1 "Walay sakey a lakin manngaray Job a manaayam ed dalin na Uz. Anggapoy pakabalawan ed sayan too, matonung, walay takot to ed Dios, tan aarawian toy kaogsan.
2 "Pitoray anak ton lalaki tan taloray bibii,
3 "piton libo so karniro to, talon libo so kamilyo, sanlibo so baka, tan liman lasus so asno. Amayamay met so aripen to tan sikatoy sankayamanan ed Bokig.
4 "Mansosoblayan a mamponsia ira may lalakin anak to ed kaabungan da. Ondarago ran amin ed ponsia tan lawas babagaan da ray taloran agagi ran bibii.
5 "Kapag nasumpal so ponsia, ombangon a masaksakbay ed ontombuk a kabwasan si Job tan mangisaklang na saray bagat a popoolan a panlinis ed saray anak to, onung ed ganggan. Lawas to yan gagawaen lapud iisipen to ya ompan sakey ed saray anak to so nankasalanan diad ag to ginagalan impansalita sumpad Dios.
6 "Nen sinmabiy agew ya onarap ed Katawan iray anghil na Dios wadman met si Satanas.
7 "Tinepet na Katawan ed sikato, Iner so nanlapwan mo? Inmebat si Satanas, Manaakar-akar ak ta liliberen koy intiron mundo.
8 "Tinepet na Katawan, Naimanom si aripen kon Job? Anggapoy miparad sikato. Anggapoy pakabalawan ed sikato, matonung, walay takot tod siak, tan aarawian toy kaogsan.
9 "Inmebat si Satanas, Takotan ka kasi nen Job anggaman ya anggapoy nagunggona to?
10 Iyaagel mo lawas, say pamilya to, tan amin a kayaryan to. Bibindisionan moy amin a kimey to tan iitdan moy ayamayamay ya ayayep a ngalngali da nalaknabay intiron bansa.
11 Balet natan, salim a paadien iray amin a walad sikato, et nengneng mo no ag to ka inayew ed dilin arap mo!
12 Inkuan na Katawan ed kinen Satanas, Sigi sirin, ipalimak ed sikay amin a walad sikato, balet ag mo didiwiten si Job. Kanyan tinmaynan lad arap na Katawan si Satanas.
13 Aminsan ya agew nen mampoponsia ray anak nen Job ed abung na sankapangulowanan ya agi ran laki,
14 sinmabid kinen Job so sakey ya aripen. Inkuanto, Peles min pambabaka iray baka tan mankakabkab ed asingger iray asno,
15 nen biglan dinmogpa iray Sabeo tan tinakew da ran amin. Pinatey day amin ya aripen mo likud labat ed siak. Siak labat so akabatik kanyan wadya ak a mangibalitad sika.
16 Mansasalita ni nen sinmabi so sakey nin aripen tan kuanto, Inatey ya amin iray karnirom, tan saray mamapastol ed sikara, ta naatotan iray karul. Siak labat so akabatik kanyan wadya ak a mangibalitad sika.
17 Mansasalita ni nen sinmabi so sakey nin aripen tan kuanto, Dinogpaan kami na taloran grupo na saray Caldeo, imbatik da ray kamilyom. Pinatey day amin ya aripen mo likud labat ed siak. Siak labat so akabatik, kanyan wadya ak a mangibalitad sika.
18 Mansasalita ni nen sinmabi so sakey nin aripen tan kuanto, Manliliket a mamangan tan maniinoman iray anak mo ed abung na sankapangulowanan ya agi ran laki,
19 nen walay mabiskeg a dagem a nanlapud kalawakan. Binmasig ed abung a kawalaan da, et inatey iran amin. Siak labat so akabatik, kanyan wadya ak a mangibalitad sika.
20 Lapud saya inmalagey si Job tan pinilat toy kawes to a pangipanengneng toy ermen to. Kiniskisan toy olo to tan intiblak tod dalin.
21 Inkuanto, Nianak ak a kalima-lima, ompatey ak a kalima-lima. Angiter so Katawan tan natan binawi to. Nadayew komun so ngaran to!
22 Anggaman ya onyay agawa, ag nankasalanan si Job, ta ag to tinetel so Dios.
1 "Nen sinmabiy agew ya onarap lamet ed Katawan iray anghil na Dios tan wadman met si Satanas.
2 "Tinepet na Katawan ed sikato, Iner so nanlapwan mo? Inmebat si Satanas, Manaakar-akar ak ta liliberen koy intiron mundo.
3 "Tinepet na Katawan, Naimanom si aripen kon Job? Anggapoy miparad sikato. Anggapoy pakabalawan ed sikato, matonung, walay takot tod siak, tan aarawian toy kaogsan. Tinanggoyur mo ak ya abuloyan ta kan maneral ed sikato anggaman ya anggapoy makasengeg, balet matoor nin siansia.
4 "Inmebat si Satanas, Ag kawananen na too so amin a kayaryan to dapot mambilay.
5 "Balet natan, salim a pasakitan so laman to, et nengneng mo no ag to ka inayew ed dilin arap mo!
6 "Kanyan inkuan na Katawan ed kinen Satanas, Sigi sirin, ipalimak ed sika si Job, balet ag mo papateyen.
7 "Tinmaynan ed arap na Katawan si Satanas tan pinagiri toy intiron laman nen Job.
8 "Linmad abay na bantakay dotak, inmirung tan angalay langa ya impankakarkar tod saray giri to.
9 "Inkuan ed sikato na asawa to, Matoor ka nin siansia, anto? Akin et ag mo la isambay Dios, pian ompatey ka la?
10 Inmebat si Job, Andi-kakanaay ibabagam! No mangiter na kamaungan so Dios, awaten tayo. Akin et ag tayo awaten no kairapan so iter to? Anggan ontan lay paniirap to si Job ag nansalita na maoges sumpad Dios.
11 Say paniirap nen Job abalitaan na saray taloran kakaaro to a di Elifaz a taga Teman, Bildad a taga Sua, tan Zofar a taga Naaman. Nampapakna ran talo a bisitaen day Job, ta ligliwaen da.
12 Nen wala ni rad arawi anengneng da lay Job, balet ag da ni abirbir. Nen abirbir da la nanogaog ira. Pinipilat day kawes da diad pangipanengneng day ermen da, nansibwag irad tagey na dabuk tan diad olo ra.
13 Insan pitoy agew tan pitoy labin kaiba ran inmirung ed dalin; anggapoy imbaga ran balut, lapud anengneng dan ontan lan paniirap to.
1 "Kayari to ya, nansalitay Job; insamba toy agew na inkianak to.
2 "Inkuanto:
3 "Nisamba komun so agew na inkianak ko; tan say labi na inkinginew ko.
4 "Magmaliw komun a bilonget iman ya agew; ag la komun nanunotan na Dios iman ya agew; ag lan balut komun naliwawaan.
5 "Nakobutan komun na ermen tan makapal a bilonget iman ya agew; nasakuban komun na lorem tan nasaniban so agew.
6 "Naekal komun iman a labi ed taon, tan ag lan balut nibilang ed saray bulan;
7 "magmaliw komun ya andi-kakanaan tan anggapoy liket.
8 "Isamba komun na saray managsamba iman ya agew, saray totoon makapatoluk ed Libiatan.
9 "Ag la komun onsinag so kabontalala ed kabwasan; naandian la komun na ilalo iman a labi ya onsabiy palbangon.
10 Nisamba komun iman a labi lapud inyabuloy to ak a nianak, tan imparontal to ak ed gunigon.
11 Inatey ak la komun ed dalem na eges nen inak odino diad samay bektan nianak ak.
12 Akin et inampupo ak ni nen inak? Akin et pinapasoso to ak ni?
13 No inatey ak la nen saman, mampapainawa ak la komun natan,
14 nanaogip a singa saray arari tan saray manoley ya amasimbalon nampapaalagey na saray dagdaan a palasio.
15 On, nanaogip ak la komun a singa saray prinsipi a nampapano ed saray kaabungan da na balituk tan pilak;
16 odino singa ogaw ya inatey lan nianak.
17 Diad lobuk ag la makagaway kaogsan iray maoges a totoo, tan makapanpainawa la ray kumikimey a naknaksawan.
18 Kareenan met lay niwalad saray anggan priso, ag la ra naingal-ingalan tan nigangganggan.
19 Atagey may abebay kipapasen wadman ira, tan saray aripen bolus la ran siansia.
20 Akin et mambilay ni ray totoon maniirap? Akin et naitdan niy liwawa iray totoon maneermen?
21 Pampirawatan day patey, balet ag onsabi; pampilalekan da niy ompatey nen say makagamur na kayamanan.
22 Ontan lay liket tan gayaga ra no lobuk la so narapat da.
23 Iyaamut na Dios so arapen da tan sasaniban toy kawalaan da.
24 Ag ak mamangan lapud ermen ko; ag ontonday panay-ay ko.
25 Onsasabid siak iray amin a tatakotan ko, tan pampapagaan ko.
26 Anggapoy kareenan tan painawak, tan ag mangangga ray gunigon ko.
1 "Inkuanen Elifaz a taga Teman:
2 "Job, ag mo komun liliknaen no mansalita ak; ag ko la napokpokan so dilak.
3 "Binangatan mo ray amayamay a totoo tan pinabiskeg mo ray makapoy.
4 "Diad panamegley na saray salitam tinangguyor mon onalagey iray nipatumba, lapud kesaw tan kapoy na laman da.
5 "Natan ta sika lay sinmoblay a manirap, nakalan kay anos tan biskeg na linawa.
6 "Walay takot mo ed Dios, tan anggapoy pakabalawan ed sika; nepeg a walay talek tan ilalom.
7 "Nudnunot mo pa; wala tay amtam a toon matonung ya asabiay deral?
8 "Akanengneng ak na saray totoon mambababa ed alog na kaogsan tan mantatanem na bokel na kabaglan, et manaani ra natan na kaogsan tan kabaglan.
9 "Say Dios diad pasnuk to singa bagyon manderal ed sikara.
10 Saray maoges a totoo singa ra masebeg a mangwam a lion balet paemelen ira na Dios tan pangpangen toy kangipenan da.
11 Singa ra lion ya anggapoy napatey dan buagen, ompatey ira tan nataytayak iray anak da.
12 Aminsan makalkalnan sinmabid siak so salita, esaes labat kanyan ngalngali ag ko narengel.
13 Singa ak nankogip na makapataktakot ed kasamisamitay ogip ko.
14 Ataktakot ak tan manggiwgiw ak; mampayegpeg so intiron laman ko.
15 Sinmiplug ed lupak so mapalayupoy a dagem, kanyan binmegas so bagoy tenger ko.
16 Walay sankanengneng kon manalalagey ed arap ko, balet ag ko nibaga no anto. Insan diad kareenan nadngel koy sakey a bosis,
17 Walay toon matonung ed arap na Dios? Walay toon malinis ed arap na Amalsa ed sikato?
18 Ag napanmatalkan na Dios iray mangatatawen ya aripen to; walay kakapoyan a narurumog to ed anggan saray anghil to.
19 Panon to sirin a panmatalkan so toon pinalsad pitek, sakey a bengatlan dabuk a nayarin liresen a singa bigis?
20 Nayarin mabilabilay nid kabwasan so sakey a too, balet ag naamamtaan a bangkay la no labi.
21 Naandi ray amin a kayaryan to; ompatey a makulang ni so kakabatan to.
1 "Tawag ka, Job, ta nengneng mo no walay onebat ed sika. Walay siopaman ya anghil a nayarian mon piregan?
2 "Inaambagel tan andi-kakanaan so alablabas a panggunigon tan pansakit na linawa.
3 "Akanengneng ak na saray totoon makulang-kulang a maligen so panagbilay da, balet biglan insambak iray kaabungan da.
4 "Ag makaarawid kaatapan iray anak da; diad korti anggapoy mangyagel ed sikara.
5 "Kanen na totoon narasan iray bungay tanaman na toon makulang-kulang anggan saray trigon walad kasabitan tan panggonaetan na saray napgaan a totoo so kayamanan to.
6 "Ag ontobod dalin so kaogsan, odino onsulming ed dalin so gunigon.
7 "Ingen manlapud sikato met lamlamang so gunigon na too, a singa panlalapud apoy na saray talagsik.
8 "No siak so sika, onsingger ak ed Dios tan sikatoy pangipiregan koy kipapasen ko.
9 "Ag natalusan iray gagawaen ton makapakelaw a bengatla, tan andi-tonda iray gagawaen ton milagro.
10 Ipepelag tod dalin so oran a manalog ed kaalogan.
11 Say Dios so mangitanduro ed saray totoon mapaabeba tan diad saray maermen iter toy gayaga.
12 Deralen to ray plano na saray totoon masilib, tan erelen tod kasiliban da iray totoon makabat, pian ag onaligwas so antokaman a gagawaen da;
13
14 anggan diad kagkaagwan karapkarap irad kabilongetan.
15 Balet say Dios iyaagel tod patey iray mairap-bilay; iyaagel tod panamairap na arum a totoo iray walad pankaukolan.
16 Iitdan toy ilalo iray mairap-bilay, tan ag to paeeselen iray totoon maoges.
17 Maliket so toon pepeteken na Dios! Ag mo liliknaen no dusaen to ka.
18 Beberberen na Dios iray sinusugat to; mamapasakit tan mamapaabig ed sika iray lima to.
19 Lawas iyagel to ka ed gunigon tan kaogsan;
20 no panaoy eras pansiansiaen to kan mabilay, tan no panaoy bakal ipaliis to kad patey.
21 Say Dios ipaliis to kad panamaoges na arum a totoo; iyagel to ka no onsabiy deral.
22 Elekan moy onsabin deral tan eras, tan ag mo takotan iray masesebeg ya ayayep.
23 Anggapoy bato so kaalogan a bakaen mo; ag kan balut dogpaan na saray masesebeg ya ayayep.
24 Insan ka manayam a walay kareenan diad dalem na tuldam; no nengnengen mo ray karnirom, arawi rad kaatapan.
25 Nawalaan ka na amayamay ya anak, a singa karakel na dika ed tapew na dalin.
26 Mambilay kay andokey, a singa trigon ontatakken ya anggad panagani.
27 Job, amta mi ya, ta abayag min inaral. Tua ya, kanyan panisiaan mo la, ta pankaabigan mo.
1 "Inmebat si Job:
2 "No simbangen iray gunigon tan ermen ko,
3 "ambelat ni ra nen say buer ed dayat, ag kayo mankelaw sirin no marlas so panagsalitak.
4 "Say Makapanyarin-amin a Dios pinapana to ak; onkakayat ed intiron laman ko so samal. Say Dios imbolus tod siak iray amayamay a panagtaktakot to.
5 "Say asnon atap marereen no mangakay dika; say baka ag oneseesel no mangakay dayami.
6 "Balet siopay malabay ed kakanen a matabang tan anggapoy asin? Odino antoy taway na kalanyog?
7 "Nakalan ak na panlabay ed sarayan kakanen, tan ag ko napaloob so antokaman a kanen ko.
8 "Akin et ag iter na Dios so kerew ko? Akin et ag to ebatan so pikakasik?
9 "Magmaung ni la laingen no oyusen to lay bilay ko.
