1

¹ "Diad sayan libro nisulat iray impasingayew na Dios ed kinen Isaias a lakin anak nen Amoz legan na impanari ed Juda di Uzias, Jotam, Acaz, tan Ezekias.

² "Inkuan na Katawan, Sikayon tawen tan mundo, dengel yoy ibagak! Linmaban ed siak iray pinabaleg kon anak.

³ "Amta na saray baka iray akankaryan ed sikara, tan amta na saray asno no iner so pamapakanan ed sikara na amo a. Balet ag ak amta o natalusan na ssaray totook ya Israelita.

⁴ "Nadudusa ka, sika a makasalanan a bansa, sikayon marotak tan maoges a totook! Ikokotep ka na saray kasalanan mo! Impolisay moy Katawan a masanton Dios na Israel tan imbeneg mo.

⁵ "Akin et itutuloy moy onsumpa? Labay mon ompalaloy pakadusam? Israel, asugat-sugat lay olom, tan wala lay sakit na pusom tan say kanunotan mo.

⁶ "Maletey so intiron laman mo. Aliber so laman mo na saray sugat, giri, tan saray tinmeterak a larag. Ag alinisan o aberber iray sugat mo. Ag ira anggan nainan na tambal.

⁷ "Nagmaliw ya apaolyan so bansa yo tan tinemek na apoy iray siudad yo. Sankanengneng yon sasakopen na saray taga arum a bansa so dalin yo tan dederalen day amin a bengatla.

⁸ "Jerusalem labat so nakdaan ya aliktub a siudadsinga la ag makapangyagel a bantayan ya abung ed kaubasan odino alolung ed alog na kamilonan.

⁹ "No ag labat inyabuloy na Katawan a Makapanyarin-amin a niagel iray pigaran totoo to, sigput kamun ya aderal so Jerusalem, a singa inkaderal na Sodoma tan Gomorra.

¹⁰ Jerusalem, saray manoley mo tan saray totoom et singa ra saray manoley tan saray totoo ed Sodoma tan Gomorra. Dengel ka ed ibabagad sika na Katawan. Talineng moy ibabangat ed sika na Dios tayo.

¹¹ Kuanto, Say abaloan yo labay ko ray bagat ya itutuloy yon isasaklang ed siak. Andi! Sinmawa ak la ed saray popoolan yon bagat tan saray taba na saray sankaabigan ya ayayep yo. Ag ko labay so dala da ray bakan kalakyan, saray karniro tan saray kanding.

¹² Siopay angibagan mangawit kayo na sarayan ayayep no mangigalang kayod siak? Siopay angiganggan ed sikayon gatin-gatinan yoy kaliber-liber na Timplok?

¹³ Andi-kakanaan so mangawit na saray bagat yo. Nanaingungotan ak lad balingit na insinson ibabagat yo. Ag ko la naanosan iray Balon Bulan a Pista yo, saray Agew na Panagpainawa yo, saray masanton panagtipon yo; nagmaliw iran andi-kakanaan lapud saray kasalanan yo.

¹⁴ Kabosul ko ray Balon Bulan a Pista yo tan saray masanton agew yo. Ag ko la ra naanosan a sakbaten.

¹⁵ Onlingaw ak ed biek no itagey yo ray lima yo a mampikasi. Ag ta kayo dengelen anggan mansosoldungay pikakasi yo, lapud dala ya amin so lima yo.

¹⁶ Orasan yoy sikayon dili. Tondaan yoy amin a kaogsan a nanenengneng kon gagawaen yo. On, tondaan yo lay panggagawa yoy kaogsan

¹⁷ tan manaral kayo lan manggaway kamaungan. Ipakurang yoy kaptekan ed saray katoowantulongan yo ray napapairap, iyagel yo ray olila, tan imasakit yo ray balo.

¹⁸ Say Katawan kuanto, Gali dia natan, ta mampapalinewan itayo. Anggaman a marotarotak kayod kasalanan, pagmaliwen ta kayon malinis a singa yilo. Anggaman ya ambalangan singa dala iray kasalanan yo, pagmaliwen ta kayon singa kapotiy bagoy karniro.

¹⁹ No onuren yo ak, kanen yo ray maabig a bengatlan bungay dalin.

²⁰ Balet no ipolisay tan labanan yo ak, andi-duaruwan ompatey kayo. Siak, say Katawan, so nansalita.

²¹ Say siudad a matoor nen saman et nagmaliw la natan a singa marotak a bii! Nen saman matonung a totoo iray manaayam diman; balet natan saray managpatey na totoo labat lay manaayam.

²² Jerusalem, singa ka pilak nen saman, balet natan andi-kakanaan ka la; singa ka masamit ya alak nen saman, balet natan danum ka labat.

²³ Mananumpa iray pangulom tan kakaiba ra na saray matakew; labalabay day mangawat lan mangawat na rigalo tan saray pasoksok. Balet ag da iyaalagey ed korti iray olila, odino onderengel ed pankatonungan na saray balo.

²⁴ Kanyan dengel yo natan so ibabaga na Katawan a Makapanyarin-amin, sa Makapanyarin Dios na Israel, Ombawi ak ed sikayo ran kalaban ko, et ag yo ak lad satan nasigensigen.

²⁵ Walay gawaen ko sumpad sikayo. Linisan ta kayon singa panagpalba ed mital, tan ekalen koy amin a dotak yo.

²⁶ Itdan ta kayo na saray pangulo tan saray sumisimbawa yo a singa nen saman. Diad ontan, say Jerusalem natawag a matonung tan matoor a siudad.

²⁷ Lapud matonung so Katawan, iyagel toy Jerusalem tan amin da ray wadman a magbabawi.

²⁸ Balet deralen toy balang sakey a mankakasalanan tan onlalaban ed sikato; pateyen toy siopaman a mangikaindan ed sikato.

²⁹ Ombaing kayo lapud impangigagalang yod saray kiew tan lapud impanggawa yo ray masanton tanamanan.

³⁰ Onlenes kayon singa ompapatey a kiew a robli, singa tanamanan ya anggapoy mansalug.

³¹ No panon a napadalang na anggan melmelag ya apoy so amagan dayami, ontan met a naderal iray makapanyarin totoo diad panamegley na saray dilin maoges a gawgawa ra tan anggapoy makapatonda na kaderal da.

2

¹ "Sikara yay salitan inter na Dios ed kinen Isaias a lakin anak nen Amoz nipaakar ed Juda tan Jerusalem:

² "Diad saray agew ya onsabi, say palandey a panalalageyan na Timplo so magmaliw a sankatageyan ed saray palandey tan ososdungan ton amin iray pokdul. Amayamay a bansa so onlan singa onaagos a danum ed sikato,

³ "tan ikuan na saray totoo ra, Gali dia ta ontatdang itayod palandey na Katawan, diad Timplo na Dios na Israel. Ibangat to itayo na saray labay ton pagawad sikatayo; mankurang itayod saray dalan sa pinili to. Ta manlalapud Jerusalem iray bangat na Katawan; manlapud Sion mansasalitad saray totoo to.

⁴ "Patondaen toy pankokolkol da ray matalonggaring a bansa. Gawaen dan lokuy iray ispada ra, tan palot iray pika ra. Ag la mambabakal iray bansa; ag la ran balut mamparaan a mibakal.

⁵ "Sikayo ran kabyangay boleg nen Jacob, mankurang itayod liwawan iiter ed sikatayo na Katawan!

⁶ "O Dios, inkaindan mo ray totoom, saray kabyangay boleg nen Jacob! Ginawam so onya lapud say bansa et napno na saray managaniton salamangkiro a taga ra Bokig tan taga ra Filistia. Aaligen na saray totoo so ogali da ray taga arum a bansa.

⁷ "Napno na pilak tan balituk so dalin da, tan ag nabilang so kayamanan da. Napno na kabayo so dalin da, tan ag nabilang iray karwahi ra.

⁸ "Napno na saray talintaoy diriyos so dalin da, tan igagalang da ray bengatlan ginawa na dilin lima ra.

⁹ "Napaabeba tan napelag ed kababaingan so balang sakey ed sikara. Ag mo pa ra pipirdonaen, O Katawan!

¹⁰ Onamut irad saray ongib na kapokdulan odino diad saray abut ed dalem na dalin, pian napaliisan day pasnuk na Katawan, tan niamutan day pakayari tan say kagalangan to!

¹¹ Onsabiy agew a mansamput so panagpaatagey na too tan naderal so panagpasirayew na amin a katoowan. Insan say Katawan labat so nitanduro ed satan.

¹² Diad satan met ya agew say Katawan a Makapanyarin-amin et ipelag tod kababaingan ya amin iray totoon makapanyari, mapaatagey tan mapasirayew.

¹³ Deralen ton amin iray atatagey a kiew a sidro ed Libano tan amin a kiew a robli ed dalin na Basan.

¹⁴ Ipalanas to ray atagey a kapalandeyan tan saray kapokdulan,

¹⁵ tan amin ya atatagey a tori, tan say padir na balang tirinsira.

¹⁶ Ipalereg to ray anggan sankabalegan tan sankarakepan a bapor.

¹⁷ Mansamput so panagpaatagey na too tan naderal so panagpasirayew na amin a katoowan. Naandipat a sigput iray talintaoy diriyos, tan nitanduro so Katawan labat diad satan ya agew.

¹⁸

¹⁹ Onamut iray totood saray ongib na kapokdulan odino diad saray abut ed dalem na dalin, pian napaliisan day pasnuk na Katawan tan niamutan day pakayari tan kagalangan to, no sikatoy onsabi a manyegyeg ed mundo.

²⁰ No onsabiy tan ya agew ibantak na saray totoo iray pilak tan balituk a talintaoy diriyos a ginagawa ra, tan itilak da rad kawalaan da ray otut tan saray kolalaknit.

²¹ No onsabiy Katawan a yegyegen toy dalin, saray onamut ed saray abut tan diad saray ongib ed kapokdulan iray totoo, pian napaliisan day pasnuk to tan niamutan day pakayari tan kagalangan to.

²² Ag kayo la manmamatalek ed too ya ag mansiansian mambilay. Anto tay kakanaan to?

3

¹ "Natan say Katawan a Makapanyarin-amin a Katawan et ngalngali to la ekalen ed Jerusalem tan Juda iray amin a panmamatalkan na saray totoo. Ekalen toy tagano ra tan say danum da,

² "saray bayani tan saray sondalo ra, saray huis tan saray propita ra, saray managparles tan saray mamasiken da,

³ "saray pangulo na sondalo tan saray manoley ed baley da, saray politiko tan saray salamangkiro ra a labay dan naoleyan so nagagawa.

⁴ "Abuloyan na Katawan ya oleyan ira na saray walad kalangweran a kulang na kakabatan tan salsali iray totoo.

⁵ "Mampapairapan tan manlalamesan so balang sakey ed sikara. Saray tobun-balo ag da pagalangan iray pangulowan da, tan saray andi-kakanaan a totoo ag da italtalek iray walad pakaoley.

⁶ "Onsabiy panaon a saray kabyangay sakey a boleg et mamili ray sakey ed sikara tan ikuandad sikato, Walay isolung mo, kanyan sikay pangulo mid sayan panaon na gunigon.

⁷ "Balet onebat, Andi! Aliwan siak! Ag ta kayo natulongan. Anggapoy nakan ko a nisulong ko. Ag yo ak pagmamaliwen a pangulo yo!

⁸ "On, aderal la so Jerusalem! Abagbag lay Juda! Sumpad Katawan iray amin a sasalitaen tan gagawaen na saray totoo ra; maparontal dan papabaingan so Dios.

⁹ "Nisingil ed sikara so panaglabi ra. Maparontal iran mankakasalanan a singa impankasalanan na saray totood Sodoma. Pangaskasiyan ira. Sikara met ni lamlamang so nanlapwan na pakadusa ra.

¹⁰ Manliket iray totoon matonung, tan maung so pansumpalan da. Panliketan da so antokaman a nansagputan da.

¹¹ Balet pangaskasiyay kipapasen da ray totoon maoges; nagawad sikara so ginagawa rad arum a totoo.

¹² Papairapen na saray managpaabang na kuarta iray totook tan sasaolen ira na saray akautangan da. Totook, ibabalang kayo na saray pangulo yo, kanyan ag yo amta no iner so laen yo.

¹³ Akaparaan lay Katawan a mangibaga na liknaan to; sipaparaan lan manintinsia ed saray totoo to.

¹⁴ Say Katawan iyaakar tod panagsintinsiaan iray mamasiken tan saray pangulo na saray totoo to. Kuantod sikara, Sikayoy nanaala na saray bungay kaubasan, tan napno na saray sinamsam yod saray mairap-bilay iray kaabungan yo.

¹⁵ Anggapoy kanepegan yon mamairap ed saray totook tan mamasegsegang ed saray mairap-bilay. Siak, say Katawan a Dios a Makapanyarin-amin, so nansalita.

¹⁶ Inkuay Katawan, Agaylay panag-paatagey na saray bibiid Jerusalem! Mataltalker so tenger dan manakar: Mankindat ira lawas. Ankekelanting so kupbang da, tan mantaningting so pulsiras dad kalit-kalit.

¹⁷ Balet dusaen ko rakiskisan koy olo ra tan paolyan ko ran tugo.

¹⁸ Onsabiy agew a say Katawan et ekalen tod saray bibiid Jerusalem iray amin a bengatlan ikikinon dan mapalalosaray pampapagangganan isosolung dad saray kalitkalit da, diad olo ra, diad beklew da,

¹⁹ tan diad saray ngalngalowan da. Ekalen to ray pandung da

²⁰ tan saray sombriro ra; ekalen to met iray isosolung dan galing ed saray taklay da tan diad balangbang da;

²¹ saray singsing ya isosolung dad saray gamet da tan diad eleng da;

²² amin da ray mararakep a kawes da, saray kawes dan andorokey, saray kolibemben da, tan saray pitaka ra;

²³ saray maimimpis a kawes da, saray linen a panyo ra, saray tubrban tan saray andokey a pandung ya isosolung dad olo ra.

²⁴ Anta mampabalingit ira komun, naboluk ira; anta mambalkes ira komun na balibali, mambalkes iray magasgasal a lobir; anta marakerakep komun so buek da, nakiskisan so olo ra; anta mankawes ira komun na marakerakep, lupot so ikawes da; magmaliw a makapabaing so ganggana ra!

²⁵ Saray lalakid siudad, anggan antoy biskeg da et napatey irad bakal.

²⁶ Manermen tan manakis iray puirta na siudad, tan say dilin siudad magmaliw a singa biin labus-lakseb a manyodyorung ed dalin.

4

¹ "No onsabiy tan a panaon, singkaten na pitoran bibii so sakey a laki tan ikuanda, Nayarian min pakanen tan kawesan so sikamin dili, balet ipangasim ya ibagam a sikay asawa mi, pian naekal ed sikamiy kababaingan na anggapoy asawa.

² "Onsabiy panaon a say Katawan pabalegen tan pagmaliwen ton marakep so balang tanaman tan kiew a walad dalin. Amin da ray nakdaan a totood Israel et ikinon tan panliketan da ray bungay dalin.

³ "Natawag a masanto ya amin iray totoon atilak ed Jerusalem, a sikaray pinili na Dios a napaliisan day patey.

⁴ "Lapud pakayari na Katawan sintinsiaan tan pasantosen to so bansa tan orasan tod kasalanan to Jerusalem tan ekalen toy dala a naibung diman.

⁵ "Insan diad tagey na Palandey na Sion tan diad tagey na saray totoon nantitipon diman, ibaki na Katawan so lorem no agew, tan say asewek tan say marlang ya apoy no labi. Say kagalangan na Dios sakbungan tan iyagel toy intiron siudad.

⁶ "Say kagalangan na Dios tarungan toy siudad pian ag napetangan no agew tan pagmaliwen ton pasen ya arawid kaatapan, pasen a siruman no walay oran tan bagyo.

5

¹ "Dengel kayo legan kon manganta, sakey a kanta na kaarok nipaakar ed kaubasan to: Say kaarok walay kaubasan to ed toktok na pokdul a matabay dalin to.

² "Binukalkal to may dalin tan inekalan to na bato; tinaneman to na sankaabigan iran wakal na ubas. Angipaalagey na tori a panagbantayan, insan angotkot na abut a panaggatinan na ubas. Inalagar ton aloto ray bungay ubas, balet anakseng iran amin.

³ "Kanyan natan say kaarok kuanto, Sikayo ran totoon manaayam ed Jerusalem tan Juda, antoy nibaga yo nipaakar ed siak tan say kaubasan ko?

⁴ "Wala kasiy nankulangan ko ed samay kaubasan ko? Akin et anakseng iray aborbor kon bunga, ya aliwan saray masamit a bungan inilaloan ko?

⁵ "Onya so gawaen kod samay kaubasan ko: Baguten ko ray dikad kaliberliber to, igebak iray padir a mangyaagel, tan abuloyan ko ray ayayep ed katakelan a mambuwag tan manggatin-gatin ed kaubasan ko.

⁶ "Paolyan kon natuboan na saray dika. Ag ko potut-potutay sanga to odino bukalkalen so dalin, no ag ingen paolyan kon kobutan na ambabaing tan arum nin masabit a dika. Iganggan ko ni ingen iray lorem ya ag da terteran na oran.

⁷ "Say Israel so kaubasan na Katawan a Makapanyarin-amin; saray totood Juda iray wakal na ubas ya intatanem to. Inilaloan to a manggawa ray kamaungan, balet nampapatey ira lalaingen na katoowan! Inilaloan ton manggawa ray kaptekan, balet onkekerew na katonungan iray papairapen da.

⁸ "Pakaskasi kayo la! Anta wala la lantiy kaabungan tan kaalogan yo, labay yo nin naaruman ira. Ag mabayag, anggapo lay natilak a pasen a para arum a totoo, tan mambukbukor kayo la ed bansa.

⁹ "Nadngel kon ibabaga na Katawan a Makapanyarin-amin, Amin da ra yan ankakabaleg tan mararakep a kaabungan et naderal ira tan ag la ra natoowan.

¹⁰ Say limaran iktarian dalin a tinanemay ubas et pangalaan labat na sakey galon ya alak. Say binin samploran sako et napananian labat na sakey sako.

¹¹ Pakaskasi kayo la! Masaksakbay kayo ya ombabangon a maninom, tan abuek kayo ya anggad aralem lay labi.

¹² Diad saray pista yo wala ray arpa, pandirita, tan plauta tan alak. Balet ag yo natatalusan so gagawaen na Katawan.

¹³ Lapud saya, naala kayon priso ed arum a bansa. Ompatey ed eras iray pangulo yo, tan ompatey ed kaapgaan iray ordinarion totoo.

¹⁴ Narasan na bangkay da so pasen a panaayaman da ray inaatey. Isasangi ton maung so songut to. Aakmunen to ray totoon atatagey so kipapasen da, a pati saray maingal a karaklan.

¹⁵ Napelag ed kababaingan so balang sakey, tan napaabeba ya amin iray mapaatagey.

¹⁶ Balet say Katawan a Makapanyarin-amin ipapanengneng toy inkatalonggaring to diad panamegley na panggagawa toy kaptekan, tan ipapaamta toy kasantosan to diad panamegley na panisintinsia tod saray totoo to.

¹⁷ Diad saray deral-deral na saray siudad mankabkab na dika iray kordiro tan makalmo ray napankabkaban iray kilaw na kanding.

¹⁸ Pakaskasi kayo la! Ag yo nayariay onlokpus ed saray kasalanan yo.

¹⁹ Kuanyo, Mangganat la komun so Katawan a manggawa ed imbaga ton gawaen, pian nanengneng mi. Sumpalen la komun na masanton Dios na Israel iray plano to; naamtaan mi la komun so walad kanunotan to.

²⁰ Pakaskasi kayo la! Ibabaga yo a maoges so maung tan maung so maoges. Pagmamaliwen yo a kabilongetan so liwawa tan say liwawa so kabilongetan. Gagawaen yon ampait so masamit tan masamit so ampait.

²¹ Pakaskasi kayo la! Ipapasen yoy sikayon dili a makabat, mapalalon marunong a talaga.

²² Pakaskasi kayo la! Sarag yon tuay maninom na alak! Masebeg tan anggapoy takot yo no nipaakar ed pantimplay alak!

²³ Balet lapu labat ed sakey a pasoksok ibobolus yo la ray totoon nankasalanan, tan sesebelan yon makagamur na katonungan iray anggapoy kasalanan.

²⁴ Kanyan natan, no panon a napoolan so dayami tan amagan dika, ontan met a naboluk iray lamut yo tan namagaan iray rosas yo, insan ira itikyab na dagem, lapud impolisay yoy imbangat ed sikatayo na Katawan a Makapanyarin-amin a masanton Dios na Israel.

²⁵ Mamapasnuk so Katawan ed saray totoo to tan inyonat toy lima ton manusad sikara. Nayegyeg iray kapalandeyan, tan natilak a singa dotak ed saray dalan iray bangkay da ray ompatey. Anggaman onyay nagawa ag onkepay pasnuk na Katawan, tan siansian akaonat niy lima ton manusa.

²⁶ Say Katawan sisinyasan to a tawagen so sakey a bansan walad bandad arawi. Ngingisiwan to ra pian ondago ran manlapud saray samput na mundo. Et natan nia la ra; masigsiglat tan mapanaspas ira.

²⁷ Anggapod sikaray nakekesawan odino ompaparokul. Ag iran balut ontetemeg odino onoogip. Anggapoy balkes ya onlolokak; anggapoy napopoltut a bariber na sandalya.

²⁸ Matdem iray pana ra, tan akaparaan a mamana iray pana ra. Anawet a singa bato iray kokoy kabayo ra, tan singa alimbusabos so katetelek na saray bokel na karwahi ra.

²⁹ Saray sondalo et mangngongwam iran singa lion ya akapatey na ayep tan aawiten tod pasen ya anggapoy makasamsam ed sikara.

³⁰ No onsabi tan ya agew, singa kakasil na ungol na dayat so panungol dad Israel. Nengneng yo yan bansa! Kabilongetan tan kaermenan! Inakmun na bilonget so liwawa.

6

¹ "Diad samay taon ya inatey si Ari Uzias anengneng koy Katawan. Manyodyorung ed trono ton atagey tan mapagalang, tan nilaknaban na kawes to so intiron Timplo.

² "Manalalagey ed kaliber-liber to iray sirapin, ya anemiray payak na balang sakey. Kapag sirapin sinakbungan toy lupa to na duaran payak to, tan say laman to asakbungan na duara met a payak, tan saramay duara inkana rad pantikyab.

³ "Mantatawagan ira: Masanto, masanto masanto! Masanto so Katawan a Makapanyarin-amin! Say sankamundoan napno na kagalangan to.

⁴ "Niyegyeg na saray bosis da so pundasion na Timplo, tan napno na asewek so dilin Timplo.

⁵ "Inkuanko, Pakaskasi ak la! Anggapo lay ilalok! Maoges ya amin so sasalitaen na dilak, tan maayam ak ed kawalaan da ray totoon maoges so sasalitaen da. Naamtaan ko ya, lapud say Ari a Katawan a Makapanyarin-amin so anengneng na saray dilin matak.

⁶ "Insan sakey ed saramay sirapin so tinmikyab ed kawalaan ko. Walay sankaawit ton ngalab a sinipit ton inalad altar.

⁷ "Indelnet tod bibil ko may ngalab tan kuanto, Nidelnet ya ed bibil mo, et natan naandi lay kaogsan mo tan apirdona la ray kasalanan mo.

⁸ "Insan nadngel kon say Katawan kuanto, Siopay ibakik? Siopay managbalita tayo? Inmebat ak, Siak! Ibaki mo ak!

⁹ "Kanyan imbaga ton onla ak ya ikuankod saray totoo, Anggan panoy idengel yo, ag yo natalusan. Anggan panoy inengneng yo, ag yo naamtaan no antoy nagagawa.

¹⁰ Insan inkuantod siak, Pagmaliw mon anawet so olo na sarayan totoo, telek iray layag da, tan bulag iray mata ra, pian ag ira makatalus o makanengneng o makadngel. Ta no makatalus, makadngel, odino makanengneng ira, nayarin ompawil irad siak tan naabigan ira.

¹¹ Tinepet ko, Katawan, anggad kapigan ya onyay nagawa? Inmebat so Katawan, Anggad aderal-deral tan anggapo la ray totoon manayam ed siudadanggad anggapo la ray manayam ed saray abunganggad say dalin et andi-kakanaan lan ataynan.

¹² Ibantak kod arawdawin pasen iray totoo tan nataynan so intiron dalin.

¹³ Anggaman a natilak ed dalin so kakaplod saray totoo, naderal met iray natilak; singa ra sengeg na kiew a robli a binatang. (Say sengeg iyaaliling toy balon gapowan na saray totoo na Dios.)

7

¹ "Ginmapoy bakal nen manaarid Juda si Ari Acaz a lakin anak nen Jotam tan apo nen Uzias. Say ari na Siria a si Rezin tan say ari na Israel a lakin anak nen Remalias et dinogpaan day Jerusalem, balet ag da adakep.

² "Nen akabatan na ari na Juda a saray sondalo na Siria et akasabi la rad dalin na Israel, mapalaloy inkataktakot to tan saray amin a totoo to. Manggiwgiw ira tan singa ra kakiewan ya ipapalig na mabiskeg a dagem.

³ "Inkuan na Katawan ed kinen Isaias, Itagar moy anak mon laki a si Searjasub, ta abet yoy Ari Acaz. Narumog yod dalan a pankikimeyan da ray managgaway abel, diad samput na banawang a pangipapaagusay danum a manlalapud niatagey a dipositoway danum.

⁴ "Ibagam ed sikato a sipaparaan lawas, mansiansian mareen, tan ag ontatakot odino nagugunigon. Say pasnuk nen Ari Rezin tan saray Siriano tan say pasnuk nen Ari Peca et singa labat asewek na duaran napopoolan a bislak.

⁵ "Nankomplut sumpad sika so Siria tan say Israel.

⁶ "Pilalek dan nadakep so Juda, taktakoten a pigampien ed sikara iray totoo to, insan da payorungen ed trono so lakin anak nen Tabeel.

⁷ "Balet siak a Katawan kuanko ya ag yan balut nagawa.

⁸ "Akin? Lapud aliwan mabiskeg so Siria nen say Damasco a manonan baley to, tan say Damasco et aliwan mabiskeg nen si Ari Rezin. No nipaakar ed Israel, naderal-deral ed loob na anemaplo tan limay taon kanyan ag natogyup a sakey a bansa.

⁹ "Aliwan mabiskeg so Israel nen say Samaria a manonan baley to, tan say Samaria aliwan mabiskeg nen si Ari Peca. No aliwan malet so pananisiam, ag ka makapansiansia.

¹⁰ Say Katawan impaikuanto lamet ed kinen Acaz,

¹¹ Kerew mod Katawan a Dios mo ya itdan to kay sakey a tanda. Nayarin manlapud pasen a panaayaman da ray inaatey itan a tanda odino manlapud tagey ed tawen.

¹² Inmebat si Acaz, Ag ak onkerew na tanda. Ag ko labay a suboken so Katawan.

¹³ Inmebat si Isaias, Dengel ka natan, sika a kabyangay boleg nen David. Makapoy ed sika ya ekalan moy anos so tooekalan moy anos so pati Dios?

¹⁴ Natan, say Katawan itdan to ka na sakey a tanda: walay sakey a marikit a malokun tan mananak na sakey a laki tan ngaranan to na Emmanuel.

¹⁵ No amta to lan ibiig so maung ed maoges, gatas tan dilo so kanen la na saray totoo.

¹⁶ Anggan kasakbayan to yan panaon, nataynan iray dalin na saramay duaran ari a manataktakot ed sika.

¹⁷ Say Katawan pairapen to ka, saray totoom, tan amin a kabyangay pamilya na ari. Mapalalo niy iter ton gunigon nen say antokaman a gunigon a sinmabi lad samay impansian na Israel tan Judaiyakar dia na Katawan so ari na Asiria.

¹⁸ No onsabi tan a panaon, say Katawan ngisiwan to ray sondalon Egipsio, et onsabi ran singa saray amayamay ya apangat a manlapud sanka-arawian a sangasangay Ilog na Nilo. Nigisiwan to met iray sondalon Asiria, et onsabi ran singa saray bayaung a manlapud dalin da.

¹⁹ Manayam irad saray patar a kawalaan na ankakabaleg a bato tan diad saray ongib ed kapalandeyan. Panatan da met ya amin iray masabit ya abeban kiew tan amin iray pastolan.

²⁰ No onsabi tan a panaon, say Katawan mangupa na sakey a kumakatlin taga nibaliw na Ilog na Eufratessay impirador na Asiriainsan kiskisan to ray balbas yo, say kaoloan yo, tan anggan say bagoy laman yo.

²¹ No onsabi tan a panaon, say dumaralus ya anggan saksakey so malangwer to baka tan dugduaray kanding to

²² et makalad sikara na magenap a gatas a nakaukolan to. On, saray nakeraan a nabilay diad dalin et nawalaan ira na gatas tan dilo a kanen da.

²³ No onsabi tan a panaon, saray mararakep a kaubasan a walay sanlibon sengeg na ubas to, tan mambiliy sanlibon pilak so kapag kaubasan, et natuboan na amayamay a masabit a dika.

²⁴ Saray totoo a sankaawit day pana ra et mananup irad man. On, magmaliw a kasabitan so intiron bansa.

²⁵ Amin da ray kapokdulan ya ataneman nen saman na saray tanaman et natuboan na amayamay a masabit a dika, kanyan anggapoy onlad man. Magmaliw lan pasen a panagpastolan na saray baka tan karniro.

8

¹ "Say Katawan inkuantod siak, Mangala ka na panagsulatan tan isulat mo yad ankabaleg a litra: Maples a Panagderal, Masiglat a Panagsamsam.

² "Manawag kay duaran napanmatalkan a lalaki, di Urias a pari tan Zacarias a lakin anak nen Jeberekias, ta sikaray tasi.

³ "Ag abayag nanlokun so asawak. Nen nianak so anak min laki inkuan ed siak na Katawan, Ngaranan mo na Mahershalal-hash-baz.

⁴ "Kasakbayan a nayarian to lan ibagay Ina tan Ama, say ari na Asiria alaen ton isempet iray amin a kayamanan na Damasco tan amin ya asamsamsam na Samaria.

⁵ "Akisalita lamet so Katawan ed siak.

⁶ "Inkuanto, Lapud sarayan totoo et impolisay day mareen a danum na Sobul na Siloe, tan manggiwgiw irad arap di Ari Rezin tan Ari Peca,

⁷ "siak, a Katawan, iyakar ko diay impirador na Asiria tan amin da ray sondalo to, ta dogpaan day Juda. Onsulong iran singa agos na danum a linmipwad saray pandel na Ilog na Eufrates.

⁸ "Delapen day intiron Juda, onaralem ya anggad takeb tan tabunan day amin a bengatla. Say Dios walad sikatayo! Say akabuskag iran payak to iyaagel day dalin tayo.

⁹ "Mantitipon kayon sitatakot, sikayo ran bansa! Dengel kayo, sikayo ran ararawin parti na mundo. Mamparaan kayon mibakal, balet takot kayo! On, mamparaan kayo, balet takot kayo!

¹⁰ Mamplano kayo, balet ag kayo mampalabo. Tongtong yo lay labay yon tongtongen, balet andi-kakanaan ya amin iray tongtongen yo, lapud walad sikami so Dios.

¹¹ Diad baleg a pakayari na Katawan pinasakbayan to ak ya ag ko tombuken so dadalanen na saray totoo. Inkuanto,

¹² Ag ka mibibiang ed pankokomplut da ray totoo tan ag ka ontatakot ed tatakotan da.

¹³ Ag mo lilingwanan a siak, say Katawan a Makapanyarin-amin, et masanto; siak so nepeg mon takotan.

¹⁴ Lapud ontan lan kinasantok singa ak sakey a baton pakapatakbaan na saray totoo; singa ak patit a pakaerelan ed saray totoon kabyangan na saray nanarian na Juda tan Israel tan saray totood Jerusalem.

