1

¹ "Masikesiken lay Ari David. Ag la napepetangan so laman to anggan nanlalatup so iyooles dad sikato.

² "Kanyan inkuan ed sikato na saray opisyal to, Kagalang ya Ari, iyabuloy mon mananap kamiy marikit a nakaibam tan manasikasod sika. Ondokul ed abay mo, pian napetangan ka.

³ "Nananap ira ed intiron dalin na Israel na sakey a magangganan marikit, et nalmo ray Abisag a taga Sunem. Inyakar da sirin ed ari.

⁴ "Ontan lay ganggana to, tan pinagaan tan inasikaso toy ari; balet ag inakdulan na ari.

⁵ "Si Adonias ya anak di David tan Hagit et yogtan nen Absalom tan mapalaloy inkaguapo ton laki. Ag balut apampasnukan nen David, tan pirawat toy magmaliw ya ari. Angiparaan la na saray ikana ton karwahi tan saray kabayo tan limamplon lalaki a mangolup ed sikato.

⁶

⁷ "Akitongtong lad kinen Joab (a say ina to et si Sarvia) tan si Abiatar a pari, et inmabuloy iran tulongan da.

⁸ "Balet ag akigampid sikato si Sadoc a pari, si Benaya a lakin anak nen Jehoyada, si Natan a propita, si Simei, si Rei, tan saray umaantabay ed kinen David.

⁹ "Aminsan ya agew, angibagat si Adonias na saray karniro, baka, tan pinataban kilaw na baka diad Oleg a Baton-Dampay ya asingger ed sobul na En-rogel. Binagaan tod sayan pista na bagat iray arum a lalakin anak nen David tan saray taga Juda ya opisyal na ari.

¹⁰ Balet ag to binagaan si agi tod ina a si Solomon, si Natan a propita, si Benaya odino saray umaantabay na ari.

¹¹ Insan linmay Natan ed kinen Batseba ya ina nen Solomon tan kuanto, Ag mo ni nadngelan a si Adonias a lakin anak nen Hagit et ginawa toy sikaton dili ya ari? Ag ya kabat nen Ari David!

¹² No labay mon niagel so bilay mo tan say bilay na anak mon Solomon, gawam yan simbawak ed sika:

¹³ Lakan tampol ed kinen Ari David tan tepet mod sikato, Ag mo ta sinambaan, Kagalang ya Ari, a si Solomon ya anak ko so onsalat ed sikan manari? Akin sirin et nagmaliw ya ari si Adonias?

¹⁴ Insan inyarum nen Natan ya inkuan, Legan mod satan a mitotongtong ed ari, onloob ak tan paneknekan koy ibabagam.

¹⁵ Kanyan linmay Bat-seba, ta pitongtongan toy ari diad dokulan to. Mataktakken lay ari, tan si Abisag a taga Sunem so manaasikasod sikato.

¹⁶ Dinmakmomo si Bat-seba a pamagalang tod ari, insan tinepet na ari ed sikato, Antoy labay mo?

¹⁷ Inmebat, Kagalang ya Ari, sinambaan mod ngaran na Katawan a Dios mo a si anak kon Solomon so onsalat ed sikan manari.

¹⁸ Balet nagmaliw lan ari si Adonias, anggaman ya anggapoy pikakabat mo.

¹⁹ Angibagat na amayamay a baka, karniro, tan pinataban kilaw na baka, insan to binagaan ed pista iray lalakin anak mo, si Abiatar a pari, tan si Joab a pangulo na saray sondalom, balet ag to binagaan si anak mon Solomon.

²⁰ Kagalang ya Ari, amin da ray totood Israel et sikay aalagaren dan mangibagad sikara no siopay manarin onsalat ed sika.

²¹ No ag mo ya gawaen natan, kapatey mo siak tan si Solomon ya anak ko et nipasen kamin traidor.

²² Mitotongtong niy Bat-seba ed ari nen sinmabid palasio si Natan.

²³ Nibagad ari a sinmabiy propita Natan. Linmoob si Natan, insan dinmakmomod arap na ari.

²⁴ Insan inkuanto, Kagalang ya Ari, imbawag mo la a si Adonias so onsalat ed sikan manari?

²⁵ Diad sayan agew, linman angibagat si Adonias na amayamay a baka, karniro, tan pinataban kilaw na baka, tan binagaan to ray lalakin anak mo, si Joab a pangulo na saray sondalom tan si Abiatar a pari. Diad sayan bekta, kaiba ran manaakan tan maniinom tan iyeeyag na saray kakaiba to, Andokey komun so bilay nen Ari Adonias!

²⁶ Balet ag to ak binagaan, Kagalang ya Ari; ag to met binagaan si Sadoc a pari, si Benaya odino anggan si Solomon.

²⁷ Inabubonan mo ya kasi, Kagalang kon Ari, anta ag mo anggan imbaga ed saray opisyal mo no siopay manarin onsalat ed sika?

²⁸ Inkuanen Ari David, Ibagam ed kinen Bat-seba ya ompawil diad abay koet pinmawil si Bat-seba tan nanalagey ed arap na ari.

²⁹ Insan inkuan na ari ed sikato, Sambaan kod sika, diad ngaran na mabilay a Katawan ya angekal ed siak ed amin a gunigon ko,

³⁰ a sumpalen ko natan imay sinambaan kod sika diad ngaran na Katawan a Dios na Israel a say anak mon Solomon so onsalat ed siak a manari.

³¹ Dinmakmomo si Bat-seba a pamagalang to tan kuanto, Mambilay komun ed ando lan ando so Kagalang ya Ari!

³² Insan ingganggan na ari, Tawag yo ra dia di Sadoc, Natan, tan Benaya. Dinmago rad arap na ari,

³³ tan kuan na arid sikara, Itagar yo ray opisyal ko, pakabayo yod dilin mulak si Solomon, tan olup yon onlad Gihon.

³⁴ Sikayon dua, Sadoc tan Natan, so manlana ed kinen Solomon a manari ed Israel. Insan yo paknulen so trumpita tan iyeyag yo, Andokey komun so bilay nen Ari Solomon!

³⁵ Tombuk yon ompawil dia, tan kasabi to onirung lad tronok. Salatan to ak a manari, ta sikatoy pinilik a manoley ed Israel tan Juda.

³⁶ Nasumpal so labay mo, ebat nen Benaya Abuloyan ya komun na Katawan a Dios mo.

³⁷ No kaonungay inkiwala na Katawan ed Kagalang ya ari, ontan met komun so kiwala tod kinen Solomon, tan gawaen ton maaligwas niy panoley to nen say sika.

³⁸ Kanyan si Sadoc, si Natan, si Benaya, tan saray umaantabay na ari et pinakabayo ray Solomon ed mula nen Ari David, tan inolup dan linmad Gihon.

³⁹ Inala nen Sadoc so pananginan na larak na oliban inala tod Tuldan Ayamay Katawan, insan to nilanaay Solomon. Pinaknul day trumpita, tan ineyag na amin a totoo, Andokey komun so bilay nen Ari Solomon!

⁴⁰ Insan da tinombuk ed impawil to a maneeyag irad liket tan mantotogtog ira na saray plauta; diad kasil na ingal da, ayegyeg so dalin.

⁴¹ Nen nasusumpal lay Adonias tan saray bisita to a mansisilibra, nadngel day ingal. Nen nadngel nen Joab so trumpita, inkuanto, Antoy kabaliksan na saman ya ingal ed siudad?

⁴² Mansasalita ni nen sinmabiy Jonatan a lakin anak nen Abiatar a pari. Loob ka, kuanen Adonias. Maung kan tookanyan andi-duaruwan maung a balita so ipasabim.

⁴³ Andi, aliwan maung a balita, ebat nen Jonatan. Ta say Kagalang ya Ari David et ginawa ton ari si Solomon.

⁴⁴ Imbaki ton mangolup ed sikato ira di Sadoc, Natan, Benaya, tan saray umaantabay na ari. Pinakabayo rad mula na ari si Solomon,

⁴⁵ insan diad Gihon di Sadoc tan Natan et nilanaan da a manari. Linma rad satan ed siudad, maneeyag-eyag ed liket iray totoo, tan natan wadman iran magolo-golon ingal lan ingal. Sikato man imay kadkadngel yon ingal.

⁴⁶ Si Solomon la natan so ari.

⁴⁷ Aliwan satan labat, linmad Kagalang ya Ari David iray opisyal to a mangilugay ed sikato tan kuanda, Say Dios mo gawaen to komun si Solomon a bantug nen say sika, tan say panoley to et maaligwas nen say impanoley mo. Insan si Ari David a walad dokulan et tinmuek ya angigalang ed Dios,

⁴⁸ tan kuanto, Idayew tayoy Katawan a Dios na Israel, ta diad sayan agew ginawa toy sakey ed saray kabyangay pamilyak a manarin onsalat ed siak, tan inyabuloy ton anengneng ko nin agawa ya!

⁴⁹ Insan tinmakot iray bisita nen Adonias, kanyan inmalagey iran amin tan nagsitaynan la ran amin.

⁵⁰ Diad gaway baleg a takot nen Adonias ed kinen Solomon, linmad Tuldan Ayamay Katawan tan pinmeket ed saray pinagkasaklur na altar.

⁵¹ Nibagad Ari Solomon a si Adonias et antakot ed sikato tan akapeket ed saray pinagkasaklur na altar tan inkuanto, Labay ko nin sambaan ed siak nen Ari Solomon ya ag to ak papatey.

⁵² Inmebat si Solomon, No ipanengneng ton matoor ed siak, anggapoy maoges a nagawad sikato, balet no andi, nepeg a pateyen,

⁵³ Kanyan angibakiy Ari Solomon, na amaepas ed kinen Adonias. Linmad ari tan dinmakmomod arap to a pamagalang to, tan kuan na arid sikato, Nayarian mo lay onsempet.

2

¹ "Nen magano lan ompatey si David, binilin toy anak ton Solomon.

² "Inkuanto, Magano lay ipatey ko. Pabiskeg moy linawam tan ipanengneng mon laki ka;

³ "sumpal moy amin ya iganggan ed sika na Katawan a Dios mo. Toluk mon amin iray ganggan tan bilin to onung na nisulat ed Ganggan nen Moises, pian onaligwas ka ed antokaman a gawaen mo, inerman so laen mo.

⁴ "No onuren mo ray ganggan to, sumpalen met na Katawan so sipan tod siak a manoley ed Israel iray kabyangay boleg ko, legan a mabolbolus tan matoor iran mangonur ed saray ganggan to.

⁵ "Wala niy ibagak ed sika. Amtam iman so ginawa nen Joab ed siak nen pinatey to ray duaran pangulo na saray sondalo na Israel a di Abner a lakin anak nen Ner tan Amasa a lakin anak nen Jeter. Amtam no panoy impamatey tod sikara nen panaon na kareenan lapud imbawi tod impamatey da nen panaon na bakal. Pinatey to ray totoon anggapoy kasalanan tan natan siak so natetetel lapud saray ginawa to, tan siak so manaanina saray bungay kaogsan to.

⁶ "Gawam so isisipen mon maabig; ag mo aabuloyan a nasabi toy agew na ipatey to.

⁷ "Balet kasian mo ray lalakin anak nen Barsillai a taga Galaad; itdan mo ra lawas na nakaukolan da, ta kinasian da ak nen ibabatikan koy agim ya Absalom.

⁸ "Sakey met iman si Simei a lakin anak nen Gera tan taga baley na Bahurim a sakop nen Benjamin. Mapalalo so impangisamba tod siak diad samay agew a linma ak ed Mahanaim, balet nen inabet to ak ed Ilog na Jordan sinambaan kod sikato ya ag ko papatey.

⁹ "Natan balet ag mo papaolyan ya ag nadusa. Gawam so isisipen mon maabig; nepeg mon papatey ya andi-saew.

¹⁰ Inatey si David tan nipompon ed Jerusalem.

¹¹ Nanari na apataplon taon, pitoy taon ed Hebron tan talomplo tan taloy taon ed Jerusalem.

¹² Si Solomon sinalatan ton ari si ama ton David, tan binmiskeg so inkiletneg na nanarian to.

¹³ Aminsan ya agew, linmad kinen Bat-seba ya ina nen Solomon si Adonias a say ina to et si Hagit. Tinepet nen Bat-seba ed sikato, Maabig kasiy iter to yan imbisitam? On, ebat to,

¹⁴ insan to inyarum, Wala pa labat so kerewen kod sika. Anto tan? tepet nen Bat-seba.

¹⁵ Inmebat, Amtam a siak komuy nagmaliw ya ari tan inilaloan ya na amin a too ed Israel. Balet sananey so agawa, ta say agik so nagmaliw ya ari lapud linawa na Katawan a sikatoy manari.

¹⁶ Wala natay labay kon kerewen; ag mo ak komun papabaingan. Anto tan? tepet nen Bat-seba.

¹⁷ Inmebat, Kerew mo pad Ari Solomon ya iter ton asawak si Abisag a taga Sunem. Amtak ya ag to ka pabaingan.

¹⁸ Maung so kanunotan mo, ebat nen Bat-seba. Onla ak, ta isalitaan ta kad ari.

¹⁹ Kanyan linmay Bat-seba ed ari, ta isalitaan toy Adonias. Inmalagey so ari a pangilugay tod ina to, insan tinmuek ya angigalang. Inmirung ed trono to tan amaiyan na yorungan ed nikawanan to tan inirungan nen ina to.

²⁰ Inkuanen Bat-seba, Walay melag a bengatlan kerewen kod sika; ag mo ak komun papabaingan. Antoy kerew yo, ina? tepet nen Solomon, Ag ta kayo pabaingan.

²¹ Inmebat, Iter mo pan asawa nen Adonias si Abisag.

²² Akin et kekerewen yon iter kod sikatoy Abisag? tepet na ari. Kerew yo met ni laingen ya iter ko met ed sikatoy trono. Andi-bali ta sikatoy pangulowan ko, tan walad diking to si Abiatar a pari tan si Joab!

²³ Insan insamba nen Solomon diad ngaray Katawan, Pateyen ak komun na Dios no aliwan bilay nen Adonias so paibayar kod sikato, lapud sayan kekerewen to!

²⁴ Pinaletan na Katawan a pairungen ak ed trono nen amak a David; tinoor toy sipan to tan inter toy nanarian ed siak tan saray kabyangay pamilyak. Isambak ed ngaran na mabilay a Katawan ya ompatey si Adonias natad sayan agew!

²⁵ Kanyan inggangan nen Ari Solomon si Benaya; linmay Benaya tan pinatey toy Adonias.

²⁶ Insan inkuanen Ari Solomon ed kinen Abiatar a pari, Sempet ka lad abung mod bario diad Anatot. Kanepegan moy ompatey, balet ag ta ka pateyen natan, lapud sikay nanasikasod Kaban na Sipanan legan a kaibam si amak a David tan lapud akidamay kad saray gunigon da.

²⁷ Kanyan pinaekal nen Solomon si Abiatar ed kipapasen ton pari na Katawan; lapud saya apatwa so sinalita na Katawan diad Silo nipaakar ed kinen Eli a pari tan saray kabyangay boleg to.

²⁸ Nadngelan nen Joab so agawa. (Tinulongan toy Adonias, balet ag to tinulongan si Absalom.) Kanyan batik ed Masanton Tulda tan pinmeket ed pinagkasaklur na altar.

²⁹ Nen nibalitad kinen Ari Solomon a batik ed Tuldan Ayamay Katawan si Joab tan walad abay na altar, angibaki na toon anepet ed sikato no akin et batik ed altar. Inmebat si Joab a sikatoy batik ed Katawan, ta antakot toy Solomon. Kanyan imbaki nen Ari Solomon si Benaya a pateyen toy Joab.

³⁰ Linmad samay tulda si Benaya tan kuantod kinen Joab, Ingganggan na ari ya ompaway ka. Andi, ebat nen Joab. Labay ko diay ompatey. Pinmawil ed ari si Benaya tan imbalita toy imbaga nen Joab.

³¹ Gawam so imbaga nen Joab, ebat nen Solomon. Patey mo tan ipompon mo. Diad satan anggapo lay ebatan ko tan siopaman nin kabyangay boleg nen David, lapud samay ginawa nen Joab nen pinatey to ray totoon anggapoy kasalanan.

³² Dusaen na Katawan si Joab lapud saraman ya impamatey to ya anggapoy pikakabat nen amak a David. Pinatey nen Joab si Abner a pangulo na saray sondalo na Israel, tan si Amasa a pangulo na saray sondalo na Juda. Pinatey to ran anggapoy kasalanan, anta maung tan matonung ni ra nen say sikato.

³³ Andi-anggaan so pakadusa nen Joab tan saray kabyangay boleg to, lapud sarayan impamatey tod saray totoon anggapoy kasalanan. Balet paaligwasen lawas na Katawan so siopaman ed saray kabyangay boleg nen David ya onyorung ed trono to.

³⁴ Kanyan linmay Benaya ed Tuldan Ayamay Katawan tan pinatey toy Joab, insan nipompon ed dilin abung to diad kalawakan.

³⁵ Si Benaya so insalat na ari ed kinen Joab a pangulo na saray sondalo, tan si Sadoc a pari so insalat tod kinen Abiatar.

³⁶ Insan impatawag na ari si Simei tan kuantod sikato, Mangipaalagey kad Jerusalem na abung mo. Manayam kad man tan ag ka ompapaway ed baley.

³⁷ NO ompaway tan labasan moy Kolus na Kidron, andi-duaruwan ompatey ka, et sikan diliy natetel.

³⁸ Maung itan so imbagam, Kagalang ya Ari, ebat nen Simei. Gawaen ko so labay mo. Kanyan abayag a nanayam ed Jerusalem si Simei.

³⁹ Kalabas na taloy taon balet, duaran aripen nen Simei so batik ed ari na Gat a si Akis a lakin anak nen Maaca. Nen nadngelan nen Simei a wala rad Gat,

⁴⁰ kinabayoan toy asno to tan linmad Gat diad kinen Ari Akis, ta anapen to ray aripen to. Nalmo to ra, kanyan insempet to ra.

⁴¹ Nen nadngelan nen Solomon so ginawa nen Simei,

⁴² impatawag to tan kuantod sikato, Ag ko ta impasambaan ed sika diad ngaran na Katawan ya ag ka ontataynan ed Jerusalem? Ag ka ta inmabubon tan insipan mon onuren mo ak?

⁴³ Akin sirin et ag mo tinoor so sinambaan mod Katawan tan ag mo sinumpal so ganggan ko?

⁴⁴ Insan to inyarum ya inkuan, Kabkabat mo ray maoges a ginagawam ed kinen amak a David, anto? Dusaen kay Katawan, lapud saraman a maoges a ginagawam.

⁴⁵ Balet bindisionan to ak tan paletan toy inkiletneg na nanarian nen David ed ando lan ando.

⁴⁶ Insan ingganggan na ari si Benaya; linmay Benaya tan pinatey toy Simei. Kanyan maligen la natan so panaari nen Solomon.

3

¹ "Akigampiy Solomon ed ari na Egipto, lapud impangasawa nen Solomon ed anak na ari. Inyakar to yan asawa to ed Siudad nen David, tan impanayam tod man ya anggad asumpal ton impaalagey so palasio to, say Timplo, tan say padir ed kaliber-liber na Jerusalem.

² "Nen saman ag ni nipaalagey so Timplo a para Katawan, kanyan nambabagat nin nandoroman altar iray totoo.

³ "Inaro nen Solomon so Katawan tan sinumpal to ray bilibilin nen ama ton David, balet nampapatas met na saray amayamay ya ayayep tan imbabagat to rad nandoroman altar.

