1

¹ "Sasalitaen na sayan libro so nipaakar ed imbabaga nen Jeremias a lakin anak nen Hilcias, tan sakey ed saray papari ed baley na Anatot diad dalin nen Benjamin.

² "Akisalitay Katawan ed kinen Jeremias nen kumalabintaloy taon na panaarid Juda nen Josias a lakin anak nen Amon.

³ "Akisalita lamet ed sikato so Katawan nen arid Juda si Joakim a lakin anak nen Josias. Kayari to ya, amimpiga-pigan akisalitay Katawan ed sikato anggad kumalabinsakey na panaari nen Sedekias a lakin anak nen Josias. Nen kumaliman bulan ed saman a taon, saray totood Jerusalem et nibantak irad arum a bansa.

⁴ "Inkuan na Katawan ed siak,

⁵ "Kasakbayan ta kan initday bilay pinili ta ka la, tan kasakbayay inkianak mo, pinili ta kan magmaliw a propita ed saray bansa.

⁶ "Insan ko inkuan, Katawan a Dios, ag ko amtay mansalita; ogaogaw ak ni.

⁷ "Balet inkuan na Katawan ed siak, Ag mo ibabagan ogaogaw ka; ingen, lakad saray totoon pangibakian kod sika, tan ibagam ed sikaray amin ya igaganggan kod sika.

⁸ "Ag ka ontatakot ed sikara, ta wala ak a mangyagel ed sika. Siak, say Katawan, so nansalita!

⁹ "Insan inyonat na Katawan so taklay to, diniwit to ray bibil ko, insan kuantod siak, Nia, iter kod sika ray nepeg mon salitaen.

¹⁰ Natad sayan agew iiter kod sikay pakaoley ed saray bansa tan saray nanarian, pian sikay mamagut tan mangigeba, maneral tan manalo, mamaalagey tan mangiletneg.

¹¹ Tinepet na Katawan ed siak, Jeremias, antoy nanenengneng mo? Inmebat ak, Sakey a sangay kiew ya almindra.

¹² Inkuan na Katawan ed siak, Tua tay imbagam, tan mambabantay ak, pian naimatunan koy pakasumpal na saray sinalitak.

¹³ Akisalita lamet ed siak so Katawan. Tinepet to, Anto niy nanenengneng mo? Inmebat ak, Nanenengneng kod baybay so sakey a bangan manlelwag so karga to. Ngalngali la onlepwad abalaten so karga to.

¹⁴ Inkuantod siak, Say deral a manlapud baybay et ondapod saray amin a manaayam diad sayan dalin,

¹⁵ lapud tatawagen kon ondago ray amin a bansa ed baybay. Saray arari ra ilira ray trono ra diad saray puirta na Jerusalem tan diad kaliber-liber na saray arum a siudad na Juda.

¹⁶ Dusaen ko ray totook lapud nankasalanan ira; inkaindan da ak, nansasaklang iray bagat ed saray diriyos, tan inggagalang da ray ginagawa ran talintaoy diriyos.

¹⁷ Mamparaan ka, Jeremias; laka, ta ibagam ed sikaray amin ya ingganggan kod sikan salitaen mo. Ag ka la natan ontatakot ed sikara; ta no andi, pagmaliwen ta kan lalon ontakot no wadman ka lad sikara.

¹⁸ Dengel ka, Jeremias! Onsumpad sika so balang sakey a too ed sayan dalinsaray arari ed Juda, saray opisyal, saray papari, tan saray totoo. Balet natan iitdan ta kay biskeg, pian nasumlang mo ra; magmaliw kan singa siudad ya aliber na padir, singa balatyang a lusek, tan singa gansan padir. Ag da ka natalo, ta wala ak ed sika a mangyagel ed sika. Siak, say Katawan, so nansalita.

2

¹ "Say Katawan imbaga ton

² "ipulong kod balang sakey a too ed Jerusalem yan salita to: Nanununotan ko no panoy katooran mo nen wala ka nid kalangweran, no panoy impangarom ed siak nen kapankasal ta; tinotombuk mo ak ed kalawakan, diad dalin ya ag nin balut ataneman.

³ "Israel, bukor moy kayaryan ko nen saman; sikay masanton kayaryan ko. Pinairap ko tan initdan ko na segsegang iray amin a mamapasakit ed sika. Siak, say Katawan, so nansalita.

⁴ "Dengel yoy salitay Katawan, sikayon ran kabyangay boleg nen Jacob, sikayo ran tribu na Israel.

⁵ "Say Katawan kuanto: Antoy dalem na saray lalaki yo sumpad siak? Antoy makasengeg na impangi-kaindan dad siak? Inggagalang da ray andi-kakanaan a talintaoy diriyos, kanyan nagmaliw iran andi-kakanaan.

⁶ "Inekal da ak lad kanunotan da, anggaman a siak so angyagel ed sikarad Egipto tan angiwanwan ed sikarad kalawakan: sakey a dalin na kalawakan tan kaabutan, sakey a dalin ya amaga tan walay kaatapan, sakey a dalin ya anggapoy ondadalan tan anggapoy anggan manayam.

⁷ "Inyakar ko rad sakey a mabonan dalin, pian napanliketan da ray naanid man tan saray arum a bengatlan maabig. Ingen dineral day dalin ko; impagmaliw dan makarimdimla so dalin ya inter kod sikara.

⁸ "Ag tinepet na saray papari, Kawa-laan na Katawan? Ag ak kabat na saray dilin paparik. Nilabanan ak na saray manoley; nansasalita ray propita diad ngaran nen Baal tan angigagalang irad saray andi-kakanaan a talintaoy diriyos.

⁹ "Kanyan, siak, say Katawan, sumpaen ko lamet iray totook. Sumpaen ko ray anak na saray anak da.

¹⁰ Lakad sagur ya anggad isla na Chipre tan mangibaki kad bokig ya anggad Kedar. Nanengneng mo ya anggapoy singa onyan agawa nen saman.

¹¹ Wala tay bansan sinalatan to ray diriyos to, anggaman ya aliwan petepeteg iray diriyos da? Balet insalat ak na saray totook, say Dios ya angiter ed sikara na kagalangan; insalat da ak ed saray diriyos ya anggapoy nagawaan dan para sikara.

¹² Kanyan igaganggan koy tawen ya onyegyeg na makapataktakot, pian natalagnaw tan napakelaw kayo,

¹³ ta duaray nankasalanan na saray totook: inkaindan da ak, siak a sobul na mabilay a danum; nankokotkot ira na saray bobun, saray bobun a nanletak kanyan ag makakargay danum.

¹⁴ Aliwan aripen so Israel; akin sirin et oosilan ya erelen na saray kalaban to?

¹⁵ Singa ra lion a nangwam ed sikato; makmaksil so pangwam da. Ginawa ran andi-kakanaan so dalin to; aderal-deral iray baley to, kanyan anggapo lay manaayam.

¹⁶ Saray taga Memfis tan saray taga Tafnes binetag day lapis-lapis na olo to.

¹⁷ Israel, sika so nansengegan ed saya! Inkaindan mo ak a Katawan a Dios mo, legan ya iwawanwan ta kad dalan.

¹⁸ Antoy nagunggonam ed iyakar mod Egipto? Say pakainom moy danum na Ilog na Nilo? Antoy nagunggonam ed iyakar mod Asiria? Say pakainom moy danum na Ilog na Eufrates?

¹⁹ Dusaen ka na dilin kaogsan mo; deralen ka na impangikaindan mod siak. Naamtaan mo no panoy kapaitan tan kaogsan na pangikaindan ed siak a Katawan a Dios mo, tan say ag mo pansiansian matoor ed siak. Siak, say Katawan a Dios a Makapanyarin-amin, so nansalita.

²⁰ Say Katawan a Dios kuanto, Israel, nen saman impolisay moy pakaoley ko; ag mo nilabay ya onuren ak tan igalang ak. Diad toktok na balang atagey a pokdul, tan diad silong na balang mabonan kiew, angigalang kad singa marotak a bii.

²¹ Intanem ta kan singa pinilin wakal na ubas, singa sankaabigan a bini. Balet nengneng mo no antoy nansumpalan mo! Nagmaliw kan aboluk tan andi-kakanaan a wakal na ubas.

²² Anggaman a mansabon ka na sanka-bayanian a sabon ed panames mo, nanengneng ko nin siansiay mansay kasalanan mo.

²³ Panoy pangibagam ya ag mo dinotakay sikan dili, ya ag mon balut inggalang si Baal? Nengneng mo no panoy impankasalanan mo nen wala kad patar; nengneng mo no antoy ginawam. Singa ka kamilyod katakelan a manmamaya, kanyan mambabatik-batik,

²⁴ maples ya oonlad kalawakan. No manmamaya, siopay makapareen ed sikato? Ag manirap so dinan man a kalakyan a malabay ya onkabayod sikato; mainomay a kabayoan no panagmaya to.

²⁵ Israel, ag mo la paniirapen so salim odino pamamagaan so kolokolong mo diad iyosil mod saray diriyos. Balet kuanmo, Andi! Ag ko la nababawi. Inarok iray diriyos na saray arum a bansa tan sikaray tombuken ko.

²⁶ Say Katawan kuanto, No panoy pakapelag ed kababaingan na matakew no narel, ontan met so pakapelag yod kababaingan, sikayon totood Israelsaray arari tan opisyal yo, saray papari tan propita yo.

²⁷ Nabaingan kayo, sikayon mangibabaga ya ama yoy sakey a kiew tan ina yoy sakey a baton-dampay. Nagawa ya, lapud imbatikan yo ak anta siak komuy singgeran yo. Balet no wala kayod gunigon, kerewen yon asinggeran ta kayon ilaban.

²⁸ Kawalaan da ray diriyos a ginagawa yon para sikayo? No wala kayod gunigon pailaban kayod sikara, no nayarian da. Juda, singa karakel na siudad mo iray diriyos mo.

²⁹ Antoy riklamom? Akin et sinumpa mo ak?

³⁰ Dinusa ta kayo, balet anggapoy angomanan yo; ag yo inabuloyan a peteken ta kayo. Singa kayo masebeg a lion ya amatey ed saray propita yo.

³¹ Dengel kayod ibagak, amin yon totood Israel. Nagmaliw ak ta a singa kalawakan ed sikayo odino singa dalin ya ambilonget tan walay kaatapan? Akin sirin, totook, et ibabaga yon gawaen yoy labay yo, tan ag kayo la ompawil ed siak?

³² Nalingwanan ta na marikit iray alahas to, odino say nubia so kawes ton para kasal? Balet nilingwanan ak na saray totook; ag nabilang iray agew ya impangilingwan dad siak.

³³ Andi-duaruwan amta yoy ontombuk ed manangaro. Makaaral ed sikayo so anggan say sankaogsan a bii.

³⁴ Say kawes yo atalaksikan na dala na saray totoon mairap-bilay tan anggapoy kasalanan, aliwan say dala na saray totoon linmoob a mantakew ed abung yo. Balet anggaman onya ray ginagawam,

³⁵ kuanmo, Anggapoy kasalanan ko; andi-saew ya ag la mamapasnuk so Katawan ed siak. Balet siak, say Katawan, duasen ta ka lapud ag mo birbiren a nankasalanan ka.

³⁶ Nileglemew moy sikan dili diad insingger mod saray diriyos na arum a bansa. Dismayaen ka na Egipto a singa impanismayad sika na Asiria.

³⁷ Ibeneg mon ibatikan so Egipto, tan diad kababaingan mo sakuban moy lupam. Siak, say Katawan, impolisay ko ray panmamatalkan mo; anggapoy nagunggonam ed sikara.

3

¹ "Say Katawan kuanto, No isian na sakey a laki so asawa to, tan ontaynan la may bii, insan naasawa na sananey a laki, samay angisian ag to la nababawi may insian to. Dotakan a sigput na onya so bansa. Balet, Israel, amayamay so kainarowan mo et, natan, labay moy ompawil ed siak!

² "Tangwa kad toktok na kapokdulan tan nengneng ka; wala tad may pasen ya ag mo angipasenay sikan dili a singa marotak a bii? Diad gilig na dalan nanaalagar ka na saray manangaro; singa ka sakey ya Arabe a mantatalaran ed kalawakan na saray pairapen to. Dinotakan moy bansa lapud pikakaloguran mo.

³ "Sikato yay makasengeg no akin et ag onoran, tan anggan panaon lay nepnep et anggapo niy napelag ya oran. Singa marotak a bii so nengneng mo; anggapoy kababaingan mo.

⁴ "Tan natan kuanmod siak, Sika so amak, inaro mo ak nanlapu lad impanogaw ko.

⁵ "Ag ka mamasnuk lawas; aliwan ando lan ando so petang na olom. Israel, sikato tan so inkuanmo, balet nanggagawa kay kaogsan ed anggaay nayarian mo.

⁶ "Nen si Josias so ari, inkuan na Katawan ed siak, Anengneng mo so ginawa na Israel, saman ya aliwan matoor a bii? Diad balang atagey a pokdul, tan diad silong na balang malambut a kiew nagmaliw diman a singa marotak a bii.

⁷ "Ninunot ko, a kayari ton gawaen ira yan amin, andi-saew ya ompawil ed siak. Balet ag pinmawil, insan say malamang ya agi ton bii a Juda et anengneng to yan agawa.

⁸ "Anengneng met na Juda ya insian koy Israel tan pinataynan ko, lapud inkaindan to ak tan nagmaliw a marotak a bii. Balet ag tinmakot so Juda ya aliwan matoor a biin agi na Israel. Nagmaliw met a marotak a bii,

⁹ "tan ag to ibabaing yan gagawaen to. Dinotakan to so dalin, tan akilawanan diad panamegley na impangigalang tod saray bato tan saray kiew.

¹⁰ Kayari na sarayan amin, say Juda ya aliwan matoor a biin agi na Israel, nankonkonwarin ompawil ed siak; aliwan masimoon so impawil tod siak. Siak, say Katawan, so nansalita.

¹¹ Insan inkuan na Katawan ed siak, Anggaman ya inkaindan ak na Israel, impanengneng to balet a maung ni nen si malamang a Juda.

¹² Imbaga to nid siak ya onla ak a mangikuan ed Israel, Aliwan matoor ya Israel, pawil kad siak. Lapud mapangasi ak, ag ta ka la pampasnukan; aliwan ando lan ando so petang na olok ed sika.

¹³ Birbir mo labat a nankasalanan ka, tan sinmumpa ka ed Katawan a Dios mo. Ipatwam a diad silong na balang mabonan kiew, inter moy panangarom ed diriyos da ray arum a bansa, tan ag mo inonur iray ganggan ko. Siak, say Katawan, so nansalita.

¹⁴ Pawil kayo, aliwan matoor a totoo; kayaryan ta kayo. Mangala ak na sakey ed sikayo ed balang baley tan duara ed balang boleg, tan papawilen ta kayo ed Palandey na Sion.

¹⁵ Itdan ta kayo na saray manoley ya ontombuk ed siak. Tekep na kakabatan tan pakatalus so panoley dad sikayo.

¹⁶ Insan no nagmaliw lan ag nabilang so kinarakel yo ed saman a dalin, ag la salitaen na saray totoo so nipaakar ed Kaban na Sipanan ko. Ag da la nunoten so nipaakar ed Kaban na Sipanan, odino nanunotan; ag da la anggan nakaukolan, odino manggawa na sananey.

¹⁷ No nasabiy tan a panaon, natawag so Jerusalem a Say Trono na Katawan, tan amin a bansa mantitipon irad man a mangigalang ed siak. Ag da la gawaen so ibagad sikara na anawet tan maoges a puso ra.

¹⁸ Mikasakey ed satan so Israel ed Juda, insan manolup iran manlapud dalin ya akadakepan da diad baybay, tan onla rad dalin ya inter kon andi-anggaan a kayaryan na saray lalaki yo.

¹⁹ Say Katawan kuanto, Israel, nilabay ko ya awaten ta kan anak, tan itdan ta ka na makapaliket a dalin, say sankaabigan a dalin ed intiron mundo. Nilabay ko a tawagen mo ak na ama, tan ag mo ak la ikaindan.

²⁰ Balet singa biin aliwan matoor ed asawa to, sikay aliwan matoor ed siak. Siak, say Katawan, so nansalita.

²¹ Walay nadngel ya eyag ed saray toktok na pokdul; manakakis tan mikakasi ray totood Israel, lapud nambilay irad kasalanan, tan alingwanan day Katawan a Dios da.

²² Pawil kayo, amin yon angikaindan ed Katawan; paabigen to kayo, tan pagmaliwen to kayon matoor. Ikuanyo, On, onsisingger kamid Katawan, ta sikatoy Katawan a Dios mi.

²³ Anggapoy naalagar min tulong a manlapud saray diriyos a gagalangen mid saray toktok na kapokdulan. Manlapu labat ed Katawan a Dios mi so tulong a para Israel.

²⁴ Balet lapud impangigalang mid Baal a dios na kababaingan, abalang mi ray amin a bengatlan nanlingetan na saray lalaki mi nanlapu lad impanogaw misaray anak mi, saray karniro mi tan saray arum ya ayayep mi.

²⁵ Nepeg miy onlereg ed kababaingan tan tabunan kamiy kabandayan. Nanlapu lad impanogaw mi, saray lalaki mi tan sikami et nankasalanan ed Katawan a Dios mi; ag mi inonur iray ganggan to.

4

¹ "Say Katawan kuanto, Totood Israel, no labay yoy mampatauli, pawil kayod siak. No ekalen yo ray talintaon kabosul ko, tan magmaliw kayon matoor ed siak.

² "Diad satan, matwa, matonung, tan maptek so pansamba yo ed ngaran ko. Insan kerewen na amin a bansa a bindisionan ko ra, tan dayewen da ak.

³ "Say Katawan kuantod saray totood Juda tan Jerusalem, Baka yo ray ag ni abakan kaalogan yo; ag yo isisibwag ed kasabitan iray bini yo.

⁴ "Toor yoy impisipanan yod siak a Katawan yo, tan isaklang yoy sikayon dili ed siak, sikayo ran totood Juda tan Jerusalem. No ag yo tooren, ondalang a singa apoy so pasnuk ko, lapud saray kaogsan a ginawa yo. Ondalang, et anggapoy makaerep.

⁵ "Paknul yod intiron dalin na Juda so trumpita! Eyag kayoy maksil tan malinew! Ibaga yod saray totood Juda tan Jerusalem ya ombatik irad saray siudad ya aliber na padir.

⁶ "Itoro yoy dalan ya ompogtad Sion! Batik kayod pasen ya arawid kaatapan! Ag kayo la manaabala! Say Katawan mangipasabi na segsegang tan baleg a deral a manlapud baybay.

⁷ "Singa lion a manlalapud amutan ton pasen; say managderal na saray bansa et akaparaan la. Onsasabin maneral ed Juda. Naderal-deral iray siudad na Juda, anggapoy natilak a manayam ed sikara.

⁸ "Kanyan mansolung kayoy sako, mannangis tan manermen kayo, lapud ag nakal ed Juda so ontan lan sanuk na Katawan.

⁹ "Inkuan na Katawan, Diad satan ya agew naekalan na biskeg na linawa iray arari tan saray opisyal; natalagnaw iray papari tan nikelawan iray propita.

¹⁰ Insan inkuanko, Katawan a Dios sigput mon pinalikdo ray totood Jerusalem! Imbagam a kareenan so niwalad saray totoo, anta manaya akatotub ed sikaray ispada.

¹¹ Onsabiy panaon a nibagad saray totood Israel a say makasinit a dagem a manlalapud kabueran et onsibuk ed saray totoo na Katawan. Ag onsibuk a singa dagem a mangipapalir na trigo

¹² say dagem ya onsibuk onung ed ganggan na Katawan et mabiskeg a tuloy! Say Katawan a dili so manisintinsia ed saray totoo to.

¹³ Nengneng yo, onsasabin singa lorem so kalaban. Singa alimbusabos iray karwahi to; mabatik nen saray agila iray kabayo to. Pangaskasiyan iti la! Aderal itayo la!

¹⁴ Jerusalem, ekalan moy kaogsan so pusom, pian nagamuran moy kilalaban. Kapigan mangangga so pannununot moy kaogsan?

¹⁵ Saray ibabaki a nanlapud dalin na Dan tan nanlapud kapokdulan na Efraim, ibabawag day maoges a balita.

¹⁶ Diad pamasakbay dad saray bansa tan pangibaga rad Jerusalem ibawag da, Onsasabi ray kalaban a nanlapud sakey ya arawin bansa. Mambando ra sumpad saray siudad na Juda,

¹⁷ liktuben day Jerusalem a singa lalakin babantayan day sakey ya alog lapud sinmumpad Katawan iray totoo to. Say Katawan so nansalita.

¹⁸ Juda, sika met ni lamlamang so nanlapwan ed saya lapud impanbilay mo tan lapud saray ginagawam. Say kasalanan mo so makasengeg ed sayan kairapan; tinoruk ton tinalus so pusom.

¹⁹ Ag ko la nayarian ya itepel yan sakit! Say panotut! Mampokal a maung so pusok! Say pusok! Ag ak makareen; Narerengel koy tanul na saray trumpita, tan say eyag na bakal.

²⁰ Mantotombukan so nagagawan panagderal; aderal-deral so intiron bansa. Biglan aderal iray tuldak; apilat-pilat iray kurtina ra.

²¹ Kapigan mangangga so nepeg kon pangimatun ed sulit na bakal tan say pandengel koy tanul na trumpita?

²² Say Katawan kuanto, Anggapoy kalakal iray totook; ag da ak kabat. Singa ra ogogaw ya anggapoy kalakal; anggapoy pakatalus da. Marunong iran manggaway kaogsan, balet ag da amtay manggaway kamaungan.

²³ Ninmengneng ak ed mundoanggapoy nengneng odino kakanaan to; tinmangay ak ed tawenanggapoy liwawa.

²⁴ Binantag ko ray kapalandeyannayeyegyeg ira, tan saray kapokdulan mambabayes ira.

²⁵ Anengneng kon anggapo ray totoo; tan anggan saray manok tinmitikyab irad arawi.

²⁶ Say mataban dalin nagmaliw a kabueran; aderal-deral iray siudad to, lapud ontan lan petang na olo na Katawan.

²⁷ (Imbaga na Katawan a magmaliw ya andi-kakanaan so intiron mundo, balet ag to deralen a sigput.)

²⁸ Manermen so dalin; ombilonget so tawen. Say Katawan so nansalita tan ag mansalat na kanunotan to. Nanggetma la so Katawan tan ag to la ya babawien.

²⁹ Diad ingal da ray kumakabayo tan saray pumapana, ombatik ya ontaynan so balang sakey a too. Ombatik ed takel iray arum; ombatik ed kawalaan da ray ankakabaleg a bato iray arum. Nataynan so balang baley, tan anggapoy toon manayam lamet ed sikara.

³⁰ Jerusalem, pangaskasiyan ka! Akin et akakawes kay ambalbalanga? Akin et manaalahas ka tan akapinta na pampaganggana iray matam? Andi-kakanaan lay pampapagangganam! Impolisay ka la na saray kainarowan mo tan labay da kan pateyen.

³¹ Akadngel ak na akis na singa biin mampapasakit lan mananak, eyag na sakey a biin mangibubuknak na pangulowan ton anak. Akis na Jerusalem ya abot-aboten toy linawa to, iyoonat toy lima to tan kuanto, Pangaskasiyan ak! Onsasabi la ran mamatey ed siak!

5

¹ "Totood Jerusalem, batik kayod saray dalan yo! Nengneng kayod kaliber-liber! Nengneng yon dili! Sokimat yo ray tindaan! Makalmo kayo kasiy anggan sakey a toon manggagawa na katonungan, tan manaanap na kaptekan. No walay narumog yo, pirdonaen na Katawan so Jerusalem.

² "Anggaman a mansasamba kayod ngaran na Katawan, ag yo lamlamang totooren iray salita yo.

³ "Andi-duaruwan aanapen na Katawan so katooran. Binakbak to kayo, balet ag yo inkabilangan; kinabil to kayo, balet ag kayo nampasimbalo. Anawet so puso yo tan ag yo ikaindan iray kasalanan yo.

⁴ "Insan ko ninunot, Sikara ya labat so mairap-bilay tan anggapoy amta. Makulang-kulang ira; ag da amta so linawa na Katawan; ag da amta so ganggan na Dios da.

⁵ "Onla ak ed saray totoon walad pakaoley tan misalita ak ed sikara. Andi-saew ya amta ra no anto so linawa na Dios da, amta ra so ganggan na Katawan. Balet amin da impolisay da so pakaoley na Katawan; ag da labay so ontoluk ed sikato.

⁶ "Lapud saya pateyen ira na saray lion a manlapud takel; bingbingkasen ira na saray asod katakelan a manlapud kalawakan; onloob ed saray baley da iray liopardo. Siopaman ed sikara so ompaway nabingbingkas ta amayamay lay kasalanan da, tan amimpiga-piga la ran inmaarawi ed Dios.

⁷ "Tinepet na Katawan, Akin et pirdonaen ko ray kasalanan na saray totook? Inkaindan da ak tan angigalang ira ed saray tila-tilan diriyos. Pinakan ko ray totook ya anggad napsel ira, balet akikalugoran ira, tan akiamung irad saray marotak a bibii o lalaki.

⁸ "Singa ra saray kabayon istalyon a maung so kapapakan da tan manariba ran mapalalo; balang sakey pilalek ton naakdulan so asawa na kaabay to.

⁹ "Ag ko nepeg iran dusaen lapud sarayan amin a gagawaen da? Ag ko nepeg so ombales ed bansa a singa saya?

¹⁰ Ibakik iray kalaban ta batangen da ray kaubasan da, balet aliwan sigput so paneral dad sikara. Ibagak ed sikara ya ekalen da ray sanga-sanga ta ag ko kayaryan ira man a sanga-sanga.

¹¹ Sigput so ag panisiad siak na saray totood Israel tan Juda. Siak, say Katawan, so nansalita.

¹² Imbori na saray Israelita so Katawan. Inkuanda, Anggapo lamlamang so gawaen to. Anggapoy kairapan ya onsabid sikatayo; ag itayo nadalan na bakal odino eras.

¹³ Imbaga ra ya andi-kakanaan iray propita tan anggapoy papaibaga na Katawan ed sikara. Say Katawan a Dios a Makapanyarin-amin inkuantod siak, Jeremias, lapud imbaga da ra yan bengatla, gawaen kon singa apoy ed sangim iray salitak. Magmaliw a singa kiew ira yan totoo, tan poolan ira na apoy.

¹⁴

¹⁵ Totood Israel, mangibaki so Katawan na sakey a bansan manlapud arawin pasen tan dogpaan to kayo. Mabiskeg tan abayag lan bansa, tan ag yo amta so salita ray totoo to.

¹⁶ Mamatey ya andi-panangasi iray pumapana ra tan matalonggaring ya amin so sondalo ra.

¹⁷ Kanen da ray bungay tanaman yo tan saray tagano yo; pateyen da ray anak yon lalaki tan bibii. Kanen da ray karniro yo tan saray baka yo; deralen da ray kaubasan tan saray kaigosan yo. Deralen na saray sondalo ra iray panmamatalkan yon siudad ya aliber na padir.

¹⁸ Say Katawan kuanto, Anggaman ontan, diad saratan ya agew ag ko sigput a deralen iray totook.

¹⁹ No tepeten da no akin et ginawak ira yan amin a bengatla, ibagam ed sikara, Jeremias, a no kaonungay impangikaindan dad Katawan tan impanlingkur dad saray diriyos da ray arum a bansa, ontan met so panlingkur dad saray totoo na bansa ya ag da dalin.

²⁰ Say Katawan kuanto, Ibagam ed saray kabyangay boleg nen Jacob, ibagam ed saray totood Juda:

²¹ Dengel kayo, sikayon anggapoy kalakal tan anggapoy pakatalus a totoo. Walay kamataan yo, balet ag kayo makanengneng, walay kalayagan yo, balet ag kayo makadngel.

²² Siak so Katawan; akin et ag yo ak takotan? Akin et ag kayo onggiwgiw ed arap ko? Impasen koy kabueran a ketegan na dayat, sakey a mansiansian ketegan ya ag to nalabsanan. Onsipwak iray daluyon to, balet ag to nalabsanan so kabueran; onungol iray daluyon to, balet ag to napalumbasan.

²³ Balet sikayo ran totoo! Anawet so olo yo tan mananumpa kayo; imbeneg yo ak, insan yo ak tinaynan.

²⁴ Ag yon balut ninunot a pagalangan ak, anggaman a siak so mangiiter na oran ed tiagew tan say oran ed nepnep tan siak so mangiiter a tinaon na panaon na panagani.

²⁵ Balet lapud saray kasalanan yo, abalang yo ra yan maabig a bengatla.

²⁶ Manaayam ed kawalaan da ray totook iray totoon maoges; mantatalaran iran singa totoon mangipapanat na iket a manerel na saray manok, balet inyan da ray patit da a manerel na totoo.

²⁷ Singa sakey ya umaanop a papanoen toy kolungan to na saray manok, pinano da ray kaabungan da na saray asamsam. Sikato yay makasengeg a makapanyari tan mayaman ira,

²⁸ no akin et matataba ra tan maung so kapapakan da. Anggapoy anggaay panaggawa ray kaogsan; ag da iiter so katonungan da ray olilan sigput odino ipapanengneng so kaptekan ed saray napapairap.

²⁹ Balet siak, say Katawan, dusaen ko ra lapud saraya: ombawi ak ed sayan bansa.

³⁰ Sakey a makapataktakot tan makapakebyew a bengatla so agawa ed sayan dalin:

³¹ saray propita tilan amin so sasalitaen da; saray papari manooley ira diad panangiganggan na saray propita, et onya so labay da ray totook a nagawa. Balet antoy gawaen da no mangangga la yan amin?

6

¹ "Totood Benjamin, batik kayod pasen ya arawiy kaatapan! Ibatikan yoy Jerusalem! Paknul yod Tecoa so trumpita tan itagey yod Bet-hakarem so sinyas. Ngalngali la onsabin manlapud baybay so gunigon tan baleg a deral.

² "Say siudad na Sion et marakep, balet naderal;

³ "mankampod man iray arari tan saray sondalo ra. Ipaalagey da ray tulda ra ed kaliber-liber to, et balang sakey ed satan mankampo ed inerman a pasen a labay to.

⁴ "Ikuanda, Mamparaan kayon ondogpa ed Jerusalem! Mamparaan kayo! Ondogpa tayo no kaagewan! Balet insan ikuandad satan, Anggapo lay oras tayo; onseselek lay agew tan onsisironget la.

⁵ "Mamparaan itayo! Ondogpa tayo natad sayan labi, tan deralen ti ray tirinsira na siudad.

⁶ "Say Katawan a Makapanyarin-amin ingganggan to ra yan arari a mambatang iray kakiewan tan mambunton iray dalin, pian nakobkob day Jerusalem. Impasakbay to la nen saman, Dusaen ko yan siudad lapud napno na panagpairap.

⁷ "No panoy pansiasiansiay masamit a danum ed bobun, ontan met so pansiasiansiay kaogsan ed Jerusalem. Narerengelan koy inkaruksa tan panagderal ed dalem na siudad; sakit tan sugat iray nanenengneng ko.

⁸ "Totood Jerusalem, ipasen yon pasakbay ed sikayo ira yan gunigon, et no ag kayo ondengel ikaindan ta kayo; gawaen kon kabueran so siudad yo, sakey a pasen ya anggapoy malabay a manayam.

⁹ "Inkuan ed siak na Katawan a Makapanyarin-amin, Singa kaubasan a namborboran so Israel; anggapon balut so akeraan a bunga. Kanyan nepeg yon iyagel so siopaman a nayarian yon iyagel, natan, ta wala niy panaon.

¹⁰ Inmebat ak, Siopay ondengel ed siak, no misalita ak ed sikara tan pasakbayan ko ra? Pinepepetan da ray kalayagan da, tan ag ira ondengel ed saray salitam. Elek-elekan da labat so paibabagam ed siak.

¹¹ Napno ak na sanuk mo, Katawan, tan naooputan ak lay anos a mamokpok ed sanuk mo. Insan inkuan na Katawan ed siak, Idapom so sanuk ko ed saray ogogaw a walad daladalan tan diad pantitiponan da ray tobun-balo. Nadakep iray asawan lalaki tan saray asawan bibii, tan anggan saray mamatakken lan maung.

¹² Niiter ed saray arum iray kaabungan da; ontan met ed saray kaalogan da tan saray kaasawaan da. Dusaen ko ray totoo ed sayan dalin.

¹³ Balang sakey, atagey may abeba so kipapasen, mansasaol ed panaanap toy kuarta; anggan saray propita tan saray papari et sasaolen da ray totoo.

¹⁴ Gagalgalawen day pananambal dad sugat na saray totook; kuanda, Maung ya amiy kipapasen, anta andi.

¹⁵ Ambaing ira kasi lapud ginagawa da ra yan makapaingungot a bengatla? Andi! Anggapon balut so baing da; ag anggan ombabalangay lupa ra. Kanyan natumba ra a singa impakatumbay arum; no dusaen ko ra, samput da la. Siak, say Katawan, so nansalita.

¹⁶ Inkuan na Katawan ed saray totoo to, Manalagey kayod nansasangaan na dalan, tan nengneng kayo; tepet yo no iner so kawalaan da ray dagdaan a dalan tan no iner so kawalaay sankamaungan a dalan. Dalan kayod saya, et nagamuran yoy kareenan. Balet inkuanda, Ag kami ondalan ed satan!

¹⁷ Anoro so Katawan na saray totoon managbantay a mandengel ed pasakbay na tanul na trumpita. Balet inkuanda, Ag kami ondengel.

¹⁸ Kanyan inkuan na Katawan, Dengel kayo ran bansa, ta amtaen yo no antoy nagawa ed saray totook.

¹⁹ Dengel ka, O mundo! Diad panusak ed maoges a plano da ra yan totoo, mangyakar ak na deral ed sikara, lapud ag da inonur iray salitak tan impolisay day bangat ko.

²⁰ Antoy kakanaan na insinson iyaakar dad siak anggaman a manlalapu rad dalin na Saba odino saray rikadon manlalapud arawin dalin? Ag ko awaten iray bagat da; ag ak manliket ed saray isasaklang da.

²¹ Kanyan, siak, say Katawan, mangyan ak na pakatiroran pian natumba ra yan totoo. Ompatey iray ama tan saray anak; ontan met ed saray kakaaro tan saray kakaabay.

²² Say Katawan kuanto, Onsasabin manlapud sakey a bansa ed baybay iray totoo; mampaparaan a mibakal so sakey a makapanyarin bansa a walad arawi.

²³ Inaala ray pana tan saray ispada ra; maruksa tan anggapoy panangasi ra. Singa ungol na dayat so tanul da no papabatiken da ray kabayo ra. Sipaparaan iran mibakal sumpad Jerusalem.

²⁴ Nadngelan miy nipaakar ed balita, kuan na saray totood Jerusalem, et kinmolaney iray taklay mi; adetdetan kami na ontan lan kairapan, a singa kairapan na biin mampapasakit.

²⁵ Ag kami la oonlad kaalogan odino manaakar ed saray dalan, lapud akaarmas iray kalaban mi tan makapataktakot so walad kaliber-liber mi.

²⁶ Say Katawan kuanto ed saray totoo to, Mansolung kayoy sako tan mantolin-tolin kayod dapul. Manermen kayon singa panermen yod saksakey ya anak yon laki, akis kayo na ampaipait, ta biglan dogpaan kayo na manderal ed sikayo.

