1 "Agaylay ermen na Jerusalem a gendat a napnoy totoo! Gagalangen na sankamundoan nen saman, balet singa biin balo so kipapasen to natan; Sankarakpan nen saman ed saray siudad, balet aripen so nagmaliwan to.
2 "Mannangnangis lawas; managagos ed aping toy lua. Diad amin da ray angaaro ed sikato nen saman, anggapoy manligliwa ed sikato ya anggan sakey ed sikara. Nantraidoran na saray kagampi to tan kalaban to ran amin natan.
3 "Saray totood Juda et pangaskasiyan iran aripen; apasoot iran manlingkur ed arawi. Manaayam irad saray sananey a dalin; anggapoy pasen a natawag dan kayaryan. Ag ira makabatik, lapud alakub ira na saray kalaban.
4 "Anggapo la natan so oonlad Timplo a mangigalang no agew iran masanto. Saray bibiin kumakantad man et maniirap ira tan manayay labat iray papari. Begtebegtew la ray puirtay siudad tan pangasikasiyan so Sion.
5 "Nampalabo ray kalaban to; sikato lay walad silong na pakayari ra. Paniirapen na Katawan, lapud amin ya amayamay a kasalanan to; Anggan saray ogogaw adakep ira tan sikaray inaawit na kalaban da.
6 "Say kagalangan na Jerusalem naandi la. Saray pangulo to singa ra saray ulsan makapkapoy lad eras, A ngalngali la naandiay biskeg legan ton ibabatikan iray umaanup.
7 "Natan ta aderal-deral lay Jerusalem, nudnunoten toy kagalangan to nen saman. Anggapoy ontulong ed sikato nen sikatoy naplag ed lima da ray kalaban; Elek-elekan na saray anakep ed sikato lapud inkatalo to.
8 "Mapalalon kaogsan so ginawa na Jerusalem, kanyan sikatoy adotakan. Balbalawen la natan na saray mangidadayew ed sikato, lapud anengneng dan alakseban. Manayay tan isasanib toy lupa to lapud kababaingan.
9 "Sankanengneng so inkarotakan to, balet anggapoy walad sikato so agawad sikato. Makapasinagem so inkaplag to; anggapoy manligliwad sikato. Analo ray kalaban to, tan kekerewen to a kasian na Katawan.
10 Sinamsam na saray kalaban iray amin a kayamanan to. Anengneng to ran linmoob ed Timplo, a say dalem to et insebel na Katawan a looban na saray Hintil.
11 Manayay iray totoo to legan dan manaanap na naakan da; Isasalat dad nakan so kayamanan da, pian napabiskeg ira. Imano mo ak, Katawan, eyag na siudad; nengneng mo pay pangaskasiyan a kipapasen ko.
12 Nengneng yo ak, eyag na siudad ed balang ondadalan. Anggapoy singa siak diad panliliknak na kairapan, Say kairapan ya impalikna na Katawan ed siak nen ampetang so olo to.
13 Manlapud tagey angipelag na apoy tan pinoolan toy dalem ko. Pinatitan to ak, et nipatumba ak. Insan to ak inkaindan, tan tinaynan to ak a nanairapan.
14 Inlista ton amin iray kasalanan ko, insan to ra binerber ya amin; Imbitin to ra ed beklew ko, et kinmapoy ak lapud saya. Impalima ak na Katawan ed saray kalaban ko, tan siak so sarasarag da.
15 Inelekan na Katawan ya amin iray makapanyarin sondalok; Angibaki na saray sondalon ondogpa ed siak tan maneral ed saray lalakin tobun-balo. Minekmek to ray sankaabigan a totook a singa kapepespes na saray ubas ed panagpespesan.
16 Sikato yay makasengeg no akin et managagos ed matak so lua. Anggapoy nayarin manligliwad siak; anggapoy makaiter ed siak na biskeg na linawa. Tinalo ak na saray kalaban; saray totook anggapoy nakdaan a kayaryan da.
17 Inyonat ko ray limak, balet anggapoy ontulong ed siak. Anawag ed kaliber-liber so Katawan na saray onlaban ed siak. Marotak a bengatla so pangipapasen dad siak.
18 Maptek so Katawan, ta sinumlang ko ray salita to. Dengel yo ak, totood inerman a pasen; nengneng yoy paniirap ko. Nalan priso iray tobun-balon bibii tan lalaki.
19 Tinmawag ak ed saray kagampik, balet ag da ak tinulongan. Inaatey ed dalan iray papari tan saray pangulo, Legan a manaanap ira na naakan, pian ombiskeg ira.