10 No amtak ya onyay gawaen to onlukso ak ed liket, anggaman ya ontan lay irap a liliknaen ko.
11 Anto niy keran biskeg kon mambilay? No anggapo lamlamang so ilalok, anto niy kana na mambilay?
12 Bato ak sirin? Gansa sirin so laman ko?
13 Anggapo lay keran biskeg a mangyagel ed siak a dili; anggapo lay nayarian kon piregan a kereway tulong.
14 Diad onyan gunigon ko nakaukolan ko ray matoor a kaaro inkaindan ko man o andi so Dios.
15 Balet sikayo ran kakaarok, papalikdoen yo ak singa saray kolus a naekatan no anggapoy oran.
16 Napno na danum iray kolus
17 balet naandipat no tiagew, et namagaan iray kolus tan karaldalin la ra.
18 Diad pananap na danum nababalang iray olup na biahiro; manakar-akar irad maawang a kabueran tan diman la ra ompatey.
19 Saray olup na biahiron taga Seba tan Tema manaanap iray danum,
20 balet naandian iray ilalo diad gilig na saray amagaan a kolus.
21 Para siak singa kayo saraman a kolus; nanenengneng yoy asagmak ko et ataktakot kayo.
22 Kinerew ko ta ya itdan yo ak na rigalo, odino ipasoksokan yo ak ed sakey a too,
23 odino iyagel yo ak ed sakey kalaban o saray totoon manamasegsegang?
24 Ibangat yo ak sirin; ibaga yod siak iray kasalanan ko. Mandeen tan mandengel ak ed sikayo.
25 Makatanggoyur iray salitan tua, balet andi-kakanaan so ibabaga yo.
26 No isisipen yon singa labat dagem so ibabagak, akin et eebatan yo ray salitak, anta naandian ak lay ilalo?
27 Sarag yon ilako iray anggan olila tan payamanen so sikayon dili diad panluko yod saray malet a kakaaro yo.
28 Nengneng yo ak. Impanlupa ak tay managtila?
29 Nalalabas kayo la. Tondaan yo la tay alablabas a panggagawa yoy aliwan matonung. Ag yo ak pankakasalananen, ta wala ak ed kaptekan.
30 Balet iisipen yon mantitila ak abaloan yon ag ko napambiigan so maung tan maoges.
1 "Say bilay na too singa pinasoot a panaglingkur na sondalo, singa bilay na pinasyan panagtrabaho.
2 "Singa sakey ya aripen a pampilpilalekan toy ambetel a siroman; singa sakey a kumikimey a mantatalaran na upa to.
3 "Binulan-bulan ya anggapoy kabaliksay bilay ko; nilabi-labi ya ontan lay paneermen ko.
4 "No ondokul ak lan onogip, andokorokey so labi; pigar-pigar ak a sanlabi ya anggad palbangon.
5 "Napnoy bigis so laman ko; napno na kegang; onaagos so nena ed saray girik.
6 "Onlalabas iray agew ko ya anggapoy ilalok, maples ya onlalabas nen say panaglaga na makinan gawaay abel.
7 "Nudnunot mo, O Dios, a singa labat ingas so bilay ko; nansamput lay liket ko.
8 "Sankanengneng mo ak natan balet ag mo la napidua. No anapen mo ak naandi ak la.
9 "Say lorem onlabas, et kabebekta ag mo la nanengneng; ontan met so too: ompatey insan ag la ompawil; nalingwanan la na amin da ray makapikabat ed sikato.
10 Ag ko nayarian so ag onesel, Ampetang so olok tan ansakit so linawak. Nepeg a mansalita ak.
11
12 Akin et guaguardiaan mo ak? Sakey ak sirin a dragon na dayat?
13 Ondokul ak ta labay koy mampainawa; mananap ak na pakainawaan kod liliknaen ko.
14 Balet sikatataktakoten mo ak diad panamegley na saray kogip, tan diad panamegley na saray pasingayew,
15 anggad lablabayen ko lay ompatey a tinikel nen say mambilay ya onya lamlamang so laman ko.
16 Ag ko la labay so mambilay; onsasawa ak lan talaga. Taynan mo ak lan bukor, ta anggapoy kabaliksan so bilay ko.
17 Akin et papablien mo so too? Akin et iimanoen moy gagawaen to?
18 Bibisitaen mon kinabwasan tan kapag bekta susuboken mo.
19 Lingaw ka pan magano pian naakmon koy ilol ko.
20 Akin et nasakitan ka no mankasalanan ak, sikan managbantay ed saray totoo? Akin et impagmaliw mo ak a kekenaen mo? Makabelbelat ak ta ed sika?
21 Ag mo tan balut napirdonay kasalanan ko? Ag mo ta napaandi so kaogsan a gagawaen ko? Ag mabayag wala ak lad lobuk, et anggapo ak la no anapen mo ak.
1 "Inmebat si Bildad a taga Sua:
2 "Asumpal ka lan siansia ed maragem a pansasalitam?
3 "Pikeweten sirin na Dios so katunongan? Pikeweten to sirin so kaptekan?
4 "Nankasalanan angangko ed Dios iray anak mo, kanyan dinusa to ra onung ed kanepegan da.
5 "Balet pawil ka la natan ed Makapanyarin-amin a Dios tan mikasi kad sikato;
6 "no talagan maptek tan malinis ka, andi-duaruwa a dagoen tan tulongan to ka; ipawil ton tumang mo iray kayaryan mo.
7 "Arawi ra may kayamanan ya abalang mo nen saman, no ipara ra ed iter na Dios ed sika.
8 "Omameng mo pan magano so kadaanan a kakabatan, tan dalepdep mo ray katwaan a naaralan na saray lalaki tayo.
9 "Antiktikey so bilay tayo tan anggapoy amta tayo; singa tayo labat onlalabas ya anino diad tapew na dalin.
10 Balet abuloyan mon ibangat ka na saray makabat a totoo nen saman a panaon; dengel kad ibabaga ra,
11 Saray dika ed danum et ag ira nabilay ed ekat; ag iran balut ontubo ed amagan dalin.
12 No naekatay danum so kawalaan da, sikaray ononan nalenes, no ankekelag ni ran baguten ya ikana.
13 Onyay kapara da ray totoon anggapoy Dios da; naandi so ilalo ra no Dios so nilingwanan da.
14 Lopuk so sasaralan da singa obung na genggeng so panmamatalkan da.
15 No onsaral irad obung na genggeng naawit to ra kasi? No linat so biraen da napaalagey to ra kasi?
16 Singa dikan ontutubod pataktak iray maoges a totoo, singa ra dikan onkakayamkam ed tanamanan.
17 Ombabaliber ed saray bato iray lamut da tan ompepeket ira ed balang baton-dampay.
18 Balet bagut mo ra, et anggapoy makapikabat a nanlapu rad man.
19 On, onya labat so liket da ray maoges a totoo; onsabi ray arum a totoo tan salatan da ra.
20 Balet ag balut ikaindan na Dios iray totoon matoor; ag to tulongan iray totoon maoges.
21 Paneleken tan paneyagen to ka lamet,
22 balet ipelag tod kababaingan iray mamobosul ed sika, tan saray maoges a totoo naandipat so kaabungan da.
1 "Inmebat si Job:
2 "On, nadngelan ko la ra tan nen saman. Balet panon a magmaliw a matonung so sakey a too ed arap na Dios?
3 "Panoy pakapisangsangan na sakey a too ed Dios? Diad sanlibon tepet na Dios anggapoy anggan sakey a naebatan.
4 "Ontan lay kakabatan tan biskeg na Dios; anggapoy makasumlang ed sikato.
5 "Bengatbengat ya ekalen to ray kapalandeyan tan diad pasnuk to deralen to ra.
6 "Yegyegen to so dalin yakayaken toy lusek na mundo.
7 "Nayarian na Dios ya ag pabutayen so agew, tan ag pasinagen iray bitewen no labi.
8 "Anggapoy tinmulong ed Dios diad impangipanat tod katawenan odino diad impanggatin-gatin tod dragon na dayat.
9 "Pinalsa na Dios iray bitewen ed tawensay Baleg ya Ulsa, say Orion, saray Pliyadis, tan saray bitewen ed abalaten.
10 Ag tayo natalusan iray gagawaen ton ankakabaleg a bengatla, tan ag nabilang iray milagron gagawaen to.
11 Ag ko nanengneng diad idalan tod arap ko. Ag ko nalikas diad panakar to.
12 Anggapoy makasebel ed sikato no alaen toy labay to; anggapoy nayarin manepet ed sikato, Antoy gagawaen mo?
13 Ag napakepa so pasnuk na Dios. Pinapatey to ray kalaban to a tinmulong ed Rahab, Say dragon na dayat ya onsusumpad sikato.
14 Kanyan anto ray nibalikas kon iyebat ed Dios?
15 Anggaman ya anggapoy kasalanan ko, ag ak makaebat ed sikato; say nayarian ko labat a gawaen say mikasid Dios a huis ko.
16 Anggaman ya abuloyan to ak a mansalita, ag ak manisia a dengelen to ak.
17 Mangibakiy bagyo ya ombasig tan manugat ed siak ya anggapoy makasengeg.
18 Ngalngali ag to ak paingasen; pait na kairapan ya amin so iiter tod siak.
19 Ipakanak kasiy biskeg ed Dios? No idalem kod korti, siopay mangawit ed sikato?
20 Anggapoy kasalanan ko tan pakabalawan ed siak, balet diad saray salik singa ak nankasalanan; amin ya ibabagak singa mamapaneknek a nankasalanan ak.
21 Anggapoy kasalanan ko, balet anggapoy wala ed siak. Onsasawa ak lan mambilay. Anggapo met ni lamlamang so pansumpalan ko; nankasalanan itayo man odino andi, dusaen itayo met ni lamlamang na Dios.
22
23 No biglan ompatey so toon anggapoy kasalanan, onelek so Dios.
24 Inter na Dios so mundo ed saray maoges a totoo, Binulag to ray amin a huis. No ag ya ginawa na Dios, siopa sirin so nanggawa?
25 Manlulumbaan ya onlabas iray agew ko, anggapoy maabig ya anggan sakey ed sikara.
26 Singa sankaplesan a baloto so ikukurang na bilay ko, maples a singa agilan manisibar na buagen to.
27 No onimis ak tan salien kon lingwanan so liliknaen ko, ompawil a manaktakot ed siak iray amin a kairapan ko; amtak a say Dios ipapasen to ak a walay kasalanan.
28
29 No say Dios et ipapasen to ak met ni lamlamang a walay kasalanan, akin et mansakit ak niy olo?
30 Anggan antoy pansabon ko, ag naorasan iray kasalanan ko.
31 Say Dios ibabantak to ak ed abut a kawalaay pitek, ibabaingan ak na anggan saray kawes ko.
32 No too labat so Dios nayarian kon ebatan; nayarin manarap kamid korti pian nanengneng la no siopad sikamiy walad kaptekan.
33 Balet anggapoy toon manalaysay ed sikami anggapoy manintinsia ed Dios tan siak.
34 Tondaan mo ak pa lan dusaen, O Dios! ag mo ak la komun tataktakoten!
35 Ag ak antakot. Salitaen koy labay kon ibaga, lapud amtak so walad dilin pusok.
1 "Onsasawa ak lan mambilay. Dengel kayo ed ibalikas kon ampait a riklamo.
2 "Ag mo ak kari dudusaen, O Dios. Ibagam pad siak no antoy ipapakasalanan mod siak.
3 "Manepeg kasin maruksa ka? Manepeg kasin balawen moy dilin pinalsam? Insan panliketan mo ray plano na saray maoges a totoo?
4 "Singa kasi panangipasen mi so panangipasen mo ed saray bengatla?
5 "Singa kasi katikey na bilay mi so katikey na bilay mo?
6 "Akin sirin et aanapen moy amin a kasalanan ko tan sosokayan moy balang kaogsan ko?
7 "Amtam ya anggapoy kasalanan ko, tan anggapoy makapangyagel ed siak ed sika.
8 "Minoli ak na saray liman tan ginawa mo ak, et natan saratan nin limam so manederal ed siak.
9 "Nunot mo a pinalsa mo ak ed pitek; pagmaliwen mo ak kasi a dabuk lamet?
10 Initdan moy pakayari so amak a mangilalak ed siak; pinabaleg mo ak ed eges nen inak.
11 Saray pokel tan saray olat so impanogyup mod laman ko; say laman tan say baog so impamalkut mod saray pokel ko.
12 Initdan mo ak na bilay tan ag mangoman a panangaro; lapud panangasikasom mabilay ak ni ya anggad natan.
13 Balet amtak la natan a nanlapud saman wala lay maamut a getmam a mamasakit ed siak.
14 Babantayan mo ak ta nengnengen mo no mankasalanan ak, pian walay makasengeg na ag mo pamirdonad siak.
15 No mankasalanan ak pangaskasiyay kipapasen ko, balet no manggawa ak na katunongan anggapoy nagunggonak, Nanairapan ak tan napno ak na kababaingan.
16 No siak so onaligwas osilan mo ak a pateyen a singa lion; manggagawa ka na anggan saray milagro a mamasakit ed siak.
17 Wala lawas so tasim sumpad siak; mampetang lan mampetang so olom ed siak; wala lawas so kairapan ya iiter mod siak.
18 O Dios, akin et inyabuloy mo nin nianak ak? Inatey ak la komun kasakbayan a walay akanengneng ed siak.
19 Nipompon ak la komun a tampol kapaway kod eges nen inak, pian singa ak ni lamlamang ag nambilay diad tapew na dalin.
20 Ag ta pigpigara lay nakdaan ya agew a pambilay ko? Pambukbukor mo ak la, pian naligliwa ak na daiset.
21 Magano lay itaynan ko tan ag ak lan balut ompawil; onla ak ed ambilonget tan maermen a dalin,
22 dalin a walay kabilongetan, tan gewgew, dalin ya anggan say liwawa et bilonget.
1 "Insan inmebat si Zofar, a taga Naaman,
2 "Anggapoy onebat ed sarayan andi-kakanaan a balikas? Napatonung kasiy sakey a too lapud masalita?
3 "Job, abaloan mo ya ag mi ka naebatan? Ya ag kami makasalita lapud saray ansakit a salitam.
4 "Ibabagam a katwaan iray salitam; tan malinis so pusom ed arap na Dios.
5 "Oy la komun ta ebatan ka na Dios!
6 "Ibaga tod sikad satan ya amayamay so ag amta nipaakar ed kakabatan; wala ray bengatlan ag natalusan na too. Daisit nen say kanepegan mo so panudusa na Dios ed sika.
7 "Nayarian mo a sukaiten iray panganggaan na talonggaring tan pakayari na Dios?
8 "Atagey nen say tawen so panganggaan na Dios, balet ag mo nayarian a sabien. Amta na Dios so nipaakar ed pasen a panaayaman da ray inaatey, balet ag mo amta.
9 "Malaknab nen say mundo so talonggaring na Dios, tan maawang nen say dayat.
10 Kabat na Dios no siopa ray andi-kakanaan a totoo; siopay makasbel ed sikato?
11 Kabat na Dios no siopa ray andi-kakanaan a totoo; nanenengneng to ray amin a maoges a gagawaen da.
12 Onggapon makabat so toon makulang-kulang no ompotiy wawak.
13 Job, pagmaliw mon matunong so bilay mo. Singger kad Dios.
14 Ekal mod abung mo so kaogsan tan say kabaglan.
15 Insan kad satan miarapan lamet ed sankamundoan, ya anggapoy takot mo tan mabiskeg so linawam.
16 Nalingwanan mo lad satan iray gunigon mo, singa la delap a dinmalan tan sigput lan alingwanan.
17 Onliwawa met lad satan a singa agew ed kaagwan so bilay mo, singa liwawad kabwasan so pagmaliwan na bilonget na bilay mo.
