1

¹ "Kayariy impatey nen Moises ya aripen na Katawan, say Katawan akitongtong ed kinen Josue a lakin anak nen Nun tan katulong nen Moises.

² "Inkuanto, Inatey la si aripen kon Moises. Mamparaan kayo la sirin, sika tan amin da ray totood Israel; baliw yoy Ilog na Jordan diad iyakar yod dalin ya iiter kod sikayo.

³ "Onung na imbagak ed kinen Moises, inter kod sika tan diad amin a totook so intiron dalin a nadalan yo.

⁴ "Saray ketegan na dalin yo et manlapud kalawakan ed abalaten ya anggad Kapalandeyan na Libano diad baybay; manlapud baleg ya Ilog na Eufrates diad bokig, beltangen toy dalin da ray Heteo, ya anggad Dayat na Mediteraneo diad sagur.

⁵ "Josue, anggapoy manalod sika legan mon mambilay. Olupen ta ka a singa impangolup kod kinen Moises. Olupen ta ka lawas; ag ta kan balut ikaindan.

⁶ "Pabiskeg moy linawam tan manmatalek ka, ta sika so pangulo da ra yan totoo diad iloob dad dalin ya insipan kod saray lalaki ra.

⁷ "Pabiskeg mo labat so linawam tan manmatalek ka; pampelengan mon onuren so intiron Ganggan ya inter ed sika nen Moises ya aripen ko. Ag mo papaolyan ya onuren so anggan dinan a parti na sayan Ganggan et onaligwas ka ed anggan iner a laen mo.

⁸ "Nepeg a pampelengan mo a say libro na Ganggan et nibasa lawas no mangigalang kayod siak. Aral mod agew tan labi, tan pampelengan mon onuren iray amin a nisulat. Diad satan onaligwas ka tan maung so pansumpalan mo.

⁹ "Ag mo lilingwanan ya ingganggan ta kan mampabiskeg na linawa tan manmatalek. Ag ka ontatakot tan ag mo pakakapoyey linawam, ta siak a Katawan a Dios mo et olupen ta ka ed iner man a laen mo.

¹⁰ Kayari to ya, ingganggan nen Josue iray pangulo

¹¹ a manliber irad loob na kampo, ta ikuandad saray totoo, Mamparaan kayo na saray nakan, ta diad loob na taloy agew, baliwen yoy Ilog na Jordan diad panakop yod dalin ya iiter ed sikayo na Katawan a Dios yo.

¹² Inkuanen Josue ed saray tribu di Ruben, Gad, tan kapalduay tribu nen Manases,

¹³ Nunot yo man so imbaga nen Moises ya aripen na Katawan ya iter ton panayaman yo yan dalin diad nibokig na Jordan.

¹⁴ Natilak ira diay kaasawaan yo, saray anak yo, tan saray ayayep yo, balet saray sondalo et ombaliw iran akaarmas ya onaan da ray kapara ran Israelita pian natulongan da ra

¹⁵ anggad nasakop day dalin a sagur na Jordan, say dalin ya inter ed sikara na Katawan a Dios yo. No nilira to la ran maligen iray amin a tribu na Israel, ompawil kayo lad satan dia tan manayam kayo lad dalin yod bokig na Jordan ya inter ed sikayo nen Moises ya aripen na Katawan.

¹⁶ Inmebat irad kinen Josue, Sumpalen miy amin ya imbagam ed sikami tan onla kamid iner man a pasen a pangibakian mod sikami.

¹⁷ Onuren mi ka a singa impangonur mi lawas ed kinen Moises; wala komun ed sika so Katawan a Dios mo a singa inkiwala tod kinen Moises!

¹⁸ Pateyen so siopaman ya onsumpad pakaoley mo tan onsumlang ed saray ganggan mo. Mampabiskeg kay linawam tan manmatalek ka!

2

¹ "Insan si Josue angibakin nanlapud kampod Acacia na duaran ispia tan binilin to ra a maamut dan nengnengen so kipapasen na dalin na Canaan, nagkalalo lad siudad na Jerico. Nen akakar irad siudad, diad abung na sakey a marotak na bii a manngaray Rahab so amalabasan day labi.

² "Nadngelan na ari ed Jerico a diad saman a labi wala ray Israelitan linmoob a manispia ed bansa,

³ "kanyan impaibaga tod kinen Rahab: Saratay lalakin wadtad abung mo et linma ra dian manispia ed intiron bansa! Papaway mo ra!

⁴ "Wala ran tuay lalakin linma diad abung ko, ebat nen Rahab, balet ag ko amta no taga ra iner. Tinmaynan la ra kasakbayan a nikaput so puirtay siudad nen kapansironget. Ag ko amtay nila ra, balet no osilan yo la ran tampol, naabut yo ni ra. (Si Rahab et pinaonla tod atep na abung ira may duaran ispia tan pinaamut to rad dalem na saray imbobontun tod man a pokepokel na tanaman.)

⁵

⁶

⁷ "Tinaynan na saramay totoo na ari so siudad, insan nikaput so puirta. Linma ran nananap ed saramay Israelitan ispia ya anggad dalan a kawalaay babaliwan na Ilog na Jordan.

⁸ "Kasakbayan a naogip ed saman a labi ira may ispia, linmad toktok na abung si Rahab tan

⁹ "kuantod sikara, Amtak ya inter ed sikayo na Katawan yan dalin. Natatakot ed sikayo ya amin iray tood sayan bansa.

¹⁰ Nadngelan mi no panoy impanpamaga na Katawan ed Dayat ya Ambalanga nen ombaliw kayo kataynan yod Egipto. Nadngelan mi met no panoy impamatey yod kindi Sehon tan Og ya arari da ray Amorreo diad bokig na Jordan.

¹¹ Kadngel mid saman a balita ataktakot kami; kinmapoy so linawa mi lapud sikayo. Say Katawan a Dios yo, et Dios ed tawen tan diad tapew na dalin.

¹² Natan mansamba kayo karid ngaran na Katawan a kasian yoy pamilyak a singa impangasik et sikayo, tan itdan yo ak na tanda a napanmatalkan ta kayo.

¹³ Isipan yod siak ya iyagel yoy amak tan si inak, saray agagik a lalaki tan bibii, tan amin a kabyangan na pamilya ra! Ag yo kami papapatey!

¹⁴ Saramay lalaki kuandad sikato, Babawien komun na Dios so bilay mi no ag mi tooren so ibaga mi! No ag mo ibagad siopaman so gagawaen mi, isipan mid sika a no inter la na Katawan ed sikami yan dalin, kasian mi kayo, ag mi kayon balut diwiten, sika tan saray kabyangay pamilyam.

¹⁵ Si Rahab et manaayam ed abung a nipapeg ed padir na siudad, kanyan inleksab to la rad bintana diad panamegley na lobir.

¹⁶ Inkuantod sikara, Laka yod kapokdulan ompan narumog kayo na saramay totoo na ari. Amut kid man a taloy agew anggad akapawil la ra. Kayari to sempet ki la.

¹⁷ Inkuan na saramay lalaki ed sikato, Tooren mi may impaisipan mod sikami.

¹⁸ Onyay nepeg mon gawaen. No looban miy dalin yo, iberber mo yan ambalangan koldon ed bintanan angilasuran mod sikami. Tawad mod abung mo ray ateng mo, saray agagim a lalaki tan amin a kabyangay pamilya nen amam.

¹⁹ No walad sikayoy ompaway ed abung, kasalanan to lan diliy ipatey to, et ag kami la natetel; balet no walay toon napasakitan ed dalem na abung; sikamid satay natetel.

²⁰ Balet no walay pangibagaan mod ginawa mi, ag mi kaukolan a sumpalen so impaisipan mod sikami.

²¹ Inmabubon imay bii insan to la ra pinasiput. Nen andi la ra, imberber tod bintana imay ambalangan koldon.

²² Linman inmamut ed kapokdulan ira may ispia. Saramay totoo na ari et taloy agew da ran inanap ed kaliber-liber na bansa, balet ag da ra naalmo, kanyan amawil la rad Jerico.

²³ Insan saramay duaran ispia inmakseb ira manlapud kapokdulan, binaliw day ilog, tan pinmawil irad kinen Josue. Imbaga rad sikato so amin ya agawa,

²⁴ tan inkuanda, Anggapoy duaruwa min say Katawan inter tod sikatayo man ya intiron bansa. Natatakot ed sikatayo iray amin a totood man.

3

¹ "Diad kaimbwas si Josue tan amin ya Israelita asaksakbay iran binmangon, tinaynan da may kampod Acacia, ta linma rad Jordan, a dimay nankampoan da legan na impanalagar dad ibaliw da.

² "Kalabas na taloy agew niliber na saray pangulo so kampo

³ "tan inkuandad saray totoo, No kanengneng yod saray paparin sankaawit day Kaban na Sipanan na Katawan a Dios yo, taynan yoy kampo tan tombuk kayod sikara.

⁴ "Ag kayo ni dia akakar nen saman, kanyan ibasbas da kayo no iner so laen yo. Balet ag yo aasinggeran so Kaban na Sipanan; dia kayod beneg to tan arawian yo na walon lasus mitro.

⁵ "Inkuanen Josue ed saramay totoo, Linisan yoy sikayon dili onung ed ganggan, tan nabwas say Katawan manggawad pegley yo na saray milagro.

⁶ "Insan to imbagad saray papari a sakbaten da may Kaban na Sipanan tan onona ran ombuat nen saray totoo. Ginawa ra so imbaga to.

⁷ "Say Katawan kuantod kinen Josue, Lapud gawaen ko natad sayan agew, igapo na amin da ray Israelita so pamagalang dad sika a sakey a matalonggaring a too, tan nabirbir da a wala ak ed sika a singa inkiwalak ed kinen Moises.

⁸ "Ibagam ed saray paparin manasakbat ed Kaban na Sipanan a no nasabi ray ilog, onlasur irad danum tan manalagey irad man ed gilig.

⁹ "Insan inkuanen Josue ed saray totoo, Gali dia ta dengel yoy ibagad sikayo na Katawan a Dios yo.

¹⁰ Legan kayon mankukurang, andi-saew a pataynanen to ray Cananeo, saray Heteo, saray Heveteo, saray Perezeo, saray Gergeseo, saray Amorreo, tan saray Jebuseo. Naamtaan yo a say mabilay a Dios et kaolup yo

¹¹ no say Kaban na Sipanan na Katawan na sankamundoan et walad onaan yon ombaliw ed Jordan.

¹² Mampili kayo na labinduan lalaki, sakey ed kapag tribu na Israel.

¹³ Kalasur dad danum ira may paparin mansakbat na Kaban na Sipanan na Katawan, ontondan onagos so Ilog na Jordan tan nagilon ed sakey a pasen so danum ya onaagos a palasur.

¹⁴ Panaon ed saman na panagani, tan onlilipua so ilog. Nen tinaynan na saray totoo imay kampo, ta ombaliw irad Ilog na Jordan, inmonad sikara iray may papari a sankasakbat day Kaban na Sipanan na Katawan. Kalasur da ra may papari ed danum,

¹⁵

¹⁶ tinmondan onagos so danum na ilog tan agilon ed bandad tagey so danum, diad Adan, say siudad a kaabay na Zaretan. Say agos a mampalasur ed Inatey a Dayat et sigput a tinmonda kanyan saramay totoo et akabaliw irad abay na Jerico.

¹⁷ Nen ombabaliw ed amagan dalin ira may totoo saramay paparin manasakbat ed samay Kaban na Sipanan et nanalagey irad amagan dalin ed pegley na Ilog na Jordan anggad akabaliw ya amin iray totoo.

4

¹ "Nen akabaliw lad Jordan iray amin a totoo, say Katawan kuantod kinen Josue,

² "Mamili kay labinduan lalaki, sakey ed kapag tribu,

³ "tan iganggan mo ran mangalay labinduan bato diad pegley na Ilog na Jordan, diad samay pasen a nanalageyan na saray papari. Ibagam ed sikaran awiten da ra man a bato tan ilira da rad pasen a pankampoan yo natad sayan labi.

⁴ "Tinawag sirin nen Josue ira may labinduan lalakin pinili to,

⁵ "tan inkuantod sikara, Laka yod man ed Jordan diad onaan na Kaban na Sipanan na Katawan a Dios yo. Balang sakey ed sikayo et manakbat na sakey a bato a para balang tribu na Israel.

⁶ "Saratan a bato et mangipanunot ed ginagawa na Katawan. Diad arapen a panaon, no tepeten na saray anak yo so kabaliksan na saratan a bato,

⁷ "ibaga yod sikara a tinmondan onagos so danum na Jordan nen imbaliw diman so Kaban na Sipanan na Katawan. Saratan a bato et mangipanunot lawas ed saray totood Israel na nipaakar ed agawa dia.

⁸ "Sinumpal na saramay lalaki imay ganggan nen Josue. Onung na ingganggan na Katawan ed kinen Josue, angala ra may lalaki na labinduan batod pegley na Jordan, sakey a bato so para kapag tribu na Israel, inawit da rad pasen a pankampoan da, tan inlira da rad man.

⁹ "Angilira met si Josue na labinduan bato ed pegley na Ilog na Jordan, dimad nanalageyan na saramay anakbat na Kaban na Sipanan. (Wadman ni ra man a bato.)

¹⁰ Nanalagey ed pegley na Jordan ira may papari anggad asumpal ya amin iray ingganggan na Katawan ya ibaga nen Josue a gawaen na saray totoo. Sikato yay ingganggan nen Moises. Nangganat a binmaliw ira may totoo.

¹¹ Nen akabasil la ra, inmonad sikara iray paparin manasakbat na Kaban na Sipanan na Katawan.

¹² Saramay lalakin kabyangan na saray tribu di Ruben, Gad, tan kapalduay Manases, ya akaparaan iran mibakal, et inmona ran binmaliw onung na imbaga nen Moises a gawaen da.

¹³ Diad arap na Katawan sakey ya apataplon libon lalaki ya akaparaan a mibakal so binmaliw a linmad patar ya asingger ed Jerico.

¹⁴ Lapud saman a ginawa na Katawan ed saman ya agew nitandurod arap na totood Israel si Josue. Pinagalangan da legan ton nambilay, a singa impamagalang dad kinen Moises.

¹⁵ Insan imbaga na Katawan ed kinen Josue

¹⁶ ya iganggan to ra may paparin manasakbat na Kaban na Sipanan ya ontatdang la rad Jordan.

¹⁷ Inonur nen Josue may imbagad sikato na Katawan,

¹⁸ et nen akasabi rad pandel na ilog ira may papari, inmagos lamet imay ilog tan asapat toy anggad saray pandel.

¹⁹ Diad kumaplon agew na ononan bulan saray totoo binaliw day Jordan tan nankampo rad Gilgal a nibokig na Jerico.

²⁰ Inlirad man nen Josue ira may labinduan baton inala rad Jordan.

²¹ Insan to inkuan ed saray totood Israel, Diad arapen a panaon, no tepeten na saray anak yo so kabaliksan na saratan a bato,

²² ibaga yod sikara so nipaakar ed imbaliw na saray Israelita ed Jordan diad amagan dalin.

²³ Ibaga yod sikara a say Katawan a Dios yo pinaekat toy Jordan a singa samay impamaekat tod Dayat ya Ambalanga legan tayon dinmalan.

²⁴ Lapud saya naamtaan na balang sakey a too ed tapew na dalin so ontan lan kabaleg na pakayari na Katawan, tan igalang yod anggad angga so Katawan a Dios yo.