¹⁵ Amayamay iray niparokul; natumba ra tan napoter ira. Naerel irad patit.

¹⁶ Sikayo ran disipulok, nepeg a bantayan tan pansiansiaen yo ray salitan inter na Dios ed siak.

¹⁷ Inyamutan na Katawan iray totoo to, balet manmamatalek ak ed sikato tan sikatoy paniilaloan ko.

¹⁸ Wadya ak, kaibak iray anak ya inter ed siak na Katawan. Say Katawan a Makapanyarin-amin a say trono to et walad toktok na Palandey na Sion, ginawa to kamin mabilay a tanda a pakapatnagan na saray totoo ed Israel.

¹⁹ Ibagad sika na saray totoo a mangipanon kad saray meremere tan mitimiti a pumaparles tan saray managpanon ed saray ispiritu na inaatey. Ikuanda, Say katwaan to, saray totoo nepeg iran mangipanon ed saray ispiritu, tan ipanonan da ray mabilay ed saray inaatey.

²⁰ Onya so iyebat mod sikara, Dengel yoy ibabangat ed sikayo na Katawan! Ag yo dedengelen iray managpanon ed saray ispiritu na inaateyag da napaandi so gunigon.

²¹ Saray totoo et nakalan iray ilalo tan narasan iran manakar-akar ed intiron dalin. Diad eras tan pasnuk da, ayewen day ari ra tan say Dios da. Nayarin ontangay irad tawen

²² odino onnengneng irad dalin, balet anggapoy arum na nanengneng da no ag say gunigon tan kabilongetan, say makapataktakot a kabilongetan ya akaibantakan da.

9

¹ "Anggapoy pakapaliis dad sayan panaon na gunigon. Aminsan naplag ed kababaingan so dalin na saray tribu di Zabulon tan Neftali; balet diad arapen a panaon nitanduro yan lugar, manlapud Mediteraneo a mampabokig ya anggad dalin ed nibaliw na Jordan, tan nasakop to ya anggad Galilea a panaayaman na saray sangkaili.

² "Akanengneng ba baleg a silew iray totoon nankukurang ed kabilongetan. Nanayam irad sakey a dalin ya ambilbilonget, balet natan onsisindag so silew ed sikara.

³ "Initdan mo ray baleg a gayaga, Katawan; impagmaliw mo ran maliket. Magayaga ra lapud saray ginagawam; singa saray totoon maliket no manaani ra, odino singa ra saray manaapag na asamsam dan kayamanan.

⁴ "Maliket ira lapud pinoter moy pakon sasakbaten da tan say bastun a mamepekpek na saray takeb da. Tinalom so bansa ya amairap ed saray totoom, a singa samay impanalom nen saman ed saray sondalo na Madian.

⁵ "Oputen na apoy iray buta na ondodogpan sondalo tan amin a kawes dan ataltalagsikan na dala.

⁶ "Dida sikatayo nianak so sakey ya ogaw! Niiter ed sikatayo so sakey ya anak a laki! Sikatoy magmaliw a manoley tayo. Natawag a Makapakelaw a Mananimbawa, Makapanyarin Dios, Andi-anggaan ya Ama, Prinsipi na Kareenan.

⁷ "Onlaknab lan onlaknab so pakaoley ton ari, mansiansian mareen so panarian to. Manoley a kasalat nen Ari David, tan iletneg tod kaptekan tan katonungan so pakayari to manlapud natan ya anggad angga. Andi-saew a sumpalen ya amin na Makapanyarin-amin a Katawan.

⁸ "Say Katawan sinintinsiaan toy nanarian na Israel, saray kabyangan na boleg nen Jacob.

⁹ "Amin da ray totood Israel, balang sakey a manaayam ed siudad na Samaria, naamtaan da a ginawa ya na Katawan. Matangsit tan mapaatagey ira natan. Kuanda,

¹⁰ Ageba ray laryon paalagey, balet salatan mi ra na saray baton paalagey. Apoter iray wanan a sikamoro, balet salatan mi ra na sankaabigan a kiew a sidro.

¹¹ Sinogsogan na Katawan iray kalaban da a dogpaan da ra.

¹² Say Siria ed bokig tan say Filistia ed sagur sinmangi ran mangakmun ed Israel. Anggaman ontan ag ni tinmonda so pasnuk na Katawan, so ag ingen siansia nin akaonat so lima ton manusa.

¹³ Ag nagbabawi ray totood Israel; anggaman a dinusa ra na Katawan a Makapanyarin-amin, ag ira pinmawil ed sikato.

¹⁴ Diad sanagew dusaen na Katawan iray pangulo na Israel tan saray totoo to; potuten toy olo ra tan say ikul da.

¹⁵ Say olo et saray matakken tan gagalangen a totootan say ikul et saray propitan tilay ibabangat da!

¹⁶ Saray mangiwawanwan ed sarayan totoo et imbalang da ra tan sigput da ran ginewgew.

¹⁷ Ag yabuloy sirin na Katawan a makabatik so siopaman ed saray tobun-balo, tan ag to kasian so siopaman ed saray balo tan saray olila, lapud anggapoy Dios da ray amin a totoo tan maoges ira tan kaogsan ya amin so sasalitaen da. Anggaman ontan ag ni ontonda so pasnuk na Katawan, no ag ingen siansia nin akaonat so lima ton manusa.

¹⁸ Say kaogsan na saray totoo et ondadalang a singa apoy a manemek na abeba ran kiew tan saray masabit a dika. Ondadalang a singa pool ed takel a mangipapaatagey na makapal ya asewek.

¹⁹ Lapud pasnuk na Katawan a Makapanyarin-amin, say pananusa to et ondadalang a singa pool ed intiron dalin tan papateyen to ray totoo, tan balang sakey iyaagel toy sikaton dili.

²⁰ Diad intiron bansa saray totoo alaen tan kanen day antokaman a naakan da, balet ag iran balut napesel. Kanen day anggan saray dilin anak da!

²¹ Saray totood Manases tan saray totood Efraim et manlalaban ira, tan mammomoyung iran ondogpa ed Juda. Anggaman ontan ag ni ontonda so pasnuk na Katawan, no ag ingen siansia nin akaonat so lima ton manusa.

10

¹ "Pakaskasi kayo la! Manggagawa kayo na saray pikewet a ganggan a mamapairap ed saray totook.

² "Ontan so panesebel yod saray mairap-bilay ed pakagamur dad saray kanepegan tan say katonungan da. Ontan so pangaala yod saray kayamanan da ray balo tan saray olila.

³ "Antoy gawaen yo no iyakar tod sikayoy deral a manlapud arawin bansa? Iner so batikan yon kereway tulong? Iner so pangyamutan yo na saray kayamanan yo?

⁴ "Napatey kayo ed bakal odino naala kayon priso. Anggaman ontan ag ni ontonda so pasnuk na Katawan, no ag ingen siansia nin akaonat so lima ton manusa.

⁵ "Inkuan na Katawan, Asiria! Ikanak so Asiria a singa pekpek a panusak ed saray totoon pamapasnukan ko.

⁶ "Imbakik so Asiria ya ondogpa ed sakey a bansan anggapoy Dios to, diad saray totoon amapetang na olok. Imbakik iray taga Asiria a mansamsam, mantakew, tan mangigatin-gatin ed saray totoo a singa ra dotak ed saray dalan.

⁷ "Balet say impirador na Asiria wala ray maruksan plano ton dili. Ginetma ton deralen iray amayamay a bansa.

⁸ "Kuanto, Ari so balang sakey a pangulo na saray sondalok!

⁹ "Adakep ko ray siudad na Calno tan Carkemis, saray siudad na Hamat tan Arpad. Adakep koy Samaria tan Damasco.

¹⁰ Inlaknab koy impanusak; dinusak iray nanarian a manangigalang ed saray talintaoy diriyos, saray talintaon dakel ira nen saray talintaon walad Jerusalem tan Samaria.

¹¹ Dineral koy Samaria tan amin da ray talintao na saray diriyos to, tan onya met so gawaen ko ed Jerusalem tan saray talintaoy diriyos ya igagalang diman.

¹² Balet say Katawan kuanto, Kayari na gagawaen kod Palandey na Sion tan diad Jerusalem, dusaen koy impirador na Asiria lapud panagpaatagey tan panagtangsit to.

¹³ Ta say impirador na Asiria kuanto, Siak a diliy nanggawad saraya. Mabiskeg ak, makabat ak, tan masilib ak. Inekal ko ray ketegan na saray bansa tan inaalak iray abaston insesempen da. Singa ak bakan kalakyan a nanggagatin ed saray totoon manaayam diman.

¹⁴ Saray bansad mundo et singa ra obung na manok, tan inaalak iray kayamanan da; singa ak nanaalay iknul ed obung ya ataynan. Anggapoy namparakpak a payak ya anaktakot ed siak; anggapoy anggan inmonin manok a mamaarawid siak!

¹⁵ Balet say Katawan kuanton, Nayari kasin ipasirayew na wasay a matalonggaring ni nen say mangiwawasay ed sikato? Odino say ligari nen say mangililigarid sikato? Say bastun ag to lilibiten so too, no ag ingen say too so manlilibit ed bastun.

¹⁶ Say Katawan a Makapanyarin-amin mangipadalan na sakit a manusad saray matataban sondalo. Diad saray laman da walay apoy a mampool lan mampool.

¹⁷ Say Dios a silew na Israel et magmaliw a sakey ya apoy. Say masanton Dios na Israel et magmaliw a manliub ya apoy a diad sanagew et poolan toy amin a bengatla, anggan saray masabit a karikaan.

¹⁸ Sigput a natemek iray makdel a takel tan saray mataban dadalusan, a singa pamatey na sakit ed too.

¹⁹ Dagdaiset so natilak a kiew tan diad karaiset da nayari ran bilangen na anggan sakey a melag ya ogaw.

²⁰ Onsabiy panaon a saray totood Israel ya akapaliis ed patey et ag la ra manmatalek ed bansan ngalngali sigput ya aneral. Petepeteg a manmatalek irad Katawan a masanton Dios na Israel.

²¹ Wala ray daiset a totood Israel ya ompawil ed makapanyarin Dios da.

²² Anggaman a natan et singa karakel na buer ed dayat so karakel na totood Israel, dagdaiset ed sikara so ompawil. Akaparaan lay kaderal na saray totood Israel, tan nagawa ya onung ed katonungan.

²³ Say Katawan a Dios a Makapanyarin-amin deralen toy intiron bansa, onung na inkuan to.

²⁴ Sat Katawan a Dios a Makapanyarin-amin kuantod saray totoo to a manaayam ed Sion, Ag kayo natatakot ed saray taga Asiria, anggaman a papairapen da kayo a singa impamairap na saray Egipsio.

²⁵ Magano lan nasumpal so panudusak ed sikayo; kayari to deralen kod satan iray taga Asiria.

²⁶ Siak, say Katawan a Makapanyarin-amin leweten ko ra a singa samay impanlewet kod saray totood Madian diad Baton Oreb. Dusaen koy Asiria a singa impanusak ed Egipto.

²⁷ No onsabiy tan ya agew ekalen ta kayod pakayari na Asiria, tan say pako ra et ag lad satan makabelbelat ed tenger yo.

²⁸ Adakep na saray sondalon kalaban so siudad na Ayat! Dinmalan irad Migron! Intilak dad Micmas iray abasto ra!

²⁹ Akabaliw la rad babaliwan tan mamapalabas iray labi ed Geba! Ataktakot iray totood baley na Rama, tan batik iray totood Gabaa a baley nen Ari Saul.

³⁰ Eyag kayo, sikayon totood Gallim! Dengel kayo, sikayon taga Laisa! Ebat kayo, sikayon taga Anatot!

³¹ Saray taga Madmena tan Gebim ombabatik iran mangyagel na bilay da.

³² Wala la natad sayan agew ed baley na Nob iray kalaban, tan aayagan day poniti so Palandey na Sion tan say siudad na Jerusalem.

³³ Say Katawan a Makapanyarin-amin biglan ipelag to ran singa sangay kiew a pinupo. Natipas tan napaabeba iray sankamapaatagey tan sankatageyan na kipapasen ed sikara.

³⁴ Batangen to ran singa pambatang na wasay ed saray kiew ed otel na takel. Natumba ran singa say katumba na saray sankaabigan a kiew na Libano!

11

¹ "Saray manarin kabyangay boleg nen David et singa ra sakey a kiew ya abatang; balet onung a saray balon sanga et onsibual irad sengeg ya amatangan, ontan met a sakey a balon ari so onletaw ed saray kabyangay boleg nen David.

² "Say ispiritu na Katawan so manayam ed sikato tan mangiter ed sikato na kakabatan, pakatalus, tan karonungan a manoley ed saray totoo to. Naamtaan toy linawa na Katawan tan pagalangan toy Katawan,

³ "tan manliket ed pangonur tod sikato. Say panagsintinsia to ag to iletneg ed nanengneng odino dengeldengel;

⁴ "onung ed kaptekan so panintinsia tod saray mairap-bilay, tan iyagel to ray katonungan da ray pakaskasi. Diad ganggan to nadusa ray katoowan, tan ompatey iray totoon maoges.

⁵ "Oleyan to ray totoo to onung ed katonungan tan kaptekan.

⁶ "Manamung tan ag manangal iray asod katakelan tan saray karniro, tan saksakey a pasen so dokulan da ray liopardo tan saray kanding. Manokub na panganan iray kilaw na baka tan saray kilaw na lion, tan melag iran ogogaw so manasikasod sikara.

⁷ "Manokub na panganan da iray baka tan saray oso, tan manamung ya ag manangal iray kilaw da, Mangan na dayami iray lion a singa pangan na saray baka.

⁸ "Anggan say mansosuson ogaw ag nasakitan no manggalaw ed abay na nanditan oleg.

⁹ "Diad Sion a masanton palandey na Dios, anggapoy antokaman a mamasakit odino manderal. Say dalin napano na pikakabat ed Katawan a singa inkapnoy dayat na danum.

¹⁰ Onsabiy agew a say balon ari a nanlapud saray manarin kabyangay boleg nen David et magmaliw a sakey a tanda ed saray bansa. Mantitipon irad panaarian ton siudad tan sikatoy igalang da.

¹¹ No onsabiy tan ya agew, ipakana lamet na Katawan so pakayari to, ta pasempeten to la ray totoo to ya atilak ed Asiria, Egipto, diad dalin na Patros, Sudan, Elam, Babilonia, tan Hamat, tan diad saray gilig na dayat tan diad saray isla.

¹² Say Katawan mangyatagey na tanda a mangipanengneng ed saray bansa a titiponen to lamet iray nikaykayat a totood Israel tan Juda, tan papapawilen to ran manlapud apatiran sokung na mundo.

¹³ Ag la onimon ed satan so nanarian na Israel ed Juda, tan ag la kalaban na Israel so Juda.

¹⁴ Mankakasakey ira ya ondogpa ed saray Filisteo diad sagur tan samsaman da ray totoon manaayam ed bokig. Dakepen da ray totood Edom tan Moab, tan onuren ira na saray totood Ammon.

¹⁵ Say Katawan paekatan toy Dayat na Suez tan mangyakar na ampetapetang a mabiskeg a dagem a mamaekat na Ilog na Eufrates; pitoran ankekelag a kolus labat so nakeraan, kanyan nayarin manakar ya ombaliw so siopaman.

¹⁶ Walay nagawan maawang a dalan a manlapud Asiria, a dalanen na saray totood Israel a nipaliis ed patey diman, a singa inkiwalay dalan a dinalan na saray lalaki ra nen tinaynan day Egipto.

12

¹ "Onsabiy agew a saray totoo mankanta ra: Idadayew ta ka, Katawan! Mamapasnuk kad siak nen saman, balet natan liligliwaen mo ak tan ambetel lay olom ed siak.

² "Say Dios so manangilaban ko; manmatalek ak ed sikato, et ag ak antakot. Say Katawan iitdan to ak na pakayari tan biskeg; sikatoy manangilaban ko.

³ "Onung a say ambetel a danum et mangiiter na liket ed saray totoon napgaan, ontan met a saray totoo na Dios et manliket ira no ilaban to ra.

⁴ "Onsabiy agew a saray totoo ikanta ra, Misalamat kayod Katawan! Kerew kayod sikaton tulongan to kayo! Ibaga yod amin a bansa iray ginagawa to! Ibaga yod sikara ya ontan lay inkatalonggaring to!

⁵ "Kantaan yoy Katawan, lapud saray ginagawa ton matalonggaring. Ipaamta yo ya ed sankamundoan.

⁶ "Maneyag tan mankanta kayod liket, sikayon manayam ed Sion! Matalonggaring so masanton Dios na Israel, tan manaayam ed kawalaan da ray totoo to.

13

¹ "Sikato yay propisiya a nipaakar ed Babilonia, say propisiya ya impuyan na Dios ed kinen Isaias a lakin anak nen Amoz.

² "Diad toktok na kinmelang a pokdul, ibitin yoy bandiran para bakal! Kolyaotan yo ray sondalo tan itagey yo ray taklay yon maninyas ed sikara ya ondogpa rad saray puirta na mapaatagey a siudad.

³ "Tinawag na Katawan iray mapaatagey tan masebeg a sondalo to, ta milaban irad masanton bakal diad panusa rad saray pamapasnukan ton totoo.

⁴ "Dengel yoy ingal ed kapalandeyansay ingal da ray amayamay a totoo, say ingal da ray mantitipon a bansa tan nanarian. Ipaparaan na Katawan na saray Sondalo iray sondalo ton mibakal.

⁵ "Onsasabi ran nanlapud ararawin bansa diad saray samput na dalin. Diad pasnuk na Katawan onsasabi a maneral ed intiron bansa.

⁶ "Ingal kayod paniirap yo! Asingger lay agew na Katawan, say agew a pangyakar na Makapanyarin-amin na panagderal!

⁷ "Nalaylay iray amin a taklay, tan ombetel so linawa na balang sakey a too.

⁸ "Ontakot iran amin tan manirap iran singa biin mampapasakit. Diad gaway takot da mannenengnengan ira, tan ombalangay lupa rad kababaingan da.

⁹ "Onsasabiy agew na Katawan, say maruksan agew ya isabi na pasnuk tan petang na olo to. Magmaliw ed satan a kalawakan so mundo tan ompatey ya amin iray makasalanan.

¹⁰ Ontondan onsinag iray bitewen tan amin da ray onsisinag a walad liwang, ambilonget so agew no ompaway, tan ag onsinag so bulan.

¹¹ Say Katawan kuanto, Mangyakar ak na deral ed tapew na dalin tan dusaen kon amin iray totoon maoges a totoo lapud saray kasalanan da. Ipaabebak ya amin iray totoon mapaatagey tan dusaen kon amin iray totoon malastug tan maruksa.

¹² Daiset ni nen say balituk iray totoon makapaliis ed patey.

¹³ Diad agew a siak, say Katawan a Makapanyarin-amin, et ipanengneng koy pasnuk ko, yakayaken koy katawenan tan yegyegen koy mundo pian naekal ed pasen to.

¹⁴ Saray sangkailin manaayam ed Babilonia et ombatik irad dilin dalin da; ombatik ira a singa saray ulsan ibabatikan da ray umaanup, tan singa ra karniron anggapoy pastol da.

¹⁵ Nasaksak ya anggad ag to ipatey so siopaman a naerel.

¹⁶ Legan ya ibabasig na saray kalaban da iray mansususon anak da, aakokosen da ray kayaryan dad abung da, tan papasooten da ray kaasawaan da, mamambantay ira labat ta anggapoy nagawaan dan mangyagel.

¹⁷ Say Katawan kuanto, Sosogsogan kon ondogpad Babilonia iray taga Medes. Anggapoy walad sikara so pilak tan anggapoy liket dad balituk.

¹⁸ Pateyen dad pana iyar tobun-balon lalaki. Ag da kasian iray ogogaw.

¹⁹ Say Babilonia et sankarakepan ed amin da ray nanarian; ikikinon na saray totoo to. Balet siak a Katawan, temeken ko a singa samay ginawak ed Sodoma tan Gomorra!

²⁰ Anggapon balut ed satan so malabay a manayam diman. Saray Arabe ag da la labay so mangipaalagey na tulda rad man, tan anggapo lay pumapastol a mampastol na saray karniro tod man.

²¹ Magmaliw a pasen a saray ayep ed katakelan labat so manayam tan panobungan na saray kulayot. Panayaman na saray abistrus, tan pambatikbatikan na saray kanding ed katakelan iray aderal-deral.

²² Saray hayina tan saray asod katakelan et mandangul-dangul irad saray tori tan saray palasio. Sinmabi lay agew na pakaderal na Babilonia. Ngalngali la mangangga ray agew to.

14

¹ "Kasian lamet na Katawan iray totoo ton Israelita tan pilien to ran kayaryan to. Panayamen to ra lamet ed saray dilin dalin da, tan ondago ray sangkaili tan miayam irad sikara.

² "Dakel iray bansan ontulong ed saray totood Israel diad ipawil da ed dalin ya inter ed sikara na Katawan, tan diman saray bansa manlingkur iran aripen na saray Israelita. Saramay anakep ya aminsan ed Israel et nadakep ira natan na Israel, tan saray totood Israel et oleyan da ra may nampapairap ed sikara nen saman.

³ "Ekalen na Katawan so kairapan a liliknaen na saray totood Israel, tan say ambelat a kimey ya impasoot ed sikaran gawaen da.

⁴ "No gawaen ya na Katawan, nepeg dan ludlureyen so ari na Babilonia tan ikuanda: Atalo la so maruksan ari! Ag to lan balut mampairap na siopaman!

⁵ "Inekal la na Katawan so pakayari na saray maoges a manoley,

⁶ "a diad gaway petang na olo ra et pinapairap da ray totoo tan ag iran balut tinmonda a nampapairap ed saray bansan adakep da.

⁷ "Sinmabin siansia ed intiron mundo so inawa tan kareenan, tan mankantad liket so balang sakey a too.

⁸ "Saray kiew a saleng tan sidro ed Libano et manliket irad inkatalo na ari, lapud anggapo lay mambatang ed sikara, natan ta naandi lay ari na Babilonia!

⁹ "Sipaparaan lan mangawat ed ari na Babilonia so pasen a panaayaman da ray inaatey. Saray ispiritu na saray makapanyari ed mundo et ag ira makareen. Onaalagey a manlapud trono ra iray ispiritu na saray nanari ed mundo.

¹⁰ Iyeyag dan amin ed sikato, Makapoy ka met lan singa sikami! Sakey ka met lad sikami!

¹¹ Pinapagalangan da ka nen saman na togtog na saray arpa, balet natan wadya ka lad pasen a panaayaman da ray inaatey. Mandokdokul ka natan ed kawalaan da ray bigis tan kobutan da ka!

¹² Ari ed Babilonia, masanag a kabontatalad kabwasan, apattak ka lan nanlapud tawen! Adakep mo ray bansa nen saman, balet natan nibantak ka ed dalin.

¹³ Ginetmam so onkalab ed tawen tan mangipasen na tronom ed tagey da ray sankatageyan a bitewen. Abaloan mon onirung kan sakey ya ari diad toktok na palandey ed baybay a pantitiponan da ray diriyos.

¹⁴ Imbagam ya onkalab ka ed saray tapew na kaloreman tan magmaliw kan singa Makapanyarin-amin.

¹⁵ Balet naplag kad sankaaraleman a pasen a panaayaman da ray inaatey.

¹⁶ Nengnengen ka na saray inaatey tan tepeten da, Ag ta saya may toon niyegyeg toy mundo tan pinagiwgiw to ray nanarian?

¹⁷ Ag ta saya man so toon aneral ed saray siudad tan impagmaliw ton kalawakan so mundo? Ag ta sikato ya may toon ag balut angibolus ed saray adakep to odino amasempet ed sikara?

¹⁸ Amid ya ararid tapew na dalin nipompon ed saray marakerakep a pantion,

¹⁹ balet anggapoy pantion mo tan nibantak a naboluk so bangkay mo. Atabunan na saray bangkay da ray sondalon apatey ed bakal; nibantak a pati sikara ed mabaton abut, tan agatin-gatinan.

²⁰ Nipompon ka ya aliwan singa saray arum ya arari, lapud dineral moy bansam tan pinapatey mo ray dilin totoom. Napatey ya amin iray maoges a kabyangay pamilyam.

²¹ Igapo lay pampatey! Ompatey ira yan lalakin anak na ari lapud saray kasalanan na lalaki ra. Pateyen ira pian anggapod sikaray manoley ed mundo odino mangiletneg a amayamay a siudad ed tapew na dalin.

²² Say Katawan a Makapanyarin-amin kuanto, Dogpaan koy Babilonia tan deralen ko. Anggapoy ikerak ya ogaw odino siopaman a mabilay. Siak, say Katawan, so nansalita.

²³ Pagmaliwen kon lonek so Babilonia tan panayaman na saray kulayot. Panisan koy Babilonia tan ikanak so panis a mangibantak ed amiamin a bengatla. Siak, say Katawan a Makapanyarin-amin, so nansalita.

²⁴ Say Katawan a Makapanyarin-amin sinambaan to: Nasumpal so antokaman ya implanok. Nagawa so antokaman ya implanok. Nagawa so antokaman a ginetmak a gawaen.

²⁵ Deralen kod dalin na Israel iray taga Asiria tan igatin-gatin ko rad kapalandeyan ko. Ekalen kod panamairap na taga Asiria iray totook tan saray ambelat a nipasakbat ed sikara.

²⁶ Sikato yay planok ed mundo; akaonat so taklay kon manusa ed saray bansa.

²⁷ Say Katawan a Makapanyarin-amin et ginetma to la yan gawaen; akaonat la so taklay ton manusa tan anggapoy makapatondad sikato.

²⁸ Sikato yay salitan nibawag diad taon ya inatey si Ari Acaz.

²⁹ Totood Filistia, apoter so bastun ya amekpek ed sikayo, balet ag yo ya nepeg a panliketan. No ompatey so sakey ya oleg, onsalat so lalon maoges nen say sikato. Ompusnak so matikyab a dragon ya iknul na oleg.

³⁰ Say Katawan magmaliw a sakey a pumapastol ed saray mairap-bilay a totoo to tan pambilayen to ran arawid kaatapan. Balet mangipadalan na eras ed sikayon Filistio tan anggapoy ikera ton mabilay ed sikayo.

³¹ Kolyaot tan kerew kayo na tulong, amin yon totood siudad na Filistia! Takot kayo, amin yo! Ta onsasabin manlalapud baybay so makapal a dabuksakey ya olup na saray sondalo ya anggapod sikaray matakot.

³² Antoy iyebat mid saray nibakin nanlapud Filistia? Ibaga mid sikara ya inletneg na Katawan so Sion tan saray maniirap a totoo to et makalmo rad man na salimbeng.

15

¹ "Sikato yay propisiya a nipaakar ed Moab. Aderal a sanlabi iray siudad na Ar tan Kir, tan nakokobutan na bilonget so dalin na Moab.

² "Onkakalab ed pokdul iray totood Dibon, ta mannangis iray man ed altar. Saray totood Moab mandageyem irad ermen lapud saray siudad na Nebo tan Medeba; kiniskisan day olo ra tan saray balbas da lapud ermen da.

³ "Akakawes na sako iray totood daladalan; maermen tan mannangis iray totoo ed saray plasa tan diad saray toktok na abung.

⁴ "Manaakis iray totood Hesbon tan Eleale, tan narengel anggad Jahaz so ogaog da. Anggan saray sondalo et manggiwgiw ira; nakalan la ray biskeg na linawa.

⁵ "Kaskasian koy Moab! Batik ed baley na Zoar tan diad Eglatshelishiyah iray totoo to. Manakakis ya ontatatdang ed Luhit iray pigaran totoo; saray arum batik irad Horonaim a maksil so panakakis da lapud sinmabin deral.

⁶ "Nakatan so Kolus na Nimrim, amagaan iray dikad gilig to, tan anggapoy nakdaan a malambut a dika.

⁷ "Bebeltangen na saray totoo so Patar na Kiew a Sausi, ta ombatik iran sankaawit da ray amin a kayaryan da.

⁸ "Narerengel so panakakis ed anggan iner a pasen ed saray ketegan na Moab. Narerengel ed saray baley na Eglaim tan Beer-elim.

⁹ "Diad baley na Dibon, ambalangad dala so ilog, tan wala niy lalon makapasinagem ya ipadalan diman na Dios. Nagaway pinasyan pampatey ed saray mabilay ya atilak ed Moab.

16

¹ "Manlapud kalawakan ed siudad na Sela saray taga Moab et ama-iyakar ira na sakey a kordiron rigalo rad manooley ed Jerusalem.

² "Manaalagar irad gilig na Ilog na Arnon, onsulong, ompawil iran anggapoy getma, a singa ra saray manok ya asibwak ed obung da.

³ "Kuandad saray totood Juda, Ibaga yod sikamiy gawaen mi. Iyagel yo kami pa; magmaliw kayo pan singa kiew a mangilaknab na anino tod kapetapetangay agew tan pampainawa yo kami pad sirum yo. Ibabatikan mi ray kalaban; iyamut yo kami pad pasen ya ag da kami naalmo.

⁴ "Panayam yo kami pa lad dalin yo. Iyagel yo kamid saray malabay a manderal ed sikami. (Mangangga so panagpairap tan panagderal, et naandi ray mandederal na bansa.

⁵ "Insan magmaliw ya ari so sakey ed saray kabyangay boleg nen David, tan iletneg tod kaptekan tan panangaro so panoley tod saray totoo. Masiglat a manggaway katonungan, tan andi-saew ya ipakurang toy kaptekan.)

⁶ "Saray totood Juda kuanda, Nadngelan min ontan lay panagpaatagey da ray taga Moab. Amta mi a malastug tan anggapoy pangitaltalek da, balet andikana ya amin so ipapangaya ra.

⁷ "Onnangis iray taga Moab lapud saray gunigon a liliknaen da. Onakis iran amin diad pakanunot dad saray taganon mananam ya inaakan dad siudad na Kirhareset. Naekalan iray ilalo.

⁸ "Aderal iray kaalogan ed Hesbon tan say kaubasan ed Sibmasaray kaubasan a say alak da et iniinom nen saman na saray manoley na saray bansa. Kinmayamkam ya aminsan iray wakal to ya anggad siudad na Jazer tan diad kalawakan diad bansa bokig, ya asabiy anggad basil na Inatey a Dayat diad bandad sagur.

⁹ "Nanangisan ko natan iray wakal na Sibma a singa pannanangis kod Jazer. Onteterter so luak lapud Hesbon tan Eleale, tan anggapoy ani a makapaliket ed saray totoo.

¹⁰ Anggapo la natan so maliket ed saray mataban kaalogan. Anggapo la ray maneeyagan o mankakantaan ed saray kaubasan. Anggapo lay manggaway alak diad panggagatin dad saray ubas; nansamput lay paneeyagan ed liket.

¹¹ Manoogaog ak ed ermen lapud agawad Moab tan Kir-hareset.

¹² Saray taga Moab pakekesawen day sikaran dili ed itatatdang dad saray santuariod tagey na pokdul tan diad saray timplo ra; mampipikasi rad man balet anggapoy nagunggona ra.

¹³ Sikato yay inmonan propisiya na Katawan nipaakar ed Moab.

¹⁴ Balet natan say Katawan kuanto, Diad loob na dugarugan taloy taon, naandipat so baleg a kayamanan na Moab. Dagdaiset so nakeraan ed saray amayamay a totoo to, tan nakapoyan ira yan nakeraan.

17

¹ "Sikato yay propisiya a nipaakar ed Damasco. Inkuan na Katawan, Magmaliw ya aliwa lan siudad so Damasco; magmaliw labat lan bonbontun na deral-deral.

² "Nakaindan ya anggad angga iray siudad na Siria. Magmaliw iran pastolan na saray karniro tan saray baka, et anggapoy mangablug ed saraya.

³ "Naekal iray tirinsira na Israel, tan naoleyan na arum a bansa so Damasco. Napelag ed kababaingan a singa saray totood Israel iray taga Siria a makapaliis ed patey. Siak, say Katawan a Makapanyarin-amin, so nansalita.

⁴ "Say Katawan inkuanto, Onsabiy panaon a naekalay kagalangan so Israel, tan nasalatan na inkaduka so kayamanan to.