⁴ "Aminsan linmad Gabaon a mangibagat si Solomon, ta dimay kawalaay sankabantugan ya altar. Nilasus la ran ayayep so imbabagat tod man nen saman.

⁵ "Diad saman a labi, pinmayawar ed sikato so Katawan diad sakey a kogip tan tinepet na Katawan ed sikato, Antoy labay mon iter kod sika?

⁶ "Inmebat si Solomon, Balbaleg a panangaroy inter mod kinen amak a David ya aripen mo, ta maung, matoor, tan matonung so impanbilay tod arap mo. Intuloy mo nin inter ed sikato yan baleg tan ag naoman a panangaro diad impangiter mod sikatoy sakey ya anak a lakin manooley natan a kasalat to.

⁷ "O Katawan a Dios, insalat mo ak ed kinen amak a manari, anggaman ya ogaogaw ak ni tan ag ko amta no panoy panoley.

⁸ "Wadya ak sirin a manoley ed saray totoon pinilim a kayaryan mo; ag ira nabilang lapud dakerakel la ra.

⁹ "Kanyan itdan mo ak pay kakabatan a nakaukolan kod matonung a panoley ed saray totoom tan pakaamta na pandomaan na maung tan maoges. Ta no andi, panon kon naoleyan ira yan matalonggaring a totoom?

¹⁰ Akaliket so Katawan lapud saya so kinerew nen Solomon.

¹¹ Kanyan kuantod sikato, Lapud ag ka kinmerew na andokey a bilay, odino kayamanan ya onkanad sikan dili, odino say ipatey na saray kalaban mo, no ag ingen kinmerew ka na kakabatan pian matonung so panoley mo,

¹² iter kod sikay kinerew mo. Iter kod sikay kakabatan tan pakatalus a matalonggaring ni nen say nipalabo lad siopaman a toon akaonan nambilay nen say sika odino diad toon mambilay a naonur nen say sika.

¹³ Iter ko met ed sikay ag mo kinerew: makagamur kay kayamanan tan say kagalangan ed legay pambilay mo, tan ag yan balut naparaan na anggan siopan ari.

¹⁴ Et no mambilay ka onung na linawak, no onuren mo ray ganggan tan saray bilin ko a singa ginawa nen amam a David, itdan ta ka na andokey a bilay.

¹⁵ Abangon si Solomon, insan to naamtaan ya akisalitad sikato so Dios diad panamegley na kogip. Insan linmad Jerusalem, nanalagey ed arap na Kaban na Sipanan na Katawan tan angisaklang ed Katawan na bagat a popoolan tan say bagat a para kareenan. Kayari to ya, nanggaway baleg a ponsia a para saray amin ya opisyal to.

¹⁶ Aminsan, walay duaran marotak a bibii ya inmapireng ed Ari Solomon.

¹⁷ Inkuan na sakey ed sikara, Kagalang ya Ari, manaayam kami yan bii ed saksakey ya abung! Legan ton wadman ed abung, nananak ak na sakey a laki.

¹⁸ Kayariy taloran agew ed impananak ko, nananak met na sakey a laki. Bukbukor min duay wadman ed abunganggapo lay arum a kaiba mi.

¹⁹ Balet aminsan a labi atapilan toy anak to, kanyan inatey imay ogaw.

²⁰ Binmangon ed saman a labi, inala toy anak ko, insan to inyan ed dokulan to; inala to may inatey ya anak to, insan to inyan ed dokulan ko.

²¹ Diad kaimbuas, abangon ak, et nen pasusoen ko lay anak ko anengneng kon inatey met la. Ninengneng kon maung imay ogaw, et abirbir kon ag ko anak.

²² Balet samay sakey a bii inmebat, Andi! Anak ko yay mabilay! Anak mo may inatey! Inmebat imay sakey a bii, Andi! Anak mo may inatey! Anak ko yay mabilay! Onyay impansangsangan da diad arap na ari.

²³ Insan inkuanen Ari Solomon, Kakayaryanen na balang sakey ed sikayo so mabilay ya ogaw, tan ag birbiren na balang sakey ed sikayo ya anak to may inatey ya ogaw.

²⁴ Kanyan amaalay sakey ya ispada so ari, et nen wala la may ispada

²⁵ inkuanto, Pankadwa yo tay ogaw; say kapaldua iter yod sayay sakey a bii, tan say kapaldua iter yod sayay sakey.

²⁶ Say peteg ya ina a napnoy puso to na panangaro ed saman ya anak to inkuantod ari, Panangasi yo, Kagalang ya Ari, ag yo papateyen so ogaw! Iter yo lad sikato! Balet samay sakey a bii inkuanto, Anggapoy pangitdan yod sikami tay ogaw, paldua yo la.

²⁷ Insan inkuanen Solomon, Ag yo papateyen so ogaw! Iter yod sayan biisikatoy petepeteg ya akananak.

²⁸ Nen nadngelan na saray totood Israel yan impanintinsia nen Solomon, mapalaloy panamagalang dad sikato, ta amta ran initdan na Dios na kakabatan a mangiter na katonungan.

4

¹ "Si Solomon so ari ed intiron Israel,

² "tan saray a so atagey ya opisyal to: Say pari: si Azarias a lakin anak nen Sadoc

³ "Saray sikritario na korti: di Elihoref tan Ahias a lalakin anak nen Sisa Say makaoley ed saray walan nisulat: si Josafat a lakin anak nen Ahilud

⁴ "Say manonan pangulo da ray sondalo: si Benaya a lakin anak nen Joiada Saray papari: di Sadoc tan Abiatar

⁵ "Say manona ed saray gobirnador na distrito: si Asarias a lakin anak nen Natan Say sumisimbawa na ari: si Zabud a pari tan anak nen Natan

⁶ "Say makaoley ed saray aripen ed palasio: si Ahisar Say makaoley ed impasoot a kimey: si Adoniram a lakin anak nen Abda.

⁷ "Anoroy Solomon na labinduan gobirnador na saray distrito na Israel. Manlapud saray distrito ra so iiter dan taganoy ari tan say pamilya to; balang sakey ed sikara sakey bulan so paniter to na tagano kapag taon.

⁸ "Saraya so kangaranan da ray gobirnador tan saray distriton ooleyan da: Ben-hur: say nipokdul a pasen na Efraim

⁹ "Ben-deker: saray siudad na Macaz, Saalbim, Bet-semas, Elon, tan Bet-hanan

¹⁰ Ben-hased: saray siudad na Arubot, tan Soco, tan say intiron dalin na Hefer

¹¹ Ben-abinadab ya asawa toy Tafat ya anak nen Solomon: say intiron dalin na Dor

¹² Baana a lakin anak nen Ahilud: saray siudad na Taanac, Megido, tan amin a dalin ya asingger ed Bet-sean, say asingger ed baley na Zaretan, say sagur na baley na Jesreel, tan anggad siudad na Abel-menhola tan say siudad na Jocneam

¹³ Ben-geber: say siudad na Ramot- galaad, tan saray bario na Galaad a sakop na boleg nen Jair a lakin kabyangay boleg nen Manases, tan say dalin na Argob diad Basan, anemaplon ankakabaleg a baley ya amin, apaliberan iray padir tan gansa iray balewet na puirta ra

¹⁴ Ahinadab a lakin anak nen Iddo: say distrito na Mahanaim

¹⁵ Ahimaaz ya asawa nen Basemat a sakey nin anak nen Solomon: say dalin na Neftali

¹⁶ Baana a lakin anak nen Husai: say dalin nen Aser tan say baley na Bealot

¹⁷ Josafat a lakin anak nen Parua: say dalin nen Isacar

¹⁸ Simei a lakin anak nen Ela: say dalin nen Benjamin

¹⁹ Geber a lakin anak nen Uri: say dalin na Galaad a nanoleyan nen Sehon ya ari na saray Amorreo tan si Ari Og na Basan Likud ed sarayan labindua, walay sakey a gobirnador na intiron bansa na Israel.

²⁰ Singa la karakel na buer ed gilig na dayat so karakel na saray totood Juda tan Israel. Daakan so kakanen tan iinomen da; maliket so panagbilay da.

²¹ Sakop na nanarian nen Solomon iray amin a bansa a manlapud bokig na Ilog na Eufrates ya anggad sagur na Filistia, tan anggad ketegay Egipto. Nambabayar iray buis ed sikato tan wala rad silong na pakaoley to legan ton nambilay.

²² Say inagew-agew a taganon nakaukolan nen Solomon et a sanlasus tan limamplon sako a pinon arina tan talon lasus a salup a magasal ya sako;

²³ samploran pinataban baka, duamplon ipapastol a baka, tan sanlasus a karniro, a andi-bali ray ankabaleg tan ankelag ya ulsa, tan saray pinataban manok.

²⁴ Manoley si Solomon ed saray dalin ed sagur na Ilog na Eufrates, manlapud Tifsa ya anggad Eufrates tan anggad sagur na siudad na Gaza. Walad silong na pakaoley to ray amin ya ararid sagur na Eufrates, tan maung so pipiolup tod saray kakaabay ton bansa.

²⁵ Legan ton nambilay, arawid kaatapan iray totood Juda tan Israel; balang pamilya wala ray tanaman ton ubas tan kakiewan ya igos.

²⁶ Si Solomon walay apataplon libo a kabayo to a para karwahi tan labinduan libo a lalakin kumakabayo.

²⁷ Sakey bulan ed kapag taon, say sakey ed saray labinduan gobirnador to so makaoley a mangiter na taganon nakaukolan nen Solomon tan amin da ray mamangakan ed palasio to; iniiter da lawas iray amin a nakaukolan.

²⁸ Sikara met so makaoley a mangiter na sibada tan dayamin nakaukolan na saray kabayon para karwahi tan saray ayayep a panagkimey; no iner so kawalaay pankaukolan ed saraya dimay pangyakaran da.

²⁹ Initdan na Dios si Solomon na nidoma-doman kakabatan tan pakatalus, tan say karunongan ya ag natokur.

³⁰ Makabat si Solomon nen saray makabat a totood Bokig odino saray makabat a totood Egipto.

³¹ Sankakabatan ed amin da ray totoo: makabat nen si Etan ya Ezrahita, tan di Heman, Calcol, tan Darda a lalakin anak nen Mahol. Binmantuged saray bansad kaliber-liber na nanarian to.

³² Nanggawa na talon libon probirbio tan sanlibo tan limaran kanta.

³³ Nansasalita na nipaakar ed saray kiew tan saray tanaman, manlapud saray sidro ed Libano ya anggad isopo ya ontutubod saray padir; nansasalita met na nipaakar ed saray ayayep, saray manok, saray ayayep ya onkokorung, tan saray sira.

³⁴ Nadngelan na amin da ray arari ed intiron mundo so kakabatan nen Solomon, kanyan angibaki ray totoon ondengel ed sikato.

5

¹ "Si Ari Hiram na Tiro et kaaro nen David, kanyan nen nadngelan ton si Solomon so sinmalat ed ama ton David a manari, angibaki na pigaran opisyal to.

² "Impaikuanen Solomon ed sikato,

³ "Amtam ya ag akapangipaalagey si amak a David na timplon pangigalangan ed Katawan a Dios to, lapud mabetbet so impibakal tod saray kalaban ton bansa a wala rad kaliber-liber to. Ag makapangipaalagey na Timplo ya anggad say Katawan et panaloen tod saray amin a kalaban to.

⁴ "Balet, natan, initdan ak na Katawan a Dios ko na kareenan ed inerman a pasen a sakop na nanarian ko. Anggapo la ray kalaban ko tan anggapo lay kaatapan a nepeg kon takotan.

⁵ "Insipan na Katawan ed kinen amak a David, Say anak mon laki ya isalat kod sikan manari so mangipaalagey na timplo a para siak. Peteg a ginetmak la natan sirin so mangipaalagey na Timplon pangigalangan ed Katawan a Dios ko.

⁶ "Kanyan mangibaki ka pad Libano na saray totoom, ta ibatangan da ak na saray sidro. Tulongan ira na saray totook, et bayaran ko ray totoom no pigaray labay mo. Sikakabat ka met lanti ya ag naparaan na saray totook so dunong na saray totoom ed pambatang na saray kiew a sidro.

⁷ "Akaliket a maung si Hiram nen naawat toy impaibaga nen Solomon, kanyan inkuanto, Nagalang natan so Katawan, lapud initdan toy David na sakey ya anak a manari ed saman a matalonggaring a bansa!

⁸ "Insan impaikuanen Hiram ed kinen Solomon: Naawat koy impaibagam ed siak. Akaparaan ak a manggawad kekerewen mo; itdan ta ka na saray kiew a sidro tan saray saleng.

⁹ "Saray totook iyakseb dad dayat iray troson manlapud Libano, insan pabalkot kon singa saray lamo, pian nipaanor da ra ya anggad labay mon pasen. Okbaren diman na saray totook, insan makaoley la rad satan iray totoom. Sika la komun balet so makaoley a mangiter na tagano da ray totook.

¹⁰ Kanyan initdan nen Hiram si Solomon na amin a troson sidro tan saleng a nakaukolan to,

¹¹ tan si Solomon initdan ton tinaon si Hiram na sanlasus libon sako ya arina tan sanlasus tan samplon libon galon a puron larak na oliba ya ipakan tod saray totoo to.

¹² Initdan na Katawan si Solomon na kakabatan onung na insipan to. Maung so olupan dan dua nen Solomon tan si Hiram, tan nanggawa ray sakey a paknaan.

¹³ Manlapud intiron Israel, talomplon libon lalaki so impasen nen Ari Solomon a pinasoot iran mankimey,

¹⁴ tan si Adoniram so makaoley ed sikara. Impankatlo nen Adoniram so grupo ra; samplon libon lalaki so balang grupo tan nanayam iray sakey bulan ed Libano tan duay bulan ed dilin bansa ra.

¹⁵ Si Solomon walaan met na walomplon libon lalaki a managtabas na bato diad kapokdulan a pasen, tan pitomplon libon lalakin managawit na saray baton atabas;

¹⁶ say impasen ton makaoley ed sayan kimey et talon libo tan talon lasus a lalaki.

¹⁷ Lapud ganggan nen Ari Solomon, nantatabas iray mararakep ya ankakabaleg a bato ya onkanad pundasion na Timplo.

¹⁸ Saray totoo di Solomon tan Hiram, tan saray totoon taga Gebal et imparaan da ray bato tan saray kiew ya onkanan pangipaalagey na Timplo.

6

¹ "Inggapo nen Solomon ya impaalagey so Timplo nen kayariy apat a lasus tan walomplon taon manlapud samay agew a tinaynan na saray Israelita so Egipto, tan legan na kumapat a taon a panaari nen Solomon, diad bulan na Sib a kumadwan bulan na taon.

² "Talomplon mitro so karokey na dalem na Timplo, samploran mitro so kaawang to, tan labinliman mitro so kaatagey to.

³ "Limaran mitro so karokey na kuarton lolooban tan samploran mitro so kaawang to a singa kaawang na santuario.

⁴ "Wala ray bongaw ed saray padir na Timplo, a mainget nid paway nen say loob da.

⁵ "Wala ray kuarton nisuldong ed nantopag a dapag na padir na Timplo, ontan to met ed beneg na Timplo. Taloran grado ra yan kuarto; balang grado duara tan kapalduan mitro so kaatagey to.

⁶ "Kapag kuarto ed sankaleksaban a grado taloran mitro so kaawang to, tan say sankatageyan talora tan kapalduan mitro so kaawang to. Manmelag manlapud leksab ed kapag grado so padir na Timplo, kanyan akapapeg la ra may kuarto tan ag insoksok ed padir iray panuksolan to.

⁷ "Tinabas la ed panagtebagan iray baton inkana ed impamaalagey na Timplo, kanyan anggapoy nadngel a tanul na martilyo, wasay, odino antokaman a kagawaan a balatyang legan ya ipapaalagey so Timplo.

⁸ "Walad abalaten a dapag na Timplo so lolooban na sankaleksaban a grado na saramay kuarto, tan dia met so kawalaay takayan a mamaarap ed kumadwa tan kumatlon grado.

⁹ "Asumpal nen Solomon ya impaalagey so Timplo. Makakapal a tablan sidro iray ginawa ton panuksolan tan bubida.

¹⁰ Nipapeg ed paway na saray padir ira may taloran gradon kakuartoan a say balang kuarto et duara tan kapalduan mitro so kaatagey to, tan nisoldung ira na saray sidron panuksolan.

¹¹ Inkuan na Katawan ed kinen Solomon,

¹² No onuren mo ray ganggan tan saray bilin ko, sumpalen kod sikay insipan kod kinen amam a David.

¹³ Manayam ak ed pegley da ray totook ya Israelita diad sayan Timplo ya ipapaalagey mo, tan ag ko ran balut ikaindan.

¹⁴ Asumpal sirin nen Solomon ya impaalagey so Timplo.

¹⁵ Manlapud datal ya anggad bubida pinalkapan na tablan sidro so loob na saray padir, tan tablan saleng so datal to.

¹⁶ Agawad beneg na dalem na Timplo so bandad dalem a kuarto a tatawagen na Sankasantosan a Pasen. Diad kumaplon mitro manlapud beneg na Sankasantosan a Pasen kineteg na tablan sidro, manlapud datal ya anggad bubida

¹⁷ Duamplon mitro so karokey na kuarto ed arap na Sankasantosan a Pasen.

¹⁸ Nikortid saray tablan sidro ya impalkap ed saray padir iray bungay kiew tan saray rosas; pinalkapan na tablan sidro so intiron dalem na Timplo, kanyan anggapoy baton nanengneng ed padir.

¹⁹ Agawa so bandad dalem a kuarto ed beneg na dalem na Timplo, tan diay getma ran panginan na Kaban na Sipanan na Katawan.

²⁰ Sayan bandad dalem a kuarto et samploran mitro so karokey to, samploran mitro so kaawang to, tan samploran mitro so kaatagey to; naokupan ya amin na puron balituk. Apalkapan na sidron tabla so altar.

²¹ Naokupan na balituk so intiron dalem na Timplo, tan walay akabeltang a balituk a golunggolung ed lolooban na bandad dalem na kuarto a naokupan met na balituk so intiron dalem to.

²² Naokupan na balituk so intiron dalem na Timplo, anggan say altar a walad Sankasantosan a Pasen.

²³ Duaran kiew na oliban kirubin so niiyan ed Sankasantosan a Pasen; limaran mitro so kaatagey na balang sakey.

²⁴ Namparay kabaleg tan inkagawa ra. Sanderwa ray payak; duara tan kapalduan mitro so karokey na balang sakey a payak da.

²⁵

²⁶

²⁷ Impanampar iran dua diad dalem na Sankasantosan a Pasen, kanyan akapanapitan so duaran payak da diad pegley na kuarto, tan saray arum a duaran payak da et akadiwit ed nantupag a padir.

²⁸ Naokupan na balituk ira yan duan kirubin.

²⁹ Nikortid padir na manonan kuarto tan diad padir na bandad dalem a kuarto iray kirubin, kiew a palmira, tan saray rosas.

³⁰ Naokupan met na balituk so anggan datal.

³¹ Duara so kaput na puirtan lolooban ed Sankasantosan a Pasen tan agawa ra ed tablan oliba; akatoron arko so walad tagey na puirta na lolooban.

³² Nikorti ed saray kaput iray kirubin, kiew a palmira, tan saray rosas. Apalkapan na balituk iray kaput, saray kirubin, tan saray kiew a palmira.

³³ Ngalngalin kuadrado so agawan hamba na lolooban na manonan kuarto; tablan oliba so nikana.

³⁴ Walay duaran nikopit a kaput ya agawad tablan saleng.

³⁵ Nikorti met ira diay kirubin, kiew a palmira, tan saray rosas tan namparparay kapal na balituk a niokup ed saraya.

