1 "Walay sakey a lakin manngaray Elcana, a taga baley na Rama diad nipokdul a dalin na Efraim. Kabyangay tribu nen Efraim, anak nen Jeroham tan apo nen Eliu, a kabyangay pamilya nen Tohu, a kabyangay boleg nen Zuf.
2 "Si Elcana duaray asawa to, si Ana tan si Penina. Si Penina wala ray anak to, balet si Ana anggapo.
3 "Tinaon ya ontataynan ed Rama si Elcana, ta onlad Silo a mangigalang tan mangibagat ed Katawan a Makapanyarin-amin. Diad Silo manaayam irad man di Ofni tan Finees ya anak nen Eli, ta papari ra na Katawan.
4 "Kapag mangibagat si Elcana, sakey a betang so iter tod kinen Penina tan sansasakey a betang ed saray anak to.
5 "Anggaman ya inararo ton maung si Ana sakey labat a betang so iter tod sikato, lapud say Katawan et ag to abuloyan a mananak.
6 "Sotil-sotilen tan pabpaabebaen nen Penina a kalaban to diad sayan ag impangyabuloy na Katawan ed sikato ya ag mananak.
7 "Tinaon yan nagagawa; kapag onla rad abung na Katawan sotil-sotilen nen Penina, kanyan onakis si Ana tan ag balut mangan.
8 "Tepeten ed satan nen Elcana ya asawa to, Ana, akin et onaakis ka? Akin et ag ka mangan? Ag ka la kari maneermen. Ag mo ak ta pinabli nen saray samploran anak a lalaki?
9 "Aminsan diad Silo, kayari ran angan ed loob na abung na Katawan, inmalagey si Ana. Maerermen si Ana tan mannangnangis na ampaitpait legan ton mampipikasid Katawan. Diad sayan bekta manyodyurong ed abay na puirta si Eli a pari.
10 Si Ana nanggaway sipan a sinambaan to: Katawan a Makapanyarin-amin, no imanoen mo ak ya aripen mon pangaskasiyan, no nonuten mo ak, ag mo ak lingwanan, tan itdan mo ak na anak a laki, isaklang kod sika legan a mabilay tan ag kon balut pakatlian.
11
12 Abaybayag a nampikasi tan inimano nen Eli so bibil to.
13 Marereen a mampipikasi; manggalaw so bibil to, balet anggapoy narengel a bosis to. Kanyan abaloan nen Eli ya abuek.
14 Inkuantod sikato, Dakel amoy nainom mo? Mampamawmaw ka ni!
15 Inmebat, Aliwak ak pan abuek. Ag ak inminom na alak no ag ingen maermen ak a maung. Mampipikasi ak tan ibabagak ed Katawan iray gunigon ko.
16 Ag yo ak komun ipapasen ya andi-kakanaan a bii. Onyay pampipikasik ta maermen ak a maung tan pangakasiyan ak.
17 Inkuanen Eli, Laka lan mareen so kalakal mo. Iter komun na Dios na Israel so kinerew mod sikato.
18 Maabig lawas komun so linawa yod siak, ebat nen Ana. Tinmaynan la, angan, tan nakal lay ermen to.
19 Kaimbuas binmangon a masakbay si Elcana tan say pamilya to, inggalang day Katawan, insan ira amawil ed Rama. Inakdulan nen Elcana si asawa ton Ana et inebatan na Katawan so pikakasi nen Ana.
20 Nanlokun sirin tan nananak na sakey a laki. Inngaran to na Samuel, ta inkuanto, Kinerew ko ed Katawan.
21 Sinmabi lamet so panaon ya iyakar ed Silo nen Elcana tan say pamilya to a mangisaklang na tinaon a bagat tan say nidoma-doman bagat ya insipan to.
22 Balet ag akila natan si Ana. Inkuantod kinen asawa to, No apakso lay ogaw, sikato lay pangawit kod abung na Katawan, tan diman lay panayaman to legan a mabilay.
23 Inkuanen Elcana, Gawam so isisipen mon sankaabigan. Tilak ka dia sirin ed abung anggad napaksom. Tulongan ka komun na Katawan ed panumpal mod sipan mo. Nanayam sirin ed abung si Ana tan inasikaso toy anak to.
24 Nen apakso to lay ogaw, inyakar tod Silo. Nanawit na taloy taon a bakan kalakyan, sakey salup ya arina, tan sakey a pananginan a katat a napnoy alak. Ogaw ni sirin si Samuel nen inawit nen ina to ed abung na Katawan diad Silo.
25 Kayari ran pinatey imay bakan kalakyan, inyakar da may ogaw ed kinen Eli.
26 Inkuanen Ana ed kinen Eli, Nabirbir yo ak ni? Siak imay biin anengneng yon manalalagey dian mampipikasi ed Katawan.
27 Inebatan na Katawan so pikakasik tan sayan ogaw so inter tod siak.
28 Kanyan isaklang ko natan ed Katawan. Legan a mabilay, kayaryay Katawan. Insan da inggalang diman so Katawan.
1 "Nampikasi si Ana: Say Katawan pinano toy liket so pusok; agaylay liket ko lapud ginawa to. Elekan ko ray onlalaban ed siak; agaylay gayagak ta tinulongan ak na Dios.
2 "Anggapoy masanto a singa say Katawan; anggapoy miparad sikato, anggapoy manangyagel a singa say Dios tayo.
3 "Itonda yo lay makmaknul a panagpasirayew yo; ag ki la mampapasirayew ed saray panagsalita yo. Ta say Katwan et sakey a Dios a makapikabat ed amin, tan sintinsiaan toy amin a gawgawa na katoowan.
4 "Napoter iray pana na saray mabiskeg a sondalo, balet ombiskeg iray makapoy.
5 "Saray totoon daakan so kakanen da nen saman miuupa la ra natan a mananap na nakan, balet aliwa lan narasan iray anggapoy nakan nen saman. Say biin lepes nananak na pitora, balet anggapoy nakdaan ya anak na biin maanak.
6 "Say Katawan mamatey tan mamabilay; ibaki tod pasen a panaayaman da ray inaatey iray totoo, tan agwaten to ra.
7 "Pagmaliwen ton mairap-bilay iray arum tan mayaman iray arum; paabebaen tod kipapasen iray arum tan paatageyen to ray arum.
8 "Agwaten tod dabuk iray mairap-bilay, tan aonen tod kairapan iray pangaskasiyan. Gawaen to ran kakaiba na saray prinsipi, tan iyakar to rad saray pasen na kagalangan. Kayaryan na Katawan iray punda-sion na mundo; diad saraya so angiletnegan toy mundo.
9 "Iyagel toy bilay da ray totoo ton matoor, balet naandipat ed kabilongetan iray totoon maoges; ag manalo so too lapud biskeg ton dili.
10 Napatey iray onlalaban ed Katawan; manlapud tawen pakarulan to ra. Sintinsiaan na Katawan so intiron mundo; pabiskegen toy ari to, panaloen toy pinili ton ari.
11 Insan sinmempet ed Rama si Elcana, balet nanayam ed Silo si ogaw a Samuel tan nanlingkur ed Katawan diad silong na panangiwanwan nen Eli a pari.
12 Maoges iray lalakin anak nen Eli. Ag da italtalek so Katawan
13 tan saray totontonen a nipaakar ed kanepegan ya alaen na saray papari ed saray totoo. Ta kapag mangibabagat so siopaman, nitan met lay aripen na pari a sankaawit toy taloray torok a tinidor. Legan a lalambungen so kami,
14 itorok toy tinidor ed lambungan, tan no antoy nala to sikatoy kayaryay pari. Amin ya Israelitan onlad Silo a mangibagat et onyay nagawad sikara.
15 Likud ed saya, anggan kasakbayan a naekal so taba tan napoolan, nitan lay aripen na pari tan kuantod toon mangibabagat, Itdan mo ak na karnin ikalot na pari; ag to awaten ed sika so inlambung a karni, sa labat so ag ni inlotun karni.
16 No onebat so too, Gawaen ta niy kanepegan tan poolan nin onona so taba, insan ka la mangalay labay mo, say aripen na pari ikuanto, Andi! Iter mo lad siak natan! No ag ka, alaen kod pasootan!
17 Sayan kasalanan na saray lalakin anak nen Eli et ambelat a tuloy ed arap na Katawan, lapud nilemlemew da ray bagat ed Katawan.
18 Si ogaw a Samuel intuloy toy nanlingkur ed Katawan, tan akasolung na ipod a linen.
19 Tinaon ya igawaan nen ina to na melag a kawes tan awit ton iter ed sikato no olupen toy asawa ton mangisaklang na tinaon a bagat.
20 Insan bindisionan nen Eli si Elcana tan si asawa to, tan ikuantod Elcana, Iyabuloy komun na Katawan a makaanak ka nid sayan bii, pian walay mangalay pasen na anak yon insaklang yod Katawan. Kayari to ya, onsempet la ra.
21 Binindisionan a tua na Katawan si Ana, tan akaanak ni na taloran lalaki tan duaran bibii. Binmaleg a manlilingkur ed Katawan si ogaw a Samuel.
22 Masikesiken la natay Eli. Naynay ton narerengel iray amin a bengatlan gagawaen na saray lalakin anak to ed saray Israelita, tan anggan say pipiakdul dad saray bibiin mankikimey ed puirta na Tuldan Ayamay Katawan.
23 Kanyan inkuantod sikara, Akin et gagawaen yo ra yan bengatla? Ibabagad siak na amin a totoo so nipaakr ed saray maoges a gagawaen yo.
24 Tondaan yo anak ko. Mabambanday yan tongtongtongen na saray totoo na Katawan!
25 No say sakey a too et mankasalanan ed kapara ton too, nayarin iyagel na Dios; balet siopay nayarin mangyagel ed toon mankasalanan ed Katawan? Balet ag ira dinmengel ed ama ra, ta ginetma la na Katawan a pateyen to ra.
26 Binmaleg si ogaw a Samuel, tan binmaleg met so panangaroy Katawan tan saray totoo ed sikato.
27 Linmad kinen Eli so sakey a propita a nankuan, Onyay papaibagay Katawan: Nen si lakim ya Aaron tan say pamilya to et aripen iray ari na Egipto, impaamtak ed sikara so siak a dili.
28 Diad saray amin a tribu na Israel, pinilik iray kabyangay pamilya to a magmaliw iran paparik, manlingkur ed altar, mamool na insinso, tan mansolung na ipod no mangipanon irad siak. Inter kod sikaray kanepegan a mangalay betang da ed saray bagat a popoolan.
29 Akin, sirin et aagoman yo ray bagat tan saray saklang ko ya ingganggan ko ran gawaen na totook? Akin et papablien mo ni ray lalakin anak mo nen say siak? Akin et aabuloyan mo ran mampatabad sikaran dili diad pangakan dad saray sankaabigan a parti na amin a bagat ya isasaklang ed siak na saray totook?
30 Siak, say Katawan a Dios na Israel, insipan ko nen saman a say pamilyam tan saray kabyangay boleg mo et anggad anggan manlingkur iran papari ed siak. Balet ibabagak natan ya ag ko la sumpalen! Ingen, pagalangan ko ray mamagalang ed siak, balet lemlemewen ko ray mambalaw ed siak.
31 Dengel ka, onsabi la so panaon a pateyen ko ray babalolakin kabyangay pamilyam tan boleg mo, pian anggapoy ontaken a lakin kabyangay pamilyam.
32 Nagunigon kayo tan makaibeg kayo naani ed amin a bindision ya iter kod saray arum a totood Israel, balet anggapon balut ed pamilyam so mambilay na andokey.
33 Anggaman ontan, pansiansiaen kon mabilay so sakey a kabyangay boleg mo, tan manlingkur a sakey a pari ed siak. Balet nabulag tan nabalang toy amin ya ilalo, tan ompatey ya amin iray arum a kabyangay boleg mo diad panamegley na ispada.
34 No saray duaran lalakin anak mo a di Ofni tan Finees et ompatey irad saksakey ya agew, mangipanengneng yad sika ya ontua ray amin ya imbagak.
35 Mamili ak na sakey a parin matoor ed siak tan manggaway amin ya ibagak ed sikato. Itdan ko na saray kabyangay boleg to tan manlingkur ira lawas ed arap na pinilik ya ari.
36 Siopaman ed saray kabyangay pamilyam so mansiansian mabilay et nakaukolan ya onlan mikerew ed sayan pari na kuarta tan say nakan, tan onkerew na abuloy ya ontulong ed saray papari, pian nawalaan na pambilay.
1 "Diad saraman ya agew nen si ogaw a Samuel et manlilingkur ed Katawan diad silong na panangiwanwan nen Eli, mataltalag a narengel so bosis na Katawan, tan pigpigaray nagagawan payawar to.
2 "Aminsan a labi si Eli a ngalngali la bulag et naogip ed dilin kuarto to.
3 "Naogip met si Samuel ed dalem na Timplo na Katawan, diad kawalaay Kaban na Sipanan na Dios. Kasakbayan na palbangon, legan a mandarlang niy lamparaan,
4 "si Samuel tinawag na Katawan, Samuel, Samuel! Inmebat, Wadya ak!
5 "insan binmatik ed kinen Eli tan kuanto, Wadya ak, ta tinawag yo ak. Balet inmebat si Eli, Ag ta ka tinawag; pawil kad dokulan mo. Kanyan amawil si Samuel ed dokulan to.
6 "Tinmawag lamet so Katawan, Samuel! Ag to amta a say Katawan so ontatawag, ta ag ni akisalita so Katawan ed sikato nen saman. Kanyan binmangon, linmad kinen Eli tan kuanto, Wadya ak, ta tinawag yo ak. Balet inmebat si Eli, Anak ko, ag ta ka tinawag. Pawil kad dokulan mo.
7
8 "Pitlon tinawag na Katawan si Samuel; binmangon, linmad kinen Eli tan kuanto, Wadya ak, ta tinawag yo ak. Insan atalusan la nen Eli a say Katawan so manatawag ed ogaw,
9 "kanyan inkuantod sikato, Pawil kad dokulan mo, tan no tawagen to ka lamet kuanmo, Mansalita ka, Katawan; onderengel so aripen mo! Kanyan amawil si Samuel ed dokulan to.
10 Sinmabi so Katawan tan nanalagey diman, tan tinawag to a singa impanawag to nen inmona, Samuel! Samuel! Inmebat si Samuel, Mansalita ka; onderengel so aripen mo.
11 Inkuam na Katawan ed sikato, Onsabiy agew a walay gawaen kod saray totood Israel, et siopamay makadngel na nipaakar ed saya ombegas so bago tod takot to.
12 Diad satan ya agew gawaen ko, manlapud gapo ya anggad samput, iray amin ya imbagak sumpad pamilya nen Eli.
13 Imbagak lad sikato a dusaen kon andi-anggaan so pamilya to, lapud saray lalakin anak to et nansalita ray maoges sumpad siak. Kabat nen Eli so panggagawa rad saya, balet ag to ra pinatonda.
14 Kanyan sinambaan kod pamilya nen Eli ya anggapoy bagat o saklang a makaekal ed dusa na sayan kaogsan a ginawa na pamilya nen Eli.
15 Nandokul ni ya anggad kabwasan si Samuel; insan binmangon tan nilukasan to ray puirta na abung na Katawan. Antakot ton ibaga ed kinen Eli so nipaakar ed payawar.
16 Tinawag nen Eli, Samuel, anak ko! Inmebat si Samuel, Wadya ak.
17 Antoy imbagay Katawan ed sika? tepet nen Eli. Ag mo komun iyaamut ed siak. Ambelat so panusay Dios ed sika no ag mo ibagad siak iray amin ya imbaga to.
18 Kanyan imbaga nen Samuel iray amin a bengatla; anggapoy inyamut to. Inkuanen Eli, Sikato so Katawan; gawaen toy antokaman ya isisipen ton maabig.
19 Legan ya ombabaleg si Samuel, walad sikatoy Katawan tan pinapatua to ray amin ya imbabaga nen Samuel.
20 Kanyan amta na amin a totood Israel, manlapud baley na Dan ya anggad baley na Beer-seba, a tuan propita na Katawan si Samuel.
21 Intuloy na Katawan ya ipaamta so sikaton dili ed Silo, a dimay pinayawaran tan akisalitaan tod kinen Samuel. Tan no mansalitay Samuel ondengel ya amin iray Israelita.
1 "Diad saman a panaon, nantitipon iray Filisteo a mibakal ed saray totood Israel, kanyan namparaan iray Israelita. Saray Israelita nankampo ra ed Ebenezer tan saray Filisteo diad Afec.
2 "Dinmogpa ray Filisteo, tan kayariy pinasyan laban, tinalo da ray Israelita ta pinatey dad lawak na bakalan so sakey ya apat a libon lalaki.
3 "Nen pinmawil ed kampo iray ag apatey ed bakal, inkuan na saray pangulod Israel, Akin et inyabuloy na Katawan a taloen itayo natan na saray Filisteo? Tila ta alaen tayod Silo so Kaban na Sipanan na Katawan, pian milad sikatayo so Katawan tan iyagel to itayod saray kalaban tayo.
4 "Kanyan angibaki ray pigaran totoo ed Silo tan inala ra may Kaban na Sipanan na Katawan a Makapanyarin-amin, a walad trono diad tagey na saray kiruben. Inolup na saray lalakin anak nen Eli, a di Ofni tan Finees, so Kaban na Sipanan.
5 "Nen sinmabiy Kaban na Sipanan, ayegyeg so dalin diad kasil na maliket ya impaneyag-eyag da ray Israelita.
6 "Nadngel na saray Filisteo so eyagan, tan kuanda, Dengel yoy maksil ya eyagan ed kampo da ray Hebreo! Anto kasiy kabaliksan to? Nen naamtaan da a sinmabid kampo da ray Hebreo so Kaban na Sipanan na Katawan,
7 "ataktakot ira tan kuanda, Sinmabid kampo ra so sakey a dios! Pakaskasi itayo la! Anggapo niy singa onyan agawad sikatayo nen saman!
8 "Siopay makapangilaban ed sikatayo ed saray makapanyarin diriyos? Sikaray diriyos ya amatey ed saray Egipsio diad panamegley na saray nandoroman salot diad kalawakan!
9 "Mampabiskeg kayoy linawa, sikayo ran Filisteo! Milaban kayon singa tuan lalaki, ta no andi, magmaliw itayon aripen na saray Hebreo, a singa impangaripen tayod sikara. Kanyan milaban kayon singa tuan lalaki!
10 Akilaban iray Filisteo; atalo ray Israelita tan kibatiktik irad kaabungan da. Amayamay a maung so inaatey: talomplon libon Israelitan sondalo so inaatey.
11 Asamsam so Kaban na Sipanan na Katawan, tan inatey ira di Ofni tan Finees a lalakin anak nen Eli.
12 Manlapud lawak na bakalan walay sakey a toon kabyangay boleg nen Benjamin a binmatik ya onlad Silo. Sinmabi ed samay agew lamlamang ya insiput to. Diad pangipanengneng toy ermen to, pinipilat toy kawes to tan ininan toy dabuk so olo to.
13 Manyodyorung si Eli ed yorungan to diad gilig na dalan, ta manaalagar. Mapaga lapud Kaban na Sipanan. Samay too imbalita tod intiron baley so agawa, et nanakis ya amin iray totoo diad takot da.
