1

¹ "Malet ya inoleyan nen Solomon a lakin anek nen Ari David so nanarian. Binindisionan na Katawan a Dios si Solomon tan impagmaliw ton makapanyarin tuloy.

² "Ingganggan ton amin iray opisyal na sanlilibon sondalo tan saray opisyal na sanlalasus, amin da ray opisyal na gobirno, amin da ray pangulo na pamilya, tan saray arum a totoo

³ "a mila rad sikatod pasen na panangigalangan diad Gabaon. Linma rad man lapud diman so kawalaay Tuldan Ayamay Katawan a ginawa nen Moises ya aripen na Dios nen wala rad kalawakan. (

⁴ "Diad saman a panaon balet, walad Jerusalem so Kaban na Sipanan; nisinup ed dalem na tuldan impaalagey nen Ari David nen inyakar ton manlapud Kiryat-jearim imay kaban).

⁵ "Wadman met et Gabaon diad arap na Tuldan Ayamay Katawan so gansan altar a ginawa nen Bezalel a lakin anak nen Uri tan apo nen Hur. Si Solomon tan amin da ray totoo et inggalang day Katawan diman ed Gabaon.

⁶ "Diad arap na samay Tulda inggalang na ari so Katawan diad impangisaklang to na saray bagat ed tapew na samay gansan altar; angisaklang na sanlibon bagat a popoolan ed tapew na samay altar.

⁷ "Diad saman a labi pinmayawar so Dios ed kinen Solomon tan tinepet to, Antoy labay mon iter kod sika?

⁸ "Inmebat si Solomon, Impatnag mo lawas so baleg a panangarom ed kinen amak a David, tan natan insalat mo ak a manari.

⁹ "O Katawan a Dios, sumpal mo pa la natan imay sipan mod kinen amak. Impagmaliw mo ak ya ari na saray totoon ag nayari ran bilangen lapud karakel da.

¹⁰ Kanyan iter mo pad siak so kakabatan tan pakatalus a nakaukolan ko ed panoley kod sikara. Ta no andi, panon kon naoleyan ira yan matalonggaring a totoom?

¹¹ Inmebat so Dios ed kinen Solomon, Duga so kinerew mo. Ag ka kinmerew na saray kayaryan, odino kayamanan, odino kagalangan, odino say ipatey da ray kalaban mo, odino say pambilay mo na andokey. Ingen kinmerew ka na kakabatan tan pakatalus pian naoleyan mo ray totook ya angipasenan kod sikan ari.

¹² Itdan ta ka na kakabatan tan pakatalus. Itdan ta ka met na saray kayaryan, kayamanan, tan kagalangan a dakel ni nen saray a kayaryan na anggan siopan ari ya akaona nen say sika odino say arin mantombuk ed sika.

¹³ Kanyan tinaynan nen Solomon imay pasen na panangigalangan diad Gabaon a kawalaay Tuldan Ayamay Katawan, insan pinmawil ed Jerusalem. Diman nanoley ed Israel si Solomon.

¹⁴ Anipon si Solomon na sanlibo tan apat a lasus a karwahi tan labinduan libon kabayo a para bakal. Inyan to ray arum ed Jerusalem, tan saray arum diad nandoroman siudad.

¹⁵ Legan na impanoley to, saray pilak tan balituk et singa karakel na bato ed Jerusalem, tan saray tablan sidro et singa karakel na kiew a sikomoro ed saray alusadsar na Juda.

¹⁶ Saray totoo na ari so makaoley ed panagsaliw na kabayo ed Musri tan Cilicia,

¹⁷ tan say panagsaliw na karwahi ed Egipto. Sikaray manlalako na saray kabayo tan saray karwahi ed saray arari da ray Heteo tan Siriano. Anem a lasus a pilak so lako rad sakey a karwahi tan sanlasus tan limamplon pilak so sakey a kabayo.

2

¹ "Ginetma nen Solomon so mangipaalagey na timplo a pangigalangan na saray totoo ed Katawan tan ginetma to met so mangipaalagey na palasion panayaman to.

² "Pitomplon libon lalaki so impasen ton manolur na saray nakaukolan ed pamaalagey, tan walomplon libon lalaki so impasen ton mantabas na bato. Talon libo tan anem a lasus a lalaki iray makaoley a mangasikasod kimey.

³ "Impaikuanen Solomon ed kinen Ari Hiram na Tiro: Lakoan mo ak met na tablan sidro a singa samay impangilakom ed amak ya Ari David nen amaalagey na palasio ra.

⁴ "Mamapaalagey ak na timplo tan dia kami mangigalang ed sikato diad pampool mi na insinson agawa rad ambalbalingit iran rikado; dia kami met mangisaklang ya andi-tonda na bagat a tinapay, tan dia met so pangisaklangan mi na saray bagat a popoolan kapag kabwasan tan labi, no Agew na Panagpainawa, no Pistay Balon Bulan, tan no arum iran masanton agew a pamagalang ed Katawan a Dios mi. Ingganggan to ya ed saray Israelita a gawaen dan ando lan ando.

⁵ "Baleg a timplo so ipapaalagey ko, lapud matalonggaring so Dios nen saray arum a diriyos.

⁶ "Balet say katwaan to anggapoy makapangipaalagey na timplon para Dios, lapud ag nakarga na anggan say intiron kabaleg na tawen so Dios mi. Kanyan panon so pakapangipaalagey ko na timplon para sikato? Say nayarian kon ipaalagey labat et say sakey a pasen a pampoolan na insinso ed Dios.

⁷ "Mangibaki ka pa dia sirin na sakey a lakin marunong a mantatak tan mankimey ed balituk, pilak, gansa, tan balatyang, tan marunong met a manggaway asul, purpura, tan ambalangan abel. Mankimey a kaiba to ray marunong a kumikimey a taga Juda tan Jerusalem a pinili ra nen saman nen amak a David.

⁸ "Amtak a marunong a mambatang na kiew iray totoom, kanyan paiyakaran mo ak pa dia na saray troson sidro, saleng, tan sandalo na Libano. Sipaparaan ak a mangibaki na totook ya ontulong ed sikara

⁹ "ed pangiparaan na amayamay a tabla, lapud balbaleg tan nidoma-domay dakep a timplo so ipaalagey ko.

¹⁰ Mangiter ak na pantagano da ray kumikimey mo. Ipaiyakaran ta ka na sanlasus libon sako ya arina, sanlasus libon sako sibada, sanlasus tan apat a lasus tan labinduan libon litro ya alak tan apat a lasus tan labinduan libon litro ya larak na oliba.

¹¹ Saya so insulat nen Ari Hiram na Tiro ed kinen Solomon a pinagkaebat to: Lapud inaro na Katawan iray totoo to, impagmaliw to kan ari ra.

¹² Nadayew komun so Katawan a Dios na Israel, say Manamalsa ed tawen tan dalin! Initdan toy Ari David na sakey a makabat ya anak a lakin maung so pakatalus to tan marunong ed amin a bengatla. Et natan mangipaalagey na timplon para Katawan tan palasion panayaman to.

¹³ Ibakik ed sikay sakey a makabat tan marunong a kumikimey a manngaran na Huram.

¹⁴ Kabyangan na tribu nen Dan so ina to, tan taga Tiro so ama to. Marunong a mankimey ed balituk, pilak, gansa, balatyang, bato, tan tabla. Nayarian ton gawaen ya amiy panagtatak tan natombuk toy antokaman a paitatak ed sikato. Pankimey mo a kaiba to ray marunong a kumikimey mo tan saray impankikimey nen amam ya Ari David.

¹⁵ Ipaiyakar mo diad sikami iray insipan mon trigo, sibada, alak, tan larak na oliba.

¹⁶ Mamatang kamid saray palandey na Libano na amin a naukolan mon sidro. Kayari to singeren mi ran singa lamo, insan mi ra iyanur ed dayat ya anggad Jope. Akaoley kayo lan mangalad man ya iyakar ed Jerusalem.

¹⁷ Impabilang nen Ari Solomon iray amin a sangkaili a manaayam ed dalin na Israel, a singa samay impamilang nen ama to a David ed saray totood Israel. Wala ray sanlasus, limamplo tan talon libo tan anem a lasus a sangkaili a manaayam ed Israel.

¹⁸ Impasen nen Solomon ed sikara iray pitomplom libo a manolur na nakaukolan, tan walomplon libo so impasen ton mantabas na bato ed kapalandeyan. Talon libo tan anem a lasus so impasen ton mangasikaso ed kimey.

3

¹ "Inggapo nen Ari Solomon ya impaalagey so Timplo na Katawan ed Jerusalem diad tapew na Palandey na Moria, a diay pinayawaran na Katawan ed kinen Ari David ya ama nen Solomon. Imparaan la ya nen David a pasen, a sikato ya may kawalaan na panagilikan nen Arauna a Jebuseo.

² "Ginmapo so impangipaalagey nen kumadwan bulan na kumapat a taon na panaari nen Solomon.

³ "Say Timplon impaalagey nen Ari Solomon et talomplon mitro so karokey to tan samploran mitro so kaawang to.

⁴ "Say kuarton lolooban et samploran mitro a kaparay kaawang na Timplo, tan anemaplon mitro so kaatagey to. Inokupan na puron balituk so dalem na kuarto.

⁵ "Say manonan kuarto et adingdingan na tablan sidro tan inokupan na puron balituk. Nikorti dia ray kiew a palmira tan saray golunggolung.

⁶ "Dinikoraan na ari so Timplo na mararakep iran alahas tan balituk a sinasaliw ed dalin na Parvaim.

⁷ "Inookup to so balituk ed saray dingding na Timplo, saray pagsen, saray lolooban, tan saray puirta. Saray kumikimey inkokorti rad dingding iray kirubin.

⁸ "Say bandad dalem a kuarto, a tatawagey Sankasantosan a Pasen, et samploran mitro so karokey to tan samploran mitro so kaawang to a kaparay kaawang na Timplo. Duamplo tan liman tonilada a balituk so nikanan impanookup ed saray dingding na Sankasantosan a Pasen:

⁹ "duamplon onsan balituk so nikana ed impanggawa na saray pasak. Inokupan met na balituk iray dingding na saray kuarton walad tagey.

¹⁰ Nanggawa met so ari na duaran kirubin a mital, inokupan to ra na balituk, insan to ra inyan ed Sankasantosan a Pasen,

¹¹ a diman ira nanampar ya akaalagey a sankaarap day lolooban. Sanderwa ray payak a duaran mitroy karokey so balang sakey. Akaonat iray payak da; nandiwitan irad pegley na kuarto tan sinmabi ra ya anggad nantopag a dingding, kanyan binenlagan day samploran mitro a sikatoy kaawang na kuarto.

¹²

¹³

¹⁴ Nanggawa met so ari na kurtinan para Sankasantosan a Pasen; ginawad pinon linen tan abel iran asul, purpura, tan ambalanga tan binordaan na indengan na saray kirubin.

¹⁵ Nanggawa so ari na duaran lusek a labinanem a mitro so kaatagey na balang sakey, insan to ra inyan ed arap na Timplo. Balang sakey walay olo to a duaran mitroy kaatagey to.

¹⁶ Nanggawa na saray golunggolung tan insabit to ran singa kadina ed toktok da ra may lusek. Nanggawa met na sanlasus a gansan granada tan insasabit to rad saramay golunggolung.

¹⁷ Nipaalagey ed duaran dapag na lolooban na Timplo: samay walad abalaten angaranan na Jakin, tan samay walad baybay angaranan na Booz.

4

¹ "Nanggawa si Ari Solomon na gansan altar a samploran mitro a kuadrado tan limaran mitroy kaatagey to.

² "Nanggawa met na malimpek a gansan kawa; duaran mitroy kaaralem to, limaran mitroy kaawang to, tan labinliman mitroy kinalimpek to.

³ "Diad kaliber-liber na paway na sangab na kawa et walay duaran dasig na dikorasion a nantapewan. Singa ra bakan kalakyan ira may dikorasion tan nibubo ran nitekep irad samay kawa.

⁴ "Naampatut yan kawa ed beneg na saray labinduan gansan bakan kalakyan ya akaarap irad paway, taloray akaarap ed baybay, talorad abalaten, talorad bokig, tan talorad sagur.

⁵ "Sankarangan so kakapal to may kawa. Singa sangab na kupa so sangab to; binmaluk ed paway a singa pital na rosas. Limamplo tan anem a libo, duan lasus tan limamplon litro so nakarga to.

⁶ "Nanggawa met na samploran palanggana, limara so nipasen ed abalaten na Timplo tan limara diad baybay. Ikana ran panorasan ed saray parti na ayayep ya isaklang a bagat a popoolan. Samay danum ed baleg a kawa et ikana na saray papari a panoras.

⁷ "Nanggawa na samploran balituk a panangipatoonay lamparaan onung na gendat a panaggawa tan samploran lamisaan, insan to ra inyan ed manonan kuarto na Timplo. Limaran panangipatoonan tan limaran lamisaan so niiyan ed baybay a dapag tan saray arum diad abalaten a dapag. Nanggawa met na sanlasus a yaung.

⁸

⁹ "Nanggawa met na patio ed dalem a para papari, tan say patio ed paway. Saray kaput da ray puirta ed nanleetan na saramay duaran patio et naokupan ira na gansa.

¹⁰ Samay kawa et niiyan ed abay na abalaten a bokig, diad suyok na Timplo.

¹¹ Nanggawa met si Huram na saray banga, pala, tan yaung. Sinumpal ton ginawa iray amin a kagawaan ya insipan ton Ari Solomon a gawaen para Timplo: Saray duaran lusek Saray duaran singa yaung ya olo ed toktok na saramay lusek Saray golunggolung ed toktok na olo na saramay lusek Saray apat a lasus a gansan granada a nidasig ya amidwa ed kapag olo na saramay lusek Saray samploran kariton Saray samploran palanggana Say kawa Saray labinduan bakan kalakyan ya angampatot ed samay kawa Saray banga, saray pala, tan saray tinidor. Pinasileng a gansa so inkana nen Huram nen ginagawa to ra yan amin a kagawaan a para Timplo na Katawan, onung na ingganggan nen Ari Solomon.

¹²

¹³

¹⁴

¹⁵

¹⁶

¹⁷ Ginawa na ari ira yan amin a kagawaan diad panagpandayan a walad ketegan na Sucot tan Zereda diad Patar na Jordan.

¹⁸ Diad ontan lan karakel na agawan kagawaan ag asimbang so intiron belat na gansan nikana.

¹⁹ Nanggawa met si Ari Solomon na saray balituk a kagawaan a para Timplo: say altar tan saray lamisaan a pangibagatan na tinapay ed Dios;

²⁰ saray panangipatoonan na lamparaan, tan saray lamparaan a puron balituk a selselan irad arap na Sankasantosan a Pasen onung ed plano;

²¹ saray dikorasion a rosas, saray lamparaan, tan saray sipit;

²² saray panagpotut na pabilo, saray yaung, saray pananginay insinso, tan saray pananginay ngalab. Amin da ra yan kagawaan et puro ran balituk. Naokupan na balituk iray puirtad paway na Timplo tan saray puirta na Sankasantosan a Pasen.

5

¹ "Nen asumpal nen Ari Solomon iray amin a kimey ed Timplo, inyan tod saray kuarton panagsinupan ed Timplo ya amin iray bengatlan insaklang nen ama ton David ed Katawansaray pilak, balituk, tan saray arum a kagawaan.

² "Insan impaawit nen Ari Solomon iray amin a pangulo na saray tribu tan saray boleg na Israel a mankakasakey irad Jerusalem, ta iyakar dad Timplo so Kaban na Sipanan na Katawan manlapud Sion, say Siudad nen David.

³ "Nantitipon iran amin nen Pista na saray Abung-abung.

⁴ "Nen akapantitipon lan amin iray pangulo, inalsa na saray Levita so Kaban na Sipanan

⁵ "tan inyakar dad Timplo. Saray papari tan saray Levita inyalis da met ed Timplo so Tuldan Ayamay Katawan, tan amin a kagawaan to.

⁶ "Si Ari Solomon tan amin da ray totood Israel nantitipon irad arap na Kaban na Sipanan tan angibagat ira na amayamay a karniro tan baka ya ag ira nabilang lapud karakel da.

⁷ "Insan saray papari inawit dad dalem na Timplo so Kaban na Sipanan na Katawan tan inyan dad Sankasantosan a Pasen, diad silong na saray payak da ra may kirubin.

⁸ "Saray akabuskag a payak da ra may kirubin et asakbungan da may kaban tan saramay tiken a panagsakbatan.

⁹ "Siopamay toon manalalagey ed arap na Sankasantosan a Pasen nanengneng to ray ngoro na saramay tiken. Balet diad arum a pasen ag to ra nanengneng. (Wadman ni ra yan tiken ya anggad natan.)

¹⁰ Anggapoy karga to may Kaban na Sipanan likud labat ed saramay duaran tapyak a bato ya inyan nen Moises diman nen walad Palandey na Sinai, nen akisipanan so Katawan ed saray totood Israel nen tataynanan day Egipto.

¹¹ Amin a paparin wadman, anggan anton grupoy kawalaan da, insaklang day sikaran dili. Amin da ray Levitan tumutogtog tan kumakanta a di Asaf, Heman, tan Jedutun tan saray kabyangay boleg da et akasolung iray linen a kawes. Nanalagey iray Levita ed abay na altar diad nibokig a dapag. Sankaawit da ray piangpiang tan saray arpa; tan kaiba da ray sanlasus tan duamplon papari a mamapaknul na trumpita. Saray kumakanta indayew day Katawan tan babansagan iray trumpita, saray piangpiang tan arum ni ran kagawaay musika. Kinanta ra: Igalang yoy Katawan ta sikato et maung, Tan mansiansia ed ando lan ando so panangaro ton ag mangoman. Legan a tataynan na saray papari so Timplo, biglan apano na lorem na Kagalangay Katawan, kanyan ag da la nituloy so pangigagalang da.

6

¹ "Nampikasiy Solomon, Katawan, nilabay moy manayam ed kaloreman tan kabilongetan.

² "Amaalagey ak natan na marakerakep a timplon para sika, sakey a pasen a panayaman mo ed ando lan ando.

³ "Legan a manalalagey iray totood man, inarap ira nen Solomon, tan kinerew ton bindisionan iray Dios.

⁴ "Inkuanto, Nagalang komun so Katawan a Dios na Israel! Sinumpal toy sipan tod amak a David, sanen inkuantod sikato,

⁵ "Manlapud samay agew ya impangipaway kod Egipto ed saray totook, ag ak nampili na anggan anton siudad ed intiron dalin na Israel a pangipaalageyan na timplon pangigalangan ed siak tan ag ak nampili na siopaman a mangipangulod saray totook ya Israelita.

⁶ "Balet natan pinilik so Jerusalem a pasen a pangigalangan ed siak, tan pinili ta ka, David, a manoley ed saray totook.

⁷ "Intuloy nen Solomon ya inkuan, Nampilalekan nen amak a David so mangipaalagey na timplo a pangigalangan ed Katawan a Dios na Israel,

⁸ "balet inkuan na Katawan ed sikato, Maung so impanpilalek mon mamaalagey na timplo a para siak,

⁹ "balet aliwan sikay mangipaalagey. Say dilin anak mo so mangipaalagey na timplok.

¹⁰ Sinumpal natan na Katawan yan sipan to: sinalatan kon manarid Israel si amak a David, tan nipaalagey koy timplon pangigalangan ed Katawan a Dios na Israel.

¹¹ Inyan kod Timplo so Kaban na Sipanan a nankarga na saray tapyak a bato a tanda na impisipanay Katawan ed saray totood Israel.

¹² Kayari to ya, diad arap na saray totoo, nanalagey si Solomon ed arap na altar tan intagey to ray lima to a nampikasi. (

¹³ Nanggaway Solomon na gansan intablado tan inyan tod pegley na patio. Duara tan kapalduan mitro a kuadrado so kabaleg to tan sakey tan kapalduan mitro so kaatagey to. Sinmapat ed sayan intablado, tinmalimukor ed pasen a nanengneng na balang sakey, insan to inyatagey ed tawen iray lima to.)

¹⁴ Onyay pikakasi nen Solomon: Katawan a Dios na Israel, anggapoy arum a dios a miparad sika diad tawen odino diad dalin! Matoor kad impisipanan mod saray totoom, tan ipapanengneng moy ag mangoman a panangarom ed saray totoon sigput a matoor ed sika.

¹⁵ Tinoor moy sipan mod amak a David ya aripen mo, tan diad sayan agew sinumpal moy amin ya imbagam.

¹⁶ Et natan, Katawan a Dios na Israel, pikasik ed sika a sumpal mo pa ni may sakey ya insipan mod amak sanen inkuanmod sikaton wala lawas so kabyangay boleg ton manari ed Israel, no saray kabyangay boleg to et pampelengan dan onuren so Ganggan mo a singa impangonur tod sika.

¹⁷ Kanyan pikasik ed sika, O Katawan a Dios na Israel, a sumpal mo pay amin ya insipan mod kinen David ya aripen mo.

¹⁸ Balet talaga kasin makapiayam kad saray totoo diad tapew na dalin, O Dios? Ag ka nakarga na anggan say intiron tawen, kanyan panon kan nakarga na sayan Timplon impaalagey ko?

¹⁹ Katawan a Dios ko, dengel mo pay pikakasik tan saray kerew ko, siak ya aripen mo.

²⁰ Bantayan mo pad agew tan labi yan Timplo, say pasen ya insipan mon pangigalangan ed sika. Dengel mo ak pa sirin legan kon mampipikasi ya akaarap ed sayan Timplo.

²¹ Dengel mo pa ray pikakasik tan saray pikakasi na saray totoom no mampikasi ran akaarap ed sayan pasen. Ditad ayaman mon tawen, dengel mo kami pa tan pirdona mo kami.