³⁶ Nipaalagey ed arap na Timplo so patio; aliber na padir a walay sidron panuksolan ed tapew na kapag mikatlon tinabas a bato.

³⁷ Diad bulan na Sib, say kumadwan bulan na kumapat a taon na panooley nen Solomon, niletneg so pundasion na Timplo.

³⁸ Diad bulan na Bul, say kumawalon bulan na kumalabinsakey a taon na panooley nen Solomon, asumsumpal a nipaalagey so Timplo onung na implano. Pitoy taon ya impaalagey nen Solomon so Timplo.

7

¹ "Impaalagey met nen Solomon so palasio to, tan asumpal na labintaloy taon.

² "Limamplon mitro so karokey na Baleg a Kuarton Takel na Libano, duamplo tan liman mitro so kaawang to, tan labinliman mitro so kaatagey to. Walay taloran talonton a sidron lusek to, labinlima a lusek so kapag talonton, tan wala ray sidro a panuksolan ya akapeket ed kapag talonton. Sidro met so bubida to, tan nituloy ed saray panagsinupan a kuarto ya inagto met ira na saray lusek.

³

⁴ "Diad kapag dapag na nantopag a padir, walay taloran talonton na bintana.

⁵ "Ngalngalin kuadrado iray hamba na saray lolooban tan saray bintana tan nampepetekan ira may bintana ed nantopag a padir.

⁶ "Say Baleg a Kuarto na Saray Lusek et duamplo tan anem a mitro so karokey to tan labinliman mitro so kaawang to. Walay balkon ton atarungan ya inagto na saray lusek.

⁷ "Say Kuarton Trono a tatawagen met na Korti na Katonungan, a diay panagsintinsiaan nen Solomon ed saray kaso, et tablan sidro so nipalkap ed saray padir to manlapud datal ya anggad wanan.

⁸ "Agawa met a singa inkagawa na saray arum a paalagey so ayaman nen Solomon diad beneg na Korti na Katonungan. Amaalagey met si Solomon na onyan ayaman a para asawa to ya anak na ari na Egipto.

⁹ "Amin da ra yan paalagey a pati say maawang a patio, manlapud pundasion ya anggad bobung, et agawa rad saray baton niparaan ed panagtebagan a diman ira tinatabas onung ed nitandan sukat tan nililinisay lagari diad duaran pagpag.

¹⁰ Ankakabaleg a baton niparaan ed panagtebagan iray niiyan ed saray pundasion, apatiran mitro so karokey na saray arum tan limaran mitro iray arum.

¹¹ Diad tapew da ra ya, niiyan iray tinatabas onung ed sukat a bato, tan saray sidron panuksolan.

¹² Say patio na palasio, say patiod Timplo, tan say kuarton lolooban ed Timplo et wala ray padir da a walay sidron panuksolan ed tapew na kapag mikatlon baton tinabas.

¹³ Impaawit nen Ari Solomon so sakey a lakin manggaray Hiram a taga Tiro, sakey a marunong a pumapanday na gansa.

¹⁴ Inatey lay ama ton taga met Tiro tan marunong met a pumapanday na gansa; kabyangay tribu nen Neftali so ina to. Maung ya impanolo si Hiram tan abayag lan pumapanday na gansa. Inmabubon ed labay na ari a sikatoy makaoley ed saray kimey a nipaakar ed gansa.

¹⁵ Angibubo si Hiram na duaran malimpek a gansan lusek a siamiran mitro so kaatagey tan anemiran mitro so kinalimpek na balang sakey.

¹⁶ Nanggawa met na duaran gansan olo-olo a duara tan kapalduan mitro so kaatagey na balang sakey; inyan to ira ya ed toktok na saramay lusek.

¹⁷ Diad nansaipan na balang lusek tan olo-olo, dinikoraan to na singa alaga-lagan golunggolung,

¹⁸ tan diad tapew to ya, ininan toy duaran talonton a gansan granada.

¹⁹ Singa lirio so nengneng da ra may olo-olo, tan duaran mitro so kaatagey da,

²⁰ tan nitapew ed duaran malimpek a parti a walad tapew na samay singa golunggolung. Apaliberan so balang sakey ed saramay olo-olo na duaran talonton na gansan granada a duan lasus so bilang da.

²¹ Impaalagey nen Hiram ira yan duaran gansan lusek diad arap na lolooban ed Timplo: walad bandad abalaten so sakey ya angaranan na Jakin, tan walad bandad baybay so sakey ya angaranan na Booz.

²² Niiyan ed toktok na saramay lusek ira may singa lirion gansan olo-olo. Kanyan asumpal so kimey ed saramay duaran lusek.

²³ Nanggaway Hiram na gansan kawa a dipositoway danum; duaran mitroy kaaralem to, limaran mitroy kaawang to, tan labinliman mitroy kinalimpek to.

²⁴ Diad kaliber-liber na paway na sangab na kawa walay duaran labinliman mitron talonton na gansan atsiw. Nibubo ra ya nen nibubo may kawa.

²⁵ Naampatut yan kawa ed beneg na saray labinduan gansan bakan kalakyan ya akaarap irad paway, taloray akaarap ed baybay, abalaten, bokig tan sagur.

²⁶ Sankarangan so kakapal to may kawa. Singa sangab na kupa so sangab to, tan binmaluk ed paway a singa rosas na lirio. Samplon libon galon so nakarga to.

²⁷ Nanggawa met si Hiram na samploran gansan kariton; balang sakey duaran mitroy karokey to, duaran mitroy kaawang to, tan sakey tan kapalduan mitroy kaatagey to.

²⁸ Agawa ra ed saray kuadradon dingding a nibastidor ira.

²⁹ Diad saray dingding nitatak iray lion, bakan kalakyan, tan saray kirubin; tan diad saray bastidor, diad tagey tan silong na saray lion tan saray bakan kalakyan wala ray nitatak a nibalbaliber a gulis.

³⁰ Kapag kariton walay apatiran gansan dalig to tan wala ray ihi ra. Diad apatiran suyok, wala ray gansan ampatot na kawa. Sarayan gansan ampatot et adikoraan iray nibalbaliber a gulis.

³¹ Diad tapew na kariton walay liken a gatonay kawa. Niatagey na labinwalon pulgada manlapud tapew na kariton tan niabeba na pitoran pulgada. Wala ray nikorkortin parakep ed kaliber-liber to.

³² Duamplo tan liman pulgada so kaatagey na saramay dalig; wala rad silong na dingding, tan akitekep ed saray kariton ira may ihi.

³³ Singa dalig na karwahi ira may dalig to; gansa ray ihi, bakkag, taglang, tan saray kubo ra.

³⁴ Diad leksab a sokung na balang kariton walay apatiran ampatot a nitekep irad kariton.

³⁵ Kapag kariton walay balkes ya akabariber ed tagey to a siamiran pulgaday lapar to. Nitekep ed kariton ira may ampatot tan saramay dingding,

³⁶ tan adikoraan ira na saray nitatak a kirubin, lion, tan saray palmiran kiew, inermay kawalaay pasen a pakapangitatakan ed sikara, tan aliber iray nitatak a nibalbaliber a gulis.

³⁷ Onya sirin so impakagawa ed saramay kariton. Nampapara ran amin; namparay kabaleg da tan say nengneng da.

³⁸ Nanggawa met si Hiram na samploran kawa; sansasakey ira may kariton. Duaran mitro so benlag na sakey, tan mankargay duan lasus a galon.

³⁹ Inyan tod abalaten na Timplo so limara, diad baybay iray arum a limara; inyan tod abalaten a bokig imay kawa a dipositoway danum.

⁴⁰ Nanggawa met si Hiram na saray banga, pala, tan saray palanggana. Asumpal ton amin iray kimey tod Timplo na Katawan, tan para si Ari Solomon. Nia ray ginawa to: Saray duaran lusek Saray duaran singa yaung ya olo na saramay duaran lusek ed toktok na olo na saramay lusek Saray golunggolung a balibalin imbaliber ed kapag olo-olo Saray apat a lasus a gansan granada a nidasig ya amidwa ed talonton, ya asanlasus so kapag olo na saray lusek Saray samploran kariton Saray samploran palanggana Say kawa Saray labinduan bakan kalakyan ya ampatot na kawa Saray banga, pala, tan saray yaung. Pinasileng a gansa ira yan amin a kagawaan na Timplo, a ginawa nen Hiram para si Ari Solomon.

⁴¹

⁴²

⁴³

⁴⁴

⁴⁵

⁴⁶ Say ari impagawa to ra yan amin diad pandayan a walad nanleetan na Socot tan Zaretan, diad patar na Jordan.

⁴⁷ Ag impasimbang nen Solomon ira yan gansan kagawaan, ta diad karakel da ag nibagay belat da.

⁴⁸ Nanggawa met si Solomon na saray balituk a kagawaan a para Timplo: say altar, say lamisaan a para masanton tinapay,

⁴⁹ saray samploran panangipatoonan na lamparaan a wala rad arap na Sankasantosan a Pasen, limaray walad bandad abalaten tan limaray walad bandad baybay; sary rosas, saray lamparaan, tan saray sipit;

⁵⁰ saray kupa, saray panagpotut na pabilo, saray yaung, saray plato a pananginay insinso, tan saray kawalin pananginay ngalab; tan saray bisagra na saray kaput na Sankasantosan a Pasen tan bisagra na saray kaput na saray puirtay Timplo. Balituk ya amin ira yan kagawaan.

⁵¹ Nen asumpal nen Ari Solomon iray amin a kimey ed Timplo, inyan tod saray kuarton panagsinupan ed Timplo ya amin iray amin a bengatlan insaklang nen ama ton David ed Katawansaray pilak, balituk, tan saray arum a kagawaan.

8

¹ "Insan impaawit nen Ari Solomon a mankakasakey ed Jerusalem iray amin a pangulo na saray tribu tan saray boleg na Israel, ta iyakar dad Timplo so Kaban na Sipanan na Katawan manlapud Sion, say siudad nen David.

² "Nantitipon iran amin nen Pista na saray Abung-abung ed kumapiton bulan na Etanim.

³ "Nen akapantitipon lan amin iray pangulo, inalsa na saray papari so Kaban na Sipanan,

⁴ "tan inyakar dad Timplo. Saray papari tan saray Levita inyalis da met ed Timplo so Tuldan Ayamay Katawan, tan amin a kagawaan to.

⁵ "Nantitipon ed arap na Kaban na Sipanan ira di Ari Solomon tan amin a totoo, tan angibagat ira na amayamay a karniro tan baka ya ag ira nabilang lapud karakel da.

⁶ "Insan saray papari inawit dad dalem na Timplo so Kaban na Sipanan tan inyan dad Sankasantosan a Pasen, diad silong na saray payak da ray kirubin.

⁷ "Saray akabuskag a payak da ray kirubin et asakbungan da may kaban tan saramay tiken a panagsakbatan.

⁸ "Siopamay toon manalalagey ed arap na Sankasantosan a Pasen a nanengneng to ray ngoro na saramay tiken. Balet diad arum a pasen ag to ra nanengneng. (Wadman ni ra yan tiken ya anggad natan.)

⁹ "Anggapoy arum a karga to may Kaban na Sipanan likud labat ed saramay duaran tapyak a bato ya inyan nen Moises diman nen walad Palandey na Sinai, nen akisipanan so Katawan ed saray Israelita nen tataynan day Egipto.

¹⁰ Kapaway ed Timplo na saray papari, bilan napno na lorem so Timplo na Katawan.

¹¹ Ag ira makapawil a manggawa na saray susumpalen da, lapud pinano na kagalangan na Katawan so Timplo.

¹² Insan nampikasiy Solomon: Katawan, sikay angilira na agew ed tawen, balet nilabay moy manayam ed kaloreman tan diad ambilonget a pasen.

¹³ Amaalagey ak na marakerakep a Timplon para sika, sakey a pasen a panayaman mo diad ando lan ando.

¹⁴ Legan a manalalagey iray totood man, inarap ira nen Ari Solomon, tan kinerew ton bindisionan iray Dios.

¹⁵ Inkuanto, Nagalang komun so Katawan a Dios na Israel! Sinumpal toy sipan tod amak a David, nen inkuantod sikato,

¹⁶ Manlapud samay agew ya impangipaway kod Egipto na saray totook ya Israelita, ag ak nampili na anggan anton siudad ed intiron dalin na Israel a pangipaalageyan na timplon pangigalangan ed siak. Balet pinili ta ka, David, a manoley ed saray totook.

¹⁷ Intuloy nen Solomon ya inkuan, Nampilalekan nen amak a David so mangipaalagey na timplo a pangigalangan ed Katawan a Dios na Israel,

¹⁸ balet inkuan na Katawan ed sikara, Maung so impanpilalek mon mamaalagey na timplo a para siak,

¹⁹ balet aliwan sikay mangipaalagey. Say dilin lakin anak mo so mangipaalagey na timplok.

²⁰ Sinumpal natan na Katawan yan sipan to; sinalatan kon manarid Israel si amak a David, tan nipaalagey koy timplon pangigalangan ed Katawan a Dios na Israel.

²¹ Nanggawa ak met na pasen ed Timplo a pangiliraan na Kaban na Sipanan a nankarga na saray tapyak a bato a tanda na impisipanay Katawan ed saray lalaki tayo nen impaway to ra ed Egipto.

²² Kayari to ya, dia nid arap na saray totoo, nanalagey si Solomon ed arap na altar. Intagey to ray lima to

²³ tan nampikasi, Katawan a Dios na Israel, anggapoy arum a dios a miparad sika diad tawen odino diad dalin! Matoor kad impisipanan mod saray totoom tan ipapanengneng moy ag mangoman a panangarom ed saray totoon sigput a matoor ed sika.

²⁴ Tinoor moy sipan mod amak a David ya aripen mo, tan diad sayan agew sinumpal moy amin ya imbagam.

²⁵ Et natan, Katawan a Dios na Israel, pikasik ed sika a sumpal mo pa ni may sakey ya insipan mod amak a David nen inkuan mod sikaton wala lawas so kabyangay boleg ton manari ed Israel, no saray kabyangay boleg to et mapeleng iran mangonur ed sika a singa impangonur tod sika.

²⁶ Kanyan pikasik ed sika, O Dios na Israel, a sumpal mo pay amin ya insipan mod kinen amak a David ya aripen mo.

²⁷ Balet tua kasin makapanayam ka ed tapew na dalin, O Dios? Ag ka nakarga na anggan say intiron tawen; panon ko sirin a kargaen na sayan Timplon impaalagey ko?

²⁸ Katawan a Dios ko, dengel mo pay pikakasik tan saray kerew ko natad sayan agew, siak ya aripen mo.

²⁹ Bantayan mo pad agew tan labi yan Timplo, say pasen a pinilim a pangigalangan ed sika. Dengel mo ak pa sirin legan kon mampipikasi ya akaarap ed sayan Timplo.

³⁰ Dengel mo pa ray pikakasik tan saray pikakasi na saray totoom no mampikasi ran akaarap ed sayan Timplo. Diad ayaman mon tawen, dengel mo kami pa tan pirdona mo kami.

³¹ No nidalem so siopaman a too lapud impanggawa toy kaogsan ed kapara ton too tan niakar ed altar mo diad sayan Timplo, ta mansamban anggapoy kasalanan to,

³² O Katawan, dengel ka pad tawen tan sintinsiaan mo ray aripen mo. Dusam pay toon nankasalan onung na kanepegan to, tan ibolus moy anggapoy kasalanan.

³³ No atalo na saray kalaban da iray totoom ya Israelita lapud nankasalanan irad sika, insan ira ompawil ed sika tan mampikasi rad sika diad sayan Timplo, ta onkerew iray pirdona,

³⁴ dengel ka pad tawen. Pirdonam pa ray kasalanan da tan ipawil mo rad dalin ya inter mod saray lalaki ra.

³⁵ No mankasalanan ed sika ray totoom, et dusaen mo ra diad panamegley na ag mo pangiter na oran, insan ira magbabawi tan onarap irad sayan Timplo diad pampikasi ra,

³⁶ dengel mo pa rad tawen. Pirdonam pa ray kasalanan na ari tan saray totoom ya Israelita. Ibangat mo pad sikaray matonung a pambilay da, tan ipelag moy oran ed sayan dalin mo ya impatawir mod saray totoom.

³⁷ No walay eras ed dalin, odino salot, odino namagaan iray tanaman, odino deralen ira na saray dorun, odino dogpaan na saray kalaban iray totoom, odino mansakit o manginagem ira,

³⁸ dengel mo pa ray pikakasi ra. No siopaman ed saray totoom ya Israelita, odino amin da, et iyonat day kalimaan da ed sayan Timplo diad pampikasi ra lapud impapuson ermen da,

³⁹ dengel mo pay pikakasi ra. Diad ayaman mod tawen dengel mo pa ra, pirdonam ira, tan tulongan mo ra. Sika labat so makaamta ed kanunotan na balang sakey a too. Iter mo pad balang sakey so kanepegan ton awaten,

⁴⁰ pian takotan ka na saray totoom legay panaon na pambilay da ed dalin ya inter mod saray lalaki ra.

⁴¹ No say sakey a sangkailin manaayam ed arawin bansa et nadngelan toy inkabantug mo tan saray ankakabaleg a bengatlan gagawaen mod saray totoom, et onla diad igalang to ka tan mampikasi diad dalem na Timplo,

⁴²

⁴³ dengel mo pay pikakasi to. Diad ayaman mod tawen dengel mo pa, tan iter mo so antokaman a kerewen tod sika, pian naamtaan tan takotan ka na amin a katoowan ed mundo a singa pakaamta tan itatakot ed sika na saray dilin totoom. Naamtaan dad satan a diad sayan Timplo ya impaalagey ko so nepeg a pangigalangan ed sika.

⁴⁴ No iganggan mo ray totoom ya onla ran mibakal ed saray kalaban da et mampikasi rad sika iner man so kawalaan da ya akaarap irad sayan siudad a pinilim tan diad sayan Timplo ya impaalagey kon para sika,

⁴⁵ dengel mo pa ray pikakasi ra. Dengel mo pa rad tawen tan panalom ira.

⁴⁶ No mankasalanan ed sika iray totoomta anggapo lantiy anggan sakey a toon ag mankakasalanantan diad pasnuk mo, et ipatalom irad saray kalaban da tan ipadakep mo rad arum a dalin ya anggan anto lay kaarawi to,

⁴⁷ dengel mo pa ray pikakasi na saray totoom. No diad saman a dalin et magbabawi ra tan mampikasi rad sika, ipatwa ray inkakasalanan tan inkaoges da, dengel mo pay pikakasi ra, O Katawan.

⁴⁸ No diad saman a dalin et petepeteg tan masimoon iran magbabawi tan mampikasi ran akaarap ed sayan dalin ya inter mod saray lalaki mi, diad sayan siudad a pinilim tan diad sayan Timplo ya impaalagey kon para sika,

⁴⁹ dengel mo pa ray pikakasi ra. Dengel mo pa rad ayaman mon tawen, tan kasian mo ra.

⁵⁰ Pirdonam pan amin iray kasalanan da tan say inkasumlang dad sika, tan iyabuloy mon kasian ira na saray kalaban da.

⁵¹ Totoom iran dili ya impaway mod Egipto, say bansan singa tonaway balatyang.

⁵² Katawan a Dios, maabig lawas komun so linawam ed saray totoom tan say ari ra, tan dengel moy pikakasi ra kapag onkerew irad sikay tulong.

⁵³ Ta pinilim irad saray katoowan ed intiron mundo, pian magmaliw iran dilin totoom, onung na imbagam ed panamegley nen Moises ya aripen mo nen impaway mod Egipto iray lalaki mi.