14 Nadngel nen Eli so akisan tan tinepet to, Antoy kabaliksan to yan akisan? Nangganat ya inmasingger ed kinen Eli imay too, tan imbaga to met ed sikatoy balita. (
15 Siamaplo tan walo lay taon nen Eli natan tan ngalngalin ag la makanengneng.)
16 Inkuan na samay too, Akapaliis ak manlapud lawak na bakalan tan ag ak tinmondan binmatik ya angga dia, diad sayan agew. Tinepet nen Eli ed sikato, Antoy agawa, anak ko?
17 Inmebat may mangibabalita, Imbatikan na saray Israelita iray Filisteo; agaylay inkatalo tayo! Apatey met iray lalakin anak mo a di Ofni tan Finees, tan asamsam so Kaban na Sipanan!
18 Nen asalita na samay too so Kaban na Sipanan na Dios, abalintuag si Eli manlapud yorungan to diad abay na puirta. Masikesiken la tan mataba-taba, kanyan apoter so tenger to, tan inatey. Apataploy taon a sikatoy pangulo na Israel.
19 Say manugang nen Eli, say asawa nen Finees, et malokun tan ngalngali la mananak. Nen nadngelan ton asamsam so Kaban na Sipanan na Dios tan inatey so katolangan to tan say asawa to, biglan nampasakit tan nananak.
20 Nen ompapatey, inkuan ed sikato na saray bibiin ontutulong ed sikato, Pabiskeg moy linawam! Sakey a laki so anak mo! Balet ag to inimano, tan ag inmebat.
21 Icabod so inngaran tod samay ogaw, ta inkuanto, Say Israel tinaynan na kagalangan na Dios totokuyen toy inkasamsam na Kaban na Sipanan tan say impatey na katolangan to tan say asawa to.
22 Inkuanto, Say Israel tinaynan na kagalangan na Dios, lapud asamsam so Kaban na Sipanan na Dios.
1 "Kayarin asamsam na saray Filisteo so Kaban na Sipanan na Dios, manlapud Ebenezer inyakar dad siudad dan Asdod.
2 "Inawit dad dalem na timplo na dios dan Dagon, tan inyan dad abay na talintao to.
3 "Diad kabkabwasan na ontombuk ya agew anengneng na saray taga Asdod a say talintao nen Dagon et atumban tikleb diad arap na Kaban na Sipanan na Katawan. Impaalagey da sirin tan impawil dad pasen to.
4 "Diad kabkabwasan ed ontombuk ya agew anengneng da a say talintao et atumba lamet a tikleb diad arap na Kaban na Sipanan. Nakal natan so olo to tan saray taklay to, tan wala rad pasen a mamaarap ed puirta; atilak so kabalgan labat. (
5 "Kanyan anggad natan saray papari nen Dagon tan saray manangigalang ed sikato diad Asdod et luluksoan da man a pasen tan ag da gagatinan.)
6 "Mapalaloy impanusa na Katawan ed saray taga Asdod, tan pinatakot to ra. Dinusa to ra tan saray totood kaliber-liber dan pasen diad panamegley na inkapelpelsaan da.
7 "Nen anengneng day nagagawa, inkuanda, Say Dios na Israel et dudusaen to itayo tan say dios tayon Dagon. Ag tayo la nayarin panayamen dia tay Kaban na Sipanan.
8 "Angibaki ra sirin na manawag ed amin da ray limaran arari na saray Filisteo! Nen atipon la ran lima, tinepet dad sikara, Antoy gawaen tayo ed Kaban na Sipanan na Dios na Israel? Inmebat ira, Iyakar yod Gat. Kanyan inyakar dad Gat, sakey a siudad ed Filistia.
9 "Balet kasabi tod man, dinusa met na Katawan iman a siudad, tan ginewgew ton maung iray totood man. Dinusa to ra diad panamegley na inkapelpelsaan na amin a totood siudad, mamataken man o mamalangwer.
10 Kanyan impaiyakar day Kaban na Sipanan ed siudad na Ecron. Kasabi tod man, ineyag na saray totoo, Inyakar da diay Kaban na Sipanan na Dios na Israel a mamatey ed sikatayon amin!
11 Kanyan angibaki ra lamet na manawag ed amin da ray limaran arari na Filistia. Nen atipon la ran lima, inkuanda, Iyakar yoy Kaban na Sipanan na Dios ed pasen ton dili, pian ag to tayo patayen tan saray pamilya tayo. Walay gewgew ed intiron siudad, ta dudusaen iran maung na Dios.
12 Anggan saray totoon ag inatey et apelpelsaan ira, tan inmakis iran kinmerew na tulong ed saray diriyos da.
1 "Kayariy pitoy bulan ya impanayam ed Filistia na Kaban na Sipanan na Katawan,
2 "tinawag na saray Filisteo iray papari tan saray salamangkiro, tan tinepet da, Antoy gawaen tayod Kaban na Sipanan na Katawan? No ipawil tayod pasen ton gendat, antoy ipila tayo?
3 "Inmebat ira, No ipawil yoy Kaban na Sipanan na Dios na Israel, nepeg a walay ipila yon rigalo ya ibayar yod impankasalanan yo. Ag yo ipapawil ya anggapoy rigalo so Kaban na Sipanan. Diad saya, onabig kayo, tan naamtaan yo no akin et dudusaen to kayo.
4 "Antoy ipila min rigalo? tepet da ray arari. Inmebat ira, Limaran pelsan balituk tan limaran otut a balituk, ta limaray pangulo na Filistia. Namparan salot so sinmabid sikayon amin tan saray limaran arariy Filistia.
5 "Nakaukolan a manggawa kayo na sarayan balituk a pelsa tan balituk ya otut a mandederal ed bansa yo, tan pagalangan yoy Dios na Israel. Itonda to angangko so panudusa tod sikayo, saray diriyos yo, tan say dalin yo.
6 "Akin et paaweten yoy olo yo a singa say ari na Egipto tan saray Egipsio? Ag yo ta amtan kayarin pinapairap iray Dios et inabuloyan da ray Israelita ya ontaynan ed Egipto?
7 "Kanyan mangiparaan kayoy balon kariton tan duaran bakan kabatyan ya ag nin balut nisagur. Isinta yo ra tan papawil yo ray kilaw dad koral.
8 "Ikarga yod kariton so Kaban na Sipanan, tan iyan yod abay to so kahon ya anginan yod saramay balituk ya ipawit yon rigalo ya ibayar yod impankasalanan yo. Paolyan yon mankurang a bukor iray baka,
9 "insan yo ra bantayan; no mamaarap irad baley na Bet-semes, say dilin pasen na Kaban na Sipanan, labay ton ibaga a say dios na saray Israelita so amairap a maung ed sikatayo. No ag ira mamaarap ed Bet-semes, naamtaan tayod satan ya aliwan sikatoy amairap; nibambana labat.
10 Ginawa ray nibagad sikara: angala ray duaran baka tan insinta da rad kariton, tan impokuk dad koral iray kilaw da.
11 Inkarga rad kariton so Kaban na Sipanan, pati samay kahon ya anginan na saray otut a balituk tan saray pelsan balituk.
12 Inmakar ira may baka, tan nampaarap iran mapmaptek ed Bet-semes, ya ag ira linmiko ed kawanan o diad kawigi. Manngakngak iran manaakar. Tinombuk ira na saramay limaran arari na Filistia ya anggad ketegan na Bet-semes.
13 Saray taga Bet-semes et manaani ray trigo ed patar. Kabebekta tinmangwa ra tan anengneng day Kaban na Sipanan, et mapalaloy liket da lapud impakanengneng da.
14 Tinmuloy imay kariton ed alog a kayaryan nen Josue a taga Bet-semes tan tinmondad man diad abay na baleg a bato. Binelang na saray totoo imay tablan kariton, tan pinatey da ra may baka, insan da ra insaklang a sakey a bagat a popoolan ed Katawan.
15 Inalsa na saray Levita so Kaban na Sipanan na Katawan tan samay kahon a kawalaan da ray balituk, tan inyan da rad mad tapew na baleg a bato. Diad saman ya agew saray taga Bet-semes et angisaklang ira na saray bagat a popoolan tan saray arum a bagat ed Katawan.
16 Nambantay ira may limaran arari na Filistia ed impanggawa rad saya, insan ira amawil ed Ecron ed saman met lamlamang ya agew.
17 Impawit na saray Filisteo so limaran pelsan balituk a rigalo rad Katawan a pambayar dad saray kasalanan da; sakey so para siudad na Asdod; sakey so para siudad na Gaza, sakey so para siudad na Ascalon, sakey so para siudad na Gat, tan sakey so para siudad na Ecron.
18 Impawit da met ira may otut a balituk, sakey so para kapag baley a panooleyan na limaran arari na Filistia, saray apaliberay padir a baley tan saray anggapoy padir a bario. Samay baleg a baton walad alog nen Josue a taga Bet-semes, ya angitapewan na samay Kaban na Sipanan na Katawan, et wadman ni a mantasi ed agawa.
19 Pinatey na Katawan so pitomplon lalaki a taga Bet-semes, ta ninengneng day dalem na Kaban na Sipanan. Nanermen iray totoo lapud impamatey na Katawan ed saray dakerakel a totoon kabandaan da.
20 Kanyan inkuan na saray taga Bet-semes, Siopay nayarin ontalindeg ed arap na Katawan, sayan masanton Dios? Iner so pangyakaran tayod Kaban to, pian naarawian to tayo la?
21 Angibaki rad saray taga siudad na Kiryat-jearim na pigaran totoo tan impaibaga ra, Impawil la na saray Filisteo so Kaban na Sipanan na Katawan. Gali dia ta ala yo.
1 "Kanyan inala na saray taga siudad na Kiryat-jearim so Kaban na Sipanan na Katawan tan inyakar dad abung nen Abinadab a manaayam ed toktok na sakey a pokdul. Si Eleazar a lakin anak nen Abinadab so kinonsagra ran mangasikasoy Kaban na Sipanan na Katawan.
2 "Abayag a walad siudad na Kiryat-jearim so Kaban na Sipanan na Katawan, sakey a duamplon taon. Diad loob to yan panaon, amin ya Israelita et kinmekerew iray tulong na Katawan.
3 "Inkuanen Samuel ed saray totood Israel, No impapusoy ipawil yod Katawan, nakaukolan ya ibantak yo la ray diriyos na saray arum a bansa tan saray talintao nen diosan Astarot. Isaklang yod Katawan so sikayon dili tan sikato labat so panlingkuran yo, et ekalen to kayo ed pakayari na saray Filisteo.
4 "Kanyan imbantak na saray Israelita iray talintao na saray diriyos a Baal tan Astarte, tan say Katawan labat so nanlingkuran da.
5 "Insan inkuanen Samuel ed amin da ray Israelita, Mantitipon kayod Mizpa, tan ipikasi ta kayod man ed Katawan.
6 "Kanyan nantitipon iran amin ed Mizpa. Angala ray danum tan imbales dan imbagat ed Katawan, tan nanayuno ran sanagew. Inkuanda, Nankasalanan kamid Katawan. (Diad Mizpa so nansintinsiaan nen Samuel ed saray kolkolan da ray Israelita.)
7 "Nen nadngelan na saray Filisteo a nantitipon ed Mizpa iray Israelita, saramay limaran arari et namparaan iran ondogpad sikara. Nen nadngelan ya na saray Israelita, ataktakot ira,
8 "tan inkuandad kinen Samuel, Ituloy moy mampikasid Katawan a Dios tayo, pian iyagel to itayod saray Filisteo.
9 "Angalay Samuel na onsususo nin kordiro tan pinoolan ton intiro ya imbagat ed Katawan. Insan akikasi a tulongan na Katawan so Israel, et inebatan na Katawan so pikakasi to.
10 Legan nen Samuel a mangibabagat, onaasingger iray Filisteo ya ondogpa, balet makmaksil a pinakarulan ira na Katawan. Agewgew ira, tan kibatiktik ira.
11 Saray Israelitan walad Mizpa inosilan da ra ya anggad Bet-car, tan pinapatey da rad dalan.
12 Insan angalay Samuel na sakey a bato, tan inyan tod ketegan na Mizpa tan Sen, tan inngaran to na Ebenezer, ta inkuanto, Tinulongan itayo na Katawan.
13 Atalo sirin iray Filisteo, tan ag inabuloyan na Katawan a makasakop irad dalin na Israel legan a nambilay si Samuel.
14 Nipawil ed Israel iray amin a siudad ya asamsam na saray Filisteo, saray siudad a walad nanleetay Ecron tan Gat, kanyan abawi na Israel so intiron dalin to. Anggapo met so kolkolan da ray Israelita tan saray Cananeo.
15 Legan a nambilay si Samuel, inoleyan toy Israel.
16 Tinaon a liberen toy Betel, Gilgal, tan Mizpa, tan sinisintinsiaan to ray kolkolan na saray totood sarayan pasen.
17 Insan ompawil ed abung tod Rama, tan diman met nanlingkur a sakey a huis. Amaalagey diman na altar ed Katawan.
1 "Nen masiken lay Samuel, impagmaliw ton huis ed Israel iray lalaki anak to.
2 "Joel so ngaran na pangulowan, tan Abias so yogtan; huis irad Beer-seba.
3 "Balet ag da inalig so ama ra; kayamanan labat so pilalek dan nagamuran, kanyan nanaala ray pasoksok tan pinipekewet day katunongan.
4 "Lapud saya, amin da ray pangulo na Israel nantitipon ira, linma ran nanoolup ed kinen Samuel diad Rama,
5 "tan kuandad sikato, Masiken ka la, tan saray anak mo et ag da ka aaligen. Kanyan sirin, manuro ka na ari a manoley ed sikami, pian wala met so ari mi, a singa saray arum a bansa.
6 "Naermenan si Samuel ed sayan inkerew da na sakey ya ari; kanyan nampikasid Katawan,
7 "et inkuan na Katawan, Onur mon amin so ibagay totoo ed sika. Aliwan sikay impolisay da; siak so impolisay da ya ari ra.
8 "Nanlapu lad impangipaway kod sikara ed Egipto, ibebeneg da ak tan manlilingkur irad saray arum a diriyos; natan gagawaen dad sika so gagawaen da lan gendat ed siak.
9 "Onur mo ra sirin, balet itdan mo ray mapeget a pasakbay tan ipaliwawam no panoy panoley na ari ed sikara.
10 Imbaga nen Samuel ed saray totoon onkekerew na ari ed sikato iray amin ya imbaga na Katawan ed sikato.
11 Impaliwawa to, Onyay panoley ed sikayo na ari yo: Pagmaliwen ton sondalo ray anak yon lalaki; manlogan iray arum ed saray karwahi ton para bakal, mankabayo ray arum, tan mambatik iray arum diad onaan da ray karwahi to.
12 Pagmaliwen to ray arum ed sikara a pangulo na tunggal libon sondalo, tan saray arum pangulo na tonggal limamplon sondalo. Pambakaen tod alog to iray anak yo, pananien to ra, tan panggawaen to ra na armas tan kagawaan na saray karwahi to.
13 Pagmaliwen to ray anak yon bibii a managgaway pabalingit to, managluto to ra, tan managgawa ray tinapay to.
14 Alaen to ray sankaabigan ya kaalogan yo, saray kaubasan yo, tan saray kaolibaan yo, insan to ra iter ed saray opisyal to.
15 Alaen toy kakaplo na saray naani yo tan saray bungay ubas yo, insan to ra iter ed saray opisyal na palasio to tan saray arum ya opisyal to.
16 Alaen to ray aripen yo, lalaki may bibii, saray sankaabigan a baka yo tan saray asno yo, tan ikana to rad dilin pankaabigan to.
17 Alaen toy kakaplo na saray karniro yo. Pagmaliwen to kayo ran aripen to.
18 No onsabi yan panaon, onakis kayon manriklamo lapud ari yo et sikayon diliy nanlabay a nawalaan kayoy aribalet ag kayo dengelen na Katawan.
19 Ag dinengel na saray totoo si SAmuel. Inkuanda, Andi! Labay miy nawalaan na ari,
20 pian singa kami saray arum a bansa, a walay dilin ari mi a manoley ed sikami, tan mangipangulod sikami a mibakal.
21 Dinengel nen Samuel ya amin iray imbaga ra tan linman imbaga tod Katawan.
22 Inmebat so Katawan, Gawam so labay da tan itdan mo ray sakey ya ari. Insan inkuanen Samuel ed saray amin a totood Israel, Pawil kayo lad kaabungan yo.
1 "Walay sakey a mayaman a lakin kabyangay tribu nen Benjamin a say ngaran to et Cis. Si Cis et anak nen Abiel tan apo nen Zeror tan kabyangay pamilya nen Becorat a kabyangay boleg nen Afia.
2 "Walay anak ton laki a manngaray Saul; malangwer ni, atagey ni na sankarangan nen amin da ray totood Israel, tan sankaguapuan ed sikara.
3 "Aminsan ya agew, abalang iray pigaran asno nen Cis. Kanyan inkuantod anak ton Saul, Mangitagar kay sakey ed saray aripen tan laka yon mananap ed saray asno.
4 "Linma rad kapokdulan a dalin na Efraim tan diad dalin na Salisa, balet ag da ra naalmo; kanyan linma rad dalin na Saalim, balet andid man ira may asno. Linma ra sirin ya anggad pasen a sakop nen Benjamin, balet siansian ag da ni ra naalmo.
5 "Nen akakar irad dalin na Zaf, inkuanen Saul ed aripen a kaiba to, Onsempet ta la, ta ompan tondaan la nen amak a nunoten iray asno tan sikata lay pampagaan to.
6 "Inmebat imay aripen, Alagar ka! Walay sakey a toon masanto ed sayan baley. Bibirbiren da yan too, ta ontutua ray amin ya ibabaga to. Laen ta, ta ag la pigan nibaga to no iner so pakalmoan tad saramay asno.
7 "Tinepet nen Saul, No onla tad sikato, antoy niiter tad sikato? Anggapo lay atilak a nakan ed pananginan ta, tan anggapoy antokaman a nayarin iter ta. Akin wala?
8 "Inmebat imay aripen, Walay awit ko dian sakey a melag a pilak. Nayarian kon iter, et ibaga to no iner so pakalmoan tad saray asno.
9 "Inmebat si Saul, Maung itan! Tala. Kanyan linma rad baley a panaayaman to may masanton too. Nen ontatatdang iran onlad baley, nabet da ray pigaran bibii ya onlan onasul. Tinepet dad saramay bibii, Wadya may managparles? (Diad saman a panaon, managparles so tawag dad sakey a propita, kanyan no walay malabay ya ontepet ed Dios, ikuanto, Onla tayod managparles.)
10 On, wadya, ebat da ra may bibii. Ganatan yo, pian naabot yo ni, ta akaonay daiset nen say sikayo. Kasabi yod baley, narumog yod man. Sinmabi natan ed baley, ta saray totoo et onla ran mangibagat ed altar a walad toktok na pokdul. Ag ni mangan iray totoon naimbitaan ya anggad isabi to, ta nepeg to nin bindisionan iray bagat. Laki la natan, et narumog yon tampol, kasakbayan ya onlan mangan ed pokdul.
11
12
13
14 Kanyan tinmuloy irad baley, et nen onloloob ira anengneng day Samuel a mamapaarap ed sikara ta onlad pasen a panangigalangan.
15 Diad agew kasakbayan na insabi nen Saul, say Katawan inkuantod kinen Samuel,
16 Nabwas, sakey ya onyan oras, ibakik ed sikay sakey a lakin kabyangay tribu nen Benjamin; lanaan mo ta sikatoy manoley ed saray totook ya Israelita, tan iyagel to rad saray Filisteo. Anengneng koy kairapan da ray totook, tan nadngel koy ikekerew dad siak na tulong.