5

¹ "Amin da ray ari na Amorreo diad bokig na Jordan tan amin da ray ari a Cananeo diad gilig na Dayat na Mediteraneo nadngelan dan pinaekat na Katawan so Jordan anggad impakabaliw na saray totood Israel. Ataktakot ira tan nakalan iray biskeg na linawa lapud saray Israelita.

² "Insan inkuan na Katawan ed kinen Josue, Manggawa ka na saray yuron bato ta segat mo ray Israelita.

³ "Sinumpal nen Josue imay ingganggan na Katawan, kanyan sinegat to ray Israelita diad pasen a tatawagen na Pokdul a Nansegatan.

⁴ "Nen tinaynan na saray Israelita so Egipto, asegat la ray amin a lalaki, balet legan na apataploy taon na imbeltang na saray totoo diad kalawakan, anggapoy ogaw a lakin asegat. Diad kalabas na saman a panaon amin da ray lalakin nayarian day mibakal nen tinaynan day Egipto et inaatey ira lapud sinumlang day Katawan. Onung na sinambaan to, ag ira naabuloyan a makanengneng ed mayaman tan mataban dalin ya insipan tod saray lalaki ra.

⁵

⁶

⁷ "Ag balut asegat iray lalakin anak na sarayan totoo, kanyan kabyangan la ra na sayan balon kailalakan so sinesegat nen Josue.

⁸ "Kayari na inkasegat da, nanayam ed kampo iray amin ya Israelita anggad inmabig so sugat da.

⁹ "Inkuan na Katawan ed kinen Josue, Natad sayan agew inekal kod sikayo so kababaingan yo lapud impakaaripen yod Egipto. Sikato yay makasengeg ya atawag iman a pasen na Gilgal, anggad natan.

¹⁰ Legan a nankampod Gilgal iray Israelita diad patar ya asingger ed Jerico, sinilibraan da so Paskua diad labi na kumalabinapat ya agew na bulan.

¹¹ Diad ontombuk ya agew kayari to ya, sikatoy onona-onan impakataway da na saray kakanen a nanlapud bungay dalin na Canaan: insanglil a trigo tan tinapay ya anggapoy libadura.

¹² Tinmonda lad saman a pinmelag iray mana, tan anggapo lay naala na saray Israelita. Nanlapu lad saman a panaon nanaakan la ra na saray kakanen a nanlapud bungay dalin na Canaan.

¹³ Nen asingger lad Jerico si Josue, biglan anengneng toy sakey a lakin manalalagey ed arap to a sankabembenan toy sakey ya ispada. Dinago nen Josue tan tinepet to, Sakey ka ed saray sondalo mi, odino sakey kan kalaban?

¹⁴ Andi, ebat na samay laki. Wadya ak a pangulo na saray sondalo na Katawan. Tinmiblak ed dalin si Josue diad impangigalang to tan kuanto, Siak so aripen mo. Antoy labay mon pagawad siak?

¹⁵ Inkuan na samay pangulo da ray sondalo na Katawan, Ekal moy sandalyam ta manalalagey kad masanton dalin. Et ginawa nen Josue so nibagad sikato.

6

¹ "Akakaput iray puirta na siudad na Jerico tan aguardiaan ira pian ag makaloob iray Israelita. Anggapoy makaloob o makapaway ed siudad.

² "Inkuan na Katawan ed kinen Josue, Ipapalimak ed sika so Jerico, pati say ari to tan amin da ray masebeg a sondalo to.

³ "Sika tan saray sondalom et nepeg yon liberen a maminsan ed sanagew so paway na siudad; anem agew a gawaen yo ya.

⁴ "Pitoran papari a sankaawit na balang sakey ed sikara so trumpita, so onlad arap na Kaban na Sipanan. Diad kumapiton agew sika tan saray sondalom et nepeg yon liberen a mamimpito so siudad legan a papaknulen na saray papari iray trumpita.

⁵ "Insan mamaknul ira na sakey a maksil a tunon andokorokey. Kadngel yod satan a tanul, oneyag na makmaksil iray amin a totoo, et nageba ray padir na siudad. Insan onkalab ed siudad iray amin a sondalo.

⁶ "Tinawag nen Josue iray papari tan inkuantod sikara, Sakbat yoy Kaban na Sipanan, tan pitorad sikayo so manayam ed arap to a sankaawit da ray trumpita.

⁷ "Insan ingganggan to ray totoo to a gapoan day onliber ed siudad; saray guardia so ononan onliber a tomtombuken ira na samay Kaban na Sipanan na Katawan.

⁸ "Kanyan onung na ingganggan nen Josue, wala ray guardian akaonad saray paparin mamapaknul na trumpita; manomtombuk ed saraya iray paparin manasakbat ed Kaban na Sipanan a totombuken ira na saray guardiad beneg. Legan dan liliberen so siudad napapaknul iray trumpita.

⁹

¹⁰ Balet ingganggan nen Josue iray totoo to ya ag ira oneeyag o mangibabalikas na anggan sakey a salita ya anggad gangganen to ra.

¹¹ Kanyan impailiber ton aminsan ed siudad ed sarayan grupo na lalaki imay Kaban na Sipanan na Katawan. Insan ira pinmawil ed kampo tan diman ira amalabas na labi.

¹² Diad ontombuk ya agew asaksakbay a binmangon si Josue. Singa samay imbeneg ya agew niliber day siudad ira may papari tan saray sondalo, a namparay impantotombukan da: onona, saray guardiad bandad onaan; ontombuk, saray pitoran papari a mamapaknul na saray trumpita; insan saray paparin manasakbat na Kaban na Sipanan na Katawan; tan diad kaonuran, saray guardiad bandad beneg. Legan dan liliberen so siudad napapaknul iray trumpita.

¹³

¹⁴ Diad sayan kumadwan agew linmiber ira lamet ya aminsan ed siudad, insan ira pinmawil ed kampo. Anem agew da yan ginawa.

¹⁵ Diad kumapiton agew binmangon irad palbangon tan niliber dan amimpito imay siudad, singa samay impanliber dan inmonasikato ya labat so agew ya amimpito ran niliber so siudad.

¹⁶ Diad kumapiton liber da, nen kuan lan paknulen na saramay papari iray trumpita, ingganggan nen Josue iray totoo to ya oneyag ira, tan kuanto, Inter lad sikayo na Katawan so siudad!

¹⁷ Say siudad tan amin a logan to et nepeg a sigput iran deralen tan ibagat irad Katawan. Si Rahab a marotak a bii tan saray kabyangay pamilya to labat so ag yo didiwiten, lapud inyamut to ray ispia tayo.

¹⁸ Balet ag kayo mangaala na antokaman a nepeg a deralen; no mangala kayo, ondalan so gunigon tan deral ed kampo na Israel.

¹⁹ Amin a bengatlan ginawa ed pilak, balituk, gansa, odino balatyang et ibiig iran para Katawan. Nepeg ya iyakar ira ed panagsinupan na kayamanan na Katawan.

²⁰ Kanyan pinaknul na saray papari iray trumpita. Kadngel ed saya na saray totoo, inmeyaeyag ira, et ageba ray padir. Insan amin a sondalo kinmalab irad siudad, et adakep da.

²¹ Pinapatey dad panamegley na ispada iray amin a walad siudad, lalaki may bibii, malangwer may matakken. Pinapatey da met iray baka, karniro, tan saray asno.

²² Insan inkuanen Josue ed saramay duaran lalakin ispia, Laka yod abung na samay marotak a bii, ipaway yo, sikato tan saray kabyangay pamilya to, onung na insipan yod sikato.

²³ Kanyan linma ran angipaway ed kinen Rahab a pati si ama to, ina to, saray agagi ton lalaki, tan arum ni ran kabyangay pamilya to. Inala da ran amin, saray kabyangay pamilya to tan saray aripen to, tan inyakar da rad asingger ed kampo da ray Israelita.

²⁴ Insan da pinoolan so siudad tan amin a logan to, likud labat ed saray bengatlan ginawad balituk, pilak, gansa, tan balatyang, ta inaala da ra tan inyaakar da ra ed panagsinupan na kayamanan na Katawan.

²⁵ Balet si Josue impaliis tod patey si Rahab a marotak a bii tan amin da ray kakanayon to, lapud inyamut nen Rahab ira may duaran ispia ya imbaki nen Josue ed Jerico. (Manaayam nid Israel ya anggad natan iray kabyangay boleg nen Rahab.)

²⁶ Diad sayan panaon si Josue impaakseb toy sakey a pasakbay: Siopamay mamasimbalon mamaalagey ed siudad na Jerico et nagawad sikato yan samba na Katawan, Siopamay mangiletneg na pundasion to nabalang toy sankapangulowanan ya anak ton laki; Siopamay mamaalagey na saray puirta to, nabalang toy sankayogtanan ya anak ton laki.

²⁷ Kaolup nen Josue so Katawan, kanyan nikayat ed intiron bansa so inkabantug to.

7

¹ "Ag asumpal imay ganggan na Katawan ed saray Israelita ya ag iran balut mangala ed Jerico na antokaman a nepeg a deralen, ta angala si Acan. Lapud saya mapalaloy pasnuk na Katawan ed sikara. (Si Acan et anak nen Carmi tan apo nen Sabdi, tan kabyangan na boleg nen Zera a kabyangan na tribu nen Juda.)

² "Si Josue angibaki na saray lalaki a manlapud Jerico ta onla ra ed Ai, sakey a siudad ed bokig na Betel tan asingger ed Bet-aven. Ingganggan to ran onla a mannengneng na dalin. Nen asumpal da lay angibakian ed sikara,

³ "inkuandad kinen Josue: Ag la nakaukolan a dogpaan na balang sakey ed sikatayo so Ai. Mangibaki ka labat na sakey a duara odino taloran libo a lalaki. Ag mo ibabaki ray amin a sondalod man a mibakal; aliwan baleg man a siudad.

⁴ "Kanyan sakey a talon libon Israelita so dinmogpa, balet apasoot iran sinmener.

⁵ "Inosilan ira na saray lalakin taga Ai manlapud puirta na siudad ya anggad saray pigaran panagalaan na tinabas a bato tan pinatey day sakey a talomplo tan anem ed sikara diad alusadsar na pokdul. Lapud saya nakalay biskeg na linawa iray Israelita tan ataktakot ira.

⁶ "Si Josue tan saray pangulo na Israel pinipilat day kawes da lapud ermen da, intitiblak day laman da ed dalin diad arap na Kaban na Sipanan na Katawan, tan nandodokul irad man ya anggad labi, a kadadabuk so kaoloan da diad pangipanengneng dad ermen da.

⁷ "Insan inkuanen Josue, Katawan a Dios, akin et pinabaliw mo kami ni ed Jordan? Pian nipalima mo kami ed saray Amorreo? Pian napatey mo kami? Akin et ag kami labat la nanayam diman ed basil na Jordan?

⁸ "Anto kasiy nibagak, O Katawan, natan a sinmener so Israel ed saray kalaban to?

⁹ "Narengelan yan andi-saew na saray Cananeo tan amin a totoo ed bansa. Liktuben da kami tan pateyen day balang sakey ed sikami! Antoy gawaen mod satan a pangyagel mod kagalangan mo?

¹⁰ Inkuan na Katawan ed kinen Josue, Bangon ka! Akin et mandodokul kad dalin ya ontan?

¹¹ Nankasalanan so Israel! Sinumlang da so paknaan ya ingganggan kod sikaran sumpalen da. Angala ra na pigaran bengatlan nepeg a deralen. Tinakew da, intila ray impanakew da, tan impikasakey dad saray kayaryan da.

¹² Sikato yay makasengeg ya ag nalabanan na saray Israelita iray kalaban da. Sinmener ira, lapud sikaran dili et asintinsiaan la ran ompatey. Ag ta kayo la olupen no ag yo deralen iray bengatlan sebel ya alaen yo!

¹³ Bangon ka! Linisan mo ray totoo onung ed ganggan tan iparaan mo ran miarapan ed siak. Ibagam ed sikaran sipaparaan ira nabwas, ta siak a Katawan a Dios na Israel et walay ibagak ed sikara: Israel, isisinup yoy pigaran bengatla ya ingganggan kon deralen yo! Ag yo nalabanan iray kalaban yo ya anggad deralen yo ray bengatlan sebel ya alaen!

¹⁴ Kanyan ibagam ed sikara a nabwas ondagod siak a mansosoblay iray tribu. Diad tribun napilik ondagod siak so balang boleg, tan diad boleg a napilik ondago so balang pamilya. Diad pamilyan napilik ondagod siak so balang laki.

¹⁵ Say toon narumog a kawalaan na saray bengatlan nepeg a deralen, poolan a pati saray kabyangay pamilya to tan amin a kayaryan to, ta makapasinagem so inter ton kababaingan ed Israel tan dineral to so impisipanan ko.

¹⁶ Diad kabkabwasan na ontombuk ya agew si Josue pinarago tan nansosoblay iray tribu na Israel, et say tribu nen Juda so apili.

¹⁷ Si Josue pinarago ton nansosoblay iray boleg na tribu nen Juda, et say boleg nen Zera so apili. Insan pinarago ton nansosoblay iray pamilya na boleg nen Zera, et say pamilya nen Zabdi so apili.

¹⁸ Pinarago ton nansosoblay iray lalaki ed pamilya nen Zabdi, et say apili si Acan a lakin anak nen Carmi tan apo nen Zabdi.

¹⁹ Inkuanen Josue ed sikato, Anak ko, ibagam so tua ed arap na Katawan a Dios na Israel, pian sikatoy napagalangan mo. Ibagam natan so ginawam. Ag mo iyaamut ed siak.

²⁰ On, tua, ebat nen Acan. Nankasalanan ak ed Katawan a Dios na Israel, et saya so ginawak.

²¹ Diad saramay asamsam akanengneng ak na marakerakep a kolibemben a nanlapud Babilonia, sakey a duaran kilon pilak, tan sakey a baritan balituk a mambelat na kapalduay kilo. Mapalaloy impanlabay kod saraya, kanyan inalak ira. Narumog yo ran akakotkot ed dalem na tuldak; walad daledalem so pilak.

²² Angibaki sirin si Josue na pigaran lalaki a batik irad samay tulda tan arumog dan nikotkot a tua ira may bengatlan nepeg a deralen; walad daledalem imay pilak.

²³ Impaway da rad tulda, inawit da rad kinen Josue tan amin ya Israelita, tan inggaton da rad arap na Katawan.

²⁴ Si Josue tan amin a totood Israel siningkat day Acan, samay pilak, samay kolibemben, samay baritan balituk, pati saray lalaki tan saray bibiin anak nen Acan, saray baka to, saray asno to, saray karniro to, samay tulda to, tan saray arum nin kayaryan to; insan da ra inyakar ed Patar na Gunigon.

²⁵ Insan inkuanen Josue, Akin et impelag mod sikamiy gunigon? Ipelag natan na Katawan so gunigon ed sika! Amin da ray totoo sirin tinutupak da si Acan ya anggad ag to impatey; tinutupak tan pinopoolan da met iray kabyangay pamilya to tan amin a kayaryan to.

²⁶ Tinabunan day ankakabaleg a bato si Acan; wadman ni ra yan bato ya anggad natan. Sikato yay makasengeg a sayan pasen et atawag na Patar na Gunigon. Lapud sayan agawa kinmepa so mapalalon pasnuk na Katawan.

