1 "Sikato yay istoria na agawaan nen Nehemias a lakin anak nen Hacalias. Diad bulan na Kislev nen Kumaduamploy taon na panooley nen Impirador Artajerjes, siak, si Nehemias, et wala ak ed manonan siudad na Susan.
2 "Si Hanani a sakey ed saray agagik a lalaki et sinmabi a kaiba to ray pigaran lalaki a nanlapud Juda. Tinepetan ko ra na nipaakar ed saray Judion pinmawil manlapud nibantakan dan Babilonia tan say nipaakar ed Jerusalem.
3 "Imbaga rad siak a baleg so paniirap da ray akaligtar tan akapawil lad baley da; memelag-melagen met ira na saray totoon sangkaili a manaayam ed kaliber-liber da. Imbaga ra met ed siak ya ageba ni ray padir na Jerusalem tan ag ni apasimbalon nipaalagey iray puirtan apoolan.
4 "Nen nadngel ko ya, inmirung ak, insan ak nanakis. Pigay agew ak a nanermen tan ag angan. Nampikasi ak ed Dios.
5 "Katawan a Dios na Tawen! Matalonggaring ka tan nepeg kan takotan. Matoor kan mangaro tan susumpalen moy impisipanan mo ed saray mangaarod sika tan mangoonur na saray ganggan mo.
6 "Imano mo ak pa, Katawan, tan talineng mo ak pa ed agew-labin pangipipikasik ed saray aripen mo a totood Israel. Ipatuak a nankasalanan kami, sikamin totood Israel. Nankasalanan ak tan saray lalakik.
7 "Maoges iray ginagawa mi sumpad sika tan ag mi inoonur iray ingganggan mo. Ag mi inoonur iray bilin tan totontonen ya inter mod sikami diad panamegley nen Moises ya aripen mo.
8 "Nunot mo pa may inkuanmod kinen Moises: No aliwa kayon matoor ed siak, sikayon totood Israel, itaytayak ta kayod arum a bansa.
9 "Balet no ompawil kayod siak tan onuren yo ray ingganggan kod sikayo, papawilen ta kayod sayan pasen a pinilik a pangigalangan ed siak, anggaman ya ataytayak kayod inerman a sokung na mundo.
10 Katawan, sikara yay aripen mo, saray dilin totoom. Inyagel mo ra diad panamegley na baleg a pakayarim tan biskeg mo.
11 Dengel mo natan so pikakasik tan saray pikakasi da ray arum ya ariripen mo a labay da kan pagalangan. Paaligwas mo ak pa natan, tan iyabuloy mon kasian ak na impirador. Diad saraman ya agew siak so makaoley ed alak na impirador.
1 "Aminsan ya agew nen bulan na Nisan diad kumaduamploy taon na panooley nen Impirador Artajerjes, inyakaran koy alak nen akarongo. Ag to ak nin balut anengneng a maermen nen saman,
2 "kanyan tinepet to, Akin et maermen ka? Aliwa ka met a mangiinagem, kanyan talagan maermen ka. Apagaan ak ed saya
3 "tan inmebat ak, Andokey ni komun so pambilay yo, Kagalang kon Impirador! Panon a niamut so ermen ko no say siudad ya angipomponan ed saray lalakik et aderalderal tan saray puirta to et dineral na apoy?
4 "Tinepet na impirador, Anto siriy labay mon kerewen? Nampikasi ak ed Dios na Tawen,
5 "insan ko inkuan ed impirador, No makaliliket ed siak so Kagalang kon Impirador tan mabolus a mangiter na kerewen ko, abuloyan mo ak pan onla ed dalin na Juda, diad siudad ya angipomponan ed saray lalakik, pian nipaalagey ko lamet so siudad.
6 "Manyodyorung ed diking na impirador so riyna. Tinepet na impirador ed siak na panon kabayag so kaandik tan no panoy ipawil ko. Inebetan ko ra yan tepet to et inmabubon ed kerew ko.
7 "Insan ko kinerew ed ari ya itdan to ak na sulat ya iter kod saray gobirnador ed Luyag na Sagur na Eufrates, pian abuloyan da ak a mambiahi ed Juda.
8 "Akikerew ak met na sulat a para si Asaf, say manaasikasod saray takel na ari. Imbaga na sulat ya itdan ak nen Asaf na saray troso ya ikanad saray puirta na tirinsiran mangguardiad Timplo, para saray padir na siudad, tan para abung a panayaman ko. Inter ed siak na impirador iray amin a kerew ko, lapud kaibak so Dios.
9 "Nen linma ak la say impirador impaolup to ak ed pigaran opisyal tan sakey ya olup na saray sondalon kumakabayo. Nen akasabi ak ed Sagur na Eufrates, inter kod saray gobirnador imay sulat na impirador.
10 Balet agunigon a maung ira si Sanbalat a taga baley na Bet-horon, tan si Tobias ya opisyal na saray Ammonita, nen nadngelan da a walay toon sinmabi a manggaway pankaabigan da ray totood Israel.
11 Linma ak ed Jerusalem, tan legan na impanayam kod man na taloy agew,
12 ag ko imbagad siopaman so pagagawad siak na Dios para Jerusalem. Insan diad pegley-labi binmangon ak, intagar koy pigara ed saramay kakaibak, insan kami pinmaway. Samay asnon kinabayoan ko, so ayep labat ya inawit mi.
13 Labi ni nen pinmaway ak ed siudad tan dinmalan ak ed Puirta na Patar diad sagur. Insan linma ak ed abalaten tan dinalan koy Bubon na Dragon nen tinmuloy ak ed Puirta na Dotak. Legan kon manaakar ninengneng ko ray atebagtebag a padir tan saray puirtan dinederal na apoy.
14 Insan ak nampabaybay tan linma ak ed Puirta na Sobul tan diad Dipositoy danum na Ari. Anggapo lay nadalan na samay asnon kinabayoan ko,
15 kanyan linma ak ed Patar na Adron tan nankabayo ak a nannenengneng ed padir. Insan ak pinmawil ed saramay dinadalan ko. Dinmalan ak ed samay Puirtay Patar nen pinmawil ak ed siudad.
16 Anggapod saramay opisyal diman so akaamtad nilnilak tan no anto ray ginagawak. Anggapo niy bengatlan imbagak ed siopaman ed saray kaparak a Judiodiad saray papari, saray pangulo, saray opisyal, odino siopaman a mankimey.
17 Balet natan inkuankod sikara, Nengneng yoy gunigon a walad sikatayo, lapud aderal-deral so Jerusalem tan saray puirta to. Pasimbaloen tin ipaalagey so padir na siudad tan pansamputen tayo la yay kababaingan tayo.
18 Insan ko imbagad sikara no panoy inkiwala na Dios ed siak tan no panoy impanulong tod siak, tan no anto ray imbaga na impirador ed siak. Inmebat ira, Igapo ti la sirin so pangipaalagey tayo lamet! Kanyan namparaan iran mangigapo na kimey.
19 Balet nen nadngelan di Sanbalat, Tobias, tan Gesem ya Arabe so plano min gawaen, inelekelekan tan niluludlurey da kami. Inkuanda, Anto tay gagawaen yo? Labanan yo la sirin so impirador?
20 Inmebat ak, Pampalaboen kami na Dios na Tawen. Sikami ray aripen to, kanyan igapo miy pangipaalagey. Balet sikayo, anggapoy kanepegan yon mangayaryan na bengatla ed Jerusalem. Anggapoy pibibiang yod saray agawgawad sayan siudad.
1 "Onya so impamaalagey lamet ed padir na siudad. Pinasimbalon impaalagey nen Eliasib a Pangulon Pari tan saray kapara ton papari so Puirta na Karniro. Insaklang dad Dios, insan da inyan iray puirta to. Insaklang da so padir ya anggad Tori na Sanlasus tan say Tori nen Hananeel.
2 "Impaalagey na saray lalakid Jerico so onsoblay a soldung na padir. Impaalagey nen Zacur a lakin anak nen Imri so onsoblay a soldung na padir.
3 "Impaalagey na saray kabyangay boleg nen Hasenaa so Puirta na Sira. Inlira da ray panuksolan tan saray puirta, insan da inyan iray balewet a pangisarad puirta.
4 "Impaalagey nen Meremot a lakin anak nen Urias tan apo nen Haccoz so onsoblay a soldung na padir. Impaalagey nen Mesullam a lakin anak nen Berekias tan apo nen Mesezabel so onsoblay a soldung na padir. Impaalagey nen Sadoc a lakin anak nen Baana so onsoblay a soldung na padir.
5 "Impaalagey na saray lalakid Tecoa so onsoblay a soldung na padir, balet saray manonan lalakid baley et ag tinmoluk ed saray makaoley ya angibagad sikaran mankimey.
6 "Impaalagey lamet nen Joiada a lakin anak nen Pasea tan si Mesullam a lakin anak nen Besodias so Puirta na Jesana. Inlira da ray panuksolan tan saray puirta, insan da inyan iray balewet a pangisarad puirta.
7 "Impaalagey nen Melatias a taga Gabaon, si Jadon a taga Meronot, tan saray lalakid siudad na Gabaon tan Mizpa so onsoblay a soldung na padir ya anggad kawalaay abung na gobirnador na Luyag na Sagur na Eufrates.
8 "Impaalagey nen Uziel a lakin anak nen Harhaya tan sakey a platiro so onsoblay a soldung na padir. Impaalagey nen Hanaias a gumagaway pabalingit so onsoblay a soldung na padir ya anggad Padir na Malapar.
9 "Impaalagey nen Refaias a lakin anak nen Hur tan manoley ed kapaldua na Distritoy Jerusalem so onsoblay a soldung na padir.