²² No naakusa so siopaman a too lapud impanggawa toy kaogsan ed kapara ton too tan niakar ed altar mo diad sayan Timplo, ta mansamban anggapoy kasalanan to,

²³ O Katawan, dengel ka pad tawen ta sintinsiaan mo ray aripen mo. Dusam pay toon nankasalanan onung na kanepegan to, tan ibolus moy anggapoy kasalanan.

²⁴ No atalo na saray kalaban da iray totoom ya Israelita, lapud nankasalanan irad sika, insan ira ompawil ed sika tan mampikasi ra diad sayan Timplo, ta onkerew iray pirdona,

²⁵ dengel ka pad tawen, O Katawan. Pirdonam pa ray kasalanan da, tan ipawil mo rad dalin ya inter mod sikara tan saray lalaki ra.

²⁶ No mankasalanan ed sika iray totoom tan dusaen mo ra diad panamegley na ag mo pangiter na oran, insan ira magbabawi tan onarap irad sayan Timplo diad pampikasi ra,

²⁷ dengel mo pa rad tawen, O Katawan, tan pirdonam iray kasalanan da ray aripen mo, saray totoom ya Israelita tan ibangat mo pad sikaray maptek a pambilay da. Insan, O Katawan, ipelag moy oran ed dalin mo ya impatawir mod saray totoom.

²⁸ No walay eras ed dalin, odino salot, odino namagaan iray tanaman, odino deralen ira na saray dorun, odino dogpaan na saray kalaban iray totoom, odino mansakit o manginagem ira,

²⁹ dengel mo pa ray pikakasi ra. No siopaman ed saray totoom ya Israelita odino amin da et iyonat day kalimaan da ed sayan Timplo diad pampikasi ra lapud impapuson ermen da,

³⁰ dengel mo pa ray pikakasi ra. Ditad ayaman mod tawen dengel mo pa ra tan pirdonam ira. Sika labat so makaamta ed kanunotan na balang sakey a too. Iter mo pad balang sakey so kanepegan ton awaten,

³¹ pian takotan ka na saray totoom tan onuren da ka legay panaon na pambilay da ed dalin ya inter mod saray lalaki ra.

³² No say sakey a sangkailin manaayam ed arawin bansa et nadngelan toy ontan lan inkatalonggaring mo tan pakapanyarim, tan no panon a sipaparaan ka lawas ya ontulong, insan onla dian mampikasi diad Timplo,

³³ dengel mo pay pikakasi to. Diad ayaman mod tawen Katawan, dengel mo pa tan iter mo so antokaman a kerewen tod sika, pian naamtaan tan takotan ka na amin a katoowan ed mundo a singa saray totoom ya Israel. Naamtaan dad satan a diad sayan Timplo ya impaalagey ko so nepeg a pangigalangan ed sika.

³⁴ No iganggan mo ray totoom ya onlan mibakal ed saray kalaban da et mampikasi rad siak, inerman so kawalaan da ya akaarap irad sayan siudad a pinilim tan diad sayan Timplon impaalagey ko a para sika,

³⁵ dengel mo pa ray pikakasi ra. Dengel mo pa rad tawen, Katawan, tan panalom ira.

³⁶ No mankasalanan ed sika ray totoomta anggapo lantiy anggan sakey a too ya ag mankakasalanantan diad pasnuk mo et impatalom irad saray kalaban da tan ipadakep mo rad arum a dalin ya anggan anto lay kaarawi to,

³⁷ dengel mo pa ray pikakasi na saray totoom. No diad saman a dalin et magbabawi ra tan mampikasi rad sika, ipatwa ray inkakasalanan tan inkaoges da, dengel mo pa ray pikakasi ra, O Katawan.

³⁸ No diad saman a dalin, et petepeteg tan masimoon iran magbabawi, tan mampikasi ran akaarap ed sayan dalin ya inter mod saray lalaki mi, diad sayan siudad a pinilim, tan diad sayan Timplo ya impaalagey kon para sika,

³⁹ dengel mo pad satan iray pikakasi ra. Dengel mo pa rad ayaman mod tawen, kasian mo ra, tan pirdonam iray amin a kasalanan da.

⁴⁰ Natan, O Dios ko, imano mo kami pa tan talineng mo ray pikakasin nibalikas ed sayan pasen.

⁴¹ Alagey ka, Katawan a Dios, insan ka onloob ed Timplo a kaibam so Kaban na Sipanan a tanda na pakayarim, tan manayam ka dia ed ando lan ando. Bindisionan mo pa ray paparim ed amin a gawaen da, tan manliket komun iray totoom lapud kaabigan mo ed sikara.

⁴² Katawan a Dios, ag mo komun ipopolisay so ari a pinilim. Nudnunot mo pa may ag mangoman a panangarom ed kinen David ya aripen mo.

7

¹ "Nen asumpal nen Solomon so pikakasi to, pinmelag a nanlapud tawen so apoy tan pinoolan to ray bagat ya insasaklang. Insan say Timplo napno na kagalangan na Katawan.

² "Ag makaloob iray papari, lapud napno na kagalangan na Katawan so Timplo.

³ "Nen anengneng na saray totood Israel a naplag a nanlapud tawen so apoy tan pinano na liwawa so Timplo, dinmakmomo ran anggad dalin, inggalang day Dios tan indayew da lapud kaabigan tan ag mangoman a panangaro to.

⁴ "Insan angibagat ed Katawan si Ari Solomon tan amin da ray totoo.

⁵ "Duamplo tan duan libon baka tan sanlasus tan duamplon libon karniro so insaklang nen Ari Solomon a bagat a para kareenan. Diad onya si Solomon tan amin da ray totoo insaklang da so Timplo.

⁶ "Nanalagey iray papari ed angipasenan ed sikara tan nanalagey met iray Levita a sankaarap da ra. Saray Levita indadayew day Katawan diad impantotogtog dad saray kagawaan na musika ya inter nen Ari David tan kinakanta ra may imno, Andi-anggaan so Panangaro to! onung na ingganggan nen David ed sikara. Pinaknul na saramay papari iray trumpita tan nanalagey iray totoo.

⁷ "Diad saman met ya agew insaklang met nen Solomon so pegley a parti na patio a walad arap na Timplo, insan angisaklang diman na saray bagat a popoolan, saray bagat a trigo, tan say taba na saray bagat a para kareenan. Dia to ra insaklang ta say gansan altar a ginawa to et melag a pangisaklangan ed sarayan bagat.

⁸ "Pitoy agew a sinilibraan nen Solomon tan amin da ray Israelita so Pista na saray Abung-abung. Dinmago ya amin iray totood Israel, manlapud Dalan na Hamat diad baybay ya anggad ketegay Egipto diad abalaten.

⁹ "Pitoy agew so impangisaklang dad altar tan pitoy agew so impansilibra ra. Nen kaonuran ya agew sinumpal day sirimonya

¹⁰ tan nen ontombuk ya agew, say kumaduamplo tan talon agew na kumapiton bulan, pinasempet la nen Solomon iray totoo. Malikeliket ira lapud amin a bindision ya inter na Katawan ed saray totoo ton Israelita, si David, tan si Solomon.

¹¹ Asumpal nen Solomon ya impaalagey so Timplo tan say palasio; atombuk ya amin iray plano to.

¹² Insan diad labi pinmayawar ed sikato so Katawan tan inkuanto, Nadngel koy pikakasim, kanyan awaten ko yan Timplo a sikatoy pasen a pangisaklangan ed siak na saray bagat.

¹³ Kapag ag ko paoranen, odino kapag mangibaki ak na saray dorun a mangan ed saray tanaman, odino mangipadalan ak na salot ed saray totook,

¹⁴ no mampikasi ra tan magbabawi rad kasalanan da, tan ibeneg da ray kaogsan a gagawaen da, dengelen ko rad satan ed tawen, pirdonaen ko ray kasalanan da, tan paaligwasen ko lamet so dalin da.

¹⁵ Bantayan ko yan pasen tan sipaparaan ak ya ondengel ed amin a pikakasin iyapay dia.

¹⁶ Pinilik tan pinasantok yan Timplo a sikatoy pasen a pangigalangan ed siak diad ando lan ando. Bantayan ko lawas tan iyagel kod amin a panaon.

¹⁷ No matoor kan manlingkur ed siak a singa ginawa nen amam a David, no onuren mo ray ganggan ko tan sumpalen mo ray amin a bilin kod sika,

¹⁸ sumpalen ko may sipan kod kinen amam a David nen imbagak ed sikato a say Israel et lawas oleyan na saray kabyangay boleg to.

¹⁹ Balet no sika tan saray totoom et ag yo onuren iray ganggan tan saray bilin kod sikayo, tan mangigalang kayod arum a diriyos,

²⁰ ekalen ta kayod dalin ya inter kod sikayo, tan ikaindan ko yan pinasantok a Timplo a sikatoy pangigalangan ed siak. Balawen tan melag-melagen na saray totoo ed inerman a pasen so bansan Israel.

²¹ Sayan Timplo et daydayewen a tuloy natan, balet nikelawan iray amin ya ondalan dia tan tepeten da, Akin et ginawa na Katawan so onya ed sayan dalin tan diad sayan Timplo?

²² Onebat iray totoo, Lapud inkaindan na saray totoo so Katawan a Dios da, ya angipaway ed saray lalaki ra ed dalin na Egipto. Sinmingger irad arum a diriyos, tan sikara yay inggalang tan nanlingkuran da. Kanyan inter na Katawan yan kaogsan ed sikara.

8

¹ "Duamploy taon ya impaalagey nen Solomon so Timplo tan say palasio to.

² "Pinasimbalo to met ya inletneg iray siudad ya inter ed sikato nen Ari Hiram tan imbaki ton manayam diman iray Israelita.

³ "Adakep toy dalin na Hamatsoba,

⁴ "tan niliber to na padir so siudad na Palmyra ed kalawakan. Pinasimbalo ton inletneg ya amin iray siudad ed Hamat a panangisempenan ira na abasto.

⁵ "Pinasimbalon inletneg met nen Solomon iray onggendan a siudad: Bethoron ed Tagey tan Bet-horon ed Leksab (saray pinadir a siudad a nayarin balewetan iray puirta ra),

⁶ "say siudad na Baalat, amin da ray siudad a panangisempenan toy abasto, tan saray siudad a pananginan na saray kabayo to tan saray karwahi. Sinumpal ton amin iray plano ton ipaalagey ed Jerusalem, diad Libano, tan diad intiron dalin a panooleyan to.

⁷ "Saray pinapasoot nen Solomon ya impankikimey et saray kabyangay boleg na saray totoon manaayam ed Canaan ya ag pinatey na saray Israelita nen nilooban day dalin. Kabyangan na sayan boleg iray totoon Amorreo, Heteo, Perezeo, Heveo, tan Jebuseo. Aripen ni ya anggad natan iray kabyangay boleg na sarayan totoo.

⁸

⁹ "Anggapoy Israelitan ginawa nen Solomon ya aripen, no ag ingen impanlingkur to ran sondalo, opisyal, pangulo na saray sondalo, kapitan na karwahi, tan kumakabayo.

¹⁰ Duan lasus tan limamplon opisyal iray makaoley ed saray totoon pinasoot a mankimey ed saray nandoroman impaalagey to.

¹¹ Inala nen Solomon ed Siudad nen David so asawa to ya anak na ari ed Egipto, insan to inyakar ed abung ya impaalagey ton para sikato. Inkuanto, Ag nepeg na asawak so manayam ed palasio nen Ari David na Israel, lapud masanto so dinan man a pasen a nanayaman na Kaban na Sipanan.

¹² Angisaklang si Solomon na saray bagat ed Katawan diad tapew na altar ya impagawa to ed arap na Timplo.

¹³ Angisaklang na saray bagat a popoolan onung na ibabagay Ganggan nen Moises kapag nasabi ra yan masanton agew: Agew na Panagpainawa, Pistay Balon Bulan, tan saray taloran tinaon a pista, salanti, Pistay Tinapay ya Anggapoy Libadura, Pistay Panagani, tan Pista na saray Abung-abung.

¹⁴ Diad impangonur tod saray bilin na ama ton David, inoksuy to so inagew-agew a kimey da ray papari, tan saray Levita a tinmulong ed saray papari diad panagkanta na saray imno tan diad saray arum a kimey da. Impanggrugrupo to met iray guardiad Timplo diad impanbantay dad balang puirta, onung ed saray ganggan nen David a too na Dios.

¹⁵ Asumpal ya amin iray bilin nen David ed saray papari tan saray Levita nipaakar ed saray abung a panagsinupan tan saray arum a pamaakaran.

¹⁶ Diad sayan panaon, asumsumpal lay amin a kimey ya impagawa nen Solomon, manlapud impangyan na pundasion ya anggad kaonuran a kimey ed Timplo na Katawan. Kanyan asumpal lan impaalagey so Timplo.

¹⁷ Insan linmay Solomon ed Eziongeber tan Elot, a wala rad gilig na dayat diad dalin na Edom.

¹⁸ Inyakaran nen Ari Hiram na saray bapor a tinoonan na saray dilin opisyal tan saray marunong a mariniro to. Binmiahi ra ed dalin na Ofir a kaiba da ray opisyal nen Solomon tan angisempet irad kinen Solomon na ngalngali labinanem a toniladan balituk.

9

¹ "Nadngelan na riyna na Seba so inkabantug nen Solomon, kanyan linmad Jerusalem ta suboken toy Solomon diad panamegley na pantepet to na saray mairap a tepet. Sinmabin kaiba to ray amayamay ya aripen, tan saray kamilyo a napnoy beneg da na saray rikado, alahas, tan balituk. Nen kaarap toy Solomon intepet to lay amin a nayarian ton tepeten.

² "Inebatan iran amin nen Solomon; anggapoy tepet a nanirapan ton impaliwawad sikato.

³ "Samay riyna na Seba nadngel toy kakabatan nen Solomon tan anengneng toy palasio ya impaalagey to.

⁴ "Anengneng to ray kakanen a niparongod lamisaan to, saray ayaman da ray opisyal to, say inkaoksuy da ray kumikimey ed palasio tan saray isosolung dan kawes, say kawes da ray aripen a mansisirbid sikato no pista, tan saray isasaklang ton bagat ed Timplo. Mapalaloy impankelaw to diad impakanengneng tod sarayan amin.

⁵ "Inkuan na samay riyna ed ari, Tua ray amin a nadngelan ko nipaakar ed sika tan say kakabatan mo nen wala ak ed dilin bansak.

⁶ "Balet ag ak anisia ya anggad impakakar ko dia tan siak a diliy akanengneng. Say nadngelan ko et ag onkapalduad tuan kakabatan mo; makabat ka ni nen say nadngelan kod saray totoo.

⁷ "Mapalar iray totoon mansisirbid sika, a wala ra lawas ed arap mo tan narerengel day kakabatan mo!

⁸ "Nadayew komun so Katawan a Dios mo! Diad impakaliket tod sika ginawa to kan ari a manoley ed ngaran to. Lapud panangaro tod saray totoo ton Israelita tan lapud labay to ran pansiansiaen ya anggad angga, impagmaliw to kan ari ra pian napansian-siam so kaptekan tan katonungan.

⁹ "Insan samay riyna na Seba initdan toy Solomon na ngalngalin limaran toniladan balituk tan saray amayamay a rikado tan alahas. Diad amin da ray rikadon naawat nen Ari Solomon ed anggan anton panaon, sankaabigan ira yay inter nen riyna na Seba. (

¹⁰ Likud ed saramay balituk ya inawit na saray totoo nen Ari Hiram tan Ari Solomon nen kasabi ran nanlapud Ofir, nanawit met iray tablan sandalo tan saray alahas.

¹¹ Inkana nen Solomon ira yan tabla ed impanggawa tod saray takayan na Timplo tan say palasio to, tan inkana to met ed impanggawa to na saray arpa tan saray saltirio a para saray tumutogtog tan saray kumakanta. Anggapo niy anengneng nen saman a kaparpara ra ed dalin na Juda.)

¹² Inter nen Solomon ed kinen riyna na Seba so antokaman a kinerew to, a kaaruman na saray inter ton pinagkasalat na saramay impaabet na riyna. Insan pinmawil lad dalin na Seba imay riyna tan saray aripen to.

¹³ Tinaon a makakaawat si Ari Solomon na masoluk a duamplo tan liman toniladan balituk,

¹⁴ likud ed buis na saray nigosianti. Mangiiter met na balituk tan pilak iray amin ya ararid Arabia, tan saray gobirnador na distritod Israel.

¹⁵ Nanggaway Solomon na duan lasus ya ankakabaleg a samper tan kapag sakey inokupan to na sakey a pitoran kilon pinitpit a balituk.

¹⁶ Nanggawa met na talon lasus ya ankekelag a samper tan kapag sakey inokupan to na sakey a duaran kilon pinitpit a balituk. Inyan tod palasio ira ya amin a samper diad baleg a kuarton tatawagey Takel na Libano.

¹⁷ Nanggawa met na baleg a tronon garing tan inokupan to na puron balituk.

¹⁸ Anemiray balitang to yan trono tan walay apakan na sali ya inokupan na balituk. Diad diking na balang panangitapeway lima walay kinortin akaalagey a lion.

¹⁹ Diad duaran samput na balang balitang wala met so kinortin akaalagey a lion; labindua ran amin. Anggapoy nanarian a walay onyan trono to.

²⁰ Balituk ya amin iray kupa nen Solomon, tan puron balituk ya amin iray ikakana ed baleg a kuarton tatawagey Takel na Libano. Diad panaon nen Solomon aliwa nin mabli so pilak.

²¹ Wala ray bapor ton ombibiahid Tarsis a kaiba da ray bapor nen Ari Hiram. Kapag kayariy taloy taon ompawil iran sankaawit da ray balituk, pilak, garing, tan saray bakes ya akekelag tan ankakabaleg.

²² Mayaman tan makabat niy Ari Solomon nen saray arum ya arari ed intiron mundo.

²³ Linma ran amin a mangipanon ed sikato, pian makarengel iray kakabatan ya inter na Dios ed sikato.

²⁴ Balang sakey ed sikara inawitan toy Solomon na rigalosaray kagawaan a balituk tan pilak, saray kawes, saray armas, saray rikado, saray kabayo, tan saray mula. Tinaon yan nagagawa.

²⁵ Si Ari Solomon walay apat a libon panangisiruman na saray karwahi tan saray kabayo to. Labinduan libo so kabayo ton para bakal. Impanayam tod Jerusalem iray pigara ed saraya, tan impanayam tod nandoroman siudad iray arum.

²⁶ Sikatoy sankatalonaan a manoley ed amin da ray arari, manlapud Ilog na Eufrates ya anggad Filistia tan diad ketegan na Egipto.

²⁷ Legan na impanoley to, saray pilak et singa karakel na bato ed Jerusalem iray pilak tan saray tablan sidro et singa karakel na kiew a sikomoro ed alusadsar na kapokdulay Juda.

²⁸ Diad Musri tan arum a bansa so nansasaliwan nen Solomon na saray kabayo to.

²⁹ Say arum nin kabyangan na impanbilay nen Solomon manlapud gapo ya anggad kasamputan et nikorit ira ed Say Awaran nen Propita Natan, diad Say Propisiya nen Ahias a taga Silo, tan diad Saray Pasingayew nen Propita Iddo. Diad saraya nikorit met so nipaakar ed impanoley na lakin anak nen Nebat a si Ari Jeroboam na Israel.

³⁰ Si Solomon nanayam ed Jerusalem legan ton naoley ya apataploy taon ed intiron Israel.

³¹ Inatey tan nipompon ed Siudad nen David tan sinmalat ed sikaton nanari si Roboam a lakin anak to.

10

¹ "Linmay Roboam ed Sikem a dimay nantitiponan na saray totood Israel a wala rad baybay, ta gawaen dan ari.

² "Nadngelan ya nen Jeroboam a lakin anak nen Nebat, a wadman nid Egipto a dimay nila to nen imbatikan toy Ari Solomon, kanyan pinmawil ed Israel.

³ "Impaawit na saray tribu ed baybay, insan ira linman amin ed kinen Roboam tan kuandad sikato,

⁴ "Ambelat so impasakbat nen amam ed sikami. No palemewen moy sasakbaten mi tan painomayen moy panagbilay mi, panlingkuran mi ka.

⁵ "Pawil ki dia kayariy taloy agew, ta ibagak ed sikayoy ebat ko, inkuantod sikara. Kanyan linma la ra.

⁶ "Insan impanon ya nen Roboam ed saray mamatakken a lalakin sumisimbawa nen ama ton Solomon. Antoy isimbawa yon iyebat kod saraman a totoo? tepet tod sikara.

⁷ "Inmebat ira, No mapangasi kad saraman a totoo tan panliketen mo ra lapud marakep ya iyebat mo, matoor ira lawas a manlingkur ed sika.

⁸ "Balet ag dinengel nen Roboam so simbawa ra. Ingen, linmad saray lalakin binmaleg a kaiba to a sikaray sumisimbawa to la natan.

⁹ "Tinepet tod sikara, Antoy isimbawa yod siak? Antoy ibagak ed saraman a totoon onkekerew a palemewen koy sasakbaten da?

¹⁰ Inmebat ira, Onyay ikuan mod saraman a totoo: Mabiskeg niy kiking ko nen say ulpo nen amak.

¹¹ Ambelat so impapasakbat ed sikayo nen amak; ambelat niy ipasakbat kod sikayo. Nilatiko kayo nen amak, pekpeken ta kayoy balatyang!

¹² Kayariy taloran agew, pinmawil ed kinen Ari Roboam si Jeroboam tan amin a totoo onung na imbaga tod sikara.

¹³ Maruksa ya inmebat ed sikara tan ag to tinombuk so simbawa da ra may mamatakken a sumisimbawa.

¹⁴ Sinalita to may impaikuan na saray mamalangwer a sumisimbawa: Ambelat so impasakbat ed sikayo nen amak; ambelat niy ipasakbat kod sikayo. Nilatiko to kayo nen amak; pekpeken ta kayoy balatyang!

¹⁵ Say Katawan a Dios so akanlinawa a si Roboam et ipolisay toy kerew na saray totoo, pian napatwa so imbaga tod kinen Jeroboam diad panamegley nen propita Ahias a taga Silo. Sikato yay makasengeg ya ag dinengel na ari iray totoo.