18 Mambilay kan arawid kaatapan tan napno na ilalo; iyagel ka na Dios tan pampainawaen to ka.
19 Ag mo la takotan iray kalaban mo; dakel iray totoon onkerew na tulong ed sika.
20 Balet saray maoges a totoo onnengneng irad kaliber-liber da, et anggapoy napaliisan da. Patey labat so iilaloan da.
1 "Inmebat si Job:
2 "Anggapoy duaruwa a sikayoy mangilalaman ed saray katoowan. No ompatey kayo ompatey a kaiba yoy kakabatan.
3 "Balet walay pakatalus kon singa sikayo; aliwa ak a saginonur ed sikayo kabat na balang sakey iray imbabagam.
4 "Elek-elekan ak natan na anggan saray kakaarok, elek-elekan da ak anggaman a matonung ak tan anggapoy pakabalawan ed siak; balet walay panaon ya inebatan na Dios so pikakasik.
5 "Anggapo ray gunigon yo, balet ta luludlureyen yo ak; singa kakabilen yoy sakey a too a ngalngali la natumba.
6 "Balet mambibilay ed kareenan iray matatakew tan saray anggapoy takot ed Dios, anggaman a say dios da labat et say dilin biskeg da.
7 "Anggan saray manok tan ayayep wala ray nibangat dad sika;
8 "paibangat kad saray pinalsan walad tapew na dalin tan saray walad dalem na dayat.
9 "Amta ran amin a say Katawan so amalsad sikara.
10 Say Dios so mangiwawanwan ed bilay na saray pinalsa to; walad lima to so bilay na balang too.
11 Balet no panoy panliket na dilam ed pannanam na kakanen, ontan met so panliket na saray layag mo ed pandengel na saray salita.
12 Saray mamasiken walay kakabatan, tan pakatalus da; balet say Dios walay kakabatan tan pakayari to. Saray mamasiken walay pakatalus da; say Dios walay pakatalus tan pakayari ton manggawa.
13
14 No amagbag so Dios, siopay makapangipaalagey, tan siopay makapangibolus ed toon ikolung to?
15 No paeren na Dios so oran namagaan so dalin; no ibolus toy oran onsabiy delap.
16 Mabiskeg so Dios tan lawas manatalo; walad silong na pakaoley to iray managpalikdo tan saray napapalikdo.
17 Eekalan toy kakabatan iray manoley, tan pagmamaliwen ton singa makulang-kulang iray pangulo.
18 Eekalan toy pakaoley iray arari tan pagmamaliwen to ran priso;
19 papaabebaen to ray papari tan saray makapanyari.
20 Pepepetan toy sangi da ray totoon panmamatalkan, tan ekalan toy kakabatan da ray mamasiken.
21 Ipepelag tod kakabaingan iray walad pakayari, tan patotondaen toy biskeg da ray manoley.
22 Paliliwawaen toy anggan sankabilongetan iran pasen.
23 Pagmamaliwen ton mabiskeg tan matalonggaring iray bansa, insan tataloen tan dederalen to ra.
24 Pangmamaliwen ton singa makulang-kulang iray pangulo na totoo, tan panaakar-akaren to ran anggapoy getma;
25 karapkarap irad kabilongetan tan mandongilngil iran singa abuek.
1 "Amin ya ibabaga yo et nadngelan ko la ra nen saman, tan natatalusan ko ran amin.
2 "Amtak iray amta yo, aliwa ak a saginonur ed sikayo.
3 "Balet aliwan sikayoy kasangsangan ko no ag say Dios; labay kon sikatoy pipalinewan ko.
4 "Sasakuban yo na tila so ag yo pakaamta; singa kayo saray doktor ya anggapoy napaabig da.
5 "Maung ni no ag kayo la oneesel, et nayarin walay makabalo a makabat kayo!
6 "Dengel yo natay ipalinew ko, tan talusan yoy tatalindegan ko.
7 "Akin et mantitila kayo? Abaloan yon say panitila yo et natulongan toy Dios?
8 "Iyaagel yo so Dios? Isasangsangan yo ed korti?
9 "No sukayan to kayo wala kasiy narumog ton kamaungan? Abaloan yon napalikdo yoy Dios a singa pamapalikdo yod saray totoo?
10 Anggaman ya iyaamut yoy panangibiig yo, pampasnukan to kayo,
11 tan diad pakayari to taktakoten to kayo.
12 Andi-kakanaan a singa dapul iray probirbio; tan lopuk a singa langa iray pankatonungan yo.
13 Mandeen kayo tan itdan yo ak na pankanawnawan mansalita, nagawa lay nagawa ed siak.
14 Akaparaan ak a mangipostay bilay ko.
15 Nakal lamlamang so ilalok, kanyan anggapoy wala ed siak anggan pateyen ak na Dios. Isangsang kon siansia so katonungan ko ed arap to.
16 Nayarin nilaban ak lapud sayan sebeg ko, bangta anggapoy maoges a toon ompangayan miarapan ed Dios.
17 Dengel yo natan so pangipaliwawak.
18 Sipaparaan ak a mangitalindeg ed kasok, lapud amtak a wala ak ed katunongan.
19 O Dios, ondago kan mangakusa ed siak? No ondago ka, sipaparaan ak ya ag onesel tan ompatey.
20 Walay duaran bengatla a kerewen kod sika. Iter mo ra et ag ta ka la iyamutan.
21 Tondaan mo ak lan dusaen, tan ag mo ak la tataktakoten.
22 Mansalita kan onona, O Dios, insan ak onebat. Odino mansalita ak ya onona, insan mo ak ebatan.
23 Anto ray kaogsan tan kasalanan ko? Antoy ray ipapakasalanan mod siak.
24 Akin et papaliisan mo ak? Akin et ipapasen mo ak a kalaban?
25 Sasalien mo ak a taktakoten? Sakey ak labat a bolung; dodogpaan moy sakey ya amagan dayami.
26 Ambelat iray ipapakasalanan mod siak, pati saray ginagawak nen ogaw ak ni.
27 Babaloren moy golunggolung iray salik; iimanoen moy amin a gagawaen ko, anggan pati saray bakat ko.
28 Lapud saya, singa ak namomogay ya aboluk a kiew, singa kawes ya ataboney.
1 "Nianak a makapoy so too; antikey tan magunigon so bilay to.
2 "Ombaleg, ombuskag tan nalaylay a singa saray rosas; naandipat a singa saray anino.
3 "Iimanoen moy anggan siak, O Dios, odino sasalaysayen tan sisintinsiaan mo ak?
4 "Anggapoy malinis a napapaway ed antokaman a marotak a singa say too.
5 "Walay nigetar a dokey na bilay na too nigetar lay bilang na bulan a pambilay to. Sikay angipasen na panganggaan to et ag to nalabsanan.
6 "Ag mo la kari nenengnengen tan paolyan mo lan bokur; paolyan mon panliketan toy mairap a bilay to no nayarian to.
7 "Wala niy ilalo ed sakey a kiew ya abatang; nayari nin onsimit tan mansanga.
8 "Anggaman a matakken la ray lamut to, tan aboluk lad dalin so akeraan a sengeg to,
9 "no nasalog-salog onsimit ni, tan mansangan singa malangwer a tanaman.
10 Balet no ompatey so too, anggaan to la; no naoyus so linawa to, iner lad satan so kawalaan to?
11 Onsabiy panaon ya ontondan onagos so ilog, tan naekatan so anggan dayat.
12 Ontan met say toon inatey ag lan balut ombangon; ag la nabangon anggad mangangga ray katawenan; ag lan balut naliing ed ogip to.
13 Iyamut mo ak komun ed pasen a panaayaman da ray inaatey; iyamut mo ak diman ya anggad napakepay pasnuk mo, insan iganam so panaon a nunoten mo ak.
14 No ompatey so too, nabilay ni kasi? Balet manalagar ak na magmaung a panaon, anggad napalabas yan panaon na gunigon.
15 Insan ka ontawag et onebat ak; manliket kad satan ed siak, siak a pinalsam.
16 Diad satan imanoen moy amin a gawaen ko, balet ag mo la anapen iray kasalanan ko.
17 Pirdonaen tan lingwanan mo ray kasalanan ko; paandien mo ray amin a kaogsan ko.
18 Onsabiy panaon a nageba ray palandey, tan nagalasogus iray ankakabaleg a bato.
19 Say danum oputen to ray bato, tan say maples ya oran iyagos to so dalin; onya so panederal mod ilalo na too.
20 Ipasilong mod pakayarim so sakey a too, insan mo paandipaten ya anggad angga; omanen moy nengneng na lupa to, insan mo la pasiputen ed sayan bilay.
21 Makagamur na kagalangan iray lalakin anak to, balet ta ag to amta; ag to met amta no napelag irad kababaingan.
22 Nalikna to labat so sakit na dilin laman to tan say ermen na dilin kanunotan to.
1 "Inmebat si Elifaz a taga Tema:
2 "Andi-kakanaan tan andi-kabaliksan iray salitam, Job!
3 "Say toon makabat ag mansalita na singa pansasalitam, odino iyagel toy sikaton dili diad panamegley na saray andi-kakanaan a salita.
4 "Ibabangat mon ag ontakot ed Dios iray totoo; babanoen mo ran mampikasi ed sikato.
5 "Say kaogsan mo ipapanengneng na panagsalitam; say panisimolam et saray masilib iran salitam.
6 "Ag la nakaukolan a sintinsiaan ta ka; saray dilin salitam so manintinsiad sika.
7 "Sika ta so onaan a nianak a too? Wala ka la sirin nen palsaen na Dios iray kapalandeyan?
8 "Nadngel mo ta ray plano na Dios? Sika ta labat so kawalaan na kakabatan na amin a katoowan?
9 "Anggapoy amtam ya ag mi amta, tan anggapoy natalusan mo ya ag mi natalusan.
10 Say nanaralan miy kakabatan saray mamasiken saray lalakin mamatakken nen si amam.
11 Akin, kulang nid sika yay panliligliwa na Dios ed sika? Insalitaan mi ed sika na maamoyut iran salita.
12 Antoy mamapaawet na pusom? Akin et mandarlang iray matam ed pasnuk mod sikami?
13 Akin et ampetang so olom ed Dios, tan ansakit iran salitan imbolus mod sikato?
14 Walay toon nagnap a malinis so puso to? Walay toon nagnap a matonung ed arap na Dios?
15 Say Dios ag to napanmatalkan iray anggan anghil to; anggan sikara aliwa ran malinis ed pakanengneng to.
16 Say panggagawa na too ed kaogsan et singa kakainom to na danum; on, marotak tan andi-kakanaan so too.
17 Dengel ka natan Job, ta ibagak ed sikay anengneng tan naamtaan ko.
18 Saray makabat a totoo imbabangat da ak na saray katwaan a naaralan dad saray lalaki ra; tan anggapo so inyamut da.
19 Sikara labat so nanayam ed dalin da tan anggapoy taga arum a bansan ananggoyur ya ikaindan day Dios.
20 Say maoges a too a mamairap ed kapara ton too ed nagunigon legan ton mambilay.
21 Makapataktakot iran tanul so narengel to, tan dogpaan na saray tutulisan no abaloan ton arawid kaatapan.
22 Anggapoy ilalo ton nibatikan toy kabilongetan, ta akaparaan so ispadan mamatey ed sikato,
23 tan manaalagar iray buitrin mangan na bangkay to. Amta to ya ambilonget so arapen to;
24 taktakoten na kapagaan tan ipatey a singa ra arin akaparaan a mibakal.
25 Onyay pansumpalan na toon ayagan toy poniti so Dios tan labanan toy Makapanyarin-amin.
26 Mapaatagey tan mananumlang yan too; lawas sankaegnaan toy samper to ta ondogpan milaban ed Dios.
27
28 Sikato yay toon anakep na saray siudad tan angalad saray abung ya imbabatkan na saray akankayarian, balet deralen na bakal ira man a siudad tan kaabungan.
29 Ag mambayag iray kayamanan to; ag mansiansia ray kayaryan to. Naandipat so anggan anino to,
30 tan ag to nibatikan so kabilongetan. Sikatoy singa sakey a kiew ya apoolan iray sanga-sanga to, tan intitikyab ed arawi na dagem iray rosas to.
31 No sikatoy makulang-kulang a manmatalek ed kaogsan anggapoy arum a nangunggona to no ag say kaogsan.
32 Kasakbayay panaon to nalaylay la; nalenes a singa sanga tan namagaan la.
33 Magmaliw a singa wakal na ubas ya apagpag iray maetan bunga to; singa kiew na oliban apagpag iray rosas to.
34 Anggapoy nakeraan a kabyangay boleg na saray totoon anggapoy Dios da, tan deralen na apoy so abung a nipaalagey lapud pasoksok.
35 Sikara yay totoon mamplaplanoy kaogsan tan manggagaway golo; napno lawas na panamalikdo so kapusoan da.
1 "Inmebat si Job:
2 "Akadngel ak na saray salitan singa saraya nen saman; gunigon labat so iiter yon ligliwa.
3 "Ag kayo la onsawan mansalita? Sikayo lawas so kaonuran a nepeg a dengelen?
4 "No pasen yoy pasen ko tan pasen koy pasen yo, nibagak iray ibabaga yo. Napeyeng-peyengan ta kayo, tan nayarian koy ag ontondan mansalita sumpad sikayo.
5 "Napabiskeg koy linawa yo lapud saray simbawak, tan ag ak mampainawan mansalita a panligliwak ed sikayo.
6 "No mansalita ak ag naekal so liliknaen ko, tan no ag ak onesel ag ak nainomayan ed paniirap ko.
7 "Pinakapoy mo ak lan maung, O Dios; inyabuloy mon ompatey iray kabyangay pamilyak.
8 "Inerel mo ak, ta sikay kalaban ko. Kabatbaog tan kapokepokel ak la, et ipapasen ya na saray totoo a mamaneknek ed impankasalanan ko.
9 "Diad pasnuk na Dios, tinetegteg toy intiron laman ko, panngiletan to ak, tan mandarlang iray mata tod siak.
10 Elek-elekan ak na saray totoo; momokuten da ak insan da ak tamtampalen.
11 Impalima ak na Dios ed saray totoon maoges.
12 Mambibilay ak nen saman ed kareenan, balet say Dios tinekmelan to ak ed beklew insan to ak imbabasig a pinairap. Ipapasen to ak a sakey a kekenaen,
13 insan to ak papanaen ed amin a dapag natatabektabek tan nasusugat-sugat ak na saray pana; anggaman ya onyay agawa, ag to ak kasian.
14 Susugaten to ak lan susugaten; dodogpaan to ak a singa masebeg a mibabakal.
15 Maneermen ak kanyan nankawes ak na sako, makapkapoy ak lan akayorung diad dabuk.
16 Ambalbalanga lay lupak ed kakaakis, linmalarag tan asiregsireg la ray matak.
17 Anggaman ontan ag ak ni angabil, tan masimoon ni so pikakasik ed Dios.
18 O Dalin, ag mo pa tatabunan iray maoges ya agawad siak! Ag mo papaolyan so katonungan a kekerewen ko!
19 Walay sakey a tasik ed tawen a mamaneknek ya ag ak nankasalanan.
20 Babalawen ak na kakaarok; manterter iray luak ed Dios.
21 Labay kon walay mangitalindeg ed siak ed Dios, a singa pangitalindeg na sakey a too ed kaaro to.
22 Daiset lan taon so akeraan a pambilay ko, tan mankukurang ak ed dalan ya ag ko la pawilen.
1 "Magano lay pangangga na bilay ko; wala ak la ed sangaban na lobuk.
