1 "Kayariy impatey nen Josue saray Israelita tinepet dad Katawan, Dinan ed saray tribu mi so ononan onla ya ondogpad saray Cananeo?
2 "Say Katawan inmebat, Say tribu nen Juda so ononan ondogpa. Impasilong ko lad pakaoley da so dalin na Canaan.
3 "Saray totoo nen Juda kuandad saray totoo nen Simeon ya agi nen Juda, Mila kayod sikami ed pasen a nipabetang ed sikami, ta mantulongan itayon mibakal ed saray Cananeo. Insan kami met milad sikayo ed pasen a nipabetang ed sikayo. Nanolup sirin ya akibakal iray tribu di Simeon
4 "tan Juda. Impanalo ra na Katawan ed saray Cananeo tan saray Perezeo, tan tinalo ray samplon libon totoo diad Bezek.
5 "Arumog dad man si Adoni-bezec tan nilabanan da.
6 "Batik si Adoni-bezec, balet inosilan da, narel da, tan pinopotut da ray tangan na lima tan sali to.
7 "Inkuanen Adoni-bezec, Nandodokdok nen saman na ibung ed silong na lamisaan ko iray arari ya apotut-potut so tangan na lima tan sali ra. Gagawaen ed siak natan na Dios imay ginagawak ed sikara. Niakar ed Jerusalem si Adoni-bezec, tan diman la inatey.
8 "Dinogpaan na saray totoo nen Juda so Jerusalem tan adakep da. Pinapatey da ray totoo to tan pinoolan day siudad.
9 "Kayari to ya, linma ran akibakal ed saray Cananeon manaayam ed kapokdulan a bario, diad saray alusadsar na pokdul, tan diad saray patar ed abalaten
10 Linma ran akibakal ed saray Cananeon manaayam ed siudad na Hebron a tatawagen nen saman na Kiryat-arba. Tinalo dad man iray boleg di Sesai, Ahiman, tan Talmai.
11 Manlapud man saray totoo nen Juda linma ran akibakal ed siudad na Debir a tatawagen nen saman na Kiryat-sefer.
12 Inkuan na sakey ed saramay totoo nen Juda a si Caleb, Paasawak si anak kon Acsa ed lakin makadakep ed Kiryat-sefer.
13 Si Otniel, say anak na lakin yogtan nen Caleb a si Cenaz, so akadakep ed samay siudad, kanyan impaasawa nen Caleb ed sikato si Acsa a marikit to.
14 Diad agew na bansal, impurpurek nen Otniel ed kinen asawa to ya onkerew na alog ed kinen ama to. Inmepas ed asno to si Acsa, insan tinepet nen Caleb ed sikato no antoy labay to.
15 Inmebat si Acsa, Rigaloan yo ak pa na dalin a walay sobul to. Samay inter yod siak a dalin ed bandad baybay et amaga tan araldalem so sobul. Kanyan inter nen Caleb ed sikato so sobul ed bandad tulo tan leksab.
16 Saray Cineo a kabyangay boleg na katolangan nen Moises et akila rad saray totoo nen Juda manlapud Jerico, say siudad na saray kiew a palmira, ya anggad kalawakan na Juda diad abalaten na Arad. Nanayam irad man a kaiba da ray Amalecita.
17 Nankakaiba iray totoo nen Juda tan saray totoo nen Simeon tan tinalo da ray Cananeo a manaayam ed siudad na Zefat. Sigput dan dineral yan siudad, kanyan inngaran da na Horma.
18 Tinulongan na KATAWAN iray totoo nen Juda, kanyan asakup da ray kapokdulan a dalin. Balet ag da alooban iray Gaza, Ascalon, tan Ecron, pati saray kaliber-liber dan pasen. Sarayan totoon manaayam ed gilig na dayat et wala ray balatyang a karwahi ra, kanyan ag ira apataynan na saray totood Juda.
19
20 Onung na ingganggan nen Moises, niiter so Hebron ed kinen Caleb ya amataynan ed siudad na taloran boleg a si Anak so sengeg da.
21 Balet ag pinataynan na saray totood tribu nen Benjamin iray Jebuseo a manaayam ed Jerusalem, tan nanlapud saman saray Jebuseo kaiba dan nanayam diman iray totoo nen Benjamin.
22 Dinogpaan na saray tribu di Efraim tan Manases so siudad na Betel a tatawagen na Luz ed saman a panaon. Tinulongan ira na KATAWAN. Angibaki ra ed siudad na saray ispia.
23
24 Akanengneng ira yan ispia na sakey a lakin ompapaway ed siudad tan kuandad sikato, Ibagam ed sikami no panoy kaloloob ed siudad, et ag mi ka diwiten.
25 Kanyan imbangat to ra. Saray totoo nen Efraim tan Manases pinapatey da ray amin a totood siudad, likud ed samay too tan saray kabyangay pamilya to.
26 Insan linmad dalin da ray Heteo imay laki, amaalagey na siudad diman, tan inngaran to na Luz a ngaran to ni ya anggad natan.
27 Ag pinataynan na tribu nen Manases iray totoon manaayam ed saray siudad na Get-sean, Taanac, Dor, Ibleam, Megido, tan saray kaabay dan baley; nansiansian nanayam irad may Cananeo.
28 Nen binmiskeg iray Israelita, pinasoot dan nankimey para sikara iray Cananeo, balet ag da ni ran siansia pinataynan.
29 Ag pinataynan na tribu nen Efraim iray Cananeo a manaayam ed siudad na Gezer, kanyan nansiansian kaiba da ray Cananeo a nanayam diman.
30 Ag pinataynan na tribu nen Zabulon iray totoon manaayam ed saray siudad na Kitron tan Nahalol, kanyan saray Cananeo nansiansian kaiba da ran nanayam diman tan a pasoot iran nankimey para saray totoo nen Zabulon.
31 Ag pinataynan na tribu nen Aser iray totoon manaayam ed saray siudad na Acco, Sidon, Ahlab, Aczib, Helba, Afec, tan Rehob.
32 Saray totoo nen Aser et kaiba da ran nanayam iray Cananeo, bangta ag da ra pinataynan.
33 Ag pinataynan na tribu nen Neftali iray totoon manaayam ed saray siudad na Bet-semes tan Bet-anat. Saray totoo nen Neftali et kaiba da ran nanayam iray Cananeo, balet pinasoot da ran nankimey para sikara.
34 Sinonson na saray Amorreo ed kapokdulan a pasen iray totood tribu na Dan tan ag da ra inabuloyan a manayam ed patar.
35 Nansiansia ray Amorreo a nanayam ed Ayalon, Saalbim, tan diad Palandey na Heres, balet nansiansia ya inoleyan ira na saray tribu di Efraim tan Manases tan pinasoot da ran nankimey para sikara.
36 Say baybay na Sela a ketegan da ray Edomita et ontalonton ya anggad Dalan na Acrabim.
1 "Manlapud Gilgal say anghil na Katawan linmad Bokim tan kuantod saray Israelita, Impaway ta kayod Egipto tan inyakar ta kayod dalin ya insipan kod saray atateng yo. Inkuanko, Ag kon balut deralen so impisipanan kod sikayo.
2 "Ag kayon balut misisipanan ed saray totoon manaayam ed sayan dalin. Nepeg yon igeba iray altar da. Balet ag yo sinumpal so imbagak ed sikayo. Sinumlang yo laingen!
3 "Kanyan ibabagak ed sikayo natan ya ag ko pataynanen ira yan totoo legan yon mankukurang. Magmaliw iran kalaban yo, tan napatitan kayo ed pangigalang ed saray diriyos da.
4 "Nen imbaga ya na samay anghil na Katawan, inmakis ya amin iray Israelita,
5 "kanyan atawag iman a pasen a Bokim. Angisaklang irad man na bagat ed Katawan.
6 "Insan imbaki la nen Josue iray totoo, tan linman mangayaryan ed betang ton dalin so balang sakey.
7 "Legan a mabilay si Josue, nanlingkur ed Katawan iray totoo tan anggan kayariy impatey to, intuloy day nanlingkur legan a mabilay ni ray pangulon akanengneng na amin da ray makapakelaw a ginagawa na Katawan ed Israel.
8 "Say aripen na Katawan a si Josue a lakin anak nen Nun et inatey nen mantaon na sanlasus tan samplora.
9 "Nipompon ed dilin parti na dalin to ed Timnat-sera diad pokdul na Efraim, diad baybay na Palandey na Gaas.
10 Inaatey ya amin iray kabyangan na saman a kailalakan; alingwanan na saray kabyangan na sinmalat a kailalakan so Katawan tan saray ginagawa tod Israel.
11 Insan nankasalanan ed Katawan iray totood Israel tan nanlingkur ira ed saray Baal.
12 Tinondaan day angigalang ed Katawan a Dios na saray atateng da, say Dios ya angipaway ed sikara ed Egipto. Inggapo da met so angigalang ed saray arum a diriyos na saray totood kaliber-liber da. Dinmadakmomo ra ed sikara, kanyan impampasnuk day Katawan.
13 Tinondaan day angigalang ed Katawan tan nanlilingkur ira ed saray Baal tan Astarot.
14 Kanyan mapalaloy impakapasnuk na Katawan ed sikara tan inabuloyan ton dinogpaan ira na saray kalaban da tan tinakewan ira. Inabuloyan to ran nipasilong ed pakayari na saray kalaban dad kaliber-liber da, tan saray Israelita et ag da niagel so sikaran dili.
15 Kapag onla ran mibakal, sumpad sikara so Katawan onung na sinambaan to lan gawaen to. Mapalaloy inkairapan da.
16 Insan say Katawan initdan to ra na saray pangulon huis ya angyagel ed sikarad saray kalaban da.
17 Balet ag da dinengel ira yan pangulo ra. Aliwan matoor iray Israelita ed Katawan tan angigalang ira ed saray arum a diriyos. Inmonur ed saray ganggan na Katawan iray atateng da, balet tinondaan na sayan balon kailalakan so tinmoluk ed Katawan.
18 Kapag say Katawan et mangiter ed Israel na pangulo, say Katawan tulongan to yan pangulo tan iyagel to ray totoo to ed saray kalaban da legan a mabilay yan pangulo. Kinasian ira na Katawan lapud manngesnges irad kairapan da, ta pinapasegsegang da ra.
19 Balet kapatey na pangulo, saray totoo ompawil irad gendat a kabibilay da tan mapalalo niy kaogsan da nen say kaogsan na imbeneg a kailalakan. Nanlilingkur tan angigagalang irad saray arum a diriyos, tan diad gaway awet na olo ra intuloy day maoges a kabibilay da.
20 Insan say Katawan pinmetang so olo tod Israel tan kuanto, Sayan bansa dineral day sipanan ya ingganggan kon onuren na saray atateng da. Lapud ag da ak inonur,
21 ag ko la pataynanen iray bansan wala nid dalin nen inatey si Josue.
22 Ikanak ira yan bansa ed panubok kod saray Israelita no matoor irad siak kasi a singa inkatoor na saray atateng da.
23 Kanyan inabuloyan na Katawan a mansiansiad dalin ira yan bansa; ag to impanalod sikara si Josue odino pinataynan ira kapatey nen Josue.
1 "Kanyan say Katawan impansiansia ton nanayam ed dalin na Canaan iray pigaran bansa, pian nasubok to ray Israelita ya ag akibakal ed Canaan.
2 "Ginawa to ya labat, pian nabangatan toy balang kailalakan na saray Israelita nipaakar ed bakal, nagkalalo lad saray ag nin balut akapibakal nen saman.
3 "Saray atilak ed dalin na Israel et saray limaran siudad na Filistia, amin da ray Cananeo, saray Sidoneo, tan saray Heveo a manaayam irad Kapalandeyan na Libano manlapud Palandey na Baalhermon ya anggad Dalan na Hamat.
4 "Sikaray inkana na Dios ed impanubok tod Israel, pian naamtaan to no ononur kasi odino onsumlang iray Israelita ed saray ganggan na Katawan ya inter tod saray atateng da diad panamegley nen Moises.
5 "Kanyan saray Israelita kaiba ran nanayam ed dalin iray Cananeo, saray Heteo, saray Amorreo, saray Pereseo, saray Heveo, tan saray Jebuseo.
6 "Akikiasawaan irad sikara tan angigagalang irad saray diriyos da.
7 "Alingwanan na saray Israelita so Katawan a Dios da; nankasalanan irad sikato tan inggagalang da ray talintao nen Baal tan Asera.
8 "Kanyan akapasnuk so Katawan ed Israel, et inabuloyan toy Ari Cusan-risataim na Mesopotamia a nadakep to ra. Waloy taon a nagmaliw iran walad silong na pakaoley to.
9 "Insan tinmawag ed Katawan iray Israelita, et angibaki na sakey a lakin angilaban ed sikara. Sayan laki et si Otniel ya anak nen Kenaz a yogtan nen Caleb.
10 Linmoob ed sikato so ispiritu na Katawan, tan nagmaliw a pangulo da ray Israelita. Akibakal si Otniel, et impanalo na Katawan ed ari na Mesopotamia.
11 Nanoley so kareenan ed Israel na apataploy taon, insan inatey si Otniel.
12 Nankasalanan lamet ed Katawan iray Israelita. Lapud sayan ginawa ra, say Katawan impagmaliw ton mabiskeg niy Ari Eglon na Moab nen say Israel.
13 Akigampiy Eglon ed saray Ammonita tan saray Amalecita; tinalo ray Israel tan adakep day Jerico a siudad na saray kiew a palmira.
14 Labinwaloy taon a walad silong na pakaoley nen Eglon iray Israelita.
15 Insan tinmawag ed Katawan iray Israelita, kanyan angibaki na sakey a too ya angyagel ed sikara. Sayan too et si Aod a lakin anak nen Gera tan kabyangay tribu nen Benjamin. Kawigi yan too. Imbaki na saray Israelita si Aod ed Moab tan sankaawit to ray rigalon para si Ari Eglon.
16 Nanggaway Aod na duaray tarem ya ispada a ngalngalin kapalduay mitro so karokey to. Imbalkes tod kawanan a diking to ya asakbungay kawes to.
17 Insan inyakar to ray rigalo ed kinen Eglon a mataba-taban laki.
18 Kapangiter nen Aod ed saramay rigalo, imbaga tod angawit na rigalo ya onsempet la ra.
19 Balet amoliktar si Aod diad kinortin bato ya asingger ed Gilgal tan pinmawil ed kinen Eglon. Inkuanto, Kagalang ya ari, walay maamut a balitan ibagak ed sika. Kanyan ingganggan na ari iray aripen to, Taynan yo kami dian bukor! Pinmaway sirin ya amin ira may aripen.
20 Insan legan a say ari et mambukbukor a manyodyorung ed dalem na ambetel a kuarto tod toktok na abung to, inasinggeran nen Aod tan kuanto, Walay papaibagad siak na Dios ed sika. Inmalagey imay ari.
21 Inoyus na kawigin lima nen Aod imay ispadad kawanan a diking to, insan to intoruk ed eges na ari.
22 Pinmanek ed eges to so anggan pati potan to may ispada tan akulyapotan na taba. Ag inoyus nen Aod imay ispada ed eges na ari, kanyan tinmalos ya anggad beneg to diad nanleetan na saray ulpo to.
