. Kanyan ingganggan tod saray totoo to a papetangen dan mamimpito so palbaan.

²⁰ Kayari to ya, ingganggan to ray sankabiskegan ed saray sondalo to a baluren da ra may talora tan ibontuk da rad manliub ya apoy.

²¹ Kanyan binalur da ra ya akasolung na kawes, kolibemben, sombriro, tan amin da ray arum a kagawaan na laman da, insan da ra imbontuk ed samay manliub ya apoy na palbaan.

²² Lapud mapeget ya ingganggan na ari a papetapetangen day palbaan, atektek ira may lalakin angibontuk ed saramay talora.

²³ Insan di Sadrac, Mesac, tan Abednego ya abalur ni ra et naplag irad pegley to may manliub ya apoy.

²⁴ Kabebekta akakogtut si Nabucodonosor diad pankelaw to. Tinepet tod saray opisyal to, Ag ta taloray binalur tayon lalaki tan imbontuk tayo rad manliub a palbaan? Inmebat ira, On, talora ra, Kagalang ya Ari.

²⁵ Akin sirin et apatiran lalaki so nanenengneng ko a manaakar-akar ed samay apoy? tepet to. Ag la ra abalur, tan ag da nengneng so nasasakitantan samay kumapat et nengneng toy singa anghil.

²⁶ Kanyan si Nabucodonosor linmad puirta to may manliub a palbaan tan kinolyaotan to ra, Sadrac, Mesac, tan Abednego! Sikayo ran aripen na Sankatageyan a Dios! Paway kayo la! Et pinmaway iran tampol.

²⁷ Nantitipon iray prinsipi, saray gobirnador, saray bokal, tan saray arum ya opisyal na ari, ta nengnengen da ra may taloran lalaki ya ag apasakitan na apoy. Ag apoolan so buek da, ag apoolan so kawes da, tan ag iran balut anggan naasyotan.

²⁸ Samay ari kuanto, Nagalang so Dios di Sadrac, Mesac, tan Abednego! Imbaki toy anghil to ya angyagel ed sarayan lalakin manlilingkur tan manmamatalek ed sikato. Sinumlang da ray ganggan ko tan imposta ray bilay da diad ag da indakmomo tan impangigalang ed dinanman a dios likud ed Dios da.

²⁹ Et natan, igaganggan ko a tegtegtegen so laman na siopaman a taga dinanman a bansa, anggan antoy kolor na baog to tan salita to, a mansalitay sumpad Dios di Sadrac, Mesac, tan Abednego. Gawaen a bontun na deral-deral so abung to. Anggapoy arum a dios a makapangyagel na onya.

³⁰ Insan inyatagey na ari so kipapasen si Sadrac, Mesac, tan Abednego diad luyag na Babilonia.

4

¹ "Si Ari Nabucodonosor impaikuanto ed amin da ray totoo ed amin a bansa, anggan antoy kolor na baog da tan salita ra, diad intiron mundo: Pinablik iran totook!

² "Dengel yoy isalaysay ko ran pakelaw tan milagro ya impanengneng ed siak na Sankatageyan a Dios.

³ "Agaylay kabaleg na pakelaw ya ipapanengneng na Dios ed sikatayo! Makapakelaw a tuloy iray milagron gagawaen to! Say Dios et ari ya anggad angga; ag mangangga so panoley to.

⁴ "Siak, si Nabucodonosor, mambibilay ak nen saman a mainawa ed palasiok, panliliketan ko so ontan lan iyaaligwas ko.

⁵ "Balet nankogip ak na makapataktakot tan akanengneng ak na makapakebyew a pasingayew nen naogip ak.

⁶ "Ingganggan kon niakar ed siak ya amin iray sumisimbawak diad Babilonia, pian nibaga rad siak so kabaliksan na saman a kogip ko.

⁷ "Insan niakar ed siak ya amin iray managparles, saray salamangkiro, saray managanito, tan saray astrologo, tan imbagak ed sikara so kogip ko, balet ag da nipaliwawad siak so kabaliksan to.

⁸ "Insan linmoob si Daniel. (Beltsasar met so tawag ed sikato; niboluy ed dios ko.) Walad sikato so ispiritu na saray masanton diriyos, kanyan imbagak ed sikato so akogip ko. Inkuankod sikato:

⁹ "Beltsasar a pangulo da ray managparles, amtak a walad sika so ispiritu da ray diriyos, tan natalusan mon amin iray mistirio. Sikato ya so kogip ko. Ibagam ed siak so kabaliksan to.

¹⁰ Legan kon naogip, walay nipasingayew ed siak a balbaleg a kiew a walad pegley na mundo.

¹¹ Binmiskeg tan inmatagey ya anggad asabi to so tawen tan nanengneng na amin a totoo ed intiron mundo.

¹² Marakerakep iray bolung to tan napno na bungan nayarin kanen na anggan amin a totoo ed intiron mundo. Nampapainawad silong to iray ayayep ed takel, nanoobung ed saray sanga to iray manok, tan angakan na saray bunga to iray amin a mabilay a pinalsa.

¹³ Legan kon nununoten so nipaakar ed samay pasingayew, anengneng koy sakey ya anghil ya onaakseb a nanlapud tawen; sipaparaan lawas a mambantay yan anghil.

¹⁴ Imbawag tod makmaksil a bosis, Batang yoy kiew tan salingsing yo ray sanga to; ekal yo ray bolung to tan itayak yo ray bunga to. Abul yo ray ayayep a walad silong to tan saray kamanukan a walad sangasanga to.

¹⁵ Balet itilak yod dalin so sengeg to tan isinger yo na golunggolung a balatyang tan gansa. Paolyan yod man ed alog a kaiba to ray dikan malambot. Natan paolyan yon nalinaewan yan laki tan nakaiba to ray ayayep tan saray tanaman.

¹⁶ Pitoy taon a say panagnunot na ayep so niwalad sikato, aliwan panagnunot na too.

¹⁷ Sikato yay sintinsia na saray sipaparaan lawas a mambantay ya anghil, pian naamtaan na amin a katoowan ed inerman a pasen a say Sankatageyan a Dios so manoley ed saray nanarian na too tan nayarian to ran iter ed siopaman a labay ton pangitdananggan diad sankamugmoan lan too.

¹⁸ Sikato yay akogip ko, kuanen Ari Nabucodonosor. Natan Beltsasar, ibagam ed siak so kabaliksan to. Anggapod saray sumisimbawak so akapangibagad siak na kabaliksan to, balet nayarian mo, lapud walad sika so ispiritu da ray masanton diriyos.

¹⁹ Lapud saya, si Daniel a tatawagen met na Beltsasar et apagaan, kanyan ag makasel. Inkuan na ari ed sikato, Ag ka mapaga lapud samay kogip tan say labay ton ibaga. Inmebat si Beltsasar, Kagalang ya Ari, aliwan sika komun so kipaakaran na kabaliksan na kogip, no ag ta saray kalaban mo.

²⁰ Samay kiew ya anengneng mon balbaleg tan asabi toy tawen et nanengneng na amin a totoo ed tapew na dalin.

²¹ Mararakep iray bolung to, tan nayarin kanen na anggan amin a katoowan ed intiron mundo iray bunga to. Nampapainawad silong to iray ayayep ed katakelan, tan nanoobung ed saray sanga to iray manok.

²² Kagalang ya Ari, sika man so kiew, atagtagey tan mabiskeg. Diad imbalbaleg mo atokdul moy tawen, tan say pakaoley mo et linmaknab ed intiron mundo.