¹⁶ Nen abirbir na saray totoo ya ag ira dengelen na ari, inmeyag ira, Anggapo lay pibibiang tayod kinen David tan say pamilya to! Antoy ginawa ran para sikatayo? Totood Israel, onsempet ti la! Akaoley lad sikaton dili si Roboam! Kanyan sinmempet la ray amin a totood Israel.

¹⁷ Pinaulyan da lay Roboam a nanoley ed saray totoon manaayam labat ed sakop na Juda.

¹⁸ Imbaki nen Ari Roboam si Adoniram, say makaoley ed saray totoon pinasoot a mankimey, ya onlad saray Israelita, balet tinutupak da ya anggad inatey. Lapud saya, nangganat si Roboam a linmogan ed karwahi to, insan batik ed Jerusalem.

¹⁹ Nanlapud saman, sumpad saray manaarin kabyangay boleg nen David iray totood baybay a nanarian na Israel.

11

¹ "Nen akasabid Jerusalem si Ari Roboam, impantitipon toy sanlasus tan walomplon libo a pinilin lalaki ed saray tribu di Juda tan Benjamin, ta mibakal ira pian nipawil tod sikaton dili so panagoley tod saray tribu na Israel a wala rad baybay.

² "Balet imbaga na Dios ed kinen propita Semaya

³ "ya onlad kinen Ari Roboam na Juda, ta ibaga tod sikato tan amin a totood saray tribu di Juda tan Benjamin

⁴ "a say Katawan kuanto, Ag yo dodogpaan iray kapara yon Israelita. Sempet kayo la, balang sakey ed sikayo, ta siak so nanlapwan na samay agawa. Inonur da so ganggan na Katawan, kanyan sinmempet la ran amin ya ag da la nilabanan si Jeroboam.

⁵ "Nanayam ed Jerusalem si Roboam tan pinaliberan to na padir iray onggendan a siudad na Juda tan Benjamin:

⁶ "Betlehem, Etam, Tecoa,

⁷ "Bet-sur, Soco, Adullam,

⁸ "Gat, Maresa, Zif,

⁹ "Adoraim, Lakis, Azeca,

¹⁰ Zora, Ayalon, tan Hebron.

¹¹ Mabiskeg so impamadir tod saray siudad tan anoro na sakey a pangulo na saray sondalo ed balang sakey a siudad. Kapag siudad angyan na saray abaston kakanen, larak na oliba, tan alak;

¹² angyan met na saray samper tan saray pika. Diad onya nansiansian walad silong na pakaoley to iray Juda tan Benjamin.

¹³ Linmad Juda iray papari tan saray Levita ed intiron dalin na Israel.

¹⁴ Tinaynan na saray Levita iray pastolan da tan saray arum nin dalin da, insan linma rad Juda tan Jerusalem, lapud si Ari Jeroboam na Israel tan saray sinmalat ed sikato et ag da ra panlingkuren a papari na Katawan.

¹⁵ Anoro si Jeroboam na saray dilin papari to a manlingkur ed saray paganon pasen a panangigalangan tan mangigalang ed saray dimonyo tan saray ginagawa ton talintao na bakan kilaw.

¹⁶ Saray totood amin a tribu na Israel a masimoon so panlabay da a mangigalang ed Katawan, say Dios na Israel, et tinombuk dad Jerusalem iray Levita pian makapangibagat irad Katawan, say Dios na saray lalaki ra.

¹⁷ Lapud saya apabiskeg so nanarian na Juda, tan taloy taon a tinulongan day Roboam a lakin anak nen Solomon tan nambilay iran singa impanbilay da nen wala rad silong na pakaoley nen Ari David tan Ari Solomon.

¹⁸ Inasawa nen Roboam si Mahalat a say ama to et si Jerimot ya anak nen David, tan say ina to et si Abigail ya anak nen Eliab tan apo nen Jesse.

¹⁹ Walay taloran lalakin anak da a di Jeus, Samarias, tan Zaham.

²⁰ Ag abayag inasawa toy Maaca ya anak nen Absalom, tan walay apatiran lalakin anak da a di Abias, Atai, Ziza, tan Selomit.

²¹ Labinwalon amin iray asawa nen Roboam tan anemaplo ray inyaamung ton bibii. Duamplo tan walon lalaki tan anemaplon bibii iray ilalak to. Si Maaca so sankainaroan to ed amin da ray asawa to.

²² Si Abias so inararo tod amin da ray anak to, tan sikatoy pinili ton onsalat ed sikaton manari.

²³ Lapud inkarunong to initdan toy kanepegan iray anak ton lalaki, tan indatak to ran impasen ed intiron Juda tan Benjamin diad saramay pinadir a siudad. Daakan so iniiter ton nakaukolan da tan amayamay so iniiter ton asawa ra.

12

¹ "Nen mabiskeg lan niletneg nen Roboam so panooley to, inkaindan to tan amin da ray totoo to so Ganggan na Katawan.

² "Lapud saya, dinogpaan nen Ari Sisak na Egipto so Jerusalem diad kumaliman taon na panooley nen Roboam.

³ "Impangulo to ray sondalo: sanlibo tan duan lasus ya akalogan ed karwahi, anemaplon libo ya akakabayo, tan arum nin sondalo ya ag ira nabilang lapud karakel da, a pati saray taga Libia, saray Sukeo, tan saray taga Etiopia.

⁴ "Adakep to ray aliber na padir a siudad na Juda tan linma ya anggad Jerusalem.

⁵ "Linmay propita Semaya ed kinen Ari Roboam tan saray pangulo na Juda a nantitipon ed Jerusalem, ta ibabatikan day Sisak. Inkuantod sikara, Saya so papaibaga na Katawan ed sikayo: Inkaindan yo ak, kanyan natan inkaindan ta kayo ed lima nen Sisak.

⁶ "Binirbir na ari tan saray pangulo a nankasalanan ira, et inkuanda, Matonung so Dios.

⁷ "Nen anengneng na Katawan so impanpaabeba ra, akisalita lamet ed kinen Semaya tan kuantod sikato, Lapud binirbir dan nankasalanan ira, ag ko ra pateyen. Balet no ondogpay Sisak, ngalngalin ag ira mambilay. Ag ondapod Jerusalem so intiron petang na olok.

⁸ "Balet taloen ira nen Sisak, et naamtaan da so pandomaan na panlingkur ed siak tan say panlingkur ed saray mangaraldalin a manoley.

⁹ "Nilooban nen Ari Sisak so Jerusalem tan inala to ray kayamanan ed Timplo tan saray kayamanan ed palasio. Inala to ray amin a bengatla pati saramay balituk a samper a ginawa nen Ari Solomon.

¹⁰ Pian nasalatan ira may samper, nanggawa na saray gansan samper si Roboam tan impalima to rad saray opisyal a makaoley ed panagguardiad saray puirta na palasio.

¹¹ Kapag onlad Timplo so ari, awiten na saray guardia ira may samper, insan da ra ipawil ed kuarton panagguardiaan.

¹² Lapud tinmoluk ed Katawan si Roboam, ag impadapo na Katawan so intiron pasnuk to, et siansian maung so kipapasen na Juda.

¹³ Nanoley ed Jerusalem si Roboam tan pinmalaloy pakayari ton ari. Apataplo tan sakey so taon to nen nagmaliw ya ari. Nanoley na labimpitoy taon ed Jerusalem, say siudad a pinili na Katawan, diad intiron dalin na Israel a pasen a pangigalangan ed Katawan. Say ina nen Roboam et si Naama a taga Ammon.

¹⁴ Maoges iray ginagawa to, lapud ag to nampilalekay mangamtad linaway Katawan.

¹⁵ Saray ginagawa nen Roboam manlapud gapo ya anggad kasamputan tan say listaan na pamilya to et nikorit ed Say Awaran nen Propita Semaya tan Say Awaran nen Propita Iddo. Legan na impanoley di Roboam tan Jeroboam naynay so impanbabakal da.

¹⁶ Inatey si Roboam, tan nipompon ed Siudad nen David. Si Abiam a lakin anak to so sinmalat ed sikaton nanari.

13

¹ "Nen kumalabinwalon taon na panooley nen Ari Jeroboam ed Israel, nagmaliw ya ari na Juda si Abiam.

² "Nanoley na taloy taon ed Jerusalem si Abiam. Say ina to si Micaya ya anak nen Uriel a taga siudad na Gabaa. Ginmapo so bakal dan dua di Abiam tan Jeroboam.

³ "Apat a lasus a libo so sondalon impibakal nen Abiam; walon lasus a libo balet si Jeroboam.

⁴ "Nambabanad kapokdulan na Efraim iray sondalo. Kinmalab ed Palandey na Zemaraim si Ari Abiam tan kinolyaotan toy Jeroboam tan saray Israelita. Dengel yo ak! inkuanto.

⁵ "Ag yo ta amta a say Katawan, say Dios na Israel, et walay ag naderal ya impisipanan tod David, nen inter tod sikato tan saray kabyangay boleg to so nanarin ed ando lan ando ed Israel?

⁶ "Si Jeroboam a lakin anak nen Nebat et linmaban ed Solomon ya ari to.

⁷ "Ag abayag anogyup na saray andi-kakanaan a lalaki, tan impasoot day labay da ed lakin anak nen Solomon a si Roboam ya ogaogaw nid saman tan anggapo niy asalsali tod bilay, kanyan ag to ra nalabanan.

⁸ "Natan labay yon labanan so pakayari na ari ya inter na Katawan ed saray kabyangay boleg nen David. Dakerakel kayon sondalo, tan walad sikayo ray balituk a bakan kilaw a diriyos yo a ginagawa nen Jeroboam.

⁹ "Pinapataynan yo ray papari na Katawan a kabyangan iray boleg nen Aaron; pinapataynan yo met iray Levita. Insan anoro kayo na saray papari a singa gagawaen na saray arum a bansa. Siopamay ondagon sankaawit toy bakan kalakyan odino pitoran karniro et nayari lan magmaliw a pari na saray tatawagen yon diriyos yo!

¹⁰ Balet, sikami, mansiasiansia kamin manlilingkur ed Katawan a Dios mi tan ag mi inkaindan. Saray papari a say sengeg da et si Aaron so manlilingkur ed Katawan tan tutulongan ira na saray Levita.

¹¹ Kapag kabwasan tan labi mangisasaklang irad Katawan na insinso tan saray ayayep a bagat a popoolan. Mangisasaklang iray bagat a tinapay ed lamisaan a malinis onung ed ganggan, tan kapag labi seselselan da ray lamparaan ya akatoon ed balituk a panangipatoonan. Sikami susumpalen mi ray ganggan na Katawan, balet sikayo inkaindan yo.

¹² Say Dios a dili so pangulo mi, tan wadya ray papari to ya akaparaan lan mamaknul na saray trumpita diad panawag dad sikamin mibakal. Totood Israel, ag yo komun lalabanan so Katawan a Dios na saray lalaki yo! Ag kayo manalo!

¹³ Legan to ya, angibakiy Jeroboam na saray totoo to a biglan ondogpa ed saray sondalo na Juda diad beneg da; saray arum balet a sondalo to akiarapan ira.

¹⁴ Ninmengneng iray taga Juda ed kaliber-liber da et naimano ra ya aliktub la ra. Tinmawag irad Katawan na tulong, tan pinaknul na saray papari iray trumpita.

¹⁵ Diad panangipangulo nen Abiam, inmeyaeyag iray taga Juda tan dinmogpa ra; tinalo na Dios si Jeroboam tan saray sondalon taga Israel.

¹⁶ Imbatikan na saray taga Israel iray taga Juda, tan impanalo na Dios iray taga Juda.

¹⁷ Mapalaloy impanalo nen Abiam tan saray sondalo to ed saray taga Israelliman lasus libo a sankamaungan a sondalo na Israel iray inaatey.

¹⁸ Lapud saray taga Juda et nanmatalek irad Katawan a Dios na saray lalaki ra, tinalo da ray taga Israel.

¹⁹ Inosilan nen Abiam iray sondalo nen Jeroboam tan adakep da ray onggendan a siudad: Betel, Jesana, tan Efron, tan saray barion asingger ed balang sakey ed sarayan siudad.

²⁰ Ag la apapawil nen Jeroboam so pakayari to legan na impanoley nen Abiam. Diad kaonuran kinabil na Katawan, et inatey.

²¹ Si Abiam, balet, pinmalaloy pakayari to. Labinapat so asawa to, duamplo tan duay lalaki tan labinanem a bibii iray ilalak to.

²² Say arum nin kabyangan na impanbilay nen Abiam, saray sinasalita tan saray ginagawa to et nikorit ira ed Say Awaran nen Propita Iddo.

14

¹ "Inatey si Ari Abiam tan nipompon ed Siudad nen David. Sinmalat ed sikaton nanari si Asa a lakin anak to. Legan na impanoley nen Asa na samploy taon mareen so nanarian to.

² "Lapud impanggawa nen Asa na kaptekan tan kamaungan akaliket so Katawan a Dios to.

³ "Ineekal to ray altar na arum a bansa tan saray paganon pasen a panangigalangan; inggegeba to ray masanton bato a lusek, tan binabatang to ray tanda na diosan Asera.

⁴ "Ingganggan to ray totoo ed Juda ya onuren day linawa na Katawan a Dios na saray lalaki ra, tan sumpalen da ray bangabangat tan saray ganggan to.

⁵ "Walay kareenan ed nanarian legan na impanoley to lapud inekal tod amin a siudad na Juda iray paganon pasen a panangigalangan tan saray altar a panagpoolay insinso.

⁶ "Legay impanoley to pinadir to ray siudad na Juda. Pigay taon ya anggapoy bakal, lapud initdan na Katawan si Asa na kareenan.

⁷ "Inkuantod saray totood Juda, Paletan ti ray siudad diad pamaalagey tayo na saray padir, saray tori, tan saray puirtan nayarin ikaput tan balewetan. Walad silong na pakayari tayo so dalin, lapud inonur tayoy linawa na Katawan a Dios tayo, kanyan inyagel to itayo tan inyarawi to itayod kaatapan ed amin a pasen. Impapaalagey da ra ya sirin et inmaligwas ira.

⁸ "Manlapud Juda talon lasus libo iray sondalo nen Ari Asa, a samper tan pika ray armas da. Manlapud Benjamin duan lasus walomplon liboy sondalo to a samper tan pana iray armas da. Masebeg iran amin tan maung so inkapasal da.

⁹ "Walay taga Etiopia a manngaran na Zera a nilooban toy Juda tan akasabi ya anggad Maresa. Sakey milyon iray sondalo to tan talon lasus iray karwahi to.

¹⁰ Pinmaway a milaban ed sikato si Asa. Diad Patar na Sefata ya asingger ed Maresa so namparaanan dan dua a mambakal.

¹¹ Nampikasid Katawan a Dios to si Asa, O Katawan, anggapoy miparad sika; nayarian mon tulongan iray makapoy tan saray makapanyari. Tulongan mo kami pa natan, O Katawan a Dios mi, lapud manmamatalek kamid sika tan, diad ngaran mo, pinmaway kamin mibakal ed sarayan amayamay a sondalo. Katawan, sika so Dios mi; anggapoy makapanilalon manalod sika.

¹² Tinalo na Katawan iray taga Etiopia nen dinogpaan ira nen Asa tan saray sondalo na Juda. Batik iray taga Etiopia,

¹³ tan inosilan ira nen Asa tan saray sondalo to ya anggad Gerar. Amayamay so apatey a taga Etiopia kanyan ag da la ayariay nantitipon lamet a mibakal. Tinalo ra na Katawan tan saray sondaloo to.

¹⁴ Insan da dinederal iray siudad a walad kaliber-liber na Gerar, lapud ataktakot ed Katawan iray totood man. Sinasamsaman da ra yan siudad tan amayamay so nala ra.

¹⁵ Dinogpaan da met iray kampo da ray pigaran pumapastol tan inaala da ray amayamay a karniro tan saray kamilyo. Insan la ra pinmawil ed Jerusalem.

15

¹ "Linmoob ed kinen Azarias a lakin anak nen Obed so ispiritu na Dios,

² "insan linman inmabet ed Ari Asa. Inkuanto, Dengel mo ak, Ari Asa, tan amin yon totood Juda tan Benjamin! Mansiansiad sikayo so Katawan, legan a mansiansia kayo ed sikato. No anapen yoy Katawan iyabuloy ton naalmo yo, balet no ibeneg yo ikaindan to kayo.

³ "Abaybayag lan panaon a nambilay so Israel ya anggapoy tua a Dios to, anggapo ray papari a mambangat ed sikara, tan anggapoy ganggan.

⁴ "Balet nen sinmabiy segsegang, sinmingger irad Katawan a Dios na Israel. Inanap da et arumog da.

⁵ "Diad saraman ya agew anggapoy toon makapaliis ed kaatapan, lapud walay segsegang tan golo ed intiron dalin.

⁶ "Say sakey a bansa pinairap toy sananey a bansa, tan say sakey a siudad pinairap toy sananey a siudad, lapud ipapasabi na Dios so segsegang tan kairapan ed sikara.

⁷ "Balet pabiskeg yoy linawa yo, tan ag yo pakakapoyey sikayon dili. Natumangan iray kimey yo.

⁸ "Apabiskeg so linawa nen Asa nen nadngel toy propisiya nen Azarias a lakin anak nen Obed. Ineekal to ray talintao a walad dalin na Juda tan Benjamin tan amin a talintao da ray siudad ya adakep to ed kapokdulan a bansa na Efraim. Inapiger to met so altar na Katawan a walad patio na Timplo.

⁹ "Ingganggan nen Asa a mantitipon iray amin a totoosaray totood Juda tan Benjamin, tan saray amayamay a totoon akigampid sikato nen anengneng dan walad sikato so Katawan, salanti saray taga Efraim, Manases, tan Simeon, tan natan manaayam la ra ed nanarian to.

¹⁰ Nantitipon irad Jerusalem nen kumatlon bulan na kumalabinliman taon na panaari nen Asa.

¹¹ Diad saman ya agew angibagat irad Katawan na pigarad saramay asamsam da: piton lasus a baka tan piton libon karniro.

¹² Akisipanan ira a diad intiron puso tan kamarerwa ra panlingkuran day Katawan a Dios na saray lalaki ra, tan nepeg a pateyen so

¹³ siopaman ed sikara ya ag manlingkur ed Katawan, malangwer may matakken, bii may laki.

¹⁴ Inkasikasil day nansamba ed ngaran na Katawan a sumpalen day impisipanan da, insan ira inmeyag, tan amaknul na saray trumpita tan saray tambuyog.

¹⁵ Maliket iray amin a totood Juda, lapud akisipanan ira diad intiron puso ra. Nanliket iran nanlilingkur ed Katawan; inawat ira sirin na Katawan tan impanari toy kareenan ed amin a pasen.

¹⁶ Inekal nen Ari Asa si bai ton Maaca ed kipapasen ton riynan ina, lapud nampagawa na makapaingungot a talintao na diosan Asera. Binatang nen Asa imay talintao, binelang to, insan to pinoolan ed Patar na Cedron iray abelang to.

¹⁷ Nansiansian matoor ed Katawan si Asa legan na impanbilay to anggaman ya ag to dineral ya amin iray paganon pasen a panangigalangan ed bansa.

¹⁸ Inyan tod Timplo ya amin iray kagawaan ya insasaklang nen ama to ed Dios. Inyan to met iray balituk tan pilak a kagawaan ya insasaklang ton dili, ed Katawan.

¹⁹ Anggapo lay bakal ya agawa anggad kumatalomplo tan limay taon na impanoley to.

16

¹ "Diad kumatalomplo tan anem a taon na panooley nen Ari Asa na Juda, nilooban nen Ari Baasa na Israel so Juda. Ginapwan ton paliberan na padir so Rama, pian anggapoy makaonla o makapaway ed Juda.

² "Kanyan angala si Ari Asa na pilak tan balituk ed kayamanan na Timplo tan palasio, insan to imbakid Damasco iray pigaran opisyal to. Diad Damasco so panaayaman na ari ed Siria a si Ari Ben-hadad. Inter dad ari may pilak tan balituk, insan da sinalita so papaibaga nen Ari Asa:

³ "Manibaan ita, a singa ginawa na saray kaamaan ta. Panangarok ed sika ra yay pilak tan balituk. Lingwanan mo lay impisipanan mod Ari Baasa na Israel, et ekalen to ray sondalo ton walad nasasakopan kon dalin.

⁴ "Inmabubon ed kinen Asa si Ari Ben-hadad, kanyan imbaki ton ondogpad saray siudad na Israel iray sondalo to tan saray pangulo ra. Adakep day Ijon, Dan, Abel-bet-maaca, tan amin da ray siudad na Neftali a panangisempenan ira na saray abasto.

⁵ "Nen nadngelan nen Ari Baasa so nagagawa, tinondaan toy pamapadir tod Rama tan tinmaynan la.

⁶ "Insan impantitipon nen Ari Asa iray lalaki ed intiron Juda tan impaekal to ray bato tan saray tablan pamapadir nen Baasa ed Rama. Impamadir nen Asa ira yan bato tan tabla ed saray siudad na Mizpa tan Geba.

⁷ "Diad saman a panaon linmad kinen Ari Asa si propita Hanani tan kuanto, Lapud aliwan say Katawan a Dios mo so nanmatalekan mo no ag ingen say ari na Siria, imbatikan ka na saray sondalo na ari ed Israel.

⁸ "Ag ta saray taga Etiopia tan saray taga Libia et dakerakel a maung so sondalo ra tan amayamay iray karwahi ra tan saray kumakabayo ra? Balet lapud nanmatalek kad Katawan, impatalo to rad sika.

⁹ "Iimanoen a maung na Katawan so sankamundoan, pian naitdan to na pakayari iray totoon matoor ed sikato so kapusoan da. Kakulang-kulangan so ginawam, kanyan manlapud natan lawas kan mibakal.