23 Insan pinmaway si Aod, insara to ray puirtan pinawayan to, tan
24 tinmaynan la. Pinmawil ira may aripen na ari, et anengneng dan akasara ray puirta. Balet abaloan dan walad dalem so ari tan mampapainawa.
25 Nanalagar irad paway ya anggad naalipanesan la ra. Nen ag nin siansia lokasan na ari so puirta, inala ra so tombuk tan nilokasan day puirta. Wadman ya akarokul ya inatey ed datal so katawan da.
26 Legan dan nanalagar, batik si Aod. Dinmalan ed kawalaay kinortin bato tan tinmuloy ed Seirata.
27 Nen sinmabid man ed kapokdulan na Efraim, pinaknul toy trumpita a panawag ton mibakal iray lalakin Israelita; impangulo to ran inmakseb a nanlapud saray kapokdulan.
28 Inkuantod sikara, Tombuk yo ak! Impanalo kayo na Katawan ed saray kalaban yon Moabita. Kanyan tinombuk dan nampaleksab si Aod tan dinakep day pasen a babaliwan na saray Moabita ed Ilog na Jordan; ag da inabuloyan so siopaman a toon ombaliw.
29 Diad saman ya agew apatey da so sakey a samplon libo a sankaabigan a Moabitan sondalo; anggapod sikara so akabatik.
30 Diad saman ya agew tinalo na saray Israelita so Moab, tan walomplon taon a nanarid dalin na Israel so kareenan.
31 Si Samgar a lakin anak nen Anat so tinmombuk a pangulo. Inyagel to met so Israel diad impamatey to na anem a lasus a Filisteo diad panamegley na baston a panagdagdag na baka.
1 "Kayari na impatey nen Aod, nankasalanan lamet ed Katawan iray Israelita.
2 "Kanyan say Katawan impadakep to rad kinen Jabin a Cananeo a nanarid siudad na Hazor. Say pangulo na saray sondalo to et si Sisara a nanayam ed Haroset-na-saray-Hintil.
3 "Si Jabin walay siam a lasus a balatyang a karwahi ton para bakal, tan duamploy taon a pinapairap ton inoleyan iray totood Israel. Insan kinmerew na tulong ed Katawan iray Israelita.
4 "Diad saman a panaon si propita Debora a biin asawa nen Lapidot so pinagkahuis a pangulo da ray Israelita.
5 "Inmirung ed silong na sakey a kiew a palmira diad nampegleyan na Rama tan Betel diad nipokdul a dalin na Efraim, insan dinmadagod sikato ray totoo, ta ibaga tod sikaray nepeg a nagawa odino gawaen da.
6 "Aminsan ya agew impaawit toy Barac a lakin anak nen Abinoam a taga siudad na Kedes na Neftali tan kuantod sikato, Say Katawan a Dios na Israel et inter tod sika yan ganggan: Mangala kay samplon libon lalaki ed saray tribu di Neftali tan Zabulon tan ipangulom iran onlad Palandey na Tabor.
7 "Papawayen koy Sisara a pangulo na saray sondalo nen Jabin, ta labanan to kayo ed Ilog na Kison. Awiten to ray karwahi to tan saray sondalo to, balet panaloen ta kayod sikato.
8 "Insan inmebat si Barac, Onla ak no mila kad siak, balet no ag ka mila, ag ak onla.
9 "Inmebat si Debora, No ontan sirin, mila ak ed sika, balet aliwan sikay napagalangan ed nagamuran a pananalo, lapud ipalima na Katawan ed sakey a bii si Sisara. Kanyan linmad Kedes si Debora a kaiba toy Barac.
10 Tinawag diman nen Barac iray kabyangay tribu di Zabulon tan Neftali, tan tinmombuk ed sikato iray samplon libon lalaki. Akilad sikato si Debora.
11 Legan to ya inlira nen Heber a Cineo so tulda to ed asingger ed Kedes, diad abay na kiew a logo diad Zananim. Inarawian nen Heber iray kapara ton Cineo a kabyangan iray boleg nen Hobab a bayaw nen Moises.
12 Nen akabatan nen Sisara a linmay Barac ed Palandey na Tabor,
13 tinawag to ray siam a lasus a karwahi ton balatyang tan amin da ray totoo to tan imbaki to rad Ilog na Kison manlapud Haroset-na-saray-Hintil.
14 Insan inkuanen Debora ed kinen Barac, Laka! Say Katawan so mangipangulod sika! Natan ed sayan agew ipatalo tod sika si Sisara. Kanyan inmakseb si Barac a nanlapud Palandey na Tabor a kaiba to ray samplon libon totoo to.
15 Nen dinmogpa si Barac tan saray sondalo to, ginewgew na Katawan si Sisara, pati saramay karwahi to tan amin a totoo to. Inmepas ed karwahi to si Sisara tan batik.
16 Inosilan nen Barac ira may karwahi tan saramay sondalo ya anggad Haroset-na-saray-Hintil, et apatey ya amin iray sondalo nen Sisara. Anggapoy lakin atilak ed sikara.
17 Batik si Sisara ed tulda nen Jael ya asawa nen Heber a Cineo, lapud maung so pipiolup nen Ari Jabin na Hazor ed pamilya nen Heber.
18 Pinmaway si Jael a mangabet ed kinen Sisara tan kuantod sikato, Loob ka; loob ka diad tuldak. Ag ka natatakot. Kanyan linmoob tan inyamut nen Jael ed sanib na kurtina.
19 Inkuanen Sisara ed sikato, Itdan mo ak pay inomen, ta napgaan ak la. Nilokasan nen Sisara so katat a supot a pananginay gatas, pinainom to, tan pinaamut to lamet.
20 Insan inkuanen Sisara ed kinen Jael, Manalagey kad puirtay tulda, et no walay onsabi tan tepeten to no walay too dia, ibagam ya anggapo.
21 Mapalaloy inkaksawan nen Sisara, kanyan akaogip na malmalet. Angalay Jael na martilyo tan sakey a palpal na tulda, nankalkalnan nilooban toy Sisara, insan to pinatey diad panamegley na impangipanek ton anggad dalin na samay palpal ed alupising nen Sisara.
22 Nen sinmabiy Barac a manaanap ed kinen Sisara, pinmaway si Jael a mangabet ed sikato tan kuantod sikato, Gala dia! Ipanengneng kod sikay toon aanapen mo. Kanyan linmoob si Barac a kaiba toy Jael, tan wadman si Sisara ya akarokul ya inatey a nipanek a tinmalus ed alupising to so palpal na tulda.
23 Diad saman ya agew impanalo na Dios iray Israelita ed kinen Jabin ya arin Cananeo.
24 Sinonson da lan sinonson a dinogpaan si Jabin ya anggad apatey da.
1 "Diad saman ya agew si Debora tan Barac a lakin anak nen Abinoam et kinanta da yan kanta:
2 "Idayew yoy Katawan! Talagan sipaparaan lan mibakal nen saman iray Israelita; maabuloy ya akibakal iray totoo.
3 "Dengel kayo, sikayo ran arari! Talineng kayo, sikayo ran manoley! Kantaan tan togtogan ko so Katawan a Dios na Israel.
4 "Katawan, nen tinaynan moy kapalandeyan na Seir, nen pinmaway ka ed dalin na Edom, ayegyeg so dalin, tan pinmelag so oran a nanlapud tawen. On, nikalbo so danum a nanlapud saray lorem.
5 "Saray kapalandeyan ayegyeg ira ed arap na Katawan na Sinai, diad arap na Katawan a Dios na Israel.
6 "Diad saramay agew nen Samgar a lakin anak nen Anat, diad saramay agew nen Jael, ag la ondadalan ed bansa iray manoolup a biahiro, tan onsasaliberber ed basbas iray totoo.
7 "Debora, abayag ya ataynan iray baley na Israel; anggapoy onkitakitaw ed sikara kasakbayan a sinmabi ka, a singa sakey ya ina ed Israel.
8 "Insan walay bakal ed dalin nen nampili na balon diriyos iray Israelita. Diad apataplon libon lalaki ed Israel, walay sakey a nanawit na samper odino pika?
9 "Akilad saray pangulod Israel so pusok, diad saray totoon mabolbolus ya akilan akibakal. Idayew yoy Katawan!
10 Salita yoy nipaakar ed saya, sikayo ran managkabayod ampotin asno, a manyodyodyorung ed saray silya, tan sikayo ran nepeg a manakar inermay laen yo.
11 Dengel kayo! Saray maingal a karaklan ed kaliber-liber na saray bobun et ibabaga ra so saray impanalo na Katawan, saray impanalo na saray Israelita! Insan nambabansag ya inmakseb a nanlapud saray siudad da iray totoo na Dios.
12 Ipangulom, Debora, ipangulom! Ipangulom! Mankanta ka! Ipangulom! Kurang ka, Barac a lakin anak nen Abinoam; mankurang kan sankatengteng mo ray totoon adakep mo!
13 Insan saray matoor ya Israelita et linma ran namparontal ed saray pangulo ra; saray totooy Katawan dinmago rad sikato a sipaparaan iran mibakal.
14 Manlapu ra ed Efraim linma ra ed patar diad nibeneg na tribu nen Benjamin tan saray totoo to. Inmakseb manlapud Makir iray panguloy sondalo; inmakseb manlapud Zabulon iray opisyal.
15 Sinmabi ray pangulo nen Isacar a kaiba ray Debora; on, sinmabiy Isacar a pati si Barac, tan saray totoo et tinombuk dad patar. Balet naapag so tribu nen Ruben; ag ira akapampapakna ya ontombuk.
16 Akin et tinmilak iran kaiba da ray karniro? Pian narengel da ray pumapastol ya ontatawag ed saray karniro? On, apaldua so tribu nen Ruben; ag ira akapampapakna ya ontombuk.
17 Nanayam ed bokig na Jordan iray kabyangay tribu nen Gad, tan saray kabyangay tribu nen Dan et nansiansia rad abay na saray bapor. Nanayam ed gilig na dayat iray kabyangay tribu nen Aser; nansiansia rad abay na danum.
18 Balet saray totoo di Zabulon tan Neftali imposta ray bilay dad bakalan.
19 Sinmabid Taanac ed gilig na kolus na Megido iray arari tan akilaban ira; akibakal iray arari na Canaan, balet anggapoy imbatik dan pilak.
20 Manlapud tawen akilaban iray bitewen; diad ibebeltang dad tawen, nilabanan day Sisara.
21 Intaban iray agos na delap ed Kison Say maples ya agos na Ilog na Kison. Ituloy koy onsulong, onsulong, a mabiskeg!
22 Insan mapanaspas a sinmabi ray kabayo, a mabanegbeg ed dalin iray sali ra.
23 Isamba yoy dalin na Meroz, kuay anghil na Katawan. Isamba yo, isamba yo iray manaayam diman. Ag ira sinmabin ontulong ed Katawan, sinmabi ran sondalo a mibakal ed saray kalaban to.
24 Say sankapalaran ed saray bibii et si Jael, say asawa nen Heber a Cineo sikatoy sankapalaran ed saray manaayam ed saray tulda.
25 Kinmerew na danum si Sisara, balet initdan to na gatas; inyakaran to na kinmegtel a gatas ed marakep a yaung.
26 Binembenan tod sakey a lima to so sakey a palpal na tulda, tan diad sakey a lima say martilyo; minaso tod olo si Sisara, et nabtag so lapis-lapis na olo to; pinanekan toy palpal so alopising to.
27 Nipatalimukor si Sisara, insan atumbad saliyan nen Jael. Diad saliyan nen Jael kinmapoy si Sisara; nipatalimukor, tan alokbub; alokbub ed dalin, insan inatey.
28 Tinmandag ed bintana si ina nen Sisara; tinmakiling ed saray barandilyas na bintana. Tinepet to, Akin et abayag lan ag ni sinmabi so karwahi to? Akin et agaylay tantan na isabi na saray kabayo to?
29 Inmebat iray sankarunongan a katulong ton bibii, tan inolit-olit ton imbagad sikaton-dili,
30 Naabala ra labat a manaanap na nasamsam da a panaapagan da, sakey o duaran bibii so para sakey a sondalo, marakep ya abel so para si Sisara, abordaan ya abel so para kolibemben na riyna.
31 Ontan pa komun so ipatey na amin a kalaban mo, O Katawan, balet onsinag komun a singa ombubutay ya agew iray kakaarom! Insan nanarin apataploy taon so kareenan ed dalin.
1 "Nankasalanan lamet ed Katawan iray Israelita, kanyan inabuloyan ton naoleyan iran pitoy taon na saray totoon taga Madian.
2 "Mabiskeg ni ray Madianita nen saray Israelita, et kiamut-amut ed ongib iray Israelita tan diad saray arum a pasen ed kapokdulan ya arawid kaatapan.
3 "Kapag mantanem iray Israelita, dogpaan ira na saray Madianita a kaiba da ray Amalecita tan saray tribu ed kalawakan.
4 "Mankampo ra ed dalin da tan deralen da ray tanaman da, ya anggad baybay ed pasen a kaliber-liber na Gaza. Alaen da ray amin a karniro, baka, tan asno ra. Anggapoy ikera ran pambilay na saray Israelita.
5 "Singa karakel na dorun no onsabi ran kaiba da ray ayayep da tan saray tulda ra. Ag ira nabilang tan saray kamilyo ra. Sinmabi ra tan dinederal day dalin,
6 "et ag makalaban ed sikara iray Israelita.
7 "Insan kinmerew na tulong ed Katawan iray Israelita, pian makalaban irad saray Madianita.
8 "Angibakid sikara so Katawan a Dios na Israel na sakey a propita tan impaikuantod sikara: Impaway ta kayod inkaaripen ed Egipto.
9 "Inyagel ta kayod saray Egipsio tan saray totoon linmalaban ed sikayod sayan dalin. Legan na pankukurang yo, pinataynan ko ra tan inter kod sikayo so dalin da.
10 Imbagak ed sikayo a siak so Katawan a Dios yo tan ag kayo nepeg a mangigalang ed saray diriyos da ray Amorreo a say dalin da so panaayaman yo natan. Balet ag yo inngalngalep iray salitak ed sikayo.
11 Insan linmad patar na Ofra imay anghil na Katawan tan inmirung ed silong na kiew a robli a kayaryan nen Joas a lakin kabyangan na boleg nen Abiezer. Inmamut a maniilik na trigo ed pespesan na alak si Gedeon a lakin anak nen Joas, pian ag nanengneng na saray Madianita.
12 Pinmanengneng ed sikatod man so anghil na Katawan tan kuanto, Walad sika so Katawan, sika a masebeg tan makapanyarin too!
13 Inkuanen Gedeon ed sikato, No walad sikamiy Katawan, akin sirin et onyay agawad sikami? Onung na tinongtong na saray atateng mi, say Katawan impaway to rad Egipto. Akin et anggapo lay singa onman a gawaen natan na Katawan? Inkaindan to kami la tan pinaolyan to kamin ooleyan na saray Madianita.
14 Insan say Katawan ingganggan toy Gedeon, Laka, ta ipakanam so biskeg tan pakayarim a mangiliktar ed saray Israelita ed pakayari na saray Madianita. Siak a dili so mangigaganggan ed sika.
15 Inmebat si Gedeon, Balet, Katawan, panoy pakapangiliktar kod Israel? Sankaleteyan so boleg ko ed saray boleg na tribu nen Manases, tan siak so saginonur ed amin da ray kabyangay kawalaan kon pamilya.
