1

¹ "Kayariy impatey nen Saul, amawil si David kasumpal ton tinalo ray Amalecita tan nanayam ed Siclag na duay agew.

² "Diad mikatlon agew sinmabiy sakey a balolakin nanlapud kampo nen Saul. Diad pangipanengneng toy ermen to pinipilat toy kawes to tan ininan toy dabuk so olo to. Linmad kinen David tan dinmakmomo ya anggad dalin a pamagalang to.

³ "Tinepet nen David, nanlapwan mo? Akabatik ak manlapud kampo na Israel, ebat to.

⁴ "Ibagam ed siak no antoy agawa, kuanen David. Imbatikan day bakal iray sondalo tayo, ebat to, tan amayamay so inatey ed saray totoo tayo. Inatey met si Saul tan si Jonatan ya anak to.

⁵ "Panoy pakaamtam ya inatey si Saul tan si Jonatan? tepet nen David.

⁶ "Inmebat, Nibanan wala ak ed palandey na Gilboa, tan anengneng koy Saul ya akasaral ed pika to, tan manasingger ed sikato ray karwahi tan saray akakabayon kalaban.

⁷ "Linmingaw tan anengneng to ak, insan to ak tinawag. Inmebat ak, Wadya ak,

⁸ "Tinepet to no siopa ak, et imbagak ed sikaton sakey ak ya Amalecita.

⁹ "Insan inkuanto, Gala dia ta patey mo ak! Mapalaloy inkasugat ko tan ompapatey ak la.

¹⁰ Kanyan dinagok tan pinatey ko, ta amtak ya ompatey met lamlamang diad katumba to. Insan ko inalay koronad olo to tan say pulsira ed taklay to tan inawit ko diad sika, katawan ko.

¹¹ Diad ermen nen David pinilat toy kawes to, tan onya met so ginawa na saray totoo to.

¹² Nanermen tan nanakis ira, tan nanayuno ra ya anggad labi para si Saul tan si Jonatan, tan para saray Israelita a totoo na Katawan, ta amayamay ed sikaray inatey ed bakal.

¹³ Tinepet nen David ed samay balolakin angibalita, Taga ka iner? Inmebat, Sakey ak ya Amalecita, balet manaayam ak ed bansam.

¹⁴ Tinepet nen David ed sikato, Akin et atepelan mon pinatey so lakin pinili na Katawan a manari?

¹⁵ Insan to tinawag so sakey ed saray totoo to tan kuanto, Patey mo! Kinabil to tan pinatey to may Amalecita.

¹⁶ Insan inkuanen David ed samay Amalecita, Sikan diliy amasabid laman mo na sayan agawad sika. Sinintinsiaan moy dusa so sikan dili diad impangibagam a pinatey moy lakin pinili na Katawan a manari.

¹⁷ Kinanta nen David yan kantay ermen para kinen Saul tan si anak ton Jonatan,

¹⁸ tan ingganggan ton ibangat ed saray totood Juda. (Nisulat ya ed Libro nen Jaser.)

¹⁹ Diad saray pokdul na Israel inatey iray pangulo tayo! Atumba iray sankasebegan a sondalo tayo!

²⁰ Ag yo ya ibabalita ed Gat odino diad saray dalan na Askelon. Ag yo panliliketen iray bibiin taga Filistia; ag yo panggagayagaen iray bibiin anak na saray pagano.

²¹ Anggapo komuy ompelag ya oran o linaew ed saray pokdul na Gilboa; anggapo lawas komun so antokaman ya ontobo ed saray alog to. Ta saray samper na masesebeg kitongilang irad man a nakalay kagalangan; say samper nen Saul wadman ya ag la nalalarakan.

²² Nen saman makapatey so pana nen Jonatan, andi-panangasiy ispada nen Saul; saray nakena ran makapanyari natumba ra, tan saray nakena ran kalaban ompatey ira.

²³ Saul tan Jonatan, pinabli tan inararo; sankaibad bilay, sankaibad patey. Maples ira nen saray agila, mabiskeg ira nen saray lion.

²⁴ Bibiid Israel, panermenan yoy Saul! Kinawesan to kayo ray balibalin ambalangan kawes, tan pineketan to ray kawes yo na alahas iran balituk.

²⁵ Atumba ray masesebeg a sondalo, inatey irad bakal. Wadman ya inatey ed kapokdulan si Jonatan.

²⁶ Panermenan ta ka, agik a Jonatan; pinabpabli ta ka! Makapakelaw so panangarom ed siak, pinalabsanan toy anggan say panangaro na saray bibii.

²⁷ Atumba la ray masesebeg a sondalo, andi-kana la ray armas da.

2

¹ "Kayari to ya, tinepet nen David ed Katawan, Onla ak a manakop ed sakey ed saray baley na Juda? On, ebat na Katawan. Dinan ey? tepet nen David. Say Hebron, kuay Katawan.

² "Kanyan linmad Hebron si David a sankaawit to ray duaran asawa to a si Ahinoam a taga Jezreel, tan si Abigail, say balo nen Nabal a taga Carmel.

³ "Inawit to met iray totoo to tan saray pamilya ra, tan nanayam irad saray baley a kaliber-liber na Hebron.

⁴ "Insan saray lalakid Juda linma rad Hebron tan nilanaan day David a manarid Juda. Nen nadngelan nen David a si Saul et impompon na saray totood Jabes, diad Galaad,

⁵ "angibakid man na pigaran lalaki tan impaikuanto: Bindisionan kayo komuy Katawan lapud impangipanengneng yoy inkatoor yod Saul ya ari yo diad impangipompon yod sikato.

⁶ "Et natan ipanengneng komun na Katawan so panangasi tan inkatoor tod sikayo. Maung met so ipanengneng kod sikayo, lapud sayan ginawa yo.

⁷ "Mampabiskeg tan mampasebeg kayo! Inatey lay ari yon Saul, tan saray totood Juda et nilanaan da ak a manari ed sikara.

⁸ "Say pangulo da ray sondalo nen Saul a si Abner ya anak nen Ner et akabatik a kaiba toy Isboset a lakin anak nen Saul. Batik irad Mahanaim a nibaliw na Jordan.

⁹ "Si Abner ginawa tod man si Isboset a manarid saray lugar na Galaad, Aser, Jezreel, Efraim, tan Benjamindiad intiron Israel.

¹⁰ Apataploy taon to nen agawan ari ed Israel, tan nanoley na duay taon. Balet say tribu nen Juda matoor ed kinen David,

¹¹ tan diad Hebron nanoley ed Juda na pitoy taon tan kapaldua.

¹² Manlapud Mahanaim, si Abner tan saray opisyal nen Isboset linma rad siudad na Gabaon.

¹³ Linma met diman si Joab a lakin anak nen Sarvia tan saray arum ya opisyal nen David, tan nanaabet irad samay dipositoy danum diman. Say sakey a grupo inmirung ed sakey a dapag tan say sakey a grupo diad basil.

¹⁴ Inkuanen Abner ed kinen Joab, Panlalabanen tayo ray pigaran lalaki na balang dapag. On, sigi! ebat nen Joab.

¹⁵ Kanyan saray labindua ed lalakin walad dapag nen Isboset tan tribu nen Benjamin et nilabanan da ray labindua ed saray lalakin walad dapag nen David.

¹⁶ Balang sakey binembenan toy olo na kalaban to tan dinoyuk tod diking, kanyan nambabansag iran atumban inatey. Kanyan saman a pasen ed Gabaon tatawagen na Alog na saray Ispada.

¹⁷ Insan tinmerak so pinasyan bakal, et saray totoo nen David tinalo da ra di Abner tan saray Israelita.

¹⁸ Akibakal iray taloran lalakin nen Sarvia a di Joab, Abisai, tan Asael. Si Asael, a mabatik a singa ulsad katakelan,

¹⁹ inosilan toy Abner. Inosilan ton andi-lingawan.

²⁰ Linmingaw si Abner tan kuanto, Si Asael ka? On, ebat to.

²¹ Tondaan mo ak lan osilan! kuanen Abner. Osilan mo lay sakey ed saray sondalo tan alam so antokaman a walad sikato. Balet ag tinondaan nen Asael.

²² Inkuan lamet nen Abner, Tondaan mo ak lan osilan! Akin et papatey kad siak? Panoy piarapan kod agim a si Joab?

²³ Balet ag tondaan nen Asael; kanyan dinoyuk nen Abner na pika ed pabenegan et nakna tod eges tan tinmalus ed beneg to. Alokbub ed dalin si Asael, tan inatey. Tinmonda tan nantanyareg so balang sakey a makasabid abaktaran nen Asael.

²⁴ Balet sinmoblay ya inmosil ed kinen Abner ira di Joab tan Abisai, et nen onseselek lay agew nakar day pokdul na Amma a nibokig na Gia diad dalan a mamaarap ed kalawakan na Gabaon.

²⁵ Saray totoon nanlapud tribu nen Benjamin nantitipon ira lamet ed kawalaan nen Abner, tan nanalagey iran akaparaan ed toktok na sakey a pokdul.

²⁶ Kinolyaotan nen Abner si Joab, Akin, ag itayo la ontondan manlalaban? Ag yo ta nanengneng a kapaitan labat so pansumpalan tayo? Kabaleyan yo kami. Kapigay pangiganggan mod saray totoom a tondaan da kami lan osilan?

²⁷ Inmebat si Joab, Sambaan kod ngaran na mabilay a Dios a no ag ka labat nansalita, osilan ka na saray totook ya anggad kabwasan.

²⁸ Insan pinaknul nen Joab so trumpita et saray totoo tinondaan da lan osilan iray Israelita. Kanyan tinmonda met la so bakal.

²⁹ Sanlabin bineltang di Abner tan saray totoo to so Patar na Jordan; binaliw day Ilog na Jordan, tan kayariy impanakar da nin sankabwasan na ontombuk ya agew akasabi rad Mahanaim.

³⁰ Nen tinondaan la nen Joab so inmosil, tinipon to ray amin a totoo to tan arumog ton labinsiam so inatey, andi-baliy Asael.

³¹ Saray totoo nen David akapatey iray talon lasus tan anemaplon totoo nen Abner a kabyangan iray tribu nen Benjamin.

³² Inala nen Joab tan saray totoo to so bangkay nen Asael tan impompon dad lobuk nen ama to diad Betlehem. Insan sanlabi ran nanakar et diad palbangon akasabi rad Hebron.

3

¹ "Abayag a panaon so impanbabakal na saray totoon akigampid pamilya nen Saul tan saray totoon akigampid kinen David. Diad ibibiskeg lan ibibiskeg nen David, onkakapoy lan onkakapoy iray kalaban to.

² "Diad Hebron nianak iray onggendan ya anak nen David manlapud onona ya anggad kumanem: Amnon, a say ina to et si Ahinoam a taga Jezreel;

³ "Kileab, a say ina to et si Abigail a balo nen Nabal a taga Carmel; Absalom, a say ina to et si Maaca ya anak nen Ari Talmai a taga Gesur;

⁴ "Adonias, a say ina to et si Hagit; Sefatias, a say ina to et si Abital;

⁵ "Itream a say ina to et si Egla, ya asawa nen David. Nianak ira yan amin ed Hebron.

⁶ "Legan a mambabakal iray totoon akigampid pamilya nen Saul tan saray totoon akigampid kinen David, ompapalaloy pakapanyari nen Abner ed saray totoo nen Saul.

⁷ "Aminsan ya agew, si Isboset ya anak nen Saul inakusa toy Abner ya akiakdul ed sakey ya asawa nen Saul a si Rizpa ya anak nen Aya.

⁸ "Lapud saya, pinmetang a maung so olo nen Abner. Inkuanto, Nababaluan mon manlilingkur ak ed Juda. Traidor ak sirin? Nanlapu lad gapo matoor ak ed Saul ya amam, saray agagi ton lalaki, tan saray kakaaro to, tan iyaagel ta kad kinen David; natan balet aakusaen mo ak a nankasalanan lapud sakey a bii!

⁹ "Insipan na Katawan ed kinen David ya ekalen toy nanarian ed kinen Saul tan saray kabyangay boleg to, insan to gawaen ya ari si David ed Israel tan Juda, manlapud baley na Dan ya anggad baley na Beer-seba. Pateyen ak komun na Dios no ag ko gawaey polaing ya ontua ya!

¹⁰ Ag akaskasel si Isboset, tan mapalaloy takot tod kinen Abner.

¹¹

¹² Angibakiy Abner na pigaran totoo ed kinen David a wala natan ed Hebron, tan impaikuanto, Siopay manoley ed sayan dalin? Mipaknaan kad siak, ta tulongan ta kan mananggoyur ed amin ya Israelita a migampi rad sika.

¹³ Inmebat si David, On, sigi! Mipaknaan ak ed sika no awiten mo diay Micol a biin anak nen Saul diad iyakar mo dian mitongtong ed siak.

¹⁴ Angibaki met na pigaran totoo ed kinen Isboset tan impaikuanto, Ipawil mod siak si asawak a Micol. Nambayar ak na sanlasus a ngoroy baog na kayaryan na saray Filisteo, pian naasawak.

¹⁵ Kanyan angibakiy Isboset na angala ed kinen Micol ed kinen asawa to a si Paltiel ya anak nen Lais.

¹⁶ Mannangnangis ya inolup nen Paltiel si asawa to ya anggad baley na Bahurim. Balet nen Pawil ka la, kuanen Abner ed Paltiel, pinmawil la.

¹⁷ Linmay Abner ed saray panguloy Israel tan kuantod sikara, Abayag lan pilalek yon manariy David ed sikayo.

¹⁸ Niay pankanawnawa yo natan. Nanunotan yo angangko ya inkuay Katawan, Ikanak so aripen kon David a mangyagel ed saray totook ya Israelita ed saray Filisteo tan saray arum a kalaban da!

¹⁹ Akisalita met si Abner ed saray totoo ed tribu nen Benjamin, insan linmad Hebron a mangibagad kinen David no antoy insipan a gawaen na saray totood tribu nen Benjamin tan saray Israelita.

²⁰ Nen si Abner tan saray kakaiba ton duamplon lalaki et linma rad kinen David diad Hebron, nanggaway David na sakey a baleg a ponsia a para sikara.

²¹ Insan inkuanen Abner ed kinen David, Onla ak la a mananggoyur ed saray amin a totood Israel a migampi la rad sika. Awaten da kan manari ed sikara, et nagamuran mod satan so pilalek mon manoley ed intiron bansa. Insipan nen David ed kinen Abner ya anggapoy maniwit ed sikato, insan to la pinaonla.

²² Ag abayag, sinmabin nanlapud laban si Joab tan saray arum ya opisyal; amayamay so awit dan asamsam da. Balet si Abner ag la kaiba nen David ed Hebron. Andi lad man, ta pinasempet la nen David kayari ton insipan ya anggapoy maniwit ed sikato.

²³ Nen sinmabiy Joab tan saray totoo to, nibagad sikato a linmay Abner ed kinen Ari David tan pinasempet nen David kayari ton insipan ya anggapoy maniwit ed sikato.

²⁴ Kanyan linmay Joab ed ari tan kuantod sikato, Antoy ginawam? Linmad sikay Abnerakin et onmay impangibakim ed sikato?

²⁵ Linma dian mamalikdod sika. Linma dian mangamta ed saray pasen a lalaen mo tan no anto ray gagawaen mo. Andi-duaruwan amtam ira ya!

²⁶ Kataynan tod kinen David, angibakiy pigaran totoo a mangawit ed kinen Abner. Nabot dad Bobun na Sira tan pinapawil da; balet ag amta ya nen David.

²⁷ Kasabi nen Abner ed Hebron, impaliis nen Joab ed puirta tan konwarin pitongtongan to, balet ta sinaksak tod eges. Kanyan apatey si Abner lapud pinatey toy Asael ya agi nen Joab.

²⁸ Nen nadngelan nen David so agawa inkuanto, Kabat na Katawan a saray totook tan siak et anggapoy pibabali mid sayan impamatey ed kinen Abner ya anak nen Ner.

²⁹ Pakadusaan ya komun nen Joab tan amin a kabyangay pamilya to. Diad kapag kailalakan, walan wala komuy lakin kabyangay pamilya to a mansakit na gonoriya, o kating, o say nayarian ton gawaen labat et say kimey na bii, o napatey ed bakal odino naerasan!

³⁰ Kanyan akabawi si Joab tan si agi ton Abisai ed kinen Abner lapud impamatey tod agi ran si Asael diad bakal ed Gabaon.

³¹ Kanyan ingganggan nen David ed kinen Joab tan saray totoo to a pilaten day kawes da, mankawes iray sako, tan panermenan day Abner. Nen pompon, nanakar a tinmombuk si Ari David ed longun nen Abner.