⁵⁴ Kasumpal nen Solomon a nampikasi ed Katawan, nanalagey ed arap na altar, a diman lay nantalimukoran ton akatagey iray lima to.

⁵⁵ Diad maksil a bosis kinerew ton bindisionan na Dios iray totoon nandaragop diman. Inkuanto,

⁵⁶ Nadayew komun so Katawan ya angiter na kareenan ed saray totoo to, onung na insipan to. Sinumpal ton amin iray maabig ya insipan to diad panamegley na aripen ton si Moises.

⁵⁷ Miayam komun ed sikatayo so Katawan a Dios tayo, a singa impiayam tod saray lalaki tayo; ag to itayo komun taynanan o kaindanan;

⁵⁸ pagmaliwen to itayo komun a maonur ed sikato, pian mambilay itayo lawas onung ed linawa to tan onuren tayo ray ganggan tan saray bilin ya inter tod saray lalaki tayo.

⁵⁹ Lawas nanunotan komun na Katawan yan pikakasik tan saray kerew kod sikato. Lawas kasian to komun iray totoo ton Israelita tan say ari ra ya iter to ray inagew-agew a nakaukolan da.

⁶⁰ Diad saya, naamtaan na amin a katoowan ed intiron mundo a bukbukor na Katawan so Diosanggapo lay arum.

⁶¹ Sikayo ran totoo to, matoor kayo komun lawas ed Katawan a Dios tayo, maonur ed saray ganggan tan saray bilin to, a singa gagawaen yo la natan.

⁶² Insan angibagat ed Katawan si Ari Solomon tan amin da ray totoo.

⁶³ Duamplo tan duan libon baka tan sanlasus tan duamplon libon karniro so insaklang nen Solomon a bagat a para kareenan. Diad onya insaklang nen Solomon tan amin da ray totoo so Timplo.

⁶⁴ Diad saman met ya agew insaklang met nen Solomon ed Katawan so pegley a parti na patio a walad arap na Timplo, insan angisaklang diman na saray bagat a popoolan, saray bagat a trigo, tan say taba na saray bagat a para kareenan. Dia to ra insaklang ta say gansan altar et melag a pangisaklangan ed sarayan bagat.

⁶⁵ Pitoy agew, diad Timplo a sinilibraan nen Solomon tan amin da ray Israelita so Pista na saray Abung-abung. Dinmago ya amin iray totoo a nanlapud nandoroman pasen, manlapud dalan a tatawagey Hamat diad baybay ya anggad ketegay Egipto diad abalaten.

⁶⁶ Diad kumawalon agew, pinasempet la nen Solomon iray totoo. Inggalang na amin a totoo si Ari Solomon tan sinmempet iran maliket lapud amin a bindision ya inter na Katawan ed aripen ton David tan saray totoo ton Israelita.

9

¹ "Kayarin impaalagey nen Ari Solomon so Timplo tan say palasio to tan amin nin arum a nilabay ton impaalagey,

² "pinmayawar lamet so Katawan ed sikato, a singa samay agawa lad Gabaon.

³ "Inkuan na Katawan ed sikato, Nadngel koy pikakasim. Pasantosen ko yan Timplon impaalagey mo, ta sikatoy pasen a pangigalangan ed siak diad ando lan ando. Asikasoen tan iyagel ko ed anggan anton panaon.

⁴ "No panlingkuran mo ak diad katooran tan kasantosan a singa impaglingkur nen amam a David tan onuren mon amin iray bilin tan saray ganggan ko,

⁵ "sumpalen ko may insipan kod kinen amam a David nen imbagak ed sikato a sakey a kabyangay boleg to so lawas manoley ed Israel.

⁶ "Balet no sika odino saray kabyangay boleg mo et tondaan yo ak ya onuren, tan ag yo la onuren iray ganggan tan saray bilin kod sikayo, tan manlingkur tan mangigalang kayo lad saray arum a diriyos,

⁷ "paekalen ko ray totook ya Israelita ed dalin ya inter kod sikara. Ikaindan ko met yan pinasantok a Timplo a sikatoy pangigalangan ed siak; balawen tan melag-melagen met na saray totoo ed inerman a pasen so bansan Israel.

⁸ "Bontun na saray deral-deral so pagmaliwan na sayan Timplo, tan nabiglaan tan nikelawan so siopaman ya ondalan. Tepetan da, Akin et ginawa na Katawan so onya ed sayan dalin tan diad sayan Timplo?

⁹ "Onebat iray totoo, Lapud inkaindan na saray totoo so Katawan a Dios da, ya angipaway ed saray lalaki ra ed dalin na Egipto. Sinmingger irad arum a diriyos tan sikara yay inggalang tan nanlingkuran da. Kanyan inter na Katawan yan kaogsan ed sikara.

¹⁰ Duamploy taon ya impaalagey nen Solomon so Timplo tan say palasio to.

¹¹ Si Ari Hiram na Tiro so angiter ed sikato na amin a kiew a sidro tan saleng tan amin a balituk a kinaukolan tod sayan kimey. Nen asumpal la ran nipaalagey, initdan nen Ari Solomon si Hiram na duamplon baley a walad sakop na dalin na Galilea.

¹² Linmay Hiram, ta nengnengen to ra may baley, balet ag akaliket ed anengneng to.

¹³ Kanyan inkuantod kinen Solomon, Anto ra man a klasin baley so inter mod siak, agi? Lapud saya atawag ni ya anggad natan iman a pasen na Cabul.

¹⁴ Ngalngalin limaran toniladan balituk so impaiyakar nen Hiram ed kinen Solomon.

¹⁵ Pinasoot ya impankikimey nen Ari Solomon iray angipaalagey na Timplo tan say palasio, saray nantabun na dalin ed bokig na siudad, tan saray angipaalagey na padir na siudad. Pinasoot to met ya impankikimey iray amasimbalon angipaalagey na saray baley na Hazor, Megido, tan say Gezer.

¹⁶ (Nen saman dinogpaan na ari ed Egipto so Gezer tan adakep to. Pinapatey to ray Cananeo a manaayam ed sayan baley, insan pinoolan to. Insan to impangaro ed kinen anak to nen naasawa nen Solomon,

¹⁷ kanyan si Solomon so amasimbalon angipaalagey ed sayan baley.) Pinasoot met ya impankikimey nen Solomon iray totoon amasimbalon angipaalagey na Aleksab a Bet-horon,

¹⁸ Baalat, Tamar ed kalawakan na Juda,

¹⁹ saray baley a panagsinupan na saray abasto to, saray baley a kawalaan da ray kabayo tan saray karwahi to, tan saray arum a nilabay ton inpaalagey ed Jerusalem, diad Libano, tan diad saray arum a pasen ed nanarian.

²⁰ Saray pinapasoot nen Solomon ya impankikimey et saray kabyangay boleg na saray totoon manaayam ed Canaan ya ag pinatey na saray Israelita nen nilooban day dalin. Kabyangan na sayan boleg iray totoon Amorreo, Heteo, Perezeo, Heveo, tan Jebuseo. Aripen ni ya anggad natan iray totoon kabyangay boleg na sarayan totoo.

²¹

²² Si Solomon anggapoy Israelitan ginawa ton aripen, no ag ingen impanlingkur to ran sondalo, opisyal, pangulo na saray sondalo, kapitan na saray kumakarwahi, tan kumakabayo.

²³ Liman lasus tan limamplon opisyal iray makaoley ed saray totoon pinasoot a mankimey ed saray nandoroman impaalagey nen Solomon.

²⁴ Nen say biin anak na ari na Egipto ya asawa nen Solomon et akaalis lan manlapud Siudad nen David tan manaayam lad palasion impagawa nen Solomon para sikato, impatabunan nen Solomon so dalin a walad bokig na siudad.

²⁵ Mamitlod sakey taon a mangisaklang si Solomon na saray bagat a popoolan tan saray bagat a para kareenan, diad altar ya impaalagey ton para Katawan. Nampopool met na insinson para Katawan. Onya so impakasusumpal na Timplo.

²⁶ Nanggawa met si Solomon na amayamay a barko diad Ezion-geber ya asingger ed Elot diad gilig na Dayat na Akaba tan sakop na dalin na Edom.

²⁷ Angibakiy ari Hiram na pigaran totoo ton walad saray barko to ya angibad saray totoo nen Solomon.

²⁸ Nambiahi rad dalin na Ofir, tan diad impawil da angawit irad kinen Solomon na ngalngali labinanem a toniladan balituk.

10

¹ "Nadngelan na riyna na Seba so inkabantug nen Solomon, kanyan linmad Jerusalem ta suboken toy Solomon diad panamegley na saray mairap a tepet.

² "Sinmabin kaiba to ray amayamay ya aripen, pati saray kamilyo a napnoy beneg da na saray rikado, alahas, tan balituk. Nen kaarap toy Solomon, intepet to lay amin a nanunotan to.

³ "Inebatan iran amin nen Solomon; anggapoy nanirapan ton impaliwawad sikato.

⁴ "Samay riyna na Seba nadngel toy kakabatan nen Solomon tan anengneng toy palasio ya impaalagey to.

⁵ "Anengneng to ray niparongod lamisaan to, saray ayaman da ray opisyal to, say inkaoksuy da ray kimikimey ed palasio tan saray isosolung dan kawes, saray aripen a mansisirbid sikato no pista, tan saray isasaklang ton bagat ed dalem na Timplo. Mapalaloy pankelaw to diad impakanengneng tod sarayan amin.

⁶ "Inkuantod Ari Solomon, Tuan amin iray nadngelan ko nipaakar ed sika tan say kakabatan mo nen wala ak ed dilin bansak!

⁷ "Balet ag ak anisia ya anggad impakakar ko dia, et siak a diliy akanengneng. Say nadngelan ko et ag onkapalduad tuan kakabatan mo; laon aralem so kakabatan mo tan dakerakel ni so kayamanan mo nen say samay nibagad siak.

⁸ "Mapalar iray asawam! Mapalar iray aripen mo, a wala ra lawas ed arap mo tan narerengel day kakabatan mo!

⁹ "Nadayew komun so Katawan a Dios mo! Diad impakaliket tod sika, ginawa to kan ari na Israel. Lapud andiangga so panangaro tod Israel, impagmaliw to kan ari ra pian napansiansiam so kaptekan tan katonungan.

¹⁰ Insan samay riyna na Seba initdan toy Solomon na ngalngali limaran toniladan balituk tan saray amayamay a rikado tan alahas. Diad amin da ray rikadon naawat nen Solomon ed anggan anton panaon, sankarakelan ira yay inter to.

¹¹ (Likud ed saray balituk ya inawit na saray barko nen Hiram nen kasabi ran nanlapud Ofir, nanawit met iray amayamay a tablan sandalo tan alahas.

¹² Inkana nen Solomon ira yan tabla ed Timplo tan diad palasio, tan inkana to ra met ed impanggagawa to na saray arpa tan saray saltirio a para saray tumutogtog tan saray kumakanta. Sankaabigan yan tablan sandalo a nilakod Israel; anggapo niy singa onyan anengneng ya anggad natan.)

¹³ Inter nen Solomon ed kinen riyna na Seba so antokaman a kinerew to, andi bali ni ray arum a naogaliyan a rigalon inter tod sikato. Insan pinmawil lad dalin na Seba imay riyna tan saray aripen to.

¹⁴ Tinaon a makakaawat si Ari Solomon na masoluk a duamplo tan liman toniladan balituk,

¹⁵ likud ed buis na saray nigosianti, tan saray inter na saray ararid Arabia, tan saray gobirnador na distrito na Israel.

¹⁶ Nanggaway Solomon na duan lasus ya ankabaleg a samper tan inokupan to na pitoran kilon balituk so balang sakey.

¹⁷ Nanggawa met na talon lasus ya ankelag a samper tan inokupan to na duaran kilon balituk so balang sakey. Inyan to ra yan amin a samper ed Baleg a Kuarton Takel na Libano.

¹⁸ Nanggawa met na baleg a tronon garing tan inokupan to na sankaabigan a balituk.

¹⁹ Anemiray balitang to yan trono tan kapag samput na balang balitang walay kinortin lion; labindua ran amin. Diad beneg na trono walay kinortin olo na bakan kalakyan, tan diad diking na balang panangitapeway lima walay kinortin akaalagey a lion. Anggapoy nanarian a walay onyan trono to.

²⁰ Balituk ya amin iray kupa nen Solomon, tan puron balituk ya amin iray ikakana ed baleg a kuarton tatawagey Takel na Libano. Anggapoy pilak ya inkana, ta diad panaon nen Solomon aliwa nin mabli so pilak.

²¹

²² Wala ray bapor ton ombibiahid Tarsis a kaiba da ray bapor nen Hiram. Kapag kayariy taloy taon ompawil iran sankaawit da ray balituk, pilak, garing, tan saray bakes ya ankelag tan ankabaleg.

²³ Mayaman tan makabat niy Ari Solomon nen saray arum ya arari.

²⁴ Nampilalekan na sankamundoan so onlad sikato, ta ondengel iray kakabatan ya inter na Dios ed sikato.

²⁵ Balang sakey a linma inawitan to na rigalosaray kagawaan a balituk tan pilak, saray kawes, saray armas, saray rikado, saray kabayo, tan saray mula. Tinaon yan nagagawa.

²⁶ Si Solomon nantipon na sanlibo tan apat a lasus a karwahi tan labinduan libo a kabayon para bakal. Impanayam tod Jerusalem iray pigara ed saraya, tan impanayam tod nandoroman siudad iray arum.

²⁷ Legan na impanoley to, say pilak et singa karakel na bato ed Jerusalem tan saray tablan sidro et singa karakel na kiew a sikamoro ed alusadsar na kapokdulay Juda.

²⁸ Saray nigosianti na ari nansasaliw irad Musri tan Cilicia na saray kabayo to.

²⁹ Nansasaliw met irad Egipto na saray karwahi. Nanlalako rad saray ararin Heteo tan Siriano na saray kabayo tan saray karwahi; anem a lasus a pilak so bili na sakey na karwahi tan sanlasus tan limamplon pilak so sakey a kabayo.

11

¹ "Amayamay si bibiid arum a bansa so naibegan nen Solomon. Likud ed samay inasawa ton anak na ari ed Egipto, angasawa ni na saray bibiin Moabita, Ammonita, Edomita, Sidonia, tan Hetea.

² "Inasawa to ra, anggaman ya ingganggan na Katawan ed saray Israelita ya ag ira mangasawa o miasawa ed sarayan totoo, ta tanggoyuren dan mangigalang ed arum a diriyos iray Israelita.

³ "Angasawa na piton lasus a prinsisa tan angyamung ni na talon lasus ya arum iran bibii. Tinanggoyur dan onarawi ed Dios,

⁴ "et masiken la nen naayat dan mangigalang ed saray diriyos na arum a bansa. Ag to naaligay ama ton David a matoor ed Katawan a Dios to.

⁵ "Inggalang nen Solomon si Astarte a diosa na Sidon, tan si Milcom a makapaingungot a dios na Ammon.

⁶ "Nankasalanan ed Katawan, kanyan ag to naaligay ama ton David a matoor ed Katawan.

⁷ "Diad tapew na palandey ed nibokig na Jerusalem, nanggaway pasen a pangigalangan ed kinen Cemos a makapaingungot a dios na Moab. Nanggawa met na pasen a pangigalangan ed kinen Milcom a makapaingungot a dios na Ammon.

⁸ "Nanggawa met ni na arum iran pasen a panangigalangan, a dimay pakapampoolan na insinso na saray asawa ton sangkaili tan dimay pakapangisaklangan da na saray bagat dad saray diriyos dan dili.

⁹ "Anggaman ya amidwan pinmayawar ed kinen Solomon so Katawan a Dios na Israel tan ingganggan tod sikaton ag mangigalang ed saray diriyos na arum a bansa, ag tinmoluk si Solomon ed sikato; inarawian to ni ingen. Kanyan akapasnuk so Katawan ed kinen Solomon,

¹⁰ tan kuantod sikato, Lapud ginagalam a dineral so impisipanan mod siak tan ag mo inonur iray ganggan kod sika, ekalen kon ekalen so nanarian ed sika tan iter kod sakey ed saray opisyal mo.

¹¹

¹² Anggaman ontan, lapud kinen amam a David ag ko ya gawaen legan mon mambibilay, no ag ingen legan na panooley na anak mon laki.

¹³ Ag ko ekalen ed sikatoy intiron nanarian; ingen mangikera ak na sakey a tribu, lapud kinen aripen kon David tan lapud Jerusalem a pinilik a siudad ko.

¹⁴ Kanyan tinanggoyur na Katawan si Hadad a kabyangay pamilya na ari ed Edom ya onlaban ed kinen Solomon.

¹⁵ Nen saman a panaon kasakbayan to ya, nen tinalo nen David so Edom, linmad may Joab a pangulo na saray sondalo to, ta ipompon to ray inaatey. Nanayam na anem bulan ed Edom si Joab tan saray totoo to. Legan to yan panaon pinapatey da ray lalakin taga Edom

¹⁶

¹⁷ likud ed kinen Hadad tan saray pigaran aripen nen ama to a taga ra Edom, ta akabatik irad Egipto. (Ogaw nid saman si Hadad.)

¹⁸ Manlapud Madian, linma rad Paran a walad sayan lugar so pigaran lalakin akikasakey ed sikara; insan ira tinmuloy ed Egipto. Linma rad ari, tan initdan to ray sakey ya abung, tagano, tan dalin.

¹⁹ Nala nen Hadad so maung a linawa na ari na Egipto, et impaasawa na ari ed kinen Hadad so ayro ton agi nen Riyna Tapenes.

²⁰ Akaanak ed sikato na sakey a laki a si Genubat, a pinabaleg na riyna ed palasio a dimay nanayaman ton kaiba to ray lalakin anak na ari.

²¹ Nen nadngelan nen Hadad ed Egipto so balitan inatey lay David tan si Joab a pangulo na saray sondalo, inkuantod kinen ari, Abuloyan mo pan ompawil ak ed dilin bansak.

²² Balet tinepet na ari, Akin? Walay kinulangan kod sika, kanyan labay mo lay onsempet? Abuloyan mo ak labat ya onla, ebat nen Hadad ed ari. Kanyan pinmawil ed dilin bansa to si Hadad. Maoges tan mapalalon kalaban na Israel si Hadad ya ari na Edom.

²³ Tinanggoyur met na Dios ya onlaban ed kinen Ari Solomon si Rezon a lakin anak nen Eliada. Imbatikan nen Rezon si amo ton Ari Hadadezer na Zoba,

²⁴ tan nagmaliw a pangulo na grupoy tutulisan. (Agawa ya nen tinalo nen David si Hadadezer tan pinapatey to ray Sirianon kakaiba to.) Linman nanayam ed Damasco si Rezon tan saray totoo to, tan ginawad man na totoo to ya arid Siria.

²⁵ Kalaban na Israel si Rezon legan a mabilay si Solomon.

²⁶ Say sakey nin linmaban ed kinen Ari Solomon et say sakey ed saray opisyal to, si Jeroboam a lakin anak nen Nebat tan taga Sereda na Efraim. Balon manngaran na Zerua so ina to.

²⁷ Onyay makasengeg na insumpa tod kinen Solomon. Mampapatabun na dalin nen saman si Solomon diad bokig na Jerusalem tan itutuloy ton pagaway padir na siudad.

²⁸ Wala nid kalangweran si Jeroboam tan walay ibabaga ton too. Nen naimano nen Solomon so inkakoli to, ginawa ton makaoley ed amin da ray pinasoot a mankimey diad lugar da ray tribu di Manases tan Efraim.

