1 "Maliket so toon ag ontotombuk ed simbawa da ray totoon maoges, ag to aaligey kagagawa da ray totoon makasalanan, tan ag mikakasakey ed saray totoon managbalaw na kamaungan.
2 "Ingen, maliket a mangoonur na Ganggan na Katawan, tan agew-labi ton dadalepdepen.
3 "Aliling toy kiew a nitanem ed abay na managos a danum; mambubunga no panaon to tan ag namamagaan iray bolung to. Onaaligwas iray amin a gagawaen to.
4 "Balet aliwan onyay toon maoges, singa taep ya ititikyab na dagem.
5 "Say Dios sintinsiaan ton nadusa so toon maoges, tan nibiig ed olupan da ray totoon matonung.
6 "Say Katawan iwawanwan tan iyaagel to so toon matonung, balet nabalang ya anggad angga so toon maoges.
1 "Akin et mamplaplanon onlaban iray bansa? Akin et manggagawa na saray andi-kakanaan a komplut iray katoowan?
2 "Saray arari ra milalaban ira, saray manoley da mankokomplut ira sumpad Katawan tan say pinili ton ari.
3 "Onokpus ti lad pakaoley da, kuanda; ibantak ti la ray lobir ya impamalur dad sikatayo.
4 "Makakalek so Katawan a manyodyorung ed trono tod tawen, tan babalawen to ra.
5 "Insan lapud pasnuk to papasakbayan to ra, tan lapud petang na olo to tataktakoten to ra.
6 "Pinayorung kon manoley so arik diad tapew na masanton palandey ko a Sion, kuanto.
7 "Ibawag koy imbagay Katawan, kuay ari. Inkuay Katawan ed siak: Sikay anak ko; natad sayan agew nagmaliw ak ya amam.
8 "Kerew ka, et iter kod sikan amin iray bansa; nakayaryan moy intiron mundo.
9 "Diad panamegley na bastun a balatyang betagen mo ra; mekmeken mo ran singa banga.
10 Kanyan natan dengel yo yan pasakbay, sikayo ran arari; manalwar kayo, sikayo ran manoley:
11 Sitatakot kayon manlingkur ed Katawan; giwgiw
12 tan dakmomo kayod sikato; ta no andi, maganon ompetang so olo to, et biglan ompatey kayo. Maliket ya amin iray ondaragon paiyagel ed sikato.
1 "Amayamay iray kalaban ko, Katawan dakerakel iray onsusumpad siak!
2 "Tongtongtongen da ak tan kuanda, Ag tulongan na Dios.
3 "Balet sika Katawan, sasalimbengan mo ak lawas, pian niarawi ak ed kaatapan; panataloen mo ak tan pabibiskegen moy linawak.
4 "Ontatawag ak na maksil a patulongan ed Katawan, tan manlapud masanton palandey to, eebatan to ak.
5 "Ondorokul ak tan naoogip ak, et maung so ibabangon ko, ta say Katawan iyaagel to ak.
6 "Ag ko antakot iray libo-libon kalaban ko a manlalakob ed siak.
7 "Gala pa, Katawan! Ilaban mo ak, O Dios ko! Dudusaen mon amin iray kalaban ko, tan eekalan mo ray pakayarin mamasakit ed siak.
8 "Say kilalaban manlalapud Katawan bindisionan to komun iray totoo to.
1 "Ebatan mo ak pa, no ontawag ak ed sika, O Dios a manangyagel ko! Tinulongan mo ak nen nagugunigon ak. Kasian mo ak pa natan tan dengel moy pikakasik!
2 "Kapigay itonda yon mamapabaing ed siak, sikayo ran totoo? Kapigay itonday pangaaro yod andi-kakanaan iran salita tan say panaanap yod saray tila?
3 "Tandaan yo a say Katawan pinili ton kayaryan to so toon matonung, tan dedengelen to ak no ontatawag ak ed sikato.
4 "Giwgiw kayon sitatakot tan tondaan yo lay mankasalanan; motektek yo yan maung no mandokdokul kayon mareen ed saray katri yo.
5 "Mangisaklang kayo na saray dugan bagat tan manmatalek kayod Katawan.
6 "Dakel iray mampikasi: Itdan mo kami pay lalon dakel a bindision! Mapangasin osdungan mo kami pa, O Katawan!
7 "Balet say liket ya inter mod siak et baleg ni nen say liket da anggaman a daakan so pilak tan alak da.
8 "No ondokul ak, mareen so pakaogip ko, ta sika labat, Katawan, so mangyaarawid siak ed kaatapan.
1 "Dengel mo pa ray salitak, O Katawan, tan talineng mo ray pandadageyem ko.
2 "Arik tan Dios ko, dengel mo ak pa no ontawag ak ya onkerew na tulong mo! Mikakasi ak ed sika, Katawan;
3 "dedengelen moy bosis ko no kabwasan; mikakasi ak ed sika no ompapaway lay agew, tan mantatalaran ak ed ebat mo.
4 "Aliwa kan sakey a Dios a manliliket ed kaogsan; ag mo aabuloyan a niwalay maoges ed arap mo.
5 "Ag mo nitepel a nengnengen iray totoon mapaatagey; kabosul mo ray managgaway kaogsan.
6 "Dederalen mo ray totoon matitila, tan babalawen mo ray totoon managpatey tan managpalikdo na kapara ran too.
7 "Balet siak, nayarian koy onloob ed abung mo lapud ag mangoman a panangarom; nayarian koy mangigalang ed masanton Timplom, tan mandakmomo ed sika a pangigalang ko.
8 "Katawan, dakerakel iray kalaban ko! Iwanwan mo ak pan mangonur ed linawam, tan ipalinew mo pay dalan mo a tombuken ko.
9 "Ag napanmatalkan so salita daray kalaban ko; labay da labat so manderal. Maamuyot so panagsalita ra, balet napnoy makapatey a panamalikdo.
10 Dusam pa ra, O Dios; magmaliw komun a kaderalan da iray komplut da; Pagit mo pa rad arap mo, lapud amayamay a kasalanan da tan lapud ilalaban dad sika.
11 Balet manliket ya amin iray sinmalimbeng ed sika; lapud liket da makapankanta ra lawas. Iyagel mo pa ray mangaarod sika; lapud sika tuan maliket ira.
12 Bibindisionan mo ray mangoonur ed sika, Katawan; say panangarom, singa samper a mangyaagel ed sikara.
1 "Katawan, ag mo ak pa pamapasnukan lapud petang na olom! Ag mo ak pa dudusaen lapud pasnuk mo!
2 "Kasian mo ak pa, O Katawan, ta mapalaloy kakairapan ko! Pabiskeg mo ak pa, ta makapkapoy ak la;
3 "tan ontan lay kagugunigon ko. Kapigay itulong mod siak, Katawan?
4 "Singgeran mo ak pa, Katawan, tan ilaban mo ak; iyagel mo ak pa, lapud ag mangoman a panangarom.
5 "Diad pasen a panaayaman da ray inaatey, ag ka la nanunotan; anggapo lad may makapangidayew ed sika!
6 "Makapkapoy ak lad paneermen ko; nilabi-labin nababasa so dokulan ko, tan naleleteb na luak so danganan ko lapud panaakis ko.
7 "Ngalngalin ag ak la makanengneng; linmalarag la ray matak diad panaakakis ko lapud amin da ray kalaban ko.
8 "Arawian yo ak, amin yon managgaway kaogsan: Dedengelen ak na Katawan ed pannangnangis ko;
9 "tatalinengen to ak ed pikekerew koy tulong tan ebatan to ray pikakasik.
10 Nabaingan ya amin iray kalaban ko tan mapalaloy kagunigon da; diad biglan kagewgew da, napagit ira.
1 "Katawan a Dios ko, pasalimbengan ak ed sika; ilaban tan iyagel mo ak pad amin da ray mangoosil ed siak,
2 "ta no andi, singa ra lion a mangyakar ed siak ed arawin pasen, ya anggapo lad may makapangilaban ed siak, et bingbingkasen da ak.
3 "Katawan a Dios ko, no nanggawa ak na maoges ed siopaman, no nantraidor ak ed kaarok, odino pinasakitan kon anggapoy makasengeg so kalaban ko, no ginawak so anggan dinan ed saraya,
4
5 "paosilan mo ak ed saray kalaban ko ta erelen da ak, pagatin-gatinan mo ak ya anggad ipatey ko, insan diad dabuk taynan day bangkay ko!
6 "Alagey ka lapud pasnuk mo, O Katawan! Talindeg ka sumpad sebeg da ray kalaban ko; bangon ka pa tan tulongan mo ak! Katonungan so labay mon nagawa,
7 "kanyan pantitipon mo pa ray katoowan ed kaliber-liber mo, tan manlapud tagey oleyan mo ra.
8 "Sikay huis na amin a katoowan. Sintinsiaan mo ak pa, O Katawan, onung ed inkatonung tan inkamaung kon too.
9 "Matonung kan Dios tan sisintinsiaan moy kanunotan tan pilalek mi. Patondam pay kaogsan da ray totoon maoges tan tumangan mo pa ray maung a totoo.
10 Say Dios so manangyagel ko, ilalaban to ray matoluk ed sikato.
11 Matonung a huis so Dios tan dudusaen to lawas iray totoon maoges.
12 No ag ira mampatauli, iyobul na Dios so ispada to. Pipinaten ton itaryay bekang na pana to;
13 ipaparaan to ray armas to makapatey, iinan to na apoy so ngoro na saray pana to.
14 Imanom so pannununot na totoon maoges ed kaogsan; iplaplano ray panggawa ray golo tan say pamalikdo ra.
15 Balet sikaran diliy napelag ed abut ya impatit dad arum a totoo.
16 Kanyan dudusaen ira lamlamang na dilin kaogsan da, tan napapasakitan ira na dilin panagduksa ra.
17 Pisasalamatan koy Katawan lapud inkatonung to; kakantaan ko na pangidayew so Katawan a Sankatageyan.
1 "O Katawan a Katawan mi, say talonggaring mo nanenengneng ed intiron mundo! Say dayew mo sasabien to ray katawenan;
2 "tan ikakanta na saray ogogaw tan saray kapangyanak. Maligen ka tan ag ka nasisigensigen na amin a kalaban mo; sarasarag mon patondaen iray onsusumlang ed sika.
3 "No nengnengen koy tawen a pinalsam, say bulan tan saray bitewen ya inliram irad pasen da
4 "siopa so too, et nununoten mo; say mogmon too, et aasikasoen mo?
5 "Anggaman ontan ginawam ya abebbebay kipapasen to nen say sika; kinoronaan mo na galang tan dayew.
6 "Tinorom a manoley ed amin da ray pinalsam; impasen mon manona ed amin da ray bengatla:
7 "saray karniro tan saray baka, tan saray ayayep ed katakelan;
8 "saray manok tan saray sira tan amin da ray pinalsan walad dayat.
9 "O Katawan a Katawan mi, say talonggaring mo nanenengneng ed intiron mundo!
1 "Katawan, misalamat ak ed sika diad intiron pusok; ibawag koy nipaakar ed amin da ray makapakelaw a ginagawam.
2 "Lapud sika malikeliket ak a mankanta. Kantaan kay pangidayew, O Sankatageyan a Dios!
3 "No ompanengneng ka, ompoliktar iray kalaban ko; natumba tan ompatey ira.
4 "Matonung tan maptek so panagsintinsiam; insintinsiam ya anggapoy kasalanan ko.
5 "Dinusam iray totoon ag manisiad sika tan dineral mo ray totoon maoges; ag la ran balut nanunotan.
6 "Angga lad angga ya aderal iray kalaban mi. Dineral mo ray siudad da, tan sigput la ran alingwanan.
7 "Balet say Katawan et ari ya anggad angga; imparaan to lay trono ton panintinsiaan to.
8 "Matonung so panooley tod sankamundoan; maptek so panisintinsia tod saray katoowan.
9 "Say Katawan so salimbeng da ray napapairap; sikatoy napiregan no panaoy segsegang.
10 Manmatalek ed sika, Katawan, iray makapikabat ed sika; ag mo ibabatikan iray ondaragod sika.
11 Kantaan yoy pangidayew so Katawan a manaayam ed Sion! Ibawag yod saray bansa iray gawgawa to!
12 Nununoten na Dios iray maniirap; ag to lilingwanan so ey-ey da, tan dudusaen to ray mamapasegsegang ed sikara.
13 Kasian mo ak pa, O Katawan! Nengneng mo pa so paniirap ko ya iiter na saray kalaban ko! Ipaliis mo ak pad patey, O Katawan,
14 pian nayarian koy ontalindeg ed arap da ray totood Jerusalem, tan nibawag kod sikaray makasengeg na pangidadayew kod sika. Manliket ak ta inlaban mo ak.
15 Saray ag manisiad Dios napepelag irad abut a kinotkotan da; naeerel irad patit ya inlira da.
16 Impaamtay Katawan so sikaton dili diad panamegley da ray matonung a pananintinsia to, tan apatitan iray maoges a totoo ed dilin gawgawa ra.
17 Patey so pansumpalan na amin da ray totoon maoges, amin da ray mangipopolisay ed Dios.
18 Ag nalingwanan lawas iray mairap-bilay; ag naekal ed anggad angga so ilalo da ray walad kairapan.
19 Alagey ka, O Katawan! Ag ka patatalod saray totoo! Tipon mo pad arap mo iray ag manisiad sika tan sintinsiaan mo ra.
20 Patakot mo pa ra, Katawan; ipaamtam ed sikara a totoo ran ompatey.
1 "Katawan, akin et arawdawi ka? Akin et onaamut ka no nagugunigon kami?
2 "Mapaatagey iray totoon maoges tan papairapen da ray mairap-bilay; erel mo pa rad saray patit ya imparaan da.
3 "Say toon maoges ipapanta toy maoges iran pilalek to; say toon maagom aayewen tan ipopolisay toy Katawan.
4 "Say toon maoges ag to ikabkabilangan so Katawan; lapud panagpaatagey to iisipen ton singa anggapoy Dios.
5 "Maaligwas so pansusumpalay amin a gagawaen na toon maoges. Ag to natatalusan iray sintinsiay Dios; eelek-elekan to ray kalaban to.
6 "Kuantod sikaton dili, Ag ak balut natalo; ag ak balut nagunigon!
7 "Napno na ayew, tila, tan taktakot iray balikas to; marlas a mansalitay ansakit tan maoges.
8 "Amut-amut ed saray bario, tan diman to tatalaranan a pateyen iray totoon anggapoy kasalanan. Sisiimen to ray totoon pakaskasi;
9 "singa lion a manaalagar ed amutan to. Tatalaranan to ray mairap-bilay, sisingkaten to rad patit to, insan to ra igagayugoy ya iyarawi.
10 Nababaktar iray totoon pakaskasi; tinalo ra na ontan lan biskeg.
11 Say toon maoges kuantod sikaton dili, Anggapoy pibabali na Dios! Inlikdem to ray mata to, kanyan ag to ak balut nanengneng!
12 Alagey ka, Katawan, ta dusam iray totoon maoges! Ag mo pa lilingwanan iray maniirap!
13 Panoy pakabalaw na toon maoges ed Dios tan pakapangikuantod sikaton dili, Ag to ak dusaen?
14 Balet nanaimatunan mo; nanaimanom so kairapan tan say kaermenan, et sipaparaan ka lawas ya ontulong. Say pakaskasin too imamatalek toy sikaton dili ed sika; tulongan mo lawas iray mankakaukolan.
15 Ekal mo pay pakayari na saray maoges tan bagel a totoo; dusam pa ra lapud kaogsan a ginagawa ra ya anggad ag ira ontonda.
16 Anggad angga ya ari so Katawan, tan naandipat ed dalin to iray ag manisiad sikato.
17 Dengelen mo, Katawan, so pikakasi da ray mapaabeba; pabiskegen moy linawa ra.
18 Dengelen moy tawag da ray napapairap tan saray olila; diad pananintinsiam kilingan mo ra pian ag la makapantaktakot iray totoon ompatey met lamlamang.
1 "Say Katawan so sasalimbengan ko. Panoy pangibaga na siopaman ed siak, Tikyab kan singa manok ed kapalandeyan,
2 "ta saray totoon maoges pininat tan impaarap da la ray pana ra a mangena diad ambilonget ed saray totoon matonung.
3 "Antoy nagawaay toon matonung, no aderal lan amiy bengatla.
4 "Say Katawan walad masanton timplo to; walad tawen so trono to. Babantayan toy amin a katoowan tan amta to ray gagawaen da.
5 "Say Katawan sasalaysayen to ray matonung tan saray maoges a totoo; kabkabosul to ray totoon maruksa.
6 "Ipepelag toy ngalab tan mandarlang ya asupri ed saray totoon maoges; dusaen to ra na makasinit a dagem.
7 "Matonung so Katawan tan aaroen toy maung iran gawgawa; manayam irad kawalaan to iray totoon manggagawad saraya.
1 "Tulongan mo kami pa, Katawan! Anggapo lay maung a toon atilak; naandipat la ray totoon napanmatalkan.
2 "Mantitilaan la ray totoo; manlolokowan tan mampapalikdowan ira.
3 "Patondam pa lan amin iray managpalikdon dila, Katawan! Pepetan mo ray mapasirayew a sangi a kuanda,
4 "Nanaala miy labay mi diad panamegley na saray salita mi. Salitaen miy labay mi, et anggapoy makapatondad sikami.
5 "Balet kuay Katawan, Onsingger ak natan, ta napapairap iray mankakaukolan tan mandadageyem ed sakit iray napapasegsegang. Iyarawik irad kaatapan ta sikatoy pampipilalekan da!
6 "Napanmatalkan iray salita na Katawan; singa ra tuan pilak a pinapuron amimpito ed palbaan.
7 "Amin a sokung na mundo et kawalaay maoges iran totoo, tan balang sakey et ipapasirayew toy kaogsan to. Iyagel mo kami pa lawas, Katawan, ipaliis mo kami pad sarayan totoo.
1 "Katawan, anggad angga so pangililingwan mod siak? Anggad kapigan ni so pangisasanib moy lupam ed siak?
2 "Kapigan mangangga yan panliliknan na irap? Kapigan mangangga yan paneermen na pusok ed agew tan labi? Kapigan mangangga so panatalod siak na saray kalaban ko?
3 "Imano mo ak tan ebatan mo ak pa, Katawan a Dios ko. Pabiskeg mo ak, pian ag ak ompatey.
4 "Ag nibagad satan na saray kalaban ko, Tinalo mi! Ag da met napanliketan ed satan so pakatumbak.
5 "Balet manmamatalek ak ed ag mangoman a panangarom; manliket ak, ta ilaban mo ak.
6 "Kantaan ta ka, O Katawan, ta amayamay iray kaabigan ya inter mod siak.
1 "Saray makulang-kulang a totoo kuandad sikaran dili, Anggapoy Dios! Maoges ira tan makapataktakot iray ginagawa ra, anggapoy anggan sakey so manggagaway kamaungan.
2 "Manlapud tawen oosdungan na Katawan iray katoowan, ta labay ton nengnengen no wala ra kasiy makalakal, no wala kasiy mangigagalang ed sikato.
3 "Aliwa so nakar dan amin; nampapara ran maoges. Anggapod sikaray manggagaway kamaungan, anggapoy anggan sakey.
4 "Tetepeten na Katawan, Sarayan totoon managgaway kaogsan, ag da amta? Pambibilay da ray tatakewen dad saray totook, tan ag ira mampipikasi ed siak.
5 "Balet ontan lay kataktakot da, ta pipilaan na Dios iray totoon matonung.
6 "Saray totoon managgaway kaogsan et dederalen da ray plano na toon mairap-bilay, balet say Katawan so manangyagel to.
7 "Oy la komun ta nagamuran la na Israel so kilalaban a manlalapud Sion! Ontan lay panliket na saray totood Israel no paaligwasen ira lamet na Katawan.
1 "Katawan, siopay nayarin onloob ed Timplom? Siopay nayarin mangigalang ed sika diad Sion, say masanton palandey mo?
2 "Say toon oonuren toy Dios, tan kamaungan lawas so gagawaen to, tua tan napanmatalkan iray salita to,
3 "tan ag to papaogesey kapara ton too. Ag manggagaway maoges ed saray kakaaro to, tan ag mangikakayat na tila nipaakar ed kapara ton too.
4 "Babalawen to ray totoon ipopolisay na Dios, balet gagalangen to ray mangoonur ed Katawan. Susumpalen toy amin ya insipan to, anggan antoy nagawad sikato.
5 "Mampapautang ya anggapoy abang tan ag napasoksokan a mantasi sumpad toon anggapoy kasalanan. Siopamay toon manusumpal ed sarayan amin et maligen lawas so bilay to.
1 "Iyagel mo ak pa, O Dios, ta onsasalimbeng ak ed sika.
2 "Kuankod Katawan, Sika so Katawan ko; manlalapud sika ya amin iray maung a bengatlan walad siak.
3 "Agaylay inkamaung da ray matoor a totoo na Katawan! Pakaliliketan kon maung a nakaiba ra.
4 "Nabontunan na kairapan, iray manlilingkur ed saray diriyos. Ag ak mibiang ed saray bagat dan dala; ag ko igalang iray diriyos da.
5 "Sika, Katawan, so amin a kayaryan ko, iiter moy amin a nakakaukolan ko; walad sanduan limam so bilay kod arapen.
6 "Makapakelaw a tuloy iray panangarom ed siak; agaylay abig da!
7 "Idadayew koy Katawan, ta iwawanwan to ak, tan no labi papasakbayan ak na konsinsiak.
8 "Ag ko lawas nalingwanan so kiwawalay Katawan; walad abay ko, tan ag ak nasigensigen na antokaman.
9 "Kanyan maliket tan magayaga ak, tan anggapon balut so pagpagak,
10 ta iyaagel mo ak ed pakayari na patey. Matoor a nanlilingkur ak ed sika, kanyan ag mo ak ikaindan ed pasen a panaayaman da ray inaatey.
11 Ipaamtam ed siak so dalan a mamaarap bilay; say kiwawalam papanoen to ak na gayaga tan iitdan to ak na liket ya anggad angga.
1 "Katawan, dengel mo pay ikekerew koy katunongan; imanom pay ikekerew ko na tulong! Dengel mo pay pikakasik, ta ag ak mantitila.
2 "Pilaan mo ak diad pananintinsiam, ta amtam so kaptekan.
3 "Sinokayan moy pusok. Dinago mo ak ed labi; sigput mo ak a sinubok, et anggapoy arumog mod siak a maoges a pilalek. Ag ak mansasalitay kaogsan
4 "a singa pansasalitay arum; inonur koy ganggan mo, tan ag ak tinmombuk ed maruksan kagagawa.
5 "Nankukurang ak lawas ed dalan mo, tan ag kon balut sinisianan.
6 "Mampipikasi ak ed sika, O Dios, ta eebatan mo ak; lingaw ka pa sirin tan dengel mo ray salitak.
7 "Ipaamtam pay ag mangoman a panangarom tan ilaban mo ak; ag ak nasigensigen na saray kalaban ko no wala ak ed diking mo.
8 "Iyagel mo ak pan singa panangyagel mod saray matam; iyamut mo ak pad silong da ray payak mo,
9 "pian ag ak nadogpaan na saray totoon maoges. Liliktuben ak na saray masebeg a kalaban ko;
10 anggapoy panangasi ra tan mapasirayew iran mansasalita.
11 Anggan iner so pigaran ko wadman ira; tatalaranan day pankanawnawan pangitumba rad siak.
12 Singa ra lion a mantatalaran ed siak, tan pampilalekan dan nabingbingkas ak.
13 Gala pa, Katawan, ta labanan mo ray kalaban ko tan talom ira! Iyagel mo ak pad saray totoon maoges diad panamegley na ispadam;
14 iyagel mo ak pad saray totoon walad sikaray amin a labay da diad sayan bilay. Dusam pa ra diad panamegley na saray kairapan ya intaryam ed sikara; nawalaan komun na dakerakel a kairapan iray anak da, tan wala ni komuy nakeraan a para saray apo ra!
15 Lapud matonung ak, nanengneng ta ka; no ombangon ak; say kiwawalam papanoen to ak na gayaga.
1 "Inararo ta ka, O Katawan! Sika so manangyagel ko.
2 "Say Katawan so manangilaban ko; sikatoy mabiskeg a tirinsirak. Say Dios ko so manangyagel ko; tan no kaibak anggapoy pagpagak. Sikatoy singa samper a manasanib ed siak; iyaagel to ak tan iyaarawi to ak ed kaatapan.
3 "Ontatawag ak ed Katawan, et iyagel to ak ed saray kalaban ko. Idayew yoy Katawan!
4 "Walad kaliber-liber ko so kaatapan na patey; saray daluyon a managderal tinatabunan da ak.
5 "Walad kaliber-liber ko so kaatapan na patey tan say lobuk intaryaan to ak na patit.
6 "Nen asabian ak na segsegang, tinmawag ak ed Katawan; kinmerew ak ed Dios ko na tulong to. Diad timplo to dinengel toy bosis ko; dinengel toy ikekerew koy tulong.
7 "Insan ginmiwgiw tan yinmegyeg so dalin; ginmalaw tan ayegyeg iray pundasion na kapalandeyan tan amasnuk so Dios.
8 "Pinmaway so asewek ed eleng to, pinmaway so manliub ya apoy tan mandarlang a ngalab ed sangi to.
9 "Inlokyab toy tawen insan inmakseb; walay makapal a lorem ed silong na saray dapan to.
10 Kinmabayod kirubin to, insan tinmikyab; linmogan ed saray payak na dagem.
11 Nankobut na bilonget; aliber na makapal a lorem a napnoy danum.
12 Pinmaway ed kirmat a walad arapan to iray kristal tan saray kidyam na apoy tan tinmalus irad makapal a lorem.
13 Insan manlapud tawen, kinmarul so Katawan; tan nadngel so bosis na Dios a Sankatageyan.
14 Ataytayak iray kalaban to nen pinapana to ra; diad panamegley na saray kirmat, pinapakoyat to ra.
15 Pinmaway so dalem na dayat tan alokasan iray pundasion na mundo, nen nampasnukan mo ray kalaban mo, Katawan, tan ineyagan mo ray maksil lapud sanuk mo.
16 Manlapud tagey, say Katawan ginawat to ak tan binembenan to ak; inagwat to ak ed araldalem a danum.
17 Inyagel to ak ed saray makapanyarin kalaban ko, tan amin da ray mamobosul ed siak, ta ag ko nayariay ontan lan inkabiskeg da!
18 Dinogpaan da ak nen maniirap ak, balet inyagel ak na Katawan.
19 Inekal to ak ed kaatapan; inlaban to ak, ta makaliliket ed siak.
20 Tutumangan ak na Katawan lapud matonung ak; bibindisionan to ak lapud anggapoy kasalanan ko.
21 Tinoluk koy ganggan na Katawan; ag ko imbeneg so Dios ko.
22 Inonur koy amin a ganggan to; ag ko impolisay iray bilibilin to.
23 Amta ton anggapoy kasalanan ko, tan inarawian koy kaogsan.
24 Kanyan tutumangan to ak lapud matonung ak, tan lapud amta ton anggapoy kasalanan ko.
25 Matoor ka, Katawan, ed saray matoor ed sika, tan nagnap so inkamaung mod saray totoon ayadyari.
26 Malinis so ipapatnag mod saray malinis so panagbilay da, balet mapasnuk kad saray maoges so panagbilay da.
27 Iyaagel mo ray totoon mauyamo, balet papaabebaen mo ray mapaatagey.
28 O Katawan, iitdan mo ak na liwawa; papaliwawaen moy bilonget ko.
29 Iitdan mo ak na biskeg ya ondogpad saray kalaban ko, tan pakayari a manakep ed saray tirinsira ra.
30 Ayadyari ray gawa na sayan Dios, napanmatalkan iray salita to! Aliling toy samper ed amin da ray papaiyagel ed sikato.
31 Bukbukor na Katawan so Dios; say Dios labat so manangyagel tayo.
32 Sayan Dios a mamapabiskeg ed siak, eekalen toy kaatapan ed dalan ko.
33 Gagawaen to ak a singa impansaliy ulsa; iyaarawi to ak ed kaatapan diad kapalandeyan.
34 Babangatan to ak ed pibabakal, pian nayarian kon ikanay sankabiskegan a pana.
35 O Katawan, iyaagel tan ilalaban mo ak; lapud pananulong mo nagmaliw ak a matalonggaring, tan lapud pakayarim niarawi ak ed kaatapan.
36 Ag mo ak inabuloyan ya adakep, tan ag ak balut atumba.
37 Oosilan ko ray kalaban ko, et naeerel ko ra; ag ko ra tondaan ya anggad ag ko ra napatey.
38 Pepekpeken ko ra, et ag ira makabangon; natutumba ran atalo ed saliyan ko.
39 Iitdan mo ak na biskeg a mibakal, tan pananalo ed saray kalaban ko.
40 Pababatiken mo ray kalaban ko; papateyen ko ray mamobosul ed siak.
41 Onkekerew ira na tulong, balet anggapoy mangilaban ed sikara; mikakasi rad Katawan, balet ag to ra ebatan.
42 Mekmekmeken ko ra, et magmaliw iran singa dabuk ya ititikyab na dagem. Gagatinan ko ran singa pitek ed saray dalan.
43 Inliktar mo ak ed saray totoon mananumpa, tan ginawa mo ak a manoley ed saray bansa; panlilingkuran ak natan na saray totoon ag ko kabat nen saman.
44 Dadakmomoan ak na saray totoon taga arum a bansa; no narengel da ak, ononur ira.
45 Onkakapoy so linawa ra tan manggiwgiw iran onsisingger a manlapud saray tirinsira ra.
46 Say Katawan et mabilay! Nadayew komun so manangyagel ko! Ibawag yoy talonggaring na Dios a manangilaban ko.
47 Panataloen to ak ed saray kalaban ko; pinasuko tod pakaoley ko iray bansa;
48 tan ililiktar to ak ed saray kalaban ko. Katawan, sikay mangiiter ed siak na pananalo ed saray kalaban ko tan sikay mangyaagel ed siak ed saray maruksan totoo.
49 Kanyan idadayew ta ka diad pegley da ray bansa; kakantaan ta ka na panangidayew.
50 Say Dios so mangiiter na saray pananalo ed arin impasen to; ag mangoomay panangaro tod toon pinili to, a si David tan diad saray kabyangay boleg to, diad ando lan ando.
1 "Ipapaamta na tawen so kagalangay Dios! Ipapanengneng to ray ginagawa na Dios!
2 "Say balang agew ibabaga toy kagalangay Dios ed ontombuk ya agew; say balang labi ipapaamta to ed ontombuk a labi.
3 "Anggapoy balikas o salitan ikakana, anggapoy tanul a narerengel;
4 "anggaman ontan onkakayat so ipapaamta ra ed intiron mundo, tan narerengel ed amin a sokung na mundo. Say Dios nanggawad tawen na abung a panayamay agew;
5 "ompapaway so agew, a singa nubio, ed ayaman to, singa bumabatik a sipaparaan lan milomba.
6 "Ompapaway ed sakey a dapag na tawen ombebeltang ya onlad sananey a dapag. Ag naliktaran so petang to.
7 "Ayadyari so ganggan na Katawan; papasimbaloen toy biskeg na too. Napanmatalkan iray ganggan na Katawan; mangiiter ira na kakabatan ed saray anggapoy amta.
8 "Maptek iray ganggan na Katawan, tan pagagayagaen day puso. Matonung iray ganggan to, tan liliwawaan day pakatalus.
9 "Maung so pangigalang ed Katawan; mansiansia ed anggad angga. Matonung so pananintinsiay Katawan, tan maptek lawas.
10 Pampilpilalekan nen say sankaabigan a balituk; masamsamit nen say sankapuroan a dilo.
11 Iitdan to ak ya aripen mo na kakabatan; natutumangan ak diad pangoonur ko.
12 Anggapoy toon makanengneng na saray dilin lingo to; ipaliis mo ak pa, Katawan, ed saray niamut a kasalanan!
13 Iyarawi mo ak pa met ed saray ginagalan kasalanan; ag mo pa iyaabuloy ya oleyan da ak. Diad ontan magmaliw ak ya anggapoy pakatetelan, tan akaliktar ak lad kaogsay kasalanan.
14 Makapaliket komun ed sika iray salitak tan saray kanunotan ko, O Katawan a salimbengan ko tan mananondon ko!
1 "Ebatan ka komuy Katawan no nagugunigon ka! Iyagel ka komuy Dios nen Jacob!
2 "Iter to komud sikay tulong a manlapud Timplo to, tan salimbeng a manlapud Palandey na Sion.
3 "Awaten to komun ya amin iray isaklang mo tan napaliket ed amin da ray ibagat mo.
4 "Iter to komun iray pampipilalekan mo tan pampalaboen to ray iplaplanom.
5 "Diad satan maneyag itayod liket tan silibraan tayoy impanalom diad pangidayew ed Dios tayo. Iter komun na Katawan ya amin iray kerew mo!
6 "Natan amtak a say Katawan et panataloen toy pinili ton ari; eebatan to manlapud masanton tawen, tan diad panamegley na pakayari to, iitdan to na saray baleg a pananalo.
7 "Saray arum a totoo manmamatalek irad karwahi ra, tan saray arum diad saray kabayo ra, balet manmamatalek itayod pakayari na Katawan a Dios tayo!
8 "Natumba tan napelag ira yan totoo, balet ombangon tan mabisbiskeg itayon onalagey.
9 "Panalom pay ari, O Katawan; ebatan mo kami pa no ontawag kamid sika.
1 "Katawan, maliket so ari lapud pinabiskeg mo; magayaga lapud impanalom.
2 "Inter moy nampilalekan to; ag mo pinabaingan ed kerew to.
3 "Dinagom ya awit moy nidomadoma ran bindision tan kinoronaan mo na puron balituk.
4 "Kinmerew na bilay et initdan mo, andokey tan andi-anggaan a bilay.
5 "Baleg so kagalangan to lapud tinulongan mo; impagmaliw mon bantug tan matalonggaring.
6 "Andi-anggaan a walad sikato ray bindision mo, say kiwawalam papanoen to na gayaga.
7 "Manmamatalek so ari ed Katawan; lapud ag mangoman a panangaro na Sankatageyan a Katawan, niarawi lawas ed kaatapan.
8 "Dakepen na ari ya amin iray kalaban to; erelen ton amin iray mamobosul ed sikato.
9 "No onpatnag so Katawan, singa manliub ya apoy a mangoput ed sikara. Lapud pasnuk to akmunen to ra, tan oputen ira na apoy.
10 Say ari pateyen to ray anak da; anggapoy nakeraan a mabilay ed saray kabyangay boleg da.
11 Mamplaplano ray maoges tan mankokomplut ira sumpad sikato, balet ag ira manalo.
12 Panaen to ra; papoliktaren tan pabatiken to ra.
13 Idayew mi ka, Katawan, lapud ontan lan biskeg mo! Ikanta tan idayew miy pakayarim.
1 "Dios ko, Dios ko, akin et inkaindan mo ak? Manay-ay ak a kinmerew na tulong, balet ag ni sinmabi.
2 "Tatawagen ta ka no agew, Dios ko, balet ag mo ak eebatan; Tatawagen ta ka no labi, balet ag ak nainawaan.
3 "Balet sika so Masanto ya akayorung ed trono, say dadayewen na Israel.
4 "Nanmatalek ed sika iray lalaki mi; nanmatalekan da ka et inlaban mo ra.
5 "Kinmerew iray tulong ed sika et nipaliis irad kaatapan; nanmatalekan da ka, et ag ira abaingan.
6 "Balet aliwa ak lan sakey a too; sakey ak lan alumbayar, a balbalawen tan pabpabaingan na saray totoo!
7 "Luludlureyen ak na amin da ray makanenengneng ed siak; dilat-dilatan tan mameyeng-peyeng ira.
8 "Kuanda, Nanmatalek kad Katawan, Akin et ag to ka ilaban? No talagan inaro to ka, akin et ag to ka tulongan?
9 "Sikay angipapaway ed siak nen nianak ak; sikay nantalimad siak nen ogaw ak ni.
10 Sinmaral ak ed sika nanlapu lad inkianak ko, tan sika lawas so Dios ko.
11 Ag mo ak pa aarawian! Asingger lay gunigon, et anggapoy arum ya ontulong ed siak.
12 Amayamay iray kalaban a singa ra bakan kalakyan ya onlalakub ed siak; wala rad kaliber-liber ko a singa ra saray masebeg a bakan kalakyan a nanlapud dalin na Basan.
13 Onsasangi ran singa lion; mangwam iran mamibingkas ed siak.
14 Anggapo lay biskeg ko; naandin singa danum a naibung ed dalin. Akidkidwas la ray amin a pokepokel ko; atonaw a singa kandila so pusok.
15 Say kolukolung ko et amagaan a singa dabuk, tan ompepeket so dilak ed tawen-tawen ko. Tinaynan mo ak ya ompapatey ed dabuk.
16 Aliktub ak na saray totoon maoges, singa ra olup na saray ason ondodoklus ed siak; bibingkasen da ray limak tan saray salik.
17 Sankanengneng la ray pokel ko. Nengnengnengen tan molmolagatan ak na saray kalaban ko.
18 Pampapalaranan da ray kawes ko tan panaapagan da.
19 Ag mo ak pa aarawian, O Katawan! Ganatan mo pa so pangilaban ed siak.
20 Ilaban mo ak pad ispada; iliktar mo pad sarayan aso so bilay ko.
21 Iyagel mo ak pad sarayan lion; sarasarag ak na sarayan kalakyan a bakad katakelan.
22 Ibagak ed saray kadalaan ko no anto ray ginagawam; idayew ta kad ulopan da:
23 Idayew yoy Katawan, sikayo ran aripen to! Itanduro yo, sikayo ran kabyangay boleg nen Jacob; igalang yo, sikayo ran totood Israel!
24 Say Katawan, ag to papaolyan iray mairap-bilay, tan ag to lilingwanan so kairapan da; ag to met ira bebenegan, no ag ingen eebatan to ra no onkekerew iray tulong.
25 Idayew ta kad baleg ya olupan, lapud saray ginagawam; isaklang ko ray insipan kon bagat ed arap da ray mangigagalang ed sika.
26 Saray mairap-bilay mangan iray labalabay da; saray ondaragod Katawan igalang da. Onaligwas ira komun ed ando lan ando!
