1 "Saray sankarakepan a kanta nen Solomon.
2 "Siak komun so angub-anguban mo na bibil mo; masamit nen say alak so panangarom.
3 "Ambalbalingit ka, singa mansamiong a pabalingit so ngaran mo. Kanyan amin a marikit aroen da ka.
4 "Ala mo ak, ta ombatik ita; sika so arik tan iyakar mo ak ed kuartom. Manliket itan dua, penepeneken tay sikaton dili ed panangaro a singa pampera na sakey a too ed alak. Ag pankelawan ya inaro ka na amin a bibii!
5 "Bibiid Jerusalem, andeket ak balet maganggana ak, andeket ak a singa saray tulda ed Kedar, balet maganggana ak a singa kurtinad palasio nen Solomon.
6 "Ag yo ak memelag-melagen lapud kolor na baog ko, lapud tinektek ak na agew. Akapasnuk ed siak nen saman iray agagik a lalaki, kanyan impankimey da ak ed kaubasan. Anggapoy oras kod saman a nanasikasod laman kon dili.
7 "Ibagam ed siak, O inarok, Iner so pampakabkaban mod saray karnirom? Iner so pampainawaan da no kaagewan? Akin et anapen ta ka nid saray karniro da ray arum a pumapastol?
8 "Ag mo amta no iner a pasen, O sika a sankagangganaan ed saray bibii? Laka, ta tombuk moy olup da ray karniro; mananap kay pankabkaban da ray kanding mo, diad abay da ray tulda na saray pumapastol.
9 "O inarok, pagagalien mo ray lalaki o singa pamapagali na saray kabatyan ed kalakyan ya isisintad saray karwahi na Faraon.
10 Agaylay dakep na buek mon manasakbung na lupam; singa ra alahas a mansaloyloy ed tenger mo.
11 Igawaan mi ka na pulsiras a balituk ya adikoraan na saray pilak.
12 Nen mandokdokul so arik ed katri to samyong na pabalingit koy inmalingernger ed kaliber-liber.
13 Ambalbalingit a singa mira so inarok legan ton akasaral ed pagew ko.
14 Say inarok et singa saray balang a rosas ya ombubuskag ed kaubasan na En-gadi.
15 Alay gangganam, O inarok; inmagayep iray matam!
16 Agaylay inkaguapom, O pinablik; makapalikliket kan tua ed siak! Saray malambut a dika so dokulan ta;
17 saray kiew a sidro so panoksulan na abung ta, tan tablan sipris so bobida.
1 "Siak so sakey labat a rosas a balang ed Saron sakey a lirio ed patar na palandey.
2 "Sakey a lirio ed kawalaan da ray kasabitan so aliling na inarok ed kawalaan da ray bibii.
3 "Sakey a kiew na mansanas a walad takel so aliling na inarok ed kawalaan da ray arum a lalaki. Labalabay koy onyorung ed anino na saman a kiew; masamsamit so pakataway ko ed saray bunga to.
4 "Inyakar to ak ed kawalaan na ponsia ton baleg, et kinolibembenan to ak na panangaro to.
5 "Pakan mo ak na saray pasas, pian ombiskeg ak tan paligsam so liknaan ko diad pamakan mod siak na saray mansanas! Makapoy ak lapud panangaro.
6 "Dinanganan ko so kawigin taklay to tan popoyuken ak na kawanan a lima to.
7 "Isipan yod siak, sikayon bibiid Jerusalem; mansamba kayod ngaran na mabatik ya ulsa odino diad ayep o korso ya ag yo kami sisigensigenen ed arowan min dua.
8 "Narerengel koy bosis na inarok. Mambabtik ya ombebeltang ed kapalandeyan tan kapokdulan diad iyaasingger tod kawalaan ko.
9 "Singa sakey a korso so inarok, singa sakey a kalakyan a kilaw na ulsa. Wadman lan manaalagey ed abay na padir. Ontatakiling ed bintana, onnenengneng ed leet da ray barandilyas.