²³ Legan kan mamabantay, walay sakey ya anghil ya inmakseb a nanlapud tawen tan kuanto, Batang yoy kiew tan deral yo, balet itilak yod dalin so sengeg to tan isinger yo na golunggolung a balatyang, tan gansa. Paolyan yod man ed alog a kaiba to ray dikan malambut. Paolyan yon nalinaewan yan laki, tan nakaiba ton pitoy taon iray ayayep.

²⁴ Saya sirin so kabaliksan to, Kagalang ya Ari, tan sikato yay imbawag na Sankatageyan a Dios a nagawad sika.

²⁵ Napaarawi kad kawalaan da ray totoo tan manayam kad kawalaan da ray ayayep ed katakelan. Pitoy taon a mangan kay dika a singa baka, tan manogip ka ed pasen ya anggapoy tarung, a diman ka nalinaewan. Insan birbiren mo a walad silong na pakaoley na Sankatageyan a Dios iray nanarian na too tan nayarian to ran iter ed siopaman a labay ton pangitdan.

²⁶ Ingganggan na saray anghil ya itilak ed dalin so sengeg ton nambatangan. Say kabaliksan to ya et say pagmaliw mo lamet ya ari no birbiren mon say Dios ooleyan toy intiron mundo.

²⁷ Kanyan, Kagalang ya Ari, tombuk mo pay simbawak. Tondaan mo lay mankasalanan, manggawa ka lay katonungan, tan kasian mo ray mairap-bilay. Diad satan mansiansia kan onaligwas.

²⁸ Amin da ra ya et agawan tua ed kinen Ari Nabucodonosor.

²⁹ Kalabas labat na labinduay bulan, nen manliliber a manaakar ed toktok na palasio na Babilonia,

³⁰ inkuanto, Nengneng yo so ontan lan inkatalonggaring na Babilonia! Lapud biskeg tan pakayarik impaalagey kon manonan siudad na nanarian ko a pakapatnagay kagalangan ko tan say katageyan ko.

³¹ Mansasalita ni si Ari Nabucodonosor nen walay bosis a nanlapud tawen a kuanto, Ari Nabucodonosor, dengel moy ibagak ed sika! Nakal lad sika so pakayarim ya ari.

³² Napaarawi kad kawalaan da ray totoo, manayam kan kaibam iray ayayep ed katakelan, tan pitoy taon kan mangay dika a singa baka. Insan birbiren mod satan ya amin a nanarian na too et walad silong na pakaoley na Sankatageyan a Dios tan nayarian to ran iter ed siopaman a labay ton pangitdan.

³³ Tinmuan tampol ira may salita. Apaarawi ed kawalaan da ray totoo si Nabucodonosor tan singa baka a nanaakan na dika. Alitlinaewan so laman to, tan dinmokey a singa payak na agila so buek to tan singa kokoy manok iray koko to.

³⁴ Kalabas na pitoy taon, inkuan na ari, tinmangay ak ed tawen, et pinmawil ed siak so kalakal ko. Inggalang ko, indayew ko, tan intandurok so Sankatageyan a Dios a mambibilay ed anggad angga. Sikato so manoley ed anggad angga, tan mansiansia ed ando lan ando so panarian to.

³⁵ Say pakanengneng tod amin a katoowan et anggapoy kabaliksan da; walad silong na pakayari to iray anghil ed tawen tan saray totoo ed mundo. Anggapoy makasumlang ed linawa to odino makasumpa ed gagawaen to.

³⁶ Nen pinmawil so kalakal ko, nipawil ed siak so dayew ko, say pakayarik, katageyan ko, tan say kagalangan na nanarian ko. Maliket ya angawat ed siak iray opisyal ko tan saray sumisimbawak, tan nipawil ed siak so pakayarik ya ari a kataruk to so kagalangan a baleg ni nen say samay inmona.

³⁷ Et natan, siak a Nabucodonosor idayew ko, igalang ko, tan itandurok so Ari na Tawen. Matonung tan maptek ya amin iray gagawaen to, tan nayarian ton iyabebad kipapasen iray mapaatagey.

5

¹ "Aminsan a labi inimbitaan nen Ari Belsasar ed sakey a baleg a ponsia iray sanlibon atagey ya opisyal to, tan naniinoman iray alak.

² "Legan dan naniinoman ingganggan nen Belsasar ya alaen da ray balituk tan pilak a kupa tan losur a sinasamsam nen ama to a Nabucodonosor diad Timplo ed Jerusalem. Impaala to ra pian napaninoman da ra, sikato, saray opisyal to, saray asawa to, tan saray iyaamung ton bibii.

³ "Niakar a tampol ed sikato ira may balituk a kupa tan losur, tan naniinoman da ra na alak

⁴ "tan indadayew da ray diriyos a balituk, pilak, gansa, balatyang, kiew, tan bato.

⁵ "Kabebekta walay pinmayawar a limay too, insan nansulat ed palitada na padir na palasio, diad pakawawandagan na ontan lan liwawa na saray lamparaan. Anengneng na ari imay mansusulat a lima.

⁶ "Pinmotiy bosaleg to tan diad gaway inkataktakot to, mampayegpeg iray pueg to.

⁷ "Inmeyag ya angibaki na mangawit ed saray salamangkiro, saray managparles, tan saray astrologo. Kaloob da inkuan na ari ed sikara, Siopamay makabasa na sayan sulat tan nibaga to no antoy kabaliksan to et kawesan na ambalangan kawes na ari, solungan na balituk a kolintas, tan magmaliw a mikatlod sankatageyan a manoley na nanarian.

⁸ "Inmasingger ed arap na katoowan ira may sumisimbawa na ari, balet anggapod sikara so makabasad samay nisulat odino makapangibaga ed ari na kabaliksan to.

⁹ "Diad inkagunigon nen Ari Belsasar lalon pinmotiy bosaleg to, tan ag amtay gawaen na saramay manonan opisyal to.

¹⁰ Nadngel na riynan ina so impaneyag na ari tan saramay manonan opisyal, kanyan linmoob ed kawalaan na ponsia. Inkuanto, Mambilay ya anggad angga so Kagalang ya Ari! Ag ka mapaga tan ag mo pampopotiay bosaleg.

¹¹ Walay sakey a laki diad nanarian mo a walad sikatoy ispiritu na saray masanton diriyos. Nen si amam so ari, impanengneng na saman a too so kaabigan na kanunotan to, pakatalus to, tan say kakabatan to a singa kakabatan da ray diriyos. Si Ari Nabucodonosor ya amam et impagmaliw ton pangulo da ray managparles, saray salamangkiro, saray managanito, tan saray astrologo.

¹² Nidoma-doma so donung to tan makabat tan marunong ed panangipatalus na saray kogip, saray pabitla, tan diad panangipaliwawa na saray mistirio; kanyan paawit mo man a lakin manngaran na Daniel, a tinawag na ari na Beltsasar, ta ibaga tod sika so kabaliksan da ra ya.

¹³ Niakar a tampol ed arap na ari si Daniel, tan inkuan na ari ed sikato, Sika so Daniel, sakey ed saramay Judio ya adakep nen amak ya ari tan inawit to dia a nanlapud Juda?

¹⁴ Nadngelan ko a walad sikay ispiritu na saray masanton diriyos, marunong ka, tan naitdan kay pakatalus tan ayadyarin kakabatan.

¹⁵ Saray sumisimbawa tan saray salamangkiro et niakar ira diad arap ko a mambasa ed sayan nisulat tan mangipatalus na kabaliksan to, balet ag da nibagay kabaliksan to.

¹⁶ Nadngelan ko a nayarian mon ipatalus so niamut iran kabaliksan tan nipaliwawam iray mistirio. No nabasam yan nisulat tan nibagam ed siak so kabaliksan to, kawesan ka na ambalangan kawes na ari, solungan ka na balituk a kolintas, tan magmaliw kan mikatlo ed sankatageyan a manoley diad nanarian.