27 Amin da ray bansa et nanunotan day Katawan. Manlapud amin a sokung na mundo onlingaw irad sikato; igalang na amin a katoowan.
28 Ari so Katawan, tan ooleyan to ray bansa.
29 Ondakmomod sikato iray amin a totoon mapaatagey; ondakmomod sikato iray amin a totoon manganggay bilay da.
30 Saray mantombuk a kailalakan et panlingkuran day Katawan; saray totoo ibaga rad onsoblay a kailalakan so nipaakar ed sikato.
31 Nibagad saray totoon iyanak ed arapen a panaon: Inlaban na Katawan iray totoo to.
1 "Say Katawan so managpastol ed siak; amin a nakakaukolan ko walad siak.
2 "Pampapainawaen to ak ed saray malambut a dika, tan iyaakar to ak ed mareen a danum.
3 "Papasimbaloen toy biskeg ko. Iwawanwan to ak ed saray maptek a dalan, onung na insipan to.
4 "Anggan sankabilongetay dadalanen ko, ag ak ontakot, ta wala kad abay ko. Say baston tan say pekpek mo iyaagel da ak.
5 "Mangipaparaan kay ponsia a para siak, a pakanengnengan ed siak na saray kalaban ko; maliket so pangaawat mod siak, tan manlepwa so pamapanom na kupak.
6 "Andi-saew a say kaabigan mo tan say panangarom et mansiansiad siak legan kon mambibilay; tan ando lan ando a manayam ak ed abung mo.
1 "Kayaryay Katawan so mundo tan amin a logan to; kien toy dalin tan amin a manaayam ed dalin.
2 "Inletneg tod aralem a danum diad dalem na dalin tan inlira tod dalem na dayat iray pundasion to.
3 "Siopay manepeg ya onkalab ed palandey na Katawan? Siopay nayarin onloob ed masanton Timplo to?
4 "Saray totoon malinis so gawa ra tan say kanunotan da, ag ira mangigagalang ed saray diriyos, tan ag da isisipan so ag da nagawaan.
5 "Say Katawan bindisionan tan ilaban to ra; say Dios ibawag to ran anggapoy kasalanan.
6 "Sikarayan totoo so onsisingger ed Dios, tan oonlad arap na Dios nen Jacob.
7 "Ilokas yoy maawang iray puirta, ilokas yo ray kadaanan a kaput, ta onloob so matalonggaring ya ari!
8 "Siopa yan matalonggaring ya ari? Say Katawan a mabiskeg tan makapanyari, say Katawan a mananalo ed bakal!
9 "Ilokas yoy maawang iray puirta, ilokas yo ray kadaanan a kaput, ta onloob so matalonggaring ya ari!
10 Siopa yan matalonggaring ya ari? Say Katawan a makapanyarin-aminsikatoy matalonggaring ya ari!
1 "Sika, Katawan, so pampipikasian ko,
2 "manmamatalek ak ed sika, O Dios ko. Ag mo pa iyaabuloy a nabaingan ak lapud katalok; ag mo pa met iyaabuloy ya elek-elekan ak na saray kalaban ko!
3 "Ag nabaingan iray manmamatalek ed sika, no ag ingen saray bengatbengat ya onsusumpad sika.
4 "Ibangat mo pad siak so linawam; ipaamtam ed siak, O Katawan.
5 "Ibangat mo ak pan mambilay onung ed katwaan mo, ta sikay Dios a Manangilaban ko. Manmatalek ak ed sika lawas.
6 "Katawan, nunot mo pay panangasim tan say ag mangoman a panangarom ya abayag mo lan impanengneng.
7 "Pirdonam pa ray kasalanan tan saray lingok nen wala ak nid kalangweran. Lapud ag mangoman a panangarom tan kaabigan mo, Katawan, nunot mo ak pa!
8 "Matonung tan maung so Katawan, kanyan ibabangat tod saray makasalanan so dalan a nepeg dan tombuken.
9 "Itotonton to ray mapaabeba ed maptek a dalan, tan ibabangat tod sikaray linawa to.
10 Katekep na aro tan katooran so pangiwawanwan tod saray manusumpal na impisipanan to tan saray ganggan to.
11 Sumpal mo pay sipan mo, Katawan, tan pirdonam pa ray kasalanan ko, ta amayamay la ra.
12 Saray matoluk ed Katawan et naamtaan dad sikato so dalan a nepeg dan tombuken.
13 Onaligwas ira lawas, tan nakayaryan na saray anak da so dalin.
14 Kaaro na Katawan iray matoluk ed sikato, tan papaletan toy impisipanan tod sikara.
15 Say Katawan so pikekerewan ko lawas na tulong. Manmamatalek ak lawas ed Katawan, et ipapaliis to ak ed kaatapan.
16 Lingaw mo ak pa, Katawan, tan kasian mo ak, ta maermen tan nanairapan ak.
17 Ekal mo pa ray pagpagak, tan agwat mo ak ed saray gunigon ko.
18 Imanom pay segsegan tan kairapan ko, tan pirdonam pa ray amin a kasalanan ko.
19 Nengneng mo pay ontan lan karakel na saray kalaban ko; tan say ontan lan pamobosul dad siak!
20 Iyagel tan ilaban mo ak pa; ag mo pa iyaabuloy a natalo ak, ta onsasalimbeng ak ed sika.
21 Iyagel ak komun na kaabigan tan kaptekan ko, ta manmamatalek ak ed sika.
22 Ekal mo pad saray totoom ya Israelita, O Dios, iray amin a gunigon da!
1 "Katawan, ibawag mo pan anggapoy kasalanan ko, ta maung iray gagawaen ko tan sigput so panmamatalek kod sika.
2 "Sokayan tan subok mo ak pa, Katawan; sintinsiaan mo pa ray pilalek ko tan saray kanunotan ko.
3 "Iwawanwan ak na ag mangoman a panangarom; itotonton ak lawas na katooran mo.
4 "Ag ak mililimug ed saray totoon andi-kakanaan; ag ak mibabalid saray mansimpisimpitan.
5 "Kabosul koy olup da ray totoon maoges, tan papaliisan ko ray managgaway kaogsan.
6 "Katawan, oorasan ko ray limak a pangipanengneng kon anggapoy kasalanan ko, tan liliberen koy altar mo diad pangigagalang kod sika.
7 "Maksil so pangakantak na imnon pisasalamat, tan ibabagak ya amin iray makapakelaw a gawgawam.
8 "Katawan, inarok so abung a panaayaman mo, say pasen a kawalaay kagalangan mo.
9 "Ag mo ak pa pidudusad saray makasalanan; ipaliis mo ak pad pansumpalan da ray managpatey na too
10 saray totoon manggagawa lawas na kaogsan tan sipaparaan ira lawas a mangawat na pasoksok.
11 Siak balet, maung so gagawaen ko; kasian tan ilaban mo ak pa!
12 Arawi ak ed antokaman a kaatapan; idadayew koy Katawan diad olup da ray totoo to.
1 "Say Katawan so silew tan kilalaban ko, kanyan anggapoy tatakotan ko. Say Katawan so mangyaagel ed siak ed antokaman a kaatapan; ag ak balut ontakot.
2 "No dogpaan ak a pateyen na saray totoon maoges, natiror tan natumba ra.
3 "Anggan liktuben ak na olup na saray sondalo, ag ak ontakot; anggan dogpaan ak na saray kalaban ko, manmatalek ak nin siansia ed Dios.
4 "Saksakey so kinerew kod Katawan; saksakey so pampipilalekan kon nagamuran: say panayam kod abung na Katawan legay bilay ko, pian nanengneng kod may kaabigan to, tan nakerew ko so panangiwanwan to.
5 "No panaoy kairapan salimbengan to ak; iyamut to ak ed Timplo to tan itapew to ak ed baton-dampay, pian ag ak nasigensigen.
6 "Kanyan taloen ko ray kalaban kon walad kaliber-liber ko. Mangisaklang ak na saray bagat ed Timplo to a katekep na eyag na liket. Kantaan tan idayew ko so Katawan!
7 "Dengel mo ak pa, Katawan, no ontawag ak ed sika! Kasian mo ak tan ebatan mo ak pa!
8 "Nen kuanmo, Dago kayod siak, immebat ak, Ondago ak ed sika, Katawan.
9 "Ag mo ak pa iyaamutan! Ag mo ak pa pamapasnukan; ag mo ak pa ipopolisay. Sikay mananulong ko; ag mo ak pa tataynan, ag mo ak pa ikakaindan, O Dios a manangilaban ko!
10 Nayarin ikaindan ak na amak tan inak, balet say Katawan so mangasikasod siak.
11 Katawan, ibangat mo ak pad labay mon gawaen ko, tan itonton mo ak ed dalan ya anggapoy kaatapan, ta amayamay iray kalaban ko.
12 Ag mo pa iyaabuloy a napelag ak ed lima da ray kalaban ko, a manusumlang ed siak diad panamegley na panagtila tan panagtaktakot.
13 Manisia ak a nanengneng ko so kaabigay Katawan diad sayan bilay.
14 Manmatalek kad Katawan. Mampabiskeg ka, pakpel moy linawam. On, manmatalek kad Katawan.
1 "Ontatawag ak ed sika, Katawan, a manangyagel ko. Dengel mo ak pa! No ag mo ak ebatan, magmaliw ak a sakey ed saray totoon onlalasur ed pasen a panaayama da ray inaatey.
2 "Dengel mo ak pa no onkerew ak ed sika na tulong, no iyatagey ko ray limak tan iyarap ko rad masanton Timplom.
3 "Ag mo ak pa pidudusad saray totoon maoges, totoon managgaway kaogsan saray totoon maung so pitotongtong dad kapara ran too, balet walay bosul ed kapusoan da.
4 "Dusam ira lapud saray ginagawa ra, lapud saray kasalanan da. Dusam ira lapud saray ginagawa ran kasalanan; iter moy dusan kanepegan da!
5 "Ag da iimanoen iray ginagaway Katawan, odino saray pinapalsa to; kanyan dusaen to ra, tan deralen to ra ya anggad angga.
6 "Idayew yoy Katawan; ta dinengel toy inkerew ko na tulong.
7 "Say Katawan so biskeg tan manangyagel ko, imamatalek kod sikato so bilay ko. Tutulongan to ak tan pagagayagaen to ak; idayew ko diad panamegley na saray maliket a kanta.
8 "Say Katawan iyaagel to ray totoo to, iyaagel tan ilalaban toy pinili ton ari.
9 "Ilaban mo pa ray totoom, O Katawan, tan bindisionan mo pa ray totoon kayaryan mo! Sika komuy pumapastol da, tan asikasom ira ya anggad angga.
1 "Idayew yoy Katawan, sikayo ran anghil na Dios; idayew yoy kagalangan tan say pakayari to.
2 "Idayew yoy mapagalang a ngaray Katawan, no ompanengneng imay Masanto, dakmomo kayod arap to.
3 "Narerengel so bosis na Katawan diad tapew da ray dayat; onkakarul so mapagalang a Dios, et narerengel so bosis to ed saray danum.
4 "Narerengel so bosis na Katawan, say bosis ton makapanyari tan napnoy kagalangan.
5 "Say bosis na Katawan popoteren to ray kiew a sidro, anggan saray sidro ed Libano.
6 "Paluluksoen ton singa saray kilaw a baka iray kapalandeyan na Libano, tan palologtuten ton singa kilaw a bakan kalakyan so Palandey a Hermon.
7 "Say bosis na Katawan so mamapakirmat.
8 "Say bosis na Katawan yeyegyegen toy kalawakan; yeyegyegen to so kalawakay Cades.
9 "Say bosis na Katawan yuyugayogen to ray kiew a robli tan papepelagen to ray bolung na kakiewan, legan ya amin a totood Timplo to et oneeyag, Nagalang so Dios!
10 Ooleyan na Katawan iray danudanum; manari ya anggad angga.
11 Pabibiskegen na Katawan iray totoo to, tan bibindisionan to ra na kareenan.
1 "Idadayew ta ka, Katawan, lapud inlaban mo ak tan ag mo inyabuloy yaelek-elekan ak na saray kalaban ko.
2 "Kinmerew ak na tulong ed sika, O Katawan a Dios ko, et pinaabig mo ak;
3 "ag mo inyabuloy ya onla ak ed lobuk. Wala ak lad dalan a mamaarap ed lobuk, balet pinapawil moy bilay ko.
4 "Kantaan yoy panangidayew so Katawan, sikayo ran matoor a totoo to! Nunot yo no anto ray ginagawa na samay Masanto, tan pisalamatan yo!
5 "Mangangganon onkekepay sanuk to, balet anggad samput na bilay so kaabigan to. Nayarin walay ermen no labi, balet onsoblay so gayaga no kabwasan so onsabi.
6 "Aliknak ya arawi ak ed kaatapan, kanyan kuankod siak a dili, Ag ak balut natalo.
7 "Maung kad siak, Katawan; inyagel mo ak a singa tirinsirad palandey. Balet, nen inyamutan mo ak, natatakot ak.
8 "Tinmawag ak ed sika, Katawan; akikasi ak a tulongan mo ak:
9 "Anton kaabigan so niiter ed sika na ipatey ko? Anton gunggona so naalam ed kipompon ko? Nadayew ka ni na saray inaatey? Nibawag da niy inkamaung mo?
10 Dengel mo ak pa, Katawan, tan kasian mo ak! Tulongan mo ak pa, Katawan!
11 Sinalatan mo na magayagan sayaw so ermen ko; nilakseb mod siak so ermen ko, insan inkawes mod siak so gayaga.
12 Ag ko sirin pepetay sangik; kantaan ta kay panangidayew. Katawan, sikay Dios ko; ando lan andon misalamat ak ed sika.
1 "Onsisingger ak a papaiyagel ed sika, O Katawan; ag mo pan balut iyaabuloy a natalo ak. Matonung kan Dios, ilaban mo ak, pikasik ed sika!
2 "Dengel mo ak pa! Ilaban mo ak la natan! Sika pa so salimbengan ko a mangyagel ed siak; sika pay tirinsirak a mangilaban ed siak.
3 "Sikay salimbengan ko tan say tirinsirak; iwanwan tan itonton mo ak pa onung na insipan mo.
4 "Ipaliis mo ak pad patit a nitaryad siak; iyarawi mo ak pad kaatapan.
5 "Imamatalek kod sika so ispirituk. Ilaban mo ak, Katawan; matoor kan Dios.
6 "Kabosul mo ray mangigagalang ed saray tila-tilan diriyos; balet manmamatalek ak ed sika.
7 "Manliket tan manggayaga ak, lapud ag mangoman a panangarom. Nanenengneng moy paniirap ko; amtam so kagugunigon ko.
8 "Ag mo inyabuloy a nadakep ak na saray kalaban ko; initdan mo ak na kawayangan ya onlad labay kon laen.
9 "Katawan, kasian mo ak pa, ta nagugunigon ak; naksawan la ray matak lapud ontan lan kakaakis; makapkapoy ak lan sigput!
10 Naknaksawan ak la lapud ermen, tan pinatikey la na kakaakis so bilay ko. Makapkapoy ak la lapud saray gunigon ko; onkakalug met la ray pokel ko.
11 Balbalawen ak na amin a kalaban ko; kabkabosul ak na saray kakaabay ko. Antakot ed siak iray makapikabat ed siak; no nanengneng da ak ed dalan, ibatikan da ak.
12 Singa ak inatey ya alingwanan la na amin a totoo; singa ak sakey a bengatlan imbantak la.
13 Narerengel koy esaesan da ray amayamay a kalaban ko; makapataktakot so walad kaliber-liber ko. Iplaplano ray ilaban dad siak, mankokomplut iran mamatey ed siak.
14 Balet, manmamatalek ak ed sika, Katawan; sikay Dios ko.
15 Wala lawas ed limam so bilay ko, iliktar mo ak pad saray kalaban ko tan saray mamapairap ed siak.
16 Kasian mo ak pan managlingkur mo; ilaban mo ak palapud ag mangoman a panangarom.
17 Ontatawag ak ed sika, Katawan; ag mo pa iyaabuloy a napelag ak ed kababaingan. Saray maoges komun so napelag ed kababaingan; nakalkalnaan ira komun a nibaki ed panaayaman da ray inaatey.
18 Patondam pa lan pansasalitaen iray matitila amin da ray malalastug tan mapaatagey a mansasalitay pamabaing nipaakar ed saray totoon matonung.
19 Makapakelaw a tuloy so kamaungan ya igaganam ed saray mangigagalang ed sika! Kabat na amin a totoo so ontan lan kamaungan mo, say ontan lan panangyagel mod kaatapan ed saray manmamatalek ed sika.
20 Lapud kiwawalam iyaagel mo ra ed saray komplut da ray totoo; diad anggapoy kaatapan a pasen, iyaamut mo ra ed saray panagpabaing na saray kalaban da.
21 Nadayew komuy Katawan! Makapakelaw so impangipanengneng toy panangaro tod siak, nen aliktub tan adogpaan ak!
22 Diad inkataktakot ko abaloan ko a pinaarawi to ak lad arap to. Balet dinengel to ak, nen kinmerew ak ed sikato na tulong.
23 Aro yoy Katawan, amin yon matoor a totoo to! Iyaagel na Katawan iray matoor, balet dudusaen to ray mapaatagey onung ed kanepegan da.
24 Mampabiskeg kayo tan mampakasil kayoy linawa, amin yon maniilalod Katawan.
1 "Maliket iray totoon apirdona la ray kasusumlang da tan apaandi la ray kasalanan da.
2 "Maliket so too a say Katawan et ag to aakusaen a nanggaway kaogsan tan anggapod puso to so antokaman a panamalingo.
3 "Nen ag ko ni impatwa ray kasalanan kod sika, Katawan, makapkapoy ak lapud impanaakis kon inagew-agew.
4 "Agew-labin dinudusa mo ak, Katawan; nakal lan sigput so biskeg ko, a singa bengatlan ambasa a pinamagay petang ed panaoy tiagew.
5 "Insan impatwak iray kasalanan kod sika; ag ko inyamut iray maoges a ginagawak. Ginetmak ya ipatwak irad sika, et pinirdonam ya amin iray kasalanan ko.
6 "Kanyan amin a matoor a totoom et nepeg day mampikasid sika no panaoy pankaukolan; no onsabiy baleg a delap na gunigon, ag nasabiy kawalaan da.
7 "Sikay pasen a panaamutan ko; sikay mangipaliis ed siak ed gunigon. Maksil ya ikantak so panangilaban mo, ta iyaagel mo ak.
8 "Kuay Katawan, Iwanwan ta kad dalan a nepeg mon tombuken; ibangat tan simbawaan ta ka.
9 "Ag yo aaligen so anggapoy kalakal a kabayo o mulo, a pakalatan tan rindaan pian napatoluk.
10 Amayamay so panirapan na totoon maoges, balet saray manmamatalek ed Katawan iyaagel iray ag mangoman a panangaro to.
11 Sikayo ran totoon matonung, manliket tan manggayaga kayo, lapud saray ginagaway Katawan! Amin yon matoluk ed sikato, iyeyag yoy liket yo!
1 "Sikayo ran totoon matonung, iyeyag yoy liket yo, lapud saray ginagaway Katawan; idayew yo, sikayo ran matoluk ed sikato.
2 "Misalamat kayod Katawan diad panamegley na pantogtog yod saray lira, kantaan yo a binansagan na saray arpan samploray deles.
3 "Kantaan yo na balon kanta, apiapiger yon togtogen so arpa, tan iyeyag yoy liket yo!
4 "Tua ray salita na Katawan, tan napanmatalkan ya amin iray gawgawa to.
5 "Inaroy Katawan so katonungan tan say kaptekan; say mundo napno na ag mangoman a panangaro to.
6 "Pinalsa na Katawan iray katawenan diad panamegley na ganggan to; pinalsa toy agew, bulan, tan saray bitewen diad panamegley na salita to.
7 "Impantitipon ton amin iray dayat ed saksakey a pasen; inyatul to ray kaaralman na dayat ed saray kuarton panagsinupan.
8 "Igalang moy Katawan, sikan sankamundoan. Pagalangan yo, sikayon amin a katoowan ed intiron mundo.
9 "Nen nansalita, apalsay mundo; nen nangganggan, linmesay amin a bengatla.
10 Say Katawan pagmamaliwen ton andi-kakanaan iray getma na saray bansa, ag to iyaabuloy a nasumpal iray plano ra.
11 Balet mansiansian anggad angga iray plano na Katawan; ando lan andon mansiansia iray getma to.
12 Maliket so bansa a say Dios to et say Katawan; maliket iray totoon pinili na Dios a kayaryan to!
13 Say Katawan onuusdong a manlapud tawen, et nanenengneng ton amin iray katoowan.
14 Manlapud a panooleyan ton pasen, uusdongan ton amin iray manaayam ed tapew na dalin.
15 Sikatoy panlalapwan na amin a kanunotan da, tan iimanoen ton amin iray gawgawa ra.
16 Ag manatalo so sakey ya ari lapud saray makapanyarin sondalo to; ag manatalo so sakey a sondalo lapud dilin biskeg to.
17 Saray kabayon para bakal et anggapoy nitolung dad pananalo; ag makapangilaban so ontan lan biskeg da.
18 Imanoen na Katawan iray mangigagalang ed sikato, saray manmamatalek ed ag mangoman a panangaro to.
19 Ilalaban to rad patey, pambibilayen to ra no panaoy eras.
20 Say Katawan so paniilaloan tayo; sikatoy mananulong tan manangyagel tayo.
21 Maliket itayo lapud sikato, manmamatalek itayod masanton ngaran to.
22 Katawan, say ag mangoman a panangarom et wala komun ed sikami, bangta manmamatalek kamid sika.
1 "Misalamat ak lawas ed Katawan; ag ak ontondan mangidayew ed sikato.
2 "Idayew koy Katawan lapud saray ginagawa to; ondengel tan manggayaga komun iray maniirap!
3 "Ibaan yo ak a mangitandurod Katawan; mankakasakey itayon mangidayew ed ngaran to!
4 "Nampikasi ak ed Katawan et inebatan to ak, inekal ton amin iray takot ko.
5 "Onsisingger ed sikato ray napapairap, et magayaga ra; ag iran balut nabaingan.
6 "Ontatawag ed sikato iray doroka, et eebatan to ra; ilalaban to ra ed amin a gunigon da.
7 "Say anghil na Katawan babantayan to ray mangigagalang ed Katawan tan iyaagel to rad kaatapan.
8 "Nengneng mon dili so ontan lan kaabigay Katawan. Maliket iray totoon onsasalimbeng ed sikato.
9 "Igalang yoy Katawan, amin yon totoo to; saray matoluk ed sikato et walay amin a nakakaukolan da.
10 Anggan saray lion nanaandian iray nakan tan nanaerasan ira, balet ag onkukulang ed antokaman a maabig iray mangoonur ed Katawan.
11 Gali dia, anak, tan dengel yo ak, ta ibangat ta kayo a mangigalang ed Katawan.
12 Labay yon maliket so pambilay yo? Labay yon andokey tan maaligwas so pambilay yo?
13 Ag kayo sirin mansasalitay maoges tan ag kayo mantitila.
14 Arawian yoy kaogsan tan manggawa kayoy kamaungan; pampilalekan yod intiron puso so kareenan.
15 Say Katawan iimanoen to ray matonung, tan dedengelen to ray tawag da;
16 balet sumpad saray managgaway kaogsan, kanyan no ompatey ira, sigput la ran nalingwanan.
17 Saray matonung ontatawag irad Katawan, et dedengelen to ra; iyaagel to rad amin a gunigon da.
18 Say Katawan maasinger ed saray nanaekalay biskeg na linawa; ilalaban to ray sigput a naandiay ilalo.
19 Amayamay iray gunigon a paniirapay toon matonung, balet say Katawan ilalaban tod amin a gunigon to;
20 aasikasoen a maung na Katawan; anggapoy pokel ton napoter.
21 Pateyen na kaogsan iray totoon maoges; nadusa ray mamobosul ed saray matonung.
22 Ilaban na Katawan iray totoo to; ag nadusa ray papaiyagel ed sikato.
1 "Sumlang mo pa ray onsusumlang ed siak, O Katawan, tan labanan mo ray onlalaban ed siak!
2 "Alam pay samper tan say kawes mon para bakal, ta dago mo ak ya iyagel.
3 "Iyayag mo pay pikam tan say wasay mo ed saray mangoosil ed siak. Isipan mo pan ilaban ak.
4 "Natalo tan napelag komun ed kababaingan iray malabay a mamatey ed siak! Napapoliktar tan nagewgew komun iray mankokomplut sumpad siak!
5 "Magmaliw ira komun a singa taep ya itiktikyab na dagem, na oosilan iray anghil na Katawan!
6 "Ambilonget tan andanglel komuy dalan da, no kakabilen iray anghil na Katawan!
7 "Anggan anggapoy makasengeg, pinatitan da ak tan angotkot iray aralem ya abut a pangerel dad siak.
8 "Balet naderal iran ag da amta; naerel irad dilin patit da tan ompatey ira.
9 "Kanyan manggayaga ak lapud Katawan; manliket ak lapud inlaban to ak.
10 Diad intiron pusok ibagak ed Katawan, Anggapoy miparad sika, Iyaagel mo ray makapoy ed saray mabiskeg, saray mairap-bilay ed saray managpairap.
11 Saray totoon maoges mantatasi ra sumpad siak, tan iyaakusa rad siak iray kasalanan ya ag kon balut ginawa.
12 Maoges so ibabales dad maung a ginawak, et ontan lay paneermen ko.
13 Balet nen mansasakit ira nanermen ak; pinairap koy siak a dili diad ag ko impangan, tan nandakmomo ak a nampikasi,
14 a singa panangipikasik ed sakey a kaaro o agi. Akatewek ak a nanaakar-akar lapud ermen, a singa ak anak a paneermenan toy ina to.
15 Balet nen maniirap ak, makaliliket ira tan niliktub da aka ludlureyen; kinabil ak na saray totoon ag ko kabat tan ag da ak tinondaan a pinairap.
16 Panngilngiletan da ak lapud pamobosul da; singa ra totoon mambabalaw ed lopuy.
17 Katawan, kapigan ka ontondan mamambantay labat? Iyagel mo ak pad saray panagdogpa ra; iyagel mo pay bilay ko ed sarayan lion!
18 Insan pisalamatan ta kad tipon da ray totoom; idayew ta kad arap dan amin.
19 Ag mo iyaabuloy a saray kalaban ko, saraman a matitila, et elek-elekan day inkatalok. Ag mo pa met iyaabuloy a saray mamobosul ed siak ya anggapoy makasengeg et ludlureyen day impanermen ko.
20 Ag ira mansasalitan singa saray kakaaro; ingen manggagawa ray nandoroman tila nipaakar ed totoon maarod kareenan.
21 Aakusaen da ak tan iyeeyag da, Anengneng miy ginawam!
22 Balet sika, Katawan anengneng mo yan agawa. Kanyan ag ka komun marereen labat, O Katawan; ag mo ak pa aarawian!
23 Liing ka pa, O Katawan, ta iyagel mo ak; bangun ka pa, Dios ko, ta italindeg moy katonungan ko.
24 Katawan a Dios ko, matonung ka, kanyan ibawag mon anggapoy kasalanan ko; ag mo iyaabuloy pa ya elek-elekan ak na saray kalaban ko.
25 Ag mo pa iyaabuloy a nibaga rad sikaran dili, Satan imay labay min nagawa! Tinalo min siansia!
26 Saray elek-elekan day paniirap ko et sigput ira komun a natalo tan nagewgew; saray mambalegbalegan nen say siak et napaabeba ra tan napelag ira komun ed kababaingan.
27 Saray mampipilalek a napaneknekan ya anggapoy kasalanan ko et oneyag ira komun ed liket tan ikuandan naynay, Matalonggaring so Katawan! Maliket ed inyaligwas na aripen to.
28 Diad satan ibawag koy inkatonung mo, tan idayew ta ka lawas ya inagew-agew.
1 "Say kasalanan mansasalita ed otel na pusoy toon maoges; ipopolisay toy Dios tan ag to igagalang.
2 "Lapud atagey a tuloy so pangipapasen tod sikaton dili, abaloan ton say kasalanan to et ag la naamtaay Dios tan ag to la pakadusaan.
3 "Maoges iray salita to tan tila ran amin; ag to la manggagawa na ontokuy ed kakabatan tan kamaungan.
4 "Mangiplaplanoy maoges no mandokdokul; anggapoy maung a gagawaen to; ag ton balut ipopolisay so kaogsan.
5 "Katawan, say ag mangoman a panangarom et sasabien to ray katawenan; say katooran mo et sasabien to ray kaloreman.
6 "Say inkatonung mo et atagey a singa saray kapalandeyan, say kaptekan mo et singa kaaralem na dayat. Sika, Katawan, so mangaasikasod saray katoowan tan saray ayayep.
7 "Mablin tuloy, O Dios, so ag mangoman a panangarom! Niyaagel kamid silong na saray payak mo.
8 "Panliliketan miy ag nasabsabaan a kakanen ya iiter mo; paniinomen mo kamid ilog na kaabigan mo.
9 "Sikay panlalapwan na amin a bilay, tan lapud silew mo nanenengneng miy liwawa.
10 Ituloy mo pan aroen iray makaamtad sika tan ipanengneng so kaabigan mo ed saray matonung.
11 Ag mo pa iyaabuloy a dogpaan ak na saray totoon mapasirayew, o pabatiken ak na saray totoon maoges.
12 Nengneng moy pasen ya abaktaran da ray totoon maoges. Wadman ni ran kibalatar, tan ag ira makabangon.
1 "Ag ka nagugunigon lapud saray totoon maoges; ag ka mangiimon ed saray manggagaway kaogsan.
2 "Ag mabayag naandipat iran singa karikaan a namamagaan; ompatey iran singa nalnes a mabunan tanaman.
3 "Manmatalek kad Katawan tan manggawa kay kamaungan; manayam kad dalin tan arawi kad kaatapan.
4 "Say Katawan so pananapan moy liket mo, et iter tod sika ray pampipilalekan na pusom.
5 "Ipiam ed Katawan so bilay mo; manmatalek kad sikato, et sikay tulongan to;
6 "say inkatonung mo pasinagen ton singa agew ed kaagwan.
7 "Mandeen kad arap to, tan mananos kan manalagar ed sikato; ag ka nagugunigon lapud saray totoon onaaligwas, odino lapud saray totoon maung so pansusumpalay maoges iran getma ra.
8 "Ag ka mapaspasnuk o mapagpaga; gunigon labat so pansumpalan to.
9 "Nakayaryan na saray manmamatalek ed Katawan so dalin balet napagit iray totoon maoges.
10 Ag mabayag naandipat la ray totoon maoges; anggan anapen mo ra, ag mo la ra narumog.
11 Balet nakayaryan na saray mapaabeba so dalin; manliket ira lapud maaligwas tan mareen so bilay da.
12 Say toon maoges mamplaplano sumpad maung a too tan manngilet lapud pambosul to.
13 Eelekan na Katawan iray totoon maoges, ta amta ton maganggano lan onsabiy kadusa ra.
14 Saray totoon maoges ooyusen da ray ispada ra tan pipinaten da ray pana ra, ta pateyen da iray mairap-bilay tan saray walad pankaukolan, ta ekalan day bilay iray manggagaway kaptekan;
15 balet nadoyuk ira na saray dilin ispada ra, tan napoter-poter iray pana ra.
16 Say daiset a kayaryay toon matonung et maung ni nen say kayamanan na amin da ray totoon maoges,
17 ta say Katawan ekalan toy biskeg iray totoon maoges, balet iyagel to ray maung a totoo.
18 Say Katawan aasikasoen to ray matoluk ed sikato, tan nakayaryan dan anggad angga so dalin.
19 Ag ira manirap no makapoy so panaon; ag ira naandiay nakan no panaoy eras.
20 Balet ompatey iray totoon maoges, naandipat a singa rosas a balang iray kalaban na Katawan; naandipat iran singa asewek.
21 Miuutang so toon maoges et ag to babayaran, balet maiter tan matulong so maung a too.
22 Ta saray binindisionay Katawan et nakayaryan day dalin, balet napagit iray insamba to.
23 Iwawanwan na Katawan so sakey a too ed nepeg a pankurangan to, tan iyaagel to ray makapaliket ed sikato.
24 No niparokul ira, ag ira mansiansian dokul, ta say Katawan ibaan to ran ombangon.
25 Aliwa ak lan ogaw; masiken ak la, balet ag ko ni akanengneng na toon matonung ya inkainday Katawan, odino mipapayabol na nakan iray anak to.
26 Mabolus lawas so linawa ton mangiter tan mamapabayes ed kapara ton too, tan bindision iray anak to.
27 Arawian moy kaogsan tan manggawa kay kamaungan, et mansiansian mambilay ed dalin iray kabyangay boleg mo;
28 ta say Katawan inaro toy kaptekan, tan ag to ikakaindan iray matoor a totoo to. Iyaagel to ra lawas, balet saray kabyangay boleg na totoon maoges et napagit ira.
29 Saray matonung kayaryanen day dalin, tan panayaman da ya anggad angga.
30 Say maung a too kakabatan so ibabalikas to, tan kaptekan so sasalitaen to.
31 Walad puso toy ganggay Dios to, tan ag ton balut sisianan.
32 Babantayan na toon maoges so maung a too tan sisiliban ton pateyen;
33 balet ag paolyan na Katawan so maung a too a napelag ed pakayariy kalaban to, o paolyan ton nasintinsiaan a nankasalanan no naakusa.
34 Manmatalek kad Katawan, tan onur mo ray ganggan to; pagalangan to ka diad pangiter tod sikay dalin, tan nanengneng mon napagit iray totoon maoges.
35 Aminsan akanengneng ak na toon maoges tan maruksa; singa kiew a sidro ed Libano so panagpaatagey to;
36 balet ag abayag linmabas ak, et anggapo met la; inanap ko, et ag ko la narumog.
37 Imanom so toon maung, asikasom so toon matonung; say toon maarod kareenan et wala ray kabyangay boleg to,
38 balet naderal ya amin iray makasalanan, tan naoput iray kabyangay boleg da.
39 Say Katawan ilalaban to ray totoon matonung tan iyaagel to ra no panaoy gunigon.
40 Tutulongan tan ililiktar to ra; iyaagel to rad totoon maoges, ta papaiyagel irad sikato.
1 "Katawan, ag mo ak pa dudusaen lapud pasnuk mo!
2 "Sinugat mo ak na saray panam, kinabil mo ak na saray limam.
3 "Lapud petang na olom, agay lay paniirap ko; lapud saray kasalanan ko mansasakit so intiron laman ko.
4 "Onlelereg ak ed karakel na kasalanan ko; nadedetdetan ak lapud ontan lay belat da.
5 "Lapud kalokowan ko, naboboluk tan ombabanget iray girik.
6 "Abokut ak la tan naknaksawan ak; maermen ak lawas ya inagew-agew.
7 "Singa ak popoolan ed kapepetang ko, tan ngalngali ak la ompatey.
8 "Makapkapoy ak tan agaylay kesaw ko; nagugunigon ak tan manay-ay ak lad sakit.
9 "Katawan, amtam ya amin iray pampipilalekan ko; narerengel mo ray amin a panay-ay ko.
10 Mampokal so pusok tan naoput lay biskeg ko, tan ngalngali ag ak la makanengneng.
11 Ag ak la singgeran na saray kakaarok tan saray kakaabay ko, lapud saray girik; aarawian ak na anggan saray kabyangay pamilyak.
12 Saray malabay a mamatey ed siak et papatitan da ak; saray malabay a mamasakit ed siak et tataktakoten da ak a pateyen; ag ira ontotondan mankokomplut sumpad siak.
13 Singa ak telek ya ag makadngel, singa ak emel ya ag makasalita.
14 Singa ak toon ag makadngel, kanyan ag ak makaebat.
15 Balet manmamatalek ak ed sika, O Katawan; et sika, Katawan a Dios ko, so onebat ed siak.
16 Ag mo pa iyaabuloy ya elek-elekan na saray kalaban ko so paniirap ko; ag mo pa met iyaabuloy a manlastug ira lapud inkatalok.
17 Ngalngali ak la natumba, tan ag ontotonday panliliknak na sakit.
18 Ipapatwak iray kasalanan ko; paneermenan ko ra.
19 Saray kalaban ko et maabig so laman da tan mabiskeg ira; dakerakel iray mamobosul ed siak ya anggapoy makasengeg.
20 Saray mangibabales na maoges ed maung et kalaban da ak lapud panggagawak na kamaungan.
21 Ag mo ak pa ikakaindan, Katawan; ag mo ak pa aarawian, O Dios ko!
22 Tulongan mo ak pa natan, O Katawan a manangilaban ko!
1 "Inkuanko, Apigeren ko ray kagagawak tan ag ko iyabuloy a pankasalananen ak na dilak; ag ak mansalita na anggan anto, no walad kaliber-liber ko ray totoon maoges.
2 "Nandeen ak tan ag ak inmeseesel; ag ak nansalita na anggan say nipaakar ed kamaungan! Balet lalon mandenden so kairapan ko,
3 "tan mapagpaga ak. Diad pannununot kon maung, lalon dinmendey gunigon ko; ag ko la napokpokay onkerew na onya:
4 "Katawan, kaonungan niy pambilay ko? Kapigay ipatey ko? Ibagam pad siak no kapigay pansamput na bilay ko?
5 "Agaylay katikey na pambilay kon inter mo! Para sika singa anggapo so karokey na intiron bilay ko. Say bilay na too singa labat siplug na dagem;
6 "singa labat anino. Anggapoy kakanaan iray pansasagputan to; mantitipon na kayamanan, balet ag to amta no siopay mannanam!
7 "Anto sirin, Katawan, so nayarian kon panilaloan? sika so paniilaloan ko.
8 "Ilaban mo ak pad amin da ray kasalanan ko, tan ag mo pa iyaabuloy a ludlureyen ak na saray totoon makulang-kulang.
9 "Mandeen ak, ag ak mangibalikas na anggan anton salita, ta sikay nanlapwan na sayan paniirap ko.
10 Ag mo ak pa la dudusaen! Ngalngali ak la ompatey lapud panagkabil mod siak.
11 Dudusaen mo ray kasalanan na too diad panamegley na panagpasnuk mo, tan dederalen mon singa bigis iray bengatlan labalabay to. Tuan say too et singa labat siplug na dagem!