20 Nengneng mo ak pa, O Katawan, ta nagugunigon ak; maguloy kamarerwak! Ngalngali ombetag so pagew kod ermen lapud nankakasalanan ak. Wala ray pateyan et daladalan, tan anggan diad dalem na kaabungan walay patey.
21 Dengel mo pay panayay ko; anggapoy manligliwad siak. Panliketan na saray kalaban ko so impangiter moy gunigon ed siak. Ipasabim pa la may agew ya insipan mo; panirap mo pa ray kalaban ko a singa paniirap ko.
22 Sintinsiaan mo pa ray dusa lapud saray kaogsan da; Dusam ira a singa impanusam ed siak, lapud saray kasalanan ko. Mapalaloy panayay ko, tan ansakit so pagew ko.
1 "Lapud pasnuk na Katawan, kinobutan to na bilonget so Sion. Impagmaliw na Katawan a bunton na deral-deral so mangatatawen ton kagalangan. Diad agew na pasnuk to inkaindan to so anggan Timplo to.
2 "Andi-panangasi a dineral na Katawan ya amin iray bario na Juda. Diad pasnuk to inggegeba to ray tirinsira na Juda. Impelag tod kababaingan so nanarian tan amin iray manoley to.
3 "Lapud sanuk to dineral toy biskeg na Israel; Ag tinmulong nen sinmabi ray kalaban. Singa apoy a nampool; tinemek toy amin a bengatla.
4 "Singa kalaban ya impaarap toy pana tod sikatayo; Pinatey ton amin iray ikikinon tan panliliketan tayo. Anggan diad Jerusalem alikna tayoy manliub a pasnuk to.
5 "Nagmaliw a singa sakey a kalaban so Katawan, dineral toy Israel; Dinederal to ray tirinsira tan saray palasio na Israel. Angiter na ag manganggan kaermenan ed saray totood Juda.
6 "Minekmek toy Timplo ya angigalangan mid sikato; Pinatonda to ray masanton agew tan saray Agew na Panagpainawa. Ari may pari, alikna ray biskeg na petang na olo to.
7 "Impolisay na Katawan so altar to tan say masanton Timplo to; Inabuloyan ton igeba na saray kalaban iray padir to. Diad pasen a maliket min angigagalangan nen saman, inmeeyag ira lapud impanalo.
8 "Peteg a ginetma na Katawan a nageba ray padir na Sion; Sinukat to ray padir, pian andi-saew a naderal to ran amin. Aderal-deral lan amin natan iray tori tan saray padir.
9 "Atabun-tabunan la na saray deral-deral iray puirta tan apoter-poter iray tarangka ra. Nibantak ed arum a bansa so ari tan saray prinsipi. Ag la nibabangat so Ganggan, tan anggapo lay nanaawat na saray propita a pasingayew a manlalapud Katawan.
10 Andi-eseesel ya akayorung ed dalin iray mamasiken ed Jerusalem, Angyan iray dabuk ed kaoloan da tan nankakawes iray sako. Indadakmomo na saray mamarikit ed siudad so kaoloan da ya anggad dalin.
11 Ambalbalanga lan maung iray matak lapud kakaakis ko; nagugunigon so kamarerwak. Makolkolaney ak lad ermen lapud inkaderal na saray totook. Napupunaw ed saray dalan na siudad iray ogogaw tan saray kapangyanak.
12 Onaakis irad kainaan da diad pikekerew day nakan tan nainom; Natutumba rad saray dalan tan singa ra saray asugat-sugatan, Tan mankalkalnan ompapatey ira ed taklay na kainaan da.
13 O Jerusalem, antoy nibagak? Panoy pakaligliwak ed sika? Anggapo niy nanirap a singa paniirap mo. Singa kaawang na dayat so inkaderal mo; siopay makapasimbalod sika?
14 Tila ya amin iray imbagad sika na saray propitam; Apalingo ka na panagpulong da, ta ag dan balut imbawag so kasalanan mo. Impasisia rad sika ya ag mo nakaukolay magbabawi.
15 Saray totoon ondadalan ed siudad et ngirngiriyetan da ka lapud pambabalaw dad sika. Mameyeng-peyeng ira tan elek-elekan day inkaderal na Jerusalem: Sikato ya may marakerakep a siudad? Sikato yay ikikinon na sankamundoan?
16 Balbalawen ka na amin da ray kalaban mo tan lapud pambosul da, mulmuldagatan da ka. Manngilngilet ira tan mankobibit ira, Aderal mi la! Sikato yay aalagaren min agew!
17 Sinumpal na Katawan so ginetma ton gawaen; Dineral to itayon andi-panangasi, onung na abayag to lan impasakbay a gawaen. Impanalo to ray kalaban tayo, tan pinaliket to rad inkatalo tayo.