⁵ "Say Israel magmaliw a singa alog ya agapas tan naani lay tanem to; magmaliw a singa ataynan ya alog ed Patar na Refaim a nantortoran la.

⁶ "Pigpigaray makapaliis ed patey; say Israel magmaliw a singa sakey a kiew na oliba ya aborbor la ray bunga to likud ed duara o taloran atilak ed toktok, odino apatira o limaran atilak ed saray sanga to. Siak, say Katawan a Dios na Israel, so nansalita.

⁷ "No onsabiy tan ya agew, onsingger iray totoo ya onkerew na tulong ed Amalsad sikara, say masanton Dios na Israel.

⁸ "Ag la rad satan manmatalek ed saray altar a ginaway dilin lima ra, odino manmatalek ed dinan man a ginawa rasaray tanda na diosan Asera tan saray altar a panagpoolan na insinso.

⁹ "No onsabiy tan ya agew, saray diudad ya aliber na padir et nataynanan tan naderal-deral ira, a singa saray siudad a tinataynan na saray Heveo tan saray Amorreo nen imbatikan da ray totood Israel.

¹⁰ Totood Israel, alingwanan yoy Dios ya angilaban ed sikayo, ya aliling toy baleg a baton-dampay ya angyagel ed sikayo. Nanggagawa kayo la laingen na saray masanton tanamanan ya angigalangan yod dios na arum a bansa.

¹¹ Anggaman a diad saman lamlamang a kabwasan na impantanem yod saray tanaman so intubo tan impanrosas da anggapo nin siansiay naani yo. Gunigon tan ag manondan sakit labat so onsabi.

¹² Agolo-golo ray bansa tan manungol ira a singa panungol na ankakabaleg a daluyon na dayat.

¹³ Onsusulong a singa mapmaples a daluyon iray bansa, balet pamapasnukan ira na Dios kanyan onsesener ira, naoosilan iran singa dabuk ed alusadsar na palandey, odino taep ya itiktikyab na alimbusabos.

¹⁴ Manataktakot ira no labi, balet kasabiy kabwasan naandi la ra! Onya so pansumpalan da ray amin a manasamsam ed saray kayaryan tayo.

18

¹ "Diad nibaliw na saray Ilog na Sudan walay sakey a dalin a pakakadngelay parakpak na saray payak.

² "Manlapud saman a dalin onsabid Ilog na Nilo iray ibabakin managbalita. Manlogan irad saray baloton papiro. Sempet kayo la, sikayo ran masiglat ya ibabaki! Iyakar yoy balita ed dalin yo ya adalan-dalan na saray ilog, diad mabiskeg tan makapanyarin bansa yo, diad saray atatagey tan pinoy baog a totoo yo a tatakotan ira na sankamundoan.

³ "Dengel kayo, amin yon manaayam ed tapew na dalin. Nengneng yoy tandan bandiran nipaalagey ed saray toktok na palandey! Dengel yoy itanul na trumpita!

⁴ "Inkuan ed siak na Katawan, Manlapud tawen ag nalikas so iyosdung ko a singa ipepelag na linaew no panaon na panaganin masalimoot so labi, odino singa ampetapetang ya agew ya onsisinag no kagkaagewan.

⁵ "Kasakbayan a naborbor iray bungay ubas, no naplag la ray rosas tan naluluto la ray bungay ubas, deralen na saray kalaban iray taga Sudan; mainomay da ran deralen, a singa kainomay na pamotut na yuro ed saray sanga na ubas.

⁶ "Saray bangkay na saray sondalo ra et natilak irad pasen a nasabi na saray manok tan saray ayayep. No panaoy tiagew kanen ira na saray manok, tan no panaoy ambetel buagen ira na saray ayayep.

⁷ "Onsabiy panaon a say Katawan a Makapanyarin-amin et mangawat na saray bagat a manlapud sayan dalin ya adalan-dalan na saray ilog, sayan mabiskeg tan makapanyarin bansa, sayan atatagey tan pinoy baog a totoo a tatakotan ira na sankamundoan. Onla rad Palandey na Sion a dimay pangigagalangan ed Katawan a Makapanyarin-amin.

19

¹ "Sikato yay propisiya a nipaakar ed Egipto. Akalogan ed lorem so Katawan tan maples a mamapaarap ed Egipto. Manggiwgiw ed arap to iray talintaoy diriyos na Egipto, tan nanaekalan na biskeg na linawa iray Egipsio.

² "Say Katawan kuanto, Panlalabanen ko ray Egipsio; mankakabilan iray sanaagi tan saray sanaabay. Mambabakal iray siudad tan mansasamsaman na pakayari iray arari.

³ "Pagmaliwen kon andi-kakanaan iray plano na Egipsio tan deralen koy kalakal da. Kerewen dan tulongan ira na saray talintaoy diriyos da tan mangipanon irad saray midyum tan mikerew irad saray inaatey na simbawa.

⁴ "Ipalimak iray Egipsio ed pakayari na sakey a masebeg tan maruksan ari a manoley ed sikara. Siak, say Katawan a Makapanyarin-amin so nansalita.

⁵ "Onkati so Ilog na Nilo, insan mankalkalnan naekatan.

⁶ "Ombanget iray kolus na ilog legan iran nanaekatan. Nalenes iray tanobung,

⁷ "tan namagaan ya amin iray tanaman ed gilig na Ilog na Nilo insan ira nitikyab.

⁸ "Onngesnges tan onakis ya amin iray totoo a say anapay bilay da et diad Ilog na Nilo; magmaliw ya andi-kakanaan iray banwit tan saray iket da.

⁹ "Manermen iray managgaway abel a linen;

¹⁰ nalemay iray marunong a mankimey tan saray managinaramey.

¹¹ Makulang-kulang iray pangulo na siudad na Soan! Andi-kakanaan iray isisimbawa na saray sankakabatan ya Egipsio! Panon dan nitepel ya ibagad ari a sikaray kasalat na saray gendat a makabat tan arari?

¹² Arid Egipto, iner so kawalaan da ray masilib mon sumisimbawa? Nayarian da angankon ibaga iray plano na Katawan a Makapanyarin-amin nipaakar ed Egipto.

¹³ Makulang-kulang iray pangulo na Soan tan Memfis. Nepeg komun ya ipangulo day bansa, balet pinalikdo ra.

¹⁴ Ginolo na Katawan so kaisipan da, kanyan makagewgew iray simbawa ra. Lapud saya, nanggagaway maoges so Egipto tan mandongilngil a singa abuek a mankaronyas ed dilin ota to.

¹⁵ Anggapoy Egipsion makatulong, mayaman may mairap-bilay, abeba may atagey so kipapasen to.

¹⁶ Onsabiy panaon a magmaliw a singa mabaing a bibii iray Egipsio. Onggiwgiw irad takot no nanengneng dan akaonat a manusad sikara so taklay na Katawan a Makapanyarin-amin.

¹⁷ Ontakot ed Juda iray Egipsio kapag nipanunot ed sikara so pansumpalan da ya imparaan na Katawan a Makapanyarin-amin.

¹⁸ No onsabiy tan a panaon, say salitan Hebreo so ikana na saray totoo ed saray limaran siudad ed Egipto. Mansamba ra ed ngaran na Katawan a Makapanyarin-amin. Say sakey a siudad natawag na Siudad na Agew.

¹⁹ No onsabiy tan a panaon, nawalaan na altar a para Katawan so Egipto tan say sakey a masanton lusek a nisaklang ed sikato diad Egipto.

²⁰ Sikara yay tanda na kiwawalay Katawan a Makapanyarin-amin ed Egipto. No napapairap iray totood man tan onkerew irad Katawan na tulong, say Katawan et mangibaki na mangyagel ed sikara.

²¹ Ipaamta na Katawan so sikaton dili ed saray Egipsio; birbiren dad satan tan igalang da, tan isaklangan da na saray bagat. Masimsimoon irad satan a mansipan tan sumpalen da ray sipan da.

²² Dusaen na Katawan iray Egipsio, insan to ra balet paabigen. Ompawil irad sikato, dengelen to ray pikakasi ra tan paabigen to ra.

²³ No onsabiy tan a panaon, nagawa so maawang a dalan a manlapud Egipto ya anggad Asiria. Makaonlad satan ed Asiria iray Egipsio tan makaonlad Egipto iray taga Asiria. Mankasakey ira yan duan bansa a mangigalang ed Katawan.

²⁴ No onsabiy tan a panaon say Israel mipara ed bansa na Egipto, tan Asiria, tan magmaliw ira yan taloran bansa a bindision ed intiron mundo.

²⁵ Bindisionan ira na Katawan a Makapanyarin-amin a kuanto, Bindisionan ta ka Egipto, sika a took; Asiria, sika a pinalsak; tan Israel, sika a toon pinilik.

20

¹ "Lapud ganggan nen Impirador Sargon na Asiria, dinogpaan na pangulo na saray sondalo na taga Asiria so Asdod a siudad na Filistia.

² "Taloy taon kasakbayan na sayan agawa, imbaga na Katawan ed kinen Isaias a lakin anak nen Amoz ya ekalen to ray sandalya to tan say insolung ton sako. Inmonur si Isaias tan nanliber-liber a kasali-sali tan labus-lakseb.

³ "Nen adakep so Asdod, inkuan na Katawan, Diad loob na taloy taon, si aripen kon Isaias et nanakar-akar a labus-lakseb tan kasali-sali. Sikato yay tanda na nagawa ed Egipto tan Sudan.

⁴ "Say ari na Asiria itaynan to ray labus-lakseb a prison adakep tod sarayan duan bansa. Malangwer may matakken, manakar a kasali-sali tan labus-lakseb, sankanengneng so ebet da, tan mangiter ya na kababaingan ed Egipto.

⁵ "Saray nanmatalek ed Sudan tan saray angikinon ed Egipto et nabaingan ira tan naekalan iray ilalo.

⁶ "No onsabiy tan a panaon, ibaga na saray totoon manaayam ed gilig na dayat na Filistia, Nengneng yoy agawad saray totoo a nanmatalekan tayon mangyagel ed sikatayod impirador na Asiria! Panoy pakaliktar tayo?

21

¹ "Sikato yay propisiya a nipaakar ed Babilonia. Say deral a manlalapud makapatak-takot a pasen et onsabin singa alimbusabos ya ombebeltang ed kalawakan.

² "Nipasingayew ed siak so nipaakar ed saray maruksan nagawa a nipaakar ed panagtraidor tan panagderal. Sondalo na Elam, dogpa kayo! Sondalo na Media, looban yo ray siudad! Panganggaen la na Dios so panamairap na Babilonia.

³ "Lapud samay anengneng tan nadngel ko ed samay pasingayew, ataktakot ak tan nairapan ak tan singa ak biin mampapasakit.

⁴ "Nanaelaw ak tan manggiwgiw ak ed takot ko. Nampilalekan kon onsabi lay kabwasan, balet lalon baleg a takot so inter tod siak.

⁵ "Diad samay pasingayew, sakey a baleg a ponsia so akaparaan. Akaaplag lad datal so alpombra a yorunga na saray bisita. Manaakan tan maniinom ira. Kabebekta nieyag so sakey a ganggan, Sikayo ran opisyal na saray sondalo! Iparaan yo ray samper yo!

⁶ "Insan inkuan ed siak na Katawan, Laka a mangipasen na guardia, tan ibagam ed sikaton ibawag toy nanenengneng to.

⁷ "No nanenengneng to ray onsasabin lalaki ya akakabayo a manoolup so kapag duara, tan saray lalakin akalogan ed asno tan kamilyo, nepeg to ran imanoen a maung.

⁸ "Insan say guardia iyeeyag to, Wadya ak, katawan, a mambabantay ed agew tan labi.

⁹ "Kabebekta nitan la ray lalaki, akakabayo ra tan sanderwa ran nanoolup. Imbawag na samay guardia, Atalo lay Babilonia! Walad dalin tan atemektemek iray amin a talintaoy diriyos a gagalangen da.

¹⁰ Totook a taga Israel, singa kayo trigon nailik-ilik, balet natan imbawag kod sikayo so maung a balitan nadngel ko ed Katawan a Makapanyarin-amin a Dios na Israel.

¹¹ Sikato yay propisiya a nipaakar ed Edom. Walay nanlapud Edom ya ontatawag ed siak, Guardia, mabayag niy labi? Magano lay isabiy kabwasan?

¹² Ebat ko, Onkakabwasan la, balet onsabi lamet so labi. No labay mo lamet so ontepet, pawil ka dian ontepet.

¹³ Sikato yay propisiyan nipaakar ed Arabia. Sikayo ran taga Dedan, nanoolup a mankakampod kalawakan ed Arabia,

¹⁴ itdan yoy danum iray totoon nagaan ya onsisingger ed sikayo. Sikayo ran taga Tema, itdan yoy nakan iray pasasayakup ed sikayo.

¹⁵ Ibabatikan na saray totoo iray ispadan akaparaan a pamatey ed sikara; ibabatikan da ray panan akaparaan a pamanad sikara. Ibabatikan day kaatapan na bakal.

¹⁶ Insan inkuan ed siak na Katawan, Diad loob na duga-rugan sakey taon mangangga so inkatalonggaring na saray tribu na Kedar.

¹⁷ Dagdaiset so natilak a mabilay ed saray masesebeg a pumapana na Kedar. Siak, say Katawan a Dios na Israel, so nansalita.

22

¹ "Sikato yay propisiya a nipaakar ed Patar na Pasingayew. Antoy nagagawa? Akin et mansisilibra ed toktok na kaabungan iray amin a katoowan?

² "Maungol so siudad, napno na ingal tan mapalaloy sayaksak na katoowan. Ag inatey ed pibabakal iray totoo yon inaatey ed sayan bakal.

³ "Ag nin balut akapana iray pangulo yo, et batik tan adakep la ra.

⁴ "Paolyan yo ak a mambukbukor ya akisan koy ampaipait iray totook ya inaatey. Ag yo ak liligliwaen.

⁵ "Sikato yay panaon na gunigon, katalo, tan gewgew ed Patar na Pasingayew, et say Katawan a Dios a Makapanyarin-amin so angyakar na saraya ed sikatayo. Ageba-geba ray padir na siudad tayo, tan makmakbaw ed kapokdulan so tawag na katoowan ya onkekerew na tulong.

⁶ "Sinmabin akakabayo iray sondalon taga bansa na Elam, tan sankaawit day pana. Saray sondalon taga Kir imparaan da ray samper da.

⁷ "Napno na karwahi iray mataban patar na Juda; manalalagey ed arap na saray puirta na Jerusalem iray sondalon akakabayo.

⁸ "Ageba-geba ray amin a tirinsira na Juda. Nen onyay agawa, impaway yod panagsinupan iray amin ya armas.

⁹ "Nalmo yo ray pasen ed padir na Jerusalem a nakaukolan ya apigeren. Ninenengneng yo ray amin a kaabungan ed Jerusalem, insan yo inggegeba ray arum pian nawalaan kayoy baton pangapiger ed padir na siudad. Pian makatipon kayo na danum,

¹⁰ nanggawa kayoy dipositowan ed loob na siudad ya agosan na danum a manlapud daan a dipositowan. Balet ag yo inasasikaso odino anunotan so Dios ya a bayag lan angiplano ed sarayan amin tan sikatoy angyabuloy a nasumpal ira.

¹¹

¹² Diad saman, say Katawan a Dios a Makapanyarin-amin et tinatangguyor to kayon manakis tan manermen, mangiskis na kaoloan yo tan mankawes na sako.

¹³ Balet naneelek tan nanliliket kayo la laingen. Nampapatey kayo na saray karniro tan saray baka a kinakakan yo, tan naniinom kayo na alak. Inkuanyo, Maung la laingen no mangan tan maninom tayo, ta nabwas ompatey itayo.

¹⁴ Say Katawan a Makapanyarin-amin a Dios a dili et akisalitad siak tan inkuanto, Legan dan mambilay, ag balut napirdona yan kaogsan a ginawa ra. Siak, say Katawan a Makapanyarin-amin a Dios, so nansalita.

¹⁵ Imbagad siak na Katawan a Dios a Makapanyarin-amin ya onla ak ed kinen Sebna, a pampipiaan ed palasio, ta ikuankod sikato,

¹⁶ Antoy abaloan mon kipapasen mo? Antoy kanepegan mon mangyongib na lobuk mo ed diking na mabaton pokdul?

¹⁷ Nayarin sakey kan matalonggaring, balet demeten tan ibasibas ka na Katawan.

¹⁸ Demeten to kan singa bola, insan to ka itupak ed maawang ya alog. Ompatey kad man ed abay na saray mararakep a karwahim ya ikikinon mo. Sikay mangiter na kababaingan ed pamilyay amom.

¹⁹ Say Katawan ekalen tan iyabeba to kad atagey a kipapasen mo.

²⁰ Say Katawan kuantod kinen Sebna, No nagawa ya, ipaawit koy aripen kon Eliakim a lakin anak nen Helcias.

²¹ Isolung kod sikatoy kawes tan balkes na opisyal ya akasolung ed sika tan iter kod sikatoy amin a pakayarin walad sika. Magmaliw a singa sakey ya ama ed saray totood Jerusalem tan Juda.

²² Iter kod sikatoy nagnap a pakaoley na ari a kabyangan na boleg nen David. Niiter ed sikatoy tombuk na opisina, no antoy lokasan to anggapoy mangikaput, tan no antoy inkaput to, anggapoy mangilokas.

²³ Malet so pangilirak ed sikato, a singa panagsabitan a nisegkal ed padir, tan sikatoy pakagalangan na amin a kabyangan na pamilya to.

²⁴ Balet magmaliw ya ambelat a sakbaten to iray amin a kakanayon to tan saray lelegpeten to. Ombitin irad sikato a singa saray banga tan saray yaung ya akabitin ed panagsabitan!

²⁵ No nagawa la ya, onlokak tan napelag imay panagsabitan a malet a nisegkal. Et sikato la yay pansamput da ra may amin a nisabit. Say Katawan so nansalita.

23

¹ "Sikato yay pasakbay ed dalin na Tiro. Managogul kayod ermen, sikayon managbiahid bapor! Aderal lay puirto yod Tiro; aderal-deral la ray kaabungan tan saray puirto to. Diad ipapawil yo manlapud Chipre, narerengelan yo yan balita.

² "Tagleey kayo, sikayo ran nigosiantin taga Sidon! Angibaki kayo ed biek na dayat

³ "na saray totoo a mansaliw tan manlako na saray trigon ontutubod Egipto tan mannigosiod saray amin a bansa.

⁴ "Siudad na Sidon, naplag ka lad kababaingan! Inkaindan ka la na tapew tan say kaaralman na dayat a kuanto, Ag ak balut nananak. Ag ak balut nampabaleg na saray anak a lalaki tan bibii.

⁵ "Anggan saray Egipsio et natalagnaw tan manermen ira no nakabatan da ya aderal lay Tiro.

⁶ "Managogul kayod ermen, sikayon taga Fenicia! Sali yoy ombatik ed Espanya!

⁷ "Sikato ta ya may maliket a siudad na Tiro ya abaybayag lan niletneg? Sikato ta ya may siudad ya angibaki na saray nansasakop ed pasen ed biek na dayat?

⁸ "Siopay angiplanod sayan deral ed Tiro, say siudad a wala ray sakop ton nanarian tan saray nigosianti to ran prinsipi et sikaray manonan gagalangen ed tapew na dalin?

⁹ "Say Katawan a Makapanyarin-amin so angiplano. Implano to ya, pian napatonda toy panagpaatagey da ray taga Tiro ed saray agawgawaan da tan ontan met pian napaabeba to ray gagalangen dan totoo.

¹⁰ Sikayo ran totood saray dalin a sakop na Espanya, laka yo lan ondalus ed kaalogan yo, ta anggapo lay manebel ed sikayo.

¹¹ Inyonat la na Katawan so lima tod tapew na dayat tan tinatalo to ray nanarian. Ingganggan to a deralen dad Fenicia iray pasen a kawalaay ankakabaleg a nigosio.

¹² Siudad na Sidon, angangga lay liket mo tan napapairap la ray totoom. Anggan ombatik irad Chipre, siansian ag ni ra makaarawid kaatapan.

¹³ (Saray taga Babilonia, aliwan saray taga Asiria, so angibolus ed saray ayayep ed katakelan a nandederal ed Tiro. Saray taga Babilonia so angipaalagey na saray torin panaglakob ed siudad na Tiro, inggegeba ray padir to, tan tinaynan dan aderal-deral).

¹⁴ Managogul kayod ermen, sikayon nigosiantid dayat! Aderal lay siudad a nanmatalekan yo.

¹⁵ Onsabiy panaon a say Tiro et nalingwanan a pitomploy taon, a singa la kabayag na panoley na sakey ya ri. Kayari na sarayan taon, say Tiro aliling toy sakey a biin marotak onung ed sayan kanta:

¹⁶ Alam so arpam, sika ya alingwanan a marotak a bii, ta liber moy baley. Mantogtog ka tan kantam lamet ira may kantam pian napapawil mod sika iray lalaki.

¹⁷ No kayari na pitimplon taon, iyabuloy na Katawan a say Tiro et makapawil ed gendat a panaganapan to, tan sikatoy paikana ed amin da ray nanarian ed intiron mundo.

¹⁸ Say kuartan natubo to ed nigosio et niyapay ed Katawan. Ag to isinup ya kuarta, no ag ingen ikana na saray manangigalang ed Katawan diad pansaliw da na tagano tan saray kawes a nakaukolan da.

24

¹ "Say Katawan deralen toy dalin tan taynan ton begtebegtew. Yesyesen toy tapew na dalin tan ikaykayat to ray totoo to.

² "Nampaparay pansumpalan na amin a totoosaray papari tan saray totoo, saray aripen tan saray amo, saray sumasaliw tan saray lumalako, saray managpabayes tan saray bumabayes, saray mayaman tan saray mairap-bilay.

³ "Nagaygay so dalin tan naderal-deral. Nansalita so Katawan tan nagaway imbaga to.

⁴ "Namamagaan so tapew na dalin tan nalalaylay iray amin a tanaman; onkakapoy so intiron mundo; naboboluk so tawen tan dalin.

⁵ "Dinotakan na saray totoo so mundo diad insusumlang dad saray ganggan na Dios tan diad impandederal dad andi-anggaan a sipanan.

⁶ "Lapud saya, insamba na Dios so dalin. Babayaran na saray totoo so ginagawa ra. Mandaiset lan mandaiset so nakekeraan a mabilay.

⁷ "Onlelenes iray sengeg na ubas tan ondadaiset lay alak. Amin da ray maliket nen saman et maermen la ra nata,

⁸ "tan tinmonda la ray maliket a togtog na saray arpa tan saray tamborin da.

⁹ "Anggapo lay maliket a panagkanta ra lapud alak; anggapo lay manliliket ed samit na alak.

¹⁰ Magolo-golo lay siudad tan saray totoo et kakapotan day sikaran dili ed abung da, pian niarawi rad kaatapan.

¹¹ Maneeyag ed saray dalan iray totoo lapud anggapo lay alak. Naandi lay liket; tinmaynan la ed dalin.

¹² Aderal-deral lay siudad tan nigeba la ray puirta to.

¹³ Onyay nagawad balang bansa ed intiron mundo. Say nagawa et singa pansamput na borbor na bunga, no apaspas la ray bunga ed amin a kiew na oliba ran aborbor la amiy bunga na sengeg na ubas.

¹⁴ Mankantad liket iray makapaliis ed patey. Saray walad Sagur ibaga ran ontan lay inkatalonggaring na Katawan,

¹⁵ tan saray walad Bokig idayew da. Saray totoon manaayam ed gilig na dayat et idayew day Katawan a Dios na Israel.

¹⁶ Narengel mid sankaarawian a pasen na mundo iray kantan pangidayew ed Israel, say matonung a bansa. Balet anggapoy ilalon para siak! Pangaskasiyan lay kipapasen ko! Itutuloy na saray traidor so mamalikdo, tan onloloor so panagpalikdo ra.

¹⁷ Dengel yo ak, amin yon totoo! Wala ray pakatak-takotan, walay ray abut, tan wala ray patit ya imparaan para sikayo.

¹⁸ Siopamay nibatikan toy pakataktakotan napelag ed abut, tan siopamay napaliisan toy abut naerel ed patit. Onoran na mapmaples tan nagalaw iray pundasion na dalin.

¹⁹ Nayegyeg so dalin, onletak, insan onsangi.

²⁰ Mandongilngil so dalin a singa sakey ya abuek, mambayes a singa alolung no walay bagyo. Dinetdetan na saray dilin kasalanan to so mundo; natumba, et ag la makabangon.

²¹ Onsabiy panaon a say Katawan et dusaen to ray pakayari ed tagey tan saray manoley ed tapew na dalin.

²² Say Dios panseseksekan to ray arari, a singa ra priso ed sakey ya abut. Ipriso to ra ya anggad onsabiy oras a pakadusa ra.

²³ Ombilonget so bulan tan ag la onsindag so agew, ta say Katawan a Makapanyarin-amin so manari. Manoley ed Jerusalem diad Palandey na Sion, tan nanengneng na saray pangulo da ray totoo so kagalangan to.

25

¹ "Katawan, sika so Dios ko; Igalang ta ka tan idayew koy ngaran mo. Makapakelaw iray ginagawam a bengatla; matoor mon sinumpal iray plano ya abayag lan ninunot mo.

² "Impagmaliw mon deral-deral iray siudad tan inggegebam iray padir da. Saray palasion impaalagey na saray kalaban mi et anggad angga la ran naandipat.

³ "Saray totood makapanyarin bansa et idayew da ka; takotan ka na saray totoo ed saray siudad da ray maruksan bansa.

⁴ "Sinmingger ed sika iray mairap-bilay tan saray walad pankaukolan, et niarawi rad kaatapan ed panaoy gunigon. Iitdan mo ray salimbeng no panaoy bagyo tan say siruman no mapalaloy petang. Saray maruksan totoo ondodogpa ran singa bagyo no panaoy ambetel,

⁵ "singa petang ed amagan pasen. Balet sika, Katawan, pinatondam so ingal da ray kalaban mi; patotondaen moy eyag da ray maruksan totoo, a singa pamapabetel na lorem ed petang na kaagwan.

⁶ "Diad Palandey na Sion say Katawan a Makapanyarin-amin et mangiparaan na baleg a ponsia a para saray bansa ed intiron mundosakey a ponsian sankananaman iray kakanen tan sankaabigan iray alak ya isaklang.

⁷ "Diad saya bigla ton ekalen so lorem na ermen a manatarung ed amin da ray bansa.

⁸ "Deralen Katawan a Dios ed ando lan ando so patey! Ponasen toy lua ed kamataan na balang sakey a too tan ekalen to so kababaingan ya inkaplagan na saray totoo to diad intiron mundo. Say Katawan a dili so nansalita.

⁹ "No nagawa la ya, say balang too ikuanto, Sikatoy Dios mi! Nanmatalek kami ed sikato, kanyan inyagel to kami. Sikato so Katawan! Nanmatalek kami ed sikato, et natan maliket tan magayaga kami lapud inyagel to kami.

¹⁰ Iyagel na Katawan so Palandey na Sion, balet nigatin iray totoo ed Moab a singa kigatin na dayami ed tai na ayep.

¹¹ Ikapay day lima ran singa ra onlangoy, balet say Dios paabebaen to ra; makapasinagem ya onlereg so lima ra.

¹² Deralen na Katawan iray tirinsira tan saray atatagey a padir na Moab tan igeba to rad dabuk.

26

¹ "Onsabiy agew a saray totooy Dios et kantaen dad dalin na Juda yan kanta: Mabiskeg so siudad tayo! Say Dios a dili so mangyaagel ed saray padir to!

² "Lokasan iray puirta na siudad tan palooben so matoor a bansa, say bansa a matonung so gagawaen da ray totoo to.

³ "Katawan, sika so mangiiter na nagnap a kareenan ed saray totoon mangyaapasakey na kanunotan dad sika, tan manmamatalek irad sika.

⁴ "Ando lan andon manmatalek kayo ed Katawan, iyagel to itayo lawas.

⁵ "Pinaabeba to ray mapaatagey nen saman; dinederal toy mabiskeg a siudad a nanayaman da, tan inggegeba tod dabuk iray padir to.

⁶ "Panaakar-akaran tan gagatin-gatinan natan na saramay aparpairap nen saman.

⁷ "Katawan, pararakepen moy dalan da ray totoon matonung; palanas so dadalanen da.

⁸ "Oonuren miy linawam tan manmamatalek kamid sika; sika labat so pampilpilalekan mi.

⁹ "Masimoon ta kan pampilalekan no labi; no sintinsiaan moy mundo tan saray totoo to, naaralan da no antoy so inkatonung.

¹⁰ Anggaman a mapangasi kad saray totoon maoges, ag dan balut naaralan so manggaway kaptekan. Anggan diad dalin na saray totoon matonung manggagawa ran siansiay kaogsan; ag da labay a birbiren so inkatalonggaring mo.

¹¹ Ag amta na saray kalaban mo a dusaen mo ra. Katawan, ipelag mo pa rad kababaingan tan panliknam pa ray kairapan; ipaliknam ed sikaray dusan imparaan mo. Ipanengneng mo pad sikara so ontan lan panangarom ed saray totoom.

¹² Sika, O Katawan, so mamaaligwas na bilay mi; sikay makankimey ed amin da ray gagawaen mi.

¹³ Katawan a Dios mi, inoleyan kami na saray arum a totoo, balet sikan bukor so Katawan mi.

¹⁴ Inaatey la ra natan tan ag ombangon iray anyani ra; anggan say anino ra anggapo la, tan dinusam tan pinatey mo ra. Anggapo lay makanunot ed sikara.

¹⁵ Katawan, sika so amabolaslas ed bansa mi; pinabaleg moy nasasakopan ton dalin ed inerman a dapag; et angiter ya ed sikay kagalangan.

¹⁶ Dinusam iray totoom, Katawan, tan diad paniirap da nampikasi rad sika.

¹⁷ Sika, Katawan, so makasengeg na impanayay mi, a singa panayay na biin mampapasakit.

¹⁸ Nanirap kami tan nampasakit kami, balet anggapo so inyanak mi. Anggapoy pananalon niiter mid dalin mi; anggapoy agawaan mi.

¹⁹ Mambilay lamet iray totoo min inaatey! Nabilay iray bangkay da. Amin da ray nanaogip ed saray lobuk da et ombangon ira tan mankanta rad liket. No panon a pabebetelen na linaew so dalin, ontan met a pabilayen na Katawan iray abayag lan inatey.

²⁰ Loob kayod saray kaabungan yo, sikayon totook, tan isara yoy puirta. Amut kayon magano ya anggad onkepay pasnuk na Dios.

²¹ Say Katawan et onsasabin manlalapud mangatatawen a pasen ya ayaman to tan dusaen to ray totood mundo lapud saray kasalanan da. Nipaamta iray maamut ya impamatey diad tapew na dalin, tan say dalin ag to la iyamut iray apatey-patey.

27

¹ "Diad satan ya agew ipakana na Katawan so makapanyari tan makapatey ya ispada to a panusa ed Libiatan, say mambalbalikerker tan mampoppotipot a dragon, tan pamatey ed dragon a manaayam ed dayat.

² "Diad satan ya agew say Katawan ikuantoy nipaakar ed marakep a kaubasan to,

³ "Babantayan koy kaubasan ko tan sasalogen ko lawas. Guaguardiaan ko ed agew tan labi, pian anggapoy manderal ed sikato.

⁴ "Ag ak la mamapasnuk ed kaubasan. No wala bilang iray ambabaing tan sabitan ya eekalen, sigput ko ran poolan.

⁵ "Balet no saray kalaban na saray totook et pilalek dan iyagel ko ra, pikaaro yo rad siak. On, pikaaro yo rad siak.

⁶ "Diad saray agew ya onsabi saray totood Israel a kabyangan iray boleg nen Jacob et manlamut iran singa kiew, insan ira manrosas tan mansimit. Say sankamundoan napano na bunga ra.