²⁷ Jeremias, subok mo ray totook, a singa panggugol mod mital; subok mo ra, ta nengneng mo no antoy kapara ra.

²⁸ Diad gaway awet na olo ran amin onlalaban ira; liber-liber iran mantatalabutob. Anawet a singa gansa tan balatyang so kapusoan da; marotak so kagagawa ran amin.

²⁹ Manliub so palbaan, balet ag natotonaw odino naeekal so dotak na mital. Anggapoy kana so pangituloy na pampalba, ta ag met lamlamang naeekal iray totoon maoges.

³⁰ Natatawag iran andi-kakanaan a pilak, ta siak, say Katawan, impolisay ko ra.

7

¹ "Say Katawan imbaki to ak ed puirta na Timplo, a nila na saray totood Juda ta mangigalang irad Katawan. Imbaga tod siak a manalagey ak diman tan ibawag ko so labay ya ibaga ed sikara na Katawan a Makapanyarin-amin a Dios na Israel: Pasimbalo yoy panagbilay yo tan saray gagawaen yo, pian abuloyan ta kayon mansiansian mambilay dia.

²

³

⁴ "Tondaan yo lay panagmatalek yod managpalikdon balikas, Arawi kamid kaatapan! Sikato yay Timplo na Katawan, sikato yay Timplo na Katawan, sikato yay Timplo na Katawan!

⁵ "Pasimbalo yoy panagbilay yo tan tondaan yo ray gagawaen yo. Matonung komuy panoolup na sakey tan sakey ed sikayo.

⁶ "Tondaan yoy panamairap yod saray sangkaili, saray olilan sigput, tan saray balo. Tondaan yoy panagpatey yo diad sayan dalin na saray totoon anggapoy kasalanan. Tondaan yoy panangigalang yod saray arum a diriyos, ta deralen to kayo.

⁷ "No sumpalen yo ra ya, abuloyan ta kayon manayam ed sayan dalin ya inter kon magnayon a kayaryan na saray lalaki yo.

⁸ "Imano yo, andi-kakanaan so panmamatalek yod managpalikdon balikas.

⁹ "Mantatakew kayo, mamapatey kayoy totoo, milalawanan kayo, anta nansamba kayo mantitila kayo, mangibabagat kayod Baal, tan mangigagalang kayod saray arum a diriyos ya ag yo ra kabat nen saman.

¹⁰ Gagawaen yo ray makapaingungot ed arap ko, insan manalagey kayod imatun ko diad dalem na Timplo tan kuanyo, Arawi kamid kaatapan!

¹¹ Abaloan yo amon amutan na saray tulisan so Timplok? Anengneng koy gagawaen yo.

¹² Laka yod Silo, say inmonan pasen a pinilik a pangigalangan ed siak, tan nengneng yo no antoy ginawak ed sikato lapud saray kaogsan na saray totook ya Israel.

¹³ Ginagawa yo ra yay kasalanan a binitlak. Anggaman ya akisalita ak ed sikayon amimpiga-piga, ag kayo dinmengel. Ag kayo inmebat nen tinawag ta kayo.

¹⁴ Kanyan gawaen kod sayan Timplok a panmamatalkan yo so singa samay ginawak ed Silo. Gawaen kod sayan pasen ya inter kod sikayo tan saray lalaki yo so singa samay ginawak ed Silo.

¹⁵ Paandipaten ta kayod pakanengneng ko a singa samay ginawak ed saray kakanayon yon totood Israel. Siak, say Katawan, so nansalita.

¹⁶ Inkuay Katawan, Jeremias, ag mo ipipikasi ra yan totoo. Ag mo ra itatagleeyan o ikekerewan ed siak, ta ag ta ka dengelen.

¹⁷ Ag mo ta nanenengneng so gagawaen da ed saray siudad na Juda tan saray dalan na Jerusalem?

¹⁸ Saray ogogaw mantitipon ira na kiew ya itotongo, saray totoon baleg a lalaki et mamaparlang ira, tan saray bibii manmamasa ra na gawaen dan kanen a para diosan tatawagen da na Riyna na Tawen. Angisaklang met ira na saray bagat ya iinomen ed saray arum a diriyos, pian napasakitan da ak.

¹⁹ Balet siak kasiy napapasakitan da? Andi, say sikaran dili so papasakitan da, tan ipepelag day sikaran dili ed kababaingan.

²⁰ Kanyan siak, say Katawan a Dios, idapok ed sayan Timplo so ontan lan pasnuk ko. Idapok ed saray totoo, saray ayayep, tan anggan diad saray kakiewan tan saray tanaman. Say pasnuk ko singa pool ya anggapoy makadepdep.

²¹ Totook, akan yo la laingen iray bagat a popoolan, a pati saray bagat a nayarin kanen. Sikato yay ibabagak, siak a Katawan a Makapanyarin-amin a Dios na Israel.

²² Nen impaway kod Egipto iray lalaki yo, anggapoy ingganggan kod sikaran nipaakar ed bagat a popoolan odino antokaman a bagat.

²³ Balet ingganggan kod sikaran onuren da ak, pian siak so magmaliw a Dios da tan sikaray magmaliw a totook. Imbagak ed sikara a mambilay ira onung na ingganggan kod sikara, pian maung so kasumpalan da.

²⁴ Balet ag ira inmonur odino dinmengel. Ingen inonur day imbaga na anawet tan maoges a puso ra, kanyan onmaung ira komun, linmoor lalaingen so kaogsan da.

²⁵ Manlapud samay agew ya impaway ed Egipto na saray lalaki yo ya anggad natan, intutuloy koy angibakid sikayo na saray aripen kon propita.

²⁶ Balet ag kayo dinmengel odino angimano. Ingen, nagmaliw kayon lalon anawet so puso tan lalon mananumpa nen saray lalaki yo.

²⁷ Kanyan, Jeremias, salitaen mo ra yad saray totook, balet ag da ka dengelen; tawagen mo ra, balet ag da ka ebatan.

²⁸ Ibagam ed sikara a say bansa ra et ag onoonur ed siak, say Dios dan Katawan; ag ira makakaaral ed panametek ko. Inatey lay katooran da; ag da la anggan sasalitaen.

²⁹ Manermen kayo, sikayo ran totood Jerusalem; potut yoy buek yo, insan yo ibantak. Manogtog kayod toktok na kapok-dulan na makapaermen, ta siak, say Katawan, impolisay tan inkaindan ko ra yan totoo a pamapasnukan ko.

³⁰ Nanggawa na sakey a kaogsan iray totoo ed Juda. Inyan dad dalem na Timplok iray karimdimlak a talintaoy diriyos da, kanyan dinotakan da.

³¹ Diad Patar na Hinnom nanggawa ray altar a tatawagey Tofet, a diay nampopoolan dad saray imbabagat dan anak da. Ag ko ingganggan a gawaen da ya odino sinmebang ed kanunotan koy onya.

³² Kanyan, onsabiy panaon ya ag la natawag na Tofet, odino Patar na Hinnom, no ag ingen natawag na Patar na Panagpateyan. Ipompon dad man iray bangkay na totoo lapud anggapo lay nakeraan a pasen a pangipomponan.

³³ Magmaliw a kanen na saray manok tan saray ayayep ed katakelan iray bangkay, tan anggapoy manibwak a manaktakot ed sikara.

³⁴ Magmaliw a kabueran so dalin. Pansamputen ko ray tanul na liket tan gayaga diad saray siudad na Juda tan diad saray dalan na Jerusalem tan saray maliket a tanul na bansal.

8

¹ "Diad satan a panaon naekal ed saray lobuk so pokel da ray arari, saray opisyal na Juda, saray papari, saray propita, tan saray arum a totoon nanaayam ed Jerusalem.

² "Natipon tan nipompon ira komun, balet magmaliw iran singa saray taiy ayayep ya ataytayak ed dalin. Nitayak irad arap na agew, bulan, tan saray bitewen ya inaro tan nanlingkuran na sarayan totoo; angipanonan tan angigalangan da ra.

³ "Saray makapaliis ed patey a totood sayan maoges a bansa a manaayam irad saray lugar ya angikaykayatan kod sikara et lablabayen da niy ompatey nen say mambilay. Siak, say Katawan a Makapanyarin-amin so nansalita.

⁴ "Say Katawan imbaga tod siak ya ikuankod saray totoo to iray salita to, Wala tay natumba ya ag ombangon? Wala tay nabalang ya ag ompawil ed nanlapwan to?

⁵ "Totook, akin et onaarawi kayod siak tan ag kayo ompawil? Ag kayo oniikban ed saray talintaoy diriyos yo tan ag yo labay so ompawil ed siak.

⁶ "Tinmalineng ak a maung, balet aliwan katwaan iray sinalita yo. Anggapoy anggan sakey ed sikayon maermen ed kaogsan to; anggapoy anggan tinmepet, Antoy ginawak a kaogsan? Balang sakey itutuloy toy dilin kabibilay to, singa sakey a kabayon maples ya ombabatik ya onlad bakal.

⁷ "Anggan saray gikgik ed liwang amta ra no oras lay kapapawil; saray malapati, saray mangalimpana, tan saray dolakak amta ra no kapigay iyakar dad arum a pasen a panayaman da. Balet, sikayo ran totook, ag yo amta ray ganggan ko a nepeg yo ran onuren.

⁸ "Panoy pangibaga yo, Makabat kami; walad sikamiy ganggan na Katawan? Nengneng yo, inoman na saray matilan iskriba iray ganggan.

⁹ "Abaingan iray makabat yon totoo; ag da amtay gawaen da tan apatitan ira. Impolisay da ray salitak; anton kakabatan so walad sikara natan?

¹⁰ Kanyan iter kod arum a lalaki so kaasawaan da, tan saray kaalogan da iter ko met ed saray arum ya akankien. Balang sakey, abeba may atagey so kipapasen, mansasaol ed panaanap toy kuarta; anggan saray propita tan saray papari et sasaolen da ray totoo.

¹¹ Gagalgalawen day pananambal dad sugat na saray totook; kuanda, Maung ya amiy kipapasen, anta andi.

¹² Totook, ambaing kayo kasi lapud ginagawa yo ra yan makapaingungot a bengatla? Andi! Anggapon balut so baing yo; ag anggan ombabalangay lupa yo! Kanyan natumba kayo a singa impakatumbay arum; no dusaen ta kayo, samput yo la. Siak, say Katawan, so nansalita.

¹³ Nilabay kon tiponen iray totook, a singa pantitipon na too na naani to; balet singa ra sengeg na ubas ya anggapoy bunga, singa ra sengeg na igos ya anggapoy bunga; amagaan iray anggan bolung da. Kanyan inabuloyan ko ray taga paway na bansa a manakup ed dalin da.

¹⁴ Akin et wadya itayon manyodyorung ya ag onggalaw? tepet na saray totooy Dios. Onla itayo la, ta ombatik itayod saray siudad a pinaliberay padir, tan diman ti la ompatey. Say Katawan a Dios tayo sinintinsiaan to itayon ompatey; initdan to tayo na samal ya inomen, lapud nankasalanan itayod sikato.

¹⁵ Nampilalek itayod kareenan, balet anggapoy naalagar tayo; nanalagartayoy panaon na pakatambal, balet takot lalaingen so sinmabi.

¹⁶ Wala lad siudad na Dan iray kalaban tayo; narerengel tayo so ariba na saray kabayoy kalaban tayo. Manggiwgiw lay intiron bansa no manaringing iray kabayo ra. Sinmabi la ran manderal na dalin tayo tan amin a logan to, manderal na siudad tayo tan saray totoon manaayam.

¹⁷ Mantalaran kayo! kuay Katawan, Ibakik ed sikayo ray oleg, nanditan oleg ya ag ira napaamo. Ketketen da kayo.

¹⁸ Ag napaabig so kaermenan ko; walay sakit ko diad pusok.

¹⁹ Dengel kayo! Diad intiron bansa narerengel koy pambabando na saray totook, Anggapo lad Sion so Katawan? Andi lad man so ari na Sion? Inmebat so Katawan ya ari ra, Akin et impanpasnuk yo ak diad impangigalang yod saray talintaoy diriyos yo tan diad indakmomo yod saray kayaryan yon andi-kakanaan a diriyos na arum a bansa?

²⁰ Inmeyag iray totoo, Linmabas lay tiagew, asumpal lay panagani, balet ag kami ni nilaban.

²¹ Asugat so pusok lapud asugat iray totook. Maneermen ak; sigput a nakalan ak na biskeg na linawa.

²² Anggapo ta lay tambal ed Galaad? Anggapo ta lad may doktor? Akin et ag naabigan iray totood bansak?

9

¹ "Bobun na danum la komun yay olok, tan sobul na lua iray matak, pian makapanakis ak ed agew tan labi lapud saray totoo bansak ya apatey-patey.

² "Wala komuy pasen a napanayaman kod kalawakan, pian niarawian ko ray totook. Aliwa ran matoor; olup iray traidor.

³ "Sipaparaan ira lawas a mantila; katilaan, aliwan katwaan, so manooley ed intiron bansa. Say Katawan kuanto, Mansosoblayan a kaogsan so gagawaen na saray totook, tan ag da ak bibirbiren a Dios da.

⁴ "Say balang sakey nepeg a manalwar ed anggan kaaro to, tan ag napampiaan na anggan siopa so agi to; ta managpalikdon singa si Jacob so balang agi, tan papaogesen na balang sakey iray kakaaro to.

⁵ "Papalikdoen na amin iray kakaaro ra, tan anggapoy mangibabagay katwaan; impasal dan mantila iray dila ra tan ag da tondaay mankasalanan. Mantotombukan lay inkaruksa a gagawaen da, tan say pampapalikdo ra. Ibabaga na Katawan a sikatoy ipopolisay na saray totoo to.

⁶

⁷ "Lapud saya say Katawan a Makapanyarin-amin kuanto, Pasilingen kon singa mital iray totoo, tan suboken ko ra. Nanggagaway kaogsan iray totook anto niy nagawaan kod sikara?

⁸ "Singa makapatey a pana iray dila ra; tila lawas so sasalitaen da. Maumaung so panagsalita na balang sakey ed kapara ton too, balet diad tuay tua sisiliban to.

⁹ "Ag ko ra dusaen lapud sarayan bengatla? Ag ak ombawi ed bansan singa onya? Siak, say Katawan, so nansalita.

¹⁰ Inkuanko, Ermenan ko ray kapalandeyan tan akisan ko ray pastolan, lapud minmaga-maga ra; anggapo lay ondadalan ed sikara. Ag la narengel so tanul da ray ayayep; tinmitikyab tan naandi la ray manok tan saray ayayep ed katakelan.

¹¹ Say Katawan kuanto, Gawaen kon bunton na deral-deral so Jerusalem, sakey a pasen a panayaman da ray asod katakelan; magmaliw a kalawakan iray siudad na Juda, tan sakey a pasen ya ag panayaman na totoo.

¹² Tinepet ko, Katawan, akin et aderal-deral so dalin, tan minmagan singa kalawakan, kanyan anggapo lay ondadalan? Siopay makabat a makatalus ed saya? Siopay angipaliwawaan mod saya, pian nibaga to met ed saray arum a totoo?

¹³ Inmebat so Katawan, Onyay agawa, lapud inkaindan na saray totook so bangat ya inter kod sikara. Ag da ak inonur odino sinumpal so imbagak ed sikara.

¹⁴ Anawet so olo ra, kanyan inonur day labay dan dili. Inggalang da ray talintao nen Baal onung na imbangat na saray lalaki ra a gawaen da.

¹⁵ Kanyan dengel kad ibagak a gawaen ko, siak a Makapanyarin-amin a Katawan, say Dios na Israel. Itdan ko ray totook na saray ampait a tanaman a kanen da. Itdan ko met iray makasamal a danum ya inomen da.

¹⁶ Ikaykayat ko rad saray bansa a sikara tan saray lalaki ra et ag da ni nadngelan tan mangibaki ak na saray sondalo sumpad sikara, anggad sigput a naderal ko ra.

¹⁷ Say Katawan a Makapanyarin-amin kuanto, Imano yo ray nagagawa! Tawag yo ray managermen, saray bibiin kumakanta no tolur.

¹⁸ Saray totoo inkuanda, Pangganat yo ra, tan kantaan da kami na kantan para tolur, anggad onterter iray lua mi, tan nabasa-basa ray goyamgoyam mi lapud kakaakis.

¹⁹ Dengel moy panaakisan da ray totoo ed Sion: Aderal-deral itayo! Sigput a naplag itayod kababaingan! Nepeg tin taynan so dalin tayo; aderal-deral tan atumtumba iray kaabungan tayo.

²⁰ Inkuanko, Dengel kayod Katawan, sikayon bibii, tan talineng yo ray salita to. Ibangat yon manermen iray anak yon bibii, ibangat yo met a mankanta na kantan para tolur iray kakaaro yo.

²¹ Linmoob ed saray bintana tayo so patey tan nilooban to ray palasio tayo; pinagit tod saray dalan iray ogogaw tan saray lalakin tobun-balo diad saray tindaan.

²² Ataytayak iray bangkay na saray totoo, singa ra nikaykayat a tai na ayayep ed kaalogan, singa ra ginapas tan intilak na saray umaani, tan anggapoy manipon na ilik. Sikato yay papaibaga na Katawan ed siak.

²³ Say Katawan kuanto, Ag nepeg ya ipasirayew na saray makabat a totoo so kakabatan da, odino saray mabiskeg a totoo so biskeg da, odino saray mayaman a totoo so kayamanan da.

²⁴ No walay labay toy mampasirayew, nepeg ya ipasirayew to ya amta to ak tan natalusan to ak, ta ag mangoman so panangarok, tan gagawaen ko so katonungan tan kaptekan ed intiron mundo. Sikara yay bengatlan panliketan ko. Siak, say Katawan, so nansalita.

²⁵ Say Katawan kuanto, Onsabiy panaon a dusaen ko ray totood Egipto, Juda, Edom, Ammon, Moab, tan amin a manaayam ed kalawakan a pinoputotan da ray buek da. Asegat ira yan amin a totoo, balet ag da tinoor so siopaman ya ipapamorya na segat. Amin da ra yan totoo tan amin a totood Israel et ag da sinumpal so impisipanan kod sikara.

10

¹ "Totood Israel, dengel yoy ibabagad sikayo na Katawan.

² "Kuanto, Ag yo aaligen so kabibilay na saray totoo ed arum a bansa, tan ag kayo nagugunigon ed saray tanda a nanengneng yo ed tawen, anggaman a natatakot iray taga arum a bansa.

³ "Andi-kakanaan so rilihion da ra yan totoo. Abatang ed takel so sakey a kiew; tinatabtaban na kagawaan na marunong ya iskoltur,

⁴ "tan adikoraan na pilak tan balituk. Nipeket na saray pasak pian ag natumba.

⁵ "Saratan a talintaoy diriyos et singa ra totoon panagabul na saray manok ed katrigowan; tan ag ira makasalita; nakaukolan a sakbaten ira ta ag ira makaakar. Ag kayo natatakot ed sikara: ag da kayo nayarin pasakitan, tan anggapoy niiter dad sikayon kaabigan.

⁶ "Katawan, anggapoy mipara ed sika: makapanyari ka, tan matalonggaring tan makapanyari so ngaran mo.

⁷ "Siopay ag mangigalang ed sika, sika ya ari na amin a bansa? Sika so manepeg a galangen. Diad saray amin a makabat ed saray bansa, tan diad amin da ray arari ed bansa, anggapoy mipara ed sika.

⁸ "Andi-kalakal tan makulang-kulang ira yan amin a totoo. Antoy naaral da ed saray kiew a talintaoy diriyos?

⁹ "Apalkapan na pilak a nanlapud Espanya iray talintaoy diriyos da; apalkapan met na balituk a nanlapud Ufaz, tan ginagawa ra na saray marunong a platiro; akawesan ira na asul tan ambalbalangan abel, ginawa ra na saray marunong a managabel.

¹⁰ Balet sika, Katawan, so tua a Dios, sika so mabilay a Dios, tan say andi-anggaan ya ari. No mampasnuk ka onggiwgiw so sankamundoan; ag natepelan na saray bansa so pasnuk mo.

¹¹ (Sikayo ran totoo nepeg yon ibagad sikara a saray diriyos ya ag da ginawa so tawen tan dalin, et naderal ira. Naandi ra ed anggan iner a pasen diad tapew na dalin.)

¹² Pinalsa na Katawan so dalin diad panamegley pakayari to; diad panamegley na kakabatan to pinalsa na Dios so mundo tan impanat toy katawenan.

¹³ Diad ganggan to inmungol so danum ed tagey na tawen; aawiten to ray lorem a nanlapud saray sokung na mundo. Pakikirmaten to no onooran, tan pasisiplugen toy dagem a manlalapud panagsinupan ton kuarto.

¹⁴ Diad pakanengneng ed saraya, nabirbir na amin a totoo a makulang-kulang tan anggapoy pakatalus da; balang platiro naeekalay ilalo ed saray talintao to, ta tila-tilan diriyos iray gagawaen da; anggapoy bilay da.

¹⁵ Andi-kakanaan ira, tan kanepegan day balawen; naderal ira no onsabin maneral ed sikara so Katawan.

¹⁶ Aliwan singa sikara so Dios nen Jacob; sikatoy nanggawa ed amin a bengatla, tan pinili ton dilin totoo to so Israel. Yahweh a Makapanyarin-amin so ngaran to.

¹⁷ Totood Jerusalem, lolooban da kayon dakepen. Ala yo ray kayaryan yo.

¹⁸ Say Katawan pataynanen to kayo lad sayan dalin; pasegsegangen to kayo ya anggad anggapoy natilak ed sikayo. Say Katawan so nansalita.

¹⁹ Inmeyag iray totood Jerusalem, Mapalaloy inkasugat mi! ag onabig iray sugat mi. Abaloan mi no nayarian mi yan itepel!

²⁰ Aderal-deral iray tulda mi; apolpoltut iray lobir ya impangitaker ed sikara. Tinaynan kami na saray anak mi; naandi la ran amin ed arap mi. Anggapoy atilak a mangipaalagey lamet ed saray tulda mi; anggapoy mangipeket na saray kurtina ra.

²¹ Inmebat ak, Anggapoy kalakal iray pangulo mi; ag ira papaiwanwan ed Katawan. Sikato yay makasengeg no akin et aliwa ran maaligwas, tan nikaykayat iray totoo tayo.

²² Dengel kayo! Sinmabi lay balita! Walay baleg a gewgew ed sakey a bansa ya anggad baybay; saray sondalo to pagmaliwen dan kabueran iray siudad na Juda, say pasen a panaayaman na saray asod katakelan.

²³ Katawan, amtak ya anggapoy siopaman a toon walad lima toy pansumpalan to; anggapoy toon nabembenan toy dilin bilay to.

²⁴ Petek mo kami pa ran totoom, O Katawan; balet ag mo lalabasen. Ag mo kami pa pepeteken no mamapasnuk ka, ompan samput mi la.

²⁵ Idapom pa so pasnuk mo ed saray totoon ag mangigagalang ed sika, tan diad saray totoon mangipopolisay ed sika. Pinapatey da ray totoom; sigput da kamin dinederal, tan dinederal day bansa mi.

11

¹ "Inkuan na Katawan ed siak,

² "Dengel mo ra yan ibabaga na sayan sipanan. Ibagam ed saray totood Juda tan saray taga Jerusalem,

³ "a siak, say Katawan a Dios na Israel, et insambak so balang sakey ya ag ontotoluk ed saray ibabaga na sayan sipanan.

⁴ "Sayan sipanan et ginawak ed saray lalaki ra nen impaway ko rad Egipto, say dalin a singa palbaan na balatyang ed sikara. Imbagak ed sikara ya onuren da ak tan sumpalen da ray ingganggan kod sikara. Imbagak ed sikara a no ontoluk ira magmaliw iran totook tan siak so Dios da.

⁵ "Diad ontan sumpalen koy insipan kod saray lalaki ra, ya iter kod sikara so mayaman tan mataban dalin a kayaryan da la natan. Inkuanko, Ontan pa komun, Katawan.

⁶ "Insan inkuan na Katawan ed siak, Lakad saray siudad na Juda tan diad saray dalan na Jerusalem. Ibawag mod man iray salitak, tan ibagam ed saray totood man ya ondengel irad ibabagay sipanan tan onuren da.

⁷ "Nen impaway ko ed Egipto iray lalaki ra, masimoon ko ran pinasakbayan ya onuren da ak. Insan ko intutuloy a pinapasakbayan iray totoo ya anggad natan.

⁸ "Balet ag ira dinmengel o inmonur. Ingen, balang sakey nansiansian anawet so puso to tan maoges. Ingganggan ko ran ontoluk ed sipanan, balet ag da labay so ontoluk. Kanyan inter kod sikaray amin a dusan nibagad saman a sipanan.

⁹ "Insan inkuan ni na Katawan ed siak, Onlalaban ed siak iray totood Juda tan saray taga Jerusalem.

¹⁰ Pinawil da ray kasalanan na saray lalaki ran ag tinmoluk ed saray ingganggan kod sikara; angigalang irad saray arum a diriyos. Dineral na saray totood Israel tan Juda so impisipanan kod saray lalaki ra.

¹¹ Lapud saya, siak, say Katawan, papasakbayan ko ra a deralen ko ra tan ag ira makabatik. Tan no sikaray onkerew na tulong ed siak, ag ko ra dengelen.

¹² Diad satan saray totood Juda tan saray taga Jerusalem onla rad saray diriyos dan pangibabagatan da, tan onkerew iray tulong. Balet ag ira nilaban na saratan a diriyos no onsabi yan deral.

¹³ Say karakel na diriyos na saray totood Juda et singa karakel na saray siudad da; tan saray karakel na saray ginagawan altar a panangisaklangan na makapaingungot iran bagat ed kinen Baal na saray taga Jerusalem et singa karakel na saray dalan ed siudad.

¹⁴ Jeremias, ag ka mampipikasid siak odino ipikasim ed siak ira yan totoo. No nagunigon ira, et onkerew irad siak na tulong, ag ko ra dengelen.

¹⁵ Say Katawan kuanto, Manggagaway kaogsan iray totoon inararok. Anto sirin so kanepegan dan niwala rad Timplo? Abaloan dan napaer day deral ya onsabid sikara diad panggagawa ra na saray sipan tan diad pangibabagat dad saray ayayep? Makapanliket ira sirin?

¹⁶ Tinawag ko ran aminsan na mabolubolung a kiew na oliba tan amayamay so balibalin bunga to; balet natan, poolan ko ray bolung to diad iterak na singa madalagorug a karul tan lupak-lupaken ko ray sanga to.

¹⁷ Siak, say Katawan a Makapanyarin-amin, intanem koy Israel tan Juda; balet natan ibabawag kod sikaray dusan panderal ed sikara. Dineral day sikaran dili, lapud nanggawa ray kaogsan; impanpasnuk da ak lapud impanbabagat dad kinen Baal.

¹⁸ Impaamtad siak na Katawan so pankokomplut na saray kalaban ko.

¹⁹ Singa ak mauyuyamon kordiro a tetengtengen ed panagpateyan, tan ag ko amtad saman a mamplaplano ray maoges a bengatla. Inkukuanda, Ibatang tayoy kiew legan a mabona-bona ni; pateyen tayo pian anggapo lay makanunot ed sikato.

²⁰ Insan nampikasi ak, Katawan a Makapanyarin-amin, sakey kan matonung a huis; susuboken moy kanunotan tan say liknaan da ray totoo. Iyabuloy mo pan nanengneng ta kan ombawid sarayan totoo, lapud sikay angimatalkan kod kipapasen ko.

²¹ Labay na saray totood Anatot a pateyen da ak, kanyan imbaga rad siak a pateyen da ak no ituloy koy pampulong kod ngaran na Katawan.

²² Kanyan inkuan na Katawan a Makapanyarin-amin, Dusaen ko ra! Napatey ed bakal iray lalakin tobun-balo ra; ompatey ed eras iray anak da.

²³ Anggapod sikaray nakeraan no onsabiy panaon ya inggetar kon panusak ed saray totood Anatot.

12

¹ "Katawan, no manriklamo ak ed sika, napaneknekan mon matonung ka. Anggaman ontan tepetan ta ka na nipaakar ed katonungan. Akin et maaligwas so panagbilay da ray totoon maoges? Akin et mapalabo ray managpalikdon totoo?

² "Itatanem mo ra, tan manlalamut ira; ontutubo ra tan mambubunga ra. Maung lawas so sasalitaen da nipaakar ed sika, balet say katwaan to arawi kad puso ra.

³ "Balet, Katawan, kabat mo ak; nanenengneng moy gagawaen ko, tan say ontan lan panangarok ed sika. Igayugoy mo pan singa karniron papateyen ira yan totoo; bantayan mo pa ra ya anggad panaon a sikara lay patasen.

⁴ "Kapigay itonda na sayan inkamagaay dalin mi, tan say inkalenes na karikaan ed kaalogan? Ompapatey iray ayayep tan saray manok, lapud kaogsan na saray totoon manaayam ed sayan dalin, ya ibabaga ra, Ag nanenengneng na Dios so gagawaen mi.

⁵ "Inkuan na Katawan, Jeremias, no nakesawan kad pilumbam ed saray totoo, panoy pilumbam ed saray kabayo? No diad pasen ya arawiy kaatapan et natumba ka, panoy pakapanayam mod makdel a takel ed gilig na Ilog na Jordan?

⁶ "Anggan saray agagim a lalaki, saray kabyangay boleg mo et nantraidoran da ka; manggagampi rad idogpa rad sika. Ag mo ra panmamatalkan, anggaman a maabig so panagsalita rad sika.

⁷ "Say Katawan kuanto, Inkaindan koy Israel; impolisay koy pinilik a bansa. Saray totoon inarok impalimak irad pakayari na saray kalaban da.

⁸ "Saray totoon pinilik sinumpa da ak; singa ra lion ed katakelan nangwam irad siak, kanyan kabosul ko ra.

⁹ "Saray pinilik a totoo et singa ra sakey a manok a niliktub tan sinibar na saray baga. Padago yo ray ayayep ed katakelan, ta pampera yo ran mangan!

¹⁰ Saray amayamay a manoley a taga arum a bansa et dineral da so kaubasan ko; ginagatinan da ray kaalogan ko; ginawa ran kabueran so marakerakep a dalin ko.

¹¹ Ginawa ran andi-kakanaan so dalin ko; nagmaliw a begtebegtew ed imaton ko. Nagmaliw a kabueran so intiron bansak, tan anggapo lay malabay ed sayan dalin ko.

¹² Manlapud biek na amin a niatagey a kabueran dinmadagon manderal iray totoo. Angibaki ak na bakal a manderal ed intiron bansa; anggapoy makapambilay ed kareenan.

¹³ Nantanem na trigo iray totook, balet kasabitan so naani ra; pinasyay impankimey da, balet anggapoy agunggona ra. Lapud mapalalon pasnuk ko ag nambunga ray tantanaman da.

¹⁴ Say Katawan kuanto, Walay ibagak nipaakar ed saray bansan maoges a kaabay na Israel. Sikaray nanderal ed dalin ya inter kod saray totook ya Israel. Pataynanen kon singa abagut a tanaman ira yan totoo maoges ed saray bansa ra, tan ekalen koy Juda ed pakaoley da.

¹⁵ Balet kayarik iran pataynanen, kasian ko ra; ipawil koy balang too ed dilin baley to tan diad dilin bansa to.

¹⁶ No diad intiron puso ra et onalig irad kabibilay na saray totook tan mansamba ra, Onung a mabilay so Katawana singa impanbangat dad saray totook a nansamba rad Baalmagmaliw iran kabyangan na saray totook tan onaligwas ira.

¹⁷ Balet no walay bansan ag ontoluk, sigput kon baguten tan deralen. Siak, say Katawan, so nansalita.

13

¹ "Imbagad siak na Katawan a manaliw ak na linen a pantalon a potut, insan ko isolung; balet binilin to ak ya ag ko iiyan ed danum.

² "Kanyan angaliw ak, insan ko insolung.

³ "Insan akisalita lamet so Katawan ed siak. Inkuanto,

⁴ "Lakad Ilog na Eufrates ta iyamut mod abut diad saray baton-dampay imay potut a pantalon.

⁵ "Kanyan linma ak, ta inyamut ko ra ed abay na Eufrates.

⁶ "Kalabas na amayamay ya agew imbagad siak na Katawan ya onla ak lamet ed Eufrates, ta alaen ko may pantalon ya impaiyamut tod siak diman.

⁷ "Kanyan linma ak lamet ed Eufrates, et nen nalmok imay pasen ya angyamutan kod samay pantalon, anengneng kon aderal tan anggapo lay kana to.

⁸ "Insan akisalita lamet so Katawan ed siak. Inkuanto,

⁹ "Onyay paneral kod panagpaatagey na Juda tan say ontan lan panagpaatagey na Jerusalem.

¹⁰ Sarayan totoon maoges et ag ira inmonur ed siak, tan lawas anawet so puso ra tan maoges ira tan inggalang tan nanlingkur irad arum a diriyos. Kanyan sirin, magmaliw iran singa sayan potut a pantalon ya anggapo lay kana to.

¹¹ Kanyan no panoy kaelet ed awak yan potut a pantalon, ontan met so kaelet a labay kon nepeg ya ipeket ed siak na amin a totood Israel tan Juda. Onyay ginawak pian magmaliw iran totook, tan mangiter iray dayew tan galang ed ngaran ko; balet ag da ak inonur.

¹² Inkuay Katawan a Dios ed siak, Jeremias, ibagam ed saray totood Israel a balang garapon et nepeg a napano na alak. Ibaga rad sika ya amta ra a balang garapon et nepeg a napano na alak.

¹³ Insan ibagam ed sikara a siak, say Katawan, pansawaen ko na alak iray totood sayan dalin anggad nabuek ira: saray ari a kabyangan iray boleg nen David, saray papari, saray propita, tan amin a totood Jerusalem.

¹⁴ Insan ko ra panbabasigan a singa saray garapon, matakken may malangwer. Ag nabaat na abagey, panangaro, odino panangasi so pamatey kod sikara.

¹⁵ Totood Israel, nansalita so Katawan! Mampaabeba kayo tan dengel kayod sikato.

¹⁶ Pagalangan yoy Katawan a Dios yo, kasakbayan a mangyakar na kabilongetan, tan natumtumba kayod kapalandeyan; kasakbayan a pagmaliwen ton ambilbilonget so iilaloan yon liwawa.

¹⁷ No ag kayo ondengel, maamut a manakis ak lapud panagpaatagey yo. Manakis ak na ampaipait, tan onagos so luak lapud nalan adakep iray totoo na Katawan.

¹⁸ Inkuan na Katawan ed siak, Ibagam ed ari tan say ina to ya onakseb iran manlapud trono ra, lapud naplag manlapud olo ra iray marakerakep a korona ra.

¹⁹ Nilakob na saray sondalo iray baley ed abalaten na Juda; anggapo so toon makadalan ed saray baley. Nala ya amin iray totood Juda tan nibantak ira ed arum a bansa.

²⁰ Jerusalem, nengneng mo! Onsasabin manlapud baybay iray kalaban mo! Kawalaan da ray totoon nipiad sikan asikasoen mo, saray totoom ya ikikinon mo?

²¹ Antoy ibagam no saray totoon abaloan mon kakaarom et dakepen tan oleyan da ka? Manirap kan singa biin manaanak.

²² No tepeten mo no akin et agawad sika ya, no akin et apilat-pilat so kawes mo tan sikay apasoot, say makasengeg et lapud mapalalo so kasalanan mo.