12 Dengel mo pay pikakasik, Katawan, tan talineng moy tagleey ko; tulongan mo ak pa no mannangnangis ak. Magano labat a sangkailim ak a singa saray lalakik.
13 Paolyan mo ak pan manbukbukor pian wala met so liket ko, kasakbayay itaynan tan iyandipat ko diad mundo.
1 "Inanosan koy nanalagar ed tulong na Katawan; insan tinalineng to ak tan dinengel toy tawag ko.
2 "Inaon to ak ed abut na kaatapan tan diad gayungayun na patey. Inlira to ak ed tapew na baton-dampay et niarawi ak ed kaatapan.
3 "Imbangat to ak a mankantay balon kanta, sakey a kantan pangidayew ed Dios tayo. Ontakot iray amayamay a makanengneng ed saya tan manmatalek irad Katawan.
4 "Maliket iray manmamatalek ed Katawan, saray ag onsisingger ed saray talintaoy diriyos odino mibabalid saray mangigagalang ed saray tila-tilan diriyos.
5 "Katawan a Dios mi, amayamay iray ginagawam a para sikami; anggapoy miparad sika! Amayamay iray makapakelaw a planom a para sikami. Ag kon balut nibitla ran amin dakerakel iran tuloy!
6 "Ag mo labay iray bagat tan saray saklang; ag mo kekerewen iray bagat a popoolan o saray bagat a para kasalanan. Initdan mo ak ingen na layag a pandengel kod sika,
7 "kanyan inmebat ak, Wadya ak; saray bilibilin mod siak et wala rad libro na Ganggan.
8 "Agaylay liket kon mangoonur na linawam, O Dios ko! Yaatul kod pusok so bangat mo.
9 "Diad pantitipon da ray amin a totoom, O Katawan, imbagak so maung a balitan Manangilaban ka. Amtam ya ag ak balut ontondan mangibagad saya.
10 Ag ko pinokuk ed siak a dili so balitay panangilaban mo; lawas kon sasalitaey katooran tan say pananulong mo. Diad pantitipon da ray amin a totoom ag ko inyamut so ag mangoman a panangarom tan say katooran mo.
11 Katawan, amtak ya ag mon balut tondaan so pangakasim ed siak! Say ag mangoman a panangarom tan say katooran mo et iyarawi da ak lawas ed kaatapan.
12 Aliber ak na amayamay a gunigondiad karakel da, ag ko ra nabilang! Tinabunan ak na saray kasalanan ko, kanyan ag ak la makanengneng; dakel ira nen say buek na olok, et nakal so biskeg na linawak.
13 Katawan, ilaban mo ak pa! Tulongan mo ak pa natan!
14 Sigput a natalo tan nagewgew komun iray manggegetman mamatey ed siak! Napasener tan napelag komun ed kababaingan iray manliliket ed kagugunigon ko.
15 Onkapoy komun so linawa ra lapud inkatalo iray manluludlurey ed siak.
16 Manliket tan manggaya komun ya amin iray ondaragod sika. Amin a misasalamat lapud panangilaban mo et ikuan da komun lawas, Agaylay talonggaring na Katawan!
17 Makapkapoy ak tan pakaskasi ak, O Katawan, balet nununoten mo ak. Sikay mananulong tan manangilaban ko; dago mo ak pa lan tulongan, O Dios ko!
1 "Maliket iray totoon maaro ed saray mairap-bilay; tulongan ira na Katawan no nagugunigon ira.
2 "Iyagel ira na Katawan tan pansiansiaen to ran mambilay; pagmaliwen to ran maliket diad tapew na dalin; ag to ra paolyan a napelag ed pakayari na saray kalaban da.
3 "Say Katawan tulongan to ra no mansasakit ira tan paabigen to ra.
4 "Inkuanko, Katawan, nankasalanan ak ed sika; kasian mo ak pa tan paabig mo ak.
5 "Saray kalaban ko makapaingungot iray sasalitaen da nipaakar ed siak. Labay da ak lan ompatey tan nalingwanan.
6 "Ag napanmatalkan iray ondadalaw ed siak; mantitipon ira na saray maoges a balitan nipaakar ed siak, insan da ibabawag ed inerman a pasen.
7 "Amin da ray mamobosul ed siak et maneesaesan ira nipaakar ed siak, say sankaogsan so nunoten da nipaakar ed siak.
8 "Kuanda, Adapoay makapatey a sakit; ag to lan balut taynan so dokulan to.
9 "Anggan say sankaasinggeran a kaarok, samay pampipiaan kon maung, samay mimikan ed siak, et nantraidoran to ak.
10 Kasian mo ak pa, Katawan, tan paabig mo ak, pian makabawi ak ed saray kalaban ko.
11 Naamtaan ko a pakaliliketan mo ak, no ag ak taloen na saray kalaban ko.
12 Tulongan mo ak, ta gagawaen koy kaptekan; panayamen mo ak ya ando lan ando ed kawalaan mo.
13 Idayew yoy Katawan a Dios na Israel! Idayew yo ya anggad angga! Amen! Amen!
1 "No panoy pampipirawat na ulsa ed ambetel a danum na kolus, ontan met so pampipirawat kod sika, O Dios.
2 "Pampilpilalekan ta ka, say Dios a mabilay. Kapigay pakaonlak ed arap mo a mangigalang ed sika?
3 "Agew-labin manakakis ak, tan saray luak labat so pambibilay ko; saray kalaban ko et pitepet da, Iner so kawalaay Dios mo?
4 "Onsasakit so pusok kapag nanununotan ko ray agawa nen saman, nen kaibak iray karaklan a linmad abung na Dios, tan inwanwan ko rad panaakar da; malikeliket iran mankankanta tan maneeyag na dayew ed Dios.
5 "Akin et onya lay paneermen ko? Akin et mapalaloy kagugunigon ko? Say Dios so panilaloan ko, tan sikato lamet so idayew ko, say manangilaban ko tan Dios ko.
6 "Diad bansa a nibantakan ko onsasakit so pusok, kanyan sikatoy nanununotan ko. Tinabunan to ak na saray daluyon na kaermenan; pinadalanan to ak na delap na gewgew, a singa manungol a danum a napepelag ed Jordan manlapud saray Palandey na Hermon tan Mizar.
7
8 "Say Katawan ipanengneng to komun no agew so ag mangoman a panangaro to, pian makapankanta ak no labi, kantan pampikasik ed Dios na bilay ko.
9 "Ibabagak ed Dios a manangyagel ko, Akin et nilingwanan mo ak? Akin et siansiay paniirap ko lapud inkaruksa da ray kalaban ko?
10 Makapkapoy ak lad panagpabaing da, ta tepet la ran tepet ed siak, Inter so kawalaay Dios mo?
11 Akin et onya lay paneermen ko? Akin et mapalaloy kagugunigon ko? Say Dios so panilaloan ko, tan sikato lamet so idayew ko, say manangilaban ko tan Dios ko.
1 "O Dios, ibawag mo pan anggapoy kasalanan ko, tan ikatonungan mo ak pad saray totoon ag mamibirbir ed Dios; iliktar mo ak pad saray totoon matitila tan maoges!
2 "Sikay manangyagel ko; akin et inkaindan mo ak? Akin et siansiay paniirap ko lapud inkaruksa da ray kalaban ko?
3 "Ibakim pay liwawam tan say katwaan mo; iwanwan da ak komun tan ipawil da ak ed Sion a masanton palandey mo, tan diad Timplom a panaayaman mo!
4 "Onla ak ed satan ed altar mo, O Dios; sikay panlalapwan na liket ko. Togtogen koy arpak tan kantaan ta kay panangidayew, Dios, O Dios ko!
5 "Akin et onya lay paneermen ko? Akin et mapalaloy kagugunigon ko? Say Dios so panilaloan ko, tan sikato lamet so idayew ko, say manangilaban ko tan Dios ko.
1 "O Dios, nadngel na saray dilin layag mi imbagad sikami na saray lalaki mi, iray makapakelaw a ginagawam nen panaon da, diad saraman ya agew;
2 "say impamagit mod saray pagano, tan say impangisoblay mod saray totoon manayam ed dalin da; say impanusam ed saray totoon taga arum a bansa, tan say impamaaligwas mod saray dilin totoom.
3 "Saray totoom ag da sinamsam so dalin diad panamegley na saray ispada ra; ag da dinakep diad panamegley na dilin pakayari ra. Sinamsam da diad panamegley na dilin pakayarim tan biskeg mo, diad panamegley na kiwawalam ed pegley da, ya angipanengneng ya inarom ira.
4 "Sikay arik tan Dios ko; panataloen mo ray totoom,
5 "tan lapud pakayarim tataloen mi ray kalaban mi.
6 "Ag ko panmamatalkan a mangilaban ed siak so panak o say ispadak,
7 "balet inliktar mo kamid saray kalaban mi, tan tinalom iray mamobosul ed sikami.
8 "Idayew mi ka lawas, tan angga anggan misalamat kamid sika.
9 "Balet, natan, impolisay tan impatalo mo kami; ag mo la oolupen iray sondalo mi.
10 Inabuloyan mon imbatikan mi ray kalaban mi, kanyan inaala da ray kayaryan mi.
11 Inabuloyan mon pinatas da kamin singa karniro; imbuybuyak mo kamid saray arum a bansa.
12 Mamurmuray impangilakom ed saray dilin totoom, a singa anggapoy kablian da.
13 Sankanengneng na saray kakaabay mi so ginawam ed sikami, kanyan eelek-elekan tan luludlureyen da kami.
14 Ginawa mo kamin panelekan na saray arum a bansa; mameyeng-peyeng irad panlelemlemew dad sikami.
15 Lawas lay pakapapaabebak; mapalalo lay pakababaingan ko,
16 lapud pakarerengel kod panagbalaw tan panaglemlemew da ray kalaban ko tan saray mamobosul ed siak.
17 Agawa ra yan amin ed sikami anggaman ya ag mi ka alingwanan, odino dineral so impisipanan mod sikami.
18 Ag mi ka binenegan; ag mi sinumlang iray ganggan mo.
19 Anggaman ontan pinaolyan mo kamin pakaskasid pegley da ray ayayep ed katakelan; tan inkaindan mo kamid sankabilongetan a pasen.
20 No tinondaan miy angigalang ed Dios mi, tan akikasi kamid sakey a dios da ray arum a bansa,
21 naamtaan mo la komun, ta kabat mo ray maamut a nunot mi.
22 Balet lapud sika, napapatey kami lawas, tan nipapasen kamin singa karniron papatasen.
23 Liing ka pa, Katawan! Akin et naogip ka? Bangon ka pa. Ag mo kami pa ipopolisay ya anggad angga!
24 Akin et iyaamutan mo kami? Ag mo lilingwanan so paniirap tan kagugunigon mi!
25 Abakbaktar kamid dalin; mandokdokul kamid dabuk lapud inkatalo mi.
26 Bangon ka pa ta tulongan mo kami! Lapud ag mangoman a panangarom, iliktar mo kami pa!
1 "Mararakep iray salitan onsesepsep ed kanunotan ko, legan kon gagawaen yan kanta a para ari. Singa lapis na maung a mananulat, say dilak akaparaan lan mangibalikas na sakey ya anlong.
2 "Sikay sankaguapoan ed amin da ray lalaki; marunong kan manalita. Bibindisionan ka lawas na Dios!
3 "Isalokbit mo lay ispadam, arin makapanyari; mapagalang tan matalonggaring ka.
4 "Lakan sigagalang ya akalogan a manalo ed bakal, diad pangyagel mod katwaan tan katonungan! Say biskeg mo, panaloen to kad amayamay a bakal!
5 "Matdem iray tarem na panam; tuturoken day kapusoan na saray kalaban mo, saray bansa ondadakmomo rad saliyan mo.
6 "Say nanarian ya inter na Dios ed sika et mansiansia ya anggad angga. Matonung so panooley mod saray totoom;
7 "papablien moy inkatonung tan bobosulen moy kaogsan. Kanyan say Dios, a Dios mo, pinili to ka tan initdan to kay liket a baleg nen say inter tod saray arum ya arari.
8 "Say pabalingit a nanlapud mira tan aloe et mansamyung ed kawes mo; saray musiko paliliketen da kad saray palasion adikoraan na garing.
9 "Saray arum a bibiid palasiom et anak na saray arari, tan manalalagey so riyna ed nikawanay tronom, ya akaalahas na puron balituk.
10 Sikan nubiay ari, dengel ka pad ibagak lingwanan mo ray totoom tan saray kakanayon mo.
11 Lapud gangganam, pampirawatan kay ari; sikatoy katawan mo, kanyan nepeg mon onuren.
12 Saray totood Tiro iyawitan da ka na saray rigalo; labay na saray mamayaman ya alaey maung a linawam.
13 Walad palasio so prinsisaagaylay inkaganggana to! Ginawad balituk a tinebey so kawes to.
14 Marakerakep so kawes to nen niyaakar ed ari, tan manomtombok iray mamarikit a mangoolup ed sikato, a niyaakar met ira ed ari.
15 Maliket tan magayaga ran onsasabi ya onloob ed palasioy ari.
16 Sikan arik, nawalaan kay amayamay a lalakin anak ya onsalat ya arari ed saray lalakim, tan panoleyen mo rad intiron mundo.
17 Sayan kantak pansiansiaen ton anggad angga so inkabantug mo, tan dayewen ka na amin a katoowan ed amin a panaon.
1 "Say Dios so salimbeng tan say biskeg tayo; sipaparaan lawas ya ontulong no panaon na gunigon.
2 "Kanyan ag itayo sirin ontakot, anggan nayegyeg so dalin, tan natumbad dayat iray kapalandeyan;
3 "anggan unungol tan ondaluyon na ankakabaleg iray dayat, tan onggalaw iray kapokdulan lapud biskeg na saman a yegyeg.
4 "Walay ilog a mangiiter na gayaga ed siudad na Dios, diad masanton ayaman na Sankatageyan.
5 "Walad saman a siudad so Dios, kanyan ag balut naderal, tan diad palbangon laen ton tulongan.
6 "Natatakot iray bansa, nagogolo ray nanarian; oneeyag so Dios, et natotonaw so sankamundoan.
7 "Walad sikatayoy Katawan a Makapanyarin-amin; say Dios nen Jacob so salimbeng tayo.
8 "Gali dia, ta nengneng yoy ginagaway Katawan. Nengneng yo ray makapakelaw a ginagawa to diad tapew na dalin.
9 "Patotondaen to ray bakal ed intiron mundo; popoteren to ray pana, dederalen to ray pika, tan popoolan to ray samper.
10 Kuanko, Itonda yo lay panlalaban yo, tan birbir yon siak so Dios, sankatalonggaringan ed saray bansa, sankatalonggaringan ed intiron mundo.
11 Walad sikatayoy Katawan a Makapanyarin-amin; say Dios nen Jacob so salimbeng tayo.
1 "Mantipak kayod liket, amin yon katoowan! Idayew yoy Dios diad panamegley na maksil iran kanta!
2 "Nepeg a takotan so Katawan a Sankatageyan; matalonggaring ya ari a manooley ed sankamundoan.
3 "Impanalo to itayo ed saray totoo; impaoleyan tod sikatayo ray bansa.
4 "Pinili toy dalin a panaayaman tayo natan, say ikikinun a kayaryan na saray totoon inaro to.
5 "Onsesegep so Dios ed trono to. Wala ray maliket ya eyag tan tanul da ray trumpita leleg ya onsesegep so Katawan.
6 "Kantaan yoy pangidayew so Dios; kantaan yoy pangidayew so ari tayo!
7 "Say Dios so arid sankamundoan; kantaan yo na pangidayew.
8 "Manyodyorung so Dios ed masanton trono to; manooley ed saray bansa.
9 "Mantitipon iray manoley ed saray bansa a kaiba da ray totoo na Dios nen Abraham. Makapanyari so Dios nen saray amin a sondalo; sikatoy sankatageyan a manoley!
1 "Matalonggaring so Katawan, tan manepenepeg ya idayew ed siudad na Dios tayo, diad masanton palandey to.
2 "Atagey tan marakep so Sion a palandey na Dios; say siudad na matalonggaring ya ari so mangiiter na gayaga ed intiron mundo.
3 "Impanengneng na Dios ya anggapoy nagawan maoges ed loob na saray tirinsira na siudad lapud kiwawala tod man.
4 "Nantitipon iray arari tan dinmago ran dinmogpa ed Palandey na Sion.
5 "Balet kanengneng da nikelawan ira; ataktakot tan kibatiktik ira.
6 "Asabian irad may baleg a takot tan segsegang, singa biin ngalngali la mananak.
7 "Singa saray bapor ya ipapalig-palig na maksil a bagyo.
8 "Say nadngelan min ginaway Dios et anengneng mi la natan diad siudad na Dios mi, say Katawan a Makapanyarin-amin; asikasoen toy siudad ya anggad angga.
9 "Diad loob na Timplom, O Dios, dadalepdepen miy ag mangoman a panangarom.
10 Idadayew kay amin a katoowan ed inerman a pasen, tan say inkabantug mo lalaknaban toy intiron mundo. Matonung so panooley mo;
11 panggayagam pa ray totood Sion! Matonung so pananintinsiam, wala komuy gayaga ed saray siudad na Juda.
12 Totoo na Dios, liber yoy Palandey na Sion tan bilang yo ray tori to;
13 imano yo ray padir to tan nengneng yo ray tirinsira to, pian nibaga yo ed ontombuk a kailalakan:
14 Sayan Dios et Dios tayo ya anggad angga; iwanwan to itayo ed amin a panaon ya arapen.
1 "Dengel yo ya, amin yon katoowan! Dengel kayo, amin yon manaayam ed inerman a pasen,
2 "atagey o abeba may kipapasen yo, mairap-bilay man o mayaman kayo.
3 "Malinew iray kanunotan ko; ibalikas ko ray salita na kakabatan.
4 "Salitaen koy nipaakar ed saray probirbio, tan ipaliwawak so kabaliksan da leleg kon manotogtog na arpa.
5 "Ag ak antakot no panaon na kaatapan, no aliktub ak na saray kalaban ko,
6 "saray totoon manmamatalek ed kayaryan da, tan ilalastug day dakel a kayamanan da.
7 "Ag nayariay too a dondonen toy sikaton dili; ag to nabayaran ed Dios so bilay to,
8 "ta mabmablin tuloy so dondon na bilay na too. Say nayarian ton ibayar et kulang ni
9 "a pakapaliis tod lobuk, tan pakapambilay ton anggad angga.
10 Nanenengneng na anggan siopa ya ompapatey met iray totoon makabat, saray luko-luko tan saray makulang-kulang, tan ititilak dad saray kabyangay boleg da iray kayamanan da.
11 Saray lobuk so panabungan dad anggad angga; diman ira manayam ed amin a panaon, anggaman a wala ray dalin dan dili nen saman.
12 Anggan matalonggaring so sakey a too, ag mansiansian mambilay; ompatey nin siansia a singa saray ayayep.
13 Nengneng yoy nagagawa ed saray manmamatalek ed sikaran dili, say pansusumpalan da ray napepenek lad kayamanan da
14 nigetar iran ompatey a singa saray karniro, tan say Patey so magmaliw a pumapastol da. Taloen ira na saray totoon matonung leleg a naboboluk iray laman da ed panaayaman da ray inaatey ya arawi ed kaabungan da.
15 Balet dondonen ak na Dios; ilaban to ak ed pakayari na patey.
16 Ag kayo nagugunigon no onyayaman so sakey a too, tan no nanaaruman lan nanaarumay kayamanan to;
17 ag to lamlamang naawit no ompatey; ag milad sikato ed lobuk so kayamanan to.
18 Anggan maliket so sakey a too ed sayan bilay, tan nidadayew lapud maaligwas,
19 mitipon met lamlamang ed saray lalaki to no ompatey, diad pasen a kawalaay bilonget ya ag mangangga.
20 Anggan matalonggaring so sakey a too ag mansiansian mambilay, ompatey nin siansia a singa saray ayayep.
1 "Mansasalitay Katawan, say Dios a Makapanyari; tatawagen toy intiron mundo, manlapud bokig ya anggad sagur.
2 "Say Dios onsisindag a manlapud Sion, say siudad a nagnap sa dakep to.
3 "Onsasabiy Dios tayo, balet aliwan mareen; walay manliub ya apoy ed arap to tan mabiskeg a bagyo ed kaliber-liber to.
4 "Tatatawagen toy tawen tan say dalin a mantasi ed panintinsia tod saray totoo to.
5 "Ibabaga to: Tipon yod arap ko iray matoor a totook, saray akisipanan ed siak diad impangisaklang day bagat.
6 "Ibabawag da ray katawenan a matonung so Dios tan sikaton dili so huis!
7 "Dengel kayod ibagak, sikayon totook; mantasi ak sumpad sika, Israel. Siak so Dios, say Dios mo.
8 "Ag ta kayo pamapasnukan lapud saray bagat yo tan saray bagat a popoolan a lawas yon iyaakar ed siak.
9 "Anggaman ontan ag ko nakakaukolay bakan kalakyan a manlapud saray alog yo, o saray kanding a kalakyan a manlapud saray koral yo;
10 kayaryan kon amin iray ayayep ed katakelan tan saray baka ed nilibon kapokdulan.
11 Kayaryan kon amin iray manok ya atap tan amin da ray mabilay a bengatlan walad kaalogan.
12 No bilang naerasan ak ag ak mialad sikayoy kanen ko, ta kien koy mundo tan amin a logan to.
13 Mangakan ak na karni na bakan kalakyan odino oniinom na dala na saray kanding?
14 Say pisasalamat so nepeg yon ibagat ed Dios, tan iter yod Makapanyarin-amin so antokaman ya insipan yo.
15 Tawag kayod siak no onsabiy gunigon; ilaban ta kayo, et idayew yo ak.
16 Balet kuay Dios ed saray totoon maoges, Antoy kanepegan yon mangidadalatdat ed saray ganggan ko? Antoy kanepegan yon manotongtong na nipaakar ed impisipanan ko?
17 Ag yo labay so pamepetek kod sikayo, ipopolisay yo ray ganggan ko.
18 No makanenengneng kayoy matakew, magmaliw kayon kakaaro to, tan kaolup-olup yo ray mikakaloguran.
19 Sipaparaan kayon mansalitay maoges; mainomay yoy mantila.
20 Sipaparaan kayon mangakusad saray dilin agagi yo tan mamakasalanan ed sikara.
21 Ginagawa yo ira yan amin, et anggapoy ibabagak, kanyan abaloan yon singa ak sikayo. Balet natan pamapasnukan ta kayo la, tan ipapalinew ko la yan pamaakaran ed sikayo.
22 Dengel yo ya, sikayon ag mangasasikasod siak, ta no andi, bingbingkasen ta kayo, et anggapoy mangyagel ed sikayo.
23 Say pisasalamat so bagat a mangigagalang ed siak, tan andi-saew ya ilaban kon amin iray mangoonur ed siak.
1 "Kasian mo ak pa, O Dios, lapud ag mangoman a panangarom; ponasan mo pa ray kasalanan ko, lapud daakan a panangasim!
2 "Orasan mo ak pad amin a kaogsan ko tan linisan mo ak pad amin a kasalanan ko!
3 "Bibirbiren ko ray maoges a ginagawak; lawas walad kanunotan ko ray kasalanan ko.
4 "Sika labat, anggapo lay arum, so nankasalananan ko, tan ginagawak iray ipapasen mon maoges. Kanyan matonung so panisintinsiam ed siak.
5 "Nen nianak ak maoges ak la; nen inlokun ak nen inak makasalanan ak la.
6 "Say matoor a puso so pampipilalekan mo; panom pa na kakabatan mo so kanunotan ko.
7 "Ekal mo pay kasalanan ko, et magmaliw ak a malinis; orasan mo ak pa, et magmaliw ak ya ampoti-poti.
8 "Parengel mo ak pa na saray tanul na liket tan gayaga; et anggan ontan lay impamairap tan impanusam ed siak, manliket ak ni lamet.
9 "Ag mo pa nenengnengen iray kasalanan ko, tan ponasan mo pan amin so kaogsan ko.
10 O Dios, gawam pan malinis so pusok; itdan mo ak pay balo tan matoor ya ispiritu.
11 Ag mo ak pa patataynanen ed arap mo; ag mo pa eekalen ed siak so masanton ispiritum.
12 Ipawil mo pad siak so gayagay panangilaban mo, tan gawam pan mabolus so linawak ya ontoluk ed sika.
13 Ibangat kod satan iray ganggan mo ed saray makasalanan, et ompawil irad sika.
14 Iyagel mo pay bilay ko, O Dios a manangilaban ko, et maliket ak a mangibawag na inkatonung mo.
15 Tulongan mo ak pa a mansalita, O Katawan, et idayew ta ka.
16 Ag mo labay iray bagat, ta no labay mo ra komun, isaklang ko la rad sika; ag mo pakaliliketay bagat iran popoolan.
17 Say mapaabeban ispiritu so ibagat kod sika, O Dios; ag mo ipolisay so mapaabeba tan magbabawin puso.
18 O Dios, kasian mo pay Sion tan tulongan mo; ipaalagey mo pa lamet iray padir na Jerusalem.
19 Diad ontan, manliket kad saray manepeg a bagat tan saray bagat min popoolan; et saray bakan kalakyan so nibagat ed tapew na altar mo.
1 "O toon makapanyari, akin et ilalastug moy kaogsan mo? Anggad angga so inkatoor na Dios.
2 "Mamplaplano kay paneral mod saray arum; singa matdem a labahas so dilam. Naynay kan mantitila.
3 "Inarom so kaogsan nen say kamaungan, say tila nen say katwaan.
4 "Labalabay mon pasakitan so kaparam a too diad panamegley na saray salitam, sikan matila!
5 "Kanyan say Dios deralen to ka ya anggad angga; singkaten to ka tan ipaway to kad panaayaman mo; ekalen to kad dalin da ray mabilay.
6 "Nanengneng ya na saray matonung a totoo et ontakot ira; elekan da kad satan tan ikuanda,
7 "Nengneng yoy toon ag impaiyagel ed Dios, no ag ingen nanmatalek ed baleg a kayamanan to, tan sinmaral ed kaogsan to.
8 "Balet, siak, aliling koy kiew na oliban ombabaleg ed abung na Dios; manmamatalek ak ya anggad angga ed ag mangoman a panangaro na Dios.
9 "Lawas a pisalamatan ta ka, O Dios, lapud saray ginagawam; diad arap da ray totoom ibawag koy kamaungan mo.
1 "Saray makulang-kulang a totoo kuandad sikaran dili, Anggapoy Dios! Maoges ira tan makapataktakot iray ginagawa ra; anggapoy anggan sakey a toon manggagaway kamaungan.
2 "Manlapud tawen oosdungan na Dios iray katoowan, ta labay ton nengnengen no wala ra kasi makabat o mangigagalang ed sikato.
3 "Balet binmeneg iran amin, nampapara ran maoges. Anggapod sikaray manggagaway kamaungan, anggapoy anggan sakey.
4 "Tetepeten na Dios, Sarayan totoon managgaway kaogsan, ag da amta? Pambibilayan day tatakewen dad saray totook, tan ag ira mampipikasi ed siak.
5 "Balet ontan lay kataktakot da; anggapo niy asali ran onyan takot; ta ibuyak na Dios iray pokepokel na saray kalaban da ray totoo to. Impolisay ira na Dios, kanyan sigput a taloen ira na Israel.
6 "Oy la komun ta nagamuran la na Israel so pananalo a manlalapud Sion! Ontan lay panliket na saray totood Israel no paaligwasen ira lamet na Katawan.
1 "Lapud pakayarim, O Dios, ilaban mo ak pa; lapud biskeg mo, iliktar mo ak pa!
2 "Dengel mo pay pikakasik, O Dios; talineng mo pa ray salitak!
3 "Nitan la ray malastug a totoon ondogpad siak; labay ak a pateyen na saray maruksan totoo totoon ag da ikabkabilangay Dios.
4 "Balet say Dios so mananulong ko. Say Katawan so manangyagel ko.
5 "Dusaey Dios komun iray kalaban ko diad panamegley na dilin kaogsan da! Deralen to ra, ta sikato et matoor.
6 "Katawan, sililiket ak a mangibagat ed sika; pisalamatan ta ka lapud kamaungan mo.
7 "Inyagel mo ak ed amin da ray gunigon ko, tan anengneng kon atalo ray kalaban ko.
1 "O Dios, dengel mo pay pikakasik; ag mo pa ipopolisay so kerew ko!
2 "Dengel mo ak pa tan ebatan mo ak; makapkapoy ak la, lapud saray pagpagak.
3 "Napapagaan ak lapud panagtaktakot da ray kalaban ko, tan lapud panagpairap da ray totoon maoges. Iitdan da ak na gunigon; ampetang so olo rad siak tan kabosul da ak.
4 "Mapalaloy takot ko, tan say takot ed patey dedetdetan to ak.
5 "Mapalaloy pankigtut tan panggiwgiw ko; say takot so manaarid siak.
6 "Kuanko, Wala komuy payak kon singa payak na malapati! Ontikyab ak ed satan tan mananap ak na napampainawaan ko!
7 "Arawiy tikyaban ko, tan diad kalawakay panayaman ko.
8 "Aporaen koy mananap na siruman ko, pian naliktaran koy mabiskeg a dagem tan say bagyo.
9 "Ag mo pa pantatalusan iray kalaban ko diad pantotongtong da, O Katawan! Nanenengneng koy inkaruksa tan gewgew
10 a liliberen day siudad ed agew tan labi, papanoen da na krimin tan gunigon.
11 Walay panagderal ed inerman a pasen; napnoy panagpairap tan panagpalikdo iray daladalan.
12 No sakey a kabosul komuy manmumurmurad siak, nitepel ko; no sakey a kalaban komuy manleleglemew ed siak, sarasarag kon iyamutan.
13 Balet, sika, sikan kaiba, sikan kalimug-limug ko tan malet a kaarok.
14 Masamsamit so impantongtong ta, tan naniba ta ya angigalang ed Dios diad Timplo.
15 Biglan ompatey komun iray kalaban ko; onla ra komun a mabilay ed pasen a panaayaman da ray inaatey! Say kaogsan walad kaabungan tan kapusoan da.
16 Balet onkekerew ak na tulong ed Katawan a Dios, et ilaban to ak.
17 Kabwasan, kaagwan, tan labi so panririklamo tan paney-ey kod sikato, et dengelen toy bosis ko.
18 Ipawil to ak ya ag adiwit manlapud saray pibabakal ko ed saray amayamay a kalaban.
19 Say Dios a manaari lan nanlapud gapoy gapo et dengelen to ak tan taloen to ra; ta ag da labay so mangoman tan ag da tatakotan.
20 Samay gendat a kaibak dinogpaan to ray kakaaro to; ag to tinoor iray sipan to.
21 Marlas a singa mantikilya so panagsalita to, balet napnoy panagbosul so puso to; singa larak a panagpoyuk iray salita to, balet matdem iran singa ispada.
22 Imatalek mod Katawan iray gunigon mo, et iyagel to ka; ag ton balut aabuloyan a natalo iray totoon matonung.
23 Balet sika, O Dios, ibantak mod lobuk, iray totoon managtila tan managpatey kasakbayay pakasumpal na kapalduay bilay da diad tapew na dalin. Siak, balet, sikay panmatalkan ko.
1 "Kasian mo ak pa, O Dios, ta dodogpaan da ak; ag ak totondaan a papairapen na saray kalaban ko.
2 "Sanagew a dodogpaan ak na saray onsusumpad siak. Agaylay karakel na onlalaban ed siak.
3 "No ontakot ak, O Katawan a Makapanyarin-amin, manmatalek ak ed sika.
4 "Manmamatalek ak ed Dios, kanyan ag ak antakot; idadayew ko lapud insipan to. Antoy nagawaan ed siak na too?
5 "Inagew-agew lawas a gugunigonen ak na saray kalaban ko, say nununoten dan naynay et say pakapasakit dad siak!
6 "Mantitipon ira ed saray pasen a masolinek tan sisiimen day amin a gagawaen ko, diad panatalaran dan mamatey ed siak.
7 "Dusam pa ra, O Dios, lapud kaogsan da; diad pasnuk mo, talom pa ra!
8 "Kabat mo so ontan lan kagugunigon ko; susukaten moy karakel na luak tan ililistam ira ed libro.
9 "Diad agew ya itatawag kod sika, ompopoliktar iray kalaban ko. Say amtak saya: say Dios et gampid siak
10 say Katawan a saray sipan to et idadayew ko.
11 Manmamatalek ak ed sikato, kanyan anggapoy takot ko. Antoy nagawaan ed siak na too?
12 O Dios, sumpalen koy insipan kod sika; isaklang kod sikay bagat kon pisasalamat,
13 ta inlaban mo ak ed patey, tan ag mo inabuloyan a natalo ak. Kanyan mankukurang ak ed arap na Dios, diad silew ya onsisindag ed saray mabilay.
1 "Kasian mo ak pa, O Dios, kasian mo ak pa, ta ondarago ak sika pian arawi ak ed kaatapan. Diad silong da ray payak mo, niyaagel ak ya anggad ilabas na saray maksil a bagyo.
2 "Ontatawag ak ed Dios a Sankatageyan, diad Dios a mangiiter na amin a nakakaukolan ko.
3 "Manlapud tawen ebatan to ak tan ilaban to ak; taloen to ray mamapairap ed siak. Ipanengneng na Dios ed siak so ag mangoman a panangaro to tan say inkatoor to.
4 "Aliktub ak na saray kalaban, a singa ra lion a mamangay too. Singa pana tan pika iray ngipen da; singa matdem ya ispada iray dila ra.
5 "O Dios, ipanengneng mo pad tawen so talonggaring mo tan diad intiron dalin, say kagalangan mo.
6 "Saray kalaban ko pinatitan da ak na iket, a pangerel dad siak; mapalaloy kapapagaan ko. Angotkot iray abut ed dalanen ko, balet sikaran diliy naplag.
7 "Walay talek na linawak, O Dios! Mankanta ak tan idayew ta ka!
8 "Liing ka, O kamarerwak! Liing kayo, sikayon arpak tan lirak! Liingen ko so agew!
9 "Pisalamatan ta ka diad arap da ray katoowan, O Katawan! Idayew ta kad arap da ray bansa!
10 Say ag mangoman a panangarom et sasabien to ray katawenan tan say inkatoor mo et gagawaten to ray lorem.
11 O Dios, ipanengneng mo pad tawen so talonggaring mo tan diad intiron dalin, say kagalangan mo.
1 "Sikayon manoley matonung so panagsintinsia yo? Maptek so panagsintinsia yod amin a katoowan?
2 "Andi! Nununoten yo labat so maoges a nagawaan yo, tan manggagawa kayoy karuksaan diad tapew na dalin.
3 "Saray totoon maoges et maoges irad intiron bilay da; manlapud inkianak da, mantitila la ra.
4 "Napno ray dita a singa saray oleg; pepepetan da ray kalayagan da a singa ra telek a kobra,
5 "ya ag to narengel so bosis na toon managpaamo na oleg, o say kanta na masilib a salamangkiro.
6 "O Dios, pangpang mo pa ray kangipenan da ra yan masebeg a lion.
7 "Naandipat ira komun a singa danum ya onaagos ed arawi; nagatin-gatinan tan namagaan ira komun a singa dikarikad basbas.
8 "Magmaliw ira komun a singa bisokul a mansumpal ed pitek; magmaliw ira komun a singa ogaw ya inatey nen nianak tan ag ton balut anengneng so liwawa.
9 "Ag da naamamtaan so kabagut da a singa dika; diad mapalalon pasnuk na Dios isiplug to ra ed arawi legan a mabilay ni ra.
10 Manggayaga iray totoon matonung no nanengneng dan nadudusa ray makasalanan; manyakyak irad dala da ray managgaway kaogsan.
11 Ikuay katoowan, Tuan natutumangan iray matonung; tuan walay Dios a manisintinsiad sankamundoan.
1 "Iliktar mo ak pad saray kalaban ko, O Dios ko; iyagel mo ak pad saray ondodogpad siak!
2 "Iyagel mo ak pad saray totoon maoges; ipaliis mo ak pad saray managpatey na too!
3 "Nengneng mo! Tatalaranan da ak a pateyen; mantitipon ya onlaban ed siak iray maruksan totoo. Aliwan lapud kasalanan o kaogsan a ginawak,
4 "odino lapud kabandayan a ginawak, O Katawan, so panggaganat dan onlad saray pasen da.
5 "Liing ka pa, Katawan a Dios a Makapanyarin-amin, ta dago mo ak a tulongan; sikan dili so onnengneng, O Dios na Israel! Bangon ka pa, ta dusam ya amin iray bansa; ag mo pa kakasian iray traidor!
6 "Nilabi-labin ompapawil ira; singa ra ason mandangul a liber-liber ed siudad.
7 "Dengel mo pay panagleglemew tan pangtaktakot da. Saray dila ra et singa ra ispada ed saray sangi ra, balet abaloan dan anggapoy makakadngel ed sikara.
8 "Balet sika, Katawan, elek-elekan mo ra; balbalawen mon amin iray bansa.
9 "Manmamatalek ak ed biskeg mo; sika so salimbengan ko, O Dios.
10 Inaro ak na Dios ko tan dagoen to ak; ipanengneng tod siak so katalo na saray kalaban ko.
11 Ag mo pa ra papateyen, O Dios, ta ompan makalingwan iray totook. Buyak mo pa ra diad panamegley na pakayarim tan talom ira, Katawan a manangyagel mi.
12 Kasalanan so walad bibil da, tan maoges ya amin iray salita ra; naerel ira komun ed inkalastug da. Lapud manaayew tan mantitila ra,
13 diad pasnuk mo, deral mo pa ra; deral mo ra ya anggad ag da kaoput. Naamtaan ed satan na amin a katoowan a say Dios so manooley ed Israel, tan say panooley to et sasakopen toy intiron mundo!
14 Nilabi-labin ompapawil iray kalaban ko, singa ra ason mandangul a liber-liber ed siudad;
15 singa ra ason liber-liber a manaanap na nabwag da, tan mantaglool ira no ag ira napesel.
16 Balet ikantak so nipaakar ed biskeg mo; kinabwasan ya ikantak a maksil so nipaakar ed ag mangoman a panangarom. Sikay salimbengan ko, say siroman diad panaoy gunigon ko.