10 Impaalagey nen Jedaya a lakin anak nen Harumaf so onsoblay a soldung na padir ya asingger ed dilin abung to. Impaalagey nen Hatus a lakin anak nen Hasabnias so onsoblay a soldung na padir.
11 Impaalagey nen Malkias a lakin anak nen Harim, tan si Hasub a lakin anak nen Pahat-moad so onsoblay a soldung na padir tan say Tori na saray Pogun.
12 Impaalagey nen Sallum a lakin anak nen Hallohes, tan manoley ed kapaldua na Distritoy Jerusalem so onsoblay a soldung na padir. (Tinmulong ed kimey iray anak ton bibii.)
13 Pinasimbalon impaalagey nen Hanun tan saray manaayam ed siudad na Zanoa so Puirta na Patar. Inlira da ray puirta, insan da inyan iray balewet a pangisarad puirta. Inapiger da met so apat a lasus tan apataplon mitro ed padir ya anggad Puirta na Deral-deral.
14 Pinasimbalon impaalagey nen Malkias a lakin anak nen Recab tan manoley na distritoy Betha-kerim so Puirta na Deral-deral. Inlira to ray puirta, insan to inyan iray balewet a pangisarad puirta.
15 Pinasimbalon impaalagey nen Sallum a lakin anak nen Col-hoza tan manoley na distritoy Mizpa so Puirta na Sobul. Tinarungan to, inlira to ray puirta, insan to inyan iray balewet. Diad Dipositoway Danum na Seloe impaalagey toy padir ya akiketeg ed tanamanan na ari, ya anggad saray balitang a mampaleksab manlapud Siudad nen David.
16 Impaalagey nen Nehemias a lakin anak nen Azbuk tan manoley ed kapaldua na distritoy Bet-sur so onsoblay a soldung na padir ya anggad kawalaay lobuk nen David, anggad dipositoy danum, tan anggad panaayaman da ray sondalo.
17 Tinmulong ed impamaalagey lamet ed padir iray onggendan a Levita: Impaalagey nen Rehum a lakin anak nen Bani so onsoblay a soldung na padir; Impaalagey nen Hasabias a manoley na kapalduay distrito na Keila so onsoblay a soldung na padir diad ngaran na distrito to;
18 Impaalagey nen Bavai a lakin anak nen Henadad tan manoley na kapalduay distrito na Keila so onsoblay a soldung na padir;
19 Impaalagey nen Ezer a lakin anak nen Jesua tan manoley ed Mizpa so onsoblay a soldung na padir a walad arap na panagsinupay armas, ya anggad pasen a nilikoay padir;
20 Impaalagey nen Baruc a lakin anak nen Zacai so onsoblay a soldung na padir ya anggad lolooban na abung nen Eliasib a pangulon pari.
21 Impaalagey nen Meremot a lakin anak nen Urias tan apo nen Haccoz so onsoblay a soldung na padir ya anggad kasamputay abung nen Eliasib.
22 Tinmulong ed impamaalagey lamet ed padir iray onggendan a papari: Impaalagey na saray paparin walad kaliber-liber na Jerusalem so onsoblay a soldung na padir;
23 Impaalagey nen Benjamin tan si Hasub so onsoblay a soldung na padir a walad arap na kaabungan da; Impaalagey nen Azarias a lakin anak nen Maasias tan apo nen Ananias so onsoblay a soldung na padir a walad arap na abung to;
24 Impaalagey nen Binui a lakin anak nen Henadad so onsoblay a soldung na padir manlapud abung nen Azarias ya anggad suyok na padir;
25 Impaalagey nen Palal a lakin anak nen Uzai so onsoblay a soldung na padir manlapud suyok na padir tan say tori ed atagey a parti na palasio diad abay na kuartil da ray guardia; Impaalagey nen Pedaya a lakin anak nen Paros so onsoblay a soldung na padir ya anggad bokig ya asingger ed Puirta na Danum tan say tori a mangguaguardiad Timplo. (Sikato yay pasen ya asingger ed parti na siudad a tatawagey Ofel, a diay nanayaman da ray kumikimey ed Timplo.)
26
27 Impaalagey na saray lalakid siudad na Tecoa so onsoblay a soldung na padir manlapud petek na baleg a torin mangguaguardiad Timplo ya anggad padir ya asingger ed Ofel; kumadwa yan impaalagey da.
28 Impaalagey na sakey a grupoy papari so onsoblay a soldung na padir a mampaarap ed baybay manlapud Puirta na Kabayo; impaalagey na balang sakey ed sikara so padir a walad arap na abung ton dili.
29 Impaalagey nen Sadoc a lakin anak nen Imer so onsoblay a soldung na padir a walad arap na abung to. Impaalagey nen Semaya a lakin anak nen Secanias tan managasikasoy Puirta na Bokig so onsoblay a soldung na Padir.
30 Impaalagey nen Hananias a lakin anak nen Selemias tan si Hanun a kumanem a lakin anak nen Zalaf so onsoblay a soldung na padir; kumadwa yan impaalagey da. Impaalagey nen Mesullam a lakin anak nen Berekias so onsoblay a soldung na padir a walad arap na abung to.
31 Impaalagey nen Malkias a platiro so onsoblay a soldung na padir ya anggad paalagey ya ikakana na saray kumikimey ed Timplo tan saray negosianti. Sayan pasen et walad abay na Puirta na Miphkad; tan asingger ed kuarton walad toktok na baybay a bokig a suyok na padir.
32 Impaalagey na saray platiro tan saray negosianti so onsoblay a soldung na padir manlapud kuartod suyok ya anggad Puirta na Karniro.
1 "Nen nadngelan nen Sanbalat a papasimbaloen ya ipaalagey na saray Judio so padir, mapalaloy petang na olo to tan niluludlurey to kami.
2 "Diad arap na saray kakaiba to tan saray sondalo na Samaria inkuanto, Antoy linmad olo na saray pangaskasiyan a Judio? Labay dan ipaalagey lamet so siudad? Abaloan da kasi a diad pangibagat da nasumpal da so kimey ed sanagew? Nayarian da kasin gawaen a bato ira may bunton na atemek-temek tan apool-poolan a bengatla?
3 "Manalalagey ed diking to si Tobias ya Ammonita, tan kuanton inyarum, Anto kasin padir so nayarian dan ipaalagey? Anggan asod katakelan labat angangko nayarian ton igeba!
4 "Nampikasi ak, O Dios, dengel mo pay panluludlurey dad sikami. Ompoktal komun ed sikara so panluludlurey dad sikami. Nasamsam komun ya amin iray kayaryan da, nadakep tan niakar irad sananey a bansa.
5 "Ag mo pa pipirdonaen so kaogsan da tan ag mo lilingwanan iray kasalanan da, ta pababaingan da kamin mangipapaalagey.
6 "Kanyan intuloy miy pangipapaalagey mi lamet ed padir; ag abayag apaldua mi lay kaatagey to, lapud mapeleng a mankimey iray totoo.
7 "Nen nadngelan di Sanbalat, Tobias, tan saray totood Arabia, Ammon, tan Asdod ya itutuloy mi so pangipapaalagey lamet ed padir na Jerusalem tan napansasaip mi la ray nagnagba, pinmetang a maung so olo ra.
8 "Kanyan nankokomplut iran ondogpa ed Jerusalem tan manggawa ray baleg a gewgew.
9 "Balet nampikasi kamid Dios mi tan labi agew a wala ray mambabantay a milaban ed sikara.
10 Kinakanta na saray taga Juda yan kanta: Onkakapoy kamid pansasakbat na ambelat; Dakerakel a maung iray deral-deral ya ekalen. Panon min ipaalagey natan so padir?
11 Abaloan na saray kalaban mi ya ag mi ra nanengneng odino ag mi naamtaan so nagagawa, anggad akasabi la ran mamapatey ed sikami tan mamapatondad kimey mi.
12 Balet mabetbet ya onlad sikami iray Judion manaayam ed kawalaan da ray kalaban mi tan papasakbayan da kami nipaakar ed saray plano da ray kalaban mi sumpad sikami.
13 Kanyan initdan ko ray totoo na saray ispada, pika, tan pana, insan ko ra impanayam ed sanib na padir diad kapag pasen ya ag ni asumpal. Kapag boleg walay kawalaan ton pasen a pambantayan.
14 Anengneng kon mapaga ray totoo, kanyan inkuankod sikara, saray pangulo ra, tan saray opisyal da, Ag kayo natatakot ed saray kalaban tayo. Nudnunot yo a matalonggaring tan makapataktakot so Katawan. Milaban kayo a pangyagel yod saray kadalaan yo, saray anak yo, saray kaasawaan yo, tan saray kaabungan yo.
15 Nadngelan na saray kalaban mi a naamtaan miy pankokomplut da kanyan abirbir dan say Dios et ginawa ton andi-kakanaan iray plano ra. Insan pinmawil kamin amin a nankimey ed padir.
16 Nanlapu lad saman, kapalduad saray totook so nankimey tan kapaldua so nangguardia. Wala ray armas dan pika, samper, pana, tan kawes a para laban. Saray pangulo pinabiskeg day linawa na saray totoon
17 mangipapaalagey na padir. Anggan saray managsakbat sankaegnaan day armas da.
18 Pati saray mankikimey akasalukbit ed awak da so ispada. Nanayam ed abay ko so makaoley a mamaknul na trumpita diad pamasakbay to.
19 Inkuankod saray totoo, saray opisyal da tan saray pangulo ra, Asiyan-siyan so kawalaay kimey ed padir kanyan nanaarawiyan itayo.