¹⁷ Inmebat si Daniel, Ag mo la nununoten itay pangiter mod siak na tumang; iter mo la ed arum a too. Ibasak ed Kagalang ya Ari so nisulat tan ibagak ed sika so kabaliksan to.

¹⁸ Say Sankatageyan a Dios impagmaliw ton matalonggaring ya ari si amam a Nabucodonosor tan kinawesan to na kagalangan tan pakapanyari.

¹⁹ Mapalaloy inkatalonggaring to, kanyan manggiwgiw tan antakot ed sikato iray totoo ed amin a bansa ya anggan antoy kolor na baog da tan salita ra. Pinatey to so siopaman a toon nilabay ton pateyen; impansiansia ton mabilay iray nilabay ton bilayen. Pinagalangan tan impelag tod kababaingan so siopaman a toon nilabay to.

²⁰ Balet lapud nagmaliw a mapaatagey, anawet so puso, tan maruksa si amam, niepas ed trono to tan nakalan na kagalangan.

²¹ Niarawid kawalaan na saray totoo, tan nagmaliw a panagnunot na ayep so panagnunot to. Nanaayam ed pasen a kaiba to ray asnod katakelan, singa bakan nanaakan na dika, tan nanoogip ed pasen ya anggapoy tarung, kanyan alitlinaewan. Onmay kipapasen to ya anggad sinmabiy panaon a binirbir ton walad silong na pakaoley na Sankatageyan a Dios iray amin a nanarian tan nayarian to ran iter ed siopaman a labay ton pangitdan.

²² Balet sika ya anak to, ag ka nampaabeba, anggaman ya amtam so amin ya agawa.

²³ Ginawam iray sumpad Katawan na tawen, ta impaalam ira may kupa tan losur a nala ed Timplo to. Naniinoman yo, sika, saray manonan opisyal mo, saray asawam, tan saray iyaamung mon bibii tan inggalang mo ray diriyos a balituk, pilak, gansa, balatyang, kiew, tan batosaray diriyos ya ag ira makanengneng odino makadngel tan anggapoy amta ran bulat. Balet ag mo pinagalangan so Dios a walad lima toy bilay mo tan walad silong na pakayari toy amin a gagawaen mo.

²⁴ Sikara yay makasengeg no akin et imbaki na Dios imay lima ya angisulat na sarayan salita.

²⁵ Sikato ya so nisulat: Mene, Mene, Tekel, Parsin.

²⁶ Sikato ya so talus to: say Mene et bilang, ta binilang na Dios iray agew a nakdaan a pansiansia na nanarian mo tan impansamput to la;

²⁷ say Tekel et belat, ta asimbang so belat mo, nalmoan a kulang so belat mo;

²⁸ say Parsin et paldua, ta apalduay nanarian mo tan niiter ed saray taga Media tan saray taga Persia.

²⁹ Tampol ya ingganggan nen Belsasar iray aripen to a kawesan day Daniel na ambalangan kawes na ari tan isolung dad beklew toy balituk a kolintas. Impagmaliw ton mikatlod sankatageyan a manoley ed nanarian.

³⁰ Diad saman lamlamang a labi apatey si Belsasar ya ari na Babilonia;

³¹ si Dario a taga Media, tan mantaon ed saman na anemaplo tan dua, et sinamsam to so pakaoley na ari.

6

¹ "Kinaliktan nen Dario so impanoro to na sanlasus tan duamplon gobirnador ed intiron impirio to.

² "Pinili to si Daniel tan duaran lalaki a mangasikaso ed saray gobirnador tan mangimano na pankaabigan na ari.

³ "Ag abayag impanengneng nen Daniel so inkatalona tod kimey ed saramay duaran kapara ton opisyal tan saramay gobirnador. Lapud inkatalona ton tuloy ed panagkimey, ginetma na ari ya ipasen ton makaoley ed intiron nanarian.

⁴ "Lapud saya saramay duaran mangaasikaso ed saray opisyal tan saramay gobirnador et nananap iray kasalanan nen Daniel a nipaakar ed panangikurang tod impirio pian nidalem da, balet anggapoy narumog da, lapud matoor si Daniel ed kimey to tan ag to manggagaway antokaman a makapoy odino kasaolan.

⁵ "Inkuanda sirin ed sakey tan sakey, Ag itayon tua makarumog na antokaman a pakapangidaleman tayod Daniel, no ag ingen dia labat ed panumpal toy ganggan na Dios to.

⁶ "Kanyan linma rad ari tan inkuanda, Mambilay komun ya anggad angga so Kagalang ya Ari Dario!

⁷ "Sikami ran mangikukurang na oley ed impiriomsaray makaoley, saray gobirnador, saray sumisimbawa, tan saray arum nin opisyalet nampapaknaan mi a say Kagalang ya Ari et mangipaakseb komun na ganggan tan nepeg a mapeget so pamasumpal ed satan a ganggan. Iganggan mo a diad loob na talomploy agew anggapoy siopaman a naabuloyan a mikerew na antokaman a bengatla ed dinanman a dios odino siopaman a too likud labat ed Kagalang ya Ari. Siopamay onsumlang ed sayan ganggan et nepeg ya ibuntok ed maawang ya abut a kawalaan da ray amayamay a lion.

⁸ "Kanyan, Kagalang ya Ari, ipaakseb mo komun yan ganggan tan pirmaan mo, et magmaliw a sakey a ganggan na saray taga Media tan Persia, tan ag balut naoman.

⁹ "Kanyan pinirmaan nen Ari Dario imay ganggan.

¹⁰ Nen naamtaan nen Daniel ya apirmaan la may ganggan, sinmempet lad abung. Diad sakey a kuartod tagey na abung to, wala ray bintana ya akaarap ed Jerusalem. Onung na gagawaen to lawas, mamitlod sanagew a tinmalimukor a nampikasi tan akisalamat ed Dios to.

¹¹ Nen anengneng na saramay kalaban nen Daniel a mampipikasid Dios to,

¹² linma ran amin ed ari ta idalem day Daniel. Inkuanda, Kagalang ya ari, ag mo ta pinirmaan so sakey a ganggan a diad loob na talomploy agew siopamay toon onkerew na antokaman a bengatla ed dinanman a dios odino diad siopaman a too likud ed sika et nepeg ya ibuntok ed baleg ya abut a kawalaan da ray lion? Inmebat so ari, Tua tay kuanyo; sakey man a ganggan na saray taga Media tan Persia, tan ag balut naoman.

¹³ Insan inkuandad ari, Si Daniel a sakey ed saray nibantak a nanlapud Juda et ag to papagalangan so Kagalang ya Ari odino oonuren so ganggan ya impaakseb mo. Inagew-agew a mamitlon mampikasi.

¹⁴ Nen nadngel ya na ari, mapalaloy inkagunigon to tan anggad inselek na agew ginawa toy anggaay nayarian to a mangyagel ed kinen Daniel.

¹⁵ Insan pinmawil ed sikato ra may lalaki tan kuandad sikato, Kabat na Kagalang ya Ari ya onung ed saray ganggan na saray taga Media tan Persia, anggapoy nepeg a naoman a ganggan ya impaakseb na ari.

¹⁶ Kanyan ingganggan na ari ya erelen si Daniel tan ibontuk ed maawang ya abut a kawalaan da ray lion. Inkuantod kinen Daniel, Iyagel ka komun na Dios a matoor mon panlilingkuran.