17 Idayew ta ka, sikan manangyagel ko. Say Dios so salimbengan ko, say Dios a mangaarod siak.
1 "Inkaindan mo kami, O Dios, tan tinalo mo kami; nampasnukan mo kamibalet natan, pawil ka pa lad sikami!
2 "Niyegyeg moy dalin, tan pinasangim; natan tambal mo pa ray sugat to, ta nabubuyak la.
3 "Impanirap mon mapalalo iray totoom; mandongilngil kamin singa abuek.
4 "Pinasakbayan mo ray mangigagalang ed sika, pian napaliisan day deral.
5 "Ilaban mo kami pa diad panamegley na pakayarim; ebatan mo pay pikakasi mi, pian niagel iray totoon inarom.
6 "Manlapud santuario to inkuay Dios, Kasumpal na panalok, apag-apagen koy Sikem, tan ibunog kod saray totook so Patar na Sucot.
7 "Kien koy Galaad tan Manases; say Efraim so hilmit ko tan say Juda so sitrok.
8 "Balet say Moab so panorasan kon palanggana, tan say Edom so pangibantakan koy sandalyak, a sakey a tanda a kayaryan ko. Abaloan na saray Filisteo ya oneyag ira lapud panalo rad siak?
9 "O Dios, siopay mangyakar ed siak diad pinadir a siudad? Siopay mangiwanwan ed siak diad Edom?
10 Peteg ya impolisay mo kami la? Ag ka la miolup ed saray sondalo mi?
11 Tulongan mo kami pan mibakal ed saray kalaban mi; anggapoy kanay tulong na too.
12 Lapud tulong na Dios, manalo kami; taloen to ray kalaban mi.
1 "Dengel mo pay ey-ey ko, O Dios; dengel mo pay pikakasik!
2 "Diad inkaekalan koy ilalo nen arawi ak ed abung ko, ontatawag ak ed sika! Iyakar mo ak pad salimbengan ya arawid kaatapan,
3 "ta sikay manangyagel ko, say mabiskeg a mangilaban ed siak ed saray kalaban ko.
4 "Panayam mo ak pad santuariom legay pambilay ko; diad silong na saray payak mo anggapo komuy nasagmak kon maoges.
5 "Nadngel mo ray sipan ko, O Dios, tan inter mod siak so tawir da ray mangigagalang ed sika.
6 "Parokey mo pay bilay na ari; amayamay komuy taon a pambilay to!
7 "Panoley mo pan anggad angga, O Dios, diad arap mo; iyagel mo pa diad panamegley na ag mangoman a panangarom tan inkatoor mo.
8 "Diad ontan, ikantak lawas so pangidayew kod sika, diad inagew-agew a pangibagat koy insipan ko.
1 "Aanosan kon aalagarey pangilaban na Dios ed siak; sikato labat so panmamatalkan ko.
2 "Sikato labat so mangyaagel tan mangilalaban ed siak; sikatoy manangyagel ko, et ag ak balut natalo.
3 "Kapigay itonda na idodogpa yon amin ed sakey a toon diad kapkapoy to et aliling toy ageban padir?
4 "Labay yo labat ya iyabeban manlapud matalonggaring a kipapasen to; panliliketan yo ray tila. Mansasalita kayoy panamindision, balet isasamba yo ed dalem na kapusoan yo.
5 "Say Dios labat so panmamatalkan ko; sikatoy paniilaloan ko.
6 "Sikato labat so mangyaagel tan mangilalaban ed siak; sikatoy manangyagel ko, et ag ak balut natalo.
7 "Walad Dios so kilalaban tan kagalangan ko; sikatoy mabiskeg a manangyagel ko; sikatoy salimbeng ko.
8 "Sikayon totook, manmatalek kayod Dios diad amin a panaon. Ibaga yod sikatoy amin a gunigon yo, ta sikatoy salimbeng tayo.
9 "Singa labat ingas iray totoo; anggapoy kana da ray totoon walad abeba odino atagey a kipapasen. Pantitipon mo ran simbangen et anggapoy belat da; anlemew ni ra nen say ingas.
10 Ag yo panmamatalkay panagduksa; ag yo iilaloan a walay nagonggona yod panagtakew; anggan ondakel so kayamanan yo, ag yo panmamatalkan.
11 Aliwan amimpinsan a nadngel koy Dios ya imbaga to a kayaryan toy pakayari,
12 tan ag mangoman so panangaro to. Sikan dili, O Katawan, so ontutumang ed balang sakey a too onung ed saray gawgawa to.
1 "O Dios, sikay Dios ko, tan pampipirawatan ta ka. Sika so pampipilalekay intiron inkatook; say kamarerwak so napnapgaan ed sika, a singa naksawan, amagaan, tan kinmelang a dalin.
2 "Nanengneng ta ka komun ed santuario; ipanengneng mo pad siak so ontan lan pakayarim tan kagalangan mo.
3 "Say ag mangoman a panangarom et magmaung ni nen say dilin bilay, kanyan idayew ta ka.
4 "Misalamat ak ed sika leleg kon mambibilay; itagey ko ray limak a mampikasid sika.
5 "Mampista so kamarerwak et napenek, tan ikantak iray magayagan kanta a pangidayew kod sika.
6 "No mandokdokul ak nanununotan ta ka; nilabi-labi sikay walad isip ko,
7 "ta sika lawas so ontutulong ed siak. Diad silong na saray payak mo mankanta ak lapud liket ko.
8 "Ompepeket ak ed sika, et aampayaen ak na saray limam.
9 "Saray walay getman mamatey ed siak napelag irad pasen a panaayaman da ray inaatey;
10 Napatey irad bakal, tan buagen na saray asod katakelan iray bangkay da.
11 Manliket so ari lapud impanalo na Dios. Idayew day Dios iray mangisisipan ed ngaran to, balet napepetan so kasangiyan da ray matitila.
1 "Wala ak ed gunigon, O Diosdengel mo pay pikakasik! Natatakot ak ed saray kalaban koilaban mo pay bilay ko!
2 "Iyagel mo ak pad saray komplut da ray totoon maoges, tan diad olupan da ray managgaway kaogsan.
3 "Iyoobul dan singa ispada so kadilaan da, tan ipapatoyung dan singa pana iray anagasang a salita ra.
4 "Masiglat dan ikakayat iray andi-baing a tila ra; dederalen da ray maung a totoo diad panamegley na benegan a panagpaoges.
5 "Mampapabiskegan iray linawa nipaakar ed saray maoges a komplut da; pantotongtongan da no iner so pangiliraan da ray patit da. Anggapoy makanengneng ed saraya, kuanda.
6 "Maoges iray plano ra, tan kuanda, Ayadyari so impangiplano tayo ed sayan krimin. Ag natalusan so puso tan kanunotay too!
7 "Balet papanaen iray Dios, et bigla ran nasusugatan.
8 "Deralen to ra, lapud saraman a salita; ompeyeng ya amin iray makanengneng ed sikara.
9 "Ontakot iran amin; dalepdepen da ray ginagawa na Dios, tan salitaen da ray gawgawa to.
10 Manliket ya amin iray totoon matonung, lapud saray ginagaway Katawan. Diad sikatoy pakalmoan day kilalaban; igalang na amin a totoon matonung.
1 "O Dios, manepeg a dayewen mi ka ed Sion tan sumpalen mi ray sipan mid sika,
2 "ta eebatan mo ray pikakasi. Ondagod sikay amin a katoowan,
3 "lapud saray kasalanan da. Anggaman ya aaripenen kami na saray kasalanan mi, papaandien mo ra.
4 "Maliket iray pipilien mo, saray iyaakar mon manayam ed santuariom. Napenek kamid saray maung a bengatlan walad abung mo, saray bindisioy masanton Timplom.
5 "Eebatan mo kami diad panamegley na pangiiter mod sikamiy pananalo, tan ilalaban mo kami diad panggagawam na saray pakelaw. Saray katoowan ed intiron mundo tan nibaliw na maawang iran dayat et manmamatalek irad sika.
6 "Diad panamegley na biskeg mo inliram iray palandey ed pasen da; impanengneng mo so balbaleg a pakayarim.
7 "Patotondaen moy ungol da ray dayat tan say ungol da ray daluyon; parereenen moy golo da ray katoowan.
8 "Natatakot so intiron mundo, lapud saray makapakelkelaw a ginagawam. Lapud saray gawgawam, wala ray malikeliket ya eyag ed inerman a pasen.
9 "Ipapanengneng moy panangarom ed dalin diad pangipepelag moy oran; gagawaen mon mayaman tan mataba. Papanoen mo na danum iray kolus; patotoboen mo ray tantanaman ed dalin. Onya so panggagawam:
10 daakan ya oran so ipepelag mod saray binakan kaalogan tan luluaken mo ra; palelemeken moy dalin diad panamegley na mayamaya, tan papabalegan mo ray ontutubon tantanaman.
11 Agaylay karakel na ani, lapud kinamaung mo! Daakan, anggan iner so laen mo.
12 Dakerakel iray ayayep ed panagpastolan; napnoy liket iray alusadsar na kapokdulan.
13 Dakerakel iray karniro ed kaalogan; napnoy trigo iray patar. Maneeyag tan mangakantad liket iray amin a bengatla.
1 "Manliket kayon oneyag a mangidayew ed Dios, amin yon katoowan!
2 "Mankanta kayon mangigalang ed ngaran to; nagnap a dayew so iter yod sikato!
3 "Kuanyod Dios, Makapakelkelaw iray gagawaen mo! Diad kabaleg na pakayarim, sitatakot ya ondadakmomod sika iray kalaban mo.
4 "Igagalang kay amin a katoowad tapew na dalin; mangakanta ran mangidayew ed sika, mangakanta ran mangidayew ed ngaran mo.
5 "Gali dia ta nengneng yoy ginagaway Dios, saray makapakelaw a ginagawa tod saray totoo.
6 "Impagmaliw ton amagan dalin so dayat; binaliw dan inakar so ilog iray lalaki tayo. Nanliket itayod man, lapud ginawa to.
7 "Manooley ya anggad angga diad panamegley na pakayari to, tan ag to aalisay mata iray bansa. Saray mananumpa et anggapo komuy onlaban ed sikato!
8 "Idayew yoy Dios tayo, amin yon bansa; iparengel yoy panangidayew yod sikato.
9 "Pansiasiansiaen to tayon mabilay ya anggad natan, tan ag to itayo inabuloyan a napelag.
10 Sinusubok mo kami, O Dios: no panoy kalilinisay pilak ya imparalan ed apoy, ontan met so impanusubok mod sikami.
11 Inaabuloyan mo kamin napelag ed patit, tan ambelat iray impapasakbat mod sikami.
12 Inaabuloyan mon pairapen kami na saray kalaban mi; dinmadalan kamid apoy tan delap, balet natan inyakar mo kamid pasen ya arawid kaatapan.
13 Mangawit ak ed abung mo na saray bagat a popoolan; isaklang kod sika ray insipan ko.
14 Iter kod sikay imbagak ya iter, nen wala ak ed gunigon.
15 Mangisaklang ak na karniron popoolan ed altar; mangibagat ak na saray bakan kalakyan tan saray kanding, et ontagey ed tawen so asewek da.
16 Gali dia tan dengel kayo, amin yon mangigagalang ed Dios, ta ibagak ed sikayoy ginawa ton para siak.
17 Tinmawag ak ed sikaton tulongan to ak; indayew kod panamegley na saray kanta.
18 No ag ko nagbabawian iray kasalanan ko, ag ak komun dinengel na Katawan.
19 Balet dinengel ak a tua na Dios; dinengel toy pikakasik.
20 Idadayew koy Dios, ta ag to impolisay so pikakasik, o inekal ed siak so ag mangoman a panangaro to.
1 "O Dios, kasian tan bindisionan mo kami pa; osdungan mo kami pan abageyen,
2 "pian naamtaay intiron mundo so linawam; pian naamtaay amin a bansa so panangilaban mo.
3 "Idayew ka komuy katoowan, O Dios; idayew ka komuy amin a katoowan!
4 "Manggayaga komun iray bansa tan mankanta ra lapud liket, ta matonung so panisintinsiam ed saray katoowan tan iwawanwan mo ray amin a bansa diad tapew na dalin.
5 "Idayew ka komuy katoowan, O Dios; idayew ka komuy amin a katoowan!
6 "Say dalin angiter na ani; say Dios a Dios tayo binindisionan to itayo.
7 "Binindisionan itayoy Dios; igalang komun na katoowan ed amin a pasen.
1 "Ombabangon so Dios tan bubuyaken to ray kalaban to. Ombabatik ya atalo iray mamobosul ed sikato!
2 "No panoy ititikyab na asewek, ontan met so pamapagit tod sikara; no panoy katotonaw na ispirma ed abay na apoy, ontan met so ipapatey na saray totoon maoges ed arap na Dios.
3 "Balet magayaga tan maliket iray matonung ed arap to; maliket ira tan oneeyag irad liket.
4 "Kantaan yoy Dios, kantaan yo na panangidayew so ngaran to; iparaan yoy dalanen na manloglogan ed saray lorem. Yahweh so ngaran tomanliket kayod arap to!
5 "Say Dios a manaayam ed masanton Timplo to et aasikasoen to ray olila tan iyaagel to ray bibiin balo.
6 "Iitdan toy abung a panayaman so toon maermen, tan paliliketen to ray priso diad pangibolus tod sikara, balet nepeg a manayam ed kalawakan iray totoon mananumpa.
7 "O Dios, nen inwanwan mo ray totoom, nen bineltang moy kalawakan,
8 "yinmegyeg so dalin, tan angipelag na oran so tawen, lapud isabiy Dios na Sinai, say isabiy Dios na Israel.
9 "Pinaoran moy maksil, tan pinatabam lamet so kinmelang lan dalin mo;
10 nanayam irad may katoowan mo; lapud kaabigan mo, initdan mo ray mairap-bilay na nakaukolan da.
11 Angipaakseb na ganggan so Katawan, kanyan amayamay so bibiin angibawag na balita:
12 Ombabatik la ray arari tan saray sondalo ra! Saray bibiin atilak ed kaabungan inaapag da ray asamsam:
13 saray malapatin pilak a mankidyam iray puron balituk a payak da. (Akin et nanayam iray arum ed sikayo ed kawalaan da ray koral na saray karniro nen agew na bakal?)
14 Nen say Makapanyarin-amin a Dios et binubuyak tod Palandey na Salmon iray arari, pinaoran tod man na yilo.
15 Agaylay pakapanyariy palandey na Basan, sakey a palandey ya amayamay so toktok to!
16 Balet, O palandey ya amayamay so toktok, akin et anlemlemew so pangipapasen mod palandey a piniliy Dios a panayaman to? Say Katawan manayam diman ya anggad angga!
17 Say Katawan a kaiba to ray nilibon makapanyarin karwahi to et oonlad masanton pasen manlapud Sinai.
18 Onkakalab ed saray atagey a pasen, a sankaawit to ray amayamay a priso; mangaawat na saray rigalo da ray totoon mananumpa. Manayam diman so Dios a Katawan!
19 Idayew tayoy Katawan, a manasakbat ya inagew-agew na saray kairapan tan saray gunigon tayo; sikatoy Dios a mangilalaban ed sikatayo.
20 Say Dios tayo et Dios a manangilaban; sikato so Katawan, say Katawan tayo, a mangipapaliis ed sikatayod patey.
21 Andi-saew a betag-betagen na Dios so kaoloan da ray kalaban to, saray ag ontotondan mankasalanan.
22 Inkuay Katawan, Ipawil kon manlapud Basan iray kalaban yo; agwaten ko rad dalem na dayat,
23 pian makapanyakyak kayod dala ra, tan nadildilan na saray aso yo ya anggad onsawa ra.
24 O Dios, nanenengneng na amin a totoo so parada na impanalom, say libot na Dios ya arik a mamapaarap ed santuario to.
25 Walad arap iray kumakanta, walad beneg iray musiko, tan walad nanleetan da iray mamarikit a mantotogtog na saray pandirita.
26 Idayew yoy Dios diad pantitipon da ray totoo to; idayew yoy Katawan, amin yon kabyangay boleg nen Jacob!
27 Walad onaan so Benjamin a sankamelagan a tribu, insan saray pangulo na Juda tan say grupo ra, tan manomtombuk iray pangulo na Zabulon tan Neftali.
28 Ipanengneng mo pay pakayarim, O Dios, say pakayarin inkanam a para sikami,
29 manlapud Timplom ed Jerusalem, a pangyaakaran da ray arari na saray rigalo rad sika.
30 Pampasnukan mo pay Egipto, saman ya ayep ed katanobungan; pampasnukan mo ray bansa, saman a poluk na bakan kalakyan tan saray kilaw da, anggad ontuek iran mangibagat ed sika na pilak da. Buybuyak mo pa ray totoon labalabay day mibakal!
31 Onsabi ray imbahador a manlapud Egipto; itagey na saray taga Etiopia iray kalimaan da diad pampikasi rad Dios.
32 Kantaan yoy Dios, sikayo ran nanarian diad mundo, kantaan yo na panangidayew so Katawan,
33 say manloglogan ed tawen, say tawen ya abaybayag lan niwala! Dengel kayod eyag ton makapanyari.
34 Ibawag yoy pakayariy Dios; walad intiron Israel so kagalangan to, tan walad saray katawenan so pakayari to.
35 Makapataktakot so Dios no ompapaway ed santuario to say Dios na Israel. Iitdan toy pakayari tan biskeg iray totoo to. Idayew yoy Dios!
1 "Ilaban mo ak pa, O Dios! Angga lad beklew koy danum;
2 "onlelereg ak ed aralem a pitek tan anggapoy anawet a natoonan ko; wala ak ed aralem a danum, tan ngalngali ak la ipalner na saray daluyon.
3 "Naksawan ak lan onkekerew na tulong, tan anagasang lay kolukolung ko. Onsasakit la ray matak diad panatalaran kod isabiy tulong mo.
4 "Saray mamobosul ed siak ya anggapoy makasengeg et amayamay ira nen saray buek na olok. Saray kabosul ko et mantitila ra sumpad siak; mabiskeg ira tan labay da ak a pateyen. Pinasoot dan ipawil ko ray bengatlan ag ko tinakew.
5 "O Dios, ag niamut ed sika ray kasalanan ko; amtam so kolokowan ko.
6 "Ag mo pa iyaabuloy a siak so makasengeg na pakabaingan da ray manmamatalek ed sika, O Katawan a Dios a Makapanyarin-amin! Ag mo pa iyaabuloy a siak so makasengeg na pakapelagan dad kababaingan iray mangigagalang ed sika, O Dios na Israel!
7 "Lapud sika alemlemew ak tan mapalaloy inkabaingan ko.
8 "Singa ak sangkaili ed saray dilin agagik, singa ak toon nanlapud arum a bansa ed dilin pamilyak.
9 "Say panangarok ed Timplom et singa apoy a mamopool ed siak; siak so pepelagan da ray panagpabaing dad sika.
10 Mampapaabeba ak diad panamegley na panaayunok, et lapud saya, papabaingan ak na totoo.
11 Mambabaliwan ak, et lapud saya, luludlureyen da ak.
12 Tongtongtongen da ak ed tindaan, tan saray buanges et manggagawa ra na saray kanta a nipaakar ed siak.
13 Balet siak, mampikasi ak ed sika, O Katawan; ebatan mo ak pa, O Dios, ed labalabay mon panaon. Ebatan mo ak pa, lapud balbaleg a panangarom, lapud matoor kad sipan mo a mangilaban.
14 Agwat mo ak pad pitek pian ag ak onlereg; iyagel mo ak pad saray kalaban ko, tan ipaliis mo ak pad aralem a danum.
15 Ag mo pa iyaabuloy a nalipos ak ed delap; ag mo pa iyaabuloy a nalener ak ed aralem a danum, odino akmunen ak na lobuk.
16 Ebatan mo ak pa, O Katawan, lapud kaabigay ag mangoman a panangarom; lingaw mo ak pa, lapud baleg a panangasim!
17 Ag mo ak pa iyaamutan ya aripen mo; ebatan mo ak pa natan, ta ontan lay kagugunigon ko!
18 Dago mo ak pa tan ilaban mo ak; iyagel mo ak pad saray kalaban ko.
19 Kabat moy pakababaingan ko, say pakapepelag kod kababaingan tan pakaluludlurey ko; nanenengneng mo ray amin a kalaban ko.
20 Mapalaloy kaermenan ko lapud panagpabaing dad siak, tan nanaandian ak na ilalo. Nananap ak na mangasid siak, balet anggapo; nananap ak na manligliwad siak, balet anggapo.
21 Nen narasan ak, initdan da ak na samal; nen napgaan ak na, initdan da ak na toka.
22 Saray ponsia ran baleg komuy pakaderalan da; saray masanton pista ra komun so pakataloan da!
23 Bolag mo pa ra, pian ag ira makanengneng; pakapoy mo pa lawas so balangbang da!
24 Idapom ed sikaray pasnuk mo; ipaterak mo pad sikaray petang na olom.
25 Nataynan tan napaolyan komun iray kampo ra; anggapo komuy natilak a mabilay ed saray tuldan panaayaman da!
26 Papairapen da ray dinudusam; sasalitaen da ray irirap da ray sinusugatan mo.
27 Ilistam pa ray amin a kasalanan da; ag mo pa ra pinanabangen ed panangilaban mo.
28 Naporak komun so kangaranan da ed libro na bilay; ag ira komun nibilang ed listaan da ray totoom.
29 Balet maniirap ak tan nasasakitan ak; agwat mo ak pa, O Dios, tan ilaban mo ak!
30 Idayew koy Dios diad panamegley na sakey a kanta; ibawag koy inkatalonggaring to diad pisalamat kod sikato.
31 Lalon panliketan ya na Katawan nen say pangisaklang na baka, nen say pangibagat na bakan kalakyan a matakken la.
32 No nanengneng ya na saray napapairap, manggayaga ra; saray mangigagalang ed Dios et ombiskeg so linawa ra.
33 Dedengelen na Dios iray walad pankaukolan, tan ag to lilingwanan iray totoo tod prisowan.
34 Idayew yoy Dios, sikayon tawen tan dalin, amin a dayat tan saray pinalsan walad saraya;
35 Ilaban toy Jerusalem tan iletneg to lamet iray baley ed Juda. Manayam irad may totoo to tan kayaryanen day dalin;
36 saray kabyangay boleg na saray aripen to et tawiren day dalin, tan manayam irad may maarod sikato.
1 "Ilaban mo ak pa, O Dios! Katawan, tulongan mo ak natan!
2 "Natalo tan nagewgew komun iray manggegetman mamatey ed siak! Napasener tan napelag ed kababainga iray manliliket lapud kagugunigon ko!
3 "Onkapoy komun so linawa ra lapud inkatalo iray manluludlurey ed siak!
4 "Manggayaga tan manliket komun ya amin iray ondadagod sika! Amin a misasalamat lapud panangilaban mo et ikuan da komun, Agaylay talonggaring na Dios!
5 "Makapkapoy ak tan pakaskasi ak; ganatan mo pay ondagod siak, O Dios. Sikay mananulong tan manangilaban ko; dago mo ak pa lan tulongan, O Katawan ko!
1 "Katawan, sika so salimbengan ko; ag mo ak pan balut patatalo!
2 "Lapud matonung ka, tulongan tan iyagel mo ak pa. Dengel mo ak tan ilaban mo ak pa!
3 "Sika pa so baton-dampay a salimbengan ko, tan mabiskeg a tirinsira a mangyagel ed siak, sikay salimbeng tan manangyagel ko.
4 "O Dios ko, iyagel mo ak pad saray totoon maoges, diad pakayari da ray maruksa tan totoon maoges.
5 "Katawad a Dios, sikay paniilaloan ko; nanlapud impanbalolakik, sikay panmamatalkan ko.
6 "Sikay panmamatalkan ko legay bilay ko; iyaagel mo ak manlapu lad inkianak ko. Idayew ta ka lawas.
7 "Sakey a panoliranan ed amayamay a totoo so bilay ko, ta sikay mabiskeg a manangyagel ko.
8 "Idadayew ta ka lawas ya inagew-agew tan ibabawag ko so kagalangan mo.
9 "Ag mo ak pa ipopolisay, natan ta matakken ak la; ag mo ak ikakaindan, natan ta makapoy ak la.
10 Labay da ak a pateyen na saray kalaban ko; mantotongtong tan mankokomplut ira sumpad siak.
11 Kuanda, Inkaindan la na Dios! Osilan tayon erelen, ta anggapoy mangyagel ed sikato.
12 O Dios, ag mo ak pa aarawian; Dios ko, tulongan mo ak pa lan tampol!
13 Saray ondodogpad siak et natalo tan naderal ira komun. Saray malabay a mamasakit ed siak et nalemlemew tan napelag ira komun ed kababaingan.
14 Sika lawas so panilaloan ko; lalon idayew ta ka lan idayew.
15 Ibawag koy inkatonung mo; tongtongen ko lawas so panangilaban mo, anggaman ya ag ko natalusan a sigput.
16 Idayew koy pakayarim, Katawan a Dios; ibawag koy inkatonung a kayaryan mon bukor.
17 Nanlapud impanogaw ko ibabangat mo ak la, tan totongtongen ko ni ray makapakelkelaw a ginagawam.
18 Natan ta matakken ak la tan ampoti lay buek ko, ag mo ak pa ikakaindan, O Dios! Ag mo ak pa tataynan leleg kon ibabawag ed amin a kailalakan ya onsabi so biskeg mo tan say pakayarim.
19 O Dios, sabien na inkatonung mo so katawenan. Matalonggaring iray ginagawam; Siopay miparad sika?
20 Initdan mo ak na saray amayamay a gunigon tan irirap, balet ipawil moy biskeg ko; ipaliis mo ak ed lobuk.
21 Pagmaliwen mo ak a lalon matalonggaring; ligliwaen mo ak lamet.
22 Idayew ta ka diad panogtog koy arpa; idayew koy inkatoor mo, O Dios ko. Togtogan ta kad arpak na saray imno, sikan Masanto na Israel.
23 Oneyag ak ed liket ko, leleg ta kan totogtogan; kantaan ta kay panangidayew ed intiron inkatook, ta inlaban mo ak.
24 Salitaen ko lawas ya inagew-agew so inkatonung mo, ta atalo tan naplag ed kababaingan iray nanggetman mamasakit ed siak.
1 "O Dios, ibangat mo pay ari a manintinsia onung na inkatonung mo; pinabang mo rad dilin kaptekan
2 "pian maptek so panoley tod saray totoom, tan matonung so panoley tod saray napapairap.
3 "Onaligwas komuy dalin; manari komuy katonungan.
4 "Maptek komuy panintinsiay ari ed saray mairap-bilay; tulongan to komun iray walad pankaukolan, tan taloen to ray managpairap ed sikara.
5 "Igalang ka komun na saray totoom anggad onsisinag ni so agew, legan ya onliliwawa niy bulan, diad amin a panaon.
6 "Say ari et magmaliw komun a singa oran ya ompelag ed kaalogan, singa mayamaya ya ondadapod dalin.
7 "Ombolaslas komuy katonungan anggad mambibilay ni so ari, tan manari komuy kareenan, anggad onliliwawa ni so bulan.
8 "Manlapud dayat ya anggad dayat so sakop na nanarian to, manlapud Ilog na Eufrates ya anggad saray samput na dalin.
9 "Ondakmomod sikaton amin iray totood kalawakan; ontakbad dabuk iray kalaban to.
10 Saray arari na Espanya tan saray arari na saray isla et mangiter irad sikato na saray rigalo; saray arari na Arabia tan Etiopia et mangiter irad sikato na saray bagat.
11 Ondakmomod sikato komun ya amin iray arari; manlingkur ed sikato ray amin a bansa.
12 Iyaagel to ray mairap-bilay ya ontatawag ed sikato, saray walad pankaukolan tan saray napapaolyan.
13 Maabagey ed saray makapoy tan saray mairap-bilay; ilalaban toy bilay da ray walad pankaukolan.
14 Iyaagel to rad kalalames tan kakairapan da; mabli ed sikato ray bilay da.
15 Andokey komun so bilay na ari! Naitdan komun na balituk a manlapud Arabia; nipikasi komun lawas; nabindisionan komun lawas na Dios!
16 Dakel komuy naani ed dalin; natoboan komun na tantanaman iray nipokpokdul a pasen, tan mabunga ran singa saray walad Libano. Napano komun na totoo iray siudad, a singa karakel na malambut a dikarikad alog.
17 Ag komun nalingwanan so ngaran na ari; mansiansia komun a singa agew so inkabantug to. Amin a bansa kerewen da komun ed Dios a bindisionan to ra a singa impamindision tod ari.
18 Idayew yoy Katawan, say Dios na Israel! Sikato labat so manggagawa na sarayan makapakelkelaw a bengatla.
19 Idayew yon anggad angga so mapagalang a ngaran to! Panoen komun na kagalangan to so intiron mundo! Amen! Amen!
20 Sikato yay samput na saray pikakasi nen David a lakin anak nen Jesse.
1 "Peteg a say Dios maung so ipapanengneng tod Israel, diad saray malinis so puso ra.
2 "Balet abalang ko lawari so panagmatalek ko; ngalngalin naandi so pananisiak,
3 "ta angimon ak ed saray mapaatagey, nen anengneng kon onaaligwas iray totoon maoges.
4 "Anggapoy ansakit a likliknaen da ra yan totoo; maksil tan mabiskeg so kalamanan da.
5 "Aliwa ran singa arum a totoon maniirap; aliwa ran singa arum a totoon nagugunigon.
6 "Kanyan say panagpaatagey da et singa kadinan akasolung ed saray beklew da tan say panagduksa ra et singa kawes ya akakolibemben ed sikara;
7 "ompapaway so kaogsan ed kapusoan da, tan ag ontotondan mamplano na kaogsan iray kanunotan da.
8 "Elek-elekan da ray arum a totoo tan totongtongen day nipaakar ed kaogsan; mapaatagey ira tan iplaplano ray pamairap dad arum a totoo.
9 "Mansasalita ray maoges sumpad Dios a walad tawen tan malastog iran mangigaganggan ed saray totoon walad tapew na dalin,
10 et diad ontan anggan saray totooy Dios onsisingger irad sikara tan mapalaloy pananisia rad amin ya ibabaga ra.
11 Kuanda, Ag naamtaan na Dios, ag nakabatan na Sankatageyan.
12 Ontan iray totoon maoges. Anta daakan lay walad sikara, mandakel lan mandakel niy kayaryan da.
13 Anggapoy kakanaan sirin so impansiansiak a malinis tan anggapoy kasalanan?
14 O Dios, impanirap mo ak lawas; kapag kabwasan dinusa mo ak!
15 No onya ray imbagak, singa ak aliwan sakey ed saray totoom.
16 Ginawak so anggaay nayaryan ko a talusan yan problima, balet agaylay irap a talusan
17 anggad linmoob ak ed Timplom. Atalusan kod satan no antoy pansumpalan da ray totoon maoges.
18 Andi-duaruwan iyakar mo rad andanglel iran pasen tan ipatumbam iran naderal.
19 Bigla ran naderal; makapataktakot so pansumpalan da.
20 Singa ra kogip a naandipat lad kabwasan; no ombangon ka, O Katawan, naandi la ra.
21 Nen agoloy isip ko, tan apasakitay liknaan ko,
22 nagmaliw ak ya ambagel a singa ayep ag ta ka atalusan.
23 Anggaman ontan siansian kaiba ta ka lawas, tan itatabin mo ak.
24 Iwawanwan ak na pananimbawam et diad kaonuran, mapagalang ya awaten mo ak.
25 Anto niy kayaryan kod tawen no ag say sika? Bangta kayaryan ta ka anto niy pampilalekan ko diad tapew na dalin?
26 Nayarin onkapoy so kanunotan tan laman ko, balet say Dios so biskeg ko; sikato labat so nakaukolan ko.
27 Saray mangikakaindan ed sika et andi-saew ya ompatey ira; deralen mo ray aliwan matoor ed sika.
28 Balet para siak, agaylay abig so maasingger ed Dios, say paiyagel ed Katawan a Dios; say pangibawag na amin a ginagawa to!
1 "O Dios, akin et onyay impangikaindan mod sikami? Ag manganggay pasnuk mod saray dilin totoom?
2 "Nunot mo pa ray totoom ya abayag mo la ran pinili a kayaryan mo, saray totoon inagwat mod impakaaripen da, pian magmaliw iran dilin tribum. Nunot mo pay Palandey na Sion a nanayaman mo nen saman.
3 "Batak mo pa ra yay amin ya aderal-deral; dineral na saray kalaban mi iray amin a walad Timplo!
4 "Naneyag ed Timplom iray kalaban mo lapud impanalo ra; inlira dad man iray bandira ra a tanday impanalo ra.
5 "Nengneng day totoon sankaegnaan da ray wasay a pamabatang day kakiewan.
6 "Saray wasay tan saray martilyo ra so impangigegeba rad saray tablan akortian.
7 "Dineral tan pinoolan day Timplom; ag da pinagalangan so pasen a pangigagalangan ed sika.
8 "Nampapaknaan dan sigput da kamin deralen; pinoolan dan amin iray masanton pasen ed bansa.
9 "Naandipat lan amin iray masanton tanda mi; anggapo lay atilak a propita, et anggapoy makaamta no kapigan mansumpal ya.
10 Kapigay pangangga, O Dios, so pamabalaw ed sika na saray kalaban mi? Anggad angga so panlelemlemew dad ngaran mo?
11 Akin et ag mo labay a tulongan kami? Akin et mantantanyareg ka labat?
12 Balet, O Dios, nanlapu lad gapo sikay ari mi; amimpiga-pigan inyagel mo kami.
13 Binelsay moy dayat lapud ontan lan pakayarim, tan binebetag moy kaolowan da ray dragon ed dayat;
14 minemekmek mo ray olo nen Libiatan tan intir moy laman ton kanen na saray ayayep ed kalawakan.
15 Pinapaagos mo ray sobul tan saray kolus; pinapaekat mo ray ankakabaleg ya ilog.
16 Pinalsam so agew tan say labi; inliram so agew tan say bulan ed kawalaan da;
17 sikay angyan na saray ketegan na mundo; ginawam so tiagew tan say nepnep.
18 Balet, Katawan, nunot mo a babalawen da ka na saray kalaban mo; totoo ran anggapoy Dios tan lelemlemewen da ka.
19 Ag mo pa papaolyan iray pangaskasiyan a totoom ed saray maruksan kalaban da; ag mo pa lilingwanan iray totoom a napapairap!
20 Nunot mo pay impisipanan mod sikami. Walay karuksaan a nagagawad amin ya ambilonget a sokung na dalin.
21 Ag mo pa iyaabuloy a nabaingan iray napapairap; iyabuloy mo pan idayew ka na sarayan mairap-bilay tan saray walad pankaukolan.
22 Talindeg ka pa, O Dios, tan iyagel moy katonungan mo! Nunot mo a saray totoon anggapoy Dios et babalawen da ka lawas.
23 Ag mo pa lilingwanan so paneeyag da ray kalaban mo, say ag manondan paniingal da ray kalaban mo.
1 "Misasalamat kamid sika, O Dios; misasalamat kamid sika! Ibabawag mi so ontan lan inkatalonggaring mo, tan sasalitaen mi ray makapakelaw a bengatlan ginagawam!
2 "Kuay Dios, Inggetar ko la so oras na panintinsia, et maptek so panintinsiak.
3 "Anggan nayegyeg so mundo tan onggiwgiw ya amin iray katoowan, pansiansiaen kon malet iray pundasion to.
4 "Ibabagak ed saray totoon maoges ya ag ira manlalastug;
5 "ibabagak ed sikaran tondaan da lay mampasirayew.
6 "Say pananintinsia ag manlalapud bokig o sagur; ag met manlalapud baybay o abalaten;
7 "say Dios so huis, wala ray sisintinsiaan ton nankasalanan tan wala ray ag nankasalanan.
8 "Bembembenay Katawan so kupa, a napnoy mabayanin alak na pasnuk to. Ibabales to tan iinomen na amin a totoon maoges; ooputen da ya anggad kaonuran a terter.
9 "Balet ag ak ontondan mansalita na nipaakar ed Dios nen Jacob, odino mankanta na panangidayew ed sikato.
10 Poteren toy pakayari da ray totoon maoges, balet naaruman so pakayari da ray matonung.
1 "Say Dios kabat dad Juda; galgalangen day ngaran to ed Israel.
2 "Walad Jerusalem so abung to; manaayam ed Palandey na Sion.
3 "Diman to pinoter iray pana da ray kalaban, saray samper tan saray ispada ra, tan amin ya armas dan para bakal.
4 "Ontan lay kagalangan mo, O Dios! Ontan lay inkatalonggaring mo legan mon ompapawil manlapud saray palandey ya analoan mod saray kalaban mo.
5 "Naandian na asamsam iray masebeg a sondalo ra; tan natan nanaogip la ra na ogip na patey; anggapoy anggan sakey ed sikara so akapangikanay armas to.
6 "Nen nampasnukan mo ra, O Dios nen Jacob, atumtumban inaatey iray kabayo tan saray akakabayo.
7 "Balet sika makapataktakot ka. Siopay makakpel ya onarap ed sika no mamapasnuk ka?
8 "Manlapud tawen, impaamtam so sintinsiam; tinmakot so mundo tan nandeen,
9 "nen inmalagey kan mangiter na sintinsia, a pangilaban mod amin da ray napapairap diad tapew na dalin.
10 Say pasnuk na totoo mansusumpal lamlamang ed lalon pangidayew dad sika; saray ag inatey ed bakal, ituloy dan silibraan iray pistam.
11 Sumpal yo ray insipan yod Katawan a Dios yo; amin yon kaliber-liber a bansa, mangawit kayo ray rigalod sikato. Say Dios patatakoten tod sikato iray totoo;
12 papaabebaen to ray mapaatagey a prinsipi, tan tataktakoten to ray arari diad tapew na dalin.
1 "Ontatawag ak na maksil ed Dios; ontatawag ak na maksil, et derengelen to ak.
2 "Mampikasi ak ed Katawan, no nagugunigon ak; sanlabin itatagey ko ray limak diad pampipikasik, balet ag ak naliligliwa.
3 "No nunoten koy Dios, mandageyem ak; no mandalepdep ak, onkakapoy so linawak.
4 "Kapag labi ag ak paogipen na Dios; diad mapalalon kapapagaan ko, ag ak makasalita.
5 "Nanununotan ko ray agew a linmabas tan natatandaan ko ray taon nen saman.
