1 "Manlapud Tuldan Ayamay Katawan, say Katawan tinawag toy Moises tan inter tod sikato iray onggendan a totontonen
2 "a tombuken na saray Israelita no mangibagat ira. No mangibagat na sakey ya ayep so siopaman, nepeg a say ayep a manlapud saray baka to, odino diad saray karniro to odino diad saray kanding to.
3 "No sakey ed saray baka to so isaklang ton bagat a popoolan, nepeg a bakan kalakyan ya anggapoy deral na laman to. Nepeg ton isaklang so baka diad lolooban na samay Tulda pian awaten na Katawan so mangisaklang.
4 "Samay too itapew tod olo na samay baka so lima to, ed diad ontan naawat imay baka a sakey a bagat a mangekal na saray kasalanan to.
5 "Pateyen tod man imay baka, insan saray paparin anak nen Aaron iyapay dad Katawan so dala to may baka. Kayari to ya, isibo da may dala diad apatiran dapag na altar a walad lolooban to may Tulda.
6 "Insan to kataten imay ayep tan tegtegtegen to.
7 "Saray papari mampool irad tapew na altar insan ira mangipatalatal na saray kiew ed tapew na apoy.
8 "Ipool da ray tegteg na samay ayep, a pati say olo tan taba to.
9 "Samay too et nepeg ton orasan iray loob-loob tan saray sali, insan parin mangibabagat poolan tod tapew na altar imay intiron bagat. Makapaliket ed Katawan so balingit na sayan bagat.
10 No sakey ed saray karniro odino kanding so ibagat na samay too, nepeg a sakey a kalakyan ya anggapoy deral na laman to.
11 Pateyen tod baybay a dapag na altar, insan saray papari isibo day dala to may ayep diad apatiran dapag na altar.
12 No samay too et ategteg to la may ayep, say parin mangibabagat ipool to ray amin a parti, a pati say olo tan say taba.
13 Samay too et nepeg ton orasan iray loob-loob tan saray sali, insan samay pari iyapay tod Katawan imay bagat tan poolan ton intiro ed tapew na altar. Makapaliket ed Katawan so balingit na sayan bagat.
14 No samay too et mangisaklang na sakey a manok a bagat a popoolan, nepeg a sakey a malapati odino sakey a malangwer a palekpek.
15 Say pari iyapay tod altar so manok, yesyesen tod beklew, insan to ipool ed altar so olo to. Nepeg ya ipaterter ed dapag na altar so dala to.
16 Ekalen toy bitoka to may manok tan saray karga to insan to ra ibantak ed nibokig a dapag na altar a pangiinan na dapul.
17 Benbenan to ray payak tan pisagen to may manok balet ag to ilaus, insan to ipool ya intiro ed tapew na altar. Makapaliket ed Katawan so balingit na sayan bagat.
1 "No say sakey a too et mangisaklang ed Katawan na bagat a trigo, nepeg to nin gilingen a pagmaliwen ya arina. Patoroan to na larak na oliba tan tapewan to na insinso,
2 "insan to iyakar ed saray paparin anak nen Aaron. Say parin mangibabagat et alaen toy sankaakup ed samay arinan pinatoroan na larak tan amin imay insinso insan to ra poolan ed tapew na altar. Sikato yay pakapatnagan a nibagat lan amin ed Katawan imay arina. Makapaliket ed Katawan so balingit na sayan bagat.
3 "Kayaryan na saray papari so soluk ed sayan bagat a trigo; masanto yan tuloy, ta inala ed kakanen ya imbagat ed Katawan.
4 "No say ibagat et tinapay a nilutod ornowan, nepeg ya anggapoy libadura to. Nayarin makapal ya inkames ed larak na oliba odino maimpis a pinoranisay larak na oliba.
5 "No say ibagat et tinapay a nilutod bibingkaan, say arina nepeg ya ikames ed larak na oliba balet ag laukan na libadura.
6 "Pingpinglisen insan patoroan na larak no iyapay a sakey a bagat.
7 "No say ibagat et tinapay a nilutod kawali, say arina nepeg ya igawad larak na oliba.
8 "Iyakar ya ibagat ed Katawan tan iter ed pari a sikatoy mangyakar ed altar.
9 "Samay pari mangalay daiset ed samay bagat, insan to poolan ed tapew na altar. Sikato yay pakapatnagan a nibagat lan amin imay kakanen. Makapaliket ed Katawan so balingit na sayan bagat a kakanen.
10 Kayaryan na saray papari so soluk ed sayan bagat; masanto yan tuloy, ta inala ed kakanen ya imbagat ed Katawan.
11 Amin a bagat a trigo ya iyapay yod Katawan et ag nepeg a laukan na libadura; ag kayon balut mangikakana na libadura odino dilo ed kakanen ya ibagat ed Katawan.
12 Say bagat a trigo a manlapud ononan anien ed kapag taon et iyakar ed Katawan, balet ag nepeg a poolan ed tapew na altar.
13 Laukan yo na asin iray amin a bagat a trigo, ta say asin mangilalaman na impisipanan na Dios ed sikayo. (Nepeg yon laukan na asin so amin a bagat yo.)
14 No mangyakar kayod Katawan na bagat a trigo a manlapud ononan anien yo, mangibagat kayo na inigoban a trigo odino tinapung a trigo.
15 Nepeg a patoroan na larak na oliba tan tapewan na insinso.
16 Say pari poolan toy daiset a trigon pinatoroay larak tan amin imay insinso a pakapatnagan a nibagat la amin ed Katawan imay trigo; sakey yan bagat a popoolan.
1 "No say sakey a too et mangisaklang ed Katawan na bagat a para kareenan tan sakey ed saray baka to so ibagat to, nepeg a sakey a kalakyan odino kabatyan ya anggapoy deral na laman to.
2 "Say too itapew tod olo na samay ayep so lima to tan pateyen tod diad lolooban na Tuldan Ayamay Katawan. Saray paparin anak nen Aaron isibo rad apatiran dapag na altar so dala to may baka,
3 "insan saray onggendan a parti na ayep isaklang dan bagat a popoolan ed Katawan: amin a taba ed saray loob-loob,
4 "saray duaran batuk a pati taba ra, tan say sankaabigan a parti na altey.
5 "Saray papari poolan da ra yan amin diad tapew na altar a pati saray bagat a popoolan. Makapaliket ed Katawan so balingit na sayan bagat.
6 "No sakey a karniro odino sakey a kanding so ibagat a para kareenan, nayarin sakey a kalakyan odino kabatyan, balet nepeg ya anggapoy deral na laman to.
7 "No say sakey a too et mangibagat na sakey a karniro,
8 "itapew tod olo na samay ayep so lima to tan pateyen to ed arapan na Tulda. Saray papari isibo rad apatiran dapag na altar so dala to may ayep
9 "tan saray onggendan a parti na ayep isaklang dan bagat a popoolan ed Katawan: say taba, say mataban ikol a pinotut ed abay na tenten, amin a taban kinmolyaput ed saray loob-loob,
10 saray batuk a pati taba ra, tan say sankaabigan a parti na altey.
11 Say parin mangibabagat poolan to ra yan amin ed tapew na altar a sakey a bagat a popoolan ed Katawan.
12 No say sakey a too et mangibagat na kanding,
13 itapew tod olo na samay ayep so lima to tan pateyen to ed arapan na Tulda. Saray papari isibo rad dapag na altar so dala to
14 tan saray onggendan a kabyangan na laman na ayep et ibagat dan popoolan ed Katawan: amin a taba na saray loob-loob,
15 saray batuk a pati saray taban kinmolyaput ed saraya, tan say sankaabigan a parti na altey.
16 Say pari poolan to ra yan amin ed tapew na altar a sakey a bagat a makapaliket ed Katawan. Amin a taba kayaryan na Katawan.
17 Anggapoy Israelita a nayarin mangan na taba odino dala; sayan totontonen et nepeg a sumpalen na amin ya Israelita ed anggan kapigan tan iner man a panaayaman da.
1 "Say Katawan ingganggan toy Moises
2 "ya ibaga tod saray Israelita a siopaman ed sikara so ag to ginagalay nankasalanan ta asumlang toy anggan dinan ed saray ganggan na Katawan, et nepeg a sumpalen to ray onggendan a totontonen.
3 "No say Pangulon Pari so nankasalanan tan impilanur to ray katoowan, nepeg a mangyapay na sakey a kilaw a bakan kalakyan ya anggapoy deral na laman to, insan ibagat ed Katawan a para kasalanan to.
4 "Iyakar tod lolooban na Tulda imay baka, itapew tod olo na baka so lima to, insan to pateyen diman diad arap na Katawan.
5 "Insan samay Pangulon Pari mangala na daiset a dala to may baka tan inyakar tod dalem na Tulda.
6 "Idelnet toy tamoro to ed samay dala insan to iwalsik a maminpito diad arap na masanton kurtina.
7 "Insan mangyan na daiset a dala ed saray pinagkasaklur ed saray suyok na altar na insinso diad dalem na Tulda. Say keran dala iyibung tod leksab na altar a panagpoolan na saray bagat; sayan altar et walad lolooban na Tulda.
8 "Alaen toy amin a taba na samay baka, say tabad saray loob-loob,
9 "saray batuk a pati taba ra, tan say sankaabigan a parti na altey.
10 Alaen na samay pari so sayan taba tan poolan tod tapew na altar a panagpoolan na saray bagat a singa gagawaen to ed taba na ayep ya imbagat a para kareenan.
11 Balet alaen na samay pari so katat na ayep, say intiron laman to, say olo to, saray sali to, tan saray loob-loob to a pati saray pait to,
12 insan to iyakar iran amin ed paway na kampo diad pasen a malinis onung ed ganggan a diay bantakay dapol. Diman to ra poolan ed sakey a bunton na kiew.
13 No amin ya Israelita so nankasalanan ta asumlang dan ag ginagala so sakey ed saray ganggan na Katawan,
14 tan no akabatan la imay kasalanan ya agawa, saray katoowan mangisaklang ira na kilaw na bakan kalakyan a sakey a bagat a para kasalanan. Iyakar da so baka diad Tuldan Ayamay Katawan;
15 saray pangulo na saray baley itapew dad olo na samay baka so kalimaan da, tan diman da pateyen imay baka.
16 Say Pangulon Pari mangala na daiset a dala tan iyakar tod dalem na Tulda;
17 idelnet toy tamoro tod samay dala, insan to iwalsik a mamimpito ed arap na kurtina.
18 Insan mangyan na daiset a dala diad saray pinagkasaklur ed saray suyok na altar na insinso diad dalem na Tulda. Samay keran dala iyibung tod leksab na altar a panagpoolan na saray bagat; sayan altar et walad lolooban na Tulda.
19 Insan to alaen iray amin a taba to may baka tan poolan tod tapew na altar.
20 No antoy gawaen tod bakan kalakyan ya ibagat a para kasalanan ontan met so gawaen tod sayan bakan kalakyan; onya so pangisaklang toy bagat a para kasalanan da ray katoowan, et napirdona so kasalanan da.
21 Insan to iyakar ed paway na kampo so baka tan poolan to a singa pamool tod bakan kalakyan a nibagat a para kasalanan to. Sikato ya so bagat a mangekal na kasalanan na katoowan.
22 No say manoley so nankasalanan ta asumlang ton ag ginagala so sakey ed saray ganggan na Katawan,
23 tan no nipakabat la ed sikato so kasalanan ya agawa to, mangyakar na kanding a kalakyan ya anggapoy deral na laman to insan to ibagat.
24 Itapew tod olo na samay ayep so lima to, insan to pateyen ed nibaybay na altar a diay panamateyan ed saray ayep ya isaklang a bagat a popoolan. Sikato yay bagat a pangekal na kasalanan.
25 Say pari idelnet toy tamoro to ed dala na ayep, iponaris to may dalad tamoro to ed saray pinagkasaklur ed saray suyok na altar a panagpoolan na saray bagat, tan iyibung tod leksab na altar so kerad samay dala.
26 Insan to poolan ed altar iray amin a taba to may ayep a singa pamool tod taba na saray ayep a pinatey ya ibagat a para kareenan. Diad onya say pari isaklang toy bagat a para kasalanan na samay manoley, et napirdona yan manoley.
27 No say sakey ed saray karaklan a too so nankasalanan ta asumlang ton ag ginagala so sakey ed saray ganggan na Katawan,
28 et no nipakabat la ed sikato so kasalanan ya agawa to, mangyakar na kanding a kabatyan ya anggapoy deral na laman to insan to ibagat.
29 Itapew tod olo na samay ayep so lima to, insan to pateyen ed nibaybay na altar a diay panamateyan ed saray ayep ya isaklang a bagat a popoolan.
30 Say pari idelnet toy tamoro to ed dala na ayep, iponaris to may dalad tamoro to ed saray pinagkasaklur ed saray suyok na altar a panagpoolan na saray bagat, tan iyibung tod leksab na altar so kerad samay dala.
31 Ekalen to ray amin a taba to may ayep a singa pangekal ed taba na saray ayep a pinatey ya ibagat para kareenan, insan to ra poolan ed tapew na altar. Makapaliket ed Katawan so balingit na sayan bagat. Diad onya say pari isaklang toy bagat a para kasalanan na sakey a too, et napirdona yan too.
32 No say sakey a too et manyakar na sakey a kordiro ya ibagat ton para kasalanan, nepeg a sakey a kabatyan ya anggapoy deral na laman to.
33 Itapew tod olo na samay ayep so lima to insan to pateyen ed nibaybay na altar a diay panamateyan ed saray ayep ya isaklang a bagat a popoolan.
34 Say pari idelnet toy tamoro to ed dala na ayep, iponaris to may dalad tamoro to ed saray pinagkasaklur ed saray soyuk na altar a panagpoolan na saray bagat, tan iyibung tod leksab na altar so kerad samay dala.
35 Ekalen to ray amin a taba to may ayep a singa pangekal ed taba na saray ayep a pinatey ya ibagat para kareenan, insan to ra poolan ed tapew na altar a pati saray bagat a popoolan a nisaklang ed Katawan. Diad onya say pari isaklang toy bagat a para kasalanan na sakey a too, et napirdona yan too.
1 "Say bagat a para kasalanan et nakaukolan ed saray onggendan a kaso. No say sakey a too et tinawag na korti a mantasi et ag to ibaga so nipaakar ed anengneng odino nadngel to, nepeg a nadusa.
2 "No say sakey a too et ag to ginagalan adiwit so bengatlan marotak onung ed ganggan, a singa bilang say inatey ya ayep, magmaliw a marotak tan nankasalanan diad bektan abirbir to so agawa to.
3 "No say sakey a too et ag to ginagalan adiwit so bengatlan marotak a nanlapud too, anggan anton bengatla, sikatoy nankasalanan diad bektan abirbir to so agawa to.
4 "No say sakey a too et nansamban andi-nunotan, ya anggan antoy kipaakaran, sikatoy nankasalanan diad bektan abirbir to so ginawa to.
5 "No say sakey a too et nankasalanan na anggan dinan ed saray abitla, nepeg ton ipatua so kasalanan to,
6 "tan say dusay kasalanan to et say pangibagat tod Katawan na sakey a kabatyan a karniro odino kanding. Say pari isaklang to so bagat a para kasalanan to yan too.
7 "No say sakey a too et ag to nayarian so mangibagat na kordiro odino kanding lapud irap na bilay to, mangyakar ed Katawan na duaran palekpek odino duaran malangwer a malapati a pinagkabayar na kasalanan to; say sakey ibagat para kasalanan tan say sakey isaklang a bagat a popoolan.
8 "Iyakar to ra ed pari, tan say pari onaen ton isaklang so manok ya ibagat para kasalanan. Yesyesen tod beklew balet ag to ekalen so olo.
9 "Insan to iwalsik ed dapag na altar so daiset a dala to. Say arum a dala ipaterter tod leksab na altar. Sikato yay bagat a pangekal na kasalanan.
10 Insan to isaklang imay sakey a manok a sakey a bagat a popoolan, onung ed saray totontonen. Diad onya say pari isaklang to so bagat a para kasalanan na sakey a too, et napirdona yan too.
11 No ag nayarian na sakey a too so mangibagat na duaran palekpek odino duaran malangwer a malapati lapud irap na bilay to, mangyakar na sakey kilon arina a bagat ton para kasalanan. Ag to laukan na larak na oliba odino insinso, lapud bagat a para kasalanan.
12 Iyakar tod pari imay arina, insan samay pari mangalay sankaakup ed samay arina a pakapatnagan a nibagat lan amin ed Katawan imay arina. Diad tapew na altar poolan ton bagat a popoolan imay sankaakup ya arina. Sikato ya so bagat a mangekal na kasalanan.
13 Diad onya say pari isaklang to so bagat a para kasalanan na sakey a too, et napirdona yan too. Say soluk ed samay arina kayaryan na pari, a singa say gawaen ed bagat a trigo.
14 Say Katawan inter tod kinen Moises iray onggendan a totontonen.
15 No say sakey a too et nankasalanan ya ag to ginagala lapud ag to impangiter na saray babayaran a masantod Katawan, nepeg a mangyakar na sakey a kalakyan a karniro odino kanding ya anggapoy deral na laman to, ta ibagat to a pambayar. Say bili na sayan bagat kuintaen onung ed panagkuinta ed santuario.
16 Nepeg ya iter toy ag to abayaran tan pasolukan to na kakalima. Iter to ya ed pari, tan say pari ibagat to so ayep a pangekal na kasalanan to yan too, et napirdona yan too.
17 No say sakey a too et ag to ginagalan asumlang so sakey ed saray ganggan na Katawan, nankasalanan tan nepeg a nadusa.
18 Nepeg a mangyakar ed pari na sakey a kalakyan a karniro odino kanding ya anggapoy deral na laman to, ta ibagat to a pambayar. Say bili na sayan bagat kuintaen onung ed panagkuinta ed santuario. Say pari isaklang to so bagat a pangekal na ag ginagalan kasalanan to yan too, et napirdona yan too.
19 Sakey yan bagat a pambayar ed kasalanan a ginawa to sumpad Katawan.
1 "Say Katawan inter tod kinen Moises iray onggendan a totontonen.