¹⁰ Lapud saya mapalaloy pasnuk nen Asa ed samay propita tan impagolung-golungan to. Diad sayan panaon met, ginapwan nen Asa a pinapairap iray arum a totoo.

¹¹ Amin da ray agawgawa legay impanoley nen Asa manlapud gapo ya anggad samput et nikorit ed Say Awaran da ray Arari ed Juda tan Israel.

¹² Nen kumatalomplo tan siam a taon na panaari nen Asa, alopuy lapud sakit na sali a nilikna to. Saray doktor, aliwan say Katawan, so nanmatalekan ton mamaabig ed sikato.

¹³ Kalabas na duay taon inatey

¹⁴ insan nipompon ed lobuk ya inongib ed balbaleg a bato. Impagawa to yan lobuk a para sikato diad Siudad nen David. Nambabangil a rikado tan pabalingit so inkakana ra ed bangkay to ya impompon. Nampool iray balbaleg a pangipanengneng na ermen dad impatey to.

17

¹ "Si Josafat a lakin anak nen Asa so sinmalat a nanari. Pinabiskeg nen Josafat so kipapasen to sumpad Israel.

² "Angipasen na saray sondalo ed saray aliber na padir a siudad na Juda, diad saray bario na Juda, tan diad saray siudad ya adakep nen Asa ed dalin na Efraim.

³ "Binindisionan na Katawan si Josafat, lapud inalig toy akaonan impanbilay nen ama to, tan ag to angigalang ed Baal.

⁴ "Nanlingkuran toy Dios nen ama to, inonur to ray ganggan na Dios, tan ag to nambilay na singa impanbibilay na saray ararid Israel.

⁵ "Pinabiskeg na Katawan so panooley nen Josafat ed nanarian na Juda, kanyan inyaakaran na saray totoo na saray rigalo. Minmayaman a mapalalo sirin tan daydayewen na saray totoo.

⁶ "Inkinon to so panaglingkur tod Katawan tan dinederal to ray paganon pasen a panangigalangan tan saray tanda na diosan Asera.

⁷ "Nen kumatlon taon na panooley nen Josafat, imbaki to ray onggendan ya opisyal, ta nambabangat irad saray siudad na Juda: Ben-hayil, Obadias, Zacarias, Natanael, tan Micaya.

⁸ "Inolup ira na saray onggendan a siamiran Levita: Semaias, Netanias, Zebadias, Asael, Semiramot, Jonatan, Adonias, Tobias, tan Tobadonias, tan saray duaran pari a di Elisama tan Joram.

⁹ "Inala ray libro na Ganggan na Katawan tan imbabangat da ray totoo ed amin a baley na Juda.

¹⁰ Say Katawan pinatakot ton mibakal ed kinen Josafat ya amin iray nanarian a walad kaliber-liber na Juda.

¹¹ Pigaran Filisteo so angyakar ed kinen Josafat na dakel a pilak tan arum iran rigalo. Pigara met ya Arabe so angyakar ed sikato na piton libo tan piton lasus a karniro tan piton libo tan piton lasus a kanding.

¹² Kanyan pinmalalo lan pinmalalo so pakayari nen Josafat. Diad intiron Juda nampapaalagey na saray ankakabaleg a tirinsira tan saray siudad

¹³ a panangisempenan na saray amayamay ya abasto. Angipasen ed Jerusalem si Josafat na saray matalonan opisyal.

¹⁴ Impasen to ra onung na saray nanlapwan dan tribu. Si Adna so pangulo na saray sondalon nanlapud saray boleg nen Juda; talon lasus libo iray sondalon walad pakaoley to.

¹⁵ Si Johanan so onkumadwad pakaoley; duan lasus walomplon libo iray sondalon walad pakaoley to.

¹⁶ Say onkumatlo si Amasias a lakin anak nen Zicri; duan lasus libo iray sondalon walad pakaoley to. (Pinalapu nen Amasias ed linawa to so impanlingkur tod Katawan.)

¹⁷ Si Eliada, a matalonan sondalo, so pangulo na saray sondalon nanlapud saray boleg nen Benjamin; walad pakaoley to so duanlasus libon sondalo a samper tan pana ray armas da.

¹⁸ Si Jozabad so onkumadwad pakaoley; walad pakaoley to so sanlasus tan walomplon libon sondalo a dugay armas dan para bakal.

¹⁹ Sikara yay lalakin nanlingkur ed ari tan kaaruman ira na saray sondalon impasen tod saray arum a pinadir a siudad na Juda.

18

¹ "Nen mapalalo lan mayaman tan bantug si Ari Josafat na Juda, akapankaaro ra nen Ari Acab na Israel lapud impanasawa na saray duaran kabyangay pamilya ra.

² "Kayariy pigaran taon linmad Samaria si Josafat ta binisita toy Acab. Diad impamagalang nen Acab ed kinen Josafat, tan saray kakaiba to, amayamay a karniro tan baka so impapatey to ya impanangkaili to. Sinali nen Acab a tangguyoren si Josafat a mankasakey iran ondogpa ed Ramot-galaad.

³ "Inkuantod kinen Josafat, Mila ka pad sikamin mibakal ed Ramot-galaad. Inmebat si Josafat, No akaparaan kayo la, akaparaan ak met la tan saray sondalok. Mikasakey kamid sikayon mibakal.

⁴ "Insan inkuanto ni, Balet ipanon tayo ni ed Katawan.

⁵ "Impantitipon sirin nen Acab iray propita, sakey ya apat a lasus ira, tan tinepet tod sikara, Laen kon dogpaan so Ramot-galaad odino andi? Dogpaan mo, ebat da. Panaloen ka na Dios.

⁶ "Balet tinepet nen Josafat, Anggapo ta lay sananey a propita a diad panamegley to makapangipanon tayod Katawan?

⁷ "Inmebat si Acab, Wala niy sananey, si Micaya a lakin anak nen Imla. Balet kabosul ko, ta ag balut mampropropisiya na pankaabigan ko; pakaderalan kon amin. Ag mo nepeg ya ibaga tan! ebat nen Josafat.

⁸ "Tinawag sirin nen Ari Acab so sakey ya opisyal, tan imbaga tod sikato ya awiten ton tampol si Micaya.

⁹ "Saramay duaran ari akasolung ira na kawes da ray arari et akayorung irad saray trono ra diad samay pasen a panagilikan ya asingger ed puirta na Samaria. Mampropropisiyad arap da ira may amin a propita.

¹⁰ Nanggawa na saray saklur a balatyang so sakey ed saray propita a si Sedekias a lakin anak nen Canaana tan kuantod kinen Acab, Onyay inkuan na Katawan: Diad panamegley na saraya, labanan yo ray Siriano, et sigput a taloen yo ra.

¹¹ Nampapara so imbaga na amin da ra may propita. Inkuanda, Lakad Ramot-galaad et manalo ka. Panaloen ka na Katawan.

¹² Legan to ya, samay opisyal a mangaawit ed kinen Micaya inkuantod sikato, Aligwas na ari so impropisiya na amin da ray arum a propita, kanyan onya met so ipropisiyam.

¹³ Balet inmebat si Micaya, Diad ngaran na mabilay a Katawan, say papaibaga na Dios so ibagak!

¹⁴ Nen pinmarontal ed arap nen Ari Acab si Micaya, tinepet na ari ed sikato, Micaya, dogpaan mi nen Ari Josafat so Ramot-galaad odino andi? Inmebat si Micaya, Laka yo, ta manalo kayo. Panaloen kayo na Katawan.

¹⁵ Balet inmebat si Acab, Mamimpigan ibagak ed sikan say katwaan labat so ibagam ed siak diad ngaray Katawan?

¹⁶ Inmebat si Micaya, Anengneng kon ataytayak ed saray pokdul iray totood Israel, a singa ra karniron anggapoy pumapastol da. Insan inkuan na Katawan, Anggapoy pangulo da ra yan totoo; pasempet mo la ran walay kareenan.

¹⁷ Inkuanen Acab ed kinen Josafat, Imbagak ed sikan ag balut mampropropisiyay pankaabigan ko; pakaderalan kon amin!

¹⁸ Intuloy nen Micaya ya inkuan, Dengel yo natan so ibabagay Katawan! Anengneng koy Katawan a manyodyorung ed trono tod tawen, tan manalalagey ed diking to iray amin ya anghil.

¹⁹ Tinepet na Katawan, Siopay mamalikdod kinen Acab, pian onlad Ramot-galaad tan diman napatey? Sananey so imbaga na saray arum ya anghil tan sananey met so imbaga na saray arum.

²⁰ Kabebekta inmasingger so sakey ya ispiritu, nanalagey ed arap na Katawan tan kuanto, Siak so mamalikdo. Panon mon palikdoen? tepet na Katawan.

²¹ Inmebat imay ispiritu, Onla ak, ta pantilaen kon amin iray propita nen Acab. Inkuan na Katawan, Laka, ta palikdom si Acab. Nagaway pilalek mo.

²² Inkuanen Micaya ed kaonuran, Saya sirin so agawa. Impantila na Katawan ed sika ra yan propitam. Balet imbaga la na Katawan ed sika so kaogsan a nagawad sika!

²³ Balet inasinggeran nen Sedekias si Micaya, tinampal to, tan kuanto, Kapigan ta inmekal ed siak so ispiritu na Katawan, insan akisalita ed sika?

²⁴ Naamtaan mo no onla kan onamut ed kuarton walad beneg, ebat nen Micaya.

²⁵ Insan ingganggan nen Acab so sakey ed saray opisyal to, Singkat moy Micaya, insan mo iyakar ed kinen Amon a gobirnador na siudad, tan kinen Prinsipi Joas.

²⁶ Ibagam ed sikaran ipriso ra, tan pakanen da labat na tinapay tan itdan day danum ya anggad isabik ya anggapoy maoges ya agawad siak.

²⁷ No ompawil kan anggapoy maoges ya agawa, inkuanen Micaya, ag nansalitad panamegley ko so Katawan! Insan to inyarum ya inkuan, Tandaan yon amin imay imbagak!

²⁸ Linman dinmogpad siudad na Ramot-galaad si Ari Acab na Israel tan si Ari Josafat na Juda.

²⁹ Inkuanen Acab ed kinen Josafat, No onla itayon mibakal ag ak pabirbir, balet mansolung kay kawes na ari. Kanyan ag nampabirbir so ari na Israel nen linman mibakal.

³⁰ Ingganggan na ari na Siria iray pangulo na saray sondalon akakarwahi ya anggapoy arum a dogpaan da no ag say ari na Israel.

³¹ Nen anengneng day Ari Josafat abaloan dan ari na Israel, kanyan dinogpaan da. Balet inmeyag si Josafat et inyagel na Katawan a Dios tan pinaarawi tod sikato ira may dinmogpa.

³² Nen saray pangulo da ray akakarwahi et abirbir da ya aliwan sikatoy ari na Israel, tinondaan dan inosilan.

³³ Balet apalaranan ya apana na sakey a sondalon Siriano si Acab diad nanleetan na kawes ton para bakal. Ineyag tod kutsiroy karwahi to, Asugatan ak! Poliktar ka, ta onarawi ta lad bakalan.

³⁴ Legan na pinasyan laban, nansiansian akasaral ed karwahi to si Ari Acab tan sankaarap to ray Siriano. Nen onseselek lay agew inatey.

19

¹ "Pinmawil ed palasio to ed Jerusalem si Ari Josafat ya anggapoy maoges ya agawad sikato.

² "Si propita Jehu a lakin anak nen Hanani inabet toy ari tan kuantod sikato, Abaloan mo a maung a tulongan iray maoges a totoo, tan say migampi ed mamobusol ed Katawan? Diad impanggawam na onya, impanpasnuk mod sika so Katawan.

³ "Anggaman ontan, walay kamaungan mo. Inekal mon amin iray tanda na diosan Asera ya igagalang na saray totoo, tan nampilalekan moy mangonur na linaway Dios.

⁴ "Nanayam ed Jerusalem si Josafat, balet ogali toy onla ed saray totoo, manlapud Beer-seba diad abalaten ya anggad samsamput na kapokdulan na Efraim diad baybay, ta tangguyoren to ray totoo ya ompawil ed Katawan a Dios da ray lalaki ra.

⁵ "Anoro na saray huis ed balang aliber na padir a siudad na Juda

⁶ "tan binibilin to ra: Api-apiger yoy panintinsia yo; aliwan too so nanlapwan na pakayari yon manintinsia no ag ingen say Katawan, tan walad sikayo so Katawan no manintinsia kayo.

⁷ "Takotan yoy Katawan tan apiger yoy antokaman a gawaen yo, lapud say Katawan a Dios tayo et ag to labay so pamikewet ed katunongan, odino say panaglabi, odino say pangawat na pasoksok.

⁸ "Diad Jerusalem, anoroy Josafat na saray Levita, papari, tan pigaran matalonggaring a totoo a sikaray manintinsia ed saray kason nipaakar ed impanumlang ed Ganggan na Katawan, odino saray nipaakar ed kolkolan na saray totood siudad.

⁹ "Saraya so bilin tod sikara: Nepeg yon gawaen iray kimey yo a katekep na takot ed Katawan; nepeg a matoor kayod sikato ed amin a gawaen yo.

¹⁰ No wala ray kabansaan yon taga inerman a siudad a mangisegep ira na kason nipaakar ed impamatey, odino nipaakar ed impanumlang ed dinanman a ganggan o totontonen, nepeg yo ran bilinen a maung nipaakar ed gawaen da legay bista, pian ag ira mankasalanan ed Katawan. No ag yo ya gawaen, ondapod sikayoy pasnuk na Katawan ed sikayo tan saray kabansaan yo. Balet no gawaen yoy kanepegan yo, ag kayo mankasalanan.

¹¹ Si Amarias a Pangulon Pari so makaoley ed amin a kason nipaakar ed Katawan. Si Zebadias a lakin anak nen Ismael tan gobirnador na Juda so makaoley ed amin a kason nipaakar ed gobirno. Saray Levita so makaoley ed pakagawa na saray sintinsia na korti. Pabiskeg yoy linawa yo tan tombuk yo ra yan bilin; pilaan komun na Katawan iray matonung!

20

¹ "Ag abayag saray sondalo na Moab tan Ammon, pati saray kagampi ran Meunita, et nilooban day Juda.

² "Angibaki ray pigaran totoo ed Ari Josafat tan kuandad sikato, Wala ray amayamay a sondalo na Edom a sinmabi ran nanlapud basil na Inatey a Dayat ta dogpaan da kayo. Adakep da la so Hazazon-tamar. (Sikato yay sananey a ngaran na En-gadi.)

³ "Ataktakot si Josafat kanyan kinerew ton iwanwan na Katawan. Insan to ingganggan a nagaway ayuno ed intiron bansa.

⁴ "Nangganat a linmad Jerusalem iray totood balang siudad na Juda, ta kinerew dad Katawan ya iwanwan to ra.

⁵ "Nantitipon ira tan saray totood Jerusalem ed balon patio na Timplo. Linmad sikara si Ari Josafat tan nanalagey ed arap da,

⁶ "insan nampikasi na maksil, O Katawan a Dios na saray lalaki mi, wala kad tawen a manooley ed amin da ray bansa ed mundo. Makapanyari tan mabiskeg ka, kanyan anggapoy makasumpad sika.

⁷ "Sika so Dios mi. Nen saray totoom ya Israelita et linma rad sayan dalin, pinataynan mo ray totoon manaayam dia, insan inter mon kayaryan lan anggad angga na saray kabyangay boleg nen Abraham a kaarom.

⁸ "Nanayam ira dia tan angipaalagey iray sakey a timplo a pamagalang dad sika, ta amta ra

⁹ "a no ondalan ed sikaray bengatlan manderal, a singa say bakal, salot, odino eras makakar iran manalagey ed arap na sayan Timplo a pangigagalangan ed sika. Makapampikasi rad sika lapud kagugunigon da, et dengelen tan iyagel mo ra.

¹⁰ Natan, dinogpaan kami na saray totood Ammon, Moab, tan Edom. Nen pinmaway ed Egipto iray lalaki mi, ag mo inabuloyan a looban da ra man a dalin, kanyan sinmaliberber ira tan ag da ra dineral.

¹¹ Onya natan so labay dan ibales ed sikamisinmabi ran mamagit ed sikami ed sayan dalin ya inter mod sikami.

¹² Sika so Dios mi! Dusam pa ra, ta anggapoy nagawaan min onsumpa ed sarayan amayamay a sondalon ondodogpad sikami. Ag mi amta no antoy gawaen mi, balet onaapireng kamid sika a tulongan mo kami.

¹³ Amin da ray lalaki ed Juda, pati saray kaasawaan tan saray anak da, et manalalagey irad man ed arap na Timplo.

¹⁴ Say ispiritu na Katawan linmoob ed sakey a Levita a wadmad saman a simpuk na totoo. Say ngaran to Jahaziel a lakin anak nen Zacarias; sikatoy kabyangay boleg nen Asaf diad panamegley di Matanias, Jeiel, tan Benaya.

¹⁵ Inkuanen Jahaziel, Kagalang kon Ari tan amin yon totood Juda tan Jerusalem, imbaga na Katawan ya ag yo nepeg a pakakapoyey linawa yo, odino ontatakot a mibakal ed sarayan amayamay a sondalo. Andid lima yo yan bakal no ag ingen walad lima na Dios.

¹⁶ Dogpaan yo ra nabwas no ontatatdang irad dalan na Sis. Naabet yo ra ed samput na patar a mamaarap ed kalawakan ya asingger ed Jeruel.

¹⁷ Aliwan sikayoy nepeg a milaban ed sayan bakal. Ilira yo labat so sikayon dili tan manalagar kayo; nanengneng yoy pangiter na Katawan ed sikayo na pananalo. Totood Juda tan Jerusalem, ag kayo ontatalaw odino ontatakot. Paway kayon mibakal, tan olupen kayo na Katawan!

¹⁸ Dinmakmomoy Josafat ya anggad dalin tan dinmakmomo met iray arum a totoo, insan inggalang day Katawan.

¹⁹ Saray Levitan kabyangay boleg di Coat tan Cori et nanalagey ira tan makmaksil dan indayew so Katawan a Dios na Israel.

²⁰ Diad kabkabwasan ed ontombuk ya agew saray totoo linma rad kalawakan ya asingger ed Tecoa. Legan dan oonla, nanalagey si Josafat tan kuantod sikara, Totood Juda tan Jerusalem! Manmatalek kayod Katawan a Dios yo, et ag kayo napasoner. Manisia kayod saray ibabaga da ray propita to, et manalo kayo.

²¹ Kayari na ari a binilin iray totoo, ingganggan to ray pigaran tumutogtog tan pigaran kumakanta a mansulong iray kawes ya isosolung da no wala ray masanton pista tan mankurang iran walad onaan da ray sondalo tan ikankanta ra: Nadayew komun so Katawan! Ag mangangga so ag mangoman a panangaro to!

²² Nen ginapwan day nankanta, ginewgew na Katawan ira may sondalon ondodogpa.

²³ Saray Ammonita tan saray Moabita et dinogpaan da ray sondalon Edomita tan pinapatey da ran amin. Kayari to ya sikaran diliy nanlalaban na pinasya.

²⁴ Nen asabi na saray sondalon Judio so sakey a torin panagbantayan a walad kalawakan, binantag da ra may kalaban et anengneng da ran kibalatar ya inaatey. Anggapod sikaray akabatik.

²⁵ Dinmago ira di Josafat tan saray sondalo to a mangala na saray kayamanan da ray kalaban. Amayamay so nalmo ran baka, abasto, kawes, tan saray mabmablin bengatla. Anggaman a taloy agew iran nanaala, ag da ayarian ya inalan amiy bengatla lapud karakel.

²⁶ Nen kumapat ya agew nantitipon irad Patar na Beraca tan indayew dad man so Dios lapud amin a ginagawa ton para sikara. Sikato yay makasengeg ya atawag iman a patar na Beraca.

²⁷ Malikeliket a pinmawil ed Jerusalem ira di Josafat tan saray sondalo to, lapud tinalo na Katawan iray kalaban da.

²⁸ Nen kasabi rad siudad, tinmalus irad Timplo a tinogtogan ira na saray arpa tan saray trumpita.

²⁹ Ataktakot iray amin a bansa ya akadngel no panoy impanalo na Katawan ed saray kalaban na Israel.

³⁰ Walay kareenan sirin nen nanoley si Josafat tan inyarawi na Dios ed kaatapan diad amin a pasen.

³¹ Talomplo tan limay taon nen Josafat nen nagmaliw ya ari na Juda, tan nanoley ed Jerusalem na duamplo tan limay taon. Say ina to si Azuba ya anak nen Silhi.

³² Ginawa toy kaptekan ed arap na Katawan a singa ginawa nen Asa ya ama to;

³³ balet ag aderal iray paganon pasen a panangigalangan. Aliwa nin sigput so impawil na saray totoo ed panangigalang ed Dios da ray lalaki ra.

³⁴ Amin a ginagawa nen Josafat manlapud gapo na impanoley to ya anggad samput, et nikorit ed Say Awaran nen Jehu a Lakin Anak nen Hanani, a parti na Say Awaran da ray Arari ed Israel.

³⁵ Aminsan, akigampiy Ari Josafat ed kinen Ari Ahazia na Israel ya amayamay so ginagawa ton kaogsan.

³⁶ Diad puirto na Ezion-geber nanggagawa ray bapor ya ibiahi rad Tarsis.

³⁷ Balet si Eliezer a lakin anak nen Dodava a taga baley na Maresa et pinasakbayan toy Josafat, Lapud akigampi kad Ahazia, deralen na Katawan so ginawam. Et aderal a tua ira may ginagawa ton bapor kanyan ag la ran balut nibiahi.

21

¹ "Inatey si Josafat tan nipompon ed pantion da ray arari diad Siudad nen David, insan sinmalat ed sikaton nanari si Jehoram a lakin anak to.

² "Walay anemiran lalakin agagi nen Jehoram a lakin anak nen Josafat ya ari na Juda: Azarias, Jehiel, Zacarias, Azarias, Micael, tan Sefatias.