6 "Sanlabin araldalem so nununoten ko; mandadalepdep ak, tan onyay itetepet kod siak a dili:
7 "Say Katawan lawas to itayo la kasin ipolisay? Ag to itayo la kasi pakaliketan?
8 "Tinmonda la kasin mangarod sikatayo? Anggapo la kasiy kana na sipan to?
9 "Alingwanan la na Dios kasi so mangasi? Ag la kasi mangasi lapud pasnuk to?
10 Insan inkuanko, Say paneermenan kon tuloy et saya: aliwa lan makapanyari so Dios.
11 Nanunotan ko ray ginagawam, Katawan; natandaan koy makapakelaw iran ginagawam nen saman.
12 Dalepdepen kon amin iray kimey mo; omamengen kon amin iray makapanyarin ginagawam.
13 Masanton amin iray gagawaen mo, O Dios! Anggapoy dios a miparad inkatalonggaring mo!
14 Sika so Dios a manggagawa na saray milagro; impapanengneng moy pakayarim ed saray bansa.
15 Diad panamegley na pakayarim inlaban mo ray totoom, saray kabyangay boleg nen Jacob tan Jose.
16 Ataktakot iray danum nen anengneng da ka, O Dios, tan ginmiwgiw so dalem na dayat.
17 Angipelag na oran iray lorem, kinmarul so tawen, tan kinmirmat ed amin a pasen.
18 Tinmolin-tolin so dalagurog na karul mo, tan niliwawaan na kirmat so intiron mundo; ayakayak tan ayegyeg so dalin.
19 Nanakar kad saray daluyon; binaliw moy aralem a dayat, balet ag nanengneng iray bakat na salim.
20 Diad panangipangulo di Moises tan Aaron, singa ka pumapastol ya angiwanwan ed saray totoom.
1 "Sikayo ran totook, dengel kayod bangat ko, tan imano yo ray ibabagak.
2 "Ikanak iray salitan manangiter na kakabatan, tan ipaliwawak iray mistirio nen saman,
3 "saray bengatlan nadngel tan naamtaan mi, saray bengatlan imbagad sikami na saray lalaki mi.
4 "Ag mi ra iyamut ed saray anak tayo; ibaga mid ontombuk a kailalakan so nipaakar ed pakayariy Katawan tan saray matalonggaring a kiwas to tan saray makapakelaw a ginagawa to.
5 "Angiter na saray ganggan ed saray totood Israel, tan diad saray kabyangay boleg nen Jacob. Binilin to ray lalaki tayo ya ibangat dad saray anak da iray ganggan to,
6 "pian naaralan ira na ontombuk a kailalakan, tan ibangat da met ed saray anak da.
7 "Diad onya manilalo met irad Dios, ag da nalingwanan iray ginagawa to, tan onuren da lawas iray ganggan to.
8 "Ag ira magmaliw a singa saray lalaki ra a matonganga tan bangar iran totoo; aliwan malet so panagmatalek dad Dios, tan ag ira nansiansian matoor ed sikato.
9 "Saray kabyangay boleg nen Efraim, a say armas da et saray pana, et kibatiktik ira nen agew na bakal.
10 Ag da tinoor so impisipanan dad Dios; ag da tinoluk so ganggan to.
11 Alingwanan da ray ginagawa to, saray milagron anengneng dan ginagawa to.
12 Diad imatun da ray lalaki ra, nanggaway milagro so Dios, diad patar na Soan na dalin na Egipto.
13 Binelsay toy dayat tan pinadalan to ra; pinaalagey ton singa padir so danum.
14 No agew inwanwan to ra diad panamegley na lorem, tan no labi diad panamegley na liwawa na apoy.
15 Pinasangi to ray baton-dampay diad kalawakan, tan initdan to ray daakan a danum a nanlapud dalem na dalin.
16 Pinapaway tod baton-dampay so sobul tan pinaagos ton singa ilog so danum.
17 Balet intuloy day nankasalanan ed Dios, tan diad kalawakan sinmumpa rad Sankatageyan.
18 Ginagala ran sinubok so Dios, diad impankerew day kakanen a labay da.
19 Nansalita ray sumpad Dios tan inkuanda, Nayarian kasi na Dios so mangiter na kakanen diad kalawakan?
20 Tua a pinekpek to so baton-dampay, et tinmoroy mapmaples a danum; balet nayarian to itayo met kasin itdan na tinapay tan karni?
21 Kanyan akapasnuk so Katawan nen nadngel to ra; kinabil to na apoy iray totoo to, tan linmoor so pasnuk tod sikara,
22 ta ag ira nanmatalek ed sikato tan ag ira anisia ya ilaban to ra.
23 Balet nansalitad tawen tan ingganggan ton onlokas iray puirta to;
24 initdan to ray nakan a nanlapud tawen, diad impangoran to na mana a kanen da.
25 Kanyan angan iray kakanen da ray anghil. Say Dios initdan to ra na daakan.
26 Pinasiplug to met so dagem ed bokig, tan diad pakayari to pinaalimbosabos toy dagem ed abalaten;
27 insan pinadapo tod saray totoo to iray manok, a singa ra karakel na buer ed gilig na dayat;
28 napnaplag irad pegley na kampo ra, diad kaliber-liber na saray tulda ra.
29 Kanyan angan tan napnapsel iray totoo; inter na Dios so nilabay da
30 Balet nen legan dan mangakan tan kasakbayan iran napesel,
31 akapasnuk so Dios ed sikara, et pinatey to ray sankabiskegan ed sikara, saray sankamaungan a lalakin tobun-balo na Israel.
32 Anggaman a wala ra yan agawa intuloy na saray totoo so nankasalanan; anggaman a wala ray milagron ginagawa to ag ira anisia.
33 Kanyan singa ingas so impamaandipat tod saray agew da, tan makapataktakot so impamasamput tod saray bilay da.
34 Balet kapag wala ray pateyen tod sikara, saray nakdaan onsingger irad Dios; mampatauli ra tan masimoon iran mampikasid sikato.
35 Anunotan dan say Dios so manangyagel da, tan say Makapanyarin-amin so dinmagon tinmulong ed sikara.
36 Balet tilan amiy salita ra, tan lastug ya amiy imbaga ra.
37 Ag ira nansiansian matoor ed sikato, tan ag da sinumpal so impisipanan dad sikato.
38 Balet say Dios mapangasid saray totoo to. Pinirdona to ray kasalanan da tan ag to ra pinatey. Naynay a pinokpokan toy pasnuk to, tan pinabetel toy petang na olo to.
39 Anunotan ton totoo ra labat, tan singa ra dagem ya onsisiplug tan nanaandi la.
40 Naynay iran sinmumpad sikato diad kalawakan; amimpiga-pigan pinaermen da.
41 Inolit-olit dan sinubok so Dios, tan impanpapasnuk da so Masanton Dios na Israel.
42 Nilingwanan day baleg a pakayari to; alingwanan da may agew ya inliktar to rad saray kalaban da,
43 tan nanggagawa na saray milagro tan tanda diad patar na Soan, ed dalin na Egipto.
44 Impagmaliw ton dala iray ilog, kanyan anggapoy nainom da ray Egipsio.
45 Angibakid sikaray amayamay ya apangat a nampapairap ed sikara; angibaki met na amayamay a patang a nandederal ed dalin da.
46 Angibakiy amayamay a dorun a nambubuwag ed saray tanem da, tan aneral ed saray aaniyen da.
47 Pinapatey to ray kaubasan da diad panamegley na oran a kristal tan saray kakiewan dan igos diad panamegley na mapalalon betel.
48 Pinapatey to met iray baka diad panamegley na oran a kristal, tan saray karniro ra diad panamegley na kirmat.
49 Pinadalan tod sikara so ontan lan kairapan diad impangidapo toy mapalalon pasnuk tan petang na olo ya imbaki to ran singa saray anghil a managpatey.
50 Ag to pinokpokay pasnuk to, odino kinawanan so bilay da, no ag ta pinatey to rad sakey a salot.
51 Pinatey to ray lalakin pangulowan ya anak ed amin a pamilya na Egipto.
52 Insan singa sakey a pumapastol, impaway to ray totoo to; tan inwanwan to ran singa poluk na karniro diad imbeltang dad kalawakan.
53 Arawi rad kaatapan nen inwanwan to ra, kanyan ag ira tinmakot; balet tinabunay dayat iray kalaban da.
54 Inyakar to rad masanton dalin to, diad kapalandeyan a sikaton diliy anakep.
55 Pinataynan to ray totoon manaayam diman nen mankukurang iray totoo to; inapag toy dalin ed saray tribu na Israel, tan inter tod saray totoo to iray panaayaman da.
56 Balet sinmumpa rad Makapanyarin-amin a Dios, tan sinubok da. Ag da tinoluk iray ganggan to,
57 balet mananumpa ra tan aliwa ran matoor a singa saray lalaki ra, tan ag ira napampiaan a singa panan pikewet.
58 Pinasanuk day Dios lapud saray paganon pasen a panangigalangan, tan pinapetang dan maung so olo to lapud saray talintaoy diriyos da.
59 Say Dios akapasnuk nen anengneng to ya, kanyan impolisay ton sigput iray totoo to.
60 Inkaindan toy tulda tod Silo, say tuldan nanayaman tod pegley tayon totoo to.
61 Inyabuloy ton nadakep na saray kalaban mi so Kaban na Sipanan, say tanda na pakayari tan kagalangan to.
62 Pinmetang so olo tod saray totoo to, tan pinaolyan ton pinatey ira na saray kalaban da.
63 Inatey ed bakal iray babalolaki, kanyan anggapoy angasawad saray mamarikit.
64 Inatey iray papari ra diad panamegley na ispada, tan ag naabuloyan a lamayan ira na kaasawaan da.
65 Diad kaonuran, say Katawan binmangon a singa aliing ed ogip to; singa toon mabiskeg a maniingal lapud abuek.
66 Pinapoliktar to ray kalaban to; andi-anggaan tan makapabaing so inkatalo ra.
67 Balet impolisay to ray kabyangay boleg na Jose; ag to piniliy tribu nen Efraim.
68 Ingen pinili toy tribu nen Juda tan say Palandey na Sion ya inararo to.
69 Diman to impaalagey so Timplo to a kaparparay abung tod tawen; inletneg to na malmalet a singa say mundo, kanyan mansiansian anggad angga.
70 Pinili toy aripen ton David a magmaliw ya aripen to; inala tod pastolan na saray karniro,
71 a dimay pangaasikasoan tod saray ayep to; ginawa ton ari na Israel, say pumapastol na saray totooy Dios.
72 Nilingwanan nen David so sikaton dili diad impangasikaso tod sikara, tan maabig so impangiwanwan to.
1 "O Dios, say dalin mo et nilooban na saray pagano. Dinotakan day inkasanto na Timplom tan dineral-deral day Jerusalem.
2 "Impabwag dad saray manok a buitri iray bangkay na saray aripen mo, diad saray ayayep ed katakelan iray bangkay na saray totoom.
3 "Imbung dan singa danum so dala da ray totoom; say dala ra inmagos ed intiron Jerusalem, et anggapoy akeraan a mangipompod saray bangkay.
4 "Luludlureyen da kami ray kakaabay min bansa; elek-elekan tan balbalawen da kami.
5 "Katawan, ag la mangangga so pasnuk mod sikami? Mansiansian mandarlang a singa apoy so pasnuk mo?
6 "Pampasnukan mo pa ray bansan ag mangigagalang ed sika, saray totoon ag mampipikasid sika.
7 "Ta pinapatey da ray totoom, tan dinederal day bansam.
8 "Ag mo kami pa dudusaen lapud saray kasalanan da ray lalaki mi. Kasian mo kami pa natan; naandi lan amiy ilalo mi.
9 "Tulongan mo kami pa, O Dios, tan ilaban mo kami pa; iyagel mo kami pa tan pirdonam pa ray kasalanan mi, lapud kagalangay ngaran mo.
10 Akin et tetepeten ed sikami na saray bansa, Kawalaay Dios yo? Ipanengneng mo pad sikami so panusam ed saray bansa lapud impangibung dad dala na saray aripen mo.
11 Dengel mo pay panay-ay da ray priso tan lapud baleg a pakayarim ibolus mo pa ray asintinsiaan lan ompatey.
12 Katawan, bales mo pan mamimpito iray arum a bansa, lapud saray impanpapabaing dad sika.
13 Insan sikami ran totoom, saray karniro na poluk mo, anggad anggan misalamat kamid sika tan idayew mi kad amin a panaon ya onsabi.
1 "Dengel mo kami pa, O Pumapastol na Israel; talineng mo kami pa, sika a pangulo da ray karnirom. Sika a manyodyorung ed tronom diad tagey da ray kirubin,
2 "ipaamtam pay sikan dili ed saray tribu di Efraim, Benjamin, tan Manases. Ipanengneng mo pad sikami so pakayarim; gala pa ta ilaban mo kami!
3 "Papawil mo kami pa, O Dios! Ipanengneng mo pad sikami so panangasim et nilaban kami!
4 "Kapigan, O Katawan a Dios a Makapanyarin-amin, so pangangga na pasnuk mod pikakasi da ray totoom?
5 "Ermen so inter mon kanen mi, tan ontan lay karakel na luan inter mon inomen mi.
6 "Inyabuloy mon panlalabanan na saray kakaabay min bansa so dalin mo; papabaingan kami na saray kalaban mi.
7 "Papawil mo kami pa, O Dios a Makapanyarin-amin! Ipanengneng mo pay panangasim ed sikami, et nilaban kami!
8 "Impaway mod Egipto so sakey a wakal na ubas; pinataynan mo ray arum a bansa, insan mo intanem ed dalin da.
9 "Pinalinan moy sakey a pasen a tobuan to; inmaralem iray lamut to tan kinmayamkam ed intiron dalin.
10 Siniruman to ray kapokdulan, saray sanga to kinobutan da ray ankakabaleg a kiew a sidro.
11 Saray sanga to asabi ray Dayat na Mediteraneo, tan anggad Ilog na Eufrates.
12 Akin et tinebag mo ray padir ed kaliber-liber to? Kanyan natan, amin da ray onlalabas et natakew da ray bunga to;
13 naalibuk tan natumba na saray animolok, tan nabwag na saray ayayep ed katakelan.
14 Lingaw mo kami pa, O Dios a Makapanyarin-amin! Manlapud tawen osdungan mo kami pa; gala pa ta ilaban mo ray totoom!
15 Gala pa ta ilaban mo yan ubas ya intanem mo, sayan malangwer nin ubas a pinabaleg mon mabisbiskeg!
16 Pinoolan na saray kalaban mi tan binatang da; moldagatan mo pa rad pasnuk mo tan patey mo ra!
17 Iyagel tan asikasom pa ray totoom a pinilim, say bansan ginawam a mabisbiskeg.
18 Ag mi ka lan balut ibeneg; pansiansia mo kami pan mabilay, et idayew mi ka.
19 Papawil mo kami pa, O Katawan a Dios a Makapanyarin-amin. Ipanengneng mo pad sikami so panangasim, et nilaban kami!
1 "Iyeyag yoy gayaga ed Dios a manangyagel tayo; ikanta yoy dayew yo ed Dios nen Jacob!
2 "Igapo yoy mankanta tan paknul yo ray pandirita; manogtog kayoy marakep ed saray arpa tan saray lira.
3 "Sibuk yoy trumpita a pangipakabat na pista, no balo so bulan tan no tulaw.
4 "Sikato yay ganggan ed Israel, sikato yay bilin na Dios nen Jacob.
5 "Ingganggan to ya ed saray totood Israel nen dinogpaan toy dalin na Egipto. Narerengel koy bosis ya ag ko kabat a kuanto,
6 "Inekal kod takeb yo iray kairapan a sasakbaten yo; impaigatun kod sikayo ray laryon sankabembenan yo.
7 "Tinmawag kayod siak nen nagugunigon kayo, et inlaban ta kayo. Manlapud panaamutan kod bagyo inebatan ta kayo. Diad saray sobul na Meriba, sinubok ta kayo.
8 "Sikayo ran totook, dengel yoy pamapasakbay ko; O Israel, agaylay pampipirawat kon ondengel kayod siak!
9 "Nepeg ya ag kayo mangigalang ed sananey a dios.
10 Siak so Katawan a Dios yo ya angipaway ed sikayod Egipto. Sangi kayo, ta pakanen ta kayo.
11 Balet ag ondengel ed siak iray totook; say Israel ag da ak toluken.
12 Kanyan inabuloyan kon mansiansiay awet na kapusoan da, tan manggawa ray labay dan dili.
13 Agaylay pampirawat kon ondengel iray totook; agaylay pampirawat kon onuren da ak!
14 Taloen kon tampul iray kalaban da, tan pasukoen ko ra.
15 Saray mamobosul ed siak onggiwgiw irad takot diad arap ko; ag manganggay dusa ra.
16 Balet pakanen ta kayoy sankaabigan a trigo, tan peneken ta kayoy dilod katakelan.
1 "Say Dios so pangulod mangatatawen a korti; sikatoy mangiiter na sintinsia no mantitipon iray diriyos:
2 "Tondaan yo lay pangiiter yoy sintinsian pikewet, tan tondaan yo lan pilaan iray totoon maoges.
3 "Iyagel yoy katonungan da ray mairap-bilay tan saray olila; iter yoy kanepengan da ray totoon walad pankaukolan tan saray kaskasian.
4 "Iyagel yo rad pakayari da ray totoon maoges.
5 "Anggapoy amta yo! Ag ki makatalus! Sigput so inkaoges yo, tan naandi lay inkatonung diad tapew na dalin.
6 "Imbagak ed sikayon diriyos kayo, tan anak kayon amin na Sankatageyan a Dios.
7 "Balet ompatey kayo a singa saray totoo; mangangga ray bilay yo a singa saray prinsipi.
8 "Gala pa, O Dios, ta oleyan moy mundo; kayaryan mon amin iray bansa.
1 "O Dios, ag ka labat pa mareereen; ag ka pa mareereen, o anggapoy eseesel!
2 "Nengneng mo! Manggogolo ray kalaban mo tan onsusumpa ray mamobosul ed sika.
3 "Iplaplano ray panilib dad saray totoom; mankokomplut ira sumpad saray iyaagel mo.
4 "Kuanda, Gali dia, deralen tayoy bansa ra, pian nalingwanan lan andi-anggaan so Israel.
5 "Onaabubon iran amin ed plano ra, tan nankakasakey iran onsumpad sika:
6 "saray totood Edom tan saray Ismaelita; saray taga Moab tan saray Agareno;
7 "saray taga Gebal, Ammon, tan Amalec; saray taga Filistia tan Tiro.
8 "Saray taga Asiria ya akimoyung met irad sikara; mabiskeg ira yan kaiba na saray kabyangay boleg nen Lot.
9 "Gawam pad sikaray ginawam ed saray Madianita, tan diad kindi Sisera tan Jabin, diad Ilog na Kison.
10 Tinalom irad Endor, tan aboluk-boluk ed dalin iray bangkay da.
11 Gawam pad saray pangulo ra so ginawam ed kindi Oreb, tan Zeeb; talom ya amin iray manoley da a singa impanalom ed kindi Zeba tan Zalmuna,
12 ya angikuan, Kayaryanen tayo so dalin a kien na Dios.
13 Dios ko, ibuybuyak mo pa ran singa dabuk, singa taep ya ipalir-palir na dagem.
14 No panoy pamopool na apoy ed katakelan, singa panisinit na dalang ed kapokdulan,
15 ontan pa met so pangosil mod sikara diad panamegley na bagyom, tan taktakot mo ra diad panamegley na mabiskeg a dagem mo.
16 Katawan, sakbungan mo pa na kababaingan so kalupaan da, tan ipabirbir mod sikaray pakayarim.
17 Andi-angga komun a natalo tan nataktakot ira; ompatey ira komun a naplag a sigput ed kababaingan.
18 Naamtaan da komun a sika labat so Katawan say Sankatageyan a manoley ed sankamundoan.
1 "Agaylay kaabigan na Timplom, O Makapanyarin-amin a Katawan!
2 "Labalabay kon tuloy so makaloob diman! Pampilpilalekan koy manayam ed Timplo na Katawan. Diad intiron pusok sililiket ak a mankankanta ed mabilay a Dios.
3 "Anggan saray manok ed tagey nanggagawa ray obung da, tan saray anuyaw walay panaayaman da; isisinup da ray sibong da ed abay na altar mo, O Katawan a Makapanyarin-amin, arik tan Dios ko.
4 "Agaylay liket da ray manaayam ed abung mo, mankakanta ran naynay na pangidayew dad sika!
5 "Agaylay liket da ray totoon manlalapud sikay biskeg da, tan mampipilalek iran onla a mangidayew ed sika diad Palandey na Sion.
6 "Nen ondadalan ed amagan patar na Baca, ompapaway diman iray sobul; say masakbay ya oran loluaken to na danum.
7 "Diad panaakar da lalon ombibiskeg ira; nanengneng dad Sion so Dios da ray diriyos!
8 "Dengel mo pay pikakasik, O Katawan a Dios a Makapanyarin-amin; talineng ka pa, O Dios nen Jacob!
9 "Bindisionan mo pay ari mi O Dios, say ari a pinilim!
10 Say sanagew a panayam ed Timplom et magmaung ni nen say sanlibon agew a panayam ed arum a pasen; labay ko niy manalagey ed puirtay abung na Dios ko, nen say manayam ed tulda na saray totoon maoges.
11 Say Katawan a Dios so manangyagel tan mapagalang ya ari tayo, kakasian to tayo tan iitdan to itayoy kagalangan. Ag to isisiblet so antokaman a kaabigan ed saray manggagaway kaptekan.
12 Agaylay liket da ray manmamatalek ed sika, O Katawan a Makapanyarin-amin!
1 "Katawan, mapangasi kad dalin mo; pinaaligwas mo lamet so Israel.
2 "Pinaandim ya amin iray kasalanan na saray totoom, tan pinirdonam iray amin a kaogsan da.
3 "Ag ka la natan mamapasnuk ed sikara, tan binmetel lay ontan lan petang na olom.
4 "Papawil mo kami pad sika, O Dios a manangilaban mi, tan tondaan mo pa lay ag mo pakaliliket ed sikami!
5 "Andi-anggaan so pasnuk mod sikami? Ag la ontonday petang na olom ed amin a kailalakan?
6 "Pasimbalom pay biskeg mi, pian sikamin totoom et idayew mi ka.
7 "Ipanengneng mo pad sikamiy ag mangoman a panangarom, O Katawan, tan iter mo pad sikamiy manangilaban a tulong mo.
8 "Onderengel ak ed ibabagay Dios a Katawan; isisipan toy kareenan ed sikatayon dilin totoo to, no ag ti la pawilen so kaogsan tayo.
9 "Peteg a sipaparaay Katawan a mangilaban ed saray mangigagalang ed sikato, et mansiansia ed dalin tayo so manangilaban a kiwawala to.
10 Manabet so panagaro tan inkatoor; ontan met a manlakapan so inkatonung tan kareenan.
11 Say inkatoor na too ontangay manlapud tapew na dalin, tan say inkatonung na Dios onosdung manlapud tawen.
12 Say Katawan paaligwasen to itayo, tan say dalin tayo mambungay daakan.
13 Manonaan ya onlad arap na Katawan so inkatonung, tan iparaan toy dalanen na Katawan.
1 "Dengel mo ak pa, Katawan, tan ebatan mo ak, ta makapoy ak tan wala ak ed pankaukolan.
2 "Iyagel mo ak pad patey, ta matoor ak ed sika; ilaban mo ak pa, ta managlingkur mo ak tan manmamatalek ak ed sika.
3 "Sikay Dios ko, kanyan kasian mo ak pa; mikakasi ak lawas ed sika.
4 "Paliket mo ak pa a managlingkur mo, Katawan, ta ontatagey iray pikakasik ed sika.
5 "Katawan, maung tan manamirdona ka, napno kay ag mangoman a panangaro ed amin da ray mampipikasid sika.
6 "Dengel mo pay pikakasik, Katawan; talineng mo pay ikekerew koy tulong.
7 "Ontatawag ak ed sika no panaoy gunigon, lapud eebatan moy pikakasik.
8 "Anggapod saray diriyos so miparad sika, Katawan, anggapoy siopaman a makagawa ed saray ginawam.
9 "Amin da ray bansan pinapalsam ondago ra tan ondakmomo rad sika. Idayew day inkatalonggaring mo.
10 Sikay makapanyari tan manggagawa ka ray pakelaw; bukor mo so Dios.
11 Katawan, ibangat mo ak pad labay mon gawaen ko, et matoor ta kan onuren; ibangat mo ak pan manlingkur ed sika diad intiron pusok.
12 Idayew ta kad intiron pusok, Katawan a Dios ko, tan ibawag kon ando lan ando so inkatalonggaring mo.
13 Agaylay kabaleg so ag mangoman a panangarom ed siak! Inlaban mo ak ed lobuk.
14 O Dios, ondadagon onsumpad siak iray mapaatagey a totoo; labay ak a pateyen na sakey ya olup na totoon maruksa, totoon ag mangitaltalek ed sika.
15 Balet sika, Katawan, mapangasi tan maaro kan Dios, maanos ka, maabagey tan matoor ka lawas.
16 Lingaw mo ak pa tan kasian mo ak; pabiskeg mo ak pa a managlingkur mo, lapud lilingkuran ta ka a singa ginawa nen inak.
17 Katawan, ipanengneng mo pad siak so pakapatnagay kaabigan mo; pian nabaingan iray mamobosul ed siak, diad pakanengneng dan niligliwa tan tinulongan mo ak.
1 "Inletneg na Katawan so siudad to diad tapew na masanton palandey;
2 "inaro to niy siudad na Jerusalem nen say dinan man a pasen ed Israel.
3 "Dengel mo, siudad na Dios, iray makapakelaw a bengatlan ibabaga ton nipaakar ed sika:
4 "No ilistak iray bansan ontotoluk ed siak, ipilak so Egipto tan say Babilonia; ipibiang ko a kabyangan na saray totood Jerusalem iray taga Filistia, Tiro, tan Etiopia.
5 "Nipaakar ed Sion, nibaga a sakop ton amin iray bansa, tan pabiskegen na Makapanyarin-amin.
6 "Say Katawan ilista to ray katoowan, tan ibilang to ran amin a mibabaley ed Jerusalem.
7 "Onsasayaw tan ikakanta ra, Diad Sion so panlalapwan na amin a bindision tayo.
1 "Katawan a Dios a manangilaban ko, no agew onkekerew ak na tulong ed sika, tan no labi onaasingger ak ed sika.
2 "Dengel mo pay pikakasik; talineng mo pay pikekerew ko na tulong!
3 "Amayamay iray sinmabin gunigon ko, kanyan manasingger ak lad lobuk.
4 "Singa ak saray ngalngali la ompatey; naandi lan amiy biskeg ko.
5 "Singa ak la nikaindan ed kawalaan da ray inaatey; singa ak saray pinapatey ya akarokul ed kalobukan da, ya ag mo la ran balut nanununotan, tan ag mo la ra natulongan.
6 "Insorub mo ak ed dalem na lobuk, diad sankabilongetan tan sankaaralem ya abut.
7 "Say pasnuk mo ambelat ya ondedetdet ed siak, tan napapairap ak a maung ed silong na daluyoy pasnuk mo.
8 "Sikay sengegan na impangikaindan ed siak na saray kakaarok; impagmaliw mo ak a makarimdimla ed sikara. Nipokuk ak kanyan ag ak la makapaway;
9 "makapoy lay pakanengneng ko lapud kakairapan ko. Katawan, inagew-agew a tatawagan ta ka tan yaatagey ko ray limak a mampipikasid sika.
10 Manggagawa ka na saray milagro a para saray inaatey? Ombabangon tan mangidadayew irad sika?
11 Nibabawag ed lobuk so ag mangoman a panangarom? Diad pasen a pakadudusaan na saray inaatey nibabawag so katooran mo?
12 Nakakabatan ed ambilonget a pasen iray milagrom odino say kaabigan mo nanenengneng ed dalin na saray alingwanan la?
13 Balet siak, Katawan, onkekerew ak ed sika na tulong; kapag kabwasan mampipikasi ak ed sika.
14 Akin et ipopolisay mo ak, Katawan? Akin et iyaamutan mo ak?
15 Nanlapu lad impanogaw ko, maniirap ak tan ngalngali ak ompatey; makapkapoy ak la lapud belat na panagdusam ed siak,
16 Dedetdetan ak na mapalalon petang na olom; dederalen ak na saray makapataktakot a panagkabil mo.
17 Singa ra delap a manliliktub lawas ed siak; onaasingger ira ya onlalakub ed siak.
18 Tinanggoyur mon ikaindan ak na saray malmalet a kakaarok; bilonget labat so akeraan a kaibak.
1 "Katawan, ikantak lawas so ag mangoman a panangarom; andi-anggaan ya ibawag ko so inkatoor mo.
2 "Amtak ya ag manganggay panangarom, tan say katooran mo et ag naderal a singa say tawen.
3 "Imbagam, Akisipanan ak ed toon pinilik; sinambaan kod managlingkur kon David,
4 "Sakey a kabyangay boleg mo so manari lawas, tan pansiansiaen kon anggad angga so panarian mo.
5 "Saray katawenan ikakanta ray makapakelaw a gagawaen mo, O Katawan; ikakanta na saray masantom so inkatoor mo.
6 "Anggapod tawen so miparad sika, Katawan; anggapod saray anghil so singa sika.
7 "Sikay gagalangen ed tipon da ray masanto; manalalagey iran amin a natatakot ed sika.
8 "Katawan a Dios a Makapanyarin-amin, anggapoy makapanyarin singa sika; diad amin a bengatla matoor ka, Katawan.
9 "Ooleyan moy makapanyarin dayat; papareenen mo ray ankakabaleg a daluyon to.
10 Binibingkas mon singa bangkay so dragon a Rahab; lapud biskeg na pakayarim tinalom iray kalaban mo.
11 Kayaryan moy tawen tan say dalin; pinalsam so mundo tan amin a logan to.
12 Ginawam so baybay tan say abalaten; kakantaan ka na Palandey na Tabor tan say Palandey na Hermon lapud liket da.
13 Agaylay pakayarim! Agaylay biskeg mo!
14 Say panarian mo niletneg ed inkatonung tan kaptekan; nanengneng ed amin a gagawaen mo so aro tan inkatoor mo.
15 Agaylay liket da ray totoon mangigagalang ed sika diad panamegley na saray kanta, saray mambibilay onung ed panangasim!
16 Lawas iran manliliket lapud sika, tan itatanduro da ka lapud inkatonung mo.
17 Iitdan mo kami na baleg a pananalo; panataloen mo kami lapud panangasim.
18 Pinilim so manangyagel mi, O Katawan; sika a Masanton Dios na Israel initdan mo kamiy ari.
19 Diad sakey a payawar nen saman, imbagam ed saray matoor a managlingkur mo, Tinulongan koy sakey a bantug a sondalo; inter koy trono ed pinilik ed saray totoo.
20 Ginawak ya ari si aripen kon David diad panamegley na impanlanak ed sikato na masanton larak.
21 Niwala lawas ed sikatoy biskeg ko, tan pabiskegan na pakayarik.
22 Ag ontalonad sikato iray kalaban to; ag taloen na saray maoges a totoo.
23 Mekmeken ko ray onlalabad sikato, tan pateyen kon amin iray mamobosul ed sikato.
24 Magmaliw ak a maaro tan matoor ed sikato; panaloen ko lawas.
25 Palaknaben koy nanarian to, manlapud Mediteraneo ya anggad Ilog na Eufrates.
26 Ikuantod siak, Sikay amak tan Dios ko; Sikay manangyagel tan manangilaban ko.
27 Pagmaliwen kon anak kon pangulowan, say sankatalonggaringan ed amin da ray arari ed mundo.
28 Sumpalen ko lawas so sipan kod sikato, tan mansiansiad anggad angga so impisipanan kod sikato.
29 Sakey a kabyangay boleg to so lawas manari; say panarian to ag manganggan singa say tawen.
30 Balet no saray kabyangay boleg to et sumlangen day ganggan ko tan ag ira mambilay onung ed saray pananontonan ko,
31 no ag da italtalek iray bilin ko tan ag da sumpalen iray ganggan ko,
32 dusaen ko ra lapud saray kasalanan da; panirapen ko ra lapud saray kaogsan da.
33 Balet ag ak ontondan mangarod kinen David, tan ag ko lingwanan a toorey sipan kod sikato.
34 Ag ko deraley impisipanan kod sikato, tan ag ko bawien so anggan sakey ya insipan kod sikato.
35 Aminsan labat tan nasput la so impansipan ko diad masanton ngaran ko; ag kon balut tilaay David.
36 Nawalaan lawas na saray kabyangay boleg to, tan daput onsisinag so agew asikasoen koy nanarian to.
37 Ag manganggan singa bulan so nanarian to, say bulan a matoor a tasid tawen.
38 Balet mamapasnuk kad pinilim ya ari; inkaindan tan impolisay mo.
39 Ag mo tinoor so impisipanan mod aripen mo, tan imbantak mod dabuk so korona.
40 Ginebam iray padir na siudad to, tan dineral mo ray tirinsira to.
41 Amin da ray ondadalan tatakewan da; elek-elekan na saray kakaabay to.
42 Impanatalom iray kalaban to; pinapaliket mo ran amin.
43 Ginagawam ya andi-kakanaan iray armas to, tan impatalom ed bakal.
44 Inekal mod sikatoy sitro na ari, tan imbalsak mod dalin so trono to.
45 Pinatikey moy panaon na kabisbiskegan to, tan impelag mod kababaingan.
46 Andi-anggaan so iyaamut mo, Katawan? Kapigan mangangga so dalang na pasnuk mo?
47 Nunot mo pa, Katawan, so katikey na bilay ko; nunot mo ya ompatey ya amiy katoowan a pinalsam.
48 Siopay makapambilay ya ag ompatey? Panon a napaliisay too so lobuk?
49 Katawan, kawalaan da ray pakapatnagay panangarom nen saman? Kawalaan da la ra may insipan mod kinen David, lapud inkatoor mo?
50 Ag mo pa lilingwanan Katawan so ontan lan impakabaingan ko ya aripen mo, say ontan lan impantetepel koy impanbabalaw-balaw ed siak na saray pagano.
51 Katawan, papabaingan na saray kalaban mo so pinilim ya ari! Nileleglemew da ya anggan iner so laen to.
52 Andi-anggaan ya idayew to Katawan! Amen! Amen!
1 "Katawan, sika lawas so abung mi diad amin ya kailalakan.
2 "Kasakbayay impamalsam ed saray palandey, odino impamalsam ed mundo, Dios ka la manlapud gapoy-gapo; Dios ka ya anggad angga.
3 "Ibabagam ed too ya ompawil ed dabuk a gendat a kipapasen to.
4 "Singa labat sanagew ed sika so sanlibon taon; singa ra labat karoman a linmabas la ra; singa ra labat antikey ya oras ed labi.
5 "Iyaagos mo kamin singa delap; magangganon singa kogip so bilay mi, Singa kami dikarikan ontutubod kabwasan,
6 "ombabaleg tan manrorosas ira, insan ira nalenes tan ompatey ed labi.
7 "Nadederal kami lapud pasnuk mo; natatakot kami lapud sanuk mo.
8 "Iiyan mod arap mo iray kasalanan mi, diad pasen a nanengneng mo ra iray maamut a kasalanan mi.
9 "Napapatikeyay bilay mi lapud pasnuk mo; mansasamput a singa esaes.
10 Pitomploy taon labat so karokey na bilay mi, o walomplo no mabiskeg kami; anggaman ontan, ermen tag segsegang labat so iiter dad sikami; nanagonuyan, anggapo lay bilay mi tan naandipat kami la.
11 Siopay akalikna na ontan lan belat na pasnuk mo? Siopay makaamtad takot a nayarin iter na pasnuk mo?
12 Ibangat mo pad sikami no panoy katikey na bilay mi, et nayarin magmaliw kamin makabat.
13 Katawan, kapigan so itonday pasnuk mo? Kasian mo kami pan aripen mo!
14 Penek mo kami pan kinabwasan na ag mangoman a panangarom, pian mankanta tan manliket kami legay bilay mi.
15 No kaonungay inter mod sikamin ermen, leleg da ra may taon a wala kamid segsegang, ontan pa met so iter mod sikamin liket.
16 Ipanengneng mo pad sikamin aripen mo, iray makapanyarin gawgawam; iyabuloy mo komun a nanengneng da ray kabyangay boleg mo so mapagalang a pakayarim.
17 Katawan a Dios mi, bindisionan mo kami pa. Paaligwas mo kami pad amin a gagawaen mi!
1 "Siopamay onlan onsalimbeng ed Katawan, siopamay mansiansiad silong na panangyagel na Makapanyarin-amin,
2 "nayarian ton ibagad Katawan, Sikay salimbeng tan manangyagel ko! Sikay Dios ko, sika so panmamatalekan ko.
3 "Andi-saew ya ipaliis to kad amin a maamut a kaatapan, tan diad amin a makapatey iran salot.
4 "Sayakopen to kad saray payak to; arawi kad kaatapan diad silong na panangasikaso to; iyagel tan ilaban ka na inkatoor to.
5 "Ag mo nepeg so ontakot ed saray kaatapan no labi, odino diad biglan idogpa na saray kalaban no agew,
6 "odino diad saray salot ya onsabi no ambilonget, odino diad saray kaogsan a mamatey no maliwawa.
7 "Anggan bilang sanlibon totooy natumban inatey ed abay mo, samplon libo ed kaliber-liber mo, anggapoy maoges a nagawad sika.
8 "Onnengneng ka et naimatunan mo no panoy kadusa da ray totoon maoges.
9 "Lapud impasen mon manangyagel moyKatawan, tan manangilaban moy Sankatageyan,
10 anggapoy maoges a nagawad sika, tan anggapoy inkaruksan nagawad abay na abung mo.