16 Inmebat so Katawan, Nayarian mon gawaen so pagagawak ed sika, ta tulongan ta ka tan mainomay mon kabilen iray Madianita; singa ka mangakabil na saksakey a too.
17 Inmebat si Gedeon, No tuan inaro mo ak, ipanengneng mod siak so pakapatnagan a sikan tuay Katawan.
18 Ag ka pa ontataynan anggad niakaran ta kay bagat a kakanen. Inkuanto, Dia ak anggad ipawil mo dia.
19 Kanyan sinmempet si Gedeon tan angiluto na sakey a kilaw na kanding, insan inkana toy sakey salup ya arina diad impanggawa toy tinapay ya ag nilaukay libadura. Inyan tod baskit so karni tan say sabaw diad banga, insan to ra inyakar ed samay anghil na Katawan a walad silong na kiew a robli, tan inter tod sikato.
20 Inkuan na samay anghil na Dios ed sikato, Itapew mod sayan baleg a bato itay karni tan saray tinapay, insan mo ikalbod sikara so sabaw. Ginawa nen Gedeon imay imbaga na anghil.
21 Inyonat na samay anghil na Katawan so lima to, insan to indiwit so ngoroy bislak a sankabembenan to ed saramay karni tan tinapay. Pinmaway so apoy ed samay bato tan inoput ton pinoolan ira may karni tan tinapay. Insan naandipat imay anghil.
22 Diad saya abirbir nen Gedeon ya anghil na Katawan imay anengneng to, kanyan natatakot a kuanto, Katawan a Dios, anengneng kod lupa-lupaan so anghil mo!
23 Balet say Katawan kuantod sikato, Mandeen ka. Ag ka natatakot. Ag ka ompatey.
24 Amaalagey diman si Gedeon na altar a para Katawan tan inngaran to na Kareenan so Katawan. (Anggad natan, sayan altar et manalalagey nid man ed Ofra a kayaryan na boleg nen Abiezer.)
25 Diad saman a labi say Katawan inkuantod kinen Gedeon, Alam so bakan kalakyan nen amam tan say sakey a bakan kalakyan a pitoy taon to, igebam so altar a ginawa nen amam a para Baal, tan itumbam so tanda nen diosan Asera a kaabay na samay altar.
26 Diad sayan pokdul mangipaalagey ka na malet ya altar a para Katawan a Dios mo. Insan mo alaen imay kumadwan baka tan isaklang mon bagat a popoolan; say pamparlang mo samay itumbam a tanda nen diosan Asera.
27 Kanyan intagar nen Gedeon iray samploran aripen to tan ginawa toy imbagad sikato na Katawan. Ginawa to ya ed labi, ta mapalaloy takot to ed saray kabyangay pamilya to tan saray totoo ed baley no gawaen to ya ed agew.
28 Kabangon na saray totoo ed ontombuk a kabwasan, anengneng dan ageba so altar a para Baal tan tanda nen diosan Asera. Naimano da met a samay kumadwan bakan kalakyan et nisaklang ed altar a nipaalagey diman.
29 Nantetepetan ira, Siopay nanggawad saya? Sinokayan da no siopa, et nalmoan da a si Gedeon a lakin anak nen Joas so nanggawa.
30 Insan da inkuan ed kinen Joas, Ipaway mo diay anak mo ta pateyen mi! Inggeba toy altar a para Baal tan say tanda nen Asera a walad kaabay to.
31 Balet inkuanen Joas ed amin da may totoon dinmagod sikato, Itatalindeg yoy Baal? Iyaagel yo? Napatey so siopaman a mangitalindeg ed sikato kasakbayan ya onsabiy kabwasan. No tuan dios si Baal, paolyan yon iyagel toy sikaton dili. Say altar to so ageba.
32 Nanlapud saman, atawag si Gedeon a Jerubaal, lapud inkuanen Joas, Paolyan yon iyagel nen Baal so sikaton dili; say altar to so ageba.
33 Insan nantitipon ya amin iray Madianita, saray Amalecita, tan saray tribud kalawakan, binaliw day Ilog na Jordan, tan nankampo ra ed Patar na Jezreel.
34 Inoleyan na ispiritu na Katawan si Gedeon, et pinaknul toy trumpita a panawag ton ontombuk ed sikato iray lalakin kabyangay boleg nen Abiezer.
35 Angibaki na saray lalakin walad sakop na duaran dalin na Manases, ta ontombuk irad sikato. Angibaki met na saray lalakin manawag ed saray lalakin manawag ed saray lalakin kabyangay tribu di Aser, Zabulon, tan Neftali, et sinmabi ra met a milad sikato.
36 Insan inkuanen Gedeon ed Dios, Imbagam a ginetmam ya ikana mo ak ed pangyagel ed Israel.
37 Ontan sirin, mangyan ak na lanan abel ed dalin a panagilikan mi na trigo. No diad kabwasan et alinaewan labat so lanan abel balet andid dalin, naamtaan kod satan ya ikana mo ak ed pangyagel ed Israel.
38 Onung na inilaloan nen Gedeon, onman so agawa. Kabangon nen Gedeon ed ontombuk a kabwasan, pinespes to may lanan abel, tan akapangisalur na sakey a losur a linaew.
39 Insan inkuanen Gedeon ed Dios, Ag ka pa komun mamapasnuk ed siak; wala pa niy kerewen ko. Maminsan pa nin ikanak imay abel ed panubok ko. Nabasa komun natan so dalin, balet mansiansian amaga may abel.
40 Onung na kinerew nen Gedeon, onman so ginawa na Dios ed saman a labi. Kasabiy kabwasan amaga may lana, balet ambasad linaew so dalin.
1 "Aminsan ya agew asaksakbay a binmangon si Gedeon tan amin a totoo to tan nankampo ra ed abay na Sobul na Harod. Walad patar ed baybay da so kampo da ray Madianita diad abay na Pokdul na More.
2 "Say Katawan kuantod kinen Gedeon, Dakerakel lan tuloy iray totoom a panaloen kod saray Madianita. Ompan abaloan da naani ya analo ra lapud pakayari ran dili, et ibaga ran anggapoy pibibiang ko.
3 "Ibawag mod saray totoo, Onsempet lay siopaman ya antakot, tan manayam kami diad Palandey na Galaad. Kanyan anempet la so duamplo tan duan libon lalaki, balet tinmilak so samplon libo.
4 "Insan inkuan na Katawan ed kinen Gedeon, Dakerakel nin siansiay totoom. Iyakar mo rad kawalaay danum, ta diman ko ibiig so para sika. No ibagak a mila ed sika so sakey a too, sikatoy milad sika. No ibagak ya ag milad sika so sakey a too, sikatoy ag milad sika.
5 "Intagar nen Gedeon ed kawalaan na danum ira may lalaki, insan inkuan na Katawan ed sikato, Ibiig mon amin iray dildilan dan singa aso so danum ed saray totoon ontalimukor ya oninom.
6 "Walay talon lasus a lalaki ya angalaos na danum ed daklap da, insan da dinildilan; amin da ray arum et tinmalimukor iran inminom.
7 "Inkuan na Katawan ed kinen Gedeon, Iyagel tan panaloen ta kayod saray Madianita, sika tan saramay kakaibam a talon lasus a dinmildil ed danum. Ibagam ya onsempet la ray arum.
8 "Kanyan pinasempet nen Gedeon ya amin iray Israelita, likud ed saramay talon lasus a sikaray angala na amin ya abasto tan saray trumpita. Walad leksab da so kampo da ray Madianita diad patar.
9 "Diad saman a labi ingganggan na Katawan si Gedeon, Bangon kayo, ta dogpaan yoy kampo da ray Madianita; panaloen ta kayo.
10 Balet no antakot kayon ondogpa, lasur kad kampo a kaibam si aripen mon Pura.
11 Narengel yod satan so ibabaga ra, et nawalaan ka na biskeg na linawan ondogpa. Kanyan si Gedeon tan si aripen ton Pura et linma rad nitalagan panagguardiaan ed kampo da ray kalaban.
12 Singa olup na dakerakel a dorun iray Madianita, saray Amalecita, tan saray kabyangay tribu ya akapanat et patar, tan singa karakel na buer ed gilig na dayat iray kamilyo ra.
13 Nen sinmabiy Gedeon, nadngel ton ibabaga na sakey a too ed kaaro to so nipaakar ed kogip to. Ibabaga to, Akogip kon tinmolin ed kampo tayo so sakey a baleg a sibadan tinapay tan nakna to so sakey a tulda. Ageba may tulda tan nipasaplak ed dalin.
14 Inmebat imay kaaro to, Anggapo lay arum itan no ag ta samay ispada nen Gedeon ya anak nen Joas tan sakey ya Israelita. Say Dios impanalo to ed Madian tan amin a sondalo tayo!
15 Nen nadngel nen Gedeon so nipaakar ed samay kogip na sakey a too tan say kabaliksan to, tinmalimukor. Insan pinmawil ed kampo da ray Israelita tan kuanto, Bangon kayo! Impanalo ki la na Katawan ed saray sondalon Madianita!
16 Impankatlo ton grupo ira may talon lasus a totoo to tan initdan to ray sansasakey a trumpita tan sansasakey a porunggo a walad dalem so nipotan ya apoy.
17 Inkuantod sikara, No kasabik ed gilig na kampo da ray Madianita, nengneng yo ak tan alig yoy gawaen ko.
18 No pinaknul ko tan say grupok so trumpita mi, paknul yo met ed kaliber-liber na kampo so trumpita yo, insan yo iyeyag, Para Katawan tan para si Gedeon!
19 Sinmabiy Gedeon tan saray sanlasus a totoo to ed samay gilig na kampo nen magano lay pegley labi tan kakkapansalat na guardia. Insan da pinaknul so trumpita ra tan imbetag da may sankabembenan dan porunggo,
20 tan onman met so ginawa na saramay duaran grupo. Binembenan dad kawigin lima ra may nipotan ya apoy, tan diad kawanan a lima ra so trumpita, insan da ineyag, Sakey ya ispada a para Katawan tan si Gedeon!
21 Nanalagey ed pasen tod kaliber-liber na kampo so balang sakey, et kibatiktik a maneyag ya amin iray sondalod mad kampo.
22 Legan a papaknulen na saray totoo nen Gedeon so trumpita ra, impanlalaban na Katawan ira may sondalo na kalaban; nandodoyukan iray ispada. Binmatik iran amaarap ed Cerera ya anggad Bet-sita, anggad baley na Abel-mehola ya asingger ed Tabata.
23 Insan atawag iray lalakid tribu di Neftali, Aser, tan duaran Manases, tan inosilan da ra may Madianita.
24 Angibaki si Gedeon na saray totoo ed amin a kapokdulan na Efraim a mangikuan, Akseb kayo, ta labanan yo ray Madianita. Tambangan yo rad Ilog na Jordan tan saray kolus ya anggad Bet-bara tan ag yo pababaliwen diman iray Madianita. Pinmaway ya amin iray lalaki ed Efraim, tan tinmambang irad Ilog na Jordan tan saray kolus ya anggad Bet-bara.
25 Adakep da so duaran panguloy sondalo na Madianita di Oreb tan Zeeb; pinatey day Oreb ed kawalaay Baton-dampay na Oreb, tan si Zeeb diad panagpespesay alak a tatawagey Zeeb. Intuloy dan inosilan iray Madianita, insan da inawit iray olo di Oreb tan Zeeb ed kinen Gedeon a walad sayan bekta ed bokig na Jordan.
1 "Insan inkuan na saray lalakid Efraim ed kinen Gedeon, Akin et ag mo kami tinawag nen linma kayon akibakal ed saray Madianita? Akin et onyay impangipasen mod sikami? Ampetang so olo ran nanriklamo lapud saya.
2 "Balet inkuantod sikara, Say agawaan ko et ag nayarin ipara ed ginawa yo. Say anggan melag ya agawaan yo, sikayon lalaki ed Efraim, et maung ni nen say agawaan na amin a kabyangan na boleg ko.
3 "Inyabuloy na Dios a lapud pakayari to, apatey yoy duaran pangulo na Madianita a di Oreb tan Zeeb. Antoy agawaan ko a nayarin ipara ed saman? Nen imbaga to ya, kinmepa so pasnuk da.
4 "Diad sayan oras abaliw la nen Gedeon tan saramay talon lasus a totoo to so Ilog na Jordan. Makapkapoy la ra, balet oosilan da ni ray kalaban da.
5 "Kasabi rad Sukot, inkuantod saray totood baley, Itdan yo pay tinapay ira yay totook. Makapkapoy la ra, et oosilan ko ra di Zeba tan Zalmuna ya arari na saray Madianita.
6 "Balet inkuan na saray pangulo da ray taga Sukot, Akin et itdan mi na nakan iray sondalom? Adakep yo la sirin ira di Zeba tan Zalmuna?
7 "Inkuanen Gedeon, Sigi sirin! No impadakep lad siak na Katawan ira di Zeba tan Zalmuna, bakbaken ta kayo na masabit a tanaman ed kalawakan.
8 "Tinmuloy ed Penuel si Gedeon tan akikerew met diman na tinapay ed saray totoo, balet say ebat ed sikara na saray totood man et singa samay ebat na saray totood Sukot.
9 "Kanyan inkuantod sikara, Ompawil ak a maung so kasumpalan ko; igebak ed satan yan tori!
10 Di Zeba tan Zalmuna tan saray sondalo ra et wala rad Carkor. Diad amin da ray sondalo na saray tribu ed kalawakan, sakey a labinliman libo labat so akeraan; sanlasus tan duamplon libo lay apatey.
11 Linmay Gedeon ed dalan a walad samput na kalawakan, diad bokig na Noba tan Jogbea, insan biniglaan ton dinogpaan ira may kalaban da.
12 Batik ira may duaran arari da ray Madianita, balet inosilan ira nen Gedeon tan adakep to ra; lapud saya agewgew ya amin iray sondalo ra.
13 Nen ompapawil lan akibakal si Gedeon tan ondadalan ed Dalan na Heres,
14 akadakep na sakey a lakin tobun-balo a taga Sukot tan tinepetan to. Insulat na samay tobun-balo iray kangaranan da ray pitomplo tan piton lalakin manona ed Sukot.
15 Insan linmay Gedeon ed saray lalaki ed Sukot tan kuanto, Nanunotan yo ni may ag yo impanulong ed siak? Imbaga yo ya ag yo naitdan na nakan iray makapkapoy lan sondalok lapud ag ko ni ra adakep di Zeba tan Zalmuna. Et natan, nia la ra!
16 Insan angala na saray masabit a tanaman ed kalawakan tan inkana to ra ed impanusa tod saray pangulo na Sukot.
17 Inggeba to met so tori ed Penuel tan pinapatey to ray lalaki ed saman a siudad.
18 Insan tinepet nen Gedeon ed kindi Zeba tan Zalmuna, Kawalaan da ra may lalakin pinatey yod Tabor? Inmebat ira, Kaparparam irabalang sakey ed sikara et singa ra anak na ari.
19 Inkuanen Gedeon, Agagik ira man, anak ira na dilin inak. Sambaan ko a no ag yo ra komun pinatey, ag ta kayo met pateyen natan.
20 Insan inkuantod kinen Joter a sankapangulowanan ya anak ton laki, Patey mo ra! Balet ag binagut na samay ogaw so ispada to. Antakot to ran pateyen, ta ogaw ni.