2 "Nakaukolan so pangisaklang na sakey a bagat no say sakey a too et nankasalanan ed Katawan lapud ag to impangipawil na indipositod sikato na kapara ton Israelita, odino lapud impanakew tod sikato na bangatla odino lapud impansaol tod sikato,
3 "odino lapud impangibori to ed nalmo ton bengatla ya abalang tan nansamba ni ingen ya ag to nalmo.
4 "No say sakey a too et nankasalanan na anggan dinan ed saray abitla, nepeg a bayaran toy inala tod sinasaol a polaing. Diad agew a sikatoy naamtaan a nankasalanan, nepeg a bayaran to may angalaan to tan pasolukan to na kakalima.
5
6 "Mangyakar ed pari na sakey a kalakyan a karniro odino kanding ya anggapoy deral na laman to, ta ibagat ton pambayar ed Katawan. Say bili na sayan bagat kuintaen onung ed panagkuinta ed santuario.
7 "Say pari ibagat to so ayep a pangekal na kasalanan to yan too, et napirdona yan too.
8 "Say Katawan ingganggan toy Moises
9 "ya iter tod kinen Aaron tan saray lalakin anak to iray onggendan a totontonen a nipaakar ed saray bagat a popoolan. Say bagat a popoolan et nepeg ya itilak a sanlabi ed tapew na altar, tan nepeg a mandarlang lawas so apoy.
10 Insan say pari ya akasolung na linen a tunika tan linen a pantalon a potut ekalen to ray dapul ya atilak ed altar tan iyan to ra ed dapag na samay altar.
11 Insan mansalat na kawes tan iyakar tod paway na kampo ira may dapul diad pasen a malinis onung ed ganggan.
12 Nepeg a mandarlang lawas so apoy ed tapew na altar tan ag balut paolyan a naerep. Kapag kabwasan sungloran na pari so apoy, apigeren ton ilira iray bagat a popoolan a walad tapew na altar, tan poolan toy taba na bagat a para kareenan.
13 Nepeg a mandarlang lawas so apoy ed tapew na altar tan ag balut paolyan a naerep.
14 Saray onggendan a totontonen et nipaakar ed saray bagat a trigo. Say sakey ed saray paparin anak nen Aaron et isaklang tod Katawan diad arap na altar so bagat a trigo.
15 Alaen toy sankaakup ed samay arinan pinatoroan na larak, tan amin ya insinson walad tapew to, insan poolan to ra ed tapew na altar a pakapatnagan a nibagat lan amin ed Katawan imay arina; makapaliket ed Katawan so balingit na sayan bagat.
16 Kanen na saray papari so akeraan ed samay arina. Nepeg a gawaen a tinapay ya anggapoy libadura tan kanen ed masanton pasen, diad solar na Tuldan Ayamay Katawan. Say Katawan inter to yad saray papari a nabebetangan da ed saray bagat a popoolan. Masanton tuloy yan bagat, a singa saray bagat a para kasalanan tan saray bagat a pambayar.
17
18 Diad amin a panaon ya onsabi siopaman ed saray lalakin kabyangay boleg nen Aaron et nayarin mangan ed saray akeraan ed bagat a trigo tan sikatoy betang da lawas ed saray bagat a popoolan ya insaklang ed Katawan. Siopamay arum a maniwit ed sayan bagat napasakitan na pakayari na inkasanto na bagat.
19 Say Katawan inter tod kinen Moises iray onggendan a totontonen
20 a nipaakar ed pangikonsagrad kinen Aaron tan saray lalakin anak to. Diad agew na pangikonsagrad siopaman ed sikara, sikatoy mangibagat ed Katawan na sakey kilon arina (singa karakel na samay inagew-agew a bagat a trigo), say kapaldua diad kabwasan tan say kapaldua diad labi.
21 Nepeg a nikames ed larak imay arina tan niluto ed bibingkaan, pingpinglisen, insan isaklang a bagat a trigo ed Katawan; makapaliket ed Katawan so balingit na sayan bagat.
22 Diad amin a panaon ya onsabi sayan bagat et nepeg ya isaklang na balang kabyangan na boleg nen Aaron a manlilingkur a sakey a Pangulon Pari. Nepeg a sigput a napoolan yan bagat ya isaklang ed Katawan.
23 Anggapoy nayarin kanen ed bagat a trigo ya isaklang na pari; amin et nepeg a poolan.
24 Say Katawan ingganggan toy Moises
25 ya iter tod kinen Aaron tan saray anak to iray onggendan a totontonen a nipaakar ed saray bagat a para kasalanan. Say ayep ya ibagat a para kasalanan et pateyen ed nibaybay na altar a dimay panamateyan ed saray ayayep ya ibagat a popoolan. Masanton tuloy yan bagat.
26 Say parin mangibagat ed samay ayep kanen tod masanton pasen, diad solar na Tuldan Ayamay Katawan.
27 Siopaman odino antokaman a makadiwit ed laman na samay ayep napasakitan na pakayari na inkasanto to. No napolasian na dala na samay ayep so dinan man a kawes nepeg ya ipesak ed masanton pasen.
28 Dinan man a bangan panlambungan ed karni na samay ayep nepeg a betagen, tan no gansan kaldiro so ikana, nepeg a gisigisen insan orasan na danum.
29 Siopamay lakin kabyangan na pamilyay pari et nayarian toy mangan ed sayan bagat; masanton tuloy yan bagat.
30 Balet no walay dala a niakar ed dalem na Tulda tan nikana ed sirimonya a pangekal na kasalanan, say ayep ya akandala et ag nepeg a kanen; nepeg a poolan.
1 "Saray onggendan a totontonen et nipaakar ed saray bagat a pambayar, masanton tuloy ira.
2 "Say ayep a para sayan bagat et nepeg a pateyen diad nibaybay na altar a dimay panamateyan ed saray ayep ya ibagat a popoolan, tan say dala to et isibo ed saray apatiran dapag na altar.
3 "Amin a taba ekalen tan ibagat ed tapew na altar: say mataban ikol, say taban kinmolyaput ed saray loob-loob,
4 "saray batuk a pati taba ra, tan say sankaabigan a kabyangan na altey.
5 "Say pari poolan tod tapew na altar iray amin a taba a sakey a bagat a popoolan ed Katawan. Sakey yan bagat a pambayar.
6 "Siopamay lakin kabyangan na pamilyay pari et nayarian toy mangan ed sayan bagat, balet nepeg a kanen ed sakey a masanton pasen, lapud masanton tuloy yan bagat.
7 "Walay sakey a totontonen a nepeg a sumpalen ed pangisaklang na bagat a para kasalanan tan diad bagat a pambayar: say karni kayaryan na pari ya angibagat.
8 "Say katat na ayep a nisaklang a bagat a popoolan et kayaryan na pari ya angibagat.
9 "Amin a bagat trigo a nilutod ornowan odino diad kawali odino diad bibingkaan et kayaryan na pari ya angibagat.
10 Balet amin ya ag niluton bagat a trigo, nilaukan man na larak odino andi, kayaryan na amin a lalakin anak nen Aaron tan nepeg a mampaparay betang na sakey ed sikara.
11 Saray onggendan a totontonen et nipaakar ed pangisaklang ed Katawan na saray bagat a para kareenan.
12 No say sakey a too et mangisaklang na sayan bagat a pisalamat tod Dios, nepeg a tekepan to na bagat a tinapay ya anggapoy libadura: nayarin makapal a tinapay a nikames ed larak na oliba, odino maimpis a pinoranisay larak na oliba, odino tinapay a nikames ed dakel a larak.
13 Mangyapay met ni na saray tinapay a walay libadura.
14 Mangiter na sakey a pisag na balang nengneng na tinapay tan iyapay tod Katawan; kayaryan ya na parin mangala na dala na samay ayep tan isibo tod altar.
15 Say karni na ayep nepeg a kanen ed agew ya impangibagat; nepeg ya anggapoy nakeraan ya anggad kabwasan.
16 No say sakey a too et mangyakar na bagat a para kareenan, a panumpal tod sipan to odino pangibagat tod mabulos a linawa, aliwan amin et nepeg a kanen diad agew ya impangibagat, no ag ingen say nakeraan nayarin kanen ed ontombuk ya agew.
17 Nepeg a poolan so antokaman a karnin nakeraan ed kumatlon agew.
18 No walay karnin kinan ed kumatlon agew, say Dios ag to awaten so bagat na samay too. Sayan bagat ag nipasen a manepeg a bagat na samay too, no ag ingen sakey bagat a marotak, tan nadusa so siopamay mangan ed sayan bagat.
19 No say karni et nidiwit ed antokaman a marotak onung ed ganggan, ag nepeg a kanen, no ag ingen poolan. Siopamay malinis onung ed ganggan nayarin mangan ed samay karni,
20 balet no say toon marotak onung ed ganggan et mangan ed samay karni, sikatoy nipasen ya aliwa lan sakey ed saray totoo na Dios.
21 Ontan met, no say sakey a too et mangan ed karni na sayan bagat kayari ton diniwit so bengatlan marotak onung ed ganggan, manlapu man ed too odino ayep, nipasen ya aliwa lan sakey ed saray totoo na Dios.
22 Say Katawan inter tod kinen Moises iray onggendan a totontonen
23 a nepeg a sumpalen na saray totood Israel. Ag nepeg a kanen so taba na baka, karniro, odino kanding.
24 Nepeg ya ag kanen so taba na ayep ya inatey a bukor odino pinatey na ayep ed takel, balet nayarin ikana ed arum a pamaakaran.
25 Siopamay mangan na taba na ayep ya ibagat a popoolan ed Katawan, et nipasen ya aliwa lan sakey ed saray totoo na Dios.
26 Anggan iner so panaayaman na saray Israelita, ag da nepeg a kanen so dala na manok odino ayep.
27 Siopamay onsumlang ed sayan ganggan nipasen ya aliwa lan sakey ed saray totoo na Dios.
28 Say Katawan inter tod kinen Moises iray onggendan a totontonen
29 a nepeg a sumpalen na saray totood Israel. Siopamay mangisaklang na bagat a para kareenan nepeg a manyakar na kabyangan na laman na samay ayep a rigalo tod Katawan.
30 Sikaton dili so mangawit na sayan bagat a popoolan. Awiten to so taba tan pagew na samay ayep tan iyapay ton rigalo ed Katawan.
31 Say pari poolan tod tapew na altar imay taba, balet samay pagew kayaryan na saray papari.
32 Say kawanan a kamanonur ya ulpo na samay ayep et niiter
33 ed pari a mangisaklang na dala tan taba na bagat a para kareenan.
34 Say pagew na ayep tan say kawanan a kamanonur ya ulpo to et sakey iran rigalo ya inalay Katawan ed saray Israelita tan inter tod saray papari. Sikato ya so nepeg ya iter na saray Israelita ed saray papari kapigan man a panaon.
35 Sikato yay parti na bagat a popoolan so niiter ed kinen Aaron tan saray anak ton lalaki nen nikonsagra ran papari na Katawan.
36 Diad saman ya agew say Katawan ingganggan to ray totood Israel ya iter dad sikara so sayan parti na bagat. Sikato yay sakey a totontonen a nepeg ya onuren na saray totood Israel kapigan man a panaon.
37 Sikara ya sirin so totontonen a para saray bagat a popoolan, saray bagat a trigo, saray bagat a para kasalanan, saray bagat a pambayar, saray bagat a pangikonsagra, tan saray bagat a para kareenan.
38 Diad Palandey na Sinai diad kalawakan, say Katawan inter to ra yan ganggan ed kinen Moises diad samay agew ya imbaga tod saray totood Israel a mangibagat ira.
1 "Say Katawan kuantod kinen Moises,
2 "Iyakar mod lolooban na Tuldan Ayamay Katawan si Aaron tan saray anak ton lalaki; piawit mod man iray kawes na pari, saray larak ya ilalana, say kilaw na bakan kalakyan ya ibagat a para kasalanan, saray duaran karniron kalakyan, tan say sambaskit a tinapay ya anggapoy libadura.
3 "Insan mod man tawagen iray amin ya Israelita.
4 "Sinumpal nen Moises ira may ingganggan na Katawan, et nen akapantitipon la ray katoowan,
5 "inkuantod sikara, Ingganggan na Katawan so gawaen ko natan.
6 "Si Moises inyakar tod arap ira di Aaron tan saramay anak ton lalaki, insan to ra inames onung ed ganggan.
7 "Kayari to ya, insolung tod kinen Aaron so kawes ya antikey so taklay tan say tunika insan to binalkesay abel so awak nen Aaron. Insolung tod sikato so ipod tan tinapewan tod awak na balibalin inabel a balkes.
8 "Insolung tod sikato so apis na pagew tan inyan to dia so Urim tan Tummim.
9 "Insan to impatoon ed olo to so turban, tan diad arap na sayan turban impeket toy balituk ya arkos, say masanton tanda na inkisaklang, onung na ingganggan na Katawan ed kinen Moises.
10 Insan inala nen Moises imay larak a panaglana tan nilanaan to may Tuldan Ayamay Katawan tan amin a wadman ed dalem to, et diad onya insaklang to ran amin ed Katawan.
11 Angalay daiset ed samay larak tan amimpito ton inwalsik ed altar tan diad saray kagawaan to, diad talyasi, tan say ansagan to a pangisaklang to rad Katawan.
12 Kinonsagra toy Aaron diad impangikalbo tod olo to na larak a panaglana.
13 Kayari to ya, insoblay ton pinaonlad arap ira may lalakin anak nen Aaron tan sinolungan to ray kawes ya antikey so taklay. Insan to ra binalabalan ed awak, tan siningeran toy kaoloan da na sakub na toktok na olo, onung na ingganggan na Katawan.
14 Insan si Moises inyakar to may kilaw na bakan kalakyan ya ibagat a para kasalanan, et si Aaron tan saray lalakin anak to intapew dad olo na samay baka iray kalimaan da.
15 Pinatey nen Moises imay baka tan inala to na dala. Insan diad panamegley na tamoro to pinoporanisan to na dala iray pinagkasaklur ed saray soyuk na altar pian nisaklang to. Kayari to ya, inibung tod leksab na altar so keran dala. Diad onya insaklang to tan nilinisan to onung ed ganggan.
16 Inala nen Moises iray amin a taba na saray loob-loob, say sankaabigan a parti na altey, tan saray batuk a pati taba ra, insan to ra pinoolan ed tapew na altar.
17 Inala to ray amin ya akeraan ed samay baka pati say katat to, say laman to, tan say pait to, insan to ra pinoolan ed paway na kampo onung na ingganggan na Katawan.
18 Kayari to ya, si Moises inyakar to may karniron kalakyan a para bagat a popoolan. Insan si Aaron tan saray lalakin anak to intapew dad oloy ayep iray kalimaan da.
19 Pinatey nen Moises imay karniro tan insibo tod apatiran kapag na altar so dala.
20 Tinetegteg to may karniro, inorasan to na danum iray loob-loob tan saray kamanonur a sali, insan to pinoolan to so olo, say taba, tan amin ni ran atilak a parti na samay karniro, onung na ingganggan na Katawan. Sayan bagat et sakey a bagat a popoolan, tan makapaliket ed Katawan so balingit to.
21
22 Insan inyakar nen Moises imay kumadwan karniron kalakyan para pangikonsagrad saray papari. Insan si Aaron tan saray lalakin anak to intapew dad oloy ayep iray kalimaan da.
23 Pinatey nen Moises imay karniro tan angala na daiset a dala insan to imponaris ed gilig na kawanan a layag nen Aaron diad kawanan a tangan na lima to tan diad kawanan a layag nen Aaron, diad kawanan a tangan na sali to.
24 Insan to inyakar ed arap ira may lalakin anak nen Aaron tan pinoranisan to na dala iray gilig na kawanan a kalayagan da, diad kawanan a tangan na kalimaan da, tan diad kawanan a tangan na kasaliyan da. Insan si Moises inwalsik tod apatiran dapag na altar so keran dala.
25 Inala toy taba, saray mataban ikol, amin a taban kinmulyaput ed saray loob-loob, say sankaabigan a parti na altey, saray batuk a pati taba ra, tan say kamanonan kawanan a sali.
26 Insan to angalay sakey a tinapay ed samay baskit a kawalaay tinapay ya anggapoy libadura a nisaklang ed Katawan, sakey a tinapay ya inlutod larak, tan sakey a maimpis a tinapay tan intapew to ra ed samay taba tan diad samay kamanonan kawanan a sali.
27 Inyan to ra yan amin a kakanen diad saray lima nen Aaron tan diad lima na saramay anak to tan inyapay da a nidoma-doman rigalo ed Katawan.
28 Insan inala nen Moises ira may kakanen a walad lima ra, intapew to rad bagat a popoolan, insan to ra pinaoolan ed tapew na altar. Sikato yay bagat a panangikonsagra. Sikato yay bagat a popoolan tan makapaliket ed Katawan so balingit to.
29 Insan inala nen Moises so pagew tan inyapay ton sakey a nidoma-doman rigalo ed Katawan. Sikato yay parti a kayaryan nen Moises ed samay karniron inkanad impangonsagra. Ginawa nen Moises so onung na ingganggan na Katawan.
30 Inala nen Moises imay larak ya ipopoyuk tan angala na daiset a dala a walad tapew na altar tan inwalsik tod kinen Aaron tan diad saramay anak to; winalsikan to met iray kawes da. Diad onya inkonsagra to rad Katawan pati saray kawes da.
31 Inkuanen Moises ed kinen Aaron tan saray anak ko, Iyakar yod lolooban na Tuldan Ayamay Katawan so karni, lambung yo, tan akan yod aman a pati say tinapay a walad baskit na saray bagat na panangikonsagra, onung na ingganggan na Katawan.
32 Poolan yoy amin a nakeraan a karni tan tinapay.
33 Diad loob na pitoran agew ag kayo ontataynan ed lolooban na Tulda, ya anggad nasumpal so sirimonyay panangikonsagra.
34 Ingganggan na Katawan so ginawa tayo natan, pian naekal so kasalanan yo.
35 Diad loob na pitoran agew nepeg a manayam kayod mad lolooban na Tulda diad agew tan labi tan gawa yoy ingganggan na Katawan. No ag yo sumpalen, ompatey kayo. Sikato ya so ingganggan na Katawan ed siak.