8

¹ "Say Katawan kuantod kinen Josue, Itagar mo ray amin a sondalo tan laka yod Ai. Ag kayo natatakot o nanaandiay biskeg na linawa. Panaloen ta kayo ed ari na Ai; nakayaryan yo ray totoo to, say siudad to, tan say dalin to.

² "Gawa yod Ai tan say ari to so singa samay ginawa yod Jerico tan say ari to, balet natan nayarian yon alaen a kayaryanen iray kayamanan to tan saray ayayep to. Iparaan yoy idogpa yon bigla ed beneg na siudad.

³ "Namparaan ya onlad Ai si Josue a pati saray sondalo to. Amili na talomplon libon sankaabigan a sondalo to, insan to ra imbaki ed labi

⁴ "ya onyay bilin tod sikara: Amut kayod biek a dapag na siudad, balet ag yo aarawian a maung; mamparaan kayon ondogpa.

⁵ "Siak tan saray totook et dagoen mi so siudad. No ompaway iray lalaki ed Ai ya onlaban ed sikami, ompoliktar kami tan ombatik kami a singa samay ginawa tayo la nen inmona.

⁶ "Osilan da kami ya anggad niyarawi mi la ra ed siudad. Abaloan dad satan ya ibabatikan mi ra a singa ginawa tayo la nen saman.

⁷ "Insan paway kayod inamutan yo tan dakep yo so siudad. Say Katawan a Dios yo iter tod sikayo so siudad.

⁸ "No nala yo la, poolan yo, onung na ingganggan na Katawan. Sikara ya so ganggan ed sikayo.

⁹ "Kanyan imbaki la ra nen Josue, tan linma la rad nanamutan da ed bokig na Ai, a nampegleyan na Betel tan Ai, tan nanalagar irad man. Inmogip nid kampo ed saman a labi si Josue.

¹⁰ Angabkabwasan a binmangon si Josue tan impantitipon to ray sondalo. Insan sikato tan saray pangulo na Israel inwanwan da ran linma ed Ai.

¹¹ Saray sondalo tan si Josue linma ran amaarap ed lolooban na siudad tan nankampo ra ed bandad baybay; maawang a patar so akileetan dad Ai.

¹² Amili na sakey a liman libon lalaki insan to ra pinaamut ed bandad sagur na siudad, diad nanleetan na Ai tan Betel.

¹³ Diad bandad baybay na siudad so kawalaay baleg a kampo tan nidasig irad man a mibakal iray sondalo. Saray arum a sondalo wala rad bandad sagur na siudad. Amalabas na labi si Josue diad patar.

¹⁴ Nen anengneng na ari na Ai ira may totoo nen Josue, nangganat a mibakal. Sikato tan amin da ray totoo to pinmaway iran amaarap ed Patar na Jordan ta mibakal irad saray Israelita diad pasen ya akibakalan da la nen inmona. Balet ag to amta a magano lan nadogpaan ed bandad beneg.

¹⁵ Si Josue tan saray totoo to nankonkoanan iran sinmener, tan batik iran amaarap ed kalawakan.

¹⁶ Amin da ray lalaki ed siudad atawag ira ya onosil ed saramay Israelitan batik, tan diad iyoosil dad kinen Josue, inmarawi la ran inmarawi ed siudad.

¹⁷ Inmosil ed saray Israelita so balang laki ed Ai, et ataynanan a silolokas so siudad tan anggapoy atilak a mangyagel.

¹⁸ Insan inkuan na Katawan ed kinen Josue, Itorom na pikam so Ai; iter ko lad sika. Ginawa nen Josue so nibagad sikato,

¹⁹ tan kapangitagey tod lima to, saramay totoon manaamut et pinmaway iran tampol, batik irad siudad, tan dinakep da. Pinoolan dan tampol so siudad.

²⁰ Nen linmingaw ira may lalakin taga Ai, anengneng day asewek a mamapaatagey ed tawen. Anggapoy nabatikan da lapud pinmoliktar ya ondogpad sikara ira may Israelitan batik a mamaarap ed kalawakan.

²¹ Nen si Josue tan saray totoo to et anengneng dan adakep la na arum a totoo to so siudad tan apoolan la, pinmoliktar ira tan ginapwan dan pinapatey ira may lalakin taga Ai.

²² Saramay Israelitan walad siudad nampalasur iran akibakal. Kanyan sigput ya aliktub na saray Israelita ira may lalakin taga Ai, tan pinapatey da ra. Anggapoy akabatik ed sikara odino akeraan a mabilay,

²³ likud labat ed ari na Ai. Dinakep da tan inyakar dad kinen Josue.

²⁴ Pinapatey na saray Israelita iray amin a taga Ai diad kalawakan ya angosilan dad sikara. Insan amawil irad Ai tan pinapatey da ray amin a totood man.

²⁵ Si Josue ag to tinondaan ya intoro to na pika imay siudad na Ai tan ag to inyabeba ya anggad apatey ya amin iray totood man. Inatey iray amin a taga Ai ed saman ya agewlabinduan libon lalaki tan bibii.

²⁶

²⁷ Saray Israelita inaala dan kayaryan la iray ayayep tan amin a bengatlan wadmad siudad onung na imbaga na Katawan ed kinen Josue.

²⁸ Pinoolan nen Josue so Ai tan tinaynan ton aderal-deral. Onya niy kipapasen to ya anggad natan.

²⁹ Insabit tod tagey na kiew so bangkay to may ari na Ai, tan pinaolyan tod man ya anggad mansironget. Nen onseselek lay agew ingganggan nen Josue ya alaen da, insan impaibantak tod lolooban na siudad. Binontonan da na amayamay a bato a wadman ni ra ya anggad natan.

³⁰ Insan si Josue nanggawad Palandey na Ebal na altar a para Katawan a Dios na Israel.

³¹ Ginawa to ya lapud sikatoy imbilin nen Moises ya aripen na Katawan ed saray Israelita, onung na ibabagay Ganggan nen Moises: sakey ya altar ya agawad saray baton ag tinabas na saray kagawaan a balatyang. Diad tapew na sayan altar insaklang dad Katawan iray bagat a popoolan tan saray bagat a para kareenan.

³² Diman, legan ya onnenengneng iray Israelita, nanggawad saramay bato si Josue na kopia na Ganggan ya intatak nen Moises.

³³ Saray Israelita a pati saray pangulo, opisyal, tan saray huis da, tan ontan met na saray kakaiba ran taga arum a bansa et nanalagey irad duaran dapag na Kaban na Sipanan na Katawan, tan sankaarap da ray paparin Levita ya anakbat na samay Kaban. Say kapalduad saramay totoo nanalagey iran akabeneg ed Palandey na Gerizim, tan saray kapaldua akabeneg irad Palandey na Ebal. Si Moises ya aripen na Katawan ingganggan ton gawaen da ya diad isabiy panaon a pangawat day bindision.

³⁴ Maksil ya imbagad satan nen Josue so intiron Ganggan, pati saray bindision tan saray samba, onung na impakaisulat dad libro na Ganggan.

³⁵ Balang sakey ed saray ganggan nen Moises et imbasa ra nen Josue ed amin a nantitipon a totoo, pati saray bibii tan saray ogogaw, ontan met ed saray taga arum a bansa a manaayam ed kawalaan da.

9

¹ "Saray impanatalo na Israel et akabatan na amin ya ari ed sagur na Jordan diad saray kapokdulan, diad saray alusadsar, tan diad saray patar ed gilig na Dayat na Mediteraneo ya anggad Libano diad baybay; sikara ya so ari da ray Heteo, saray Amorreo, saray Cananeo, saray Pereseo, saray Heveo, tan saray Jebuseo.

² "Nanmomoyung ira yan amin a mibakal ed kinen Josue tan saray Israelita.

³ "Balet nen saray Heveo a sikaray totood Gabaon et nadngelan day ginawa nen Josue ed Jerico tan Ai,

⁴ "ninunot dan palikdoen si Josue. Angaala ray kakanen tan pinapano ray beneg na asno ra na saray napipilat lan sako tan saray sakaban a katat a pananginay alak.

⁵ "Nansosolung iray apilat-pilat a kawes tan dagdaan la ran sandalya a dinadait la. Amaga-maga tan abootan la ray tinapay a binabalon da.

⁶ "Insan ira linmad kampod Gilgal tan kuandad kinen Josue tan saray lalaki na Israel, Arawdawiy nanlapwan min dalin. Labay min mipaknaan kayod sikami.

⁷ "Balet inkuan ed sikara na saray lalaki na Israel, Akin et mipaknaan kamid sikayo? Angangko asingger dia so panaayaman yo.

⁸ "Inkuandad kinen Josue, Sikami ray aripen yo. Tinepet ed sikara nen Josue, Siopa kayo? Nanlapwan yo?

⁹ "Insan da tinongtong ed sikato yan istorio: Arawdawin dalin so nanlapwan mi, lapud nadngelan miy nipaakar ed Katawan a Dios yo. Nadngelan miy amin a ginagawa to ed Egipto

¹⁰ tan say ginawa to ed saray duaran ari da ray Amorreo diad bokig na Jordan: Si Ari Sehon na Hesbon tan si Ari Og na Basan a manaayam ed Astarot.

¹¹ Saray pangulo mi tan amin da ray totoon manaayam ed dalin mi et imbaga rad sikami a mangala kamiy abasto a para biahi tan onla kamin onabet ed sikayo. Imbilin dad sikami a manlingkur kamid sikayo tan kerewen mi a mipaknaan kayod sikami.

¹² Nengneng yo ra yay tinapay mi. Nen onsiput kamid man ed abung mi ya onabet ed sikayo, ampetang ni ra. Balet natan amaga-maga tan abootan la ra.

¹³ Nen pinano mi ra yan katat a pananginay alak, balo ni ra, balet natan apilat la ra. Apilat la ray kawes tan saray sandalya mi lapud bayag na impankurang mi.

¹⁴ Saray lalakid Israel angawat iray pigaran kakanen a nanlapud saramay taga Gabaon, balet ag da la ya impanon ed Katawan.

¹⁵ Akipaknaan si Josue na pikakaaro ed saray totoon taga Gabaon tan inabuloyan to ran mambilay. Sinambaan na saray pangulo da ray Israelita a tooren day impipaknaan da.

¹⁶ Kalabas na taloy agew manlapud samay agawan paknaan, naamtaan na saray Israelita a saramay akipaknaan dan totoo et manaayam iran tua ed asingger a pasen.

¹⁷ Kanyan saray totood Israel ginapwan day pinmaway et kayariy taloy agew, akasabi ra ed saray siudad a panaayaman na saray totoo: Gabaon, Kafira, Beerot, tan Kiryat-jearim.

¹⁸ Balet ag ira nayarin pateyen na saray Israelita, lapud walay sinambaan ed sikara na saray pangulo ra, diad ngaran na Katawan a Dios na Israel. Amin a totoo et nanriklamo rad saray pangulo nipaakar ed saya,

¹⁹ balet inmebat ira, Walay sinambaan mid sikara diad ngaran na Katawan a Dios na Israel. Ag ti la ra natan nadiwit.

²⁰ Nepeg ti ran pambilayen lapud sikatoy insipan mi; no diwiten tayo ra, dusaen itayo na Dios.

²¹ Abuloyan yo ran mambilay, balet nepeg ya ikiewan tan iyasolan da itayo. Sikatoya so imbaga na saramay pangulo.

²² Ingganggan nen Josue a niakar ed sikato ra may totood Gabaon, insan to tinepet ed sikara, Akin et pinalikdo yo kami? Imbaga yod sikami a taga kayo arawdawin pasen, anta manaya dia kayo labat manaayam.

²³ Lapud sayan ginawa yo, insamba kayo na Dios. Mansiansian aripen iray totoo yo, manalay kiew tan manasol ira para santuario na Dios ko.

²⁴ Inmebat ira, Ginawa mi ya, lapud naamtaan mi a say Katawan a Dios yo et tuan ingganggan toy aripen ton Moises ya iter tod sikayo yan intiron dalin tan pateyen yo ray totoon manaayam dia legan a mankukurang kayo. Ginawa mi ya lapud antakot kamid sikayo, ompan pateyen yo kami.

²⁵ Natan wala kamid silong na pakayari yo; gawa yod sikami so isisipen yon manepeg.

²⁶ Kanyan onya so ginawa nen Josue: inyagel to ra tan ag to inabuloyan iray totood Israel a pateyen da ra.

²⁷ Balet impagmaliw to ran aripen a managalay kiew tan managasol na danum na saray totood Israel; sikara met so manangiter na kiew tan danum a para altar na Katawan. Anggad sayan panaon itutuloy da ni yan kimey ed pasen a pinili na Katawan a pangigalangan ed sikato.

10

¹ "Si Adonizedek ya ari na Jerusalem nadngelan to a si Josue et dinakep tan sigput ton dineral so siudad na Ai tan pinatey toy ari to a singa ginawa to ed Jerico tan say ari to. Nadngelan to met a saray totood Gabaon akikaaro rad saray Israelita tan manaayam irad kawalaan da.

² "Mapalaloy inkapagaan na saray totood Jerusalem lapud say Gabaon et singa kabaleg na saray arum a siudad a walay ari ra; baleg nen say Ai, tan marunong a bumabakal iray totoo to.

³ "Kanyan si Adonizedek impaikuantod kindi Ari Hoham na Hebron, Ari Piram na Jarmut, Ari Jafia na Lakis, tan Ari Debir na Eglon:

⁴ "Gali dia ta tulongan yo ak ya ondogpad Gabaon, lapud akikaaro ray totoo to ed kinen Josue tan saray Israelita.

⁵ "Nanmomoyung ira yan limaran arari da ray Amorreo a salanti saray arari ed Jerusalem, Hebron, Jarmut, Lakis, tan Eglon, insan da niliktub so Gabaon, tan dinogpaan da.

⁶ "Saray taga Gabaon impaikuandad kinen Josue a walad kampod Gilgal: Ag mo kami kari ikakaindan! Gala dian tampol ta tulongan mo kami! Amin da ray arari ed nipokdul iran pasen et nanmomoyung ira tan dinogpaan da kami!

⁷ "Kanyan nampikal ed Gilgal ira di Josue tan amin a sondalo to a pati saray sankamaungan a bumabakal.

⁸ "Inkuan na Katawan ed kinen Josue, Ag kayo ontatakot ed sikara; impanalo ta kayo lad sikara. Anggapod sikaray nayarin onlaban ed sikayo.

⁹ "Sanlabin nankurang ira di Josue tan saray sondalo to manlapud Gilgal ya anggad Gabaon, tan biniglaan dan dinogpaan ira may Amorreo.

¹⁰ Say Katawan ginewgew to ray Amorreo nen anengneng da ray sondalo na Israel. Saray Israelita pinapatey dad Gabaon iray Amorreo tan inosilan da rad dalan ed alusadsar na palandey ed Bet-horon; dinogpaan da ra ya anggad Azeka tan Maceda diad abalaten.

¹¹ Nen saray Amorreo et ibabatikan da ra may Israelitan sondalo, impepelag na Katawan ed sikara iray ankakabaleg ya oran a kristal ya anggad Azeka. Dakel niy apatey na oran a kristal nen say pinapatey da ray Israelita.

¹² Diad saman agew ya impanalo na Katawan iray Israelita ed saray Amorreo, akisalitay Josue ed Katawan. Diad arap na saray Israelita inkuanto, Agew, tonda kad petek na Gabaon; Bulan, tonda kad petek na Patar na Ayalon.

¹³ Tinmondan tua so agew tan say bulan ya anggad atalo na saray Israelita iray kalaban da. Nisulat ya ed Libro nen Jaser. Tinmondad pegley na tawen tan ag sinmelek a sanagew.