³ "Initdan iray ama ra na amayamay a balituk, pilak, tan arum nin mabmablin kayaryan, insan to impasen so balang sakey ed sikara a makaoley ed sakey a pinadir a siudad na Juda. Balet lapud sankapangulowanan si Jehoram, sikatoy pinili nen Josafat ya onsalat ed sikaton manari.

⁴ "Nen malet lay panooley tod nanarian, impapatey ton amin iray agagi ton lalaki, tan saray pigaran opisyal ya Israelita.

⁵ "Nagmaliw ya ari si Jehoram nen mataon na talomplo tan dua, tan nanoley ed Jerusalem na waloy taon.

⁶ "Inalig toy maoges a ginagawa nen Ari Acab tan saray arum ya arari na Israel, lapud inasawa toy sakey ed saray anak nen Acab. Nankasalanan ed Katawan,

⁷ "balet ag labay na Katawan a mansamput so panoley da ray kabyangay boleg nen David, lapud akisipanan ed kinen David. Insipan to a saray kabyangay boleg nen David so manoley ya anggad angga.

⁸ "Legan na panooley nen Jehoram, linmaban ed Juda so Edom, tan nagmaliw a walay dilin ari na Edom.

⁹ "Kanyan si Jehoram tan saray opisyal to a pati saray karwahi ra et nilooban day Edom. Balet nilakob irad man na saray sondalo na Edom. Diad labi ayarian day sinmelak et akabatik ira.

¹⁰ Nanlapud saman andi lad silong na pakaoley na Juda so Edom. Diad saman met a panaon, linmaban met ed Juda so siudad na Libna, lapud inkaindan nen Jehoram so Katawan say Dios na saray lalaki to.

¹¹ Nanggagawa ni ingen met ed saray pokdul na Juda na saray paganon pasen a panangigalangan tan inlagyat ton nankasalanan ed Katawan iray totoo na Juda tan Jerusalem.

¹² Si propita Elias impawitan toy sulat si Jehoram ya onyay logan to: Dusaen kay Katawan a Dios nen lakim a David lapud ag mo inalig so maung ya impanoley nen amam a Josafat o si Ari Asa na Juda.

¹³ Inalig mo ingen iray maoges ya ararid Israel tan inlagyat mo ray totood Juda tan Jerusalem ed panusumlang dad Dios, a singa impangilagyat nen Acab tan saray sinmasalat ed sikato ed saray totood Israel diad impanumlang dad Katawan. Pinapatey mo met iray agagim a lalakin maung ni ran totoo nen say sika.

¹⁴ Lapud saya, mapalaloy panusa na Katawan ed saray totoom, saray anak mo, saray asawam, tan deralderalen to ray kayamanan mo.

¹⁵ Manirap ka lapud pansakit mod pait ya ondenden lan ondenden ya inagew-agew.

¹⁶ Wala ray Filisteo tan Arabe a manaayam ed asingger ed panaayaman na saray taga Etiopia diad gilig na dayat. Say Katawan imbaki to ran mibakal ed kinen Jehoram.

¹⁷ Nilooban day Juda, inaala da ray kayamanan ed palasio, tan inaawit dan priso iray amin ya asawa na ari tan saray anak ton lalaki, likud labat ed kinen Ahazia a sankayogtanan ya anak ton laki.

¹⁸ Kayariy inkagawa da ra yan amin, impansakit na Katawan so ari ed saray pait to et mapalaloy impanirap to.

¹⁹ Ngalngalin duay taon a dinmenden lan dinmenden so sakit to, anggad ontan lay impanirap ton inatey. Saray totoo et ag ira nampool a pangipanengneng na ermen dad impatey to; aliwan singa agawgawad saray lalaki to.

²⁰ Talomplo tan duay taon nen Jehoram nen nagmaliw ya ari tan nanoley ed Jerusalem na waloy taon. Anggapoy nanermen nen inatey. Impompon dad Siudad nen David, balet aliwan diad kamposanto da ray arari.

22

¹ "Walay olup na saray Arabe a dinmogpa, et pinatey da ray amin a lalakin anak nen Ari Jehoram likud ed kinen Ahazia a sankayogtanan ya anak to. Kanyan saray taga Jerusalem insalat dad kinen ama to si Ahazia a manari ed Juda.

² "Nagmaliw ya ari si Ahazia nen mantaon na duamplo tan dua, tan nanoley ed Jerusalem na sakey taon. Say ina to et si Atalia ya apo nen Ari Omri na Israel.

³ "Inalig to ray maoges a ginagawa na saray kabyangay pamilya nen Acab, lapud imbabangat nen ina to ed panggaway kaogsan.

⁴ "Nankasalanan ed Katawan, lapud kapatey nen ama to sinmalat a sumisimbawa to iray arum a kabyangay pamilya nen Ari Acab, et sikaray makasengeg na inkaderal to.

⁵ "Diad impangonur tod simbawa ra, akigampid Ari Joram na Israel diad impibakal dad Ari Hazael na Siria. Diad Ramot-galaad so nambabakalan da. Asugatan si Joram ed sayan bakal.

⁶ "Pinmawil ed siudad na Jezreel ta mampaabig ed sugat to, tan binisitad man nen Ahazia.

⁷ "Linawa na Dios a sayan imbisita tod kinen Joram et sikatoy makasengeg na inkaderal to. Legan a wadmay Ahazia, linma ran dua nen Joram a mangabet ed kinen Jehu a lakin anak nen Nimsi. Si Jehu so pinili na Katawan a mamasamput na panoley na saray kabyangay boleg nen Acab.

⁸ "Legan a susumpalen nen Jehu so sintinsiay Dios ed saray kabyangay boleg nen Acab, nabet to ray pangulo na Juda tan saray kakaanakan nen Ahazia ya angolup ed imbisita to. Pinatey nen Jehu ran amin.

⁹ "Inanap day Ahazia tan arumog dan manaamut ed Samaria. Inawit dad kinen Jehu, insan pinatey to. Balet impompon da lapud pamagalang dad kinen laki nen Ahazia a si Ari Josafat a ginawa toy anggaay nayarian ton manlingkur ed Katawan. Anggapoy atilak a kabyangay pamilya nen Ahazia a nayarian toy manoley ed nanarian.

¹⁰ Kadngel nen Atalia ya ina nen Ari Ahazia ed impamatey ed anak to, impapatey ton amin iray kabyangay pamilya na ari na Juda.

¹¹ Balet nibatik nen Josaba so sakey a lakin anak nen Ahazia a si Joas a pateyen da met lawari, a pati saray arum ya agagi to. Inyamut to ed sakey a kuarto ed Timplo tan impaibaan to ed sakey a managasikaso. Diad impangyamut tod sikato, inyagel tod patey si Joas ed lima nen Atalia. Si Josaba et biin agid ama nen Ahazia, ta saksakey so ama ra a si Ari Jehoram. Say asawa to et si Joiada a sakey a pari.

¹² Niamut ya anem taon si Joas legan a manooley a riyna si Atalia.

23

¹ "Kayariy anem taon, ginetma la nen Joiada a pari so onggalaw. Akipaknaan ed saray limaran opisyal na saray sanlalasus a sondalo, a di Azaria a lakin anak nen Jehoram, Ismael a lakin anak nen Jeohanan, Azaria a lakin anak nen Obed, Maasias a lakin anak nen Adaya, tan Elisafat a lakin anak nen Zicri.

² "Linma rad amin a siudad na Juda tan inaawit dad Jerusalem iray Levita tan amin da ray pangulo na saray boleg.

³ "Nantitipon iran amin ed Timplo, tan diman ira akisipanan ed kinen Joas ya anak na ari. Inkuanen Joiada ed sikara, Sikato ya so anak nen Ari Ahazia ya inatey la! Sikato natay magmaliw ya ari, onung na insipan na Katawan ed saray kabyangay boleg nen Ari David.

⁴ "Onyay gawaen tayo. Saray papari tan saray Levita, no onla ran mankimey no Agew na Panagpainawa, et guardiaan na kakatlod sikara iray puirta na Timplo,

⁵ "guardiaan na sakey nin kakatlo so palasio, tan guardiaan na saray akeraan so Puirtay Pundasion. Mantitipon ed patio na Timplo iray amin a totoo.

⁶ "Anggapod satan so onloob ed Timplo, likud ed saray papari tan saray Levita a niganan manlingkur. Nayarin onloob ira ya, lapud nisaklang so bilay da, balet nepeg ya onuren na arum a totoo iray bilin na Katawan kanyan manayam irad paway.

⁷ "Saray Levita so mangguardia ed kaliber-liber na ari ya akaoyus iray ispada ra, tan olupen da lawas so ari ed inerman a laen to. Pateyen so siopaman ya onloob ed Timplo.

⁸ "Inonur na saray Levita tan saray totood Juda iray bilin nen Joiada. Ag ira pinasempet nen Joiada no Agew na Panagpainawa, wala man o anggapoy kimey da, kanyan sipaparaan ira lawas ya iganggan na saray pangulo ra.

⁹ "Inter nen Joiada ed saray opisyal iray pika tan saray samper a kayaryan nen Ari David a nisinup ira ed Timplo.

¹⁰ Impasen to ray totoo a mangguardia rad kaliber-liber na arap na Timplo, ta iyagel day ari; akaoyus so ispada ran mangguardia.

¹¹ Insan impaway nen Joiada si Joas, kinoronaan to tan inter tod sikato so kupia na ganggan na nipaakar ed panari. Kanyan nagmaliw ya ari si Joas. Si Joiada a pari tan saray lalakin anak to nilanaan day Joas, insan inmeyag so balang sakey, Andokey komuy pambilay na ari!

¹² Nadngel nen Atalia so paneeyagan na saray totoo a pangidayew dad ari, kanyan nangganat a linmad Timplo a dimay nantitiponan na saray totoo.

¹³ Anengneng tod man so balon ari a walad lolooban na Timplo; manalalagey ed abay na lusek a niganan para saray arari tan aliber na saray opisyal na sondalo tan saray managtrumpita. Malikeliket a maneeyagan iray amin a totoo tan papaknulen da ray trumpita. Saray tumutogtog tan saray kumakanta ed Timplo so mangipapangulo ed sayan nagagawa, tan ikakana da ray kagawaan da ed musika. Diad inkagunigon to ginebyas toy kawes to tan ineyag to, Sumlang ya ed pakaoley! Sumlang ya ed pakaoley!

¹⁴ Ag labay nen Joiada a napatey ed solar na Timplo si Atalia, kanyan ingganggan tod saray opisyal na sondalo, Ipaway yod dalan ed leet na saray dasig da ray sondalo, tan patey yoy siopaman a mangyagel ed sikato.

¹⁵ Siningkat da, inyakar dad palasio insan da pinatey ed Puirtay Kabayo.

¹⁶ Si Joiada a pari impikasakey tod sikato so ari tan saray totoo diad impisipanan to a magmaliw iran totoo na Katawan.

¹⁷ Linma ran amin ed timplo nen Baal, insan inggeba ra; minekmek da ray altar tan saray wadman a talintaoy diriyos, tan pinatey dad arap na saray altar si Matan a pari nen Baal.

¹⁸ Si Joiada impasen ton makaoley ed saray kimey ed Timplo iray papari tan saray Levita. Nepeg dan onuren iray kimey ya impabetang nen Ari David ed sikara. Nepeg da met so mangisaklang ed Katawan na saray bagat a popoolan onung ed Ganggan nen Moises. Makaoley met ira ed musika tan saray pista.

¹⁹ Angipasen met si Joiada na saray mangguardia ed saray puirta na Timplo pian ag makaloob so siopaman ya aliwan malinis onung ed ganggan.

²⁰ Insan si Joiada, saray pangulo na sondalo, saray matalonggaring ya ombaley, saray opisyal tan amin a totoo et imparada ray ari manlapud Timplo ya anggad palasio. Dinmalan ira ed manonan puirta, insan inlira dad trono to so ari.

²¹ Akaliket iray amin a totoo, tan dinmeen so siudad, natan ta inatey lay Atalia.

24

¹ "Nagmaliw ya ari na Juda si Joas nen mantaon na pitora, tan nanoley ed Jerusalem na apataploy taon. Si Zibia a taga siudad na Beer-seba so ina to.

² "Legay impanbilay nen Joiada a pari, ginagawa nen Joas iray makapaliket ed Katawan.

³ "Amiliy Joiada na duaran bibii ya impaasawa tod Ari Joas, et nanilalak na lalaki tan bibii.

⁴ "Ag abayag ginetma nen Ari Joas ya apigeren so Timplo na Katawan.

⁵ "Ingganggan to ray papari tan saray Levita ya onla rad saray siudad na Juda, ta mankolikta rad saray totoo na kuarta a para samay tinaon a pamaapiger ed Timplo. Imbaga tod sikaran ganatan da yan gawaen, balet nantayam-tayam ira may Levita.

⁶ "Impatawag to sirin si Joiada a pangulo ra, tan tinepet to, Akin et ag mo ni impakolikta ed saray Levita so buis da ray taga Juda tan Jerusalem, a si Moises ya aripen na Katawan et ingganggan tod saray totoo a bayaran da para Tuldan Ayamay Katawan? (

⁷ "Saray mananombuk nen Atalia, samay maoges a bii, et dineral day Timplo tan inkakana rad panangigalang ed Baal iray amayamay a masanton kagawaan.)

⁸ "Ingganggan na ari iray Levita a manggawa ray kahon a pananginay tulong tan iyan dad puirta na Timplo.

⁹ "Impaibaga rad intiron Jerusalem tan Juda a balang sakey et nepeg ya iyakar tod Katawan imay buis ya ononan kinoliktad kalawakan nen Moises ya aripen na Dios.

¹⁰ Akaliketan ya na saray totoo tan saray pangulo ra, kanyan inyaakar da may kuarta ran para buis tan pinapano ra may kahon.

¹¹ Inagew-agew saray Levita iyakar da may kahon ed opisyal na ari a makaoley. No napno la, ondago so sikritario na ari tan say opisyal na Pangulon Pari, alaen day kuarta, insan da ipawil imay kahon ed pasen to. Kanyan amayamay so akolikta ran kuarta.

¹² Insan ipalima na ari tan si Joiada imay kuarta ed saray makaoley ed panagapiger na Timplo, a nanuupa ra na saray manapiger a kantiro, karpintiro, tan platiro.

¹³ Pinasiay impankimey da ra may nanapiger, kanyan nipawil dad gendat a kipapasen ton mabisbiskeg imay Timplo.

¹⁴ Nen asumpal so impangapiger, niiter ed ari tan si Joiada iray soluk a balituk tan pilak. Inkana da ra ya ed panggawa na saray yaung tan arum ni ran kagawaan na Timplo. Legan a mabilay si Joiada, ag tinmonda so pangisasaklang na saray bagat ed Timplo.

¹⁵ Masikesiken lay Joiada nen inatey, sanlasus tan talomplo so taon to.

¹⁶ Impompon da ed saray pantion da ray arari diad Siudad nen David, lapud impamirbir da ed impanlilingkur tod saray totood Israel, diad Dios, tan diad Timplo.

¹⁷ Balet kapatey nen Joiada, tinanggoyur na saray pangulo na Juda si Ari Joas ya ondengel ed sikara.

¹⁸ Tinondaan na saray totoo so mangigalang ed Timplo na Katawan, say Dios na saray lalaki ra, tan angigalang irad saray talintaoy diriyos tan saray talintaoy diosan Asera. Lapud sayan kasalanan na saray totood Juda tan Jerusalem, akapasnuk so Katawan ed sikara.

¹⁹ Angibaki so Katawan na saray propita a mamasakbay ed sikara pian makapawil irad Katawan, balet ag da ra dinengel.

²⁰ Insan say ispiritu na Dios linmoob ed kinen Zacarias a lakin anak nen Joiada a pari. Nanalagey ed sakey a pasen a nanengneng na saray totoo tan inkulyaot to, Tetepeten ed sikayo na Katawan a Dios no akin et sinumlang yo ray ganggan to tan ipepelag yod sikayon dili so deral! Inkaindan yoy Katawan kanyan inkaindan to kayo!

²¹ Akikomplut si Ari Joas ed saray totoo sumpad kinen Zacarias, et nen ingganggan to tinupak dad patio si Zacarias.

²² Alingwanan na ari so matoor ya impanlingkur ed sikato nen Joiada ya ama nen Zacarias, kanyan impapatey toy Zacarias. Nen ompapatey si Zacarias, inmeyag, Nanengneng komun na Katawan so gagawaen yo tan dusaen to kayo!

²³ Nen magano lan mansamput iman a taon, dinogpaan na saray sondalon Siriano so Juda tan Jerusalem, pinatey da ray amin a pangulo, tan amayamay so asamsam dan insempet ed Damasco.

²⁴ Daiset iray Sirianon sondalo, balet impatalo na Katawan iray amayamay a Judion sondalo lapud inkaindan na totoo so Katawan a Dios na lalaki ra. Onya so impakadusa nen Ari Joas.

²⁵ Mapalaloy inkasugat nen Joas, et nen tinmaynan la ra may kalaban da, nankomplut so duaran opisyal to tan pinatey da ed katri to, pian makabales irad samay impamatey ed anak nen Joiada a pari. Nipompon ed Siudad nen David, balet aliwan diad kamposanto da ray arari. (

²⁶ Saramay nankomplut ya amatey ed sikato et si Zabad lakin anak na Ammonitan bii a manngaray Simeat, tan si Jozabad a lakin a anak na Moabitan bii a manngaray Simrit.)

²⁷ Nikorit ed Say Komintario ed Libro da ray Arari so istoria na saray lalakin anak nen Joas, saray propisiyan asalita sumpad sikato, tan say impamaapiger tod Timplo. Si Amasias a lakin anak to so sinmalat ed sikaton nanari.

25

¹ "Nagmaliw ya ari si Amasias nen mantaon na duamplo tan lima, tan nanoley ed Jerusalem na duamplo tan siam a taon. Si Joadan a taga Jerusalem so ina to.

² "Ginagawa toy makapaliket ed Katawan, balet aliwan maseseg ed saya.

³ "Nen malet lad lima nen Amasias so pakaoley, pinatey to ra may opisyal ya amatey ed kinen ama ton ari.

⁴ "Balet ag to pinatey iray anak da, no ag ingen tinombuk toy ibabagay Katawan onung ed Ganggan nen Moises: Ag nepeg a pateyen iray atateng, lapud saray kasalanan a ginawa na saray anak da, tan ag nepeg a pateyen iray anak, lapud saray kasalanan a ginawa na saray atateng da; nepeg a pateyen so sakey a too, lapud kasalanan a ginawa ton dili.

⁵ "Tinogyup nen Amasias iray amin a lalaki ed saray tribu di Juda tan Benjamin tan impagmaliw to ran pigaran grupoy sondalo onung na nanlalapwan dan boleg. Angipasen na saray opisyal ed saray sanlilibo tan saray sanlalasus a totoo. Talon lasus libo ran amin a sondalo, tan duamplo a mampaatagey so taon da. Pinili ra yan sondalo, akaparaan iran mibakal, tan marunong iran mangikanay pika tan samper.

⁶ "Likud ed sarayan sondalo to, angupa ni na sanlasus libon sondalo na Israel. Apatiran toniladan pilak so inyupa to.

⁷ "Balet sakey a propita so linmad kinen Ari Amasias tan kuantod sikato, Ag mo pipilaen ira yan Israelitan sondalo. Ag kaiba na Katawan ira yan totoon taga Baybay a Nanarian.

⁸ "Abaloan mo amon napabiskeg kan mibakal no kaibam ira, balet ipatalo ka na Dios ed saray kalaban mo. Walad sikatoy pakayari a panaloen odino ipatalo ka.

⁹ "Tinepet nen Amasias ed samay propita, Antoy gawaen kod samay imbayar kon pilak ed sikara? Inmebat imay propita, Nayarian na Dios ya ipawil ed sika so masoluk ni nen say saman!

¹⁰ Pinasempet la sirin nen Amasias ira may inupaan ton sondalo. Lapud saya sinmempet iran mapalaloy pasnuk da ed saray taga Juda.

¹¹ Pinabiskeg nen Amasias so linawa to tan impangulo to ray sondalo to a linmad Patar na Asin. Diman ira nambabakal et akapatey ira di Amasias na samplon libon Edomitan sondalo

¹² tan akadakep ira na samplon libo. Inyakar da ra yan adakep da ed tambib na kelas ed siudad na Sela insan da ra intutulak. Kanyan inaatey iran amin ed tapew na saray baton ankakabaleg ed leksab.

¹³ Legan to ya, saramay sondalon taga Israel ya ag ira impila nen Amasias ed bakal et dinogpaan da ray siudad na Juda a wala rad nanleetan na Samaria tan Bet-horon. Akapatey ira na talon libon lalaki, tan akasamsam ira na amayamay a bengatla.

¹⁴ Kayari nen Amasias a tinalo iray Edomita, pinmawil a sankaawit to ray talintaoy diriyos da. Inlira to ra yan talintao, inggalang to ra, tan nampool ed sikara na insinso.

¹⁵ Akapasnuk so Katawan ed saya, kanyan angibaki na propita ed kinen Amasias. Tinepet na samay propita, Akin et igagalang mo ray diriyos na arum a bansa ya ag da anggan niyagel ed pakayarim iray dilin totoo ra?

¹⁶ Tinepet nen Amasias, Kapigan lay impanggawa mid sikan sumisimbawa na ari? Tonda ka lan mansalita, ta no andi papatey ta ka! Tinmonda may propita kayari ton inkuan, Amtak la natan a ginetma lay Dios a deralen to ka, lapud ginawam ira yan amin tan ag mo dinengel so simbawak.

¹⁷ Nankokomplut sumpad Israel si Ari Amasias na Juda tan saray sumisimbawa to. Angibaki na totoo to ed kinen Ari Joas na Israel a lakin anak nen Joacaz tan apo nen Jehu, ta pasasagyat ton mibakal ed sikato.