20 No narengel yoy tanul na trumpita, mantitipon kayod kawalaan ko. Say Dios tayo so kaiba tayon milaban.
21 Kanyan inagew-agew, manlapud palbangon ya anggad mansironget, kapalduad sikamiy mankikimey tan kapalduad so akapika a mangguaguardia.
22 Legan to yan panaon, imbagak ed saray totoon makaoley ed kimey a sikara tan saray ontutulong ed sikara et nepeg day manayam ed Jerusalem no labi, pian naguardiaan miy siudad no labi tan makapankimey kami no agew.
23 Siak, saray kakaibak, saray aripen ko, tan saray managbantay ed siak, et ag mi inekal so kawes mi no labi. Wala lawas ed lima iray armas mi.
1 "Diad ontombuk a panaon dakerakel a totoo, lalaki may bibii, so nanriklamo sumpad saray kapara ran Judio.
2 "Inkuay pigara, Dakel iray anak mi. Nakaukolan miy trigo pian mansiansia kamin mambilay.
3 "Inkuanda ray arum, Apasootan kamin angiprinda na saray kaalogan mi, saray kaubasan mi, tan saray kaabungan mi pian makasaliw kamiy trigo et ag kamin naerasan.
4 "Wala ni ray angikuan, Apasootan kamin inmutang pian niiter mid ari so buis na saray kaalogan tan saray kaubasan mi.
5 "Nampaparay dala mi, sikami tan saray kapara min Judio. Anggapoy pidomaan na saray anak mi ed saray anak da. Balet akin et nakaukolan a gawaen min aripen iray anak mi? Nilako lan aripen iray arum ya anak min bibii. Pangaskasiyan kami, lapud nala la ray kaalogan tan kaubasan mi.
6 "Nen nadngelan ko ray riklamo ra, mapalaloy pasnuk ko.
7 "Ginetmak so manggaway polaing a pamatondad sayan kagagawa. Tinetel ko ray pangulo tan saray opisyal na baley. Inkuankod sikara, Papairapen yo ray agagi yo! Imbagak a mantitipon iray totoon pian naasikasoy riklamo ra.
8 "Inkuankod sikara, Gagawaen tayoy anggaay nayarian tayon manondon ed saray agagi tayon Judio a nilako rad saray arum a bansa. Natan balet, papasooten yo ray agagi yo ya ilako ray sikaran dili ed sikayo a kapara ran Judio! Ag makaskasel iray pangulo tan anggapoy nibaga ra.
9 "Insan inkuanko, Makapoy itay gagawaen yo! Nepeg yon takotan so Dios tan gawaen so antokaman a kaptekan. Ag yo naitdan ed satan iray kalaban tayon Hentil na pankanawnawan manludlurey ed sikatayo.
10 Siak, saray kakaibak, tan saray katulong ko et pinautang mi ray totoo na kuarta tan trigo. Ag ti la ra pambabayaren ed saray utang da.
11 Ipawil yo natan ed sikara iray kaalogan da, saray kaubasan da, saray kaolibaan da, tan saray kaabungan da. Lingwanan yo la ray utang dad sikayon kuarta, odino trigo, odino alak, odino larak na oliba!
12 Inmebat iray pangulo, Sumpalen mi ray ibabagam. Ipawil mi lad sikaray kayaryan da tan ag mi la singilen iray utang dad sikami. Tinawag ko ray papari tan diad arap da impansambak iray pangulo a tooren day sipan da.
13 Inekal koy abel ya akabariber ed awak ko insan ko impayagpayag. Onya met so pangipayag na Dios ed siopaman ed sikayo ya ag manoor ed sipan to, inkuankod sikara. Paandipaten na Dios iray kaabungan yo tan amin a kayaryan yo; anggapoy bengatlan ikera tod sikayo. Inkuan na balang sakey a wadman, Amen!, insan da indayew so Katawan. Tinoor na saray pangulo so sipan da.
14 Legan na labinduay taon a siak so gobirnador na dalin na Juda, manlapud kumaduamplo ya anggad kumatalomplo tan duay taon na panooley nen Impirador Artajerjes, ag kon kinan tan saray kakanayon ko so taganon kanepegan a niiter ed gobirnador.
15 Makapabelat ed saray totoo iray amin a gobirnador ya akaonan nanoley nen say siak, lapud kinaukolan da a niiter ed sikaran inagewagew so apataplon kuartan pilak ya isaliw da na tagano tan alak. Pinapairap na anggan saray katulong da iray totoo. Balet domay impanoley ko, lapud walay takot kod Dios.
16 Inyoput koy pakayarik ed pangipaalagey lamet ed padir tan anggapoy bengatlan kinayaryan ko. Tinmulong ed impamaalagey lamet na padir iray amin a katulong ko.
17 Naynay kon pinakan ed lamisan ko so sanlasus tan limamplon Judio tan saray pangulo ra, likud nid saray arum a totoon dinmagod siak a taga ra kaliber-liber a bansa.
18 Inagew-agew a nansaklang ak na sakey a baka, anemiran sankaabigan a karniro, tan amayamay a manok. Kapag samploy agew sasalatan koy ipaparongok a sawasawaan ya alak. Anggaman ontan, ag ko inala so kuartan kanepegan ya awaten na gobirnador, ta ambelat la so sasakbaten na saray totoo.
19 O dios, ag mo pa lilingwanan a tumangan lapud amin a bengatlan ginagawak para sarayan totoo.
1 "Nadngelan di Sanbalat, Tobias, Gesem ya Arabe, tan saray arum nin kalaban mi ya asumpal mi lan nipaalagey so padir tan apansasaip lan amin iray nagnagba, anggaman ya ag mi ni nilira iray puirta.
2 "Impaibaga di Sanbalat tan Gesem a banaen ko rad sakey a bario diad Patar na Ono, ta labay da ak a pitongtongan. Balet say gagala dad saya et say pangabil dad siak.
3 "Kanyan angibaki ak na totook tan impaibagak ed sikara, Amayamay so kimey ko, kanyan ag ak ditan makakar. Ag ko nayarian a patondaen so kimey lapu labat ed pitongtong kod sikayo.
4 "Amipat da ak a nampabakian, balet nampara so inebat kod sikara.
5 "Insan diad kumalima pinawitan to ak nen Sanbalat, na sakey a lokas a sulat ya inyawat na sakey ya aripen to.
6 "Onyay logan na sulat: Imbagad siak nen Gesem a nibabalitad saray totood kaliber-liber a bansa a sika tan saray kaparam a Judio et getma yoy onlaban ed oley, kanyan papasimbaloen yon ipaalagey so padir. Imbaga to ni a pilalek moy magmaliw ya ari,
7 "tan akitongtongan mo la ray pigaran propita ya ibawag dad Jerusalem a sikay ari na Juda. Andi-duaruwan narengelan ya na Kagalang ya Impirador, kanyan gala la, ta pantongtongan ta yan dua.
8 "Onyay impaiyakar kon ebat kod sikato: Anggapoy katwaan to yan ibabagam. Sika so nampabrika ed sayan amin.
9 "Papatakoten da kami labat, pian natondaan so kimey. Nampikasi ak, Balet natan, O Dios, pabiskeg mo ak pa!
10 Diad sayan panaon, binisitak si Semaya a lakin anak nen Delaya tan apo nen Mehetabel, ta ag makataynan ed abung to. Inkuantod siak, Nepeg ya onamut itan dua ed Masanton Pasen na Timplo, insan ta italak iray puirta, ta onla ra dian mamatey ed sika. Nayarin diad sayan labi so iyakar da dian pamatey ed sika.
11 Inmebat ak ed sikato, Aliwa ak a toon batik-batik tan amut-amut. Abaloan mon onamut ak ed Timplo lapud pangawanan koy bilay ko? Ag ak onla.
12 Nen ninudnunot ko ya, abirbir kon ag nansalitay Dios ed kinen Semaya, no ag ta inupaan di Sanbalat tan Tobias a mamasakbay ed siak.
13 Inupaan dan mamatakot ed siak pian onabuloy ak, et diad ontan mankasalanan ak. Naderal dad satan so kagalangan ko tan napabaingan da ak.
14 Nampikasi ak, O Dios, nudnunot mo pa yan ginawad siak di Tobias tan Sanbalat, tan dusam ira. Nudnunot mo pa met imay biin propita a si Noadias tan saramay arum a propitan nantataktakot ed siak.
15 Kayariy impankimey a limamplo tan duay agew, asumpal so impamaalagey lamet ed padir nen kumaduamplo tan liman agew na bulan na Elul.
16 Nen nadngelan ya na saray kalaban mi ed kaliber-liber iran bansa, abirbir dan abaingan irad saray totoo, lapud amta na balang sakey ya asumpal so kimey lapud tulong na Dios.
17 Legan na panaon na impankimey ed padir, misusulatan iray pangulo na saray Judio ed kinen Tobias.
18 Amayamay a totood Juda a migagampi rad kinen Tobias, lapud manugang nen Secanias a lakin anak nen Ara. Sakey ni, inasawa nen Jehohanan ya anak to biin anak nen Mesullam a lakin anak nen Berekias.
19 Saray totoo sasalitaen dad arap ko iray amin a maabig a gawgawa nen Tobias, tan sasalitaen dad sikato ray amin ya imbabagak. Ag tinmondan nansulat a pamatakot tod siak.
1 "Apasimbalo lan nipaalagey so padir, nilira la ray puirta, tan niiter lay kimey da ray guardiay Timplo, saray kumakantad Timplo, tan saray arum a Levita.
2 "Insan ko impasen a manoley ed siudad na Jerusalem so duaran lalaki a di Hanani ya agik tan Hananias a pangulon opisyal na tirinsira. Anggapoy mipara ed kinen Hananias ed inkatoor to tan say inkatakot tod Dios.