¹⁴ Anggapon balut nen saman ya anggad natan, so singa sayan agew a tinoluk na Katawan so sakey a too. Tinulongan na Katawan ya akibakal so Israel!

¹⁵ Kayari to yan bakal, amawil lad kampod Gilgal si Josue tan saray sondalo to.

¹⁶ Saraman balet so limaran Amorreon arari akabatik ira tan inmamut ira ed ongib na Maceda.

¹⁷ Walay akalmod sikara tan nibagad kinen Josue so pasen a panaamutan da.

¹⁸ Inkuanto, Mangitolin kayo na ankakabaleg a bato ed sangab na ongib. Mangyan kayo na pigaran guardia,

¹⁹ balet ag kayod man manaayam. Ituloy yon osilan iray kalaban tan dogpaan yo rad bandad beneg; ag yo aabuloyan a makasabi rad siudad da! Say Dios a Katawan impanalo to kayod sikara.

²⁰ Pinapatey ira nen Josue tan saray totood Israel; balet wala ray akaloob ed dalem na saray padir na siudad da, kanyan ag ira apatey.

²¹ Insan amin da ray totoo nen Josue pinmawil irad sikato diad kampod Maceda ya anggapoy agawad sikara. Anggapod saman a dalin so akakpel a nansalita na sumpad saray Israelita.

²² Insan inkuanen Josue, Lokasan yo may ongib tan iyakar yo dia ra may arari.

²³ Kanyan nilokasan da may ongib, tan impaway da ra may arari ed Jerusalem, Hebron, Jarmut, Lakis, tan Eglon, insan da ra

²⁴ inyakar ed kinen Josue. Tinawag ton amin iray lalaki ed Israel tan ingganggan to ya onsingger ed sikato ira may opisyal ya akilad sikato tan iyan da ray sali ra ed kabeklewan na saramay arari. Ginawa ra so nibagad sikara.

²⁵ Insan inkuanen Josue ed saramay opisyal to, Ag kayo natatakot o nabebetelay linawa. Mampabiskeg kayoy linawa tan manmatalek kayo lapud onya so gawaen na Katawan ed amin da ray kalaban yo.

²⁶ Insan pinatey nen Josue ira may arari tan insabit tod limaran kiew iray bangkay da ya anggad labi.

²⁷ Diad inselek na agew impaiyepas nen Josue ira may bangkay tan impaibontuk to rad samay ongib ya inamutan da ra may arari. Ankakabaleg a bato so insara da ed sangab na samay ongib, et wadman ni ra ya anggad natan.

²⁸ Diad saman ya agew dinogpaan tan adakep nen Josue so Maceda tan say ari to. Pinapatey to ray amin a totoon walad siudad; anggapoy atilak a mabilay. Ginawa tod ari na Maceda so singa samay ginawa tod ari na Jerico.

²⁹ Manlapud man ed Maceda si Josue tan saray sondalo to linma rad Libna tan dinogpaan da.

³⁰ Impanalo met na Katawan iray Israelita ed sayan siudad tan say ari to. Anggapoy inkera ra ya anggan sakey, no ag ta pinatey da ray amin a totood man. Ginawa, rad ari na Libna so singa samay ginawa ra ed ari na Jerico.

³¹ Manlapud Libna si Josue tan saray sondalo to linma rad Lakis, niliktub da insan da dinogpaan.

³² Impanalo na Katawan iray Israelita diad kumadwan agew na impibakal da ed Lakis. Singa samay ginawa ra ed Libna, anggapoy inkera ra, no ag ta pinatey da ray amin a totood man.

³³ Si Ari Joram na Gezer dinmagon ontulong ed Lakis, balet tinalo nen Josue tan saray sondalo to tan anggapoy intilak dad sikaran mabilay.

³⁴ Manlapud Lakis si Josue tan saray sondalo to linma rad Eglon, niliktub da insan da dinogpaan.

³⁵ Adakep da ed saman lamlamang ya agew tan pinatey day balang sakey a tood man, a singa ginawa ra ed Lakis.

³⁶ Manlapud Eglon si Josue tan saray sondalo to tinmatdang irad kapokdulan tan dinogpaan day Hebron,

³⁷ et adakep da. Pinatey day ari to tan amin iray totood siudad, a pati saray totood kaliber-liber ton baley. Sigput a dineral nen Josue so siudad, a singa ginawa tod Eglon. Anggapod may atilak a mabilay.

³⁸ Insan si Josue tan saray sondalo to pinmoliktar irad Debir, tan dinogpaan da.

³⁹ Adakep da, pati say ari to tan saray kaliber-liber ton baley. Pinatey day balang too ed saman a pasen. Ginawa nen Josue ed Debir tan say ari to so singa ginawa tod Hebron tan diad Libna tan say ari to.

⁴⁰ Adakep nen Josue so intiron dalin. Tinalo to ray arari ed kapokdulan a pasen, diad nibokig a palasur, tan diad nisagur ya alusadsar, ontan met ed ampetang a pasen diad abalaten. Anggapoy intilak ton mabilay; pinapatey ton amin iray totoo ed sarayan pasen. Sikato ya so ingganggan na Katawan a Dios na Israel.

⁴¹ Tinalo nen Josue ira yan amin a pasen manlapud Cades-barnea diad abalaten ya anggad Gaza ed gilig na dayat, pati intiron dalin na Gosen, tan anggad Gabaon diad baybay.

⁴² Tinalo nen Josue ira yan amin ya arari tan saray nanarian da diad aminpinsan ya inliber ton nandodogpa, lapud kaiba na Israel ya akibakal so Katawan a Dios to.

⁴³ Kayari to ya, pinmawil ed kampod Gilgal si Josue tan saray sondalo to.

11

¹ "Nen nadngelan nen Ari Jabin na Hazor so balitan nipaakar ed impanatalo na Israel, nampabakian to si Ari Jobab na Madon, saray arari na Simron tan Acsaf,

² "tan saray ararid kapokdulan a pasen diad baybay, diad Patar na Jordan ya abalaten na Dayat na Galilea, diad alusadsar iran pasen, tan diad gilig na dayat ya asingger ed Dor.

³ "Nampabakian to met iray Cananeon manaayam ed duaran dapag na Jordan, saray Amorreo, saray Heteo, saray Pereseo, tan saray Jebuseo a wala rad kapokdulan a pasen, ontan met ed saray Heveo a manaayam irad alusadsar na Palandey na Hermon diad dalin na Mizpa.

⁴ "Sinmabi ran kaiba da ray amin a sondalo ra, a singa ra karakel na buer ed gilig na dayat. Wala met iray amayamay a kabayo tan karwahi ra.

⁵ "Nanmomoyung ira yan arari tan nankakasakey iran nankampo ed abay na kolus na Merom, ta bakalen day Israel.

⁶ "Say Katawan kuantod kinen Josue, Ag kayo natatakot ed sikara. Diad onyan oras nabwas apatey ko la ran amin para Israel. Lopuy yo ray kabayo ra tan poolan yo ray karwahi ra.

⁷ "Kanyan si Josue tan amin a totoo to dinogpaan dan bigla iray kalaban da diad kolus na Merom.

⁸ "Say Katawan impanalo to ray Israelita; dinogpaan da ray kalaban da tan inosilan da ra ya anggad Misrefotmaim tan Sidon diad baybay, tan anggad patar na Mizpa diad bokig. Tinmuloy so bakal ya anggad anggapoy nakdaan a mabilay ed saray kalaban.

⁹ "Ginawa nen Josue ed sikara so onung na ingganggan na Katawan; nilolopuy to ray kabayo ra tan pinopoolan to ray karwahi ra.

¹⁰ Insan pinmawil si Josue, dinakep toy Hazor tan pinatey toy arid man. (Diad saman a panaon say Hazor so sankabiskegan ed amin da ray nanarian.)

¹¹ Pinapatey da ray amin a totood man; anggapoy inkera ran mabilay, tan pinoolan da so siudad.

¹² Adakep nen Josue ira yan amin a siudad tan saray arari ra tan pinapatey da ray amin a totoo ra, onung na ingganggan nen Moises ya aripen na Katawan.

¹³ Balet saray Israelita ag da pinoolan iray siudad a nipaalagey ed atagey iran pasen, likud labat ed Hazor a pinoolan nen Josue.

¹⁴ Saray totood Israel inaala ray amin a mabmabli ran kagawaan tan saray ayayep ed sarayan siudad tan kinakayaryan da la ra. Balet pinapatey da ray amin a totoo; anggapoy akeraan a mabilay.

¹⁵ Say Katawan inter tod kinen Moises ya aripen iray ganggan to, et si Moises inter to ra yan ganggan ed kinen Josue, tan si Josue inonur to ran amin. Sinumpal to ray amin ya ingganggan na Katawan ed kinen Moises.

¹⁶ Adakep nen Josue iray amin a dalinsaray kapokdulan tan saray alusadsar diad baybay tan diad abalaten, say intiron dalin ed Gosen tan diad ampetang iran pasen ed niabalaten to, ontan met ed Patar na Jordan.

¹⁷ Limaknab so asakop ton dalin manlapud Palandey na Halak diad abalaten ya asingger ed Edom, anggad Baalgad diad baybay, diad patar na Libano ya abalaten na Palandey na Hermon. Abayag ya akibakal si Josue ed saray arari ed sarayan pasen, balet adakep to ran amin tan pinapatey to ra.

¹⁸

¹⁹ Say siudad labat ya akikaarod saray totood Israel et say Gabaon a panaayaman na pigaran Heveo. Amin da ray arum a siudad et atalo ra ed bakal.

²⁰ Say Katawan so amaawet na kapusoan da pian ag ira onsener a mibakal ed saray Israelita, kanyan sigput iran naderal tan napatey ya andi-panangasi. Sikato ya so ingganggan na Katawan ed kinen Moises.

²¹ Diad sayan panaon si Josue linma tan pinapatey to ray alan a tatawagen ira na Anakim a manaayam ira ed kapokdulan a dalin na Hebron, Debir, Anab, tan diad amin a kapokdulan a pasen na Juda tan Israel. Pinapatey iran amin nen Josue tan sigput ton dinederal iray siudad da.

²² Anggapoy atilak ya Anakim ed dalin na Israel; balet wala ray pigaran atilak ed Gaza, Gat, tan Asdod.

²³ Adakep nen Josue so intiron dalin, onung na ingganggan na Katawan ed kinen Moises. Inter nen Josue so dalin ed saray Israelita; inaapag tod balang tribu. Tinmonda ray bakal kanyan nainawaan iray totood Israel.

12

¹ "Adakep tan panaayaman la na saray totood Israel so dalin a nibokig na Jordan, manlapud Patar na Arnon ya anggad Patar na Jordan tan diad Palandey na Hermon diad baybay. Duaran arari so tinalo ra.

² "Say sakey ya ari et si Sehon, say Amorreon ari a nanoley ed Hesbon. Sakop na nanarian to so kapaldua na Galaad: manlapud Aroer (a walad gilig na Patar na Arnon) tan manlapud siudad a walad pegley na saman a patar, ya anggad Ilog na Jabok a ketegan na Amon;

³ "sakop to met ni so Patar na Jordan manlapud Dayat na Galilea diad sagur ya anggad Bet-jesimot (a bokig na Inatey a Dayat) tan nasabi toy alusadsar na Palandey na Pisga.

⁴ "Tinalo da met si Ari Og na Basan sakey ed saray akeraan a Refaim. Nanoley ed Astarot tan Edrei.

⁵ "Sakop na nanarian to so Palandey na Hermon, Saleca, tan intiron Basan ya anggad saray ketegan na Gesur tan Maaca; sakop to met so kapaldua na Galaad ya anggad ketegan na nanarian nen Ari Sehon na Hesbon.

⁶ "Tinalo nen Moises tan saray Israelita ira yan duaran arari. Si Moises ya aripen na Katawan impabetang to ra yan dalin ed saray tribu di Ruben, Gad, tan kapalduan na tribu nen Manases.

⁷ "Si Josue tan saray Israelita tinatalo da ray amin ya arari ed saray dalin a nisagur na Jordan, manlapud Baalgad diad Patar na Libano ya anggad Palandey na Halak diad abalaten ya asingger ed Edom. Inaapag nen Josue yan dalin ed saray tribu tan inter tod sikaran kayaryan da.

⁸ "Sayan parti na dalin et sakopen to ray kapokdulan a pasen, saray alusadsar ed sagur, say Patar na Jordan tan saray alusadsar to, saray palasur ed bokig, tan say ampetang a pasen ed abalaten. Sarayan pasen et nanayaman ira na saray Heteo, saray Amorreo, saray Cananeo, saray Perezeo, saray Heveo, tan saray Jebuseo.

⁹ "Saray totood Israel tinatalo da ray arari na onggendan iran siudad: Jerico, Ai (abay na Betel),

¹⁰ Jerusalem, Hebron,

¹¹ Jarmut, Lakis,

¹² Eglon, Gezer,

¹³ Debir, Geder,

¹⁴ Horma, Arad,

¹⁵ Libna, Adullam,

¹⁶ Maceda, Betel,

¹⁷ Tapua, Hefer,

¹⁸ Afec, Lasaron,

¹⁹ Madon, Hazor,

²⁰ Simron-meron, Acsaf,

²¹ Taanac, Megido,

²² Kedes, Jokneam (diad Carmel),

²³ Dor (diad gilig na dayat), Goiim (diad Galilea)

²⁴ tan Tirzatalomplo tan sakey iran amin ya arari.

13

¹ "Masikesiken la natan si Josue. Say Katawan kuantod sikato, Masikesiken ka la, balet maawang niy dalin a sasakopen ni:

² "say intiron dalin a sakop na Filistia tan Gesur,

³ "ontan met ed intiron dalin a sakop na saray Avim ya anggad abalaten. (Say dalin a manlapud kolus na Sihor, diad ketegan na Egipto ya anggad baybay diad ketegan na Ekron et sakop na saray Cananeo; saray ari na Filistia et manaayam irad Gaza, Asdod, Askelon, Gat, Ekron.)

⁴ "Sasakopen ni ray intiron dalin na saray Cananeo, tan say Meara (a kayaryan na saray Sidoneo), ya anggad Afek, diad ketegan da ray Amorreo;

⁵ "say dalin da ray Gibalita; say intiron sakop na Libano ya anggad bokig, manlapud Baalgad a bandad abalaten na Palandey na Hermon ya anggad Dalan na Hamat.

⁶ "Sasakopen met ni so intiron dalin na saray Sidoneo a manaayam ira ed kapokdulan a pasen diad nanleetan na Kapalandeyan na Libano tan Misrefot-maim. Pataynanen ko ra yan totoo legan a mankukurang iray Israelita. Nepeg mon apagen ed saray Israelita so dalin onung na ingganggan kod sika.

⁷ "Natan sirin, apag-apag mo yan dalin a kayaryanen na saray siamiran tribu tan say kapalduan tribu nen Manases.

⁸ "Saray tribu di Ruben tan Gad tan say kapalduan tribu nen Manases et naawat da lay dalin ya inter ed sikara nen Moises ya aripen na Katawan; say dalin da et walad nibokig na Ilog na Jordan.

⁹ "Sakop na dalin da so anggad Aroer (a walad gilig na patar na Arnon) tan say siudad ed pegley na saman a patar tan sakop to met so intiron niatagey a patar manlapud Medeba ya anggad Dibon.