¹⁷ Niiyan ed samay sangab na abut so baleg a bato tan say ari intimbritod samay bato so dilin timbri to tan say timbri na saramay manonan opisyal to, pian anggapoy makapangyagel ed kinen Daniel.

¹⁸ Insan pinmawil so ari ed palasio tan sanlabin ag akaogip, ag balut angan odino nanliket ed antokaman.

¹⁹ Diad palbangon binmangon imay ari tan nangganat a linmad samay abut.

²⁰ Kasabi tod samay abut, mapagpagan kinmulyaot, Daniel ya aripen na mabilay a Dios! Ayarian kan niagel ed saray lion na Dios a matoor mon panlilingkuran?

²¹ Inmebat si Daniel, Mambilay komun ya anggad angga so Kagalang ya Ari!

²² Imbaki na Dios ko so anghil to ya amepet ed sangi da ray lion, pian ag da ak napasakitan. Ginawa to ya, ta amta to ya anggapoy kasalanan ko tan anggapoy maoges a ginawak ed sika, Kagalang ya Ari.

²³ Ontan lay impakaliket na ari tan ingganggan to ya aonen ed abut si Daniel. Kanyan inaon da tan anengneng da ya ag balut asakitan, ta nanmatalek ed Dios.

²⁴ Insan ingganggan na ari ya erelen ira may lalakin angidalem ed kinen Daniel tan impaibontuk to ra, pati saray kaasawaan da tan saray anak da, ed samay abut a kawalaan da ray lion. Kasakbayan ya asabi ray kaaralman na abut, asimpayut la ra na saray lion tan tinetemek day amin a pokel da.

²⁵ Insan sinulat nen Ari Dario iray totoo ed amin a bansa, anggan antoy kolor na baog da tan salita ra: Maabig komun so kipapasen yon amin a sabien to yan ganggan ko.

²⁶ Iganggan ko ed intiron impiriok a nepeg a takotan tan galangen na amin a too so Dios nen Daniel. Sikatoy mabilay a Dios, tan sikatoy manoley ed ando lan ando. Ag balut naderal so panarian to, tan ag balut mangangga so pakayari to.

²⁷ Sikato so mangilalaban tan mangyaagel; manggagawa na saray milagro tan saray pakelaw diad tawen tan diad dalin. Inyagel toy Daniel ed pamatey na saray lion.

²⁸ Inmaligwas si Daniel legan na impanoley nen Dario tan legan na impanoley nen Ciro a taga Persia.

7

¹ "Diad ononan taon na panaari nen Belsasar ed Babilonia, walay sakey a kogip ko tan akanengneng ak na sakey a pasingayew ed labi, tan sikato yay nisulat ko

² "nipaakar ed anengneng ko ed saman a labi: Onsisiplug ed tapew na dayat so dagem a manlalapud amin a dapag.

³ "Sinmakbit ed gilig na dayat so apatiran ankakabaleg ya ayayep a nandoromaan ira.

⁴ "Say onona singa lion so nengneng to, balet wala ray payak to a singa saray payak na agila. Nen ombabantay ak, nakal ira may payak to. Niatagey imay ayep tan nipaalagey a singa too. Insan niiter ed sikato so kanunotan na too.

⁵ "Say kumadwan ayep et singa uso ya akaalagey ed saginonur iran sali to. Sankatangal to ray taloran taglang tan walay bosis a nankuan ed sikato, Sigi, mangan ka labat na karni ed anggaay nayarian mo!

⁶ "Nen ombabantay ak, sakey lamet ya ayep so pinmaway. Singa liopardo so nengneng to, balet walay apatiran payak ed beneg to a singa ra payak na manok, tan apatiray olo to. Niiter ed sikato so pakaoley.

⁷ "Legan kon ombabantay, pinmanengneng so kumapat ya ayep; makapanyari, makapataktakot tan mabisbiskeg ya ayep. Nginasngas tod saray ankakabaleg a balatyang a ngipen to iray pinatey to, insan to ra ginatin-gatinan. Nidomad saramay talora ta walay samploran saklur to.

⁸ "Nen nenengnengen ko ra may saklur to, anengneng kon ontutubod kawalaan da so sakey a melag a saklur. Binagut toy taloran saklur ed saramay wadman la. Sayan saklur wala ray mata ton matay too tan walay sangi ton mapasirayew a mansalita.

⁹ "Nen onnenengneng ak, nilira iray trono. Inmirung ed sakey a trono imay mambibilay ya anggad angga. Singa poti na yilo so kawes to, tan singa puron abel a lana iray buek to. Manliub so trono ton nilirad saray apoy a dalig,

¹⁰ tan panlalapwan na managagos ya apoy. Libo-libon totooy wadman a manlilingkur ed sikato, tan manalalagey ed arap to iray milyon a totoo. Ginmapo la so bista, tan alokasan iray libro.

¹¹ Nen onnenengneng ak, sankarengel ko ni may melag a saklur a malangas tan mapasirayew a mansasalita. Nen ombabantay ak, apatey imay kumapat ya ayep, tan nibantak ed manliub ya apoy so bangkay to tan diman dinmapul.

¹² Nakal ed saramay arum ya ayep so pakayari ra, balet naabuloyan iran mambilay a walay getar.

¹³ Legan na sayan pasingayew ed labi, anengneng koy singa sakey a too. Onsisingger ed siak, ya aliber na saray lorem, tan linmad samay mambibilay ya anggad angga tan niparontal ed sikato.

¹⁴ Naitdan imay too na pakaoley, kagalangan, tan pakayari na ari, pian makapanlingkur ed sikato iray totoo ed amin a bansa ya anggan antoy kolor na baog da tan salita ra. Mansiansia so pakaoley to, tan ag manggangga so panarian to.

¹⁵ Lapud saramay nipasingayew ed siak, apagaan tan agunigon ak.

¹⁶ Inasinggeran koy sakey ed saramay manalalagey diman tan kinerew kod sikaton ipaliwawa ton amin iray pasingayew. Kanyan imbaga tod siak so kabaliksan dan amin.

¹⁷ Inkuanto, Saramay ankakabaleg ya ayep et apatiran impirio ya onletaw ed tapew na dalin.

¹⁸ Saray totoo na Sankatageyan a Dios et awaten da so panarian tan anggad anggan mansiansiad sikara yan panarian.

¹⁹ Insan ko nampilalekan a naamtaan so nipaakar ed samay kumapat ya ayep a nidomad saramay arum ya ayayepsamay makapataktakot ya ayep a biningbingkas tod saray gansan koko to tan nginasngas tod saray balatyang a ngipen to iray pinatey to, insan to ra ginatin-gatinan.

²⁰ Nilabay ko met a naamtaan so nipaakar ed saramay samploran saklur ed olo to tan say saklur a tinmombuk a tinmubo tan pinapelag toy talora ed saramay saklur. Wala ray mata to tan sakey a sangi tan mapasirayew a mansalita. Makapataktakot ni nen saramay arum.

²¹ Nen onnenengneng ak, akibakal imay saklur ed saray totooy Dios tan tinalo to ra.

²² Insan sinmabi may mambibilay ya anggad angga tan sinintinsiaan ton analo ra may totoo na Sankatageyan a Dios. Sinmabiy panaon ya awaten na saray totooy Dios so panarian.

²³ Sikato yay paliwawan niiter ed siak: Samay kumapat ya ayep et say kumapat ya impirio ya onletaw diad tapew na dalin tan nidoma ed amin da ray arum ya impirio. Mekmeken toy intiron mundo, insan to gatin-gatinan.

²⁴ Saramay samploran saklur et saray samploran arari a manoley ed samay impirio. Insan onletaw so sakey ya ari a nidoma ed saramay akaona lan ari tan taloen toy talorad sikara.