3 "Imbagak ed sikara ya ag da lolokasan iray puirta na Jerusalem no ag ni abayag so imbutay so agew, tan ikaput tan balewetan da ra no wadman ni ray guardia, kasakbayan dan onsiput no onseselek lay agew. Imbagak met ed sikara a monoro ray guardia manlapud saray totoon manaayam ed Jerusalem, tan ipasen da ray arum a mangguardia ed nigana ran pasen, tan saray arum diad kaliber-liber na dilin kaabungan da.
4 "Maawang so siudad na Jerusalem, balet daiset iray totoon manaayam diman, tan pigpigara ni ray nipaalagey a kaabungan.
5 "Pinuyanan ak na Dios a pantitiponen ko ray totoo tan saray pangulo tan saray opisyal da, tan nengnengen koy listaan na saray pamilya ra. Inanap koy listaaan da ray totoon akaonan pinmawil a nanlapud arum a bansan nibantakan da, et sikato yay nalmok.
6 "Dakerakel ed saray nibantak ed luyag na Babilonia so pinmawil ed Jerusalem tan diad Juda; pinmawil so balang sakey ed sikara diad dilin baley to. Saray pamilya da ra ya et manaayam la ran nibantak ed Babilonia nanlapu lad impanakep nen Ari Nabucodonosor ed sikara.
7 "Saray pangulo ra et di Zorobabel, Jesua, Nehemias, Azarias, Raamias, Nahamani, Mardokeo, Bilsan Misperet, Bigvai, Nehum, tan Baana.
8 "Sikato yay listaan da ray boleg na Israel a kataruk toy bilang na saray pinmawil: Parosduanlibo, sanlasus pitomplo tan dua; Sefatiastalon lasus, pitomplo tan dua; Araanem a lasus, limamplo tan dua; Pahat-moab (kabyangan iray boleg nen Jesua tan Joab) duan libo, walon lasus tan labinwalo; Elamsanlibo, duan lasus, limamplo tan apat; Zatuwalon lasus, apataplo tan lima; Zacaipiton lasus tan anemaplo; Binuianem a lasus, apataplo tan walo; Bebaianem a lasus, duamplo tan walo; Azgadduan libo, talon lasus, duamplo tan dua; Adonicamanem a lasus, anemaplo tan pito; Begyaiduan libo, anemplo tan pito; Adinanem a lasus, limamplo tan lima; Ater (atawag met na Ezekias) siamaplo tan walo; Hasumtalon lasus, duamplo tan walo; Bezaitalon lasus, duamplo tan apat; Harifsanlasus tan labindua; Gideonsiamaplo tan lima.
9 Pinmawil met ira yan totoo a saray lalaki ra et nanayam ed saray onggendan a baley: Betlehem tan Netofasanlasus, walomplo tan walo; Anatotsanlasus, duamplo tan walo; Bet-azmavetapataplo tan dua; Kiryat-jearim, Cefira, tan Ceerotpiton lasus, apataplo tan talo; Rama tan Gebaanem a lasus, duamplo tan sakey; Micmassanlasus, duamplo tan dua; Betel tan Aisanlasus, duamplo tan talo; Say sananey a Nebolimamplo tan dua; Say sananey ya Elamsanlibo, duan lasus, limamplo tan apat; Harimtalon lasus tan duamplo; Jericotalon lasus, apataplo tan lima; Lod, Hadid, tan Onopiton lasus, duamplo tan sakey; Senaatalon libo, siam a lasus tan talomplo.
10 Sikato yay listaan da ray boleg na paparin pinmawil: Jedaya (kabyangay boleg nen Jesua) siam a lasus; pitomplo tan talo; Imersanlibo, limamplo tan dua; Pasursanlibo, duan lasus, apataplo tan pito; Harimsanlibo tan labimpito.
11 Saray boleg na Levita a pinmawil: Saray tumutogtog tan saray kumakanta ed Timplo (saray kabyangan na boleg nen Asaf) sanlasus, apataplo tan walo; Saray guardiad Timplo (kabyangan iray boleg di Sallum, Ater, Talmon, Acub, Hatita, tan Sobai) sanlasus, talomplo tan walo.
12 Saray boleg da ray kumikimey ed Timplo a pinmawil: Ziha, Hasufa, Taboat, Keros, Sia, Padon, Lebana, Hagaba, Salmai, Hanan, Gidel, Gahar, Reaya, Rezin, Necoda, Gazam, Uza, Pasea, Besai, Meunim, Nefusesim, Bacbuc, Hacufa, Harhur, Bazlit, Mehida, Harsa, Barcos, Sisera, Tema, Nezia, tan Hatifa.
13 Saray boleg da ray katulong nen Solomon ya akapawil: Sotai, Soferet, Perida, Jaala, Darcon, Gidel, Sefatias, Hatil, Pokeret-hazebaim, tan Amon.
14 Talon lasus, siamaplo tan dua ya amin so bilang da ray kabyangay boleg na saray kumikimey ed Timplo tan saray aripen nen Solomon a pinmawil.
15 Anem a lasus, apataplo tan dua ray kabyangay boleg di Delaya, Tobias, tan Necoda a pinmawil ira manlapud saray baley na Tel-mela, Tel-harsa, Kerub, Addon tan Imer; balet ag da napaneknekan a kabyangan iray boleg na Israelita.
16 Saray onggendan a boleg na papari et ag ira makarumog na listaan a mamaneknek na sengeg na pamilya ra: Habaias, Haccoz, tan Barzillai, (Say laki na saray paparin kabyangay boleg na Barzillai et angasawa na sakey a biin kabyangay boleg nen Barzillai a taga Galaad tan inala toy ngaran na boleg na katolangan ton laki.) Ag ira naawat a papari, lapud ag da napaneknekan no siopa ray lalaki ra.
17 Imbagad sikara na gobirnador na saray Judio ya ag ira makapangan na kakanen ya imbagat ed Dios, anggad walay sakey a parin makapangipanon ed Urim tan Tummim.
18 Say bilang na amin a pinmawil et apataplo tan duan libo, talon lasus tan anemaplo. Saray lalaki tan bibiin aripen da piton libo, talon lasus, talomplo tan pito; Saray lalaki tan bibiin tumutogtog tan saray kumakantaduan lasus, apataplo tan lima; saray kabayopiton lasus, talomplo tan anem; saray muladuan lasus, apataplo tan lima; saray kamilyoapat a lasus, talomplo tan lima; saray asnoanem a libo, piton lasus tan duamplo.
19 Amayamay a totoo so tinmutulong ed pambayar na agastos ed impamaalagey lamet ed Timplo. Say gobirnadorpitoran kilo a balituk, limamplon yaung ya ikakanad sirimonya, liman lasus tan talomplon kawes da ray papari; Saray pangulo da ray bolegsanlasus, limamplo tan talo a kilon balituk, sanlibo, apat a lasus tan anemaplon kilo a pilak; saray arum a totoosanlasus, limamplo tan talo a kilon balituk, sanlibo talon lasus, duamplo tan apat a kilon pilak, tan anemaplo tan piton kawes da ray papari.
20 Nanaayam ed saray baley tan saray siudad na Juda iray amin a totood Israel; saray papari, saray Levita, saray guardiad Timplo, saray tumutogtog tan saray kumakanta, saray amayamay ya ordinarion totoo, tan saray kumikimey ed Timplo.
1 "Diad kumapiton bulan saray totood Israel et manaayam la rad saray dilin baley da. Nen ononan agew na saman a bulan nantitipon iran amin ed Jerusalem diad plasa a walad kaloob ed Puirta na Danum. Kinerew dad kinen Esdras, say pari tan iskriba na Ganggan ya inter na Katawan ed Israel diad panamegley nen Moises, ya alaen toy libro na Ganggan.
2 "Inala nen Esdras insan to inyakar ed nantitiponan na saray totoolalaki, bibii, tan ogogaw a nayarian da lay ontalus.
3 "Diad saman a plasa ed abay na puirta imbasa tod sikaray Ganggan manlapud palbangon ya anggad kaagwan, et marengerengel iray totoo.
4 "Si Esdras nanalagey ed tapew na intabladon tabla ya impaalagey makasengeg ed saman ya agawa. Nanalagey ed nikawanan to iray onggendan a totoo: Matitias, Sema, Anaya, Urias, Helcias, tan Maasias. Diad nikawigi to saraya so nanalagey: Pedaya, Misael, Malkias, Hasum, Hasbadana, Zacarias, tan Mesullam.
5 "Atagey so panalalageyan nen Esdras, kanyan sankanengneng sa amin a totoo. Ag da inyalis so mata rad sikato et kapangilukas tod libro inmalagey ya amin.
6 "Inkuanen Esdras, Nadayew komun so Katawan, say matalonggaring a Dios! Amin a totoo inyatagey day lima ra tan kuanda, Amen, Amen! Insan ira dinmakmomon angigalang ya anggad dalin.
7 "Inmalagey iray totoo, tan saray onggendan a Levita so angipaliwawad sikara na Ganggan; Jesua, Bani, Serebias, Jamin, Acub, Sabetai, Hodias, Maasias, Kelita, Azarias, Josabad, Hanan, tan Pelaya.
8 "Impatalus dad salitan ikakana na saray totoo so Ganggan na Dios, insan da impaliwawa pian natalusan na saray totoo.
9 "Nen nadngel na saray totoo so labay ya ibaga na Ganggan, atenyeg so puso ra kanyan nanaakis ira. Saray mangipapaliwawa na Ganggan a di Nehemias a gobirnador, Esdras a pari tan iskriba, tan saray Levita, et inkuanda sirin ed amin a totoo, Masanto yan agew ed Katawan a Dios yo, kanyan ag kayo nepeg a manermen odino onakis.