¹⁰ Nasabi na dalin da so ketegan na Amon tan sakop to ray amin a siudad ya inoleyan nen Ari Sehon ya Amorreo a nanoley ed Hesbon.

¹¹ Sakop to met so Galaad, saray dalin na Gesur tan Maaca, say intiron Palandey na Hermon, tan say intiron dalin na Basan ya anggad Saleca.

¹² Sakop to met ni so nanarian nen Og, say kaonuran ed saray Refaim, tan nanoley ed Astarot tan Edrei. Tinalo nen Moises ira yan totoo tan pinataynan to ra.

¹³ Balet saray Israelita ag da pinataynan iray totood Gesur tan Maaca; manaayam ni rad Israel ya anggad natan.

¹⁴ Si Moises ag to initdan na dalin so tribu nen Levi. Onung na imbaga na Katawan ed kinen Moises, say betang na saray Levita et say apag da ed saray bagat a popoolan ed altar na Katawan a Dios na Israel.

¹⁵ Si Moises initdan to na sakey a parti na dalin iray pamilya na tribu nen Ruben.

¹⁶ Sakop na dalin da so Aroer (a walad gilig na Patar na Arnon) tan say siudad ed pegley na saman a patar tan sakop to met so intiron niatagey a patar ed kaliber-liber na Medeba.

¹⁷ Sakop to met so Hesbon tan amin iray siudad ed niatagey a patar; Dibon, Bamot-baal, Bet-baalmeon,

¹⁸ Jahaz, Kedemot, Mefaat,

¹⁹ Kiryataim, Sibma, Zaret-sahar a walad pokdul na patar,

²⁰ Bet-peor, saray palasur na Palandey na Pisga, tan Bet-jesimot.

²¹ Sakop to met iray amin a siudad ed niatagey a patar tan say intiron nanarian nen Ari Sehon ya Amorreo a nanoley ed Hesbon. Tinalo nen Moises si Sehon tan saray manoley ed Madian a di Evi, Rekem, Zur, Hur, tan Reba. Amin da ra ya et wala rad silong na pakaoley nen Ari Sehon.

²² Say sakey ed saray pinapatey na saray Israelita et si pumaparles a Balaam a lakin anak nen Beor.

²³ Say Jordan so nisagur a ketegan na tribu nen Ruben. Sikara yay siudad tan baley a niiter ed saray pamilya na tribu nen Ruben.

²⁴ Si Moises et initdan to met na sakey a parti na dalin iray pamilya na tribu nen Gad.

²⁵ Sakop na dalin da so Jazer tan amin da ray siudad na Galaad, say kapaldua na dalin na Amon ya anggad Aroer na nibokig na Raba;

²⁶ sakop met na dalin da so Hesbon ya anggad Ramot-mizpa tan Betonim, manlapud Mahanaim ya anggad ketegan na Lodebar.

²⁷ Diad Patar na Jordan sakop na dalin da so Bet-haram, Bet-nimra, Sucot, tan Safon, say akeraan ed nanarian nen Ari Sehon na Hesbon. Say ketegan dad sagur et say Ilog na Jordan ya anggad baybay na Dayat na Galilea.

²⁸ Sikara yay siudad tan baley a niiter ed saray pamilya na tribu nen Gad.

²⁹ Si Moises initdan to met na sakey a parti na dalin iray pamilya na kapalduay tribu nen Manases.

³⁰ Sakop na dalin da so Mahanaim tan say intiron dalin na Basansay intiron nanarian nen Og ya ari na Basan, tan amin iray anemaplon bario na Jair diad dalin na Basan.

³¹ Sakop met na dalin da so kapalduay Galaad, pati say Astarot tan Edrei, saray manonan siudad na nanarian nen Og diad Basan. Sikara ya so niiter ed kapaldua na saray pamilya a say sengeg da et si Makir a lakin anak nen Manases.

³² Onya so impangapag nen Moises ed dalin a nibokig na Jerico tan say Jordan nen sikatoy walad saray patar na Moab.

³³ Balet anggapoy dalin ya impabetang nen Moises ed tribu nen Levi. Imbaga tod sikara a say betang da et say apag da ed saray bagat ed Katawan a Dios na Israel.

14

¹ "Say onggendan et say inkaapag na dalin na Canaan a nisagur na Ilog na Jordan. Saray angapag na dalin ed saray katoowan et si Eleazar a pari, si Josue a lakin anak nen Nun, tan saray pangulo da ray pamilya na saray tribu na Israel.

² "Onung na ingganggan na Katawan ed kinen Moises, niiter so betang na balang sakey a tribu ed saray siamira tan kapalduan tribu na Israel diad panamegley na pampapalaranan.

³ "Impabetang la nen Moises so dalin a nibokig na Jordan ed saray duara tan kapalduan tribu. (Saray kabyangay boleg nen Jose et nagmaliw a duaran tribu: Manases tan Efraim.) Balet si Moises ag to initdan na dalin iray Levita, likud labat ed saray siudad a panayaman da tan saray kaalogan a pampastolan dad saray baka tan saray karniro ra.

⁴

⁵ "Inapag-apag na saray totood Israel so dalin onung na ingganggan na Katawan ed kinen Moises.

⁶ "Aminsan ya agew wala ray totoon kabyangan na tribu nen Juda a linma rad kinen Josue diad Gilgal. Say sakey ed sikara a si Caleb, say lakin anak nen Jefone a Cenizeo, kuantod kinen Josue, Amtam so imbaga na Katawan diad Cades-barnea ed kinen Moises a too na Dios nipaakar ed sika tan siak.

⁷ "Apataploy taon ko nen si Moises ya aripen na Katawan et imbaki to ak manlapud Cades-barnea a manispia ed sayan dalin. Tuan balita so impawil kon imbagad sikato.

⁸ "Balet saramay lalakin kaibak a nanispia pinatakot da ray totoo. Siak balet matoor kon inonur so Katawan a Dios ko.

⁹ "Lapud saman a ginawak, insipan nen Moises ed siak ya andi-saew a saray anak ko tan siak et awaten min kayaryan so dalin a panakaran ko.

¹⁰ Balet natan, nengneng mo. Apataplo tan limay taon la so linmabas nanlapu lad samay panaon na impangibagay Katawan na sayan sipan ed kinen Moises. Agawa ya nen ombebeltang ed kalawakan so Israel, et say Katawan pambibilayen to ak ni ya anggad natan, onung na insipan to. Nengneng mo ak! Walomplo tan limay taon ko la

¹¹ et mabiskeg ak ni a singa samay panaon na impangibakid siak nen Moises. Mabisbiskeg ak ni a mibakal odino manggawa na antokaman.

¹² Natan sirin, iter mod siak so kapokdulan a pasen ya insipan ed siak na Katawan diad samay agew na impangibaga miy anengneng mid impanispia mi. Imbaga mid sika a diad saman a baleg tan apaliberan na padir a siudad et wadman iray Anakim a poli ra na alan. Angangko olupen ak na Katawan et napataynan ko ra, onung na imbagay Katawan.

¹³ Binindisionan nen Josue si Caleb a lakin anak nen Jefone tan inter tod sikato so siudad na Hebron.

¹⁴ Anggad natan kayaryan ni ya na saray kabyangay boleg nen Caleb a lakin anak nen Jefone a Cenizeo so Hebron, lapud matoor ton inonur so Katawan a Dios na Israel.

¹⁵ Kasakbayan to ya say Hebron et tatawagen na siudad na Arba. (Si Arba et sankabiskegan nen saman ed saray Anakim.) Wala natan so kareenan ed sayan dalin.

15

¹ "Saray pamilya na tribu nen Juda naawat day onggendan a parti na dalin: Sakop na dalin da so anggad sankaarawian a pasen ed abalaten na kalawakan na Zin, diad ketegan na Edom.

² "Sayan ketegan ed bandad abalaten et onggapod samput na Inatey a Dayat,

³ "tan mampaabalaten a manlapud Dalan na Akrabim tan ontuloy ya anggad Zin. Ondalan ed abalaten na Cades-barnea, labasan toy Hezron tan ontuloy ed Adar, insan onlikod Karka,

⁴ "ondalan ed Azmon, tan tontonen toy kolus a walad ketegan na Egipto tan talusen toy Dayat na Mediteraneo a sikatoy pansamputan na ketegan. Sikato yay ketegan na Juda ed bandad abalaten.

⁵ "Say ketegan ed bandad bokig et say Dayat ya Inatey ya anggad sabangan na Ilog na Jordan. Say ketegan ed bandad baybay et manlapud man

⁶ "ya ontuloy ya anggad Bet-hogla, tan nadalan toy baybay na Bet-araba. Insan mampatatdang ed Bato na Bohan (si Bohan et lakin anak nen Ruben),

⁷ "manlapud Patar na Acor ya anggad Debir, insan onlikod baybay a mamaarap ed Gilgal ya akaarap ed Dalan na Adumim diad abalaten a dapag na patar. Manlapu dia ontuloy ed saray sobul na En-semes, insan diad En-rogel,

⁸ "tan mampatatdang ed Patar na Hinom diad niabalaten a dapag na pokdul a kawalaan na Jerusalem a siudad na saray Jebuseo. Say ketegan ontuloy ya anggad toktok na pokdul ed nisagur a dapag na Patar na Hinom, diad nibaybay a samput na Patar na Refaim.

⁹ "Manlapud man ontalus ed saray Sobul na Neftoa tan diad saray siudad ya asingger ed Palandey na Efron. Manlapud man onlikon mamaarap ed Baala (odino Kiryat-jearim),

¹⁰ a diman onsaliberber ed sagur na Baala a mamaarap ed nipokdul a dalin na Edom, insan ontuloy ed nibaybay a dapag na Palandey na Jearim (odino Kesalon), insan mampalasur ed Bet-semes tan ondalan ed Timna.

¹¹ Ontuloy so ketegan ed pokdul a nibaybay na Ecron, onlikon mamaarap ed Sikeron, insan ondalan ed Palandey na Baala, tan ontuloy ed Jamnia. Say ketegan mansamput ed Dayat na Mediteraneo,

¹² a sikatoy ketegan ed bandad sagur. Diad loob na sarayan ketegan nanayam iray totoo a kabyangan na saray pamilya nen Juda.

¹³ Onung na ingganggan na Katawan ed kinen Josue, niiter so parti na dalin na Juda ed kinen Caleb a lakin anak nen Jefone tan kabyangay tribu nen Juda. Naawat to so Hebron, say siudad a kayaryan nen Arba ya ama nen Anak.

¹⁴ Pinataynan nen Caleb iray kabyangay boleg nen Anaksaray boleg di Sesai, Ahiman, tan Talmai.

¹⁵ Manlapud man linmay Caleb ed Debir tan dinogpaan to ray totoon manaayam diman. (Nen saman sayan siudad tatawagen a Kiryat-sefer.)

¹⁶ Inkuanen Caleb, Paasawak si anak kon Acsa ed lakin makadakep ed Kiryat-sefer.

¹⁷ Si Otniel, a lakin anak nen Kenaz a lakin agi nen Caleb, so akadakep ed samay siudad, kanyan impaasawa nen Caleb ed sikato si Acsa ya anak to.

¹⁸ Diad agew na kasal da, imbaga nen Otniel ed kinen asawa to a mikerew ed kinen ama to na sakey ya alog. Inmepas ed asno imay asawa nen Otniel, tan tinepet nen Caleb no anto so labay to.

¹⁹ Inmebat, Itdan yo ak pa na dalin a kawalaan na sobul. Amaga may inter yod siak a dalin. Kanyan inter nen Caleb ed sikato iray niatagey tan niabeban sobul.

²⁰ Sikato ya so dalin a naawat na saray pamilyay tribu nen Juda.

²¹ Saray siudad a wala rad bandad abalaten a kayaryan da, ya asingger irad ketegan na Edom, et saraya: Cabseel, Eder, Jagur,

²² Cina, Dimona, Adada,

²³ Kedes, Hazor, Itnan,

²⁴ Zif, Telem, Bealot,

²⁵ Hazor-hadata, Keryot-hezron (odino Hazor),

²⁶ Amam, Sema, Molada,

²⁷ Hazar-gada, Hesmon, Bet-pelet,

²⁸ Hazar-sual, Beer-seba, Bizjoteya,

²⁹ Baala, Iyim, Ezem,

³⁰ Eltolad, Cesil, Horma,

³¹ Siclag, Madmana, Sansana,

³² Lebaot, Silhim, Ayin, tan Rimon; duamplo tan siam iran amin a siudad, a pati saray baleg ed kaliber-liber da.

³³ Saray siudad ed saray alusadsar et saraya: Estaol, Zora, Asena,

³⁴ Zanoa, En-ganim, Tapua, Enam,

³⁵ Jarmut, Adullam, Soco, Azeka,

³⁶ Saaraim, Aditaim, Gedera, tan Gederotaim; labinapat iran amin a siudad, a pati saray baley ed kaliber-liber da.

³⁷ Siudad da met ni ra yay onggendan: Zenan, Hadasa, Migdal-gad,

³⁸ Dilan, Mizpa, Jocteel,

³⁹ Lakis, Bozcat, Eglon,

⁴⁰ Cabon, Lakmam, Kitlis,

⁴¹ Gederot, Bet-dagon, Naama, tan Maceda; labinanem iran amin a siudad, a pati saray baley ed kaliber-liber da.

⁴² Wala met ni ra yan siudad da: Libna, Eter, Asan,

⁴³ Ifta, Asena, Nezib,

⁴⁴ Ceila, Aczib, Maresa; siamiran siudad iran amin a pati saray baley ed kaliber-liber da.

⁴⁵ Wala met so siudad dan Ecron a pati saray baley tan saray bario to,

⁴⁶ tan amin da ray siudad tan saray baley ya asingger ed Asdod, manlapud Ecron ya anggad Dayat na Mediteraneo.

⁴⁷ Wala met ni ra so siudad dan Asdod tan Gaza, a pati saray baley tan saray bario ra, a nasabi ra so kolus ed ketegan na Egipto tan say gilig na Dayat na Mediteraneo.

⁴⁸ Diad kapokdulan iran dalin saraya so siudad da: Samir, Jatir, Soco,

⁴⁹ Dana, Kiryat-sefer (odino Debir),

⁵⁰ Anab, Estemoa, Anim,

⁵¹ Gosen, Holon, tan Gilo; labinsakey a siudad iran amin, a pati saray baley a kaliber-liber da.

⁵² Siudad da met iray onggendan: Arab, Duma, Esan,

⁵³ Janim, Bet-tapua, Afeca,

⁵⁴ Humta, Hebron, Sior; siamiran siudad iran amin a pati saray baley ed kaliber-liber da.

⁵⁵ Siudad da met ni ray onggendan: Maon, Carmelo, Zif, Juta,

⁵⁶ Jezreel, Jocdeam, Zanoa,

⁵⁷ Cain, Gabaa, tan Timna; samplora a siudad iran amin, a pati saray baley ed kaliber-liber da.

⁵⁸ Wala met ni ra yan siudad da: Halhul, Bet-sur, Gedor,

⁵⁹ Mearat, Bet-anot, tan Eltecon; anemiran siudad iran amin, a pati saray baley ed kaliber-liber da.

⁶⁰ Siudad da met ni ray onggendan: Kiryat-baal (odino Kiryat-jearim) tan Rabba; duara ran siudad, a pati saray baley ed kaliber-liber da.

⁶¹ Diad kalawakan saraya so siudad da: Bet-araba, Midin, Secaca,

⁶² Nibsan, Siudad ya Asin, tan En-gadi; anemiran siudad iran amin, a pati saray baley ed kaliber-liber da.