³² Nipompon ed Hebron si Abner, tan diad lobuk manorangal so ari tan saray amin a totoo.

³³ Kinanta nen David yan kantay ermen a para si Abner: Akin et inatey a singa ambagel si Abner?

³⁴ Ag abalur iray lima to, Ag met ataker iray sali to; Inatey a singa toon pinatey na saray kriminal! Insan inakisan lamet na saray totoo.

³⁵ Sanagew a tatangguyoren na saray totoo si David a mangan, balet sinambaan to, Pateyen ak komun na Dios no mangan ak na antokaman kasakbayan ya onselek so agew!

³⁶ Naimano da ya tan akaliket ira. Say katwaan to et panliketan da so antokaman a gawaen nen David.

³⁷ Amin a totoo nen David tan amin a totood Israel et akabatan da ya anggapoy pibabali nen David ed impatey nen Abner.

³⁸ Inkuan na ari ed saray opisyal to, Ag yo ta amta a diad sayan agew et inatey so sakey a matalonggaring a pangulo ed Israel?

³⁹ Anggan sakey ak ya arin pinili na Dios, makapkapoy ak ed sayan agew. Ag ko nayariay inkaruksa da ra yan lalakin anak nen Sarvia! Dusaen komun na Katawan ira yan kriminal onung ed kanepegan da!

4

¹ "Tinmakot si Isboset ya anak nen Saul nen nadngelan ton apatey ed Hebron si Abner, tan apagaan iray amin a totood Israel.

² "Si Isboset walay duaran opisyal to a manangipanguloy idodogpa rad arum a lugar, a di Baana tan Recab, lalakin anak nen Rimon a taga Beerot tan kabyangay tribu nen Benjamin. (Say Beerot et nipapasen a kabyangay dalin nen Benjamin.

³ "Saray totoon manaayam diman nen saman et batik irad Gittaim a sikato lay panaayaman da nanlapud saman.)

⁴ "Say sakey a kabyangay boleg nen Saul et si Mefiboset a lakin anak nen Jonatan. Limay taon to nen inatey ira di Saul tan Jonatan. Nen say balitan nipaakar ed impatey da et sinmabin nanlapud Jezreel inalay managkomis si Mefiboset tan batik; balet diad panggaganat to naplag to, kanyan alopuy.

⁵ "Pinmikal si Recab tan si Baana, ta onla rad abung nen Isboset. Kagkaagewan so insabi ra, tan mamapainaway Isboset.

⁶ "Say biin mamapalin na trigo ed puirta et akatomeg insan akaogip, kanyan akaloob ira di Recab tan Baana ya anggapoy akalikas.

⁷ "Kaloob da, talus day kuarton naogipan nen Isboset, insan da pinatey. Pinotut day olo to, inawit da, insan sanlabi ran nanakar ed Patar na Jordan.

⁸ "Inyawat da may olo ed kinen Ari David ed Hebron tan kuandad sikato, Niay olo nen Isboset ya anak nen Saul a kalaban mo a mamapatey ed sika nen saman. Imbawian ka natan na Katawan ed kinen Saul tan saray kabyangay boleg to.

⁹ "Inmebat si David ed sikara, Mansamba ak ed ngaran na mabilay a Katawan, ya angyagel ed siak ed amin a kaatapan.

¹⁰ Samay angibalitad siak diad Siclag na impatey nen Saul et abaloan ton sankaawit toy maung a balita. Siningkat ko tan impapatey ko. Sikato may tumang ya inter kod sikato lapud samay maung ya imbalita to!

¹¹ Ag kasi lalon ambelat a dusa so iter ed saray totoon maoges lapud pamatey da ed toon anggapoy kasalanan a naogip ed dilin abung to? Ombawi ak natan ed sikayo lapud impamatey yod sikato, tan paandien ta kayo ed tapew na dalin!

¹² Ingganggan nen David iray sondalo to, et pinatey day Recab tan si Baana. Pinotut da ray lima tan saray sali ra, insan da ra ya insabit ed abay na dipositoy danum ed Hebron. Inala ra may olo nen Isboset, insan da impompon ed lobuk nen Abner diad Hebron.

5

¹ "Insan amin a tribu na Israel linma rad kinen David diad Hebron tan kuandad sikato, Kadalaan tan kalamanan mo kami.

² "Nen saman, anggan nen ari mi ni si Saul, impangulom ed bakal iray totood Israel, tan insipan ed sika na Katawan ya iwanwan mo ray totoo to tan oleyan mo ra.

³ "Kanyan amin a panguloy Israel linma rad kinen Ari David diad Hebron. Diad arap na Katawan akisipanan ed sikara, nilanaan da et nagmaliw ya ari na Israel.

⁴ "Talomploy taon nen David nen nagmaliw ya ari, tan nanoley na apataploy taon.

⁵ "Diad Hebron nanoley ed Juda na pitora tan kapalduan taon, tan diad Jerusalem nanoley ed intiron Israel tan Juda na talomplo tan taloy taon.

⁶ "Aminsan, namparaan si Ari David tan saray totoo to ya ondogpa ed Jerusalem. Abaloan na saray Jebusita, a sikaray manaayam diman, ya ag to nayarian a dakepen so siudad, kanyan inkuandad sikato, Ag ka dian balut makaloob; nayarian kan ag palooben na anggan saray bulag tan saray lopuy. (

⁷ "Balet dinakep nen David so tirinsira na Sion, kanyan nagmaliw ya atawag na Siudad nen David.)

⁸ "Diad saman ya agew inkuanen David ed saray totoo to, Wala rad sikayoy mamobosul ed saray Jebusita a singa pamobusul kod sikara? Nayarian yo ra kasin pateyen? Lakayo sirin tan dalan kayod dalan na danum. Dogpaan yo ra man a pangaskasiyan a bulag tan lopuy. (Sikayo yay makasengeg no akin et nikuan, Ag makaloob ed abung na Katawan iray bulag tan saray lopuy.)

⁹ "Kayarin adakep so tirinsira, nanayaman nen David tan inngaran to na Siudad nen David. Impaalagey toy siudad ed kaliber-liber na tirinsira; inggapo tod pasen a tinabonan diad bokig na pokdul.

¹⁰ Pinmalalo lan pinmalalo so inkatalonggaring nen David, ta walad sikatoy Katawan a Dios a Makapanyarin-amin.

¹¹ Si Ari Hiram na Tiro angibaki na totoo to ed kinen David; initdan to na saray troson sidro, saray karpintiro tan saray kantiro ta ipaalageyan day sakey a palasio.

¹² Abirbir nen David ed satan a say Katawan inletneg ton manari ed Israel, tan papaaligwasen toy nanarian to a pankaabigan na saray totoo to.

¹³ Kaalis nen David manlapud Hebron, angyamung ni tan angasawa ni na pigaran bibii ed Jerusalem, kanyan dinmakel iray anak ton bibii tan lalaki.

¹⁴ Niay kangaranan da ray anak ton nianak ed Jerusalem: Samua, Sobab, Natan, Solomon,

¹⁵ Ibhar, Elisua, Nefeg, Jafia,

¹⁶ Elisama, Eliada, tan Elifelet.

¹⁷ Nen nadngelan na saray Filisteo ya agawa lan arid Israel si David, linma ray sondalo ran manakep ed sikato. Nen nadngelan ya nen David, linmad pasen a niliber na padir.

¹⁸ Akasabid Patar na Refaim iray Filisteo tan nanayam irad man.

¹⁹ Tinepet nen David ed Katawan, Dogpaan ko ray Filisteo? Panaloen mo ak kasi? Inmebat so Katawan, On, dogpaan mo ra! Panaloen ta ka!

²⁰ Kanyan linmad Baal-perazim si David, tan tinalo tod man iray Filisteo. Inkuanto, Singa sinelak na delap iray kalaban ko nen dinogpaan iray Katawan. Kanyan saman a pasen atawag na Baal-perazim.

²¹ Tinaynan diman na saray Filisteo iray talintaoy diriyos da, et inaala ra nen David tan saray totoo to.

²² Pinmawil ed Patar na Refaim iray Filisteo tan nanayam irad man lamet.

²³ Impanon lamet nen David ed Katawan, et say Katawan inmebat, Ag ka dia manlalapu no dogpaan mo ra. Saliberber ka tan dogpa kan manlapud biek a dapag, diad abay na saray kiew a balsamo.

²⁴ No narengel mod tagey na kakiewan so tanul na panaakar da ray sondalo, dogpa ka, ta wala ak ed onaan mo a mibakal ed saray sondalo na Filistia.

²⁵ Ginawa nen David so ingganggan na Katawan, tan pinasoner to ray Filisteo manlapud Geba ya anggad Gezer.

6

¹ "Aminsan, impantitipon lamet nen David iray sankamaungan a sondalo ed Israel; talomplon libo ran amin.

² "Inwanwan to ra ed Baale-juda, ta alaen dad man so Kaban na Sipanan na Dios a natatawag onung ed ngaray Katawan a Makapanyarin-amin a say trono to et walad tagey na saray kirubin.

³ "Inala rad abung nen Abinadab a walad toktok na pokdul, insan da inlugan ed sakey a balon kariton. Di Uza tan Ahio a lalakin anak nen Abinadab so angiwanwan ed samay kariton.

⁴ "Nanakar ed onaan si Ahio.

⁵ "Si David tan amin ya Israelita et nansasayaw tan nankakanta ra ed anggaay nayarian da a pangigalang ed Katawan. Nantotogtog iray arpa, saltirio, tambul, tamborin, tan piangpiang.

⁶ "Kasabi rad pasen a panagilikan nen Nacon, nipatakba ra may baka, kanyan inyonat nen Uza so lima to, tan binembenan toy Kaban na Sipanan.

⁷ "Akapasnuk a tampol so Katawan a Dios ed kinen Uza tan pinatey to lapud ag to impamagalang. Inatey diman si Uza diad abay na Kaban na Sipanan,

⁸ "kanyan manlapud saya atawag iman na pasen na Perez-uza. Akapasnuk si David, ta diad sanuk na Katawan dinusa toy Uza.

⁹ "Insan tinmakot si David ed Katawan tan kuanto, Panon ko natan ya isempet so Kaban na Sipanan?

¹⁰ Kanyan ag to la labay ya awiten ed Jerusalem; ingen, inmiwas ed dalan tan intilak to lad abung nen Obed-edom a taga siudad na Gat.

¹¹ Say Kaban na Sipanan nanayam diman a taloy bulan, binindisionan na Katawan si Obed-edom tan say pamilya to.

¹² Nadngelan nen Ari David a lapud Kaban na Sipanan, binindisionan na Katawan so pamilya nen Obed-edom tan amin a kayaryan to. Kanyan inala toy Kaban na Sipanan ed abung nen Obed-edom, ta iyakar ton malikeliket ed Jerusalem.

¹³ Nen saray totoon angawit na Kaban na Sipanan et akakotdang iray anemira, pinatonda ra nen David, ta angibagat ed Katawan na sakey a bakan kalakyan tan sakey a pinataban kilaw a baka.

¹⁴ Si David, ya akabariber labat na abel a linen ed awak to, et sinmayaw ed anggaay nayarian to a pangigalang tod Katawan.

¹⁵ Kanyan sikato tan amin da ray Israelita inyakar dad Jerusalem imay Kaban na Sipanan a kataruk day eyag na liket tan tanul na saray trumpita.

¹⁶ Legan a niyaakar ed siudad so Kaban na Sipanan, tinmandag si Micol a biin anak nen Saul et anengneng toy Ari David a mansasayaw-sayaw tan manlukso-lukso ed arap na Katawan. Lapud saya binalaw tod puso to si David.

¹⁷ Inyakar day Kaban na Sipanan tan inyan dad pasen to diad dalem na tulda ya imparaan nen David a panginan. Insan angisaklang ed Katawan na saray bagat a popoolan tan bagat a para kareenan.

¹⁸ Kayari ton angibagat, binindisionan tod ngaran na Katawan a Makapanyarin-amin iray totoo,

¹⁹ tan binunogan to ran amin na kakanen. Initdan toy balang sakey a laki tan balang sakey a bii ed Israel na sakey a tinapay, sakey a tegteg ya inkalut a karni, tan pigaran pasas. Insan sinmempet lay balang sakey.

²⁰ Ag abayag sinmempet met lay David a mangilugay ed pamilya to. Pinmaway ya onabet ed sikato si Micol tan inkuanto, Sayan agew ontan lay impangitanduro na arid Israel ed sikaton dili! Singa ambagel a lakseb ed arap da ray bibiin managlingkur na saray opisyal to!

²¹ Inmebat si David, Sinmayaw ak a pangigalang kod Katawan ya amilid siak a mangipangulod saray totoo tod Israel; aliwan si amam tan say pamilya to so apili. Ituloy koy mansayaw a pangigalang kod Katawan,

²² tan iloor kon pabandayen so siak a dili. Nayarin ipasen mo ak ya andi-kana, balet atagey so pangipasen ed siak na saramay bibiin asalitam!

²³ Ag balut akaanak si Micol a biin anak nen Saul.

7

¹ "Manaayam la natan si Ari David ed palasio to, tan inyagel na Katawan ed amin da ray kalaban to.

² "Insan inkuan na ari ed kinen propita Natan, Wadya ak a manaayam ed abung a sidro, balet say Kaban na Sipanan na Dios et akasinup labat ed dalem na sakey a tulda!

³ "Inmebat si Natan, Gawam labat so antokaman a walad kanunotan mo, ta walad sika so Katawan.

⁴ "Balet diad saman a labi inkuan na Katawan ed kinen Natan.

⁵ "Laka, ta ibagam ed aripen kon David a kuankod sikato, Aliwan sikay mamaalagey na timplon panayaman ko.

⁶ "Nanlapu lad impangipaway kod saray totood Israel ed Egipto ya anggad natan, ag ak balut nanayam ed dalem na timplo; diad dalem na tulday nanaayaman ko tan nanaakar-akar ak.

⁷ "Diad impipilak ed saray totood Israel ag kon balut tinepet ed siopaman a pinilik a panguloy Israel no akin et ag to ak impaalageyan na timplo a sidro.

⁸ "Kanyan ibagam ed aripen kon David a siak, say Katawan a Makapanyarin-amin, kuankod sikato, Inekal ta kad panagpastol moy karniro ed kaalogan, insan ta ka ginawan manoley ed saray totook ya Israel.

⁹ "Kaiba ta ka ed anggan iner a nilam, tan tinalok iray kalaban mo diad indogpam. Gawaen ta kan matalonggaringan a singa saray sankatalonggaringan a pangulod intiron mundo.

¹⁰ Amili ak na sakey a pasen a para saray totook ya Israel tan impanayam ko rad man ya ag la ra nasigensigen. Nanlapu lad inloob dad sayan dalin, dinodogpaan ira na maruksan totoo, balet ag la ya nagawad sikara. Isipan kon iyagel ta kad saray kalaban mo, tan parakelen ko ray kabyangay boleg mo.

¹¹

¹² No ompatey ka tan nipompon kad kawalaan da ray lalakim, gawaen kon ari so sakey ed saray anak mo tan pabiskegen koy nanarian to.

¹³ Sikatoy mamaalagey na sakey a timplon para siak, tan pansiansiaen ko ya anggad angga so nanarian to.

¹⁴ Siak so ama to tan sikatoy magmaliw ya anak ko. No manggaway maoges, dusaen kon singa panusay ama ed anak to.

¹⁵ Balet ag ko ekalen so ag mangoman a panangarok ed sikato, aliwan singa ginawak ed kinen Saul.

¹⁶ Nawalaan ka lawas na saray kabyangay boleg mo, tan pansiansiaen ko ya anggad angga so nanarian mo.

¹⁷ Imbaga nen Natan ed kinen David iray amin ya impaamtay Dios ed sikato.

¹⁸ Si Ari David linmoob ed Tuldan Ayamay Katawan, inmirung tan nampikasi, Aliwak a manepeg, anggan say pamilyak, et antokaman a ginagawam lad siak, Katawan a Dios.

¹⁹ Balet natan, lalon dakel so gagawaen mo, Katawan a Dios; nansipan kay nipaakar ed saray kabyangay pamilyak diad arapen a panaon. Inyabuloy mon naamtaan ya na too,Katawan a Dios!

²⁰ Anto niy nayarian kon ibagad sika? Kabkabat mo ak, say aripen mo.

²¹ Linawam tan getmam a gawaen ya; ginawam ira yan amin a bengatla pian nibangat mo ak.

²² Agaylay inkatalonggaring mo, Sankatageyan a Katawan! Anggapoy miparad sika; amta mi lawas a bukbukor mo so Dios.