10 Mitotongtong ed siak so inarok. Gala sirin, O inarok; mila kad siak, O pinablik.
11 Asumpal lay panaon na ambetel; tinmonda lay nepnep;
12 ombubuskag la ray rosas ed kaalogan. Panaon la natan na panagkanta; narerengel lay oni da ray malapati ed kaalogan.
13 Naluluto la ray bungay igos; mansamyung lay balingit na saray rosas da ray ubas. Gala sirin, O inarok; mila kad siak, O pinablik.
14 Singa ka malapatin onaamut ed lengat na baleg a bato. Nengnengen ko pa tay malimgas a lupam tan dengelen ko pay masamsamit a bosis mo.
15 Erel mo ray asod katakelan, saray ankelag ya asod katakelan, kasakbayan dan naderal iray manrorosas a kaubasan ta.
16 Kayaryan ko so inarok, tan kayaryan to ak. Pankakabkaben tod kawalaan da ray lirio iray karniro to
17 ya anggad onsiplug lay dagem na kabwasan tan onandipat lay bilonget. O inarok, pawil kan singa korso, pawil kan singa kalakyan a kilaw na ulsa, ed kapalandeyan na Beter.
1 "Labi-labin kokogkogipen kod dokulan so inarok; aanapen ko, balet ag ko narumog.
2 "Binmangon ak tan linma ak ed kaliber-liber na siudad, nanakar-akar ak ed saray dalan tan diad saray plasa. Inanap ko lan inanap so inarok, balet ag ko narumog.
3 "Anengneng ak na saray guardia nen manaakar-akar iran mambantay ed siudad. Tinepet kod sikara, “Anengneng yoy lakin inarok?"
4 "Kataynan kod arapan da, arumog koy inarok. Binembenan ko tan ag ko inikbanan ya anggad niyakar kod abung nen inak, tan pinaloob kod kuarton nianakan ko.
5 "Isipan yod siak, sikayon bibiid Jerusalem; mansamba kayod ngaran na mabatik ya ulsa tan diad ayep a korso ta ag yo kami sisigensigenen ed arowan min dua.
6 "Anto yay onsasabin singa lusek na asewek a manlalapud kalawakan, abalingitan na insinso tan mira, say insinson ilalako da ray nigosianti?
7 "Onsasabiy Solomon; sankasakbat dad trono to; anemaplon sondalo so mangguaguardiad sikato; sankamaungan ira yan sondalo ed Israel.
8 "Amin da et marunong iran mangikana na ispada; matalonggaring iran mibabakal. Akaawit so balang sakey ed sikara na ispada, sipaparaan iran mibakal anggan labiy idogpay kalaban.
9 "Si Solomon sankasakbat dad trono to a ginawad sankaabigan a kiew.
10 Saray lusek na trono et naokupan ira na pilak; abordaan na balituk so abel a sakbung to. Say kotsun to et naapisan na ambalbalangan abel, a lapud aro inabel na saray bibiin taga Jerusalem.
11 Bibiid Sion, gali dia ta nengneng yoy Ari Solomon Akakorona na koronan intoon nen ina to diad samay agew na impankasal to, diad samay agew na impanliket tan impanggayaga to.
1 "Agaylay gangganam, O inarok! Inmagayep iray matam ya asakbungan na bilom. Saray buek mo et singa olup na kanding a manggagalaw ed alusadsar na kapokdulan na Galaad.
2 "Ampoti-poti ray ngipen mo; singa ra karniron kapankatli tan kapanames. Anggapon balut so ngileb mo tan balibaliy impanpepetekan da ray ngipen mo.
3 "Singa ambalbalangan laso so bibil mo; agaylay dakep da no mansasalita ka. Manilengsileng iray aping mon asakbungan na bilom.
4 "Say beklew mo et singa tori nen David, malimpek tan pino-pinoy baog to; walay kuintas ton singa akasabit a sanlibon samper na sondalo.