⁶³ Balet saray totood Juda ag da ayarian a pinataynan iray Jebuseo a manaayam ed Jerusalem. Manaayam ni rad man a kaiba da ray totood Juda.

16

¹ "Say bandad abalaten a ketegan na dalin a nipabetang ed saray kabyangan na boleg nen Jose et onggapod Jordan diad asingger ed Jerico, diad pasen a nibokig na saray sobul na Jerico, tan ontuloy ya anggad kalawakan. Manlapud Jerico sabien toy kapokdulan a pasen ya anggad Betel.

² "Manlapud Betel ontuloy ed Luz, ondalan ed Atarot-adar a panaayaman na saray Arkita.

³ "Insan mampasagur ya anggad dalin da ray Aplatita tan ontuloy ed pasen na Abeban Bet-horon. Manlapud man ontuloy ed Gezer tan mansamput ed Dayat na Mediteraneo.

⁴ "Saray kabyangay boleg nen Jose, salanti saray tribu di Efraim tan Manases, et nipabetang yan dalin ed sikara.

⁵ "Sikato yay dalin a sakop da ray pamilya na tribu nen Efraim: say ketegan da manlapud Atarot-adar diad bandad bokig ya anggad Bet-horon,

⁶ "tan manlapud man ontalus ed dayat na Mediteraneo. Say ketegan dad baybay et say Micmetat. Manlapud bokig na Micmetat say ketegan da onliko ed Taanat-silo insan ontuloy ed bokig ya anggad Janoa.

⁷ "Manlapud Janoa mampaleksab ed Atarot tan Naara, sabien toy Jerico tan mansamput ed Jordan.

⁸ "Manlapud Tapua say ketegan mamaarap ed sagur tan ontalus ed kolus na Cana, insan mansamput ed Dayat na Mediteraneo. Sikato ya so dalin a niiter ed saray pamilya na tribu nen Efraim.

⁹ "Kayaryan da met iray baley tan saray bario a wala rad dalin a sakop na tribu nen Manases, balet niiter irad saray Efraimita.

¹⁰ Ag da pinataynan iray Cananeo a manaayam ed Gezer, kanyan anggad natan saray Cananeo kaiba ran manaayam iray Efraimita, balet apasoot ira yan Cananeo a mankimey ya ariripen.

17

¹ "Say sakey a parti na dalin ed sagur na Jordan et nipabetang ed saray pigaran pamilyan say sengeg da et si Manases a pangulowan a lakin anak nen Jose. Si Makir ya ama nen Galaad et sankapangulowanan a lakin anak nen Manases tan sakey a sondalo, kanyan nipabetang ed sikato so Galaad tan Basan a walad bokig na Jordan.

² "Say dalin a walad bandad sagur na Jordan et nipabetang ed kindi Abiezer, Helec, Asriel, Sikem, Hefer, tan Semida a sikaray arum a kabyangay boleg nen Manases a lakin nen Jose tan sikaray pangulo na pamilya ra.

³ "Si Zelofehad, a lakin anak nen Hefer a lakin anak nen Galaad a lakin anak nen Makir a lakin anak nen Manases, et anggapoy anak ton laki no ag ta bibii labat. Say kangaranan na anak to et saraya: Mala, Noa, Hogla, Milca, tan Tirza.

⁴ "Linma rad kinen Eleazar a pari tan si Josue a lakin anak nen Nun tan diad saray pangulo, tan kuanda, Say Katawan ingganggan toy Moises ya itdan to kami tan saray lalakin kakanayon mi na sakey a parti na dalin a kayaryanen mi. Kanyan onung ed ganggan na Katawan, naitdan ira na dalin a pati saray kakanayon da.

⁵ "Sikato yay makasengeg a si Manases et akaawat na samploran betang a kaaruman na Galaad tan Basan diad nibokig na Jordan

⁶ "bangta saray bibii tan lalakin kabyangan na pamilya to et apabetangan ira na dalin. Say dalin na Galaad et nipabetang ed saray arum a kabyangan na boleg nen Manases.

⁷ "Say dalin nen Manases et onggapod Aser ya anggad Micmetat a bokig na Sikem. Ontuloy ed abalaten so ketegan tan nasakop to ray totood En-tapua.

⁸ "Say dalin a kaliber-liber na Tapua et kayaryan nen Manases, balet say baleg na Tapua a walad ketegan et kayaryan na saray kabyangay boleg nen Efraim.

⁹ "Insan mampaleksab ed kolus na Cana so ketegan. Saray siudad ed abalaten na kolus et kayaryan nen Efraim, anggaman a sakop ira na dalin nen Manases. Ontuloy so ketegan na Manases ed nibaybay a dapag na kolus tan mansamput ed Dayat na Mediteraneo.

¹⁰ Walad bandad abalaten so Efraim, tan say Manases walad bandad baybay tan say ketegan dad sagur et say dayat na Mediteraneo. Say Aser et walad bandad baybay a sagur, tan say Isacar walad bandad baybay a bokig.

¹¹ Diad loob na dalin di Isacar tan Aser, kayaryan nen Manases so Bet-sean tan Ibleam, a pati saray baley a kaliber-liber da, tan ontan met ed Dor (samay walad gilig na dayat), En-dor, Taanac, Megido, tan saray baley a kaliber-liber da.

¹² Balet saray totoo na Manases ag da apataynan iray totoon manaayam ed sarayan siudad, kanyan siansian manaayam nid man iray Cananeo.

¹³ Anggaman a binmiskeg iray Israelita, ag da pinataynan iray amin a Cananeo, balet pinasoot da ran nankimey para sikara.

¹⁴ Saray kabyangay boleg nen Jose kuandad kinen Josue, Akin et initdan mo kami na sakey labat a parti na dalin? Dakerakel kami lapud binindisionan kami na Katawan?

¹⁵ Inmebat si Josue, No dakerakel kayo tan meleg a para sikayo so kapokdulan a pasen na Efraim, laka yod katakelan tan manlinis kayod man na dalin diad kawalaan da ray Perezeo tan saray Refaim.

¹⁶ Inmebat ira, Say kapokdulan a pasen et kulang a para sikami, balet saray Cananeon manaayam ed saray patar et wala ray balatyang a karwahi ra, salanti saray manaayam ed Bet-sean, a pati saray baley ed kaliber-liber to tan saray manaayam ed Patar na Jezeel.

¹⁷ Inkuanen Josue ed tribu nen Efraim tan kapalduay tribu nen Manases, Dakerakel kayon tua tan mabisbiskeg kayo. Aliwan saksakey a betang sirin so awaten yo.

¹⁸ Niiter a kayaryan yo so kapokdulan a pasen. Anggaman a matakel, nalinisan yo tan nakaryaryan yo manlapud sakey a samput ya anggad sananey a samput. No nipaakar ed saray Cananeo, napataynan yo ra anggaman a wala ray balatyang a karwahi ra tan mabiskeg iran totoo.

18

¹ "Kayarin adakep na saray Israelita so intiron dalin na Canaan, nantitipon irad Silo, insan da inlira so Tuldan Ayamay Katawan.

² "Wala ni ray pitoran tribu na saray totood Israel ya ag ni ra apabetangan na dalin.

³ "Kanyan inkuanen Josue ed saray totood Israel, Kapigan niy iloob yon pangala ed dalin ya inter ed sikayo na Katawan a Dios na saray lalaki yo?

⁴ "Mamili kayo na taloran lalaki ed kapag tribu, ta ibakik ira ed intiron bansa a mangimapa ed dalin a labay dan kayaryanen. Insan ira ompawil ed siak.

⁵ "Pankapitoen a parti so dalin; ag la galawen so dalin ed abalaten a nipabetang ed tribu nen Juda tan say dalin ed baybay a nipabetang ed tribu nen Jose.

⁶ "Igawaan yoy mapa ira yan pitoran parti, insan yo dia iyakar ed siak. Ipanonan ta kayod Katawan a Dios yo diad panamegley na pampapalaranan.

⁷ "Balet saray Levita ag ira itdan na betang da ed dalin lapud say betang da et say panlingkur dan papari na Katawan. Say tribu di Gad, Ruben, tan say kapalduay tribu nen Manases et naawat da la so dalin dad bokig na Jordan ya inter ed sikara nen Moises ya aripen na Katawan.

⁸ "Saramay lalakin apili linma ran mangimapa ed dalin kayari nen Josue ya imbilin ed sikara: Laka yod intiron dalin tan imapa yo, insan kayo dia ompawil ed siak. Kasabi yo diad Silo ipanonan ta kayod Katawan diad panamegley na pampapalaranan.

⁹ "Kanyan niliber day intiron dalin ira may lalaki tan inggogolis da no panoy impangapag dan pitoran parti so dalin. Inlilista da met iray nandoroman baley. Insan iray pinmawil ed kinen Josue diad kampo ed Silo.

¹⁰ Impanonan ira nen Josue ed Katawan diad panamegley na impanpapalaranan, et impabetang tod balang sakey ed saramay akeraan a tribu na Israel so sakey a parti na dalin.

¹¹ Say dalin a kayaryan da ray pamilya na tribu nen Benjamin et sikatoy ononan nipabetang. Say dalin da et walad nanleetan na tribu nen Juda tan say tribu nen Jose.

¹² Diad baybay onggapo so ketegan da ed Jordan, insan mampaatagey ed baybay na Jerico tan mampasagur ya ondalan ed kapokdulan ya anggad kalawakan na Bet-aven.

¹³ Ontuloy so ketegan ed alusadsar diad niabalaten na Luz (tatawagen met ya na Betel), insan mampaleksab ed Atarot-adar diad palandey a niabalaten na Abeban Bet-horon.

¹⁴ Insan ontuloy so ketegan ed sananey a dapag ta ombalikod abalaten manlapud nisagur a dapag na sayan palandey tan onlad Kiryat-baal (odino Kiryat-jearim), a kayaryan na tribu nen Juda. Sikato ya so ketegan ed sagur.

¹⁵ Say ketegan ed abalaten onggapo ed samput na Kiryat-jearim insan ontuloy ed saray Sobul na Neftoa.

¹⁶ Mampalasur ed satan ed alusadsar ya ososdongan toy Patar na Hinom, diad nibaybay a samput na Patar na Refaim. Ontuloy ed abalaten tan nadalan toy Patar na Hinom a niabalaten na pokdul da ray Jebuseo, insan ontalus ed Enrogel.

¹⁷ Onlikod satan ed baybay a mamaarap ed En-semes insan ontuloy ed Gelilot a kasumbaliwan na Dalan na Adumim. Say ketegan et mampalasur ed Bato na Bohan (si Bohan et sakey a lakin anak nen Ruben)

¹⁸ insan ondalan ed nibaybay na pokdul ya ososdongan toy Patar na Jordan. Mampalasur ed satan ed patar,

¹⁹ tan ondalan ed nibaybay na nipokdul a pasen na Bet-hogla tan mansamput ed nibaybay a sabangan na Inatey a Dayat a kawalaay sabangan na Ilog na Jordan. Sikato ya so ketegan ed abalaten.

²⁰ Say Ilog na Jordan so ketegan ed bokig. Sikara yay ketegan na dalin a naawat na saray pamilya na tribu nen Benjamin.

²¹ Saray siudad a kayaryan na saray pamilya na tribu nen Benjamin et saraya: Jerico, Bet-hogla, Emek-keziz,

²² Bet-araba, Zemaraim, Betel,

²³ Avim, Para, Ofra,

²⁴ Kefar-haammoni, Ofni, tan Geba; labindua ran amin a siudad a pati saray baley ed kaliber-liber da.

²⁵ Siudad da met iray onggendan: Gabaon, Rama, Beerot,

²⁶ Mizpa, Cefira, Moza,

²⁷ Rekem, Irpeel, Tarala,

²⁸ Zela, Elef, Jebus (odino Jerusalem), Gibeat, tan Kiryat-jearim; labinapat iran amin a siudad, a pati saray baley ed kaliber-liber da. Sikato yay dalin a nipabetang ed saray pamilya na tribu nen Benjamin.

19

¹ "Say kumadwan apabetangan na dalin et saray pamilya na tribu nen Simeon. Say dalin da et walad loob na dalin a nipabetang ed tribu nen Juda.

² "Sakop to so Beer-seba, Seba, Molada,

³ "Hazar-sual, Bala, Ezem,

⁴ "Eltolad, Betul, Horma,

⁵ "Siclag, Bet-marcabot, Hazar-susa,

⁶ "Bet-lebaot tan Saruhen; talomplon siudad iran amin, a pati saray baley a kaliber-liber da.

⁷ "Sakop to met ni so Ayin, Rimon, Eter, tan Asan; apatiran siudad iran amin, a pati saray baley ed kaliber-liber da.

⁸ "Sakop to ray amin a baley ed kaliber-liber na sarayan siudad ya anggad Baalat-beer (odino Rama) diad abalaten. Sikato yay dalin a naawat na saray pamilya na tribu nen Simeon.

⁹ "Bangta say nipabetang ed Juda et baleg nen say nakaukolan da, niiter ed tribu nen Simeon so arum a parti na dalin da.

¹⁰ Say kumatlon apabetangan na dalin et saray pamilya na tribu nen Zabulon. Say dalin a naawat da et nasabi toy anggad Sarid.

¹¹ Manlapud man say ketegan mampasagur ya anggad Marala tan makasabid Dabeset tan say kolus a nibokig na Jocneam.

¹² Manlapud biek a dapag na Sarid ontuloy ed bokig ya anggad ketegan na Kislot-tabor, insan ontuloy ed Daberat tan mampaatagey ed Jafia.

¹³ Manlapud man mampabokig ya anggad Gat-hefer tan Et-kazin, onlikon mamaarap ed Nea tan ontalus ed Rimon.

¹⁴ Diad baybay say ketegan onlikon mamaarap ed Hanaton tan mansamput ed Patar na Ifteel.

¹⁵ Sakop na dalin da so Catat, Nahalal, Simron, Idala, tan Betlehem; labinduan siudad iran amin a pati saray baley ed kaliber-liber da.

¹⁶ Sarayan siudad tan saray baley da et sakop ira na dalin a nipabetang ed saray pamilya na tribu nen Zabulon.

¹⁷ Say kumapat ya apabetangan na dalin et saray pamilya na tribu nen Isacar.

¹⁸ Say dalin da et sakop toy Jezreel, Kesulot, Sunem,

¹⁹ Hafaraim, Shion, Anaharat,

²⁰ Rabit, Cision, Ebez,

²¹ Remet, En-gannim, En-hada, tan Bet-pazez.

²² Nasabi na ketegan da so Tabor, Sahazuma, tan Bet-semes, insan mansamput ed Jordan. Sakop to so labinanem a siudad a pati saray baley ed kaliber-liber da.

²³ Sarayan siudad tan saray baley da et sakop na dalin a nipabetang ed saray pamilya na tribu nen Isacar.

²⁴ Say kumaliman apabetangan na dalin et saray pamilya na tribu nen Aser.

²⁵ Say dalin da et sakop toy Helcat, Hali, Beten, Acsaf,

²⁶ Alamelec, Amad, tan Misal. Diad sagur nasabi toy Carmelo tan Sihor-libnat.

²⁷ Diad iliko na ketegan da ed bokig ontuloy ed Bet-dagon tan nasabi toy Zabulon tan patar na Ifteel, insan ontuloy ed Bet-emec tan Neiel diad baybay. Diad baybay nadalan toy Cabul,

²⁸ Hebron, Rehob, Hamon, Cana, ya anggad Sidon.