18 O Jerusalem, patawag mo na maksil ed Katawan iray padir mo! Paagos mon singa ilog so luam ed agew tan labi; Manakis tan manermen ka lawas ya anggad ikapoy mo.
19 Diad sanlabi liing-liing kan ontawag ed Katawan; Walwalan moy pusom tan kerew mod sikato a kasian to ray anak mo Saray anak ya ompapatey ed eras diad balang sokung na daladalan!
20 Nengneng mo pa, O Katawan! Nengneng mo pa ray papairapen mo! Kakanen na saray bibii iray bangkay na saray anak dan inararo! Napapatey ed Timplo iray papari tan saray propita.
21 Malangwer may matakken, kibalatar iran bangkay ed saray dalan. Apatey-patey na ispada na saray kalaban iray mamalangwer a bibii tan lalaki. Andi-panangasin pinapatey mo ra nen agew na pasnuk mo.
22 Tinawag mo ray kalaban ko, ta manggawa ray makapataktakot a doypowan ed kaliber-liber ko. Anggapoy makapaliis no agew na pasnuk mo. Saray kalaban pinapatey da ray pinapabaleg ko tan inararok ya anak.
1 "Siak no sakey ed saray makaamta no antoy kabaliksan na pananusa na Dios.
2 "Sinonson to ak lan sinonson ed kabilongetan ya anggapo lan balut so liwawa.
3 "Tan andi-panangasin binabakbak to ak lan binabakbak.
4 "Sinusugat to ak ya anggad pinmapaway so laman ko, tan pinopoter to ray pokel ko.
5 "Impokuk to ak a pangaskasiyan ed kairapan diad dalem na prisowan.
6 "Pinasoot to ak ya impanayam ed ambilonget a pasen tan singa ak abayag lan inatey.
7 "Ginolunggolungan to ak na baleg; pinadir to so kaliber-liber ko, kanyan ag ak makabatik.
8 "Kinmerew ak na tulong, balet ag ak dinengel na Dios;
9 "Mandongilngil ak a manakar; anggan iner a pasen so arapen ko walay akasaran padir a bato.