²⁵ Mansalita na sumpad Sankatageyan a Dios tan pairapen to ray totoo na Dios. Salien ton omanen iray ganggan na rilihion da tan saray pista ra, tan oleyan ton taloy taon tan kapaldua iray totoo na Dios.

²⁶ Insan nasintinsiaan ed mangatatawen a korti, naekal so pakayari to, tan naderal a sigput.

²⁷ Niiter ed saray totoo na Sankatageyan a Dios so pakayari tan inkatalonggaring na amin a nanarian ed tapew na dalin. Ag mangangga so nanarian da; manlingkur tan ononur ed sikara iray amin a manoley diad tapew na dalin.

²⁸ Sikato yay samput na samay inkagawa. Ataktakot ak a maung kanyan pinmotiy bosaleg ko, tan pinokuk kod siak a dili ira yan amin ya agawa.

8

¹ "Diad kumatlon taon na panaari nen Belsasar, pinmatnag ed siak so kumadwan pasingayew.

² "Diad sayan pasingayew biglan niwala ak ed dalem na aliber na padir a siudad na Susa diad luyag na Elam. Manalalagey ak ed gilig na Ilog na Ulai,

³ "tan diman ed pandel na ilog anengneng koy sakey a karniron kalakyan a duaray andorokey a saklur to, a say sakey et andokdokey tan balo ni nen samay sakey.

⁴ "Binantayan ko may karniro a bobonoen toy bandad sagur, baybay, tan diad abalaten. Anggapoy ayep a makapatondad sikato odino makapaliis ed pakayari to. Ginawa toy labay ton dili tan pinmalaloy inkalastug to.

⁵ "Legan kon momotekteken so kabaliksan to ya, sinmabin nanlapud sagur so sakey a kanding. Mapmaples a sinmabi; diad gaway peles to ag dinmiwit ed dalin iray sali to. Walay maparparontal a saklur tod nanleetan na saray mata to.

⁶ "Amaarap ed samay karniron anengneng kon manalalagey ed gilig na ilog, tan inoput toy biskeg to ed indumbo tod samay karniro.

⁷ "Binantayan kon dinmogpa ed samay karniro. Diad ontan lan pasnuk ton dinmumbo ed samay karniro, apoter to may duaran saklur. Makulang so biskeg to may karniro ya onlaban ed samay kanding. Nipasobsob ed dalin tan agatin-gatinan, et anggapoy makapangilaban ed sikato ed pakayari na samay kanding.

⁸ "Pinmalalo lan pinmalalo so inkalastug to may kanding, balet nen kabisbiskegan to la apoter imay balbaleg a saklur to. Balet sinmalat ed samay saklur so apatiran maparontal a saklur, tan akatoro ed sananey a dapag so balang sakey.

⁹ "Diad sakey ed sarayan apatiran saklur, tinmubo so sakey a melag a saklur, a say pakayari to et linmaknab ed abalaten tan diad bokig tan anggad Nisipan a Dalin.

¹⁰ Pinmalaloy imbiskeg to ya anggad nilalabanan to ray sondalo ed tawen, saray dilin bitewen, insan to imbantak ed dalin iray pigarad sikara tan ginagatinan to ra.

¹¹ Nilabanan to so anggan say Prinsipi da ray mangatatawen a sondalo, pinatonda toy inagew-agew a panagbagat ed sikato, tan dinederal toy Timplo.

¹² Nankasalanan iray totoo, anta mangisaklang ira komun na manepeg ya inagew-agew a bagat, tan nibantak ed dalin so katwaan. Maaligwas imay saklur ed amin a ginagawa to.

¹³ Insan ko nadngel so sakey ya anghil ya anepet ed kapara ton anghil, Kapigay pangangga na saraman a bengatlan anengneng ed pasingayew? Kapigay pangangga sakey a makapasinagem a kasalanan a sinmalat ed inagew-agew iran bagat? Kapigay pangangga na pakagatingatin ed saray sondalo ed tawen tan say Timplo?

¹⁴ Nadngel kon inmebat imay sananey ya anghil, Mansiansian sanlibo, sanlasus tan limamplon agew, tan legan to yan panaon labi tan kabwasan ya anggapoy nisaklang a bagat. Insan nipawil so gendat a kipapasen na Timplo.

¹⁵ Siak, si Daniel, tatalusan koy kabaliksan to may pasingayew, insan biglan walay singa sakey a toon manalalagey ed arap ko.

¹⁶ Nadngel koy sakey a bosis na too a nanlapud pandel na Ilog na Ulai a kuanto, Gabriel, ipaliwawam ed sikatoy kabaliksan na anengneng to.

¹⁷ Dinmagoy Gabriel tan nanalagey ed abay ko, tan lapud mapalaloy inkataktakot ko niparugso ak ed dalin. Inkuantod siak, Sika a toon ompatey, talusan moy kabaliksan na pasingayew a nipaakar ed anggaay mundo.

¹⁸ Legan ton mansasalita, niparugso ak tan ag ko amtay tapew na dalin. Balet binembenan to ak, tan impaalagey to ak,

¹⁹ tan kuanto, Ipapanengneng kod sikay pansumpalan na pasnuk na Dios. Samay pasingayew et nipaakar ed niganan panaon na anggaan.

²⁰ Samay anengneng mon karniron kalakyan a duaray saklur to et say nanarian na Media tan Persia.

²¹ Samay kanding et say nanarian na Grecia, tan samay maparparontal a saklur ed nanleetay mata to et say ononan ari.

²² Saramay apatiran saklur a tinmubo nen apoter imay ononan saklur et saray apatiran nanarian a pakaapagan na samay bansa tan aliwan singa biskeg na samay inmonan nanarian so biskeg da.

²³ No magano lay pangangga na saraman a nanarian tan nagmaliw la ran maoges, kanyan kanepegan da lay dusalen, walay onletaw ya arin anawet so olo tan maoges, tan managpalikdo.

²⁴ Ompalaloy biskeg tobalet aliwan lapud dalin pakayari to. Makapataktakot so panderal to tan onaligwas ed amin a gawaen to. Deralen to ray makapanyarin lalaki tan saray dilin totoo na Dios.

²⁵ Lapud masilib, mampalabo ed pampalikdo to. Ikinon toy laman ton dili tan pateyen ton anggapoy pasakbay iray dakel a totoo. Onsumlang ed anggan say sankatalonggaringan ya Ari, balet naderal ya anggapoy ikanan pakayari na too.

²⁶ Ontuay pasingayew a nipaakar ed saray labi tan kabwasan a bagat a nipaliwawad sika. Balet iyamut mo ni natan lapud mabaybayag niy pakasumpal to.

²⁷ Siak, si Daniel, kinmapoy ak tan nansakit ak a pigaran agew. Insan ak binmangon tan pinmawil ed kimey ya impalima na ari ed siak, balet nikelawan ak ed pasingayew tan ag ko natalusan so kabaliksan to.

9

¹ "Nanoley ed nanarian na Babilonia si Dario a taga Media tan lakin anak nen Asuero.

² "Nen ononan taon na panooley to siak, si Daniel, inaral ko ray masanton libro tan ninunot koy nipaakar ed pitomploy taon a kaderal na Jerusalem, onung ed imbaga na Katawan ed kinen propita Jeremias.

³ "Insan masimoon ak a nampikasi ed Katawan a Dios, nankerew ak ed sikato, nanayuno ak, nankawes ak na sako, tan nanirung ak ed dapul.

⁴ "Nampikasi ak ed Katawan a Dios ko tan impatwak iray kasalanan na saray totook. Inkuanko, Katawan a Dios, matalonggaring ka tan gagalangen mi ka Matoor ka ed impisipanan mo tan ipapanengneng mo lawas so ag mangoman a panangarom ed saray mangaarod sika tan manusumpal na saray ganggan mo.