10 Sempet ki la ta mampista kayo. Iyapag yod saray kulang so paraan iray kakanen tan alak yo. Masanto yan agew ed Katawan tayo, kanyan ag kayo maneermen. Pabiskegen kayo na liket ya iter ed sikayo na Katawan.
11 Nanliliber iray Levita, ta pinapareen da ray totoo. Imbabaga rad sikaran ag ira maneermen, ta masanto man ya agew.
12 Kanyan sinmempet lad abung iray amin a totoo. Maliket iran nanaakan tan naniinom; iniitdan da ray kulang so paraan, lapud atalusan da ray imbasad sikara.
13 Diad ontombuk ya agew saray pangulo da ray boleg, saray papari, tan saray Levita et linmad kinen Esdras, ta manaral iray ibabangat na Ganggan.
14 Naamtaan da a say Ganggan ya inter na Katawan diad panamegley nen Moises et ingganggan to ray Israelita a manayam irad saray abung-abung legay Pista na saray Abung-abung.
15 Kanyan inter da ray onggendan a bilin, insan da impaibawag ed intiron Jerusalem tan saray arum a siudad tan baley: Laka kayod kapokdulan, ta mangala kayo ray sang-sangay kiew na oliba, agoo, mirto, palma, tan saray arum a mabolung a kiew, insan tayo ra gawaen ya abung-abung onung na nisulat ed Ganggan.
16 Kanyan anggaala ray totoo na saray sanga-sangay kiew, insan ira nanggagawa na saray abung-abung ed plastadon atep na saray kaabungan da, diad saray solar da, diad patio na Timplo, tan diad saray plasa ed abay na Puirta na Danum tan Puirta nen Efraim.
17 Amin da ray totoon pinmawil manlapud inkadakep nanggagawa ra na saray abung-abung tan nanaayaman da. Natan labat so impakagawa to ya nanlapud saramay agew nen Josue a lakin anak nen Nun, kanyan mapalaloy liket na balang sakey ed sikara.
18 Manlapud ononan agew na pista ya anggad kaonuran ya agew, nanbabasa ran inagew-agew na sakey a parti na Ganggan na Dios. Nampista ra na pitoy agew, tan diad kumawalon agew walay sirimonyan pansamput, onung na ibabagay Ganggan.
1 "Diad kumaduamplo tan apat ya agew ed saman met lamlamang a bulan, nantitipon iray totoo ta nanayuno ra a pangipanengneng day ermen dad saray kasalanan da. Imbibiig da lay sikaran dili ed amin da ray sangkaili. Nankakawes iray sako tan iniinan day dabuk so kaolowan da a tanday ermen da. Nanalegey ira, insan da ginapwan ya impapatwa iray kasalanan da tan saray kasalanan da ray lalaki ra.
2
3 "Diad loob na sakey a taloy oras nibasad sikara so Ganggan na Katawan a Dios da, tan diad ontombuk a taloran oras impapatwa ray kasalanan da tan inggagalang da so Katawan a Dios da.
4 "Walay intabladon para saray Levita, tan dia ra nanalagey di Jesua, Bani, Cadmiel, Sebanias, Buni, Serebias, Bani, tan Kenani. Maksil so bosis dan nampikasi ed Katawan a Dios da.
5 "Saray onggendan a Levita tinawag dan mangigalang iray totoo: Jesua, Cadmiel, Bani, Hasabnias, Serebias, Hodias, Sebanias, tan Petahias. Inkuanda: Alagey kayo tan idayew yoy Katawan a Dios yo; idayew yo ed ando lan ando! Idayew komun na balang sakey a too sa mapagalang a ngaran to, anggaman ya aliwan nagnap so panangigalang na too.
6 "Insan saray totood Israel nampikasi ra na onya: Sika, Katawan, sika labat so Katawan; pinalsam iray katawenan tan saray bitewen ed tawen. Pinalsam so dalin tan say dayat tan amin a logan da; initdan moy bilay iray amin a bengatla. Ondadakmomo tan mangigagalang ed sika iray mangatatawen a pakayari.
7 "Sika, Katawan a Dios, sika so amili ed kinen Abram tan impaway mo manlapud baley na Ur diad Babilonia; sinalatan mo so ngaran to na Abraham.
8 "Arumog mon matoor ed sika, insan akisipanan kad sikato. Insipan mon iter ed sikatoy dalin na saray Cananeo, say dalin na saray Heteo tan saray Amorreo, say dalin na saray Perezeo, Jebuseo, tan saray Gergeseo; inter mo a panayaman na saray kabyangay boleg to. Sinumpal moy sipan mo, lapud matoor ka.
9 "Anengneng mo no panoy impanirap da ray lalaki mi ed Egipto; dinengel moy inkerew da na tulong nen wala rad Dayat ya Ambalanga.
10 Nanggagawa ka na saray makapakelaw a milagro sumpad ari na Egipto, sumpad saray opisyal to tan saray totood nanarian to lapud amtam no panoy impamapairap dad saray totoom. Binmantug kad saman tan bantug ka ni ya anggad natan.
11 Benelsay mo so dayat para saray totoom insan mo ra impanakar ed pinamagam a dayat. Impalner mod aralem a danum iray angosil ed sikara; singa ra baton linmereg ed madaluyon a dayat.
12 Diad panamegley na lorem inwanwan mo ra no agew, tan no labi niliwawaan mo ra na apoy so dadalanen da.
13 Manlapud tawen inmakseb kad Palandey na Sinai, insan kad man akisalitad saray totoo; initdan mo ra na saray maung a ganggan, saray maptek a bangabangat.
14 Imbangat mo ra a ngilinan da ray masanton Agew na Panagpainawa, tan inter mod sikara iray ganggan mo diad panamegley nen Moises ya aripen mo.
15 Nen naerasan ira initdan mo ray tinapay a nanlapud tawen; nen napgaan ira initdan mo ray danum a nanlapud baton dampay. Imbagam ed sikara a kayaryanen day dalin a sinambaan mon iter ed sikara.
16 Balet nagmaliw a mapaatagey tan bangar iray lalaki mi tan ag da inonur iray ganggan mo.
17 Ag ira tinmoluk; alingwanan da ray amin a ginagawam; alingwanan da ray milagron ginagawam. Lapud panagpasirayew da amili ray sakey a pangulo a mamapawil ed sikara ed inkaaripen da ed Egipto. Balen manamirdona ka a Dios; mapangasi tan maaro ka, tan aliwa kan maipapasnuk. Alay kabaleg na ag mangoman a panangarom; ag mo ra inkaindan.
18 Nanggawa ray talintaon kilaw a baka, insan inkuandan sikatoy dios ya angipaway ed sikarad Egipto. Agaylay impamabaing dad sika, Katawan!
19 Balet ag mo ra inkaindan dimad kalawakan, lapud baleg so panangasim. Ag mo pinaandi imay lorem odino samay apoy ya angiwanwan ed sikara no labi tan no agew diad impankurang da.
20 Lapud kaabigan mo imbagam, so nepeg dan gawaen; initdan mo ray mana a kanen da, tan danum ya inomen da.
21 Diad apataploy taon ya impanayam dad kalawakan initdan mo ray amin a nakaukolan da; ag balut dinmaan so kawes da, tan ag linmarag ed sakit so sali ra.
22 Inyabuloy mon nadakep da iray bansa tan saray nanarian, saray dalin ya akiketeg ed dalin da. Dinakep day dalin na Hesbon a nanarian nen Sehon, tan say Basan a nanarian nen Og.
23 Initdan mo ray anak a say karakel da et singa karakel na bitewen ed tawen; inyabuloy mon nadakep da tan napanayaman da so dalin ya insipan mon iter ed saray lalaki ra.
24 Dinakep day dalin na Canaan; impanalom ira ed saray totoon manaayam diman. Initdan mo ray totoom na pakayarin manggawa na labay dan gawaen ed saray totoo tan saray arari ed dalin na Canaan.
25 Dinakep na saray totoom iray siudad ya aliber na padir, saray mabunan dalin, saray abung a napnoy kayamanan, saray bobun a walay danum, saray kaolibaan, saray kakiewan a mambunga, tan saray kaubasan. Inaakan day amin a labay da, kanyan tinmataba ra; nanliket irad amin a kaabigan ya inter mod sikara.
26 Balet kinalaban ka na saray totoom tan ag da ka inonur; binenegan day Ganggan mo. Pinapatey da ray propitan mamapasakbay ed sikara, saray propitan mangibabagad sikaran ompawil irad sika. Pinapabaingan da kan amimpigapiga na saray totoom,
27 kanyan inyabuloy mon nadakep tan naoleyan ira na saray kalaban da. Nen wala rad segsegang kinmerew irad sika na tulong, et manlapud tawen dinengel mo ra. Lapud baleg a panangasim initdan mo ra na saray pangulo ya angyaagel ed sikarad saray kalaban da.
28 Nen pinmawil so mareen a panagbilay da, nankasalanan ira lamet; kanyan impadakep mo ra lamet ed saray kalaban da. Balet nen nagbabawi ra tan kinerew dan iyagel mo ra, manlapud tawen dinengel mo ra; lapud baleg a panangasim amimpiga-pigan inyagel mo ra.
29 Pinasakbayan mo ran onuren da ray ganggan mo balet lapud panagpasirayew da ag da ra inonur, anggaman a say pangonur ed Ganggan mo et pakagamuran na bilay. Diad kinaawet na olo ra tan inkabangar da, ag da labay so ontoluk.