17 Nen anengneng nen Samuel si Saul, say Katawan inkuantod sikato, Sikato ya may lakin imbagak ed siak. Sikatoy manoley ed saray totook.
18 Insan sinmingger si Saul ed kinen Samuel, diad abay na puirta, tan tinepet to, Ibagam pad siak, iner so panaayaman to may managparles?
19 Inmebat si Samuel, Siak so managparles. Onona ka lan onlad pasen a panangigalangan. Mirongo kayon mangan ed siak diad sayan agew. Nabwas na kabwasan ebatan koy amin a tepet mo tan ibaki ta ka la.
20 No nipaakar ed saray asno a taloy agew la ran abalang, ag yo la ra pampapagaan; nalmo la ra. Balet siopay pampilpilalekan na saray totood Israel? Sikasika tan say pamilya na amam.
21 Inmebat si Saul, Kabyangan ak na tribu nen Benjamin, say sankamelagan a tribu ed Israel, tan say pamilyak et sankamugmoan ed tribu. Akin, sirin, et onyay ibabagam ed siak?
22 Intagar nen Samuel si Saul tan saray aripen ed baleg a kuarto tan pinayorung to rad kabisira diad lamisaan a kawalaan na saray bisita, a sakey a talomplo ran amin.
23 Inkuanen Samuel ed lumuluto, Awit mo dia may karnin inter kod sikan ibiig mo.
24 Kanyan inala na samay lumuluto so pinilin karni a parti na ulpo tan inyan tod arap nen Saul. Inkuanen Samuel ed kinen Saul, Niay karnin nisinup para sika. Akan mo. Impaibiig kon para sika a kanen mod sayan bekta a kaibam iray inimbitaan ko. Kanyan si Saul karungo ton angan si Samuel ed saman ya agew.
25 Nen linmeksab iran onlad baley manlapud samay pasen a panangigalangan imbilkagan dad toktok na abung si Saul,
26 tan diman inmogip. Diad palbangon, tinawag nen Samuel si Saul a walad toktok na abung. Bangon ka la, ta papawilen ta ka la. Binmangon si Saul, tan linma ran dua nen Samuel ed dalan.
27 Kasabi rad ketegan na baley, inkuanen Samuel ed kinen Saul, Ibagam ed satay aripen ya onona la. Inmona la sirin imay aripen, tan intuloy nen Samuel so nansalita, Tilak ka ni dian magano, ta ipaamtak ed sikay imbaga na Dios.
1 "Insan angalay Samuel na sakey a botilyan larak na oliba tan inkalbo tod olo nen Saul, inanguban to, tan kuanto, Say Katawan lalanaan to kan manoley ed saray totoo ton Israelita. Oleyan mo ray totoo to tan iyagel mo rad saray kalaban da. Saya so pakapatnagan mo a pinili say Katawan a manoley ed saray totoo to.
2 "No taynan mo ak ed sayan agew, nasabat moy duaran lalaki diad abay na lobuk nen Raquel diad Selsa, diad pasen a sakop nen Benjamin. Ibaga rad sika a nalmo la ra may asno ya aanapen mo, kanyan ag la ra pampapagaan nen amam no ag ingen sika natan so pampapagaan to. Pitepet to, Anto kasiy gawaen kon nipaakar ed samay anak ko?
3 "Ituloy moy kurang mo ya anggad pakasabim ed masanton kiew diad Tabor, a dimay pakaabetan mod taloran lalaki ya onlad Betel a diman ira mangisaklang na bagat ed Dios. Igagayugoy na sakey ed sikara so taloran kanding, sankaawit na sakey so taloran tinapay, tan sankaawit na kumatlo so katat a pananginan a napnoy alak.
4 "Ilugay da ka tan itdan da kay duaran tinapay; awat mo ra.
5 "Insan ka onla ed Pokdul na Dios diad Gabaa a kawalaay sakey a kampo da ray Filisteo. Kaloob mod baley, naabet moy sakey ya olup na saray propita ya onleleksab iran nanlapu ed altar a walad toktok na pokdul. Manotogtog ira na saray arpa, tambul, plauta, tan saray saltirio. Mansayaw-sayaw tan maneeyag-eyag ira.
6 "Biglad satan ya onloob ed sika so ispiritu na Katawan; mikasakey kan manggawa na gagawaen da, tan magmaliw kan doma a too.
7 "No nagawa ra ya, gawam so antokaman a pagawad sika na Dios.
8 "Onaan mo ak ya onlad Gilgal, a diman ta ka banaen tan mangisaklang ak na saray bagat a popoolan tan saray bagat a para kareenan. Manalagar kad man na pitoy agew ya anggad isabik tan ibagak ed sika ray gawaen mo.
9 "Nen si Saul et tinaynan toy Samuel, say Dios initdan toy Saul na balon inkatoo. Amin ya imbagad sikato nen Samuel agawa ed saman ya agew.
10 Nen akasabid Gabaa si Saul tan samay aripen to, sakey ya olup na propita so angabet ed kinen Saul. Biglan linmoob ed sikatoy ispiritu na Dios, tan akikasakey ed gagawaen da.
11 Saray totoon makaamtad sikato nen saman nantetepetan ira, Antoy agawad anak nen Cis? Nagmaliw ta lan sakey a propita si Saul?
12 Tinepet na sakey a lakin tagad man, Saratay arum eypropita ta ray kaamaan da? Onyay inggapo na sayan balikas, Nagmaliw ta met lan sakey a propita si Saul?
13 Nen ayari lay Saul ed ginawa to, linmad pokdul.
14 Say pangamaen nen Saul anengneng toy Saul tan samay aripen to, tan tinepet tod sikara, Nanlapwan yo? Anapen mi ray asno, ebat nen Saul. Nen ag mi ra narumog, linma kamid kinen Samuel.
15 Antoy imbaga tod sikayo? tepet na pangamaen to.
16 Imbaga tod sikami a nalmo la ray asno, ebat nen Saulbalet ag to imbagad kinen pangamaen to so imbaga nen Samuel nipaakar ed pagmaliw ton ari.
17 Impantitipon nen Samuel ed Mizpa iray totoo, diad ngaray Katawan,
18 tan inkuantod sikara, Say Katawan, say Dios na Israel, kuanto, Siak so angipaway ed sikayo ed Egipto, tan angyagel ed sikayod saray Egipsio tan diad saray arum a totoon nampapairap ed sikayo.
19 Sikatoy Dios yo, say angyagel ed sikayod amin a gunigon tan kairapan yo, balet natan impolisay yo ak tan kinmerew kayo na sakey ya ari. Sigi sirin, mantitipon kayod arap na Katawan, onung ed tribu tan onung ed boleg.
20 Pinarago nen Samuel so balang tribu, tan say Katawan pinili toy tribu nen Benjamin.
21 Insan lamet pinarago nen Samuel iray pamilyad tribu nen Benjamin, et say pamilya nen Matri so apili. Insan dinmago ray lalakid pamilya nen Matri et si Saul ya anak nen Cis so apili. Inanap da, baleg nen ag da narumog,
22 tinepet dad Katawan, Wala niy arum? Inmebat so Katawan, Wadmay Saul, onaamut ed kawalaay abasto.
23 Kanyan batik ira tan inawit day Saul ed kawalaan da ray totoo, tan anengneng da ya atagey ni na sakey dangan nen say sikaran amin.
24 Inkuanen Samuel ed saray totoo, Nia so toon pinili na Katawan! Anggapoy mipara ed sikato. Inmeyag iray amin a totoo, Andokey komuy bilay na ari!
25 Impaliwawa nen Samuel ed saray totoo iray kanepegan tan saray kimey na sakey ya ari, insulat to rad sakey a libro, tan insinup to ed sakey a masanton pasen. Insan to la pinasempet iray totoo ed kaabungan da.
26 Pinmawil met lay Saul ed abung to diad Gabaa. Wala ray akilad sikato a pigaran makapanyarin lalaki a tinenyeg na Dios so puso ra.
27 Balet wala ray pigaran andi-kakanaan a totoo ya inkuanda, Panon to itayon niyagel yan too? Binalaw day Saul tan ag da initdan na antokaman.
1 "Kalabas na nayarin sakey bulan, si Nahas ya ari ed Ammon tan saray sondalo to et linma ran onlaban ed baley na Jabes a sakop na Galaad. Kinobkub da may baley, tan inkuan na saray taga Jabes ed kinen Nahas, Mipaknaan kad sikami, tan awaten mi kan manoley ed sikami.
2 "Inmebat si Nahas, Mipaknaan ak ed sikayo no ontoluk kayon sukiten koy kawanan a mata na balang sakey ed sikayo, pian napabanday so intiron Israel.
3 "Saray pangulo na Jabes kuanda, Itdan mo kami na pitoran agew, ta mangibaki kamiy mangibalitad intiron dalin na Israel. No anggapoy ontulong ed sikami, onsuko kami lad sika.
4 "Saramay nibaki akasabi rad Gabaa a panaayaman nen Saul, et nen imbaga ray balita, manakis iray totoo ed ermen da.
5 "Onsasabid saman si Saul a nanlapud alog tan sankatengteng to ray baka to. Tinepet to, Antoy maoges ya agawa? Akin et onaakis so balang sakey? Imbaga rad sikato so imbalita da ra may nanlapud Jabes.
6 "Nen nadngel ya nen Saul, linmoob ed sikato so ispiritu na Dios tan pinmetang a maung so olo to.
7 "Angalay duaran baka, pinatas to, tan impailiber tod intiron dalin na Israel tan impaibaga to, Siopamay ag milad kinen Saul tan si Samuel a mibakal, onyay nagawad saray baka to! Saray totood Israel tinmakot irad Katawan, kanyan akila ran amin ed bakal.
8 "Impantitipon nen Saul iran amin ed Bezec: talon lasus a libo so nanlapud Israel tan talomplon libo so nanlapud Juda.
9 "Imbaga rad saramay nibakin nanlapud Jabes, Ibaga yod saray kabandaan yo a no onkakaaguan nabwas, niagel kayo. Akaliket a maung iray taga Jabes nen nadngel day balita,
10 tan kuandad kinen Nahas, Nabwas onsuko kamid lad sika, tan gawam lay labay mon gawaen ed sikami.
11 Kaimbuas ginawa nen Saul a taloran grupo iray totoo to, tan diad palbangon dinogpaan da ray Ammonita a walad kampo. Kasabiy kaaguan apatey da la ra. Ataytayak iray akeraan, tan nagsibatik so balang sakey ed sikara.
12 Insan inkuan na saray totood Israel ed kinen Samuel, Iner so kawalaan da ra may totoon angikuan a si Saul et ag nepeg ya ari mi? Iyakar mo ra dia, ta pateyen mi ra!
13 Balet inkuanen Saul, Anggapo natan so pateyen, ta diad sayan agew inyagel na Katawan so Israel.
14 Inkuanen Samuel ed sikara, Onla itayod Gilgal tan oliten tayon ibawag ya ari tayo si Saul.
15 Linma ra sirin ya amin ed Gilgal, tan diad masanton pasen imbawag dan ari si Saul. Angisaklang ira na saray bagat a para kareenan, tan nanliket na baleg ed sayan agawa si Saul tan amin da ray totood Israel.
1 "Insan inkuanen Samuel ed saray totood Israel, Ginawak lay labay yon gawaen ko. Initdan ta ki lay arin manoley ed sikayo,
2 "tan natan sikato lay mangiwanwan ed sikayo. Para say siak, masiken ak la tan ampoti lay buek ko, kanyan saray anak ko lay kaiba yo. Siak so pangulo yo nanlapud lad balolaki ak ya anggad natan.
3 "Nia ak natan ya akatalindeg ed arap yo. No walay ginawak a makapoy, akusa yo ak natan ed arap na Katawan tan diad arap na pinili ton ari. Walay inalak a bakan kayaryan na arum o asnon kayaryan na arum? Sinaol o pinairap koy siopaman? Angawat ak na pasoksok ed siopaman, kanyan nambulag-bulagan ak? No walay ginawak ed saraya, ipawil koy inalak.
4 "Inmebat iray totoo, Ag mo kami sinaol o pinairap; anggapoy antokaman ya inalam ed sikami.
5 "Inmebat si Samuel, Say Katawan tan say pinili ton ari, sikaray tasik ed sayan agew ya anggapoy nalmoan yon kasalanan ko. On, say Katawan so tasi mi, ebat da.
6 "Intuloy nen Samuel so nansalita, Say Katawan so amili ed kinen Moises tan si Aaron tan sikatoy angipaway ed Egipto ed saray lalaki yo.
7 "Alagey kayo natan ed kawalaan yo, tan akusaen ta kayod arap na Katawan. Ipanunot kod sikayoy amin a pakelaw a ginagaway Katawan diad impangilaban tod sikayo tan saray lalaki yo.
8 "Nen linmad Egipto si Jacob tan say pamilya to, pinapairap iray tagad man. Kinmerew na tulong iray lalaki yo. Imbaki na Katawan ed satan ira di Moises tan Aaron, a sikaray angipangulo ed intaynan dad Egipto tan angiter na panayaman da ed sayan dalin.
9 "Balet impolisay na saray lalaki yo so Katawan a Dios da. Kanyan inabuloyan na Katawan a taloen ira na saray Filisteo, tan say ari na Moab, tan si Sisera, say pangulo da ray sondalo na siudad na Hazor.
10 Insan kinmerew iray tulong ed Katawan tan kuanda, Nankasalanan kami, ta impolisay mi ka, Katawan, tan nanlingkur kamid saray talintaoy diriyos di Baal tan Astarot. Iyagel mo kami pad saray kalaban mi, et panlingkuran, mi ka!
11 Imbaki na Katawan si Gideon, insan si Barak, insan si Jefte, insan siak. Balang sakey ed sikami inyagel mi kayod saray kalaban yo, tan niarawi kayod kaatapan.
12 Balet nen ngalngali kayo la labanan nen Nahas ya ari ed Ammon, impolisay yon ari yo so Katawan tan kuanyod siak, Labay miy sakey ya arin manoley ed sikami.
13 Nia natan so arin pinili yo; kinerew yo, et natan inter lad sikayo na Katawan.
14 Maung so kipapasen yo no takotan yoy Katawan a Dios yo, panlingkuran yo, dengelen yo, tan onuren yo ray ganggan to, tan no sikayo tan say ari yo et tumboken yo.
15 Balet no ag yo dengelen so Katawan no ag ingen sumlangen yo ray ganggan to, sumpaen to kayo tan say ari yo.
16 Kanyan sirin, manalagey kayod kawalaan yo, et nanengneng yoy bengatlan makapakelaw a gawaen na Katawan.
17 Tiagew ed natan, anto? Balet mampikasi ak, et say Katawan pakarulen tan paoranen to. No nagawa ya, nabirbir yon nanggawa kayoy baleg a kasalanan ed Katawan nen kinmerew kayod sikato na sakey ya ari.
18 Kanyan nampikasiy Samuel, tan diad saman ya agew pinakarul tan pinaoran na Katawan. Insan tinmakot ed Katawan tan diad kinen Samuel, iray totoo tan
19 inkuandad kinen Samuel, Ipikasi mo kami pad Katawan a Dios mo, pian ag kami ompatey. Abirbir mi la natan, a likud ed saray arum a kasalanan nankasalanan kamid impankerew miy sakey ya ari.
20 Ag kayo natatakot, ebat nen Samuel. Anggaman a ginawa yo yan kaogsan, ag yo komun ipopolisay so Katawan, no ag ingen panlingkuran yod intiron puso yo.
21 Ag kayo manlilingkur ed saray tila-tilan diriyos; ag da kayo natulongan odino nilaban, ta aliwa ran peteg a Dios.
22 Sinambaan na Katawan ya ag to kayo ikaindan, ta ginetma to lan pagmaliwen kayo a totoo to.
23 Para say siak, ag komun iyabuloy na Katawan a mankasalanan ak diad pangitondak na pangipikasik ed sikayo. Ingen, ibangat kod sikayo no anto ray maung tan maptek a gawaen yo.
24 Takotan yoy Katawan, tan matoor so panlingkur yod sikato diad intiron puso yo. Ag yo lilingwanan iray makapakelaw a ginagawa ton para sikayo.
25 Balet no itoluy yoy mankasalanan, napatey kayo tan say ari yo.
1
2 "Amili si Saul na talon libon lalakin taga Israel: say duan libo kaiba to ra diad Micmas tan diad nipokdul a dalin na Betel, tan say sanlibo kaiba ra nen Jonatan diad Gabaa, diad dalin a sakop na tribu nen Benjamin. Pinasempet la nen Saul iray arum a lalaki.
3 "Pinatey nen Jonatan so pangulo na saray sondalo na Filistia a walad Geba, tan amin da ray Filisteo et nadngelan da yan agawa. Insan angibakiy Saul na saray managtrumpita tan linma ran nampapaknul na trumpita diad intiron bansa. Say kabaliksan to ya say panawag tod saray Hebreo a mibakal.
4 "Abalitaan na amin ya Israelita a pinatey nen Saul so pangulo na saray sondalo na Filistia tan kabosul iray Filisteo. Kanyan diad impakadngel na saray totoo ed tawag, akitipon irad kinen Saul diad Gilgal.
5 "Nantitipon iray Filisteo a mibakal ed saray Israelita. Talomplon liboy karwahi ra; anem a liboy sondalon akakabayo, tan singa karakel na buer ed dayat iray arum a sondalo ra. Linma rad Micmas diad bokig na Bet-aven, tan diman ira nankampo.
6 "Insan pinasia ran dinogpaan iray Israelita, et pangaskasiyay kipapasen na saray Israelita. Inmaamut iray arum ed sikara diad saray ongib tan diad saray abut, diad nanleleetan na saray ankakabaleg a bato, tan diad saray araralem ya abut tan saray bobun;
7 "binaliw na saray arum so Ilog na Jordan, diad pasen a sakop na Gad tan Galaad. Wala nid Gilgal si Saul, tan manggiwgiw ed takot iray totoon kakaiba to.
8 "Inalagar toy Samuel a pitoy agew, onung na imbilin nen Samuel ed sikato, balet ag ni sinmabid Gilgal si Samuel. Saray totoo tataynan da lay Saul,
9 "kanyan inkuantod sikara, Awit yo dia ray bagat a popoolan tan saray bagat a para kareenan. Angisaklang na bagat a popoolan,
10 tan diad pakasusumpal to, sinmabiy Samuel. Pinmaway ya onabet si Saul, tan inggalang to.
11 Balet inkuanen Samuel, Antoy ginawam? Inmebat si Saul, Tataynan ak la na saray totoo, ta ag ka sinmabid oras ya imbagam tan, sakey ni, mantitipon ed Micmas iray Filisteo.
12 Kanyan inisip ko, Dogpaan ak diad Gilgal na saray Filisteo, et ag ko ni inalay maung a linaway Dios. Kanyan apasootan ak a mangibagat.
13 Kalokowan so ginawam, ebat nen Samuel. Ag mo inonur so inggangan ed sika na Katawan a Dios mo. No inonur mo komun, abuloyan to ka tan saray kabyangay boleg mo a manoley ya anggad angga ed Israel.
14 Balet natan ag la mansiansia so panoley mo. Lapud ag mo inonur so Katawan, mananap la na lakin labay to tan panoleyen tod saray totoo to.
15 Tinmaynan ed Gilgal si Samuel, tan intuloy toy kurang to. Saray atilak a totoo akila rad kinen Saul ya onlan mitipon ed saray sondalo to. Manlapud Gilgal, linma rad Gabaa, a sakop na dalin nen Benjamin. Ninengneng nen Saul iray sondalo to, a sakey anem a lasus ira.