11 Iganggan na Dios iray anghil ton mangasikasod sika, tan mangyagel ed sikad inerman a laen mo.
12 Ampayaen da kad lima ra, pian diad bato anggan saray salim ag mo ra nitopa.
13 Gatinan mo ray lion tan saray oleg, saray masesebeg a lion tan saray nanditan oleg.
14 Kuay Dios, Ilaban ko ray mangaarod siak, tan iyagel ko ray mamibirbir ed siak a Katawan.
15 No ontawag irad siak ebatan ko ra; no wala rad gunigon ibaan ko ra. Iyagel tan pagalangan ko ra.
16 Tumangan ko ra na andokey a bilay, tan ilaban ko ra.
1 "Maabig so misalamat ed sika, O Katawan, say pankanta a pamagalang ed sika, O Dios a Sankatageyan,
2 "say pangibawag a kinabwasan na ag mangoman a panangarom, tan say pangibawag a nilabi-labi na inkatoor mo,
3 "ya olupen na togtog na nandeles a kagawaan na musika, tan say laineng na arpa.
4 "Katawan, paliliketen ak na saray makapanyarin gawgawam; lapud saray ginagawam, mankakanta ak ed liket ko.
5 "Matalonggaring a tuloy iray gawgawam, Katawan! Agaylay kaaralem na saray nunot mo!
6 "Say makulang-kulang ag to natalusan tan say ambagel ag to natebek
7 "a nayarin ombaleg a singa dikarika iray totoon maoges, tan onaligwas iray amin a managgaway kaogsan; anggaman ontan, sigput so kaderal da,
8 "balet sika, Katawan, so anggad anggan sankatageyan.
9 "Amta mi ya ompatey iray kalaban mo, tan natalo ya amin iray totoon maoges.
10 Pinabiskeg mo ak a singa kalakyan a bakad katakelan; binindisionan mo ak na liket.
11 Anengneng koy inkatalo da ray kalaban ko tan arengel koy tawag da ray totoon maoges.
12 Onsalumpapak a singa kiew a palmira iray matonung a totoo; ombaleg iran singa kiew a sidro na Libano.
13 Singa ra kiew ya intanem ed abung na Katawan, ya onsasalumpapak ed Timplo na Dios tayo;
14 mambubunga ni ra, anggan matakken la ra; lawas mabisbiskeg tan mabona-bona ra.
15 Dia nanengneng a matonung so Katawan, anggapoy kaogsan ed sikato a manangyagel ko.
1 "Ari so Katawan. Akawesan na kagalangan tan abalkesan na biskeg. Niletneg a malmalet so mundo kanyan ag balut nagiing.
2 "Manlapud gapoy gapo malet a niletneg so tronom, O Katawan, tan wala ka la kasakbayan na inkiwalay panaon.
3 "Onuungol la ray dalem na dayat, O Katawan; makmaknul la ra tan manungol ira.
4 "Manaarid tawen so Katawan, matalonggaring ni nen say ungol na dayat tan makapanyari ni nen saray daluyon.
5 "Magnayon iray ganggan mo, Katawan, tan tuan masanto so Timplom ya anggad angga.
1 "Katawan, sika so Dios a manudusa; ipanengneng mo pay pasnuk mo!
2 "Sika so huis na amin a katoowan; alagey ka pa tan iter mod saray mapaatagey so dusan kanepegan da!
3 "Kapigan so itonda na panggayaga da ray makasalanan? Kapigan, Katawan?
4 "Kapigan so itonda na panlalastug da ray managgaway kaogsan, tan say pampapasirayew dad saray kasalanan da?
5 "Papasegsegangen da ray totoom, Katawan; papairapen da ray totoon kayaryan mo.
6 "Papateyen da ray balon bibii, saray olila, tan saray sangkailin manaayam ed dalin mi.
7 "Kuanda, Ag itayo nanenengneng na Katawan; ag itayo nanaimano na Dios na Israel.
8 "Talusan yo, sikayo ran totook, agay lay inkakulang-kulang yo! Kapigay pakaaral yo?
9 "Pinalsa na Dios iray layag tayoag to makadngel? Pinalsa to ray mata tayoag to makanengneng?
10 Pampapasnukan to ray bansaag to ra dusaen? Bumabangat na katoowananggapoy amta to?
11 Amta na Katawan so nununotey totoo; amta to ya andi-kakanaan so panagnunot da.
12 Katawan, agaylay liket na toon bibilinen mo, say toon babangatan mo na ganggan mo!
13 Iitdan mo na inawa no panaoy gunigon, anggad pakakotkot na abut a pamatit ed saray makasalanan.
14 Ag paolyan na Katawan iray totoo to; ag to ikaindan iray totoon kayaryan to.
15 Manari lamet so inkatonung ed saray korti, tan italindeg na amin a totoon matonung.
16 Siopay angitalindeg ed siak ed saray totoon maoges? Siopay angibad siak diad insumlang kod saray managgaway kaogsan?
17 No ag ak tinulongay Katawan, wala ak la komun a tampol ed dalin na kareenan.
18 Kuanko, Natutumba ak; balet inampaya ak na ag mangoman a panangarom, O Katawan.
19 No mapagpaga tan nagugunigon ak, liligligwaen tan pagagayagaen mo ak.
20 Ag mo pibabalian iray maoges a huis, ya ipapasen dan onung ed ganggan so bengatlan aliwan matonung,
21 a mankokomplut ira sumpad saray maung a totoo, tan sisintinsiaan da na patey iray anggapoy kasalanan.
22 Balet iyaagel ak na Katawan; ilalaban ak na Dios ko.
23 Lapud kaogsan da dusaen to ra, tan lapud saray kasalanan da deralen to ra; say Katawan a Dios tayo so manderal ed sikara.
1 "Dago kayo, ta idayew tayoy Katawan! Lapud liket mankanta tayo ed Dios a mangyaagel ed sikatayo!
2 "Ondago tayod arap to a misalamat ed sikato, tan mankanta itayo na saray maliket a kanta a pangidayew.
3 "Ta makapanyarin Dios so Katawan makapanyarin ari na amin da ray diriyos.
4 "Manooley ed intiron mundo, manlapud puseg na dalin ya anggad sankatageyan iran palandey.
5 "Manooley ed dayat a pinalsa to; tan dia met ed dalin a ginawa to.
6 "Dago kayo, ta mandakmomo tan mangigalang itayod sikato; mantalimukor itayod arap na Katawan a Manamalsa tayo!
7 "Sikatoy Dios tayo; sikatayoy totoon aasikasoen to, saray karniron tataganoen to. Diad sayan agew, dengel yoy ibabaga to:
8 "Ag yo papaawetey olo yo, a singa saray lalaki yo nen wala rad Meriba, a singa sikara nen samay agew a wala rad kalawakay Masa.
9 "Sinali da ak diman tan sinubok da ak, anggan anengneng day ginagawak para sikara.
10 Diad loob na apataploy taon, akapasnuk ak ed saraman a totoo, Inkuanko, Aliwa ran matoor! Ag da labay ya onuren iray ganggan ko!
11 Diad pasnuk ko, insambak ira, Ag iran balut makaloob ed dalin a pangiteran ko komun ed sikaray inawa.
1 "Kantaan yoy balon kanta so Katawan! Kantaan yoy Katawan, amin yon katoowan ed tapew na dalin!
2 "Kantaan yoy Katawan, tan idayew yo! Ibawag yon inagew-agew so maung a balita ya inlaban to itayo.
3 "Ibando yod saray bansa so kagalangan to, tan diad amin a katoowan iray makapakelaw a gawgawa to.
4 "Matalonggaring so Katawan tan nepeg ya idaydayew; nepeg a lalon igalang nen saray amin a diriyos.
5 "Talintao labat ya amin iray diriyos da ray arum a bansa, balet say Katawan pinalsa to ray katawenan.
6 "Galang tan pakayari so walad kaliber-liber to; biskeg tan dakep so walad dalem na Timplo to.
7 "Amin yon katoowan ed tapew na dalin, idayew yoy Katawan; idayew yoy kagalangan tan pakapanyari to.
8 "Idayew yoy mapagalang a ngaray Katawan; mangawit kayoy bagat tan loob kayod Timplo to.
9 "Dakmomo kayod arap na Masanton Katawan no omparontal, giwgiw kayod arap to, amin yon katoowan!
10 Ibaga yod amin a bansa, Manaari so Katawan! Malet so inkiletneg na mundo tan ag balut natenyeg; matonung so panintinsia tod amin a katoowan.
11 Manliket kayo, sikayon dalin tan tawen! Ongul kan dayat tan amin a pinalsa a manaayam ed sika;
12 manggayaga kayon kaalogan tan amin a pinalsan manaayam ed sikayo. Saray kakiewan mankanta ra ed liket diad arap na Katawan,
13 no onsabiy Katawan a manoley ed sankamundoan. Maptek tan matonung so panoley tod amin a katoowan.
1 "Ari so Katawan! Manggayaga ka, O dalin! Manliket kayo, amin yon isla na saray dayat!
2 "Aliber na saray lorem tan kabilongetan so Katawan; maptek tan matonung so panooley to.
3 "Walay apoy ed arap to tan popoolan to ray kabosul to a walad kaliber-liber to.
4 "Say kirmat to liliwawaan toy mundo; nanenengneng na mundo, et manggiwgiw.
5 "Natotonaw a singa ispirma iray kapokdulan ed arap na Katawan, diad arap na Katawan na intiron mundo.
6 "Ibabawag na katawenan so inkatonung na Katawan, tan nanenengneng na amin a katoowan so kagalangan to.
7 "Napepelag ed kababaingan ya amin iray mangigagalang ed saray talintaoy diriyos; mandadakmomo ya amin iray diriyos ed Katawan.
8 "Manggagayaga iray totood Sion, tan manliliket iray totood siudad na Juda lapud pananintinsiam, O Katawan.
9 "Makapanyarin-amin a Katawan, sikay manooley ed intiron mundo; matalonggaring kan tuloy nen saray diriyos.
10 Inaro na Katawan iray mamobosul na kaogsan; iyaagel toy bilay na saray totoo to, ilalaban to rad pakayari da ray totoon maoges.
11 Onsisinag so silew ed saray totoon matonung, ta onsisinag so gayaga ed saray maung a totoo.
12 Amin yon matonung, manggayaga kayo, lapud ginagaway Katawan! Nunot yoy ginagaway masanton Dios, tan misalamat kayod sikato.
1 "Kantaan yoy balon kanta so Katawan; nanggagaway makapakelkelaw iran bengatla! Lapud dilin pakayari tan masanton biskeg to, sikatoy analo.
2 "Imbawag na Katawan so impanalo to; impaamta tod saray bansa so manangilaban a pakayari to.
3 "Sinumpal toy insipan tod saray totood Israel, a katekep toy ag mangoman a panangaro tan say inkatoor tod sikara. Anengneng na amin a katoowan so impanalo na Dios tayo.
4 "Mankanta kayod liket ed Katawan, amin yon walad mundo; idayew yo diad panamegley na saray kanta tan saray maliket ya eyag!
5 "Kantaan yo na saray dayew so Katawan! Mantogtog kayod saray arpa!
6 "Sibuk yo ray trumpita tan saray tamboyug, tan eyag kayod liket ed Katawan ya ari tayo.
7 "Ungol ka, dayat, tan amin da ray pinalsan manaayam ed sika; mankanta ka, dalin, tan amin da ray manaayam ed sika!
8 "Mantipak kayo, sikayo ran ilog; mantetekep kayon mankanta a maliket diad arap na Katawan, sikayo ran kapokdulan,
9 "ta onsasabi so Katawan a manoley ed sankamundoan. Matonung tan maptek so panoley tod amin a katoowan ed mundo.
1 "Ari so Katawan, et manggiwgiw iray katoowan. Manyodyorung ed trono tod tagey da ray kirubin, et nayeyegyeg so dalin.
2 "Makapanyari so Katawan diad Sion; ooleyan ton amin iray bansa.
3 "Idayew na amin a katoowan so matalonggaring tan mapagalang a ngaran to. Sikatoy masanto!
4 "Makapanyarin ari, inarom so inkatonung; inletneg moy inkatonung ed Israel; inawit moy kaptekan tan kaalasan.
5 "Idayew yoy Katawan a Dios tayo; igalang yo ed arap na trono to! Sikatoy masanto!
6 "Di Moises tan Aaron iray papari to, tan si Samuel so sakey ed saray nampikasid sikato; tinmawag irad Katawan, et inebatan to ra.
7 "Manlapud lusek a lorem, akisalitad sikara; inonur da ray ganggan tan saray bangat ya inter tod sikara.
8 "O Katawan a Dios mi inebatan mo ray totoom; impanengneng mod sikara a Dios kan manamirdona, anggaman a dinusam ira lapud saray kasalanan da.
9 "Idayew yoy Katawan a Dios tayo, tan igalang yo ed masanton palandey to! Masanto so Katawan a Dios tayo!
1 "Kantaan yo so Katawan, amin yon pinalsa ed intiron mundo!
2 "Igalang yoy Katawan a magayaga; dago kayon mankanta ed arap to!
3 "Birbir yon Dios so Katawan! Pinalsa to itayo, tan kayaryan to itayo; totoo to itayo, saray karniro to.
4 "Loob kayod saray puirta na Timplo a misasalamat kayo; laka yod saray patio to a mangidadayew kayo. Misalamat tan mangidayew kayod sikato.
5 "Maung so Katawan; ando lan ando so panangaro to tan anggad angga so inkatoor to.
1 "Nipaakar ed inkatonung tan inkatoor yan kantak; et sika, O Katawan, so pangakantaan ko.
2 "Mambilay ak ya anggapoy kaogsan ko. Kapigan so idagom ed siak? Mambilay ak ya anggapoy pakabalawan diad abung ko
3 "tan ag kon balut abuloyay kaogsan. Kabosul koy gagawaen da ray totoon onaarawid Dios; anggapoy pibabalik ed sikara.
4 "Ipolisay ko ray maoges a kanunotan tan ag ko mibiang ed kaogsan.
5 "Paarawien koy siopaman a beneg-benegan a mamapaoges ed kapara ton too; ag ko anosan so too a mapaatagey tan malastug.
6 "Manliket ak ed saray matoor ed Dios tan panayamen ko rad palasiok. Naabuloyan a manlingkur ed siak iray nagnap a napanmatalkan.
7 "Anggapoy managpalikdon manayam ed palasiok; anggapoy mansimpisimpitan a magnayon ed arap ko.
8 "Kinabwasan a deralen ko iray totoon maoges ed dalin tayo. Papawayen kod siudad na Katawan iray amin a managgaway kaogsan.
1 "Katawan, dengel mo pay pikakasik, tan talineng moy pikekerew koy tulong!
2 "Ag mo ak pa iyaarawian no wala ak ed gunigon! Dengel ka pad siak, tan ebatan mo ak pan tampol no ontawag ak!
3 "Nanaandipat a singa asewek so bilay ko; ondadalang a singa apoy so laman ko.
4 "Nalelemay so pusok a singa dikan agatin-gatinan; anggapo lay ganas kon mangan.
5 "Makmaksil so pantatagleey ko; kakatakatat tan kapokepokel ak la.
6 "Singa ak manok ya atap ed kalawakan, singa kulayot a manaayam ed aderal-deral a pasen.
7 "Ag ak makaogip; singa ak manok a bukbukor tod toktok na abung.
8 "Papabaingan da ak lawas na saray kalaban ko; saray manluludlurey ed siak ikakana ray ngaran ko ed panagayew.
9 "Dapul so pambibilay ko, tan onlalauk so luak ed iinomen ko,
10 lapud pasnuk tan petang na olom. Inalam ak, insan mo ak imbantak.
11 Say bilay ko singa anino ed labi; singa ak nalelenes a dika.
12 Balet sika, Katawan, ari ka ya anggad angga; nanunotan ka na amin a kailalakan.
13 Ombangon ka tan kasian moy Sion; sinmabi lay oras na pangasim ed sikato; sikato yay manepeg a panaon!
14 Saray aripen mo aaroen da so Sion, anggan aderal la; kakasian da, anggan abagbag la.
15 Takotan na saray bansa so Katawan; takotan na amin ya ararid tapew na dalin so pakayari to.
16 No ipaalagey lamet na Katawan so Sion, ipaamta toy kagalangan to.
17 Dengelen to ray nikaindan a totoo to tan ebatan toy pikakasi ra.
18 Nepeg ya isulat para ontombuk a kailalakan so ginagaway Katawan, pian idayew na saray totoon ag ni nianak.
19 Inmosdung so Katawan manlapud masanton pasen tod tagey, manlapud tawen inmosdung ed dalin.
20 Nadngel toy tagleey da ray priso, tan imbolus to ray asintinsiaan ya ompatey.
21 Diad ontan nibawag ed Sion so ngaray Katawan, tan sikatoy nidayew ed Jerusalem
22 no mandaragop iray totoo ed saray bansa tan saray nanarian a mangigalang ed Katawan.
23 Pinakapoy ak na Katawan nen ogaw ak ni; pinatikey toy bilay ko.
24 Dios ko, ag mo ak pa ni aalaen natan, ta aliwa ak nin masiken. Katawan, mambibilay kan anggad angga;
25 abayag lan pinalsam so mundo, tan saray dilin limam so nanggawad katawenan.
26 Naandipat ira, balet mansiansia ka; ondaan iran amin a singa kawes. Salatan mo ran singa kawes, et naandi ra.
27 Balet ag kan balut mangoman, tan ag mangangga so bilay mo.
28 Mambilay ya arawid kaatapan iray anak mi, tan diad silong na panangyagel mo mambilay ya ag nasigensigen iray kabyangay boleg da.
1 "Kamarerwak, idayew moy Katawan! Sigput ya inkatook, idayew moy masanton ngaran to!
2 "Kamarerwak, idayew moy Katawan, tan ag mo lilingwanan so ontan lan panangasi to.
3 "Papaandien ton amin iray kasalanan ko tan papaabigen ton amin iray sakit ko.
4 "Iyaagel to ak ed lobuk, tan ibibindision tod siak so panangaro tan panangasi.
5 "Papanoen toy bilay ko na saray kaabigan, pian makapansiansia ak a malangwer tan mabiskeg a singa agila.
6 "Diad pananintinsia na Katawan pipilaan to ray napapairap, tan iiter toy kanepegan da.
7 "Impaamta tod kinen Moises iray plano to, tan impanengneng tod saray totood Israel iray ginagawa to.
8 "Maaro tan mapangasi so Katawan, aliwan maipapasnuk tan napno na ag mangoman a panangaro.
9 "Aliwan lawas so panagpasnuk to; aliwan anggad angga.
10 Ag to itayo dudusaen onung ed kanepegan tayo, odino babalesen onung ed saray kasalanan tan kaogsan tayo.
11 No panoy kaatagey na tawen manlapud dalin, ontan met so kabaleg na panangaro tod saray mangigagalang ed sikato.
12 No panoy kaarawiy bokig ed abalaten, ontan met so kaarawiy impangekal tod sikatayo na saray kasalanan tayo.
13 No panoy panangasi na ama ed saray anak to, ontan met so pangakasiy Katawan ed saray mangigagalang ed sikato.
14 Amta to no antoy inkagawa tayo; nanununotan ton dabuk itayo.
15 Para sikatayon totoo, singa labat dika so bilay tayo. Ombabaleg tan ombobona itayon singa rosas a balang;
16 insan sisiplugey dagem, et naandi la ag la nanengneng na siopaman.
17 Balet mansiansian anggad angga so panangaroy Katawan ed saray mangigagalang ed sikato, tan magnayon ed amin a kailalakan so kaabigan to,
18 diad saray matoor ed impisipanan to tan mangoonur na saray ganggan to.
19 Inletneg na Katawan so trono to ed tawen; sikatoy ari ed sankamundoan.
20 Idayew yoy Katawan, sikayo ran mabiskeg tan makapanyarin anghil a manusumpal na saray ganggan to tan onderengel na ibabaga to.
21 Idayew yoy Katawan, amin yo ran mangatatawen a pakayari, sikayo ran aripen to a mangoonur ed linawa to!
22 Idayew yoy Katawan, amin yo ran pinalsa to, diad amin a pasen panooleyan to. Kamarerwak, idayew moy Katawan!
1 "Idayew moy Katawan, O kamarerwak! O Katawan a Dios ko, agaylay talonggaring mo! Akawesan kay dayew tan kagalangan,
2 "tan nilimbus moy sikan dili na liwawa. Inyaplag mon singa tulda iray katawenan,
3 "tan impaalagey moy abung mo ed tapew na saray danum ed tagey. Ikakanam a karwahi iray kaloreman tan lologanan mo ray payak na dagem.
4 "Gagawaen mo ran ibabakim so dagem; gagawaen mo ran aripen mo so kirmat.
5 "Malet so impangiletneg mod mundo diad saray pundasion to, et ag balut nagalaw.
6 "Intapew mon singa kawes so dayat ed mundo, tan sinakubay danum iray kapalandeyan.
7 "Nen nampasnukan mo ray danum, batik ira; nen nadngel day ingal mon nangganggan, koyat ira.
8 "Inmagos irad tapew na kapalandeyan, insan diad saray patar, diad pasen a ginawam a para sikara.
9 "Nanggawa kay ketegan ya ag dan balut nalabsanan, pian ag da la nasakuban so intiron mundo lamet.
10 Papaagosen mod saray patar iray sobul, tan managagos ed nanleleetan da ray kapokdulan so danum na saray ilog.
11 Mangiiter ira na danum ed saray ayayep ed katakelan; diman so pangeekalan na saray asnod katakelan na inkapgaan da.
12 Diad saray kiew ed kaliber-liber, manggagaway obung iray manok tan mankankanta ra.
13 Manlapud tawen, ipepelag moy oran ed saray kapokdulan, et napapano na bindision mo so dalin.
14 Patutuboen mo ray dikarika a pambilay na saray ayayep tan saray tantanaman ya ikakana na katoowan, pian makapantanem iray pambilay da
15 tan makapanggawa ray alak a pakaliketan da, larak na oliba a pakagayagaan da, tan tinapay a pakabiskegan da.
16 Napepenek na danum iray kiew a sidro na Libano, saray kiew a kayaryan tan intatanem na Katawan.
17 Diman manoobung iray manok ed tagey; saray dulakak manoobung irad saray kiew ya igos.
18 Manaayam ed saray atagey a palandey iray kanding ed katakelan, tan manaamut ed saray ankakabaleg a kabatowan iray koniho.
19 Pinalsam so bulan a panandaay pansalat na panaon; amta na agew so oras na iselek to.
20 Ginawam so labi, et no ambilonget la, ompaway iray ayayep ed katakelan.
21 Mangwam iray kilaw a lion, no liber-liber iran mananap na kakanen ya iiter na Dios.
22 No ompaway lay agew ompawil ira, tan ondokul irad saray panaayaman da.
23 Insan saray totoo onla la rad kimey da tan mankimey ira ya anggad isabiy labi.
24 Katawan, amayamay iray pinapalsam a bengatla! Diad panamegley na ontan lan kakabatan mo, ginagawam ira! Say dalin napno na saray pinalsam.
25 Walay dayat, maawang tan balbaleg, a panaayaman da ray ag nabilang a pinalsa, melag o baleg man ira.
26 Mambiabiahid tapew to iray bapor, tan manggagalaw ed dalem to so Libiatan, say pinalsam a dragon ed dayat.
27 Sikay panmamatalkan dan amin a mangiter ed sikaray tagano no nakaukolan da.
28 Iitdan mo ra, et kakanen da; iiter moy tagano ra, et napepesel ira.
29 No onarawi ka, natatakot ira, no ekalen moy ingas mo, ompatey ira tan ompawil irad dabuk a nanlapwan da.
30 Balet no itdan mo ra na ingas mo, napalsa ra; papasimbaloen moy bilay na dalin.
31 Mansiansian anggad angga komuy kagalangan na Katawan! Panliketan komun na Katawan iray ginagawa to!
32 Onnenengneng ed dalin so Katawan, et onggigiwgiw; didiwiten to ray kapalandeyan, et onaasewek ira.
33 Kantaan koy Katawan legay pambilay ko; daput mambibilay ak kantaan ko na saray dayew so Dios ko.
34 Pakaliketan to komuy kantak, ta manlalapud sikato so gayagak.
35 Naderal komud tapew na dalin iray makasalanan; naandipat la ra komuy maoges a totoo. Idayew moy Katawan, sikan kamarerwak! Idayew yoy Katawan!
1 "Misalamat kayod Katawan, ibawag yoy pakapanyari to, tan ipaamta yod saray bansa iray ginagawa to!
2 "Kantaan yoy dayew so Katawan; ibelyaw yoy amin a makapakelkelaw iran gawgawa to.
3 "Manggayaga kayo, ta kayaryan to itayo; manliket komun ya amin iray mangigagalang ed Katawan!
4 "Laka yod Katawan tan kerew kayoy tulong to; tan igalang yo ed ando lan ando.
5 "Sikayo ran kabyangay boleg nen Abraham ya aripen na Katawan, sikayo ran kabyangay boleg nen Jacob a pinili na Katawan, nunot yo ray makapakelkelaw a milagron ginagawa to, tan saray sintinsian iniiter to.
6
7 "Say Katawan so Dios tayo, para amin a katoowan iray ganggan to.
8 "Sumpalen toy impisipanan to ya anggad angga, saray sipan to ya anggad nilibon kailalakan.
9 "Sumpalen toy impipakna tod kinen Abraham tan say insipan tod kinen Isaac.
10 Say Katawan akisipanan ed kinen Jacob, say andi-anggaan ya impisipanan tod kinen Israel.
11 Iter kod sikay dalin na Canaan, inkuanto. Sikatoy tawiren mo.
12 Pigpigara nen saman iray totoo na Dios, tan sangkaili rad dalin na Canaan.
13 Nansosoblay so nanaayaman da ran bansa tan saray nanarian.
14 Balet ag inyabuloy na Dios a pairapen ira na anggan siopa, tan diad panangyagel tod sikara, pinapasakbayan to ray arari.
15 Inkuanto, Ag yo didiwiten iray aripen kon pinilik; ag yo papasakitan iray propitak!
16 Impadalan na Katawan so eras ed bansa ra, tan inala ton amiy kakanen da.
17 Balet pinaona tod sikara si Jose, a nilakon sakey ya aripen.
18 Agolunggolungan iray sali to, tan abariberay balatyang so beklew to,
19 ya anggad tinmua so impropisiya to. Pinaneknekay salita na Katawan a tuay imbaga nen Jose.
20 Insan impaibolus na ariy Egipto; imbolus na manoley na saray bansa.
21 Impasen ton makaoley ed gobirno to, tan impanoley tod intiron dalin to
22 a walay pakayari tod saray opisyal na ari tan pakaoley a mambangat ed saray sumisimbawa to.
23 Insan linmad Egipto si Jacob, tan nanayam ed saman a bansa.
24 Say Katawan initdan to na amayamay ya anak iray totoo to, tan ginawa to ran mabiskeg nen saray kalaban da.
25 Inabuloyan to ray Egipsio a mamosul ed saray totoo to, tan mamalikdo ed saray aripen to.
26 Insan imbaki toy aripen ton si Moises, tan si Aaron a pinili to ra.
27 Ginagawa ray makapanyarin gawgawa na Dios tan nanggagawa ray milagro ed Egipto.
28 Pinabilonget na Dios so bansa, balet ag inonur na saray Egipsio so ganggan to.
29 Impagmaliw ton dala iray ilog da tan pinatey to ray amin a sira ra.
30 Apano na patang so bansa ra; anggan say palasioy ari nanaayaman da.
31 Nangganggan so Katawan et apano na apangat tan ageyet so intiron bansa.
32 Aliwan say oran so impelag tod dalin da, no ag ingen pinaoran toy yilo tan pinakirmat to;
33 dinederal to ray kaubasan da tan saray kakiewan dan igos, tan tinumba ton amin iray kakiewan.
34 Nangganggan et sinmabi ray dorun, ya ag ira nabilang ed karakel da.
35 Kinan day amin a tantanaman da; kinan day amin a bungay dalin da.
36 Pinatey ton amin iray pangulowan a lakin anak na balang pamilya ed Egipto.
37 Pinapaway tod satan iray Israelita; nanaawit iray balituk tan saray pilak; mabiskeg tan maabig so laman dan amin.
38 Makaliliket iray Egipsio nen tinmaynan iray Israelita, ta antakot da ra.
39 Tinarungan na Dios iray totoo to na lorem, tan initdan to ray apoy a nanliwawad sikara no labi.
40 Kinmerew ira, et initdan to ray pugo; initdan to ray kakanen a nanlapud tawen a mamesel ed sikara.
41 Nilokasan toy sakey a baton-dampay, et tinmuroy danum; singa ilog ya inmagos ed kalawakan.
42 Anunotan toy masanton sipan to ed kinen Abraham ya aripen to.
43 Kanyan pinapaway tan inwanwan to ray totoo to, et nankakanta tan naneeyag ira lapud liket.
44 Inter tod sikaray dalin na saray taga arum a bansa tan impakayaryan tod sikara so kaalogan da,
45 pian onuren na saray totoo to iray ganggan to tan sumpalen da ray bilin to. Idayew yoy Katawan!
1 "Idayew yoy Katawan! Misalamat kayod Katawan, ta sikato et maung; andi-anggaan so panangaro to.
2 "Siopay makapangidalatdat na amin iray makapakelkelaw a ginagawa to? Siopay makapangidayew na nagnap ed sikato?
3 "Maliket iray ontotoluk ed ganggan to, saray manggagawa lawas na inkatonung.
4 "Nunot mo ak pa, Katawan, no tulongan mo ray totoom; ag mo ak met lilingwanan mo ilaban mo ra.
5 "Ipanengneng mo pad siak so iyaligwas da ray totoom tan pibiang mo ak ed liket na bansam, diad gayaga da ray totoon kayaryan mo.
6 "Nankakasalanan kami, a singa ginawa da ray lalaki mi; nanggagawa kamiy kaogsan tan kabaglan.
7 "Ag atalusan na saray lalaki mid Egipto iray makapakelkelaw a gawgaway Dios; alingwanan da ray amimpiga-pigan impanengneng na Dios a panangaro tod sikara, tan sinumlang da so Makapanyarin-amin diad Dayat ya Ambalanga.
8 "Anggaman ontan, inlaban to ra, onung ed insipan to, pian nipanengneng toy baleg a pakayari to.
9 "Ginanggan toy Dayat ya Ambalanga, et minmaga; inwanwan ton binmaliw ed ekat iray totoo to.
10 Inlaban to rad saray amosul ed sikara; inyagel to rad saray kalaban da.
11 Balet nalner ed danum iray kalaban da; anggapoy anggan sakey ya atilak ed sikara.
12 Diad ontan, anisia ray totoo to ed saray salita to, tan kinantaan day panangidayew.
13 Balet alingwanan dan tampol iray ginagawa to, tan ag da la inalagar so simbawa to.
14 Nen wala rad kalawakan sinmabid sikara so alablabas a pilalek et sinubok day Dios.
15 Kanyan inter tod sikaray kinerew da, balet impadalan to met ed sikaray salot.
16 Diad kalawakan angimon irad kinen Moises tan diad kinen Aaron, say masanton aripen na Katawan.
17 Insan sinmangiy dalin tan inakmun toy Datan tan tinabunan toy Abiram tan say pamilya to;
18 linmeksab so apoy ed saray mananombuk da, tan pinoolan to ra man a totoon maoges.
19 Nanggawa ray balituk a baka diad Sinai, tan inggagalang da man a talintao;
20 insalat day kagalangan na Dios ed talintaoy ayep a mangakay dika.
21 Nilingwanan day Dios ya angilaban ed sikara, diad panamegley da ray makapanyarin gawgawa to ed Egipto.
22 Makapakelkelaw iray ginagawa tod man! Makapakelkelaw iray ginagawa tod Dayat ya Ambalanga!
23 Nen imbaga na Dios a deralen to ray totoo to, binaat nen Moises a pinili ton aripen to, et pinakepa na Dios so pasnuk ton maneral ed sikara.
24 Insan impolisay da so balibalin dalin, ta ag da sinisia so sipan na Dios.
25 Ngorongoro rad dalem na saray tulda ra, tan ag ira dinmengel ed Katawan.
26 Kanyan sinambaan to a paolyan to ran ompatey ed kalawakan,
27 tan ibuyak tod nandoroman bansa iray kabyangay boleg da, tan paolyan to ran ompatey ed saray arum a bansa.
28 Insan akibabali ran angigalang ed Baal diad Peor tan angan ira na saray imbagat ed saray diriyos ya anggapoy bilay.
29 Impanpasnuk day Dios lapud sarayan ginagawa ra, kanyan dinmalan so salot ed sikara.
30 Balet inmalagey si Finees tan dinusa to ray nankasalanan, et tinmonday salot.
31 Lapud saman a ginawa to nibilang a matonung si Finees manlapud saman a panaon ya anggad angga.
32 Impanpasnuk na saray totoo so Katawan diad saray sobul na Meriba, kanyan nanirap si Moises lapud sikara.
33 Pinasanuk day Moises, kanyan angibolus na makapoy a salita.
34 Ag da pinatey iray totoon pagano, anta ingganggay Katawan a pateyen da ra.
35 Ingen, akiasawaan irad sikara, tan tinmombuk irad saray kaogaliyan da.
36 Angigalang iray totooy Dios ed saray talintaoy diriyos, et sikato yay aderalan da.
37 Insasaklang da ray dilin anak dan lalaki tan bibii a bagat ed saray talintaoy diriyos ed Canaan.
38 Pinapatey da ra man ya ogogaw ya anggapoy kasalanan, et arotakay dalin lapud saman ya impanpapatey da.
39 Dinotakan day sikaran dili onung ed ganggan lapud saray gawgawa ra, tan aliwa ran matoor ed Dios.
40 Kanyan amasnuk so Katawan ed saray totoo to; naingungotan ed sikara.
41 Impelag to rad silong na pakayari da ray pagano; tan nanoley ed sikara iray kalaban da.
42 Pinapairap ira na saray kalaban da, tan sigput da ran inoleyan.
43 Amimpiga-pigan inyagel na Katawan iray totoo to, balet nilabay day onsumpad sikato; kanyan lalon linmereg irad kasalanan.
44 Anggaman ontan, dinengel iray Dios nen tinmawag ira, tan inimano toy kairapan da.
45 Lapud sikara, anunotan toy impisipanan to, tan lapud baleg a panangaro to nansalat na kanunotan.
46 Pinalemek toy kapusoan na saray mamapairap ed sikara kanyan akasian da ra.
47 Ilaban mo kami pa, O Katawan a Dios mi, tan tipon mo kami a manlapud saray arum a bansa, pian misalamat kami, tan idayew miy masanton ngaran mo.
48 Idayew yoy Katawan, say Dios na Israel; idayew yo natan tan anggad angga! Ikuan komun na amin a katoowan, Amen! Idayew yoy Katawan!
1 "Misalamat kayod, Katawan, ta sikato et maung; andi-anggaan so panangaro to!
2 "Olit yo ra yan a salita a pangidayew ed Katawan, amin yon inlaban to. Inyagel to kayod saray kalaban yo,
3 "impawil to kayon manlapud saray nandoroman bansa, manlapud bokig tan sagur, manlapud baybay tan abalaten.
4 "Saray arum nanakar-akar irad anggapoy basbas a kalawakan, tan ag da narumog so dalan a mamaarap ed sakey a siudad a panayaman da.
5 "Naeras-erasan tan naap-apgaan ira, kanyan nakalan iray ilalo.
6 "Insan diad inkagunigon da, tinmawag irad Katawan, et inyagel to rad paniirap da.
7 "Inwanwan to rad maptek a dalan a mamaarap ed sakey a siudad a napanayaman da.
8 "Nepeg dan pisalamatan so Katawan, lapud ag mangoman a panangaro to, lapud makapakelaw iran ginagawa ton para sikara!
9 "Pepeneken to ray nanaapgaan, tan pepeselen to ra na maung a bengatla iray nanaerasan.
10 Nambibilay iray arum ed bilonget tan ermen; priso ran maniirap ya agolunggolungan,
11 ta sinusumlang da ray salita na Dios a Makapanyarin-amin tan impopolisay da ray simbawa to.
12 Apunaw ira lapud kairapay kimey; atumtumba ra, et anggapoy ontulong ed sikara.
13 Insan diad inkagunigon da, tinmawag irad Katawan, et inyagel to rad paniirap da.
14 Impaway to ra a nanlapud kawalaan dan bilonget tan ermen, tan pinopoltut to ray golunggolung da.
15 Nepeg dan pisalamatay Katawan lapud ag mangoman a panangaro to, lapud makapakelaw iran ginagawa ton para sikara.
16 Gegebaen to ray gansan puirta, tan popoteren to ray balatyang a balewet.
17 Saray arum a totoo et makulangkulang ira; maniirap ira lapud saray kasalanan da tan saray kaogsan da;
18 ag da napaloob so antokaman a kakanen, tan ngalngali la ra ompatey.
19 Insan diad inkagunigon da, tinmawag irad Katawan, et inyagel to rad paniirap da.
20 Lapud ganggan to pinaabig to ra, tan inlaban to rad lobuk.
21 Nepeg dan pisalamatay Katawan, lapud ag mangoman a panangaro to, lapud makapakelaw iran ginagawa ton para sikara.
22 Nepeg dan pisalamatan diad panamegley na saray bagat, tan ibawag day ginagawa to diad panamegley na saray kanta na liket.
23 Saray arum nambabapor iran nambaroy ed dayat; diad saray dayat so nanaalaan day pambilay da.
24 Anengneng da no anto ray ginagaway Katawan, saray makapakelaw a ginagawa tod dayat.
25 Nangganggan, et sinmiplug so mabiskeg a dagem, ya amadaluyon na ankakabaleg.
26 Binmobontatuk iray bapor et linmelereg irad kaaralman. Diad onman a kaatapan, saray lalaki nakal so biskeg na linawa ra;
27 mamparugso tan mandongilngil iran singa saray abuek nagmaliw ya anggapoy kabaliksan so dunong da.
28 Insan diad inkagunigon da, tinmawag irad Katawan, et inyagel to rad paniirap da.
29 Pinatonda toy maksil a bagyo, et dinmeen iray daluyon.
30 Lapud linminak, makaliliket ira tan inyakar to rad puirto a labay dan laen.
31 Nepeg dan pisalamatay Katawan lapud ag mangoman a panangaro to, lapud makapakelaw iran ginagawa ton para sikara.
32 Nepeg dan ibawag so inkatalonggaring to diad tipon da ray totoo, tan igalang da diad tipon da ray pangulo.
33 Say Katawan sigput ton pinaekat iray ilog, tan pinatonda ton onagos iray sobul.
34 Impagmaliw ton maasin tan ag natobuan so mabonan dalin, lapud kaogsan da ray manaayam diman.
35 Ginawa ton danum iray kabueran, tan impagmaliw ton managagos a sobul so amagan dalin.
36 Impanayam to rad may totoon narasan, tan nanggawa ray sakey a siudad a panayaman da.
37 Pinasekan da ray kaalogan tan tinaneman day ubas, et akaani ra na daakan.
38 Binindisionan to ray totoo to et nanaanak iray amayamay; ag to inabuloyan ya ondaiset iray baka ra.
39 Sanen atalo tan apaabeba iray totooy Dios lapud maruksan panamairap, gunigon, tan kaermenan,
40 pinabaingan to ray mamapairap ed sikara, tan impanakar-akar to rad kalawakan ya anggapoy basbas.