²⁹ Insan say ketegan onlikod Rama tan nasabi toy siudad na Tiro ya apaliberan na padir. Insan onlikod Hosa tan mansamput ed Dayat na Mediteraneo. Sakop to met so Mahalab, Aczib,

³⁰ Uma, Afec, tan Rehob; duamplo tan duan siudad iran amin, a pati saray baley ed kaliber-liber da.

³¹ Sarayan siudad tan saray baley da et sakop ira na dalin a nipabetang ed saray pamilya na tribu nen Aser.

³² Say kumanem ya apabetangan na dalin et saray pamilya na tribu nen Neftali.

³³ Say ketegan na dalin da et manlapud Helef ya anggad kiew a robli ed Zaananim, insan mamaarap ed Adamineceb tan diad Jabneel ya anggad Lacum, insan mansamput ed Jordan.

³⁴ Manlapud man onlikod sagur a mamaarap ed Aznot-tabor insan ontuloy ed Hucoca tan nasabi toy Zabulon diad abalaten, Aser, diad sagur, tan Jordan diad bokig.

³⁵ Saray apaliberan na padir a siudad et saraya: Sidim, Ser, Hamat, Racat, Cineret,

³⁶ Adama, Rama, Hazor,

³⁷ Kedes, Edrei, En-hazor,

³⁸ Jiron, Migdal-el, Horem, Bet-anat, tan Bet-semes; labinsiam a siudad iran amin a pati saray baley ed kaliber-liber da.

³⁹ Sarayan siudad tan saray baley da et sakop na dalin a nipabetang ed saray pamilya na tribu nen Neftali.

⁴⁰ Say kumapiton apabetangan na dalin et saray pamilya na tribu nen Dan.

⁴¹ Say dalin da sakop toy Zora, Estaol, Ir-semes,

⁴² Saalabin, Ayalon, Itla,

⁴³ Elon, Timna, Ecron,

⁴⁴ Elteke, Gibeton, Baalat,

⁴⁵ Jehud, Bene-berac, Gatrimon,

⁴⁶ Me-jarcon, tan Racon; ontan met ed kaliber-liber na Jope.

⁴⁷ Nen abalang na saray totoo na Dan so dalin da, linma rad Lesem tan dinogpaan da. Adakep da, pinapatey da ray totoo to, tan kinayaryan da. Nanayam irad man tan impagmaliw da a Dan so ngaran to may siudad; impara ra ed ngaran na laki ran si Dan.

⁴⁸ Sarayan siudad tan saray baley da et sakop na dalin a nipabetang ed saray pamilya nen Dan.

⁴⁹ Nen kayarin inapag-apag na saray totood Israel so dalin, initdan day Josue a lakin anak nen Nun na sakey a parti na dalin.

⁵⁰ Onung na ingganggan na Katawan, inter dad sikato so siudad a kinerew to: say Timnat-sera diad kapokdulan a dalin na Efraim. Pinasimbalo ton impaalagey imay siudad tan nanayam diman.

⁵¹ Si Eleazar a pari, si Josue a lakin anak nen Nun, tan saray pangulo da ray pamilya na saray tribu na Israel et impapabetang da ra yan parti na dalin diad panamegley na pampapalaranan da diad impangipanon dad Katawan diad Silo, diad lolooban na Tuldan Ayamay Katawan. Diad onya asumpal dan inaapag-apag so dalin.

20

¹ "Insan imbaga na Katawan ed saray totood Israel diad panamegley nen Josue, Mamili kayo na saray siudad a salimbengan onung na imbagak ed sikayo diad panamegley nen Moises.

²

³ "Say toon makapatey ya ag to ginagala nayarin onlad siudad a salimbengan et nibatikan to la so toon labay toy ombawid sikato.

⁴ "Nayarin ombatik ed sakey ed sarayan siudad, onlad pasen a panagsalaysayan diad lolooban na siudad, tan diman to ipaliwawad saray pangulo no antoy agawa. Palooben dad satan ed siudad, itdan day pasen a panayaman to, pian makapanayam diman.

⁵ "No say toon labay toy ombawid sikato et tombuken tod man, saray totood siudad et ag da nepeg ya ipalima ed sikato imay toon sinmalimbeng. Nepeg da ya iyagel ta akapatey na too ya ag to ginagala, aliwan lapud pambosul to.

⁶ "Nayarian toy manayam diman ya anggad nasalaysay tan nasintinsiaan na karaklan tan anggad ipatey na Pangulon Pari ed saman a panaon. Insan samay too nayarin to lay onsempet la ed dilin baley to a nanlapwan to nen binmatik.

⁷ "Kanyan diad sagur na Jordan imbiig day Kedes na Galilea, diad kapokdulan a dalin na Neftali; Sikem, diad kapokdulan a dalin na Efraim; tan Hebron, diad kapokdulan a dalin na Juda.

⁸ "Diad bokig na Jordan, diad niatagey a patar ed kalawakan a walad bokig na Jerico, pinili ray Bezer, diad dalin na Ruben; Ramot na Galaad, diad dalin na Gad; tan Golan na Basan, diad dalin na Manases.

⁹ "Sikara yay siudad a salimbengan ya apili ran para saray amin a totood Israel tan para amin a sangkailin manaayam ed dalin da. Siopamay makapatey ya ag to ginagala niagel diman ed toon labay toy ombawid sikato; ag napatey no sikatoy ag ni asalaysay na karaklan.

21

¹ "Saray pangulo da ray pamilya na saray Levita linma rad kinen Eleazar a pari, si Josue a lakin anak nen Nun, tan saray pangulo da ray pamilya na amin a tribu na Israel.

² "Diad Silo ed dalin na Canaan inkuandad sikara, Ingganggan na Katawan diad panamegley nen Moises a nepeg a naitdan kami na saray siudad a panayaman mi tan saray dalin ed kaliber-liber da a pampastolan mid saray ayayep mi.

³ "Kanyan onung ed ingganggan na Katawan saray totood Israel initdan da ray Levita na saray siudad tan saray dalin a panagpastolan a tinaksing dad saray dalin da.

⁴ "Say ononan naitdan na saray siudad et saray boleg nen Coat a Levita. Nipabetang ed saray pamilya a say sengeg da et si Aaron a pari so labintalon siudad ya ataksing ed saray dalin na Juda, Simeon, tan Benjamin.

⁵ "Nipabetang ed saray arum a kabyangan na boleg nen Coat so samploran siudad ya ataksing ed saray dalin na Efraim, Dan, tan say kapalduay Manases.

⁶ "Nipabetang ed boleg nen Gerson so labintalon siudad ya ataksing ed saray dalin na Isacar, Aser, Neftali tan say kapalduay Manases.

⁷ "Nipabetang ed saray pamilya na boleg nen Merari so labinduan siudad ya ataksing ed saray dalin na Ruben, Gad, tan Zabulon.

⁸ "Diad panamegley na pampapalaranan, saray totood Israel impabetang dad saray Levita ira yan siudad tan saray dalin a panagpastolan da, onung na ingganggan na Katawan diad panamegley nen Moises.

⁹ "Sikara yay kangaranan na saray siudad ya ataksing ed saray dalin na Juda tan Simeon, a niiter

¹⁰ irad saray kabyangay boleg nen Aaron a kabyangan ira na boleg nen Coat a say sengeg to et si Levi. Sikara so ononan naitday betang.

¹¹ Niiter ed sikara so siudad na Arba (si Arba so ama nen Anak), a tatawagen natan na Hebron, diad nipokdul a dalin na Juda; niiter met ed sikara so dalin a panagpastolan ed kaliber-liber to.

¹² Balet saray kaalogan ed siudad tan pati saray baley to et niiter la ran kayaryan nen Caleb a lakin anak nen Jefone.

¹³ Likud ed Hebron (sakey ed saray siudad a salimbengan), saray onggendan a siudad et nipabetang ira ed saray kabyangay boleg nen Aaron a pari: Libna,

¹⁴ Jatir, Estemoa,

¹⁵ Holon, Dibir,

¹⁶ Ayin, Juta, tan Bet-semes a pati saray dalin a panagpastolan da; siamiran siudad iran amin a nanlapud rad tribu di Juda tan Simeon.

¹⁷ Manlapud dalin na Benjamin niiter ed sikara so apatiran siudad: Gabaon, Geba,

¹⁸ Anatot, tan Almon, a pati saray dalin a panagpastolan da.

¹⁹ Labintalon amin a siudad a pati saray pastolan dan dalin, so niiter ed saray papari a kabyangan na boleg nen Aaron.

²⁰ Saray arum a pamilyay Levita a kabyangan ira na boleg nen Coat et apabetangan ira na pigaran siudad ya ataksing ed dalin na Efraim.

²¹ Niiter ed sikara so apatiran siudad: Sikem tan saray dalin a panagpastolan to ed kapokdulan a dalin na Efraim (sakey ed saray siudad a salimbengan), Gezer,

²² Kibzaim, tan Bet-horon, a pati saray dalin a panagpastolan da.

²³ Manlapud dalin na Dan niiter ed sikara so apatiran siudad: Elteke, Gibeton,

²⁴ Ayalon, tan Gat-rimon, a pati saray dalin a panagpastolan da.

²⁵ Manlapud dalin na kapalduay Manases niiter ed sikara so duaran siudad: Taanac, tan Gat-rimon, a pati saray dalin a panagpastolan da.

²⁶ Akaawat ira yan pamilya ed boleg nen Coat na samploran siudad a pati saray dalin a panagpastolan da.

²⁷ Say sananey a grupoy pamilya na saray Levita a kabyangan iray boleg nen Gerson et akaawat ira na duaran siudad ya ataksing ed dalin na kapalduay Manases: Golan na Basan (sakey ed saray siudad a salimbengan) tan Be-estera, a pati saray dalin a panagpastolan da.

²⁸ Manlapud dalin na Isacar naawat da so apatiran siudad: Cision, Daberat,

²⁹ Jarmut, tan En-ganim, a pati saray dalin a panagpastolan da.

³⁰ Manlapud dalin na Aser naawat da so apatiran siudad: Misal, Abdon,

³¹ Helcat, tan Rehob, a pati saray dalin a panagpastolan da.

³² Manlapud dalin na Neftali naawat da so taloran siudad: Kedes na Galilea, a pati saray dalin a panagpastolan to (sakey ed saray siudad a salimbengan), Hamot-dor, tan Cartan a pati saray dalin a panagpastolan da.

³³ Akaawat ira yan nandoroman pamilya na boleg nen Gerson na labintalon siudad, pati saray dalin a panagpastolan da.

³⁴ Saray arum a pamilya da ray Levita a kabyangan iray boleg nen Merari et naawat da so apatiran siudad ya ataksing ed dalin na Zabulon: Jocneam, Carta,

³⁵ Dimna, tan Nahalal a pati saray dalin a panagpastolan da.

³⁶ Manlapud dalin na Ruben naawat da so apatiran siudad: Bezer, Jahaz,

³⁷ Kedemot, tan Mefaat, a pati saray dalin a panagpastolan da.

³⁸ Manlapud tribu nen Gad naawat da so apatiran siudad: Ramot na Galaad, a pati saray dalin a panagpastolan to (sakey ed saray siudad a salimbengan), Mahanaim,

³⁹ Hesbon, tan Jazer a pati saray dalin a panagpastolan da.

⁴⁰ Kanyan nipabetang ed boleg nen Merari so labinduan siudad.

⁴¹ Manlapud dalin na saray totood Israel niiter ed saray Levita so apataplo tan walon siudad, pati saray dalin a panagpastolan da.

⁴²

⁴³ Kanyan say Katawan inter tod Israel so intiron dalin a sinambaan ton iter ed saray lalaki ra. Nen akayaryan da lay dalin, nanayam irad man.

⁴⁴ Say Katawan impanari to so kareenan ed intiron dalin onung na insipan tod saray lalaki ra. Anggapoy anggan sakey ed amin a kalaban da ray Israelita so analod sikara, ta impanalo ra na Katawan.

⁴⁵ Sinumpal na Katawan iray amin ya insipan tod saray totood Israel.

22

¹ "Insan impantitipon nen Josue iray totood saray tribu di Ruben, Gad, tan kapalduay Manases.

² "Inkuantod sikara, Sinumpal yo ray amin ya ingganggan ed sikayo nen Moises ya aripen na Katawan tan inonur yo ray amin a ganggan ko.

³ "Nanlapud la nen saman ya anggad natan ag yon balut ikakaindan iray kapara yon Israelita. Pampepelengan yon oonuren iray ganggan na Katawan a Dios yo.

⁴ "Onung na insipan na Katawan a Dios yo initdan to na kareenan iray kapara yon Israelita. Sempet kayo natan sirin ed dalin a kayaryan yo, say dalin ed bokig na Jordan ya inter ed sikayo nen Moises ya aripen na Katawan.

⁵ "Pampelengan yon onuren so ganggan ya inter ed sikayo nen Moises: aro yoy Katawan a Dios yo, onur yoy linawa to, sumpal yo ray ganggan to, nepeg a matoor kayo lawas ed sikato, tan lingkuran yo ed intiron puso tan kamarerwa yo.

⁶ "Pinasempet ira nen Josue kayari to ran binindisionan tan binilin: Mayamyaman kayon onsempet; amayamay iray ayayep, pilak, balituk, gansa, balatyang tan kawes yo. Pinabang yo ray katribuwan yo na saray asamsam yod saray kalaban yo. Insan la ra sinmempet. Si Moises inter to so dalin a walad bokig na Jordan ed kapalduay tribu nen Manases, balet si Josue inter tod kapaldua na sayan tribu tan diad saray arum a tribu so dalin a walad sagur na Jordan.

⁷

⁸

⁹ "Kanyan sinmempet la ra may totood tribu di Ruben, Gad, tan say kapalduay Manases. Tinaynan da ra may arum a totood Israel diad Silo ed dalin na Canaan, ta onsempet la rad dilin dalin da, say dalin ed Galaad, a sikatoy inala ra onung na ingganggan ed sikara na Katawan diad panamegley nen Moises.

¹⁰ Nen saray totood tribu di Ruben, Gad, tan kapalduay Manases et akasabi ra ed Gelilot, a sakop ni na sagur na Jordan, amaalagey ira na balbaleg ya altar diad gilig na ilog.

¹¹ Nibagad saray arum a totood Israel, Dengel kayo! Saray totood tribu di Ruben, Gad, tan say kapaldua na Manases et angipaalagey ira na altar diad Gelilot, diad kawalaan tayon dapag na Jordan!

¹² Nen nadngelan ya na saray totood Israel, nantitipon iran amin ed Silo ta mibakal irad saray tribun walad bokig.

¹³ Insan saray totood Israel imbaki rad saray totood tribu di Ruben, Gad, tan say kapalduay Manases diad dalin na Galaad si Finees a lakin anak nen Eleazar a pari.

¹⁴ Akilad kinen Finees iray samploran manonan lalaki, sakey so manlapud kapag tribu ed saray tribun walad sagur tan balang sakey ed sikara so pangulo na sakey a pamilya ed saray boleg.

¹⁵ Sinmabi ra ed dalin na Galaad, diad saray totoo na tribu di Ruben, Gad, tan say kapalduay Manases.

¹⁶ Insan insalitaan day amin a totoo na Katawan ya inkuanda, Akin et ginawa yo yan kaogsan a sumpad Dios na Israel? Sinumlang yoy Katawan diad impamaalagey yod sayan altar a para sikayon dili! Ag yo la oonuren so Katawan!