16 Si Saul, si anak ton Jonatan, tan saray totoo to et nanayam irad Geba a sakop na dalin nen Benjamin; walad Micmas balet so kampo na saray Filisteo.
17 Saray sondalo na Filistia tinaynan day kampo ra, ta linma ran ondogpa. Talora ran grupo: say sakey amaarap ed Ofra, diad dalin a sakop na Sual;
18 say kumadwa amaarap ed Bet-horon tan say kumatlo amaarap ed ketegan ya ososdungan toy Patar na Zeboim tan say kalawakan.
19 Anggapod saman so pumapanday ed intiron dalin na Israel, ta ag labay na saray Filisteo a saray Israelita et manggawa ray ispada tan pika. (
20 Saray Israelita et nakaukolan ya onla rad Filistia a mampatarem na saray lukoy, buka, wasay, tan saray palot da.
21 Say bayar dad pampatarem na wasay tan pampaapiger na gayang et sakey a melag a pilak, tan duara ed pampatarem na lukoy odino buka.)
22 Kanyan diad agew na bakal anggapod saray Israelitan sondalo, likud ed kinen Saul tan si anak ton Jonatan, so walay ispada odino pika.
23 Saray Filisteo angibaki ray sakey a grupoy sondalo a mangyagel ed Dalan na Micmas.
1 "Aminsan ya agew inkuanen Jonatan ed balolakin umaawit na armas to, Talad kampo da ray Filisteo. Balet ag ya imbaga nen Jonatan ed kinen ama ton Saul,
2 "a say kampo to et walad silong na kiew a granada diad Migron ya ag arawid Gabaa; wala ray kaiba ton sakey ya anem a lasus a lalaki.
3 "(Say parin akasolung na ipod et si Ahias, say lakin anak na agi nen Icabod a si Ahitob, a lakin anak nen Finees tan apo nen Eli a pari na Katawan diad Silo.) Anggapoy makaamta a tinmaynan si Jonatan.
4 "Diad Dalan na Micmas a nepeg a baliwen nen Jonatan diad iyakar tod kampo da ray Filisteo, walay duaran ankakabaleg tan nanotuk-otuk a bato ed balang dapag: Boses so tawag ed sakey, Sene so sakey.
5 "Say sakey walad baybay na dalan tan akaarap ed Micmas; say sakey walad abalaten tan akaarap ed Geba.
6 "Inkuanen Jonatan ed samay balolaki, Onla tad kampo da ray paganon Filisteo. Tulongan ita angangko na Katawan; no tulongan to ta, anggapoy antokaman a makasbel ed sikato diad pangiter tod sikatay pananalo, anggaman a dagdaiset ita.
7 "Inmebat imay balolaki, Kaiba mo ak ed antokaman a labay mon gawaen.
8 "Sigi, sirin, kuanen Jonatan. Ombeltang ta tan mampanengneng tad saray Filisteo.
9 "No ibaga rad sikatan alagaren ta ran ondagod sikata, ag ta onalis ed kawalaan ta.
10 No ibaga ran dagoen ta ra, laen ta ra, ta sikatoy pakapatnagan ya inter na Katawan ed sikata so pananalo ed saray Filisteo.
11 Nampanengneng ira sirin ed saray Filisteo, et saray Filisteo kuanda, Nengneng yo! Ompapaway iray pigaran Hebreo ed saray abut a nanaamutan da!
12 Insan da ra tinawag di Jonatan tan samay balolaki, Gali dia! Walay ibaga mid sikayo! Inkuanen Jonatan ed samay balolaki, Tombuk mo ak. Say Katawan initdan toy Israel na pananalo ed sikara.
13 Kinmalab si Jonatan diad impaway tod samay dalan, ya inkana to ray lima tan say pueg to. Tinmombuk ed sikato may balolaki. Dinogpaan nen Jonatan iray Filisteo et aleslespak ira, tan samay balolaki pinapatey to ra.
14 Diad saman a laban, sakey a duamplon lalaki so pinapatey di Jonatan tan samay balolaki diad pasen a sakey a kapalduay iktario so kabaleg to.
15 Manggiwgiw ed takot iray amin a Filisteon walad samay pasen; saray sondalon walad kampo tan saray walad lawak na bakalan et manggiwgiw irad takot; yenmegyeg, tan walay baleg ya aligewgewan.
16 Saray bantay a totoo nen Saul a wala rad Gabaa, a sakop na dalin nen Benjamin, anengneng da ray Filisteon kibatiktik ed anggan iner.
17 Kanyan inkuanen Saul ed saray totoo to, Bilang yo ray sondalo, ta nengneng yo no siopay anggapo. Nen abilang da la ra, arumog dan anggapo ra di Jonatan tan samay balolakin umaawit na armas to.
18 Awit yo dia may ipod kuanen Saul ed kinen Ahias a pari. (Diad saman ya agew sankaawit nen Ahias ed onaan da ray Israelita.)
19 Legan a mitotongtong si Saul ed samay pari, lalon onloloor so gewgew ed kampo da ray Filisteo, kanyan inkuanen Saul ed samay pari, Anggapo lay panaon na pangipanon ed Katawan!
20 Insan si Saul tan saray totoo to linma ran mibakal ed saray Filisteo a lapud aligewgewan et manlalaban iran dili.
21 Saray Hebreo, ya akigampi ed saray Filisteo tan akila la rad sikara ed kampo, binmiek irad dapag di Saul tan Jonatan.
22 Saray arum ya Israelita a manaamut irad kapokdulan na Efraim et nadngelan dan kibatiktik iray Filisteo, kanyan angiba ran mibakal.
23 Nilabanan da ray Filisteo ya anggad labas na Bet-aven. Diad saman ya agew inyagel na Katawan so Israel.
24 Diad saman ya agew makapkapoy ed eras iray Israelita, ta walay ganggan nen Saul ed sikara. Sinambaan tod sikara, Nisamba so toon mangan ed sayan agew, kasakbayan a makabawi ak ed saray kalaban ko. Kanyan anggapoy angan ya anggan sakey ed sanagew.
25 Linma ran amin ed takel, tan amayamay so dilod man.
26 Napnoy dilo so takel, balet anggapoy angan ta antakot irad samay samba nen Saul.
27 Balet ag nadngel nen Jonatan so impantaktakot nen ama to diad panamegley na sakey a samba; kanyan indelnet tod kawalaay dilo so bislak a sankaawit to, tan angan na dilo. Binmiskeg a tampol.
28 Balet inkuan na sakey ed sikato, Makapkapoy itayon amin ed eras, balet pinatakot itayo nen amam tan kuanto, Nisamba so toon mangan ed sayan agew.
29 Inmebat si Jonatan, Makapasinagem so ginawa nen amak ed saray totoo! Nengneng moy inbiskeg ko lapud impangan koy dilo!
30 Lalon maung komun ed sayan no saray totoo tayo et kinan day asamsam dan kakanen nen tinalo da ray kalaban. Lalon dakerakel ni komuy apatey da a Filisteo!
31 Diad saman ya agew tinalo na saray Israelita iray Filisteo, a nilalabanan da manlapud Micmas ya anggad Ahilon. Diad sayan bekta makapkapoy lad eras iray Israelita,
32 kanyan nanlulumbaan irad saray asamsam dad saray kalaban da, inaala da ray karniro, saray baka, tan saray kilaw, pinapatas da ran tampol diman, tan kinakakan da ran walay dala.
33 Nibagad kinen Saul, Nengneng mo, mankakasalanan ed Katawan iray totoo diad papangan day karnin walay dala. Traidor kayo! eyag nen Saul. Mangitolin kayo diad abay ko na baleg a bato.
34 Insan ingganggan to, Laka kayod saray totoo tan ibaga yod sikaran amin ya awiten da dia ray baka tan saray karniro ra. Patasen tan kanen da ra dia, pian ag ira mangay karnin walay dala et ag ira mankasalanan ed Katawan. Kanyan diad saman lamlamang a labi, inyaakar da ray baka ra tan pinapatas da rad man.
35 Nanggaway Saul na altar ed Katawan; sayan altar so ononan ginawa to.
36 Inkuanen Saul ed saray totoo to, Leksaban tin dogpaan iray Filisteo no labi. Pairapen ti ra ya anggad palbangon, insan pateyen ti ran amin. Gawam so antokaman ya isisipen mon maabig, ebat da. Balet inkuanto may pari, Ipanon ti nid Dios.
37 Kanyan tinepet nen Saul ed Dios, Dogpaan ko ra kasiy Filisteo? Panaloen mo kami kasi ed sikara? Balet ag inmebat so Dios ed saman ya agew.
38 Kanyan inkuanen Saul ed saray pangulo da ray totoo, Gali dia ta nengnengen tayo no anton kasalanan so agawad sayan agew.
39 Isipan kod mabilay a Katawan, say manangilaban na Israel, a pateyen so nankasalanan, anggan si Jonatan ya anak ko. Balet anggapoy imbaga na siopaman.
40 Inkuanen Saul ed sikara, Alagey kayon amin ed satan a dapag, tan sikami nen Jonatan manalagey ed sayan dapag. Gawan so antokaman ya isisipen mon maabig, ebat da.
41 Inkuanen Saul, Katawan a Dios na Israel, akin et ag mo ak inebatan ed sayan agew? Ebatan mo ak pa diad panamegley na sarayan bato. No say nankasalanan et si Jonatan o siak, ebat kad panamegley na Urim; balet no saray totoom ya Israel, ebat kad panamegley na Tummim. Onung ed ebat si Jonatan tan si Saul iray atoro, tan saray totoo et anggapoy kasalanan da.
42 Insan inkuanen Saul, Gawa yo natay pampapalaranan pian natoro no siopad sikamin dua nen Jonatan so nankasalanan. Et si Jonatan so atoro.
43 Insan tinepet nen Saul ed kinen Jonatan, Antoy ginawam? Inmebat si Jonatan, Angan ak na daiset a dilo ed ngoro na bislak a sankabembenan ko. Nia akakaparaanan ak ya ompatey.
44 Inmebat si Saul ed sikato, Pateyen ak komun na Dios no ag ta ka papatey!
45 Balet inkuan na saray totoo ed kinen Saul, Pateyen kasi si Jonatan ya angipanguloy impanalo na Israel? Andi! Isipan mid mabilay a Katawan ya ag naandi so anggan saksakey a buek nen Jonatan. Tinulongan na Dios ed ginawa tod sayan agew. Kanyan saray totoo impaliis day Jonatan ed ipapatey.
46 Kayari to ya tinondaan nen Saul ya inosilan iray Filisteo, tan amawil la rad dilin dalin da.
47 Nen ari lad Israel si Saul, nilabanan to ray kalaban tod inerman a pasen: saray totood Moab, Ammon, tan Edom, saray ararid Zoba, tan saray Filisteo. Analo ed inerman ya akibakalan to.
48 Matalonggaring so impibakal to, tan tinalo to ray anggan saray Amalecita. Inyagel toy Israel ed amin da ray dinmodogpa.
49 Saray anak nen Saul et di Jonatan, Isui, tan Melkisua. Say pangulowan ya anak ton bii et si Merab, tan say yogtan et si Micol.
50 Say asawa to et si Ahinoam, say anak nen Ahimaaz; say pangulo da ray sondalo to et si kapinsan ton Abner, say lakin anak nen pangamaen to a si Ner.
51 Si Cis ya ama nen Saul tan si Ner ya ama nen Abner et anak ira nen Abiel.
52 Legan a nambilay si Saul pinasiay impibakal tod saray Filisteo. Kanyan kapag makanengneng na lakin mabiskeg tan masebeg, pagmaliwen ton kabyangan na saray sondalo to.
1 "Inkuanen Samuel ed kinen Saul, Say Katawan et siak so imbaki to a lanaan ta kan manari ed saray totoo tod Israel. Natan sirin, dengel moy ibaga na Katawan a Makapanyarin-amin.
2 "Dusaen to ray totoon Amalecita, ta sinumpa da ray Israelita nen tataynan day dalin na Egipto.
3 "Laka, ta dogpaan mo ray Amalecita, tan deral mon sigput so antokaman a walad sikara. Ag kan balut mangikekera; patey mo ray amin a lalaki, bibii, ogogaw, tan amin a kapangyanak; saray baka, karniro, kamilyo, tan saray asno.
4 "Impantitipon nen Saul iray sondalo to tan ninengneng to rad Telaim: duan lasus libon sondalo so nanlapud Israel tan samplon libo so nanlapud Juda.
5 "Insan sikato tan saray totoo to linma rad siudad na Amalec, tan nantalaran irad nakatan ya ilog.
6 "Pinasakbayan da ray Cineo, Taynan kayo pian ag mi kayo napipatey, ta kinasian yo ray Israelita nen ontataynan irad Egipto. Kanyan tinmaynan iray Cineo.
7 "Tinalo nen Saul ray Amalecita; nilabanan da ra manlapud Havila ya anggad Sur, diad bokig na Egipto;
8 "dinakep dan mabilay si Agag ya ari da ray Amalecita, balet pinatey dad panamegley na ispada iray amin a totoo.
9 "Si Saul tan saray totoo to et ag da pinatey si Agag, tan ag da met pinatey iray sankaabigan a karniro, baka, saray kilaw na baka tan kordiro, tan amin a bengatlan walay kana; dineral da balet iray amin ya andi-kana o aliwliwa.
10 Inkuan na Katawan ed kinen Samuel,
11 Magbabawi ak a ginawak ya ari si Saul; imbeneg to ak tan ag to inonur iray ganggan ko. Apasnukay Samuel, tan sanlabin akikasi ed Katawan.
12 Kabkabwasan ed ontombuk ya agew linman anapen toy Saul. Nadngelan ton linmad baley na Carmel si Saul, a dimay nanggawaan toy monuminto to, insan tinmuloy ed Gilgal.
13 Linmay Samuel ed kinen Saul tan angilugay ed sikato, Bindisionan kay Katawan. Samuel! Inonur koy ganggan to.
14 Tinepet nen Samuel, Akin balet et walay narerengel kon manngakngak iran baka tan mambikbik iran karniro?
15 Inmebat si Saul, Inala ra na saray totook ed saray Amalecita. Ag da pinatey iray sankaabigan a karniro tan saray baka, ta isaklang da ran bagat ed Katawan a Dios mo, balet sigput min pinatey iray arum.
16 Inkuanen Samuel, Tonda ka la, ta ibagak ed sikay imbagay Katawan ed siak kalabyan. Ibagam pa sirin, kuanen Saul.
17 Inmebat si Samuel, Anggaman ya ipapasen moy sikan dili ya abeba, sikay pangulo da ray tribu ed Israel. Say Katawan nilanaan to kan manari ed Israel,
18 tan ingganggan to kan mamatey ed saray Amalecitan maoges a totoo. Imbaga ton labanan yo ra ya anggad napatey yo ran amin.
19 Akin sirin et ag mo inonur? Akin et nanlulumbaan kayod saray asamsam yo, et lapud saya ginawa yoy maoges ed Katawan?
20 Inonur koy Katawan, ebat nen Saul. Linma ak ed angibakian to, inalak a mabilay si Ari Agag, tan pinapatey ko ray amin ya Amalecita.
21 Balet saray totook ag da pinatey iray sankaabigan a karniro tan saray baka ya asamsam da; ingen, inyakar da ra diad Gilgal ya ibagat ed Katawan a Dios mo.
22 Inkuanen Samuel, Antoy lalon labay na Katawan: say pangonur, odino saray saklang tan saray bagat? Maung niy ononur ed sikato nen say mangibagat ed sikato na saray sankaabigan a karniro.
23 Say isumpa ed sikato et singa kinaoges na panangipanon ed saray maoges ya ispiritu tan say panagpaatagey et singa kinaoges na panangigalang ed saray diriyos. Lapud impolisay moy ganggan na Katawan, impolisay to ka met ya ari.
24 On, nankasalanan ak, ebat nen Saul, Ag ko inonur so ganggan na Katawan tan saray bilibilin mo. Antakot ak ed saray totook, kanyan ginawak iray labay da.
25 Balet natan kerewen kod sika, pirdona mo ak tan mila kad siak ed Gilgal, pian nigalang koy Katawan.
26 Ag ak milad sika, ebat nen Samuel. Impolisay moy ganggan na Katawan, kanyan impolisay to ka ya ari na Israel.
27 Insan pinmoliktar lan ontaynan si Samuel, balet siningkat nen Saul so kolibemben to, et apilat.
28 Inkuanen Samuel ed sikato, Say Katawan inekal to natan ed sika so nanarian na Israel tan inter tod sakey a toon maung nen say sika.
29 Say mapagalang a Dios na Israel et ag mantila o mangoman na kanunotan. Aliwan too a mangoman na kanonutan.
30 Nankasalanan ak, ebat nen Saul. Balet pagalangan mo ak pa ni labat diad arap da ray pangulo na totook tan amin a totood Israel. Mila kad siak pian nigalang koy Katawan a Dios mo.
31 Kanyan akilay Samuel ed sikato ed Gilgal, tan inggalang nen Saul so Katawan.
32 Iyakar yo diad siak si Agag ya ari da ray Amalecita, ganggan nen Samuel. Inmasingger ed sikato si Agag, manggiwgiw ed takot, ta inisisip tod sikaton dili, Agaylay irap na ompatey!
33 Inkuanen Samuel, Say ispadam impagmaliw ton anggapoy anak iray amayamay ya ina; ontan met a magmaliw ya anggapoy anak so inam. Insan tinartar toy Agag diad arap na altar ed Gilgal.
34 Insan linma lay Samuel ed Rama, tan sinmempet lay Ari Saul ed Gabaa.
35 Legan na impambilay ni nen Samuel ag to la anengneng si Saul; balet nanermen lapud kinen Saul. Nagbabawi so Katawan a ginawa ton arid Israel si Saul.
1 "Inkuan na Katawan ed kinen Samuel, Kaonungay kabayag so panermen mo lapud kinen Saul? Impolisay ko lan ari na Israel. Mangala kay larak na oliba tan lakad lakin say ngaran to et Jesse, a walad Betlehem, ta pinilik ya ari so sakey ed saray anak ton lalaki.
2 "Panoy panggawak ed satan? tepet nen Samuel. No narengelan nen Saul, pateyen to ak! Inmebat so Katawan, Mangawit kay kilaw a baka tan ibagam a wadman kan mangibagat ed Katawan.
3 "Imbitaan moy Jesse ed bagat, tan ibagak ed sikay gawaen mo. Lanaan mon manari so lakin ibagak ed sika.
4 "Ginawa nen Samuel so imbaga na Katawan a gawaen to. Linmad Betlehem, a diman inabet na saray manggiwgiw a panguloy siudad tan tinepet da, Mangiter kasiy kareenan yan imbisitam, managparles?
5 "On, ebat to. Linma ak dian mangibagat ed Katawan. Linisan yoy sikayon dili tan mila kayod siak. Impanpalinis to ra di Jesse tan saray anak ton lalaki, tan inimbitaan to rad bagat.
6 "Kasabi ra, anengneng nen Samuel si Eliab a lakin anak nen Jesse tan kuantod sikaton dili, Sayan lakin manalalagey ed arap na Katawan et andi-duaruwan sikatoy pinili ton manari.
7 "Balet inkuan na Katawan ed sikato, Ag mo iimanoen no panoy kinabaleg tan kinaguapo to. Impolisay ko, ta say panagpilik aliwan singa panagpili na too. Say too say walad paway so nenengnengen to, balet say puso so nenengnengen ko.
8 "Insan tinawag nen Jesse si anak ton Abinadab tan inyakar tod kinen Samuel. Balet inkuanen Samuel, Andi, say Katawan ag to met ya pinili.