21 Insan inkuan di Zeba tan Zalmuna ed kinen Gedeon, Sigi, sika lan dili so mamatey ed sikami. Say tuan laki labat so nepeg a mamatey ed kapara ton lalaki. Kanyan pinatey to ra nen Gedeon, insan to inala ray arkos a palagaygay na beklew da ray kamilyo ra.
22 Kayari to ya, inkuan na saray Israelita ed kinen Gedeon, Sika la so manoley ed sikamisika, insan kayarim onsalat iray kabyangay pamilyam. Inliktar mo kamid saray Madianita.
23 Inmebat si Gedeon, Aliwan siak odino say anak kon laki so manoley ed sikayo. Say Katawan so manoley ed sikayo.
24 Balet intuloy ton inkuan, Wala pay kerewen kon sakey a bengatla ed sikayo. Amin yo, iter yod siak iray ikaw ya inaala yo. (Singa saray arum a totood kalawakan, akaikaw na balituk iray Madianita.)
25 Inmebat iray totoo, Maliket kamin mangiter ed sika. Angibilkag ira na abel, tan inyan na balang sakey ya Israelita ed samay abel iray ikaw a nala to.
26 Sakey a duamplon kilon balituk so nala nen Gedeon, andi bali ni ray dikorasion, saray kolintas, saray ambalangan kawes ya isosolung na saray ararid Madian, tan saray abel ya akabaliber ed beklew na saray kamilyo ra.
27 Ginawa nen Gedeon a talintao imay balituk, insan to inyan ed baley ton Ofra. Imbeneg na amin da ray Israelita so Dios tan linma rad man ya angigalang ed samay talintao. Sakey iman a patit ed kinen Gedeon tan say pamilya to.
28 Atalo sirin na saray Israelita so Madian tan ag la ra linmaban. Apataploy taon a nanari ed dalin so kareenan ya anggad impatey nen Gedeon.
29 Sinmempet si Gedeon ed abung to tan nanayam diman.
30 Pitomplon lalaki iray anak to, lapud amayamay so asawa to.
31 Wala met so sakey ya inamung ton bii ed Sikem; nanananak ed sikato na sakey a laki tan inngaran to na Abimelec.
32 Masikesiken lay Gedeon a lakin anak nen Joas nen inatey tan nipompon ed lobuk nen ama to a Joas, diad Ofra a baley na boleg nen Abiezer.
33 Kayariy impatey nen Gedeon nagmaliw ya aliwan matoor lamet ed Dios iray Israelita tan angigagalang irad saray Baal. Impagmaliw dan dios da so Baal-na-Sipanan.
34 Ag da la nilingkuran so Katawan a Dios ya angyagel ed sikara ed saray amin a kalaban dad kaliber-liber da.
35 Ag da amtay ombales na maung a linawa ed pamilya nen Gedeon, lapud saray amin a kaabigan a ginagawa to ed Israel.
1 "Si Abimelec a lakin anak nen Gedeon et linmad baley na Sikem a panaayaman na kakanayon nen ina to. Imbaga tod saray kakanayon to
2 "a tepeten dad saray totood Sikem, Antoy labay yo? Say panoley ed sikayo na saray pitomplon lalakin anak nen Gedeon odino say panoley na sakey labat a too? Nepeg yon nunoten a kadalaan yoy Abimelec.
3 "Saray kakanayon na ina nen Abimelec et sinalita da ed saray totood Sikem so nipaakar ed samay patetepet nen Abimelec. Pinakna na saray totood Sikem ya ontombuk irad kinen Abimelec, lapud kanayon da.
4 "Initdan da na pitomplon pilak a kuartan nanlapud timplo nen Baal-na-Sipanan. Impangupa to may kuarta na sakey ya olup na totoon maoges, pian miolup irad sikato.
5 "Linmad abung nen ama to ed baley na Ofra tan diad tapew na sakey a bato, pinatey to ra may pitomplon agagi ton lalaki ya anak nen Gedeon. Balet akaamut si Jotam a sankayogtanan ya anak nen Gedeon, kanyan ag apatey.
6 "Insan nagtitipon ya amin iray totood Sikem tan Bet-millo tan linma rad masanton kiew a robli ed Sikem, tan diman da impagmaliw ya ari si Abimelec.
7 "Nen nadngelan nen Jotam so nipaakar ed saya, linman nanalagey ed toktok na Palandey na Gerizim tan kinulyaotan to ra, Dengel kayod siak, sikayo ran totood Sikem, ta ompan dengelen kayo na Dios!
8 "Aminsan ya agew, saray kiew linma ran mamili na manarid sikara. Inkuandad kiew ya oliba, Sika la so ari mi.
9 "Inmebat imay oliba, Pian naoleyan ta kayo, nepeg kon itonda so pangiiter ko na larak ya ikakanan pamagalang ed saray diriyos tan saray totoo.
10 Insan saramay kiew inkuandad sengeg na igos, Gala, ta sika la so ari mi.
11 Balet inmebat imay igos, Pian naoleyan ta kayo, nepeg kon itonda so pangiiter ko na saray masasamit a bunga.
12 Kanyan saramay kiew inkuandad sengeg na ubas, Gala, ta sika la so ari mi.
13 Balet inmebet imay ubas, Pian naoleyan ta kayo, nepeg kon itonda so pangiiter koy alak a mamapaliket ed saray diriyos tan saray totoo.
14 Kanyan amin da ra may kiew inkuandad masabit ya abeban kiew. Gala, ta sika la so ari mi.
15 Inmebat imay masabit ya abeban kiew, No tuan labay yon pagmaliwen ak ya ari yo, gali dia sirin ta sirum kayod silong ko. No ag kayo, ompugsoy manliub ya apoy a manlapud saray masabit a sangak tan poolan to ray kiew a sidro ed Libano.
16 Natan sirin, kuanen Jotam ya intuloy, malinis kasiy konsinsia yo tan anggapoy duaruwa yo nen impagmaliw yon ari si Abimelec? Pinagalangan yo kasiy pakanudnotan ed amak a Gedeon tan marakep kasiy ginawa yod pamilya ra onung ed kanepegan ya itumang ed saramay ginagawa ra?
17 Nepeg yon nunoten ya akibakal si amak lapud sikayo. Imposta toy bilay to, pian niliktar to kayod saray Madianita.
18 Balet natan aliwa kayon matoor ed pamilya nen amak. Pinatey yod tapew na sakey a bato ira may pitomplon lalaki ya anak to. Et lapud kanayon yo si Abimelec ya ilalak nen amak ed aripen to, impagmaliw yon ari na Sikem.
19 Natan sirin, no say ginawa yo natan ed kindi amak a Gedeon tan say pamilya ra et makatonungan, manliket kayon miolup ed kinen Abimelec tan panliket yo met a miolup ed sikayo.
20 Balet no andi, ompugso komun so manliub ya apoy a manlapud kinen Abimelec tan poolan to ray totood Sikem tan Bet-millo. Ompugso met komun so manliub ya apoy a manlapud Sikem tan Bet-millo tan poolan toy Abimelec.
21 Lapud antakot nen Jotam si agi ton Abimelec, batik tan nanayam ed Beer.
22 Taloy taon ya inoleyan nen Abimelec so Israel.
23 Insan dineral na Dios so maung a panoolup na saray totood Sikem tan si Abimelec, kanyan nilabanan day Abimelec.
24 Agawa ya, pian nabayaran day maoges a ginawa nen Abimelec tan saray totood Sikem ya anogsog ed sikato a mamatey ed saray pitomplon lalakin anak nen Gedeon.
25 Saray totood Sikem angipasen ira na saray totoo ed saray toktok na palandey, ta sikaray mananeb ed kinen Abimelec, tan sinasamsaman da ray amin a dinmalan diman. Sayan nagagawa et nibaga ed kinen Abimelec.
26 Insan si Gaal a lakin anak nen Ebed et linmad Sikem a kaiba to ray agagi ton lalaki, tan nanmatalek ed sikato iray totoo ed Sikem.
27 Linma ran amin ed kaubasan da tan namborbor iray bunga, nanggawa ray alak, tan sinilibraan day sakey a pista. Linma rad timplo na dios da a dimay nanaakanan tan naniinoman da tan nanleglemewan dad kinen Abimelec.
28 Inkuanen Gaal, Anto itayon klasin totood Sikem? Akin et manlilingkur itayod kinen Abimelec? Siopa ta man a too a? Anak labat nen Gedeon, anto? Onur-onur ed sikato si Zebul, balet akin et manlilingkur itayod sikato? Nepeg a matoor kayod laki yon Hamor a sengeg na boleg yo!
29 Ag la siak so pangulo na sarayan totoo! Paandipaten kod satan si Abimelec! Ibagak ed sikato, Parakel mo ray sondalom, insan gala ta mibakal ka!
30 Akapasnuk si Zebul a manoley ed siudad nen nadngelan toy imbaga nen Gaal.
31 Angibakiy Zebul ed kinen Abimelec a walad Aruma a mangikuan, si Gaal a lakin anak nen Ebed tan saray agagi ton lalaki et linma rad Sikem; ag da ka kono palooben ed siudad.
32 Nepeg sirin tan saray totoom so onla ed kaalogan tan amut kayod man natan ed sayan labi.
33 Nabwas na kabkabwasan no ompapaway so agew, biglaan yon dogpaan so siudad. Insan no ompaway si Gaal tan saray totoo a milaban ed sikayo, kabil yo ra na anggaay nayarian yo!
34 Kanyan si Abimelec tan amin a totoo to et ginmalaw irad labi tan inmamut iran apatiran grupo ed paway na Sikem.
35 Nen anengneng nen Abimelec tan saray totoo to si Gaal a pinmaway tan nanalagey ed puirta na siudad, pinmaway irad panaamutan da.
36 Anengneng ira nen Gaal tan kuantod Zebul, Nengneng mo! Wala ray totoon onlalasur a manlalapud saray toktok na palandey! Inkuanen Zebul, Aliwa ra man a totoo. Anino ra labat ed kapalandeyan.
37 Inkuanen Gaal lamet, Nengneng mo! Wala ray totoon onlalasur a manlalapud alusadsar na palandey tan say sakey a grupo et onsasabi ran manlalapud kiew a robli na saray managparles!
38 Insan inkuanen Zebul ed sikato, Kawalaan to natan imay panagsalitam? Ag mo ta tinepet no akin et manlilingkur itayod sayan too a si Abimelec? Sikara man so totoon nileleglemew mo. Paway ka la, ta labanan mo ra.
39 Impangulo nen Gaal a pinmaway iray totood Sikem tan nilabanan day Abimelec.
40 Inosilan nen Abimelec si Gaal, et batik si Gaal. Amayamay iray asugatan, anggan diad puirta na siudad.
41 Nanayam ed Aruma si Abimelec, tan pinataynan nen Zebul ed Sikem si Gaal tan saramay lalakin agagi to, kanyan ag la rad man akapanayam.
42 Diad ontombuk ya agew akabatan nen Abimelec ya iplaplano na saray totood Sikem so ompaway ed kaalogan,
43 kanyan tinawag to ray totoo to, impankatlo to ran grupo, inmamut irad kaalogan tan nanalagar ira. Nen anengneng ton ompapaway ed siudad iray totoo, pinmaway si Abimelec ed panaamutan to, ta pateyen to ra.
44 Nen si Abimelec tan say grupo to et ginanatan day sinmulong a mangguardiad puirta na siudad, dinogpaan na saray duaran grupo iray totoo ed kaalogan tan pinapatey da ran amin.
45 Sanagew so impanlalaban da. Adakep nen Abimelec so siudad, pinapatey to ray totoo to, inggeba to ray paalagey, tan tinabunan to na asin so dalin.
46 Nen amin da ray manonan totoo a manaayam ed tori na Sikem et akabatan day agawa, inmamut ira ed tirinsira ed timplo nen Baal-na-Sipanan.
47 Nibagad kinen Abimelec a nantitipon irad man,
48 kanyan linmad Palandey na Zalmon a pati saray totoo to. Angalay wasay, nambatang na saray sanga, insan to sinakbat. Imbaga tod saray totoo to a ganatan dan aligen so ginawa to.
49 Kanyan nambabatang na sangay kiew so balang too, insan tinombuk day Abimelec tan imbunton dad sengeg na tori iray kiew. Pinoolan da may kiew legan a walad dalem ira may totoo, et inatey ya amin iray wadmad torisakey a sanlibo ran amin, lalaki tan bibii.
50 Insan linmad Tebez si Abimelec, nilakub toy siudad, tan dinakep to.
51 Walad may mabiskeg a tori, et batik diman ya amin iray totood siudad, laki may bii, pati saray pangulo. Sinaraan dad may sikaran dili tan linma rad atep.
52 Nen sinmabiy Abimelec a dogpaan to may tori, linma ya anggad puirta, ta poolan to may tori.
53 Balet walay sakey a biin angipelag na gilingan ed olo nen Abimelec, et apisit so lapis-lapis na olo to.
54 Insan to tinawag a tampol so tobun-balon umaawit na saray armas to tan kuantod sikato, Bagut moy ispadam, ta patey mo ak. Ag ko labay a nibagan sakey a bii so amatey ed siak. Kanyan dinoyuk na samay tobun-balo si Abimelec, et inatey.
55 Nen anengneng na saray Israelita ya inatey si Abimelec, sinmempet la ran amin.
56 Onya so impaningil na Dios ed kinen Abimelec, lapud kaogsan a ginawa tod si ama to diad impamatey tod saramay pitomplon lalakin agagi to.
57 Impanirap met na Dios iray totood Sikem lapud kaogsan da, onung na impangisambad sikara nen Jotam a lakin anak nen Gedeon.
1 "Kayariy impatey nen Abimelec si Tola a lakin anak nen Pua tan apo nen Dodo et sinmalat ya angyagel ed Israel. Sikatoy kabyangan na tribu nen Isacar tan nanayam ed Samir diad kapokdulan na Efraim.
2 "Duamplo tan taloy taon a sikatoy pangulo na Israel. Insan inatey tan nipompon ed Samir.
3 "Kayari nen Tola sinmalat si Jair a taga Galaad. Impangulo ton duamplo tan duay taon so Israel.
4 "Walay talomplon lalakin anak to a talomplon asnoy loganan da. Walay talomplon siudad da ed dalin na Galaad, a natatawag ni ra na saray bario nen Jair.
5 "Inatey si Jair tan nipompon ed Kamon.
6 "Nankasalanan lamet ed Katawan iray Israelita diad impangigagalang dad saray Baal tan diad saray Astarot, ontan met ed saray diriyos na Siria, Sidon, Moab, tan Filistia. Inkaindan day Katawan tan tinondaan day angigalang ed sikato.
7 "Kanyan akapasnuk so Katawan ed saray Israelita, tan inabuloyan ton nadakep ira na saray Filisteo tan saray Ammonita.
8 "Labinwaloy taon a pinapairap tan pinapasegsegang da ray amin ya Israelitan manaayam ed bansa na saray Amorreo diad bokig na Ilog na Jordan diad Galaad.
9 "Binaliw met na saray Amorreo so Jordan, ta nilabanan da ray tribu di Juda, Benjamin, tan Efraim. Mapalaloy inkairapan na Israel.
10 Insan tinmawag ed Katawan iray Israelita tan inkuanda, Nankasalanan kamid sika, ta inkaindan mi ka, O Dios mi, insan kami angigagalang ed saray Baal.