10 Singa uson mantatalaran ed siak; singa lion ya anegkem ed siak.
11 Inosilan to ak ed dalan, biningbingkas to ak, insan to ak tinaynan.
12 Pininat toy pana to tan impagmaliw to ak a kekenaen na saray pana to.
13 Pinmanek ed pusok so pana to.
14 Nagmaliw ak ya elek-elekan lawas na katoowan; siak so gagalaw-galawen dan amin.
15 Kapaitan na kairapan ya amin so inter tod siak a kakanen tan iinomen.
16 Impangpang toy ngipen ko ed saray baton-dampay, tan inngorangor toy lupak ed dalin.
17 Alingwanan koy kabaliksan na abig-laman tan kareenan tan liket.
18 Nakalan ak lay pilalek a mambilay; naandi lay ilalok ed Katawan.
19 Ampait ya apgo so pakanunot kod kairapan a liliknaen ko, tan say inkaandian koy abung.
20 Pinunot ko ya lawas, et nalmay so kamarerwak.
21 Balet pinmawil so ilalok nen anunotan ko yan bengatla:
22 Ag mangangga so ag mangoman a panangaro tan panangasi na Katawan.
23 Balo ra lawas a singa kabwasan; agaylay inkatoor na Katawan.
24 Say Katawan labat so walad siak, kanyan diad sikato so kawalaay ilalok.
25 Maung so Katawan ed amin a totoon manmamatalek ed sikato;
26 Maung so mananos a manalagar ed panangilaban na Katawan.
27 Maung a naaralan na sakey a too so mananos manlapud inkaogaw to.
28 No manirap itayo, nepeg a mananos tan mandeen itayon bukbukor.
29 Ag tayo nepeg so manriklamo, ta ag la pigan wala niy ilalo tayo.
30 Nepeg ya akoen tayoy amin a panamabaing tan panagkabil dad sikatayo.
31 Mapangasi so Katawan tan ag to itayo ikaindan ed ando lan ando.
32 Anggaman a panermenen to itayo, kasian to tayo onung na daakan ya ag mangoman a panangaro to.
33 Ag to panliketan so pamasakit odino pamaermen tod sikatayo.
34 Amta na Katawan no maniirap so ispiritu tayo ed dalem na prisowan;
35 Amta to no ag niniiter ed sikatayo iray inter tod sikatayon kanepegan;
36 Amta to no napipikewet ed korti so katonungan.
37 Say linawa labat na Katawan so nasusumpal.
38 Diad panangiganggan na Sankatageyan a Dios, nagawa so maung tan say makapoy.
39 Akin et naynay itayon manriklamo no nadudusa itayo lapud kasalanan tayo?
40 Sukimaten tayoy kabibilay tayo, insan ompawil itayod Katawan.
41 Lokasan tayoy puso tayo ed Dios a walad tawen, tan mampikasi tayo,
42 Nankasalanan tan linmaban kami, et ag mo kami pinirdona, O Katawan.
43 Inosilan mo kami tan andi-panangasin pinapatey mo kami; asaniban na pasnuk mo so panangasim.
44 Sinmanib kad lorem na pasnuk, kanyan ag makasabi ray pikakasi mi.
45 Ginawa mo kamin bantakan na dotak na saray katoowan ed mundo.
46 Pabpabaingan tan ludlureyen kami na amin da ray kalaban mi.
47 Dinalan kami la na deral tan desyang; mambibilay kamin walad kaatapan tan takot.
48 Singa ilog ya onaagos so luak lapud inkaderal na saray totook.
49 Ag ontondan onagos so luak
50 Ya anggad osdungan a nengnengen itayo na Katawan a walad tawen.
51 Nanaermenay pusok diad pakanengneng kod nansumpalan da ray bibii ed siudad.
52 Singa ak manok ya apatitan na saray kalaban kon mamobosul ed siak anggaman ya anggapoy makasengeg.
53 Impelag da ak a mabilay ed dalem na bobun, insan da sinakuban na bato so sangab.
54 Ngalngali ak la onlereg ed danum, et abaloan kon ompatey ak la.
55 Manlapud dalem na bobun tinmawag ak ed sika, O Katawan,
56 Dinengel mo ak nen kinerew kod sikan talinengen moy kerew ko.
57 Inebatan mo ak tan imbagam ed siak ya ag ak ontakot.
58 Inyagel mo ak, Katawan, tan inlaban moy bilay ko.
59 Amtam so makapoy ya agawad siak; siak pa so pilaan mo ed panintinsiam.
60 Amtam so pamobosul ed siak na saray kalaban ko, tan say pankokomplut da sumpad siak.
61 Nadngel moy panamabaing dad siak, O Katawan; amtam iray pankokomplut da sumpad siak.
62 Sanagew a pantotongtongan da ak tan mamplaplano ra.
63 Manlapud kabwasan ya anggad labi, luludlureyen da ak.
64 Dusam pa ra, O Katawan, lapud saray ginawa ra;
65 Isambam pa ra tan itdan mo pa ra na anawet a puso!
66 Osilan mo ra tan paandipat mo ra ed tapew na dalin!
1 "Binmurarog la so kirlap na balituk tayo; ataytayak ed saray dalan iray bato na Timplo;
2 "Mablin singa balituk iray lalakin tobun-balo ed Sion nen saman, balet natan nibibilang iran singa saray ordinarion banga.
3 "Papasusoen na anggan inan asod katakelan iray anak da, balet singa saray abistrus ed kalawakan a maruksa rad sibong da iray totook.
4 "Inabuloyan dan inaatey ed eras tan inkapgaan iray anak dan kapangyanak; mikekerew na nakan iray anak da, balet anggapoy mangiter ed sikara.
5 "Ompapatey ed eras diad saray dalan iray totoon gendat a maung so kakanen da; manaanap ed basuraan na napambilay da iray totoon binmaleg ed inawa.
6 "Ambelat niy impakadusa na saray totook nen say impakadusa na saray totoo Sodoma, a biglay inkaplag da ed limay Dios.
7 "Anggapoy dotak da ray prinsipi tayo nen saman tan malinis iran singa yilo, maung iran impanlaman tan mabiskeg ira, balibaliy abiglaman da.
8 "Diad saray dalan ag la ra nabirbir natan, ta dinmeket a singa oring so kalupaan da; singa amagan kiew lay baog dan kinmomanet tan kapokepokel la ra.
9 "Maung niy kipapasen da ray inaatey ed bakal nen saray inaatey ed eras; nankalkalnan naoyus so linawa ra, lapud anggapoy napambilay da.
10 Makapataktakot so intaruk na desyang a sinmabi ed saray totook; inlalambung na saray maaron ina iray dilin anak da.
11 Impelag na Katawan so intiron biskeg na petang na olo to; pinoolan to ya anggad dalin so siudad na Sion.
12 Anggapoy siopaman ed anggan iner a pasen, anggan saray manoley ed saray arum a bansa, so anisian walay kalaban a makaloob ed saray puirta na Jerusalem.