9 "Insan inyakar nen Jesse si Samma. Andi, say Katawan ag to met ya pinili, kuanen Samuel.
10 Onyay impangyakar nen Jesse ed saray pitoran anak ton lalakin diad kinen Samuel. Inkuanen Samuel ed sikato, Andi, say Katawan anggapoy pinili tod saraya.
11 Insan to tinepet, Wala ni ray anak mon lalaki? Inmebat si Jesse, Wala ni, say sankayogtanan, balet andi dia ta aasikasoen to ray karniro. Paonlam dia, kuanen Samuel. Ag itayo mangibagat, no ag ni sinmabi.
12 Kanyan nampabakian nen Jesse. Guapon laki, maung a laman, tan manimimis so mata to. Inkuan na Katawan ed kinen Samuel, Sikato yalanaan mo!
13 Inala nen Samuel so larak na oliba tan nilanaan toy David diad arap da ray agagi to. Linmoob a tampol ed kinen David so ispiritu na Katawan tan walad sikato manlapud saman ya agew. Insan amawil lad Rama si Samuel.
14 Tinaynan na ispiritu na Katawan si Saul, tan pinairap na sakey a ispiritun maoges ya imbakiy Katawan.
15 Inkuan ed sikato na saray managlingkur to, Amta min papairapen kay sakey ya ispiritun maoges ya imbakiy Dios.
16 Iganggan mo kami et mananap kamiy sakey a lakin amta toy manogtog na arpa. No onloob ed sika so ispiritun maoges, say laki manogtog na arpa et diad satan onmaung kayo lamet.
17 Ingganggan ira nen Saul, Iyanapan yo ak sirin na lakin maung a manogtog tan iyakar yo dia.
18 Inkuan na sakey ed saray managlingkur to, Si Jesse a taga Betlehem et walay anak ton laki a maung a manogtog. Masebeg met tan guapon laki, maung a sondalo, tan maung a manalita. Walad sikato so Katawan.
19 Angibaki sirin ed kinen Jesse si Saul tan impaikuanto, Ibakim ed siak si David ya anak mon managasikasoy karniro.
20 Si Jesse imbaki toy David ed kinen Saul tan impanawit toy katat a pananginan a napnoy alak, sakey a malangwer a kanding, tan sakey ya asno a napnoy tinpaay so beneg to.
21 Linmay David ed kinen Saul tan nilingkuran to. Labalabay nen Saul tan pinili ton umaawit na saray armas to.
22 Insan si Saul impaikuan tod kinen Jesse, Labay koy David. Iyabuloy mon manayam la dian manlingkur.
23 Nanlapud saman, kapag say ispiritun maoges ya imbaki na Dios et onloob ed kinen Saul, alaen nen David so arpa to tan manogtog. Ontaynan ed satan so ispiritun maoges, tan onmaung si Saul et ompawil so gendat a liknaan to.
1 "Saray Filisteo nantitipon irad Soco, sakey a baley ed Juda, ta mibakal ira; nanggawa ray kampo ed sakey a pasen a tatawagey Efes-dammin, diad nanleetan na Soco tan Azeca.
2 "Si Saul tan saray Israelita nantitipon ira tan nanggawa ray kampo ed Patar na Ela a dimay namparaanan dan mibakal ed saray Filisteo.
3 "Nandarasig iray Filisteo ed toktok na sakey a pokdul tan saray Israelita diad sananey a pokdul, tan sakey a patar so nanleetan da.
4 "Walay sakey a lakin manngaray Goliat a taga siudad na Gat, pinmaway ed kampo da ray Filisteo tan sinagyat ton milaban iray Israelita. Taloran mitro so kaatagey to,
5 "tan akakawes na gansan limamplo tan liman kilo so belat to, tan akahilmit met na gansa.
6 "Asolungan met na gansa ed bikking tan ulpo to, tan sankasakbat toy sakey a pikan gansa.
7 "Say potan na gayang to et singa ngalngalowan so kabaleg to tan say tarem ton balatyang et mambelat na anemiran kilo. Walay sakey a sondalon manaakar ed onaan to a manaawit na samper to.
8 "Nanalagey si Goliat tan inmeyag ed saray Israelita, Antoy gagawaen yod tan et akadasig kayon mibakal? Sakey ak a Filisteo, sikayo ran aripen nen Saul! Mamili kayoy sakey ed saray totoo yo a milaban ed siak.
9 "No manalo tan napatey to ak, magmaliw kamin aripen yo; balet no manalo ak tan napatey ko magmaliw kayon aripen mi.
10 Sagyaten ko dia natan iray sondaloy Israel. Mamili kayoy sakey a milaban ed siak!
11 Nen nadngel ya nen Saul tan saray totoo to, ataktakot ira.
12 Si David et anak nen Jesse ya Efratita, a taga Betlehem ed Juda. Si Jesse waloray anak ton lalaki, tan masikesiken la nen ari si Saul.
13 Akilad kinen Saul a mibakal iray taloran anak ton pangulowan. Eliab so ngaran na sankapangulowanan, Abinadab so kumadwa, Samma so kumatlo,
14 tan si David so sankayogtanan. Legan a kaiba nen Saul ira may taloran pangulowan,
15 si David nampawil-pawil ed Betlehem a manasikasoy karniro nen ama to.
16 Diad loob na apataplon agew, kabwasan tan labin sinasagyat nen Goliat a milaban iray Israelita.
17 Aminsan ya agew inkuanen Jesse ed kinen David, Awit mo yay sansalup ya insanglil a trigo tan sarayay samploran tinapay, tan igangganat mon iter ed kindi kuyam diad kampo.
18 Awit mo met ira yay samploran kiso a para samay panguloy sanlibon sondalo. Nengneng mo no antoy kipapasen da ra may kuyam, tan mangawit ka diay bengatlan pakapatnagan ya anengneng mo ra tan maung so kipapasen da.
19 Si Ari Saul, saray kuyam, tan amin iray arum ya Israelita et wala rad Patar na Ela a mibabakal ed saray Filisteo.
20 Diad kaimbuas, asaksakbay a binmangon si David, impaasikaso tod sananey a too iray karniro, inala to may kakanen, tan linma la, onung na imbaga nen Jesse ed sikato. Nen sinmabid kampo, duga-rugan mandarasig lan mibakal iray Israelita tan maneeyag-eyag ira.
21 Nanaarapan la ran mambakal iray sondalo na Filistia tan saray sondalo na Israel.
22 Intilak nen David ed opisyal a managasikasoy abasto so awit to, linmad saray nandarasig a sondalon mibakal, dinago to ray kuya to, tan tinepet toy kipapasen da.
23 Nen mitongtong si David ed sikara, linmad onaan da ray sondalon Filisteo si Goliat tan sinagyat ton milaban iray Israelita, a singa gagawaen ton gendat. Nadngel nen David.
24 Nen anengneng na saray Israelita si Goliat, kibatiktik irad takot,
25 Nengneng yo! inkuan na sakey tan sakey ed sikara. Dengel yoy panasagyat to! Insipan nen Ari Saul ya itdan toy baleg a tumang so toon makapatey ed sikato; ipaasawa to nid sikato so anak ton marikit, tan ag to pambuisen iray kabyangay pamilya na ama to.
26 Tinepet nen David ed saray totoon asingger ed sikato, Antoy nagamuran na toon makapatey ed sayan Filisteo tan makapangipaliis ed kababaingan na Israel? Ta siopa ta yan paganon Filisteo et sagyaten ton milaban iray sondalo na mabilay a Dios?
27 Imbaga rad sikato so nagamuran na toon makapatey ed kinen Goliat.
28 Si Eliab a sankapangulowanan a kuya nen David, nadngel toy David a mitotongtong ed saray totoo. Asanukan ed kinen David tan kuanto, Antoy gagawaen mo dia? Siopay manaasikasod saray pigaran karniro diad kalawakan? Mamaung ka! Linma ka dia labat a mambantay ed bakal!
29 Anto tay ginawak a? tepet nen David. Ag nayariy anggan mantepet sirin?
30 Imbeneg toy kuya to tan akitongtong ed sakey a too, tan intepet to lamet imay tepet to, et kapag ontepet namparay iyebat dad sikato.
31 Nadngel na pigaran totoo so imbaga nen David insan da imbagad kinen Saul. Impatawag nen Saul si David.
32 Inkuanen David ed kinen Saul, Anggapoy nepeg ya ontakot ed saman a Filisteo! Onla ak tan labanan ko.
33 Andi, ebat nen Saul. Panoy pilaban mod sikato? Ogaw ka ni, tan sikato et sondalo lan nanlapud ogaw ni!
34 Inkuanen David, Aasikasoen ko ray karniro nen amak. No walay lion o uson manegkem ed sakey a kordiro,
35 osilan kon dogpaan, tan alaen ko may karnirod sangi to. No say lion o uso et poliktaran to ak a labanan, singkaten kod beklew tan pekpeken ko ya anggad ompatey.
36 Akapatey ak la na saray lion tan saray uso, tan pateyen ko met iman a Filisteo a manasagyat a milaban iray sondalo na mabilay a Dios.
37 Say Katawan inyagel to ak ed saray lion tan saray uso; iyagel to ak met ed saman a Filisteo. Inmebat si Saul, Sigi, laka, tan say Katawan wala komud sika.
38 Impaisolung tod David iray dilin armas to; say gansan hilmit ya insolung tod olo nen David, tan say kawes a para bakal.
39 Imbalkes tod tapew na kawes ton para bakal so ispada nen Saul tan sinali toy onakar, balet ag to nayarian, ta ag to ra pasal ya isolung. Inkuantod kinen Saul, Ag ak makapilaban no walad siak ira ya. Ag ko ra pasal. Kanyan inekal to ran amin.
40 Inala toy baston to, tan anokdok ed kolus na malinggas a limaran bato tan inyan to rad supot to. Akaparaan so bansut ton onabet ed kinen Goliat.
41 Inmakar ya onabet ed kinen David imay Filisteo, tan walad onaan to may managawit na samper ton balatyang. Manasingger,
42 et nen anengneng to lan maung si David, binalaw to, ta sakey labat a balolakin maung so alagey to tan guapo.
43 Inkuantod kinen David, Antoy gawaen mod satay baston? Abaloan mo sirin ya aso ak? Kinerew to ya isamba na saray dios to si David.
44 Inkuantod kinen David, Gala dia, ta ipakan kod saray manok tan saray ayayep so bangkay mo.
45 Inmebat si David, Onla kan milaban ed siak a sankaawit moy ispada, doyuk, tan pika, balet onla ak ed sikan milaban diad ngaran na Katawan a Makapanyarin-amin, say Dios na saray sondalon Israelita a sinagyat mon milaban.
46 Diad sayan agew say Katawan iyawat to kad limak; taloen ta ka tan potuten koy olom. Saray bangkay da ray sondalon Filisteo et ipakan kod saray manok tan saray ayayep. Naamtaan ed satan na intiron mundo a say Israel et walay Dios to,
47 tan nanengneng na amin da ray wadya ya ag to nakaukolay ispada o pika diad pangyagel tod saray totoo to. Sikatoy mananalo ed bakal, tan ipasilong to kayod pakayari mi.
48 Kinmurang lamet si Goliat ya onabet ed kinen David, et masiglat ya amaarap si David ed kawalaay dasig da ray Filisteo ta labanan toy Goliat.
49 Kinaut toy supot to tan angalay sakey a bato, insan to imbansut kinen Goliat. Nakna tod moling, nabtag so lapis-lapis na olo to, tan atumban tikleb ed dalin.
50 Kanyan, anggan anggapoy nikanan ispada, tinalo nen David si Goliat, tan pinatey to ed panamegley na bansut tan sakey a bato!
51 Binatik to, nanalagey ed abay to, inoyus toy ispada nen Goliat, tan pinatey to, insan to pinotutay olo. Nen anengneng na saray Filisteo ya inatey so palbayani ra, kibatiktik ira.
52 Inoosilan ira na saray totoo ed Israel tan Juda; naneeyag ira tan inoosilan da ra ya anggad Gat tan saray puirta ed Ecron. Saray Filisteo kibalatar iran sugatan ed dalan a mamaarap ed Saaraim ya anggad Gat tan Ecron.
53 Nen amawil iray Israelita, kayari ran inoosilan iray Filisteo, inaala ray antokaman a walad kampo ra.
54 Inala nen David so olo nen Goliat tan inawit tod Jerusalem, balet insinop tod tulda to ray armas nen Goliat.
55 Nen si Saul et anengneng toy David ya onlan milaban ed kinen Goliat, tinepet tod kinen Abner a pangulo na saray sondalo to, Siopa man a balolaki? Ag ko amta, O ari, ebat nen Abner.
56 Laka sirin, ta tepet mo, inkuanen Saul.
57 Kanyan nen pinmawil si David ed kampo, kayari ton pinatey si Goliat, inawit nen Abner ed kinen Saul. Sankaawit ni nen David so olo nen Goliat.
58 Tinepet nen Saul, Balolaki, siopay akan-anak ed sika?
1 "Asumpal a nantongtong si Saul tan si David, kayari to ya, si Jonatan a lakin anak nen Saul et naayat a maung ed kinen David tan inaro ton singa panangaro tod sikaton dili.
2 "Nanlapud saman ya agew si Saul inala toy David tan ag to la pinasempet.
3 "Si Jonatan akisipanan a mikaaron anggad angga ed kinen David, ta inaro to a singa panangaro tod sikaton dili.
4 "Inekal toy kawes ya akasolung ed laman to tan inter tod kinen David; inter to met so kawes ton para bakal a pati say ispada, pana, tan say balkes to.
5 "Si David analo ed amin a bakal ya angibakian nen Saul ed sikato, kanyan ginawa nen Saul a sakey ya opisyal na saray sondalo to. Akapaliket ya ed saray totoo nen Saul tan saray opisyal to.
6 "Nen ompawil si David, kayari ton pinatey si Goliat, tan onsesempet met la ray sondalo, inmabet ed kinen Saul iray bibiin nanlapud amin a baley na Israel. Nankakanta ray maliket a kansion, nansasayaw ira, tan nantotogtog iray tamborin tan saltirio.
7 "Diad panliliket da, anganta ray bibii. Si Saul amatey na nilibo, balet si David amatey na asamplon libo.
8 "Ag ya labay nen Saul, tan pinmetang so olo to. Inkuanto, Ibabaga ran asamplon liboy pinatey nen David, balet nilibo labat ed siak. Anggapo lay nagawan onsoblay no ag say panari to!
9 "Nanlapud saman ya agew, angimon ed kinen David.
10 Diad ontombuk ya agew linmoob ed kinen Saul so maoges ya ispiritu a nanlapud Dios, kanyan manitaw a singa ambagel ed abung to. Manotogtog si David, na arpa, a singa gagawaen ton inagew-agew, tan sankabembenan nen Saul so pika.
11 Ipanek kod padir, kuanen Saul ed sikaton dili, tan pinika ton amidwa; balet alikiran iran dua nen David.
12 Antakot si Saul ed kinen David, ta walad kinen David so Katawan a tinmaynan lad kinen Saul.
13 Kanyan pinaarawi nen Saul si David tan ginawa ton pangulo na saray sanlibon sondalo. Diad bakal, sikatoy dilin angiwawanwan ed saray totoo to,
14 tan maaligwas ed amin a ginawa to, ta walad sikato so Katawan.
15 Naimano nen Saul so ontan lan iyaaligwas nen David tan lalon tinmakot ed sikato.
16 Balet si David inaroy amin a totoo ed Israel tan Juda, ta maaligwas a pangulo.
17 Insan inkuanen Saul ed kinen David, Niay Merab, say anak kon sakapangulowanan a bii. Iter kod sikan asawaen mo, dapot no masebeg tan matoor kan sondalo a manlingkur ed siak, tan milaban kad saray bakal na Katawan. (Ginawa ya nen Saul, ta abaloan ton diad onya napatey na saray Filisteo si David, et aliwa lan sikaton dili so mamatey.)
18 Inmebat si David, Siopa ak, tan siopa ray pamilyak, et magmaliw ak a manugang na ari?
19 Balet nen sinmabiy agew a niiter lan asawa nen David si Merab, si Adriel a taga Mehola so angikasal.
20 Balet si Micol ya anak nen Saul inmibeg ed kinen David, tan akaliket si Saul nen akabatan to.
21 Inkuantod sikaton dili, Iter kon asawaen nen David si Micol; agamilen kon mangalut ed sikato, pian napatey na saray Filisteo.
22 Ingganggan to ray opisyal a mitongtong irad kinen David no anggapoy arum a makadngel tan ibaga rad sikato, Makaliliket so ari ed sika tan labay ka na amin ya opisyal to; kanyan maung no asawaen mo la natan so anak ton marikit.
23 Kanyan imbaga da ya ed kinen David, tan inmebat, Baleg a kagalangan so magmaliw a manugang na ari, baleg a tuloy ed sakey a mairap-bilay tan abebad kipapasen a singa siak.
24 Saray opisyal imbaga rad kinen Saul so ebat nen David,
25 et si Saul ingganggan to ran mangibaga ed kinen David: Say labay labat na ari ya ibayar mod sikato pian naasawam so marikit to et say baog na ngoroy kayaryan na sanlasus ya inatey a lalakin Filisteo, pian makabawid saray kalaban to. (Onyay inisip nen Saul a pagawa; pian napatey na saray Filisteo si David.)
26 Imbaga na saray opisyal ed kinen David so papaibaga nen Saul, tan maliket si David ed pagmaliw ton manugang na ari. Kasakbayay agew na kasal,
27 si David tan saray totoo to linma ran amatey na duan lasus a Filisteo. Inawit toy baog na kayaryan na balang sakey tan imbilang tod ari, pian magmaliw a manugang to. Kanyan apasootan si Saul ya impaasawa tod kinen David si anak ton Micol.
28 Abirbir lan sigput nen Saul a say Katawan et walad kinen David; abirbir to met ya inaro nen anak ton Micol.
29 Kanyan lalon tinmakot ed kinen David tan kinabosul to legan ton nambilay.
30 Kapag onsabin mibakal iray Filisteo, maaligwas nin mibakal si David nen saray arum ya opisyal nen Saul. Lapud saya, lalon binmantug si David.
1 "Imbaga nen Saul ed kinen anak ton Jonatan tan saray amin ya opisyal to a getma ton pateyen si David. Balet inararo nen Jonatan si David,
2 "kanyan inkuantod sikato, Labay kan pateyen nen amak. Manalwar ka nabwas na kabwasan; lakad maamut a pasen tan diman ka.
3 "Onla ak tan abayan koy amak diad alog a panamutan mo tan salitaen koy nipaakar ed sika. No walay nakabatan ko ibagak ed sika.
4 "Indayew nen Jonatan si David ed kinen Saul, tan kuanto, Ag kayo komun manggagaway maoges ed kinen aripen yon David. Anggapoy kaogsan a ginawa tod sikayo; amin ingen a ginawa to et pankaabigan yo.
5 "Imposta toy bilay to nen pinatey toy Goliat, et baleg so pananalon inter na Katawan ed Israel. Nanliket kayo nen anengneng yo yan pananalo. Akin, sirin, et labay yoy manggaway kaogsan ed toon anggapoy kasalanan diad pamatey yod kinen David ya anggapon balut so makasengeg?
6 "Dinengel nen Saul si Jonatan tan sinambaan tod ngaran na Katawan ya ag to la pateyen si David.
7 "Kanyan tinawag nen Jonatan si David tan imbaga toy amin a nantongtongan da; insan to inyakar ed kinen Saul, et nanlingkur si David ed ari a singa ginawa to nen saman.