²³ Anggapoy arum a bansa diad tapew na dalin a miparad Israel. Inyagel mod inkaaripen iray Israelita tan ginawam ira a totoom. Diad panamegley na saray ankabaleg tan makapakelaw a ginagawam para sikara, kinmayat ed intiron mundo so dayew mo. Pinataynan mo ray taga arum a bansa tan saray diriyos da legan a mankukurang iray totoom, saray totoon impaway mod Egipto pian nakayaryan mo ra.

²⁴ Ginawam ya andi-anggaan a totoom so Israel tan sika, Katawan, so nagmaliw a Dios da.

²⁵ Katawan a Dios, sumpal mo pad amin a panaon so insipan mo nipaakar ed siak tan saray kabyangay boleg ko, tan gawam pay onung na sinalitam.

²⁶ Nitanduro ka tan lawas ikuan na saray totoo, Say Katawan a Makapanyarin-amin so Dios ed intiron Israel. Pansiansiaen moy nanarian ko,

²⁷ O Katawan a Makapanyarin-amin a Dios na Israel! Matalek kon ipikasi yad sika, ta impuyan mo yan amin ed siak ya aripen mo, tan imbagam ed siak a gawaen mon arari iray kabyangay boleg ko.

²⁸ Katawan a Dios, sika so Dios; susumpalen mo lawas iray sipan mo, et insipan mod siak yan maung a bengatla.

²⁹ Kerewen kod sikan bindisionan mo ray kabyangay boleg ko, tan pansiansiam yan bindision ed sikara. Sika, Katawan a Dios, so angisipan ed saya; mansiansian ando lan ando ed saray kabyangay boleg mo so bindision mo.

8

¹ "Ag abayag, dinogpaan lamet nen David iray Filisteo tan tinalo to ra, kanyan tinmonday pakaoley da ed saman a dalin.

² "Insan to tinalo ray Moabita; pinarokul tod dalin iray priso, sinukat to ra na lobir, insan to pinatey ed sikara so duara ed kapag talora. Kanyan saray Moabita nagmaliw iran walad silong na pakaoley to, tan nambabayar iray buis ed sikato.

³ "Insan to tinaloy ari na Zoba a si Hadadezer a lakin anak nen Rehob, legan ya oonlay Hadadezer a mamapawil na pakaoley tod dalin a kaabay na Ilog na Eufrates.

⁴ "Adakep nen David so sanlibo tan piton lasus a kumakabayo to tan duamplon libon arum a sondalo to. Angikera na saray kabayon para sanlasus a karwahi, insan to nilolopuy iray arum.

⁵ "Nen saray taga Siria et angibaki ra na saray sondalon ontulong ed Ari Hadadezer, dinogpaan ira nen David tan pinatey toy duamplo tan duan libon lalaki.

⁶ "Insan nankampod Damasco iray sondalo to; saray tagad man nagmaliw iran walad silong na pakaoley to, kanyan nambabayar iray buis ed sikato. Impanalo na Dios si David ed anggan iner a pasen.

⁷ "Asamsam nen David iray balituk a samper a sankaawit na saray opisyal nen Hadadezer, tan inawit to ra ed Jerusalem.

⁸ "Amayamay met so nala ton gansa ed Beta tan Berotai, saray siudad ya ooleyan nen Hadadezer.

⁹ "Akabatan nen Ari Toi na Hamat a tinalo nen David iray amin a sondalo nen Hadadezer.

¹⁰ Kanyan imbaki toy lakin anak to a si Joram a mangilugay ed kinen Ari David tan mangitanduro ed sikato lapud impanalo tod kinen Hadadezer, ya amimpigan akalaban nen Toi. Initdan nen Joram si David na saray rigalon ginawad balituk, pilak, tan gansa.

¹¹ Insaklang nen David ira ya ed Katawan a pati saray pilak tan balituk a nalnala tod saray bansan tinatalo to

¹² Edom, Moab, Amnon, Filistia, tan Amalectan ontan met ed kabyangan na saray nala tod kinen Hadadezer.

¹³ Pinmalaloy imbantug nen David nen pinmawil, kayari ton pinatey ed Patar na Asin so labinwalon libon taga Edom.

¹⁴ Nankampod nandoroman lugar na Edom iray sondalo to, kanyan nagmaliw a walad silong na pakaoley to ray tagad man. Impanatalo na Katawan si David ed anggan iner a pasen.

¹⁵ Nanoley si David ed intiron Israel; maptek tan anggapoy nilabi so impanoley tod saray totoo.

¹⁶ Si Joab a sananey ya anak nen Sarvia so pangulo na saray sondalo; si Josafat a lakin anak nen Ahilud so akaoley ed pansulat na awaran;

¹⁷ si Sadoc a lakin anak nen Ahitob tan si Ahimelec a lakin anak nen Abiatar et sikaray papari; si Seraya so sikritario na palasio;

¹⁸ si Benaya a lakin anak nen Joiada so akaoley ed saray bantay ed kinen David; tan saray lalakin anak nen David et papari ra.

9

¹ "Aminsan ya agew tinepet nen David, Wala niy atilak kasin kabyangay pamilya nen Saul? No wala ni, labay kon kasian makasengeg ed kinen Jonatan.

² "Walay aripen na pamilya nen Saul a manngaran na Siba; nibagad sikato ya onlad kinen David. Sikay Siba? tepet na ari. On, siak so aripen mo, ebat to.

³ "Tinepet na ari ed sikato, Wala niy atilak kasin kabyangay pamilya nen Saul, pian nakasian ko onung na insipan kod Dios? Inmebat si Siba, Wala niy sakey ed saray anak nen Jonatan, balet lopuy.

⁴ "Kawalaan to? tepet na ari. Walad abung nen Makir a lakin anak nen Amiel, diad Lo-debar, ebat nen Siba.

⁵ "Kanyan impaawit nen Ari David.

⁶ "Nen sinmabiy Mefiboset a lakin anak nen Jonatan tan apo nen Saul, dinmakmomod kinen David a pangigalang to. Inkuanen David, Mefiboset, insan inmebat, Wadya ak ya aripen mo.

⁷ "Ag ka natatakot, ebat nen David. Kasian ta ka makasengeg ed kinen amam a Jonatan. Ipawil kod sikay amin a dalin a kayaryan nen lakim a Saul, tan mangan ka lawas ed lamisaan ko.

⁸ "Dinmakmomo lamet si Mefiboset tan kuanto, Singa ak la inatey ya aso, katawan! Akin et ontan lay abig na linawam ed siak?

⁹ "Insan tinawag nen David si Siba ya aripen nen Saul tan kuanto, Iter kod kinen Mefiboset, ya apo na katawan mon inatey la, so amin a kayaryan nen Saul tan say pamilya to.

¹⁰ Sika, saray anak mo, tan saray aripen mo so ondalus ed dalin para sikato; iter yod sikatoy naani, pian walay taganoy pamilya to. Balet si Mefiboset mangan lawas ed lamisaan ko. (Si Siba labinliman lalaki so anak to tan duamplo so aripen to.)

¹¹ Inmebat si Siba, Gawaen koy amin ya ingganggan mo, Kagalgalang kon Ari. Kanyan angakan si Mefiboset ed lamisaan na ari, a singa sakey ed saray lalakin anak na ari.

¹² Si Mefiboset walay malangwer ya anak ton laki a mangaray Mica. Nagmaliw ya aripen nen Mefiboset iray amin a kabyangay pamilya nen Siba.

¹³ Kanyan nanayam ed Jerusalem si Mefiboset a lopuy iray sali to. Diad lamisaan na ari so angakanan to lawas.

10

¹ "Ag abayag, inatey si Ari Nahas na Amnon tan sinmalat ya ari si Hanun a lakin anak to.

² "Inkuanen David, Ipanengneng koy matoor a pikakaaro ed kinen Hanun, a singa ginawa nen ama ton Nahas ed siak. Kanyan angibakiy David na saray mangibaga na pidadamay tod kinen Hanun. Nen sinmabid Amnon ira may imbaki;

³ "inkuan na saray panguloy Ammonita ed kinen ari, Abaloan mo sirin a say pamagalang ed kinen amam so impangibaki nen David ed sarayan totoo a midamay ed sika? Andi! Imbaki to ra dian manespia tan mannengneng ed siudad, pian nadakep da itayo!

⁴ "Siningkat nen Hanun ira may imbaki nen David, nilabahasan to ray balbas dad kapalduan dapag, pinotut to ya anggad tapi ray kawes da, insan to la ra pinapawil.

⁵ "Ag da labay so onsempet, ta ontan lay baing da. Nen akabatan nen David so agawa, impaibaga ton manayam ni rad Jerico ya anggad itoboy balbas da, insan la ra onsempet.

⁶ "Abirbir na saray Ammonita ya agawa ran kalaban si David, kanyan angupa ray duamplon libon Sirianon sondalo a taga Bet-rehob tan Soba, labinduan libon lalaki a taga Tob, tan say ari ed Maaca a kaiba to ray sanlibon totoo to.

⁷ "Akabatan ya nen David, kanyan imbaki toy Joab tan saray amin a sondalo to.

⁸ "Kinmurang iray Ammonita tan namparaan iran mibakal diad lolooban na Rabba a manonan siudad da, balet saray arumsaray taga Siria, Tob tan Maacanamparaan irad kaalogan.

⁹ "Anengneng nen Joab a dogpaan ira na saray kalaban da ed arap tan diad beneg da, kanyan amili na saray sankamaungan a sondalo na Israel tan namparaan iran onarap ed saray taga Siria.

¹⁰ Saray arum a sondalo to impangulo ra nen agi ton si Abisai ya angiganggan a mamparaan iran onarap ed saray Ammonita.

¹¹ Inkuanen Joab ed kinen Abisai, No nanengneng mon tataloen ak na taga Siria, dago mo ak a tulongan, et no nanengneng ta kan tataloen na saray Ammonita, dagoen ta kan tulongan.

¹² Mampabiskeg kayoy linawa! Pasiaen tayoy mibakal para saray totoo tayo tan para saray siudad na Dios tayo. Say linawa na Katawan komun so nagawa!

¹³ Kanyan si Joab tan saray totoo to kinmurang iran ondogpa, et kibatiktik iray taga Siria.

¹⁴ Nen anengneng na saray Ammonita a kibatiktik iray taga Sirira, imbatikan day Abisai tan sinmoner irad siudad. Kayari nen Joab ya akibakal ed saray Ammonita, pinmawil lad Jerusalem.

¹⁵ Abirbir na saray taga Siria a tinalo ra na saray Israelita, kanyan impantitipon da ray amin a sondalo ra.

¹⁶ Impatawag nen Ari Hadadezer iray taga Siria a walad bokig na Ilog na Eufrates, kanyan linma rad Helam. Inwanwan ira nen Sobac a pangulo na saray sondalo nen Hadadezer na Soba.

¹⁷ Nen abalitaan ya nen David, impantitipon to ray sondalo to, binaliw day Ilog na Jordan, angurang iran onlad Helam a dimay namparaanan na saray taga Siria a miarapan ed kinen David. Ginmapoy bakal,

¹⁸ et saray Israelita pinasoner da ray taga Siria. Si David tan saray totoo to akapatey iray piton lasus a kumakarwahin taga Siria, tan apataplon libo a kumakabayo. Asugatan day Sobac a pangulo na saray sondalon kalaban da, insan inatey ed bakalan.

¹⁹ Nen naamtaan na saray ararin walad pakaoley nen Hadadezer a tinalo ra na saray Israelita, akikaaro rad saray Israelita tan nagmaliw iran walad silong na pakaoley da. Saray taga Siria antakot la ran ontulong ed saray Ammonita.

11

¹ "Diad ontombuk a tiagew, say panaon ya ipapaway da ray ararin mibakal, imbaki nen David a mibakal si Joab, saray opisyal to, tan saray sondaloy Israel; tinalo da ray Ammonita tan nilooban day siudad na Rabba. Balet nanayam ed Jerusalem si David.

² "Aminsan ya agew, nen ngarngarem la, binmangon si David ed pampapainawa to, insan linmad toktok na palasio. Diad panaakar-akar tod man akanengneng na sakey a biin manaames ed abung. Magangganan maung yan bii.

³ "Kanyan angibaki na manepet, tan akabatan to a saman a bii et si Bat-seba ya anak nen Eliam tan asawa nen Urias a Heteo.

⁴ "Angibakiy David na saray mangawit ed kinen Bat-seba; inawit da, insan to inakdulan. (Karkayariy binulan a panaglinis nen Bat-seba onung ed ganggan.) Insan la sinmempet.

⁵ "Ag abayag, nanlokun, kanyan impaibaga tod kinen David.

⁶ "Insan si David impaikuantod kinen Joab, Ibakim diay Urias a Heteo. Kanyan imbaki nen Joab si Urias ed kinen David.

⁷ "Nen sinmabiy Urias, tinepet nen David ed sikato no maung kasiy kipapasen nen Joab tan saray sondalo, tan no antoy nagagawad bakal.

⁸ "Insan to inkuan ed kinen Urias, Sempet ka, ta mampainawa kan magano. Tinmaynan si Urias, tan walay rigalon impaiyakar nen David ed abung to.

⁹ "Balet ag sinmempet ed abung si Urias; ingen, inmogip ed puirta na palasio a kaiba to ray guardiay ari.

¹⁰ Nen nadngelan nen David ya ag sinmempet ed abung si Urias, tinepet tod sikato, Abayag lay inkaandim tan kasabi-sabim; akin et ag ka ni sinmempet?

¹¹ Inmebat si Urias, Mibabakal iray totood Israel tan Juda, a kaiba ray Kaban na Sipanan; say pangulok a Joab tan saray opisyal to et wala rad kampo diad kaalogan. Panoy isempet kod abung, mangan, oninom, tan onogip a kaakdul koy asawak? Diad ngaray tawen, isambak ya ag ko ya nayarin gawaen!

¹² Kanyan inkuanen David, Manayam ka ni dia sirin a sanagew, ta nabwas papawilen ta kad bakalan. Kanyan nanayam ed Jerusalem si Urias ed saman ya agew tan diad ontombuk ya agew.

¹³ Inimbitaan nen David a mandem, insan to binuek. Balet diad saman a labi ag lamet sinmempet ed abung si Urias; ingen, inmogip ed oles to a kaiba to ray guardiay ari.

¹⁴ Diad kaimbuas nanggaway David na sulat a para si Joab, insan to impawit ed kinen Urias.

¹⁵ Insulat to: Ipasen moy Urias ed arap na kawalaay pinasyan laban, insan kayo onsoner tan paolyan yon napatey.

¹⁶ Kanyan nen lolooban nen Joab so siudad, imbaki toy Urias ed pasen ya amta ton mabiskeg iray kalaban da.

¹⁷ Pinmaway ed siudad iray sondalo na kalaban da, tan nilabanan da ray sondalo nen Joab; pigaran opisyal nen David so inatey a pati si Urias.

¹⁸ Insan impaibalita nen Joab ed kinen David so kipapasen na bakal,

¹⁹ tan binilin to may imbaki to, Kayarim ya ibagay nipaakar ed bakal,

²⁰ nayarin mampasnuk tan tepeten tod sika, Akin et inasinggeran yon maung so siudad diad impilaban yod sikara? Ag yo ta amtan panaen da kayo manlapud saray padir?

²¹ Ag yo ta anunotan no panoy impatey nen Abimelec a lakin anak nen Jerubesset? Diad Tebez iman so inkagawaan to; sakey a bii so angipelag na gilingan manlapud tagey na padir tan sikatoy inateyan nen Abimelec. Akin sirin et inabayan yon maung so padir? No tepeten ya na ari, ikuan mo ed sikato, Inatey met si opisyal mon Urias.

²² Kanyan linmad kinen David imay imbaki nen Joab tan imbaga toy imbilin nen Joab ed sikato.

²³ Inkuanto, Mabiskeg iray kalaban mi nen say sikami; pinmaway irad siudad tan nilabanan da kamid kaalogan, balet pinasoner mi rad puirtay siudad.

²⁴ Insan manlapud padir pinapana da kami, tan pigaran opisyal moy apatey a pati si Urias ya opisyal mo.

²⁵ Inkuanen David ed samay imbaki, Pabiskeg moy linawa nen Joab. Ibagam ed sikato ya ag nagogoloy isip to, ta ag nibaga no siopay napatey ed bakal. Ibagam met ed sikato ya ag nagogoloy isip to, ta ag nibaga no siopay napatey ed bakal. Ibagam met ed sikato a pabiskegen toy idogpa tod siudad, pian nadakep yo.

²⁶ Nen nadngelan nen Bat-seba ya inatey so asawa to, inala nen David ed palasio; nagmaliw ya asawa to tan naanakan to na sakey a laki. Balet akapaermen ed Katawan yan ginawa nen David.

