1

¹ "Wadyad sayan libro iray sinalita nen Moises ed saray totood Israel nen wala rad kalawakan a nibokig na Ilog na Jordan. Diad saman a panaon wala rad Patar na Jordan ya asingger ed Suf, diad nanleetan na baley na Paran ed sakey a dapag tan saray baley na Tofel, Laban, Hazerot, tan Dizahab diad sananey a dapag. (

² "Labinsakey ya agew ya akaren so manlapud Palandey na Sinai ya anggad Cades-barnea, no say kapokdulan na Edom so dalanen.)

³ "Diad ononan agew na kumalabinsakey a bulan na kumaapataplon taon kayari ran tinaynan so Egipto, imbaga nen Moises ed saray totoo iray amin a bengatlan ingganggan na Katawan ya ibaga tod sikara.

⁴ "Agawa ya sanen tinalo na Katawan si Sehon ya ari da ray Amorreo a nanoley ed baley na Hesbon, tan si Og ya ari na Basan a nanoley ed saray baley na Astarot tan Edrei.

⁵ "Nen saray totood Israel et wala rad bokig na Jordan a sakop na dalin na Moab, inggapo nen Moises ya impaliwawa iray ganggan tan saray bangat na Dios. Inkuanto,

⁶ "Nen wala itayo nid Palandey na Sinai, say Katawan a Dios tayo inkuantod sikatayo, Abayag lay panaayam yo diad sayan palandey.

⁷ "Alis kayo la tan laka yod kapokdulan a dalin da ray Amorreo tan diad saray kaliber-liber a pasendiad Patar na Jordan, diad kapokdulan tan saray abeban pasen, diad niabalaten a pasen, tan diad gilig na Mediteraneo. Laka yod dalin na Canaan tan tuloy kayod labas na Kapalandeyan na Libano ya anggad baleg ya Ilog na Eufrates.

⁸ "Amin da ra yan pasen et sikaray dalin ya insipan ko, siak a Katawan, ya iter ed saray lalaki yon di Abraham, Isaac, tan Jacob, tan diad saray kabyangay boleg da. Laka yo sirin tan panayaman yo.

⁹ "Inkuanen Moises ed saray totoo, Nen wala itayo nid man ed Palandey na Sinai, inkuankod sikayo, Ag ko la nayarian a gawaen a bokur so pangipangulod sikayo.

¹⁰ Say Katawan a Dios yo et impagmaliw to kayo la natan a singa karakel na bitewen ed tawen.

¹¹ Oy la komun ta say Katawan a Dios na saray lalaki yo et maminlibo to kayo nin parakelen tan paaliguasen to kayo, onung na insipan to!

¹² Balet panon kon sakbaten a bukor so belat na panariglod saray kolkolan yo?

¹³ Mamili kayod saray tribu yo na saray lalakin makabat, mapangasi, tan walaan na saray salsalid panagbilay, ta ipasen ko ran makaoley ed sikayo.

¹⁴ Inmabubon kayo a sikato yay maung a gawaen.

¹⁵ Kanyan inalak iray pinili yon pangulod saray tribu yo a lalakin makabat tan walaan na saray salsalid bilay, insan ko ra impasen a makaoley ed sikayo. Pigarad sikara so makaoley ed tunggal libon totoo, tunggal lasus, tunggal limamplo, tan tunggal pulo. Anoro ak met na saray arum ya opisyal ed amin da ray tribu.

¹⁶ Diad saman a panaon binilin ko ra, Salaysay yo ray totoon mankokolkol. Apiger yon sintinsiaan so anggan dinan a kolkolan na saray dilin totoo yo odino kolkolan na saray sangkailin manaayam ed kawalaan yo.

¹⁷ Anggapoy nepeg a kilingan yo ed panagsintinsia yo; nepeg a nampara so letnegan na panintinsia yo ed siopaman, abeba man o atagey so kipapasen to. Ag yo tatakotan so anggan siopa, ta manlapud Dios iray iter yon sintinsia. No walay mairap yon sintinsiaan a kaso iyapireng yod siak, ta siak so akaoley a manintinsia.

¹⁸ Ontan met, diad saman a panaon binilin ta kayo no anto ray nepeg a gawaen yo.

¹⁹ Ginawa tayo so ingganggan ed sikatayo na Katawan a Dios tayo. Tinaynan tayo so Palandey na Sinai tan bineltang tayoy maawang tan makapataktakot a kalawakan diad inyakar tayod kapokdulan a dalin da ray Amorreo. Nen asabi tayoy Cades-barnea,

²⁰ imbagak ed sikayo, Wadya kayo la natan ed kapokdulan a dalin da ray Amorreo ya iiter ed sikatayo na Katawan a Dios tayo, say Dios na saray lalaki tayo. Nengneng yo, satan la man so dalin. Laka yo ta panayaman yo onung na ingganggan to. Ag kayo manduaruwa odino ontatakot.

²¹

²² Balet dinmago kayod siak tan kuanyo, Mangibaki tayo na totoon mangispia ed saman a dalin, pian nibaga rad sikatayo no dinay sankamaungan a dalanen tayo tan no antoy kipapasen da ray siudad diman.

²³ Marakep imay kuanyon gawaen, kanyan amili ak na labinduan lalaki, sakey ed balang tribu.

²⁴ Linma rad kapokdulan a dalin ya anggad Patar na Escol tan ninengneng da so dalin.

²⁵ Nen pinmawil ira angisempet ira na saray bungay kiew diman, tan imbaga ran mataba-taban dalin so iter ed sikatayo na Katawan a Dios tayo.

²⁶ Balet sinumlang yo so ganggan na Katawan a Dios yo, tan ag yo nilabay so onloob ed dalin.

²⁷ Nangoro-ngoro kayo tan inkuanyod sakey tan sakey, Kabosul itayo na Katawan. Impaway to itayod Egipto ta ipalima to itayod saray Amorreo, et diad ontan napatey da itayo.

²⁸ Akin et onla tayod man, anta antakot itayo. Saramay imbaki tayo et kuandan mabiskeg tan atagey ni ray totood man nen say sikatayo, tan manaayam irad saray siudad ya anggad tawen iray padir da. Akanengneng irad man na saray alan!

²⁹ Balet inkuankod sikayo, Ag kayo natatakot ed saraman a totoo.

³⁰ Iwanwan kayo na Katawan a Dios yo, tan milaban para sikayo, a singa anengneng yon ginawa to ed Egipto

³¹ tan diad kalawakan. Anengneng yo no panoy abig na impangyakar tod sikayo diad sayan pasen, singa sakey ya aman angawit na melag a lakin anak to.

³² Balet anggaman ya onmay imbagak, ag yo nin siansia nanmatalkan so Katawan,

³³ anta lawas inonaan to kayo a mananap na pasen a pankampoan yo. Pian nanengneng yoy dalanen yo, nanayam ed onaan yo a sakey a lusek ya apoy no labi tan sakey a lusek a lorem no agew.

³⁴ Nadngel na Katawan iray riklamo yo et akapasnuk, kanyan sinambaan ton inkuan,

³⁵ Anggapoy anggan sakey ed sikayo a kabyangan na sayan kailalakan so makaloob ed mataban dalin ya insipan kon iter ed saray lalaki yo.

³⁶ Si Caleb a lakin anak nen Jefone so makaloob labat ed dalin. Nansiansian matoor ed siak, kanyan iter kod sikato tan saray kabyangay boleg to so dalin ya inispiaan to.

³⁷ Lapud sikayo say Katawan akapasnuk met ed siak tan kuanto, Anggan sika, Moises, ag ka makaloob ed dalin.

³⁸ Balet pabiskeg moy linawa na katulongan mon si Josue a lakin anak nen Nun. Ipangulo to ray Israelita ed panakop dad dalin.

³⁹ Insan inkuan na Katawan ed sikatayon amin, Saray ogogaw nin anak yo ya ag da amtay maung tan maoges so makaloob ed dalinsaray anak yon ibabaga yon singkaten ira na saray kalaban yo. Iter kod sikara so dalin, tan panayaman da.

⁴⁰ Balet sikayo ran totoo, poliktar kayo ta pawil kayod kalawakan diad dalan a mamaarap ed Dayat na Akaba.

⁴¹ Inmebat kayo, Moises, nankasalanan kamid Katawan. Balet natan ondogpa kami, onung na ingganggan ed sikami na Katawan a Dios tayo. Insan namparaan a mibakal so balang sakey ed sikayo, tan inilaloan yon mainomay a looban so kapokdulan a dalin.

⁴² Balet inkuan na Katawan ed siak, Pasakbayan mo ran ag ira ondodogpa, ta ag ko ra ibaan, kanyan taloen ira na saray kalaban da.

⁴³ Imbagak ed sikayo so impaibaga na Katawan, balet ag yo dinengel. Sinmumlang kayod sikato, tan mamaung kayon amaarap ed kapokdulan a dalin.

⁴⁴ Insan pinmaway a singa karakel na bayaung iray Amorreon manaayam ed saman a kapokdulan tan nilabanan da kayo. Inosilan da kayo ya anggad Horma tan tinalo da kayod kapokdulan a dalin na Edom.

⁴⁵ Kanyan kinmerew kayod Katawan na tulong to, balet ag to kayo dinengel, ni inimano.

⁴⁶ Kanyan sirin, kayari na abayag tin impanayam ed Cades,

2

¹ "pinmoliktar itayo tan amaarap itayod kalawakan ya anggad dalan a mamaarap ed Dayat na Akaba, onung na ingganggan na Katawan. Abaybayag tayon nanakar-akar ed kapokdulan na Edom.

² "Insan imbagad siak na Katawan

³ "ya abayag lan tuloy so panaakar-akar tayod kapokdulan, kanyan nepeg a mamaarap itayod baybay.

⁴ "Imbaga tod siak ya ibagak ed sikayo ray onggendan a bilin: Ngalngali yo la nabatak so kapokdulan a dalin na Edom, say dalin na saray kakanayon yo a saray kabyangay boleg nen Esau. Ontakot irad sikayo,

⁵ "balet ag yo igagapoy mibakal ed sikara, lapud ag ta kayo itdan na anggan sansankarangan a dalin da. Inter ko lay dalin na Edom ed saray kabyangay boleg nen Esau.

⁶ "Nayarian yoy mansaliw na kakanen tan danum ed sikara.

⁷ "Nunot yo no panoy impamindision na Katawan a Dios yo ed amin a ginagawa yo. Inasikayo to kayo legan yon nanaakar-akar ed sayan maawang a kalawakan. Apataploy taon ya inolup to kayo, tan ag kayon balut kinmulang ed antokaman a nakaukolan yo.

⁸ "Kanyan intuloy tayoy kurang tayo tan tinaynan tayoy dalan a manlapud saray baley na Elat tan Ezion-geber tan mamaarap ed Dayat ya Inatey, insan linmiko tayod baybay a bokig a mamaarap ed Moab.

⁹ "Say Katawan kuantod siak, Ag yo gugunigonen iray totood Moab, saray kabyangay boleg nen Lot; ag yo igagapoy mibakal ed sikara. Inter ko lad sikara so siudad na Ar, tan ag ta kayo itdan na anggan anton parti na dalin da. (

¹⁰ Nen saman nanayam ed Ar iray makapanyarin poli na alan a tatawagen ira na Emim. Ankakabaleg iran singa saray Anakim a sananey a poli na alan.

¹¹ Atawag met ira na Refaim a singa saray Anakim; balet saray Moabita tinawag da ra na Emim.

¹² Nanayam met nen saman ed Edom iray Horeo, balet pinapaway ira na saray kabyangay boleg nen Esau, dinederal day bansa ra, tan nanayam irad man a singa impamapaway na saray Israelita ed saray kalaban da diad dalin ya inter ed sikara na Katawan.)

¹³ Insan binaliw tayoy Ilog na Zered onung na imbagad sikatayo na Katawan.

¹⁴ Talomplo tan walo tan taon ed saman so linmabas kayariy intaynan tayo manlapud Cades-barnea. Inaatey lan amin iray lalakin bumabakal ed saman a kailalakan, onung na imbaga na Katawan a pansumpalan da.

¹⁵ Intuloy na Katawan a dinusa ra ya anggad naoput iran amin.

¹⁶ Kayariy impatey dan amin,

¹⁷ inkuan na Katawan ed sikatayo,

¹⁸ Diad sayan agew ondalan kayod dalin na Moab diad Ar.

¹⁹ Asingger kayo lad satan ed dalin da ray Ammonita, saray kabyangay boleg nen Lot. Ag yo ra gugunigonen; ag yo igagapoy mibakal ed sikara, lapud ag ta kayon balut itdan na parti na dalin ya inter ko lad sikara. (

²⁰ Sayan dalin et tatawagen met a dalin da ray Refaim, say ngaran da ray totoon nanayam diman nen saman; Zamzummim so impanawag ed sikara na saray Ammonita.

²¹ Singa kaatagey na saray Anakim so kaatagey da. Amayamay ira tan makapanyari ran poli. Balet dineral ira na Katawan, kanyan inala na saray Ammonita so dalin da tan nanayam irad man.

²² Onya met so ginawa na Katawan ed saray Edomita a kabyangan ira na boleg nen Esau a manaayam ira ed kapokdulan a dalin na Edom. Dineral to ray Horeo kanyan inala na saray Edomita so dalin da tan nanayam irad man, tan manaayam ni rad man ya anggad natan.

²³ Say dalin a gilig na dayat na Mediteraneo et nanayaman na saray totoon taga isla na Creta. Dineral da ray Avvim a totoon gendat a manaayam ed sayan pasen tan inala day amin a dalin da ya anggad baybay diad siudad na Gaza.)

²⁴ Kalabas tayod dalin na Moab, say Katawan inkuantod sikatayo, Natan, ituloy yoy kurang yo tan baliw yoy Ilog na Arnon. Ipasilong kod pakayari yo si Sehon ya ari da ray Amorreo a manooley ed Hesbon, tan say dalin to. Dogpaan yo, tan igapo yon panayaman so dalin to.

²⁵ Manlapud sayan agew pagmaliwen kon ontakot ed sikayo iray totood inerman a pasen. Diad pakabitla labat ed ngaran yo onggiwgiw lad takot so balang sakey a too.

²⁶ Insan manlapud kalawakan na Kedemot angibaki ak na totoo ed kinen Ari Sehon na Hesbon ya impaibagak ed sikato ira yan salita a mangiter na kareenan:

²⁷ Padalan mo kami pad dalin mo. Tuloy-tuloy kamin ondalan tan ag kamin balut oniwas.

²⁸ Bayaran mi so antokaman a naakan tan nainom mi. Anggapoy arum a gawaen mi no ag say ondalan labat ed dalin mo,

²⁹ ombaliw ed Ilog na Jordan ya anggad pakasabi mid dalin ya iter ed sikami na Katawan a Dios mi. Saray kabyangay boleg nen Esau a manaayam ed Edom, tan saray Moabita a manaayam ed Ar et inabuloyan da kamin dinmalan ed dalin da.

³⁰ Balet ag itayo inabuloyan nen Ari Sehon ya ondalan ed dalin to. Impagmaliw na Katawan a Dios yo ya anawet so puso to tan mananumlang, pian taloen tayo tan naala tayoy dalin to, say dalin a panaayaman tayo ni ya anggad natan.

³¹ Insan say Katawan kuantod siak, Nengneng mo, impalimak lad sikayo si Ari Sehon tan say dalin to; ala yoy dalin to tan panayaman yo.

³² Sinmabiy Sehon tan amin da ray totoo to tan nilabanan da itayo diad asingger ed baley na Jahaz,

³³ balet say Katawan a Dios tayo impatalo to rad sikatayo; pinatey tayoy Sehon, saray anak ton lalaki, tan amin da ray totoo to.

³⁴ Dinadakep tan dinederal tayo ray amin a baley da, tan pinapatey tayo ray amin a lalaki, bibii, tan saray ogogaw. Anggapoy intilak tayon mabilay ed sikara.

³⁵ Inaala tayo ray ayayep da tan saray kayamanan da ray baley da.

³⁶ Say Katawan a Dios tayo et inabuloyan to itayon anakep ed amin da ray baley a manlapud Aroer, a walad samput na patar na Arnon, tan manlapud siudad ed pegley na saman a patar ya anggad Galaad. Anggapoy siudad ya ag tayo ayarian so padir to.

³⁷ Balet ag tayo sinmingger ed dalin da ray Ammonita odino linmad saray gilig na Ilog na Jaboc odino diad saray baley ed kapokdulan a dalin odino diad saray arum a pasen a say Katawan a Dios tayo et insebel ton laen tayo.

3

¹ "Insan tayo nampabaybay tan intuloy tayoy kurang tayo ya anggad dalin na Basan, et pinmaway si Ari Og a pati saray amin a totoo to a mibakal ed sikatayo diad asingger ed baley na Edrei.

² "Balet say Katawan kuantod siak, Ag kayo natatakot ed sikato. Ipalimak ed sikayo si Ari Og tan saray totoo to, tan amin a dalin to. Gawa yod sikato so singa ginawa yod si Sehon ya ari da ray Amorreo a nanoley ed Hesbon.

³ "Kanyan say Katawan impatalo to met ed sikatayo si Ari Og tan saray totoo to, insan tayo ra pinapatey ya amin.

⁴ "Dinakep tayo met iray amin a baley toanggapoy baley to ya ag tayo inala. Anemaplon amin so baley ya adakep tayosay intiron dalin na Argob, a dimay nanoleyan nen Ari Og na Basan.

⁵ "Amin da ra yan baley et apaliberan iray atatagey a padir, walaan ira na saray puirta, tan abalewetan ira na balatyang; wala met iray amayamay a barion anggapoy padir.

⁶ "Dinederal tayo ray amin a baley tan pinapatey tayo ray amin a lalaki, bibii, tan amin ya ogogaw, a singa ginawa tayod saray baley a kayaryan nen Ari Sehon na Hesbon.

⁷ "Inaala tayo ray ayayep da tan saray kayamanan da ray baley da.

⁸ "Diad saman a panaon inala tayod saraman a duaran Amorreon ari so dalin a nibokig na Ilog na Jordan, manlapud Ilog na Arnon ya anggad Palandey na Hermon. (

⁹ "Saray Sidonio et tatawagen da na Sirion so Palandey na Hermon, balet saray Amorreo Senir so panatawag da.)

¹⁰ Inala tayo ray amin a dalin a sakop nen Ari Og na Basan: saray siudad ed niatagey a patar, saray dalin ed Galaad tan Basan, ya anggad saray baley na Saleca tan Edrei diad bokig. (

¹¹ Si Ari Og so kaonuran ed saray totoon Refaim. Say longun ton bato et ngalngali duaran mitro so benlag to tan limaran mitro so onduy to, onung ed panagsukat na karaklan. Nanengneng ni man a longun ed Raba a siudad da ray Ammonita.)

¹² Nen nala tayo lay dalin, impabetang kod saray tribu di Ruben tan Gad so pasen a baybay na baley na Aroer diad asingger ed Ilog na Arnon tan say parti na kapokdulan a dalin na Galaad a pati saray baley to.

¹³ Diad kapaldua na tribu nen Manases impabetang kod sikara so nakdaan a dalin na Galaad tan say amin a dalin na Basan a nanoleyan nen saman nen Og a salanti say intiron dalin na Argob. (Atawag a dalin na saray Refaim so Basan.

¹⁴ Si Jair a kabyangan na tribu nen Manases et inala ton kayaryan so intiron dalin na Argob, a salanti say Basan, ya anggad ketegan na Gesur tan Maaca. Inngaran tod sikaton dili iray bario, tan anggad natan atawag ni ra a bario nen Jair.)

¹⁵ Impabetang kod boleg nen Makir a kabyangay tribu nen Manases so dalin na Galaad.

¹⁶ Diad saray tribu di Ruben tan Gad impabetang ko so dalin a manlapud Galaad ya anggad ilog na Arnon. Say pegley na ilog so ketegan dad abalaten, tan say ketegan dad baybay et say Ilog na Jaboc a say parti to et say ketegan da ray Ammonita.

¹⁷ Diad sagur nasabi na ketegan da so Ilog na Jordan, manlapud Dayat na Galilea diad baybay ya anggad Dayat ya Inatey diad abalaten tan diad Palandey na Pisga diad bokig.

¹⁸ Diad saman met a panaon inter kod sikara iray onggendan a bilin: Say Katawan a Dios tayo et inter tod sikayo yan dalin ed bokig na Jordan ta panayaman yo. Natan sirin itdan yoy armas iray nayarin mibakal a totoo yo tan pabaliw yo rad Jordan; manayam irad onaan na saray arum a tribu na Israel, ta ibaan da ran manakup ed dalin da.

¹⁹ Saray kaasawaan yo, saray anak yo, tan saray baka yoamtak ya amayamay iray ayayep yoet sikara labat so natilak ed baley ya impabetang kod sikayo.

²⁰ Tulongan yo ray kapara yon Israelita ya anggad nasakop da lay dalin ya iter ed sikara na Katawan diad sagur na Jordan tan anggad napanayam la rad man na Katawan ya anggapo lay manigensigen ed sikara, a singa ginawa to la diad sikayo. Kayari to ya, nayarian yo lay ompawil ed sayan dalin ya impabetang kod sikayo.

²¹ Insan inkuankod kinen Josue: Anengneng mo ray amin a ginawa na Katawan a Dios mo ed saramay duaran ari a di Sehon tan Og; onman so gawaen to ed balang sakey a too ed dalin a looban yo.

²² Ag yo ra tatakotan, ta milaban para sikayo so Katawan a Dios yo.

²³ Diad saman a panaon masimsimoon ak a nampikasi,

²⁴ Amtak, O Katawan a Dios, ya impanengneng mod siak labat so gapo na saray baleg tan makapakelaw a bengatlan gawaen mo. Diad tawen odino diad dalin, anggapoy diyos-diyos a makagawa na saray makapakelaw a bengatlan ginagawam!

²⁵ Abuloyan mo pan makabaliw ak ed Ilog na Jordan, Katawan, pian nanengneng koy mataban dalin ed biek na ilog, say marakep a kapokdulan a dalin tan saray Kapalandeyan na Libano.

²⁶ Balet lapud sikayo akapasnuk ed siak so Katawan tan ag to ak la dengelen. Inkuanto la laingen, Duga la tan! Ag mo la ya bibitlaen a balut!

²⁷ Lakad toktok na Palandey na Pisga ta bantag kad baybay, diad abalaten, diad bokig, tan diad sagur. Apiapiger mon imanoen so nabantag mo, ta ag kan balut makabaliw ed Ilog na Jordan.

²⁸ Bilin mo si Josue. Pabiskeg moy linawa to, lapud sikatoy mangipangulo ed saray totoo diad ibaliw dan manakup ed dalin a nanengneng mo.