⁵ "Nankasalanan kami, maoges kami, makapoy iray ginagawa mi. Sinumlang tan impolisay mi ray ganggan mo tan saray bilin mod sikami.

⁶ "Ag mi dinengel iray aripen mon propita a diad ngaran mo et nansasalita ra ed saray arari mi, saray manoley mi, saray lalaki mi tan say intiron bansa.

⁷ "O Katawan, matonung lawas so gagawaen mo, balet impelag miy sikamin dili ed kababaingan. Tua ya ed amin min manaayam ed Juda tan diad Jerusalem; tua met ya ed amin da ray Israelitan inkakayat mod saray bansan walad arawi odino asingger lapud aliwa ran matoor ed sika.

⁸ "Makapabaing so ginagawa na saray arari mi, saray manoley mi, tan saray lalaki mi; nankasalanan irad sika, O Katawan.

⁹ "Mapangasi tan manamirdona ka, anggaman a sinmumpa kamid sika,

¹⁰ Ag kami dinmengel ed sika, O Katawan a Dios mi, nen imbagam a mambilay kami onung ed saray ganggan ya inter mod sikami diad panamegley na saray aripen mon propita.

¹¹ Sinumlang na amin ya Israelita iray ganggan mo tan ag da nilabay a dengelen so imbagam. Nankasalanan kamid sika, kanyan impelag mod sikami iray samban nisulat ed Ganggan nen Moises ya aripen mo.

¹² Ginawam so imbagam a gawaen mod sikami tan saray manoley mi. Ag miparad arum a siudad ed tapew na dalin so impanusam ed Jerusalem,

¹³ tan inter mod sikami iray amin a dusan nisulat ed Ganggan nen Moises. Balet anggad natan, O Katawan a Dios mi, ag mi ni gagawaen so pamaliket mid sika diad pangibeneg ed saray kasalanan mi odino pangonur ed katwaan mo.

¹⁴ O Katawan a Dios mi, akaparaan ka la nen saman a manusad sikami, et dinusa mo kamin tua, lapud matonung lawas so gagawaen mo, tan ag mi ka dinengel.

¹⁵ O Katawan a Dios mi, lapud pakayarim impaway mod Egipto iray totoom, tan ag nalingwanan ya anggad natan so pakayarim. Nankakasalanan kami; maoges iray ginawa mi.

¹⁶ Nen saman inyaagel mo kami lapud pakayarim, kanyan ag ka pa la mamapasnuk ed Jerusalem. Siudad tan masanton pokdul mo so Jerusalem. Balbalawen na amin a totoo ed saray kaliber-liber a bansa so Jerusalem tan saray totoom, lapud saray kasalanan mi tan saray maoges a ginagawa da ray lalaki mi.

¹⁷ O Dios mi, dengel mo pay pikakasik tan say kerew ko. Ipawil mo pad gendat a kipapasen so Timplom ya aderal, pian naamtaan da a sika so Dios.

¹⁸ Dengel mo kami pa, O Dios; nengneng mo kami tan imanom so gunigon mi tan say paniirap na siudad ya atawag ed ngaran mo. Mampipikasi kamid sika, aliwan lapud matonung kami mo ag ingen lapud mapangsi ka.

¹⁹ Katawan, dengel mo kami pa. Katawan, pirdona mo kami pa. Katawan, talineng mo kami pa tan galaw ka pa! Ag ka pa manaabala, O Katawan, pian naamtaan na amin a totoo a sika so Dios! Kayaryan mo yan siudad tan sarayan totoo.

²⁰ Intuloy ko so nampikasi; impatwak iray kasalanan ko tan saray kasalanan da ray totook ya Israel, tan kinerew kod Katawan a Dios ko ya ipawil to la komun ed gendat a kipapasen so masanton Timplo to.

²¹ Legan kon mampipikasi, maples a tinmikyab ed kawalaan ko si Gabriel ya anengneng kod samay inmonan pasingayew ed siak. Oras lad saya na panangisaklang na bagat ed labi.

²² Impaliwawa tod siak, Daniel, linma ak dia, ta tulongan ta kan mantalus ed sayan propisiya.

²³ Nen ginapwan moy mampikasi ed Dios, inebatan to ka la. Inaro to ka, kanyan linma ak dian mangibagad sika na ebat. Dengel kan maung sirin, legan kon ipapaliwawa so kabaliksan na samay pasingayew.

²⁴ Mamimpiton pitomplo a taon so karokey na panaon ya inggetar na Dios a pangibolus ed saray totoom tan say masanton siudad mo ed kasalanan tan kaogsan. Napirdona so kasalanan tan niletneg so andi-anggaan ya inkatonung, pian ontua so pasingayew tan say propisiya, tan nisaklang lamet ed Dios so masanton Timplo.

²⁵ Amtaen tan talusan mo ya: Manlapud kipaakseb na ganggan a nipawil ed gendat a kipapasen so Jerusalem ya anggad isabi na pangulon pinili na Dios, mamimpiton pitoran taon so napalabas. Nipaalagey lamet so Jerusalem; nipawil iray dalan tan saray mabiskeg a tirinsira to, tan mansiansia ra ya a mamimpiton anemaplo tan duan taon, balet panaon ya na saray gunigon.

²⁶ Diad kasamputan na sayan panaon napatey ya anggapoy kasalanan so pangulon pinili na Dios. Deralen na saray ondogpan sondalo na makapanyarin manoley so siudad tan say Timplo. Say kasamputan onsabin singa delap a taruk toy bakal tan deral ya imparaan na Dios.

²⁷ Pitoy taon a saman a manoley et nawalaan na malet a sipanan ed amayamay a totoo, tan kalabas na kapalduad sayan panaon, patondaen toy pangisaklang na saray bagat. Nipasen ed sankatageyan a parti na Timplo so Makapataktakot a Managderal tan mansiansiad man ya anggad onsabi so inggetar na Dios a pangangga na samay angipasen diman.

10

¹ "Nen kumatlon taon na panaari nen Ciro ed Persia, sinmabid kinen Daniel a tatawagen met na Beltsasar so salita. Tua ra so salita, balet mapalalon mairap a talusan. Nipaliwawad sikato diad panamegley na sakey a pasingayew.

² "Diad saman a panaon, maneermen ak a taloy simba.

³ "Ag ak angan na antokaman a mananam a kakanen odino antokaman a karni; ag ak inminom na dinanman ya alak, tan ag ko sinagaysay so buek ko ya anggad kalabas na taloy simba.

⁴ "Diad kumaduamplo tan apat ya agew na ononan bulan na saman a taon, manalalagey ak ed gilig na baleg ya Ilog na Tigris.

⁵ "Tinmangay ak, et anengneng koy sakey a lakin akakawes na linen tan akabalkes na pinon balituk.

⁶ "Mankidyam a singa alahas so laman to. Singa kirmat so liwaway lupa to, tan singa mandarlang ya apoy iray mata to. Mansiayap a singa pinasileng a gansa iray taklay tan bikking to, tan makmaksil a singa ungol na olup na dakerakel a totoo so bosis to.

⁷ "Bukbukor koy akanengneng na saman a pasingayew. Anggapoy antokaman ya anengneng na saray totoon kaibak, balet lapud mapalalon inkataktakot da, batik iran inmamut.

⁸ "Bukbukor koy atilak diman, a bambantayan ko man a makapakelaw a pasingayew. Anggapoy nakdaan a biskeg ko, tan naoman so nengneng na lupak, kanyan anggapoy makabirbir ed siak.