²³ Nasalatan ta na toon andeket so kolor na baog to, odino naekal ta na liopardo so batek na bago to? No nayarian da, naaralan yo, sikayon totood Jerusalem, so manggaway kaptekan, sikayon pasal yoy manggaway kaogsan.

²⁴ Say Katawan ikaykayat to kayon singa taep ya itiktikyab na dagem a manlalapud kabueran.

²⁵ Inkuan na Katawan a sikato yay magmaliw a kapalaran yo; sikato yay ginetma ton gawaen ed sikayo, lapud nilingwanan yo tan nanmatalek kayod saray tila-tilan diriyos.

²⁶ Say Katawan a dili so mamingbingkas na kawes yo, tan iparontal to kayod kababaingan.

²⁷ Anengneng kayo na Katawan ed panggagawa na saray bengatlan kabosul to. Anengneng to kayon tinmotombuk ed saray paganon diriyos diad saray kapokdulan tan saray kaalogan, singa kayo lakin mantitiyam na asawa na kaabay to, odino singa kayo kabayon kalakyan a mangoosil na kabatyan. Totood Jerusalem, pakaskasiy kipapasen yo! Kapigan kasiy pagmaliw yon malinis?

14

¹ "Say Katawan kuantod siak nipaakar ed abaybayag a tiagew,

² "Say Juda et walad kaermenan, ompapatey iray siudad to, mandokdokul ed dalin iray totoo to lapud kaermenan, tan onkekerew na tulong so Jerusalem.

³ "Saray mayaman a totoo ibabaki da ray aripen da, ta mangala ray danum; oonla rad saray bobun, balet ag ira makakalmoy danum; ompapawil ira ya anggapoy karga iray pananginan da. Sasakbungan da ray olo ra, lapud kababaingan tan ag da amtay gawaen da.

⁴ "Nanaekalan na biskeg na linawa iray dumaralus, lapud anggapoy oran tan amaga-magay dalin; iyaamut day kalupaan da.

⁵ "Diad alog tataynan na inan ulsa iray anak ton kapangyanak, lapud anggapoy dika.

⁶ "Manalalagey ed tapew na saray pokdul iray asnod katakelan, tan apus-apusan iran singa saray asod katakelan; kurarap la ra lapud anggapoy nakan da.

⁷ "Ontatawag ed siak iray totook, Anggaman ya aakusaen kami na saray kasalanan mi, tulongan mo kami pa, Katawan, onung na insipan mo. Amimpiga kamin inmarawid sika; nankasalanan kamid sika.

⁸ "Sika labat so ilalo na Israel, sika so mangilalaban ed sikami ed kaderalan. Akin et singa ka sangkaili ed dalin mi, singa biahiron sanlabi labat so pipundo to?

⁹ "Akin et singa ka toon abiglaan, singa sakey a sondalon ag makatulong? Andi-duaruwan wala kad sikami, Katawan! Sikami ray totoom; ag mo kami pa ikakaindan.

¹⁰ Say Katawan kuanto nipaakar ed sarayan totoo, Inaro ra so ontaynan ed siak tan ag da pokpokan so sikaran dili. Kanyan sirin, ag ak manliket ed sikara. Nunoten ko ray maoges a ginagawa ra tan dusaen ko ra lapud saray kasalanan da.

¹¹ Inkuan na Katawan ed siak, Ag mo kekerewen a tulongan ko ra yan totoo.

¹² Anggan manayuno ra ag ko dengelen so ikekerew day tulong; ag ak manliket ed sikara anggaman a mangisaklang irad siak na saray bagat a popoolan tan saray bagat a trigo. Ingen, pateyen ko ra diad panamegley na bakal, eras tan salot.

¹³ Insan inkuanko, Katawan a Dios, amtam ya ibabaga da ray propita ed saray totoo ya anggapoy ondalan a bakal odino eras, ta kuandan insipan mo a manari labat so kareenan ed dalin tayo.

¹⁴ Balet inmebat so Katawan, Saray propita mantitila ra ed ngaran ko; ag ko ra imbaki, odino ingganggan, odino akisalitaan. Ag nanlapud siak iray pasingayew a sasalitaen da; andi-kakanaan iray pasakbay a ninudnunot da.

¹⁵ Siak, say Katawan, ibabagak ed sika so gawaen kod sarayan propita ya ag ko ra imbaki, balet mansasalita ra ed ngaran ko tan ibabaga ran anggapoy ondalan a bakal tan eras ed sayan dalin. Pateyen ko ra ed panamegley na bakal tan eras.

¹⁶ Saray totoon angibagaan dad sarayan bengatla et napatey met ira ed panamegley na bakal tan eras. Nibantak ed saray dalan na Jerusalem iray bangkay da, tan anggapoy toon mangipompon ed sikara. Nagawa ya ed sikaran aminpati saray kaasawaan da, saray lalakin anak da, tan saray bibiin anak da. Pambayaren ko rad saray kaogsan da.

¹⁷ Ingganggan ak na Katawan ya ibagak ed sikaray nipaakar ed kaermenan ko. Ikuanko, Onagos komun ed agew tan labi so luak, ag ak komun ontondan onakis, lapud mapalaloy inkasugat na saray totook, tan ontan lay inkasakitan da.

¹⁸ No ompaway ak ed saray kaalogan, nanengneng ko ray bangkay na saray totoon inaatey ed bakal; no onla ak ed saray baley, nanengneng ko ray totoon ompapatey ed eras. Itutuloy na saray propita tan saray papari so kimey da, balet ag da amta so gagawaen da.

¹⁹ Katawan, sigput so impangipolisay mod saray totood Juda? Kabosul mo ray totood Sion? Akin et mapalaloy impanugat mod sikami, kanyan ag kami la naabigan? Nampilalekan min nagamuray kareenan, balet anggapoy maabig a sinmabi; inilaloan min onabig kami, balet makapasinagem lalaingey sinmabi.

²⁰ Katawan, nankasalanan kamid sika; ipatwa mi ray kasalanan mi tan saray kasalanan da ray lalaki mi.

²¹ Nunot mo pa ray sipan mo, tan ag mo kami pa babalawaen; ag mo pa ipepelag ed kababaingan so Jerusalem say pasen a kawalaay mapagalang a tronom. Sumpal mo pa may impisipanan mod sikami, tan ag mo pa dederalen.

²² Anggapod saray diriyos na saray bansa so makapaoran; anggan say tawen ag to makapangipelag na mayamaya. Sikay paniilaloan mi, Katawan a Dios mi, ta sikay manggagawa na sarayan bengatla.

15

¹ "Insan inkuan na Katawan ed siak, Anggan manalagey ira di Moises tan Samuel diad arap ko a mikasi ed siak, ag ko kasian ira yan totoo. Paekal mo ra tan pataynan mo rad pakanengneng ko.

² "No tepeten dad sika no iner so laen da, ibagam ed sikara a nibagak la: Saray arum ompatey irad salot diman so laen da! Saray arum ompatey irad bakal diman so laen da! Saray arum ompatey irad eras diman so laen da! Saray arum nadakep ira diman so laen da!

³ "Siak, say Katawan, ginetmak lan apatiran makapasinagem a segsegang so ondalan ed sikara: napatey ira; bingbingkasen na saray aso iray bangkay da; kanen na saray manok iray bangkay da, tan buagen na saray ayayep ed katakelan iray nakeraan.

⁴ "Pagmaliwen kon pakataktakotan ira na saray amin a katoowan ed intiron mundo, lapud samay ginagawad Jerusalem nen Manases a lakin anak nen Ezekias sanen sikatoy ari na Juda.

⁵ "Say Katawan kuanto, Siopay mangasid sikayo, totood Jerusalem, tan siopay manermen ed sikayo? Siopay mambayag ya onsamar a manepet no antoy kipapasen yo?

⁶ "Impolisay yo ak, sikayon totoo; imbeneg yo ak. Kanyan inyonat ko ray limak, tan kinabil ta kayo, lapud naoputan ak lay anos ed sikayo.

⁷ "Diad kapag baley ed bansa, imbantak ta kayod tagey a singa taep. Dineral ta kayo, totook, pinapatey ko ray anak yo lapud ag yo tinondaan so maoges a kabibilay yo.

⁸ "Ginawak a dakel nen saray buer ed gilig na dayat iray bibiin balo a kadalaan yo. Pinatey ko ray anak yo nen kabisbiskegan da; impanliknak na kairapan iray kainaan da. Bengatbengat ko ran pinaermen tan pinatakot.

⁹ "Nalmay so inan naandi so pitoran anak to, abot-aboten toy linawa to. Nagmaliw a kabilongetan so liwawan walad sikato; napnoy kababaingan tan kinmapoy so liknaan to. Papatey kod saray kalaban yo iray akeraan nid sikayon mabilay. Siak, say Katawan, so nansalita.

¹⁰ Pangaskasiyay kipapasen ko! Akin et impaway ak ni na inak ed sayan mundo? Akin et nianak ak a mikolkol tan misangsangan ed balang sakey diad bansa? Ag ak mampapabayes na kuarta odino ombabayes ed siopaman; balet isasamba ak na balang sakey.

¹¹ Katawan, ontua komun ya amin iray samba ra no ag ta ka nanlingkuran a maung, no ag ko ra impikasid sika nen walay gunigon tan segsegang da. (

¹² Anggapoy siopaman a makapoter ed balatyang, nagkalalod balatyang a nanlapud baybay tan walay lauk ton gansa.)

¹³ Inkuan na Katawan ed siak, Mangibaki ak na saray kalaban a mangibatik ed saray kayamanan tan pinablin kayaryan na saray totook, pian nadusak ira lapud saray ginagawa ran kasalanan ed intiron dalin.

¹⁴ Gawaen ko ran aripen na saray kalaban da diad dalin ya ag da kabat, lapud singa apoy so pasnuk ko tan ondalang ya anggad angga.

¹⁵ Insan inkuanko, Katawan, natatalusan mo. Nunot mo ak pa tan tulongan mo ak. Sika pa lay ombales ed saray mamapairap ed siak. Ag mo la ra aanosan, pian ag da ak napatey. Nunot mo a sikay makasengeg na panaakok na kababaingan.

¹⁶ Nansalita kad siak et dinengel koy amin ya imbagam. Kayaryan mo ak, Katawan a Dios a Makapanyarin-amin, kanyan saray salitam pinano ray pusok na gayaga tan liket.

¹⁷ Ag ko inarap so akiliket-liket tan akielek-elekan ed saray totoo. Lapud impangonur kod saray ganggan mo, nambukbukor ak tan napno ak na pasnuk.

¹⁸ Akin et ag mansamput so paniirap ko? Akin et ag onabig iray sugat ko? Getmam ta ya ekalan ak na biskeg na linawa a singa kolus a nanaekatan no tiagew?

¹⁹ Say Katawan inmebat, No ompawil ka, awaten ta ka, tan magmaliw kan aripen ko lamet. No mansalita kay makana-kana, aliwan say andi-kakanaan, magmaliw kan propitak lamet. Ompawil ed sika iray totoo, tan ag nakaukolan ya onla kad sikara.

²⁰ Diad sarayan totoo pagmaliwen ta kan singa puron gansan padir. Labanan da ka, balet ag da ka natalo. Wala ak a mangyagel ed sika tan mangyarawid sikad kaatapan.

²¹ Iyagel ta kad pakayari na saray maoges tan maruksan totoo. Siak, say Katawan, so nansalita.

16

¹ "Akisalita lamet ed siak so Katawan tan inkuanto,

² "Ag ka mangaasawa odino maniilalak ed sayan pasen.

³ "Ibagak ed sika no antoy nagawa ed saray anak a nianak dia tan saray atateng da.

⁴ "Ompatey irad ambelat a sakit. Anggapoy manermen ed ipatey da, tan ag ira nipompon. Magmaliw a singa taiy ayep ya abunton ed dalin iray bangkay da. Napatey irad bakal, odino ompatey irad eras, tan buagen na saray manok tan saray ayayep ed katakelan iray bangkay da.

⁵ "Ag ka onloloob ed abung a walay maneermen. Ag mo paneermenan so siopaman. Ag ko la bindisionan na kareenan iray totook, odino aroen tan kasian.

⁶ "Ompatey ed sayan dalin iray mamayaman tan saray mairap-bilay, balet anggapoy manermen odino mangipompon ed sikara. Anggapoy manggerger na laman odino mangiskis na olo to a pangipanengneng toy paneermen to.

⁷ "Anggapoy mirongon mangan odino oninom ed siopaman pian ligliwaen tod impatey na inaro tod bilay. Anggapoy mangipanengneng na abagey tod siopaman anggan diad toon naandi so ina o ama to.

⁸ "Ag ka onloloob ed abung a kawalaay totoon manliliket. Ag ka mirorongod sikaran mangan odino oninom.

⁹ "Dengel kad siak a Katawan a Makapanyarin-amin, say Dios na Israel, ed nepeg kon ibaga. Patondaen ko ray tanul na likeliket tan gayaga, tan say sayaksak na saray nubio tan saray nubia ed sayan pasen. Saray totoo dia mambilay ira ya anggad pakanengneng dan nagawa ya.

¹⁰ No ibagam ed saray totoo ira yan bengatla, tepeten dad sika no akin et ginetmak lan dusaen ira a mapalalo. Tepeten da no antoy kaogsan da tan no antoy kasalanan da ed Katawan a Dios da.

¹¹ Insan mo ibagad sikara a say Katawan inkuanto, Saray lalaki yo inkaindan da ak tan nanlingkur tan angigalang irad arum a diriyos. Inkaindan da ak tan ag da inonur iray bangat ko.

¹² Balet mapalalo nin maoges so ginawa yo nen saray lalaki yo. Amin yo et anawet so puso yo tan maoges kayo, tan ag kayo ontoluk ed siak.

¹³ Kanyan ibantak ta kayod dalin ya ag yon balut kabat tan saray lalaki yo. Diad agew tan labi, diman kayo manlingkur ed saray arum a diriyos, tan ag ta kayo kasian.

¹⁴ Say Katawan kuanto, Onsabiy panaon ya anggapoy toon mansamba ed siak a mabilay a Dios ya angipaway ed dalin na Egipto ed saray totood Israel.

¹⁵ Ingen mansamba rad siak a mabilay a Dios ya angipaway ed saray totood Israel manlapud dalin ed baybay tan manlapud amin a bansan angikaykayatan kod sikara. Ipawil ko rad dilin bansa ra, say dalin ya inter kod saray lalaki ra. Siak, say Katawan, so nansalita.

¹⁶ Say Katawan kuanto, Mangibaki ak na saray amayamay a sumisigay a mangerel ed sarayan totoo. Insan mangibaki ak na saray amayamay ya umaanup a manganup ed sikara diad palandey tan pokdul, tan anggan diad saray abut ed saray ankakabaleg a bato.

¹⁷ Nanenengneng koy amin a gagawaen da. Anggapoy antokaman ya akaamut ed siak; ag makapaliis ed pakanengneng ko iray kasalanan da.

¹⁸ Mamidway belat so dusan iter kod sikara, lapud kasalanan tan kaogsan da; dinotakan day dalin ko na saray talintaon anggapoy bilay a singa bangkay, tan pinano ra na saray tila-tilan diriyos.

¹⁹ Katawan, sika so mangyaagel ed siak, tan mangiiter na biskeg ko; tutulongan mo ak no panaon na gunigon. Onlad sika ray bansan nanlapud nandoroman sokung na mundo tan ikuanda, Tila-tilan diriyos labat so walad saray lalaki mi; anggapo lay arum no ag ta saray andi-kakanaan a talintaoy diriyos.

²⁰ Makagawa kasi na saray dili ton diriyos so sakey a too? Andi! Say nagawa to aliwa ran peteg a diriyos.

²¹ Kanyan sirin, kuay Katawan, maminsan tan duga la, ipaamtak ed sikara so pakayarik tan say biskeg ko; naamtaan da a siak so Katawan.

17

¹ "Say Katawan kuanto, Totood Juda, insulat na balatyang a lapis so kasalanan yo; intatak na maotuk a diamanti ed kapusoan yo, tan nikorti ed saray sokung na saray altar yo.

² "Saray totoom et mangigagalang ira diad saray altar tan saray tanda a nipaalagey para si diosan Ashera diad abay na masalumpapak a kiew, diad toktok na saray pokdul,

³ "tan diad toktok na saray palandey ed maawang a dalin. Pasamsam kod saray kalaban yo iray kayamanan tan saray mabmablin kayaryan yo lapud amin a kasalanan a ginagawa yo ed intiron mundo.

⁴ "Napasoot kayon mangikban na dalin ya inter kod sikayo. Pagmaliwen ta kayon aripen na saray kalaban yo diad dalin ya ag yo kabat, lapud say pasnuk ko et singa apoy, tan ondalang ya anggad angga.

⁵ "Say Katawan kuanto, Dusaen koy toon onarawid siak, tan manmatalek ed too, tan diad biskeg na saray ompatey a totoo.

⁶ "Sikatoy singa abeban kiew ed kabueran ya ontutubod andi-kakanaan amagan dalin, diad maasin a dalin ya anggapoy tanaman a mabilay; anggapoy antokaman a maabig a nagawad sikato.

⁷ "Balet bindisionan koy toon manmatalek tan manisiad siak.

⁸ "Sikatoy singa kiew a nitanem ed abay na kolus tan ipapasabi tod danum iray lamut to. Ag antakot no onsabiy tiagew, ta mansiansian birdi ray bolung to; anggapoy pagpaga to no ag onoran; ag ontonda a mambunga.

⁹ "Siopay makatalus ed puso na too? Anggapoy ontalona ed panamalikdo to; ag onabig so sakit to.

¹⁰ Siak, say Katawan, sokayan ko ray kanunotan tan suboken ko ray puso da ray totoo. Tumangan ko so balang too onung na panagbilay to, onung na gagawaen to.

¹¹ Say toon masaol ed kuarta singa manok a poposnakan to ray ag to iniknol. Diad kabisbiskegan to nabalang toy kayamanan to, tan diad kaonuran sikatoy sakey a makulang-kulang.

¹² Singa mapagalang a trono so Timplo tayo; nanlapud gapo manalalagey ed toktok na sakey a palandey.

¹³ Katawan, sika so ilalo na Israel; nabaingan ya amin iray mangikaindan ed sika. Naandipat iran singa saray ngaran a nisulat ed dabuk, lapud inkaindan da ka, say Katawan, say sobul na ambetebetel a danum.

¹⁴ Katawan, tambal mo ak pa, et sigput ak ya onabig; iyagel mo ak, et sigput ak a nilaban. Sika so idadayew ko!

¹⁵ Saray totoo kuandad siak, Iner so kawalaan na saray taktakot na Katawan sumpad sikami? Pagawam la ra natan ed sikato!

¹⁶ Balet, Katawan, ag ta kan balut tinanggoyur a mangyakar na deral ed sikara; ag ko anggan nampilalekan ya onsabiy panaon na gunigon ed sikara. Katawan, kabat mo ya; amtam no antoy imbagak.

¹⁷ Ag mo ak pa tataktakoten; no onsabiy gunigon, sikay salimbengan ko.

¹⁸ Ipelag mo pad kababaingan iray mamapairap ed siak, balet ipaliis mo ak pa, Katawan. Patakot mo pa ra, balet ag mo ak tataktakoten. Iyakar mo pad sikaray deral tan mekmek mo ra.

¹⁹ Inkuan ed siak na Katawan, Jeremias, laka ta ibawag mo ray salitak diad Puirta na Totoo, a sikatoy puirtan dadalanen na saray ararid Juda no onloob odino ompaway irad siudad; insan ka onlad arum nin puirta na Jerusalem.

²⁰ Ibagam ed saray arari tan amin a totood Juda tan amin a taga Jerusalem ya onloloob irad saraman a puirta, ya ondengel irad salitaen ko.

²¹ Ibagam ed sikara a no inaro ray bilay da, ag ira mansasakbat na antokaman no Agew na Panagpainawa; ag ira manawit na bengatlan idalan dad saray puirta na Jerusalem,

²² odino manaawit na antokaman ya ipaway dad saray abung da no Agew na Panagpainawa. Ag ira nepeg a mankimey no Agew na Panagpainawa; ngilinan dan sakey a masanton agew, onung na ingganggan kod saray lalaki ra.

²³ Ag dinmengel odino angasikaso ed siak iray lalaki ra. Ingen nagmaliw iran anawet a puso; ag ira ononur ed siak odino manaral ed siak.

²⁴ Ibagam ed sarayan totoo a nepeg dan onuren iray amin a ganggan ko. Ag ira nepeg a manawit na antokaman ya idalan dad saray puirta na sayan siudad no Agew na Panagpainawa. Nepeg dan ngilinan a masanton agew so Agew na Panagpainawa tan ag iran balut manggagawa na antokaman a kimey.

²⁵ No onuren da ra ya, onloob ed puirta na Jerusalem iray arari tan saray pangulo ra tan walay pakayari ran singa samay pakayari nen Ari David. Kaiba da ray totood Juda tan Jerusalem, a mankarwahi tan mankabayo ra, tan nawalaan lawas na saray totoo so siudad na Jerusalem.

²⁶ Onsabi ray totoo a manlapud saray baley na Juda tan saray bario ed kaliber-liber na Jerusalem; manlapu rad dalin na Benjamin, diad saray alusadsar na saray pokdul, diad saray kapalandeyan, tan diad abalaten na Juda. Mangawit irad Timplok na saray bagat a popoolan tan saray isasaklang, saray bagat a trigo tan insinso, tan saray bagat a pangiter na pisasalamat.

²⁷ Balet nepeg ya onuren da ak tan ngilinan da a masanton agew so Agew na Panagpainawa. Ag ira nepeg a mangawit na antokaman ya idalan dad saray puirta na Jerusalem ed satan ya agew, ta no mangidalan ira, poolan ko ray puirta na Jerusalem. Temeken na pool iray palasio na Jerusalem, tan anggapoy makasebseb.

18

¹ "Inkuan na Katawan ed siak,

² "Lakad abung na manggaway banga, ta iparengel kod man ed sikay salitak.

³ "Kanyan linma ak diman tan anengneng kon mankikimey ed dalig to may managgaway banga.

⁴ "Kapag naaliwa so bangan kikimeyan to, alaen to may damili tan gawaen ton sananey ya ikakana.

⁵ "Insan inkuan na Katawan ed siak,

⁶ "Ag ko ta nagawaan ed sikayo, totood Israel, so singa samay ginawa na manggaway banga ed damili? Bebembenan ta kayod limak a singa pambebemben na managgaway banga ed damili.

⁷ "No diad anggan anton panaon ikuankon baguten, ibasig, odino deralen koy dinanman a bansa o nanarian,

⁸ "balet kabebekta saman a bansa et ikaindan toy kaogsan to, omanen koy imbagak a kanunotan kon gawaen ed saman a bansa.

⁹ "Balet no ikuankon iletneg odino ipaalagey koy dinanman a bansa o nanarian,

¹⁰ balet kabebekta saman a bansa et manggaway kaogsan, omanen koy imbagak a kanunotan ko a gawaen ed saman a bansa.

¹¹ Natan sirin, ibagam ed saray totood Juda tan saray taga Jerusalem a walay getmak a sumpaen ira tan ipaparaan koy panusak ed sikara. Ibagam ed sikara a tondaan da lay maoges a panagbilay dasalatan da lay kabibilay da tan bengatlan gagawaen da.

¹² Say iyebat da, Andi! Akin ey? Paaweten mi so puso mi tan gawaen miy maoges onung na kaliktan mi!

¹³ Say Katawan kuanto, Tepet mod balang bansa: Wala lay agawan singa onya nen saman? Nanggaway makapasinagem a bengatla iray totood Israel!

¹⁴ Nanaandian ta na yilo iray mabaton niatagey a pasen ed Libano? Nanaekatan kasi ray ambetel a kolus ed palandey to?

¹⁵ Balet nilingwanan ak na saray totook; mampopool iray insinso ed saray talintaoy diriyos. Niparokul irad dalan a nepeg dan dalanen, ag da la dadalanen iray gendat a dalan; ondadalan irad saray dalan ya anggapo ray tanda.

¹⁶ Ginawa ran makapataktakot yan dalin, a nabalaw ya anggad angga. Nataktakot ya amin iray ondalan, lapud saray nanengneng da; ipeyeng-peyeng day olo rad pankelaw da.

¹⁷ Ikaykayat kod arap na saray kalaban da iray totook, a singa ra dabuk ya insiplug na dagem a nanlapud bokig. Ibeneg ko ra tan ag ko ra tulongan no onsabiy deral.

¹⁸ Insan inkuan na saray totoo, Pankokomplutan tayo lay Jeremias! Wala ray paparin mangibangat ed sikatayo, saray makabat a totoon manimbawad sikatayo, tan saray propitan mangibaga na salitay Katawan. Akusaen tayo, tan tondaan tayo lay ondengel ed ibabaga to.

¹⁹ Kanyan nampikasi ak, Katawan, dengel mo pay ibabagak, tan dengel mo no antoy ibabaga da ray totoo nipaakar ed siak.

²⁰ Kaogsan ta so tumang na kamaungan? Balet angotkot iray abut a kapelagan ko. Nunot mo a sinmingger ak ed sika tan insalitaan ko ra nipaakar ed sikara, pian onkepa so pasnuk mod sikara.

²¹ Balet natan, Katawan, gawam pan ompatey ed eras iray anak da; ipapatey mo pa rad bakal. Iyabuloy mo pan nabalo ray bibii tan naandid mundo ray anak da; gawam pan ompatey ed salot iray lalaki, tan diad bakal iray lalakin walad kalangweran.

²² Mangibaki ka pa na olup da ray totoon bigla-biglan mangakokos ed logan na saray kaabungan da; paeyag mo rad takot. Angotkot iray abut a kapelagan ko, tan angyan iray patit a pangerel dad siak.

²³ Balet, Katawan, amtam so pankokomplut dan pamatey ed siak. Ag mo pa pipirdonaen so kaogsan da; ag mo poponasen so kasalanan da. Ipatombam ira diad katalo ra; dusam ira legan a mamapasnuk ka.

19

¹ "Imbagad siak na Katawan ya onla ak a manaliw na banga. Imbaga tod siak a manawag ak na pigaran mamasiken na saray totoo tan pigaran mamatakken a papari,

² "ta itagar ko rad patar na Ben-hinnom diad kapaway na Puirta na Langa. Diman ko ipulong so salita na Katawan ya iter tod siak.

³ "Imbagad siak na Katawan ya ikuanko, Dengel kayo, arari na Juda tan sikayon totood Jerusalem, ed labay kon ibaga, siak a Katawan a Makapanyarin-amin a Dios na Israel. Mangyakar ak ed sayan pasen na deral, et onkaningking so layag na balang sakey a makadngel ed sayan deral.

⁴ "Gawaen ko ya, lapud inkaindan ak na saray totoo tan dinotakan da yan pasen diad impangibabagat da dia ed saray arum a diriyossaray diriyos ya ag da kabat, sikara, saray lalaki ra, o saray ararid Juda. Sayan pasen dinelap da na dala da ray anggapoy kasalanan a totoo,

⁵ "tan nampapaalagey iray altar a para si Baal, pian makapampool ira na saray anak dan isaklang a bagat a popoolan. Ag ko ya ingganggan ed sikara; ag balut anggan sinmibang ed kanunotan ko.

⁶ "Kanyan sirin, onsabiy panaon a sayan pasen et ag la natawag na Tofet odino Patar na Hinom. Ingen natawag a Patar na Panagpateyan.

⁷ "Diad sayan pasen deralen kon amin iray plano na saray totood Juda tan Jerusalem. Panaloen kod sikara iray kalaban da tan pateyen ko rad bakal. Iter kon buagen na saray manok tan saray ayayep ed katakelan iray bangkay da.

⁸ "Iyakar kod sayan siudad so onyan makapasinagem a deral pian balang sakey ya ondalan et natalagnaw tan nikelawan.

⁹ "Lakoben na saray kalaban da yan siudad tan pateyen da ray totoo to. Makapasinagem a tuloy yan panlakob, kanyan saray totoo kanen da ray anggan anak da tan manaakanan ira.

¹⁰ Insan imbagad siak na Katawan ya ibetag kod arap na saray totoon akilad siak imay banga,

¹¹ tan ibagak ed sikara a say Katawan a Makapanyarin-amin inkuanto, Betagen ko ra yan totoo tan sayan siudad a singa pametag ed sakey a banga pian ag lan balut natoop. Saray totoo ipompon da anggan diad Tofet iray inaatey da lapud anggapoy arum a pasen a pangipomponan.

¹² Isisipan ko a gawaen kon singa Tofet yan siudad tan saray manaayam diman.

¹³ Magmaliw a marotak a singa Tofet iray kaabungan ed Jerusalem tan saray kaabungan na saray ararid Juda, tan saray kaabungan a diad saray toktok da so nampopoolan na saray insinson para saray bitewen, tan diman met so angibungan na saray iinomen a bagat ed saray diriyos.

¹⁴ Insan tinaynan koy Tofet ya angibakian na Katawan ed siak a pangibawagan koy salita to. Linma ak a nanalagey ed patio na Timplo tan imbagak ed amin a totoo

¹⁵ a say Katawan a Makapanyarin-amin a Dios na Israel et inkuanto, Iyakar ko lad sayan siudad tan diad amin a kaliber-liber to ran baley iray amin a dusan imbagak a gawaen ko, lapud anawet so puso yo tan ag kayo ondengel ed ibabagak.

20

¹ "Nen si Pasur a lakin anak nen Imer a pari tan manonan opisyal na Timplo et nadngel to ak a mangibabawag ed sarayan bengatla,

² "impapasiplatan to ak insan to ak impaigolunggulong ed abay na Puirta nen Benjamin diad Timplo.

³ "Diad kaimbuas, nen impaokbaran ak la nen Pasur, inkuankod sikato, Aliwan Pasur so impangingaran na Katawan ed sika. Initdan to ka na ngaran a Makapataktakot ed Anggan Iner a Pasen.

⁴ "Ta say Katawan inkuanto, Gawaen ta kan makapataktakot ed sikan dili tan diad saray kakaarom, tan nanengneng mo ran amin a pateyen ed ispada na saray kalaban da. Ipasilong kod pakayari na ari na Babilonia iray amin a totood Juda. Pateyen to ray arum ed sikara tan saray arum awiten to ran adakep ed Babilonia.

⁵ "Ipasamsam kod saray kalaban da iray amin a kayamanan ed sayan siudad, tan alaen da ray amin a kayaryan to, anggan saray kayamanan na saray ararid Juda, tan awiten da ran amin ed Babilonia.

⁶ "Nipaakar ed sika, Pasur, tan amin da ray kabyangay pamilyam, nadakep tan niakar kayod Babilonia. Ompatey tan nipompon kayod man ya amin a pati amin a kakaarom a tinitilaan mo.

⁷ "Katawan, pinalikdo mo ak, tan siak so apalikdo. Mabiskeg ka ni nen say siak, kanyan tinalo mo ak. Luludlureyen ak na balang sakey; eelek-elekan da ak lawas.

⁸ "Kapag mansalita ak, manakis ak, tan iyeyag ko, Duksa! Deral! Katawan, siak lawas so naluludlurey tan nababalaw-balaw, lapud ibabawag koy salitam.

⁹ "Balet no kuanko, Lingwanan koy Katawan, tan ag ak la mansalita ed ngaran to, say salitam ed satan singa apoy ya ondadalang ed pusok; kinmetket la rad saray pokel ko. Gagawaen koy anggaay nayarian kon pokpokan, balet ag ko la nayarian.

¹⁰ Narerengel koy paneesaesan na saray karaklan, Makapataktakot ed anggan iner a pasen! Kanyan idalem tayod saray makankanepegan! Anggan saray kakaarok a malet aalagden day kapelag ko. Angangko nayarin palikdoen, kuanda; naerel tayo sirin tan makabawi tayo.

¹¹ Balet wala ka, Katawan, ed diking ko, mabiskeg tan makapanyari ka, tan natumba ray mamapasegsegang ed siak; ag da ak balut taloen. Andi-anggaan so pakapelag dad kababaingan lapud ag ira manalo. Ag balut nalingwanan so pakapelag dad kababaingan.

¹² Balet, Katawan a Makapanyarin-amin, maptek so panusubok mod saray totoo; amtam no anto ray walad puso tan kanunotan da. Iyabuloy mo pan nanengneng koy ibawim ed saray kalaban ko, ta impalimak ed sika so kipapasen ko.

¹³ Mankanta kayod Katawan! Igalang yoy Katawan! Iyaagel to ray napapairap ed pakayari da ray maoges a totoo.

¹⁴ Nisamba komun so agew na inkianak ko! Lingwanan yoy agew ya impangyanak ed siak na inak!

¹⁵ Nisamba komun so lakin pinaliket toy amak, nen imbawag tod amak so balita, Laki! Laki so anak mo!

¹⁶ Niolibay komun iman a too ed saray siudad ya andi-panangasin dinederal na Katawan. Makarengel komun iman a too no kabwasan na saray akis no paniirap, tan no kaagewan say eyag na para bakal,

¹⁷ lapud ag to ak pinatey nen wala ak nid dalem na eges nen inak. Eges nen inak la komun ed satan so lobuk ko, tan ag ak la komun nianak.

¹⁸ Akin et nianak ak? Pian kasi manirap ak labat tan manermen ak labat tan mansamput ed kapelag ed kababaingan so bilay ko?

21

¹ "Si Ari Sedekias na Juda imbaki tod siak si Pasur a lakin anak nen Malakias tan si Sofonias, say pari a lakin anak nen Maasias ta impakerew to;

² "Isalitaan mo kami pa ed Katawan, ta babakalen kami nen Ari Nabucodonosor na Babilonia. Angangko manggawa para sikatayo na sakey ed saray milagro to, tan pasooten ton paseneren si Nabucodonosor.

³ "Insan akisalitay Katawan ed siak, tan imbagak ed saramay totoon nibakid siak

⁴ "ya ibaga rad kinen Sedekias a say Katawan a Dios na Israel kuanto, Sedekias, taloen ko ray sondalom a pilalabanen mo sumpad ari na Babilonia tan saray sondalo to. Ibunton kod pegley na siudad iray armas yo.

⁵ "Siak a dili so onlaban ed sikayo diad intiron biskeg ko, pasnuk ko, petang na olok, tan sanuk ko.

⁶ "Pateyen ko so balang sakey a manaayam ed sayan siudad; ompatey ed makapataktakot a salot iray amin a totoo tan ayayep.

⁷ "Balet sika, saray opisyal mo, tan saray totoon ag inatey ed bakal, eras, tan salot et ipadakep ta kayon amin ed Ari Nabucodonosor tan saray kalaban yo a malabay a mamatey ed sikayo. Papatey to kayo nen Nabucodonosor. Anggapoy ikera tod sikayo; ag to kasian odino abageyen so siopaman ed sikayo. Siak, say Katawan, so nansalita.

⁸ "Insan imbaga na Katawan ed siak ya ikuankod saray totoo, Dengel kayo! Siak, say Katawan, itdan ta kayoy pankanawnawan mampili ed dalan a mamaarap ed bilay odino dalan a mamaarap ed patey.

⁹ "Siopamay manayam ed dalem na siudad ompatey ed bakal, eras, odino salot. Balet siopamay ompaway tan onsukod saray taga Babilonia, ya ondodogpa ra natan ed siudad et ag ompatey. Say bilay da labat so nayarian dan iyagel.