11 Saya so ebat na Katawan ed sikara: Pinapairap kayo nen saman na saray Egipsio, saray Amorreo, saray Ammonita, saray Filisteo,
12 saray Sidonia, saray Amalecita, tan saray Maonita, insan kayo tinmawag ed siak. Ag ta kayo ta inliktar ed sikara?
13 Balet inkaindan yo ak nin siansia tan angigagalang kayod saray arum a diriyos, kanyan ag ta kayo la iliktar.
14 Laka yon ontawag ed saray diriyos a pinili yo. Paiyagel kayod sikara no wala kayod gunigon.
15 Balet saray totood Israel kuandad Katawan, Nankasalanan kami. Gawam so labay mon gawaen, balet iliktar mo kami pa natan.
16 Kanyan imbabantak da ray kayaryan dan diriyos na arum a bansa, tan inggalang da lay Katawan; et agunigon so Katawan lapud kakairapan na saray Israelita.
17 Insan namparaan a mibakal iray Ammonita tan nankampo rad Galaad. Nantitipon iray lalaki ed Israel tan nankampo ra ed Mizpa na Galaad.
18 Nantetepetan iray totood man tan saray pangulo na saray tribu na Israel, Siopay mangipangulod sayan pibakal tayod saray Ammonita? Siopamay mangipangulo sikatoy magmaliw a pangulo na amin a totood Galaad.
1 "Si Jefte a taga Galaad et masebeg a sondalo, balet biin marotak so ina to. Si ama ton Galaad
2 "et wala ni ray arum a lalakin anak tod asawa to. Nen binmaleg ira pinasoot dan pinataynan si Jefte. Inkuandad sikato, Anggapoy natawir mod kayaryan nen ami mi; anak ka na sananey a bii.
3 "Tinaynan nen Jefte iray agagi to tan nanayam ed dalin na Tob. Naayat tod man ya akiolup ed sikato iray lalakin maoges, tan nanoolup iran nanliber-liber a nanggagawa na kaogsan.
4 "Kalabas na pigaran agew linman akibakal ed Israel iray Ammonita.
5 "Nen agawa ya, linmad dalin na Tob iray pangulo na Galaad, ta awiten day Jefte.
6 "Inkuandad sikato, Gala, ta ipangulo mo kami, pian nayarian tayon labanan iray Ammonita.
7 "Balet inmebat si Jefte, Mapalaloy impanbosul yod siak, kanyan pinasoot yo ak a taynan koy abung nen amak. Akin et onla kayo dia ed siak natan, ta walay gunigon yo?
8 "Inkuandad kinen Jefte, Wadya kami natan ed sika, lapud labay mi kan milad sikami ta mibakal tayod saray Ammonita tan ipangulom iray amin a totood Galaad.
9 "Inkuanen Jefte ed sikara, No pasempeten yo ak ta mibakal ak ed saray Ammonita, et panaloen ak na Katawan, siak so magmaliw a manoley yo.
10 Inmebat ira, Onabubon kami. Say Katawan so tasi tayo!
11 Kanyan akilad saramay pangulo na Galaad si Jefte, et saray totoo impagmaliw dan manoley tan pangulo ra. Diad Mizpa pinalinew nen Jefte diad arap na Katawan so labay ton nagawa.
12 Angibakiy Jefte na pigaran totoo ed ari na Ammon a mangikuan, Antoy makasengeg na pilalaban mod siak? Akin et nilooban mon bakalen so bansak?
13 Inmebat ed saramay imbaki nen Jefte so ari na Ammon, Nen pinmaway ed Egipto iray Israelita ginamgam day dalin ko manlapud Ilog na Arnon ya anggad Ilog na Jabok tan say Ilog na Jordan. Natan nepeg mon ipawil ed siak a mabolbolus.
14 Pinapawil nen Jefte ed ari na Ammon ira may imbaki to ya
15 onyay impaiyebat tod sikara: Aliwan tua a say Israel et ginamgam toy dalin na Moab odino say dalin na Ammon.
16 Onyay peteg ya agawa: nen tinaynan na saray Israelita so Egipto, dinmalan ira ed kalawakan ya anggad Dayat ya Akaba tan akasabi ra ed Cades.
17 Insan ira angibakid ari na Edom na saray totoo ya onkerew na abuloy ya ondalan irad dalin to. Balet ag ira inabuloyan na ari na Edom ya ondalan. Kinerew da met ed ari na Moab a padalanen to ra, balet ag to met ira inabuloyan. Kanyan nanayam ed Cades ira may Israelita.
18 Insan bineltang da so kalawakan; sinmaliberber ira ed dalin na Edom tan samay dalin na Moab ya anggad akasabi ra ed nibokig na Moab, diad basil na Ilog na Arnon. Nankampo rad man, balet ag da bineltang so Arnon, lapud ketegan iman na Moab.
19 Insan saramay Israelita angibaki ra ed Sehon ya ari na saray Amorreo tan manooley ed Hesbon, ta kerewen dad sikato ya abuloyan to ran ombeltang ed bansa to, pian makakar irad dalin da.
20 Balet ag to inabuloyan ira may Israelita ya ondalan. Impantitipon to ingen ya amin iray sondalo to, nankampod Jahaz, tan dinogpaan toy Israel.
21 Balet impanalo na Katawan a Dios na Israel iray Israelita ed kinen Sehon tan saray sondalo to. Kanyan inala na saray Israelita ya amin iray dalin na saray Amorreo a manaayam ed saman a bansa.
22 Nanayaman day amin a dalin na saray Amorreo manlapud Armon diad abalaten ya anggad Jabok diad baybay tan manlapud kalawakan diad bokig ya anggad Jordan diad sagur.
23 Kanyan say Katawan a Dios na Israel so amataynan ed saray Amorreo, pian napanayaman na saray Israelita so dalin da. Labay mo a babawien iman a dalin?
24 Kayaryan mo labat so antokaman ya inter ed sika na dios mon Cemos. Balet kayaryanen mi met so antokaman ya inter ed sikami na Katawan min Dios.
25 Abaloan mon matalonggaring ka ni nen si Balac a lakin anak nen Zippor tan ari na Moab? Inmangat a mibakal ed Israel? Akibakal ed sikamin Israelita?
26 Talon lasus taon a nanayam so Israel ed Hesbon tan Aroer, tan diad saray kaliber-liber dan baley, tan diad amin a siudad ed gilig na Ilog na Armon. Akin et ag mo ra binabawi ed loob to man a panaon?
27 On, ag ta kan balut nanggawaay antokaman a makapoy. Sika so manggagaway makapoy diad pibabakal mod siak. Say Katawan so huis a manintinsia natan ed saray Israelita tan saray Ammonita.
28 Balet ag dinengel na samay ari na Ammon imay impaibaga nen Jefte.
29 Insan nanayam ed Jefte so ispiritu na Katawan. Dinmalan si Jefte ed Galaad tan Manases, insan pinmawil ed Mizpa na Galaad tan linmad Ammon.
30 Insipan nen Jefte ed Katawan: Katawan, no panaloen mo ak ed saray Ammonita,
31 isaklang kon popoolan a bagat ed sika so ononan too ya ompaway ed abung ko ya onabet ed siak, no ompawil ak ya analod bakal.
32 Kanyan binaliw nen Jefte so ilog, ta labanan to ray Ammonita, et impanalo na Katawan.
33 Dinogpaan to ra manlapud Aroer ya anggad pasen a kaliber-liber na Minnit, duamplon siudad ya amin, tan anggad Abeleramin. Agaylay karakel na apatey ed saman a bakal, tan tinalo na Israel iray Ammonita.
34 Nen pinmawil si Jefte ed abung tod Mizpa, wadmay biin anak to ya ompapaway ed abung, ta onabet ed sikato. Onsasayaw tan manotogtog na tamborin. Saksakey yan anak to.
35 Kanengneng tod sikato, pinilat toy kawes tod ermen to tan kuanto, O anak ko! Paniingeten moy pagew ko! Akin et sikay makasengeg na mapalalon kagunigon ko. Walay sinambaan kod Katawan, et ag ko la nababawi.
36 Inkuan ed sikato na samay anak, Ama, no nansipan kayo ed Katawan, sumpal yoy imbaga yon gawaen ed siak, bangta pinabawi kayo na Katawan ed saray kalaban yon Ammonita.
37 Balet kinerew tod kinen ama to, Iyabuloy yo pa yan gawaen ko. Paolyan yo ak a bukor a duay bulan, pian makapanakar-akar ak ed kapalandeyan a kaibak iray kakaarok; panermenan koy ipatey ko a sakey a birhin.
38 Imbaga nen Jefte ya onla, kanyan pinasiput ton onarawi ed loob na duay bulan. Linma sirin ed kapalandeyan a kaiba to ray kakaaro to. Nanermen na mapalalo, lapud ompatey ya anggapoy asawa tan anggapoy anak.
39 Kalabas na duay bulan pinmawil ed kinen ama to. Ginawa nen Jefte imay insipan tod Katawan, kanyan inatey a birhin imay anak to. Sikato yay gapowan na ogali ed Israel
40 a saray Israelitan bibii et ompaway iran apat agew kapag taon tan ermenan day biin anak nen Jefte a taga Galaad.
1 "Namparaan a mibakal iray totoo nen Efraim; binaliw day Jordan tan linma rad Zafon tan kuandad Jefte, Akin et binaliw moy ketegan diad impibakal mod saray Ammonita ya ag mo kami tinawag ya akilad sika? Poolan miy abung mo legan a wala kad dalem to!
2 "Balet inkuanen Jefte ed sikara, Siak tan saray totook et mapalaloy impikolkol mid saray Ammonita. Tinawag ta kayo, balet ag yo ak labay ya iyagel ed sikara.
3 "Nen anengneng kon ag yo ak iyagel, impostak so bilay ko tan binaliw koy ketegan a mibakal ed sikara, et impanalo ak na Katawan ed sikara. Akin sirin et onla kayo dia natan a mibakal ed siak?
4 "Insan impantitipon nen Jefte ya amin iray lalakid Galaad, nilabanan da ray lalaki ed Efraim tan tinalo da ra. (Imbaga na saray lalakid Efraim, Sikayo ran taga Galaad ed Efraim tan Manases, tinaynanan yod Efraim!)
5 "Pian ag makabatik iray taga Efraim, dinakep na saray taga Galaad iray pasen a babaliwan ed Ilog na Jordan. Siopaman a toon taga Efraim a labay toy ombaliw tan onkerew na abuloy et tepetan na saray Galaad, Taga ka Efraim? No Andi, kuanto,
6 "paibalikas dad sikatoy Shibolet. Balet say ibalikas to Sibolet, ta tuan ag da nayarian ya ibalikas na duga. Singkaten dad satan tan pateyen dad man ed sakey ed saray babaliwan ed Ilog na Jordan. Diad saman a panaon apataplo tan duan libon taga Efraim so apatey.
7 "Anem taon ya impangulo nen Jefte so Israel. Insan inatey tan nipompon ed baley ton Galaad.
8 "Kayari nen Jefte, si Ibzan, a taga Betlehem so sinmalat ya angipangulo ed Israel.
9 "Talomplon lalaki tan talomplon bibii iray anak to. Impiasawa to ra may anak ton bibii ed saray kabyangan na arum a boleg tan impangasawa to ra may anak ton lalaki ed saray arum a boleg. Pitoy taon ya impangulo nen Ibzan so Israel,
10 insan inatey tan nipompon ed Betlehem.
11 Kayari nen Ibzan, si Elon a taga Zabulon so angipangulod Israel a samploy taon.
12 Insan inatey tan nipompon ed Ayalon a sakop na dalin na Zabulon.
13 Kayari nen Elon, si Abdon a lakin anak nen Hilel tan taga Piraton so angipangulod Israel.
14 Apataploy anak ton lalaki tan talomploy apo ton lalaki; pitomplon asnoy loganan da. Waloy taon ya impangulo nen Abdon so Israel,
15 insan inatey tan nipompon ed Piraton a sakop na dalin na Efraim diad kapokdulan a bansa da ray Amalecita.
1 "Nankasalanan lamet ed Katawan iray Israelita, kanyan inyabuloy ton apataploy taon ya inoleyan na saray Filisteo iray Israelita.
2 "Diad saman a panaon walay sakey a lakin manngaran na Manoa a taga baley na Zora tan kabyangay tribu nen Dan. Ag mananak so asawa to, ta lepes.
3 "Pinmanengneng so anghil na Katawan ed asawa nen Manoa tan kuanto, Lepes ka, balet ag mabayag manlokun ka tan mananak kay sakey a laki.
4 "Manlapud natan ag ka lan balut oniinom na antokaman ya alak, odino mangan na kakanen a sebel;
5 "tan kapaway na anak mo ag mon balut popotutay buek to, lapud manlapud inkianak to sikatoy isaklang ed Dios a sakey a Nazareo. Igapo toy pangyagel tod saray Israelita ed lima da ray Filisteo.
6 "Insan samay bii linmad kinen asawa to tan kuanto, Dinmagod siak so sakey a too na Dios, tan singa makapataktakot ya anghil, na Dios so nengneng to. Ag ko tinepet ed sikato no taga iner, tan ag to imbagad siak so ngaran to.
7 "Balet imbaga tod siak a manlokun ak tan mananak ak na sakey a laki. Imbaga to nid siak ya ag ak balut oninom na anton klasiy alak odino mangan na antokaman a kakanen a sebel, lapud legan a mambilay so iyanak ko sikatoy isaklang ed Dios a sakey a Nazareo.
8 "Insan nampikasi ed Katawan si Manoa, Katawan, ipangasim a papawil mod sikami imay too na Dios, ta ibaga tod sikami no antoy nepeg min gawaen no kapaway na ogaw.
9 "Sinumpal na Dios imay kinerew nen Manoa, et pinmawil imay anghil to ed samay bii nen manyodyorung ed alog. Ag kaiba na samay bii si asawa ton Manoa,
10 et batik a tampol tan imbaga tod kinen asawa to, Gala, Manoa! Samay toon dinmagod siak ed samay aminsan ya agew et pinmanengneng lamet ed siak.
11 Inmalagey si Manoa tan tinombuk toy asawa to. Linmad samay laki si Manoa tan tinepet to, Sika may laki ya akitongtong ed asawak? Siak, ebat to may laki.
12 Insan inkuanen Manoa, Natan sirin, no ontua ray salitam, antoy nepeg a gawaen na ogaw? Anton klasiy bilay so pambilay to?
13 Inmebat may anghil na Katawan, Nepeg a sumpalen na asawam iray amin ya imbagak ed sikato.
14 Ag to nepeg so mangan na antokaman a manlapud sengeg na ubas; ag to nepeg so oninom na anton klasiy alak odino mangan na antokaman a kakanen a sebel. Nepeg ton gawaen so antokaman ya imbagak ed sikato.
15 Diad ag pikakabat nen Manoa ya anghil na Katawan so katongtong to, inkuantod sikato, Ag ka ni onaalis. Ilutoan mi ka ni na kilaw na kanding. Balet inkuan na samay anghil, No ag ak ni ontaynan, ag ko kanen lamlamang so iparaan mon kanen. Balet no labay moy mamparaan, isaklang mo lan bagat a popoolan ed Katawan.