36 Kanyan si Aaron tan saramay anak to sinumpal day amin ya ganggan na Katawan diad panamegley nen Moises.
1 "Diad ontombuk ya agew kayari na samay sirimonya na panangikonsagra, si Moises tinawag toy Aaron tan saray anak ton lalaki tan saray pangulo na Israel.
2 "Inkuantod kinen Aaron, Mangala ka na sakey a kilaw na bakan kalakyan tan sakey a kordiron kalakyan ya anggapoy deral na laman da tan ibagat mo ra ed Katawan, say baka bagat a para kasalanan tan say kordiro bagat a popoolan.
3 "Insan ibagam ed saray totood Israel a mangala ray sakey a kanding a kalakyan, ta ibagat da a para kasalanan, sakey taon a baka tan sakey taon a kordiro ya anggapoy deral na laman da, ta isaklang da ran bagat a popoolan,
4 "tan sakey a bakan kalakyan tan sakey a kordiron kalakyan ta ibagat da ran para kareenan. Ibagat da ra ya ed Katawan a katekep da so bagat a trigo ya inkames ed larak. Nepeg da yan gawaen ta say Katawan mampanengneng ed sikara natan.
5 "Inyakar dad arap na Tulda ira may amin ya ingganggan nen Moises ya awiten da, tan nantitipon diman iray amin ya Israelita ta igalang da so Katawan.
6 "Inkuanen Moises, Ingganggan na Katawan a gawaen yo ra yan amin, pian nipanengneng ed sikato so kagalangan to.
7 "Insan to inkuan ed kinen Aaron, Lakad altar ta isaklang mo so bagat a para kasalanan tay say bagat a popoolan a mangekal na saray kasalanan mo tan saray kasalanan na saray totoo. Isaklang mo yan bagat a mangekal na saray kasalanan na saray totoo onung na ingganggan na Katawan.
8 "Linmad altar si Aaron tan pinatey to may kilaw na bakan kalakyan, ta isaklang a bagat a para saray kasalanan to.
9 "Saramay anak to inyakar dad sikato so dala, indelnet tod samay dala so tamoro to, pinoranisan to may pinagkasaklur ed saray suyok na altar, tan inibung tod leksab na altar so keran dala.
10 Insan to pinoolan ed tapew na altar so taba, saray batuk, tan say sankaabigan a parti na altey, onung na ingganggan na Katawan ed kinen Moises.
11 Balet pinoolan tod paway na kampo so karni tan say katat na samay ayep.
12 Pinatey to may ayep ya ikanad bagat a popoolan a para sikaton dili. Saramay anak to inyakar dad sikato so dala, tan insibu ton amin ed saray apatiran dapag na altar.
13 Inter dad sikato so olo tan saray arum a tegteg na samay ayep, insan to ra pinoolan ed tapew na altar.
14 Inorasan to ray loob-loob tan saray kamanonur a sali, intapew to rad saray arum a kabyangan na samay bagat a popoolan, insan to ra pinoolan ed tapew na altar.
15 Kayari to ya, insaklang to ra may bagat na saray totoo. Inala to may kanding ya ibagat a para saray kasalanan da ray totoo, pinatey to, tan imbagat to a singa ginawa to ed samay bagat a pangekal na saray kasalanan to.
16 Inala to met imay ayep para bagat a popoolan tan insaklang to onung ed saray totontonen.
17 Inyapay to may bagat a trigo, angala na sankaakup ya arina tan pinoolan tod tapew na altar. (Kaaruman ya na inagew-agew a bagat a popoolan.)
18 Pinatey to may bakan kalakyan tan samay karniron kalakyan, ta ibagat ira a para kareenan; sakey yan bagat a para saray totoo. Saramay anak ton lalaki inyakar dad sikato so dala, tan insibo to ed apatiran dapag na altar.
19 Si Aaron intapew tod saray pagew na samay baka tan samay karniro iray taba, say mataban ikol, say taban kinmulyaput ed saray loob-loob, saray batuk, tan say sankaabigan a parti na altey insan to ra inyakar ya amin ed altar. Pinoolan tod tapew na altar iray taba
20 tan inyapay ton nidoma-doman rigalod Katawan a para saray papari ira so pagew tan saray kamanonur a sali, onung na ingganggan nen Moises.
21
22 Nen asumpal nen Aaron ya insaklang iray amin a bagat, inyatagey to ray lima to tan impaarap to rad katoowan, tan binindisionan to ra, insan linmasur.
23 Si Moises tan si Aaron linmoob irad dalem na samay Tuldan Ayamay Katawan; nen pinmaway ira binindisionan da ray katoowan tan pinmatnag ed amin a totoo so kagalangan na Katawan.
24 Kabebekta say Katawan angipelag na apoy, tan inoput ton pinoolan imay bagat a popoolan tan saramay taba ed tapew na altar. Nen anengneng ya na saray totoo, inmeyag iran amin tan dinmakmomo ra ya anggad dalin.
1 "Di Nadab tan Abiu a lalakin anak nen Aaron inala ra so pananginay insinso na balang sakey ed sikara, kinargaan da ra na ngalab, tinapewan da ra na insinso, insan da ra inyapay ed Katawan. Balet aliwa yan masanton apoy, ta say Katawan ag to ra ingganggan ya iyapay da.
2 "Kabebekta say Katawan angipelag na apoy tan pinoolan to ra ya anggad ag da impatey ed arap to.
3 "Insan inkuanen Moises ed kinen Aaron, Sikato yay sasalitaen na Katawan nen inkuanto, Amin da ray manlingkur ed siak nepeg a pagalangan day inkasantok; ipatnag kod saray totook so kagalangan ko! Balet ag inmesel si Aaron.
4 "Tinawag nen Moises ira di Misael tan Elzafan a lalakin anak nen Uziel a pangamaen nen Aaron, tan kuantod sikara, Gali dia ta alsa yo ray bangkay na kakapinsan yo diad masanton Tulda, tan iyakar yo rad paway na kampo.
5 "Kanyan dinmago ra tan say kawes ya akasolung ed saramay bangkay so nanlibitan da nen impaway da rad kampo, onung na ingganggan nen Moises.
6 "Insan inkuanen Moises ed kinen Aaron tan diad saray lalakin anak to a di Eleazar tan Itamar, Ag yo papaolyan ya agotgot so buek yo, odino pipilaten iray kawes yo diad pangipanengneng yon maneermen kayo. No gawaen yo ompatey kayo, tan say Katawan mampasnuk ed amin ya Israelita. Balet amin a kapara yon Israelita et naabuloyan iran manermen, lapud sayan patey a say makasengeg et say apoy ya impelag na Katawan.
7 "Ag kayo ontataynan ed lolooban na Tulda, ta no ontaynan kayo ompatey kayo, lapud nisaklang kayo diad panamegley na ilalana a larak na Katawan. Kanyan ginawa ra so imbaga nen Moises.
8 "Say Katawan kuantod kinen Aaron,
9 "Sika tan saray lalakin anak mo et ag nepeg ya onloob ed Tuldan Ayaman ko kayari yon oninom na alak odino arum nin mabayanin inomen, ta no gawaen yo ya, ompatey kayo. Sikato ya so sakey a ganggan a nepeg a sumpalen na amin a kabyangay boleg mo.
10 Nepeg yon pambiigan so bengatlan kayaryan na Dios tan say bengatlan kayaryan na karaklan; nepeg yo met a pambiigan so malinis tan say marotak onung ed ganggan.
11 Nepeg yo met ya ibangat ed saray totood Israel iray amin a ganggan ya inter kod sikara diad panamegley nen Moises.
12 Si Moises inkuantod kinen Aaron tan saray nakdaan a lalakin anak to a di Eleazar tan Itamar, Ala yoy bagat a trigo ya akeraan ed bagat a popoolan ed Katawan, gawa yon tinapay ya anggapoy libadura insan yo kanen ed abay na altar, lapud masanton tuloy yan bagat.
13 Akan yod sakey a masanton pasen; sikato ya so betang yo tan saray lalakin anak yo ed bagat a popoolan ed Katawan. Sikato ya so ingganggan ed siak na Katawan.
14 Balet sikayo tan saray anak yon lalaki tan bibii et nayarian yon kanen so pagew tan say kamanonur a sali a nisaklang a nidoma-doman rigalo ed Katawan a para saray papari. Nayarian yo ran kanen ed sakey a pasen a malinis onung ed ganggan. Sarayan bagat et niiter irad sikayo a parti ran nabebetangan yo ed saray bagat a para kareenan ya isaklang na saray totood Israel.
15 Awiten da so kamanonur a sali tan say pagew no isaklang a bagat a popoolan ed Katawan so taba. Sarayan parti et kayaryan yo ra ed ando lan ando, sikayo tan saray anak yo, onung na ingganggan na Katawan.
16 Si Moises tinepet to so nipaakar ed samay kanding ya ibagat para kasalanan, et naamtaan to ya apoolan la. Lapud saya, akapasnuk si Moises ed kinen Eleazar tan si Itamar. Inkuantod sikara,
17 Akin et ag yo inakan ed masanton pasen imay bagat a para kasalanan? Masanton tuloy iman, et say Katawan inter tod sikayo pian napaandi toy kasalanan na amin da ray Israelita.
18 Bangta say dala to et ag niakar ed dalem na masanton Tulda, nepeg komun ya inakan yod man imay bagat onung na ingganggan ko.
19 Inmebat si Aaron, Natad sayan agew say totoo angisaklang irad arap na Katawan na bagat dan para kasalanan tan bagat a popoolan, balet siansian makapasinagem so agawad siak. No angan ak natan ed samay bagat a para kasalanan, makapaliket ya kasi ed Katawan?
20 Akaliket si Moises nen nadngel to yan ebat nen Aaron.
1 "Say Katawan inter tod kindi Moises tan Aaron iray onggendan a totontonen
2 "a nepeg a tombuken na saray totood Israel. Nayarian yon kanen so dinan man ya ayep ed tapew na dalin
3 "a pisag so koko to tan mamparintek.
4 "Balet ag yo nepeg a kanen iray kamilyo, saray konihod takel, odino saray konihon amo. Ipasen yon marotak ira yan ayayep, ta mamparintek ira balet aliwan pisag so koko ra.
5
6
7 "Ag kayo mamangakan na baboy ta ipasen yon marotak ya ayep; pisag iray koko to, balet ag mamparintek.
8 "Ag kayo mamangakay dinan man ed sarayan ayayep, ni didiwiten so laman ton inatey; marotak ira yan ayayep.
9 "Nayarian yo a kanen so anggan dinan a sira a nanggigim tan nansiksik,
10 balet ag nayarin kanen so antokaman a manaayam ed danum ya anggapoy gigim tan siksik.
11 Ipasen yon marotak ira yan sira. Ag yo ra kakanen, ni didiwiten iray laman dan inatey.
12 Ag kayo mamangakay antokaman a mabilay ya ag nansiksik tan ag nanggigim a manaayam ed danum.
13 Ag yo nepeg a kanen iray onggendan a marotak a manok: agila, kulayot, baga, gikgik; busardo, buitri, wawak; abistrus; garsita, tigkalak, dulakak, pilikano, kalamon, abudilla, tan kaging.
14
15
16
17
18
19
20 Amin a nampayak a bigis et marotak
21 likud labat ed saray manlukso.
22 Nayarian yoy mangan na dorun, dalokduk, odino wirwir.
23 Balet amin a nampayak tan mankorung et ipasen yo ran marotak.
24 Siopamay makadiwit ed inatey a laman na saray onggendan ya ayayep et marotak ya anggad labi: amin ya ayayep a nankoko likud no pisag so koko ra tan mamparintek ira, tan amin ya ayayep ya apatiray sali tan andorokey so koko ra. Siopamay manawit na inatey a laman da ra yan ayayep nepeg ya ipesak toy kawes to, balet sikatoy marotak ni ya anggad labi.
25
26
27
28
29 Ipasen yon marotak iray bulilit, otut, tilay, toko, tiki, buaya, basakay, tan angga.
30
31 Siopamay maniwit ed saraya odino say inatey a laman da et marotak ya anggad labi.
32 Amin a bengatlan adapoan na laman dan inatey et marotak. Sarayan bengatla et tabla, abel, katat, odino sako ya anggan antoy pangikakanaan. Nakaukolan ya itaksaw irad danum balet mansiansia ran marotak ya anggad labi.
33 Et no dinmapod banga so inatey a laman da, amin a karga to may banga magmaliw a marotak, tan nepeg yon betagen.
34 Amin a kakanen a naibungan na danum a walad saman a banga et magmaliw a marotak tan amin a nayarin inumen a wadman ed saman a banga et magmaliw a marotak.
35 Anggan anton bengatla a nadapoan na inatey a laman et magmaliw a marotak; say dalin a dalikan odino pogun et nepeg a betagen,
36 balet say sobul odino bobun et mansiansian malinis anggaman ya amin a bengatlan nadiwit na inatey a laman et magmaliw a marotak.
37 No nadapoan day bokel ya itatanem, samay bokel mansiansian malinis.
38 Balet no say bokel ya akatalem ed danum et napelagan na inatey a laman na ayep a marotak, samay bokel magmaliw a marotak.
39 Siopamay makadiwit na inatey a laman na sakey a nayarin kanen et magmaliw a marotak ya anggad labi.
40 No walay mangan na anggan dinan a parti na samay inatey ya ayep, nepeg ton ipesak so kawes to, balet sikato niy marotak ya anggad labi; siopamay manawit na inatey ya ayep nepeg ya ipesak toy kawes to, balet sikato niy marotak ya anggad labi.
41 Ag yo nepeg so mansira na dinan man ya ankekelag ya ayep a manaakar ed tapew na dalin, ta marotak ira.
42 Nayarin sarayan ayayep et maniilas ira, odino panaakar day apatiran sali ra, odino amayamay so sali ra.
43 Ag yo dodotakay sikayon dili diad pangan yod sarayan ayayep.
44 Siak so Katawan a Dios yo, kanyan nepeg a masanto kayo ta siak et masanto ak.
45 Siak so Katawan ya angipaway ed sikayod Egipto pian siak so magmaliw a Dios yo. Nepeg a masanto kayo, ta siak et masanto ak.
46 Sikato ya sirin so ganggan a nipaakar ed saray ayayep tan saray manok, nipaakar ed amin a manaayam ed danum, tan amin a manaakar ed tapew na dalin.
47 Apiger yon pambiigan so malinis tan say marotak onung ed ganggan, saray ayayep a nayarin kanen tan saray ayayep a sebel a kanen.
1 "Say Katawan inter to ray onggendan a totontonen
2 "a nepeg a sumpalen na saray totood Israel. Diad loob na pitoran agew kayariy pananak na sakey ya ina ed sakey a laki, sayan ina et marotak onung ed ganggan, a singa inkarotak to no naliliberan.
3 "Diad kumawalon agew nepeg a segetan so ogaw.
4 "Sayan ina talomplo tan taloy agew ni a siansian marotak lapud inkaekalan toy dala nen mananak; nepeg ya ag to mandiwit na antokaman a masanto, ni onloob ed dalem na masanton Tulda ya anggad pagmaliw to lan malinis onung ed ganggan.
5 "Diad loob na labinapat agew kayariy pananak na ina ed sakey a bii, sayan ina et marotak onung ed ganggan, a singa inkarotak to no naliliberan. Insan anemaplo tan anem ya agew ni a siansian marotak lapud inkaekalan toy dala nen nananak.
6 "No nagmaliw lan malinis ongun ed ganggan kayari na inkarotak to lapud impananak to na laki odino bii, nepeg a mangyakar ed pari diad lolooban na Tuldan Ayamay Katawan na sakey taon a kordiro, ta isaklang a bagat a popoolan tan say sakey a malapati odino sakey a palekpek, ta isaklang a bagat a para kasalanan.
7 "Say pari isaklang to yan bagat ed Katawan tan gawaen toy sirimonya a mangekal na inkarotak to et, diad ontan, magmaliw a malinis onung ed ganggan. Sikato ya sirin so nepeg a gawaen na sakey a bii kayari ton mananak.
8 "No ag nayarian na sakey a bii so mangibagat na sakey a kordiro, nepeg a mangisaklang na duaran palekpek odino duaran malapati, say sakey isaklang a bagat a popoolan tan say sakey ibagat a para kasalanan. Say pari gawaen toy sirimonya a mangekal na inkarotak na samay bii et, diad ontan, magmaliw a malinis onung ed ganggan.
1 "Say Katawan inter tod kindi Moises tan Aaron ira yan totontonen.
2 "No say sakey a too et agiri odino apelsaan odino alanokan a nayarin magmaliw a singa sakit a kating, iyakar ed kinen Aaron odino diad sakey ed saray paparin anak to.
3 "Say pari nengnengen to may sakit na baog et, no pinmoti ray bagod kawalaan to tan singa kinmotlaung, singa kating yan sakit. Say pari ed satan sintinsiaan ton marotak imay too.
4 "Balet no samay sakit na baog et ampoti tan ag kinmotlaung tan ag pinmoti ray bago, say pari panayamen ton pitoy agew a bukbukor to imay too ed akabiig a pasen.
5 "Say pari nengnengen to lamet diad kumapiton agew imay too; no diad pakanengneng to et ag angoman imay sakit tan ag kinmayat, panayamen to nin pitoy agew ed akabiig a pasen.
6 "Samay pari nengnengen to lamet diad kumapiton agew et no nakal so poti to may sakit tan ag kinmayat, sintinsiaan ton malinis imay too onung ed ganggan; sakey labat a giri. Samey too ipesak tok kawes to et magmaliw a malinis onung ed ganggan.
7 "Balet no samay sakit et kinmayat kayari na impannengneng tan impanintinsia na pari a malinis imay too, nepeg a mampanengneng lamet imay too ed pari.
8 "Say pari nengnengen to lamet, et no kinmayat imay sakit, sintinsiaan to a marotak imay too; kating so sakit to.