5 "Saray susom et singa ra saray korso; singa ra siping ya ulsa a mamangakan ed kawalaan da ray lirio.
6 "Manayam ak ed palandey na mira, diad pokdul na insinso, ya anggad onsiplug so palayupoy na dagem na kabwasan tan onandipat lay kabilongetan.
7 "Agaylay gangganam, O inarok; agaylay inkayadyarim!
8 "Mila kad siak a manlapud Kapalandeyan na Libano, O nobiak; gala ta taynan ta so Libano. Akseb kan manlapud toktok na Palandey na Amana, manlapud Palandey na Senir tan Palandey na Hermon, a panaayaman na saray lion tan saray liopardo.
9 "Say linggis na matam tan say kuintas ya akasolung ed sika, O inarok tan nobiak, et atanggoyur day pusok.
10 Agaylay samit so panangarom, O inarok tan nobiak. Masamit ni so panangarom nen say alak; anggapoy makapipara ed pabalingit mo.
11 Walad bibil mo so taway na dilo, O inarok; gatas tan dilo a para siak so dilam. Walad kawes mo so amin a balingit na Libano.
12 Say inarok, say nobiak, et sakey a niamut a tanamanan, ya apaliberan na padir, sakey a sobul a kayaryan na sakey a too;
13 ontutubod man iray tantanaman. Ontutubo ran singa saray tanaman a granada tan mambubunga ray sankaabigan a bunga. Daakan iray pabalingit a hina tan nardo,
14 saray sapron, kalamus, tan sinamon, odino amin a klasiy insinso. Ontutubod man iray mira, aloe tan amin a sankabalingitan a pabalingit.
15 Sobul so manasalog na samay tanamanan, say sobul na managagos a danum, on, say sobul a managagos a manlalapud Kapalandeyan na Libano.
16 Bangon ka, Dagem ed Baybay. Dagem ed Abalaten, siplug ka ed tanamanan ko; panom na balingit so dagem. Paonlam pad tanamanan to so inarok ta mangan na saray sankaabigan a bunga.
1 "Linmoob ak la ed tanamanan ko, O inarok, O nobiak. Manaala ak na saray tanamanan kon balsamo tan mira; manaakan ak na dilok ed obung na bayaung; oniinom ak na alak ko tan say gatas ko. Mangan tan inom kayo, sikayo ran manangaro, anggad nabuek kayo na aro!
2 "Nen akaogip ak, abangon so liknaan ko. Akogip kon tinmoktok ed puirta so inarok. Paloob mo ak pa, O inarok, say pinablik ya aliling toy malimlimgas a malapati. Abasa na linaew so olok, apoyut na kelpa so buek ko.
3 "Nanlakseb ak la; akin et mankawes ak ni lamet? Nilinisan ko la ray salik; akin et dotakan ko ra lamet?
4 "Say inarok impeket tod puirta so lima to, nidomay liknaan ko lapud asingger la.
5 "Akaparaan ak la a mamaloob ed sikato. Apoyukan la na mira so intiron limak, ambasa-basa na mira iray gamet ko, nen inegnaan ko may lokasay puirta.
6 "Nilukasan koy puirta ta onloob so inarok, balet naandipat la. Agaylay panlabay kon dengelen so bosis to! Inanap ko, balet ag ko nalmo; tinawag ko, balet anggapoy narengel kon ebat to.
7 "Arumog ak na saray guardian manliliber ed siudad; kinabil da ak tan sinugatan da ak; pinipilat na saray guardiad padir na siudad so kolibemben ko.
8 "Isipan yod siak, O bibiid Jerusalem, no narumog yo may inarok, ibaga yod sikato a makapoy ak lapud panangaro.
9 "Sankagangganaan ed saray bibii, domad arum a lalaki so inarom? Anto tay nidoman talonggaring to a makasengeg na pansipan mid sika?