²⁹ Aminsan ya agew, nen manaakar a nanlapud Jerusalem si Jeroboam, inabet nen propita Ahias a taga Silo; bukbukor dan dua ed dalan diad maawang a bario. Akasolung na balon kawes si Ahias;

³⁰ nilakseb to, impankalabindua to,

³¹ insan to inkuan ed kinen Jeroboam, Ala kay samploran pinglis para sika, ta say Katawan a Dios na Israel kuantod sika, Ikalen toy nanarian ed kinen Solomon, tan iter kod sikay samploran tribu.

³² Natilak ed kinen Solomon so sakey a tribu lapud aripen kon David tan lapud Jerusalem, say siudad a pinilik ed intiron dalin na Israel.

³³ Gawaen ko ya, ta impolisay ak nen Solomon tan angigalang ed Astarte a diosa na Sidon, Cemos a dios na Moab, tan Milcom a dios na Ammon. Ag ak inonur nen Solomon; ag to inalig si ama ton David a nanggaway katonungan tan angonur ed saray ganggan tan saray bilin kod sikato.

³⁴ Balet ag ko ekalen so intiron nanarian ed kinen Solomon, tan pansiansiaen kon manoley legan ton mambibilay, lapud kinen pinilik a David ya aripen kon angonur na saray ganggan tan saray bilin ko.

³⁵ Ekalen koy nanarian ed anak ton laki, insan ko iter ed sikay samploran tribu.

³⁶ Iter koy sakey a tribu ed lakin anak nen Solomon, pian nawalaan ak lawas na kabyangay boleg nen aripen kon David a manoley ed Jerusalem, say pinilik a siudad a pangigalangan ed siak.

³⁷ Gawaen ta ka, Jeroboam, ya ari na Israel, tan manoley ka ed amin a lugar a labay mo.

³⁸ Wala ak lawas ed sika no sigput ya onuren mo ak tan gawaen moy linawak diad panumpal mod saray ganggan tan saray bilin ko a singa ginawa nen David ya aripen ko. Gawaen ta kan ari na Israel tan pansiansiaen ko a saray kabyangay boleg mo so onsalat ed sikan manoley, a singa samay ginawak ed kinen David.

³⁹ Lapud kasalanan nen Solomon dusaen ko ray kabyangay boleg nen David, balet aliwan ando lan ando so panusak.

⁴⁰ Lapud saya, labay a pateyen nen Solomon si Jeroboam, balet batik ed Ari Sisak na Egipto tan nanayam diman ya anggad impatey nen Solomon.

⁴¹ Nisulat ed libron Say Awaran nen Solomon iray arum nin gawgawa tan say nipaakar ed kakabatan nen Solomon.

⁴² Nanayam ya ari ed Jerusalem legan ton nanoley ed intiron Israel na apataploy taon.

⁴³ Inatey tan nipompon ed Siudad nen David, insan sinmalat ed sikaton nanari si Roboam a lakin anak to.

12

¹ "Linmay Roboam ed Sikem a nantitiponan na saray totood Israel a wala rad baybay, ta gawaen dan ari.

² "Nadngelan ya nen Jeroboam a lakin anak nen Nebat, a wadman nid Egipto a dimay nila to nen imbatikan toy Ari Solomon, kanyan pinmawil manlapud Egipto.

³ "Impaawit na saray tribu ed baybay, insan ira linman amin ed kinen Roboam tan kuandad sikato,

⁴ "Ambelat so impasakbat nen amam ed sikami. No palemewan moy sasakbaten mi tan painomayan moy panagbilay mi, panlingkuran mi ka.

⁵ "Pawil ki dia kayariy taloy agew, ta ibagak ed sikayoy ebat ko, inkuantod sikara. Kanyan linma la ra.

⁶ "Insan impanon ya nen Roboam ed saray mamatakken a lalakin sumisimbawa nen ama ton Solomon. Antoy isimbawa yon iyebat kod saraman a totoo? tepet tod sikara.

⁷ "Inmebat ira, No labay mo a maung so panlingkur mod saraman a totoo, iter moy kerew da, et matoor ira lawas a manlingkur ed sika.

⁸ "Balet ag dinengel nen Roboam so simbawa ra. Ingen linmad saray lalakin binmaleg a kaiba to a sikaray sumisimbawa to la natan.

⁹ "Tinepet tod sikara, Antoy isimbawa yod siak? Antoy ibagak ed saraman a totoon onkekerew a palemewan koy sasakbaten da?

¹⁰ Inmebat ira, Onyay ikuan mod saraman a totoo: Mabiskeg niy kiking ko nen say ulpo nen amak.

¹¹ Ambelat so impasakbat ed sikayo nen amak; ambelat niy ipasakbat kod sikayo. Nilatiko kayo nen amak; pekpeken ta kayoy balatyang!

¹² Kayariy taloran agew, pinmawil ed kinen Ari Roboam si Jeroboam tan amin a totoo, onung na imbaga na ari ed sikara.

¹³ Maruksa ya inmebat ed sikara tan ag to tinombuk so simbawa da ra may mamatakken a sumisimbawa.

¹⁴ Sinalita to may impaikuan na saray mamalangwer a sumisimbawa: Ambelat so impasakbat ed sikayo nen amak; ambelat niy ipasakbat kod sikayo. Nilatiko kayo nen amak; pekpeken ta kayoy balatyang!

¹⁵ Say Katawan so akanlinawa a si Roboam et ipolisay toy kerew na saray totoo, pian napatwa so imbaga tod kinen Jeroboam diad panamegley nen propita Ahias a taga Silo. Sikato yay makasengeg ya ag dinengel na ari iray totoo.

¹⁶ Nen abirbir na saray totoo ya ag ira dengelen na ari, inmeyag ira, Anggapo lay pibibiang tayod kinen David tan say pamilya ko. Antoy ginawa ran para sikatayo? Totood Israel, onsempet ti la! Akaoley lad sikaton dili si Roboam! Kanyan sinmempet lan amin iray totood Israel.

¹⁷ Pinaolyan da lay Roboam a nanoley ed saray totoon manaayam labat ed sakop na Juda.

¹⁸ Insan imbaki nen Ari Roboam si Adoniram, say makaoley ed saray totoon pinasoot a mankimey, ya onlad saray Israelita, balet tinutupak da ya anggad inatey. Lapud saya, nangganat si Roboam a linmogan ed karwahi to, insan batik ed Jerusalem.

¹⁹ Nanlapud saman, sumpad saray manaarin kabyangay boleg nen David iray totood baybay a nanarian na Israel.

²⁰ Nen nadngelan na saray totood Israel a pinmawil lay Jeroboam a nanlapud Egipto, binagaan dan mitongtong ed saray totoo, insan da ginawan ari na Israel. Saray kabyangan labat na tribu nen Juda so nansiansian matoor ed saray kabyangay boleg nen David.

²¹ Nen akasabid Jerusalem si Roboam, impantitipon to ray sanlasus tan walomplon libo a pinilin lalaki ed saray tribu di Juda tan Benjamin, ta mibakal ira pian nipawil tod sikaton dili so panagoley tod saray tribu na Israel a wala rad baybay.

²² Balet imbaga na Dios ed kinen propita Semaya

²³ ya onlad kinen kinen Ari Roboam na Juda, ta ibaga tod sikato tan amin a totood saray tribu di Juda tan Benjamin

²⁴ a say Katawan kuanto, Ag yo dodogpaan iray dilin agagi yo, saray totood Israel. Sempet kayo la, balang sakey ed sikayo, ta siak so nanlapwan na samay agawa. Inonur dan amin so ganggan na Katawan, kanyan sinmempet la ra.

²⁵ Si Ari Jeroboam na Israel niliber toy padir so baley na Sikem diad nipokdul a luyag na Efraim tan nanayam diman ya agano. Tinmaynan diman tan niliber toy padir so baley na Penuel ya inalisan to.

²⁶ Inkuantod sikaton dili, No onya lan onyay nagagawa ya onlad Jerusalem iray totook a mangibagat ed Katawan diad Timplod man, naayat iran migampid kinen Ari Roboam na Juda, insan da ak pateyen.

²⁷

²⁸ Kayari to yan dinalepdep, nanggawa na duaran balituk a kilaw na bakan kalakyan, insan inkuantod saray totoo, Abaybayag lay iyaakar yo lan iyaakar a mangigalang ed Jerusalem. Tondaan yo la. Totood Israel, nia ray diriyos yo ya angipaway ed sikayo ed Egipto!

²⁹ Inyan tod Betel imay sakey a bakan balituk tan diad Dan so sakey.

³⁰ Kanyan nankasalanan iray totoo diad iyaakar dan mangigalang ed Betel tan diad Dan.

³¹ Nanggawa met ed saray toktok na pokdul na saray pasen a panangigalangan, tan anoro na saray papari diad saray pamilya ya aliwa ran kabyangan na tribu nen Levi.

³² Ginawa nen Jeroboam a sakey a pista so kumalabinliman agew na kumawalon bulan, kaparay agew a sisilibraan ed Juda. Diad tapew na altar diad Betel nambabagat ed saray bakan balituk a ginawa to, tan angipasen ed Betel na saray papari a manlingkur ed altar a ginawa to.

³³ Diad kumalabinliman agew na kumawalon bulan, say agew a sikaton diliy angigana, linmad Betel, ta mansilibra onung na imbaga ton gawaen na saray totood Israel, diad panamegley na pambagat tod tapew na altar.

13

¹ "Lapud ganggan na Katawan, linmad Betel a nanlapud Juda so sakey a propita tan asabian ton manalalagey ed abay na altar si Jeroboam a mangibabagat.

² "Diad panangonur tod Katawan imay propita, inkuanto, O altar, altar, onyay inkuan na Katawan: Nianak ed pamilya nen David so sakey a lakin ogaw a manngaran na Josias. Pateyen tod tapew mo ray paparin managlingkur ed saray paganon altar tan mangibabagat irad sika; poolan to met ed tapew mo ray pokel na inaatey a totoo.

³ "Intuloy na samay propita ya inkuan, Natemek yan altar, tan nataytayak iray dapul to. No nagawa ya, naamtaan mod satan a nansalitay Katawan diad panamegley ko.

⁴ "Nen nadngel ya nen Jeroboam, intoro to may too tan ingganggan to, Erel yo man a too! Aparalitikon tampol so taklay na ari, kanyan ag to la napikus.

⁵ "Insan biglan atemek so altar tan ataytayak ed dalin iray dapul, a singa samay impasakbay na propita diad ngaran na Katawan.

⁶ "Inkuanen Ari Jeroboam ed samay propita, Ipikasi mo ak pa ed Katawan a Dios mo, tan kerew mon paabigen toy taklay ko. Nampikasid Katawan imay propita, et inmabig so taklay na ari.

⁷ "Insan inkuan na ari ed samay propita, Mila kad siak ed abung, ta pakanen ta ka. Itdan ta ka met na tumang mod ginawam.

⁸ "Inmebat imay propita, Anggan iter mod siak so kapalduay kayamanan mo, ag ak milad sika, odino say oninom o mangan ed sayan lugar,

⁹ "ta ingganggan na Katawan ya ag ak mangan o oninom, tan ag ak ondalan ed dalan a dinalan ko no ompawil ak.

¹⁰ Kanyan nen pinmawil ag dinmalan ed dinalan to, no ag ingen diad sanamey lan dalan.

¹¹ Diad saman a panaon, walay masiken a propitan manaayam ed Betel. Linmad sikato ray lalakin anak to tan imbalita rad sikato may ginawa na propitan taga Juda diad Betel ed saman ya agew, tan no anto so imbaga tod kinen Ari Jeroboam.

¹² Nen tinmaynan imay propita, dinay dinalan to? tepet ed sikara na samay masiken a propita. Intoro rad sikato so dalan,

¹³ insan to imbaga a sintaan day asnon kabayoan to. Ginawa ra, insan kinmabayo.

¹⁴ Tinombuk to may propitan taga Juda, insan to nalmon manyodyorung ed silong na kiew a robli. Sikay propitan taga Juda? tepet to. Siak, ebat to may too.

¹⁵ Mila kad siak ed abung, to mangan ka, inkuanto.

¹⁶ Balet inmebat imay propitan taga Juda, Ag ak milad sikad abung mo odino awaten koy panangkailim ed siak. Ag ak mangan odino oninom na antokaman ed sayan lugar,

¹⁷ ta ingganggan na Katawan ya ag ak mangan odino oninom, tan ag ak ondalan ed dinalan ko no ompawil ak.

¹⁸ Insan inkuan na samay masiken a propitan taga Betel, Propita ak met a singa sika, tan diad ganggan na Katawan inkuan ed siak na anghil ya itagar ta kad abung ko, ta sangkailien ta ka. Balet mantitila may masiken a propita.

¹⁹ Kanyan akilad samay masiken a propita imay propitan taga Juda, insan ira dinmongo.

²⁰ Legan dan mangakan ed lamisaan, nadngel na samay masiken a propita so salita na Katawan,

²¹ kanyan ineyag ton inkuan ed samay propita taga Juda, Imbagay Katawan a lapud ag mo inonur tan ag mo ginaway pagagawa tod sika,

²² no ag ingen pinmawil ka tan angan kad lugar ya ingganggan ton ag mo panganan, napatey ka tan ag nipompon ed lobuk na pamilyam so bangkay mo.

²³ Kayari ran angan samay masiken a propita insintaan toy asno may propitan taga Juda.

²⁴ Linma la may propitan taga Juda, tan diad dalan inabet na lion tan pinatey da. Abaktar ed dalan so bangkay na samay propita, tan nanalagey ed abay to imay asno tan samay lion.

²⁵ Wala ray pigaran totoon dinmalan, et anengneng dad dalan so bangkay, tan samay lion a manalalagey ed ag arawi. Tinmuloy irad Betel, insan da imbalitay anengneng da.

²⁶ Nen nadngelan na samay masiken a propita, inkuanto, Bangkay iman na samay propitan ag to inonur so ganggan na Katawan! Ag tinmoluk kanyan angibakiy Katawan na lion ya amatey ed sikato, onung na imbaga na Katawan a gawaen to.

²⁷ Insan to inkuan ed saray lalakin anak to, Isintaan yo ak na asnon kabayoan ko. Ginawa ray imbaga to,

²⁸ insan nankabayon linma. Nalmo to may bangkay na propitan abaktar ed dalan, tan manalalagey nid abay to ira may asno tan lion. Ag kinan na lion imay bangkay odino diniwit to may asno.

²⁹ Inalsa na samay masiken a propita imay bangkay, inlogan tod beneg na asno, impawil tod Betel, ta panermenan to, insan to ipompon.

³⁰ Imponpon tod lobuk na dilin pamilya to imay masiken a propita tan inermenan to pati saray lalakin anak to. Inkuanda, Agi, O agi!

³¹ Kayariy pompon inkuan na samay propita ed saray anak to, No ompatey ak, ipompon yo ak ed angipomponan ed samay propita, tan iyabay yoy bangkay kod sikato.

³² Ontuan ontua ira may sinalita to, lapud ganggan na Katawan, sumpad altar ed Betel tan saray amin a panangigalangan a pasen ed saray baley na Samaria.

³³ Ag siansian inkaindan nen Ari Jeroboam so maoges a gagawaen to. Intuloy to ingen a pinilid saray ordinarion pamilya iray totoon magmaliw a paparin manlingkur ed saray altar a ginagawa to. Ginawa ton pari so siopaman a toon malabay a mampari.

³⁴ Kasalanan nen Jeroboam yan ginawa to, tan lapud saya sikatoy makasengeg na inkaderal tan inkaandipat na panoley na saray kabyangay boleg to.

14

¹ "Diad saman a panaon nansakit si Abias a lakin anak nen Ari Jeroboam.

² "Inkuanen Jeroboam ed kinen asawa to, Oman moy nengneng mo, pian anggapoy makabirbir ed sika. Insan lakad Silo a panaayaman nen Ahias, say propita angibagan manari ak ed Israel.

³ "Iyawitan mo na samploran tinapay, pigaran kanen, tan sakey a garapon a dilo. Tepet mo no antoy nagawad ogaw, et ibaga tod sika.

⁴ "Kanyan linmad abung nen Ahias diad Silo imay asawa nen Jeroboam. Ag la makanengneng si Ahias lapud kinamasiken to la.

⁵ "Imbaga na Katawan ed sikato ya onsasabiy asawa nen Jeroboam, ta tepeten to so nipaakar ed lakin anak to a mansasakit. Imbaga met na Katawan no antoy nepeg ton ibaga. Sinmabi may asawa nen Jeroboam, tan nankonkoanan a sananey a bii.

⁶ "Balet nen alikas la nen Ahias so isasabi tod puirta, inkuanto, Loob ka. Amtak ya asawa ka nen Jeroboam. Akin et mankonkoanan kan sananey a bii? Walay makapoy a balitak ed sika.

⁷ "Laka ta ibagam ed kinen Jeroboam ya onyay kuan ed sikato na Katawan a Dios na Israel, Pinili ta kad saray totoo tan ginawa ta kan manoley ed saray totook ya Israelita.

⁸ "Inekal koy nanarian ed saray kabyangay boleg nen David tan inter kod sika. Balet ag mo naaligan si aripen kon David a sigput so inkatoor tod siak, inonur to ray ganggan ko, tan say matonung labat so ginawa to ed arap ko.

⁹ "Ambelat ni ray ginawam a kasalanan nen saray akaonan nanoley nen say sika. Impolisay mo ak tan impanpasnuk mo ak lapud impanggagawam na saray talintaoy diriyos tan saray imahin a mital a panagpikasian mo.

¹⁰ Lapud saya deralen koy boleg mo tan pateyen kon amin iray lakin kabyangay boleg mo, malangwer may matakken. Paandipaten koy pamilyam; magmaliw iran singa dotak a pinoolan na sakey a too.

¹¹ Kanen na saray aso so siopaman ya ompatey ed siudad a kabyangay pamilyam, tan siraen na saray manok a buitri so siopaman ya ompatey ed maawang ya alog. Siak a Katawan so nansalita.

¹² Intuloy nen Ahias ya inkuan ed kinen asawa nen Jeroboam, Sempet ka la. Ompatey so ogaw ya anak mo kaloob mod baley.

¹³ Panermenan na amin a totood Israel, insan da ipompon. Sikato labat so kabyangay pamilya nen Jeroboam a maung so kipompon to, ta bukbukor toy akaliketan na Katawan a Dios na Israel.

¹⁴ Mangipayorung so Katawan na sakey a toon manarid Israel tan sikatoy mamaandi ed saray manoley a kabyangay boleg nen Jerobaom.

¹⁵ Dusaen na Katawan so Israel, tan magmaliw a singa kiew a payar ya iwal-iwalen na mabiskeg ya agos na danum. Pataynanen to ray totood Israel ed sayan maung a dalin ya inter tod saray lalaki ra, insan to ra ikaykayat ed nibaliw na Ilog na Eufrates, ta apampasnuk da lapud impanggawa ra na saray talintao nen diosan Asera.

¹⁶ Ikaindan na Katawan so Israel, lapud nankasalanan si Jeroboam tan inlagyat ton nankasalanan iray totood Israel.

¹⁷ Tinmaynan imay asawa nen Jeroboam tan pinmawil ed Tirsa. Kaloob tod abung to, inatey so ogaw ya anak to.

¹⁸ Inermenan na saray totood Israel, insan da imponpon, onung na imbaga na Katawan diad panamegley na aripen ton propita a si Ahias.

¹⁹ Nisulat ed libron Awaran da ray Ararid Israel iray arum nin ginagawa nen Ari Jeroboam, saray bakal ya akilabanan to, tan no panoy impanoley to.

²⁰ Nanari si Jeroboam na duamplo tan duay taon. Inatey, nipompon, insan sinmalat ed sikaton nanari si Nadab a lakin anak to.