12

¹ "Imbaki na Katawan si propita Natan ed kinen David. Linmay Natan ed sikato tan kuanto, Walay duaran laki a manaayam ed saksakey a baley; mayaman so sakey tan mairap-bilay so sakey.

² "Samay mayaman amayamay so baka tan karniro to.

³ "Samay mairap-bilay saksakey so kordiro to, a sinaliw to. Inasikaso to, tan binmaleg a kaiba na saray anak to. Initdan toy dilin kakanen to, pinapinom tod dilin kupa to, tan inakakwal to. Singa to dilin anak a bii.

⁴ "Aminsan ya agew walay sinmabin sangkaili na samay mayaman a laki. Ag labay na samay lakin mayaman so mamatas na dilin ayep to a panagkaili to; ingen, inala to may kordiro na samay mairap-bilay tan sikatoy impanangkaili to.

⁵ "Pinmetang a maung so olo nen David ed samay mayaman a too. Inkuanto, Isipan kod mabilay a Katawan a nepeg ya ompatey iman a nanggawad saya!

⁶ "Nepeg ton bayaran na mamipat a karakel so inala to, lapud sayan andi-panangasin ginawa to.

⁷ "Sika man a too, inkuanen Natan ed kinen David. Onyay kuan na Katawan a Dios na Israel: Ginawa ta kan ari na Israel tan inyagel ta kad kinen Saul.

⁸ "Inter kod sikay nanarian to tan saray asawa to; ginawa ta kan ari na Israel tan Juda. No kinmulang ni ya, initdan ta ka ni komun na singa karakel na inter ko lad sika.

⁹ "Akin sirin et ag mo inonur iray ganggan ko? Akin et ginawam yan kaogsan? Impapatey mod bakal si Urias; inabuloyan mon pinatey na saray Ammonita, insan mo inasaway asawa to!

¹⁰ Natan sirin diad balang kailalakan, pigaran kabyangay boleg mo so napatey diad panamegley na ispada, lapud ag mo ak inonur tan inasawam so asawa nen Urias.

¹¹ Tandaan mo, dagdagen ko a manngunigon ed sika so sakey a kabyangay pamilyam. Naimatunan mo ya, no alaen ko ray asawam insan ko ra iter ed sakey a laki; akdulan to ra ya anggan agew.

¹² Maamut so impankasalanan mo, balet abuloyan ko yan nagawa ed agew, pian naimatunan na intiron Israel!

¹³ Nankasalanan ak ed Katawan, kuanen David ed kinen Natan. Inmebat si Natan, Pinirdona ka na Katawan; ag ka ompatey.

¹⁴ Balet lapud sinumpam so Katawan diad impanggawam ed sayan kaogsan; ompatey so anak mo.

¹⁵ Insan sinmempet lay Natan. Impaninagem na Katawan so ogaw ya anak nen David ed asawa nen Urias.

¹⁶ Nampikasiy David a paabigen na Dios komun imay ogaw. Ag mangan si David; labi-labin onloob ed kuarto to tan mandokul ed datal.

¹⁷ Laen na saray opisyal na palasio a bangonen, balet ag to, tan ag mangan a kaiba to ra.

¹⁸ Kalabas na sakey simba, inatey so ogaw; antakot iray opisyal nen David a mangibalitad sikato. Inkuanda, Nen mabilay ni may ogaw, ag itayo inebatan nen David nen akitongtong itayod sikato. Panoy pangibaga tayod sikaton inatey so anak to? Ompan manggaway maoges ed sikaton dili?

¹⁹ Nen naimano nen David a maneesaesan ira, atalusan ton inatey lay ogaw. Kanyan tinepet tod sikara, Inatey lay ogaw? On, inatey la, ebat da.

²⁰ Binmangon ed datal si David, nanames, nansagaysay, tan nampales. Insan linman angigalang ed abung na Katawan. Nen pinmawil ed palasio, kinmerew na nakan, tan kapangisaklang da, angan.

²¹ Ag mi ya natalusan, kuan na saray opisyal to ed sikato. Nen mabilay ni may ogaw, ineerman mo tan ag ka mangan; balet kapatey to, binmangon ka tan angan ka!

²² On, ebat nen David. Nanayuno tan nanermen ak legan a mabilay ni. Abaloan kon kasian ak na Katawan tan ag to abuloyan ya ompatey so ogaw.

²³ Balet natan ta inatey la, akin et manayuno ak? Napabilay ko ta ni? Onsabiy agew ya onla ak ed pasen a kawalaan to, balet ag to lan balut makapawil ed siak.

²⁴ Niligliwa nen David si asawa ton Bat-seba tan inakdulan to. Nananak na sakey a laki si Bat-seba. Solomon so inngaran nen David ed ogaw. Inaro na Katawan so ogaw,

²⁵ tan ingganggan toy Natan a ngaranan toy ogaw na Jedidia, ta inaro na Katawan.

²⁶ Intuloy nen Joab so impibakal tod Rabba, say manonan siudad na Amnon. Nen ngalngali to la nadakep,

²⁷ angibaki na saray totoon mangibalitad kinen David: Dinogpaan koy Rabba tan nalak lay dipositoy danum na siudad.

²⁸ Tipon mo ray arum a sondalom, dogpaan yoy siudad tan sikan diliy manakep. Ag ko labay a siak so napagalangan ed pakadakep ed siudad.

²⁹ Kanyan tinipon nen David iray sondalo to, linmad Rabba, dinogpaan to tan adakep to.

³⁰ Say talintaoy dios na saray Ammonita a si Milcom et walay balituk a korona to a mambelat na sakey a talomplo tan apat a kilo, walay mablin bato ed samay korona. Inala nen David imay bato, insan to inyan ed korona to. Amayamay met ni ray nala ton bengatla ed siudad,

³¹ tan impankikimey to ray totood man diad panamegley na saray ligari, buka, balatyang, tan wasay a balatyang. Pinapasoot to ran impanggagaway ankakabaleg a laryo. Onya met so ginagawa tod saray totood arum a baley na Amnon. Insan pinmawil ed Jerusalem a kaiba to ray totoo to.

13

¹ "Si Absalom a lakin anak nen David et walay magangganan agi ton marikit a manggaray Tamar. Say sakey a lakin anak nen David a si Amnon et naibegan toy Tamar.

² "Diad ontan lan panibeg to, akainagem. Inisip ton ag to nayarin kayaryanen, ta sakey a birhin.

³ "Walay masilib a kaaro ton manngaray Jonadab a lakin anak nen Simea a lakin agi nen David.

⁴ "Inkuanen Jonadab ed kinen Amnon, Anak kay ari, balet inagew-agew ta kan nanenengneng a maermen. Antoy makasengeg a? Walay panibeg kod kinen Tamar ya agi nen Absalom ya agik ed ina, ebat to.

⁵ "Inkuanen Jonadab ed sikato, Mansakit-sakitan ka tan dokul ka. No laen to ka nen amam a nengnengen, ikuan mod sikato, Ibaki yo pa diay agik a Tamar, ta pakanen to ak. Labay kon nanengneng ya iparaanan to ak dia na tinapay, insan to ak pakanen.

⁶ "Kanyan nansakit-sakitan si Amnon, tan dinmokul. Linmay Ari David a nengnengen to, insan kuanen Amnon ed sikato, Ibaki yo pa diay agik a Tamar, ta labay kon nanengneng ya iparaanan to ak dia na tinapay, insan to ak pakanen.

⁷ "Kanyan impaibaga nen David ed kinen Tamar diad palasio: Lakad abung nen Amnon ta iparaanan moy kanen to.

⁸ "Kanyan linmay Tamar tan asabi toy Amnon a walad dokulan. Angalay arina, minasa to, tan nanggaway pigaran tinapay a sankanengneng nen Amnon.

⁹ "Insan inekal to rad kawali; ipapakan to ra, balet ag mangan si Amnon. Inkuanto, Papaway mo ray amin a totoon wadya, kanyan pinmaway iran amin.

¹⁰ Insan to inkuan ed sikato, Awit mo la dia ra tay tinapay tan pakan mo ak. Inala to ray tinapay tan sinmingger ed sikato.

¹¹ Nen idederew to ra, siningkat nen Amnon tan kuanto, Miakdul kad siak agik!

¹² Andi, kuanen Tamar. Ag mo ak papasootan! Ag ya nagagawa ed Israel! Ag ka manggagaway makapabaing!

¹³ Anto niy lupak a miarap ed karaklan? Tan sika, magmaliw kan mabambanday a maung ed Israel. Ipangasim, ta mitongtong kad ari! Andi-duaruwan iter to ak ed sika.

¹⁴ Balet ag dengelen nen Amnon; et lapud mabiskeg nen say sikato, apasoot ton inakdulan.

¹⁵ Insan kinabosul a maumaung nen Amnon; mapalalo niy impambosul to nen say impangaro to. Inkuantod sikato, Paway ka dia!

¹⁶ Andi, ebat to. Ambelat nin kasalanan so pamapaway mod siak nen say ginawam! Balet ag dengelen nen Amnon;

¹⁷ tinawag toy dilin aripen to tan kuanto, Paarawim ed arap ko yan bii! Papaway mo tan italak moy puirta!

¹⁸ Pinapaway na samay aripen tan intalak toy puirta. Si Tamar akakawes na andokey so saloy tan taklay, say ikakawes na saray prinsisan anggapoy asawa ed saman a panaon.

¹⁹ Ininan toy dapul so olo to, pinilat toy kawes to, tan linma lan manakis a sankaakup toy lupa to.

²⁰ Nen anengneng nen Absalom ya agi to, tinepet to, Pinasoot kan inakdulan nen Amnon? Ag mo la kari liliknaen a maung. Lapud ta agim ed ama, ag mo la ibabagad siopaman so agawa. Maerermen a nanayam si Tamar ed abung nen Absalom.

²¹ Nen nadngelan nen David so agawa, nampasnuk a maung.

²² Ag lan balut akitongtong si Absalom ed kinen Amnon, lapud mapalalon pasnuk tod sikato ed impamasoot tod kinen Tamar.

²³ Kayariy duay taon, kakatlian nen Absalom iray karniro to diad Baal-hazor ya asingger ed baley na Efraim. Inimbitaan ton onlad man iray amin a lalakin anak na ari.

²⁴ Linmad kinen Ari David tan kuanto, Papakatlian ko ray karnirok. Dagup kayo pa tan saray opisyal yo.

²⁵ Andi, anak ko, ebat na ari, No onla kamin amin, nairapan kan maung ed panangkailim. Ipapasoot nen Absalom, balet ag onabuloy so ari, tan papaonlaen to la.

²⁶ Balet inkuanen Absalom, Sigi sirin, anggan si Amnon labat so abuloyan yon onla. Akin et sikato? tepet na ari.

²⁷ Balet mapilit si Absalom, kanyan inmabuloy si David a pilaen toy Amnon tan amin da ni ray arum a lalakin anak to. Namparaan si Absalom na panangan a manepeg a para ari,

²⁸ tan binilin to ray aripen to: Imano yo no akainom lan maung si Amnon, tan kapangiganggan ko, patey yo. Ag kayo natatakot ta siak a dili so makaoley. Mampasebeg kayo tan ag kayo ontatalaw!

²⁹ Kanyan pinatey na saray aripen si Amnon onung na imbilin nen Absalom. Amin iray arum a lalakin anak nen David et kinabayoan da ray asno ra tan kibatiktik ira.

³⁰ Nen onsesempet ira, nibagad kinen David: Pinatey nen Absalom iray amin a lalakin anak moanggapoy anggan sakey ya atilak ed sikara!

³¹ Inmalagey so ari, pinilat toy kawes to a pangipanengneng toy ermen to, tan tinmiblak ed dalin. Pinilat da met so kawes da ray kakaiba ton aripen to.

³² Balet inkuanen Jonadab a lakin anak nen Simea a lakin agi nen David, Kagalang kon Ari, ag apatey iray amin ya anak mon lalaki. Si Amnon labat so apatey. Diad nengneng labat nen Absalom nalikas ya igagaem to lan pateyen si Amnon nanlapu lad samay impamasoot to ed kinen Tamar ya agi nen Absalom.

³³ Kanyan ag mo komun panisiaen so balitan inatey ya amin iray lalakin anak mo; si Amnon labat so inatey.

³⁴ Batik la balet si Absalom. Kabebekta say bantay anengneng tod dalan ed gilig na palandey so olup na totoon onsasabin nanlapud Horanaim. Linmad kinen ari tan imbalita toy anengneng to.

³⁵ Inkuanen Jonadab ed kinen David, Anak mo ra tay onsasabi, onung na samay aganok nin imbaga.

³⁶ Kapangibaga tod saya, sinmabi ray lalakin anak nen David; insan ira manorangal, tan inmakis na ampaipait si David tan saray opisyal to.

³⁷ Batik si Absalom tan linmad ari na Gesur a si Talmai a lakin anak nen Amihud, tan nanayam diman na taloy taon. Abayag ya inermenan nen David si Amnon;

³⁸

³⁹ balet nen ayari lay impanermen tod impatey nen Amnon, akailiw ed kinen Absalom.

14

¹ "Amta nen Joab a lakin anak nen Sarvia a makakailiw lan maung so Ari David ed kinen Absalom.

² "Kanyan impaawit toy sakey a biin masilib a taga Tecoa. Kasabi to, inkuanen Joab ed sikato, Mankonkuanan kan maermen; mambaliwan ka, tan ag mo sasagaysayen so buek mo. Ipanengneng mon sakey kan bii ya abayag lan maneermen.

³ "Lakad ari tan ibagam ed sikato so paibagak ed sika. Insan imbaga nen Joab so paibaga to.

⁴ "Linma may bii ed ari, dinmakmomo ya anggad dalin a pamagalang to, tan kuanto, Tulongan mo ak pa, Kagalang kon Ari!

⁵ "Antoy labay mo, tepet na ari. Balo ak a mairap-bilay, ebat to. Inatey lay asawak.

⁶ "Walay duaran anak kon laki; aminsan ya agew, nankokol irad kaalogan ya anggapoy makabelsay ed sikara, et apatey so sakey.

⁷ "Natan balet, kalaban ak na amin a kakanayon ko, tan labay dan ipalimak ed sikara may sakey ya anak ko, pian napatey da lapud pinatey toy agi to. No gawaen da ya, magmaliw ya anggapoy anak ko! Ekalen day samput a kawalaay ilalok, tan paandian day asawak na anak a mangituloy na ngaran to diad tapew na dalin.

⁸ "Inmebat so ari, Sempet ka la, ta siak lay akaoley.

⁹ "Inkuan na samay bii, Kagalang kon Ari, say pamilyak tan siak so nepeg a tetelen ed antokaman a gawaen mo; anggapoy kasalanan mo tan say mapagalang a pamilyam.

¹⁰ Inmebat so ari, No walay manaktakot ed sika, awit mo dia et ag to ka lad satan sigensigenen.

¹¹ Inkuanto may bii, Mampikasi ka pad Katawan a Dios mo, pian say kanayon kon labay toy ombawi et ag to la labay so mamatey, et diad ontan, ag la napatey imay sakey ya anak ko. Inmebat si David, Isipan kod mabilay a Katawan ya ag balut nadiwit so anak mo.

¹² Iyabuloy mo pan mangibaga ak niy sakey a bengatlad sika, Kagalang kon Ari, inkuanto may bii. On, sigi, kuan na ari.

¹³ Inkuanto may bii ed sikato, Akin et onyay ginawam a kaogsan ed saray totoo na Dios? Ag mo abuloyan ya ompawil so anak mon binmatik, kanyan sikan diliy anintinsia a nalilingo ka diad panamegley na samay kapkapangibagam.

¹⁴ Ompatey itayon amin; aliling tayoy danum a naibung ed dalin, ya ag la nakupkup. Anggan say Dios ag to la pabibilayen iray inatey a totoo, balet nayarian na ari a papawilen so toon nibantak ed arum a bansa.

¹⁵ Natan, Kagalang kon Ari, say makasengeg na nilaan ko dian mitongtong ed sika et lapud tataktakoten ak na saray totoo; kanyan kuankod siak a dili a mitongtong ak ed sika, ta ag la pigan gawaen moy kerewen kod sika.

¹⁶ Inisip kon dengelen mo ak tan iyagel mo ak ed toon manggegetman mamatey ed siak tan say anak ko, et diad ontan, naekal to kamid dalin ya inter na Dios ed saray totoo to.

¹⁷ Inkuankod siak a dili a say sipan mo, Kagalang kon Ari, et iyarawi to ak ed kaatapan, ta say ari et singa anghil na Dios tan napambiigan toy maung tan maoges. Wala komun ed sika so Katawan a Dios mo!

¹⁸ Inmebat so ari, Tepetan ta ka, et ibagam ed siak so amin a katwaan. Mantepet ka, Kagalang kon Ari, ebat to.