41 Balet inyagel tod kairapan da iray walad pankaukolan tan pinarakel ton singa karniro iray pamilya ra.
42 Saray matonung nanenengneng da ya et magayaga ra, balet ag makaskasel ya amin iray totoon maoges.
43 Nudnunoten komun na saray makabat ira yan bengatla; motekteken da komun so ag mangoman a panangaroy Katawan.
1 "Walay talek na linawak, O Dios! Mankanta ak tan idayew ta ka! Liing ka, O kamarerwak!
2 "Liing kayo, sikayon arpak tan lirak! Liingen ko so agew!
3 "Pisalamatan ta ka diad arap da ray katoowan, O Katawan! Idayew ta kad arap da ray bansa!
4 "Say ag mangoman a panangarom sasabien to ray katawenan, tan say inkatoor mo gagawaten to ray lorem.
5 "O Dios, ipanengneng mo pad tawen so talonggaring mo tan diad intiron dalin say kagalangan mo.
6 "Ilaban mo kami pa diad panamegley na pakayarim; ebatan mo pay pikakasik, pian niagel iray totoon inarom.
7 "Manlapud santuario to, inkuay Dios, Kasumpal na panalok apag-apagen koy Sikem, tan ibunog kod saray totook so Patar na Sukot.
8 "Kien koy Galaad tan Manases; say Efraim so hilmit ko, tan say Juda so sitrok.
9 "Say Moab so panorasan kon palanggana, tan say Edom so pangibantakan koy sandalyak. Oneyag ak lapud impanalok ed saray Filisteo.
10 O Dios, siopay mangyakar ed siak diad pinadir a siudad? Siopay mangiwanwan ed siak diad Edom?
11 Peteg ya impolisay mo kami la? Ag ka la miolup ed saray sondalo mi?
12 Tulongan mo kami pan mibakal ed saray kalaban mi; anggapoy kanay tulong na too.
13 Lapud tulong na Dios, manalo kami; taloen to ray kalaban mi.
1 "Idadayew ta ka, O Dios; ag ka pa marereen!
2 "Dinogpaan ak na saray maoges tan matitilan totoo. Tila so sasalitaen da nipaakar ed siak,
3 "tan maoges iray ibabaga ra nipaakar ed siak; dodogpaan da ak ya anggan anggapoy makasengeg.
4 "Susumpaen da ak, anggaman ya aaroen ko ra, tan impikasik ira.
5 "Maoges so ibabales dad siak anta kamaungan so gagawaen kod sikara, tan bosul so ibabales dad panangarok.
6 "Mamili ka pay sakey a toon manintinsiad kalaban ko, tan ipaakusam pad sakey ed saray dilin kalaban to.
7 "Nabista komun tan nasintinsiaan a nankasalanan; anggan say pikakasi to et nipasen komun a krimin!
8 "Magano la komun ya ompatey; soblayey arum a too komun so anapay-bilay to!
9 "Naolila komun iray anak to, tan nabaloy asawa to!
10 Magmaliw komun ya anggapoy abung a mipapayabol iray anak to; napaekal ira komud aderal-deral a panaayaman da!
11 Saray akautangan to et alaen da komun ya amin iray kayaryan to, tan saray sangkaili et alaen dan amiy nanlingetan to.
12 Anggapo komuy mangasid sikato; anggapo komuy mangasikasod saray nataynan ton olilan anak to.
13 Ompatey komun ya amiy kabyangay boleg to, tan nalingwanan la komuy ngaran to diad ontombuk a kailalakan.
14 Nanunotan komun na Katawan iray kasalanay lalaki to, tan ag to pirdonaen iray kasalanay ina to.
15 Say Katawan nanunotan ton naynay komun iray kasalanan da, balet sikaran dili et sigput komun a nalingwanan ira diad tapew na dalin.
16 Ag balut anunotan na saman a too so angasi; pinairap tan pinatey to iray mairap-bilay, saray walad pankaukolan, tan saray pakaskasi.
17 Nilabay toy mangisamba kanyan nisamba met komun! Kabosul toy mamindision kanyan anggapo met komuy mamindision ed sikato!
18 Singa kainomay na panangisulong toy kawes so panangisamba to; singa danum met komun ya onsepsep ed laman to iray samba to, tan singa ra larak komun ya onsepsep ed saray pokel to!
19 Singa met komun kawes a manakbung na laman to iray samba to, tan singa ra balkes ya akasolung lawas ed sikato.
20 Katawan, onya komuy panusam ed saray kalaban ko saray mamapaoges ed siak!
21 Balet Katawan kon Dios, tulongan mo ak pa onung ed insipan mo, tan iyagel mo ak pa lapud kaabigay panangarom.
22 Mairap so bilay ko tan wala ak ed pankaukolan, asugat ya anggad dalem so pusok.
23 Ngalngali ak la naandipat a singa aninod labi; natitikyab ak a singa bigis.
24 Makapkapoy iray pueg ko lapud kakulangay kakanen ko; kapokepokel tan kakatakatat ak la.
25 Elek-elekan ak na saray totoon makanenengneng ed siak; mameyang-peyang iran mamabalaw ed siak.
26 Tulongan mo ak pa, Katawan kon Dios; ilaban mo ak pa lapud ag mangoman a panangarom!
27 Ipaamtam pad saray kalaban ko a sikay mangilalaban ed siak.
28 Nayarin isamba da ak, balet bindisionan mo ak. Natalo komun iray mamapairap ed siak, tan siak a managlingkur mo et manliket ak komun.
29 Nakobutan komun na kababaingan iray kalaban ko, isolung da komun a singa kawes so kababaingan da.
30 Ikasil koy misalamat ed Katawan; idayew kod tipon da ray karaklan,
31 ta iyaagel toy toon mairap-bilay tan ilalaban tod saray manisintinsiad sikaton ompatey.
1 "Say Katawan inkuantod katawan ko ya ari, Yorung ka ed nikawanan ko anggad napasukok ed sika iray kalaban mo.
2 "Manlapud Sion, say Katawan palaknaben toy pakayarim ya ari. Oleyan mo ray kalaban mo, kuanto.
3 "Maabuloy iray totoom a milaban no agew a mibakal kad saray kalaban mo. Singa linaew ed kabkabwasan saray balolakim onla rad sika diad saray masanton pokdul.
4 "Say Katawan sinambaan to tan ag to benegan: Pari kan anggad angga, onung ed inkapari nen Melkisedek.
5 "Say Katawan et walad nikawanan a diking mo; taloen to ray arari no sikato lay mamasnuk.
6 "Sintinsiaan to ray bansa, tan panoen to na saray bangkay so alug a panagbakalan, taloen to ray arari ed intiron mundo.
7 "Say ari oninom ed sobul a walad gilig na dalan, tan no binmiskeg la, onalagey a manalo.
1 "Idayew yoy Katawan! Diad tipon da ray matonung a totoo to misalamat ak ed Katawan ed intiron pusok.
2 "Makapakelaw a tuloy iray gagawaey Katawan! Amin da ray makaliliket ed saraya et labay da ran natalusan.
3 "Napnoy kagalangan tan pakayari iray amin a gagawaen to; ag manganggay inkatonung to.
4 "Ag ipapalingwan na Katawan iray makapakelaw a kimey to; sikatoy mapangasi tan maabagey.
5 "Iitdan toy kakanen iray mangigagalang ed sikato; nununoten to lawas so impisipanan to.
6 "Impapanengneng tod saray totoo to so pakayari to diad impangiter tod sikara na saray dalin na totood arum a bansa.
7 "Sikatoy matoor tan matonung ed amin a gagawaen to; napanmatalkan ya amin iray ganggan to.
8 "Mansiansia ran anggad angga; niiter ira onung ed katwaan tan inkatonung.
9 "Imbolus to ray totoo to, tan andi-anggaan so impisipanan tod sikara. Sikatoy masanto tan makapanyari!
10 Say pangigalang ed Katawan so gapo na kakabatan; iitdan to na pakatalus iray mangoonur na ganggan to. Nepeg ya idayew ed ando lan ando so Katawan.
1 "Idayew yoy Katawan! Maliket so toon mangigagalang ed Katawan, tan makaliliket a mangoonur ed saray ganggan to.
2 "Magmaliw a makapanyari diad tapew na dalin iray anak na matonung a too; nabindisionan iray kabyangay boleg to.
3 "Magmaliw ya amayamay so kayaryan tan kayamanan na pamilya to, tan onaligwas ya anggad angga.
4 "Say silew onwawandag ed bilonget para saray maung a totoo, para saray mapangasi, maabagey, tan matonung.
5 "Maliket so toon mabonluk a piutangan tan ag to amtay mansaol.
6 "Say maung a too mansiansian maung so kipapasen to; lawas nanunotan.
7 "Ag antakot a makadngel na maoges a balita; mabiskeg so pananisia to, tan manmamatalek ed Katawan.
8 "Mabiskeg so linawa to tan ag natatakot; ag to panduaruwan a nanengneng ton natalo iray kalaban to.
9 "Maiter ed saray mairap-bilay, tan ag manganggay panangasi to; magmaliw a makapanyari tan galangey totoo.
10 Nanengneng ya na saray totoon maoges et makapasnuk; manngilet ira tan naandipat la ra; nakal lan anggad angga so ilalo ra.
1 "Idayew yoy Katawan! Sikayo ran aripen na Katawan, idayew yoy ngaran to!
2 "Nagalang komun so ngaran to, natan tan diad ando lan ando.
3 "Manlapud bokig ya anggad sagur idayew yoy ngaran na Katawan!
4 "Ooleyay Katawan iray amin a bansa, atagey nen saray katawenan so kagalangan to.
5 "Anggapoy mipara ed Katawan a Dios tayo. Manaayam ed sankatageyan,
6 "balet onoosdung a mangimano ed saray katawenan tan dalin.
7 "Babangonen ton manlapud dabuk iray mairap-bilay; aagwaten tod kairapan iray walad pankaukolan;
8 "tan pipiolupen to rad saray prinsipi, saray prinsipi da ray totoo to.
9 "Papagalangan tod abung, na asawan anggapoy anak; paliliketen to diad pangiter to ray anak ed sikato. Idayew yoy Katawan!
1 "Nen tinaynan na saray totood Israel so Egipto, nen tinaynan na saray kabyangay boleg nen Jacob iman a dalin a kayaryan na arum a totoo,
2 "nagmaliw a masanton totoo na Katawan so Juda, tan nagmaliw a kayaryan to so Israelita.
3 "Ninmengneng so Dayat ya Ambalanga, et binmatik; tinmondan onagos so Ilog na Jordan.
4 "Linmulukson singa kanding iray kapalandeyan; kinmokogtut a singa kordiro iray kapokdulan.
5 "O Dayat, antoy agawa, et binmatik ka? Tan sika, Jordan, akin et tinmonda kan onagos?
6 "Kapalandeyan, akin et linmulukso kayon singa kanding? Kapokdulan, akin et kinmokogtut kayon singa kordiro?
7 "Giwgiw ka, O sankamundoan, diad isabiy Katawan, diad arap na Dios nen Jacob,
8 "say Dios a gagawaen ton danum iray baton dampay, tan managos a sobul iray baton kalipkip.
1 "Sika labat, Katawan, sika labat, aliwan sikami so nepeg a pangitnay galang, lapud ag mangoman a panangarom tan say katooran mo.
2 "Akin et tetepeten da ray bansa ed sikami, Kawalaay Dios yo?
3 "Walad tawen so Dios mi, tan gagawaen toy antokaman a labay to.
4 "Saray diriyos da et balituk tan pilak, ginawa ra na limay totoo.
5 "Walay sangi ra, balet ag ira makasalita; walay mata ra, balet ag ira makanengneng.
6 "Walay layag da, balet ag ira makadngel; walay eleng da, balet ag ira makaangub.
7 "Walay lima ra, balet ag ira makabemben; walay sali ra, balet ag ira makaakar; ag da anggan napaungol so kolukolung da.
8 "Saray nanggagawad sikara tan amin da ray manmamatalek ed sikara et magmaliw ira komun a singa saray talintao a ginagawa ra.
9 "Manmatalek kayod Katawan, sikayon totood Israel. Tutulongan tan iyaagel to kayo.
10 Manmatalek kayod Katawan, sikayon papariy Dios. Tutulongan tan iyaagel to kayo.
11 Manmatalek kayod Katawan, sikayon manangigalang ed sikato! Tutulongan tan iyaagel to kayo.
12 Say Katawan nununoten tan bindisionan to itayo; bindisionan to ray totood Israel tan amin da ray papariy Dios.
13 Bindisionan ton amin iray manangigalang ed sikato, atagey man o abeba so kipapasen da.
14 Itdan kayo komuy Katawan na amayamay ya anak, sikayo tan saray kabyangay boleg yo.
15 Bindisionan kayo komuy Katawan, ya amalsay tawen tan dalin!
16 Kayaryan a bukor na Katawan so tawen, balet inter toy mundo ed too.
17 Say Katawan ag idadayew na saray inaatey, saray oonlad dalin na kareenan.
18 Balet sikatayon mabilay pisalamatan tayoy Katawan manlapud natan ya anggad angga. Idayew yoy Katawan!
1 "Inarok so Katawan, ta derengelen to ak; derengelen to ray pikakasik.
2 "Kapag ontawag ak ed sikato, talinengen to ak.
3 "Walad kaliber-liber ko so kaatapan na patey, manasingger ed siak so patit na lobuk; napno ak na takot tan paga.
4 "Insan tinmawag ak ed Katawan, Pikasik ed sika, Katawan, ilaban mo ak pa!
5 "Mapangasi tan matonung so Katawan; maabagey so Dios tayo.
6 "Say Katawan iyaagel to ray pakaskasi; nen wala ak ed kaatapan, inlaban to ak.
7 "O kamarerwak, manmatalek ka, ta maung ed siak so Katawan.
8 "Say Katawan impaliis to ak ed patey; pinatonda toy panagagos na luak, tan ag to inyabuloy a natalo ak.
9 "Kanyan kaibak so Katawan ed pankukurang ko, diad mundo da ray mabilay.
10 Siansian manisia ak, anggan nen inkuanko, Mapalaloy paniirap ko,
11 anggan nen natatakot ak, inkuanko, Anggapoy toon napampiaan.
12 Antoy nayarian kon ibales ed Katawan lapud saray amin a kaabigan tod siak?
13 Mangyakar ak ed Katawan na bagat ya alak, a pisalamat kod impangilaban tod siak.
14 Diad tipon da ray amin a totoo to, iter kod sikatoy insipan ko.
15 Agaylay sakit ed Katawan so ipatey na siopaman ed saray totoo to!
16 Siak so aripen mo, Katawan; lilingkuran ta kan singa impanlingkur nen inak. Impaliis mo ak ed patey.
17 Itdan ta kay bagat na pisasalamat tan mampikasi ak ed sika.
18 Diad tipon da ray amin a totoom, diad Timplom ed Jerusalem, iter kod sikay insipan kod sika. Idayew yoy Katawan!
1 "Idayew yoy Katawan, amin yon bansa! Idayew yo, amin yon katoowan!
2 "Baleg so ag mangoman a panangaro tod sikatayo, tan ag manganggay katooran to. Idayew yoy Katawan!
1 "Misalamat kayod Katawan, ta sikato et maung, tan andi-anggaan so panangaro to.
2 "Ikuan komun na saray totood Israel, Andi-anggaan so panangaro to.
3 "Ikuan komun na saray papari na Dios, Andi-anggaan so panangaro to.
4 "Ikuan komun na saray mangigagalang ed sikato, Andi-anggaan so panangaro to.
5 "Diad kasesegsegang ko, tinmawag ak ed Katawan; inebatan to ak tan imbolus to ak.
6 "Kaibak so Katawan, ag ak ontakot; antoy nagawaay too ed siak?
7 "Say Katawan so ontutulong ed siak, et nanengneng koy katalo da ray kalaban ko.
8 "Maung ni so manmatalek ed Katawan, nen say manmatalek ed too.
9 "Maung ni so manmatalek ed Katawan, nen say manmatalek ed saray totoon pangulo.
10 Niliktub ak na amayamay a kalaban; balet pinapatey ko ra diad panamegley na pakayariy Katawan!
11 Niliktub da ak ed amin a dapag, balet pinapatey ko ra diad panamegley na pakayariy Katawan!
12 Singa ra bayaung ya angambungal ed siak, balet naoput iran tampol a singa pinoolan a sinigit; pinapatey ko ra diad panamegley na pakayariy Katawan.
13 Dinogpaan da ak, et ngalngali ak la atalo, balet tinulongan ak na Katawan.
14 Say Katawan iitdan to ak na pakayari tan biskeg; inlaban to ak.
15 Dengel yoy maliket iran eyag na impanalo diad katuldaan da ray totooy Dios: Say mabiskeg a pakayariy Katawan so nanggawad saya!
16 Say pakayariy Katawan so angiter ed sikatayoy pananalo say mabiskeg a pakayari tod bakal!
17 Ag ak ompatey, no ag ta mambilay ak tan ibawag ko ray ginagaway Katawan.
18 Mapalaloy impanusay Katawan ed siak, balet ag to ak inabuloyan ya ompatey.
19 Ilokas yon para siak iray puirta na Timplo; onloob ak tan misalamat ak ed Katawan!
20 Saya so puirtay Katawan; saray matonung labat so makaloob.
21 Idadayew ta ka, Katawan, lapud dinengel mo ak, tan initdan mo ak na pananalo.
22 Say baton impasen ya andi-kakanaan na saray karpintiro nagmaliw lamlamang a sankakanaan a bato.
23 Ginawa ya na Katawan; makapakelkelaw a nengnengen!
24 Sikato yay agew na panangilaban na Katawan; manliket tan manggayaga tayo!
25 Ilaban mo kami, pikasi mid sika, Katawan! Paaligwas mo kami pa, Katawan!
26 Bindisionan komuy Dios so onsabid ngaran na Katawan! Manlapud Timploy Katawan bibindisionan mi ka!
27 Say Katawan et Dios; inimisan to tayo. Bembenan yo ray sangasangay kiew, ta igapo yo lay pista tan liber-liber yoy altar.
28 Sikay Dios ko, et misalamat ak ed sika; ibawag koy inkatalonggaring mo.
29 Misalamat kayod Katawan, ta sikato et maung, tan andi-anggaan so panangaro to.
1 "Maliket iray totoon anggapoy pakabalawan ed panagbilay da, saray mambibilay onung ed ganggan na Katawan.
2 "Maliket iray manusumpal na saray ganggan to, saray mangoonur ed sikato ed intiron puso ra.
3 "Ag iran balut manggagaway maoges; mankukurang irad saray dalan na Katawan.
4 "Katawan inter mod sikami ray ganggan mo, tan imbagam a matoor mi ran onuren.
5 "Agaylay pampipilalek kon matoor ak komun ed pangonur kod saray bilibilin mo!
6 "No imanoen kon amin iray ganggan mo, ag ak nabaingan.
7 "Legan kon aaralen iray matonung a sintinsiam, idayew ta ka diad panamegley na malinis a pusok.
8 "Onuren ko ray ganggan mo; ag mo ak pan balut ikakaindan!
9 "Panon a napansiansia na tobun-balo so bilay ton malinis? Diad panamegley na pangonur tod saray ganggan mo.
10 Lilingkuran ta ka ed intiron pusok; ag mo ak pa aabuloyan ya onsumlang ed saray ganggan mo.
11 Iyootel kod pusok so ganggan mo, pian ag ak mankasalanan ed sika.
12 Idadayew ta ka, Katawan: ibangat mo pad siak iray pananontonan mo.
13 Olit-oliten kon ibelyaw ya amin iray ganggan ya inter mo.
14 Panliliketan ko niy mangonur ed saray ganggan mo, nen say pakagamur koy baleg a kayamanan.
15 Aaralen ko ray bilin mo, tan sosokayan ko ray bangat mo.
16 Panliliketan ko ray ganggan mo; ag ko lingwanan iray ganggan mo.
17 Ipanengneng mo pad siak ya aripen mo so kamaungan mo, pian mambilay ak tan naonur ko ray bangabangat mo.
18 Lokasan mo pa ray matak pian nanengneng ko iray makapakelaw a katwaan a walad ganggan mo.
19 Magangganoy panayam ko diad tapew na dalin; ag mo pa iyaamut ed siak iray ganggan mo.
20 Mapalaloy pampipilalek na pusok; labay kon naamtaan lawas iray sintinsiam.
21 Pamapasnukan mo ray mapaatagey; nisamba ray onsusumlang ed saray ganggan mo.
22 Ipaliis mo ak pad saray panagpabaing tan panagbalaw da, ta inonur ko ray ganggan mo.
23 Anggan mantitipon iray manoley tan pankokomplutan da ak, siansian aralen ko ray bilibilin mo.
24 Saray bilibilin mo paliliketen da ak, sikaray manisimbawad siak.
25 Mandokdokul ak ed dabuk ta atalo ak; bangon mo ak pa, onung na insipan mo!
26 Impatwak ya amin iray ginagawak, et inebatan mo ak; ibangat mo pad siak so pananontonan mo!
27 Tulongan mo ak pa, pian natalusan ko ray ganggan mo, et dalepdepen ko ray makapakelaw a bangabangat mo.
28 Nalmay ak la lapud kaermenan ko; pabiskeg mo ak pa, onung na insipan mo.
29 Iyarawi mo ak pad aliwan tua a dalan, tan lapud kaabigan mo ibangat mo pad siak so ganggan mo.
30 Pinilik so pagmaliw kon maonur; inimanok iray sintinsiam.
31 Tinombuk ko ray bilibilin mo, Katawan; ag mo ak pa ipepelag ed kababaingan.
32 Mapeleng kon onuren iray ganggan mo, ta aruman mo niy pakatalus ko.
33 Katawan, ibangat mo pad siak so kabaliksan da ray ganggan mo, et lawas ko ran onuren.
34 Itdan mo ak pay pakatalus pian naonur koy ganggan mo; onuren ko ed intiron pusok.
35 Pansiansia mo ak pan matoluk ed saray ganggan mo, ta pakalmoan ko ray liket.
36 Itdan mo ak pay pilalek a mangonur ed saray ganggan mo, aliwan say pilalek ya onyaman.
37 Iyarawim pad siak so pangimanod antokaman ya andi-kakanaan; ipanengneng mo pad siak so kamaungan mo onung na insipan mo.
38 Sumpal mo pay sipan mod siak ya aripen mo, say sipan mod saray matoluk ed sika.
39 Ipaliis mo ak pad saray panamabaing a tatakotan ko; makapakelaw a tuloy iray sintinsiam!
40 Labay kon onuren iray ganggan mo; matonung ka, kanyan pasimbalom pay bilay ko.
41 Katawan, ipanengneng mo pad siak so ontan lan panangarom, tan ilaban mo ak onung na insipan mo.
42 Diad ontan naebatan ko ray mamapabaing ed siak, ta manmamatalek ak ed salitam.
43 Iyabuloy mo pan say katwaan lawas so salitaen ko, ta say ilalok walad saray sintinsiam,
44 Onuren ko lawas so ganggan mo, ed ando lan ando.
45 Mambilay ak ed nagnap a kawayangan, ta pampepelengan kon onuren iray bangabangat mo.
46 Ibawag kod saray arari iray ganggan mo, et ag ak ombaing.
47 Panliliketan kon onuren iray ganggan mo, ta inarok ira.
48 Gagalangen tan aaroen ko ray ganggan mo; dalepdepen ko ray bilibilin mo.
49 Nunot mo pay sipan mod siak ya aripen mo; angiter ed siak na ilalo.
50 Anggan nen maniirap ak aligliwa ak, ta say sipan mo initdan to ak na bilay.
51 Mapalaloy pambabalaw ed siak na saray mapaatagey a totoo, balet ag ak sinmian ed ganggan mo.
52 Katawan, nanununotan ko ray sintinsiam nen saman, et liligliwaen da ak.
53 Mapalaloy petang na olok, no nanenengneng ko ray totoon maoges a susumlangen day ganggan mo.
54 Manggagawa ak na saray kanta nipaakar ed saray ganggan mo, legan na antikey a panayam kod tapew na dalin.
55 Nununoten ta ka no labi, Katawan, tan dadalepdepen koy ganggan mo.
56 Nanaalmok so liket ed pangoonur kod saray ganggan mo.
57 Sika labat, Katawan, so pampipilalekan ko; isisipan kon onuren iray ganggan mo.
58 Kekerewen kod sika ed intiron pusok a kasian mo ak pa onung na insipan mo!
59 Ninunot koy kagagawak, et isisipan kon tombuken iray ganggan mo.
60 Ag ak manaabala no ag ta gaganatan ko ya onuren iray ganggan mo.
61 Saray maoges a totoo pinatitan da ak, balet ag ko lilingwanan so ganggan mo.
62 Diad pegley-labi onliliing ak, a mangidayew ed sika lapud saray maptek a sintinsiam.
63 Kaaro ak na amin da ray manlilingkur ed sika, amin da ray mangoonur na saray ganggan mo.
64 Katawan, say mundo napno na ag mangoman a panangarom; ibangat mo pad siak iray ganggan mo.
65 Tinoor moy sipan mo, Katawan, tan maumaung kad siak ya aripen mo.
66 Itdan mo ak pay kakabatan tan pakatalus, ta manmamatalek ak ed saray ganggan mo.
67 Kasakbayan na impanusam ed siak, maoges so kagagawak, balet natan oonuren koy salitam.
68 Agaylay kamaungan mo tan panangasim! Ibangat mo pad siak iray ganggan mo.
69 Saray mapaatagey a totoo mantitila ra nipaakar ed siak, balet oonuren ko ed intiron pusok iray pananontonan mo.
70 Ag makatalus ira yan totoo, balet panliliketan koy ganggan mo.
71 Pankaabigan ko so impakadusak, ta naaral ko lalaingen iray ganggan mo.
72 Say ganggan ya inter mo et mablid siak, nen say nilibo a balituk tan pilak.
73 Pinalsa mo ak tan aasikasoen mo ak; itdan mo ak pay pakatalus pian naaralan ko ray ganggan mo.
74 Makaliliket iray manangigalang ed sika no nanengneng da ak, ta maniilalo ak ed sipan mo.
75 Amtak, Katawan, a maptek iray sintinsiam; amtak met a dinusa mo ak ta matoor ka.
76 Iyabuloy mo komun a naligliwa ak na ag mangoman a panangarom, onung na insipan mod siak ya aripen mo.
77 Kasian mo ak pa, et mambilay ak, ta makaliliket ak ed ganggan mo.
78 Nabaingan komun iray mapaatagey lapud panagpaoges dad siak; para say siak, dalepdepen ko ray bilibilin mo.
79 Onasingger komun ed siak iray mangigagalang ed sika, amin da ray makaamtad saray ganggan mo.
80 Sigput ko komun a naonur iray ganggan mo, pian ag ak napelag ed kababaingan na inkatalo.
81 Katawan, nalmay ak lad panaalagar koy pangilaban mod siak; maniilalo ak ed salitam.
82 Naksawan la ray matak ed panaalagar koy insipan mo, legan a tetepeten ko, Kapigay panulong mod siak?
83 Andi-kakanaan ak a singa imbantak a supot a katat a pananginay alak; anggaman ontan ag ko lilingwanan iray ganggan mo.
84 Kaonungay kabayag na panalagar ko, siak ya aripen mo? Kapigay panusam ed saray mamapairap ed siak?
85 Saray mapaatagey ya ag mangoonur na saray ganggan mo et angotkot ira na saray abut a pamatit dad siak.
86 Napanmatalkan ya amin iray ganggan mo; papairapen na saray totoo diad panamegley na panagpalikdo ra tulongan mo ak pa!
87 Apatey da ak la lawari, balet ag ko inkaindan iray ganggan mo.
88 Pansiansia mo ak pan mabilay lapud ag mangoman a panangarom, pian naonur ko ray ganggan mo.
89 Mansiansia ya anggad-angga so salitam, O Katawan; ando lan ando ed tawen.
90 Mansiansia ya anggan kapigan so inkatoor mo; inliram so mundo, et ag nagalaw ed pasen to.
91 Mansiasiansia ya anggad natan iray amin a bengatla lapud ganggan mo, ta aripen mo ran amin.
92 No ag labat sobul na gayagak so ganggan mo, inatey ak la komun lapud paniirap ko.
93 Ag kon balut ikaindan iray bilibilin mo, ta diad panamegley da, pansiasiansiaen mo ak a mabilay.
94 Kayaryan mo ak, ilaban mo ak pa! Nampelengan kon onuren iray ganggan mo.
95 Saray totoon maoges tatalaranan da ak a pateyen, balet dalepdepen ko ray ganggan mo.
96 Naaralan ko ya aliwan ayadyari ya amiy bengatla; balet ayadyari so ganggan mo.
97 Agaylay panangarok ed ganggan mo! Lawas kon dadalepdepen.
98 Walad siak lawas so ganggan mo tan pagmamaliwen to ak a makabat nen saray kalaban ko.
99 Maung niy pakatalus ko nen saray amin a managbangat ed siak, ta dadalepdepen ko ray bilibilin mo.
100 Makabat ak ni nen saray mamasiken, ta oonuren ko ray ganggan mo.
101 Papaliisan koy maoges a kagagawa, ta labay kon onuren so salitam.
102 Ag ko inkaindan iray bilibilin mo, tan sikan diliy bumabangat ko.
103 Diad pakataway ko masamsamit iray bilibilin mo; masamsamit ira nen say dilo!
104 Nanaarumay kakabatan ko lapud saray ganggan mo, kanyan kabosul koy amin a maoges a kagagawa.
105 Say salitam et sakey a lamparaan a mangiwanwan ed siak, tan sakey a liwawad dalan ko.
106 Tooren ko so sinambaan ko, ya onuren ko ray maptek a bilibilin mo.
107 Katawan, mapalalon talagay paniirap ko; pansiansia mo ak pan mabilay onung na insipan mo!
108 Awat mo pay iiter kon pisasalamat ed sika, Katawan, tan ibangat mo pad siak iray ganggan mo.
109 Sipaparaan ak a mangipostay bilay ko; ag ko nilingwanay ganggan mo.
110 Papatitan ak na saray totoon maoges, balet ag ko sinumlang iray ganggan mo.
111 Andi-anggaan a tawir ko iray ganggan mo; sikaray liket na pusok.
112 Tinibokel kod kanunotan ko a sumpalen iray ganggan mo, anggad agew na ipatey ko.
113 Kabosul ko ray aliwan sigput a matoor ed sika, balet inarok so ganggan mo.
114 Sikay manangyagel ko tan manangasikasok; maniilalo ak ed sipan mo.
115 Arawian yo ak, sikayon totoon maoges. Onuren ko ray ganggan na Dios ko.
116 Pabiskeg mo ak pa, O Dios, onung na insipan mo, et mambilay ak; ag ak komun nabaingan ed paniilalok!
117 Ampaya mo ak pa, et arawi ak ed kaatapan, tan imanoen ko lawas iray ganggan mo.
118 Ipopolisay moy balang toon mangoonur na ganggan mo; andi-kakanaan iray kasiliban da.
119 Singa dotak so pangipapasen mod saray totoon maoges, kanyan inarok iray bilin mo.
120 Lapud sika natatakot ak; lapud saray sintinsiam natatakot ak.
121 Inkatonung tan kamaungan iray ginawak; ag mo ak pa ikakaindan ed lima da ray kalaban ko!
122 Isipan mo pan tulongan mo ak a managlingkur mo; ag mo iyaabuloy a pairapen ak na saray totoon mapaatagey!
123 Naksawan la ray matak lapud panaalagar koy panangilaban na tulong mo, say kilalaban ya insipan mo.
124 Ipanengneng mo pad siak so ag mangoman a panangarom, tan ibangat mod siak iray ganggan mo.
125 Aripen mo ak; itdan mo ak pay pakatalus, pian naamtaan ko ray bangat mo.
126 Katawan, natan lay pangipanengneng moy pakayarim, tan saray totoo susumlangen day ganggan mo!
127 Inarok iray ganggan mo nen say balituk, anggan say sankaabigan lan balituk.
128 Kanyan oonuren ko ray amin a bili-bilin mo; kabusol kon amin iray maoges a kagagawa.
129 Makapakelaw iray bangat mo; oonuren ko ra ed intiron pusok.
130 Say pangipaliwawa na saray salitam et mangiter na liwawa tan kakabatan ed saray anggapoy pakatalus.
131 Akanganga ak tan abut-abuten koy linawak, diad pampipilalek kod saray ganggan mo.
132 Lingaw mo ak pa tan kasian mo ak, a singa gagawaen mod saray mangaarod sika.
133 Onung na insipan mo, ag mo pa iyaabuloy a natumba ak; ag mo pa iyaabuloy a naoleyan ak na maoges.
134 Iyagel mo ak pad saray mamapairap ed siak, pian naonur ko ray ganggan mo.
135 Ibindision mo pad siak so kiwawalam; ibangat mo pad siak iray ganggan mo.
136 Singa ilog a managos iray lua ed matak, lapud ag oonuren na saray totoo so ganggan mo.
137 Matonung ka, Katawan, tan maptek iray ganggan mo.
138 Sigput a matonung tan maptek iray inter mon pananontonan.
139 Singa apoy a mamopool ed siak so pasnuk ko, lapud ag ikabkabilangan na saray kalaban ko iray ganggan mo.
140 Agay lay inkatwa na sipan mo! Agaylay panangarok ed sipan mo!
141 Namemelag-melag ak tan nababalaw-balaw ak, balet ag ko ikakaindan iray bangat mo.
142 Mansiansia ya anggad angga so inkatonung mo, tan tua lawas so ganggan mo.
143 Nagugunigon tan nanaermenan ak, balet pagagayagaen ak na saray ganggan mo.
144 Lawas a matonung iray bilibilin mo; itdan mo ak pay pakatalus, et mambilay ak.
145 Diad intiron pusok ontatawag ak ed sika, O Katawan; ebatan mo ak pa, et onuren ko ray ganggan mo!
146 Ontatawag ak ed sika; ilaban mo ak pa, et sumpalen ko ray ganggan mo.
147 Palbangon ni, ontatawag ak lan patulongan ed sika; maniilalo ak ed sipan mo.
148 Sanlabin abangon ak a mandadalepdep ed saray bilibilin mo.
149 Katawan, dengel mo ak pa, onung ed ag mangoman a panangarom; pambilay mo ak pa, lapud panangasim!
150 Manasingger iray maruksan mamapairap ed siak, saray totoon ag balut mangoonur na ganggan mo.
151 Balet wala kad abay ko, Katawan, tan tuan amin iray ganggan mo.
152 Abayag lay impakaaral kod saray bilibilin mo; ginawam iran mansiansia ya anggad angga.
153 Imanom pay paniirap ko, tan ilaban mo ak, ta ag ko inkaindan so ganggan mo.
154 Italindeg mo pay katonungan ko, tan ibolus mo ak; ilaban mo ak pa, onung na insipan mo!
155 Ag nilaban iray totoon maoges, ta ag da oonuren iray ganggan mo.
156 Balet agaylay kabaleg na panangasim, Katawan; kasian mo ak pa tan ilaban mo ak.
157 Dakerakel iray kalaban ko tan saray mamapairap ed siak, balet ag ak onkukulang ed panangonur ed saray ganggan mo.
158 Nanaingungotan ak no nanenengneng ko ray traidor, ta ag da oonurey ganggan mo.
159 Imanom pa so ontan lan panangarok ed saray bilibilin mo, Katawan. Ilaban mo ak pa onung ed ag mangoman a panangarom.
160 Say otel na ganggan mo et say katwaan tan andi-anggaan ya amin iray matonung a sintinsiam.
161 Saray makapanyarin totoo papairapen da ak ya anggan anggapoy makasengeg, balet papagalangan koy ganggan mo.
162 Agaylay liket ko lapud saray sipan mo, a singa toon akalmoy baleg a kayamanan.
163 Kabosul tan kagulak so antokaman a tila, balet inarok so ganggan mo.
164 Inagew-agew mamimpiton pisasalamatan ta ka, lapud saray matonung a sintinsiam.
165 Walay nagnap a kareenan da ray mangaarod ganggan mo, tan anggapoy bengatlan makatumbad sikara.
166 Aalagden koy pangilaban mod siak, Katawan, ta susumpalen koy antokaman ya iganganggan mo.
167 Oonuren ko ray bangabangat mo; inarok ira ed intiron pusok.
168 Oonuren ko ray ganggan tan saray bilibilin mo; sankanengneng moy amin a gagawaen ko.
169 Onsabi komun ed sika, O Katawan, so pikekerew ko na tulong mo! Itdan mo ak pay pakatalus, onung na insipan mo.
170 Dengel mo pay pikakasik, tan ilaban mo ak pa, onung na insipan mo.
171 Idayew ta kan naynay, ta ibabangat mod siak iray ganggan mo.
172 Mankanta ak na nipaakar ed ganggan mo, ta matonung iray ganggan mo.
173 Sipaparaan ka komun ya ontulong ed siak, ta oonuren ko ray ganggan mo.
174 Pampilpilalekan koy manangilaban a tulong mo, Katawan! Panliliketan koy ganggan mo.
175 Pambilay mo ak pa ni, pian nidayew ta ka; tulongan ak komun na saray bilibilin mo!
176 Akar-akar ak a singa abalang a karniro; anap mo ak pa sirin ya aripen mo, ta ag ko inkaindan iray ganggan mo.
1 "Nen wala ak ed gunigon tinmawag ak ed Katawan, et inebatan to ak.
2 "Iyagel mo ak pa, Katawan, ed saray matitila tan saray managpalikdo.
3 "Sikayo ran matitila, antoy gawaen na Dios ed sikayo? Panoy panusa tod sikayo?
4 "Dusaen to kayod panamegley na saray maotuk a panay sondalo, diad panamegley na saray ampetapetang a ngalab!