⁹ "Nen nadngel koy bosis to, nipatiblak ak ed dalin tan nakalan ak na liknaan.

¹⁰ Insan walay liman angegnad siak, intagey to ray limak, tan impatalimukor to ak; manggiwgiw ak nid saman.

¹¹ Inkuan na samay anghil ed siak, Daniel, inararo ka na Dios. Alagey ka tan dengedengel moy ibagak ed sika. Nibaki ak ed sika. Kapangibaga to yad siak, inmalagey ak a mangigiwgiw ni.

¹² Insan inkuanto, Daniel, ag ka natatakot. Dinengel na Dios so pikakasim nanlapu lad samay ononan agew na impanpaabebam, pian nawalaan kay maung a pakatalus. Ebat na pikakasim so inyakar ko dia.

¹³ Say prinsipin anghil na nanarian na Persia et sinumlang to ak na duamplo tan sakey ya agew. Insan si Miguel a sakey ed saray manonan anghil et dinmagon tinmulong ed siak, lapud bukbukor koy atilak ed Persia.

¹⁴ Linma ak dia, ta ipatalus kod sikay nagawad saray totoom diad arapen a panaon. Sikato yay pasingayew a nipaakar ed arapen a panaon.

¹⁵ Kayari to ra yan imbaga, ninmengneng ak ed dalin ya ag ak makasalita.

¹⁶ Insan samay anghil, a singa tooy nengneng to, et diniwit to ray bibil ko. Inkuankod sikato, Pakakapoyen ak a maung na sayan pasingayew. Ag ontonday panggiwgiw ko.

¹⁷ Singa ak aripen ya akaalagey ed arap na amo to. Panoy pakapitongtong kod sika? Anggapo lay nakdaan a biskeg odino ingas ko.

¹⁸ Inegnaan to ak lamet, et binmiskeg ak.

¹⁹ Inkuanto, Inaro ka na Dios, kanyan ag ka natatakot no ag ingen mandenen ka tan pabiskeg moy linawam. Kayari ton nansalita, lalon binmiskeg ak tan inkuanko, Ibagam ed siak so labay mon ibaga. Pinabiskeg mo ak?

²⁰ Inkuanto, Amtam so makasengeg na inyakaran kod sika? Linma ak dia, ta ipaamtak ed sika so nisulat ed Libro na Katawan. Ompawil ak la natan, ta milaban ak ed anghil a bantay na Persia. Kayari to ya ompanengneng so anghil a bantay na Grecia. Anggapoy arum ya ontulong ed siak likud ed kinen Miguel ya anghil a bantay na Israel.

11

¹ "Sikatoy makaoley ya ontulong tan mangyagel ed siak.

² "Katwaan ira yay salitaen kod sika natan. Samay anghil inkuanto, Talora nin ari so manaoley ed Persia, insan onsalat so kumapat a mayaman ni nen saramay talora. Diad kabisbiskegan to lapud kayamanan to, sagyaten ton mibakal so nanarian na Grecia.

³ "Insan onletaw so makapanyarin ari. Manoley ed balbaleg ya impirio tan gawaen to so antokaman a labay to.

⁴ "Balet diad kabisbiskegay pakayari to nabuyak so impirio to tan napangkapat. Onsalat ed sikatoy ararin aliwan sikatoy sengeg da, balet ag da naparaay pakayari to.

⁵ "Magmaliw a mabiskeg so ari na Egipto. Balet magmaliw a mabiskeg ni nen say sikato so sakey ed saray pangulo da ray sondalo to tan manoley ed lalon makapanyarin nanarian.

⁶ "Kayari na pigaran taon say ari na Egipto migampid ari na Siria tan ipaasawa tod sikato so marikit to. Balet ag mambayag so panggampi ra, et napatey imay bii, say asawa to, say anak ton melag, tan saray aripen ton akilad sikato.

⁷ "Ag mabayag magmaliw ya ari so sakey ed saray kakanayon to may bii. Dogpaan na sayan ari iray sondalo na ari na Siria, looban to ray tirinsira ra, tan taloen to ra.

⁸ "Awiten tod Egipto iray talintaoy diriyos da tan saray kagawaan a balituk tan pilak a nisaklang ed saraman a diriyos. Kalabas na pigaran taon a walay kareenan ed kaliber-liber

⁹ "dogpaan na ari na Siria so Egipto, balet napasoot ya ompawil ed dalin to.

¹⁰ Mamparaan a mibakal iray lalakin anak na ari na Siria tan mantipon ira na dakerakel a sondalo. Onlan singa delap so sakey ed sikara tan dogpaan toy tirinsira na kalaban.

¹¹ Diad petang na oloy ari na Egipto bakalen toy ari na Siria tan nadakep toy amayamay a sondalo to.

¹² Mampaatagey lapud impanalo to tan impamatey tod amayamay a sondalo, balet ag mansiansiay panalo to.

¹³ Ompawil so ari na Siria ed bansa to tan mantipon na lalon dakerakel a sondalo nen samay inmona. No onsabiy manepeg a panaon, onla lamet ed Egipto a kaiba to ray sondalon amayamay tan dugay aramas da tan malaem so abasto ra.

¹⁴ Insan amayamay a totoo so onlaban ed ari na Egipto. Wala met iray pigaran masebeg a lalakin kabandaan mo, Daniel, ya onsumpa lapud sakey a pasingayew ya anengneng da, balet natalo ra.

¹⁵ Kanyan say ari na Siria lakoben toy sakey a siudad ya aliber na padir tan dakepen to. Saray sondalo na Egipto et ag da ituloy so mibakal; anggan saray sankasebegan ed sikara et kulang so biskeg dan milaban.

¹⁶ Say taga Sirian makadakep et gawaen tod sikara so labalabay to, tan anggapoy onsumlang ed sikato. Onalagey ed Nisipan a Dalin tan sigput ton naoleyan yan dalin.

¹⁷ Iplano na ari na Siria a palaknaben so nanarian to, tan ikana toy amin a sondalo to. Insan konwarin migampid ari na kalaban ton nanarian, ipaasawa tod sikato so marikit ya anak to, pian naderal to; balet ag mampalabo ed plano to.

¹⁸ Kayari tod say, dogpaan to ray bansan walad gilig na dayat tan nadakep toy amayamay ed saraya. Balet sakey a pangulo na arum a bansa so manalod sikato tan patondaen toy panagpaatagey to; ipawil ton tua ed sikato so panagpaatagey na ari na Siria.

¹⁹ Ompawil so ari ed saray tirinsira to ed dilin dalin to, balet natalo, tan saya la so anggaan to.

²⁰ Insan onsalat ed sikato so sakey ya ari a mangibaki na sakey ya opisyal a mamairap ed saray totoo diad pansingil toy atatagey a buis, pian ondakel so kayamanan na nanarian. Ag mabayag napatey iman ya ari balet aliwan diad arap na karaklan odino diad bakal.

²¹ Samay anghil intuloy ton impaliwawa: Say onsalat ya ari na Siria et sakey a maoges a too ya anggapoy kanepegan ton manari, balet ag ilaloan so isabi to tan samsamen toy pakaoley diad panamegley na panamalikdo.

²² Siopamay toon onsumlang ed sikato, anggan say Pangulon Pari, et napatey tan naandipat.

²³ Diad pipaknaan tod saray arum a bansa, palikdoen to ra, tan ombiskeg lan ombiskeg anggaman a melag a bansa so ooleyan to.

²⁴ Looban ton anggapoy pasakbay so sakey a mayaman a luyag tan gawaen to ray bengatlan ag balut ginawa na saray lalaki to. Insan to apagen ed saray totoo to iray antokaman a kagawaan tan kayaryan ya asamsam tod bakal. Mamplano na idogpa tod saray tirinsira, balet onkulang so panaon to.