¹⁰ Ginetmak la ya ag ko iyagel yan siudad, no ag ta deralen ko. Nipalima ed ari na Babilonia tan poolan ton temeken. Siak, say Katawan, so nansalita.

¹¹ Imbagad siak na Katawan ya ikuankod saray manoley ed Juda, saray kabyangay boleg nen Ari David, ira yan salita, Dengel kayod ibagak, siak a Katawan. Ipakana yon inagew-agew so katonungan. Iyagel yoy toon nasasaol ed lima na manasaol ed sikato. No ag yo ya gawaen, saray maoges a gagawaen yo papetangen day olok tan onliub a singa apoy ya ag naerep.

¹²

¹³ Sika, Jerusalem, manyodyorung kad pasen ya atagey nen saray patar, a singa baton-dampay ya atagey nen say palanas a dalin. Balet, siak, say Katawan, labanan ta ka. Ibabagam ya anggapoy makadogpa ed sika odino makaloob ed kawalaan mo.

¹⁴ Balet, dusaen ta ka lapud ginawam. Poolan koy palasiom, tan say apoy temeken to met ya amin iray walad kaliber-liber to. Siak, say Katawan, so nansalita.

22

¹ "Imbagad siak na Katawan ya onla ak ed palasio na ari na Juda, say kabyangay boleg nen David, tan ibagak diman ed ari, saray opisyal to, tan saray totood Jerusalem ya ondengel irad inkuan na Katawan:

²

³ "Siak, say Katawan, igaganggan kod sikayo a manggawa kayoy kaptekan tan katonungan. Iyagel yoy toon nasasaol ed lima na manasaol ed sikato. Ag yo panggagawaay makapoy o papairapen iray sangkaili, saray olila, odino saray balon bibii; ag yo papateyen ed sayan masanton pasen iray totoon anggapoy kasalanan.

⁴ "No sumpalen yo ray ingganggan kod sikayo, mansiansian ari iray kabyangay boleg nen David. Sikarad satan, saray opisyal da tan saray totoo ra et ituloy day ondalan ed saray puirta na sayan palasio ya akakarwahi tan akakabayo ra.

⁵ "Balet no ag yo onuren iray salitak, sambaan kod sikayo a nageba yan palasio. Siak, say Katawan, so nansalita.

⁶ "Para say siak say palasiod Juda et marakep a singa dalin na Galaad tan kaparpara na Saray Palandey na Libano; balet pagmaliwen kon kalawakan ya anggapoy toon manaayam.

⁷ "Mangibaki ak na totoon manderal ed sayan palasio. Awiten dan amin iray wasay da, batangen da ray balibalin lusek a sidro, insan da ra ibontuk ed apoy.

⁸ "Ag mabayag amayamay iray taga arum a bansa ya ondalan tan mantetepetan ira no akin et siak, say Katawan, ginawak so onya ed sayan matalonggaring a siudad.

⁹ "Insan onebat ira a say makasengeg et say impangikaindan yoy impisipanan yod siak a Dios yo, tan say impangigalang tan say impanlingkur yod saray arum a diriyos.

¹⁰ Totood Juda, ag yo aakisan si Ari Josias, odino eermenan so impatey to. Balet akisan yoy ampaipait si Joacaz a lakin anak to; aawiten dad arawin pasen tan ag lan balut makapawil; ag to lan balut nanengneng so dalin ton nianakan.

¹¹ Say Katawan kuanto nipaakar ed kinen Joacaz a lakin anak nen Josias, a sikatoy sinmalat ed kinen ama to a manari ed Juda, Tinmaynan ed sayan pasen tan ag lan balut ompawil.

¹² Ompatey la ed bansa ya angyakaran dad sikato, tan ag to lan balut nanengneng yan dalin.

¹³ Pakaskasi so toon mangipapaalagey na abung diad panamegley na aliwan matonung a polaing, tan papabalegen to diad panamegley na panagsaol; ya anggapoy nagunggona na saray pankikimeyen ton kadalaan to, ta ag to iiter iray upa ra.

¹⁴ Pakaskasi so toon mangikuan, Mamaalagey ak na baleg ya abung, a wala ray maawang a kuarto tod tagey. Kanyan ininan to na saray bintana imay abung to, diningding to na tablan sidro, tan pinintaan to na ambalanga.

¹⁵ Magmaliw ka sirin a maung ya ari lapud tablan sidro iray inkanam ed abung mo tan marakep ni nen saray arum? Nagnap a bilay so nanliketan nen amam. Maptek tan matonung lawas so impanbilay to, kanyan inmaligwas ed amin a ginagawa to.

¹⁶ Maptek so impanalaysay tod saray mairap-bilay, tan maung so nansumpalan na amin a bengatla. Sikato yay kabaliksan na pakapikabat ed Katawan.

¹⁷ Balet, sika, anggapoy arum a pampipilalekan mo no ag say pankaabigan mon dili; papateyen mo ray anggapoy kasalanan, tan maruksay pamapairap mod saray totoom. Say Katawan so nansalita.

¹⁸ Kanyan sirin, say Katawan kuanto nipaakar ed lakin anak nen Josias a si Joakim ya ari na Juda, Anggapoy manermen ed ipatey to, odino mangikuan, Agayla agik! Agayla! O pinablik ya ari! Anggapoy onakis ed sikato, odino oneyag, Katawan ko! O kagalang kon arik!

¹⁹ Singa kipompon na sakey ya asno so kipompon to, sikatoy nigayugoy tan nibantak ed paway na saray puirta na Jerusalem.

²⁰ Totood Jerusalem, kalab kayod Palandey na Libano tan eyag kayo, laka yod dalin na Basan tan mankolyaot kayo; eyag kayon manlapud saray palandey na Moab, ta atalo lan amin iray kagampi yo.

²¹ Nansalita so Katawan ed sikayo nen maaligwas so kipapasen yo, balet ag kayo dinmengel. Onya so ginawa yo nanlapu la nen wala ki nid kalangweran; ag kayon balut ononur ed Katawan.

²² Isiplug na dagem iray pangulo yo, nadakep a prisod bakal iray kagampi yo, napelag ed kababaingan so siudad yo tan nabaingan, lapud saray amin a maoges a ginagawa yo.

²³ Maimeng kayon manaayam ed saray abung a ginawad tablan sidro a nanlapud Libano, balet pangaskasiyay kipapasen yo no dapoan kayoy kairapan, a singa kairapan a liliknaen na biin mampapasakit.

²⁴ Inkuan na Katawan ed lakin anak nen Joakim a si Joakin ya ari na Juda, Legan a siak so mabilay a Dios, ekalen ta ka anggaman a sika so singsing a panagtimbri diad gamet ko,

²⁵ insan ta ka iter ed saray malabay a mamatey ed sika, saray totoon tatakotan mo. Ipalima ta kad Ari Nabucodonosor na Babilonia tan saray sondalo to.

²⁶ Ibantak ta ka tan say inam diad ag mo nianakan a bansa, tan diman kayon dua ompatey.

²⁷ Pampilalekan yon nanengneng lamet yan bansa, balet ag ki lan balut makapawil.

²⁸ Inkuanko, Nagmaliw ta lan singa nabtag a banga si Joakin, nibantak tan anggapo lay malabay? Sikato tan so makasengeg no akin et sikato tan saray anak to et nibantak irad dalin ya ag dan balut amta?

²⁹ O dalin, dalin, dalin! Dengel yoy inkuan na Katawan:

³⁰ Sayan laki et asintinsiaan lan nabalang to ray anak to, sakey a lakin ag balut onaligwas. Anggapo ray kabyangay boleg ton manoley ed Juda a kasalat nen David. Siak, say Katawan, so nansalita.

23

¹ "Makapataktakot so isintinsia na Dios ed saray manoley a manederal tan mangikakayat ed saray totoo to.

² "Sikato yay kuan na Katawan a Dios na Israel nipaakar ed saray manoley a sikara komuy angasikasod saray totoo to, Intaytayak yo ray totook tan pinataynan yo ra; ag yo ra inasikaso. Dusaen ta kayo natan lapud saray maoges a ginagawa yo.

³ "Tiponen ko ray totook ya akeraan manlapud saray bansan angikay-kayatan kod sikara, tan ipawil ko rad dilin dalin da. Nawalaan iray amayamay ya anak tan ondakel so bilang da.

⁴ "Manoro ak na saray manoley a manasikasod sikara. Ag la rad satan ontakot odino nataktakot, tan anggapod sikaray nabalang. Siak, say Katawan so nansalita.

⁵ "Say Katawan kuanto, Onsabiy panaon a mamili ak na ari a matonung a kabyangay boleg nen David. Sayan ari manoley a sikakabat tan gawaen tod intiron dalin so katonungan tan kaptekan.

⁶ "No sikato so ari, arawid kaatapan iray totood Juda, tan mambilay ed kareenan iray totood Israel. Natawag na, Say Katawan a Kilalaban tayo.

⁷ "Onsabiy panaon, kuay Katawan, a saray totoo et ag la ra mansamba a kuanda, Nitay mabilay a Dios ya angipaway ed dalin na Egipto ed saray totood Israel.

⁸ "Ingen mansamba ra a kuanda, Nitay mabilay a Dios ya angipaway na saray totood Israel ed baybay a bansa tan angipaway met ed sikara ed saray amin a bansa ya angikayatan tod sikara. Insan irad satan manayam ed dilin dalin da.

⁹ "Nalmay so pusok, tan manggiwgiw ak. Lapud Katawan, lapud saray matonung a salita to, singa ak toon abuek, sakey a toon mapalaloy nainom ton alak.

¹⁰ Say dalin napno na saray totoon aliwan matoor ed Katawan; nambilay iran maoges tan andi-kakanaay impangikana rad pakayari ra. Lapud impangisamba na Katawan nagmaliw a maneermen so dalin tan amagaan iray pastolan.

¹¹ Say Katawan kuanto, Anggapoy Dios da iray propita tan saray papari; apesgaan ko ran manggagaway kaogsan ed dalem na Timplo.

¹² Andanglel tan ambilonget so dalanen da; pakaronyasen tan patumbaen ko ra. Iyakar kod sikaray deral; onsasabiy panaon na kadusa ra. Siak, say Katawan, so nansalita.

¹³ Anengneng koy kasalanan na saray propitad Samaria; nampropisiya rad ngaran nen Baal, tan imbalang da ray totook ya Israelita.

¹⁴ Balet lalon maoges so anengneng kon gagawaen na saray propitad Jerusalem: mikakaloguran ira tan mantitila ra; tutulongan dan manggawa na makapoy iray totoo, kanyan anggapoy ontondan manggaway kaogsan. Para say siak, singa ra Sodoma; say kaogsan da singa kaogsan na saray totood Gomorra.

¹⁵ Kanyan sirin, siak, say Katawan a Makapanyarin-amin, kuanko nipaakar ed saray propita ed Jerusalem: Pakanen ko ray ampait a tanaman, tan painomen ko ra na samal a danum, lapud inkayat dad intiron dalin so kaogsan.

¹⁶ Say Katawan a Makapanyarin-amin kuantod saray totood Jerusalem, Ag yo dedengelen so ibabaga na saray propita, ta iitdan da kayo labat na saray maapan ilalo. Ibabaga ra labat ed sikayo iray walad kanunotan da, aliwan saray imbagak.

¹⁷ Ibabaga ra lawas ed saray totoo ya ag ondedengel na saray salitak, a maung ya amin so pansumpalan da. Ibabaga rad balang sakey ya anawet so puso to ya ag balut nadiwit na deral.

¹⁸ Inkuanko balet, Anggapod sarayan propita so akapikabat ed niamut a kanunotan na Katawan. Anggapod sikaray akadngel odino akatalus ed salita to odino dinmengel o angasikaso ed imbaga na Katawan.

¹⁹ Singa bagyo so pasnuk to, singa makmaksil ya alimbusabos ya ombasig ed kaolowan da ray totoon maoges,

²⁰ tan ag ontonda ya anggad nasumpal toy labay ton gawaen. Diad saray agew ya onsabi natalutalusan ya na saray totoo to.

²¹ Say Katawan inkuanto, Ag ko imbaki ira yan propita, balet linma ran siansia. Nampropisiya ra ed ngaran ko anggaman ya anggapoy sinalitak ed sikara.

²² No akabatan da ray niamut a kanununotan ko, ayarian da komun ya impulong so salitak ed saray totook tan atanggoyur da ran mangibeneg ed saray maoges a panagbilay da tan saray maoges a gagawaen da.

²³ Siak so sakey a Dios a kawalaan toy amin a pasen, aliwan saksakey a pasen labat.

²⁴ Anggapoy toon makaamut ed pasen ya ag kod man nanengneng. Ag yo ta amta a kawalaan koy amin a pasen ed tawen tan diad dalin?

²⁵ Amtak so imbabagbaga na saraman a propita a nampropropisiya na tila ed ngaran ko tan ipapapasen da a walay sinalitak ed sikara diad panamegley na saray kogip da.

²⁶ Kapigan kasiy itonda na sarayan propita ed pamalikdo rad saray totook diad panamegley na dilin tila ra?

²⁷ Abaloan da a diad panamegley na saray ibabaga ran kogip et lingwanan ak na saray totoo, a singa impangilingwan ed siak na saray lalaki ra tan impanlingkur dad kinen Baal.

²⁸ Say propitan walay kogip to nepeg ton ibaga a sakey labat a kogip, balet say propitan walad sikatoy salitak nepeg a matoor ton ipulong. Antoy piparaan na dayami ed ilik?

²⁹ Singa apoy so salitak, tan singa mantilyon manmekmek na saray bato.

³⁰ Sumpa ak ed saray propitan ikana da ray salita na kapara ran propita, insan da ipasen a salitak ira.

³¹ Sumpa ak met ed saray propita a salitaen da ray dilin salita ra, insan da ipasen a nanlapud siak ira yan salita ra.

³² Dengel yo so ibabagak, siak a Katawan! Sumpa ak ed saray propita a mangibabaga na saray kogip da a napnoy tila. Ibabaga da ra yan kogip da tan ibabalang da ray totook diad panamegley na saray panagtila ra tan panagpasirayew da. Ag ko ra imbaki odino ingganggan ya onla. Anggapon balut so nayarian dan itulong ed saray totoo. Siak, say Katawan, so nansalita.

³³ Say Katawan inkuantod siak, Jeremias, no say sakey ed saray totook odino sakey a propita odino sakey a pari et tepeten tod sika, Anto so papaibaga na Katawan? ibagam ed sikato, Sakey ka a makabelbelat ed Katawan, kanyan ibantak to ka.

³⁴ No walay sakey a propita, odino sakey a pari, odino sakey ed saray totook so mangikana na sarayan salita, Say makabelbelat ed Katawan, dusaen ko tan say pamilya to.

³⁵ Ingen say nepeg a tepeten na balang sakey a too ed saray kakaaro tan saray kakanayon to saya, Antoy inebat na Katawan? Antoy imbaga na Katawan?

³⁶ Kanyan ag da la nepeg ya ikana ira yan salita, Say makabelbelat ed Katawan, ta no walay mangikana, pansakbaten kon tua na ambelat. Saray totoo pinikewet da ray salita na Dios da, say mabilay a Dios a Katawan a Makapanyarin-amin.

³⁷ Jeremias, tepet mod saray propita, Antoy inebat na Katawan ed sikayo? Antoy imbaga na Katawan?

³⁸ No ag da onuren so ganggan ko, ta ikana ra yan salita, say makabelbelat ed Katawan, ibagam ed sikara

³⁹ ya andi-duaruwan alsaen ko ra, insan ko ra ibantak ed arawi, sikara tan say siudad ya inter kod sikara tan saray lalaki ra.

⁴⁰ Ipelag ko rad andi-anggaan a kababaingan tan kabandayan ya ag balut nalingwanan.

24

¹ "Si Ari Nabucodonosor na Babilonia inyakar ton adakep ed Babilonia, manlapud Jerusalem, so lakin anak nen Joakim a si Joakin ya ari na Juda, saray pangulo na Juda, tan saray marunong a karpintiro tan kumikimey. Kayari na sayan inkagawa, say Katawan impanengneng tod siak so duaran baskit a bungay igos a niiyan ed arap na Timplo.

² "Samay sakey a baskit nankarga na balibali ran onaan a bungay igos; samay sakey a baskit nankargay aliwaliwan bungay igos ya ag nayarin kanen.

³ "Insan inkuan ed siak an Katawan, Jeremias, antoy nanenengneng mo? Inmebat ak, Bungay igos. Saray balibali et mapalalon balibali, tan saray aliwaliwa et mapalalon aliwaliwa, kanyan ag nayarin kanen.

⁴ "Kanyan inkuan ed siak na Katawan,

⁵ "Siak, say Katawan a Dios na Israel, ipapasen ko a saray totoon niakar ed Babilonia et singa sarayan balibalin bungay igos et kasian ko ra.

⁶ "Asikasoen ko ra tan ipawil ko rad sayan dalin. Iletneg, aliwan temeken, ko ra; itanem, aliwan baguten, ko ra.

⁷ "Itdan ko ra na pilalek a mangamta a siak so Katawan. Diad satan magmaliw iran totook tan siak so Dios da, lapud ompawil irad siak diad intiron puso ra.

⁸ "No panon a sarayan aliwaliwan bungay igos et ag nayari ran kanen, ontan met so gawaen ko, siak a Katawan, ed kinen Ari Sedekias na Juda, saray katambayan tod oley, tan saray arum a totood Jerusalem ya atilak ed sayan dalin odino batik ed Egipto.

⁹ "Iyakar kod sikara yan deral pian ontakot iray amin a bansa ed mundo. Ludlureyen ira na saray totoo, sutil-sutilen da ra, balbalawen da ra, tan ikana ran sakey a samba so ngaran da anggan iner a pasen a pangikayatan kod sikara.

¹⁰ Ipadalan kod sikaray bakal, eras, tan salot anggad anggapoy anggan sakey ed sikara so natilak ed dalin ya inter kod sikara tan saray lalaki ra.

25

¹ "Diad kumapat a taon na panaarid Juda nen Joakim a lakin anak nen Josias, naawat ko so salita na Katawan nipaakar ed amin a totood Juda. (Sikato yay ononan a taon na panaarid Babilonia nen Nabucodonosor.)

² "Inkuankod amin a totood Juda tan Jerusalem,

³ "Diad loob na duamplo tan taloy taon, nanlapu lad kumalabintalon taon na panaarid Juda nen Josias a lakin anak nen Amon ya anggad natan, nansasalitad siak so Katawan tan intutuloy kon imbagad sikayo so sinalita to. Balet ag yo inasasikaso.

⁴ "Ag kayo dinmengel odino angasikaso, anggaman ya intutuloy na Katawan so mangibaki na saray aripen ton propita.

⁵ "Imbabaga rad sikayo a benegan yo ray maoges a panagbilay yo tan kaindanan yo ray maoges a gagawaen yo, pian nayarian yoy manayam ya ando lan ando ed dalin ya inter na Katawan ed sikayo tan saray lalaki yo.

⁶ "Imbaga rad sikayo ya ag kayo mangigagalang tan manlilingkur ed arum a diriyos, tan ag yo pampapasnuken so Katawan diad panamegley na pangigalang yod saray talintaon ginagawa yo. No inonur yo labat so Katawan, ag to kayo la komun dinusa.

⁷ "Balet say Katawan a dili imbaga to a sikatoy ag yo dinengel. Ingen impanpasnuk yo diad panamegley na saray talintaoy diriyos yo, kanyan sikayon dili so nanlapwan na sayan panudusa tod sikayo.

⁸ "Kanyan sirin, lapud ag kayo dinmengel ed sikato, say Katawan a Makapanyarin-amin, kuanto,

⁹ "Tawagen kon amin iray totood baybay tan say aripen kon Ari Nabucodonosor na Babilonia. Pibakalen ko ra sumpad sayan bansa tan amin a manaayam dia tan amin a kaliber-liber ton bansa. Deralen ko ya anggad angga yan bansa tan saray kaabay to, paolyan ko ran aderal-deral ya anggad angga, makapataktakot tan makapasinagem iran nengnengen.

¹⁰ Patondaen ko ray paneeyag dad liket tan gayaga tan saray maliket a tanul ed saray bansal. Naandian ira na larak a para saray lamparaan da tan saray trigo.

¹¹ Magmaliw a bontun na dera-deral yan intiron dalin tan makaptaktakot a nengnengen. Pitomploy taon a panlingkuran na sarayan kakaabay a bansa so Babilonia.

¹² Kayari tod satan dusaen koy Babilonia tan say ari to lapud saray kaogsan da. Deralen ko man a bansa tan paolyan kon aderal-deral ya anggad angga.

¹³ Dusaen ko man a bansa na saray deral ya iyakar kod saray bansa nen akitongtong ak diad panamegley nen Jeremiasamin da ray deral a nisulat ed sayan libro.

¹⁴ Pambayaren ko ray taga Babilonia lapud saray ginagawa ra, et amayamay a bansa tan matalonggaring ya arari so mangaripen ed sikara.

¹⁵ Say Katawan a Dios na Israel inkuantod siak, Nia so kupa na alak a napnoy pasnuk ko. Alam ta ipainom mod saray bansan pangibakian kod sika.

¹⁶ No inomen da, mandongilngil ira tan naderal so olo ra lapud bakal a padalanen kod sikara.

¹⁷ Kanyan inalak ed lima na Katawan imay kupa, insan ko impainom ed saray bansan angibakian tod siak.

¹⁸ Apainom so Jerusalem tan amin a baley ed Juda, pati saray arari tan saray pangulo na Juda, pian magmaliw iran bunton na dera-deral; makapataktakot tan makapasinagem iran nengnengen, tan saray totoo ikana ran sakey a samba so ngaran da a singa gagawaen da ni. (Onya natan so agawad sikara.)

¹⁹ Saya so listaan na amin da ray arum ya inminom ed samay kupa: say ari na Egipto, saray opisyal tan saray pangulo to; amin da ray Egipsio, tan amin a sangkaili a manaayam ed Egipto; amin ya arari na dalin na Uz; amin ya arari na saray Filisteo ed saray siudad na Ascalon, Gaza, Ekron, tan say akeraan ed Asdod; amin da ray totood Edom, Moab, tan Ammon; amin ya arari na Tiro tan Sidon; amin ya arari ed saray dalin na Meditiraneo; saray siudad na Dedan, Tema, tan Buz; amin da ray totoon nampapotut na buek da; amin da ray arari ed Arabia; amin da ray kabyangay tribu a walad kalawakan; amin da ray arari ed Zimri, Elam, tan Media; amin da ray arari ed baybay, arawi may asingger, mansosoblayan ira. Nepeg ya inminom so balang bansa ed intiron mundo. Say kaonuran ya oninom et say ari na Babilonia.

²⁰

²¹

²²

²³

²⁴

²⁵

²⁶

²⁷ Insan inkuan ed siak na Katawan, Ibagam ed saray totoo a siak, say Katawan a Makapanyarin-amin a Dios na Israel, igaganggan ko ra ya oninom a anggad nabuwek-buwek ira tan manota-ota ra, anggad natumba ra tan ag ira la makabangon lapu ed bakal ya ipadalan kod sikara.

²⁸ No ag da labay ya awaten tan inoman itay kupan walad limam, ibagam ed sikara a say Katawan a Makapanyarin-amin so angibaga a nepeg dan inomen so walad kupa.

²⁹ Igapok ed dilin siudad ko so panderal. Abaloan da amon ag ira nadusa? Nadusa ra, ta ipadalan koy bakal ed amin a katoowan diad tapew na dalin. Siak, say Katawan, so nansalita.

³⁰ Sika, Jeremias, nepeg mon ipulong ya amin iray imbagak. Nepeg mon ikuan ed sarayan totoo, Say Katawan unungol manlapud tawen tan onkarul manlapud saray tagey na tawen. Unungol sumpad saray totoo to; oneyag a singa lakin manggagatingatin na saray ubas, Narengel na balang too ed tapew na dalin,

³¹ say tanul na bosis to makmakbaw ed anggan iner a sokung na mundo. Say Katawan akusaen to ray bansa. Salaysayen ton amin iray katoowan, tan papatey to ray totoon maoges. Say Katawan so nansalita.

³² Say Katawan a Makapanyarin-amin imbaga to a say deral et mansosoblay ya onsasabi ed balang bansa, tan sakey a mabiskeg a bagyo so mantitipon ed saray arawin sokung na mundo.

³³ Diad satan ya agew, saray pinapatey na Katawan kitongilang ed intiron mundo so bangkay da. Anggapoy manermen ed sikara. Anggapoy mangisinup odino mangipompon na bangkay da. Nabunbunton irad dalin a singa taiy ayayep.

³⁴ Akis kayo, sikayo ran pangulo, sikayo ran pumapastol na saray totook, akis kayoy maksil! Manermen kayo tan mantolin kayod dabuk. Sinmabi lay panaon a sikayoy pateyen, tan napatas kayon singa karniron kalakyan.

³⁵ Ag kayo la makabatik.

³⁶ Manayay tan onaakis kayo lapud kaermenan, ta dineral na Katawan so bansa yo diad pasnuk to tan tinaynan ton aderal-deral so bansa yon panaariay kareenan.

³⁷

³⁸ Inkaindan na Katawan iray totoo to a singa lion ya ontataynan ed ongib to. Nagmaliw a kalawakan so bansa ra lapud baleg a bakal tan lapud mapalalon petang na olo na Katawan.

26

¹ "Ag abayag, nen nagmaliw ya ari na Juda si Joakim a lakin anak nen Josias,

² "say Katawan inkuantod siak, Manalagey kad patio na Timplo tan ibawag mo ray ingganggan kon salitaen mod saray totoon nanlapud saray baley na Juda a mangigalang diman. Ibagam ya amiy bengatla.

³ "Ag la pigan ondengel iray totoo tan ikaindan day maoges a panagbilay da. No onyay gawaen da, mangoman ak ed kanunotan nipaakar ed ginetmak lan panderal ed sikara lapud saray maoges a gawgawa ra.

⁴ "Say Katawan imbaga tod siak ya ikuankod saray totoo yan salita to, Siak, say Katawan, imbagak lad sikayo a nepeg yo ak a toluken diad pangonur yod saray bangat kod sikayo.

⁵ "Nepeg yon dengelen iray salita na saray aripen kon propita ya imbabakik ed sikayo. Ag yo nin balut inonur iray imbabaga rad sikayo.

⁶ "No ituloy yoy ag mangonur ed siak, gawaen kod sayan Timplo so singa samay ginawak ed Silo tan saray amin a bansa ikana ray ngaran na sayan siudad a sakey a samba.

⁷ "Saray papari, saray propita, tan amin a totoo et nadngel da ak a nansalita na sarayan bengatla diad dalem na Timplo,

⁸ "tan kapangibagak ed saray amin ya ingganggan na Katawan a salitaen ko, siningkat da ak tan ineeyag da, Nepeg moy pateyen lapud saya!

⁹ "Akin et imbagam, diad ngaran na Katawan, a sayan Timplo et magmaliw a singa Silo, tan naderal yan siudad, tan anggapoy manayam dia? Insan minokut ak na saray totoo.

¹⁰ Nen saray pangulo na Juda nadngelan da no antoy agawa, nangganat iran linma ed Timplo manlapud palasio tan inmirung irad pasen da diad Balon Puirta.

¹¹ Insan saray papari tan saray propita kuandad saray pangulo tan saray totoo, Sayan too kanepegan toy pateyen lapud nansalita sumpad siudad tayo. Sikayon dili so akadngel ed sikato.

¹² Insan inkuanko, Imbaki ak na Katawan a mampropisiya nipaakar ed amin a nadngel yo sumpad sayan Timplo tan sumpad sayan siudad.

¹³ Nepeg yo sirin so mangoman na panagbilay yo tan saray bengatlan gagawaen yo, tan onur yo la so Katawan a Dios yo. Diad ontan, sikatoy mangoman ed kanununotan nipaakar ed paneral tod sikayo.

¹⁴ No para say siak, wala ak ed silong na pakayari yo! Gawa yod siak labat so antokaman ya amta yon kaptekan tan kamaungan.

¹⁵ Balet onyay andi-duaruwan nagawa: no pateyen yo ak, sikayo tan saray totood sayan siudad et mankasalanan lapud impamatey yod toon anggapoy kasalanan, ta say Katawan so angibakid siak ya iter kod sikayo yan pasakbay.

¹⁶ Insan saramay pangulo tan saramay totoo kuandad saray papari tan saray propita, Ag nepeg a pateyen yan too, lapud nansalita ed sikatayo diad ngaran na Katawan tayon Dios.

¹⁷ Insan pigarad saray mamasiken na baley so inmalagey tan inkuandad saray totoon nantitipon,

¹⁸ Nen ari ed Juda si Ezekias, si propita Mikias a taga Moreset imbaga tod amin a totoo a say Katawan a Makapanyarin-amin inkuanto, Nabakan singa alog so Sion; magmaliw a bunton na deral-deral so Jerusalem, tan magmaliw a takel so palandey a panalalageyan na Timplo.

¹⁹ Ag pinatey nen Ari Ezekias tan saray totoo to si Mikias. Ingen tinakotan nen Ezekias so Katawan tan nala to so maung a linawa to. Diad onman angoman so Katawan ed kanununotan ton manderal ed sikara. Balet sikatayo, ngalngali ti la iyakar so baleg a deral ed sikatayon dili. (

²⁰ Wala met so sakey a lakin nansalita ed ngaran na Katawan, say anak nen Semaya a si Urias a taga Kiryat-jearim. Nansalita sumpad sayan siudad tan sayan bansa a singa samay ginawa nen Jeremias.

²¹ Nen si Ari Joakim tan saray sondalo to, tan saray opisyal to nadngel day imbaga nen Urias, impaanap na ari a papatey si Urias. Balet nadngelan ya nen Urias, kanyan diad inkataktakot to batik ed Egipto.

²² Balet si Ari Joakim imbaki tod Egipto si Elnatan a lakin anak nen Acbor tan saray arum a lalaki ta alaen day Urias.

²³ Manlapud Egipto inyakar dad kinen Ari Joakim si Urias; impapatey nen ari insan to impaibantak so bangkay to ed panangipomponan ed saray karaklan.)

²⁴ Balet ag ak nipalimad saray totoo pian pateyen da ak, lapud inyagel ak nen Ahikam a lakin anak nen Safan.

27

¹ "Ag abayag nen nagmaliw ya ari na Juda si Sedekias a lakin anak nen Josias, imbaga na Katawan ed siak

² "a manggawa ak na pako, singeran ko na katat tan iyan kod beklew ko.

³ "Insan say Katawan imbaga tod siak a paibagak ed saray ararid Edom, Moab, Ammon, Tiro, tan Sidon diad panamegley na saray ibabaki ra a wala ra natan ed Jerusalem, ta mitongtong irad kinen Ari Sedekias.

⁴ "Say Katawan a Makapanyarin-amin a Dios na Israel imbaga tod siak ya iganggan ko ra ya ibaga rad saray arari ra a say Katawan inkuanto:

⁵ "Siak, diad panamegley na pakayarik tan biskeg ko, pinalsak so mundo, saray totoo, tan amin ya ayayep a manaayam ed tapew na dalin; iiter ko ya ed siopaman a labay kon pangitdan.

⁶ "Siak so angyan ed sarayan amin a bansa diad silong na pakayari na aripen kon Ari Nabucodonosor na Babilonia. Panlilingkuren ko met ed sikato iray anggan ayayep ed katakelan.

⁷ "Manlingkur ed sikato ray amin a bansa, tan manlingkur irad anak ton laki tan say apo ton laki, anggad isabiy panaon na kapelag na bansa ton dili. Diad satan manlingkur so bansa to ed saray makapanyarin bansa tan diad saray matalonggaring ya arari.

⁸ "Balet no walay bansa odino nanarian ya ag onsilong ed pakaoley nen Nabucodonosor tan ag ontoluk ed pakaoley to, dusaen ko itan a bansa diad panamegley na bakal, eras, tan salot, anggad sigput a napaderal kod sikato.

⁹ "Ag yo dedengelen iray propita yo, odino siopaman a mangibabagan nayarian ton ipasakbay so nagawa ed arapen diad panamegley na saray kogip, odino diad panamegley na panawag tod saray ispiritu na saray inaatey, odino diad panamegley na salamangka. Ibabaga ran amin ya ag kayo nepeg a manlingkur ed ari na Babilonia.

¹⁰ Papalikdoen da kayo tan sikaray makasengeg na kibantak yod pasen ya arawid bansa yo. Pataynanen ta kayo tan naderal kayo.

¹¹ Balet no onsuko so sakey a bansa ed ari na Babilonia tan panlingkuran to, abuloyan kod satan a manayam ed dilin dalin to, dalusan to, tan panayaman to. Siak, say Katawan, so nansalita.

¹² Onya met so inkuankod kinen Ari Sedekias na Juda, Paoleyan kad ari na Babilonia. Manlingkur kad sikato tan saray totoo to, et mambilay ka.

¹³ Akin et ompatey kayod bakal, o diad salot? Sikato yay imbaga na Katawan a nagawa ed dinan man a bansan ag paoleyan ed ari na Babilonia.

¹⁴ Ag yo dedengelen iray propitan mangibabaga ya ag yo nepeg a panlingkuray ari na Babilonia. Papalikdoen da kayo labat.

¹⁵ Say dilin Katawan so angibaga ya ag to ra imbaki tan diad ngaran to titilaan da kayo. Kanyan sirin, pataynanen to kayo tan napatey kayo, sikayo tan saray propitan mantitilad sikayo.

¹⁶ Insan imbagak ed saray papari tan saray totoo a say Katawan kuanto: Ag yo dedengelen iray propitan mangibabaga a magano lan nipawil manlapud Babilonia iray kayamanan ed Timplo. Titilaan da kayo.

¹⁷ Ag yo ra dedengelen! Paoleyan kayod ari ed Babilonia, et mambilay kayo! Akin et magmaliw a bontun na deral-deral yan siudad?

¹⁸ No talagan propita ra, tan awit day salitak, pakerew mo rad siak a Makapanyarin-amin a Katawan ya ag ko abuloyan a naalad Babilonia iray nakdaan a kayamanan ed Timplo tan diad palasio na ari. (

¹⁹ Nen si Ari Nabucodonosor et inyakar tod Babilonia si Jeconias a lakin anak nen Joakim tan ari na Juda, tan saray manonan totoo ed Juda tan Jerusalem, intilak to ray may lusek, samay dipositoway danum, saramay kariton, tan saray arum a kayamanan ed timplo.)

²⁰ Dengel moy ibabagak, siak a Makapanyarin-amin a Katawan a Dios na Israel, nipaakar ed saray kayamanan ya atilak ed Timplo tan diad palasio ed Jerusalem:

²¹

²² Naala rad Babilonia tan mansiansia rad man ya anggad agew a limengen ko ra. Alaen ko rad satan tan ipawil ko rad sayan pasen. Siak, say Katawan, so nansalita.

28

¹ "Diad saman a taon, nen kumaliman bulan na kumapat a taon na panaari nen Sedekias, akisalitad siak ed Timplo si Ananias a lakin anak nen Azur, sakey a propitan taga Gabaon. Diad arap na saray papari tan saray totoo imbaga tod siak

² "a say Katawan a Makapanyarin-amin, say Dios na Israel, et inkuanto, Dineral koy pakayari na ari na Babilonia.

³ "Diad loob na duay taon ipawil kod sayan pasen iray amin a kayamanan ed Timplo ya inaala ra nen Ari Nabucodonosor tan inaawit to rad Babilonia.