²¹ Apataplo tan sakey so taon nen Roboam a lakin anak nen Solomon nen nagmaliw ya ari na Juda, tan nanoley na labinpitoy taon ed Jerusalem, say siudad a pinili na Katawan ed intiron dalin na Israel a pangigalangan ed sikato. Si Naama a taga Ammon so ina nen Roboam.

²² Nankasalanan ed Katawan iray totood Juda tan lalon maoges iray ginagawa ra nen saray ginagawa da ray lalaki ra. Sikaray akasonglur na baleg a pasnuk na Katawan ed sikara.

²³ Nanggagawa ra na saray pasen a pangigalangan ed saray tila-tilan diriyos, saray baton lusek, tan saray talintao nen diosan Asera diad toktok na saray pokdul tan diad silong na saray masalumpapak a kiew.

²⁴ Say sankaogsan ed amin a ginagawa ra et say inkiwala na saray lalaki tan saray bibiin marotak diad saray ginagawa ran altar. Inalig na saray totood Juda iray amin a bengatlan makapabaing a ginagawa na saray totoon pinataynan na Katawan nen nilooban na saray Israelita so bansa.

²⁵ Diad kumaliman taon na panooley nen Roboam, dinogpaan nen Ari Sisak na Egipto so Jerusalem.

²⁶ Imbatik ton amin iray kayamanan ed dalem na Timplo tan palasio, pati saray balituk a samper a ginagawa nen Solomon.

²⁷ Nanggaway Ari Roboam na pigaran gansan samper ya isalat tod saramay balituk a samper, insan to ra impalima ed saray opisyal a makaoley ed saray guardia na saray puirta na palasio.

²⁸ Kapag onlad Timplo so ari awiten na saray guardia ira may samper, insan da ra lamlamang ipawil ed kuarton panagguardiaan.

²⁹ Nisulat ed libron Say Awaran da ray Ararid Juda iray arum nin ginagawa nen Ari Roboam.

³⁰ Legan na impanoley di Roboam tan Jeroboam naynay so impanbabakal dan dua.

³¹ Inatey si Roboam, nipompon ed kamposanto da ray arari diad siudad nen David (say ina to si Naama a taga Ammon), insan sinmalat ed sikaton nanari si Abiam a lakin anak to.

15

¹ "Diad kumalabinwalon taon na panooley nen Ari Jeroboam ed Israel, nagmaliw ya ari na Juda si Abiam,

² "tan nanoley ed Jerusalem na taloy taon. Si Maaca ya anak nen Absalom so ina to.

³ "Ginawa to ray kasalanan a ginagawa nen ama to tan aliwan sigput a matoor ed Katawan a Dios to; ag to naaligan si laki tod dapan a si David.

⁴ "Balet lapud kinen David, say Katawan a Dios to initdan toy Abiam na sakey a lakin anak ya onsalat ed sikaton manoley ed Jerusalem tan mamasiansian arawid kaatapan so Jerusalem.

⁵ "Ginagawa ya na Katawan, lapud ginawa nen David iray makapaliket ed sikato tan ag ton balut sinumlang iray ganggan to, likud ed samay ginawa to ed Urias a Heteo.

⁶ "Legan na impanoley nen Abiam naynay so impanbabakal dan dua nen Jeroboam.

⁷ "Nisulat ed libron Say Awaran da ray Ararid Juda iray arum nin ginagawa nen Abiam.

⁸ "Inatey si Abiam, nipompon ed Siudad nen David, insan sinmalat ed sikaton nanari si Asa a lakin anak to.

⁹ "Diad kumaduamplon taon na panooley nen Ari Jeroboam ed Israel, nagmaliw ya ari na Juda si Asa,

¹⁰ tan nanoley ed Jerusalem na apataplo tan sakey a taon. Si Maaca ya anak nen Absalom so bai to.

¹¹ Ginagawa nen Asa iray makapaliket ed Katawan, a singa saray ginagawa nen David.

¹² Pinataynan tod bansa iray amin a lalaki tan bibiin marotak a manlilingkur ed sray paganon altar, tan inekal to ray amin a talintaoy diriyos a ginagawa na saray akaonan nanoley nen say sikato.

¹³ Inekal to si bai ton Maaca ed kipapasen ton riynan ina, ta nanggawa na makapaingungot a talintao na diosan Asera. Binatang nen Asa imay talintao, insan to pinoolan ed Patar na Cedron.

¹⁴ Nansiansian matoor ed Katawan si Asa legan na impanbilay to, anggan ag to dineral ya amin iray paganon pasen a panangigalangan.

¹⁵ Inyan tod dalem na Timplo ya amin iray kagawaan ya insasaklang nen ama to ed Dios. Inyan to met iray balituk tan pilak a kagawaan ya insasaklang ton dili.

¹⁶ Legan a walad pakaoley ira di Ari Asa na Juda tan Ari Baasa na Israel, naynay iran nambabakal a dua.

¹⁷ Nilooban nen Baasa so Juda tan ginapwan ton paliberan na padir so Rama, pian anggapoy makaonla o makapaway ed Juda.

¹⁸ Kanyan inala nen Ari Asa iray amin a pilak tan balituk ya atilak nid dalem na Timplo tan diad dalem na palasio, insan to ingganggan iray pigaran opisyal to ya iyakar da rad Damasco. Diad Damasco so panaayaman na ari na Siria a si Ari Ben-hadad a lakin anak nen Tabrimon tan apo nen Hezion. Inter dad ari imay pilak tan balituk, insan da sinalita so papaibaga nen Ari Asa:

¹⁹ Manibaan ita, a singa ginawa na saray kaamaan ta. Panangarok ed sika ra yay pilak tan balituk. Lingwanan mo lay impigampim ed Ari Baasa, et ekalen to ray sondalo ton walad nasasakopan kon dalin.

²⁰ Inmabubon ed kinen Asa si Ari Ben-hadad, kanyan imbaki ton ondogpad saray siudad na Israel iray sondalo to tan saray pangulo ra. Adakep day Ijon, Dan, Abel-bet-maaca, say pasen ya asingger ed Dayat na Galilea, tan say intiron nasasakopan na Neftali.

²¹ Nen nadngelan nen Ari Baasa so nagagawa, tinondaan toy pamapadir tod Rama tan linma lad Tirza.

²² Insan ingganggan nen Ari Asa a balang sakey a tood Juda, anggapoy impoktil, et ontulong ed pangekal ed Rama na saray bato tan saray tablan impanpadir nen Baasa. Impamadir nen Asa ira yan bato tan tabla ed Mizpa tan Geba, sakey a siudad a nasasakopan na Benjamin.

²³ Nisulat ed libron say Awaran da ray Ararid Juda iray arum nin ginagawa nen Ari Asa, saray impanatalo tod bakal tan saray baley a pinapadir to. Balet nen masiken la, alopuy lapud sakit na sali a nilikna to.

²⁴ Inatey si Asa, nipompon ed kamposanto da ray arari diad Siudad nen David, insan sinmalat ed sikaton nanari si Josafat a lakin anak to.

²⁵ Diad kumadwan taon na panooley nen Ari Asa na Juda, nagmaliw ya arid Israel si Nadab a lakin anak nen Ari Jeroboam, tan nanoley a duay taon.

²⁶ Nanggagaway kaogsan ed arap na Katawan tan inlagyat ton nankasalanan so Israel, a singa ginawa nen ama to.

²⁷ Si Baasa a lakin anak nen Ahias tan kabyangan na tribu nen Isacar et niliputan toy Nadab tan pinatey to legan a lolooban nen Nadab so siudad na Gibeton diad Filistia.

²⁸ Agawa ya nen kumatlon taon na panooley nen Ari Asa ed Juda. Kanyan sinalatan nen Baasa si Nadab a nanari ed Israel.

²⁹ Kayorung ton ari, ginapwan ton pinatey ya amin iray kabyangay pamilya nen Jeroboam. Onung na imbagay Katawan diad panamegley na aripen ton si Propita Ahias na Silo, apatey ya amin iray kabyangay pamilya nen Jeroboam; anggapoy anggan sakey ya atilak.

³⁰ Agawa ya lapud impanpasnuk nen Jeroboam so Katawan a Dios na Israel, diad impankasalanan to tan diad impangilagyat ton nankasalanan so Israel.

³¹ Nisulat ed libron Say Awaran da ray Ararid Israel iray arum nin ginagawa nen Nadab.

³² Legan a walad pakaoley si Ari Asa na Juda tan si Ari Baasa na Israel, naynay iran nambabakal a dua.

³³ Diad kumatlon taon na impanoley nen Ari Asa ed Juda, nagmaliw ya ari na Israel si Baasa a lakin anak nen Ahias, tan nanoley ed Tirza a duamplo tan apat a taon.

³⁴ Nanggagaway kaogsan ed arap na Katawan tan inlagyat ton nankasalanan so Israel a singa ginawa nen Jeroboam ya akaonan nanoley nen say sikato.

16

¹ "Nansalitay Katawan ed kinen propita Jehu a lakin anak nen Hanani tan impaikuantod kinen Baasa:

² "Ag da ka ni italtalek nen saman, et ginawa ta kan pangulo na saray totook ya Israelita, balet nankasalanan kan singa si Jeroboam tan inlagyat mon nankasalanan iray totook. Pinmetang so olok lapud saray kasalanan da,

³ "kanyan paandipaten ta ka tan saray kabyangay pamilyam, a singa ginawak ed kinen Jeroboam.

⁴ "Kanen na saray aso so angkay na siopaman a kabyangay pamilyam ya ompatey ed siudad, tan siraen na saray manok a buitri so bangkay na siopaman ya ompatey ed kaalogan!

⁵ "Nisulat ed libron Say Awaran da ray Ararid Israel iray arum nin ginagawa nen Baasa tan saray impanatalo tod bakal.

⁶ "Inatey si Baasa, nipompon ed Tirza, insan sinmalat ed sikaton nanari si Ela a lakin anak to.

⁷ "Niiter ed panamegley nen propita Jehu a lakin anak nen Hanani so salita na Katawan sumpad kinen Baasa tan saray kabyangan na pamilya to, lapud saray kasalanan nen Baasa ed Katawan. Aliwa labat a say impanggagawa toy kaogsan, a singa say impanggagawa nen Jeroboam ya akaonan nanoley nen say sikato, so makasengeg na impamasnuk na Katawan, no ag ingen lapu met ed impamatey tod kinen Jeroboam tan amin kabyangan na pamilya to.

⁸ "Diad kumaduamplo tan anem a taon na panooley nen Ari Asa ed Juda, nagmaliw ya ari na Israel si Ela a lakin anak nen Baasa, tan nanoley a duay taon ed Tirza.

⁹ "Nantraidoran nen Zimri a sakey ed saray opisyal ton makaoley ed kapalduad saray karwahi na ari. Aminsan ya agew, maniinom na alak ed Tirza so ari diad abung nen Arza a makaoley ed palasio.

¹⁰ Linmoob ed abung si Zimri, pinatey toy Ela, insan sinalatan ton nanari. Agawa ya diad kumaduamplo tan piton taon na panooley nen Asa ed Juda.

¹¹ Kagapoy impanari nen Zimri, pinatey ton amin iray kabyangay pamilya nen Baasa. Apatey ya amin iray lalakin kakanayon tan kakaaro to.

¹² Kanyan onung na imbagay Katawan sumpad kinen Baasa diad panamegley nen propita Jehu, pinatey nen Zimri ya amin iray kabyangay pamilya nen Baasa.

¹³ Apampasnuk nen Baasa tan say lakin anak ton si Ela so Katawan a Dios na Israel, lapug impangigalang dad saray talintaoy diriyos tan lapud impangilagyat dan nankasalanan iray Israelita.

¹⁴ Nisulat ed libron Say Awaran da ray Ararid Israel iray arum nin ginagawa nen Ela.

¹⁵ Diad kumaduamplo tan piton taon na impanoley nen Ari Asa ed Juda, nanoley ed Tirza diad Israel na pitoy agew si Zimri. Lolooban ed saman na saray sondalo na Israel so siudad na Gibeton na Filistia,

¹⁶ et nen nadngelan dan nantraidoran nen Zimri so ari tan pinatey to, imbawag da lad man a manari ed Israel si Omri a pangulo ra.

¹⁷ Tinaynan nen Omri tan saray sondalo to so Gibeton, ta nila ran nilooban so Tirza.

¹⁸ Nen anengneng nen Zimri ya alooban lay siudad, linmad tirinsira ed dalem na palasio, insan pinoolan toy palasio tan diman la akalut.

¹⁹ Agawa ya lapud saray kasalanan to tan, lapud nilagyat ton nankasalanan so Israel a singa ginawa nen Jeroboam ya akaonan nanoley nen say sikato.

²⁰ Nisulat ed libron Say Awaran da ray Ararid Israel iray arum nin ginagawa nen Zimri pati say impamatey tod lipotan.

²¹ Apaldua so totood Israel: say kapalduad sikara labay et dan manari si Tibni a lakin anak nen Ginat, balet say kapaldua labay day Omri.

²² Diad kaonuran, analo ra may malabay ed kinen Omri; inatey si Tibni tan nagmaliw ya ari si Omri.

²³ Kanyan diad kumatalomplo tan sakey a taon na panooley nen Ari Asa ed Juda, nagmaliw ya arid Israel si Omri, tan nanoley a labinduay taon. Nanoley ed Tirza nen ononan anemiran taon,

²⁴ insan to sinaliw na anem a libon pilak ed toon manngaran na Semer so pokdul na Samaria. Pinadir nen Omri imay pokdul, amaalagey na sakey a baley diman, insan to inngaran na Samaria, say ngaran ya inaon ed Semer ya akankien nen saman ed samay pokdul.

²⁵ Pinalumbasan nen Omri iray akaonan nanoley nen say sikato diad impankasalanan tod Katawan.

²⁶ Singa si Jeroboam, apampasnuk toy Katawan a Dios na Israel, lapud saray kasalanan to tan lapud nilagyat ton nankasalanan tan angigalang ed saray talintaoy diriyos iray totoo.

²⁷ Nisulat ed libron Say Awaran da ray Ararid Israel iray arum nin ginagawa nen Omri tan amin ya asumpal ton kimey.

²⁸ Inatey si Omri, nipompon ed Samaria, insan sinmalat ed sikaton nanari si Acab a lakin anak to.

²⁹ Diad kumatalomplo tan walon taon na panooley nen Ari Asa ed Juda, nagmaliw ya arid Israel si Acab a lakin anak nen Omri, tan nanoley ed Samaria na duamplo tan duan taon.

³⁰ Pinalumbasan ton amin iray akaonan nanoley nen say sikato diad impankasalanan tod Katawan.

³¹ Ag apera ed impangalig tod kasalanan nen Jeroboam; pinalumbasan to ingen, ta inasawa toy Jezebel ya anak nen Ari Etbaal na Sidon, tan angigalang ed Baal.

³² Nanggawad Samaria na timplo nen Baal, inggawaan to met na altar, insan to inyan ed dalem na timplo.

³³ Nanggawa met na talintao nen diosan Asera. Pinalumbasan ton nankasalanan iray amin ya ararid Israel ya akaonan nanoley nen say sikato, lapud saray ginagawa ton maoges ya amasnukay Katawan a Dios na Israel.

³⁴ Legan na impanoley to, si Hiel a taga Betel pinasimbalo ton impaalagey so Jerico. Diad impangiletneg tod pundasion na Jerico inatey si Abiram a lakin pangulowan ya anak to, tan diad impamaalagey tod saray puirta inatey si Segub a lakin yogtan ya anak to. Abalang nen Hiel ira yan anak to, onung na impasakbay na Katawan diad panamegley nen Josue a lakin anak nen Nun.

17

¹ "Inkuanen propita Elias a taga Tisbe na Galaad ed kinen Ari Aca, Diad ngaran na Katawan a mabilay a Dios na Israel a panlilingkuran ko, ibagak ed sikan anggapoy napelag a linaew o oran ed loob na arapen a duara odino taloy taon ya anggad ag ko pangibagan onoran la.

² "Insan inkuan na Katawan ed kinen Elias,

³ "Taynan mo yan pasen tan lakad bokig, insan ka onamut ed Kolus na Carit a nibokig na Jordan.

⁴ "Diad kolus ka manalay inomen mo, tan ingganggan kon maniter ed sikay taganom iray wawak.

⁵ "Inonur nen Elias so ganggan na Katawan; linman nanayam ed abay na Kolus na Carit.

⁶ "Naniinom ed danum na kolus, tan kabwasan tan labi ya inyaakaran na saray wawak na tinapay tan karni.

⁷ "Ag abayag nakatan imay kolus, lapud anggapoy oran.

⁸ "Insan inkuan na Katawan ed kinen Elias,

⁹ "Lakad baley na Sarepta, diad asingger ed Sidon tan manayam kad man. Ingganggan koy sakey a biin balo a tagad man a pakanen to ka.

¹⁰ Kanyan linmad Sarepta si Elias; nen manasingger lad puirta na baley akanengneng na sakey a biin balo a mandodokdok na kiew ya itotongo. Inkuantod sikato, Itdan mo ak pay danum ya inomen.

¹¹ Nen oonla lan mangala may balo na inomen, impaabot ton inkuan, Iyalaan mo ak pa met na pigaran tinapay.

¹² Inmebat imay bii, Diad ngaran na mabilay a Katawan a Dios mo, sambaan kod sikan anggapoy tinapay ko. Sankaakup labat so arinak a walad pasig tan dagdaiset a larak na oliban walad garapon. Linma ak diad mandokdok na itongo, insan ko isempet, ta iparaan ko may arinak a para siak tan say anak kon laki. Kaonuran la man a kanen mi, insan ompatey kami lad era.

¹³ Ag ka mapaga, kuanen Elias ed sikato. Laka la, ta iparaan moy kanen yo. Balet igawaan mo ak ni ed satay walad sikan arina na sakey a tinapay, insan mo dia iyakar. Kayarim iparaan moy kera para sika tan say anak mon laki.

¹⁴ Ta onyay inkuan na Katawan a Dios na Israel, Ag naandian na arina so pasig, tan ag naadian na larak so garapon anggad ed agew a siak, say Katawan et mangipelag ak na oran.

¹⁵ Anempet imay balo tan ginawa toy onung na imbagad sikato nen Elias, et awalaan iran amin na nakan ed amayamay ya agew.

¹⁶ Onung na insipan na Katawan, diad panamegley nen Elias, ag naadian na arina so pasig tan ag naadian na larak so garapon.

¹⁷ Nen ontombuk iran agew, akainagem imay lakin anak na samay balo; dinmeden lan dinmenden so sakit to, insan diad kaonuran inatey.

¹⁸ Inkuantod kinen Elias, Too na Dios, akin et ginawam ed siak ya? Linma ka dian mangipanunot ed Dios na kasalanan ko, pian onsabiy patey ed anak ko?

¹⁹ Iyakar mod siak itay anak mo, kuanen Elias. Sinakloy nen Elias imay ogaw, inyakar tod kuartod tagey a panaayaman to, tan imparokul tod katri.

²⁰ Insan maksil so bosis tod nampikasi, O Katawan kon Dios, akin et onya lan makapasinagem so ginawam ed samay balo? Pinatuloy to ak tan pinagaan to ak; akin et binabawim lad bilay so anak to?

²¹ Insan amitlon inyonat toy laman to ed tapew na samay ogaw, tan nampikasi, O Katawan a Dios ko, pabilay mo pa yan ogaw!

²² Inebatan na Katawan so pikakasi nen Elias; pinmawil so kamarerwa to may ogaw, et abilay.