16
17 Inmebat si Manoa, Ibagam ed sikami so ngaran mo, pian nagalang mi ka no ontua ra may salitam.
18 Inkuan na samay anghil, Akin et labay mon kabaten so ngaran ko? Say ngaran ko et sakey a makapakelaw a ngaran.
19 Kanyan angalay sakey a kilaw na kanding si Manoa tan daiset a trigo, insan diad baton-dampay ya altar insaklang to ra a para Katawan a manggagawa na saray pakelaw.
20 Legan a mamapaatagey manlapud samay altar so apoy, anengneng Manoa tan samay asawa to imay anghil na Katawan dimad apoy a nampaatagey ed tawen. Abirbir ed satan nen Manoa a samay laki et anghil na Katawan, kanyan tinmikleb iran duad dalin nen asawa to. Ag da lan balut anengneng imay anghil.
21
22 Inkuanen Manoa ed samay asawa to, Andi-saew ya ompatey ita, ta anengneng ta lay Dios!
23 Balet inmebat imay asawa to, No tuan labay na Katawan a pateyen ita, ag to la komun inawat ira may bagat ta; ag to la komun impanengneng yan amin ed sikata tan ag to la komun imbagad sikata yan bengatla.
24 Nananak imay bii na sakey a laki tan inngaran to na Samson. Binmaleg imay ogaw tan binindisionan na Katawan.
25 Ginapwan na ispiritu na Katawan a pabiskegen si Samson legan a walad nanleetan na Zora tan Estaol diad Kampo nen Dan.
1 "Aminsan ya agew linmad Timna si Samson tan akanengneng diman na sakey a biin Filistia.
2 "Sinmempet tan inkuantod kinen ama tan ina to, Walay sakey a Filistian bii diad Timna ya akasagyat na imanok. Ala yo pa, ta labay kon asawaen.
3 "Balet tinepet ed sikato di ama tan ina to, Akin et kalkalmom a dimay pangalaan moy asawaen mo ed saraman a paganon Filisteo? Ag ka ta makalmoy bii ed boleg tayo, diad saray kadalaan tayo? Balet inkuanen Samson ed kinen ama to, Sikato so labay kon alaen yo a para siak. Sikatoy naibegan ko.
4 "Ag amta na saramay ateng nen Samson a say Katawan so mangiwawanwan ed sikato ed sayan gagawaen to, ta say Katawan et manaanap na pankanawnawan nalabanan to ray Filisteo. Diad sayan panaon ooleyan na saray Filisteo so Israel.
5 "Kanyan linmad Timna si Samson, pati si ama tan ina to. Nen ondadalan irad man ed sakey a kaubasan, nadngel nen Samson so mangwam a malangwer a lion.
6 "Kabebekta pinabiskeg na ispiritu na Katawan si Samson, et diad panamegley na saray lima to biningbingkas to may lion a singa labat nambibingkas na kilaw na kanding. Balet ag to imbagad saramay ateng to so ginawa to.
7 "Linma ya akitongtong ed samay bii, et agustoan to.
8 "Kalabas na pigaran agew amawil si Samson, ta asawaen to. Nen walad dalan pinmaliis tan ninengneng to may lion a pinatey to, et nikelawan ta anengneng toy obung na bayaung tan pigaran dilo ed dalem na laman na samay inatey a lion.
9 "Kinopkop to may dilo tan kinan to legan a manaakar. Insan linmad kindi ama tan ina to tan initdan to ray dilo. Kinan da, balet ag imbaga nen Samson ya inala to may dilo ed laman na inatey a lion.
10 Linmad abung na samay bii si ama to, tan namponsiad man na baleg si Samson. Ogali ya nen saman na saray tobun-balo.
11 Nen anengneng na saray Filisteo si Samson, angibaki ra na talomplon tobun-balo ya akiayam ed sikato.
12 Inkuanen Samson ed sikara, Pabitlaan ta kayo. Mipostaan ak ed sikayo na talomplon pinon linen tan talomplon pampalesan a marakep a kawes. No ag yo nabitla kasakbayan a mansamput so pitoy agew na ponsia, sikayoy mangiter ed siak na talomplon pinon linen tan talomplon pampalesan a marakep a kawes; balet no nabitla yo siak so mangiter ed sikayo. Ibagam itay pabitlam, kuanda. Dengelen mi.
13
14 Inkuanto, Manlapud manag-akan, pinmaway so bengatlan naakan; Manlapud mabiskeg, pinmaway so bengatlan masamit. Kalabas na taloy agew ag da ni amtay ebat to may pabitla.
15 Diad kumapat ya agew inkuandad samay asawa nen Samson, Palikdom so asawam ya ibaga tod sika so ebat na samay pabitla to. No ag ka, poolan miy abung nen amam legan a wala kad dalem. Sikamiy inimbitaan yon dua, pian natakewan yo kami, anto?
16 Kanyan linmad kinen Samson imay asawa to a manakakis tan kuanto, Ag mo ak inaron tua! Kabosul mo ak! Pinabitlaan mo ray kakaarok, et ag mo ibagad siak so ebat to! Inkuanen Samson, Ag ko anggan imbagad kinen amak tan si inak so ebat. Sika ni ingen so pangibagaan ko?
17 Nanakis imay bii ya anggad kumapiton agew na ponsia. Balet diad kumapiton agew imbaga nen Samson ed kinen asawa to so ebat na samay pabitla, ta sinmawa lad panetepet lan panetepet na asawa to. Insan imbaga na samay asawa to so ebat ed saramay Filisteo.
18 Kanyan diad kumapiton agew kasakbayan ya onloob ed kuarto si Samson, inkuan na saramay lalakin taga siudad, Dinan niy masamit nen say dilo? Dinan niy mabiskeg nen say lion? Inmebat si Samson, No ag yo impambaka so bakak Ag yo naebatay pabitlak.
19 Kabebekta pinabiskeg na ispiritu na Katawan si Samson, et linmad Askelon a dimay amateyan toy talomplon lalaki tan inaala to ray kawes da, insan to ra inter ed saramay akaebat na pabitla to. Kayari to, sinmempet a mapalaloy petang na olo to lapud samay agawa.
20 Samay asawa to niiter ed lakin manonan angolup ed sikato nen nankasal.
1 "Ag abayag kayariy bansal, nen panaganiy trigo, binmisitay Samson ed kinen asawa to tan inawitan to na kilaw na kanding. Inkuantod kinen katolangan ton laki, Looban kod kuarto si asawak. Balet ag to palooben si Samson.
2 "Inkuantod kinen Samson, Tuan abaloan kon kabosul mo, kanyan inter kod kaarom. Balet magana ni may yogtan to. Sikato lay asawaen mo.
3 "Inkuanen Samson, Ag ak la natan natetel ed antokaman a gawaen kod saray Filisteo!
4 "Kanyan linman nanerel na talon lasus ya asod katakelan. Sanderwa to ran sinisinger ed ikul tan diad namboknulan sinisingeran to ra na nipotan a panagsilew.
5 "Insan dinangatan to ra may panagsilew tan imbobolus to rad kaalogan na trigo a kayaryan na saray Filisteo. Lapud saya ag to labat pinoolan iray naani, no ag ingen pati saray wala nid alog ya aaniyen. Apoolan met iray kaolibaan.
6 "Nen tinepet na saray Filisteo no siopay nanggawad saya, akabatan da a si Samson, lapud si katolangan ton taga Timna et inter tod kaaro nen Samson si asawa nen Samson. Kanyan saray Filisteo pinoolan dan mabilay imay bii tan pinoolan da met so abung nen ama to.
7 "Inkuanen Samson ed sikara, Lapud sayan ginawa yo ag ak ontonda anggad ag ak makabawid sikayo!
8 "Mapalaloy indogpa tod sikara, et amayamay so pinatey to. Insan linman nanayam ed ongib a walad Etam.
9 "Sinmabi ray Filisteo tan nankampo rad Juda tan dinogpaan day baley na Lehi.
10 Tinepet na saray totood Juda, Akin et dodogpaan yo kami? Inmebat ira, Linma kami dian mangerel ed kinen Samson tan gawaen mid sikato so singa ginawa tod sikami.
11 Kanyan sarayan talon libon lalaki ed Juda et linma rad ongib ed Etam tan kuandad kinen Samson, Ag mo ta amtan saray Filisteo so manooley ed sikatayo? Anto yay ginawam ed sikami? Inmebat si Samson, Ginawak ed sikara so singa ginawa rad siak.
12 Inkuandad sikato, Linma kami dian mamalur ed sika, pian nipalima mi kad sikara. Inkuanen Samson, Sambaan yo sirin ya ag yo ak papateyen.
13 Sigi, kuanda, baluren mi ka labat tan ipalima mi kad sikara. Ag mi ka pateyen. Kanyan binalur da na duaran balon lobir tan inlasur dan nanlapud samay ongib.
14 Kasabiy tod Lehi, mambabtik a dinmagod sikato iray Filisteo tan ineeyagan da. Kabebekta pinabiskeg na ispiritu na Katawan, et pinopoltut ton singa apoolan a tinebey ira may lobir ya akabalur ed saray taklay to.
15 Insan akarumog na pokel na saray pangal na asno ya agano nin inatey. Ginawat ton inala, tan sikatoy impamatey to na sanlibon Filisteo.
16 Kanyan kinanta nen Samson, Diad panamegley na pokel na saray pangal na asno, pinatey koy lalakin sanlibo; Diad panamegley na pokel na saray pangal na asno, impabubuntonan ko.
17 Kayari to ya, imbantak to may pokel. Atawag a Ramat-lehi imay pasen ya akagawaan ed saya.
18 Insan napnapgaan si Samson, kanyan tinmawag ed Katawan tan kuanto, Impanalo mo ak na baleg; natan ompatey ak, lapud inkapgaan tan, lapud nadakep ak na sarayan paganon Filisteo?
19 Insan nilokasan na Dios so nibobun a dalin diman ed Lehi, et pinmaway dimay danum. Inminom si Samson tan binmiskeg lamet. Kanyan samay sobul atawag na Hakkore; wadman ni ya anggad natan.
20 Duamploy taon ya impangulo nen Samson so Israel legan na impanoley na Filistia ed dalin.
1 "Aminsan ya agew linmay Samson ed Gaza a siudad na Filistia. Akabat tod man so sakey a marotak a bii tan akiakdulan to.
2 "Akabatan na saray totood Gaza a wadmay Samson, kanyan niliktub da may pasen tan sanlabi ran inalagar ed puirta na siudad. Mareereen iran sanlabi tan ninunot dad sikaran dili, Manalagar itayo dia ya anggad kabwasan, insan tayo pateyen.
3 "Balet anggad pegley labi labat ed dokulan si Samson, insan la binmangon. Inegnaan to may puirta na siudad, binagut to ya akila ray lusek, kaput, balewet tan amin a parti to. Sinakbat to tan inawit to ya anggad toktok na pokdul a tantandagan toy Hebron.
4 "Kayari to yan agawa, inmibeg si Samson ed sakey a biin manngaran na Delila a manaayam ed Patar na Sorek.
5 "Linmad samay bii iray limaran arari na saray Filisteo tan kuanda, Tanggoyur moy Samson ya ibaga tod sika no akin et mabisbiskeg tan no panon min natalo, nabalur, tan napagmaliw min anggapo lay nagawaan to. Balang sakey ed sikami et itdan mi kad satan na sanlibo tan sanlasus a kuartan pilak.
6 "Kanyan inkuanen Delila ed kinen Samson, Ibagam pad siak no akin et mabisbiskeg ka. No walay malabay a mamalur ed sika tan pagmaliwen to kan anggapoy nagawaan, antoy gawaen to?
7 "Inmebat si Samson, No baluren da ak na pitoran balon lobir na pana ya ag ira impamaga, magmaliw a singa biskeg na arum a too so biskeg ko.
8 "Kanyan saramay arari na saray Filisteo ed kinen Delila na pitoran lobir na pana ya ag ira impamaga, insan to binalur si Samson.
9 "Impanalagar nen Delila iray pigaran lalaki diad sakey a kuarto, nen abalur to la inmeyag, Samson! Nitan la ray Filisteo! Balet pinoltut to ra may lobir a singa labat tinebey ya asinit na apoy. Kanyan ag da ni amta so maamut a panlalapway biskeg to.
10 Inkuanen Delila ed kinen Samson, Lulukoen mo ak, ta ag mo ibabagad siak so tua. Ibagam la kari no panon kan nabalur na siopaman.
11 Inkuantod sikato, No baluren da ak na balon lobir ya ag nin balut inkana, magmaliw a singa biskeg na arum a too so biskeg ko.
12 Kanyan angalay Delila na pigaran balon lobir, insan to binalur si Samson. Kabebekta inmeyag, Samson! Nitan la ray Filisteo! Manaalagar ed sananey a kuarto ira may lalaki. Balet singa tinebey a pinopoltut to ra may lobir ed taklay to.
13 Inkuanen Delila lamet ed kinen Samson, Lulukoen mo ak ni, ta ag mo ibabagay tua ed siak. Ibagam pa la kari no panoy pakabalur na siopaman ed sika. Inkuanen Samson ed sikato, No ilagam ed panaglagaay abel so pitoran lapir na buek ko, insan mo sigpitan na palpal, magmaliw a singa biskeg na arum a too so biskeg ko.
14 Et nen naogip si Samson, inala toy pitoran lapir na buek nen Samson, nilaga tod panaglagaay abel, insan to sinigpitan na palpal. Kabebekta inmeyag, Samson! Nitan la ray Filisteo! Balet binmangon tan ginoyur to ray buek tod panaglagaay abel.
15 Kanyan inkuanen Delila ed sikato, Panoy pangibabagam ya inaro mo ak, anta andi manaya. Amitlo mo ak lan niluko, tan ag mo nin siansia imbagad siak no akin et mabisbiskeg ka.
16 Inagew-agew ton tinepet lan tinepet ed kinen Samson. Sinmawan siansiay Samson tan naingungotan la,
17 kanyan imbaga toy tua, Ag nin balut apotutan so buek ko, inkuanto. Nisaklang ak ed Dios a sakey a Nazareo nanlapu lad inkianak ko. No napotutan so buek ko, naandi so biskeg ko tan magmaliw a singa biskeg na arum a too so biskeg ko.
18 Nen abirbir nen Delila ya imbaga lad sikato nen Samson so tua, impaikuantod saramay Filisteon arari, Pawil ki ni dian maminsan. Imbaga to lad siak so tua. Sinmabi ra tan sankaawit da la may kuartan insipan dan iter.
19 Inayat nen Delila a makaogip si Samson ed akwalan to, insan anawag na sakey a laki ya amotut na pitoran lapir na buek nen Samson. Ginapwan nen Delila a pairapen si Samson, ta naandi lay biskeg to.
20 Insan inmeyag, Samson! Nitan la ray Filisteo! Binmangon tan ninunot to, Makaokpus ak tan nabolus ak a singa gendat. Ag to amta a tinaynan la na Katawan.
21 Dinakep na saray Filisteo si Samson tan sinokit da ray mata to. Inyakar da ed Gaza, ginolunggolungan da na gansa, insan da impankimey ed gilingan diad dalem na prisowan.
22 Balet ginmapon tinmubo so buek to.
23 Nantitipon a mansilibra iray arari na Filistia tan mangisaklang iray baleg a bagat ed dios dan Dagon. Nankanta ra, Impatalo na dios mi so kalaban min Samson!