30 Piga-pigay taon ya inanosan mo ran pinapasakbayan. Impansasalitam iray propitam, balet nantelek-telekan iray totoom, kanyan inyabuloy mon nadakep na saray arum a bansa.
31 Anggaman ontan, ag mo ra inkaindan o dineral, lapud baleg so panangasim. Maaro tan mapangasi ka a Dios!
32 O Dios mi, alay talonggaring mo! Makapataktakot tan makapanyarin tuloy! Matoor mon susumpalen so impisipanan mo. Nanlapu lad samay panaon a pinapairap kami na saray ararid Asiria, ontan lay paniirap mi ya anggad natan. Saray arari mi, saray pangulo mi, saray papari tan saray propita mi, saray lalaki mi, tan amin a totoo mi et maniirap ira. Nudnunot mo pa so ontan lan impanirap mi!
33 Maptek so ginawam diad impanusam ed sikami; matoor ka lawas, anggaman a nankasalanan kami.
34 Saray lalaki mi, saray arari mi, saray pangulo mi, tan saray papari mi, et ag da inonur so Ganggan mo. Ag da dinengel iray ganggan mo tan saray pasakbay mo.
35 Lapud abuloy mo saray arari inoleyan da ray totoom, legan a manaayam irad maawang tan mabunan dalin ya inter mod sikara; balet ag da binenegan so kasalanan tan ag da ka nanlingkuran.
36 Et natan aripen kami ed dalin ya inter mod sikami, diad sayan mabunan dalin a mangiiter ed sikami na tagano.
37 Saray bungay dalin oonla rad saray arari ya inter mo ran manoley ed sikami lapud impankasalanan mi. Gagawaen dad sikami tan saray ayayep mi so labalabay da, kanyan sigput kamin pangaskasiyan!
38 Lapud sayan amin ya agawa, sikamin totood Israel, et nanggawa kami na malet a paknaan ya insulat tan pinirmaan na saray pangulo mi, saray Levita mi, tan saray papari mi.
1 "Say inmonan nampirma et say Gobirnador a si Nehemias a lakin anak nen Hacalias, insan sinmoblay si Sedekias. Nampirma met iray onggendan:
2 "Saray papari: Seraya, Azarias, Jeremias, Pasur, Amarias, Malkias, Hatus, Sebanias, Maluc, Harim, Meremot, Obadias, Daniel, Gineton, Baruc, Mesullam, Abias, Miamim, Maazias, Bilgai, tan Semaya.
3
4
5
6
7
8
9 "Saray Levita: Jesua a lakin anak nen Azanias, Binui, a kabyangay boleg nen Henadad, Cadmiel, Sebanias, Hodias, Kelita, Pelaya, Hanan, Mica, Rehob, Hasabias, Zacur, Serebias, Sebanias, Hodias, Bani, tan Beninu.
10
11
12
13
14
15
16
17
18
19
20
21
22
23 Saray pangulo da ray totoo: Paros, Pahat-moab, Elam, Zatu, Bani, Buni, Asgad, Bibai, Adonias, Bigvai, Adin, Ater, Ezekias, Azur, Hodias, Hasum, Bezai, Harif, Anatot, Nebai, Magpias, Mesullam, Hezir, Mezezabel, Sadoc, Jadua, Palatias, Hanan, Anaya, Oseas, Hananias, Hasub, Hallohes, Pilha, Sobec, Rehum, Hasabna, Maaseya, Ahias, Hanan, Anan, Malluc, Harim tan Baana.
24
25
26
27
28 Sikamin totood Israel, saray papari, saray Levita, saray guardiad Timplo, saray tumutogtog tan saray kumakanta ed Timplo, saray kumikimey ed Timplo, tan saray arum a diad panangonur ed Ganggan na Dios et imbiig day sikaran dili ed saray sangkailin manaayam ed dalin mi, sikami tan saray kaasawaan mi tan amin da ray anak min wala lay pakatalus,
29 et mikakasakey kamid saray pangulo mi diad pansamba mi a mambilay kami onung ed Ganggan na Dios, ya inter to ed panamegley na aripen ton si Moises tan nadusa kami no ag mi sumpalen; ya onuren min amin so ingganggan ed sikami na Katawan, say Katawan mi; a toluken mi ray amin a bilin tan totontonen to.
30 Ag kami mangasawa odino miasawa ed saray sangkailin manaayam diad dalin mi.
31 No diad Agew na Panagpainawa odino diad arum a masanton agew et mangyakar iray sangkaili na trigo odino antokaman ya ilako rad sikami, ag kami manaliw ed sikara. Kapag kumapiton taon ag mi dalusay dalin mi, tan lingwanan mi la ray amin ya utang ed sikami.
32 Tinaon kamin manginagnag na kakawalo na sakey onsan pilak ya itulong mid gastosen ed Timplo.
33 Iter mi ray onggendan a nakaukolan ed panangigalang ed Timplo: say masanton tinapay, say inagew-agew a bagat a trigo, saray ayayep ya isaklang a bagat a popoolan ya inagew-agew, saray masanton bagat a para saray Agew na Panagpainawa, saray Pista na Balon Bulan, tan saray arum a pista, saray arum a masanton bagat, saray bagat a pangekal na saray kasalanan na Israel, tan arum nin nakaukolan para Timplo.
34 Sikamin totoo, saray papari, tan saray Levita, et mampapalaranan kami a tinaon pian naamtaan mi no dinan iray boleg a mangiter na kiew a pamool ed saray bagat ya isaklang ed Katawan a Dios tayo, onung na ibabagay Ganggan.
35 Iyakar min tinaon ed Timplo so bagat ya ononan naani mi tan say ononan aluton bungay kiew mi.
36 Iyakar mid saray papari a manlilingkur ed Dios diad Timplo so pangulowan ya anak min laki, ta isaklang mid Dios, onung na ibabagay Ganggan. Iyakar mi met so besag a kilaw na baka mi tan say besag a kilaw na karniro mi odino say besag na kanding mi.
37 Mangyakar kamid saray papari diad Timplo na minasan arina ya agawad ononan trigon naani kapag taon; iyakar mi met iray arum nin bagat min alak, larak na oliba, tan amin a klasin prutas. Iyakar mid saray Levita a managalay kakaplo ed saray daralusan min bario so kakaplo na saray bungay tanaman ed dalin mi.
38 No panagala na saray kakaplo nepeg a kaiba na saray Levita iray paparin say sengeg na boleg da et si Aaron. Say kakaplo na amin a natipon da et para Timplo tan nepeg ya iyakar na saray Levita ed saray kuarton panagsinupan.
39 Saray totood Israel tan saray Levita et iyakar dad saray kuarton panagsinupan a kawalaan na saray kagawaan na Timplo iray iniiter a trigo, alak, tan larak na oliba. Diay panaayaman na saray paparin liber day mankimey ed Timplo, saray guardiad Timplo, tan saray tumutogtog tan saray kumakanta ed Timplo. Ag mi paolyan so abung na Dios mi.
1 "Nanayam ed Jerusalem iray pangulo, nampapalaranan balet iray arum a totoo no dinan a pamilya ed kapag samplora so manayam ed masanton siudad na Jerusalem. Saray arum a pamilya et nepeg a manayam la rad saray arum a siudad tan saray arum a baley.
2 "Indayew na amin a totoo so siopaman nin maabuloy a manayam ed Jerusalem.
3 "Diad saray arum a siudad tan baley saray totood Israel, saray papari, saray Levita, saray kumikimey ed Timplo, tan saray kabyangay boleg da ray aripen nen Solomon et nanayam irad dilin dalin da diad saray dilin baley da. Say onggendan et say listaan na saray manonan totood luyag na Juda a manaayam irad Jerusalem.
4 "Saray kabyangay tribu nen Juda: Si Ataya a lakin anak nen Uzias tan apo nen Zacarias. Saray arum a lalaki to et di Amarias, Sefatias tan Mahalalel a kabyangan iray boleg nen Fares a lakin anak nen Juda.
5 "Si Maasias a lakin anak nen Baruc tan apo nen Colhose. Saray arum a lalaki to et di Hazaya, Adaya, Joarib, tan Zacarias a kabyangan iray boleg nen Sela a lakin anak nen Juda.
6 "Diad saray kabyangay boleg nen Fares apat a lasus, anemaplo tan walo a matalonan lalaki so nanayam ed Jerusalem.
7 "Saray kabyangay tribu nen Benjamin: Si Sallu a lakin anak nen Mesullam tan apo nen Joed. Saray arum a lalaki to et di Pedaya, Colaya, Maasias, Itiel, tan Jesaias.
8 "Di Gabai tan Sallai ya asingger so pikanayon dad kinen Sallu. Siam a lasus, duan lasus tan walomplon amin iray kabyangay tribu nen Benjamin a nanayam irad Jerusalem.
9 "Si Joel a lakin anak nen Zicri so pangulo ra, tan si Juda a lakin anak nen Senua so onkumadwan opisyal na siudad.
10 Saray papari: Si Jedaya a lakin anak nen Joarib, tan si Jakin.
11 Si Seraya a lakin anak nen Helcias tan apo nen Mesullam. Saray arum a lalaki to et di Sadoc, Meraiot, tan Ahitob a Pangulon Pari.
12 Walon lasus, duamplo tan duan amin iray kabyangan na sayan boleg a nanlingkur ed Timplo. Si Adaya a lakin anak nen Jeroham tan apo nen Pelalias. Saray arum a lalaki to et di Amzi, Zacarias, Pasur, tan Malkias.
13 Duan lasus, apataplo tan duan amin iray kabyangan na sayan boleg a sikaray pangulo na saray pamilya. Si Amasai a lakin anak nen Azarel tan apo nen Azai. Saray arum a lalaki to et di Mesillemot tan Imer.