⁷ "Say impanusa na Katawan ed Israel et aliwan mapalalon singa say impanusa tod saray kalaban to. Daiset iray apatey a totoo to nen saray apatey a kalaban to.

⁸ "Dinusa na Katawan iray totoo to diad panamegley na impangibantak tod sikara ed arum a bansa. Impaibantak to ra ed mabiskeg tan maruksan dagem a nanlapud bokig.

⁹ "Balet napirdona labat iray kasalanan na Israel, no natemek a singa katemek na tisa iray baton altar a panangigalangan na saray pagano, tan no anggapoy natilak a tanda na diosan Asera odino altar a panagpoolay insinso.

¹⁰ Aderal-deral so siudad ya aliber na padir. Ataynan a singa kalawakan ya anggapoy onkitakitaw. Nagmaliw a pastolan na saray baka, a pakapampainawaan tan pakapankabkaban da.

¹¹ Amagaan iray sanga na saray kiew tan apoter-poter ira; saray bibii aalaen da ra yan itongo. Lapud anggapoy atalusan na saray totoo, ag ira a bageyen o kasian na Dios a Manamalsa ra.

¹² Diad satan ya agew, manlapud Eufrates ya anggad ketegan na Egipto, say Katawan tiponen ton sansakey iray totoo to, a singa say kibiig na ilik ed apa no iiliken.

¹³ No onsabiy tan ya agew, nasibuk so trumpita a panawag ya ompawil iray Israelitan nibantak ed Asiria tan Egipto. Onsabi rad Jerusalem tan igalang dad may Katawan ed masanton palandey to.

28

¹ "Pangaskasiyan so nanarian na Israel! Onkukupas so kagalangan to a singa koronan rosas ya akatoon ed olo da ray abuek a pangulo to. Dugad pabalingit iray kaoloan da, balet kidokul-dokul ira lapud mapalalon inkabuek da.

² "Say Katawan walay too ton mabiskeg tan makapanyari ya akaparaan ya ondogpa ed sikara; sikatoy onsabi a singa oran a kristal, singa mapmaples ya oran, singa mabiskeg tan maples ya agos na delap, tan lanayapan toy dalin.

³ "Nagatin-gatinan so panagpaatagey na saray pangulo.

⁴ "Say onkukupas a kagalangan da ra may mapaatagey a pangulo et naandipat a singa saray onaan a bungay igos, naborbor ira tan naakan iran tampol no kaloto ra.

⁵ "Onsabiy agew a say Katawan a Makapanyarin-amin et magmaliw a singa mapagalang a koronan bolung a para saray totoo ton akapaliis ed patey.

⁶ "Itdan to na maung a pakatalus ed katonungan iray huis, tan biskeg na linawa iray mangyaagel ed saray puirta na siudad pian ag nadogpaan na saray kalaban.

⁷ "Abuek iray pati propita tan saray papari, kanyan mandongil-ngil ira. Mapalaloy karakel na nainom dan alak, kanyan mantumba ra tan ag da amtay gagawaen da. Akainom a maung iray propita, kanyan ag da natalusay pasingayew na Dios, tan saray papari et mapalaloy inkabuek da, kanyan aliway sintinsia ra ed saray kason niaapireng ed sikara.

⁸ "Napno na ota iray lamisaan ya yoyorungan da, tan anggapoy atilak a pasen a malinis.

⁹ "Manririklamo ra nipaakar ed siak. Kuanda, Siopa ray abaloan na satan a too a babangatan to? Siopa ray mankaukolan na saray ibabangat to? Onkana ra labat ed saray kapamakson ogogaw!

¹⁰ Labay to itayon ibangat diad panamegley na tonggal litra, tonggal linya, tan tonggal liksion.

¹¹ No ag yo ak dengelen, ikana na Dios sirin iray totoon taga arum a bansa a domay panagsalita diad pangibangat to na sakey a liksion ed sikayo.

¹² Imbaga to ya itdan to kayon amin na inawa tan ligliwa, balet ag kayo dinmengel ed sikato.

¹³ Lapud saya ibangat kayo na Katawan diad panamegley na tonggal litra, tonggal linya, tan tonggal liksion. Diad satan niparokul kayo diad balang ikupbang yo. Nasugat kayo, napatitan kayo, tan nadakep kayo.

¹⁴ Dengel yoy ibabaga na Katawan, sikayo ran mapaatagey a totoon manooley ed sarayan totoo diad Jerusalem.

¹⁵ Ipapanta yo ya akisipanan kayo ed patey tan akipaknaan kayod pasen a panaayaman da ray inaatey. Ag yo panduaduarowaan a napaliisan yoy deral no onsabi, lapud manmamatalek kayo ya iyagel kayo na saray tila tan saray palikdo.

¹⁶ Balet natan saya so kuan na Katawan a Dios; Mangipapasen ak ed Sion na mabiskeg tan baleg a pundasion. Mangililira ak ed pundasion na baleg a baton suyok ya akapangisulatan na sarayan salita, Maanos met so malet a pananisia.

¹⁷ Say inkatonung so mitro a panukat ed samay pundasion, tan say kaptekan so patawin to. Say oran a kristal so mangyanur ed saray tilan panmamatalkan yo, tan deralen na delap so salimbengan yo.

¹⁸ Magmaliw ya andi-kana so impisipanan yod patey, tan naderal so impipaknaan yod pasen a panaayaman da ray inaatey. Natumba kayon nibasig, no ondalan ed sikayoy deral.

¹⁹ Ondalan lan ondalan ed sikayo so deral, kapag kabwasan. Nepeg yo yan liknaen ed agew tan labi. Mangiter na balon takot ed sikayo so kapag balon balita na Dios.

²⁰ Singa kayo samay too ed sakey a probirbio ya ondokul ed sakey a katrin antikey a tuloy, tan makisir a tuloy so oles.

²¹ Mibakal so Katawan a singa ginawa tod Palandey na Perazim tan diad patar na Gabaon, pian nasumpal toy ginetma ton gawaenanggaman a singa nidoman tuloy so gagawaen to. Sigput a sumpalen toy makapakelaw a kimey to.

²² Ag yo eelekan so pasakbay ya iiter kod sikayo. No elekan yo lalon nairapan kayon ompaliis. Nadngel koy getma na Katawan a Makapanyarin-amin a deralen toy intiron bansa.

²³ Dengel yoy ibabagak; asikaso yo no antoy sasalitaen kod sikayo.

²⁴ Wala tay dumaralus a mambaka tan mansagar lawas so gawaen tod daralusan to?

²⁵ Ag ta no niparaan to lay dalin et isibwag to la ray bokel na anis tan komino, tan idasig to lan itanem iray trigo tan sibada tan diad gilig-gilig na alog to et taneman to na saray arum a tanaman?

²⁶ Amta ton gawaen iray kimey to, ta say Dios so angibangat ed sikato.

²⁷ Ag ton balut ikana so pekpek a panmaso ed bokel na anis tan komino, no ag ingen ikana toy bislak a dugarugay kabaleg to.

²⁸ Ag to deralen so trigo diad panilik to lan panilik; amta toy gawaen to diad pangipadalan tod kariton tan baka ed saray trigo, ya ag to ra temeken.

²⁹ Amin ira yan kakabatan et nanlapud Katawan a Makapanyarin-amin. Saray plano na Dios et napno ra na kakabatan, tan aligwas lawas so pansumpalan da.

29

¹ "Say altar na Dios, say dilin Jerusalem et pangaskasiyay kipapasen to! Kaskasian so siudad a nankampoan nen David! Palabasen niy sakey o duaran taon, a pati saray pista to,

² "insan say Dios iyakar toy deral ed siudad a tatawagey altar na Dios. Niwalad satan so panakis tan panagugol, tan say intiron siudad et magmaliw a singa altar a naames na dala.

³ "Dogpaan na Dios so Jerusalem, lakoben to, tan looban to.

⁴ "Say Jerusalem ed satan et magmaliw a singa anyani a pipiliten toy mansalita diad dalem na dalin, a singa sakey ya esaes a manlalapud dabuk.

⁵ "Jerusalem, amin da ray taga arum a bansan ondodogpad sika et singa ra dabuk ya ontikyab ed arawi, tan saray makapataktakot a sondalo ra et ontikyab iran singa taep. Insan diad ag iilaloan tan bigla-biglan nagawa,

⁶ "say Katawan a Makapanyarin-amin iyagel to ka diad panamegley na saray karul tan yegyeg. Mangibaki na saray alimbusabos tan say manliub ya apoy;

⁷ "naandipat ed satan a singa kogip, singa pasingayew ed labi, iray amin a sondalo na saray bansan dinmodogpa ed siudad na altar na Dios tan amin da ray armas tan saray kagawaan da.

⁸ "Amin da ray bansan nankakasakey ya ondogpad Jerusalem et magmaliw iran singa sakey a toon narasan tan mankokogip a mamangan, kanyan kabangon to narasan ni lamlamang, odino singa sakey a toon ompapatey ed inkapgaan tan mankokogip ya oniinom, kanyan kabangon to amagaay kolu-kolung to ni lamlamang.

⁹ "Mankulang-kulangan kayo, et magmaliw kayon makulang-kulang. Manbulag-bulagan kayo, et magmaliw kayon bulag. Magmaliw kayon abuek, anggaman ya anggapoy alak! Mandongilngil kayo, anggaman ya ag kayo akainom na anggan sankaakmon ya alak!

¹⁰ Impantemeg kayo na Katawan, ngalngali kayo la makalirep na malmalet. Saray propita so nepeg komun a pinagkamata na saray totoo, balet pinerengan ira na Dios.

¹¹ Niamut ed sikayo iray amin a pasingayew a nipaakar ed arapen; magmaliw a singa sakey ya atimbrian a nilokut a babasaen. No iyakar yod siopaman ya amta toy mambasa tan kerewen yod sikaton ibasa tod sikayo, ibaga ton ag to nayarian a basaen lapud atimbrian.

¹² No iyakar yod siopaman ya ag to amtay mambasa tan kerewen yod sikaton ibasa tod sikayo, onebat ya ag to amtan basaen.

¹³ Inkuan na Katawan, Igagalang da ak ira yan totoo diad panamegley na bibil da, balet arawdawid siak so puso ra. Say rilihion na sarayan totoo et say panagpatlep da labat ed saray abangonan tan saray totontonen ya impaakseb na too.

¹⁴ Kanyan pakelawen ko ra yan totoo diad panggawak ed sikara na mantotombukan a pakelaw. Saray makabat magmaliw iran makulang-kulang, tan say inkasilib da magmaliw ya andi-kana.

¹⁵ Pangaskasiyan iray totoon mangyaamut ed Katawan na saray plano ra! Maamut a gagawaen da ray getma ra, tan abaloan da ya anggapoy makanengneng ed sikara o makaamta na saray gagawaen da.

¹⁶ Babaligtaren day amin a bengatla. Siopay manona, say dumadamili o say pitek? Say ginawa nayarian to kasin ibaga ed nanggawad sikato, Ag mo ak ginawa? Odino nayarian to kasin ibagad sikato, Ag mo amtay gagawaen mo?

¹⁷ Onung na ibabaga ra, ag mabayag magmaliw a daralusan so makdel a takel, tan magmaliw a takel so daralusan.

¹⁸ No onsabi tan ya agew, say telek nayarian ton dengelen so libron nibasa ed maksil, tan say bulag ya abayag lan mambibilay ed kabilongetan et nalokasan iray mata to tan makanengneng.

¹⁹ Saray duruka tan mapaabeban totoo et narumog da lamet so liket ya iiter na Katawan a masanton Dios na Israel.

²⁰ Sayan agew balet so anggaan da ray mamapairap ed saray arum a totoo tan mangipapanengneng na ag da pangingal-ngalep ed Dios. Naderal ya amin iray makasalanan.

²¹ Deralen na Dios iray mamapaoges na kapara ran too, saray manesebel na pakadusa da ray kriminal, tan saray mantatasiy tila pian ag niiter so katonungan da ray maptek so kabibilay da.

²² Kanyan natan say Katawan a Dios na Israel, ya angyagel ed kinen Abraham nen walad gunigon, kuanto, Sikayo ran totook, ag kayo la napelag ed kababainngan, ag kayo la mampabalangay lupa.

²³ No nanengneng yo ray ogogaw ya iter kod sikayo, nabirbir yod satan a siak so masanto a Dios na Israel. Igalang yo ak tan mankelaw kayon manalagey ed arap ko.

²⁴ Naaralan na saray makulang-kulang so ontalus, tan manliket a paibangat iray mariklamo lawas.

30

¹ "Say Katawan nansalita: Pangaskasiyan iray manooley ed Juda lapud linmaban irad siak. Totombuken da ray ag ko implano, tan akipakna ra sumpad linawak; pantatabunan day kasalanan a gagawaen da.

² "Oonla rad Egipto ya onkerew na tulong balet ag ira kinmerew ed siak na simbawa. Labay dan iyagel ira na Egipto, kanyan nanmatalek ira ed ari na Egipto.

³ "Balet anggapoy pakayari na ari ya ontulong ed sikara, tan saray panangyagel na Egipto et mansumpal ed kaderal da.

⁴ "Anggaman ya akasabi lad saray siudad na Soan tan Hanes na Egipto iray opisyal ya imbaki na Juda,

⁵ "magbabawi ray totood Juda diad impanmatalek dad ag napampiaan a bansa, say bansan ag makatulong no ag ingen mangipelag ed sikarad kababaingan.

⁶ "Sikato yay sinalita na Dios nipaakar ed saray ayayep ed kalawakan diad abalaten: Saramay imbaki ondadalan irad maatap a kalawakan a panaayaman na saray lion tan wala ray maditan oleg tan mantikyab a dragon. Saray beneg na saray asno tan saray kamilyo et pinano ra na saray mabmablin rigalo ya iter dad bansan ag makatulong ed sikara.

⁷ "Andikakanaan a tulong so iter na Egipto. Lapud saya pinangaranan koy Egipto na Say Maamon Dragon.

⁸ "Imbagad siak na Dios ya isulat kod sakey a libro no antoy kipapasen da ray totoo, pian mansiansian walay pakaamtaan na ontan lan kaogsan da.

⁹ "Sikaray totoon onsusumlang lawas ed Dios, matila ra lawas, tan ag da labay lawas so ondengel ed saray bangat na Katawan.

¹⁰ Ibabaga rad saray propita a mandeen ira. Kuanda, Ag yo sasalitaen ed sikamiy nipaakar ed kaptekan. Ibaga yod sikamiy labay min dengelen. Pansiasia yod sikami ray balibali ran kogip.

¹¹ Ekal kayod dalan mi; ag yo kami sasaraan. Ag mi labay a dengelen itay nipaakar ed masanton Dios na Israel.

¹² Balet say masanton Dios na Israel kuanto: Ag yo labay a dengelen iray ibabagak, no ag ingen manmamatalek kayod panagduksa tan panagpalikdo.

¹³ Nankasalanan kayo. Singa kayo sakey ya atagey a padir a linmetak manlapud tagey ya anggad leksab; ag mabayag bigla kayon nageba.

¹⁴ Nabetag kayon singa banga, tan diad kamisimisi yo anggapoy langa a nayarin panginan na ngalab o pangaur na danum ed bobun.

¹⁵ Say Katawan a Dios a Masanto na Israel kuanto ed saray totoo, Pawil kayo tan mandeen kayon manmatalek ed siak. Diad ontan ombiskeg kayo tan niarawi kayod kaatapan. Balet ag yo labay a gawaen.

¹⁶ Ingen, plano yon ibatikan iray kalaban yo diad ikabayo yod saray mabatik a kabayo. Kanyan say ibatik yo so pilalek yon gawaen. Abaloan yon mabatik la ray kabayo yo, balet mabatik ni ray kabayo na onosil ed sikayo!

¹⁷ Ombatik, so sanlibod sikayo no nanengneng yoy sakey a sondalon kalaban, et masarag lay limaran sondalo a mamabatik ed sikayon amin. Anggapoy natilak ed saray sondalo yo likud ed begbegtew a bandira ya akabitin ed sakey a tiken a walad tapew na pokdul.

¹⁸ Anggaman ontan, manaalagar so Katawan a mangasid sikayo. Sipaparaan a mangasid sikayo lapud matonung lawas so gagawaen to. Maliket iray totoon manmamatalek ed Katawan.

¹⁹ Ag kayo la onakis, sikayo ran totoon manaayam ed Jerusalem. Mapangasi so Katawan, et no onkerew kayod sikato na tulong, ebatan to kayo.

²⁰ Say Katawan abuloyan to kayon manliknay kairapan, balet wadtan a mangibangat ed sikayo; ag la nakaukolan ya anapen yo.

²¹ No onsuawi kayod dalan, narengel yod benegan yo so bosis to a mankuan, Saya so dalan. Tombuk yo.

²² Alaen yo ray talintao yo a naokupan na pilak tan saray naokupan na balituk, insan yo ra ibantak a singa dotak, tan iyeyag yo, Ag mi kayo la labay a nanengneng!

²³ Kapag mantanem kayod kaalogan yo, paoranan na Katawan, pian ontubo ray tanaman yo et dakel so naani yo; saray baka yo et nawalaan met ira na maawang tan marikan pastolan.

²⁴ Mangan na sankaabigan tan sankalangweran a dika iray bakan kalakyan tan saray asnon mambaka na saray kaalogan yo.

²⁵ Diad agew a nadakep iray tirinsira na saray kalaban yo tan napatey iray totoo ra, onagos iray sobul a manlapud balang palandey tan balang pokdul.

²⁶ Say bulan magmaliw a maliwawan singa agew, tan say agew magmaliw a mamimpitoy kinaliwawa to, a singa kinaliwaway pitoran agew a nankakasakey. Nagawa ra yan amin no berberen tan paabigen na Katawan iray sinusugat tod saray totoo to.

²⁷ Nanengneng ed arawi so pakayari tan kagalangan na Katawan. Ipapanengneng na apoy tan asewek so pasnuk to. Mansasalita et ondadalang a singa apoy iray salita to.

²⁸ Ibabaki toy walad arap ton dagem a singa delap a mangyaanur ed amin a bengatla. Ipapalanas ton deralen iray bansa tan patotondaen to ray maoges a plano ra.

²⁹ Balet sikayo ran totoo na Dios, manliket tan mankanta kayo a singa gagawaen yo no labi no masanton pista. Manliket kayon singa saray manaakar legan a totogtogen iray plauta diad pamapaarap dad Timplo na Katawan a manangyagel na Israel.

³⁰ Iparengel na Katawan ed balang sakey so mapagalang a bosis to tan ipalikna tod sikaray biskeg na pasnuk to. Wala ed satan so manliub ya apoy, ompelag iray makapal a lorem, oran a kristal, tan mapalalon nepnep.

³¹ Nataktakot iray taga Asiria no narengel day bosis na Katawan tan nalikna ray biskeg na pananusa to.

³² Legan a say Katawan et kakabilen to ya andi-tonda iray taga Asiria, andi-tonda met so panogtog na saray totoo na saray tambol tan saray arpa. Say dilin Katawan so onlaban ed saray taga Asiria.

³³ Abaybayag la a niparaan so sakey a pasen a walay baleg ya apoy a mamool ed ari na Asiria. Aralem yan pasen tan maawang tan atagtagey so nibonton a kiew. Isibuk na Katawan so singa onaagos ya apoy a mamool ed samay kiew.

31

¹ "Pangaskasiyan iray onlan patulongan ed Egipto! Manmamatalek ira ed mabiskeg tan dakerakel a sondalo, kabayo, tan karwahi na Egipto. Balet ag ira manmamatalek ed Katawan a masanton Dios na Israel odino onkekerew na tulong ed sikato.

² "Amta na Katawan so gagawaen to! Mangyaakar na deral. Susumpalen to so sinalita to a dusaen iray maoges a totoo tan saray mangyaagel ed sikara.

³ "Aliwan Dios iray taga Egiptototoo ra labat. Aliwan makapanyari iray kabayo ra. No onggalaw so Katawan, natumba so mabiskeg a bansa tan say tinulongan ton makapoy a bansa. Naderal iran dua.

⁴ "Inkuan na Katawan ed siak, Anggan panon so paningal tan paneyag na saray pastol, ag da napatakot so lion pian arawian toy pinatey ton ayep; ontan met, anggapoy makabanod siak ed pangyagel kod Palandey na Sion, siak a Katawan a Makapanyarin-amin.

⁵ "No panoy pambabantay na manok ed tagey ed obung to pian niagel to ray sibong to, ontan met so pankawanan tan pangyagel kod Jerusalem.

⁶ "Inkuan na Dios, Totood Israel, nankasalanan tan linmaban kayod siak. Balet pawil kayo la natan ed siak!

⁷ "Onsabiy panaon ya amin yo et ibantak yo ray makapakasalanan a talintaon ginagawa yod pilak tan balituk.

⁸ "Naderal ed bakal so Asiria, balet aliwan diad panamegley na pakayariy too. Ibatikan na saray taga Asiria so bakalan tan naaripen iray tobun-balo ra.

⁹ "Ombatik ed takot so ari ra, tan diad gaway kataktakot na saray opisyal, ibatikan da ray bandira rad bakal. Say Katawan so nansalitasay Katawan a nagagalang ed Jerusalem tan diman mandarlang so apoy to a pampopool ed saray bagat.

32

¹ "Onsabiy panaon a walay sakey ya arin manoley onung ed katonungan, tan wala ray pangulon ipakurang day kaptekan.

² "Balang sakey ed sikara et magmaliw a singa sakey a salimbeng no panaoy maragem tan sakey a pasen ya amutan no walay bagyo. Magmaliw iran singa kolus a managagos ed sakey ya amagamagan pasen, tan sakey a sirum ed petek na balbaleg a bato ed kinmelang a dalin.

³ "Silolokas ed satan iray mata ra tan saray layag dan mannengneng tan mandengel ed saray totoon walad pankaukolan.

⁴ "Naekal so inkaingungot da, magmaliw iran marunong ya ontalus tan matoor ed salita ra.

⁵ "Anggapo lay manisip a mapagalang so sakey a makulang-kulang o walay mangibagan maptek so toon anggapoy kababaingan.

⁶ "Andikakanaan so sasalitaen na makulang-kulang tan maoges so nununoten ton gawaen. Panamabaing ed Katawan iray gagawaen tan sasalitaen to, tan ag ton balut iitdan na kakanen iray narasan o iitdan na inomen iray napgaan.

⁷ "Maoges so toon makulang-kulang tan kaogsan iray gagawaen to; nununoten toy paneral tod saray mairap-bilay diad panamegley na saray tila tan diad panebel tod sikaran makagamur na katonungan da.

⁸ "Balet say toon walay kagalangan matonung iray gawa to tan malet a tatalindegan toy kaptekan.

⁹ "Sikayo ran bibiin mambibilay ed inawa, ya anggapoy kapagaan yo, dengel yoy ibabagak.

¹⁰ Nayarin malikeliket so panagbilay yo natan, balet diad arapen a taon ed onyan panaon manermen kayo lapud anggapoy naborbor yon bungay ubas.

¹¹ Mambibilay kayod inawa ed abayag lan panaon, tan anggapoy kapagaan yo; balet natan giwgiw kayod takot! Lakseb yoy kawes yo tan mansapey kayoy sako.

¹² Tiplak yoy muling yo tan osdung kayod kaermenan lapud aderal iray matataban kaalogan yo tan saray kaubasan yo;

¹³ saray masabit a dika tan saray balisanga so ontutubod dalin da ray totook. Nangisan yo ray amin a kaabungan a maliket a nanaayaman nen saman na saray totoo tan say siudad a magayaga nen saman.

¹⁴ Nataynan so anggan palasio tan magmaliw a sigput a begtebegtew so anggan manonan siudad. Naderal ed ando lan ando iray kaabungan tan saray torin panag-guardiaan. Manakar-akar diman iray asnod katakelan, tan mankabkab irad may karniro.

¹⁵ Balet maminsan nin ibaki na Dios ed sikatayo so ispiritu to. Magmaliw a mataban dalin so kalawakan, tan mangiter na marakep a bunga iray kaalogan.

¹⁶ Say kaptekan tan say inkatonung so manari ed anggan iner a pasen na dalin.

¹⁷ Lapud say inkatonung so gawaen na balang sakey, mansiansiad dalin so kareenan tan niarawid kaatapan.

¹⁸ Naandiy kapagaan ed bilay da ray totooy Dios, tan niarawid kaatapan so kaabungan da tan manayam so kareenan.

¹⁹ (Balet onuran na kristal ed saray katakelan, tan nageba so siudad.)

²⁰ Nawalaan na ontan lan liket so balang sakey, ta daakan so danum a manalog ed saray tanaman, tan arawid kaatapan so pampastolan ed saray asno tan saray baka ra.

33

¹ "Pangaskasiyan iray kalaban mi! Nantakew tan nanlipot ira, anta anggapoy nantakew odino nanlipot ed sikara. Balet mangangga so panaon na pantakew tan say panlipot da, ta natakewan tan nalipotan ira.

² "Katawan, kasian mo kami pa. Sikay nanilaloan mi. Iyagel mo kami pa ya inagew-agew tan ilaban mo kami ed saray panaon na gunigon.

³ "No sikay mibakal a para sikami, saray bansa ibatikan day ingal na bakal.

⁴ "Nadopagan tan nasamsam iray kayaryan da.

⁵ "Matalonggaring a tuloy so Katawan! Ooleyan toy amin a bengatla. Panoen to na kaptekan tan inkatonung so Jerusalem,

⁶ "tan iletneg ton malet so bansa. Iyagel to lawas iray totoo to tan itdan to ray kakabatan tan pakatalus. Say sankabalegan dan kayamanan et say pangigagalang dad Katawan.

⁷ "Ontatawag na tulong iray masesebeg a totoo. Manakakis na ampaipait iray nibakin mitongtong a nipaakar ed kiwalay kareenan.

⁸ "Anggapoy manakar ed saray dalan a maawang lapud maatap a tuloy. Nadederal iray sipanan tan paknaan na saray bansa. Anggapo lay toon akeraan a babaingan na saray totoo.

⁹ "Ataynan so dalin kanyan anggapoy onkitakitaw. Amagaan so takel na Libano, nagmaliw a singa kalawakan so patar na Saron, tan mampagpag iray bulong na kakiewan ed Basan tan diad Palandey na Carmelo.

¹⁰ Say Katawan kuantod saray bansa, Natan, siak so onggalaw. Ipanengneng koy ontan lan pakayarik.

¹¹ Mamplaplano kayo na saray andi-kabaliksan tan anggapoy kana iray gagawaen yo. Say ispirituk et singa apoy a maneral ed sikayo.

¹² Nabuyak kayon singa saray baton-dampay a pinoolan a gawaen a dena; natemek kayon singa saray sabit a pinoolan a padapolen.

¹³ Say ginawak et narengelan komun na balang sakey a walad arawi odino asingger tan birbiren da komuy pakayarik.

¹⁴ Manggiwgiw ed takot iray makasalanan a totood Sion. Kuanda, Singa apoy a mandarlang ed anggad angga so panagsintinsia na Dios. Wala kasid sikatayoy makapangitepel ed onyan dalang?

¹⁵ Nitepel yo, no salitaen tan gawaen yoy inkatonung, no ag yo ikanay pakayari yo a mansaol ed saray mairap-bilay tan ag kayo mangawat na pasoksok, no ag kayo miolup ed saray mamplaplanon mamatey na too odino manggawa na arum a kaogsan.

¹⁶ Diad satan niarawi kayod kaatapan ya aliling yoy walad dalem na tirinsira. Nawalaan kayoy kanen tan inomen.

¹⁷ Nanengneng yo lamet so sakey ya arin sigagalang a manoley ed sakey a dalin ya onlaknab ed amin a dapag.

¹⁸ Magmaliw a singa labat sakey a nununoten ira may gendat a takot yod saray sangkailin sumisingil na buis tan saray ispiya.

¹⁹ Anggapo lay nanengneng yon mapaatagey a sangkailin mansalitay ag yo natalusan.

²⁰ Nengneng yoy Sion, say siudad a panggagawaan tayo na saray pista tayo. Nengneng kayod Jerusalem! Sakey a pasen a maung a panayaman ya arawid kaatapan! Magmaliw a singa tuldan ag balut nagagalaw, ag balut nababagut iray palpal to tan ag balut napopoltut iray lobir to.

²¹ Ipanengneng ed sikatayo na Katawan so kagalangan to. Manayam tayo ed gilig na saray maawang ya ilog tan kolus, ya ag dalanen na bapor da ray kalaban.

²² Andi-kakanaan iray lobir na saratan a bapor, tan ag ombuskag iray layag da! Akokosen tayoy amin a kayamanan na saray sondalo na kalaban, tan walay daakan a nasamsam a napiapagan na anggan saray piley a totoo. Say Katawan a dili so magmaliw ya ari tayo; manoley ed sikatayo tan iyagel to itayo.

²³

²⁴ Anggapoy too a manayam ed dalin tayo a manriklamod sakit; napirdona ya amin so kasalanan.

34

¹ "Gali dia, sikayon totood amin a bansa! Mantitipon kayo tan dengel kayo. Singger tan dengel kayo, amin yon manaayam ed intiron mundo.

² "Mamapasnuk so Katawan ed amin da ray bansa tan amin a sondalo ra. Sinintinsiaan to la ran napatey.

³ "Ag nikotkot iray bangkay da, no ag ta kitongilang iran naboluk tan ombanget; nabalangaan na dala iray kapalandeyan.

⁴ "Ondapul so agew, bulan, tan saray bitewen diad kapelag da. Naandi so tawen a singa kalokut na ikamen, tan napelag iray bitewen a singa kapelag na saray bolung a manlapud sangay ubas odino sangay kiew ya igos.

⁵ "Say Katawan imparaan tod tawen so ispada to, tan natan nitipas ed Edom, diad saray totoon sinintinsiaan ton ompatey.

⁶ "Naames so ispada to na dala tan taba ra a singa dala tan taba na saray nibagat a kordiro tan kanding. Mangibagat so Katawan ed siudad na Bosra; gawaen to ya a pamatey na dakerakel a totoo ed dalin na Edom.

⁷ "Saray totoo napelag iran singa saray bakad katakelan tan saray kilaw a bakan kalakyan tan nabalangaan na dala so mundo tan nalayanapan na taba.

⁸ "Sikato yay panaon na pangyagel na Katawan ed Sion tan ibawi tod saray kalaban to.

⁹ "Magmaliw ya alkitran iray ilog na Edom, tan magmaliw ya asupri so dalin. Napoolan a singa alkitran so intiron bansa.

¹⁰ Ondalang ed agew tan labi, tan ando lan ando a manlapud sikato so asewek ya ontagey. Mansiansian andi-kakanaan so dalin na Edom, tan anggapo la dian balut so malabay ya ondalan.

¹¹ Saray kulayot tan saray wawak la so onsalat a manayam ed saman a dalin. Say Katawan pagmaliwen ton bunton na deral-deral tan kitongilang ya amiy ganagana.

¹² Anggapoy arin manoley ed bansa, tan naandi ray pangulo.

¹³ Saray masabit a tanaman et ontubo rad saray palasio tan saray baley ya aliber na padir, tan panayaman ira na saray asod katakelan tan saray kulayot.

¹⁴ Manliber-liber diman iray ayayep ed katakelan, tan mantatawagan iray dimonyod man. Onlad man so dragon ed labi, ta diman mananap na pampainawaan to.

¹⁵ Manobung irad may kulayot, maniknul irad man, pusnakan da rad may sibong da, tan diman da ra asikasoen. Mantitipon irad may buitri, a mansosoblayan iran onsabi.

¹⁶ Sokimat yod libro na Katawan a nipaakar ed saray mabilay a pinalsa tan basa yoy ibabaga to. Anggapoy anggan sakey ed sarayan pinalsa so nabalang, tan walay asawa so balang sakey ed sikara. Say Katawan a dili so angiganggan ed saya; say ispiritu to so manipon ed sikara.

¹⁷ Say Katawan so mangapag ed sikara na dalin tan itdan toy balang sakey na apag. Mansiansia ran manayam ed dalin, tan kayaryan da ya anggad angga.

35

¹ "Manliket so kalawakan, tan ombuskag iray rosas diman.