²⁹ Kanyan nanayam tayod patar a kasumbaliwan na baley na Bet-peor.

4

¹ "Insan inkuanen Moises ed saray totoo, Onur yo ray amin a ganggan ya ibabangat kod sikayo, et mansiansia kayon mambilay tan sakopen yo so dalin ya iter ed sikayo na Katawan a Dios na saray lalaki yo.

² "Ag yo aaruman so igaganggan kod sikayo, tan ag yo babawasan. Onur yo ray ganggan na Katawan a Dios yo, saray ganggan ya inter kod sikayo.

³ "Anengneng yon dili so ginawa na Katawan diad Palandey na Peor. Pinatey toy balang sakey a toon angigalang diman ed Baal,

⁴ "balet sikayon matoor ed Katawan a Dios yo et mabilay ki ni ya anggad natan.

⁵ "Imbangat kod sikayo ray amin a ganggan onung na imbagad siak na Katawan a Dios ko. Onur yo ra ed dalin a ngalngali yo la looban tan panayaman.

⁶ "Pampelengan yo ran onuren, ta sikatoy pakabirbiran na saray totood saray arum a bansa a makabat kayo. No narengelan da ra yan amin a ganggan ikuanda, Agay lay kakabatan tan pakatalus na saray totood sayan makapanyarin bansa!

⁷ "Anggapoy arum a bansa, anggan anto lay pakapanyari to, ya asingsingger ed sikato so dios to no nakaukolan to, a singa kinaasingger ed sikato na Katawan a Dios tayo. Eebatan to itayo kapag onkerew tayoy tulong to.

⁸ "Anggapoy arum a bansa, anggan anto lay pakapanyari to, a walaan na saray ganggan a matonung a singa saray ganggan ya imbangat ko natan ed sikayo.

⁹ "Manalwar kayo! Ag yon balut lilingwanan, legay bilay yo, imay anengneng na dilin mata yo. Ibaga yod saray anak yo tan saray apo yo

¹⁰ so nipaakar ed samay agew na impanalagey yo ed arap na Katawan a Dios yo diad Palandey na Sinai nen inkuantod siak, Tipon mo ray totoo. Labay kon narengel day labay kon ibaga, pian naaralan day ontoluk ed siak legay pambilay da tan nibangat dan ontoluk met ed siak iray anak da.

¹¹ Ibaga yod saray anak yo no panoy inyakar tan impanalagey yo ed alusadsar na palandey ya akobutan na makapal a lorem a makapal ya asewek tan apoy a manliub ya anggad tawen.

¹² Ibaga yod sikara no panoy impisalitay Katawan ed sikayo manlapud apoy, no panoy impakadngel yon nansalita balet ag yon balut anengneng.

¹³ Imbaga tod sikayo so nepeg yon gawaen pian nasumpal yo so impisipanan tod sikayonepeg yon onuren so Samploran Ganggan ya insulat tod duaran tapyak a bato.

¹⁴ Imbagad siak na Katawan ya ibangat kod sikayo ray amin a ganggan a nepeg yon onuren ed dalin a ngalngali yo la looban tan panayaman.

¹⁵ Anggapon balut so anengneng yo nen say Katawan et akisalitad sikayo manlapud apoy diad Palandey na Sinai. Kanyan manalwar kayo,

¹⁶ ompan mankasalanan kayo diad panggawa yoy talintaon kaparpara na antokaman, laki man o bii,

¹⁷ ayep odino manok ed tagey,

¹⁸ ayep man a korung-korung odino sira.

¹⁹ Ag kayo patutukso a mangigalang tan manlingkur ed antokaman a nanengneng yod tawen say agew, bulan, tan saray bitewen. Say Katawan a Dios yo et inter ton igalang ira ya na amin da ray arum a totoo.

²⁰ Balet sikayo ray totoon inyagel tod Egipto ya aliling toy manliub a palbaan. Impaway to kayod man pian pagmaliwen to kayon dilin totoo to a sikatoy kipapasen yo natan.

²¹ Lapud sikayo akapasnuk ed siak so Katawan a Dios yo tan imbagabaga ton ag ak makabaliw ed Ilog na Jordan ya onloob ed mataban dalin ya iter tod sikayo.

²² Siak ompatey ak ed sayan dalin tan ag kon balut nabaliw so ilog, balet sikayo ngalngali yo la nabaliw tan napanayaman iman a mataban dalin.

²³ Manalwar kayo ta ompan nalingoanan yo so impisipanan ed sikayo na Katawan a Dios yo. Onur yoy ganggan to ya ag kayo manggagawa na antokaman a talintaoy dios,

²⁴ lapud maimon tan singa manliub ya apoy so Katawan a Dios yo.

²⁵ Anggan abaybayag kayo lan manaayam ed saman a dalin tan awalaan kayo la na saray anak tan apo, ag kayo mankakasalanan diad panggawa yoy antokaman a talintaoy dios. Maoges ya ed arap na Katawan, tan sikatoy makasengeg na pampasnuk to.

²⁶ Nitan so tawen tan say dalin a sikara natan so mantasi sumpad sikayo a no ag yo ak onuren, ag mabayag naandipat kayod dalin. Ag kayo mambayag a manayam ed dalin ed nibaliw na Jordan a ngalngali yo la napanayaman. Sigput kayon napatey.

²⁷ Say Katawan itaytayak to kayo ed saray arum a bansa tan pigpigarad sikayo so makapaliis ed patey.

²⁸ Manlingkur kayod man ed saray diriyos a ginagawa na lima, saray diriyos a kiew tan bato, saray diriyos ya ag makanengneng o makadngel tan ag da nayariay mangan o onangub.

²⁹ Diman yo anapen so Katawan a Dios yo et no ipuspuso yon anapen, narumog yo.

³⁰ No nagugunigon kayo la tan nagagawa lad sikayo ra yan amin, ompawil kayo lamlamang ed Katawan tan onuren yo.

³¹ Sikatoy mapangasin Dios. Ag to kayo ikaindan o pateyen, tan ag to lingwanan so impisipanan tod saray lalaki yo.

³² “Osisa yo so apalabas, say panaon kasakbayan na inkianak yo, manlapud impamalsay Dios ed too diad tapew na dalin. Sukimat yo so intiron mundo. Wala la kasi so agawa nen saman a matalonggaring a singa saya? Wala ka kasi so akadngel na singa onyan agawa?

³³ Wala la kasi ray totoon siansian nambilay a singa sikayo kayariy impakadngel dad dios ya akisalitad sikara manlapud apoy?

³⁴ Wala la kasi so dios a sinali toy linman angalad arum a bansa na saray totoo tan impagmaliw to ran dilin totoo to, a singa ginawad sikayod man ed Egipto na Katawan a Dios yo? Anengneng na dilin mata yo so impangipapakana tod baleg a pakayari to tan say biskeg to; impapadalan to ray salot tan bakal, nanggagawa na saray milagro, saray pakelaw, tan saray makapataktakot a bengatla.

³⁵ Say Katawan impapanengneng to ra man ed sikayo, pian napaneknekan tod sikayo a bukbukor to so Dios tan anggapo lay arum.

³⁶ Inabuloy ton narengel yo so bosis ton nanlapud tawen pian nabilin to kayo; tan diad tapew na dalin inabuloy ton nanengneng yo so masanton apoy to, tan akisalitad sikayo manlapud saman ya apoy.

³⁷ Lapud inaro to ray lalaki yo, pinili to kayo, tan lapud baleg a pakayari to sikaton diliy angipaway ed sikayo manlapud Egipto.

³⁸ Legan na impankukurang yo, pinapataynan to ray bansan baleg tan makapanyari nen say sikayo pian makaloob kayo tan niiter tod sikayo so dalin da, say dalin a kayaryan yo ni ya anggad natan.

³⁹ Kanyan natan tandaan yo tan ag yon balut lilingwanan a say Katawan et Dios ed tawen tan diad dalin. Anggapoy arum a dios.

⁴⁰ Onur yo ray amin a ganggan to ya inter kod sikayo natan, et maung ya amin so pansumpalan yo tan saray kabyangay boleg yo. Mansiansia kayon manayam ed dalin ya iter ed sikayo na Katawan a Dios yo tan kayaryan yo ed anggad angga.

⁴¹ Insan angibiig si Moises na taloran siudad diad bokig na Ilog na Jordan

⁴² a nayarin batikan na sakey a toon akapatey ya ag to ginagala, na kapara ton toon ag to kalaban. Nayarian toy ombatik ed sakey ed sarayan siudad et ag la nayarin pateyen.

⁴³ Diad tribu nen Ruben say nibiig a siudad say Bezer a niatagey a patar a kalawakan; diad tribu nen Gad say Ramot a sakop na dalin na Galaad; tan diad tribu nen Manases say Golan a sakop na dalin na Basan.

⁴⁴ Inter nen Moises ed saray totood Israel iray ganggan tan saray bangat na Dios.

⁴⁵ Inter to ra yan ganggan ed sikara nen akapaway irad Egipto tan wala la rad patar a bokig na Ilog na Jordan tan kasumbaliwan na baley na Bet-peor. Sayan pasen kabyangan na dalin nen Sehon ya ari da ray Amorreo a sikatoy nanoley ed baley na Hesbon. Si Moises tan saray Israelita et tinalo ray Sehon nen pinmaway irad Egipto.

⁴⁶

⁴⁷ Nilooban dan nanayaman so dalin to tan say dalin nen Og, say ari na Basan, tan sananey ya ari da ray Amorreo a nanayam ed bokig na Jordan.

⁴⁸ Sayan dalin et manlapud baley na Aroer diad gilig na Ilog na Arnon, tan mamaarap ed baybay ya anggad Palandey na Sirion, salanti say Palandey na Hermon.

⁴⁹ Sakop to met so intiron dalin a bokig na Ilog na Jordan ya anggad Dayat ya Inatey diad abalaten tan say alusadsar na Palandey na Pisga diad bokig.

5

¹ "Impantitipon nen Moises iray amin a totood Israel tan kuantod sikara, Totood Israel, dengel yo ray amin a ganggan ya iter kod sikayo ed sayan agew. Aral yo ra tan pampelengan yo ran onuren.

² "Diad Palandey na Sinai akisipanan so Katawan a Dios tayo,

³ "aliwan diad saray atateng tayo labat, no ag ingen pati diad sikatayon amin a mabilay natan.

⁴ "Manlapud apoy diad toktok na palandey say Katawan akisalitan lupa-lupaan ed sikayo.

⁵ "Diad saman nanalagey ak ed nampegleyan yo tan say Katawan pian nibagak ed sikayo so imbaga to, lapud antakot kayod samay apoy tan ag kayo kinmalab ed palandey. Say Katawan kuanto,

⁶ "Siak so Katawan a Dios yo ya angipaway ed sikayod Egipto ya akaaripenan yo.

⁷ "Ag mo igagalang iray arum a diriyos; siak labat so igalang mo.

⁸ "Ag mo igagawaay sikan dili na talintao odino antokaman a kaolibay na bengatlan walad tawen odino walad tapew na dalin odino bengatlan walad danum ed dalem na dalin.

⁹ "Ag ka ondadakmomo, ni mangigagalang ed saraya, ta siak, say Katawan a Dios mo et maimon ak. Dusaen ko ray mamosul ed siak tan saray kabyangay boleg da ya anggad kumatlo tan kumapat a kailalakan.

¹⁰ Balet aroen ko ray nilibon kailalakan na saray mangarod siak tan mangonur na saray ganggan ko.

¹¹ Ag mo ikakanad maoges iran getma so ngaran ko a Yahweh, a Dios mo, ta dusaen koy siopaman a mangikanad ngaran ko diad andi-kakanaan a pamaakaran.

¹² Ngilinan moy Agew na Panagpainawa tan ipasen mon masanto, onung na ingganggan ko, siak a Katawan a Dios mo, ed sika.

¹³ Anem agew a makapankimey ka,

¹⁴ balet say kumapiton agew et sikatoy agew na panagpainawa a nisaklang ed siak. Diad sayan agew anggapoy toon mankimey: sika, saray anak mo, saray aripen mo, saray ayep mo, odino saray sangkailin manaayam ed bansam. Nepeg a mampainawa iray aripen mo a singa pampainawam.

¹⁵ Nunot mo ya aripen ka nen saman ed Egipto, tan siak a Katawan a Dios mo et impaway ta kad man diad panamegley na baleg a pakayarik tan biskeg ko. Kanyan igaganggan ta kan ngilinan mo so Agew na Panagpainawa.

¹⁶ Igalang moy amam tan say inam, onung na ingganggan ko, siak a Katawan a Dios mo, ed sika, pian maung lawas so kipapasen mo tan andokey so pambilay mo ed dalin ya iter kod sika.

¹⁷ Ag ka mamapatey.

¹⁸ Ag ka mikakaloguran.

¹⁹ Ag ka mantatakew.

²⁰ Ag ka mantitila no mantasi ka sumpad kaparam a too.

²¹ Ag mo iibegan so asawa na kaparam a too; ag mo iibegan so abung to, say dalin to, saray aripen to, saray baka to, saray asno to, odino antokaman a kayaryan to.

²² Sikara yay ganggan ya inter ed sikayo na Katawan nen nantitipon kayo ed palandey. Nen nansalitad sikayo diad panamegley na makapanyarin bosis a nanlapud apoy tan nanlapud makapal a lorem, inter to ra yan ganggan tan anggapo lay arum. Insan to ra intatak ed duaran tapiak a bato tan inter to rad siak.

²³ Nen napopoolan imay intiron palandey tan nadngel yoy bosis a nanlapud kabilongetan, dinmagod siak iray pangulo na saray tribu yo tan saray mamatakken yo

²⁴ tan kuanda, Say Katawan a Dios tayo et impanengneng tod sikatayo so pakapanyari tan kagalangan to nen nadngel min nansalita a nanlapud apoy! Anengneng mi la natan a siansian mambilay so sakey a too, anggaman ya akisalitad sikato so Dios.

²⁵ Balet akin et iposta mi lamet so bilay mi? Pateyen to kami man ya apoy. Andi-duaruwan ompatey kami no narengel min mansalita lamet so Katawan a Dios tayo.

²⁶ Wala tay toon nambilay kayari ton nadngel a nansalitan nanlapud apoy so mabilay a Dios?

²⁷ Pawil ka, Moises, ta dengel moy amin ya ibaga na Katawan a Dios tayo. Insan ka ompawil dia, ta ibagam ed sikami so imbaga to. Ondengel tan ononur kami.

²⁸ Nen nadngel ya na Katawan, inkuantod siak, Nadngel koy imbaga na sarayan totoo, et tuay imbaga ra.

²⁹ Oy la komun ta ontan lawas so liknaan da! Oy la komun ta igalang da ak lawas tan onuren da ray amin a ganggan ko, pian maung lawas so kipapasen tan saray kabyangay boleg da ed anggad angga.

³⁰ Laka, ta ibagam ed sikara ya ompawil la rad katuldaan da.

³¹ Balet sika, Moises, tilak ka ni dia, ta iter kod sika ray amin a ganggan tan bilin ko. Ibangat mod saray totoo, pian naonur da ra no wala la rad dalin ya iter kod sikara.

³² Sikayo ran totood Israel pampelengan yon sumpalen iray amin ya ingganggan na Katawan a Dios yo. Ag yo susumlangen so anggan dinan a ganggan to.

³³ Onur yo ran amin, pian maung lawas so kipapasen yo tan mansiansia kayon mabilay ed dalin a panayaman yo.

6

¹ "Saraya so ganggan ya imbilin ed siak na Katawan a Dios yo ya ibangat kod sikayo. Onur yo ra ed dalin a ngalngali yo la looban tan panayaman.

² "Legan na pambilay yo, sikayo tan saray kabyangay boleg yo et nepeg a takotan yo so Katawan a Dios yo tan onur yo ray amin a ganggan to, pian andokey so pambilay yo ed saman a dalin.

³ "Dengel yo ra, sikayo ran totood Israel, tan sumpal yo ra! Diad satan maung lawas so kipapasen yo, tan magmaliw kayon baleg bansa tan manayam kayod saman a mayaman tan mataban dalin onung na insipan na Katawan a Dios na saray lalaki tayo.

⁴ "Sikayo ran Israelita, tandaan yo ya! Bukor na Katawan a Dios tayo so Katawan.

⁵ "Aro yo so Katawan a Dios yo ed intiron puso yo, intiron kamarerwa yo, tan intiron biskeg yo.

⁶ "Ag yo lilingwanan ira yan ganggan ya iiter kod sikayo natad sayan agew.

⁷ "Ibangat yo rad saray anak yo. Salita yo ra no wala kayod kaabungan yo tan no wala kayod arawin pasen, no mampapainawa kayo tan no mankikimey kayo.

⁸ "Ibariber yo rad saray taklay yo tan iberber yo rad muling yo pian nanunotan yo ra.

⁹ "Isulat yo rad saray lusek na kaput na kaabungan yo tan diad saray puirta yo.

¹⁰ Onung na insipan na Katawan a Dios yo ed saray lalaki yon di Abraham, Isaac, tan Jacob, itdan to kayo na dalin a walaan na saray ankakabaleg tan maaligwas a siudad ya ag yo ra impaalagey.

¹¹ Saray kaabungan et napano ra na maabig iran bengatla ya ag yo ra inkarga, tan wala ray bobun ya ag yo ra kinotkot, tan wala ray kaubasan tan kaolibaan ya ag yo ra intanem. No say Katawan et niyakar to ka yod sayan dalin tan walay amin a labay yon kanen,

¹² ag yon balut lilingwanan so Katawan ya angipaway ed sikayod Egipto ya akaaripenan yo.

¹³ Takotan yoy Katawan a Dios yo sikato labat so igalang yo, tan mansipan kayo ed ngaran to labat.

¹⁴ Ag kayo mangigagalang ed arum a diriyos, anggan dinan a diriyos na saray totood kaliber-liber yo.

¹⁵ No mangigalang kayod arum a diriyos, ondalang a singa apoy so pasnuk na Katawan ed sikayo tan sigput to kayon pateyen, ta say Katawan a Dios yo a kaolup yo et maimon.

¹⁶ Ag yo susuboken so Katawan a Dios yo a singa ginawa yod sikato diad Masa.

¹⁷ Pampelengan yon onuren iray amin a ganggan ya inter tod sikayo.

¹⁸ Gawa yoy amin a maung tan matonung ed arap na Katawan, et maung lawas so kipapasen yo. Nayarian yon kayaryanen so mataban dalin ya insipan na Katawan ed saray lalaki yo,

¹⁹ tan pataynan yo ray kalaban yo, onung na insipan to.

²⁰ Diad arapen a panaon saray anak yo tepeten dad sikayo, Akin et say Katawan a Dios tayo et ingganggan ton onuren tayo ra yan amin a ganggan?

²¹ Ibaga yod satan ed sikara, Aripen kami nen saman na ari na Egipto, et say Katawan impaway to kamid Egipto lapud baleg a pakapanyari to.

²² Anengneng na dilin mata mi so impanggagawa to na saray milagro tan saray makapataktakot a bengatla ed saray Egipsio, say ari ra, tan diad amin ya opisyal to.

²³ Imbolus to kami manlapud Egipto tan inyakar to kami dia tan inter tod sikami yan dalin, onung na insipan tod saray lalaki tayo.

²⁴ Insan say Katawan a Dios tayo ingganggan to ya onuren mi ra yan ganggan tan sikatoy takotan mi. No sumpalen mi ra ya, asikasoen to lawas so bansa tayo tan paaliguasen to.

²⁵ Makaliket ed sikatayo so Dios, no matoor tayon onuren iray amin ya ingganggan tod sikatayo.

7

¹ "Say Katawan a Dios yo et iyakar to kayod dalin a panayaman yo, tan amayamay a totoo so pataynanen to. Legan yon looban so dalin, pataynanen to ray totoo na pitoran bansa a baleg tan makapanyari nen say sikayo: saray Heteo, saray Gergeseo, saray Amorreo, saray Cananeo, saray Perezeo, saray Hebeo, tan saray Jebuseo.

² "No sikaray pasukoen ed sikayo na Katawan a Dios yo tan taloen yo ra, nepeg yon pateyen iran amin. Ag kayo migagampid sikara, tan ag yo ra kakasian.

³ "Sikayo tan saray anak yo, ag kayo mimiasawaan ed sikara,

⁴ "ompan tangguyoren da ray anak yon mangikaindan ed Katawan et mangigalang irad arum a diriyos. No ontan so nagawa, makapasnuk ed sikayo so Katawan tan pateyen to kayon tampol.

⁵ "Kanyan sirin, igeba yo ray altar da, deral yo ray masanton baton lusek da, batang yo ray tanda na diosa ran Asera, tan poolan yo ray talintaoy diriyos da.

⁶ "Gawa yo ra ya, ta kayaryan kayo na Katawan a Dios yo. Diad amin da ray totood tapew na dalin pinili to kayon dili a nidoma-doman totoo to.

⁷ "Say Katawan inaro tan pinili to kayo, aliwan lapud dakel kayo ni nen saray arum a totood arum a bansa, ta sikayoy sankamelagan a bansa diad tapew na dalin.

⁸ "Pinili to kayo lapud inaro to kayo tan labay ton tooren imay sipan tod saray lalaki yo. Kanyan inlaban to kayo diad panamegley na baleg a pakapanyari to tan imbolus to kayod impakaaripen yod ari na Egipto.

⁹ "Ag yo lilingwanan a say Katawan a Dios yo et bukor toy Dios tan sikatoy matoor. Tooren toy impisipanan to tan ag mangoman so panangaro tod saray nilibon kailalakan na saray mangarod sikato tan saray matoluk ed saray ganggan to,

¹⁰ balet andi-saew a dusaen to ray mamosul ed sikato.

¹¹ Natan sirin, onur yo ray nibangat ed sikayo; sumpal yo ray amin a ganggan ya inter kod sikayo ed sayan agew.

¹² No dengelen yo ra yan ganggan tan matoor ya onuren yo ran amin, say Katawan a Dios yo et ituloy ton pansiansiaen so impisipanan tod sikayo tan iter tod sikayo so ag mangoman a panangaro, onung na insipan tod saray lalaki yo.

¹³ Aroen to kayo tan bindisionan to kayo, pian ondakel so bilang yo tan nawalaan kayoy amayamay ya anak; bindisionan toy kaalogan yo, pian nawalaan kayoy trigo, alak, tan larak na oliba; tan bindisionan to kayo diad pangiter tod sikayo na amayamay a baka tan karniro. Iter to ra yan amin a bindision ed sikayo diad dalin ya insipan tod saray lalaki yo ya iter ed sikayo.

¹⁴ Anggapoy arum a bansa a nabindisionan a mapalalo nen say sikayo. Anggapod sikayo tan anggan saray ayayep yo so magmaliw a lepes.