8 "Tinmerak lamet so bakal sumpad saray Filisteo. Dinogpaan ira nen David; amayamay iray apatey a Filisteo, kanyan kibatiktik iray arum.
9 "Aminsan linmoob kinen Saul so maoges ya ispiritu. Manyodyorung ed loob na abung tan sankabembenan toy pika. Wadman met si David a manotogtog na arpa.
10 Si Saul pinika ton ipanek ed padir si David, balet akalikir si David, kanyan nipanek ed dingding imay pika. Batik si David tan tinmaynan.
11 Diad saman a labi angibakiy Saul na pigaran totoo a mambantay na abung nen David tan mamatey ed sikato diad kaimbuas. Pinasakbayan nen Micol si David, No ag ka ombatik ed sayan labi, ompatey ka nabwas.
12 Pinalasur to sirin ed bintana, insan batik, tan tinmaynan si David.
13 Inala nen Micol so talintaoy dios a para abung, imparokul tod katri, inyan tod olowan to so danganan a bagoy karniro, tan sinakbungan toy abel.
14 Nen alaen na saray totoo nen Saul si David, imbaga nen Micol ed sikara a mansasakit.
15 Balet pinapawil ira nen Saul ta nengnengen dan dili si David. Inkuantod sikara, Alsa yod katri to, awit yo dia, ta pateyen ko.
16 Linmoob ira tan arumog dad katri so talintaoy dios a para abung, tan say danganan a bagoy karniro ed olowan to.
17 Tinepet nen Saul ed kinen Micol, Akin et pinalikdo mo ak diad impamabatik mod kalaban ko? Inmebat si Micol, Imbaga tod siak a pateyen to ak no ag ko tulongan ya ombatik.
18 Batik si David tan linmad kinen Samuel diad Rama tan imbaga toy amin a ginagawa nen Saul ed sikato. Insan linma ra nen Samuel ed Nayot tan nanayam irad man.
19 Nadngelan nen Saul a walad Nayot si David, diad Rama,
20 kanyan angibakiy pigaran lalaki a mangalad sikato. Anengneng na sarayan imbaki so grupo na saray propita a mansasayaw-sayaw tan maneeyag-eyag; si Samuel so pangulo ra. Linmoob ed sikaray ispiritu na Dios, tan ginapwan da met so mansayaw-sayaw tan maneyag-eyag.
21 Nen nadngelan ya nen Saul angibaki na pigaran lalaki, balet ginapwan da met so mansayaw-sayaw tan maneyag-eyag. Pinitlo toy angibaki, tan namparay agawa.
22 Insan sikaton diliy linma ed Rama. Nen akasabid samay baleg a bobun ed Secu, tinepet to no iner so kawalaan nen Samuel tan si David, et nibagad sikato a wala rad Nayot, diad Rama.
23 Nen oonlad man, linmoob met ed sikato so ispiritu na Katawan, insan nansasayaw-sayaw tan naneeyag-eyag ya anggad impakasabi tod Nayot.
24 Inekal toy kawes to tan nansasayaw-sayaw tan naneeyageyag ed arap nen Samuel, tan labus-lakseb a nandokul a sanagew tan sanlabi. (Sikato yay inggapo na balikas, Nagmaliw ta met lan sakey a propita si Saul?)
1 "Insan tinmaynan si David manlapud Nayot, diad Rama, linmad kinen Jonatan tan kuantod sikato, Antoy ginawak? Antoy kasalanan ko? Antoy maoges a ginawak ed kinen amam a pamateyan tod siak?
2 "Inmebat si Jonatan, Ag iyabuloy na Dios ya ompatey ka! Ibabaga na amak so amin a gagawaen da, makabaliksan man o andi, tan akin et iyamut da yad siak? Anggapoy katwaan to!
3 "Balet inmebat si David, Kabkabat nen amam so ontan lan panangarom ed siak, kanyan ginetma to lan iyamut ed sikay gawaen to, pian ag ka nasakitan a maung. Sambaan kod sika diad ngaray mabilay a Katawan a wala ak lad sangabay lobuk!
4 "Inkuanen Jonatan, Gawaen koy amin ya ibagam.
5 "Inmebat si David, Nabwas et Pistay Balon Bulan; nepeg a mirongo ak ed ari. Balet abuloyan mon onla ak ya onamut ed alog, anggad labi na kumatlon agew.
6 "No naimano nen amam ya anggapo ak ed lamisaan, ibagam ed sikaton nampatanir ak ed sika ya ongganggano ak ed Betlehem, ta asabiy tinaon a bagat a para intiron pamilyak.
7 "No ikuanto, Andi bali, andi ak ed kaatapan; balet no mampasnuk, naamtaan mo a talagan walay maoges a getma tod siak.
8 "Ipangasim pan gawaen ya para siak, tan sumpal moy masanton sipanan ta. Balet no nankasalanan ak, sika lan diliy mamatey ed siak! Akin et abuloyan mon say amam so manggawa?
9 "Inmebat si Jonatan, Ag ka mannununot na ontan! No amtak a talagan walay maoges a getma nen amak, imbagak la komun ed sika.
10 Insan tinepet nen David, Siopay mangipakabat ed siak no mamapasnuk ya onebat si amam ed sika?
11 Talad alog, ebat nen Jonatan. Kanyan linma ra,
12 tan inkuanen Jonatan ed kinen David, Say Katawan a Dios na Israel komun so tasi ta! Diad onyan oras nabwas tan diad ontombuk ya agew tepetan koy amak. No maung lay linawa tod sika, paipakabat kod sika.
13 No getma to ka nin pasakitan, pateyen ak komun na Katawan no ag ko paipakabat ed sika, pian nibatikan moy kaatapan. Wala komud sikay Katawan a singa inkiwala to nen saman ed kinen amak!
14 Legan kon mambilay, matoor ka komun ed siak tan sumpal moy masanton sipan mo; balet no ompatey ak,
15 ag napoltut komuy pangiter moy panangasi ed pamilyak. No sigput lan naoput na Katawan iray kalaban mo,
16 mansiansia ni komun so sipanan tan dua. No ag natoor, dusaen ka na Katawan.
17 Si Jonatan impansamba to lamet si David ya aroen to, ta si Jonatan inaro toy David a singa panangaro tod sikaton dili.
18 Insan inkuanen Jonatan ed kinen David, Lapud nabwas et Pista na Balon Bulan, naimano ya anggapo kad man ed pasen mo.
19 Nabwasa sakey, lalon naimano ya anggapo ka; laka sirin ed pasen ya inamutan mo nen saman, tan amut kad abonbonton iran batod man.
20 Mangibolus ak na taloran pana, a singa dimay kekenaen ko.
21 Insan ko ibagad aripen ko ya alaen to ra. No ikuankod sikato, Nengneng mo, wadtan ed sayan diking mo iray pana; alam ira, say labat ton ibaga arawi kad kaatapan, et nayarian moy ompaway. Sambaan kod ngaran na mabilay a Katawan ya arawi kad kaatapan.
22 Balet no ikuanko, Wadtan ed sananey a diking mo ray pana, taynan kad satan, ta patataynanen kay Katawan.
23 No nipaakar ed sipanan tan dua, andi-duaruwan tulongan ita na Katawan a tooren ta, anggad angga.
24 Kanyan inmamut ed alog si David. Diad agew na Pistay Balon Bulan, dinmongon mangan si Saul.
25 Inmirung ed gendat a yorungan tod abay na dingding. Kaabay toy Abner, tan inmirung ed petek to si Jonatan. Anggapoy akayorung ed pasen nen David,
26 balet anggapoy imbaga nen Saul, ta inisip to, Wala angangkoy agawad sikato kanyan aliwan malinis onung ed ganggan.
27 Diad ontombuk ya agew, say agew kayariy Pistay Balon Bulan anggapo niy akayorung ed pasen nen David, kanyan tinepet tod kinen Jonatan, Akin et ag dia angay David karuman tan natan?
28 Inmebat si Jonatan, Akikasid siak ya abuloyan kon onlad Jerusalem.
29 Inkuanto, Abuloyan mo pan onla ak, ta say pamilyak et onla rad baley a mangibagat, tan imbilin nen kuyak a nepeg koy onlad man. Kanyan no talagan kaaro mo ka, abuloyan mo ak ya onla, pian nanengneng ko ray kakanayon ko! Sikato yay makasengeg no akin et anggapod pasen to diad lamisaan yo.
30 Ampetang so olo nen Saul ed kinen Jonatan tan kuantod sikato, Anak kay maoges tan mananumpan bii! Amtak la natan a pipilaan moy David, tan papabandayen moy sikan dili tan si inam!
31 Ag mo ta amtan no mabilay si David et ag kan balut magmaliw ya ari ed sayan bansa? Laka, ta awit mo dianepeg ya ompatey!
32 Inmebat si Jonatan, Akin et nepeg ya ompatey? Antoy ginawa to?
33 Lapud saya, pinika nen Saul si Jonatan, ta labay ton pateyen; atalusan nen Jonatan a talagan getma nen ama to a patayen si David.
34 Ampetang so olo nen Jonatan, tinmaynan ed lamisaan tan ag angan ed saman ya agew, say kumadwan agew na Pistay Balon Bulan. Nanermenan ton maung si David, ta pinabaingan nen Saul.
35 Diad ontombuk a kabwasan linmay Jonatan ed alog, ta nengnengen toy David onung na paknaan dan dua. Kaiba toy sakey a ogaw a laki,
36 tan kuantod sikato, Batik ka ta anap moy panan ibolus ko. Batik imay ogaw, insan angipanay Jonatan ed labas to.
37 Nen asabi toy pasen a kawalaay pana, kinolyaotan nen Jonatan, Say pana et wadman nid bandad man!
38 Ag kad tan labat manalalagey! Ganatan mo! Inala na samay ogaw imay pana tan pinmawil ed kinen amo to.
39 Anggapoy amta tod nagagawa; si Jonatan tan si David labat so makaamta.
40 Inter nen Jonatan iray armas to ed samay ogaw tan impaipawil to rad baley.
41 Kasiput to may ogaw, pinmaway ed abonbonton iran bato si David, tinmalimukor tan amitlon dinmakmomo ya anggad dalin. Manakis iran dua nen Jonatan legan dan nanlakapan; maermen niy David nen si Jonatan.
42 Insan inkuanen Jonatan ed kinen David, Wala komuy Dios ed sika. Andi-duaruwan ontulong so Katawan pian sika tan siak, saray kabyangan na boleg mo tan saray kabyangan na boleg ko, et tooren tayon anggad angga so masanton sipanan tan dua. Insan tinmaynan lay David tan amawil lad baley si Jonatan.
1 "Linmay David ed kinen pari Ahimelec diad Nob. Manggiwgiw si Ahimelec a pinmaway a mangabet ed sikato tan tinepet to, Akin et bukbukor moy linma dia?
2 "Wadya ak, ta ingganggan ak na ari, ebat nen David. Binilin to ak ya ag ko ibagay angibakian tod siak a gawaen ko. Imbagak ed saray totook a mambabana kamid sakey a pasen.
3 "Antoy walad tan a nakan? Itdan mo ak na limaran tinapay o antokaman a wala.
4 "Inkuan na pari, Anggapoy tinapay ko, no ag say masanton tinapay labat; nayarian mon alaen no saray totoom et ag ira akiakdul ed bii nen imbeneg iran agew.
5 "Talagan andi, ebat nen David. Ag papaolyan na saray totook a malinis ira onung ed ganggan, anggan ordinario so pegdat mi; insan la natan, ta nidomay pegdat mi!
6 "Kanyan inter na pari ed kinen David so masanton tinapay, ta say wala labat et saray tinapay ya insaklang ed Dios a sikaray inekal lad masanton lamisaan tan sinalatan lay kapanggawan tinapay. (
7 "Say pangulo da ray pastol nen Saul, a si Doeg a taga Edom, et nibanan wadman ed saman ya agew, ta mangigalang ed Katawan.)
8 "Inkuanen David ed kinen Ahimelec, Walay pika o ispadan niiter mod siak? Magangganat ak lapud ganggan na ari, kanyan anggapo lay oras kon angalay ispadak odino arum ya armas.
9 "Inmebat si Ahimelec, Walad siak so ispada nen Goliat a Filisteo a pinatey mod Patar na Ela; wadmad beneg na ipod, abalkut ed abel. No labay mo, alamsikato labat so armas a wadya. Anggapo lay arum a miparad satan, inkuanen David. Iter mod siak!
10 Kanyan tinmaynan si David, imbatikan toy Saul, tan linmad kinen Ari Akis na Gat.
11 Inkuan na saray opisyal na ari ed kinen Akis, Aliwa tan sikato ya may David, say ari na bansa to? Sikato ya may lakin totokuyen na saray bibii ed kakantaen da legan dan mansasayaw, Si Saul amatey na nilibo, balet si David amatey na asamplon libo.
12 Atenyeg so liknaan nen David lapud sarayan salita, tan tinmakot a maung ed kinen Ari Akis.
13 Kanyan no walad arap da, omanen toy kagagawa to, tan no pokpokan da manamambagelan; mansulsulat ed saray puirta na siudad tan palpaolyan ton onagos ed balbas to so ilol to.
14 Kanyan inkuanen Akis ed saray opisyal to, Nengneng yo tan a too! Ambagel! Akin et inawit yo ni dia?
15 Amayamay la diay ambagel. Akin et angawit ki ni diay manggaway inaambangel diad loob na dilin abung ko?
1 "Tinmaynan si David ed siudad na Gat tan linmad sakey ya ongib diad asingger ed baley na Adullam. Nen nadngelan na saray agagi to tan saray arum a kabyangay pamilya to a wadmay David, akikasakey irad sikato.
2 "Linmad sikato ray totoon napapairap, o saray walay utang, o saray walay riklamo; sakey ya apat a lasus iran amin, tan nagmaliw a pangulo ra.
3 "Linmay David ed Mizpa, tan kuantod ari na Moab, Ipangasim a manayam ni ra dia di amak tan inak anggad naamtaan ko no antoy gawaen na Dios para siak.
4 "Kanyan intilak nen David iray atateng to ed ari na Moab, tan nanayam irad man legan a nanamut si David ed dalem na ongib.
5 "Insan linmay propita Gad ed kinen David tan kuanto, Ag ka dia manaayam; lakan tampol ed dalin na Juda. Kanyan pinmikal si David tan linmad takel na Heret.
6 "Aminsan ya agew walad Gabaa si Saul, manyodyorung ed silong na kiew a tamarisko diad pokdul, sankabembenan toy pika to, tan akaalagey ed kaliber-liber to iray amin ya opisyal to. Nibagad sikato ya arumog lay David tan saray totoo to;
7 "kanyan kuantod saray opisyal to, Dengel kayo, totoo na Benjamin! Say abaloan yo sirin ya itdan kayo nen David na saray alog tan kaubasan, tan gawaen to kayon opisyal na saray sondalo!
8 "Sikato yay makasengeg a pankokomplutan yo ak? Anggapoy anggan sakey ed sikayo so angidalem ed siak ya akigampid kinen David so dilin anak ko. Anggapoy anggan sakey ed sikayoy angabagey ed siak o mangibagad siak a si David a sakey ed saray dilin totook, et manaanap natan na pankanawnawan pamatey tod siak, tan say anak kon dili so ananggoyur ed sikato!
9 "Si Doeg a taga Edom et manalalagey diman a kaiba na saray opisyal nen Saul, tan inkuanto, Anengneng koy David nen linmad kinen Ahimelec ya anak nen Ahitub diad Nob.
10 Tinepet nen Ahimelec ed KATAWAN no antoy nepeg a gawaen nen David, insan initdan toy nakan tan inter to may ispada nen Goliat a Filisteo.
11 Kanyan impaawit nen Ari Saul si Ahimelec a pari tan amin a kakanayon to a papari met ira diad Nob, tan linma rad sikato.
12 Inkuanen Saul ed kinen Ahimelec, Dengel ka, Ahimelec! Sipaparaan ak, ebat to.
13 Tinepet nen Saul, Akin et pankokomplutan yo ak nen David? Akin et initdan moy nakan tan sakey ya ispada, tan impanonan mod Dios? Natan sinumlang to ak tan manaalagar na pankanawnawan pamatey tod siak!
14 Inmebat si Ahimelec, Sankatooran si David ed saray opisyal mo! Sikatoy dilin manugang mo, kapitan na saray managbantay ed sika, tan gagalangen ed palasiom.
15 On, impanonan kod Dios, tan amimpiga la yan ginawak. No nipaakar ed pankokomplut ya ibabagam, ag mo ak aakusaen tan say siopaman ed pamilyak. Anggapoy pakapikabat kod sayan pamaakaran!
16 Inkuan na ari, Ahimelec, nepeg ya ompatey ka tan amin a kakanayon mo.
17 Insan inkuantod saray guardian manalalagey ed abay to, Patey yo ray papari na KATAWAN! Akikomplut irad kinen David tan ag da imbagad siak a batik, anggaman ya amta ra. Balet anggapod saramay guardia so angigalaw na lima ton mamatey ed saray papariy KATAWAN.
18 Kanyan inkuanen Saul ed kinen Doeg, Patey mo ra! kanyan pinatey nen Doeg iran amin. Diad saman ya agew walomplo tan liman papari na KATAWAN so pinatey to; mansosolung na ipod ira yan papari.
19 Impapatey met nen Saul iray arum ni ran manaayam ed Nob, say siudad da ray papari; bibii tan lalaki, ogogaw tan saray mansususo, saray baka, saray asno, tan saray karniroapatey iran amin.
20 Balet akabatik si Abiatar a sakey ed saray lalakin anak nen Ahimelec, tan akikasakey ed kinen David.
21 Imbaga tod sikato so impamatey nen Saul ed saray papari na KATAWAN.
22 Inkuanen David ed sikato, Nen anengneng koy Doeg ed saman ya agew, amtak ya andisaew ton ibaga. Kanyan siak so makasengeg na impatey na amin a kakanayon mo.
23 Miayam kad siak, tan ag ka natatakot. Labay nen Saul a pateyen to tan dua, balet arawi kad kaatapan no kaiba mo ak.
1 "Nadngelan nen David a dodogpaan na saray Filisteo so baley na Keila tan tatakewen day kasumsumpal ya inani.
2 "Kanyan tinepet tod KATAWAN, Laen kon dogpaan iray Filisteo? On, ebat na KATAWAN. Dogpaan mo ra tan iyagel moy Keila.
3 "Balet inkuan ed sikato na saray totoo to, Antakot kami la diad Juda; aloor so takot mi no onla tayod Keila tan dogpaan tayo ray sondalon Filisteo!
4 "Kanyan impanon lamet nen David ed KATAWAN, tan imbagay KATAWAN ed sikato, Lakad Keila tan dogpaan mo ray Filisteo ta panaloen ta kad sikara.
5 "Kanyan si David tan saray totoo to et linma rad Keila tan dinogpaan da ray Filisteo; dakerakel so pinapatey dad sikara tan inaala ray baka ra. Kanyan inyagel nen David iray totoo ed saman a baley.
6 "Nen si Abiatar a lakin anak nen Ahimelec et akabatik tan akikasakey ed kinen David ed Keila, inawit toy ipod.
7 "Nibagad kinen Saul a linmay David ed Keila, tan kuanto, Say Dios impasilong to lad pakayarik si David. Inkolung toy sikaton dili diad inyakar tod baley ya aliber na padir tan abalewetan iray puirta to.
8 "Kanyan tinawag to ray totoo to ta mibakal irad Keila, pian nadakep day David tan saray totoo to.