9 "No say sakey a too et walay sakit ton kating, iyakar ed pari
10 a mannengneng ed sakit na samay too. No walay ampotin babag ed baog to ya amapoti na saray bago tan pinmaway lay laman,
11 saya et abayag lan kating. Say pari sintinsiaan ton marotak; ag la nakaukolan a papawilen ton panayamen ed samay akabiig a pasen, mapatpatnag lan sikatoy marotak.
12 No samay sakit et onkayat ed intiron laman to, manlapud olo ya anggad sali to,
13 say pari nengnengen to lamet. No narumog ton kinmayat ed intiron laman to, sintinsiaan ton malinis onung ed ganggan. No amin a baog to et nagmaliw ya ampoti sikato so malinis onung ed ganggan.
14 Balet manlapud bekta a walay tinmerak a babag, sikato so marotak.
15 Say pari nengnengen to lamet, tan no nanengneng to so tinmerak a babag, sintinsiaan ton marotak imay too. Say tinmerak a babag et sakey a sakit a kating, kanyan marotak imay too.
16 Balet no onabig so babag a tinmerak tan nagmaliw ya ampoti lamet, samay too onla ed pari
17 a mannengneng lamet ed sikato. Et no pinmoti imay sakit, sikatoy malinis onung ed ganggan, tan say pari sintinsiaan ton malinis.
18 No say sakey a too et walay pelsa ton inmabig la
19 balet no ag abayag et walay linmetaw ya ampotin larag odino ampotin balangaan a batek ed nanlapwan na samay pelsa, sikatoy onla ed pari.
20 Nengnengen na pari, et no kinmotlaung imay batek tan pinapoti to ray bago, sintinsiaan ton marotak. Kating yan sakit a ginmapod pelsa.
21 Balet no say pari et nengnengen to may batek tan narumog ton ag pinmoti rad may bago tan ag kinmotlaung, balet ta posisawan so kolor to, say pari panayamen ton pitoy agew imay mansasakit ed akabiig a pasen.
22 No onkayat imay batek, say pari sintinsiaan ton marotak; walay sakit to.
23 Balet no anggapoy pangomanan to may batek tan ag onkayat, sakey labat a piglat na pelsa, tan say pari sintinsiaan ton malinis imay too onung ed ganggan.
24 No say sakey a too et apoolay parti na laman to, tan nagmaliw ya ampoti odino ampotin balangaan a batek so apoolan a laman,
25 say pari nengnengen to. No pinmoti ray bago diad kawalaay batek tan kinmotlaung, kating yan sakit a ginmapod inpakapoolan to, sintinsiaan ton marotak.
26 Balet no ag pinmoti ray bago diad apoolan a parti, tan ag kinmotlaung, balet ta posisawan so kolor to, say pari panayamen ton pitoy agew a bukbukor to imay too ed akabiig a pasen.
27 Say pari nengnengen to lamet diad kumapiton agew, et no onkakayat imay batek talagan sakit a kating, tan say pari sintinsiaan ton marotak imay too.
28 Balet no anggapoy angomanan to may batek tan ag onkakayat tan posisawan so kolor to, aliwan sakit a kating. Say pari sintinsiaan ton malinis imay too, onung ed ganggan, lapud sakey labat a piglat na samay apoolan.
29 No say sakey a laki odino say sakey a bii et walay sakit tod baog na olo odino baba,
30 say pari nengnengen to may sakit. No singa kinmotlaung tan saray bagod samay kawalaay sakit et duyawan tan pino, kating yan sakit; say pari sintinsiaan tod satan a marotak imay too.
31 No diad pannengneng na pari ed samay too et naalmoan ton ag kinmotlaung imay sakit, balet ta aliwa nin magket iray bago, panayamen to na pitoy agew a bukbukor to may too ed akabiig a pasen.
32 Diad kumapiton agew say pari nengnengen to lamet imay sakit, et no ag kinmayat tan anggapo ray duyawan a bago ed kawalaay sakit tan ag kinmotlaung,
33 samay too kiskisan toy kaliber-liber na samay sakit. Say pari ed satan panayamen to lamet na pitoy agew a bukbukor to imay too ed akabiig a pasen.
34 Diad kumapiton agew say pari nengnengen to lamet imay sakit, ta no ag kinmayat tan ag kinmotlaung, sintinsiaan ton malinis imay too onung ed ganggan. Samay too ipesak toy kawes to, tan sikatoy malinis la.
35 Balet no kinmayat imay sakit kayari na impanintinsia ed sikato a malinis,
36 say pari nengnengen to lamet. No kinmayat la so sakit ag to la nakaukolan a nengnengen no wala kasi odino anggapo so duyawan a bago; mapatnag a samay too et marotak.
37 Balet no diad pakanengneng na samay pari et ag kinmayat imay sakit tan totobuan la ra na magket a bago imay sakit, inmabig lan talaga, tan samay pari sintinsiaan ton malinis onung ed ganggan.
38 No say sakey a laki odino bii et wala ray ampotin batek ed baog to,
39 say pari nengnengen to yan too. No ampotin posisaw so kolor na saray batek, batek ira labat a linmetaw ed baog; say too et malinis onung ed ganggan.
40 No say sakey a too et ayangyangan ed beneg na olo to odino diad arap na olo to, sikatoy aliwan marotak no ag ta yangyangan labat.
41
42 Balet no walay onletaw a balangaan ya ampotin giri ed samay ayangyangan a parti, sakit yan kating.
43 Say pari nengnengen to, tan no walan talagay balangaan ya ampotin giri,
44 samay pari sintinsiaan ton marotak imay too, lapud samay kating a walad olo to.
45 Say toon walay kating ed laman to nepeg a mankawes na apilat-pilat, ag mansagaysay, sakuban toy kapalduan lupa to ed bandad leksab, tan oneyag, Marotak, marotak!
46 Mansiansian marotak legan a walay sakit to, tan nepeg a manayam ya arawid saray totoo, diad paway na kampo.
47 No walay boot ed kawes a lana odino linen,
48 odino boot ed abel a lana odino linen, odino boot ed katat odino diad antokaman a ginawad katat,
49 no birdian odino balangaan so kolor to, boot yan onkayat tan nepeg ya ipanengneng ed pari.
50 Say pari nengnengen to tan isinup to na pitoy agew imay nipanengneng a bengatla.
51 Nengnengen to lamet diad kumapiton agew, et no kinmayat imay boot, samay bengatla et marotak.
52 Say pari poolan to, lapud onkayat yan pikas a nepeg a deralen diad panamegley na apoy.
53 Balet no diad panengneng na pari ed samay boot, et narumog ton ag onkakayat ed samay bengatla,
54 iganggan to a nipesak tan nisinup nin pitoy agew.
55 Insan to lamet nengnengen, et no ag angoman so kolor na samay boot anggaman ya ag kinmayat, siansia nin marotak, nepeg yon poolan imay bengatla, anggan say boot et walad arap odino diad beneg.
56 Balet no diad pannengneng lamet na pari et kinmopas imay boot, satsaten toy parti na kawes odino katat a kawalaay boot insan to ekalen.
57 Insan no ompatnag lamet so boot, onkakayat lamet tan nepeg a poolan na akankien so kawes odino katat.
58 No ipesak to, et nakal imay boot, ipesak to lamet, et magmaliw lan malinis onung ed ganggan.
59 Sikato ya sirin so ganggan a nipaakar ed boot ed kawes a lana odino linen, o abel a lana odino linen, odino diad pikas ed antokaman a ginawad katat.
1 "Say Katawan inter tod kinen Moises
2 "iray onggendan a totontonen a nipaakar ed sirimonya a panlinis ed sakey a toon inmabig ed sakit a kating. Diad agew a say sakey a too et nasintinsiaan a malinis onung ed ganggan, sikatoy niakar ed pari.
3 "Insan say pari iyakar tod paway na kampo tan diman to nengnengen. No inmabig la may sakit
4 "say pari iganggan to a niakar ed sikato so duaran manok a malinis onung ed ganggan, sakey a poter na kiew a sidro, sakey ya ambalangan koldon, tan sakey a sangay isopo.
5 "Insan say pari iganggan to a samay sakey a manok et pateyen ya akasalur so sakey a bangan nankarga na danum ya inalad sobol.
6 "Alaen to may sananey a manok tan isawsaw tod dala na samay pinatey a manok; isawsaw to met imay kiew a sidro, samay ambalangan koldon, tan samay sangay isopo.
7 "Iwalsik ton mamimpito imay dala ed samay toon linisan ed sakit ton kating, insan sintinsiaan ton malinis onung ed ganggan. Paibolus tod kaalogan imay mabilay a manok.
8 "Samay too ipesak toy kawes to, poklisan toy olo to, tan manames; diad onya magmaliw a malinis onung ed ganggan. Nayarian toy onloob ed kampo balet ta manayam ni na pitoy agew ed paway na tulda to.
9 "Diad kumapiton agew kiskisan toy buek to, balbas to, kirep to, tan amin a bagoy laman to; ipesak toy kawes to tan manames. Diad onya magmaliw lan malinis onung ed ganggan.
10 Diad kumawalon agew sikatoy mangyakar na laman a duaran kordiron kalakyan tan sakey a kordiron kabatyan a sakey taon ya anggapoy deral na laman da, duaran kilon arina ya inkames ed larak na oliba tan talora tan kapalduan litro a larak na oliba.
11 Say pari iyakar to may too tan sarayan bagat diad lolooban na Tuldan Ayamay Katawan.
12 Insan say pari alaen to may sakey a kordiron kalakyan tan, katekep na samay taloran tan kapalduan litron larak, isaklang to a bagat a pambayar. Isaklang to a nidoma-doman rigalod Katawan a para pari.
13 Pateyen to may kordiro diad masanton pasen a panamateyan ed saray ayep ya ibagat para kasalanan tan saray ayep ya ibagat a popoolan. Nepeg to yan gawaen lapud say bagat a pambayar et kayaryan na pari tan masanton tuloy a singa bagat a para kasalanan.
14 Say pari mangala na daiset a dala to may kordiro, insan to iponaris ed gilig na kawanan a layag to may toon sintinsiaan a malinis onung ed ganggan, diad tangan na kawanan a lima to, tan diad tangan na kawanan a sali to.
15 Say pari mangala na daiset a larak na oliba tan ipaterter tod daklap na kawigin lima to,
16 idelnet toy tamoro na kawanan a lima to tan iwalsik tod man a mamimpito diad arapan na Katawan.
17 Mangala na daiset a larak a walad daklap to tan daiset a dala to may kordiro, insan iporanis to rad kawanan a gilig na layag to may toon sintinsiaan a malinis onung ed ganggan, diad tangan na kawanan a lima to, tan diad tangan na kawanan a sali to.
18 Ilana tod olo to may too imay akeraan a larak ed daklap to. Diad onya gawaen toy sirimonya na panlinis.
19 Insan say pari isaklang toy bagat a para kasalanan tan gawaen toy sirimonya na panlinis. Kayari to ya, pateyen toy ayep a para bagat a popoolan
20 tan, katekep na bagat a trigo isaklang tod tapew na altar. Diad onya say pari gawaen toy sirimonya na panlinis, tan samay too et magmaliw a malinis onung ed ganggan.
21 No mairap so bilay na sakey a too tan ag to nayarian ira yan ibagat, mangyakar na sakey labat a kordiron kalakyan ya isaklang ton bagat a pambayar ya onkanan panlinis ed sikato onung ed ganggan, sakey a nidoma-doman bagat ed Katawan a para pari. Sikatoy mangyakar na sakey labat a kilon arina ya inkames ed larak na oliba a para bagat a trigo tan talora tan kapalduan litron larak na oliba.
22 Mangyakar met na duaran palekpek odino duaran malangwer a malapati; say sakey ibagat a para kasalanan tan say sakey para bagat a popoolan.
23 Diad kumawalon agew na panlinis ed sikato iyakar to ra ya ed pari diad lolooban na Tulda.
24 Say pari alaen to may kordiro tan samay larak na oliba tan isaklang ton nidoma-doman rigalo ed Katawan a para pari.
25 Pateyen to may kordiro tan mangala na daiset a dala to, insan to iponaris ed gilig na kawanan a layag to may too, diad tangan na kawanan a lima to, tan diad tangan na kawanan a sali to.
26 Samay pari mangipaterter na larak ed daklap na kawigin lima to
27 tan diad panamegley na tamoro na kawanan a lima to iwalsik tod man a mamimpito diad arapan na Katawan.
28 Mangipoyuk na daiset a larak ed saramay pasen ya angiponarisan to na dala: diad gilig na kawanan a layag to may too, diad tangan na kawanan a lima to, tan diad tangan na kawanan a sali to.
29 Say akeraan ed samay larak a walad daklap to et ipoyuk tod olo na samay too tan diad onya gawaen to so sirimonya na panlinis.
30 Insan mangisaklang na sakey ed saramay palekpek odino malangwer a malapati,
31 a sakey a bagat a para kasalanan tan say sananey para bagat a popoolan a katekep toy bagat a trigo. Diad onya say pari gawaen toy sirimonya na panlinis.
32 Sikato ya so ganggan a sumpalen na toon walay sakit ton kating balet ag to nayarian ya isaklang so ingganan bagat a para panlinis to.
33 Say Katawan inter tod kinen Moises tan Aaron
34 iray onggendan a totontonen a nipaakar ed saray abung a nabobootan. (Sarayan totontonen et tombuken ira no saray totood Israel et akaloob la ra ed dalin na Canaan ya iter na Katawan ed sikara.)
35 Siopamay makalmo na boot ed abung to nepeg ya ibaga tod pari.
36 Say pari iganggan to ya ekalen iray amin a karga to may abung kasakbayan a laen ton nengnengen so boot; ta no ag da ra ekalen nasintinsiaan ira a marotak onung ed ganggan. Insan onlad samay abung so pari
37 ta nengnengen toy boot. No wala ray birdian odino balangaan a batek a singa kinmotlaung la rad dingding,
38 taynan to may abung tan italak ton pitoy agew.
39 Diad kumapiton agew ompawil ta nengnengen to lamet imay abung. No kinmayat imay boot,
40 iganggan ton saray bato ed kawalaan na samay boot et ekalen ira tan ibantak irad sakey a marotak a pasen onung ed ganggan diad paway na siudad.
41 Kayari to ya, paekal to ray amin a palitadad dalem na abung tan paibantak to rad sakey a marotak a pasen diad paway na siudad.
42 Insan saray arum a bato la so isalat ed saramay baton nakal, tan palitadaan la na balo so dalem na abung.
43 No nabootan lamet imay abung kayarin nakal la ra may bato tan say palitada tan apalitadaan lay balo,
44 say pari laen ton nengnengen. No kinmayat imay boot, samay abung et marotak.
45 Nepeg a bagbagen la may abung; amin a bato to, saray kiew to, tan amin a palitada to et nepeg ya ibantak irad sakey a marotak a pasen diad paway na siudad.
46 Siopamay toon onloob ed abung legan ya akatalak et magmaliw a marotak ya anggad labi.
47 Siopamay toon ondokul odino mangan ed loob to may abung et nepeg ya ipesak toy kawes to.
48 No diad pannengneng na pari et ag la linmetaw so boot kayarin apalitadaan na balo imay abung, sintinsiaan na pari a malinis la onung ed ganggan imay abung lapud naandipat lan sigput so boot.
49 Diad panlinis ed samay abung onung ed ganggan, say pari mangala na duaran manok, pigaran poter na kiew a sidro, sakey ya ambalangan koldon, tan sakey a sangay isopo.
50 Pateyen to may sakey a manok ya akasalur so sakey a bangan nankargay danum ya inalad sobol.
51 Insan to alaen ira may kiew a sidro, samay sangay isopo, samay ambalangan koldon, tan samay mabilay a manok tan isawsaw to ra ed dala na samay pinatey ton manok tan diad samay danum. Insan walsikan ton mamimpito imay abung.
52 Diad onya linisan to may abung diad panamegley na dala na samay manok, samay danum ya inalad sobul, samay mabilay a manok, saray poter na kiew a sidro, samay sangay isopo, tan samay ambalangan koldon.
53 Insan to ibolus ed paway na siudad diad kaalogan imay manok a mabilay. Diad onya gawaen toy sirimonya na panlinis na abung, a et magmaliw a malinis onung ed ganggan.
54 Sikara ya so ganggan a nipaakar ed saray sakit na baog;
55 saray giri, saray pelsa, odino saray babag, tan nipaakar met ed boot na kawes odino boot na abung.
56
57 Sarayan ganggan ipaamta ra no marotak odino malinis so antokaman.
1 "Say Katawan inter tod kinen Moises tan Aaron iray onggendan a totontonen
2 "a nepeg a sumpalen na saray totood Israel. No say sakey a laki et walay ompapaway ed kayaryan to, manterterter man odino nababara,
3 "marotak yan laki.
4 "Say katrin dokulan to odino antokaman a yorungan to et marotak.
5 "Siopamay makadiwit ed katri to yan laki
6 "odino onirung ed inirungan to et nepeg ya ipesak toy kawes to tan manames, tan siansian marotak ya anggad labi.
7 "Siopamay maniwit ed toon walay ompapaway ed kayaryan to et nepeg ya ipesak toy kawes to tan manames, tan siansian marotak ya anggad labi.
8 "No say toon walay ompapaway ed kayaryan to et alukdaan toy toon malinis onung ed ganggan, sayan toon alukdaan et nepeg ya ipesak toy kawes to tan manames, tan siansian marotak ya anggad labi.
9 "Say silyan yorungan na samay too et marotak.
10 Siopamay makadiwit ed inirungan na samay too et marotak ya anggad labi. Siopamay mangawit na antokaman ya inirungan to may too et nepeg ya ipesak toy kawes to tan manames, tan siansian marotak ya anggad labi.
11 Siopamay toon nadiwit na lakin walay ompapaway ed kayaryan to ya ag ni nanoras na lima to, nepeg ya ipesak toy kawes to tan manames, tan siansian marotak ya anggad labi.
12 Say bangan nadiwit na samay too et nepeg a betagen, tan say kiew a yaung a nadiwit to et nepeg ya orasan.
13 Kayarin inmabig so lakin walay ompapaway ed kayaryan to, nepeg a manalagar na pitoran agew insan to ipesak so kawes to tan manames ed managagos a danum na sobul, et diad ontan sikato lay malinis onung ed ganggan.