10 Guapo tan mabiskeg so inarok; nidoma ed saray sanlibon lalaki.
11 Malagansa so lupa to tan pino-pino; kolet tan andeket a singa wawak so buek to.
12 Saray mata to et balibali ran singa saray malapatid abay na managagos a kolus, saray malapatin nanames ed gatas tan manalalagey ed gilig na managagos a sobul.
13 Saray aping to et singa ra marakerakep a tanamanan, a napno na saray tanaman ya ambalbalingit. Singa saray lirio iray bibil to; ambasa-basa ra na mira.
14 Maimimos iray gamet to, tan akasingsing na saray nambato. Say laman to et singa pino-pinon garing, ya akotepan na saray sapiro.
15 Saray ulpo to et singa ra lusek ya alabastro, nilira ed balituk a patoonan. Matalonggaring a singa Kapalandeyan na Libano ya atatagey iray kiew dan sidro.
16 Masamsamit ya anguban so sangi to; panliketan koy amin a nipaakar ed sikato. Onya so kapara na inarok, O bibiid Jerusalem.
1 "Sankagangganaan ed amin da ray bibii, iner so nakar na inarom? Ibagam ed sikami no iner so inarap ton dalan, pian natulongan mi kan mananap ed sikato.
2 "Say inarok et linmad tanamanan to, a tutuboan na saray kiew a balsamo. Pankakabkaben tod tanamanan iray karniro to,
3 "Kayaryan ko so inarok, tan siak so kayaryan to; pankakabkaben to ray karniro to ed kawalaan da ray lirio.
4 "O inarok, maganggana kan singa Tirza; balibali kan singa siudad na Jerusalem; makapakelaw kan singa sarayan duaran matalonggaring a siudad.
5 "Ag mo inenengneng ed siak iray matam; ompepeket irad siak kanyan ag ak makagalaw. Saray buek mo et singa olup na kanding a manggagalaw ed alusadsar na kapokdulan na Galaad.
6 "Ampoti-potin singa karniron kapanames iray ngipen mo. Anggapon balut so ngileb mo tan balibaliy impanpepetekan da ray ngipen mo.
7 "Manilengsileng iray aping mo ya asakbungan na bilom.
8 "Anggaman anemaplo so riyna na ari, walomploy iyaamung ton bibii, tan ag nabilang iray eegnaan ton mamarikit,
9 "balet siak, saksakey so inarok, tan singa balibalin malapati. Bukbukor to so biin anak nen ina to; nidoma-domay panangaro nen ina to ed sikato. Amin da ray bibii et onnenengneng irad sikato tan idadayew da; saray riyna tan saray bibiin iyaamung et ikankanta ray dayew to.
10 Siopa yay singa palbangon so kalilinggis to? Maganggana tan maliwliwan singa agew odino say bulan.
11 Linma ak ed kakiewan ya almindra ta nengnengen kod patar iray malangwer a tanaman, saray balon bulong na ubas tan saray rosas da ray kiew a granada.
12 Manggiwgiw ak; impanpilalek mo ak a mangaro, a singa say pampilpilalek a mibakal na kutsiro na karwahi.
13 Sayaw ka, sayaw ka, biin taga Sulam. Bantayan mi ka legan mon onsasayaw. Akin et labay yo ak a bantayan legan kon onsasayaw ed nanleetan na saray nandarasig a managbantay?
1 "Nidoma-domay indengan mon bii! Agaylay abig na saray salim ya akasandalya. Singa kinorti na marunong ya iskotur iray malimpek ya ulpom.
2 "Awalaan ka na poseg a singa malim limpek a losur, ya ag balut nanaandian na masamit ya alak. Say balangbang mo et singa aberber a trigon pinalot, tan apaliberan na saray lirio.
3 "Singa siping ya ulsa iray susom, singa ra duaran korso.