14 Sanlasus, duamplo tan walon kabyangan na sayan boleg iray matalonan sondalo. Say pangulo ra et si Zabdiel a kabyangay sakey a pamilyan matalona.
15 Saray Levita: Si Semaya a lakin anak nen Hasub tan apo nen Azricam. Saray arum a lalaki to et di Hasabias tan Buni.
16 Di Sabetai tan Josabad, saray matalonan Levita a makaoley ed kimey diad paway na Timplo.
17 Si Matanias a lakin anak nen Mica tan apo nen Zabdi, tan kabyangay boleg nen Asaf. Impangulo to ray kumakantad Timplo diad panagkanta ray dasal na pisasalamat. Si Bacbukias a katulong nen Matanias ed kimey to. Si Abda a lakin anak nen Samua tan apo nen Galal, tan kabyangay boleg nen Jedutun.
18 Duan lasus, walomplo tan apat ya amin iray Levitan nanayam ed masanton siudad na Jerusalem.
19 Saray Guardia ed Timplo: Di Akub, Talmon tan saray kakanayon da; sanlasus, pitomplo tan dua ran amin.
20 Saray arum a totood Israel tan saray arum a papari tan saray Levita et nanayam irad dilin dalin da diad saray arum a siudad tan baley na Juda.
21 Saray kumikimey ed Timplo et nanayam irad Ofel a sakop na Jerusalem. Di Ziha tan Gispa so angipangulod sikara ed kimey.
22 Say pangulod kimey da ray Levita a nanayam ed Jerusalem et si Uzi a lakin anak nen Bani tan apo nen Hasabias. Saray arum a lalaki to et di Matanias tan Mica, tan kabyangay boleg nen Asaf, say boleg a makaoley ed togtog tan kanta ed saray sirimonyad Timplo.
23 Wala ray totontonen ya impaakaseb na ari nipaakar ed pansosoblay na saray boleg a mangipangulo ed inagew-agew a togtog tan kanta ed Timplo.
24 Si Petahias, a lakin anak nen Mezezabel tan kabyangay boleg nen Zera tan say tribu nen Juda, so angilaman ed saray totood Israel diad korti na Persia.
25 Amayamay iray totoon nanayam ed saray baley ya asingger ed kaalogan da. Saray kabyangay boleg na tribu nen Juda et nanayam irad Kiryat-arba, Dibon, Jecabseel, tan diad saray barion asingger ed sarayan siudad.
26 Nanayam met ira ed saray siudad na Jesua, Molada, Bet-pelet,
27 Hazar-sual, tan diad Beer-seba tan saray kaliber-liber ton bario.
28 Nanayam irad siudad na Siklag, diad Mecona tan saray kaliber-liber ton bario.
29 Nanayam irad baley na Enrimon, Zora, Jarmut,
30 Zanoa, Adullam, tan diad saray kaliber-liber dan bario. Nanayam irad Lakis tan diad kaalogan to, diad Azeca tan saray bario to. Saray totood Juda nanayam ira sirin ed dalin a nanleetan na Beer-seba diad abalaten tan say Patar na Hinom diad baybay.
31 Saray totood tribu nen Benjamin nanayam irad saray siudad na Geba, diad baybay ya anggad Micmas, Ai, Betel tan saray kaliber-liber ton bario,
32 Anatot, Nob, Ananias,
33 Hazor, Rama, Gitaim,
34 Hadid, Zeboim, Neballat,
35 Lod, tan Oni, tan diad Patar na saray Marunong a Kumikimey.
36 Saray pigaran grupo na Levita a gendat a nanayam irad dalin na Juda et nipabetang ed sikara a miayam irad dalin na saray totood tribu nen Benjamin.
1 "Say onggendan et say listaan da ray papari tan saray Levitan pinmawil manlapud saray arum a bansan nibantakan da. Kaolup ira nen Zorobabel a lakin anak nen Sealtiel tan si Jesua a Pangulon Pari.
2 "Saray Papari: Saraya, Jeremias, Esdras, Amarias, Malluc, Hatus, Secanias, Rehum, Meremot, Iddo, Ginetio, Abias, Miamin, Maadias, Bilga, Semaya, Joiarib, Jedaya, Sallu, Amoc, Helcias, tan Jedaya. Sikara yay lalakin pangulo na amin da ray kapara ran papari nen panaon nen Jesua.
3
4
5
6
7
8 "Saray Levita: Saray onggendan et sikaray makaoley ed panagkanta na saray imno na pisasalamat: Jesua, Binui, Cadmiel, Serebias, Juda, tan Matanias.
9 "Saray onggendan et sikaray kumakanta na saray ebat: Bacbukias, Unno, tan saray kapara ran Levita.
10 Si Jesua so ama nen Joakim ya ama nen Eliasib; si Eliasib so ama nen Joiada
11 ya ama nen Jonatan; tan si Jonatan so ama nen Jadua.
12 Nen pangulon pari si Joakim, saraya so pangulo da ray boleg na papari: Diad boleg nen Sereya, si Meraya Diad boleg nen Jeremias, si Hananias Diad boleg nen Esdras, si Mesullam Diad boleg nen Amarias, si Johanan Diad boleg nen Melicu, si Jonatan Diad boleg nen Sebanias, si Jose Diad boleg nen Harim, si Adna Diad boleg nen Merayot, si Helkai Diad boleg nen Iddo; si Zacarias Diad boleg nen Ginneton, si Mesullam Diad boleg nen Abias, si Zicri a kabyangay boleg nen Miniamin Diad boleg nen Moadias, si Piltai Diad boleg nen Bilga, si Samua Diad boleg nen Semaya, si Jonatan Diad boleg nen Joiarib, si Matenai Diad boleg nen Jedaya, si Uzi Diad boleg nen Sallai, si Callai Diad boleg nen Amoc, si Eber Diad boleg nen Helkias, si Hasabias Diad boleg nen Jedaya, si Natanael.
13
14
15
16
17
18
19
20
21
22 Walay nisinup a listaan da ray pangulo na saray pamilya da ray Levita tan saray papari legan na impanbilay na saray onggendan a Pangulon Papari: Eliasib, Joiada, Jonatan, tan Jadua. Asumpal yan listaan nen impirador na Persia si Dario.
23 Saray pangulo na saray pamilya da ray Levita et nikorit ed saray awaran, ya angga labat ed panaon nen Jonatan ya apo nen Eliasib.
24 Diad panangipangulo di Hasabias, Serebias, Jesua, Binui, tan Cadmiel naapag-apag ed pigaran grupo iray Levita. Duaran grupo so manebatan a mangidayew ed Dios tan misalamat ed Dios onung na saray bilin nen Ari David a too na Dios.
25 Saray onggendan a guardiay Timplo et makaoley iran mangguardia ed saray kuarton panagsinupan ed abay da ray puirta na Timplo: Matanias, Bacbukias, Obadias, Mesullam, Talmon, tan Acub.
26 Sarayan totoo nambilay ira legan na panaon nen Joakim a lakin anak nen Jesua tan apo nen Josadak, tan legan na panaon nen Nehemias a gobirnador, tan legan na panaon nen Esdras, say parin iskriba.
27 Nen nisaklang ed Dios so padir na siudad na Jerusalem, atawag a mantitipon ed Jerusalem iray Levitan manaayam ed inerman a pasen. Agaway onya pian makapibiang irad pista na panangisaklang tan diad pankanta na pisasalamat tan pantogtog na saray piangpiang tan saray arpa.
28 Saray kumakantan pamilyay Levita et nanlalapu rad panaayaman da diad kaliber-liber na Jerusalem, diad saray baley a kaliber-liber na Netofa,
29 tan diad Bet-gilgal, Geba, tan Azmavet.
30 Sinumpal na saray papari tan saray Levita so panaglinis onung ed ganggan para sikara, saray totoo, saray puirta, tan say padir na siudad.
31 Tinipon kod tapew na padir iray pangulo na Juda, insan ko ra ginawan makaoley ed duaran baleg a grupo a mangiter na pisasalamat ed Dios legan dan manliber ed siudad. Say sakey a grupo linmad kawanan diad tapew na padir tan amaarap ed Puirta na Deral-deral.
32 Tomtombuken nen Hosaya iray kumakanta, insan sikatoy tomtombuken na kapaldua na saray pangulo na Juda.
33 Saray pangulo et tomtombuken ira na saray onggendan a papari a mamapaknul na trumpita: Azarias, Esdras, Mesullam Juda, Benjamin, Semaya, tan Jeremias. Tomtombuken ira nen Zacarias a lakin anak nen Jonatan tan apo nen Semaya. (Saray arum a lalaki to et di Matanias, Micaya, tan Zacur a kabyangay boleg nen Asaf.)
34
35
36 Sikatoy tomtombuken na arum iran kabyangay boleg to a di Semaya, Azarel, Milalai, Gilalai, Maai, Natanael, Juda, tan Hanani. Amin da et nanaawit ira na saray panagtogtog na musika a singa saray nantotogtogan nen Ari David a too na Dios. Si Esdras ya iskriba so angipangulo ed sayan grupo diad impankurang da.
37 Diad Puirta na Sobul nantakayan iran amaatagey ed siudad nen David, dinmalan irad palasio nen David, insan ira pinmawil ed padir diad kawalaay Puirta na Danum diad nibokig na siudad.
38 Samay sakey a grupo na totoon misasalamat et linmad kawigi diad tapew na padir. Tomtombuken ko ra. Nilabasan mi so Tori na saray Pogun diad inyakar mid Maawang a Padir
39 manlapud man intuloy miy kurang mi insan nilabasan mi so Puirta nen Efraim, Puirta na Jesana, Puirta na Sira, Tori nen Hananel, tan say Tori na Sanlasus. Nilabasan mi met so Puirta na Karniro insan kami la tinmonda ed Puirta na Guardia.