¹⁸ Balet onyay ebat nen Ari Joas: Aminsan, diad Palandey na Libano, impaikuan na masabit a kiew ed kiew a sidro: Ipaasawam so anak mo ed anak ko! Insan dinmalan so sakey ya ayep ed katakelan tan ginatinan to may masabit a kiew.

¹⁹ Sika, Amasias, ipapantam a tinalom la ray Edomita, balet ibabagak ed sika natan ya ag ka la onaalis ed nanarian mo. Akin et mangigagapo ka niy golo a pakaderalan mo tan saray totoom?

²⁰ Balet ag dinmengel si Amasias. Linawa na Dios a natalo si Amasias, lapud inggalang to ray talintaoy diriyos na saray Edomita.

²¹ Kanyan akibakal si Joas na Israel ed kinen Ari Amasias na Juda. Nanabet ira ed Bet-semes na Juda.

²² Atalo ray sondalo na Juda tan kibatiktik iran sinmempet.

²³ Adakep nen Joas si Amasias tan inawit tod Jerusalem. Inggeba tod man so padir na siudad manlapud Puirtay Efraim ya anggad Puirtay Sokung, sakey a sanlasus tan siamaplon mitroy karokey.

²⁴ Insempet tod Samaria iray amin a balituk tan pilak ed Timplo, saray kagawaan ed Timplo a guaguardiaan ira na saray kabyangay boleg nen Obed-edom, tan saray kayamanan ed palasio. Angawit met na saray totoon pamasengegan toy panumpal na labay ton nagawa.

²⁵ Kayariy impatey nen Ari Joas na Israel nambilay niy Ari Amasias na Juda na labinlimay taon.

²⁶ Nikorit ed Say Awaran da ray Arari ed Juda tan Israel ya amin iray arum a ginagawa nen Amasias manlapud inggapo na impanoley to ya anggad samput.

²⁷ Nanlapud insumlang tod Katawan, walay komplut a pamatey ed sikato diad Jerusalem. Diad kaonuran batik ed siudad na Lakis, balet tinombuk diman na saray kalaban to tan diman da pinatey.

²⁸ Nilogan ed beneg na kabayo so bangkay nen Amasias nen niakar ed Jerusalem, tan nipompon ed kamposanto da ray arari diad Siudad nen David.

26

¹ "Pinili na amin a totood Juda so lakin anak nen Amasias a si Uzias ya onsalat ed kinen ama to a manari. Labinanem so taon to nen pinili ra. (

² "Abawi nen Uzias so siudad na Elat tan pinasimbalo ton impaalagey kayari na impatey nen Amasias.)

³ "Nagmaliw ya ari si Uzias nen mantaon na labinanem tan nanoley ed Jerusalem na limamplo tan duay taon. Si Jecolia a taga Jerusalem so ina to.

⁴ "Ginagawa toy makapaliket ed Katawan tan inalig toy ginagawa nen ama to.

⁵ "Legan a mabilay si Zacarias, a sumisimbawa ton nipaakar ed itatakot ed Dios, matoor ton nilingkuran so Katawan, kanyan pinaaligwas na Dios.

⁶ "Akibakal si Uzias ed saray Filisteo. Inggeba to ray padir na saray siudad na Gat, Jabnia, tan Asdod, tan nampapaalagey na saray aliber na padir a siudad diad asingger ed Asdod tan saray arum a pasen ed Filistia.

⁷ "Tinulongan na Dios ed impanalo tod saray Filisteo, saray Arabe a manaayam ed Gurbaal, tan saray Meunita.

⁸ "Angiter na saray rigalo iray Ammonita ed kinen Uzias. Nagmaliw a mapalaloy pakayari to kanyan kinmayat ya anggan diad Egipto so inkabantug to.

⁹ "Pinabiskeg nen Uzias so padir na Jerusalem diad impamaalagey to na saray tori ed Puritay Sokung, Puritay Patar, tan diad saray nilikuan na padir.

¹⁰ Nampapaalagey met na saray aliber na padir a tori diad kaalogan, tan nampapakotkot na amayamay a bobun, lapud amayamay iray ayayep to ed saray alusadsar tan saray patar ed bokig. Lapud maliket ed panagtanaman, tinanggoyur to ray totoon mantanem ira na ubas tan saray arum nin tanaman diad saray kapokdulan tan diad saray mataban dalin.

¹¹ Amayamay iray sondalo ton akaparaan a mibakal. Di Jeiel tan Maasias so makaoley ed saray isusulat a nipaakar ed saray sondalo, diad panangiwanwan nen Ananias ya opisyal na ari.

¹² Duan libo tan anem a lasus iray opisyal na sondalo.

¹³ Talon lasus tan piton libo tan liman lasus a sondalo so ipapangulo na sarayan opisyal; marunong ira yan mibakal ed saray kalaban diad pangyagel dad ari.

¹⁴ Initdan nen Uzias ira yan sondalo na saray samper, pika, hilmit, kawes a para bakal, pana, tan saray baton para bansut.

¹⁵ Diad Jerusalem, saray marunong a kumikimey to et nanggawa ra na saray kagawaan a pangibansut na saray ankakabaleg a bato tan pana, manlapud saray tori tan saray sokung na padir na siudad. Kinmayat ed anggan iner a pasen so inkabantug nen Uzias, tan mapalaloy pakayari to lapud saray nidoma-doman tulong a nanaawat tod Dios.

¹⁶ Balet nagmaliw a mapaatagey si Ari Uzias nen pinmalaloy pakayari to; sikato yay makasengeg na inkaderal to. Nileglemew to so Katawan a Dios to nen linmad Timplo a nampool na insinso ed tapew na altar a panagpoolay insinso.

¹⁷ Si Azarias a pari, a kaiba to ray walomplon papari a mabiskeg tan makpel so linawa ra, et tinombuk day ari

¹⁸ ta banoen da. Inkuandad sikato, Uzias! Anggapoy kanepegan mon mamool na insinso ed Katawan. Saray papari labat a say sengeg da et si Aaron so nisaklang a manggawad saya. Taynan mo yan masanton pasen. Mankakasalanan kad Katawan a Dios, kanyan ag to panliketan itay gagawaen mo.

¹⁹ Si Uzias manalalagey diman ed Timplo diad abay na altar a panagpoolay insinso, tan sankabembenan toy pananginay insinso. Akapasnuk ed saramay papari, et tampol ya akating so muling to.

²⁰ Ataktakot si Azarias tan saramay arum a papari diad impakanengneng dad muling na ari. Insan da pinasoot a taynan to so Timplo. Nangganat a pinmaway, lapud dinusa na Katawan.

²¹ Nanlapud saman ag la inmabig imay kating nen Uzias ya anggad ag to impatey. Lapud sikatoy aliwan malinis onung ed ganggan, ag lan balut akaloob ed Timplo, no ag ta nanayam la ed nibiig ya abung. Nakal ed sikatoy amin a kimey na ari tan si Jotam a lakin anak to so nanoley ed bansa.

²² Inkorit nen propita Isaias a lakin anak nen Amoz iray arum a ginagawa nen Ari Uzias legan na impanoley to.

²³ Inatey si Uzias tan nipompon ed alog a panangipomponan ed saray arari; ag nipompon ed saray pantion na arari lapud samay sakit to. Si Jotam a lakin anak to so sinmalat ed sikaton nanari.

27

¹ "Nagmaliw ya ari si Jotam nen mantaon na duamplo tan lima, tan nanoley ed Jerusalem na labinanem taon. Si Jerusa ya anak nen Zadoc so ina to.

² "Ginagawa to ray makapaliket ed Katawan, a singa ginagawa nen ama to; balet ag to inalig si ama to, ta ag nankasalanan diad panamegley na panagpool na insinso ed Timplo. Balet siansia so pankakasalanan da ray totoo.

³ "Si Jotam so nanggawa na Puirtad Baybay diad Timplo tan dakel so ginawa ton kimey ed padir na siudad na Jerusalem diad pasen a tatawagey Ofel.

⁴ "Diad kapalandeyan na Juda angipaalagey na saray siudad, tan diad katakelan angipaalagey na saray tirinsira tan saray tori.

⁵ "Binakal toy ari na Ammon tan saray sondalo to, tinalo to ra, tan pinasoot to ran mambayar na onggendan a buis a tinaon diad loob na taloy taon: apatiran toniladan pilak, sanlasus libon sakon a trigo, tan sanlasus libon sakon sibada.

⁶ "Nagmaliw a lalon makapanyari si Jotam, lapud matoor ton inonur so Katawan a Dios to.

⁷ "Saray arum ya agawaan nen Jotam legan na impanoley to et nikorit ira ed Say Awaran da ray Ararid Israel tan Juda.

⁸ "Duamplo tan limay taon nen Jotam nen nagmaliw ya ari, tan nanoley ed Jerusalem na labinanem taon.

⁹ "Inatey tan nipompon ed Siudad nen David tan si Acaz a lakin anak to so sinmalat ed sikaton nanari.

28

¹ "Nagmaliw ya ari si Acaz nen mantaon na duamplo, tan nanoley ed Jerusalem na labinanem taon. Ag to inalig iray maung a ginagawa nen laki ton Ari David; ginagawa to ingen so aliwan makapaliket ed Katawan,

² "ta inalig to ray ginagawa na saray ararid Israel. Nampagawa na saray mital a talintao nen Baal;

³ "nampopool na insinso ed Patar na Hinom; tan insaklang ton bagat a popoolan ed saray talintaoy diriyos so anggan saray dilin anak ton lalaki, ta inalig toy makapaingungot a kaogaliyan na saray totoon pinataynan na Katawan legan a mankukurang iray Israelita.

⁴ "Nambabagat tan nampopool na insinso si Acaz diad saray paganon pasen a panangigalangan, diad saray pokdul, tan diad silong na balang masalumpapak a kiew.

⁵ "Lapud nankasalanan si Ari Acaz, impatalo na Katawan a Dios to ed ari na Siria; amayamay a totoo na Juda so adakep na sayan ari tan insempet to ra ed Damasco. Si Acaz impatalo met na Katawan ed ari na Israel a si Peca a lakin anak nen Remalias; sanlasus tan duamplon libon sondalo na Juda so apatey na sayan ari ed loob na sakey agew. Say Katawan a Dios na saray lalaki ra et inyabuloy ton nagawa ya ed saray Judio, lapud inkaindan da.

⁶

⁷ "Si Zicri a sondalon Israelita pinatey to ra di Maasias a lakin anak nen Acaz, Azricam a makaoley ya inkargadod palasio, tan Elcana ya opisyal ya onkumadwad ari.

⁸ "Anggaman a kadalaan da ray totoo na Juda saray totoo na Israel dinakep da so duanlasus libo a bibii tan ogogaw tan insempet da ra ed Samaria, a pati amayamay a bengatlan asamsam da.

⁹ "Manaayam ed Samaria so sakey a lakin manngaran na Obed, sakey a propita na Katawan. Inabet to ra may ompapawil a sondalon Israelita ya onloloob la rad siudad tan kuanto, Akapasnuk ed Juda so Katawan a Dios na saray lalaki yo kanyan impadakep to rad sikayo. Balet nadngelan to a lapud mapalalon petang na olo yo pinapatey yo ra

¹⁰ tan natan getma yon aripenen iray lalaki tan saray bibiin taga Jerusalem tan Juda. Ag yo ta amta a nankasalanan kayo met ed Katawan a Dios yo?

¹¹ Dengel yo ak! Agagi yo ra yay adakep yo. Papawil yo la ra, ta no andi dusaen kayo na Katawan diad pasnuk to.

¹² Apatiran pangulon lalaki a taga ra Nanarian ed Baybay so sinmumlang met ed gagawaen na saray sondalo; sarayan apatiran lalaki et di Azarias a lakin anak nen Johanan, Berekias a lakin anak nen Mesillemot, Ezekias a lakin anak nen Sallum, tan Amasa a lakin anak nen Hadlai.

¹³ Inkuanda, Ag yo dia aawiten ira tan a priso! Mapalalo lay impankasalanan tayod Katawan kanyan dusaen to itayo la lapud sikatoy impanpasnuk tayo. Balet natan labay yo nin aruman so kasalanan tayo.

¹⁴ Kanyan saramay sondalo impalima rad saray totoo tan saray pangulo ra ira may priso tan saray amin a sinasamsam da.

¹⁵ Atoro ira may apatiran pangulo a mangala na saray kawes ed saramay bengatlan asamsam, insan da iter ed saramay priso. Initdan da ra may priso na isolung dan kawes tan sandalya; initdan da met ira na dugan kanen tan inomen da, tan tinatambal da na larak na oliba iray sugasugat da. Inlologan dad asno iray ag makaakar lapud kapoy da, insan saray amin a priso et inyaakar da rad Jerico, say siudad na saray kiew a palmira tan sakop na Juda. Insan pinmawil lad Samaria ira may Israelita.

¹⁶ Dinogpaan lamet na saray Edomita so Juda tan adakep da ray amayamay a totoo, kanyan kinmerew na tulong si Ari Acaz ed impirador na Asiria.

¹⁷

¹⁸ Legan to ya, dodogpaan met na saray Filisteo iray baley ed saray alusadsar diad sagur tan diad abalaten na Juda. Adakep da ray siudad na Bet-semes, Ayalon, Gederot, Soco, Timna, tan Gimzo a pati saray bario ra, tan nanayaman da ra yan pasen.

¹⁹ Inter na Katawan ira yan segsegang ed Juda lapud pinaolyan nen Ari Acaz so pankaabigan na saray totoo to, tan sinumlang toy linawa na Katawan.

²⁰ Si Impirador Tiglat-pileser na Asiria et ag to tulongan si Ari Acaz; sinumlang to tan pinairap to ingen.

²¹ Kanyan inala nen Acaz iray kayamanan a walad Timplo, palasio, tan saray kaabungan da ray pangulo na totoo, insan to ra inter ed impirador na Asiria. Balet siansian ag to tinulongan.

²² Nen mapalalo lay segsegang nen Acaz, inaruman to niy ginawa ton kasalanan ed Katawan.

²³ Nambabagat ed diriyos na saray Siriano ya analod sikato. Inkuanto, Saray diriyos da ray Siriano et tinulongan da ray ararid Siria, kanyan no mangibagat ak ed sikara nayarin, tulongan da ak met. Lapud saya sinmabiy deral ed sikato tan say bansa to.

²⁴ Likud ed saya, inaala ton amin iray kagawaan na Timplo, insan to ra minemekmek. Kinaputan toy Timplo insan nanggagawa na saray altar ed amin a pasen na Jerusalem.

²⁵ Diad balang siudad tan baley na Juda, angipaalagey na saray paganon pasen a panangigalangan, a pampoolan da na insinso ed saray diriyos na arum a bansa. Lapud saya sikato lamlamang so nanlapwan na impanpasnuk ed sikato na Katawan a Dios na saray lalaki to.

²⁶ Nikorit ed Say Awaran da ray Arari na Juda tan Israel iray arum ya agawgawa legay impanoley to manlapud gapo ya anggad samput.

²⁷ Inatey si Acaz tan nipompon ed Jerusalem, balet aliwan diad pantion da ray arari. Si Ezekias a lakin anak to so sinmalat ed sikaton nanari.

29

¹ "Duamplo tan lima nen Ezekias nen nagmaliw ya ari na Juda, tan nanoley ed Jerusalem na duamplo tan siam taon. Si Abia ya anak nen Zacarias so ina to.

² "Ginagawa toy makapaliket ed Katawan, ta inalig to ray ginagawa nen laki ton Ari David.

³ "Diad ononan bulan na taon ya inggapo nen Ezekias a nanari, nilokasan to ray puirta na Timplo tan impaapiger to ra.

⁴ "Tinipon tod bokig na patio na Timplo iray papari tan saray Levita,

⁵ "tan diman to ra akitongtongan. Inkuanto, Sikayo ran Levita, linisan yo onung ed ganggan so sikayon dili tan say Timplo na Katawan a Dios na saray lalaki yo. Ekal yo ray amin a makarotak ed Timplo.

⁶ "Aliwan matoor ed Katawan a Dios tayo iray lalaki tayo, ta ginagawa ray aliwan makapaliket ed sikato. Inkaindan da tan imbeneg day pasen a panaayaman to.

⁷ "Insasara da ray puirta na Timplo, ineerep da ray lamparaan, tan ag la ra nampopool na insinso o nansasaklang na saray bagat ed Timplo na Dios na Israel.

⁸ "Lapud saya akapasnuk so Katawan ed Juda tan Jerusalem, et nikelawan tan ataktakot so balang sakey lapud ginawa tod sikara. Malinlinew so pakaamta yod sayan inkagawa.

⁹ "Inaatey ed bakal iray lalaki tayo, adakep iray kaasawaan tan saray anak tayo tan niakar irad arum a bansa.

¹⁰ Ginetmak la natan a misipanan itayo ed Katawan, say Dios na Israel, pian ontonda lay pasnuk tod sikatayo.

¹¹ Anak ko, ag kayo la manaabala. Sikayo ray pinili na Katawan a mampool na insinso ed sikato tan sikayo ray mangipangulo na saray totoo ed pangigalang ed sikato.

¹² Wadman iray onggendan a Levita: Diad boleg nen Coat, di Mahat a lakin anak nen Amasai tan Joel a lakin anak nen Azarias Diad boleg nen Merari, di Cis a lakin anak nen Abdi tan Azarias a lakin anak nen Jehaleleel Diad boleg nen Gerson, di Joah a lakin anak nen Zima tan Eden a lakin anak nen Joah Diad boleg nen Elizafan, di Simri tan Jeiel Diad boleg nen Asaf, di Zacarias tan Matanias Diad boleg nen Heman, di Jehiel tan Simei Diad boleg nen Jedutun, di Semaya tan Uziel.

¹³

¹⁴

¹⁵ Tinipon da ray kapara ran Levita, tan nilinisan day sikaran dili onung ed ganggan. Insan onung na ingganggan na ari ginapwan dan nilinisan so Timplo onung ed Ganggan na Katawan.

¹⁶ Linmoob ed Timplo iray papari ta nilinisan da, insan da impaway ed patio na Timplo iray amin a bengatlan marotak onung ed ganggan. Manlapud man saray amin a bengatlan marotak et inyakar na saray Levita diad Patar na Cedron, diad paway na siudad.

¹⁷ Diad ononan agew na ononan bulan inggapo ray kimey tan diad kumawalon agew asumpal day impanlinis da, pati say kuarton lolooban ed Timplo. Insan ira lamet nankimey ed ontombuk a waloy agew ya anggad kumalabinanem ya agew na saman a bulan, diad impangiparaan dad Timplo a pangigalangan.

¹⁸ Linma ra may Levita ed kinen Ari Ezekias tan impaamta ray onggendan: Asumpal mi la so impanlinis ed intiron Timplo onung ed ganggan, pati say altar a pangisaklangan na bagat a popoolan, say lamisaan a para masanton tinapay, tan amin a kagawaan da.

¹⁹ Impawil mi met iray amin a kagawaan ya inekal nen Ari Acaz legan na saray taon ya ag to tinoor so Dios. Pinasimbalo mi ran insaklang tan wadman ira natan ed arap na altar na Katawan.

²⁰ Ag nanabalay Ari Ezekias ed impanipon tod saray manonan totoo ed siudad, insan ira nambabansag a linmad Timplo.

²¹ Angala ray pitoran bakan kalakyan, pitoran karniro, pitoran kordiro, tan pitoran kanding ta isaklang da ra a pangekal na saray kasalanan na pamilyay ari tan saray totood Juda, tan panlinis na Timplo onung ed ganggan. Imbaga na ari ed saray papari, a kabyangan ira na boleg nen Aaron, ya isaklang dan bagat ed altar ira may ayayep.

²² Pinatey ya onona na saramay papari ira may bakan kalakyan, insan saramay karniro, insan saramay kordiro, tan inwawalsik dad altar so dala na balang ayep ya imbagat.

²³ Diad kaonuran inyakar da ra may kanding ed ari tan saray arum a mangigagalang, insan impaitapew dad saramay kanding so kalimaan da.

²⁴ Kayari to ya pinatey na saray papari ira may kanding, insan da impaturo ed altar so dala ra a sakey a bagat a pangekal na kasalanan na amin a totoo. Ginawa da ya, ta ingganggan na ari ya isaklangan ya amin iray Israelita na saray bagat a popoolan tan saray bagat a para kasalanan.

²⁵ Tinombuk na ari iray bilin ya inter na Katawan ed kinen Ari David diad panamegley nen Gad a propita na ari tan diad panamegley nen propita Natan; angipasen na saray Levita ed Timplo a wala ray arpa tan piangpiang da,

²⁶ a singa saray kagawaan na musika ya inkakana ra nen Ari David. Nanalagey met irad may papari a wala ray trumpita ra.

²⁷ Ingganggan nen Ezekias ya isaklang la so bagat a popoolan; et nen nigapo lay pambabagat, nankanta ray totoo a pangidayew dad Katawan, tan pinaknul na saray tumutogtog iray trumpita ra tan saray arum a kagawaan na musika.

²⁸ Akibiang so balang sakey ed impangigalang ed Katawan tan nituloy so pankakanta tan pantotogtog ya anggad apoolan ya amin ira may imbagat.

²⁹ Insan say ari tan amin da ray totoo nantalimukor ira tan inggalang day Dios.

³⁰ Si Ari Ezekias tan saray pangulo na bansa et imbaga rad saramay Levita a kantaen dad Katawan iray kanta a pangidayew ya insulat ira nen David tan si Asaf a propita. Kanyan kinanta ran malikeliket legan dan mantatalimukor tan mangigagalang ed Dios.

³¹ Inkuanen Ezekias ed saray totoo, Natan ta malinis kayo la onung ed ganggan, mangawit kayo na saray bagat a para pisasalamat ed abung na Katawan. Tinmoluk ira may totoo, tan angaawit a mabolbolus so arum ed sikara na saray ayayep a para bagat a popoolan.