¹⁵ Say Katawan ipaliis to kayod antokaman a sakit, tan ag to ipadalan ed sikayo so antokaman a makapataktakot a salot a nilikna yod man ed Egipto, no ag ingen ipadalan to rad saray amin a kalaban yo.

¹⁶ Deral yo ray amin a bansa ya ipatalo ed sikayo na Katawan, ta ag yo ran balut kakasian. Ag yo igagalang iray diriyos da, ta patit ya ed sikayo.

¹⁷ Ag yo ibabagad sikayon dili a sarayan totoo et dakel ira nen say sikayo kanyan ag yo ra napataynan.

¹⁸ Ag kayo ontatakot ed sikara; nunot yo may ginawa na Katawan a Dios yo ed ari na Egipto tan amin a totoo to.

¹⁹ Nunot yo ra may makapataktakot a salot ya anengneng na dilin mata yo, saramay milagro tan pakelaw, tan samay baleg a pakayari tan biskeg na Katawan a Dios yo ya impangibolus tod sikayo. Pateyen to ra yay totoon tatakotan yo natan a singa impamatey tod saray Egipsio.

²⁰ Gewgewen to ni ra ingen tan pateyen to ray makabatik tan makaamut.

²¹ Kanyan ag kayo ontatakot ed sarayan totoo. Kaolup yo so Katawan a Dios yo; sikatoy Dios a makapanyari tan nepeg a takotan.

²² Kalkalnaan to a pataynanen ira yan totoo legan a looban yoy bansa ra. Ag yo ra napatey a mamimpinsan, ta no napatey yo ran mamimpinsan ondakel iray ayayep ed takel et maatap ed satan so bilay yo.

²³ Say Katawan ipatalo tod sikayo ray kalaban yo tan gewgewen to ra ya anggad ompatey ira.

²⁴ Ipatalo tod sikayo ray ari ra. Pateyen yo ra, tan nalingwanan ira. Anggapoy makabaat ed sikay; pateyen yo so balang sakey ed sikara.

²⁵ Poolan yo ray talintaoy diriyos da. Ag yo pampipilalekan a nakayaryan yo ray balituk odino pilak ya akasolung ed sikara. Ag yo ra aalaen a para sikayo. No alaen yo ran para sikayo, magmaliw iran patit ed sikayo, lapud kabosul na Katawan so pangigalang ed talintaoy dios.

²⁶ Ag kayo mangisesempet na anggan dinan ed sarayan talintaoy diriyos, ta ompan nipelag met ed sikayo so samban walad sikara. Nepeg yon bosulen tan sumpaen ira yan talintaoy diriyos, lapud insamba ra na Katawan.

8

¹ "Pampelengan yon onuren iray amin a ganggan ya inter kod sikayo natad sayan agew, pian mansiansia kayon mambilay, ondakel kayo, tan napanayaman yoy dalin ya insipan na Katawan ed saray lalaki yo.

² "Nunot yo no panoy impangiwanwan ed sikayo na Katawan a Dios yo ed loob na apataploy taon diad kalawakan, impanlikna to kayoy kairapan a panubok ed sikayo, pian naamtaan to no antoy ginetma yon gawaen tan no kasi onuren yo ray ganggan to odino andi.

³ "Pinaerasan to kayo, insan to kayo initdan na mana a kanen yo, say tagano ya ag yo nin balut atawayan, sikayo tan saray lalaki yo. Onmay ginawa to pian nibangat to kayo ya aliwan tinapay labat so pambilay na too, no ag ingen mambilay met ed amin a salita na Katawan.

⁴ "Legan na saman ya apataploy taon ag balut dinmaan so kawes yo, ni alanukan iray sali yo.

⁵ "Nunot yo a say Katawan a Dios yo et dusaen to kayo a singa pandusa na ama ed saray anak to.

⁶ "Kanyan onur yo so ingganggan na Katawan ed sikayo: mambilay kayo onung ed saray bangat to tan sikatoy takotan yo.

⁷ "Say Katawan a Dios yo et iyakar to kayo ed sakey a mataban dalinsakey a dalin a wala ray ilog tan kolus to, walad dalem to iray sobul ya onaagus ed saray patar tan kapokdulan;

⁸ "sakey a dalin a napananian na trigo tan sibada; napamborboran na ubas, igos, granada, tan oliba, tan napanalaan met na dilo.

⁹ "Ag kayon balut naerasan diman odino niwala kayod pankaukolan. Walay naalan balatyang ed saray ankakabaleg a bato to, tan gansa ed saray kapokdulan to.

¹⁰ Walad may amin a labay yon kanen, tan misalamat kayod Katawan a Dios yo lapud saman a mataban dalin ya inter tod sikayo.

¹¹ Manalwar kayo, ta ompan nalingwanan yo so Katawan a Dios yo; onur yo ray amin a ganggan to ya iiter kod sikayo natan.

¹² No wala lay amin a labay yon kanen tan akapaalagey kayo la ray marakep a kaabungan a panayaman yo

¹³ tan dinmakel la ray baka tan saray karniro yo, saray pilak tan balituk yo tan amin a kayaryan yo,

¹⁴ manalwar kayo ta ompan magmaliw kayon mapaatagey tan nalingwanan yoy Katawan a Dios yo ya angipaway ed sikayod Egipto ya akaaripenan yo.

¹⁵ Inwanwan to kayon binmeltang ed samay maawang tan makapataktakot a kalawakan a kawalaan na saray nanditan oleg tan alakdan. Diad saman ya amaga tan anggapoy danum a dalin pinapaway tod baton dampay so danum a para sikayo.

¹⁶ Diad kalawakan initdan to kayo na mana a kinan yo, say kakanen ya ag balut atawayan na saray lalaki yo. Initdan to kayo na saray kairapan a panubok tod sikayo, pian diad kaonuran nabindisionan to kayo na saray maabig a bengatla.

¹⁷ Kanyan sirin, ag yon balut iisipen a minmayaman kayo lapud biskeg tan pakayari yon dili.

¹⁸ Nunot yo a say Katawan a Dios yo so angiter ed sikayo na pakayari a mampayaman. Onyay gagawaen to lapud niy matoor ya anggad natan ed samay impisipanan tod saray lalaki yo.

¹⁹ Ag yo lilingwanan so Katawan a Dios yo, ag kayo onsisingger ed saray diriyos a igalang tan panlingkuran yo. No gawaen yo ya, pasakbayan ta kayo natan ya andi-saew ya ompatey kayo.

²⁰ No ag yo onuren so Katawan, ompatey kayo a singa saray totoon pateyen to legan na pankukurang yo.

9

¹ "Dengel kayo, sikayon totood Israel! Natad sayan agew ngalngali yo la baliwen so Ilog na Jordan tan panayaman so dalin a kayaryan na saray bansan ankabaleg tan makapanyari nen say sikayo. Ankakabaleg iray siudad da ya anggad tawen iray padir da.

² "Atatagey iran totoo tan mabisbiskeg ira; alan ira, tan nadngelan yo ya anggapoy makalaban ed sikara.

³ "Balet sikayon dili nanengneng yo natan a say Katawan a Dios et manayam ed onaan yo a singa manliub ya apoy. Taloen to ra legan a lolooban yo so dalin da, pian napataynan yo ra tan masiglat yo ran napatey onung na insipan to.

⁴ "No apataynan la ra na Katawan a Dios yo para sikayo, ag yo ibabagad sikayon dili a pinaloob to kayo ed saman a dalin lapud sikatoy kanepegan yo. Andi, say Katawan et pataynanen ton para sikayo ira yan totoo lapud maoges ira.

⁵ "Say Katawan et pakakayaryan tod sikayo so dalin da, aliwan lapud maung kayon totoo tan gagawaen yo so katunongan. Pataynanen to ra lapud maoges ira tan lapud labay ton tooren imay insipan tod saray lalaki yo ya Abraham, Isaac, tan Jacob.

⁶ "Andi-duaruwa sirin a say Katawan et iter tod sikayo man a mataban dalin aliwan lapud kanepegan yo. Andi, ta totoo kayon mananumlang.

⁷ "Ag yon balut lilingwanan imay ginawa yon makasengeg na impanpasnuk na Katawan a Dios yo nen wala kayod kalawakan. Nanlapud samay agew na impanaynan yod Egipto ya anggad sayan agew na impakasabi yo dia, sinusumlang yoy Katawan.

⁸ "Anggan dimad Palandey na Sinai impanpasnuk yoy Katawan; lapud mapalalon pasnuk to akaparaan lan mamatey ed sikayo.

⁹ "Kinmalab ak ed tagey na palandey ta alaen ko ra may tapyak a baton akaitatakan na impisipanan ed sikayo na Katawan. Nanayam ak diman ya apataploy agew tan labi tan ag ak balut angan o inminom.

¹⁰ Insan say Katawan inter tod siak iray may duaran tapyak a baton angitatakan na dilin lima to na saramay imbaga tod sikayo manlapud apoy nen nantitipon kayod man ed palandey.

¹¹ On, kayariy apataploy agew tan labi say Katawan inter tod siak ira may duaran tapyak a baton angitatakan tod samay impisipanan to.

¹² Insan say Katawan kuantod siak, Akseb kan tampol, ta saray totoom ya impaway mo manlapud Egipto et nagmaliw iran maoges. Sinumlang da la may ingganggan kod sikara, tan nanggawa ra na para sikara na talintaoy dios.

¹³ Say Katawan kuanto nid siak, Amtak so awet na olo da ra yan totoo.

¹⁴ Ag mo ak babaaten ed gawaen ko. Ginetmak la ran pateyen pian anggapo lay makanunot ed sikara. Insan ta ka pagmaliwen a sengeg na sakey a bansan lalon baleg tan makapanyari nen say sikara.

¹⁵ Kanyan inmakseb ak a nanlapud palandey a sankaawit ko ra may duaran tapyak a baton akaitatakan na sipanan. Diad saman manliub ya apoy so manlalapud palandey.

¹⁶ Anengneng ko a sinumlang yo la may ingganggan ed sikayo na Katawan a Dios yo, tan nankasalanan kayod sikato diad impanggawa yo na para sikayon dili na sakey a mital a bakan kalakyan a talintaoy dios.

¹⁷ Kanyan diad arapan yo imbasig ko ra may duaran tapyak a bato tan apisag-pisag ira.

¹⁸ Insan apataploy agew tan labin tinmikleb ak lamet ed arap na Katawan tan ag ak balut angan o inminom. Ginawak iman lapud nankasalanan kayod Katawan tan impanpasnuk yo.

¹⁹ Antakot ak ed samay mapalalon pasnuk na Katawan, ta lapud mapalalon pasnuk to, akaparaan lan mamatey ed sikayo; balet dinengel to ak ni lamet.

²⁰ Diad saman, mapalalo met so pasnuk na Katawan ed kinen Aaron et pateyen to la lawari, kanyan impikasik met si Aaron.

²¹ Inalak imay makapakasalanan a talintaon ginawa yosamay mital a bakan kalakyantan imbontuk kod apoy. Insan ko tinemektemek ya anggad dinmabuk, tan imbantak ko may dabuk ed kolus ya onaagos ed leksab na palandey.

²² Impanpasnuk yo met so Katawan a Dios yo nen wala kayod Tabera, Masa, tan Kibrot-hattava.

²³ Et nen imbaki to kayon manlapud Cades-barnea kayari to kayon binilin a mangayaryan ed dalin ya iter tod sikayo, sinmumlang kayod sikato; ag kayo nanmatalek odino inmonur ed sikato.

²⁴ Nanlapu lad samay impikabat kod sikayo, susumlangen yo lay Katawan.

²⁵ Kanyan tinmikleb ak ed arap na Katawan ed saraman ya apataploy agew tan labi, lapud imbaga ton pateyen to kayo la.

²⁶ Et nampikasi ak, Katawan a Dios, ag mo pa papateyen iray dilin totoom, saray totoon inyagel tan impaway mod Egipto diad panamegley na baleg a biskeg tan pakayarim.

²⁷ Nudnunot mo pa ray aripen mon di Abraham, Isaac, tan Jacob, tan palabas mo lay inkaawet na olo da ra yan totoo, say inkaoges da, tan say kasalanan da.

²⁸ Ta no andi, saray Egipsio ibaga ra ya ag mo ra ayarian ya iyakar ed dalin ya insipan mod sikara. Ibaga ra ya inyakar mo rad kalawakan ta pateyen mo ra, lapud kabosul mo ra.

²⁹ Say katwaan to, sikaray totoon pinilim a kayaryan tan impaway mo rad Egipto diad panamegley na baleg a biskeg tan pakayarim.

10

¹ "Insan say Katawan kuantod siak, Manabas ka na duaran tapyak a bato a singa saramay inmona tan manggawa ka na kiew a Kaban a panginan ed sikara. Laen mo ak dimad tagey na palandey,

² "ta itatak kod saray pagagawak ed sikan tapyak a bato iray intatak kod saramay imbetag mo, insan mo ra ikarga ed Kaban.

³ "Kanyan nanggawa ak na Kaban ya akasia tan duaran tapyak a bato a singa saramay inmona tan inawit ko ra ed tagey na palandey.

⁴ "Insan say Katawan intatak tod saramay bato iray salitan intatak to la ed saramay inmonan bato, salanti saray Samploran Ganggan ya inter tod sikayo nen akisalitad sikayo manlapud apoy diad samay agew a nantitipon kayod palandey. Inter ed siak na Katawan ira may tapyak a bato,

⁵ "insan inmakseb ak nanlapud palandey. Insan onung na ingganggan na Katawan, inkargak ira ed samay Kaban a ginawak, et wadman ni ra ya anggad natan. (

⁶ "Saray Israelita nampikal ira a manlapud saray bobun a kayaryan na saray totood Jaakan, tan linma rad Mosera. Inatey diman si Aaron tan diman met nipompon, tan say anak ton laki a si Eleazar so sinmalat ed sikaton pari.

⁷ "Manlapud man linma rad Gudgoda, insan diad Jotbata a daakan so danum diman.

⁸ "Diad palandey say Katawan tinoro to ray lalakin kabyangay tribu nen Levi a sikaray makaoley ed Kaban na Sipanan, manlingkur irad sikato, tan sikaray mamindision ed ngaran to. Saraya ni so kimey da ya anggad natan.

⁹ "Sikato yay makasengeg a say tribu nen Levi et ag ira angawat na parti na dalin ya aliwan singa saray arum a tribu; say inawat da et samay pankanawnawa ran manlingkur ed Katawan, onung na insipan na Katawan a Dios yo.)

¹⁰ Apataploy agew tan labi a nanayam ak ed tagey na palandey, a singa samay ginawak nen inmonan inyakar ko. Dinengel ak ni na Katawan tan inmabubon ya ag to kayo pateyen.

¹¹ Insan imbaga tod siak ya ipangulo to kayo, pian nakayaryan yo so dalin ya insipan ton iter ed saray lalaki yo.

¹² Natan, sikayon totood Israel, dengel yo ray labay a pagawa ed sikayo na Katawan a Dios yo: Takotan yo so Katawan tan onur yo ray amin a labay ton pagawad sikayo. Aro yo, panlingkuran yo ed intiron puso yo,

¹³ tan tombuk yo ray amin a ganggan to. Iiter ko natan ira yan ganggan ed sikayo ya onkanan pankaabigan yo.

¹⁴ Kayaryan na Katawan so anggan saray sankatageyan a katawenan; kayaryan to met so mundo, tan amin a logan to.

¹⁵ Balet balbaleg so panangaro na Katawan ed saray lalaki yo kanyan pinili to kayo, aliwan saray arum a totoo, tan sikayo ni ya anggad natan iray apilin totoo to.

¹⁶ Kanyan sirin, manlapud natan toluk kayod Katawan tan ekal yoy inkaawet na olo yo.

¹⁷ Say Katawan a Dios yo et makapanyari nen saray amin a diriyos tan walad silong to ray amin a pakayari. Sikato so matalonggaring tan makapanyari, tan sikato so nepeg a toluken. Anggapoy lalabien to, tan ag to mangaawat na pasoksok.

¹⁸ Iyaalagey toy pankatonungan da ray olila tan saray balo; inaro to ray sangkaili a manaayam ed kawalaan da ray totoo tayo, tan iitdan to ra na tagano tan kawes.

¹⁹ Kanyan sirin, aro yo ra yan sangkaili, ta sangkaili kayo met nen saman ed Egipto.

²⁰ Takotan yoy Katawan a Dios yo tan sikatoy panlingkuran yo. Mansiansia kayod sikato tan mansipan kayo ed ngaran to labat.

²¹ Idayew yosikatoy Dios yo, tan anengneng na dilin mata yo iray ankakabaleg tan makapakelkelaw a ginagawa ton para sikayo.

²² Nen linmad Egipto iray lalaki yo, pitpitomplo ra labat. Balet natan say Katawan a Dios yo et impagmaliw to kayon singa karakel na bitewen ed tawen.

11

¹ "Aro yo so Katawan a Dios yo tan onur yo lawas iray amin a ganggan to.

² "Nunot yo natan iray naaralan yo a nipaakar ed Katawan diad panamegley na saray ginagawa to. Aliwan saray anak yo, no ag ingen sikayo, so akanengneng. Anengneng yo so inkatalonggaring na Katawan, say pakayari to, say biskeg to,

³ "tan saray milagron ginagawa to. Anengneng yo so ginagawa tod ari na Egipto tan diad intiron bansa to.

⁴ "Anengneng yo no panoy sigput ya impamaandipat na Katawan ed saray sondalon Egipsio, pati saray kabayo tan saray karwahi ra, diad impangipalner tod sikara ed Dayat ya Ambalanga nen oosilan da kayo.

⁵ "Amta yo no anto ray ginagawa na Katawan a pankaabigan yo diad kalawakan kasakbayan ya akasabi kayo dia.

⁶ "Nanunotan yo no antoy ginawa to ed kindi Datan tan Abiram a lalakin anak nen Eliab a kabyangan na tribu nen Ruben. Anengneng yon amin so insangiy dalin tan say impangakmun tod sikara, pati saray pamilya ra, saray tulda ra, tan amin da ray aripen tan saray ayep da.

⁷ "On, sikayo ray akanengneng ed sarayan amin a bengatlan makapakelaw a ginagawa na Katawan.

⁸ "Onur yo ray ingganggan kod sikayo natad sayan agew. Diad satan nayarian yon baliwen so ilog tan napanayaman yoy dalin a ngalngali yo la looban.

⁹ "Andokey met ed satan so pambilay yo ed mayaman tan mataban dalin ya insipan na Katawan ya iter ed saray lalaki yo tan saray kabyangay boleg da.

¹⁰ Say dalin a ngalngali yo la napanayaman et aliwan singa samay dalin na Egipto a nanayaman yo nen saman. Dimad Egipto, no mantanem kayoy trigo, nakaukolan a mamasia kayon mankimey pian naparanuman yo so kaalogan; singa kayo manaasikasoy tanamanan na pisipising.

¹¹ Balet say dalin a ngalngali yo la looban et kapalandeyan tan kapokdulan, sakey a dalin a sasalogen na oran.

¹² Say Katawan a Dios yo et aasikasoen to yan dalin tan babantayan to lawas.

¹³ Kanyan sirin, onur yo ray ganggan ya inter kod sikayo natad sayan agew; aro yo so Katawan a Dios yo tan manlingkur kayod sikato ed intiron puso yo tan intiron kamarerwa yo.

¹⁴ No onuren yo, ipelag toy oran ed dalin yo no panaon na pankaukolan, pian walay trigo, alak, tan larak a para sikayo,

¹⁵ tan say dika a para saray ayayep yo. Nawalaan kayo na amin a taganon nakaukolan yo.

¹⁶ Manalwar kayo ta ompan napalingo kayo et ikaindan yoy Katawan tan mangigalang tan manlingkur kayod arum a diriyos.

¹⁷ No onyay gawaen yo, mampasnuk ed sikayo so Katawan. Ag to papelagen so oran, et onkelang so dalin yo tan anggapoy ontubon tanaman. Insan ag mabayag, ompatey kayod man, anggaman a maung iman a dalin ya iter tod sikayo.

¹⁸ Tandaan yo ra yan ganggan tan aro yo ra. Ibariber yo rad saray taklay yo tan iberber yo rad moling yo pian nanunotan yo ra.

¹⁹ Ibangat yo rad saray anak yo. Salita yo ra no wala kayod kaabungan yo tan no wala kayod arawin pasen, no mampapainawa kayo tan no mankikimey kayo.

²⁰ Isulat yo rad saray lusek na kaput na kaabungan yo tan diad saray puirta yo.

²¹ Diad satan sikayo tan saray anak yo et mambilay na andokey ed dalin ya insipan na Katawan a Dios yo ya iter tod saray lalaki yo. Manayam kayod man legan a walay tawen ed tagey na dalin.

²² Pampelengan yon onuren iray amin ya ingganggan kod sikayo: Aro yo so Katawan a Dios yo, toluk yo ray amin a ganggan to, tan mansiansia kayon matoor ed sikato.

²³ Diad satan pataynanen to ray amin a bansa legan na pankukurang yo, et panayaman yoy dalin da ray bansan baleg tan makapanyari nen say sikayo.

²⁴ Amin a dalin a nabatak yo et kayaryan yo. Say dalin yo et sakopen to so manlapud kalawakan diad abalaten ya anggad Kapalandeyan na Libano diad baybay, tan manlapud Ilog na Eufrates diad bokig ya anggad Dayat na Mediteraneo diad sagur.

²⁵ Inermay laen yod saman a dalin say Katawan a Dios yo et patakoten tod sikayo ray totoo, onung na insipan to, tan anggapoy makalaban ed sikayo.

²⁶ Diad sayan agew pampilien ta kayo ed bindision tan samba

²⁷ bindision no onuren yo ray ganggan na Katawan a Dios yo a iiter ko rad sikayo natan;

²⁸ balet samba, no sumlangen yo ra yan ganggan diad pangigalang yod arum a diriyos ya ag yo ra angigalangan nen saman.

²⁹ No say Katawan niyakar to kayo lad dalin a panayaman yo, nepeg ya ibawag yo manlapud Palandey na Gerizim so bindision tan manlapud Palandey na Ebal so samba. (

³⁰ Sarayan duaran palandey et wala rad sagur na Ilog na Jordan, diad dalin da ray Cananeo a manaayam ed patar na Jordan. Wala rad bandad sagur tan ag ira arawi ed saray masanton kiew ed More ya abay na baley na Gilgal.)

³¹ Ngalngali yo la baliwen so Ilog na Jordan tan panayaman so dalin ya iter ed sikayo na Katawan a Dios yo. No naala yo tan napanayaman yo la,

³² pampelengan yon sumpalen iray amin a ganggan ya iiter kod sikayo natad sayan agew.

12

¹ "Saraya so ganggan a pampelengan yo ya onuren legan a manaayam kayod dalin ya iiter ed sikayo na Katawan a Dios na saray lalaki yo. Dengel yo ra!