24 Manliliket ira tan kuanda, Tawag yo diay Samson, ta paliketen to itayo! Nen impaway dad Prisowan si Samson, ingganggan dan paliketen to tan pinaalagey dad nanleetan na saray lusek. Nen anengneng na saray totoo, nankanta ray pangidayew dad dios da. Say dios tayo impanalo to itayo ed kalaban tayo a nandederal na dalin tayo tan nampapatey na amayamay ed sikatayo!
25
26 Inkuanen Samson ed ogaw a mangitatabin ed sikatod lima, Ipakarapas mod siak iray lusek na paalagey, ta onsaral ak.
27 Aseksek na bibii tan lalaki imay paalagey. Wadman ya amin ira may limaran arari na Filistia, tan sakey a talon libon lalaki tan bibii iray walad atep na paalagey a mambabantay ed kinen Samson a mamapaliket ed sikara.
28 Insan nampikasiy Samson, Katawan a Dios, nunot mo ak pa; O Dios, pabiskeg mo ak pa nin maminsan labat natan, pikasik ed sika, pian makabawi ak ed sarayan Filisteo ed impanokit dad saray matak.
29 Kanyan pinmeket si Samson ed saray duaran lusek ed pegley na paalagey. Impeket ton sansakey iray lima to ed saramay duaran lusek, intolak to ra
30 tan inmeyag, Ompatey ak komun a kaibak ira yan Filisteo! Intolak tod anggaay nayarian to may paalagey, et nagbad saramay limaran arari tan amin da ray arum a totoon wadman. Dakel niy apatey nen Samson diad samay impatey to nen say apatey to legan ton nambilay.
31 Saray agagi ton lalaki tan saray arum nin kabyangay pamilya to et dinmago ran angalay bangkay to. Insempet da tan impompon dad nanleetan na Zora tan Estaol diad lobuk nen ama ton Manoa. Duamploy taon a sikatoy pangulo na Israel.
1 "Nen saman walay sakey a lakin manngaran na Micaya a manaayam ed kapokdulan a dalin na Efraim.
2 "Inkuantod ina to, Nen walay anakew na sanlibo tan sanlasus a kuartan pilak yo, insamba yo may anakew. Nadngel kon ginawa yo man a samba. Walad siak iman so kuarta. Siak so angala. Inkuanen ina to, Bindisionan ka komun na Katawan, anak ko!
3 "Impawil nen Micaya imay kuarta, insan inkuanen ina to, Pian ag ondapod anak ko imay samba, masimoon kon isaklang ed Katawan yan kuartan pilak. Ikanak ed panggawad kiew a talintao a naokupay pilak. Kanyan natan ipawil kod sika yay kuarta.
4 "Insan impawil nen Micaya ed kinen ina to imay kuarta. Inala nen ina to so duan lasus a pilak, insan to inter ed sakey a platiro. Nanggawa may platiro na sakey a talintaon kiew tan inokupan to na pilak. Nipasen ed abung nen Micaya imay agawan talintao.
5 "Si Micaya et walay pasen ton dili a panangigalangan. Nanggawa na saray pigaran talintao tan sakey ya ipod, tan tinoro ton sakey a pari so sakey ed saray anak ton lalaki.
6 "Anggapod saman a panaon so ari na Israel; ginawa na balang too so labay ton gawaen.
7 "Diad saman a panaon walay sakey a lakin tobun-balo a Levita a manaayam ed baley na Betlehem na Juda.
8 "Tinaynan toy Betlehem ta mananap na arum a pasen a panayaman to. Nen manaakar, asabi toy abung nen Micaya, diad kapokdulan a dalin na Efraim.
9 "Tinepet ed sikato nen Micaya, Nanlapwan mo? Inmebat, Sakey ak a Levita a taga Betlehem na Juda. Manaanap ak na pasen a panayaman ko.
10 Inkuanen Micaya, Manayam ka diad siak. Sikay magmaliw a sumisimbawak tan parik, et itdan ta ka, kapag sakey taon, na samploran pilak a kuarta, pigaran kawes, tan say kanen mo.
11 Inmabuloy imay tobun-balon Levita ed kinen Micaya, kanyan nagmaliw a singa sakey ed saray anak nen Micaya.
12 Impasen nen Micaya imay Levita a pari to, tan nanayam lad mad abung nen Micaya.
13 Inkuanen Micaya, Natan ta walay Levitan parik, amtak la a paaligwasen ak na Katawan.
1 "Anggapod saman a panaon so ari na Israel. Diad saraman ya agew saray kabyangay tribu nen Dan et peles dan manaanap na nakayaryan dan dalin a panayaman da, lapud diad amin da ray tribu na Israel sikaray ag ni akaawat na nabebetangan dan dalin.
2 "Kanyan saray totoo nen Dan amili ra na limaran nayarin lalaki ed amin da ray pamilya na tribu tan imbaki da ran manlapud saray baley na Zora tan Istaol. Binilin da ra a liberen day dalin, ta nengnengen da. Nen akasabi rad kapokdulan na dalin na Efraim, akiayam irad abung nen Micaya.
3 "Nen wadman ira, abirbir day punto na panagsalita na samay tobun-balo a Levita, kanyan sinmingger irad sikato tan tinepet da, Antoy gagawaen mo dia? Siopay angyakar ed sika dia?
4 "Inmebat, Walay paknaan min dua nen Micaya a bayaran to ak diad pampaparik ed sikato.
5 "Inkuandad sikato, Tepet mo pad Dios no maaligwas kami ed sayan kurang mi.
6 "Inmebat imay pari, Anggapoy nepeg yon pampagaan. Aasikasoen kayo na Katawan ed sayan kurang yo.
7 "Kanyan tinmaynan ira may limaran lalaki tan linma rad baley na Lais. Anengneng da no panon a saray totood man et manaayam iran arawid kaatapan a singa saray Sidonio. Mareen so panagbilay da, anggapo ray mansasangsangan odino mansisiblangan; walad sikaray amin a nakaukolan da. Arawid sikara iray Sidonio tan anggapoy pasisiglaotan dad arum a totoo.
8 "Nen pinmawil ed Zora tan Estaol ira may limaran lalaki, tinepet ed sikara na saray kabaleyan da no antoy arumog da.
9 "Sigi sirin, ebat da ra may limara, dogpaan tayo so Lais. Anengneng mi man a dalin, tan agaylay abig to. Ag kayo dia manaayam ya anggapoy gagawaen. Ganatan tayo so onla tan samsamen tayo man a dalin!
10 No makakar kayod man naimano yo ya anggapoy isisip dan dogpaan ira na anggan siopa. Maawang iman a bansa, tan walan amiy nakaukolan na saray totoo. Inter na Dios iman a dalin ed sikayo.
11 Kanyan tinaynan day Zora tan Estaol iray anem a lasus a lalaki a kabyangan na tribu nen Dan. Linma ran sipaparaan a mibakal
12 tan nankampo rad Kiryat-jearim na Juda. Sikato yay makasengeg a natatawag ni man a dalin a kampo na Dan.
13 Manlapud saman a pasen tinmuloy ira, et akasabi ra ed abung nen Micaya diad kapokdulan a dalin na Efraim.
14 Insan saramay limaran nibaki a mannengneng ed dalin a kaliber-liber na Lais kuandad saray kakaiba ra. Diad sakey ed saray abung dia walay kiew a talintaon naokupan na pilak. Wala met iray arum a talintao tan walay sakey ya ipod. Antoy kuanyon gawaen tayo?
15 Kanyan linma rad abung nen Micaya a panaayaman na samay tobun-balon Levita, tan tinepet da no antoy kipapasen na panagbilay to.
16 Legan to ya, manalalagey ed puirta ira may anem a lasus a sondalo na Dan ya akaparaan a mibakal.
17 Tinmuloy ed abung ira may limaran nibaki a mannengneng ed dalin tan inala ra may kiew a talintaon naokupan na pilak, saramay arum a talintao, tan samay ipod, legan a kaiba na samay pari ed puirta ira may anem a lasus a sondalon akaarmas.
18 Nen linmad abung nen Micaya ira may limaran lalaki tan inala da ra may talintao tan ipod, tinepet na samay pari ed sikara, Antoy gagawaen yo?
19 Inkuandad sikara, Ag ka maingal. Ag ka onsasalita. Milad kad sikami tan sika so pari tan sumisimbawa mi. Ag mo ta labay so mampari ed intiron sakey a tribu na Israel nen say sakey a pamilya labat?
20 Lapud saya akaliket imay pari, kanyan inala to ra may talintao tan samay ipod tan akilad sikara.
21 Pinmoliktar ira tan ginapwan day linma a walad onaan da ray anak da, saray baka ra, tan saray kayaryan da.
22 Arawi lay nakar da nen tinawag nen Micaya iray kakaabay to, ta mibakal ira. Nabot da ra may kabyangay tribu nen Dan
23 tan ineeyagan da ra. Pinmoliktar ira may kabyangay tribu nen Dan tan tinepet dad kinen Micaya, Akin, antoy agawa? Akin ira tay amayamay a totoo?
24 Inmebat si Micaya, Imbatik yoy parik tan saray diriyos a ginagawak; anto niy akeraan ed siak? Insan natan tepeten yo no antoy agawa?
25 Inkuandad kinen Micaya, Maung lay mandeen ka nen say makapasnuk ira yay lalaki dia, et dogpaan da ka. Andi-saew a nasaplut kayon sankapamilyaan.
26 Insan intuloy na saramay kabyangay tribu nen Dan so nankurang. Anengneng nen Micaya ya anggapoy nagawaan ton milaban, kanyan amoliktar lan sinmempet.
27 Kayarin inala na saramay kabyangay tribu nen Dan imay pari tan saramay bengatlan ginawa nen Micaya, linma ran dimogpa ed Lais, samay baley a mareen so panagbilay na saray totoo to, tan walad patar a singa Betrehob. Pinapatey da ray totood man tan pinoolan day baley. Anggapoy mangyagel ed sikara, lapud arawi so Lais ed Sidon, tan anggapoy pipiolupan dan arum a totoo. Pinasimbalon impaalagey na saramay kabyangay tribu nen Dan tan nanayam irad man.
28
29 Sinalatan day ngaran to may baley a Lais; insalat da so Dan; impara ra ed ngaran na ateng da a Dan a lakin anak nen Jacob.
30 Inlira na saramay kabyangay tribu nen Dan imay talintao a galangen da, et si Jonatan a lakin anak nen Gersom tan apo nen Moises so pari na saray kabyangay Tribu nen Dan tan saray kabyangay boleg nen Jonatan so pari ra ya anggad nibantak ed arum a bansa iray totoo.
31 Nansiansian wadman imay talintao nen Micaya legan a walad Silo so Tulda a panangigalangan ed Dios.
1 "Diad saramay agew ya anggapo niy ari na Israel, walay sakey a Levita a manaayam ed niarawin pasen ed kapokdulan a dalin na Efraim. Angyamung na sakey a biin taga Betlehem na Juda.
2 "Balet akapasnuk ed sikato imay bii, amawil ed kinen ama to ed Betlehem, tan nanayam diman ya apat bulan.
3 "Insan samay laki ginetma to a tombuken, ta koyungen ton ompawil ed sikato. Intagar toy aripen to tan kaiba toy duaran asno. Pinaloob na samay bii imay Levita ed abung nen ama to; nen anengneng na samay ama imay Levita, malikeliket ton inawat.
4 "Pinilit na samay ama a manayam nid man imay Levita, kanyan nanayam diman a taloy agew. Nanaakan tan inmoogip irad man.
5 "Diad kaimbuas na kumapat ya agew asaksakbay iran binmangon tan namparaan iran ompikal. Balet inkuan na samay ama ed samay Levita, Mangan kayo ni, pian mabiskeg kayon mambiahi. Kayari yon mangan, insan kayo la onla.
6 "Kanyan inmirung ira may duaran lalaki, angan tan inminom ira. Insan samay ama na bii kuantod samay Levita, Mansanlabi ka ni dia kari tan manliket ka.
7 "Inmalagey ya onla la may Levita, balet mapilit may ama a mansanlabi ni imay Levita, kanyan inmogip nid man.
8 "Diad kabkabwasan na kumaliman agew ginapwan toy mampatanir imay Levita, balet inkuan na samay ama, Mangan kayo ni. Mampangarem kayo ni. Kanyan angan ni ra may duaran lalaki.
9 "Nen ompikal la lamet imay laki, samay kaamung ton bii, tan samay aripen, inkuan na samay ama, Onlalabi la; ogip kayo ni dia laingen. Mansanlabi kayo ni dia; dia kayo ni tan manliket kayo. Mangabkabwasan kayo la ompikal nabwas.
10 Balet ag la labay na samay Levita so mansanlabid man, kanyan nampikal ya onsempet la a pati samay biin kaamung to. Walay duaran asno ra a walay silya na beneg da. Ngarngarem la nen asingger la rad Jebus (say Jerusalem), kanyan samay aripen kuantod kinen amo to, Ontonda tayo, ta dia lad sayan siudad na saray Jebuseo so pamalabasan tayoy labi.
11
12 Balet inkuan na samay amo to, Ag itayo ontondad siudad ya aliwan Israelita iray totoo to. Ituloy tayo lay panaakar tayo, ta mamalabas tayo la na labi ed Gabaa odino diad Rama.
13
14 Kanyan nilabasan day Jebus tan intuloy day kurang da. Sinmelek lay agew nen akasabi ra ed Gabaa a sakop na dalin na tribu nen Benjamin.
15 Inmarawi rad dalan, ta diman la ra mamalabas na labi. Linmoob irad baley tan nanirung irad plasa, balet anggapoy toon mamatuloy ed sikarad abung to a naogipan da.
16 Legan dan wadman, walay masiken ya onsesempet la kayari ton nankimey ed daralusan to. Gendat a taga kapokdulan a dalin na Efraim, balet manaayam la natan diad Gabaa. (Kabyangan na tribu nen Benjamin iray arum a totood man.)
17 Naimano na samay masiken imay mambibiahi a walad plasa, et tinepet tod sikato, Nanlapwan yo? Iner so laen yo?
18 Inmebat imay Levita, Nanlapu kamid Betlehem na Juda, et natan onsempet kami la ed arawdawin pasen na kapokdulan a dalin na Efraim. Anggapoy mamatuloy ed sikami,
19 anggaman a sankaawit miy abasto mi tan say dayamin para saray asno mi. Walay tinapay tan alak a para sayay asawak tan sikamin dua yay aripen ko. Walan amiy nakaukolan mi.
20 Inkuan na samay masiken, Tuloy kayod abung ko! Asikasoen ta kayo; aliwan manepeg a mamalabas kayoy labi diad plasa.
21 Kanyan intagar to rad abung to tan pinakan to ra may asno ra. Inorasan na saramay sangkaili so kasaliyan da, insan ira nandem.
22 Manliliket ira nen kabebekta walay ray pigaran lalakin marotak so inkatoo ra a sinmabi ran nanlapud baley. Niliktub da may abung tan ginapwan day nantoktok ed kaput. Inkuandad samay masiken, Ipaway mo dia tay lakin kaibam a sinmempet! Labay miy miakdul ed sikato!
23 Balet pinmaway imay masiken tan kuantod sikara, Aleg, kakaaro! Ag yo kari gagawaen itan a maoges tan mabanday a bengatla! Sangkailik yan tooy wadya.
24 Say maung, samay asawa to tan say anak kon marikit so iter kod sikayo. Gawa yo lay labalabay yod sikara. Balet ag yo gagawaen so mabambanday ed sayan laki!