¹⁹ Si Joab so nambangat ed sikad saya? tepet na ari. Inmebat may bii, Isambak ed tawen, Kagalang kon Ari, ya anggapoy polaing a makapangipaliis na pangebat ed tepet mo. Say katawan to, si opisyal mon Joab so angibangat na gawaen tan salitaen ko.

²⁰ Balet ginawa to ya, pian naapiger so antokaman ya aderal. Balet makabat a singa anghil na Dios so Kagalang kon Ari tan kabat toy amin a nagagawa.

²¹ Nanagonuyan, inkuan na ari ed kinen Joab, Ninunot kon gawaen so labay mon nagawa. Laka, ta papawil mo la dia may balolakin Absalom.

²² Si Joab tinmiblak ed dalin a pamagalang to, tan kuanto, Bindisionan ka komuy Dios, Kagalang kon Ari! Amtak la natan a nalak so maung a linawam, ta inter moy kekerewen ko.

²³ Kanyan pinmikal si Joab, linmad Gesur tan pinapawil tod Jerusalem si Absalom.

²⁴ Balet ingganggan na ari ya ag manayam ed palasio si Absalom. Inkuanto, Ag ko labay a nanengneng so lupa to. Kanyan nanayam ed dilin abung to si Absalom tan ag akiarapan ed ari.

²⁵ Diad intiron Israel anggapoy anggan sakey a toon mipara ed inkabantug nen Absalom lapud inkaguapo to; anggapoy deral to manlapud toktok na olo to ya anggad dapan to.

²⁶ Makapakapal so buek to, tan maminsan a mampakatlid sakey taon no andokorokey tan ambelbelat lay buek to. Say naekal a buek to et mambelat na duaran kilo onung na panagsimbang na ari.

²⁷ Si Absalom taloray lakin anak to tan sakey so bii a si Tamar a magangganan maung.

²⁸ Diad duay taon ya impanayam nen Absalom ed Jerusalem, ag ton balut anengneng so ari.

²⁹ Insan to impatawag si Joab, ta paonlaen tod ari; balet ag ondagoy Joab. Impatawag lamet nen Absalom, balet ag nin siansia ondago.

³⁰ Kanyan inkuantod saray aripen to, Dengel kayo, kaabay na alog ko so alog nen Joab, tan walay tanem ton sibada. Laka yo, ta poolan yo. Kanyan linma ra tan pinoolan da may alog.

³¹ Linmay Joab ed abung nen Absalom tan tinepet to, Akin et pinoolan na saray aripen mo so alog ko?

³² Inmebat si Absalom, Ag ka ondago nen impatawag ta kan onla dia, pian nibaki ta kad ari ya ontepet diad ngaran ko: Akin et tinaynan ko niy Gesur tan linma ak dia? Maung la laingen no ag ak inmalis diman. Intuloy nen Absalom so nansalita, Gawam so polaing a pakapitongtong kod ari, tan no walay kasalanan ko, papatey mo ak ed sikato.

³³ Kanyan linmay Joab ed kinen ari tan imbaga toy sinalita nen Absalom. Impatawag na ari si Absalom; dinmagoy Absalom tan dinmakmomo ya anggad dalin diad arap na ari. Inawat na ari si Absalom tan inanguban to.

15

¹ "Kayari to ya, angalay Absalom na sakey a karwahi tan pigaran kabayo, tan limamplon sondalo ya ombatik ed onaan to.

² "Masaksakbay ya ombangun, onlad puirtay siudad tan manalagey ed abay na dalan. No walay onlad man a walay kaso to tan labay ton pasintinsiaan ed ari, tawagen nen Absalom tan tepeten to no taga iner. Kayarin ibaga na samay too so tribun nanlapwan to,

³ "ikuanen Absalom, Nengneng mo, walay katonungan mo, balet anggapoy toon tinoro na ari a manalaysay na kasom.

⁴ "Insan to iyarum ya ikuan, Ag ak la sakey a huis! Diad satan ondagod siak so siopamay toon walay kaso to odino mananap na katonungan to, et itdan koy katonungan.

⁵ "No samay too et ondagod kinen Absalom tan ondakmomod arap to, awaten to, bembenan to tan anguban to.

⁶ "Ginawa ya nen Absalom ed balang sakey ya Israelita ya ondagod ari a mananap na katonungan, kanyan apaasingger to rad sikato.

⁷ "Kalabas na apat taon, inkuanen Absalom ed kinen David, Abuloyan mo ak pan onlad Hebron, ta sumpalen koy sipan kod Katawan.

⁸ "Nen manaayam ak ed Gesur, diad Siria, insipan kod Katawan a no papawilen to ak ed Jerusalem, igalang ko ed Hebron.

⁹ "Inkuan na ari, Lakan walay kareenan. Linma sirin ed Hebron si Absalom.

¹⁰ Balet angibakid amin a tribu ed Israel tan impaikuanto, No narengel yoy trumpita, iyeyag yo, Nagmaliw ya ari ed Hebron si Absalom!

¹¹ Inimbitaan nen Absalom so duan lasus a lalakin nanlapud Jerusalem, et akila rad sikato; anggapoy amta ran balut nipaakar ed komplut, tan akila ran maung so getma ra.

¹² Nen mangibabagat si Absalom, angibakid baley na Gilo na mangawit ed kinen Ahitofel a sakey ed saray managsimbawa nen Ari David. Binmiskeg so komplut a sumpad ari, tan dinmakel iray akiolup ed kinen Absalom.

¹³ Inkuan na sakey ya ibabaki ed kinen David, Migagampi ray Israelita ed kinen Absalom.

¹⁴ Kanyan inkuanen David ed saray opisyal ton kaiba tod Jerusalem, Nakaukolan ya ontaynan tayon tampol no labay tayon nibatikay Absalom! Ganatan yo! Ta ag mabayag onsabi la, taloen to itayo, tan pateyen to ray amin a walad siudad!

¹⁵ Inmebat ira, On, Kagalang min Ari, wadya kamin akaparaan a manggawa na antokaman ya ibagam.

¹⁶ Kanyan tinmaynan so ari a kaiba to ray amin a kabyangay pamilya to tan saray opisyal to, likud ed saray samploran asawa to a pinatilak to ran mangasikasoy palasio.

¹⁷ Nen say ari tan amin a totoo to et tataynan day siudad, tinmonda ra ed kasamputan ya abung.

¹⁸ Manalalagey ed diking to ray amin ya opisyal to, legan a linmabas ed arap to ray managbantay ed sikato. Linmabas met ed arap to iray anem a lasus a sondalon nanlapud Gat a tinmombuk ed sikato.

¹⁹ Inkuan na ari ed kinen Itai a pangulo ra, Akin et mimila ka ed sikami? Pawil ka la ta mikakasakey kad balon ari. Taga ka sananey a bansa, mimiayam ka dia labat, tan arawi kad dilin bansam.

²⁰ Aganggano ka nin manaayam dia, kanyan akin et panakar-akaren ta kan kaibak? Ag ko anggan amta no iner so laen ko. Pawil ka la tan itagar mo la ra tay kabansaan mo. Mapangasi tan matoor komun so Katawan ed sikayo.

²¹ Balet inmebat si Itai, Kagalang kon Ari, sambaan kod sika diad ngaran na mabilay a Katawan, a mila ak lawas ed sika anggan iner so laen mo, patey may pansumpalan tayo.

²² Inmebat si David, Sigi sirin, kurang ki la! Akila sirin si Itai tan amin iray totoo to, a pati saray kabyangay pamilya ra.

²³ Manorangal iray totoo nen tinmaynan iray totoo nen David. Binaliw nen David so Kolus na Cedron, tinombuk na saray totoo to, tan nampaarap iran amin ed kalawakan.

²⁴ Kaiba ray pari a si Sadoc. Saray Levita so nanawit na Kaban na Sipanan na Dios. Inggaton da tan ag da inala ya anggad amin a totoon kaiba nen David et akataynan la rad siudad. Wadman met si Abiatar a pari.

²⁵ Insan inkuan na ari ed kinen Sadoc, Ipawil mo lad siudad so Kaban na Sipanan. No maung so linawa na Katawan ed siak, papawilen to ak a nengnengen ko tan say pasen a kawalaan to.

²⁶ Balet no aliwan maung so linawa tod siak, akaparaan ak a mangawat ed antokaman a labay ton gawaen ed siak.

²⁷ Intuloy ton inkuan ed kinen Sadoc, Sigi, awit moy Ahimaaz ya anak mo tan si Jonatan ya anak nen Abiatar; pawil ki lan walay kareenan ed siudad.

²⁸ Manalagar ak ed saray babaliwan ed ilog diad kalawakan, anggad pakapasabik na balitan manlapud sika.

²⁹ Kanyan si Sadoc tan si Abiatar impawil dad Jerusalem imay Kaban na Sipanan tan nanayam irad man ed siudad.

³⁰ Tinmatdang si David ed Palandey na Kaolibaan; manakakis, akasali-sali tan sinakbungan toy olo to a pangipanengneng toy ermen to. Sinakbungan met na amin a totoo to so olo ra tan manakakis met ira.

³¹ Nen nibagad kinen David a si Ahitofel et akikomplut ed kinen Absalom, nampikasi, Pikasik ed sika, Katawan, a pagmaliw mon andi-kakanaan so simbawa nen Ahitofel!

³² Kasabi nen David ed toktok na pokdul a kawalaay pasen na panangigalangan ed Dios, inabet nen Cusai ya arkita ya apilat so kawes to tan walay dabuk na olo to.

³³ Inkuanen David ed sikato, Anggapoy nitulong mo no mila kad siak,

³⁴ balet natulongan mo ak no ompawil kad siudad tan no ibagam ed kinen Absalom a matoor kan manlingkur ed sikato a singa impanlingkur mod kinen ama to. Gawam met so anggaay nayarian mon manumlang ed antokaman a simbawa nen Ahitofel.

³⁵ Wadman ira di paparin Sadoc tan Abiatar; ibagam ed sikara so antokaman a narengel mod palasio.

³⁶ Kaiba da ray anak dan si Ahimaaz tan si Jonatan, kanyan nayarian mo ran ibaki dia a mangibagad siak na antokaman a narengel mo.

³⁷ Kanyan pinmawil ed siudad si Cusai a kaaro nen David nen onsasabi lay Absalom.

16

¹ "Nen akalabas na daiset si David ed toktok na pokdul, inabet nen Siba ya aripen nen Mefiboset, a wala ray kaiba ton duaran asno a napnoy beneg da na duan lasus a tinapay, sanlasus a monggol na pasas, sanlasus a monggol na kapamborbor a prutas, tan sakey a supot a katat a napnoy alak.

² "Tinepet nen Ari David, Antoy gawaen mod saratan ya amin? Inmebat si Siba, Saray asno luganan na pamilyay ari, saray tinapay tan saray prutas kanen na saray totoo, tan say alak inomen da no naksawan la rad kalawakan.

³ "Kawalaan nen Mefiboset ya apo nen katawan mon Saul? tepet na ari ed sikato. Inmebat si Siba, Manaayam ed Jerusalem, ta sisiaen to ya ipawil natan na saray Israelita ed sikato so nanarian na laki ton si Saul.

⁴ "Inkuan na ari ed kinen Siba, Kien mo lay amin a kayaryan nen Mefiboset. Siak so aripen mo, ebat nen Siba. Maabig lawas komun so linawam ed siak, Kagalang kon Ari!

⁵ "Kasabi nen Ari David ed Bahurim, inabet na sakey ed saray kakanayon nen Saul, si Simei a lakin anak nen Gera. Nen onsasabi inaayew-ayew to si David.

⁶ "Tinutupak toy bato si David tan saray opisyal to, anggaman ya akaliber ed kinen David iray totoo to tan saray managbantay to.

⁷ "Insamba nen Simei tan kuanto, Taynan ka dia! Taynan ka dia! Managpatey na too! Kriminal!

⁸ "Inalam so nanarian nen Saul, et natan dudusaen kay Katawan lapud impamatey mod amayamay a kabyangay pamilya nen Saul. Inter na Katawan so nanarian ed anak mon si Absalom, tan aderal ka la, sikan managpatey na too!

⁹ "Si Abisai a lakin anak nen Sarvia kuantod kinen Ari, Akin et palpaolyan mon ayewen ka na satan ya aso? Abuloyan mo ak pan onla, ta potuten koy olo to!

¹⁰ Inkuan na ari ed sanagin si Abisai tan si Joab, Anggapoy pibabali yod saya. No aayewen to ak lapud imbagay Katawan ed sikato, siopay toon walay kanepegan a manepet no akin et gagawaen to?

¹¹ Insan inkuanen David ed kinen Abisai tan saray amin ya opisyal to, No say dilin anak ko et labay to ak a pateyen, ag kasi nagkalalo ed satan a Benjaminita? Imbaga na Katawan a manayew; kanyan paolyan yon gawaen to.

¹² Angangko imanoen na Katawan so pangaskasiyan a kipapasen ko, et itdan to ak na saray bindision ya onsalat ed sayan panaayew to.

¹³ Kanyan intuloy nen David tan saray totoo to so kurang da. Tinmombuk si Simei, tan diad gilig na pokdul so dinalan to; legan ton manaakar inaagew to ra tan tinutupak to ra na bato tan dabuk.

¹⁴ Naknaksawan si David tan saray totoo to nen asabi ra so Jordan, kanyan nampainawa rad man.

¹⁵ Linmoob ed Jerusalem si Absalom tan amin da ray Israelitan kakaiba to; kaiba ra met si Ahitofel.

¹⁶ Nen si Cusai ya Arkita tan kaaro nen David et nabet toy Absalom, ineyag to, Andokey komun so bilay na ari! Andokey komun so bilay na ari!

¹⁷ Tinepet nen Absalom ed sikato, Antoy agawad inkatoor mod kaarom a David? Akin et ag ka akilad sikato?

¹⁸ Inmebat si Cusai, Panoy pilak? Nepeg koy migampi ed toon pinili na Katawan, sarayan totoo tan amin ya Israelita. Mikasakey ak ed sika.

¹⁹ Sakey ni, siopay panlingkuran ko, no ag say anak na dilin katawan ko? Nanlingkur ak ed amam, ontan met a manlingkur ak natan ed sika.

²⁰ Insan inmarap ed kinen Ahitofel si Absalom tan kuanto, Natan ta wadya itayo la, antoy isimbawam a gawaen tayo?

²¹ Inmebat si Ahitofel, Laka, ta akdulan mo ray bibiin inamung nen amam ya intilak to ran manasikasod palasio. Diad ontan, nakabatan na intiron Israel a bobosulen ka nen amam, tan napabiskeg so linawa da ray totoom.

²² Kanyan nanggawa ray tulda a para si Absalom diad toktok na palasio, tan diad pakanengneng na amin a totoo linmoob si Absalom tan akiakdul ed saray bibiin inamung nen ama to.

²³ Diad saraman a panaon, amin a simbawa nen Ahitofel et nipapasen a singa dilin salita na Dios; tinotombuk ira nen David tan si Absalom.

17

¹ "Aminsan ya agew, inkuanen Ahitofel ed kinen Absalom, Abuloyan mo ak pan mamili na labinduan libon lalaki, ta osilan miy David ed sayan labi.

² "Dogpaan mi no naksawan tan nanaekalan lay biskeg na linawa. Nataktakot ed satan, tan ombatik iray totoo to. Say ari labat so pateyen ko,

³ "insan ko papawilen ed sika iray amin a totoo to; singa rad satan sakey a bii ya ompapawil ed asawa to. Saksakey a too so labay mon pateyen, kanyan ag ko diwiten iray arum a totoo.

⁴ "Akaliket si Absalom tan amin da ray pangulo na Israel ed sayan simbawa.

⁵ "Inkuanen Absalom, Tawag yo diay Cusai, ta dengelen tayoy nibaga to met.

⁶ "Nen sinmabiy Cusai, inkuanen Absalom ed sikato, Niay simbawa nen Ahitofel; tombuken mi kasi? No andi, ibagam ed sikami no antoy gawaen.

⁷ "Inmebat si Cusai, Say simbawa natan nen Ahitofel et aliwan maung.

⁸ "Amtam a si amam a David tan saray totoo to et maung iran mibakal; masebeg iran singa uson kabatyan ya imbatik iray anak to. Likud nid saya, abayag lan mibabakal si amam, kanyan no labi ag onoogip a kaiba to ray totoo to.

⁹ "Nayarin manaamut natan ed ongib odino diad arum a pasen. Diad oras a dogpaan nen David iray totoom et nabalitaan na anggan siopa, ibaga ton atalo ray totoom.