9 "Nen nadngelan nen David a getma nen Saul a dogpaan, inkuantod kinen Abiatar a pari, Iyakar mo dia may ipod.
10 Insan kuanen David, KATAWAN a Dios na Israel, nadngelan kon getma nen Saul so onla diad Keila tan deralen to, lapud siak ya aripen mo.
11 Ipalima ak kasi na saray totood Keila ed kinen Saul? Talaga kasin onla diay Saul onung na nadngelan ko? KATAWAN a Dios na Israel, pikasik ya ebatan mo ak! Inmebat so KATAWAN, Onsabiy Saul.
12 Siak kasi tan saray totook et ipalima na saray totood Keila ed kinen Saul? tepet lamet nen David. On, ipalima da kayo, ebat na KATAWAN.
13 Kanyan si David tan saray totoo tosakey a anem a lasus iran amintinaynanan dan tampol so Keila tan nanalis-alis ira. Nen nadngelan nen Saul a tinaynan nen David so Keila, ag to la intuloy so getma to.
14 Nanaamut ed nipokdul a dalin si David diad kalawakan ya asingger ed Zif. Ag tinondaan nen Saul ya anapen, balet ag ipalima na Dios ed sikato.
15 Antakot si David, ta anapen nen Saul a pateyen. Si David walad Hores, diad kalawakan ya asingger ed Zif.
16 Nilad man nen Jonatan, pinabiskeg toy linawa to tan impanonut to ya ag paolyan na Dios.
17 Inkuanto, Ag ka natatakot, ta ag ka nadiwit nen amak. Kabkabat to a sikay manari ed Israel tan siak so onkumaduad sika ed betang.
18 Nanggawa ray masanton sipanan a mankaaro ra lawas. Tinmilak ed Hores si David, tan sinmempet lay Jonatan.
19 Walay pigaran taga Zif a linmad kinen Saul diad Gabaa tan kuanda, Si David et manaamut ed Hores a lugar mi, diad palandey na Hakila a nisagur na kalawakad Juda.
20 Amta mi, O Ari, ya ontan lay pilalek mon mangerel ed sikato; lakad man tan andi-duaruwan nipalima mid sika.
21 Inmebat si Saul, Bindisionan kayo komun na KATAWAN lapud mapangasi kayod siak!
22 Laka yo tan palinew yo nin maminsan; anap yo no iner so talagan kawalaan to tan no siopay akanengneng ed sikatod man. Nadngelan kon masilib a maung.
23 Anap yo ray petepeteg a pasen a panaamutan to, insan ki dia ompawil a tampol a mangibagad siak. Et no wadman nid saman a pasen, laen kon anapen ed anggan intiron dalin na Juda.
24 Kanyan amawil irad Zif tan akaona la ra nen si Saul. Si David tan saray totoo to et wala rad kalawakan na Maon, diad nisolinek a patar a nisagur na kalawakay Juda.
25 Linmay Saul tan saray totoo to a mananap ed kinen David. Balet nadngelan ya nen David, kanyan linmad mabaton pokdul a walad kalawakan na Maon tan nanayam diman. Nen nadngelan ya nen Saul, nila ton tinombuk si David.
26 Si Saul tan saray totoo to et wala rad sakey a dapag na pokdul, balet si David tan saray totoo to et wala rad biek a dapag to man a pokdul. Maganat dan ibabatikan si Saul tan saray totoo to, ta manasingger la rad sikara tan ngalngali la ra nadakep.
27 Balet sinmabiy sakey ya ibabaki tan kuantod kinen Saul, Pawil kayon tampol! Lolooban na saray Filisteo so bansa!
28 Kanyan tinondaan ton inosilan si David tan linman akilaban ed saray Filisteo. Lapud saya, atawag iman a pasen na Pokdul a Nansianan.
29 Tinmaynan diman si David tan linmad lugar na Engadi, tan dimay nanamutan to.
1 "Nen amawil si Saul kayari ton nilabanan iray Filisteo, nibagad sikato a walad kalawakan na En-gadi si David.
2 "Angalay talon libon sankamaungan a mibakal a lalaki ed Israel tan linma ran mananap ed kinen David tan saray totoo to diad bokig na Saray Bato na Kanding ed Takel.
3 "Linmad sakey ya ongib a walad abay na pigaran koral na karniro diad gilig na dalan, tan sinmorub diman ta labay toy nainawaan. Nibana a diad daledalem to man ya ongib akaamut ira di David tan saray totoo to.
4 "Inkuan ed sikato na saray totoo to, Sikato la yay pankanawnawam! Imbagad sika na KATAWAN ya ipasilong tod pakayarim so kalaban mo tan nayarian mon gawaen ed sikato so antokaman a labay mo. Nankalkalnan kinorung nen David si Saul tan angerger na saloy na kawes nen Saul ya ag to amta.
5 "Balet kabebekta ag pinareen na konsinsia to,
6 "tan kuantod saray totoo to, Ag iyabuloy komun na KATAWAN a pasakitan koy pinili ton ari! Ag ko nepeg a pasakitan ta sikatoy ari a pinili na KATAWAN!
7 "Kanyan tinanggoyur to ray totoo ton ag da dogpaan si Saul. Inmalagey si Saul, pinmaway ed ongib, tan ontataynan la.
8 "Pinmaway met ed ongib si David, tinombuk to, insan to tinawag, Kagalgalang kon Ari! Linmingaw si Saul et si David dinmakmomo ya anggad dalin a pamagalang to,
9 "tan kuanto, Akin et dedengelen mo ray totoon mangibabaga a pasakitan ta ka?
10 Nanengneng mon dili a nanagonuyan labat impasilong ka na KATAWAN ed pakayarik. Pigaran totook so angibagad siak a pateyen ta ka, balet et ag ko ya ginawa tan kuankon ag ta ka pasakitan, ta pinili ka na KATAWAN a manari.
11 Nengneng mo, ama, nengneng mo yay sankabembenan kon parti na saloy na kawes mo! Apatey ta ka la komun, balet saya labat lay ginerger ko. Diam nanengneng ya anggapoy kanunutan kon onlaban ed sika o pasakitan ka. Aanapen mo ak a pateyen anggaman ya anggapoy ginawak a maoges ed sika.
12 Sintinsiaan ita komun na KATAWAN, no siopad sikatay manggagaway maoges! Dusaen ka komun na KATAWAN lapud gagawaen mod siak, ta no siak ag ta ka pasakitan.
13 Onung na inkuay sakey a daan a balikas, Saray maoges a totoo labat so manggaway kaogsan. Kanyan ag ta ka pasakitan.
14 Nengneng mo no siopay labay a pateyen na ariy Israel! Nengneng mo no siopay oosilan to! Sakey ya inatey ya aso, sakey a lies!
15 Say KATAWAN so manintinsia, tan ibaga to no siopad sikatay manggagaway kaogsan. Ag to ya komun paolyan, siak komuy iyalagey to, tan iyagel to ak ed sika.
16 Kayari nen David a nansalita, inkuanen Saul, Sikan talaga anak kon David? Ginapwan toy onakis,
17 insan to inkuan ed kinen David, Maptek ka nen say siak. Maung so ipapatnag mod siak, balet maoges so gagawaen kod sika!
18 Diad sayan agew impatnag mo so ontan lan kamaungan mod siak, ta ag mo ak pinatey, anggaman ya impasilong ak na KATAWAN ed pakayarim.
19 No naerel na sakey a too so kalaban to, ibolus to kasin ag adiwit? Bindisionan ka komuy Dios lapud ginawam ed siak ed sayan agew!
20 Amtak la natan ya andi-duaruwan manari kad Israel, tan mansiansiay nanarian diad silong na oley mo.
21 Isipan mod siak diad ngaray KATAWAN ya ag mo didiwiten iray kabyangay boleg ko, pian say ngaran ko tan say ngaray pamilyak et ag nalingwanan.
22 Insipan ya nen David. Insan la sinmempet si Saul, tan pinmawil ed panaamutan to si David tan saray totoo to.
1 "Inatey si Samuel, kanyan nantitipon iray amin ya Israelita tan nanermen ira lapud sikato. Insan impompon dad abung to diad Rama. Kayari to ya, tinmaynan si David tan linmad kalawakan na Paran.
2 "Walay sakey a lakin kabyangay boleg nen Caleb a manngaray Nabal; taga baley na Maon, balet say kawalaay anapan to diad baley na Carmel. Mayaman a maung yan too: talon libo so karniro to tan sanlibo so kanding to. Say asawa to si Abigail, sakey a maganggana tan maotek a bii; balet si Nabal maonganget tan aliwliway ogali to. Aminsan walad Carmel si Nabal a mangakatliy karniro to.
3
4 "Walad kalawakan si David tan nadngelan to yan gagawaen nen Nabal.
5 "Kanyan angibakid Carmel na samploran balolaki; binilin to ran anapen day Nabal, tan ipasabi ray panangilugay to.
6 "Binilin to ran ikuan dad kinen Nabal: Ilulugay to ka nen David, pinablin kaaro. Maung komun konoy kipapasen mo, say pamilyam, tan amin a kayaryan mo.
7 "Nadngelan ton kakatilian mo ray karnirom, tan labay ton ipaamtad sika a kaiba mi ray pumapastol mo et ag mi ra pinasakitan. Anggapoy abalang da legan a wala rad Carmel.
8 "Tepet mo labat ed sikara et ibaga rad sika. Linma kami dia ed agew na pista; maung komuy pangawat mod sikami. Iter mo pa komun so nayarian mon iter ed sikami ya aripen mo, tan diad kinen David a kaarom.
9 "Nen sinmabid Carmel ira may totoo nen David, imbaga ra may papaibaga to. Insan ira nanalagar diman,
10 tan inmebat a siansiay Nabal ed sikara, David? Siopa tan a too? Natad sayan panaon, amayamay iray aripen ya ibabatikan da ray amo ra!
11 Ag ko iter so tinapay tan danum, tan saray ayayep a pinapatas kon para saray kumakatliy karnirok, ed saray totoon ag ko amta no iner so nanlapwan da!
12 Amawil ed kinen David ira may totoo to tan imbaga rad sikatoy imbaga nen Nabal.
13 Ibalkes yo ray ispada yo! ingganggan to, et sikatoy ginawa ran amin. Imbalkes met nen David so ispada to tan pinmikal a kaiba to ray sakey a apat a lasus a lalaki; saray duan lasus atilak iran mambantay ed saray abasto.
14 Say sakey ed saray aripen nen Nabal inkuantod kinen Abigail ya asawa nen Nabal, Ag yo ni nadngelan? Manlapud kalawakan angibakiy David na pigaran totoo tan impaisabi toy panangilugay ed kinen amo mi, balet pinabaingan to ra.
15 Saraman a totoo et maumaung irad sikami; ag da kamin balut sinigensigen, tan legan a kaiba mi rad man ed kaalogan, anggapon balut so abalang mi.
16 Agew-labi da kamin inyagel nen inaasikaso mi ray karniro.
17 Nudnunot mo ya natan sirin no antoy nepeg yon gawaen. Nayarin maoges so nagawad amo mi tan say intiron pamilya to. Maonganget, kanyan anggapoy dengelen to!
18 Nangganat ya angalay Abigail na duan lasus a tinapay; duaran pananginan a katat a napnoy alak, limaran litson a karniro, limaran salup ya insanglil a trigo, sanlasus a monggol na ubas, duan lasus a kanen ya impamagan bungay igos, tan inyan to rad beneg na saray asno.
19 Insan to inkuan ed saray aripen, Onona kayon onla, ta ontombuk ak la. Balet anggapoy imbaga tod kinen asawa to.
20 Akakabayod asno si Abigail tan ondadalan ed kakurbad gilig na palandey, insan kabebekta nabet toy David tan saray totoo to.
21 Nunudnunoten nen David, Akin et binabantayan kod kalawakan so kayaryan na saman a too? Anggapoy kayaryan ton abalang, et natan onyay ibales tod tulong kod sikato!
22 Pateyen ak komun na Dios no kasabiy kabwasan et walay inkerak a mabilay a lakin kaiba to!
23 Nen anengneng nen Abigail si David, inmepas a tampol tan tinmikleb ed dalin,
24 diad saliyan nen David, tan kuantod sikato, Ipangasim, dengel mo ak! Siak lay tetel mo ed amin ya agawa.
25 Paolyan mo pa la komun iman a Nabal, ta andi-kabaliksan a too! Say inkatoo to et kapara na kabaliksan na ngaran tosakey ya ambagel! Andid man ak, nen linma rad may aripen mo.
26 Say KATAWAN so manesebel a sikan dili so ombawi tan mamatey ed saray kalaban mo. Natan sambaan ko diad ngaran na mabilay a KATAWAN a nadusan singa si Nabal iray kalaban mo tan amin da ray malabay a mamasakit ed sika.
27 Kanyan awat mo pa yay panangaron awit ko a para sika, tan iter mod saray totoom.
28 Pirdona mo ak pa, no wala bilang so maoges a ginawak. Say KATAWAN gawaen to kan ari, tan anggan saray kabyangay boleg mo, ta milalaban kad saray bakal na KATAWAN; ag ka manggaway kaogsan legay pambilay mo.
29 No walay ondogpad sika tan labay to kan pateyen, say KATAWAN a Dios iyarawi to kad kaatapan, a singa pambantay na sakey a too ed mablin kayamanan. Ibasileng na KATAWAN iray kalaban mo, a singa pangipalsut na sakey too ed saray bato.
30 No sinumpal la na KATAWAN iray maung a bengatlan insipan tod sika, tan ginawa to ka lan ari na Israel,
31 anggapo lad satan so pagbabawian o panermenan mo, lapud impamatey mon anggapoy makasengeg odino lapud imbawim. No binindisionan ka lay KATAWAN, ag mo ak pa komun lilingwanan.
32 Inkuanen David ed sikato, Nagalang so KATAWAN, say Dios na Israel, ya angibakid sikan mangabet ed siak natan!
33 Salamat ed Dios lapud kamaungay impannonut mo tan lapud impangipaliis mod siak ed pamatey kod kaparak a too tan say impamanom ya ombawi ak a dili.
34 Sinambaan ko lad ngaray mabilay a Dios na Israel a pateyen ko ray amin a totoo nen Nabal. No ag ka labat nangganat ya inmabet ed siak, ompatey iran amin komun kasakbayay kabwasan. Say KATAWAN so anebel ed siak ya ag to kayo napasakitan!
35 Insan inawat nen David iray awit to tan kuantod sikato, Sempet ka la tan ag ka mapaga. Gawaen koy labay mon nagawa.
36 Amawil lay Abigail ed kinen Nabal a diad abung to walay baleg a ponsian manepeg a para ari. Abuek la tan masayaksak so nengneng to, kanyan anggapo lay imbaga nen Abigail ed sikato anggad kabwasan.
37 Nen amawmawan lan maung, imbaga nen Abigail ed sikato so amin ya agawa. Naataki tan nagmaliw a paralitiko.
38 Kayariy sakey a samploran agew dinusa na KATAWAN si Nabal, et inatey.
39 Nen nadngelan nen David ya inatey si Nabal, inkuanto, Nagalang so KATAWAN! Binmawid kinen Nabal lapud impamabaing tod siak. Say KATAWAN so angipaliis ed siak ya aripen to ed panggawak na maoges. Dinusa na KATAWAN si Nabal lapud kaogsan to. Insan angibakiy David na mangibagan labay ton asawaen si Abigail.
40 Saray aripen to linma rad kinen Abigail diad Carmelo tan inkuan dad sikato, Si David imbaki to kamin mangalad sika ta iyakar mi kad sikaton asawaen to.
41 Dinmakmomoy Abigail ya anggad dalin tan kuanto, Siak so aripen ton sipaparaan a mangoras ed saray sali na saray aripen to.
42 Magangganat ya inmalagey tan kinmabayod asno to. Inolup na limaran aripen ton bibii diad impila tod saray aripen nen David, tan nagmaliw ya asawa to.
43 Inasawa nen David si Ahinoam a taga Jezreel, tan natan nagmaliw met ya asawa toy Abigail.
44 Legan to ya impaasawa nen Saul so anak to a si Micol ed kinen Palti ya anak nen Lain a taga baley na Gallim. Si Micol asawa nen David nen saman.
1 "Wala ray pigaran taga Zif a linmad kinen Saul diad Gabaa tan imbaga rad sikaton manaamut si David diad pokdul na Hakila a nibokig na Jesimon.
2 "Amiliy Saul na talon libon sankamaungan a sondalo na Israel tan kaiba to ran linman mananap ed kinen David diad Zif.
3 "Nankampo rad pokdul na Hakila diad gilig na dalan. Wala nid kalawakan si David, ta nen akabatan ton aanapen nen Saul,
4 "angibaki na saray ispia. Nalmoan da a wadman a talagay Saul.
5 "Linman tampol tan ninengneng toy inogipan nen Saul tan say anak nen Ner a si Abner a pangulo na saray sondalo nen Saul. Naogip si Saul ed dalem na kampo, tan niliber na saray totoo to.
6 "Insan tinepet nen David ed kinen Ahimelec a Heteo, tan diad kinen Abisai ya anak nen Zarvia tan agi nen Joab, Siopad sikayon dua so milad siak ya onlad kampo nen Saul? Siak, ebat nen Abisai.
7 "Kanyan diad saman a labi linmoob si David tan si Abisai ed kampo nen Saul et nalmo ran naogip si Saul diad pegley na kampo tan walad olowan toy pika ton akapanek ed dalin. Naogip ed kaliber-liber si Abner tan saray sondalo to.
8 "Inkuanen Abisai ed kinen David, Natan ed sayan labi impasilong na Dios ed pakayarim so kalaban mo. Iyabuloy mon say pika ton dili so idoyuk kod sikato tan ipanek kod dalin diad maminsan labat a doyukag la nakaukolay mamidwa!
9 "Balet inkuanen David, Ag mo didiwiten! Andi-saew a dusaen na KATAWAN so siopaman a maniwit ed pinili ton ari.
10 Diad ngaran na mabilay a KATAWAN, kuanen David ya intoluy, Amtak a say dilin KATAWAN so mamatey ed kinen Saul, diad isabi na agew na ipatey ton bukor o diad ipatey tod bakal.
11 Ag komun iyabuloy na KATAWAN a siak so mamasakit ed toon pinili ton ari! Alaen ta labat so pika to tan say pananginan toy danum, insan ta la onla.
12 Kanyan inala nen David so pika tan say pananginay danum a wala rad olowan nen Saul, insan tinmaynan la ra nen Abisai. Anggapoy akanengneng o akaamta ed agawa, o abangon; akaogip iran maung, ta malet so impamaogip na KATAWAN ed sikaran amin.
13 Linmay David ed biek a dapag na patar tan kinmalab ed pokdul ya araw-dawi met la.
14 Insan inmeyag ed saray sondalo nen Saul tan kinen Abner, Abner! Narerengel mo ak? Siopa tay maneeyag et babangonen toy ari? tepet nen Abner.
15 Inmebat si David, Abner, aliwa tan sikay sankatalonggaringan a tood Israel? Akin balet et ag mo iyaagel so katawan mon ari? Walad tay linmoob ed kampo yo a sakey a toon mamatey ed ari.
16 Pinaolyan moy kimey mo, Abner! Diad ngaran na mabilay a KATAWAN, nepeg yoy pateyen ya amin, ta ag yo inyagel so toon ginawa na KATAWAN ya ari. Nengneng yo! Iner so kawalaay pika na ari? Iner so kawalaay pananginay danum a walad olowan to?