14 Diad kumawalon agew mangyakar na duaran palekpek odino duaran malapati diad lolooban na samay Tuldan Ayamay Katawan, ta iter to ra ed pari.
15 Say pari ibagat toy sakey a para kasalanan tan say sakey ibagat ton popoolan. Diad onya gawaen toy sirimonya a panlinis ed too.
16 No say sakey a laki et nampaterak, nepeg ya amesen toy intiron laman to, tan siansian marotak ya anggad labi.
17 Antokaman a naplagan na samay impaterak to, abel man odino katat, nepeg ya ipesak, tan siansian marotak ya anggad labi.
18 Kayari impanakdul na sanasawa nepeg a manames iran dua, tan siansia ran marotak ya anggad labi.
19 No naliliberan so sakey a bii, siansian marotak a pitoy agew. Siopamay makadiwit na laman to yan bii siansian marotak ya anggad labi.
20 Antokaman a yorungan odino dokulan to legan na kaliliberan to et marotak.
21 Siopamay makadiwit na katri to odino antokaman a yorungan to, nepeg ya ipesak toy kawes to tan manames, tan siansian marotak ya anggad labi.
22
23
24 Siopamay lakin miakdul ed sikato legan na kaliliberan to et naalisan na inkarotak to tan siansian marotak a pitoy agew, tan dinan man a katrin dokulan to et marotak.
25 No say sakey a bii et mampapadala ed pigaran agew anggaman ya aliwa lan agew na kaliliberan to, odino siansian mampapadala ni anggaman ya asumpal lay agew na kaliliberan to, siansian marotak legan a mampapadala, a singa inkarotak to legan na kaliliberan to.
26 Legan na pampapadala to say katri a dokulan to odino antokaman a yorungan to et marotak.
27 Siopamay makadiwit ed saraya et marotak; nepeg ya ipesak toy kawes to tan manames, tan siansian marotak ya anggad labi.
28 Katonda na pandadala to, nepeg a manalagar na pitoran agew, insan magmaliw a malinis onung ed ganggan.
29 Diad kumawalon agew samay manpapadala mangyakar ed pari na duaran palekpek odino duaran malangwer a malapati, diad lolooban na Tuldan Ayamay Katawan.
30 Say pari ibagat ton para kasalanan imay sakey a manok tan ibagat ton popoolan imay sakey tan diad onya gawaen toy sirimonya na panlinis ed samay bii.
31 Say Katawan imbaga tod kinen Moises a pasakbayan to ray totood Israel nipaakar ed inkarotak da, pian ag da nadotakan so Tulda a walad pegley na kampo. No dotakan da nepeg a pateyen ira.
32 Sikara yay totontonen a nipaakar ed sakey a lakin walay ompapaway ed kayaryan to odino mampaterak,
33 tan nipaakar ed biin naliliberan, odino nipaakar ed lakin miakdul ed biin marotak onung ed ganggan.
1 "Say Katawan akisalita ed kinen Moises kayari na impatey na saramay duaran lalakin anak nen Aaron ya inatey ira nen angisaklang ira na aliwan masanton apoy ed Katawan.
2 "Inkuanto, Ibagam ed kinen agim ya Aaron a no manepeg a panaon labat so iyakar tod dalem na kurtina diad Sankasantosan a Pasen, ta ompanengneng ak diman ed sakey a lorem diad tagey na sakub na Kaban na Sipanan. No ag to ya toluken, nepeg a pateyen.
3 "Nayarin onloob ed Sankasantosan a Pasen kayari ton angawit na kilaw a bakan kalakyan ya ibagat ton para kasalanan tan say sakey a karniron kalakyan ya isaklang a bagat a popoolan.
4 "Insan say Katawan inter to ray onggendan a totontonen. Kasakbayan ya onloob ed Sankasantosan a Pasen si Aaron, nepeg a manames tan isolung to ray kawes na pari: say linen a kawes tan pantalon a potut, say balkes, tan say turban.
5 "Saray Israelita mangiter ira ed kinen Aaron na duaran kanding a kalakyan ya ibagat a para kasalanan tan sakey a karniron kalakyan ya isaklang a bagat a popoolan.
6 "Mangibagat na sakey a kalakyan a baka a pangekal ed saray dilin kasalanan to tan saray kasalanan da ray kabyangay pamilya to.
7 "Insan to iyakar ed lolooban na Tuldan Ayamay Katawan ira may duaran kanding.
8 "Diman to gawaen so pampapalaranan; ikana toy duaran bato a say sakey nanmarka na para Katawan tan say sakey para Azazel.
9 "Si Aaron isaklang toy kanding ya apilin para Katawan tan ibagat ton para kasalanan.
10 Say kanding ya apilin para Azazel iyapay ton mabilay ed Katawan tan ibolus tod kalawakan diad Azazel, pian naekal iray kasalanan na katoowan.
11 No ibagat nen Aaron imay bakan kalakyan a para saray kasalanan to tan saray kasalanan da ray kabyangay pamilya to,
12 mangala na pananginay insinso a napnoy ngalab a nanlapud altar tan duaran akup a pinon insinso, insan awiten to ra ed loob na Sankasantosan a Pasen.
13 Diman ed arap na Katawan iyan tod ngalab imay insinso, pian say asewek na samay insinso et nasaniban to may sakub na Kaban na Sipanan; ag to nanengneng ed satan imay sakub et ag ompatey.
14 Mangala na daiset a dala to may baka tan diad panamegley na tamoro to iwalsik tod arap na samay sakub, insan mamimpito ton iwalsik so daiset a dala diad arap to may Kaban na Sipanan.
15 Kayari to ya, pateyen to may kanding ya ibagat a para saray kasalanan da ray totoo. Awiten to ed Sankasantosan a Pasen so dala to tan iwalsik tod samay sakub, insan diad arap na samay Kaban na Sipanan a singa ginawa tod dala na samay baka.
16 Diad onya, si Aaron gawaen toy sirimonya na panlinis ed samay Sankasantosan a Pasen lapud inkarotak na saray Israelita tan lapud kasalanan dan amin. Onyay nepeg ton gawaen ed samay Tulda, lapud manalalagey ed pegley na kampo a marotak onung ed ganggan.
17 Anggapoy toon nepeg a manayam ed dalem na Tulda manlapud iloob nen Aaron ed Sankasantosan a Pasen a manggaway sirimonya na panlinis ya anggad ipaway to. Kayari ton gawaen so sirimonya a para sikato, para pamilya to, tan para amin ya Israelita,
18 nepeg ya ompaway ya onlad altar a panagpoolan na saray bagat, ta linisan to. Nepeg a mangawit na daiset a dala to may bakan kalakyan tan daiset a dala to may kanding tan iporanis to ra ed saray pinagkasaklur na saray suyok na altar.
19 Diad panamegley na tamoro to nepeg a mamimpito ton walsikan so tapew na altar. Diad onya, nalinisan to may altar ed saray kasalanan da ray totood Israel tan napasanto to.
20 No asumpal la nen Aaron a gawaen so sirimonya na panlinis ed Sankasantosan a Pasen, saray arum nin parti na Tuldan Ayamay Katawan tan say altar, iyapay tod Katawan imay kanding ya apilin para Azazel.
21 Itapew ton duay lima to ed olo na samay kanding tan ipatua to dia iray amin a kaogsan, kasalanan, tan kasusumlang na saray totood Israel. Diad onya, niyalis to ra ya ed olo na samay kanding. Samay kanding et ibolus ed kalawakan na sakey a lakin apilin manggawa ed saya.
22 Samay kanding et awiten ton amin iray kasalanan da ray Israelita diad dalin ya ag natotoowan.
23 Insan si Aaron onloob ed Tulda, lakseben to ray kawes na pari ya insosolung to kasakbayan a linmoob ed Sankasantosan a Pasen, insan to la rad man taynan.
24 Nepeg a manames ed masanton pasen insan to isolung so dilin kawes to. Kayari to ya, ompaway, ta mangisablang na bagat a popoolan a mangekal na saray dilin kasalanan to tan saray kasalanan da ray katoowan.
25 Poolan tod tapew na altar so taba na ayep ya ibagat a para kasalanan.
26 Say toon angibolus na kanding ed kalawakan diad Azazel et nepeg ya ipesak toy kawes to tan manames kasakbayan ya ompawil ed kampo.
27 Say laman na samay baka tan samay kanding ya imbagat a para kasalanan a say dala ra et niakar ed Sankasantosan a Pasen a pangekal na kasalanan, et iyakar irad paway na kampo tan diman ira poolan. Say katat, say karni, tan saray pait et poolan ira.
28 Say toon mamool ed saraya et nepeg ya ipesak toy kawes to tan manames kasakbayan ya ompawil ed kampo.
29 Saray onggendan a totontonen et nepeg a tombuken ira ya anggan kapigan man a panaon. Diad kumaplon agew na kumapiton bulan, saray Israelita tan saray sangkailin manaayam ed kawalaan da et nepeg a manayuno ra tan ag ira mankimey.
30 Diad sayan agew gawaen so sirimonya a panlinis ed sikara ed saray kasalanan da, pian nalinisan ira onung ed ganggan.
31 Sayan agew et masanton tuloy, kanyan saray totoo et nepeg a manayuno ra tan ag ira mankimey. Sarayan totontonen et nepeg a tombuken ira ya anggan kapigan man a panaon.
32 Say Pangulon Pari a nikonsagra tan nisaklang a salatan toy ama to et sikatoy manggawa na sirimonya na panlinis. Mansolung na saray kawes na pari
33 tan gawaen toy sirimonya na panlinis ed Sankasantosan a Pasen, saray arum nin a parti na Tuldan Ayamay Katawan, say altar, saray papari, tan amin ya Israelita.
34 Sarayan totontonen et nepeg a tombuken ya anggan kapigan man a panaon. Sayan sirimonya et nepeg a gawaen a maminsan ed sakey taon a panlinis ed amin a kasalanan da ray Israelita. Ginawa sirin nen Moises so ingganggan na Katawan.
1 "Say Katawan ingganggan toy Moises
2 "ya iter tod kindi Aaron tan saray anak ton lalaki tan amin ya Israelita iray onggendan a totontonen.
3 "Say Israelitan mamatey na baka odino karniro odino kanding diad pasen ya aliwan diad lolooban na Tuldan Ayamay Katawan tan ibagat tod Katawan, onsumlang ed Ganggan. Angibung na dala, kanyan ag la nibilang a sakey ed saray totoo na Dios.
4
5 "Say kabaliksan to yan ganggan et saya: saray Israelita et iyakar da la natan ed Katawan iray ayep a diad kaalogan so pamapateyan da nen saman. Awiten da la ra natan ed pari diad lolooban na Tulda tan pateyen da ran ibagat a para kareenan.
6 "Say pari isibo tod saray dapag na altar a walad lolooban na Tulda so dala, tan poolan toy taba a mangiter na balingit a makapaliket ed Katawan.
7 "Saray Israelita et ag da la nepeg a sumlangen so Katawan diad pamatey dad saray ayayep da ed kaalogan tan ibagat da rad kanding a dimonyo. Saray totood Israel et nepeg dan onuren yan totontonen ya anggan kapigan man a panaon.
8 "Siopamay Israelita odino sangkailin manaayam ed kawalaan da ray Israelita a mangisaklang na bagat a popoolan odino arum a bagat
9 "ed Katawan diad arum iran pasen ya aliwan diad lolooban na Tulda, ag la nibilang a sakey ed saray totoo na Dios.
10 No walay Israelita odino sangkailin manaayam ed kawalaan da ray Israelita a mangan na dala, sumpaen na Katawan tan ag to la ibilang a sakey ed saray totoo to.
11 Walad dala so bilay na amin a pinalsan mabilay; sikato yay makasengeg a say Katawan ingganggan to ya amin a dala et ibungen ed tapew na altar pian naekal iray kasalanan na totoo. Say dala a sikatoy bilay et mamaandi na saray kasalanan.
12 Sikato yay makasengeg a say Katawan et imbaga tod saray totood Israel a sikara odino siopaman a sangkailin manaayam ed kawalaan da ray Israelita et ag nayarin mangan na dala.
13 No say sakey ya Israelita odino sakey a sangkaili a manaayam ed kawalaan da ray Israelita et mangerel na ayep odino manok a malinis onung ed ganggan, nepeg ya ipaterter tod dalin so dala to insan to tabunan na dalin.
14 Walad dala so bilay na amin a pinalsan mabilay; sikato yay makasengeg a say Katawan imbaga tod saray totood Israel ya ag ira mangan na dala tan ag la nibilang a sakey ed saray totoo to so siopaman a mangan na dala.
15 Siopaman a too, Israelita man odino sangkaili, a mangan na karni na ayep ya inatey a bukor odino pinatey na ayep ed takel et nepeg ya ipesak toy kawes to, manames, tan manalagar ya anggad labi kasakbayan a magmaliw a malinis onung ed ganggan.
16 No ag to ra ya gawaen, nadusa.
1 "Say Katawan kuantod saray Israelita diad panamegley nen Moises, Siak so Katawan a Dios yo.
2
3 "Ag yo aaligen iray kagagawa na saray Egipsio a nanayaman yo nen saman, odino saray kagagawa da ray taga dalin na Canaan a pangyaakaran kod sikayo natan.
4 "Sumpal yo ray ganggan ko tan tombuk yo ray bilin kod sikayo. Siak so Katawan a Dios yo.
5 "Tombuk yo ray ganggan tan saray bilin ya iter kod sikayo; makapansiansia kayon mambilay no onuren yo ra. Siak so Katawan.
6 "Say Katawan inter to ray onggendan a totontonen. Ag kayo miaakdul ed siopaman ya asingger a kanayon yo. Siak so Katawan.
7 "Ag mo ipepelag ed kababaingan so amam lapud piakdul mod inam. Ag nepeg ya ipelag mod kababaingan so dilin inam.
8 "Ag yo ipepelag ed kababaingan so amam lapud piakdul mod siopaman ya asawa to.
9 "Ag ka miaakdul ed peteg ya agim a bii odino agim ed ama odino ina, anggaman a sasakey ya abung so binalegan yo.
10 Ag mo piaakdulan so apom a bii; ipelag to ka ya ed kababaingan.
11 Ag ka miaakdul ed biin anak nen amam ed sananey a bii ta agim met ni lamlamang.
12 Ag ka miaakdul ed panginaen mo, agi man na amam odino agi na inam.
13
14 Ag ka miaakdul ed asawa na pangamaen mo, ta panginaen mo met ni lamlamang.
15 Ag ka miaakdul ed biin manugang mo
16 odino diad ayrom.
17 Ag ka miaakdul ed anak odino apo na biin akiakdulan mo la; nayarin asingger a kanayon mo et maoges a tuloy so piakdul mod sikato.
18 Ag mo aasawaen so ayrom legan a mabilay niy asawam.
19 Ag ka miaakdul ed biin naliliberan, ta marotak onung ed ganggan.
20 Ag ka miaakdul ed asawa na sananey a laki; pagmaliwen to kan marotak onung ed ganggan.
21 Ag mo aabuloyan a saray anak mo et nikana ra ed pangigalang ed diyos-diyos a Moloc, ta mangipelag ya ed kababaingan na ngaran na Dios.
22 Ag nepeg a say sakey a laki et miakdul ed kapara ton laki; kabosul ya na Dios.
23 Ag nepeg a misiping ed ayep so sakey a laki odino bii; mabambanday yan kagagawa tan pagmaliwen to kayon marotak onung ed ganggan.
24 Ag yo dodotakan so sikayon dili onung ed ganggan diad panamegley na sarayan kagagawa, ta saray paganon manaayam ed dalin a laen yo et sikara yay impanotak dad sikaran dili; pataynanen ira na Katawan pian nalooban yoy dalin da.
25 Lapud saray kagagawa ra dinotakan da so dalin da, kanyan say Katawan dudusaen to so dalin tan gagawaen ton pagiten na sayan dalin iray totoon manaayam diman.
26 Ginawa ra yan amin a mabambanday a kagagawa kanyan dinotakan day dalin, balet ag nepeg a gawaen yo ra ya. Amin yo, Israelita kayo man odino sangkaili, nepeg ya onuren yo ray ganggan na Katawan tan saray bilin to,
27
28 et diad ontan say dalin ag to kayo pagiten, a singa impamagit tod saray pagano a nanayam diman kasakbayan na panayam yo.
29 Ta siopamay manggawad sarayan mabambanday a kagagawa et ag la nibilang a sakey ed saray totoo na Dios.
30 Say Katawan kuanto, Sumpal yo ray ganggan ya iter kod sikayo tan ag yo aaligen iray kagagawa na saray totoon manaayam ed dalin a laen yo, tan ag yo dodotakan so sikayon dili diad panggawa yod dinan man ed saraya. Siak so Katawan a Dios yo.
1 "Say Katawan kuantod saray Israelita diad panamegley nen Moises, Nepeg a masanto kayo, ta siak a Katawan a Dios yo et masanto.
2
3 "Balang sakey ed sikayo et nepeg a pangalangan toy ina to tan say ama to, tan nepeg a ngilinan toy Agew na Panagpainawa, onung na ingganggan ko. Siak so Katawan a Dios yo.
4 "Ag yo ak ikakaindan tan ag kayo mangigagalang ed saray talintaoy diriyos; ag kayo manggagawa na saray mital a diriyos insan yo ra pampikasian. Siak so Katawan a Dios yo.
5 "No mamatey kayo na ayep ya ibagat a para kareenan, tombuk yo ray totontonen ya inter kod sikayo, et awaten koy bagat yo.
6 "Say karni et nepeg a kanen diad agew na impamatey ed ayep odino diad ontombuk ya agew. Nepeg a poolan so karnin nakeraan ed kumatlon agew,
7 "lapud marotak onung ed ganggan; no walay mansira ed sayan karni, ag ko awaten so bagat yo.
8 "Siopamay mangan ed nakeraan a karni mankasalanan lapud panleglemew tod bengatlan masanto, tan ag la nibilang a sakey ed saray totook.