2 "Bambantayan koy ontan lan pait na panagbalaw da ray totoo ed siak.
3 "Ag ak mantitila, O Dios. Sisiam iray ibabagak. Anggapoy arum a mamaneknek ed ibabagak.
4 "Sikay angikaput na kanunotan da kanyan ag ira makatalus; ag mo pa aabuloyan a sikaray manalo ed siak natan.
5 "Ibabaga na samay daan ya oliran a say toon palikdoen toy kakaaro to lapud kuarta, manirap iray anak to lapud saya.
6 "Natan saray totoo ikakana ra yan oliran sumpad siak; saray totoo ondarago ran onlulukda ed lupak.
7 "Korarap so pakanengneng ko lapud kaermenan; singa toruk la ray taklay ko tan saray salik.
8 "Mankelaw iray ipapasen day sikaran dili a matonung, tan ipapakasalanan dad siak ya anggapoy Dios ko.
9 "Saray ipapasen day sikaran dili a maptek laloy panisia ra a sikaray duga.
10 Balet no ondago ran amin a manalagey ed arap ko, anggapod sikaray makabat a narumog ko.
11 Linmabas lay panaon ko; aderal iray planok; naandi lay ilalok.
12 Balet ibabaga na saray kakaarok ya agew so labi; ibabaga ran asingger lay liwawa, balet amtak a kabilongetan so kawalaan ko nin siansia.
13 Say ilalok labat say pasen a panaayaman da ray inaatey, a dimay dokulan kon onogip ed kabilongetan.
14 Ibagak a say lobuk so amak, tan saray bigis a mangay laman ko sikaray inak tan bibiin agagik.
15 Iner ni sirin so kawalaay ilalok? Siopay makanenengneng a walay ilalok?
16 Ag milad siak so ilalo no onla ak ed pasen a panaayaman da ray inaatey.
1 "Inmebat si Bildad a taga Sua:
2 "Job, kapigay itondam a mansalita? No itondam makapitongtong kamid sika.
3 "Akin et ipapasen mo kamin anggapoy kalakal a singa baka?
4 "Papasakitan moy sikan dili labat lapud petang na olom. Nikaindan sirin mundo lapud sika? Iyalis sirin na Dios iray palandey lapud sika?
5 "Naerep so silew na maoges a too; ag lan balut ondalang so apoy to.
6 "Onkuyep so lamparaan ed tulda to.
7 "Mankitsing nen saman so kutdang to, balet natan mankitley la; saray dilin plano to so mangiparokul ed sikato.
8 "Nasabi toy patit ya iket nasinger ed satan iray sali to;
9 "nabalur iray mokur to tan sikatoy nipoger.
10 Niamut ed dalin so patit a para sikato; nitarya ed dalanen to so sakey a kalut.
11 Diad kaliber-liber to takot so manaalagar ed sikato; tombutombuk ed inerman a laen to.
12 Mayaman nen saman, balet natan nanaerasan; manaalagar ed abay to so deral.
13 Onkakayat ed intiron laman to so makapatey a sakit, tan boboluken to ray taklay to tan saray bikking to.
14 Niarawi ed tuldan panmamatalkan to, tan nigayugoy ya onarap ed Ari na Patey.
15 Nayarin manayam natan so siopaman ed tulda to kayarin awalsikan na asuprin pamatey na bigis!
16 Amagaan iray lamut to tan nalnes iray sanga to.
17 Angangga la so inkabantug to ed dilin bansa to tan diad arum a bansa; anggapo lay makanunot ed sikato.
18 Taynan to lay liwawa ya onarap ed kabilongetan; taynan to lay tapew na dalin.
19 Anggapoy akeraan a kabyangay boleg to; inaatey la ran amin.
20 Manlapud bokig ya anggad sagur, amin iray makangel ed inkagawa to, onkelaw tan onggiwgiw irad takot.
21 Sikato ya so pansumpalan na saray totoon maoges, sa pansumpalan na saray ag mangingalngalep ed Dios.
1 "Inmebat si Job:
2 "Akin et ag yo ak la tondaan a pairapen diad panamegley na saray salita?
3 "Papabaingan yo ak lan papabaingan; ag kayo la ambaing a manggaway makapoy ed siak?
4 "Anggan ipasen bilang a nankasalanan ak, antoy pibabali yo ey?
5 "Abaloan yo a maung kayo nen say siak, tan ipapasen yo a say paniirap ko so paneknek a nankasalanan ak.
6 "Nepeg yon amtaen a say Dios so nanggawad sayan kairapan; pinatitan to ak ya inerel.
7 "Manririklamo ak ed inkaruksa to, balet anggapoy onderengel; anggapoy onderengel ed ikekerew koy katunongan.
8 "Sinaraan na Dios so dalan, kanyan ag ak makalabas; kinobutan to na bilonget so dalan ko.
9 "Pinaandi to ray amin a kayamanan ko, tan dineral toy kagalangan ko.
10 Babakbaken to ak ed anggan iner a dapag. Babagoten ton singa kiew so ilalok, insan tataynan to ak a nalenes tan ompatey.
11 Mapalaloy pasnuk na Dios ed siak; ipapasen to ak a sakey a kalaban to.
12 Ibabaki ton ondogpad siak iray sondalo to; mankokotkot iray abut ya amutan da tan kokobkoben day tuldan panaayaman ko.
13 Say Dios impaikaindan to ak ed saray agagik; ag ak la kabat na saray kabat ko nen saman;
14 nagsitaynan la ray kakanayon tan saray kakaarok.
15 Alingwanan ak la na saray sinasangkailik nen saman ed abung ko; saray katulong kon bibii ipapasen da ak lan sangkaili tan taga arum a bansa.
16 No tawagen koy sakey ya aripen, ag to ak ebatan anggaman a mikakasi ak a patulongan.
17 Ag natepelan na asawak so banget na sangik, tan ag ak singgeran na saray anggan dilin agagik.
18 Balbalawen ak na saray ogogaw tan elek-elekan da ak no nanengneng da ak.
19 Kabkabosul ak na anggan saray malet a kakaarok; ginula ak na saray pinabpablik nen saman.
20 Kapokepokel ak la; ngalngali ag ko aliktaray patey.
21 Kakaaro ta kayo! Kasian yo ak! Tinomba ak la na Dios.
22 Akin et papairapen yo ak a singa pamapairap na Dios? Ag kayo ni nakda ed pamapasakit yod siak?
23 Oy la komun a walay ag makalingwan ed sarayay ibabagak, tan isulat to rad sakey a libro.
24 Odino nitatak komun ed baton-dampay ira yay salitak, pian mansiansia ra ed ando lan ando.
25 Balet amtak a walad tawen so sakey a manangyagel ko, onsabid kaonuran a mangyagel ed siak.
26 Anggaman a naoput na bigis yay baog ko, legan a wala ak nid sayan laman ko nanengneng ko so Dios.
27 Nanengneng na saray dilin matak, et aliwan sangkaili ed siak. Nakalan ak na biskeg na linawa lapud kuanyo,
28 Panoy pamairap tayod sikato? Nananap kayoy pamasengegan yoy pangabil yod siak.
29 Balet natan, takotan yoy ispada say ispadan mangyakar na pasnuk na Dios ed kasalanan, pian naamtaan yo a walay manintinsia.
1 "Inmebat si Sofar a taga Naaman:
2 "Job, ginolom so kanunotan ko, kanyan ag ko la natepelan so onebat.
3 "Sakey a panamabaing ed siak iray imbabagam, balet amtak no panoy iyebat kod sika.
4 "Andi duaruwa ya amtam a nanlapu la nen saman, nen inmonan nipasen ed tapew na dalin so too,
5 "anggapoy maoges a toon nambayag so impanliket to.
6 "Nayarin ombaleg ya anggad tawen, tan diad kaatagey to natokdul na olo to iray lorem,
7 "balet singa dabuk ya itikyab na dagem. Saray gendat a makapikabat ed sikato onkelaw ira no iner so nakar to.
8 "Naandipat a singa sakey a kogip, singa pasingayew ed labi, insan ag lan balut nanengneng.
9 "Ag la nanengneng na saray gendat ton kakaiba; naandi la ed pasen a gendat ton nanayaman.
10 Magmaliw a mikakasi ed saray mairap-bilay iray anak to, tan sikaray mangipawil na saray tinatakew to.
11 Malangwer tan mabiskeg nen saman so laman to, balet ag mabayag magmaliw a dabuk.
12 Mananam ed sikato so kaogsan tan masamsamit ton molmolmolan.
13
14 Balet diad eges to magmaliw ya ampait a kakanen, ampaipait a singa samal.
15 Say maoges a too iyoota toy kayamanan a tinatakew to; babawien na Dios ya alaen anggan walad dalem na eges to.
16 Singa samal so kaogsan ya aakmunen na maoges a too; mamapatey ed sikato a singa ketket na nanditan oleg.
17 Ompatey la kasakbayay pakanengneng tod saray ilog na larak na oliba, odino saray kolus a panagagosay gatas tan dilo.
18 Nakaukolan ya ipawil to ray amin a nanlingetan to; anggapoy pankanawnawa ton manliket ed kayamanan to,
19 lapud pinapairap tan inkakaindan to ray mairap-bilay, tan sinasamsam to ray abung ya impapaalagey na saray arum a totoo.
20 Ag balut napenek so inkaagom to.
21 No mangan anggapon balut so nakeraan, balet natan mansamput la so aligwas to.
22 Diad panaon na iyali-aligwas to, ondetdet ed sikatoy amin a belat na kairapan.
23 Paolyan mon mangan na labalabay to! Diad ontan lan pasnuk na Dios dusaen to.
24 Diad ibatik ton ompaliis ed ispadan balatyang, nakena na panan gansa.
25 Ontalus ed laman to so sakey a pana; onterter ed masileng ya otuk na pana so dala to, tan nalemay so puso to ed takot.
26 Naderal ya amin iray tinipon ton kayamanan; sakey ya apoy ya ag pinadalang na limay too, so mamool ed sikato tan amin a kabyangay pamilya to.
27 Ipatnag na tawen to kasalanan na sayan too, tan mantasi so dalin sumpad sikato.
28 Amin a kayamanan to naderal ira no onsabiy agew na pasnuk na Dios.
29 Sikato yay pansumpalan na saray totoon maoges, say pansumpalan ya ipabetang na Dios ed sikara.
1 "Inmebat si Job:
2 "Dengel yon maung so ibagak sikato ya labat so ligliwan kerewen kod sikayo.
3 "Itdan yo ak ni na pankanawnawan mansalita, et no kayarik balaw yo ak labat, no labay yo.
4 "Aliwan say too so kakokol ko; walay manepeg a makasenged no akin et ag ak makaanos.
5 "Nengneng yo ak. Ag ta la makatalagnaw tan makamemet na sangi so nanengneng yo?
6 "No nudnunoten koy agawad siak, nagugunigon ak tan mampayegpeg so laman ko.
7 "Akin et aabuloyan na Dios a mambilay na andokey iray totoon maoges, ombiskeg tan onaligwas ira?
8 "Naimatonan dan ombabaleg iray anak da tan saray apo ra.
9 "Ag iiyabuloy na Dios a naderal so kaabungan da; anggapoy nepeg dan takotan ed pambilay da.
10 On, manlolokun iray baka ra, tan manaanak iran anggapoy maoges a nagagawa.
11 Singa kordiron batik-batik tan manggagalaw iray anak da,
12 mansasayaw tan manliliket ira legan a totogtogen iray arpa tan plauta.
13 Maaligwas ira legay pambilay da, tan mareen ira no naoyus so linawa ra.
14 Saray totoon maoges ibaga rad Dios a paolyan to ran bukbukor; ag da labay ya amtaen so linawa tod bilay da.
15 Isipen da ya ag nakaukolan so manlilingkur ed Dios, tan andi-kana so mampikasi ed sikato.
16 Ipasen da ya inmaligwas ira lapud dilin biskeg da, balet ag ko abubonan so ontan a pananisia ra.
17 Amimpiga lan narep so lamparaan na saray maoges a totoo? Wala lay dinalan na deral ed sikara? Dinusa ta la na Dios ed pasnuk to iray totoon maoges,
18 tan impagmaliw to ran singa taep ya impalir-palir na dagem, odino dabuk ya intitikyab na bagyo?
19 Ibabaga yo a say Dios dusaen toy anak lapud saray kasalanan na ama to. Andi! Padusa yod Dios iray makasalanan, tan ipanengneng tod sikara a dusaen to ra lapud saray dilin kasalanan da.
20 Ipaako yod saray makasalanan so dusa ran dili; ipalikna yod sikara so sanuk na Makapanyarin-amin a Dios.
21 No anggangga lay bilay na sakey a too, mapaga ni kasi ed pankaabigan da ray anak to?
22 Nayari kasin ibangat na too so Dios a huis na anggan saray atagey so betang da?
23 Wala ray totoon maung so impanlaman da ya anggad ipatey da; mainomay tan maliket iran ompatey, balibali tan mabiskeg so laman da.
24
25 Saray arum anggapon balut so liket da; mambilay tan ompatey iran maermen.
26 Balet nampapara ran ompatey tan ipompon; kanen iran amin na saray bigis.
27 Amtak no antoy nununoten yo, tan say plano yon manggaway maoges ed siak.
28 Tepeten yo, Iner so kawalaan la natan na abung na matalonggaring a too, samay toon maoges so ginagawa to?
29 Ag kayo ta ni akapitongtong ed saray totoon managbiahi? Ag yo ta amta so awit dan balita?
30 Diad agew na isabiy pasnuk tan pananusa na Dios, say toon maoges so nilaban lawas.
31 Anggapoy mangakusa ed maoges a too, tan ombales sed sikato lapud saray ginagawa to.
32 No sikatoy itolur ed kamposanto diad kawalaay lobuk ton guardiado,
33 nilibo ray mitolor ed sikato, tan anggan say dalin balibalin nitapew ed bangkay to.
34 Balet sikayo, andi-kakanaan so panliligliwa yod siak! Tilan amin iray ebat yo!
1 "Inmebat si Elifaz:
2 "Wala tay too, anggan sikatoy sankakabatan, a nayarin makana ed Dios?
3 "Manliket kasiy Dios lapud matonung ka, odino wala kasiy nagunggona to no anggapoy pakabalawan ed panagbilay mo?
4 "Aliwan lapud walay takot mod Dios so makasengeg na pamapasnuk tan panisintinsia tod sika.
5 "Andi, no ag ingen lapud dakerakel iray kasalanan mo, tan lapud ag ontonday kaogsan mo.
6 "Pian makabayar so agim ya akautang ed sika, inalam iray kawes to kanyan anggapoy nisolung to.
7 "Ag mo initdan na inomen iray naksawan, tan ag mo initdan na nakan iray narasan.
8 "Inkanam so pakayarim tan kipapasen mo pian naalam so intiron dalin.
9 "Ag mo tinulongan iray balon bibii a sinmisingger ed sika; tinatakewan tan pinapairap mo ray olila.