¹⁰ Diad satan anggan saray sankasebegan a totoo, ya anggapoy takot da a singa saray lion, et ontakot ira, ta amta na amin a totood Israel a matalonggaring a sondalo si amam tan maung a mibakal iray totoo to.

¹¹ Say simbawak sirin et say panipon mod amin ya Israelita, manlapud baley na Dan ya anggad baley na Beer-seba, a singa ra karakel na buer ed dayat; insan sikan dili so mangipangulod pibakal da.

¹² Anapen tayoy David ed anggan iner a kawalaan to, insan tayo biglaan a dogpaan. Anggapod satan so anggan sakey a manilay ed sikara.

¹³ No ombatik ed sakey a siudad, mangalay lobir iray totoo tayo tan biraen tayod patar so siudad! Diad satan, anggapoy anggan sakey a baton natilak diman ed toktok na pokdul.

¹⁴ Inkuanen Absalom tan amin da ray Israelita, Maung so simbawa nen Cusai nen si Ahitofel. Ginetma na Katawan ya ag natombuk so maung a simbawa nen Ahitofel, pian walay maoges ya onsabi ed kinen Absalom.

¹⁵ Insan imbaga nen Cusai ed kindi Sadoc tan Abiatar a papari so simbawa tod kinen Absalom tan saray panguloy Israelita, tan say simbawa met nen Ahitofel.

¹⁶ Inyarum nen Cusai ya inkuan, Ganatan yo! Paibaga yod kinen David a diad sayan labi ag ira manaayam ed saray babaliwan ed ilog diad kalawakan, no ag ingen baliwen ton tampol so Jordan, pian sikato tan saray totoo et ag ira naerel tan ag ira napatey.

¹⁷ Si Jonatan a lakin anak nen Abiatar tan si Ahimaaz a lakin anak nen Sadoc et manaalagar irad En-rogel, diad asingger ed Jerusalem, ta ag da labay a nanengneng iran onloob ed siudad. Mabetbet ya onlad may sakey a biin aripen tan ibaga tod sikaray nagagawa, insan ira onlad satan a mangibalitad kinen Ari David.

¹⁸ Balet aminsan nibanan anengneng ira na sakey ya ogaw a laki, insan to imbagad kinen Absalom, kanyan maganat iran linman onamut ed abung na sakey a lakin taga Bahurim. Walay bobun tod abay na abung to, tan diman ira linmasur.

¹⁹ Angalay sakub so asawa to may laki, inyan tod sangab na bobun, tan tinayakan toy trigo, pian anggapoy makaimano na antokaman.

²⁰ Sinmabi ray opisyal nen Absalom ed samay abung tan tinepet dad samay bii, Kawalaan di Ahimaaz tan Jonatan? Binaliw day ilog, ebat to. Inanap da ra balet ag da ra narumog, kanyan amawil la rad Jerusalem.

²¹ Kasiput da, pinmaway ed bobun si Ahimaaz tan si Jonatan, insan ira linmad kinen David. Imbaga rad sikatoy plano nen Ahitofel sumpad sikato, insan da inkuan, Ganatan yo; baliw ki lad ilog.

²² Kanyan binaliw nen David tan saray totoo to so Jordan; akabaliw iran amin kasakbayay kabwasan.

²³ Nen anengneng nen Ahitofel ya ag atombuk so simbawa to, kinabayoan toy asno to, insan pinmawil ed dilin baley to. Kayari ton inapiger so kipapasey kayaryan to, imbitay toy laman to. Nipompon ed lobuk na pamilya to.

²⁴ Nen akasabid baley na Mahanaim si David, abaliw la nen Absalom tan saray totoo to so Jordan. (

²⁵ Si Absalom insalat toy Amasa ed pasennen Joab a pangulo na saray sondalo. Si Amasa lakin anak nen Itra ya Ismaelita; say ina to si Abigail ya anak nen Nahas tan agi na ina nen Joab a si Sarvia.)

²⁶ Si Absalom tan saray Israelita nankampo ra ed dalin na Galaad.

²⁷ Nen sinmabid Mahanaim si David, inabet nen Sobi a lakin anak nen Nahas a taga siudad na Rabba ed Amnon, tan si Makir a lakin anak nen Amiel a taga Lodebar, tan si Barzillai a taga Rogelim ed Galaad.

²⁸ Angawit ira na saray yaung, saray banga, tan saray ikakanad kakaogip; nanawit met iray kakanen a para si David tan saray totoo to: trigo, sibada, arina, insanglil a trigo, agayep, bokebokel, dilo, kiso, gatas, tan pigaran karniro. Amta ra a si David tan saray totoo to et narasan, napgaan, tan naksawan ira ed kalawakan.

18

¹ "Impantitipon nen David iray amin a totoo to, insan ginawa to ran pigaran grupo, na tonggal libo tan tonggal lasus, tan wala ray opisyal ya impasen ton mangipangulod balang grupo.

² "Imbaki to ran taloran grupo; si Joab so panguloy sakey, si Abisai ya agi to so panguloy sakey, tan si Itai a taga Gat so panguloy sakey met. Inkuan na ari ed saray totoo to, Mila ak ed sikayo.

³ "Ag ka nepeg a milad sikami, ebat da. Anggapoy walad saray kalaban no bilang ombatik kamin amin, odino anggan napatey so kapalduad sikami; balet aliling moy samplon libo ed sikami. Kanyan magmaung ni no natilak ka diad siudad tan ipawit mo lay tulong ed sikami.

⁴ "Inmebat so ari, Gawaen koy isisipen yo a sankaabigan. Insan nanalagey ed abay na puirta, legan ya ompapaway iray totoo to a nanoolup ya asanlibo tan asanlasus.

⁵ "Ingganggan tod kindi Joab, Abisai, tan Itai, Makasengeg ed siak ag yo papasakitan so malangwer a lakin si Absalom. Nadngel na amin a sondalo so impangibaga nen David ed sayan ganggan.

⁶ "Linmad kaalogan iray sondalo nen David tan nilabanan dad Takel na Efraim iray Israelita.

⁷ "Tinalo na saray totoo nen David iray Israelita; diad ontan lan inkatalo ra duamplon libod sikara so inatey ed saman ya agew.

⁸ "Kinmayat so bakal ed intiron kaalogan, et dakel niy inatey ed dalem na takel nen say inatey ed bakalan.

⁹ "Kabebekta nabet nen Absalom iray pigaran totoo nen David. Akakabayod sakey a mula si Absalom tan diad insilong tod sakey a baleg a kiew a robli, asagur ed saray sanga so olo to. Tuloy so batik na samay mula, kanyan atilak a mambitbitay si Absalom.

¹⁰ Anengneng na sakey ed saray totoo nen David, kanyan imbalita tod kinen Joab, Anengneng koy Absalom a mambitbitay ed sakey a kiew a robli!

¹¹ Inmebat si Joab, No anengneng mo, akin et ag mo lan tampol pinatey diman? Anggan siak maliket ak komun a mangiter ed sikay samploran pilak tan sakey a balkes.

¹² Balet inmebat imay too, Anggan initdan yo ak na sanlibon pilak, ag ko diwiten so anak na ari. Nadngel min amin so ganggan na ari ed sika, si Abisai tan si Itai, Makasengeg ed siak, ag yo papasakitan so malangwer a lakin si Absalom.

¹³ No ag ko inonur so ganggan na ari et pinatey koy Absalom, andiduaruwan nadngelan na ari, ta narerengelan ton amin. Iyagel mo ak ed satan kasi?

¹⁴ Ag ko la darakey panaon kod sika, kuanen Joab. Angalay taloran pika, insan to ra impika ed pagew nen Absalom, nen mabilay nin mambitbitay ed tagey na kiew a robli.

¹⁵ Insan samploran sondalo nen Joab so inmasingger tan nilaos dan pinatey.

¹⁶ Impapaknul nen Joab so trumpita a pamatonda to lad bakal, kanyan tinondaan la na saray sondalo so onosil ed saray Israelita tan amawil la ra.

¹⁷ Inala ray bangkay nen Absalom, impelag dad aralem a bobun ed takel, insan da tinabunan na saray bato. Amin ya Israelita batik ed kaabungan da.

¹⁸ Legan na impanbilay nen Absalom angipaalagey na monuminto to diad Patar na Ari, ta anggapoy anak ton laki a mangituloy na ngaran to. Ngaran ton dili so inngaran tod samay monuminto, et anggad sayan agew tatawagen na Monuminto nen Absalom.

¹⁹ Insan inkuanen Ahimaaz ya anak nen Sadoc ed kinen Joab, Iyabuloy mo pan ombatik ak ed ari, ta ibagak ed sikatoy maung a balita ya inyagel na Katawan ed saray kalaban to.

²⁰ Inkuanen Joab, Andi! Ag mo iyaakar natan so maung a balita. Dia lad arum ya agew so pangyakar mo, aliwan natan, ta inatey so anak na ari.

²¹ Insan to inkuan ed aripen ton Cusita, Laka, ta ibagam ed ari so anengneng mo. Dinmakmomo may aripen, insan la batik.

²² Inkuan lamet nen Ahimaaz, Anggan antoy nagawa, ipangasim ya ibagak met so balita. Akin et labay mo tan a gawaen, anak ko, anta anggapo met lamlamang so tumang a nagamuran mo? tepet nen Joab.

²³ Inkuan lamet nen Ahimaaz, Anggan antoy nagawa, labay koy onla. Laka sirin, inkuanen Joab. Batik tan dinmalan ed Patar na Jordan, insan to alabsanan imay aripen a Cusita.

²⁴ Manyodyorung si David ed nanleetan na puirtan walad paway tan say puirtan walad dalem na siudad. Kinmalab ed padir so bantay, insan tinmoon ed toktok na puirta; ninmengneng et abantag toy toon mambabatik a bukbukor.

²⁵ Tinmawag ed ari tan imbaga toy abantag to, et say ari kuanto, No bukbukor to, maung a balitay awit to. Manasingger imay mambabatik.

²⁶ Insan akanengneng lamet imay bantay na sakey a toon mambabatik a bukbukor. Inkulyaot tod bantay na puirta, Nengneng mo! Wala niy sakey a toon mambabatik! Inmebat so ari, Maung met a balita so awit to tan.

²⁷ Inkuan na bantay, Nanenengneng kon say onaan et singa kababatik nen Ahimaaz. Inkuan na ari, Maung a too, kanyan sankaawit toy maung a balita.

²⁸ Insan inkulyaot nen Ahimaaz ed ari, Maung ya amin so agawa. Tinmiblak ed dalin ed arap na ari, tan kuanto, Nagalang komun so Katawan a Dios mo ya angiter ed sika na pananalo ed saray totoon sinmumpa ed sika, Kagalang kon Ari!

²⁹ Maung so kipapasen na malangwer a lakin si Absalom? tepet na ari. Inmebat si Ahimaaz, Nen imbaki to ak nen opisyal mon Joab, anengneng koy sakey a baleg ya aligewgewan, balet ag ko nibaga no anto man.

³⁰ Lakad man tan manalagey ka, inkuan na ari ed sikato; kanyan linma tan nanalagey diman.

³¹ Insan sinmabi may aripen a Cusita tan kuantod ari, Walay maung ya ibalitak ed sika, Kagalang kon Ari! Natad sayan agew initdan kay Katawan na pananalo ed amin da ray sinmumpad sika!

³² Maung so kipapasen na malangwer a lakin si Absalom? tepet na ari. Inmebat imay aripen, Maung komun a say agawad sikato et nagawa met ed amin da ray kalaban mo, tan amin ya onsumpad sika.

³³ Agaylay ermen na ari. Linmad kuarton walad tagey na puirta. Legan ton oonla, manakakis tan kuanto, O anak ko! Anak kon Absalom, anak ko! Siak la komuy inatey, aliwan sika, O anak ko! Absalom, anak ko!

19

¹ "Nibagad si Joab a panaakisan tan paneermenan nen David si Absalom.

² "Kanyan diad saman ya agew say liket na saray sondalo nen David lapud impanalo ra et nagmaliw ya ermen, nen nadngelan dan paneermenan na ari so anak to.

³ "Mareereen iran pinmawil ed siudad, a singa ra sondalon ambaing lapud ibabatikan day bakal.

⁴ "Sinakbungan na ari so lupa to tan inmeyag na maksil, O anak ko! Anak kon Absalom! Absalom ya anak ko!

⁵ "Linmay Joab ed abung na ari tan kuantod sikato, Pinaabebam natan iray totoomsaray totoon angyagel na bilay mo tan say bilay na saray anak mon bibii, say bilay na saray asawam tan saray bibiin iyaamung mo.

⁶ "Kakabosulen mo ray mangaarod sika tan aaroen mo ray mamobusul ed sika. Ta lapud sayan ginawam, pinalinew mo ya anggapoy kabaliksan dad sika ray opisyal mo tan saray totoom. Amtak la natan a maliket ka no mabilay si Absalom tan sikami balet et inaatey la.

⁷ "Laka sirin natan tan pabiskeg moy linawa da ray totoom. Isambak ed ngaray Katawan a no ag mo ya gawaen, nabwas na kabwasan anggapoy anggan sakey a toon nakeraan a migampid sika. Sikato la yay sankaogsan a nagawad bilay mo.

⁸ "Insan inmalagey so ari, linma tan inmirung ed abay na puirtay siudad. Nadngelan na saray totoo to a wadman, kanyan inmasingger irad sikato. Legan to ya, batik iray amin ya Israelita, tan nagsisempet irad kaabungan da.

⁹ "Diad intiron bansa nambabalingaan iray totoo. Inkuandad sakey tan sakey, Inyagel itayo nen Ari David ed saray kalaban tayo. Inyagel to itayod saray Filisteo, balet natan imbatikan toy Absalom tan tinaynan toy bansa.

¹⁰ Nilanaan tayoy Absalom a manari, balet apatey ed bakal. Kanyan akin et anggapoy mamapawil dia ed kinen Ari David?

¹¹ Say balitan nipaakar ed sasalitaen na saray Israelita et akasabid kinen Ari David. Kanyan imbaki toy Sadoc tan si Abiatar a papari a manepet ed saray pangulo na Juda, Akin et sikayo la laingey onur ya ontulong ed pakapawil na ari ed palasio to?

¹² Kakanayon ta kayo, kalamanan tan kadalaan ta kayo; akin et sikayoy onur a mamapawil ed siak?

¹³ Binilin met ira nen David ya ikuandad kinen Amasa, Kanayon ta ka. Manlapud natan, salatan moy Joab a pangulo na saray sondalo. Pateyen ak komun na Dios no ag ko ya gawaen!

¹⁴ Sarayan salita nen David akapapawil na inkatoor na amin a totood Juda, kanyan impaibaga rad ari ya ompawil la tan amin da ray opisyal to.

¹⁵ Nen ompapawil lay ari, inabet na saray totood Juda a linmad Gilgal a mangolup ed ibaliw to ed Ilog na Jordan.

¹⁶ Diad saman met a bekta, si Simei a lakin anak nen Gera, a kabyangay tribu nen Benjamin tan taga Bahurim, nangganat a linmad Jordan ya onabet ed Ari David.

¹⁷ Kaiba to ray sanlibon lalaki a nanlapud tribu nen Benjamin. Si Siba ya aripen na pamilya nen Saul tan saray labinliman anak ton lalaki tan duamplon aripen to et linma ra met ed Jordan kasakbayan na isabiy ari.

¹⁸ Binaliw day ilog a mangolup ed ibaliw na ari tan saray kakaiba to tan manggawa ed antokaman a labay to. Nen kuan lan ombaliw so ari, tinmiblak si Simei ed arap to

¹⁹ tan kuanto, Kagalang kon Ari, ipangasim pan lingwanan mo la may makapoy a ginawak diad samay agew a tinaynan moy Jerusalem. Ag mo la komun ipapakasalanan ed siak; ag mo la komun nununoten.

²⁰ Amtak a nankasalanan ak, kanyan siak so onaan a kabyangan na saray tribun walad baybay a linma dia natan a mangabet ed Kagalang kon Ari.

²¹ Inkuanen Abisai a lakin anak nen Sarvia, Nepeg a pateyen si Simei, ta inayew toy toon pinili na Katawan a manari.

²² Balet inkuanen David ed saray sanagin Abisai tan Joab, Siopay anepet ed sikayo no antoy nepeg a gawaen? Labay yon itdan ak na gunigon? Siak la natan so ari na Israel; anggapoy Israelitan napatey natan ed sayan agew.

²³ Insan inkuantod kinen Simei, Sambaan kod sika ya ag ta ka papatey.

²⁴ Insan sinmabin mangabet ed ari si Mefiboset ya apo nen Saul. Ag to inorasan so sali to, ag to pinotutan so balbas to, odino impesak so kawes to nanlapu lad intaynan na ari ed Jerusalem ya anggad impawil ton sipapalabo.