² "Diad dalin a kayaryanen yo, deral yo ray amin a pasen a pangigagalangan na saray totoo ed saray diriyos da diad saray atagey a palandey, diad saray pokdul, tan diad silong na saray malambut a kiew.

³ "Igeba yo ray altar da tan mekmek yo ray masanton lusek da. Poolan yo ray tanda na diosan Asera tan batang yo ray talintaoy diriyos da, pian ag la ran balut nigalang ed saraman a pasen.

⁴ "Ag yo igagalang so Katawan a Dios yo a singa panangigalang na sarayan totoo ed saray diriyos da.

⁵ "Diad dalin na amin da ray tribu yo, say Katawan mamili na sakey a pasen a panayaman to a sikatoy laen na saray totoo a pangigalangan ed sikato.

⁶ "Diman yo iyakar iray isaklang yon bagat a popoolan tan saray arum a bagat, say kakaplo na saray kayaryan yo, tan saray bagat yo, saray rigalon isipan yon iter ed Katawan, saray bagat yon manlapud mabolus a linawa yo, tan saray besag ya anak na saray baka tan saray karniro yo.

⁷ "Dimad saman a pasen, diad arap na Katawan a Dios yo ya amindision ed sikayo, sikayo tan saray kabyangay pamilya yo et kanen tan panliketan yo ray maabig a bengatlan nansasagputan yo.

⁸ "No onsabiy tan a panaon, ag yo gagawaen so singa gagawaen yo ni ya anggad natan. Mangigagalang kayo nin amin onung na kaliktan yo,

⁹ "lapud ag kayo ni akaloob ed dalin ya iiter ed sikayo na Katawan a Dios yo, a diman kayo makapambilay ya arawid kaatapan.

¹⁰ No nabaliw yo lay Ilog na Jordan, say Katawan pasakop tod sikayo so dalin tan manayam kayod man. Ag to kayo la pasigen-sigen ed amin a kalaban yo, tan manayam kayod man ya arawid kaatapan.

¹¹ Say Katawan mamili na saksakey a pasen a pangigalangan ed sikato, tan iyakar yod man ed sikato iray amin ya ingganggan kod sikayo: saray isaklang yon bagat a popoolan tan saray arum a bagat, say kakaplo na saray kayaryan yo tan saray bagat yo, tan saray nidoma-doman rigalo ya insipan yon iter ed Katawan.

¹² Manliket kayod man ed arap to, pati saray anak yo, saray aripen yo, tan saray Levitan manayam ed saray baley yo; nunot yo a saray Levita et anggapoy dilin dalin da.

¹³ Ag nepeg a mangisaklang kayo na saray bagat ed inerman a pasen a labay yo;

¹⁴ nepeg yo ran isaklang labat ed saksakey a pasen a pilien na Katawan ed dalin na sakey ed saray tribu yo. Diman labat so pangisaklangan yo na saray bagat a popoolan tan diman so panggawaan yod amin ya ingganggan kod sikayo.

¹⁵ Nayarian yoy mamatas tan mangan na saray ayep yo diad iner may panayaman yo. Nayarin kanen yo so anggan anton karakel ya iter ed sikayo na Katawan. Malinis may marotak kayo onung ed ganggan, nayarian yo ran kanen a singa pangan yo na karniy gasila tan ulsa.

¹⁶ Balet ag yo nepeg a kanen so dala ra; nepeg yon ikalbo ed dalin a singa say danum.

¹⁷ Ag yo kakanen ed pasen a panayaman yo so dinan man ya ibagat yod Katawan: saray kakaplo na trigo yo, say alak yo, odino say larak na oliba yo, odino saray besag ya anak na saray baka tan saray karniro yo, saray rigalon isipan yon iter ed Katawan, saray bagat yon manlapud mabolus a linawa, odino saray arum a bagat.

¹⁸ Sikayo tan saray anak yo, a pati saray aripen yo tan saray Levitan manayam ed saray baley yo, et kanen yo ra yan bagat dia labat ed arap na Katawan a Dios yo, diad saksakey a pasen a panangigalangan a pilien na Katawan a Dios yo. Panliketan yod man iray saray ginagawa yo.

¹⁹ Ag yon balut papaolyan iray Levita legan na panayam yod dalin yo.

²⁰ No apaawang la na Katawan a Dios yo so dalin yo onung na insipan to, nayarian yoy mangan na karni kapag nanunotan yo.

²¹ No arawdawin tuloy ed kawalaan yo so pasen a panangigalangan, nayarian yoy mamatas, kapag nanunotan yo, na baka odino karniro ya inter ed sikayo na Katawan, tan nayarin kanen yo yan karni ed abung yo onung na imbagak ed sikayo.

²² Siopamay malinis odino marotak onung ed ganggan, nayarin mangan na sayan karni, a singa pangan to na karniy gasila tan ulsa.

²³ Balet ag yo kakanen so karnin nandala, ta say bilay wala ed dala, tan ag yo nepeg a kanen so bilay a walad karni.

²⁴ Ag yo kakanen so dala; ikalbo yo ingen ed dalin a singa say danum.

²⁵ No onuren yo yan ganggan, napaliket so Katawan, et maung lawas so kipapasen yo tan saray kabyangay boleg yo.

²⁶ Iyakar yo samay saksakey a pasen iray bagat yo tan saray rigalon insipan yon iter ed Katawan.

²⁷ Isaklang yod man ed altar na Katawan iray bagat yon popoolan. Isaklang yod man met iray bagat a kanen yoy karni ra tan ikalbo yod altar so dala ra.

²⁸ Pampelengan yon onuren iray amin ya ingganggan kod sikayo, et anggad angga a maung lawas so kipapasen yo, sikayo tan saray kabyangay boleg yo, lapud matonung tan makapaliket ed Katawan a Dios yo so gawaen yo.

²⁹ Say Katawan a Dios yo et deralen to ray bansa legan na pankukurang da, tan kayaryanen yo tan panayaman yo.

³⁰ Kayarin deralen na Katawan ira yan bansa, manalwar kayo, ta ompan napatitan kayon mangigalang ed saray diriyos da. Ag yo oosisaen no panoy panangigalang da, ompan aligen yo ra.

³¹ Ag yo ipapara so panangigalang yod Dios yo ed panangigalang da ed saray diriyos da, ta diad panangigalang dad saray diriyos da gagawaen da ray amin a makapaingungot a kabosul na Katawan. Ibabagat da ni ingen ed apoy na saray altar da iray anak da.

³² Onur yo ray amin ya ingganggan kod sikayo; ag yo ra pasosolukan odino babawasan.

13

¹ "Say sakey a propita odino sakey a managpatalus na kogip et nayarin mangisipan a manggaway sakey a milagro odino sakey a pakelaw,

² "pian natangguyor to kayon mangigalang tan manlingkur ed saray diriyos ya ag yo ni ra inggalang nen saman. Anggaman ontua bilang so insipan to,

³ "ag yo dedengelen. Say Katawan a Dios yo et ikana to a panubok ed sikayo, pian naamtaan to no kasi inaro yo ed intiron puso yo tan intiron kamarerwa yo.

⁴ "Tombuk yo so Katawan tan takotan yo; toluk tan sumpal yo ray ganggan to; igalang yo tan mansiansia kayod sikato.

⁵ "Balet nepeg a pateyen so siopaman a managpatalus na kogip odino siopaman a propitan mangibagad sikayo a sumlangen yoy Katawan ya angipaway ed sikayod Egipto ya akaaripenan yo. Maoges itan a too ta labay to kayon iyarawi ed panagbilay ya ingganggan na Dios a tombuken yo. Nepeg a pateyen pian naandid pegley yo yan kaogsan.

⁶ "Nayarin anggan say agi yon laki, odino say anak yon laki, odino say anak yon bii odino say asawa yon bii ya inararo yo, odino say kaaro yon malmalet et maamut to kayon tanggoyuren a mangigalang ed arum a diriyos ya ag yo ni ran balut inggalang, sikayo tan saray lalaki yo.

⁷ "Nayarin say sakey ed sikara et tanggoyuren to kayon mangigalang ed saray diriyos da ray totoon manaayam ed abay yo, odino saray diriyos da ray totoon manaayam ed arawid sikayo.

⁸ "Balet ag yo aabuloyan a natanggoyur to kayo; ag yo anggan dedengelen. Ag yo kakasian o aabageyen, tan ag yo iyaagel.

⁹ "Patey yo! Sikayo so ononan manupak ed sikato, insan tupaken na arum a totoo.

¹⁰ Tupak yo ya anggad ompatey! Sinali to kayon iyarawi ed Katawan a Dios yo ya angipaway ed sikayod Egipto ya akaaripenan yo.

¹¹ Diad satan narengelan na amin ya totood Israel so agawa; ontakot ira, et anggapo lay manggawa na onyan kaogsan.

¹² No manaayam kayo lad saray baley ya iter ed sikayo na Katawan a Dios yo, nayarin narengelan yo

¹³ a pigaran andi-kakanaan a totoo ed bansa yo so amalikdod saray totood baley da a mangigalang ed saray diriyos ya ag da ni ran balut inggalang nen saman.

¹⁴ No narengelan yoy ontan a balbalita, osisa yon maung; et no talagan tua ya agaway ontan a kaogsan,

¹⁵ patey yo ray amin a totood satan a baley tan amin ya ayayep da. Deral yon sigput itan a baley.

¹⁶ Pantitipon yon ibunton ed plasa iray amin a kayaryan na saray totoon manaayam diman. Insan yo poolan so baley tan amin a logan to a sikatoy sakey a bagat ed Katawan a Dios yo. Nepeg a satan a baley et paolyan ya aderal-deral ya anggad angga tan ag lan balut pasimbaloen ya ipaalagey.

¹⁷ Ag kayo mangisisinup na antokaman a nepeg a deralen, et diad satan onkepa so ontan lan pasnuk na Katawan tan abageyen to kayo. Kasian to kayo tan parakelen to kayon totoo, onung na insipan tod saray lalaki yo,

¹⁸ no onuren yo ray amin a ganggan ya inter kod sikayo diad sayan agew, tan gawaen yo ray amin a matonung.

14

¹ "Sikayo ray totoo na Katawan a Dios yo. Kanyan no manermen kayod inatey, ag yo sasalgeren so laman yo o kikiskisan so arap na olo yo.

² "Kayaryan kayo na Katawan a Dios yo; pinili to kayon dilin totoo to diad saray amin a totood tapew na dalin.

³ "Ag yo kakanen iray bengatla a say Dios impasen to ran marotak.

⁴ "Nayarian yon kanen ira yan ayayep: baka, karniro, kanding,

⁵ "ulsa, karnirod katakelan, kanding ed katakelan odino gasila

⁶ "dinan man ya ayep a pisag so koko to tan mamparintek.

⁷ "Balet ag nepeg a kanen iray ayep likud no pisag so koko ra tan mamparintek ira. Ag nayarin siraen yo so kamilyo, konihon amo, odino konihod katakelan. Nepeg ya ipasen ira yan ayayep, ta mamparintek ira balet aliwan pisag so koko ra.

⁸ "Ag kayo mangakan na baboy. Marotak ya ayep; pisag iray koko to, balet ag mamparintek. Ag kayo mamangakay dinan man ed sarayan ayayep o didiwiten so laman ton inatey.

⁹ "Nayarian yo a kanen so anggan dinan a sira a nanggigim tan nansiksik,

¹⁰ balet ag nayarin kanen so antokaman a manaayam ya anggapoy gigim tan siksik; ipasen yon marotak ira yan sira.

¹¹ Nayarian yon kanen so antokaman a malinis a manok.

¹² Balet sarayan manok so sebel a kanen: agila, kulayot, baga, gikgik; busardo, buitri, wawak; abistrus; garsita, tigkalak, dulakak, pilikano, kalamon, abudilla, tan kaging.

¹³

¹⁴

¹⁵

¹⁶

¹⁷

¹⁸

¹⁹ Amin a nampayak a bigis et marotak; ag yo ra kakanen.

²⁰ Nayarian yon kanen so antokaman a malinis a bigis.

²¹ Ag yo kakanen so antokaman ya ayep ya inatey a bukor. Nayarin ipakan yod saray sangkailin manaayam ed kawalaan yo, odino ilako yo ed arum iran sangkaili. Balet kayaryan kayo na Katawan a Dios yo; sikayo ray totoo to. Ag yo ilolotod gatas na ina to so kordiro odino kilaw na kanding.

²² Ibiig yoy kakaplo na amin a naani yod kaalogan yo kapag taon.

²³ Insan kayo onla ed sakey a pasen a pinili na Katawan a Dios yo a pangigalangan ed sikato; et diad arap tod man akan yoy kakaplo na trigo yo, alak yo, larak na oliba yo, tan besag ya anak na baka tan karniro yo. Gawa yoy onya pian naaralan yon takotan lawas so Katawan a Dios yo.

²⁴ No arawin tuloy ed abung yo so pasen a panangigalangan kanyan mairap yon awiten so kakaplo na ani ya impamindision na Katawan ed sikayo, saya so gawaen yo:

²⁵ Ilako yo so kakaplo na naani yo, insan yo awiten ed samay pasen a panangigalangan so kuarta a nanlakoan yo.

²⁶ Igastos yo yan kuarta ed antokaman a labay yobaka, kordiro, alak, odino antokaman a makabuektan diman, diad arap na Katawan a Dios yo, sikayo tan saray kabyangay pamilya yo et akan yo may sinaliw yo tan manliket kayo.

²⁷ Ag yo papaolyan iray Levitan manaayam ed saray baley yo; anggapoy kayaryan dan dili.

²⁸ Diad kasamputan na kapag mikatlon taon iyakar yoy kakaplo na amin a naani yo, insan yo ra isinup ed saray baley yo.

²⁹ Para saray Levita yan kakanen, bangta anggapoy kayaryan dan dili; ontan met, sayan kakanen et para saray sangkaili, saray olila, tan saray balo a manaayam irad saray baley yo. Nepeg ya ondago ran mangalay nakaukolan da. Gawa yoy onya, et say Katawan a Dios yo bindisionan to kayo ed amin a gawaen yo.

15

¹ "Diad kasamputan na kapag kumapiton taon paandi yo la ray amin a kuartan utang ed sikayo.

² "Onya so nepeg a nagawa. Balang sakey a too nepeg to lan paandien so kuartan impabayes tod kapara ton Israelita; ag to la nepeg a singilen, ta say Katawan a dili et imbawag to lan apaandi la.

³ "Nayarin singilen yo so utang ed sikayo na sangkaili, balet ag yo nepeg a singilen so utang ed sikayo na kadalaan yo.

⁴ "Say Katawan a Dios yo et bindisionan to kayo ed dalin ya iiter tod sikayo. Anggapoy anggan sakey a too yo so magmaliw a mairap so bilay to

⁵ "no onuren yo so Katawan tan apiapigeren yon sumpalen iray amin ya ingganggan kod sikayo natan.

⁶ "Bindisionan kayo na Katawan onung na insipan to. Pautangen yo na kuarta iray amayamay a bansa, balet ag yo nakaukolan so miutang ed anggan dinan a bansa; naoleyan yo ray amayamay a bansa, balet anggapoy bansan nayarin manoley ed sikayo.

⁷ "No diad anggan anton baley ed dalin ya iter ed sikayo na Katawan a Dios yo et walay sakey a kapara yon Israelita a walad pankaukolan, ag yo sisibletan tan ikikibot so tulong yod sikato.

⁸ "Ingen, mabonluk kayon mangiter ed sikato tan pabayes yo na amin a nakaukolan to.

⁹ "Ag yo iisipen a lapud magano lan onsabi so taon a pamaandid saray utang, et ag yo la pautangen so kadalaan yon mairap-bilay. Ag yo aabuloyan ya onloob ed isip yo so ontan a maoges a kanunotan. No ag yo pabayesen, ontawag ed Katawan na sumpad sikayo, et mankasalanan kayo.

¹⁰ Mabolbolus sirin ya itdan yo, et say Katawan bindisionan to kayo ed amin a gawaen yo.

¹¹ Wala lawas so pigaran Israelita a mairap so bilay da tan wala rad pankaukolan, kanyan igaganggan ta kayon nepeg a mabonluk so panangiter yod sikara.

¹² No say kapara yon Israelita, bii may laki, et ilako toy sikaton dili a sakey ya aripen yo, nepeg ya ibolus yo kayariy anem taon a panlingkur tod sikayo. No onsabiy kumapiton taon, nepeg a paolyan yo lan onla.

¹³ No ibolus yo la, ag yo ibabakin anggapoy awit to.

¹⁴ Mabonluk yon itdan na antokaman ya impamindision ed sikayo na Katawankarniro, trigo, tan alak.

¹⁵ Nunot yo ya aripen kayo nen saman ed Egipto et imbolus kayo na Katawan a Dios yo; sikato yay makasengeg ya iiter kod sikayo yan ganggan.

¹⁶ Balet nayarin ag labay na aripen yo so ontaynan; nayarin inararo to kayo tan saray kabyangay pamilya yo, kanyan labay to lay mansiansian manayam ed sikayo.

¹⁷ Iyakar yod puirta na abung yo tan tebeng yod man so layag to; diad satan mansiansian aripen yo ya anggad ag to ipatey. Onya met so gawaen yo ed biin aripen yo.

¹⁸ Ag nepeg a mairap so linawa yon mangibolus na aripen; andibali ta nilingkuran to kayo lan anem taon, tan kapaldua labat so upa na kumikimey so agastos yo. Onyay gawaen yo et say Katawan a Dios yo bindisionan to kayo ed amin a gawaen yo.

¹⁹ Ibiig yon para Katawan a Dios yo ray amin a besag a kalakyan a kilaw na baka tan karniro yo; ag yo pankikimey ira yan baka tan ag yo kakatlian ira yan karniro.

²⁰ Tinaon, sikayo tan saray kabyangay pamilya yo et nepeg a kanen yo ra ed arap na Katawan diad samay pasen a panangigalangan.

²¹ Balet no walay deral na laman na sarayan ayep, no lopuy ira odino bulag ira odino walay sananey a mapalalon deral na laman da, ag yo ra nepeg ya ibagat ed Katawan a Dios yo.

²² Nayarin kanen yod abung ira yan ayep. Amin yo, malinis odino marotak kayo onung ed ganggan, et nayarin kanen yo ra, a singa pangan yo na ulsa odino gasila.

²³ Balet ag yo kakanen so dala ra; ikalbo yo ingen ed dalin a singa say danum.

16

¹ "Pagalangan yoy Katawan a Dios yo diad panamegley na pansilibra yo na Paskua no bulan na Abib; diad aminsan a labi ed saman a bulan so impangipaway tod sikayod Egipto.

² "Laka yod samay pasen a panangigalangan ta patas yod man so sakey ed saray karniro odino baka yo a kanen yo no Paskua a pamagalang ed Katawan a Dios yo.

³ "No kanen yo yan panangan, ag kayo mangakan na tinapay a walay libadura. Ta pitoy agew mangan kayo na tinapay ya anggapoy libadura to, a singa samay ginawa yo nen tinaynan yon magangganat so Egipto. Akan yo yan tinapay, say tinapay na kairapan, pian legan na pambilay yo nanunotan yo may agew ya impaway yod Egipto, saman a pasen a nanirapan yo.

⁴ "Pitoy agew a sebel ed siopaman a too ed dalin yo so mangisinup na arina ed abung to; tan say karni na pinatas ya ayep ed labi na ononan agew et nakaukolan a kanen ed saman met lamlamang a labi.

⁵ "Patas yod samay pasen a panangigalangan iray ayayep ya onkanad Paskuaaliwan diad anggan iner a pasen ed dalin ya iter ed sikayo na Katawan a Dios yo. Patas yo ra no onseselek so agew, ta sikato yay oras na impanaynan yod Egipto.

⁶

⁷ "Ilambung yo so karni tan akan yo ed samay pasen a panangigalangan; diad ontombuk a kabwasan sempet ki la.

⁸ "Diad ontombuk ya anem agew nepeg a mangan kayoy tinapay ya anggapoy libadura, tan diad kumapiton agew mantitipon kayon mangigalang ed Katawan a Dios yo, tan ag kayo mankikimey ed satan ya agew.

⁹ "Mambilang kayo na pitoran simba manlapud pangigapo yo na panagani,

¹⁰ insan yo silibraan so Pista na Panagani a pamagalang yod Katawan a Dios yo, diad panamegley na pangisaklang yod sikato na bagat a manlapud mabolus a linawa onung ed karakel na ani ya impamindision tod sikayo.

¹¹ Manliket kayo ed arap na Katawan a pati saray anak yo, saray aripen yo, tan saray Levita, saray sangkaili, saray olila, tan saray balon bibii a manaayam ed saray baley yo. Gawa yo yad samay pasen a panangigalangan.

¹² Pampelengan yon onuren ira yan ganggan; ag yo lilingwanan ya aripen kayo met nen saman ed Egipto.

¹³ Kayari yon nailik iray amin a trigo yo tan napespes iray ubas yo, silibraan yo na pitoran agew so Pista na saray Abung-abung.

¹⁴ Manliket kayo a pati saray anak yo, saray aripen yo, tan saray Levita, saray sangkaili, saray olila, tan saray balon bibii a manaayam ed saray baley yo.

¹⁵ Pagalangan yo so Katawan a Dios yo diad panamegley na pansilibra yon pitoy agew diad samay pasen diad sakey a pasen a panangigalangan. Manliket kayo, ta binindisionan na Katawan so panagani yo tan say kimey yo.

¹⁶ Amin da ray lalakin totood bansa yo et nepeg ya onla ran mamitlod sakey taon ed samay pasen a panangigalangan ta igalang day Katawan: no Paskua, no Pista na Panagani, tan no Pista na saray Abung-abung. Balang sakey a laki et nepeg a mangawit na nayarian ton iter a rigalo

¹⁷ onung ed karakel na saray bindision ya inter ed sikato na Katawan a Dios yo.

¹⁸ Manoro kayo na saray huis tan saray arum ya opisyal ed kapag baley ya iter ed sikayo na Katawan a Dios yo. Sarayan totoo et nepeg ya ipakurang day katonungan ed saray totoo.

¹⁹ Ag nepeg a pikeweten da so katonungan o walay lalabien da ed panagsintinsia ra; ag ira nepeg a mangawat na pasoksok, ta bulagen to ray anggan makabat tan matonung a totoo, et natanggoyur la ran mamikewet na katonungan.

²⁰ Lawas a maptek tan matonung kayo komun, pian napanayaman yoy dalin ya iiter ed sikayo na Katawan a Dios yo tan makapansiansia kayon manayam diman.

²¹ No manggawa kayo na altar a para Katawan a Dios yo, ag yo iyaabay so kiew a tanda na diosan Asera.