³² Angawit ira na pitomplon bakan kalakyan, sanlasus a karniro tan duan lasus a kordiro ya isaklang a bagat a popoolan para Katawan;

³³ angaawit met ira na anem a lasus a bakan kalakyan tan talon libon karniro ya ibagat tan kanen na saray totoo.

³⁴ Bangta daiset iray papari tan ag da nayarian a pateyen ya amin ira may ayayep, tinulongan ira na saray Levita ya anggad impakapansumpal na kimey tan impakapanlinis da ray arum a papari onung ed ganggan. (Mapeleng ni ray Levita a manlinis na sikaran dili onung ed ganggan nen saray papari.)

³⁵ Likud ed impangisaklang na saray bagat a popoolan, saramay papari et makaoley ira ed impanpool ed taba da ra may nisaklang a bagat a sinira na saray totoo, tan makaoley met ira ed impangipatoro na alak a nisaklang a kaiba da ray bagat a popoolan. Diad saya, ginmapo sirin so panangigalang ed Timplo.

³⁶ Makaliliket si Ari Ezekias tan saray totoo, lapud tinulongan ira na Dios ed maganon impanumpal dad saray amin.

30

¹ "Ag asilibraan na saray totoo so Paskua diad manepeg a panaon, diad ononan bulan, lapud kulang so bilang da ray paparin malinis onung ed ganggan tan aliwan dakerakel so totoon dinmagop ed Jerusalem. Kanyan si Ari Ezekias, saray opisyal to, tan saray totood Jerusalem nampapakna ran silibraan da no kumadwan bulan. Impaibaga ya sirin na ari ed amin da ray totood Israel tan Juda. Nidoma-domay sulat ya impawit tod saray tribu di Efraim tan Manases, diad impangimbita tod sikaran ondagop irad Timplo ed Jerusalem ta silibraan day Paskua a pamagalang dad Katawan a Dios na Israel.

²

³

⁴ "Akaliket so ari tan saray totoo ed sayan plano ra

⁵ "kanyan inimbitaan da ray amin ya Israelita, manlapud Dan ed baybay ya anggad Beer-seba diad abalaten, ya onla ran amin ed Jerusalem ta silibraan day Paskua onung ed Ganggan, pian lalon dakel ira nen saray totoo ed inmoonan impansilibra ra.

⁶ "Lapud ganggan na ari tan saray opisyal to saray ibabaki linma rad intiron Juda tan Israel a sankaawit da yan imbitasion: Totood Israel! Apaliisan yoy impanakep na saray taga Asiria ed dalin tayo. Natan pawil kayo ed Katawan, say Dios di Abraham, Isaac, tan Jacob, pian pawilen to kayo.

⁷ "Ag yo aaligen iray lalaki yo tan saray kapara yon Israelita ya aliwa ran matoor ed Katawan a Dios da. Onung na nanenengneng yo, dinusa to ran mapalalo.

⁸ "Ag yo papaaweten so puso yon singa sikara, no ag ingen toluk kayod Katawan. Dago kayod Timplo ed Jerusalem a pinasanton andi anggaan na Katawan a Dios yo. Igalang yo pian ag to kayo la pampasnukan.

⁹ "No ompawil kayo ed Katawan, saray kakanayon to et kasian ira na saray anakep ed sikara, tan papawilen da ra. Mapangasi tan maaro so Katawan a Dios yo, kanyan no ompawil kayod sikato, awaten to kayo.

¹⁰ Saramay ibabaki linma ra ed balang siudad na dalin na tribu di Efraim tan Manases, tan asabi ra so dalin na tribu nen Zabulon diad baybay, balet inelek-elekan ira na saray totoo tan niluludlurey da ra.

¹¹ Anggaman ontan wala ray pigaran kabyangan na saray tribu di Aser, Manases, tan Zabulon a maabuloy iran onlad Jerusalem.

¹² Tinenyeg met na Dios so kapusoan da ray totood Juda tan impankakasakey to rad pilalek dan mangonur na linawa to diad panumpal dad saray ganggan na ari tan saray opisyal to.

¹³ Amayamay a totoon dinmagop ed Jerusalem diad kumadwan bulan ta silibraan day Pista na Tinapay ya Anggapoy Libadura.

¹⁴ Inaala da ray amin ya altar ed Jerusalem ya angisasaklangan na saray bagat tan amopoolan na insinso, insan da ra imbantak ed Patar na Cedron.

¹⁵ Diad kumalabinapat ya agew na bulan pinatey da ray kordiro a para bagat ed Paskua. Nababaingan iray papari tan saray Levita ya aliwan malinis onung ed ganggan kanyan insaklang day sikaran dilin. Nayarian da la natan sirin so mangisaklang na bagat a popoolan ed Timplo.

¹⁶ Linma rad pasen da ed Timplo onung na totontonen a walad Ganggan nen Moises a too a Dios. Inter na saray Levita ed saray papari so dala da ray imbagat, insan inwawalsik dad altar.

¹⁷ Lapud amayamay iray totoon aliwan malinis onung ed ganggan, ag da nayarin pateyen iray kordiron para Paskua, kanyan impateyan la ra na saray Levita, tan insaklang dad Katawan ira may kordiro.

¹⁸ Amayamay met ed saray totoon nanlapud tribu di Efraim, Manases, Isacar, tan Zabulon so ag nanlinis na sikaran dili onung ed ganggan, kanyan aliwan manepeg so pansisilibra rad Paskua. Kanyan impikasi ra nen Ezekias:

¹⁹ O Katawan a Dios na saray lalaki mi, lapud kaabigan mo pirdonam pa ra yan masimoon a mangigagalang ed sika, anggaman ya aliwa ran malinis onung ed ganggan.

²⁰ Inebatan na Katawan imay pikakasi nen Ezekias; pinirdona to ray totoo tan ag to ra pinasakitan.

²¹ Pitoy agew a magayaga sinilibraan na saray totoon nantitipon ed Jerusalem so Pista na Tinapay ya Anggapoy Libadura, tan saray Levita tan saray papari et inagew-agew dan indadayew so Katawan diad anggaay nayarian da.

²² Intanduro nen Ezekias ira may Levita lapud kamaungan dan angipangulo ed impangigalang ed Katawan. Kayariy pitoy agew na impangisasaklang day bagat a para kareenan tan say impangiiter day pisasalamat ed Katawan a Dios na saray lalaki ra,

²³ nampapakna ran amin a silibraan da ni na pitoy agew. Kanyan malikeliket ni ra lamet a nansilibra.

²⁴ Angiter si Ari Ezekias na sanlibon bakan kalakyan tan piton libon karniro ed saray totoo ta pateyen tan kanen da; angiter met ed sikara iray opisyal na sanlibon bakan kalakyan tan samplon libon karniro. Amayamay iray paparin nanlinis na sikaran dili onung ed ganggan.

²⁵ Kanyan malikeliket so balang sakeysaray totood Juda, saray papari, saray Levita, saray totoon nanlapud baybay, tan saray sangkailin manaayam lad Israel tan Juda.

²⁶ Awalaan na baleg a liket so Jerusalem, lapud anggapoy singa onyan agawa nanlapud samay panaon nen Ari Solomon a lakin anak nen David.

²⁷ Kinerew na saray papari tan saray Levita a bindisionan komun na Katawan iray totoo. Nadngel na Dios a manaayam ed tawen so pikakasi ra et inawat to ra.

31

¹ "Kayari na pista, amin da ray totood Israel linma rad balang siudad na Juda tan minemekmek da ray baton lusek, binabatang da ray tanda na diosan Asera, tan dinederal da ray altar tan saray paganon pasen a panangigalangan. Onya met so ginagawa ra ed arum a pasen na Juda tan diad saray dalin na Benjamin, Efraim, tan Manases, insan la ra sinmempet.

² "Pinasimbalo nen Ari Ezekias so togyup da ray papari tan saray Levita. Diad sayan togyup da niiter ed balang sakey so kanepegan ton kimeyan. Saraya so kimey da: say pangisaklang na bagat a popoolan tan say bagat a para kareenan, say pibiang ed panangigalang ed Dios diad Timplo, tan say pangiter na dayew tan pisasalamat diad nandoroman pasen na Timplo.

³ "Naniiter so ari na dilin ayayep to ya isaklang a bagat a popoolan kapag kabwasan tan labi, tan saray ibagat no Agew na Panagpainawa, Pistay Balon Bulan, tan arum ni ran pista onung na nisulat ed Ganggan na Katawan.

⁴ "Ingganggan ni na ari a mangyakar iray totood Jerusalem na saray bagat a nepeg ya iter ed saray papari tan saray Levita, pian niiter day arum a panaon da ed panumpal day Ganggan na Katawan.

⁵ "Kapangipaakseb ed ganggan na ari, angyaakar iray totood Israel na saray rigalo ran sankaabigan a trigo, alak, larak na oliba, dilo, tan arum ni ran bungay dalin. Inyaakar da met iray kakaplo na antokaman a kayaryan da.

⁶ "Inyaakar na amin da ray totoon manaayam ed saray siudad na Juda so kakaplo na saray baka tan saray karniro ra. Inyaakar da met iray amayamay a rigalo ran isaklang dad Katawan a Dios da.

⁷ "Diad kumatlon bulan so inggapo na isabi na saray rigalo tan nansiansian apat bulan.

⁸ "Nen anengneng nen Ari Ezekias tan saray opisyal to so karakel na niiter, inggalang day Katawan tan intanduro da ray totoo ton Israelita.

⁹ "Akisalitay ari ed saray papari tan saray Levita nipaakar ed sarayan rigalo.

¹⁰ Si Azarias a Pangulon Pari tan kabyangay boleg nen Sadoc kuantod kinen Ezekias, Nanlapu lad samay panaon a saray totoo et inyaakar dad Timplo iray rigalo ra, duga so kakanen; dakerakel ni ingen so soluk mi. Binindisionan na Katawan iray totoo to kanyan wala ra yan amin ed sikami.

¹¹ Onung ed ganggan na ari, angiparaan ira na saray kuarton panagsinupan ed solar na Timplo,

¹² insan da insinup iray amin a rigalo tan saray kakaplo pian anggapoy nabalang. Anoro ra na sakey a Levitan si Conanias a sikatoy makaoley ed saramay kuarto tan tinoro ran katulong to si agi ton laki a si Simei.

¹³ Samploran Levita iray atoron mankimey diad panangiwanwan da; di Jehiel, Azazias, Nahat, Asael, Jerimot, Josabad, Eliel, Ismakias, Mahat, tan Benaya. Saray anoro ed saraya et si Ari Ezekias tan si Azarias a Pangulon Pari.

¹⁴ Si Core a lakin anak nen Imna tan sakey a Levita a pangulo da ray guardia ed Puirtay Bokig na Timplo, so makaoley a manawat tan mangibunog na saray rigalon nisaklang ed Katawan.

¹⁵ Diad arum iran siudad a panaayaman na saray papari, matoor a tinmulong ed sikato ira yan Levita: Eden, Minyamin, Jesua, Semaya, Amarias, tan Secanias. Nambubunog ira na kakanen da ray kapara ran Levita onung ed saray kimey da,

¹⁶ aliwan onung ed nanlapwan dan boleg. Inyapag da so balang sakey a lakin mantaon na talomplo a mampaatagey a walay inagew-agew a kimey to ed Timplo onung na bebembenan ton betang.

¹⁷ Niiter ed saray papari iray kimey da onung na saray nanlapwan dan boleg, balet saray Levitan mantaon na duamplo a mampaatagey onung ed grupon kawalaan da.

¹⁸ Nipalista ran amin a pati saray kaasawaan da, saray anak da, tan saray arum a manaayam ed sikara, ta nakaukolan a sipaparaan ira lawas a manumpal na saray masanton kimey da.

¹⁹ Diad saray paparin manaayam ed saray siudad a nipabetang ed saray kabyangay boleg nen Aaron, odino diad saray panagpastolan a sakop na sarayan siudad, wala ray napampiaan a lalakin mangibunog na kakanen ed amin a lalakin kabyangay pamilya na pari tan diad balang sakey a walad listaan na saray boleg na Levita.

²⁰ Ginagawa nen Ari Ezekias ed intiron Juda so matunong tan say makapaliket ed Katawan a Dios to.

²¹ Maaligwas si Ezekias, lapud antokaman a ginagawa to nipaakar ed Timplo odino pangonur tod Ganggan, ginagawa to lapud masimoon ya inkatoor tan panangaro tod Dios to.

32

¹ "Kayari na sarayan agawgawa, say matoor ya impanlilingkur nen Ari Ezekias ed Katawan, nilooban nen Ari Senakerib na Asiria so Juda. Nilakob to ray siudad ya aliber na padir, tan inganggan tod saray sondalo to ya igeba da ray padir pian makaloob ira.

² "Nen anengneng nen Ezekias a dogpaan met nen Senakerib so Jerusalem,

³ "ginetma to tan saray opisyal to a patondaen day danum ed paway na siudad, pian anggapoy danum da ray taga Asiria no kaasingger dad Jerusalem. Impangulo na saray opisyal iray amayamay a totoon pinmaway ed siudad tan sinaraan da ray amin a sobul, pian anggapoy ompaway a danum.

⁴

⁵ "Pinabiskeg na ari so siudad diad impangapiger tod padir, impamaalagey tod saray tori ed tapew na padir, tan impamaalagey to na kumadwan padir ed bandad paway. Inapiger to met imay pasen a tinabonan diad nibokig na daan a parti na Jerusalem, tan nampapagawa na amayamay a pika tan samper.

⁶ "Impasen na ari iray amin a lalaki ed siudad diad silong na panangipangulo na saray opisyal na sondalo, insan to ra impantitipon ed plasa diad puirta na siudad. Inkuantod sikara,

⁷ "Mampabiskeg kayo tan ag yo patatalawey linawa yo; ag yo tatakotan so impirador na Asiria odino saray sondalon ipapangulo to. Mabiskeg niy pakayarin walad sikatayo nen say pakayarin walad sikato.

⁸ "Walad sikatoy pakayari na too, balet walad sikatayoy Katawan a Dios tayo ya ontulong ed sikatayo tan milaban ed saray pibakalan tayo. Apabiskeg so linawa da ray totoo lapud sarayan balikas na ari ra.

⁹ "Ag abayag, nen wala nid Lakis si Senakerib tan saray sondalo to, angibaki na saray totoo to ed kinen Ezekias tan saray totood Juda a kaiba tod Jerusalem tan impaikuanto:

¹⁰ Siak, Senakerib, say Impirador na Asiria, tetepeten kod sikayo ran totoo no antoy panmamatalkan yod pansiasiansia yod Jerusalem, anta nalalakob la?

¹¹ Ibabagad sikayo nen Ezekias a say Katawan a Dios yo so mangyagel ed sikayo ed pakayari mi, balet titilaan to kayo; paolyan to kayon ompatey ed eras tan inkapgaan.

¹² Sikatoy nandederal ed saray pasen a panangigalangan tan saray altar, insan to imbagad saray totood Juda tan Jerusalem a mangigalang tan mampool ira na insinso ed saksakey ya altar labat.

¹³ Ag yo ta amta so ginagawa na saray lalakik tan siak ed saray totoo na arum a bansa? Ayarian ta na saray diriyos na arum a bansa ya inyagel ed impirador na Asiria so totoo ra?

¹⁴ Ayarian ta na saray diriyos na arum a bansa ya inyagel ed sikami so bansa ra? Anto sirin so ipapangaya yon niagel kayo na dios yo?

¹⁵ Ag kayo la sirin patitilaan odino papaibalang ed kinen Ezekias. Ag yo sisigsiaen! Anggapoy dios na anggan anton bansa ya akayarin angyagel ed saray totoo to ed pakayari na siopaman ya impirador na Asiria. Kanyan andi-duaruwan ag kayo niagel na satay dios yo!

¹⁶ Saray opisyal na saray taga Asiria et mapalalo niy imbabaga ran pamaoges ed Katawan a Dios tan si Ezekias ya aripen na Katawan.

¹⁷ Diad samay sulat nen impirador na Asiria nileglemew ton mapalalo so Katawan a Dios na Israel. Inkuantod samay sulat, Saray diriyos na saray bansa et ag da ayarian ya inyagel iray totoo ra ed pakayarik. Ontan met say dios nen Ezekias et ag to niagel ed pakayarik iray totoo to.

¹⁸ Ineyag na saramay opisyal yan balikas diad salitay Hebreo, pian nataktakot tan napabetel so linawa da ray totood Jerusalem a wala rad tapew na padir na siudad, et diad ontan mainomay a nadakep so siudad.

¹⁹ Diad panagsalita ra impara ray Dios na Jerusalem ed saray diriyos na arum a totoo, saray talintaoy diriyos a ginagawa na limay too.

²⁰ Insan si Ari Ezekias tan si propita Isaias a lakin anak nen Amoz nampikasi rad Dios tan kinmerew iray tulong to.

²¹ Say Katawan angibaki na sakey ya anghil ya amatey ed saray masesebeg a sondalo tan saray opisyal na saray sondalo na Asiria. Naplag ed kababaingan a pinmawil ed Asiria so impirador. Aminsan ya agew nen sikatoy walad timplo na dios to, pinatey na pigaran anak ton lalaki diad panamegley na ispada.

²² Onya so impangyagel na Katawan ed kinen Ari Ezekias tan saray totood Jerusalem ed pakayari nen Senakerib ya impirador na Asiria, tan dia met ed pakayari na arum a kalaban da. Impanari na Katawan so kareenan ed amin a pasen.

²³ Amayamay iray totoon linmad Jerusalem a sankaawit da ray bagat dad Katawan tan saray rigalo rad kinen Ezekias; kanyan nanlapud saman ya agawa, igagalang na amin a totood arum a bansa si Ezekias.

²⁴ Diad sayan panaon, nansakit si Ezekias tan ngalngali inatey. Nampikasid Katawan, et say Katawan initdan to na sakey a tanda ya onabig.

²⁵ Balet ontan lay impanpaatagey nen Ezekias ta ag to anggan impanengneng so pisasalamat tod Katawan ya amaabig ed sikato. Lapud saya nanliknay kairapan iray totood Juda tan Jerusalem.

²⁶ Diad kaonuran balet, nampaabeba si Ezekias tan saray totood Jerusalem, kanyan ag dinusa na Katawan iray totoo legan na impanbilay nen Ezekias.

²⁷ Nagmaliw a mayamyaman si Ezekias, tan igagalang na balang sakey a too. Nanggawa na saray kuarton panagsinupan na saray balituk, pilak, mabmabli ran bato, rikado, samper tan saray arum ni ran mabmablin kayaryan to.

²⁸ Angipaalagey met na saray panagsinupan na trigo, alak, tan larak na oliba; angipaalagey met na saray koral da ray baka tan saray karniro to.

²⁹ Likud nid saraya, say Dios initdan to na saray karniro tan saray baka tan ontan lan karakel na arum nin kayamanan, kanyan angipaalagey na amayamay a siudad.

³⁰ Si Ari Ezekias so anara na papawayan na Sobul na Gihon, insan to impaarap ya onagos ya anggad sakey a pasen ed dalem na saray padir na Jerusalem. Inmaligwas si Ezekias ed amin da ray ginagawa to.

³¹ Kanyan anggan nen sinmabi ray taga Babilonia a nibakin manosisad nidoma-doman agawa ed bansa to, inabuloyan na Dios si Ezekias a gawaen toy labay ton dili pian nasubok so petepeteg ya inkatoo to.

³² Saray arum a ginagawa nen Ari Ezekias tan say panangaro tod Katawan, et nikorit ira ed Say Pasingayew ed kinen Propita Isaias a Lakin Anak nen Amoz tan diad Say Awaran da ray Ararid Juda tan Israel.

³³ Inatey si Ezekias tan nipompon ed niatagey a parti na kamposanto da ray arari. Pinagalangan na amin da ray totood Juda tan Jerusalem si Ezekias diad impatey to. Si Manases a lakin anak to so sinmalat ed sikaton nanari.

33

¹ "Labinduay taon nen Manases nen nagmaliw ya ari na Juda, tan nanoley ed Jerusalem na limamplo tan limay taon.

² "Nanggagawa na kaogsan ed arap na Katawan, diad impangaalig tod saray makapaingungot ya ogali da ray totoon pinapataynan na Katawan legan a mankukurang iray totoo to.

³ "Pinapasimbalo ton impaalagey iray paganon pasen a panangigalangan a dinederal nen Ezekias ya ama to. Nanggagawa na saray altar a panangigalangan ed Baal, saray talintao na diosan Asera, tan inggagalang to ray bitewen.

⁴ "Nanggawad Timplo na saray altar a panangigalang na saray pagano, anta say Timplo so pasen ya imbaga na Katawan a pangigalangan ed sikato.

⁵ "Diad duaran patio na Timplo nanggawa na saray altar a pangigalangan ed saray bitewen.

⁶ "Insaklang ton bagat a popoolan ed Patar na Hinom iray lalakin anak to. Nambubuyon tan nansasalamangka; nampapanon ed saray managpalar tan saray manangipanon ed saray ispiritu na inaatey. Mapalaloy impankasalanan tod Katawan, kanyan impanpasnuk to.

⁷ "Angyan na sakey a talintao ed Timplo. Onyay inkuan na Katawan ed kinen David tan si Solomon a lakin anak to nipaakar ed sayan Timplo: Diad Jerusalem, diad ed sayan Timplo, so pasen a pinilik ed amin da ray lugar na labinduan tribu na Israel a pangigalangan ed siak.

⁸ "No onuren na saray totood Israel ya amin iray bilin ko, tan sumpalen day intiron Ganggan ya inter ed sikara nen Moises ya aripen ko, ag ko ra abuloyan a napataynan ed dalin ya inter kod saray lalaki ra.

⁹ "Inlagyat nen Manases iray totood Juda a mankasalanan na ambelat ni nen saray kasalanan a ginagawa da ray totoon pinapataynan na Katawan legan a mankukurang iray totoo to.

¹⁰ Anggaman a pinasakbayan na Katawan si Manases tan saray totoo to, siansian ag da dinengel.