² "Mankanta tan maneyag ed liket so kalawakan; magmaliw a marakep a singa Saray Palandey na Libano tan mataba a singa saray kaalogan na Carmelo tan Saron. Nanengneng na balang sakey a too so kagalangan na Katawan, say inkatalonggaring to tan say pakapanyari to.

³ "Itdan yo na biskeg iray naksawan a lima tan saray pueg a mankalog ed kapoy da.

⁴ "Ibaga yod balang sakey a toon nakalay biskeg na linawa, Mampabiskeg kayo tan ag kayo natatakot! Onsasabiy Dios a mangyagel ed sikayo; onsasabin manusad saray kalaban yo.

⁵ "Diad satan, makanengneng iray bulag, tan makadngel iray telek.

⁶ "Manlukson singa ulsa iray piley, tan mankantad liket iray emel. Onagos iray kolus ed kalawakan;

⁷ "magmaliw ya ilog so makasinit a kabueran, tan nawalaan na saray sobul so amaga-magan dalin. Ontubo ray tanobung tan saray talaib ed pasen a panaayaman a gendat na saray asod katakelan.

⁸ "Niwalad satan so sakey a maawang a dalan a tatawagey, Say Dalan na Inkasanto. Anggapoy makasalanan a manakar ed saman a dalan; anggapo rad may makulang-kulang a mangibalang ed saray ondalan.

⁹ "Anggapo rad may niwalan lion; anggapoy ondalan diman a masebeg ya ayep. Diad ipawil na saray totoon inyagel na Katawan ondalan irad saman a dalan.

¹⁰ Magayaga ran makasabid Jerusalem, mangankanta tan maneyag-eyag irad liket da. Manliket iran ando lan ando, naandi lan anggad angga so ermen tan dageyem.

36

¹ "Diad kumalabinapat a taon na panooley nen Ari Ezekias, dinogpaan nen Senakerib ya impirador na Asiria iray aliber na padir a siudad na Juda tan adakep to ra.

² "Nen walad Lakis so ari, imbaki tod Jerusalem so manonan opisyal to tan saray amayamay a sondalo to, ta ibaga rad kinen Ari Ezekias ya onsuko la. Kasabi rad Jerusalem, nanayam irad dalan a pankikimeyan da ray managgaway abel, diad abay na banawang ya aagosay danum a manlalapud dipositoway danum a walad nipokdul.

³ "Taloran opisyal na Juda so inmabet ed samay manonan opisyal nen Senakerib: di Eliakim a lakin anak nen Helcias tan sikatoy makaoley ed palasio, Sebna a sikritario na korti, tan Joa a lakin anak nen Asaf tan makaoley ed saray nepeg ya isulat.

⁴ "Samay opisyal na Asiria inkuantod sikara a say ari na Asiria et labay ton amtaen no antoy makasengeg na pambabaleg-balegan nen Ari Ezekias.

⁵ "Inkuanto, Abaloan mo amon naala na saray salita so pasen na talonggaring tan biskeg na saray sondalo? Siopay abaloan mon ontulong ed sika ed ilaban mod Asiria?

⁶ "Iilaloan moy Egipton ontulong ed sika, balet saman a bansa et singa labat bastun a bulawitnapoter tan nasakitan niy limam. Onyay kapara na ari ed Egipto no walay siopaman a manmatalek ed sikato.

⁷ "Insan inkuan na samay opisyal na Asiria, Nayarin ibaga yod siak a manmamatalek kayod Katawan a Dios yo. Balet, ag ta dineral nen Ezekias iray altar na Katawan tan saray pasen a panangigalangan ed sikato nen imbaga tod saray totood Juda tan Jerusalem a diad altar ed Jerusalem labat so pangigalangan da?

⁸ "On, sigi, diad ngaran na ari palugaran ta kayo. Itdan ta kayoy duan libon kabayo no makalmo kayoy lalakin mankabayod sikara!

⁹ "Ag kayo makasimbang ed anggan sankaabebaan lan opisyal na Asiria, balet iilaloan yo a saray Egipsio et itdan da kayo na saray karwahi tan saray sondalon kumakabayo.

¹⁰ Abaloan yo ag ak tinulongan na Katawan ed indogpak ed bansa yo tan dineral ko? Say dilin Katawan so angibagad siak a dogpaan koy bansa yo tan deralen ko.

¹¹ Insan inkuan di Eliakim, Sebna, tan Joa ed samay opisyal, Mansalita kad sikamiy Aramaica, ta natalusan mi. Ag ka mansasalitay Hebreo, ta ondedengel iray totoon walad tapew na padir.

¹² Inmebat imay opisyal, Abaloan yo amon sikayo tan say ari yo labat so angibakian na impirador ed siak a pangibagaan kod sarayan amin a bengatla? Andi, mitotongtong ak met ed saray totoon manyodyorung ed tapew na padir, a kapara yo ran mangan na dilin tai ra tan oninom na dilin sirit da.

¹³ Insan inmalagey imay opisyal tan ineyag tod salitay Hebreo, Dengel yoy ibabagad sikayo na impirador na Asiria.

¹⁴ Ipapasakbay tod sikayon ag yo aabuloyan a palikdoen kayo nen Ezekias, ta ag to kayo lamlamang niagel.

¹⁵ Ag yo aabuloyan a tanggoyuren to kayon manmatalek ed Katawan. Ag yo nununoten ya iyagel kayo na Katawan tan ag to abuloyan a dakepen na saray sondalo na Asiria so siudad yo.

¹⁶ Ag yo dedengeley Asiria a paway kayod siudad tan suko ki la. Naabuloyan kayon mangan na ubas ed dilin kaubasan yo, mangan na igos ed dilin kaigosan yo, tan oninom na danum ed dilin bobun yo

¹⁷ anggad panayamen kayo na ari ed sakey a bansa, a singa met lamlamang say bansa yo, a wala ray kaubasan a mangiter na alak, tan wala ray trigo a gawaen a tinapay.

¹⁸ Ag yo dedengeley Ezekias no ibaga tod sikayon iyagel kayoy Katawan, ta papalalikdoen to kayo labat. Wala tay dios na dinan man a bansa ya inyagel tod impirador na Asiria so dalin to?

¹⁹ Iner la natan so kawalaan da ray diriyos na Hamat tan Arpad? Iner so kawalaan da ray diriyos na Sefarvaim? Wala tad sikaray angyagel ed Samaria?

²⁰ Siopad sarayan diriyos da so angyagel ed bansa ra ed impirador mi? Panon sirin so pannununot yon iyagel na Katawan so Jerusalem?

²¹ Ag inmeseesel iray totoo, onung na ingganggan ed sikara nen Ari Ezekias; ag met ira anggan inmebat.

²² Diad ermen di Eliakim, Sebna, tan Joa, pinilat day kawes da, linma la ra, insan imbalita rad ari so imbaga na samay opisyal na Asiria.

37

¹ "Diad ermen nen Ari Ezekias nen nadngel toy imbalita da ra may opisyal to, pinilat toy kawes to, insan linmad Timplo na Katawan.

² "Imbaki tod kinen propita Isaias a lakin anak nen Amoz ira di Eliakim a makaoley ed palasio, Sebna a sikritario na korti, tan saray mamatakken a papari. Akakawes met iray sako.

³ "Saya so impaikuantod kinen Isaias: Agew natan na kairapan; nadudusa tan nipepelag itayod kababaingan. Singa itayo biin asabi lay pananak to, balet ta makapkapoy a mangipaway na ogaw.

⁴ "Imbaki na impirador na Asiria so manonan opisyal to ya amabaing ed mabilay a Dios. Nadngel komun na Katawan a Dios mo ira man a panamabaing tan dusaen to ra may nansalita. Kanyan ipikasim pad Dios iray nakdaan a totoo tayo.

⁵ "Nen nadngel nen Isaias so impaibaga nen Ari Ezekias,

⁶ "onyay inyebat to: Ibabaga na Katawan ed sika ya ag ka patataktakot ed saray taga Asiria diad pangibabaga ran ag to ka nilaban.

⁷ "Parengelan na Katawan so impirador na balbalitan makasengeg na pawilan tod dilin bansa to, tan diman papatey na Katawan.

⁸ "Akabatan na samay opisyal na Asiria a tinaynan na impirador so Lakis, tan mibabakal ed siudad na Libna; kanyan linmad man a pangipanonan to.

⁹ "Nadngelan na impirador na Asiria a diad panangipangulo nen Ari Tirhaka na Etiopia onsasabi ray sondalon ondogpad sikato, kanyan nansulat ed kinen Ari Ezekias

¹⁰ na Juda tan inkuantod sulat to, Ag ka palilingod imbaga na Dios a panmamatalkan mo, ya ag ka napelag ed silong na pakaoley ko.

¹¹ Nadngelan mo lay ginawa na saray impirador na Asiria ed anggan anton bansan ginetma ran deralen. Abaloan mo a makapaliis ka?

¹² Dinederal na saray lalakik iray siudad na Gozan, Haran, Rezef, tan pinapatey da ray totoon taga Eden a manaayam ed Talassar, et anggapod saray diriyos da so akapangyagel ed sikara.

¹³ Antoy agawaan na saray ararid saray siudad na Hamat, Arfad, Sefarvaim, Hena, tan Iva?

¹⁴ Inawat nen Ari Ezekias so sulat ed lima na saramay imbaki na impirador tan binasa to. Insan linmad Timplo, inyan tod man imay sulat diad arap na Katawan,

¹⁵ tan nampikasi,

¹⁶ O Makapanyarin-amin a Katawan a Dios na Israel, manyodyorung kad tagey da ray kirubin, bukor moy Dios a manooley ed amin a nanarian diad mundo. Pinalsam so tawen tan dalin.

¹⁷ Imanom pa, Katawan, so nagagawad sikami. Dengel mo pan amin iray salitan pamapabaing nen Senakerib ed sika, Dios a mabilay.

¹⁸ Amta min amin, Katawan, a dinederal na saray impirador na Asiria so amayamay a bansa, ginagawa ran andikabaliksan iray dalin da,

¹⁹ tan pinopoolan da ray diriyos data aliwa ran tuan diriyos; talintaon kiew odino bato ra labat a ginagawa na limay too.

²⁰ Kanyan natan, Katawan a Dios mi, iyagel mo kami pad saray taga Asiria, pian naamtaan na amin da ray bansa ed intiron mundo a bukbukor mo so Katawan a Dios.

²¹ Insan impaibaga nen Isaias ed kinen Ari Ezekias a diad impangebat na Katawan ed pikakasi na ari,

²² inkuan na Katawan, Eelekan ka na siudad na Jerusalem, Senakerib, tan luludlureyen to ka.

²³ Siopay abaloan mon papabaingan tan luludlureyen mo? Ag mo ak papagalangan, say masanton Dios na Israel.

²⁴ Angibaki ka na saray totoom ya ipasirayew dad siak a dinakep mo ray sankaatageyan a palandey na Libano, lapud saray amayamay a karwahim. Impasirayew mo a nambabatang kad man na saray sankaatageyan a kiew a sidro tan saray sankaabigan a kiew na saleng, tan nakar mo ray sankaote-otelan na saray takel.

²⁵ Impasirayew mon angotkot ka na saray bobun tan inminom ka na danum ed arum iran dalin, tan pinaekat moy Ilog na Nilo diad panamegley na impanyayarak na saray sondalom.

²⁶ Ag mo ta ni nadngelan ya abayag ko la yan ginetma? Sinumpal ko la ra ya natan. Initdan ta kay pakayarin napagmaliw mon bunton na deral-deral iray siudad ya aliber na padir.

²⁷ Anggapoy agawaan na saray totoon manaayam diman. Ataktakot ira tan akatanga ran nikelawan. Nagmaliw iran singa dikad alog odino dika-rikan tinmubod toktok na abung a siniplug ira na ampetapetang a dagem nanlapud bokig.

²⁸ Balet amtak iray amin a nipaakar ed sika, saray gagawaen mo tan saray lalaen mo. Amtak so mapalalon petang na olom ed siak.

²⁹ Naawat koy pakabat nipaakar ed satan a pamapasnuk mon maung tan satan a panagpaatagey mo, kanyan natan inan koy patili so eleng mo tan pakalat so sangim tan ipawil ta kad dalan a nanlapwan mo.

³⁰ Insan inkuanen Isaias ed kinen Ari Ezekias, Niay sakey a pakapatnagan ed sakey a nagawa. Diad sayan taon tan diad ontombuk a taon, trigon balang labat so naakan yo, balet diad ontombuk a taon nayarian yo lay mantanem na trigo tan naani yo; makapantanem kayo met na saray ubas tan makapangan kayo na saray bunga ra.

³¹ Saray mansiansian mabilay a taga Juda onaligwas iran singa saray tanaman a manlamut na aralem, insan ira mambunga.

³² Wala ray mansiansian mabilay a totood Jerusalem tan Palandey na Sion, ta ginetma la na Makapanyarin-amin a Katawan a gawaen to yan andi-saew.

³³ Onyay inkuan na Katawan nipaakar ed impirador na Asiria: Ag to looban o panaen yan siudad. Anggapoy onsingger ed siudad a sondalon walay samper to, tan anggapoy nagawan bontun a para panakep ed siudad.

³⁴ Ompawil ed dinalan to, tan ag to looban yan siudad. Siak a Katawan so nansalita.

³⁵ Iyagel ko yan siudad lapud sikatoy pakagalangan ko tan lapud samay sipan kod kinen David ya aripen ko.

³⁶ Diad saman a labi linmad kampo na saray taga Asiria so sakey ya anghil na Katawan tan pinatey toy sanlasus tan walomplo tan liman libon sondalo. Diad palbangon ed ontombuk ya agew kibalatar irad man ya inaatey!

³⁷ Insan sinmener si Senakerib ya impirador na Asiria tan pinmawil ed Ninive.

³⁸ Aminsan ya agew, nen mangigagalang si Senakerib ed dalem na timplo na dios ton Nisroc, pinatey na duara ed saray anak ton lalaki a di Adramelec tan Sarezer, diad panamegley na ispada, insan batik irad dalin na Ararat. Sakey ed saray anak to a si Esarhadon so sinmalat ed sikaton nanoley.

38

¹ "Legan to met ira man ya agew, nansakit si Ari Ezekias tan ngalngali inatey. Linmad sikato si propita Isaias a lakin anak nen Amoz tan kuantod sikato, Ibabaga na Katawan ya oksuy mo lan amiy bengatla, ta ag ka la onabig. Mamparaan kan ompatey.

² "Inyarap nen Ezekias so lupa tod padir, insan nampikasi:

³ "Nunot mo pa, Katawan, a matoor tan masimoon so impanlingkur kod sika, tan sinumpal ko lawas iray nilabay mon pagawad siak. Kayari ton nampikasi nanakis na ampaipait.

⁴ "Insan ingganggan na Katawan si Isaias

⁵ "ya ompawil ed kinen Ezekias ta ikuantod sikato, Siak, say Katawan a Dios na lakim a David, et nadngel koy pikakasim tan anengneng koy interter na luam; pambilayen ta ka ni nalabinlimay taon.

⁶ "Iyagel ta ka tan sayan siudad na Jerusalem ed impirador na Asiria tan ituloy kon iyagel so siudad.

⁷ "Inmebat si Isaias, Say Katawan itdan to ka na sakey a tanda a mamaneknek a sumpalen toy sipan to.

⁸ "Diad saramay balitang na takayan a ginawa nen Ari Acaz, say Katawan paseneren to na samploran balitang so anino. Sinmener a tua na samploran balitang so anino.

⁹ "Kayariy inyabig nen Ezekias ed sakit to, insulat to yan kantan panangidayew:

¹⁰ Ninunot ko a diad kakkaksilay bilay ko, Onla ak lad pasen a panaayaman da ray inaatey, Et naandian ak lay pankanawnawan mambilay.

¹¹ Ninunot ko a diad tapew na dalin a kawalaan da ray mabilay, Ag ko lan balut nanengneng lamet so Katawan Odino siopaman a mabilay a too.

¹² Apoltut so bilay ko tan nansamput la. Singa sakey a tuldan inkusbo, Singa abel ya apaksut ed panaginarameyan. Abaloan kon pansasamputen la na Dios so bilay ko.

¹³ Sanlabi ak a manayay ed sakit Singa tetemeken na lion iray pokel ko. Abaloan kon pansasamputen la na Dios so bilay ko.

¹⁴ Melmelag tan makapkapoy lay bosis ko, Tan managlem ak a singa malapati. Diad kanenengneng kod tawen naksawan lay matak. Katawan, agwat mo ak pad sayan gunigon.

¹⁵ Balet antoy nibagak? Say Katawan so angiter ed sayan sakit. Ansakit so pagew ko kanyan ag ak makaogip.

¹⁶ Katawan, mambilay ak para sika, tan para sika labat; Paabig mo ak pa tan pambilay mo ak ni.

¹⁷ Say kapaitan na bilay ko et nasalatan na inawa. Iyaagel moy bilay ko ed amin a kaatapan; Pipirdonaen moy amin a kasalanan ko.

¹⁸ Diad pasen a panaayaman da ray inaatey, Anggapoy siopaman a makapangi- galang ed sika; Ag makapanmatalek ed inkatoor mo iray inaatey.

¹⁹ Saray mabilay so mangidadayew ed sika, A singa pangidadayew kod sika natan. Ibaga na saray kaamaan ed saray anak da so ontan lan inkatoor mo.

²⁰ Katawan, pinaabig mo ak. Manogtog kami na saray arpa tan mankanta kamiy dayew mo. Diad Timplom mankanta kamiy pangidayew legan na pambilay mi.

39

¹ "Legan to yan panaon say ari na Babilonia a si Merodac-baladan a lakin anak nen Baladan et nadngelan ton nansakit si Ari Ezekias; kanyan impawitan to na sulat tan rigalo.

² "Maliket si Ezekias ya nagawat ed saramay imbaki tan impanengneng ton amin iray kayamanan tosaray pilak tan saray balituk to, saray rikado tan saray pabalingit to, tan amin a kagawaan na saray sondalo. Anggapoy ag to impanengneng ed sikara a bengatlan walad saray kuarton panagsinupan odino walad anggan iner a pasen na nanarian.

³ "Insan linmay propita Isaias ed kinen Ari Ezekias tan tinepet to, Iner so nanlapwan na sarayan totoo tan antoy kuandad sika? Inmebat si Ezekias, Nanlapu rad Babilonia ya arawdawin bansa.

⁴ "Antoy anengneng dad palasio? tepet nen Isaias. Anengneng dan amin. Anggapoy ag ko impanengneng ed sikara a bengatlan walad saray kuarton panagsinupan, ebat nen Ezekias.

⁵ "Insan inkuanen Isaias ed ari, Ibabaga na Katawan a Makapanyarin-amin ya

⁶ "onsabiy panaon a naawit ed Babilonia iray amin a bengatlan walad palasio tan amin a tinitipon ya anggad natan na saray lalakim. Anggapoy bengatlan nakeraan.

⁷ "Wala ray pigaran kakanayon mo a naala tan magmaliw iran yunuko a manlingkur ed palasio na ari na Babilonia.

⁸ "Say atalusan nen Ari Ezekias a kabaliksan to ya et say kiwala na kareenan tan kaandi na kaatapan legan na pambilay to, kanyan inmebat, Maung so imbagam ed siak a salita na Katawan.

40

¹ "Say Dios tayo kuanto, Ligliwa yo ray totook, Ligliwa yo ra!

² "Pabiskeg yoy linawa da ray totoo ed Jerusalem. Ibaga yod sikaran andokey lay paniirap da tan apirdona la ray kasalanan da. Sigput ko la ran dinusa lapud amin a kasalanan da.

³ "Sakey a bosis so mankelyaw, Iparaan yod kalawakan so sakey a dalan a para Katawan! Linisan yo so dalan ed kalawakan a para Dios tayo!

⁴ "Tabunan yo so kapag patar; patar yo so kapag palandey. Saray pokdul magmaliw iran patar, tan say matibagkul a kaomaan et magmaliw a palanas.

⁵ "Insan nipaamta ed satan so kagalangan na Katawan, tan nanengneng na amin a katoowan. Say Katawan a dili so angisipan ed saya.

⁶ "Sakey a bosis so mankelyaw, Ibawag moy balita! Antoy balitan ibawag ko? tepet ko. Ibawag mo ya amin a katoowan et singa ra dika; ag ira mansiansian singa saray rosas ed uma.

⁷ "No ibakid sikara na Katawan so dagem nalenes iray dika tan nalaylay iray rosas. Saray katoowan et singa la ra dikan maganoy bilay.

⁸ "On, nalaylay iray dika tan onkupas iray rosas, balet mansiansiad ando lan ando so salita na Dios tayo.

⁹ "Jerusalem, tatdang kad atagey a palandey, ta ipulong moy maung a balita! Kolyaot ka, Sion, ibawag moy maung a balita! Ag ka ontatakot, mansalita ka. Ibagam ed saray baley na Juda ya onsasabi lay Dios da!

¹⁰ Onsasabi so Katawan a Dios a makapanyarin manoley, onsasabin kaiba to ray totoon inyagel to.

¹¹ Asikasoen to ray karniro to a singa panagkomponi na pumapastol; tiponen to ray kordiro tan ampopoen to rad taklay to; anosan ton iwanwan iray kainaan da.

¹² Nasukat na siopaman so dayat ed panamegley na dakolap to odino say tawen diad panamegley na lima to? Nikarga na siopaman so dalin na mundo ed sakey a kupa odino naala so belat na saray palandey tan saray pokdul diad panamegley na simbangan?

¹³ Walay makapangibaga ed Katawan no antoy gawaen to? Siopay makapangibangat odino makasimbawad sikato?

¹⁴ Siopay pangipanonan na Katawan pian naamtaan, natalusan tan naaralan to no panoy panggawa tod antokaman?

¹⁵ Anggapoy wala ed Katawan iray bansa, singa ra labat sankaterter a danum; singa labat kalemew na dabuk iray ararawin isla.

¹⁶ Amin da ray ayayep ed katakelan na Libano et kulang iran ibagat ed Dios tayo, tan kulang iray kiew ton pamool.

¹⁷ Diad sikato tuan anggapoy kakanaan da ray bansa.

¹⁸ Siopay nayarin pangiparaan ed Dios? Antoy kapara to?

¹⁹ Sikatoy ag mipara ed talintaon gagawaen na iskotur, a say platiro et okupan to na balituk tan ipatoon tod pilak.

²⁰ Say toon ag to nayarian ya ikanay pilak o balituk lapud kairapay bilay to, et pilien to lay kiew ya ag naboluk. Manaanap na marunong ya iskotur a manggawa na talintaon ag natumba.

²¹ Ag yo amta? Ag ni asalitad sikayo nen saman? Ag yo ni nadngelan no panoy inggapo na mundo?

²² Ginawa na samay manyodyorung ed trono to diad tagey na mundo tan labas na tawen; singa kamelag na gilata so nengneg da ray totoo diad leksab. Impanat ton singa kortina so tawen, singa sakey a tuldan panayaman.

²³ Papaabebaen to ray makapanyarin manoley, pagmamaliwen to ran anggapoy kabaliksan.

²⁴ Singa ra malangwer a tanaman; katubo-tubo ra tan kakkapanlamut da. No say Katawan et paragemen to, namagaan ira tan nitikyab iran singa dayami.

²⁵ Siopay nayarin pangiparaan ed Dios? Walay siopaman a singa sikato?

²⁶ Tangay kayo pa ed tawen! Sipay amalsad saray sankanengneng yon bitewen? Say mangiwawanwan ed sikaran singa saray sondalo et amta toy karakel da tan tatawagen tod ngaran so balang sakey ed sikara. Ontan lay kabaleg so pakayari to anggapoy nabalang ya anggan sakey ed sikara!

²⁷ Totood Israel, akin et manririklamo kayo ya ibabaga yon ag amta na Katawan iray gunigon yo odino anggapoy walad sikato no nalalames kayo?

²⁸ Ag yo amta? Ag yo ni nadngelan? Say Katawan so andi-anggaan a Dios; pinalsa to so sankamundoan. Ag balut nakesawan odino napunaw. Anggapoy makatalus na kanunotan to.

²⁹ Pabibiskegen to ray makapoy tan saray naksawan.

³⁰ Onkapoy iray anggan malangwer ni; napunaw iray totoon kabisbiskegan da.

³¹ Balet napasimbalo so biskeg na saray manmamatalek ed Katawan. Onalagey iran nampayak a singa agila; mambatik ira, et ag ira napunaw; manakar ira, et ag ira onkapoy.

41

¹ "Say Dios kuanto, Mandeen kayo tan dengel yo ak, sikayo ran arawin dalin! Mamparaan kayon mangiparontal na kaso yo ed korti; nawalaan kayoy pankanawnawan mansalita. Mantitipon tayon manimbang no siopay walad katonungan.

² "Siopay angyakar na mananalod bakal a taga bokig tan panataloen to ya anggad iner so laen to? Siopay mangiiter ed sikatoy pananalo ed saray arari tan saray bansa? Wawasiwasen to ra na ispada to, et nikayat iran singa dabuk. Bubuyaken ira na saray pana to, et magmaliw iran singa osang ya itiktikyab na dagem.

³ "Oosilan to ra, et arawi lawas ed kaatapan no onoosil; ontan lay peles to a ngalngali ag ondapo so sali to!

⁴ "Siopay angyabuloy ya onyay nagawa? Siopay angigetar na amin ya agawgawa ed imbeneg? Siak a Katawan a wala la ed gapoy gapo, tan siak a Katawan so niwala ed kasamputan.

⁵ "Saray totood saray arawin dalin anengneng day ginagawak; manggiwgiw irad takot da. Kanyan nantitipon iran amin tan dinmago ra.

⁶ "Saray marunong a kumikimey tan platiro et mantutulongan tan mampapabiskegan iray linawa.

⁷ "Say karpintiro kuantod platiro, Marakep itay ginawam! Say iskotur a titiktikan toy mantilyo pian napino so talintaoy diriyos et pabibiskegen toy linawa na toon manotoop ed talintao. Ikuanda, Marakep so inkapainang to insan da ipeket na pasak imay talintao.

⁸ "Balet sikayo, Israelitan aripen ko, sikayo ray totoon pinilik saray kabyangay boleg nen Abraham a kaarok.

⁹ "Inala ta kayon manlapud saray samput na dalin; tinawag ta kayod saray sankaarawian a sokung na mundo tan kuantod sikayo, Sikayo ray aripen ko. Ag ta kayo impolisay, no ag ingen pinili ta kayo.

¹⁰ Ag kayo natatakotwala ak ed sikayo! Siak so Dios yoag yo aabuloyan a taktakoten kayo na antokaman! Pabiskegen tan tulongan ta kayo; iyagel tan ilaban ta kayo.

¹¹ Amin da ray ampetang so olo rad sikayo et nakabatan day kababaingan na inkatalo. Ompatey iray onlalaban ed sikayo

¹² tan naandipat irad tapew na dalin.

¹³ Siak so Katawan a Dios yo; Pabiskegen ta kayo tan ibagak ed sikayo, Ag kayo natatakot; tulongan ta kayo.

¹⁴ Say Katawan kuanto, Daiset may makapoy kayon Israelita, ag kayo natatakot, tulongan ta kayo. Siak, say masanton Dios na Israel, so mangyaagel ed sikayo.

¹⁵ Pagmaliwen ta kayon singa sagar, a balo tan matmatdem iray tarem to. Sagaran yo ray kapalandeyan tan deralen yo ra; ondabuk iray kapokdulan ed kamekmek da.

¹⁶ Ibontuk yo ra ed tagey; ibatik ira na dagem, tan itaytayak ira na bagyo. Diad satan manliket kayo ta siak so Dios yo; idayew yo ak, say masanton Dios na Israel.

¹⁷ No diad pankaukolan na saray totook et mananap ira na danum, no amaga lay kolokolung da lapud inkapgaan, siak ed satan a Katawan et ebatan koy pikakasi ra; siak, a Dios na Israel et ag ko ran balut ikaindan.

¹⁸ Saray ilog paagosen kod saray kapokdulan ya anggapoy tanaman tan paagosen kod saray patar iray sobul. Pagmaliwen kon dipositoy danum so kalawakan; pagmaliwen kon managagos a danum so amagan dalin.

¹⁹ Patuboen kod kalawakan iray sidro, akasia, mirto, tan saray oliba. Magmaliw a takel so dalin ya anggapoy tanaman, natuboan na saleng, sipris, tan olmo.

²⁰ Nanengneng ya na saray totoo tan naamtaan da a siak, say Katawan so nanggawad saya. Natalusan dad satan a say masanton Dios na Israel so angyabuloy a nagawa ra ya.

²¹ Say Katawan ya ari na Israel kuanto: Sikayo ran diriyos na bansa, iparontal yoy riklamo yo. Ipaway yo la ray sankaabigan a paneknek yo!

²² Gali dia, ta ipasakbay yo no antoy nagawa, pian naamtaan mi no nagawa la. Ipaliwawa yod korti no anto ray agawa ed imbeneg a panaon, tan ibaga yod sikami ray kabaliksan da.

²³ Ibaga yod sikami no antoy nagawad arapen pian nabirbiran mi a diriyos kayo! Manggawa kayoy antokaman a kamaungan odino antokaman a deral, et diad ontan ontakot tan onkelaw kami!

²⁴ Sikayo tan amin da ray gagawaen yo et anggapoy kabaliksan; makapaingungot iray mangigagalang ed sikayo!

²⁵ Nampili ak na toon manaayam ed bokig, manlapud baybay awiten kon ondogpa. Gagatin-gatinan to ray manoley ya aliling day pitek, sikatoy singa managgaway banga a manggatin-gatin ed pitek.

²⁶ Siopad sikayoy nampasakbay a nagawa ya, pian nibaga mi a dugay impasakbay yo? Anggapod sikayoy akasalita na nipaakar ed saya; anggapoy akadngel a walay imbaga yo!

²⁷ Siak, say Katawan, so inmonan angibalitad Sion; Angibaki ak na angibalitad Jerusalem a kuanto, Onsasabi ray totoom! Onsesempet la ra!

²⁸ Nen nananap ak ed saray diriyos, anggapoy nibaga na anggan siopad sikara; anggapod sikaray makaebat ed saray tinepet ko.

²⁹ Andi-kana ra yan amin a diriyos: anggapon balut so nagawaan da makapoy tan anggapoy pakayari ira yan talintaoy diriyos.

42

¹ "Say Katawan kuanto, Saya so aripen ko a pinabiskeg ko sikatoy pinilik tan pakaliliketan ko. Pinanok na ispirtuk, tan sikatoy mangyakar ed balang bansa na inkatonung.

² "Ag to oneyag odino mangyatagey na bosis to; ag mambando ed saray dalan.

³ "Ag to poteren so pikewet a tanobung odino erepen so makuykuyep a lamparaan. Iyakar toy mansiansian inkatonung ed amin a katoowan.

⁴ "Ag naekalan na ilalo odino biskeg na linawa; iletneg tod mundo so inkatonung. Pampilalekan ya aalagaren na saray ararawin bansa so bangat to.

⁵ "Pinalsa na Dios iray katawenan tan impanat to ra; pinalsa toy mundo tan amin a manaayam dia; initdan toy bilay tan linawa iray amin a katoowan ed mundo. Et natan say Katawan a Dios kuantod aripen to,

⁶ "Siak, say Katawan, tinawag ta ka tan initdan ta kay pakayari a mangipakurang na inkatonung ed tapew na dalin. Diad panamegley mo misipanan ak ed amin da ray katoowan; diad panamegley mo mangyakar ak na silew ed saray bansa.

⁷ "Itdan moy pakanengneng iray bulag, tan ibolus mo ray akayorung ed ambilonget a prisowan.

⁸ "Yahweh so ngaran ko, Anggapoy arum a dios a makapibiang ed kagalangan ko; ag ko abuloyan a makapibiang iray talintaoy diriyos ed dayew ko.

⁹ "Tinmua la natan iray impapasakbay ko. Ibagak ed sikayo natan iray balon bengatla anggan kasakbayan na igapoy pakagawa ra.