²² Tan ag kayo mangililira na baton lusek a pangigalangan ed talintaoy dios; kabosul ya na Katawan.

17

¹ "Ag kayo mangibabagat ed Katawan a Dios yo na baka odino karniron walay deral na laman; kabosul ya na Katawan.

² "No walay nadngelan yon balita a diad sakey ed saray baley yo et walay laki odino bii a nankasalanan ed Katawan a Dios yo tan dineral toy impisipanan na Katawan

³ "diad panamegley na pangigagalang tan panlilingkur tod saray diriyos odino diad agew odino diad bulan odino diad saray bitewen, a sumlang ed ganggan na Katawan,

⁴ "osisa yon maung no kasi et tua o andi. No talagan tua ya agawa yan kaogsan ed Israel,

⁵ "ipaway yod baley itan a too tan tupak yo ya anggad ag to ipatey.

⁶ "Balet nayari labat a pateyen no walay duara odino dakel nen say duara a mantasin sumpad sikato; ag nepeg a pateyen no saksakey so mantasi.

⁷ "Saray tasi so ononan mangitupak na saray bato ed samay toon nankasalanan, insan ontombuk iray arum; diad onya napaandipat yo la yan kaogsan.

⁸ "Nayarin wala ray kason mairap a tuloy a sintinsiaan na saray huis ed baley, a singa bilang saray kason nipaakar ed saray kayaryan, odino impakasugat ed laman, odino ed impamatey ed too. No onyay nagawa, laka yod samay pasen a panangigalangan a pinili na Katawan a Dios yo,

⁹ "tan iparontal yoy kaso yo ed saray Levitan papari tan diad huis ya akayorung ed saman a panaon, ta sikaray panintinsia yo.

¹⁰ Iter day sintinsia ra, tan no antoy imbaga ran gawaen yo sikatoy nepeg a tombuken yo.

¹¹ Awat yo so sintinsia ra tan apiager yon sumpalen so pagagawa ra.

¹² Nepeg a pateyen so siopaman a manumlang ed sintinsia na huis odino pari a manlilingkur ed saman a panaon; diad onya napaandipat yo yan kaogsan ed Israel.

¹³ Narengel ed satan na balang sakey a too so agawa et ontakot ira, tan anggapo lay makatepel a manggawa na ontan nin kaogsan.

¹⁴ Kayari yon nakayaryan so dalin ya iter ed sikayo na Katawan a Dios yo tan manaayam kayo lad man, pampapaknaan yod stan a mankaukolan kayo na sakey ya ari a singa saray arum a bansan walad kaliber-liber yo.

¹⁵ Nepeg a say pilien a manari et say toon pinili na Katawan a Dios yo. Nakaukolan a sikatoy sakey ed saray totoo yo; ag yo pagmamaliwen ya ari yo so sangkaili.

¹⁶ Say ari ag nepeg ya amayamay iray kabayo ton para saray sondalo to, tan ag to nepeg ya ibaki ray totoo to a manaliw ed Egipto na saray kabayo, ta imbaga la na Katawan ya ag lan balut ompawil diman iray totoo to.

¹⁷ Say ari ag nepeg ya amayamay iray asawa to, ta sikato yay makasengeg na iyarawi tod Katawan; nepeg ya ag mampayaman na pilak tan balituk.

¹⁸ No nagmaliw lan ari, nepeg a nawalaan na libro na saray ganggan tan saray bangat na Dios a kinopia ed libron isisinup da ray Levitan pari.

¹⁹ Nepeg a sayan libro et wala lawas ed abay to tan basaen ton naynay legan a mabilay, pian naaralan toy ontakot ed Katawan tan matoor ton naonur iray amin a ganggan a logan to.

²⁰ Diad onya ag to isipen ya atagey niy kipapasen to nen saray kapara ton Israelita tan niyarawi ed panumlang tod saray ganggan na Katawan diad anggan anton polaing. Diad ontan ombayag so panoley tod Israel, tan kapag onsalat a manoley et manlapud boleg to.

18

¹ "Saray Levitan pari a kabyangan ira na tribu nen Levi et anggapoy betang dad dalin na Israel; ingen say panlapwan na pambilay da et saray bagat tan saray rigalon inter ed Katawan.

² "Ag ira nepeg a mangayaryan na dalin, aliwan singa saray arum a tribu; say betang da et say kanepegan dan pari na Katawan, onung na insipan na Katawan.

³ "Kapag nibagat so baka odino karniro, nepeg ya iter ed saray papari iray takeb, saray aping, tan say eges.

⁴ "Sikaray nepeg a mangawat na ononan apag ed trigo, alak, larak na oliba, tan lanan abel.

⁵ "Diad amin da ray tribu yo say Katawan pinili to ray kabyangay tribu nen Levi a manlingkur irad sikato a papari ya anggad angga.

⁶ "Anggan siopan Levita a taga inerman a baley ed Israel et nayarian toy onla ed samay pasen a panangigalangan

⁷ "tan nayarin manlingkur diman a sakey a pari na Katawan a Dios to, a singa saray arum a Levitan manlilingkur lad man.

⁸ "Sikatoy nepeg a mangawat na kakanen a singa karakel na aawaten da ray arum a papari; tan nayari ton isinup so antokaman ya ipawit ed sikato na saray kabyangay pamilya to.

⁹ "No onsabi kayod dalin ya iiter ed sikayo na Katawan a Dios yo, ag yo aaligen iray makapaingongot ya ogali na saray bansan wadman la.

¹⁰ Ag yo ibabagat ed apoy a walad tapew na altar iray anak yo, tan ag yo aabuloyan a saray totoo yo et mamparles ira, tan ag yo aaligen so gagawaen da ray managbuyon, mananem, manangipanon ed maoges ya ispiritu,

¹¹ manangikanay anting-anting, manangipanon ed ispiritu da ray inaatey, managsalamangka, tan saray managanito.

¹² Say Katawan a Dios yo et kabosul to ray totoon manusumpal na sarayan makapaingongot a gawgawa, tan sikato yay makasengeg a pataynanen to ray totoo ed sarayan bansa legan yon mankukurang.

¹³ Ag kayo manggagaway pakabalawan ed sikayo ed arap na Katawan.

¹⁴ Insan inkuanen Moises, Diad dalin a ngalngali yo la panayaman, saray totood man et oonuren day simbawa na saray managparles tan saray managbuyon, balet say Katawan a Dios yo et ag to kayo abuloyan a manggawa na onya.

¹⁵ Ingen, mangibaki ed sikayo na sakey a propita a singa siak a manlapud saray totoo yo, tan nepeg ya onuren yo.

¹⁶ Diad samay agew a nantitipon kayod Palandey na Sinai, kinerew yon ag yo la dengelen a mansalita lamet so Katawan o nengnengen yo so mandarlang a kiwawala to, ta antakot kayo ompan ompatey kayo.

¹⁷ Kanyan say Katawan kuantod siak, Maung so kekerewen da.

¹⁸ Mangibaki ak ed sikara na sakey a propita a singa sika a manlapud saray totoo ra; salitaen kod sikatoy ibaga to tan ibaga tod saray totoo iray amin ya iganggan ko.

¹⁹ Sikatoy mansalita ed ngaran ko, tan dusaen koy siopaman ya ag mangonur ed sikato.

²⁰ Balet nepeg ya ompatey so siopaman a propitan mansalitad ngaran ko anta ag ko ingganggan a mansalita, odino siopaman a propitan mansalita ed ngaran na saray diriyos.

²¹ Nayarin mankelaw kayo no panoy pakapangibaga yo ya ag nanlapud Katawan so salita na sakey a propita.

²² No mansalitad ngaran na Katawan so sakey a propita balet ag ontuay salitaen to, ag nanlapud Katawan so salita to. Satan a propita et nansalita ed pakayari ton dili, kanyan nepeg ya ag yo takotan.

19

¹ "Kayarin pateyen na Katawan a Dios yo iray totoon say dalin da et iiter tod sikayo tan no nala yo la ray siudad da tan saray kaabungan da tan panaayaman yo la ra,

² "pankatlo yo so dalin. Kapag kakatlo na dalin nepeg a walay sakey a siudad a mainomay a laen. No walad satan so toon makapatey na siopaman, nayarian toy onsalimbeng ed sakey ed sarayan siudad.

³

⁴ "No walay toon makapatey ya ag to ginagala tan ag to kalaban nayarian toy ombatik ed sakey ed sarayan siudad et niyarawid kaatapan.

⁵ "Bilbilang, walay duaran toon linman mambatang na kiew ed takel, et diad pambabatang na samay sakey et naoyus imay oloy wasay to tan nakna to may sakey, insan inatey, nayarian toy ombatik ed sakey ed saramay siudad tan niyarawid kaatapan.

⁶ "No saksakey so siudad tan arawdawin tuloy a batikan, nayarin say kanayon a makaoley ya ombawid samay impakapatey naabot to may toon akapatey et, diad petang na olo to, napatey to so toon anggapoy kasalanan. Say katwaan to ag nepeg a pateyen imay toon akapatey ta ag to ginagalan pinatey so toon ag to kalaban.

⁷ "Sikato yay makasengeg ya igaganggan ta kayon mangibiig na taloran siudad.

⁸ "No apaawang la na Katawan a Dios yo so dalin yo, onung na insipan tod saray lalaki yo, tan niiter to lay amin a dalin ya insipan to,

⁹ "mamili kayo nid satan na taloran siudad. (Iter tod sikayo yan dalin no sumpalen yoy amin ya igaganggan kod sikayo diad sayan agew tan no aroen yo so Katawan tan mambilay kayo onung ed saray bangat to.)

¹⁰ Gawa yoy onya pian ag ompatey iray anggapoy kasalanan. Diad ontan ag kayo mankasalanan ta ag yo ra pateyen ed dalin ya iiter ed sikayo na Katawan.

¹¹ Balet antoy gawaen no bilang say sakey a too et ginagala ton pinatey so kalaban to, insan ombatik ya onsalimbeng ed sakey ed sarayan siudad?

¹² Saray pangulo na baley to et paawit da, insan da ipalima ed kanayon a makaoley ya ombawid samay impamatey, ta pateyen to.

¹³ Ag yo kakasian. Paandipat yo yan managpatey na too, pian maung lawas so kipapasen yo.

¹⁴ Ag yo iyaalis so ketegan na kaabay yo, ketegan ya abaybayag lan nipasen ed dalin ya iiter ed sikayo na Katawan a Dios yo.

¹⁵ Kulang so sakey a tasi a mamaneknek a nankasalanan so toon naakusa; duara odino taloran tasi so nakaukolan.

¹⁶ No say sakey a too et iyakusa tod sakey a too so kasalanan ya ag to ginawa,

¹⁷ nepeg ya onla ran dua ed samay pasen a panangigalangan, tan sintinsiaan ira na saray pari tan saray huis a peles dan manlilingkur.

¹⁸ Salaysayen iran maung na saray huis; no nalmoan ya aliwan tua may iyaakusa na sakey a too ed kapara ton Israelita,

¹⁹ nepeg ya awaten toy dusan awaten komun na samay naakusa. Diad onya napaandipat yo la yan kaogsan.

²⁰ Narengelan ed satan na amin a totoo so agawa; ontakot ira, tan anggapo lad satan so manggawa na onyan a kaogsan.

²¹ Diad ontan a nagawa ag kayo mangiiter na panangasi; no antoy inutang sikatoy ibayar; say bilay bayaran na bilay; say mata bayaran na mata; say ngipen bayaran na ngipen; say lima bayaran na lima; tan say sali bayaran na sali.

20

¹ "No ompaway kayon mibakal ed saray kalaban yo et nanengneng yo ray karwahi tan saray kabayo tan saray sondalon amayamay ni ra nen say sikayo, ag yo ra tatakotan. Say Katawan a Dios yo ya angipaway ed sikayo ed Egipto et kaolup yo.

² "Kasakbayan a mibakal kayo, onlad arap na saray sondalo so sakey a pari tan ikuantod sikara,

³ "Lalaki na Israel, dengel kayo! Natad sayan agew onla kayon mibakal. Ag kayo ontatakot ed saray kalaban yo, ag yo papakapoyey linawa yo, tan ag kayo natataranta.

⁴ "Say Katawan a Dios et olupen to kayo, tan panaloen to kayo.

⁵ "Insan saray opisyal ikuandad saray totoo, Wala diad sikayo so kapkapangipaalagey toy abung to ya ag to ni abasaan? No wala, nepeg ya onsempet. Ta no napatey ed bakal, sananey a too so mampabasa.

⁶ "Wala diad sikayo so kakkapantanem toy kaubasan to tan ag nin balut akapamborbor na bunga to? No wala, nepeg ya onsempet. Ta no napatey ed bakal, sananey so manliket ed bungay kaubasan to.

⁷ "Wala diad sikayo so akisipanan a mikasal? No wala, nepeg ya onsempet. Ta no napatey ed bakal, sananey a laki so mangikasal na biin akisipanan to.

⁸ "Saray opisyal ikuanda met ni ed saray totoo, Wala diad sikayo so apatalaw toy linawa to tan antakot? No wala, nepeg ya onsempet. Ta no ag onsempet, patalawen to met so linawa da ray arum.

⁹ "No asumpal lan nansalita ed saray sondalo ira may opisyal, nepeg a pilien iray mangipangulod saray olup na sondalo.

¹⁰ No onla kayon ondogpa ed sakey a siudad, itdan yon onona iray totoo to na pankanawnawa ya onsuko ra.

¹¹ No lokasan da ray puirta ta onsuko la ra, magmaliw iran aripen yo tan pasoot yo ran panlingkuren ed sikayo.

¹² Balet no saray totood satan a siudad et ag ira onsuko, no ag ingen onlaban ira, liktub yo na sondalo.

¹³ Insan no say Katawan a Dios yo et iyabuloy ton nadakep yo so siudad, patey yoy amin a lalaki ed satan a siudad.

¹⁴ Balet nayarin alaen yo a para sikayo iray bibii, saray ogogaw, saray ayayep da, tan saray arum a bengatlan walad siudad. Nayari yon ikana iray amin a kayaryan na saray kalaban yo. Say Katawan et inter to rad sikayo.

¹⁵ Ontan so nepeg a gawaen yo ed saray siudad ya arawid dalin a panayaman yo.

¹⁶ Balet no adakep yo la ray siudad ya iiter ed sikayo na Katawan a Dios yo, patey yoy balang sakey a too.

¹⁷ Sigput yon pateyen iray amin a totoo: saray Heteo, saray Amorreo, saray Cananeo, saray Pereseo, saray Heveo, tan saray Jebuseo, onung na ingganggan ed sikayo na Katawan.

¹⁸ Patey yo ra, pian ag da kayo tanggoyuren a mankasalanan ed Katawan diad pambangat dad sikayon manggawa na saray amin a makapaingongot a gagawaen da diad panangigalang dad saray diriyos da.

¹⁹ No manadakep kayo na siudad, ag yo babatangen iray kakiewan to, anggaman a mabaybayag so pibakal yo. Akan yoy bunga ra, balet ag yo ra dederalen; ag yo ra kalaban.

²⁰ Nayarin batangen yo ray kiew ya ag naakay bunga ra tan ikana yo rad iloob yod siudad anggad pakadakep yo.

21

¹ "Anto so gawaen no wala bilang so sakey a toon arumog a pinatey ed alog, diad dalin ya iter ed sikayo na Katawan a Dios yo, tan ag yo amta no siopay amatey ed sikato?

² "Nepeg a laen na saray pangulo tan saray huis yo, ta sukaten da so kaarawi manlapud pasen ya akarumogan ed sikato ya anggad saray asingger a baley.

³ "Insan saray pangulo na baley a sankaasinggeran ed akarumogan na bangkay et nepeg a mamili ra na sakey a kilaw na baka ya ag nin balut nisinta.

⁴ "Iyakar da ed sakey a pasen ya asingger ed kolus ya ag balut nanaekatan, tan ag nin balut abaka o ataneman so dalin a kawalaan to, insan dad man balekneen so beklew to may baka.

⁵ "Onla met irad may Levitan papari, lapud sikaray manintinsia ed kason walay apasakitan odino adesiang. Say Katawan a Dios yo et pinili to ran manlingkur ed sikato tan mamindision ed ngaran to.

⁶ "Insan amin da ray pangulo na baley a sankaasinggeran ed samay pasen ya akalmoan ed samay bangkay na toon pinatey orasan dad tapew na samay baka so kalimaan da

⁷ "tan ikuanda, Ag mi pinatey iman a too tan ag mi amta no siopay amatey ed sikato.

⁸ "Katawan pirdonam pa ray totoon Israelita ya impaway mod Egipto. Pirdona mo kami pa, tan ag mo kami tetelen ed impamatey ed toon anggapoy kasalanan.

⁹ "Kanyan diad panumpal yod pagagawa na Katawan, ag kayo napakasalanan ed sayan impamatey.

¹⁰ No say Katawan a Dios yo et panaloen to kayod bakal tan wala ray totoon nadakep yo,

¹¹ nayarin makanengneng kayo na sakey a magangganan bii a labay yon asawaen.

¹² Isempet yod abung yo a diman mankiskis na olo to, mankoko,

¹³ tan mampales. Nepeg a manayam ed abung yo tan ermenan ton sakey bulan iray ateng to; kayari to ya, nayari yo lan asawaen.

¹⁴ No diad idalan na panaon et ag yo la labay, nepeg ya ibolus yo la. Bangta pinasoot yon akiakdulan, ag yo nayarin ipasen a sakey ya aripen insan yo ilako.

¹⁵ Anto so gawaen no wala bilang so sakey a lakin duaray asawa to tan naanakan to ran dua na lalaki, balet say pangulowan et aliwan anak na biin labalabay to?

¹⁶ No sayan too et apagen to lad saray anak to so kayaryan to, ag to nepeg a palabian so anak ton laki ed samay labalabay ton asawa diad pangiter to na betang na samay pangulowan ya anak ton laki.

¹⁷ Nepeg ya iter tod samay pangulowan ya anak ton laki so duaran betang na saray kayaryan to, anggaman a sikatoy anak na samay ag to labalabay ya asawa. Nepeg a sayan too birbiren toy pangulowan ya anak ton laki tan iter tod sikato so apag a kanepegan ya awaten to.

¹⁸ Antoy gawaen no bilang ta walay sakey a too a walay sakey ya anak ton laki ya anawet so olo to tan bangar, sakey ya anak ya ag ontoluk ed saray ateng to, anggaman a dudusaen da?

¹⁹ Saray ateng to et nepeg ya iyarap dad saray pangulo na baley a panaayaman to ta pasalaysay da.

²⁰ Saramay ateng ikuandad saramay pangulo, Anawet so olo na sayan anak mi, bangar, tan ag ontoluk ed sikami; mandadarak labat na kuarta tan buanges.

²¹ Insan saray totood siudad tupaken da may anak ya anggad ag to ipatey, et diad ontan napaandi yan kaogsan. Narengelan na amin a totood Israel so agawa et ontakot ira.

²² No pinatey so sakey a too lapud ginawa ton ambelat a kasalanan tan imbitin ed sakey a kiew so bangkay to

²³ ag nepeg a natilak diman a sanlabi. Nepeg a nipompon ed saman met lamlamang ya agew, lapud say bangkay ya akabitin ed kiew et ipelag tod dalin so samba na Dios. Ipompon yoy bangkay, pian ag yo narotakan so dalin ya iiter ed sikayo na Katawan a Dios yo.

22

¹ "No nanengneng yoy nablus a baka odino karniro na kapara yon Israelita, ag yo papaolyan; erel yo tan ipawil yod sikato.

² "Balet no arawdawiy panaayaman na makankayaryan odino ag yo amta no siopa, isempet yo lad abung yo. No onsabin mananap so makankayaryan, iter yod sikato.

³ "Ontan met so gawaen yod nalmo yon asno, kawes, odino antokaman a bengatla ya abalang na kapara yon Israelita.

⁴ "No niparokul so asno na kapara yon Israelita odino say baka to, ag yo papaolyan, no ag ingen tulongan yon mangipaalagey.

⁵ "Saray bibii et ag ira nepeg a mansolung na kawes da ray lalaki, tan saray lalaki et ag ira nepeg a mansolung na kawes da ray bibii; kabosul na Dios iray totoon manggawa na ontan.

⁶ "No makarumog kayo na obung na manok ya atap ed tagey na kiew odino diad dalin, tan akaekem so ina ed saray iknol to odino diad saray sibong to, ag yo nepeg ya alaen imay ina.

⁷ "Nayarin alaen yo ra may sibong, balet ibolus yo may ina, pian andokey so bilay yo tan maaligwas kayo.

⁸ "No mamaalagey kayoy balon abung, kargaan yon kargaan na barandilyas iray gilig na atep to. Diad satan anggapo lay kasalanan yo no walay napelag tan ompatey.

⁹ "Ag kayo mantatanem na arum a tanaman ed alog ya angitaneman yod saray ubas yo; no taneman yo na arum a tanaman, ag yo la nikana so bunga na saray ubas tan say bunga na saray arum ya intanem yo.

¹⁰ Ag yo pansisipolen a pambaka so baka tan asno.

¹¹ Ag yo isosolung so kawes ya inabel ed lana tan linen.

¹² Daitan yo na palagoygoy so apatiran suyok na kawes yo.

¹³ Antoy gawaen no bilang ta walay sakey a laki ya angasawa insan ag abayag na impanamung da et ag to la labay,

¹⁴ kanyan igawaan to na kasalanan ya aliwa lan birhin nen inasawa to?

¹⁵ No onyay nagawa, saray ateng to may bii et nepeg ya alaen day adalaan ya oles a dinokolan da kayariy impankasal da, insan da iyakar ed korti tan ipanengneng dad man ed saray pangulo na baley.

¹⁶ Say ama na bii ikuantod sikara, Sayan anak ko et impaasawak ed sayan laki, et natan ag to la labay.

¹⁷ Inggawaan to na kasalanan, ta ibabaga ton aliwa lan birhin nen inasawa to. Balet saya so pakapatnagan a birhin so anak ko nen inasawa to; nengneng yo yay adalaan ya oles a dinokolan da kayariy impankasal da!

¹⁸ Diad satan saramay pangulo na baley alaen da may asawan laki tan sipsiplatan da.

¹⁹ Pambayaren da met na sanlasus a kuartan pilak tan iter da rad samay ama na bii, ta samay asawan laki et impelag tod kababaingan so sakey a biin Israelita. Sakey ni, mansiansian asawa to may bii, tan ag ton balut nisiyan legan ton mambilay.

²⁰ Balet no tua may dalem tan anggapoy pakapatnagan a birhin imay bii,

²¹ iyakar dad satan ed lolooban na abung nen ama to, tan diman tupaken na saray lalakid siudad ya anggad ag to ipatey. Samay bii et nanggawa na makapabaing ed saray totoo tayo diad impiakdul tod laki kasakbayan na impikasal to, legan a manaayam ni ed abung nen ama to. Diad ontan, napaandipat yo yan kaogsan.