17 Abirbir nen Saul so bosis nen David, tan tinepet to, Sika tan a tua, anak kon David? On, siak, O ari, ebat nen David.
18 Intuloy ton inkuan, Akin et oosilan mo ak ni ya aripen mo? Anto tay ginawak a? Antoy ginawak a kasalanan?
19 Dengel mo pay ibagak, O ari. No say KATAWAN so anagdag ed sika a sumpaen mo ak, sakey a bagat komuy makaoman na kanunutan to; balet no totooy anagdag, isamba ra komun na KATAWAN. Pinataynan da ak manlapud dalin na KATAWAN tan apasoot ak a manayam ed sakey a bansa a saray diriyos to labat so nayarian kon igalang.
20 Ag mo komun aabuloyan a napatey ak ed arum a bansa, ya arawi ed KATAWAN. Akin et say ari na Israel anapen to ak a pateyen a singa sakey a lies? Akin et anapen to ak a singa sakey a manok ya atap?
21 Inmebat si Saul, Makapoy so ginawak. Pawil ka la, David, ya anak ko! Ag ta ka lan balut pasakitan, ta ag mo ak pinatey ed sayan labi. Nakalan ak na kalakal! Maoges a tuloy so ginawak!
22 Inmebat si David, Niay pikam, O ari! Mangibaki kay sakey ed saray totoom, ta alaen to.
23 Tumangan na KATAWAN iray matoor tan matonung. Impasilong ka natan na KATAWAN ed pakayarik, balet et ag ta ka diniwit, ta say KATAWAN ginawa kan ari.
24 No antoy ginawak ed sika natan, ontan met komun so gawaen na KATAWAN ed siak, tan iyarawi to ak ed antokaman a gunigon!
25 Inkuanen Saul ed kinen David, Bindisionan ka komun na Dios, anak ko! Onaligwas so antokaman a gawaen mo! Kanyan linma lay David, tan sinmempet met lay Saul.
1 "Inkuanen David ed sikaton dili, Onsabiy agew a pateyen ak nen Saul. Say sankaabigan a gawaen ko et say ibatik kod Filistia. Tondaan to ak ed satan ya anapen ed Israel, et niarawi ak ed kaatapan.
2 "Kanyan si David tan saray anem a libon totoo to linma ran tampol ed anak nen Maoc, a si Akis ya ari na Gat.
3 "Nanayam irad Gat a kaiba da ray pamilya ra. Kaiba nen David iray duaran asawa to, a si Ahinoam a taga Jezreel, tan si Abigail ya asawa nen Nabal a taga Carmel.
4 "Nen nadngelan nen Saul a batik ed Gat si David, tinondaan to lan anapen.
5 "Inkuanen David ed kinen Akis, No kaaro mo ak, itdan mo ak na melag a baley a panayaman ko. Ag nakaukolan a miayam ak ed sikad manonan siudad.
6 "Kanyan inter toy baley a Siclag, tan lapud saya say Siclag sasakupen ya anggad natan na saray ararid Juda.
7 "Labinanem a bulan a nanayam si David ed Filistia.
8 "Diad legan to yan panaon, si David tan saray totoo to et dinodogpaan da ray totood Gesur, Girzi, tan Amalek, ya abayag la ran manaayam ed sarayan lugar. Dinodogpaan to ra lugar ya anggad Sur, tan anggad Egipto,
9 "tan pinapatey to ray amin a lalaki tan amin a bibii, tan inaala to ray karniro, baka, asno, kamilyo, tan anggan saray kawekawes. Insan ompawil ed kinen Akis,
10 a manepet ed sikato, Iner so nandogpaan mo natan? Si David ibaga tod sikaton nanlapud sagur na Juda, odino diad lugar na tribu nen Jerameel, odino diad lugar a panaayaman da ray Cineo.
11 Pinapatey nen David so balang sakey, laki may bii, pian anggapoy makakar ed Gat a mangibalita ed talagan gagawaen to tan saray totoo to. Onyay gagawaen nen David legan ton nanayam ed Filistia.
12 Balet nanmatalek si Akis ed kinen David, tan kuantod sikaton dili, Kabosul a maung na saray dilin totoo ton Israelita, kanyan manlingkur ed siak legan ton mambilay.
1 "Ag abayag, tinipon na saray Filisteo iray sondalo ra ta mibakal irad Israel. Inkuan sirin nen Akis ed kinen David, Andi-duaruwan natalusan mo a sika tan saray totoom et nepeg a mangibad sikamin mibakal.
2 "Talaga, ebat nen David, Aripen mo ak, tan sikan dili so makanengneng no antoy nagawaan ko. Inkuanen Akis, Maung! Gawaen ta kan managbantay ed siak legan kon mambilay.
3 "Inatey lad saman si Samuel, kanyan nanermen iray amin a totood Israel. Impompon dad Rama a dilin baley to. Pinataynan nen Saul ed paway na Israel iray amin a managpalar tan amin a manangipanon ed saray ispiritu na inaatey.
4 "Nantitipon iray sondalo na Filistia tan nankampo rad asingger ed baley na Sunem; tinipon nen Saul iray Israelita tan nankampo rad Palandey na Gilboa.
5 "Nen anengneng nen Saul iray sondalo na Filistia, ataktakot,
6 "kanyan tinepet tod KATAWAN no antoy gawaen to. Balet ag balut inebatan na KATAWAN, diad panamegley na kogip, odino diad panamegley na Urim tan Tummin, odino diad panamegley na saray propita.
7 "Insan to ingganggan iray opisyal to, Iyanapan yo ak na sakey a biin manangipanon ed saray ispiritu na inaatey, ta onla ak a mangipanon. Walay sakey ed Endor, ebat da.
8 "Nansolung na nidoman kawes si Saul, pian ag nabirbir tan diad kapansironget linman kaiba to ray duaran totoo to, ta nengnengen da may bii. Ipanonan mo ak ed saray ispiritu tan ibagam ed siak no antoy nagawa, inkuantod samay bii. Tawag moy ispiritun bitlaen ko.
9 "Inmebat may bii, Andi-duaruwan amtam so ginawa nen Ari Saul, no panoy impamataynan tod Israel ed saray managpalar tan saray manangipanon ed saray ispiritu na inaatey. Akin, sirin, et papatitan mo ak pian napapatey mo ak.
10 Insamba nen Saul, Diad ngaran na mabilay a KATAWAN, isipan kod sikan ag ka nadusa diad panggawam ed saya.
11 Siopay tawagen ko? tepet to may bii. Si Samuel, ebat to.
12 Nen anengneng na samay bii si Samuel, inmeyag tan kuantod kinen Saul, Akin et pinalikdo mo ak? Si Ari Saul ka!
13 Ag ka natatakot! kuanen ari ed sikato, Antoy nanenengneng mo? Nanenengneng kon ompapaway ed dalin so sakey ya ispiritu, ebat to.
14 Antoy nengneng to ey? tepet nen Saul. Sakey a masiken so ompapaway, ebat to. Akakolibemben. Insan naamtaan nen Saul a si Samuel iman a tua, kanyan dinmakmomo ya anggad dalin a pamagalang to.
15 Inkuanen Samuel ed kinen Saul, Akin et sinigensigen mo ak? Akin et pinapawil mo ak? Inmebat si Saul, Nagugunigonan ak a maung! Babakalen ak na saray Filisteo, tan inkaindan ak na Dios. Ag to ak la ebatan a balut, diad panamegley na saray propita, o diad saray kogip. Kanyan tinawag ta kan mangibagad siak no antoy nepeg kon gawaen.
16 Inkuanen Samuel, Akin et tawagen mo ak, no inkaindan kay KATAWAN tan nagmaliw kan kalaban ko?
17 Ginawa na KATAWAN so impaibaga tod siak ed sika: inala toy nanarian ed sika tan inter tod kinen David.
18 Ag mo inonur so ganggan na KATAWAN ta ag mo sigput a pinatey iray Amalecita tan dineral iray kayaryan da. Sikato yay makasengeg a gagawaen ya na KATAWAN ed sika.
19 Ipalima to ka tan say Israel ed Filistia. Nabwas sika tan say anak mo et mitipon kayod siak, tan ipalima met na KATAWAN ed Filistia iray sondalo na Israel.
20 Atumban tampol si Saul tan naonat ed dalin, ta ataktakot ed imbaga nen Samuel. Makapkapoy, ta ag balut angan a sanagew tan sanlabi.
21 Dinago na samay bii tan anengneng ton ataktakot, kanyan kuantod sikato, Impostak so bilay kod panggawak na kinerew mon gawaen ko.
22 Gawam pa sirin so kerewen ko. Iyabuloy mon iparaanan ta kay kanen mo. Nepeg a mangan ka, pian mabiskeg kan ompawil.
23 Ag inmabuloy si Saul, tan inkuanton ag mangan na antokaman. Balet tinanggoyur met na saray opisyal to. Inmabuloy a siansia, binmangon, tan inmirung ed katri.
24 Pinatey a tampol na samay bii so pinataba ton kilaw a baka. Insan angalay arina, kinames to, tan nanggaway tinapay ya anggapoy libadura.
25 Insaklangan toy Saul tan saray opisyal to, et angan ira. Pinmikal irad saman met lamlamang a labi.
1 "Impantitipon na saray Filisteo ed Afeo iray sondalo ra, balet nanggaway kampo iray Israelita ed abay na sobul diad Patar na Jezreel.
2 "Kinmurang iray limaran arari na Filistia a kaiba da ray nilasus tan nilibon totoo ra; walad beneg nen Akis si David tan saray totoo to.
3 "Anengneng ira na saray pangulo da ray sondalo na Filistia tan tinepet da, Antoy gagawaen da ra tay Hebreo dia? Inmebat si Akis, Si David itan, sakey ya opisyal nen Ari Saul na Israel. Abayag lan kaiba to ak. Anggapo niy nalmok a nankasalananan to nanlapu lad insabi tod siak.
4 "Balet ampetang so olo da ra may pangulo na saray sondalo na Filistia ed kinen Akis tan kuandad sikato, Papawil mo tan a too ed baley ya inter mod sikato. Ag mo pipilaen ed sikatayon mibakal, ta ag la pigan sikatayo la laingen so labanan to no peles na bakal. Anto ta niy lalon maabig a polaing ed pamapawil toy maung a linawa na katawan to nen say pamatey tod saray totoo tayo?
5 "Sikato ya may David a totokuyen na saray bibii ed kakantaen da legan dan mansasayaw, Si Saul amatey na nilibo, balet si David amatey na asamplon libo.
6 "Tinawag nen Akis si David tan kuantod sikato, Sambaan kod mabilay a Dios na Israel a matoor kad siak; tan maliket ak a kaiba ta kan milaban ed sayan bakal. Anggapo niy nalmok a nankasalananan mo nanlapu lad insabim ed siak ya anggad natan. Balet ag ka abuloyan na saray arum a panguloy sondalo.
7 "Kanyan laka lan mareen, tan ag ka manggagaway makapaimbel na linawa ra.
8 "Inmebat si David, Antoy ginawak a makapoy a? No onung na imbagam et anggapoy nalmom a nankasalanan ko nanlapu lad inggapok a manlingkur ed sika ya anggad natan, akin et ag ak milad sikan milaban ed saray kalaban mo, katawan ko tan arik?
9 "Inmebat si Akis, Tua tay imbagam. Ipapasen ta kan matoor a singa sakey ya anghil na Dios. Balet inkuan na saray arum a panguloy sondalo ya ag ka makapilad sikamin mibakal.
10 Kanyan sirin, David, amin yon anaynan ed kinen Saul tan tinmipon ed siak, nepeg yoy ombangon a masaksakbay nabwas tan pawil ki la kaliwawa to.
11 Kanyan kaimbuas, si David tan saray totoo to, asaksakbay iran pinmikal ya ompawil ed Filistia, balet saray Filisteo linma rad Jezreel.
1 "Kalabas na duay agew, sinmabid Siclag si David tan saray totoo to. Dinogpaan na saray Amalecita so sagur na Juda tan say Siclag. Pinoolan day baley na Siclag,
2 "tan dinakep da ray bii; anggapoy pinatey da, balet inawit da ran amin nen tinmaynan ira.
3 "Nen sinmabiy David tan saray totoo to, nalmo ran apoolan so baley tan adakep iray kaasawaan da, tan saray anak dan lalaki tan bibii.
4 "Kanyan nanakis si David tan saray totoo to, tan ag ira tinmonda ya anggad makapkapoy la ran maung.
5 "Adakep met iray anggan duaran asawa nen David, a si Ahinoam a taga Jezreel tan si Abigail ya asawa nen Nabal a taga Carmelo.
6 "Agunigon a maung si David, ta ansakit a maung so linawa da ray totoo to lapud inkabalang na saray anak da, tan pantotongtongan da lan tupaken. Balet pinabiskeg na KATAWAN a Dios to so linawa to.
7 "Inkuanen David ed kinen Abiatar a pari tan lakin anak nen Ahimelec, Iyakar mo dia may ipod, et inyakar nen Abiatar ed sikato.
8 "Tinepet nen David ed KATAWAN, Osilan ko ray dinmogpa? Naabot ko ni ra kasi? Inmebat so KATAWAN, Osilan mo ra: andi-duaruwan naabot mo ra tan nabawim iray adakep.
9 "Pinmikal si David tan saray anem a lasus a totoo to, et nen akasabi rad Kolus na Besor, tinmilak iray arum diman.
10 Intuloy nen David so kurang to a kaiba to ray apat a lasus a lalaki; atilak iray duan lasus, ta diad inkaksawan da, ag da nabaliw lay kolus.
11 Saramay kaiba nen David akalmo rad bario na ogaw ya Egipsio tan inyakar dad kinen David. Pinakan tan pinainom da;
12 initdan da met na pigaran impamagan bungay igos tan duaran monggol a pasas. Kayari ton angan, pinmawil so gendat a biskeg to; diad imbeneg a taloy agew tan taloy labi ag balut angan o inminom.
13 Tinepet nen David ed sikato. Siopay amom, tan taga ka iner? Taga ak Egipto, tan aripen ak na sakey ya Amalecita, ebat to. Taloy agew lay apalabas nanlapu lad impangitilak na amok; ta nansakit ak.
14 Dinogpaan miy lugar da ray Kereteo, diad sagur na Juda, tan say lugar da ray boleg nen Caleb; pinoolan miy Siclag.
15 Ibaan mo ak pan onlad kawalaan da ray dinmogpa, kuanen David. Inmebat, Ibaan ta ka no isipan mod ngaran na Dios ya ag yo ak papateyen o ipapalima ed amok.
16 Inibaan to sirin si David a mananap ed sikara. Akaykayat ed nandoroman pasen iray dinmogpa tan malikeliket iran manaakan tan maniinom, lapud karakel na asamsam dad dalin na Filistia tan Juda.
17 Diad palbangon ed ontombuk ya agew, dinogpaan ira nen David tan nilabanan to ra ya anggad labi. Likud ed apat a lasus a babalolakin batik a nankabayod kamilyo, anggapo lay arum ya akabatik.
18 Abawi nen David ya amin iray sinamsam na saray Amalecita, pati saray duaran asawa to.
19 Anggapon balut so naandi; abawi nen David ya amin iray lalaki tan bibiin anak na saray totoo to, tan amin a bengatlan sinamsam na saray Amalecita.
20 Abawi to met ya amin iray baka tan karniro; saray totoo to dinadagdag da ran amin tan kuanda, Kayaryan nen David ira ya!
21 Insan amawil ed saramay duan lasus a lalakin tinmilak ed gilig na Kolus na Besor lapud inkaksawan dan maung. Inmabet irad kinen David tan saray totoo to; dinago ra nen David tan ampetapetang so impangilugay tod sikara.
22 Balet inkuan na saray maoges tan andi-kakanaan a totoon akilad kinen David, Ag ira akilad sikatayo, kanyan ag ti ra itdan na antokaman ya asamsam. Alaen da labat iray kaasawaan da tan saray anak da tan onla la ra.
23 Balet inmebat si David, Agagik ira, ag yo ya nayarin gawaen ed saray inter na KATAWAN ed sikatayo! Inyarawi to tayod kaatapan tan impanalo to itayod saray dinmogpa.
24 Anggapoy onabuloy ed satay ibabaga yo! Nepeg a panaapagan yoy betang na balang sakey. Namparay betang na saray ontilak a nambantay na abasto tan saray onlan mibakal.
25 Ginawa nen David yan totontonen et anggad natan, totombuken ni ya na saray Israelita.
26 Nen pinmawil ed Siclag si David, impawitan to ray kakaaro to, saray panguloy Juda, na saray asamsam tan impaibaga to, Niay panangarok ed sikayo; kabyangan ya na saray asamsam mid saray kalaban na KATAWAN.
27 Impawitan to ray totood Betel, saray totood Ramot a sagur na Juda, tan saray totood Jatir,
28 Aroer, Sifmot, Estemoa,
29 tan Racal; saray kabyangay boleg nen Jerameel, tan saray Cineo,
30 saray totood Horma, Borasan, Atac,
31 tan Hebron. Impawitan to ray amin a lugar a nanlalapwan to tan saray totoo to.
1 "Saray Filisteo binakal da ray Israelita diad Palandey na Gilboa. Amayamay iray inaatey ya Israelita balet akabatik iray arum.
2 "Nabot na saray Filisteo si Saul tan saray lalakin anak to, tan pinatey da ray talora ed saray anak to a di Jonatan, Abinadab, tan Milkisua.
3 "Pinasiay laban ed kawalaan nen Saul, et pinana na saray kalaban da, tan mapalaloy inkasugatan to.
4 "Inkuantod balolakin umaawit na armas to, Oyus moy ispadam tan patey mo ak, ompan panggalaw-galawan da ak ira yan anggapoy Dios. Balet ag ginawa na samay balolaki, ta mapalaloy takot to. Kanyan inala nen Saul so dilin ispada to, insan to intakbay laman to ed samay ispada.
5 "Nen anengneng na samay balolaki ya inatey lay Saul, intakba to met so laman to ed dilin ispada to, et inatey a kaiba toy Saul.
6 "Onyay impatey nen Saul, saray taloran anak ton lalaki, tan samay balolaki; diad saman ya agew inaatey iray amin a totoo nen Saul.
7 "Nen saray Israelitan manaayam ed biek a dapag na Patar na Jezreel tan bokig na Ilog na Jordan et nadngelan dan kibatiktik iray sondalo na Israel tan apatey si Saul tan saray anak ton lalaki, tinaynanan da ray baley da. Insan sinmabi ray Filisteo tan nanayam irad saraman a baley.
8 "Diad kaimbuas na kayariy bakal, saray Filisteo linma ran mangalay antokaman a naala rad saray bangkay. Nalmo ray bangkay nen Saul tan saray taloran lalakin anak to a kibalatar irad Palandey na Gilboa.
9 "Pinotut day olo nan Saul tan inala ray armas to, insan ira angibaki ed Filistia na pigaran totoo a mangibagay maung a balita ed saray talintaoy diriyos da tan diad saray totoo ra; impaawit dad sikara imay olo tan saramay armas nen Saul.
10 Insan da inyan ed dalem na timplo na diosan Astarot iray armas nen Saul, tan impasak day kabalgan tod padir na siudad na Bet-san.
11 Nen nadngelan na saray totood Jabes diad Galaad so ginawa na saray Filisteo ed kinen Saul,
12 amin a sankasebegan a lalaki, nanakar iran sanlabi a linmad Bet-san. Inala rad padir iray bangkay di Saul tan saray anak ton lalaki, insan inyakar da rad Jabes a diman da ra pinoolan.
13 Inala da ray pokel tan inkotkot da rad silong na tamarisko, diad baley na Jabes, insan ira nanayuno a pitoy agew.