¹⁰ Mankanta kayoy balon kanta ed Katawan; ikantam so dayew to, o intiron mundo. Idayew yo, sikayon mambiabiahid dayat; idayew yo, amin yon pinalsa a walad dayat! Mankanta kayo, sikayo ran arawin dalin tan amin yon manaayam ditan!

¹¹ Say kalawakan tan saray baley to et igalang da komun so Dios; igalang komun na saray totood Kedar! Saray totoon manaayam ed siudad na Sela et oneyag ira komun diad toktok na kapalandeyan lapud liket da!

¹² Saray manaayam ed arawin dalin et idayew tan igalang da komun so Katawan.

¹³ Say Katawan ompapaway a milaban a singa sondalon mibabakal; akaparaan tan mampilalek a mibakal. Oneeyag na eyag na bakal; ipapanengneng toy pakayari to sumpad saray kalaban to.

¹⁴ Say Dios kuanto, Abayag a panaon ya ag ak inmeseesel; ag ko inebetan iray totook. Balet natan sinmabi lay oras na igalaw ko; oneeyag ak a singa biin mampapasakit.

¹⁵ Deralen ko ray kapalandeyan tan saray kapokdulan, tan pamagaen ko ray dika tan saray kiew. Pagmaliwen kon pigaran kalawakan iray maawang ya ilog, tan pamagaen ko ray dipositoway danum.

¹⁶ Itabin ko ray bulag a totook diad saray dalan ya ag da nin balut nanakaran. Pagmaliwen kon liwawa so bilonget da tan pataren koy matibagkul a dalin da. Sikara yay sipan ko, et sumpalen ko ran sumpalen.

¹⁷ Amin da ray manmamatalek ed saray talintaoy diriyos ya ibabaga ran dios da iray imahin et napaabeba ra tan napelag irad kababaingan.

¹⁸ Say Katawan kuanto, Dengel kayo, sikayon telek a totoo! Konineng kayo, sikayo ran bulag!

¹⁹ Wala ta niy mapalaloy inkabulag to nen say aripen ko, mapalaloy inkatelek to nen say aripen kon ibabakik?

²⁰ Israel, amayamay so nanenengneng mo, balet anggapoy walad sika. Akalokas iray layag mo, balet anggapoy narerengel mo.

²¹ Say Katawan a Dios et mampilalek a mangilaban, kanyan itanduro to ray ganggan tan saray bangat to, tan labay to ya onuren ira na saray totoo to.

²² Balet natan asamsaman iray totoo to; akolung ira ed dalem na dalin tan niamut irad saray prisowan. Atakewan tan asamsaman ira, balet anggapoy onsingger a mangyagel ed sikara.

²³ Siopad sikayoy ondengel ed saya? Manlapud natan manasikaso kayo lan ondengel?

²⁴ Siopay angipalimad Israel ed saray managsamsam? Say dilin Katawan a nankasalananan tayo! Ag tayo nambilay onung ed linawa to odino inmonur ed saray bangat to.

²⁵ Lapud saya indapo tod sikatayoy pasnuk to tan impanirap to tayod bakal. Singa apoy ya amool ed intiron Israel so pasnuk to, balet ag tayo atalusan no antoy kabaliksan na nagagawa; ag tayon balut akaaral ed agawa.

43

¹ "Say Katawan ya amalsad sika, Israel, kuanto, Ag ka natatakotiyagel ta ka. Tinawag ta kad ngaran mokayaryan ta ka.

² "No ondalan kad aralem a danum, wala ak ed sika; ag ka natabunan na saray gunigon mo. No ondalan kad apoy, ag ka napoolan; ag ka napasakitan na saray ambelat a subok ya onsabid sika.

³ "Ta siak so Katawan a Dios mo, say masanton Dios na Israel, a mangilalaban ed sika. Ipatalok so Egipto, Etiopia tan Seba pian narondon ka.

⁴ "Ipatalok ya amin iray bansa pian nilaban koy bilay mo, lapud mabli kad siak tan lapud inaro ta ka tan itdan ta kay kagalangan.

⁵ "Ag ka nanatakotwala ak ed sika! Manlapud bokig tan sagur pasempeten ko ray totoom.

⁶ "Ibagak ed baybay ya ibolus to ra tan ibagak met ed abalaten ya ag to ra popokpokan. Ibagak ya abuloyan da ray totook ya ompawil a manlapud saray arawin dalin, ompawil iran manlapud amin a sokung na mundo.

⁷ "Sikaray dilin totook, tan pinalsak ira a mangiter ed siak na kagalangan.

⁸ "Say Dios kuanto, Awit yod korti iray totook. Walay mata ra, balet ag ira makanengneng; walay layag da, balet ag ira makadngel!

⁹ "Pantitipon yo ray amin a totoo ed saray bansa. Siopad saray diriyos da so makapangipasakbay ed nagawa ed arapen a panaon? Siopad sikaray angipasakbay ed nagagawa natan? Iyarap komun na sarayan diriyos iray tasi ra a mamaneknek ya ag ira alingo, a mangipaliwawa ed katwaan na saray salita ra.

¹⁰ Totood Israel, sikayo ray tasik; pinili ta kayon aripen ko, pian nakabatan yo ak tan manisia kayo ed siak tan natalusan yo a Siak si Siak. Likud ed siak anggapo lay arum a dios nen saman, natan, tan anggan kapigan.

¹¹ Bukbukor ko so Katawan, siak labat so makapangilaban ed sikayo.

¹² Impasakbay koy nagawa, insan inlaban ta kayo. Anggapoy dios na arum a bansa a nanggawad saya; sikayo ray tasik.

¹³ Siak so Dios tan Siak si Siak. Anggapoy makapaliis ed pakayarik; anggapoy makaoman ed antokaman a gagawaen ko.

¹⁴ Say masanton Dios na Israel, say Katawan a Mananondon yo, kuanto, Diad pangilaban kod sikayo, mangibaki ak na saray sondalo a mibakal ed Babilonia; igebak iray puirta na siudad, et magmaliw ya akis so eyag na saray totoo to.

¹⁵ Siak so Katawan, say masanton Dios yo. Pinalsa ta ka, Israel, tan siak so arim.

¹⁶ Nen saman a panaon, say Katawan nanggaway dalan a binmeltang ed dayat, say dalan ed madaluyon a danum.

¹⁷ Insulong tod kadederal iray makapanyarin sondalo, saray sondalon akakarwahi tan akakabayo. Atumtumba ra, et ag la ra makabangon, naandipat iran singa narep a silew na lamparaan!

¹⁸ Balet say Katawan kuanto, Ag kayo manmamatalek ed saray agawgawad imbeneg a panaon, odino pinunot iray agawa nen saman ni.

¹⁹ Talaranan yoy gawaen kon balo a bengatla. Nagagawa lananengneng yo la natan! Manggawa ak na dalan ed kalawakan tan itdan ta kayo na saray sobul diman.

²⁰ Igalang ak na anggan saray ayayep ed katakelan; idayew ak na saray asod katakelan tan saray abistrus no saray ilog et paagosen kod kalawakan, pian naitdan na danum iray totook a pinilik.

²¹ Sikaray totoon ginawak a para siak, mankanta ra na saray dayew ko!

²² Say Katawan kuanto, Balet sinmawa kad siak nen saman, Israel; ag mo ak inggalang.

²³ Ag mo ak inyakaran na karnirom a para bagat a popoolan; ag mo inkanan pangigalang ed siak iray bagat mo. Ag ta ka impansakbat na ambelat diad impamilit kod sikan mangibagat odino pinairap ta ka diad impankerew kod sikay insinso.

²⁴ Ag mo ak insaliwan na insinso odino pinenek ak na taba na saray tabay ayayep mo. Say agawa, ingen, et siak so impansakbat mo lapud saray kasalanan mo; pinakesaw mo ak lapud saray kaogsan a ginagawam.

²⁵ Anggaman ontan, siak so Dios a mamipirdonad saray kasalanan mo, et onyay gagawaen ko lapud inka-Dios ko. Ag ta ka singilen ed saray kasalanan mo.

²⁶ Onla ta ed korti; ipaway mo no antoy dalem mo! Iparontal mo ray pankatonungan mo a mamaneknek a dugay gagawaen mo!

²⁷ Say sankaonaan a lakim et nankasalanan; nankasalanan ed siak iray pangulom,

²⁸ tan saray manoley mo impagmaliw dan andi-kakanaan a pasen so santuariok. Lapud saya dineral koy Israel; inyabuloy kon napabaingan iray dilin totook.

44

¹ "Say Katawan kuanto, Dengel ka natan, Israel, ya aripen ko, saray totoon pinilik, saray kabyangay boleg nen Jacob.

² "Siak so Katawan ya amalsad sika; nanlapud inkianak mo, tinutulongan ta ka. Ag ka natatakot; sika so aripen ko, say toon pinilik tan inarok.

³ "Itdan ko na danum so amagamagan dalin tan paagosen ko so kinmelang a dalin na sobul na danum. Ikalbok ed saray anak mo so ispirituk; iter kod saray kabyangay boleg mo so bindision ko.

⁴ "Ontubo ran singa dikan malambut lawas ed kasasalug to, singa ra kiew a sausi ed gilig na managagos a danum.

⁵ "Sansakey ya ibagad satan na saray totoo, Kayaryan ak na Katawan. Ondago ran mikasakey ed saray totood Israel. Balang too itatak tod taklay to so ngaran na Katawan tan tawagen toy sikaton dili a sakey ed saray totooy Dios.

⁶ "Say Katawan a manooley tan mangyaagel ed Israel, say Katawan a Makapanyarin-amin, kuanto, Siak so sankaonaan tan say sankaonuran; anggapo lay arum a Dios no ag say siak labat.

⁷ "Nayarian ta na siopaman a gawaen so singa ginawak? Siopay akapangipasakbay ed amin ya agawa nanlapud gapo ya anggad samput na panaon?

⁸ "Ag kayo natatakot, totook! Amta yo a nanlapud saman a panaon ya anggad natan impasakbay koy amin ya agawa, et sikayo ray tasik. Wala ta niy arum a Dios? Wala ta niy makapanyarin dios ya ag kon balut akabatan?

⁹ "Andi-kakanaan iray amin a manggagaway talintaoy diriyos, tan anggapoy kana iray pabpablien dan diriyos. Bulag tan anggapoy mata iray mangigagalang ed sarayan diriyostan napelag irad kababaingan.

¹⁰ Anggapoy iter ton kaabigan so panggaway mital a talintao ya igalang a dios!

¹¹ Napaabeba ya amin iray mangigagalang ed talintaoy dios. Totoo labat iray manggagawa na talintaoy diriyos. Ondago ra komun a mantitipon tan salaysayen iranataktakot ira tan napelag irad kababaingan.

¹² Say managpanday na talintaon mital et tonawen tod apoy so mital. Martilyoen to na mabiskeg a taklay to so mital pian nagawan sakey ya imahin. Diad pankimey to, naerasan, naapgaan, tan nakesawan.

¹³ Sokaten na iskotur so sakey a poter na tibokel a kiew. Igolis to na tisa ed samay kiew iray nepeg ton gawaen. Kitikitan tod satan na saray kagawaan to, gawaen ton sakey a kaparpara na sakey a guapon laki, ta ilira tod dalem na abung to.

¹⁴ Nayarin mamatang na kiew a sidro ya ikana to, odino pilien toy kiew a lugo o saleng diad takel. Odino mantanem na kiew a lauril tan alagaren ton ompelag so oran a mamatubo ed intanem to.

¹⁵ Say sakey a too ikana ton itotongo iray arum a kabyangan na kiew tan say arum a kabyangan et gawaen ton talintao. Saray arum a parti parlangan to a pandangdangan to tan panggawaan to na tinapay; say arum a parti gawaen ton sakey a talintaoy dios, insan to galangen.

¹⁶ Parlangan to iray arum a parti na kiew; pankalutan to na karni, kanen to, tan napesel. Mandangdang tan ikuanto, Agaylay abig ta apetangan ak! Agaylay dakep yan apoy!

¹⁷ Say arum a parti na kiew gawaen ton sakey a talintaoy dios, insan to dakmomoan tan igalang. Pampikasian to tan kuanto, Sika so dios koilaban mo ak pa!

¹⁸ Diad gaway inkakulang-kulang da ra yan totoo ag da amtay gagawaen da. Ikokopit day mata ra tan sasaraan day kanunotan da ed katwaan.

¹⁹ Saray managgaway talintao et anggapoy pakatalus odino liknaan dan mangikuan, Namparlangan ko ray arum a kiew. Nanggawaan ko na kanen iray ngalab, tan nankalutan ko na karni insan ko kinan. Say arum ed samay kiew et ginawak a talintaoy dios. Et natan antoy agawak; anta sakey a poter na kiew et nakar kon dadakmomoan!

²⁰ Say ginawa to may too et anggapoy pidomaan tod pangan na dapul. Pinalikdo na makulang-kulang a kanunotan to, kanyan ag nayarian a tulongan. Ag to birbiren ed sikaton dili a say sankabembenan ton talintao et aliwan dios lamlamang.

²¹ Say Katawan kuanto, Tandaan mo ya, Israel; tandaan mo a sikay aripen ko. Pinalsa ta ka a magmaliw ya aripen ko, tan ag ta kan balut lingwanan.

²² Saray kasalanan mo et impapalir ko ra a singa lorem. Pawil kad siak; siak so mangilalaban ed sika.

²³ Eyag kayod liket, sikayon katawenan! Eyag kayo, sikayon aralem a pasen na dalin! Eyag kayod liket, sikayon kapalandeyan, tan amin yon kakiewan ed katakelan! Diad impangilaban tod saray totoo ton Israel impanengneng toy inkatalonggaring to.

²⁴ Siak so Katawan a manangilaban mo; siak so amalsad sika. Siak so Katawan a Manamalsad amin a bengatla. Siak labat so angipanat ed katawenan; nen pinalsak so mundo, anggapoy tinmulong ed siak.

²⁵ Pagmamaliwen kon andi-kabaliksan iray managbuyon tan andi-kakanaan iray managparles. Susumlangen ko ray salita na saray makabat tan ipapanengneng kod sikaran anggapoy kabaliksan so kakabatan da.

²⁶ Balet no walay ipasakbay na aripen ko, no walay ibakik a mangipaamta na saray planok gagawaen kon ontua ira man a pasakbay tan planok. Ibabagak ed Jerusalem a manayam lamet iray totood man, tan ibagak ed saray siudad na Juda a nipaalagey ira lamet. Onalagey lamet iray siudad ya aderal-deral.

²⁷ Diad sakey a ganggan ko namamagaan so dayat.

²⁸ Ikokuankod kinen Ciro, Sikay mangilaman ed siak a manoley; onuren mo so labay kon pagawad sika; iganggan mon nipaalagey lamet so Jerusalem tan nilira iray pundasion na Timplo.

45

¹ "Say Katawan pinili ton manari si Ciro. Tinoro to a manakep ed saray bansa; ibabaki ton mangekal na pakayari da ray arari; ilokas na Katawan iray puirta na saray siudad a looban nen Ciro. Say Katawan kuantod kinen Ciro.

² "Siak a diliy mangiparaan na dalan mo, pataren ko ray kapalandeyan tan saray kapokdulan. Igebak iray gansan puirta tan poteren ko ray balewet a balatyang.

³ "Itdan ta ka na saray kayamanan a manlapud saray ambilonget tan maamut a pasen; naamtaan mod satan a siak so Katawan, say Dios na Israel ya anawag ed sika ed ngaran mo.

⁴ "Totoroen ta kan ontulong ed aripen kon Israel, saray totoon pinilik. Initdan ta kay baleg a kagalangan anggaman ya ag mo ak kabat.

⁵ "Siak so Katawan; anggapo lay arum a Dios. Itdan ta kay biskeg a nakaukolan mo, anggaman ya ag mo ak kabat.

⁶ "Gagawaen ko ya pian naamtaan na amin a katoowan ed sankamundoan a siak so Katawan tan anggapo lay arum.

⁷ "Papalsaen ko so liwawa tan kabilongetan; iiter koy bindision tan ipapadalan koy deral. Siak a Katawan so manggagawa ed sarayan amin.

⁸ "Mangiter ak na pananalon singa oran a manlapud tawen; onsangiy dalin a mangawat ed oran et manrosas na kilalaban tan inkatonung. Siak, say Katawan, so mangyabuloy a nagawa ya.

⁹ "Makasopyat kasiy banga ed nanggawad sikato, say banga ya iyaliling to ray arum? Nayari kasin tepeten na banga no antoy gagawaen na dumadamilid sikato? Nayari kasin manriklamoy banga ya aliwan marunong so nanggawad sikato?

¹⁰ Nitepel kasi na sakey a too ya ikuan ed saray atateng to, Akin et onyay impanggawa yod siak?

¹¹ Say Katawan a masanton Dios na Israel, a walad lima toy nagawad arapen, kuanto: Anggapoy kanepegan mon manepet na nipaakar ed saray anak ko odino ibagam ed siak so nepeg kon gawaen!

¹² Siak so nanggawad mundo tan amalsad too a manayam ed tapew na dalin. Lapud pakayarik impanat koy katawenan; siak so makaoley ed agew, bulan, tan saray bitewen.

¹³ Siak a dili so anogsog ed kinen Ciro a manumpal na getmak tan mangoksuy ed amin a bengatla. Peteken koy amin a dalanen to. Ipaalagey to lamet so siudad kon Jerusalem, tan ibolus to ray totook ya adakep. Anggapoy angupa odino amasoksok ed impanggawa tod saya. Say Katawan a Makapanyarin-amin so nansalita.

¹⁴ Say Katawan kuantod Israel, Kayaryanen mo ray kayamanan ed Egipto tan Sudan, tan magmaliw ya aripen mo iray atatagey a totood Seba; akagolunggolung iran ontombok ed sika. Ondakmomo rad sika tan ibawag da, Walad sika so Diossikato labat so Dios.

¹⁵ Say Dios na Israel a mangilalaban ed saray totoo to et Dios ya iyaamut toy sikaton dili.

¹⁶ Nabaingan ya amin iray managgaway talintaoy diriyos; napelag iran amin ed kababaingan.

¹⁷ Balet ta inlaban na Katawan so Israel, tan mansiansiad ando lan ando so impanalo to; ag balut napelag ed kababaingan iray totoo to.

¹⁸ Say Katawan pinalsa toy katawenan sikato so Dios! Tinibokel tan ginawa toy mundo ginawa ton malet tan mansiansia lawas. Ag to ginawan anggapoy kabaliksan to, no ag ingen ginawa ton pasen a panayaman na saray totoo. Sikato so angikuan, Siak so Katawan, tan anggapo lay arum.

¹⁹ Ag ak nansalita ed maamut odino inamut koy getmak. Ag ko imbagad saray totood Israel ya anapen da ak ed maamut a pasen. Siak so Katawan, sasalitaen koy katwaan; Ipapaamtak no antoy maptek.

²⁰ Say Katawan kuanto, Mantitipon kayo, sikayon totood saray bansa, amin yon nilaban nen atalo so impirio; mamparontal kayod panalaysay ed sikayo! Saray totoon mampaparadan awit da ray talintao ra tan mampipikasi rad saray diriyos ya ag makapangilaban ed sikara totoo ran anggapon balut so amta!

²¹ Dago kayo tan iparontal yod korti so dalem yo; mampapanonan komun iray nidalem. Siopay abayag lan angipasakbay ed agawa? Aliwa tan siak, say Katawan, say Dios so mangilalaban ed saray totoo to? Anggapo lay arum a Dios likud ed siak.

²² Pawil kayod siak natan, et nilaban kayo, amin yon totoo ed intiron mundo! Siak labat so Dios, anggapo lay arum.

²³ Tua so sipan ko, tan ag balut naoman. Sasambaan kod siak a dili; Ondagod siak so balang sakey tan ontalimukor irad arap ko tan sambaan dan matoor irad siak.

²⁴ Ibaga ra a diad siak labat so pakalmoan na pananalo tan biskeg; balet amin da ray mamobosul ed siak et napelag irad kababaingan.

²⁵ Siak, say Katawan, ilaban ko ray amin a kabyangan na boleg nen Jacob, et idayew da ak.

46

¹ "Sikato la yay anggaan na saray diriyos na Babilonia! Nen saman inggalang na saray totoo si Bel tan Nebo, balet natan akalogan irad beneg na asno, makabelbelat irad saray naksawan lan ayayep.

² "Saray talintaoy diriyos et ag da nilaban so sikaran dili; adakep ira tan niakar irad arawi. Sikato la yay anggaan na saray diriyos na Babilonia.

³ "Dengel kayod siak, sikayon kabayangan na boleg nen Jacob, amin yon atilak a totook. Inasikaso ta kayo nanlapu lad inkianak yo.

⁴ "Siak so Dios yo tan asikasoen ta kayo anggad ontakken kayo tan ompoti lay buek yo. Ginawa ta kayo tan asikasoen ta kayo; tulongan tan iyagel ta kayo.

⁵ "Siopay pangiparaan yod siak? kuay Katawan. Wala niy arum a singa siak?

⁶ "Lolokasan na saray totoo iray supot da insan da ikakalbo ray balituk da; isisimbang da ray pilak ed simbangan. Manguupa ray platiron manggawa na dios; insan da dadakmomoan tan gagalangen so sakey a dios.

⁷ "Sasakbaten tan aawiten da; ililira rad sakey a pasen, tan manalagey diman, ag makaalis ed kawalaan to. No walay mampikasi ed sikato ag makaebat odino makapangilaban ed gunigon to.

⁸ "Tandaan yo ya, sikayo ran makasalanan; nudnunot yo ray ginagawak.

⁹ "Tandaan yo ray agawa nen saman; birbir yon bukbukor koy Dios tan anggapo lay arum a singa siak.

¹⁰ Nanlapud gapo impasakbay koy pansumpalan; abayag ko lan impasakbay no antoy nagawa. Imbagak a nasumpal a nasumpal iray planok; imbagak a gawaen kon gawaen iray amin a ginetmak a gawaen.

¹¹ Tatawagen kon ondago so toon manlapud bokig, onsibar a singa sakey ya agila tan gawaen to so implanok. Nansalita ak, et tuan nagawa so sinalitak.

¹² Dengel kayod siak, sikayon totoon anawet ya impanpuso, ya abaloan yon arawi ni so pananalo.

¹³ Papaasinggeren koy agew na pananalo aliwa lan arawi lamlamang. Ag la naabala so panalok. Ilaban ko so Jerusalem tan iter kod man so kagalangan na Israel.

47

¹ "Say Katawan kuanto, Babilonia, epas kad tan ed tronom tan yorung kad dabuk ed dalin. Nen saman singa ka sakey a birhin, sakey a siudad ya ag natalo, balet natan aliwa ka lan anlemek tan masimpit! Aripen ka la natan!

² "Patelek moy gilingan! Manggiling kay arina! Ekal moy pandung mo! Lakseb moy marakep a kawes mo! Itagey moy paldam diad ibaliw mod saray kolus.

³ "Nanengneng na saray totoo a labus ka; nanengneng da kan apaabeba tan abaingan. Ombawi ak, et anggapoy mamatondad siak.

⁴ "Imbolus itayo na masanton Dios na Israel say ngaran to et Yahweh a Makapanyarin-amin.

⁵ "Say Katawan kuantod Babilonia, Yorung kan andi eseesel tan dia kad ambilonget a pasen; ag da ka la tawagen a riyna na saray bansa!

⁶ "Akapasnuk ak ed saray totook; impasen kon ag ko la ra kayaryan: Impasilong ko rad pakayarim, et ag mo ra kinasian; anggan saray mamatakken pinairap mo ran tuloy.

⁷ "Abaloan mo a sika lawas so riyna, tan ag mo inngalngalep ira yan bengatla; ag mo anggan ninunot no kapigay pangangga ra.

⁸ "Dengel ka, sikan maarod like-liket, sika ya abaloan mon arawi kad kaatapan. Ipapasen moy sikan dili a matalonggaring a singa Dios ya anggapoy miparad sika. Abaloan mo ya ag kan balut nabalo odino nasalim so nabalangan na anak.

⁹ "Balet diad sakey a bekta, diad sakey ya agew, nagawa ra yan dua ed sika. Anggan antoy panggawam na amin a salamangka, nabalang moy asawam tan saray anak mo.

¹⁰ Anggapoy kapagaan mo ed panggagawam a kaogsan; abaloan mon anggapoy makanenengneng ed sika. Pinalikdo ka na kakabatan tan pakatalus mo, tan inkuanmod sikan dili, Siak so Dios anggapo lay arum a singa siak.

¹¹ Onsabid sikay deral, et anggapoy salamangkam a makapatondad saya. Biglan onsabid sikay desyang say desyang ya ag mon balut inilaloan!

¹² Ituloy moy panagsalamangkam tan say panagparles mo; inkakanam la ra nanlapu lad impanogaw mo. Angangko makatulong irad sika; angangko nataktakot mo ray kalaban mo.

¹³ Mapagpaga ka anggaman ya amayamay iray simbawad sika. Pamparontal mo la natan iray astrologom ta ilaban da ka saray totoon aaralen day kiwas da ray bitewen, saray totoon mangipapasen na ketegan da ray katawenan tan ibabaga rad sikan binulan no antoy nagawad sika.

¹⁴ Aliling da naaniy dayami, et poolan iran paandipaten na apoy! Ag da anggan nilaban so sikaran dili ag da natepelan so petang na dalang; aliwan makapinawa yan apoy a pandangdangan da.

¹⁵ Onyay pasen da ray astrologon pangipapanonan mo nanlapu lad impanogaw mo. Taynanan da ka tan onla la rad labay dan laen, tan anggapod sikaray natilak a mangilaban ed sika.

48

¹ "Dengel yo ya, sikayo ran totood Israel, sikayo ran totoon say sengeg yo et si Juda: Mansasamba kayod ngaran na Katawan tan ibabaga yon igagalang yoy Dios na Israel balet anggapoy kabaliksan iray salita yo.

² "Anggaman ontan ikikinon yon ibaga a mibabaley kayod masanton siudad tan manmamatalek kayod Dios na Israel, a say ngaran to et Yahweh a Makapanyarin-amin.

³ "Say Katawan kuantod Israel, Abaybayag ko lan impasakbay no anto ray nagawa; insan kabebekta, ginawak ira.

⁴ "Amtak ya anawet so olom, anaweawet a singa balatyang tan ag napiklon singa gansa.

⁵ "Lapud saya impasakbay ko lan abayag so nagawad sika ed arapen; kasakbayan a nagawa ray bengatla imbabawag ko la ra, pian ag mo ipasen a saray talintao tan saray imahin na diriyos mo so angyabuloy a nagawa ra ya.

⁶ "Agawa la ray amin ya impasakbay ko; nepeg mon birbiren yan katwaan. Natan ibagak ed sikay balon bengatla ya onsabi, bengatla ran nagawa ya ag ko impaamta nen saman.

⁷ "Natan ko labat iyaabuloy a nagawa ra; ag mo ni nadngelan ya agawa lay onya. Ta no agawa la nen saman, ibagam ya amtam lay nipaakar ed saya.

⁸ "Amtak ya ag ka napanmatalkan, a sika lawas so bantug a mananumpa. Sikato yay makasengeg ya ag mo yan balut nadngelan nen saman, ya ag mon balut naamingaw.

⁹ "Pian idayew na saray totoo so ngaran ko, popokpokan koy pasnuk ko, ag ko la idapo tan ag ta kayo la pateyen.

¹⁰ Sinubok ta kayod apoy na kairapan, singa pakalinis na pilak ed palbaan. Balet apapaway kon andi-kakanaan kayo.

¹¹ Lapud siak so makasengeg na panggagawak ed gagawaen ko ag ko abuloyan a nalemlemew so ngaran ko odino abuloyan koy siopaman a minabang ed kagalangan a siak labat so akankayaryan.

¹² Say Katawan kunato, Dengel kad siak, Israel, saray totoon pinilik! Siak si Siak, say sankaonaan, tan say sankaonuran!

¹³ Inlira na limak so pundasion na mundo tan impanat koy katawenan. No tawagen ko ray mundo tan saray katawenan, ondago ran tampol tan iparontal day sikaran dili.

¹⁴ Mantitipon kayo, amin yo, tan dengel yo ak! Anggapod saray diriyos so makapangipasakbay a say toon pinilik et dogpaan toy Babilonia; sumpalen to so labay kon pagawad sikato.

¹⁵ Siak so nansalita tan anawag ed sikato; inwanwan ko tan impanpalabok.

¹⁶ Singger kad siak natan tan dengel moy ibagak. Nanlapu lad gapo anggapoy iyaamut kod panagsalitak tan tinmua ya amin iray salitak. (Natan say Katawan a Dios initdan to ak na pakayari to tan imbaki to ak.)

¹⁷ Say masanton Dios na Israel, say Katawan a Mananondon yo, kuanto: Siak so Katawan a Dios yo, say Dios a mangibangat ed sikayo ed pankaabigan yo tan sikatoy mangiwanwan ed dalan na panagbilay a nepeg yon tombuken.

¹⁸ No komun ta dinmengel kayo ed saray ganggan ko, inmagos komun ed sikayo ray bindision a singa kolus ya ag balut naekatan. Sinmasabi komun ed sikayoy pananalo a singa saray daluyon ya onsisipwak ed gilig na dayat.

¹⁹ Singa la komun karakel na buer so karakel na saray kabyangay boleg yo, tan andi-duaruwa komun ya ag ko ran balut impapatey.

²⁰ Paway kayod Babilonia, taynanan yo man a pasen! Maliket yon ibawag so balita; ipaamta yod amin a pasen: Dinondon la na Katawan so aripen ton Israel!

²¹ Nen inwanwan na Katawan ed kalawakan iray totoo to, ag da asaliy napgaan. Pinapaway ton para sikara so danum ed baton-dampay; nilengat toy baton-dampay, et inmagos so danum.

²² Anggapoy kareenan so bilay da ray managkasalanan, kuay Katawan.

49

¹ "Dengel kayod siak, sikayon arawin bansa, sikayon totoon manaayam ed arawin lugar! Kasakbayan na inkianak ko, pinili ak la na Katawan tan tinoro to ak a magmaliw ya aripen to.

² "Ginawa ton singa matdem ya ispada iray salitak. Inyagel to ak na dilin lima to. Ginawa to ak a singa sakey a panan matdem tan sipaparaan ya ikana.

³ "Inkuantod siak, Israel, sikay aripen ko; lapud sika, idayew ak na saray totoo.

⁴ "Inkuanko, Nankimey ak, et anggapoy kabaliksan so impansagput ko! Inoput koy amin a biskeg ko, balet anggapoy agawaan ko. Anggaman ontan napanmatalkan koy Katawan a mangyaalagey na kanepegan ko: tumangan to ak lapud saray gagawaen ko.

⁵ "Kasakbayan na inkianak ko, tinoro ak la na Katawan; ginawa to ak ya aripen to a mamapawil ed saray totoo to, a mamapawil ed saray ataytayak a totood Israel. Say Katawan iitdan to ak na kagalangan; sikatoy panlalapwan na biskeg ko.

⁶ "Say Katawan inkuantod siak, Walay babaleg a kimey a pagawak ed sika ya aripen ko, ag ko labat paipawil ed sika so inkatalonggaring na saray totood Israel ya akapaliis ed patey, no ag ingen gawaen ta ka met a sakey a silew ed saray bansa pian nilaban iray amin a katoowan ed tapew na dalin.

⁷ "Say masanton Dios tan manangilaban na Israel kuanto ed bansan mapalaloy kababalaw to, a kabosul na saray bansa tan aripen na saray manoley: Saray arari nanengneng dan nibolus ka tan onalagey ira diad pamagalang da; nanengneng met na saray prinsipi so kabolus mo tan ondakmomo ra diad pangigalang dad sika. Nagawa ya lapud say Katawan pinili toy aripen to; say masanton Dios na Israel susumpalen to ray sipan to.

⁸ "Say Katawan kuantod saray totoo to, No onsabiy panaon na pangilaban kod sikayo, ipatnag kod siyayoy maung a linawak tan ebatan koy ikekerew yoy tulong. Bantayan tan iyagel ta kayo tan diad panamegley yo misipanan ak ed amin a katoowan. Panayamen ta kayo lamet ed dalin yo a natan et anggapoy kabaliksan to.