⁴ "Ipawil ko met diay lakin anak nen Joakim a si Joakin ya ari na Juda. Kaiba ton ompawil iray amin a totood Juda a nibantak ed Babilonia. On, deralen koy pakayari na ari na Babilonia. Siak, say Katawan, so nansalita.

⁵ "Insan akisalita ak ed kinen propita Ananias diad arap da ray papari tan saray arum a totoo a manalalagey ed dalem na Timplo.

⁶ "Inkuanko, Amen! Ilaloan kon gawaen na Katawan so ontan. Ilaloan kon sumpalen na Katawan ira tan ya amin a salitam. Ipawil to komun manlapud Babilonia iray amin a kayamanan ed Timplo tan saray amin a totoon adakep ed arawin lugar.

⁷ "Balet dengel moy ibabagak ed sika tan saray totoo.

⁸ "Saray propitan nansalita nen abayag lan panaon kasakbayan na panaon ko tan panaon mo, impropisiya ray idalan na bakal, eras, tan salot ed saray amayamay a bansa tan saray makapanyarin nanarian.

⁹ "Balet say propitan mangipropisiya na kiwalay kareenan et nabirbir labat a propita ya imbakin peteg na Katawan, no ontua ray salita to.

¹⁰ Insan inala nen Ananias so pakon walad beklew ko tan pinopoter to.

¹¹ Diad arap na amin a totoo inkuanko, Inkuan na Katawan ya onyay pamoter to ed pakon inyan nen Ari Nabucodonosor ed tenger na saray amin a bansa; gawaen to ya ed loob na duay taon. Insan ak la tinmaynan.

¹² Ag abayag kayari to ya, inkuan na Katawan ed siak

¹³ ya onla ak a mangikuan ed kinen Ananias, Inkuan na Katawan a nayarian mon poteren so pakon kiew, balet salatan to na pakon balatyang.

¹⁴ Inkuan na Katawan a Makapanyarin-amin, say Dios na Israel, ya inan toy pakon balatyang so tenger na sarayan amin a bansa, tan panlingkuran day Ari Nabucodonosor iray ayayep ed katakelan.

¹⁵ Insan inkuankod kinen Ananias, Dengel ka, Ananias! Ag ka imbaki na Katawan, tan gagawaen mon manisiad tila ira yan totoo.

¹⁶ Kanyan, ibabagay Katawan a paandipaten to ka. Ompatey kad sayan taon, ta imbagam ed saray totoo ya onlaban irad Katawan.

¹⁷ Inatey si Ananias nen kumapiton bulan ed saman a taon.

29

¹ "Sinulat ko ray pangulo, saray papari, saray propita, tan amin a totoon dinakep nen Nabucodonosor ed Jerusalem tan inyakar to ran priso ed Babilonia.

² "Ginawak yan sulat nen akataynan lad Jerusalem ira di Ari Joakin, say ina to, saray opisyal ed palasio, saray pangulod Juda tan Jerusalem, saray marunong a mankimey tan saray panday.

³ "Inter ko so sulat ed kindi Elasa a lakin anak nen Safan tan Gemarias a lakin anak nen Hilcias a sikaray imbaki nen Ari Sedekias na Juda ed kinen Ari Nabucodonosor na Babilonia. Onyay tanul na sulat:

⁴ "Say Katawan a Makapanyarin-amin a Dios na Israel kuantod saray amin a totoon inyabuloy ton nadakep nen Nabucodonosor diad Jerusalem tan inyakar to ran priso ed Babilonia:

⁵ "Mamaalagey kayoy kaabungan yo tan manayam kayod man. Mantanaman kayo tan akan yo ray naani yo.

⁶ "Mangasawa tan miasawa kayo pian nawalaan kayo ray anak. Insan yo pangasawaen tan piasawaen iray anak yo, pian nawalaan met iray anak. Nakaukolan ya ondakel so bilang yo ya aliwan ondaiset.

⁷ "Mankimey kayo a pankaabigan na saray siudad a nampaiprisoan kod sikayo. Ipikasi yo ed siak ira ta no maaligwas ira, maaligwas kayo met.

⁸ "Siak, say Katawan a Dios na Israel, papasakbayan ta kayon ag kayo papapalikdo ed saray propitan kaiba yod tan, odino saray arum ya ipapasen day sikaran dili a nayarian dan ibagay nagawa ed arapen a panaon. Ag yo aasikasoen iray kogkogip da.

⁹ "Titilaan da kayo ed ngaran ko. Ag ko ra imbaki. Siak, say Katawan, so nansalita.

¹⁰ Say Katawan kuanto, Kayari na pitomploy taon a panoley na Babilonia ed sikayo, ipanengneng koy panangarok ed sikato tan sumpalen koy sipan ko a papawilen ta kayod dalin yo.

¹¹ Siak labat so makaamta na saray planok ed sikayo. Sarayan plano et makaiter ed sikayo na aligwas, aliwan deral; saray planon mamatwa ed iilaloan yon nagawa ed arapen a panaon.

¹² Insan kayo ontawag ed siak ed satan. Ondago kayod siak tan mikasi kayo, et ebatan ta kayo.

¹³ Anapen yo ak et narumog yo ak, lapud anapen yo ak ed intiron puso yo.

¹⁴ On, kuankod sikayo, narumog yo ak, insan papawilen ta kayod dalin yo. Tiponen ta kayo manlapud balang bansa tan balang lugar ya angikayatan kod sikayo, insan papawilen ta kayo ed dalin yo a dimay amadakepan kod sikayo. Siak, say Katawan, so nansalita.

¹⁵ Ibabaga yo, sikayo ran totoo, a say Katawan angiter ed sikayod tan ed Babilonia na saray propita.

¹⁶ Dengel yo so ibabagay Katawan nipaakar ed arin manoley a singa impanoley nen David, tan say nipaakar ed saray totood sayan siudad a sikaray kakanayon yon ag nipiolup ed sikayon adakep.

¹⁷ Ibabagay Katawan a Makapanyarin-amin, Mangipadalan ak ed sikara na bakal, eras, tan salot, tan pagmaliwen ko ran singa saray bungay igos a diad mapalalon inkaboluk da, ag ira nayarin kanen.

¹⁸ Osilan ko ra na bakal, eras, tan salot, pian diad ontan saray totood amin a bansa ed mundo et nataktakot ira ed nanengneng da. Inerman a pasen a pangikayatan kod sikara, saray totood man et natalagnaw tan nataktakot ira ed agawad sikara. Ludlureyen da ra tan ikana ran sakey a samba so ngaran da.

¹⁹ Onyay nagawad sikara, lapud ag da inonur iray salitak ya impapaibagak ed sikara diad panamegley da ray propitan aripen ko. Ag ira dinmengel.

²⁰ Amin yon totoo ya impaibantak kod Babilonia, dengel kayod ibabagak, siak a Katawan.

²¹ Say Katawan a Makapanyarin-amin a Dios na Israel nansalita na nipaakar ed kinen Acab a lakin anak nen Colaya tan si Sedekias a lakin anak nen Maasias a titilaan da kayo ed ngaran to. Imbaga na Katawan, ya ipalima to rad pakayari nen Ari Nabucodonosor na Babilonia a mangipapatey ed sikarad arap yo.

²² No saray totoon niakar a priso ed Babilonia manlapud Jerusalem et labay dan isamba so sakey a too, ikuanda, Gawaen na Katawan komun ed sika so singa ginawa tod kindi Sedekias tan Acab, a say ari na Babilonia et inkakalut to ran mabilay.

²³ Onyay nagawad sikara, lapud ambelabelat so ginagawa ran kasalananakikaloguran irad asaway kapara ran too, tan nantila rad ngaray Katawan. Sumpa yad linaway Katawan; amta to ray ginagawa ra, tan sikatoy tasi sumpad sikara. Say Katawan so nansalita.

²⁴ Say Katawan a Makapanyarin-amin a Dios na Israel impaikuantod siak ed kinen Semaya a taga Nehelam, Diad ngaran mo nansulat kad amin a totood Jerusalem tan kinen Sofonias a lakin anak nen Maasias a pari tan diad amin a papari. Diad samay sulat mo inkuanmod kinen Sofonias:

²⁵

²⁶ Say Katawan ginawa to kan pari a sinmalat ed kinen Joiada tan sika natan so manonan opisyal na Timplo. Kanepegan mon pabalur na golunggolung tan pasolungay kuilyon balatyang so beklew na balang sakey a manluko-lukowan a mampropisiya.

²⁷ Akin et ag mo ya ginawa ed kinen Jeremias a taga Anatot, ta nampropropisiya ed saray totoo?

²⁸ Nepeg a napatonda, ta imbaga tod saray Israelitan walad Babilonia a mabaybayag iran naprisod man, kanyan nepeg day mangipaalagey na kaabungan da, manayam irad man, mantanaman ira, tan pambilay day bungay tanaman da.

²⁹ Imbasa nen Sofonias yan sulat ed siak.

³⁰ Insan imbaga na Katawan ed siak

³¹ ya impaibagak ed amin a priso ed Babilonia ya onya so inkuanto nipaakar ed kinen Semaya: Siak, say Katawan, dusaen koy Semaya tan amin a kabyangay boleg to. Ag ko imbaki, balet nansalitad sikayon singa propita, tan impanisia to kayod tila. Anggapoy nakeraan a kabyangay boleg to ed sikayo. Ompatey la kasakbayan na panggawak na kaabigan da ray totook. Ag to la naimatunan, lapud imbaga tod sikaran labanan da ak. Siak, say Katawan, so nansalita.

30

¹ "Say Katawan a Dios na Israel

² "inkuantod siak: Isulat mod sakey a libro iray amin ya imbagak ed sika,

³ "ta onsabi lay panaon ya ipawil koy maung a kipapasen da ray totook ed Israel tan Juda. Papawilen ko rad dalin ya inter kod saray lalaki ra, tan kayaryanen da lamet. Siak, say Katawan, so nansalita.

⁴ "Say Katawan kuantod saray totood Israel tan Juda,

⁵ "Nadngel koy makapataktakot ya eyag, sakey ya eyag a mangiter na takot, aliwan kareenan.

⁶ "Tonda kayo natan, ta mannunot kayo! Mananak ta na sakey ya ogaw so laki? Akin sirin et sankanengneng koy balang laki a sankabembenan toy eges to a singa biin mampapasakit? Akin et ampoti-potiy bosaleg na balang sakey a too?

⁷ "Onsasabi so sakey a makapataktakot ya agew; anggapoy agew a makapipara ed sikato sikatoy panaon a kagunigon na saray totook, balet nayarian dan agwantaan.

⁸ "Say Katawan a Makapanyarin-amin kuanto: No nasabi tan ya agew, poteren koy pakon walad tenger da tan ekalen koy akagolunggolung ed sikara. Ag la rad satan aripenen na saray taga arum a bansa.

⁹ "Maglingkur ira ingen ed siak, say Katawan a Dios da, tan diad kabyangay boleg nen David ya iter kon manarid sikara.

¹⁰ Totook, ag kayo natatakot; totood Israel, ag kayo nasesegawan. Iyagel ta kayod saman ya arawin lugar, diad saman a dalin ya akaprisoan yo. Ompawil kayod dalin yo tan manayam kayod man a walay kareenan; niarawi kayod kaatapan, tan anggapoy manaktakot ed sikayo.

¹¹ Laen ta kayon iyagel. Deralen kon amin iray bansan angikayatan kod sikayo, balet ag ta kayo deralen. Ag ko abuloyan ya ag kayo nadusa; balet no dusaen ta kayo, gawaen ko onung ed katonungan. Siak, say Katawan, so nansalita.

¹² Inkuan na Katawan ed saray totoo to, Ag napaabig iray sugat yo; ag la ra onabig.

¹³ Anggapoy mangasikasod sikayo, anggapoy nitambal ed saray sugat yo, anggapo lay ilalon onabig kayo.

¹⁴ Alingwanan kayo la na amin da ray kainarowan mo; ag da ki la labay. Dinogpaan ta kayon singa sakey a kalaban; mapalaloy inkadusa yo, lapud amayamay so kasalanan yo tan mapalaloy kaogsan yo.

¹⁵ Ag kayo manririklamo lapud saray sugat yo; ag kayo la napaabig. Onyay impanusak ed sikayo, lapud amayamay so kasalanan yo tan mapalaloy kaogsan yo.

¹⁶ Balet natan, nabwag ya amin iray mambubuag ed sikayo; naalan priso iray amin a kalaban yo. Napairap ya amin iray mamapairap ed sikayo, nasamsaman ya amin iray manasamsam ed sikayo.

¹⁷ Pagmaliwen kon maung lamet so kipapasen yo; paabigen ko ray sugat yo, anggaman ibabaga na saray kalaban yo, Nibantak so Sion; anggapoy malabay ed sikato. Siak, say Katawan, so nansalita.

¹⁸ Say Katawan kuanto, Papawilen kod dalin da iray totook, tan kasian koy balang pamilya; napasimbalon nipaalagey so Jerusalem; tan say palasio.

¹⁹ Mankanta na panangidayew iray totoon manaayam diman; maneyag irad liket. Lapud panamindision ko ondakel ira, tan napagalangan ira.

²⁰ Ipawil kod gendat a pakayari so bansa ra, tan iletneg kon malmalet lamet; dusaen kon amin iray mamapairap ed sikara.

²¹ Manlapud dilin bansa ra iray manoley ed sikara, kadalaan da met lamlamang so prinsipi ra. No imbitaan kon onsingger, ondagod siak; ta siopay ondagon ag inimbitaan? Magmaliw iran totook tan siak so Dios da. Siak, say Katawan, so nansalita.

²²

²³ Sakey a bagyo so pasnuk na Katawan, sakey a mabiskeg a dagem ya ombasig ed tagey na olo na saray totoon maoges. Ag ontonda ya anggad nasumpal ya amin iray labay ton gawaen. Diad arapen iran agew natalutalusan ya na saray totoo to.

31

¹ "Say Katawan kuanto, Onsabiy panaon a magmaliw ak a Dios na amin a tribu na Israel, tan sikaray magmaliw a totook.

² "Kinasian kod kalawakan iray totoon nibatikan day patey. Nen nampilalek na painawa iray totood Israel,

³ "pinmatnag ak ed sikara manlapud arawi. Totood Israel, inaro ta kayo lawas, kanyan intuloy kon impatnag ed sikayo so ag mangoman a panangarok.

⁴ "Pasimbaloen ko so kipapasen yo a totook. Alaen yo lamet iray tamborin yo tan maliket kayon mansayaw-sayaw.

⁵ "Taneman yo lamet iray kaubasan ed toktok na kapokdulan na Samaria, tan saray mantanem kanen da ray bungay kaubasan.

⁶ "On, onsabiy agew a saray managbantay ikolyaot dad toktok na kapokdulan na Efraim, Ontatdang itayod Sion, diad Katawan a Dios tayo.

⁷ "Say Katawan kuanto, Mankanta kayod liket para Israel, say sankatalonggaringan ed saray bansa. Kanta yoy imno na panangidayew, Inyagel na Katawan iray totoo to, inliktar ton amin iray akeraan.

⁸ "Alaen ko rad bansa ed baybay tan tiponen ko ran manlapud saray sokung na mundo. Milad sikara iray bulag tan saray lopuy, saray malokun tan amin da ray paanak-anak. Ompawil ira a sakey a matalonggaring a bansa.

⁹ "Diad liket dan ompapawil iray totook ag da napokpokay interter na lua ra, mampipikasi ra legan ko ran iwawanwan. Iwanwan ko rad gilig na managagos a danum, diad mablak a dalan pian ag ira niparokul. Singa ama so pasen ko ed Israel, et si Efraim so sankapangulowanan ya anak kon laki.

¹⁰ Say Katawan kuanto, Dengel yo ak, sikayo ran bansa, tan ibawag yod arawi ran gilig na dayat iray salitak. Inkaykayat ko ray totook, balet tiponen ko ra, bantayan ko ran singa pambabantay na pumapastol ed saray karniro to.

¹¹ Imbolus ko ray Israelita, tan inyagel ko rad makapanyarin bansa.

¹² Ondago ra tan mankanta rad liket diad Palandey na Sion tan panliketan da ray rigalok saray rigalon trigo, alak, tan larak na oliba, saray karniro tan saray baka. Magmaliw iran singa asalusalug a tanamanan, tan nawalaan ira na amin a nakaukolan da.

¹³ Insan mansayaw tan manliket iray bibii; manggayaga ray lalaki, malangwer may matakken. Ligliwaen ko ra tan pagmaliwen kon liket so ermen da; pagmaliwen kon gayaga so ermen da.

¹⁴ Peneken ko na mananam a kakanen iray papari, tan iter koy amin a nakaukolan na saray totook. Siak, say Katawan, so nansalita.

¹⁵ say Katawan kuanto, Nadngel so tanul ed Rama, tanul na ampaipait a pannangis tan panugaog. Si Raquel saray anak to nanangisan to ra; maneermen tan ag naligliwa, ta naandi la ra.

¹⁶ Tondaan yo lay panaakis yo, tan ponasan yo ray lua yo. Ag nayarin ag natumangan iray amin a ginagawa yo para saray anak yo; ompawil iran manlapud dalin na kalaban.

¹⁷ Maung so ilalo yod arapen a panaon; ompawil ed dilin bansa ra iray anak yo. Siak, say Katawan, so nansalita.

¹⁸ Narerengel kon maermen ya ibabaga na saray Israelita, Katawan, nen saman singa kami maatap a bakan kalakyan, balet binabangatan mo kamin ontoluk. Papawil mo kami pa; sipaparaan kamin ompawil ed sika, Katawan a Dios mi.

¹⁹ Inmarawi kami ed sika, balet kabebekta nilabay miy ompawil. Kayari mo kamin dinusa, nanampat kami lapud ermen na pagbabawi. Ambaing kami, lapud saray kasalanan mi nen wala kami nid kalangweran.

²⁰ Israel, sikay pinablik ya anak, say anak kon inararo. Kapag bitlaen koy ngaran mo, nununoten ta ka a katekep na panangaro. Milmilay linawak ed sika; andi-duaruwan kasian ta ka.

²¹ Mangyan kayo ray tanda tan pakapatnagan ed dalan; anap yo may dinalan yo. Pawil kayo, sikayon totood Israel, sempet kayod saray baley a tinaynan yo.

²² Kapigan mangangga so panduaruwa yo, sikayon anggapoy pananisian totoo? Nanggawa ak na bengatlan balo tan nidoma, nidoma a singa sakey a bii ya iyaagel toy laki.

²³ Say Katawan a Makapanyarin-amin a Dios na Israel kuanto, No papawilen kod dalin da iray totook, ibaga da lamet ed dalin na Juda tan saray baley to, Bindisionan komun na Katawan so masanton palandey na Jerusalem, say masanton pasen a panaayaman to.

²⁴ Manayam ed Juda tan saray baley to iray totoo; niwalad satan iray dumaralus tan saray pumapastol a wala ray karniro ra.

²⁵ Pasimbaloen koy liknaan da ray mapagpaga, tan peneken koy kakanen iray makapkapoy lad eras.

²⁶ Diad onta, ikuan na saray totoo, Naogip ak, tan binmangon ak ya apasimbaloy liknaan.

²⁷ Siak, say Katawan, kuanko ya onsabiy panaon a panoen ko na totoo tan ayayep so dalin na Israel tan Juda.

²⁸ Onung na impangasikasok ed impamagut, impangibalsak, impangipatalo, impaneral, tan impamataynan kod sikara, ontan met so pangasikasok ed pangiletneg tan pamasimbaloy kipapasen da.

²⁹ No onsabi tan a panaon, ag la ikuan na saray totoo, Angan na anakseng ya ubas iray atateng, Balet akilem iray anak da.

³⁰ Ingen say nagawa onya: Siopamay mangan na anakseng ya ubas, nakilem so dilin ngipen to, tan ompatey so balang sakey lapud dilin kasalanan to.

³¹ Say Katawan kuanto, Onsabiy panaon a baloy pisipanan kod saray totood Israel tan saray totood Juda.

³² Aliwan singa samay impisipanan kod saray lalaki ra nen intabin ko ran impaway ed Egipto. Aliwa ran matoor ed saman a sipanan, anggaman ya alimbawak so sakey ya asawan laki ed sikara.

³³ Onya so pisipanan kod saray totood Israel: Iyan kod sikaray ganggan ko tan isulat kod kapusoan da. Siak so magmaliw a Dios da, tan sikara so totook.

³⁴ Anggapod sikaray nepeg a mangibangat ed kabansaan to na nipaakar ed pangamta ed Katawan, ta nakabatan da ak ya amin, abeba may atagey so kipapasen da. Pirdonaen ko ray kasalanan da tan ag ko la nunoten iray ginagawa ran kaogsan. Siak, say Katawan, so nansalita.

³⁵ Say Katawan iiter toy agew a manliwawa no agew tan say bulan tan saray bitewen a manindag no labi. Kimbogen toy dayat, kanyan onungol iray daluyon to; Yahweh a Makapanyarin-amin so ngaran to.

³⁶ Isisipan to a legan a mansiansiay gendat ya oksuy na sansinakoban, mansiansian sakey a bansa so Israel.

³⁷ No nasukat so tawen, tan nasokait iray pundasion na mundo, ipolisay tod satan iray totood Israel, lapud amin a ginagawa ra. Say Katawan so nansalita.

³⁸ Onsabi so panaon, kuay Katawan, a napasimbalon nipaalagey a siudad ko so intiron Jerusalem, manlapud tori na Hananel ya anggad Puirta na Sokung.

³⁹ Insan manlapud man ed sagur say ketegan mampaarap ed pokdul na Gareb, insan diad kaliber-liber na Goa.

⁴⁰ Say intiron patar na pomponan ed saray bangkay tan bantakan na dotak, tan amin a kaalogan ed pandel na Kolus na Cedron ya anggad Puirta na Kabayo et magmaliw iran masanton pasen ed siak. Ag lan balut nigeba odino naderal yan siudad.

32

¹ "Akisalitay Katawan ed siak nen kumaplon taon na panaari nen Sedekias ed Juda, tan kumalabinwalon taon na panaari nen Nabucodonosor ed Babilonia.

² "Diad saman a panaon, dodogpaan na saray sondalo na ari na Babilonia so Jerusalem, tan asaraan ak ed patio na palasioy ari.

³ "Impriso ak diman nen Ari Sedekias tan inakusa to ak ya imbawag kon say Katawan kuanto, Ipadakep ko yan siudad ed ari na Babilonia,

⁴ "tan ag makabatik si Ari Sedekias. Niawat ed ari na Babilonia; napilupaan to tan napitongtongan ton dili.

⁵ "Niakar ed Babilonia si Sedekias, tan manayam diman ya anggad arapen kon tulongan. Anggano mibakal ed saray tagan Babilonia, ag manalo. Siak, say Katawan, so nansalita.

⁶ "Imbagad siak na Katawan

⁷ "a si Hanamel a lakin anak nen pangamaen kon Sallum et onsabi a kerewen tod siak a saliwen koy alog to ed Anatot a sakop na dalin na Benjamin, ta siak so sankaasinggeran a kanayon to, tan walay kanepegan kon manaliw.

⁸ "Insan, onung na imbagay Katawan, linmad siak si kapinsan kon Hanamel diad patio na palasioy ari tan kinerew tod siak, Saliw mo pa la may alog ko ed Anatot a sakop na dalin na Benjamin. Sikay sankaasinggeran a kanayon ko, tan walay kanepegan mon manaliw tan mangayaryan ed saman ya alog. Saliw mo pa la. Akabatan ko lad saman ya ingganggan ak na Katawan a gawaen ko ya.

⁹ "Kanyan sinaliw kod kinen Hanamel imay alog tan imbilang kod sikatoy kuarta; labinpiton pilak ya amin so bili to.

¹⁰ Pinirmaan tan tinimbrian koy kasulatan, impatasian ko, tan inalay belat na kuarta ed simbangan.

¹¹ Insan ko inala ray kupia na saliwansay atimbrian a kupia a logan toy paknaan tan saray nepeg a gawaen, tan say lokas a kupia.

¹² Insan diad arap nen Hanamel, saray tasi a nampirmad kasulatay saliwan, tan amin da ray Judion manyodyorung ed patio na palasio, inyawat ko ra may kupia ed kinen Baruc a lakin anak nen Nerias tan apo nen Maasias.

¹³ Diad arap dan amin inkuankod kinen Baruc,

¹⁴ Say Katawan a Makapanyarin-amin, say Dios na Israel, et ingganggan to ka ya alaen mo ra yan kasulatan, say atimbrian a saliwan tan say lokas a kupia, insan mo ra iyan ed dalem na pasig, pian ag naderal ya anggan pigay taon.

¹⁵ Imbaga na Katawan a Makapanyarin-amin, say Dios na Israel, a nasaliw lamet ed sayan dalin iray kaabungan, kaalogan, tan saray kaubasan.

¹⁶ Kayarik ya inter imay kasulatay saliwan ed kinen Baruc nampikasi ak,

¹⁷ Katawan a Dios, lapud baleg a pakayarim tan biskeg mo, ginawam so tawen tan dalin; mainomay mon gawaey antokaman a bengatla.

¹⁸ Impanengneng moy ag mangoman a panangarom ed saray nilibon totoo, balet dudusaen mo met iray totoo lapud saray kasalanan da ray atateng da. Matalonggaring tan makapanyari kan Dios; Yahweh a Makapanyarin-amin so ngaran mo.

¹⁹ Manggagawa ka ray planon napnoy kakabatan tan saray matalonggaring a bengatla; sankanengneng mo ray amin a kabibilay na saray totoo, tan tutumangan mo ra onung na gawgawa ra.

²⁰ Nanggawa ka na saray milagro tan pakelaw ed dalin na Egipto. Itutuloy mo ra yan gagawaen ya anggad sarayan agew, diad Israel tan diad saray arum a bansa, kanyan anggan iner a pasen kabat ka na saray totoo.

²¹ Diad panamegley na saray milagro tan pakelaw ya anaktakot ed saray kalaban mi, inkanam so pakayarim tan biskeg mo diad impangipaway mod Egipto na saray totood Israel.

²² Inter mod sikara yan mayaman tan mataban dalin, onung na insipan mod saray lalaki ra.

²³ Balet nen akakar irad sayan dalin tan kinayaryan da, ag da inonur iray ganggan mo odino nambilay onung ed bangat mo; ag da sinumpal so antokaman a pagagawam ed sikara. Sikato yay makasengeg no akin et inyakar mod sikara yan amin a deral.

²⁴ Saray taga Babilonia nanggagawa rad kaliber-liber na siudad na saray bunton a looban dan manakep, tan ondodogpa ra. Lapud bakal, eras, tan salot napelag ed lima ra so siudad. Katawan, nanengneng mo a tinmuan amin iray imbagam.

²⁵ Balet, Katawan a Dios, sikay angiganggan ed siak a saliwen ko may alog diad arap da ray tasi, anggaman a ngalngali la nadakep na saray taga Babilonia so siudad.

²⁶ Insan inkuan na Katawan ed siak,

²⁷ Siak so Katawan, say Dios na amin a katoowan. Anggapoy antokaman a mairap ed siak.

²⁸ Kanyan sirin, iter ko yan siudad ed Ari Nabucodonosor na Babilonia tan saray sondalo to, tan dakepen da,

²⁹ tan poolan da. Poolan da ray pati abung a nampopoolan na saray totoo na insinson bagat ed kinen Baal diad saray toktok na kaabungan tan nankakalboan da na alak a bagat ed saray diriyos. Diad sarayan abung saray totoo impanpasnuk da ak.

³⁰ Manlapu lad inggapoy awaran na saray totood Israel tan saray totood Juda, kaogsan labat so ginagawa ra tan impanpasnuk da ak lapud saray ginagawa ra.

³¹ Impanpasnuk to ak na mapalalo yan siudad nanlapu lad agew na inkipaalagey to. Ginetmak lan paandipaten,

³² lapud amin a kaogsan a ginagawa da ray totood Juda tan Jerusalem, pati saray arari tan saray pangulo ra, saray papari ra tan saray propita ra.

³³ Imbeneg da ak; anggaman ya intutuloy koy pambangat ed sikara, ag ira ondengel tan makaaral.

³⁴ Inyan da ni ingen ed dalem na Timplo a nipaalagey ed ngaran ko iray talintaon kabosul ko tan dinotakan day Timplo.

³⁵ Nanggagawa ra na saray altar a para Baal diad Patar na Hinnom, a pangibagatan dad dios a Moloc na saray anak dan lalaki tan bibii. Ag ko ingganggan ed sikara a gawaen day onya, tan ag anggan sinmebang ed kanunotan ko a gawaen da man a makapaingungot a bengatla, pian pankasalananen da ray totood Juda.

³⁶ Say Katawan a Dios na Israel kuantod siak, Jeremias, ibabaga na saray totoo a lapud bakal, eras, tan salot napelag yan siudad ed lima na ari na Babilonia. Balet dengel mo niy nepeg kon ibaga.

³⁷ Saray totoon inkaykayat kod saray bansa lapud petang na olok, pasnuk, tan sanuk kod sikara et tiponen ko ra, insan ipawil ko rad sayan pasen tan panayamen ko ra dian arawid kaatapan.

³⁸ Diad satan magmaliw iran totook, tan siak so Dios da.

³⁹ Itdan ko ray saksakey a getmad bilay: say pamagalang da lawas ed siak a pankaabigan da tan saray kabyangay boleg da.

⁴⁰ Misipanan ak na andi-anggaan ed sikara. Ag ak ontondan manggaway kamaungan ed sikara, tan pagmaliwen ko ran ontakot ed siak diad intiron puso ra, pian ag da ak lan balut benegan.

⁴¹ Panliketan koy panggawak na kamaungan ed sikara, tan pansiansiaen ko ran iletneg ed sayan dalin.

⁴² Onung na impangyakar koy deral ed sarayan totoo, ontan met iter kod sikaray amin a maung a bengatla ya insipan kod sikara.

⁴³ Ibabaga na saray totoo a sayan dalin et magmaliw a kalawakan ya anggapoy too odino ayep a manayam, tan niiter ed saray taga Babilonia. Balet nasaliw lamet iray kaalogan ed sayan dalin.

⁴⁴ Saliwen ira na saray totoo, tan napirmaan iray kasulatan na saliwan, natimbrian ira, tan natasian ira. Nagawa ya ed pasen a sakop na dalin na Benjamin, diad saray bario ed kaliber-liber na Jerusalem, diad saray baley na Juda, tan diad saray baley ed kapokdulan, diad saray alusadsar, tan diad abalaten na Juda. Papawilen kod dalin da iray totoo. Siak, say Katawan, so nansalita.

33

¹ "Legan ya apokuk ak nid prisowan diad patio na palasio, sinmabi lamet ed siak so salita na Katawan.

² "Akisalitad siak so Katawan ya amalsa, anibokel, tan angilira ed mundo tan Yahweh so ngaran to. Inkuanto,

³ "Tawag kad siak, et ebatan ta ka; ibagak ed sika ray makapakelaw tan niamut a bengatlan ag mo ni ra akabatan.

⁴ "Siak a Katawan, say Dios na Israel, kuanko a saray kaabungan ed Jerusalem tan say palasio ed Juda et nageba ra lapud panlakob tan pandogpa.

⁵ "Onlaban iray pigara ed saray taga Babilonia a mampanod sayan siudad na saray bangkay da ray kabilen ko lapud pasnuk tan sanuk ko. Inmarawi ak ed sayan siudad lapud saray maoges a bengatlan ginagawa na saray totoo to.

⁶ "Balet paabigen ko yan siudad tan saray totoo to tan ipawil koy gendat a biskeg da. Ipanengneng kod sikaray daakan ya aligwas tan say bilay ya arawid kaatapan.

⁷ "Paaligwasen koy Juda tan Israel, tan ipawil koy gendat a kipapasen da.

⁸ "Linisan ko rad kasalanan dad siak; pirdonaen ko ray kasalanan da tan say insumpa rad siak.

⁹ "Say Jerusalem et magmaliw a panlapwan na liket, galang, tan dayew ko; tan amin a bansa ed intiron mundo ontakot tan onggiwgiw ira no narengelan da ray nipaakar ed maabig a bengatlan gagawaen kod saray totood Jerusalem, tan say aligwas ya iiter kod siudad.

¹⁰ Inkuan na Katawan, Ibabaga na saray totoo a sayan pasen et singa kalawakan ya anggapoy too o ayep a manaayam. Tuay ibabaga ra ya anggapoy kabaliksan iray baley na Juda tan saray dalan na Jerusalem; anggapoy manaayam a too o ayep ed sikara. Balet diad sarayan pasen narengel yo lamet

¹¹ iray eyag na liket tan gayaga, tan say tanul na sayaksak ed saray bansal. Narengel yo ray totoon mankanta legan dan mangibabagat ed Timplok na pisasalamat; ikuanda, Misalamat kayod Katawan a Makapanyarin-amin, ta sikato et maung, tan ag mangangga so panangaro to. Paaligwasen ko yan dalin a singa samay kipapasen to nen saman. Siak, say Katawan, so nansalita.

¹² Inkuan na Katawan a Makapanyarin-amin, Diad sayan dalin a singa kalawakan ya anggapoy too o ayep a manaayam, nawalaan lamet na saray pastolan a napanyakaran na saray pumapastol na saray karniro ra.

¹³ Diad saray baley ed kapokdulan, diad saray alusadsar, diad abalaten na Juda, diad dalin a sakop na Benjamin, diad saray bario ed kaliber-liber na Jerusalem, tan diad saray baley na Juda, saray pumapastol et bilangen da lamet iray karniro ra. Siak, say Katawan, so nansalita.

¹⁴ Inkuan na Katawan, Onsabiy panaon a sumpalen koy sipan kod saray totood Israel tan Juda.

¹⁵ Diad satan a panaon mamili ak na sakey ya ari a kabyangay boleg nen David. Manoley ed intiron dalin onung na kaptekan tan katonungan.

¹⁶ Niagel tan mambilay ya arawid kaatapan iray totood Juda tan Jerusalem. Say siudad natawag na Say Katawan a Kilalaban Tayo.

¹⁷ Siak, say Katawan, isisipan ko a wala lawas so manarid Israel a kabyangay boleg nen David,

¹⁸ tan wala lawas iray paparin kabyangay tribu nen Levi a manlingkur ed siak tan mangisaklang na saray bagat a popoolan, saray bagat a trigo tan saray nandoroman bagat.

¹⁹ Inkuan na Katawan ed siak,

²⁰ Akisipanan ak ed agew tan say labi, kanyan onsabi ra lawas ed manepeg a panaon; et ag yan balut naderal a sipanan.

²¹ Ontan met akisipanan ak ed aripen kon David pian nawalaan lawas na kabyangay boleg a manari, tan akisipanan ak ed saray papari a kabyangay tribu nen Levi pian manlingkur ira lawas ed siak; et ag ira yan balut naderal a sipanan.

²² Parakelen ko ray kabyangay boleg nen aripen kon David tan saray managlingkur kon papari a kabyangay tribu nen Levi. Ag ira nabilang ed satan a singa ag pakabilang ed saray bitewen ed tawen odino saray buer ed gilig na dayat.

²³ Inkuan na Katawan ed siak,

²⁴ Naimanom so pangibabaga da ray totoo ya impolisay koy Israel tan say Juda, saray duaran pinilik a pamilya? Kanyan balbalawen da ray totook tan ag da la ra ipapasen a sakey a bansa.