²² No narel a miaakdul so sakey a laki ed asawa na sakey a laki, nepeg a pateyen ira tan a duan nanakdul. Diad ontan, napaandipat yo yan kaogsan.

²³ No narel a miaakdul so sakey a laki ed sakey a biin akisipanan lan miasawad sananey a laki,

²⁴ nepeg ya iyakar yo ra ed paway na baley tan diman yo ra tupaken ya anggad ag da ipatey. Samay bii et nepeg a pateyen lapud ag inmeyag a kinmerew na tulong, anggaman a walad baley. Samay laki et nepeg a pateyen lapud akiakdul ed biin akisipanan lan miasawa. Diad ontan, napaandipat yo yan kaogsan.

²⁵ No walay sakey a lakin pinasoot tod alog so sakey a biin akisipanan lan miasawad sananey a laki, nepeg a pateyen imay lakin amasoot;

²⁶ anggapoy nepeg a gawaen ed samay bii, lapud ag nanggaway kasalanan a patey so kanepegan a dusa to. Saya et kapara toy kaso na sakey a lakin angabil na sananey a laki tan pinatey to.

²⁷ Samay laki et pinasoot tod alog so biin akisipanan lan miasawa, et anggan inmeyag a kinmerew na tulong imay bii, anggapoy makatulong ed sikato.

²⁸ No walay sakey a lakin narel ya amasoot na sakey a marikit ya ag ni akisipanan a miasawa,

²⁹ nepeg a mambayar ed ama na samay bii na limamplon kuartan pilak, tan samay bii et magmaliw ya asawa to, lapud pinasoot ton akiakdulan. Ag ton balut nisiyan legan ton mambilay.

³⁰ Sebel ed siopaman a laki so pangipaabeba na kagalangan na ama to diad pangakdul tod siopaman ya asawa na ama to.

23

¹ "Ag nayarin mikasakey ed saray totoo na Katawan so siopaman a lakin kapon odino apotut so kayaryan to.

² "Ag nayarin mikasakey ed saray totoo na Katawan so siopaman ya anak ed paway odino saray anak tan apo to ya anggad kumaplon kailalakan.

³ "Ag nayarin mikasakey ed saray totoo na Katawan so siopaman ya Ammonita odino Moabita odino siopaman a kabyangan na boleg da ya anggad kumaplon kailalakan.

⁴ "Ag da kayo initdan na kanen tan inomen nen mankukurang kayo a nanlapud Egipto, tan inupaan day Balaam a lakin anak nen Beor, tan taga siudad na Petor na Mesopotamia, ya isamba to kayo.

⁵ "Balet say Katawan a Dios yo et ag to dinengel si Balaam; impagmaliw to ni ingen a bindision imay samba, lapud inaro to kayo.

⁶ "Legan a sakey kayon bansa, ag yon balut tutulongan ira man a bansa o papaaligwasen ira.

⁷ "Ag yo bobosulen iray Edomita, ta kakanayon yo ra. Ag yo met bobosulen iray Egipsio, ta nanayam kayod man nen saman ed dalin da.

⁸ "Saray kabyangay boleg da ed kumatlon kailalakan tan mantombuk iran kailalakan et nayarin mikasakey ed saray totoo na Katawan.

⁹ "No wala kayo ed kampo no panaoy bakal, paliisan yoy antokaman a makadotak ed sikayo onung ed ganggan.

¹⁰ No nagmaliw a marotak a sakey a laki lapud nampaterak ed kogip tod labi, nepeg ya ompaway ed kampo tan manayam ed paway.

¹¹ No onlalabi la nepeg a manames, tan diad kaselek na agew nayarian to lay ompawil ed kampo.

¹² Nakaukolan a walay pasen a panagbawasan ed paway na kampo.

¹³ Say sakey ed saray awit yon kagawaan et say baston a kiew, pian no mambawas kayo makakotkot kayoy abut insan natabunan yo so bawas yo.

¹⁴ Pansiansia yon malinis onung ed ganggan so kampo yo, ta manaayam ed kampo yo so Katawan a Dios yo a mangyagel ed sikayo tan mangiter ed sikayo na pananalo ed saray kalaban yo. Ag kayo manggagawa na antokaman a mabanday a pangibenegan na Katawan ed sikayo.

¹⁵ No imbatikan na sakey ya aripen so amo to tan linmad sikayon paiyagel, ag yo papapawilen.

¹⁶ Nayarin manayam ed anggan dinan a baley a pilien to ed saray baley yo, tan nepeg ya ag yo pairapen.

¹⁷ Sebel ed siopaman ya Israelita, bii may laki, so magmaliw a babayaran a too ed timplo.

¹⁸ Ontan met, say kuartan nalmoan ed onyan marotak a kagagawa et ag nayarin iyakar ya ibagat ed Timplo na Katawan a Dios yo diad panumpal na sakey a sinambaan a sipan. Sebel so onya, lapud kabosul na Katawan iray marotak a babayaran a totoo ed Timplo.

¹⁹ No mangipabayes kayo na kuarta odino kakanen odino antokaman ed kapara yon Israelita, ag yo papaabangan.

²⁰ Nayarin paabangan yo so ipautang yo ed siopaman a sangkaili, balet aleg ed kapara yon Israelita. Tombuk yo yan ganggan, et say Katawan a Dios yo bindisionan toy antokaman a gawaen yo no wala kayo lad dalin a panayaman yo.

²¹ No manggawa kayoy sinambaan a sipan ed Katawan a Dios yo, sumpal yon sumpal; say Katawan anapen tod sikayo so insipan yo, tan kasalanan yo no ag yo iter so insipan yo.

²² Aliwan kasalanan so ag pansipan a sinambaan ed Katawan

²³ balet no mabolbolus kayon mangisipan, sumpal yon andi-saew.

²⁴ No manakar kayod basbas na kaubasan na siopaman, nayarian yoy mangan na labalabay yon bunga, balet ag nepeg a mangikarga kayod pananginan insan yo awiten.

²⁵ No manakar kayod basbas na katrigowan na siopaman, nayarian yoy mangan na anggan anton karakel na naalay lima yo, balet ag nepeg a manggapas kayo.

24

¹ "Antoy gawaen no wala bilang so sakey a lakin mangasawa, insan ag mabayag et ag to la labay so asawa to, lapud walay mabanday a nalmo tod sikato? Kanyan manggawa na saray kasulatan na pansiyan, iter to rad sikato, tan pataynanen to lad abung to.

² "Insan bilang miasawad sananey a laki imay biin insian,

³ "tan ag mabayag samay laki ag to la labay, kanyan manggawa na saray kasulatan na pansiyan, iter to rad sikato, tan pataynanen to lad abung to. Odino bilang ompatey imay kumadwan asawa to.

⁴ "Diad ontan samay asawan inmona ag to nepeg ya asawaen lamet imay bii; nepeg ton ipasen a marotak la. No asawaen to lamet, manggawa na makapaingungot ed Katawan. Ag kayo nepeg a manggawa na onyan kasalanan no wala kayo lad dalin ya iiter ed sikayo na Katawan a Dios yo.

⁵ "No kakkapangkasal na sakey a laki, ag nepeg a pansondaloen o pankimeyen na antokaman a pananglingkur ed baley; nepeg ya ag pankimeyen a sakey taon, pian makapanayam ed abung tan napaliket toy asawa to.

⁶ "No mangipabayes kayoy bengatla ed sakey a too, ag nepeg ya alaen yon kaletan so gilingan na trigo to. Ta no alaen yo naandid pamilya to so ikakana ran pangiparaan na kanen da pian mambilay ira.

⁷ "Nepeg a pateyen so siopaman a mangalay kapara ton Israelita tan aripenen to odino ilako ton sakey ya aripen. Diad ontan, napaandipat yo yan kaogsan.

⁸ "No akating kayo, apiapiger yon tombuken so ibagad sikayo na Levitan pari; sumpal yo ray bilin ya intilak kod sikara.

⁹ "Nunot yoy ginawa na Katawan a Dios yo ed kinen Miriam nen oonla kayo dian nanlapud Egipto.

¹⁰ No mangipabayes kayo na antokaman ed sakey a too, ag kayo onloloob ed abung ton mangala na kawes ya iter ton kaletan ed sikayo;

¹¹ manalagar kayod paway na abung tan paolyan yon ondago a mangiter ed sikayo.

¹² No mairap so bilay na pautangen yo, ag yo isisinup no labi itan a kawes;

¹³ ipawil yod sikato no nasabiy labi, pian walay idokul ton onogip. Diad satan misalsalamat, tan makaliket ed sikayo so Katawan a Dios yo.

¹⁴ Ag yo sasaolen so mairap-bilay tan walad pankaukolan a miuupan aripen, kapara yo man ya Israelita odino sangkailin manaayam ed sakey ed saray baley yo.

¹⁵ Kapag nasabiy ngarem kasakbayan ya onselek so agew bayaran yoy sanagew ya impankimey to; nakaukolan toy kuarta tan iilaloan ton awaten. No ag yo bayaran, ontawag ed Katawan na sumpad sikayo, et sikayoy mankasalanan.

¹⁶ Ag nepeg a pateyen iray ateng lapud kasalanan a ginawa na saray anak da, tan ag nepeg a pateyen iray anak lapud saray kasalanan a ginawa na saray ateng da; say sakey a too nepeg a pateyen lapud kasalanan a sikaton diliy nanggawa.

¹⁷ Ag yo pipikeweten so katunongan da ray sangkaili tan saray olila; tan ag yo aalaen so kawes na biin balo a kaletan na utang tod sikayo.

¹⁸ Ag yo lilingwanan ya aripen kayo nen saman ed Egipto tan imbolus kayo na Katawan a Dios yo; sikayo yay makasengeg na impangiteran kod sikayo yan ganggan.

¹⁹ No manggapas kayod alog yo et alingwanan yoy arum a ginapas yo, ag yo la papawilen ya alaen; nepeg ya itilak la rad man a para saray sangkaili, saray olila, tan saray bibiin balo, pian say Katawan a Dios yo et bindisionan toy amin a gawaen yo.

²⁰ No mamborbor kayod kaolibaan yo, ag yo la papawilen a tortoren so atilak; nepeg a betang la ra na saray sangkaili, saray olila, tan saray bibiin balo.

²¹ No mamborbor kayod kaubasan yo; ag yo papawilen a tortoren iray atilak; nepeg a betang la ra na saray sangkaili, saray ilila, tan saray bibiin balo.

²² Ag yo lilingwanan ya aripen kayo nen saman ed Egipto; sikato yay makasengeg na impangiteran kod sikayo yan ganggan.

25

¹ "Anto so gawaen no wala bilang so duaran Israelita ya onarap irad korti lapud kolkolan da, et say sakey nasintinsiaan a nankasalanan tan say sakey andi?

² "No asintinsiaan a leweten imay nankasalanan, patikleben na huis tan palewet to. Say karakel na lewet ya ondapod sikato et onsimbang ed belat na ginawa ton kasalanan.

³ "Nayarin nalewet na anggad apataplo, balet ag la onsoluk ed sayan bilang; no onsoluk nid saya naekalan lay galang ed arap na karaklan.

⁴ "Ag yo babalongosan so baka no paniiliken yo.

⁵ "No manaayam ed saksakey a solar so sanagin lalaki, insan inatey so sakey ed sikara, tan anggapoy lakin anak to, samay abalo ag nepeg a miasawa ed siopaman ya aliwan kabyangan na pamilya; kanepegan na lakin agi na samay inatey ya asawaen to may abalo.

⁶ "Say pangulowan ya anak dan laki et nipasen ya anak na samay inatey, pian mansiansian kabyangan na Israel so pamilya to.

⁷ "Balet no say lakin agi na samay inatey et ag to labay ya asawaen imay ayro ton abalo, onlan omparontal imay bii ed saray pangulo na baley tan ikuanto, Say bayaw kon laki et ag to labay a gawaen so kanepegan to; ag to labay ya itdan so agi to na sakey a kabyangan na boleg na saray totood Israel.

⁸ "Diad satan saray pangulo na baley paawit da may laki ta pitongtongan da. No ag to ni labay ya asawaen imay ayro to,

⁹ "samay balo et onsingger ed sikato a sankanengneng na saramay pangulo na baley, alaen toy sakey ed saray sandalya to may bayaw to, lukdaan tod lupa, tan ikuanto, Onya so nagawa ed lakin ag to itdan na sakey a kabyangan na boleg so agi ton inatey.

¹⁰ Say pamilya to may laki et natawag ed Israel a pamilya na laki a naoyusay sandalya.

¹¹ No manlalaban so duaran lalaki et say asawa na sakey ed sikara et tulongan toy asawa to diad panggemes tod paltak na samay sakey,

¹² ag yo kakasian itan a bii; potut yoy lima to.

¹³ Ag kayo mansasaol no mangikana kayoy simbangan tan sukatan.

¹⁴

¹⁵ Ikana yo so tua tan dugan simbangan tan sukatan, pian andokey so pambilay yo ed dalin ya iiter ed sikayo na Katawan a Dios yo.

¹⁶ Kabosul na Katawan iray totoon masaol.

¹⁷ Nunot yo may ginawad sikayo na saray Amalecita nen oonla kayo dian nanlapud Egipto.

¹⁸ Anggapoy takot dad Dios, kanyan dinogpaan da kayod beneg nen naknaksawan tan napupunaw kayo la; pinapatey da ra may makapkapoy lan walad bandad onur.

¹⁹ Ontan sirin, no niiter lad sikayo na Katawan a Dios yo so dalin tan inyarawi to kayo lad kaatapan ya iter na saray kalaban yod kaliber-liber yo, patey yo ray amin a Amalecita, pian anggapo lay makanunot ed sikara. Ag yo ya lilingoanan!

26

¹ "No alooban yo lay dalin ya iiter ed sikayo na Katawan a Dios yo, tan panaayaman yo la,

² "balang sakey ed sikayo et nepeg a mangikargad sakey a baskit na onona ran naani yo a bunga na saray tanaman yo, insan yo iyakar ed samay pasen a panangigalangan.

³ "Laka yod pari a peles ton manlilingkur ed satan a panaon tan ikuanyo, Birbiren ko natan ed Katawan a Dios ko ya akaloob ak la ed dalin ya insipan tod saray lalaki mi ya iter ed sikami.

⁴ "Samay pari alaen to may baskit ed sikayo insan to igaton ed arap na altar na Katawan a Dios yo.

⁵ "Insan diad arap na Katawan ibitla yo ra yan salita: Say lakik et sakey ya akar-akar ya Arameo, ya inawit ton nanayam ed Egipto so pamilya to. Nen linma rad Egipto dagdaiset ira, balet nagmaliw iran baleg tan makapanyarin bansa.

⁶ "Pinairap kami na saray Egipsio tan pinasoot da kamin nankimey ta aripen da kami.

⁷ "Insan kinmerew kami na tulong ed Katawan a Dios na saray lalaki mi. Nadngel to kami tan anengneng toy irap mi, segsegang mi, tan say pangaskasiyan a kipapasen mi.

⁸ "Diad panamegley na baleg a pakayari tan biskeg to inyagel to kamid Egipto. Nanggagawa na saray milagro tan pakelaw, tan saray makapataktakot a bengatla.

⁹ "Inyakar to kami diad tan inter tod sikami yan mayaman tan mataban dalin.

¹⁰ Kanyan natan iyakar kod Katawan so sayan ononan naani ya inter tod siak. Insan iyepas yon ilira ed arap na Katawan imay baskit tan mangigalang kayod man.

¹¹ Misalamat kayo lapud saray maabig a bengatla ya inter na Katawan a Dios yo ed sikayo tan say pamilya yo; insan pinabang yod liket yo iray Levita tan saray sangkaili a manaayam ed kawalaan yo.

¹² Kapag kumatlon taon iter yod saray Levita, saray sangkaili, saray olila, tan saray bibiin balo, so kakaplon bunga na saray tanaman yo, pian iner man a baley walay napambilay da. No agawaan yo la ya,

¹³ ikuanyod Katawan, Diad abung ko anggapoy atilak a masanton kakaplo; inter ko lad saray Levita, saray sangkaili, saray olila, tan saray bibiin balo, onung na ingganggan mod siak. Ag ko sinumlang o nilingwanan so dinan man a ganggan mon nipaakar ed kakaplo.

¹⁴ Ag ak amawas na kinan ko ed kakaplo nen maneermen ak; ag ak angipaway ed abung ko na parti na kakaplok nen marotak ak onung ed ganggan, tan ag ak balut angalad kakaplo na inter kon limos a para inatey. Inonur ta ka, O Katawan; ginawak ya amin so ingganggan mo nipaakar ed kakaplo.

¹⁵ Manlapud tad masanton pasen ed tawen osdungan mo pa ray totoom ya Israelita tan bindisionan mo ra; bindisionan mo pa met so mayaman tan mataban dalin ya inter mod sikami onung na insipan mod saray lalaki mi.

¹⁶ Natad sayan agew say Katawan a Dios yo igaganggan to kayon mangonur ed amin da ray ganggan to; sumpal yo ra ed intiron puso yo tan kamarerwa yo.

¹⁷ Natad sayan agew binirbir yo a Dios yo so Katawan; insipan yo ya onuren yo, sumpalen iray amin a ganggan to, tan tombuken yo ray amin a bilin to.

¹⁸ Natad sayan agew say Katawan inawat to kayo a dilin totoo to onung na insipan to; tan ingganggan to kayon onuren yo ray amin a ganggan to.

¹⁹ Pagmaliwen to kayon matalonggaring nen saray arum a bansa ya inletneg to, tan sikayoy mangiter na dayew tan kagalangan ed ngaran to. Sikayoy magmaliw a dilin totoo to onung na insipan to.

27

¹ "Insan si Moises, a kaiba to ray pangulo na Israel, kuantod saray totoo, Onur yo ray amin ya ibilin kod sikayo natad sayan agew.

² "Diad agew ya ibaliw yod Ilog na Jordan tan iloob yod dalin ya iiter ed sikayo na Katawan a Dios yo, mangilira kayo na saray ankakabaleg a bato, palitadaan yo ra,

³ "insan yo isulat ira yan amin a ganggan tan bangat. No akaloob kayo la ed mayaman tan mataban dalin ya insipan ed sikayo na Katawan a Dios da ray lalaki yo,

⁴ "tan akabaliw kayo lad Jordan, ilira yo ra yan bato ed Palandey na Ebal, onung na ibibilin kod sikayo natad sayan agew, tan palitadaan yo ra.

⁵ "Manggawa kayod man na sakey ya altar a bato, balet ag kayo mangikakana na balatyang a kagawaan,

⁶ "lapud saray baton ag tinabas labat so nepeg ya ikana yod amin ya altar a gawaen yo para Katawan a Dios yo. Diman kayo mangisaklang na saray bagat a popoolan,

⁷ "tan diman kayo mangisaklang tan mangan na saray bagat a para kareenan, tan manliket kayod arap na Katawan a Dios yo.

⁸ "Diad tapew na saray apalitadaan a bato, isulat yon malinlinew so balang salita na saray ganggan na Dios.

⁹ "Insan si Moises a kaiba to ray Levitan pari, kuantod amin a totood Israel, Mandeen kayo tan dengel yo ak, sikayon totood Israel. Natad sayan agew nagmaliw kayon totoo na Katawan a Dios yo;

¹⁰ kanyan onur yo tan sumpal yo ray amin a ganggan to ya iiter kod sikayo natad sayan agew.

¹¹ Insan inkuanen Moises ed saray totood Israel,

¹² No akabaliw kayo lad Ilog na Jordan, saray onggendan a tribu et manalagey ira ed Palandey na Gerizim tan ibawag day bindision ed saray totoo: Simeon, Levi, Juda, Isacar, Jose tan Benjamin.

¹³ Saray onggendan a tribu et manalagey ira ed Palandey na Ebal tan ibawag day samba: Ruben, Gad, Aser, Zabulon, Dan, tan Neftali.

¹⁴ Saray Levita ikolyaot da ra yan salita:

¹⁵ Napelag komun so samba na Dios ed siopaman a manggawa na talintaon bato, kiew, odino mital insan to galangen ed maamut; kabosul na Katawan so pangigalangan ed saray talintaoy diriyos. Insan onebat iray amin a totoo, Amen!

¹⁶ Napelag komun so samba na Dios ed siopaman ya ag to igalang so ama odino ina to. Insan onebat iray amin a totoo, Amen!

¹⁷ Napelag komun so samba na Dios ed siopaman a mangyalis na mohun na dalin na kaabay to. Insan onebat iray amin a totoo, Amen!

¹⁸ Napelag komun so samba na Dios ed siopaman a mangibalang na bulag ed dalan. Insan onebat iray amin a totoo, Amen!

¹⁹ Napelag komun so samba na Dios ed siopaman ya ag mangiter na kanepegan da ray sangkaili, saray olila, tan saray bibiin balo. Insan onebat iray amin a totoo, Amen!

²⁰ Napelag komun so samba na Dios ed siopaman a mangipelag na ama to ed kababaingan diad pangakdul tod sakey ed saray asawa nen ama to. Insan onebat iray amin a totoo, Amen!

²¹ Napelag komun so samba na Dios ed siopaman a sipingan toy ayep. Insan onebat iray amin a totoo, Amen!

²² Napelag komun so samba na Dios ed siopaman ya akdulan toy biin agi to odino agi tod ama o ina. Insan onebat iray amin a totoo, Amen!

²³ Napelag komun so samba na Dios ed siopaman ya akdulan toy katolangan ton bii. Insan onebat iray amin a totoo, Amen!

²⁴ Napelag komun so samba na Dios ed siopaman a maamut a mamatey na too. Insan onebat iray amin a totoo, Amen!

²⁵ Napelag komun so samba na Dios ed siopaman a mangawat na kuarta a bayar na pamatey tod toon anggapoy kasalanan. Insan onebat iray amin a totoo, Amen!

²⁶ Napelag komun so samba na Dios ed siopaman ya ag mangonur ed amin a ganggan tan bangat na Dios. Insan onebat iray amin a totoo, Amen!

28

¹ "No onuren yo so Katawan a Dios tan matoor yon sumpalen iray ganggan to ya iiter kod sikayo natad sayan agew, pagmaliwen to kayon matalonggaring nen saray arum a bansa ed tapew na dalin.

² "Onur yoy Katawan a Dios yo et niiter ed sikayo ra yan amin a bindision:

³ "Say Katawan bindisionan to ray baley tan saray alog yo.

⁴ "Say Katawan bindisionan to kayo na amayamay ya anak, daakan a bunga na saray tanaman, tan amayamay a baka tan karniro.

⁵ "Say Katawan bindisionan to ray trigo yo tan saray kakanen a ginawad trigo.