⁹ "Ikuankod saray priso, Laka kayo la! tan diad saray walad kabilongetan ikuanko, Paway kayo lad liwawa! Magmaliw iran singa saray karniro a mankakabkab ed kapokdulan;

¹⁰ ag iran balut naerasan odino naapgaan. Ag ira napasakitan na petang na agew tan makasinit a dagem, ta iwanwan ira na samay maarod sikara. Iwanwan to rad abay na sobul na danum.

¹¹ Manggawa ak na maawang a dalan ya ombeltang ed kapalandeyan tan iparaan koy dalan a panakaran na saray totook.

¹² Manlapud arawin dalin iray totook. Manlapu rad baybay tan diad sagur, tan manlapu rad Aswan diad abalaten.

¹³ Mankanta kayo, sikayon katawenan! Eyag kad liket, sikan mundo. Maksil a mankanta komun iray kapalandeyan! Ligliwaen na Katawan iray totoo to; kasian to ray totoon maniirap.

¹⁴ Balet inkuan na saray totood Jerusalem, Inkaindan itayo na Katawan! Alingwanan to tayo.

¹⁵ Kanyan say Katawan oneebat, Nalingwanan ta na ina so mansususon anak to tan ag to aroen so ogaw ya inyanak to? Anggan nalingwanan na ina so anak to, siak ag ta kayon balut nalingwanan.

¹⁶ Jesusalem, ag ta kan balut nalingwanan! Insulat kod saray dakolap ko so ngaran mo.

¹⁷ Magano lan onsabi ray mangipaalagey lamet ed sika, tan ontaynan iray nanderal ed sika.

¹⁸ Nengneng kad liber-liber ta imanom no antoy nagagawa! Mantitipon iray totoomonsesempet la ra! No panon ya anggapoy duaruwa a siak so mabilay a Dios, ontan met a nikinon mo ray totoom; nikinon mo ran singa pangikinon na nubia ed saray alahas to.

¹⁹ Aderal tan apaolyan so bansam balet natan magmaliw lan melmelag a panayaman na saray onsasabin totoo. Et napataynan ed arawi ira may nanderal ed sika.

²⁰ Saray totoom a nianak ed akabantakan dan dalin et ikuandad sika, Melag yan dalin nakaukolan tayo niy arum a panayaman!

²¹ Insan mo ibaga satan ed sikan dili, Siopay angyanak ed sarayan anak a para siak? Abalang ko ray anak ko tan ag ak la makaanak. Nibantak tan apataynan ak ed arawin dalin siopay amabaleg ed sarayan anak? Atilak ak a bukbukor iner so nanlapwan na sarayan anak?

²² Say Katawan a Dios kuantod saray totoo to: Sinsayan ko ray bansa et pasempeten da ray anak yo.

²³ Magmaliw a singa ama yo iray arari; magmaliw a singa ina yo iray riyna. Ondakmomo rad sikayo tan igalang da kayo; mapaabeba ran mangigalang ed sikayo. Naamtaan yod satan a siak so Katawan; ag nabaingan so siopaman a toon manalagar na tulong ko.

²⁴ Nibatik yo kasiy asamsam na sakey a sondalo? Niagel yo kasi ray priso na sakey a maruksan too?

²⁵ Say Katawan kuanto, Ontan so nagawa. Nibatik iray priso na sondalo tan naala so asamsam na maruksan too. Labanan koy siopaman ya onlaban ed sikayo, tan iyagel ko ray anak yo.

²⁶ Pagmaliwen kon mampapateyan iray mamapairap ed sikayo; nabuek irad pampatey na too. Diad satan naamtaan na amin a katoowan a siak so Katawan, say Mananondon tan Manangilaban yo. Naamtaan da a siak so makapanyarin Dios na Israel.

50

¹ "Say Katawan kuanto, Abaloan yo amon pinataynan ko ray totook a singa sakey a lakin angisian na asawa to? Kawalaan sirin na saray kasulatan na impansian? Abaloan yo amon inlako ta kayo ed inkadakep a singa sakey a too ya inlako ton aripen iray anak to? Andi, adakep kayod arawi lapud saray kasalanan yo; apataynan kayod arawi lapud saray kaogsan a ginagawa yo.

² "Akin et ag inmebat iray totook nen linma ak a mangilaban ed sikara? Akin et ag ira inmebat nen tinmawag ak? Makapoy ak ta a mangilaban ed sikara? Diad sakey a ganggan ko napaekat koy dayat tan magmaliw a kalawakan iray ilog, et ompatey iray sirad man lapud kakulangay danum.

³ "Nayarian kon pagmaliwen ya ambilonget so tawen, a singa walay paneermenan ton inatey.

⁴ "Imbangat na Katawan a Dios ed siak so salitaen ko, pian napabiskeg ko so linawa na toon mapaga. Kapag kabwasan iitdan to ak na pilalek ya ondengel ed ibangat to.

⁵ "Say Katawan initdan to ak na pakatalus, et ag ak linmaban ed sikato odino inarawian ko.

⁶ "Intaryak so beneg ko ed saray nansiplat ed siak. Ag ko ra binaat nen pinabaingan da ak, nen binagut da ray balbas ko tan nilulukdaan day lupak.

⁷ "Balet ag ak nasakitan na saray panamabaing da lapud tutulongan ak na Katawan a Dios. Pinakapal koy lupak pian nitepel ko ra. Amtak ya ag ak napelag ed kababaingan.

⁸ "Lapud asingger so Dios, tan paneknekan ton anggapoy kasalanan ko. Wala kasiy siopaman a makatepel a mangakusa ed siak? No wala, onla kamin dua ed korti, ta iparontal toy pangaakusaan tod siak.

⁹ "Say dilin Katawan a Dios so mangyaagel ed siak siopa sirin so makapaneknek a siak so nankasalanan? Naandipat ya amin iray mangaakusad siak; naandipat iran singa abel ya inoput na taboney.

¹⁰ Amin yon mangigagalang ed Katawan tan mangoonur ed saray salita na aripen to, nayarin ambilonget a tua so dadalanen yo, balet manmatalek kayod Katawan, ipia yod Dios so bilay yo.

¹¹ Sikayon mankokomplut a maneral ed saray arum et naderal kayo ed saray dilin komplut yo. Say dilin Katawan so mangyabuloy ya onyay nagawa; makapasinagem so pansumpalan yon kairapan.

51

¹ "Say Katawan kuanto, Dengel yo ak, sikayon malabay a nilaban, sikayo ran onsisingger ed siak ya onkerew na tulong. Nunot yoy baton-dampay a nanlapwan yo, say panagtabasan na bato ya akatabasan ed sikayo.

² "Nunot yoy laki yon Abraham, tan si Sara a sikaray sengeg na boleg yo. Anggapoy anak nen Abraham nen tinawag ko, balet binindisionan ko tan initdan ko na saray anak; pinarakel ko ray kabyangay boleg to.

³ "Kasian ko so Jerusalem saray amin a manaayam ed saray deral-deral to. Anggaman a kalawakan so dalin to, gawaen ko a sakey a tanamanan, singa samay tanamanan a ginawak ed Eden. Niwalad man so liket tan gayaga, tan saray kantan pangidayew tan pisalamat ed siak.

⁴ "Dengel yo ak, sikayo ran totook, dengel yoy ibabagak: Iter koy bangat ko ed saray bansa; mangiter ed sikara na liwawa iray ganggan ko.

⁵ "Masiglat ak ya onsabi ta ilaban ko ra; asingger lay agew na panalok; Siak a dili so manoley ed saray bansa. Saray arawin dalin aalagaren da ak ya onsabi: siilalo ran manaalagar ed siak a mangilaban ed sikara.

⁶ "Tangay kad katawenan; nengneng kad mundo! Naandipat a singa asewek so katawenan; nabuyak a singa daan a kawes so mundo, tan ompatey a singa apangat iray totoo to. Balet mansiansia so kilalaban ya iter ko, ag mangangga so pananalok.

⁷ "Dengel yo ak, sikayon makaamta na inkatonung, sikayo ran mabmabli ed puso, yoy bangat ko. Ag kayo natatakot no balbalawen tan pabpabaingan kayo na saray totoo;

⁸ "naandipat iran singa ataboney a kawes! Balet mansiansia so kilalaban ya iter ko; say pananalok nasungdoan toy amin a panaon.

⁹ "Liing ka pa, Katawan, ta tulongan mo kami! Ikanam pa so pakayarim ta ilaban mo kami; ikanam pa a singa ginawam nen saman. Sika so nantetegteg ed Rahab a dragon ed dayat.

¹⁰ Sika met so amaekat ed dayat tan nanggawa kay dalan a binmeltang ed dayat, pian makadalan ira may iyaagel mo.

¹¹ Onsabin magaygayaga ed Jerusalem ira may inyagel mo, mankanta tan maneyag ira lapud liket. Manliket ira ed ando lan ando, naandi lad bilay da so ermen tan dageyem.

¹² Say Katawan kuanto, Siak so mamapabiskeg ed sikayo. Akin et takotan yoy too ya ompatey, ya ag mambayag a mambilay a singa dika?

¹³ Alingwanan yo lay Katawan a nanggawad sikayo, ya angipanat ed katawenan tan angiletneg na saray pundasion na mundo? Akin et antakot kayo lawas ed pasnuk da ray mamapairap ed sikayo, saray sipaparaan a maneral ed sikayo? Ag kayo la nadiwit na ontan lan pasnuk da.

¹⁴ Ag mabayag nabolus la ray priso; mambilay ira na andokey tan nawalaan ira na amin a nakaukolan dan kanen.

¹⁵ Siak so Katawan a Dios yo; kikimbogen koy dayat tan panuungolen ko ray daluyon to. Yahweh a Makapanyarin-amin so ngaran ko!

¹⁶ Impanat koy katawenan tan inlirak iray pundasion na mundo; kuankod saray totood Jerusalem, Sikayo ray totook! Iter kod sikayo ray salitak, tan iyaagel ta kayo diad panamegley na dilin limak.

¹⁷ Jerusalem, liing ka! Molagat ka tan bangon ka! Inminom kad kupa na dusa a diad pasnuk na Katawan et inter tod sikan inomen mo; ininom mo, et nampadongilngil ed sika.

¹⁸ Anggapoy mangiwanwan ed sika, anggapod saray totoom so mangitabin ed sika.

¹⁹ Duaran deral so dinmalan ed sika: dineral na bakal so dalin mo tan naerasan iray totoom. Anggapoy siopaman a mangabagey ed sika.

²⁰ Diad suyok na balang dalan mamparogsod kapoy iray totoom; singa ra ulsan narel ed iket na umaanop. Alikna ray sulit na pasnuk na Dios.

²¹ Sikayon maniirap a totood Jerusalem, sikayon mandongilngil a singa kayo abuek,

²² iyaagel kayo na Katawan a Dios yo tan kuanto, Eekalen koy kupan inter kod sikayo lapud pasnuk ko. Ag yo la nepeg ya inomen so alak a makapadongilngil ed sikayo.

²³ Iter ko lad saray nampapariap ed sikayo, saray amarokul ed sikayo ed saray dalan, insan da kayo ginagatinan a singa kayo dotak.

52

¹ "Jerusalem, mampabiskeg ka tan mampatalonggaring ka lamet! Masanton siudad na Dios, kawesan moy sikan dili na kagalangan! Ag lan balut looban na saray pagano iray puirtam.

² "Pokpokan moy dabuk ed sikan dili, O Jerusalem! Bangon kad dabuk tan yorung kad tronom! Okbar yoy golungolung ya akasinger ed sikayo, sikayon adakep a totood Sion!

³ "Say Katawan a Dios kuantod saray totoo to, Nen nagmaliw kayon aripen, anggapoy kuartan imbayar; ontan met anggapoy kuartan ibayar diad panondon ed sikayo.

⁴ "Nen linma kayon nanayam a sangkaili ed Egipto, linma kayod dilin linawa yo; balet say Asiria inala to kayod pasootan tan anggapo so antokaman ya imbayar to.

⁵ "Natan say agawad sikayod Babilonia et singa samay agawa lad sikayo nen saman; aripen kayo, balet anggapoy antokaman ya imbayar. Saray manooley ed sikayo et mapaatagey tan malastug ira tan lawas dan ipapanengneng so ag da pangingalngalep ed siak.

⁶ "Onsabiy agew a birbiren yon siak so Dios tan siak so akisalita ed sikayo.

⁷ "Agaylay abig a nengnengen so ibabaki ya onsasabin bebeltangen toy kapalandeyan a taruk toy maung a balita, say balita na kareenan! Ibabawag toy pananalo tan kuantod Sion, Ari so Dios mo!

⁸ "Maneeyag iray mangguaguardiad siudad, mambabansag iran oneeyag lapud liket. Nanengneng dad dilin mata ra so ipapawil na Katawan ed Sion.

⁹ "Ikasil yoy pankanta yo lapud liket, sikayo ran deral-deral na Jerusalem! Ta say Katawan iyagel toy siudad to tan ligliwaen to ray totoo to.

¹⁰ Ikana na Katawan so masanton pakayari to; ilaban to ray totoo to, tan nanengneng ya na sankamundoan.

¹¹ Ag yo sasaewen a taynan so Babilonia, amin yon umaawit na saray kagawaan na Timplo. Ag yo didiwiten so antokaman a marotak onung ed ganggan; pansiansia yon masanto so sikayon dili tan taynan kayo.

¹² Ag kayo natan nepeg ya ontaynan a magangganat; ag yo ipapasen ya onlilimot kayon ontaynan. Say Katawan a Dios yo so mangiwanwan ed sikayo tan mangyagel ed sikayod amin a dapag.

¹³ Say Katawan kuanto, Maung so kasumpalay kimey na aripen ko; ontan lay kitanduro tan kigalang to.

¹⁴ Amayamay iray atalagnaw nen anengneng day aripen ko; asugat-sugat so intiron laman to kanyan singa aliwa lan tooy nengneng to.

¹⁵ Balet natan amayamay a bansay mankelaw ed sikato, tan diad pankelaw da ray arari ag ira makaskasel. Nanengeng tan natalusan day ag da ni akabatan nen saman.

53

¹ "Onebat iray totoo, Siopa kasiy anisia ed ibabalita mi natan? Siopa kasiy akabirbir ed pakapanyari na Katawan ed sayan agawa?

² "Linawa na Katawan a say aripen to et ontubo a singa tanaman a say kawalaay lamut to diad amagan dalin. Aliwa-liwa so inalageyan to odino nengneng to, kanyan ag itayo naayat ya onlinggis ed sikato. Anggapoy karakpan ed sikato, kanyan ag itayo natanggoyur ya onsingger ed sikato.

³ "Binabalaw tan impopolisay na totoo; intepel toy kairapan tan sulit. Anggapoy anggan onnengneng ed sikato ag inasasikaso na totoo a singa anggapoy kabaliksan ton too.

⁴ "Balet intepel toy kairapan a nepeg tayo komun a nanirapan, say sulit a nepeg tayo komun a nilikna. Ingen say abaloan tayo samay kairapan to et dusan inter na Dios ed sikato.

⁵ "Balet asugat-sugat lapud saray kasalanan tayo, apekpekpek lapud saray kaogsan a ginagawa tayo. Apaabig itayo lapud dusan nilikna to; lapud saray siplat a dinmadapod laman to pinmawil so gendat a biskeg tayo.

⁶ "Nen saman singa tayo saray karniron abalang, manaakar ed dilin dalan to so balang sakey ed sikatayo. Balet impasakbat na Katawan ed sikato so dusan kanepegan tayo.

⁷ "Mapalaloy inkairapan to, balet sipapaabeban nantepel; ag ton balut nambalikas na anggan sakey a salita. Aliling toy sakey a kordiron magano lan patasen, singa sakey a karniron magano lan katliay bago, ag ton balut nambalikas na anggan sakey a salita.

⁸ "Inerel da tan sinintinsiaan da, insan da tinengneng a pateyen, et anggapoy wala ed saray totoo so nansumpalan to. Pinatey lapud saray kasalanan da ray totoo tayo.

⁹ "Nisorub ed lobuk a kaiba to ray totoon maoges; nipompon a kaiba to ray totoon mayaman, anggaman ya ag balut nanggaway kaogsan odino nantila.

¹⁰ Say Katawan kuanto, Linawak a sikatoy manirap; sakey a bagat a makapirdonay kasalanan so impatey to. Kanyan nanengneng to ray kabyangay boleg to; andokey so pambilay to, tan diad panamegley to maung so pansumpalay getmak.

¹¹ Kayari na panirap to legan ton mambilay, nawalaan lamet na gayaga; naamtaan to ya aliwan andi-kakanaan so impanirap to. Say matoor ya aripen ko a pakakaliketan ko et sakbaten toy dusa na amayamay a totoo tan, lapud sikato, pirdonaen ko ra.

¹² Kanyan itdan ko na pasen na kagalangan, sakey a pasen a nakaiba to ray matalonggaring tan makapanyarin totoo. Sibobolus ton inter so bilay to tan say impatey to kapara na impatey na saray totoon maoges. Inala toy pasen da ray amayamay a makasalanan tan impikasi ton napirdona ra.

54

¹ "Jerusalem, singa ka biin lepes, balet natan makapankanta tan makapaneyag ka lapud liket. Nawalaan ka natan na saray anak a dakel ni nen saray anak na biin ag balut tinaynan na asawa to.

² "Pabaleg moy tuldan panaayaman mo; parokey moy singer to tan paletan mo ray palpal to!

³ "Paawangen moy ketegan mo ed amin a dapag; nabawi na saray totoo so dalin a panaayaman natan na saray arum a bansa. Napano na saray totoo iray siudad ya ataynan ira natan.

⁴ "Ag ka natatakotag ka la napelag ed kababaingan; ag ka la napaabeba. Nalingwanan moy kalamangan mo nen malangwer ka nin asawan bii, tan say ontan lan kaermenan mon sakey a balo.

⁵ "Magmaliw a singa asawam a laki so Amalsad sika Yahweh a Makapanyarin-amin so ngaran to. Ilaban ka na masanton Dios na Israel sikatoy manoely ed intiron mundo.

⁶ "Israel, singa ka malangwer ya asawan bii, a tinaynan na asawa to kanyan mapalaloy segsegang mo. Balet tinawag ka lamet na Katawan a kuanto,

⁷ "Diad maganon bekta tinaynan ta ka; balet lapud ontan lan panangarok ed sika sayakopen ta ka.

⁸ "Diad maganon bekta tinaynan ta kan walay pasnuk ko, balet andi-anggaan kon ipanengneng so panangarok ed sika. Saya sirin so ibabaga na Katawan a mangilalaban ed sika.

⁹ "Nen panaon nen Noe insipan ko ya ag ko la delapen so intiron mundo. Isipan ko natan ya ag ak la mampasnuk ed sika; ag ta ka la pampasnukan odino dusaen.

¹⁰ Nayarin nakusbo ray kapalandeyan tan saray kapokdulan, balet ag manganggay panangarok ed sika; Ando lan andon sumpalen koy sipan kon mangiter na kareenan. Saya sirin so ibabaga na Katawan a mangaarod sika.

¹¹ Say Katawan kuanto, O Jerusalem, sika a maniirap tan kaskasian a siudad, tan anggapoy manligliwad sika, saray mabmablin bato so ikanak ed pamaalagey ko lamet na saray pundasion mo.

¹² Rubi ray ikanak ed pangipaalagey kod saray torim, bato ran mankidyam a singa apoy iray ikanak ed saray puirtam, tan alahas iray ikanak ed padir.

¹³ Siak a dili so mambangat ed saray totoom tan mangiter ed sikara na ontan lan aligwas na bilay.

¹⁴ Say inkatonung tan say kaptekan so mamabiskeg ed sika. Niarawi ka ed kaatapan na panamairap tan panagtaktakot.

¹⁵ No walay ondogpad sika, ondogpa ya anggapoy abuloy ko; Natumba so siopaman ya onlaban ed sika.

¹⁶ Pinalsak so pumapanday a mampaparlang na apoy tan mamipitpit na saray gawaen ya armas. Pinalsak met iray sondalo, a mangikakana na saray armas a pamatey.

¹⁷ Balet anggapoy armas a makapasakit ed sika; walay niebat mo ed amin a mangakusa ed sika. Iyagel ko ray aripen ko tan panaloen ko ra. Say Katawan so nansalita.

55

¹ "Say Katawan kuanto, Dago kayo, amin yon napgaanniay danum! Dago kayo, sikayon anggapoy kuarta manaliw kayoy trigo tan mangan kayo! Dago kayo! Manaliw kayoy alak tan gatas anggapoy nepeg yon bayaran!

² "Akin et gagastosen yoy kuarta yo ed antokaman ya ag makapenek? akin et gagastosen yoy suildo yo, et siansian narasan kayo? Dengel yo ak tan gawa yoy ibabagak, et manliket kayo ed sankananaman iran kakanen.

³ "Dengel kayo natan, sikayon totook, tan dago kayod siak; dago kayod siak et nawalaan kayoy bilay! Ando lan andoy pisipanan kod sikayo tan iter kod sikayoy bindision ya insipan kod kinen David.

⁴ "Ginawak a pangulo tan manoley si David ed saray bansa, tan diad panamegley to impanengneng kod sikaray pakayarik.

⁵ "Tawagen yo natan iray arum a bansa; ag da kayo amta nen saman, balet natan mambabtik iran ondago a mikasakey ed sikayo! Siak, say Katawan a Dios yo, say masanton Dios na Israel, so makaoley ed pakasumpal ed saya; itdan ta kayo na kagalangan tan dayew.

⁶ "Pawil kayod Katawan tan mampikasi kayod sikato, natan ta asingger ni.

⁷ "Saray makasalanan a totoo et ibeneg da komun so kabibilay da tan omanen day panagnunot da. Ompawil ira komun ed Katawan a Dios tayo, ta mapangasi tan sipaparaan a mamirdona.

⁸ "Say Katawan kuanto, Saray kanunotan ko et aliwan singa saray kanunotan yo, tan saray kagagawak et aliwan singa saray kagagawa yo.

⁹ "No panoy kaatagey na saray katawenan ed mundo, ontan met so kaatagey na saray kagagawa tan saray kanunotan ko ed saray kagagawa tan saray kanunotan yo.

¹⁰ Say salitak ed singa yilo tan singa oran ya ompepelag a manlapud tawen a manalog ed dalin. Patutuboen da ray tanaman a mangiiter na bokel ya itanem tan say bunga a kanen.

¹¹ Ontan met so pagmaliwan na salitan ibabalikas ko ag ompawil ed siak ya anggapoy agawaan to; sumpalen toy antokaman a ginetmak tan gawaen toy angibakian kon gawaen to.

¹² Maliket kayon ontaynan ed Babilonia; mareen kayon nipaway ed siudad. Mankanta ray kapalandeyan tan saray kapokdulan, tan mantipak ed liket iray kakiewan.

¹³ Ontubo ray kiew a sipris ed pasen a kawalaan da ray sabitan natan; ontubo ray kiew a mirtil ed pasen a totobuan natan na saray ambabaing. Sikato yay tanda a mansiansia lawas, sakey a tanda a mangipanunot ed ginawak, siak a Katawan.

56

¹ "Say Katawan kuantod saray totoo to, Gawa yo so katonungan tan kaptekan, ta ag mabayag ilaban ta kayo.

² "Bindisionan ko ray totoon ngingilinan da lawas so Agew na Panagpainawa tan ag da susumlangen so ganggan nipaakar ed sayan agew. Bindisionan ko ray ag manggagawa na antokaman a kaogsan.

³ "Say toon taga arum a bansa ya akikasakey ed saray totoo na Katawan et ag to nepeg ya ikuan, Say Katawan ag to ak pangigalangen a kaibak iray totoo to. Say toon kapun ag ton balut nepeg a nunoten a lapud ag to makaanak et ag to makapikasakey ed saray totooy Dios.

⁴ "Say Katawan kuantod satan a too, No ngilinan moy Agew na Panagpainawa tan gawaen moy makapaliket ed siak tan matoor mon sumpalen so impisipanan ko,

⁵ "nanunotan ed Timplok tan diad saray totook so ngaran mo. Mabayag ni so pakanunot ed sika nen say no wala ray anak mon lalaki tan bibii. Ag kan balut nalingwanan.

⁶ "Say Katawan kuantod saray sangkailin nagmaliw a kabyangan na saray totoo na Katawan, a mangaaro tan manlilingkur irad sikato, ngingilinan day Agew na Panagpainawa, tan matoor dan susumpalen so impisipanan to:

⁷ "Iyakar ta kayod Sion, say masanton palandey ko, panliketen ta kayo ed dalem na abung kon panagpikasian, tan awaten ko ray bagat ya isaklang yod altar ko. Natawag so Timplok ya abung na panagpikasian na saray totoo ed amin a bansa.

⁸ "Say Katawan a Dios ya angisempet ed saray totoo ton Israel manlapud saray bansan nibantakan da et insipan to a pikasakeyen to nid sikara iray arum a totoo.

⁹ "Say Katawan imbaga tod saray arum a bansa ya ondago ran singa saray ayayep ed takel tan buagen da ray totoo to.

¹⁰ Kuanto, Amin da ray pangulo a kanepegan day mamasakbay komun ed saray totook et bulag ira! Anggapoy amta ra. Singa ra bantay ya aso ya ag makadangulmandokdokul ira labat a mankogkogip. Agaylay panlabay dan onogip!

¹¹ Singa ra masisiban aso ya ag balut napepesel. Anggapoy pakatalus da ra yan pangulo. Gagawaen na balang sakey ed sikara so labay to tan say dilin pankaabigan to so aanapen to.

¹² Sarayan bueken kuanda, Mangala tayoy alak tan maninom tayoy laba-labay tayo! Nabwas lalon maliket tayo, ta dakel niy alak a nainom tayo nen say natan.

57

¹ "Ompatey iray matonung, et anggapoy toon makatalus odino mangabagey. Balet no ompatey ira, anggapo lay makasigensigen ed sikara.

² "Ta diad ipatey na saray totoon matonung nagamuran day kareenan tan inawa.

³ "Dago kayo dia a pasintinsiaan, sikayon makasalanan! Anggapoy pidomaan yod saray managanito, managkalugoran, tan saray marotak a bibii.

⁴ "Siopay luludlureyen yo? Sikayon matitila, siopay kakantiawan yo?

⁵ "Igagalang yo ray diriyos na inkabona diad panaakdulan yod silong na saray masanton kiew yo. Ibabagat yo ray anak yo diad saray ongib na ankakabaleg a bato diad gilig na saray kolus.

⁶ "Mangaala kayod man na saray pino-pinon bato, insan igagalang yo ran diriyos. Iibungan yo ra na alak a pinagkabagat ed sikara tan iyaakaran yo ra na saray bagat a trigo. Abaloan yon napapaliket yo ak ed saraya?

⁷ "Kalab-kalab kayod tagey na kapalandeyan a mangisaklang diman na saray bagat tan diman kayo met manaakdulan.

⁸ "Ililira yod saray beneg na kaput yo iray mabanbanday a talintao yo. Ikakaindan yo ak; manlalabus-lakseb kayo, insan kayo onsasapat ed saray ankakabaleg a katri yo a kaiba yo ray kainarowan yon uupaan yo tan diman yo ra aakdulan. Diman yo pepeneken so kaliktan na laman yo.

⁹ "Popoyukan yoy laman yo na saray nandoroman pabalingit, insan kayo mangigalang ed dios a Moloc. Diad pananap yo na saray diriyos ya igalang yo, mangibabaki kayod ararawin pasen, ya anggan diad pasen a panaayaman da ray inaatey.

¹⁰ Pakekesawen yoy sikayon dili diad panaanap yo na arum a diriyos, balet ag yo totondaan so mananap. Nununoten yo a pabibiskegen kayo na saray mabambanday a talintao yo, kanyan ag kayon balut nakekesawan.

¹¹ Say Katawan kuanto, Siopa ra yan diriyos a mamapatakot ed sikayo, kanyan tilatilaan yo ak tan sigput yo ak lan lilingwanan? Tinondaan yo lay pangigagalang yod siak lapud abayag ak ya ag oneseesel?

¹² Abaloan yo a maung so gagawaen yo, balet iparontal koy kagagawa yo, et ag kayo natulongan na saray talintao yo.

¹³ No onkerew kayoy tulong, pailaban kayod saratay talintaoy diriyos yo. Diad sakey a siplug na dagem, nibantak ira! Balet saray manmamatalek ed siak et nakayaryan day dalin tan igalang da ak ed Timplok.

¹⁴ Say Katawan kuanto, Papawil yod siak iray totook. Ekal yo ray amin a makasbel ed dalanen da! Manggawa kayoy dalan tan iparaan yo!

¹⁵ Siak so atagey tan masanton Dios a mambibilay ed ando lan ando. Manaayam ak ed atagey tan masanton pasen, balet manaayaman ak met ed kawalaan da ray mapaabeba tan magbabawin totoo, pian nipawil koy biskeg na linawa ra tan say ilalo ra.

¹⁶ Initdan ko na bilay iray totook, tan ag ko ituloy so pangakusak ed sikara odino pamasnuk kod sikara ed ando lan ando.

¹⁷ Akapasnuk ak ed sikara lapud kasalanan da tan say inkaagom da, kanyan dinusak ira tan inkaindan ko ra. Balet anawet so olo ra tan intuloy dan inonur so labay da.

¹⁸ Anengneng koy ginagawa ra, balet paabigen ko ra. Iwanwan ko ra tan tulongan ko ra, ta ligliwaen ko ray maermen.

¹⁹ Itdan ko ran amin na kareenan, amin da ray walad arawi tan saray walad asingger! Paabigen ko ray totook.

²⁰ Balet saray totoon maoges singa ra madaluyon a dayat, a dotak tan linang so isasakbit da.

²¹ Anggapoy kareenan da ray makasalanan, kuay Katawan.

58

¹ "Say Katawan kuanto, Eyag kayod anggaay nayarian yo! Ibaga yod saray totook ya Israelita iray kasalanan da!

² "Inagew-agew da ak ya igagalang, tan ibabaga ra a maseet iran mangaamta na linawak tan mangoonur na saray ganggan ko. Kekerewen dad siak ya itdan ko ray matonung iran ganggan tan maliket ira konon mangigagalang ed siak.

³ "Tepet na saray totoo, Akin et manayuno kami no ag lamlamang imanoen na Katawan so panayuno mi? Akin et manayuno kami anta ag met lamlamang imanoen na Katawan so ag mi pangan. Say Katawan kuantod sikara, Say katwaan to ibabansag yod panagayuno yo so panggagawa yoy pankaabigan yon dili tan say pamapairap yod saray kumikimey yo.

⁴ "Say panaayuno yo pagmamaliwen to kayon maruksa, tan mankokolkol kayo tan manlalaban kayo. Abaloan yo dengelen ko ray pikakasi yo lapud sayan panagayuno yo?

⁵ "No manaayuno kayo, papairapen yoy sikayon dili; itetewek yon singa dika so olo yo tan mangyaaplag kayoy sako tan tatayakan yoy dapul so dokulan yo. Ontan so tatawagen yon panagayuno? Abaloan yon manliket ak ed satan?

⁶ "Say labay kon panagayuno saya: Okbar yoy golungolung na panamairap tan ekal yoy pako na panagpikewet yo ed inkatonung, tan ibolus yo ray napapairap.

⁷ "Itdan yo na kakanen iray narasan tan parawes yod kaabungan yo ray mairap-bilay ya anggapoy abung. Itdan yo na kawes iray anggapoy nipales, tan ag yo papaliisay pakatulong yod saray kakanayon yo.

⁸ "Diad satan say panangasik onwandag ed sikayo a singa ibutay na agew ed kabwasan tan onabig a tampol iray sugat yo. Wala ak lawas ed dikingan yo a mangilaban ed sikayo; say kiwawalak et iyagel to kayo ed anggan iner a pasen.

⁹ "No mampikasi kayo, ebatan ta kayo. No ontawag kayod siak, eselan ta kayo. No patondaen yoy panamairap yod kapara yon totoo, say panangipanengneng yoy panagbosul yo, tan say panagsalita yoy maoges;

¹⁰ no itdan yoy nakan iray narasan tan iter yoy nakaukolan da ray walad pankaukolan, magmaliw a singa liwawad kaagwan so bilonget ed liber-liber yo.