²⁵ No panoy pangitutuloy ko, siak a Katawan, na impisipanan kod agew tan say labi, diad impangipaakseb ko na saray oksuy ed katawenan tan mundo,

²⁶ ontan met so pangituloy koy impisipanan kod saray kabyangay boleg nen Jacob tan diad aripen kon David. Mamili ak na sakey ed saray kabyangay boleg nen David a sikatoy manoley ed saray kabyangay boleg di Abraham, Isaac, tan Jacob. Kasian ko ray totook tan paaligwasen ko ra lamet.

34

¹ "Akisalitad siak so Katawan nen si Ari Nabucodonosor na Babilonia tan saray sondalo to, a tutulongan iray arum a sondalon taga ra arum a bansa a wala rad silong na pakaoley to, et dodogpaan day Jerusalem tan saray kakaabay ton baley.

² "Say Katawan, say Dios na Israel, imbaga tod siak ya onla ak ed kinen Ari Sedekias na Juda ta ikuanko yan salita to, Siak, say Katawan, ipadakep ko yan siudad ed ari na Babilonia, tan poolan to.

³ "Ag ka makabatik; nadakep ka tan nipalima kad sikato. Napilupaan mo tan napitongtongan mo yan ari; insan ka onlad Babilonia.

⁴ "Sedekias, dengel moy ibabagak nipaakar ed sika. Ag ka napatey ed bakal.

⁵ "Mareen so ipatey mo. No panoy impamool na saray totoo na insinso nen impompon da ray lalakim ya akaona ran nanoley nen say sika, ontan met so pampool da na insinso a para sika. Panermenan da ka tan kuanda, Inatey so ari mi! Siak, say Katawan, so nansalita.

⁶ "Insan imbagak ira yan salita ed kinen Ari Sedekias diad Jerusalem,

⁷ "legan a dodogpaan na saray sondalo na arid Babilonia so siudad. Dodogpaan met na saray sondalo so Lakis tan say Azeka, saray akeraan labat ya apaliberan na padir a siudad na Juda.

⁸ "Si Ari Sedekias tan saray totood Jerusalem nampapakna ran ibolus

⁹ "da ray aripen a Hebreo, laki may bii, pian anggapoy siopaman a mangaripen na kapara ton Israelita.

¹⁰ Nampapaknan amin iray totoo tan saray pangulo ra ya ibolus da ray aripen da, tan ag da la ran balut aripenen. Imbolus da ray aripen,

¹¹ balet ag abayag angoman iray kanununotan, ta binabawi da ra, insan da ra pinasoot ya inaripen lamet.

¹² Insan say Katawan

¹³ a Dios na Israel imbaga tod siak ya ikuanko yan salita tod saray totoo: Akisipanan ak ed saray lalaki yo nen impaway ko rad Egipto tan imbolus ko rad inpakaaripen da. Imbagak ed sikara

¹⁴ a kapag pitoy taon mangibolus ira na siopaman a Hebreon aripen ya akapanlingkur lad sikara na anem taon. Balet ag ak inkabilangan na saray lalaki yo; ag da dinengel so imbagak.

¹⁵ Agano nin angoman kayoy kanunotan tan ginawa yoy makapaliket ed siak. Nampapakna kayon amin ya ibolus yo ray kapara yon Israelita, tan akisipanan kayo diad arap ko, diad dalem na Timplo a pangigagalangan ed siak.

¹⁶ Balet angoman kayo lamet na kanunotan tan ag yo ak pinagalangan. Binabawi yon amin ira may aripen ya imbobolus yo onung na labay da, tan pinasoot yo ra lamet ya inaripen.

¹⁷ Kanyan natan, siak, say Katawan, kuanko ya ag yo ak inonur; ag yo initdan na kawayangan iray kapara yon Israelita. Sigi sirin, itdan ta kayoy kawayangan: say kawayangan ya ompatey ed bakal, salot tan eras. Gawaen koy amin a bansa ed intiron mundo a nataktakot lapud gawaen kod sikayo.

¹⁸ Saray opisyal ed Juda tan Jerusalem, pati saray opisyal ed palasio, saray papari, tan amin a pangulo et akisipanan irad siak diad panamegley na indalan dad nanleetan na pinaldua ran bakan kalakyan. Balet dineral da may sipanan, ta ag da inonur iray nepeg dan gawaen onung ed impisipanan da. Kanyan gawaen kod sarayan totoo so singa samay ginawa rad baka.

¹⁹

²⁰ Ipadakep ko rad saray kalaban da a mampilalek a mamatey ed sikara, et kanen na saray manok tan saray ayayep ed katakelan iray bangkay da.

²¹ Ipadakep ko met si Ari Sedekias na Juda tan saray opisyal to ed saray malabay a mamatey ed sikara. Ipadakep ko rad saray sondalo na Babilonia a tinmonda la ran ondodogpa ed sikayo.

²² Iganggan ko ra, et ompawil irad sayan siudad. Dogpaan da, dakepen da, insan da poolan. Saray baley na Juda et pagmaliwen ko ran singa kalawakan ya anggapoy manaayam. Siak, say Katawan, so nansalita.

35

¹ "Nen si Joakim a lakin anak nen Josias so ari na Juda, say Katawan inkuantod siak,

² "Lakad boleg na saray Recabita tan misalita kad sikara. Insan inyakar mo rad sakey ed saray kuarto na Timplo tan itdan mo ray alak.

³ "Kanyan tinipon kon amin iray kabyangay boleg a Recabitasi Jaazanias (say lakin anak na sananey a Jeremias, a lakin anak nen Habasinias,) tan amin iray agagi tan anak ton lalaki

⁴ "insan intagar ko rad Timplo. Inyakar ko rad kuarto na saray disipulo nen propita Hanan a lakin anak nen Igdalias. Sayan kuarto et walad tagey na kuarto nen Maasias a lakin anak nen Sallum, sakey a manonan opisyal na Timplo. Asingger met yan kuarto ed saray kuarto na saray arum ya opisyal.

⁵ "Insan angyan ak na saray kupa tan saray pitsir a napnoy alak diad arap na saray Recabita, tan kuankod sikara, Inom kayo.

⁶ "Balet inmebat ira, Ag kami oniinom na alak. Si laki min Jonadab ya anak nen Recab imbaga to a sikami tan saray kabyangay boleg mi et ag kamin balut oninom na alak.

⁷ "Imbaga to met ed sikami ya ag kami mangipaalagey na saray abung odino ondalus ed dalin, tan ag kami mantanem ed kaubasan odino saliwen ira. Ingganggan to kamin manayam lawas ed saray tulda, pian mansiansia kamin singa sangkaili ed sayan dalin a panaayaman mi.

⁸ "Inonur mi ray amin a bilin ed sikami nen Jonadab. Ag kami oniinom na alak, anggan saray kaasawaan mi, saray lalakin anak mi, odino saray bibiin anak mi.

⁹ "Ag kami mangipapaalagey na saray abung a a panayaman mimanaayam kamid saray tuldatan anggapoy kaubasan, kaalogan, odino bungay tanaman mi. Sigput min inonur iray ingganggan ed sikami nen laki min Jonadab.

¹⁰ Balet nen nilooban nen Ari Nabucodonosor so bansa, ginetma miy onlad Jerusalem pian nibatikan mi ray taga Babilonia tan saray sondalon taga Siria. Sikato yay makasengeg no akin et manaayam kami diad Jerusalem.

¹¹

¹² Insan say Katawan a Makapanyarin-amin, say Dios na Israel, imbaga tod siak ya onla ak ed saray totood Juda tan Jerusalem tan ikuankod sikara so salita to, Siak, say Katawan, tetepeten kod sikayo no akin et ag kayo ondengel ed siak tan ag yo onuren iray bangat ko.

¹³

¹⁴ Inonur na saray kabyangay boleg nen Jonadab so ganggan to ya ag ira oninom na alak, tan anggad natan anggapod sikaray oniinom na alak. Siak balet, ag yo ak oonuren anggaman ya ag ak ontotondan misasalitad sikayo.

¹⁵ Intutuloy koy mangibakid sikayo na amin da ray aripen a propita, tan imbaga rad sikayo a tondaan yo lay maoges a panagbilay yo tan manggawa ki lay kamaungan. Pinasakbayan da kayon ag mangigalang tan ag manlingkur ed saray arum a diriyos pian nayarian yoy mansiansian manayam ed dalin ya inter kod sikayo tan saray lalaki yo. Balet ag kayo dinmengel odino angasasikasod siak.

¹⁶ Saray kabyangay boleg nen Jonadab inonur day ganggan na laki ra, balet sikayon totoo ag yo ak inonur.

¹⁷ Kanyan, siak, say Katawan a Makapanyarin-amin a Dios na Israel, iyakar kon amin iray insipan kon deral ed sikayo ran totood Juda tan Jerusalem. Gawaen ko ya, ta ag kayo dinmengel nen akisalita ak ed sikayo, tan ag yo ak inebatan nen tinawag ta kayo.

¹⁸ Insan imbagak ed saray kabyangay boleg nen Recabita a say Katawan a Makapanyarin-amin a Dios na Israel kuanto, Inonur yoy ganggan nen laki yon Jonadab; sinumpal yo ray bangat to, tan ginawa yo ray amin ya ingganggan tod sikayo.

¹⁹ Lapud saya, siak, say Katawan a Makapanyarin-amin a Dios na Israel, isisipan ko a nawalaan lawas si Jonadab a lakin anak nen Recab na sakey a lakin kabyangay boleg to a manlingkur ed siak.

36

¹ "Nen kumapat a taon na panaarid Juda nen Joakim a lakin anak nen Josias, inkuan na Katawan ed siak,

² "Mangala kay sakey a nilokut a papil ta isulat mon amin iray imbagak ed sika, nipaakar ed Israel tan Juda, tan amin a bansa. Isulat mon amin iray imbagak ed sika manlapu lad samay inmonan impisalitak ed sika, nen ari ni si Josias, ya anggad natan.

³ "Angangko no narengel na saray totood Juda iray amin a deral a getmak ya iyakar ed sikara, ikaindan day maoges a kabibilay da. Pirdonaen kod satan iray kaogsan tan saray kasalanan da.

⁴ "Kanyan tinawag koy Baruc a lakin anak nen Nerias, tan indiktak ed sikato ya amin iray imbaga na Katawan ed siak. Insulat iran amin nen Baruc diad sakey a nilokut a papil.

⁵ "Insan binilin ko si Baruc, Asebelan ak lan onlad Timplo.

⁶ "Kanyan sika lay onlad man no arapen a panayuno na saray totoo, tan maksil mon ibasa yan nilokut a babasaen, pian narengel day amin ya imbagad siak na Katawan, ya indiktak irad sika. Gawam ya ed pasen a narengel kay amin a totoo, pati saray totood Juda a sinmabin nanlapud saray baley da.

⁷ "Gawam ya, ta ag la pigan mampikasi rad Katawan tan benegan day maoges a kabibilay da, lapud imbesngaw na Katawan ed sarayan totoo so mapalalon pasnuk tan sanuk tod sikara.

⁸ "Kanyan imbasa nen Baruc diad Timplo iray salita na Katawan onung na samay amin ya imbagak ed sikara.

⁹ "Nen kumasiam a bulan na kumaliman taon na panaarid Juda nen Joakim, nanayuno iray totoo pian naala ray maung a linaway Katawan. Akibiang ed sayan ayuno iray amin a manaayam ed Jerusalem tan amin da ray linmad man a nanlapud saray baley na Juda.

¹⁰ Nen manderengel ya amin iray totoo, binasa nen Baruc ed samay nilokut a babasaen iray amin ya imbagak. Ginawa to ya ed Timplo, diad kuarto na sikritariod ari a si Gemarias a lakin anak nen Safan. Walad bandad tagey a patio so kuarto to, diad lolooban na Puirtan Balo na Timplo.

¹¹ Si Micaya a lakin anak nen Gemarias tan apo nen Safan, nadngel toy Baruc a nambasad nilokut a babasaen na saray imbaga na Katawan.

¹² Insan linmay Micaya ed palasioy ari, diad kuarto na samay sikritario na ari, a dimay panmimitingan na amin da ray opisyal. Wadman ira di Elisama a sumisimbawa na ari, Delaya a lakin anak nen Semaya, Elnatan a lakin anak nen Acbor, Gemarias a lakin anak nen Safan, Sedekias a lakin anak nen Hananias tan saray arum ya opisyal.

¹³ Imbaga tod sikara iray amin a nadngel ton imbasa nen Baruc ed saray totoo.

¹⁴ Insan imbaki na saray opisyal si Jehudi, (a lakin anak nen Netanias, ya apo nen Selemias, tan apod pueg nen Cusi) ta ibaga tod Baruc ya awiten tod sikara imay nilokut a babasaen ya imbasa tod saray totoo. Inyakar nen Baruc ed sikara a sankaawit to may nilokut a babasaen.

¹⁵ Yorung ka tan ibasam ed sikami tay nilokut a babasaen, kuanda ra may opisyal. Kanyan imbasad sikara nen Baruc.

¹⁶ Kayari to ya abasan amin, mapagpaga ran nannenengnengan, tan inkuandad kinen Baruc, Nepeg mi yan ipasabi ed ari.

¹⁷ Insan tinepet dad sikato, Ibagam ed sikami, panon mon insulat ira ya? Indikta ra yad sika nen Jeremias?

¹⁸ Inmebat si Baruc, Indikta nen Jeremias ed siak so balang salita tan insulat kod tinta ed sayan nilokut a babasaen.

¹⁹ Insan inkuandad sikato, Nepeg ya onamut ka tan si Jeremias. Ag yo ipapaamtad siopaman so kawalaan yo.

²⁰ Inyan na saramay opisyal imay nilokut a babasaen ed kuarto nen Elisama a sikritario na ari, tan linma rad patio na ari tan diman da imbagad ari iray amin a bengatla.

²¹ Insan say ari impaala tod kinen Jehudi imay nilokut a babasaen tan binasa tod ari tan saray amin ya opisyal a manalalagey ed kaliber-liber to.

²² Panaoy ambetel ed saman tan manyodyorung ed abay na apoy so ari diad loob na palasio ton para panaoy ambetel.

²³ No nabasa nen Jehudi so talora odino apatiran karasig, salgeren ya ekalen na ari insan to ibontuk ed apoy. Onyay ginagawa to ya anggad apoolan imay intiron babasaen.

²⁴ Balet samay ari odino saramay opisyal ya akadngel ed sarayan amin et ag ira tinmakot odino angipatnag na pagbabawi ra.

²⁵ Anggaman a kinerew di Elnatan, Delaya, tan Gemarias ed ari ya ag to poolan imay babasaen, ag to ra dinengel.

²⁶ Insan ingganggan na ari ira di Jerameel a prinsipi, Seraya a lakin anak nen Azriel, tan Selemias a lakin anak nen Abdeel, ya erelen da ak tan si Baruc a sikritariok. Balet inyamut kami na Katawan.

²⁷ Kayarin pinoolan na ari imay nilokut a babasaen ya indiktak ed kinen Baruc, imbaga na Katawan ed siak

²⁸ a mangala ak na sananey a nilokut a pansulatan, ta isulat kon amin iray walad samay nilokut a babasaen a pinoolan nen Ari Joakim.

²⁹ Imbaga na Katawan ed siak ya ikuankod kinen Ari Joakim yan salita to, Pinoolan mo may babasaen, tan tinepet mod kinen Jeremias no akin et insulat ton onsabi so ari na Babilonia a manderal ed sayan dalin, tan pateyen to ray totoo tan saray ayayep dia.

³⁰ Kanyan sirin, siak, say Katawan, kuankod sika, Ari Joakim, ya anggapoy kabyangay boleg mo a makapanoley ed nanarian nen David. Say bangkay mo nibantak ed pataktak a napetangan no agew tan nabetelan no labi.

³¹ Dusaen ta ka, saray kabyangay boleg mo, tan saray opisyal mo lapud saray kasalanan yo. Sika, saray totood Jerusalem, tan Juda et ag dinmengel ed saray pasakbay ko, kanyan iyakar kod sikayon amin so deral ya imbagak lan gawaen ko.

³² Insan angala ak na sananey a nilokut a pansulatan tan inter kod sikritariok a si Baruc. Insulat ed satan nen Baruc iray amin ya indiktak. Insulat ton amin iray logan na samay nilokut a babasaen a pinoolan nen Ari Joakim tan saray salita a miparpara ed saramay indiktak ed sikato.

37

¹ "Si Ari Nabucodonosor na Babilonia insalat tod kinen Joakin a lakin anak nen Joakim so lakin anak nen Josias a si Sedekias a manari ed dalin na Juda.

² "Balet si Sedekias, saray opisyal to, tan saray totoo et ag ira inmonur ed saray salitan impaibagad siak na Katawan.

³ "Si Ari Sedekias imbaki tod siak si Jucal a lakin anak nen Selemias tan say pari a si Sofonias a lakin anak nen Maasias, ta kerewen dan ipikasik ed Katawan a Dios tayo so bansa.

⁴ "Ag ak ni aprisod sayan panaon, kanyan mililimug-limug ak nid saray totoo.

⁵ "Pinmaway lad ketegan na Egipto iray sondalon Egipsio, et nen nadngelan ya na saray taga Babilonia ya onlalakob ed Jerusalem, sinmener ira.

⁶ "Insan imbagad siak na Katawan a Dios na Israel ya ikuankod kinen Sedekias yan salita,

⁷ "Onsasabin ontulong ed sika ray sondalon Egipsio, balet ompawil irad Egipto.

⁸ "Insan ompawil diad satan iray taga Babilonia, dogpaan da yan siudad, dakepen da, insan da poolan.

⁹ "Papasakbayan ta ka, siak a Katawan, ya ag mo papalikdoey sikan dili diad panilalom ya ag dia ompawil iray taga Babilonia, ta talagan ompawil ira.

¹⁰ Anggaman a natalom ya amin iray sondalo na Babilonia, ta pian saray nakeraan labat ed sikara et saray sugatan a mandokdokul ed dalem na saray tulda ra, sarayan totoo et looban da ni yan siudad, insan da poolan.

¹¹ Nen manasingger ed Jerusalem iray sondalo na Egipto sinmoner iray sondalo na Babilonia.

¹² Manlapud Jerusalem linma ak ed pasen a nasasakopan nen Benjamin, ta alaen koy nabebetangan ko ed kayaryan na pamilyak.

¹³ Balet nen akasabi ak ed Puirta nen Benjamin, say makaoley ed saray sondalon mambabantay diman, a si Irias ya anak nen Selemias tan apo nen Ananias, sinabat to ak tan kuanto, Ombabatik kan migampid saray taga Babilonia!

¹⁴ Inmebat ak, Aliwan tua tan! Ag ak ombabatik a migampid saray taga Babilonia. Balet ag ak dinengel nen Irias. Inerel to ak ingen tan inyakar to ak ed saray opisyal.

¹⁵ Mapalaloy pasnuk dad siak; sinisiplatan da ak, insan da ak impokuk ed abung nen Jonatan a sikritarioy ari, a nagmaliw a prisowan so abung to.

¹⁶ Nipokuk ak ed kuartod dalem na dalin tan nanayam ak diman ya abayag.

¹⁷ Insan impaawit ak nen Ari Sedekias, tan maamut ton tinepet ed siak diman ed palasio, Walay papaibaga na Katawan? Inmebat ak, Wala! Nipalima kad ari na Babilonia.

¹⁸ Insan tinepet ko, Antoy kasalanan kod sika, odino diad saray opisyal mo, odino diad saray totoom a makasengeg na pangipiprisoan mod siak?

¹⁹ Antoy asumpalan da ray propitan angibagad sika a say ari na Babilonia et ag to ka dogpaan odino sayan bansa?

²⁰ Kanyan natan, Kagalang kon Ari, kerewen kod sika a dengel mo ak pa, tan iter moy kerewen ko. Ag mo ak pa la ipapawil ed prisowan diad abung nen Jonatan. Ta ni ipawil mo ak, andi-saew ya ompatey ak lad man.

²¹ Kanyan ingganggan nen Ari Sedekias a nipokuk ak ed dalem na patio a diman ak naiitdan na sakey a tinapay ya inagew-agew, anggad naoput lan amin so tinapay ed siudad.

38

¹ "Si Sefatias a lakin anak nen Matan, si Gedalias a lakin anak nen Pasur, si Jucal a lakin anak nen Selemias, tan si Pasur a lakin anak nen Malkias nadngel day ibabagak ed saray totoo

² "a say Katawan inkuanto, Ompatey ed bakal, odino eras, odino salot so siopaman a manayam ed dalem na siudad. Balet ag napatey so siopaman ya ompaway ed siudad ta onsukod saray taga Babilonia; nipaliis ed patey tan mambilay.

³ "Imbabagak, met a say Katawan inkuanto, Iter ko yan siudad ed saray sondalon taga Babilonia, tan nadakep da.

⁴ "Insan inkuan na saray opisyal ed ari, Nepeg a pateyen yan too. Diad pansasalita toy onya pakakapoyen toy linawa da ray sondalo tan saray arum a totoon walad dalem na siudad. Aliwan pankaabigan na karaklan so aanapen na sayan too, no ag say pakaderalan da.

⁵ "Inmebat si Ari Sedekias, No ontan sirin, gawa yod sikatoy labay yo; ag ta kayo nayarin sebelan.

⁶ "Kanyan inala ra ak tan diad panamegley na lobir inlosur da ak ed dalem na bobun a walad patio tan kayaryan nen Prinsipi Malkias. Anggapoy danum to may bobun no ag ingen pitek labat so karga to, kanyan kinmotep ak.

⁷ "Balet si Ebed-melec a taga Sudan, sakey a yunoko tan walay kimey tod palasioy ari, nadngelan ton impelag da ak ed dalem na bobun. Diad sayan bekta walad Puirta nen Benjamin so ari.

⁸ "Kanyan linmad man si Ebed-melec tan kuantod ari,

⁹ "Kagalang kon Ari, maoges so ginawa na saraman a totoo. Impelag dad dalem na bobun si Jeremias, kanyan andi-saew ya ompatey lad man ed eras lapud naoput lay kakanen ed siudad.

¹⁰ Kanyan ingganggan na ari si Ebed-melec a mangitagar na taloran lalaki a wadman, ta agwaten da ak ed bobun kasakbayan ya ompatey ak.

¹¹ Intagar sirin nen Ebed-melec ira may lalaki tan linma rad panagsinupan a kuarto ed palasio, ta angala ray daan iran kawes. Insan da impataoy ed siak imay abel a nisinger ed lobir.

¹² Insan inkuanen Ebed-melec ed siak, Ibaliber mod kilikilim itay abel, pian ag ka nasakitan na lobir. Ginawak so nibagad siak.

¹³ Ginoyur da ak sirin diad panamegley na samay lobir, et naagwat ak. Kayari to ya, nipokuk ak lad dalem na patio.

¹⁴ Impaawit ak nen Ari Sedekias diad kumatlon lolooban ed Timplo. Inkuantod siak, Walay tepeten kod sika, et ag ko labay a walay iyamut mod siak.

¹⁵ Inmebat ak, No ibagak ed sikay katwaan, papatey mo ak, tan no simbawaen ta ka, ag mo ak dengelen.

¹⁶ Kanyan diad maamut insipan nen Ari Sedekias ed siak, Sambaan kod mabilay a Katawan a mangiiter ed sikatayoy bilay, ya ag ta ka papatey odino ipalimad saray totoon malabay a mamatey ed sika.

¹⁷ Insan ko imbagad kinen Sedekias a say Katawan a Makapanyarin-amin a Dios na Israel inkuanto, No onsuko kad ari na saray opisyal na Babilonia, nipaliis kad patey tan ag napoolan yan siudad. Sika tan say pamilyam et nipaliis ed patey.

¹⁸ Balet no ag ka onsuko, nipalimad saray taga Babilonia yan siudad, poolan da, tan ag mo ra nibatikan.

¹⁹ Balet inmebat si Ari Sedekias, Antakot ak ed saray Judion akigampid saray taga Babilonia. Ompan siak so nipalimad sikara et pairapen da ak.

²⁰ Inkuankod sikato, Ag ka nipalimad sikara. Kerewen kod sika ya onur moy salitay Katawan onung na imbagak lad sika; diad ontan maung so pansumpalan mo. Nipaliis kad patey.

²¹ Balet diad sakey a pasingayew impaamtad siak na Katawan so nagawad sika no ag ka onsuko.

²² Anengneng kod samay pasingayew ya amin da ray bibiin atilak ed palasio ed Juda et niyaakar la rad saray opisyal na ari na Babilonia. Dengel moy ibabaga ra legan dan oonla. Say ari pinalikdo na saray malet a kakaaro to, naonur so labay da nen say labay to. Natan ta linmereg lad pitek so sali to, tinaynan la na saray kakaaro to.

²³ Insan inkuanko ni, Amin da ray bibii tan saray anak mo et nipaway iran niakar ed saray taga Babilonia, tan ag mo ra nibatikan. Nadakep ka na ari na Babilonia, tan napoolan yan siudad.

²⁴ Inmebat si Sedekias, Ag mo ibabagad siopaman yan tongtongan ta, pian niarawi kad kaatapan.

²⁵ No narengelan na saray opisyal ya akitongtong ak ed sika, onla ra dia tan tepeten da no antoy nantongtongan ta. Isipan da ya ag ka pateyen no ibagam ed sikara so nantongtongan ta.

²⁶ Ibagam labat ed sikara a kekerewen mod siak ya ag ta ka la papawilen ed prisowan a dimay pateyan mo.

²⁷ Linman tua ed siak iray amin ya opisyal. Tinetepetan da ak, tan imbagak ed sikara imay amin ya impaibaga na ari. Anggapoy agawaan da, lapud anggapoy akadngel ed tongtongan mi nen ari.

²⁸ Nansiansia ak a nanayam ed patio na palasio anggad adakep so Jerusalem.

39

¹ "Nen kumaplon bulan na kumasiam a taon na panaarid Juda nen Sedekias, sinmabiy Nabucodonosor tan amin a sondalo to tan dinogpaan day Jerusalem.

² "Nen kumasiam ya agew na kumapat a bulan na kumalabinsakey a taon na panaari nen Sedekias, ageba ray padir na siudad. (

³ "Nen adakep so Jerusalem, amin da ray atagey ya opisyal na ari na Babilonia dinmago ra tan angopisina rad Puirta na Pegley, a pati di Nergal Sarezer, Samgar Nebo, Sarsekim, tan sananey nin Nergal Sarezer.)

⁴ "Nen si Ari Sedekias na Juda tan amin da ray sondalo to et anengneng day agawa, sinali ran ibatikay siudad legay labi. Pinmaway irad tanamanan na ari, insan ira dinmalan ed puirtan nanleetan na saray duaran padir tan batik iran amaarap ed Patar na Jordan.

⁵ "Balet inosilan ira na saray sondalo na Babilonia, tan adakep day Sedekias ed saray patar ya asingger ed Jerico. Inyakar day Sedekias ed kinen Ari Nabucodonosor a walad siudad na Ribla diad dalin na Hamat, tan diman sinintinsiaan nen Nabucodonosor.

⁶ "Diad Ribla nengnengnengen nen Sedekias iray lalakin anak to legan ya impapatey ira na ari na Babilonia. Impapatey to met iray opisyal na Juda.

⁷ "Insan to impasokit iray mata nen Sedekias, tan to impagulonggulongan ya iyakar ed Babilonia.

⁸ "Legan to ya, pinoolan na saray taga Babilonia so palasio ed Jerusalem tan saray abung na totoo, tan inggegeba da ray padir na Jerusalem.

⁹ "Diad kaonuran, si Nebuzaradan a pangulo na saray sondalo inyakar ton priso ed Babilonia iray nakdaan a totoo ed siudad tan saray akigampid sikato.

¹⁰ Intilak tod dalin na Juda iray sankamairapay bilay a totoo ya anggapoy kayaryan dan balut, insan to ra initdan na saray kaubasan tan kaalogan.

¹¹ Balet si Ari Nabucodonosor na Babilonia imbaga tod kinen Nebuzaradan a pangulo na saray sondalo ya ipaakseb to yay onggendan a ganggan:

¹² Laka ta anap moy Jeremias tan asikasom a maung. Ag mo papasakitan, tan iter mo so antokaman a labay to.

¹³ Kanyan si Nebuzaradan, tan saray atagey ya opisyal a di Nebusazban tan si Nergal-sarezer, tan amin da ray arum nin opisyal na ari na Babilonia

¹⁴ et impaala da ak ed patio na palasio. Impaasikaso da ak ed kinen Gedalias a lakin anak nen Ahicam tan apo nen Safan. Insempet to ak la sirin ed abung. Akilimug-limug ak sirin ed saray totood man.

¹⁵ Akisalitay Katawan ed siak legan ya apokuk ak ni ed patio na palasio. Imbaga tod siak

¹⁶ ya ibagak ed kinen Ebed-melec a taga Sudan a say Katawan a Makapanyarin-amin a Dios na Israel inkuanto, Deral so iyakar kod sayan siudad, aliwan say aligwas, onung na nibagak lan gawaen ko. No nagaway onya, wadtan kan makaimatun.

¹⁷ Balet, siak, say Katawan, iyagel ta ka tan ag ka nipalimad saray totoon tatakotan mo.

¹⁸ Iyarawi ta kad kaatapan, tan ag ka napatey. Nipaliis kad patey lapud nanmatalek kad siak. Siak, say Katawan, so nansalita.

40

¹ "Akisalitad siak so Katawan kayarin imbolus ak ed Rama nen Nebuzaradan a pangulo na saray sondalo. Niakar ak diman ya akagolunggolung; kaibak ya amin iray totoon taga Jerusalem tan Juda a niakar a priso ed Babilonia.

² "Impaliis ak na samay panguloy sondalo tan inkuantod siak, Impasakbay la na Katawan a Dios mo a deralen to yan dalin,

³ "et natan sinumpal to yan impasakbay to. Onyay agawa lapud saray totoom et nankasalanan irad Katawan tan ag da inonur.

⁴ "Ekalen ko la natan iray golunggolung ed ngalngalowan mo tan ibolus ta ka la. No labay moy milad siak ed Babilonia, nayari tan asikasoen ta ka. Balet no ag mo labay, andi bali. Napampilyan mo so intiron bansa; nayarian moy onla ed anggan iner a labay mo.

⁵ "Nen ag ak onebat, inkuanen Nebuzaradan ed siak, Pawil kad kinen Gedalias, a lakin anak nen Ahicam tan apo nen Safan, a sikatoy impagmaliw na ari na Babilonia a gobirnador na saray baley na Juda. Nayarian moy manayam ed sikato a kalimug mo ray totood man, odino onla ka ed inerman a pasen a labay mo. Initdan to ak na rigalo tan say nakan ya awiten ko, insan to ak la pinasiput.

⁶ "Linma ak ya akiayam ed kinen Gedalias diad Mizpa tan akilimug-limug ak ed saray totoon atilak ed dalin na Juda.

⁷ "Wala ray pigaran ag sinmukon opisyal tan sondalo na Juda. Nadngelan da a say ari na Babilonia et ginawa ton gobirnador na dalin si Gedalias a lakin anak nen Ahicam tan impasen ton makaoley ed amin da ray ag niakar a priso ed Babilonia, salanti saray sankamairapay bilay ed dalin.

⁸ "Kanyan nila ra si Gedalias ed Mizpa. Saray linma et di Ismael a lakin anak nen Natanias, Johanan a lakin anak nen Carea, Seraya a lakin anak nen Tanhumat, saray lalakin anak nen Efai a taga Metofat, tan Jezanias a taga Maaca.

⁹ "Inkuanen Gedalias ed sikara, Isipasipan kod sikayo ya anggapoy nepeg yon takotan diad isuko yod saray taga Babilonia. Manayam kayod sayan dalin tan panlingkuran yoy ari na Babilonia, et maung so pansumpalan yo.

¹⁰ Manayam ak ed Mizpa tan siak so mangilaman ed sikayo no onla ra diay taga Babilonia. Balet sikayo nayarian yoy manala tan mangisinup na alak, bunga na saray tanaman, tan say larak na oliba. Nayarian yoy manayam ed saray barion asakop yo.

¹¹ Legan to ya, amin da ray Israelita a walad dalin na Moab, Ammon, Edom, tan saray arum a bansa, et nadngelan da a say ari na Babilonia et inabuloyan to ray pigaran Israelita a manaayam ed Juda, tan impagmaliw ton gobirnador da si Gedalias.

¹² Kanyan tinaynan da ray pasen a nikaykayatan da tan pinmawil irad Juda. Linma rad kinen Gedalias diad Mizpa, tan nanaala ray amayamay ya alak tan saray bungay tanaman.

¹³ Kayari to ya, si Johanan a lakin anak nen Carea tan saray pangulo na saray sondalo ya ag sinmuko et linma rad kinen Gedalias diad Mizpa

¹⁴ tan kuandad sikato, Amtam a si Ari Balis na Ammon et imbaki toy Ismael a lakin anak nen Natanias, pian papatey to ka? Balet ag to ya sinisia nen Gedalias.

¹⁵ Insan si Johanan inkuantod maamut ed kinen Gedalias, Iyabuloy mon onla ak a pateyen koy Ismael, tan anggapod satan so makaamta no siopay amatey ed sikato. Ag ka nepeg a pateyen na saman a too. No napatey ka, nikaykayat iray Judion ooleyan mo; tan sakey ni, napatey ya amin iray atilak ed Juda.

¹⁶ Balet inmebat si Gedalias, Aleg, ag mo itutuloy itan a kanunotan mo! Aliwan tua tay ibabagam nipaakar ed kinen Ismael!

41

¹ "Nen kumapiton bulan, si Ismael a lakin anak nen Natanias tan apo nen Elisama, tan sakey a kabyangay pamilya na ari, linmad Mizpa a kaiba to ray samploran lalaki, ta nengnengen day Gobirnador Gedalias. Nen wala rad Mizpa tan mandorongo ra,

² "inoyus nen Ismael so ispada to tan saramay samploran lalaki, insan da pinatey si Gedalias.

³ "Pinatey met nen Ismael ya amin iray Israelitan kaiba nen Gedalias ed Mizpa tan saray sondalon taga Babilonia a nibanan wadman.

⁴ "Kaimbuas, kasakbayan a naamtaan so impamatey ed kinen Gedalias,

⁵ "wala ray walomplon lalakin sinmabi a nanlapud Sikem, Silo, tan Samaria. Inekal da ray balbas da, pinipilat da ray kawes da, tan sinasalger day laman da. Sankaawit da ray trigo tan say insinso ya ibagat da ed dalem na Timplo.

⁶ "Pinmaway ed Mizpa si Ismael tan manakakis ya inabet to ra. Kaasingger tod sikara, inkuanto, Loob kayod siudad ta nengneng yoy Gedalias.

⁷ "Kaloob dad siudad, pinatey ira nen Ismael tan saray totoo to, insan da impepelag ed bobun iray bangkay da.

⁸ "Balet walay samplora ed samay grupo ya akikasid kinen Ismael, Ag mo kami kari papateyen! Walay trigo, sibada, larak na oliba, tan dilo mi a niamut ed kaalogan. Kanyan kinawanan toy bilay da tan ag to ra impipatey ed saramay kakaiba ra.

⁹ "Balbaleg a bobun imay angipelagan nen Ismael ed saray bangkay na saramay pinapatey to. Sikato man imay bobun a ginawa nen Ari Asa nen dodogpaan nen Ari Baasa na Israel. Pinano nen Ismael na bangkay imay bubon.

¹⁰ Insan dinakep nen Ismael iray bibiin anak na ari tan saray arum a totoo ed Mizpa a sikaray impalima nen Nebuzaradan a pangulo da ray sondalo na Babilonia ed kinen Gedalias. Inala nen Ismael iran priso, insan da ginapwan so amaarap ed dalin na Ammon.