4 "Singa torin garing so beklew mo. Saray matam et singa saray dipositoway danum ed Hesbon, diad asingger ed puirta na saman a matalonggaring a siudad. Matondiris so eleng mon singa torid Libano ya ososdungan toy Damasco.
5 "Akatangar a singa Palandey na Carmelo so olom. Singa sankarakpan ya abel a balangaan so nilapir a buek mo; say karakpan to makasagyat na imanoy ari.
6 "Agaylay simpit mo, agaylay gangganam; sigput so gayagan iiter na panangarom.
7 "Singa kiew a palmira so alagey mo, tan singa amunggol a bunga to iray susom.
8 "Kalaben ko so kiew a palmira tan borboren ko ray bunga to. Para siak singa munggol na ubas iray susom, singa balingit na mansanas so ingas mo,
9 "tan singa sankasamitan ya alak so sangim. Ontan sirin onagos komun a balibali so alak ed inarok, onagos ed saray bibil tan saray ngipen to.
10 Kayaryan ak na inarok, tan pampilalekan to ak.
11 Gala, inarok, ta ompaway ta ed kaalogan tan mansanlabi tad man.
12 Ombangon ta a masakbay ta nengnengen tay kaubasan nengnengen ta ra no kasi onsisimit la ra, no kasi ombubuskag la ray rosas da, tan no kasi manrorosas la ray kiew a granada. Iter kod man ed sika so panangarok.
13 Naangub mo so balingit na saray tanaman a mandragoras, tan walad abay na puirta ta iray masasamit a bunga. Insinup kon para sika so daan tan balo a ligliwa.
1 "Oy la komun a sakey kan agik a laki, ya inasikaso na inak ed pagew to. Diad satan, no naabet ta kad dalan, nayarian ta kan anguban, et anggapoy walad karaklan.
2 "Iyakar ta kad abung nen inak, a dimay pangibangatan mod siak no antoy kabaliksan na panangaro. Itdan ta kay masamsamit ya alak, say alak kon ginawad bungay granada.
3 "Danganan ko so kawigin taklay mo, tan poyuken ak na kawanan a limam.
4 "Isipan yod siak, sikayon bibiid Jerusalem, ya ag yo kami sisigensigenen ed arowan min dua.
5 "Siopa yay onsasabin manlalapud kalawakan, ya akatabin ed inaro to? Binangon ta kad silong na mansanas, diad pasen a nianakan mo.
6 "Siak labat so arom; siak labat so lakap mo. Makapanyari tan mabiskeg a singa patey so aro. Onliuliub a singa pool.
7 "Ag naerep na danum so aro; ag nalener na anggan anton delap. Balet no walay manali a saliwen to na kayamanan to so aro, bosul lalaingen so nagunggona to.
8 "Walay agi min bii a katayatdang, tan kamoktil niy suso to. Antoy gawaen mid sikato no karawen na sakey a tobun-balo?
9 "No komun ta sikatoy sakey a padir, ipaalageyan mi na pilak a tori. Balet no sikatoy sakey a puirta, paliberan mi na saray tablan sidro.
10 Sakey ak a padir, tan saray susok so tori to. Amta na inarok a narumog kod sikato so inawa tan kareenan.
11 Si Solomon walay kaubasan to ed sakey a pasen a tatawagen na Baal-hamon. Wala ray dumaralus ya angabang ed sikato, balang sakey ed sikara nambayar na pilak a kuarta a sanlibo.
12 Solomon, kayaryan mo la tay sanlibon pilak a kuarta, tan saray dumaralus kayaryan da lay duanlasus a pilak a kuarta. Wala met so kayaryan kon dili a kaubasan.
13 Dengelen ko pay bosis mod tanamanan, O inarok; saray kakaarok et manaalagar iran ondengel ed sika.
14 O Inarok, gala diad siak, ganatan mon singa korso, singa kalakyan a kilaw na ulsa ed kapalandeyan a tutuboan na tanaman a gagawaen a pabalingit.