9 "No manani kayod saray kaalogan yo, ag yo gagapasen iray walad saray gilig na kaalogan yo tan ag yo la papawilen a tortoren iray atilak-tilak.
10 Ag yo totortoren iray atilak a bungay igos kayari yon mamborbor, ni dodokdoken iray napnaplag ed dalin; paolyan yo la ran para saray mairap-bilay odino saray sangkaili. Siak so Katawan a Dios yo.
11 Ag kayo mantatakew odino manasaol odino mantitila.
12 Ag kayo mansisipan ed ngaran ko no ag yo lamlamang tooren; saya et makapangipelag ed kababaingan na ngaran ko. Siak so Katawan a Dios yo.
13 Ag yo aanamutey pankanawnawa yod arum a too odino tatakewan yo. Ag yo aabalaen na anggan sanlabi so upa na siopaman ya impankimey yo.
14 Ag yo aayewen so toon telek; ag kayo mangiiyan na antokaman a pakapateran na toon bulag. Takotan yo ak; siak so Katawan a Dios yo.
15 Nepeg a maptek tan matonung so pangiter yoy sintinsia; ag yo kikilingan so toon mairap-bilay, ni tatakotan so toon mayaman.
16 Ag yo tatalabutoben so siopaman, tan no walay toon nidalem ed korti a nayarin nasintinsiaan na patey, mantasi kayo no say pantasi yo et natulongan to. Siak so Katawan.
17 Ag yo bobosulen so siopaman a too, no ag ingen mipulangan kayod sikato, pian ag kayo mankasalanan lapud sikato.
18 Ag kayo ombabawi ed siopaman a too odino say ituloy yon bosulen, no ag ingen aro yo so kapara yon too a singa panangaro yo ed sikayon dili. Siak so Katawan.
19 Onur yo ray ganggan ko. Ag yo pakakastaan so sakey ya ayep ed doman ayep. Ag kayo mantatanem na duaran nandomaan a bokel ed sakey ya alog. Ag kayo mangisosolung na kawes ya inabel ed duaran klasiy tinebey.
20 No akisipanan lan mikasal ed sakey a laki so sakey ya aripen a bii, et ag ni abayaran, ni nibolus, insan walay lakin miakdul ed sikato, nepeg a nadusa ran dua, balet ag nepeg iran pateyen, bangta sayan bii et sakey ya aripen.
21 Samay lakin akiakdul mangyakar na karniron kalakyan diad lolooban na Tuldan Ayaman ko, ta bagat ton pambayar.
22 Diad panamegley na sayan karniro say pari gawaen toy sirimonya na panlinis a pangekal na kasalanan na samay laki, et pirdonaen na Dios.
23 No makasabi kayo la ed dalin na Canaan tan mangitanem kayo na anggan anton klasiy kiew a mambunga, nepeg yon ibilang a marotak onung ed ganggan iray bunga ra ed loob na ononan taloy taon. Diad loob na sayan panaon ag yo ra kakanen.
24 Diad kumapat a taon amin a bungay kiew et ibagat yo ran pangipanengneng na pisasalamat yod siak a Katawan.
25 Balet diad kumaliman taon nayarian yo lan kanen so bunga ra. No sumpalen yo ya, mambunga na dakel iray kakiewan yo. Siak so Katawan a Dios yo.
26 Ag kayo mangakan na karnin nandala ni. Ag kayo manggagawa na antokaman a panagbuyon odino panagsalamangka diad pananulong na maoges ya ispiritu.
27 Ag yo kakatlian so buek ed saray diking na olo yo, ni popotutan so balbas yo,
28 ni tatatakan so laman yo odino salsalgeran so laman yo lapud panermen yod inatey yo. Siak so Katawan.
29 Ag yo ipepelag ed kababaingan iray anak yon bibii lapud panggawa yod sikaran marotak a bibii ed timplo; no gawaen yo ya, onsingger kayo ed arum a diriyos tan say dalin napano na inmoralidad.
30 Ngilinan yo so Agew na Panagpainawa, tan pangalangan yo so pasen a panangigalangan ed siak. Siak so Katawan.
31 Ag kayo miaalay simbawa ed saray totoon manangipanon ed saray ispiritu na inaatey. No gawaen yo ya, magmaliw kayon marotak onung ed ganggan. Siak so Katawan a Dios yo.
32 Itdan yoy lugar iray mamatakken tan igalang yo ra. Takotan yo ak a Katawan a Dios.
33 Ag yo panggagawaan na makapoy iray sangkailin manaayam ed dalin yo.
34 Ipasen yo ran singa pangipasen yod saray kapara yon Israelita, tan aro yo ran singa panangaro yod sikayon dili. Ag yo lilingwanan a sangkaili kayo met nen saman ed dalin na Egipto. Siak so Katawan a Dios yo.
35 Ag yo sasaolen so siopaman diad pangikana yoy masaol a sukatan, simbangan, odino bilangan.
36 Ikana yoy anggapoy saol a simbangan tan sukatan. Siak so Katawan a Dios yo, tan siak so angipaway ed sikayo manlapud Egipto.
37 Sumpal yo ray amin a ganggan ko tan saray bilin ko. Siak so Katawan.
1 "Say Katawan kuantod saray Israelita diad panamegley nen Moises, Siopaman ed sikayo odino siopaman a sangkailin manaayam ed kawalaan yo a mangiter na anak to, ta ikanad pangigalang ed diyos-diyos a Moloc, et nepeg a tupaken na amin a katoowan ya anggad ompatey.
2
3 "No walad sikayoy mangiter ed Moloc na sakey ed saray anak to tan dotakan toy masanton Tuldak tan ipelag ton kababaingan so masanton ngaran ko, sumpaen ko tan ag ko la ibilang a sakey ed saray totook.
4 "Balet no palabasen na katoowan so ginawa to tan ag da pateyen,
5 "siak a dili so onsumpad sikato tan amin a kabyangan na pamilya to tan sumpaen ko met iray amin a mikasakey ed insumlang tod siak diad impangigalang tod Moloc. Ag ko la ra ibilang a totook.
6 "No walad sikayoy onkerew na simbawa ed saray midium tan diad saray manangipanon ed saray ispiritu na inaatey, sumpaen ko tan ag ko la ibilang a sakey ed saray totook.
7 "Nepeg a masanto kayo ta siak so Katawan a Dios yo.
8 "Sumpal yo ray ganggan ko, lapud siak so Katawan a mamapasanto ed sikayo.
9 "Say Katawan inter to ray onggendan a totontonen. Siopamay mangisamba na ama to odino ina to et nepeg a pateyen; sikaton dili so makasengeg na ipatey to.
10 No say sakey a too et mikaloguran ed asawa na kapara ton Israelita, sikato tan say biin akikaloguranan to et nepeg iran pateyen.
11 Say lakin miakdul ed sakey ed saray asawa na ama to ipelag tod kababaingan so ama to, tan sikato tan say biin akiakdulan to et nepeg iran pateyen. Sikaran dili so makasengeg na ipatey da.
12 No say sakey a laki et miakdul ed manugang to, nepeg iran pateyen a dua. Maoges a tuloy so ginawa ra tan sikaran dili so makasengeg ed ipatey da.
13 No say sakey a laki et miakdul ed kapara ton laki, nanggawa ran dua na kabandayan tan nepeg iran pateyen a dua. Sikaran dili so makasengeg na ipatey da.
14 No say sakey a laki et asawaen toy sanina, nepeg iran poolan a talo ya anggad ag da ipatey lapud maoges a tuloy so ginawa ra; ag yo ya aabuloyan a nagawad sikayo.
15 No say sakey a laki et misiping ed ayep, sikato tan say ayep ya akisipingan to et nepeg iran pateyen.
16 No say sakey a bii et pasipingan ed ayep, sikato tan say ayep ya akisipingan to et nepeg iran pateyen. Sikaran dili so makasengeg na ipatey da.
17 No say sakey a laki et asawaen toy agi ton peteg odino say agi tod ama o ina, nanggawa ran duay kababaingan, tan nepeg iran pataynanen ed olupan da ray Israelita. Akiakdul ed agi to kanyan nepeg ya akoen toy dusa na ginawa to.
18 No say sakey a laki et miakdul ed biin naliliberan nepeg iran pataynan ed olupan da ray Israelita, lapud sinumpa ray totontonen nipaakar ed inkarotak onung ed ganggan.
19 No say sakey a laki et miakdul ed panginaen to, nepeg ya akoen day dusa lapud maoges a tuloy so ginawa ra.
20 No say sakey a laki et miakdul ed asawa na pangamaen to ipelag tod kababaingan so pangamaen to tan sikato tan samay biin akiakdulan to et nepeg iran dusaen; ag ira nawalaan na anak.
21 No alaen na sakey a laki so asawa na agi to, ompatey iran dua ya anggapoy anak. Nanggawa may laki na karotakan onung ed ganggan tan impelag tod kababaingan so agi to.
22 Say Katawan kuanto, Onur yo ray amin a ganggan tan amin a bilin ko, pian ag kayo ipolisay na dalin na Canaan a pangyaakaran kod sikayo.
23 Ag yo aaligen iray kagagawa na saray totoon manaayam diman; pataynanen ko ra may paganon totoo pian makaloob kayo. Lapud saray maoges a gagawaen da, pinaingungot da ak.
24 Balet insipan kon kayaryanen yo man a mataba tan mayaman a dalin, kanyan iter kod sikayo. Siak so Katawan a Dios, tan siak so angibiig ed sikayo ed saray arum a bansa.
25 Kanyan nepeg yon pambiigan iray ayayep tan saray manok a malinis tan saray marotak onung ed ganggan. Ag yo kakanen iray marotak ya ayayep odino saray manok. Sinintinsiaan ko la ran marotak, tan magmaliw kayon marotak no kanen yo ra.
26 Nepeg a masanto kayo tan siak labat so akankayaryan ed sikayo, lapud siak so Katawan tan masanto ak. Imbiig ta kayo ed saray arum a bansa pian sikayo labat so kayaryan ko.
27 Siopamay laki odino biin mangipanon ed saray ispiritu na inaatey et nepeg a tupaken ya anggad ag to ipatey; siopaman a manggawad saya sikaton dili so makasengeg na ipatey to.
1 "Say Katawan ingganggan toy Moises ya ikuantod saray paparin anak nen Aaron, Nepeg a say pari ag to dotakay sikaton dili onung ed ganggan diad pibiang tod sirimonyay pompon na kanayon to,
2 "likud no say inatey et ina to, ama to, anak to, agi ton laki,
3 "odino agi ton marikit a manaayam ed abung to.
4 "Ag to nepeg a dotakan so sikaton dili diad ipatey na kanayon tod asawa.
5 "Say pari ag nepeg a labahasan toy anggan dinan a parti na olo to, ni potutan toy balbas to odino salsalgeren toy laman to diad pangipanengneng toy paneermen to.
6 "Nepeg a sikatoy masanto tan ag to nepeg ya ipelag ed kababaingan so ngaran ko. Sikatoy mangisasaklang na bagat a popoolan, kanyan nepeg a masanto.
7 "Say pari nepeg ya ag mangasawa na biin marotak, odino naakdulan la odino insian na asawa to; say pari et masanto.
8 "Saray totoo nepeg ya ipasen dan masanto so pari, lapud sikatoy mangisasaklang ed siak na bagat a kakanen. Siak so Katawan, masanto ak tan pasantosen ko ray totook.
9 "No say anak na pari et magmaliw a marotak a bii, ipelag tod kababaingan so ama to; sayan anak nepeg a poolan ya anggad ag to ipatey.
10 Say Pangulon Pari et kinalboan na larak so olo to tan nisaklang a mangisolung na saray kawes na pari, kanyan ag to nepeg a paolyan ya ag asagaysay so buek to odino pilaten toy kawes to diad pangipanengneng ton maneermen.
11 Sikatoy nisaklang ed siak kanyan ag to nepeg a dotakan so sikaton dili onung ed ganggan odino dotakan toy masanton Tulda diad itaynan tod man tan iloob tod abung a kawalaay bangkay, anggan say inatey et say dilin ama o ina to. Siak so Katawan.
12
13 Nepeg a say asawaen to et say biin ag nin balut akiakdul ed siopaman,
14 aliwan balo odino insian na asawa to odino biin marotak. Nepeg ya asawaen toy biin ag ni adiwit a kabolegan to.
15 No aliwan birhin so asawaen to, saray anak to a nepeg a masanto ra et marotak ira onung ed ganggan. Siak so Katawan tan siak so angibiig ed sikato a Pangulon Pari.
16 Say Katawan ingganggan toy Moises ya ikuantod
17 kinen Aaron, Siopamay kabyangay boleg mon walay deral na laman to et ag nepeg a mangisaklang ed siak na bagat a kakanen. Mansiansia yan totontonen ed anggan kapigan a panaon.
18 Ag nayarin say toon walay deral na laman to et mangibagat: say toon bulag, kitlaey, aliwaliway lupa to odino anggan anton parti na laman to;
19 say toon lopuy so lima to odino sali to;
20 say toon bokut odino onano, say toon bulding odino walay sakit tod baog; tan anggan say toon kapon.
21 Siopaman a kabyangay boleg nen Aaron a pari a walay deral na laman to et ag nayarin mangisaklang ed siak na bagat a kakanen.
22 Sayan toon walay deral na laman to et nayarin mangan na kakanen ya imbagat ed siak, say masanton bagat a kakanen odino say masanton tuloy a bagat a kakanen;
23 balet lapud walay deral na laman to, ag nayarin onsingger ed masanton kurtina odino diad altar. Ag to nepeg a dotakan ira yan masanton bengatla, lapud siak so Katawan a mamapasantod sikara.
24 Sikara ya sirin so imbaga nen Moises
25 ed kinen Aaron tan diad saray lalakin anak nen Aaron, tan diad amin ya totood Israel.
1 "Say Katawan ingganggan toy Moises ya ikuantod
2 "kindi Aaron tan saray lalakin anak to, Ag yo nepeg ya ipelag ed kababaingan so masanton ngaran ko, kanyan pagalangan yo ray masanton bagat ya isasaklang ed siak na saray totood Israel. Siak so Katawan.
3 "No say kabyangay boleg yo a marotak onung ed ganggan et onsingger ed saray masanton bagat ya insaklang ed siak na saray totood Israel, ag lan balut makapanglingkur ed altar. Sayan totontonen et mansiansia ed anggan kapigan a panaon. Siak so Katawan.
4 "Siopaman a kabyangay boleg nen Aaron, a walay sakit ton kating odino walay ompapaway ed kayaryan to, et ag nayarin mangan na antokaman a masanton bagat ya anggad malinis la onung ed ganggan. Say pari et marotak no diwiten toy antokaman a marotak onung ed ganggan lapud nidiwit ed bangkay, odino no nampaterak
5 "odino no adiwit toy ayep o toon marotak onung ed ganggan.
6 "Siopamay parin magmaliw a marotak siansian marotak ya anggad labi, tan anggan no malinis la ag nin siansia makapangan na saray masanton bagat no ag ni nanames.
7 "Kaselek na agew sikato lay malinis, tan nayarian to lan kanen iray masanton bagat a sikaray kakanen to.
8 "Ag to nepeg a kanen so karni na dinan man ya ayep ya inatey a bukor odino pinatey na saray ayep ed takel; sayan karni et makarotak ed sikato. Siak so Katawan.
9 "Amin a pari nepeg a tombuken da ray totontonen ya inter ko. No ag da ra tombuken, mankasalanan ira tan ompatey ira, lapud sinumlang da ray masanton totontonen. Siak so Katawan a mapasantod sikara.
10 Saray kabyangan labat na pamilyay pari so nayarin mangan na saray masanton bagat; anggapo lay arum a nayarin mangan ed sarayan bagatag nayari so anggan toon manaayam ed sakey a pari odino say toon uupaan ton mankimey.
11 Balet saray aripen na pari a sinaliw to ra na dilin kuarta to odino nianak ira ed dilin abung to et nayarin mangan ed kakanen a nanaawat na pari.
12 Say biin anak na pari ya akiasawa ed lakin aliwan pari et ag nayarin mangan na anggan dinan a masanton bagat.
13 Balet say balo odino insian a bii ya anggapoy anak to tan pinmawil a manaayam ed abung na ama to a singa say gendat a kipapasen to nen marikit ni, nayarin mangan na kakanen a nanaawat na ama ton pari. Saray kabyangan labat na pamilya na pari so nayarin mangan na saray masanton bagat.
14 No walay toon aliwan kabyangay pamilya na pari ya ag to ginagalay angan na antokaman a masanton bagat, nepeg a bayaran tod pari so bili na kinan to tan pasolukan to na kakalima.
15 Saray papari et nepeg ya ag da dotakan iray masanton bagat;
16 nepeg ya ag da iyabuloy a kanen ira na toon aliwan manepeg a mangan; saya et pakapankasalananan na toon mangan tan pakadusaan to. Siak so Katawan a mamapasanto ed saray bagat.
17 Say Katawan ingganggan toy Moises
18 ya iter tod kindi Aaron tan saray lalakin anak to tan diad amin ya totood Israel iray onggendan a totontonen. No say sakey ya Israelita odino sakey a sangkailin manaayam ed dalin na Israel et mangisaklang na bagat a popoolan, a panumpal tod sipan to odino sakey a bagat a pinalapud mabolus a linawa, say ayep ya ibagat to et nepeg ya anggapoy deral na laman to.
19 Pian naawat so bagat to, nepeg a sakey a kalakyan ya ayep ya anggapoy deral na laman to so ibagat to.
20 No mangibagat kayoy ayep a walay deral na laman to, say Katawan et ag to awaten.
21 No say sakey a too et mangyakar ed Katawan na bagat a para kareenan, a panumpal tod sipan to odino pangibagat tod mabolus a linawa, say ayep ya ibagat to et nepeg ya anggapoy deral na laman to pian naawat.
22 Ag kayo mangibabagat ed Katawan na ayep a bulag odino lopuy odino sugatan, odino walay mansayon giri to odino walay ambabasal to odino wala ray kegang to. Ag yo isasaklang a bagat a popoolan ed tapew na altar so onya ran ayep.