5 "Say piamung ed sikayo et singa kaoges na panayam ed Mesec o piamung ed saray taga Kedar!
6 "Abayag lay panaayam ko ed kawalaan na saray totoon managbosul na kareenan!
7 "No kareenan so salitaen ko, say bakal so labay da.
1 "Onnenengneng ak ed kapalandeyan; iner so panlapway tulong ed siak?
2 "Say tulong ed siak manlapud Katawan, ya amalsay tawen tan dalin.
3 "Ag to iyabuloy a natumba ka; abangon lawas so manangyagel mo!
4 "Say manangyagel na Israel, et ag ontetemeg odino nanaogip.
5 "Bantayan ka na Katawan; walad abay mo a mangyagel ed sika.
6 "No agew ag ka pasakitan na petang na agew, o say sinag na bulan, no labi.
7 "Iyagel kay Katawan ed amin a kaatapan, ag to iyabuloy a walay maoges a nagawad sika.
8 "Iyagel to ka no onla kad laen mo tan no ompawil ka, natan tan anggad angga.
1 "Makaliliket ak nen inkuandad siak, Onla itayod abung na Katawan.
2 "Et natan wadya kami la, manalalagey ed loob na saray puirta na Jerusalem!
3 "Naapiger so Jerusalem; maoksuy tan marakep la lamet.
4 "Dimay lalaen da ray tribu, saray tribu na Israel, a misalamat ed Katawan, onung na ingganggan tod sikara.
5 "Dimay kawalaan da ray trono, a nansisintinsiaan na saray ararid Israel.
6 "Pikasi yoy kareenan na Jerusalem: Onaligwas komun iray mangaarod sika!
7 "Wala komuy kareenan ed loob da ray padir mo tan arawi komun ed kaatapan iray palasiom.
8 "Lapud saray kakaarok tan saray kakanayon ko, kuankod Jerusalem, Manari komuy kareenan ed sika!
9 "Lapud abung na Katawan a Dios tayo, pikakasik so iyaligwas mo.
1 "Katawan, ontatangay ak ed sika, ditad tawen a panooleyan mo.
2 "No panoy paniilalo na aripen ed amo ton laki, o say aripen a bii ed amo ton bii, ontan met so paniilalo mid sika, Katawan a Dios mi, anggad kasian mo kami.
3 "Kasian mo kami pa, Katawan, kasian mo kami; ontan lay impakababalaw mi!
4 "Abayag lay impanlelemlemew ed sikami na saray mamayaman, tan say impanbabalaw na saray maruksan mapaatagey.
1 "Anto kasi no ag itayo tinulongay Katawan? Ebat ka, O Israel!
2 "No ag itayo tinulongay Katawan nen dinogpaan itayo na saray kalaban tayo,
3 "inakmun da itayo lan mabilay komun lapud mapalalon pasnuk dad sikatayo;
4 "inyanur itayo la komun na delap, impalner itayo la komun na danum,
5 "impalgep itayo la komun na mabiskeg ya agos.
6 "Misalamat itayod Katawan, ya ag angyabuloy a deralen itayo na saray kalaban tayo.
7 "Akabatik itayon singa manok a nablus ed patit; apultot so patit, tan nablus itayo!
8 "Say tulong ed sikatayo et manlalapud Katawan, ya amalsay tawen tan dalin.
1 "Saray manmamatalek ed Katawan et singa ra Palandey na Sion, ya ag balut nagalaw, no ag ingen mansiansia lawas.
2 "No panon so inkaliber na Jerusalem na kapalandeyan, ontan met so panasayakop na Katawan ed saray totoo to, natan tan anggad angga.
3 "Ag magnayon a manoley ed dalin na saray totoon matonung iray totoon maoges; ta no magnayon so panoley da, nayarin manggawa met na kaogsan iray totoon matonung.
4 "Katawan, maung pay ipanengneng mod saray maung a totoo, diad saray mangoonur na saray ganggan mo.
5 "Balet dusam pa met iray mangoonur na maoges a kaliktan da, no dusaen mo ray manggagaway kaogsan. Manari komun ed Israel so kareenan!
1 "Nen say Katawan et impawil to kamid Jerusalem, singa labat sakey a kogip!
2 "Agaylay impaneelek-elek tan impankankanta mi lapud liket! Insan inkuan na saray arum a bansa, Matalonggaring iray ginagawa na Katawan para sikara!
3 "Peteg a makapakelaw iray ginagawa na Katawan para sikami; ontan lay liket mi!
4 "Katawan, paaligwas mo kami pa lamet, a singa pamaparanum na oran ed saray nakatan a kolus.
5 "Iyabuloy mo pan saray nanaakis legan dan mantatanem et manani ran malikeliket!
6 "Saray nanaakis legan dan iyaakar iray bini et ompawil iran maliket a mangankanta lapud liket da, a sankaawit da ray naani ra.
1 "No ag ipaalagey na Katawan so abung, anggapoy kana so sagput da ray managpaalagey; no ag iyagel na Katawan so siudad, anggapoy kana so pambabantay da ray guardia.
2 "Anggapoy kana na pamasyay panaanap na pambilay, ya onogip na atrasado tan ombangoy masakbay. Ta iiter na Katawan so nakaukolan da ray aaroen to, legan a naogip ira.
3 "Rigalo na Katawan iray anak; petepeteg iran tumang.
4 "Saray lalakin anak na sakey a too no malangwer ni ra et singa ra pana a walad limay sondalo.
5 "Maliket so toon walay dakel ya ontan iran pana to! Ag balut natalo, no miarap ed saray kalaban to diad pasen a panagsintinsiaan.
1 "Maliket ya amin iray matoluk ed Katawan, saray mambibilay ya onung ed saray ganggan to.
2 "Pambilay moy bunga na nanlingetan mo; manliket tan onaligwas ka.
3 "Diad abung mo magmaliw a singa mabungan ubas so asawam, tan magmaliw iray anak mo a singa malangwer iran kiew na oliba diad kaliber-liber na lamisaan mo.
4 "Andi-duaruwan nabindisionan na onya so toon matoluk ed Katawan.
5 "Manlapud Sion, bindisionan ka komuy Katawan! Nanengneng mo komuy iyaligwas na Jerusalem legan mon mambilay!
6 "Andokey komuy bilay mo, pian nanengneng mo ray apom! Manari komun ed Israel so kareenan!
1 "Ibagam pad sikami, Israel, so ontan lan impamairap ed sika na saray kalaban mo, nanlapu lad impanogaw mo!
2 "Nanlapud lad impanogaw ko, mapalalon pinapairap ak na saray kalaban ko, balet ag da ak atalo.
3 "Sinusugat da na aralem so beneg ko, tan ginawa ran singa binakan alog.
4 "Balet say Katawan a matonung et inagwat to ak ed inkaaripen.
5 "Natalo tan napapoliktar komun ya amin iray mamobosul ed Sion.
6 "Magmaliw ira komun a singa saray dikan ontutubod toktok na abung, a namagaan ira kasakbayan na ibaleg da;
7 "anggapoy manipon ed sikara, o mamalkut a mangala ed sikara.
8 "Anggapod saray ondadalan so mangibaga, Bindisionan kayo komuy Katawan! Bibindisionan mi kayo diad ngaray Katawan.
1 "Manlapud kaaraleman na inkaekalan koy ilalo, ontatawag ak ed sika, Katawan.
2 "Dengel mo pay tagleey ko, Katawan, talineng mo pay ikekerew koy tulong!
3 "No inlistam iray kasalanan mi, siopay makapaliis ed panusam?
4 "Balet pipirdonaen mo kami, kanyan nepeg mi kan igalang.
5 "Ontan lay panaalagar koy tulong na Katawan, tan manmamatalek ak ed salita to.
6 "Aalagaren koy Katawan; say panaalagar ko et alabas nen say pantatalaran ed kabwasan say pantatalaran ed kabwasan na saray bantay.
7 "Israel, manmatalek kad Katawan, ta ag mangomay panangaro to tan sipaparaan lawas a mangilaban.
8 "Ilaban to ray totoo ton Israelita ed amin a kasalanan da.
1 "Katawan, intondak lay mampaatagey, tan inkaindan ko lay mampasirayew. Anggapoy pibabalian kod saray ankakabaleg a pamaakaran, o saray bengetlan ag ko natalusan.
2 "Ingen mareen tan maliket so panagbilay ko. No panoy kareen na ogaw no walad saray taklay na ina to, ontan so kareen na pusok.
3 "Israel, manilalo kad Katawan, natan tan anggad angga!
1 "Katawan, nunot mo pay David tan amin ya intepel ton kairapan.
2 "Nunot mo pa, Katawan, so insipan to, say sinambaan tod sika, O Makapanyarin Dios nen Jacob:
3 "Ag ak onsempet ed abung odino ondokul ed katrik;
4 "ag ak mampainawa odino onogip,
5 "anggad ag ko pakapangiter na pasen a para Katawan, sakey ya abung na Makapanyarin Dios nen Jacob.
6 "Nadngelan mid Betlehem so nipaakar ed Kaban na Sipanan, tan nalmo mi ed kaalogay Jearim.
7 "Inkuanmi, Onla itayod abung na Katawan; mangigalang itayod arapay trono to!
8 "Katawan, gala pad Timplo a kaibam so Kaban na Sipanan, say tanda na pakayarim, tan manayam ka dian anggad angga.
9 "Gawaen lawas komun na saray paparim so inkatonung; oneyag komud liket iray totoom!
10 Nansipan kad kinen aripen mon David; ag mo pa ipopolisay so pinilim ya ari, Katawan.
11 Sinambaan mod kinen Davidsakey a sipan ya ag mo benegan: Gawaen kon ari so sakey ed saray anak mon lalaki, tan onsalat ed sikan manari.
12 No tooren na saray anak mo so impisipanan ko, tan onuren da ray ganggan ya ibangat kod sikara, onsalat met a manari ya anggad angga iray anak da.
13 Pinili na Katawan so Sion; labay ton dimay panayaman to:
14 Diay panayaman ko ya anggad angga; diay labay kon panoleyan.
15 Itdan koy Sion na daakan a nakaukolan to; peneken ko na kakanen iray mairap-bilay a totoo to.
16 Bindisionan ko ray papari to diad amin a gawaen da, tan mankanta tan oneyag iray totoo to lapud liket da.
17 Diak gawaen a matalonggaring ya ari so sakey ed saray anak nen David; diak pagnayonen so oley na pinilik ya ari.
18 Tabunan ko na kababaingan iray kalaban to, balet onaligwas so nanarian to.
1 "Agaylay abig tan makapaliket ed saray totooy Dios a mambilay iran mankakasakey!
2 "Singa mablin panaglanan larak a managagos ed olo tan balbas nen Aaron, ya anggad kuilyo na kawes to.
3 "Singa linaew ed Palandey na Hermon, ya ompepelag ed kapokdulan na Sion. Diman so angisipanay Katawan na bindision to, say bilay a mansiansian anggad angga.
1 "Dago kayo, ta idayew yoy Katawan, amin yon aripen to, amin a manlilingkur ed Timplo to no labi.
2 "Diad Timplo itagey yoy kalimaan yo a mampikasi, tan idayew yoy Katawan!
3 "Say Katawan ya amalsay tawen tan dalin, et bindisionan to kayo komun manlapud Sion!
1 "Idayew yoy Katawan! Idayew yoy ngaran to, sikayo ran aripen na Katawan,
2 "a manalalagey ed abung na Katawan, diad Timplo na Dios tayo.
3 "Idayew yoy Katawan, ta sikato et maung; kantaan yoy dayew so ngaran to, ta sikatoy mapangasi.
4 "Pinili ton para sikaton dili si Jacob, saray totood Israel.
5 "Amtak a matalonggaring so Katawan tayo; matalonggaring ni nen amin da ray diriyos.
6 "Gagawaen toy labay ton gawaen diad tawen tan diad dalin, diad saray dayat tan diad saray kaaralman.
7 "Sikatoy mamapaatagey ed saray lorem a manlapud saray samput na dalin; gagawaen toy kirmat para saray bagyo, tan ipapaway toy dagem a manlapud kuarton panagsinupan to.
8 "Diad Egipto, pinatey ton amin iray pangulowan, too man odino ayep.
9 "Nanggawad man na saray milagro tan pakelaw a panusa tod ari tan amin da ray opisyal to.
10 Dinederal toy amayamay a bansa, tan pinapatey to ray makapanyarin arari;
11 si Sehon ya ari na saray Amorreo, si Og ya ari na Basan, tan amin ya arari ed Canaan.
12 Inter to ray dalin da ed saray totoo to; inter to rad Israel.
13 Katawan, nibawag ka lawas a Dios; nanunotan ka na amin a kailalakan.
14 Iyagel na Katawan iray totoo to; kasian to ray aripen to.
15 Pilak tan balituk iray diriyos na saray bansa; saray limay too so nanggagawad sikara.
16 Walay sangi ra, balet ag ira makasalita; walay mata ra, balet ag ira makanengneng.
17 Walay layag da, balet ag ira makadngel; ag ira anggan makaingas.
18 Saray nanggagawad sikara tan amin da ray manmamatalek ed sikara et magmaliw ira komun a singa saray talintaoy diriyos a ginagawa ra!
19 Idayew yoy Katawan, sikayon totoo na Israel; idayew yo, sikayon papari na Dios!
20 Idayew yoy Katawan, sikayon Levita; idayew yo, amin yon mangigagalang ed sikato!
21 Idayew yoy Katawan diad Sion, diad Jerusalem a panaayaman to. Idayew yoy katawan!
1 "Misalamat kayod Katawan, ta sikato et maung tan andi-anggaan so panangaro to.
2 "Misalamat kayod sankatalonggaringan ed saray diriyos; andi-anggaan so panangaro to.
3 "Misalamat kayod sankamapanyarian ed saray kakatawan; andi-anggaan so panangaro to.
4 "Sikato labat so manggagawad saray ankakabaleg a milagro; andi-anggaan so panangaro to.
5 "Diad kakabatan to, pinalsa to ray katawenan; andi-anggaan so panangaro to;
6 "impasen toy dalin ed tapew na saray danum; andi-anggaan so panangaro to.
7 "Pinalsa toy agew tan say bulan; andi-anggaan so panangaro to;
8 "say agew a manoley no agew; andi-anggaan so panangaro to;
9 "say bulan tan saray bitewen a manoley ira no labi; andi-anggaan so panangaro to.
10 Pinatey to ray lalakin pangulowan ya anak na saray Egipsio; andi-anggaan so panangaro to.
11 Impaway tod Egipto iray totood Israel; andi-anggaan so panangaro to;
12 diad panamegley na mabiskeg tan makapanyari ran taklay to; andi-anggaan so panangaro to.
13 Binelsay toy Dayat ya Ambalanga; andi-anggaan so panangaro to.
14 Pinadalan tod pegley na dayat iray totoo to; andi-anggaan so panangaro to;
15 balet impalner toy ari na Egipto tan saray sondalo to; andi-anggaan so panangaro to.
16 Inwanwan to ray totoo to diad imbeltang dad kalawakan; andi-anggaan so panangaro to.
17 Pinapatey to ray makapanyarin arari; andi-anggaan so panangaro to;
18 pinapatey to ray bantug ya arari; andi-anggaan so panangaro to;
19 si Sehon ya ari na saray Amorreo; andi-anggaan so panangaro to;
20 tan si Og ya ari na Basan; andi-anggaan so panangaro to.
21 Inter to ray dalin da ed saray totoo to; andi-anggaan so panangaro to;
22 inter to rad Israel ya aripen to; andi-anggaan so panangaro to.
23 Ag to itayo nilingwanan nen atalo itayo; andi-anggaan so panangaro to;
24 inekal to itayod pakayari na saray kalaban tayo; andi-anggaan so panangaro to.
25 Iitdan toy tagano iray amin a pinalsan mabilay; andi-anggaan so panangaro to.
26 Misalamat kayod Dios na tawen; andi-anggaan so panangaro to.
1 "Diad gilig na saray ilog ed Babilonia inmiirung kami; mannangis kamin akanunot diman ed Sion.
2 "Insasabit mi ray arpa mi ed saray asingger a kiew a sansi.
3 "Impankanta kami na saray anakep ed sikami; inkuanda a paliketen mi ra: Manganta kayoy nipaakar ed Sion!
4 "Panoy panganta mi ed Katawan diad sananey a bansa?
5 "Ag ak lan balut komun makatogtog na arpa, no nalingwanan ta ka, O Jerusalem!
6 "Ag ak lan balut komun makakanta, no ag ta ka nanununotan, no ag ta ka nanunotan a sankabalgan a liket ko!
7 "Nunot mo pa, Katawan, so ginagawa da ray Edomita, nen agew ya adakep so Jerusalem. Nunot mo may imbabagbaga ra, Geba yo ya anggad pundasion to!
8 "Babilonia, naderal ka! Maliket so too ya ombawid sika lapud ginagawam ed sikami
9 "say toon mangalad saray anak mon kapangyanak, insan ibasig to rad baton-dampay.
1 "Katawan, misasalamat ak ed sika ed intiron pusok; Kakantaan ta kay panangidayew diad arap da ray diriyos.
2 "Ondadakmomo ak ed arap na masanton Timplom tan idadayew koy ngaran mo, lapud ag mangoman a panangarom tan katooran mo, ta impanengneng mon sankatageyan so ngaran mo tan saray ganggan mo.
3 "Inebatan mo ak nen tinmawag ak ed sika; pinabiskeg mo ak na pakayarim.
4 "Katawan, idayew kay amin ya ararid dalin, ta nadngel da ray sipan mo.
5 "Ikanta ray nipaakar ed ginagawam tan say nipaakar ed baleg a kagalangan mo.
6 "Anggaman a wala kad atagtagey a pasen, aasikasoen mo ray abebbebay kipapasen, tan ag ka niamutan na saray mapaatagey.
7 "Anggan aliber ak na saray gunigon, iyaarawi mo ak ed kairapan; Susumlangen mo ray mamapasnuk a kalaban ko, tan ilalaban mo ak diad panamegley na pakayarim.
8 "Sumpalen mon amin iray insipan mod siak; Katawan, andi-anggaan so panangarom. Sumpal mo pay kimey ya inggapom.
1 "Katawan, sinokayan mo ak kanyan kabat mo ak.
2 "Antam ya amin iray gagawaen ko; anggan arawiy kawalaan mo, natatalusan mo ray kanunotan ko.
3 "Nanenengneng mo ak, anggan mankikimey odino mampapainawa ak; amtam ya amin so kiwas ko.
4 "Angan kasakbayay pansalitak amtam la no antoy ibagak.
5 "Wala kad kaliber-liber ko; iyaagel mo ak diad panamegley na pakayarim.
6 "Aralem a tuloy so pakaamtam ed siak; ag ko nayarian a tokuren.
7 "Iner so laen ko, pian nibatikan ta ka? Iner so batikan ko pian, naarawian koy kiwawalam?
8 "No onla ak ed tawen, wadman ka; no ondakul ak ed pasen a panaayaman da ray inaatey, wadman ka.
9 "No ontikyab ak ed labas na bokig, o manayam ak ed sankaawarian a pasen ed sagur,
10 wadman ka a mangiwanwan ed siak, wadman ka ya ontulong ed siak.
11 Nayarin kerewen kod bilonget ya iyamut to ak, o kerewen kod liwawan walad kaliber-liber ko a magmaliw a labi.
12 Balet anggan say bilonget aliwan ambilonget ed sika, tan say labi maliwawan singa agew. Namparay liwawa tan bilonget ed sika.
13 Pinalsam ya amiy parti na laman ko; tinoop mo ak ed eges na inak.
14 Idadayew ta ka, lapud nepeg kan takotan; makapakelaw tan nidoma ya amin iray gagawaen mo. Nagnap so pakapikabat kod saya.
15 Amtam nen nagagawa ray pokel ko, sanen naapiapiger a natotoop ira ed eges na inak, nen ombabaleg ak diman ya anggapoy makaamta;
16 anengneng mo ak kasakbayay inkianak ko. Saray inggetar ya agew na pambilay ko et nisulat la rad librom, kasakbayan na inggapo ra.
17 O Dios, mairirap kon talusan iray kanunotan mo; amayamay iran tuloy!
18 No bilangen ko ra, dakel ni ra nen say buer. No ombangon ak, wala ak nid abay mo.
19 O Dios, agaylay pirawat kon pateyen mo ray totoon maoges! Agaylay pampilalek kon taynan ak lan bukor na saray totoon maruruksa!
20 Mansasalita ray maoges a nipaakar ed sika; lelemlemewen day ngaran mo.
21 Katawan, agaylay pambosul kod saray mamobosul ed sika! agaylay pambalaw kod saray onsusumlang ed sika!
22 Mapalalo so pamobosul kod sikara; ipapasen ko ran kalaban ko.
23 Sokayan mo ak pa, Katawan, tan amtaen moy walad isip ko; subok mo ak, tan amtaen mo so walad kanunotan ko.
24 Nengneng mo pa no walay antokaman a kaogsan ed siak tan iwanwan mo ak pad andi-anggaan a dalan.
1 "Iyagel mo ak pa, Katawan, ed saray totoon maoges; ag mo ak pa padidiwit ed saray totoon maruksa.
2 "Mannununot ira lawas na kaogsan tan manangigapo ra lawas na kolkol.
3 "Singa makapatey ya oleg so kadilaan da; singa ditay kobra iray salita ra.
4 "Iyagel mo ak pa, Katawan, ed pakayari da ray totoon maoges; ag mo ak padidiwit ed saray maruksan totoo, a pankokomplutan day nipaakar ed katumbak.
5 "Pinatitan ak na saray mapaatagey a totoo; inlira da ray patit da, tan angyan ira na saray kalut ed dalan ta erelen da ak.
6 "Kuankod Katawan, Sikay Dios ko. Dengel mo pay ikekerew ko na tulong, O Katawan!
7 "Katawan a Dios ko, say mabiskeg a manangyagel ko, inyagel mo ak legay bakal.
8 "Katawan, ag mo pa iiter so labay da ray totoon maoges; ag mo pa aabuloyan a nasumpal day maoges a getma ra!
9 "Ag mo pa panataloen iray kalaban ko; ipoktal mod sikaray panataktakot dad siak.
10 Napelagan ira komun na saray ampetapetang a ngalab; napelag ira komud aralem ya abut tan ag la ra makaagwat.
11 Ag komun manalo iray totoon mangaakusay tila ed kapara ran too; naosilan tan naderal komun na kaogsan iray totoon maruksa.
12 Kabat ko, Katawan, ya itatalindeg moy katonungan da ray mairap-bilay, tan saray walad pankaukolan.
13 Tuan idayew da ka ray totoon matonung; manayam ira ed kawaalaan mo.
1 "Ontatawag ak ed sika, Katawan; tulongan mo ak pa natan! Dengel mo ak pa no ontawag ak ed sika.
2 "Awat mo pan singa insinso so pikakasik, tan saray akatagey a limak a singa bagat no labi.
3 "Katawan, mangyan ka pay guardiad sangik, sakey a bumabantay ed puirta na saray bibil ko.
4 "Iyarawi mo ak pad pampilalek a manggaway maoges, o diad pikasakey ed kaogsan na saray totoon maoges. Ag ak komun mibabalid saray pista ra.
5 "Nayarin dusaen tan pampasnukan ak na maung a too diad panangasi to, balet ag ko abuloyan a pagalangan ak na saray totoon maoges, ta ipipikasik lawas so sumpad maoges iran gawa ra.
6 "Saray totoo birbiren dan tua ray salitak no nibantak lad kelas iray manoley da.
7 "Singa say kiew ya abelang-belang tan asapsapsap, ontan so kitayak na saray pokel da ed sangab na pasen a panaayaman da ray inaatey.
8 "Balet Katawan a Dios, manmamatalek ak ed sika. Papaiyagel ak ed sika; ag mo pa iyaabuloy ya ompatey ak!
9 "Iyarawi mo ak pad saray patit ya intarya rad siak, diad saray patit da ray managgaway kaogsan.
10 Napelag komun iray totoon maoges ed saray dilin patit da, balet makapaliis ak.
1 "Ontatawag ak a patulongan ed Katawan; mikakasi ak ed sikato.
2 "Iyaakar kod sikato ray riklamok; idadalem kod sikato ray gunigon ko.
3 "Amta toy nepeg kon gawaen, no nanaekalan ak lay ilalo. Saray kalaban ko pinatitan da ak ed dalanen ko.
4 "No onlingaw ak ed diking ko, anggapoy nanengneng kon ontulong ed siak; anggapoy mangyagel ed siak. Anggapoy mangaasikasod siak.
5 "Katawan, onkekerew ak ed sika na tulong; sika, Katawan, so manangyagel ko; sika labat so nakaukolan kod sayan bilay.
6 "Dengel mo pay ikekerew ko na tulong; ta linmereg ak ed kaermenan. Ilaban mo ak pad saray kalaban ko, ta mabiskeg iran tuloy nen siak;
7 "Agwat mo ak pad segsegang ko; idayew ta kad satan diad tipon da ray totoom, lapud kaabigan mod siak.
1 "Dengel mo pay pikakasik, Katawan. Lapud matonung ka dengel mo pay pikekerew ko; lapud matoor ka ebatan mo ak pa!
2 "Ag mo ak pa sisintinsiaan ya aripen mo; anggapoy toon matonung ed arap mo.
3 "Inosilan ak na kalaban ko, tan sigput to ak a tinalo. Impokuk to ak ed ambilonget a prisowan, tan singa ak saray inaatey lan abayag.
4 "Kanyan nanaekalan ak lay ilalo; mapalaloy paneermen ko.
5 "Nanununotan koy linmabas iran agew; dadalepdepen ko ray amin a ginagawam, momotekteken ko ray amin a gawgawam.
6 "Itatagey ko ray limak a mampikasid sika; singa amagan dalin a napgaan ed sika so kamarerwak.
7 "Ebatan mo ak pa la natan, Katawan! Naandi lan amiy ilalok! Ag mo ak pa iyaamutan, ta ompan sakey ak ed saray oonlad pasen a panaayaman da ray inaatey.
8 "Ipanunot mo pad siak kapag kabwasan so ag mangoman a panangarom, ta manmamatalek ak ed sika. Itorom pad siak so dalan a nepeg kon laen, ta mikakasi ak ed sika.
9 "Onaasinger ak a paiyagel ed sika, Katawan; iyagel mo ak pad saray kalaban ko.
10 Sikay Dios ko; ibangat mo ak pan mangonur na linawam. Ipanengneng mo pad siak so kamaungan mo tan iwanwan mo ak pad dalan ya anggapoy kaatapan.
11 Iyagel mo ak pa Katawan, onung na insipan mo; lapud inkatonung mo agwat mo ak pad saray gunigon ko!
12 Lapud ag mangoman a panangarom ed siak, patey mo pa ray kalaban ko, tan deral mo ray amin a managpairap ed siak, ta aripen mo ak.
1 "Idayew yoy Katawan a manangyagel ko! Ipapasal to ak ed pibabakal, tan ibabangat to ak ed pilalaban.
2 "Sikatoy manangyagel ko tan tirinsirak sikatoy salimbeng ko tan manangilaban ko, sikatoy samper a panmamatalkan ko pian niarawi ak ed kaatapan. Tataloen to ray bansan walad silong na pakaoley ko.
3 "Katawan, siopa so too et iimanoen mo; say mogmon too et aasikasoen mo?
4 "Say too et singa labat siplug na dagem; saray agew to et singa aninon ondadalan.
5 "Katawan, ilokyas mo pay tawen tan lasur ka; diwit mo ray kapalandeyan, et onasewek ira.
6 "Pakirmat mo pay tawen tan buybuyak mo ray kalaban mo; panam iray kalaban mo tan pabatik mo ra.
7 "Manlapud tagey, gawat mo ak pan agwaten diad aralem a danum, tan ilaban mo ak; iyagel mo ak pad pakayari da ray totoon taga arum a bansa,
8 "saray totoon tilay sasalitaen da, tan mantitila ra anggan sinambaan da a say katwaan so ibaga ra.
9 "Kantaan ta kay balon kanta, O Dios; manogtog ak na arpa tan kantaan ta ka.
10 Panataloen mo ray arari, tan iyaagel moy aripen mon si David.
11 Iyagel mo ak pad saray maruksan kalaban ko, ilaban mo ak pad pakayari da ray totoon taga arum a bansa, saray anggapoy tua ed antokaman a sasalitaen da tan mantitila ra anggan sinambaan da a say katwaan so ibaga ra.
12 Singa komun saray tanaman ya ombabaleg tan ombibiskeg iray anak min babalolaki. Singa komun saray ankabaleg a lusek a mamaparakep ed sokusokung na palasio iray anak min mamarikit.
13 Napano komun iray kamalir mi na amin a bungay tanaman. Libo-libo komuy iyanak na saray karniro ed kaalogan mi.
14 Ondakerakel komun iray anak na baka mi, anggapo komuy naekalan ed sikara. Anggapo komuy mannangis ed saray daladalan mi lapud segsegang!
15 Maliket so bansan onyay kipapasen to; maliket iray totoon say Dios da et say Katawan!
1 "Ibawag koy inkatalonggaring mo, Dios ko tan arik; ando lan ando a misalamat ak ed sika.
2 "Agew-agew a misalamat ak ed sika; anggad-angga ya idayew ta ka.
3 "Matalonggaring so Katawan tan manepenepeg a galangen; sigput ya ag natalusan so inkatalonggaring to.
4 "Manlapud sakey a kailalakan ya anggad ontombuk, nadayew iray ginagawam; ibawag da ray makapanyarin kimey mo.
5 "Salitaen da so kagalangan tan say katageyan mo, tan dalepdepen ko ray makapakelaw a gawgawam.
6 "Salitaen na katoowan iray makapanyarin gawgawam, tan ibawag koy inkatalonggaring mo.
7 "Ibaga ray nipaakar ed ag nasabsabaan a kamaungan mo tan ikanta ray nipaakar ed panangasim.
8 "Say Katawan maaro tan mapangasi, aliwan maipapasnuk tan baleg so ag mangoman a panangaro to.
9 "Sikatoy maung ed amin a too tan mapangasi ed amin a pinalsa to.
10 Katawan, idayew ka na amin a pinalsam, tan pisalamatan ka na amin a totoom.
11 Salitaen day kagalangay panarian mo tan ibaga ray pakayarim,
12 pian naamtaay amin a katoowan iray makapanyarin gawgawam tan say mapagalang a pakayari na panarian mo.
13 Anggad angga so panarian mo, tan ari kan anggad angga. Say Katawan matoor ed saray sipan to, tan maung ya amin iray gagawaen to.
14 Tutulongan to ray nagugunigon; itatanduro to ray atumba.
15 Amin iray mabilay a bengatla onnenengneng iran mailalod sika, tan iitdan mo ray pambilay no nakaukolan da.
16 Iitdan mo ran amin na daakan tan pepeneken mo rad pankaukolan da.
17 Say Katawan matonung ed amin a gagawaen to, tan mapangasid amin a kimey to.
18 Asingger ed amin da ray ontatawag ed sikato, saray tua so itatawag dad sikato.
19 Iiter toy nakaukolan da ray mangigagalang ed sikato; derengelen toy akis da tan ilalaban to ra.
20 Iyaagel to ray amin a maarod sikato, balet deralen to ray amin a totoon maoges.
21 Idayew ko so Katawan; say masanton ngaran to et idayew komun na amin a pinalsa diad ando lan ando.
1 "Idayew yoy Katawan! Idayew moy Katawan, O kamarerwak!
2 "Idayew ko so Katawan legan kon mambibilay; Kantaan ko so Dios ko diad intiron bilay ko.
3 "Ag ka manmamatalek ed saray totoon pangulo; anggapoy toon makapangilaban ed sika.
4 "No ompatey ira, ompawil irad dalin; naandipat met lad satan ya agew iray plano ra.
5 "Maliket so toon tutulongan na Dios nen Jacob, tan maniilalo ed Katawan a Dios to,
6 "say Manamalsay tawen, dalin, dayat, tan amin a logan da. Susumpalen to lawas iray sipan to;
7 "kikilingan tod panagsintinsia to iray napapairap, tan iitdan toy nakan iray narasan. Say Katawan ibobolus to ray priso,
8 "tan iitdan toy pakanengneng iray bulag. Itatanduro to ray atumba; aaroen to ray matonung a totoo to.
9 "Iyaagel to ray sangkailin manaayam ed bansa tayo; tutulongan to ray balo tan saray olila, balet iyaakar to ray totoon maoges ed kaderalan da.
10 Say Katawan et ari ya anggad angga. Say Dios mo, O Sion, manoley ed amiy panaon. Idayew yoy Katawan!
1 "Idayew yoy Katawan! Maung so mankantay pangidayew ed Dios tayo; maabig tan makapaliket so pangidayew ed sikato.
2 "Say Katawan ipapaalagey to lamet so Jerusalem; papapawilen to ray Israelitan nibantak ed sananey a bansa.
3 "Papaabigen to ray nanaekalay biskeg na linawa tan beberberen to ray sugat da.
4 "Inggetar toy bilang da ray bitewen tan tatawagen to rad kangaranan da.
5 "Matalonggaring tan makapanyari so Katawan tayo; ag nasukat so kakabatan to.
6 "Itatanduro to ray mapaabeba, balet ibabasig tod dalin iray totoon maoges.
7 "Kantaan yo na saray imno na dayew so Katawan; togtogan yod arpa so Dios tayo.
8 "Itatayak tod tawen iray lorem; iitdan to na oran so dalin tan pababalegan tod kapokdulan iray karikaan.
9 "Iiter toy tagano da ray ayayep tan papakanen to ray sibong na wawak no ontawag ira.
10 Say Katawan aliwan maliket ed mabiskeg iran kabayo; aliwa met a magayagad saray masebeg a sondalo;
11 balet pakaliliketan to ray mangigagalang ed sikato, saray manmamatalek ed ag mangoman a panangaro to.
12 Idayew moy Katawan, O Jerusalem! Idayew moy Dios mo, O Sion!
13 Papabiskegen to ray puirtam; bibindisionan to ray totoom.
14 Pansiasiansiaen tod kareenan iray ketegan mo tan pepeneken to kay sankaabigan a trigo.
15 Say Katawan igaganggan toy mundo, et tampol a nasusumpal so ibabaga to.
16 Itatayak ton singa lanan abel so yilo tan ikakayat ton singa dapul iray kinmigtel a linaew.
17 Singa saray ankekelag a bato iray kristal ya ipepelag to; anggapoy makatepel ed betel ya ibabaki to!
18 Insan mangganggan et natonaw so yilo; pasiplugen toy dagem, et onagos so danum.
19 Ibabaga tod saray totoo to so salita to; ipapaamta tod Israel iray bilin tan ganggan to.
20 Ag to ya ginawa para saray arum a bansa; ag da amta ray ganggan to. Idayew yoy Katawan.
1 "Idayew yoy Katawan! Manlapud tawen idayew yoy Katawan, idayew yo sikayon ran manaayam ed tagey.
2 "Idayew yo, amin yon anghil to, amin yon kabyangay mangatatawen a sondalo.
3 "Idayew yo, sikayon agew tan bulan; idayew yo, sikayo ran masnag a bitewen.
4 "Igalang yo, sikayo ran sankatageyan a katawenan, tan sikayo ran danum a walad tagey na tawen.
5 "Igalang dan amin komuy ngaran na Katawan! Nangganggan et apalsa ra;
6 "diad panamegley na ganggan to, andi-anggaan a nilira ra ed saray pasen da, et ag da nayarin sumlangen.
7 "Manlapud dalin idayew yoy Katawan, sikayon dragon ed dayat tan amin yon dalem na dayat;
8 "sikayon kirmat tan kristal, yilo tan lorem, sikayo ran mabiskeg a dagem a mangoonur ed ganggan to.
9 "Igalang yo, sikayon kapokdulan tan kapalandeyan, sikayon kakiewan a mambubunga tan sikayon katakelan;
10 amin yon ayayep ya amo tan ayayep ed katakelan, ayayep a korung-korung tan kamanokan ed tagey!
11 Igalang yo, sikayo ran arari tan amin yon katoowan, sikayo ran prinsipi tan amin yon manooley;
12 sikayo ran babalolaki tan mamarikit, ontan yo met a mamatakken tan ogogaw.
13 Idayew dan amin komuy ngaran na Katawan. Matalonggaring nen anggan dinan so ngaran to; atagey nen say dalin tan tawen so kagalangan to.
14 Pinabiskeg toy bansa to, pian idayew na amin a totoo to saray totood Israel a mabli ran tuloy ed sikato. Idayew yoy Katawan!
1 "Idayew yoy Katawan! Kantaan yoy balon kanta so Katawan; idayew yo diad tipon da ray matoor a totoo to!
2 "Israel, manggayaga ka lapud Manamalsam; totoo na Sion, manliket kayo lapud ari yo!
3 "Idayew yoy ngaran to diad panamegley na sayaw; togtog yo ray tambul tan saray arpa diad pangidayew yod sikato.
4 "Naliliketay Katawan ed saray totoo to; papagalangan to ray mapaabeba diad pangiiter tod sikaray pananalo.
5 "Manliket komun iray totooy Dios lapud impanalo ra tan lawas mankanta ra komun a maliket.
6 "Paneyaeyag yo ra komun legan dan idadayew so Dios, a sankabembenan da ray matdem ya ispada,
7 "pian natalo da ray bansa, tan nadusa da ray totoon pagano;
8 "pian nabalor day galonggolong iray arari, tan saray pangulo ra na balatyang a golonggolong;
9 "pian nadusa da ray bansa onung na ingganggan na Dios. Sikato yay pananalo na saray totooy Dios. Idayew yoy Katawan!
1 "Idayew yoy Katawan! Idayew yoy Dios diad Timplo to! Idayew yoy biskeg to diad tawen!
2 "Idayew yo lapud saray makapanyarin ginagawa to. Idayew yo lapud sikatoy sankatalonggaringan.
3 "Idayew yo diad pamaknul yod saray trumpita. Idayew yo diad panogtog yod saray arpa tan lira.
4 "Idayew yo diad pamaknul yod saray tambul tan diad pansayaw yo. Idayew yo diad panogtog yod saray arpa tan plauta.
5 "Idayew yo diad pamaknul yod saray piangpiang. Idayew yo diad pamaknul yod saray maknul a piangpiang.
6 "Idayew yoy Katawan, amin yon mabilay a pinalsa! Idayew yoy Katawan!