10 Kanyan natan aliber ka na saray patit, et biglan mapalaloy kataktakot mo.
11 Binmilonget kanyan ag ka makanengneng, et tabunan kay danum na delap.
12 Ag ta manaayam ed sankatageyan a tawen so Dios, tan ososdongan to ray bitewen anggaman ya atagtagey ira?
13 Balet tetepeten mo, Antoy amta na Dios? Asaniban na lorempanoy pakapansintinsia tod sikatayo?
14 Abaloan mo ya ag makanengneng so Dios, ta asaniban na makapal a lorem, legan a manaakar ed tapew na tambobung na tawen.
15 Mansiansia kan mankurang ed dinadalan na saray totoon maoges?
16 Kasakbayan na insabiy panaon da, sinmabiy delap ya angyanur ed sikara.
17 Sikara yay totoon angipolisay ed Dios tan inisip dan anggapoy nagawaan tod sikara.
18 Balet diad tuay tua say Dios so amaaligwas ed sikara ag ko natalusan iray kanunotan da ray totoon maoges.
19 Maliket iray maung a totoo tan makakalek iray matonung no nanengneng dan nadusa ray totoon maoges.
20 Ikuanda, Aderal so kayamanan da ray totoon maoges, tan pinadapul na apoy so antokaman nin nakdaan.
21 Job, mipulangan ka la natan ed Dios tan ag mo la ipapasen a kalaban mo; no gawaen moy onya, bindisionan to ka.
22 Awat moy bangat ya iiter to; iyan mod pusom iray salita to.
23 On, nepeg kan ompawil a sipapaabeba ed Dios, tan ekal mo lay amin a kaogsan a nagagawad dalem na abung mo.
24 Ibantak mo ray balituk mo; tan ibasuram ed nakatan a kelas iray sankaabigan a balituk mo.
25 Ipasen mo lan say Makapanyarin-amin a Dios so balituk mo tan sankaabigan a pilak mo.
26 Diad ontan manmatalek ka lawas ed Dios tan narumog mo a sikatoy sobul na gayagam.
27 No mampikasi ka, ebatan to ka, et diad ontan sumpalen mo ray sipan mo.
28 Onaligwas ka ed amin a gawaen mo, tan onsindag so liwawa ed dalan mo.
29 Paabebaen na Dios iray mapaatagey tan iyagel to ray mapaabeba.
30 Iyagel to ka no anggapoy kasalanan mo, no say kaptekan so gawaen mo.
1 "Inmebat si Job:
2 "Manriklamo ak ni sumpad Dios; ag ko nitepel so ag manngesnges lapud pamapairap tod siak.
3 "Oy la komun ta amtak so pananapan kod sikato, tan amtak no panoy pakakar kod kawalaan to.
4 "Mipalinewan ak ed sikato, tan ipaliwawak ya amin so katunongan ko.
5 "Labay kon amtaen no antoy ibaga tod siak, tan no panoy iyebat to.
6 "Ipakana na Dios kasi so intiron biskeg to sumpad siak? Andi, ondengel no mansalita ak.
7 "Maptek so panagbilay ko; nayarian koy mipalinewan ed Dios; ibawag tod satan ya anggad angga ya anggapoy kasalanan ko.
8 "Nananap ak ed Bokig, balet andid man so Dios; tan ag ko arumog nen inanap kod Sagur.
9 "Say Dios nankimey ed Baybay tan diad Sagur, balet siansian ag ko anengneng.
10 Anggaman ontan amta toy kurang ko; no sobuken to ak narumog ton malinis so panagbilay ko.
11 Matoor kon totombuken so pinili tod dalanen ko, tan ag ak balut onsuasuawi.
12 Oonuren ko lawas iray Ganggan na Dios; susumpalen koy linawa to, aliwan say dilin labay ko.
13 Sikatoy ag balut mangoman. Anggapoy makasumlang ed sikato odino makabaat ed labay ton gawaen.
14 Sumpalen toy getma to nipaakar ed siak; sayan getma to et sakey ed saray amayamay a getma to.
15 Manggiwgiw ak ed takot no wala ak ed arap to.
16 Pinakapoy na Makapanyarin-amin a Dios so linawak. Say Dios, aliwan say kabilongetan, so mamapatakot ed siak anggaman a binulag ak na bilonget.
1 "Akin et ag mangibiig so Makapanyarin-amin a Dios na panaon a panagsintinsia, say agew a pangiter na katunongan ed saray manlilingkur ed sikato?
2 "Wala ray totoon mangyalis na ketegan pian makagamgam iray dalin; mantakew ira na saray karniro insan da ilauk ed saray papastulan da.
3 "Ibatik da ray asno na saray olila; ipokuk day baka na biin balo ya anggad pakabayar to na utang tod sikara.
4 "Ekalan da ray mairap-bilay na saray kanepegan; pasooten dan ombatik tan onamut iray walad pankaukolan.
5 "Kanyan saray mairap-bilay, singa ra asnod katakelan a mananap na nakan ed amagan kalawakan, pian napakan da ray anak da.
6 "Nakaukolan a miani ra ed kaalogan na arum a totoo, tan mitortor irad kaubasan na saray totoon maoges.
7 "No labi onogip iran anggapoy oles, anggapoy makapapetang na laman da.
8 "Napoyut ira lapud oran ya ompelag ed kapalandeyan; mantitipon irad satan ya onsirum ed abay na saray ankakabaleg a bato.
9 "Saray totoon maoges pagmaliwen dan aripen iray ogogaw ya olilad ama, tan alaen da ray anak na mairap-bilay a pinagkabayar na pautang da.
10 Balet saray mairap-bilay ompaway iran anggapoy kawes tan narasan iran manani na trigo.
11 Manlarak ira na oliba tan manggawa ray alak na ubas, balet sikaran dili, napgaan ira.
12 Diad saray siudad onakis iray sugatan tan saray ompapatey, balet ag imanoen na Dios so pikakasi ra.
13 Wala ray totoon ipolisay day liwawa; ag da natalusan tan ag da labay a tombuken so panangiwanwan to.
14 Ompaway no palbangon so managpatey na too tan pateyen to ray mairap-bilay, insan diad labi mantakew.
15 Say mikakaloguran alagaren toy isabiy labi, insan to sakuban lupa so to pian anggapoy makabirbir ed sikato.
16 Diad labi onloob ed kaabungan iray matakew, balet ibatikan day liwawa tan onamut ira no agew.
17 Antakot day liwawa na agew, balet anggapoy takot da ed anggan antoy bilonget. [Inmebat si Zofar]
18 Inyanur na delap so toon maoges, tan insamba na Dios so dalin to; ag la onlan mankimey ed kaubasan to.
19 No panoy kaandi na yilo no ampetang so panaon tan anggapon balut so oran, ontan met so kaandid tapew na dalin na makasalanan.
20 Anggapo lay makanunot ed sikato, anggan say dilin ina to; oputen na bigis so laman to tan sigput a naderal a singa atumban kiew.
21 Onyay nagawa lapud makapoy so ginawa tod saray bibiin balo tan ag to kinasian iray bibiin lepes.
22 Diad biskeg to, say Dios deralen toy makapanyari; onggalaw so Dios et ompatey so toon maoges.
23 Nayarin say Dios pambilayen to ya arawid kaatapan, balet ag to alisay mata anggan kapigan.
24 Say toon maoges onaligwas a magano balet insan namagaan a singa dika, singa ginapas a pagey.
25 Walay makapangibaga ya aliwa yan tua? Walay makapaneknek ya aliwan tua ray salitak?
1 "Inmebat si Bildad:
2 "Makapanyari so Dios; nepeg a takotan na amin; pansiasiansiaen ton mareen so mangatatawen a panarian to.
3 "Wala tay makabilang ed saray managlingkur ton anghil? Wala tay pasen ya ag nasindagan na silew na Dios?
4 "Panon a magmaliw a matonung o malinis ed arap na Dios so sakey a too?
5 "Diad pakanengneng to, anggan say bulan aliwan maliwawa, tan saray bitewen aliwan malinis.
6 "Insan lad saray totoo a sakey a bigis, sakey ya alombayar? Mabli kasi ed arap na Dios?
1 "Inmebat si Job:
2 "Agaylay impanulong mod siak, siak a sakey ya anggapoy lay pakayari, tan naandian na biskeg!
3 "Agaylay abig na simbawan inter mod siak, tan say kakabatan ya inter mod siak anta makulang-kulang ak.
4 "Siopay abaloan mon ondengel ed amin a salitam? Siopay angipuyan ed sikan mansalita na singa onya? [Inmebat si Bildad]
5 "Mampayegpeg iray ispiritu na saray inaatey a wala rad danum diad silong na dalin.
6 "Sankanengneng na Dios so pasen a panaayaman da ray inaatey; anggapoy makasanib ed mata to.
7 "Impanat na Dios so baybay a tawen, tan imbitin tod liwang so mundo.
8 "Sikatoy mamapano na danum ed saray lorem, tan mamopokpok ed ipelag da anggan ambelat la ra.
9 "Iyaamut tod sanib na lorem so baleg a bulan.
10 Imbiig toy liwawa ed bilonget, diad panamegley na malimpek a gulis ed tapew na dayat.
11 No pampasnukan to ray lusek na tawen, onggalaw tan onggiwgiw irad takot.
12 Lapud pakayari to tinalo to so dayat, lapud karunongan to pinatey toy dragon a Rahab.
13 Lapud ingas to pinaliwawa toy tawen, tan diad lima to pinatey toy ombabatik a dragon.
14 Melag labat ira yan kabyangan na pakayari to; esaes labat so nadngel tayo. Siopay makapikabat no kaonungay kabaleg na pakayariy Dios?
1 "Inmebat si Job:
2 "Isambak ed ngaran na mabilay a Makapanyarin-amin a Dios, ya angekal na kanepegan ko tan amapait na bilay ko
3 "legan a paingasen ak na Dios;
4 "say bibil ko ag mangibalikas na antokaman a maoges; say dilak ag mantila.
5 "Ag kon balut ibaga a sikayo so duga; legan a mabilay ak ipasoot kon anggapoy kasalanan ko.
6 "Anggan kapigan italindeg ko a wala ak ed katonungan; malinis so konsinsiak ed kapigan man.
7 "Amin iray onsusumpa tan onlalaban ed siak, nadusa ra komun a singa kanepegan da ray totoon maoges tan aliwan matonung.
8 "Antoy ilalo na toon anggapoy Dios to, no babawien la na Dios so bilay to?
9 "No gunigon so onsabid sikato, dengelen kasi na Dios so itawag to?
10 Nampilalekan to komun so liket ya iiter na Dios, tan nampikasi lawas komun ed sikato.
11 Aboluyan yo ak a mangibangat ed sikayoy ontan lan kabaleg na pakayari na Dios, tan mangipaliwawa na ginetma na Dios a Makapanyarin-amin.
12 Balet andi la, ta anengneng yo met lamlamang; akin sirin et mansasalita kayoy andi-kakanaan? [Inmebat si Zofar]
13 Onya so panusa na Makapanyarin-amin a Dios ed maoges tan managpairap a too.
14 Nayarin nawalaan na amayamay ya anak a lalaki, balet napatey iran amin ed bakal; kulang lawas so tagano da ray anak to.
15 Ompatey ed salot iray makaligtas ed bakal, et ag manermen iray anggan kaasawaan da.
16 Nayarin daakan so pilak na toon maoges, tan dakerakel iray kawes to;
17 balet isolung na saray totoon matonung iray kawes to, tan apagen na saray anggapoy kasalanan iray pilak to.
18 Singa abung na genggeng so abung ya ipaalagey na toon maoges, odino singa alolung ed alog a panagbantayan na sakey aripen.
19 Onogip a mayaman no maminsan a labi, et kabangon tod kabwasan anggapo lay kayamanan to.
20 Onsabid sikatoy takot a singa biglan delap; say alimbuasabos ed labi itikyab tod arawi;
21 say dagem a manlapud bokig so mangyarawid sikatod abung to;
22 onsiplug ed sikato ya andi-panangasi, legan a gagawaen toy anggaay nayarian ton onarawi.
23 Mambanesbes ya ombasig so dagem ed sikato legan ya ombabatik, tan patakoten to lapud pakayari ton manderal.
1 "Wala ray minas a pangokotkotay pilak; Wala ray pasen a panggogogolay balituk.
2 "Nakotkot ed dalin so balatyang Tan naalad saray bato so gansa.
3 "Susukimaten na saray totoo so sankabilongetan a pasen. Panaanapan day dalem na dalin, Tan mankokotkot iray ankakabaleg a bato ed kabilongetan.
4 "Saray totoo mankokotkot iray minas ed dalem na dalin, Diad pasen ya arawid panaayaman na totoo Tan ag balut nagagatinan. Diman bukbukor day mankikimey Tan bitin-bitin irad saray lobir.
5 "Ontotobod dalin iray tagano, Balet diad dalem to yan dalin Wala ray mankokotkot tan mandederal.
6 "Walay sapiro ed saray bato na mundo, Tan walay balituk ed dabuk to.
7 "Anggapoy wawak a makapikabat ed saray dalan a mamaarap ed saray minas, Anggan saray agila ag da ni ra anengneng.
8 "Anggapoy lion odino arum a masebeg ya ayep Ya akasali lan nankurang ed sarayan dalan.
9 "Kokotkoten na saray totoo iray sankaawetan a bato, Kotkoten da ray pundasion na saray palandey.
10 Diad panggagawa ra na saray usok, Makakalmo ra na saray mabmablin bato.
11 Kokotkoten da so anggad panlalapwan na saray ilog tan ipapaway dad liwawa so antokaman a niamut.
12 Balet iner so pakalmoan na kakabatan? Iner so pakaaralan na pakatalus?
13 Ag narumog ed saray totoo so kakabatan; Anggapoy makaamta na petepeteg a kablian to.
14 Ibabaga na kaaralman na saray ilog tan saray dayat Ya ag narumog diman so kakabatan.
15 Ag nasaliw na balituk tan pilak.
16 Say bili na saray sankarakepan a balituk tan alahas Ag makapipara ed bili na kakabatan.
17 Mabli nen say balituk, Nen say ikakanan balituk odino sankarakepan a salming.
18 Say kakabatan mabli Nen say koral o kristal o pirlas.
19 Say sankaabigan a topasio tan say balituk a sankapuroan, Et ag ira mipara ed kablian na kakabatan.
20 Iner, sirin, so pakalmoan na kakabatan? Iner so pakaaralan na pakatalus?
21 Anggapoy mabilay a pinalsa a makanengneng ed kakabatan, Anggan say manok ya ontitikyab.
22 Bibirbiren na anggan say patey tan say deral, A dengel-dengel labat so amta ra.
23 Say Dios labat so makaamta na dalan; Amta to so pasen a pakarumogad kakabatan,
24 Lapud sankanengneng toy amin a sokung na mundo, Tan amin a bengatlan walad silong na tawen.
25 Nen inter na Dios so pakayari ed dagem Tan inggetar toy kabaleg na dayat;
26 Nen ginetma na Dios no iner so kapelagan na oran, Tan no iner so dalanen na kirmat,
27 Anengneng tod satan so kakabatan tan sinubok toy kablian to, Et apaknaan to.
28 Inkuan na Dios ed too, Magmaliw kan makabat no takotan moy Katawan, Nawalaan kay pakatalus no ibatikan moy kaogsan.
1 "Nansalita lamet si Job:
2 "Komun ta napapawil ira may agew a linmabas, nen bambantayan ak na Dios!
3 "Say Dios wala lawas ed siak nen saman; nen manaakar ak ed bilonget inantabay to ak na liwawa.