²⁵ Nen sinmabin nanlapu ed Jerusalem si Mefiboset a mangabet ed ari, inkuan na ari ed sikato, Mefiboset, akin et ag ka akilad siak?

²⁶ Inmebat, Kagalang kon Ari, onung na kabat mo met la, sakey ak a lopuy. Imbagak ed aripen ko ya ilogan to ak ed asnok, pian makapila ak ed sika, balet pinalikdo to ak.

²⁷ Nantilad sika nipaakar ed siak, balet singa ka anghil na Dios, kanyan gawam so antokaman ya amtam a maabig.

²⁸ Kanepegan a pateyen mo ray amin a kabyangay boleg nen Saul, balet initdan mo ak na kanepegan a mangan ed lamisaan mo. Anggapo lay kanepegan kon onkerew ni na antokaman a panangasi ed sika.

²⁹ Inmebat so ari, Ag mo la aaruman itay ibabagam. Ginetmak lan panapagan yo nen Siba iray kayaryan nen Saul.

³⁰ Iter mo lan amin ed kinen Siba, ebat nen Mefiboset. Masarag lad siak a say Kagalang kon Ari et akapawil ya anggapoy agawan maoges ed sikato.

³¹ Manlapud Rogelim, linma met si Barzillai a taga Galaad a mangolup ed ari diad ibaliw tod Jordan.

³² Mataktakken lan maung si Barzillai; walomploy taon to la. Mayaman a maung, kanyan nen say ari et walad Mahanaim, sikatoy naniiter na kanen na ari.

³³ Inkuan na ari ed sikato, Mila kad siak ed Jerusalem, ta asikasoen ta ka.

³⁴ Balet inmebat si Barzillai, Antikey lay pambilay ko; akin et nepeg ko niy milad Kagalang kon Ari diad iyakar tod Jerusalem?

³⁵ Walomploy taon ko la tan anggapo lay antokaman a makaiter ed siak na liket. Ag ko la nananam so kakanen tan iinomen ko, tan ag ko la narengel so bosis da ray kumakanta. Makabelbelat ak labat ed sika, Kagalang kon Ari.

³⁶ Ag ak manepeg a mangawat ed satan a baleg a tumang. Kanyan mila ak labat ed sika diad lablabas na Jordan.

³⁷ Insan yo ak la abuloyan ya onsempet, ta labay ko so ompatey ed abay na lobuk na saray atateng ko. Niay anak kon Camaam; awit mo la, Kagalang kon Ari, tan akaoley ka lan manggawad sikato na isisipen mon maabig.

³⁸ Inmebat so ari, Pilaen ko tan gawaen kod sikato so isisipen mon maabig. Gawaen ko so antokaman a kerewen mo.

³⁹ Insan binaliw nen David tan saray totoo to so Jordan. Inanguban toy Barzillai tan binindisionan to, insan la sinmempet si Barzillai.

⁴⁰ Kabaliw na ari, ya inolup na amin a lalakin taga Juda tan kapaldua na amin a lalakin taga Israel, tinmuloy ed Gilgal a kaiba toy Camaam.

⁴¹ Insan linmad ari iray Israelita tan kuandad sikato, Akin et abaloan na saray agagi min lalaki a taga Juda a walay kanepegan dan mangalad sika tan olupen da ka, say pamilyam, tan saray totoom diad imbaliw yod Jordan?

⁴² Inmebat iray taga Juda, Ginawa mi man, ta kanayon mi so ari. Akin sirin et pampetangan yoy olo? Ag to binayaran so kinan mi tan ag to kami initdan na antokaman.

⁴³ Inmebat iray Israelita, Mamimpulo nin karakel so kanepegan mid Ari David nen say sikayo anggaman a kanayon yo. Akin et memelag-melagen yo kami? Ag yo lilingwanan a sikamiy akaonan nantotongtong na nipaakar ed ipawil na ari! Balet mapetang ni ray lalakin taga Juda a misangsangan nen saray lalakin taga Israel.

20

¹ "Nibanan wadman ed Gilgal so sakey a toon andi-kakanaan a si Seba a lakin anak nen Bicri, tan kabyangan na tribu nen Benjamin. Pinaknul toy trumpita tan ineyag to, Anggapoy pibabali mid kinen David ya anak nen Jesse. Ag kami ontombuk ed sikato! Lalakin taga Israel, onsempet ti la!

² "Kanyan tinaynan na saray Israelita si David tan akila rad kinen Seba, balet nansiansian matoor ed kinen David iray lalakin taga Juda, kanyan inolup da manlapud Jordan ya anggad Jerusalem.

³ "Kasabi nen David ed palasio tod Jerusalem, inala to ra may samploran iyaamung ton bibii ya intilak to ran manasikasoy palasio, insan to ra impabantayan. Initdan to ray pambilay da, balet ag to la ran balut inakdulan. Apokuk ira legan na impanbilay da; nambilay iran singa saray balo.

⁴ "Inkuan na ari ed kinen Amasa, Pantitipon mo ray amin a lalakin taga Juda, insan nabwas a sakey pawil ka dia a kaibam ira.

⁵ "Linman mantipon ed sikara, balet ag pinmawil ed samay agew ya imbaga na ari.

⁶ "Kanyan inkuan na ari ed kinen Abisai, Mapalalo nin gunigon so iter nen Seba nen si Absalom. Alam iray totook ta osilan yo, ta no andi onloob ed pigaran baley ya aliber na padir insan to tayo la ibatikan.

⁷ "Kanyan saray totoo nen Joab, saray bantay na ari, tan amin iray arum a sondalo tinaynan day Jerusalem a kaiba ray Abisai, ta osilan day Seba.

⁸ "Kasabi rad baleg a bato diad Gabaon, inabet ira nen Amasa. Akakawes na para bakal si Joab, tan akasalukbit ed balkes to so ispada ton walad kaluban. Diad inkurang to, pinmaway so ispada tan apattak.

⁹ "Inkuanen Joab ed kinen Amasa, Antoy bilay, kaaro? insan to binembenan ed kawanan a lima to so balbas nen Amasa, ta anguban to.

¹⁰ Balet ag naimano nen Amasa so ispadan sankabembenan nen Joab ed sakey a lima to. Indoyuk nen Joab so ispada ed eges nen Amasa et abuyak ed dalin so pait to. Inatey a tampol, kanyan ag la pinidua nen Joab. Insan intuloy nen Joab tan si Abisai ya agi to so onosil ed kinen Seba.

¹¹ Nanalagey ed abay na bangkay nen Amasa so sakey ed saray totoo nen Joab tan ineyag to, Siopamay migampid kinen Joab tan si David, ontombuk ed kinen Joab!

¹² Walad pegley na dalan so bangkay nen Amasa a napnoy dala. Nen anengneng na samay too nen Joab ya ontotonday balang sakey, ginayugoy tod alog imay bangkay, insan to sinakbungan na oles.

¹³ Nen nakal lad dalan imay bangkay, tinmombuk so balang sakey ed kinen Joab diad iyosil tod kinen Seba ya anak nen Bicri.

¹⁴ Dinmalan si Seba ed saray pasen a kawalaan da ray amin a tribu na Israel, insan linma ed siudad na Abel-bet-maaca. Nantitipon iray amin a kabyangay boleg nen Bicri, insan da tinombuk ed siudad si Seba.

¹⁵ Nadngelan na saray totoo nen Joab a wadmay Seba, kanyan linma ra tan niliktub da may siudad. Nambonton iray dalin ed paway na padir tan ginapwan dan kotkotan so silong na padir, pian natumba.

¹⁶ Dimad dalem na siudad walay sakey a biin masilib; manlapud padir inmeyag, Dengel kayo! Dengel kayo! Ibaga yod kinen Joab ya onasingger dia, ta labay koy mitongtong ed sikato.

¹⁷ Linmay Joab, tan tinepet to may bii, Sika si Joab? On, ebat to. Dengel mo ak, inkuanto may bii. Onderengel ak, ebat nen Joab.

¹⁸ Inkuanto may bii, Nen saman a panaon inkukuanda, Laka yon mangipanon ed Abel et naebatan kayoet onyay ginagawa ra.

¹⁹ Sakey a manonan siudad so kawalaan mi, sakey ed saray sankareenan tan sankatooran a siudad ed Israel. Akin et labay mon deralen? Labay mo ta a bagbagen so kayaryan na Katawan?

²⁰ Andin balut! ebat nen Joab. Ag kon balut deralen o bagbagen so siudad yo!

²¹ Aliwan sikatoy getma mi. Walad tay sakey a lakin manngaray Seba ya anak nen Bicri tan taga nipokdul a pasen na Efraim; inggapo toy milaban ed Ari David. Ipalimam ed siak yan laki, et taynan ko lay siudad. Ibontuk mid tad biek na padir so olo to, kuanto may bii.

²² Linmad saray totoo ed siudad tan tinanggoyur to ra, kanyan pinotut day olo nen Seba, insan da imbontuk ed kinen Joab diad biek na padir. Pinaknul toy trumpita a pamataynan tod saray totoo to, kanyan manlapud siudad sinmempet la ra. Pinmawil ed Jerusalem si Joab, insan linmad ari.

²³ Si Joab so pangulo na saray sondalod Israel; si Benaya a lakin anak nen Joiada so pangulo da ray bantay na ari;

²⁴ si Adoram so makaoley ed impasoot a kimey; si Josafat a lakin anak nen Ahilud so makaoley ed saray nepeg ya isulat;

²⁵ si Siva so sikritario na korti; di Sadoc tan Abiatar iray papari,

²⁶ tan si Ira a taga baley na Jair et sakey met ed saray papari nen David.

21

¹ "Legan na impanoley nen David, walay eras a taloy taon. Impanon ya nen David ed Katawan, et say Katawan kuanto, Nankasalanan si Saul tan say pamilya to lapud impamatey dad saray taga Gabaon. (

² "Saray totood Gabaon et aliwa ran Israelita; melag iran olup na Amorreo ya angisipanan na saray Israelita ya iyagel, balet ginetma nen Saul a pateyen ira lapud ontan lay pilalek ton manggaway pankaabigan da ray totood Israel tan Juda.)

³ "Kanyan tinawag nen David iray totood Gabaon tan kuantod sikara, Antoy labay yon gawaen ko para sikayo? Labay koy manggaway kamaungan ed sikayo ya isalat ed samay kaogsan ya agawad sikayo, pian nabindisionan yo ray totoo na Katawan.

⁴ "Inmebat ira, Say kolkolan mid kinen Saul tan say pamilya to et ag nayarin arigloen na pilak o balituk; ag mi met labay so mamatey na siopaman ya Israelita. Anto sirin so isisipen yon nepeg kon gawaen para sikayo? tepet nen David.

⁵ "Inmebat ira, Ginetma nen Saul ya oputen kami, pian anggapo lay nakeraan ed sikamin mambilay ed dalin na Israel.

⁶ "Kanyan ipalimam ed sikami so pitoran lalakin kabyangay boleg nen Saul, ta ibitay mi rad Gabaa diad arap na Katawan ed palandey to. Ipalimak irad sikayo, ebat na ari.

⁷ "Balet lapud samay masanton sipanan dan dua nen Jonatan, ag to impalima si Mefiboset a lakin anak nen Jonatan tan apo nen Saul.

⁸ "Balet inala toy Armoni tan si Mefiboset, saray duaran lalakin anak nen Saul ed kinen Rizpa ya anak nen Aya. Inala to met iray limaran lalakin anak nen Merab a biin anak nen Saul; sikaray anak dan dua nen Adriel ya anak nen Barzillai a taga Mehola.

⁹ "Impalima ra nen David ed saray totood Gabaon, insan da ra imbibitay ed palandey, diad arap na Katawaninaatey iran amin a pito. Onggapo lay tiagew tan say panagani na sibada nen pinatey da ra.

¹⁰ Si Rizpa a biin inyamung nen Saul tan anak nen Aya et angalay sakon kawes, insan inyaplag tod tapew na baton baleg, tan nanayam diman ed kawalaan da ray bangkay manlapud kagapoy panagani ya anggad interter na oran. No agew abulen to ray manok ya onsingger ed saramay bangkay, tan no labi iyagel to rad saray ayayep ed katakelan.

¹¹ Nen nadngelan nen David so ginawa nen Rizpa,

¹² linmad saray totood Jabes diad Galaad, ta inala to ray pokel di Saul tan Jonatan. (Saray totood Jabes tinakew da ray bangkay di Saul tan Jonatan diad plasa na Bet-san ya angisabitan na saray Filisteo diad samay agew ya apatey day Saul diad Palandey na Gilboa.)

¹³ Inala nen David iray pokel di Saul tan Jonatan, insan to met tinipon iray pokel na saramay pitoran lalaki ya imbitay.

¹⁴ Insan da impompon iray pokel di Saul tan Jonatan diad lobuk na ama nen Saul a si Kis a taga Zela, diad pasen a nasasakopan nen Benjamin; ginawa ray amin ya ingganggan na ari. Kayari to ya, dinengel na Dios iray pikakasi ran para bansa.

¹⁵ Wala lamet so bakal na saray Filisteo tan saray Israelita; linmay David tan saray totoo to, ta akilaban irad saray Filisteo. Aminsan, nen peles na bakal, akesawan a maung si David.

¹⁶ Say sakey ya alan a manngaray Isbibenob, a sankaawit toy gansan pika a mambelat na apatiran kilo tan akasalukbit na balon ispada, abaloen ton napatey toy David.

¹⁷ Balet si Abisai a lakin anak nen Sarvia dinago ton tinulongan si David, dinogpaan to may alan, insan to pinatey. Kayari to ya, saray totoo nen David impaisipan dad sikato ya ag lan balut milad bakal. Inkuanda, Sikay ilalo na Israel, et ag mi labay a naandi kad sikami.

¹⁸ Kayari to ya, walay bakal sumpad saray Filisteo diad Gob. Diad sayan bakal pinatey nen Sibecai a taga Husa so sakey ya alan a manngaran na Sipai.

¹⁹ Walay sakey nin bakal sumpad saray Filisteo diad Gob. Diad sayan bakal si Elhanan a lakin anak nen Jair tan taga Betlehem pinatey toy Goliat a taga Gat, a say potan na pika to et singa kabaleg na panagpotipotay tinebey ed panaglagaay abel.

²⁰ Walay sananey nin bakal ed Gat. Diad sayan bakal walay sakey ya alan a labalabay toy mibakal. Anemiray gamet na balang lima to tan sali to.

²¹ Sinagyat ton milaban iray Israelita, et pinatey nen Jonatan a lakin anak nen Simea a lakin agi nen David.

²² Sarayan apat a pinatey nen David tan saray totoo to, et kabyangan ira na boleg na saray alan ed Gat.

22

¹ "Sikato yay kinanta nen David ed Katawan nen inyagel na Katawan ed kinen Saul tan saray arum a kalaban to:

² "Say Katawan so manangilaban ko; sikatoy mabiskeg a tirinsirak.

³ "Say Dios ko so manangyagel ko, tan no kaibak anggapoy pagpagak. Sikatoy singa samper a manasanib ed siak; iyaagel to ak tan iyaarawi to ak ed kaatapan. Sikatoy manangilaban ko; iyaagel to ak ed antokaman a maoges ya onsabid siak.

⁴ "Ontatawag ak ed Katawan, et iyaagel to ak ed saray kalaban ko. Idayew yoy Katawan!

⁵ "Walad kaliber-liber ko so kaatapan na patey; saray daluyon a managderal tinatabunan da ak.

⁶ "Walad kaliber-liber ko so kaatapan na patey tan say lobuk intaryaan to ak na patit.

⁷ "Nen asabian ak na segsegang, tinmawag ak ed Katawan; kinmerew ak ed Dios ko na tulong to. Diad dalem na timplo to, dinengel toy bosis ko; dinengel toy ikekerew koy tulong.

⁸ "Insan ginmiwgiw tan yinmegyeg so dalin; ginmalaw tan ayegyeg iray pundasion na katawenan, ta amasnuk so Dios!

⁹ "Pinmaway so asewek ed eleng to, pinmaway so manliub ya apoy tan mandarlang a ngalab ed sangi to.

¹⁰ Inlokiab toy tawen insan inmakseb, walay makapal a lorem ed silong na saray dapan to.

¹¹ Kinmabayod kirubin to insan tinmikyab; linmogan ed saray payak na dagem.

¹² Nankobut na bilonget; aliber na makapal a lorem a napnoy danum;

¹³ pinaapoy na kirmat ed arap to iray mandarlang a ngalab.

¹⁴ Insan manlapud tawen, kinmarul so Katawan; tan nadngel so bosis na Dios a Makapanyarin-amin.