²³ Impawil nen Elias imay ogaw diad leksab na abung ed kinen ina to tan kuantod sikato, Nengneng mo, mabilay so anak mo!

²⁴ Inmebat imay balo, Amtak la natan a sakey kan too na Dios, tan tuan mansasalitay Katawan diad panamegley mo!

18

¹ "Kayariy pigaran agew, nen mikatloy taon lan anggapoy oran, inkuan na Katawan ed kinen Elias, Laka, ta iparontal moy sikan dili ed kinen Ari Acab, insan ko la paoranen.

² "Linma sirin si Elias. Mapalalo lan tuloy natan so eras ed Samaria,

³ "kanyan tinawag nen Acab si Obadias a makaoley ed palasio. (Masimoon so panamagalang nen Obadias ed Katawan,

⁴ "et nen papateyen nen Jezebel iray propita na Katawan inala toy sanlasus ed saray ongib, tan iniitdan to ray tagano tan nainom.)

⁵ "Inkuanen Acab ed kinen Obadias, Tala, ta anapen tan amin iray kawalaay sobul tan saray kolus diad intiron nanarian, tan nengnengen ta no wala ray dikan nipakan tayod saray kabayo tan saray mula, pian ag ira ompatey. Angangko ag tayo mamatey na anggan sakey ed saray ayayep tayo.

⁶ "Akapampakna ra no anton pasen so laen na balang sakey ed sikara, kanyan nansian ira.

⁷ "Nen walad dalan si Obadias, biglan nabet toy Elias. Abirbir to, dinmakmomod arap to, tan tinepet to, Sikan tua si Elias?

⁸ "On, siak, ebat to. Laka, ta ibagam ed amom ya ari a wadya ak.

⁹ "Inmebat si Obadias, Antoy ginawak a kaogsan a makasengeg na pangitapang mod siak, pian napatey ak nen Ari Acab?

¹⁰ Diad ngaran na mabilay a Katawan a Dios mo, sambaan ko ya impaanap ka na ari ed anggad iner a sokung na mundo. Diad inerman a baley ya impakapangibagaan ya andi kad man, impansamba toy pangulod saman a pasen ya ag da kad man narumog.

¹¹ Et natan papaonlaen mo ak ed sikato, ta ibagak ed sikaton wadya ka?

¹² Antoy amtak no kataynan ko dia et awiten ka na ispiritu na Katawan ed pasen ya anggapoy mikabat? Insan mo ibagak ed kinen Acab a wadya ka tan ag to ka narumog, pateyen to ak. Nepeg mon nunoten a gagalangen koy Katawan nanlapu lad impanogaw ko.

¹³ Ag mo ta nadngelan a nen papateyen nen Jezebel iray propita na Katawan et pinaamut kon alimamplo ed saray ongib iray sanlasus ed sikara, iniitdan ko ray tagano tan say nainom da?

¹⁴ Panon sirin so pangibabakim ed siak ya ibagak ed ari a wadya ka? Andi-saew a pateyen to ak!

¹⁵ Inmebat si Elias, Diad pakayari na Makapanyarin-amin a Katawan a panlilingkuran ko, isipan ko ya iparontal ko natan so siak a dili ed ari.

¹⁶ Kanyan linmad Acab si Obadias tan imbaga tod sikato imay papaibaga nen Elias. Linma sirin ya onabet ed kinen Elias si Acab.

¹⁷ Nen anengneng nen Acab si Elias, inkuanto, A, wadya ka manaya, sikan managgunigon ed Israel!

¹⁸ Aliwan siak so managgunigon, ebat nen Elias. Sikasika tan si amam. Ag mo oonuren iray ganggan na Katawan tan igagalang mo ray talintao nen Baal.

¹⁹ Iganggan mon banaen ak na amin a totood Israel diad Palandey na Carmelo. Awit mo ray apat a lasus tan limamplon propita nen Baal tan saray apat a lasus a propita na diosan Asera a tataganoen ira nen Riyna Jezebal.

²⁰ Kanyan impantitipon nen Acab ed Palandey na Carmelo iray amin a totood Israel tan saray propita nen Baal.

²¹ Linmay Elias ed saray totoo tan kuanto, Kapigay pangipasakey yod kanunotan yo? No Dios so Katawan sikatoy igalang yo; no Dios si Baal, sikatoy igalang yo! Balet ag inmesel iray totoo.

²² Insan inkuanen Elias, Bukbukor ko lay atilak a propita na Katawan, balet apat a lasus iray propita nen Baal.

²³ Ala kayoy duaran bakan kalakyan; paala yod sikaray sakey, pateyen da, insan da tegtegtegen; iyan dad tapew na saray kiewbalet ag da seselselan. Nampara met so gawaen kod samay sakey a baka.

²⁴ Insan pampikasi yod dios da iray propita nen Baal, balet mampikasi ak ed Katawan; say Dios a mangipelag na apoy ya ebat na pikakasisikato so Dios. Inmebat iray totoo, Maung itan. Siabobun kami.

²⁵ Insan inkuanen Elias ed saray propita, Lapud dakerakel kayo, ala kayoy sakey a bakan kalakyan, ta onona kayon mamparaan. Mampikasi kayod dios yo, balet ag yo seselselan so kiew.

²⁶ Inala da may bakan niiter ed sikara, imparaan da, tan nampikasi rad kinen Baal ya anggad kaagewan. Ineyag da, Ebatan mo kami pa, Baal! tan nansayaw-sayaw irad kaliber-liber na altar a ginawa ra. Balet anggapoy ebat a naalagar da.

²⁷ Nen kaagewan la ginapwan nen Elias a lureyen ira, Ikasil yoy mampikasi! Sikatoy sakey a dios! Ompano mankokogip, odino mampapainawa, odino walay nila to! Odino ompan nanaogip, kanyan nepeg yon bangonen!

²⁸ Kanyan inkasil day pampipikasi ra, tan sinasalger day laman da na saray yuro tan saray punyal, onung na sirimonya ra, ya anggad inmaagos so dala.

²⁹ Nanlalabir-labir tan naneeyag-eyag ira ya anggad onngangarem la; balet anggapoy ebat, anggapoy anggan narengel a tanul.

³⁰ Insan inkuanen Elias ed saray totoo, Asinggeran yo ak, kanyan minokut da. Inapiger toy nigeban altar na Katawan.

³¹ Angalay labinduan bato, sakey so para kapag sakey a tribu ya inngaran onung ed saramay labinduan anak nen Jacob, say lakin angitdan na Katawan na ngaran ya Israel.

³² Inkana nen Elias ira yan bato diad impangapiger tod samay altar a pangigalangan ed Katawan. Angotkot na banawang ed kaliber-liber na altar, a nayarin mankarga na apatiran galon a danum diad kinabaleg to.

³³ Insan to intapew ed altar iray kiew, tinetegteg to may baka, tan intapew tod saramay kiew. Inkuanto, Pano yoy danum so apatiran boyug tan ikalbo yod samay bagat tan saramay kiew. Ginawa ray imbaga to

³⁴ tan kuanto, Pidwa yon gawaenet ginawa ra. Gawa yo ni lamet, kuanto niet ginawa ra.

³⁵ Inmagos ed kaliber-liber to may altar so danum tan napno may banawang.

³⁶ Diad oras na panagbagat ed ngarem, inasinggeran nen Elias imay altar tan nampikasi, O Katawan a Dios di Abraham, Isaac, tan Jacob, ipaamtam natan a sikay Dios na Israel, tan siak so aripen mo a nanggawad saya, lapud panangiganggan mo.

³⁷ Ebatan mo ak pa, Katawan, ebatan mo ak pa, pian nabirbir na sarayan totoo a sika, say Katawan, et Dios, tan papapawilen mo rad sikan dili.

³⁸ Angipelag na apoy so Katawan, tan pinoolan to may bagat, saramay kiew, tan saramay bato, tan tinektek toy dalin tan pinamaga to may banawang a kawalaay danum.

³⁹ Nen anengneng ya na saray totoo tinmiblak irad dalin, tan kuanda, Say Katawan et Dios; say Katawan labat so Dios!

⁴⁰ Ingganggan nen Elias, Erel yo ray propita nen Baal; ag kayo mamapabatik na anggan sakey ed sikara! Inerel da ra, insan inyakar nen Elias iran amin ed Kolus na Kison tan diman to ra pinapatey.

⁴¹ Inkuanen Elias ed kinen Ari Acab, Laka, ta mangan ka la. Narerengel koy ungol na onsasabin oran.

⁴² Nen onlan mangan si Acab, kinmalab ed toktok na Palandey na Carmelo si Elias tan diman dinmakmomo ya anggad dalin a walad pegley na saray pueg to so olo to.

⁴³ Inkuantod aripen to, Laka, ta bantag moy dayat. Linma may aripen, insan pinmawil a kuanto, Anggapoy anengneng ko. Amimpiton imbaki nen Elias ya onlan onnengneng.

⁴⁴ Diad kumapito pinmawil tan kuanto, Akanengneng ak na melag a lorem a singa daklap so kabaleg to tan ontatagey a nanlapud dayat. Ingganggan nen Elias imay aripen to, Lakad Ari Acab, ta ibagam ed sikaton onlogan lad karwahi to tan onsempet la, ta ompan naabot na oran ed dalan.

⁴⁵ Kabebekta akobutan na makapal a lorem so tawen, ginmapon sinmiplug so dagem, tan pinmelag so mapmaples ya oran. Linmogan ed karwahi to si Acab tan pinmawil ed Jezreel.

⁴⁶ Linmoob so pakayari na Katawan ed kinen Elias; malet ton imbariber so kawes tod balangbang to tan batik ya inonaan si Acab ya anggad lolooban ed Jezrell.

19

¹ "Imbaga nen Ari Acab ed kinen asawa ton Jezebel iray amin a ginawa nen Elias tan say impamatey tod amin da ray propita nen Baal.

² "Impaikuanen Jezebel ed kinen Elias: Pateyen ak komun na saray diriyos no diad onyan oras nabwas et ag ko gawaen ed sika so singa ginawam ed saray propita.

³ "Tinmakot si Elias, kanyan batik diad pangyagel tod bilay to; intagar tod Beerseba na Juda imay aripen to. Intilak diman nen Elias imay aripen to

⁴ "tan nanakar a sanagew ed kalawakan. Tinmonda tan inimirung ed silong na sakey a kiew tan labay to la komun so ompatey. Nampikasi, Alablabas la ya, Katawan. Babawim lay bilay ko, ta singa ak met la lamlamang inatey!

⁵ "Dinmokul ed silong na kiew, insan akaogip. Kabebekta diniwit na anghil tan kuanto, Bangon ka, ta mangan ka.

⁶ "Ninmengneng ed kaliber-liber, et anengneng tod olowan to so sakey a tinapay tan sakey a garapon na danum. Angan tan inminom, insan dinmokul lamet.

⁷ "Pinmawil imay anghil na Katawan tan pinidwa ton binangon, insan kuanto, Bangon ka, ta mangan ka; no ag ka mangan nairapan kad panakar mo.

⁸ "Binmangon si Elias, angan tan inminom; angiter ed sikato na biskeg imay tagano diad impanakar to na apataplon agew tan apataplon labi ya anggad Sinai, say masanton palandey.

⁹ "Nampalabas diman na labi ed dalem na sakey ya ongib. Kabebekta akisalitad sikato so Katawan, Elias, antoy gagawaen mo dia?

¹⁰ Inmebat si Elias, Katawan a Dios a Makapanyarin-amin, panlilingkuran ta ka lawas, tan sika labat so panlilingkuran ko. Balet inkaindan na saray totood Israel so impisipanan dad sika, dinederal da ray altar mo, tan pinapatey da ray propitam. Bukbukor ko lay atilaktan labay da ak nin pateyen.

¹¹ Paway ka tan manalagey kad arap ko diad toktok na palandey, inkuan ed sikato na Katawan. Insan dinmalan so Katawan, angibakiy mabiskeg a dagem a nanyegyeg ed saray palandey tan amisagpisag ed saray baton ankabalegbalet andid man ed dagem so Katawan. Tinmonday siplug to may mabiskeg a dagem, insan walay yegyeg--balet andid man ed yegyeg so Katawan.

¹² Kayari to may yegyeg walay poolbalet andid man ed pool so Katawan. Kayariy pool walay makalkalnan esaes na bosis.

¹³ Nen nadngel nen Elias insakbung tod lupa toy kolibemben to, pinmaway tan nanalagey ed wangalay ongib. Inkuan ed sikato na samay bosis, Elias, antoy gagawaen mo dia?

¹⁴ Inmebat, Katawan a Dios a Makapanyarin-amin, panlilingkuran ta ka lawas, tan sika labat so panlilingkuran ko. Balet inkaindan na totood Israel so impisipanan dad sika, dinederal da ray altar mo, tan pinapatey da ray propitam. Bukbukor ko lay atilaktan labay da ak nin pateyen.

¹⁵ Inkuan na Katawan, Pawil ka tan lakad kalawakan ya asingger ed Damasco. Loob kad siudad, lanaan mon manari ed Siria si Hazael,

¹⁶ tan lanaan mo met a manarid Israel si Jehu a lakin anak nen Nimsi. Lanaan mo met ya onsalat ed sikan mampropita si Eliseo a lakin anak nen Safat a taga Abelmehola.

¹⁷ Siopamay ag napatey nen Hazael pateyen nen Jehu, tan siopamay ag napatey nen Jehu pateyen nen Eliseo.

¹⁸ Balet mangikera ak ed Israel na piton libon mabilay a totooamin da ray matoor ed siak tan ag ira dinmakmomod kinen Baal odino inmangub ed talintao to.

¹⁹ Tinmaynan si Elias, insan asabi toy Eliseo a mambabaka a kaiba toy olup na pigaran baka; walad onaan to ray labinsakey ya olup, tan pambabaka toy mikalabinduan olup. Sininggeran nen Elias, insan to inkolibemben ed kinen Eliseo so kolibemben to.

²⁰ Intilak ed satan nen Eliseo iray baka to, tan inabot toy Elias, tan kuanto, Abuloyan mo ak pa nin onangub ed kindi amak tan inak diad pampatanir kod sikara, insan mila ak ed sika. Inmebat si Elias, Sigi, pawil ka. Ag ta ka sesebelan!

²¹ Kayari ton nampatanir, inala to ra may baka to, pinatas to ra, tan inluto to ra. Insonglur to ray pako da ra may baka to. Inter tod saray totoo so aluton karni tan kinan da. Insan linma a tinmombuk a katambayan nen Elias ed saray kimey to.

20

¹ "Impantitipon nen Ari Ben-hadad na Siria iray amin a sondalo to. Kaiba toy talomplo tan duan manoley a kaolup da ray kabayo ra tan saray karwahi ra, ta looban day Samaria, insan dinogpaan da.

² "Angibakid siudad na pigaran totoo tan inkuandad Ari Acab, Papaibaga nen Ari Ben-hadad

³ "ya isukom ed sikato ray pilak tan saray balituk mo, saray sankagangganaan ya asawam tan saray sankabiskegan ya anak mo.

⁴ "Ibaga yod kagalang kon Ari Ben-hadad ya onabuloy ak; alaen to ak tan amin a kayaryan ko, ebat nen Acab.

⁵ "Ag abayag, pinmawil ed Acab ira may imbaki tan imbaga ray impaikuanen Ari Ben-hadad: Impaibagak lad sika ya ipalimam ed siak iray pilak tan saray balituk mo, saray asawam tan saray anak mo.

⁶ "Natan, balet, ibakik iray opisyal ko, ta mansokimat irad palasiom tan diad kaabungan na saray opisyal mo tan alaen day antokaman ya ipapasen dan mabli. Diad singa onyan oras nabwas onla rad tan.

⁷ "Impaawit nen Ari Acab ya amin iray pangulo na bansa tan kuanto, Nengneng yo no panoy panggugunigon na sayan too ed sikatayo. Inmabuloy ak la lantid pangala tod saray asawak tan saray anak ko, saray pilak tan saray balituk ko.

⁸ "Inmebat ira may pangulo tan saray totoo, Ag mo dedengelen; ag ka onaabuloy ed labay to.

⁹ "Kanyan inmebat si Acab ed saramay imbaki nen Ben-hadad, Ibaga yod Kagalang kon Ari ya onabuloy ak ed samay inmonan aalaen to, balet ag ak onabuloy ed sayay kumadwan labay ton gawaen. Tinmaynan ira may imbaki, insan pinmawil iran onyay papaibaga

¹⁰ nen Ben-hadad: Looban ta kad tan a kaibak iray amayamay a sondalon maneral na siudad mo. Diad karakel da sarasarag dan akupen iray deral-deral. Pateyen ak komun na saray diriyos no ag ko ya gawaen!

¹¹ Inmebat si Ari Acab, Ibaga yod kinen Ben-hadad a mampasirayew so peteg a sondalo kayariy bakal, aliwan diad kasakbayan na bakal.

¹² Naawat nen Ben-hadad so ebat nen Acab legan a sikato tan saray kakaiba ton pangulo et maniinoman irad dalem na saray tulda ra. Kanyan ingganggan tod saray totoo to a mamparaan iran ondogpa ed siudad; et namparaan ira.

¹³ Legan to ya, linmay sakey a propita ed kinen Ari Acab tan kuanto, Ibabagay Katawan, Ag ka ontatakot ed saraman ya amayamay a sondalo! Panaloen ta kad sayan agew, et diad ontan naamtaan mo a siak so Katawan.

¹⁴ Siopa ray mangipangulod idogpa? tepet nen Acab. Inmebat imay propita, Saray sondalon walad silong na pakaoley da ray gobirnador na saray distrito, ta onyay imbilin na Katawan. Siopay mangipangulod amin da ray sondalo? tepet nen Acab. Sika, ebat to may propita.

¹⁵ Kanyan tinawag na ari iray sondalon walad silong na pakaoley da ray gobirnador na saray distrito; duan lasus tan talomplo tan dua ran amin. Insan tinawag to ray sondalo na Israel; piton libo ran amin a lalaki.

¹⁶ Ginmapod kaagwan so indogpa ra legan a si Ben-hadad tan saray talomplo tan duan kakaiba ton pangulo et maniinoman irad dalem na saray tulda ra.

¹⁷ Inmonan kinmurang ira may duan lasus tan talomplo tan dua a sondalo. Saray managsiim ya imbaki nen Ben-hadad imbaga rad sikaton walay sakey a grupo na saray sondalon ompapaway ed Samaria.

¹⁸ Ingganggan nen Ben-hadad, Ala yo ran mabilay, onla ra dia man a milaban odino mikaaro.

¹⁹ Inmonan dinmogpa ra may duan lasus tan talomplo tan duan sondalo, insan tomtombuken ira na saray sondalon Israelita.

²⁰ Apatey na balang sakey ed sikara so kalaban to. Batik iray Siriano, tan inoosilan ira na saray Israelita. Akakabayon binmatik si Ben-hadad tan saray pigaran akakabayo met a kaiba to.

²¹ Linmad bakalan si Ari Acab, inaala to ray kabayo tan saray karwahi na saray kalaban to, tan amayamay so pinapatey ton Siriano.

²² Insan linmay propita ed kinen Ari Acab tan kuanto, Pawil ka tan pabiskeg moy kipapasen da ray sondalom tan apiapiger moy panagplanom, ta diad arapen a tiagew dogpaan ka lamet na ari na Siria.

²³ Inkuan na saray opisyal nen Ben-hadad ed sikato, Diriyos na palandey iray diriyos na Israel, kanyan tinalo itayo na taga Israel. Balet andi-saew a taloen tayo ra no labanan ti rad saray patar.

²⁴ Ekal mo lad kipapasen da ra may talomplo tan duan manoley tan salatan mo ra na saray opisyal da ray sondalo.