¹¹ Iwanwan ta kayo lawas tan penekan ta kayo na maabig iran bengatla. Pansiansiaen ta kayon mabiskeg. Magmaliw kayon singa sakey a tanamanan a walay daakan a danum to, singa sobul na danum ya ag balut naekatan.

¹² Pasimbaloen ya ipaalagey na saray totoo yo iray abayag lan aderal-deral ya ayaman yo, ipaalagey da ra lamet ed saray daan a pundasion. Natawag kayo a totoon angipaalagey lamet ed saray ageba tan saray aderal-deral ya abung.

¹³ Say Katawan kuanto, No ipasen yon masanto so Agew na Panagpainawa tan ag yo anapen so pankaabigan yon dili ed satan ya agew; no pablien yo so masanton agew ko tan pagalangan yo diad ag yo pambiahi, pankimey, odino pansalita na andi-kabaliksan diad satan ya agew,

¹⁴ narumog yod satan so liket ya iter na panlingkur ed siak. Pagmaliwen ta kayon galgalangen na sankamundoan, tan manliket kayo ed panayam yo ed dalin ya inter kod laki yon Jacob. Siak, say Katawan, so nansalita.

59

¹ "Ag yo nununoten a say Katawan et makapoy, kanyan ag to kayo nilaban odino telek, kanyan ag to kayo narengel no onkerew kayoy tulong!

² "Saray kasalanan yo so makasengeng na ag to idengel ed sikayo. Saray kasalanan yo so mamapasian ed sikayo ed Dios no mangigalang kayod sikato.

³ "Nankasalanan kayod panagtila yo, panagduksa yo, tan panagpatey yoy too.

⁴ "Mangisesegep kayoy kaso ed korti, balet andi kayo ed katonungan. Saray tila so panmamatalkan yod panalo yo. Papasakitan yo ray arum a totoo diad panggagawa yod saray maoges a plano yo.

⁵ "Aliling day iknul na nanditan oleg iray maoges a pankokomplut yo. Ompatey so mangan na iknul, ta no teraken mo oleg so ompaway! Anggapoy kaabigan a niiter ed sikayo na saray pankokomplut yosinga ra andi-kakanaan a kawes a ginawad linat na genggeng!

⁶

⁷ "Maoges lawas iray plano yo, tan agaylay siglat yon manumpal. Bengat-bengat kayon mamapatey na saray totoon anggapoy kasalanan. Deral tan bagbag so ititilak yo ed inerman a laen yo,

⁸ "tan maatap so bilay na amin a too no siber-siber kayo. Andid katonungan iray amin a gagawaen yo. Pikewet a dalan so totombuken yo, tan maatap so bilay na amin a manakar ed satan a dalan.

⁹ "Saray totoo kuanda, Amta tayo la natan no akin et ag itayo iyagel na Dios ed saray mamapairap ed sikatayo. Pampipilalekan tayoy liwawan pankurangan, balet bilonget labat ya amin so wala,

¹⁰ tan solingsoling itayon singa tayo bulag. Nipapatakba itayo anggan kagkaagwan; singa itayo manaakar ed labi, singa tayo walad ambilonget a pasen a panaayaman da ray inaatey.

¹¹ Ataktakot tan maerermen itayo. Pampipirawatan tayon say Dios ilaban to itayod kakairapan tan kalalames tayo, balet anggapoy naalagar tayo.

¹² Katawan, amayamay iray kaogsan a ginagawa mi sumpad sika. Aakusaen kami na saray kasalanan mi. Malinew so pakaamta mid saray kasalanan mi.

¹³ Sinmumpa kamid sika, impolisay mi ka, tan ag mi ka inonur. Pinapairap mi ray arum tan inmarawi kamid sika. Pikewet iray kanunotan mi; tila ray salita mi.

¹⁴ Apaarawi lay inkatonung, tan ag makaasingger lay kaptekan. Niparokul ed plasa so katwaan, tan anggapod may pasen na inkatoor.

¹⁵ Nanaandipat lay amin ya inkatoor kanyan siopamay ontondan manggaway kaogsan et sikato so panggawaan day kaogsan. Anengneng ya na Katawan, et naermenan lapud inkaandi na inkatonung.

¹⁶ Mankelaw ed impakanengneng to ya anggapoy ontulong ed saray napapairap. Kanyan ipakana toy dilin pakayari to ed pangyagel tod sikara tan say panalo to.

¹⁷ Isolung ton singa kawes a mital ed pagew to so inkatonung, tan singa hilmit so pakayarin mangilaban. Kawesan toy sikaton dili na ontan lan pampilalek a mametek ed saray pikewet tan say panusa tan pamales ed saray maoges a paniirapan na saray totoo.

¹⁸ Dusaen to ray kalaban to onung ed saray ginawa ra, pati saray manaayam ed saray arawin dalin.

¹⁹ Amin a totoo, manlapud bokig ya anggad sagur, takotan day Katawan tan say baleg a pakayari to. Onsabi a singa maples ya ilog, singa mabiskeg a dagem.

²⁰ Say Katawan kuantod saray totoo to, Onla ak ed Jerusalem a mangyagel tan mangilaban ed amin yon angibeneg ed saray kasalanan yo.

²¹ Saya so pisisipanan kod sikayo: Initdan ta kayo na pakayarik tan inyawat ko ray bangat kod sikayo a kayaryanen yo ra ed anggad angga; et manlapud natan ya anggad angga nepeg ya onuren yo ak tan ibangat yo ray anak yo tan saray kabyangay boleg yo ya onuren da ak.

60

¹ "Bangon ka, Jerusalem, tan sinag kan singa agew; Onsisinag ed sikay kagalangan na Katawan!

² "Nakobutan na bilonget iray arum a bansa, Balet onsinag ed sika so silew na Katawan; Mansiansiad sikay liwawa na kiwawala to.

³ "Onsingger ed silew mo iray bansa, Tan onsingger ed ibutay na balon agew mo iray arari.

⁴ "Nengneng kad kaliber-liber mo, tan imanom no antoy nagagawa: Mantitipon iray totoom ya onsempet la! Manlapud arawin pasen iray anak mon lalaki; Naawit a singa ogogaw iray anak mon bibii.

⁵ "Nanengneng mo yan nagawa, et nalimbos kay liket; Manlukso-lukso ka lapud liket mo. Niakar ed sika iray kayamanan na saray bansa; Onsabin manlapud biek na dayat iray kayamanan da.

⁶ "Manlapud Madian tan Efa onsabi ray baleg ya olup na kamilyo. Manlapu rad Seba a sankaawit day balituk tan insinso. Saray totoo ibaga ray maung a balitan nipaakar ed ginawa na Katawan!

⁷ "Amin da ray karniro ed Kedar tan Nebayot Niakar iran para bagat ed sika Tan nibagat irad altar a pamaliket ed Katawan. Pagmaliwen na Katawan a lalon mapagalang so Timplo to.

⁸ "Anto ra yan bapor a singa lorem so panlalayag da? Singa ra malapatin onsesempet la?

⁹ "Bapor iran manlalapud arawi ran bansa, Sankaawit da ray onsempet lan totoo na Dios. Sankaawit na saray totoo so balituk tan pilak A pamagalang ed ngaran na Katawan, Say masanton Dios na Israel, Ya impagmaliw ton galangen na amin a bansa iray totoo to.

¹⁰ Say Katawan kuantod Jerusalem, Pasimbaloen ya ipaalagey na saray sangkaili iray padir mo, Tan panlingkuran ka na saray arari ra. Diad gaway pasnuk ko dinusa ta ka, Balet natan abageyen tan kasian ta ka.

¹¹ Agew-labin silolokas naani iray puirtam, Pian saray ararid bansa Nayarin iyakar dad sika iray kayamanan da.

¹² Balet sigput a naderal iray bansa Ya ag manlilingkur ed sika.

¹³ Saray kiew a saleng, sipris, juniper, Saray sankaabigan a kiew ed katakelan na Libano, Et niakar ira a pamaalagey lamet ed sika, O Jerusalem, Pamarakep ira ed Timplok, Pian magmaliw a galgalangen so siudad ko.

¹⁴ Saray anak na saramay nampapairap ed sika et ondago ra Tan ondakmomo ra a pamagalang dad sika. Amin da ra may nambabalaw ed sika et igalang da kad saliyan mo. Tawagen da kan Say Siudad na Katawan. Sion, say Siudad na masanton Dios na Israel.

¹⁵ Ag ka la nikaindan tan nabosul, Sakey a siudad ya ataynan tan apaolyan. Pagmaliwen ta kan matalonggaring tan marakep, Sakey a pasen a kawalaay gayaga a mansiansia.

¹⁶ Talimaen ka na saray bansa tan saray arari A singa pangaasikaso na ina ed anak ton melag. Naamtaan mo a siak, so angilaban ed sika, Ya ibobolus ka na makapanyarin Dios na Israel.

¹⁷ Balituk so iyakar kod sika, aliwan gansa, Pilak tan gansa, aliwan balatyang tan kiew, Balatyang, aliwan bato. Ag ka la pairapen na saray manoley mo; Panoleyen ko ra ed inkatonung tan kareenan.

¹⁸ Ag la narengel iray tanul na panamairap; Anggapo lay nagawan panagderal ed dalin mo. Magmaliw ak a singa padir a mangyagel ed sika. Idayew mo ak lapud inlaban ta ka.

¹⁹ Diad satan aliwa lan agew so manliwawad sika no agew Odino say bulan so silew mo no labi; Ta siak a Katawan so magmaliw ya andi-anggaan a silew mo; Onsinag ed sika so silew na kagalangan ko.

²⁰ Mangangga ray agew na ermen mo. Siak a Katawan so magmaliw ya andi-anggaan a silew mo, Manganggan onsinag so agew tan say bulan, Balet mansiansia ak ya onsinag.

²¹ Magmaliw a matonung ya amin iray totoo, Tan kayaryanen dan ando lan ando so dalin. Intanem ko ra, ginawak ira, A mangipatnag ed amin a totoo na inkatalonggaring ko.

²² Anggan say sankamelagan tan sankamugmoan a pamilyam Magmaliw a singa matalonggaring a bansa. No onsabiy niganan panaon, Masiglat ko yan sumpalen. Siak so Katawan!

61

¹ "Say Katawan a Dios pinano to ak na ispiritu to. Pinili to ak tan imbaki to ak A mangibagad saray mairap-bilay na maung a balita. Mamaabig ed saray maermen, Mangibawag na kawayangan ed saray adakep Tan mangibolus ed saray priso.

² "Imbaki to ak a mangibawag A say panaon sinmabi la A say Katawan ilaban to ray totoo to Tan taloen to ray kalaban to. Imbaki to ak a manligliwad amin a maermen,

³ "A mangiter ed saray maneermen ed Sion Na liket tan gayaga, aliwan ermen, Sakey a kanta na dayew, aliwan ermen. Magmaliw iran singa saray kiew A say Katawan a dili so angitanem. Say inkatonung so gawaen dan amin, Tan nadayew so Dios lapud ginawa to.

⁴ "Ipaalagey da lamet iray siudad ya abayag la ran aderal-deral.

⁵ "Totook ira, panlingkuran kayo na saray sangkaili. Komponien da ray ayayep yo, Dalusan da ray dalin yo, tan asikasoen da ray kaubasan yo.

⁶ "Natawag kayo a papari na Katawan, Saray aripen na Dios tayo. Manliket kayod kayamanan na saray bansa Tan ikinon yon kayaryan yo ra.

⁷ "Angangga lay kababaingan tan say inkaandian yoy kagalangan. Manayam kayod dilin dalin yo. Tan nadoblian so kayamanan yo; Mansiansiad ando lan ando so liket yo.

⁸ "Say Katawan kuanto, Inarok so inkatonung tan kabosul koy panagpairap tan panaggaway kaogsan. Tumangan kon tumangan iray totook Tan migawaan ak ed sikara na sipanan ya andi-anggaan.

⁹ "Ombantug irad saray bansa; Nakabatan na balang sakey a makanengneng ed sikara A sikaray totoon binindisionan ko.

¹⁰ Manliket so Jerusalem lapud ginagawa na Katawan. Sikatoy singa nubian akasolung na kawes a para kasal to. Say Dios kinawesan to na kilalaban tan pananalo.

¹¹ Anggapoy duaruwa ya ombasik tan ontubo iray bokel a nisibwag ed dalin, Ontan met ya anggapoy duaruwan ilaban na Katawan a Dios iray totoo to, Tan idayew na amin da ray bansa.

62

¹ "Mansalita ak a pamabiskeg kod linawa na Jerusalem; Ag ak mampainawa ya anggad sikatoy nilaban, Tan onsinag a singa baleg a silew ed labi so pananalo to.

² "Jerusalem, nanengneng na amin a bansa so panalom! Nanengneng na amin ya ari ra so kagalangan mo. Natawag kad balon ngaran, Sakey a ngaran ya inter na dilin Katawan.

³ "Magmaliw kan singa marakep a korona a para Katawan.

⁴ "Ag ka la natawag na Nikaindan, Odino say dalin mo et natawag na Say tinaynan ya Asawan Bii. Say ngaran mo magmaliw a Makakaliket so Dios ed Sikato. Say dalin mo natawag na Maliket a Naasawa, Lapud makaliliket ed sika so Katawan Tan magmaliw kan singa asawan laki ed dalin mo.

⁵ "Singa sakey a balolakin mangaasawa na sakey a birhin, Say anibokel ed sika asawaen to ka. No panoy panliket na nubio ed nubia to, Ontan met so panliket ed sika na Dios mo.

⁶ "Angipasen ak ed tapew na saray padir mo, Jerusalem, na saray bantay; Nepeg ya agew labi ran ag balut ondeen. Nepeg ya ipanunot dad Katawan iray sipan to Tan ag da ipalingwan ed Katawan.

⁷ "Nepeg ya ag da pampapainawaen so Katawan anggad ipaalagey to lamet so Jerusalem, Tan gawaen ton siudad a dadayewen na intiron mundo.

⁸ "Say Katawan sinambaan ton insipan, Tan lapud pakayari to sumpalen to yan sipan to: Ag la magmaliw a tagano nan saray kalaban yo iray bungay tanaman yo, Tan ag la inomen na saray sangkaili so alak yo.

⁹ "Balet sikayo a nantanem tan nanani na bungay trigo, Kanen yoy tinpay tan idayew yoy Katawan. Sikayon nanaasikaso tan namboborbor na ubas Inomen yod saray patio na Timplok so alak.

¹⁰ Sikayon totood Jerusalem, paway kayod siudad Tan manggawa kayoy dalanen na saray ompapawil a totoo yo! Mangiparaan kayoy maawang a dalan; ekalan yo na saray bato! Mangyan kayo na saray tanda, pian naamtaan na saray bansa

¹¹ A say Katawan ibabawag tod intiron mundo: Ibaga yod saray totood Jerusalem A say Katawan onsasabin mangilaban ed sikayo, Kaiba to ray totoon inyagel to.

¹² Natawag kayo na Saray Masanton Totoo Na Dios, Saray Totoon Inlaban na Katawan. Say Jerusalem natawag na Say Siudad Ya Inaro Na Dios, Say Siudad Ya Ag Pinaolyan Na Dios.

63

¹ "Siopa yay onsasabin nanlapud siudad na Bozra ed Edom? Siopa yay mapagalang ya akakawes na ambal-balanga, a manaakar a sankataruk toy pakayari tan biskeg? Sikato so Katawan, makapanyarin mangilaban, ya onsabin mangibawag na pananalo to.

² "Akin et ambalbalangay kawes to, singa kawes na toon manggagatin na ubas a gawaen ya alak?

³ "Say Katawan ebat to, Ginagatinan kon singa ubas iray bansa, et anggapoy dinmagon tinmulong ed siak. Ginagatinan ko rad pasnuk ko, et awalwalsikan na dala so intiron kawes ko.

⁴ "Ginetmak a sinmabi lay panaon na pangilaban kod saray totook; panaon la a panusa ed saray kalaban da.

⁵ "Mankelaw ak nen ninmengneng ak tan anengneng kon anggapoy ontulong ed siak. Balet pinabiskeg ak na pasnuk ko tan siak a diliy analo.

⁶ "Diad pasnuk ko ginagatinan ko ray amin a bansa tan tinetemek ko ra. Imbung kod dalin so dala ra.

⁷ "Salitaen ko so ag mangoman a panangaro na Katawan; Idadayew ko lapud amin a ginagawa ton para sikatayo. Daakan so impamindision tod saray totood Israel lapud panangasi tan say ag mangoman a panangaro to.

⁸ "Say Katawan kuanto, Sikaray totook; ag da ak palikdoen. Kanyan inlaban to rad

⁹ "amin a kairapan da. Aliwan anghil, no ag ta say Katawan, so angilaban ed sikara. Lapud panangaro tan panangasi to dinondon to ra. Nen imbeneg iran panaon inaasikaso to ra lawas,

¹⁰ balet sinumpa ra tan pinaermen da so masanton ispiritu to. Kanyan nagmaliw a kalaban da so Katawan tan nilabanan to ra.

¹¹ Balet kabebekta anunotan da ray apalabas ya agew nen Moises ya aripen na Katawan, tan tinepet da, Iner natan so kawalaan na Katawan ya angilaban na saray pangulo da ray totoo to ed kalener dad dayat? Kawalaan na Katawan ya angiter ed kinen Moises na ispiritu to?

¹² Kawalaan na Katawan a diad pakayari to et nanggawa na saray ankabaleg a pakelaw diad panamegley nen Moises, binelsay toy danum ed dayat tan inwanwan ton binmaliw iray totoo to ed aralem a danum, pian makagamur na ag manganggan kagalangan to? Diad panangiwanwan na Katawan, singa ra kabayod katakelan ya ag balut natumba.

¹³

¹⁴ Say Katawan impanpainawa to ra tan singa ra bakan niakar ed patar a malambut a pastolan. Inwanwan to ray totoo to tan diad onya apagalangan so ngaran to.

¹⁵ Katawan, manlapud tawen a panaayaman mo ed inkasantom tan kagalangan mo, nengneng mo kami pa. Iner so kawalaay baleg a panangimasakit mod sikami? Iner so kawalaay pakayarim? Kawalaay panangarom tan panangasim? Ag mo kami pa ibebeneg.

¹⁶ Sika so ama mi. Ag kami bibirbiren na saray lalaki min di Abraham tan Jacob, balet sika, Katawan, so ama mi; sika lawas so mangyaagel ed sikami.

¹⁷ Akin et abuloyan mon nabalangan mi ray dalan mo? Akin et papaaweten moy olo mi, pian nibeneg mi ka? Pawil ka pa, makasengeg ed saray totoon manlilingkur ed sika, saray totoon kayaryan mo lawas.

¹⁸ Sikami ran masanton totoom et apataynan kami ya agano na saray kalaban mi; ginagatinan day santuariom.

¹⁹ Ipapasen mon singa ag mo kami inoleyan a balut, singa ag kamin balut totoom.

64

¹ "Akin et ag mo gaygayen so tawen, insan ka onlasur? Nanengneng ka na kapalandeyan tan onyegyeg irad takot da.

² "Onggiwgiw iran singa manlelwag a danum ya akatoon ed apoy. Gala pa ta ipanengneng moy pakayarim ed saray kalaban mo, tan pagiwgiw mod arap mo iray bansa!

³ "Wala may panaon a dinmago ka tan nanggawa ka na saray makapataktakot a bengatlan ag mi inilaloan. Anengneng ka na saray kapalandeyan tan ginmiwgiw irad takot da.

⁴ "Anggapoy niy akanengneng odino akadngel na nipaakar ed Dios a singa sika, a manggagawa na onman iran gawa para saray maniilalod sika.

⁵ "Maliket kan mangaawat ed saray maseet a manggagaway inkatonung, saray makanununot a mangonur na linawam. Nampasnuk kad sikami, balet intuloy miy nankasalanan; anggaman a mapalaloy pasnuk mo, intuloy miy nanggaway kaogsan nanlapud saman a panaon.

⁶ "Nankasalanan kamin amin; marotarotak a tuloy so anggan say sankaabigan lan gagawaen mi. Lapud saray kasalanan mi singa kami saray amagaan a bolung ya intitikyab na dagem.

⁷ "Anggapoy onsisingger ed sikan mampikasi tan onkerew na tulong. Inyamutan mo kami tan inkaindanfy mo kami lapud saray kasalanan mi.

⁸ "Balet sika so ama mi, Katawan. Aliling miy pitek, tan aliling moy managgaway banga. Pinalsa mo kami,

⁹ "kanyan, Katawan, ag mo pa kapalaloen so pasnuk mod sikami odino pagnayonen so paningil mod saray kasalanan mi. Sikami ray totoom, kasian mo kami pa.

¹⁰ Singa kabueran iray siudad mo; ataynan ya aderal-deral so Jerusalem,

¹¹ tan aderal na apoy so Timplo mi, say masanto tan marakep a pasen ya angidayewan ed sika nen saman na saray lalaki mi. Aderal-deral ya amin iray pasen ya inararo mi nen saman.

¹² Katawan, ag natenyeg so pusom lapud saraya? Anggapoy gawaen mo tan panirapen mo kami na mapalalo?

65

¹ "Say Katawan kuanto, Sipaparaan ak ya ondengel ed saray pikakasi da ray totook, balet ag ira nampikasi. Sipaparaan ak a naalmo ra, balet ag da anggan sinaliy nananap. Ag nampikasid siak so bansa, anggaman ya akaparaan ak ya onebat na Wadya ak ya ontulong ed sikayo.

² "Sipaparaan ak lawas a mangawat ed saray totook ya anawet so olo ra tan itutuloy day manggaway makapoy tan mangonur ed dilin labay da.

³ "Anggapoy baing dan mamapapetang na olok. Mangisasaklang iray bagat ed saray masanton tanamanan tan mampopool iray insinso ed tapew na saray altar a panangigalangan na saray pagano.

⁴ "Diad labi oonla rad saray ongib tan diad saray lobuk, ta mangipanon irad saray ispiritu na inaatey. Mamangan iray karniy baboy tan oniinom iray sabaw na karnin nisaklang a bagat na saray pagano.

⁵ "Insan da kukuan ed saray arum a totoo, Arawi kayod sikami, ag yo kami nayarin diwiten lapud masansanto kami! Ag ko naanosan ira yan totoosinga apoy ya ag naerep so pasnuk kod sikara.

⁶ "Asumpal ko lan ninunot so dusa ra tan nisulat la so sintinsia ra. Ag ko palabasen so ginawa ra, no ag ingen singilen ko ra

⁷ "ed saray kasalanan da tan saray kasalanan na lalaki ra. Nampopool ira na insinso ed saray altar a panangigalangan na saray pagano pokdul tan nansasalita ray maoges sumpad siak. Kanyan dusaen ko ra onung na kanepegan na saray imbeneg a ginagawa ra.

⁸ "Say Katawan kuanto, Anggapoy too a deralen to ray maung a bungay ubas; ingen gawaen to ra ya alak. Ag ko met deralen ya amin iray totookilaban ko ray manlilingkur ed siak.

⁹ "Bindisionan ko ray Israelitan kabayangay tribu nen Juda, tan kayaryanen na saray kabyangay boleg da so dalin kon kapalandeyan. Manayam diman iray pinilik a totoo a manlilingkur ed siak.

¹⁰ Igalang da ak tan ipastol da ray karniro tan saray baka ra ed Patar na Saron diad sagur tan diad Patar na Gunigon diad bokig.

¹¹ Balet nidomay kasumpalan yo, sikayon mangikakaindan ed siak, mangililingwan ed Sion a masanton palandey ko, tan mangigagalang ed Gad tan Meni a diriyos a kapalaran tan pansumpalan.

¹² Makapataktakot ya ipapatey so pansumpalan yo, lapud ag kayo inmebat nen tinawag ta kayo odino dinmengel nen nansalita ak ed sikayo. Nilabay yoy onsumpad siak tan say panggaway kaogsan.

¹³ Kanyan ibagak ed sikayo a saray mangigagalang tan mangoonur ed siak et nawalaan ira na daakan a nakan tan nainom, balet naerasan tan naapgaan kayo. Manliket ira, balet napelag kayod kababaingan.

¹⁴ Mankanta rad liket, balet manakis kayo lapud sakit na pagew.

¹⁵ Ikana na saray pinilik a totoo so ngaran yo a sakey a samba. Siak a Katawan a Dios pateyen ta tayo. Balet itdan ko na balon ngaran iray mangoonur ed siak.

¹⁶ Siopamay toon manaayam ed dalin ya onkerew na bindision kerewen ton bindisionan na matoor a Dios. Siopamay mansamba mansamba ed ngaran na matoor a Dios. Naandi tan nalingwanan iray gunigon ed imbeneg a panaon.

¹⁷ Say Katawan kuanto, Mamalsa ak na balon mundo tan balon katawenan. Sigput a nalingwanan iray agawgawa ed imbeneg a panaon.

¹⁸ Ando lan andon manliket tan manggayaga kayo komun ed palsaen ko. Say balon Jerusalem a gawaen ko et napano na liket, tan manliket iray totoo to.

¹⁹ Manliket ak met lapud Jerusalem tan saray totoo to. Anggapo lad man naaniy manaakisan tan say ontawag ya onkerew na tulong.

²⁰ Anggapo lay ompatey ya ogogaw ya ankekelag, tan amin a totoo et nasabi ray nigetar a panaon a pambilay da. Nipasen a malangwer ni so toon nasabi toy sanlasus taon. Mapatnag a dinusak iray ompatey kasakbayan a nasabi ray sanlasus taon.

²¹ Mangipaalagey na kaabungan iray totoo tan panayaman daag ira ikana na arum a totoo. Mantanem ira na saray ubas tan manliket iran mangan na bungaaliwan saray arum so mangan. Saray totook mambilay ira na andokey a singa saray kiew. Sigput dan pambilay iray bengatlan nansagputan da.

²²

²³ Onaligwas so antokaman a kimeyan da, tan ag nadalan na segsegang iray anak da. Bindisionan ko ra tan amin da ray kabyangay boleg da ed amin a panaon ya onsabi.

²⁴ Anggan ag ni ra asumpal a mampipikasi ed siak, ebatan ko la ray pikakasi ra.

²⁵ Mandorongo a mangan iray asod katakelan ton saray kordiro; saray lion mangan ira na dayami a singa saray baka; tan saray oleg ag la ra mangetket. Anggapo lad satan so antokaman a mamasakit odino kaogsan diad masanton palandey ko a Sion.

66

¹ "Say Katawan kuanto, Say tawen so tronok tan say dalin so toonan na salik. Anton klasiy abung sirin so ipaalagey yon para siak, anton klasiy pasen so panayaman ko?

² "Siak a dili so amalsad sansinakuban. Maliket ak ed saray mapaabeba tan magbabawi, saray walay takot tan mangoonur ed siak.

³ "Saray totoo gagawaen day labay dan dili. Anggapoy pandomaan ed sikara so pamatey na baka ya ibagat tan say pamatey na too ya ibagat; say pangibagat na kordiro tan say pamekpek na aso ed tenger; say pangisaklang da na bagat a trigo tan say pangibagat day dala na baboy; say pangibagat da na insinso tan say pampikasi rad talintaoy diriyos. Maliket irad makapaingungot a klasiy panangigalang ed Dios.

⁴ "Kanyan iyakar kod sikaray deralsaray bengatlan tatakotan dalapud anggapod sikaray inmebat nen tinmawag ak, odino dinmengel nen nansalita ak. Nilabay day ag mangonur ed siak tan say manggaway kaogsan.

⁵ "Dengel kayod ibabagay Katawan, sikayon walay takot ed sikato tan mangoonur ed sikato: Lapud matoor kayod siak, pigaran totoo yo so mamobosul ed sikayo tan ipopolisay da kayo. Luludlureyen da kayo tan kuanda, Ipanengneng komun na Katawan so inkatalonggaring to tan ilaban to kayo, pian nanengneng mi kayon manliket. Balet sikaran dili et napelag ed kababaingan.

⁶ "Dengel kayo! Saman a baleg a tanul ed siudad, saman ya eyag ed Timplo et eyag na Katawan a manudusa ed saray kalaban to!

⁷ "Say masanton siudad ko et singa biin ag la mampapasakit diad biglan panaanak to na sakey ya ogaw.

⁸ "Wala ta lay akanengneng o akadngel na nipaakar ed sayan inkagawa? Nianak kasi ed sanagew so sakey a bansa? Ag la nepeg a manirap a mabayag so Sion, kasakbayan a niletneg so bansa.

⁹ "Ag yo ipapasen ya ag ko abuloyan a nianak iray totook anta ngalngali la ra niboknak. Say Katawan so nansalita.

¹⁰ Miliket kayod Jerusalem; manggayaga kayo para sikato, amin yon mangaaro ed saya siudad. Miliket kayo natan ed sikato, amin yo a nanermen lapud sikato!

¹¹ Manliket kayod aligwas to, a singa sakey ya ogaw a melag a maliket a mansususod ina to.

¹² Say Katawan kuanto, Iyakar kod sikayoy ag manganggan aligwas; saray kayamanan na saray bansa onagos irad sikayo a singa sakey ya ilog ya ag balut naekatan. Magmaliw kayon singa sakey ya ogaw ya aasikasoen na ina to, aampopoen to, tan aaroen to.

¹³ Ligliwaen ta kayod Jerusalem, a singa sakey ya inan liligliwaen toy anak to.

¹⁴ Manggayaga kayo naani no nanengneng yo yan nagawa; pabiskegen to kayo tan paabigen toy laman yo. Naamtaan yod satan a siak, say Katawan, tutulongan ko ray mangoonur ed siak, tan idapok so pasnuk kod saray kalaban ko.

¹⁵ Say Katawan onsabin kaiba toy apoy. Onlogan ed saray payak na bagyo no dusaen to ray pamapasnukan to.

¹⁶ Diad panamegley na apoy tan ispada dusaen to ray amin a totood mundo a narumog ton walay kasalananamayamay ed sikaray napatey.

¹⁷ Say Katawan kuanto, Asingger lay pansamput na bilay da ray totoon lilinisan day sikaran dili pian makapangigalang iran singa saray pagano, manlilibot iran onlad saray masanton tanamanan, tan mangakan iray karniy baboy tan karniy otut tan arum ni ran makapaingungot a kakanen.

¹⁸ Amtak iray kanunotan tan saray gawgawa ra. Onsabi ak a manipon ed saray totood amin a bansa. No mantitipon ira, nanengneng da no antoy nagawaan na pakayarik

¹⁹ tan nakabatan da a siak so manudusad sikara. Balet mangikera ak na pigarad sikara tan ibakik irad saray bansa tan diad saray ararawin dalin ya ag da ni nadngel so inkabantug ko odino anengneng so inkatalonggaring ko tan pakayarik; diad Espanya, Libia, tan Lidia a pati saray marunong a pumapana to, tan diad Tubal tan Grecia. Diad sarayan bansa ibawag day inkatalonggaring ko.

²⁰ Manlapud saray bansa papawilen da ray kadalaan yo a sikaray rigalod siak. Iyakar da rad masanton palandey ed Jerusalem ya akakabayo rad mula, kabayo, tan diad saray kamilyo, tan saray arum akalogan irad karwahi tan diad saray kariton, a singa saray Israelita a mangyaakar ed Timplo na saray bagat da a trigo ya akakargad saray pananginan a malinis onung ed ganggan.

²¹ Pigarad sikaray pagmaliwen kon papari tan Levita.

²² No panon a say balon mundo tan say balon katawenan et mansiansia ra lapud pakayarik, ontan met a mansiansia ray kabyangay boleg yo tan say ngaran yo.

²³ Kapag Pista na Balon Bulan tan kapag Agew na Panagpainawa amin da ray totoo ed balang bansa et onla ran mangigalang ed siak diad Jerusalem, kuay Katawan.

²⁴ No onsisiput ira, nanengneng da ray bangkay na saray linmaban ed siak. Ag balut ompatey iray bigis a mangan ed sikara, tan ag balut naerep so apoy a mamool ed sikara. Makapaingungot ed amin a katoowan so nengneng da.