¹⁵ Ataytayak iray kalaban to nen pinapana to ra; diad panamegley na kirmat, pinapakoyat to ra.

¹⁶ Pinmaway so dalem na dayat, tan alokasan iray pundasion na mundo, nen nampasnukan na Katawan iray kalaban to, tan ineyagan to ray maksil lapud sanuk to.

¹⁷ Manlapud tagey, say Katawan ginawat to ak tan binembenan to ak; inagwat to ak ed araldalem a danum.

¹⁸ Inyagel to ak ed saray makapanyarin kalaban ko, tan amin da ray mamobosul ed siak, ta ag ko nayariay ontan lan inkabiskeg da!

¹⁹ Dinogpaan da ak nen maniirap ak, balet inyagel ak na Katawan.

²⁰ Inekal to ak ed kaatapan; inlaban to ak, ta makaliliket ed siak.

²¹ Tutumangan ak na Katawan lapud matonung ak; bibindisionan to ak lapud anggapoy kasalanan ko.

²² Tinoluk koy ganggan na Katawan; ag ko imbeneg so Dios ko.

²³ Inonur koy amin a ganggan to; ag ko impolisay iray bilibilin to.

²⁴ Amta ton anggapoy kasalanan ko, tan inaarawian koy kaogsan.

²⁵ Kanyan tutumangan to ak lapud matonung ak, tan lapud amta ton anggapoy kasalanan ko.

²⁶ Matoor ka, Katawan, ed saray matoor ed sika, tan nagnap so inkamaung mod saray totoon ayadyari.

²⁷ Malinis so ipapatnag mod saray malinis so panagbilay da, balet mapasnuk kad saray maoges so panagbilay da.

²⁸ Iyaagel mo ray totoon mauyamo, balet papaabebaen mo ray mapaatagey.

²⁹ Sika, Katawan, so liwawak; papaliwawaen moy bilonget ko.

³⁰ Iitdan mo ak na biskeg ya ondogpad saray kalaban ko, tan pakayari a manakep ed saray tirinsira ra.

³¹ Ayadyari ray gawa na sayan Dios, napanmatalkan iray salita to! Aliling toy samper ed amin da ray pa paiyagel ed sikato.

³² Bukbukor na Katawan so Dios; say Dios labat so manangyagel tayo.

³³ Sayan Dios so mabiskeg a salimbeng ko, eekalen toy kaatapan ed dalan ko.

³⁴ Gagawaen to ak a singa impansaliy ulsa; iyaarawi to ak ed kaatapan diad kapalandeyan.

³⁵ Babangatan to ak ed pibabakal, pian nayarian kon ikanay sankabiskegan a pana.

³⁶ Katawan, iyaagel tan ilalaban mo ak; lapud pananulong mo nagmaliw ak a matalonggaring,

³⁷ Ag mo ak inabuloyan ya adakep, tan ag ak balut atumba.

³⁸ Osilan ko ray kalaban ko et tataloen ko ra; ag ko ra tondaan ya anggad ag ko ra napatey.

³⁹ Pepekpeken ko ra, et ag ira makabangun; natutumba ran atalo ed saliyan ko.

⁴⁰ Iitdan mo ak na biskeg a mibakal, tan pananalo ed saray kalaban ko.

⁴¹ Pababatiken mo ray kalaban ko; papateyen ko ray mamobosul ed siak.

⁴² Onkekerew ira na tulong, balet anggapoy mangilaban ed sikara, mikakasi rad Katawan, balet ag to ra ebatan.

⁴³ Memekmeken ko ra, et magmamaliw iran singa dabuk. Gagatinan ko ran singa pitek ed saray dalan.

⁴⁴ Inliktar mo ak ed saray totoon mananumpa, tan impansiamsiam so panooley kod saray bansa; panlilingkuran ak natan na saray totoon ag ko kabat nen saman.

⁴⁵ Dadakmomoan ak na saray totoon taga arum a bansa; no narengel da ak, ononur ira.

⁴⁶ Onkakapoy so linawa ra tan manggiwgiw iran onsisingger a manlapud saray tirinsira ra.

⁴⁷ Say Katawan et mabilay! Idayew yoy manangyagel ko! Ibawag yoy talonggaring na mabiskeg a Dios a mangilalaban ed siak!

⁴⁸ Panataloen to ak ed saray kalaban ko; tataloen to ray totoon walad silong na pakaoley ko;

⁴⁹ tan ililiktar to ak ed saray kalaban ko. Katawan, sikay mangiiter ed siak na pananalo ed saray kalaban ko tan sikay mangyaagel ed siak ed saray maruksan totoo.

⁵⁰ Kanyan idadayew ta ka diad pegley da ray bansa; kakantaan ta ka na panangidayew.

⁵¹ Say Dios mangiiter na pananalo ed arin impasen to; ag mangoomay panangaro tod toon pinili to, diad kinen David tan saray kabyangay boleg to, diad ando lan ando.

23

¹ "Si David a lakin anak nen Jesse et sikatoy ginawa na Dios a matalonggaring, pinili na Dios nen Jacob a manari, tan sikatoy nanggawa na saray marakep a kanta a para Israel. Nia ray kaonuran a salita nen David:

² "Say ispiritu na Katawan misasalita ed panamegley ko; walad dilak iray salita to.

³ "Nansalita so Dios na Israel; inkuan ed siak na manangyagel na Israel: Say arin maptek so panooley to, tan manooley a walay takot ed Dios,

⁴ "et singa agew ya onsisindag ed kabwasan ya anggapoy lorem, say agew a mamapasileng na karikaan kayariy oran.

⁵ "Onyay pamindision na Dios ed saray kabyangay boleg ko, ta andi-angga so impisipanan tod siak, sakey a paknaan ya ag naderal, sakey a sipan ya ag naoman. Sikato ya labat so labay kon nagawa; sikato yay panananalok, et andi-duaruwan ipagamur ed siak na Dios.

⁶ "Balet saray totoon ag manisiad Dios et singa ra sabit ya imbantak; anggapoy liman makadiwit ed sikara.

⁷ "Nakaukolan a mangikana kay kagawaan a balatyang odino pika; sigput a napoolan ira.

⁸ "Saraya so kangaranan na saray bantug a sondalo nen David; say onona si Yosevbasevet a taga Takerom a pangulo na Saray Talora; inkana toy pika diad impilaban to ed walon lasus a lalaki, et apatey to ran amin legan na sakey a bakal.

⁹ "Say kumadwa ed sarayan taloran bantug et si Eleazar a lakin anak nen Dodo a kabyangay boleg nen Aho. Aminsan ya agew sinagyat dan dua nen David a milaban iray Filisteo a nantitipon a mibakal. Sinmoner iray Israelita,

¹⁰ balet ag inmalis si Eleazar tan nilabanan to ray Filisteo ya anggad inkelat a maung na taklay to, kanyan ag to la naikbanan so ispada to. Diad saman ya agew, balbaleg so impanalo na Katawan. Kayariy bakal, pinmawil iray Israelita ed kawalaan nen Eleazar tan inaala ray armas na saray inaatey.

¹¹ Say kumatlod sarayan taloran bantug et si Samma a lakin anak nen Age, tan taga Harar. Nantitipon iray Filisteo ed Lehi a kawalaay alog na agayep. Imbatikan na saray Israelita iray Filisteo,

¹² balet ag inmalis ed alog si Samma, inyagel to, tan pinapatey to ray Filisteo. Diad saman ya agew, balbaleg so impanalo na Katawan.

¹³ Aminsan ya agew, nen asingger lan onggapoy panagani, talora ed Saray Talomplo so linma ed Ongib na Adullam a kawalaan nen David; wala met iray pigaran Filisteo a mankakampod Patar na Refaim.

¹⁴ Diad saman a panaon walad pokdul a tirinsira si David, tan sakey ya olup na saray Filisteo so linmoob ya anakup ed Betlehem.

¹⁵ Sinmabid kinen David so pakakailiew kanyan inkuanto, Wala komuy makapangiter ed siak na danum a nanlapud bobun a walad abay na puirtay Betlehem.

¹⁶ Saramay taloran bantug a sondalo et pinasoot day sinmelak ed kampo da ray Filisteo, angala ray danum ed bobun, insan da inter ed kinen David. Balet ag to inomen, no ag ta inkalbo to tan imbagat tod Katawan,

¹⁷ tan kuanto, Katawan, ag nayarin balut ya inomen ko ya! Ta no inomen ko, singa iinomen ko so dala da ra yan totoo ya angipostay bilay da! Kanyan ag to ininom. Sikara ya so ginagawa na saramay taloran bantug a sondalo.

¹⁸ Say lakin agi nen Joab a si Abisai (Si Sarvia so ina ra) so pangulo da ray Talomplon Bantug. Inkana toy pika diad impilaban tod saray talon lasus a lalaki tan pinapatey to ra, kanyan nagmaliw a bantug ed Saray Talomplo.

¹⁹ Sikatoy sankabantugan ed Saray Talomplo, kanyan nagmaliw a pangulo ra, balet ag to aparaan so inkabantug na Saray Talora.

²⁰ Say lakin anak nen Joiada a si Benaya a taga Cabseel et sakey met nin bantug a sondalo; wala ray ginagawa ton makapakebiew. Pinatey toy duaran matalonggaring a bumabakal a taga Moab. Aminsan ya agew ya ambetebetel, linma ed dalem na ongib tan pinatey toy sakey a lion.

²¹ Pinatey to met so sakey ya Egipsion baleg so laman to tan nanarmas na pika. Pinekpek to na baston, sinamsam toy pika to tan sikatoy impamatey to.

²² Saraya so ginagawa nen Benaya a sakey ed Saray Talomplo.

²³ Bantug ed Saray Talomplo, balet et ag to aparaay inkabantug na Saray Talora. Si David ginawa ton pangulo na saray mambabantay ed sikato.

²⁴ Sikara ya so arum a lalakin kabyangan na Saray Talomplo: Asahel a lakin agi nen Joab Elhanan a lakin anak nen Dodo, tan taga Betlehem Samma tan Elica a taga ra Harod Helez a taga Pelet Ira a lakin anak nen Ikes, tan taga Tecoa Abiezer a taga Anatot Mebunai a taga Husa Zalmon a taga Aho Maharai a taga Netofa Heleb a lakin anak nen Baana, tan taga Netofa Itai a lakin anak nen Ribai, tan taga Gabaa a sakop nen Benjamin Benaya a taga Piraton Hidai a taga saray patar a kaabay na Gaas Abi-albon a taga Araba Azmavet a taga Bahurim Eliaba a taga Saalbon Saray lalakin anak nen Jasen Jonatan Samma a taga Arar Ahiam a lakin anak nen Sarar, tan taga Arar Elifalet a lakin anak nen Ahasbai, tan taga Maaca Eliam a lakin anak nen Ahitofel, tan taga Gilo Hezro a taga Carmel Paarai a taga Arab Igal a lakin anak nen Natan, tan taga Soba Bani a taga Gad Zelek a taga Amnon Naharai a taga Beerot tan sikatoy umaawit na armas nen Joab ya anak nen Sarvia Ira tan Jareb a taga ra Jatir Urias a Heteo. Talomplo tan pito ran amin a bantug a sondalo.

24

¹ "Aminsan akapasnuk so Katawan ed Israel, kanyan tinanggoyur ton mangiter na gunigon ed saray Israelita si David. Inkuan na Katawan ed sikato, Laka, ta bilang mo ray totood Israel tan Juda.

² "Kanyan ginanggan nen David si Joab a pangulo na saray sondalo, Itagar mo ray opisyal mo tan laka yod amin a tribu na Israel, manlapud Dan a sakey a ketegan na bansa ya anggad Beer-seba a sananey a ketegan, ta bilang yo ray totoo. Labay kon naamtaan so karakel da.

³ "Balet inmebat si Joab ed ari, Kagalang kon Ari, say Katawan a Dios mo et parakelen to komun a maminlasus so totoo to, andokey ni komuy bilay mo, pian nanengneng moy panggawa tod saya. Balet akin et pabibilang mo ray totoo?

⁴ "Balet naonur lamlamang so ganggan na ari ed kinen Joab tan saray opisyal to; tinaynan da, ta linma ran mamilang ed saray totood Israel.

⁵ "Binaliw day Jordan, insan ira nankampo ed abalaten na Aroer, say siudad a walad pegley na patar, diad sakop na dalin nen Gad. Manlapud sayan lugar, linma rad baybay na Jazer,

⁶ "insan dia ed Galaad, tan tinmuloy irad Kades, say lugar da ray Heteo. Insan linma rad Dan, tan manlapud Dan, linma rad sagur na Sidon.

⁷ "Insan linma rad abalaten na aliber na padir a siudad na Tiro, tinmuloy irad amin a siudad na saray Heveo tan saray Cananeo, insan kasamputan diad Beer-seba a sagur na Juda.

⁸ "Kayari ran nakar na siam bulan tan duamplon agew so intiron dalin na Israel, pinmawil irad Jerusalem.

⁹ "Insan imbaga nen Joab ed ari so abilang da: diad Israel walon lasus a libon lalaki so nayarin mansondalo tan diad Juda linman lasus libon lalaki so nayarin mansondalo.

¹⁰ Balet kayariy impakabilang nen David ed saray totood Israel, ag pareenen na konsinsia to, kanyan kuantod Katawan, Ambelat so kasalanan ko lapud sayan ginawak! Pirdona mo ak pa. Inaambagel so ginawak.

¹¹ Inkuan na Katawan ed kinen Gad a propita nen David, Lakad kinen David, ta ibagam ed sikato ya itdan koy taloran panpilian. Gawaen ko so antokaman a pilien to. Kaimbuas, nen abangon lay David,

¹²

¹³ linmad sikatoy Gad, sinalita toy impaibaga na Katawan, tan tinepet to, Dinay pilien mo? Taloy taon ya eras ed dalin mo, odino taloy bulan ya ibatik-batikan mo ray kalaban mo, odino taloy agew a salot ed dalin mo? Kanyan nunot mo tan ibagam ed siak no antoy ebat mo, ta sikatoy ibagak ed Katawan, ya angibakid siak.

¹⁴ Inmebat si David, Makapasinagem so kipapasen ko! Balet ag ko labay a dusaen ak na too. Say Katawan so labay kon manusad sikami, ta mapangapangasi.

¹⁵ Kanyan say Katawan angibaki na salot ed Israel a ginmapod saman a kabwasan ya anggad panaon a tinandaan to. Manlapud Dan a sakey a ketegan na bansa ya anggad Beer-seba a sananey a ketegan, pitomplon libon Israelita iray inaatey.

¹⁶ Nen ngalngali deralen na anghil na Katawan so Jerusalem, angoman na kanunotan so Katawan nipaakar ed panudusa tod saray totoo, kanyan kuantod samay anghil a mamapatey ed sikara, Tondaan mo la! Duga la tan! Samay anghil et walad abay na panagilikan nen Arauna a Jebuseo.

¹⁷ Anengneng nen David imay anghil a mamapatey na saray totoo, tan kuantod Katawan, Siak so nankasalanan. Siak so nanggaway kaogsan. Antoy ginawa na sarayan totoo? Nepeg a siak tan say pamilyak so dusaen mo.

¹⁸ Diad saman met lamlamang ya agew linmay Gad ed kinen David tan kuantod sikato, Lakad panagilikan nen Arauna ta manggawa kad may altar a para Katawan.

¹⁹ Inonur nen David so ganggan na Katawan; linma sirin onung na imbaga nen Gad ed sikato.

²⁰ Inmosdung si Arauna et anengneng toy ari tan saray opisyal to ya ondaragod sikato. Diad pamagalang to tinmiblak ed arap nen David,

²¹ insan tinepet to, Kagalang kon ari, akin et wadya ka? Inmebat si David, Labay kon saliwen so pasen a panagilikan mo, pian makapanggawa ak na altar a para Katawan, et ontonda lay salot.

²² Alam labat, Kagalang kon Ari, kuanen Arauna, tan isaklang mod Katawan so antokaman a labay mo. Nia ray bakan isaklang a bagat a popoolan; nia ray pako ra tan saray tablan panagilikan a nayarin pamparlang.

²³ Inter iran amin nen Arauna ed ari, tan kuanto, Awaten komun na Katawan so bagat mo.

²⁴ Balet inmebat so ari, Andi, bayaran kod sika. Ag ak mangisaklang ed Katawan kon Dios na saray bagat ya ag ko binayaran. Kanyan say ari sinaliw to na limamplon pilak a kuarta imay pasen a panagilikan tan saramay baka.

²⁵ Insan nanggaway altar a para Katawan tan angisaklang na saray bagat a popoolan tan saray bagat a para kareenan. Inebatan na Katawan so pikakasi to, kanyan tinmonda so salot ed Israel.