²⁵ Masebeg yan ari tan mabiskeg so linawa ton mantipon na dakerakel a sondalo, pian nadogpaan toy ari na Egipto a mamparaan met ya onlaban a kaiba to ray dakerakel tan makapanyarin sondalo to. Balet napalikdo so ari na Egipto, kanyan ag manalo.

²⁶ Saray sankaasinggeran ed sikaton sumisimbawa to so maneral ed sikato. Amayamay iray sondalo ton napatey, tan naoput ira.

²⁷ Insan saramay duaran ari ondongo ran mangan ed saksakey a lamisaan, balet maoges so getma ran dua, tan mantilaan ira. Ag da nagamuran so labay da, lapud ag ni sinmabi so panaon a pakala ra.

²⁸ Onsempet so ari na Siria a sankaawit to ray asamsam to, tan malet so getma ton maneral ed rilihion da ray totoo na Dios. Gawaen to so labalabay to, insan la ompawil ed dilin dalin to.

²⁹ Onsabiy panaon a dogpaan to lamet so Egipto, balet doma lad satan so nagawa.

³⁰ Onsabin akalogan ed bapor iray taga Roma tan labanan da, et nataktakot. Insan ompawil a mapalaloy petang na olo to tan deralen to so rilihion da ray totoo na Dios. Onuren to so simbawa da ray angikaindan ed saman a rilihion.

³¹ Pagmaliwen na arum a sondalo to a marotak, onung ed ganggan, so Timplo. Patondaen day inagew-agew a bagat tan ilira da so Makapataktakot a Managderal.

³² Diad panamegley na panamalikdo natanggoyur na ari a tulongan na saray angikaindan la ed rilihion da, balet onlaban ed sikato iray ontotoluk ed Dios.

³³ Saray makabat a pangulo na saray totoo et inagnag dad arum a totoo so kakabatan da. Balet ag mabayag napatey ed bakal iray arum ed sikara odino poolan da ran mabilay, tan saray arum et nasamsam iray kayaryan da tan nadakep ira.

³⁴ Legan a nitutuloy so panagpatey, dagdaiset so tulong a naawat na saray totooy Dios. Anggaman ya amayamay so migampid sikara, maoges balet so getma ra.

³⁵ Napatey ira may arum a pangulon makabat, balet lapud sayan nagawa nalinisan iray totoo. Ontuloy yan nagawa ya anggad onsabi so anggaan, say panaon ya inggetar na Dios.

³⁶ Gawaen na ari na Siria so labay to. Ipaatagey toy sikaton dili tan ibaga ton sikatoy matalonggaring nen say dinanman a dios, anggan say Sankatageyan a Dios. Nagawaan to ya, anggad panaon a panusay Dios ed sikato. Gawaen na Dios so onung na implano ton gawaen.

³⁷ Ag ikabkabilangan na ari so dios a nanlilingkuran na saray lalaki to, tan say dios ya inararo na saray bibii. Diad tuay tua, ag to ikabilangan ya amin iray diriyos, ta ipasen toy sikaton dili a matalonggaring nen say siopaman ed sikaran amin.

³⁸ Ingen pagalangan to so dios a mangyaagel na saray tirinsira. Mangibagat na balituk, pilak, alahas, tan arum ni ran mabmablin rigalo ed sakey a dios ya ag balut inggalang na saray lalaki to.

³⁹ Diad pangyagel tod saray tirinsira to, ikana to ray totoon mangigagalang ed dios na arum a bansa. Pagalangan to na baleg iray amin a paoleyan ed sikato, ipasen to rad atagey a kipapasen, tan tumangan to ra na dalin.

⁴⁰ No ngalngali la mansamput so panoley na ari na Siria, ondogpad sikato so ari na Egipto, et say ari na Siria iyoput toy pakayari ton onlaban ya ipakana to ray karwahi, saray kabayo, tan amayamay a bapor. Singa danum a delap ya onagos so iloob tod saray amayamay a bansa.

⁴¹ Looban toy anggan say Nisipan a Dalin tan pateyen toy nilibon totoo, balet makabatik iray totood bansa na Edom, Moab, tan saray nakdaan ed Ammon.

⁴² No looban to ra yan bansa, looban to met so Egipto.

⁴³ Alaen ton amin iray akaamut a balituk tan pilak na Egipto tan saray arum a mabmablin kayaryan to. Dakepen toy Libia tan Sudan.

⁴⁴ Insan nataktakot lapud balitan manlapud bokig tan baybay, kanyan mibakal na pinasya tan amayamay a totoo so napatey to.

⁴⁵ Ilira to ni ingen iray ankakabaleg a tulda ton ayamay ari diad nanleetan na dayat tan palandey a panalalageyan na Timplo. Balet ompatey so ari na Siria, ya anggapod man so siopaman ya ontulong ed sikato.

12

¹ "Samay anghil a linen so kawes to inkuanto, Diad satan a panaon ompanengneng imay matalonggaring ya anghil Miguel a mangguaguardiad saray totoom. Insan la ondalan so panaon na ontan lan kairapan ya ag nin balut dinmalan nanlapu lad inletneg da ray bansa. No onsabiy tan a panaon, nilaban ya amin iray totoo na bansa a nisulat so kangaranan dad libro na Dios.

² "Onolid bilay iray amayamay ed saray inaatey la: manliket ed bilay ya andi-anggaan iray arum balet manliknay andi-anggaan a kababaingan iray arum.

³ "Onsinag a singa liwaway tawen iray makabat a pangulo. Ontan met, saray ananggoyur ed saray amayamay a totoo diad panggawa ray inkatonung et anggad anggan onsinag iran singa saray bitewen.

⁴ "Inkuantod siak, Natan, Daniel, ikaput mo la so libro tan timbrian mo ya anggad isabiy anggaan na mundo. Legan to ya, amayamay iray mandarak na sagput dan mangamta na kabaliksan na nagagawa.

⁵ "Insan anengneng koy duaran lalakin manalalagey ed nantopag a pandel na ilog.

⁶ "Say sakey ed sikara tinepet tod anghil a manalalagey ed bandad tulo tan akakawes na linen, Kapigay itonda na sarayan makapakelaw a nagagawa?

⁷ "Samay anghil inyonat tod tawen iray lima to tan nansambad ngaran na Andi-anggaan a Dios. Nadngel kon imbaga to, Anggad onlabas so taloy taon tan kapaldua. No mansamput lay panagpairap ed saray totooy Dios, agawa la ya amin a bengatla.

⁸ "Nadngel koy imbaga to, balet ag ko atalusan. Kanyan tinepet ko, Balet panoy pangangga na amin a bengatla?

⁹ "Inmebat imay anghil, Laka la, Daniel, ta nepeg ya iyamut ira yan salita tan ag iran balut ipaamta ya anggad onsabi lay anggaan.

¹⁰ Amayamay iray totoon nalinisan. Ag natalusan na saray totoon maoges, balet ituloy day panggagawa ray kaogsan; saray makabat labat so makatalus.

¹¹ Manlapud samay panaon ya apatonda so inagew-agew a panagbagat, salantiy manlapud samay panaon na Makapataktakot a Managderal, sanlibo, duan lasus tan siamaplon agew so onlabas.

¹² Maliket iray totoon mansiansian matoor ya anggad kalabas na sanlibo, talon lasus tan talomplo tan lima ya agew!

¹³ Sika, Daniel, mansiansia kan matoor ya anggad kasamputan. Insan ka ompatey, balet onalagey kan mangawat na tumang mo diad kasamputan na panaon.