4 "Nen saraman ya agew maaligwas so bilay ko, tan say pikakaaro na Dios inyagel toy ayaman ko.
5 "Wala nid saman ed siak so Dios, tan siber-siber ed abay ko iray anak ko.
6 "Maniiter nen saman na daakan a gatas iray bakak tan saray kanding ko, tan saray kiew na olibak mabonabona ra anggan saray walad kabatowan.
7 "No mantitipon nen saman iray mamasiken na siudad, et siak met lad satay mikasakey ed sikara,
8 "mankalkalna met lan onoyus iray tobun-balo no kanengneng dad siak, tan nagsialagey iray pangulo na saray totoo.
9 "Ontondan mansalita iray pangulo na saray totoo;
10 namemet iray anggan manonan totoo.
11 Balang sakey ya akanengneng ed siak odino akadngel na nipaakar ed siak et maabig so nibaga ra nipaakar ed saray ginagawak.
12 Tinutulongan ko ray mairap-bilay ya inmeey-ey; tinutulongan ko met iray olila a solingsoling.
13 Indadayew ak na saray sankapangaskasiyay kipapasen, tan pinaligen koy bilay da ray bibiin balo.
14 Ginawak lawas so anggaay nayarian ko a manumpal na kaptekan tan katunongan.
15 Nagmaliw ak a mata da ray bulag, tan sali da ray lopuy.
16 Singa ak ama ed saray mairap-bilay, tan akigampi ak ed saray sangkailin walay gunigon.
17 Dinederal koy pakayari da ray maruksan totoo tan inyaagel ko ray papairapen da.
18 Inilaloan ko a mambilay ak na andokey tan ompatey ak a maliket ed abung.
19 Singa ak kiew a kinmayamkam ed danum iray lamut to, tan kapag labi binasa na linaew iray sanga to.
20 Indadayew ak nen saman na amin a totoo, tan nansiansia lawas so biskeg ko.
21 Nen naniiter ak na simbawa, marereen iray totoo tan marengerengel irad saray ibabagak;
22 anggapo lay niarum da no kasumpal kon manimbawa. Saray salitak sinmepsep ed muling da a singa oran ed dalin;
23 maliket iran amin ya angawat a singa saray dumaralus a maliket a mangawat na oran no tiagew.
24 Iniimisan ko ra nen kinmakapoy so linawa ra; binmiskeg so linawa ra nen anengneng day masayaksak a lupak.
25 Nagmaliw ak a pangulo tan imbabagak so nepeg dan gawaen; inwawanwan ko ran singa panangiwanwan na ari ed saray sondalo to, tan nililigliwak ira nen maermen ira.
1 "Balet saray malangwer nen say siak a lalaki luludlureyen da ak natan! Andi kakanaan iray kaamaan da, kanyan ag ko ra labay ya anggan pangibaen ed saray asok a mangguardiad saray karniro.
2 "Lalaki ran naoput lay biskeg da; diad inkakapoy da ag da la nayariay mankimey para siak.
3 "Mairirap so bilay da tan narnarasan ira; nanngangatngat iray anggan saray amagan lamut no labi, diad makapataktakot tan makapaermen a pasen so nanaayaman da.
4 "Binabagut tan kinakakan da ray tanaman ed kalawakan, anggan saray anggapoy taway a lamut na kiew!
5 "Balang sakey a too ineyagan to ran pinaarawi; naeyagan iran singa matatakew.
6 "Apilit iran manayam ed saray ongib, diad saray abut ed gilig na baton ankabaleg.
7 "Maneeyag irad kalawakan a singa saray ayayep tan nambubuntonan irad silong na saray abeban kiew.
8 "Totoo ran andi-kakanaan tan anggapoy kalakal! Pinapataynan da rad paway na bansa.
9 "Balet natan wadya ran elek-elekan da ak; ipapasen da ak a sakey a toon ludlureyen.
10 Kabosubosul da ak; abaloan dan ag ak manepeg ed sikara, tan ag da kawkawanan ingen a lukdaan ak ed lupa.
11 Lapud say Dios impagmaliw to ak a makapoy tan dinusa to ak, ontan lay pasnuk da ed siak.
12 Dodogpaan da ak ira yan olup; pababatiken da ak; ipaparaan day kaonuran ya idogpa rad siak.
13 Sasaraan day pakaliktaran ko pian napatey da ak; anggapoy mamatonda ed sikafa.
14 Onsosorub irad saray abut na panaamutan ko, tan nambobontunan iran pinmata ed siak.
15 Asabian ak na baleg a takot; say kagalangan ko naandin singa dagem, tan say aligwas ko naandipat a singa lorem.
16 Natan ngalngali ak la ompatey; ag ak nanainawaan ed liliknaen kon kairapan.
17 No labi ansakisakit iray pokel ko; ag ontonday otut a liliknaen ko.
18 Say Dios tetekmelan to ak ed beklew tan kekeskesen to so kawes ko.
19 Ibabantak to ak ed kapitekan; nagmaliw ak a singa dabuk tan dapul.
20 Ontatawag ak ed sika, O Dios, balet ag mo ak ebatan; no mampikasi ak ag mo ak asikasoen.
21 Nagmaliw kan maruksa ed siak; iyooput moy pakayarim ed pamapairap mod siak.
22 Aabuloyan mon itikyab ak ed arawi na dagem; papaibasig-basig mo ak ed maples a bagyo.
23 Amtak ya iyaakar mo ak la ed patey, say pansumpalan na amin a mabilay.
24 Akin et kakabilen moy toon nanairapan lan maung, ya anggapo lay nagawaan to no ag ta manalagar labat na panangasi?
25 Ag ko ta akidamay ed saray walay gunigon tan akiliknad saray walad pankaukolan?
26 Nanilalo ak ed isabiy liket tan liwawa, balet gunigon tan kabilongetan so sinmabid siak la laingen.
27 Lapud kapagaan tan sakit singa ak abingbingkas; kairapan labat so walad siak ya inagew-agew.
28 Maermen so kankukurang ko tan anggapoy ligliwa; manalalagey ak ed simpuk da ray totoo tan kerew-kerew ak na tulong.
29 Say bosis ko et pangaskasi tan makapaermen, a singa pankiak na manok odino panngakngak na kilaw.
30 Nagmaliw ya andeket so baog ko; napopoolan ed kapepetang ko.
31 Nen saman maliket a togtog so narerengel ko, balet natan say tanul na ermen tan akis.
1 "Sinambaan ko ya ag ak onlinggis a walay marotak a getmak ed sakey a marikit.
2 "Antoy gagawaen na Dios a Makapanyarin-amin ed sikatayo? Panoy ibabales tod saray gawa na too?
3 "Ipapadalan toy deral tan kairapan ed saray managgaway kaogsan.
4 "Amta na Dios iray amin a gagawaen ko; sankanengneng toy balang kutdang ko.
5 "Ag ak nanggawa na antokaman a kaogsan, tan anggapoy pinalikdok a siopaman.
6 "Simbangen ak komun na Dios ed anggapoy saol a simbangan, pian nanengneng ton anggapoy kasalanan ko.
7 "No sinmian ak ed maptek a dalan, odino naayat ak ed kaogsan, no amansaan so limak na kasalanan,
8 "naderal komun ya amin iray tanaman ko, odino sananey so maninawa ed intanem ko.
9 "No naayat ak na asawa na kaabay ko, tan nanalagar ak ya akaamut ed paway na puirta to,
10 mamparaan komun so asawak na kanen na sananey a laki tan miogip ed dokulan na sananey a laki.
11 Mapalalo yan kasalanan tan nepeg a patey so dusa to.
12 Singa manliub tan ag naerep ya apoy a mangoput ed amin a kayaryan ko.
13 Nen nanriklamo ed siak so sakey ed saray aripen ko, dinengel ko tan ginawak so kanepegan ko.
14 No ag ko dinengel, panoy piarap kod Dios? Antoy nibagak no sinmabin manintinsiad siak?
15 Ag ta say Dios ya amalsad siak et sikato met so amalsad saray aripen ko?
16 Ag kon balut insiblet so tulong kod saray mairap-bilay; ag ko inabuloyan a mambilay ed kaermenan iray bibiin balo;
17 odino pinaolyan a narasan iray olila anta walay kanen ko.
18 Legan na impanbilay ko inaasikasok ira.
19 Nen walay amtak a mankaukolan ya ag makasaliw na kawes to lapud kairapan to,
20 initdan ko na kawes a lana a ginawad bago na saray karnirok. Indayew to ak ed satan tan akisalsalamat.
21 No walay olilan sinaol ko, lapud amtak a manalo ak ed korti,
22 napoter komun iray taklay ko; naekal ira komun ed takeb ko.
23 Antakot koy pananusa na Dios, kanyan ag ko nayarian a gawaen yan kaogsan.
24 Ag kon balut nanmatalekan so kayamanan
25 odino impasirayew so dakerakel a kayamanan ko.
26 Ag kon balut inggalang so maliwliwawan agew, odino say marakerakep a bulan.
27 Ag ak atukso a manggawa ed saya, diad impangangub kod limak a pangigalang ed sarayan pinalsa.
28 Say nepeg a dusa na sayan kasalanan et patey; paandien ton wala so Makapanyarin-amin a Dios.
29 Nen naniirap iray kalaban ko ag ak balut nanliket, odino nanggayaga nen walay dinmalan a deral ed sikara.
30 Ag ak nankasalanan, ta ag ko impikasi ya ompatey ira komun.
31 Kabat na saray katulong kon lalaki a pinarawes ko lawas iray sangkaili.
32 Ag ko inabuloyan ya onogip ed saray dalan iray managbiahi, no ag ingen pinarawes ko rad abung ko.
33 Iyaamut na arum a totoo iray kasalanan da, balet ag kon balut iyaamut iray kasalanan ko.
34 Ag kon balut tinakotan so ibaga na saray totoo; ag ak balut nandeen odino nanayam ed abung lapud antakot koy panagbalaw da.
35 Anggapoy ondengel ed sasalitaen ko? Sambaan ko a tua ray amin a salitak. Ebatan ak komun na Dios a Makapanyarin-amin. No nisulat komun iray ipapakasalanan na kalaban ko, pian nanengneng ko ra,
36 sililiket ko ran sakbaten ed takeb ko odino agtoen ira a singa korona.
37 Ibagak ed Dios iray amin a ginagawak, tan mataletalek ak a miarap ed sikato.
38 No tinakew koy dadalusan kon dalin tan inalak ed peteg ya akankayaryan
39 no kinan koy naani ya ag ko binayaran, et pinaerasan ko ray dinmalus
40 aliwan say trigo tan say sibada komun so ontubo, no ag ingen saray dika tan saray kasabitan. Dia nansamput iray salita nen Job.
1 "Tinmondan inmebat ed kinen Job ira may taloran lalaki, ta ag ton balut akoen a walay kasalanan to.
2 "Balet si Eliu ag to la napokpokay pasnuk to lapud ipapasen nen Job ya anggapoy kasalanan to tan tetetelen toy Dios. (Si Eliu et lakin anak nen Barakel, kabyangay pamilya nen Buz, tan kabyangay boleg nen Ram.)
3 "Ampetang met so olo to ed saramay taloran kakaaro nen Job. Anggapoy dugan niebat da ed kinen Job, kanyan ompapaway a singa say Dios so walay kasalanan.
4 "Sankaogawan ed sikarad man si Eliu kanyan ag inmesel ya anggad asumpal iran amin a nansalita.
5 "Kanyan nen ag la ra makaebat ira may talora ed kinen Job, akapasnuk tan
6 "ginapwan toy nansalita: Ogaw ak ni, tan masiken kayo la, kanyan nababaingan tan natatakot ak a mangibagad sikayoy walad kanunotan ko.
7 "Ta kuankod siak a dili a manepeg yoy mansalita, a sikayon mamatakken nepeg yon inagnag so kakabatan yo.
8 "Balet say ispiritu na Makapanyarin-amin a Dios so onloob ed too tan mangiter na kakabatan.
9 "Aliwan lapud matakken lay too et makabat la, odino amta to lay tua.
10 Kanyan natan, dengel yo ak pa; abuloyan yo ak a mangibagad sikayoy walad kanunotan ko.
11 Inanosan koy nandengel legan yon mansasalita tan nanalagar ak legan yon mansusukimat na maung ya ibaga.
12 Inimano ta kayon maung balet ta anggapoy agawaan yo; ag yo naebatan iray imbabaga nen Job.
13 Panoy pangibaga yo sirin ya arumog yoy kakabatan? Nepeg ya onebat ed Job so Dios, lapud anggapoy ayarian yo.
14 Sikayoy akisalitaan nen Job, aliwan siak, balet ag ko ebatan na singa impangebat yo.
15 Job, naoputan la ray nibaga; anggapo lay niebat dad sika.
16 Manalagar ak ni, anta ag la ra makaesel? Manalalagey ira ya anggapo lay nibaga ra.
17 Andi, iter ko natay dilin ebat ko tan ibagak ed sika so walad kanunotan ko.
18 Amayamay so labay kon ibaga; ag ko la napokpokay mansalita.
19 No ag ak naitdan na pankanawnawan mansalita, ompatduk ak a singa pananginan a katat a napnoy balon alak.
20 Ag ko nayarian lan itepel; nepeg a mansalita ak pian nainawaan ak.
21 Anggapoy pilaan kod sayan singbatan; ag ko idayew so anggan siopaman.
22 Ag ko amtay mangidayew na siopaman, tan no gawaen ko, tampol a dusaen ak na Dios.
1 "Kanyan natan, Job, dengel mon maung iray amin a salitaen kod sika.
2 "Ibagak ed sikay walad kanunotan ko.
3 "Manlapud pusok iray amin a salitaen ko, tan tua ray ibagak.
4 "Say ispiritu na Dios so amalsa tan angiter ed siak na bilay.
5 "Ebatan mo ak, no nayarian mo. Iparaan mo ray isangsang mo.
6 "Nampara ita, Job, ed pakanengneng na Dios; nanlapu itan dua ed pitek.
7 "Kanyan anggapoy makasengeg na itakot mod siak; ag ta ka sarasarag a taloen.
8 "Nadngel ko ya imbagam:
9 "Anggapoy kasalanan ko; anggapoy ginawak a maoges. Malinis ak tan anggapoy kaogsan ed bilay ko.
10 Balet say Dios manaanap na pamasengegan toy isumlang tod siak, tan ipapasen to ak a sakey a kalaban.
11 Sisingeren toy golunggolung iray salik; iimanoen toy amin a kiwas ko.
12 Balet ibagak ed sika, Job, a nalilingo ka. Matalonggaring so Dios nen say anggan siopa.
13 Akin et tetetelen moy Dios ed ag to pangebat na saray riklamom?
14 Anggaman a mansasalitay Dios diad panamegley na nandoroman polaing, anggapoy mangasikasod ibabaga to.
15 Mansasalitay Dios ed panamegley na saray kogip tan saray pasingayew, diad labi no nanaogip iray totoo.
16 Say Dios ipaparengel tod saray totoo iray sasalitaen to, tan patatakoten to ra lapud saray pasakbay to.
17 Mansasalitay Dios pian napatonda ton mankasalanan iray totoo, tan ag la ra mampaatagey.
18 Ag iyabuloy na Dios a naderal ira; ipapaliis to ra anggan diad patey.
19 Pepeteken na Dios so too diad pangiter toy sakit tan panotut na laman to.
20 Say mansasakit a too ontabang so panangan to, tan ag to napaloob so anggan anton mananam a kakanen.
21 Manebeng lan manebeng tan sankanengneng la ray pokel to;
22 manasingger ed sangab na lobuk.