¹⁷ Ag yo ta nanunotan imay kasalanan tayo nen wala tayod Peor, nen say Katawan et dinusa to na salot iray dilin totoo to? Maniirap itayo ni lapud saman a kasalanan tayo. Kulang ta ni man a kasalanan tayo?

¹⁸ Ag yo la labay ya onuren natan? No onsumlang kayo natan ed Katawan, pampasnukan to ray Israelita ed anggan arapen a panaon.

¹⁹ Natan sirin, no aliwan manepeg so dalin yo a pangigalangan ed Katawan, laka yod dalin na Katawan a kawalaan na Tulda to. Mangala kayoy parti na dalin mi. Balet ag kayo onsusumlang ed Katawan o pagmamaliwen yo kamin mananumpa diad pamaalagey yoy altar ya onarum ed altar na Katawan a Dios tayo.

²⁰ Ag yo ta nanunotan imay ag impangonur nen Acan a lakin anak nen Zera ed ganggan a nipaakar ed saray bengatlan nepeg a deralen, et adusa so intiron totood Israel? Aliwan si Acan labat so inatey lapud samay kasalanan to.

²¹ Saray totood tribu di Ruben, Gad, tan say kapalduay Manases et inmebat irad saramay pangulo da ray pamilya ed saray tribun walad sagur:

²² Say Makapanyari et say Dios! Sikato so Katawan! Say Makapanyari et say Dios! Sikato so Katawan! Amta to no akin et ginawa mi yan altar, tan labay mi met a naamtaan yo no akin! No sinumpa mi so Katawan tan inekal miy pananisia mid sikato, patey yo kami la natan.

²³ No sinumpa miy Katawan ta nanggawa kamiy altar min dili a pampoolan mid saray bagat odino ikana min pangisaklangan na saray bagat a trigo odino saray bagat a para kareenan, sikato lan dili so manusad sikami.

²⁴ Andi, ginawa mi yan altar lapud antakot kami ta ag la pigan saray kabyangay boleg yod arapen a panaon et ibaga rad saray kabyangay boleg mi, Antoy pibabali yo ed Katawan a Dios na Israel?

²⁵ Impagmaliw ton ketegan tayo so Jordan, sikami tan sikayo ran totoo na Ruben tan Gad. Anggapoy pibabali yod Katawan. Diad ontansaray kabyangay boleg yo et nayarin patondaen dan mangigalang ed Katawan iray kabyangay boleg mi.

²⁶ Kanyan ginawa mi yan altar, aliwan pampoolan odino pangisaklangan mid saray bagat,

²⁷ no ag ingen sikatoy sakey a tanda a para saray totoo mi tan saray totoo yo, tan ontan met a para saray kailalakan ya ontombuk ed sikatayo, tanda a talagan mangigagalang kamid Katawan diad arapan na masanton Tulda to diad panamegley na saray bagat min popoolan, saray bagat a para kareenan tan arum ni ran bagat. Sikato sirin so pamasakbay ed saray kabyangay boleg yo ya ag da ibagan saray kabyangay boleg mi et anggapoy pibabali rad Katawan.

²⁸ Ninunot mi a no onyay nagawa, saray kabyangay boleg mi et nayarian dan ikuan, Nengneng yo! Saray lalaki mi et nanggawa ray altar a singa altar na Katawan. Sayan altar et aliwan pangisaklangan na saray bagat a popoolan odino arum a bagat, no ag ingen sikatoy sakey a tanda para saray totoo mi tan saray totoo yo.

²⁹ Anggapon balut so getma min onsumpad Katawan odino ontonda kamin ontombuk ed sikato diad panggawa miy sakey ya altar a pangisaklangan mi na saray bagat a para kareenan odino saray bagat a trigo odino arum ni ran bagat. Ag mi kaduaan imay altar a walad arap na Tuldan Ayaman to.

³⁰ Si Finees a pari tan saramay akilad sikaton samploran manonan lalaki ed saray totood Israel, saray pangulo da ray pamilya na saray tribun walad sagur et nadngel da may imbaga na saray totood saray tribu di Ruben, Gad, tan say kapalduay na Manases, kanyan aliketan ira.

³¹ Si Finees a lakin anak nen Eleazar a pari kuantod sikara, Natan amta mi a kaiba tayo so Katawan. Ag kayo sinmumpad sikato, kanyan inyagel yod pananusay Katawan iray totood Israel.

³² Insan si Finees tan saramay pangulo tinaynan da ra may totoo na Ruben tan Gad diad dalin na Galaad tan pinmawil la rad Canaan, diad saray totood Israel, tan insalaysay dad sikara so agawa.

³³ Aliketan iray Israelita tan inggalang day Dios. Ag da la nantotongtongan so iyakar dan mibakal pian naderal day dalin a panaayaman na saray totoo na Ruben tan Gad.

³⁴ Inkuan na saray totoo na Ruben tan Gad, Sayan altar et sakey a tasi ed sikatayo a say Katawan et Dios. Kanyan inngaran da may altar na Tasi.

23

¹ "Kalabas na abayag a panaon kasumpal to ya, impanari na Katawan so kareenan ed dalin na Israel. Masikesiken lad saman si Josue,

² "kanyan tinawag toy intiron Israel, saray mamatakken, saray pangulo, saray huis, tan saray opisyal na saray totoo, tan kuanto, Masikesiken ak la.

³ "Anengneng yo ray amin a ginagawa na Katawan a Dios yo ed amin da ra yan bansa lapud sikayo. Say Katawan a Dios so mibabakal para sikayo.

⁴ "Impabetang ko lad saray tribu yo so dalin na saray akeraan nin bansa; tan amin da ray bansan dinadakep ko la, manlapud Ilog na Jordan diad bokig ya anggad Dayat na Mediteraneo diad sagur.

⁵ "Say Katawan a Dios yo et pabatiken to ra legan yon lolooban iray dalin da. Nakayaryan yoy dalin da onung na insipan ed sikayo na Katawan a Dios yo.

⁶ "Kanyan pampelegan yon onuren tan sumpalen iray amin a nisulat ed libro na Ganggan nen Moises. Ag yo papaolyan so anggan anton parti na ganggan,

⁷ "et ag kayod satan milimug-limug ed saray akeraan ed sarayan totoo a manaayam ed kawalaan yo, o salitaen yoy kangaranan da ray diriyos da, o ikana yo ray kangaranan da diad pansamba yo, o galangen yo ray diriyos da, odino ondadakmomo kayod sikara.

⁸ "Ingen, nepeg a mansiansia kayon matoor ed Katawan, a singa ginawa yo la nen saman ya anggad natan.

⁹ "Pinataynan na Katawan iray totood ankakabaleg tan makapanyarin bansa legan na pankukurang yo, et anggapoy akayarin milaban ed sikayo.

¹⁰ Anggan siopad sikayo nayarian ton pabatiken so sanlibon lalaki, ta mibabakal a para sikayo so Katawan a Dios yo, onung na insipan tod sikayo.

¹¹ Pampelengan yo sirin ya aroen so Katawan a Dios yo.

¹² No ipolisay yo so Katawan tan migampi kayod saray akeraan nin bansa tan miasawaan kayod sikara,

¹³ andiduaruwan ag la ra pabatiken na Katawan a Dios yo legan yon lolooban iray dalin da. Ingen, magmaliw iran singa patit o kalut ed sikayo odino singa ra ansakit a bakbak ed beneg yo odino sabit ed mata yo. Et mansiansia yan anggad anggapoy nakeraan ed sikayo ed sayan maung a dalin ya inter ed sikayo na Katawan a Dios yo.

¹⁴ Magano ak lan ontaynan ed sayan mundo. Amta na balang sakey ed sikayo diad puso tan kamarerwa to a say Katawan a Dios yo et inter tod sikayoy amin iran maabig a bengatla ya insipan to. Asumpal ya amin iray insipan to; anggapoy ag agawa.

¹⁵ Balet no panoy impanumpal tod amin ya insipan tod sikayo, ontan met so gawaen tod amin ya impasakbay tod sikayo.

¹⁶ No ag yo sumpaley impisipanan na Katawan a Dios yo onung na ganggan ton sumpalen yo, tan manlingkur tan mangigalang kayod arum a diriyos, dusaen to kayod pasnuk to, et ag mabayag anggapoy nakeraan ed sikayo diad sayan maung a dalin ya inter tod sikayo.

24

¹ "Tinipon nen Josue ed Sikem iray amin a totood tribu na Israel. Tinawag to ray mamatakken, saray pangulo, saray huis, tan saray opisial na Israel, tan pinmarontal irad arap na Dios.

² "Inkuanen Josue ed amin da ray totoo, Sikatoya so ibabaga na Katawan a Dios na Israel; Nen saman a panaon nanayam ed biek na Ilog na Eufrates iray lalaki yo tan angigalang irad arum a diriyos. Sakey ed saraman a lalaki yo et si Tera ya ama di Abraham tan Nacor.

³ "Insan ko inala si Abraham a laki yo diad nibaliw na Eufrates tan inwanwan kon nankurang ed intiron dalin na Canaan. Initdan ko na amayamay a kabyangay boleg. Inter kod sikayo si Isaac,

⁴ "tan inter kod kinen Isaac ira di Jacob tan Esau. Inter kod kinen Esau so kapokdulan a dalin na Edom, balet linmad Egipto si laki yon Jacob tan saray anak to.

⁵ "Insan imbakik ira di Moises tan Aaron, tan angiter ak na baleg a kairapan ed Egipto. Balet impaway ta kayo;

⁶ "impaway kod Egipto iray lalaki yo, tan inosilan ira na saray Egipsion akakabayo tan akakarwahi. Balet nen akasabid Dayat ya Ambalanga iray lalaki yo

⁷ "tinmawag irad siak tan kinmerew iray tulong, et angyan ak na bilonget ed nanleetan da tan saray Egipsion inmosil. Impatabonan kod dayat iray Egipsio et nalner ira. Amta yo no antoy ginawak ed Egipto. Abayag kayon nanayam ed kalawakan.

⁸ "Insan ta kayo inyakar ed dalin na saray Amorreo a manaayam irad bokig na Jordan. Nilabanan da kayo balet impanalo ta kayod sikara. Inala yoy dalin da, tan pinapatey ko ra legan na pankukurang yo.

⁹ "Insan akilaban ed sikayo so ari na Moab a si Balak a lakin anak nen Zipor. Impaibaga tod kinen Balaam a lakin anak nen Beor ya isamba to kayo.

¹⁰ Balet ag ko dinengel si Balaam, kanyan binindisionan to kayo, tan diad onya inyagel ta kayod kinen Balak.

¹¹ Binaliw yoy Jordan tan linma kayod Jerico. Nilabanan kayo na saray lalakid Jerico a singa ginawa na saray Amorreo, Perezeo, Cananeo, Heteo, Gergaseo, Heveo, tan saray Jebuseo. Balet impanalo ta kayod sikaran amin.

¹² Nen ondodogpa kayo ginewgew ko ra pian napabatik ko ray duaran arari na saray Amorreo. Anggapoy pibabalid saya na saray ispada tan saray pana yo.

¹³ Initdan ta kayoy dalin ya ag yon balut nansagputan tan saray siudad ya ag yo impaalagey. Manaayam kayo lad man tan mangakan kayo la na bunga na saray ubas tan saray oliba ya ag yo ra intanem.

¹⁴ Natan sirin, intuloy nen Josue ya inkuan, pagalangan yo so Katawan tan masimoon tan matoor yon panlingkuran. Ibantak yo ray diriyos ya inggagalang nen saman na saray lalaki yo diad Mesopotamia tan diad Egipto. Say Katawan labat so panlingkuran yo.

¹⁵ No ag yo labay a panlingkuran so Katawan, mampili kayo natan no siopay panlingkuran yo, saray diriyos ya inggagalang na saray lalaki yo ed Mesopotamia odino saray diriyos da ray Amorreo a panaayaman yo natan so dalin da. Para say siak tan say pamilyak, panlingkuran mi so Katawan.

¹⁶ Inmebat iray totoo, Ag min balut taynan so Katawan pian makapanlingkur kamid arum a diriyos!

¹⁷ Say Katawan a Dios tayo et inekal tod inkaaripen ed Egipto iray lalaki tayo tan pati sikatayo, tan anengneng tayo ray milagron ginagawa to. Inyarawi to itayod kaatapan ed anggan iner a nila tayo diad amin a bansan dinadalan tayo.

¹⁸ Legan tayon lolooban yan dalin, pinataynan to ray Amorreo a manaayam dia. Kanyan manlingkur kami met et Katawan; sikato so Dios tayo.

¹⁹ Inkuanen Josue ed saray totoo, Balet ompan ag yo nayarian a panlingkuran so Katawan? Sikato so masanto a Dios tan ag to pirdonaen iray kasalanan yo. Maimon a Dios

²⁰ et no taynan yo pian makapanglingkur kayod arum iran diriyos, sumpaen to kayo tan dusaen to kayo. Pateyen to kayo, anggaman a maung so ginagawa tod sikayo nen saman.

²¹ Saramay totoo kuandad kinen Josue, Andi! Say Katawan so panlingkuran mi.

²² Inkuanen Josue ed sikara, Sikayon dili so tasi ya imbaga yon say Katawan so panlingkuran yo. On, kuanda, sikamin dili iray tasi.

²³ Insan inkuanen Josue ed sikara, Ibantak yo sirin iray diriyos na arum a bansa a walad sikayo, tan isipan yon matoor kayo ed Katawan a Dios na Israel.

²⁴ Inkuan sirin na saray totoo ed kinen Josue, Manlingkur kamid Katawan a Dios tayo. Onuren mi ray ganggan to.

²⁵ Kanyan diad saman ya agew si Josue nanggaway sipanan a para saray totoo, tan diad Sikem inter tod sikara iray ganggan tan saray totontonen a tombuken da.

²⁶ Insulat nen Josue ira yan ganggan ed libro na Ganggan na Dios. Insan angala na balbaleg a bato tan inlira to ra ed silong na kiew a robli diad santuario na Katawan.

²⁷ Inkuantod saray amin a totoo, Sayan bato et tasi tayo. Nadngel to ray amin a sinalita na Katawan ed sikatayo. Kanyan sayan bato et tasi a sumpad sikayo, pian ag kayo onsumlang ed Dios.

²⁸ Insan imbaki la nen Josue iray totoo, et pinmawil lad dilin betang ton dalin so balang sakey a too.

²⁹ Kayari to ya, inatey si Josue a lakin anak nen Nun nen mantaon na sanlasus tan samplora.

³⁰ Impompon da ed dilin dalin to ed Timnat-sera diad kapokdulan a dalin na Efraim a baybay na Palandey na Gaas.

³¹ Legan a mabilay si Josue, nanlilingkur ed Katawan iray totood Israel, tan intuloy da yan ginawa kayariy impatey to legan a mabilay iray pangulon akanengneng na amin da ray ginagawa na Katawan ed Israel.

³² Saray pokel nen Jose ya inalad Egipto na saray totood Israel et nipompon ed Sikem, sakey a parti na dalin a sinaliw nen Jacob ed saray lalakin anak nen Hamor ya ama nen Sikem; sinaliw to na sanlasus a kuartan pilak. Sayan dalin et tinawir na saray kabyangay boleg nen Jose.

³³ Si Eleazar a lakin anak nen Aaron et inatey tan nipompon ed Gabaa, say baley a walad kapokdulan a dalin na Efraim a niiter ed anak ton laki a si Finees.