¹¹ Nadngelan nen Johanan a lakin anak nen Carea tan amin da ra may kakaiba ton pangulo na sondalo so maoges a ginawa nen Ismael.

¹² Kanyan intagar da ray totoo ra tan nila ran labanan si Ismael. Nabot da ed pasen ya asingger ed baleg a dipositoway danum ed Gabaon.

¹³ Aliketan ira may prison inaala nen Ismael nen anengneng day Johanan tan saray pangulo na saray sondalo.

¹⁴ Kanyan pinmoliktar ira may priso tan batik irad kinen Johanan.

¹⁵ Balet nibatikan nen Ismael tan saramay waloran kakaiba to si Johanan, insan linma rad dalin na Ammon.

¹⁶ Si Johanan sirin tan saramay kakaiba ton pangulo na sondalo et inaasikaso da ray may sondalo, bibii, anak, tan saray yunuko ya inaalan priso nen Ismael ed Mizpa kayari ton pinatey si Gedalias.

¹⁷ Insan ira sinmiput ya onlad Egipto. Tinmonda ran agano ed Kimham ya asingger ed Betlehem. Ginetma ray onla ed Egipto,

¹⁸ pian nibatikan da ray taga Babilonia, ta antakot da ra lapud samay impamatey nen Ismael ed kinen Gedalias a ginawa na ari na Babilonia a gobirnador na dalin.

42

¹ "Insan amin da ra may pangulo na sondalo, pati si Johanan a lakin anak nen Carea tan si Azarias a lakin anak nen Hosaya tan saray totoon nandoromay kipapasen da, et linma rad siak

² "tan kuanda, Gawam pay kerewen mid sika! Ipikasi mo kami pa ed Katawan a Dios tayo. Ipikasi mo kami pa ran atilak dian mabilay. Amayamay kami ni nen saman balet dagdaiset kami la natan, a singa nanenengneng mo.

³ "Pikasim pa a say Katawan a Dios tayo et ipanengneng tod sikami so nepeg min laen tan gawaen.

⁴ "Inebetan ko ra, Maung itay anunotan yo. Ipikasi ta kayod Katawan a Dios tayo tan ibagak so kekerewen yo. No antoy ibaga to, salitaen kod sikayo. Anggapoy iyamut kod sikayo.

⁵ "Insan inkuandad siak, Say Katawan a Dios tayo komun so tua tan matoor a tasi sumpad sikami no ag mi onuren ya amin iray ganggan ya iter tod sika para sikami.

⁶ "Maung may maoges so kipaakaran to, onuren miy Katawan a Dios tayo a kekerewen min pangipikasian yod sikami. No ontoluk kamid sikato, maung ya amin so pansumpalan mi.

⁷ "Kayariy samploran agew akisalitay Katawan ed siak,

⁸ "kanyan tinawag ko ra di Johanan a lakin anak nen Carea, amin da ray kaiba ton pangulo na saray sondalo, tan saray arum a totoo.

⁹ "Inkuankod sikara, Say Katawan a Dios na Israel ya angibakian yod siak a pangibagaan koy kerew yo, inkuanto,

¹⁰ No labay yoy mansiansian manayam ed sayan dalin, iletneg ta kayo; ag ta kayo deralen; itanem ta kayo ya aliwan baguten. Akapaermen na mapalalo ed siak so deral ya inyakar kod sikayo.

¹¹ Ag kayo la ontatakot ed ari na Babilonia. Ag yo tatakotan, ta wala ak ed sikayo; iyagel ta kayod pakayari to.

¹² Lapud mapangasi ak, pakasian ta kayod sikato tan abuloyan to kayon ompawil a manayam ed dalin yo. Siak, say Katawan, so nansalita.

¹³ Balet, sikayon akeraan ed Juda, nepeg ya onuren yo so Katawan a Dios yo. Nepeg a manayam kayod sayan dalin tan ag yo ibabaga, Andi, onla kamin manayam ed Egipto, ag kami lad man nadalan na bakal odino makadngel na trumpitan panawag na bakal, odino bilang naerasan. Balet no ipasoot yoy onla, saya so ikuan ed sikayo na Katawan a Makapanyarin-amin a Dios na Israel, No talagan labay yoy manayam ed Egipto,

¹⁴

¹⁵

¹⁶ aboten kayod man na bakal a tatakotan yo, dalanen kid man na eras a pampapagaan yo, tan ompatey kid man ed Egipto.

¹⁷ Amin da ray talagan malabay a manayam ed Egipto ompatey ira ed bakal, o eras, o salot. Anggapod sikaray nakeraan a mabilay, anggapoy anggan sakey a makapaliis ed deral ya iyakar kod sikara.

¹⁸ Say Katawan a Dios na Israel kuanto, No panoy impamasnuk kod saray totood Jerusalem, ontan met so pamasnuk kod sikayo, no onla kayod Egipto. Magmaliw kayon makapagiwgiw a nengnengen; ludlureyen kayo na saray totoo tan ikana ray ngaran yo a sakey a samba. Ag yo lan balut nanengneng yan pasen.

¹⁹ Insan intuloy kon inkuan, Imbaga na Katawan ed sikayo ran atilak ed Juda ya ag kayo oonla ed Egipto. Kanyan papasakbayan ta kayo natan,

²⁰ ta satay kalingo yo et mambunga na ipatey yon amin. Kinerew yod siak ya ipikasi ta kayo ed Katawan a Dios tayo, tan insipan yo a gawaen yoy amin ya ingganggan to.

²¹ Natan imbagak ed sikayo so papaibaga na Katawan, balet ag yo oonuren ya amiy bengatlan papaibagad siak na Katawan a Dios tayo ed sikayo.

²² Kanyan sirin, tandaan yo ya: ompatey kayod bakal, odino eras, odino salot ed dalin a labay yon laen tan panayaman.

43

¹ "Asumpal kon imbagad saray totoo ya amin iray impaibagad siak na Katawan a Dios da.

² "Insan si Azarias a lakin anak nen Hosaya, si Johanan a lakin anak nen Carea, tan saray arum a mapaatagey a totoo kuandad siak, Mantitila ka. Ag ka imbaki na Katawan a Dios mi a mangibagad sikamin ag kami manayam ed Egipto.

³ "Ingen sinogsogan ka nen Baruc a lakin anak nen Nerias, pian nipasilong kamid pakayari na saray taga Babilonia, et nayarin napatey da kami odino niakar da kami ed Babilonia.

⁴ "Kanyan si Johanan, odino siopaman ed saray pangulo na saray sondalo, odino siopaman ed saray totoo et ag da labay so ontoluk ed ganggan na Katawan a mansiansia ran manayam ed dalin na Juda.

⁵ "Insan si Johanan tan amin da ra may pangulo na saray sondalo inyakar dad Egipto so balang toon atilak ed Juda, a pati amin da ray totoon pinmawil a manlapud saray bansan nikaykayatan da:

⁶ "saray lalaki, saray bibii, saray anak, tan saray bibiin anak na ari. Inala ray amin ya intilak nen Nebuzaradan a pangulo na saray sondalo na Babilonia diad panagasikaso nen Gedalias; akapila diay Baruc tan siak.

⁷ "Ag da inonur so ganggan na Katawan tan linma rad Egipto ya anggad siudad na Tafnes.

⁸ "Diad Tafnes say Katawan inkuantod siak,

⁹ "Mangala ka na pigaran ankakabaleg a bato tan ikotkot mod dalan diad arap na lolooban na paalagey na gobirno diad sayan siudad, tan abuloyan mo ray pigaran Judio ya onnengneng ed gagawaen mo.

¹⁰ Insan mo ibagad sikara a siak, say Katawan a Makapanyarin-amin a Dios na Israel, iyakar ko diay aripen kon Ari Nabucodonosor na Babilonia, insan to ipasen so trono to diad tapew na sayan inkotkot mon bato, tan ipaalageyan to na tulday ari.

¹¹ Onsabiy Nabucodonosor tan taloen toy Egipto. Saray asintinsiaan lan ompatey ed salot ompatey irad salot; saray asintinsiaan lan naalan priso naala ran priso; tan saray asintinsiaan lan ompatey ed bakal ompatey irad bakal.

¹² Poolan ko ray timplo na saray diriyos na Egipto tan say ari na Babilonia et poolan to ray diriyos da odino isempet to ra. Linisan na ari na Babilonia so Egipto, a singa panlinis na sakey a pastol ed kawes to diad pangekal tod saray lies na karniro, insan onsempet lan sipapalabo.

¹³ Temeken to ray masanton bato a monuminto ed Heliopolis diad dalin na Egipto, tan poolan to ray timplo na saray diriyos na saray Egipsio.

44

¹ "Akisalitay Katawan ed siak nipaakar ed amin ya Israelitan manaayam ed Egipto, diad saray siudad na Migdol, Tafnes, tan Memfis, tan diad saray pasen a walad abalaten na bansa.

² "Inkuan na Katawan a Makapanyarin-amin a Dios na Israel, Sikayon dili so akanengneng ed deral ya inyakar ko ed Jerusalem tan diad saray arum a siudad na Juda. Aderal ni ra ya anggad natan, tan anggapoy manaayam ed sikara,

³ "lapud saray totoon manaayam ed saraman a siudad et nanggagawa ray kaogsan tan impanpasnuk da ak. Nambabagat irad saray arum a diriyos tan nanlilingkur irad saray diriyos ya ag da kabat, odino sikayo, odino saray lalaki yo.

⁴ "Ag ak tinmondan angibaki na saray aripen kon propita ya angibagad sikayon ag yo gagawaen yan makapangingungot a bengatlan kabkabosul ko.

⁵ "Balet ag kayo ondengel odino mangasikaso. Ag yo tondaan iray maoges a panangibagat yod saray arum a diriyos.

⁶ "Kanyan nampasnuk ak a maung ed saray baley na Juda tan diad saray dalan na Jerusalem, tan pinopoolan ko ra. Aderal-deral ira tan nagmaliw iran makapagiwgiw a nengnengen, a singa kipapasen da natan.

⁷ "Kanyan siak, say Katawan a Makapanyarin-amin a Dios na Israel, tetepeten kod sikayo natan no akin et gagawaen yod sikayon dili ira yan kaogsan. Labay yon onsabiy deral ed saray lalaki, bibii, saray anak tan saray ogogaw, pian anggapoy nakeraan ed sikayo?

⁸ "Akin et pampapasnuken yo ak diad pangigagalang yod saray talintaoy diriyos tan diad pangibabagat yod saray arum a diriyos diad Egipto a nila yon panaayaman? Gagawaen yo ya a paneral ed sikayon dili, pian ludlureyen kayo na amin iray bansa diad tapew na dalin tan ikana ray ngaran yo a sakey a samba?

⁹ "Alingwanan yo la ra may amin a kaogsan a ginagawa na saray lalaki yo, saray ararid Juda tan saray asawa ra, sikayo tan saray kaasawaan yo, diad saray baley na Juda tan diad saray daladalan na Jerusalem?

¹⁰ Balet anggad natan ag kayo ni nampaabeba. Ag yo ak ni papagalangan tan ag kayo ni mambibilay onung ed saray ganggan ya inter kod sikayo tan saray lalaki yo.

¹¹ Kanyan siak, say Katawan a Makapanyarin-amin a Dios na Israel, sumpaen ta kayo tan deralen koy intiron Juda.

¹² Andi-saew a deralen kon amin iray akeraan a totood Juda tan talagan labay day manayam ed Egipto. Amin da, abeba may atagey so kipapasen, ompatey irad bakal odino eras diad Egipto. Magmaliw iran makapagiwgiw a nengnengen; ludlureyen ira na saray totoo tan ikana ray ngaran da a sakey a samba.

¹³ Dusaen ko ra may manaayam ed Egipto a singa impanusak ed Jerusalem; dusaen ko ra diad panamegley na bakal, eras, tan salot.

¹⁴ Anggapod saray akeraan a totood Juda a linma ran manaayam ed Egipto, so makabatik odino makapaliis ed patey. Anggapod sikaray makapawil ed Juda a pampilalekan dan panayaman lamet. Anggapoy makapawil, likud labat ed pigpigaran makabatik.

¹⁵ Insan amin da ray lalakin amta ran saray kaasawaan da et angibabagat irad saray arum a diriyos tan amin da ray bibiin manalalagey diman, pati saray Judion manaayam ed saray pasen a walad abalaten na Egiptodakel iran amin ya olupinkuandad siak,

¹⁶ Ag mi labay a dengelen iray salitam, saray salitan imbagam ed ngaran na Katawan.

¹⁷ Sumpalen mi ray amin ya imbaga min gawaen. Mangibagat kamid diosa mi, say Riyna na Tawen tan mangisaklang kamid sikato na bagat ya alak, a singa samay ginagawa mid saray baley na Juda tan diad saray dalan ed Jerusalem, ta onya met so ginagawa na lalaki mi, saray arari tan saray pangulo mi. Daakan ed saman a panaon iray kakanen mi, maaligwas kami, tan anggapo ray gunigon mi.

¹⁸ Balet nanlapu lad intonda miy nambabagat ed Riyna na Tawen tan tinondaan miy mangisaklang ed sikato na bagat ya iinomen, naandian kami na kayaryan tan inaatey ed bakal tan eras iray totoo mi.

¹⁹ Insan inyarum na saray bibii, Nen nanggawa kami na saray kanen a kaparpara na Riyna na Tawen, angisaklang kamid sikato na saray bagat, tan angibung ed sikato na saray bagat ya alak, inabubonan na saray kaasawaan mi so gagawaen mi.

²⁰ Insan inkuankod saray amin a lalaki tan saray bibiin inmebat ed siak na onman,

²¹ Nipaakar ed saray bagat a sikayo tan saray lalaki yo, saray arari yo tan saray pangulo yo, tan saray totood bansa, ya insasaklang yod saray baley na Juda tan diad saray dalan na Jerusalemabaloan yon ag amta o alingwanan ira na Katawan?

²² Diad sayan agew aderal-deral so dalin yo tan anggapoy manaayam. Nagmaliw a makapagiwgiw a nengnengen tan ikakana na saray totoo so ngaran to a sakey a samba, lapud ag la naanosan na Katawan so marotak tan maoges a gagawaen yo.

²³ Sinmabid sikayo yan deral natan, lapud nambabagat kayod saray arum a diriyos tan nankakasalanan kayod Katawan diad ag yo impangonur ed amin da ray ganggan to.

²⁴ Insan imbagak ed saray amin a totoo, nagkalalo lad saray bibii, so sinalita na Katawan a Makapanyarin-amin a Dios na Israel ed saray totood Juda a manaayam ed Egipto: Sikayo tan saray kaasawaan yo et walay sinambaan yod Riyna na Tawen. Insipan yon mangisaklang kayod sikato na saray bagat tan mangibung ed sikato na saray bagat ya alak. Tinoor yo ra yan sipan yo. Maung sirin so ginawa yo! Sumpal yo ray sipan yo! Toor yo ray sinambaan yo!

²⁵

²⁶ Balet natan dengel kayod samba, a siak a Katawan et ginawak diad makapanyarin ngaran ko ed sikayon amin ya Israelita a walad Egipto: Ag ko lan balut abuloyan so siopaman ed sikayo a mangikanay ngaran ko diad pansamba to a kuanto, Nitay Katawan a Dios a mabilay!

²⁷ Ag ta kayon balut paaligwasen; ingen, naderal kayo. Amin yon taga Juda a manaayam ed Egipto et ompatey ed bakal o diad salot, anggad anggapoy anggan sakey a nakeraan ed sikayo.

²⁸ Balet wala rad sikayoy pigaran makapaliis ed patey tan taynan day Egipto ya ompawil ed Juda. Diad satan saray akapaliis ed patey et naamtaan da no siopay akansalita so tinmua, siak o sikara.

²⁹ Siak, say Katawan, iter kod sikayo yan tanda a dusaen ta kayo ed sayan pasen, tan ontua so sipan kon paneral ed sikayo.

³⁰ Ipalimak si Ari Hofra na Egipto ed saray kalaban ton malabay a mamatey ed sikato, a singa samay impangipalimak ed kinen Ari Sedekias na Juda ed kinen Ari Nabucodonosor na Babilonia a kalaban to tan malabay a mamatey ed sikato.

45

¹ "Nen kumapat a taon na panaarid Juda nen Joakim a lakin anak nen Josias, insulat nen Baruc a lakin anak nen Nerias iray indiktak ed sikato. Insan imbagak

² "ed kinen Baruc a say Katawan a Dios na Israel inkuanto, Baruc,

³ "ibabagam, Pakaskasi ak la! Say Katawan inaruman to na ermen iray gunigon ko. Makapkapoy ak lad panagdageyem, tan ag ak makapampainawa!

⁴ "Balet siak a Katawan, babagbagen ko so impaalagey ko tan babaguten ko so intanem ko. Gawaen ko ya ed intiron mundo.

⁵ "Aanapen moy nidoman bengatlan para sikan dili? Ag mo la itutuloy, ta deralen koy amin a katoowan; anggaman ontan, nipaliis kad patey anggan iner so laen mo. Siak, say Katawan, so nansalita.

46

¹ "Say Katawan akisalitad siak nipaakar ed saray bansa.

² "Sikato ya so imbaga to nipaakar ed Egipto. Nansalita so Katawan nipaakar ed saray sondalo nen Ari Neco na Egipto, a tinalo nen Ari Nabucodonosor na Babilonia diad Carkemis ya asingger ed Ilog na Eufrates nen kumapat a taon na panaarid Juda nen Joakim a lakin anak nen Josias:

³ "Iyeeyag na saray opisyal na Egipto, Iparaan yo ray samper yo, tan kurang kayon mibakal!

⁴ "Sintaan yo ray kabayo yo tan kabayoan yo ra! Mantatalontonan kayo, tan isolung yo ray hilmit yo! Patdeman yo ray pika yo! Mankawes ki lay para bakal!

⁵ "Balet antoy nanenengneng ko? tepet na Katawan. Ompopoliktar irad takot. Mapalaloy kakairapan na saray sondalo ra; diad gaway takot dan amin, gagawaen day anggay nayarian dan ombatik, tan ag la ra onlilingaw.

⁶ "Ag makaarawi iray mabatik; ag makataynan iray sondalo. Nipapatakba tan natutumba ra ed baybay ya asingger ed Ilog na Eufrates.

⁷ "Siopa yay ontatagey a singa Nilo, singa sakey ya ilog ya onsasapat ed pangdel so danum to?

⁸ "Say Egipto, ya ontatagey a singa Nilo, a singa sakey ya ilog ya onsasapat ed pangdel so danum to. Inkuan na Egipto, Ontagey ak tan salinapen koy mundo; deralen ko ray siudad tan saray totoon manaayam ed sikara.

⁹ "Dagdag yo lan onla iray kabayo, tan pakurang yo la ray karwahi! Ibaki yo la ray sondalo: saray lalakin sankaawit da ray samper a taga Sudan tan Libia, saray marunong a pumapanan taga Lidia.

¹⁰ Sikato yay agew na Katawan a Dios a Makapanyarin-amin: ombawi natad sayan agew; dusaen to ray kalaban to natad sayan agew. Kanen ira na ispada to ya anggad napsel; inomen toy dala ra ya anggad apenek. Ibagat natad sayan agew na Makapanyarin-amin iray kalaban ton inaatey diad baybay ya asingger ed Eufrates.

¹¹ Totood Egipto, laka yod Galaad, ta mangala kayoy tambal! Asali lan anggapoy kana iray tambal yo; anggapoy bengatlan makapaabig ed sikayo.

¹² Nadngelan na saray bansa so kababaingan yo; nadngelan na balang sakey so panaakis yo. Mampapateran iray sondalo kanyan natutumba ra.

¹³ Akisalitay Katawan ed siak nen si Ari Nabucodonosor na Babilonia et pinmawil a dogpaan toy Egipto. Inkuanto,

¹⁴ Ibawag mod saray baley na Egipto, diad Migdol, Memfis, tan Tafnes, Mamparaan kayon mangyagel ed sikayon dili; naderal ed bakal iray amin a kayaryan yo!

¹⁵ Akin et atumba si Apis a makapanyarin dios yo? Lapud kinabil na Katawan!

¹⁶ Nipatakba tan atumba ray sondalo yo; balang sakey kuantod sakey tan sakey, Ganatan yo! Onsempet itayo lad saray totoo tayo, pian napaliisan tayoy ispada da ray kalaban!

¹⁷ Itdan yo na balon ngaran so Egipto, Say Maknul a Mapaatagey ya Apalabas Toy Pankanawnawa To.

¹⁸ Siak, a Katawan a Makapanyarin-amin, et ari. Siak so mabilay a Dios. Say biskeg na onsabin ondogpa ed sikayo et singa Palandey na Tabor ya atagey nen saray arum, tan singa Palandey na Carmelo a diad kinaatagey to et ososdungan toy dayat.

¹⁹ Sikayon taga Egipsio, mamparaan kayon naalan priso! Nagawan andi-kakanaan a pasen so Memfis, nagawan dera-deral tan anggapoy manayam.

²⁰ Singa balibalin baka so Egipto, a dinogpaan na sakey a kamontuk a nanlapud baybay.

²¹ Anggan saray uupaan to ran sondalo et singa ra bakan anggapoy nitulong. Ag ira inmalagey a linmaban; pinmoliktar iran amin tan batik ira. Sinmabiy agew na pakadusa ra, say oras na kaderal da.

²² Ombabatik so Egipto tan singa oleg ya onaarawi, nen onaasingger iray sondalo na kalaban. Sankaawit day wasay iray dinmogpad sikato, a singa saray totoon mambabatang na kakiewan;

²³ binabatang da ray kakiewan ed takel to. Ag nabilang iray totoo ra; dakel nen saray dorun iray sondalo ra.

²⁴ Nipasen ed kababaingan iray Egipsio; adakep ira na saray taga baybay. Siak, say Katawan, so nansalita.

²⁵ Say Katawan a Makapanyarin-amin a Dios na Israel kuanto, Dusaen koy Amon a dios na Tebes, say Egipto a pati saray diriyos tan saray arari to. Alaen koy ari na Egipto tan amin da ray manmamatalek ed sikato.

²⁶ Ipalimak irad saray malabay a mamatey ed sikara, diad kinen Ari Nabucodonosor na Babilonia tan saray sondalo to. Ag mabayag, manayam iray totoo lamet ed Egipto a singa impanayam da nen saman. Siak, say Katawan, so nansalita.

²⁷ Sikayo ran totook, ag kayo natatakot, totood Israel, ag kayo ontatalaw. Iyagel ta kayo ed saman ya araw-dawin pasen, diad saman a dalin ya akaprisoan yo. Ompawil kayod dalin yo, tan mareen so panayam yo; niarawi kayod kaatapan, tan anggapo lay manaktakot ed sikayo.

²⁸ Dagoen ta kayo, ta iyagel ta kayo. Deralen koy amin a bansa ya angikaykayatan kod sikayo, balet ag ta kayo deralen. Andi-saew ya abuloyan kon nadusa kayo; balet no dusaen ta kayo, gawaen ko onung ed katonungan. Siak, say Katawan, so nansalita.

47

¹ "Kasakbayan a dinogpaan na ari na Egipto so Gaza, akisalitay Katawan ed siak nipaakar ed saray Filisteo.

² "Inkuanto: Nengneng yo! Onaatagey so danum ed baybay, tan maples ya onagos a singa ilog no delap. Delapen toy dalin tan amin a logan to, saray siudad tan saray totoon manaayam diman. Saray totoo oneyag iran onkerew na tulong; onakis na ampaipait ya amin iray katoowan.

³ "Narengel da ray kutdang na saray kabayo, say pampanaspas na saray karwahi, say tanul na pantetlek da ray dalig. Ag la pawilen na saray ama iray anak da; laoylaoy iray taklay da.

⁴ "Sinmabi lay oras na paneral ed Filistia, say oras na pamatonda ed amin a nakdaan a tulong a manlapud Tiro tan Sidon. Siak, say Katawan, deralen ko ray Filisteo, amin da ray nanlapud saray gilig na Creta.

⁵ "Sinmabiy baleg a kaermenan ed saray totood Gaza, tan ag oneseesel iray totood Ascalon. Kapigan ontonda so panermen na saray arum a Filisteo?

⁶ "Oneeyag kayo, Ispada na Katawan! Kapigan ontonda so pantipas mo? Pawil ka lad kaluban mo, manayam ka lad tan a mampainawa!

⁷ "Balet panoy pampainawa to, anta initdan koy gawaen ton kimey? Ingganggan kon dogpaan toy Ascalon tan saray totoon manaayam ed gilig na dayat.

48

¹ "Sikato yay inkuan na Katawan a Makapanyarin-amin nipaakar ed Moab: Kaskasian iray totoo ed Nebo aderal so baley da! Adakep so Kiryataim, ageba so mabiskeg a tirinsira to, tan abaingan ed kababaingan iray totoo to;

² "naandi lay kagalangan nen Moab. Adakep na saray kalaban so Hesbon tan mankokomplut iran maneral ed bansa na Moab. Ag makaesel so baley na Madmen; onsulong iray sondalo sumpad sayan baley.

³ "Oneeyag iray totood Horonaim, Panagduksa! Panagderal!

⁴ "Aderal so Moab; dengel yo ray ogogaw a manakakis.

⁵ "Diad dalan a mamaatagey ed Luhit dengel yoy pandageyem da; diad dalan a mamaleksab ed Horonaim, dengel yoy pannangnangis dad kaermenan.

⁶ "Ganatan yo, iyagel yoy bilay yo! kuanda. Batik kayon singa asnod kalawakan!

⁷ "Moab, nanmatalek kad biskeg tan kayamanan mo, balet natan pati sika so naalan nadakep, naalan nibantak ed arum a bansa so dios mon Camos, naala met iray pati prinsipi to tan saray papari to.

⁸ "Anggapoy anggan sakey a baley a makapaliis ed panagderal; naderal iray patar tan kaalogan. Siak, say Katawan, so nansalita.

⁹ "Iparaanan yoy pantion so Moab; ag mabayag naderal la; Nataynan ya aderal-deral iray baley to, tan anggapo lay manayam diman. (

¹⁰ Nisamba so toon ag mankolin mankimey para Katawan! Nisamba so toon ag to ikakanay ispada tod pampatey!)

¹¹ Say Katawan inkuanto, Arawi lawas ed kaatapan so Moab, tan ag balut nibantak ed arum a bansa. Say Moab et singa alak ya ag nagagalaw ed akapanginan tan ag balut nibabales-bales ed nandodoman pasig. Ag balut aderal so taway to tan ag naomay samit na taway to.

¹² Kanyan sirin, onsabiy oras a mangibaki ak na saray totoon mangibung ed Moab a singa alak. Paekatan da ray pasig ton pananginay alak, insan da ra mekmeken.

¹³ Diad satan saray taga Moab ibaing day dios dan Camos a singa samay inkabaingan da ray Israelita ed Betel, sakey a dios a nanmatalkan da.

¹⁴ Lalakin taga Moab, akin et ipapasen yoy sikayon dili a palbayani, masebeg a sondalon asali la rad bakal?

¹⁵ Aderal so Moab tan saray siudad to; apatey iray sankamaungan a mamalangwer ton lalaki. Siak so ari a Katawan a Makapanyarin-amin, tan siak so nansalita.

¹⁶ Onsasabi lay kadusa na Moab; magano lan onsabi so kaderal to.

¹⁷ Panermenan yo man a bansa, sikayon manaayam ed kaliber-liber to. Amin yon makaamta ed inkabantug to; Kuanyo, Apoter lay makapanyarin panooley na Moab; naandi lay kagalangan tan biskeg to.

¹⁸ Sikayon manaayam ed Dibon, epas kayod tad pasen a kawalaay kagalangan yo tan yorung kayod dabuk; wadya lay managderal na Moab, tan dineral to ray tirinsira to.

¹⁹ Sikayon manaayam ed Aroer, manalagey kayod gilig na dalan tan manalagar kayo; tepetan yo ray ontataynan no antoy agawa.

²⁰ Naplag la so Moab, so iyebat da, nangisan yo; napelag lad kababaingan. Ibawag yod gilig na Ilog na Arnon ya aderal la so Moab!

²¹ Sinmabi lay sintinsia ed saray siudad ed patar; diad Holon, Jahzah, Mefat,

²² Dibon, Nebo, Bet-diblataim,

²³ Kiryataim, Bet-gamul, Bet-meon,

²⁴ Kiryot, tan Bosra. Sinmabi lay sintinsia ed amin da ray siudad na Moab, arawi may asingger.

²⁵ Nakal lay biskeg na Moab, aderal lay pakayari to. Siak, say Katawan, so nansalita.

²⁶ Inkuan na Katawan, Buek yo so Moab, ta linmaban ed siak. Pandokulan toy dilin ota to, tan elek-elekan na saray totoo.

²⁷ Moab, nanunotan mo no panoy impanluludlurey mod saray totood Israel? Impapasen mon kaolup ira na saray matakew, kanyan mameyeng-peyeng ka kapag nasalitam ira.

²⁸ Sikayo ran taga Moab, taynanan yo ray baley yo! Laka yon manayam ed saray diking na kapalandeyan! Alig yo ray palekpek-punay a manobung ed saray gilig na kelas.

²⁹ Mapalalon mapaatagey so Moab! Nadngelan kon mapaatagey, ag mangitaltalek, tan malastug iray totood Moab. Atagtagey so panangipasen dad sikaran dili.

³⁰ Siak a Katawan amtak so inkamapaatagey da. Andi-kakanaan so panagpaatagey da tan ag mansiansia ray gagawaen dan bengatla.

³¹ Kanyan nangisan kon amin iray taga Moab tan saray totood Kireres.

³² Mapalalo niy pannangis kod saray taga Sibma nen saray taga Jazer. Siudad na Sibma, singa ka ubas a saray sangam et labsanan day Inatey a Dayat tan sabien day Jazer. Balet natan aderal iray bungam ed panaoy tiagew tan saray masasamit ya ubas mo.

³³ Naandi ray liket tan gayaga ed mabonan dalin na Moab. Ag ko la papaagosen so alak a manlapud panagpespesan na ubas; anggapo lay manggawa na alak tan anggapo la ray oneyag ed liket.

³⁴ Maneeyag iray totoon taga Jesebon tan Eleale, tan narengel ya anggad Jahaz so eyag da; narerengel na saray taga Zoar, Horonaim, tan Eglat-selisiya. Nakatan so anggan say Kolus na Nimrim.

³⁵ Patondaen ko ray taga Moab ed pangisasaklang dad saray bagat a popoolan diad saray pasen na panangigalangan da tan say pangibabagat dad saray diriyos da. Siak, say Katawan, so nansalita.

³⁶ Singa ak toon manotogtog ed plauta na sakey a togtog a para tolur diad pannanangis kod Moab tan saray totood Kireres, ta naandi ya amin so kayaryan da.

³⁷ Kinikiskisan dan amin so olo ra tan pinopotut day balbas da. Sinasalger day kalimaan da tan nankakawes na sako so balang sakey ed sikara.

³⁸ Diad amin a toktok na abung ed Moab tan diad amin a plasa to, akis na kaermenan labat so narerengel lapud binetag kon singa pasig so Moab kanyan anggapo lay malabay.

³⁹ Abetag-betag lay Moab! Eyag kayo! Naplag lad kababaingan so Moab. Aderal la, tan luludlureyan na amin a kaliber-liber ton bansa. Siak, say Katawan, so nansalita.

⁴⁰ Say Katawan insipan to a sakey a bansa so onsibar a singa agila ed Moab ya akabuskag iray payak to,

⁴¹ tan nadakep iray baley tan saray tirinsira. Diad satan ya agew ontakot a singa biin mampapasakit iray sondalo na Moab.

⁴² Naderal so Moab tan magmaliw ya aliwa lan bansa, lapud linmaban ed siak.

⁴³ Onsabiy takot ed saray taga Moab tan manaalagar ed sikara iray abut, tan saray patit. Say Katawan so nansalita.

⁴⁴ Siopamay ibatikan toy takot napelag ed saray abut, tan siopamay makaagwat ed saray abut naalad saray patit, ta ingganak lay panaon na pakaderal na Moab.

⁴⁵ Saray totoon pangaskasiyan ya akabatik salien day paiyagel ed Hesbon, say siudad ya aminsan inoleyan nen Ari Sihon, balet napopoolan. Tinemek na apoy iray tirinsira tan saray kapalandeyan na saray totood Moab a maliket irad bakal.

⁴⁶ Pangaskasiyan iray taga Moab! Inaatey iray totoon angigalang ed dios a Camos, tan nalan priso iray anak dan lalaki tan bibii.

⁴⁷ Balet diad saray agew ya arapen say Katawan pagmaliwen ton maaligwas lamet so Moab. Sikato yay sintinsia ya inter na Katawan ed Moab.

49

¹ "Sikato yay inkuan na Katawan nipaakar ed Ammon: Iner so kawalaan da ray lalaki na Israel? Anggapo ta lad sikaray mangyagel ed dalin da? Akin et inabuloyan da ray totoon manangigalang ed dios a Moloc a sakopen day dalin na tribu nen Gad tan manayam irad man?

² "Balet onsabiy oras a parengelan ko na ingal na bakal iray totoo ed siudad na Rabba, tan nataynan ya aderal-deral tan apoolan iray bario to. Diad satan say Israel nabawi tod saray angala so dalin to.

³ "Totoon taga Hesbon, eyag kayo! Aderal la so Ai! Bibiin taga Rabba, manermen kayo! Mankawes kayoy sako tan manermen kayo. Mambatik-batik kayon ag yo amtay gagawaen yo. Naalad arum a bansa so dios yon Moloc a pati saray papari tan saray prinsipi to.

⁴ "Akin et mapaatagey kayo, sikayon aliwan matoor a totoo? Nanaandian kayo lay biskeg. Akin et manmamatalek kayod pakayari yon dili, tan ibabaga yon anggapoy ondogpad sikayo?

⁵ "Pataktakot ta kayod saray walad kaliber-liber yo. Ontaynan kayon amin. Ombatik so balang sakey ed sikayo diad pangyagel tod bilay to, tan anggapo lad satan so manipon ed saray akabatik a sondalo.

⁶ "Balet, ag mabayag, paaligwasen ko lamet so Ammon. Siak, say Katawan, so nansalita.

⁷ "Sikato yay inkuan na Katawan a Makapanyarin-amin nipaakar ed Edom: Naandian ta lay kakabatan iray taga Edom? Ag ta la nibaga na saray sumisimbawa ra so nepeg dan gawaen? Naandipat ta lay intiron kakabatan da?

⁸ "Totood Dedan, poliktar tan batik kayo! Amut kayo! Deralen ko ray kabyangay boleg nen Esau, lapud sinmabi lay oras na panusak ed sikara.

⁹ "No manalay ubas iray managborbor, wala ray itilak dan bunga ed saray wakal; no onsabid labi iray matakew, mangala ra labat na labalabay da.

¹⁰ Balet, siak, sinigput kon dineral iray kabyangay boleg nen Esau; nilokasan ko ray panaamutan da, kanyan ag la ra makaamut. Aderal iray totood Edom. Anggapoy anggan sakey ya atilak.

¹¹ Itilak mod siak iray ulilan anak mo, ta asikasoen ko ra. Nayarin manmatalek ed siak iray babalom a bibii.

¹² No saramay ag da kanepegay nadusa et kinaukolan iran oninom ed kupa na dusa, sikayo niy ag nadusa? Andi-saew a nadusa kayo; nepeg ya oninom kayo ed kupa!