40 Kanyan saramay duaran grupo a mangiiter na pisasalamat ed Dios ed sinmabi rad pasen a kawalaay Timplo. Likud ed saray pangulo a kaibak,
41 wala met ed grupok iray paparin mamapaknul na trumpita a di: Eliakim, Maaseya, Miniamin, Micaya, Elioenai, Zacarias, tan Hananias;
42 tan tomtombuken ira na saray onggendan: Maaseya, Semaya, Eleazar, Uzi, Johanan, Malkias, Elam, tan Ezer. Inkasil-kasil na saray kumakanta so impankakanta ra diad panangipangulo nen Izrahias.
43 Amayamay a bagat so insasaklang dad saman ya agew, tan mapalaloy gayaga na saray totoo lapud ontan lay impamaliket na Dios ed sikara. Akipista met iray bibii tan saray ogogaw. Narengel ed arawdawi so kasil na bosis dan amin.
44 Diad saman a panaon nipasen iray pigaran lalaki a makaoley ed saray kuarton panagsinupan na saray tulong para Timplo a pati saray kakaplo, tan say trigon ononan anien tan say bungan ononan borboren kapag taon. Sarayan totoo so makaoley a manala, diad kaalogan na nandoroman siudad, na saray rigalon iter na totoo a para saray papari tan saray Levita onung na ibabagay Ganggan. Aliketan ya amin iray totoo na Juda ed saray papari tan saray Levita
45 a mangoonur na panaglinis onung ed ganggan tan saray arum a sirimonyan ingganggan na Dios. Saray kumakanta tan saray tumutogtog ed Timplo tan saray guardia et ginagawa da met iray kimey da onung na saray totontonen ya impaakseb nen Ari David tan Solomon ya anak to.
46 Manlapud panaon nen Ari David tan si Asaf saray tumutogtog tan saray kumakanta so angipangulo ed saray kantan pangidayew tan pangiter na pisasalamat ed Dios.
47 Diad panaon nen Zorobabel tan diad panaon met nen Nehemias, amin da ray totood Israel naniiter iran inagew-agew na saray rigalon nakaukolan na saray tumutogtog tan saray kumakanta tan saray guardiad Timplo. Saray totoo et naniiter ira na masanton bagat ed saray Levita, tan saray Levita iniiter day kanepegan a betang na saray papari.
1 "Nen nibabasad saray totoo so Ganggan nen Moises asabi so parti ya ibabaga ton sebel a mikasakey ed saray totoo na Dios iray Ammonita odino saray Moabita.
2 "Say makasengeg ed saya et lapud saray Ammonita tan saray Moabita et ag da initdan na nakan tan nainom iray Israelita nen peles dan tataynan so Egipto. Binayaran da ingen na kuarta si Balaam a mangisambad saray Israelita, balet say Dios tayo impagmaliw ton bindision imay samba.
3 "Nen nadngel na saray totood Israel yan parti na Ganggan pinaekal dad olupan da iray amin a taga arum a bansa.
4 "Si Eliasib a pari a makaoley nen saman ed saray kuarton panagsinupan ed Timplo et abayag a maabig so pipiolup tod kinen Tobias.
5 "Inabuloyan ton ikana nen Tobias so sakey a baleg a kuarto a nigana a pangisinupan labat na saray bagat a tribo tan insinso, saray kagawaan ya ikakanad Timplo, saray bagat a para saray papari, tan saray kakaplo na trigo, alak, tan larak na oliba a rigalod saray Levita, saray tumutogtog tan saray kumakantad Timplo, tan saray guardiad Timplo.
6 "Nen onyay nagagawa, anggapo ak ed Jerusalem, ta diad kumatalomplo tan duan taon na panaari nen Artajerjes ed Babilonia pinmawil ak diman a mangibalitad sikato. Ag abayag inabuloyan to ak
7 "ya ompawil ed Jerusalem. Nikelawan ak ed impakaamtak ya inabuloyan nen Eliasib si Tobias a mangikana na sakey a kuarto na Timplo.
8 "Mapalaloy petang na olok ed saman tan imbantak kod paway iray amin a kayaryan nen Tobias.
9 "Ingganggan kon nalinisan imay kuarto onung ed ganggan; ingganggan ko met a nipawil diman iray kagawaan na Timplo, saray bagat a trigo, tan say insinso.
10 Akabatan ko met a tinaynan na saray tumutogtog tan saray kumakanta, tan saray Levita so Jerusalem ta pinmawil irad kaalogan da. Onyay agawa, lapud kulang a pambilay da so iiter na totood sikara.
11 Nampasnukan ko ray opisyal lapud impangyabuloy dan nakaindan so Timplo. Pinapawil kod Timplo iray Levita tan saray tumutogtog tan saray kumakanta ed Timplo, insan ko ra impankimey lamet.
12 Inggapo lamet na saray totood Israel so mangyakar ed saray kuarton panagsinupan ed Timplo na kakaplo na trigo, alak, tan larak na oliba ra.
13 Impasen kon makaoley ed saray kuarton panagsinupan iray onggendan a lalaki: Semaya a pari: Sadoc ya iskriba; tan Pedaya a Levita. Si Hanan a lakin anak nen Zacur tan apo nen Matanias so katulong dad kimey. Walay panagmatalek kod sikaran ibunog dan anggapoy saol ed saray kapara ran kumikimey iray abasto.
14 O Dios ko, nudnunot mo pa ra yan amin a ginagawak a para Timplom tan say panangigalang a nagawad dalem to.
15 Diad saman a panaon akanengneng ak ed Juda na saray totoon mamepespes na ubas no Agew na Panagpainawa. Saray arum papanoen day beneg na saray asno ra na trigo, alak, ubas, igos, tan arum ni ran bengatla, insan da iyaakar ed Jerusalem; pinasakbayan ko ran ag ira mangilalako ed saman ya agew.
16 Wala ray pigaran totoon taga siudad na Tiro a manaayam ed Jerusalem a mangaawit irad siudad na saray sira tan amin a klasin sasaliwen, ta ilalako rad saray totoo mi no Agew na Panagpainawa.
17 Nampasnukan ko ray pangulo na saray Judio tan inkuankod sikara, Nengneng yoy kaogsan a gagawaen yo! Gagawaen yon aliwan masanto so Agew na Panagpainawa.
18 Onya so makasengeg na anusaan na Dios ed saray lalaki yo, nen dineral to yan siudad. Balet say Dios et lalon papepetangen yoy olo tod Israel diad panggagawa yon aliwan masanto so Agew na Panagpainawa.
19 Ingganggan ko a kagapo na kapag Agew na Panagpainawa, diad kapansironget ikaput iray puirta na siudad tan ag ira lolokasan ya anggad asumpal lay Agew na Panagpainawa. Angipasen ak ed saray puirta na pigarad saray totook, pian naasikaso ran anggapoy bengatlan niloob ed siudad no Agew na Panagpainawa.
20 Aminsan o amidwa, saray nigosianti na amin a klasin sasaliwen et nampalabas iray labi na Biarnes diad paway na padir na siudad.
21 Pinasakbayan ko ra, Akin et wadya kayo? No gawaen yo niy onya dusaen ta ki la. Nanlapu lad saman ag la ra pinmawil ed Agew na Panagpainawa.
22 Ingganggan ko ray Levita a linisan day sikaran dili onung ed ganggan, insan ira onlan mangguardiad saray puirta pian naasikaso ran masanto lawas so Agew na Panagpainawa. Nudnunot mo ak pa, O Dios, lapu met ed saya, tan ag mo ak papaolyan lapud kabaleg na ag mangoman a panangarom.
23 Diad saman met a panaon akabatan ko a dakerakel iray Judion lalaki ya angaasawa na saray bibiin taga Asdod, Ammon, tan Moab.
24 Say kapaldua na saray anak da et ikana ray salita ed Asdod odino salita tayo.
25 Nampasnukan ko ra may lalaki tan insambak ira. Pinepepekpek ko ra tan inggogonut ko ra. Impansambak ira diad ngaran na Dios ya ag la ra mangasawa na saray bibiin taga arum a bansa.
26 Inkuankod sikara, Saray bibiin taga arum a bansa so makasengeg na impankasalanan nen Ari Solomon, anggaman a matalonggaring ni nen saray ararid arum a bansa, tan anggaman a diad panangaro na Dios ed sikato ginawa ton ari ed intiron Israel, apattak ed sayan kasalanan.
27 Aligin mi sirin so ginawa yo tan sumlangen mi so Dios diad pangasawa mid saray bibiin taga arum a bansa?
28 Si Joiada a lakin anak nen Eliasib so Pangulon Pari. Balet inasawa na sakey ed saray lalakin anak to so anak nen Sanbalat a taga baley na Bet-horon, kanyan pinataynan kod Jerusalem si Joiada.
29 Nudnunot mo pa, O Dios, no panon so impandotak na sarayan totoo ed inkapari tan say inpisipanan mod saray papari tan saray Levita.
30 Nilinisan ko ray totoo ed antokaman a marotak ya inawit na totoon taga arum a bansa; angipaakseb ak na saray totontonen para saray papari tan saray Levita pian naamtaan na balang sakey ed sikara o kimey to;
31 impaiyakar kod manepeg a panaon iray kiew a pampool na saray bagat; impaiyakar ko met ed saray totoo iray bagat dan ononan anien a trigo tan saray ononan borboren a bunga. Ag mo lilingwanan yan amin, O Dios, tan tumangan mo ak pa.