23 Say bakan kalakyan odino kordiron masoluk odino kulang so imbaleg na dinan a partiy laman to et nayarin ibagat a pinalapud mabolus a linawa, balet ag nayarin isaklang a bagat diad panumpal ed sipan.
24 Ag yo ibabagat ed Katawan so ayep a saray bokel na paltak to et apitpit, agerger, asugat, odino apotut. Diad dalin yo sebel ya.
25 Ag yo isasaklang a bagat a kakanen so ayep a nanlapud saray sangkaili. Sayan ayep et nibilang a walay deral na laman to kanyan ag nayarin ibagat.
26 No nianak so kilaw a baka odino kordiro odino kilaw a kanding, ag nepeg ya isian ed ina to ed loob na pitoy agew, balet kalabas na saratan ya agew nayari lan isaklang a bagat a popoolan.
27
28 Ag yo ibabagat ed saksakey ya agew so baka tan say kilaw to odino say karniro tan say kordiro to odino say kanding tan say kilaw to.
29 No mangisaklang kayoy bagat a pisasalamat ed Katawan, tombuk yo ray totontonen pian naawat kayo;
30 akan yod saman lamlamang ya agew so imbagat yo tan ag kayo mangikekera na para ontombuk a kabwasan. Siak so Katawan.
31 Say Katawan kuanto, Onur yo ray ganggan ko; siak so Katawan.
32 Ag yo ipepelag ed kababaingan so masanton ngaran ko; amin a totood Israel nepeg a birbiren da ak a masanto. Siak so Katawan a mamapasanto ed sikayo;
33 siak so angipaway ed sikayo manlapud Egipto pian magmaliw a siak so Dios yo. Siak so Katawan.
1 "Say Katawan inter tod kinen Moises
2 "iray onggendan a totontonen a tombuken na saray totood Israel no mampista ra diad pangigalang dad Katawan.
3 "Walay anem agew a pankimey yo, balet ag yo lilingwanan a say kumapiton agew et agew na panagpainawa. Diad satan ya agew ag kayo mankikimey, no ag ingen mantitipon kayon mangigalang ed Dios. Say Agew na Panagpainawa et kayaryan na Katawan, anggan iner so panaayaman yo.
4 "Ibawag mo ray onggendan a pista ed saray niganan panaon.
5 "Say Paskua a silibraan pamagalang ed Katawan et onggapod kapansironget na kumalabinapat agew na ononan bulan.
6 "Diad kumalabinliman agew say Pista na Tinapay ya Anggapoy Libadura et onggapo, tan diad loob na pitoy agew nepeg ya anggapoy libaduran tinapay so kanen yo.
7 "Diad ononan agew na pista mantitipon kayon mangigalang ed Katawan tan tonda kayod inagew-agew a kimey yo.
8 "Pitoy agew a mangisaklang kayod Katawan na saray bagat a popoolan. Diad kumapiton agew mantitipon kayo lamet a mangigalang ed Katawan, balet tonda kayod inagew-agew a kimey yo.
9 "No onsabi kayod dalin ya iter ed sikayo na Katawan et manani kayo, iyakar yod pari so ononan berber na trigo.
10 Say pari isaklang to yan berber na trigo a nidoma-doman rigalo ed Katawan, pian naawat kayo. Say pari isaklang to may trigo diad ontombuk ya agew kayari na Agew na Panagpainawa.
11
12 Diad agew a pangisaklang yod bagat a trigo, mangisaklang kayo met na sakey taon a kordiron kalakyan ya anggapoy deral na laman to a sikatoy bagat a popoolan.
13 Katekep to ya, mangyapay kayo na sakey tan kapalduan kilon arina ya inkames ed larak na oliba a sikatoy bagat a popoolan. Say balingit na sayan bagat et makapaliket ed Katawan. Mangisaklang kayo met na sakey litron alak.
14 Ag kayo mangakan na balon trigo ya ag inloto, odino insanglil, odino ginawan tinapay, ya anggad nisaklang yo la yan bagat ed Dios. Sayan totontonen et nepeg a tombuken na amin a kabyangay boleg yo ya anggan kapigan man a panaon.
15 Mambilang kayo na pitoran simba manlapud ontombuk ya agew kayari na Agew na Panagpainawa, say agew na impangisaklang yod Katawan na sakey a berber na trigo.
16 Diad kumalimamplon agew, say ontombuk ya agew kayari na kumapiton Agew na Panagpainawa, mangisaklang kayo lamet ed Katawan na balon bagat a trigo.
17 Kapag pamilya mangyakar na duaran tinapay tan iyapay ton nidoma-doman rigalo ed Katawan. Kapag tinapay gawaen ed sakey tan kapalduan kilon arinan nanlibadura insan iyapay ed Katawan a sikatoy bagat ya ononan anien.
18 Katekep na sayan tinapay, saray Israelita mangisaklang ira na pitoran sakey taon a kordiro, sakey a bakan kalakyan, tan duaran kanding ya anggapoy deral na laman dan amin. Isaklang ira ed Katawan a bagat a popoolan a katekep na bagat a trigo tan bagat ya alak. Say balingit na sayan bagat et makapaliket ed Katawan.
19 Ontan met say sakey a kanding a kalakyan isaklang yon bagat a para kasalanan tan say duaran sakey taon a kordiro kalakyan isaklang yon bagat a para kareenan.
20 Say pari iyapay toy tinapay a katekep na duaran kordiro a sikaray nidoma-doman rigalo ed Katawan tan para saray pari. Masanto ra yan bagat.
21 Diad satan ya agew tonda kayod inagew-agew a kimey yo, balet mantitipon kayon mangigalang ed Katawan. Saray kabyangay boleg yo et nepeg a tombuken da ra yan totontonen ya anggan kapigan man a panaon, tan anggan iner man so panayaman da.
22 No manani kayod saray kaalogan yo, ag yo gagapasen iray walad saray gilig na kaalogan yo, tan ag yo la papawilen a tortoren iray atilak-tilak; itilak yo la ran para saray mairap-bilay tan saray sangkaili. Say Katawan et sikatoy Dios yo.
23 Diad ononan agew na kumapiton bulan ngilinan yo so sakey a nidoma-doman agew na panagpainawa, tan mantitipon kayon mangigalang ed Katawan no ontanul iray trumpita.
24
25 Mangisaklang kayoy bagat a popoolan ed Katawan tan tonda kayo ed inagew-agew a kimey yo.
26 Say kumaplon agew na kumapiton bulan et agew a panggawa na sirimonya a pangekal na saray kasalanan da ray totoo. Diad satan ya agew ag kayon balut mangakan; mantitipon kayon mangigalang ed Katawan, tan mangisaklang kayo na bagat a popoolan ed sikato.
27
28 Ag kayo mankikimey ed satan ya agew, lapud sikatoy agew a panggawa na sirimonyan pangekal na kasalanan.
29 Siopamay mangan ed satan ya agew ag la nibilang a sakey ed saray totoo na Dios.
30 Tan no walay mankimey ed satan ya agew say Katawan a dili so mamatey ed sikato.
31 Sayan totontonen et nepeg a tombuken na amin da ray kabyangay boleg yo ya anggan man iner so panayaman da.
32 Manlapud kaselek na agew na kumasiam ya agew na bulan ya anggad kapansironget na kumaplon agew ngilinan yo yan agew a sakey a nidoma-doman agew na panagpainawa; legan na sayan agew nepeg ya anggapoy kanen na anggan siopa.
33 Say Pista na saray Abung-abung onggapo ed kumalabinliman agew na kumapiton bulan tan silibraan a pitoy agew.
34
35 Diad ononan agew na pampista yo mantitipon kayon mangigalang ed Katawan tan tonda kayod inagew-agew a kimey yo.
36 Pitoy agew a mangisaklang kayod Katawan na saray bagat a popoolan. Diad kumawalon agew mantitipon kayo lamet a mangigalang ed Katawan tan mangisaklang kayo na bagat a popoolan. Sikato yay agew a pangigalang ed Katawan, tan tonda kayod inagew-agew a kimey yo. (
37 Sikara yay niganan pista a pantitipon yon mangigalang ed Katawan tan pangisaklang yo na saray bagat a kakanen, saray bagat a popoolan, saray bagat a trigo, saray arum a bagat, tan saray bagat ya alak, onung na nakaukolan ed inagew-agew.
38 Sarayan pista et kaaruman ira na saray Agew na Panagpainawa, tan sarayan bagat et kaaruman ira na saray rigalon isasaklang yo, saray bagat a panumpal yod saray sipan yo, tan saray bagat a pinalapud mabolus a linawa ya iter yod Katawan.)
39 No naani yo la ray bunga na saray tanaman yod kaalogan yo, silibraan yon pitoy agew yan pista, manlapud kamalabinliman agew na kumapiton bulan. Say ononan agew et sakey a nidoma-doman agew na painawa.
40 Diad satan ya agew mangala kayoy pigaran sankaabigan a bungay kiew, saray sangay kiew a palmira tan saray sangay mabolung a kiew tan igapo yoy mampista a pangigalang yod Katawan a Dios yo.
41 Pistaan yo a pitoy agew. Sayan totontonen et nepeg a tombuken na saray kabyangay boleg yo ya anggan kapigan man a panaon.
42 Amin ya Israelita et manayam iran pitoy agew ed saray abung-abung
43 pian naamtaan na saray kabyangay boleg yo a say Katawan impanayam to rad abung-abung iray Israelita nen impaway to rad Egipto. Sikatoy Katawan a Dios yo.
44 Onya sirin so impangiter nen Moises ed saray Israelita na sarayan totontonen diad pansilibra rad saray niganan pista a pamagalang ed Katawan.
1 "Say Katawan imbaga tod kinen Moises
2 "ya iganggan to ray Israelita a mangiter iray puro tan sankaabigan a larak na oliba ta ikanad saray lamparaan ed dalem na Tulda, pian naynay a mandarlang so silew.
3 "Kapag labi si Aaron selselan to ra tan pansiansiaen to ran mandarlang ya anggad kabwasan, diad arap na Katawan ed paway na kurtinad arap na Kaban na Sipanan a walad dalem na Sankasantosan a Pasen. Sayan totontonen et nepeg a tombuken ya anggan kapigan man a panaon.
4 "Si Aaron et asikasoen to ray lamparaan a walad saray panangipatoonan a puron balituk tan pampagaan to a mandarlang iran naynay ed arap na Katawan.
5 "Mangala kayoy samplora tan kapalduan kilon arina, ta manggawa kayoy labinduan tinapay.
6 "Idatak yo a duaran dasig iray tinapay, anemira ed kapag dasig, diad tapew na lamisaan ya inokupan na puron balituk tan walad arap na Katawan.
7 "Mangyan kayo na daiset ya insinso ed kapag dasig, a pakapatnagan a sikatoy bagat a popoolan ed Katawan, a mangalay pasen na tinapay.
8 "Kapag Agew na Panagpainawa, anggan kapigan man a panaon, say tinapay nepeg ya ilira ed arap na Katawan. Sikato yay andi-anggaan a susumpalen na saray totood Israel.
9 "Say tinapay kayaryan nen Aaron tan saray kabyangay boleg to, tan kanen da ed masanton pasen, lapud masanton tuloy yan parti na bagat a popoolan ed Katawan, a para saray papari.
10 Walay lakin say ama to et sakey ya Egipsio tan say ina to et sakey ya Israelitan manggaray Selomit ya anak nen Dibri a kabyangay tribu nen Dan. Diad kampo sayan laki akikolkol ed sakey ya Israelita. Legan na pankokolkol dan dua inayew toy Katawan imay laki, kanyan inyakar dad kinen Moises,
11
12 impabantayan da, tan nanalagar ira no antoy ibaga na Katawan a gawaen dad sikato.
13 Say Katawan kuantod kinen Moises,
14 Ipaway yod kampo itan a too. Balang sakey a toon akadngel ed impanayew tod Katawan et itapew to ray lima to ed olo na satay too a pangipaneknek ton sikatoy nankasalanan, insan amin ya Israelita tupaken da ya anggad ompatey.
15 Insan ibagam ed saray totood Israel a siopamay mansalita na maoges sumpad Dios nepeg a pandusaan toy maoges a ginawa to
16 tan pateyen. Siopamay Israelita odino sangkaili a manaayam ed dalin da ray Israelita a mansalita na maoges sumpad Katawan nepeg a tupaken na amin ya Israelita ya anggad ompatey.
17 Siopamay mamatey na kapara ton too, nepeg a pateyen,
18 tan siopamay mamatey na ayep na kapara ton too, nepeg a salatan to. Say bilay bayaran na bilay.
19 No sinugatan na sakey a too so kapara ton too, nepeg a gawaen ed sikato so ginawa to.
20 No amoter na pokel na kapara ton too, nepeg a poteren met so pokel to; no anokit na mata na kapara ton too, nepeg a sukiten met so mata to; no angekal na ngipen na kapara ton too, nepeg ya ekalen met so ngipen to. No anugat na kapara ton too, nepeg a sugaten met a singa impanugat to.
21 Siopamay amatey na ayep na kapara ton too nepeg a salatan to, balet siopamay mamatey na kapara ton too, nepeg a pateyen.
22 Sayan ganggan et para sikayon amin ya Israelita tan saray sangkailin manaayam ed dalin yo, lapud siak so Katawan a Dios yo.
23 Nen nibaga la ya nen Moises ed saray totood Israel, impaway dad kampo may laki tan tinupak da ya anggad inatey. Diad onya saray totood Israel ginawa ra so ingganggan na Katawan ed kinen Moises.
1 "Say Katawan akisalitad kinen Moises diad tagey na Palandey na Sinai tan ingganggan to
2 "ya iter tod saray Israelita iray onggendan a totontonen. No makaloob kayo lad dalin ya iter ed sikayo na Katawan, nepeg yon igalang so Katawan diad ag yo pantanem ed dalin kapag kumapiton taon.
3 "Taneman yon anem taon iray kaalogan yo, potutan yoy wakawakal na saray kaubasan yo, tan ani yoy bunga na saray tanaman yo.
4 "Balet say kumapiton taon, sikatoy taon a pampainawan sigput na dalin, say taon a nisaklang ed Katawan. Ag yo tataneman iray kaalogan yo odino popotutan so wakawakal na saray kaubasan yo.
5 "Ag yo anggan aanien iray trigon tinmubon bukor, tan ag yo boborboren so bunga na saray kaubasan ya ag yo pinotutan so wakawakal da; sikatoy taon a pampainawan sigput na dalin.
6 "Anggaman ya ag adalusan so dalin ed satan a taon, itdan to kayo na kanen yo, saray aripen yo, saray uupaan yon totoo, saray sangkailin manaayam ed sikato,
7 "saray amon ayayep yo, tan saray atap ya ayayep a wala rad kaalogan yo. Amin a bungan iter na dalin et nayarin pantagano.
8 "Mambilang kayoy pitoran sampipiton taon, kanyan magmaliw ya apataplo tan siam a taon ya amin.
9 "Insan diad kumaplon agew na kumapiton bulan, say Agew na Pangekal na Kasalanan, mangibaki kayo na sakey a lakin mamaknul na trumpita ed intiron bansa.
10 Onyay pangibiig yod kumalimamplon taon tan pangibawag yoy kawayangan ed amin a manaayam ed dalin. Legan na sayan taon amin a kayaryan ya inlako nepeg ya ipawil ira ed gendat ya akankayaryan, odino diad saray kabyangay boleg to; tan balang toon inlakon aripen nepeg ya ompawil ed pamilya to.
11 Ag yo nepeg a taneman iray kaalogan yo odino anien iray trigon tinmotubun bukor; ag yo met boborboren so bunga na saray kaubasan ya ag yo pinotutan so wakawakal da.
12 Nepeg ya ipasen yon masanto so intiron taon; kanen yo labat iray bungan iter na dalin.
13 Diad sayan taon amin a kayaryan ya inlako nepeg ya ipawil ira ed gendat ya akankayaryan.
14 Kanyan no mangilako kayoy dalin ed kapara yon Israelita odino manaliw kayod sikato, ag yo sasaolen.
15 Say bili na dalin et nepeg ya itukoy ed karakel na taon a pakapambunga to kasakbayan na ontombuk a Taon na Panangipawil.
16 No dakel niy taon, paatageyan yoy bili to; balet no daiset lay taon, paabebaan yoy bili, lapud say ilalako et say karakel na bungan iter na dalin.
17 Ag yo sasaolen so kapara yon Israelita, no ag ingen takotan yo so Katawan a Dios yo.
18 Onur yoy amin a ganggan tan bilin na Katawan, pian mambilay kayon arawid kaatapan ed dalin a panayaman yo.
19 Say dalin mangiter na bunga to tan nawalaan kayo na amin a labay yon kanen tan mambilay kayod man ya arawid kaatapan.
20 Nayarin walay mantepet no antoy pambilay yo legan na kumapiton taon, ag taneman iray kaalogan tan ag borboren iray bungay tanaman.
21 Say Katawan bindisionan toy dalin diad kumanem a taon pian magenap a pambilay a duay taon so iter ton tagano.
22 No mantanem kayod kaalogan yo no kumawalon taon, say pambibilay yo nid satan say naani yo ed kumanem a taon tan duga nin pambilay yo ya anggad pakaani yo lad intanem yo.
23 Say dalin ag nepeg ya ilakon anggad angga lapud ag yo kayaryan; say Dios so akankayaryan, tan singa kayo sangkailin naabuloyan a mangikana ed dalin.
24 No alako so dalin, nepeg a birbiren so kanepegan na gendat ya akankayaryan a manondon.
25 No mairap so bilay na sakey ya Israelita tan apilitan ya angilako na dalin to, say sankaasinggeran a kanayon to so manondon.
26 Say toon anggapoy kanayon ton manondon nayarin onaliguas ed arapen a panaon tan nayarian to lan dondonen.
27 No onyay nagawa nepeg ton iter ed toon analiw na dalin to so bili a kapetekan na saray taon a nakdaan a kasakbayan ya onsabiy Taon na Panangipawil, ta diad satan a taon et nipawil lamlamang ed sikato may dalin to.
28 Balet no anggapoy kuarta ton panondon ed dalin to, say dalin mansiansian kayaryan na analiw ya anggad onsabiy Taon na Panangipawil. Diad satan a taon say dalin nipawil ed gendat a makankayaryan.