¹³ Sinambaan kon dili a say siudad na Bozra et magmaliw a makapataktakot a nengnengen tan sakey ya andi-kakanaan; ludlureyen na saray totoo tan ikana ray ngaran to a sakey a samba. Ando lan andon naderal iray kaliber-liber ton baley. Siak, say Katawan, so nansalita.

¹⁴ Inkuanko, Edom, akaawat ak na balitan nanlapud Katawan. Angibaki na mangibawag ed saray bansa a tiponen da ray sondalo ra, ta mamparaan iran ondogpad sika.

¹⁵ Pakapoyen ka na Katawan, tan balbalawen ka na saray totoo.

¹⁶ Pinalikdo ka na panagpaatagey mo. Anggapoy ontatakot ed sika ya aliwan singa iisipen mo. Manaayam kayod saray mabaton diking na kapalandeyan, atagey diad toktok na palandey; balet anggaman a manayam kayod atagtagey a singa kawalaay obung na agila, iyakseb kayo na Katawan. Say Katawan so nansalita.

¹⁷ Say Katawan inkuanto, Makapasinagem so nagawa ed Edom, kanyan nikelawan tan nataktakot ed agawa so siopaman a makadalan.

¹⁸ Nagawa ed Edom so agawad Sodoma tan Gomorra nen aderal ira tan saray kaliber-liber dan baley. Anggapo lad may malabay a manayam. Siak, say Katawan, so nansalita.

¹⁹ Onsabi ak a singa isasabid malambut a pastolan na sakey a lion a nanlapud makdel a takel ed gilig na Ilog na Jordan, insan ko biglan pataynanen ed bansa ra iray Edomita. Insan manoley ed bansa so pangulon pilien ko. Siopay mipara ed siak? Siopay mampangayan onlaban ed siak? Siopan manoley so makasumpad siak?

²⁰ Kanyan dengel kayod implanok sumpad saray taga Edom, tan say ginetmak a gawaen ed saray totoon manaayam ed siudad na Teman. Nagayugoy iray anggan ankekelag ya anak da, tan nataktakot so balang sakey ed sikara.

²¹ No napelag so Edom nayegyeg so intiron dalin, tan narengel ya anggad Dayat ya Ambalanga so ingal na totoo.

²² Say kalaban dogpaan toy Bozra; singa agilan onsibar ya akabuskag iray payak to. Diad satan ya agew saray sondalo na Edom ontakot ira a singa biin mampapasakit.

²³ Sikato yay inkuan na Katawan nipaakar ed Damasco: Natatakot tan mapagpaga iray taga siudad na Hamat tan Arfad lapud akadngel iray maoges a balita. Singa dayat ya ontatabun ed sikara so kapagaan, tan ag ira makapainawa.

²⁴ Nagmaliw a maletey iray taga Damasco tan batik irad takot da. Manlilikna ray kairapan tan pakaskasi ran singa biin mampapasakit.

²⁵ Sigput a nikaindan imay maliket tan bantug nen saman a siudad.

²⁶ Diad satan ya agew napatey ed saray dalan na siudad iray lalakin tobun-balo tan amin a sondalo to.

²⁷ Poolan ko ray padir na Damasco tan saray palasio nen Ari Ben-hadad. Siak say Katawan a Makapanyarin-amin, so nansalita.

²⁸ Sikato yay propisiya na Katawan nipaakar ed tribu nen Kedar tan saray pasen ya ooleyan nen Hazor, a tinalo ra nen Ari Nabucodonosor na Babilonia: Laka, ta dogpaan mo ray totood Kedar; deral mo so tribu na saray totoon taga bokig!

²⁹ Ala yo ray tulda ra tan saray karniro ra, saray kortina ra tan amin a bengatlan walad dalem na saray tulda ra. Ala yo ray kamilyo ra tan ikuanyod saray totoo, Takot so walad kaliber-liber yo!

³⁰ Totoon taga Hazor, siak a Katawan, kuankod sikayo, batik kayod arawi tan amut kayo. Namplano na sumpad sikayo si Ari Nabucodonosor na Babilonia, tan saya so kuanto,

³¹ Gali la! Dogpaan tayo ra man a totoon mambibilay ed kareenan tan arawid kaatapan. Anggapoy kaput odino tarangka iray puirtay siudad da; sigput ya anggapoy mangyagel ed sikara.

³² Ala yo ray kamilyo ra tan amin a baka ra! Ikayat kod nandoroman pasen ira tay totoon nampapotut na antikey tan iyakar kod sikaray deral a manlapud kaliber-liber da.

³³ Magmaliw ya ando lan andon andi-kakanaan a pasen so Hazor, sakey a pasen a saray asod katakelan labat so manaayam, tan anggapo lad may manayam a too. Siak, say Katawan, so nansalita.

³⁴ Nen agano nin manaarid Juda si Sedekias, akisalitad siak so Katawan a Makapanyarin-amin nipaakar ed bansa na Elam.

³⁵ Inkuanto, Pateyen kon amin iray pumapana a ginawa ran makapanyarin maung so Elam.

³⁶ Manlapud amin a dapag pasiplugen koy dagem sumpad Elam, tan nikaykayat ed nandoroman pasen iray totoo to, anggad anggapoy bansan ag da abatikan.

³⁷ Patakoten ko ray totoo to ed saray kalaban dan malabay a mamatey ed sikara. Diad gaway pasnuk kod sikara deralen ko ra tan ibakik iray sondalon onlaban ed sikara ya anggad naoput ko ra.

³⁸ Deralen ko ray arari ra tan saray pangulo ra, insan ko ilira so tronok diman.

³⁹ Balet ag mabayag paaligwasen ko lamet iray totoo ed Elam. Siak, say Katawan, so nansalita.

50

¹ "Sikato yay sinalita na Katawan ed siak nipaakar ed Babilonia tan saray totoo to:

² "Ibagam ed saray bansa so balita! Ibawag mo! Iparontal moy tanda, tan ibandom so balita! Ag mo iyaamut! Naplag so Babilonia! Say dios ton Merodac et naplag ed kababaingan! Mabambanday so asumpalan da ray talintaoy diriyos na Babilonia; atemek-temek iray makapaingungot a talintao to.

³ "Sakey a bansa ed baybay so sinmabi lan ondogpa ed Babilonia, tan pagmaliwen ton andi-kakanaan a pasen. Ibatikan na saray totoo tan saray ayayep, tan anggapoy manayam diman.

⁴ "Say Katawan kuanto, No onsabi tan a panaon, saray totood Israel tan saray totood Juda mannangnangis iran onsabi a mananap ed siak a Dios da.

⁵ "Tepeten da no iner so dalan ya ompogtad Sion, insan irad man onla. Misipanan ira na andi-anggaan ed siak tan ag dan balut la deralen.

⁶ "Singa abalang a karniro iray totook; saray pumapastol da pinaolyan da ran abalang ed kapalandeyan. Nanakar-akar irad nandoroman palandey, kanyan alingwanan da la no iner so kawalaay abung da.

⁷ "Dinodogpaan ira na amin ya akalmod sikara. Saray kalaban da kuanda, Aliwan maoges so ginawa tayod sikara, tan nankasalanan irad Katawan. Nanmatalek ed Katawan iray lalaki ra, kanyan nepeg komun a nansiansian matoor irad sikato.

⁸ "Totood Israel, ibatikan yoy Babilonia! Taynan yo la tan a bansa! Sikayoy ononan ontaynan!

⁹ "Ta sogsogan ko so sakey ya olup na bansa ed baybay tan padogpaan ko ra ed Babilonia. Mandarasig iran mibakal ed bansa tan dakepen da. Marunong ira yan mamana; nakena ran nakena so pontaen da.

¹⁰ Nasamsaman so Babilonia, tan alaen day amin a labalabay da iray mansamsam. Siak, say Katawan, so nansalita.

¹¹ Say Katawan kuanto, Totoon taga Babilonia, sinamsaman yoy bansak. Anggaman a maliket tan magayaga kayo, a singa kayo bakan niakar ed saray malamlambut a dika, odino manaringing a kabayo,

¹² say bansa yo et napelag ed kababaingan tan kabandayan. Magmaliw a sankaabebaan a pasen so Babilonia ed amin da ray bansa; magmaliw ya amaga-maga tan anggapoy danum a kalawakan.

¹³ Diad pasnuk ko anggapoy manayam ed Babilonia, ta magmaliw ya aderal-deral a siudad, tan natalagnaw tan nikelawan ya amin iray ondalan.

¹⁴ Lalakin pumapana, mandarasig kayon mibakal ed Babilonia, insan yo lakoben. Ipalsut yo ray amin a pana yo ed Babilonia, ta nankasalanan ed siak a Katawan.

¹⁵ Diad kaliber-liber to eyag kayoy para bakal sumpad sikato. Sinmuko la so Babilonia. Ageba tan alooban la ray padir to. Siak, so ombabawi ed saray taga Babilonia. Kanyan bawi kayod sikara, tan gawa yod sikaray singa ginawa rad arum.

¹⁶ Ag yo aabuloyan a walay dumaralus a mantanem ed Babilonia, odino walay manani. Amin da ray sangkailin manaayam diman et ompawil irad dilin dalin da, lapud takot dad saray sondalon ondodogpa.

¹⁷ Say Katawan kuanto, Saray totood Israel et singa ra karniron osil-osilan tan ikaykayat na saray lion. Onona, dinogpaan ira na ari ed Asiria, insan si Ari Nabucodonosor na Babilonia nginangalngal to ray pokel da.

¹⁸ Lapud saya, siak, say Katawan a Makapanyarin-amin a Dios na Israel, dusaen koy Ari Nabucodonosor tan say bansa to, a singa impanusak ed ari na Asiria.

¹⁹ Papawilen kod dalin da iray totood Israel. Pantagano da ray bunga na tanaman ya ontutubod Palandey na Carmelo tan diad pasen na Basan, tan kanen day labalabay da ed saray tanaman ya ontutubo ed dalin na Efraim tan dalin na Galaad.

²⁰ No onsabi yan panaon, anggapoy narumog a kasalanan ed Israel tan diad Juda, lapud pirdonaen ko ray totoon intilak kon mambilay. Siak, say Katawan, so nansalita.

²¹ Say Katawan kuantod Ciro, Dogpaan mo ray taga Merataim tan Pecod. Patey mo ra tan deral mo ra. Sumpal mon amin iray ingganggan kod sika. Siak, say Katawan, so nansalita.

²² Narerengel ed dalin so tanul na bakal tan walay nagagawan baleg a panderal.

²³ Minaso tan minekmek na Babilonia so intiron mundo, balet natan apoter la man a maso. Atalagnaw ya amin iray bansa lapud agawad Babilonia.

²⁴ Babilonia, narel kad impatit kod sika, anggaman ya ag mo amta. Arumog ka tan narel ka, lapud linmaban kad siak.

²⁵ Nilokasan koy pasen ya akaisinupan na saray armas ko tan, diad pasnuk ko, impaway ko ra lapud siak a Katawan a Makapanyarin-amin a Dios et walay gawaen ko ed Babilonia.

²⁶ Manlapud amin a dapag dogpaan yoy Babilonia tan lokasan yo ray pasen ya akaisinupan na saray trigo! Ibunton yon singa abunton a trigo iray nasamsam yo! Deral yoy bansa! Ag kayon balut mangikekera na antokaman!

²⁷ Patey yo ray amin a sondalo ra! Patas yo ra! Pangaskasiyan iray taga Babilonia! Sinmabi lay panaon na panusad sikara! (

²⁸ Saray Israelitan priso a manaayam ed Babilonia et ombabatik irad Sion, tan ibabaga ra no panoy imbawi na Katawan a Dios tayo lapud samay ginawa na saray taga Babilonia ed Timplo to.)

²⁹ Ibaga yod saray sondalon pumapana a dogpaan day Babilonia. Ibaki yoy balang sondalon marunong a mamana. Lakob yoy siudad tan ag kayon balut mamapabatik na anggan siopa. Bawi kayod sikato onung na ginawa to, tan gawa yod sikatoy singa ginagawa tod arum, lapud nampaatagey sumpad siak, say Masanto na Israel.

³⁰ Napatey ed saray dalan na siudad iray tobun-balo ton lalaki, tan naderal ya amin iray sondalo to ed satan ya agew. Siak, say Katawan, so nansalita.

³¹ Babilonia, sumpa ak ed sika, siak a Katawan a Makapanyarin-amin a Dios, lapud mapaatagey ka. Sinmabi lay panaon a panusak ed sika.

³² Sikan mapaatagey a bansa, natumba tan napelag ka, et anggapoy ontulong ed sika. Poolan ko ray siudad mo, tan naderal ya amin iray walad kaliber-liber.

³³ Say Katawan a Makapanyarin-amin kuanto, Napapairap iray taga Israel tan saray taga Juda. Mapeget so pangguaguardiad sikara na saray anakep ed sikara tan ag da ra ibolus.

³⁴ Balet mabiskeg so mangyagel ed sikaraYahweh a Makapanyarin-amin so ngaran to. Sikaton diliy mangyalagey ed sikara tan mangyakar na kareenan ed mundo, balet gunigon so iyakar tod saray taga Babilonia.

³⁵ Say Katawan kuanto, Patey ed Babilonia! Patey ed saray totoo to, saray manoley to tan diad saray makabat a totoo to.

³⁶ Patey ed saray matitila ton propita agaylay inkakulang-kulang da! Patey ed saray sondalo to agaylay inkataktakot da!

³⁷ Patey yo ray kabayo to tan deral yo ray karwahi to! Patey ed saray inoopaan ton sondalo agaylay kapoy da! Deral yo ray kayamanan to; akokos tan samsam yo ra.

³⁸ Paandi yo so danum ed dalin to; paekatan iray ilog to. Say Babilonia et kawalaan da ray makapataktakot a talintaoy diriyos a ginagawa ran makulang-kulang iray totoo.

³⁹ Kanyan say Babilonia panayaman na saray dimonyo tan saray maoges ya ispiritu, tan saray marotak a manomanok onung ed ganggan. Ag lan balut panayaman ya anggan kapigan na saray totoo.

⁴⁰ Nagawa met ed Babilonia so agawad Sodoma tan Gomorra nen dineral ko ra tan saray kaliber-liber dan baley. Anggapo lad may manayam anggan kapigan. Siak, say Katawan, so nansalita.

⁴¹ Onsasabi ray totoon taga sakey a bansa ed baybay; sakey a bansan walad arawi; amayamay iray ararin mampaparaan a mibakal.

⁴² Inala da la ray pana ra tan saray ispada ra; maruksa tan anggapoy panangasi ra. Singa manungol a dayat so tanul da, legan dan mamapakoyat na saray kabayo ra. Akaparaan iran mibakal ed Babilonia.

⁴³ Nererengel na ari na Babilonia so balita, tan alaylay iray taklay to. Mapalaloy paneermen to, tan paniirap to a singa sakey a biin mampapasakit.

⁴⁴ Onsabi ak a singa isasabid malambut a pastolan na sakey a lion a nanlapud makdel a takel na Ilog na Jordan insan ko biglan pataynanen ed siudad da iray taga Babilonia. Insan manoley ed bansa so pangulon pilien ko. Siopay mipara ed siak? Siopay onlaban ed siak? Siopan manoley so makasumpad siak?

⁴⁵ Kanyan dengel kayod siak a Katawan, dengel yoy implanok sumpad saray taga siudad na Babilonia, tan say ginetmak a gawaen ed saray totoo to. Nagayugoy iray anggan ankekelag ya anak da, tan natalagnaw so balang too.

⁴⁶ Diad ontan lan makapasinagem a katalo na Babilonia onggiwgiw ya amin iray bansa ed kaliber-liber to, tan narengel da so panay-ay to.

51

¹ "Say Katawan kuanto, Mangyakar ak ed Babilonia tan saray totoo to na managderal a dagem.

² "Mangibaki ak na saray totoon taga arum a bansa a manderal ed Babilonia; a singa dagem a mangitikyab na taep ed arawi. No onsabi tan ya agew na panagderal, ondogpa ra manlapud amin a dapag tan taynan da ya anggapoy nakeraan so dalin.

³ "Ag yo la iitdan na panaon iray sondalo na Babilonia a mamana odino mangisolung na saray armas da. Ag yo kakasian iray tobun-balon lalaki! Patey yoy amin a sondalo!

⁴ "Nasugatan ira tan ompatey ira ed saray dalan da ray siudad da.

⁵ "Siak, say Katawan a Dios a Makapanyarin-amin, ag ko inkaindan so Israel tan Juda, anggaman a nankasalanan irad siak a Masanto na bansan Israel.

⁶ "Ibatikan yoy Babilonia! Batik kayo diad pangilaban yod bilay yo! Ag kayo papapatey, lapud kasalanan na Babilonia. Ombabawi ak la natan tan dudusaen ko onung na kanepegan to.

⁷ "Nen saman, say Babilonia et singa balituk a kupa a walad limak, tan buebueken koy intiron mundo. Ininom na saray bansa so alak to, kanyan nakalan iray kalakal.

⁸ "Biglan atalo so Babilonia, tan aderal! Ermenan yo! Iyalaan yoy tambal, ta ag la pigan onabig.

⁹ "Saray taga arum a bansan manaayam diman kuanda, Sinali min tutulongan so Babilonia, balet anggapo lay nagawaan mi. Taynanan ti la, ta ompawil ti lad dilin bansa tayo. Dinusa na Dios ed anggaay pakayari to so Babilonia tan dineral ton sigput.

¹⁰ Say Katawan kuanto, Iyeeyag na saray totook, Impanengneng na Katawan a wala itayod katonungan. Onla tayon mangibagad saray totoo ed Jerusalem na ginawa na Katawan a Dios tayo.

¹¹ Dinagdag na Katawan iray arari na Media, lapud getma ton deralen so Babilonia. Onya so ibawi to lapud samay inkaderal na Timplo to. Saray opisyal ya ondodogpa igaganggan da, Tareman yo ray pana yo! Iparaan yo ray samper yo!

¹² Isinyas yon dogpaan iray padir na siudad na Babilonia. Paletan yo so panagguardia! Mangyan kayo na saray guardia! Mangipasen kayo na saray mansanib. Ginawa na Katawan so imbaga to lan gawaen to ed saray totood Babilonia.

¹³ Amayamay iray ilog na Babilonia tan saray baleg a kayamanan to, balet asabi lay oras to tan apongpong lay pabilo na bilay to.

¹⁴ Say Katawan a Makapanyarin-amin et sinambaan tod sikaton dili a mangyakar na amayamay a lalakin ondogpa ed Babilonia a singa ra dakerakel a dorun, tan iyeyag day panalo ra.

¹⁵ Say Katawan ginawa toy mundo diad panamegley na pakayari to; diad panamegley na kakabatan to pinalsa toy dalin, tan impanat toy katawenan.

¹⁶ Diad ganggan to onuungol so danum ed katawenan; manlapud amin a sokung na mundo papaatageyen toy lorem. Pakikirmaten to no peles na oran, tan manlapud panagsinupan to ibabaki toy maples ya oran.

¹⁷ Diad pakanengneng ed saya magmaliw a makulang-kulang tan anggapoy pakatalus ya amin iray totoo; magmaliw a mangamanga iray managgaway talintao, lapud tila-tila tan anggapoy bilay iray diriyos a gagawaen da.

¹⁸ Andi-kakanaan ira kanyan nepeg day balawen; ompatey ira no onsabiy agew na panusay Katawan ed sikara.

¹⁹ Say Dios nen Jacob et aliwan singa sikara; sikatoy nanggawa ed amin a bengatla, tan pinili ton totoo ton dili so Israel. Yahweh a Makapanyarin-amin so ngaran to.

²⁰ Say Katawan kuanto, Babilonia, sikay masok, say armas kod bakal. Inkana ta kan nanmemekmek ed saray bansa tan saray nanarian,

²¹ nambibingkas ed saray kabayo tan saray akakabayo, nandederal ed saray karwahi tan saray kutsiro,

²² nampapatey ed saray lalaki tan saray bibii, nampapatey ed saray mamatakken tan saray mamalangwer, naneekal na bilay da ray babalolaki tan saray mamarikit.

²³ Nampapatey ed saray pumapastol tan saray karniro ra, nampapatey ed saray dumaralus tan saray kabayon panagbaka ra, nanooyus na bilay da ray manoley tan saray atatagey ya opisyal.

²⁴ Say Katawan kuanto, Naimatunan yoy paningil kod Babilonia tan saray totoo to, lapud amin a kaogsan a ginagawa ra ed Jerusalem.

²⁵ Babilonia, singa ka sakey a palandey a maneral ed intiron mundo, balet kalaban mo ak, siak a Katawan. Egnaan ta ka, ipalanas ta kad dalin, tan padapulen ta ka.

²⁶ Anggapoy baton naalad saray deral-deral mo a nikanad paalagey. Magmaliw kan singa andi-anggan andi-kakanaan a pasen. Siak, say Katawan, so nansalita.

²⁷ Isinyas yoy idogpa! Paknul yoy trumpita pian narengel na saray bansa! Pamparaan yo ray bansa a mibakal ed Babilonia! Ibaga yo ya ondogpa ray nanarian na Ararat, Minni, tan Askenaz. Mamili kayo na opisyal a mangipangulo ed bakal. Mangyakar kayo na saray kabayon singa amayamay a dorun so karakel da.

²⁸ Iparaan yon mibakal ed Babilonia iray bansa. Awiten iray arari ed Medo, saray pangulo tan saray opisyal da, tan amin iray bansan walad leksab na pakaoley da.

²⁹ Manggiwgiw so sankamundoan lapud susumpalen na Katawan so plano to a pagmaliwen a nikaindan a pasen so Babilonia; kanyan anggapo lad may toon malabay a manayam.

³⁰ Tinondaan la na saray sondalo na Babilonia so mibakal tan nanayam la rad tirinsira ra. Nakalan iray biskeg na linawa, tan nagmaliw iran singa bibii. Ageba ray puirta na siudad tan apoolan iray kaabungan.

³¹ Nansosoblayan iray angibaga ed ari na Babilonia ya alooban la ed anggad iner a dapag so siudad to.

³² Adakep la na kalaban so babaliwan ed ilog tan apoolan la ray amin a tirinsira. Ag da la amtay gagawaen da iray sondalon taga Babilonia.

³³ Ag mabayag, gapasen ira la na saray kalaban tan gatin-gatinan da ran singa ilik ed panagilikan. Siak, say Katawan a Makapanyarin-amin a Dios na Israel, so nansalita.

³⁴ Tinetegteg na ari na Babilonia so Jerusalem, insan to kinan. Impagmaliw toy siudad a singa pasig a nakalay karga; singa dragon ya ayep ya angakmon ed siudad. Inaala toy labalabay to, insan to imbantak iray nakdaan.

³⁵ Ibaga komun na saray taga Sion, Ebatan komun na Babilonia so duksan ginagawa tod sikatayo! Ibaga komun na saray taga Jerusalem, Ebatan komun na Babilonia so kairapan a nilikna tayo!

³⁶ Kanyan say Katawan kuantod saray taga Jerusalem, Iyalageyan ta kayo, tan ibawian ta kayod saray kalaban yo, lapud saray ginagawa dad sikayo. Paekaten koy sobul na danum na Babilonia, tan paekaten ko ray ilog to.

³⁷ Insan magmaliw a bunton na deral-deral so Babilonia tan panayaman na saray ayayep ed katakelan. Makapataktakot a nengnengen; anggapod may toon manayam, tan nataktakot ya amin iray makanengneng ed agawa.

³⁸ Saray taga Babilonia mangwam ira a singa saray lion, tan manngengem iran singa saray anak na lion.

³⁹ Masiba ra? Iparaanan ko ray sakey a ponsia, tan bueken tan panliketen ko ra. Onogip ira tan ag ira lan balut ombangon.

⁴⁰ Tengtengen ko ran singa papatasen a kordiro, kanding, tan kalakyan a karniro. Siak, say Katawan, so nansalita.

⁴¹ Say Katawan kuanto nipaakar ed Babilonia: Adakep la so Babilonia, say siudad ya idadayew na intiron mundo! Makapasinagem a nengnengen na saray bansa so nagmaliwan na Babilonia!

⁴² Sinmapat ed Babilonia so danum na dayat, tan tinabunan to na manungol iran daluyon.

⁴³ Nagmaliw a makapataktakot a nengnengen iray baley to, tan nagmaliw iran andiay danum a kabueran, ya anggapo lad may toon manaayam odino ondadalan.

⁴⁴ Dusaen koy Bel a dios na Babilonia, tan paipawil kod sikato ray tinatakew to; ag la igalang na saray bansa. Atumba ray padir na Babilonia.

⁴⁵ Totoon taga Israel, ibatikan yo la so Babilonia! Ibatikan yoy ontan lan pasnuk ko diad pangyagel yod bilay yo.

⁴⁶ Ag yo pakakapoyey linawa yo odino ontatakot lapud saray dengel-dengel yon balita. Tinaon a doma so onkakayat a dengel-dengel a balitasaray balitan nipaakar ed panagduksa ed dalin tan saray nipaakar ed pibabakal na sakey ya ari ed kapara ton ari.

⁴⁷ Kanyan sirin, onsabiy oras a dusaen ko ray talintaoy diriyos na Babilonia. Nabaingan so intiron bansa, tan napatey ya amin iray totoo to.

⁴⁸ Oneyag ed liket ya amin iray bengatlan walad tawen tan diad dalin no say Babilonia et napelag ed lima da ray totoon manlapud baybay a maneral.

⁴⁹ Say Babilonia so makasengeg na inateyan na saray totood intiron mundo, tan napelag so Babilonia lapud samay impanpapapatey tod saray amayamay ya Israelita. Siak, say Katawan so nansalita.

⁵⁰ Say Katawan kuantod saray totoo ton walad Babilonia: Apaliisan yoy patey! Laki la natan! Ag kayo la manaabala! Anggaman ya arawdawi kayod bansa yo, nudnunot yo ak a Katawan yo, tan say Jerusalem.

⁵¹ Kuanyo, Naplag kamid kababaingan tan apabaingan kami; sigput ya apanbanday kami lapud saray taga arum a bansa et sinmalin irad saray masanton pasen ed Timplo.

⁵² Kanyan sirin, ibabagak ya onsabiy panaon a dusaen ko ray talintaoy diriyos na Babilonia, tan manay-ay ed intiron bansa iray sugatan.

⁵³ Anggan makasegep ed tawen so Babilonia, tan manggawad may mabiskeg a tirinsira, siansian mangibaki ak na saray totoon maneral ed sikato. Siak, say Katawan, so nansalita.

⁵⁴ Say Katawan kuanto, Dengel yoy panakis ed siudad na Babilonia, say panermen lapud inkaderal na intiron bansa.

⁵⁵ Dederalen koy Babilonia tan ag ko paeeselen. Singa manungol a daluyon so peles da ray sondalo, tan maneyaeyag iran ondogpa.

⁵⁶ Sinmabi ran maneral ed Babilonia; adakep iray sondalo na Babilonia, tan apoter-poter iray pana ra. Siak so Dios a manudusad kaogsan tan dusaen ko so Babilonia onung ed kanepegan to.

⁵⁷ Bueken ko ray manoley to saray makabat ton totoo, saray pangulo to, tan saray sondalo to. Onogip ira tan ag ira lan balut ombangon. Siak, say ari, so nansalita; siak so Katawan a Makapanyarin-amin.

⁵⁸ Nageba ya anggad dalin iray makapal a padir na Babilonia, tan napoolan iray atatagey iran puirta to. Magmaliw ya andi-kakanaan ya amin iray kimey da ray totood saray bansa, tetemeken na apoy ya amin iray nansagpotan da. Siak, say Katawan a Makapanyarin-amin, so nansalita.

⁵⁹ Si Seraias a lakin anak nen Nerias tan apo nen Maasias et dilin mananulong nen Ari Sedekias na Juda. Diad kumapat a taon na panooley nen Sedekias ed Juda, linmad Babilonia si Seraya a kaiba toy Sedekias, et walay bilin kod sikato.

⁶⁰ Insulat kod sakey a libro so amin a nagawan panagderal ed Babilonia, tan saray arum a bengatlan nipaakar ed Babilonia.

⁶¹ Inkuankod kinen Seraias, No kasabim ed Babilonia, ibasam ya andi-saew ed saray totoo iray amin a nisulat dia.

⁶² Insan ka mampikasi, Katawan, imbagam a deralen mo yan pasen, pian anggapo lay antokaman a mabilay a manayam dia, totoo may ayayep, tan magmaliw a singa ando lan andon kabueran.

⁶³ Seraias, no kasumpal mon ibasa yan libro ed saray totoo, isinger mod baton baleg, tan ibantak mod Ilog na Eufrates,

⁶⁴ tan ikuanmo, Onyay nagawa ed Babiloniaonlereg tan ag lan balut makaimwas, lapud deral ya iyakar dia na Katawan. Dia mansasamput iray salita nen Jeremias.

52

¹ "Duamplo tan sakey so taon nen Sedekias nen nagmaliw ya ari na Juda, tan nanoley ed Jerusalem na labinsakey taon. Say ina to si Hamatal ya anak nen Jeremias a taga siudad na Libna.

² "Nanggagawa na kaogsan ed arap na Katawan si Ari Sedekias a singa ginagawa nen Ari Joakin.

³ "Lapud mapalalon pasnuk na Katawan, pinaekal tod arap to iray totood Jerusalem tan saray totood Juda. Linmaban si Sedekias ed Ari Nabucodonosor na Babilonia.

⁴ "Kanyan diad kumaplon agew na kumaplon bulan na kumasiam a taon na panooley nen Sedekias ed Juda, linmad Jerusalem si Nabucodonosor tan amin da ray sondalo to, ta dinogpaan da. Nankampo ra ed paway na siudad, tan pinaliberan da na padir

⁵ "tan nilakob da ya anggad kumalabinsakey a taon na panooley nen Sedekias.

⁶ "Diad kumasiam ya agew na kumapat a bulan na saman lamlamang a taon nen mapalaloy eras ya anggapo lay naakan na saray totoo,

⁷ "abungaw na saray kalaban so padir na siudad. Anggaman a nilakob na saray taga Babilonia so siudad, akabatik ya amin iray sondalo na Juda legan na labi. Dinmalan irad tanamanan na ari insan ira dinmalan ed puirtan nanleetan na saray duaran padir tan batik iran amaarap ed Patar na Jordan.

⁸ "Balet saray sondalon taga Babilonia inosilan day Ari Sedekias tan narel da diad saray patar ya asingger ed Jerico, tan imbatikan na saray amin a sondalo to.

⁹ "Niakar si Sedekias ed kinen Ari Nabucodonosor a walad siudad na Ribla a nasasakopay Hamat, tan diman sinintinsiaan nen Nabucodonosor.

¹⁰ Diad Ribla si Sedekias nengnengnengen to ray anak ton lalaki ya impapatey nen Ari Nabucodonosor tan impapatey to met iray opisyal na Juda.

¹¹ Insan to impasokit iray mata nen Sedekias tan impagolunggolungan to tan impaiyakar tod Babilonia. Nansiansian priso ed Babilonia si Sedekias ya anggad impatey to.

¹² Nen kumaplon agew na kumaliman bulan na kumalabinsiam a taon na panooley nen Ari Nabucodonosor ed Babilonia, linmoob ed Jerusalem si Nebuzaradan a sumisimbawa na ari tan pangulo na saray sondalo to.

¹³ Pinoolan toy Timplo, say palasio, tan saray kaabungan na amin a manonan totoo ed Jerusalem;

¹⁴ tan ginegeba na saray sondalo to so padir na siudad.

¹⁵ Insan si Nebuzaradan inyakar tod Babilonia iray nakdaan a totoo ed siudad, saray atilak a marunong a kumikimey tan saray akigampid saray taga Babilonia.

¹⁶ Balet intilak tod Juda iray sankamairapay bilay a totoo ya anggapoy kayaryan dan balut, insan to ra impandalus ed saray kaalogan tan impanasikaso to ray kaubasan.

¹⁷ Minekmek na saray taga Babilonia iray gansan lusek tan saray kariton a walad Timplo, pati say baleg a gansan dipositoway danum, insan da inaawit ed Babilonia iray amin a gansa.

¹⁸ Inala da met iray pala, saray pananginay dapul, saray panagpotut na pabilo, saray yaung a panagsaluray dala na saray bagat, saray yaung ya ikakanad panagpool na insinso, tan amin nin gansan kagawaan ya ikakana ed panaglingkur ed Timplo.

¹⁹ Inala da ray amin a kagawaan a balituk o pilak; saray ankekelag a yaung, saray kawali a pananginay ngalab, saray yaung a pananginay dala na saray bagat, saray pananginay dapul, saray patoonay lamparaan, saray yaung a pananginay insinso, tan saray yaung ya ikakanad panangibung na saray bagat ya alak.

²⁰ Diad gaway belat da ray ikakanan gansa a ginagawa nen Ari Solomon a para Timplosaray duaran lusek, saray kariton, say baleg a kawa, tan saray labinduan bakan kalakyan ya angampatot ed samay kawa et ag ira nayarin simbangen.

²¹ Namparpara ira may duaran lusek; balang sakey waloran mitro so kaatagey, tan anemiran mitro so kinalimpek da. Diad toktok na balang lusek, walay olo a duaran mitroy kaatagey to. Diad kaliber-liber na sayan olo walay alagalaga ya adikoraan na granada, ya amin da et gansa met.

²²

²³ Sanlasus a granadan amin so walad samay alagalaga ed balang lusek, tan nanengneng ed dalin iray siamaplo tan anem ed saramay granada.

²⁴ Si Nebuzaradan a pangulo na saray sondalo na Babilonia inaala ton priso ira di Seraias a Pangulon Pari, Sofonias ya onkumadwad Pangulon Pari, tan talora nin manonan opisyal na Timplo.

²⁵ Inala tod siudad so sakey a lakin pangulo na sakey ya olup na sondalo, pitoran sumisimbawa na ari a wala ni rad siudad, say mananulong na panguloy sondalo a makaoley ed listaan a nipaakar ed saray sondalo, tan saray anemaplo ni ran manonan totoo.

²⁶ Inyakar to ra nen Nebuzaradan ed ari na Babilonia a walad siudad na Ribla

²⁷ a sakop na dalin na Hamat. Impapasiplatan tan impapatey irad man na ari. Kanyan niarawi rad dalin da iray totood Juda tan nibantak irad arawin pasen.

²⁸ Saya so listaan na saray inaalan priso nen Nabucodonosor: nen kumapiton taon na panaari to angala na talon libo tan duamplo tan talo;

²⁹ nen kumawalon taon angalad Jerusalem na walon lasus tan talomplo tan dua:

³⁰ nen kumaduamplo tan talon taon angalay Nebuzaradan na piton lasus tan apataplo tan lima. Apat a libo tan anem a lasus ya amin so nalan totoo.

³¹ Nen taon a nagmaliw ya arid Babilonia si Evil-merodac, kinasian to si Ari Joakin na Juda; impaway to ed prisowan. Agawa ya nen kumaduamplo tan limay agew na kumalabinduan bulan na kumatalomplo tan piton taon na inkapriso nen Joakin.

³² Maung a linawa so impanengneng nen Evil-merodac ed kinen Joakin. Initdan toy kipapasen ya atagey niy kagalangan nen say kipapasen da ray arum ya arari a kaiba to ran apriso ed Babilonia.

³³ Kanyan naabuloyan si Joakin a salatan toy kawes ton kawes na priso, mirongo ed ari kapag panangan legay impanbilay to ni.

³⁴ Inagew-agew, anggad ag to impatey, iniiter na ari so gastosen tod nakaukolan to.