⁶ "Say Katawan bindisionan to ray amin a gawaen yo.

⁷ "Say Katawan taloen to ray kalaban yo no dogpaan da kayo. Dogpaan da kayo ed sakey a dapag, balet ibatikan da kayod amin a dapag.

⁸ "Say Katawan a Dios yo bindisionan toy kimey yo tan panoen to na ilik iray pananginan yo. Bindisionan to kayo ed dalin ya iiter tod sikayo.

⁹ "No onuren yoy Katawan a Dios yo tan sumpalen yo ray amin a ganggan to, pagmaliwen to kayon dilin totoo to, onung na insipan to.

¹⁰ Diad satan nanengneng na amin a katoowan ed intiron mundo a say Katawan pinili to kayon dilin totoo to, et ontakot irad sikayo.

¹¹ Say Katawan itdan to kayo na amayamay ya anak, amayamay a baka, tan daakan a bunga na saray tanaman diad dalin ya insipan tod saray lalaki yo ya iter tod sikayo.

¹² Lokasan toy tawen a mayaman a panagsinupan to tan ipelag toy oran no manepeg a panaon tan bindisionan toy amin a kimey yo, pian makapabayes kayod amayamay a bansa, balet ag la nakaukolan a miutang kayo ed anggan dinan a bansa.

¹³ Say Katawan a Dios yo et pagmaliwen to kayon pangulo, aliwan mananombuk, na saray bansa; ag kayo onlereg no ag ta onaligwas kayo lawas no matoor yon onuren iray amin a ganggan to ya iiter kod sikayo natad sayan agew.

¹⁴ Balet ag nepeg a sumlangen yo ra diad anggan anton pamaakaran; ag nepeg met a mangigalang tan manlingkur kayod saray diriyos.

¹⁵ Balet no sumlangen yoy Katawan a Dios yo tan ag yo onuren iray amin a ganggan tan saray bilin to ya iiter tod sikayo natad sayan agew, amin da ra yan samba et nagawad sikayo:

¹⁶ Say Katawan isamba to ray baley tan saray alog yo.

¹⁷ Say Katawan isamba to ray trigo yo tan saray kakanen a ginawad trigo.

¹⁸ Say Katawan isamba to kayo diad pangiter tod sikayo na daiset ya anak, makapoy a bunga na saray tanaman, tan daiset a baka tan karniro.

¹⁹ Say Katawan isamba to ray amin a gawaen yo.

²⁰ No manggawa kayoy kaogsan tan ipolisay yoy Katawan ipadalan tod sikayo so deral, gewgew, tan gunigon ed amin a gawaen yo, ya anggad sigput tan masiglat kayon naoput.

²¹ Ipadalan tod sikayoy mantotombukan a salot, ya anggad anggapoy anggan sakey a natilak ed sikayod dalin a ngalngali yo la panayaman.

²² Say Katawan ipadalan tod sikayo ray makaalis a sakit, larag, tan petang; pakisiren ton maung so danum yo tan pasinagen toy makasinit a petang na agew et naderal iray tanaman yo. Ondalan ed sikayo ra ya, anggad ag yo ipatey.

²³ Anggapoy ompelag ya oran kanyan onawet a singa balatyang so dalin yo.

²⁴ Oran komun so ipelag tod sikayo, balet andi; paalimbusabosen to ingen na dabuk tan buer ya anggad ag yo ipatey.

²⁵ Say Katawan ipatalo to kayod saray kalaban yo. Dogpaan yo rad sakey a dapag balet ibatikan yo rad amin a dapag, et diad ontan ontakot iray amin a katoowan ed intiron mundo no nanengneng day nagawad sikayo.

²⁶ No ompatey kayo, ondago ray manok ya atap tan saray ayayep ed katakelan a mambuwag na saray bangkay yo, et anggapoy mangabul ed sikara.

²⁷ Say Katawan paletawen toy pelsa ed laman yo, a singa samay ginawa tod saray Egipsio. Nagiri so intiron laman yo. Napanoy kegang so laman yo, onggatel ya amiy baog yo, balet ag kayo onabig.

²⁸ Say Katawan ekalan to kayoy kalakal; bulagen to kayo tan gewgewen to kayo.

²⁹ Anggan agew karapkarap kayo a singa toon bulag, et ag yo natonton so laen yo. Ag kayo onaligwas ed antokaman a gawaen yo. Napairap kayo tan natakewan kayo lawas, et anggapoy siopaman ya ontulong ed sikayo.

³⁰ Misipanan kayon mangasawabalet sananey iray mangikasal ed sikara. Mamaalagey kayo na abung, balet ag yo napanayaman. Mantanem kayo na ubas, balet ag yo natawayan so bunga to.

³¹ Napatas ed arap yo ray baka yo, balet ag yo natawayan so karni ra. Sankanengneng yon nigayugoy iray asno, balet ag la ra nipawil ed sikayo. Niiter ed saray kalaban yo iray karniro yo, balet anggapoy siopaman ya ontulong ed sikayo.

³² Sankanengneng yon niiter ya ed saray sangkaili iray anak yon lalaki tan bibii. Inagew-agew ya onagasang so mata yod pannengneng yod ipawil na saray anak yo, balet ta ag la ra ompawil.

³³ Saray totoo na sakey a bansan ag yo amta et alaen na da ray bunga na saray tanaman a nansagputan yon pinabaleg, balet panamairap tan panamasegsegang labat so awaten yo lawas.

³⁴ Say kairapan yo et deralen toy kalakal yo.

³⁵ Say Katawan limbosen to ray bikking tan olpo yo na ag onabig tan ansakit a giri; nalimbos kayo na pelsa, manlapud olo ya anggad sali.

³⁶ Say Katawan iyakar to kayo tan say ari yo ed sakey a bansa ya ag yo ni nanayaman nen saman, sikayo o saray lalaki yo; manlingkur kayod man ed saray diriyos a kiew tan saray diriyos a bato.

³⁷ Diad saray bansan pangitayakan ed sikayo na Katawan, saray totood man et nikelawan ira ed agawad sikayo; ludlureyen tan balbalawen da kayo.

³⁸ Mangipasek kayo na dakel ya ilik, balet dagdaiset so naani yo, lapud oputen na dorun.

³⁹ Mantanem kayoy ubas tan asikasoen yo ra, balet ag kayo makaborbor na bunga ra o makainom na alak a manlapud saraya, lapud kanen na bigis iray sengeg da.

⁴⁰ Ontobud iner man a pasen ed dalin iray kiew ya oliba, balet naandian kayoy larak, lapud nabekew iray bunga ra.

⁴¹ Nawalaan kayo na saray anak a lalaki tan bibii, balet naandi rad arap yo, lapud nadakep irad bakal.

⁴² Kanen na bigis iray kakiewan tan saray tanaman yo.

⁴³ Saray sangkailin manayam ed dalin yo et ombiskeg lan ombiskeg so pakayari ra, balet onkapoy lan onkapoy so pakayari yo.

⁴⁴ Nawalaan iray kuartan nipautang dad sikayo, balet anggapoy nipautang yod sikara. Diad kaonuran sikaray manoley ed sikayo.

⁴⁵ Onsabid sikayo ra yan kadederal, tan mansiansia rad sikayo ya anggad ompatey kayo, lapud ag yo inonur so Katawan a Dios yo tan ag yo sinumpal iray ganggan ya inter tod sikayo.

⁴⁶ Sikara yay tanda tan pakelaw a say Dios et sinintinsiaan to kayo tan saray kabyangay boleg yo ya anggad angga.

⁴⁷ Say Katawan binindisionan to kayo na daakan a bengatla, balet ag kayo nanlingkur a maliket tan magayaga ed sikato.

⁴⁸ Kanyan sirin panlingkuran yo ray kalaban yo a say Katawan et ibaki to ran mibakal ed sikayo. Naerasan, naapgaan kayo, tan naandian kayoy ikawesamin a nakaukolan yo. Pairapen kayon mapalalo na Katawan ya anggad ompatey kayo.

⁴⁹ Say Katawan mangibaki na onsumpad sikayon sakey a bansan manlapud arawin dalin, ya ag yo amta so salita ray totoo to. Onsibar irad sikayon singa sakey ya agila.

⁵⁰ Makapataktakot ira tan anggapoy panangasi rad siopaman, tobun-balo may matakken.

⁵¹ Kanen da ray ayayep yo tan saray bunga da ray tanaman yo, et ompatey kayod eras. Ag da kayo ikeraan na saray bungay tanaman yod alog, alak, larak na oliba, baka, odino karniro; et ompatey kayo.

⁵² Dogpaan day amin a baley ed dalin ya iiter ed sikayo na Katawan a Dios yo, tan nageba ray atatagey a padir a panmamatalkan yo.

⁵³ No lolooban na saray kalaban yo iray baley yo, naandian kayoy nakan, kanyan kanen yo ray anggan saray anak ya inter ed sikayo na Katawan a Dios yo.

⁵⁴ Anggan say lakin masimpit tan galgalangen a pamilyay sengeg to et mapalaloy kaandian toy nakan legan a lolooban da ray boley yo, kanyan kanen toy pigara ed saray anak to lapud anggapo lay arum a nakan to. Ag to anggan itdan so agi to, odino say inaro ton asawa, odino siopaman ed saray nakdaan ya anak to.

⁵⁵

⁵⁶ Onya met so gawaen na sakey a biin sankasimpitan tan galgalangen a pamilyay sengeg to, tan diad mapalalon inkayaman to et ag to asaliy nanakar ed inyoonla tod iner man a pasen. No looban na saray kalaban so baley to, mapalaloy kaandian toy nakan, kanyan maamut ton kanen so kapangyanak ya anak to tan say pinmaway a baley to. Ag to anggan itdan so inaro ton asawa odino siopaman ed saray anak to.

⁵⁷

⁵⁸ No ag yo pampelengan ya onuren iray amin a bangat na Dios a nisulat ed sayan libro tan no ag yo pagalangan so makapakelaw tan makapataktakot a ngaran na Katawan a Dios yo,

⁵⁹ ipadalan tod sikayo tan saray kabyangay boleg yo so ag onabig a sakit tan makapataktakot a salot ya ag manonda.

⁶⁰ Ipadalan to lamet ed sikayo iray amin a makapataktakot a sakit ya asali yo la ed Egipto, tan ag kayon balut onabig.

⁶¹ Ipadalan to met ni iray amin a klasiy sakit tan salot ya ag ira abitla ed sayan libro na saray ganggan na Dios tan saray bangat to, et naoput kayo.

⁶² Anggaman a magmaliw kayo a singa karakel na bitewen ed tawen, dagdaiset labat so natilak ed sikayon mabilay, lapud ag yo inonur so Katawan a Dios yo.

⁶³ No kaonungan so impanliket na Katawan ed impamaaligwas tan impamarakel tod sikayo, ontan met so panliket tod pamatey tan paneral ed sikayo. Napagit kayod dalin a ngalngali yo la nakayaryan a panayaman.

⁶⁴ Say Katawan itaytayak to kayod saray amin a bansa, manlapud sakey a samput na dalin ya anggad sananey a samput, et diman kayo manlingkur ed saray diriyos a kiew tan bato, saray diriyos a sikayo tan saray lalaki yo et ag yo ran balut ginalang nen saman.

⁶⁵ Ag diman manarid sikayo so kareenan, tan anggapoy pasen a nayarian yon tawagen a kayaryan yo; say Katawan tabonan to kayo na kapagaan, kaandiay ilalo, tan kaermenan.

⁶⁶ Magmaliw a maatap lawas so bilay yo. Agew-labin manarid sikayoy takot, tan lawas mambilay kayod takot ed patey.

⁶⁷ Ompokal lawas ed kapagaan so kapusoan yo lapud saray amin a nanengneng yo. Kapag kabwasan pampilalekan yoy isabi na labi, tan kapag labi pampilalekan yoy isabi na kabwasan.

⁶⁸ Say Katawan papawilen to kayod Egipto ya akalogan ed saray bapor, anggaman ya imbaga ton ag kayo lad man ompawil. Salien yon ilakoy sikayon dili ya ariripen na saray kalaban yo, balet anggapoy malabay a manaliw ed sikayo.

29

¹ "Diad impisipanan na Katawan saraya so ingganggan to ed kinen Moises ya ipasumpal ed saray Israelita nen wala rad dalin na Moab; amin da ra ya et kaaruman na samay impisipanan na Katawan ed sikara diad Palandey na Sinai.

² "Impantitipon nen Moises iray amin a totood Israel tan kuantod sikara, Anengneng yon dili so ginawa na Katawan ed ari na Egipto, saray opisyal to, tan diad intiron bansa.

³ "Anengneng yo ra may makapataktakot a salot, saramay milagro, tan saramay ankakabaleg a pakelaw a ginagawa na Katawan.

⁴ "Balet anggad natan ag to ni impatalus ed sikayo so kabaliksan na saraman ya asalsali yo.

⁵ "Say Katawan inwanwan to kayod a kalawakan et ag balut dinmaan iray kawes tan saray sandalya yo.

⁶ "Anggapoy naakan yon tinapay odino nainom ya alak odino antokaman a makabuek, balet inter na Katawan ed sikayo ray nakaukolan yo pian nibangat tod sikayo a sikato et Dios yo.

⁷ "Et nen akasabi tayod sayan pasen, pinmaway ya akibakal ed sikatayo ira di Ari Sehon na Hesbon tan Ari Og na Basan. Balet tinalo tayo ra,

⁸ "inala tayoy dalin da, tan inapag tayod saray tribu nen Ruben tan Gad, tan diad kapaldua na tribu nen Manases.

⁹ "Pampelengan yon onuren iray yan amin a pasusumpal na sayan sipanan, pian onaligwas kayod amin a gawaen yo.

¹⁰ Natad sayan agew amin yo et manalalagey ed arap na Katawan a Dios yosaray pangulo yo tan saray opisyal yo, saray lalaki yo,

¹¹ saray bibii, saray anak yo, tan saray sangkailin manaayam ed kawalaan yo a managala ray itotongo tan managasul iray danum yo.

¹² Wadya kayo natan ya onabubon ed sayan pisipanan ed sikayo na Katawan a Dios yo tan mangawat na saray susumpalen a nipaakar ed sayan sipanan,

¹³ pian napaletan to natan a sikayo ray totoo to tan sikato so Dios yo, onung na insipan tod sikayo tan saray lalaki yon di Abraham, Isaac, tan Jacob.

¹⁴ Aliwan sikayo labat so pisisipanan na Katawan tan pangiitdan to na sarayan susumpalen.

¹⁵ Misisipanan ed sikatayon amin a manalalagey natan ed arap to tan ontan met diad saray kabyangay boleg tayon ag ni ra nianak.

¹⁶ Amta yo no panoy impanbilay tayod man ed Egipto tan no panoy indalan tayo ed dalin da ray arum a bansa.

¹⁷ Anengneng yo ray makapaingungot a talintao ran kiew, bato, pilak, tan balituk.

¹⁸ Manalwar kayo ya anggapoy sakey a laki, bii, pamilya, odino tribu a manalalagey natad sayan agew a mangikaindan ed Katawan a Dios tayo pian mangigalang ed saray diriyos na arum a bansa. Singa ya sakey a lamut a magmaliw ya ampait tan samal a tanaman.

¹⁹ Pampelengan yo ya anggapo diay anggan sakey ed sikayo ya onderengel ed sarayan pagagawa na Dios, a sisiaen tod sikaton dili a maung lawas so kipapasen to, anggaman a diad gaway awet na olo to et gawaen toy labay to. Pateyen kayo na satan a nagawa, sikayon amin, maung may maoges.

²⁰ Say Katawan ag to pirdonaen itan a too. Ingen say mandarlang a pasnuk na Katawan et onliub a sumpad sikato, tan amin a samba a nisulat ed sayan libro et ompelag ed sikato ya anggad sigput a naoput na Katawan.

²¹ Say Katawan pagmaliwen ton sakey a panmarmaran da ray amin a kabyangay amin a tribu na Israel tan ipelag tod sikato so deral onung ed amin da ray samban nikorit ed sipanan a nisulat ed sayan libro na saray bangat na Katawan.

²² Diad saray mantombuk a kailalakan saray kabyangay boleg yo tan saray sangkailin taga arawin dalin et nanengneng da ray deral tan saray kairapan ya impadalan na Katawan ed dalin yo.

²³ Saray kaalogan et magmaliw iran andi-kakanaan, atabunan na asumpri tan asin; ag nataneman na anggan dinan a tanaman, tan anggapoy anggan dika ya ontobo. Say dalin yo et magmaliw a singa saray siudad na Sodoma tan Gomorra, singa Adma tan Zeboiim a dinederal ira na Katawan nen mapalaloy pasnuk to.

²⁴ Insan amin da ray totood intiron mundo tepeten da, Akin et ginawa ya na Katawan ed dalin da? Antoy makasengeg a mapalaloy pasnuk to?

²⁵ Et say ebat saya, Say makasengeg et lapud dineral na saray totoo so impisipanan ed sikara na Katawan, say Dios na saray lalaki ra, nen impaway to rad Egipto.

²⁶ Nanlingkur irad arum a diriyos ya ag dan balut ginalang nen saman, saray diriyos ya insebel na Katawan a panlingkuran da.

²⁷ Kanyan say Katawan akapasnuk ed saray totoo to tan impadalan tod dalin da iray amin a samban nisulat ed sayan libro.

²⁸ Nagmaliw a mapalaloy pasnuk na Katawan, tan diad gaway pasnuk to binagut to rad dalin da tan imbantak to rad sananey a dalin, et wadman ira natan.

²⁹ Wala ray arum a bengatlan iyaamut na Katawan a Dios tayo; balet impaamta tod sikatayo so Ganggan to, et sikatayo tan saray kabyangay boleg tayo nepeg ya onuren tayo ya anggad angga.

30

¹ "Initdan ta kayo natan na pankanawnawan mampili ed bindision tan samba. No agawa la ra yan amin ed sikayo, tan manaayam kayo lad arum a bansa ya angikayatan ed sikayo na Katawan a Dios yo, nanunotan yo yan inter kod sikayon pampilian yo.

² "No sikayo tan saray kabyangay boleg yo et ompawil kayod Katawan tan masimsimoon yo lan onuren ira yan ganggan to ya iiter kod sikayo natad sayan agew,

³ "say Katawan a Dios yod satan et kasian to kayo. Papawilen to kayod dalin yo manlapud saray bansan angikayatan tod sikayo, tan paaligwasen to kayo lamet.

⁴ "Anggaman a nikayat kayod sankaarawian a sokung na mundo, tiponen kayo na Katawan a Dios yo insan to kayo papawilen,

⁵ "pian nakayaryan yo lamet so dalin a nanayaman na saray lalaki yo. Lalon paaligwasen to kayo tan lalon parakelen to kayo nen saray lalaki yo nen saman.

⁶ "Say Katawan a Dios yo et itdan to kayo tan saray kabyangay boleg yo na matoluk a puso pian aroen yo ed intiron puso yo, et mansiansia kayon manayam ed saman a dalin.

⁷ "Ipelag to ra yan amin a samba ed saray kalaban yo ya amosul tan amairap ed sikayo;

⁸ "et tuloken yo lamet tan onuren yo ray amin a ganggan to ya iiter kod sikayo natad sayan agew.

⁹ "Say Katawan paaligwasen to kayo ed amin a gawaen yo; nawalaan kayo na amayamay ya anak tan amayamay ya ayayep, tan makaani kayo na daakan ed saray alog yo. No kaonungay impanliket to ya amaaligwas ed saray lalaki yo, ontan met so panliket ton mamaaligwas ed sikayo,

¹⁰ balet nakaukolan ya onuren yo tan sumpalen yo ray amin a ganggan to a nisulat ed sayan libro na saray bangat to. Nakaukolan a masimsimoon so ipawil yod sikato.

¹¹ Aliwan mairap ya onuren o talusan yan ganggan ya iiter kod sikayo natad sayan agew.

¹² Aliwan walad tawen. Ag yo la nepeg a tepeten, Siopay onkalab ed tawen ta iyepas tod sikatayo so ganggan, pian nayarian tayon dengelen tan onuren?

¹³ Aliwa met a walad basil na dayat. Ag yo la nepeg a tepeten, Siopay ombaliw ed dayat ta iyakar tod sikatayo so ganggan, et pian nayarian tayon dengelen tan onuren?

¹⁴ Andi, wadyad kawalaan yo so ganggan. Amta yo tan nayarian yon ibitla, kanyan natan onur yo.

¹⁵ Natad sayan agew iter kod sikayoy pankanawnawan mampili ed maung tan maoges, bilay tan patey.

¹⁶ No onuren yo ray iiter kod sikayo natan a ganggan na Katawan a Dios yo, no aroen yo so Katawan, no tuloken yo, tan sumpalen yo ray amin a ganggan to, onaligwas kayo tan magmaliw kayon sakey a bansa ya amayamay iray totoo to. Say Katawan a Dios yo et bindisionan to kayo ed dalin a ngalngali yo la panayaman.

¹⁷ Balet no sumlangen yo tan ag yo dengelen, tan napalingo kayon mangigalang ed saray arum a diriyos,

¹⁸ naoput kayopapasakbayan ta kayo la dia natan. Ag kayo mambilay na andokey ed dalin a ngalngali yo la panayaman diad nibaliw na Jordan.

¹⁹ Iiter kod sikayo natan so pankanawnawa yon mampili ed bilay tan patey, bindisionan na Dios tan say samba na Dios, tan tatawagen koy tawen tan dalin a mantasi no antoy pilien yo. Pili yo so bilay.

²⁰ Aro yo so Katawan a Dios yo, onur yo tan mansiansia kayon matoor ed sikato, et diad ontan saray kabyangay boleg yo et mambilay ira na andokey ed dalin ya insipan ton iter ed saray lalaki yon di Abraham, Isaac, tan Jacob.

31

¹ "Intuloy nen Moises so nansalita ed saray totood Israel,

² "tan inkuanto, Sanlasus tan duamploy taon ko la natan kanyan ag ko la nayarian so mangipangulod sikayo. Aliwan satan labat, say Katawan imbaga tod siak ya ag ko baliwen so Jordan.

³ "Say Katawan a Dios yo et manayam ed onaan yo tan deralen to ray bansan manaayam diman, pian napanayaman yo so dalin; et si Josue so pangulo yo onung na imbaga na Katawan.

⁴ "Pateyen na Katawan ira may totoo a singa impanalo tod kindi Sehon tan Og ya arari na saray Amorreo, tan impaneral tod bansa ra.

⁵ "Panaloen to kayod sikara, et nepeg yon gawaen ed sikaray onung na imbagak ed sikayo.

⁶ "Pabiskeg yoy linawa yo tan manmatalek kayo. Ag yo ra tatakotan. Olupen kayo na Katawan a Dios yo. Ag to kayo paolyan o ikaindan.