29 No say sakey a too et mangilako na abung a walad dalem na pinadir a siudad, walay kanepegan ton manondon ed legay sakey taon manlapud agew na impangilako to.
30 Balet no ag to narondon legan na sakey taon, naandid sikatoy kanepegan a manondon, tan say abung magmaliw lan kayaryan ya anggad angga na analiw tan saray kabyangay boleg to; ag ipawil so abung ya anggan Taon na Panangipawil.
31 Balet saray abung ed saray barion ag pinaliberay padir et ipasen ira a singa alog; say gendat ya akankayaryan walay kanepegan ton manondon, tan saray abung nepeg ya ipawil ira no Taon na Panangipawil.
32 Balet saray Levita walay kanepegan dan manondon, anggan kapigan, ed kayaryan da a walad dalem na saray siudad a nipabetang ed sikara.
33 No say sakey ya abung ed sarayan siudad et inlako na sakey a Levita tan ag arondon, nepeg ya ipawil no Taon na Panangipawil, lapud saray abung a kayaryan na saray Levita ed saray siudad da et kayaryan da ran anggad angga ed dalin na Israel.
34 Balet say dalin a panagpastolan ed kaliber-liber da ray siudad na Levita et nepeg ya ag balut ilako; kayaryan dan anggad angga.
35 No nagmaliw a mairap so bilay na kapara yon Israelita a kaabay yo tan ag to nayarian a bilayen so sikaton dili, nepeg yon itdan na pantagano to a singa pangiter yod toon uupaan yon mankimey, pian nayarian toy mansiansian manayam ed abay yo.
36 Ag yo pangaabangen; ingen toluk yoy Dios tan abuloyan yon manayam ed abay yo so kapara yon Israelita.
37 Ag yo pangaabangen ed kuartan ipabayes yod sikato, tan ag yo panotoboan ed kakanen ya ilako yod sikato.
38 Sikato yay ganggan na Katawan a Dios yo ya angipaway ed sikayo manlapud Egipto ta iter tod sikayoy dalin na Canaan tan magmaliw a Dios yo.
39 No magmaliw a mairap so bilay na kapara yon Israelita a kaabay yo tan ilako tod sikayo so sikaton dili ya aripen, ag yo pankikimeyen a singa sakey ya aripen.
40 Manayam ed sikayo a sakey a kumikimey a miuupa tan panlingkuran to kayo ya anggad Taon na Panangipawil.
41 Diad satan a taon sikato tan saray anak to et taynan da kayo tan ompawil lad pamilya to tan diad kayaryan na saray lalaki to.
42 Saray Israelita et aripen ira na Katawan, tan impaway to ra manlapud Egipto; ag ira nepeg ya ilakon aripen.
43 Ag yo ra papairapen, no ag ingen toluk yo so Dios yo.
44 No nakaukolay yoy aripen manaliw kayo lad saray kaliber-liber a bansa.
45 Nayarin saliwen yo met iray anak na saray sangkailin manaayam ed dalin yo. Saratan ya anak a nianak ira ed dalin yo et nayarin magmaliw iran kayaryan yo,
46 tan nayarin ipatawir yo ra ed saray lalakin anak yo, a panlingkuran da ra legan dan mambilay. Balet ag yo nepeg a pairapen so siopaman a kapara yon Israelita ya agi yo.
47 No bilang ta minmayaman so sakey a sangkailin manaayam ed dalin yo, balet nagmaliw a mairap so bilay na sakey a Israelita tan ilako toy sikaton dili ya aripen ed sayan sangkaili odino diad sakey a kabyangay pamilya to,
48 no alako la, wala niy kanepegan ton narondon. Say sakey ed saray agagi ton lalaki
49 odino say pangamaen to odino say kapinsan to odino say sakey ed saray asingger a kanayon to so nayarin manondon ed sikato; odino no bilang ta akalmoy malaem, nayarin saliwen ton dili so kawayangan to.
50 Nepeg a mikuintaan ed angaliw ed sikato, tan bilangen da so karakel na taon a manlapud samay impangilako tod sikaton dili ya anggad arapen a Taon na Panangipawil; say bili na pakabolus to nepeg ya ipara ra ed upa na toon miuupa.
51 Nepeg ya ipawil toy parti na impanaliw ed sikato onung ed bilang na saray nakdaan a taon,
52
53 a singa sikatoy tinaon ya inupaan. Nepeg ya ag pairapen na amo to.
54 No ag narondon ed sayan polaing, sikato tan saray anak to et nibolus ed arapen a Taon na Panangipawil.
55 Ag nayarin naaripen ya anggad angga so sakey ya Israelita lapud saray totood Israel et aripen ira na Katawan. Impaway to ra manlapud Egipto; sikato so Katawan a Dios da.
1 "Say Katawan kuanto, Ag kayo manggagawa na saray diriyos, ni mangipapaalagey na saray talintao, saray baton lusek, odino saray kinortin bato a galangen yo. Siak so Katawan a Dios yo.
2 "Ngilinan yo ray agew na panagpainawa tan igalang yoy pasen a panangigalangan ed siak. Siak so Katawan.
3 "No mambilay kayo onung ed saray ganggan ko tan onuren yo ray bilin ko,
4 "mangipelag ak na oran no manepeg a panaon, pian makapangiter na bunga so dalin tan makapambunga ray kakiewan.
5 "Diad karakel na bungay tanaman yo; manaani kayo ni anta panaon lay panagborbor na ubas, tan mamboborbor kayo niy ubas, anta panaon lay panagtanem na trigo. Nawalaan kayo na amin a labay yon kanen, tan mambilay kayon arawid kaatapan ed dalin a panayaman yo.
6 "Itdan ta kayo na kareenan ed dalin yo, kanyan makaogip kayo ya anggapoy manigensigen ed sikayo. Paandipaten kod man iray masebeg ya ayayep ed takel, tan naandi lad may bakal.
7 "Taloen yo ray kalaban yo;
8 "say limarad sikayo taloen day sanlasus tan say sanlasus taloen day samplon libo.
9 "Bindisionan ta kayo tan itdan ta kayo na amayamay ya anak; sumpalen koy kanepegan ko ed impisipanan kod sikayo.
10 Diad karakel na anien yo sakey taon ya abastoen yo; ibantak yod satan so ombak a trigo yo, tan pambilay yo lay balo.
11 Manayam ak ed kawalaan yo diad masanton Tuldak tan ag ta kayon balut ipolisay.
12 Olupen ta kayo; siak so magmaliw a Dios yo tan sikayo ray totook.
13 Siak a Katawan a Dios et impaway to kayo manlapud Egipto pian ag ka yo la naaripen. Pinoter koy pakayarin angitelmer ed sikayo tan inabuloyan ta kayon manakar a maptek so kaoloan.
14 Say Katawan kuanto, No ag yo ak dengelen tan ag yo onuren iray ganggan ko, nadusa kayo.
15 No ag yo onuren iray ganggan tan saray bilin ko tan deralen yoy impisipanan kod sikayo,
16 dusaen ta kayo. Ipadalan kod sikayoy deralsaray ag natambal a sakit tan say petang na laman a mamulag ed sikayo tan kalkalnan ton oyusey bilay yo. Mantanem kayo balet anggapoy nagonggona yo, ta saray kalaban yo so mangalad saray intanem yo.
17 Sumlangen ta kayo pian natalo kayo; oleyan kayo na saray kalaban yo tan diad ontan lan kataktakot yo ombatik kayo anggan anggapoy mangoosil ed sikayo.
18 No ag yo ak ni onuren kayari to ya, mamimpitoy belat na iyarum kon dusa yo lapud saray kasalanan yo.
19 Patondaen koy ontan lan inkamapaatagey yo; anggapoy ompelag ya oran, et onmaga so dalin yo tan onawet a singa balatyang.
20 Anggapoy nagonggona yod pinasian pansagput yo, lapud ag mangiter na bunga so dalin yo tan ag mambunga so kakiewan yo.
21 No siansia nin sumlangen yo ak tan ag yo ak ni onuren, mamimpito nin belat so iyarum ko lamet ed dusa yo lapud saray kasalanan yo.
22 Mangibaki ak ed sikayo na saray masebeg ya ayayep ed takel, tan pateyen da ray anak yo, deralen da ray baka yo, tan lapud dagdaiset ed sikayo so ikera ra magmaliw a begtebegtew iray dalan yo.
23 No kayari na sayan dusa et siansian ag yo ak ni dengelen, no ag ingen ituloy yo niy isusumlang ed siak,
24 sumpaen ta kayo tan mamimpito nin belat so iyarum ko lamet ed dusa yo lapud saray kasalanan yo.
25 Ipadalan kod sikayoy bakal a panusak ed sikayo lapud impaneral yo ed impisipanan kod sikayo, tan no mamtitipon kayon onamut ed dalem na saray siudad yo ipadalan kod sikayoy salot, et napasoot kayon onsuko ed saray kalaban yo.
26 Patondaen koy pangyakar na kakanen yo, kanyan say samploran bibii nakaukolan da labat so sakey ya ornowan a panggawaan dad amin a tinapay da. Ibunog day tinapay da ta no naakan yo lan amin, narasan kayo nin siansia.
27 No kayari na sayan dusa et siansian ag yo ak ni dengelen, no ag ingen ituloy yo niy isusumlang ed siak,
28 sumpaen ta kayod pasnuk ko tan mamimpito nin belat so iyarum ko lamet ed dusa yo lapud saray kasalanan yo.
29 Mapalaloy kaerasan yo kanyan kanen yo lay anggan saray dilin anak yo.
30 Deralen ko ray pasen a panangigalangan yo ed tapew na saray kapokdulan, igebak iray altar a panagpoolan yoy insinso, tan ibontuk kod saray atumtumban talintaoy diriyos iray bangkay yo. Diad gaway pasnuk ko,
31 pagmaliwen kon aderalderal iray siudad yo, deralen ko ray pasen a panangigalangan yo, tan ag ko awaten iray bagat yo.
32 Sigput kon deralen so dalin yo kanyan nikelawan iray kalaban yon manayam diman.
33 Ipadalan kod sikayoy bakal tan itaytayak ta kayod saray arum a bansa. Nataynan so dalin yo, tan naderal-deral iray siudad yo.
34 Diad satan say dalin sigput a mampainawa ta ag yo impanpainawa; nataynan tan mampainawa legan a wala kayod dalin na saray kalaban yo.
35
36 Pagmaliwen ta kayon mapalalon matakot, sikayon nibantak ed arum a bansa, kanyan anggan diad kalasakas labat na bolung ombatik ki la. Ombatik kayon singa oosilan ed bakal tan natumba kayo, anggan anggapoy kalaban ed abay yo.
37 Mantatabunan kayod katumba yo ya anggan anggapoy onoosil ed sikayo, tan ag yo nalabanan iray kalaban yo.
38 Nibantak kayo ed arum a bansa tan diman kayo ompatey, diad pangakmon ed sikayo na dalin da ray kalaban yo.
39 Saray daiset a nakeraan ed sikayo diad dalin da ray kalaban yo et nakalkalnaan iran ompatey lapud dilin kasalanan yo tan lapud kasalanan na saray lalaki yo.
40 Balet saray kabyangay boleg yo ipatua da ray kasalanan da tan saray kasalanan da ray lalaki ra ya anumlang tan linmaban ed siak,
41 tan anagyat ed siak ya onsumpad sikara tan mangibantak ed sikara diad dalin na saray kalaban da. Diad ontan, no saray kabyangay boleg yo et apaabeba la ra tan abayaran da la ray kasalanan da tan say insumlang da,
42 nunoten koy impisipanan kod kinen Jacob, tan diad kinen Isaac tan diad kinen Abraham, tan pasimbaloen koy sipan ko ya iter kod saray totook so dalin.
43 Balet nakaukolan nin say dalin et naandian na totoo pian makapampainawan sigput, tan saray totoo et bayaran da niy impangipolisay dad saray ganggan ko tan saray bilin ko.
44 Balet anggaman ontan, no wala ni rad dalin na saray kalaban da, ag ko ra sigput ya ikaindan, ni deralen. Ta no sigput ko ran ikaindan mangangga so impisipanan kod sikara, et siak so Katawan a Dios da.
45 Pasimbaloen koy impisipanan kod saray lalaki ra nen impanengneng kod amin a bansa so pakayarik diad impangipaway kod saray totook manlapud Egipto, pian siak a Katawan so magmaliw a Dios da.
46 Amin da ra ya et sikaray ganggan tan bilin ya inter na Katawan ed kinen Moises diad tagey na Palandey na Sinai; nepeg ira yan onuren na saray totood Israel.
1 "Say Katawan inter tod kinen Moises
2 "iray onggendan a totontonen a tombuken na saray totood Israel. No say sakey a too et niiter ed Katawan diad panumpal ed sakey a nidoma-doman sipan, satan a too nayarin narondon diad pambayar na saray onggendan a karakel na kuarta,
3 "onung ed panagkuinta ed santuario: -matakken a laki, duamplo ya anggad anemaploy taon: limamplon kuartan pilak -matakken a bii: talomplon kuartan pilak -tobun-balon laki, limara ya anggad duamploy taon: duamplon kuartan pilak -tobun-balon bii: samploran kuartan pilak -ogaw a laki, sakey bulan ya anggad limay taon: limaran kuartan pilak -ogaw a bii: taloran kuartan pilak -lakin mantaon na masoluk ya anemaplo: labinliman kuartan pilak -biin mantaon na masoluk ya anemaplo: samploran kuartan pilak.
4
5
6
7
8 "No diad gaway irap na sakey a toon nansipan et ag to nayarian a bayaran so nigetar a bayar, iyakar tod pari so toon nisaklang, et say pari paabebaen to so bayar onung na nayarian na samay too.
9 "No say sipan et nipaakar ed sakey ya ayep a nayarin ibagat ed Katawan, balang ayep ya irigalon onya ed Katawan et masanto,
10 tan say toon angisipan et ag to nepeg a salatan na sananey ya ayep. Ta no salatan to, saray duaran ayep et kayaryan ira na Katawan.
11 Balet no say sipan et nipaakar ed ayep a marotak onung ed ganggan, tan ag nayarin ibagat ed Katawan, say too awiten tod pari imay ayep.
12 Say pari kuintaen toy bili na samay ayep onung ed kaabigan odino kakapoyan to may ayep, tan ag la naoman so bili.
13 No samay too et labay ton dondonen imay ayep, nepeg a bayaran to may bili tan aruman to ni na kakalima.
14 No say sakey a too et labay ton isaklang ed Katawan so abung to, say pari kuintaen toy bili onung ed kaabigan odino kakapoyan to may abung, tan ag la naoman so bili.
15 No say toon mangisaklang et labay ton dondonen imay abung, nepeg a bayaran to may bili tan aruman to ni na kakalima.
16 No say sakey a too et isaklang tod Katawan so parti na dalin to, say bili kuintaen onung ed karakel na bokel ya itanem ed samay dalin, tan say bili na sakey a salup a sibada et samploran kuartan pilak.
17 No kasumsumpal na Taon na Panangipawil so pangisaklang tod dalin to, say intiron bili so nepeg a bayaran.
18 No arum nin panaon kasumpal na Taon na Panangipawil so pangisaklang to, say pari kuintaen toy bili onung ed karakel na taon ya akeraan ya anggad ontumbuk a Taon na Panangipawil, kanyan abeba so bili to.
19 No say toon angisaklang et labay ton dondonen imay dalin, nepeg ton bayaran so bili tan aruman to ni na kakalima.
20 No ilako tod arum a too so alog, anggaman ya ag to ni dinondon ed Katawan, say kanepegan ton manondon ed naandi.
21 Diad arapen a Taon na Panangipawil say alog et magmaliw a masanto tan anggad anggan kayaryan na Katawan; kayaryanen la na saray papari.
22 No say sakey a too et isaklang tod Katawan so alog a sinaliw to,
23 say pari kuintaen to so bili onung ed karakel na taon ya akeraan ya anggad ontombuk a Taon na Panangipawil, et samay too nepeg a bayaran toy bili ed saman lamlamang ya agew; say kuarta kayaryan na Katawan.
24 No Taon na Panangipawil samay alog nepeg ya ipawil ed gendat ya akankayaryan odino diad saray kabyangay boleg to.
25 Amin a bili nepeg a kuintaen onung ed panagkuinta ed santuario.
26 Say besag ya anak na ayep et kayaryan la na Katawan, kanyan ag la nakaukolan ya isaklang ed sikato a sakey a bagat a manlapud mabolus a linawa. Say kilaw na baka, say kordiro, odino say kilaw na kanding et kayaryan la na Katawan,
27 balet say besag ya anak na marotak ya ayep onung ed ganggan et nayarin dondonen onung ed akuintan bili to tan aruman ni na kakalima. No ag narondon, nayarin ilako ed sananey a too onung ed akuintan bili to.
28 Ag nayarin ilako o dondonen na sakey a too so insaklang ton sigput ed Katawan; nayarin too, ayep, odino dalin. Masanto tan anggad anggan kayaryan na Katawan yan insaklang to.
29 Anggan say toon nisaklang a sigput ed Katawan et ag la nayarin dondonen; nakaukolan a pateyen.
30 Say kakaplo na amin a bungay dalin, trigo man odino bungay kiew, et kayaryan na Katawan.
31 No say sakey a too et labay ton dondonen so anggan dinan ed saraya, nepeg ton bayaran so akuintan bili tan aruman to ni na kakalima.
32 Say sakey ed kapag samploran amon ayep et kayaryan na Katawan. No bilangen iray ayep, kayaryan na Katawan so balang kumasamplo.
33 Say akankayaryan na ayep nepeg ya ag to ibiig a kumasamplo iray makapoy, tan nepeg ya ag to met salatan iray maung ya apilin kumasamplo. No salatan to so sakey ya ayep na sananey ya ayep, kayaryan na Katawan iran dua tan ag to nayarin dondonen.
34 Sikara yay ganggan ya inter na Katawan ed kinen Moises diad tagey na Palandey na Sinai; nepeg ira yan onuren na saray totood Israel.