23 Nayarin walay sakey ya anghil ya ondagon ontulong ed sikato sakey ed saray nilibon anghil na Dios, saray manangipanunot ed saray totoo na nepeg dan gawaen.
24 Diad panangasi na anghil ikuanto, Ibolus yo! Ag ni nepeg ya ompatey. Nia so dondon a para kibolus to.
25 Onogaw tan ombiskeg lamet so laman to;
26 ebatan na Dios no mampikasi; maliket a mangigalang ed Dios; ipawil na Dios ed sikatoy maligen a bilay.
27 Ibaga tod arap na saray totoo, Nankasalanan ak. Maoges iray ginagawak, balet pinirdona ak na Dios.
28 Ag to inyabuloy ya ompatey ak, kanyan mabilay ak ni ya anggad natan.
29 Say Dios oolit-oliten to yan gagawaen;
30 ipapaliis tod patey so sakey a too, tan iitdan to na maliket a panagbilay.
31 Natan, Job, dengel mo so ibabagak; mandeen ka tan abuloyan mo ak a mansalita.
32 Balet no walay labay mon ibaga ibagam labat; maliket ak a mamirbir a walay katonungan mo.
33 Balet no anggapoy nibagam, dengel kad siak; mandeen ka, ta ibangat ta ka no panoy pagmaliw mon makabat.
1 "Sikayo ran lalaki, makabat tan makatalus kayo; dengel yo natan iray ibagak.
2
3 "Nibaga yon mananam so kakanen no natawayan yo; balet ag yo nibagan napnoy kakabatan iray salita no narengel yo ra.
4 "Sikatayon dili so mamili tan mangipasen no anto so maung tan maptek.
5 "Onung ed kinen Job, anggapoy kasalanan to, tan ag iiter na Dios so kanepegan to.
6 "Tetepeten nen Job, Panoy pantilak diad pangibagak ya alingo ak? Ompapatey ak lad inkasugat ko, balet anggapoy kasalanan ko.
7 "Akanengneng kayo lay toon singa si Job? Anggapon balut so panamagalang tod Dios.
8 "Labalabay toy miolup ed saray totoon maoges, tan milmilad saray makasalanan.
9 "Ibabaga to ya anggapon balut so naalan kaabigan diad pangonur na linaway Dios.
10 Sikayon totoon makatalus, dengel yo ak. Manggawa kasi na maoges so Makapanyarin-amin a Dios?
11 Tutumangan to ray totoo ed saray gagawaen da, tan iiter tod sikaray kanepegan da.
12 Ag manggagawa na kaogsan so Makapanyarin-amin a Dios; ag ton balut pipikeweten so katonungan.
13 Wala tay toon angiter ed Dios na pakapanyari to? Wala tay angipasen ed sikato a manoley ed mundo?
14 No babawien na Dios so ingas na bilay,
15 ompatey ya amin iray totoon mabilay tan ompawil irad dabuk.
16 No makabat kayo, dengel yo natan iray ibagak.
17 Abaloan yon kabosul na Dios so katonungan? Pankakasalananen yoy matonung a Dios?
18 Dudusaen na Dios iray arari tan saray manoley, no andi-kana tan maoges ira.
19 Pinalsa na Dios so balang sakey; ag to pipilaan iray manoley, odino kikilingan iray mayaman tan papaulyan iray mairap-bilay.
20 Nayarin biglan ompatey ed labi so sakey a too. Kakabilen na Dios iray totoo et ompatey ira; mainomay ton pateyen iray makapanyarin totoo.
21 Iimanoen na Dios so balang kutdang na too.
22 Diad imaton na Dios anggapoy bilonget a nayarin mananib ed makasalanan.
23 Ag nakaukolan na Dios so mangiganay panaon a panintinsia tod saray totoo.
24 Ag to nakaukolan so panalaysay tod saray pangulo pian naekal tan nasalatan to ra.
25 Lapud amta toy gagawaen da, tataloen to ra tan dederalen to ra ed labi.
26 Dudusaen na Dios iray makasalanan diad arap na saray totoo,
27 lapud tinondaan day itotombuk dad sikato tan ag da la ikabkabilangan iray ganggan to.
28 Pinasoot dan ontawag ed Dios iray mairap-bilay, et denengel toy ikekerew day tulong.
29 No labay na Dios ya anggapon balut so gawaen to, anggapoy makapambalaw ed sikato. No paolyan na Dios so sankamundoan, antoy nagawaan na too?
30 Anggapoy nagawaan na anggan dinanman a bansa a pakapaliis tod panoley na saray maruksa.
31 Job, impatuam lad Dios iray kasalanan mo tan insipan mon ag ka la mankasalanan lamet?
32 Kinerew mo lad Dios ya ipanengneng tod sika ray kasalanan mo, tan akipakna kan tondaan mo lay panggawam na kaogsan?
33 Bangta ipopolisay moy gagawaen na Dios, naalagar mo ta a gawaen toy labay mon pagawa? Sika so mampili, aliwan siak; ibagam natan no antoy walad kanunotan mo.
34 Anggan siopan too a walay kalakal onabubon ed siak; siopaman a makabat a makadngel ed siak ibaga to
35 ya ag natatalusan nen Job so sasalitaen to, tan andi-kakanaan iray ibabaga to.
36 Dalepdep yon maung iray sasalitaen nen Job; naamtaan yod satan a mansasalitan singa toon maoges.
37 Aaruman to na pananumlang iray kasalanan to; diad arap tayon amin luludlurey toy Dios.
1 "Job, anggapoy katonungan mon mangibaga ya anggapoy kasalanan mod arap na Dios,
2
3 "odino tepeten mod Dios, Antoy walad sika no mankasalanan ak? Anggapoy kaabigan a nalak diad ag ko impankasalanan.
4 "Ebatan ta ka tan saray kakaarom.
5 "Tangay moy tawen! Nengneng mo so ontan lan kaatagey na saray lorem!
6 "No mankasalanan ka, ag nasakitan so Dios. No mamimpiga-piga kan manggaway kaogsan, liknaen kasi na Dios?
7 "No matonung ka, antoy nitulong mod Dios? Anggapoy nakaukolan na Dios ed sika.
8 "Saray kaparam a totoo so manirap lapud saray kasalanan mo, tan sikaray natulongan lapud kaabigan mo.
9 "No saray totoo et napapairap ira, onngengesnges ira; onkekerew irad siopaman a makapangilaban ed sikara.
10 Balet ag ira onsisingger ed Dios ya amalsa ed sikara, anta sikatoy makapangiter ed sikara na ilalo no mapalaloy kagugunigon da.
11 Ag ira onsisingger ed Dios ya angiter ed sikatayoy kakabatan a matalona, nen say kakabatan na anggan dinan ya ayep o manok.
12 Onkekerew iray tulong, balet ag ira ebatan na Dios lapud mapaatagey tan maoges iran totoo.
13 Andi-kakanaan so ikekerew day tulong; ag ira iimanoen o dengelen na Makapanyarin-amin a Dios.
14 Job, ibabagam ya ag mo nanengneng so Dios; balet mananos kan manalagar, ta wala lad lima toy kasom.
15 Say abaloan mo ag manusa so Dios, tan anggapoy walad sikatoy kasalanan.
16 Job, andi-kakanaan so pangituloy moy pansasalitam; malinlinew ya ag mo amtay sasalitaen mo.
1 "Intuloy nen Eliu so nansalita:
2 "Mananos kay daiset ya ondengel ed salitaen kon papaibaga na Dios.
3 "Malaknab so pakatalus ko; ikanak so kakabatan ko a mangipanengneng a matonung so Dios ya amalsa ed siak.
4 "Anggapoy tila ya ibagak ed sika; makabat a too so sankanengneng mod arap mo.
5 "Agaylay biskeg na Dios! Anggapoy babalawen to; anggapoy ag to natatalusan.
6 "Ag to pansiasiansiaen a mabilay iray makasalanan, iiter tod saray mairap-bilay so katonungan da.
7 "Iyaagel to ray matonung; panoleyen to ran singa saray arari, tan aabuloyan to ran napagalangan ed ando lan ando.
8 "Balet no saray totoo et abalur iray golung-golung, tan maniirap ira lapud saray ginagawa ra,
9 "ipapanengneng na Dios ed sikara iray kasalanan da tan say panagpaatagey da.
10 Ipaparengel tod sikara so pasakbay to, pian arawian day kaogsan.
11 No oonuren day Dios tan panlilingkuran da, mambilay irad kareenan tan aligwas legan na pambibilay da diad tapew na dalin.
12 Balet no andi, biglan ompatey ira, tan onla la rad kawalaan da ray inaatey.
13 Pasnuk lawas so walad puso na saray totoon anggapoy Dios da, tan anggan nadudusa ra, ag ira onkekerew na tulong.
14 Ompatey ira no kabisbiskegan da; mansumpal ed kababaingan so bilay da.
15 Balet say Dios ibabangat to ray totoo diad panamegley na kairapan tan ikakana toy kaermenan a mangilukas na kanunotan da.
16 Nen saman say Dios inagwat to ka ed gunigon, tan pinaligen toy bilay mo; abunton na kakanen so lamisaan mo.
17 Balet natan nadudusa ka onung ed kanepegan mo.
18 Manalwar ka ompan napalikdo ka na pasoksok, odino nibalang ka na kayamanan.
19 Andi-kakanaan lay ikerew moy tulong; ag ka la natan natulongan na biskeg mo.
20 Ag mo la pampipilalekay isabi na labi, say panaon ya ipatey na katoowan.
21 Manalwar ka ta ompan natanggoyur kad kaogsan; niiter ed sikay kairapan pian niarawi kad kaogsan.
22 Nudnunot mo so ontan lan kabaleg na pakayari na Dios; sikatoy sankamaungan ed amin da ray bumabangat.
23 Anggapoy makapangibaga no antoy gawaen na Dios, odino makaakusad sikaton nanggaway maoges.
24 Nadadayew lawas so Dios lapud gagawaen to; nepeg met a galangen mo.
25 Anengneng na amin a totoo so ginagawa to; balet nababantag ti ra labat.
26 Ag tayo natalusan a sigput so talonggaring na Dios odino nabilang iray taon to.
27 Say Dios so mamapasegep ed danum na dalin tan pagmamaliwen ton oran.
28 Papepelagen toy lorem pian onoran et naterteran iray amin a katoowan.
29 Anggapoy makapikabat no panoy panaakar na saray lorem, tan no panoy idadalagorug na karul ed tawen a panaayaman na Dios.
30 Pakirmaten to ed intiron tawen, balet siansian andeket so kaaraleman na dayat.
31 Onyay panamakan na Dios ed saray totoo tan say panangiter to na daakan a tagano.
32 Sisingkaten to so kirmat, tan igaganggan ton kenaen to so labay to.
33 Ipapaamta na karul so onsasabin bagyo, tan amta na saray baka ya onsasabi lay bagyo.
1 "Mampokal so pagew ko lapud bagyo.
2 "Dengel kayon amin ed bosis na Dios; dengel kayod karul a manlalapud sangi to.
3 "Ibabaki onggolis ed tawen so kirmat, manlapud sakey a samput ya anggad sananey a samput na mundo.
4 "Insan narengel to tanul na bosis to, say makapataktakot a dalagorug na karul, et siansian mankirkirmat.
5 "Lapud ganggan na Dios nagawa ray makapakelaw a bengatla ya ag tayo ra natalusan.
6 "Igaganggan ton ompelag ed tapew na dalin iray kristal, tan say maksil ya oran.
7 "Patotondaen toy pankikimey na saray totoo; ipanengneng to ed sikara so nayarian ton gawaen.
8 "Saray ayayep ed katakelan oonla rad ayaman da.
9 "Manlalapud abalaten so mabiskeg a dagem, tan manlalapud baybay so ambetebetel a dagem.
10 Say ingas na Dios pakikigtelen toy danum tan pagmamaliwen ton yilo.
11 Onggogolis so kirmat manlapud saray lorem,
12 legan dan manaakar onung ed linawa na Dios. Susumpalen da ray amin a ganggan na Dios diad amin a pasen ed intiron mundo.
13 Ipepelag na Dios so oran a panalog ed dalin; nayarin ipepelag to a panusa tod katoowan, odino pangipanengneng tod sikara na panangaro to.
14 Mandeen ka Job, ta dengel ka; dalepdep mo ray makapakelaw a bengatlan gagawaen na Dios.
15 Amtam no panoy pangigaganggan na Dios tan no panoy pamapakirmat ton manlapud saray lorem?
16 Amtam no panoy pampappataw na saray lorem ed tawen, say gawa na makapakelaw a dunong na Dios?
17 Ag mo amta; manirap ka labat lapud petang no onsiplug ed dalin so dagem a manlalapud abalaten.
18 Nayarian mo ta a tulongan so Dios ed pangipanat toy tawen tan panggawa ton anawet a singa mital a pinasileng?
19 Ibangat mo kami no antoy ibaga mid Dios; anggapoy karga na kanunotan mi; anggapoy nayarian min ibaga.
20 Ag ko kerewen a misalita ak ed Dios; akin et itdan koy pankanawnawan maneral ed siak?
21 Natan makaseleng so liwaway tawen, maliwliwawan ag nayarin linggisen; malinis so tawen lapud pinanisan na dagem.
22 Nanenengneng ed baybay so binmalituk a liwawa, tan papatakoten itayo na kagalangay Dios.
23 Ontan lay kabaleg na pakapanyari na Dios, kanyan ag itayo makaasingger ed sikato; matonung tan maptek so pipiolup tod katoowan.
24 Ag sirin pankelawan ya ontakot ed sikato iray amin a totoo, tan saray palpaolyan to ray mankabatkabatan.
1 "Manlapud bagyo, say Katawan akisalitad kinen Job:
2 "Siopa kan manduaruwa ed kakabatan ko diad panamegley na saray andi-kakanaan a salitam?
3 "Alagey kan sakey a laki, ta ebatan mo ray tepeten kod sika.
4 "Wadman ka nen palsaen koy mundo? No dakel so amtam, ibagam irad siak.
5 "Siopay angigetar na kabaleg na mundo? Siopay anukat? Amtam so ebat da ra ya?
6 "Antoy angipatoonan ed saray lusek a mangaagtod mundo? Siopay angilira na sankakanaan a bato na mundo?
7 "Diad saman a palbangon nankakasakey a nankanta ray bibitewen, tan inmeeyag ed liket iray anghil.
8 "Siopay angisara na saray puirta a manamper ed danum na dayat nen pinmaway a nanlapud dalem na dalin?
9 "Siak so anakbung na saray lorem ed dayat tan amalkut na bilonget.
10 Siak so angyan na ketegan na dayat tan impokuk ko ed pasen ya akatalak iray puirta to.
11 Imbagak ed dayat, Angga ka dia labat tan ag ka la onlalabsan! Dia mangangga iray mabiskeg a daluyon mo.
12 Job, nanlapud inkianak mo, asalim lan ingganggan ya onsabiy palbangon na sakey ya agew?
13 Ingganggan mo lay palbangon a singkaten toy mundo tan yegyegen toy kawalaan da ray maoges a totoo pian onpaway ira?
14 Lapud liwaway agew mapatpatnag ray pokdul tan saray patar; singa ra akonsen-kosen a kawes, tan malinew iran singa bakat na timbri ed saray dalin.