¹¹ Kanyan inabuloyan na Katawan a looban na saray pangulo da ray sondalo na Asiria so Juda. Adakep day Manases, kinawetan da, binalur da na gansan golunggolung, insan da inawit ed Babilonia.

¹² Nampaabeba nen maniirap, inmasingger ed Katawan a Dios to, insan kinmerew na tulong.

¹³ Dinengel na Dios so pikakasi nen Manases tan inebatan to diad panamegley na impangyabuloy ton makapawil ed Jerusalem tan manoley lamet. Diad saya anisiay Manases a say Katawan et Dios.

¹⁴ Kayari to ya, pinaatagey nen Manases so padir a walad bandad paway diad nibokig na Siudad nen David manlapud sakey a pasen ed patar ya asingger ed Sobul na Gihon diad baybay na Puirtay Sira tan diad Ofel a sakop na siudad. Angipasen met na opisyal na saray sondalo ed balang siudad ya aliber na padir.

¹⁵ Ineekal tod Timplo iray diriyos na arum a bansa tan samay talintaon inyan tod man nen saman. Ineekal to met iray paganon altar a walad pokdul a panalalageyan na Timplo tan diad saray arum a pasen ed Jerusalem; inyakar tod paway na siudad ira yan ineekal to, insan to ra imbabantak.

¹⁶ Inapiger to met so altar ya angigagalangan ed Katawan, insan angisaklang diman na saray bagat a para kareenan tan saray bagat a pangiter na pisasalamat. Ingganggan to ray amin a totood Juda a panlingkuran day Katawan a Dios na Israel.

¹⁷ Anggaman ya intuloy na saray totoo so nambabagat ed saray arum a pasen a panangigalangan, say Katawan labat so angibagatan da.

¹⁸ Saray arum a ginagawa nen Manases, say pikakasi tod Dios to, tan saray sinalita na saray propitan nansalitad sikato diad ngaran na Katawan a Dios na Israel et nikorit iran amin ed Say Awaran da ray Ararid Israel.

¹⁹ Say pikakasi na ari tan say ebat na Dios ed sayan pikakasi, saray ginagawa ton kasalanan tan kaogsan kasakbayan a nagbabawisaray ginagawa ton pasen a panangigalangan na saray pagano tan saray tanda na diosan Asera, tan saray talintaoy diriyos ya inggagalang to et nikorit iran amin ed Say Awaran da ray Propita.

²⁰ Inatey si Manases tan nipompon ed palasio, insan si Amon a lakin anak to so sinmalat ed sikaton nanari.

²¹ Duamplo tan duay taon nen Amon nen nagmaliw ya ari na Juda, tan nanoley ed Jerusalem na duay taon.

²² Nanggagaway kaogsan ed arap na Katawan a singa si ama ton tan Manases, inggagalang to ray talintaoy diriyos ya inggalang nen ama to.

²³ Balet ag to inalig si ama ton nampaabeba tan inmasingger ed Katawan; mapalalo niy ginagawa ton kaogsan nen si ama to.

²⁴ Nankokomplut iray opisyal nen Amon sumpad sikato, insan da pinatey ed palasio.

²⁵ Pinatey na saray totood Juda ira may amatey ed kinen Amon tan ginawa ran ari si Josias a lakin anak to.

34

¹ "Waloy taon nen Josias nen nagmaliw ya ari ed Juda, tan nanoley ed Jerusalem na talomplo tan sakey taon.

² "Ginagawa toy makapaliket ed Katawan; inalig to ray ginagawa nen laki ton Ari David, ta mapeget ton inonur ya amin iray ganggan na Dios.

³ "Nen kumawalon taon na panooley nen Ari Josias, nen ogaogaw ni, ginapwan to lan inggalang so Dios na laki ton Ari David. Kayariy apat taon ginapwan ton dinederal iray pasen a panangigalangan na saray pagano, saray tanda na diosan Asera, tan saray arum nin talintaoy diriyos.

⁴ "Diad panangiwanwan to dinederal na saray totoo to iray altar a panangigalangan ed kinen Baal, inggegeba da ray kaabay dan altar a panagpoolan na insinso. Minemekmek da ya anggad dinmabuk iray talintao nen Asera tan saray arum a talintaoy diriyos, insan intatayak day dabuk ed saray lobuk da ray totoon nambabagat ed sarayan diriyos.

⁵ "Pinoolan to ray pokel da ray paganon papari diad tapew na saray altar ya angigalangan da. Diad impanggagawa tod sarayan amin impagmaliw ton malinis lamet onung ed ganggan so Juda tan say Jerusalem.

⁶ "Onya met so ginawa tod saray siudad tan saray aderal a lugar na Manases, Efraim, tan Simeon tan anggad Neftali diad baybay.

⁷ "Diad intiron Nanarian ed Baybay, dinederal to ray altar tan saray tanda na Asera, minemekmek to ya anggad dinmabuk iray talintaoy diriyos, tan tinetemek ton amin iray altar a panagpoolan na insinso. Insan pinmawil ed Jerusalem.

⁸ "Nen kumalabinwalon taon na panooley nen Ari Josias, kayari ton nilinisan onung ed ganggan so bansa tan say Timplo, imbaki ton manapiger na Timplo na Katawan a Dios to si Safan a lakin anak nen Azalia, si Maasias, say gobirnador na Jerusalem, tan si Joas a lakin anak nen Joakaz, sakey ya atagey ya opisyal.

⁹ "Nipalima ed kinen Hilcias a Pangulon Pari so kuarta ya akoliktad Timplo na saray Levitan guardia. (Sayan kolikta et iniiter na saray taga Efraim, Manases, tan saray arum nin pasen ed Nanarian ed Baybay tan saray taga Juda, Benjamin, tan Jerusalem.)

¹⁰ Insan nipalima yan kuarta ed saramay makaoley ed panaapiger na Timplo, insan da inter ed

¹¹ saray karpintiro tan saray managpaalagey, ta isaliw da na saray bato tan saray tablan ikana ed panaapiger ed saray paalagey a pinaolyan na saray ararid Juda a naboluk.

¹² Napanmatalkan a sigput iray nankimey. Saray angipangulod sikara et si Jahat tan si Obadias a kabyangan iray Levitan boleg nen Merari, tan si Zacarias tan si Mesullam a kabyangan iray Levitan boleg na Coat. (Marunong ed musika iray amin a Levita.)

¹³ Saray arum a Levita et sikaray angipangulo ed panagsakbat na saray ikakana tan sikaray kapatas ed saray totoon walad nandoroman kimey. Sikritario odino guardia na Timplo iray arum a Levita.

¹⁴ Nen ipapaway da ra may kuarta ed kuarton panagsinupan, nalmo nen Hilcias so libro na Ganggan na Katawan, samay Ganggan ya inter na Dios ed kinen Moises.

¹⁵ Inkuantod kinen Safan, Nalmok diad Timplo so libro na Ganggan. Inter tod Safan imay libro,

¹⁶ insan inyakar nen Safan ed ari. Inkuanto, Sinumpal mi ray amin ya ingganggan mo.

¹⁷ Inala mi ray kuartan nisinup ed Timplo insan mi ra inter ed saray kumikimey tan saray kapatas da.

¹⁸ Insan to inyarum ya inkuan, Niay libron inter ed siak nen Hilcias. Insan maksil ton imbasa imay libro ed ari.

¹⁹ Nen nadngel na ari so impangibasad libro, ginebyas toy kawes to lapud ermen to.

²⁰ Ingganggan to ra di Hilcias, Ahicam a lakin anak nen Safan, Abdon a lakin anak nen Mica, Safan a sikritario na korti, tan si Asaya a mananulong na ari:

²¹ Lakayo ta ipanonan yo ak ed Katawan tan amin iray totoon atilak nin manaayam ed Juda tan Israel. Amtaen yo so nipaakar ed saray bangat na sayan libro. Mamapasnuk so Katawan ed sikatayo, lapud ag inonur na saray lalaki tayo so salita na Katawan tan ag da ginawa so ibabaga na sayan libro.

²² Lapud ganggan na ari, si Hilcias tan saray arum et linma ran angipanon ed sakey a biin manngaran na Hulda, sakey a propita a manaayam ed balo nin kabyangan na Jerusalem. (Say asawa to yan bii a si Sallum ya anak nen Tocat tan apo nen Hasra et sikatoy makaoley ed saray kawes ya isosolung na saray papari no manlingkur irad Timplo.) Imbaga rad kinen Hulda iray agawa,

²³ insan to impaikuan ed ari

²⁴ ira yan salita na Katawan: Dusaen koy Jerusalem tan amin da ray totoo to onung ed saray samban nisulat ed samay libron nibasa ed ari.

²⁵ Impolisay da ak tan nambabagat irad saray arum a diriyos, kanyan impanpasnuk da ak lapud amin a ginagawa ra. Pinmetang so olok ed Jerusalem, et ag ombetel.

²⁶ No nipaakar ed ari, siak, say Katawan a Dios na Israel, kuanko: Dinengel moy nisulat ed samay libro,

²⁷ nampatauli ka tan nampaabeba kad siak; ginebyas moy kawes mo tan manakakis ka nen nadngelan mo no panoy panusak ed Jerusalem tan saray totoon manaayam diman. Nadngel koy pikakasim,

²⁸ kanyan no inatey ka la so panusak ed Jerusalem. Iyabuloy kon mareen so ipatey mo. Pinmawil ed kinen Ari Josias ira may totoo tan imbaga ra yan salita.

²⁹ Impaawit nen Josias iray amin a pangulo na Juda tan Jerusalem,

³⁰ insan ira nambabansag a linmad Timplo, a kaolup da ray papari tan saray propita, tan amin da ray arum a totoon manaayam ed Jerusalem, mayaman may mairap-bilay. Imbasa na ari diad arap dan amin so intiron libro na sipanan ya arumog ed Timplo.

³¹ Nanalagey si Josias ed abay na lusek a para ari, insan akisipanan ed Katawan ya onuren toy Katawan, sumpalen to diad intiron puso tan kamarerwa to iray ganggan tan bilin to, tan gawaen to iray kakaukolan na sipanan onung na nisulat ed samay libro.

³² Impaisipan tod saray totood Benjamin tan amin da ray wadwad Jerusalem a sumpalen da so sipanan. Kanyan sinumpal na saray totood Jerusalem so nepeg dan gawaen lapud impisipanan dad Dios na saray lalaki ra.

³³ Dinederal nen Ari Josias iray amin a makapaingungot a talintaon walad dalin a kayaryan na saray totood Israel. Legan na impanbilay to, pinatoluk to ray totoo a manlingkur ed Katawan a Dios na saray lalaki ra.

35

¹ "Sinilibraan nen Josias ed Jerusalem so Paskua ya impamagalang tod Katawan; nen kumalabinapat agew na ononan bulan pinatey da ray ayayep a para pista.

² "Inter tod saray papari iray nepeg dan gawaen ed Timplo tan binilin to ran apigeren dan gawaen iray kimey da.

³ "Binilin to met iray Levita a bumabangat na Israel a nisaklang iran manlingkur ed Katawan. Inkuantod sikara, Iyan yoy masanton Kaban na Sipanan ed Timplo ya impaalagey nen Ari Solomon a lakin anak nen David. Ag yo la natan saksakbaten ya iyalis-alis, no ag ta panlingkuran yoy Katawan a Dios yo tan saray totoo ton Israel.

⁴ "Laka yod Timplo tan manayam kayod pasen a niganad boleg a nanlapwan yo, onung ed saray kimey ya impapabetang ed sikayo nen Ari David tan si Ari Solomon a lakin anak to.

⁵ "Apiger yon togyupen so sikayon dili pian wala ray pigarad sikayon makatulong ed balang pamilya na saray totood Israel.

⁶ "Sikayo ray mamatey ed saray kordiro tan saray kanding a para Paskua. Linisan yo lay sikayon dili onung ed ganggan tan iparaan yo ray bagat, pian saray kapara yon Israelita et onuren da ray bilin ya inter na Katawan ed panamegley nen Moises.

⁷ "Angiter si Ari Josias na talomplon libon karniro, kordiro, tan malangwer a kanding tan talon libon bakan kalakyan ya ikana na saray totoo no Paskua; dilin ayayep to ra ya.

⁸ "Angiter met iray opisyal to na ikana na saray totoo, saray papari, tan saray Levita. Insan saray opisyal na Timplo a di Hilcias, Zacarias, tan Jehiel, initdan da ray papari na duanlibo tan anem a lasus a kordiro tan malangwer a kanding, tan talon lasus a bakan kalakyan ya ibagat no pista.

⁹ "Saray pangulo na saray Levita a di Conanias, Semaya tan say agi ton laki a si Natanael, Hasabias, Jeiel, tan Jozabad et angiter ira na liman libon kordiro tan malangwer a kanding, tan liman lasus a bakan kalakyan ya ibagat na saray Levita no Paskua.

¹⁰ Nen niparaan lan amiy nakaukolan ed Paskua, saray papari tan saray Levita linma rad pasen da onung na ingganggan na ari.

¹¹ Kayarin apatey ira may kordiro tan saramay kanding, kinatat ira na saray Levita, balet inwawalsik na saray papari ed tapew na altar so dala.

¹² Insan da inapag-apag ed saray totoo, onung na saray grupo na pamilya, ira may karni na ayayep a para bagat a popoolan, pian nibagat da onung na saray bilin a walad Ganggan nen Moises.

¹³ Inkakalut na saray Levita iray bagat a para Paskua, onung ed saray totontonen. Inlalambung dad saray banga, kaldiro, tan saray kawali iray masanton bagat, insan masiglat dan imbubunog so karni ed saray totoo.

¹⁴ Kayari to ya, saray Levita imparaanan da na karni so sikaran dili tan saray paparin kabyangay boleg nen Aaron, lapud saray papari et ag ira akatonda ya anggad labi iray papari a nampopool na saray bagat a popoolan tan say taba na saray imbagat.

¹⁵ Saray tumutogtog tan saray kumakanta a kabyangan ira na boleg nen Asaf et wala rad saray pasen ya impabetang ed sikara nen Ari David: Asaf, Heman, tan Jedutun a propita na ari. Ag kinaukolan na saray guardiad saray puirta na Timplo ya ontaynan irad saray pasen da, lapud saray Levita et imparaanan da la ra na Paskua.

¹⁶ Kanyan lapud ganggan nen Ari Josias, niparaan ed saman ya agew iray amin a nakaukolan ed pangigalang ed Katawan, pampistay Paskua, tan pangisaklang na saray bagat a popoolan ed tapew na altar.

¹⁷ Pitoy agew a sinilibraan na amin a totood Israel a wala rad Jerusalem so Paskua tan say Pista na Tinapay ya Anggapoy Libadura.

¹⁸ Nanlapu lad samay panaon nen propita Samuel, anggapo niy singa onyan impansilibra na Paskua. Anggapoy arum ya arin nansilibra na Paskua a singa sayan impansilibra di Ari Josias, saray papari, saray Levita tan saray totood Juda, Israel, tan Jerusalem,

¹⁹ nen kumalabinwalon taon na panooley nen Josias.

²⁰ Kayari na saray amin a ginagawa nen Ari Josias para Timplo, impangulo nen Ari Neco na Egipto iray sondalo to a mibakal ed Carkemis diad gilig na Ilog na Eufrates. Nilabanan nen Josias si Neco,

²¹ balet angibakiy Neco na saray totoo tan impaikuanto, Sayan pibabakal ko et anggapoy pibabalim, Ari na Juda. Ag ak dia linman mibakal ed sika, no ag ingen diad saray kalaban ko tan imbaga na Dios a mangganat ak. Kaibak so Dios, kanyan ag mo lalabanan, ta no ipasoot mo pateyen to ka.

²² Balet ag sinmener si Josias. Ag to dinengel so ibabaga na Dios diad panamegley nen Ari Neco, kanyan ag nampabirbir a linman akibakal ed patar na Megido.

²³ Legan na bakal, apana na saray Egipsio si Ari Josias, kanyan ingganggan tod saray katulong to, Iyarawi yo ak ta mapalaloy inkasugat ko.

²⁴ Inekal dad karwahi to, inkarga rad sananey a karwahi ton wadwan, insan da inyakar ed Jerusalem. Inatey diman tan nipompon ed kamposanto da ray arari. Nanermen ya amin iray totood Juda tan Jerusalem lapud impatey to.

²⁵ Nanggaway propita Jeremias na kantan panermen ed kinen Ari Josias, tan nagmaliw ed Israel a kantaen ya na saray lalaki tan bibii no manermen irad sikato. Narumog yan kanta ed tipon na saray kantan panermen.

²⁶ Saray arum a ginagawa nen Ari Josias, say panangaro tod Katawan, say panangonur tod Ganggan, tan say impanbilay to manlapud gapo ya anggad samput et nikorit ira ed Say Awaran da ray Ararid Israel tan Juda.

36

¹ "Pinili na saray totood Juda si Joacas a lakin anak nen Josias, insan da nilanaan ed Jerusalem ya onsalat ed kinen ama to.

² "Duamplo tan taloy taon to nen nagmaliw ya ari na Juda, tan nanoley ed Jerusalem na taloy bulan.

³ "Adakep nen Ari Neco na Egipto si Joacas tan impanbuis toy Juda na talon libo tan liman lasus a kilon pilak, tan talomplo tan liman kilon balituk.

⁴ "Impasen ton ari na Juda si Eliakim a lakin agi nen Joacas tan sinalatan toy ngaran to na Joakim. Inawit nen Neco si Joacas ed Egipto.

⁵ "Duamplo tan limay taon nen Joakim nen nagmaliw ya ari na Juda, tan nanoley ed Jerusalem na labinsakey taon. Nanggagawa na kaogsan ed arap na Katawan a Dios to.

⁶ "Nilooban nen Ari Nabucodonosor na Babilonia so Juda, adakep toy Joakim, tan inawit ton agolunggolungan ed Babilonia.

⁷ "Inala nen Nebucodonosor so pigaran kayamanan na Timplo, insn to ra inyan ed palasio Tod Babilonia.

⁸ "Saray arum a ginagawa nen Ari Joakim ed pati saray makapaingungot a kagagawa to tan say kaogsan a ginagawa to et nikorit ira ed Say Awaran da ray Ararid Israel tan Juda. Si Joakin a lakin anak to so sinmalat ed sikaton nanari.

⁹ "Labinwaloy taon nen Joakin nen nagmaliw ya ari na Juda, tan nanoley ed Jerusalem na taloy bulan tan samploy agew. Nanggagawa met na kaogsan ed arap na Katawan.

¹⁰ Nen sinmabiy tiagew, si Ari Nabucodonosor inawit toy Joakin a sakey a priso ed Babilonia, tan inala to ray kayamanan na palasioy ari. Insan si Nabucodonosor ginawa ton ari na Juda tan Jerusalem si Sedekias a pangamaen nen Joakin.

¹¹ Duamplo tan sakey so taon nen Sedekias nen nagmaliw ya ari na Juda, tan nanoley ed Jerusalem na labinsakey taon.

¹² Nanggagawa na kaogsan ed arap na Katawan, tan ag dinmengel a sipapabeba ed kinen propita Jeremias ya angibawag na salitay Katawan.

¹³ Linmaban si Sedekias ed Ari Nabucodonosor ya amasoot ed sikaton mansamba diad ngaran na Dios a magmaliw a matoor ed ari. Anawet so puso to kanyan ag nagbabawi o pinmawil ed Katawan a Dios na Israel.

¹⁴ Ontan met, saray pangulo na Juda, saray papari, tan saray karaklan et ag da tinoor so Dios, ta inalig da ray kaogsan da ray bansan walad kaliber-liber da diad impangigalang dad saray talintaoy diriyos. Diad onya, dinotakan day Timplo a pinasanto na Katawan.

¹⁵ Intuloy na Katawan a Dios na saray lalaki ra so angibaki na saray totoon mamasakbay ed sikara, lapud labay ton niagel iray totoo to tan say Timplo to.

¹⁶ Balet niludlurey da ray totoon imbabaki na Dios, ag da dinengel iray salita to, tan inelek-elekan da ray propita to. Diad kaonuran, ontan lay pasnuk na Katawan ed sikara kanyan ag la ra makapaliis.

¹⁷ Kanyan imbaki na Katawan so ari na Babilonia ya ondogpad sikara. Pinapatey na ari iray tobun-balon lalaki a taga Juda, anggan diad Timplo. Anggapoy panangasi to ed anggan siopa, malangwer may matakken, laki may bii, mansasakit may maksil so laman. Say Dios impalima to ran amin ed sikato.

¹⁸ Say ari na Babilonia inala to ray kagawaan ed Timplo, saray kayamanan a walad panagsinupan ed Timplo, tan saray kayamanan na ari tan saray opisyal to, insan to ra inawit ya amin ed Babilonia.

¹⁹ Pinoolan toy Timplo tan say siudad, pati saray palasio to tan saray kayamanan to, insan inggeba to ray padir na siudad.

²⁰ Siopaman ya apaliisan toy patey et inawit ira nen Nabucodonosor ed Babilonia, tan diman to ra inaripen, pati saray kabyangay boleg da, ya anggad inkiletneg na Impirio na Persia.

²¹ Sikato yay impakasumpal na samay impasakbay na Katawan diad panamegley nen propita Jeremias: Magmaliw ya andi-kabaliksan a pitomploy taon so dalin, pian nasalatan iray ag angilinan ya Agew na Panagpainawa.

²² Nen ononan taon na panooley ed Babilonia nen Impirador. Ciro na Persia, imbaga na Katawan ed sikato a mangipaakseb na sakey a ganggan, paisulat to, insan to paibasay maksil ed inerman a pasen ed impirio. Agawa ya pian napatwa so imbaga na Katawan diad panamegley nen propita Jeremias.

²³ Sikato ya so ganggan nen Ciro ya Impirador na Persia. Say Katawan a Dios na Tawen ginawa to ak a manoley ed intiron mundo tan ingganggan to ak a mamaalagey na sakey a timplo to diad Jerusalem na Juda. Amin yo sirin a totoo na Dios, pawil kayo lad Jerusalem. Mila komun ed sikayo so Katawan a Dios yo.