13 Balet onyay agawa lapud nankasalanan iray propita to tan saray papari to, ta sikaray makasengeg na impatey na saray anggapoy kasalanan a totoo.
14 Singa bulag a nanakar-akar ed dalan iray pangulo to, naames iray dala, kanyan anggapoy malabay a maniwit ed sikara.
15 Arawi kayo! eyag da ray totoo. Marotak kayo! Ag yo kami didiwiten! Kanyan nanakar-akar irad saray bansa, ta anggapoy malabay a mamatuloy ed sikara.
16 Anggapo lay pannunot na Katawan ed sikara; sikaton diliy angikaykayat ed sikara. Anggapo lay panagasasikaso tod saray papari tan saray pangulo tayo.
17 Nananap kami lan nananap na tulong, balet anggapo met lamlamang. Nanalagar kami lan nanalagar na tulong na sakey a bansa, balet anggapo met lamlamang so nitulong to.
18 Babantayan kami na kalaban; ag kami anggan makakar ed saray dalan. Sinmabi lay oras mi, sinmabi lay anggaan mi.
19 Maples nen say agila ed liwang iray onoosil ed sikami. Inosilan da kamid kapalandeyan; tinambangan da kamid kalawakan.
20 Narel day sobul na bilay mi, say arin pinili na Katawan; sikatoy manoley a nanmatalekan min mangyagel ed sikami ed anggan siopan ondogpad sikami.
21 Manliket tan manggayaga kayo, sikayon taga Edom tan Uz. Onsabi met ed sikayoy deral, mandongilngil kayo met a manakar-akar ya anggapoy kawes.
22 Nambayar lay Sion na kasalanan to; ag kami la nibantak ed arum a bansa. Balet sika Edom, dusaen ka na Katawan; ibawag toy kasalanan a gagawaen mo.
1 "Nudnunot mo pay asumpalan mi, O Katawan. Nengneng mo kami pa, tan imanom so inkaplag mid kababaingan.
2 "Walad lima na saray taga arum a bansa iray kayaryan mi; manaayam ed kaabungan mi iray totoon sangkaili.
3 "Pinapatey na kalaban iray kaamaan mi; balo la natan iray kainaan mi.
4 "Nakaukolan a bayaran miy danum ya iinomen mi; nakaukolan a saliwen mi ray itotongo mi.
5 "Pinairap da kamin pinabatik a singa asno o kamilyo, naknaksawan kami, balet ag da kami abuloyan a mampainawa.
6 "Linma kamid Asiria tan Egipto ya akikerew, pian nawalaan kamiy magenap a napambilay.
7 "Nankasalanan iray lalaki mi tan inaatey la ra, balet maniirap kami lapud saray kasalanan da.
8 "Ooleyan kami na saray totoon anggapoy pidomaan dad saray aripen, anggapoy mangyagel ed sikami ed pakaoley da.
9 "Ipupusta miy bilay mi kapag mananap kamiy napambilay; lapud akar-akar ed kaalogan iray managpatey na too.
10 Lapud eras singa kami popoolan ed kapepetang mi, ya anggad ampetang lay baog mi a singa pogun.
11 Diad dilin Palandey na Sion apasoot iray kaasawaan mi; diad saray bario na Juda nalnalay inkabii da ray mamarikit mi.
12 Narel tan nibitay iray pangulo mi; ag da inggalang iray mamatakken mi.
13 Apasoot a manggiling iray lalakin tobun-balo tayo; mandokingking a mansasakbat na ambelat a kiew iray ogogaw a lalaki.
14 Ag la onyoyorung ed puirta na siudad iray mamatakken a lalaki, tan ag la manotogtog o mangakanta iray tobun-balo.
15 Naandi lad bilay mi so gayaga; ermen so sinmalat ed saray panagsayaw mi.
16 Anggapo lay nakdaan ed amin da ray ikikinon mi. Nankasalanan kami, kanyan pangaskasiyay kipapasen mi natan.
17 Ambelat so pagew mi lapud saya tan binmilonget so pakanengneng mi,
18 lapud anggapo lay onkitakitaw a too ed Palandey na Sion, tan saray asod katakelan so akar-akar lad saray deral-deral to.
19 Balet sika, Katawan, so ari ed anggad angga, tan mansiansia kan manoley ya anggad kapigan.
20 Akin et abaybayag lay impangikaindan mod sikami? Ag mo kami la nanunotan?
21 Papawil mo kamid sika, O Katawan! Papawil mo kami pa! Ipawil mo pay gendat a kagalangan mi.
22 Odino andi-anggaan lay impangikaindan mod sikami? Ag la manganggay pasnuk mod sikami?