⁷ "Insan tinawag nen Moises si Josue tan kuantod sikato ed arap na saray amin a totood Israel, Pabiskeg moy linawam tan manmatalek ka; sika so mangipangulo ed sarayan totoo a manayam ed dalin ya insipan na Katawan ed saray lalaki ra.

⁸ "Say Katawan a dili so mangiwanwan ed sika tan olupen to ka. Ag to ka paolyan o ikaindan; kanyan ag mo pabebeteley linawam tan ag ka ontatakot.

⁹ "Kanyan insulat nen Moises so Ganggan na Dios tan inter tod saray Levitan papari, a makaoley ed Kaban na Sipanan na Katawan, tan diad saray pangulo na Israel.

¹⁰ Inkuantod sikara, Diad samput na kapag pitoy taon, no asingger lay panamaandi na saray utang, ibasa yoy Ganggan diad maksil a bosis no Pista na saray Abung-abung.

¹¹ Ibasa yod saray totood Israel no onla rad samay pasen na panangigalangan a mangigalang irad Katawan a Dios yo.

¹² Pantitipon yo ray amin a lalaki, bibii, tan saray ogogaw, tan saray sangkailin manaayam ed saray baley yo, pian narengel dan amin so Ganggan tan naaralan da so ontakot ed Katawan a Dios yo tan matoor dan onuren iray bangat to.

¹³ Diad onya narengel na saray kabyangay boleg yon ag da nin balut arengel so Ganggan na Katawan a Dios yo. Naaralan dad satan so ontoluk ed sikato legan dan manayam ed dalin a ngalngali yo la panayaman diad nibaliw na Jordan.

¹⁴ Insan say Katawan kuantod kinen Moises, Antiktikey lay pambilay mo. Tawag moy Josue ta itagar mod mad Tulda pian nabilin ko. Linma sirin ed Tulda si Moises tan si Josue,

¹⁵ et pinmanengneng ed sikarad man so Katawan ed sakey a lusek na lorem a nanalagey ed abay na puirtay Tulda.

¹⁶ Say Katawan kuantod kinen Moises, Magano lay ipatey mo, et kapatey mo magmaliw iran malamang ed siak iray totoo tan deralen day impisipanan kod sikara. Ikaindan da ak tan mangigalang irad saray paganon diriyos na dalin a ngalngali da lan looban.

¹⁷ No ontan so nagawa mampasnuk ak ed sikara; ikaindan ko ra, et ompatey ira. Amayamay so ondalan ed sikaran makapataktakot a deral, et nabirbir da ya agawa ra yad sikara lapud andi ak lad sikara, siak a Dios da.

¹⁸ Ag ko rad satan tulongan lapud maoges so ginawa ra tan angigalang irad saray diriyos.

¹⁹ Natan isulat mo yan kanta. Ibangat mod saray totood Israel, pian magmaliw a sakey a tasi a sumpad sikara.

²⁰ Iyakar ko rad saman a mayaman tan mataban dalin onung na insipan kod saray lalaki ra. Nawalaan irad man na amin a labay dan kanen; mainawa tan maliket so pambilay dad man. Balet onasingger irad arum a diriyos tan mangigalang irad sikara. Ipolisay da ak tan deralen day impisipanan kod sikara,

²¹ et amayamay a makapataktakot a deral so ondalan ed sikara. Balet nakanta yan kanta, tan magmaliw a sakey a tasi a sumpad sikara. Anggan natan, kasakbayan ko ran iyakar ed dalin ya insipan kod sikara, amtak la so nununoten da.

²² Diad saman ya agew insulat nen Moises imay kanta tan imbangat tod saray totood Israel.

²³ Insan say Katawan akisalitad kinen Josue a lakin anak nen Nun tan inkuantod sikato, Pabiskeg moy linawam tan manmatalek ka. Ipangulom iray Israelita ya onlad dalin ya insipan kod sikara, et olupen ta ka.

²⁴ Insulat nen Moises so Ganggan na Dios ed sakey a libro; inapiapiger to pian anggapoy nalingonanan to.

²⁵ Kayari ton insulat, inkuantod saray Levitan papari a makaoley ed Kaban na Sipanan na Katawan.

²⁶ Ala yo yan libro na Ganggan na Dios tan iyan yod abay na Kaban na Sipanan na Katawan a Dios yo, pian mansiansiad man a sakey a tasin sumpad saray totoo to.

²⁷ Amtak so ontan lan inkaawet na olo ra tan say inkasumlang da. Legan na impanbilay ko sinumlang day Katawan, tan lalo ni ingen so isumlang da no inatey ak la.

²⁸ Pantitipon yod arap ko iray amin a pangulo na tribu tan saray opisyal, pian nibagak ed sikara yan bengatla; tawagen koy tawen tan say dalin a mantasi sumpad sikara.

²⁹ Amtak a kayariy ipatey ko saray totoo et magmaliw iran maoges tan ipolisay day imbabangat kod sikara. Et diad onsabin panaon nadalan ira na deral, lapud pampasnuken day Katawan diad panggawa ray isesebel to.

³⁰ Imbalikas nen Moises imay intiron kanta tan dinengel na amin a totood Israel.

32

¹ "Tawen tan dalin, dengel yo ray salitak, dengedengel yoy ibagak.

² "Napelag a singa oran so bangat ko tan magmaliw a singa linaew ed dalin. Saray salitak ompelag a singa mayamaya ed saray malangwer a tanaman, singa makalkalnan oran ya ompelag ed malambut iran dika.

³ "Idayew ko so ngaran na Katawan, tan saray totoo to ibawag day inkatalonggaring to.

⁴ "Say Katawan so makapanyarin manangyagel yo, ayadyari tan matonung ya amin so gagawaen to; Matoor tan matwa so Dios yo; say katonungan tan kaptekan so gagawaen to.

⁵ "Balet aliwan matoor kayod sikato, aliwa kayon manepeg a totoo to; makasalanan tan managpalikdo kayon bansa.

⁶ "Onya so labay yon ibales ed Katawan, sikayon totoon makulang-kulang tan anggapoy liknaan? Sikato so ama yo ya amalsad sikayo, inletneg to kayo a sakey a bansa.

⁷ "Nunot yo so apalabas, say abaybayag lan panaon nen saman; tepet yod kaamaan yo ta ibaga rad sikayo so agawa, tepet yod saray mamasiken ta ibaga rad sikayo so agawad apalabas.

⁸ "Say Sankatageyan impabetang tod saray bansa iray dalin da; sikatoy angilira ed saray katoowan no iner so panayaman da. Anoro na sakey a mangatatawen a pinalsa a para balang sakey a bansa,

⁹ "balet pinili ton para sikaton dili iray kabyangay boleg nen Jacob.

¹⁰ Arumog to ran manaakar-akar ed maawang a kabueran, sakey a kalawakan ya andi-kakanaan tan maples so onsisiplug a dagem. Inyagel to ra tan tinalima to ra, a singa panangyagel tod sikaton dili.

¹¹ Say Katawan pansiansiaen ton ag napelag so Israel, singa sakey ya agilan babangatan ton ontikyab so sibong to, sasampaten to rad saray akabuskag a payak to.

¹² Say Katawan a bukor so angiwanwan ed saray totoo to ya anggapoy tinmulong a dios na arum a bansa.

¹³ Inabuloyan ton manoley ira ed saray atagey a pasen, tan impanbilay day bunga na saray tanaman ed kaalogan. Nanaala ray dilo ed saray sengat na saray ankakabaleg a bato; malambut a tinmobod kabatowan iray kakiewan dan oliba.

¹⁴ Daakan a gatas so inter na saray bakat tan saray kanding da; awalaan iray sankaabigan a karniro, kanding, tan baka, awalaan met ira na sankaabigan a trigo, tan sankasamitan ya alak.

¹⁵ Minmayaman iray totoo na Katawan, matataba ra ta sawasawaan day kakanen, balet mananumlang irad Katawan. Inkaindan day Dios ya amalsad sikara tan impolisay day makapanyarin manangilaban da.

¹⁶ Lapud impangigalang dad saray arum a diriyos angimon so Katawan; akapasnuk lapud saray ginagawa ran kaogsan.

¹⁷ Angibagat irad saray aliwan peteg a diriyos, balo diriyos ya ag balut naamtaan na saray lalaki ra, diriyos ya ag balut inonur na saray Israelita.

¹⁸ Alingwanan day Dios da, say makapanyarin manangilaban da, say angiter ed sikara na bilay.

¹⁹ Nen anengneng na Katawan yan ginawa ra, akapasnuk tan impolisay to ray anak ton lalaki tan bibii.

²⁰ Inkuanto, Ag ko la ra tulongan; nengnengen kod satan no antoy nagawa ed sarayan anawet so olo tan aliwan matoor a totoo.

²¹ Lapud saray talintaoy diriyos da pinapetang day olok; pinaimon da ak lapud saray ipapasen dan diriyos da, saray aliwan peteg a diriyos. Kanyan ikanak so sakey a paganon bansa a mamapetang na olo ra; paimonen ko ra lapud sakey a bansan makulang-kulang iray totoo to.

²² Onliub a singa apoy so pasnuk ko tan poolan toy amin a bengatlan walad tapew na dalin. Sabien toy daledalem na pasen a panayaaman da ray inaatey tan padapolen toy anggan saray letnegan na kapalandeyan.

²³ Ipadalan kod sikaray ag mangangga ran deral tan ibolus kod sikara iray amin a panak.

²⁴ Ompatey irad eras tan sakit a mapalalon petang; ompatey irad makapataktakot iran salot. Mangibaki ak na saray ayayep ed katakelan ya ondogpad sikara, tan saray nanditan oleg a mangetket ed sikara.

²⁵ Dakel iray ompatey ed daladalan lapud bakal; onsabiy takot ed dalem na kaabungan. Ompatey iray tobun-balon lalaki tan bibii; ag makapaliis ed patey iray mansusoson ogogaw tan saray mamasiken.

²⁶ Pinatey ko la ra komun ya amin, pian anggapo lay makanunot ed sikara.

²⁷ Balet ag ko nayarin iyabuloy a mampasirayew iray kalaban da diad pangibaga ran tinalo da ray totook, anta siak a dili so amatalod sikara.

²⁸ Say Israel et sakey a bansan anggapoy kalakal to; anggapoy pakatalus da ray totoo to.

²⁹ Ag da nanengneng so makasengeg na inkatalo ra; ag da natalusan so kabaliksan na inkagawa ra.

³⁰ Akin et tinalo na sakey a too so sanlibon totoo, tan duara so samplon libo? Say Katawan a Dios da et inkaindan to ra; say makapanyarin Dios da impalima to rad kalaban da.

³¹ Amta na saray kalaban da a makapoy iray dilin diriyos da, ag da naaligan so makapanyarin Dios na Israel.

³² Saray kalaban dan maoges a singa saray totood Sodoma tan Gomorra et singa ra saray wakal na ubas a mambunga ray ampait tan makasamal,

³³ singa ra alak a ginawad ditay oleg.

³⁴ Ag nalingwanan na Katawan so ginagawa na saray kalaban da, aalagaren toy manepeg a panaon a panusa tod sikara.

³⁵ Say Katawan ombawi tan dusaen to ra; onsabiy panaon a natumba ra; asingger lay agew na ipatey da.

³⁶ Say Katawan iyagel to ray totoo to no nanengneng ton naandi lay biskeg da. Kasian to ray manlingkur ed sikato, no nanengneng ton pangaskasiyay awawey da.

³⁷ Insan say Katawan tepeten tod saray totoo to, Kawalaan da ra may makapanyarin diriyos a nanmatalkan yo?

³⁸ Pinakan yo ra na tabay ayep ya imbabagat yo tan pinainom yo ray alak ya insasaklang yon bagat ed sikara. Tawag yo ra ta tulongan da kayo natan; paiyagel kayod sikara.

³⁹ Siak, tan siak labat, so Dios; anggapo lay arum. Mamatey ak tan mangiter ak na bilay, manugat ak tan mamaabig ak, tan anggapoy makasumlang ed antokaman a gawaen ko.

⁴⁰ Legan a siak so mabilay a Dios, iyatagey koy limak tan sambaan ko

⁴¹ ya iyobul koy mankidiam ya ispadak tan ipakurang kon ipakurang so katonungan. Ombawi ak ed saray kalaban ko tandusaen ko ray mamosul ed siak.

⁴² Saray panak naames na dala ra, tan say ispadak pateyen to ray amin ya onsumlang ed siak. Anggapoy ikerak a mabilay ed amin da ray onlaban ed siak; anggan saray sugatan tan priso et ompatey ira.

⁴³ Sikayo ran bansa, nepeg yon idayew iray totoo na Katawan dusaen to ray mamatey ed sikara. Ombawid saray kalaban to tan pirdonaen to ray kasalanan da ray totoo to.

⁴⁴ Si Moises tan si Josue a lakin anak nen Nun et imbalikas da yan kanta, pian narengel na saray totood Israel.

⁴⁵ Nen asumpal nen Moises ya inter ed saray totoo iray bangat na Dios,

⁴⁶ inkuanto, Pampelengan yon onuren iray ganggan ya inter kod sikayo natad sayan agew. Ibangat yo ra ed saray anak yo, pian matoor da met ya onuren iray amin a bangat na Dios.

⁴⁷ Aliwan apa ira yan salita; sikaray dilin bilay yo. Onur yo ra et mambilay kayo na andokey ed samay dalin ed nibaliw na Jordan a ngalngali yo la panayaman.

⁴⁸ Diad saman ya agew say Katawan kuantod kinen Moises,

⁴⁹ Lakad Kapalandeyan na Abarim diad dalin na Moab a kasumbaliwan na siudad na Jerico; kalab kad Palandey na Nebo, ta bantag moy dalin na Canaan a ngalngalik la iter ed saray totood Israel.

⁵⁰ Ompatey kad man ed toktok na palandey a singa si agim ya Aaron ya inatey ed toktok na Palandey na Hor,

⁵¹ lapud aliwa kayon duan matoor ed siak diad arap na saray totood Israel. Nen wala kayo ed abay na danum na Meriba diad asingger ed baley na Cades diad kalawakan na Zin, ag yo ak pinagalangan ed arap na saray totoo.

⁵² Nabantag mod arawi so dalin, balet ag ka makaloob ed saman a dalin ya iiter kod saray totood Israel.

33

¹ "Saraya so bindision ya inter nen Moises a too na Dios ed saray Israelita kasakbayan na impatey to.

² "Say Katawan nanlapud Palandey na Sinai; inmatagey a singa agew ed tagey na Edom tan sinminag ed saray totoo to manlapud Palandey na Paran. Kaiba to ray samplon libon anghil manliub ya apoy so walad nikawanan to.

³ "Inaro na Katawan iray totoo to tan iyaagel to ray totoon kayaryan to. Kanyan ondakmomo itayod saliyan to tan onuren tayo ray ganggan to.

⁴ "Onuren tayoy Ganggan ya inter ed sikatayo nen Moises, say Ganggan a sankablian a kayaryan na bansa tayo.

⁵ "Say Katawan nagmaliw ya ari na saray totoo ton Israelita nen nantitipon iray tribu ra tan saray pangulo ra.

⁶ "Inkuanen Moises nipaakar ed tribu nen Ruben: Ag komun naerep a balut so tribu nen Ruben, Anggaman a daiset iray kabyangan to.

⁷ "Nipaakar ed tribu nen Juda inkuanto: Katawan, dengel mo pay ikekerew day tulong; Pikasakeyen mo ra lamet ed saray arum a tribu. Milaban ka pa Katawan, para sikara, Tan tulongan mo pa ran mibakal ed saray kalaban da.

⁸ "Nipaakar ed tribu nen Levi inkuanto: O Katawan, ipaamtam pay linawam diad panamegley na Urim tan Tummim Diad panamegley na saray matoor ya aripen mon Levita; Sinubok mo ra ed dalin na Masa Tan apaneknekan mon matua ra diad danum ed meriba.

⁹ "Impanengneng dan baleg so panangaro rad sika Nen say panangaro rad saray atateng, agagi, odino anak da. Inonur da ray ganggan mo Tan matoor irad impisipanan mod sikara.

¹⁰ Ibangat da ray totoom a mangonur ed Ganggan mo; Mangisaklang ira na saray bagat ed altar mo.

¹¹ Katawan, tulongan mo pan ombiskeg so tribu ra; Manliket ka pa ed gagawaen da. Temek mo ray amin a kalaban da; Ag mo pa la ran balut papabangonen.

¹² Nipaakar ed tribu nen Benjamin inkuanto: Sikato yay tribu ya inaro na Katawan tan iyaagel to; Guaguardiaan to ran sanagew Tan manaayam ed pegley da.

¹³ Nipaakar ed tribu nen Jose inkuanto: Say Katawan bindisionan to komun na oran so dalin da. Bindisionan to met komun na danum a manlapud dalem na dalin.

¹⁴ Nabindisionan komun so dalin da na bunga na saray tanaman ya alotod agew. Nawalaan komun na daakan tan sankamaungan iran bungay kiew no panaon na panagbunga.

¹⁵ Napano komun na masasamit a bungay kiew iray abaybayag lan kapokdulan da.

¹⁶ Napano komun na amin a kaabigan so dalin da. Nabindisionan komun na kaabigan na Katawan, A nansalitan nanlapud mandarlang ya abeban kiew. Onsabi komun ira yan bindision ed tribu nen Jose Ta sikato so pangulo da ray agagi ton lalaki.

¹⁷ Singa biskeg na bakan kalakyan so biskeg nen Jose, Singa saray saklur na bakad katakelan iray saklur to. Saray saklur to et singa pigan libon saklur nen Manases Tan samplon libon saklur nen Efraim. Pambono to rad saray bansa Tan pandesdes tod saraya ya anggad saray sokusokung na mundo.

¹⁸ Nipaakar ed saray tribu di Zabulon tan Isacar inkuanto: Onaligwas komun so tribu nen Zabulon ed panagbiahi to ed dayat, Tan ondakerakel komun ed abung da so kayamanan na saray kabyangay tribu nen Isacar.

¹⁹ Imbitaan dad palandey da ra sangkaili. Tan mangisaklang irad man na manepeg iran bagat. Diad dayat so pangaalaan day kayamanan da Tan diad saray buer ed gilig na dayat.

²⁰ Nipaakar ed tribu nen Gad inkuanto: Nagalang so Dios ya amaawang na dalin da ray kabyangay tribu nen Gad. Mantatalaran iran singa lion, Mantatalaran na bingbingkasen dan taklay odino tapak-tapak na olo.

²¹ Inala ran para sikara so sankaabigan a parti na dalin; Nipabetang ed sikara so apag na pangulo. Inonur da ray ganggan tan saray bilin na Katawan Nen nantitipon iray pangulo na Israel.

²² Nipaakar ed tribu nen Dan inkuanto: Sakey a malangwer a lion so tribu nen Dan Onlulukso manlapud Basan.

²³ Nipaakar ed Neftali inkuanto: Apenepenek na kaabigan tan bindision na Katawan iray kabyangan na tribu nen Neftali; Say dalin da sakop toy anggad abalaten manlapud Dayat na Galilea.

²⁴ Nipaakar ed tribu nen Aser inkuanto: Dakdakel niy bindision na tribu nen Aser nen saray arum a tribu na Israel. Sikato komun so araroen na saray agagi ton lalaki, Tan dakerakel komun so ontubon kiew na oliba ed dalin to.

²⁵ Niagel komun na saray gansa tan balatyang a puirta iray baley to, Tan arawi ra lawas komun ed kaatapan.

²⁶ Sikayon Israelita, anggapoy dios a miparad Dios yo, Manloglogan a sigagalang a ombeltang ed tawen. Manloglogan ya onsorub ed kaloreman ta ondagon ontulong ed sikayo.

²⁷ Say andi-anggaan a Dios so lawas manangyagel yo; saray magnayon a taklay to so sakorung yo. Pinataynan to ray kalaban yo legan yon mankukurang, tan imbaga tod sikayon deralen yo ran amin.

²⁸ Kanyan manaayam ya arawid kaatapan iray kabyangay boleg nen Jacob, mareen so bilay dad sakey a dalin a daakan so trigo tan alak, diad dalin a linaew so manasalog.

²⁹ Israel, agay lay liket mon bansa! Anggapoy mipara sika, sakey a bansan inliktar na Katawan. Say Katawan a dili so samper tan ispadam, a mangyagel ed sika tan mangiter ed sikay pananalo. Ondagon mikasid sika iray kalaban mo, et gatin-gatinan mo ra.

34

¹ "Manlapud saray patar na Moab si Moises linmad Palandey na Nebo, tan kinmalab ed toktok na Palandey na Pisga a nibokig na Jerico, tan diman impanengneng ed sikato na Katawan so intiron dalin na Canaan: say dalin na Galaad ya anggad baybay diad baley na Dan;

² "say intiron dalin na Neftali; saray dalin na Efraim tan Manases; say dalin na Juda ya anggad sagur diad Dayat na Mediteraneo;

³ "say niabalaten a parti na Juda; tan say patar a manlapud Zoar ya anggad Jerico, say siudad na saray kiew a palmira.

⁴ "Insan say Katawan kuantod kinen Moises, Saman so dalin ya insipan kod kindi Abraham, Isaac, Jacob ya iter kod saray kabyangay boleg da. Impanengneng kod sika, balet ag ta ka palooben diman.

⁵ "Kanyan si Moises ya aripen na Katawan inatey diman ed dalin na Moab, onung na imbagay Katawan ed sikato.

⁶ "Say Katawan impompon tod sakey a patar na Moab a kapetekan na baley na Bet-peor, balet anggad sayan agew anggapo niy makaamtad pasen ya angipomponan ed sikato.

⁷ "Sanlasus tan duamploy taon nen Moises nen inatey; ag angoman so biskeg to, tan maung niy pakanengneng to.

⁸ "Saray totood Israel et inermenan dan talomploy agew diad saray patar na Moab.

⁹ "Si Josue a lakin anak nen Nun et napno na kakabatan, lapud tinoro nen Moises a kasalat to. Inonur na saray totood Israel si Josue tan sinumpal da ray ganggan ya inter ed sikara na Katawan diad panamegley nen Moises.

¹⁰ Anggapon balut so linmetaw a propitan singa si Moises diad dalin na Israel; say Katawan akisalitad sikato a lupa-lupaan.

¹¹ Anggapoy arum a propitan akagawa na saray milagro tan saray pakelaw a singa saray milagro tan pakelaw ya impagawa na Katawan ed kinen Moises sumpad ari na Egipto, saray opisyal to, tan diad intiron bansa.

¹² Anggapoy arum a propitan akagawa na singa saray makapanyari tan makapataktakot a bengatlan ginagawa nen Moises ed arap na amin ya Israelita.