²⁵ Insan ka manipon na singa karakel na saramay angikaindan ed sika, tan manipon ka met na singa karakel na saray kabayo tan saray karwahi. Labanan tid patar iray taga Israel, et taloen ti rad satan. Inmabubon si Ari Ben-hadad tan tinombuk to may simbawa ra.

²⁶ Diad ontombuk a tiagew tinipon nen Ben-hadad iray totoo to, ta onla rad siudad na Afek, insan dogpaan da ray taga Israel.

²⁷ Atipon met iray totood Israel tan naitdan iray ikana ra; kinmurang ira tan nanayam irad kampon sankaarap da ray Siriano. Duara ran grupo tan singa ra labat duaran ankekelag a poluk na saray kanding no ipara rad saray Siriano, ta pinanatan na saray Siriano so intiron sakey a bario.

²⁸ Walay sakey a propita a linmad kinen Ari Acab tan kuanto, Ibabagay Katawan: Lapud ibabaga na saray Siriano a dios ak na saray palandey, aliwan dios na saray patar, panaloen ta kad saray amayamay a sondalo ra, et nabirbir mo tan saray totoom a siak so Katawan.

²⁹ Pitoy agew a saray Siriano tan saray taga Israel et nanayam irad saray kampo ra a nanaarapan. Diad kumapiton agew ginapwan day nanlalaban, et akapatey iray Israelita na sanlasus libon Siriano.

³⁰ Saray ag apatey batik irad siudad na Afek, et apataan diman na saray padir na siudad iray duamplo tan piton libo ed sikara. Batik met ed loob na siudad si Ben-hadad, tan inmamut ed kuartod beneg na sakey ya abung.

³¹ Linma ray opisyal to tan kuandad sikato, Nadngelan min mapangasi ray arari na Israel. Abuloyan mo kamin mamberber na sakod balangbang mi tan mangibaliber na lobir ed beklew mi, insan kami onlad ari, ta ag la pigan ag to ka pateyen.

³² Kanyan namberber iray sako ed balangbang da, nambaliber iray lobir ed beklew da, tan linma rad kinen Acab tan kuanda, Mikakasid sikayoy aripen yon Ben-hadad ya ag mo la komun papateyen. Inmebat si Acab, Mabilay ni? Maung! Singa agi so pasen tod siak!

³³ Inimano na saray opisyal nen Ben-hadad so maung a pakapatnagan, et nen inkuanen Acab so agi sinambot dan inkuan, On, tua tay kuanmo, agim si Ben-hadad! Awit yo dia, ganggan nen Acab. Kasabi nen Ben-hadad, inimbitaan nen Acab a manloganan irad karwahi.

³⁴ Inkuanen Ben-hadad ed sikato, Ipawil kod sika ray baley a sinamsam nen amak ed kinen amam, tan nayaryan moy mamaalagey na panaglakowan ed Damasco, a singa ginawa nen amak ed Samaria. Inmebat si Acab, Ibolus ta ka sirin lapud saratan a paknaan. Akipaknay Acab ed sikato, insan to la imbolus.

³⁵ Lapud ganggan na Katawan, say sakey a kabyangay grupo na saray propita ingganggan toy sakey a kapara ton propita, Kabil mo ak! Balet ag to kinabil.

³⁶ Kanyan inkuantod sikato, Lapud ag mo inonur so ganggan na Katawan, pateyen ka na lion kataynan mo dia. Kataynan to may propita, sinabat tan pinatey na lion.

³⁷ Insan linmad sananey a too man a propita tan kuanto lamet, Kabil mo ak! Kinabil to tan asugatan.

³⁸ Binerberan toy abel so lupa to pian ag nabirbir, insan linman nanalagar diad abay na dalan ed ilabas na ari na Israel.

³⁹ Nen onlalabas lay ari, tinawag na samay propita tan kuanto, Kagalang ya Ari, mibabakal ak nen angyakar ed siak so sakey a sondalo na sakey ya adakep a kalaban tan kuanto, Bantayan mo yan too; no nabolus mo, bilay moy ibayar mo, odino mambayar kay talon libon pilak.

⁴⁰ Balet nen amayamay so gagawaen kon arum a bengatla, akabatik imay too. Inmebat may ari, Sikay anintinsiad sikan dili, nepeg kan mambayar.

⁴¹ Biglan inekal to may akabariber ed lupa to, et say ari abirbir ton tampol a sakey ed saray propita.

⁴² Insan inkuan na samay propita ed ari, Ibabagay Katawan; Lapud inabuloyan mon makabatik so ingganggan ko a pateyen mon too, patey so ibayar mo, tan napatey iray totoom lapud impamabatik mod saray totoo to.

⁴³ Agunigon tan maerermen a sinmempet imay ari ed abung tod Samaria.

21

¹ "Diad asingger ed palasio nen Ari Acab diad Jezreel, walay kaubasan a kayaryan na sakey a lakin manngaray Nabot.

² "Aminsan inkuanen Acab ed kinen Nabot, Iter mo pad siak so kaubasan mo; asingger ed palasiok, et labay kon pantanemay pising. Salatan ko na magmaung a kaubasan, o no labay mo bayaran koy kanepegan ton bili.

³ "Tinawir ko yan kaubasan ed saray lalakik, ebat nen Nabot. Ag iyabuloy na Katawan ya iter kod sika!

⁴ "Agunigon tan akapasnuk a sinmempet ed abung si Acab lapud samay imbaga nen Nabot ed sikato. Dinmokul ed katri to, inarap toy padir, tan ag mangan.

⁵ "Dinago nen Jezebel ya asawa to tan tinepet to, Akin et mapalaloy kagugunigon mo? Akin et ag ka mangan?

⁶ "Inmebat si Acab, Lapud samay imbaga nen Nabot ed siak. Imbagak ed sikaton saliwen ko may kaubasan to o no labay to, salatan koy sananey a kaubasan, balet imbaga ton ag ko naala!

⁷ "Aliwa tan ari ka na Israel? ebat nen Jezebel. Bangon kad tad katri, manliket ka tan mangan ka. Iter kod sikay kaubasan nen Nabot!

⁸ "Insan nanggawa na saray sulat, impirma toy ngaran nen Acab, intimbri toy timbri nen Acab, insan to impawit ed saray opisyal tan saray manonan totoo ed Jezreel.

⁹ "Onyay tanul na saray sulat: Ibawag yoy sakey ya agew a panayuno, pantitipon yo ray totoo, insan yo payorungen ed pasen na kagalangan si Nabot.

¹⁰ Mangala kayoy duaran luko-lukon lalaki, paalagey yo rad arap nen Nabot, insan akusaen dan aayewen toy Dios tan say ari. Ipaway yod satan ed siudad, insan yo tupaken ya anggad ompatey.

¹¹ Ginawa na saray opisyal tan saray manonan totoo ed Jezreel so ingganggan nen Jezebel.

¹² Imbawag day sakey ya agew a panayuno, impantitipon da ray totoo, insan da pinayorung ed pasen na kagalangan si Nabot.

¹³ Diad arap na saray totoo, inakusa na saramay duaran lalaki si Nabot ya aayewen toy Dios tan say ari. Kanyan impaway dad siudad si Nabot, tan tinupak da ya anggad inatey.

¹⁴ Insan impaibaga rad kinen Jezebel. Apatey lay Nabot.

¹⁵ Kapangawat nen Jezebel ed balita, inkuantod kinen Acab, Inatey lay Nabot. Laka la, ta kayaryanen mo la may kaubasan ton ag to ilakod sika.

¹⁶ Linman tampol si Acab a mangayaryan ed samay kaubasan.

¹⁷ Insan inkuan na Katawan ed kinen propita Elias a taga Tisbe,

¹⁸ Lakad kinen Ari Acab na Samaria. Nasabim a mangakayaryan ed kaubasan nen Nabot.

¹⁹ Ibagam ed sikato a siak, say Katawan, kuankod sikato, Anta pinatey mo la may too, alaen mo ni lamet so kayaryan to? Ibagam ed sikaton onyay kuanko, Dildilan na saray aso so dalam ed pasen a nandildilan na saray aso ed dala nen Nabot!

²⁰ Nen anengneng nen Acab si Elias inkuanto, Nalmo mo ak lamet, kalaban ko? On, nalmo ta ka lamet, ebat nen Elias. Sigput so panggagawam na kaogsan ed arap na Katawan.

²¹ Kanyan inkuan na Katawan ed sika, Panliknaen ta kay segsegang. Ekalen ta kan ari tan paandipaten kon amin iray lalakin kabyangay pamilyam, malangwer may matakken.

²² Saray kabyangay pamilyam magmaliw iran singa saray kabyangay pamilya di Jeroboam a lakin anak nen Nebat tan Ari Baasa a lakin anak nen Ahias, lapud impanpasnuk mo ak diad impangilagyat mon mankasalanan iray taga Israel.

²³ Inkuan met na Katawan a kanen na saray aso diad siudad na Jezreel so bangkay nen Jezebel.

²⁴ Kanen met na saray aso so bangkay na siopaman a kakanayon mon ompatey ed siudad, tan kanen na saray buitri so bangkay na siopaman ya ompatey ed kaalogan.

²⁵ (Anggapoy manoley a singa si Acab a sigput so impanggawa toy kaogsan ed arap na Katawansi asawa ton Jezebel so nantatanggoyur ed sikato.

²⁶ Nanggagawa na saray makapabaing a tuloy a kasalanan na panangigalang ed saray talintao, a singa ginagawa na saray Amorreo, saray totoon pinataynan na Katawan ed dalin nen nilooban na saray Israelita.)

²⁷ Nen asumpal a nansalitay Elias, pinilat nen Acab so kawes to, inekal to tan nansolung na sako. Ag angan, dinmokul ed sako, tan nanakar-akar a maerermen.

²⁸ Inkuan na Katawan ed kinen propita Elias,

²⁹ Naimanom no panoy impamaabeba nen Acab ed sikaton dili diad arap ko? Lapud onyan ginawa to, ag ko iter ed sikato so dusa legan ton mambilay; legan na pambilay na anak ton laki, iter koy dusa ed saray kabyangay pamilya nen Acab.

22

¹ "Duay taon ya anggapoy balingaan na Israel tan Siria,

² "balet diad kumatlon taon linman akitongtong si Ari Josafat na Juda ed kinen Ari Acab na Israel.

³ "Tinepet nen Acab ed saray opisyal to, Amta yo a kayaryan tayoy Ramot-Galaad. Akin balet et ag tayo babawien ed ari na Siria?

⁴ "Inkuanen Acab ed kinen Josafat, Mila ka pad sikamin mibakal ed Ramot-galaad. Inmebat si Josafat, No akaparaan kayo la, akaparaan kami met la. Mikasakey kamid sikayon mibakal.

⁵ "Insan inkuanto ni, Balet ipanon tayo ni ya ed Katawan.

⁶ "Impantitipon sirin nen Acab iray propita a sakey ya apat a lasus ira tan tinepet tod sikara, Laen kon dogpaan so Ramot-galaad odino andi? Dogpaan mo, ebat da. Panaloen ka na Katawan.

⁷ "Balet tinepet nen Josafat, Anggapo ta lay sananey a propita na Katawan a pangipanonan tayo?

⁸ "Inmebat si Acab, Wala niy sananey, si Micaya a lakin anak nen Imla. Balet kabosul ko, ta ag balut mampropropisiya na pankaabigan ko; pakaderalan kon amin. Ag mo nepeg ya ibaga tan! ebat nen Josafat.

⁹ "Tinawag sirin nen Ari Acab so sakey ya opisyal, tan imbaga tod sikato ya awiten ton tampol si Micaya.

¹⁰ Saramay duaran ari akasolung ira na kawes da ray arari et akayorung irad saray trono ra diad samay pasen a panagilikan ya asingger ed puirta na Samaria. Mampropropisiyad arap da ira may amin a propita.

¹¹ Nanggawa na saray saklur a balatyang so sakey ed sarap propita a si Sedekias a lakin anak nen Canaana tan kuantod kinen Acab, Onyay inkuan na Katawan: Diad panamegley na saraya, labanan mo ray Siriano, et sigput a taloen mo ra.

¹² Nampapara so imbaga na amin da ra may propita. Inkuanda, Lakad Ramot-galaad, et manalo ka. Panaloen ka na Katawan.

¹³ Legan to ya, samay opisyal a mangaawit ed kinen Micaya inkuantod sikato, Aligwas na ari so impropisiya na amin da ray arum a propita, kanyan onya met so ipropisiyam.

¹⁴ Balet inmebat si Micaya, Diad ngaran na mabilay a Katawan, say papaibaga tod siak so ibagak!

¹⁵ Nen pinmarontal ed arap nen Ari Acab si Micaya, inkuan na ari ed sikato, Micaya, dogpaan mi nen Ari Josafat so Ramot-galaad odino andi? Inmebat si Micaya, Laka yo, ta manalo kayo. Panaloen kayo na Katawan.

¹⁶ Balet inmebat si Acab, Mamimpigan ibagak ed sikan say katwaan labat so ibagam ed siak diad ngaray Katawan?

¹⁷ Inmebat si Micaya Anengneng kon ataytayak ed saray pokdul iray totood Israel, a singa ra karniron anggapoy pumapastol da. Insan inkuan na Katawan, Anggapoy pangulo da ra yan totoo; pasempet mo la ran walay kareenan.

¹⁸ Inkuanen Acab ed kinen Josafat, Imbagak ed sikan ag balut mampropropisiyay pankaabigan ko; pakaderalan kon amin!

¹⁹ Intuloy nen Micaya ya inkuan, Dengel mo natan so ibabagay Katawan! Anengneng koy Katawan a manyodyorung ed trono tod tawen, tan manalalagey ed diking to iray amin ya anghil to.

²⁰ Tinepet na Katawan, Siopay mamalikdod kinen Acab, pian onlad Ramot-galaad tan diman napatey? Sananey so imbaga na saray arum ya anghil tan sananey met so imbaga na arum.

²¹ Kabebekta inmasingger so sakey ya ispiritu, nanalagey ed arap na Katawan tan kuanto, Siak so mamalikdo. Panon mon palikdoen? tepet na Katawan.

²² Inmebat imay ispiritu, Onla ak, ta pantilaen kon amin iray propita nen Acab. Inkuan na Katawan, Laka, ta palikdom si Acab. Nagaway pilalek mo.

²³ Inkuanen Micaya ed kaonuran, Saya sirin so agawa. Impantila na Katawan ed sika ra yan propitam. Balet imbaga la na Katawan ed sika so kaogsan a nagawad sika.

²⁴ Balet inasinggeran nen Sedekias si Micaya, tinampal to, tan kuanto, Kapigan ya inmekal ed siak so isipiritu na Katawan, insan nansalita ed sika?

²⁵ Naamtaan mo no onla kan onamut ed kuarton walad beneg, ebat nen Micaya.

²⁶ Insan ingganggan nen Acab so sakey ed saray opisyal to, Singkat moy Micaya, insan mo iyakar ed kinen Amon a gobirnador na siudad, tan kinen Prinsipi Joas.

²⁷ Ibagam ed sikaran ipriso ra tan pakanen da labat na tinapay tan itdan day danum ya anggad isabik ya anggapoy maoges ya agawad siak.

²⁸ No ompawil kan anggapoy maoges ya agawa, kuanen Micaya, ag nansalitad panamegley ko so Katawan! Insan to inyarum ya inkuan, Tandaan yon amin a totooimay imbagak!

²⁹ Linman dinmogpad siudad na Ramot-galaad si Ari Acab na Israel tan si Ari Josafat na Juda.

³⁰ Inkuanen Acab ed kinen Josafat, No onla itayon mibakal ag ak pabirbir, balet mansolung kay kawes na ari. Kanyan ag nampabirbir so ari na Israel nen linman mibakal.

³¹ Ingganggan na arid Siria iray talomplo tan duan pangulo na saray sondalon akakarwahi ya anggapoy arum a dogpaan da no ag say ari na Israel.

³² Nen anengneng day Ari Josafat abaloan dan ari na Israel, kanyan dinogpaan da. Balet nen inmeyag,

³³ abirbir dan aliwan ari na Israel, kanyan tinondaan dan dogpaan.

³⁴ Balet apalaranan ya apana na sakey a sondalon Siriano si Acab diad nanleetan na saray kawes ton para bakal. Ineyag tod kutsiroy karwahi to, Asugatan ak! Poliktar ka, ta onarawi ta lad bakalan.

³⁵ Legan na pinasian laban, nansiansian akasaral ed karwahi to si Ari Acab tan sankaarap to ray Siriano. Managagos so dala a manlalapud sugat to tan aluak na dala so datal na karwahi, insan inatey nen labi la.

³⁶ Nen onlalabi la niganggan ed saray sondalo na Israelita, Onsempet lay balang sakey a laki ed dilin bansa tan siudad to!

³⁷ Kanyan inatey si Ari Acab. Niakar ed Samaria so bangkay to tan diman nipompon.

³⁸ Naorasan ed dipositoway danum so karwahi to diad Samaria a diman dinidildilan na saray aso so dala to tan dimay nanoorasan na saray marotak a bibii, onung na sinalita na Katawan.

³⁹ Nisulat ed libron Say Awaran da ray Ararid Israel iray arum nin ginagawa nen Ari Acab, pati say nipaakar ed palasio ton garing tan saray siudad ya impapaalagey to.

⁴⁰ Kapatey nen Acab sinmalat ed sikaton nanari so lakin anak to a si Ahazias.

⁴¹ Diad kumapat a taon na panooley nen Ari Acab ed Israel, nagmaliw ya ari na Juda si Josafat a lakin anak nen Asa.

⁴² Talomplo tan limay taon to nen ginmapon manari, tan nanayam ed Jerusalem legan ton nanoley a duamplo tan limay taon. Si Azuba ya anak nen Silhi so ina to.

⁴³ Ginawa toy kaptekan ed arap na Katawan a singa ginawa nen Asa ya ama to; balet ag to aderal iray paganon pasen a panangigalangan, kanyan intuloy na saray totoo so nambabagat tan nampopool na insinso ed saraman a pasen.

⁴⁴ Akikaaro si Josafat ed ari na Israel.

⁴⁵ Nisulat ed libron Saray Awaran da ray Ararid Juda iray arum nin ginagawa nen Josafat, say inkasebeg to tan saray impibakal to.

⁴⁶ Pinataynan ton amin ed dalin iray marotak a lalaki tan bibiin atilak nid saramay panaon nen ama ton Asa, tan manlilingkur irad saray paganon altar.

⁴⁷ Nen saman anggapoy ari ed dalin na Edom; inoleyan na toon tinoro na ari ed Juda.

⁴⁸ Wala ray barko nen Josafat a para biahid dalin na Ofir, ta manalay balituk; balet aderal irad Ezion-geber, kanyan ag la ra nambiahin balut.

⁴⁹ Insan imbaga nen Ari Ahazias na Israel a mambiahid bapor iray totoo to a kaolup da ray totoo nen Josafat, balet ag inmabubon si Josafat.

⁵⁰ Inatey si Josafat tan nipompon ed Siudad nen David, insan sinmalat ed sikaton nanari si Jehoram a lakin anak to.

⁵¹ Diad kumalabinpiton taon na panooley nen Ari Josafat ed Juda, nagmaliw ya ari na Israel si Ahazias a lakin anak nen Acab, tan nanoley ed Samaria na duay taon.

⁵² Nankasalanan ed Katawan, ta inalig toy ginagawa di Acab ya ama to, Jezebel ya ina to, tan Ari Jeroboam a nilagyat dan nankasalanan so Israel.

⁵³ Inggalang tan nanlingkuran toy Baal tan impanpasnuk toy Katawan a Dios na Israel, a singa si ama to.