25 Balet ag ondengel ira may lalaki. Kanyan inala na samay Levita imay asawa to tan impaway ton inter ed sikara. Pinasoot tan nanliketan dan sanlabi tan ag da tinondaan ya anggad kabwasan.
26 Sinmabid palbangon imay bii tan aloknut lad puirta na abung na samay masiken ya akipunduan na asawa to. Wadman ni ya anggad maliwawa la.
27 Binmangon imay asawa to diad saman a kabwasan, et nen nilokasan toy puirta ya ompikal la, anengneng tod may asawa to ya akarokul tan akaonat so lima ton onggagawat ed kaput.
28 Inkuanto may laki, Bangon ka, ta onla itayo la. Balet ag onebat. Kanyan sinakloy ton impabenlag ed beneg na asno tan ginapwan toy onsempet.
29 Kasabi tod abung to, angalay yuron baleg. Inala to may bangkay na asawa to, impankalabindua ton tegteg tan impaiyakar to so sakey a tegteg ed kapag tribu na Israel.
30 Amin a totoon akanengneng ed saman inkuanda, Ag kami ni akanengneng na onyan agawa! Ag ni yan balut agawa nanlapu lad intaynan da ray Israelita diad Egipto! Nakaukolan a nudnunoten tan tongtongen tayoy nepeg tin gawaen nipaakar ed saya!
1 "Amin da ray totood Israel, manlapud Dan diad baybay ya anggad Beer-seba diad abalaten tan manlapud Galaad diad bokig, et inmebat irad tawag a mibakal ira. Nantitipon iran singa saksakey iran laman diad arap na Katawan diad Mizpa.
2 "Saray pangulo na amin a tribu na Israel ed wadya ra ed sayan impantitipon na saray totoo na Dios, a say bilang da et asabi toy apat a lasus libon sondalo ya akaispada.
3 "Nadngelan na saray totood Benjamin so sayan impantitipon ed Mizpa na amin da ray arum ya Israelita. Tinepet na saray Israelita, Ibagam ed sikami no panoy inkagawa na saman a kaogsan?
4 "Inmebat imay Levita a pinatey so biin kaamung to, Linma ak ya amalabas na labi ed Gabaa a sakop na dalin na Benjamin; kaibak imay kaamung kon bii.
5 "Dinmagon mangalad siak iray lalakin tagad man ed Gabaa, kanyan niliktub dad saman a labi so abung a nampunduan mi. Ginetma da ak a pateyen, balet saman lay asawak so pinasoot tan nanliketan da.
6 "Inalak so bangkay to, tinetegteg ko, insan ko impaiyakar so sakey a tegteg ed balang tribu na Israel. Nanggawa ra man a totoo na maoges tan mabanday a bengatla sumpad sikatayo.
7 "Israelita tayo dian amin. Antoy nepeg tayon gawaen natan nipaakar ed saya?
8 "Nambabansag ya inmalagey ira may totoo tan kuanda, Anggapod sikatayoy onsempet, tulda odino abung so panaayaman to.
9 "Onyay nepeg tayon gawaen: mampapalaran itayo, ta mamili tayo na lalaki ya ondogpad Gabaa.
10 Say kakaplod saray lalakid Israel et sikaray makaoley a maniter na abasto da ray sondalo; saray arum onla ran manusa ed Gabaa lapud sayan mabanday a ginawa ra sumpad Israel.
11 Kanyan amin da ray lalaki ed Israel et nantitipon a saksakey so getma rasay idogpa rad baley na Gabaa.
12 Saray tribu na Israel et angibaki ra na saray totoo ed intiron dalin na tribu na Benjamin a mangikuan, Makapasinagem yan kaogsan a ginawa yo.
13 Ipalima yod sikami ra man a totoon andi-kakanaan a taga Gabaa, ta pateyen mi ra pian naekal yan kaogsan ed Israel. Balet ag dinengel na saray totood Benjamin ira may arum ya Israelita.
14 Nantitipon ed Gabaa iray totood amin a siudad na Benjamin, ta bakalen da ray arum a totood Israel.
15 Diad saman ya agew duamplo tan anem a libon sondalo a nanlapud saray siudad da so atawag da. Likud ed saraya, anipon iray totood Gabaa na piton lasus a lalakin nidoma-doman pinili; kawigi ra yan sondalo. Nayarian na siopaman ed sikara a bansotan so sakey a buek et nakena ton nakena.
16
17 Apat a lasus libon impasal a sondalo na Israel so atipon, likud ed saray kabyangay tribu nen Benjamin.
18 Linmad pasen a panangigalangan diad Betel iray Israelita, tan tinepet dad man ed Dios, Dinan a tribu so ononan ondogpad saray Benjaminita? Say Katawan inmebat, Say tribu nen Juda.
19 Kanyan diad ontombuk a kabwasan ginapwan na saray Israelita so nankampo ed pasen ya asingger ed Gabaa.
20 Linma ran ondogpad saray sondalo nen Benjamin, kanyan inlira da rad pasen ya akaarap ed siudad iray sondalo.
21 Pinmaway ed siudad iray sondalo nen Benjamin, et diad saman ya agew akapatey ira na duamplo tan duan libon sondalon Israelita.
22 Insan linmad pasen a panangigalangan iray Israelita tan nanermen irad arap na Katawan ya anggad labi. Tinepet dad sikato, Onla kami lamet a mibakal ed saray agagi min Benjaminita? Inmebat so Katawan, On. Lapud sayan ebat binmiskeg so linawa da ra may Israelita, kanyan inlira ra lamet ed pasen ya angiliraan day sikaran dili nen imbeneg ya agew.
23
24 Pidwa lan onsulong a mibakal iray Israelita sumpad saray Benjaminita.
25 Pinmaway ed Gabaa lamet iray Benjaminita, et natan akapatey ira na labinwalon libon sondalon Israelita ya impasal.
26 Insan amin da ray Israelita linma rad Betel tan nanermen ira. Nanirung irad man ed arap na Katawan tan ag iran balut angan anggad labi. Angisaklang ira na saray bagat a popoolan tan saray bagat a para kareenaninsaklang da ra yan amin ed arap na Katawan.
27 Diad saraman ya agew wadman ed Betel imay Kaban na Sipanan na Dios, tan si Finees a lakin anak nen Eleazar tan apo nen Aaron so makaoley ed samay Kaban. Tinepet na saray totoo ed Katawan, Onla kami lamet a mibakal ed saray agagi min Benjaminita, odino ontonda kami la? Inmebat so Katawan, Mibakal kayo, et nabwas panaloen ta kayod sikara.
28
29 Kanyan saray Israelita amaamut irad kaliber-liber na Gabaa na saray pigaran sondalo.
30 Diad kumatlo na nantotombukan ya agew sinmulong a mibakal ed saray sondalo na Benjaminita tan inlira da ray sondalo ra ed pasen a sankaarap day Gabaa a singa samay ginagawa da la.
31 Pinmaway a mibakal ira may Benjaminita, kanyan apaarawi rad siudad. Onung na singa samay ginagawa da la nen inmona, ginapwan dan pinapatey iray Israelita ed maawang ya alog, diad dalan a mamaarap ed Betel tan diad dalan a mamaarap ed Gabaa. Akapatey la ra na sakey a talomplon Israelita.
32 Inkuan na saray Benjaminita, Tinalo ti la ra a singa samay impanalo tayod saray inmonan bakal. Balet implano na saray Israelita ya onsener ira, pian napaarawi da rad siudad tan makakar irad saray dalan.
33 Kanyan nen sinmener so manonan olup na saray sondalon Israelita tan nantitipon irad Baaltamar, biglan pinmaway ed panaamutan dan mabaton-dampay diad kaliber-liber na siudad ira may akapaliber ed Gabaa.
34 Samplon libon apili-pilin sondalo na Israel iray dinmogpad Gabaa, et pinasiay agawan bakal. Ag alikas na saray Benjaminita a ngalngali la ra natalo.
35 Impanalo na Katawan iray Israelita ed saray sondalo na Benjamin. Diad saman ya agew akapatey iray Israelita na duamplo tan liman libo tan sanlasus a kalaban,
36 insan abirbir na saray Benjaminita ya atalo ra. Say manonan olup na saray sondalon Israelita et sinmener irad saray Benjaminita, lapud nanmatalek irad saray lalakin akaamut ed kaliber-liber na Gabaa.
37 Masiglat a batik ed Gabaa ira yan lalaki; pinanatan da may siudad tan pinatey day balang tood man.
38 Say manonan olup na saray sondalon Israelita tan saramay inmamut et walay nampaknaan dan sakey a tanda. No nanengneng na saray walad bakalan ya Israelita so sakey a makapal ya asewek a manlapud baley,
39 ompoliktar ira. Diad sayan bekta akapatey la ra may Benjaminita na talomplon Israelita. Inkuandad sikaran dili, On, tinalo ti la ra a singa samay impanalo tayod saramay inmonan bakal.
40 Insan pinmaway imay tanda; say makapal ya asewek et ginmapon inmatagey a nanlapud baley. Nikelawan iray Israelita ed anengneng dan kapopoolan na intiron siudad.
41 Insan pinmoliktar ira may Israelita, et atalagnaw ira may Benjaminita lapud abirbir dan ngalngali la ra naoput.
42 Sinmener ira tan batik irad maawang a kaalogan, balet ag ira makabatik. Aseldet irad pegley na samay manonan olup na saray sondalon Israelita tan saramay ompapaway lan manlapud siudad, kanyan apatey ira.
43 Apatitan na saramay Israelita ira may kalaban da; ag da ra tinondaan ya inosilan ya anggad sakey a pasen ed bokig na Gabaa. Pinapatey da ra legan da ran inosilan.
44 Labinwalon libon sankaabigan a Benjaminitan sondalo so apatey.
45 Amoliktar iray arum ed sikara tan batik iran amaarap ed kaalogan ya anggad Baton-dampay na Rimmon. Liman libo ed sikara so apatey ed saray dalan. Intuloy na saray Israelita ya inosilan ya anggad Gidom iray nakdaan. Akapatey ni ra na duan libo.
46 Diad saman ya agew duamplo tan liman libon Benjaminitan iray apateymasebeg iran amin a sondalo.
47 Balet anem a lasus a lalaki so akabatik ya anggad maawang ya alog tan akakar ira ed baleg a Baton-dampay na Rimmon. Nanayam irad man ya apat bulan.
48 Pinawil na saramay Israelita iray akeraan a Benjaminita tan pinapatey da ran aminlalaki, bibii, ogogaw, tan pati saray ayayep. Pinoolan day amin a baley ed saman a dalin.
1 "Nen nantitipon ed Mizpa iray Israelita, sinambaan dad Katawan: Anggapod sikatayo so mangyabuloy ya asawaen na siopaman a Benjaminita so biin anak tayo.
2 "Kanyan natan linmad Betel iray Israelita tan nanirung irad arap na Katawan ya anggad labi. Maknul tan ampaipait so impandageyem dad ermen:
3 "Katawan a Dios na Israel, akin et agaway onya? Akin et ngalngali naandipat ed Israel so tribu nen Benjamin?
4 "Diad kabkabwasan na ontombuk ya agew binmangon ira may totoo tan amaalagey irad man na altar. Angisaklang ira na saray bagat a popoolan tan saray bagat a para kareenan.
5 "Tinepet da, Walay grupo ed amin da ray tribu na Israel ya ag akitipon ed arap na Katawan diad Mizpa? (Sinambaan da nen saman a siopamay ag linmad Mizpa et nepeg a pateyen).
6 "Saray Israelita et inermenan da ray lalakin agagi ran Benjaminita tan kuanda, Natad sayan agew say Israel et akabalang na sakey ed saray tribu to.
7 "Antoy gawaen tayo, pian naitdan tayo na saray asawa iray lalakin Benjaminita ya akeraan? Sinambaan tayod Katawan ya ag tayon balut paasawad sikara iray anak tayo.
8 "Nen tinepet da no wala kasiy grupo ed saray tribu na Israel ya ag akitipon ed Mizpa, naamtaan da ya anggapoy taga Jabes na Galaad ya akitipon diman;
9 "anggapoy taga Jabes ya inmebat nen tinawag so kangaranan da ray sondalo.
10 Kanyan samay tipon angibaki ra na labinduan libon sankasebegan a sondalon lalaki tan onyay bilin dad sikara: Laka yo, ta patey yo ray amin a totoo ed Jabes, pati saray bibii tan saray ogogaw.
11 Patey yo ray amin a lalaki tan amin a biin aliwan birhin.
12 Akarumog ira na apat a lasus a birhin ed saray totood Jabes, kanyan inawit da rad kampod Silo a sakop na dalin na Canaan.
13 Insan nampabakian na intiron tipon na saray Israelita ira may Benjaminitan walad baleg a Baton-dampay na Rimmon tan impaibaga rad sikara tondaan da la so bakal.
14 Amawil la sirin ira may Benjaminita, tan saramay arum ya Israelita inter dad sikara ira may bibiin taga Jabes ya ag da ra pinatey. Balet kulang iran para sikara.
15 Kaskasian na saray totoo iray Benjaminita, lapud dineral na Katawan so pankakasakey na saray tribu na Israel.
16 Kanyan saray pangulo na tipon kuanda, Anggapo lay biin atilak ed tribu nen Benjamin. Antoy gawaen tayo, pian naitdan tayo na saray asawa iray lalakin Benjaminita ya akeraan?
17 Ag nepeg a nabalangan na sakey a tribu so labinduan tribu na Israel. Mananap tayo na polaing a makapangituloy na kiwawalay tribu nen Benjamin.
18 Balet ag tayo ra nayarin pangasawaen ed saray anak tayo, lapud sinambaan tayo a nisamba so siopaman a mangyabuloy ya asawaen na Benjaminita so anak to.
19 Insan anunotan da ya asingger lan onsabi manaya so tinaon a pista na Katawan ed Silo. (Walad baybay na Betel so Silo, abalaten na Lebona, tan bokig na dalan a nanleetan na Betel tan Sikem.)
20 Inkuandad saramay Benjaminita, Laka yon onamut ed saray kaubasan
21 tan mambantay kayo. No ompaway ya onsayaw iray bibiid Silo legan na pista, paway kayo met ed inamutan yon kaubasan. Balang sakey ed sikayo et mangalad pasootan na asawaen to ed saramay bibii tan awit yo rad man ed dalin na Benjamin.
22 No onlad sikayo a manriklamo ray ama odino agagi ran lalaki, nayarin ibaga yo ed sikara, Ipangasi yon ag yo la ra aalaen lapud ag mi ra inalad sikayod bakal, pian naasawa mi ra. Bangta ag yo ra inter ed sikami, ag kayo mankasalanan ed ag yo impanoor ed sipan yo.
23 Ginawa ya na saramay Benjaminita; amili so balang sakey ed sikara na asawaen to ed saray bibiin onsasayaw ed Silo, insan to imbatik. Pinmawil irad dilin dalin da, impaalagey da lamet iray baley, tan nanayam irad man.
24 Diad saman lamlamang a panaon tinmaynan ya amin iray arum ya Israelita; pinmawil ed dilin tribu to so balang sakey a too, tan diad dilin pamilya to tan diad dilin kayaryan to.
25 Diad saman a panaon anggapoy ari ed Israel. Ginawa na balang sakey a too so labay ton gawaen.