15 Maliwliwawan tuloy so liwaway agew ed saray totoon maoges, kanyan patotondaen to ran manggaway kaogsan.
16 Akakar ka la ed saray sobul ed dalem na dayat? Asabim la so kaaraleman na dayat?
17 Wala lay angipanengneng ed sika na saray puirta a mamaarap ed ambilonget a kawalaan da ray inaatey?
18 Amtam so kabaleg na mundo? Ebatan mo ak no amtam.
19 Amtam no iner so panlalapwan na liwawa, odino iner so panlalapway bilonget?
20 Nipanengneng mod sikara no iner so anggaay sabien da, odino napapawil mo ra?
21 No naebatan mo ra ya, mapatnag sirin a masikesiken ka la tan wala ka la nen apalsay mundo.
22 Alooban mo la ray kuarton panagsinupan ya anginan ko na yilo tan kristal ya oran?
23 Imparaan ko ran para panaon na gunigon, para agew na bakal tan laban.
24 Nakar mo lay papawayan na agew, odino say pasen a panlalapway dagem ed bokig?
25 Siopay angotkot na saray ilog ya aagosay maples ya oran? Siopay angiparaan na dalaney karul?
26 Siopay mangipepelag na oran ed kalawakan ya anggapoy manaayam?
27 Siopay manasalog ed amaga tan kinmelang a dalin, pian ontubo ray dika-rika?
28 Walay ama na oran o linaew?
29 Siopay ina na yilo o ambetebetel a panaon,
30 a papaaweten dan singa bato so danum tan pakikigtelen da so tapew na dayat?
31 Napankakasakey mon singeren so olup na bitewen a tatawagen na Pliyadis? Naokbar mo ray singer na olup na bitewen a tatawagen na Orion?
32 Niwanwan mo ed kapag panaon iray bitewen, tan nitonton mo ray olup na bitewen a tatawagen na Baleg tan Melag ya Uso?
33 Amtam iray totontonen a mangooksuy na katawenan; tan nipakanam ira diad tapew na dalin?
34 Nakelyawan mon iganggan iray lorem, a poyoten da ka na oran?
35 No iganggan moy kirmat, ondagod sika tan ikuanto, Sipaparaan ak a manlingkur ed sika?
36 Siopay mangibabagad manok ya ibis a manelap so Ilog na Nilo, odino mangibabagad lalong ya ompelag so oran?
37 Siopay makabat a nayarian ton bilangen iray lorem, tan pigaren to ra pian nepelag so oran,
38 say oran a mamakolnet ed dabuk?
39 Iyaanapan mo na kakanen iray lion, tan pepeselen mo ray narasan a mamalangwer a lion,
40 no onaamut irad saray ongib da, odino mandokdokul iran manaalagar ed ayaman da?
41 Siopay mamapakan ed saray wawak no liber-liber iran narasan, no saray sibong da et onkekerew irad siak na nakan?
1 "Amtam no kapigan so kianak na saray kanding ed palandey? Abantayan mo lan manaanak iray ulsad katakelan?
2 "Amtam no panoy kabayag na panlokun da? Amtam no kapigay pananak da?
3 "Amtam no kapigay ikorung dan mampasakit, tan ipaway da ray anak da?
4 "Ombaleg tan ombiskeg ed kalawakan iray anak da; ontaynan ira tan ag la ra ompawil.
5 "Siopay angiter na kawayangan da ray asnod katakelan? Siopay angibolus ed sikara tan impantawataw to ra?
6 "Inter kon panayaman da so kalawakan tan impanayam ko rad saray maasin a patar.
7 "Aarawian da ray maingal a siudad; anggapoy makapaamo tan makapangikimey ed sikara.
8 "Say kapalandeyan so pastulan a pankakabkaban da, a dimay panaanapan day malambut a dikan kanen da.
9 "Napankimey mo so kalakyan a bakad katakelan? Maabuloy a manayam a sanlabi ed koral a ginawam?
10 Nasinger moy sakey a bakan kalakyan, pian napambakam? Odino napansagar mod kaalogan mo?
11 Napanmatalkan mo so ontan lan biskeg to tan napanilaloan mon gawaen toy kimey mo?
12 Napanilaloan mo a mangisempet na naanim, tan mangisinup na ilik a manlapud panagilikan mo?
13 Agaylay peles na pamparakpak na saray payak na manok ya abistrus! Balet anggapoy abistrus a makatikyab a singa dulakak.
14 Say abistrus ititilak tod dalin iray iknol to, pian napetangan ira ed dalin.
15 Ag to balet amta a nayarin nagatinan ira na too, odino betagen ira na ayep ed katakelan.
16 Ipapasen ton singa ag to kayaryan iray iknol to, tan anggapoy walad sikato anggan nadarak so sagput to.
17 Siak so nanggawad sikato ya anggapoy kalakal, tan ag ko initdan na kakabatan.
18 Balet no sikatoy ombatik, elekan toy kabayo tan say akakabayon onoosil ed sikato.
19 Sika, Job so angiter na biskeg ed kabayo tan amatobod tenger to na marakep a buek?
20 Sikay angiter ed sikara na pakayarin makalukso ran singa dorun, tan napatakot da ray totoo lapud pamponges da?
21 Ikokosay-kosay day dalin ed patar; iyooput day biskeg dan onkoyat ed bakalan.
22 Ag da amta so ontakot odino ompaga, tan ag ira napasoner na anggan anton ispada.
23 Mankidiam tan makalangakang iray armas a sankaawit na saray akakabayod sikara.
24 Diad sebeg tan pasnuk agaylay peles dan ombatik; no trumpitay apaknul ag ira makapandeen.
25 Omponges ira kapag napaknul so trumpita; nasisingob day bakal anggan arawi ni ra, tan narerengel da ray ganggan na saray sondalon opisyal.
26 Sikay panaaralan na baga ya ontikyab sano buskagen to ray payak ton mamaarap ed abalaten?
27 Manoobung ed tagey na kapalandeyan so agila lapud ganggan mo?
28 Manaayam ed toktok na saray sankatageyan a bato tan onsasanib-sanib ed saray bato.
29 Diad sayan pasen mantatalaran na nayarian ton pateyen tan kanen; nanenengneng toy anggan saray walad arawi.
30 Saray agila mankokompug irad kawalaay bangkay, tan saray anak da sosopsopen day dala.
1 "Job, sinalim a nilabanan so Makapanyarin-amin a Dios; onsuko ka la natan, odino onebat ka ni?
2
3 "Si Job inmebat ed Katawan:
4 "Katawan, nansalita ak na andi-kabaliksan. Antoy niebat ko ni? Pepetan ko lay songut ko.
5 "Nansalita ak lay masoluk nen say nepeg kon ibaga.
6 "Manlapud bagyo say Katawan akisalita lamet ed kinen Job:
7 "Alagey ka natan a sakey a laki, ebatan mo ray tepeten kod sika.
8 "Labay mo a paneknekan ya aliwa ak a matonung a siak so mankakasalanan tan sika so maptek?
9 "Mabiskeg ka nen say siak? Ondadalagorug so bosis mo a singa bosis ko?
10 No tua, kawesan moy sikan dili na talonggaring tan dayew; balkut moy sikan dili na tanduro tan kagalangan.
11 Imanom iray mapasirayew; pampasnukan mo ra tan paabebam ira.
12 On, nengneng mo ra tan itumbam ira; igatin mo ray maoges a totoo ed kawalaan da.
13 Ipompon mo ran amin ed dalin; balur mo ra ed pasen a kawalaan da ray inaatey.
14 Diad satan siak so ononan mangidayew ed sika tan akoen ko a sikan diliy analo.
15 Nengneng mo so Bihimot; pinalsak tan pinalsa ta ka. Mamangay dika a singa baka,
16 balet alay biskeg a walad laman to, tan alay pakayarin walad pokel to!
17 Singa talker na kiew a sidro so ikol to, tan mabiskeg iray pokel na olpo to.
18 Singa awet na gansa iray pokel to, singa balatyang iray bikking to.
19 Sikatoy manonan makapakelaw ed amin da ray pinalsak. Say Manamalsa to labat so makatalod sikato.
20 Ontotobod kapalandeyan a panggagalawan na saray ayayep ed katakelan, iray dikan kakanen to.
21 Ondorokul ed silong na saray masabit a kiew, tan onaamut ed dalem na saray tanobung ed danum.
22 Saray masabit a kiew tan saray kiew a sausi ed gilig na kolus iitdan day siruman to.
23 Ag antakot ed anggan ontan lan agos na ilog; anggapoy walad sikato anggan onsipwak ed lupa to so danum na Jordan.
24 Siopay makabulag tan makadakep ed sikato? Odino siopay makadeyeng na eleng to ed sakey a patit?
1 "Naerel moy Libiatan diad panamegley na banwit, odino nasinger moy dilo to na lobir?
2 "Nadeyeng mo na lobir so eleng to odino natagam so sangi to?
3 "Kerewen tod sika ya ibolus mo? Kerewen tod sikan kasian mo?
4 "Misipanan ed sika tan isipan tod sikan panlingkuran to ka ya anggad angga?
5 "Singeren mon singa sakey a manok ed tagey a kokomponien mo, singa sakey a bengatlan panliketan na saray aripen mon bibii?
6 "Tawalan na saray sumisigay? Tegtegtegen na saray nigosianti ta ilako ra?
7 "Napanum na saray doyuk so baog to, odino nasegkal mo na pika so olo to?
8 "Diwit mon maminsan et ag mo labay ya oliten; ag mon balut nalingwanan so laban!
9 "Siopamay makanengneng ed Libiatan, naekalay biskeg na linawa tan natumbad dalin.
10 Masebesebeg no sikatoy nasigensigen; anggapoy ompangayan miarapan ed sikato.
11 Siopay ondogpad sikato ya ag narisgo? Anggapoy anggan sakey diad intiron mundo.
12 Ibagak pad sika so nipaakar ed saray sali na Libiatan; salitaen ko met so kabaleg tan kabiskeg to.
13 Anggapoy makaekal na walad tapew a kawes to; anggapo met so makatorok ed kawes a para bakal ya akasolung ed sikato.
14 Siopay makalengat na sangi to, anta arasdasig iray makapataktakot a ngipen to?
15 Nansasaip a samper so beneg to, nampepeketan ira tan singa batoy awet da.
16 Diad elet na impansasaip da, ag makadalan so dagem ed naleleetan da.
17 Ontan lay abig na inkipeket dan amin, kanyan ag iran balut naaknit.
18 Onkidiam so liwawa no ombasis marmarlang so mata to a singa ompapaway ya agew.
19 Ompapaway ed sangi to so manliub ya apoy, tan mantikyab iray talagsik ya amayamay.
20 Ompapaway ed eleng to so asewek, singa asewek na mandarlang a dikad silong na banga.
21 Say ingas to dadangatan toy abunton ya oring; ompapaway ed sangi to so apoy.
22 Mabisbiskeg so beklew to, kanyan natataktakot iray amin a makabet ed sikato.
23 Anggapoy makapoy a pasen ed baog to; anawet tan ag napikon singa balatyang.
24 Anggapoy takot so binmaton puso to, ag napatoluk tan anawet a singa gilingan.
25 No ombalikwat natatakot iray anggan makapanyari; natalagnaw irad takot da.
26 Anggapoy ispadan makasugat ed sikato; anggapoy pika, o pana, o doyuk a makapasakit ed sikato.
27 Para sikato say balatyang et singa labat dayami, tan say gansa et singa labat aboluk a kiew.
28 Anggapoy panan makapabatik ed sikato; singa labat osang iray baton nitupak ed sikato.
29 Para sikato singa labat dayami so pekpek, tan elekan to labat iray totoon mamikad sikato.
30 Singa nabnabtag a banga so eges to; singa sasagaren so mapitek a dalin a dadalanen to.
31 Kikimbogen ton singa manlelwag a danum so dayat, tan papaboraen toy dayat a singa larak ed banga.
32 Onsisilong so dinalan to; pagmamaliwen ton singa bora so dayat.
33 Anggapoy kapara to diad tapew na dalin; sikatoy pinalsa ya anggapoy takot.
34 Melagmelagen to ray anggan atagtagey so kipapasen dan ayayep; sikatoy ari da ray amin ya ayayep ed katakelan.
1 "Insan inebatan nen Job so Katawan:
2 "Amtak, Katawan, a nagawaan moy amin a bengatla; anggapoy makabaat ed antokaman a labay mon gawaen.
3 "Tetepeten mo ya alay tepel kon manduaruwad kakabatan mo, anta sakey ak ya anggapoy amta. Nansalita ak na nipaakar ed saray bengatlan ag ko natalusan, nipaakar ed saray makapakelaw a bengatlan ag ko naamtaan.
4 "Imbagam ed siak a mandengel ak legan a mansalita ka tan ebatan ko ray tepet mo.
5 "Nen saman dengel-dengel labat so amtak nipaakar ed sika, balet natan dilin matak so akanengneng ed sika.
6 "Kanyan nababaingan ak lapud amin ya imbagak tan magbababawi diad dabuk tan dapul.
7 "Kayarin imbaga na Katawan ira yan amin ed kinen Job, inkuantod kinen Elifas, a taga Teman: Mamapasnuk ak ed sika tan saratay duaran kakaarom, lapud ag yo sinalita so katwaan nipaakar ed siak, a singa ginawa nen Job.
8 "Natan sirin, mangyakar kayod kinen Job na pitoran bakan kalakyan tan pitoran karniron kalakyan ta isaklang yo ran bagat a popoolan para sikayo. Ipikasi to kayo nen Job, et ebatan koy pikakasi yo tan ag ta ki la dusaen onung na kanepegan yo. Kanepegan yo komuy dusaen lapud ag yo sinalita so katwaan nipaakar ed siak, a singa ginawa nen Job.
9 "Sinumpal di Elifaz, Bildad, tan Zofar imay imbaga na Katawan a gawaen da, et dinengel na Katawan so pikakasi nen Job.
10 Insan kayari nen Job ya impikasid Katawan ira may taloran kakaaro to, pinaaligwas lamet na Katawan; initdan toy mamiduan karakel na samay kayaryan to nen saman.
11 Amin ya agagi nen Job a lalaki tan bibii tan saray gendat a kakaaro to binisita ra tan akiliket irad sikato ed abung to. Impanengneng day pidadamay da tan nililigliwa ra ed saray gunigon tan kairapan ya inter na Katawan ed sikato. Angiter so balang sakey ed sikara na kuarta tan sakey a balituk a singsing.
12 Mapalalo niy impambindision na Katawan ed kaonuran a panaon na impanbilay nen Job nen samay inmonan panaon na impanbilay to. Saray kayaryan nen Job et labinapat a libon karniro, amen a libon kamilyo, duanlibon baka, tan sanlibon kabatyan ya asno.
13 Akailalak ni na pitoran lalaki tan taloran bibii.
14 Inngaran to na Jemima so sankapangulowanan a biin anak to, Kesia so kumadwa, tan Keren-hapuc so sankayogtanan.
15 Diad intiron mundo anggapoy miparad ganggana na saray bibiin anak nen Job. Initdan met ira nen ama ra na tawir a singa saray lalakin agagi ra.
16 Kayari na sayan inkagawa, nambilay ni si Job na sanlasus tan apataplon taon tan anengneng to ni ray apo to, anggad kumapat a kailalakan.
17 Masikesiken lan inatey si Job.